ལྔ་པ། སྨྱན་བྱེད་པའི་དགེ་འདུན་ལྷག་མ་བཤད་པ།
སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་མཉན་ཡོད་ན་རི་དྭགས་འཛིན་གྱི་བུ་ནག་པོ་ཞེས་བྱ་བ་འདུག་སྟེ། དེ་མཉན་ཡོད་པའི་བྲམ་ཟེ་དང་ཁྱིམ་བདག་རྣམས་ཀྱི་གཏམ་འདྲེ་བ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པ་ཡིན་པས། གང་ཡང་རུང་བ་དག་ལ་བུ་མོ་སྦྱིན་པར་བྱ་བ་ཡོད་པ་དེ་དག་ཀྱང་རི་དྭགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་ནག་པོ་ཁྱོད་ཀྱིས་ཁྱིམ་ཆེ་གེ་མོ་ཞིག་ཤེས་སམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང་། དེ་དག་དེ་ལ་ནག་པོ་ཇི་ལྟར་དེ་ན་ཁྱེའུ་དེ་མཁས་པ་དང་། ལེ་ལོ་མེད་པ་དང་། སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་བགོ་བ་མང་པོ་སྦྱིན་ནུས་པ་དང་། ལས་ཆུང་བ་ཡིན་ནམ་ཞེས་འདྲིའོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་ཁྱེའུ་དེ་ཏེ་པོར་མི་མཁས་པ་དང་། ལེ་ལོ་ཅན་སྒྲུབ་མི་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་པོ་སྦྱིན་མི་ནུས་པ་དང་། ལས་ཆེ་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པར་མི་བྱེད་དོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་ཁྱེའུ་དེ་ཏེ་པོར་མཁས་པ་དང་། ལེ་ལོ་མེད་པ་དང་སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་བགོ་བ་མང་པོ་སྦྱིན་ནུས་པ་དང་། ལས་ཆུང་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པར་བྱེད་དོ། །གང་ཡང་
རུང་བ་དག་བུ་མོ་སློང་བར་བྱེད་པ་དེ་དག་ཀྱང་རི་དྭགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་ནག་པོ་ཁྱོད་ཀྱིས་ཁྱིམ་ཆེ་གེ་མོ་ཞིག་ཤེས་སམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང་། དེ་དག་དེ་ལ་ནག་པོ་ཇི་ལྟ་དེ་ན་བུ་མོ་དེ་མཁས་པ་དང་། ལེ་ལོ་མེད་པ་དང་། སྒྲུབ་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནམ་ཞེས་འདྲིའོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བུ་མོ་དེ་ཏེ་པོར་མི་མཁས་པ་དང་། ལེ་ལོ་ཅན་དང་། སྒྲུབ་མི་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་སློང་བར་མི་བྱེད་དོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བུ་མོ་དེ་ཏེ་པོར་མཁས་པ་དང་། ལེ་ལོ་མེད་པ་དང་སྒྲུབ་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནོ་ཞེས་བསྟན་པར་གྱུར་ན་དེ་དག་བུ་མོ་དེ་སློང་བར་བྱེད་དོ། །རི་དྭགས་འཛིན་གྱི་བུ་ནག་པོས་དེ་ལྟར་བསྟན་ནས། གང་ཡང་རུང་བ་དག་གི་བུ་མོ་སྦྱིན་ཉེས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མི་མཁས་པ་དང་ལེ་ལོ་ཅན་དང་། སྒྲུབ་མི་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་པོ་སྦྱིན་མི་ནུས་པ་དང་། ལས་ཆེ་བ་ཡིན་པས་གང་དག་ལ་རི་དྭགས་འཛིན་གྱི་བུ་ནག་པོས་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ། །ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་སྦྱིན་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མཁས་པ་དང་། ལེ་ལོ་མེད་པ་དང་སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་པོ་སྦྱིན་ནུས་པ་དང་། ལས་ཆུང་བ་ཡིན་པས་གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་བཞིན་དུ་གང་ཡང་རུང་བ་དག་གིས་
བུ་མོ་བསླང་ཉེས་པར་གྱུར་ན། དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླངས་ན་བུ་མོ་དེ་མི་མཁས་པ་དང་། ལེ་ལོ་ཅན་དང་སྒྲུབ་མི་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་པས། གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གིས་བུ་མོ་བསླང་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ན་བུ་མོ་བསླངས་ན་བུ་མོ་དེ་མཁས་པ་དང་ལེ་ལོ་མེད་པ་དང་། སྒྲུབ་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་པས། གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་ན་རི་དྭགས་འཛིན་གྱི་བུ་ནག་པོ་ལ་མཉན་ཡོད་ན་དུས་གཅིག་ཏུ་བསྔགས་པ་དང་བསྔགས་པ་མ་ཡིན་པ་དག་ཀྱང་བྱུང་བར་གྱུར་ཏོ། །དེ་དུས་གཞན་ཞིག་ན་སངས་རྒྱས་ལ་མངོན་པར་དད་ཆོས་དང་དགེ་འདུན་ལ་མངོན་པར་དད། སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་ཞིང་དེས་སྲོག་གཅོད་པ་སྤངས་ཏེ། སྲོག་གཅོད་པ་ལས་ཕྱིར་ལོག །མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་སྤངས་ཏེ་འབྲུའི་ཆང་དང་། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ཕྱིར་ལྡོག་གོ་།དེ་དུས་ཅུང་ཞིག་ཁྱིམ་པར་ཁྱིམ་ན་འདུག་ནས་དད་པ་སྔ་མ་དེ་ཉིད་རྗེས་སུ་སྤེལ་ཞིང་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ལེགས་པར་གསུངས་པའི་ཆོས་འདུལ་བ་ལ་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་དེ་ལྟར་རབ་ཏུ་བྱུང་ནས་ཀྱང་མཉན་ཡོད་པའི་བྲམ་ཟེ་དང་། ཁྱིམ་བདག་རྣམས་དང་སྔོན་བཤེས་པ་ཉིད་ཀྱིས་དེ་
དག་གི་གཏམ་འདྲེ་བ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པ་ཡིན་པས། གང་ཡང་རུང་བ་དག་ལ་བུ་མོ་སྦྱིན་པར་བྱ་བ་ཡོད་པ་དེ་དག་ཀྱང་རི་དྭགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་འཕགས་པ་ཁྱོད་ཀྱིས་ཁྱིམ་ཆེ་གེ་མོ་ཞིག་མཁྱེན་ཏམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང་། དེ་དག་དེ་ལ་འཕགས་པ་ཇི་ལྟ་དེ་ན་ཁྱེའུ་དེ་མཁས་པ་དང་ལེ་ལོ་མ་མཆིས་པ་དང་། སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་བ་སྩོལ་རྔོ་ཐོག་པ་དང་། ལས་ཆུང་བ་ལགས་སམ་ཞེས་འདྲིའོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟང་དག་ཁྱེའུ་དེ་ཏེ་པོར་མི་མཁས་པ་དང་། ལེ་ལོ་ཅན་དང་། སྒྲུབ་མི་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་པོ་སྦྱིན་མི་ནུས་པ་དང་། ལས་ཆེ་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པ་མི་བྱེད་དོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟང་དག་ཁྱེའུ་དེ་ཏེ་པོར་མཁས་པ་དང་ལེ་ལོ་མེད་པ་དང་། སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་བགོ་བ་མང་པོ་སྦྱིན་ནུས་པ་དང་། ལས་ཆུང་བ་ཡིན་ནོ་ཞེས་བསྟན་པར་གྱུར་ན་དེས་ན་དེ་དག་བུ་མོ་དེ་ཁྱེའུ་དེ་ལ་སྦྱིན་པར་བྱེད་དོ། །གང་ཡང་རུང་བ་དག་བུ་མོ་སློང་བར་བྱེད་པ་དེ་དག་ཀྱང་རི་དྭགས་འཛིན་གྱི་བུ་ནག་པོའི་གན་དུ་སོང་སྟེ། འདི་སྐད་ཅེས་འཕགས་པ་ཁྱོད་ཀྱིས་ཁྱིམ་ཆེ་གེ་མོ་ཞིག་མཁྱེན་ཏམ་ཞེས་འདྲིའོ། །དེས་ཤེས་སོ་ཞེས་སྨྲས་པ་དང་། དེ་དག་དེ་ལ་འཕགས་པ་ཇི་ལྟར་དེ་ན་བུ་མོ་དེ་མཁས་པ་དང་། ལེ་ལོ་མ་མཆིས་པ་དང་། སྒྲུབ་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་རྔོ་ཐོག་པ་ལགས་སམ་ཞེས་འདྲིའོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟང་དག་བུ་མོ་དེ་ཏེ་པོར་མི་མཁས་པ་དང་། ལེ་ལོ་ཅན་དང་། སྒྲུབ་མི་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་ནོ་ཞེས་བསྟན་པར་གྱུར་ན། དེས་ན་དེ་དག་བུ་མོ་དེ་སློང་བར་མི་བྱེད་དོ། །གལ་ཏེ་རི་དྭགས་འཛིན་གྱི་བུ་ནག་པོས་འདི་སྐད་ཅེས་བཞིན་བཟང་དག་བུ་མོ་དེ་ཏེ་པོར་མཁས་པ་དང་། ལེ་ལོ་མེད་པ་དང་།
སྒྲུབ་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་ནུས་པ་ཡིན་ནོ་ཞེས་བསྟན་པར་གྱུར་ན། དེས་ན་དེ་དག་བུ་མོ་དེ་སློང་བར་བྱེད་དོ། །རི་དྭགས་འཛིན་གྱི་བུ་ནག་པོས་དེ་ལྟར་བསྟན་ནས་གང་ཡང་རུང་བ་དག་གི་བུ་མོ་སྦྱིན་ཉེས་པར་གྱུར་ན། དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བྱིན་ན་ཁྱེའུ་དེ་མི་མཁས་པ་དང་། ལེ་ལོ་ཅན་དང་། སྒྲུབ་མི་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་། བགོ་བ་མང་པོ་སྦྱིན་མི་ནུས་པ་དང་ལས་ཆེ་བ་ཡིན་པས་གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་སྦྱིན་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་སྦྱིན་ན་ཁྱེའུ་དེ་མཁས་པ་དང་། ལེ་ལོ་མེད་པ་དང་། སྒྲུབ་ཕོད་པ་དང་། ཁྱེའུ་དེ་བུ་མོ་ལ་བཟའ་བ་དང་བགོ་བ་མང་པོ་སྦྱིན་ནུས་པ་དང་། ལས་ཆུང་བ་ཡིན་པས་གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེས་པ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པས་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་བཞིན་དུ་གང་ཡང་རུང་བ་དག་གིས་བུ་མོ་བསླངས་ཉེས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླངས་ན་བུ་མོ་དེ་མི་མཁས་པ་དང་། ལེ་ལོ་ཅན་དང་སྒྲུབ་མི་ཕོད་པ་དང་། བུ་མོ་དེ་བག་ཡོད་པས་ཁྱིམ་ན་གནས་པར་མི་ནུས་པ་ཡིན་པས། གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེ་བ། ཕེབས་པར་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་པ་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་མི་བསྔགས་པ་རྗོད་པར་བྱེད་དོ། །གང་ཡང་རུང་བ་དག་གི་བུ་མོ་བསླངས་ལེགས་པར་གྱུར་ན་དེ་དག་འདི་སྐད་ཅེས་བདག་ཅག་གིས་རི་དྭགས་འཛིན་གྱི་བུ་ནག་པོ་ལ་དྲིས་ནས་བུ་མོ་བསླངས་ན་བུ་མོ་དེ་མཁས་པ་དང་། ལེ་ལོ་མེད་པ་དང་། སྒྲུབ་ཕོད་པ་དང་། བུ་མོ་དེ་བག་
ཡོད་པས་ཁྱིམ་ན་གནས་པར་ནུས་པ་ཡིན་པས། གང་དག་ལ་རི་དྭགས་འཛིན་གྱི་བུ་ནག་པོ་གཏམ་འདྲེ་བ། ཕེབས་པ་སྨྲ་བ། སྨོས་འདྲིན་འགྲོགས་བཤེས་ཡིད་གཅུགས་ཁྱིམ་དུ་འཇུག་པར་བྱེད་པར་བདོག་པ་དེ་དག་ལ་ཡང་འདི་ལྟར་འགྱུར་རོ་ཞེས་བསྔགས་པ་རྗོད་པར་བྱེད་དོ། །དེ་ན་རི་དྭགས་འཛིན་གྱི་བུ་ནག་པོ་ལ་མཉན་ཡོད་ན་དུས་གཅིག་ཏུ་བསྔགས་པ་དང་བསྔགས་པ་མ་ཡིན་པ་དག་བྱུང་བར་གྱུར་ཏོ། །དེ་ནི་རེ་ཞིག་བྱུང་བ་ཡིན་གྱི་སངས་རྒྱས་བཅོམ་ལྡན་འདས་ཀྱིས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བ་ནི་མ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་དག་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ་མཛའ་ན་མོ་ཉིད་དུ་སྨྱན་བྱེད་ན། མུ་སྟེགས་ཅན་དག །ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་ནི་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་དེ། བྲམ་ཟེ་དང་ཁྱིམ་བདག་བསླབ་པའི་གཞི་ཡང་དག་པར་མ་བླངས་པ་གཞན་དག་ཀྱང་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ། མཛའ་ན་མོ་ཉིད་དུ་སྨྱན་བྱེད་ན་ཤེས་ལྡན་དག་ཤཱཀྱའི་བུའི་དགེ་སྦྱོང་རྣམས་བྲམ་ཟེ་དང་ཁྱིམ་བདག་བསླབ་པའི་གཞི་ཡང་དག་པར་མ་བླངས་པ་རྣམས་ལ་བྱེ་བྲག་ནི་ཅི་ཡོད། བསམ་པ་ནི་ཅི་ཡོད། ཐ་དད་དུ་བྱ་བ་ནི་ཅི་ཡོད། དགེ་སྦྱོང་མགོ་རེག་འདི་དག་ལ་སུ་ཞིག་བསོད་སྙོམས་བྱིན་པ་དང་། བྱ་བར་སེམས་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བ་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །དེ་བཞིན་གཤེགས་པ་ནི་དོན་གྱི་དབང་གཉིས་གཟིགས་པ་ན་དགེ་སློང་གི་དགེ་འདུན་སྡུད་པར་མཛད་དེ། འདི་ལྟ་སྟེ། ངའི་ཉན་ཐོས་རྣམས་ཀྱིས་ཀུན་ཤེས་པ་ཉིད་དུ་བྱ་བའི་ཕྱིར་དང་། ངས་འདུལ་བ་
ལ་བསླབ་པའི་གཞི་ལེགས་པར་བཅས་པར་འགྱུར་བའོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ། མཁྱེན་བཞིན་དུ་རྨེད་པ་མཁྱེན་ཀྱང་མི་རྨེད་པ། དུས་སུ་རྨེད་པ་དུས་ལས་ཡོལ་བར་མི་རྨེད་པ། དོན་དང་ལྡན་པ་རྨེད་པ་དོན་དང་མི་ལྡན་པ་མི་རྨེད་པས། སངས་རྒྱས་བཅོམ་ལྡན་འདས་ནི་དོན་དང་མི་ལྡན་པ་རྨེད་པ་ལ་ཆུ་ལོན་གྱིས་ཟློག་པར་མཛད་པ་ཡིན་ནོ། །དེ་ལ་སངས་རྒྱས་བཅོམ་ལྡན་འདས་རྣམས་ནི་དོན་དང་ལྡན་པ་རྨེད་པ་ལ་དུས་མཁྱེན་པ་ཡིན་པས། སངས་རྒྱས་བཅོམ་ལྡན་འདས་ཀྱིས་དྲུག་སྡེ་རྣམས་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པར་གྱུར་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ལ་སྐྱེས་པའི་ཚིག་དང་། སྐྱེས་པ་ལ་བུད་མེད་ཀྱི་ཚིག་གིས་ཆུང་མ་ཉིད་དམ་མཛའ་ན་མོ་ཉིད་དུ་སྨྱན་བྱེད་ན་ཐ་ན་ཐང་འགའ་ཕྲད་པ་ལ་ཡང་རུང་སྟེ་དགེ་འདུན་ལྷག་མའོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ་གཞན་ཡང་དེ་དང་འདྲ་བ་གང་ཡིན་པའོ། །བུད་མེད་ལ་སྐྱེས་པའི་ཚིག་དང་ཞེས་བྱ་བ་ནི་སྐྱེས་པའི་ཀུན་ཏུ་སྤྱད་པའི་བསམ་པའི་ཚིག་གང་ཡིན་པ་དེ་བུད་མེད་ལ་རྗོད་པར་བྱེད་པས་སོ། །སྐྱེས་པ་ལ་བུད་མེད་ཀྱི་ཚིག་གིས་ཞེས་བྱ་བ་ནི། བུད་མེད་ཀྱི་ཀུན་ཏུ་སྤྱད་པའི་བསམ་པའི་ཚིག་གང་ཡིན་པ་སྐྱེས་པ་ལ་རྗོད་པར་བྱེད་པས་སོ། །ཆུང་མ་ཉིད་དམ་མཛའ་ན་མོ་ཉིད་དུ་ཞེས་བྱ་བ་ནི་ཆུང་མ་བདུན་དང་། མཛའ་ན་མོ་བཅུ་ཉིད་དུའོ། །ཆུང་མ་བདུན་གང་ཞེ་ན། ཆུ་ཚིགས་ཀྱིས་བྱིན་པ་དང་། རིན་
ཆས་ཉོས་པ་དང་། བཙན་ཕྲོགས་སུ་ཐོབ་པ་དང་། དང་སམ་དུ་འདུས་པ་དང་། གོས་ཟས་ཀྱིས་འཚོལ་བ་དང་། ཁ་དུམ་པ་དང་། ཐང་འགའ་ཕྲད་པ་ནི་བདུན་པའོ། །དེ་ལ་ཆུ་ཚིགས་ཀྱིས་བྱིན་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་ཕ་མ་དག་གིས་སྐྱེས་པ་ལ་འདི་ཁྱོད་ཀྱི་ཆུང་མ་སྐྱེ་དགུའི་བདག་མོ་བྱོས་ཤིག་ཅེས་ཆུ་ཚིགས་ཀྱིས་བྱིན་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་ཆུ་ཚིགས་ཀྱིས་བྱིན་པའི་ཆུང་མ་ཞེས་བྱའོ། །རིན་ཆས་ཉོས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པས་འདི་དག་གི་ཆུང་མ་སྐྱེ་དགུའི་བདག་མོ་བྱའོ། །ཞེས་ཕ་མ་དག་ལས་རིན་ཆས་ཉོས་ཤིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་རིན་ཆས་ཉོས་པའི་ཆུང་མ་ཞེས་བྱའོ། །བཙན་ཕྲོགས་སུ་ཐོབ་པའི་ཆུང་མ་གང་ཞེ་ན། འདི་ལྟ་སྟེ་རྒྱལ་པོ་རྒྱལ་རིགས་སྤྱི་བོར་དབང་བསྐུར་བས་དཔུང་གི་ཚོགས་ཡན་ལག་པ་བཞི་པ་གོ་བསྐོན་ཏེ། ཕ་རོལ་གྱི་ཡུལ་འཁོར་དང་ཕ་རོལ་གྱི་ཡུལ་དུ་སོང་ནས་མ་ཕེབས་པ་ཕབ་ཅིང་། ཕེབས་པར་གནས་ནས་ཐོབ་རྒྱལ་དུ་སྒྲོགས་པར་བྱེད་པའི་ཚེ་དེ་ན་སྐྱེས་པས་རྒྱལ་པོ་རྒྱལ་མཚན་དུ་བྱས་ནས་བུད་མེད་དམ་གཞོན་ནུ་མ་གང་ཡིན་པ་འདི་བདག་གི་ཆུང་མ་སྐྱེ་དགུའི་བདག་མོ་བྱའོ་ཞེས་ཕྲོགས་ཤིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པས་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་བཙན་ཕྲོགས་སུ་ཐོབ་པའི་ཆུང་མ་ཞེས་བྱའོ། །གཞན་ཡང་བཙན་ཕྲོགས་སུ་ཐོབ་པའི་ཆུང་མ་གང་ཞེ་ན། འདི་ལྟ་སྟེ་ཆོམ་རྐུན་པ་དག་གིས་གྲོང་གཞོམ་པའམ། གྲོང་ཁྱེར་གཞོམ་པའམ། ལྗོངས་གཞོམ་པ་བྱས་ཏེ། རང་གི་མགོ་རྒྱལ་མཚན་དུ་བྱས་ནས་བུད་མེད་དམ་གཞོན་ནུ་མ་གང་ཡིན་པ་འདི་བདག་གི་ཆུང་མ་སྐྱེ་དགུའི་བདག་མོ་བྱའོ་ཞེས་ཕྲོགས་ཤིང་དེ་དེའི་ཆུང་མ་སྐྱེ་དགུའི་
བདག་མོར་གྱུར་ནས། དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་བཙན་ཕྲོགས་སུ་ཐོབ་པའི་ཆུང་མ་ཞེས་བྱའོ། །དང་སམ་དུ་འདུས་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་རང་གི་དད་པ་དང་། གཅུགས་པ་དང་དགའ་བས་སྐྱེས་པའི་གན་དུ་འོངས་ཏེ་འདི་སྐད་ཅེས་རྗེའི་སྲས་ཚུར་སྤྱོན་ཁྱོད་བདག་གི་ཁྱིམ་ཐབ་མཛོད་ཅིག་དང་བདག་གིས་ཁྱོད་ཀྱི་བཙུན་མོ་སྐྱེ་དགུའི་བདག་མོ་བགྱིའོ་ཞེས་ཟེར་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་དང་སམ་དུ་འདུས་པའི་ཆུང་མ་ཞེས་བྱའོ། །གོས་ཟས་ཀྱིས་འཚོ་བའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པའི་གན་དུ་འོངས་ཏེ། འདི་སྐད་ཅེས་རྗེའི་སྲས་ཚུར་སྤྱོན་ཁྱོད་ཀྱིས་བདག་ལ་གོས་དང་ཟས་སྩོལ་ཅིག་དང་བདག་གིས་ཁྱོད་ཀྱིས་བཙུན་མོ་སྐྱེ་དགུའི་བདག་མོ་བགྱིའོ་ཞེས་ཟེར་ཞིང་། དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་གོས་ཟས་ཀྱིས་འཚོ་བའི་ཆུང་མ་ཞེས་བྱའོ། །ཁ་དུམ་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པའི་གན་དུ་འོངས་ཏེ། འདི་སྐད་ཅེས་རྗེའི་སྲས་ཚུར་སྤྱོན་ཁྱོད་ཀྱི་ནོར་གང་ལགས་པ་དེ་དང་། བདག་གི་ནོར་གང་ལགས་པ་དེ་དག་གཅིག་ཏུ་བསྡུས་ཏེ་བདག་ཅག་གཉིས་མཉམ་དུ་འཚོ་བར་བགྱི་ཞིང་བདག་ཅག་གཉིས་ལས་ཁྱེའུའམ། བུ་མོ་གང་དག་མཆིས་པར་འགྱུར་བ་དེ་དག་ཀྱང་བདག་ཅག་ཤི་ཞིང་དུས་ལ་བབ་པ་དག་ལ་ཉུང་དུའམ་མང་པོ་ཡང་རུང་བའི་སྦྱིན་པ་དག་སྦྱིན་ཞིང་བསོད་ནམས་དག་བགྱིས་ནས་འདི་དེ་གཉིས་གང་དུ་སྐྱེས་པ་དེར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བགྱིད་པར་གྱུར་པ་བགྱིའོ་ཞེས་ཟེར་ཞིང་དེ་དེའི་ཆུང་མ་སྐྱེ་དགུའི་བདག་མོར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ།
སྦས་པ་ཤིན་ཏུ་སྦས་པ། དེ་ནི་ཁ་དུམ་པའི་ཆུང་མ་ཞེས་བྱའོ། །ཐང་འགའ་ཕྲད་པའི་ཆུང་མ་གང་ཞེ་ན། བུད་མེད་དམ་གཞོན་ནུ་མ་གང་སྐྱེས་པས་དེང་བདག་འདི་དང་ལྷན་ཅིག་དགའ་མགུར་སྤྱད་པར་བྱའོ་སྙམ་ནས་དེའི་དུས་སུ་གླས་ཤིང་ཡུད་ཙམ་ཕྲད་པར་གྱུར་ནས་དེས་དེ་འདི་ལ་གཞན་དག་འདོད་པ་དག་གི་ཕྱིར་སྤྱད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་ཐང་འགའ་ཕྲད་པའི་ཆུང་མ་ཞེས་བྱའོ། །མཛའ་ན་མོ་བཅུ་གང་ཞེ་ན། མས་བསྲུངས་པ་དང་། ཕས་བསྲུངས་པ་དང་། མིང་པོས་བསྲུངས་པ་དང་། ཕུ་ནུ་མོས་བསྲུངས་པ་དང་། སྒྱུག་མོས་བསྲུངས་པ་དང་། གྱོས་པོས་བསྲུངས་པ་དང་། ཉེ་དུས་བསྲུངས་པ་དང་། རིགས་ཀྱིས་བསྲུངས་པ་དང་། རུས་ཆགས་ཀྱིས་བསྲུངས་པ་དང་། རྣམ་པར་འཁྲུག་པ་མེད་པ་ནི་བཅུ་པའོ། །དེ་ལ་མས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་ཚོར་བ་དག་གིས་ཉེན་པར་གྱུར་ནས། དེ་མའི་གན་ན་གནས་ཤིང་མས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་མས་བསྲུངས་པའི་མཛའ་ན་མོ་ཞེས་བྱའོ། །ཕས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ་རྒྱལ་པོའི་འཇིགས་པས་ཡུལ་འཁོར་གཞན་དང་། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པར་གྱུར་ནས། དེའི་ཕའི་གན་ན་གནས་ཤིང་ཕས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་ཕས་བསྲུངས་པའི་མཛའ་ན་མོ་ཞེས་བྱའོ། །མིང་པོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་
མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པར་གྱུར་ནས་དེ་མིང་པོའི་གན་ན་གནས་ཤིང་མིང་པོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་མིང་པོས་བསྲུངས་པའི་མཛའ་ན་མོ་ཞེས་བྱའོ། །ཕུ་ནུ་མོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་ནམ་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་ཚོར་བ་དག་གིས་ཉེན་པར་གྱུར་ནས། དེ་ཕུ་ནུ་མོའི་གན་ན་གནས་ཤིང་ཕུ་ནུ་མོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་ཕུ་ནུ་མོས་བསྲུངས་པའི་མཛའ་ན་མོ་ཞེས་བྱའོ། །སྒྱུག་མོས་བསྲུངས་པའི་མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གི་ཕ་མ་དང་། ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་། ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པར་གྱུར་ནས། དེ་སྒྱུག་མོའི་གན་ན་གནས་ཤིང་སྒྱུག་མོས་དེ་ལ་འདི་སྐད་ཅེས་ཁོ་མོའི་བུ་མཐོང་བ་གང་ཡིན་པ་དེ་ནི་ཁྱོད་མཐོང་བ་ཡིན་ལ། ཁྱོད་མཐོང་བ་གང་ཡིན་པ་དེ་ཡང་ཁོ་མོའི་བུ་མཐོང་བ་ཡིན་པས་ཁོ་མོའི་ཟས་དང་། གོས་ཀྱིས་མནའ་མ་གནས་པར་གྱིས་ཤིག །མནའ་མ་དགའ་བར་གྱིས་ཤིག་ཅེས་སྨྲས་ནས་སྒྱུག་མོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་སྒྱུག་མོས་བསྲུངས་པའི་མཛའ་ན་མོ་ཞེས་བྱའོ། །གྱོས་པོས་བསྲུངས་པའི་
མཛའ་ན་མོ་གང་ཞེ་ན། བུད་མེད་དམ་གཞོན་ནུ་མ་གང་གིས་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་ཚོར་བ་དག་གིས་ཉེན་པར་གྱུར་ནས། དེ་གྱོས་པོའི་གན་ན་གནས་ཤིང་གྱོས་པོས་དེ་ལ་འདི་སྐད་ཅེས་ཁོ་བོའི་བུ་མཐོང་བ་གང་ཡིན་པ་དེ་ནི་ཁྱོད་མཐོང་བ་ཡིན་ལ་ཁྱོད་མཐོང་བ་གང་ཡིན་པ་དེ་ཡང་ཁོ་བོའི་བུ་མཐོང་བ་ཡིན་པས་ཁོ་བོའི་ཟས་དང་གོས་ཀྱིས་མནའ་མ་གནས་པར་གྱིས་ཤིག །མནའ་མ་དགའ་བར་གྱིས་ཤིག་ཅེས་སྨྲས་ནས། གྱོས་པོས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་གྱོས་པོས་བསྲུངས་པའི་མཛའ་ན་མོ་ཞེས་བྱའོ། །ཉེ་དུས་བསྲུངས་པའི་མཛའ་ན་མོ་གང་ཞེ་ན། ཉེ་དུ་ཞེས་བྱ་བ་ནི་ཁྱིམ་བདུན་པ་ཚུན་ཆད་ལས་བརྟེན་པ་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ཏེ། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ་རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་ཆར་བ་དག་གིས་ཉེན་པར་གྱུར་ནས། དེ་ཉེ་དུའི་གན་ན་གནས་ཤིང་ཉེ་དུས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་ཉེ་དུས་བསྲུངས་པའི་མཛའ་ན་མོ་ཞེས་བྱའོ། །རིགས་ཀྱིས་བསྲུངས་པའི་མཛའ་ན་མོ་གང་ཞེ་ན། རིགས་ཞེས་བྱ་བ་ནི་བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ཏེ། བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པར་གྱུར་ནས། དེ་
རིགས་གཅིག་པའི་གན་ན་གནས་ཤིང་རིགས་གཅིག་པས་དེ་འདི་ལ་གཞན་དག་འདོད་པ་དག་གིས་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་རིགས་ཀྱིས་བསྲུངས་པའི་མཛའ་ན་མོ་ཞེས་བྱའོ། །རུས་ཆགས་ཀྱིས་བསྲུངས་པའི་མཛའ་ན་མོ་གང་ཞེ་ན། རུས་ཞེས་བྱ་བ་ནི་ཀུད་སའི་རིགས་དང་། བད་སའི་རིགས་དང་། ཤན་དི་ལིའི་རིགས་དང་། བྷ་ར་དྭ་ཛའི་རིགས་དང་། ལྔ་པའི་རིགས་དང་། ཉེ་ལྔའི་རིགས་དང་། གོ་ཏ་མའི་རིགས་ཏེ་བུད་མེད་དམ་གཞོན་ནུ་མ་གང་གི་ཕ་མ་དང་ཁྱིམ་ཐབ་ཤི་ཞིང་དུས་ལ་བབ་པར་གྱུར་ཏམ། རྒྱལ་པོས་བཅིངས་སམ་བསད་དམ། རྒྱལ་པོའི་འཇིགས་པས་ཡུལ་འཁོར་གཞན་དང་ཡུལ་གཞན་དུ་བྲོས་པར་གྱུར་ཏམ། སྨྱོས་པ་དང་སེམས་འཁྲུགས་པ་དང་ཚོར་བ་དག་གིས་ཉེན་པར་གྱུར་ནས། དེ་རུས་ཆགས་ཀྱི་གན་ན་གནས་ཤིང་རུས་ཆགས་ཀྱིས་དེ་འདི་ལ་གཞན་དག་འདོད་པ་དག་གི་ཕྱིར་སྤྱོད་པར་མ་གྱུར་ཅིག་ཅེས་བསྲུངས་པ་ཤིན་ཏུ་བསྲུངས་པ། སྦས་པ་ཤིན་ཏུ་སྦས་པ་དེ་ནི་རུས་ཆགས་ཀྱིས་བསྲུངས་པའི་མཛའ་ན་མོ་ཞེས་བྱའོ། །རྣམ་པར་འཁྲུག་པ་མེད་པའི་མཛའ་ན་མོ་གང་ཞེ་ན། དགེ་སློང་མ་དང་སྤྱོད་པ་ཅན་མོ་དང་། ཀུན་ཏུ་རྒྱུའི་མོ་དང་ཁྱིམ་ཐབ་ཀྱི་མལ་གྱི་རྗེས་སུ་འཇུག་པ་དང་། ཆོས་བཞིན་སྤྱོད་པ་དེ་ནི་རྣམ་པར་འཁྲུག་པ་མེད་པའི་མཛའ་ན་མོ་ཞེས་བྱའོ། །སྨྱན་ཞེས་བྱ་བ་ནི་ཕྲིན་བྱེད་པའོ། །བྱེད་ན་ཞེས་བྱ་བ་ནི་བྱེད་པར་གྱུར་ནའོ། །ཐ་ན་ཐང་འགའ་ཕྲད་པ་ལ་ཡང་རུང་སྟེ་ཞེས་བྱ་བ་ནི། ཐ་ན་ཡུད་ཙམ་ལ་ཡང་རུང་སྟེའོ། །དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་ནོ། །དེ་ལ་ལྟུང་བ་ཇི་ལྟར་འགྱུར་ཞེ་ན། བར་སྡོམ་ལ། སྤྲིང་པའི་ཕྲིན་དང་དགེ་སློང་གཉིས། །སྤྱོད་ལམ་དང་ནི་སྔོན་འགྲོ་དང་། །བདག་དང་བདག་མིན་ཡུལ་ཕྱོགས་ཚིག །སྤྲིང་ཡིག་ལག་ཡིག་ཆུང་མའོ། །དགེ་སློང་གིས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང་། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་མངགས་
པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་པ་མནོས་ཏེ་མངགས་པས་ཕྲིན་ཕར་སྐྱེལ་བར་བྱེད་ཅིང་བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་ཉིད་ཀྱིས་སྤྲིང་པ་མནོས་ཏེ། མངགས་པས་ཕྲིན་པར་ཡང་སྐྱེལ་པ་་བྱེད་ཅིང་། མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་མར་སྐྱེལ་བར་བྱེད་ཅིང་། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་། མངགས་པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། མངགས་པས་ཕྲིན་ཕར་སྐྱེལ་བར་བྱེད་ཅིང་། བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། མངགས་པས་ཕྲིན་ཕར་ཡང་སྐྱེལ་བར་བྱེད་ཅིང་། མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་ཡང་སྐྱེལ་བར་བྱེད་ཅིང་། བདག་ཉིད་ཀྱིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། བདག་ཉིད་ཀྱིས་ཕྲིན་ཕར་སྐྱེལ་བར་བྱེད་ཅིང་། མངགས་པས་མངགས་པས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། མངགས་པས་མངགས་པས་ཕྲིན་ཕར་
སྐྱེལ་བར་བྱེད་ཅིང་། བདག་ཉིད་ཀྱིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་མངགས་པས་མངགས་པ་ལས་བདག་ཉིད་ཀྱིས་སྤྲིང་པ་མནོས་ཏེ། མངགས་པས་མངགས་པས་ཕྲིན་ཕར་ཡང་སྐྱེལ་བར་བྱེད་ཅིང་། མངགས་པས་མངགས་པས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་པ་མནོས་ཏེ། གཉི་གས་ཕྲིན་ཕར་ཡང་སྐྱེལ་བར་བྱེད་ཅིང་། གཉི་གས་ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་པ་མནོས་ཏེ། དེ་ན་གཅིག་འདི་སྐད་ཅེས་རེ་ཞིག་ཁོ་བོའི་དོན་དུ་ཕྲིན་ཕར་ཡང་སྐྱོལ་ལ། ཕྲིན་ཚུར་ཡང་སྐྱོལ་ཅིག་ཅེས་ཟེར་ནས། དེས་དེའི་དོན་དུ་ཕྲིན་ཕར་ཡང་སྐྱེལ་བར་བྱེད་ཅིང་། ཕྲིན་ཚུར་ཡང་སྐྱེལ་བར་བྱེད་ན་གཉི་ག་ལ་དགེ་འདུན་ལྷག་མར་འགྱུར་རོ། །དགེ་སློང་གཉི་གས་སྤྲིང་པ་མནོས་ཏེ་དེ་ན་གཅིག་འདི་སྐད་ཅེས་ཁོ་བོས་ནི་ཕྲིན་ཕར་ནི་སྐྱེལ་ལོ། །ཕྲིན་ཚུར་ནི་མི་སྐྱལ་ལོ་ཞེས་ཟེར་ན་དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང་། ཕྲིན་ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་ལ། གང་ཕྲིན་ཕར་ནི་སྐྱེལ་བར་བྱེད་ལ་ཕྲིན་ཚུར་ནི་སྐྱེལ་བར་མི་བྱེད་པ་དེ་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་པ་མནོས་ཏེ། དེ་ན་གཅིག་འདི་སྐད་ཅེས་ཁོ་བོ་ནི་ཕྲིན་ཕར་ཡང་མི་སྐྱེལ་ལ་ཚུར་ཡང་མི་སྐྱེལ་ལོ་ཞེས་ཟེར་ན། དེ་གཉིས་ལས་གང་ཕྲིན་ཕར་ཡང་སྐྱེལ་བར་བྱེད་ཅིང་། ཕྲིན་ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་ལ། གང་ཕྲིན་ཕར་ཡང་སྐྱེལ་བར་མི་བྱེད་ལ་ཕྲིན་ཚུར་ཡང་སྐྱེལ་བར་མི་བྱེད་པ་དེ་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་པ་མནོས་ཏེ། གཉི་གས་ཕྲིན་ཕར་ནི་སྐྱེལ་བར་བྱེད་ལ། ཕྲིན་ཚུར་ནི་སྐྱེལ་བར་མི་བྱེད་ན་གཉི་ག་ལ་ཉེས་པ་སྦོམ་པོ་གཉིས་གཉིས་སུ་འགྱུར་རོ། །དགེ་སློང་གཉིས་ཀྱིས་གཉི་གས་སྤྲིང་པ་མནོས་ཏེ་དེ་ན་གཉིས་ག་འདི་སྐད་ཅེས་བདག་ཅག་གཉི་ག་ཕྲིན་ཕར་ཡང་སྐྱེལ་བར་མི་བྱེད་ལ། ཕྲིན་ཚུར་ཡང་སྐྱེལ་བར་མི་བྱེད་དོ་ཞེས་ཟེར་ན་གཉི་ག་ལ་ཉེས་པ་སྦོམ་པོ་རེ་རེར་འགྱུར་རོ། །དགེ་སློང་གཅིག་ཁྱིམ་པ་གཅིག་དང་ཁྱིམ་པ་མོ་གཅིག་དང་མགྲོན་ལམ་དུ་འགྲོ་བ་ན་དེ་ན་གལ་ཏེ་ཁྱིམ་པ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་མོ་འདི་ལ་འདི་སྐད་ཅེས་ཁྱོད་ཁྱིམ་པ་འདིའི་
ཆུང་མའམ། མཛའ་ན་མོ་མའམ། སྨོས་འདྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་རམ། ཡང་ན་ཁྱིམ་པ་མོ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་འདི་ལ་འདི་སྐད་ཅེས་ཁྱོད་ཁྱིམ་པ་མོ་འདིའི་ཁྱོའམ་མཛའ་ན་ཕོའམ་སྨོན་འདྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་བ་ལ་དགེ་སློང་དེས་སྤྲིང་པ་རྣམ་པ་དེ་ལྟ་བུ་དེ་མནོས་ཏེ་ཕྲིན་ཕར་སྐྱེལ་བར་བྱེད་དམ་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །འགྲོ་བ་ལ་ཇི་ལྟ་བ་བཞིན་དུ་སྡོད་པ་དང་འདུག་པ་དང་། ཉལ་བ་དག་ལ་ཡང་དེ་བཞིན་ནོ། །དགེ་སློང་གཅིག་དང་ཁྱིམ་པ་གཅིག་དང་ཁྱིམ་པ་མོ་གཅིག་ལ་ཇི་ལྟ་བ་བཞིན་དུ་དགེ་སློང་གཉིས་དང་། ཁྱིམ་པ་གཉིས་དང་། ཁྱིམ་པ་མོ་གཉིས་དང་། དགེ་སློང་རབ་ཏུ་མང་པོ་དང་། ཁྱིམ་པ་རབ་ཏུ་མང་པོ་དང་། ཁྱིམ་པ་མོ་རབ་ཏུ་མང་པོ་ལ་ཡང་དེ་བཞིན་དུ་ཅི་རིགས་པར་རྒྱས་པར་སྦྱར་རོ། །དགེ་སྦྱོང་མདུན་དུ་འགྲོ་བའི་དགེ་སྦྱོང་དང་ཕྱི་བཞིན་དུ་འབྲང་བའི་དགེ་སྦྱོང་གཉིས་ལས་མདུན་དུ་འགྲོ་བའི་དགེ་སྦྱོང་གི་སྤྲིང་པ་མནོས་ཏེ། མདུན་དུ་འགྲོ་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་ལ་དགེ་འདུན་ལྷག་མར་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་པ་མནོས་ཏེ། མདུན་དུ་འགྲོ་བའི་དགེ་སློང་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། ཕྱི་བཞིན་འབྲང་བའི་དགེ་སློང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་པ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་། མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ་ཕྱི་བཞིན་འབྲང་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །མདུན་དུ་འགྲོ་བའི་དགེ་སྦྱོང་གིས་སྤྲིང་པ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན་མདུན་དུ་འགྲོ་བའི་དགེ་སྦྱོང་ལ་ཉེས་པ་སྦོམ་པོ་གཅིག་ཏུ་འགྱུར་ལ། ཕྱི་བཞིན་འབྲང་བའི་དགེ་སྦྱོང་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སྦྱོང་མདུན་དུ་འགྲོ་བའི་དགེ་སྦྱོང་དང་། ཕྱི་བཞིན་འབྲང་བའི་དགེ་སྦྱོང་གཉིས་ལས་ཕྱི་བཞིན་འབྲང་བའི་དགེ་སྦྱོང་གིས་སྤྲིང་པ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་ཕྱི་བཞིན་
འབྲང་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་ལ་དགེ་འདུན་ལྷག་མར་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་པ་མནོས་ཏེ། ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཕར་སྐྱེལ་བར་བྱེད་ཅིང་མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན་ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་པ་མནོས་ཏེ། མདུན་དུ་འགྲོ་བའི་དགེ་སྦྱོང་གིས་ཕྲིན་བར་སྐྱེལ་བར་བྱེད་ཅིང་ཕྱི་བཞིན་འབྲང་བའི་དགེ་སྦྱོང་གིས་ཕྲིན་ཚུར་སྐྱེལ་བར་བྱེད་ན། ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཉིས་སུ་འགྱུར་ལ། མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ་གཅིག་ཏུ་འགྱུར་རོ། །ཕྱི་བཞིན་འབྲང་བའི་དགེ་སྦྱོང་གིས་སྤྲིང་པ་མནོས་ཏེ། མདུན་དུ་འགྲོ་བའི་དགེ་སྦྱོང་གིས་ཕྲིན་ཕར་ཡང་སྐྱེལ་བར་བྱེད་ཅིང་། མདུན་དུ་འགྲོ་བའི་དགེ་སྦྱོང་གིས་ཕྲིན་ཚུར་ཡང་སྐྱེལ་བར་བྱེད་ན། ཕྱི་བཞིན་འབྲང་བའི་དགེ་སྦྱོང་ལ་ཉེས་པ་སྦོམ་པོ་གཅིག་ཏུ་འགྱུར་ལ། མདུན་དུ་འགྲོ་བའི་དགེ་སྦྱོང་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །ཁྱིམ་བདག་ནི་གཉིས་ཏེ། བདག་པོ་དང་། བདག་པོ་མ་ཡིན་པའོ། །དེ་ལ་བདག་པོ་ཞེས་བྱ་བ་ནི་བུ་མོ་སྦྱིན་པ་དང་། འཕྲོག་པའི་བདག་པོར་གྱུར་ཅིང་བླའི་གྲའི་ནང་དུ་སོང་ཡང་རུང་། འོག་གཟུའི་ནང་དུ་སོང་ཡང་རུང་སྟེ། དེའི་ཚིག་ཡང་དག་པ་མ་ཡིན་པ་ཡང་གཟུང་བར་འོས་པར་འགྱུར་བ་གང་ཡིན་པ་དེ་ནི་བདག་པོ་ཞེས་བྱའོ། །བདག་པོ་མ་ཡིན་པ་ཞེས་བྱ་བ་ནི་བུ་མོ་སྦྱིན་པ་དང་། འཕྲོག་པའི་བདག་པོར་གྱུར་པ་མ་ཡིན་ཞིང་བླའི་གྲའི་ནང་དུ་སོང་ཡང་རུང་། འོག་གཟུའི་ནང་དུ་སོང་ཡང་རུང་སྟེ། དེའི་
ཚིག་ཡང་དག་པར་ཡང་གཟུང་བར་འོས་པར་མི་འགྱུར་བ་གང་ཡིན་པ་དེ་ནི་བདག་པོ་མ་ཡིན་པ་ཞེས་བྱའོ། །དགེ་སློང་གིས་བདག་པོ་ལས་སྤྲིང་པ་མནོས་ཏེ། བདག་པོ་ལས་ཕྲིན་ཕར་ཡང་སྐྱེལ་བར་བྱེད་ཅིང་བདག་པོ་ལ་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་བདག་བོ་ལས་སྤྲིང་པ་མནོས་ཏེ། བདག་པོ་ལ་ཕྲིན་ཕར་སྐྱེལ་བར་བྱེད་ཅིང་། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང་། ཉེས་བྱས་གཅིག་ཏུ་འགྱུར་རོ། །དགེ་སློང་གིས་བདག་པོ་ལས་སྤྲིང་པ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་སྐྱེལ་བར་བྱེད་ཅིང་། བདག་པོ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང་། ཉེས་བྱས་གཅིག་ཏུ་འགྱུར་རོ། །དགེ་སློང་གིས་བདག་པོ་ལས་སྤྲིང་པ་མནོས་ཏེ། བདག་པོ་མ་ཡིན་པ་ལས་ཕྲིན་ཕར་སྐྱེལ་བར་བྱེད་ཅིང་། བདག་པོ་མ་ཡིན་པ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང་། ཉེས་བྱས་གཉིས་སུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་པ་མནོས་ཏེ། བདག་པོ་མ་ཡིན་པ་ལ་ཕྲིན་ཕར་ཡང་སྐྱེལ་བར་བྱེད་ཅིང་། བདག་པོ་མ་ཡིན་པ་ལ་ཕྲིན་ཚུར་ཡང་སྐྱེལ་བར་བྱེད་ན། ཉེས་བྱས་གསུམ་དུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་པ་མནོས་ཏེ། བདག་པོ་ལ་ཕྲིན་ཕར་སྐྱེལ་བར་བྱེད་ཅིང་། བདག་པོ་མ་ཡིན་པ་ལས་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང་། ཉེས་བྱས་གཉིས་སུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་པ་མནོས་ཏེ། བདག་པོ་མ་ཡིན་པ་ལས་ཕྲིན་ཕར་སྐྱེལ་བར་བྱེད་ཅིང་། བདག་པོ་ལ་ཕྲིན་ཚུར་སྐྱེལ་བར་བྱེད་ན་ཉེས་པ་སྦོམ་པོ་གཅིག་དང་། ཉེས་བྱས་གཉིས་སུ་འགྱུར་རོ། །དགེ་སློང་གིས་བདག་པོ་མ་ཡིན་པ་ལས་སྤྲིང་པ་མནོས་ཏེ། བདག་པོ་ལ་ཕྲིན་ཕར་ཡང་སྐྱེལ་བར་བྱེད་ཅིང་། བདག་པོ་ལས་ཕྲིན་ཚུར་ཡང་སྐྱེལ་བར་བྱེད་ན་ཉེས་པ་སྦོམ་པོ་གཉིས་དང་། ཉེས་བྱས་གཅིག་ཏུ་འགྱུར་རོ། །རྒྱུ་གསུམ་གྱིས་སྤྲིང་པའི་ཕྲིན་ཚུར་བསྐྱལ་བར་འགྱུར་ལ་ཕར་བསྐྱལ་བར་ནི་མི་འགྱུར་ཏེ། གསུམ་གང་ཞེ་ན། ཡུལ་ཕྱོགས་དང་། བརྡ་དང་། མཚན་མས་སོ། །ཇི་ལྟར་ཡུལ་ཕྱོགས་ཀྱིས་ཤེ་ན། གང་གི་ཚེ་ཁོ་བོ་སྐྱེད་མོས་ཚལ་ལམ་མདུན་སའམ། ལྷའི་གནས་ག་གེ་མོ་ཞིག་
ན་འདུག་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་ཡུལ་ཕྱོགས་ཀྱིས་སོ། །ཇི་ལྟར་བརྡས་ཤེ་ན། གང་གི་ཚེ་ཁོ་བོ་སྔ་དྲོའམ། གུང་ཚིགས་སམ་ཕྱེམ་བྲེད་ན་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་བརྡས་སོ། །ཇི་ལྟར་མཚན་མས་ཤེ་ན། གང་གི་ཚེ་ཁོ་བོ་སྐྲ་དང་ཁ་སྤུ་བྲེག་ནས་རིང་པོ་མ་ལོན་པའམ། སྣམ་སྦྱར་དམར་སེར་གྱོན་པའམ། ལྷུང་བཟེད་ཞ་ཉེའི་དབྱར་འདབ་ཅན་ནམ། འཁར་བ་ལྕགས་སྦུབས་ཅན་ནམ། ཞུན་མར་གྱི་ལྷུང་བཟེད་དམ། འབྲུ་མར་གྱི་ལྷུང་བཟེད་དང་། སྦྲང་རྩིའི་ལྷུང་བཟེད་དམ། བུ་རམ་གྱི་དབུ་པའི་ལྷུང་བཟེད་ཐོགས་པ་ཁྱོད་ཀྱིས་མཐོང་བ་དེའི་ཚེ་བྱ་བ་དེ་བྱས་པར་ཁྱོད་ཀྱིས་ཤེས་པར་གྱིས་ཤིག་ཅེས་བྱ་བ་སྟེ། དེ་ལྟར་མཚན་མས་སོ། །རྒྱུ་གསུམ་གྱིས་ནི་སྤྲིང་པའི་ཕྲིན་ཕར་བསྐྱལ་བར་ཡང་འགྱུར་ལ། ཕྲིན་ཚུལ་བསྐྱལ་བར་ཡང་འགྱུར་ཏེ། གསུམ་གང་ཞེ་ན། ཚིག་དང་། སྤྲིང་ཡིག་དང་། ལག་ཡིག་གིས་སོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་སྐྱེལ་བར་ཡང་བྱེད་ཅིང་། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་ཡང་བྱེད་ཅིང་སྤྲིང་ཡིག་གིས་ཕྲིན་ཚུར་སྐྱེལ་བར་ཡང་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་བརྡ་དང་མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ་ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་
སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་ཡང་བྱེད་ཅིང་། ལག་ཡིག་གིས་ཕྲིན་ཚུར་སྐྱེལ་བར་ཡང་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ཚིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་བརྡ་དང་མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་བརྡ་དང་མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་
མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་སྤྲིང་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་བརྡ་དང་མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིད་གིས་སྤྲིང་པ་མནོས་ཏེ། ཚིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ཚིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་བརྡ་དང་། མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་སྐྱེལ་བར་བྱེད་ཅིང་ལག་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན། དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། སྤྲིང་ཡིག་གིས་ཕྲིན་ཕར་ཡང་སྐྱེལ་བར་བྱེད་ཅིང་། སྤྲིང་ཡིག་གིས་ཕྲིན་ཚུར་ཡང་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ། །དགེ་སློང་གིས་ལག་ཡིག་གིས་སྤྲིང་པ་མནོས་ཏེ། ལག་ཡིག་གིས་ཕྲིན་ཕར་སྐྱེལ་བར་བྱེད་ཅིང་། ཡུལ་ཕྱོགས་དང་། བརྡ་དང་།
མཚན་མས་ཕྲིན་ཚུར་སྐྱེལ་བར་བྱེད་ན་དགེ་འདུན་ལྷག་མར་འགྱུར་རོ།། །།འདུལ་བ་རྣམ་པར་འབྱེད་པ། བམ་པོ་བཅོ་བརྒྱད་པ། དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་ཡིན་ལ་འཐབས་པའི་འོག་མ་ཡིན་པ་དང་། དུམ་པ་མ་བཅད་པ་དང་། རྡེའུ་གསུམ་མ་གཏོར་བ་དང་། ཆོ་ག་མ་གཏང་བ་དང་། ཆུང་མ་མ་ཡིན་པར་མ་བསྒྲགས་པ་དང་། དྲིལ་མ་བསྒྲགས་པ་དག་གི་སྡུམ་བྱེད་ཅིང་། མཐུན་པར་གྱུར་ན་ཉེས་བྱས་གཅིག་ཏུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་དེ་དག་ཉིད་འཐབས་པ་ཉིད་ཀྱི་མོད་དང་། འཐབས་པའི་འོག་ཡིན་ལ་དུམ་པ་མ་བཅད་པ་དང་། རྡེའུ་གསུམ་མ་གཏོར་བ་དང་། ཆོ་ག་མ་གཏང་བ་དང་། ཆུང་མ་མ་ཡིན་པར་མ་བསྒྲགས་པ་དང་། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གཉིས་སུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་དེ་དག་ཉིད་འཐབས་པ་ཉིད་ཀྱི་མོད་དང་། འཐབས་པའི་འོག་དང་། དུམ་པ་བཅད་པ་ཡིན་ལ། རྡེའུ་གསུམ་མ་གཏོར་བ་དང་། ཆོ་ག་མ་བཏང་བ་དང་། ཆུང་མ་མ་ཡིན་པར་མ་བསྒྲགས་པ་དང་། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང་། འཐབས་པའི་འོག་དང་། དུམ་པ་བཅད་པ་དང་། རྡེའུ་གསུམ་གཏོར་བ་ཡིན་ལ། ཆོ་ག་མ་བཏང་བ་དང་། ཆུང་མ་མ་ཡིན་པར་མ་བསྒྲགས་པ་དང་། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་། ཉེས་པ་སྦོམ་པོ་གཅིག་ཏུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང་། འཐབས་པའི་འོག་དང་། དུམ་པ་བཅད་པ་དང་། རྡེའུ་གསུམ་གཏོར་བ་དང་། ཚེ་ག་བཏང་བ་ཡིན་ལ། ཆུང་མ་མ་ཡིན་པར་མ་བསྒྲགས་པ་དང་། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་། ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང་། འཐབས་པའི་
འོག་དང་། དུམ་པ་བཅད་པ་དང་། རྡེའུ་གསུམ་གཏོར་བ་དང་། ཆོ་ག་བཏང་བ་དང་། ཆུང་མ་མ་ཡིན་པར་བསྒྲགས་པ་ཡིན་ལ། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་། ཉེས་པ་སྦོམ་པོ་གསུམ་དང་། དགེ་འདུན་ལྷག་མ་གཅིག་ཏུ་འགྱུར་རོ། །དགེ་སློང་གི་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང་། རིན་ཆས་ཉོས་པ་དང་། བཙན་ཕྲོགས་སུ་ཐོབ་པ་འཐབས་པ་ཉིད་ཀྱི་མོད་དང་། འཐབས་པའི་འོག་དང་། དུམ་པ་བཅད་པ་དང་། རྡེའུ་གསུམ་གཏོར་བ་དང་། ཆོ་ག་བཏང་བ་དང་། ཆུང་མ་མ་ཡིན་པར་བསྒྲགས་པ་དང་། དྲིལ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་། ཉེས་པ་སྦོམ་པོ་བཞི་དང་། དགེ་འདུན་ལྷག་མ་གཉིས་སུ་འགྱུར་རོ། །དགེ་སློང་གིས་ཆུང་མ་དེ་ལས་གཞན་པ་འཐབས་པ་ཉིད་ཀྱི་མོད་དང་། འཐབས་པའི་འོག་དང་། དུམ་པ་བཅད་པ་དང་། རྡེའུ་གསུམ་གཏོར་བ་དང་། ཆོ་ག་གཏང་བ་དང་། ཆུང་མ་མ་ཡིན་པར་བསྒྲགས་པ་དང་། དྲིལ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་དགེ་འདུན་ལྷག་མར་འགྱུར་རོ། །དགེ་སློང་ཁྱིམ་དུ་འགྲོ་བས་ཁྱིམ་དུ་སོང་སྟེ། འདི་སྐད་ཅེས་ཅིའི་ཕྱིར་ཁྱེའུ་ཆེན་པོ་འདིའི་ཁྱིམ་མི་དབུབ་ཅེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་བུ་མོ་ཆེན་མོ་འདི་མི་བཀྲི་ཞེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་ཁྱེའུ་འདི་དང་བུ་མོ་འདི་མི་སྤྲད་ཅེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་ཁྱེའུ་འདི་གྱོས་པོའི་གན་དུ་མི་འགྲོ་ཞེས་ཟེར་ན་ཉེས་བྱས་སུ་འགྱུར་རོ། །ཅིའི་ཕྱིར་བུ་མོ་འདི་གྱོས་པོའི་གན་དུ་མི་བཀྲི་ཞེས་ཟེར་ན་ཉེས་བྱས་སུ་འགྱུར་རོ། །དགེ་སློང་ཁྱིམ་དུ་འགྲོ་བས་དེ་ལྟར་དེ་དང་མཐུན་པའི་ཚིག་བརྗོད་ན་ཐམས་ཅད་དུ་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་
པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །སྨྱན་བྱེད་པའི་དགེ་འདུན་ལྷག་མ་སྟེ་ལྔ་པ་རྫོགས་སོ།། ། །