བཅུ་ཚན་གསུམ་པ། མ་བསྐོས་པ་ལ་སོགས་པའི་སྡེ་ཚན།
སྡོམ་ལ། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །བར་སྡོམ་ལ། དགའ་བྱེད་བསྟན་པའི་མདོ་སྡེ་དང་། །དྲུག་སྡེ་ལམ་མདོ་བྱི་རོ་དང་། །མཛོད་གསུམ་འཕགས་འཚོང་འདུ་ཤེས་མེད། །འཚོ་བྱེད་རྟ་དང་སྨོན་ལམ་མོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ། མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་མ་འཕགས་མ་ཉན་ཐོས་
ཆེན་མོ་གནས་བརྟན་མོ་གནས་བརྟན་མོ་འདི་ལྟ་བུ་འདི་དག་མཉན་ཡོད་དུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་ཏེ་འདི་ལྟ་སྟེ་སྐུལ་བྱེད་མ་དང་། མི་ནད་དང་། མ་ད་བ་དང་། པ་ཋད་ཙར་དང་། འབྲོག་གནས་དང་། བདེ་བ་དང་། ཟླ་བ་དང་། གཽ་ཏ་མཱི་སྐེམ་མོ་དང་། ཨུཏྤ་ལའི་མདོག་དང་། དགེ་སློང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱི་དང་། དེ་དག་དང་གཞན་ཡང་དགེ་སློང་མ་འཕགས་མ་ཉན་ཐོས་ཆེན་མོ་གནས་བརྟན་མོ་གནས་བརྟན་མོ་དག །མཉན་ཡོད་དུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་སོ། །དེ་ནས་སྐྱེ་དགུའི་བདག་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱིས་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་། རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ང་ནི་ད་རྒན་པོ་རྒས་པ་དགོག་ཏུ་གྱུར་པ་ཡིན་པས་འཁོར་བཞི་པོ། །དགེ་སློང་དང་། དགེ་སློང་མ་དང་། དགེ་བསྙེན་དང་།
དགེ་བསྙེན་མ་དག་ལ་སྟོན་ན་ངལ་བར་འགྱུར་གྱིས། དགེ་སློང་དག་དེ་ལྟ་བས་ན་དེང་ཕྱིན་ཆད་དགེ་སློང་གནས་བརྟན་གནས་བརྟན་རྣམས་ཀྱིས་རེས་ཀྱིས་དགེ་སློང་མ་ལ་སྟོན་ཅིག །དེའི་ཚེ་ན་དགེ་སློང་གནས་བརྟན་གནས་བརྟན་རྣམས་རེས་ཀྱིས་དགེ་སློང་མ་རྣམས་ལ་སྟོན་པར་བྱེད་དོ། །ཚེ་དང་ལྡན་པ་དགའ་བྱེད་ནི་རེས་བབ་པ་ན་དགེ་སློང་མ་རྣམས་ལ་སྟོན་པར་མི་བཏུབ་བོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱིས་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་། རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་གནས་བརྟན་གང་དག་དགེ་སློང་མ་ལ་རེས་ཀྱིས་སྟོན་པར་བྱེད། བཙུན་པ་དགེ་སློང་གནས་བརྟན་གནས་བརྟན་དག་ཕལ་ཆེར་དགེ་སློང་མ་ལ་རེས་ཀྱིས་སྟོན་པར་བགྱིད་དེ། ཚེ་དང་ལྡན་པ་དགའ་བྱེད་ནི་རེས་བབ་ཀྱང་དགེ་སློང་མ་ལ་སྟོན་པར་མི་འཚལ་ལོ། །དེའི་ཚེ་ན་ཚེ་དང་ལྡན་པ་དགའ་བྱེད་འཁོར་དེ་ཉིད་ན་འདུག་ཅིང་མཐུན་པར་གྱུར་ཏོ། །དེ་
ནས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བྱེད་ལ་བཀའ་སྩལ་པ། དགའ་བྱེད་ཁྱོད་ཀྱིས་དགེ་སློང་མ་ལ་ཐོམས་ཤིག །དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག །དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག །དེ་ཅིའི་ཕྱིར་ཞེ་ན། དགའ་བྱེད་དགེ་སློང་མ་ལ་ངའམ། ཁྱོད་ཀྱིས་གཏམས་ཀྱང་རུང་ཞིང་། དགེ་སློང་མ་ལ་ངའམ། ཁྱོད་ཀྱིས་རྗེས་སུ་བསྟན་ཀྱང་རུང་ལ། དགེ་སློང་མ་རྣམས་ལ་ངའམ། ཁྱོད་ཀྱིས་ཆོས་དང་ལྡན་པའི་གཏམ་བྱར་ཡང་རུང་བའི་ཕྱིར་རོ། །ཚེ་དང་ལྡན་པ་དགའ་བྱེད་ཀྱིས་ཅང་མི་སྨྲ་བས་བཅོམ་ལྡན་འདས་ལས་དང་དུ་བླངས་སོ། །དེ་ནས་ཚེ་དང་ལྡན་པ་དགའ་བྱེད་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་དགའ་བྱེད་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་ནས་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། ། དེ་ནས་ཚེ་དང་ལྡན་པ་དགའ་བྱེད་ཕྱེ་མ་རེད་ནང་དུ་ཡང་དག་འཇོག་ལས་ལངས་ནས་སྣམ་སྦྱར་ཐོགས་ཏེ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ་། །དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཚེ་དང་ལྡན་པ་དགའ་བྱེད་ཀྱི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་དགའ་བྱེད་ཚུར་ཤེག །བཙུན་པ་དགའ་བྱེད་བྱོན་པ་ལེགས་སོ། །བཙུན་པ་དགའ་བྱེད་གདན་བཤམས་པ་ཉིད་ལ་བཞུགས་སུ་གསོལ། ཚེ་དང་ལྡན་པ་དགའ་བྱེད་སྟན་
བཤམས་པ་ཉིད་ལ་འདུག་གོ །དེ་ནས་དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་དགའ་བྱེད་ཀྱིས་དགེ་སློང་མ་དེ་དག་ལ་འདི་སྐད་ཅེས་སྨྲས་སོ། །སྲིང་མོ་དག་ཁྱེད་ཅག་རྣམ་པར་སེལ་བ་ཡོངས་སུ་དྲིས་ཤིག་དང་། ཆོས་དང་ལྡན་པའི་གཏམ་བརྗོད་པར་བྱའོ། །དེ་ལ་ཁྱེད་ཀྱིས་ཀུན་ཤེས་པ་དག་གིས་ཀྱང་ཀུན་ཤེས་སོ་ཞེས་བརྗོད་པར་གྱིས་ཤིག །ཀུན་མི་ཤེས་པ་དག་གིས་ཀྱང་ཀུན་མི་ཤེས་སོ་ཞེས་བརྗོད་པར་གྱིས་ཤིག །གང་གིས་སྨྲས་པ་གང་གིས་དོན་ཀུན་ཤེས་པ་དེས་ནི་དེ་ཁོ་ན་བཞིན་དུ་ཟུང་ཤིག །གང་གིས་སྨྲས་པ་གང་གིས་དོན་ཀུན་མི་ཤེས་པ་དེས་ནི་བདག་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས། འདི་ཇི་ལྟ་བུ་ལགས་ཞེས་ཡོངས་སུ་དྲིས་ཤིག །བཙུན་པ་དགའ་བྱེད་གང་གི་སླད་དུ་བཙུན་པ་དགའ་བྱེད་ཀྱིས་དེ་སྐད་ཅེས་སྲིང་མོ་དག་ཁྱེད་ཅག་རྣམ་པར་སེལ་བ་དྲིས་ཤིག་དང་ཆོས་དང་ལྡན་པའི་གཏམ་བརྗོད་པར་བྱའོ། །དེ་ལ་ཁྱེད་ཀྱིས་ཀུན་ཤེས་པ་དག་གིས་ཀྱང་ཀུན་ཤེས་སོ་ཞེས་བརྗོད་པར་གྱིས་ཤིག །ཀུན་མི་ཤེས་པ་དག་གིས་ཀྱང་ཀུན་མི་ཤེས་སོ་ཞེས་བརྗོད་པར་གྱིས་ཤིག །གང་གིས་སྨྲས་པ་གང་གིས་དོན་ཀུན་ཤེས་པ་དེས་ནི་དེ་ཁོ་ན་བཞིན་དུ་ཟུང་ཤིག །གང་གིས་སྨྲས་པ་གང་གིས་དོན་ཀུན་མི་ཤེས་པ་དེས་ནི་བདག་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས་འདི་ཇི་ལྟ་བུ་ལགས་ཞེས་ཡོངས་སུ་དྲིས་ཤིག་ཅེས་བཀའ་སྩལ་པ་དེ་ཉིད་ཀྱིས་བདག་ཅག་གློ་བ་དགའ་ཞིང་རངས་པར་གྱུར་ཏོ། །བཙུན་པ་དགའ་བྱེད་ཆོས་གསུང་ཤིག་དང་བདག་ཅག་གིས་ཀུན་འཚལ་བ་དག་གིས་ཀྱང་ཀུན་འཚལ་ཏོ་ཞེས་བརྗོད་པར་བགྱིའོ། །ཀུན་མ་འཚལ་བ་དག་གིས་ཀྱང་ཀུན་མ་འཚལ་ཏོ་ཞེས་བརྗོད་པར་བགྱིའོ། །གང་གིས་སྨྲས་པ་གང་གིས་དོན་ཀུན་འཚལ་བ་དེས་ནི་དེ་ཁོ་ན་བཞིན་དུ་གཟུང་བར་བགྱིའོ། །གང་གིས་སྨྲས་པ་གང་གིས་དོན་ཀུན་མ་འཚལ་བ་དེས་ནི་བཙུན་པ་དགའ་བྱེད་ཉིད་ལ་བཙུན་པ་དགའ་བྱེད་སྨྲས་པ་འདིའི་དོན་ཅི་ལགས་
འདི་ཇི་ལྟ་བུ་ལགས་ཞེས་ཡོངས་སུ་དྲི་བར་བགྱིའོ། །སྲིང་མོ་དག་ཁྱེད་ཀྱིས་ནང་གི་སྐྱེ་མཆེད་མིག་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་ནང་གི་སྐྱེ་མཆེད་རྣ་བ་དང་། སྣ་དང་། ལྕེ་དང་། ལུས་དང་། ཡིད་དག་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག་ཅག་གིས་སེམས་ཀྱང་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་ཕྱི་རོལ་གྱི་སྐྱེ་མཆེད་གཟུགས་དག་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་ཕྱི་རོལ་གྱི་སྐྱེ་མཆེད་སྒྲ་དག་དང་། དྲི་དག་དང་། རོ་དག་དང་། རེག་བྱ་དག་དང་། ཆོས་དག་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་། བདག་ཅག་གིས་སེམས་ཀྱང་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །
སྨྲས་པ་དེའི་དོན་ནི་ཇི་ལྟར་ཕྱི་རོལ་གྱི་སྐྱེ་མཆེད་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་བའི་མིག་གི་རྣམ་པར་ཤེས་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་བའི་ཡིད་ཀྱི་རྣམ་པར་ཤེས་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་རྣམ་པར་ཤེས་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་། བདག་ཅག་གིས་སེམས་ཀྱང་ཇི་ལྟར་རྣམ་པར་ཤེས་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རྣམ་པར་ཤེས་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པའི་མིག་གི་འདུས་ཏེ་རེག་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང་། གསུམ་འདུས་པ་ལས་རེག་པའི་ཡིད་ཀྱི་འདུས་ཏེ་རེག་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །
དེ་ཅིའི་ཕྱིར་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་རེག་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག་ཅག་གིས་སེམས་ཀྱང་ཇི་ལྟར་རེག་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རེག་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་། གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བའི་མིག་གི་འདུས་ཏེ་རེག་པ་ལས་བྱུང་བའི་ཚོར་བ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང་གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བའི་ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ཚོར་བའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་བདག་ཅག་གིས་སེམས་ཀྱང་ཇི་ལྟར་ཚོར་བའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་རེག་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་ཁྱེད་ཀྱིས་མིག་དང་གཟུགས་རྣམས་ལ་བརྟེན་ནས་མིག་གི་རྣམ་པར་ཤེས་པ་སྐྱེ་ཞིང་། གསུམ་འདུས་པ་ལས་རེག་པ། རེག་
པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པའི་མིག་གི་འདུས་ཏེ་རེག་པ་ལས་བྱུང་བའི་སྲེད་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །སྲིང་མོ་དག་ཁྱེད་ཀྱིས་རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཆོས་རྣམས་ལ་བརྟེན་ཏེ་ཡིད་ཀྱི་རྣམ་པར་ཤེས་པ་སྐྱེ་ཞིང་། གསུམ་འདུས་པ་ལས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པའི་ཡིད་ཀྱི་འདུས་ཏེ་རེག་པ་ལས་བྱུང་བའི་སྲེད་པ་དེ་ལ་འདི་ནི་བདག་གིའོ། །འདི་ནི་བདག་གོ །འདི་ནི་བདག་གི་བདག་གོ་ཞེས་བྱ་བར་ཡང་དག་པར་རྗེས་སུ་མཐོང་ངམ། བཙུན་པ་དགའ་བྱེད་མ་མཐོང་ངོ་། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སྲེད་པའི་ཚོགས་དྲུག་པོ་འདི་དག་ནི་བདག་མ་མཆིས་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་། བདག་ཅག་གིས་སེམས་ཀྱང་ཇི་ལྟར་སྲེད་པའི་ཚོགས་དྲུག་པོ་འདི་དག་བདག་མ་མཆིས་པ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་སྲེད་པའི་ཚོགས་དྲུག་པོ་འདི་དག་བདག་མེད་པ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ལྟ་སྟེ་དཔེར་ན་འབྲུ་མར་དང་། མར་མེའི་སྙིང་པོ་ལ་བརྟེན་ནས་འབྲུ་མར་གྱི་མར་མེ་འབར་བར་འགྱུར་ཞིང་། འབྲུ་མར་གྱི་མར་མེ་དེའི་འབྲུ་མར་ཡང་མི་རྟག་པ་ཡིན། མར་མེའི་སྙིང་པོ་དང་། མེ་ལྕེ་དང་སྣོད་ཀྱང་མི་རྟག་པ་ཡིན་ན། སྲིང་མོ་དག་གང་འདི་སྐད་ཅེས་དེའི་འབྲུ་མར་མེད་པ་དང་མར་མེའི་སྙིང་པོ་དང་། མེ་ལྕེ་དང་། སྣོད་མེད་ན་ཡང་དེ་ལ་བརྟེན་པའི་སྣང་བ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ་ཞེས་ཟེར་ན། དེ་སྐད་ཟེར་བ་དེ་ཡང་དག་པར་སྨྲས་པ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་འབྲུ་མར་གྱི་
མར་མེ་དེའི་འབྲུ་མར་ཡང་མི་རྟག་པ་ལགས། མར་མེའི་སྙིང་པོ་དང་། མེ་ལྕེ་དང་། སྣོད་ཀྱང་མི་རྟག་པ་ལགས་ལ། དེའི་འབྲུ་མར་མ་མཆིས་ཤིང་། ཞུན་མར་གྱི་སྙིང་པོ་དང་། མེ་ལྕེ་དང་། སྣོད་མ་མཆིས་ན་དེ་ལ་བརྟེན་པའི་སྣང་བ་གང་ལགས་པ་དེ་ཐམས་ཅད་དུ་མི་འབྱུང་བའི་སླད་དུའོ། །སྲིང་མོ་དག་དེ་བཞིན་དུ་ནང་གི་སྐྱེ་མཆེད་དྲུག་པོ་མི་རྟག་པ་འདི་དག་ལ་གང་འདི་སྐད་ཅེས་ནང་གི་སྐྱེ་མཆེད་དྲུག་པོ་མི་རྟག་པ་འདི་དག་ལ་བརྟེན་ནས་བདེ་བ་དང་། ཡིད་བདེ་བ་སྐྱེད་པ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ། །ཞེས་ཟེར་ན་དེ་སྐད་ཅེས་ཟེར་བ་དེ་ཡང་དག་པར་སྨྲ་བ་ཡིན་ནམ་བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་མི་རྟག་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པ་ཇི་ལྟ་བ་བཞིན་དུ་མཐོང་ཞིང་། བདག་ཅག་གིས་སེམས་ཀྱང་ཇི་ལྟར་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང་། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང་། ཉེ་བར་ཞི་བར་འགྱུར་བ་དང་། བསིལ་བར་འགྱུར་བ་དང་། ནུབ་པར་འགྱུར་བ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨས་པ་དེའི་དོན་ནི་ཇི་ལྟར་ནང་གི་སྐྱེ་མཆེད་དྲུག་པོ་འདི་དག་མི་རྟག་ཅིང་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང་། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང་། ཉེ་བར་ཞི་བར་འགྱུར་བ་དང་། བསིལ་བར་འགྱུར་བ་དང་། ནུབ་པར་འགྱུར་བ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ལྟ་སྟེ་དཔེར་ན་ཤིང་ལྗོན་པ་ཆེན་པོ་རྩ་བ་དང་ལྡན་པ། སྡོང་པོ་དང་ལྡན་པ། སྙིང་པོ་དང་ལྡན་པ། ཡལ་ག་དང་། ལོ་མ་དང་།
མེ་ཏོག་དང་། འབྲས་བུ་དང་ལྡན་པའི་རྩ་བ་ཡང་མི་རྟག་པ་ཡིན། སྡོང་པོ་དང་། སྙིང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་ཡང་མི་རྟག་པ་ཡིན་ན་སྲིང་མོ་དག་གང་འདི་སྐད་ཅེས་དེའི་རྩ་བ་མེད་པ་དང་། སྡོང་པོ་དང་། སྙིང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་མེད་ན་ཡང་དེ་ལ་བརྟེན་པའི་གྲིབ་མ་གང་ཡིན་པ་དེ་རྟག་པ། བརྟན་པ་ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་གནས་པར་འགྱུར་རོ་ཞེས་ཟེར་ན། དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་ཞུགས་ཤིང་ལྗོན་པ་ཆེན་པོ་རྩ་བ་དང་ལྡན་པ། སྡོང་པོ་དང་ལྡན་པ། སྙིང་པོ་དང་ལྡན་པ། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་དང་ལྡན་པ། དེའི་རྩ་བ་ཡང་མི་རྟག་པ་ལགས། སྡོང་པོ་དང་། སྙིང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་ཡང་མི་རྟག་པ་ལགས་ལ། དེའི་རྩ་བ་མ་མཆིས་ཤིང་། སྡོང་པོ་དང་། སྙིང་པོ་དང་། ཡལ་ག་དང་། ལོ་མ་དང་། མེ་ཏོག་དང་། འབྲས་བུ་མ་མཆིས་ན། དེ་ལ་བརྟེན་པའི་གྲིབ་མ་གང་ལགས་པ་དེ་ཐམས་ཅད་ཀྱི་ཐམས་ཅད་དུ་མི་འབྱུང་བའི་སླད་དུའོ། །སྲིང་མོ་དག་དེ་བཞིན་དུ་ཕྱི་རོལ་གྱི་སྐྱེ་མཆེད་དྲུག་པོ་མི་རྟག་པ་འདི་དག་ལ་གང་འདི་སྐད་ཅེས་ཕྱི་རོལ་གྱི་སྐྱེ་མཆེད་དྲུག་པོ་མི་རྟག་པ་འདི་དག་ལ་བརྟེན་ནས་བདེ་བ་དང་། ཡིད་བདེ་བ་སྐྱེས་པ་གང་ཡིན་པ་དེ་རྟག་པ། བརྟན་པ། ཐེར་ཟུག་པ། རྣམ་པར་མི་འགྱུར་བའི་ཆོས་ཅན་ཡང་དག་པ་དེ་ཁོ་ན་བཞིན་དུ་གནས་པར་འགྱུར་རོ་ཞེས་ཟེར་ན་དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་བདག་ཅག་གིས་དང་པོ་ཉིད་ནས་ཇི་ལྟར་སླད་རོལ་གྱི་སྐྱེ་མཆེད་དྲུག་པོ་འདི་དག་མི་རྟག་པ་དེ་ལྟར་ཡང་དག་པའི་ཤེས་རབ་ཀྱིས་ཡང་དག་པའི་ལྟ་བ་བཞིན་དུ་མཐོང་ཞིང་། བདག་ཅག་གི་སེམས་ཀྱང་ཇི་ལྟར་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང་། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང་། ཉེ་བར་ཞི་བར་འགྱུར་བ་
དང་། བསིལ་བར་འགྱུར་བ་དང་། ནུབ་པར་འགྱུར་བ་དེ་ལྟར་དེ་ལ་མོས་པའི་སླད་དུའོ། །སྲིང་མོ་དག་ལེགས་སོ་ལེགས་སོ། །སྨྲས་པ་དེའི་དོན་ནི་ཇི་ལྟར་ཕྱི་རོལ་གྱི་སྐྱེ་མཆེད་དྲུག་པོ་འདི་དག་མི་རྟག་ཅིང་ཆོས་དེ་དང་དེ་དག་སྐྱེས་པས་ཆོས་དེ་དང་དེ་དག་སྐྱེ་བར་འགྱུར་ཞིང་། ཆོས་དེ་དང་དེ་དག་འགགས་པས་ཆོས་དེ་དང་དེ་དག་འགག་པར་འགྱུར་བ་དང་། ཉེ་བར་ཞི་བར་འགྱུར་བ་དང་། བསིལ་བར་འགྱུར་བ་དང་། ནུབ་པར་འགྱུར་བ་དེ་ཁོ་ན་བཞིན་དུ་བལྟ་བར་བྱའོ། །སྲིང་མོ་དག་འདི་ན་སྐྱེས་བུ་མཁས་པ་དག་དཔེས་སྨྲས་པའི་དོན་ཀུན་ཤེས་པར་འགྱུར་བས་དེའི་ཕྱིར་རེ་ཞིག་དཔེ་ཉོན་ཅིག །སྲིང་མོ་དག་འདི་ལྟ་སྟེ་དཔེར་ན་བ་ལང་གསོད་པའམ། བ་ལང་གསོད་པའི་སློབ་མ་མཁས་པ་ཞིག་གིས་བ་ལང་བཤའ་བའི་གྲི་རྣོན་པོས་བ་ལང་བསད་དེ་དེའི་ནང་གི་ཤའི་ཚོགས་ཀྱང་མ་ཉམས་ཕྱི་རོལ་གྱི་པགས་པའི་ཚོགས་ཀྱང་མ་ཉམས་པར། བར་གྱི་ཆུ་རྒྱུས་དང་། བར་གྱི་གློ་བ་དང་། བར་གྱི་མཆིན་པ་དང་། བར་གྱི་རྩ་རྒྱུན་གང་ཡིན་པ་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་རྡུང་བར་བྱེད། ཀུན་དུ་དམྱལ་བར་བྱེད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་བརྡུངས། ཀུན་དུ་དམྱལ་ཏེ་ཡང་བ་ལང་གི་ཀོ་བས་གཡོགས་པར་གྱུར་པ་དེ་ལ་སྲིང་མོ་དག་གང་འདི་སྐད་ཅེས་བ་ལང་ཀོ་བ་དང་ལྡན་པ་ཡིན་གྱི་བྲལ་བ་མ་ཡིན་ནོ་ཞེས་ཟེར་ན་དེ་སྐད་ཟེར་བ་དེ་ཡང་དག་པར་སྨྲ་བ་ཡིན་ནམ། བཙུན་པ་དགའ་བྱེད་མ་ལགས་སོ། །དེ་ཅིའི་སླད་དུ་ཞེ་ན། བཙུན་པ་དགའ་བྱེད་འདི་ལྟར་བ་ལང་འགུམས་པའམ། བ་ལང་འགུམས་པའི་སློབ་མ་མཁས་པས་བ་ལང་འགུམས་པའི་གྲི་རྣོན་པོས་བ་ལང་བཀུམ་སྟེ་དེའི་ནང་གི་ཤའི་ཚོགས་ཀྱང་མ་ཉམས་སླད་རོལ་གྱི་པགས་པའི་ཚོགས་ཀྱང་མ་ཉམས་པར་བར་གྱི་ཆུ་རྒྱུས་དང་། བར་གྱི་གློ་བ་དང་། བར་གྱི་མཆིན་པ་དང་། བར་གྱི་རྩ་རྒྱུན་གང་ལགས་པ་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་རྡུང་བར་བགྱིད། ཀུན་དུ་དམྱལ་བར་བགྱིད་ཅིང་དེ་དག་ཐམས་ཅད་ཀུན་དུ་བཅད། ཀུན་དུ་དྲལ་ནས་ཀུན་དུ་
བརྡུངས། ཀུན་དུ་དམྱལ་ཏེ་ཡང་བ་ལང་གི་ཀོ་བས་གཡོགས་པར་གྱུར་པ་དེ་ནི་བཙུན་པ་དགའ་བྱེད་བ་ལང་ཀོ་བ་དང་ལྡན་པ་མ་ལགས་ཀྱིས་བྲལ་བ་ལགས་པའི་སླད་དུའོ། །སྲིང་མོ་དག་དེ་ལྟར་ཇི་ཙམ་དུ་དོན་རྣམ་པར་རིག་པར་བྱ་བའི་ཕྱིར་དཔེ་དེ་བྱས་ཏེ། འདི་ལ་དོན་ནི་འདི་ཡིན་པར་བལྟ་བར་བྱ་སྟེ། སྲིང་མོ་དག་བ་ལང་ཞེས་བྱ་བ་དེ་ནི་ལུས་གཟུགས་ཅན་རགས་པ་འབྱུང་བ་ཆེན་པོ་བཞི་ལས་གྱུར་པ། ཕ་མའི་མི་གཙང་བ་མེར་མེར་པོ་ལས་བྱུང་བ། འབྲས་ཆན་དང་ཟན་དྲོན་གྱིས་ཉེ་བར་བསགས་པ། རྟག་ཏུ་བྱུག་པ་དང་། ཁྲུས་དང་། མཉེ་བ་དང་། འབྱེ་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཅན་གང་ཡིན་པའི་ཚིག་བླ་དགས་ཡིན་ནོ། །ནང་གི་ཤའི་ཚོགས་ཞེས་བྱ་བ་དེ་ནི་ནང་གི་སྐྱེ་མཆེད་དྲུག་པོ་དག་གི་ཚིག་བླ་དགས་ཡིན་ནོ། །ཕྱི་རོལ་གྱི་པགས་པའི་ཚོགས་ཞེས་བྱ་བ་དེ་ནི་ཕྱི་རོལ་གྱི་སྐྱེ་མཆེད་དྲུག་པོ་དག་གི་ཚིག་བླ་དགས་ཡིན་ནོ། །བར་གྱི་ཆུ་རྒྱུས་དང་། བར་གྱི་གློ་བ་དང་། བར་གྱི་མཆིན་པ་དང་། བར་གྱི་རྩ་རྒྱུན་ཞེས་བྱ་བ་དེ་ནི་དགའ་བའི་འདོད་ཆགས་ཀྱི་ཚིག་བླ་དགས་ཡིན་ནོ། །བ་ལང་གསོད་པའམ། བ་ལང་གསོད་པའི་སློབ་མ་མཁས་པ་ཞེས་བྱ་བ་དེ་ནི་འཕགས་པའི་ཉན་ཐོས་ཐོས་པ་དང་ལྡན་པའི་ཚིག་བླ་དགས་ཡིན་ནོ། །གྲི་ཞེས་བྱ་བ་དེ་ནི་ཤེས་རབ་ཀྱི་མཚོན་གྱི་ཚིག་བླ་དགས་ཡིན་ནོ། །སྲིང་མོ་དག་འཕགས་པའི་ཉན་ཐོས་ཐོས་པ་དང་ལྡན་པས་ཤེས་རབ་ཀྱི་མཚོན་གྱིས་ཀུན་དུ་སྦྱོར་བ་དང་། འཆིང་བ་དང་། བག་ལ་ཉལ་བ་དང་། ཉེ་བའི་ཉོན་མོངས་པ་དང་། ཀུན་ནས་དཀྲིས་པ་ཐམས་ཅད་ཀུན་དུ་གཅོད་པར་བྱེད། ཀུན་དུ་འདྲལ་བར་བྱེད། ཀུན་དུ་རྡུང་བར་བྱེད། ཀུན་དུ་དམྱལ་བར་བྱེད་དོ། །སྲིང་མོ་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། འདོད་ཆགས་སྤངས་པའི་ཕྱིར་ཆགས་པར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་ཆགས་པར་མི་འགྱུར་བ་དང་། ཞེ་སྡང་སྤངས་པའི་ཕྱིར་ཞེ་སྡང་བར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་ཞེ་སྡང་བར་མི་འགྱུར་བ་དང་།
གཏི་མུག་སྤངས་པའི་ཕྱིར་རྨོངས་པར་འགྱུར་བའི་ཆོས་རྣམས་ལ་བདག་གི་སེམས་གང་ཡིན་པ་རྨོངས་པར་མི་འགྱུར་བ་དེ་ལྟར་བསླབ་པར་བྱའོ། །སྲིང་མོ་དག་དེ་ལྟ་བས་ན་འདི་ལྟར་བསླབ་པར་བྱ་སྟེ། ཉེ་བར་ལེན་པའི་ཕུང་པོ་ལྔ་པོ་དག་ལ་འབྱུང་བ་དང་འཇིག་པར་རྗེས་སུ་ལྟ་ཞིང་གནས་པར་བྱའོ། །རེག་པའི་སྐྱེ་མཆེད་དྲུག་པོ་དག་ལ་ཀུན་འབྱུང་བ་དང་ནུབ་པར་འགྱུར་བར་རྗེས་སུ་ལྟ་ཞིང་གནས་པར་བྱའོ། །དྲན་པ་ཉེ་བར་གཞག་པ་བཞི་པོ་དག་ལ་སེམས་ཉེ་བར་བཞག་ཅིང་གནས་པར་བྱའོ། །དྲན་པ་ཉེ་བར་གཞག་པ་བཞི་པོ་དག་ལ་སེམས་ལེགས་པར་ཉེ་བར་བཞག་ཅིང་གནས་ན་བྱང་ཆུབ་ཀྱི་ཡན་ལག་བདུན་པོ་དག་ཀུན་དུ་བསྟེན་པར་བྱ། གོམས་པར་བྱ། ལན་མང་དུ་བྱའོ། །ཞེས་དེ་ལྟར་བསླབ་པར་བྱའོ། །སྲིང་མོ་དག་ཁྱེད་ཀྱིས་བྱང་ཆུབ་ཀྱི་ཡན་ལག་བདུན་པོ་དག་ཀུན་དུ་བསྟེན་པའི་རྒྱུ་དང་། གོམས་པར་བྱས་པའི་རྒྱུ་དང་། ལན་མང་དུ་བྱས་པའི་རྒྱུ་དང་ལེགས་པར་ཡིད་ལ་བྱས་པའི་རྒྱུས་འདོད་པའི་ཟག་པ་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བ་དང་། སྲིད་པའི་ཟག་པ་དང་མ་རིག་པའི་ཟག་པ་ལས་སེམས་འདོད་ཆགས་དང་བྲལ་ཞིང་རྣམ་པར་གྲོལ་བར་འགྱུར་རོ། །སྲིང་མོ་དག་ཁྱེད་ཅག་རྣམ་པར་གྲོལ་བ་དག་ལ་བདག་ཅག་སྐྱེ་བ་ནི་ཟད། ཚངས་པར་སྤྱོད་པ་ནི་སྤྱད། བྱ་བ་ནི་བྱས་སྲིད་པ་འདི་ལས་གཞན་ནི་མི་ཤེས་སོ་ཞེས་རྣམ་པར་གྲོལ་བའི་ཤེས་པ་དང་མཐོང་བ་སྐྱེ་བར་འགྱུར་གྱིས། སྲིང་མོ་དག་ཁྱེད་ཀྱིས་དེ་ལྟར་བསླབ་པར་བྱའོ། །དེ་ནས་ཚེ་དང་ལྡན་པ་དགའ་བྱེད་དགེ་སློང་མ་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག ། ཡང་དག་པར་གཟེངས་བསྟོད། ཡང་དག་པར་རབ་དུ་དགའ་བར་བྱས་ནས་སྟན་ལས་ལངས་ཏེ་སོང་ངོ་། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེ་དགུའི་བདག་མོ་ཆེན་མོ་
གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱི་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱི་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་རིགས་ཀྱི་བུ་དགའ་བྱེད་ཀྱི་དགེ་སློང་མ་ལྔ་བརྒྱ་པོ་དག་ལ་ལེགས་པར་གཏམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་མ་ཐོབ་ཀྱང་འདིའི་ཚེ་དུས་བྱེད་པར་གྱུར་ན། ངས་དེ་དག་ཀུན་དུ་སྦྱོར་བ་གང་དང་ལྡན་པས་ཡང་འཇིག་རྟེན་འདིར་འོང་བར་འགྱུར་བའི་ཀུན་དུ་སྦྱོར་བ་གཅིག་མ་སྤངས་པར་ཡང་དག་པར་རྗེས་སུ་མ་མཐོང་བ་ལ་ལྟོས། དགེ་སློང་དག་འདི་ལྟ་སྟེ་དཔེར་ན་ཟླ་བ་ཡར་གྱི་ངོ་དེ་ཉིད་ཀྱི་ཚེས་བཅུ་བཞི་ལ་བབ་པ་ན་མི་དག་ཟླ་བ་ལ་ཉའམ། ཉ་མ་ཡིན་ཞེས་གཉིས་སུ་འབྱེད་པར་བྱེད་དེ། འདི་ལྟར་ཉ་མ་ཡིན་པའི་ཕྱིར་མཐར་ཐུག་པ་ཉིད་དུ་མ་གྱུར་པ་དེ་བཞིན་དུ་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གཏམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་མ་ཐོབ་ཀྱང་འདིའི་ཚེ་དུས་བྱེད་པར་གྱུར་ན། ངས་དེ་དག་ཀུན་སྦྱོར་བ་གང་དང་ལྡན་པས་ཡང་འཇིག་རྟེན་འདིར་འོང་བར་འགྱུར་བའི་ཀུན་དུ་སྦྱོར་བ་གཅིག་མ་སྤངས་པར་ཡང་དག་པར་རྗེས་སུ་མ་མཐོང་ངོ་། །དེ་ལྟར་དེ་ནས་བཅོམ་ལྡན་འདས་ཀྱིས་དགེ་སློང་མ་ལྔ་བརྒྱ་པོ་དག་ཕྱིར་
མི་འོང་བ་ཉིད་དུ་ལུང་བསྟན་ཏོ། །དེ་ནས་བཅོམ་ལྡན་འདས་ཀྱིས་ཡང་ལན་གཉིས་སུ་ཚེ་དང་ལྡན་པ་དགའ་བྱེད་ལ་བཀའ་སྩལ་པ། དགའ་བྱེད་ཁྱོད་ཀྱིས་དགེ་སློང་མ་ལ་འདོམས་ཤིག །དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག །དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག །དེ་ཅིའི་ཕྱིར་ཞེ་ན། དགའ་བྱེད་དགེ་སློང་མ་ལ་ངའམ། ཁྱོད་ཀྱིས་གཏམས་ཀྱང་རུང་ཞིང་དགེ་སློང་མ་ལ་ངའམ། ཁྱོད་ཀྱིས་རྗེས་སུ་བསྟན་ཀྱང་རུང་ལ། དགེ་སློང་མ་རྣམས་ལ་ངའམ། ཁྱོད་ཀྱིས་ཆོས་དང་ལྡན་པའི་གཏམ་བྱར་ཡང་རུང་བའི་ཕྱིར་རོ། །ཚེ་དང་ལྡན་པ་དགའ་བྱེད་ཀྱིས་ཅང་མི་སྨྲ་བས་བཅོམ་ལྡན་འདས་ལས་དང་དུ་བླངས་སོ། །དེ་ནས་ཚེ་དང་ལྡན་པ་དགའ་བྱེད་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་དགའ་བྱེད་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེས་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ། །དེ་ནས་ཚེ་དང་ལྡན་པ་དགའ་བྱེད་ཕྱེ་མ་རེད་ནང་དུ་ཡང་དག་འཇོག་ལས་ལངས་ནས་སྣམ་སྦྱར་ཐོགས་ཏེ་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ་། །དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་ཚེ་དང་ལྡན་པ་དགའ་བྱེད་ཀྱི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་དགའ་བྱེད་ཚུར་གཤེགས། བཙུན་པ་དགའ་བྱེད་བྱོན་པ་ལེགས་སོ། །བཙུན་པ་
དགའ་བྱེད་གདན་བཤམས་པ་ཉིད་ལ་བཞུགས་སུ་གསོལ། ཚེ་དང་ལྡན་པ་དགའ་བྱེད་སྟན་བཤམས་པ་ཉིད་ལ་འདུག་གོ །དེ་ནས་དགེ་སློང་མ་དེ་དག་གིས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཚེ་དང་ལྡན་པ་དགའ་བྱེད་དགེ་སློང་མ་དེ་དག་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་འཁོར་དགེ་སློང་མ་ལྔ་བརྒྱ་དང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་སྐྱེ་དགུའི་བདག་མོ་ཆེན་མོ་གཽ་ཏ་མཱི་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་གཽ་ཏ་མཱི་ཁྱོད་ཀྱི་དུས་ཡིན་གྱིས་སོང་ཤིག་ཅེས་སྐུལ་བར་མཛད་དོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་གཽ་ཏ་མཱི་སོང་ནས་རིང་པོ་མ་ལོན་པར་ཐུགས་སུ་ཆུད་ནས་དགེ་སློང་རྣམས་ལ་བཀའ་སྩལ་པ།
དགེ་སློང་དག་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གདམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་ཐོབ་སྟེ། འདིའི་ཚེ་དུས་བྱེད་པར་གྱུར་ན་དེ་དག་གིས་ལམ་གདགས་སུ་མེད་དེ་འདི་སྡུག་བསྔལ་གྱི་མཐར་གྱུར་པ་ལ་ལྟོས། དགེ་སློང་དག་འདི་ལྟ་སྟེ་དཔེར་ན་ཟླ་བ་ཡར་གྱི་ངོ་དེ་ཉིད་ཀྱི་ཚེས་བཅྭ་ལྔ་ལ་བབ་པ་ན་མི་དག་ཟླ་བ་ཉའམ། ཉ་མ་ཡིན་ཞེས་གཉིས་སུ་འབྱེད་པར་མི་བྱེད་དེ། འདི་ལྟར་ཉ་ཡིན་པའི་ཕྱིར་མཐར་ཐུག་པ་ཉིད་དུ་གྱུར་པ་དེ་བཞིན་དུ་རིགས་ཀྱི་བུ་དགའ་བྱེད་ཀྱིས་དགེ་སློང་མ་ལྔ་བརྒྱ་པོ་དག་ལ་ལེགས་པར་གདམས་ཤིང་ལེགས་པར་རྗེས་སུ་བསྟན་ནས་རྣམ་པར་གྲོལ་ཞིང་མཐར་ཐུག་པ་ཉིད་ཐོབ་སྟེ་འདིའི་ཚེ་དུས་བྱེད་པར་གྱུར་ན་དེ་དག་གིས་ལམ་གདགས་སུ་མེད་དེ། འདི་ཉིད་སྡུག་བསྔལ་གྱི་མཐར་གྱུར་པ་ཡིན་ནོ། །དེ་ལྟར་དེ་ན་བཅོམ་ལྡན་འདས་ཀྱིས་དགེ་སློང་མ་ལྔ་བརྒྱ་པོ་དག་མཆོག་ཉིད་དུ་ལུང་བསྟན་ཏོ། །འདི་ནི་རེ་ཞིག་བྱུང་བ་ཡིན་ཏེ། སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མི་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གནས་བརྟན་གནས་བརྟན་དག་གི་རེས་ཀྱིས་དགེ་སློང་མ་ལ་བསྟན་པར་བྱའོ། །ཞེས་བཀའ་སྩལ་ནས། དགེ་སློང་དྲུག་སྡེ་དག་ལ་དགེ་སློང་མ་སྟོན་པའི་རེས་བབ་པ་ན་དེ་དག་ཇི་ཙམ་པ་དེ་ཙམ་བསྟན་ནས། དེ་དག་དང་ལྷན་ཅིག་མཐོ་འཚམ་པར་བྱེད། ཀུན་དུ་རྩེ་བར་བྱེད། ཀུན་དུ་ཅ་ཅོ་འདོན་པར་བྱེད། གཞོགས་སྟེགས་དང་། ཕྱར་གཡེང་དང་། ལུས་སྒྱུར་བར་བྱེད་དེ། དེ་ན་གང་དག་བདག་གིར་བྱེད་པ་དེ་དག་ནི་དེ་དག་དང་ལྷན་ཅིག་མཐོ་འཚམ་པར་བྱེད། ཀུན་དུ་རྩེ་བར་བྱེད། ཀུན་དུ་ཅ་ཅོ་འདོན་པར་བྱེད། གཞོགས་སྟེགས་དང་། ཕྱར་གཡེང་དང་། ལུས་སྒྱུར་བར་བྱེད་དོ། །གང་དག་བདག་གིར་མི་བྱེད་པ་དེ་དག་ནི་འཆག་ས་དག་དང་། དག་ར་དག་དང་སྒོ་ཁང་
དག་ན་གནས་ངན་ལེན་ཀུན་དུ་སྤྱོད་པ་འདི་ལྟ་བུ་དག་བདག་ཅག་ལ་ཀུན་དུ་སྟོན་པར་བྱེད་དོ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དྲུག་སྡེ་དག་དགེ་སློང་མའི་སྟོན་པར་བསྐོ་བར་མི་བྱའོ། །དེ་ལྟར་བཅོམ་ལྡན་འདས་ཀྱིས་དྲུག་སྡེ་དག་དགེ་སློང་མའི་སྟོན་པར་བསྐོ་བར་མི་བྱའོ་ཞེས་བཀའ་སྩལ་ནས། དེ་དག་གཅིག་གིས་གཅིག་བསྐོས་ཏེ་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མ་བསྐོས་པར་དགེ་སློང་མ་ལ་བསྟན་པར་མི་བྱའོ། །དེ་དག་གིས་མཚམས་ཀྱི་ཕྱི་རོལ་དུ་དོང་སྟེ་གཅིག་གིས་གཅིག་བསྐོས་ནས་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ཕྱི་རོལ་དུ་བསྐོས་པས་དགེ་སློང་མ་ལ་བསྟན་པར་མི་བྱའོ། །དེ་དག་གིས་མཚམས་ཀྱི་ནང་དུ་དགེ་སློང་ནད་པ་རྣམས་ཀྱི་འདུན་པ་བླངས་ཏེ་ལྷག་མ་རྣམས་བྲེལ་བར་བྱས་ནས་གཅིག་གིས་གཅིག་བསྐོས་ཏེ་དགེ་སློང་མ་ལ་སྟོན་པར་བྱེད་པ་ན་ཉེས་དམིགས་དེ་ཉིད་དུ་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མཚམས་ཀྱི་ནང་དུ་དགེ་སློང་ནད་པ་རྣམས་ཀྱི་འདུན་པ་བླངས་ཏེ་ལྷག་མ་རྣམས་བྲེལ་བར་བྱེད་ནས་གཅིག་གིས་གཅིག་བསྐོས་ཏེ་དགེ་སློང་མ་ལ་བསྟན་པར་མི་བྱ་བར་འདི་ལྟར་གསོ་སྦྱོང་བཅྭ་ལྔ་པ་དེ་ཉིད་ཀྱི་ཚེ་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་དགེ་སློང་མའི་སྟོན་པ་བསྐོ་བར་བྱའོ། །འདི་ལྟར་བསྐོ་བར་བྱ་སྟེ། ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་སློང་མའི་སྟོན་པར་སྤྲོའམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་མའི་སྟོན་པར་སྤྲོ་ན། གལ་ཏེ་དགེ་
འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ཏེ་དགེ་སློང་མིང་འདི་ཞེས་བགྱི་བ་འདི་དགེ་སློང་མ་ལ་སྟོན་ཏོ། །འདི་ནི་གསོལ་བའོ། །ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་སློང་མའི་སྟོན་པར་སྤྲོ་ནས་དེའི་སླད་དུ་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ཏེ། དགེ་སློང་མིང་འདི་ཞེས་བགྱི་བ་འདི་དགེ་སློང་མ་ལ་སྟོན་ན། ཚེ་དང་ལྡན་པ་གང་དག་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་སློང་མའི་སྟོན་པར་བསྐོས་ལགས་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །བཅོམ་ལྡན་འདས་ཀྱིས་དགེ་སློང་མའི་སྟོན་པ་བསྐོ་བར་བྱའོ། །ཞེས་བཀའ་སྩལ་ནས་དེ་དག་བུས་པ་ཡང་རུང་རྨོངས་པ་ཡང་རུང་། མི་གསལ་བ་ཡང་རུང་། མི་མཁས་པ་ཡང་རུང་སྟེ་བྱེ་བྲག་མེད་པར་སྐོ་བར་བྱེད་ནས་དེ་དག་རེ་ཞིག་བདག་ཉིད་མ་དུལ་བས་གཞན་འདུལ་བར་འགྱུར་བ་དེ་ནི་གནས་མེད་པ་དང་། བདག་ཉིད་མ་ཞི་བས་གཞན་ཞི་བར་བྱེད་པ་དེ་ནི་གནས་མེད་པ་དང་། བདག་ཉིད་འདམ་ལས་མ་རྒལ་བས་གཞན་འདམ་ལས་སྒྲོལ་བར་བྱེད་པ་དེ་ནི་གནས་མེད་པ་དང་། དེ་དག་རེ་ཞིག་བདག་ཉིད་ཡོངས་སུ་མྱ་ངན་ལས་མ་འདས་པས་གཞན་ཡོངས་སུ་མྱ་ངན་ལས་འདས་པར་བྱེད་པ་དེ་ཡང་གནས་མེད་པས་བཅོམ་ལྡན་འདས་ཀྱིས་བཀའ་སྩལ་པ། ཆོས་ལྔ་དང་ལྡན་པ་དགེ་སློང་མའི་སྟོན་པར་བསྐོ་བར་བྱ་སྟེ། ལྔ་གང་ཞེ་ན། ཚུལ་ཁྲིམས་དང་ལྡན་པ་དང་། མང་དུ་ཐོས་པ་དང་། གནས་བརྟན་རྒྱལ་ཚབ་ལྟ་བུ་དང་། གྲོང་ཁྱེར་པའི་སྐད་དང་ལྡན་པ་དང་། དེར་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང་། གལ་ཏེ་སུན་ཕྱུང་ན་ཡང་
དེས་ལྟུང་བ་དེ་ཆོས་བཞིན་དུ་ཕྱིར་བྱས་པའོ། །ཇི་ལྟར་ཚུལ་ཁྲིམས་དང་ལྡན་པ་ཡིན་ཞེ་ན། ཕམ་པར་འགྱུར་བ་བཞི་པོ་དག་ལས་གང་ཡང་རུང་བའི་ལྟུང་བ་མ་བྱུང་བ་སྟེ། དེ་ལྟར་ཚུལ་ཁྲིམས་དང་ལྡན་པ་ཡིན་ནོ། །ཇི་ལྟར་མང་དུ་ཐོས་པ་ཡིན་ཞེ་ན། དེས་སོ་སོར་ཐར་པའི་མདོ་གདོན་པ་རྒྱ་ཆེར་ཐོན་པ་དང་། ལོབས་པ་སྟེ་དེ་ལྟར་མང་དུ་ཐོས་པ་ཡིན་ནོ། །ཇི་ལྟར་གནས་བརྟན་རྒྱལ་ཚབ་ལྟ་བུ་ཡིན་ཞེ་ན། རྫོགས་པར་བསྙེན་ནས་ལོ་ཉི་ཤུའམ་ལྷག་པ་སྟེ་དེ་ལྟར་གནས་བརྟན་རྒྱལ་ཚབ་ལྟ་བུ་ཡིན་ནོ། །ཇི་ལྟར་གྲོང་ཁྱེར་པའི་སྐད་དང་ལྡན་པ་ཡིན་ཞེ་ན། ཕོ་བྲང་འཁོར་ནི་གྲོང་ཁྱེར་ཞེས་བྱ་སྟེ། དེའི་སྐད་དང་ལྡན་པ་སྟེ་དེ་ལྟར་གྲོང་ཁྱེར་པའི་སྐད་དང་ལྡན་པ་ཡིན་ནོ། །ཇི་ལྟར་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་བ་ཡིན་ཞེ་ན། དེས་དགེ་སློང་མའི་ལུས་ལ་ལུས་ཉེ་བར་གཞོལ་བ་མ་བྱས་པ་སྟེ། དེ་ལྟར་ན་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་བ་ཡིན་ཏེ། ཆོས་ལྔ་པོ་དེ་དག་དང་ལྡན་པ་དགེ་སློང་མའི་སྟོན་པར་བསྐོ་བར་བྱའོ། །བཅོམ་ལྡན་འདས་ཀྱིས་ཆོས་ལྔ་དང་ལྡན་པ་དགེ་སློང་མའི་སྟོན་པར་བསྐོ་བར་བྱའོ་ཞེས་བཀའ་སྩལ་ནས། དགེ་སློང་དྲུག་སྡེ་དག་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་ནས། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་ བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། །སངས་རྒྱས་བཅོམ་ལྡན་འདས་ཀྱིས་དགེ་སློང་དྲུག་སྡེ་དག་ལ་རྨས་པ། དགེ་སློང་དག་ངས་མ་བསྐོས་པར་དགེ་སློང་མ་ལ་བསྟན་པར་མི་བྱའོ་ཞེས་གསུངས་ན། ཁྱེད་མ་བསྐོས་པ་ཁོ་ནར་དགེ་སློང་མ་ལ་སྟོན་པར་བྱེད་པ་བདེན་
ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ། ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་སྟོན་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེའི་བུ་བཙས་སོ་ཅོག་དུས་བྱེད་ནས་དུས་ཞིག་ན་དེའི་ཆུང་མ་ལ་སེམས་ཅན་ཞུགས་པར་གྱུར་ནས། དེ་ནས་བྲམ་ཟེ་དེ་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་པ་དང་། དེ་དང་ཧ་ཅང་ཐག་མི་རིང་བ་ན་བུད་མེད་རྒན་མོ་ཞིག་འདུག་པ་དེས་དེ་མཐོང་ནས་དེས་སྨྲས་པ། བྲམ་ཟེ་ཅིའི་སླད་དུ་ཁྱོད་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་བཞུགས། བྲམ་ཟེས་སྨྲས་པ། ཁོ་བོའི་བུ་བཙས་སོ་ཅོག་དུས་བྱེད་དེ། དེ་ཡང་ཁོ་བོའི་ཆུང་མ་ལ་སེམས་ཅན་ཞུགས་པར་གྱུར་པས་བུ་གཞན་བཙའ་བར་འགྱུར་བ་གང་ཡིན་པ་དེ་ཡང་དུས་བྱེད་པར་འགྱུར་བས་མྱ་ངན་མང་པོ་བྱིན་ཏེ་འགྲོ་བར་འགྱུར་རོ། །རྒན་མོས་སྨྲས་པ། གང་གི་ཚེ་ཁྱོད་ཀྱི་བཙུན་མོ་བཙའ་བར་འགྱུར་བ་དེའི་ཚེ་ན་ཁོ་མོ་སྦྲོན་ཅིག །དེ་ནས་དུས་གཞན་ཞིག་ན་དེའི་ཆུང་མ་བཙའ་བའི་དུས་ལ་བབ་ནས།
བྲམ་ཟེ་དེས་བུད་མེད་རྒན་མོ་དེ་བོས་ནས་དེ་ཡང་འོངས་སོ། །ཇི་ཙམ་ན་བཙས་པ་དང་དེ་ལས་ཁྱེའུ་ཞིག་བྱུང་ནས་བུད་མེད་རྒན་མོ་དེས་ཁྱེའུ་དེ་ཁྲུས་བྱས་ཏེ་རས་དཀར་པོས་དཀྲིས་ནས། དེའི་ཁ་ཞུན་མར་གྱིས་བཀང་སྟེ་བུ་མོ་ཞིག་གི་ལག་དུ་བྱིན་ནས། དེས་བུ་མོ་ལ་སྨྲས་པ། བུ་མོ་ཁྱེའུ་འདི་ལམ་པོ་ཆེའི་བཞི་མདོར་ཟུང་ལ་གལ་ཏེ་དགེ་སྦྱོང་ངམ། བྲམ་ཟེ་འགའ་སྣང་ན་དེ་ལ་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚོལ་ལ། དེ་ལ་འདི་སྐད་ཅེས། ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ་ཞེས་གྱིས་ཤིག། ཉི་མ་ནུབ་པ་ན་གལ་ཏེ་གསོན་ན་ཁྱེར་ཏེ་ཤོག་ཤིག །གལ་ཏེ་དུས་བྱེད་ན་དེ་ཉིད་དུ་འོར་ཅིག །བུ་མོ་དེ་གྲིམས་པ། སྒྲུབ་ཕོད་པ་ཡིན་པས་དེས་ཁྱེའུ་དེ་ཁྱེར་ནས་ལམ་པོ་ཆེའི་བཞི་མདོར་སོང་སྟེ་འདུག་གོ །མུ་སྟེགས་ཅན་དག་གི་ཀུན་དུ་སྤྱོད་པ་ནི་ནང་པར་སྔར་ལངས་ཏེ། ཆུ་ངོགས་སུ་རེག་པའི་ཕྱིར་འགྲོ་བ་ཡིན་པས་མུ་སྟེགས་ཅན་ཆུ་ངོགས་སུ་རེག་པའི་ཕྱིར་འདོང་བ་དག་དེར་ལྷགས་ནས། བུ་མོ་དེས་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚལ་ཏེ། སྨྲས་པ། འཕགས་པ་དག་ཁྱེའུ་འདི། འཕགས་པ་དག་གི་ཞབས་ལ་ཕྱག་འཚལ་ལོ། །དེ་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག །ཚེ་རིང་དུ་སྐྱོང་བར་གྱུར་ཅིག །ཕ་མ་གཉིས་ཀྱི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག །དགེ་སློང་གནས་བརྟན་གནས་བརྟན་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་། བུ་མོ་དེས་རྗེ་ས་དང་བཅས། གུས་པ་དང་བཅས་པས་གནས་བརྟན་གནས་བརྟན་དག་གི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ། །གནས་བརྟན་གནས་བརྟན་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག །ཚེ་རིང་དུ་སྐྱོང་བར་གྱུར་ཅིག །ཕ་མ་གཉིས་ཀྱི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག། བུ་མོ་དེས་ཁྱེའུ་དེ་རྒྱལ་བྱེད་ཀྱི་ཚལ་གྱི་ལམ་ཀར་ཁྱེར་བ་དང་།
བཅོམ་ལྡན་འདས་ཀྱང་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་མཉན་ཡོད་དུ་བསོད་སྙོམས་ལ་གཤེགས་ནས་བུ་མོ་དེས་རྒྱ་ཆེར་རྗེ་ས་དང་བཅས། གུས་པ་དང་བཅས་པས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་གསོལ་པ། བཅོམ་ལྡན་འདས་ཁྱེའུ་འདི་བཅོམ་ལྡན་འདས་ཀྱི་ཞབས་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཡུན་རིང་དུ་འཚོ་བར་གྱུར་ཅིག །ཚེ་རིང་དུ་སྐྱོང་བར་གྱུར་ཅིག །ཕ་མ་གཉིས་ཀྱི་ཆོས་དང་ལྡན་པའི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག །བུ་མོ་དེས་ཉི་མ་ནུབ་ཁར་བལྟས་ན་དེ་གསོན་པར་མཐོང་ནས་དེས་དེ་ཁྱེར་ཏེ་ཁྱིམ་དུ་འོངས་པ་དང་། དེ་དག་གིས་བུ་མོ་དེ་ལ་དྲིས་པ། ཁྱེའུ་གསོན་ནམ། བུ་མོས་སྨྲས་པ། གསོན་ནོ། །དེ་དག་གིས་སྨྲས་པ། ཁྱོད་ཀྱིས་གང་དུ་བཟུང་། ལམ་པོ་ཆེ་ག་གེ་མོ་ཞིག་ཏུའོ། །དེ་དག་གིས་སྨྲས་པ། ཁྱེའུའི་མིང་ཅིར་གདགས། ཁྱེའུ་འདི་ལམ་པོ་ཆེར་བཟུང་བས་འདིའི་མིང་ལམ་ཆེན་པོ་ཞེས་གདགས་སོ་ཞེས་དེའི་མིང་ལམ་ཆེན་པ་ཞེས་བཏགས་སོ། །ཁྱེའུ་ལམ་ཆེན་པ་དེ་བསྲིངས་བསྐྱེད་དེ་ཆེན་པོར་གྱུར་ཏོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་དང་། གྲངས་དང་། རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་དང་། འབྱེད་པ་དང་། ཀློག་པའི་ཕ་རོལ་དུ་སོན་ཅིང་། དེའི་ཚེ་ན་བྲམ་ཟེའི་སྤྱོད་ཚུལ་དང་། སྤྱོད་པ་དང་། གཙང་སྦྲ་དང་། ཀུན་དུ་སྤྱོད་པ་དང་ཐལ་བ་བླང་བ་དང་། བྱ་མ་བུམ་བླང་བ་དང་། ས་བླང་བ་དང་། ལག་སྟངས་དང་། ཐོར་ཚུགས་དང་། རབ་བསྔགས་བྱ་བ་དང་། ཀྱེ་ཞེས་བྱ་བ་དང་། ངེས་བརྗོད་ཀྱི་རིག་བྱེད་དང་། མཆོད་སྦྱིན་གྱི་རིག་བྱེད་དང་། སྙན་ཚིག་གི་རིག་བྱེད་དང་། སྲིད་སྲུང་གི་རིག་བྱེད་དང་། བྲམ་ཟེའི་ལས་དྲུག་པོ་མཆོད་སྦྱིན་བྱེད་པ་དང་། མཆོད་སྦྱིན་བྱེད་དུ་འཇུད་པ་དང་། ཀློག་པ་དང་། ཀློག་ཏུ་འཇུད་པ་དང་། སྦྱིན་པ་དང་། ལེན་པ་ལ་མཁས་པའི་བྲམ་ཟེ་རིག་བྱེད་དང་། རིག་བྱེད་ཀྱི་ཡན་ལག་གི་ཕ་
རོལ་དུ་སོན་པ་ཤེས་པས་རང་གི་སྨྲ་བ་གསལ་བར་བྱེད་པ། གཞན་གྱི་སྨྲ་བ་ཚར་གཅོད་ནུས་པར་གྱུར་ཏོ། །དེའི་ཚེ་ན་བྲམ་ཟེ་ལམ་ཆེན་པ་དེས་བྲམ་ཟེའི་ཁྱེའུ་ལྔ་བརྒྱ་ཙམ་དག་བྲམ་ཟེའི་གསང་ཚིག་དག་འདོན་དུ་བཅུག་གོ །ཇི་ཙམ་དུས་གཞན་ཞིག་ན་ཡང་བྲམ་ཟེ་དེ་ཆུང་མ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ནས་དེ་བཙའ་བའི་དུས་ལ་བབ་པའི་ཚེ་བྲམ་ཟེ་དེས་བུད་མེད་རྒན་མོ་དེ་བོས་ཏེ་དེ་ཡང་འོངས་སོ། །ཇི་ཙམ་ན་བཙས་པ་དང་། དེ་ལས་ཁྱེའུ་ཞིག་བྱུང་ནས་བུད་མེད་རྒན་མོ་དེས་ཁྱེའུ་དེ་ཁྲུས་བྱས་ཏེ་རས་དཀར་པོས་དཀྲིས་ནས་དེའི་ཁ་ཞུན་མར་གྱིས་བཀང་སྟེ། བུ་མོ་ཞིག་གི་ལག་ཏུ་བྱིན་ནས་དེས་བུ་མོ་དེ་ལ་སྨྲས་པ་བུ་མོ་ཁྱེའུ་འདི་ལམ་པོ་ཆེའི་བཞི་མདོར་ཟུང་ལ་གལ་ཏེ་དགེ་སྦྱོང་ངམ། བྲམ་ཟེ་འགའ་སྣང་ན་དེ་ལ་རྗེ་ས་དང་བཅས། གུས་པ་དང་བཅས་པས་རྐང་པ་ལ་ཕྱག་འཚོལ་ལ། དེ་ལ་འདི་སྐད་ཅེས་ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ་ཞེས་གྱིས་ཤིག །ཉི་མ་ནུབ་པ་ན་གལ་ཏེ་གསོན་ན་ཁྱེར་ཏེ་ཤོག་ཤིག །གལ་ཏེ་དུས་བྱེད་ན་དེ་ཉིད་དུ་འོར་ཅིག །བུ་མོ་དེ་བླུན་མོ་ལེ་ལོ་ཅན་ཡིན་པས་དེས་ཁྱེའུ་དེ་ཁྱེར་ནས་ལམ་ཕྲན་དུ་སོང་སྟེ་འདུག་གོ །མུ་སྟེགས་ཅན་དག་གི་ཀུན་དུ་སྤྱོད་པ་ནི་ནང་པར་སྔར་ལངས་ཏེ། ཆུ་ངོགས་སུ་རེག་པའི་ཕྱིར་འགྲོ་བ་ཡིན་པས་མུ་སྟེགས་ཅན་ཆུ་ངོགས་སུ་རེག་པའི་ཕྱིར་འདོང་བ་དག་དེར་ལྷགས་ནས་བུ་མོ་དེས་རྗེ་ས་དང་བཅས་གུས་པ་དང་བཅས་པས་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་དག་ཁྱེའུ་འདི་འཕགས་པ་དག་གི་ཞབས་ལ་ཕྱག་འཚལ་ལོ། །དེ་དག་གིས་སྨྲས་པ། ཡུན་རིང་དུ་འཚོ་བར་གྱུར་ཅིག །ཚེ་རིང་དུ་སྐྱོང་བར་གྱུར་ཅིག །ཕ་མ་གཉིས་ཀྱི་ཡིད་ལ་བསམ་པ་ཡོངས་སུ་རྫོགས་པར་གྱུར་ཅིག །བུ་མོ་དེས་ཉི་མ་ནུབ་ཁར་བལྟས་ན་དེ་གསོན་པ་མཐོང་ནས་དེས་དེ་ཁྱེར་ཏེ་ཁྱིམ་དུ་འོངས་པ་དང་། དེ་དག་གིས་བུ་མོ་དེ་ལ་དྲིས་པ། ཁྱེའུ་གསོན་ནམ། བུ་མོས་སྨྲས་པ། གསོན་ནོ། །དེ་དག་གིས་སྨྲས་པ། ཁྱོད་ཀྱིས་གང་དུ་བཟུང་། ལམ་ཕྲན་
ག་གེ་མོ་ཞིག་ཏུའོ། །དེ་དག་གིས་སྨྲས་པ། ཁྱེའུའི་མིང་ཅིར་གདགས། ཁྱེའུ་འདི་ལམ་ཕྲན་དུ་བཟུང་བས་འདིའི་མིང་ལམ་ཕྲན་པ་ཞེས་གདགས་སོ་ཞེས་དེའི་མིང་ལམ་ཕྲན་པ་ཞེས་བཏགས་སོ། །ཁྱེའུ་ལམ་ཕྲན་པ་དེ་བསྲིངས་བསྐྱེད་དེ་ཆེན་པོར་གྱུར་ཏོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ན་ཡི་གེ་ལ་བཅུག་ན་དེས་སིད་ཅེས་བརྗོད་ན་བརྗེད་པར་བྱེད་ལ། ཞེས་བརྗོད་ན་སིད་བརྗེད་པར་བྱེད་ནས། དེའི་སློབ་དཔོན་དེས་བྲམ་ཟེ་ལ་སྨྲས་པ། བྲམ་ཟེ་ཁོ་བོས་བྲམ་ཟེའི་ཁྱེའུ་མང་པོ་གཞན་དག་ཀྱང་ཀློག་ཏུ་གཞུག་དགོས་པས་ཁོ་བོ་ལམ་ཕྲན་པ་ཀློག་ཏུ་འཇུད་མི་ནུས་སོ། །ལམ་ཆེན་པ་ནི་ཉུང་ངུ་བརྗོད་པས་མང་པོ་འཛིན་པར་ནུས་ན་ལམ་ཕྲན་པ་འདི་ནི་སིད་ཅེས་བརྗོད་ན་བརྗེད་པར་བྱེད་ལ། ་བརྗོད་ན་སིད་བརྗེད་པར་བྱེད་དོ། །བྲམ་ཟེས་བསམས་པ། བྲམ་ཟེ་ཐམས་ཅད་ཡི་གེ་དང་འབྲུ་ལ་མཁས་པ་མ་ཡིན་ཏེ། འདི་རིག་བྱེད་ཀྱི་བྲམ་ཟེར་འགྱུར་རོ་སྙམ་ནས་དེས་ཀློག་མཁན་ལ་རིག་བྱེད་ཀློག་པར་ཕུལ་བ་དང་། དེས་ༀ་བརྗོད་ན་བྷུ་བརྗེད་པར་བྱེད་ལ། བྷུ་ཞེས་བརྗོད་ན་ༀ་བརྗེད་པར་བྱེད་ནས་ཀློག་མཁན་གྱིས་བྲམ་ཟེ་ལ་སྨྲས་པ། བྲམ་ཟེ་ཁོ་བོས་བྲམ་ཟེའི་ཁྱེའུ་མང་པོ་གཞན་དག་ཀྱང་ཀློག་ཏུ་གཞུག་དགོས་པས་ཁོ་བོ་ལམ་ཕྲན་པ་ཀློག་ཏུ་འཇུད་མི་ནུས་སོ། །ལམ་ཆེན་པ་ནི་ཉུང་ངུ་བརྗོད་པས་མང་པོ་འཛིན་པར་ནུས་ན། ལམ་ཕྲན་པ་འདི་ནི་ༀ་ཞེས་བརྗོད་ན་བྷུ་བརྗེད་པར་བྱེད་ལ། བྷུ་ཞེས་བརྗོད་ན་ༀ་བརྗེད་པར་བྱེད་དོ། །བྲམ་ཟེས་བསམས་པ། བྲམ་ཟེ་ཐམས་ཅད་རིག་བྱེད་ཀློག་པ་མ་ཡིན་ཏེ། མཁས་ཀྱང་རུང་མི་མཁས་ཀྱང་རུང་། གཙང་ཡང་རུང་མི་གཙང་ཡང་རུང་སྟེ། བྲམ་ཟེ་གང་ཡིན་པ་དེ་ཉིད་ལྷ་ཡིན་པས་འདི་ནི་རིགས་བྲམ་ཟེ་ཁོ་ནར་འགྱུར་སྙམ་མོ། །དེ་བུལ་བ་མཆོག་ཏུ་བུལ་བ་ཆུང་བ་མཆོག་ཏུ་ཆུང་བ་ཡིན་པས་དེའི་མིང་ལམ་ཆུང་བ་ལམ་ཆུང་བ་ཞེས་བྱ་བར་གྱུར་ཏོ། །བྲམ་ཟེ་དེ་གང་དུ་ཅུང་ཟད་ཅི་ལ་མགྲོན་དུ་བོས་པར་ལམ་ཆུང་བ་དེ་ཁྲིད་དེ་འགྲོའོ། །དུས་གཞན་ཞིག་ན་བྲམ་ཟེ་དེ་ན་བར་གྱུར་ནས་དེ་རྩ་བ་དང་། སྡོང་བུ་དང་། འདབ་མ་དང་མེ་ཏོག་
དང་། འབྲས་བུའི་སྨན་དག་གིས་བསྙེན་བཀུར་བྱས་ཀྱང་ཉམས་པ་ཉིད་དུ་གྱུར་ནས་དེ་ལམ་ཆེན་པ་བོས་ཏེ་སྨྲས་པ་བུ་ཁོ་བོ་འདས་ནས་ཁྱོད་ནི་མྱ་ངན་བྱ་མི་དགོས་ཀྱིས་ཁྱོད་ཀྱི་ནུ་བོ་ལམ་ཆུང་བ་འདི་ལ་ཁྱོད་ཀྱིས་མཁོ་བ་བསྟབས་པར་གྱིས་ཤིག་ཅེས་སྨྲས་ནས། བསགས་པ་ཀུན་གྱི་མཐའ་ཟད་ཅིང་། །མཐོན་པོ་རྣམས་ནི་མཐའ་ལྟུང་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པོའི་མཐའ་ནི་འཆི་བ་ཡིན། །ཞེས་བྱ་བ་ཡིན་པས། དེ་དུས་ཀྱི་ཆོས་དང་ལྡན་པར་གྱུར་ཏོ། །དེ་གཉིས་ཀྱིས་གོས་སྔོན་པོ་དང་། སེར་པོ་དང་དམར་པོ་དང་། དཀར་པོ་དག་གིས་ཁྱོགས་སྤྱིལ་བརྒྱན་ཏེ་དུར་ཁྲོད་དུ་བསྐྱལ་ནས་བསྲེགས་ཏེ། དེའི་འོག་ཏུ་མྱ་ངན་བསང་བ་བྱས་ཏེ་འཁོད་དོ།། །།འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་བདུན་པ། བྲམ་ཟེ་ལམ་ཆེན་པ་དེ་མཉན་ཡོད་དང་། རྒྱལ་བྱེད་ཀྱི་ཚལ་གྱི་བར་ན་གནས་ཀྱི་ཤིང་ལྗོན་པ་ཞིག་ཡོད་པ་དེའི་དྲུང་ན་བྲམ་ཟེའི་ཁྱེའུ་ལྔ་བརྒྱ་ཙམ་བྲམ་ཟེའི་གསང་ཚིག་ཀློག་ཏུ་འཇུད་ཅིང་འདུག་གོ །ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་གཉིས་ཀྱིས་འདུལ་བའི་བྱ་བ་བྱས་ནས་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ཏོ། །མཉན་ཡོད་ན་སྐྱེ་བོ་ཕལ་པོ་ཆེའི་ཚོགས་ཀྱིས་འཕགས་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་བ་ན་མཉན་ཡོད་དུ་ཕྱིན་ཏོ་ཞེས་ཐོས་སོ། །ཐོས་ནས་ཀྱང་སྲོག་ཆགས་བརྒྱ་ཕྲག་དུ་མ་དག་ཕྱིར་འབྱུང་བར་བརྩམས་པ་དང་། ལམ་ཆེན་པས་དེ་དག་ཕྱིར་འབྱུང་བར་མཐོང་ནས་སྨྲས་པ། ཤེས་ལྡན་དག་གར་འདོང་། དེ་དག་གིས་སྨྲས་པ། འཕགས་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀོ་ས་ལ་དག་ཏུ་ལྗོངས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ཏེ་དེ་གཉིས་ལྟར་འདོང་ངོ་། །ལམ་ཆེན་པས་སྨྲས་པ། དེ་གཉིས་ནི་རིགས་མཆོག་སྤངས་ཏེ་རིགས་གཉིས་པ་དགེ་སྦྱོང་གཽ་ཏ་མའི་གན་དུ་རབ་ཏུ་བྱུང་བ་ཡིན་པས་དེ་གཉིས་མཐོང་བས་ཅི་བྱ། དེ་ན་བྲམ་ཟེའི་ཁྱེའུ་དད་པ་ཅན་ཞིག་འདུག་པ་དེས་སྨྲས་
པ། མཁན་པོ་དེ་སྐད་མ་གསུང་ཤིག །དེ་གཉིས་ནི་བདག་ཉིད་ཆེན་པོ་ལགས་པས་གལ་ཏེ་མཁན་པོས་དེ་གཉིས་ལས་ཆོས་གསན་པར་གྱུར་ན་མཁན་པོའི་ཐུགས་མངོན་པར་དད་པར་འགྱུར་བ་གང་ལགས་པ་དེ་ལྟ་བུའི་གནས་མཆིས་སོ། །ལམ་ཆེན་པས་བསམས་པ། བརྟག་པར་བྱས། རེ་ཞིག་གང་གི་ཚེ་བྲམ་ཟེའི་ཁྱེའུ་དག་མི་ཀློག་པར་འགྱུར་བ་དེའི་ཚེ་བདག་ཀྱང་འགྲོ་བར་བྱའོ་སྙམ་མོ། །བྲམ་ཟེའི་ཁྱེའུ་དེ་དག་གི་ཀུན་དུ་སྤྱོད་པ་ནི་གང་གི་ཚེ་མི་ཀློག་པ་དེའི་ཚེ་ན་ལན་འགའ་ནི་གྲོང་ཁྱེར་ལྟར་འདོང་བར་བྱེད། ལན་འགའ་ནི་ཡམ་སྲེག་ཤིང་ཐུར་འདོང་བར་བྱེད་པས་དུས་གཞན་ཞིག་ན་དེ་དག་མི་ཀློག་པར་གྱུར་ནས་དེ་དག་ཡམ་སྲེག་ཤིང་ཐུར་དོང་བ་དང་། ལམ་ཆེན་པ་དེ་ཡང་རྒྱལ་བྱེད་ཀྱི་ཚལ་ག་ལ་བ་དེར་སོང་ངོ་། །དགེ་སློང་ཞིག་རྒྱལ་བྱེད་ཀྱི་ཚལ་གྱི་སྒོ་ན་ཤིང་ལྗོན་པའི་དྲུང་ན་འཆག་ཅིང་འདུག་པ་དེ་བྲམ་ཟེ་དེས་ཐག་རིང་པོ་ཁོ་ན་ནས་མཐོང་ནས་དེའི་གན་དུ་སོང་སྟེ་སྨྲས་པ། ཀྱེ་དགེ་སློང་སངས་རྒྱས་ཀྱི་བཀའ་ཅུང་ཞིག་སྨྲོས་ཤིག །དགེ་སློང་དེས་བསམས་པ། བྲམ་ཟེ་འདི་ནི་རྒོལ་བ་ཡིན་པས་འདི་ལ་བྱུང་རྒྱལ་དུ་སྨྲ་བར་མི་ནུས་སོ་སྙམ་ནས། དེས་བྲམ་ཟེ་དེ་ལ་དགེ་བ་བཅུའི་ལས་ཀྱི་ལམ་དང་། མི་དགེ་བ་བཅུའི་ལས་ཀྱི་ལམ་རྒྱ་ཆེར་བསྟན་ཏོ། །བྲམ་ཟེས་སྨྲས་པ། ཀྱེ་དགེ་སློང་ཁོ་བོ་ཡང་བྱ་བ་ཡོངས་སུ་ཉམས་ལ། ཁྱོད་ཀྱང་དགེ་བའི་ཕྱོགས་ཡོངས་སུ་ཉམས་ན་མ་ལེགས་ཀྱི་ཁོ་བོ་འགྲོས། ཕྱིས་ཀྱང་འོང་ངོ་ཞེས་སྨྲས་ཏེ་སོང་ངོ་། །དུས་གཞན་ཞིག་ན་ཡང་བྲམ་ཟེའི་ཁྱེའུ་དེ་དག་མི་ཀློག་པར་གྱུར་ནས་དེ་དག་ཡམ་སྲེག་ཤིང་ཐུར་དོང་བ་དང་། ལམ་ཆེན་པ་ཡང་གཅིག་པུ་རྒྱལ་བྱེད་ཀྱི་ཚལ་དུ་སོང་ངོ་། །དགེ་སློང་དེས་བྲམ་ཟེ་དེ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་དེས་བསམས་པ། དེའི་ཚེ་ན་བདག་གིས་བྲམ་ཟེ་འདི་ལ་དགེ་བ་བཅུའི་ལས་ཀྱི་ལམ་དང་། མི་དགེ་བ་བཅུའི་ལས་ཀྱི་ལམ་རྒྱ་ཆེར་བསྟན་གྱིས་ད་ནི་བདག་གིས་འདི་ལ་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་། ལུགས་ལས་བཟློག་པ་རྒྱ་ཆེར་བསྟན་པར་བྱའོ་སྙམ་མོ། །བྲམ་
ཟེ་དེ་དགེ་སློང་དེ་ག་ལ་བ་དེར་སོང་སྟེ་ཕྱིན་ནས་དགེ་སློང་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་དགེ་སློང་དེས་བྲམ་ཟེ་དེ་ལ་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་། ལུགས་ལས་བཟློག་པ་རྒྱ་ཆེར་བསྟན་ཏོ། །བྲམ་ཟེ་དེ་མངོན་པར་དད་པར་གྱུར་ནས་སྨྲས་པ། དགེ་སློང་བདག་རབ་དུ་དབྱུང་དུ་གསོལ། དགེ་སློང་དེས་བསམས་པ། བྲམ་ཟེ་འདི་ནི་རྒོལ་བ་ཡིན་པས་རབ་དུ་ཕྱུང་ན་བསྟན་པ་ལ་གཅེས་པ་བྱེད་པར་འགྱུར་གྱིས་རབ་དུ་དབྱུང་ངོ་སྙམ་ནས་དེས་སྨྲས་པ། བྲམ་ཟེ་དེ་ལྟར་གྱིས་ཤིག །བྲམ་ཟེས་སྨྲས་པ། ཀྱེ་དགེ་སློང་བདག་ནི་བྲམ་ཟེ་གྲགས་པ་ཅན་ལགས་པས་བདག་གིས་འདི་ཉིད་དུ་རབ་དུ་འབྱུང་བའི་རྔོ་མི་ཐོག་ན་ལྗོངས་སུ་བཞུད་དོ། །དེ་ལྟར་གྱིས་ཤིག །དགེ་སློང་དེས་བྲམ་ཟེ་དེ་ལྗོངས་སུ་ཁྲིད་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་སྨྲས་པ། བཞིན་བཟངས་དགེ་སློང་གི་ལས་ནི་གཉིས་ཏེ། བསམ་གཏན་དང་། ཀློག་པ་ཡིན་ན་ཁྱོད་བསམ་གཏན་དང་། ཀློག་པ་གང་འདོད། ལམ་ཆེན་པས་སྨྲས་པ། མཁན་པོ་གཉིས་ཀ་ཡང་བགྱི་སྟེ། གདུགས་ལ་ནི་བཀླག་པར་བགྱི། དགུང་ལ་ནི་བསམ་གཏན་བགྱིའོ། །བུ་དེ་བཞིན་གྱིས་ཤིག །དེ་ནས་ཚེ་དང་ལྡན་པ་ལམ་ཆེན་པས་ཉིན་མོ་བཀླག་པ་དང་ཁ་ཏོན་བྱས་པས་སྡེ་སྣོད་གསུམ་པོ་དག་ལྷོགས་པར་གྱུར་ཏེ། སྡེ་སྣོད་གསུམ་དང་ལྡན་པ། ཆོས་སྒྲོག་པ། རིག་པ་དང་གྲོལ་བའི་སྤོབས་པ་ཅན་དུ་གྱུར་ཏོ། །མཚན་མོ་བསམ་གཏན་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་
ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ། བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ་བོང་བ་དང་གསེར་དུ་མཉམ་པ་ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་། མངོན་པར་ཤེས་པ་དང་སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ་དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་མངོན་དུ་སྨྲ་བར་བྱ་བར་གྱུར་ཏོ། །གང་གི་ཚེ་ཚེ་དང་ལྡན་པ་ལམ་ཆེན་པ་རབ་ཏུ་བྱུང་བ་དེའི་ཚེ་ན་ལམ་ཆུང་བའི་ལོངས་སྤྱོད་སྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་ནས་དེས་ཚེགས་ཆེན་པོས་འཚོ་བ་སྦྱར་བར་བརྩམས་སོ། །དེ་ནས་ཚེ་དང་ལྡན་པ་ལམ་ཆེན་པ་འདི་སྙམ་དུ་སེམས་ཏེ། བདག་གིས་ཐོས་པས་ཐོབ་པར་བྱ་བ་གང་ཡིན་པ་དེ་བདག་གིས་ཐོབ་ཀྱི་བདག་མཉན་ཡོད་དུ་སོང་ལ་བཅོམ་ལྡན་འདས་ལ་བསྙེན་བཀུར་བྱའོ་སྙམ་མོ། །དེ་ནས་ཚེ་དང་ལྡན་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ། །མཉན་ཡོད་ན་སྐྱེ་བོ་ཕལ་པོ་ཆེའི་ཚོགས་ཀྱིས་འཕགས་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ་ཞེས་ཐོས་སོ། །ཐོས་ནས་ཀྱང་སྐྱེ་བོ་ཕལ་པོ་ཆེའི་ཚོགས་ཕྱིར་འབྱུང་བར་བརྩམས་པ་ལམ་ཆུང་བས་མཐོང་ནས་དེས་དྲིས་པ་ཤེས་ལྡན་དག་གར་འདོང་དེ་དག་གིས་སྨྲས་པ། འཕགས་པ་ལམ་ཆེན་པ་འཁོར་ལྔ་བརྒྱ་དང་ཀོ་ས་ལ་དག་ཏུ་ལྗོངས་རྒྱུར་གཤེགས་པ་ན་མཉན་ཡོད་དུ་བྱོན་ཏེ་དེ་ལྟར་འདོང་ངོ་། །ལམ་ཆུང་བས་བསམས་པ། དེ་འདི་དག་གི་ཕུ་ནུ་ཡང་མ་ཡིན། ཉེ་དུ་ཡང་མ་ཡིན་ཡང་འདི་དག་དེ་ལྟར་འདོང་ན་དེ་བདག་གི་ཕུ་བོ་ཡིན་ན་བདག་ཅིའི་ཕྱིར་
དེ་ལྟར་མི་འགྲོ་སྙམ་ནས་ལམ་ཆུང་བ་ཡང་འཕགས་པ་ལམ་ཆེན་པ་བལྟ་བའི་ཕྱིར་སོང་ངོ་། །ཚེ་དང་ལྡན་པ་ལམ་ཆེན་པས་དེ་མཐོང་ནས་སྨྲས་པ་ལམ་པ་འཚོའམ། འཕགས་པ་འཚོའོ། །ཇི་ལྟར་འཚོ་དེས་སྨྲས་པ་འཕགས་པ་ཚེགས་ཆེན་པོས་སོ། །ཚེ་དང་ལྡན་པ་ལམ་ཆེན་པས་སྨྲས་པ། ཇི་ལྟར་རབ་ཏུ་མི་འབྱུང་ངམ། ལམ་ཆུང་བས་སྨྲས་པ། འཕགས་པ་བདག་ནི་བུལ་བ་མཆོག་ཏུ་བུལ་བ་ཆུང་བ་མཆོག་ཏུ་ཆུང་བ་ལགས་ན་བདག་བཅོམ་ལྡན་འདས་ཀྱི་བསྟན་པ་ལ་རབ་ཏུ་འབྱུང་བར་འགྱུར་རམ། ཚེ་དང་ལྡན་པ་ལམ་ཆེན་པས་དེ་ལ་དགེ་བའི་རྩ་བ་ཅུང་ཟད་ཡོད་དམ་ཞེས་བལྟས་ན་ཡོད་པར་མཐོང་ངོ་། །སུ་ལ་རག་ལས་སྙམ་ན་བདག་ཉིད་ལ་རག་ལས་པར་མཐོང་ནས་དེས་སྨྲས་པ། ལམ་པ་ཐུབ་པའི་དབང་པོའི་གསུང་རབ་འདི་ལ་ནི་རིགས་གཅེས་པ་མ་ཡིན་རུས་གཅེས་པ་མ་ཡིན། ཐོས་པ་གཅེས་པ་མ་ཡིན་གྱི་ཐུབ་པའི་དབང་པོའི་གསུང་རབ་འདི་ལ་ནི་སྒྲུབ་པ་གཅེས་པ་ཡིན་གྱིས་གལ་ཏེ་འདོད་ན་རབ་ཏུ་བྱུང་ཤིག །འཕགས་པ་རབ་ཏུ་འབྱུང་ངོ་། །ཚེ་དང་ལྡན་པ་ལམ་ཆེན་པས་ལམ་ཆུང་བ་དེ་རབ་ཏུ་ཕྱུང་རྫོགས་པར་བསྙེན་པར་བྱས་ནས་དེས་དེ་ཀློག་ཏུ་གཞུག་པར་བརྩམས་པ་དང་། ལུས་ངག་ཡིད་ཀྱིས་སྡིག་པ་མི་བྱ་ཞིང་། །འཇིག་རྟེན་ཀུན་ལ་ཡོངས་འཛིན་འདོད་བྲལ་བ། །དྲན་དང་ལྡན་ཞིང་ཤེས་བཞིན་ཅན་གྱིས་ནི། །གནོད་ལྡན་སྡུག་བསྔལ་གང་ཡིན་བསྙེན་མི་བྱ། །ཞེས་བྱ་བའི་ཚིགས་སུ་བཅད་པ་འདི་ཟླ་བ་གསུམ་གྱིས་ཀྱང་ལོབས་པར་མ་གྱུར་ཏོ། །བ་ལང་རྫི་དང་ཕྱུགས་རྫི་གཞན་དག་གིས་ཐོས་ནས་ལོབས་པར་གྱུར་པ་དང་། དེ་རྗེ་ས་དང་བཅས། གུས་པ་དང་བཅས་པས་དེ་དག་གི་གན་དུ་སོང་སྟེ་དྲིས་པ་དང་། དེ་དག་གིས་དེ་ལ་བསྟན་ཏོ། །ཇི་ལྟར་སངས་རྒྱས་བཅོམ་ལྡན་འདས་གསོན་ཞིང་བཞུགས་ཏེ་འཚོ་ཞིང་གཞེས་པ་རྣམས་ལ་ཆོས་ཉིད་ཀྱིས་ཉན་ཐོས་རྣམས་ཀྱི་འདུས་པ་ཆེན་པོ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་དབྱར་ཉེ་བར་བསྒྲུབ་པའི་ཚེའོ། །གཉིས་པ་ནི་སྟོན་ཟླ་འབྲིང་པོའི་ཉ་ལའོ། །ཉན་ཐོས་ཆེན་པོ་རྣམས་ལ་ཡང་དེ་བཞིན་ནོ། །དེ་ལ་གང་དག་དབྱར་ཟླ་འབྲིང་པོ་ཉ་
ལ་དབྱར་ཉེ་བར་བསྒྲུབ་པའི་ཚེ་གདམས་ངག་མནོས་ཏེ། གྲོང་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་དབྱར་གནས་པར་ཁས་ལེན་པ་དེ་དག་ནི་སྟོན་ཟླ་འབྲིང་པོའི་ཟླ་བ་ཉ་ལ་ལྷགས་ནས་ཇི་ལྟར་ཐོབ་པ་ནི་རྗོད་པར་བྱེད། མ་ཐོབ་པ་ནི་ཐོབ་པར་བྱ་བའི་ཕྱིར་འོག་ཏུ་འདྲི་བར་བྱེད་པས་ཚེ་དང་ལྡན་པ་ལམ་ཆེན་པའི་ལྷན་ཅིག་གནས་པ་དང་། ཉེ་གནས་གང་དག་ལྗོངས་སུ་དབྱར་གནས་པར་ཁས་བླངས་པ་དེ་དག་དབྱར་གྱི་ཟླ་བ་གསུམ་པོ་དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་ཞིང་ལྷུང་བཟེད་དང་ཆོས་གོས་ཐོགས་ཏེ། ཚེ་དང་ལྡན་པ་ལམ་ཆེན་པ་ག་ལ་བ་དེར་དོང་ནས་ཕྱིན་པ་དང་། ཚེ་དང་ལྡན་པ་ལམ་ཆེན་པའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་དེ་དག་ཁ་ཅིག་ནི་ཇི་ལྟར་ཐོབ་པ་རྗོད་པར་བྱེད་དོ། །ཁ་ཅིག་ནི་མདོ་སྡེ་དང་། འདུལ་བ་དང་། ཆོས་མངོན་པ་དག་གི་ཁ་ཏོན་དག་དང་ཡོངས་སུ་དྲི་བ་དག་ཚོལ་བར་བྱེད་དོ། །དེ་ན་གང་དག་བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་དེ་དག་དྲུག་སྡེ་དག་ལ་སྟེན་པར་བྱེད། སྙེན་པར་བྱེད། བསྙེན་བཀུར་བྱེད་པས་ཚེ་དང་ལྡན་པ་ལམ་པ་ཡང་དྲུག་སྡེ་དག་ལ་སྟེན་པར་བྱེད། སྙེན་པར་བྱེད། བསྙེན་བཀུར་བྱེད་པ་ན་ཉེ་དགའས་ཚེ་དང་ལྡན་པ་ལམ་པ་ལ་སྨྲས་པ། ལམ་པ་ཁྱོད་ཀྱི་མཁན་པོ་གཅིག་པ་འདི་དག་ཀྱང་མཁན་པོ་ལས་ཁ་ཏོན་དག་དང་ཡོངས་སུ་དྲི་བ་དག་ཚོལ་བར་བྱེད་ཀྱིས་ཁྱེད་ཀྱང་སོང་ལ་རེ་ཞིག་མཁན་པོ་ལས་ཁ་ཏོན་དག་དང་ཡོངས་སུ་དྲི་བ་དག་ཚོལ་ཅིག །ལམ་པས་སྨྲས་པ། བདག་གིས་ཅི་ཡང་མ་བཀླགས་ཏེ། ཟླ་བ་གསུམ་གྱིས་ཚིགས་སུ་བཅད་པ་གཅིག་བཀླགས་ན་དེ་ཡང་མ་ལོབས་པས་བདག་གིས་ཁ་ཏོན་དག་དང་ཡོངས་སུ་དྲི་བ་དག་ཇི་ལྟར་བཙལ། ཉེ་དགའས་སྨྲས་པ། བཅོམ་ལྡན་འདས་ཀྱིས་གསང་ཚིག་གི་དྲི་མ་ནི་མི་ཀློག་པ་ཡིན་ནོ་ཞེས་མ་གསུངས་སམ། རེ་ཞིག་ལྷོགས་ཤིག་དང་ཚིགས་སུ་བཅད་པ་ཅིའི་ཕྱིར་ལོབས་པར་མི་འགྱུར། ཚོལ་ཅིག་དང་། ལམ་པ་སོང་སྟེ་སྨྲས་པ། མཁན་པོ་དག་བདག་ལ་རེ་
ཞིག་ཁ་ཏོན་དག་སྩོལ་ཅིག །ཚེ་དང་ལྡན་པ་ལམ་ཆེན་པས་བསམས་པ། ཅི་འདི་རེ་ཞིག་རང་གི་བློས་གསོལ་པར་བྱེད་དམ། འོན་ཏེ་གཞན་གྱིས་བཏང་སྙོམས་སུ་བསམས་ན། དེ་གཞན་གྱིས་བཏང་བར་མཐོང་ནས་ཚེ་དང་ལྡན་པ་ལམ་ཆེན་པས་བསམས་པ། ཅི་འདི་རེ་ཞིག་སྨད་པས་གདུལ་བ་ཡིན་ནམ། འོན་ཏེ་བསྟོད་པས་འདུལ་བ་ཡིན་སྙམ་དུ་བསམས་ན། སྨད་པས་གདུལ་བ་ཡིན་པར་མཐོང་ནས་དེས་དེའི་གཉའ་བ་ནས་བཟུང་སྟེ། རྒྱལ་བྱེད་ཀྱི་ཚལ་གྱི་ཕྱི་རོལ་དུ་བསྐྲད་ནས་སྨྲས་པ། ཁྱོད་ནི་རེ་ཞིག་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ན་ཁྱོད་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་ཅི་བྱ། འདི་ཉིད་ན་འདུག་ཤིག །ལམ་པ་ད་ནི་བདག་དགེ་སྦྱོང་ཡང་མ་ཡིན། བྲམ་ཟེ་ཡང་མ་ཡིན་ནོ་སྙམ་ནས་དེས་ངུ་བར་བརྩམས་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་རྒྱལ་བྱེད་ཀྱི་ཚལ་གྱི་ཕྱི་རོལ་ན་ངུ་བ་གཟིགས་སོ། །དེ་ནས་བཅོམ་ལྡན་འདས་ཐུགས་རྗེ་ཆེན་པོས་བསྐུལ་བ་ན་ཚེ་དང་ལྡན་པ་ལམ་པ་ག་ལ་བ་དེར་གཤེགས་ཏེ་བྱོན་ནས་ཚེ་དང་ལྡན་པ་ལམ་པ་ལ་འདི་སྐད་ཅེས་བཀའ་སྩལ་ཏོ། །ལམ་པ་ཁྱོད་ཅིའི་ཕྱིར་རྒྱལ་བྱེད་ཀྱི་ཚལ་གྱི་ཕྱི་རོལ་ན་ངུ་། ལམ་པས་གསོལ་པ། བཅོམ་ལྡན་འདས་བདག་མཁན་པོས་གཉའ་བ་ནས་བཟུང་སྟེ། རྒྱལ་བྱེད་ཀྱི་ཚལ་གྱི་སླད་རོལ་དུ་བསྐྲད་ནས་ཁྱོད་ནི་རེ་ཞིག་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ན། ཁྱོད་བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་སྟེ་ཅི་བྱ། འདི་ཉིད་ན་འདུག་ཤིག་ཅེས་མཆི་བས་ད་ནི་བདག་དགེ་སྦྱོང་ཡང་མ་ལགས། བྲམ་ཟེ་ཡང་མ་ལགས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། བྱིས་པས་བསྟོད་པ་གང་ཡིན་དང་། །མཁས་པས་སྨོད་པ་གང་ཡིན་པ། །འདིར་ནི་མཁས་སྨོད་མཆོག་ཡིན་གྱི། །བྱིས་པས་བསྟོད་པ་མ་ཡིན་ནོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། བུ་ཁྱོད་ཀྱི་མཁན་པོ་ནི་བསྐལ་པ་གྲངས་མེད་པ་གསུམ་གྱིས་བྱ་དཀའ་བ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ཏེ་ཐུབ་པའི་དབང་པོའི་
གསུང་རབ་འདི་ཡང་དག་པར་བསྒྲུབས་པ་མ་ཡིན་གྱི། ངས་ནི་བསྐལ་པ་གྲངས་མེད་པ་གསུམ་གྱིས་བྱ་དཀའ་བ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་ཏེ་ཐུབ་པའི་དབང་པོའི་གསུང་རབ་འདི་ཡང་དག་པར་བསྒྲུབས་པ་ཡིན་ན་ཁྱོད་དེ་བཞིན་གཤེགས་པ་ལས་ཀློག་ནུས་སམ། བཙུན་པ་བདག་ནི་བུལ་བ། མཆོག་ཏུ་བུལ་བ། ཆུང་བ། མཆོག་ཏུ་ཆུང་བ་ལགས་སོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་བཀའ་སྩལ་པ། གང་གིས་བྱིས་པ་བྱིས་ཉིད་རིག །དེ་ལ་དེས་ན་དེ་མཁས་ཡིན། །བྱིས་པ་མཁས་པར་རློམ་བྱེད་པ། །དེ་འདིར་ཤིན་ཏུ་བྱིས་པ་ཡིན། །སངས་རྒྱས་བཅོམ་ལྡན་འདས་རྣམས་ཚིག་རེ་རེ་ནས་ཆོས་འདོན་པར་མཛད་པ་ནི་གནས་མ་ཡིན་སྐབས་མ་ཡིན་ཏེ། དེ་ནི་གནས་མེད་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ལམ་པ་ཀློག་ཏུ་ཆུག་ཤིག །ཚེ་དང་ལྡན་པ་ཀུན་དགའ་བོས་ལམ་པ་ཀློག་ཏུ་གཞུག་པར་བརྩམས་པ་དང་། དེས་ཀློག་མ་ནུས་ནས། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཙུན་པ་བདག་གིས་རེ་ཞིག་སྟོན་པ་ལ་ཡང་བསྙེན་བཀུར་བགྱི་འཚལ་ཐོས་པ་ཡང་གཟུང་འཚལ་ཚོགས་དག་ཀྱང་ཀློག་ཏུ་སྩལ་འཚལ་བྲམ་ཟེ་དང་ཁྱིམ་བདག་མཆིས་ཤིང་ལྷགས་པ་རྣམས་ལ་ཡང་ཆོས་བསྟན་པར་བགྱི་འཚལ་བས་བདག་གིས་ལམ་པ་ཀློག་ཏུ་སྩལ་བའི་རྔོ་མི་ཐོག་གོ །བཅོམ་ལྡན་འདས་ཀྱིས་དེ་ལ་རྡུལ་སྤང་ངོ་དྲི་མ་སྤང་ངོ་ཞེས་བྱ་བའི་ཚིག་གཉིས་སྩལ་ན། དེས་ཚིག་དེ་གཉིས་མ་ཟིན་ནས་བཅོམ་ལྡན་འདས་ཀྱིས་འདིའི་ལས་སྦྱང་བར་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་ལ་བཀའ་སྩལ་པ། ལམ་པ་ཁྱོད་ཀྱིས་དགེ་སློང་རྣམས་ཀྱི་མཆིལ་ལྷམ་དང་། ལྷམ་སྒྲོག་གུ་ཅན་དགའ་ཕྱི་ནུས་སམ། བཙུན་པ་རྔོ་ཐོག་གོ །སོང་ལ་དགེ་སློང་རྣམས་ཀྱི་མཆིལ་ལྷམ་དང་། ལྷམ་སྒྲོག་གུ་ཅན་དག་ཕྱིས་ཤིག་དེས་དགེ་སློང་རྣམས་ཀྱི་མཆིལ་ལྷམ་དང་། ལྷམ་སྒྲོག་གུ་ཅན་དག་ཕྱི་བར་
བརྩམས་པ་དང་། དགེ་སློང་རྣམས་ཀྱིས་དེ་ལ་མི་སྟེར་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལམ་པ་མཆིལ་ལྷམ་དང་། ལྷམ་སྒྲོག་གུ་ཅན་དག་འཕྱིར་ཆུག་ཤིག །དེ་ཅིའི་ཕྱིར་ཞེ་ན། འདིའི་ལས་སྦྱང་བར་བྱ་བའི་ཕྱིར་རོ། །འདི་ལ་ཚིག་གཉིས་ཀྱི་ཁ་ཏོན་དག་ཀྱང་རྗེས་སུ་སློབས་ཤིག །ལམ་པས་དགེ་སློང་རྣམས་ཀྱི་མཆིལ་ལྷམ་དང་། ལྷམ་སྒྲོག་གུ་ཅན་དག་འཕྱི་བ་ན་དགེ་སློང་རྣམས་ཀྱིས་དེ་ལ་རྡུལ་སྤང་ངོ་། །དྲི་མ་སྤང་ངོ་ཞེས་བྱ་བའི་ཁ་ཏོན་གཉིས་པོ་དག་ཀྱང་བསླབས་ནས། ལམ་པས་དུས་གཞན་ཞིག་ན་ཁ་ཏོན་གཉིས་པོ་དེ་ཡང་ལོབས་པར་གྱུར་ཏོ། །དེ་ནས་ཚེ་དང་ལྡན་པ་ལམ་པ་མཚན་མོའི་ནམ་ནངས་པའི་ཚེ་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་རྡུལ་སྤང་ངོ་། །དྲི་མ་སྤང་ངོ་ཞེས་བཀའ་སྩལ་པ་གང་ཡིན་པ་དེ་ཅི་བཅོམ་ལྡན་འདས་ཀྱིས་ནང་གི་རྡུལ་ལས་དགོངས་ཏེ་བཀའ་སྩལ་ཏམ། འོན་ཏེ་ཕྱི་རོལ་གྱི་རྡུལ་ལས་དགོངས་ཏེ་བཀའ་སྩལ་སྙམ་མོ། །དེ་དེ་ལྟར་སེམས་པ་ན་དེའི་ཚེ་དེ་ལ་སྔོན་མ་ཐོས་པའི་ཚིགས་སུ་བཅད་པ་གསུམ་པོ་འདི་དག་བློ་ལ་སྣང་བར་གྱུར་ཏོ། ། རྡུལ་འདིར་འདོད་ཆགས་དེ་ནི་ས་རྡུལ་མིན། ། རྡུལ་ནི་འདོད་ཆགས་མིང་སྟེ་རྡུལ་གྱི་མིན། ། མཁས་པ་གང་གིས་རྡུལ་དེ་རྣམ་སྤངས་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །རྡུལ་འདིར་ཞེ་སྡང་དེ་ནི་ས་རྡུལ་མིན། །རྡུལ་ནི་ཞེ་སྡང་མིང་སྟེ་རྡུལ་གྱི་མིན། ། མཁས་པ་གང་གིས་རྡུལ་དེ་རྣམ་སྤངས་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །རྡུལ་འདིར་གཏི་མུག་དེ་ནི་ས་རྡུལ་མིན། །རྡུལ་ནི་གཏི་མུག་མིང་སྟེ་རྡུལ་གྱི་མིན། །མཁས་པ་གང་གིས་རྡུལ་དེ་རྣམ་སྤངས་པ། །དེ་དག་བདེ་གཤེགས་བསྟན་ལ་བག་ཡོད་འགྱུར། །དེས་སྤྲོ་བ་དང་། འབད་པ་དང་། བརྩལ་བ་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་། རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱི་ཟིལ་གྱིས་མནན་ནས་ཉོན་མོངས་པ་ཐམས་ཅད་
སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་སུ་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །ཚེ་དང་ལྡན་པ་ལམ་པ་སྐྱིལ་མོ་ཀྲུང་གིས་འདུག་པ་ཚེ་དང་ལྡན་པ་ལམ་ཆེན་པས་མཐོང་ནས་དགྲ་བཅོམ་པ་དག་ནི་མ་བསམས་པར་ཤེས་པ་དང་། མཐོང་བ་མི་འཇུག་པས་ཚེ་དང་ལྡན་པ་ལམ་ཆེན་པས་ལག་པ་གཉིས་ཀྱིས་ཚེ་དང་ལྡན་པ་ལམ་པ་བཟུང་སྟེ་སྨྲས་པ། ལམ་པ་རེ་ཞིག་ཁ་ཏོན་དག་གྱིས་ཤིག་དང་དེའི་འོག་ཏུ་བསམ་གཏན་པར་འགྱུར་རོ། །ཚེ་དང་ལྡན་པ་ལམ་པས་གླང་པོ་ཆེའི་སྣ་འདྲ་བའི་ལག་པ་བརྐྱང་བ་དང་། ཚེ་དང་ལྡན་པ་ལམ་ཆེན་པས་རྒྱབ་ཏུ་རྣམ་པར་བལྟས་ནས་མཐོང་སྟེ། དེས་སྨྲས་པ། ཚེ་དང་ལྡན་པ་ལམ་པ་ཁྱོད་ཀྱིས་ཡོན་ཏན་གྱི་ཚོགས་དེ་ལྟ་བུ་དག་རྟོགས་སམ། རྟོགས་སོ། །ཐམས་ཅད་དུ་བཅོམ་ལྡན་འདས་ཀྱིས་ལམ་ཆུང་བ་རབ་ཏུ་ཕྱུང་ངོ་ཞེས་སྒྲ་གྲགས་ནས། རྒྱལ་པོའི་ཁབ་ན་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་ཀྱིས་ལམ་ཆུང་བ་རབ་ཏུ་ཕྱུང་ངོ་ཞེས་ཐོས་ནས་དེས་བསམས་པ། གལ་ཏེ་བཅོམ་ལྡན་འདས་རྒྱལ་པོའི་ཁབ་ཏུ་གཤེགས་པར་གྱུར་ན་བཙུན་པ་ལམ་པ་མ་གཏོགས་པ། སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་
གཞན་དུ་སྤྱན་དྲངས་ཏེ་གདུགས་ཚོད་གསོལ་ལོ་སྙམ་མོ། །གཞན་མུ་སྟེགས་ཅན་དག་ཤེས་ལྡན་དག་དགེ་སྦྱོང་གཽ་ཏ་མ་འདི་སྐད་ཅེས་ངའི་ཆོས་ནི་ཟབ་པ། ཟབ་པར་སྣང་བ། མཐོང་བར་དཀའ་བ། རྟོགས་པར་དཀའ་བ། བརྟག་མི་ནུས་པ། རྟོག་གེའི་སྤྱོད་ཡུལ་མ་ཡིན་པ། ཞིབ་མོ་བརྟགས་པ། མཁས་པ་མཛངས་པས་རིག་པར་བྱ་བ་ཡིན་ནོ་ཞེས་ཟེར་ན་འདི་ལྟར་ལམ་ཆུང་བ་ལ་སོགས་པ་བུལ་བ། མཆོག་ཏུ་བུལ་བ། ཆུང་བ། མཆོག་ཏུ་ཆུང་བ་དག་ཀྱང་རབ་ཏུ་འབྱིན་པར་བྱེད་ན་དེའི་ཆོས་ཇི་ལྟར་ཟབ་པ་ཡིན་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་དོ། །བཅོམ་ལྡན་འདས་ཀྱིས་ཉན་ཐོས་ཆེན་པོ་རི་རབ་དང་འདྲ་བ་ལ་སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པ། མི་དགེ་བ་སྐྱེད་པར་བྱེད་ཀྱིས་འདིའི་ཡོན་ཏན་བསྒྲག་པར་བྱའོ་སྙམ་དུ་དགོངས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ལམ་པ་ལ་དེ་བཞིན་གཤེགས་པའི་ཞལ་ནས་ཁྱོད་ཀྱིས་དགེ་སློང་མ་ལ་སྟོན་ཅིག་ཅེས་བཀའ་སྩལ་ཏོ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་སྨྲས་པ། ཚེ་དང་ལྡན་པ་ལམ་པ་བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་དགེ་སློང་མ་ལ་སྟོན་ཅིག་ཅེས་བྱུང་ངོ་། །ཚེ་དང་ལྡན་པ་ལམ་པས་བསམས་པ། བཅོམ་ལྡན་འདས་ཀྱིས་ཅིའི་སླད་དུ་དགེ་སློང་གནས་བརྟན་གནས་བརྟན་དག་བཞག་སྟེ་བདག་ལ་བཀའ་སྩལ་སྙམ་ནས། དེས་བཅོམ་ལྡན་འདས་བདག་གི་ཡོན་ཏན་བསྒྲག་པར་བཞེད་པར་རིག་ནས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས་སྨྲས་པ། བཙུན་པ་ཀུན་དགའ་བོ་བཅོམ་ལྡན་འདས་ཀྱིས་བཀའ་སྩལ་པ་བཞིན་འཚལ་ལོ། །དགེ་སློང་མ་གསོ་སྦྱོང་འབུལ་བ་གཉིས་རྒྱལ་བྱེད་ཀྱི་ཚལ་དུ་འོངས་ཏེ། དེ་གཉིས་ཀྱིས་སྨྲས་པ། བདག་ཅག་དགེ་སློང་མའི་སྟོན་པ་སུ་བསྐོས། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ལམ་པའོ། །ཅི་ལགས་འཕགས་པ་ལམ་ཆེན་པའམ། ཚེ་
དང་ལྡན་པ་ལམ་པའོ། །དེ་གཉིས་ཀྱིས་སྨྲས་པ། ཕུ་ནུ་མོ་ཇི་ལྟར་བུད་མེད་ཀྱི་ཡུལ་བརྙས་པ་ལ་ལྟོས། དེས་ཟླ་བ་གསུམ་གྱིས་ཚིགས་སུ་བཅད་པ་གཅིག་བཀླགས་ན་དེ་ཡང་མ་ལོབས་པ་ཡིན་ལ། དགེ་སློང་མ་རྣམས་ནི་སྡེ་སྣོད་གཉིས་པ་དང་། སྡེ་སྣོད་གསུམ་པ་ཆོས་སྒྲོག་པ། རིག་པ་དང་། གྲོལ་བའི་སྤོབས་པ་ཅན་དག་ཡིན་ན། དེས་དགེ་སློང་མ་ལ་སྟོན་པར་འགྱུར་བ་ཇི་ལྟར་བྱེད་པ་བལྟས་འདོང་ངོ་ཞེས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྨྲས་པ། བཙུན་པ་ལམ་པ་དགོངས་སུ་གསོལ། རྒྱལ་པོའི་ཀུན་དགའ་ར་བའི་དགེ་སློང་མའི་དགེ་འདུན་མཐུན་པ་རྒྱལ་བྱེད་ཀྱི་ཚལ་གྱི་དགེ་སློང་གི་དགེ་འདུན་མཐུན་པའི་ཞབས་ལ་མགོ་བོས་ཕྱག་འཚལ་ལོ། །གནོད་པ་ཉུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོ་འམ། སྟོབས་དང་ལྡན་ནམ། བདེ་འམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ་ཞེས་སྙུན་གསོལ་ལོ། །ཟླ་བ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་གསོལ་ལོ། །འདུན་པ་དང་གསོ་སྦྱོང་བགྱི་བར་གསོལ་བ་འདེབས་སོ། །གསོལ་བ་ཡང་མཁྱེན་པར་གསོལ་ལོ། །ཐབས་ཡིན་ནོ། །དེ་གཉིས་ཀྱིས་སྨྲས་པ། ཐབས་ཡིན་ནོ། །ཞེས་བྱ་བ་ཙམ་ཡང་ཤེས་པ་ལྟ་ཞེས་དེ་གཉིས་དབྱར་ཁང་དུ་དོང་བ་དང་། དགེ་སློང་མ་རྣམས་ཀྱིས་མཐོང་ནས་སྨྲས་པ། བདག་ཅག་དགེ་སློང་མའི་སྟོན་པ་སུ་བྱོན། དེ་གཉིས་ཀྱིས་སྨྲས་པ། འཕགས་པ་ལམ་པའོ། །ཅི་འཕགས་པ་ལམ་ཆེན་པའམ། འཕགས་པ་ལམ་ཆེན་པ་མ་ཡིན་གྱི་འདི་ལྟར་ལམ་པའོ། །དེ་དག་གིས་སྨྲས་པ། ཕུ་ནུ་མོ་དག་ཇི་ལྟར་བུད་མེད་ཀྱི་ཡུལ་བརྙས་པ་ལ་ལྟོས་དེ་ཟླ་བ་གསུམ་གྱིས་ཚིགས་སུ་བཅད་པ་གཅིག་བཀླགས་ན་དེ་ཡང་མ་ལོབས་པ་ཡིན་ལ། དགེ་སློང་མ་རྣམས་ནི་སྡེ་སྣོད་གཉིས་པ་དང་། སྡེ་སྣོད་གསུམ་པ། ཆོས་སྒྲོག་པ། རིག་པ་དང་། གྲོལ་བའི་སྤོབས་པ་ཅན་དག་ཡིན་ན། དེས་ཇི་ལྟར་དགེ་སློང་མ་ལ་སྟོན་པར་འགྱུར། བདག་ཅག་ཇི་ལྟར་བཅོམ་ལྡན་འདས་ཀྱིས་ཟིལ་གྱིས་
མནན་པ་ལྟར་ནི་ཡ་མཚན་ཅན་དགུ་བཅུ་རྩ་དྲུག་པོ་དག་གིས་ཀྱང་བུད་མེད་ཀྱི་ཡུལ་འགའ་ཡང་ཟིལ་གྱིས་མ་མནན་ཏོ། །དགེ་སློང་མ་བཅུ་གཉིས་སྡེ་དག་གིས་དེ་ལྟར་འཕགས་པ་ལམ་པ་དགེ་སློང་མའི་སྟོན་པར་འོང་ངོ་ཞེས་ཐོས་ནས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་གིས་ཅི་ནས་ཀྱང་ཕྱིན་ཆད་ཐོས་པ་ཉུང་ངུ་འགའ་ཡང་དགེ་སློང་མ་ལ་སྟོན་པར་མི་འགྱུར་བ་དེ་ལྟར་བུ་ཟན་མོའི་བུ་དེ་མི་དགའ་བར་བྱའོ་ཞེས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་ལས་མི་མོ་དྲུག་གིས་ནི་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་ཤོམས་ཤིག །མི་མོ་དྲུག་གིས་ནི་མཉན་ཡོད་དུ་ཞུགས་ལ་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་དག་ཏུ་སྐྱེ་བོ་ཕལ་པོ་ཆེའི་ཚོགས་ལ་སང་བདག་ཅག་དགེ་སློང་མའི་སྟོན་པ་ཉན་ཐོས་ཆེན་པོ་འདི་འདྲ་བ་ཞིག་བྱོན་པར་འགྱུར་གྱིས་ཁྱེད་ཅག་ལས་གང་གིས་དེར་བདེན་པ་དག་མཐོང་བར་མ་གྱུར་པ། དེས་ཡུན་རིང་པོར་འཁོར་བར་འཁོར་བར་བྱ་དགོས་པར་འགྱུར་རོ། །ཞེས་སྒྲོགས་ཤིག །དེ་དག་ལས་མི་མོ་དྲུག་གིས་ནི་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་བཤམས་སོ། །མི་མོ་དྲུག་གིས་ནི་མཉན་ཡོད་དུ་ཞུགས་ཏེ་ལམ་པོ་ཆེ་དང་། སྲང་དང་། བཞི་མདོ་དང་། སུམ་མདོ་དག་ཏུ་སྐྱེ་བོ་ཕལ་པོ་ཆེའི་ཚོགས་ལ་སང་བདག་ཅག་དགེ་སློང་མའི་སྟོན་པ་ཉན་ཐོས་ཆེན་པོ་འདི་འདྲ་བ་ཞིག་བྱོན་པར་འགྱུར་གྱིས་ཁྱེད་ཅག་ལས་གང་གིས་དེར་བདེན་པ་དག་མཐོང་བར་མ་གྱུར་པ་དེས་ཡུན་རིང་པོར་འཁོར་བར་འཁོར་བར་བྱ་དགོས་པར་འགྱུར་རོ། །ཞེས་བསྒྲགས་པ་དང་། སྲོག་ཆགས་འབུམ་ཕྲག་དུ་མ་དག་ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ཏོ། །དེ་ནས་ཚེ་དང་ལྡན་པ་ལམ་པ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་སོ། །དེ་མཉན་ཡོད་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ལྷུང་བཟེད་དང་ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་ནང་དུ་ཡང་དག་འཇོག་གི་ཕྱིར་
གཙུག་ལག་ཁང་དུ་ཞུགས་སོ། །དེ་ནས་ཚེ་དང་ལྡན་པ་ལམ་པ་ཕྱེ་མ་རེད་ནང་དུ་ཡང་དག་འཇོག་ལས་ལངས་ཏེ་སྣམ་སྦྱར་ཐོགས་ནས་ཕྱི་བཞིན་འབྲང་བའི་དགེ་སྦྱོང་དགེ་སློང་ཞིག་དང་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བ་ག་ལ་བ་དེར་སོང་ངོ་། །སྐྱེ་བོ་ཕལ་པོ་ཆེའི་ཚོགས་ཀྱིས་དེ་མཐོང་ནས་དེ་དག་གིས་སྨྲས་པ། དགེ་སློང་མའི་སྟོན་པ་དེ་གང་ཡིན། ཅི་དགེ་སྦྱོང་སྔ་མ་ཡིན་ནམ། འོན་ཏེ་ཕྱི་བཞིན་འབྲང་བའི་དགེ་སྦྱོང་ཡིན། དེ་དག་གིས་སྨྲས་པ། ཁྱེད་ཀྱིས་ཕྱི་བཞིན་འབྲང་བའི་དགེ་སྦྱོང་འགའ་ཞིག་དགེ་སློང་མ་ལ་སྟོན་པར་བྱེད་ཅེས་ཐོས་སམ། དགེ་སྦྱོང་སྔ་མ་འདི་ཉིད་དགེ་སློང་མའི་སྟོན་པ་ཡིན་ནོ། །དེ་དག་གིས་སྨྲས་པ། འདི་ཟླ་བ་གསུམ་གྱིས་ཚིགས་སུ་བཅད་པ་གཅིག་བཀླགས་ན་དེ་ཡང་མ་ལོབས་པ་ཡིན་ན། དེས་དགེ་སློང་མ་སྡེ་སྣོད་གཉིས་པ་དང་། སྡེ་སྣོད་གསུམ་པ། ཆོས་སྒྲོག་པ། རིག་པ་དང་། གྲོལ་བའི་སྤོབས་པ་ཅན་དག་ལ་ཇི་ལྟར་སྟོན་པར་འགྱུར། དགེ་སྦྱོང་མ་སྒྲེ་བྱི་མོ་འདི་དག་གིས་བདག་ཅག་བྲིད་པར་གྱུར་གྱིས་ཚུར་ཤེག་འདོང་ངོ་། །གཞན་དག་གིས་སྨྲས་པ། ཇི་ལྟ་བྱེད་པ་ཡང་བལྟས་རེ་ཞིག་སྡོད་ཅིག །དེ་ནས་ཚེ་དང་ལྡན་པ་ལམ་པ་འཁོར་དེའི་ནང་དུ་ཞུགས་ནས་སེང་གེའི་ཁྲི་ག་ལ་བ་དེར་སོང་བ་དང་། ཇི་ཙམ་ན་ཡལ་ག་ཁྲུ་བཅུ་གཉིས་པ་དག་ལས་སེང་གེའི་ཁྲི་བཤམས་པ་མཐོང་ནས་དེས་བསམས་པ། ཅི་རེ་ཞིག་དད་པར་གྱུར་པ་དག་གིས་བཤམས་པ་ཡིན་ནམ། འོན་ཏེ་མཐོ་འཚམ་པའི་བསམ་པ་ཅན་དག་གིས་བཤམས་པ་ཡིན་སྙམ་ན། ཇི་ཙམ་ན་མཐོ་འཚམ་པའི་བསམ་པ་ཅན་དག་གིས་བཤམས་པར་མཐོང་ངོ་། །དེ་ནས་ཚེ་དང་ལྡན་པ་ལམ་པས་གླང་པོ་ཆེའི་སྣ་ལྟ་བུའི་ལག་པ་བརྐྱང་སྟེ་སེང་གེའི་ཁྲི་དེ་ཇི་ལྟར་གནས་སུ་བཞག་པ་དེ་ལྟར་མནན་ནས་ཚེ་དང་ལྡན་པ་ལམ་པ་ཅི་ནས་ཀྱང་ཁ་ཅིག་གིས་མཐོང་། ཁ་ཅིག་གིས་མ་མཐོང་བ་དེ་ལྟར་སེང་གེའི་ཁྲི་ལ་འདུག་གོ །དེ་ནས་ཚེ་དང་ལྡན་པ་ལམ་པ་ཏིང་ངེ་འཛིན་འདི་ལྟ་བུ་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་རང་གི་སྟན་ལས་མི་སྣང་བར་གྱུར་ཅིང་། ཤར་
ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ། སྤྱོད་ལམ་བཞི་པོ་འདི་ལྟ་སྟེ། འགྲོ་བ་དང་། འགྲེང་བ་དང་། འདུག་པ་དང་། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་འཇུག་སྟེ། ཚེ་དང་ལྡན་པ་ལམ་པ་མེའི་ཁམས་ལ་ཡང་སྙོམས་པར་ཞུགས་པའི་ལུས་ལས་འོད་ཟེར་སྣ་ཚོགས་འདི་ལྟ་སྟེ་སྔོན་པོ་དག་དང་། སེར་པོ་དག་དང་། དམར་པོ་དག་དང་། དཀར་པོ་དག་དང་། བཙོད་ཀ་དག་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ངོ་། །ཆོ་འཕྲུལ་ཟུང་དག་ཀྱང་རྣམ་པར་སྟོན་ཏེ། ལུས་ཀྱི་སྨད་ནས་མེ་འབར་ཞིང་ལུས་ཀྱི་སྟོད་ནས་ཆུ་གྲང་མོའི་རྒྱུན་དག་འབྱིན་པར་བྱེད་དོ། །ལུས་ཀྱི་སྟོད་ནས་མེ་འབར་ཞིང་ལུས་ཀྱི་སྨད་ནས་ཆུ་གྲང་མོའི་རྒྱུན་དག་འབྱིན་པར་བྱེད་དོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང་། ནུབ་དང་། བྱང་ཕྱོགས་སུ་ཡང་དེ་བཞིན་ཏེ། དེ་ཕྱོགས་བཞིར་རྫུ་འཕྲུལ་གྱི་ཆོ་འཕྲུལ་རྣམ་པ་བཞི་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ཏེ་འཁོར་གྱི་གོང་དུ་སེང་གེའི་ཁྲི་བཤམས་པ་ཉིད་ལ་འདུག་གོ །འདུག་ནས་ཚེ་དང་ལྡན་པ་ལམ་པས་དགེ་སློང་མ་རྣམས་ལ་སྨྲས་པ། སྲིང་མོ་དག་ཁོ་བོས་ཟླ་བ་གསུམ་གྱིས་ཚིགས་སུ་བཅད་པ་གཅིག་བཟུང་སྟེ། ཁོ་བོ་ཚིགས་སུ་བཅད་པ་དེ་ཉིན་མཚན་བདུན་གྱི་བར་དུ་ཚིག་གཞན་དག་དང་། ཡི་གེ་གཞན་དག་དང་། ཚིག་དང་ཡི་གེ་གཞན་དག་གིས་དོན་རྣམ་པར་འབྱེད་པར་སྤྲོའོ། །སྲིང་མོ་དག་དེ་ལ་ལུས་ཞེས་བྱ་བས་ནི་བཅོམ་ལྡན་འདས་ཀྱིས་ལུས་ཀྱིས་ཉེས་པར་སྤྱོད་པ་གསུམ་མི་བྱ་བ་བསྟན་ཏོ། །ངག་ཅེས་བྱ་བས་ནི་བཅོམ་ལྡན་འདས་ཀྱིས་ངག་གིས་ཉེས་པར་སྤྱོད་པ་བཞི་མི་བྱ་བ་བསྟན་ཏོ། །ཡིད་ཀྱིས་ཞེས་བྱ་བས་ནི་བཅོམ་ལྡན་འདས་ཀྱིས་ཡིད་ཀྱིས་ཉེས་པར་སྤྱོད་པ་གསུམ་མི་བྱ་བ་བསྟན་ཏོ། །སྡིག་པ་མི་བྱ་ཞིང་ཞེས་བྱ་བས་ནི་བཅོམ་ལྡན་འདས་ཀྱིས་སྡིག་པ་ཐམས་ཅད་མི་བྱ་སྟེ་ཞེས་བྱ་བ་བསྟན་ཏོ། །འཇིག་རྟེན་ཀུན་ལ་ཞེས་བྱ་བས་ནི་བཅོམ་ལྡན་འདས་ཀྱིས་ཉེ་བར་ལེན་པའི་ཕུང་པོ་ཐམས་ཅད་བསྟན་ཏོ། །ཡོངས་འཛིན་ཞེས་བྱ་བས་ནི་བཅོམ་ལྡན་འདས་ཀྱིས་ཡོངས་འཛིན་རྣམ་པ་གསུམ་བསྟན་ཏེ།
འདོད་ཆགས་ཀྱི་ཡོངས་འཛིན་དང་། ཞེ་སྡང་གི་ཡོངས་འཛིན་དང་། གཏི་མུག་གི་ཡོངས་འཛིན་ཏོ། །ཚེ་དང་ལྡན་པ་ལམ་པས་ཇི་ཙམ་གྱིས་ཚིགས་སུ་བཅད་པ་ཕྱེད་ཀྱི་དོན་ཀྱང་རྣམ་པར་ཕྱེ་བ་དེ་ཙམ་གྱིས་སྲོག་ཆགས་ཁྲི་ཉིས་སྟོང་གིས་བདེན་པ་དག་མཐོང་སྟེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་བཀོད་དོ། །དེ་ནས་ཚེ་དང་ལྡན་པ་ལམ་པས་འཁོར་དེ་དག་ཕལ་ཆེར་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་བཀོད་ནས་སྟན་ལས་ལངས་ཏེ་སོང་ངོ་། །དགེ་སློང་དག་རྒྱལ་བྱེད་ཀྱི་ཚལ་གྱི་སྒོ་ན་འཆག་ཅིང་འཁོད་པ་དེ་དག་གིས་ཚེ་དང་ལྡན་པ་ལམ་པ་ཐག་རིང་པོ་ཁོ་ན་ནས་འོང་བ་མཐོང་ནས་དེ་དག་གིས་སྨྲས་པ། ཚེ་དང་ལྡན་པ་དག་ཚེ་དང་ལྡན་པ་ལམ་པས་དེང་སྐྱེ་བོ་ཕལ་པོ་ཆེའི་ཚོགས་མངོན་པར་མ་དད་པར་གྱུར་པར་བྱས་གོར་མ་ཆག་ན། མངོན་སུམ་དུ་མི་དགའ་བ་བརྗོད་པ་ནི་སྡུག་བསྔལ་བ་ཡིན་པས་ཕྱི་བཞིན་འབྲང་བའི་དགེ་སྦྱོང་ལ་དྲིའོ་ཞེས་དེ་དག་གིས་དེའི་ཕྱི་བཞིན་འབྲང་བའི་དགེ་སྦྱོང་ལ་སྨྲས་པ། ཚེ་དང་ལྡན་པ་དེང་ཚེ་དང་ལྡན་པ་ལམ་པས་སྐྱེ་བོ་ཕལ་པོ་ཆེའི་ཚོགས་ཇི་སྙེད་ཅིག་མངོན་པར་མ་དད་པར་བྱས་དེས་སྨྲས་པ། སུས་མ་དད་པ་བྱས་བཅོམ་ལྡན་འདས་ཀྱིས་བཱ་རཱ་ཎ་སཱི་དྲང་སྲོང་སྨྲ་བ་རི་དགས་ཀྱི་ནགས་སུ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་ཆོས་དང་ལྡན་པའི་ཆོས་ཀྱི་འཁོར་ལོ་བསྐོར་ཅེས་གང་ཐོས་པ་དེ་དེང་ཚེ་དང་ལྡན་པ་ལམ་པས་རྗེས་སུ་བསྐོར་ཏོ། །
དེ་དག་གིས་སྨྲས་པ། ཇི་ལྟར་གྱུར། དེས་སྨྲས་པ། ཚེ་དང་ལྡན་པ་ལམ་པས་ཇི་ཙམ་གྱིས་ཚིགས་སུ་བཅད་པ་ཕྱེད་ཀྱི་དོན་ཀྱང་རྣམ་པར་ཕྱེ་བ་དེ་ཙམ་གྱིས་སྲོག་ཆགས་ཁྲི་ཉིས་སྟོང་གིས་བདེན་པ་དག་མཐོང་སྟེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་རྣམ་པར་བཀོད་དོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་སེམས་སྒྱུར་བ་ལ་མཁས་པ་རྣམས་ཀྱི་ནང་ན་འདི་ལྟ་སྟེ། ལམ་པ་འདི་ནི་མཆོག་ཡིན་ནོ། །དེ་ལྟ་བས་ན་ཆོས་འདི་ལྟ་བུ་དང་ལྡན་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱིས་མ་བསྐོས་པར་དགེ་སློང་མ་ལ་སྟོན་ན་ཆོས་འདི་ལྟ་བུ་དང་ལྡན་པ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིས་སོ། །མ་བསྐོས་པར་ཞེས་བྱ་བ་ནི་གསོལ་
བ་དང་གཉིས་ཀྱི་ལས་ཀྱིས་སོ། །དགེ་སློང་མ་ཞེས་བྱ་བ་ནི་ཆོས་འདི་པ་ལའོ། །སྟོན་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །ཆོས་འདི་ལྟ་བུ་དང་ལྡན་པ་མ་གཏོགས་ཏེ་ཞེས་བྱ་བ་ནི་ཆོས་འདི་ལྟ་བུ་དང་ལྡན་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་དགེ་འདུན་གྱིས་བསྐོས་ཀྱང་མཚམས་ཀྱི་ཕྱི་རོལ་དུ་བསྐོས་ཤིང་མཚམས་ཀྱི་ནང་དུ་མ་བསྐོས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཀྱང་གསོ་སྦྱོང་བཅྭ་ལྔ་པ་དེ་ཉིད་ལ་མ་བསྐོས་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ་དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཀྱང་དགེ་འདུན་ཐམས་ཅད་འདུག་ཅིང་མཐུན་པ་མ་ཡིན་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ཀྱང་ཚུལ་ཁྲིམས་དང་ལྡན་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་
བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ་དེ་ཡང་ཚུལ་ཁྲིམས་དང་ལྡན་པ་ཡིན་ཡང་མང་དུ་ཐོས་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་པ་ཡིན་ཡང་གནས་བརྟན་རྒྱལ་ཚབ་ལྟ་བུ་མ་ཡིན་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་། མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ། གནས་བརྟན་རྒྱལ་ཚབ་ལྟ་བུ་ཡིན་ཡང་གྲོང་ཁྱེར་པའི་སྐད་དང་ལྡན་པ་མ་ཡིན་ན། གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ཡང་འདི་ལྟར་དེས་དགེ་སློང་མ་ལ་ལུས་ཀྱིས་རེག་པས་སུན་ཕྱུང་བར་གྱུར་ཅིང་དེས་ལྟུང་བ་དེ་ཡང་ཆོས་བཞིན་དུ་ཕྱིར་མ་བྱས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་
པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་པ་ཡིན་ལ། གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ལ། དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང་། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་དེ་ཡང་ཆོས་བཞིན་དུ་ཕྱིར་བྱས་པ་ཡིན་ཡང་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་པར་མི་ནུས་ན་གང་དག་སྐོ་བར་བྱེད་པ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ། གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་། དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་ལ་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང་། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་དེ་ཡང་ཆོས་བཞིན་དུ་ཕྱིར་བྱས་ལ་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་པར་ནུས་ཀྱང་ལྕི་བའི་ཆོས་བརྒྱད་པོ་དག་རྒྱ་ཆེར་བརྗོད་པར་མི་ནུས་ན་གང་དག་སྐོ་བར་བྱེད་པ་དེ་དག་ལ་ཉེས་བྱས་སུ་འགྱུར་ལ། དེ་བསྐོས་པ་དེས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་དགེ་འདུན་གྱིས་མཚམས་ཀྱི་ནང་དུ་བསྐོས་ཤིང་མཚམས་ཀྱི་ཕྱི་རོལ་དུ་མ་བསྐོས་ཏེ་གསོ་སྦྱོང་བཅྭ་ལྔ་པ་དེ་ཉིད་ལ་བསྐོས་ཤིང་དགེ་འདུན་ཐམས་ཅད་འདུག་ཅིང་མཐུན་པར་གྱུར་ལ། དེ་ཡང་ཚུལ་ཁྲིམས་དང་ལྡན་ཞིང་མང་དུ་ཐོས་ལ་གནས་བརྟན་རྒྱལ་ཚབ་ལྟ་བུ་ཡིན་ཞིང་གྲོང་ཁྱེར་པའི་སྐད་དང་ལྡན་པ་དེས་དགེ་སློང་མ་ལ་ལུས་ཀྱིས་རེག་པས་སུན་མ་ཕྱུང་ཞིང་། གལ་ཏེ་སུན་ཕྱུང་བར་གྱུར་ན་ཡང་དེས་ལྟུང་བ་ཡང་ཆོས་བཞིན་དུ་ཕྱིར་བྱས་ལ་ཕམ་པར་འགྱུར་བའི་ཆོས་བརྒྱད་པོ་དག་རྒྱ་ཆེར་བརྗོད་ནུས་ཤིང་ལྕི་བའི་ཆོས་བརྒྱད་པོ་དག་ཀྱང་རྒྱ་ཆེར་བརྗོད་ནུས་ན། གང་དག་སྐོ་བར་བྱེད་པ་དེ་དག་ལ་ལྟུང་བ་མེད་ལ། དེ་བསྐོས་པ་དེས་དགེ་སློང་མ་ལ་སྟོན་ན་ཡང་ལྟུང་བ་མེད་དོ། །དགེ་སློང་མ་ལ་སྟོན་པ་
ཕྱི་མ་ནི་སྲིང་མོ་དག་ཅི་ཁྱེད་ཅག་དགེ་སློང་མའི་དགེ་འདུན་ཚོགས་སམ། ཡོངས་སུ་དག་གམ། མཐུན་ནམ། ཁ་ན་མ་ཐོ་བ་མེད་དམ། ཁྱེད་ཅག་ལ་དགེ་འདུན་གྱིས་མ་བསྐོས་པའི་གང་ཟག་འགའ་ཞིག་སྟོན་པར་མི་བྱེད་དམ། ཁྱེད་ཅག་ལ་སྟོན་པའི་གང་ཟག་ནི་འགའ་ཞིག་དགེ་འདུན་ལས་འོང་ངོ་། །ཁྱེད་ཅག་ལ་དགེ་སློང་འགའ་ཡང་སྟོན་པར་མི་སྤྲོའོ། །ཁྱེད་ཅག་གི་གདམས་ངག་དང་རྗེས་སུ་བསྟན་པ་ནི་དགེ་འདུན་ལས་སོ། །སྲིང་མོ་དག་གིས་བག་ཡོད་པར་སྒྲུབས་ཤིག་ཅེས་བྱ་བ་དེ་སྟོན་ནུས་པའོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་དགེ་སློང་མ་བཅུ་གཉིས་སྡེ་དག་གིས་ཚེ་དང་ལྡན་པ་ལམ་པ་ལ་གནོད་པར་བགྱིའོ་སྙམ་པ་ལས་ཕན་པ་ཉིད་བགྱིས་པ་ལ་གཟིགས། དགེ་སློང་ད་ལྟར་འབའ་ཞིག་ཏུ་མ་ཟད་ཀྱི། འདི་ལྟར་འདས་པའི་དུས་ན་ཡང་དེ་དག་གིས་དེ་ལ་གནོད་པར་བྱའོ་སྙམ་པ་ལས་ཕན་པ་ཉིད་བྱས་པར་གྱུར་ཏེ། དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་བཙས་སོ། །འདོད་པ་འདི་དག་ནི་ལན་ཚྭ་དང་འདྲ་སྟེ། ཇི་ལྟ་ཇི་ལྟར་བསྟེན་པ་དེ་ལྟ་དེ་ལྟར་སྐོམ་པར་འགྱུར་བས་དེ་ཡང་དང་ཡང་དུ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་ཇི་ཙམ་ནས་བུ་བཅུ་གཉིས་བཙས་ནས་དེས་དེ་དག་ཁྱིམ་འབུབས་སུ་བཅུག་གོ །དུས་གཞན་ཞིག་ན་དེའི་ཆུང་མ་དུས་ལ་བབ་ནས་བྲམ་ཟེ་དེ་ཡང་རྒས་པའི་གནས་སྐབས་སུ་མྱ་ངན་གྱིས་ནོན་པས་མིག་གཉིས་མདོངས་པར་གྱུར་ཏོ། །དེའི་མནའ་མ་བཅུ་གཉིས་པོ་དེ་དག་ཉེས་པར་སྤྱོད་པ་ཤ་སྟག་ཡིན་ཏེ། གང་གི་ཚེ་དེ་དག་གི་ཁྱིམ་ཐབ་དག་ཕྱི་རོལ་དུ་དོང་བ་དེའི་ཚེ་ན་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པར་བྱེད་དོ། །བྲམ་ཟེ་དེ་སྒྲ་ལ་མཁས་པས་དེས་འདི་ནི་བདག་གི་བུ་རྣམས་ཀྱི་སྒྲ་ཡིན་ནོ། །འདི་ནི་སྐྱེས་པ་གཞན་དག་གི་སྒྲ་ཡིན་ནོ། །ཞེས་བྱ་བར་ཤེས་པས་དེས་སྐྱེས་པ་གཞན་དག་གི་སྒྲ་ཐོས་ནས་མནའ་
མ་རྣམས་བསྡིགས་པ་དང་། དེ་དག་གིས་བསམས་པ། བྲམ་ཟེ་འདི་བདག་ཅག་ལ་གནོད་པའི་ཕྱིར་ཞུགས་པ་ཡིན་གྱིས་བཟའ་ནར་བྱའོ་སྙམ་ནས། དེ་དག་གིས་དེ་ལ་འབྲས་ཆན་རྩུབ་པོ་དང་། རྩབས་བསྐོལ་བ་བྱིན་ནོ། །བྲམ་ཟེ་དེས་བུ་རྣམས་ལ་སྨྲས་པ། བུ་དག་ཁོ་བོ་མནའ་མ་འདི་དག་གིས་འབྲས་ཆན་རྩུབ་པོ་དང་། རྩབས་བསྐོལ་བ་བྱིན་ནོ། །དེ་དག་གིས་ཆུང་མ་དག་ལ་སྨྲས་པ། ཁྱེད་ཅག་གིས་ཅིའི་ཕྱིར་ཡབ་ལ་འབྲས་ཆན་རྩུབ་པོ་དང་། རྩབས་བསྐོལ་བ་གསོལ། དེ་དག་གིས་སྨྲས་པ། ཡབ་ཀྱི་བསོད་ནམས་དག་པས་ཏེ། དེའི་དོན་དུ་སྣོད་དུ་འབྲས་སཱ་ལུ་ཐུག་པོ་ཆེ་དག་སྩལ་ན་འབྲས་ཆན་རྩུབ་པོར་འགྱུར་ཞིང་། ཆབ་ཞོ་སྩལ་ན་རྩབས་བསྐོལ་བར་འགྱུར་རོ། །ཅིའི་ཕྱིར་དེ་དག་དེ་ལྟར་འགྱུར། དེ་དག་གིས་སྨྲས་པ། གལ་ཏེ་ཁྱེད་ཅག་ཐུགས་མི་ཆེས་ན་བདག་ཅག་གིས་ཁྱེད་ཀྱི་མངོན་སུམ་དུ་བགྱིའོ། །དེ་དག་གིས་གཅིག་ལ་གཅིག་སྨྲས་པ། བདག་ཅག་གིས་ཁྱིམ་ཐབ་དག་ལ་དམ་བཅས་པའི་སྐབས་དེ་གྲུབ་པར་བྱ་དགོས་སོ་ཞེས་དེ་དག་གིས་རྫ་མཁན་བོས་ཏེ་སྨྲས་པ། བཞིན་བཟངས་ཁྱོད་ཀྱིས་རྫེའུ་ཁ་གཅིག་ལ་ནང་གཉིས་ཡོད་པ་བྱེད་ནུས་སམ། དེས་སྨྲས་པ། ནུས་སོ་ཞེས་དེས་རྫེའུ་ཁ་གཅིག་ལ་ནང་གཉིས་ཡོད་པ་བྱས་སོ། །དེ་དག་གིས་རྫེའུའི་ནང་གཅིག་ཏུ་འབྲས་རྩུབ་པོ་དག་བླུགས་ལ། ནང་གཅིག་ཏུ་ནི་འབྲས་སཱ་ལུ་ཐུག་པོ་ཆེ་དག་བླུགས་སོ། །རྫེའུ་ཅིག་ཤོས་ཀྱི་ནང་གཅིག་ཏུ་ནི་ཞོ་བླུགས་ལ། ནང་གཅིག་ཏུ་རྩབ་མོ་བླུགས་ཏེ་གཡོས་བྱས་ནས་ཁྱིམ་ཐབ་དག་ལ་སྨྲས་པ། རྗེའི་སྲས་དག་ཅི་ལགས་ཇེ་དང་པོར་ཡབ་བཤོས་གསོལ་ལམ། འོན་ཏེ་རྗེའི་སྲས་དག་གསོལ། དེ་དག་གིས་སྨྲས་པ། ཇེ་དང་པོར་ཡབ་བཤོས་གསོལ་ལ། དེའི་འོག་ཏུ་ཁོ་བོ་ཅག་བྱིན་ཅིག །དེ་དག་གིས་དེ་དག་གི་མདུན་དུ་རྫེའུའི་ནང་གཅིག་ཕྱེ་སྟེ། འབྲས་ཆན་རྩུབ་པོ་བཅུས་ཤིང་རྫེའུ་ཅིག་ཤོས་ཀྱི་ནང་གཅིག་ཕྱེ་སྟེ་རྩབ་མོ་བསྐོལ་བ་བཅུ་ནས་གྱོས་པོ་ལ་བྱིན་ནོ། །དེའི་འོག་ཏུ་རྫེའུའི་ནང་གཅིག་ཕྱེ་སྟེ་འབྲས་སཱ་ལུ་ཐུག་པོ་ཆེའི་ཆན་བཅུས་ཤིང་རྫེའུ་ཅིག་ཤོས་ཀྱི་ནང་གཅིག་ཕྱེ་སྟེ་ཞོའི་ཚོད་མ་
བཅུས་ནས་ཁྱིམ་ཐབ་རྣམས་ལ་བྱིན་ནོ། །བུ་རྣམས་ཀྱིས་ཕ་ལ་སྨྲས་པ། ཡབ་ཁྱོད་ཀྱི་བསོད་ནམས་དག་པས་ཏེ། བདག་ཅག་གི་མངོན་སུམ་ཁོ་ནར་རྫེའུ་གཅིག་གི་ནང་དུ་འབྲས་སཱ་ལུ་ཐུག་པོ་ཆེ་དག་སྩལ་ཅིང་རྫེའུ་ཅིག་ཤོས་ཀྱི་ནང་དུ་ཆབ་ཞོ་སྩལ་ཏེ་གཡོས་བགྱིད་དུ་སྩལ་ན། ཁྱོད་ཀྱི་ཞལ་དུ་ནི་འབྲས་ཆན་རྩུབ་པོ་དང་། རྩབས་བསྐོལ་བ་མཆི་ལ། བདག་ཅག་གི་གཡར་དུ་ནི་འབྲས་སཱ་ལུ་ཐུག་པོ་ཆེའི་ཆན་དང་། ཆབ་ཞོའི་ཚོད་མ་མཆི་བས་བུད་མེད་དག་གིས་མ་ནོངས་སོ། །བྲམ་ཟེས་བསམས་པ། ཁོ་བོས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན་ཅིའི་ཕྱིར་ཁོ་བོའི་བསོད་ནམས་དག་ཟད་པར་གྱུར་སྙམ་ནས། དེས་དེ་དག་གིས་མ་ཚོར་བར་ལྐོག་ཏུ་དེ་དག་གི་ཚང་མང་དུ་སོང་སྟེ་ལག་ནོམ་གྱིས་བཙལ་བ་དང་། རྫེའུ་ཁ་གཅིག་ལ་ནང་གཉིས་ཡོད་པ་དག་ལག་པས་ཟིན་ནས་དེས་དེ་དག་གཞན་དུ་སྦས་ཏེ། བུ་དག་འོངས་ཤིང་ལྷགས་པ་ན་བུ་དག་ཁོ་བོའི་བསོད་ནམས་དག་ཟད་པ་ལ་ལྟོས་ཞེས་རྫེའུ་དེ་དག་བསྟན་ནས་ཚིགས་སུ་བཅད་པ་སྨྲས་པ། བུ་རྣམས་གཞན་གྱི་ཁྱིམ་དག་ན། །རྫེའུ་གཅིག་ལ་ནི་ཁ་གཅིག་ཡོད། །བདག་ཅག་སྐལ་བ་མེད་རྣམས་ཀྱི། །རྫེའུ་ནང་གཉིས་ལའང་ཁ་གཅིག་ཡོད། །དེ་དག་གིས་ཆུང་མ་དེ་དག་ཏེ་པོར་བརྡེགས་པ་དང་། དེ་དག་གིས་བསམས་པ། བྲམ་ཟེ་འདི་བདག་ཅག་ལ་གནོད་པའི་ཕྱིར་ཞུགས་པ་ཡིན་གྱིས། བདག་ཅག་གིས་འདི་གསད་པར་བྱའོ་སྙམ་ནས་ཕྱོགས་དེར་སྦྲུལ་ཁས་སྡིགས་པ་ཞིག་འོངས་ནས་དེ་དག་གིས་དེ་ལ་དྲིས་པ། བཞིན་བཟངས་སྦྲུལ་ཡོད་དམ། དེས་སྨྲས་པ། སྦྲུལ་ཇི་ལྟ་བུ་འདོད་ཅི་ཤི་བའམ། འོན་ཏེ་གསོན་པོ། དེ་དག་གིས་སྨྲས་པ། ཤི་བའོ། །དེས་བསམས་པ། འདི་དག་ལ་སྦྲུལ་ཤི་བས་ཅི་བྱ་སྟེ། འདི་དག་བྲམ་ཟེ་འདི་གསོད་པར་འདོད་གོར་མ་ཆག་སྙམ་མོ། །ཆོས་ཉིད་ཀྱིས་ན་སྦྲུལ་ཁྲོས་པའི་དུག་ནི་མགོ་དང་མཇུག་མའི་གནས་གཉིས་སུ་འཕོ་བས་དེས་སྦྲུལ་ནག་པོ་ཁྲོས་པར་བྱས་ཏེ་མགོ་དང་མཇུག་མ་བཅད་ནས་རྐེད་པའི་ཆ་དེ་དག་ལ་བྱིན་ནོ། །དེ་དག་གིས་ཕོ་ཤའི་ཁུ་ཤ་བྱས་ཏེ་བྲམ་ཟེ་དེ་ལ་སྨྲས་པ། ཡབ་ཕོ་ཤའི་ཁུ་ཤ་
གསོལ་ལམ། བྲམ་ཟེ་དེས་བསམས་པ། ཅིའི་ཕྱིར་འདི་དག་གིས་བདག་ལ་ཕོ་ཤའི་ཁུ་ཤ་ལྡུད་པར་འགྱུར་ཏེ། དུག་ཅུང་ཞིག་སྦྱིན་འདོད་གོར་མ་ཆག་སྙམ་ནས། དེས་བསམས་པ། ཇི་ལྟར་ཤི་ཡང་བླས་བཏུང་ངོ་སྙམ་ནས་དེ་དག་གིས་དེ་ལ་སྦྲུལ་གྱི་ཕོ་ཤའི་ཁུ་ཤ་བླུད་ནས་དེས་དེ་འཐུངས་པ་དང་། དེའི་རླངས་པས་ལིང་ཐོག་ཕྱིད་ནས་བྲམ་ཟེ་དེས་མིག་མཐོང་བར་གྱུར་ཏོ། །དེས་བསམས་པ། ཅི་ནས་ཀྱང་རྣོན་དུ་གཞུག་པའི་ཐབས་བྱའོ་སྙམ་ནས་དེས་ས་ལ་བསྒྱེལ་ཏེ་ཉལ་ནས་སྨྲས་པ། ཁོ་བོ་ཤི་ལ་ཐུག་གོ་ཁོ་བོ་ཤི་ལ་ཐུག་གོ་དེ་དག་གིས་བསམས་པ། མྱུར་དུ་ཤི་བར་གྱུར་ཅིག་སྙམ་ནས་སྨྲས་པ། ཡབ་ཡང་གསོལ་ཅིག་དང་ཁྱོད་སོས་པར་འགྱུར་རོ། །དེས་སྨྲས་པ། བཏུང་ངོ་དེ་དག་གིས་དེ་ལ་ཡང་སྦྲུལ་གྱི་ཕོ་ཤའི་ཁུ་ཤ་བླུད་ནས་དེས་ཡང་འཐུངས་པ་དང་། དེའི་རླངས་པས་དེའི་ལིང་ཐོག་རྒྱ་ཆེར་ཕྱིད་དོ། །དེའི་མིག་གིས་སྔ་མ་བཞིན་གསལ་བར་མཐོང་ནས་དེ་ཅང་མི་སྨྲ་བར་འདུག་གོ །མནའ་མ་དེ་དག་སྔོན་བྲམ་ཟེ་མདོངས་པར་གྱུར་པའི་གནས་སྐབས་ན་དེ་ཁྱད་དུ་བསད་དེ་བག་མེད་པར་སྤྱོད་པ་དེ་བཞིན་དུ་ཡང་སྤྱད་པར་བརྩམས་པ་དང་། བྲམ་ཟེ་དེ་དབྱུག་པ་ཐོགས་ཏེ་ལངས་ནས་སྨྲས་པ། ཁྱེད་ཇི་སྙམ་དུ་སེམས། ད་ལྟར་ཁོ་བོ་མི་མཐོང་སྙམ་མམ། ད་ཁོ་བོའི་མིག་སྦྲུལ་གྱི་ཕོ་ཤའི་ཁུ་ཤའི་རླངས་པས་ཕོག་པས་ལིང་ཐོག་ཐམས་ཅད་ཕྱིད་དེ་སྔོན་གྱི་གནས་སྐབས་བཞིན་དུ་ཐམས་ཅད་གསལ་བར་མཐོང་གིས་བུ་མོ་དག་ཕྱིན་ཆད་བག་ཡོད་པར་སྤྱོད་ཅིག །དགེ་སློང་དག་དེའི་ཚེ་དེའི་དུས་ན་བྲམ་ཟེ་གང་ཡིན་པ་དེ་ནི་ལམ་པ་འདི་ཉིད་ཡིན་ནོ། །དེའི་ཚེ་དེའི་དུས་ན་མནའ་མ་བཅུ་གཉིས་པོ་གང་ཡིན་པ་དེ་ནི་དགེ་སློང་མ་བཅུ་གཉིས་སྡེ་འདི་དག་ཡིན་ཏེ། དེའི་ཚེ་ན་ཡང་འདི་དག་གིས་དེ་ལ་གནོད་པ་བྱའོ་སྙམ་པ་ལས་ཕན་པ་ཉིད་བྱས་པར་གྱུར་ཏོ། །ཡང་སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་བཅོམ་ལྡན་འདས་ཀྱིས་ཚེ་དང་ལྡན་པ་ལམ་པ་གདམས་ངག་ཅུང་ཞིག་གིས་གདམས་པ་མཛད་པས་འཁོར་བའི་དགོན་པ་ནས་ཕྱུང་སྟེ་ཤིན་ཏུ་
མཐར་ཐུག་པ་གྲུབ་པ་དང་བདེ་བ་བླ་ན་མ་མཆིས་པའི་མྱ་ངན་ལས་འདས་པ་ལ་གཞག་པ་མཛད་པ་ལ་གཟིགས། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་ངས་འདི་གདམས་ངག་ཅུང་ཞིག་གིས་གཏམས་པས་དབང་ཕྱུག་གི་བདག་པོ་ཆེན་པོ་ལ་བཞག་པར་གྱུར་ཏེ། དེ་ཉོན་ཅིག །དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཕྱུག་པ་ནོར་མང་ལ་ལོངས་སྤྱོད་ཆེ་བ། ཡོངས་སུ་བཟུང་བ་ཡངས་ཤིང་རྒྱ་ཆེ་བ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་བྱུང་ནས་དེས་ཆུང་མ་ལ་སྨྲས་པ། བཟང་མོ་བདག་ཅག་ལ་བུ་ལོན་འཕྲོག་པ་ནོར་འཕྲོག་པ་བྱུང་གིས་ཁོ་བོ་ཟོང་ཐོགས་ཏེ་རྒྱ་མཚོ་ཆེན་པོར་འཇུག་ཏུ་འགྲོའོ། །རྗེའི་སྲས་དེ་བཞིན་མཛོད་ཅིག །ཁྱིམ་བདག་དེས་བསམས་པ། གལ་ཏེ་ཆུང་མ་འདི་ལ་ཀཱར་ཥཱ་པ་ཎ་མང་པོ་དག་གཏད་པར་གྱུར་ན་སྐྱེས་པ་གཞན་དང་ལྷན་ཅིག་འགྱུར་བ་སྟེན་པར་འགྱུར་རོ་སྙམ་ནས་དེས་དེ་ལ་ཀཱར་ཥཱ་པ་ཎ་ཉུང་ཟད་ཅིག་བྱིན་ནོ། །རི་བྲགས་དེ་ན་ཚོང་དཔོན་ཞིག་འདུག་པ་དེ་ཁྱིམ་བདག་དེའི་ཆུང་པོ་གྲོགས་ཡིན་པས་ཁྱིམ་བདག་དེས་ཚོང་དཔོན་དེའི་ལག་ཏུ་ཀཱར་ཥཱ་པ་ཎ་མང་པོ་དག་གཏམས་ནས་སྨྲས་པ། གལ་ཏེ་ཁོ་བོའི་ཆུང་མ་གོས་དང་ཟས་ཡོངས་སུ་ཉམས་པར་གྱུར་ན། ཁྱོད་ཀྱིས་ཟས་དང་གོས་ཀྱིས་དེ་ལ་མཁོ་བ་བསྟབས་པར་གྱིས་ཤིག་ཅེས་སྨྲས་ནས། དེ་ཟོང་ཐོགས་ཏེ་རྒྱ་མཚོ་ཆེན་པོར་ཞུགས་པ་དང་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ཆུང་མ་དེས་ཁྱེའུ་དེ་ཉེ་དུའི་སྟོབས་དང་ལག་སྟོབས་ཀྱིས་བསྙོད་ཅིང་གསོས་ཏེ། བསྐྱེད་པ་དང་། ཁྱེའུ་དེས་མ་ལ་དྲིས་པ། མ་བདག་གི་ཕ་དང་མེས་པོ་དག་གིས་ལས་ཅི་ཞིག་བྱས་པར་གྱུར། མས་བསམས་པ། གལ་ཏེ་འདི་ལ་རྒྱ་མཚོ་ཆེན་པོར་གྲུ་བོ་ཆེ་སྤྱོད་པར་གྱུར་ཏོ་ཞེས་བྱས་ན་འདི་ཡང་རྒྱ་མཚོ་ཆེན་པོར་འཇུག་པར་འགྱུར་ཞིང་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་
འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་དེས་སྨྲས་པ། བུ་ཁྱོད་ཀྱི་ཕ་དང་མེས་པོ་དག་འདི་ཉིད་ན་ཚོང་པ་བྱེད་པར་གྱུར་ཏོ། །མ་ཀཱར་ཥཱ་པ་ཎ་དག་བྱིན་ཅིག་དང་བདག་གིས་ཀྱང་འདི་ཉིད་དུ་ཚོང་བྱའོ། །བུ་ཁོ་མོ་ལ་ཀཱར་ཥཱ་པ་ཎ་དག་ག་ལ་ཡོད། ཁོ་མོས་ཁྱོད་ཀྱང་ཉེ་དུའི་སྟོབས་དང་ལག་སྟོབས་ཀྱིས་བསྙོད་ཅིང་གསོས་ཏེ་བསྐྱེད་པ་ཡིན་པས་ཁོ་མོ་ལ་ཀཱར་ཥཱ་པ་ཎ་དག་གི་འབྱོར་པ་ཡོད་རེ་སྐན། འདི་ལྟར་ཚོང་དཔོན་འདི་ཁྱོད་ཀྱི་ཕའི་ཆུང་པོ་གྲོགས་ཡིན་གྱིས་འདི་ལས་ཀཱར་ཥཱ་པ་ཎ་དག་ལོང་ལ་ལས་གྱིས་ཤིག །ཁྱེའུ་དེ་ཚོང་དཔོན་དེའི་གན་དུ་སོང་བ་དང་། ཚོང་དཔོན་དེ་ཡང་མི་གཞན་ཞིག་གིས་ལན་གསུམ་གྱི་བར་དུ་ཚོང་ལ་དོར་བྱས་པས་དེ་དེ་ལ་ནན་ཐུར་བྱེད་ཅིང་འདུག་པ་ན་དེའི་ཁྱིམ་ནས་བུ་མོ་མངག་གཞུག་མས་ཕྱག་དར་གྱི་སྟེང་དུ་བྱི་བའི་རོ་ཞིག་བཞག་སྟེ་ཕྱིར་བྱུང་ནས་དོར་བར་བརྩམས་པ་དང་། ཚོང་དཔོན་དེས་མི་དེ་ལ་སྨྲས་པ། མི་གང་ནུས་པ་ཡིན་ན་དེས་བྱི་བའི་རོ་འདིས་ཀྱང་བདག་ཉིད་འཛིན་པར་ནུས་སོ། །ཁྱེའུ་དེས་དེ་ཐོས་ནས་བསམས་པ། ཚོང་དཔོན་འདི་ནི་བདག་ཉིད་ཆེན་པོ་ཡིན་པས་འདི་བྱུང་རྒྱལ་དུ་སྨྲ་བར་མི་བྱེད་པས་བྱི་བའི་རོ་འདིས་བདག་ཉིད་འཛིན་པར་ནུས་གོར་མ་ཆག་སྙམ་ནས། ཁྱེའུ་དེ་བུ་མོ་མངག་གཞུག་མ་དེའི་ཕྱི་བཞིན་སོང་སོང་སྟེ། བུ་མོ་མངག་གཞུག་མ་དེས་ཕྱག་དར་བོར་བ་དང་། ཁྱེའུ་དེས་བྱི་བའི་རོ་དེ་བླངས་ནས་ཚོང་དུས་སུ་སོང་ངོ་། །དེ་ན་ཚོང་ཁང་ན་བྱི་ལ་ཞིག་བཏགས་ཤིང་འདུག་ནས་ཁྱེའུ་དེས་བྱི་བའི་རོ་དེ་བྱི་ལ་དེ་ལ་བསྟན་པ་དང་། དེས་དེ་མཐོང་ནས་མཆོང་བར་བརྩམས་པ་དང་། ཚོང་པ་དེས་ཁྱེའུ་ལ་སྨྲས་པ། བྱི་བའི་རོ་འོ་ནི་བྱི་ལ་འདི་ལ་བྱིན་ཅིག ཁྱེའུས་སྨྲས་པ། འདི་རིན་མེད་པར་ཇི་ལྟར་སྦྱིན། རིན་བྱིན་ཅིག་དང་སྦྱིན་ནོ། །ཚོང་པ་དེས་ཁྱེའུ་དེ་ལ་སྲན་མ་དག་གིས་སྙིམ་པ་བཀང་སྟེ་བྱིན་ནོ། ཁྱེའུས་བསམས་པ། གལ་ཏེ་བདག་གིས་འདི་འཆོས་པར་གྱུར་ན་གཞི་ཆད་པར་འགྱུར་རོ་སྙམ་ནས་ཁྱེའུ་དེས་སྲན་མ་དེ་དག་སླང་ལ་བརྔོས་ནས་ཆུ་གྲང་མོས་རིལ་བ་བཀང་སྟེ་རི་བྲགས་སུ་སོང་ནས་ཕྱོགས་གང་དུ་ཤིང་ཐུན་དག་ངལ་
གསོ་བར་འགྱུར་བའི་ཕྱོགས་དེར་སོང་སྟེ་བསྡད་པ་དང་། ཤིང་ཐུན་དག་ལྷགས་ནས་ཁྱེའུ་དེས་དེ་དག་ལ་སྨྲས་པ། ཞང་པོ་དག་ཤིང་ཁུར་ཞོག་ལ་ཡིད་ཙམ་ཞིག་ངལ་སོ་ཤིག །དེ་ནས་ཤིང་ཐུན་དེ་དག་གིས་ཤིང་ཁུར་དག་བཞག་པ་དང་། ཁྱེའུ་དེས་དེ་དག་ལ་སྲན་མ་ཉུང་ཟད་ཉུང་ཟད་བྱིན་ཞིང་ཆུ་གྲང་མོ་ཡང་འཐུང་དུ་བཅུག་གོ །ཤིང་ཐུན་རྣམས་ཀྱིས་སྨྲས་པ། ཚ་བོ་ཁྱོད་གར་འགྲོ། ཤིང་ཐུར་འགྲོའོ། །ཁོ་བོ་ཅག་ཇི་ཙམ་དུ་སྔར་དོང་ན་ཡང་ད་འཁོར་བ་ཡིན་ན། ཁྱོད་ད་སོང་ན་ནམ་ཞིག་འཁོར་བར་འགྱུར་ཞེས་དེ་དག་གིས་དེ་ལ་ཤིང་རེ་རེ་བྱིན་ནོ། །ཤིང་རེ་རེ་པོ་དེ་དག་གིས་ཁྱེའུ་དེའི་ཤིང་ཁུར་ལངས་ནས་དེས་དེ་ཁྱེར་ཏེ་ཕྱིར་ལོག་གོ །དེས་དེ་དག་བཙོངས་ཏེ་སྲན་མ་དག་ཉོས་ནས་དེ་དག་བརྔོས་ཏེ། ཆུ་གྲང་མོས་བུམ་པ་བཀང་ནས་ཡང་ཕྱོགས་དེ་ཉིད་དུ་སོང་སྟེ་བསྡད་པ་དང་། ཤིང་ཐུན་དེ་དག་ཀྱང་ལྷགས་ནས་དེས་དེ་དག་ལ་སྨྲས་པ། ཞང་པོ་དག་ཤིང་ཁུར་ཞོག་ལ་ཡིད་ཙམ་ཞིག་ངལ་སོས་ཤིག་དེ་ནས་ཤིང་ཐུན་དེ་དག་གིས་ཤིང་ཁུར་དག་བཞག་པ་དང་། ཁྱེའུ་དེ་ཡང་དེ་དག་ལ་སྲན་མ་དག་གིས་བགོ་བཤའ་བྱས་ཤིང་ཆུ་གྲང་མོས་ངོམས་པར་བྱས་པ་དང་། དེ་དག་གིས་སྨྲས་པ། ཚ་བོ་ཁྱོད་ཉིན་གཅིག་བཞིན་དུ་སྲན་མ་དང་ཆུ་ཐོགས་ལ་འདི་ཉིད་དུ་སྡོད་ཅིག་དང་། ཁོ་བོ་ཅག་གིས་ཁྱོད་ལ་ཤིང་ཁུར་གྱི་གོང་ཤིང་ཁྱེར་ཏེ་འོང་ངོ་། །ཁྱེའུ་དེས་ཉི་མ་རེ་རེ་ཞིང་དེ་བཞིན་བྱ་བར་བརྩམས་ནས་དེས་དེ་དག་ལ་སྨྲས་པ། ཞང་པོ་དག་ཁྱེད་ཅག་ཤིང་ཁུར་དག་ཚོང་འདུས་སུ་མ་ཁྱེར་བར་ཁོ་བོའི་སྡུམ་པར་ཞོག་ཤིག་དང་། ཁོ་བོས་ཁྱེད་ཅག་ལ་རིན་བསྡོམས་ཏེ་སྦྱིན་ནོ། །དེ་དག་གིས་ཤིང་ཁུར་དག་དེའི་ཁྱིམ་དུ་བཞག་གོ །དུས་གཞན་ཞིག་ན་ཉི་མ་བདུན་དུ་ཡུལ་ངན་བྱུང་ནས་ཁྱེའུ་དེས་ཤིང་དེ་དག་བཙོངས་པ་དང་། དེས་ཁེ་སྤོགས་མང་པོ་གྲུབ་པོ། །དེ་ནས་ཁྱེའུ་དེས་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། ཤིང་ཚོང་བ་འདི་ནི་ཐ་ཆད་ཡིན་ཏེ། འདི་ལྟར་ཙན་དན་གྱིས་འཚོ་ན་ཡང་ཤིང་གིས་འཚོ་བ་ཁོ་ནར་ཟད་པས། བདག་གིས་བཟའ་བཅའི་ཟོང་དགྲམ་པར་བྱའོ་སྙམ་ནས། དེས་བཟའ་བཅའི་ཟོང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དེར་
ཡང་ཁེ་སྤོགས་མང་པོ་གྲུབ་པར་གྱུར་ཏོ། །དེས་ཡང་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། བཟའ་བཅའ་འཚོང་བ་འདི་ནི་ཐ་ཆད་ཡིན་གྱིས་བདག་གིས་སྤོས་འཚོང་གི་ཟོང་དགྲམ་པར་བྱའོ་སྙམ་ནས་དེས་སྤོས་འཚོང་གི་ཟང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དེར་ཡང་ཁེ་སྤོགས་མང་པོ་གྲུབ་པར་གྱུར་ཏོ། །དེས་ཡང་བསམས་པ། ཚོང་པ་རྣམས་ཀྱི་ནང་ན་འདི་ལྟ་སྟེ། སྤོས་འཚོང་འདི་ནི་ཐ་ཆད་ཡིན་གྱིས་བདག་གིས་དབྱིག་གི་ཟོང་དགྲམ་པར་བྱའོ་སྙམ་ནས་དེས་དབྱིག་གི་ཟོང་བཀྲམ་ཞིང་དེ་ཆོས་དང་རིགས་པས་ཚོང་བྱེད་པས་དེས་དབྱིག་ཚོངས་པ་ཐམས་ཅད་ཟིལ་གྱིས་མནན་ནས་དེའི་མིང་བྱི་དབྱིག་པ་བྱི་དབྱིག་པ་ཞེས་བྱ་བར་གྱུར་ཏོ། །དབྱིག་ཚོངས་པ་དེ་དག་གིས་སྨྲས་པ། བྱི་དབྱིག་པ་འདིས་བདག་ཅག་ཐམས་ཅད་ཟིལ་གྱིས་མནན་གྱིས། ཅི་ནས་ཀྱང་འདི་རྒྱ་མཚོ་ཆེན་པོར་འཇུག་ཅིང་དེར་ཚུལ་མ་ཡིན་པས་སྡུག་བསྔལ་བར་འགྱུར་བ་དེ་ལྟར་ང་རྒྱལ་བསྐྱེད་པར་བྱའོ་སྙམ་ནས། དེ་དང་ཧ་ཅང་ཐག་མི་རིང་བར་འཁོད་དེ་ལོང་གཏམ་སྨྲ་བས་འཁོད་ཅིང་། ཤེས་ལྡན་དག་འདི་ལྟ་སྟེ་དཔེར་ན་མི་གླང་པོ་ཆེའི་གཉར་ཞོན་ནས་རྟའི་རྒྱབ་ཏུ་ཞོན་པ་དང་། རྟའི་རྒྱབ་ཏུ་ཞོན་ནས་ཁྱོགས་སྤྱིལ་ལ་ཞོན་པ་དང་། ཁྱོགས་སྤྱིལ་ལ་ཞོན་ནས་རྐང་པས་འགྲོ་བ་དེ་བཞིན་དུ་བྱི་དབྱིག་པ་འདི་ཡང་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་ཅིང་འགྲོ་བར་གྱུར་པ་ལས་འདི་ད་ལྟར་དབྱིག་ཚོངས་ཉིད་ཀྱིས་ཚེགས་ཆེན་པོས་འཚོ་བ་སྦྱོར་བར་བྱེད་དོ། །ཞེས་སྨྲས་པ་དང་། བྱི་དབྱིག་པས་ཐོས་ནས་དེས་སྨྲས་པ། ཤེས་ལྡན་དག་ཅི་ཟེར། ཁྱོད་ཀྱི་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་ཅིང་འགྲོ་བར་གྱུར་པ་ལས་དེང་སང་དེ་དག་ཤི་ནས་ཁྱོད་དབྱིག་ཚོངས་ཙམ་གྱིས་ཚེགས་ཆེན་པོས་འཚོ་བ་སྦྱོར་བར་བྱེད་དོ། །བྱི་དབྱིག་པ་ཁྱིམ་དུ་སོང་སྟེ་མ་ལ་དྲིས་པ། མ་ཁོ་བོའི་ཕ་མེས་དག་རྒྱ་མཚོ་ཆེན་པོར་གྲུ་བོ་ཆེ་སྤྱོད་པར་གྱུར་པ་བདེན་ནམ། མས་བསམས་པ། འདིས་འགའ་ཞིག་ལས་ཐོས་པར་གྱུར་གོར་མ་ཆག་གིས་བདག་གིས་འདི་ལ་བརྫུན་གྱི་ཚིག་སྨྲ་བ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས་དེས་སྨྲས་པ། བུ་བདེན་ནོ། །བྱི་དབྱིག་
པས་སྨྲས་པ། མ་བདག་ཀྱང་རྒྱ་མཚོ་ཆེན་པོར་འཇུག་གིས་གནོང་ཤིག། མས་སྨྲས་པ། བུ་འདི་ཉིད་དུ་འདུག་ཤིག །བྱི་དབྱིག་པས་ཡང་དང་ཡང་དུ་འགྲོའོ་ཞེས་སྨྲས་པ་དང་། མས་དེ་དུས་ཀྱིས་འཆུ་བར་ཤེས་ནས་གནང་ངོ་། །བྱི་དབྱིག་པས་སྲང་ཆེན་པོར་ཚོང་པའི་ཚོགས་རྣམས་ལ་ཁྱེད་ཅག་ལས་གང་དེད་དཔོན་བྱི་དབྱིག་པ་དང་། ལྷན་ཅིག་ཤོ་གམ་མེད་པ་དང་། ལ་གཅན་མེད་པ་དང་། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་སྤྲོ་བ་དེས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་གྱིས་ཤིག་ཅེས་དྲིལ་བསྒྲག་པ་བྱས་སོ། །དེ་ནས་ཚོང་པ་ལྔ་བརྒྱ་ཙམ་གྱིས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་བྱི་དབྱིག་པས་དགེ་མཚན་དང་། བཀྲ་ཤིས་དང་། དགེ་བར་འགྱུར་བ་བྱས་ཏེ་ཤིང་རྟ་དག་དང་། ཁུར་དག་དང་། སྤྱད་དག་དང་། གླེ་བ་དག་དང་། རྔ་མོ་དག་དང་། བ་ལང་དག་དང་། བོང་བུ་དག་ལས་ཟོང་མང་པོ་བཀལ་ཏེ་ཚོང་པ་དེ་དག་དང་ལྷན་ཅིག་རྒྱ་མཚོ་ཆེན་པོར་འཕགས་སོ། །དེ་ན་དེ་ལ་མི་ལྔ་ཡོད་དེ། སྡུད་པར་བྱེད་པ་དང་། ཚར་གཅོད་པར་བྱེད་པ་དང་། བྱི་དོར་པ་དང་། ཆུ་ཕྱགས་པ་དང་། རླུང་ཡོར་ཐོགས་པའོ། །སྡུད་པར་བྱེད་པ་གང་ཞེ་ན། དེ་ན་བཟའ་བ་དང་། བཏུང་བ་སྦྱོར་བ་གང་ཡིན་པའོ། །ཚར་གཅོད་པར་བྱེད་པ་གང་ཞེ་ན། དེ་ན་རྩོད་པ་བྱུང་ངོ་ཅོག་ཉེ་བར་ཞི་བར་བྱེད་པ་གང་ཡིན་པའོ། །བྱི་དོར་བྱ་བ་གང་ཞེ་ན། དེ་ན་གྲུ་འཆོས་པར་བྱེད་པ་གང་ཡིན་པའོ། །ཆུ་ཕྱགས་པ་གང་ཞེ་ན། དེ་ན་ཆུ་འཕྱག་པར་བྱེད་པ་གང་ཡིན་པའོ། །རླུང་ཡོར་ཐོགས་པ་གང་ཞེ་ན། དེ་ན་རྒྱུ་སྐར་དག་ལ་རྣམ་པར་ལྟ་བར་བྱེད་པ་གང་ཡིན་པའོ། །དེ་མཐར་གྱིས་རྒྱ་མཚོའི་འགྲམ་དུ་ཕྱིན་པ་དང་། ཚོང་པ་དེ་དག་གིས་རྒྱ་མཚོ་ཆེན་པོ་མཐོང་ནས་སྐྲག་སྟེ་གྲུ་བོ་ཆེར་འཇུག་པར་མི་སྤྲོ་ནས། དེད་དཔོན་བྱི་དབྱིག་པས་རླུང་ཡོར་ཐོགས་པ་ལ་སྨྲས་པ། ཀྭའི་ནང་རྗེ་རྒྱ་མཚོ་ཆེན་པོའི་བསྔགས་པ་ཇི་ལྟ་བ་བཞིན་དུ་སྒྲོགས་ཤིག །དེ་ནས་རླུང་ཡོར་ཐོགས་པས་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག །རྒྱ་མཚོ་ཆེན་པོ་འདི་ན་རིན་པོ་ཆེ་ཆེན་པོ་ཆེ་བ་འདི་ལྟ་བུ་འདི་ལྟ་སྟེ། ནོར་བུ་དག་དང་། མུ་
ཏིག་དང་། བཻ་ཌཱུརྱ་དང་། མན་ཤེལ་དཀར་པོ་དང་། བྱི་རུ་དང་། དངུལ་དང་། ས་ལེ་སྦྲམ་དང་། རྡོའི་སྙིང་པོ་དང་། སྤུག་དང་། དམར་པོ་དང་། གཡས་སུ་འཁྱིལ་པ་དག་ཡོད་ཀྱིས་ཁྱེད་ཅག་ལས་གང་རིན་པོ་ཆེ་དེ་ལྟ་བུ་དག་གིས་བདག་ཉིད་དང་། ཕ་མ་དང་བུ་དང་། ཆུང་མ་དང་། བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་དག་ལེགས་པར་བདེ་བས་ཚིམ་པར་བྱ་བ་དང་། དུས་དང་དུས་སུ་དགེ་སྦྱོང་དང་། བྲམ་ཟེ་དག་ལ་མཐོན་པོར་འགྲོ་བ་དང་། སྐལ་བ་ཅན་དུ་འགྱུར་བ་དང་། རྣམ་པར་སྨིན་པ་བདེ་བ་དང་། ཕྱི་མ་ལ་མཐོ་རིས་སུ་འགྲོ་བའི་ཡོན་འབུལ་བར་འདོད་པ་དེ་རྒྱ་མཚོ་ཆེན་པོར་ཞུགས་ཤིག །འཇིག་རྟེན་ནི་འབྱོར་པ་འདོད་པས་སྐྱེ་བོ་ཕལ་པོ་ཆེའི་ཚོགས་གྲུ་བོ་ཆེར་ཞུགས་པ་དང་། དེས་དེ་དག་གྲུ་བོ་ཆེས་མི་བཟོད་པར་གྱུར་ནས་དེད་དཔོན་བྱི་དབྱིག་པས་བསམས་པ། ད་བདག་གིས་ཕྱིར་བྱུང་ཤིག་ཅེས་ཇི་སྐད་སྨྲ་བར་བྱ་སྙམ་ནས་དེས་རླུང་ཡོར་ཐོགས་པ་ལ་སྨྲས་པ། ཀྭའི་ནང་རྗེ་རྒྱ་མཚོ་ཆེན་པོའི་བསྔགས་པ་མ་ཡིན་པ་ཇི་ལྟ་བ་བཞིན་དུ་སྒྲོགས་ཤིག །དེ་ནས་རླུང་ཡོར་ཐོགས་པས་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག །རྒྱ་མཚོ་ཆེན་པོ་འདི་ན་འཇིགས་པ་ཆེན་པོ་ཆེ་བ་འདི་ལྟ་བུ་འདི་ལྟ་སྟེ། ཉ་ཆེན་གྱི་འཇིགས་པ་དང་། ཉ་ཆེན་མིད་ཀྱི་འཇིགས་པ་དང་། ཉ་ཆེན་མིད་པ་མིད་ཀྱི་འཇིགས་པ་དང་། ཆུ་རླབས་ཀྱི་འཇིགས་པ་དང་། དབའ་ཀློང་གི་འཇིགས་པ་དང་། ཆུ་སྲིན་ཀུམ་བྷི་རའི་འཇིགས་པ་དང་། ཆུ་སྲིན་བྱིས་པ་གསོད་ཀྱི་འཇིགས་པ་དང་། ཆུའི་ནང་ནས་བྱུང་བའི་རི་དག་ལ་ཐུག་པའི་འཇིགས་པ་དང་། རླུང་ནག་པོའི་འཇིགས་པ་དག་ཡོད་ཅིང་། འདིར་ཆོམ་རྐུན་པ་ནོར་འཕྲོག་པ་སྔོན་པོ་དང་། དཀར་པོ་དག་ཀྱང་འོང་བར་འགྱུར་ཏེ། དེ་དག་གིས་ཁྱེད་ཅག་ཐམས་ཅད་ཀྱི་ཐམས་ཅད་དུ་སྲོག་དང་འབྲལ་བར་བྱེད་པར་འགྱུར་གྱིས་ཁྱེད་ཅག་ལས་གང་བདག་ཉིད་དང་། ཕ་མ་དང་། བུ་དང་། ཆུང་མ་དང་། བྲན་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་དང་། མཛའ་བཤེས་
དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་སྡུག་པ་དག་ཡོངས་སུ་གཏོང་བར་མི་འདོད་པ་དེ་རྒྱ་མཚོ་ཆེན་པོར་མ་འཇུག་ཤིག །འཇིག་རྟེན་ནི་དཔའ་བོ་ཉུང་ལ་སྔར་མ་མང་བས་སྐྱེ་བོ་ཕལ་པོ་ཆེའི་ཚོགས་ཕྱིར་བྱུང་བ་དང་། དེས་དེ་དག་གྲུས་བཟོད་པར་གྱུར་ནས་དེའི་འོག་ཏུ་རླུང་ཡོར་ཐོགས་པས་སྒྲ་ལན་གསུམ་བསྒྲག་པ་བྱས་ཏེ། དེའི་འོག་ཏུ་ཉག་ཐག་གཅིག་བཀྲོལ་ཞིང་གཉིས་པ་དང་། གསུམ་པའི་བར་དུ་བཀྲོལ་ནས་དེས་གྲུ་བོ་ཆེ་རླུང་ཡོར་ཆེན་པོ་ཐོགས་པས་ལེགས་པར་བཟུང་བ། རླུང་གི་ཤུགས་སྟོབས་དང་ལྡན་པས་བསྐྱོད་པ། སྤྲིན་ཆེན་པོ་བཞིན་དུ་སོང་སྟེ་རྗེས་སུ་མཐུན་པའི་རླུང་གིས་ཕུལ་ནས་ཇི་ཙམ་ན་རིན་པོ་ཆེའི་གླིང་དུ་ཕྱིན་ཏོ། །དེ་ནས་རླུང་ཡོར་ཐོགས་པས་སྒྲ་བསྒྲག་པར་བརྩམས་པ། འཛམ་བུའི་གླིང་པའི་ཚོང་པ་ཤེས་ལྡན་དག་ཉོན་ཅིག །རིན་པོ་ཆེའི་གླིང་འདི་ཉིད་ན་ནོར་བུ་མཆིང་བུ་རིན་པོ་ཆེ་འདྲ་བ་དག་ཀྱང་ཡོད་ཀྱིས་ཁྱེད་ཀྱིས་དེ་དག་ཉེ་བར་བརྟག་ཅིང་བརྟག་ཅིང་ཕྱིས་ཁྱེད་ཅག་འཛམ་བུའི་གླིང་དུ་སོན་པ་ན་འགྱོད་པར་མི་འགྱུར་བ་དེ་ལྟར་རིན་པོ་ཆེ་དག་ལོང་ཤིག །རིན་པོ་ཆེའི་གླིང་འདི་ཉིད་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་དག་ཡོད་དེ། དེ་དག་གིས་སྐྱེས་པ་དག་ཅི་ནས་ཀྱང་འདི་ཉིད་དུ་ཚུལ་མ་ཡིན་པས་སྡུག་བསྔལ་བར་འགྱུར་བ་དེ་ལྟ་དེ་ལྟར་མཐོ་འཚམ་པར་འགྱུར་གྱིས་ཁྱེད་ཀྱིས་དེ་དག་བསྙེན་པར་མི་བྱའོ། །རིན་པོ་ཆེའི་གླིང་འདི་ཉིད་ན་མྱོས་པར་འགྱུར་བའི་འབྲས་བུ་དག་ཡོད་དེ། གང་གིས་དེ་དག་ཟོས་པ་ཞག་བདུན་དུ་བརྒྱལ་ཞིང་འདུག་པར་འགྱུར་བས་ཁྱེད་ཀྱིས་དེ་དག་བཟའ་བར་མི་བྱའོ། །རིན་པོ་ཆེའི་གླིང་འདི་ཉིད་ན་མི་མ་ཡིན་པ་དག་འཁོད་དེ་དེ་དག་ཞག་བདུན་ལས་ལྷག་པར་ཁྱེད་འཁོད་པར་མི་བཟོད་པས་ཞག་བདུན་འདས་ནས་རླུང་གང་གིས་འདི་ལྟ་སྟེ། གྲུ་བོ་ཆེ་བྱ་བ་མ་བྱས་པར་ཁྱེར་བར་འགྱུར་བ་དེ་ལྟ་བུ་གཏོང་བར་འགྱུར་བས་ཁྱེད་ཀྱིས་དེ་ལ་ཡང་མ་ཐུག་པར་བྱའོ། །ཚོང་པ་དེ་དག་གིས་དེ་ཐོས་ནས་སེམས་བསྡུས་ཤིང་བག་ཡོད་པར་འཁོད་དེ། དེ་དག་གིས་རིན་པོ་ཆེ་དག་ཉེ་བར་བརྟགས་ཤིང་བརྟགས་ཤིང་གྲུ་བོ་ཆེ་དེ་འདི་ལྟ་སྟེ། དཔེར་ན་ཏིལ་དང་། འབྲས་ཐུག་པོ་ཆེ་དང་། རྒྱ་ཤུག་དང་། རྒྱ་སྲན་དག་བཞིན་དུ་བཀང་སྟེ་རིན་པོ་
ཆེའི་གླིང་ནས་འཕགས་ནས་རྗེས་སུ་མཐུན་པའི་རླུང་གིས་བདས་ཏེ། འཛམ་བུའི་གླིང་དུ་ཕྱིན་པར་གྱུར་ཏོ། །དེ་བཞིན་དུ་ལན་བདུན་གྱི་བར་དུ་གྲུ་བོ་ཆེ་ལེགས་པར་གྲུབ་སྟེ་འཛམ་བུའི་གླིང་དུ་འོངས་སོ། །དེ་ནས་དེད་དཔོན་བྱི་དབྱིག་པ་ལ་མས་སྨྲས་པ། བུ་ཁྱིམ་ཕུབ་ཤིག །དེས་སྨྲས་པ། མ་ཅི་བུ་ལོན་པ་དག་བཅད་ནས་དེའི་འོག་ཏུ་ཁྱིམ་དབུབ་པར་བྱའོ། །མས་དེ་ལ་སྨྲས་པ། བུ་ཁྱོད་ཀྱི་ཕས་ཀྱང་བུ་ལོན་པ་ཡོད་པར་མ་བྱས་མེས་པོས་ཀྱང་མ་བྱས་ན་ཁྱོད་ལ་བུ་ལོན་པ་ག་ལས་བྱུང་། དེས་སྨྲས་པ། མ་ཁོ་བོ་ཉིད་ཤེས་སོ་ཞེས་དེས་རིན་པོ་ཆེ་བཞི་ལས་བྱས་པའི་བྱི་བ་བཞི་བྱེད་དུ་བཅུག་ནས། སྤྲོག་མ་གསེར་གྱིས་བཀང་སྟེ་བྱི་བ་བཞི་པོ་དེ་དག་སྤྲོག་མའི་ཕྱོགས་བཞིར་བཞག་ནས་ཚོང་དཔོན་དེའི་གན་དུ་སོང་ངོ་། །ཚོང་དཔོན་དེ་ཡང་དེ་ཉིད་ཀྱི་བསྔགས་པ་བརྗོད་ཅིང་འདུག་སྟེ་ཤེས་ལྡན་དག་དེད་དཔོན་བྱི་དབྱིག་པ་དེས་རྩྭའམ། བོང་བའམ། གང་དང་གང་བླང་པ་དེ་དང་དེ་དག་ཐམས་ཅད་གསེར་དུ་འགྱུར་ཏེ། ཇི་ཙམ་དུ་དེ་བསོད་ནམས་དང་ལྡན་ཞིང་དབང་ཆེ་བར་གྲགས་པ་ལ་ལྟོས་ཞེས་དེའི་བསྔགས་པ་བརྗོད་ཅིང་འདུག་གོ །དེ་དེ་ལྟར་དེའི་བསྔགས་པ་བརྗོད་པའི་གཏམ་ཟེར་ཞིང་འདུག་པ་ན་སྒོ་བ་དེའི་གན་དུ་སོང་སྟེ་དེད་དཔོན་བྱི་དབྱིག་པ་སྒོ་ན་སྡོད་ཅིང་མཆིས་སོ་ཞེས་བརྗོད་པ་དང་། ཚོང་དཔོན་གྱིས་སྨྲས་པ། དེད་དཔོན་བྱི་དབྱིག་པ་འཇུག་ཏུ་ཆུག་ཤིག །སུ་ཞིག་དེད་དཔོན་བྱི་དབྱིག་པ་ཟློག་པར་བྱེད། དེ་ནས་དེད་དཔོན་བྱི་དབྱིག་པ་ནང་དུ་ཞུགས་ནས་དེས་ཚོང་དཔོན་དེ་ལ་སྨྲས་པ། ཚོང་དཔོན་འདི་ནི་གཞི་ལགས། འདི་ནི་ཁེ་སྤོགས་ལགས་ཀྱིས་བཞེས་ཤིག །ཚོང་དཔོན་གྱིས་སྨྲས་པ། དེད་དཔོན་ཁོ་བོས་ཁྱོད་ལ་ཆུང་ཟད་ཀྱང་བྱིན་པར་མི་དྲན་ནོ། །དེད་དཔོན་གྱིས་སྨྲས་པ། བདག་གིས་ཁྱོད་དྲན་པར་བྱའོ་ཞེས་དེས་དྲན་པར་བྱས་པ་དང་། ཚོང་དཔོན་གྱིས་དྲིས་པ། ཁྱོད་སུའི་བུ་ཡིན། ཁྱིམ་བདག་ཆེ་གེ་མོ་ཞིག་གིའོ། །ཚོང་དཔོན་གྱིས་སྨྲས་པ། འོ་ན་ཁྱོད་ཁོ་བོའི་ཆུང་པོ་གྲོགས་ཀྱི་བུ་ཡིན་ཏེ། ཁྱོད་ཀྱི་ཕ་འགྲོ་བ་ན་ཁོ་བོའི་ལག་ཏུ་ཀཱར་ཥཱ་པ་ཎ་མང་པོ་དག་གཏམས་པས་ཁོ་བོ་ཉིད་ཀྱིས་ཁྱོད་ལ་སྦྱིན་པར་བྱ་བ་ཡིན་ནོ་ཞེས་ཚོང་དཔོན་དེས་གསེར་གྱི་རིལ་བ་
ཆུས་བཀང་བའི་མཆོད་ཡོན་གྱིས་བསུ་ནས་བུ་མོ་ཐུ་མོ་རྒྱན་ཐམས་ཅད་ཀྱིས་བརྒྱན་ཏེ་དེད་དཔོན་བྱི་དབྱིག་པའི་ཆུང་མར་བྱིན་ནོ། །དགེ་སློང་དག་དེའི་ཚེ་དེའི་དུས་ན་ཚོང་དཔོན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་དེད་དཔོན་བྱི་དབྱིག་པ་གང་ཡིན་པ་དེ་ནི་ལམ་པ་འདི་ཡིན་ཏེ། དེའི་ཚེ་ཡང་ངས་འདི་ལ་གདམས་ངག་ཅུང་ཞིག་གིས་གཏམས་པས་དབང་ཕྱུག་གི་བདག་པོ་ཆེན་པོ་ལ་བཞག་པར་གྱུར་ལ། ད་ལྟར་ཡང་ངས་འདི་ལ་གདམས་ངག་ཅུང་ཞིག་གིས་གཏམས་པས་འཁོར་བའི་དགོན་པ་ནས་ཕྱུང་སྟེ་ཤིན་ཏུ་མཐར་ཐུག་པ་གྲུབ་པ་དང་བདེ་བ་བླ་ན་མེད་པའི་མྱ་ངན་ལས་འདས་པ་ལ་བཞག་གོ །། །འདུལ་བ་རྣམ་པར་འབྱེད་པ། བམ་པོ་བཞི་བཅུ་རྩ་བརྒྱད་པ། སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ལམ་པས་ལས་ཅི་ཞིག་བགྱིས་ན་ལས་དེའི་རྣམ་པར་སྨིན་པས་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་རིགས་ཀྱི་བུ་ལམ་པ་ཉིད་ཀྱིས་ལས་ཚོགས་རྙེད་པ་རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བརའགྱུར་བ་དག་བྱས་ཤིང་བསགས་པས་ལམ་པ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་འདས་པའི་དུས་ན་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་། ཞབས་སུ་ལྡན་པ། བདེ་
བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་གི་འཁོར་ཉི་ཁྲི་དང་བཱ་རཱ་ཎ་སཱི་ན་ཉེ་བར་བརྟེན་ཅིང་བཞུགས་སོ། །དེའི་གསུང་རབ་ལ་ལམ་པ་འདི་དགེ་སློང་སྡེ་སྣོད་གསུམ་པར་གྱུར་ཏེ། དེས་ཆོས་ཀྱི་སེར་སྣས་འགའ་ལ་ཡང་ཚིག་བཞི་པའི་ཚིགས་སུ་བཅད་པ་ཡང་མ་བསྟན་ཏོ། །ཡང་རི་བྲགས་ཤིག་ན་ཕག་འཚོང་ཞིག་འདུག་སྟེ། ཆུ་ཀླུང་གི་ཕ་རོལ་དང་ཚུ་རོལ་གྱི་རི་བྲགས་དེར་དུས་སྟོན་བྱུང་ནས་ཕག་འཚོང་དེས་བསམས་པ། གལ་ཏེ་ཕག་དག་གསད་དུ་ནི་ཤ་དེ་སྙེད་ཉོ་བར་མི་འགྱུར་བས་གསོན་པོ་ཉིད་དུ་བཀུར་བར་བྱ་ཞིང་དེར་ཕྲལ་ལ་བསད་ཅིང་བསད་ཅིང་བཙོང་བར་བྱའོ་སྙམ་ནས་དེས་ཕག་མོང་པོ་དག་གཅིག་ལ་གཅིག་སྦྲེལ་ཏེ་གྲུར་བཙུད་ནས་འཕགས་པ་དང་། དེ་དག་གིས་གྲུ་དེ་སྐྱོད་པ་ན་བུབ་པར་གྱུར་ནས་དེ་དག་དེར་ཚུལ་མ་ཡིན་པས་སྡུག་བསྔལ་བར་གྱུར་ཏོ། །ཕག་འཚོང་དེ་ཡང་རྒྱུན་ཕྱོགས་སུ་ཁྱེར་བ་ན་ཆུ་ཀླུང་དེའི་འགྲམ་ན་རང་སངས་རྒྱས་ལྔ་བརྒྱ་ཙམ་འཁོད་ནས། དེ་དག་ལས་རང་སངས་རྒྱས་གཅིག་ཅིག་ཆུའི་དོན་དུ་ཆུ་འགྲམ་དུ་སོང་བ་དང་། དེས་དེ་མཐོང་ནས་དེས་བསམས་པ། ཅི་འདི་རེ་ཞིག་ཤི་བ་ཡིན་ནམ། འོན་ཏེ་གསོན་པ་ཡིན་སྙམ་ནས་དེས་གླང་པོ་ཆེའི་སྣ་འདྲ་བའི་ལག་པ་བརྐྱང་སྟེ་དེ་ཕྱུང་ནས་བྱེ་མ་བདལ་ཏེ་དེར་ཁ་སྦུབ་ཏུ་བཞག་ནས་སོང་ངོ་། །དེའི་རྒྱུན་ཐམས་ཅད་ནས་ཆུ་ཟགས་ནས་དེས་འདུ་ཤེས་ཕྱིར་རྙེད་དེ་ལངས་པ་དང་། མིའི་རྗེས་མཐོང་ནས་དེ་དེའི་རྗེས་བཞིན་དུ་སོང་བ་དང་། ཇི་ཙམ་ན་རང་སངས་རྒྱས་ལྔ་བརྒྱ་མཐོང་ནས་དེས་དེ་དག་ལ་ལོ་མ་དང་། འབྲས་བུ་དང་། སོ་ཤིང་གིས་བསྙེན་བཀུར་བྱ་བར་བརྩམས་པ་དང་། དེ་དག་གིས་དེ་ལ་ལྷུང་བཟེད་ཀྱི་ལྷག་མ་བྱིན་ནོ། །གང་གི་ཚེ་རང་སངས་རྒྱས་དེ་དག་སྐྱིལ་མོ་ཀྲུང་བཅས་ཏེ་བསམ་གཏན་བྱེད་པ་དེའི་ཚེ་ན་དེ་ཡང་མཐའ་གཅིག་ཏུ་འདུག་ནས་སྐྱིལ་མོ་ཀྲུང་བཅས་ཏེ་བསམ་གཏན་བྱེད་དོ། །དེས་དེར་འདུ་ཤེས་མེད་པའི་སྙོམས་པར་འཇུག་པ་བསྐྱེད་ནས་འདུ་ཤེས་མེད་པའི་སེམས་ཅན་ལྷ་རྣམས་ཀྱི་ནང་དུ་སྐྱེས་སོ། །དགེ་སློང་དག་
དེའི་ཚེ་དེའི་དུས་ན་ཡང་དག་པར་རྫོགས་པའི་སངས་རྒྱས་འོད་སྲུང་གི་གསུང་རབ་ལ་དགེ་སློང་སྡེ་སྣོད་གསུམ་དང་ལྡན་པར་གྱུར་པ་གང་ཡིན་པ་དང་། ཕག་འཚོང་དུ་གྱུར་པ་གང་ཡིན་པ་དེ་ནི་དགེ་སློང་ལམ་པ་འདི་ཡིན་ཏེ། འདིས་ཆོས་ཀྱི་སེར་སྣས་འགའ་ལ་ཡང་ཚིག་བཞི་པའི་ཚིགས་སུ་བཅད་པ་ཡང་མ་བསྟན་པ་གང་ཡིན་པ་དང་། ཕག་དག་བསད་པ་གང་ཡིན་པ་དང་། འདུ་ཤེས་མེད་པའི་སེམས་ཅན་རྣམས་ཀྱི་ནང་ནས་འདིར་སྐྱེས་པ་གང་ཡིན་པའི་ལས་དེའི་རྣམ་པར་སྨིན་པས་བུལ་བ། མཆོག་ཏུ་བུལ་བ། ཆུང་བ་མཆོག་ཏུ་ཆུང་བར་གྱུར་ཏོ། །དགེ་སློང་དག་དེ་ལྟར་ན་གདམས་ངག་མེད་པ་ལ་ཉེས་དམིགས་འདི་དང་གཞན་དག་ཀྱང་ཡོད་དེ་དེ་ལྟ་བས་ན་དགེ་སློང་གིས་གདམས་ངག་མེད་པར་བསམ་གཏན་མི་བྱའོ། །བསམ་གཏན་བྱེད་ན་འགལ་ཚབས་ཅན་དུ་འགྱུར་རོ། །དེ་ནས་བཅོམ་ལྡན་འདས་མཉན་ཡོད་དུ་ཅི་དགྱེས་པར་བཞུགས་ནས་རྒྱལ་པོའི་ཁབ་ག་ལ་བ་དེར་གཤེགས་ཏེ་མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྒྱལ་པོའི་ཁབ་ན་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཞེས་ཐོས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་འཚོ་བྱེད་གཞོན་ནུས་གསོས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུད་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མས་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་འཇུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་འཚོ་བྱེད་གཞོན་ནུས་གསོས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས། བཅོམ་ལྡན་
འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སང་བདག་གི་སྡུམ་པར་དགེ་སློང་གི་དགེ་འདུན་དང་ཐབས་ཅིག་ཏུ་གདུགས་ཚོད་གསོལ་བར་ཅི་གནང་། སངས་རྒྱས་བཅོམ་ལྡན་འདས་རྣམས་ནི་བསྙེན་པར་དཀའ་བ་དང་། བཟོད་པར་དཀའ་བ་ཡིན་པས་འཚོ་བྱེད་གཞོན་ནུས་གསོས་ཀྱིས་སངས་རྒྱས་བཅོམ་ལྡན་འདས་ལ་བཙུན་པ་ལམ་པ་མ་གཏོགས་སོ་ཞེས་གསོལ་མ་ནུས་སོ། །བཅོམ་ལྡན་འདས་ཀྱིས་ཅང་མི་གསུང་བས་འཚོ་བྱེད་གཞོན་ནུས་གསོས་ལ་གནང་ངོ་། །དེ་ནས་འཚོ་བྱེད་གཞོན་ནུས་གསོས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་། རྗེས་སུ་ཡི་རང་བ་བྱས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ནས། ཚེ་དང་ལྡན་པ་ཀུན་དགའ་བོ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་འཚོ་བྱེད་གཞོན་ནུས་གསོས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །བཙུན་པ་ཀུན་དགའ་བོ་མཁྱེན་པར་མཛོད་ཅིག །བདག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་བདག་གི་སྡུམ་པར་གདུགས་ཚོད་ལ་སྤྱན་དྲངས་ཏེ་བཙུན་པ་ལམ་པ་ནི་མ་གཏོགས་སོ། །འཚོ་བྱེད་ཁྱོད་ཀྱི་དགེ་བའི་ཆོས་རྣམས་ཇི་ལྟར་འཕེལ་བར་གྱུར་ཅིག །དེ་ནས་འཚོ་བྱེད་གཞོན་ནུས་གསོས་ཀྱིས་ཚེ་དང་ལྡན་པ་ཀུན་དགའ་བོས་སྨྲས་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་ཚེ་དང་ལྡན་པ་ཀུན་དགའ་བོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ངོ་། །དེ་ནས་ཚེ་དང་ལྡན་པ་ཀུན་དགའ་བོས་འཚོ་བྱེད་གཞོན་ནུས་གསོས་སོང་ནས་རིང་པོ་མ་ལོན་པར་རིག་ནས། ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ལམ་པ་མཁྱེན་པར་མཛོད་ཅིག །འཚོ་བྱེད་གཞོན་ནུས་གསོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་
འདུན་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཏེ་ཚེ་དང་ལྡན་པ་ལམ་པ་གཅིག་པུ་མ་གཏོགས་སོ། །བཙུན་པ་ཀུན་དགའ་བོ་དེའི་དགེ་བའི་ཆོས་རྣམས་ཇི་ལྟར་འཕེལ་བར་གྱུར་ཅིག །དེ་ནས་འཚོ་བྱེད་གཞོན་ནུས་གསོས་ཀྱིས་དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་གོན་བྱས་ནས་ནང་པར་སྔར་ལངས་ཏེ་གདན་དག་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་འཚོ་བྱེད་གཞོན་ནུས་གསོས་ཀྱི་བཀད་ས་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ལམ་པའི་བྱུག་རིས་ཞོག་ཤིག་འཚོ་བྱེད་གཞོན་ནུས་གསོས་ཀྱི་གསེར་གྱི་རིལ་བ་བྷྲཱིང་ག་ར་ཐོགས་ཏེ་རྒན་པའི་མཐའ་ལོགས་སུ་བསྡད་པ་དང་བཅོམ་ལྡན་འདས་ཀྱིས་ཆབ་ཀྱི་རྒྱུན་མ་བཞེས་སོ། །འཚོ་བྱེད་གཞོན་ནུས་གསོས་ཀྱིས་གསོལ་བ། ཅིའི་སླད་དུ་བཅོམ་ལྡན་འདས་ཆབ་ཀྱི་རྒྱུན་བཞེས་པར་མི་མཛད། བཅོམ་ལྡན་འདས་ཀྱིས་བཀའ་སྩལ་པ། ད་དུང་དགེ་སློང་གི་དགེ་འདུན་མ་འཚོགས་སོ། །འཚོ་བྱེད་གཞོན་ནུས་གསོས་ཀྱིས་གསོལ་པ། བཅོམ་ལྡན་འདས་གང་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ལམ་པའོ། །འཚོ་བྱེད་གཞོན་ནུས་གསོས་ཀྱིས་གསོལ་པ། བཅོམ་ལྡན་འདས་དེ་བདག་གིས་གཡར་མ་དྲངས་སོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་འཚོ་བྱེད་ཁྱོད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་མ་དྲངས་སམ། བཅོམ་ལྡན་འདས་སྤྱན་དྲངས་སོ། །འོ་ན་ཅི་ལམ་པ་དགེ་འདུན་ལས་ཕྱི་རོལ་དུ་གྱུར་པ་ཡིན་ནམ། བཅོམ་ལྡན་འདས་མ་ལགས་སོ། །སོང་ལ་དེ་བོས་
ཤིག་འཚོ་བྱེད་གཞོན་ནུས་གསོས་ཀྱིས་བསམས་པ་འདི་ལྟར་བདག་གིས་བཅོམ་ལྡན་འདས་ཀྱི་བཀས་བོད་པར་ནི་བྱ་མོད་ཀྱི་དེ་ལ་གུས་པར་བྱས་ཏེ་བྲིམ་པར་ནི་མི་བྱའོ་སྙམ་ནས་དེས་མངག་པ་བཏང་སྟེ་སོང་ལ་དེ་བོས་ཤིག་ཅེས་བསྒོའོ། །ཚེ་དང་ལྡན་པ་ལམ་པ་ཡང་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་དགེ་སློང་སྟོང་ཉིས་བརྒྱ་ལྔ་བཅུ་སྤྲུལ་ཏེ་འདུག་གོ །མངག་པ་དེ་སོང་སྟེ་ལམ་པ་ལམ་པ་ཞེས་བོས་པ་དང་། དགེ་སློང་དུ་མ་དག་གིས་ཨང་ཞེས་ལན་བཏབ་བོ། །མི་དེ་འོངས་ཏེ་འཚོ་བྱེད་གཞོན་ནུས་གསོས་ལ་སྨྲས་པ། བདག་དེར་མཆིས་ཏེ་ལམ་པ་ལམ་པ་ཞེས་བོས་ན་འོད་མའི་ཚལ་ཀ་ལན་ད་ཀའི་གནས་ན་སྔར་དགེ་སློང་དག་གིས་གང་ཞིང་འཁོད་པ་དེ་ཁོ་ན་བཞིན་དུ་དགེ་སློང་དག་གིས་གང་ཞིང་འཁོད་ནས་དགེ་སློང་དུ་མ་དག་གིས་ཨང་ཞེས་ལན་བཏབ་ན་དེ་དག་ལས་གང་བོད། འཚོ་བྱེད་གཞོན་ནུས་གསོས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སོང་ཤིག་སོང་ལ་ལམ་པ་ཡང་དག་པ་གང་ཡིན་པ་དེ་ཤོག་ཤིག་ཅེས་གྱིས་ཤིག །དེ་སོང་སྟེ་སྨྲས་པ། ལམ་པ་ཡང་དག་པ་གང་ལགས་པ་དེ་གཤེགས་སུ་གསོལ། དེ་ནས་ཚེ་དང་ལྡན་པ་ལམ་པས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས་དེར་སོང་སྟེ་རང་གི་བྱུག་རིས་སུ་འདུག་པ་དང་། འཚོ་བྱེད་གཞོན་ནུས་གསོས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བྲིམ་པར་བརྩམས་ནས་ཚེ་དང་ལྡན་པ་ལམ་པ་ལ་གུས་པར་མ་བྱས་པར་བྲིམས་སོ། །བཅོམ་ལྡན་འདས་ཀྱིས་དགོངས་པ། ཉན་ཐོས་ཆེན་པོ་རི་རབ་དང་འདྲ་བ་ལ་འཚོ་བྱེད་གཞོན་ནུས་གསོས་ཀྱིས་སྨྲས་པ་ལེན་པར་བྱེད་ཀྱིས། འདིའི་ཡོན་ཏན་བསྒྲག་པར་བྱའོ་སྙམ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་ལྷུང་བཟེད་ལེན་པ་ཡིན་ན་བཅོམ་ལྡན་འདས་ཀྱིས་དེ་ལ་མ་སྩལ་ཏོ། །ཆོས་ཉིད་ཀྱིས་ན་ཇི་སྲིད་དུ་བཅོམ་ལྡན་འདས་ཀྱིས་ལྷུང་བཟེད་བླང་བར་མ་གྱུར་གྱི་བར་དུ་དགེ་སློང་གནས་བརྟན་གནས་བརྟན་དག་གི་ལྷུང་བཟེད་དག་ལེན་པར་མི་བྱེད་དོ། །ཚེ་དང་ལྡན་པ་ལམ་པས་བསམས་པ། ཅིའི་ཕྱིར་བཅོམ་ལྡན་འདས་དང་
དགེ་སློང་གནས་བརྟན་གནས་བརྟན་དག་གིས་ལྷུང་བཟེད་དག་ལེན་པར་མི་བྱེད་སྙམ་ན། བདག་ཉིད་ཀྱི་ཡོན་ཏན་བསྒྲག་པའི་ཕྱིར་རོ་སྙམ་དུ་རིག་ནས་སྟོན་པའི་ཐུགས་ལ་དགོངས་པ་ཡོངས་སུ་རྫོགས་པར་བྱའོ་སྙམ་ནས། ཚེ་དང་ལྡན་པ་ལམ་པས་སྟན་ཕྱེད་ལས་འཕགས་པར་བྱས་ཏེ། གླང་པོ་ཆེའི་སྣ་ལྟ་བུའི་ལག་པ་བརྐྱང་ནས་བཅོམ་ལྡན་འདས་ཀྱི་ལྷུང་བཟེད་བླངས་པ་དང་། འཚོ་བྱེད་གཞོན་ནུས་གསོས་རྒན་པའི་མཐའ་ལོགས་ན་འདུག་པས་མཐོང་ནས་དེས་བསམས་པ། རྫུ་འཕྲུལ་གྱི་ཆོ་འཕྲུལ་རྣམ་པར་སྟོན་པ་འདི་གནས་བརྟན་གང་ཡིན་སྙམ་ནས་དེ་ལྷུང་བཟེད་ཀྱི་རྗེས་བཞིན་སོང་བ་དང་། ཅི་ཙམ་ན་ཚེ་དང་ལྡན་པ་ལམ་པ་ཡིན་པར་མཐོང་ངོ་། །མཐོང་ནས་དེ་བརྒྱལ་ཏེ་ས་ལ་བསྒྱེལ་བ་དང་། ཆུས་གདབ་པས་སྲོག་ཕྱིར་ལོན་ནས་ཚེ་དང་ལྡན་པ་ལམ་པའི་རྐང་པ་གཉིས་ལ་གཏུགས་ཏེ་བཟོད་པ་གསོལ་ཅིང་ཚིགས་སུ་བཅད་པས་སྨྲས་པ། ཙན་དན་རྟག་ཏུ་བསིལ་ངད་ཡོན་ཏན་ལྡན། །ཨུཏྤལ་རྟག་ཏུ་དྲི་བདའ་དྲི་མེད་གསར། །རྟག་གསལ་དག་པའི་བཻ་ཌཱརྱ་འོད་བཞིན། །བྱིས་པའི་སྐྱེ་བོའི་སྡིག་པ་རྟག་ཏུ་ནི། །མཚུངས་མེད་གོར་མའི་རི་མོ་རྟག་པ་བཞིན། །འཕགས་པའི་སྐྱེ་བོ་རྟག་ཏུ་ཐུགས་རྗེ་མངའ། །དགྲ་བཅོམ་དག་གི་བཟོད་པ་བརྟན་པ་ལགས། །ཚེ་དང་ལྡན་པ་ལམ་པས་སྨྲས་པ། འཚོ་བྱེད་བཟོད་དོ། །བཅོམ་ལྡན་འདས་ཀྱིས་ཡོན་བཤད་པ་མཛད་ནས་གདན་ལས་བཞེངས་ཏེ་གཤེགས་སོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་འཚོ་བྱེད་གཞོན་ནུས་གསོས་ཀྱིས་གང་གི་ཚེ་ཚེ་དང་ལྡན་པ་ལམ་པའི་ཡོན་ཏན་དག་མངོན་པར་མ་འཚལ་བ་དེའི་ཚེ་ན་གུས་པ་མ་ལགས་པ་ལ་བརྩོན་ཞིང་། གང་གི་ཚེ་ཡོན་ཏན་དག་མངོན་པར་འཚལ་བ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་བགྱིད་པ་ལ་གཟིགས། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་དེས་གང་གི་ཚེ་འདིའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་གུས་པ་མ་ཡིན་པ་ལ་བརྩོན་ཞིང་གང་གི་ཚེ་ཡོན་ཏན་དག་མངོན་པར་ཤེས་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་གྱུར་ཏེ་དེ་ཉོན་ཅིག །དགེ་སློང་དག་སྔོན་བྱུང་
བ་འདས་པའི་དུས་ན་བྱང་ལམ་ནས་དེད་དཔོན་ཞིག་གིས་ཟོང་རྟ་ལྔ་བརྒྱ་བདས་ཏེ་ཡུལ་དབུས་སུ་ཕྱིན་ཏོ། །དེའི་རྒོད་མའི་མངལ་དུ་རྟ་ཅང་ཤེས་ཞུགས་ནས་དེ་གང་གི་ཉི་མ་ལ་ཞུགས་པ་དེ་ཉིད་ཀྱི་ཉི་མ་ནས་བཟུང་སྟེ་རྟ་དེ་དག་ཕྱིན་ཆད་སྐད་འབྱིན་པར་མི་བྱེད་ནས་དེད་དཔོན་གྱིས་བསམས་པ། བདག་གི་རྟ་རྣམས་ལ་ནད་འགའ་ཞིག་བྱུང་ངམ། ཅི་ན་དེས་རྟ་འདི་དག་སྐད་འབྱིན་པར་མི་བྱེད་སྙམ་མོ། །དུས་གཞན་ཞིག་ན་རྒོད་མ་དེ་འབྲངས་པ་ལས་རྟེའུ་ཕོ་ཞིག་བྱུང་ནས་དེ་གང་གི་ཉི་མ་ལ་བྱུང་བ་དེ་ཉིད་ཀྱི་ཉི་མ་ནས་བཟུང་སྟེ་རྟ་དེ་དག་ཕྱིན་ཆད་སྣ་སྒྲ་འབྱིན་པར་ཡང་མི་བརྩོན་ནས་དེད་དཔོན་གྱིས་བསམས་པ། རྟེའུ་སེམས་ཅན་སྐལ་ཆད་འདི་བྱུང་བས་འདིའི་ཉེས་པས་བདག་གི་རྟ་རྣམས་ལ་ནད་བྱུང་བར་གྱུར་ཏོ་སྙམ་ནས་དེས་རྒོད་མ་དེ་རྟག་ཏུ་ཞོན་ཞིང་དེ་ལ་རྩྭ་དང་ཆས་ཀྱང་སྦྱིན་པར་མི་བྱེད་དོ། །དེ་མཐར་གྱིས་མཆོད་གྱུར་ཅེས་བྱ་བའི་གནས་སུ་ཕྱིན་པ་དང་། དེར་དེ་དབྱར་གྱི་ནམ་ལ་བབ་ནས་དེས་བསམས་པ། གལ་ཏེ་ང་སོང་བར་གྱུར་ན་རྟ་རྣམས་ཀྱི་རྨིག་པ་འདྲུལ་བར་འགྱུར་བས་ཟོང་དུ་མི་རུང་བར་འགྱུར་གྱིས་དབྱར་གྱི་ནམ་ལ་འདི་ཉིད་དུ་འདུག་པར་བྱའོ་སྙམ་ནས་དེ་དབྱར་གྱི་ནམ་ལ་དེ་ཉིད་དུ་འདུག་པ་དང་། དེ་ན་གནས་པའི་བཟོ་བོ་དག་གིས་དེ་ལ་རང་རང་གི་བཟོ་དག་གིས་བསྙེན་བཀུར་བྱས་སོ། །དེ་འགྲོ་བའི་དུས་ཀྱི་ཚེ་བཟོ་བོ་དག་ལྷགས་པ་དང་། དེས་དེ་དག་ལ་བགོ་བཤའ་དག་བྱས་སོ། །དེ་ན་རྫ་མཁན་གཅིག་ཅིག་འདུག་པ་དེས་ཀྱང་དེ་ལ་བཟོས་བསྙེན་བཀུར་བྱས་པས་དེ་ལ་ཆུང་མས་སྨྲས་པ། རྗེའི་སྲས་དེད་དཔོན་དེ་མཆིས་བཞུད་ལ་ཅུང་ཞིག་སློངས་ཤིག །རྫ་མཁན་དེས་དེད་དཔོན་འཕགས་པའི་མདུན་དུ་འཇིམ་པའི་གོང་བུ་ཐོགས་ཏེ་བསྡད་པ་དང་། དེད་དཔོན་དེས་དེ་མཐོང་ནས་དེ་ལ་སྨྲས་པ། ཀྭའི་ནང་རྗེ་ཁྱོད་ཧ་ཅང་འཕྱིས་ཏེ་འོངས་པས་ངའི་ཕན་ཐམས་ཅད་བྱས་སོ། །དེད་དཔོན་དེ་རྟེའུ་དེ་ལ་བཀྲ་མི་ཤིས་པའི་བློ་སྐྱེས་པས་དེད་དཔོན་དེས་རྫ་མཁན་དེ་ལ་སྨྲས་པ། འདི་ལྟར་ཁོ་བོ་ལ་རྟེའུ་གཅིག་ཅིག་ཡོད་ཀྱི་གལ་ཏེ་འདོད་ན་ཁྲིད་དེ་སོང་ཤིག །རྫ་མཁན་གྱིས་སྨྲས་པ། མ་ནོངས་སོ། །བདག་ནི་རྫ་མ་བགྱིད་པར་འགྱུར་ལ། འདིས་ཀྱང་གཅོག་པར་འགྱུར་རོ། །དེ་ནས་རྟེའུ་དེས་རྫ་མཁན་དེའི་
རྐང་པ་གཉིས་ལ་ལྕེས་བལྡག་པར་བརྩམས་པ་དང་། རྫ་མཁན་དེ་རྟེའུ་དེ་ལ་རྗེས་སུ་ཆགས་པ་སྐྱེས་ནས་དེས་དེ་ཁྲིད་དེ་ཁྱིམ་དུ་སོང་ངོ་། །དེ་ལ་ཆུང་མས་སྨྲས་པ། རྗེའི་སྲས་ཁྱོད་ཀྱིས་དེ་ལས་ཅུང་ཟད་ཐོབ་བམ། རྟེའུ་འདི་ཐོབ་བོ། །མ་ནོངས་སོ། །ཁྱོད་ནི་རྫ་མ་བྱེད་པར་འགྱུར་ལ་འདིས་ཀྱང་གཅོག་པར་འགྱུར་རོ། །རྟེའུ་དེ་ཆུང་མའི་རྐང་པ་གཉིས་ལ་ཡང་ལྕེས་བལྡག་པར་བརྩམས་པ་དང་། ཆུང་མ་དེ་ཡང་རྟེའུ་དེ་ལ་རྗེས་སུ་ཆགས་པ་སྐྱེས་སོ། །རྟེའུ་དེ་རྫ་མ་སོ་བཏང་བ་དང་མ་བཏང་བ་དག་གི་ནང་དུ་འགྲོ་བ་ན་རྫ་མ་འགའ་ཡང་མི་གཅོག་ནས་རྫ་མཁན་དེས་ཆུང་མ་ལ་སྨྲས་པ། རྟེའུ་བཟང་པོ་ཞིག་སྟེ་ཤེས་བཞིན་དུ་འགྲོ་བར་བྱེད་དོ། །དུས་གཞན་ཞིག་ན་རྫ་མཁན་དེ་སྒྲོ་བ་ཐོགས་ཏེ་ས་ལེན་དུ་སོང་བ་དང་། རྟེའུ་དེ་ཡང་དེའི་ཕྱི་བཞིན་ཐོག་ཐག་འབྲང་ཞིང་འོངས་སོ། །རྫ་མཁན་དེས་སས་སྒྲོ་བ་བཀང་བ་དང་། རྟེའུ་དེས་རྒྱབ་བཟེད་ནས། རྫ་མཁན་དེས་སའི་སྒྲོ་བ་དེ་རྟེའུ་དེའི་རྒྱབ་ཏུ་བཀལ་ནས་དེས་དེ་ཁྲིད་དེ་ཁྱིམ་དུ་འོངས་ནས་རྫ་མཁན་དེས་ཆུང་མ་ལ་སྨྲས་པ། བཟང་མོ་རྟེའུ་བཟང་པོ་ཞིག་སྟེ། ཁོ་བོས་ཕྱིན་ཆད་ས་བསྐུར་དགོས་པར་མི་འགྱུར་རོ། །ཁོ་བོས་དེར་ས་དགལ་བར་བྱས་ཁྱོད་ཀྱིས་འདིར་ཕོག་ཤིག་ཆུང་མ་དེ་ལེགས་སོ་ཞེས་རྟེའུ་དེ་ལ་ཕུབ་མ་དང་སྲན་ཕུབ་དག་བྱིན་ནོ། །དེའི་ཚེ་ན་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང། འཁྲུག་ལོང་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ་ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །དེའི་རྟ་ཅང་ཤེས་དུས་ལ་བབ་ནས་ཉི་འོག་གི་རྒྱལ་པོ་རྣམས་ཀྱིས་རྒྱལ་པོ་ཚངས་བྱིན་གྱི་རྟ་ཅང་ཤེས་དུས་ལ་བབ་པོ་ཞེས་ཐོས་པ་དང་། དེ་དག་གིས་དེ་ལ་ཡང་ན་ནི་སྒྱུ་དཔྱ་འཇོལ་ཅིག་ཡང་ན་ནི་བཱ་རཱ་ཎ་སཱིའི་ཕྱི་རོལ་གྱི་སྐྱེད་མོས་ཚལ་དུ་མ་བྱུང་ཤིག །དེ་ལྟ་མི་བྱེད་ན་གཉའ་བ་ནས་བཏགས་ཏེ་བཀྲིའོ་ཞེས་ཕྲིན་སྤྲིང་ངོ་། །རྒྱལ་པོ་ཚངས་བྱིན་དེ་དག་ལ་སྒྱུ་དཔྱ་འཇལ་བར་ཡང་མི་བྱེད། འཇིགས་པས་
ཕྱི་རོལ་གྱི་སྐྱེད་མོས་ཚལ་དུ་ཡང་འབྱུང་བར་མི་བྱེད་ཅིང་འདུག་གོ །དེད་དཔོན་དེ་ཡང་མཐར་གྱིས་བཱ་རཱ་ཎ་སཱིར་ཕྱིན་པ་དང་། རྒྱལ་པོ་ཚངས་བྱིན་གྱིས་བྱང་ལམ་ནས་དེད་དཔོན་ཞིག་གིས་ཟོང་རྟ་ལྔ་བརྒྱ་དེད་དེ་བཱ་རཱ་ཎ་སཱིར་ཕྱིན་ཅེས་ཐོས་ནས་དེས་བློན་པོ་རྣམས་ལ་སྨྲས་པ། ཤེས་ལྡན་དག་ངས་ཡུན་ཇི་སྲིད་ཅིག་ཏུ་འདིར་ཞུགས་ཏེ་འདུག་པར་བྱ། དེང་ལ་རྟ་ཅང་ཤེས་ཚོལ་ཅིག། དེ་དག་དེད་དཔོན་དེའི་གན་དུ་དོང་སྟེ་དེ་དག་གིས་རྟ་དེ་དག་མཐོང་ནས་གཅིག་ལ་གཅིག་སྨྲས་པ། ཤེས་ལྡན་དག་རྟ་འདི་དག་ནི་རྟ་ཅང་ཤེས་ཀྱིས་བཏུལ་བ་ཤ་སྟག་ཡིན་ན་འདི་ན་རྟ་ཅང་ཤེས་ནི་འགའ་ཡང་མི་སྣང་ངོ་། །དེ་དག་གིས་རྒོད་མ་དེ་མཐོང་ནས་སྨྲས་པ། ཤེས་ལྡན་དག་རྒོད་མ་འདི་ལས་རྟ་ཅང་ཤེས་འབྲངས་ན་དེ་ནི་མི་སྣང་ངོ་། །དེ་དག་དེད་དཔོན་གྱི་གན་དུ་སོང་སྟེ་དྲིས་པ། དེད་དཔོན་ཁྱོད་ཀྱིས་རྟ་འགའ་ཞིག་བཙོངས་པའམ། གཞན་ལ་བྱིན་པ་ཡོད་དམ། དེད་དཔོན་གྱིས་སྨྲས་པ། བཙོངས་པ་ནི་འགའ་ཡང་མེད་དེ། འདི་ལྟར་ཁོ་བོས་མཆོད་གྱུར་གྱི་གནས་སུ་རྟེའུ་ཞིག་བཀྲ་མི་ཤིས་སོ་སྙམ་ནས་རྫ་མཁན་ཞིག་ལ་བྱིན་པ་ནི་ཡོད་དོ། །དེ་དག་གིས་གཅིག་ལ་གཅིག་སྨྲས་པ། ཤེས་ལྡན་དག་དེད་དཔོན་འདི་ནི་བླུན་པོ་ཞིག་ཡིན་ཏེ། སྙིང་པོ་གང་ཡིན་པ་བོར་ནས་སྙིགས་མ་དག་དེད་དེ་འདིར་འོངས་སོ། །དེ་དག་གིས་རྒྱལ་པོ་ལ་ཞུས་ཏེ་མཆོད་གྱུར་དུ་དོང་ནས་དེ་དག་རྫ་མཁན་དེའི་དྲུང་དུ་དོང་སྟེ་དྲིས་པ། ཁྱོད་ལ་རྟེའུ་འདིས་ཅི་བྱ། རྫ་མཁན་གྱིས་སྨྲས་པ། འདི་ཁོ་བོའི་ས་དགལ་ལོ། །དེ་དག་གིས་སྨྲས་པ། ཁོ་བོ་ཅག་གིས་ཁྱོད་ལ་བོང་བུ་སྦྱིན་གྱིས་ཁྱོད་ཀྱིས་ཁོ་བོ་ཅག་ལ་འདི་བྱིན་ཅིག། རྫ་མཁན་གྱིས་སྨྲས་པ། ཁོ་བོ་ལ་འདི་ཉིད་མཁོའོ། །དེ་དག་གིས་སྨྲས་པ། གླང་བཞི་དང་ལྡན་པའི་ཤིང་རྟ་སྦྱིན་ནོ། །རྫ་མཁན་གྱིས་སྨྲས་པ། ཁོ་བོ་ལ་འདི་ཉིད་མཁོའོ། །དེ་དག་གིས་སྨྲས་པ། ཁྱོད་དེང་གྲོས་གྱིས་ཤིག་དང་ཁོ་བོ་ཅག་སང་ཡང་འོང་ངོ་ཞེས་ཟེར་ཏེ་དོང་ངོ་། །ཆོས་ཉིད་ཀྱིས་ན་འཇིག་རྟེན་གནས་པ་ཆགས་ནས་རིང་པོ་མ་ལོན་པའི་ཚེ་ན་དུད་འགྲོ་དག་ཀྱང་སྨྲ་ཤེས་པ་ཡིན་པས་རྟེའུ་དེས་རྫ་མཁན་དེ་ལ་སྨྲས་པ། དེ་དག་ཅི་འདོད། ཁྱོད་འདོད་དོ། །ཅིའི་ཕྱིར་སྦྱིན་པར་མི་བྱེད། ཅི་ཁྱོད་ཀྱི་སྙིང་
ལམ་ན་ཁོ་བོ་ཇི་སྲིད་འཚོའི་བར་དུ་ཁྱོད་ཀྱི་ས་ཁལ་བྱེད་ཅིང་ཕུབ་མ་དང་སྲན་ཕུབ་ཟ་སྙམ་མམ་ཁོ་བོས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་བཀུར་བར་བྱ་ཞིང་གསེར་གྱི་སྣོད་ནས་བཟང་ཆས་ཟིལ་དངར་གྱིས་བཅིན་པ་དག་བཟའ་བར་བྱ་དགོས་སོ། །དེ་དག་རྟེའུ་ཞེས་ཟེར་ན་དེ་དག་ལ་རྟ་ཅང་ཤེས་ཞེས་ཟེར་དུ་ངོ་ཚའམ་ཅི་ཞེས་བརྗོད་པར་བྱའོ། །གལ་ཏེ་རིན་གྱི་ཕྱིར་བྱིན་ཅིག་ཅེས་ཟེར་ན་དེ་དག་ལ་ཡང་ན་གསེར་འབུམ་བྱིན་ཅིག །ཡང་ན་འདིའི་བརླ་གཡས་པས་གསེར་ཇི་ཙམ་འདྲེན་ནུས་པ་དེ་ཙམ་བྱིན་ཅིག་ཅེས་བརྗོད་པར་བྱའོ། །ཕྱི་དེ་ཉིན་བར་དེ་དག་འོངས་ཏེ་རྫ་མཁན་ལ་དྲིས་པ། ཀྭའི་ནང་རྗེ་ཁྱོད་ཀྱིས་གྲོས་བྱས་སམ། གྲོས་བྱས་སོ། །འོ་ན་རྟེའུ་འདི་བྱིན་ཅིག་ཁྱེད་རྟ་ཅང་ཤེས་ཞེས་ཟེར་དུ་ངོ་ཚའམ་ཅི། དེ་དག་གིས་བསམས་པ། གླེན་པ་འདིས་འདི་རྟ་ཅང་ཤེས་ཡིན་ནམ་མ་ཡིན་ཅི་ཤེས་ཏེ། འདི་ལྟར་རྟ་འདི་ཉིད་བྱས་པ་གཟོ་བ་ཡིན་པས་འདི་ཉིད་ཀྱིས་འདི་ལ་སྨྲས་པར་གྱུར་གོར་མ་ཆག་སྙམ་ནས་དེ་དག་གིས་སྨྲས་པ། རྟ་ཅང་ཤེས་ཡིན་ཡང་རུང་། རྟེའུ་ཡིན་ཡང་རུང་གིས་རིན་གྱི་ཕྱིར་བྱིན་ཅིག །རྫ་མཁན་གྱིས་སྨྲས་པ། ཡང་ན་གསེར་འབུམ་བྱིན་ཅིག །ཡང་ན་འདིའི་བརླ་གཡས་པས་གསེར་ཇི་ཙམ་འདྲེན་ནུས་པ་དེ་ཙམ་བྱིན་ཅིག །དེ་དག་གིས་བསམས་པ། འདི་མཐུ་དང་ལྡན་པ་ཡིན་པས་ཆོས་མང་པོ་དག་འདྲེན་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ་སྙམ་ནས་སྨྲས་པ། གསེར་འབུམ་སྦྱིན་ནོ། །དེ་དག་གིས་རྒྱལ་པོ་ཚངས་སྦྱིན་ལ་གསེར་འབུམ་གྱིས་རྟ་ཅང་ཤེས་ཁུགས་སོ་ཞེས་སྤྲིང་པ་དང་། རྒྱལ་པོ་ཚངས་པས་བྱིན་གྱིས་དེ་དག་ལ་རིན་ཇི་ཙམ་གྱིས་ཁུག་པ་དེ་ཙམ་གྱིས་ལོང་ཤིག་ཅེས་སྤྲིང་ངོ་། །དེ་དག་གིས་གསེར་འབུམ་གྱིས་བླངས་ནས་དེ་དག་རྟ་ཅང་ཤེས་དེ་ཁྲིད་དེ་བཱ་རཱ་ཎ་སཱིར་ལྷགས་ནས་དེ་དག་གིས་དེ་རྟ་བྲེས་ཀྱི་དང་པོར་བཏགས་ཏེ་དེ་ལ་རྩྭ་དང་ཆས་བྱིན་ན་དེ་དེ་མི་ཟ་ནས་རྒྱལ་པོས་སྨྲས་པ། ཁྱེད་ཀྱི་རྟ་ཅང་ཤེས་ནད་པ་ཞིག་ཁྲིད་དེ་འོངས་སམ། ཅི་དེ་དག་གིས་སྨྲས་པ། འདི་བྲོ་འཚལ་བ་མ་ལགས་ཏེ། འདི་ལྟར་ཇེ་འདི་ལ་རྨའོ་ཞེས་དེ་ནས་འདུལ་སྦྱོང་བས་ཚིགས་སུ་བཅད་པ་སྨྲས་པ། མགྱོགས་འགྲོ་གང་ཚེ་རན་ཆས་ཆུ་མེད་པའི། །རྫ་མཁན་བྲེས་ན་མགོ་སྐམས་རུས་ལྤགས་ཙམ། །རང་སོས་
གཏུབས་པའི་རྩ་དག་ཟ་བ་སོམས། །དེ་ཚེ་མང་པོས་ཁྱོད་ལ་བསམས་མ་གྱུར། །འདི་ན་མགྱོགས་འགྲོ་སྟོང་གི་ཐོག་འདྲེན་ཅིང་། །རྒྱལ་པོས་ཆིབས་རན་མཆོག་དག་ཉེར་བསྟབས་པ། །ཅིའི་ཕྱིར་མི་ཟ་དྲིས་པ་བདག་ལ་སྨྲོས། །དེ་ནས་རབ་མགྱོགས་དྲང་པོ་བརྟན་ལྡན་པ། །མི་བཟོད་འཁྲུགས་བཅས་མགྱོགས་འགྲོ་མཆོག་གིས་ནི། །དེ་ལས་ཉེར་ཞི་ལེགས་པར་བསམས་བྱས་ནས། །འདུལ་སྦྱོང་བློ་ལྡན་མི་མཆོག་དེ་ལ་སྨྲས། །འདིར་ཁྱོད་ཁོ་བོའི་ཡོན་ཏན་དེ་ཉིད་ཤེས། །ཁོ་བོ་ཇི་བཞིན་ཁྱོད་ཀྱིས་མ་རིག་མིན། །མཁས་པས་བརྙས་ན་ས་སྟེང་མི་རྒྱུ་ཞིང་། །ཁོ་བོ་འདིར་ནི་མྱུར་དུ་ཤི་ཡང་བླ། །སྐྱེ་བོ་ངན་པས་ཡུན་རིང་བརྙས་གྱུར་ཀྱང་། །གལ་ཏེ་ཡོན་ཏན་ཁྱོད་ལྡན་དེ་བརྙས་མིན། །སྐྱེ་བོ་མཛངས་པས་སྐད་ཅིག་བརྙས་གྱུར་ན། །ཞི་བ་གལ་ཏེ་ཡོན་ཏན་དེ་བརྙས་ཡིན། །འདུལ་སྦྱོང་བས་རྒྱལ་པོ་ལ་སྨྲས་པ། ལྷ་འདི་ནི་བྲོ་འཚལ་བ་མ་ལགས་ཀྱི་འདི་ལྟར་རིམ་པ་མ་བགྱིས་པས་དེའི་སླད་དུ་འདི་རན་དང་ཆས་མི་འཚལ་ལོ། །འདིའི་རིམ་པ་ཇི་ལྟར་བྱ། ལྷ་ཤུལ་དཔག་ཚད་ཕྱེད་དང་གསུམ་ཚུན་ཆད་མཛེས་པར་བགྱི་ཞིང་གྲོང་ཁྱེར་ཡང་མཛེས་པར་བགྱི། རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་དཔུང་གི་ཚོགས་ཡན་ལག་བཞི་དང་བཅས་པས་བསུ་བར་བགྱི། ཕྱོགས་གང་དུ་བཞག་པའི་ཕྱོགས་དེ་ཟངས་མའི་གླེགས་བུ་དག་གིས་གཡོག་པར་བགྱི། རྒྱལ་པོའི་སྲས་བུ་ཐུ་བོས་མགོའི་སྟེང་དུ་གདུགས་སྲོག་ཤིང་བརྒྱ་པ་གཟུང་བར་བགྱི། རྒྱལ་པོའི་སྲས་མོ་ཐུ་མོས་རྔ་ཡབ་གསེར་ཅན་ནོར་བུས་སྤྲས་པས་སྦྲང་མ་དག་བསྐྱབ་པར་བགྱི། རྒྱལ་པོའི་བཙུན་མོ་དམ་པས་གསེར་གྱི་སྣོད་ནས་ཟིལ་དངར་གྱིས་བཅིན་པའི་བཟང་ཆས་ཀྱི་ཟས་བསྟབས་པར་བགྱི། རྒྱལ་པོའི་བློན་པོ་དམ་པས་གསེར་གྱི་ཆོལ་ཟངས་ཀྱིས་རྟུག་པ་དོར་བར་བགྱིའོ། །རྒྱལ་པོས་སྨྲས་པ། དེ་ལྟ་ན་འདི་རྒྱལ་པོ་ཡིན་གྱི་ང་རྒྱལ་པོ་མ་ཡིན་ནོ། །འདུལ་སྦྱོང་བས་སྨྲས་པ། ལྷ་འདི་ལ་དུས་ཐམས་ཅད་དུ་བསྙེན་བཀུར་དེ་ལྟར་བགྱི་མི་འཚལ་ཏེ། འདི་ལྟར་དགུང་བདུན་གྱི་བར་དུ་བགྱིའོ། །དགུང་བདུན་འདས་ནས་བཀའ་ཉན་པར་འགྱུར་རོ། །འདས་པ་གང་ལགས་པ་དེ་ད་བགྱི་བར་མི་སྤྱོད་ཀྱང་ལྷག་མ་གང་ལགས་པ་དེ་མཛད་དུ་གསོལ། རྒྱལ་པོས་ཕྱོགས་གང་
དུ་གཞག་པའི་ཕྱོགས་དེ་ཟངས་མའི་གླེགས་བུ་དག་གིས་ཀྱང་གཡོགས། རྒྱལ་པོའི་བུ་ཐུ་བོ་ཡང་མགོའི་སྟེང་དུ་གདུགས་སྲོག་ཤིང་བརྒྱ་པ་འཛིན་དུ་བཅུག། རྒྱལ་པོའི་བུ་མོ་ཐུ་མོ་ཡང་རྔ་ཡབ་གསེར་ཅན་ནོར་བུས་སྤྲས་པས་སྦྲང་མ་དག་སྐྱོབ་ཏུ་བཅུག །རྒྱལ་པོའི་བཙུན་མོ་དམ་པ་ཡང་གསེར་གྱི་སྣོད་ནས་ཟིལ་དངར་གྱིས་བཅིན་པའི་བཟང་ཆས་ཀྱི་ཟས་སྟོབས་སུ་བཅུག །རྒྱལ་པོའི་བློན་པོ་དམ་པ་ཡང་གསེར་གྱི་ཆོལ་ཟངས་ཀྱིས་རྟུག་པ་འདོར་དུ་བཅུག་གོ །ས་བདག་འདུལ་སྦྱོང་བཅས་པ་དེ་ལ་ཆགས། །ཤིན་ཏུ་དྲི་ཞིམ་བྱུག་པ་མཆོག་འཆང་ཞིང་། །ས་བདག་བཙུན་མོ་ཟིལ་དངར་བཟང་ཆས་ཀྱིས། །སྣོད་བཀང་མགྱོགས་འགྲོ་མཆོག་ཕྱིར་འཛིན་པར་བྱེད། རྒྱལ་པོ་སྐྱེད་མོས་ཚལ་གྱི་སར་འགྲོ་བར་འདོད་པ་ལ་རྟ་ཅང་ཤེས་ཕུལ་བ་དང་། དེས་རྒྱབ་སྨད་ནས་རྒྱལ་པོས་འདུལ་སྦྱོང་བ་ལ་རྨས་པ། འདི་རྒྱབ་མི་ནའམ། དེས་སྨྲས་པ། ལྷ་བྲོ་མི་འཚལ་ཏེ། འདི་ལྟར་རྒྱལ་པོ་བཅིབས་དཀའ་བར་འགྱུར་སྙམ་ནས་དེའི་སླད་དུ་འདིས་རྒྱབ་སྨད་དོ། །རྒྱལ་པོས་ཞོན་ཏེ་སོང་བ་དང་། དེ་འགྲོ་བ་ན་ཆུ་བྱུང་ནས་དེ་དེ་ལ་མི་རྒལ་བ་དང་། རྒྱལ་པོས་འདུལ་སྦྱོང་བ་ལ་རྨས་པ། འདི་མི་འཇིགས་སམ། ལྷ་མི་འཇིགས་ཏེ་འདི་ལྟར་རྔ་མའི་ཆབ་ཀྱིས་རྒྱལ་པོ་གཤེར་བར་གྱུར་ན་མི་རུང་ངོ་སྙམ་པས་དེའི་སླད་དུ་རྒལ་བར་མི་བགྱིད་དོ། །རྒྱལ་པོས་དེའི་རྔ་མ་གསེར་གྱི་སྦུབས་སུ་བཅུག་པ་དང་དེ་དེ་ལས་རྒལ་ཏོ། །རྒྱལ་པོ་དེ་སྐྱེད་མོས་ཚལ་དུ་སོང་སྟེ་བག་མེད་པར་འདུག་པ་དང་། ཉི་འོག་གི་རྒྱལ་པོ་དག་གིས་རྒྱལ་པོ་ཚངས་བྱིན་སྐྱེད་མོས་ཚལ་དུ་སོང་ངོ་ཞེས་ཐོས་ནས། དེ་དག་ལྷགས་ནས་གྲོང་ཁྱེར་གྱི་སྒོ་དག་བཟུང་ངོ་། །རྒྱལ་པོ་ཚངས་བྱིན་གྱིས་ཉི་འོག་གི་རྒྱལ་པོ་དག་གིས་གྲོང་ཁྱེར་གྱི་སྒོ་དག་བཟུང་ངོ་ཞེས་ཐོས་ནས་དེ་རྟ་ཅང་ཤེས་ལ་ཞོན་པ་དང་། བཱ་རཱ་ཎ་སཱི་དང་སྐྱེད་མོས་ཚལ་གྱི་བར་དུ་རྫིང་བུ་ཚངས་ལྡན་ཞེས་བྱ་བ་ཨུཏྤལ་དང་། པད་མ་དང་། ཀུ་མུ་ད་དང་། པད་མ་དཀར་པོས་ཁེབས་པ་ཞིག་གིས་ཆོད་ནས་རྟ་ཅང་ཤེས་ཀྱིས་བསམས་པ། རྒྱལ་པོ་རྒྱལ་རིགས་སྤྱི་བོར་དབང་བསྐུར་བ། གནོད་པ་དང་། ཉམ་ང་བ་དང་། ཕོངས་པར་གྱུར་པ་བདག་གིས་ཡལ་བར་དོར་བ་ནི་བདག་གི་ཚུལ་དང་མཐུན་པ་མ་ཡིན་ནོ་སྙམ་ནས། རྟ་ཅང་
ཤེས་དེས་པད་མའི་འདབ་མ་དག་གི་སྟེང་དུ་རྐང་པ་བཞག་སྟེ་སྒེའུ་ཅུང་ནས་བཱ་རཱ་ཎ་སཱིར་ཞུགས་པ་དང་། རྒྱལ་པོ་དགའ་ནས་བློན་པོ་རྣམས་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྲོག་ཕྱུང་བ་དེ་ལ་ཅི་སྦྱིན། ལྷ་རྒྱལ་སྲིད་ཀྱི་ཕྱེད་དོ། །རྒྱལ་པོས་སྨྲས་པ། འདི་ནི་དུད་འགྲོ་ཡིན་པས་འདི་ལ་རྒྱལ་སྲིད་ཀྱི་ཕྱེད་ཀྱིས་ཅི་བྱ་སྟེ། འདི་ལྟར་འདི་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན། བསོད་ནམས་དག་བྱ་ཞིང་དུས་མ་ཡིན་པར་ཀུ་མུ་དའི་དུས་སྟོན་བྱའོ་སྙམ་ནས། རྒྱལ་པོ་དེ་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན་པ་དང་། བསོད་ནམས་དག་བྱ་བར་བརྩམས་ཤིང་ཞག་བདུན་དུ་དུས་མ་ཡིན་པར་ཀུ་མུ་དའི་དུས་སྟོན་དག་བྱས་པ་དང་། དེད་དཔོན་དེས་མི་དག་ལ་དྲིས་པ། ཤེས་ལྡན་དག་ཅིའི་ཕྱིར་དུས་མ་ཡིན་པར་ཀུ་མུ་དའི་དུས་སྟོན་འདི་བྱུང་བར་གྱུར། དེ་དག་གིས་དེ་ལ་སྨྲས་པ། རྒྱལ་པོས་མཆོད་གྱུར་ཅེས་བྱ་བའི་གནས་དེ་ནས་རྫ་མཁན་ཞིག་ལས་གསེར་འབུམ་གྱིས་རྟ་ཅང་ཤེས་ཉོས་ཏེ་འདིར་འོངས་ནས་དེས་རྒྱལ་པོ་འདིའི་སྲོག་ཕྱུང་ནས། རྒྱལ་པོས་དེ་ལས་རྟེན་ཏེ་ཞག་བདུན་དུ་སྦྱིན་པ་དག་སྦྱིན། བསོད་ནམས་དག་བྱེད་ཅིང་དུས་མ་ཡིན་པར་ཀུ་མུ་དའི་དུས་སྟོན་བྱས་སོ། །དེད་དཔོན་གྱིས་བསམས་པ། མ་ལ་རྟེའུ་དེ་ཅང་ཤེས་སུ་མ་གྱུར་ཏམ་ཇེ་སོང་ལ་དེ་བལྟའོ་སྙམ་ནས་དེའི་གན་དུ་སོང་བ་དང་། རྟ་ཅང་ཤེས་དེས་སྨྲས་པ། ཀྭའི་ནང་རྗེ་ཁྱོད་ཀྱིས་རྟ་ལྔ་བརྒྱ་པོ་དག་གིས་ཅི་ཐོབ། གསེར་འབུམ་མོ། །ཁོ་བོ་གཅིག་པུས་ཀྱང་རྫ་མཁན་དེ་ལ་གསེར་འབུམ་བྱིན་ནོ། །དེ་བརྒྱལ་ཏེ་ས་ལ་འགྱེལ་ནས་ཆུ་གདབ་པས་སྲོག་ཕྱིར་རྙེད་ནས་རྟ་ཅང་ཤེས་ཀྱི་རྐང་པ་གཉིས་ལ་གཏུགས་ཏེ་བཟོད་པ་གསོལ་ཏོ། །དགེ་སློང་དག་དེའི་ཚེ་དེའི་དུས་ན་དེད་དཔོན་གང་ཡིན་པ་དེ་ནི་འཚོ་བྱེད་གཞོན་ནུས་གསོས་འདི་ཉིད་ཡིན་ནོ། །དེའི་ཚེ་དེའི་དུས་ན་རྟ་ཅང་ཤེས་གང་ཡིན་པ་དེ་ནི་ལམ་པ་འདི་ཉིད་ཡིན་ཏེ། དེའི་ཚེ་ཡང་དེས་གང་གི་ཚེ་དེའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་དེ་ལ་གུས་པ་མ་ཡིན་པ་ལ་ཞུགས་པར་གྱུར་ལ། གང་གི་ཚེ་དེའི་ཡོན་ཏན་དག་མངོན་པར་ཤེས་པར་གྱུར་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་གྱུར་
ལ། ད་ལྟར་ཡང་དེས་གང་གི་ཚེ་འདིའི་ཡོན་ཏན་དག་མངོན་པར་མི་ཤེས་པ་དེའི་ཚེ་ན་འདི་ལ་གུས་པ་མ་ཡིན་པ་ལ་ཞུགས་ལ། གང་གི་ཚེ་ཡོན་ཏན་དག་མངོན་པར་ཤེས་པར་གྱུར་པ་དེའི་ཚེ་ན་རྐང་པ་གཉིས་ལ་གཏུགས་ཏེ་བཟོད་པ་གསོལ་བར་བྱེད་དོ། །སངས་རྒྱས་བཅོམ་ལྡན་འདས་ལ་དགེ་སློང་རྣམས་ཀྱིས་ཞུས་པ། བཙུན་པ་ཚེ་དང་ལྡན་པ་ལམ་པས་ལས་ཅི་བགྱིས་ན་ལས་དེའི་རྣམ་པར་སྨིན་པས་བཅོམ་ལྡན་འདས་ཀྱིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་ལུང་བསྟན། བཅོམ་ལྡན་འདས་ཀྱིས་བཀའ་སྩལ་པ། སྨོན་ལམ་གྱི་དབང་གིས་སོ། །གང་དུ་སྨོན་ལམ་བཏབ། དགེ་སློང་དག་སྔོན་བྱུང་བ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་འདི་རབ་ཏུ་བྱུང་བར་གྱུར་པ་ན་གང་ལས་རབ་ཏུ་བྱུང་བའི་མཁན་པོ་དེ་ཡང་དག་པར་རྫོགས་པའི་སངས་རྒྱས་འོད་སྲུང་གིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་ལུང་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས་དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་ཇི་ལྟར་མཁན་པོ་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་འོད་སྲུང་གིས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་པ་དེ་བཞིན་དུ་བདག་ཀྱང་བཅོམ་ལྡན་འདས་ཤཱཀྱ་ཐུབ་པ་ཤཱཀྱའི་སེང་གེ་ཤཱཀྱའི་རྒྱལ་པོའི་གཙོ་བོ་དེས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་སེམས་སྒྱུར་བ་ལ་མཁས་པ་རྣམས་ཀྱི་མཆོག་ཏུ་བསྟན་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་། འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །མ་བསྐོས་པར་སྟོན་པའི་ལྟུང་བྱེད་དེ་ཉི་ཤུ་གཅིག་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགའ་བྱེད་ཁྱོད་ཀྱིས་དགེ་སློང་མ་ལ་འདོམས་ཤིག །དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག །དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་ཅེས་བཀའ་སྩལ་ནས། དེ་ནས་ཨུཏྤལའི་མདོག་འཁོར་དགེ་སློང་མ་ལྔ་བརྒྱ་ཚེ་དང་ལྡན་པ་དགའ་བྱེད་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་དུ་འདུག་གོ །ཚེ་དང་ལྡན་པ་དགའ་བྱེད་ཀྱིས་བསམས་པ། བུད་མེད་ཀྱི་ཡུལ་ནི་ཤེས་རབ་ཆུང་བ་ཡིན་ནོ་སྙམ་ནས་དེས་དེ་ལ་དོན་དང་། ཚིག་དང་། ཡི་གེ་མདོར་འདུས་པ་འདུས་པ་དག་གིས་ཆོས་བསྟན་ཏོ། །དེ་ཤེས་རབ་ཅན་ཡིན་པས་གོང་ནས་གོང་དུ་འདྲི་བར་བྱེད་ནས་ཚེ་དང་ལྡན་པ་དགའ་བྱེད་ཀྱིས་ལན་བཏབ་ཅིང་། དེས་དེ་ལ་ཇི་ཙམ་ན་ཉི་མ་ནུབ་པའི་དུས་ལ་བབ་པ་དེ་ཙམ་གྱི་བར་དུ་ཆོས་བསྟན་ནས་དེ་དག་གིས་
དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ཏེ་དོང་བ་དང་། ཇི་ཙམ་ན་མཉན་ཡོད་ཀྱི་སྒོ་དག་བཅད་པར་གྱུར་ནས་དགེ་སློང་མ་རྣམས་ཀྱིས་སྒོ་བཙལ་བ་དང་། སྒོ་བས་སྨྲས་པ། སྒོ་བཅད་ལགས་སོ། །དེ་དག་གིས་སྨྲས་པ། ཕྱེ་ཤིག་ལྡེ་མིག་དག་རྒྱལ་པོའི་ཕོ་བྲང་དུ་འཚལ་ཏོ། །དེ་དག་གིས་བསམས་པ། འདི་ཉིད་དུ་འཁོད་དོ་སྙམ་ནས་མཉན་ཡོད་དང་ཧ་ཅང་མི་རིང་བ་ན་ཀུན་དགའ་ར་བ་ཞིག་འདུག་པ་དེར་དེ་དག་དོང་ངོ་། །བཅོམ་ལྡན་འདས་ཀྱིས་ཤིང་ལྗོན་པ་ཡང་རྒན་རིམས་ཀྱིས་བསྐོ་བར་བྱའོ་ཞེས་བཀའ་སྩལ་པས་དེ་དག་གིས་ཤིང་ལྗོན་པ་དག་རྒན་རིམས་ཀྱིས་བསྐོ་བར་བརྩམས་པ་དང་། དེ་ན་དེ་དག་ཤིང་ལྗོན་པ་དག་སྒོ་བ་རྣམས་ལ་ཨ་ཡྱཱེ་ཨ་ཧ་ཌེ་ཨ་ག་ཨེ་ཨ་ག་ཧ་ཌེ་ཞེས་འབོད་པའི་སྒྲ་མཐོན་པོ་དང་། སྒྲ་ཆེན་པོ་བྱུང་ངོ་། །གཡོན་ཅན་ལྔ་བརྒྱ་ཙམ་མཉན་ཡོད་འཇོམས་པར་འདོད་པ་དག་ལྷགས་པ་དེ་དག་གིས་སྒྲ་མཐོན་པོ་དང་། སྒྲ་ཆེན་པོ་དེ་ཐོས་ནས། དེ་དག་གིས་སྨྲས་པ། ཤེས་ལྡན་དག་མཉན་ཡོད་ན་རེ་ཞིག་སྡོད་ཅིག །ཤེས་ལྡན་དག་རྗེ་བཙུན་མོའི་འཁོར་གྱིས་མ་ཐོས་པར་འདི་དག་གཞོམ་པར་བྱའོ། །ཨུཏྤ་ལའི་མདོག་གིས་བསམས་པ། མི་མཛེས་པ་འགའ་ཞིག་རིག་པར་མི་འགྱུར་རམ་སྙམ་ན། ཇི་ཙམ་ན་འཇོམས་པར་འདོད་པའི་གཡོན་ཅན་ལྔ་བརྒྱ་ཙམ་པོ་དེ་དག་མཐོང་ནས་དེས་འཕགས་སྐྱེས་པོའི་དཔུང་སྤྲུལ་ཏེ་རྔ་པ་ཊ་ཧ་བརྡུངས་པ་དང་། དེ་དག་གིས་སྨྲས་པ། ཤེས་ལྡན་དག་བདག་ཅག་འཕགས་སྐྱེས་པོའི་དཔུང་གིས་བསྐོར་ཏེ་བདག་ཅག་ཟིན་པར་གྱུར་ན་མི་རུང་གིས་འབྲོས་པར་བྱའོ་ཞེས་དེ་ལྟར་རིག་ནས་དེ་དག་བྲོས་སོ། །ཨུཏྤ་ལའི་མདོག་གིས་དགེ་སློང་མ་དེ་དག་ལ་སྨྲས་པ། ཕུ་ནུ་མོ་དག་གཡོན་ཅན་འཇོམས་པར་འདོད་པ་ལྔ་བརྒྱ་ཙམ་འདིར་ལྷགས་ནས་ཁོ་མོས་དེ་དག་བསྡིགས་ནས་བྲོས་ཀྱིས། ཁད་ཀྱི་དལ་བུ་དལ་བུས་ལག་བརྡས་སྒོ་ཕྱེ་ཤིག །དེ་དག་ནང་པར་སྔར་ལངས་ཏེ་མཉན་ཡོད་དུ་ཞུགས་པ་དང་། བྲམ་ཟེ་དང་། ཁྱིམ་བདག་གིས་མཐོང་ནས་དེ་དག་གིས་སྨྲས་པ། ཤཱཀྱའི་བུའི་དགེ་སྦྱོང་རྣམས་ཀྱིས་ཆོས་འདྲེ་བ་དང་། ལྷག་པར་འདྲེ་ཞིང་ཚངས་པར་སྤྱད་པ་སྤྱོད་པར་བྱེད་པ་བཟང་ངོ་། །དགེ་སློང་དོན་ཉུང་ངུ་དག་ཅིའི་ཕྱིར་དགེ་
སློང་དག་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་དགའ་བྱེད་ལ་རྨས་པ། དགའ་བྱེད་ཁྱོད་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་མི་བརྩོན་པ་དང་མི་སྦྱོར་བ་དང་། མ་བརྟགས་པར་སྤྱོད་པ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་བརྩོན་པ་དང་། སྦྱོར་བ་དང་བརྟགས་ཏེ་སྤྱོད་པའི་བསྔགས་པ་བརྗོད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་དགེ་འདུན་གྱིས་བསྐོས་ཀྱང་ཉི་མ་ནུབ་པའི་དུས་ཀྱི་བར་དུ་དགེ་སློང་མ་ལ་སྟོན་ན་ལྟུང་བྱེད་དོ། །དགེ་སློང་ཞེས་བྱ་བ་ནི་ཆོས་འདི་པའོ། །དགེ་འདུན་གྱིས་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིས་སོ། །བསྐོས་ཀྱང་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་སོ། །ཉི་མ་ནུབ་པའི་དུས་ཀྱི་བར་དུ་ཞེས་བྱ་བ་ནི་ཉི་མ་ནུབ་པའི་དུས་ལ་བབ་པར་རོ། །དགེ་སློང་མ་ཞེས་བྱ་བ་ནི་ཆོས་འདི་པ་ལའོ། །སྟོན་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་
བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གི་ཉི་མ་ནུབ་པ་ལ་ཉི་མ་ནུབ་པར་འདུ་ཤེས་པས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་གི་ཉི་མ་ནུབ་པ་ལ་ཡིད་གཉིས་ཟ་བས་དགེ་སློང་མ་ལ་སྟོན་ན་ལྟུང་བྱེད་དུ་འགྱུར་རོ། །དགེ་སློང་གིས་ཉི་མ་མ་ནུབ་པ་ལ་ཉི་མ་ནུབ་པར་འདུ་ཤེས་པས་དགེ་སློང་མ་ལ་སྟོན་ན་ཉེས་བྱས་སུ་འགྱུར་རོ། །དགེ་སློང་གི་ཉི་མ་མ་ནུབ་པ་ལ་ཡིད་གཉིས་ཟ་བས་དགེ་སློང་མ་ལ་སྟོན་ན་ཉེས་བྱས་སུ་འགྱུར་རོ། །མཚན་ཐོག་ཐག་ཆོས་ཉན་པར་གྱུར་པ་དང་། གཙུག་ལག་ཁང་གི་སྒོ་དྲུང་དུ་སྟོན་པ་དང་། སྒོ་མ་བཅད་པར་འདུག་པ་དང་། གྲོང་ཁྱེར་གྱི་ནང་ན་གཙུག་ལག་ཁང་ངམ། དབྱར་ཁང་འདུག་པ་དང་། ཁྱིམ་གཞན་དུ་སོང་སྟེ་སྟོན་པ་ལ་ལྟུང་བ་མེད་དོ། ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་དགེ་སློང་མ་ལྔ་བརྒྱ་གཡོན་ཅན་གྱི་འཇིགས་པ་ལས་ཡོངས་སུ་བསྐྱབས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདིས་དོན་མཐུན་མང་པོ་སེང་གེའི་འཇིགས་པ་ལས་ཡོངས་སུ་བསྐྱབས་པར་གྱུར་ཏེ་དེ་ཉོན་ཅིག་དགེ་སློང་དག་སྔོན་བྱུང་བ་འདས་པའི་དུས་ན་རི་བྲགས་ཤིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེས་ཆུང་མ་ལ་སྨྲས་པ། བཟང་མོ་ཁོ་བོ་ཟོང་ཐོགས་ཏེ་ཡུལ་གཞན་དུ་འགྲོའོ། །ཆུང་མས་སྨྲས་པ། རྗེའི་སྲས་བདག་ཀྱང་མཆིའོ། །ཁྱིམ་བདག་གིས་སྨྲས་པ། ལམ་དུ་ཁྱོད་ཀྱི་གཡོག་སུས་བྱེད་པར་འགྱུར། ཁྱོད་འདི་ཉིད་དུ་འདུག་ཤིག་ཆུང་མས་བདག་མི་ཁྲིད་དོ་སྙམ་ནས་ངུ་བར་བརྩམས་པ་དང་། ཞོ་ཤས་འཚོ་བ་དག་གིས་ཁྱིམ་བདག་ལ་དྲིས་པ། ཇོ་བོས་ཅིའི་སླད་དུ་འདི་ངུར་སྩལ། ཁྱིམ་བདག་གིས་སྨྲས་པ། མི་ཁྲིད་དོ་སྙམ་ནས་སོ། །དེ་དག་གིས་
སྨྲས་པ། ཅིའི་སླད་དུ་མི་བཀྲི། ཁྱིམ་བདག་གིས་སྨྲས་པ། དེར་འདིའི་གཡོག་སུ་བྱེད་པར་འགྱུར། དེ་དག་གིས་སྨྲས་པ། དེར་བདག་ཅག་གིས་འདིའི་གཡོག་བགྱིའོ། །ཁྱིམ་བདག་དེས་དེ་ཁྲིད་དེ་སོང་ནས་དོན་མཐུན་དེ་དག་དགོན་པའི་ལམ་ཞིག་ཏུ་མཚན་མོ་བཏབ་པ་དང་། དོན་མཐུན་དེ་དག་ལམ་གྱིས་དུབ་པས་ཉལ་ནས། ཁྱིམ་བདག་གི་ཆུང་མ་དེ་མེལ་ཚེ་བྱེད་དོ། །ཇི་ཙམ་ན་དེར་སེང་གེ་འོངས་ནས་དེས་མགལ་དུམ་ཐོགས་ཏེ་དེ་བསྡིགས་པ་དང་བྲོས་པར་གྱུར་ནས་ལྷས་ཚིགས་སུ་བཅད་པ་སྨྲས་པ། གང་ཕྱིར་བྱ་བ་ཐམས་ཅད་ལ། །སྐྱེས་པ་འབའ་ཞིག་མཁས་པ་མིན། །དེ་དང་དེ་ལ་བུད་མེད་ཀྱང་། །ཟིན་ལ་མཁས་པ་ཉིད་དུ་འགྱུར། །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གི་ཆུང་མ་གང་ཡིན་པ་དེ་ནི་ཨུཏྤ་ལའི་མདོག་འདི་ཉིད་ཡིན་ལ། དེའི་ཚེ་དེའི་དུས་ན་དོན་མཐུན་ལྔ་བརྒྱ་གང་ཡིན་པ་དེ་དག་ནི་དགེ་སློང་མ་ལྔ་བརྒྱ་འདི་དག་ཡིན་ཏེ། དེའི་ཚེ་ཡང་འདིས་དོན་མཐུན་མང་པོ་སེང་གེའི་འཇིགས་པ་ལས་ཡོངས་སུ་བསྐྱབས་པར་གྱུར་ལ། ད་ལྟར་ཡང་འདིས་དགེ་སློང་མ་ལྔ་བརྒྱ་གཡོན་ཅན་གྱི་འཇིགས་པ་ལས་ཡོངས་སུ་བསྐྱབས་སོ། །ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་དེ་ཉི་ཤུ་གཉིས་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགའ་བྱེད་ཁྱོད་ཀྱིས་དགེ་སློང་མ་ལ་ཐོམས་ཤིག་དགའ་བྱེད་ཁྱོད་ཀྱིས་དགེ་སློང་མ་ལ་རྗེས་སུ་སྟོན་ཅིག་དགའ་བྱེད་ཁྱོད་ཀྱིས་དགེ་སློང་མ་རྣམས་ལ་ཆོས་དང་ལྡན་པའི་གཏམ་གྱིས་ཤིག་ཅེས་བཀའ་སྩལ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱི་འཁོར་དགེ་སློང་མ་ལྔ་བརྒྱ་དང་ཚེ་དང་ལྡན་པ་དགའ་བྱེད་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །ཚེ་དང་ལྡན་པ་དགའ་བྱེད་ཀྱིས་དེ་ལ་དོན་དང་། ཚིག་དང་། ཡི་གེ་ཟབ་པ་ཟབ་པ་དག་གིས་ཆོས་བསྟན་ཏོ། །བུད་མེད་ཀྱི་ཡུལ་ནི་ཤེས་རབ་འཆལ་པའི་ཕྱིར་བརྡ་མི་ཕྲད་ཅིང་འཇིགས་པའི་ཕྱིར་འདྲི་མི་ནུས་སོ། །དེ་ནས་སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཚེ་དང་ལྡན་པ་དགའ་བྱེད་ཀྱིས་སྨྲས་པ་ལ་མངོན་པར་དགའ་
བ་དང་རྗེས་སུ་ཡི་རང་བ་བྱས་ཏེ་ཚེ་དང་ལྡན་པ་དགའ་བྱེད་ཀྱི་རྐང་པ་གཉིས་ལ་མགོ་བོས་ཕྱག་འཚལ་ནས་སྟན་ལས་ལངས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱིས་འདི་སྐད་ཅེས་གསོལ་ཏོ། །བཙུན་པ་འཕགས་པ་དགའ་བྱེད་ཀྱིས་དགེ་སློང་མ་རྣམས་ལ་དོན་དང་། ཚིག་དང་། ཡི་གེ་ཟབ་པ་ཟབ་པ་དག་གིས་ཆོས་བསྟན་ན། བུད་མེད་ཀྱི་ཡུལ་ནི་ཤེས་རབ་འཆལ་པའི་སླད་དུ་བརྡ་མི་མཇལ་ཅིང་། འཇིགས་པའི་སླད་དུ་འདྲི་བའི་རྔོ་མི་ཐོག་སྟེ། བཅོམ་ལྡན་འདས་ཀྱིས་སྦྱིན་པ་ནི་མི་འཇིགས་པའི་རྒྱུ་ལགས་སོ་ཞེས་བཀའ་སྩལ་ན། གལ་ཏེ་བཅོམ་ལྡན་འདས་ཀྱིས་གནང་ན་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་ན་གནོང་གིས་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བྱའོ། །བཅོམ་ལྡན་འདས་ཀྱིས་དགེ་སློང་མ་རྣམས་ཀྱིས་དགེ་སློང་རྣམས་ལ་ཀུན་དགའ་བར་འགྱུར་བ་དག་བྱའོ་ཞེས་བཀའ་སྩལ་ནས། དེ་དག་གིས་ཇི་ལྟར་བྱ་བ་དག་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། བཅའ་བ་ལྔ་པོ་རྩ་བ་དང་སྡོང་བུ་དང་འདབ་མ་དང་། མེ་ཏོག་དང་། འབྲས་བུ་དག་དང་། བཟའ་བ་ལྔ་པོ་འབྲས་ཆན་དང་། ཟན་དྲོན་དང་། འདེ་གུ་དང་། ཤ་དང་། སྣུམ་ཁུར་དག་དང་། ལྷུང་བཟེད་དང་། ཆོས་གོས་དང་། དྲ་བ་དང་། ཕོར་བུ་དང་། ཤུར་བུ་དང་། ལྕག་ཕོད་དང་། ཤུར་བུ་ཕྲེའུ་དང་། རྒྱ་ཅང་དག་གིས་བྱའོ། །དགེ་སློང་མ་ཞིག་གིས་འོ་ཐུག་ཁྱེར་ཏེ་རྒྱལ་བྱེད་ཀྱི་ཚལ་དུ་སོང་བ་དང་དྲུག་སྡེ་དག་གི་ཀུན་དུ་སྤྱོད་པ་ནི་འདིར་བདག་ཅག་གིས་བྲམ་ཟེ་དང་། ཁྱིམ་བདག་འོངས་ཤིང་ལྷགས་པ་ལ་ཡང་ཆོས་བསྟན་པར་བྱ། རྒོལ་བ་དག་ཀྱང་ཚར་གཅད་པར་བྱ། རང་གི་གྲགས་པ་ཡང་བསྒྲག་པར་བྱའོ་སྙམ་ནས། དྲུག་སྡེ་ལས་གང་ཡང་རུང་བས་རྒྱལ་བྱེད་ཀྱི་ཚལ་གྱི་སྒོ་སྟོང་པར་མི་འཇོག་པས་ཉེ་དགའ་ནང་པར་སྔར་ལངས་ཏེ་སོ་ཤིང་བོར་ནས་སྣམ་སྦྱར་དམར་སེར་གྱོན་ཏེ་རྒྱལ་བྱེད་ཀྱི་ཚལ་གྱི་
སྒོ་ན་འཆག་ཅིང་འདུག་གོ །ཉེ་དགའས་དགེ་སློང་མ་དེ་མཐོང་ནས་དེ་ལ་དྲིས་པ། ཁྱེར་ཏེ་འོངས་པ་འདི་ཅི། འོ་ཐུག་གོ །སུ་ལ་བླུད། འཕགས་པ་དགའ་བྱེད་དོ། །གལ་ཏེ་ཉེ་དགའས་ཀྱང་འོ་ཐུག་རྙེད་པར་འགྱུར་ན་རྟག་པ་ཁོ་ནར་དགེ་སློང་མ་ལ་སྟོན་པར་འགྱུར་རོ། །དེ་བཞིན་དུ་དགེ་སློང་མ་ཁ་ཅིག་གིས་ནི་ཞོ་ཐུག་ཁྱེར་ཏེ་འོངས། ཁ་ཅིག་གིས་ནི་ཧྭགས་ཀྱི་ལ་དུ་ཁྱེར་ཏེ་འོངས་པ་དང་། ཉེ་དགའས་སྨྲས་པ། ཁོ་བོ་ཀོ་ཚེ་དང་ལྡན་པ་དགའ་བྱེད་ཆོས་བཟང་པོའི་ཆོས་ཀྱིས་དགེ་སློང་མ་ལ་སྟོན་སྙམ་གྱི། ཁོ་བོ་ཀོ་ཚེ་དང་ལྡན་པ་དགའ་བྱེད་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་སྙམ་མི་སེམས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཆུང་ཟད་ཙམ་གྱི་ཕྱིར་དགེ་སློང་མ་རྣམས་ལ་སྟོན་པར་བྱེད་ཅེས་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་རྣམས་ལ་འདི་སྐད་ཅེས་དགེ་སློང་དག་ནི་ཟས་ཆུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་
དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ། །དགེ་སློང་དག་ཅེས་བྱ་བ་ནི་ཆོས་འདི་པ་དག་གོ །ཟས་ཅུང་ཟད་ཙམ་གྱི་ཕྱིར་ཞེས་བྱ་བ་ནི་བཅའ་བ་ལྔ་དང་། བཟའ་བ་ལྔའི་ཕྱིར་རོ། །དགེ་སློང་མ་ལ་ཞེས་བྱ་བ་ནི་ཆོས་འདི་པ་ལའོ། །སྟོན་ཏོ་ཞེས་ཟེར་ན་ཞེས་བྱ་བ་ནི་ལྷག་པའི་ཚུལ་ཁྲིམས་དང་། ལྷག་པའི་སེམས་དང་། ལྷག་པའི་ཤེས་རབ་བོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་ཡི་དྭགས་ངན་སོང་དང་། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཙམ་དགེ་སློང་རྣམས་ལ་འདི་སྐད་ཅེས་དགེ་སློང་དག་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ཟས་ཆུང་ཟད་ཙམ་གྱི་ཕྱིར་དགེ་སློང་མ་ལ་སྟོན་པ་བདེན་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དེ་ཉི་ཤུ་གསུམ་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཚོང་དཔོན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་རྒས་པའི་གནས་སྐབས་སུ་ཉེ་དུ་ཟད་པར་གྱུར་ཅིང་ནོར་ཟད་པ་དང་། ལོངས་སྤྱོད་ཟད་པར་གྱུར་ནས་དེས་ཆུང་མ་ལ་སྨྲས་པ། བཟང་མོ་ཁོ་བོས་ད་ནོར་སྒྲུབ་པར་མི་ནུས་ཀྱིས་ཁོ་བོ་རབ་ཏུ་འབྱུང་དུ་འགྲོའོ། །ཆུང་མས་སྨྲས་པ། རྗེའི་སྲས་བདག་ཀྱང་རབ་ཏུ་འབྱུང་ངོ་། །དེ་ལྟར་གྱིས་ཤིག་
ཅེས་དེས་ཆུང་མ་སྐྱེ་དགུའི་བདག་མོ་ཆེན་མོ་གཽ་ཏ་མཱིའི་གན་དུ་ཁྲིད་དེ་སྨྲས་པ། འཕགས་མ་བདག་གི་མཆིས་འབྲང་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བར་འཚལ་ན་འཕགས་མས་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། སྐྱེ་དགུའི་བདག་མོ་ཆེན་མོ་གཽ་ཏ་མཱིས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དེས་ཚོང་དཔོན་ལ་སྨྲས་པ། རྗེའི་སྲས་བུད་མེད་ཀྱི་ཡུལ་ནི་སྲིད་པ་སྤྱད་པ་ལགས་ཀྱིས་དུས་དང་དུས་སུ་སྤྱོན་ཅིག །ཚོང་དཔོན་དེ་ཡང་རྒྱལ་བྱེད་ཀྱི་ཚལ་དུ་སོང་སྟེ་དགེ་སློང་གི་གན་དུ་རབ་ཏུ་བྱུང་ངོ་། ། མཉན་ཡོད་པའི་ཚོང་དཔོན་རབ་ཏུ་བྱུང་ངོ་ཞེས་དེ་གྲགས་ཤིང་བསོད་ནམས་ཆེ་བས་དེས་དེའི་ཆོས་གོས་དང་། བསོད་སྙོམས་དང་། གནས་མལ་དང་། ན་བའི་རྐྱེན་དང་། སྨན་གྱི་ཡོ་བྱད་དག་གྲུབ་པོ། །དེ་དུས་གཞན་ཞིག་ན་སྣམ་སྦྱར་དམར་སེར་གྱོན་ཏེ་དགེ་སློང་མ་དེའི་དབྱར་ཁང་དུ་སོང་བ་དང་། དགེ་སློང་མ་དེས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ། མདུན་དུ་འདུག་ནས་དེས་དེའི་སྣམ་སྦྱར་དེ་ལ་ཡང་དང་ཡང་དུ་རྟོག་ནས་དགེ་སློང་དེས་སྨྲས་པ། སྲིང་མོ་སྣམ་སྦྱར་འདི་འདོད་དམ། དེས་སྨྲས་པ། ལྷའི་གནས་ཀྱི་ལྷག་མ་བཞིན་དུའོ། །དེས་བསམས་པ། བདག་གི་འདི་ལ་སྣམ་སྦྱར་འདི་སྦྱིན་པར་བྱ་ཞིང་བདག་གིས་སྣམ་སྦྱར་གཞན་བཙེམ་པར་བྱའོ་སྙམ་ནས། དེས་དེ་ལ་སྣམ་སྦྱར་དེ་བྱིན་ཏེ་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་དེ་བཞིན་གཤེགས་པ་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་ཀོ་ས་ལ་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་
ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུག་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་ཏུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་
བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་ཏུ་བཟང་བ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ་ཀུན་ཤེས་ཀཽཎྜི་ནྱ་དང་། རླངས་པ་དང་། མིང་ཆེན་དང་། མ་འགགས་པ་དང་། ཤཱ་རིའི་བུ་དང་། མཽད་གལ་གྱི་བུ་ཆེན་པོ་དང་། འོད་སྲུང་དང་། ཀུན་དགའ་བོ་དང་། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང་། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ་ཀོ་ས་ལ་དག་ཏུ་ལྗོངས་རྒྱུར་གཤེགས་སོ། །ཆོས་ཉིད་ཀྱིས་ན་སངས་རྒྱས་བཅོམ་ལྡན་འདས་དག་ལྗོངས་རྒྱུར་གཤེགས་པ་ན་འགའ་ཞིག་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུ་བར་མི་འགྱུར་རམ་སྙམ་པས་སྐུ་ཐམས་ཅད་ཀྱིས་གཡས་ཕྱོགས་ནས་གླང་པོ་ཆེའི་ལྟ་སྟངས་ཀྱིས་རྣམ་པར་གཟིགས་པ་ཡིན་པས་བཅོམ་ལྡན་འདས་ཀྱིས་དགེ་སློང་དེ་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ་བ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དགེ་སློང་དབྱར་གནས་པ་དག་གིས་ཆོས་གོས་ཀྱི་རྙེད་པ་མ་གྲུབ་བམ། བཅོམ་ལྡན་འདས་གྲུབ་བོ། །ཀུན་དགའ་བོ་འོ་ན་ཅིའི་ཕྱིར་དགེ་སློང་འདི་ཆོས་གོས་སྟོད་གཡོགས་སྨད་གཡོགས་དང་བཅས་པས་ལྗོངས་རྒྱུར་འགྲོ། ཚེ་དང་ལྡན་པ་ཀུན་དགའ་བོས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་དག་དགེ་སློང་མ་ཉེ་དུ་མ་ཡིན་པ་ལ་གོས་དག་སྦྱིན་ནམ། བཙུན་པ་སྩལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དགེ་སློང་མ་ཉེ་དུ་མ་ཡིན་པ་ནི་འདི་སྙམ་དུ་འདིའི་ཆོས་གོས་གསུམ་ཚང་ངམ། འོན་ཏེ་མ་ཚང་སྙམ་དུ་མི་སེམས་པར་འདི་ལྟར་ཐོབ་བོ་ཅོག་ལེན་པར་བྱེད་ཀྱི་ཉེ་དུ་ལ་ནི་བྱིན་ཡང་ལེན་པར་མི་བྱེད་དོ། །དེ་ནས་བཅོམ་
ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་རྨས་པ། དགེ་སློང་ཁྱོད་དགེ་སློང་མ་ཉེ་དུ་མ་ཡིན་པ་ལ་གོས་སྦྱིན་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམས་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལ་གོས་སྦྱིན་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །དགེ་སློང་མ་ཞེས་བྱ་བ་ཡང་ཆོས་འདི་པའོ། །ཉེ་དུ་མ་ཡིན་པ་ལ་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ལས་བརྟེན་པའི་བདུན་པ་ཚུན་ཆད་ནི་ཉེ་དུ་ཡིན་ལ་དེ་ཕན་ཆད་ནི་ཉེ་དུ་མ་ཡིན་ནོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་དག་ལས་གང་ཡང་རུང་བའོ། །སྦྱིན་ན་ཞེས་བྱ་བ་ནི་བསླང་མི་དགོས་པར་རོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་
ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་བྱིན་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་བྱིན་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་བྱིན་ན་ཉེས་བྱས་སུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་ཡིད་གཉིས་ཟ་བས་གོས་བྱིན་ན་ཉེས་བྱས་སུ་འགྱུར་རོ། །བོར་བརླག་བྱུང་བ་ལ་སྦྱིན་པ་དང་། ལེགས་པར་སྨྲ་བ་ལ་སྦྱིན་པ་དང་། དགེ་སློང་མའི་དགེ་འདུན་ལ་གོས་ཀྱི་སྦྱིན་པ་སྦྱིན་པ་དང་། རྫོགས་པར་བསྙེན་པར་བྱེད་པ་ལ་སྦྱིན་པ་དང་། རིན་གྱི་ཕྱིར་སྦྱིན་པ་དང་། བརྗེ་བའི་ཕྱིར་སྦྱིན་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གོས་སྦྱིན་པའི་ལྟུང་བྱེད་དེ་ཉི་ཤུ་བཞི་པ་རྫོགས་སོ།། །།འདུལ་བ་རྣམ་པར་འབྱེད་པ། བམ་པོ་བཞི་བཅུ་དགུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་མ་སྦེད་མའི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་ནས། དེས་རས་ཡུག་ཆེན་ཅིག་རྙེད་པ་དང་དེ་སུ་ཞིག་བདག་གི་ཆོས་གོས་ཚེམ་པར་འགྱུར་སྙམ་དུ་སེམས་ཁོང་དུ་ཆུད་ཅིང་འདུག་པ་ན། དགེ་སློང་མ་རྣམས་ཀྱིས་དེ་ལ་སྨྲས་པ། སྦེད་མ་ཁྱོད་ཅིའི་ཕྱིར་སེམས་ཁོང་དུ་ཆུད་ཅིང་འདུག། ཕུ་ནུ་མོ་དག་ཁོ་མོ་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་ནས་ཁོ་མོས་རས་ཡུག་ཆེན་ཞིག་རྙེད་ན། ཁོ་མོའི་ཆོས་གོས་སུ་འདྲུབ་པར་འགྱུར་མི་ཤེས་སོ། །སྦེད་མ་ཁྱོད་གསེར་གྱི་སྣོད་ཀྱིས་སློང་མོ་ལ་རྒྱུའམ། ཁྱོད་ཀྱི་དགེ་སློང་འཕགས་པ་འཆར་ཀ་རབ་ཏུ་བཤེས་པ་ཡིན་ནོ། །སྦེད་མས་སྨྲས་པ། དེས་ཁོ་མོའི་ཆོས་གོས་དྲུབས་པར་མི་འགྱུར་རོ། །ཁྱོད་ཀྱིས་དེ་ལ་ལན་འགའ་བཅོལ་བ་ཡོད་དམ། ལན་འགའ་ཡང་བཅོལ་བ་མེད་དོ། །ཅི་ཁྱོད་ཆུ་སྒྲ་གྲགས་པས་ལྷམ་འབུད་དམ། སོང་ལ་ཆོལ་ཅིག་དང་འདྲུབ་པར་འགྱུར་རོ། །སྦེད་མ་འཆར་ཀའི་གན་དུ་སོང་སྟེ། དེའི་རྐང་པ་གཉིས་ལ་མགོ་བོས་ཕྱག་
འཚལ་ནས་མདུན་དུ་འདུག་པ་དང་། ཚེ་དང་ལྡན་པ་འཆར་ཀས་དེའི་རས་ཡུག་ཆེན་མཐོང་ནས་དེ་ལ་སྨྲས་པ། སྦེད་མ་གང་ལ་རས་ཡུག་ཆེན་འདི་ལྟ་བུ་ཡོད་པ་དེས་རས་སར་བ་ལས་སྣམ་སྦྱར་ཉི་རིམ་བྱས་ཏེ་སྙིང་ལས་ཆུང་ངུས་དགེ་བའི་ཕྱོགས་ལ་ཏྲོན་བྱས་པར་འགྱུར་རོ། །སྦེད་མས་སྨྲས་པ། འཕགས་པ་བདག་ཁྱོད་ལ་རས་ཡུག་ཆེན་མི་འབུལ་བ་ནི་མ་ལགས་ན་འདི་ལྟར་བདག་གི་ཆོས་གོས་ལྔ་ངན་ཅིང་སྣམ་སྦྱར་ཡང་རྙིངས་པས་ཁྱོད་ཀྱིས་བདག་གི་སྣམ་སྦྱར་ཚེམས་ཏེ་སྩོལ་ཅིག །འཆར་ཀས་བསམས་པ། གལ་ཏེ་རེ་ཞིག་བཙེམ་པར་བྱར་ཡང་བཅུ་གཉིས་སྡེ་དག་ལས་གང་དང་གང་དག་ལ་ཆོས་གོས་བཙེམ་པར་བྱ་བ་བྱུང་བར་གྱུར་པ་དེ་དག་ཐམས་ཅད་ཀྱང་བདག་གི་གན་དུ་ཁྱེར་ཏེ་འོང་བས་དེ་སྙེད་ཅིག་བཙེམ་པར་ཡང་ཇི་ལྟར་ནུས། གལ་ཏེ་མི་བཙེམ་དུ་ནི་ཚིག་པའི་གཡར་ཚུས་ཀྱང་མི་སྟེར་བར་འགྱུར་བས་འདི་ལྟར་ཅི་ནས་ཀྱང་ཤིང་གི་སྣོད་དུ་བསྐོལ་བ་བཞིན་དུ་དང་པོ་གང་ཡིན་པ་དེ་ཉིད་ཐ་མར་འགྱུར་བ་དེ་ལྟར་བཙེམ་པར་བྱའོ་སྙམ་ནས་དེས་དེ་ལ་སྨྲས་པ། ཞོག་ལ་སོང་ཤིག །སྦེད་མས་བཞག་སྟེ་སོང་བ་དང་། དྲུག་སྡེ་དག་དེར་དོང་ནས་དེ་དག་གིས་རས་ཡུག་ཆེན་དེ་མཐོང་ནས་སྨྲས་པ། བཙུན་པ་འཆར་ཀ་རས་ཡུག་ཆེན་འདི་སུའི། ལས་བདག་གིར་བྱ་བ་དེའིའོ། །གང་གི་སྦེད་མའིའོ། །འོ་ན་འཁོད་དེ་ཅི་རུང་བཙེམ་པར་བྱའོ། །དེ་ལྟར་གྱིས་ཤིག །དེ་དག་གིས་རས་ཡུག་ཆེན་དེ་བརྒྱངས་ཏེ་དྲས་ཤིང་དྲུབས་ནས་འཆར་ཀས་སྣམ་སྦྱར་དེ་དང་ཚོན་སྣ་ལྔའི་སྐུད་པ་ཁྱེར་ཏེ་འཆག་ཏུ་སོང་ནས། དེས་དེར་སོང་སྟེ་སྣམ་སྦྱར་དེ་ལ་ཚོན་སྣ་ལྔའི་སྐུད་པས་བདག་ཉིད་སྦེད་མའི་མགུལ་ནས་འཁྱུད་དེ་འདུག་པ་ཞིག་སྐུད་རིས་སུ་བཙེམ་ནས་དེ་གཙུག་ལག་ཁང་དུ་འོངས་ཏེ་སྣམ་སྦྱར་དེ་བལྟབ་ནས་ཆོས་གོས་ཀྱི་གདང་ལ་བཀལ་ཏེ་བཞག་པ་དང་། སྦེད་མ་ཡང་འོངས་ནས་འཆར་ཀས་སྨྲས་པ། སྦེད་མ་ཁོ་བོས་ཀྱང་སྣམ་སྦྱར་བཙེམས་ན་ཁྱོད་ཀྱང་འོངས་སོ། །དེས་སྣམ་སྦྱར་དེ་བལྟབ་བཞིན་དུ་སྦེད་མའི་ཕྲག་པ་ལ་བཀལ་ཏེ་སྨྲས་པ། རེ་ཞིག་ཇི་སྲིད་དུ་ཚོན་གྱིས་མ་བཅལ་བ་དེ་སྲིད་དུ་མ་དབྱེ་ཤིག །ལྟུང་བ་དང་བཅས་པར་གྱུར་ཏ་རེ། སྦེད་མས་སྣམ་སྦྱར་དེ་དེ་བཞིན་བལྟབ་
བཞིན་ཁོ་ནར་དབྱར་ཁང་དུ་འཕགས་པ་དང་། དེ་ལ་དགེ་སློང་མ་ཁྲིམས་ཟླས་སྨྲས་པ། སྦེད་མ་འཕགས་པ་འཆར་ཀས་སྣམ་སྦྱར་ཇི་ལྟར་བཙེམས་པ་བལྟས་འོན་ཅིག །སྦེད་མས་དེ་ལ་སྨྲས་པ། འཕགས་པ་འཆར་ཀ་ན་རེ་རེ་ཞིག་ཇི་སྲིད་དུ་ཚོན་གྱིས་མ་བཅལ་བ་དེ་སྲིད་དུ་མ་དབྱེ་ཤིག། ལྟུང་བ་དང་བཅས་པར་གྱུར་ཏ་རེ་ཞེས་ཟེར་རོ་ཞེས་ལྟར་མ་སྟེར་རོ། །སྦེད་མ་དབྱར་ཁང་དུ་སོང་བ་དང་། དེ་ལ་དགེ་སློང་མ་རྣམས་ཀྱིས་སྨྲས་པ། སྦེད་མ་འཕགས་པ་འཆར་ཀས་སྣམ་སྦྱར་ཇི་ལྟར་བཙེམས་པ་བལྟས་འོན་ཅིག །སྦེད་མས་སྨྲས་པ། འཕགས་པ་འཆར་ཀ་ན་རེ་རེ་ཞིག་ཇི་སྲིད་དུ་ཚོན་གྱིས་མ་བཅལ་བ་དེ་སྲིད་དུ་མ་དབྱེ་ཤིག །ལྟུང་བ་དང་བཅས་པར་གྱུར་ཏ་རེ་ཞེས་ཟེར་རོ། །དགེ་སློང་མ་གྲོགས་མོ་དག་གིས་འདི་ལ་ལྟུང་བར་འགྱུར་བ་ཅི་ཡོད་ཅེས་དེའི་རྒྱབ་ལོགས་སུ་འདུག་སྟེ་སྣམ་སྦྱར་ཧུར་ཅེས་ཕྲོགས་ནས་ཕྱེ་སྟེ་བལྟས་པ་དང་། དགེ་སློང་མ་རྣམས་ཀྱིས་དེ་ལ་ཚོན་སྣ་ལྔའི་སྐུད་པས་འཆར་ཀ་སྦེད་མའི་མགུལ་ནས་འཁྱུད་དེ་འདུག་པ་སྐུད་རིས་སུ་བཙེམས་པ་མཐོང་ནས་རྟ་གད་ཀྱིས་བཏབ་སྟེ་སྨྲས་པ། སྦེད་མ་ཁྱོད་ལ་འཕགས་པ་འཆར་ཀས་ཡུན་རིང་མོ་ཞིག་གིས་གཟོད་འཁྱུད་དོ། །སྐྱེ་དགུའི་བདག་མོ་ཆེན་མོ་གཽ་ཏ་མཱིས་ཐོས་ནས་དེས་སྨྲས་པ། ནུ་མོ་དག་ཁྱེད་མགོ་ཕྱི་ཞིང་མཆན་ཁུང་སྤུན་པ་ཡིན་ན་ཅི་དགོད། དེ་དག་གིས་སྨྲས་པ། འཕགས་མ་ཇི་ལྟ་ཇི་ལྟར་འཕགས་པ་འཆར་ཀས་མི་མཛེས་པ་བགྱིས་པ་ལ་གཟིགས། ནུ་མོ་དག་དྲུག་སྡེ་གནས་ངན་ལེན་ཀུན་དུ་སྤྱོད་པ་དག་གིས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ་ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་
ཀ་ཁྱོད་དགེ་སློང་མ་ཉེ་དུ་མ་ཡིན་པའི་གོས་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པའི་གོས་བྱེད་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀའམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པའི་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ཀྱི་བདུན་པ་ཚུན་ཆད་ནི་ཉེ་དུ་ཡིན་ལ། དེ་ཕན་ཆད་ནི་ཉེ་དུ་མ་ཡིན་ནོ། །གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཀོ་ཏམ་པའི་གོས་དང་། ཉི་འོག་གི་གོས་དག་ལས་གང་ཡང་རུང་བའོ། །བྱེད་ན་ཞེས་བྱ་བ་ནི་འཚེམ་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཉེ་དུ་མ་ཡིན་པར་འདུ་ཤེས་པས་གོས་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ་ཡིད་གཉིས་ཟ་བས་གོས་བྱེད་ན་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཉེ་དུ་མ་ཡིན་པར་འདུ་ཤེས་པས་གོས་བྱེད་ན་ཉེས་བྱས་སུ་
འགྱུར་རོ། །དགེ་སློང་གིས་དགེ་སློང་མ་ཉེ་དུ་ལ་ཡིད་གཉིས་ཟ་བས་གོས་བྱེད་ན་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གོས་བྱེད་པའི་ལྟུང་བྱེད་དེ་ཉི་ཤུ་ལྔ་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ་འགྲོ་ན་ཡང་འགྲོ་བར་ཆས་པའི་རྙེད་པ་སྒྲུབ་པར་བྱེད། འོང་ན་ཡང་བློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་། སྐྱེ་བོ་མང་པོ་དགའ་བ་དང་། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང་། གང་ནས་ཀྱང་མི་འོང་བས་རྙེད་པ་འཐོབ་པ་དང་། སྐྱེ་བོ་མང་པོ་དགའ་བ་དང་། ཡིད་དུ་འོང་བར་ག་ལ་འགྱུར་གྱིས། ཡུ་བུ་ཅག་ཀྱང་འདོང་ངོ་། །གང་དུ་འདོང་། ལྗོངས་རྒྱུར་འདོང་ངོ་། །ཇེ་སྲིང་མོ་དག་བལྟའོ་ཞེས་དེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་དགེ་སློང་མའི་དབྱར་ཁང་དུ་དོང་སྟེ་བཅུ་གཉིས་སྡེ་དག་གི་གན་དུ་སོང་ནས་སྨྲས་པ། སྲིང་མོ་དག་ཁྱེད་ཅག་བལྟས་ཀྱིས་ཁོ་བོ་ཅག་ལྗོངས་རྒྱུར་འདོང་ངོ་། །དེ་དག་ངུས་པ་དང་། དྲུག་སྡེ་དག་གིས་སྨྲས་པ། སྲིང་མོ་དག་ངུར་ཅི་ཡོད། གལ་ཏེ་ཁྱེད་ཅག་ལྗོངས་རྒྱུར་བཞུད་ན་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ། །དྲུག་སྡེ་དག་གིས་སྨྲས་པ། སྲིང་མོ་དག་བཅོམ་ལྡན་འདས་འཁོར་སྟོང་ཉིས་བརྒྱ་ལྔ་བཅུ་དང་བཞུགས་ན་ཁྱེད་ཅག་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ་ཞེས་ཟེར་རམ། དེ་དག་གིས་སྨྲས་པ། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན་མཆི་བ་དང་། སྟན་འདིང་བ་དང་། ཆོས་སྟོན་པར་ལྟ་ག་ལ་འགྱུར། ཉེ་དགའས་སྨྲས་པ། སྲིང་མོ་དག་འོ་ན་ལྷན་ཅིག་འདོང་ངོ་། །སྦོམ་དགའ་མོས་སྨྲས་པ། དགེ་སློང་མ་དག་དགེ་སློང་རྣམས་དང་ལྷན་ཅིག་མཆིར་རུང་ངམ། ཉེ་དགའས་སྨྲས་པ། ལེགས་པར་རུང་ངོ་ཤིན་ཏུ་རུང་ངོ་གང་དུ་བཀག་སུས་བཀག་
ལམ་རྒྱགས་མང་པོ་དག་སྟ་གོན་གྱིས་ཤིག །དེ་དག་གིས་ལམ་རྒྱགས་མང་པོ་དག་སྟ་གོན་བྱས་སོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་དག་མཉན་ཡོད་དུ་བསོད་སྙོམས་བརྒྱུས་ནས་དགེ་སློང་མའི་དབྱར་ཁང་དུ་དོང་བ་དང་། དེ་དག་ལ་བཅུ་གཉིས་སྡེ་དག་གིས་སྨྲས་པ། ཇོ་བོ་ཅག་ཇེ་ཞལ་ཚུས་གསོལ་ཅིག །དེ་དག་གིས་གཡར་ཚུས་བྱས་བྱས་པ་ན་དེ་དག་གིས་ལམ་རྒྱགས་སྦྱར་བ་ཐམས་ཅད་ཟོས་ནས་དེ་དག་གིས་སྨྲས་པ། སྲིང་མོ་དག་ཁྱེད་ཀྱིས་ལམ་རྒྱགས་ཇི་སྙེད་སྟ་གོན་བྱས་པ་བལྟས་འོན་ཅིག །དེ་དག་གིས་སྨྲས་པ། ཁྱེད་ཀྱིས་གསོལ་བ་དེ་དག་ལགས་སོ། །དྲུག་སྡེ་དག་གིས་སྨྲས་པ། ལམ་རྒྱགས་དེ་ཙམ་གྱིས་ལྗོངས་རྒྱུར་ཇི་ལྟར་ནུས། འདི་ལྟར་ལམ་ཀར་ལྷག་པར་བཀྲེས་པར་འགྱུར་གྱིས་ལམ་རྒྱགས་མང་དུ་སྟ་གོན་གྱིས་ཤིག །དེ་དག་གིས་ལམ་རྒྱགས་མང་པོ་དག་སྟ་གོན་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །བསོད་སྙོམས་པ་ཞིག་ཀྱང་དེ་དག་དང་ལྷན་ཅིག་ལྗོངས་རྒྱུར་འཕགས་པ་དང་དགེ་སློང་རྣམས་ཀྱིས་དེ་ལ་སྨྲས་པ། བསོད་སྙོམས་པ་འདི་དག་ནི་གནས་ངན་ལེན་ཀུན་དུ་སྤྱོད་པ་ཡིན་གྱིས་ཁྱོད་འདི་དག་དང་ལྷན་ཅིག་ལྗོངས་རྒྱུར་མ་འགྲོ་ཤིག །ཁྱོད་ལ་མཐོ་འཚམ་པར་འགྱུར་རོ། །བསོད་སྙོམས་པས་སྨྲས་པ། ཁོ་བོ་ལོ་འདས་པ་ཡིན་པས་འདི་དག་ལ་ལུང་མནོད་པ་དང་། བཀླག་པ་དང་། ཁ་ཏོན་དང་། ཡོངས་སུ་དྲི་བ་དང་། རྣལ་འབྱོར་དང་། ཡིད་ལ་བྱ་བ་འགའ་ཡང་རག་མ་ལས་པས་འདི་དག་གིས་ཁོ་བོ་ལ་ཐོ་བཙམ་དུ་ཅི་ཡོད་ཅེས་དེས་དེ་དག་གི་ཚིག་ཚིག་མ་ཡིན་པར་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །དེ་དག་གིས། གང་གི་ཚེ་མཚམས་ཀྱི་ཕྱི་རོལ་ཏུ་སོན་པ་དེའི་ཚེ་ན་སྨྲས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱ། ཚུར་ཤེག་བདག་ཅག་རང་རང་གི་སྤྱོད་ལམ་གྱིས་འཁོད་པར་བྱའོ་ཞེས་དང་པོར་དགའ་བོ་འདུག་ནས་དེའི་འོག་ཏུ་དགའ་མོ་འདུག །དེའི་འོག་ཏུ་དགའ་བོའི་ལྷན་ཅིག་གནས་པ་འདུག །དེའི་འོག་ཏུ་དགའ་མོའི་ལྷན་ཅིག་གནས་པ་འདུག །དེའི་འོག་ཏུ་དགའ་
བོའི་དགེ་ཚུལ་འདུག །དེའི་འོག་ཏུ་དགའ་མོའི་དགེ་ཚུལ་འདུག་གོ །དེ་བཞིན་དུ་ཉེ་དགའ་དང་། གཙུག་དགའ་མོ་ལ་སོགས་པ་ཡང་སྤེལ་མར་བཀོད་དེ་དོང་ངོ་། །དོན་མཐུན་དེ་དང་བྲམ་ཟེ་ཞིག་འགྲོ་བ་དེས་དེ་དག་མཐོང་ནས་དེས་སྨྲས་པ། འདི་ནི་དགེ་སྦྱོང་ཡིན། དེའི་ཆུང་མ་ནི་འདི་ཡིན། དེའི་བུ་ནི་འདི་ཡིན། དེའི་མནའ་མ་ནི་འདི་ཡིན། དེའི་ཚ་བོ་འདི་ཡིན། དེའི་ཚ་བོའི་ཆུང་མ་ནི་འདི་ཡིན་པར་ཤེས་སོ། །ཉེ་དགའས་ཐོས་ནས་དེས་སྨྲས་པ། བཀྲེན་པ་ཁྱོད་ཀྱི་གཉའ་བ་རྡོག་པས་མནན་ནས་འདི་ནི་ཁོ་བོའི་ཆུང་མ་ཡིན། འདི་ནི་ཁོའི་བུ་ཡིན། འདི་ནི་ཁོའི་མནའ་མ་ཡིན། འདི་ནི་ཁོ་བོའི་ཚ་བོ་ཡིན། འདི་ནི་ཁོ་བོའི་ཚ་བོའི་ཆུང་མ་ཡིན། བསོད་སྙོམས་པ་དེས་བསམས་པ་བདག་ཤི་བ་ནི་བླའི་གནས་ངན་ལེན་ཀུན་ཏུ་སྤྱོད་པ་འདི་དག་དང་ལྷན་ཅིག་ལྗོངས་རྒྱུར་འགྲོ་བ་ནི་མི་རུང་ངོ་སྙམ་ནས་དེ་ཕྱིར་ལོག་སྟེ་རྒྱལ་བྱེད་ཀྱི་ཚལ་དུ་སོང་བ་དང་། དགེ་སློང་རྣམས་ཀྱིས་དེ་མཐོང་ནས་སྨྲས་པ། བསོད་སྙོམས་པ་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དྲུག་སྡེ་གནས་ངན་ལེན་ཀུན་ཏུ་སྤྱོད་པ་དག་གིས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ། །ཅི་བྱས། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་
སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ་ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་མ་རབ་ཏུ་མང་པོ་དག་རྒྱལ་པོའི་ཁབ་ཏུ་དགེ་སློང་མའི་དབྱར་ཁང་རྒྱལ་པོའི་ཀུན་དགའ་ར་བར་དབྱར་གནས་པར་ཁས་བླངས་ནས་དེ་དག་དབྱར་གྱི་ཟླ་བ་གསུམ་པོ་དག་འདས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་འཕགས་ནས་དེ་དག་གིས་མཉན་ཡོད་དུ་འགྲོ་བའི་དོན་མཐུན་བཙལ་བར་བརྩམས་པ་དང་། ཇི་ཙམ་ན་དེ་དག་གིས་དགེ་སློང་དང་བཅས་པའི་དོན་མཐུན་མཐོང་ནས་སྨྲས་པ། ཕུ་ནུ་མོ་དག་དོན་མཐུན་འདི་ནི་དགེ་སློང་དང་བཅས་པ་ཡིན་གྱིས། དགེ་སློང་མེད་པའི་དོན་མཐུན་གཞན་བཙལ་བར་བྱའོ། །ཞེས་དེ་དག་གིས་དགེ་སློང་མེད་པའི་དོན་མཐུན་གཞན་བཙལ་བར་བརྩམས་པ་དང་། ཇི་ཙམ་ན་དགེ་སློང་མེད་པའི་དོན་མཐུན་མ་རྙེད་ནས་དེ་དག་གིས་སྨྲས་པ། ཕུ་ནུ་མོ་དག་བདག་ཅག་གིས་ཤིན་ཏུ་ཡུན་རིང་པོར་བསྡད་ན་ཡང་དགེ་སློང་མེད་པའི་དོན་མཐུན་མ་རྙེད་ཀྱིས་དོན་མཐུན་འདི་ཉིད་དང་མགོ་སྣང་ཙམ་གྱིས་འདོང་བར་བྱའོ། །ཞེས་དེ་དག་དོན་མཐུན་དེ་དང་ལྷན་ཅིག་མགོ་སྣང་ཙམ་གྱིས་འཕགས་སོ། །དོན་མཐུན་དེ་ཤིན་ཏུ་རིངས་པར་སོང་ནས་དེ་དག་ཕྱི་བཞིན་འབྲང་ཞིང་འགྲོ་བ་ན་ཆོམ་རྐུན་པ་དག་གིས་བཅོམ་ནས་དེ་
དག་མཐར་གྱིས་མཉན་ཡོད་དུ་ཕྱིན་ཏེ་དགེ་སློང་མའི་དབྱར་ཁང་དུ་དོང་བ་དང་དགེ་སློང་མ་རྣམས་ཀྱིས་མཐོང་ནས་སྨྲས་པ། ཕུ་ནུ་མོ་དག་ཇི་ལྟ་བདེ་བར་བརྒྱུས་སམ། ཇི་ལྟར་བདེ་བར་བརྒྱུས། བདག་ཅག་ཆོམ་རྐུན་པ་དག་གིས་བཅོམ་མོ། །ཕུ་ནུ་མོ་དག་ཇི་ལྟར་བདག་ཅག་བཅོམ་ལྡན་འདས་ཀྱིས་ཡོངས་སུ་བཏང་བ་དེ་ལྟར་ནི་ཡ་མཚན་ཅན་དགུ་བཅུ་རྩ་དྲུག་པོ་དག་གིས་ཀྱང་བུད་མེད་ཀྱི་ཡུལ་འགའ་ཡང་ཡོངས་སུ་མ་བཏང་ངོ་། །ཞེས་ཟེར་བའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དུས་མ་གཏོགས་སོ། །དགེ་སློང་དག་དོན་མཐུན་དང་ལྷན་ཅིག་ལྗོངས་རྒྱུར་འདོང་བ་ན་དེ་དག་བསོད་སྙོམས་ཀྱིས་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ་ལམ་རྒྱགས་བསྐུར་བར་བྱའོ། །བཅོམ་ལྡན་འདས་ཀྱིས་ལམ་རྒྱགས་བསྐུར་བར་བྱའོ་ཞེས་བཀའ་སྩལ་ནས་དེ་དག་གིས་སུས་བསྐུར་བར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། རྩེ་རྒོད་ཀྱིས་བསྐུར་བར་བྱའོ། །རྩེ་རྒོད་མེད་ན་རྩེ་རྒོད་མོས་བསྐུར་བར་བྱའོ། །རྩེ་རྒོད་མོ་མེད་ན་དགེ་ཚུལ་གྱིས་བསྐུར་བར་བྱའོ། །དགེ་ཚུལ་མེད་ན་དགེ་ཚུལ་མས་བསྐུར་བར་བྱའོ། །དགེ་ཚུལ་མ་མེད་ན་དགེ་སློང་རྣམས་ཀྱིས་དགེ་སློང་མའི་ལམ་རྒྱགས་བསྐུར་བར་བྱ་ཞིང་། དགེ་སློང་མ་རྣམས་ཀྱིས་དགེ་སློང་རྣམས་ཀྱི་ལམ་རྒྱགས་བསྐུར་བར་བྱ་སྟེ། དགེ་སློང་རྣམས་ཀྱིས་དགེ་སློང་མ་རྣམས་ཀྱི་བྱིན་ལེན་བསྟབ་པར་བྱ་ཞིང་། དགེ་སློང་མ་རྣམས་ཀྱིས་དགེ་སློང་རྣམས་ཀྱི་བྱིན་ལེན་བསྟབ་པར་བྱའོ། །དགེ་སློང་དག་ལྗོངས་རྒྱུ་ཞིང་འདོང་བ་ན་ན་བར་གྱུར་ནས་དགེ་སློང་མ་དག་གིས་དེ་དག་བོར་ཏེ་དོང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་རྣམས་ཀྱིས་ཀྱང་དགེ་སློང་དག་བཀུར་བར་བྱའོ། །དགེ་སློང་མ་དག་རྐང་པ་ལོགས་ནས་འཛིན་ཅིང་དགེ་སློང་དག་མགོ་ལོགས་ནས་འཛིན་པ་ན་དགེ་སློང་མ་དག་འདོད་ཆགས་སྐྱེས་ནས་བཅོམ་ལྡན་འདས་ཀྱིས་
བཀའ་སྩལ་པ། དགེ་སློང་དག་གིས་རྐང་པ་ལོགས་ནས་གཟུང་བར་བྱ་ཞིང་། དགེ་སློང་མ་དག་གིས་མགོ་ལོགས་ནས་གཟུང་བར་བྱའོ། །དེ་དག་གྲོང་དུ་ཕྱིན་ནས་ཐམས་ཅད་སྡོད་པ་ན། དེ་དག་བསོད་སྙོམས་ཀྱིས་ཕོངས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ཀྱིས་བསྡད་པར་མི་བྱ་བར་དེ་ན་བའི་སྨན་དང་ཟན་ལེགས་པར་སྦྱར་ཏེ་དགེ་སློང་གཅིག་བཞག་ནས་ལྷག་མ་རྣམས་འདོང་བར་བྱའོ། །དགེ་སློང་མ་རྣམས་ལ་ཡང་དེ་བཞིན་དུ་བྱའོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ལམ་དོན་མཐུན་གྱིས་བགྲོད་པར་བྱ་བ་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་དེ་ལ་དེ་ནི་དུས་ཡིན་ནོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ་གཞན་ཡང་དེ་ལྟ་བུ་གང་ཡིན་པའོ། །དགེ་སློང་མའི་དོན་མཐུན་དང་ལྷན་ཅིག་ཅེས་བྱ་བ་ནི་ཆོས་འདི་པའོ། །འཐམས་ནས་ཞེས་བྱ་བ་ནི་བརྡའ་བྱས་ནས་སོ། །འགྲོན་ལམ་དུ་ཞེས་བྱ་བ་ནི་དགོན་པའི་ལམ་དུའོ། །འཇུག་ན་ཞེས་བྱ་བ་ནི་འགྲོ་ནའོ། །དུས་མ་གཏོགས་ཏེ་ཞེས་བྱ་བ་ནི་དུས་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་
ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་དུས་ནི་འདི་ཡིན་ཏེ་ལམ་དོན་མཐུན་གྱིས་བགྲོད་པར་བྱ་བ་ཞེས་བྱ་བ་ནི་དོན་མཐུན་མེད་པར་བགྲོད་མི་ནུས་པའོ། །དོགས་པ་དང་བཅས་པར་གྲགས་པ་ཞེས་བྱ་བ་ནི་ཆོམ་རྐུན་པ་དང་གཡོན་ཅན་གྱིས་འཇིགས་པར་གྲགས་པའོ། །འཇིགས་པ་དང་བཅས་པར་གྲགས་པ་ཞེས་བྱ་བ་ནི་སེང་གེ་དང་། སྟག་དང་། གུང་གིས་འཇིགས་པར་གྲགས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ན་ཞེས་བྱ་བ་ནི་ཤ་སྦྲང་དང་། སྦྲང་བུ་མཆུ་རིངས་དང་། རླུང་དང་། ཉི་མ་དང་། སྡིག་སྦྲུལ་གྱི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ནའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་རོ། །རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲོང་ནས་དགོན་པའི་འགྲོན་ལམ་དུ་འཇུག་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་མཐུན་དང་ལྷན་ཅིག་འཐམས་ནས་དགོན་པ་ནས་གྲོང་གི་འགྲོན་ལམ་དུ་འཇུག་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་དང་ལྷན་ཅིག་འགྲོན་ལམ་དུ་འཇུག་པའི་ལྟུང་བྱེད་དེ་ཉི་ཤུ་དྲུག་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྷུང་བཟེད་ནག་པོ་ཅན་འདི་དག་ནི་རྐང་པ་སྤྲེའུ་ཞག་གིས་བསྐུས་ཏེ། འགྲོན་ན་ཡང་འགྲོ་བར་ཆས་པས་རྙེད་
པ་སྒྲུབ་པར་བྱེད། འོང་ན་ཡང་བློ་བུར་དུ་འོངས་པའི་རྙེད་པ་སྒྲུབ་པར་བྱེད་ཅིང་། སྐྱེ་བོ་མང་པོ་དག་དགའ་བ་དང་། ཡིད་དུ་འོང་བར་ཡང་འགྱུར་རོ། །ཡུ་བུ་ཅག་ནི་ཁྲོན་པའི་རུས་སྦལ་དང་འདྲ་བར་གར་ཡང་མི་འདོང་། གང་ནས་ཀྱང་མི་འོང་བས་རྙེད་པ་ཐོབ་པ་དང་། སྐྱེ་བོ་མང་པོ་དག་དགའ་བ་དང་། ཡིད་དུ་འོང་བར་ག་ལ་འགྱུར་གྱིས་ཡུ་བུ་ཅག་ཀྱང་འདོང་ངོ་། །གང་དུ་འདོང་། ལྗོངས་རྒྱུར་འདོང་ངོ་། །ཇེ་སྲིང་མོ་དག་བལྟའོ་ཞེས་དེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་དགེ་སློང་མའི་དབྱར་ཁང་དུ་དོང་སྟེ་བཅུ་གཉིས་སྡེ་དག་གི་གན་དུ་དོང་ནས་སྨྲས་པ། སྲིང་མོ་དག་ཁྱེད་ཅག་བལྟས་ཀྱིས་ཁོ་བོ་ཅག་ལྗོངས་རྒྱུར་འདོང་ངོ་། །དེ་དག་ངུས་པ་དང་། དྲུག་སྡེ་དག་གིས་སྨྲས་པ། སྲིང་མོ་དག་ངུར་ཅི་ཡོད། གལ་ཏེ་ཁྱེད་ཅག་ལྗོངས་རྒྱུར་བཞུད་ན་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ། །དྲུག་སྡེ་དག་གིས་སྨྲས་པ་སྲིང་མོ་དག་བཅོམ་ལྡན་འདས་འཁོར་སྟོང་ཉིས་བརྒྱ་ལྔ་བཅུ་དང་བཞུགས་ན། ཁྱེད་ཅག་བདག་ཅག་ལ་རྒྱལ་བྱེད་ཀྱི་ཚལ་སྟོངས་པར་འགྱུར་རོ་ཞེས་ཟེར་རམ་དེ་དག་གིས་སྨྲས་པ། ལྷུང་བཟེད་ནག་པོ་ཅན་དག་བདག་ཅག་མཐོང་བར་ཡང་མི་དགའ་ན། མཆི་བ་དང་སྟན་གདིང་བ་དང་། ཆོས་སྟོན་པར་ལྟ་ག་ལ་འགྱུར། ཉེ་དགའས་སྨྲས་པ། སྲིང་མོ་དག་འོ་ན་ལྷན་ཅིག་འདོང་ངོ་དེ་དག་གིས་སྨྲས་པ། བཅོམ་ལྡན་འདས་ཀྱིས་དགེ་སློང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་འགྲོན་ལམ་དུ་འཇུག་ན་དུས་མ་གཏོགས་ཏེ་ལྟུང་བྱེད་དོ་ཞེས་བསླབ་པའི་གཞི་བཅའ་བ་མ་མཛད་དམ། ཉེ་དགའས་སྨྲས་པ། དེ་ནི་སྐམ་སའི་ལམ་དུ་བཅའ་བ་མཛད་པས་བདག་ཅག་གྲུའི་ལམ་དུ་འདོང་ངོ་། །སྦོམ་དགའ་མོས་སྨྲས་པ། དགེ་སློང་མ་དག་དགེ་སློང་དག་དང་ལྷན་ཅིག་གྲུའི་ལམ་དུ་མཆིར་རུང་ངམ། ཉེ་དགའས་སྨྲས་པ། ལེགས་པར་རུང་ངོ་། །ཤིན་ཏུ་རུང་ངོ་། །གང་དུ་བཀག །སུས་བཀག །ལམ་རྒྱགས་མང་པོ་དག་སྟ་གོན་གྱིས་ཤིག །དེ་དག་གིས་ལམ་རྒྱགས་མང་པོ་དག་ལྟ་གོན་བྱས་སོ། །དྲུག་སྡེ་དག་
སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་དག་མཉན་ཡོད་དུ་བསོད་སྙོམས་བརྒྱུས་ནས་དགེ་སློང་མའི་དབྱར་ཁང་དུ་དོང་བ་དང་། དེ་དག་ལ་བཅུ་གཉིས་སྡེ་དག་གིས་སྨྲས་པ། ཇོ་བོ་ཅག་ཇེ་ཞལ་ཚུས་གསོལ་ཅིག །དེ་དག་གིས་གཡར་ཚུས་བྱས་པ་ན་དེ་དག་གིས་ལམ་རྒྱགས་སྦྱར་བ་ཐམས་ཅད་ཟོས་ནས། དེ་དག་གིས་སྨྲས་པ། སྲིང་མོ་དག་ཁྱེད་ཀྱིས་ལམ་རྒྱགས་ཇི་སྙེད་སྟ་གོན་བྱས་པ་བལྟས་འོན་ཅིག །དེ་དག་གིས་སྨྲས་པ། ཁྱེད་ཀྱིས་གསོལ་པ་དེ་དག་ལགས་སོ། །དྲུག་སྡེ་དག་གིས་སྨྲས་པ། ལམ་རྒྱགས་དེ་ཙམ་གྱིས་ལྗོངས་རྒྱུར་ཇི་ལྟར་ནུས། འདི་ལྟར་ལམ་ཀར་ལྷག་པར་བཀྲེས་པར་འགྱུར་གྱིས་ལམ་རྒྱགས་མང་དུ་སྟ་གོན་གྱིས་ཤིག །དེ་དག་གིས་ལམ་རྒྱགས་མང་པོ་དག་སྟ་གོན་བྱས་ཏེ་དྲུག་སྡེ་དག་དང་ལྷན་ཅིག་ལྗོངས་རྒྱུར་འཕགས་སོ། །བསོད་སྙོམས་པ་ཞིག་ཀྱང་དེ་དག་དང་ལྗོངས་རྒྱུར་འཕགས་པ་དང་། དགེ་སློང་རྣམས་ཀྱིས་དེ་ལ་སྨྲས་པ། བསོད་སྙོམས་པ་འདི་དག་ནི་གནས་ངན་ལེན་ཀུན་དུ་སྤྱོད་པ་ཡིན་གྱིས་འདི་དག་དང་ལྷན་ཅིག་ལྗོངས་རྒྱུར་མ་འགྲོ་ཤིག །ཁྱོད་ལ་མཐོ་འཚམ་པར་འགྱུར་རོ། །བསོད་སྙོམས་པས་སྨྲས་པ། ཁོ་བོ་ལོ་འདས་པ་ཡིན་པས་འདི་དག་ལ་ལུང་མནོད་པ་དང་། བཀླག་པ་དང་། ཁ་ཏོན་དང་། ཡོངས་སུ་དྲི་བ་དང་། རྣལ་འབྱོར་དང་། ཡིད་ལ་བྱ་བ་འགའ་ཡང་རག་མ་ལས་པས་འདི་དག་གིས་ཁོ་བོ་ལ་ཐོ་བཙམ་དུ་ཅི་ཡོད་ཅེས་དེས་དེ་དག་གི་ཚིག་ཚིག་མ་ཡིན་པར་བྱས་ཏེ། དྲུག་སྡེ་དག་དང་ལྷན་ཅིག་གྲུར་འཇུག་ཏུ་འཕགས་སོ། །དེ་དག་གིས་གང་གི་ཚེ་མཚམས་ཀྱི་ཕྱི་རོལ་དུ་སོན་པ་དེའི་ཚེ་ན་སྨྲས་པ། དགའ་བོ་ཉེ་དགའ་བདག་ཅག་གིས་ཡུན་ཇི་སྲིད་དུ་གཞན་གྱི་སྤྱོད་ལམ་གྱིས་འཁོད་པར་བྱ། ཚུར་གཤེགས་བདག་ཅག་རང་རང་གི་སྤྱོད་ལམ་གྱིས་འཁོད་པར་བྱའོ། །ཞེས་དང་པོར་དགའ་བོ་འདུག་ནས། དེའི་འོག་ཏུ་དགའ་མོ་འདུག །དེའི་འོག་ཏུ་དགའ་བོའི་ལྷན་ཅིག་གནས་
པ་འདུག །དེའི་འོག་ཏུ་དགའ་མོའི་ལྷན་ཅིག་གནས་པ་འདུག །དེའི་འོག་ཏུ་དགའ་བོའི་དགེ་ཚུལ་འདུག །དེའི་འོག་ཏུ་དགའ་མོའི་དགེ་ཚུལ་མ་འདུག །དེ་བཞིན་དུ་ཉེ་དགའ་དང་། གཙུག་དགའ་མོ་ལ་སོགས་པ་ཡང་སྤེལ་མར་བཀོད་དེ་དོང་ངོ་། །དོན་མཐུན་དེ་དང་བྲམ་ཟེ་ཞིག་ལྷན་ཅིག་འགྲོ་བ་དེས་དེ་དག་མཐོང་ནས་དེས་སྨྲས་པ། འདི་ནི་དགེ་སྦྱོང་ཡིན་དེའི་ཆུང་མ་ནི་འདི་ཡིན་དེའི་བུ་ནི་འདི་ཡིན་དེའི་མནའ་མ་ནི་འདི་ཡིན། དེའི་ཚ་བོ་ནི་འདི་ཡིན། དེའི་ཚ་བོའི་ཆུང་མ་ནི་འདི་ཡིན་པར་ཤེས་སོ། །ཉེ་དགའས་ཐོས་ནས་དེས་སྨྲས་པ། བཀྲེན་པ་ཁྱོད་ཀྱི་གཉའ་བ་རྡོག་པས་མནན་ནས་འདི་ནི་ཁོ་བོའི་ཆུང་མ་ཡིན། འདི་ནི་ཁོ་བོའི་བུ་ཡིན། འདི་ནི་ཁོ་བོའི་མནའ་མ་ཡིན། འདི་ནི་ཁོ་བོའི་ཚ་བོ་ཡིན། འདི་ནི་ཁོ་བོའི་ཚ་བོའི་ཆུང་མ་ཡིན་ནོ། །བསོད་སྙོམས་པ་དེས་བསམས་པ་བདག་ཤི་བ་ནི་བླའི་གནས་ངན་ལེན་ཀུན་དུ་སྤྱོད་པ་འདི་དག་དང་ལྷན་ཅིག་གྲུར་ཞུགས་ཏེ་འགྲོ་བ་ནི་མི་རུང་ངོ་སྙམ་ནས། དེ་ཕྱིར་ལོག་སྟེ་རྒྱལ་བྱེད་ཀྱི་ཚལ་དུ་སོང་བ་དང་། དགེ་སློང་རྣམས་ཀྱིས་དེ་མཐོང་ནས་སྨྲས་པ། བསོད་སྙོམས་པ་ཇི་ལྟ་བདེ་བར་བརྒྱུས་སམ། ཚེ་དང་ལྡན་པ་དག་ཇི་ལྟར་བདེ་བར་བརྒྱུས། དྲུག་སྡེ་གནས་ངན་ལེན་ཀུན་དུ་སྤྱོད་པ་དག་གིས་འདྲུམས་པ་ལྟུང་བས་བཅོམ་ལྡན་འདས་ཀྱི་བསྟན་པ་འཇིག་པར་བྱེད་དོ། །ཅི་བྱས། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་
འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོའམ། ཐུར་དུ་འགྲོ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཁྱིམ་བདག་ཅིག་གིས་ཆུ་ཀླུང་གནས་ཅན་གྱི་ཕ་རོལ་ཐི་བ་ཅན་གྱི་ཀུན་དགའ་ར་བར་དགེ་འདུན་གྱི་ཕྱིར་གཙུག་ལག་ཁང་བྱེད་དུ་བཅུག་ནས། དེས་གཙུག་ལག་ཁང་དེ་དབུལ་བའི་ཕྱིར་གཉིས་ཀའི་དགེ་འདུན་སྤྱན་དྲངས་སོ། །དགེ་སློང་མ་ཞིག་དགེ་བའི་ཕྱོགས་ལ་བརྩོན་པར་གྱུར་པ་དེས་བསམས་པ། དེང་བདག་གིས་བསོད་སྙོམས་ལ་བརྒྱུ་མི་དགོས་པས་ཇི་སྲིད་དུ་གདུགས་ཚོད་ལ་ཉེ་བར་མ་གྱུར་པ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱ་ཞིང་། དེའི་འོག་ཏུ་དུས་ཤེས་པར་བྱས་ཏེ་འགྲོའོ་སྙམ་ནས་དེས་ཇི་སྲིད་དུ་གདུགས་ཚོད་ལ་ཉེ་བར་མ་གྱུར་པ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱས་ནས། དེའི་འོག་ཏུ་དུས་ཤེས་པར་བྱས་ཏེ་ཆུ་ཀླུང་གི་འགྲམ་དུ་སོང་བ་དང་། ཇི་ཙམ་ན་དགེ་སློང་དག་གྲུར་
ཞུགས་ནས་གྲུ་པས་སྨྲས་པ། འཕགས་མ་གྲུར་ཞུགས་ཤིག །བཞིན་བཟངས་ཇེ་སོང་ཤིག་དང་། གྲུ་གཞན་བཀང་བ་ན་འགྲོའོ། །གྲུ་པ་དེས་ཡང་དང་ཡང་དུ་འོངས་ཏེ་སྨྲས་པ། འཕགས་མ་གྲུར་ཞུགས་ཤིག །དེས་ཀྱང་སྨྲས་པ། བཞིན་བཟངས་ཇེ་སོང་ཤིག་དང་། གྲུ་གཞན་བཀང་བ་ན་འགྲོའོ། །གྲུ་པ་དེ་སོང་ནས་ཆུ་ཀླུང་གི་ཕ་རོལ་དུ་གྲུ་ཕུར་པ་ལ་བརྟོད་དེ། སྐྱེ་བོ་ཕལ་པོ་ཆེའི་ཚོགས་ཀྱི་ནང་དུ་ཞུགས་ཤིང་འདུག་གོ །དགེ་སློང་མ་དེས་ཡང་དང་ཡང་དུ་བོས་པ་དང་། གྲུ་པ་དེས་ཚིག་ཀྱང་མ་སྟེར་ནས་དེ་དེ་ན་སྡོད་སྡོད་ནས་ཇི་ཙམ་ན་གདུགས་ཚོད་ཡོལ་ནས། དེའི་འོག་ཏུ་དབྱར་ཁང་དུ་ཕྱིར་ལོག་སྟེ་དེ་ཇི་སྲིད་དུ་ལུས་ལས་མདངས་མ་ཡལ་བ་དེ་སྲིད་ཀྱི་བར་དུ་དགེ་བའི་ཕྱོགས་ལ་ཏྲོན་བྱས་ནས། གང་གི་ཚེ་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང་། དགེ་སློང་མ་རྣམས་ལྷགས་ཏེ་དེ་ལ་སྨྲས་པ། འཕགས་མ་གལ་ཏེ་ཟས་གཞན་གྱི་ཡིན་ཞེས་ཏེ་ལྟོ་ཡང་གཞན་གྱི་ཡིན་སྙམ་མམ། ཅི་བྱས། ཇི་ཙམ་གྱིས་གློས་ཕབ་སྟེ་ཉལ་བར་གྱུར་པ་དེ་ཙམ་གྱིས་ཟས་ཟོས་སོ། །སུས་ཟོས། ཁྱོད་ཀྱིས་སོ། །ཁོ་མོས་མ་ཟོས་སོ། །འོ་ན་ཅིའི་ཕྱིར་གློས་ཕབ་སྟེ་ཉལ། དེས་སྐབས་དེ་རྒྱས་པར་དགེ་སློང་མ་རྣམས་ལ་བརྗོད་ནས་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་དོ། །དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་ཐད་ཀར་ཕ་རོལ་དུ་འགྲོ་བ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་
སློང་གང་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོའམ། ཐུར་དུ་འགྲོ་ན་ཐད་ཀར་ཕ་རོལ་དུ་འགྲོ་བ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མའི་དོན་མཐུན་དང་ལྷན་ཅིག་ཅེས་བྱ་བ་ནི་ཆོས་འདི་པའིའོ། །འཐམས་ནས་ཞེས་བྱ་བ་ནི་བརྡ་བྱས་ནས་སོ། །གྲུ་གཅིག་ཏུ་ཞེས་བྱ་བ་ནི་ཤོ་གམ་གཅིག་པ་དང་། ལ་གཅན་གཅིག་པ་དང་། གྲུ་བཙས་གཅིག་པར་རོ། །འཇུག་ཅིང་ཞེས་བྱ་བ་ནི་ཞོན་ཞིང་ངོ་། །གྱེན་དུ་འགྲོའམ་ཞེས་བྱ་བ་ནི་རྒྱུན་ལས་བཟློག་ཕྱོགས་སུ་འགྲོ་བའོ། །ཐུར་དུ་འགྲོ་ན་ཞེས་བྱ་བ་ནི་རྒྱུན་ཕྱོགས་སུ་འགྲོ་ནའོ། །ཐད་ཀར་ཕ་རོལ་དུ་འགྲོ་བ་མ་གཏོགས་ཏེ་ཞེས་བྱ་བ་ནི་ཐད་ཀར་ཕ་རོལ་དུ་འགྲོ་བ་བཞག་སྟེའོ། །ལྟུང་བྱེད་དོ་ཞེས་བྱ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་། སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲུ་གཅིག་ཏུ་འཇུག་ཅིང་གྱེན་དུ་འགྲོའམ། ཐུར་དུ་འགྲོ་ན་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་མཐུན་དང་ལྷན་ཅིག་འཐམས་ནས་གྲོང་ནས་དགོན་པར་གྲུ་གཅིག་ཏུ་འཇུག་ཅིང་གྱེན་དུ་འགྲོའམ། ཐུར་དུ་འགྲོ་ན་གྲོང་རྒྱང་གྲགས་ཀྱིས་བར་དུ་ཆོད་པ་བདུན་པོ་
དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །དགེ་སློང་གིས་དགེ་སློང་མའི་དོན་མཐུན་དང་ལྷན་ཅིག་འཐམས་ནས་དགོན་པ་ནས་གྲོང་དུ་གྲུ་གཅིག་ཏུ་འཇུག་ཅིང་གྱེན་དུ་འགྲོའམ། ཐུར་དུ་འགྲོ་ན་གྲོང་རྒྱང་གྲགས་ཀྱིས་བར་དུ་མ་ཆོད་པ་བདུན་པོ་དག་གི་རྒྱང་གྲགས་ཕྱེད་ཕྱེད་དུ་ཉེས་བྱས་སུ་འགྱུར་ལ། རྒྱང་གྲགས་རེ་རེར་ལྟུང་བྱེད་དུ་འགྱུར་རོ། །ཡོ་བ་ལས་བཟུར་བ་དང་། གཏིབ་ཆད་པ་ལས་བཟུར་བ་དང་། དབའ་ཀློང་ལས་བཟུར་བ་དང་། རུ་སྐྱ་ཆག་པ་དང་། གདོས་པ་ཆག་པ་དང་། རུ་སྐྱ་འཛིན་པ་མི་ཉན་པ་ལ་ལྟུང་བ་མེད་དོ། །འགྲམ་གཉིས་ན་བར་ཆད་བརྒྱད་པོ་དག་ལས་གང་ཡང་རུང་བ་ཉེ་བར་གནས་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་དེ་ཉི་ཤུ་བདུན་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་འཆར་ཀ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་མཐར་གྱིས་མཉན་ཡོད་དུ་བསོད་སྙོམས་ལ་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་ངོ་། །ཁྱིམ་བདག་གི་ཆུང་མ་སྦེད་མས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་སྟེ། མཐོང་ནས་ཀྱང་ཚེ་དང་ལྡན་པ་འཆར་ཀའི་ཕྱིར་སྟན་ཤོམ་པར་བྱེད་ཅིང་འདི་སྐད་ཅེས་ཀྱང་སྨྲས་སོ། །བཙུན་པ་འཆར་ཀ་ཚུར་སྤྱོན་བཙུན་པ་འཆར་ཀ་བྱོན་པ་ལེགས་སོ། །བཙུན་པ་འཆར་ཀ་གདན་བཤམས་པ་ཉིད་ལ་བཞུགས་ཤིག །ཚེ་དང་ལྡན་པ་འཆར་ཀ་ཁ་ནང་དུ་བལྟས་ཏེ་འདུག་གོ །ཁྱིམ་བདག་གི་ཆུང་མ་སྦེད་མ་ཡང་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་ཁ་ཕྱིར་བལྟས་ཏེ་འདུག་གོ །འཆར་ཀས་དེ་ལ་ཇི་ཙམ་པ་དེ་ཙམ་གྱིས་ཆོས་བསྟན་ནས་སྔོན་བགད་པ་དང་། རྩེས་པ་དང་། དགའ་བ་བྱས་པ་དང་། དགའ་མགུར་སྤྱད་པ་དག་དྲན་པར་བྱ་བར་བརྩམས་ཏེ། སྦེད་མ་ཁྱོད་ཀྱིས་བདག་ཅག་གཉིས་སྐྱེད་མོས་ཚལ་དང་། འདུན་ས་དང་། ལྷའི་གནས་ག་གེ་མོ་ཞིག་ཏུ་བཅའ་བ་འདི་དང་འདི་ལྟ་བུ་འཆོས་པ་དང་། བཟའ་བ་འདི་དང་འདི་ལྟ་བུ་ཟོས་པ་དང་། བཏུང་བ་འདི་དང་འདི་ལྟ་བུ་འཐུངས་པ་
དང་། གནས་མལ་འདི་དང་འདི་ལྟ་བུ་བཤམས་པ་དང་། འབྲུ་མར་གྱི་མར་མེ་འདི་དང་འདི་ལྟ་བུ་བཙུགས་ཤིང་དེར་བདག་ཅག་གཉིས་ཀྱིས་འདི་དང་འདི་ལྟ་བུ་བྱས་པ་དྲན་ནམ། སྦེད་མས་སྨྲས་པ་དྲན་ནོ། །བསོད་སྙོམས་པ་ཞིག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་མཉན་ཡོད་དུ་བསོད་སྙོམས་ལ་རྒྱུ་བ་ན་ཁྱིམ་བདག་གི་ཆུང་མ་སྦེད་མའི་ཁྱིམ་ག་ལ་བ་དེར་སོང་བ་དང་ཁྱིམ་བདག་གི་ཆུང་མ་སྦེད་མས་དེ་མཐོང་ནས་དེས་བསམས་པ་གལ་ཏེ་ལངས་ཏེ། བསོད་སྙོམས་ཕུལ་བར་གྱུར་ན་བཙུན་པ་འཆར་ཀའི་གཏམ་སྤངས་པར་འགྱུར་རོ་སྙམ་ནས་དེས་ལག་པས་སོང་ཤིག་ཅེས་བརྡ་བྱས་སོ། །འཆར་ཀས་སྦེད་མ་ལག་བརྡ་བྱེད་པ་མཐོང་ནས་དེས་སྨྲས་པ། སྦེད་མ་ཁྱོད་ཁོ་བོ་འདུག་བཞིན་དུ་མདུན་དུ་སྐྱེས་པ་གཞན་དང་ལྷན་ཅིག་ལག་བརྡ་བྱེད་དམ་སྦེད་མས་སྨྲས་པ། འཕགས་པ་བདག་སྐྱེས་པ་གཞན་དང་ལག་བརྡ་མི་བགྱིད་དེ། འདི་ལྟར་བསོད་སྙོམས་པ་ཞིག་མཆིས་ནས་བདག་གིས་བསམས་པ་གལ་ཏེ་ལངས་ཏེ། བསོད་སྙོམས་ཕུལ་བར་གྱུར་ན་འཕགས་པའི་བཀའ་མཆིད་སྤངས་པར་འགྱུར་རོ་སྙམ་ནས་བདག་གིས་དེ་ལ་མཆིས་ཤིག་ཅེས་ལག་བརྡ་བགྱིས་སོ། །འཆར་ཀས་སྨྲས་པ་སྦེད་མ་ཁྱོད་ཀྱི་སྙིང་ལམ་ན་ཁོ་བོས་ཁྱོད་ལ་འཕགས་པའི་བདེན་པ་བཞིའི་གཏམ་བྱས་སྙམ་མམ་ཅི་འདི་ལྟར་ཁོ་བོས་ལག་པས་བཅལ་བ་བརྒྱ་དག་གིས་ལོངས་སྤྱོད་དག་བསྒྲུབས་ན་ཁྱོད་ཀྱིས་སྦྱིན་པ་དག་བྱིན་ཞིང་བསོད་ནམས་དག་བྱེད་ཀྱང་མི་ནུས་སམ། སྦེད་མས་བསོད་སྙོམས་པ་དེ་བོས་ཏེ་བཅའ་བ་དང་། བཟའ་བ་གཙང་ཞིང་བསོད་པ་དག་གིས་ལྷུང་བཟེད་བཀང་སྟེ་བྱིན་ནས་དེས་དེ་ཁྱེར་ཏེ་སོང་ངོ་། །ཚེ་དང་ལྡན་པ་འཆར་ཀ་ཟས་ཀྱི་བྱ་བ་བྱས་ཏེ་གཙུག་ལག་ཁང་དུ་སོང་བ་དང་། བསོད་སྙོམས་པ་དེས་བསམས་པ། བཙུན་པ་འཆར་ཀ་ལ་གཏམ་བྱ་ཞིང་ཐོས་ནས་མཆོག་ཏུ་དགའ་བ་བསྐྱེད་པར་བྱའོ་སྙམ་ནས་དེས་དེ་ལ་སྨྲས་པ། བཙུན་པ་འཆར་ཀ་མཆོག་ཏུ་
དགའ་བ་སྐྱེད་ཅིག །དེང་དོན་གྱིས་ན་བདག་གིས་ཁྱོད་ཀྱི་བསོད་སྙོམས་ཟོས་སོ། །བསོད་སྙོམས་པ་ཤེས་ཏེ་དེས་དང་པོར་ཁྱོད་བོས་སྙམ་མམ་ཅི་དེས་ཁྱོད་སོང་ཤིག་ཅེས་ལག་བརྡ་བྱས་ནས་ཁོ་བོས་དེའི་འོག་ཏུ་དེའི་ཕྱིར་འབོད་དུ་བཅུག་གོ །ཅི་བྱིན། བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་བཀང་སྟེ་བྱིན་ཏེ་བཙུན་པ་འཆར་ཀ་དེ་ནི་ཁྱོད་ཀྱི་ཡིན་ནོ། །དེའི་ཚེ་ན་བཙུན་པ་འཆར་ཀ་དེ་ཉིད་ན་འདུག་པར་གྱུར་ཏམ་འདུག་གོ །ཁྱོད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ཏུ་རུང་ངམ་རུང་ཡང་སྲིད་མི་རུང་ཡང་སྲིད་དེ་ཁོ་བོ་དེ་ལྟར་འདུག་གོ །བསོད་སྙོམས་པ་ཁྱོད་ཀྱི་དེང་དེ་ལྟར་ཁོ་བོའི་བསོད་སྙོམས་ཟོས་ཤིང་གལ་ཏེ་མི་བཟོད་ན་ཁོ་བོ་ལས་བརྟེན་ཏེ་བསླབ་པའི་གཞི་འཆར་ཆུག་ཤིག །ཅི་དེ་ཁོ་བོས་ཡལ་བར་བོར་དུ་རེའམ་ཞེས་ཟེར་བའི་སྐབས་དེ་དགེ་སློང་རྣམས་ལ་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ་འཆར་ཀ་ཁྱོད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་པར་བྱེད་པ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་
བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀའམ། གཞན་ཡང་དེ་ལྟ་བུ་གང་ཡིན་པའོ། །བུད་མེད་ཀྱི་ཡུལ་དང་ཞེས་བྱ་བ་ནི་བུད་མེད་དམ། གཞོན་ནུ་མ་མི་ཚངས་པར་སྤྱོད་པ་སྤྲོད་པ་ལས་བྱུང་བའི་ཆོས་སྟེན་ནུས་པ་དང་ངོ་། །ལྷན་ཅིག་ཅེས་བྱ་བ་ནི་དེ་དང་ལྷན་ཅིག་གོ །གཅིག་པུ་ཅིག་དང་ཞེས་བྱ་བ་ནི་དེ་དང་ངོ་། །དབེན་པ་ཞེས་བྱ་བ་ནི་གང་ན་བུད་མེད་དང་སྐྱེས་པ་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ཞེས་བྱ་བ་ནི་ལྔས་བསྐྱབས་པ་ན་སྟེ། རྩིག་པས་བསྐྱབས་པ་དང་། རིབ་མས་བསྐྱབས་པ་དང་། ཡོལ་བས་བསྐྱབས་པ་དང་། ཐིབས་པོས་བསྐྱབས་པ་དང་། མཚན་མོས་བསྐྱབས་པ་ནའོ། །སྟན་ལ་ཞེས་བྱ་བ་ནི་གཞི་ལའོ། །འདུག་ན་ཞེས་བྱ་བ་ནི་འདོམ་གང་གི་ནང་དུ་རྐུབ་ཚོས་འཇོག་པར་བྱེད་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན་དགེ་སློང་གིས་ཇི་ཙམ་ཅུང་ཟད་བུད་མེད་ཀྱི་ཡུལ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་སྟན་ལ་འདུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །སྒོ་ཁང་ན་འདུག་པ་དང་སྨན་འཐག་ཏུ་འཇུད་པ་དང་སྒོ་མ་བཅད་པར་འདུག་པ་དང་། གཞན་དག་འཇུག་ཅིང་གཞན་
དག་འབྱུང་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཅིག་པུ་འདུག་པའི་ལྟུང་བྱེད་དེ་ཉི་ཤུ་བརྒྱད་པ་རྫོགས་སོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །གང་གི་ཚེ་སྦེད་མ་རབ་ཏུ་བྱུང་ནས་དེ་དགེ་སྐོས་བྱེད་པ་ན་དགེ་སློང་མ་རྣམས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བསོད་སྙོམས་ལ་དོང་བ་ན་སྦེད་མ་གཙུག་ལག་ཁང་ན་ཕྱག་དར་བྱེད་ཅིང་འདུག་གོ །ཚེ་དང་ལྡན་པ་འཆར་ཀ་ཡང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། མཉན་ཡོད་དུ་བསོད་སྙོམས་ལ་རྒྱུ་བ་ན་དགེ་སློང་མའི་དབྱར་ཁང་ག་ལ་བ་དེར་སོང་ངོ་། །སྦེད་མ་དགེ་སློང་མའི་དབྱར་ཁང་ན་ཕྱག་དར་བྱེད་ཅིང་འདུག་པ་དེས་ཚེ་དང་ལྡན་པ་འཆར་ཀ་ཐག་རིང་པོ་ཁོ་ན་ནས་མཐོང་སྟེ་མཐོང་ནས་ཀྱང་འདི་སྐད་ཅེས་སྨྲས་སོ། །འཕགས་པ་འཆར་ཀ་བྱོན་པ་ལེགས་སོ་བྱོན་པ་ལེགས་སོ་ཞེས་དེས་ཕྱགས་མ་ཕྱོགས་གཅིག་ཏུ་བཞག་ནས་ཚེ་དང་ལྡན་པ་འཆར་ཀའི་རྐང་པ་གཉིས་ལ་ཕྱག་འཚལ་ཏེ་མདུན་དུ་འགྲེང་ངོ་། །འཆར་ཀས་དེ་ལ་ཇི་ཙམ་པ་དེ་ཙམ་གྱིས་ཆོས་བསྟན་ནས་སྔོན་བགད་པ་དང་རྩེས་པ་དང་། དགའ་བ་བྱས་པ་དང་དགའ་མགུར་སྤྱད་པ་དག་དྲན་པར་བྱ་བར་བརྩམས་ཏེ་སྦེད་མ་ཁྱོད་ཀྱིས་བདག་ཅག་སྐྱེད་མོས་ཚལ་དང་། འདུན་ས་དང་ལྷའི་གནས་ག་གེ་མོ་ཞིག་ཏུ་བཅའ་བ་འདི་དང་འདི་ལྟ་བུ་འཆོས་པ་དང་བཟའ་བ་འདི་དང་འདི་ལྟ་བུ་ཟོས་པ་དང་། བཏུང་བ་འདི་དང་འདི་ལྟ་བུ་འཐུངས་པ་དང་གནས་མལ་འདི་དང་འདི་ལྟ་བུ་བཤམས་པ་དང་འབྲུ་མར་གྱི་མར་མེ་འདི་དང་འདི་ལྟ་བུ་བཙུགས་ཤིང་དེར་བདག་ཅག་གཉིས་ཀྱིས་འདི་དང་འདི་ལྟ་བུ་བྱས་པ་དྲན་ནམ། སྦེད་མས་སྨྲས་པ་དྲན་ནོ། །དེ་ནས་དགེ་སློང་མ་རྒན་མོ་ནད་མ་ཞིག་འདུག་ནས་དེས་བསམས་པ། འདི་གཉིས་ཅིའི་ཕྱིར་ན་མ་བག་མར་བླངས་པ་ཚུན་ཆད་ཀྱང་གཅིག་ལ་གཅིག་རྗོད་པར་བྱེད་སྙམ་མོ། །སྦེད་མས་སྨྲས་པ། འཕགས་པ་ད་བཞུད་ཅིག་
དགེ་སློང་མ་དག་མཆི་བར་འགྱུར་ཞིང་དབྱར་ཁང་ཕྱག་དར་མ་བགྱིས་པར་མཆིས་པས་དགེ་སློང་མ་དག་སྨོད་པར་འགྱུར་རོ་ཞེས་དེས་ཕྱགས་མ་བླངས་པ་དང་འཆར་ཀ་སོང་ངོ་། །སྦེད་མས་གཙུག་ལག་ཁང་ཕྱག་དར་བྱ་བར་བརྩམས་པ་དང་། དགེ་སློང་མ་དེ་དག་ཀྱང་ལྷགས་ནས་དེ་དག་གིས་སྨྲས་པ། སྦེད་མ་ཁྱོད་ཀྱིས་ཅི་བྱས་ན་དབྱར་ཁང་འདི་དེ་ཁོ་ན་བཞིན་དུ་ཕྱག་དར་དང་བཅས་པར་འདུག །སྦེད་མས་སྨྲས་པ་ཕུ་ནུ་མོ་དག་གང་ཚུན་ཆད་ནས་ཁྱེད་ཅག་བསོད་སྙོམས་ལ་དོང་བ་དེ་ཚུན་ཆད་ནས་ཁོ་མོ་ས་ལ་མ་འདུག་གོ །དགེ་སློང་མ་རྒན་མོ་ནད་མ་དེས་ཐོས་ནས་དེས་དགེ་སློང་མ་རྣམས་ལ་སྨྲས་པ། གང་ཚུན་ཆད་ཁྱེད་ཅག་བསོད་སྙོམས་ལ་དོང་བ་དེ་ཚུན་ཆད་ནས་སྦེད་མ་མ་འདུག་པ་དེ་ནི་བདེན་ཏེ། འདི་ལྟར་འཕགས་པ་འཆར་ཀ་བྱོན་པར་གྱུར་ནས་འདི་དེ་དང་ལྷན་ཅིག་འགྲེང་ཞིང་། མ་བག་མར་བླངས་པ་ཚུན་ཆད་ཀྱང་གཅིག་གིས་གཅིག་ལ་བརྗོད་དོ། །དགེ་སློང་མ་དེ་དག་གིས་སྦེད་མ་ལ་དྲིས་པ་སྦེད་མ་ཁྱོད་ཀྱིས་དེ་ལྟར་བྱས་པ་བདེན་ནམ། ཕུ་ནུ་མོ་དག་བདེན་ནོ། །དགེ་སློང་མ་དེ་དག་ཅིའི་ཕྱིར་དགེ་སློང་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་བར་བྱེད་ཅེས་སྨོད་པར་བྱེད་ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་མ་རྣམས་ཀྱིས་དགེ་སློང་རྣམས་ལ་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་དགེ་སློང་མ་དང་
ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་ན་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀའམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་དང་ཞེས་བྱ་བ་ནི་ཆོས་འདི་པ་དང་ངོ་། །ལྷན་ཅིག་ཅེས་བྱ་བ་ནི་དེ་དེ་དང་ལྷན་ཅིག་གོ །གཅིག་པུ་ཅིག་དང་ཞེས་བྱ་བ་དེ་ནི་དེ་དེ་དང་ངོ་། །དབེན་པ་ཞེས་བྱ་བ་ནི་གང་ན་སྐྱེས་པ་དང་། བུད་མེད་དང་མ་ནིང་གཞན་འགའ་ཡང་མེད་པའོ། །སྐྱབས་ཡོད་པ་ན་ཞེས་བྱ་བ་ནི་ལྔས་བསྐྱབས་པ་ན་སྟེ། རྩིག་པས་བསྐྱབས་པ་དང་རིབ་མས་བསྐྱབས་པ་དང་ཡོལ་བས་བསྐྱབས་པ་དང་། ཐིབས་པོས་བསྐྱབས་པ་དང་། མཚན་མོས་བསྐྱབས་པ་ནའོ། །འགྲེང་ན་ཞེས་བྱ་བ་ནི་འདོམ་གང་གི་ནང་དུ་འགྲེང་ནའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་ཡི་དགས་ངན་སོང་དང་ངན་འགྲོ་དང་ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་སློང་མ་དང་ལྷན་ཅིག་གཅིག་པུ་ཅིག་དང་དབེན་པ་སྐྱབས་ཡོད་པ་ན་འགྲེང་
ན་ཐམས་ཅད་དུ་ལྟུང་བྱེད་དུ་འགྱུར་རོ། །སྒོ་ཁང་དུ་འགྲེང་བ་དང་། སྨན་འཐག་ཏུ་འཇུད་པ་དང་སྒོ་མ་བཅད་པར་འགྲེང་བ་དང་། གཞན་དག་འཇུག་ཅིང་གཞན་དག་འབྱུང་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཅིག་པུ་འགྲེང་བའི་ལྟུང་བྱེད་དེ་ཉི་ཤུ་དགུ་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་ཚེ་དང་ལྡན་པ་འོད་སྲུང་ཆེན་པོ་མཉན་ཡོད་ན། ཤར་གྱི་ཀུན་དགའ་ར་བ་ན་རི་དགས་འཛིན་གྱི་མའི་ཁང་བཟངས་ན་འདུག་གོ །དེ་ནས་ཚེ་དང་ལྡན་པ་འོད་སྲུང་ཆེན་པོ་ཕྱེ་མ་རེད་ནང་དུ་ཡང་དག་འཇོག་ལས་ལངས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་བཀའ་སྩལ་ཏོ། །འོད་སྲུང་ད་ལྟར་ཁྱོད་ནི་རྒན་པོ་རྒས་པ་དགོག་ཏུ་གྱུར་པ་ཡིན་ལ་ངའི་སྨད་གཡོགས་ཤ་ནའི་གོས་ཕྱག་དར་ཁྲོད་དག་ནི་ལྕིས། འོད་སྲུང་ཁྱོད་དགེ་འདུན་གྱི་གཙུག་ལག་ཁང་དུ་ཤོག་ལ་གང་ཟག་གིས་མགྲོན་དུ་བོས་པ་དག་བདག་གིར་གྱིས་ཤིག །ཁྱིམ་བདག་གིས་གོས་མཚོན་གྱིས་དྲས་པ་དག་ཀྱང་ཁ་དོག་ངན་པར་གྱིས་ལ་ཆོང་ཤིག །ཚེ་དང་ལྡན་པ་འོད་སྲུང་ཆེན་པོས་ཅང་མི་སྨྲ་བས་བཅོམ་ལྡན་འདས་ལས་མཉན་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ་། །དེའི་ཚེ་ན་མཉན་ཡོད་ན་ཁྱིམ་བདག་ཅིག་འདུག་པ་དེ་ལ་ཡུན་རིང་པོ་ནས་སྨོན་པ་འདི་ལྟ་བུ་སྐྱེས་ཏེ། ཀྱེ་མ་བདག་གིས་གནས་བརྟན་འོད་སྲུང་ཆེན་པོ་ལྷ་དང་མིས་མཆོད་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན་ཅི་མ་རུང་
སྙམ་ནས། ཁྱིམ་བདག་དེས་བཅོམ་ལྡན་འདས་ཀྱིས་འཕགས་པ་འོད་སྲུང་ཆེན་པོ་དགེ་འདུན་ལ་གཏད་པ་ཐོས་སོ། །ཐོས་ནས་ཀྱང་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་འོད་སྲུང་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་འོད་སྲུང་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ། །དེ་ནས་ཁྱིམ་བདག་དེ་འདི་སྙམ་དུ་སེམས་ཏེ། གལ་ཏེ་བདག་གིས་འཕགས་པ་འོད་སྲུང་ཆེན་པོ་ཉག་གཅིག་ཁྱིམ་གཞན་དུ་སྤྱན་དྲངས་པར་གྱུར་ན་མི་གནང་བར་འགྱུར་བ་དེ་ལྟ་བུའི་གནས་ཡོད་པར་འགྱུར་གྱིས་བདག་གིས་དེ་བདག་ཉིད་དང་བཞི་སྤྱན་དྲང་ངོ་སྙམ་མོ། །དེ་ནས་ཁྱིམ་བདག་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་ཚེ་དང་ལྡན་པ་འོད་སྲུང་ཆེན་པོ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་འོད་སྲུང་ཆེན་པོས་སང་བདག་གི་སྡུམ་པར་བདག་ཉིད་དང་བཞི་གདུགས་ཚོད་གསོལ་བར་ཅི་གནང་ཚེ་དང་ལྡན་པ་འོད་སྲུང་ཆེན་པོས་ཁྱིམ་བདག་དེ་ལ་ཅང་མི་སྨྲ་བས་དང་དུ་བླངས་སོ། །དེ་ནས་ཁྱིམ་བདག་དེས་ཚེ་དང་ལྡན་པ་འོད་སྲུང་ཆེན་པོ་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་འོད་སྲུང་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་རང་གི་སྡུམ་པ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཁོ་བོ་ལ་ཡུན་རིང་པོ་ནས་སྨོན་པ་འདི་ལྟ་བུ་སྐྱེས་ཏེ། ཀྱེ་མ་བདག་གིས་གནས་བརྟན་འོད་སྲུང་ཆེན་པོ་ལྷ་དང་མིས་མཆོད་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན་ཅི་མ་རུང་སྙམ་ནས། ཁོ་བོས་དེ་བདག་ཉིད་དང་
བཞི་སང་ཁྱིམ་གཞན་དུ་གདུགས་ཚོད་ལ་སྤྱན་དྲངས་ན་དེས་ཀྱང་ཅང་མི་གསུང་བས་གནང་གིས་ཞལ་ཟས་བསོད་པ་མང་པོ་དག་སྟ་གོན་གྱིས་ཤིག །ཁྱིམ་བདག་གི་ཆུང་མ་དེས་ཁྱིམ་བདག་ལས་མཉན་ནས་ཁ་ཟས་གྲང་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོ་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་ནས། ཁྱིམ་བདག་དེ་ནང་པར་སྔར་ལངས་ཏེ་བསམས་པ། གལ་ཏེ་འོག་གི་ས་གཞིར་གདན་བཤམས་ན་ནི་སློང་མོ་པ་དག་འདོང་བ་ན་ལང་ལོང་བྱེད་པར་འགྱུར་ལ། གལ་ཏེ་སྟེང་གི་ས་གཞིར་གདན་བཤམས་ན་ནི་དེར་སྦྲང་བུ་དག་གིས་འཁྲུག་ལོང་བྱེད་པར་འགྱུར་བས་བར་གྱི་ས་གཞིར་གདན་བཤམ་པར་བྱའོ་སྙམ་ནས་དེས་བར་གྱི་ས་གཞིར་སྟན་བཤམས་ནས་ཚེ་དང་ལྡན་པ་འོད་སྲུང་ཆེན་པོ་ལ་མངག་པས་བཙུན་པ་འོད་སྲུང་ཆེན་པོ་གདུགས་ཚོད་གཡར་དགོངས་འཚལ་ན་ད་དེའི་དུས་ལ་བབ་པར་དགོངས་སུ་གསོལ་ཞེས་བསྐུལ་ཏོ། །བཅོམ་ལྡན་འདས་ཀྱིས་གང་གི་ངོར་མགྲོན་དུ་བོས་པ་དེས་དུས་སྔར་དེར་འགྲོ་བར་བྱའོ་ཞེས་བཀའ་སྩལ་པས། དེ་ནས་ཚེ་དང་ལྡན་པ་འོད་སྲུང་ཆེན་པོ་དུས་སྔ་བ་ཁོ་ནར་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་ཁྱིམ་བདག་དེའི་སྡུམ་པ་ག་ལ་བ་དེར་སོང་སྟེ་ཕྱིན་ནས་བར་གྱི་ས་གཞིར་འཛེགས་ཏེ་སྟན་བཤམས་པ་ཉིད་ལ་འདུག་གོ །དེ་ནས་ཁྱིམ་བདག་དེས་ཚེ་དང་ལྡན་པ་འོད་སྲུང་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་འོད་སྲུང་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་ཏེ་འདི་སྐད་ཅེས་སྨྲས་སོ། །མཚན་བཟང་ཨ་རོག་གྱ་
བསོད་སྙོམས་བྱིན་ཅིག །ཁྱིམ་བདག་དེས་སྨྲས་པ། འཕགས་མ་དེང་འཕགས་པ་འོད་སྲུང་ཆེན་པོ་ལྷ་དང་མིས་མཆོད་པ་བདག་གི་སྡུམ་པར་སྤྱན་དྲངས་ཏེ་ཞལ་ཟས་སྟ་གོན་བགྱིས་པས་རེ་ཞིག་ཅུང་བྲེལ་གྱིས་བཞུད་ཅིག་སྦོམ་དགའ་མོས་སྨྲས་པ། དེ་ནི་གཞན་མུ་སྟེགས་ཅན་ལས་རབ་ཏུ་བྱུང་བ། བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ལ། ཁོ་མོ་ནི་ཤཱཀྱ་མོ་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ་རིགས་པ་དང་གྲོལ་བའི་སྤོབས་པ་ཅན་ཡིན་ན་དེའི་ཟན་སྦྱོར་ཞིང་ཁོ་མོ་ལ་བསོད་སྙོམས་མི་སྟེར་མོད་ཚེ་དང་ལྡན་པ་འོད་སྲུང་ཆེན་པོས་དེ་ཐོས་ཏེ། ཐོས་ནས་ཀྱང་བསམས་པ་དེ་ལ་བསོད་ནམས་མ་ཡིན་པ་མང་པོ་སྐྱེ་བར་གྱུར་ན་མི་རུང་ངོ་སྙམ་ནས་དེས་མགུལ་བསལ་བའི་སྒྲ་ཕྱུང་བ་དང་། ཚེ་དང་ལྡན་པ་འོད་སྲུང་ཆེན་པོ་དབྱིག་གི་གདངས་དང་ལྡན་པ་ཡིན་པས་དེའི་སྒྲས་ཁྱིམ་ཐམས་ཅད་གང་བར་གྱུར་ཏོ། །སྦོམ་དགའ་མོས་དེའི་སྒྲ་ཐོས་ནས་སྨྲས་པ་ཀླུའི་མིང་ཅན་འདི་ཉིད་ན་བཞུགས་སོ། །ཁྱིམ་བདག་དེས་ཐོས་ནས་སྨྲས་པ་ད་གཟོད་ཁོ་ན་དེ་ནི་གཞན་མུ་སྟེགས་ཅན་ལས་རབ་ཏུ་བྱུང་བ་བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཡིན་ལ་ཞེས་ཟེར་ཞིང་། ད་ནི་ཀླུའི་མིང་ཅན་ཞེས་ཟེར་རོ་ཞེས་དེ་གཤེ་ཞིང་བར་གྱི་གཞི་ནས་འབབ་པར་བརྩམས་པ་དང་། སྦོམ་དགའ་མོས་དེ་འབབ་པའི་སྒྲ་ཐྲིག་ཐྲིག་ཟེར་བ་ཐོས་ནས་དེས་བསམས་པ། ཁྱིམ་བདག་འདི་ཤུགས་འདི་ལྟ་བུས་འབབ་པ་ལས་ན་བདག་ལ་གནོད་པ་བྱེད་པར་འགྱུར་གོར་མ་ཆག་སྙམ་ནས། དེས་ཤི་ང་དཔུང་ཆད་བརྫེས་ཏེ་འབྲོས་པར་བརྩམས་པ་དང་། ཁྱིམ་བདག་དེས་སྨྲས་པ། དགེ་སྦྱོང་མ་མགོ་རེག་མོ་མ་འབྲོས་པར་སྡོད་ཅིག་ཅི་འབྲོས། ཁྱོད་ཀྱིས་ཁོ་བོའི་ཁྱིམ་དུ་འཇུག་པར་མི་བྱའོ། །སྦོམ་དགའ་མོས་སྨྲས་པ། ཁྱོད་ཀྱི་ཁྱིམ་རྟུག་ཁུང་དང་བཙོན་རར་གྱུར་ཅིག །ཁྱོད་ཀྱི་ཁྱིམ་དུ་གདོལ་པ་དག་འཇུག་པར་གྱུར་ཅིག །ཁོ་མོ་ཅག་གིས་རྒྱལ་པོ་ལས་བཙུན་མོའི་འཁོར་གྱིས་ཡོངས་སུ་སྤང་བ་ཐོབ་པས། ཁོ་མོ་ལ་ཇི་ཙམ་དུ་རེག་པར་བྱེད་པ་དེ་ཙམ་དུ་ཁོ་མོས་ཁྱོད་ཀྱི་ལག་པ་གཉིས་མཁྲིག་
མ་ནས་གཅོད་དུ་གཞུག་གོ། །ཁྱིམ་བདག་དེས་སྨྲས་པ། དགེ་སྦྱོང་མ་མགོ་རེག་མོ་དགེ་སློང་མ་གནས་བརྟན་མོ་གནས་བརྟན་མོ་དག་གིས་རྒྱལ་པོ་ལས། བཙུན་མོའི་འཁོར་གྱིས་ཡོངས་སུ་སྤང་བ་ཐོབ་པ་ཡིན་གྱིས་གནས་ངན་ལེན་ཀུན་དུ་སྤྱོད་པ་ཁྱོད་ཀྱིས་མ་ཐོབ་བོ། །དེ་ནས་ཁྱིམ་བདག་དེ་ཕྱིར་ལོག་ནས་ཚེ་དང་ལྡན་པ་འོད་སྲུང་ཆེན་པོ་ལ་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མས་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་ཚེ་དང་ལྡན་པ་འོད་སྲུང་ཆེན་པོ་ཟན་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཚེ་དང་ལྡན་པ་འོད་སྲུང་ཆེན་པོའི་མདུན་དུ་ཆོས་ཉན་པའི་ཕྱིར་འདུག་གོ །དེ་ནས་ཚེ་དང་ལྡན་པ་འོད་སྲུང་ཆེན་པོ་ཁྱིམ་བདག་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུད་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མས་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་བདག་དེང་ཁོ་ན་དགེ་འདུན་ལ་གཏད་པར་གྱུར་ན་བདག་དེང་ཁོ་ན་གཞན་མུ་སྟེགས་ཅན་ལས་རབ་ཏུ་བྱུང་བ། བུལ་བ་མཆོག་ཏུ་བུལ་བ། ཆུང་བ་མཆོག་ཏུ་ཆུང་བ་ཞེས་བགྱི་བར་ཡང་གྱུར། བདག་དེང་ཁོ་ན་ཀླུའི་མིང་ཅན་ཞེས་བགྱི་བར་ཡང་གྱུར་ཏེ། བཙུན་པ་བདག་ནི་ཡུན་རིང་པོ་ནས་དགོན་པ་པ་ལགས་ཤིང་། དགོན་པ་པ་ཉིད་ཀྱི་བསྔགས་པ་ཡང་བརྗོད། བསོད་སྙོམས་པ་
ལགས་ཤིང་བསོད་སྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པ་ལགས་ཤིང་ཕྱག་དར་ཁྲོད་པ་ཉིད་ཀྱི་བསྔགས་པ་ཡང་བརྗོད་པ་ལགས་སོ། །འོད་སྲུང་ཁྱོད་ཀྱིས་དོན་གྱི་དབང་དུ་ཞིག་ཡང་དག་པར་མཐོང་ན་དགོན་པ་པ་ཡིན་ཞིང་དགོན་པ་པ་ཉིད་ཀྱི་བསྔགས་པ་ཡང་བརྗོད། བསོད་སྙོམས་པ་ཡིན་ཞིང་བསོད་སྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པ་ཡིན་ཞིང་ཕྱག་དར་ཁྲོད་པ་ཉིད་ཀྱི་བསྔགས་པ་ཡང་བརྗོད། བཙུན་པ་གཉིས་ཏེ་བདག་ཉིད་ཚེ་འདི་ལ་བདེ་བར་གནས་པའི་སླད་དུ་དང་། སླད་མའི་སྐྱེ་བོ་དག་ལ་སྣང་བ་བགྱིས་པར་འགྱུར་བའི་སླད་དུ་སྟེ། དགེ་སློང་གནས་བརྟན་རྒྱལ་ཚབ་ལྟ་བུ་རབ་ཏུ་བྱུང་ནས་ཡུན་རིང་དུ་ལགས་པ། ཚངས་པར་སྤྱོད་པ་མངོན་པར་སྤྱད་པ། སྟོན་པས་བསྔགས་པ། ཚངས་པ་མཚུངས་པར་སྤྱོད་པ་མཁས་པ་རྣམས་ཀྱིས་བཀུར་བ་གང་དག་འདས་པར་གྱུར་པ་དེ་དག་ཡུན་རིང་པོ་ནས་དགོན་པ་པར་གྱུར་ཅིང་དགོན་པ་པ་ཉིད་ཀྱི་བསྔགས་པ་ཡང་བརྗོད། བསོད་སྙོམས་པར་གྱུར་ཅིང་བསོད་སྙོམས་པ་ཉིད་ཀྱི་བསྔགས་པ་ཡང་བརྗོད། ཕྱག་དར་ཁྲོད་པར་གྱུར་ཅིང་ཕྱག་དར་ཁྲོད་པ་ཉིད་ཀྱི་བསྔགས་པ་ཡང་བརྗོད་པར་གྱུར་པ་དེ་དག་ཐོས་ནས་དེ་ལྟ་དེ་ལྟར་སྒྲུབ་པར་འགྱུར་ཞིང་དེ་དག་ལ་ཡུན་རིང་པོའི་དོན་དང་སྨན་པ་དང་། བདེ་བར་འགྱུར་རོ། །འོད་སྲུང་ཁྱོད་ཡུན་རིང་པོ་ནས་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་མི་རྣམས་ཀྱི་དོན་དང་། ཕན་པ་དང་། བདེ་བའི་ཕྱིར་ཞུགས་པ་ལེགས་སོ་ལེགས་སོ། །འོད་སྲུང་གང་ལ་ལ་ཞིག་སྦྱངས་པའི་ཡོན་ཏན་དེ་དག་གི་བསྔགས་པ་མ་ཡིན་པ་རྗོད་པར་བྱེད་པ་དེ་ནི་ངའི་བསྔགས་པ་མ་ཡིན་པ་རྗོད་པར་བྱེད་པ་ཡིན་ལ། གང་ལ་ལ་ཞིག་སྦྱངས་པའི་ཡོན་ཏན་དེ་དག་གི་བསྔགས་པ་རྗོད་པར་བྱེད་པ་དེ་ནི་ངའི་བསྔགས་པ་རྗོད་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། ངས་ཡུན་རིང་པོ་ནས་སྦྱངས་པའི་ཡོན་ཏན་དེ་དག་བསྟོད་ཅིང་བཀུར་ལ་བསྔགས་ཤིང་རབ་ཏུ་བསྔགས་པའི་ཕྱིར་རོ། །འོད་སྲུང་དེ་
ལྟ་བས་ན་ཁྱོད་ནི་དགོན་པ་པ་ཡིན་ཞིང་དགོན་པ་པ་ཉིད་ཀྱི་བསྔགས་པ་བརྗོད་པ་དང་། བསོད་སྙོམས་པ་ཡིན་ཞིང་བསོད་སྙོམས་པ་ཉིད་ཀྱི་བསྔགས་པ་བརྗོད་པ་དང་། ཕྱག་དར་ཁྲོད་པ་ཡིན་ཞིང་ཕྱག་དར་ཁྲོད་པ་ཉིད་ཀྱི་བསྔགས་པ་བརྗོད་པ་ཡིན་ཏེ། འོད་སྲུང་ཁྱོད་ཀྱིས་དེ་ལྟར་བསླབ་པར་བྱའོ། །འདི་ནི་རེ་ཞིག་བྱུང་བ་ཡིན་ཏེ་སངས་རྒྱས་བཅོམ་ལྡན་འདས་རེ་ཞིག་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་ནི་མི་མཛད་དོ། །འདུལ་བ་རྣམ་པར་འབྱེད་པ། བམ་པོ་ལྔ་བཅུ་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཕོངས་པ་དང་བཅས་པའི་དུས་བྱུང་ནས་བྲམ་ཟེ་དང་། ཁྱིམ་བདག་དད་པ་ཅན་དག་གིས་དགེ་སློང་གནས་བརྟན་གནས་བརྟན་དག་གི་བསོད་སྙོམས་སྦྱར་ཏོ། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས་དེ་དག་བཅུ་གཉིས་སྡེ་དག་གི་གན་དུ་དོང་བ་དང་། དེ་དག་གིས་སྨྲས་པ། འཕགས་པ་དག་བཞུགས་ལ་ཞལ་ཚུས་གསོལ་ཅིག །སུས་སྦྱིན་པར་འགྱུར། དེ་དག་གིས་སྨྲས་པ། བདག་ཅག་གིས་གསོལ་ལོ། །སང་སུས་སྦྱིན་པར་འགྱུར། བདག་ཅག་གིས་གསོལ་ལོ། །དྲུག་སྡེ་དག་གིས་སྨྲས་པ། སྲིང་མོ་དག་དེ་ཙམ་གྱིས་ཁོ་བོ་ཅག་འཚོ་བར་མི་ནུས་ཀྱི་འདི་ལྟར། བྲམ་ཟེ་དང་ཁྱིམ་བདག་དད་པ་ཅན་གང་དག་གིས་དགེ་སློང་གནས་བརྟན་གནས་བརྟན་དག་གི་བསོད་སྙོམས་སྦྱར་བ་དེ་དག་གལ་ཏེ་ཁྱེད་ཀྱིས་ཁོ་བོ་ཅག་གི་ཕྱིར་སྦྱོར་དུ་བཅུག་ན་དེ་ལྟ་ན་ཁོ་བོ་ཅག་འཚོ་བར་ནུས་སོ། །སྦོམ་དགའ་མོས་སྨྲས་པ་འཕགས་པ་དག་དེ་ལྟར་བགྱིར་རུང་ངམ། དྲུག་སྡེ་དག་གིས་སྨྲས་པ། ཅི་ཁོ་བོ་ཅག་ལྟོགས་ཏེ་འཆི་བར་བྱའམ། ལེགས་པར་རུང་ངོ་། །ཤིན་ཏུ་རུང་ངོ་། །གང་དུ་བཀག །སུས་བཀག །དེ་ནས་དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་ཁྱིམ་གང་དུ་ཚེ་དང་ལྡན་པ་
ཀུན་ཤེས་ཀཽཎྜི་ནྱའི་བསོད་སྙོམས་སྦྱར་བའི་ཁྱིམ་དེར་སོང་སྟེ་འདི་སྐད་ཅེས་སྨྲས་སོ། །ཁྱེད་ཀྱིས་སུའི་བསོད་སྙོམས་སྦྱར། དེ་དག་གིས་སྨྲས་པ། འཕགས་པ་ཀུན་ཤེས་ཀཽཎྜི་ནྱའིའོ། །སྦོམ་དགའ་མོས་སྨྲས་པ། ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་གང་ཡིན་པ་དེའི་བསོད་སྙོམས་སྦྱོར་ན་དེ་ལྟ་ན་ཁྱེད་ལ་བསོད་ནམས་ཆེ་བར་འགྱུར་རོ། །དེ་དག་གིས་སྨྲས་པ། འཕགས་མ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ་རིགས་པ་དང་གྲོལ་བའི་སྤོབས་པ་ཅན་དེ་གང་ལགས། སྦོམ་དགའ་མོས་སྨྲས་པ། འཕགས་པ་དགའ་བོ་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོག་པ། རིགས་པ་དང་གྲོལ་བའི་སྤོབས་པ་ཅན་ཡིན་ནོ། །དེ་དག་གིས་སྨྲས་པ། དེ་ལྟར་བགྱིའོ་ཞེས་དེ་དག་གིས་འཕགས་པ་ཀུན་ཤེས་ཀཽཎྜི་ནྱའི་བསོད་སྙོམས་སྦྱར་བ་གང་ཡིན་པ་དེ་དགའ་བོའི་ཕྱིར་སྦྱོར་དུ་བཅུག་གོ །དེ་བཞིན་དུ་གང་དག་གི་དགེ་སློང་གནས་བརྟན་གནས་བརྟན་དག་གི་བསོད་སྙོམས་སྦྱར་བ་དེ་དག་ཐམས་ཅད་དྲུག་སྡེ་དག་གི་ཕྱིར་སྦྱོར་དུ་བཅུག་གོ །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་དོང་བ་དང་། དེ་དག་ལྷུང་བཟེད་སྣོད་ཁས་བཏགས་པའི་བསོད་སྙོམས་དག་གིས་འོངས་པ་དགེ་སློང་རྣམས་ཀྱིས་མཐོང་ནས་སྨྲས་པ། ཨེ་མའོ་དྲུག་སྡེ་དག་གིས་ལྷུང་བཟེད་སྣོད་དག་ཁས་བཏགས་སོ། །དྲུག་སྡེ་དག་གིས་སྨྲས་པ། གང་དག་གིས་བདག་ཅག་གི་ཕྱིར་བསོད་སྙོམས་དག་སྦྱོར་དུ་བཅུག་པའི་སྲིང་མོ་དག་ནད་མེད་པར་གྱུར་ཅིག །དགེ་སློང་རྣམས་ཀྱིས་སྨྲས་པ། ཁྱེད་ཅག་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟར་རུང་ངམ། དྲུག་སྡེ་དག་གིས་སྨྲས་པ། རུང་ཡང་སྲིད། མི་རུང་ཡང་སྲིད་དེ་ཅི་ཁོ་བོ་ཅག་ལྟོགས་ཏེ་འཆི་བར་བྱའམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་མས་སྦྱོར་དུ་བཅུག་པའི་ཟས་ཟ་བར་བྱེད་ཅེས་སྨོད་པར་བྱེད། ཕྱར་
ཀ་གཏོང་བར་བྱེད་ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེ་ལས་ཀྱི་མཐའ་གཉིས་བྱེད་དུ་འཇུད་དེ་ཚོང་དང་། ཞིང་ལས་ཀྱི་མཐའོ། །དེས་དགོན་པར་ཞིང་རྨོས་ནས་ས་བོན་བཏབ་སྟེ་ཞིང་དེའི་དྲུང་དུ་སྤྱིལ་བུ་བྱས་ནས་ཟོང་ཐོགས་ཏེ་ཡུལ་གཞན་དུ་སོང་ངོ་། །བསོད་སྙོམས་པ་ཞིག་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་དེས་དེར་བྱུལ་ན་ཞིང་དེའི་དྲུང་ན་སྤྱིལ་བུ་མཐོང་ནས་དེས་བསམས་པ། ཕྱོགས་འདི་གོ་
སྐབས་དབེན་པ་ཡིན་གྱི་འདི་ཉིད་དུ་འདུག་པར་བྱའོ་སྙམ་ནས། དེས་དེ་ཉིད་དུ་འདུག་པར་བརྩམས་ཏེ་མཉན་ཡོད་དུ་བསོད་སྙོམས་བརྒྱུས་ནས་དེ་ཉིད་དུ་གནས་འཆའོ། །དེར་མིའི་དྲིས་རི་དགས་དང་བྱ་འགའ་ཡང་མི་འོང་ཞིང་དེར་ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་ཕབ་པས་ཞིང་དེ་ཤིན་ཏུ་ཕུན་སུམ་ཚོགས་པར་གྱུར་ཏོ། །ཁྱིམ་བདག་དེ་ཡང་དོན་ལེགས་པར་གྲུབ་སྟེ་བཀྲ་ཤིས་ཤིང་བདེ་བར་འོངས་སོ། །དེ་ནས་ཁྱིམ་བདག་དེས་རྫས་སྦས་ནས་ཁྲུས་བྱས་ཏེ་ཟན་ཟོས་པ་དང་ཆུང་མས་སྨྲས་པ། རྗེའི་སྲས་ཁྱོད་ཀྱིས་དགོན་པའི་ཞིང་དེ་ལ་ས་བོན་བཏབ་ནས་ཡུལ་གཞན་དུ་བཞུད་ན་གལ་ཏེ་ས་བོན་གྱི་སྐྱིན་པ་ཙམ་གྲུབ་པར་གྱུར་ཏམ་ཇེ་གཟིགས་ཤིག །ཁྱིམ་བདག་དེ་དེར་སོང་བ་དང་ཇི་ཙམ་ན་ཞིང་དེ་ལོ་ཐོག་ཤིན་ཏུ་ཕུན་སུམ་ཚོགས་པ་མཐོང་ནས་དེས་བསམས་པ། བདག་གིས་འདིར་རིབ་མ་ཡང་མ་བྱས། སྲུང་མའི་མི་འགའ་ཡང་མ་བཞག་པར་ཞིང་འདི་ཤིན་ཏུ་ལོ་ཐོག་ཕུན་སུམ་ཚོགས་པར་གྱུར་པ་འདི་ལ་རྒྱུ་ཅི་ཡོད་སྙམ་ནས། དེས་དེར་བྱུལ་བ་དང་མིའི་རྗེས་མཐོང་ནས་དེ་རྗེས་བཞིན་དུ་སྤྱིལ་བུ་དེར་སོང་བ་དང་། ཇི་ཙམ་ན་དགེ་སློང་བསོད་སྙོམས་པ་ཞིག་སྐྱིལ་མོ་ཀྲུང་གིས་འདུག་པ་མཐོང་ནས་དེས་བསམས་པ། འདིའི་མཐུས་ཞིང་འདི་ཤིན་ཏུ་ལོ་ཐོག་ཕུན་སུམ་ཚོགས་པར་གྱུར་ཏོ་སྙམ་ནས་དེས་སྨྲས་པ། འཕགས་པ་སྤྱིལ་བུ་འདི་ན་བཞུགས་སམ། དེས་སྨྲས་པ། ཁྱིམ་བདག་ཡིན་ནོ། །ཁྱིམ་བདག་གིས་སྨྲས་པ། འཕགས་པ་ཞིང་འདི་བདག་གི་ལགས་ཀྱིས་འཕགས་པས་མེ་ཏོག་དང་། འབྲས་བུ་དང་། ཚེམ་ཤིང་དག་ཅི་བདེར་ལོངས་སྤྱད་དུ་གསོལ། འཕགས་པས་སང་བདག་གི་སྡུམ་པར་བསོད་སྙོམས་གསོལ་བར་ཅི་གནང་། ཁྱིམ་བདག་ཁོ་བོ་ནི་བསོད་སྙོམས་པ་ཡིན་པས་བསོད་སྙོམས་འབའ་ཞིག་ལ་རྒྱུའོ་ཞེས་དེས་དེའི་དང་དུ་མ་བླངས་ནས་ཁྱིམ་བདག་དེས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་འདི་སྐད་ཅེས་སྨྲས་སོ། །བཟང་མོ་བང་བ་སྟ་གོན་གྱིས་
ཤིག །ཞིང་དེ་ལས་ལོ་ཐོག་ཤིན་ཏུ་ཕུན་སུམ་ཚོགས་པར་གྱུར་ཏོ། །ཆུང་མས་བསམས་པ་འདི་བདག་ལ་ཀུ་རེ་ཟེར་རོ་སྙམ་ནས་དེས་སྨྲས་པ། རྗེའི་སྲས་ཁྱོད་ཀྱིས་དེར་རིབ་མ་ཡང་མ་བགྱིས། སྲུང་མའི་མི་འགའ་ཡང་མ་བཞག་ན་བདག་ལ་ཀུ་རེ་བགྱིར་ཅི་མཆིས། ཁྱིམ་བདག་གིས་སྨྲས་པ། བཟང་མོ་ཅི་ཁོ་བོ་ཁྱོད་ལ་ཀུ་རེ་བྱེད་སྙམ་མམ་འདི་ལྟར་ཡིད་ཆེས་པར་གྱིས་ཤིག །ཞིང་དེའི་ལོ་ཐོག་ཤིན་ཏུ་ཕུན་སུམ་ཚོགས་པར་གྱུར་ཏོ། །ཆུང་མས་སྨྲས་པ། ཅིའི་སླད་དུ། ཁྱིམ་བདག་གིས་སྨྲས་པ། ཁོ་བོས་ཞིང་དེའི་དྲུང་དུ་སྤྱིལ་བུ་བྱས་ཏེ་སྤྱིལ་བུ་དེར་དགེ་སློང་བསོད་སྙོམས་པ་ཞིག་འདུག་པས་དེའི་མཐུས་ཞིང་དེ་ཤིན་ཏུ་ལོ་ཐོག་ཕུན་སུམ་ཚོགས་པར་གྱུར་ཏོ། །ཆུང་མས་སྨྲས་པ། འོ་ན་ཁྱོད་ཀྱིས་ཅིའི་སླད་དུ་དེ་སང་བསོད་སྙོམས་ལ་སྤྱན་མ་དྲངས། ཁྱིམ་བདག་གིས་སྨྲས་པ། ཁོ་བོས་དེ་སྤྱན་དྲངས་ན་བསོད་སྙོམས་པ་དེའི་ཞལ་ནས་ཁྱིམ་བདག་ཁོ་བོ་ནི་བསོད་སྙོམས་པ་ཡིན་པས་བསོད་སྙོམས་འབའ་ཞིག་ལ་རྒྱུའོ་ཞེས་དེས་དང་དུ་མ་བླངས་སོ། །ཆུང་མས་སྨྲས་པ། དེ་དག་ནི་ཞབས་ལ་ཕྱག་འཚལ་ཏེ་སྤྱན་དྲང་བ་ལགས་སོ། །ཁྱིམ་བདག་གིས་སྨྲས་པ། འོ་ན་ཁྱོད་ཀྱིས་ཞལ་ཟས་སྟ་གོན་གྱིས་ཤིག་དང་ཁོ་བོ་དེར་སོང་ལ་ཞབས་ལ་ཕྱག་འཚལ་ཏེ་སྤྱན་དྲང་བར་བྱའོ་ཞེས་དེ་སོང་སྟེ་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་སྨྲས་པ། འཕགས་པ་སང་བདག་གི་སྡུམ་པར་བསོད་སྙོམས་གསོལ་བར་ཅི་གནང་། བསོད་སྙོམས་པ་དེས་སྨྲས་པ། ཁྱིམ་བདག་ཁོ་བོ་ནི་བསོད་སྙོམས་འབའ་ཞིག་ལ་རྒྱུའོ། །ཁྱིམ་བདག་གིས་སྨྲས་པ། འཕགས་པ་ཁྱོད་ཀྱིས་བདག་གི་སྡུམ་པར་བསོད་སྙོམས་མི་གསོལ་དུ་མི་རུང་ངོ་། །བསོད་སྙོམས་པ་དེས་ཁྱིམ་བདག་དེ་དུས་ཀྱིས་འཆུ་བར་ཤེས་ནས་ཅང་མི་སྨྲ་བས་དང་དུ་བླངས་སོ། །ཁྱིམ་བདག་དེས་བསོད་སྙོམས་པ་དེས་ཅང་མི་སྨྲ་བས་དང་དུ་བླངས་པར་རིག་ནས་རྐང་པ་ལ་ཕྱག་འཚལ་ཏེ་སོང་ནས་རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཁོ་བོས་བསོད་སྙོམས་པ་དེ་སང་གདུགས་ཚོད་ལ་སྤྱན་དྲངས་ན་དེས་ཀྱང་ཅི་མི་སྨྲ་བས་དང་དུ་བླངས་ཀྱིས་ཞལ་
ཟས་གཙང་ཞིང་བསོད་པ་དག་སྟ་གོན་གྱིས་ཤིག །ཁྱིམ་བདག་གི་ཆུང་མ་དེས་ཁ་ཟས་གྲང་ཆ་གང་དག་ཡིན་པ་དེ་དག་ནི་དེ་ཉིད་ཀྱི་ཉིན་མོ་སྟ་གོན་བྱས། དྲོད་བག་གང་དག་ཡིན་པ་དེ་དག་ནི་ཕྱི་དེ་ཉིན་པར་སྟ་གོན་བྱས་སོ། །དགེ་སློང་བསོད་སྙོམས་པ་དག་བསོད་སྙོམས་ལ་འཇུག་པར་བརྩམས་པ་དང་། བསོད་སྙོམས་པ་གཞན་ཞིག་བསོད་སྙོམས་པ་དེའི་གན་དུ་སོང་སྟེ་སྨྲས་པ། བསོད་སྙོམས་པ་ཚུར་ཤོག་བསོད་སྙོམས་ལ་འདོང་ངོ་། །དེས་སྨྲས་པ། ཁོ་བོ་ཁྱིམ་བདག་ཅིག་གིས་མགྲོན་དུ་བོས་པས་དུས་ཤེས་པར་བྱས་ཏེ་འགྲོས་ཁྱོད་སོང་ཤིག །དེས་སྨྲས་པ། བསོད་སྙོམས་པ་རྙེད་པ་དང་ལྡན་ཞིང་བསོད་སྙོམས་པ་བསོད་ནམས་ཆེན་པོར་གྱུར་གྱིས་ཟས་ཀྱི་ཚོད་ཤེས་པར་གྱིས་ཤིག །ཁོ་བོས་ཀྱང་དེ་ལ་དུས་ཤེས་པར་བྱའོ། །དགེ་སློང་མ་སྦོམ་དགའ་མོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་ནས། དེ་མཐར་གྱིས་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་ཏེ་སྨྲས་པ། མཚན་བཟང་ཨ་རོག་གྱ་བསོད་སྙོམས་བྱིན་ཅིག །ཁྱིམ་བདག་གི་ཆུང་མས་སྨྲས་པ། འཕགས་མ་བདག་གིས་བསོད་སྙོམས་པ་ཞིག་སྤྱན་དྲངས་པ་དེ་འཕྱིས་ཏེ་ཟན་བཅད་པར་གྱུར་ན་མི་རུང་བས་བདག་བྲེལ་གྱིས་རེ་ཞིག་བཞུད་ཅིག །སྦོམ་དགའ་མོས་སྨྲས་པ། གལ་ཏེ་ཁོ་མོས་བསོད་སྙོམས་པ་དེ་ཁྲིད་དེ་འོང་ན་ཁྱོད་ཀྱིས་ཁོ་མོ་ལ་བསོད་སྙོམས་སྦྱིན་ནམ། དེས་སྨྲས་པ་གསོལ་ལོ། །ཕྱི་བཞིན་འབྲང་བའི་དགེ་སྦྱོང་མ་འདི་ལ་སུས་སྦྱིན་པར་འགྱུར། བདག་གིས་གསོལ་ལོ། །གཙུག་ལག་ཁང་སྲུང་བ་དག་སུས་སྦྱིན་པར་འགྱུར། བདག་གིས་གསོལ་ལོ། །སྦོམ་དགའ་མོས་བསམས་པ། བསོད་སྙོམས་པ་དག་གིས་བསོད་སྙོམས་བརྒྱུས་ནས་ད་ཙམ་ཕྱིར་འབྱུང་བས་གང་ད་གཟོད་འཇུག་པ་དེ་བསོད་སྙོམས་པ་དེ་ཡིན་ནོ་སྙམ་ནས་དེ་གྲོང་ཁྱེར་གྱི་སྒོར་སོང་སྟེ་བསྡད་དོ། །བསོད་སྙོམས་པ་དེས་ཀྱང་བསམས་པ། དེང་བདག་གིས་བསོད་སྙོམས་ལ་རྒྱུ་མི་དགོས་པས་དགེ་བའི་ཕྱོགས་ལ་ཏྲོན་བྱ་ཞིང་དུས་ཤེས་པར་བྱས་ཏེ། འགྲོ་སྙམ་ནས་དེས་དུས་ཤེས་པར་
བྱས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་འཇུག་པར་བརྩམས་པ་དང་དེ་སྦོམ་དགའ་མོས་མཐོང་ནས་བསམས་པ། བསོད་སྙོམས་པ་དེ་འདི་ཡིན་ནོ་སྙམ་ནས་དེས་དེ་ལ་དྲིས་པ། འཕགས་པ་སྡུམ་པ་ག་གེ་མོ་ཞིག་ཏུ་སྤྱན་མ་དྲངས་སམ། སྲིང་མོ་གཡར་དྲངས་སོ། །འཕགས་པ་བདག་གིས་ཁྱིམ་དེར་ཁྱོད་ཀྱི་བསྔགས་པ་བརྗོད་དོ། །དེས་སྨྲས་པ། སྲིང་མོ་ཅི་ཁོ་བོས་ཁྱོད་ལ་ཁོ་བོའི་བསྔགས་པ་བརྗོད་ཅིག་ཅེས་བྱས་སམ། འཕགས་པ་བཀའ་མ་སྩལ་ཏོ། །བསོད་སྙོམས་པ་དེས་བསམས་པ། འདི་ནི་དགེ་སློང་མས་སྦྱོར་དུ་བཅུག་པའི་ཟས་ཡིན་པར་གྱུར་གྱིས་བདག་གིས་ཟན་བཅད་པ་ནི་བླའི་བདག་ལྟུང་བ་དང་བཅས་པར་གྱུར་ན་མི་རུང་ངོ་སྙམ་ནས་དེ་ཕྱིར་ལྡོག་པར་བརྩམས་པ་དང་། སྦོམ་དགའ་མོས་སྨྲས་པ། འཕགས་པ་བདག་གིས་ཁྱོད་ཀྱི་གདུང་ཡང་མ་འཚལ། མཚན་ཡང་མ་འཚལ་བས་བདག་གིས་ཁྱོད་ཀྱི་བསྔགས་པ་བརྗོད་རེ་སྐན། བསོད་སྙོམས་པས་སྨྲས་པ། སྲིང་མོ་གལ་ཏེ་ཁྱོད་ཀྱི་ཚིག་སྔ་མ་བདེན་ན་ནི་ཕྱི་མ་བརྫུན་ལ། གལ་ཏེ་ཕྱི་མ་བདེན་ན་ནི་སྔ་མ་བརྫུན་ནོ་ཞེས་དེ་ཕྱིར་ལོག་སྟེ་སྤྱིལ་བུ་དེ་ཉིད་དུ་སོང་ནས་དེ་ཇི་སྲིད་དུ་ལུས་ལས་མདངས་མ་ཡལ་བ་དེ་སྲིད་དུ་དགེ་བའི་ཕྱོགས་ལ་ཏྲོན་བྱས་ནས་གང་གི་ཚེ་ལུས་ལས་མདངས་ཡལ་བ་དེའི་ཚེ་ན་གློས་ཕབ་སྟེ་ཉལ་བ་དང་བསོད་སྙོམས་པ་གཞན་དག་གིས་དེ་ལ་སྨྲས་པ། གལ་ཏེ་ཟས་གཞན་གྱི་ཡིན་ཞེས་དེ་ལྟོ་ཡང་གཞན་གྱི་ལྟོ་ཡིན་སྙམ་མམ། ཅི་བྱས། ཅི་ཙམ་གྱིས་དགེ་བའི་ཕྱོགས་ལ་ཏྲོན་བྱེད་ཀྱང་མི་ནུས་པ་དེ་ཙམ་གྱི་ཟས་ཟོས་སོ། །སུས་ཟོས། ཁྱོད་ཀྱིས་ཟོས་སོ། །ཁོ་བོས་མ་ཟོས་སོ། །འོ་ན་ཅིའི་ཕྱིར་གློས་ཕབ་སྟེ་ཉལ། དེས་སྐབས་དེ་དགེ་སློང་རྣམས་ལ་རྒྱས་པར་བརྗོད་ནས་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་སྔར་ཁྱིམ་དུ་བོས་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་།
བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ་འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཤེས་བཞིན་དུ་དགེ་སློང་མས་སྦྱོར་དུ་བཅུག་པའི་ཟས་ཟ་ན་སྔར་ཁྱིམ་དུ་བོས་པ་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ། གཞན་ཡང་དེ་ལྟ་བུ་གང་ཡིན་པའོ། །ཤེས་བཞིན་དུ་ཞེས་བྱ་བ་ནི་བདག་ཉིད་ཀྱིས་རིག་པའམ། གཞན་གྱིས་བརྗོད་པས་སོ། །དགེ་སློང་མས་ཞེས་བྱ་བ་ནི་ཆོས་འདི་པས་སོ། །སྦྱོར་དུ་བཅུག་པའི་ ཞེས་བྱ་བ་ནི་སྦྱོར་དུ་བཅུག་པ་གཉིས་ཏེ། ཚུལ་ཁྲིམས་ཀྱིས་སྦྱོར་དུ་བཅུག་པ་དང་། ཐོས་པས་སྦྱོར་དུ་བཅུག་པའོ། །ཟས་ཞེས་བྱ་བ་ནི་བཅའ་བ་ལྔ་དང་། བཟའ་བ་ལྔའོ། །ཟ་ན་ཞེས་བྱ་བ་ནི་མགུལ་དུ་མིད་ནའོ། །སྔར་ཁྱིམ་དུ་བོས་པ་མ་གཏོགས་ཏེ་ཞེས་བྱ་བ་ནི་སྔར་ཁྱིམ་དུ་མགྲོན་དུ་བོས་པ་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། འདི་ལྟ་སྟེ། དགེ་སློང་རབ་ཏུ་མང་པོ་དག་ཁྱིམ་གཞན་དུ་མགྲོན་དུ་བོས་པར་གྱུར་པ་ན་དེར་དགེ་སློང་མ་འོངས་ཏེ་མགྲོན་དྲིས་པ། ཁྱོད་ཅག་གིས་དགེ་སློང་གང་དག་མགྲོན་དུ་བོས། ཆེ་གེ་མོ་དང་ཆེ་གེ་མོ་ལ་སོགས་པ་དག་གོ །ཟན་ཇི་ལྟ་བུ་དག་སྦྱིན། སུམ་ཕེལ་གྱི་ཟན་དག་གོ །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་
བཅོམ་པ་དག་ཡིན་པས་དེ་དག་ལ་གཙང་ཕྱེ་སྦྱིན་པར་བྱའོ། །ཞུན་མར་ཇི་ལྟ་བུ་སྦྱིན། རའི་ཞུན་མར་སྦྱིན་ནོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་བ་མར་སྦྱིན་པར་བྱའོ། །ལན་ཚྭ་ཇི་ལྟ་བུ་སྦྱིན། འགྱུར་བྱེད་ཀྱི་ལན་ཚྭའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་རྒྱམ་ཚྭ་དང་། བ་ཚྭ་དང་། རྒྱ་མཚོའི་ཚྭ་སྦྱིན་པར་བྱའོ། །བཏུང་བ་ཇི་ལྟ་བུ་བླུད་རྩབ་མོའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་དར་བ་བླུད་པར་བྱའོ། །ཟན་སྤག་པ་ཇི་ལྟ་བུ་སྦྱིན། ཚྭ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་ཚོག་པ་དང་། བཙོས་པ་དང་། ཞོ་ཐུག་བླུད་པར་བྱའོ། །ཁུར་བ་ཇི་ལྟ་བུ་སྦྱིན། མོན་སྲན་གྲེའུའི་ཁུར་བའོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་ཧྭགས་ཀྱི་ཁུར་བ་དང་། མོན་ཁུར་དང་། བོག་རན་སྦྱིན་པར་བྱའོ། །མོན་ཁུར་སྤག་པ་ཇི་ལྟ་བུ་སྦྱིན། ཚྭ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་བརྔོ་ཤ་དང་། སྲེག་ཤ་དང་། ཤ་རྣམ་པ་མང་པོ་སྦྱིན་པར་བྱའོ། །སྐོམ་ཇི་ལྟ་བུ་བླུད། བུ་རམ་ཆབ་བོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་ཧྭགས་ཆབ་དང་། ལི་ཁ་རའི་ཆབ་དང་། དྲོ་འཇམ་བླུད་པར་
བྱའོ། །འབྲས་ཆན་ཇི་ལྟ་བུ་སྦྱིན། འབྲས་ཆན་རྩུབ་པོ་དང་། ཀོ་དྲ་བའི་ཆན་ནོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་འབྲས་སཱ་ལུའི་ཆན་སྦྱིན་པར་བྱའོ། །སྲན་ཚོད་ཅི་ལྟ་བུ་བླུད། མོན་སྲན་གྲེའུའི་སྲན་ཚོད་དོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་མོན་སྲན་སྡེའུའི་སྲན་ཚོད་བླུད་པར་བྱའོ། །བྱ་ན་ཇི་ལྟ་བུ་སྦྱིན། བརྔོ་ཚོད་དོ། །མི་རུང་སྟེ། དགེ་སློང་དེ་དག་ནི་རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པས་དེ་དག་ལ་ཤ་རྣམ་པ་སྣ་ཚོགས་དང་། ཧྭགས་ཚོད་དང་ཞོ་དང་། འོ་ཚན་བླུད་པར་བྱའོ། །ཞེས་སྦྱོར་དུ་བཅུག་ནས། དགེ་སློང་གིས་གལ་ཏེ་ཤེས་བཞིན་དུ་ཟོས་ན་ལྟུང་བྱེད་དུ་འགྱུར་རོ། །རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་དང་། དགྲ་བཅོམ་པ་དག་ཡིན་པ་བདེན་ན་ལྟུང་བ་མེད་དོ། །འདི་ལྟ་སྟེ་དགེ་སློང་རབ་ཏུ་མང་པོ་དག་ཁྱིམ་གཞན་དུ་མགྲོན་དུ་བོས་པར་གྱུར་པ་ན་དེར་དགེ་སློང་མ་འོངས་ཏེ་དྲིས་པ། ཁྱེད་ཅག་གིས་དགེ་སློང་གང་དག་མགྲོན་དུ་བོས། ཆེ་གེ་མོ་དང་ཆེ་གེ་མོ་ལ་སོགས་པ་དག་གོ །ཟན་ཇི་ལྟ་བུ་དག་སྦྱིན། སུམ་ཕེལ་གྱི་ཟན་དག་གོ །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་གཙང་ཕྱེ་སྦྱིན་པར་བྱའོ། །ཞུན་མར་ཇི་ལྟ་བུ་སྦྱིན། རའི་ཞུན་མར་སྦྱིན་ནོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་བ་མར་སྦྱིན་པར་བྱའོ། །ལན་ཚྭ་ཇི་ལྟ་བུ་སྦྱིན། འགྱུར་བྱེད་ཀྱི་ལན་ཚྭའོ། །མི་རུང་སྟེ་དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས། དེ་དག་ལ་རྒྱམ་ཚྭ་དང་། བ་
ཚྭ་དང་། རྒྱ་མཚོའི་ཚྭ་སྦྱིན་པར་བྱའོ། །བཏུང་བ་ཇི་ལྟ་བུ་བླུད། རྩབ་མོའིའོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་དར་བ་བླུད་པར་བྱའོ། །ཟན་སྤག་པ་ཇི་ལྟ་བུ་སྦྱིན། ཚྭ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་ཚོག་པ་དང་། བཙོས་པ་དང་། ཞོ་ཐུག་བླུད་པར་བྱའོ། །ཁུར་བ་ཇི་ལྟ་བུ་སྦྱིན། མོན་སྲན་གྲེའུའི་ཁུར་བའོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་ཧྭགས་ཀྱི་ཁུར་བ་དང་། མོན་ཁུར་དང་། བོག་རན་སྦྱིན་པར་བྱའོ། །མོན་ཁུར་སྤག་པ་ཇི་ལྟ་བུ་སྦྱིན། ཚྭ་དང་སྦྱར་བའི་ལྡུམ་མོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་བརྔོ་ཤ་དང་། སྲེག་ཤ་དང་། ཤ་རྣམ་པ་མང་པོ་སྦྱིན་པར་བྱའོ། །སྐོམ་ཅི་ལྟ་བུ་བླུད། བུ་རམ་ཆབ་བོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་ཧྭགས་ཆབ་དང་། ལི་ཁ་རའི་ཆབ་དང་། དྲོ་འཇམ་བླུད་པར་བྱའོ། །འབྲས་ཆན་ཇི་ལྟ་བུ་སྦྱིན། འབྲས་ཆན་རྩུབ་པོ་དང་། ཀོ་དྲ་བའི་ཆན་ནོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་འབྲས་སཱ་ལུའི་ཆན་སྦྱིན་པར་བྱའོ། །སྲན་ཚོད་ཇི་ལྟ་བུ་བླུད། མོན་སྲན་གྲེའུའི་སྲན་ཚོད་དོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་མོན་སྲན་སྡེའུའི་སྲན་ཚོད་བླུད་པར་བྱའོ། །བྱ་ན་ཇི་ལྟ་བུ་སྦྱིན། བརྔོ་ཚོད་དོ། །མི་རུང་སྟེ། དགེ་སློང་དེ་དག་ནི་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པས་དེ་དག་ལ་ཤ་རྣམ་པ་སྣ་
ཚོགས་དང་ཧྭགས་ཚོད་དང་། ཞོ་དང་། འོ་ཚན་བླུད་པར་བྱའོ་ཞེས་སྦྱོར་དུ་བཅུག་ནས། དགེ་སློང་གིས་གལ་ཏེ་དེ་ཤེས་བཞིན་དུ་ཟོས་ན་ལྟུང་བྱེད་དུ་འགྱུར་རོ། །མདོ་སྡེ་འཛིན་པ་དང་། འདུལ་བ་འཛིན་པ་དང་། མ་མོ་འཛིན་པ་དག་ཡིན་པ་བདེན་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་དེ་སུམ་བཅུ་པ་རྫོགས་སོ།། །།