བཅུ་ཚན་དགུ་པ། ཆོས་སྟོན་ལ་སོགས་པའི་སྡེ་ཚན།
འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་བརྒྱད་པ། སྡོམ་ལ། ཟས་བཅས་སྐྱ་རེངས་ད་གདོད་དང་། །ཁབ་རལ་དང་ནི་ཁྲི་རྐང་དང་། །བདལ་དང་གདིང་བ་གཡན་པ་དང་། །རས་ཆེན་བདེ་གཤེགས་ཆོས་གོས་སོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་ཁྱིམ་བདག་ཅིག་འདུག་པ་དེའི་ཁྱིམ་དུ་ཉེ་དགའ་དུས་དང་དུས་སུ་འགྲོ་ཞིང་དེས་དེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་གོ །དུས་གཞན་ཞིག་ན་དེས་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་དག་གི་བསྔགས་པ་རྒྱ་ཆེར་བརྗོད་པ་དང་། དེས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་ཅུང་ཟད་བགྱིའོ། །ཉེ་དགའས་སྨྲས་པ། ལེགས་ཀྱིས་དེ་བཞིན་གྱིས་ཤིག་ཅི་ཞིག་བྱེད། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ལོ། །ཁྱིམ་བདག་ཁྱོད་ཀྱིས་སེམས་རྒྱ་ཆེན་པོ་བསྐྱེད་ཀྱིས་གདུགས་ཚོད་གསོལ་ཅིག། འཕགས་པ་ཁྱོད་ཀྱིས་བདག་གི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་སང་བདག་གི་སྡུམ་པར་གདུགས་ཚོད་ལ་སྤྱན་དྲང་བའི་རིགས་སོ། །དེས་དང་དུ་བླངས་སོ། །དེ་ནས་ཚེ་དང་ལྡན་པ་ཉེ་དགའས་ཁྱིམ་བདག་དེ་ལ་ཨ་རོག་གྱ་ཞེས་བྱས་ཏེ་སོང་ནས་དེ་གཙུག་ལག་ཁང་དུ་སོང་སྟེ། དེས་ཁྱིམ་བདག་དེའི་མིང་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང་། དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་ཉེ་དགའས་ཁྱིམ་བདག་དེ་མ་དད་པ་ཡིན་ན་ཁྱོད་ཀྱིས་ཇི་ལྟར་རྗེས་སུ་འཇུག་པར་བྱས། ཉེ་དགའས་སྨྲས་པ། ཚེ་དང་ལྡན་པ་དག་ཉེ་དགའ་ལ་དེ་ཙམ་ཡང་མི་གནས་སམ། རྗེས་སུ་འཇུག་པར་བྱས་པ་འབའ་ཞིག་ཏུ་མ་ཟད་ཀྱི་སྐྱབས་སུ་འགྲོ་བ་དང་། བསླབ་པའི་གཞི་དག་ལ་ཡང་བཞག་གོ །དགེ་སློང་རྣམས་ཀྱིས་སྨྲས་པ། ལེགས་པར་བྱས་ཀྱིས་འདོང་ལ་བཟའ་བར་བྱའོ། །ཆོས་ཉིད་ཀྱིས་ན་གང་གི་ངོར་དགེ་སློང་གི་དགེ་འདུན་སྤྱན་དྲངས་པ་དེ་དུས་སྔར་འགྲོ་བ་ཡིན་པས་ཚེ་དང་ལྡན་པ་ཉེ་དགའ་དུས་སྔར་དེར་སོང་ནས་དེས་ཁྱིམ་བདག་དེ་ལ་སྨྲས་པ། ཁྱིམ་བདག་ཁོ་བོ་ཁྱིམ་དུ་འགྲོ་བའི་ཁྱིམ་དག་ལྟའི་བར་དུ་ཁྱོད་རེ་ཞིག་
ཞལ་ཟས་སྟ་གོན་གྱིས་ཤིག །ཁོ་བོ་མ་འོངས་ཀྱི་བར་དུ་ཡང་ཁྱོད་ཀྱིས་རེ་ཞིག་བྲིམ་པར་མི་བྱའོ་ཞེས་སྨྲས་ཏེ་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་ཁྱིམ་བདག་དེ་རྒྱུས་མི་ཤེས་པ་ཡིན་པས་དེས་སྤྱན་འདྲེན་གཏོང་བར་མི་བྱེད་ཀྱིས་དུས་སྔར་ཤེག་ཤིག་དང་འདོང་ངོ་ཞེས་སྒོ་ཞིག། ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་བསྒོ་བ་དང་། དགེ་སློང་རྣམས་ཆས་ཏེ་ལྷགས་སོ། །དེ་ནས་བཅོམ་ལྡན་འདས་དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་དེའི་ཁྱིམ་ག་ལ་བ་དེར་གཤེགས་ཏེ་སྒོ་དྲུང་ན་གཞེས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་དེ་ལ་སངས་རྒྱས་ལ་སོགས་པ་དགེ་སློང་གི་དགེ་འདུན་སྒོ་དྲུང་ན་གཞེས་ཀྱིས་ཅི་བདེ་གྱིས་ཤིག་ཅེས་སྒོ་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ནང་དུ་སོང་སྟེ། ཁྱིམ་བདག་དེ་ལ་ཁྱིམ་བདག་སངས་རྒྱས་ལ་སོགས་པ་དགེ་སློང་གི་དགེ་འདུན་སྒོ་དྲུང་ན་གཞེས་ཀྱིས་ཅི་བདེ་གྱིས་ཤིག །ཁྱིམ་བདག་གིས་སྨྲས་པ། འཕགས་པ་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་དག་བཤམས་ཀྱིས་བཞུགས་སུ་གསོལ། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་བདག་གིས་ཁྱེད་ཅག་གི་ཅི་བདེ་ཅི་ལགས་ནི་མ་འཚལ་གྱི། འདི་ལྟར་ཁྱེད་ཅག་ཁོ་ནའི་སླད་དུ་གདན་བཤམས་ཀྱིས་བཞུགས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་སྐད་ཟེར་ན་ཁྱེད་ཅག་ཁོ་ནའི་ཕྱིར་སྟན་དག་བཤམས་པས་ཅི་བདེ་བྱས་པར་བརྗོད་པར་བྱ་སྟེ། འདུག་པར་བྱ་ཞིང་འདི་ལ་འགྱོད་པར་མི་བྱའོ། །སངས་རྒྱས་ལ་སོགས་པ་དགེ་སློང་གི་དགེ་འདུན་བཞུགས་པ་དང་ཇི་ཙམ་ན་གདུགས་ཚོད་ལ་བབ་ཏུ་ཉེ་བས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་
ལ་ཁྱིམ་བདག་ལ་གདུགས་ཚོད་ལ་བབ་ཏུ་ཉེ་བས་ཞལ་ཟས་བྲིམས་ཤིག །ཟས་འདིས་ཁྱོད་ལ་ཅི་ཞིག་བྱ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང་། དེས་སྨྲས་པ། འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་ཉེ་དགའ་མཆིས་སམ་ཞེས་མཆི་ནས་བདག་གིས་མ་མཆིས་སོ་ཞེས་བགྱིས་པ་དང་། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་ཡུད་ཙམ་ཞིག་གཞེས་ནས་ཡང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་ཁྱིམ་བདག་ལ་གདུགས་ཚོད་ལ་བབ་ཀྱིས་ཞལ་ཟས་བྲིམས་ཤིག །ཟས་རུལ་བར་གྱུར་པ་འདིས་ཁྱོད་ལ་ཅི་བྱ་ཞེས་གྱིས་ཤིག། ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་བསྒོ་བ་དང་། དེས་སྨྲས་པ། འཕགས་པ་ཉེ་དགའ་མཆིས་སམ། ཚེ་དང་ལྡན་པ་ཀུན་དགའ་བོས་སྨྲས་པ། ཁྱིམ་བདག་མ་འོངས་སོ། །དེས་སྨྲས་པ། འཕགས་པ་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ། བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་གསོལ་པ། བཅོམ་ལྡན་འདས་ཁྱིམ་བདག་དེའི་མཆིད་ནས་ཉེ་དགའ་མཆིས་སམ་ཞེས་མཆིས་ནས། བདག་གིས་མ་མཆིས་སོ་ཞེས་བགྱིས་པ་དང་། དེའི་མཆིད་ནས་དེ་མཆིའི་བར་དུ་ཡུད་ཙམ་ཞིག་གཞེས་སུ་གསོལ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་སོང་ལ་ཁྱིམ་བདག་ལ་ཉེ་དགའ་འོངས་པར་མ་གྱུར་ན་ཟན་སྦྱིན་པར་མི་བྱེད་དམ་ཞེས་གྱིས་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཁྱིམ་བདག་ལ་དེ་སྐད་སྨྲས་པ་དང་། དེས་སྨྲས་པ། འཕགས་པ་མི་གསོལ་ལོ། །བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་
བོས་གསོལ་པ། བཅོམ་ལྡན་འདས་མི་གསོལ་ལོ་ཞེས་མཆིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་བཀའ་སྩལ་པ། གཞན་དབང་ཐམས་ཅད་སྡུག་བསྔལ་ཏེ། །བདག་དབང་ཐམས་ཅད་བདེ་བ་ཡིན། །ཐུན་མོང་དག་གིས་གནོད་བྱེད་དེ། །འབྲེལ་པ་ཤིན་ཏུ་འདའ་བར་དཀའ། །ཇི་ཙམ་ན་གདུགས་ཚོད་ཀྱི་མཐའ་ལ་བབ་པ་ན་ཉེ་དགའ་འོངས་ནས་དེས་སྨྲས་པ། ཁྱིམ་བདག་མི་འབྲིམ་པར་ཅི་སྡོད། དེས་སྨྲས་པ། འཕགས་པ་ཁྱོད་ཀྱི་ཞལ་ནས་ཁོ་བོ་མ་འོངས་ཀྱི་བར་དུ་རེ་ཞིག་བྲིམ་པར་མི་བྱའོ་ཞེས་བྱུང་ལ་ད་འདི་སྐད་ཅེས་གསུང་ངམ། ཉེ་དགའ་ཤགས་མེད་ནས་ཅང་མི་སྨྲ་བར་འདུག་གོ །དེ་ནས་ཁྱིམ་བདག་དེས་བྲིམ་པར་བརྩམས་པ་དང་། ཇི་ཙམ་ན་གདུགས་ཚོད་ཡོལ་ནས་དགེ་སློང་ཁ་ཅིག་གིས་ནི་ཟན་ཐོབ་ནས་ཟན་བཅད་པ་བྱས། ཁ་ཅིག་གིས་ནི་ཟན་མ་ཐོབ་པ་ཁོ་ནར་ཟན་བཅད་པ་བྱས་ནས་བཅོམ་ལྡན་འདས་ཀྱིས་ཡོན་བཤད་པ་མཛད་དེ་གཤེགས་སོ། །ཉེ་དགའ་ངོ་ཚ་བར་གྱུར་པའི་སྙིང་གིས་དེ་ཉིད་དུ་འདུག་གོ །དེའི་ཉིན་མོ་གསོ་སྦྱོང་གི་ཞལ་ཏ་པ་རྒན་པའི་མཐའ་ལོགས་སུ་འདུག་སྟེ། དགེ་སློང་རྣམས་ལ་ཡང་དག་པར་བསྒོ་ཞིང་སྨྲས་པ། བཙུན་པ་ཉེ་དགའ་མ་མཆིས་སམ། འགའ་ཞིག་གིས་དེའི་འདུན་པ་བླངས་སམ། དགེ་སློང་རྣམས་ཀྱིས་སྨྲས་པ། དེ་མ་འོངས་ཏེ་སུས་ཀྱང་དེའི་འདུན་པ་ཡང་མ་བླངས་སོ། །དགེ་སློང་གཞན་དག་གིས་སྨྲས་པ། ཚེ་དང་ལྡན་པ་དག་ཉེ་དགའས་བདག་ཅག་སྔ་དྲོ་ཟང་ཟིང་གི་ཆེད་ལ་ཆེས་ཐོ་བཙམས་ལ། ད་ནི་ཆོས་ཀྱི་ཆེད་ལ་ཐོ་འཚམ་པར་བྱེད་དོ། །དགེ་སློང་དོན་ཆུང་ངུ་དག་ཅིའི་ཕྱིར་དགེ་སློང་དག་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་ཟས་དང་བཅས་པའི་ཁྱིམ་
དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་བར་བྱེད་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་། ཕྱི་དྲོ་ཁྱིམ་དག་ཏུ་རྒྱུ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ།། །།དགེ་སློང་ནད་ངན་ཅན་དག་འཁོད་པ་དག་གིས་ཡུན་རིང་དུ་འདུག་མི་ནུས་ནས་དགེ་སློང་ནད་གཡོག་རྣམས་ཀྱིས་ནད་པའི་བྱ་བ་ཉམས་པར་བྱེད་ཅིང་། དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་པ་འདུག་པ་ལ་བསྒོ་བར་བྱའོ། །བཅོམ་ལྡན་འདས་ཀྱིས་ཁྱིམ་པ་འདུག་པ་ལ་བསྒོ་བར་བྱའོ། །ཞེས་བཀའ་སྩལ་ནས། དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས། དགེ་སློང་དེས་དེར་འགྲོ་བར་བརྩམས་ཏེ། དེ་ལམ་གྱི་ཕྱེད་དུ་སོན་པ་དང་། བདག་གིས་ཁྱིམ་པ་འདུག་པ་ལ་མ་བསྒོའོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ། ཇི་སྲིད་དུ་ཁྱིམ་པ་འདུག་པ་ལ་བསྒོ་བར་བྱེད་པ་དེ་སྲིད་དུ་དེའི་ལྷུང་བཟེད་དང་། ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ། འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན། དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི། གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ། །ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་
བཀའ་སྩལ་པ། དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་དང་ཕྱི་དྲོ་ཁྱིམ་དག་ཏུ་རྒྱུ་ཞིང་ཁྱིམ་པ་འདུག་པ་ལ་མི་སྒོ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །ཟས་དང་བཅས་པའི་ཞེས་བྱ་བ་ནི་མགྲོན་དུ་བོས་པ་དང་བཅས་པའིའོ། །ཁྱིམ་དུ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་དུའོ། །མགྲོན་དུ་བོས་ནས་ཞེས་བྱ་བ་ནི་བསོད་སྙོམས་ཀྱི་ཕྱིར་རོ། །སྔ་དྲོ་ཞེས་བྱ་བ་ནི་སྔ་དྲོ་ཉིད་དེ་ཁྱིམ་གཉིས་ལས་ལྷག་པར་རྒྱུ་ནའོ། །ཕྱི་དྲོ་ཞེས་བྱ་བ་ནི་ཕྱི་དྲོ་ཉིད་དེ་ཁྱིམ་གསུམ་ལས་ལྷག་པར་རྒྱུ་ནའོ། །ཁྱིམ་དག་ཏུ་ཞེས་བྱ་བ་ནི་བྲམ་ཟེ་དང་། ཁྱིམ་བདག་གི་ཁྱིམ་དག་ཏུའོ། །རྒྱུ་ཞིང་ཞེས་བྱ་བ་ནི་འགྲོ་ཞིང་ངོ་། །ཁྱིམ་པ་འདུག་པ་ལ་མི་སྒོ་ན་ཞེས་བྱ་བ་ནི་དེ་ན་ཁྱིམ་པ་གང་འདུག་པ་ལའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་ཡི་དགས་ངན་སོང་དང་ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན། དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་ཇི་ཙམ་ཅུང་ཟད་ཟས་དང་བཅས་པའི་ཁྱིམ་དུ་མགྲོན་དུ་བོས་ནས་སྔ་དྲོ་ཁྱིམ་གཉིས་ལས་ལྷག་པར་རྒྱུ་ཞིང་ཕྱི་དྲོ་ཡང་ཁྱིམ་གསུམ་ལས་ལྷག་པར་རྒྱུ་ན་ཐམས་ཅད་དུ་ལྟུང་བྱེད་དུ་འགྱུར་རོ། །དེའི་ངོར་མགྲོན་དུ་
བོས་པ་མ་ཡིན་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གྲོང་རྒྱུ་བའི་ལྟུང་བྱེད་དེ་བརྒྱད་བཅུ་རྩ་གཅིག་པ་རྫོགས་སྷོ།། །།སྒོ་གཏན་གྱི་བསླབ་པའི་གཞིའི་བར་སྡོམ་ལ། དགའ་བོ་ཉེ་དགའ་ཞག་བདུན་དང་། །བཟང་བྱིན་སྡུམས་བྱེད་ཚུལ་ཁྲིམས་དང་། །ནག་པོ་ཚིགས་བཅད་འཆར་ཀ་དང་། །བཅུ་དང་བསླབ་གཞིའི་རིམ་པ་དང་། །གྲོང་ཁྱེར་གཉིས་དང་གཡུལ་གཞི་དང་། །ལྷ་མོ་ཁར་ཕོར་འཕྱང་བ་དང་། །སྔོ་བསངས་རྒྱལ་སྲིད་པོག་ཀ་ན། །མ་ལ་ཁར་བ་བྱིན་པ་དང་། །ལྷམ་གྱི་དབང་ཕྱུག་མཉན་ཡོད་དང་། །སྔོན་གྱི་ཚུལ་དང་ནོར་བཟངས་དང་། །དྲང་སྲོང་རྣམས་དང་གཙུག་ལག་ཁང་། །མགུ་བྱེད་དང་ནི་གཟུངས་བྱེད་དང་། །སྟོང་ཐུབ་དང་ནི་འབྲོག་གནས་དང་། །ལག་བརྒྱུད་དང་ནི་སྔོ་བསངས་ཅན། །མི་གདུང་རྣམས་སུ་སྐྱེས་པ་དང་། །དཔའ་ཆེན་དང་ནི་སྒུར་མཆོག་དང་། །དཔེ་མེད་མ་དང་ལྕགས་མགར་དང་། །སིང་ག་ལ་དང་ཤར་པ་དང་། །སྙན་སྨྲ་དང་ནི་ཚིག་པ་དང་། །སྒུར་དང་ཐོས་པ་འཛིན་པ་དང་། །བྲན་མོ་དང་ནི་བྲམ་ཟེ་མོ། །མགུ་བྱེད་དཔལ་ལྡན་གྱུར་པ་དང་། །ཤཱ་རིའི་བུ་ནི་ཞུགས་པ་དག །སྒོ་གཏན་ཡང་དག་བསྡུས་པ་ཡིན། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགོན་པ་དང་ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩྭ་སྤྱིལ་དང་། བླ་གབ་མེད་པ་དང་། དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་འདི་དག་ཏུ་བསམ་གཏན་གྱིས་ཤིག །དགེ་སློང་དག་བག་ཡོད་པར་བསྒྲུབས་ལ་ཕྱིས་འགྱོད་པར་མི་འགྱུར་བར་གྱིས་ཤིག །འདི་ནི་ངའི་གདམས་ངག་དང་རྗེས་སུ་བསྟན་པ་ཡིན་ནོ། །བཅོམ་ལྡན་འདས་ཀྱིས་དགེ་སློང་རྣམས་ལ་དེ་སྐད་ཅེས་བཀའ་སྩལ་ནས། དགེ་སློང་རྣམས་དགོན་པ་དང་། ཤིང་དྲུང་དང་། ཁྱིམ་གྱིས་སྟོང་པ་དང་། རི་སུལ་དང་། རི་ཕུག་དང་། རྩྭ་སྤྱིལ་དང་། བླ་གབ་མེད་པ་དང་། དུར་ཁྲོད་དང་། ནགས་ཁྲོད་དང་། རི་དྲུང་དང་། བས་མཐའི་གནས་མལ་དག་ཏུ་ཞུགས་ཏེ། ཁ་ཅིག་ནི་རི་
རབ་ཀྱི་བང་རིམ་ན་བསམ་གཏན་བྱེད། ཁ་ཅིག་ནི་གསེར་གྱི་རི་བདུན་པོ་དག་ལ། ཁ་ཅིག་ནི་མཚོ་ཆེན་པོ་མ་དྲོས་པ་ན། ཁ་ཅིག་ནི་རྫིང་བུ་དལ་གྱིས་འབབ་པ་ན། ཁ་ཅིག་ནི་རྣལ་འབྱོར་པའི་སྐྱེ་བོ་དང་རྗེས་སུ་མཐུན་པའི་གྲོང་དང་། གྲོང་རྡལ་དང་། ཡུལ་དང་ཡུལ་འཁོར་དང་། རྒྱལ་པོའི་ཕོ་བྲང་གི་ཕྱོགས་དེ་དང་དེ་དག་ན་བསམ་གཏན་བྱེད་དོ། །རིའི་རྒྱལ་པོ་རི་རབ་དཔག་ཚད་བརྒྱད་ཁྲི་ནི་ཆུའི་ནང་དུ་ནུབ། དཔག་ཚད་བརྒྱད་ཁྲི་ནི་ཆུ་ལས་མངོན་པར་འཕགས་ཏེ་དེ་ལ་དཔག་ཚད་འབུམ་དྲུག་ཁྲི་ཡོད་དོ། །རིའི་རྒྱལ་པོ་རི་རབ་ཀྱི་ངོས་རེ་རེ་ལ་དཔག་ཚད་བརྒྱད་ཁྲི་བརྒྱད་ཁྲི་ཡོད་དེ། དེ་དག་ལ་དཔག་ཚད་སུམ་འབུམ་ཉི་ཁྲི་ཡོད་དོ། །རིའི་རྒྱལ་པོ་རི་རབ་རིན་པོ་ཆེ་སྣ་བཞི་ལས་བྱས་པ་གཟུགས་བཟང་བ། བལྟ་ན་སྡུག་པ། མཛེས་པ་ཡིན་ཏེ། དེར་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་པར་གནས་པ་ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་སྟེ། དེས་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །དེ་ན་དགེ་སློང་གང་དག་རི་རབ་ཀྱི་བང་རིམ་ན་བསམ་གཏན་བྱེད་པ་དེ་དག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་གྱུར་ནས་དེ་དག་དབྱར་གྱི་ཟླ་བ་གསུམ་པོ་དག་འདས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་མཉན་ཡོད་དུ་ལྷགས་པ་དང་། དགེ་སློང་རྣམས་ཀྱིས་དེ་དག་མཐོང་ནས་སྨྲས་པ། ཚེ་དང་ལྡན་པ་དག་འོངས་པ་ལེགས་སོ། །འོངས་པ་ལེགས་སོ། །ཁྱེད་ཅག་ག་ལས་འདིར་འོངས། ཁྱེད་ཅག་དབྱར་གང་དུ་གནས་པར་ཁས་བླངས། དེ་དག་གིས་སྨྲས་པ། ཚེ་དང་ལྡན་པ་དག་བདག་ཅག་རི་རབ་ཀྱི་བང་རིམ་ནས་འདིར་འོངས་སོ། །བདག་ཅག་རི་རབ་ཀྱི་བང་རིམ་དུ་དབྱར་གནས་པར་ཁས་བླངས་སོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཅག་ཅིའི་
ཕྱིར་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་གྱུར། དེ་དག་གིས་སྨྲས་པ་ཚེ་དང་ལྡན་པ་དག་རི་རབ་ཀྱི་བང་རིམ་དུ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱེས་ནས་དེ་གཉིས་ཀྱི་ལུས་ཀྱིས་དེ་ལན་གསུམ་དཀྲིས་ཏེ་འཁོད་ཅིང་བསྐལ་པར་གནས་པ། ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པ་ཡིན་ནོ། །དེ་གཉིས་འདི་སྙམ་དུ་སེམས་ཏེ། བདག་ཅག་གཉིས་ཀྱི་བསོད་ནམས་ཀྱི་གནས་འདི་བྱུང་ངོ་སྙམ་ནས་དེ་གཉིས་སེར་སྣས་ཀུན་ནས་དཀྲིས་པས་ཉིན་མོ་ལན་གསུམ་མི་མཐུན་པའི་རླུང་གཏོང་སྟེ། དེས་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་མང་པོ་དག་ཚུལ་མ་ཡིན་པས་སྡུག་བསྔལ་བར་གྱུར་ཏོ། །བདག་ཅག་ཀྱང་མི་མཐུན་པའི་རླུང་དེས་སྐྱ་བོ་བསེང་བསེང་པོར་གྱུར་ཅིང་། རིད་པ་དང་ཉམ་ཆུང་བ་དང་། རྐེ་བ་དང་ལུས་མ་ཐོབ་པར་གྱུར་ཏོ། །དགེ་སློང་རྣམས་ཀྱིས་སྨྲས་པ། ཚེ་དང་ལྡན་པ་དག་ཁྱེད་ཀྱིས་དེ་གཉིས་གདུལ་བར་མི་ནུས་སམ། དེ་དག་གིས་སྨྲས་པ། ཚེ་དང་ལྡན་པ་དག་རེ་ཞིག་དེ་གཉིས་བདག་ཅག་གིས་གདུལ་བ་མ་ཡིན་ནོ། །འོ་ན་སུས་གདུལ་བ་ཡིན། ཉན་ཐོས་ཆེན་པོས་གདུལ་བ་ཡིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་དགོངས་པ། དེ་གཉིས་གང་གིས་གདུལ་བ་ཡིན་སྙམ་ན། དགེ་སློང་མཽད་གལ་གྱི་བུ་ཆེན་པོས་གདུལ་བ་ཡིན་པར་གཟིགས་ཤིང་མཁྱེན་ནས། ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་རི་རབ་ཀྱི་བང་རིམ་ན་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ལ་སོམས་ཤིག། ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཇི་ལྟར་སེམས་མཉམ་པར་བཞག་ན་མཉན་ཡོད་ནས་མི་སྣང་བར་གྱུར་ཅིང་། རི་རབ་ཀྱི་བང་རིམ་དུ་སོན་པར་གྱུར་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་བཞུགས་སོ། །དེའི་ཚེ་ན་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་གཉིད་ལོག་པར་གྱུར་ནས་དེས་སེ་གོལ་གྱིས་སད་པར་བྱ་བར་བརྩམས་ན་དེ་གཉིས་མ་སད་དོ། །དེས་དེ་གཉིས་ཀྱི་སྟེང་དུ་
བཅག་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་དེ་གཉིས་ཀྱི་ལྟོར་ཞུགས་ཏེ་སྤྲིན་ཆེན་པོ་བཞིན་དུ་འབྲུག་བསྒྲགས་པར་བརྩམས་ན་དེ་ལྟ་ན་ཡང་དེ་གཉིས་མ་སད་དོ། །དེས་ཀླུ་ཆེན་པོའི་ལུས་ཀྱིས་རིའི་རྒྱལ་པོ་རི་རབ་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་པ་དང་། དེ་གཉིས་ཁུར་ལྕི་བས་མནན་པས་སད་དེ་ཇི་ཙམ་ན་ཀླུ་ཆེན་པོ་ཞིག་གིས་བདག་ཅག་གཉིས་མནན་པར་མཐོང་ནས་དེ་གཉིས་ཀྱིས་བསམས་པ། ཀླུ་རྫུ་འཕྲུལ་ཆེན་པོ་ཞིག་བྱུང་སྟེ་བདག་ཅག་གཉིས་གནས་འདི་ནས་ཉམས་པར་གྱུར་གྱིས་བྲོས་ཏེ་འདོང་ངོ་སྙམ་དུ་རིག་ནས་སྐྲག་སྟེ། བྲམ་ཟེའི་ཁྱེའུའི་ཁ་དོག་ཏུ་བདག་ཉིད་མངོན་པར་སྤྲུལ་ནས་འབྲོས་པར་བརྩམས་སོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་རྫུ་འཕྲུལ་མངོན་པར་འདུ་བྱ་བ་དེ་ཕྱིར་བསྡུས་ནས། དེ་གཉིས་ཀྱི་མདུན་དུ་འདུག་སྟེ་སྨྲས་པ། ཀླུའི་དབང་པོ་གཉིས་གར་འདོང་། དེ་གཉིས་ཀྱིས་སྨྲས་པ། ཀླུ་རྫུ་འཕྲུལ་ཆེན་པོ་ཞིག་བྱུང་སྟེ། བདག་ཅག་གཉིས་འདི་ནས་ཉམས་པར་གྱུར་གྱིས་འབྲོས་སུ་འགྲོའོ། །དེས་སྨྲས་པ། ཚུར་ཤོག་ཀླུ་དེ་ཅི་འདྲ་བ་བལྟའོ། །དེ་གཉིས་དེ་དང་ལྷན་ཅིག་ཕྱིར་ལོག་པ་དང་། ཇི་ཙམ་ན་མི་སྣང་ནས་དེ་གཉིས་ཀྱིས་སྨྲས་པ། འཕགས་པས་བདག་ཅག་གཉིས་ལ་ཀུ་རེ་མ་བགྱིས་སམ། དེས་སྨྲས་པ། དེ་ཡིན་ནོ་འོ་ན་བདག་ཅག་གཉིས་ཀྱིས་ནོངས་པ་ཅི་བགྱིས། རྒ་བའི་ཆོས་ཅན་ཁྱེད་གཉིས་ཀྱིས་སངས་རྒྱས་ཀྱི་ཕོ་ཉ་འོངས་པ་ལ་མ་བསམས་སོ། །འཕགས་པ་ཁྱོད་སངས་རྒྱས་ཀྱི་ཕོ་ཉ་ལགས་སམ། སངས་རྒྱས་ཀྱི་ཕོ་ཉ་ཡིན་ནོ། །འཕགས་པ་གལ་ཏེ་ཁྱོད་སངས་རྒྱས་ཀྱི་ཕོ་ཉ་ལགས་ན་བདག་ཅག་གཉིས་ཀྱིས་ཅི་བགྱི་བ་སྩལ་དུ་གསོལ། ཚུར་ཤོག་བཅོམ་ལྡན་འདས་ཀྱི་སྤྱན་སྔ་ཁོ་ནར་འདོང་ངོ་། །འཕགས་པ་མ་ནོངས་ཏེ་དེ་བཞིན་བགྱིས་བཞུད་དོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་
འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་གང་གི་སླད་དུ་བདག་ལ་བཀའ་སྩལ་པའི་ཀླུའི་རྒྱལ་པོ་དགའ་བོ་དང་ཉེ་དགའ་དེ་གཉིས་ནི་འདི་ལགས་སོ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་ལ་འདི་སྐད་ཅེས་བཀའ་སྩལ་ཏོ། །ཀླུའི་དབང་པོ་ཁྱེད་གཉིས་སྔོན་གྱི་ཉེས་པར་སྤྱད་པས་ཀླུའི་སྐྱེ་གནས་ངན་པར་སྐྱེས་ཤིང་ཁྱེད་གཉིས་ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་། རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོགས་པ། གཞན་གྱི་སྲོག་བཅད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱེད་གཉིས་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེ་གཉིས་ཀྱིས་གསོལ་པ། བཅོམ་ལྡན་འདས་བདག་ཅག་གཉིས་ཀྱིས་ཅི་ཞིག་བགྱི་བ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་ཚུལ་ཤོག་ངའི་དྲུང་དུ་སྐྱབས་སུ་འགྲོ་བ་དང། བསླབ་པའི་གཞི་དག་ལོང་ལ་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་རྣམས་ལ་མི་འཇིགས་པ་བྱིན་ཅིག །དེ་གཉིས་ཀྱིས་གསོལ་པ། བཙུན་པ་བདག་ཅག་གཉིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང་། བསླབ་པའི་གཞི་དག་ལེན་ཅིང་རི་རབ་ཀྱི་བང་རིམ་ལ་གནས་པའི་རི་དགས་དང་། བྱ་རྣམས་ལ་མི་འཇིགས་པ་སྩོལ་ཏོ། །དེ་གཉིས་ཀྱིས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །དགེ་སློང་རྣམས་ཐེ་ཚོམ་སྐྱེས་ནས། ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ལས་ཅི་བགྱིས་ན་ལས་དེའི་རྣམ་པར་སྨིན་པས་ཀླུའི་ནང་དུ་སྐྱེས། ལས་ཅི་བགྱིས་ན་དེས་རིན་པོ་ཆེ་སྣ་བཞི་ལས་བགྱིས་པའི་གནས་མངོན་པར་གྲུབ་ཅིང་ལྷའི་བདུད་རྩིའི་ཟས་དང་སྦྲང་རྩིའི་ཆང་གི་བཏུང་བ་དང་། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར། ལས་ཅི་བགྱིས་ན་དེས་ན་བསྐལ་པར་གནས་པ་ས་འཛིན་པ། འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་
རྔོ་མི་ཐོག་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་གཉིས་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་། བསགས་པས་འདི་གཉིས་ཀྱིས་ལས་བྱས་ཤིང་། བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་སོ། །དེའི་ཚེ་ན་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཀྲཱི་ཀཱི་ཞེས་བྱ་བ་རྒྱལ་སྲིད་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང་། བ་ལང་དང་མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །རྒྱལ་པོ་ཀྲཱི་ཀཱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་
འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་དགེ་སློང་ཉི་ཁྲིས་བསྐོར་ཅིང་གྲོང་ཁྱེར་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་བརྟེན་ཅིང་བཞུགས་ཞེས་ཐོས་སོ། །ཐོས་ནས་ཀྱང་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ། རྒྱལ་པོ་ཀྲཱི་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་ཀུན་དུ་འགྲོ་བ་ལྟར་བཟང་བ་མཐོང་ངོ་། །མཐོང་མ་དག་ཏུ་རྒྱལ་པོ་ཀྲཱི་ཀཱི་བཅོམ་ལྡན་འདས་འོད་སྲུང་ལ་ཤིན་ཏུ་དད་པ་སྐྱེས་ནས་ཡང་དག་པར་རྫོགས་པའི་སངས་རྒྱས་འོད་སྲུང་ག་ལ་བ་དེར་སོང་སྟེ་ཕྱིན་ནས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །ཡང་དག་པར་རྫོགས་པའི་སངས་རྒྱས་འོད་སྲུང་གིས་རྒྱལ་པོ་ཀྲཱི་ཀཱིའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་གང་ཐོས་ན། རྒྱལ་པོ་ཀྲཱི་ཀཱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་
དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །ཞེས་སྨྲས་ཏེ་སྟན་ལས་ལངས་ནས་ཡང་དག་པར་རྫོགས་པའི་སངས་རྒྱས་འོད་སྲུང་ལ་ལན་གསུམ་བསྐོར་བ་བྱས་ཏེ་ཞབས་གཉིས་ལ་མགོ་བོས་ཕྱག་འཚལ་ནས་སོང་ངོ་། །གང་གི་ཚེ་རྒྱལ་པོ་ཀྲཱི་ཀཱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བ་དེའི་ཚེ་ན་དེ་དོན་གྱི་གནས་སུ་འདུག་སྟེ། བློན་པོ་དང་གྲོང་ཁྱེར་པ་དང་། ཡུལ་མི་རྣམས་ལ་སྨྲས་པ། ཀྭའི་བློན་པོ་དང་། གྲོང་ཁྱེར་པ་དང་། ཡུལ་མི་དག་ཉོན་ཅིག །ངས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་བདེན་པ་དག་མཐོང་བས་ད་ངས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་འཇུག་མི་ནུས་ཀྱིས་དེའི་ཕྱིར་ཁྱེད་ཀྱིས་གཞོན་ནུ་ལེགས་སྐྱེས་རྒྱལ་སྲིད་ཀྱི་དབང་ཕྱུག་གི་བདག་པོར་ཞོག་ཤིག །ང་ཡང་དག་པར་རྫོགས་པའི་སངས་རྒྱས་འོད་སྲུང་གི་སྤྱན་སྔར་སྐྲ་དང་། ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ལ་བློན་པོའི་མཆོག་དགའ་བོ་དང་། ཉེ་དགའ་ཞེས་བྱ་བ་གཉིས་ཤིག་ཡོད་པ་དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་སྨྲས་པ། ལྷས་མཚན་མ་ཙམ་འབའ་ཞིག་མཛོད་ཅིག་དང་བདག་ཅག་གཉིས་ཀྱིས་ཆོས་ཀྱིས་ལྷའི་རྒྱལ་སྲིད་བགྱིད་དུ་སྩལ་ཏོ། །རྒྱལ་པོས་སྨྲས་པ། གལ་ཏེ་དེ་ལྟ་ན་བྱེད་
དུ་ཆུག་ཤིག། དེ་གཉིས་ཀྱིས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་གཉིས་ཀྱི་ཉེ་དུ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་དེ་དག་དེ་གཉིས་ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག །ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག། དེ་གཉིས་ཀྱིས་དེ་དག་ལས་ཐོས་ནས་ཇི་སྲིད་པ་དེ་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་དག་ཡང་དེ་གཉིས་ཀྱི་གན་དུ་འོངས་ཏེ་སྨྲས་པ། ཚེ་དང་ལྡན་པ་གཉིས་ཆོས་ཀྱིས་རྒྱལ་སྲིད་བྱེད་དུ་ཆུག་ཤིག། ཆོས་དང་ཆོས་མ་ཡིན་པས་བྱེད་དུ་མ་གཞུག་ཤིག། སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག །དེ་གཉིས་ཀྱིས་སྨྲས་པ། འཕགས་པ་དག་བདག་ཅག་བློན་པོ་དག་ནི་རྒྱལ་སྲིད་བགྱིད་དུ་སྩོལ་བ་གསང་ཚིག་མཐུན་པས་འཚོ་བ་ལགས་པས་གཅིག་ཏུ་ཆོས་ཀྱིས་རྒྱལ་སྲིད་བགྱིད་དུ་སྩོལ་བའི་རྔོ་མི་ཐོག་སྟེ། ངེས་པར་ཁོ་ནར་ཁྱད་པར་ཅན་མ་ལགས་པ་དག་ནི་ཚར་བཅད་པར་བགྱི་ཞིང་ཁྱད་པར་ཅན་དག་ནི་ཡོངས་སུ་བསྐྱང་བར་བགྱི་འཚལ་ལོ། །དེ་དག་གིས་སྨྲས་པ། གལ་ཏེ་དེ་ལྟ་ན་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་ཆུག་ལ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ལ། དགེ་སློང་རྣམས་ལ་ནི་གཞོན་ནུའི་ཡོངས་སུ་སྤང་བ་བྱིན་ཅིག །དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ཅིག་དང་། དེས་ཁྱོད་གཉིས་ལ་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ། །དེ་གཉིས་ཀྱིས་སྨྲས་པ། འཕགས་པ་དག་མ་ནོངས་ཀྱིས་དེ་བཞིན་བགྱིའོ་ཞེས་དེ་གཉིས་ཀྱིས་ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ཞིང་། དགེ་སློང་རྣམས་ལ་ནི་
གཞོན་ནུའི་ཡོངས་སུ་སྤང་བ་བྱིན། དགེ་སློང་མ་རྣམས་ལ་ནི་བཙུན་མོའི་འཁོར་གྱི་ཡོངས་སུ་སྤང་བ་བྱིན་ནོ། །དགེ་སློང་དག་དེའི་ཚེ་དེའི་དུས་ན་རྒྱལ་པོ་ཀྲཱི་ཀཱིའི་བློན་པོའི་མཆོག་དགའ་བོ་དང་། ཉེ་དགའ་ཞེས་བྱ་བ་དེ་གཉིས་ནི་ད་ལྟར་ཀླུའི་རྒྱལ་པོ་དགའ་བོ་དང་། ཉེ་དགའ་འདི་གཉིས་ཡིན་ཏེ། དེ་གཉིས་ཀྱིས་ཆོས་དང་ཆོས་མ་ཡིན་པས་རྒྱལ་སྲིད་བྱེད་དུ་བཅུག་པ་གང་ཡིན་པ་དེས་ནི་ཀླུ་རྣམས་ཀྱི་ནང་དུ་སྐྱེས་སོ། །ཡོ་བྱད་ཐམས་ཅད་ཕུན་སུམ་ཚོགས་པའི་གཙུག་ལག་ཁང་བྱེད་དུ་བཅུག་སྟེ་ཡང་དག་པར་རྫོགས་པའི་སངས་རྒྱས་འོད་སྲུང་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་བ་གང་ཡིན་པ་དེས་ནི་རིན་པོ་ཆེ་སྣ་བཞི་ལས་བྱས་པའི་གནས་མངོན་པར་གྲུབ་ཅིང་ལྷའི་བདུད་རྩིའི་ཟས་དང་། སྦྲང་རྩིའི་ཆང་གི་བཏུང་བ་དང་། རེ་རེ་ལ་ཡང་འཁོར་ཉིས་སྟོང་ལྔ་བརྒྱ་དང་ལྡན་པར་གྱུར་ཏེ། དགེ་སློང་རྣམས་ལ་གཞོན་ནུའི་ཡོངས་སུ་སྤང་བ་བྱིན་པ་དང་། དགེ་སློང་མ་རྣམས་ལ་བཙུན་མོའི་འཁོར་གྱི་ཡོངས་སུ་སྤང་བ་བྱིན་པ་གང་ཡིན་པ་དེས་ནི་བསྐལ་པར་གནས་པ། ས་འཛིན་པ་འདབ་ཆགས་ཀྱི་རྒྱལ་པོ་འདབ་བཟངས་ཀྱིས་དབྱུང་བར་མི་ནུས་པར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །གང་གི་ཚེ་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་གཉིས་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཀོད་པ་དེའི་ཚེ་ན་དེ་གཉིས་ཚེས་བརྒྱད་དང་། ཚེས་བཅུ་བཞི་དང་། ཚེས་བཅོ་ལྔ་ལ་རི་རབ་ཀྱི་བང་རིམ་དུ་འོངས་ནས་བཅོམ་ལྡན་འདས་ལ་བསྙེན་བཀུར་བྱེད་དོ། །དེ་གཉིས་གང་གི་ཚེ་མཚན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་གཞལ་མེད་ཁང་པའི་ཆ་ལུགས་ཀྱིས་བསྙེན་བཀུར་བྱེད་ཅིང་། གང་གི་ཚེ་ཉིན་མོ་
བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་ནི་ཁྱིམ་བདག་གི་ཆ་ལུགས་ཀྱིས་བསྙེན་བཀུར་བྱེད་དོ། །དུས་གཞན་ཞིག་ན་དེ་གཉིས་ཉིན་མོ་ཁྱིམ་བདག་གི་ཆ་ལུགས་ཀྱིས་བཅོམ་ལྡན་འདས་ཀྱི་སྤྱན་སྔར་སོང་ངོ་། །ཇི་ཙམ་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་རྒྱལ་བྱེད་ཀྱི་ཚལ་ག་ལ་བ་དེར་སོང་ངོ་། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་རྒྱལ་པོ་དེ་གང་གི་ཚེ་བཅོམ་ལྡན་འདས་ཀྱི་སྤྱན་སྔར་འགྲོ་བ་དེའི་ཚེ་ན་བདག་བཅོམ་ལྡན་འདས་ཀྱི་སྤྱན་སྔར་སོང་བ་ན་འགའ་ཞིག་བདག་ལ་མངོན་སུམ་དུ་ལྡང་བར་མི་འགྱུར་བ་མེད་གྲང་སྙམ་ནས་མི་དག་པའི་མཐའ་ཅན་གཏོང་བར་བྱེད་པ་ཡིན་པས་དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་རྒྱལ་བྱེད་ཀྱི་ཚལ་གྱི་སྒོར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀྭའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག། མི་དག་པའི་མཐའ་ཅན་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང་། ཇི་ཙམ་ན་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བྱེད་པ་མཐོང་ངོ་། །མཐོང་ནས་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་གསོལ་ཏོ། །ལྷ་ཁྱིམ་བདག་གཉིས་ཤིག་བཅོམ་ལྡན་འདས་ལ་བསྙེན་བཀུར་བགྱིད་དེ་དེ་གཉིས་ལྷའི་ཡུལ་ན་གནས་པ་དག་ལགས་གོར་མ་བཀུམ་མོ། །རྒྱལ་པོས་བསམས་པ། ཁྱིམ་བདག་དེ་གཉིས་བདག་གི་ཡུལ་ན་གནས་པ་ཡིན་པས་དེ་གཉིས་ཀྱིས་བདག་མཐོང་ན་མངོན་དུ་ལྡང་བར་འགྱུར་གྲང་སྙམ་ནས་དེ་བཅོམ་ལྡན་འདས་ག་ལ་བ་དེར་སོང་ངོ་། །ཀླུའི་རྒྱལ་པོ་དགའ་བོ་དང་ཉེ་དགའ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་དེ་གཉིས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས་རེ་ཞིག་དམ་པའི་ཆོས་ལ་བསྙེན་བཀུར་བགྱིའམ། འོན་ཏེ་རྒྱལ་པོ་ལ་བསྙེན་བཀུར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀླུའི་དབང་པོ་གཉིས་རེ་ཞིག་དམ་པའི་ཆོས་ལ་བསྙེན་
བཀུར་གྱིས་ཤིག། སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང་། །སངས་རྒྱས་གང་དག་མ་བྱོན་དང་། །སངས་རྒྱས་མྱ་ངན་སེལ་མཛད་པ། །ད་ལྟར་མང་པོ་གང་བཞུགས་དག །ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང་། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་ཅིང་། །བདག་ཉིད་ཆེན་པོ་མངོན་འདོད་པ། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །དེ་གཉིས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་མངོན་དུ་ལྡང་བར་མ་བྱས་པ་དང་། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་གཉིས་བདག་གི་ཡུལ་ན་གནས་པ་དག་ཡིན་ན་བདག་ལ་མངོན་དུ་ལྡང་བར་མི་བྱེད་དོ་སྙམ་ནས་དེ་ཁྲོ་བས་ཀུན་ནས་དཀྲིས་བཞིན་དུ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །བཅོམ་ལྡན་འདས་ཀྱིས་འདི་ཁྲོ་བས་ཀུན་ནས་དཀྲིས་སོ་སྙམ་ནས་བཀའ་མཆིད་གཞན་དག་མཛད་པར་བརྩམས་ཏེ་ཆོས་སྟོན་པར་མི་མཛད་པ་དང་། དེས་གསོལ་པ། བཅོམ་ལྡན་འདས་ཆོས་བསྟན་དུ་གསོལ། །བདེ་བར་གཤེགས་པ་ཆོས་བསྟན་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚིགས་སུ་བཅད་པ་དག་བཀའ་སྩལ་པ། རབ་ཏུ་དང་སེམས་མེད་པ་དང་། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བཏུལ་བྱས་ཤིང་། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདི་སྤོང་བ། །དེས་ནི་ལེགས་གསུངས་ཤེས་པར་འགྱུར། །རྒྱལ་པོ་རྒྱ་ཆེར་དེ་གཉིས་ལ་ཁྲོས་ཏེ་བསམས་པ། འདི་གཉིས་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་བཀུམ་མོ་སྙམ་དུ་རིག་ནས་སྡོད་ཅིག་ཅེས་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་
འཚལ་ནས་སྟན་ལས་ལངས་ཏེ་སོང་ངོ་། །གང་གི་ཚེ་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཉིན་མོ་བཅོམ་ལྡན་འདས་ལ་བསྙེན་བཀུར་བྱེད་པ་དེའི་ཚེ་ན་དེ་གཉིས་ཀྱི་ཞོ་ཤས་འཚོ་བ་དག་གིས་རི་རབ་ཀྱི་བང་རིམ་ནས་མཉན་ཡོད་ཀྱི་བར་གྱི་ལམ་ཇི་སྲིད་པའི་ལམ་གྱི་ངོས་གཉིས་སུ་རྩིག་པ་དངར་ཏེ་འཁོད་པར་བྱེད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་གང་གི་ཚེ་ཁྱིམ་བདག་འདི་གཉིས་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བར་གྱུར་པ་དེའི་ཚེ་ན་འདི་གཉིས་ཀྱི་མགོ་བོ་དྲུངས་ནས་ཆོད་ལ་ས་ལ་སྒྱེལ་བར་གྱིས་ཤིག །ཚིག་དེ་སྐད་ཅེས་སྨྲས་པ། ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཀྱི་ཞོ་ཤས་འཚོ་བ་དག་གིས་ཐོས་སོ། །ཐོས་ནས་ཀྱང་དེ་དག་འཁྲུགས་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་སྟེང་དུ་རྡོ་རྗེ་རྩེ་གཅིག་པ་དང་། འཁོར་ལོ་དང་མདའ་བོ་ཆེ་དང་། མཚོན་རྩེ་གཅིག་པ་ལ་སོགས་པའི་མཚོན་དག་འཕང་བར་བརྩམས་སོ། །སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ། མཽད་གལ་གྱི་བུ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འཁོར་དང་བཅས་པ་དང་། མཉན་ཡོད་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་མཽད་གལ་གྱི་བུ་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་བཀའ་མཉན་ནས། བྱམས་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལ་སྙོམས་པར་ཞུགས་པའི་བྱེ་བྲག་གིས་རྡོ་རྗེ་རྩེ་གཅིག་པ་དང་། འཁོར་ལོ་དང་། མདའ་བོ་ཆེ་དང་། མཚོན་རྩེ་གཅིག་ལ་སོགས་པའི་མཚོན་དེ་དག་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་དག་ཏུ་གྱུར་ཏེ། ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་སྟེང་དུ་འབབ་པར་བརྩམས་སོ། །དེ་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་དག་གིས་གང་བཞིན་དུ་ཁྱིམ་དུ་ཞུགས་ནས་དེས་བཙུན་མོའི་འཁོར་དང་། གཞོན་ནུ་དང་བློན་པོ་དང་ཁྲོམ་གྱི་རུ་སྣ་དང་། གྲོང་
རྡལ་གྱི་མི་དང་། ཡུལ་མི་དང་། བྲམ་ཟེ་དག་ལ་སྨྲས་པ། ཤེས་ལྡན་དག་ང་རྒྱལ་བྱེད་ཀྱི་ཚལ་དུ་ཞུགས་ཚུན་ཆད་ནས་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་དག་གིས་གང་བཞིན་དུ་ཁྱིམ་དུ་ཞུགས་པ་འདི་ཅི་ཡིན་སུ་ཡི་མཐུ་ཡིན། དེ་ན་གང་དག་སྙན་པ་དང་འཇམ་པར་སྨྲ་བ་ལ་མཁས་པ་དེ་དག་གིས་སྨྲས་པ། ལྷ་གཞན་སུ་ཞིག་གིས་འདི་འཚལ་བར་འགྱུར། འདི་གཞན་སུ་ཞིག་གི་མཐུ་ལགས། འདི་ལྟར་ལྷ་ཉིད་ཆོས་ཀྱིས་རྒྱལ་སྲིད་བགྱིད་དུ་སྩོལ་བས་འདི་ལྷ་ཉིད་ཀྱི་མཐུ་ལགས་སོ། །རྒྱལ་པོས་སྨྲས་པ། ཤེས་ལྡན་དག་དེ་བདེན་ཏེ། ད་ཆོས་ཀྱིས་རྒྱལ་སྲིད་བྱེད་དུ་འཇུག་པས་འདི་གོར་མ་ཆག་པར་ངའི་མཐུ་ཡིན་ནོ། །བཙུན་མོའི་འཁོར་གྱིས་སྨྲས་པ། བདག་ཅག་ལྷ་ལས་གཞན་པའི་སྐྱེས་པའི་གན་དུ་མི་མཆི་ཞིང་བདག་པོ་ལས་མི་འཕྱོ་བས་འདི་ནི་བདག་ཅག་གི་མཐུ་ལགས་སོ། །གཞོན་ནུ་རྣམས་ཀྱིས་སྨྲས་པ། བདག་ཅག་ཡབ་ཡུམ་ལ་གུས་ཤིང་སྲི་ཞུ་ཆེ་བས་འདི་ནི་བདག་ཅག་གི་མཐུ་ལགས་སོ། །བློན་པོ་རྣམས་ཀྱིས་སྨྲས་པ། བདག་ཅག་ཆོས་ཀྱིས་ལྷའི་རྒྱལ་སྲིད་བགྱིད་དུ་སྩོལ་བས་འདི་ནི་བདག་ཅག་གི་མཐུ་ལགས་སོ། །ཁྲོམ་གྱི་རུ་སྣ་དག་གིས་སྨྲས་པ། བདག་ཅག་ལྷའི་བཀའ་ཆོས་དང་ལྡན་པར་སྒྲུབ་པར་བགྱིད་པས་འདི་ནི་བདག་ཅག་གི་མཐུ་ལགས་སོ། །གྲོང་རྡལ་གྱི་མི་དང་ཡུལ་གྱི་མི་དག་གིས་སྨྲས་པ། བདག་ཅག་ལྷ་ལ་ཆོས་དང་ལྡན་པར་དཔྱ་འབུལ་བས་འདི་ནི་བདག་ཅག་གི་མཐུ་ལགས་སོ། །རྒྱལ་པོས་བསམས་པ། འདི་དག་སོ་སོ་ནས་བདག་ཅག་གི་མཐུའོ། །བདག་གི་མཐུའོ་ཞེས་ཟེར་ན་སུའི་མཐུ་ཡིན་པ་མི་ཤེས་ཀྱིས། འདི་ལྟར་སངས་རྒྱས་བཅོམ་ལྡན་འདས་འདི་ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་ལ་བླ་ན་མེད་པའི་མངའ་བརྙེས་པ་ཡིན་གྱིས་སངས་རྒྱས་བཅོམ་ལྡན་འདས་ལ་ཞུར་འགྲོའོ་སྙམ་དུ་རིག་ནས་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་དེ་དག་གིས་ཐུ་བ་བཀང་ནས་བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་
བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ནི་ཁྱོད་ཀྱི་མཐུ་ཡང་མ་ཡིན། བཙུན་མོའི་འཁོར་གྱི་ཡང་མ་ཡིན། གཞོན་ནུ་རྣམས་ཀྱི་ཡང་མ་ཡིན། བློན་པོ་རྣམས་ཀྱི་ཡང་མ་ཡིན། ཁྲོམ་གྱི་རུ་སྣའི་ཡང་མ་ཡིན། གྲོང་རྡལ་གྱི་མི་དང་། ལྗོངས་ཀྱི་མི་རྣམས་ཀྱི་ཡང་མ་ཡིན། བྲམ་ཟེ་རྣམས་ཀྱི་ཡང་མ་ཡིན་ཏེ། འདི་ལྟར་དེ་ནི་དགེ་སློང་མཽད་གལ་གྱི་བུ་ཆེན་པོའི་མཐུ་ཡིན་ཏེ། གལ་ཏེ་དགེ་སློང་མཽད་གལ་གྱི་བུ་ཆེན་པོས་ཁྱོད་བཙུན་མོའི་འཁོར་དང་། གཞོན་ནུ་དང་། བློན་པོ་དང་གྲོང་རྡལ་གྱི་མི་དང་། ཡུལ་གྱི་མི་དང་བཅས་པ་ལ་མ་བསམས་སུ་ཟིན་ན་དེང་ཉིད་དུ་མཉན་ཡོད་སྤྱོད་ཡུལ་དུ་མི་འགྱུར་བ་ཞིག་ན། དེ་ནི་དགེ་སློང་མཽད་གལ་གྱི་བུ་དེས་ཁྱོད་བཙུན་མོའི་འཁོར་དང་། གཞོན་ནུ་དང་། བློན་པོ་དང་། གྲོང་རྡལ་གྱི་མི་དང་། ཡུལ་མི་དང་བཅས་པ་ལ་བསམས་པའི་མཐུ་ཡིན་གྱིས་དེ་ལ་སེམས་མངོན་པར་དད་པར་གྱིས་ཤིག། རྒྱལ་པོས་གསོལ་པ། བཅོམ་ལྡན་འདས་དེ་ལྟར་དགེ་སློང་མཽད་གལ་གྱི་བུའི་མཐུ་ལགས་ཤིང་བཅོམ་ལྡན་འདས་ཀྱི་ཡང་མ་ལགས་ཉན་ཐོས་ཆེན་པོ་གཞན་དག་གི་ཡང་མ་ལགས་པར་ཇི་ལྟར་འཚལ་བར་བགྱི། རྒྱལ་པོ་ཆེན་པོ་དེ་ནི་ངའི་མཐུ་ཡང་མ་ཡིན། ཉན་ཐོས་ཆེན་པོ་གཞན་དག་གི་ཡང་མ་ཡིན་ཏེ། འདི་ལྟར་དེ་ནི་དགེ་སློང་མཽད་གལ་གྱི་བུའི་མཐུ་ཡིན་ནོ། །གལ་ཏེ་ཁྱོད་སོམ་ཉི་དང་ཡིད་གཉིས་ཟ་ན་ལྷའི་མེ་ཏོག་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དཱ་ར་བ་འདི་དག་ས་ལ་བོར་ཞིག། དེས་དེ་དག་ས་ལ་བོར་བ་དང་། རྡོ་རྗེ་རྩེ་གཅིག་པ་དང་། འཁོར་ལོ་དང་། མདའ་བོ་ཆེ་དང་། མཚོན་རྩེ་གཅིག་ལ་སོགས་པའི་མཚོན་ཤ་སྟག་ཏུ་གྱུར་ཏོ། །དེས་དེ་དག་མཐོང་ནས་ཉམ་ང་བར་གྱུར་ཏེ་གསོལ་པ། བཅོམ་ལྡན་འདས་འདི་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་
ལ་རབ་ཏུ་སྡང་བའི་སེམས་བསྐྱེད་པས་དེ་ལས་འདི་བྱུང་ངོ་། །རྒྱལ་པོས་གསོལ་པ། བཙུན་པ་བདག་གིས་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་མཐོང་བར་ཡང་མི་དྲན་ན་རབ་ཏུ་སྡང་བའི་སེམས་བསྐྱེད་པར་ལྟ་ག་ལ་འགྱུར། རྒྱལ་པོ་ཆེན་པོ་ངས་ཁྱོད་ལ་དྲན་པར་བྱའོ། །བཙུན་པ་བཅོམ་ལྡན་འདས་ཀྱིས་དྲན་པར་མཛད་དུ་གསོལ། །རྒྱལ་པོ་ཆེན་པོ་ཁྱོད་ཀྱིས་ངའི་མདུན་དུ་ཁྱིམ་བདག་གཉིས་ཤིག་ཆོས་ཉན་པ་གང་ཡིན་པ་དེ་གཉིས་ཀྱིས་ཁྱོད་ལ་མངོན་དུ་ལྡང་བ་མ་བྱས་པ་དེ་དྲན་ནམ། བཅོམ་ལྡན་འདས་དེ་དྲན་ནོ། །རྒྱལ་པོ་ཆེན་པོ་ཁྱིམ་བདག་དེ་གཉིས་ནི་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ཡིན་ནོ། །དེས་གསོལ་པ། བཅོམ་ལྡན་འདས་དེ་གཉིས་འཁྲུགས་པར་མ་གྱུར་ཏམ། རྒྱལ་པོ་ཆེན་པོ་དེ་གཉིས་ནི་འཁྲུགས་པར་མ་གྱུར་ཏེ། དེ་གཉིས་ཀྱི་ཞོ་ཤས་འཚོ་བ་དག་འཁྲུགས་པར་གྱུར་ཏོ། །བཅོམ་ལྡན་འདས་བདག་གིས་དེ་གཉིས་ལ་ཇི་ལྟར་བསྒྲུབ་པར་བགྱི། རྒྱལ་པོ་ཆེན་པོ་བཟོད་པ་གསོལ་བར་བྱའོ། །བཅོམ་ལྡན་འདས་དེ་གཉིས་ནི་རི་རབ་ཀྱི་བང་རིམ་ན་མཆིས་ལ། བདག་ནི་འདི་ན་མཆིས་ན་བདག་གིས་ཇི་ལྟར་དེ་གཉིས་ལ་བཟོད་པ་གསོལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་གཉིས་ཚེས་བརྒྱད་དང་། ཚེས་བཅུ་བཞི་དང་། ཚེས་བཅོ་ལྔ་ལ་ངའི་རྐང་པ་ལ་ཕྱག་འཚལ་དུ་འདིར་འོང་གིས་ཁྱོད་ཀྱང་ཚེས་བརྒྱད་དང་བཅུ་བཞི་དང་། ཚེས་བཅོ་ལྔ་ལ་འདིར་ཤོག་ཤིག་དང་ངས་ཁྱོད་ལ་དེ་གཉིས་བསྟན་པར་བྱའི་ཁྱོད་ཀྱིས་བཟོད་པ་གསོལ་ཅིག །དེས་གསོལ་པ། བཙུན་པ་ཅི་ལགས་བདག་གིས་དེ་གཉིས་ཀྱི་རྐང་པ་གཉིས་ལ་གཏུག་པར་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་དེ་གཉིས་ཀྱི་རྐང་པ་གཉིས་ལ་གཏུག་པར་མི་བྱ་སྟེ། འདི་ལྟར་མི་མ་རབས་དག་གི་རྐང་པ་ལ་ཕྱག་འཚལ་བ་གང་ཡིན་པ་དེ་ནི་མི་གཙོ་བོ་དག་གིས་ལག་པ་ནས་བཟུང་བ་ཡིན་གྱིས་ཁྱོད་ཀྱིས་ལག་པ་གཡས་པ་རྐྱོང་ལ་ཀླུའི་དབང་པོ་གཉིས་བཟོད་པ་མཛོད་ཅིག་ཅེས་བཟོད་པ་གསོལ་ཅིག་དང་དེ་གཉིས་བཟོད་པར་འགྱུར་རོ། །དེས་གསོལ་པ། བཙུན་པ་མ་ནོངས་
ཏེ་དེ་བཞིན་དུ་བགྱིའོ་ཞེས་གསོལ་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ངོ་། །ཇི་ཙམ་དུས་གཞན་ཞིག་ན་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་རི་རབ་ཀྱི་བང་རིམ་དུ་འོངས་ནས་བདག་ཉིད་ཁྱིམ་བདག་གི་ཆ་ལུགས་སུ་མངོན་པར་སྤྲུལ་ཏེ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང་། བཅོམ་ལྡན་འདས་ཀྱིས་དེ་ལ་བརྡ་མཛད་དོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་ལག་པ་གཡས་པ་བརྐྱང་སྟེ་སྨྲས་པ། ཀླུའི་དབང་པོ་གཉིས་བཟོད་པ་མཛོད་ཅིག །དེ་གཉིས་ཀྱིས་སྨྲས་པ། རྒྱལ་པོ་ཆེན་པོ་བཟོད་པར་བགྱིའོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས་ལ་བཟོད་པ་གསོལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་འཕགས་པ་མཽད་གལ་གྱི་བུ་ཆེན་པོ་ལ་མཆོད་པའི་སླད་དུ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བདག་གི་སྡུམ་པར་དགུང་བདུན་གྱི་བར་དུ་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ཅང་མི་གསུང་བས་གནང་ངོ་། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སོང་ནས་དེས་བློན་པོ་རྣམས་ལ་བསྒོ་བ་ཤེས་ལྡན་དག་ངས་འཕགས་པ་མཽད་གལ་གྱི་བུ་ཆེན་པོ་མཆོད་པའི་ཕྱིར་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཞག་བདུན་དུ་གདུགས་ཚོད་ལ་སྤྱན་དྲངས་ཀྱིས་ཁྱེད་ཀྱིས་གྲོང་ཁྱེར་མཛེས་པར་གྱིས་ལ་གདུགས་ཚོད་སྟ་གོན་གྱིས་ཤིག །རྒྱལ་པོ་རྣམས་
ནི་ཚིག་གིས་འགྲུབ་པ་ཡིན་ལ། ལྷ་རྣམས་ནི་སེམས་ཀྱིས་འགྲུབ་པ་ཡིན། རྣལ་འབྱོར་པ་རྣམས་ནི་སེམས་བསྐྱེད་པ་ཙམ་གྱིས་ཐམས་ཅད་འགྲུབ་པ་ཡིན་པས་བློན་པོ་རྣམས་ཀྱིས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་རྒྱལ་བྱེད་ཀྱི་ཚལ་དང་མཉན་ཡོད་ཀྱི་བར་གྱི་ལམ་ཇི་སྲིད་པ་དག་མཆོག་ཏུ་མཛེས་པར་བྱས་ཤིང་མཉན་ཡོད་ཀྱང་རྡོ་བ་དང་གསེག་མ་དང་། གྱོ་མོ་མེད་པར་རྣམ་པར་གནས་པར་བྱས་ཏེ། ཙན་དན་གྱི་ཆུས་ཆག་ཆག་བཏབ་ཅིང་བདུག་སྤོས་དྲི་ཞིམ་པོའི་སྣོད་ཉེ་བར་བཞག་སྟེ་དར་གྱི་ཆུན་པོའི་ཚོགས་དཔྱངས་ཤིང་རྒྱལ་མཚན་དང་། བ་དན་བསྒྲེང་སྟེ་མེ་ཏོག་སྣ་ཚོགས་བཀྲམ་ཞིང་ལྷ་རྣམས་ཀྱི་ལྷའི་འདུན་ས་ཆོས་བཟངས་ལྟར་ཉམས་དགའ་བར་བྱས་སོ། །ཞལ་ཟས་ཀྱང་ཁ་དོག་དང་། དྲི་དང་རོ་ཕུན་སུམ་ཚོགས་པ་དང་ལྡན་པ། སྐྱུ་རུམ་སྣ་ཚོགས་དང་བཅས་པ། སྤྱན་གཟིགས་སྣ་ཚོགས་ཀྱིས་མཛེས་པར་བྱས་པ་བཤམས་ནས་འབྱོར་པ་དེ་ལྟ་བུ་འདིས་ཉི་མ་རེ་རེ་ཞིང་སངས་རྒྱས་ལ་སོགས་པ་དགེ་སློང་གི་དགེ་འདུན་རྒྱལ་པོའི་ཕོ་བྲང་དུ་གདུགས་ཚོད་གསོལ་ཏོ། །དེ་ན་མཚན་མོ་ཁུར་བ་འཚོད་པ་དག་ཏུ་མེ་ཤོར་ནས་དེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་གླང་པོ་ཆེ་ཡན་ལག་མཆོག་དང་ལྡན་པ་མང་པོ་དག་ཚིག་པར་གྱུར་ཏོ། །དེ་ནས་གདུགས་ཚོད་ཞག་བདུན་ཐལ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཉན་ཡོད་དུ་དྲིལ་བསྒྲག་པ་བྱེད་དུ་བཅུག་ནས་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ། །གང་མེ་སྦར་བར་བྱེད་ན་དེ་ཀཱར་ཥཱ་པ་ཎ་དྲུག་བཅུའི་ཆད་པས་བཅད་པར་བྱ་བའམ། ཕྱག་སྦལ་དུ་བཅུག་སྟེ་འཆི་བར་བྱ་དགོས་སོ་ཞེས་བསྒོའོ། །དེའི་ཚེ་ན་མཉན་ཡོད་ན་ཁྱིམ་བདག་བཟང་བྱིན་ཞེས་བྱ་བ་ཕྱུག་པ། ནོར་མང་བ་ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་སྟེ། དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་
བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་བཟང་བྱིན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་བཟང་བྱིན་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་བཟང་བྱིན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་བཟང་བྱིན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཁྱིམ་བདག་བཟང་བྱིན་གྱིས་དེ་ཉིད་ཀྱི་མཚན་མོ་བཅའ་བ་དང་། བཟའ་བ་གཙང་ཞིང་བསོད་པ་སྟ་གོན་བྱས་ཏེ་ནང་པར་སྔར་ལངས་ནས་གདན་དག་བཤམས་ཏེ་ཆུ་ར་བཞག་ནས། བཅོམ་ལྡན་འདས་ལ་སྤྱན་འདྲེན་གྱིས་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་ཁྱིམ་བདག་བཟང་བྱིན་གྱི་ཁྱིམ་ག་ལ་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་ཁྱིམ་བདག་བཟང་བྱིན་གྱིས་སངས་རྒྱས་ལ་སོགས་
པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས་བཟའ་བ་དང་བཅའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་། བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །བཅོམ་ལྡན་འདས་ཀྱིས་དེའི་བསམ་པ་དང་། བག་ལ་ཉལ་དང་། ཁམས་དང་རང་བཞིན་ཐུགས་སུ་ཆུད་ནས་འདི་ལྟར་ཁྱིམ་བདག་བཟང་བྱིན་ཆུང་མ་དང་བཅས་པས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །
སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བར་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །བཅོམ་ལྡན་འདས་ཀྱིས་ཆོས་བསྟན་པ་མཛད་ནས་གཤེགས་སོ། །ཁྱིམ་བདག་བཟང་བྱིན་ཆུང་མ་དང་བཅས་པས་གང་གི་ཉིན་མོ་བདེན་པ་མཐོང་བར་བྱས་པ་དེའི་ཉིན་མོ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཁྱིམ་བདག་བཟང་བྱིན་གྱིས་ཀྱང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ནས་བཅོམ་ལྡན་འདས་ཀྱིས་ཁྱིམ་བདག་བཟང་བྱིན་ཆུང་མ་དང་བཅས་པ་ལ་གང་ཐོས་ནས་དེ་གཉིས་ཀྱིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་ཡང་མངོན་པར་བསྒྲུབས་པར་གྱུར་པ་དེ་ལྟར་ཆོས་བསྟན་པ་མཛད་དོ། །གང་གི་ཉིན་མོ་ཁྱིམ་བདག་བཟང་བྱིན་ཆུང་མ་དང་བཅས་པས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་མངོན་པར་བསྒྲུབས་པ་དེའི་ཉིན་མོ་དེའི་ཆུང་མ་ལ་བུ་བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ་མཛེས་པ། གསལ་བ་གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ་ལག་པ་རིང་བ། འཕྲལ་བའི་དབྱེས་ཆེ་བ་སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་འདིའི་ཕ་མ་གཉིས་ཀྱིས་ཉི་མ་གང་ལ་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཤིང་རྫུ་འཕྲུལ་མངོན་པར་བསྒྲུབས་པར་གྱུར་པའི་ཉི་མ་དེ་ལ་བཙས་པས་དེའི་ཕྱིར་ཁྱེའུའི་མིང་རྫུ་འཕྲུལ་ལེན་ཅེས་བྱའོ་ཞེས་དེའི་མིང་རྫུ་འཕྲུལ་ལེན་ཅེས་བྱ་བར་བཏགས་སོ། །ཁྱེའུ་རྫུ་འཕྲུལ་ལེན་པ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དེ་དག་གིས་འོ་མ་དང་ཞོ་དང་མར་དང་ཞུན་
མར་དང་མར་གྱི་སྙིང་ཁུ་དང་གཞན་ཡང་ཡོ་བྱད་ཀྱི་བྱེ་བྲག་གཙོ་བོ། གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་རྩིས་དང་ལག་རྩིས་དང་དབྱུང་བ་དང་། གཞུག་པ་དང་། བཞག་པ་ལ་ཉེ་བར་ཞུགས་ནས་དེ་ཡི་གེའི་མཐར་ཕྱིན་ཅིང་། འབྱེད་པ་དང་ཀློག་པ་དང་། མཁས་པ་དང་སྤྱོད་པ་གསལ་བ་དང་། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །དེ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་བཙུན་མོའི་འཁོར་གྱི་དྲུང་དུ་སོང་བ་དང་། དེའི་བཙུན་མོའི་འཁོར་གྱིས་སྟེང་གི་ཁང་བཟངས་ཀྱི་གཞིར་གཏོགས་པ་ནས་དེ་ལ་མེ་ཏོག་གི་ཕྲེང་བ་འཕངས་སོ། །འཇིག་རྟེན་ནི་མཛའ་བཤེས་དང་། དགྲ་བོ་དང་། ཐ་མལ་པ་ཡིན་པས་ཇི་ཙམ་ན་གཞན་དག་གིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་སྨྲས་པ། ལྷ་གཞོན་ནུ་རྫུ་འཕྲུལ་ལེན་ནི་ལྷའི་བཙུན་མོའི་འཁོར་དོན་དུ་གཉེར་རོ། །རྒྱལ་པོ་དག་ནི་མི་རྟོག་པར་བྱེད་པས་དེས་བློན་པོ་རྣམས་ལ་བསྒོ་བ། ཤེས་ལྡན་དག་ངས་ཁྱིམ་བདག་བཟང་བྱིན་གྱི་བུ་གཞོན་ནུ་རྫུ་འཕྲུལ་ལེན་ཡོངས་སུ་བཏང་ངོ་། །བློན་པོ་རྣམས་ཀྱིས་དེ་ཀ་ར་བཱི་རའི་མེ་ཏོག་གི་ཕྲེང་བས་མགུལ་པ་བཅིངས་ཏེ་གོས་སྔོན་པོ་གྱོན་པའི་མི་དག་བཀྲི་ནས་གྲོང་ཁྱེར་གྱི་དབུས་ནས་ཕྱིར་བྱུང་སྟེ་བསད་སར་ཕྱིན་ནས་གསོད་དུ་བཅུག་གོ །མཉན་ཡོད་ཀྱི་སྐྱེ་བོའི་ཚོགས་དང་། ཡུལ་ཐ་དད་པ་ནས་ལྷགས་པའི་མི་དག་གིས་རྒྱལ་པོ་སྡིག་ཅན་འདི་ནི་མ་བརྟགས་པར་བྱེད་པ་ངན་པ་ཡིན་ཏེ། དེས་ཁྱིམ་བདག་གི་བུ་གཞོན་ནུ་རྫུ་འཕྲུལ་ལེན་ཁོན་མེད་པ། འགྲན་མི་ཚོལ་བ། མི་འཁུ་བ་བསད་དོ་ཞེས་བརྗོད་དོ། །དེ་བཞིན་དུ་བཙུན་མོའི་འཁོར་དང་། གཞོན་ནུ་དང་། བློན་པོ་རྣམས་ཀྱིས་ཀྱང་ངན་པ་དེས་ཁྱིམ་བདག་གི་བུ་གཞོན་ནུ་རྫུ་འཕྲུལ་ལེན་ཁོན་མེད་པ། འགྲན་མི་ཚོལ་བ། མི་འཁུ་བ་
བསད་པ་ནི་ལེགས་པ་མ་བྱས་སོ། །ཤིན་ཏུ་མ་བྱས་སོ་ཞེས་བརྗོད་དོ། །ཁྱིམ་བདག་བཟང་བྱིན་གྱིས་བསམས་པ། བདག་གིས་བདོག་ཅིང་བདག་དབང་བ་སུ་ལ་ཡང་ཡོངས་སུ་མ་བཏང་བ་གང་ཡིན་པ་དེ་ཐམས་ཅད་ནི་གཞོན་ནུ་རྫུ་འཕྲུལ་ལེན་ལ་ལྟོས་པ་ཡིན་ན་དེ་ནི་སྔོན་གྱི་ལས་ཀྱི་ཉེས་པས་རྒྱལ་པོས་མ་བརྟགས་པར་ལྔ་པ་ཉིད་དུ་བསྒྲུབས་པས་ད་སུའི་ཕྱིར་བཅད་པར་བྱ་སྟེ། དམན་པ་དང་། མགོན་མེད་པ་དང་། བཀྲེན་པ་དང་། སྡུག་ཕོངས་པ་དག་ལ་ཡོངས་སུ་གཏང་བར་བྱའོ་སྙམ་ནས་དེ་ཀཱ་པ་ཤ་ཎ་གཅིག་ཅིག་ཟོང་གི་རྒྱུར་བཞག་ནས་ནོར་གྱི་རྣམ་པ་གཞན་ཐམས་ཅད་དམན་པ་དང་། མགོན་མེད་པ་དང་། བཀྲེན་པ་དང་། སྡུག་ཕོངས་པ་དག་ལ་ཡོངས་སུ་བཏང་ངོ་། །དེས་ཀཱ་པ་ཤ་ཎ་གཅིག་པོ་དེས་ཟོང་ཉོས་ཤིང་བཙོངས་པས་དེས་ཀཱ་པ་ཤ་ཎ་བཞི་རྙེད་ནས་དེས་ཀཱ་པ་ཤ་ཎ་གཅིག་གིས་ནི་བཅོམ་ལྡན་འདས་ཀྱི་དྲི་གཙང་ཁང་སྤོས་ཀྱི་བྱུག་པས་བྱུགས་སོ། །གཉིས་པས་ནི་གཡོག་འཁོར་གྱི་ཟན་སྦྱར་ཏོ། །གསུམ་པས་ནི་དགེ་འདུན་གྱི་ཕྱིར་དགེ་སློང་ལ་ཆོས་སྟོན་བྱིན་ཏོ། །བཞི་པ་ནི་ཟོང་གི་རྒྱུར་བཞག་གོ །དེའི་ཁྱིམ་ན་ལོངས་སྤྱོད་སྲབས་པའི་ཕྱིར་སྦྱིན་པ་ངན་པ་དག་ཀྱང་སྦྱིན་པར་བྱེད། མཆོག་ཏུ་ངན་པ་དག་ཀྱང་སྦྱིན་པར་བྱེད་པས་དེའི་མིང་ངན་པ་བཟང་བྱིན་ཞེས་བྱ་བར་གྱུར་ཏོ། །དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས། བཅོམ་ལྡན་འདས་ཀྱིས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཇི་ལྟར་ཁྱོད་ཀྱི་ཁྱིམ་ན་སྦྱིན་པ་དག་བྱིན་ནམ། བསོད་ནམས་བྱེད་དམ། བཙུན་པ་དེ་བཞིན་ཏེ། བདག་གི་སྡུམ་པ་ན་སྦྱིན་པ་དག་ཀྱང་སྩོལ་ཅིང་བསོད་ནམས་དག་ཀྱང་བགྱིད་ན། དེ་དག་ནི་ངན་པ་དག་དང་མཆོག་ཏུ་ངན་པ་དག་ལགས་སོ། །ཁྱིམ་བདག་སྦྱིན་པ་ངན་པའམ། བཟང་པོ་སྦྱིན་ཡང་རུང་སྟེ། དེ་གཉི་ག་ལོངས་སྤྱོད་ཀྱི་རྣམ་པར་སྨིན་པ་ཅན་ཡིན་ནོ། །ཁྱིམ་བདག་སྦྱིན་པ་ངན་པའམ། བཟང་པོ་སྦྱིན་ཡང་རུང་སྟེ། དེ་ཡང་དད་པས་མ་ཡིན། གུས་པས་མ་ཡིན། རང་གི་ལག་
ནས་མ་ཡིན། དུས་སུ་མ་ཡིན། གནོད་པ་མེད་པ་མ་ཡིན། གང་གི་ཚེ་དེའི་རྣམ་པར་སྨིན་པ་སོ་སོར་མྱོང་བར་འགྱུར་བ་དེའི་ཚེ་ན་དེའི་སེམས་ཁྱིམ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། ཟས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གོས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གནས་མལ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། བཞོན་པའི་ལོངས་སྤྱོད་རྒྱ་ཆེན་པོ་དག་ལ་འཇུག་པར་མི་འགྱུར། གཟུགས་དང་སྒྲ་དང་དྲི་དང་རོ་དང་རེག་བྱ་རྒྱ་ཆེན་པོ་དག་ལ་འཇུག་པར་མི་འགྱུར་ཏེ། ཁྱིམ་བདག་སྦྱིན་པ་དེ་ལྟ་བུ་བྱིན་པའི་འབྲས་བུ་རྣམ་པར་སྨིན་པ་ནི་དེ་ལྟ་བུར་འདོད་པར་བྱའོ། །ཁྱིམ་བདག་སྦྱིན་པ་ངན་པའམ། བཟང་པོ་སྦྱིན་ཡང་རུང་སྟེ། དེ་ཡང་དད་པས་ཡིན། གུས་པས་ཡིན། རང་གི་ལག་ནས་ཡིན། དུས་སུ་ཡིན། གནོད་པ་མེད་པ་ཡིན་ན། གང་གི་ཚེ་དེའི་རྣམ་པར་སྨིན་པ་སོ་སོར་མྱོང་བར་འགྱུར་བ་དེའི་ཚེ་ན་དེའི་སེམས་ཁྱིམ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། ཟས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གོས་ཀྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གནས་མལ་གྱི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། བཞོན་པའི་ལོངས་སྤྱོད་རྒྱ་ཆེན་པོ་དག་ལ་འཇུག་པར་འགྱུར། གཟུགས་དང་སྒྲ་དང་དྲི་དང་རོ་དང་རེག་བྱ་རྒྱ་ཆེན་པོ་དག་ལ་འཇུག་པར་འགྱུར་ཏེ། ཁྱིམ་བདག་སྦྱིན་པ་དེ་ལྟ་བུ་བྱིན་པའི་འབྲས་བུ་རྣམ་པར་སྨིན་པ་ནི་དེ་ལྟ་བུར་འདོད་པར་བྱའོ།། །།འདུལ་བ་རྣམ་པར་འབྱེད་པ། བམ་པོ་དྲུག་བཅུ་རྩ་དགུ་པ། ཁྱིམ་བདག་སྔོན་བྱུང་བ་བྲམ་ཟེ་དུས་དཔོག་ཅེས་བྱ་བ་ཤིང་སཱ་ལ་ཆེན་པོ་ལྟ་བུ་ཞིག་བྱུང་བར་གྱུར་ཏེ། དེས་བྲམ་ཟེ་རྣམས་ལ་སྦྱིན་པ་འདི་ལྟ་བུ་འདི་བྱིན་ཏེ་གླང་པོ་ཆེ་གསེར་གྱིས་བརྒྱན་པ། གསེར་གྱིས་མཛེས་པར་བྱས་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །རྟ་གསེར་གྱིས་བརྒྱན་པ། གསེར་གྱིས་མཛེས་པར་བྱས་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་བརྒྱད་
ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཤིང་རྟ་རྣམ་བཞི་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་དང་། སེང་གེའི་པགས་པས་གཡོགས་པ་དང་། སྟག་ལྤགས་ཀྱིས་གཡོགས་པ་དང་། གུང་ལྤགས་ཀྱིས་གཡོགས་པ་དང་། ཨར་མོ་ནིག་གིས་བཀབ་པ། རྣམ་པར་རྒྱལ་བྱེད་ཡིད་དུ་འོང་བ་དང་ལྡན་པའི་ཤིང་རྟ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཁང་པ་བརྩེགས་པ་རྣམ་བཞི་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པའི་ཁང་པ་བརྩེགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཁྲི་རྣམ་བཞི་གསེར་ལས་བྱས་པ་དང་། དངུལ་ལས་བྱས་པ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ། ཤུར་བུས་བླས་པ། སྟན་སྦྱར་མ་བཏིང་བ། སྟན་ནང་ཚངས་ཅན་བཏིང་བ། སྟན་ཁྲ་བོ་བཏིང་བ། སྟན་ཆེན་པོ་བཏིང་བ། སྟན་བཟང་པོ་བཏིང་བ། སུ་མཚན་གྱི་གོས་ཀྱི་སྟེང་གཡོགས་བཏིང་བ། སྟེང་ནས་བགོ་བའི་གོས་དང་བཅས་པ། གཉིས་སུ་རྒྱབ་རྟེན་དམར་པོ་བཞག་པའི་ཁྲི་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །གསེར་གྱི་སྣོད་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །དངུལ་གྱི་སྣོད་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །གསེར་གྱི་སྣོད་དངུལ་ཕྱེས་གང་བ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །དངུལ་གྱི་སྣོད་གསེར་ཕྱེས་གང་བ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །རས་ཟུང་རྣམ་བཞི་ཀ་ཤི་ཀའི་རས་ཕྲན་དང་། ཟར་མའི་རས་ཕྲན་དང་། དུ་གུ་ལའི་རས་ཕྲན་དང་། ཀོ་ཏམ་པའི་རས་ཕྲན་ཟུང་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །བ་གསེར་གྱི་རྭ་ཅན་རྨིག་པ་དངུལ་ལས་བྱས་པ་བེའུ་མཐུན་པ་དང་བཅས་པ་ཁར་བའི་ཟེ་བ་ཅན། རས་བཅོས་བུ་ཕྲུགས་ཀྱིས་གཡོགས་པ་བརྒྱད་ཁྲི་བཞི་སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །བུ་མོ་གསེར་གྱི་དཔུང་རྒྱན་ཅན་མགུལ་རྒྱན་དང་བཅས་པ། རྒྱན་བཟང་པོས་བརྒྱན་པ་བརྒྱད་ཁྲི་བཞི་
སྟོང་བྲམ་ཟེ་རྣམས་ལ་སྦྱིན་པར་བྱིན་ནོ། །ཟས་དང་སྐོམ་དང་བཅའ་བ་དང་བཟའ་བ་དང་བལྡག་པ་དང་། བཞིབ་པ་གཞན་ལྟ་སྨོས་ཀྱང་ཅི་དགོས་ཏེ། བྲམ་ཟེ་རྣམས་ལ་སྦྱིན་པར་དེ་ལྟ་བུ་དེ་བྱིན་ནོ། །ཁྱིམ་བདག་བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་སོ་སོའི་སྐྱེ་བོ་འཛམ་བུའི་ཚལ་དུ་འོངས་པ་གཅིག་ལ་ཟན་བཟའ་བ་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་།
གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་
ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་གཅིག་ཟན་བྱིན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་
ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་གང་ཡིན་པ་ནི། སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང་། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་
ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང་། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང་། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་དག་ཕུལ་བ་གང་ཡིན་པ་དེ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་།
གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང་། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང་། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་དག་ཕུལ་བ་དང་། གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་མཐུན་པའི་མཆོད་སྦྱིན་འབུལ་བ་དང་། སངས་རྒྱས་ལ་སྐྱབས་སུ་འགྲོ་བ་དང་། ཆོས་ལ་སྐྱབས་སུ་འགྲོ་བ་དང་། དགེ་འདུན་ལ་སྐྱབས་སུ་འགྲོ་བ་དང་། བསླབ་པའི་གཞི་དག་ལེན་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང་། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང་། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང་། སྟན་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་དག་ཕུལ་བ་དང་། གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་མཐུན་པའི་མཆོད་སྦྱིན་ཕུལ་བ་དང་། གང་སངས་རྒྱས་ལ་སྐྱབས་སུ་འགྲོ་བ་དང་། ཆོས་ལ་སྐྱབས་སུ་འགྲོ་བ་དང་། དགེ་འདུན་
ལ་སྐྱབས་སུ་འགྲོ་བ་དང་། བསླབ་པའི་གཞི་དག་ལེན་པ་དང་། གང་གིས་སེམས་ཅན་སྲོག་ཆགས་འབྱུང་པོ་ཐམས་ཅད་ལ་བྱམས་པའི་སེམས་བསྒོམ་པ་གང་ཡིན་པ་ནི་སྦྱིན་པ་དེ་བས་སྦྱིན་པ་འདི་ཆེས་འབྲས་བུ་ཆེའོ། །ཁྱིམ་བདག་བྲམ་ཟེ་ཤིང་སཱ་ལ་ཆེན་པོ་ལྟ་བུ་དུས་དཔོག་གིས་བྲམ་ཟེ་རྣམས་ལ་སྦྱིན་པ་དེ་ལྟ་བུ་དེ་བྱིན་པ་དང་། གང་གིས་ཕྱི་རོལ་པའི་དྲང་སྲོང་འདོད་པ་རྣམས་ལས་འདོད་ཆགས་དང་བྲལ་བ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་རྒྱུན་དུ་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ལན་གཅིག་ཕྱིར་འོང་བ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་ཕྱིར་མི་འོང་བ་བརྒྱ་ཟན་བྱིན་པ་དང་། གང་གིས་དགྲ་བཅོམ་པའི་འབྲས་བུ་མངོན་སུམ་དུ་བྱ་བའི་ཕྱིར་ཞུགས་པ་བརྒྱ་ཟན་བྱིན་པ་དང་། གང་གིས་དགྲ་བཅོམ་པ་བརྒྱ་ཟན་བྱིན་པ་དང་། གང་གིས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་ཕུལ་བ་དང་། གང་གིས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་བཅུག་པ་དང་། གང་གིས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་ཁྲིའུ་དང་། སྟན་དང་སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་དག་ཕུལ་བ་དང་། གང་གིས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་དང་མཐུན་པའི་མཆོད་སྦྱིན་ཕུལ་བ་དང་། གང་སངས་རྒྱས་ལ་སྐྱབས་སུ་འགྲོ་བ་དང་། ཆོས་ལ་སྐྱབས་སུ་འགྲོ་བ་དང་། དགེ་འདུན་ལ་སྐྱབས་སུ་འགྲོ་བ་དང་། བསླབ་པའི་གཞི་དག་ལེན་པ་དང་། གང་གིས་སེམས་ཅན་སྲོག་ཆགས་འབྱུང་པོ་ཐམས་ཅད་ལ་བྱམས་པའི་སེམས་སྒོམ་པ་དང་། གང་འདུ་བྱེད་ཐམས་ཅད་ལ་མི་རྟག་པར་རྗེས་སུ་ལྟ་ཞིང་གནས་པ་དང་། ཟད་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ། སྤོང་བར་རྗེས་སུ་ལྟ་ཞིང་གནས་པ་གང་ཡིན་པ་ནི་སྦྱིན་པ་
དེ་བས་སྦྱིན་པ་འདི་ཆེས་འབྲས་བུ་ཆེའོ། །ཁྱིམ་བདག་དེ་ལྟ་བས་ན་ཁྱོད་ཀྱིས་འདི་ལྟར་འདུ་བྱེད་ཐམས་ཅད་ལ་མི་རྟག་པར་རྗེས་སུ་ལྟ་ཞིང་གནས་པར་བྱེད་པ་དང་ཟད་པར་རྗེས་སུ་ལྟ། འདོད་ཆགས་དང་བྲལ་བར་རྗེས་སུ་ལྟ། འགོག་པར་རྗེས་སུ་ལྟ། སྤོང་བར་རྗེས་སུ་ལྟ་ཞིང་གནས་པར་བྱའོ། །ཞེས་བསླབ་པར་བྱ་སྟེ། ཁྱིམ་བདག་ཁྱོད་ཀྱིས་དེ་ལྟར་བསླབ་པར་བྱའོ། །དེ་ནས་ཁྱིམ་བདག་ངན་པ་བཟང་བྱིན་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རངས་པ་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་དུས་གཞན་ཞིག་ན་རང་གི་ཁྱིམ་ན་མཚན་མོ་མར་མེ་སྦར་ཏེ་སངས་རྒྱས་ཀྱི་བཀའ་ཀློག་པ་ན་རྒྱལ་པོའི་ཞོ་ཤས་འཚོ་བ་གྲོང་ཁྱེར་ཉུལ་བ་དག་གིས་སྒོ་གཏན་གྱི་བུ་གུ་ནས་དེ་མཐོང་ནས། དེ་དག་གིས་དེ་ལ་སྨྲས་པ། ཁྱིམ་བདག་རྒྱལ་པོས་དྲིལ་བསྒྲགས་པ་བྱེད་དུ་བཅུག་སྟེ་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ། །གང་སྦར་བར་བྱེད་པ་དེ་ཀཱ་པ་ཤ་ཎ་དྲུག་བཅུའི་ཆད་པས་བཅད་པར་བྱ་བའམ། ཕྱག་སྦལ་དུ་བཅུག་སྟེ་འཆི་བར་བྱའོ་ཞེས་བཀའ་བཏགས་ན་ཁྱོད་ཀྱིས་ཅིའི་ཕྱིར་མཚན་མོ་མེ་སྦར། དེས་སྨྲས་པ། ཤེས་ལྡན་དག་འདི་ནི་མེ་མ་ཡིན་ཏེ་མར་མེ་ཡིན་ནོ། །ཁྱིམ་བདག་ཅི་འདིས་མེའི་བྱ་བ་བྱེད་མི་ནུས་སམ། ཡང་ན་ནི་ཀཱ་པ་ཤ་ཎ་དྲུག་བཅུ་ཕུལ་ཅིག །ཡང་ན་ནི་ཕྱག་སྦལ་ན་འདུག་ཤིག །ཤེས་ལྡན་དག་ཁོ་བོ་ལ་ཀཱ་པ་ཤ་ཎ་དྲུག་བཅུའི་འབྱོར་པ་ག་ལ་ཡོད། ཕྱག་སྦལ་དུ་འདུག་གོ །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ཕྱག་སྦལ་ནི་རིམ་པ་གསུམ་ཡོད་དེ། མི་གཙོ་བོ་གང་དག་ཡིན་པ་དེ་དག་ནི་སྟེང་རིམ་དུ་འཇོག་པར་བྱེད། མི་བར་མ་གང་དག་ཡིན་པ་དེ་དག་ནི་བར་དུ་འཇོག་པར་བྱེད། མི་ངན་པ་གང་དག་ཡིན་པ་དེ་དག་ནི་གཏིང་དུ་འཇོག་པར་བྱེད་པས་དེ་མི་གཙོ་བོ་ཡིན་པའི་ཕྱིར་དེ་དག་གིས་སྟེང་རིམ་དུ་བཞག་གོ །དེ་ནས་རྒྱལ་པོ་ཆེན་པོ་བཞི་མཚན་མོའི་ཐུན་དང་པོ་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་སྨྲས་སོ། །
ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག །དེས་སྨྲས་པ། ཉེ་དབང་དག་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ །ཅིའི་ཕྱིར་ཀཱ་པ་ཤ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ །ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག། ཁྱོད་ཀྱི་ཁྱིམ་མམ། ཆུའི་གནས་གང་དག་དབྱིག་དང་། གསེར་གྱིས་དགང་བར་བྱ། ཉེ་དབང་དག་ཁྱེད་སྙིང་ལས་ཆུང་ངུར་གྱིས་ཤིག་དང་། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་དག་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེ་དག་གི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་ཐུན་དང་པོ་ལ་ཕྱག་སྦལ་ན་མེའི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་མཐོང་ངོ་། །དེ་ནས་ལྷའི་དབང་པོ་བརྒྱ་བྱིན་མཚན་མོའི་གུང་ཐུན་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་འདི་སྐད་ཅེས་སྨྲས་སོ། །ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག །དེས་སྨྲས་པ། ཀཽ་ཤི་ཀ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ །ཅིའི་ཕྱིར། ཀཱ་པ་ཤ་ཎ་དྲུག་བཅུའི་ཕྱིར་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ །ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག །ཁྱོད་ཀྱི་ཁྱིམ་མམ། ཆུའི་གནས་གང་དག་དབྱིག་དང་། གསེར་གྱིས་དགང་བར་བྱ། ཀཽ་ཤི་ཀ་ཁྱོད་སྙིང་ལས་ཆུང་ངུར་གྱིས་ཤིག་དང་བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་
འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་གུང་ཐུན་ལ་ཕྱག་སྦལ་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་ངོ་། །དེ་ནས་མི་མཇེད་ཀྱི་བདག་པོ་ཚངས་པ་མཚན་མོའི་ཐུན་ཐ་མ་ལ་ཁྱིམ་བདག་ངན་པ་བཟང་བྱིན་ག་ལ་བ་དེར་སོང་སྟེ་ཕྱིན་ནས་ཁྱིམ་བདག་ངན་པ་བཟང་བྱིན་ལ་དི་སྐད་ཅེས་སྨྲས་སོ། །ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག །དེས་སྨྲས་པ། ཚངས་པ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ །ཅིའི་ཕྱིར། ཀཱ་པ་ཤ་ཎ་དྲུག་བཅུའི་ཕྱིར་ཏེ། ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ །ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག །ཁྱོད་ཀྱི་ཁྱིམ་མམ། ཆུའི་གནས་གང་དག་དབྱིག་དང་། གསེར་གྱིས་དགང་བར་བྱ། ཚངས་པ་ཁྱོད་སྙིང་ལས་ཆུང་ངུར་གྱིས་ཤིག་དང་། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ། །དེ་ཆོས་མཉན་པའི་ཕྱིར་དེའི་མདུན་དུ་འདུག་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་
དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་འདྲའོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་མཚན་མོའི་ཐུན་ཐ་མ་ལ་ཕྱག་སྦལ་ན་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་ངོ་། །མཐོང་ནས་ཀྱང་ཕྱག་སྦལ་སྲུང་བའི་མི་མངག་པས་བཀུག་སྟེ་སྨྲས་པ། ཀྭའི་ནང་རྗེ་ངས་དྲིལ་བསྒྲགས་པ་བྱེད་དུ་བཅུག་སྟེ་མཉན་ཡོད་དུ་སུས་ཀྱང་མཚན་མོ་མེ་སྦར་བར་མི་བྱའོ་ཞེས་བསྒོ་ན། ང་ཉིད་ཀྱི་ཕྱག་སྦལ་ན་མདང་མཚན་མོ་ཐོག་ཐག་མེའི་ཕུང་པོ་ཆེན་པོ་སྦར་བ་དེ་ཅིའི་ཕྱིར། དེས་སྨྲས་པ། ལྷ་སུས་ཀྱང་མཚན་མོ་ཕྱག་སྦལ་དུ་ཞུགས་མེ་སྦར་ཏེ། ལྷས་དེར་ཅི་ཞིག་གཟིགས་མ་འཚལ་ཏོ། །རྒྱལ་པོས་ཞོ་ཤས་འཚོ་བ་རྣམས་ལ་བསྒོ་བ་ཤེས་ལྡན་དག་དེང་ལ་ཅི་བདེན་ནམ་བརྫུན་པ་ཕྱག་སྦལ་རྟོགས་ཤིག །དེ་དག་དོང་སྟེ་ཕྱག་སྦལ་བརྟགས་ན་ཐལ་བ་ཡང་མི་སྣང་ནས། དེ་དག་ཕྱིར་ལོག་སྟེ་རྒྱལ་པོ་ལ་སྨྲས་པ། ལྷ་བདག་ཅག་གིས་ཕྱག་སྦལ་བརྟགས་ན་ཐལ་བ་ཡང་མི་གདའོ། །རྒྱལ་པོས་ཕྱག་སྦལ་སྲུང་བའི་མི་ལ་སྨྲས་པ། ཀྭའི་ནང་རྗེ་དེ་ན་མི་གཙོ་བོ་གང་འདུག །ལྷ་ཁྱིམ་བདག་ངན་པ་བཟང་བྱིན་མཆིས་སོ། །དེ་བོས་ཤིག །དེས་ལྷ་བཀའ་བཞིན་འཚལ་ཞེས་དེ་བོས་པ་དང་། རྒྱལ་པོས་དེ་ལ་སྨྲས་པ། ཁྱིམ་བདག་ངས་དྲིལ་བསྒྲགས་པ་བྱེད་དུ་བཅུག་སྟེ་སུས་ཀྱང་མཉན་ཡོད་དུ་མཚན་མོ་མེ་སྦར་བར་མི་བྱའོ་ཞེས་བསྒོ་ན་ཁྱོད་ཀྱིས་ཅིའི་ཕྱིར། ཕྱག་སྦལ་དུ་མཚན་ཐོག་ཐག་མེ་སྦར། དེས་སྨྲས་པ། ལྷ་བདག་
གིས་ཡུད་ཙམ་ཡང་ཞུགས་མ་བལྟམ་ན་མཚན་ཐོག་ཐག་ལྟ་ཅི་སྨོས། ཁྱིམ་བདག་ང་ཉིད་ཀྱིས་མཚན་མོའི་ཐུན་དང་པོ་ལ་མེའི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་དང་། མཚན་མོའི་གུང་ཐུན་ལ་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ་རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དང་མཚན་མོའི་ཐུན་ཐ་མ་ལ་མེའི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཀྱང་ཆེས་འཕགས་པ་དང་། ཆེས་གྱ་ནོམ་པའི་མེའི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་མཐོང་བཞིན་དུ་ཁྱོད་ན་རེ་དེ་སྐད་ཅེས་བདག་གིས་ཡུད་ཙམ་ཡང་མེ་མ་སྦར་ན་མཚན་ཐོག་ཐག་ལྟ་ཅི་སྨོས་ཞེས་ཟེར་ན་དེ་ཅི་ཡིན། ལྷ་དེ་ནི་མད་དེ། བདག་གིས་ནི་མཚན་མོ་ཞུགས་མ་སྦར་མོད་ཀྱི་འདི་ལྟར་མདང་མཚན་མོའི་ཐུན་དང་པོ་ལ་རྒྱལ་པོ་ཆེན་པོ་བཞི་བདག་ག་ལ་བ་དེར་མཆིས་ཏེ་ཕྱིན་ནས་བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་དག་ལ་འདི་སྐད་ཅེས་ཉེ་དབང་དག་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང་། དེ་དག་བདག་ལ་འདི་སྐད་ཅེས་ཅིའི་ཕྱིར་ཞེས་མཆིས་ནས་བདག་གིས་དེ་ལ་འདི་སྐད་ཅེས་ཀཱ་པ་ཤ་ཎ་དྲུག་བཅུའི་ཕྱིར་ཏེ། ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ་ཞེས་བགྱིས་ན། དེ་དག་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་
ཚིག་བརྗོད་ཅིག་ཁྱོད་ཀྱི་ཁྱིམ་མམ། ཆུའི་གནས་གང་དག་དབྱིག་དང་། གསེར་གྱིས་དགང་བར་བྱ་ཞེས་མཆིས་ནས། བདག་གིས་དེ་དག་ལ་འདི་སྐད་ཅེས་ཉེ་དབང་དག་སྙིང་ལས་ཆུང་ངུར་གྱིས་ཤིག །བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང་། དེ་དག་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན། དེ་དག་གི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །དེ་ནས་མཚན་མོའི་གུང་ཐུན་ལ་ལྷའི་དབང་པོ་བརྒྱ་བྱིན་བདག་ག་ལ་བ་དེར་མཆིས་ཏེ་ཕྱིན་ནས། བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན་ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་ལ་འདི་སྐད་ཅེས་ཀཽ་ཤི་ཀ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང་། དེ་བདག་ལ་འདི་སྐད་ཅེས་ཅིའི་ཕྱིར་ཞེས་མཆིས་ནས། བདག་གིས་དེ་ལ་འདི་སྐད་ཅེས་ཀཱ་པ་ཤ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ་ཞེས་བགྱིས་ན། དེ་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག་དང་། ཁྱོད་ཀྱི་ཁྱིམ་མམ། ཆུའི་གནས་གང་དག་དབྱིག་དང་གསེར་གྱིས་དགང་བར་བྱ་ཞེས་མཆིས་ནས། བདག་གིས་དེ་ལ་འདི་སྐད་ཅེས་ཀཽ་ཤི་ཀ་ཁྱོད་སྙིང་ལས་ཆུང་ངུར་གྱིས་ཤིག་དང་། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང་། དེ་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་
ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །དེ་ནས་མཚན་མོའི་ཐུན་ཐ་མ་ལ་མི་མཇེད་ཀྱི་བདག་པོ་ཚངས་པ་བདག་ག་ལ་བ་དེར་མཆིས་ཏེ། ཕྱིན་ནས་བདག་ལ་འདི་སྐད་ཅེས་ཁྱིམ་བདག་ཁྱོད་ཕྱག་སྦལ་ན་འདུག་པ་ཚུལ་དང་མཐུན་པ་མ་ཡིན་ན། ཅིའི་ཕྱིར་ཁྱོད་ཕྱག་སྦལ་ན་འདུག་ཅེས་མཆིས་ནས། བདག་གིས་དེ་ལ་འདི་སྐད་ཅེས་ཚངས་པ་ཁོ་བོ་རང་དབང་གིས་ཕྱག་སྦལ་ན་འདུག་པ་མ་ཡིན་ཏེ། འདི་ལྟར་རྒྱལ་པོའི་ཞོ་ཤས་འཚོ་བ་དག་གིས་ཕྱག་སྦལ་དུ་བཅུག་གོ་ཞེས་བགྱིས་པ་དང་། དེ་བདག་ལ་འདི་སྐད་ཅེས་ཅིའི་ཕྱིར་ཞེས་མཆིས་ནས། བདག་གིས་དེ་ལ་འདི་སྐད་ཅེས་ཀཱ་པ་ཤ་ཎ་དྲུག་བཅུའི་ཕྱིར་ཏེ་ཁོ་བོ་ལ་དེ་དག་གི་འབྱོར་པ་མེད་པས་དེའི་ཕྱིར་ཕྱག་སྦལ་ན་འདུག་གོ་ཞེས་བགྱིས་ན། དེ་བདག་ལ་འདི་སྐད་ཅེས་ཁྱིམ་བདག་དེའི་ཕྱིར་ཁྱོད་སེམས་བསྐྱེད་ལ་ཚིག་བརྗོད་ཅིག །ཁྱོད་ཀྱི་ཁྱིམ་མམ་ཆུའི་གནས་གང་དག་དབྱིག་དང་། གསེར་གྱིས་དགང་བར་བྱ་ཞེས་མཆིས་ནས། བདག་གིས་དེ་ལ་འདི་སྐད་ཅེས་ཚངས་པ་ཁྱོད་སྙིང་ལས་ཆུང་ངུར་གྱིས་ཤིག་དང་། བདག་ལ་རྒྱལ་པོ་དད་པས་དད་པའི་དབང་དུ་བྱ་བ་བྱེད་པར་འགྱུར་རོ། །གལ་ཏེ་འདོད་ན་འདུག་ཤིག་དང་ཁྱོད་ལ་ཆོས་བསྟན་པར་བྱའོ་ཞེས་བགྱིས་པ་དང་། དེ་ཆོས་མཉན་པའི་སླད་དུ་བདག་གི་མདུན་དུ་མཆིས་པ་ན་དེའི་ལུས་འདི་འདྲ་སྟེ། འདི་ལྟ་སྟེ་དཔེར་བགྱི་ན་ཞུགས་ཀྱི་ཕུང་པོ་ཆེན་པོ་སྔ་མ་བཞི་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་པས་ཆེས་འཕགས་པ་དང་། ཆེས་གྱ་ནོམ་པའི་ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་བས་ཀྱང་ཆེས་འཕགས་པ་དང་། ཆེས་གྱ་ནོམ་པའི་ཞུགས་ཀྱི་ཕུང་པོ་ཆེན་པོ་འབར་བ། རབ་ཏུ་འབར་བ། ཀུན་དུ་རབ་ཏུ་འབར་བ། མེ་ལྕེ་གཅིག་ཏུ་གྱུར་ཅིང་སྲེག་པ་དག་འདྲའོ། །རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་ངས་ཀྱང་ཁྱོད་ལ་དམ་པ་སྦྱིན་གྱིས་ཅི་འདོད་པ་སྨྲོས་ཤིག །དེས་སྨྲས་པ། ལྷ་གལ་ཏེ་ཁྱོད་བདག་ལ་ཐུགས་དད་ན་བདག་དགུང་ལ་
ཞུགས་མར་གྱི་འོད་ལ་སངས་རྒྱས་ཀྱི་བཀའ་ཀློག་པར་འཚལ་ལོ། །རྒྱལ་པོས་སྨྲས་པ། ཁྱིམ་བདག་ཁྱོད་འབའ་ཞིག་ལ་གནང་བར་མ་ཟད་ཀྱི་འདི་ལྟར་ཁྱོད་ཉིད་ལ་བརྟེན་ནས། གཞན་གང་དག་མཚན་མོ་མེ་མར་གྱི་འོད་ལ་སངས་རྒྱས་ཀྱི་བཀའ་ཀློག་པར་འདོད་པ་ཐམས་ཅད་ལ་ཡང་གནང་ངོ་། །དེ་ནས་ཁྱིམ་བདག་ངན་པ་བཟང་བྱིན་རྒྱལ་པོས་བཏང་བས་དགའ་མགུ་རབ་ཏུ་དགའ་སྟེ་རྒྱལ་པོའི་དྲུང་ནས་སོང་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་རྒྱལ་བྱེད་ཀྱི་ཚལ་དུ་སོང་ངོ་། །རྒྱལ་རིགས་ནི་མངོན་པའི་ང་རྒྱལ་ཅན་ཡིན་པས་དེས་རྒྱལ་བྱེད་ཀྱི་ཚལ་གྱི་སྒོར་བསྡད་དེ་མི་དག་པའི་མཐའ་ཅན་ཞིག་ལ་སྨྲས་པ། ཀྭའི་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་པ་ལྟོས་ཤིག། མི་དག་པའི་མཐའ་ཅན་དེས་ལྷ་བཀའ་བཞིན་འཚལ་ཞེས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལས་མཉན་ནས་བཅོམ་ལྡན་འདས་ག་ལ་བ་དེར་སོང་བ་དང་། ཇི་ཙམ་ན་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ལ་བསྙེན་བཀུར་བྱེད་པ་མཐོང་ངོ་། །མཐོང་ནས་ཀྱང་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ག་ལ་བ་དེར་སོང་སྟེ་ཕྱིན་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་སྨྲས་སོ། །ལྷ་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ལ་བསྙེན་བཀུར་བགྱིད་ཅིང་མཆིས་སོ། །རྒྱལ་པོས་བསམས་པ། ཁྱིམ་བདག་དེ་བདག་གི་ཡུལ་ན་གནས་པ་ཡིན་པས་དེས་བདག་མཐོང་ན་མངོན་དུ་ལྡང་བར་འགྱུར་གྲང་སྙམ་ནས། དེ་བཅོམ་ལྡན་འདས་ག་ལ་བ་དེར་སོང་ངོ་། །ཁྱིམ་བདག་ངན་པ་བཟང་བྱིན་གྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཐག་རིང་པོ་ཁོ་ན་ནས་མཐོང་ངོ་། །མཐོང་ནས་ཀྱང་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་ཅི་ལགས། རེ་ཞིག་དམ་པའི་ཆོས་ལ་བསྙེན་བཀུར་བགྱིའམ། འོན་ཏེ་རྒྱལ་པོ་ལ་བསྙེན་བཀུར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རེ་ཞིག་དམ་
པའི་ཆོས་ལ་བསྙེན་བཀུར་གྱིས་ཤིག །སངས་རྒྱས་བཅོམ་ལྡན་འདས་རྣམས་ནི་དམ་པའི་ཆོས་ལ་གུས་པར་མཛད་དེ་དགྲ་བཅོམ་པ་དག་ཀྱང་ཆོས་བླ་མར་བྱེད་དོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་དག་བཀའ་སྩལ་པ། སངས་རྒྱས་གང་དག་འདས་པ་དང་། །སངས་རྒྱས་གང་དག་མ་བྱོན་དང་། །སངས་རྒྱས་མྱ་ངན་སེལ་མཛད་པ། །ད་ལྟར་མང་པོ་གང་བཞུགས་དག །ཐམས་ཅད་དམ་པའི་ཆོས་ལ་ནི། །གུས་པར་གནས་གྱུར་གནས་འགྱུར་ཞིང་། །དེ་བཞིན་གུས་པར་གནས་མཛད་དེ། །དེ་ནི་སངས་རྒྱས་ཆོས་ཉིད་ཡིན། །དེ་ཕྱིར་བདག་ལ་ལེགས་འདོད་ཅིང་། །བདག་ཉིད་ཆེན་པོ་མངོན་འདོད་པས། །སངས་རྒྱས་བསྟན་པ་དྲན་བྱེད་ན། །འདི་ལ་དམ་ཆོས་གུས་པར་བྱ། །ཁྱིམ་བདག་ངན་པ་བཟང་བྱིན་གྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་མངོན་དུ་ལྡང་བ་མ་བྱས་པ་དང་། རྒྱལ་པོ་ཁྲོས་ཏེ་བསམས་པ། ཁྱིམ་བདག་འདི་བདག་གི་ཡུལ་ན་གནས་པ་ཡིན་ན་བདག་ལ་མངོན་དུ་ལྡང་བ་མི་བྱེད་དོ་སྙམ་ནས། དེ་ཁྲོ་བས་ཀུན་ནས་དཀྲིས་བཞིན་དུ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །བཅོམ་ལྡན་འདས་ཀྱིས་འདི་ཁྲོ་བས་ཀུན་ནས་དཀྲིས་སོ་སྙམ་དུ་མཁྱེན་ནས། བཀའ་མཆིད་གཞན་དག་མཛད་པར་བརྩམས་ཏེ་ཆོས་སྟོན་པར་མི་མཛད་པ་དང་། དེས་གསོལ་པ། བཅོམ་ལྡན་འདས་ཆོས་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་དེ་ལ་ཚིགས་སུ་བཅད་པ་དག་བཀའ་སྩལ་པ། རབ་ཏུ་དང་སེམས་མེད་པ་དང་། །ཞེ་སྡང་ཅན་དང་འཁྲུགས་པ་ཡིས། །ཡང་དག་རྫོགས་སངས་བསྟན་པ་ཡི། །དམ་ཆོས་ཀུན་ཤེས་བྱ་མི་ནུས། །གང་གིས་ཉེས་རྩོམ་བཏུལ་བྱས་ཤིང་། །རབ་དང་མེད་པའི་སེམས་བསལ་ཏེ། །ཀུན་ནས་མནར་སེམས་འདིར་སྤོང་བ། །དེས་ནི་ལེགས་གསུངས་ཤེས་པར་འགྱུར། །རྒྱལ་པོས་བསམས་པ། ཁྱིམ་བདག་འདི་ལ་བརྟེན་ནས་བཅོམ་ལྡན་འདས་ཀྱིས་ཆོས་མཉན་པ་ཡང་རྒྱུན་བཀུམ་མོ་སྙམ་ནས། དེ་ལ་རྒྱ་ཆེར་ཁྲོ་བའི་སེམས་སྐྱེས་ཏེ་སྡོད་ཅིག་ཅེས་བྱས་ནས།
བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བློན་པོ་རྣམས་ལ་བསྒོ་བ། ཤེས་ལྡན་དག་གང་གི་ཚེ་ཁྱིམ་བདག་ངན་པ་བཟང་བྱིན་བཅོམ་ལྡན་འདས་ཀྱི་སྤྱན་སྔ་ནས་ཕྱིར་བྱུང་བ་དེའི་ཚེ་དེ་ལ་ཁྱོད་ངའི་ཡུལ་ན་མ་འདུག་ཤིག་ཅེས་བསྒོ་ཤིག། དེ་ནས་ལྷ་གང་ཁྱིམ་བདག་ངན་པ་བཟང་བྱིན་ལ་མངོན་པར་དད་པ་དེས་སྲོག་ཆགས་ཏྲེ་མ་བུ་ཀ་དང་། ཏྲཻ་ལ་ཏ་ཀ་མང་པོ་དག་བཏང་ནས་དེ་དག་གིས་རྒྱལ་པོ་དེ་ཀུན་ནས་བསྐོར་ཏེ་ཟིན་པ་ན་དེ་ཉམ་ང་བས་རང་གི་ཁྱིམ་དུ་ཕྱིན་ཅིང་དེར་བཙུན་མོའི་འཁོར་དང་། གཞོན་ནུ་དང་། བློན་པོ་དང་ཁྲོམ་གྱི་རུ་སྣ་དང་། གླང་པོ་ཆེ་དང་། རྟ་དག་ཀྱང་ཀུན་ནས་བསྐོར་ཅིང་ཟིན་པར་གྱུར། མཉན་ཡོད་ན་གནས་པའི་སྐྱེ་བོའི་ཚོགས་ཐམས་ཅད་ཀྱང་ཀུན་ནས་བསྐོར་ཅིང་ཟིན་པར་གྱུར་ཏོ། །དེ་ནས་རྒྱལ་པོ་སྐྲག་སྟེ་མྱུར་བ་མྱུར་བར་གླང་པོ་ཆེ་ལ་ཞོན་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཙུན་པ་རེ་ཞིག་དེའི་ཚེ་ཡང་ཀླུའི་རྒྱལ་པོ་དགའ་བོ་དང་། ཉེ་དགའ་གཉིས། འཁྲུགས་པར་གྱུར་ན་ད་སུ་ཞིག་འཁྲུགས་ལགས། རྒྱལ་པོ་ཆེན་པོ་ཇི་ལྟར་གྱུར། བཅོམ་ལྡན་འདས་བདག་སྲོག་ཆགས་ཏྲེ་མ་བུ་ཀ་དང་། ཏྲཻ་ལ་ཏ་ཀ་དག་གིས་ཀུན་ནས་བསྐོར་ཅིང་ཟིན་པར་གྱུར། མཆིས་འབྲང་གི་འཁོར་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་སྣ་དང་། གླང་པོ་ཆེ་དང་། རྟ་དག་ཀྱང་ཀུན་ནས་བསྐོར་ཅིང་ཟིན་པར་གྱུར། མཉན་ཡོད་ན་གནས་པའི་སྐྱེ་བོའི་ཚོགས་ཐམས་ཅད་ཀྱང་ཀུན་ནས་བསྐོར་ཅིང་ཟིན་པར་གྱུར་ཏོ། །རྒྱལ་པོ་ཆེན་པོ་ཁྱོད་ཀྱིས་ཁྱིམ་བདག་ངན་པ་བཟང་བྱིན་ལ་རབ་ཏུ་སྡང་བའི་སེམས་བསྐྱེད་དོ། །བཅོམ་ལྡན་འདས་ཅི་ལགས་ཁྱིམ་བདག་དེ་འཁྲུགས་པར་གྱུར་ཏམ། རྒྱལ་པོ་ཆེན་པོ་དེ་ནི་ཕྱིར་མི་འོང་བ་ཡིན་པས་འཁྲུགས་པ་སྐྱེད་པར་མི་བྱེད་དེ། འདི་ལྟར་ལྷ་གང་དེ་ལ་མངོན་པར་
དད་པ་དེ་འཁྲུགས་པར་གྱུར་ཏོ། །བཅོམ་ལྡན་འདས་བདག་གིས་དེ་ལ་ཇི་ལྟར་བསྒྲུབ་པར་བགྱི། རྒྱལ་པོ་ཆེན་པོ་ཁྱོད་ཀྱིས་དེ་ལ་བཟོད་པ་གསོལ་བར་བྱའོ། །བཅོམ་ལྡན་འདས་ཅི་ལགས་བདག་གིས་དེའི་རྐང་པ་གཉིས་ལ་གཏུགས་པར་བགྱིའམ། རྒྱལ་པོ་ཆེན་པོ་རྐང་པ་གཉིས་ལ་གཏུག་པར་མི་བྱ་སྟེ། འདི་ལྟར་མི་མ་རབས་དག་གི་རྐང་པ་ལ་ཕྱག་འཚལ་བ་གང་ཡིན་པ་དེ་ནི་མི་གཙོ་བོ་དག་གིས་ལག་པ་ནས་བཟུང་བ་ཡིན་གྱིས། ཁྱོད་ཀྱིས་ལག་པ་གཡས་པ་རྐྱོང་ལ་ཁྱིམ་བདག་བཟོད་པར་གྱིས་ཤིག་ཅེས་བཟོད་པ་གསོལ་ཅིག་དང་དེས་བཟོད་པར་འགྱུར་རོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་པ་དང་རྗེས་སུ་ཡི་རང་བ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །མཉན་ཡོད་ན་ཁྱིམ་བདག་སྡུམས་བྱེད་དང་། ཚུལ་ཁྲིམས་ཚོང་དཔོན་ཞེས་བྱ་བ་གཉིས་ཤིག་ཡོད་དོ། །དེ་ན་གཏམས་པ་སྲུང་བ་རྣམས་ལ་ནི་སྡུམས་བྱེད་དྲང་པོ་ཡིན། གཅིག་པུས་ཆེ་བཞི་འབྱེད་པ་རྣམས་ལ་ནི་ཚུལ་ཁྲིམས་ཚོང་དཔོན་དྲང་པོ་ཡིན་ལ། དེ་ཡང་ངོ་ཚ་དང་ལྡན་པས་བཤང་བའི་སར་ཐག་རིང་དུ་འགྲོ་བ་ཡིན་ནོ། །མཉན་ཡོད་ན་སྟོན་ཟླ་ཐ་ཆུངས་ཀྱི་གཡོན་ཅན་ཞེས་བྱ་བ་ཆོམ་རྐུན་པ་དག་འཁོད་པ་དེ་དག་གི་ཀུན་ཏུ་སྤྱོད་པ་ནི་དགག་དབྱེ་བྱས་མ་ཐག་ཏུ་འདུས་ནས་ཤེས་ལྡན་དག་བདག་ཅག་གིས་ལས་ཅི་ཞིག་བྱས་ན་དེས་བཙལ་མི་དགོས་པར་ལོ་སྐོར་དུ་ལོངས་སྤྱོད་ཅིང་བདེ་བར་འཁོད་པར་འགྱུར་ཞེས་ཕན་ཚུན་གྲོས་བྱེད་དོ། །དེ་དག་ལས་གཅིག་གིས་སྨྲས་པ། ཤེས་ལྡན་དག་ཁྱིམ་བདག་སྡུམས་བྱེད་འདི་གཏམས་པ་འཛིན་པ་ཡིན་པས་འདི་ལ་བརྒལ་ཞིང་བརྟག་པར་བྱའོ། །གཞན་དག་གིས་སྨྲས་པ། མ་ཉེས་ཀྱིས་དེ་བཞིན་བྱ་སྟེ། འདི་ལྟར་ཁྱིམ་བདག་ཚུལ་ཁྲིམས་ཚོང་དཔོན་འདི་གཅིག་པུས་ཆེ་བཞི་འབྱེད་པ་རྣམས་ལ་དྲང་བ་ཡིན་ལ། དེ་ཡང་ངོ་ཚ་དང་ལྡན་པས་བཤང་བའི་སར་ཐག་རིང་དུ་འགྲོ་བས་དེ་བཟུང་སྟེ་བསྡིགས་ན་དེས་ཆེ་བཞི་འབྱེད་པར་འགྱུར་རོ་ཞེས་དེ་དག་གིས་དེའི་
བྱ་ར་བྱས་ཏེ། དེ་བཤང་བའི་སར་སོང་བ་བཟུང་ནས་བསྡིགས་ཏེ་སྨྲས་པ། ཁྱིམ་བདག་ཁྱོད་གསོན་ནམ་འཆི། དེས་སྨྲས་པ། ཤེས་ལྡན་དག་ཁྱེད་ཀྱིས་ཇི་ལྟར་བསམས་པའོ། །དེ་དག་གིས་སྨྲས་པ། ཁྱིམ་བདག་གལ་ཏེ་དེ་ལྟ་ན་ཁོ་བོ་ཅག་ཁྱིམ་བདག་སྡུམས་བྱེད་ལ་ནོར་བརྒྱའམ་སྟོང་གིས་རྒོལ་ཞིང་རྟོག་གིས་ཁྱོད་ཀྱིས་ཆེ་བཞི་ཕྱེ་ཤིག །དེས་སྨྲས་པ། ཤེས་ལྡན་དག་ཅི་ཡང་དག་པས་སམ། ཡང་དག་པ་མ་ཡིན་པས། ཁྱིམ་བདག་ཡང་དག་པ་མ་ཡིན་པས་སོ། །ཤེས་ལྡན་དག་ཁོ་བོ་ཡང་དག་པ་མ་ཡིན་པས་ཆེ་བཞི་མི་འབྱེད་དེ། ཁོ་བོས་ཚེ་གཅིག་གི་སྡུག་བསྔལ་ལས་ཐར་བར་བྱ་བའི་དོན་དུ་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །དེ་དག་གིས་སྨྲས་པ། ཁྱིམ་བདག་གལ་ཏེ་རེ་ཞིག་ཆེ་བཞི་འབྱེད་ན་དེ་ལྟ་ན་ལེགས། གལ་ཏེ་མི་འབྱེད་ན་ཁོ་བོ་ཅག་གིས་ཁྱོད་མགོ་དྲུངས་ནས་བཅད་དེ་ས་ལ་བསྒྱེལ་བར་བྱའོ། །དེས་ཚིགས་སུ་བཅད་པ་སྨྲས་པ། ཁོ་བོ་ཆོས་ལ་གནས་ན་མྱུར་དུ་ཤི་ཡང་བླ། །ཆོས་ལ་རྒྱབ་ཀྱིས་ཕྱོགས་ན་གསོན་པར་མ་གྱུར་ཅིག །ཆོས་ལ་གནས་པ་སུམ་བཅུ་ལྷ་ཡི་བདེ་བ་སྤྱོད། །ཆོས་ལས་ཉམས་པ་མི་བཟད་འཇིགས་པའི་ངན་སོང་ལྟུང་། །དེ་ནས་སྟོན་ཟླ་ཐ་ཆུངས་ཀྱི་གཡོན་ཅན་དེ་དག་གིས་ཁྱིམ་བདག་དེའི་རྐང་པ་གཉིས་ལ་གཏུགས་ཏེ་སྨྲས་པ། ཁྱིམ་བདག་བདག་ཅག་ལ་མི་འཇིགས་པ་སྩོལ་ཅིག །དེས་སྨྲས་པ་སྦྱིན་ནོ། །སྟོན་ཟླ་ཐ་ཆུངས་ཀྱི་གཡོན་ཅན་དེ་དག་གིས་དེའི་རྐང་པ་གཉིས་ལ་གཏུགས་ཏེ་དོང་ངོ་། །མཉན་ཡོད་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱི་ནུ་བོ་རྒྱལ་བུ་ནག་པོ་ཞེས་བྱ་བ་གཟུགས་བཟང་བ་བལྟ་ན་སྡུག་པ་མཛེས་པ། དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན། སངས་རྒྱས་ལ་སྐྱབས་སུ་སོང་། ཆོས་དང་དགེ་འདུན་ལ་སྐྱབས་སུ་སོང་བ་ཞིག་འདུག་པ་དེ་ཡན་ལག་བརྒྱད་དང་ལྡན་པའི་གསོ་སྦྱོང་ལ་ཉེ་བར་གནས་པའི་གན་དུ་བདུད་ཀྱི་རིས་ཀྱི་ལྷ་མོ་ཞིག་འོངས་ཏེ། རིགས་པས་བསྐྱེད་པ་མ་ཡིན་པས་མགྲོན་དུ་གཉེར་བ་ནི་དེས་དེ་དང་དུ་མ་བླངས་སོ། །ཇི་ཙམ་དུས་གཞན་ཞིག་ན་ཁྱིམ་བདག་ངན་པ་བཟང་བྱིན་དང་། ཁྱིམ་བདག་སྡུམས་བྱེད་དང་། ཁྱིམ་བདག་ཚུལ་ཁྲིམས་ཚོང་
དཔོན་དང་། རྒྱལ་བུ་ནག་པོ་རྣམས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་རྒྱལ་པོའི་འབྱོར་པ་ཆེན་པོ་དང་། རྒྱལ་པོའི་མཐུ་ཆེན་པོས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁྱིམ་བདག་ངན་པ་བཟང་བྱིན་ནི་འདི་ཡིན་ནོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་སྟན་ལས་ལངས་ཏེ་ལག་པ་གཡས་པ་བརྐྱང་ནས་སྨྲས་པ། ཁྱིམ་བདག་བཟོད་པ་མཛོད་ཅིག། ཁྱིམ་བདག་གིས་སྨྲས་པ་ལྷ་བཟོད་པར་འཚལ་ལོ། །དེ་ནས་བཅོམ་ལྡན་འདས་ལ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་འདི་སྐད་ཅེས་གསོལ་ཏོ། །བཙུན་པ་བདག་ནི་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ལགས་ན་བདག་གིས་བདག་གི་ཡུལ་ན་གནས་པའི་འབངས་ལ་བཟོད་པ་གསོལ་བ་གང་ལགས་པ་དེ་ངོ་མཚར་མི་ཆེའམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རྗེ་དཔོན་གྱིས་བཟོད་པ་གསོལ་བ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་ཁྱིམ་བདག་ངན་པ་བཟང་བྱིན་གྱིས་འདི་སྐད་ཅེས་གསོལ་ཏོ། །བཙུན་པ་བདག་ལ་ཀཱ་པ་ཤ་ཎ་གཅིག་མཆིས་པ་དེས་བདག་གིས་ཟོང་མཇལ་ཅིང་བཙོངས་ནས་དེ་ལས་ཀཱ་པ་ཤ་ཎ་བཞི་གྲུབ་ཅིང་དེ་དག་ལས་གཅིག་གིས་ནི་བཅོམ་ལྡན་འདས་ཀྱི་དྲི་གཙང་ཁང་དུ་སྤོས་ཀྱི་བྱུག་པས་བྱུགས། གཉིས་པ་ནི་དགེ་འདུན་གྱི་སླད་དུ་དགེ་སློང་མཆོད་སྟོན་སྩལ། གསུམ་པས་ནི་གཡོག་འཁོར་གྱི་འཚོ་བ་སྦྱར། བཞི་པ་ནི་ཟོང་གི་རིན་དུ་བཞག་སྟེ། བཙུན་པ་བདག་ནི་ནོར་མ་མཆིས་པའི་སྦྱིན་པ་གང་ལགས་པ་དེ་ངོ་མཚར་མི་ཆེའམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ནོར་མེད་པའི་སྦྱིན་པ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་ཁྱིམ་བདག་ཚུལ་ཁྲིམས་ཚོང་དཔོན་
གྱིས་འདི་སྐད་ཅེས་གསོལ་ཏོ། །བཙུན་པ་བདག་སླད་རོལ་དུ་མཆིས་པ་དང་། སྟོན་ཟླ་ཐ་ཆུངས་ཀྱི་གཡོན་ཅན་དག་གིས་བཟུང་ནས་བསྡིགས་ཏེ། དེ་དག་བདག་ལ་འདི་སྐད་ཅེས་ཁྱིམ་བདག་ཅི་ཁྱོད་གསོན་ནམ་འཆི་ཞེས་མཆི་ནས་བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཁྱེད་ཀྱིས་ཇི་ལྟར་བསམས་པའོ་ཞེས་བགྱིས་པ་དང་། དེ་དག་བདག་ལ་འདི་སྐད་ཅེས་ཁྱིམ་བདག་གལ་ཏེ་དེ་ལྟ་ན་ཁོ་བོ་ཅག་ཁྱིམ་བདག་སྡུམས་བྱེད་ལ་ནོར་བརྒྱའམ། སྟོང་གིས་རྒོལ་ཞིང་རྟོག་གིས་ཁྱོད་ཀྱིས་ཆེ་བཞི་ཕྱེ་ཤིག་ཅེས་མཆི་ནས། བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཅི་ཡང་དག་པས་སམ། ཡང་དག་པ་མ་ཡིན་པས་ཞེས་བགྱིས་ན། དེ་དག་བདག་ལ་འདི་སྐད་ཅེས་ཁྱིམ་བདག་ཡང་དག་པ་མ་ཡིན་པས་སོ་ཞེས་མཆི་ནས། བདག་གིས་དེ་དག་ལ་འདི་སྐད་ཅེས་ཤེས་ལྡན་དག་ཁོ་བོ་ཡང་དག་པ་མ་ཡིན་པས་ཆེ་བཞི་མི་འབྱེད་དེ། ཁོ་བོས་ཚེ་གཅིག་གི་སྡུག་བསྔལ་ལས་ཐར་བར་བྱ་བའི་དོན་དུ་ཚེ་རབས་མང་པོའི་སྡུག་བསྔལ་བསྐྱེད་པར་མི་ནུས་སོ་ཞེས་བགྱིས་པ་དང་། དེ་དག་བདག་ལ་འདི་སྐད་ཅེས་ཁྱིམ་བདག་གལ་ཏེ་རེ་ཞིག་ཆེ་བཞི་འབྱེད་ན་དེ་ལྟ་ན་ལེགས། གལ་ཏེ་མི་འབྱེད་ན་ཁོ་བོ་ཅག་གིས་ཁྱོད་མགོ་དྲུངས་ནས་བཅད་དེ་ས་ལ་བསྒྱེལ་བར་བྱའོ་ཞེས་མཆི་ནས། བདག་གིས་ཚིགས་སུ་བཅད་པ་འདི་སྐད་ཅེས། ཁོ་བོ་ཆོས་ལ་གནས་ན་མྱུར་དུ་ཤི་ཡང་བླ། །ཆོས་ལ་རྒྱབ་ཀྱིས་ཕྱོགས་ན་གསོན་པར་མ་གྱུར་ཅིག །ཆོས་ལ་གནས་པ་སུམ་བཅུ་ལྷ་ཡི་བདེ་བ་སྤྱོད། །ཆོས་ལས་ཉམས་པ་མི་བཟད་འཇིགས་པའི་ངན་སོང་ལྟུང་། །ཞེས་སྨྲས་པ་དང་། དེ་དག་གིས་བདག་གི་རྐང་པ་གཉིས་ལ་གཏུགས་ཏེ། བདག་ལ་འདི་སྐད་ཅེས་ཁྱིམ་བདག་བདག་ཅག་ལ་མི་འཇིགས་པ་སྩོལ་ཅིག་ཅེས་མཆི་ནས། བདག་གིས་དེ་དག་ལ་འདི་སྐད་ཅེས་སྦྱིན་ནོ་ཞེས་བགྱིས་ཏེ། བཙུན་པ་བདག་ཕོངས་པར་གྱུར་པས་ཀྱང་ཆོས་ཡོངས་སུ་མ་བཏང་སྟེ། བདག་གིས་ཕོངས་པར་གྱུར་པ་ན་ཆོས་སྤྱད་པ་ངོ་མཚར་མི་ཆེའམ། བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་ཕོངས་པར་གྱུར་པ་ན་ཆོས་སྤྱད་པ་ངོ་མཚར་ཆེའོ། །དེ་ནས་བཅོམ་ལྡན་འདས་ལ་རྒྱལ་བུ་ནག་པོས་འདི་སྐད་ཅེས་གསོལ་ཏོ། །བཙུན་པ་བདག་ཡན་
ལག་བརྒྱད་དང་ལྡན་པའི་གསོ་སྦྱོང་ལ་ཉེ་བར་གནས་པའི་གན་དུ་བདུད་ཀྱི་རིས་ཀྱི་ལྷ་མོ་ཞིག་མཆིས་ནས་རིགས་པས་བསྐྱེད་པ་མ་ལགས་པས་མགྲོན་དུ་གཉེར་བ་ན་བདག་གིས་དེ་དང་དུ་མ་བླངས་ཏེ། བཅོམ་ལྡན་འདས་བདག་ནོར་མང་ལ་འདོད་པ་དག་ལས་དབེན་པ་དེ་ངོ་མཚར་མི་ཆེའམ། བཅོམ་ལྡན་འདས་ཀྱིས་བཀའ་སྩལ་པ། གཞོན་ནུ་ནོར་མང་ལ་འདོད་པ་དག་ལས་དབེན་པ་ངོ་མཚར་ཆེའོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་ལ་ཚིགས་སུ་བཅད་པ་བཀའ་སྩལ་པ། རྗེ་དཔོན་བཟོད་གསོལ་ནོར་མེད་སྦྱིན་པ་དང་། །ཕོངས་པར་གྱུར་པ་ཆོས་སྤྱོད་བྱེད་པ་དང་། །ནོར་མང་འདོད་པ་དག་ལས་དབེན་བྱེད་པ། །བཞི་པོ་དེ་དག་ཤིན་ཏུ་བྱ་དཀའ་ཡིན། །དེ་ནས་ཁྱིམ་བདག་ངན་པ་བཟང་བྱིན་དང་། ཁྱིམ་བདག་སྡུམས་བྱེད་དང་། ཁྱིམ་བདག་ཚུལ་ཁྲིམས་ཚོང་དཔོན་དང་། རྒྱལ་བུ་ནག་པོ་རྣམས་ཀྱིས་བཅོམ་ལྡན་འདས་ལ་ཆོས་མངོན་པ་དང་། འདུལ་བ་མངོན་པའི་ཞུ་བ་ཞུས་ནས། བཅོམ་ལྡན་འདས་ཀྱིས་དེ་དག་ལ་གོང་ནས་གོང་དུ་བཀའ་ལན་སྩལ་པ་དང་། ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཡང་དེ་དག་གི་གདོང་དུ་ལྟ་ཞིང་འདུག་སྟེ། དེས་ཡུད་ཙམ་ཞིག་ཆོས་དང་ལྡན་པའི་གཏམ་མཉན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། སྟན་ལས་ལངས་ནས་སོང་སྟེ། དེ་བཙུན་མོའི་འཁོར་གྱི་ནང་དུ་ཞུགས་ནས་བཙུན་མོ་ཕྲེང་ལྡན་མ་ལ་སྨྲས་པ། ཕྲེང་ལྡན་མ་དེང་ཁྱིམ་བདག་ངན་པ་བཟང་བྱིན་དང་། ཁྱིམ་བདག་སྡུམས་བྱེད་དང་། ཁྱིམ་བདག་ཚུལ་ཁྲིམས་ཚོང་དཔོན་དང་། རྒྱལ་བུ་ནག་པོ་རྣམས་ཀྱིས་བཅོམ་ལྡན་འདས་ལ་ཆོས་མངོན་པ་དང་། འདུལ་བ་མངོན་པའི་ཞུ་བ་ཞུས་ནས། བཅོམ་ལྡན་འདས་ཀྱིས་ཀྱང་དེ་དག་ལ་གོང་ནས་གོང་དུ་ལན་བཀའ་སྩལ་པ་དང་། ང་ཡང་དེ་དག་གི་གདོང་དུ་ལྟ་ཞིང་ཁ་རོག་པར་འདུག་འདུག་ནས་ལངས་ཏེ་སོང་ངོ་། །ཕྲེང་ལྡན་མས་སྨྲས་པ། ལྷ་ཁྱོད་ཀྱིས་ཀྱང་ཅིའི་སླད་དུ་བཅོམ་ལྡན་འདས་ལ་མ་ཞུས། ཕྲེང་ལྡན་མ་ང་ནི་ཐོས་པ་ཉུང་བ་ཡིན་ལ། དེ་དག་ནི་ཐོས་པ་མང་བ་ཡིན་པས་ངས་ཅི་ཞིག་ཞུར་ཡོད། ལྷ་ཁྱོད་ཀྱང་ཅིའི་སླད་དུ་སངས་རྒྱས་ཀྱི་བཀའ་
ཀློག་པར་མི་མཛད། ཕྲེང་ལྡན་མ་ང་རྒྱལ་པོའི་བྱ་བ་དང་། རྒྱལ་པོའི་བྱེད་པ་དག་ལ་རྟག་ཏུ་བྲེལ་བས་ཇི་ལྟར་ཀློག། གལ་ཏེ་ཁྱོད་འགའ་ཞིག་ལས་སངས་རྒྱས་ཀྱི་བཀའ་ཀློག་ན་ངས་མཚན་མོ་ཁྱོད་ལས་བཀླག་པར་བྱའོ། །ལྷ་དེ་ལྟར་བགྱིའོ། །རྒྱལ་པོས་བཙུན་མོ་རྒྱལ་རིགས་དབྱར་ཚུལ་མ་ལ་སྨྲས་པ། ཁྱོད་སུ་ལས་ཀློག །དེས་སྨྲས་པ། ལྷ་འཕགས་པ་ཤཱ་རིའི་བུ་ལས་སོ། །བཙུན་མོ་ཕྲེང་ལྡན་མ་ལ་སྨྲས་པ། ཁྱོད་སུ་ལས་ཀློག །དེས་སྨྲས་པ། ལྷ་འཕགས་པ་འཆར་ཀ་ལས་སོ། །དེ་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ཚེ་དང་ལྡན་པ་ཤཱ་རིའི་བུ་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །འཕགས་པ་རྒྱལ་རིགས་དབྱར་ཚུལ་མ་འཕགས་པ་ལས་སངས་རྒྱས་ཀྱི་བཀའ་ཀློག་པར་འཚལ་ན། ཀློག་ཏུ་སྩལ་བར་གསོལ། དེས་སྨྲས་པ། ལྷ་བཅོམ་ལྡན་འདས་ལ་ཞུའོ་ཞེས་དེ་ནས་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་སྐད་ཅེས་རྒྱལ་རིགས་དབྱར་ཚུལ་མ་ཀློག་ཏུ་སྩོལ་ཅིག་ཅེས་མཆི་ན། བདག་གིས་དེ་ལ་ཇི་སྐད་བརྗོད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ཀློག་ཏུ་ཆུག་ཤིག །ཚེ་དང་ལྡན་པ་ཤཱ་རིའི་བུས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ལྷ་ཀློག་ཏུ་སྩལ་ཏོ་ཞེས་ཁས་བླངས་སོ། །རྒྱལ་པོས་དེའི་རྐང་པ་གཉིས་ལ་མགོ་བོས་ཕྱག་འཚལ་ཏེ་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཕྱིན་ནས་ཚེ་དང་ལྡན་པ་འཆར་ཀའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གྱིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །འཕགས་པ་ཕྲེང་ལྡན་མ་འཕགས་པ་ལས་སངས་རྒྱས་ཀྱི་བཀའ་ཀློག་པར་
འཚལ་ན་ཀློག་ཏུ་སྩལ་པར་གསོལ། དེས་སྨྲས་པ། ལྷ་བཅོམ་ལྡན་འདས་ལ་ཞུའོ་ཞེས་དེ་ནས་ཚེ་དང་ལྡན་པ་འཆར་ཀས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་འཆར་ཀས་འདི་སྐད་ཅེས་གསོལ་ཏོ། །བཙུན་པ་ཀོ་ས་ལར་བྱུང་བའི་རྒྱལ་པོ་གསལ་རྒྱལ་འདི་སྐད་ཅེས་ཕྲེང་ལྡན་མ་ཀློག་ཏུ་སྩོལ་ཅིག་ཅེས་མཆི་ན། བདག་གིས་དེ་ལ་ཇི་སྐད་བརྗོད་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཆར་ཀ་ཀློག་ཏུ་ཆུག་ཤིག། ཚེ་དང་ལྡན་པ་འཆར་ཀས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་ལ་ལྷ་ཀློག་ཏུ་སྩོལ་ཏོ་ཞེས་ཁས་བླངས་ནས། རྒྱལ་པོས་དེའི་རྐང་པ་གཉིས་ལ་ཕྱག་འཚལ་ཏེ་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་པ། ཚེ་དང་ལྡན་པ་ཤཱ་རིའི་བུ་ནི་དུས་ཤེས་པ་དང་། དུས་རིག་པ་ཡིན་པས་དེ་དུས་སུ་སོང་ནས་རྒྱལ་རིགས་དབྱར་ཚུལ་མ་ཀློག་ཏུ་འཇུག་གི་དུས་མ་ཡིན་པར་མི་འགྲོའོ། །ཚེ་དང་ལྡན་པ་འཆར་ཀ་ནི་དུས་མི་ཤེས་པ་དང་། དུས་མི་རིག་པ་ཡིན་པས་དུས་སུ་ཡང་སོང་སྟེ་ཕྲེང་ལྡན་མ་ཀློག་ཏུ་འཇུག་ལ། དུས་མ་ཡིན་པར་ཡང་འགྲོའོ། །ཇི་ཙམ་དུས་གཞན་ཞིག་ན་ཀོ་ས་ལར་བྱུང་བའི་རྒྱལ་པོ་གསལ་རྒྱལ་རི་བྲགས་གཞན་ཞིག་ཏུ་བྱ་བ་ཅུང་ཞིག་བྱུང་ནས་དེ་མཚན་མོ་ཉིད་དུ་ལངས་ཏེ་དེར་འཕགས་པ་དང་། ཚེ་དང་ལྡན་པ་འཆར་ཀ་གླང་པོ་ཆེའི་སྒྲ་དང་། རྟའི་སྒྲ་དང་། དུང་གི་སྒྲས་སད་ནས་དེས་བསམས་པ། བཙུན་མོ་ཕྲེང་ལྡན་མ་ལ་བཟླས་པ་སྦྱིན་དུ་འགྲོའོ་སྙམ་ནས། དེ་རྒྱལ་པོའི་ཕོ་བྲང་གི་སྒོར་སོང་བ་དང་སྒོ་བས་སྨྲས་པ། འཕགས་པ་དུས་མ་ལགས་པར་རྒྱལ་པོའི་ཕོ་བྲང་དུ་མ་འཇུག་པར་རེ་ཞིག་གཞེས་ལ་སླད་ཀྱིས་ཞུགས་ཤིག །དེ་ཁྲོས་ཏེ་སྨྲས་པ། བཀྲེན་པ་ཇི་སྲིད་དུ་གསུས་པོ་ཆེ་འདི་གསོན་པ་དེ་སྲིད་དུ་ཁོ་བོ་འདིར་དུས་སུ་ཡང་འཇུག་ལ། དུས་མ་ཡིན་པར་ཡང་འཇུག་གོ །འདི་ཤི་ན་འདིར་གདོལ་པ་དག་དང་ཆོམ་རྐུན་པ་དག་འཇུག་པར་འགྱུར་ཞིང་འདི་མི་གཙང་བའི་ར་བ་དང་། བཙོན་ར་དང་ཝ་ལམ་ཅན་དུ་འགྱུར་རོ། །
སྒོ་བ་སྐྲག་ནས་ཅང་མི་སྨྲ་བར་འདུག་པ་དང་། ཚེ་དང་ལྡན་པ་འཆར་ཀ་ནང་དུ་ཞུགས་པ་ན་བཙུན་མོ་ཕྲེང་ལྡན་མ་གཉིད་ལོག་ཅིང་འདུག་ནས་དེས་སེ་གོལ་གྱི་སྒྲས་དེ་བསླང་བ་དང་། དེས་དེའི་རྐང་པ་ལ་ཕྱག་འཚལ་ཏེ་མདུན་དུ་འདུག་གོ །བཙུན་མོ་ཕྲེང་ལྡན་མ་བཙུན་མོའི་འཁོར་ལ་འོས་པའི་གོས་དག་གྱོན་པས་ཚེ་དང་ལྡན་པ་འཆར་ཀ་དབང་པོ་རྣམས་བསྡུས་ཏེ་འདུག་པ་དང་། བཙུན་མོ་ཕྲེང་ལྡན་མས་བསམས་པ། ཅིའི་ཕྱིར་འཕགས་པ་འཆར་ཀ་དབང་པོ་རྣམས་བསྡུས་ཏེ་འདུག་སྙམ་ནས་དེས་ཡང་བསམས་པ། བདག་གིས་བཙུན་མོའི་འཁོར་ལ་འོས་པའི་གོས་དག་གྱོན་པས་དེའི་ཕྱིར་འཕགས་པ་འཆར་ཀ་དབང་པོ་རྣམས་བསྡུས་ཏེ་འདུག་གོ་སྙམ་དུ་རིག་ནས། དེ་གནས་ཁང་དུ་ཞུགས་ཏེ་གོས་སྟུག་པོ་དག་གྱོན་ནས་ཕྱིར་བྱུང་བ་དང་། ཚེ་དང་ལྡན་པ་འཆར་ཀས་དེ་ལ་བཟླས་པ་བྱིན། ལུང་གཞན་ཡང་ཕོག་པ་དང་། བཙུན་མོ་ཕྲེང་ལྡན་མས་སྨྲས་པ། འཕགས་པ་ཅི་ལགས་དེང་དགེ་འདུན་སྤྱན་དྲངས་སམ། འོན་ཏེ་བསོད་སྙོམས་མཛད། དེས་སྨྲས་པ། བསོད་སྙོམས་བགྱིད་དོ། །བཙུན་མོ་ཕྲེང་ལྡན་མས་སྨྲས་པ། འཕགས་པ་གལ་ཏེ་བསོད་སྙོམས་མཛད་ན་བདག་ལས་ལྷག་པར་བསོད་པ་འབུལ་བ་སུ་ཞིག་མཆིས་ཏེ། བདག་ཉིད་ཀྱིས་འབུལ་ལོ་ཞེས་དེས་བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་བཀང་སྟེ་དེ་དེ་ལ་ཕུལ་ལོ། །ཚེ་དང་ལྡན་པ་འཆར་ཀས་དེ་བླངས་ཏེ་ཕྱིར་བྱུང་བ་དང་། ཚེ་དང་ལྡན་པ་ཤཱ་རིའི་བུ་ནང་དུ་འཇུག་པ་དང་ཕྲད་ནས་དེས་སྨྲས་པ། དོན་ཉུང་ངུ་ཁྱོད་ཀྱིས་བརྩོན་འགྲུས་འདི་ལྟ་བུས་ཟག་པ་ཟད་པར་བྱས་སམ། ཅི་ན་ཁྱོད་ད་གཟོད་འོང་ཁོ་བོས་ནི་བཟླས་པ་བྱིན་ནས་ལུང་གཞན་ཡང་ཕོག་སྟེ། ཁོ་བོས་བཅའ་བ་དང་བཟའ་བ་གཙང་ཞིང་བསོད་པས་ལྷུང་བཟེད་གང་བ་འདི་ཡང་ཐོབ་བོ། །ཚེ་དང་ལྡན་པ་ཤཱ་རིའི་བུས་སྨྲས་པ། དེའི་ཕྱིར་ཁྱོད་དྲུག་སྡེ་ཡིན་ནོ། །དགེ་སློང་དོན་ཉུང་ངུ་དག་གིས་ཐོས་ནས་ཅིའི་ཕྱིར་དགེ་སློང་དག་ནམ་མ་ནངས། སྐྱ་རེངས་མ་ཤར་རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་
བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་རྨས་པ། འཆར་ཀ་ཁྱོད་ནམ་མ་ནངས། སྐྱ་རེངས་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་བ་བདེན་ནམ། བཙུན་པ་མད་དོ་སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཅིའི་ཕྱིར་ཞེ་ན། དགེ་སློང་དག་རྒྱལ་པོའི་ཕོ་བྲང་དུ་འགྲོ་བ་ལ་ཉེས་དམིགས་བཅུ་པོ་འདི་དག་ཡོད་པའི་ཕྱིར་ཏེ། བཅུ་གང་ཞེ་ན། དགེ་སློང་དག་འདི་ལ་རྒྱལ་པོ་བཙུན་མོ་དང་ལྷན་ཅིག་འདུག་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ལ། དེ་ནས་བཙུན་མོས་དགེ་སློང་མཐོང་ནས་འཛུམ་འབྱིན་པར་བྱེད་ན་དེ་ལ་རྒྱལ་པོ་འདི་སྙམ་དུ་འདི་ལྟར་བཙུན་མོས་དགེ་སློང་མཐོང་ནས་འཛུམ་འབྱིན་པར་བྱེད་པ་ལས་ན་དགེ་སློང་གིས་དབེན་པར་སྡིག་པའི་ལས་འགའ་ཞིག་བྱ་བར་སེམས་པར་མི་འགྱུར་རམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དང་པོ་ཡིན་ནོ། །གཞན་ཡང་རྒྱལ་པོ་བཙུན་མོའི་གན་དུ་སོང་བ་བརྗེད་དམ། སྦྲུམ་པ་བཙུན་མོའི་འཁོར་གྱི་ནང་དུ་ཞུགས་པར་གྱུར་ལ། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན། དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་གཉིས་པ་ཡིན་ནོ། །གཞན་ཡང་རྒྱལ་པོའི་ཕོ་བྲང་ནས་རིན་པོ་ཆེའམ། རིན་པོ་ཆེར་སྨོན་པ་སྟོར་བར་
གྱུར་ལ་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་གསུམ་པ་ཡིན་ནོ། །གཞན་ཡང་རྒྱལ་པོའི་ཕོ་བྲང་ནས་གསང་ཚིག་ཕྱི་རོལ་དུ་འཕེལ་བར་གྱུར་ལ་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ལ་རྒྱལ་པོ་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བཞི་པ་ཡིན་ནོ། །གཞན་ཡང་རྒྱལ་པོ་གཞོན་ནུ་རྣམས་ལ་གསོད་པར་སེམས་ལ། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་དུ་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་ལྔ་པ་ཡིན་ནོ། །གཞན་ཡང་གཞོན་ནུ་རྣམས་རྒྱལ་པོ་གསོད་པར་སེམས་ཤིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དྲུག་པ་ཡིན་ནོ། །གཞན་ཡང་རྒྱལ་པོས་བློན་པོ་མཐོན་པོ་དག་གནས་དམའ་བར་འཇོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ། དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བདུན་པ་ཡིན་ནོ། །གཞན་ཡང་རྒྱལ་པོས་བློན་པོ་དམའ་བ་དག་གནས་མཐོན་པོར་འཇོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བརྒྱད་པ་ཡིན་ནོ། །གཞན་ཡང་རྒྱལ་པོ་དཔུང་གི་ཚོགས་ཡན་ལག་བཞི་པ་གླང་པོ་ཆེའི་ཚོགས་དང་། རྟ་པའི་ཚོགས་དང་། ཤིང་རྟ་
པའི་ཚོགས་དང་དཔུང་བུ་ཆུང་གི་ཚོགས་གོ་སྐོན་ཏེ་ལྗོངས་དག་ཏུ་འགྲོ་བ་དང་ལྡོག་པར་བྱེད་ཅིང་དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་དགུ་པ་ཡིན་ནོ། །གཞན་ཡང་རྒྱལ་པོ་མ་ཕེབས་པ་འབེབས་པར་བྱེད་ཅིང་ཕེབས་པ་གནས་པར་བྱེད་ལ། ཐོབ་རྒྱལ་དུ་བསྒྲགས་ནས་དེའི་འོག་ཏུ་ཆད་པ་ཆེན་པོས་རྗེས་སུ་རྟོན་པར་བྱེད་ཅིང་། དགེ་སློང་ཡང་རྒྱལ་པོའི་ཕོ་བྲང་དུ་འགྲོ་ན་དེ་ན་གང་དག་ཡིད་མི་དགའ་བ་དེ་དག་འདི་སྙམ་དུ་དགེ་སློང་རྒྱལ་པོའི་ཕོ་བྲང་འདིར་འགྲོ་བ་ལས་ན་དེའི་ལས་མ་ཡིན་ནམ་སྙམ་དུ་སེམས་པར་འགྱུར་ཏེ། དེ་ནི་རྒྱལ་པོའི་ཕོ་བྲང་དུ་འགྲོ་བའི་ཉེས་དམིགས་བཅུ་པ་ཡིན་ནོ། །དགེ་སློང་དག་དེ་ལྟར་ན་རྒྱལ་པོའི་ཕོ་བྲང་དུ་འགྲོ་བ་ནི་གླང་པོ་ཆེའི་གནོད་པ་དང་། རྟའི་གནོད་པ་དང་། ཤིང་རྟའི་གནོད་པ་དང་། དཔུང་བུ་ཆུང་གི་གནོད་པ་འབྱུང་བར་འགྱུར་ཏེ། དགེ་སློང་དག་རྒྱལ་པོའི་ཕོ་བྲང་དུ་འགྲོ་བ་ནི་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ། དགེ་སྦྱོང་གི་ཚུལ་དང་མི་མཐུན་པ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ནམ་མ་ནངས་སྐྱ་རེངས་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ་སྒོ་གཏན་གྱི་ཉེན་ཀོར་ལས་འདའ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །དེའི་ཚེ་ན་འཛམ་བུའི་གླིང་ན་གྲོང་ཁྱེར་
ཆེན་པོ་རྒྱལ་པོའི་ཁབ་དང་། སྒྲ་སྒྲོགས་ཞེས་བྱ་བ་གཉིས་ཡོད་དེ། གང་གི་ཚེ་རྒྱལ་པོའི་ཁབ་རྒུད་པ་དེའི་ཚེ་ན་ནི་སྒྲ་སྒྲོགས་འབྱོར་པར་འགྱུར་ལ། གང་གི་ཚེ་སྒྲ་སྒྲོགས་རྒུད་པ་དེའི་ཚེ་ན་ནི་རྒྱལ་པོའི་ཁབ་འབྱོར་པར་འགྱུར་རོ། །གྲོང་ཁྱེར་ཆེན་པོ་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་ཞེས་བྱ་བས་རྒྱལ་སྲིད་འབྱོར་པ་རྒྱས་པ་བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང་ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་། ནད་དང་བྲལ་བ། སཱ་ལུ་དང་བུ་རམ་ཤིང་གི་ཕྲེང་བ་དང་བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ་ཆོས་དང་ལྡན་པ། ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །དེ་ན་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང་འབྲས་བུ་འཆགས་པ་ཡིན་ཞིང་། ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག་ཤིན་ཏུ་ཕུན་སུམ་ཚོགས་པར་གྱུར་ཏོ། །དེ་ལ་བཙུན་མོ་ཟླ་འོད་ཅེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་པ་དང་། བུ་རྒྱལ་ཚབ་གཙུག་ཕུད་ཅན་ཞེས་བྱ་བ་དང་བློན་པོའི་མཆོག་ཧེ་རུ་ཀ་དང་བྷི་རུ་ཀ་ཞེས་བྱ་བ་གཉིས་ཡོད་དོ། །གྲོང་ཁྱེར་རྒྱལ་པོའི་ཁབ་ན་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །དེ་ན་ཡང་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང་། འབྲས་བུ་འཆགས་ཤིང་ལྷས་ཀྱང་དུས་དང་། དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག་ཤིན་ཏུ་ཕུན་སུམ་ཚོགས་པར་གྱུར་ཏོ། །དེ་ལ་བཙུན་མོ་ལུས་འཕགས་མ་ཞེས་བྱ་བ་གཟུགས་བཟང་བ། བལྟ་ན་སྡུག་པ། མཛེས་པ་ཡན་ལག་དང་ཉིང་ལག་ཐམས་ཅད་དང་ལྡན་པ་དང་། བུ་རྒྱལ་ཚབ་མ་སྐྱེས་དགྲ་ཞེས་བྱ་བ་དང་། བློན་པོའི་མཆོག་མ་ག་དྷཱའི་སྣ་ཆེན་པོ་ལ་
གཏོགས་པ་བྲམ་ཟེ་དབྱར་ཚུལ་ཞེས་བྱ་བ་ཡོད་དོ། །ཇི་ཙམ་དུས་གཞན་ཞིག་ན་རྒྱལ་པོའི་ཁབ་ནས་ཚོང་པ་དག་ཟོང་ཐོགས་ཏེ་ཡུལ་གཞན་དུ་འཕགས་ནས་དེ་དག་མཐར་གྱིས་གྲོང་དང་། གྲོང་རྡལ་དང་ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་ཚོང་འདུས་དག་ལ་རྣམ་པར་ལྟ་བ་ན་གྲོང་ཁྱེར་ཆེན་པོ་སྒྲ་སྒྲོགས་སུ་ཕྱིན་ཏོ། །ཇི་ཙམ་ན་རྒྱལ་པོ་ཨུ་ཏྲ་ཡ་ན་བློན་པོའི་ཚོགས་ཀྱིས་ཡོངས་སུ་བསྐོར་ཏེ་དོན་གྱི་གནས་ན་འདུག་པ་ན་ཚོང་པ་དེ་དག་སྐྱེས་ཐོགས་ཏེ་རྒྱལ་པོ་ཨུ་ཏྲ་ཡ་ནའི་གན་དུ་སོང་བ་དང་། རྒྱལ་པོ་ཨུ་ཏྲ་ཡ་ནས་དེ་དག་ལ་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་ནས་གནས་ཇི་ལྟ་བ་བཞིན་དུ་འཁོད་དོ། །རྒྱལ་པོ་ཨུ་ཏྲ་ཡ་ནས་དེ་དག་མཐོང་ནས་བློན་པོ་རྣམས་ལ་སྨྲས་པ། ཤེས་ལྡན་དག་ཡུལ་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་། མི་མང་པོས་གང་བ་འདི་ལྟ་བུ་དང་། ཤིང་ལྗོན་པ་རྟག་ཏུ་མེ་ཏོག་དང་། འབྲས་བུ་འཆགས་པ་འདི་ལྟ་བུ་དང་། ལྷས་དུས་དང་དུས་སུ་ཆར་གྱི་རྒྱུན་ལེགས་པར་འབེབས་ཤིང་ལོ་ཏོག་ཤིན་ཏུ་ཕུན་སུམ་ཚོགས་པ་དང་ལྡན་པའི་རྒྱལ་པོ་གཞན་འགའ་ཞིག་ཡོད་དམ། ཚོང་པ་དེ་དག་གིས་སྨྲས་པ། ལྷ་མཆིས་ཏེ། ཤར་གྱི་ཡུལ་ན་གྲོང་ཁྱེར་རྒྱལ་པོའི་ཁབ་ཅེས་བགྱི་བ་དེ་ན་རྒྱལ་པོ་གཟུགས་ཅན་སྙིང་པོ་ཞེས་བགྱི་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་། མི་མང་པོས་གང་བ་བགྱིད་དུ་སྩོལ་བ་དེ་ན་ཡང་ཤིང་ལྗོན་པ་དག་ཀྱང་རྟག་ཏུ་མེ་ཏོག་དང་། འབྲས་བུ་འཆགས་ཤིང་། ལྷས་ཀྱང་དུས་དང་དུས་སུ་ཆར་གྱི་རྒྱུན་ལེགས་པར་འབེབས་པས་ལོ་ཏོག་ཤིན་ཏུ་ཕུན་སུམ་ཚོགས་པ་ལགས་སོ། །རྒྱལ་པོ་ཨུ་ཏྲ་ཡ་ནས་ཐོས་ནས་དེ་ལ་རྗེས་སུ་ཆགས་པ་སྐྱེས་ནས་དེས་སྨྲས་པ། ཤེས་ལྡན་དག་རྒྱལ་པོ་དེའི་ཡུལ་ན་ཅི་ཞིག་དཀོན་བློན་པོ་རྣམས་ཀྱིས་སྨྲས་པ། ལྷ་ནི་རིན་པོ་ཆེའི་མངའ་བདག་ལགས་ལ། རྒྱལ་པོ་དེ་ནི་གོས་ཀྱི་བདག་པོ་ལགས་པས་དེ་ལ་རིན་པོ་ཆེ་དག་དཀོན་ནོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་རིན་པོ་ཆེ་རྟོག་པ་དག་བོས་ཤིག་ཅེས་རྒྱལ་པོས་རིན་པོ་ཆེ་དག་བརྟགས་ཤིང་བརྟགས་ཤིང་སྒྲོམ་བཀང་ནས་
ཚོང་པ་དེ་དག་གི་ལག་ཏུ་སྐྱེས་སུ་བསྐུར་ཞིང་ཕྲིན་ཡིག་ཀྱང་། ཤེད་མཐུན་དགྱེས་པ་ཁྱོད་བདག་གིས་མ་མཐོང་བའི་གྲོགས་ལགས་ཀྱིས། གལ་ཏེ་གྲོང་ཁྱེར་སྒྲ་སྒྲོགས་སུ་ཁྱོད་ལ་བགྱི་བ་ཅུང་ཟད་མཆིས་ན་བདག་ལ་ཕྲིན་ཡིག་སྐུར་ཅིག་དང་ཐམས་ཅད་བསྒྲུབ་བོ་ཞེས་བྲིས་ཏེ་བསྐུར་རོ། །དེ་ནས་ཚོང་པ་དེ་དག་གིས་སྐྱེས་དང་། ཕྲིན་ཡིག་དང་ཟོང་རིན་ཁྱེར་ཏེ་རྒྱལ་པོའི་ཁབ་ཏུ་འཕགས་ནས་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ནས་རིན་པོ་ཆེའི་སྒྲོམ་དང་། ཕྲིན་ཡིག་དེ་དག་ཁྱེར་ཏེ། རྒྱལ་པོ་གཟུགས་ཅན་སྙིང་པོའི་གན་དུ་དོང་ནས་རྐང་པ་གཉིས་ལ་གཏུགས་ཏེ། སྒྲོམ་དང་ཕྲིན་ཡིག་དག་ཕུལ་ནས་སྨྲས་པ། ལྷ་གྲོང་ཁྱེར་སྒྲ་སྒྲོགས་ནས་རྒྱལ་པོ་ཨུ་ཏྲ་ཡ་ན་ཞེས་བགྱི་བ་དེས་ལྷ་ལ་སྐྱེས་དང་ཕྲིན་ཡིག་འདི་དག་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་བཀླགས་ཏེ་སྨྲས་པ། ཤེས་ལྡན་དག་རྒྱལ་པོ་དེའི་ཡུལ་ན་ཅི་ཞིག་དཀོན། བློན་པོ་རྣམས་ཀྱིས་སྨྲས་པ། ལྷ་ནི་གོས་ཀྱི་མངའ་བདག་ལགས་ལ། རྒྱལ་པོ་དེ་ནི་རིན་པོ་ཆེའི་བདག་པོ་ལགས་པས་དེ་ལ་གོས་དག་དཀོན་ནོ། །དེ་ནས་རྒྱལ་པོ་གཟུགས་ཅན་སྙིང་པོས་གོས་རིན་པོ་ཆེ་དག་གིས་སྒྲོམ་བཀང་སྟེ་སྐྱེས་སུ་བསྐུར་ཞིང་། ཕྲིན་ཡིག་ཀྱང་ཤེད་མཐུན་དགྱེས་པ་ཁྱོད་ཀྱིས་ཕྲིན་ཡིག་སྤྲིང་པ་དེས་མཇལ་ཏེ་ཁྱོད་ཀྱང་བདག་གིས་མ་མཐོང་བའི་གྲོགས་ལགས་ཀྱིས་རྒྱལ་པོའི་ཁབ་ཏུ་ཁྱོད་ལ་ཡང་བགྱི་བ་ཅུང་ཟད་མཆིས་ན་བདག་ལ་ཕྲིན་ཡིག་སྤྲིང་ཤིག་དང་། ཐམས་ཅད་བསྒྲུབ་བོ་ཞེས་བྲིས་ཏེ་བློན་པོ་རྣམས་ལ་བསྒོ་བ། སྐྱེས་དང་ཕྲིན་ཡིག་འདི་དག་ཁྱེར་ལ་ཕོ་ཉ་དག་ལས་སྐུར་ཅིག །བློན་པོ་རྣམས་ཀྱིས་ཕོ་ཉ་དག་ལས་བསྐུར་བ་དང་དེ་དག་གིས་སྐྱེས་དང་ཕྲིན་ཡིག་དེ་དག་ཁྱེར་ཏེ། སྒྲ་སྒྲོགས་སུ་འཕགས་ནས་མཐར་གྱིས་སྒྲ་སྒྲོགས་སུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ཏེ་གོས་ཀྱི་སྒྲོམ་དང་ཕྲིན་ཡིག་དེ་དག་ཁྱེར་ནས་རྒྱལ་པོ་ཨུ་ཏྲ་ཡ་ནའི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྒྲོམ་དང་ཕྲིན་ཡིག་དག་ཕུལ་ཏེ་སྨྲས་པ། ལྷ་རྒྱལ་པོ་གཟུགས་ཅན་སྙིང་པོས་ལྷ་ལ་སྐྱེས་འདི་དང་ཕྲིན་འདི་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་བཀླགས་ཏེ་སྨྲས་པ། ཤེས་ལྡན་དག་རྒྱལ་པོ་དེའི་ཆུ་ཞེང་
ཅི་འདྲ། དེ་དག་གིས་སྨྲས་པ། ལྷའི་ཅི་འདྲ་བ་ཁོ་ན་ལྟ་བུའོ། །བློན་པོ་རྣམས་ཀྱིས་སྨྲས་པ། ལྷ་དེ་ལྟ་བུ་ལགས་མོད་ཀྱི་འོན་ཀྱང་རྒྱལ་པོ་དེ་རང་གིས་མཚོན་འདེབས་པ། ཉེན་ཀོར་གྱི་མཁར་གྱི་རྒྱལ་པོ་རྣམས་དང་ལྷན་ཅིག་རང་གིས་གཡུལ་འགྱེད་ཅིང་གཡུལ་འགྱེད་དུ་སྩོལ་བ་ལགས་སོ། །རྒྱལ་པོ་ཨུ་ཏྲ་ཡ་ན་ལ་ནོར་བུའི་ཁྲབ་ཡན་ལག་ལྔ་པོ་དུས་ཚིགས་སུ་རེག་པ་བདེ་བ་དང་། གཅད་དཀའ་བ་དང་། དབུག་དཀའ་བ་དང་། དུག་འཇིལ་བ་དང་། སྣང་བའི་བདག་ཉིད་དང་ལྡན་པ་ཞིག་ཡོད་ནས། རྒྱལ་པོ་ཨུ་ཏྲ་ཡ་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་དེ་གལ་ཏེ་རང་གིས་མཚོན་འདེབས་པ། ཉེན་ཀོར་གྱི་མཁར་གྱི་རྒྱལ་པོ་རྣམས་དང་ལྷན་ཅིག་གཡུལ་འགྱེད་ཅིང་འགྱེད་དུ་འཇུད་པ་ཡིན་ན་དེ་ལ་ནོར་བུའི་ཁྲབ་འདི་བསྐུར་གྱིས་ཕོ་ཉ་དག་སྟ་གོན་གྱིས་ཤིག །དེ་དག་གིས་ཕོ་ཉ་དག་སྟ་གོན་བྱས་ནས། རྒྱལ་པོ་ཨུ་ཏྲ་ཡ་ནས་རིན་པོ་ཆེའི་ཁྲབ་དེ་དང་ཕྲིན་ཡིག་ཀྱང་འདི་སྐད་ཅེས་ཤེད་མཐུན་དགྱེས་པ་ཁྱོད་ལ་བདག་གིས་ནོར་བུའི་ཁྲབ་འདི་སྐྱེས་སུ་བསྐུར་ཏེ། འདི་ཡང་ཡོན་ཏན་ལྔ་པོ་དུས་ཚིགས་སུ་རེག་པ་བདེ་བ་དང་། གཅད་དཀའ་བ་དང་། དབུག་དཀའ་བ་དང་། དུག་འཇིལ་བ་དང་། སྣང་བའི་བདག་ཉིད་དང་ལྡན་པ་ལགས་ཀྱིས་ཁྱོད་ཀྱིས་འདི་བདག་དང་རྐྱེན་པས་རང་ཉིད་ཀྱིས་བཅང་བར་བགྱི་ཞིང་སུ་ལ་ཡང་སྩལ་བར་མི་བགྱིའོ་ཞེས་བྲིས་ཏེ་བསྐུར་རོ། །ཕོ་ཉ་རྣམས་ཀྱིས་སྐྱེས་དེ་དང་ཕྲིན་ཡིག་ཁྱེར་ཏེ་རྒྱལ་པོའི་ཁབ་ཏུ་འཕགས་ནས་མཐར་གྱིས་རྒྱལ་པོའི་ཁབ་ཏུ་ཕྱིན་ཏོ། །དེ་ནས་ལམ་གྱིས་དུབ་པའི་ངལ་བསོས་ནས་ནོར་བུའི་ཁྲབ་དེ་དང་ཕྲིན་ཡིག་ཁྱེར་ཏེ། རྒྱལ་པོ་གཟུགས་ཅན་སྙིང་པོའི་གན་དུ་དོང་ནས་རྐང་པ་གཉིས་ལ་གཏུགས་ཏེ་ནོར་བུའི་ཁྲབ་དང་། ཕྲིན་ཡིག་ཕུལ་ནས་སྨྲས་པ། ལྷ་རྒྱལ་པོ་ཨུ་ཏྲ་ཡ་ནས་ལྷ་ལ་སྐྱེས་འདི་དང་ཕྲིན་ཡིག་འདི་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་བཀླགས་ཏེ་ནོར་བུའི་ཁྲབ་དེ་མཐོང་ནས་མཆོག་ཏུ་ཡ་མཚན་སྐྱེས་ཏེ། བློན་པོ་རྣམས་ལ་སྨྲས་པ། ཤེས་ལྡན་དག་རིན་
པོ་ཆེ་རྟོག་པ་དག་བོས་ཤིག །དེ་དག་གིས་རིན་པོ་ཆེ་རྟོག་པ་དག་བོས་ནས་རྒྱལ་པོས་སྨྲས་པ། ཤེས་ལྡན་དག་རིན་པོ་ཆེ་འདིའི་རིན་ཐང་ཆོད་ཅིག། རིན་པོ་ཆེ་རྟོག་པ་དག་གིས་ནོར་བུའི་ཁྲབ་དང་ལྡན་པའི་རིན་པོ་ཆེ་རེ་རེ་ནས་བརྟག་པར་བརྩམས་ན་རིན་པོ་ཆེ་རེ་རེ་ཡང་རིན་ཐང་མེད་པར་མཐོང་ནས། དེ་དག་གིས་རྒྱལ་པོ་ལ་སྨྲས་པ། ལྷ་འདི་ལ་ནོར་བུ་རིན་པོ་ཆེ་རེ་རེ་ཡང་རིན་ཐང་མ་མཆིས་པ་ལགས་སོ། །ཆོས་ཉིད་ཀྱིས་ན་རིན་པོ་ཆེ་གང་གིས་རིན་ཐང་གདབ་པར་མི་ནུས་པ་དེའི་རིན་ཐང་བྱེ་བར་འདེབས་སོ། །རྒྱལ་པོ་གཟུགས་ཅན་སྙིང་པོས་རིན་པོ་ཆེ་དག་བགྲངས་ནས། བདག་གིས་དེ་ལ་སྐྱེས་ལན་ཅི་ཞིག་བསྐུར་བར་བྱ་སྙམ་དུ་ཉམ་ང་བར་གྱུར་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་ནས་བློན་པོ་རྣམས་ལ་སྨྲས་པ། ཤེས་ལྡན་དག་རྒྱལ་པོ་ཨུ་ཏྲ་ཡ་ནས་ང་ལ་སྐྱེས་འདི་ལྟ་བུ་བསྐུར་ན་ངས་དེ་ལ་སྐྱེས་ལན་ཅི་ཞིག་བསྐུར་བར་བྱ། མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་ཚུལ་གྱིས་སྨྲས་པ། ལྷ་ཁྱོད་ཀྱི་ཡུལ་དུ་ཡང་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པའི་རིན་པོ་ཆེ་བྱུང་བ་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལགས་ཀྱིས། ཁྱོད་ཀྱིས་ཀྱང་རས་ལ་སངས་རྒྱས་ཀྱི་སྐུ་གཟུགས་འདྲིར་སྩོལ་ལ་སྐྱེས་ལན་དུ་བསྐུར་བར་གསོལ། རྒྱལ་པོས་སྨྲས་པ། གལ་ཏེ་དེ་ལྟ་ན་བཅོམ་ལྡན་འདས་ལ་ཞུའོ་ཞེས་དེ་ནས་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་ཞེས་བགྱི་བ་བདག་གིས་མ་མཐོང་བའི་གྲོགས་ཤིག་མཆིས་པ་དེས་བདག་ལ་ནོར་བུའི་ཁྲབ་ཡན་ལག་ལྔ་དང་ལྡན་པ་ཞིག་སྐྱེས་སུ་བསྐུར་ཏེ། དེའི་སླད་དུ་གལ་ཏེ་བཅོམ་ལྡན་འདས་ཀྱིས་གནང་ན་བདག་གིས་ཀྱང་རས་ལ་བཅོམ་ལྡན་འདས་ཀྱི་སྐུ་གཟུགས་འདྲིར་སྩལ་ཏེ་དེ་ལ་སྐྱེས་ལན་དུ་བསྐུར་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གནང་གིས་སྐུར་ཅིག །ཁྱོད་ཀྱི་སེམས་སྐྱེས་པ་བཟང་སྟེ། རྒྱལ་པོ་ཨུ་ཏྲ་ཡ་ནས་མཐོང་མ་ཐག་ཁོ་ནར་དད་པ་སྐྱེ་བར་འགྱུར་ཞིང་
བདེན་པ་མཐོང་བར་བྱེད་པར་འགྱུར་རོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེས་ཡུལ་ཐམས་ཅད་ན་གནས་པའི་རི་མོ་མཁན་དག་བཀུག་སྟེ་སྨྲས་པ། ཤེས་ལྡན་དག་བཅོམ་ལྡན་འདས་ཀྱི་སྐུ་གཟུགས་རས་ལ་བྲིས་ཤིག །དེ་དག་གིས་སྨྲས་པ། ལྷ་བྲི་བར་འཚལ་ལོ། །དེ་དག་གིས་བཅོམ་ལྡན་འདས་ཀྱི་མཚན་མ་གཟུང་བར་བརྩམས་པ་དང་། སངས་རྒྱས་བཅོམ་ལྡན་འདས་རྣམས་ནི་བལྟ་བས་ཆོག་མི་ཤེས་པ་ཡིན་པས་དེ་དག་གིས་བཅོམ་ལྡན་འདས་ཀྱི་མཚན་མ་གཟུང་བར་མ་ནུས་ནས་དེ་དག་ཡི་ཆད་དེ་རྒྱལ་པོའི་གན་དུ་སོང་ནས་སྨྲས་པ། ལྷ་བདག་ཅག་གིས་བཅོམ་ལྡན་འདས་ཀྱི་མཚན་མ་གཟུང་བར་རྔོ་མ་ཐོག་སྟེ། གལ་ཏེ་ལྷས་བཅོམ་ལྡན་འདས་ཕོ་བྲང་གཞན་དུ་སྤྱན་དྲངས་ཏེ་གདུགས་ཚོད་གསོལ་ན། དེ་ལྟ་ན་བདག་ཅག་གིས་བཅོམ་ལྡན་འདས་ཀྱི་མཚན་མ་གཟུང་བར་རྔོ་ཐོག་གོ །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཕོ་བྲང་གཞན་དུ་སྤྱན་དྲངས་ཀྱང་སངས་རྒྱས་བཅོམ་ལྡན་འདས་རྣམས་ནི་བལྟ་བས་ཆོག་མི་ཤེས་པ་ཡིན་པས་འདི་ལྟར་དེ་དག་གིས་བཅོམ་ལྡན་འདས་ཀྱི་སྐུ་མཐོང་བ་ན་དེ་དང་དེ་ལ་བལྟ་བས་ངོམས་པར་མ་གྱུར་ནས། དེ་ལྟ་ན་ཡང་བཅོམ་ལྡན་འདས་ཀྱི་མཚན་མ་གཟུང་བར་མ་ནུས་ནས་བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་རི་མོ་མཁན་རྣམས་ཀྱིས་དེ་བཞིན་གཤེགས་པའི་མཚན་མ་གཟུང་བར་མི་ནུས་ཀྱི་ཡི་ཆད་པར་མ་བྱེད་པར་རས་དེ་འོན་ཅིག་དང་ངས་གྲིབ་མ་གཏང་བར་བྱའོ། །རྒྱལ་པོས་རས་ཕུལ་བ་དང་། བཅོམ་ལྡན་འདས་ཀྱིས་དེར་གྲིབ་མ་བཏང་སྟེ་རི་མོ་མཁན་རྣམས་ལ་བཀའ་སྩལ་པ། ཤེས་ལྡན་དག་གྲིབ་མ་འདིར་ཚོན་སྣ་ཚོགས་ཀྱིས་ཁོང་ཤིག །རྒྱལ་པོ་ལ་ཡང་བཀའ་སྩལ་པ། རྒྱལ་པོ་ཆེན་པོ་སྐུ་གཟུགས་བྱས་ཟིན་ནས་འོག་ཏུ་སྐྱབས་སུ་འགྲོ་བ་དང་། བསླབ་པའི་གཞི་དག་དང་། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་། ལུགས་ལས་བཟློག་པ་དག་བྲི་བར་བྱའོ། །སྟེང་དུ་ཚིགས་སུ་བཅད་པ་གཉིས་པོ། བརྩམ་པར་བྱ་ཞིང་འབྱུང་བར་
བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་དག་བྲི་བར་བྱའོ། །ཕོ་ཉ་དག་ལ་ཡང་ཕྲིན་དུ་ས་ཕྱོགས་གོ་སྐབས་ཡངས་པར་བཀུར་སྟི་ཆེན་པོས་སྐུ་གཟུགས་དབྱེ་བར་བྱ་སྟེ། གལ་ཏེ་འདི་ཅི་ཡིན་ཞེས་འདྲི་ན། འདི་ནི་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པ་སངས་རྒྱས་བཅོམ་ལྡན་འདས་ཀྱི་སྐུ་གཟུགས་ཡིན་ནོ་ཞེས་བརྗོད་པར་བྱའོ། །གལ་ཏེ་འོག་ཏུ་བྲིས་པ་འདི་ཅི་ཡིན་ཞེས་འདྲི་ན་འདི་ནི་ཁས་ལེན་པའོ། །འདི་ནི་བསླབ་པའི་གཞི་དག་གོ །འདི་ནི་འཇིག་རྟེན་གྱི་འབྱུང་བ་དང་ལྡོག་པའོ་ཞེས་བརྗོད་པར་བྱའོ། །གལ་ཏེ་སྟེང་དུ་བྲིས་པ་འདི་ཅི་ཡིན་ཞེས་འདྲི་ན་འདི་ནི་མངོན་པར་སྤྲོ་བར་བྱ་བའོ་ཞེས་བརྗོད་པར་བྱའོ་ཞེས་སྒོ་ཞིག །རྒྱལ་པོས་ཐམས་ཅད་བྲིས་ཤིང་འདྲིར་བཅུག་ནས་དྲི་སྣ་ཚོགས་ཀྱིས་བསྒོས་ཏེ་ལེགས་པར་དྲིལ་ནས་གསེར་གྱི་དོང་བུར་བཅུག་སྟེ། གསེར་གྱི་དོང་བུ་ཡང་དངུལ་གྱི་དོང་བུར་བཅུག །དངུལ་གྱི་དོང་བུ་ཡང་ཟངས་ཀྱི་དོང་བུར་བཅུག །ཟངས་ཀྱི་དོང་བུ་ཡང་དྲི་སྣ་ཚོགས་ཀྱིས་བསྒོས་པའི་གོས་དག་གིས་དཀྲིས་ཏེ། གླང་པོ་ཆེའི་རྒྱབ་ཏུ་བཀལ་ནས་གྲོང་ཁྱེར་མཛེས་པ་དང་། ལམ་མཛེས་པ་ཆེན་པོས་གྲོང་ཁྱེར་ནས་ཕྱུང་སྟེ། རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་འདི་སྐད་ཅེས་ཤེད་མཐུན་དགྱེས་པ་ཁྱོད་ལ་བདག་གིས་འཇིག་རྟེན་གསུམ་ལས་ཆེས་ཁྱད་པར་དུ་འཕགས་པའི་སྐྱེས་འདི་བསྐུར་གྱིས་ཁྱོད་ཀྱིས་འདི་དཔག་ཚད་ཕྱེད་དང་གསུམ་དུ་གྲོང་ཁྱེར་མཛེས་པ་དང་། ལམ་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ་ས་ཕྱོགས་གོ་སྐབས་ཡངས་པར་མཆོད་པ་དང་བཀུར་སྟི་ཆེན་པོ་བྱས་ཏེ་དབྱེ་བར་བྱའོ། །དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ། །ཕོ་ཉ་རྣམས་ལ་ཡང་ཁྱེད་ཀྱིས་འདི་དང་འདི་སྐད་ཅེས་བརྗོད་པར་བྱའོ་ཞེས་བསྒོ་ནས། དེ་དག་གིས་སྐུ་གཟུགས་དང་ཕྲིན་ཡིག་དེ་ཁྱེར་ཏེ་སྒྲ་སྒྲོགས་སུ་འཕགས་སོ། །དེ་དག་མཐར་གྱིས་སྒྲ་སྒྲོགས་ཀྱི་འདབ་ཏུ་ཕྱིན་ནས་དེ་དག་གིས་ལམ་གར་བསྡད་
དེ་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་བཀླགས་ནས་ཁྲོ་བས་ཀུན་ནས་དཀྲིས་པར་གྱུར་ཏེ། བློན་པོ་རྣམས་ལ་སྨྲས་པ། ཤེས་ལྡན་དག་དེས་ང་ལ་ཕྲིན་ཡིག་འདི་སྐད་སྤྲིང་བ་ལ་ཉོན་ཅིག །དེས་ང་ལ་སྐྱེས་ཇི་ལྟ་བུ་ཞིག་བསྐུར་ན་དེའི་ཕྱིར་ངས་དཔག་ཚད་ཕྱེད་དང་གསུམ་དུ་གྲོང་ཁྱེར་མཛེས་པ་དང་། ལམ་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱའོ་ཞེས་ཟེར། དཔུང་གི་ཚོགས་ཡན་ལག་བཞི་པ་སྟ་གོན་གྱིས་ཤིག་དང་ད་སོང་ལ་དེའི་ཡུལ་འཁོར་གཞོམ་པར་བྱའོ། །བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་དེ་ནི་བདག་ཉིད་ཆེན་པོ་ཞིག་ལགས་ཞེས་གདའ་བས་དེས་ལྷའི་ཞལ་སྔར་སྐྱེས་ངན་ངོན་ཞིག་བསྐུར་བར་རྔོ་མི་ཐོག་པས་ཇེ་བརྟག་པར་བགྱིས་ཏེ། གལ་ཏེ་ལྷའི་ཐུགས་མཉེས་ན་དེ་ལྟ་ན་ལེགས། གལ་ཏེ་མ་མཉེས་ན་བདག་ཅག་གིས་དེ་ལ་དུས་འཚལ་བར་བགྱིའོ། །དེ་དག་གིས་དཔག་ཚད་ཕྱེད་དང་གསུམ་ཚུན་ཆད་དུ་ལམ་མཛེས་པ་བྱེད་དུ་བཅུག་སྟེ། གྲོང་ཁྱེར་སྒྲ་སྒྲོགས་ཀྱང་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་གཞག་ནས་ཙན་དན་གྱི་ཆུས་ཆག་ཆག་བཏབ་ཅིང་བདུག་སྤོས་དྲི་ཞིམ་པོའི་སྣོད་དག་དངར་ཏེ་དར་གྱི་ཆུན་པོའི་ཕྲེང་བ་དཔྱངས་ཤིང་། གདུགས་དང་། རྒྱལ་མཚན་བསྒྲེང་སྟེ། མེ་ཏོག་སྣ་ཚོགས་བཀྲམ་ཞིང་ལྷའི་སྐྱེད་མོས་ཚལ་དགའ་བའི་ཚལ་ཞེས་བྱ་བ་ལྟར་དགའ་བར་འགྱུར་བར་བྱས་ནས་རྒྱལ་པོ་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་ནས་གྲོང་ཁྱེར་གྱི་ནང་དུ་འཇུག་ཏུ་བཅུག་གོ །དེ་ནས་སྲོག་ཆགས་བྱེ་བ་འབུམ་ཕྲག་དུ་མ་དག་ཀྱང་དེར་འདུས་པར་གྱུར། ནམ་མཁའི་དཀྱིལ་དུ་ཡང་ལྷ་འབུམ་ཕྲག་དུ་མ་དག་འདུས་པར་གྱུར་ནས་ས་ཕྱོགས་གོ་སྐབས་ཡངས་པར་དེ་དག་གི་ནང་དུ་མཆོད་པ་ཆེན་པོ་བྱས་ཏེ་སྐུ་གཟུགས་དེ་ཕྱེ་བ་དང་། ཡུལ་དབུས་ནས་ཚོང་པ་མང་པོ་ཟོང་ཐོགས་ཏེ་གྲོང་ཁྱེར་སྒྲ་སྒྲོགས་སུ་ལྷགས་པ་དེ་དག་གིས་སངས་རྒྱས་ཀྱི་སྐུ་གཟུགས་དེ་མཐོང་ནས་སངས་རྒྱས་ལ་ཕྱག་འཚལ་ལོ། །སངས་རྒྱས་ལ་ཕྱག་འཚལ་ལོ་ཞེས་ཐམས་ཅད་ཀྱིས་སྐད་ཅིག་ཏུ་སྒྲ་ཕྱུང་ངོ་། །རྒྱལ་པོ་ཨུ་ཏྲ་ཡ་ནས་
སངས་རྒྱས་ཞེས་བྱ་བའི་སྒྲ་སྔོན་མ་ཐོས་པ་ཐོས་ནས་སྤུའི་ཁུང་བུ་ཐམས་ཅད་ཟིང་ཞེས་བྱེད་པར་གྱུར་ནས་ཡ་མཚན་སྐྱེས་ཏེ་ཡུན་རིང་མོ་ཞིག་ཏུ་མིག་ཚུགས་སུ་བརྟགས་ནས་སྨྲས་པ། ཤེས་ལྡན་དག་སངས་རྒྱས་ཞེས་བྱ་བ་དེ་སུ་ཡིན། དེ་དག་གིས་སྨྲས་པ། ལྷ་ཡུལ་དབུས་ན་གངས་ཀྱི་རི་ངོས་དང་ཉེ་བ་ཆུ་ཀླུང་སྐལ་ལྡན་ཤིང་རྟ་པའི་འགྲམ་དྲང་སྲོང་སེར་སྐྱའི་བསྟི་གནས་དང་ཧ་ཅང་མི་རིང་བར་ཤཱཀྱ་རྣམས་ཀྱི་གཞོན་ནུ་བྱུང་སྟེ། དེ་བྲམ་ཟེ་ལྟས་པ་དང་མཚན་མཁན་དག་གིས་གལ་ཏེ་གཞོན་ནུ་དེ་ཕོ་བྲང་གི་ནང་ན་བཞུགས་པར་གྱུར་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྒྱལ་བ། ཆོས་ཀྱི་རྒྱལ་པོ། ཆོས་དང་ལྡན་པ། རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་པོ་དེ་དག་ནི་འདི་ལྟ་བུར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། དམག་དཔོན་རིན་པོ་ཆེ་ཉིད་ནི་བདུན་པ་ཡིན་ནོ། །འདི་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཚང་བ་ཡོད་པར་འགྱུར་རོ། །དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་འཚེ་བ་མེད་ཅིང་མཚོན་གྱིས་བདའ་བ་མེད་ལ་ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །གལ་ཏེ་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ན་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་རྣམ་པར་གྲགས་པའི་སྒྲ་དང་ལྡན་པར་འགྱུར་རོ་ཞེས་ལུང་བསྟན་ཏེ། ལྷ་འདི་ནི་དེའི་སྐུ་གཟུགས་ལགས་སོ། །རྒྱལ་པོ་རྒྱ་ཆེར་ཡིད་དགའ་ནས་སྨྲས་པ། ཤེས་ལྡན་དག་དེ་ནི་ཤེས་ཀྱིས་འདི་དྲིའོ། །འོག་ཏུ་བྲིས་པ་འདི་ཅི་ཡིན། ལྷ་འདི་ནི་ཁས་ལེན་པ་ལགས་སོ། །འདི་ནི་བསླབ་པའི་གཞི་དག་ལགས་སོ། །འདི་ནི་འཇིག་རྟེན་གྱི་འབྱུང་བ་དང་ལྡོག་པ་དག་ལགས་སོ། །ཤེས་ལྡན་དག་དེ་ཡང་ཤེས་ཀྱིས་འདི་དྲིའོ། །སྟེང་དུ་བྲིས་པ་འདི་ཅི་ཡིན། ལྷ་འདི་ནི་
མངོན་པར་སྤྲོ་བར་བགྱི་བ་ལགས་སོ། །རྒྱལ་པོ་ཨུ་ཏྲ་ཡ་ནས་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་། ལུགས་ལས་བཟློག་པ་ཡང་བཟླས་པ་ཡང་བཟླས་ནས་ལེགས་པར་གཟུང་བ་བྱས་ཏེ། མཚན་མོ་ནམ་ནངས་པའི་ཚེ་དོན་ཐམས་ཅད་དང་ལས་ཀྱི་མཐའ་ཐམས་ཅད་བག་ཡངས་སུ་བྱས་ཏེ་འདུག་ནས་སྐྱིལ་མོ་ཀྲུང་བཅས་ཏེ་ལུས་དྲང་པོར་བསྲང་ནས་དྲན་པ་ཕྱོགས་པར་བཞག་སྟེ། རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་། ལུགས་ལས་བཟློག་པ་ལ་རྣམ་པར་ལྟ་བར་བྱེད་དེ། འདི་ལྟ་སྟེ་འདི་ཡོད་པས་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག། སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ་འདི་མེད་པས་འདི་མི་འབྱུང་ལ། འདི་མ་སྐྱེས་པའི་ཕྱིར་འདི་མི་སྐྱེ་བ་སྟེ། འདི་ལྟ་སྟེ་མ་རིག་པ་འགགས་པས་འདུ་བྱེད་རྣམས་འགག །འདུ་བྱེད་རྣམས་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག །རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་དང་། མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་
དང་འཁྲུག་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ་ཞེས་རྣམ་པར་ལྟ་བར་བྱེད་དེ། དེས་རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་ལུགས་སུ་འབྱུང་བ་དང་ལུགས་ལས་བཟློག་པ་ལ་རྣམ་པར་ལྟ་བ་ན་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ། །དེས་བདེན་པ་མཐོང་ནས་ཚིགས་སུ་བཅད་པ་སྨྲས་པ། རིང་ན་བཞུགས་པའི་སངས་རྒྱས་ཀྱིས། །ཤེས་རབ་ཀྱི་མིག་རྣམ་པར་སྦྱངས། །གང་ལ་དེ་འདྲའི་གསོས་མངའ་བ། །སྨན་པའི་མཆོག་ལ་ཕྱག་འཚལ་ལོ། །དེས་ཤེས་ནས་དད་པ་དང་ལྡན་པས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་འདི་སྐད་ཅེས་ཤེད་མཐུན་དགྱེས་པ་ཁྱོད་ལ་བརྟེན་ནས་བདག་གིས་སེམས་ཅན་དམྱལ་བ་དང་། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བྱས། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཅད། མཐོ་རིས་དང་ཐར་པའི་སྒོ་དག་ནི་ཕྱེ། ཐོག་མ་མེད་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་མངོན་སུམ་དུ་བྱས་ཏེ། བདག་དགེ་སློང་མཐོང་བར་འདོད་ཀྱིས་ཁྱོད་ཀྱིས་དགེ་སློང་འགའ་ཞིག་གཏང་བའི་རིགས་སོ་ཞེས་བྲིས་ཏེ་སྤྲིང་ངོ་། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་དེ་བཀླགས་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ནས་བདེན་པ་དག་མཐོང་ནས་དེས་བདག་ལ་ཕྲིན་ཡིག་བསྐུར་ཏེ། དགེ་སློང་མཐོང་བར་འཚལ་གྱིས་དགེ་སློང་འགའ་ཞིག་གཏང་བའི་རིགས་སོ་ཞེས་མཆི་ན། དེའི་སླད་དུ་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་
འདས་ཀྱིས་དགོངས་པ། རྒྱལ་པོ་ཨུ་ཏྲ་ཡ་ན་འཁོར་དང་བཅས་པ་དང་གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་དགེ་སློང་གང་གིས་གདུལ་བ་ཡིན་སྙམ་དུ་དགོངས་ན། དགེ་སློང་ཀཱ་ཏྱཱ་ཡ་ན་ཆེན་པོའི་གདུལ་བ་ཡིན་པར་གཟིགས་ནས། བཅོམ་ལྡན་འདས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་བཀའ་སྩལ་པ། ཀཱ་ཏྱཱ་ཡ་ན་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ན་འཁོར་དང་བཅས་པ་དང་། སྒྲ་སྒྲོགས་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་གྲོང་ཁྱེར་སྒྲ་སྒྲོགས་ག་ལ་བ་དེར་དོང་ངོ་། །རྒྱལ་པོ་གཟུགས་ཅན་སྙིང་པོས་ཀྱང་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་ཤེད་མཐུན་དགྱེས་པ་ཁྱོད་ཀྱི་ཕྱིར་བདག་གིས་དགེ་སློང་སྟོན་པ་དང་འདྲ་བ་འདི་འཁོར་ལྔ་བརྒྱ་དང་བཏང་གིས་ཁྱོད་ཀྱིས་དཔག་ཚད་ཕྱེད་དང་གསུམ་དུ་ལམ་མཛེས་པ་དང་། གྲོང་ཁྱེར་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ། གྲོང་ཁྱེར་གྱི་ཕྱི་རོལ་དུ་གཙུག་ལག་ཁང་ལྔ་བརྒྱ་བྱེད་དུ་གཞུག་ཅིང་ཁྲི་དང་། ཁྲིའུ་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་ལྔ་བརྒྱ་ཡང་སྦྱིན་པར་བྱ། བསོད་སྙོམས་ལྔ་བརྒྱ་ཡང་སྦྱོར་དུ་གཞུག་པར་བྱ་སྟེ། དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་པར་འགྱུར་རོ་ཞེས་བྲིས་ཏེ་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་བཀླགས་ནས་དགའ་བ་དང་། མཆོག་ཏུ་དགའ་བ་སྐྱེས་ཏེ་དེས་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་
མཛེས་པར་བྱེད་དུ་བཅུག་ནས་བདག་ཉིད་དཔུང་གི་ཚོགས་ཡན་ལག་བཞི་པ་དང་། སྐྱེ་བོ་འབུམ་ཕྲག་དུ་མའི་འཁོར་དང་བཅས་པས་བསུ་ནས་བཀུར་སྟི་ཆེན་པོས་གྲོང་ཁྱེར་སྒྲ་སྒྲོགས་སུ་འཇུག་ཏུ་བཅུག་ཅིང་། གྲོང་ཁྱེར་གྱི་ཕྱི་རོལ་དུ་གཙུག་ལག་ཁང་ལྔ་བརྒྱ་ཡང་བྱེད་དུ་བཅུག །ཁྲི་དང་ཁྲིའུ་དང་སྟན་ནང་ཚངས་ཅན་དང་། ལ་བ་དང་སྔས་དང་གོར་བུ་ལྔ་བརྒྱ་ཡང་འབུལ་དུ་བཅུག །བསོད་སྙོམས་ལྔ་བརྒྱ་ཡང་སྦྱོར་དུ་བཅུག་སྟེ། ས་ཕྱོགས་གོ་སྐབས་ཡངས་པར་སྟན་ཤོམ་དུ་བཅུག་གོ །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ །སྲོག་ཆགས་འབུམ་ཕྲག་དུ་མ་དག་ཀྱང་ཁ་ཅིག་ནི་ལྟད་མོ་སྐྱེས་པ་ན། ཁ་ཅིག་ནི་སྔོན་གྱི་དགེ་བའི་རྩ་བ་དག་གིས་བསྐུལ་བ་ན་དེར་འདུས་པར་གྱུར་ཏོ། །དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་འཁོར་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས་སྲོག་ཆགས་འབུམ་ཕྲག་དུ་མ་དག་གིས་གང་ཐོས་ནས་ཁྱད་པར་ཆེན་པོ་རྟོགས་པར་གྱུར་པ་དེ་ལྟ་བུའི་ཆོས་བསྟན་པ་བྱས་ཏེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་རབ་ཏུ་བྱུང་སྟེ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་སོ། །ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་རང་བྱང་ཆུབ་ཏུ་སེམས་བསྐྱེད། ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཁོར་ཕལ་ཆེར་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་བབ་པར་བཀོད་དོ། །གྲོང་ཁྱེར་སྒྲ་སྒྲོགས་ན་ཁྱིམ་བདག་རྒྱལ་དང་། སྐར་རྒྱལ་ཞེས་བྱ་བ་གཉིས་ཤིག་འཁོད་པ་དེ་གཉིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ག་ལ་བ་དེར་དོང་སྟེ་ཕྱིན་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་ཁྱིམ་བདག་རྒྱལ་དང་། སྐར་
རྒྱལ་གཉིས་ཀྱིས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་ཀཱ་ཏྱཱ་ཡ་ན་ཆེན་པོ་བདག་ཅག་གཉིས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པའི་དགེ་སློང་གི་དངོས་པོ་དང་། བདག་ཅག་གཉིས་ཀྱིས་འཕགས་པ་ཀཱ་ཏྱཱ་ཡ་ན་ཆེན་པོའི་དྲུང་དུ་ཚངས་པར་སྤྱོད་པ་སྤྱད་པ་འཐོབ་བམ། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་གཉིས་རབ་ཏུ་ཕྱུང་རྫོགས་པར་བསྙེན་པར་བྱས་ཏེ་གདམས་ངག་དང་རྗེས་སུ་བསྟན་པ་བྱིན་ནས་དེ་གཉིས་ཀྱིས་སྤྲོ་བ་དང་། འབད་པ་དང་། བརྩལ་བ་བྱས་པས་གོང་ནས་གོང་དུ་ཡིད་ལ་བྱེད་པའི་ཁྱད་པར་ཐོབ་ནས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ་འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་རྣམ་པར་འཐོར་བ་དང་རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་གཉིས་ཀྱིས་འབར་བ་དང་། གསལ་བ་དང་། ཆར་འབབ་པ་དང་། གློག་འབྱིན་པའི་ཆོ་འཕྲུལ་དག་བྱས་ནས་ཕུང་པོའི་ལྷག་མ་མེད་པའི་མྱ་ངན་
ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་གཉིས་ཀྱི་ཉེ་དུ་དག་གིས་ལུས་ལ་ལུས་ཀྱི་མཆོད་པ་བྱས་ནས་མཆོད་རྟེན་གཉིས་བྱེད་དུ་བཅུག་སྟེ་གཅིག་ནི་རྒྱལ་གྱིའོ། །ཅིག་ཤོས་ནི་སྐར་རྒྱལ་གྱིའོ། །རྒྱལ་པོ་ཨུ་ཏྲ་ཡ་ན་ཉིན་རེ་ཉིན་རེ་ཞིང་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་དྲུང་དུ་སོང་ནས་ཆོས་མཉན་ཏེ་བཙུན་མོའི་འཁོར་ལ་འཕགས་པ་ཀཱ་ཏྱཱ་ཡ་ན་ཆེན་པོ་ཆོས་དངར་བ་དངར་བ་སྟོན་པར་བྱེད་དེ། སྦྲང་བུ་སྦྲང་རྩི་འབྱིན་པ་བཞིན་ནོ་ཞེས་རྗོད་པར་བྱེད་དོ། །དེ་དག་གིས་སྨྲས་པ། ལྷ་སངས་རྒྱས་འབྱུང་བ་ནི་འབྲས་བུ་དང་བཅས་པ་ལགས་སོ། །ཇི་ལྟར་གང་གི་སླད་དུ་ཁྱོད་ཆོས་གསན་པས་སོ། །གལ་ཏེ་དེ་ལྟ་ན་ཁྱེད་ཅག་ཀྱང་ཅིའི་ཕྱིར་ཆོས་མི་ཉན། ལྷ་བདག་ཅག་ནི་ངོ་ཚ་དང་ལྡན་པ་ལགས་པས་ཇི་ལྟར་དེར་མཆིས་ཏེ་ཆོས་མཉན་པར་བགྱི། གལ་ཏེ་འཕགས་པ་ཀཱ་ཏྱཱ་ཡ་ན་ཆེན་པོ་འདི་ཉིད་དུ་མཆིས་ཏེ་ཆོས་སྟོན་པར་བགྱིད་ན་དེ་ལྟ་ན་བདག་ཅག་ཀྱང་ཆོས་ཉན་ཏོ། །རྒྱལ་པོ་ཨུ་ཏྲ་ཡ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་སྨྲས་པ། འཕགས་པ་བཙུན་མོའི་འཁོར་ཆོས་ཉན་པར་འཚལ་ལོ། །དེས་སྨྲས་པ། རྒྱལ་པོ་ཆེན་པོ་དགེ་སློང་དག་ནི་བཙུན་མོའི་འཁོར་གྱི་ནང་དུ་ཞུགས་ཤིང་ཆོས་མི་སྟོན་ཏོ། །བཅོམ་ལྡན་འདས་ཀྱིས་བཙུན་མོའི་འཁོར་གྱི་ནང་དུ་འཇུག་པ་བཀག་གོ །འཕགས་པ་འོ་ན་སུ་ཞིག་བཙུན་མོའི་འཁོར་ལ་ཆོས་སྟོན་པར་བགྱིད། རྒྱལ་པོ་ཆེན་པོ་དགེ་སློང་མའོ། །རྒྱལ་པོ་ཨུ་ཏྲ་ཡ་ནས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་འདི་སྐད་ཅེས་ཤེད་མཐུན་དགྱེས་པ་བདག་གི་བཙུན་མོའི་འཁོར་ཆོས་ཉན་པར་འཚལ་ན་དེའི་སླད་དུ་དགེ་སློང་མ་འགའ་ཞིག་གཏང་བའི་རིགས་སོ་ཞེས་བྲིས་ཏེ་བསྐུར་རོ། །རྒྱལ་པོ་གཟུགས་ཅན་སྙིང་པོས་ཕྲིན་ཡིག་དེ་བཀླགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ནས་
ཕྲིན་ཡིག་སྤྲིང་སྟེ་བཙུན་མོའི་འཁོར་ཆོས་ཉན་པར་འཚལ་གྱིས་དེའི་སླད་དུ་དགེ་སློང་མ་འགའ་ཞིག་གཏང་བའི་རིགས་སོ་ཞེས་མཆི་ན་དེའི་སླད་དུ་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་དགོངས་པ། རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང་གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་དགེ་སློང་མ་གང་གིས་གདུལ་བ་ཡིན་སྙམ་དུ་དགོངས་ན། དགེ་སློང་མ་རི་མའི་གདུལ་བ་ཡིན་པར་གཟིགས་ནས་དེ་ནས་བཅོམ་ལྡན་འདས་ཀྱིས་དགེ་སློང་མ་རི་མ་ལ་བཀའ་སྩལ་པ། རི་མ་གྲོང་ཁྱེར་སྒྲ་སྒྲོགས་ན་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་གྱི་བུད་མེད་དང་། སྒྲ་སྒྲོགས་ན་གནས་པའི་བུད་མེད་རྣམས་ལ་སོམས་ཤིག །དགེ་སློང་མ་རི་མས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་དགེ་སློང་མ་རི་མ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་ཆོས་གོས་ཐོགས་ནས་འཁོར་ལྔ་བརྒྱ་དང་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ངོ་། །རྒྱལ་པོ་གཟུགས་ཅན་སྙིང་པོས་ཀྱང་རྒྱལ་པོ་ཨུ་ཏྲ་ཡ་ན་ལ་ཕྲིན་ཡིག་འདི་སྐད་ཅེས་ཤེད་མཐུན་དགྱེས་པ་ཁྱོད་ཀྱི་ཕྱིར་བདག་གིས་ཉན་ཐོས་མ་ཆེན་མོ་སྟོན་པས་བསྔགས་པ་འདི་འཁོར་ལྔ་བརྒྱ་དང་གཏང་གིས་ཁྱོད་ཀྱིས་ཀྱང་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱ་ཞིང་བདག་ཉིད་དཔུང་གི་ཚོགས་ཡན་ལག་བཞི་དང་ལྡན་པས་བསུ་བར་བྱ་སྟེ། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་ཡང་བྱེད་དུ་གཞུག་པར་བྱ། ཁྲི་དང་ཁྲིའུ་དང་། སྟན་ནང་ཚངས་ཅན་དང་། ལ་བ་དང་སྔས་དང་། གོར་བུ་ལྔ་བརྒྱ་ཡང་འབུལ་བར་བྱ། བསོད་སྙོམས་ལྔ་བརྒྱ་ཡང་སྦྱོར་དུ་གཞུག་པར་བྱ་སྟེ། དེས་ན་ཁྱོད་ཀྱིས་བསོད་ནམས་ཆེན་པོ་འཐོབ་
པར་འགྱུར་རོ་ཞེས་བྲིས་ཏེ་བསྐུར་རོ། །རྒྱལ་པོ་ཨུ་ཏྲ་ཡ་ནས་ཕྲིན་ཡིག་དེ་བཀླགས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ། དེས་དཔག་ཚད་ཕྱེད་དང་གསུམ་དུ་ལམ་དང་གྲོང་ཁྱེར་མཛེས་པར་བྱེད་དུ་བཅུག་ནས་བདག་ཉིད་དཔུང་གི་ཚོགས་ཡན་ལག་བཞི་པ་དང་། སྐྱེ་བོ་འབུམ་ཕྲག་དུ་མའི་འཁོར་དང་བཅས་པས་བསུ་ནས་བཀུར་སྟི་ཆེན་པོས་གྲོང་ཁྱེར་དུ་འཇུག་ཏུ་བཅུག་ཅིང་། གྲོང་ཁྱེར་གྱི་ནང་དུ་དབྱར་ཁང་ལྔ་བརྒྱ་བྱེད་དུ་བཅུག་སྟེ། ཁྲི་དང་ཁྲིའུ་དང་། སྟན་ནང་ཚངས་ཅན་དང་ལ་བ་དང་སྔས་དང་གོར་བུ་ལྔ་བརྒྱ་ཡང་འབུལ་དུ་བཅུག །བསོད་སྙོམས་ལྔ་བརྒྱ་ཡང་སྦྱོར་དུ་བཅུག་གོ །དགེ་སློང་མ་རི་མ་ཉིན་རེ་ཞིང་རྒྱལ་པོ་ཨུ་ཏྲ་ཡ་ནའི་བཙུན་མོའི་འཁོར་དང་། གྲོང་ཁྱེར་སྒྲ་སྒྲོགས་ན་གནས་པའི་བུད་མེད་རྣམས་ཀྱི་ནང་དུ་ཞུགས་ཏེ་ཆོས་སྟོན་པར་བྱེད་དོ། །རྒྱལ་པོ་ཨུ་ཏྲ་ཡ་ན་ནི་པི་བང་མཁས་པ་ཡིན་ལ། བཙུན་མོ་ཟླ་འོད་ནི་གར་མཁས་པ་ཡིན་པས་ཇི་ཙམ་དུ་དུས་གཞན་ཞིག་ན་རྒྱལ་པོ་ཨུ་ཏྲ་ཡ་ནས་པི་བང་སྦྲིངས་ཏེ་བཙུན་མོ་ཟླ་འོད་གར་བྱེད་དོ། །དེས་དེ་གར་བྱེད་པ་ན་ཆུད་ཟ་བའི་མཚན་མ་མཐོང་ནས་དེས་དེ་ལ་མགོ་མཇུག་ཏུ་བརྟགས་ཏེ་བསམས་ན་ཞག་བདུན་འདས་ན་འདི་དུས་བྱེད་པར་འགྱུར་རོ་སྙམ་ནས་དེའི་ལག་ནས་པི་བང་ཤོར་ཏེ་ས་ལ་ལྷུང་བ་དང་། བཙུན་མོ་ཟླ་འོད་ཀྱིས་སྨྲས་པ། ལྷ་བདག་གིས་གར་མ་ལེགས་སམ་ཅི་ནོངས། ཟླ་འོད་ཁྱོད་ཀྱིས་གར་མ་ལེགས་པ་མ་ཡིན་ཏེ། འདི་ལྟར་ངས་ཁྱོད་གར་བྱེད་པ་ན་ཆུད་ཟ་བའི་མཚན་མ་མཐོང་བས་ཉི་མ་བདུན་པ་ལ་ཁྱོད་དུས་བྱེད་པར་འགྱུར་རོ། །བཙུན་མོ་ཟླ་འོད་ཀྱིས་རྒྱལ་པོའི་རྐང་པ་གཉིས་ལ་གཏུགས་ཏེ་སྨྲས་པ། ལྷ་གལ་ཏེ་དེ་ལྟ་ན་བདག་གིས་ལྷ་ལ་བསྙེན་བཀུར་ནི་བགྱིས་ལགས་ན། གལ་ཏེ་ལྷས་གནང་ན་བདག་རབ་ཏུ་འབྱུང་ངོ་། །རྒྱལ་པོས་སྨྲས་པ། ཟླ་འོད་དུས་ཡིན་གྱིས་གནང་ངོ་། །གལ་ཏེ་ཁྱོད་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱེད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ཡིན་ནོ། །གལ་ཏེ་ཀུན་ཏུ་སྦྱོར་བ་ལྷག་མ་དང་བཅས་པས་དུས་བྱས་ཏེ་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་ཁྱོད་ལྷར་གྱུར་པས་ང་ལ་བལྟ་བར་བྱའོ། །
དེས་སྨྲས་པ། ལྷ་བཀའ་བཞིན་འཚལ། རྒྱལ་པོ་ཨུ་ཏྲ་ཡ་ནས་བཙུན་མོ་ཟླ་འོད་དགེ་སློང་མ་རི་མ་ལ་གཏད་དེ་སྨྲས་པ། འཕགས་མ་བཙུན་མོ་ཟླ་འོད་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཚལ་གྱིས་དེའི་སླད་དུ་འཕགས་མས་འདི་རབ་ཏུ་འབྱུང་བ་དང་། རྫོགས་པར་བསྙེན་པར་མཛད་པའི་རིགས་སོ། །དགེ་སློང་མ་རི་མས་སྨྲས་པ། དེ་ལྟར་བགྱིའོ་ཞེས་དེས་དེ་རབ་ཏུ་ཕྱུང་ཞིང་རྫོགས་པར་བསྙེན་པར་བྱས་སོ། །དགེ་སློང་མ་རི་མས་བསམས་པས། དེ་ལ་འཆི་བའི་འདུ་ཤེས་སྒོམས་ཤིག་ཅེས་གདམས་ངག་བྱིན་ནོ། །བཙུན་མོ་ཟླ་འོད་ཀྱིས་འཆི་བའི་འདུ་ཤེས་བསྒོམ་པར་བརྩམས་ནས་དེ་ཉི་མ་བདུན་པ་ལ་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་སོ། །ལྷའི་བུའམ་ལྷའི་བུ་མོའི་ཆོས་ཉིད་ནི་སྐྱེས་ནས་རིང་པོ་མ་ལོན་པ་ལ་སེམས་གསུམ་སྐྱེ་སྟེ། གང་ནས་ཤི་འཕོས་པ་དང་། གང་དུ་སྐྱེས་པ་དང་། ལས་གང་གིས་སྐྱེས་པའོ། །ལྷའི་བུ་མོ་ཟླ་འོད་ཀྱིས་བསམས་པ། བདག་གང་ནས་ཤི་འཕོས་སྙམ་ན། མི་རྣམས་ཀྱི་ནང་ནས་ཤི་འཕོས་པ་དང་། གང་དུ་སྐྱེས་སྙམ་ན་རྒྱལ་ཆེན་བཞི་པའི་ནང་དུ་སྐྱེས་པ་དང་། ལས་གང་གིས་སྐྱེས་སྙམ་ན་བཅོམ་ལྡན་འདས་ཀྱི་བསྟན་པ་ལ་ཚངས་པར་སྤྱོད་པ་སྤྱད་པ་ཉིད་ཀྱིས་སྐྱེས་པར་མཐོང་ངོ་། །དེ་ནས་ལྷའི་བུ་མོ་ཟླ་འོད་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་ལྷའི་བུ་མོ་ཟླ་འོད་རྣ་ཆ་གདུབ་འཁོར་གཡོ་ཞིང་དྲི་མ་མེད་པ་ཐོགས་ཏེ་དོ་ཤལ་དང་སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་གིས་ཐུ་བ་བཀང་སྟེ་ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་
ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང་། འདི་ལྟར་ལྷའི་བུ་མོ་ཟླ་འོད་ཀྱི་ཁ་དོག་གི་མཐུས་འོད་མའི་ཚལ་ཀ་ལན་ད་ཀའི་གནས་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷའི་བུ་མོ་ཟླ་འོད་ཀྱི་བསམ་པ་དང་བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་ལྷའི་བུ་མོ་ཟླ་འོད་ཀྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་ཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བ་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་
མཐོང་བ་རབ་དཀོན་པ། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་ལྷའི་བུ་མོ་ཟླ་འོད་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཏོག་འབྱོར་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ་ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ་། །དེ་འདི་སྙམ་དུ་སེམས་ཏེ། བདག་གིས་རྒྱལ་པོ་ཨུ་ཏྲ་ཡ་ན་ལ་ཁས་བླངས་པས་ད་དེ་བལྟ་བའི་དུས་ཡིན་ནོ་སྙམ་ནས། དེ་ནས་ལྷའི་བུ་མོ་ཟླ་འོད་རྒྱལ་པོ་ཨུ་ཏྲ་ཡ་ན་ག་ལ་བ་དེར་སོང་ངོ་། །དེའི་ཚེ་ན་རྒྱལ་པོ་ཨུ་ཏྲ་ཡ་ན་གཅིག་པུ་སྟེང་གི་ཁང་བཟངས་ཀྱི་གཞིར་གཏོགས་པ་ན་ཉལ་ཞིང་འདུག་ནས་དེས་དེ་སྣང་བ་རྒྱ་ཆེན་པོས་ཁྱབ་པར་བྱས་ཏེ་སེ་གོལ་གྱི་སྒྲས་བསླང་བ་དང་། དེ་གཉིད་ཀྱིས་ནོན་པའི་མིག་དང་རྣམ་པར་ཤེས་པ་མི་གསལ་བས་སྨྲས་པ། ཁྱོད་སུ། དེས་སྨྲས་པ། བདག་ཟླ་འོད་དོ། །རྒྱལ་པོས་སྨྲས་པ། ཚུར་ཤོག་དགའ་མགུར་སྤྱད་པར་བྱའོ། །དེས་སྨྲས་པ་ལྷ་བདག་ཤི་ཞིང་དུས་ལ་བབ་ནས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཏེ། གལ་ཏེ་བདག་དང་ལྷན་ཅིག་མཇལ་བཞེད་ན་བཅོམ་ལྡན་འདས་ཀྱི་སྤྱན་སྔར་རབ་ཏུ་བྱུང་ཞིག་དང་། གལ་ཏེ་ཚེ་འདི་ཉིད་ལ་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་མཛད་ན་ནི་དེ་ཉིད་ཁྱོད་ཀྱི་སྡུག་བསྔལ་གྱི་མཐའ་ལགས་སོ། །གལ་ཏེ་ཀུན་དུ་སྦྱོར་བ་ལྷག་མ་དང་བཅས་པས་དུས་བགྱིས་ཏེ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་པར་གྱུར་ན་ནི་དེར་ཁྱོད་བདག་དང་མཇལ་བར་འགྱུར་རོ་ཞེས་སྨྲས་ཏེ་དེ་ཉིད་དུ་མི་སྣང་བར་གྱུར་ཏོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་གཅིག་པ། རྒྱལ་པོ་ཨུ་ཏྲ་ཡ་ནས་མཚན་ཐོག་ཐག་ཏུ་རབ་ཏུ་འབྱུང་བ་རྗེས་སུ་བསམས་ནས་ནང་པར་སྔར་ལངས་ཏེ་བློན་པོ་རྣམས་ལ་སྨྲས་
པ། ཤེས་ལྡན་དག་བཙུན་མོ་ཟླ་འོད་ག་ལ་འདུག་ལྟོས་ཤིག །དེ་དག་གིས་སྨྲས་པ། ལྷ་དུས་ལ་བབ་བོ། །རྒྱལ་པོ་ཨུ་ཏྲ་ཡ་ནས་བསམས་པ། གང་གི་ཕྱིར་བདག་ལ་ལྷ་མོས་བསྐུལ་ནས་བདག་ཁྱིམ་པ་ཁྱིམ་གྱི་ནང་ན་གནས་ཤིང་སོགས་འཇོག་གི་ལོངས་སྤྱོད་དང་འདོད་པ་ལ་ཡོངས་སུ་སྤྱོད་པ་ནི་བདག་གི་ཚུལ་དང་མཐུན་པ་མ་ཡིན་གྱིས། བདག་གིས་གཞོན་ནུ་གཙུག་པུད་ཅན་རྒྱལ་སྲིད་ལ་དབང་བསྐུར་ཏེ་བདག་སྐྲ་དང་ཁ་སྤུ་བྲེགས་ནས་གོས་ངུར་སྨྲིག་དག་བགོས་ཏེ། ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་ངོ་སྙམ་ནས། དེས་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་མངག་པས་བོས་ཏེ་སྨྲས་པ། ཤེས་ལྡན་གཉིས་བུ་གཞོན་ནུ་གཙུག་པུད་ཅན་ང་ལ་ཅི་འདྲ་བ་དེ་ཁོ་ན་བཞིན་དུ་ཁྱེད་གཉིས་ལ་ཡང་དེ་འདྲ་བ་ཡིན་གྱིས་ཁྱེད་གཉིས་ཀྱིས་དེ་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་གྱིས་ཤིག །ང་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ་། །དེ་གཉིས་ཀྱིས་ཐོས་ནས་མཆི་མས་བརྣངས་ཏེ་འཁོད་དོ། །རྒྱལ་པོས་གཞོན་ནུ་གཙུག་པུད་ཅན་ལ་སྨྲས་པ། བུ་ཁྱོད་ཇི་ལྟ་ངའི་ཚིག་མཉན་པ་དང་བྱ་བར་སེམས་པ་དེ་བཞིན་དུ། ཁྱོད་ཀྱིས་བློན་པོའི་མཆོག་ཧེ་རུ་ཀ་དང་བྷི་རུ་ཀ་འདི་གཉིས་ཀྱི་ཚིག་མཉན་པ་དང་བྱ་བར་སོམས་ཤིག །ང་ནི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་ངོ་། །དེས་ཀྱང་ཐོས་ནས་མཆི་མས་བརྣངས་ཏེ་འདུག་གོ །དེ་ནས་རྒྱལ་པོ་ཨུ་ཏྲ་ཡ་ནས་གྲོང་ཁྱེར་སྒྲ་སྒྲོགས་སུ་དྲིལ་བསྒྲག་པ་བྱེད་དུ་བཅུག་སྟེ། གྲོང་ཁྱེར་སྒྲ་སྒྲོགས་ན་གནས་པ་དག་དང་། ཕོ་བྲང་འཁོར་གྱི་མི་དག་དང་། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་ལ་ཤེས་ལྡན་དག་ཉོན་ཅིག །ང་ནི་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་གིས་ངས་རྒྱལ་སྲིད་བྱེད་དུ་བཅུག་པ་ན་གང་ལ་གནོད་པ་ཅུང་ཟད་ཅི་བྱས་པ་དེ་བཟོད་པར་གྱིས་ཤིག་ཅེས་བསྒོའོ། །གྲོང་ཁྱེར་སྒྲ་སྒྲོགས་ན་གནས་པ་རྣམས་དང་། ཕོ་བྲང་འཁོར་གྱི་མི་རྣམས་དང་། ཡུལ་ཐ་དད་པ་ནས་ལྷགས་པའི་སྐྱེ་བོའི་
ཚོགས་རྣམས་རྒྱལ་པོ་ལ་རྗེས་སུ་ཆགས་པ་ཡིན་པས་དེ་དག་གིས་ཐོས་ནས་ཐམས་ཅད་མཆི་མས་བརྣངས་ཏེ་འཁོད་དོ། །དེ་ནས་རྒྱལ་པོ་ཨུ་ཏྲ་ཡ་ནས་གཞོན་ནུ་གཙུག་པུད་ཅན་རྒྱལ་སྲིད་ལ་བཞག་ནས་རྩ་ལག་གི་སྐྱེ་བོ་རྣམས་ལ་བཟོད་པ་གསོལ་ཏེ། དགེ་སྦྱོང་དང་། བྲམ་ཟེ་དང་། བཀྲེན་པ་དང་། སྡུག་ཕོངས་པ་རྣམས་ལ་སྦྱིན་པ་དག་བྱིན། བསོད་ནམས་དག་བྱས་ཏེ་མི་བསྙེན་བཀུར་བ་ཅིག་དང་། རྒྱལ་པོའི་ཁབ་ལོགས་སུ་ཕྱོགས་ཏེ་འཕགས་སོ། །དེ་ནས་རྒྱལ་པོ་གཙུག་པུད་ཅན་བཙུན་མོའི་འཁོར་དང་། གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་བཅས་པ་དང་། གཞན་ཡང་ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་ཕྱི་བཞིན་ཕྱི་བཞིན་དུ་འབྲང་སྟེ། སྲོག་ཆགས་འབུམ་ཕྲག་དུ་མ་དག་གིས་བསྐྱལ་བཞིན་དུ་གྲོང་ཁྱེར་སྒྲ་སྒྲོགས་ནས་ཕྱིར་བྱུང་སྟེ། སྐྱེད་མོས་ཚལ་ཤིང་ལྗོན་པའི་ཚལ་སྣ་ཚོགས་ཀྱིས་བརྒྱན་པ། མེ་ཏོག་དང་འབྲས་བུ་དང་། ཆུ་རྒྱུན་སྣ་ཚོགས་དང་ལྡན་པ། ངང་པ་དང་། ཁྲུང་ཁྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ཤང་ཤང་ཏེའུ་སྒྲ་འབྱིན་པ་ཞིག་ཏུ་ཡུད་ཙམ་ཞིག་བསྡད་ནས་གྲོང་ཁྱེར་སྒྲ་སྒྲོགས་ལོགས་སུ་རྣམ་པར་བལྟས་ཏེ་རྒྱལ་པོ་གཙུག་པུད་ཅན་ལ་སྨྲས་པ། བུ་ངས་ཆོས་ཀྱི་རྒྱལ་སྲིད་བྱེད་དུ་བཅུག་པས་དེའི་ཕྱིར་སྲོག་ཆགས་འབུམ་ཕྲག་འདི་སྙེད་ངའི་ཕྱི་བཞིན་དུ་འབྲང་བར་གྱུར་གྱིས། ཁྱོད་ཀྱིས་ཀྱང་ཆོས་ཀྱིས་རྒྱལ་སྲིད་བྱེད་དུ་གཞུག་པར་བྱའོ། །སྐྱེ་བོའི་ཚོགས་དེ་ལ་ཡང་བག་ཕབ་སྟེ་སྨྲས་པ། ཤེས་ལྡན་དག་ངས་ཁྱེད་ཀྱི་རྒྱལ་པོར་འདི་བསྐོས་ཀྱིས་ཕྱིར་དེང་ལ་བདེ་བར་སྒྲུབས་ཤིག་ཅེས་སྨྲས་ཏེ་སོང་ངོ་། །རྒྱལ་པོ་གཙུག་པུད་ཅན་བཙུན་མོའི་འཁོར་དང་། གཞོན་ནུ་དང་། བློན་པོ་དང་ཕོ་བྲང་འཁོར་གྱི་མི་དང་བཅས་པ་དང་ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་རྣམས་མཆི་མས་དཀྲུགས་པའི་མིག་གིས་ཡུད་ཙམ་ཡུད་ཙམ་ཕྱི་བཞིན་རྟོག་ཅིང་རྟོག་ཅིང་གྲོང་ཁྱེར་སྒྲ་སྒྲོགས་སུ་ཕྱིར་ལོག་གོ །དེ་ནས་རྒྱལ་པོ་ཨུ་ཏྲ་ཡ་ན་མཐར་གྱིས་གྲོང་ཁྱེར་རྒྱལ་པོའི་ཁབ་ཏུ་ཕྱིན་ནས་དེས་སྐྱེད་མོས་ཚལ་དུ་བསྡད་
དེ། མི་དེ་ལ་སྨྲས་པ། ཀྭའི་ནང་རྗེ་རྒྱལ་པོ་གཟུགས་ཅན་སྙིང་པོའི་གན་དུ་སོང་ལ་རྒྱལ་པོ་ཨུ་ཏྲ་ཡ་ན་སྐྱེད་མོས་ཚལ་ན་སྡོད་དོ་ཞེས་སྦྲོན་ཅིག །མི་དེ་སོང་སྟེ་རྒྱལ་པོ་གཟུགས་ཅན་སྙིང་པོ་ལ་ལྷ་རྒྱལ་པོ་ཨུ་ཏྲ་ཡ་ན་སྐྱེད་མོས་ཚལ་ན་སྡོད་དོ་ཞེས་སྦྲན་ཏོ། །དེས་ཐོས་ནས་འཕྲལ་ཁོ་ན་ལ་ལངས་ཏེ་ཞོ་ཤས་འཚོ་བ་རྣམས་ལ་སྨྲས་པ། ཤེས་ལྡན་དག་རྒྱལ་པོ་དེ་དཔུང་ཆེན་པོ་དང་ལྡན་པ་ཡིན་ན་དེས་མ་སྦྲན་པ་ཁོ་ནར་འོངས་པ་ཁྱེད་ཅག་སུས་ཀྱང་མ་ཤེས་སོ། །དེས་སྨྲས་པ། ལྷ་དེ་ལ་དཔུང་ག་ལ་མཆིས་ཏེ་དཔོན་གཡོག་གཉིས་པུ་ཞིག་མཆིས་སོ། །རྒྱལ་པོ་གཟུགས་ཅན་སྙིང་པོས་བསམས་པ། གང་གི་ཕྱིར་བདག་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་བགྱིས་ན་དེ་བཞིན་དུ་གྲོང་ཁྱེར་དུ་གཞུག་པ་ནི་བདག་གི་ཚུལ་དང་མཐུན་པ་མ་ཡིན་གྱིས། བདག་གིས་བཀུར་སྟི་ཆེན་པོས་འཇུག་ཏུ་གཞུག་གོ་སྙམ་དུ་རིག་ནས། ལམ་མཛེས་པ་དང་གྲོང་ཁྱེར་མཛེས་པར་བྱེད་དུ་བཅུག་ནས་དཔུང་གི་ཚོགས་ཡན་ལག་བཞི་པས་བསུའོ། །དེ་ནས་གཉའ་བ་སྤྲད་དེ་གླང་པོ་ཆེའི་རྒྱབ་ཏུ་ཞོན་ནས་གྲོང་ཁྱེར་རྒྱལ་པོའི་ཁབ་ཏུ་བཅུག་སྟེ། སྤོས་སྣ་ཚོགས་དང་སྦྱར་བའི་ཆུས་ཁྲུས་བྱེད་དུ་བཅུག་ནས་རྒྱལ་པོ་ལ་འོས་པའི་གོས་དག་དང་། སྤོས་དང་། ཕྲེང་བ་རྒྱུ་དང་། བྱུག་པ་སྣ་ཚོགས་དག་གིས་ལེགས་པར་བརྒྱན་ནས་ཟན་བྱིན་ཏེ་ལམ་གྱིས་དུབ་པའི་ངལ་བསོས་ནས་སྨྲས་པ། ཤེད་མཐུན་དགྱེས་པས་རྒྱལ་སྲིད་རྒྱས་པ་དང་། བཙུན་མོའི་འཁོར་དང་། གཞོན་ནུ་དང་། བློན་པོ་དང་ཕོ་བྲང་འཁོར་གྱི་མི་རྣམས་སྤངས་ཏེ་འདིར་ཅི་ལ་བྱོན། ས་གཞན་གྱི་རྒྱལ་པོ་འགའ་ཞིག་གིས་ཡུལ་འཁོར་གཞོམ་པར་བགྱིས་པའམ། གཞོན་ནུ་རྒྱལ་སྲིད་ལ་མངོན་པར་དགའ་བ་བློན་པོ་སྐྱོན་ཆགས་པས་བསླུས་པ་འགའ་ཞིག་གིས་བརྟུལ་བའམ་གཅིག་ཏུ་མ་གྱུར་ཏམ། དེས་སྨྲས་པ། ཤེད་མཐུན་དགྱེས་པ་དེ་ལྟར་མ་གྱུར་ཏེ། བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ལོ། །རྒྱལ་པོ་གཟུགས་ཅན་སྙིང་པོས་ཐོས་ནས་ཡིད་དགའ་ཞིང་དགའ་སྟེ། རོ་སྟོད་
བསྲང་ནས་ལག་པ་གཡས་པ་བརྐྱང་སྟེ། ཀྱེ་མ་སངས་རྒྱས། ཀྱེ་མ་ཆོས། ཀྱེ་མ་དགེ་འདུན། ཀྱེ་མ་ཆོས་ཀྱི་ལེགས་པར་གསུངས་པ་ཉིད་འདི་ལྟར་སྐྱེས་བུ་གཙོ་བོ་འདི་ལྟ་བུ་དག་གིས་རྒྱལ་སྲིད་རྒྱས་པ་དང་། བཙུན་མོའི་འཁོར་རྒྱས་པ་དང་། མཛའ་བཤེས་དང་། རྩ་ལག་གི་ཚོགས་རྒྱ་ཆེན་པོ་དང་། མཛོད་དང་། བང་བ་དང་། ཁྱིམ་རྒྱ་ཆེན་པོ་དག་སྤངས་ཏེ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འདོད་པ་ངོ་མཚར་ཆེའོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་པ་སྨྲས་ནས་རྒྱལ་པོ་ཨུ་ཏྲ་ཡ་ན་ཁྲིད་དེ་བཅོམ་ལྡན་འདས་ག་ལ་བ་དེར་སོང་ངོ་། །དེའི་ཚེ་ན་བཅོམ་ལྡན་འདས་འཁོར་འབུམ་ཕྲག་དུ་མའི་གོང་ན་བཞུགས་ཤིང་ཆོས་སྟོན་པར་མཛད་དོ། །བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་འདི་ནི་རྒྱལ་པོ་གཟུགས་ཅན་སྙིང་པོ་ཡིན་ཏེ། དེ་སྐྱེས་དང་བཅས་པས་ངའི་གན་དུ་འོང་ངོ་། །དེ་བཞིན་གཤེགས་པའི་སྐྱེས་ནི་འདི་ལྟ་སྟེ། གདུལ་བའི་སྐྱེས་ལྟ་བུ་གཞན་མེད་དོ་ཞེས་བཀའ་སྩལ་ནས་ཅང་མི་གསུང་བར་བཞུགས་སོ། །རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་གཟུགས་ཅན་སྙིང་པོས་འདི་སྐད་ཅེས་གསོལ་ཏོ། །བཙུན་པ་རྒྱལ་པོ་ཨུ་ཏྲ་ཡ་ན་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་འཚལ་ན་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་འདི་རབ་ཏུ་དབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། བཅོམ་ལྡན་འདས་ཀྱིས་དེ་ལ་དགེ་སློང་ཚུར་ཤོག་ཅེས་པས་རབ་ཏུ་ཕྱུང་ཞིང་། དགེ་སློང་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་།
ལག་པ་ལྷུང་བཟེད་དང་། བྱ་མ་བུམ་གྱིས་འབྲེལ་པ་དང་། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་པར་གྱུར། །དེ་ནས་ཚེ་དང་ལྡན་པ་ཨུ་ཏྲ་ཡ་ན་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ། རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །དེ་སྐྱེ་བོ་ཕལ་པོ་ཆེའི་ཚོགས་ཀྱིས་མཐོང་ནས་གྲོང་ཁྱེར་རྒྱལ་པོའི་ཁབ་ཐམས་ཅད་དུ་བཅོམ་ལྡན་འདས་ཀྱིས་རྒྱལ་པོ་ཨུ་ཏྲ་ཡ་ན་རབ་ཏུ་ཕྱུང་རྫོགས་པར་བསྙེན་པར་མཛད་ནས་དེ་བསོད་སྙོམས་ལ་རྒྱལ་པོའི་ཁབ་ཏུ་ཞུགས་སོ་ཞེས་དེ་ལྟ་བུའི་སྒྲ་སྒྲོགས་པར་གྱུར་ཏོ། །དེ་སྐད་ཐོས་ནས་སྲོག་ཆགས་འབུམ་ཕྲག་དུ་མ་དག་འདུས་པར་གྱུར་ཅིང་། ཁྱིམ་གྱི་ནང་ན་གནས་པའི་བུད་མེད་དག་ཀྱང་སྐར་ཁུང་དང་། སྐར་ཁུང་དྲ་བ་ཅན་དང་། ལན་ཀན་དག་གི་དྲུང་དུ་འཁོད་དེ་ལྟ་བར་བྱེད་དོ། །རྒྱལ་པོ་གཟུགས་ཅན་སྙིང་པོ་ལ་བློན་པོ་རྣམས་ཀྱིས་སྨྲས་པ། ལྷ་རྒྱལ་པོ་ཨུ་ཏྲ་ཡ་ན་རྒྱལ་པོའི་ཁབ་ཏུ་བསོད་སྙོམས་ལ་ཞུགས་ཏེ་སྲོག་ཆགས་འབུམ་ཕྲག་དུ་མ་དག་གིས་བསྐོར་ཅིང་མཆིས་སོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས་དགེ་སློང་ཨུ་ཏྲ་ཡ་ན་ག་ལ་བ་དེར་སོང་སྟེ་ཕྱིན་ནས་དགེ་སློང་ཨུ་ཏྲ་ཡ་ན་ལ་ཚིགས་སུ་བཅད་པ་འདི་སྐད་ཅེས་སྨྲས་སོ། །མི་དབང་གྲོང་ཁྱེར་སྟོང་དང་ནི། །སྒྲ་སྒྲོགས་ཀྱང་ནི་སྤྱད་བྱས་ནས། །བོར་བའི་བསོད་སྙོམས་ཚོལ་བྱེད་པ། །ཇི་ལྟ་ཡོངས་སུ་མི་གདུང་ངམ། །གསེར་དང་དེ་བཞིན་དངུལ་གྱི་སྣོད། །སྲང་ཚད་བརྒྱ་པ་སྤྱད་བྱས་ནས། །ས་ཡི་ལྷུང་བཟེད་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །སཱ་ལུའི་འབྲས་ཆན་གཙང་མ་དག །ཤ་ཡིས་བརླན་པས་སྤྱད་བྱས་ནས། །ཟན་དྲོན་ཁེངས་པ་སྤྱོད་བྱེད་པ། །ཇི་ལྟ་ཡོངས་སུ་མི་གདུང་ངམ། །སྲིན་བལ་རས་བལ་ཟར་མ་དང་། །ཀོ་ཏམ་ཀ་ཤིའི་གོས་སྤངས་ནས། །ཕྱག་དར་ཁྲོད་དག་སྲེལ་བྱེད་པ། །ཇི་ལྟ་ཡོངས་སུ་མི་གདུང་ངམ། །
རླུང་མེད་སྒོ་གཏན་བསྡམས་པ་ཡི། །ཁང་པ་བརྩེགས་པར་ཁྱོད་ཉལ་ནས། །ཤིང་ལྗོན་དྲུང་དུ་གནས་གྱུར་པ། །ཇི་ལྟ་ཡོངས་སུ་མི་གདུང་ངམ། །འཇམ་ཞིང་རས་བལ་འདྲ་བ་ཡི། །མལ་ཁྲི་དག་ལ་ཁྱོད་ཉལ་ནས། །རྩྭ་ཡི་སྟན་ལ་ཉལ་གྱུར་པ། །ཇི་ལྟ་ཡོངས་སུ་མི་གདུང་ངམ། །བཙུན་མོ་མཚུངས་པ་ཡིད་འོང་བ། །གུས་པར་ཉལ་ཅིང་སྙན་སྨྲས་པ། །དུ་མ་ཁྱོད་ཀྱིས་རྣམ་སྤངས་པ། །ཇི་ལྟ་ཡོངས་སུ་མི་གདུང་ངམ། །གླང་ཆེན་གཉའ་དང་ཤིང་རྟ་དང་། །རྟ་ཡི་བཞོན་པས་ཁྱོད་སོང་ནས། །རྐང་པས་ས་ལ་རྒྱུ་བྱེད་པ། །ཇི་ལྟ་ཡོངས་སུ་མི་གདུང་ངམ། །ནོར་མང་ལྡན་པའི་མཛོད་དང་ནི། །ཁང་པ་དག་ཀྱང་རྣམ་སྤངས་ཏེ། །ཅི་ཡང་མེད་པ་ཐོབ་གྱུར་པ། །ཇི་ལྟ་ཡོངས་སུ་མི་གདུང་ངམ། །ཨུ་ཏྲ་ཡ་ནས་སྨྲས་པ། རྒྱལ་པོ་གལ་ཏེ་གདུལ་དཀའ་བ། །གཞན་གྱི་ཟས་ཀྱིས་འཚོ་བྱེད་ན། །མ་གྲུབ་པས་ནི་དེ་འདུལ་ཏེ། །གཉའ་ཤིང་བ་ལང་འདུལ་བ་བཞིན། །རྒྱལ་པོ་གཟུགས་ཅན་སྙིང་པོས་སྨྲས་པ། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་དུ་སྨྲ། །རྒྱལ་སྲིད་ཕྱེད་ནི་སྦྱིན་བྱ་ཡིས། །ཁྱོད་ནི་སྔོན་བཞིན་ལོངས་སྤྱོད་ཀྱིས། །རྒྱལ་པོ་ཁྱོད་ཡིད་མི་བདེ་འམ། །ཅི་ཕྱིར་དམན་པ་བཞིན་དུ་སྨྲ། །ཡིད་ཀྱིས་གང་དང་གང་འདོད་པའི། །ལོངས་སྤྱོད་རབ་མཆོག་སྦྱིན་པར་བྱ། །ཨུ་ཏྲ་ཡ་ནས་སྨྲས་པ། རྒྱལ་པོ་གང་ཞིག་འཇིག་རྟེན་ན། །ལུས་ཀྱི་ཆོས་རེག་བཀྲེན་པ་མེད། །དེ་ནི་ངེས་པར་ལྷ་ཉིད་དང་། །ཡང་ན་མྱ་ངན་འདའ་བར་འགྱུར། །མི་དབང་གང་ཞིག་ཆོས་སྤངས་ཞིང་། །འདི་ལ་ཆོས་མིན་དགའ་བྱེད་པ། །རྒྱལ་པོ་དེ་བཀྲེན་ཤེས་པར་བྱ། །མུན་ནས་མུན་པར་འགྲོ་བར་འགྱུར། །ཁྱོད་ལ་ཆོས་ནི་བསྟན་བྱ་ཡིས། །རྒྱལ་པོ་ཆེན་པོ་བདག་ལ་ཉོན། །ཆོས་ཐོས་འོག་ཏུ་རྒྱལ་པོ་ནི། །གང་དུ་འདོད་པར་འགྲོ་བར་འགྱུར། །ཡོན་ཏན་མེད་པའི་ལུས་ལ་ནི། །གཅིག་ཉིད་ཡོན་ཏན་ཆེན་པོ་སྟེ། །ཇི་ལྟ་ཇི་ལྟར་གཟུང་བྱས་པ། །དེ་ལྟ་དེ་ལྟར་རྗེས་འཇུག་འགྱུར། །རྒྱལ་པོ་བཅུ་པའི་བཅུ་པོ་འདི། །སྐྱེས་བུའི་ཆེར་ནི་བརྗོད་པར་བྱ། །བུ་དང་ཆུང་མ་ནོར་དེ་ལ། །རྩེད་མོ་དགའ་བ་ཅི་ཞིག་ཡོད། །བུ་ཡིས་དགའ་བ་སྟོན་བྱེད་དེ། །
ཆུང་མས་ཁེངས་པ་རྗོད་པར་བྱེད། །ཆོམ་རྐུན་ནོར་ནི་སྒྲུབ་བྱེད་དེ། །རྒྱལ་པོ་དག་ནི་བཅིངས་ལས་གྲོལ། །མཐར་བྱེད་པ་ལས་སྨན་དག་དང་། །ནོར་དང་ཉེ་དུས་སྐྱོབ་མི་ནུས། །རིག་སྔགས་ཀུན་དང་དཔུང་དག་དང་། །དཔའ་བརྟུལ་གྱིས་ཀྱང་སྐྱོབ་ནུས་མིན། །འདི་ན་མཐུ་ཆེན་གནས་མཐོ་ལ། །གནས་པའི་ལྷ་ཚེ་རིང་པོ་ཡང་། །དེ་ཡང་ཚེ་ཟད་ཉམས་འགྱུར་བས། །འཆི་ལས་དེ་རིང་སུ་ཞིག་འཐར། །མཐུ་ཆེན་ནོར་ལྡན་གྲགས་འབར་བ། །རྒྱལ་སྲིད་བྱས་པ་ཁྱབ་འཇུག་དང་། །མུན་བྱེད་སྒྲ་ངན་སྐྱ་བསེང་བུ། །དེས་ཀྱང་འཆི་བ་བཟློག་མ་ནུས། །རྒྱལ་པོ་སྡོམ་བརྩོན་དཀའ་ཐུབ་དང་། །ལས་དང་བརྩོན་འགྲུས་རྟུལ་བ་དང་། །འཁོར་ཚོགས་རྒྱ་ཆེན་ནོར་དག་གིས། །འཆི་ལས་ཇི་ལྟར་ཐར་མི་ནུས། །བར་སྣང་རྒྱ་མཚོའི་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་འཆི་བདག་གིས། །མི་ཚུགས་འགྱུར་བའི་ས་ཕྱོགས་མེད། །བར་སྣང་རྒྱ་མཚོ་ནང་དང་ནི། །རི་ཡི་སུལ་དུ་ཞུགས་པ་འམ། །གང་དུ་གནས་ན་ལས་རྣམས་ཀྱིས། །མི་ཚུགས་འགྱུར་བའི་ས་ཕྱོགས་མེད། །རུས་པ་ཐི་བའི་མདོག་འདྲ་བ། །བོར་ཞིང་ཕྱོགས་ཕྱོགས་རྣམ་འཐོར་བ། །གང་དང་གང་ཡིན་དེ་དག་ནི། །མཐོང་ན་འདི་ལ་སུ་ཞིག་དགའ། །ཐོད་པ་དུང་གི་མདོག་འདྲ་བ། །བོར་ཞིང་ཀུ་བ་ལྷུང་ལྟ་བུ། །གང་དང་གང་ཡིན་དེ་དག་ནི། །མཐོང་ན་འདི་ལ་སུ་ཞིག་དགའ། །རྒྱལ་པོ་ཚ་ན་སྒྲིབ་བྱེད་ཅིང་། །གྲང་ན་གཡོག་པར་བྱེད་པ་ཡི། །ཁྱོད་ཀྱི་བདག་ཉིད་ཅེས་བྱ་བ། །གང་ཡིན་དེ་ཡང་འཆི་བས་འཇོམས། །མི་ཡིས་ཇི་ཙམ་ཟས་ཟོས་ཤིང་། །གྱོན་ནམ་ཡང་ན་བྱིན་པ་དེ། །དེ་ཡི་རང་གིར་ཤེས་བྱ་སྟེ། །གཞན་ནི་བོར་ཏེ་འགྲོ་བར་འགྱུར། །མི་ཡི་རྐུན་པོས་མི་འཕྲོགས་དང་། །གཞན་དང་ཐུན་མོང་མ་ཡིན་པའི། །གཏེར་ནི་སྦྱིན་པའམ་ཡང་ན་ནི། །ལེགས་བྱས་གཞན་གྱིས་སྦ་བར་བྱ། །སྟག་གིས་རི་དགས་བསད་འདྲེན་ལྟར། །ན་རྒ་འཆི་བས་ཁྱོད་མྱུར་འདྲེན། །མཛའ་བཤེས་བློན་ཚོགས་ཀུན་འདུས་པ། །ཁྱོད་ཀྱི་ནད་ནི་སེལ་མི་ནུས། །དེ་ལ་སྤྱད་ལྷག་ནོར་འབྲུ་དང་། །གསེར་དངུལ་གང་དག་ཡོད་པ་ལ། །བུ་དང་ཆུང་མ་འཁོར་བཅས་དག །
བགོ་སྐལ་ཉིད་དུ་སེམས་པར་བྱེད། །གལ་ཏེ་ཕ་ཤི་བུ་ལོན་ཆགས། །བུ་སྡུག་དེ་ལ་མེ་མི་ཁྱེར། །ཤི་ན་འཆི་བཞིན་མི་ངུ་ཞིང་། །བདག་གི་ཕའམ་རྗེར་མི་སྨྲ། །ཕྱུག་ཤེས་བདག་གི་ཕ་ཟེར་ཞིང་། །སྐྲ་བཤིག་མཆི་མའི་བཞིན་གྱིས་ངུ་། །མེ་ཡང་མདུན་དུ་ཁྱེར་བྱེད་ཅིང་། །ཀྱེ་མ་འདི་ནི་ལྷར་འགྱུར་ཟེར། །གོས་ཀྱིས་བཀབ་བཞིན་ཁྱེར་བྱེད་ཅིང་། །མེ་བཏང་དེ་ནས་སྲེག་པར་བྱེད། །ཉེ་དུ་ངུ་ཞིང་གོས་གཅིག་གིས། །དེ་སྲེགས་སྤངས་ཏེ་ལོངས་སྤྱོད་བྱེད། །དེ་གཅིག་སྐྱེ་ཞིང་སྐྱེ་ཚེ་གཅིག །དེ་བཞིན་གཅིག་འཆི་འཆི་ཚེ་གཅིག །སྐྱེ་འདིར་གཅིག་པུས་སྡུག་བསྔལ་མྱོང་། །འཁོར་བར་འགྱུར་ལ་གྲོགས་མེད་དོ། །དེ་མཐོང་འདི་ལ་དམ་པ་རྣམས། །རབ་འབྱུང་ཁྱིམ་ན་འདུག་མི་བྱེད། །དེ་དག་ཆགས་པ་ཀུན་བྲལ་ནས། །ཕྱིན་ཆད་མངལ་ན་འཇུག་མི་འགྱུར། །དེ་ནས་རྒྱལ་པོ་གཟུགས་ཅན་སྙིང་པོ་དགེ་སློང་ཨུ་ཏྲ་ཡ་ནས་གོང་ནས་གོང་དུ་སྤོབས་པས་ལན་གླན་པས་ཅང་མི་སྨྲ་ཞིང་སྤོབས་པ་མེད་པར་གྱུར་ཏེ་སོང་ངོ་། །དེ་ནས་རྒྱལ་པོ་གཙུག་པུད་ཅན་གྱིས་རེ་ཞིག་ཇི་སྲིད་དུ་ཆོས་ཀྱི་རྒྱལ་སྲིད་བྱེད་དུ་བཅུག་ནས་ཆོས་མ་ཡིན་པས་རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་ལ་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱིས་སྨྲས་པ། ལྷ་ཆོས་ཀྱིས་རྒྱལ་སྲིད་བགྱིད་དུ་སྩོལ་ལ། ཆོས་མ་ལགས་པས་བགྱིད་དུ་མ་སྩལ་ཅིག །དེ་ཅིའི་སླད་དུ་ཞེ་ན། ལྷ་ཡུལ་གྱི་མི་དག་ནི་མེ་ཏོག་གི་ཤིང་ལྗོན་པ་དང་། འབྲས་བུའི་ཤིང་ལྗོན་པ་དག་དང་འདྲ་བའི་སླད་དུ་སྟེ། ལྷ་འདི་ལྟ་སྟེ། དཔེར་བགྱི་ན་མེ་ཏོག་གི་ཤིང་ལྗོན་པ་དང་། འབྲས་བུའི་ཤིང་ལྗོན་པ་དག་ནི་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་མེ་ཏོག་དང་། འབྲས་བུ་དག་འབྱིན་པར་བགྱིད་དོ། །ལྷ་དེ་བཞིན་དུ་ཡུལ་གྱི་མི་དག་ཀྱང་དུས་དང་དུས་སུ་ལེགས་པར་ཡོངས་སུ་བསྐྱངས་པ་ན་བར་ཆད་མ་མཆིས་པའི་སྦྱོར་བས་དུས་ཇི་ལྟ་བ་བཞིན་དུ་དཔྱ་དང་ལོ་ཐང་དག་འབུལ་བར་བགྱིད་དོ། །དེ་དེ་གཉིས་ཀྱིས་བཟློག་པ་ན་རེ་ཞིག་ཇི་སྲིད་དུ་ཆོས་ཀྱིས་རྒྱལ་སྲིད་བྱེད་དུ་བཅུག་ནས་ཡང་ཆོས་མ་ཡིན་པས་
རྒྱལ་སྲིད་བྱེད་དུ་གཞུག་པར་བརྩམས་པ་དང་། དེ་ལ་དེ་གཉིས་ཀྱིས་ལན་གསུམ་གྱི་བར་དུ་ཡང་སྨྲས་ན་སྲིད་པ་འཕོས་པ་དང་ལྡན་པས་བཟློག་ཀྱང་མི་སྡོད་དེ་དེ་ཁྲོས་ནས་བློན་པོ་གཞན་དག་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་ཡང་གཅོག་པ་དེའི་ཆད་པ་ཇི་ལྟ་བུ་ཡིན། དེ་ན་བློན་པོ་སྐྱོན་ཆགས་པ་ཁ་ཅིག་གིས་སྨྲས་པ། ལྷ་འདི་ལ་རྨ་ཅི་འཚལ་ཏེ། དེའི་ཆད་པ་ནི་དགུམ་པ་ལགས་སོ། །ཚིགས་སུ་བཅད་པ་དག་ཀྱང་སྨྲས་པ། བློན་པོ་སྐྱོན་ནི་ཆགས་པ་དང་། །འགུལ་བར་གྱུར་པའི་སོ་དང་ནི། །ཟས་ལ་སྐྱོན་ནི་ཆགས་པ་དག །ཕྱུང་བ་འབའ་ཞིག་བདེ་བར་གྱུར། །བློན་པོ་བློ་དང་ལྡན་གྱུར་ཅིང་། །ཤེས་རབ་དང་ནི་འདུལ་ལ་མཁས། །མཛོད་ནས་གོ་འཕང་གནས་པ་ནི། །གང་གིས་མི་གསོད་དེ་གསོད་འགྱུར། །རྒྱལ་པོ་གཙུག་པུད་ཅན་གྱིས་སྨྲས་པ། ཤེས་ལྡན་དག་འདི་གཉིས་ནི་ངའི་ཡབ་ཀྱིས་བསྐོས་པ་ཡིན་པས་ང་འདི་གཉིས་གསོད་པར་མི་བྱེད་ཀྱིས། འདི་ལྟར་འདི་གཉིས་ཀྱིས་ངའི་མིག་སྔར་འདུག་པར་མི་བྱའོ་ཞེས་དེ་གཉིས་ཀྱི་སྒོ་བཟློག་ནས་སྐྱོན་ཆགས་པ་གཞན་གཉིས་ཤིག་བློན་པོར་བསྐོས་པ་དང་། དེ་གཉིས་ཀྱིས་སྨྲས་པ། ལྷ་ཏིལ་མ་བརྡུངས་པ་དང་། མ་སྩལ་བ་དང་། མ་བསྲོས་པ་དང་། མ་བཙིར་བ་དག་གིས་ཏིལ་མར་མི་འབྱིན་ཏེ། མིའི་དབང་པོ་སྐྱེ་བོ་དག་ཀྱང་དེ་དང་འདྲའོ། །རྒྱལ་པོས་སྨྲས་པ། ཁྱེད་གཉིས་ཀྱིས་བྱས་པ་གང་ཡིན་པ་དེ་ནི་མཆོག་ཏུ་བརྩོན་པ་ཡིན་ནོ། །དེ་གཉིས་ཀྱིས་ཡུལ་གྱི་མི་དག་ལ་གནོད་པ་བྱ་བར་བརྩམས་སོ། །ཇི་ཙམ་དུས་གཞན་ཞིག་ན་ཚོང་པ་ཞིག་ཟོང་ཐོགས་ཏེ་གྲོང་ཁྱེར་སྒྲ་སྒྲོགས་ནས་རྒྱལ་པོའི་ཁབ་ཏུ་ཕྱིན་པ་དང་། ཚེ་དང་ལྡན་པ་ཨུ་ཏྲ་ཡ་ནས་དེ་མཐོང་ནས་ངོ་ཤེས་ཏེ་སྨྲས་པ། ཇི་ལྟ་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང་། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་
བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་མཐར་གྱིས་དྲི་བར་བརྩམས་པས། དེ་ན་བློན་པོ་གང་ནི་གཙོ་བོ་ཡིན། །གང་ནི་གཙོ་བོ་མ་ཡིན། གང་གི་དབང་གིས་ནི་གཙུག་པུད་ཅན་ཡུལ་གྱི་མི་དག་ལ་གནོད་པ་བྱེད། དེས་སྨྲས་པ། ལྷ་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱི་སྒོ་ནི་བཟློག །སྐྱོན་ཆགས་པ་གཞན་གཉིས་ཤིག་ནི་བློན་པོར་བསྐོས་ཏེ། དེ་གཉིས་ཀྱི་དབང་གིས་གཙུག་པུད་ཅན་ཡུལ་གྱི་མི་དག་ལ་གནོད་པ་བགྱིད་དོ། །ཨུ་ཏྲ་ཡ་ནས་སྨྲས་པ། ཀྭའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང་། ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་པུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་བྱའོ། །ཚོང་པ་དེས་ཟོང་བསྒྱུར་ཏེ་ཟོང་རིན་ཁྱེར་ནས་འཕགས་ཏེ་མཐར་གྱིས་སྒྲ་སྒྲོགས་སུ་ཕྱིན་ནས་དེས་ཉེ་དུ་རྣམས་ལ་གསང་སྟེ་སྨྲས་པ། ཤེས་ལྡན་དག་ཁོ་བོས་ཟོང་ཐོགས་ཏེ་རྒྱལ་པོའི་ཁབ་ཏུ་སོན་ནས་ཁོ་བོས་དེར་རྒྱལ་པོ་བགྲེས་པོ་མཐོང་ནས། དེའི་ཞལ་ནས་ཀྭའི་ནང་རྗེ་ཁྱོད་སོང་ལ་སྒྲ་སྒྲོགས་ན་གནས་པའི་སྐྱེ་བོའི་ཚོགས་ལེགས་པར་དབུགས་ཕྱུང་ཤིག་དང་། ཡང་དེར་བཟློག་ཏུ་འོང་སྟེ། ང་ཉིད་ཀྱིས་གཙུག་པུད་ཅན་ཅི་ནས་ཀྱང་ཡུལ་གྱི་མི་རྣམས་ལ་གནོད་པ་མི་བྱེད་པ་དེ་ལྟར་གནོད་པ་ལས་བཟློག་པར་བྱ་ཞིང་ཕན་པ་ལ་ངེས་པར་སྦྱར་བར་བྱའོ་ཞེས་བྱུང་ངོ་། །དེ་དག་གིས་ཀྱང་གཞན་དག་ལ་བརྗོད་ཅིང་དེ་དག་གིས་ཀྱང་གཞན་དག་ལ་བརྗོད་པས་དེ་ལྟར་སྒྲ་དེ་རྣ་བ་གཅིག་ནས་གཅིག་ཏུ་བརྒྱུད་པས་བློན་པོ་སྐྱོན་ཆགས་པ་དེ་གཉིས་ཀྱི་རྣར་སོན་ནས་དེ་གཉིས་ཀྱིས་བསམས་པ། གལ་ཏེ་རྒྱལ་པོ་རྒན་པོ་འོང་བར་གྱུར་ན་དེས་གདོན་མི་ཟ་བར་ཧེ་རུ་ཀ་དང་། བྷི་རུ་ཀ་གཉིས་ཡང་བློན་པོའི་མཆོག་ཏུ་སྐོ་ཞིང་བདག་ཅག་གཉིས་ལ་གནོད་པ་བྱེད་པར་འགྱུར་གྱིས། དེའི་ཕྱིར་གང་གིས་དེ་ལམ་ཀར་གསོད་དུ་འཇུག་པར་འགྱུར་བའི་ཐབས་ཀྱི་རྣམ་པ་ཞིག་བྱའོ་སྙམ་ནས་དེ་གཉིས་ཀྱིས་
རྒྱལ་པོ་གཙུག་པུད་ཅན་ལ་སྨྲས་པ། ལྷ་རྒྱལ་པོ་བགྲེས་པོ་བྱོན་པར་འགྱུར་རོ་ཞེས་གདའོ། །དེས་སྨྲས་པ། དེ་རབ་ཏུ་བྱུང་བས་དེ་ཅིའི་ཕྱིར་འདིར་འོང་བར་འགྱུར། དེ་གཉིས་ཀྱིས་སྨྲས་པ། ལྷ་གང་གིས་གདུགས་གཅིག་རྒྱལ་སྲིད་བགྱིད་དུ་སྩལ་བ་དེ་ནི་རྒྱལ་སྲིད་མ་མཆིས་པས་དགའ་བར་ག་ལ་འགྱུར་ཏེ། དེ་ཡང་རྒྱལ་སྲིད་བགྱིད་དུ་སྩོལ་བར་འཚལ་ལོ། །གཙུག་པུད་ཅན་གྱིས་སྨྲས་པ། གལ་ཏེ་དེ་རྒྱལ་པོར་གྱུར་ན་ང་ཉིད་ཀྱིས་གཞོན་ནུ་བྱས་ཏེ། འདི་ལ་འགལ་བ་ཅི་ཡོད། དེ་གཉིས་ཀྱིས་སྨྲས་པ། ལྷ་དེ་ནི་ཚུལ་དང་མཐུན་པ་མ་ལགས་ཏེ་གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་ཡུལ་གྱི་མི་དག་གིས་ཐལ་མོ་སྟོང་དག་གིས་ཕྱག་བགྱིས་པས་རྒྱལ་སྲིད་བགྱིད་དུ་སྩལ་ནས་ཡང་ཇི་ལྟར་གཞོན་ནུའི་གནས་སུ་གནས་པར་མཛད་ཡུལ་འཁོར་ཡོངས་སུ་བཏང་བ་ནི་མི་སྡོ་ཡི་གཞོན་ནུའི་གནས་སུ་གནས་པ་ནི་མི་རུང་སྟེ། འདི་ལྟ་སྟེ་དཔེར་བགྱི་ན་མི་ཞིག་གླང་པོ་ཆེའི་གཉའ་བར་མཆིས་ནས་རྟའི་རྒྱབ་ཏུ་མཆི་བ་དང་། རྟའི་རྒྱབ་ཏུ་མཆིས་ནས་ཤིང་རྟས་མཆི་བ་དང་། ཤིང་རྟས་མཆིས་ནས་རྐང་པ་གཉིས་ཁོ་ནས་མཆི་བ་བཞིན་དུ། རྒྱལ་སྲིད་བགྱིད་དུ་སྩལ་ནས་ཡང་གཞོན་ནུའི་གནས་ན་གནས་པ་ཡང་དེ་དང་འདྲའོ། །དེ་གཉིས་ཀྱིས་བསླུས་ནས་དེས་སྨྲས་པ། འོ་ན་འདི་ལ་གང་རིགས། འདི་ལ་ཇི་ལྟར་བསྒྲུབ་པར་བྱ། དེ་གཉིས་ཀྱིས་སྨྲས་པ། ལྷ་དེ་འགུམས་སུ་སྩལ་བར་བགྱིའོ། །གལ་ཏེ་འགུམས་སུ་མ་སྩལ་གོར་མ་བཀུམ་པར་བློན་པོ་སྐྱོན་ཆགས་པ་དག་དང་བསྡོངས་ཏེ་ལྷ་ཉིད་དགྲོངས་པར་བགྱིད་དོ། །དེ་སྐད་ཅེས་སྨྲས་པ་དང་། དེ་བཞིན་གྱུར་ཅིང་ཉམས་ཏེ་ཡུད་ཙམ་ཞིག་ཅང་མི་སྨྲ་བར་འདུག་ནས་མཆི་མས་བརྣངས་པའི་སྙིང་གིས་སྙིང་རྗེ་བཞིན་ཞུམ་པ་དང་། ཐོགས་པའི་ཡིད་དག་གིས་སྨྲས་པ། ཤེས་ལྡན་གཉིས་ཇི་ལྟར་ཡབ་དགྲོངས་སུ་རུང་། དེ་གཉིས་ཀྱིས་སྨྲས་པ། ལྷས། ཕ་འམ་ཡང་ན་སྤུན་དག་གམ། །རང་ལས་སྐྱེས་པའི་བུ་ཡང་རུང་། །གལ་ཏེ་དགྲ་ཁྲོད་ཞུགས་གྱུར་ན། །ས་ཕུང་འཕེལ་བ་ཉིད་དུ་བྱ། །ཞེས་བགྱི་
བ་མ་གསན་ཏམ། ཡང་སྨྲས་པ། ལྷས་གང་ལ་བུ་ཕོ་སྟོང་བདོག་ཅིང་། ཐམས་ཅད་གྲུ་གཅིག་ཞུགས་གྱུར་པ། །དེར་ནི་དགྲ་བོ་གཅིག་ཏུ་བྱུང་། །དེ་ཡི་དོན་དུ་དེ་ནུབ་བྱ། །ཞེས་བགྱི་བ་མ་གསན་ཏམ། ལྷས་གཞན་དག་ནས། ཁྱིམ་གྱི་ཕྱིར་ནི་གཅིག་གཏང་བྱ། །གྲོང་ཕྱིར་ཁྱིམ་ནི་གཏང་བར་བྱ། །ལྗོངས་ཕྱིར་གྲོང་ནི་གཏང་བྱ་སྟེ། །བདག་ཉིད་ཕྱིར་ནི་ས་གཏང་བྱ། །ཞེས་འབྱུང་བ་ཡང་མ་གསན་ཏམ། ལྷ་འདི་ལ་དགོངས་པར་བགྱི་བ་ཅི་ཡང་མ་མཆིས་ཏེ། དེ་ནི་དགུམ་པར་བགྱི་ལགས་པས་འགུམས་སུ་སྩལ་བར་བགྱིའོ། །གལ་ཏེ་ལྷ་འདི་ལ་ཕྱི་ཤོལ་མཛད་ནས་ལྷ་ལ་རྗེས་སུ་ཆགས་པའི་གཞོན་ནུ་དང་། བློན་པོ་དང་། ཕོ་བྲང་འཁོར་གྱི་མི་དང་ཡུལ་གྱི་མི་གང་དག་ལགས་པ་དེ་དག་འཁྲུགས་པར་གྱུར་ན་གོར་མ་བཀུམ་པར་ལྷ་ལ་གནོད་པ་བགྱིད་པར་འགྱུར་རོ། །འདོད་པ་དག་ལ་བསྟེན་པས་ནི་སྡིག་པའི་ལས་མི་བྱ་བ་ཅི་ཡང་མེད་པས་དེས་དེ་ལྟར་གྱིས་ཤིག་ཅེས་ཁས་བླངས་སོ། །དེ་ནས་བློན་པོ་སྐྱོན་ཆགས་པ་དེ་གཉིས་དགའ་བ་དང་མགུ་བ་དང་མཆོག་ཏུ་དགའ་བ་སྐྱེས་ནས་མི་གཤེད་མ་པ་དག་ལ་སྨྲས་པ། ཤེས་ལྡན་དག་དེང་ལ་རྒྱལ་པོ་རྒན་པོ་སོད་ཅིག་དང་ཁྱེད་ཅག་ལ་ལོངས་སྤྱོད་དག་གིས་བགོ་བཤའ་བྱའོ། །རྒྱལ་པོ་དེ་ལ་ཕོ་བྲང་འཁོར་གྱི་མི་དང་ཡུལ་མི་ཐམས་ཅད་རྗེས་སུ་ཆགས་པས་དེ་གསོད་པར་སྤྲོ་བ་འགའ་ཡང་མེད་དོ། །དེ་གཉིས་ཀྱིས་དེ་དག་ལ་ལན་གསུམ་གྱི་བར་དུ་ཡང་དབྱིག་དང་། གསེར་དང་གྲོང་སྦྱིན་པ་ལ་སོགས་པས་སྤྲོ་བར་བྱེད་ན་སྤྲོ་བ་འགའ་ཡང་མ་བྱུང་ནས། དེ་ནས་དེ་གཉིས་ཁྲོ་བས་ཀུན་ནས་དཀྲིས་པས་ཕྱག་སྦལ་སྲུང་བ་རྣམས་ལ་བསྒོ་བ། ཤེས་ལྡན་དག་དེང་ལ་མི་དེ་དག་བུ་དང་། ཆུང་མ་དང་རྩ་ལག་དང་མཛའ་བཤེས་དང་། ཉེ་དུའི་ཚོགས་དང་བཅས་པ་ཆིངས་ལ་ཆུག་ཤིག །དེ་དག་གིས་ཐོས་ནས་སྐྲག་པར་གྱུར་ཏེ་སྨྲས་པ། ལྷ་ཉག་མི་བཞེས་སུ་གསོལ། བདག་ཅག་ནི་ཕྱག་རྗེད་བཀའ་ཉན་པ་དག་ལགས་ཀྱིས་མཆིའོ། །ཞེས་དེ་དག་གིས་རལ་གྲི་རྣོན་པོ་མཆན་དུ་བཅུག་སྟེ་འཕགས་སོ། །ཚེ་དང་ལྡན་པ་ཨུ་ཏྲ་ཡ་ན་དབྱར་གྱི་ཟླ་བ་གསུམ་པོ་
དག་འདས་ནས་ཆོས་གོས་བྱས་པ་དང་ལྡན། ཆོས་གོས་ཟིན་པ་དང་ལྡན་པས་ལྷུང་བཟེད་དང་ཆོས་གོས་ཐོགས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་གྲོང་ཁྱེར་སྒྲ་སྒྲོགས་སུ་ལྗོངས་རྒྱུ་ཞིང་མཆི་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཚེ་དང་ལྡན་པ་ཨུ་ཏྲ་ཡ་ན་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ་རྒྱལ་པོའི་ཁབ་ཏུ་བསོད་སྙོམས་ལ་ཞུགས་སོ། །རྒྱལ་པོའི་ཁབ་ཏུ་བསོད་སྙོམས་བརྒྱུས་ནས་ཟས་ཀྱི་བྱ་བ་བྱས་ཏེ་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པར། ཇི་ལྟར་ལོངས་སྤྱོད་པའི་གནས་མལ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་ཐོགས་ནས་ལས་ཀྱི་སྟོབས་ཀྱིས་བདས་ཏེ་སོང་ངོ་། །ལས་ཀྱིས་རིང་དུ་འདྲེན་བྱེད་དེ། །རིང་ལས་ལས་ཀྱིས་འདྲེན་པར་བྱེད། །གང་དུ་ལས་རྣམས་སྨིན་འགྱུར་བ། །དེར་ནི་ལས་ཀྱིས་རབ་ཏུ་འདྲེན། །དེ་གྲོང་ཁྱེར་སྒྲ་སྒྲོགས་ག་ལ་བ་དེར་སོང་ནས་མཐར་གྱིས་རྒྱུ་ཞིང་འགྲོ་བ་ན་ལམ་ཀ་ན་རི་བྲགས་ཤིག་ཡོད་པ་དེར་བསོད་སྙོམས་ལ་ཞུགས་ནས་དེ་དེ་ནས་བསོད་སྙོམས་བརྒྱུས་ཏེ་སོང་བ་དང་། མི་གཤེད་མ་པ་དེ་དག་དང་ཕྲད་ནས་དེ་དག་གིས་དེ་མཐོང་ངོ་། །དེས་ཀྱང་དེ་དག་ངོ་ཤེས་ནས་དེ་དག་དང་ལྷན་ཅིག་སྐྱེད་མོས་ཚལ་ཞིག་ཏུ་མཚན་མོ་གནས་པར་ཁས་བླངས་ནས་དེས་དེ་དག་ལ་དྲི་བར་བརྩམས་པ། ཇི་ལྟ་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་ནད་མེད་དམ། །དེ་ལ་ཕས་ཀྱི་སྡོ་བ་འགའ་མེད་ཅིང་། །རང་གི་རྒྱལ་སྲིད་ཆོས་ཀྱིས་བྱེད་འཇུག་གམ། །དེ་དག་གིས་སྨྲས་པ། ལྷ་དེ་བཞིན་སྒྲ་སྒྲོགས་དག་ན་གཙུག་པུད་ཅན། །འཁོར་དང་ཚོགས་བཅས་སྟོབས་ལྡན་བྲོ་མ་འཚལ། །དེ་ལ་ཕས་ཀྱི་སྡོ་བ་མ་མཆིས་ཏེ། །
རྒྱལ་སྲིད་རྟག་ཏུ་ཆོས་མ་ལགས་པས་བགྱིད། །མི་མཆོག་ཁྱོད་ཀྱི་ཚུལ་དང་མཐུན་པ་ཡི། །འཕགས་དངོས་མངོན་བརྟགས་གང་ལགས་ཁྱོད་ཀྱིས་མཛོད། །ཞི་བ་དེ་ཡི་ཚུལ་མཐུན་གང་ལགས་པ། །དེ་ནི་དེ་རིང་ཉེ་བར་གཟིགས་པར་འགྱུར། །ཚེ་དང་ལྡན་པ་ཨུ་ཏྲ་ཡ་ནས་སྨྲས་པ། ཤེས་ལྡན་དག་ཅི་དེང་དེར་འོང་བ་ལ་མངོན་པར་མི་དགའ་འམ། དེ་དག་གིས་སྨྲས་པ། ལྷ་མངོན་པར་མི་དགའོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་མི་འགྲོས་ཕྱིར་ལྡོག་པར་བྱའོ། །དེ་དག་གིས་ཚིགས་སུ་བཅད་པ་སྨྲས་པ། སྐྱེས་བུ་དཔའ་ཁྱོད་སླར་ནི་གང་དུ་གཤེགས། །སྲས་ནི་ཁྱོད་གསོན་མངོན་པ་མི་དགའ་སྟེ། །བདག་ཅག་བྱུར་ངན་རྒྱལ་པོས་བསྐོས་རྣམས་ཀྱིས། །འདིར་ནི་ཁྱོད་དགྲོངས་སླད་དུ་མཆིད་ཀྱིས་འཚལ། །ཚེ་དང་ལྡན་པ་ཨུ་ཏྲ་ཡ་ནས་སྨྲས་པ། ཤེས་ལྡན་དག་ཁྱེད་ཅག་ང་གསོད་པའི་མི་གཤེད་མ་པ་དག་ཡིན་ནམ། ལྷ་བདག་ཅག་ཁྱོད་དགྲོངས་པའི་གཤེད་མ་པ་དག་ལགས་སོ། །ཚེ་དང་ལྡན་པ་ཨུ་ཏྲ་ཡ་ནས་བསམས་པ། བཅོམ་ལྡན་འདས་ཀྱིས་བདག་ལ་ཨུ་ཏྲ་ཡ་ན་སོང་ལ་ཁྱོད་ཀྱིས་ལས་བདག་གིར་བྱ་བ་ཡིད་ལ་བྱའོ་ཞེས་བཀའ་སྩལ་པ་གང་ཡིན་པ་དེ་ནི་འདི་ཡིན་པ་ལྟ་སྟེ། འཁོར་བ་ནི་རྣམ་པ་ཐམས་ཅད་དུ་ངན་པ་སྙིང་པོ་མེད་པ་འཇིག་པའི་ཆོས་ཅན་ཡིན་ནོ་སྙམ་དུ་རིག་ནས། དེ་དག་ལ་སྨྲས་པ། བཞིན་བཟངས་དག་ང་དོན་གང་གི་ཕྱིར་རབ་ཏུ་བྱུང་བའི་དོན་དེ་ངས་ད་དུང་མ་ཐོབ་ཀྱིས་རེ་ཞིག་ང་རང་གི་དོན་རྗེས་སུ་སྒྲུབ་ཀྱི་བར་དུ་ཡུད་ཙམ་ཞིག་སྡོད་ཅིག །དེ་དག་གིས་ཕན་ཚུན་གྲོས་བྱས་ཏེ་སྨྲས་པ། ལྷ་དེ་ལྟར་མཛོད་ཅིག །དེ་ནས་ཚེ་དང་ལྡན་པ་ཨུ་ཏྲ་ཡ་ན་ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་པོ་གཉིད་ལོག་པའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་སྤྱོད་ལམ་ཞི་བས་འདུག་གོ །བཅོམ་ལྡན་འདས་ཀྱིས་མང་དུ་ཐོས་པ་ལ་ཕན་ཡོན་ལྔ་ཡོད་དེ། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་གསུངས་
པས་དེས་བརྩོན་འགྲུས་བརྩམས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ། འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་རྣམ་པར་འཐོར་བ་དང་། རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་དག་གང་གི་ཕྱིར་སྐྲ་དང་ཁ་སྤུ་དག་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་འདི་ཉིད་ལ་རང་གི་མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་། དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ། རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཚེ་དང་ལྡན་པ་ཨུ་ཏྲ་ཡ་ནས་དགྲ་བཅོམ་པ་ཉིད་ཐོབ་ནས་རྣམ་པར་གྲོལ་བའི་དགའ་བ་དང་བདེ་བ་སོ་སོ་ཡང་དག་པར་རིག་པ་ན་དེའི་ཚེ་ཚིགས་སུ་བཅད་པ་སྨྲས་པ། དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང་། །དེ་བཞིན་སྒྲིབ་ལས་ཐར་གྱུར་ཀྱང་། །རྒྱལ་པོའི་ཆོས་ལས་དེང་མ་ཐར། །ཅེས་སྨྲས་ནས་མི་གཤེད་མ་དེ་དག་ལ་སྨྲས་པ། བཞིན་བཟངས་དག་ངས་ཐོབ་པར་བྱ་བ་གང་ཡིན་པ་དེ་ཐོབ་ཟིན་གྱིས་ད་ནི་ཁྱེད་ཅག་དོན་གང་གི་ཕྱིར་འོངས་པའི་དོན་དེ་ཐོབ་པར་བྱའོ། །དེ་དག་གིས་སྨྲས་པ། ལྷ་གལ་ཏེ་རྒྱལ་པོ་གཙུག་ཕུད་ཅན་བདག་ཅག་ལ་རྒྱལ་པོ་རྒན་པོས་འཆི་བའི་དུས་ཀྱི་ཚེ་ཅི་ཞིག་སྨྲས་ཞེས་རྨེད་ན། བདག་ཅག་གིས་དེ་ལ་ཇི་སྐད་བརྗོད་པར་བགྱི།
བཞིན་བཟངས་དག་དེ་ལ་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །ཞེས་བརྗོད་པར་བྱའོ། །གཞན་ཡང་འདི་སྐད་ཅེས། ཁྱོད་ཀྱིས་མཚམས་མེད་པ་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང་། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེ་གཉིས་ཀྱིས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བྱ་དགོས་ཀྱིས་སྡིག་པ་སྣ་ཚོགས་ལས་ཤོགས་ཤིག་དང་། དེ་ལྟ་ལས་བསྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་མཐར་ཐུག་པར་འགྱུར་རོ་ཞེས་བརྗོད་པར་བྱའོ། །ཚེ་དང་ལྡན་པ་ཨུ་ཏྲ་ཡ་ནས་ཡང་བསམས་པ། སེམས་ཅན་དེ་སེམས་ཅན་དམྱལ་བ་ཆེན་པོ་ལས་གཞོལ་བར་གྱུར་ན་མི་རུང་གིས་རྫུ་འཕྲུལ་གྱིས་འགྲོའོ་སྙམ་ནས། དེས་རྫུ་འཕྲུལ་གྱི་ཐབས་གང་དང་གང་ཡིན་བརྩམས་ན་དེའི་ལས་ཀྱིས་ནོན་པས་རྫུ་ཞེས་བྱ་བ་ཙམ་ཡང་སྣང་བར་མ་གྱུར་ན་རྫུ་འཕྲུལ་ལྟ་སྨོས་ཀྱང་ཅི་དགོས། དེ་ནས་མི་གཤེད་མ་པ་དེ་དག་ལས་མི་སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་གཅིག་གིས་རལ་གྲི་ཤུབས་ནས་ཕྱུང་སྟེ། དེའི་མགོ་དྲུངས་ནས་བཅད་ནས་ས་ལ་བསྒྱེལ་ཏོ། །དེ་ནས་བཅོམ་ལྡན་འདས་འཛུམ་པ་མཛད་དོ། །ཆོས་ཉིད་ཀྱིས་ན་གང་གི་ཚེ་སངས་རྒྱས་བཅོམ་ལྡན་འདས་རྣམས་འཛུམ་པ་མཛད་པ་དེའི་ཚེ་ན་ཞལ་ནས་འོད་ཟེར་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་ཁ་ཅིག་ནི་འོག་ལོགས་སུ་འདོང་། ཁ་ཅིག་ནི་སྟེང་ལོགས་སུ་འདོང་བས་གང་དག་འོག་ལོགས་སུ་འདོང་བ་དེ་དག་ནི་སེམས་ཅན་དམྱལ་བ་ཡང་སོས་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། ཆུ་བུར་ཅན་དང་། ཆུ་བུར་རྡོལ་དང་། སོ་ཐམས་ཐམས་དང་། ཀྱི་ཧུད་ཟེར་དང་། ཨ་ཅུ་ཟེར་དང་། ཨུཏྤལ་ལྟར་གས་
པ་དང་། པད་མ་ལྟར་གས་པ་དང་། པད་མ་ལྟར་གས་པ་ཆེན་པོར་དོང་སྟེ། སེམས་ཅན་དམྱལ་བ་ཚ་བ་གང་དག་ཡིན་པ་དེ་དག་ཏུ་ནི་བསིལ་བར་གྱུར་ཏེ་འབབ་པར་བྱེད་ལ། སེམས་ཅན་དམྱལ་བ་གྲང་བ་གང་དག་ཡིན་པ་དེ་དག་ཏུ་ནི་དྲོ་བར་གྱུར་ཏེ་འབབ་པར་བྱེད་དོ། །དེས་སེམས་ཅན་དེ་དག་གི་གནོད་པའི་བྱེ་བྲག་དག་རྒྱུན་གཅོད་པར་བྱེད་ཅིང་དེ་དག་འདི་སྙམ་དུ། ཤེས་ལྡན་དག་ཅི་བདག་ཅག་འདི་ནས་ཤི་འཕོས་སམ། འོན་ཏེ་གཞན་དུ་སྐྱེས་སྙམ་དུ་སེམས་སོ། །དེ་དག་དད་པ་བསྐྱེད་པར་བྱ་བའི་ཕྱིར་བཅོམ་ལྡན་འདས་ཀྱིས་སྤྲུལ་པ་གཏོང་བར་མཛད་དེ། དེ་དག་གིས་སྤྲུལ་པ་མཐོང་ནས་འདི་སྙམ་དུ་ཤེས་ལྡན་དག་བདག་ཅག་འདི་ནས་ཤི་འཕོས་པ་མ་ཡིན་ལ། གཞན་དུ་སྐྱེས་པ་ཡང་མ་ཡིན་ཏེ། འདི་ལྟར་སེམས་ཅན་སྔོན་མ་མཐོང་བ་འདིའི་མཐུས་བདག་ཅག་གི་གནོད་པའི་བྱེ་བྲག་རྒྱུན་ཆད་པར་གྱུར་ཏོ་སྙམ་དུ་སེམས་སོ། །དེ་དག་སྤྲུལ་པ་ལ་སེམས་མངོན་པར་དད་པར་གྱུར་ནས། སེམས་ཅན་དམྱལ་བ་མྱོང་བར་འགྱུར་བའི་ལས་དེ་ཟད་པར་བྱས་ནས་གང་དུ་བདེན་པ་དག་གི་སྣོད་དུ་གྱུར་པར་འགྱུར་བའི་ལྷ་དང་མི་རྣམས་ཀྱི་ནང་དུ་ཉིང་མཚམས་སྦྱོར་བ་ལེན་པར་བྱེད་དོ། །གང་དག་སྟེང་ལོགས་སུ་འདོང་བ་དེ་དག་ནི་རྒྱལ་ཆེན་བཞི་པ་དང་། སུམ་བཅུ་རྩ་གསུམ་པ་དང་། འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་དང་། ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་དང་། འོད་ཆུང་དང་ཚད་མེད་འོད་དང་། འོད་གསལ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་གྱི་ལྷ་རྣམས་ཀྱི་ནང་དུ་དོང་ནས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ཞེས་བྱ་བའི་སྒྲ་སྒྲོགས་པར་བྱེད་ཅིང་ཚིགས་སུ་བཅད་པ་གཉིས་པོ། །བརྩམ་པར་བྱ་ཞིང་འབྱུང་བར་བྱ། །སངས་རྒྱས་བསྟན་ལ་འཇུག་པར་བྱ། །འདམ་བུའི་ཁྱིམ་ལ་གླང་ཆེན་བཞིན། །འཆི་བདག་སྡེ་ནི་གཞོམ་པར་བྱ། །
གང་ཞིག་རབ་ཏུ་བག་ཡོད་པར། །ཆོས་འདུལ་འདི་ལ་སྤྱོད་འགྱུར་བ། །སྐྱེ་བའི་འཁོར་བ་རབ་སྤངས་ནས། །སྡུག་བསྔལ་ཐ་མར་བྱེད་པར་འགྱུར། །ཞེས་བྱ་བ་ཡང་སྨྲས་སོ། །དེ་ནས་འོད་ཟེར་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་བྱུལ་ནས་བཅོམ་ལྡན་འདས་ཀྱི་སླད་བཞིན་སླད་བཞིན་དུ་རྗེས་སུ་འདོང་སྟེ། དེ་ལ་གལ་ཏེ་བཅོམ་ལྡན་འདས་འདས་པའི་ལས་ལུང་སྟོན་པར་བཞེད་ན་ནི་བཅོམ་ལྡན་འདས་ཀྱི་སྣམ་ལོགས་སུ་ནུབ་པར་འགྱུར་རོ། །མ་འོངས་པའི་ལས་ལུང་སྟོན་པར་བཞེད་ན་ནི་མདུན་ལོགས་སུ་ནུབ་པར་འགྱུར། སེམས་ཅན་དམྱལ་བར་སྐྱེ་བར་ལུང་སྟོན་པར་བཞེད་ན་ནི་ཞབས་ཀྱི་མཐིལ་དུ་ནུབ་པར་འགྱུར། དུད་འགྲོར་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་ལོང་བུར་ནུབ་པར་འགྱུར། ཡི་དགས་སུ་སྐྱེ་བ་ལུང་སྟོན་པར་བཞེད་ན་ནི་ཞབས་ཀྱི་མཐེ་བོར་ནུབ་པར་འགྱུར། མིར་སྐྱེ་བ་ལུང་སྟོན་པར་བཞེད་ན་ནི་པུས་མོར་ནུབ་པར་འགྱུར། སྟོབས་ཀྱི་འཁོར་ལོས་སྒྱུར་བའི་རྒྱལ་སྲིད་ལུང་སྟོན་པར་བཞེད་ན་ནི་ཕྱག་མཐིལ་གཡོན་པར་ནུབ་པར་འགྱུར། འཁོར་ལོས་སྒྱུར་བའི་རྒྱལ་སྲིད་དུ་ལུང་སྟོན་པར་བཞེད་ན་ནི་ཕྱག་མཐིལ་གཡས་པར་ནུབ་པར་འགྱུར། ལྷར་སྐྱེ་བ་ལུང་སྟོན་པར་བཞེད་ན་ནི་ལྟེ་བར་ནུབ་པར་འགྱུར། ཉན་ཐོས་ཀྱི་བྱང་ཆུབ་ལུང་སྟོན་པར་བཞེད་ན་ནི་ཞལ་དུ་ནུབ་པར་འགྱུར། རང་སངས་རྒྱས་ཀྱི་བྱང་ཆུབ་ལུང་སྟོན་པར་བཞེད་ན་ནི་མཛོད་སྤུར་ནུབ་པར་འགྱུར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལུང་སྟོན་པར་བཞེད་ན་ནི་གཙུག་ཏོར་དུ་ནུབ་པར་འགྱུར་རོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་གཉིས་ཀྱི་མཐིལ་དུ་ནུབ་བོ་དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ཏེ་བཅོམ་ལྡན་འདས་ལ་ཞུས་པ། ཁ་དོག་སྣ་ཚོགས་སྟོང་གིས་བཀྲ་བ་ཡི། །ཚོགས་རྣམས་ཞལ་གྱི་སྒོ་ནས་བྱུང་གྱུར་ཏེ། །དེ་ཡིས་ཕྱོགས་རྣམས་ཐམས་ཅད་སྣང་བགྱིས་པ། །ཉི་གདུགས་བརྡལ་བར་གྱུར་པ་ཅི་བཞིན་ནོ། །ཡང་ཚིགས་སུ་བཅད་པ་སྨྲས་པ། རྒོད་བྲལ་ཞུམ་དང་རྒྱགས་པ་རབ་སྤངས་པ། །སངས་རྒྱས་འགྲོ་བ་མཆོག་གི་རྒྱུར་
གྱུར་པ། །རྒྱལ་བ་དགྲ་ཐུལ་བྱེད་རྒྱུ་མ་མཆིས་པ། །རྩ་ལག་དུང་ལྟར་དཀར་འཛུམ་སྟོན་མི་མཛད། །དེ་སླད་བརྟེན་པ་རང་བློས་དུས་མཁྱེན་ནས། །ཐུབ་པ་ཁྱུ་མཆོག་དགེ་སྦྱོང་སྐྱེ་དབང་པོ། །ཉན་པའི་སྐྱེ་བོ་སོམ་ཉི་ལྡན་རྣམས་ལ། །ཐེ་ཚོམ་སྐྱེས་པ་གསུང་ཚིག་བརྟན་པ་དང་། །དམ་པ་དགེ་བ་དག་གིས་བསལ་དུ་གསོལ། །ཚྭ་ཆུ་རི་རྒྱལ་ལྟ་བུར་བརྟན་པ་ཡི། །སངས་རྒྱས་མགོན་རྣམས་གློ་བུར་འཛུམ་མི་སྟོན། །བརྟན་ནས་ཅི་སླད་འཛུམ་པ་སྟོན་མཛད་པ། །སྐྱེ་བོའི་ཚོགས་རྣམས་དེ་ནི་ཉན་པར་འཚལ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ་དེ་དེ་བཞིན་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་མེད་རྐྱེན་མེད་པར་འཛུམ་པ་མི་མཛད་དེ། ཀུན་དགའ་བོ་འདི་ལྟར། དགེ་སློང་ཨུ་ཏྲ་ཡ་ན་ནི། །མདུད་པ་སྦྱོར་བ་ཟུག་རྔུ་དང་། །དེ་བཞིན་སྒྲིབ་ལས་ཐར་གྱུར་ཀྱང་། །རྒྱལ་པོའི་ཆོས་ལས་དེང་མ་ཐར། །ཀུན་དགའ་བོ་གྲོང་ཁྱེར་སྒྲ་སྒྲོགས་ན་གནས་པའི་རྒྱལ་པོ་གཙུག་པུད་ཅན་སྡིག་པའི་གྲོགས་པོས་བསྐོར་བས་དགེ་སློང་ཨུ་ཏྲ་ཡ་ན། དགྲ་བཅོམ་པ་ཉིད་ཐོབ་པ་སྲོག་དང་བྲལ་བར་བྱས་ཏེ། དེས་ཕ་དགྲ་བཅོམ་པ་སྲོག་དང་བྲལ་བར་བྱས་པས་ངེས་པར་སེམས་ཅན་དམྱལ་བ་ཆེན་པོ་མནར་མེད་པར་སྐྱེ་བར་འགྱུར་རོ། །བཙུན་པ་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏམ། ཀུན་དགའ་བོ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་ཅིང་སྲོག་དང་བྲལ་བར་གྱུར་ཏོ། །ཚེ་དང་ལྡན་པ་ཀུན་དགའ་བོས་དེ་ཐོས་ནས་མཆི་མས་བརྣངས་ཏེ་འདུག་གོ །དེ་ནས་གཤེད་མ་པ་མི་དེ་དག་གིས་ཚེ་དང་ལྡན་པ་ཨུ་ཏྲ་ཡ་ནའི་ལྷུང་བཟེད་དང་། ཆོས་གོས་དང་ཁར་གསིལ་ཁྱེར་ཏེ་གྲོང་ཁྱེར་སྒྲ་སྒྲོགས་སུ་ཕྱིན་ནས་དེ་དག་གིས་བློན་པོ་སྐྱོན་ཆགས་པ་དེ་གཉིས་ལ་སྨྲས་པ། རྒྱལ་པོ་རྒན་པོ་བསད་དོ། །དེ་གཉིས་ཀྱིས་ཐོས་ནས་དགའ་བ་དང་མཆོག་ཏུ་དགའ་བ་སྐྱེས་ཏེ་རྒྱལ་པོ་གཙུག་པུད་ཅན་ག་ལ་བ་དེར་དོང་ནས་སྨྲས་པ། ལྷ་དགྱེས་པ་སྐྱེད་ཅིག །ད་ནི་ལྷའི་རྒྱལ་སྲིད་ལ་ཚེར་མ་མ་མཆིས་སོ། །ཇི་ལྟར་གྱུར་ལྷའི་དགྲ་གང་ལགས་པ་དེ་
བཀུམ་མོ། །ངའི་དགྲ་གང་ཡིན། ལྷ་རྒྱལ་པོ་རྒན་པོའོ། །དེ་བསད་པ་ཇི་ལྟར་ཤེས། དེ་གཉིས་ཀྱིས་མི་གཤེད་མ་པ་དག་བསྟན་ཏེ་སྨྲས་པ། ལྷ་མི་འདི་དག་ནི་གཤེད་མ་པ་ལགས་ཏེ་འདི་དག་གིས་དེ་བཀུམ་མོ། །རྒྱལ་པོ་གཙུག་པུད་ཅན་གྱིས་དེ་དག་མཐོང་ནས་སྨྲས་པ། ཤེས་ལྡན་དག་རྒྱལ་པོ་རྒན་པོ་ལ་དབང་ཇི་ཙམ་ཡོད། ལྷ་དེ་ལ་དབང་ག་ལ་མཆིས་ཏེ་ལྷུང་བཟེད་དང་། ཆོས་གོས་དང་ཁར་གསིལ་འདི་ལགས་སོ། །རྒྱལ་པོ་གཙུག་པུད་ཅན་གྱིས་དེ་མཐོང་ནས་བརྒྱལ་ཏེ་ས་ལ་སྒྱེལ་ནས་ཆུས་བཏབ་སྟེ་དབུགས་ཕྱིར་བྱུང་ནས་སྨྲས་པ། ཤེས་ལྡན་དག་རྒྱལ་པོ་རྒན་པོས་འཆི་བའི་ཚེ་ཅི་སྨྲས། ལྷ་རྒྱལ་པོ་རྒན་པོ་སྲོག་དང་བྲལ་ཀར་འདི་སྐད་ཅེས། རྒྱལ་སྲིད་ཕྱིར་ནི་ཕ་བསད་པས། །བསོད་ནམས་མ་ཡིན་མང་པོ་བསྐྱེད། །ང་ནི་ཡོངས་སུ་མྱ་ངན་འདའ། །ཁྱོད་ནི་མནར་མེད་འགྲོ་བར་འགྱུར། །ཞེས་མཆིའོ། །གཞན་ཡང་འདི་སྐད་ཅེས། ཁྱོད་ཀྱིས་མཚམས་མེད་པའི་ལས་གཉིས་བྱས་ཏེ། ཕ་སྲོག་དང་ཕྲལ་བ་གང་ཡིན་པ་དང་། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ཡིན་པ་དེས་ཁྱོད་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བྱ་དགོས་ཀྱིས་སྡིག་པ་སྡིག་པ་ལས་ཤོགས་ཤིག་དང་། དེ་ལྟ་ན་ལས་བསྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་གཏུགས་པར་འགྱུར་རོ། །ཞེས་མཆིའོ། །དེ་མྱ་ངན་གྱི་ཟུག་རྔུས་གཟིར་བས་འདམ་བུ་སྔོན་པོར་བརྔས་པ་བཞིན་དུ་རྙིས་པར་གྱུར་ནས། དེས་བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་བོས་ཏེ་སྨྲས་པ། ཤེས་ལྡན་གཉིས་ཁྱེད་གཉིས་ཀྱིས་ང་ལས་དེ་ལྟ་བུ་བྱེད་པ་ལས་མ་བཟློག་གོ །དེ་གཉིས་ཀྱིས་སྨྲས་པ། ལྷས་བདག་ཅག་གཉིས་སྤྱན་ལམ་དུ་མ་བཞག་ན་ཇི་ལྟར་བཟློག་པར་བགྱི། དེས་བློན་པོ་སྐྱོན་ཆགས་པ་དེ་གཉིས་མིག་ལམ་དུ་མི་སྣང་བར་བཞག་ནས་ཧེ་རུ་ཀ་དང་། བྷི་རུ་ཀ་གཉིས་ཕྱིར་བློན་པོའི་མཆོག་ཏུ་བསྐོས་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་གསང་སྟེ། ཚེ་དང་ལྡན་པ་རྒྱལ་དང་། སྐར་རྒྱལ་གྱི་མཆོད་རྟེན་གཉིས་ལ་ཁུང་བུ་གཉིས་བརྐོས་ནས་དེར་བྱི་ལའི་ཕྲུ་གུ་
གཉིས་བཞག་སྟེ། དེ་གཉིས་ཀྱིས་ཉི་མ་རེ་རེ་ཞིང་ཤ་སྲི་རེ་རེ་བྱིན་ནས་འདི་སྐད་ཅེས་རྒྱལ་དང་སྐར་རྒྱལ་གཉིས་བདེན་པ་དང་བདེན་པའི་ཚིག་གང་གིས་ཁྱོད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ། དད་པས་སྦྱིན་པར་བྱ་བ་ཆུད་གསན་པས་བྱི་ལའི་སྐྱེ་གནས་ངན་པར་སྐྱེས་པའི་བདེན་པ་དང་བདེན་པའི་ཚིག་དེས་ཤ་སྲི་ལོང་ལ་རང་རང་གི་མཆོད་རྟེན་ལ་བསྐོར་བ་བགྱིས་ཏེ། རང་རང་གི་ཁུང་དུ་ཞུགས་ཤིག་ཅེས་སློབ་པར་བྱེད་དོ། །གང་གི་ཚེ་དེ་གཉིས་ལེགས་པར་ལོབས་པར་གྱུར་པ་དེའི་ཚེ་ན་བློན་པོ་སྐྱོན་ཆགས་པ་དེ་གཉིས་ཨུ་ཏྲ་ཡ་ནའི་བཙུན་མོའི་གན་དུ་སོང་སྟེ་སྨྲས་པ། ལྷ་མོ་ཁྱོད་ཀྱི་སྲས་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ན་ཅིའི་སླད་དུ་ཁྱོད་བཏང་སྙོམས་མཛད། དེས་སྨྲས་པ། ཁྱོད་གཉིས་ཉིད་ཀྱིས་དེ་ལས་དེ་ལྟ་བུ་བྱེད་དུ་བཅུག་ན་ད་ཁོ་མོས་ཇི་ལྟར་བྱ། དེ་གཉིས་ཀྱིས་སྨྲས་པ། ལྷ་མོ་ཅི་གང་དུ་བུམ་པ་ལྷུང་བ་དེར་དཔྱང་ཐག་ཀྱང་ལྷུང་བར་བགྱིའམ། དེས་སྨྲས་པ། དེ་ཤེས་ཏེ་རེ་ཞིག་དེའི་ཕ་བསད་པ་ནི་ཁོ་མོས་གསང་བར་བྱ་ན། དགྲ་བཅོམ་པ་བསད་པ་སུས་གསང་བར་འགྱུར། དེ་གཉིས་ཀྱིས་སྨྲས་པ། ལྷ་མོ་དགྲ་བཅོམ་པ་བསད་པ་བདག་ཅག་གཉིས་ཀྱིས་གསང་བར་བགྱིའོ། །དེས་སྨྲས་པ། གལ་ཏེ་དེ་ལྟ་ན་ལེགས་སོ་ཞེས་དེ་དེའི་གན་དུ་སོང་སྟེ་སྨྲས་པ། སྲས་ཅིའི་སླད་དུ་ཁྱོད་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར། དེས་སྨྲས་པ། ཡུམ་ཁྱོད་ཀྱང་དེ་སྐད་ཅེས་ཅིའི་ཕྱིར་ཁྱོད་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་གྱུར་ཅེས་གསུང་ངམ། གང་གི་སླད་དུ་བདག་བློན་པོ་སྐྱོན་ཆགས་པ་གཉིས་ཀྱིས་བསླུས་པས་མཚམས་མེད་པའི་ལས་གཉིས་བགྱིས་ཏེ་ཡབ་སྲོག་དང་ཕྲལ་བ་གང་ལགས་པ་དང་། དགེ་སློང་དགྲ་བཅོམ་པ་ཟག་པ་ཟད་པ་སྲོག་དང་ཕྲལ་བ་གང་ལགས་པ་དེས་བདག་ཡུན་རིང་པོར་སེམས་ཅན་དམྱལ་བ་ཆེན་པོ་མནར་མེད་པར་གནས་པར་བགྱི་འཚལ་ན། བདག་ཇི་ལྟར་སྐྱ་བོ་བསེང་བསེང་པོ་རིད་པ་དང་། ཉམ་ཆུང་བ་དང་། རྐེ་བ་དང་། ལུས་མ་ཐོབ་པར་མི་འགྱུར་
དུ་རུང་། དེས་སྨྲས་པ། སྲས་ཅི་མི་འཇིགས་པ་སྩོལ་ཅིག་དང་། གང་མེད་པ་དེ་བཀའ་མཆིད་བགྱིའོ། །དེས་སྨྲས་པ། ཡུམ་གསོལ་གྱིས་ཇི་ལྟར་ལགས་པ་གསུངས་ཤིག། སྲས་དེ་ནི་ཁྱོད་ཀྱི་ཡབ་མ་ལགས་ཏེ། འདི་ལྟར་བདག་གིས་ཟླ་མཚན་བཀྲུ་བའི་སླད་དུ་སྐྱེས་པ་གཞན་དག་དང་ལྷན་ཅིག་དགའ་མགུར་སྤྱོད་པ་དེ་ལས་ཁྱོད་འཁྲུངས་སོ། །དེས་བསམས་པ། དེ་ལྟ་ན་ཕ་བསད་པར་མ་གྱུར་ཏོ་སྙམ་དུ་རིག་ནས་སྨྲས་པ། ཡུམ་གལ་ཏེ་དེ་ལྟ་ན་ཕ་བསད་པ་ནི་མ་མཆིས་ན་དགྲ་བཅོམ་པ་བསད་པ་མཆིས་པ་དེ་ཇི་ལྟར་མཐར་ཐུག་པར་བགྱི། དེས་སྨྲས་པ། སྲས་འདི་ལ་ཤེས་པ་ལ་མཁས་པ་དག་སྨྲ་བར་བགྱི་སྟེ། དེ་དག་གིས་དེ་མཐར་ཐུག་པར་བགྱིད་པར་འགྱུར་རོ། །ཞེས་སྨྲས་ཏེ་སོང་ནས། དེས་བློན་པོ་སྐྱོན་ཆགས་པ་དེ་གཉིས་བོས་ཏེ་སྨྲས་པ། ཁོ་མོས་དེའི་ཕ་བསད་པ་ནི་བསལ་ཟིན་གྱིས་ད་ཁྱོད་གཉིས་ཀྱིས་དགྲ་བཅོམ་པ་བསད་པ་སོལ་ཅིག །རྒྱལ་པོ་གཙུག་པུད་ཅན་གྱིས་བློན་པོ་རྣམས་ལ་བསྒོ་བ། བློན་པོ་གང་དག་ཤེས་པ་ལ་མཁས་པ་ཐམས་ཅད་སྡུས་ཤིག །དེ་དག་གིས་བློན་པོ་གང་དག་ཤེས་པ་ལ་མཁས་པ་ཐམས་ཅད་བསྡུས་པ་དང་བློན་པོ་སྐྱོན་ཆགས་པ་དེ་གཉིས་ཀྱང་དེར་འདུས་པར་གྱུར་ཏོ། །དེ་ནས་རྒྱལ་པོ་གཙུག་པུད་ཅན་གྱིས་དེ་དག་ལ་སྨྲས་པ། ཤེས་ལྡན་དག་ངས་དགྲ་བཅོམ་པ་བསད་པ་གང་ཡིན་པ་དེ་ཇི་ལྟར་མཐར་ཐུག་པར་བྱ། དེ་ན་རྒྱལ་པོས་ཉེ་བར་འཚོ་བའི་མི་ཐམས་ཅད་ཀྱིས་ནི་མི་མཐུན་པར་སྨྲ་བར་བརྩམས་ཏེ། དེ་ན་ཁ་ཅིག་གིས་སྨྲས་པ། ལྷ་དེས་དགྲ་བཅོམ་པ་ཉིད་མངོན་སུམ་དུ་བགྱིས་པར་སུས་མཐོང་། ཁ་ཅིག་གིས་སྨྲས་པ། ལྷ་དགྲ་བཅོམ་པ་དག་ནི་ཐམས་ཅད་མཁྱེན་པ་དང་འདྲ་སྟེ་ནམ་མཁའ་ལ་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་འདི་ལ་ཐུགས་ངན་བགྱིར་ཅི་མཆིས། དེས་སྨྲས་པ། ཁྱེད་གཉིས་ཀྱང་དེ་སྐད་ཅེས་འདི་ལ་མྱ་ངན་བྱར་ཅི་ཡོད་ཟེར་རམ། ཁྱེད་གཉིས་ཉིད་ན་རེ་དགྲ་བཅོམ་པ་གསོད་དུ་བཅུག་གོ་ཞེས་མི་ཟེར་རམ། དེ་གཉིས་ཀྱིས་སྨྲས་པ། ལྷ་དགྲ་བཅོམ་པ་དག་མ་མཆིས་ན་དགྲ་བཅོམ་པ་དག་བཀུམ་པ་མཆིས་རེ་སྐན། དེས་སྨྲས་པ། ངས་མངོན་སུམ་ཁོ་
ནར་དགྲ་བཅོམ་པ་རྒྱལ་དང་། སྐར་རྒྱལ་གཉིས་ཀྱིས་འབར་བ་དང་། གསལ་བ་དང་། ཆར་འབབ་པ་དང་། གློག་འབྱིན་པའི་ཆོ་འཕྲུལ་དག་བྱས་ཏེ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་མཐོང་བཞིན་དུ་ཁྱེད་གཉིས་ཀྱིས་དེ་སྐད་ཅེས། དགྲ་བཅོམ་པ་དག་མེད་ན་དགྲ་བཅོམ་པ་བསད་པ་ཡོད་རེ་སྐན། ཞེས་ཟེར་རམ། དེ་གཉིས་ཀྱིས་སྨྲས་པ། ལྷ་ཇི་ལྟར་དེ་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བགྱི་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ། དེང་སང་ཉིད་དུ་ཡང་རང་རང་གི་མཆོད་རྟེན་ན་མཆིས་པ་ལྷའི་མངོན་སུམ་དུ་བགྱིའོ། །རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཚུར་ཤོག་དང་ཅི་ཡང་དག་པའམ། ཡང་དག་པ་མ་ཡིན་པ་ལྟར་འདོང་ངོ་། །གྲོང་ཁྱེར་སྒྲ་སྒྲོགས་ཐམས་ཅད་དུ་ཇི་ལྟར་རྒྱལ་དང་། སྐར་རྒྱལ་གཉིས་བྱི་ལའི་སྐྱེ་གནས་སུ་སྐྱེས་ཏེ་རང་རང་གི་མཆོད་རྟེན་ན་འདུག་ནས་རྒྱལ་པོ་ལྟར་སོང་ངོ་ཞེས་བྱ་བའི་སྒྲ་དེས་ཁྱབ་པར་གྱུར་ནས་སྲོག་ཆགས་འབུམ་ཕྲག་དུ་མ་དག་ལྟད་མོ་སྐྱེས་ནས་རྒྱལ་པོའི་ཕྱི་བཞིན་དུ་འབྲང་ངོ་། །དེ་ནས་བློན་པོ་སྐྱོན་ཆགས་པ་དེ་གཉིས་ཀྱིས་རྒྱལ་པོ་དང་བཅས་པའི་འཁོར་འབུམ་ཕྲག་དུ་མའི་མདུན་དུ་སྨྲས་པ། རྒྱལ་དང་སྐར་རྒྱལ་གཉིས་ཉོན་ཅིག་བདེན་པ་དང་བདེན་པའི་ཚིག་གང་གིས་ཁྱེད་གཉིས་ཀྱིས་སྒྱུ་མས་འཇིག་རྟེན་བསླུས་ཏེ་དད་པས་སྦྱིན་པར་བྱ་བ་ཆུད་གཟན་པས་བྱི་ལའི་སྐྱེ་གནས་ངན་པར་སྐྱེས་ཏེ་རང་རང་གི་མཆོད་རྟེན་ན་འདུག་པའི་བདེན་པ་དང་བདེན་པའི་ཚིག་དེས་ཤ་སྲི་འདི་ལོང་ལ་རང་རང་གི་མཆོད་རྟེན་ལ་བསྐོར་བ་བགྱིས་ཏེ་རང་རང་གི་ཁུང་དུ་ཞུགས་ཤིག །དེ་སྐད་སྨྲས་པ་དང་། དེ་གཉིས་ཀྱིས་རང་རང་གི་ཁུང་ནས་བྱུང་སྟེ་ཤ་སྲི་བླངས་ནས་རང་རང་གི་མཆོད་རྟེན་ལ་བསྐོར་བ་བྱས་ནས་རང་རང་གི་ཁུང་དུ་ཞུགས་པ་སྲོག་ཆགས་འབུམ་ཕྲག་དུ་མ་དག་གིས་མཐོང་ནས། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་གཟིགས་སམ། དེས་སྨྲས་པ་མཐོང་ངོ་། །དེ་གཉིས་ཀྱིས་སྨྲས་པ། ལྷ་དེ་ལྟར་ན་འཇིག་རྟེན་ན་དགྲ་བཅོམ་པ་དག་མ་མཆིས་ཏེ་དེ་ནི་སྐྱེ་བོའི་བཀའ་མཆིད་འབའ་
ཞིག་ཏུ་བས་སོ། །དེ་ནས་རྒྱལ་པོ་དེ་ལ་འཇིག་རྟེན་དགྲ་བཅོམ་པ་དག་ཡོད་དོ་སྙམ་པའི་ལྟ་བ་ཡོད་པ་གང་ཡིན་པ་དེ་མེད་པར་གྱུར་ཏོ། །དེ་ན་གང་དག་མ་དད་པ་དེ་དག་ལ་ནི་མེད་པར་ལྟ་བ་སྐྱེས་པར་གྱུར་ཏོ། །གང་དག་བར་མར་གནས་པ་དེ་དག་ནི་ཡིད་གཉིས་ཟ་བར་གྱུར་ཏོ། །གང་དག་དད་པ་དེ་དག་ནི་གནོང་ཞིང་མི་དགའ་བ་དང་། མི་འཇིགས་པ་མེད་པར་གྱུར་ཏོ། །དེ་ནས་རྒྱལ་པོ་གཙུག་པུད་ཅན་གྱིས་བསམས་པ། གལ་ཏེ་འཇིག་རྟེན་ན་དགྲ་བཅོམ་པ་དག་མེད་ན་བདག་གིས་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འཁོར་ལྔ་བརྒྱ་དང་། དགེ་སློང་མ་རི་མ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་དབུལ་སྙམ་ནས་དེས་དགེ་སློང་རྣམས་དང་། དགེ་སློང་མ་རྣམས་ཀྱི་བསོད་སྙོམས་བཅད་ནས་དགེ་སློང་རྣམས་དང་། དགེ་སློང་མ་རྣམས་ཀྱང་གྲོང་ཁྱེར་སྒྲ་སྒྲོགས་ནས་དོང་ངོ་། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དང་། དགེ་སློང་མ་རི་མ་ནི་གདུལ་བ་ལ་ལྟོས་པས་དེ་ཉིད་ན་འཁོད་དོ། །ཇི་ཙམ་དུས་གཞན་ཞིག་ན་རྒྱལ་པོ་གཙུག་པུད་ཅན་གྲོང་ཁྱེར་སྒྲ་སྒྲོགས་ནས་ཕྱིར་བྱུང་བ་ན་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་གྲོང་ཁྱེར་སྒྲ་སྒྲོགས་སུ་བསོད་སྙོམས་ལ་ཞུགས་པ་དང་། དེས་རྒྱལ་པོ་མཐོང་ནས་འདི་མི་དགའ་བར་སེམས་པར་གྱུར་ན་མི་རུང་ངོ་སྙམ་ནས་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ཏུ་སྡོད་པ་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་ཅིའི་ཕྱིར་འཕགས་པ་ཀཱ་ཏྱཱ་ཡ་ན་ཆེན་པོ་འདི་ང་མཐོང་ནས་མཐའ་གཅིག་ཏུ་སོང་སྟེ་སྡོད། དེའི་ཕྱི་བཞིན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འཕགས་པ་ཀཱ་ཏྱཱ་ཡ་ན་ཆེན་པོའི་ཐུགས་ལམ་ན་ལྷ་ག་ཤེད་དུ་གཟིགས་མོ་དང་དགེ་མཚན་ལ་གཤེགས་པས་མི་དགྱེས་པར་དགོངས་པར་གྱུར་ན་མི་རུང་ངོ་སྙམ་པ་དང་། ཚོན་གྱི་ལས་བགྱི་བ་དཀའ་བས་ཆོས་གོས་དག་རྡུལ་གྱིས་ཕོག་པར་གྱུར་ན་མི་རུང་ངོ་སྙམ་དུ་དགོངས་སོ། །རྒྱལ་པོ་ཅང་མི་སྨྲ་བར་སོང་ངོ་། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་གྲོང་ཁྱེར་སྒྲ་སྒྲོགས་སུ་བསོད་སྙོམས་བརྒྱུས་ཏེ་བྱུང་བ་ན་རྒྱལ་པོ་གཙུག་པུད་ཅན་ནང་དུ་འཇུག་
ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དེ་བཞིན་དུ་མཐའ་གཅིག་ཏུ་སོང་སྟེ་སྡོད་དོ། །རྒྱལ་པོ་གཙུག་པུད་ཅན་གྱིས་དེ་མཐའ་གཅིག་ན་སྡོད་པ་མཐོང་ངོ་། །མཐོང་ནས་ཀྱང་བློན་པོ་རྣམས་ལ་སྨྲས་པ། ཤེས་ལྡན་དག་འཕགས་པ་ཀཱ་ཏྱཱ་ཡ་ན་ཆེན་པོ་འདིས་སྔར་ང་མཐོང་ནས་མཐའ་གཅིག་ཏུ་སོང་སྟེ་སྡོད་པའི་རྒྱུ་ནི་དེ་ཡིན་ན་ད་ལྟར་ཡང་མཐའ་གཅིག་ཏུ་སོང་སྟེ་སྡོད་པའི་རྒྱུ་ཅི་ཡིན། དེའི་ཕྱི་བཞིན་བློན་པོ་སྐྱོན་ཆགས་པ་གཉིས་འགྲོ་བ་དེ་གཉིས་ཀྱིས་སྨྲས་པ། ལྷ་འདིའི་མཆིད་ནས་ཁོ་བོ་ཕ་གསོད་པ་འདིའི་རྡུལ་གྱིས་མི་རེག་པར་བྱའོ་ཞེས་མཆིའོ། །རྒྱལ་པོ་དེ་ནི་ཡོངས་སུ་མི་རྟོག་པ་ཡིན་པས་དེ་སྐད་ཐོས་ནས་ཁྲོ་བས་ཀུན་ནས་དཀྲིས་པར་གྱུར་ཏེ་འཁོར་ཐམས་ཅད་ལ་སྨྲས་པ། ཤེས་ལྡན་དག་ཁྱེད་ཅག་ལས་གང་དང་གང་ང་ལ་དགའ་བ་དེ་དང་དེས་དགེ་སྦྱོང་མགོ་རེག་འདིའི་སྟེང་དུ་ས་སྤར་མོ་རེ་རེས་གཏོར་ཅིག །སྐྱེ་བོའི་ཚོགས་ཐམས་ཅད་ཀྱིས་ས་སྤར་མོ་རེ་རེ་གཏོར་ཏོ། །རྒྱལ་པོ་དེ་དཔུང་ཆེ་བ་ཡིན་པས་རེ་རེས་ས་སྤར་མོ་རེ་རེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་སྟེང་དུ་གཏོར་བ་དང་། དེའི་སྟེང་དུ་ས་ཕུང་ཆེན་པོ་རྣམ་པར་གནས་པར་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཀྱང་དེའི་དབུས་སུ་ལོ་མ་མ་ཡིན་པའི་སྤྱིལ་བུ་མངོན་པར་སྤྲུལ་ཏེ་འདུག་གོ །དེ་དག་དེ་ལས་འཐོར་བ་ན་བ་ལང་རྫི་དང་ཕྱུགས་རྫི་དག་གིས་མཐོང་ནས་དེ་དག་སྨོད་བཞིན་དུ་མཐའ་འཁོར་ཞིང་སྡོད་པ་ན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཕྱི་བཞིན་འབྲང་ཞིང་འོང་བ་ཕྱོགས་དེར་ཕྱིན་ནས་དེ་གཉིས་ཀྱིས་དྲིས་པ། ཤེས་ལྡན་དག་འདི་ཅི་ཡིན། དེ་དག་གིས་སྨྲས་པ། རྒྱལ་པོ་འཐབ་ཀྲོལ་ཅན་ཕ་གསོད་པ་དེས་འཕགས་པ་ཀཱ་ཏྱཱ་ཡ་ན་ཆེན་པོ་ཉེས་པ་མེད་པ་གནོད་པ་མི་བྱེད་པ་སས་བཀབ་བོ། །དེ་གཉིས་མཆི་མས་བརྣངས་ཏེ་ངུ་བའི་བཞིན་གྱིས་བ་ལང་རྫི་དང་ཕྱུགས་རྫི་དག་དང་ལྷན་ཅིག་ས་ཕྱག་པར་བརྩམས་པ་དང་། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་བྱུང་ནས་དེ་གཉིས་ཀྱིས་རྐང་པ་གཉིས་ལ་གཏུགས་ཏེ་དྲིས་པ། འཕགས་པ་འདི་ཅི་ལགས། དེས་སྨྲས་པ། ལས་དག་ཡིན་མོད་གཞན་ཅི་ཞིག་འབྱུང་བར་འགྱུར།། །།འདུལ་
བ་རྣམ་པར་འབྱེད་པ། བམ་པོ་བདུན་བཅུ་རྩ་གཉིས་པ། དེ་གཉིས་ཀྱིས་སྨྲས་པ། འཕགས་པ་གཙུག་པུད་ཅན་སྐྱེ་བོ་ཕལ་པོ་ཆེ་དང་བཅས་པས་ལས་འདི་ལྟ་བུ་བགྱིས་པ་གང་ལགས་པ་དེའི་རྣམ་པར་སྨིན་པ་ཅིར་འགྱུར། དེས་སྨྲས་པ། དེང་ནས་ཉི་མ་བདུན་ན་གྲོང་ཁྱེར་སྒྲ་སྒྲོགས་སས་ནོན་པར་འགྱུར་རོ། །འཕགས་པ་རིམ་པ་ཇི་ལྟ་བུར་འགྱུར། ཚེ་དང་ལྡན་པ་གཉིས་རེ་ཞིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང་། དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ། །དེ་གཉིས་ཀྱིས་སྨྲས་པ། འཕགས་པ་ཅི་ལགས། བདག་ཅག་གཉིས་ཀྱང་ལས་དེའི་ཆ་ཅན་ལགས་སམ། བཞིན་བཟངས་གཉིས་ཁྱེད་གཉིས་ནི་ལས་དེའི་ཆ་ཅན་མ་ཡིན་ནོ། །འཕགས་པ་གལ་ཏེ་དེ་ལྟ་ན་བདག་ཅག་གཉིས་ཀྱིས་གྲོང་ཁྱེར་འདི་ནས་ཇི་ལྟར་འབྱུང་བར་བགྱི། དེས་སྨྲས་པ། བཞིན་བཟངས་གཉིས་ཁྱེད་གཉིས་ཀྱིས་རང་གི་ཁྱིམ་ནས་ཆུ་ཀླུང་གི་བར་དུ་ཕུག་རྐོར་ཆུག་ལ་ཁྱིམ་དྲུང་དུ་གྲུ་བཞག་སྟེ་སྡོད་ལ་གང་གི་ཚེ་རིན་པོ་ཆེའི་ཆར་འབབ་པ་དེའི་ཚེ་ན་རིན་པོ་ཆེ་དག་གིས་གྲུ་འགེངས་སུ་ཆུག་ལ་བྲོས་ཤིག །དེ་གཉིས་ཀྱིས་དེའི་རྐང་པ་གཉིས་ལ་གཏུགས་ཏེ་གྲོང་ཁྱེར་སྒྲ་སྒྲོགས་སུ་ཞུགས་ནས་དེ་གཉིས་རྒྱལ་པོའི་གན་དུ་སོང་སྟེ་སྨྲས་པ། འཕགས་པ་ཀཱ་ཏྱཱ་ཡ་ན་ཆེན་པོ་ལ་ཅུང་ཞིག་བགྱིས་སམ། ཅི་ན་དོག་སས་བཀབ། དེས་སྨྲས་པ། ཤེས་ལྡན་གཉིས་དེ་གསོན་ནམ། ལྷ་གསོན་ནོ། །ཅི་ཟེར། ལྷ་དེ་འདི་སྐད་ཅེས་དེང་ནས་གདུགས་བདུན་ན་གྲོང་ཁྱེར་སྒྲ་སྒྲོགས་དོག་སས་ནོན་པར་
འགྱུར་ཞེས་མཆིའོ། །རིམ་པ་ཇི་ལྟར་འགྱུར། དེ་གཉིས་ཀྱིས་སྨྲས་པ། ལྷ་དེ་འདི་སྐད་ཅེས་རེ་ཞིག་ཉི་མ་དང་པོ་ལ་རླུང་མོ་ཆེ་བྱུང་ནས་གྲོང་ཁྱེར་སྒྲ་སྒྲོགས་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་འཇོག་པར་འགྱུར་རོ། །ཉི་མ་གཉིས་པ་ལ་མེ་ཏོག་གི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་འཇུག་པར་འགྱུར་ཞིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་འབབ་པར་འགྱུར་རོ། །ཉི་མ་བདུན་པ་ལ་སའི་ཆར་འབབ་པར་འགྱུར་རོ་ཞེས་མཆིའོ། །བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་བྲམ་ཟེ་གང་ལ་སློང་མོ་སྩལ་ནས་ཡང་བཅད་ན་དེ་ལེགས་པ་ཅི་ཞིག་སེམས་ཏེ། ལྷས་དེ་འཁོར་ལྔ་བརྒྱ་དང་ལྡན་པ་ལ་བསོད་སྙོམས་སྩལ་ནས་བཅད་ཅིང་སས་ཀྱང་གཡོགས་པས་དེ་འདི་སྐད་མཆི་བ་ལས་གཞན་པ་ཆེས་ཤིས་པའི་ཚིག་སྨྲ་བར་ག་ལ་འགྱུར། རྒྱལ་པོ་གཙུག་པུད་ཅན་གྱིས་བསམས་པ། དེ་བདེན་ནོ་སྙམ་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཀྱིས་བཞིན་བསྒྱུར་ཅིང་ལག་པ་གཉིས་ཡོངས་སུ་དྲིལ་ཏེ་དོང་ངོ་། །དེ་ན་ཧེ་རུ་ཀ་ལ་བུ་སྔོ་བསངས་ཞེས་བྱ་བ་ཁྱེའུ་ཞིག་ཡོད་ལ། བྷི་རུ་ཀ་ལ་ཡང་བུ་མོ་སྔོ་བསངས་ཅན་ཞེས་བྱ་བ་བུ་མོ་ཞིག་ཡོད་ནས། ཧེ་རུ་ཀས་ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཕུལ་ཏེ་སྨྲས་པ། འཕགས་པ་གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་འདི་ཁྱོད་ཉིད་ཀྱི་ཞབས་འབྲིང་བ་ལགས་སོ། །བྷི་རུ་ཀས་ཀྱང་བུ་མོ་སྔོ་བསངས་ཅན་དགེ་སློང་མ་རི་མ་ལ་ཕུལ་ཏེ་སྨྲས་པ། འཕགས་མ་གལ་ཏེ་འདི་ལ་དགེ་བའི་རྩ་བ་འགའ་ཞིག་མཆིས་ན་རབ་ཏུ་དབྱུང་དུ་གསོལ། གལ་ཏེ་མ་མཆིས་ན་ཀཽ་ཤཱམྦཱི་ན་ཁྱིམ་བདག་གདངས་ཅན་ཞེས་བགྱི་བ་བདག་གི་ཆུང་པོ་གྲོགས་ཤིག་མཆིས་པ་དེ་ལ་གཏད་དུ་གསོལ། དེས་ཁས་བླངས་སོ། །དེ་
ནས་དགེ་སློང་མ་རི་མ་བུ་མོ་སྔོ་བསངས་ཅན་ཁྲིད་དེ་རྫུ་འཕྲུལ་གྱིས་གྲོང་ཁྱེར་སྒྲ་སྒྲོགས་ནས་སོང་ནས། དེས་བུ་མོ་དེ་ཀཽ་ཤཱམྦཱིར་ཁྱིམ་བདག་གདངས་ཅན་ལ་གཏད་ནས་ཕྲིན་ཇི་སྐད་སྤྲིང་བ་ཡང་བཟླས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ནི་དེ་ཉིད་དུ་འདུག་གོ །བློན་པོའི་མཆོག་ཧེ་རུ་ཀ་དང་བྷི་རུ་ཀ་གཉིས་ཀྱིས་ཁྱིམ་ནས་ཆུ་ཀླུང་གི་བར་དུ་ཕུག་རྐོར་བཅུག་སྟེ་ཁྱིམ་དྲུང་དུ་གྲུ་བཞག་ནས་བསྡད་དོ། །ཇི་ཙམ་ན་ཉི་མ་དེ་ལ་རླུང་མོ་ཆེ་བྱུང་ནས་དེས་གྲོང་ཁྱེར་སྒྲ་སྒྲོགས་དེ་རྡོ་བ་དང་། གསེག་མ་དང་། གྱོ་མོ་མེད་པར་རྣམ་པར་བཞག་གོ །ཉི་མ་གཉིས་པ་ལ་མེ་ཏོག་གི་ཆར་འབབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་རྒྱལ་པོ་ང་ལས་ནུ་ལ་དགུང་བདུན་དུ་དབྱིག་གི་ཆར་བབ་ཅེས་གདའ་བས་ལྷ་ལ་ཡང་མེ་ཏོག་གི་ཆར་འདི་བབ་པས་རིང་པོ་མི་ཐོགས་པར་གོས་ཀྱི་ཆར་འབབ་པར་འགྱུར་རོ། །ཉི་མ་གསུམ་པ་ལ་གོས་ཀྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གོས་ཀྱི་ཆར་འདི་བབ་པས་རིང་པོ་མི་ཐོགས་པར་དངུལ་གྱི་ཆར་འབབ་པར་འགྱུར་རོ། །ཉི་མ་བཞི་པ་ལ་དངུལ་གྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་དངུལ་གྱི་ཆར་འདི་བབ་པས་རིང་པོ་མི་ཐོགས་པར་གསེར་གྱི་ཆར་འབབ་པར་འགྱུར་རོ། །ཉི་མ་ལྔ་པ་ལ་གསེར་གྱི་ཆར་བབ་པ་དང་། བློན་པོ་སྐྱོན་ཆགས་པ་དེ་གཉིས་ཀྱིས་སྨྲས་པ། ལྷ་ལ་གསེར་གྱི་ཆར་འདི་བབ་པས་རིང་པོ་མི་ཐོགས་པར་རིན་པོ་ཆེའི་ཆར་འབབ་པར་འགྱུར་རོ། །དེའི་འོག་ཏུ་གྲོང་ཁྱེར་སྒྲ་སྒྲོགས་ཀྱི་ཉེན་ཀོར་ན་གནས་པ་གང་དག་གིས་ལས་མཐུན་པར་བྱས་པ་དེ་དག་གྲོང་ཁྱེར་སྒྲ་སྒྲོགས་སུ་ཞུགས་ཤིང་དེ་དག་ཞུགས་པ་ན་ཉི་མ་དྲུག་པ་ལ་རིན་པོ་ཆེའི་ཆར་བབ་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཀྱིས་རིན་པོ་ཆེ་དག་གིས་གྲུ་འགེངས་སུ་བཅུག་སྟེ་བྲོས་སོ། །དེ་ན་ཧེ་རུ་ཀས་ཕྱོགས་གཞན་ཞིག་ཏུ་ཧེ་རུ་ཀའི་རྩལ་ཞེས་བྱ་བའི་གྲོང་ཁྱེར་རྩིག་ཏུ་བཅུག་ནས། དེའི་མིང་ཧེ་རུ་ཀའི་རྩལ་ཧེ་རུ་ཀའི་རྩལ་ཅེས་བྱ་བར་གྱུར་ཏོ། །བྷི་རུ་ཀས་ཀྱང་ཕྱོགས་གཞན་ཞིག་ཏུ་བྷི་རུ་ཀའི་རྩལ་ཅེས་བྱ་བའི་གྲོང་
ཁྱེར་རྩིག་ཏུ་བཅུག་ནས་དེའི་མིང་བྷི་རུ་ཀའི་རྩལ་བྷི་རུ་ཀའི་རྩལ་ཅེས་བྱ་བར་གྱུར་ཏོ། །ཉི་མ་བདུན་པ་ལ་སའི་ཆར་འབབ་པར་བརྩམས་པ་དང་། གྲོང་ཁྱེར་སྒྲ་སྒྲོགས་སུ་སྒྲ་མཐོན་པོ་དང་། སྒྲ་ཆེན་པོ་བྱུང་ནས་རྒྱལ་པོས་སྨྲས་པ། ཤེས་ལྡན་དག་སྒྲ་མཐོན་པོ་དང་། སྒྲ་ཆེན་པོ་དེ་ཅི་བློན་པོ་རྣམས་ཀྱིས་སྨྲས་པ། ལྷ་སའི་ཆར་བབ་པོ། །རྒྱལ་པོས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་བློན་པོའི་མཆོག་ཧེ་རུ་ཀ་དང་། བྷི་རུ་ཀ་ག་ན་འདུག་ཚོལ་ཅིག །དེ་དག་གིས་བཙལ་བར་བརྩམས་པ་དང་། ཇི་ཙམ་ན་དེ་གཉིས་བྲོས་པར་ཚོར་ནས། དེ་དག་གིས་རྒྱལ་པོ་ལ་སྨྲས་པ། ལྷ་དེ་གཉིས་བྲོས་ཏེ་མ་མཆིས་སོ། །དེ་ནས་རྒྱལ་པོ་གཙུག་པུད་ཅན་འབྲོས་པར་བརྩམས་པ་དང་། མི་མ་ཡིན་པ་དག་གིས་སྒོ་བཅད་དོ། །ཁྱེའུ་སྔོ་བསངས་ཀྱིས་སྨྲས་པ། འཕགས་པ་གྲོང་ཁྱེར་དུ་སྒྲ་མཐོན་པོ་དང་སྒྲ་ཆེན་པོ་བྱུང་བ་འདི་ཅི་ལགས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། བུ་སྐར་ཁུང་ནས་ཁར་ཕོར་ཕྱིར་ཕྱུང་ཤིག། དེས་སྐར་ཁུང་ནས་ཁར་ཕོར་ཕྱིར་ཕྱུང་བ་དང་སས་ཕྱེད་ཙམ་གང་བར་གྱུར་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་དུང་སྤྱོད་ཡུལ་ལྷག་མ་དང་བཅས་པ་ཡིན་ནོ་སྙམ་མོ། །ཇི་ཙམ་ན་ཡང་ཁར་ཕོར་ཕྱི་རོལ་དུ་ཕྱུང་བ་དང་བྱུར་བུར་གང་བར་གྱུར་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བསམས་པ། ད་ནི་སྤྱོད་ཡུལ་མེད་པར་གྱུར་གྱིས་འགྲོའོ་སྙམ་མོ། །དེ་ནས་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་གང་ཡིན་པ་དེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ག་ལ་བ་དེར་སོང་སྟེ་ཕྱིན་ནས་རྐང་པ་གཉིས་ལ་ཕྱག་འཚལ་ཏེ་སྨྲས་པ། འཕགས་པ་བདག་ཀྱང་མཆི་སྟེ་འཕགས་པའི་བསྙེན་བཀུར་བགྱིའོ། །དེས་དང་དུ་བླངས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྔོ་བསངས་ལ་སྨྲས་པ། བུ་ཆོས་གོས་ཀྱི་གྲྭ་ནས་ཟུང་ཤིག་དང་འདོང་ངོ་། །དེས་ཆོས་གོས་ཀྱི་གྲྭ་ནས་བཟུང་བ་དང་དེས་ཁྱེའུ་སྔོ་བསངས་ཁྲིད་དེ་རྫུ་འཕྲུལ་གྱིས་སྟེང་གི་ནམ་མཁའ་ལས་སོང་ངོ་། །སྒྲ་སྒྲོགས་ན་གཉུག་མར་གནས་པའི་ལྷ་མོ་ཡང་རང་གི་རྫུ་འཕྲུལ་གྱིས་དེའི་ཕྱི་བཞིན་སོང་བ་དང་། གྲོང་ཁྱེར་སྒྲ་སྒྲོགས་
ཀྱང་སས་ནོན་པར་གྱུར་ཏོ། །དེ་དག་མཐར་གྱིས་ཁ་ར་བ་ན་ཞེས་བྱ་བའི་རི་བྲགས་སུ་ཕྱིན་ནས་དེ་དག་དེ་ན་གཡུལ་གྱི་གཞི་ན་འཁོད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཁྱེའུ་སྔོ་བསངས་གཡུལ་གྱི་གཞིར་བཞག་སྟེ་བསོད་སྙོམས་ལ་ཞུགས་པ་དང་། ལྷ་མོ་དེའི་མཐུས་གཡུལ་གྱི་གཞི་དེར་འབྲུ་འཕེལ་བར་གྱུར་ནས་དེ་ན་མི་གང་འདུག་པ་དེས་ཁྱེའུ་དེ་མཐོང་ནས་དེའི་གན་དུ་སོང་སྟེ་སྨྲས་པ། ཀྱེ་ཁྱེའུ་ཁྱོད་ཀྱི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེས་སྨྲས་པ། ཁོ་བོའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་པ་མ་ཡིན་ཏེ། འདི་ལྟར་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་ཕྱོགས་ག་གེ་མོ་ཞིག་ན་འདུག་པ་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ཏོ། །དེ་དེའི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། ལྷ་མོ་བདག་གྲོང་དུ་མཆི་སྟེ་སླར་མཆིའི་བར་དུ་རེ་ཞིག་ལྡེ་མིག་དང་། ལྡེ་མིག་ཀྱོག་པོ་འདི་གཟུང་ཞིང་ཁྱོད་ཀྱིས་བདག་མ་ལགས་པ་གཞན་སུ་ལ་ཡང་མི་སྩལ་བར་གསོལ། དེས་བླངས་པ་དང་། མི་དེ་ཡང་རི་བྲགས་སུ་སོང་ནས་རི་བྲགས་ན་གནས་པའི་སྐྱེ་བོའི་ཚོགས་བསྡུས་ཏེ་སྨྲས་པ། ཤེས་ལྡན་དག་གྲོང་ཁྱེར་སྒྲ་སྒྲོགས་ན་གཉུག་མར་གནས་པའི་ལྷ་མོ་འདིར་འོངས་ཏེ་གཡུལ་གྱི་གཞི་ན་འདུག་པས་དེའི་མཐུས་གཡུལ་གྱི་གཞིར་འབྲུ་འཕེལ་བར་གྱུར་ནས་བདག་གིས་དེའི་ལག་ཏུ་ལྡེ་མིག་དང་། ལྡེ་མིག་ཀྱོག་པོ་བྱིན་ཏེ་བདག་གིས་དེ་ལ་བདག་གྲོང་དུ་མཆི་སྟེ་སླར་མཆིའི་བར་དུ་ལྡེ་མིག་དང་། ལྡེ་མིག་ཀྱོག་པོ་འདི་གཟུང་ཞིང་ཁྱོད་ཀྱིས་བདག་མ་གཏོགས་པ་གཞན་སུ་ལ་ཡང་སྩལ་བར་མི་བགྱིའོ་ཞེས་སྨྲས་ཀྱིས། དེའི་ཕྱིར་གྲོང་མི་རྣམས་ལ་གལ་ཏེ་བདག་གི་བུ་གཙོ་བོར་དབང་བསྐུར་ན་ཁོ་བོ་བདག་ཉིད་སྲོག་དང་འབྲལ་བར་གསོལ་བ་འདེབས་ཏེ། དེ་ལྟ་ན་ལྷ་མོ་བདག་ཅག་གི་གནས་ནས་གར་ཡང་འགྲོ་བར་མི་འགྱུར་བས་ཁྱེད་ཅག་ལོངས་སྤྱོད་དག་གིས་མངོན་པར་འཕེལ་བར་འགྱུར་ཞིང་ཡམས་ཀྱི་ནད་ཐམས་ཅད་ཀྱང་ཉེ་བར་ཞི་བར་འགྱུར་རོ། །དེ་དག་གིས་དེའི་བུ་གཙོ་བོར་དབང་བསྐུར་ནས་དེས་ཀྱང་བདག་ཉིད་སྲོག་དང་བྲལ་བར་བྱས་སོ། །དེ་
ནས་དེ་དག་གིས་གནས་དེ་ཐམས་ཅད་སྤོས་དང་མེ་ཏོག་གིས་མཛེས་པར་བྱས་ཤིང་གདུགས་དང་རྒྱལ་མཚན་གྱིས་བརྒྱན་ཏེ། གཏོར་མ་ཐོགས་ནས་ལྷ་མོ་དེ་ག་ལ་བ་དེར་དོང་སྟེ་ཕྱིན་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་མོ་ཁྱོད་འདི་ཉིད་ན་བཞུགས་པར་གསོལ། །དེས་སྨྲས་པ། ཁོ་མོ་ནི་འཕགས་པ་ཀཱ་ཏྱཱ་ཡ་ན་ཆེན་པོ་ལ་བསྙེན་བཀུར་བྱེད་པ་ཡིན་པས་འདི་ན་ཁོ་མོའི་གནས་མེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་སྨྲས་པ། ལྷ་མོ་ཁྱོད་ཀྱིས་གང་ལས་ལྡེ་མིག་དང་། ལྡེ་མིག་ཀྱོག་པོ་བླངས་པ་སོམས་ཤིག །དེས་བསམ་པ་ལ་ཞུགས་པ་དང་། ཇི་ཙམ་ན་མི་དེ་དུས་ལ་བབ་པར་མཐོང་ནས་དེས་གནས་དེ་ན་གནས་པའི་སྐྱེ་བོའི་ཚོགས་ལ་སྨྲས་པ། ཤེས་ལྡན་དག་ཁོ་མོ་དམ་ཚིག་གིས་གནས་པར་བྱ་སྟེ། གལ་ཏེ་ཁོ་མོའི་གནས་གཞི་ཇི་ལྟ་བུ་བྱེད་དུ་འཇུག་པ་དེ་ལྟ་བུར་འཕགས་པའི་གནས་གཞི་ཡང་བྱེད་དུ་འཇུག་ན་ཁོ་མོ་འདུག་གོ །དེ་དག་གིས་ཁས་བླངས་ནས། དེ་དག་གིས་ལྷ་མོ་དེའི་གནས་ཇི་ལྟ་བུ་བྱེད་དུ་བཅུག་པ་དེ་ལྟ་བུར་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་གནས་ཀྱང་བྱེད་དུ་བཅུག་གོ །ལྷ་མོ་དེའི་གནས་སུ་མར་མེ་བཙུགས་པ་གང་ཡིན་པ་དེ་དེས་ཁྱེར་ཏེ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་གནས་སུ་འཛུགས་པར་བྱེད་དོ། །དེ་མར་མེ་ཁྱེར་ཏེ་འགྲོ་བ་རྩིག་དྲུང་ན་འདུག་པའི་མི་ཞིག་གིས་མཐོང་ནས་དེས་བསམས་པ། ལྷ་མོ་འདི་འཕགས་པ་ཀཱ་ཏྱཱ་ཡ་ན་ཆེན་པོའི་གན་དུ་འདོང་བས་འགྲོའོ་སྙམ་པ་དང་། དེས་དེའི་སེམས་ཤེས་ནས་ཁྲོས་ཏེ་རི་བྲགས་འདི་ན་གནས་པའི་སྐྱེ་བོའི་ཚོགས་འདི་ནི་སྡིག་པའི་སེམས་ཀུན་དུ་སྤྱོད་པ་ཡིན་ཏེ། འཕགས་པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་སྐུར་པ་འདེབས་པར་བྱེད་དོ་སྙམ་ནས། དེས་རི་བྲགས་དེར་མི་ངས་ཕྱུང་སྟེ་སྐྱེ་བོ་ཕལ་པོ་ཆེ་ཤི་བར་གྱུར་ནས་སྐྱེ་བོ་ཤི་བའི་རོ་ཕྱིར་འབྱིན་པ་ན་ཁྲི་དང་ཁྲི་དག་འདོམ་པར་གྱུར་ཏོ། །གནས་དེ་ན་གནས་པའི་སྐྱེ་བོའི་ཚོགས་ཀྱིས་ལྟས་པ་དག་བཀུག་སྟེ། དྲིས་པ། འདི་ཅི་ལས་གྱུར། དེ་དག་གིས་སྨྲས་པ། ལྷ་མོ་འཁྲུགས་སོ། །དེ་དག་གིས་དེ་ལ་བཟོད་པ་གསོལ་བར་བརྩམས་པ་དང་། དེས་སྨྲས་
པ། ཁྱེད་ཅག་འཕགས་པ་ཀཱ་ཏྱཱ་ཡ་ན་ཆེན་པོ་འདོད་པའི་དྲི་ང་བ་མེད་པ་ལ་བརྫུན་གྱིས་སྐུར་པ་འདེབས་པར་བྱེད་དོ། །དེ་དག་གིས་ཡང་སྨྲས་པ། ལྷ་མོ་བཟོད་པ་མཛོད་ཅིག་དང་འགའ་ཡང་བསྙེན་བཀུར་མ་ལགས་པ་བགྱིད་པར་མི་འགྱུར་རོ། །དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ཁྱེད་ཅག་ཁོ་མོ་ལ་ཇི་ལྟར་བསྙེན་བཀུར་བྱེད་པ་དེ་ལྟར་འཕགས་པ་ཀཱ་ཏྱཱ་ཡ་ན་ཆེན་པོ་ལ་ཡང་བྱེད་ན་བཟོད་པར་བྱའོ། །དེ་དག་གིས་སྨྲས་པ། ལྷ་མོ་ཆེས་ཁྱད་པར་དུ་འཕགས་པར་བགྱིས་བཟོད་པར་མཛོད་ཅིག །དེས་དེ་དག་ལ་བཟོད་པར་བྱས་སོ། །དེ་དག་གིས་ཀྱང་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་ཆེས་ཁྱད་པར་དུ་འཕགས་པའི་བསྙེན་བཀུར་བྱས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་ཉིད་དུ་དབྱར་གནས་པར་ཁས་བླངས་ནས་ཁྱེའུ་སྔོ་བསངས་ཁྲིད་དེ་ལྷ་མོ་ལ་སྨྲས་ནས་འཕགས་པ་དང་། ལྷ་མོས་སྨྲས་པ། འཕགས་པ་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་ཕོར་བྱིན་ནས་དེས་དེ་ལ་ཁས་ཕུབ་སྟེ་མཆོད་རྟེན་དུ་བྱས་ནས་དུས་སྟོན་བྱེད་དུ་བཅུག་ནས། ཁར་ཕོར་གྱི་དུས་སྟོན་ཁར་ཕོར་གྱི་དུས་སྟོན་ཞེས་བྱ་བའི་མིང་དུ་གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཁྱེའུ་སྔོ་བསངས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་ཆོས་གོས་ཀྱི་གྲྭ་ནས་འཇུས་ཏེ་དེ་འཕྱང་ཞིང་འགྲོ་བ་བ་ལང་རྫི་དང་ཕྱུགས་རྫི་དག་གིས་མཐོང་ནས། དེ་དག་གིས་འཕྱང་བ་པ་འཕྱང་བ་པ་ཞེས་བྱ་བའི་སྒྲ་ཆེན་པོ་ཕྱུང་བས་ཡུལ་དེའི་མི་རྣམས་ཀྱི་མིང་འཕྱང་བ་པ་འཕྱང་བ་པ་ཞེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་རི་བྲགས་ཤིག་ཏུ་ཕྱིན་ནས་དེར་ཁྱེའུ་སྔོ་བསངས་ཤིང་ལྗོན་པའི་དྲུང་དུ་བཞག་སྟེ་བསོད་སྙོམས་ལ་ཞུགས་སོ། །རི་བྲགས་དེ་ན་རྒྱལ་པོ་བུ་མེད་པར་དུས་ལ་བབ་ནས་ཕོ་བྲང་འཁོར་གྱི་མི་དང་བློན་པོ་དང་། ཡུལ་མི་དག་འདུས་ཏེ་སྨྲས་པ། ཤེས་ལྡན་དག་གང་ཞིག་རྒྱལ་པོར་དབང་བསྐུར་བར་བྱ། དེ་ན་ཁ་ཅིག་གིས་སྨྲས་པ། གང་བསོད་ནམས་དང་དབང་ཆེ་བར་གྲགས་པའོ། །ཁ་ཅིག་གིས་སྨྲས་པ།
དེ་ཇི་ལྟར་ཤེས་པར་བྱ། ཁ་ཅིག་གིས་སྨྲས་པ། རྟོག་པ་དག་བསྐོ་བར་བྱའོ། །དེ་དག་གིས་རྟོག་པ་དག་བསྐོས་ནས་དེ་དག་གིས་ཕན་ཚུན་བཙལ་བར་བརྩམས་པ་དང་། དེ་དག་གིས་ཁྱེའུ་དེ་ཤིང་ལྗོན་པའི་དྲུང་ན་གཉིད་ལོག་པ་མཐོང་ནས། དེ་དག་གིས་དེའི་མཚན་མ་གཟུང་བར་བརྩམས་པ་དང་། ཇི་ཙམ་ན་ཤིང་ལྗོན་པ་གཞན་དག་གི་གྲིབ་མ་ཤར་ཕྱོགས་སུ་གཞོལ་བ་དང་། ཤར་ཕྱོགས་སུ་འབབ་པ་དང་། ཤར་ཕྱོགས་སུ་བབ་པར་གྱུར་ན་ཤིང་ལྗོན་པ་དེའི་གྲིབ་མས་ཁྱེའུ་དེའི་ལུས་མི་གཏོང་བར་མཐོང་ངོ་། །མཐོང་ནས་ཀྱང་གྲོས་བྱ་བར་བརྩམས་པ། ཤེས་ལྡན་དག་ཁྱེའུ་འདི་བསོད་ནམས་དང་དབང་ཆེ་བར་གྲགས་པ་ཡིན་གྱིས་འདི་དབང་བསྐུར་བར་བྱའོ། །དེ་དག་གིས་དེ་སད་པར་བྱས་ཏེ་སྨྲས་པ། ཁྱེའུ་རྒྱལ་སྲིད་ལོང་ཤིག །ཁྱེའུས་སྨྲས་པ། ཁོ་བོ་རྒྱལ་སྲིད་དོན་དུ་གཉེར་བ་མ་ཡིན་ཏེ། ཁོ་བོ་ནི། འཕགས་པ་ཀཱ་ཏྱཱ་ཡ་ན་ཆེན་པོའི་བསྙེན་བཀུར་བ་ཡིན་ནོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ཐོས་ནས་ཅི་ཁྱེའུ་འདི་ལ་རྒྱལ་སྲིད་དུ་འགྱུར་བའི་ལས་དག་ཡོད་དམ་མེད་སྙམ་དུ་བསམས་ནས་ཡོད་པར་མཐོང་ནས་དེས་སྨྲས་པ། བུ་རྒྱལ་སྲིད་ལོང་ལ་འདི་ལྟར་ཁྱོད་ཀྱིས་ཆོས་ཀྱིས་བྱེད་དུ་ཆུག་ཤིག། དེས་མནོས་ཏེ། དེ་དག་གིས་དེ་དབང་བསྐུར་ནས་ཁྱེའུ་སྔོ་བསངས་ཀྱིས་དེར་རྒྱལ་སྲིད་བྱེད་དུ་བཅུག་པས་སྔོ་བསངས་ཀྱི་རྒྱལ་སྲིད་སྔོ་བསངས་ཀྱི་རྒྱལ་སྲིད་ཅེས་བྱ་བའི་མིང་དུ་གྱུར་ཏོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་བོག་ཀ་ནར་ཕྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོའི་མ་བོག་ཀ་ནར་སྐྱེས་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐོང་ནས་སྨྲས་པ། བུ་ཁྱོད་ཡུན་རིང་ཞིག་ལོན་ནས་མཐོང་ངོ་། །བུ་ཁྱོད་ཡུན་རིང་ཞིག་ལོན་ནས་མཐོང་ངོ་། །དེའི་ནུ་མ་གཉིས་ལས་ཀྱང་འོ་མའི་རྒྱུན་འཛག་གོ །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེ་ལ་ཡུམ་ཡུམ་ཞེས་བག་ཕབ་པ་དང་། དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཟན་བྱིན་ནས། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་དེའི་བསམ་པ་དང་། བག་ལ་ཉལ་བ་དང་། ཁམས་དང་། རང་བཞིན་ཁོང་དུ་ཆུད་ནས་གང་ཐོས་ནས། དེས་སྟན་དེ་ཉིད་ལ་འདུག་
བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པར་བྱས་སོ། །དེས་བདེན་པ་མཐོང་ནས་བཙུན་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ་ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། དཀའ་བ་བྱེད་པའི་མ་ལ་ནི། །བུ་ཕོ་བཟང་པོས་གང་བྱ་བ། །དེ་ནི་ཁྱོད་ཀྱིས་བདག་ལ་བགྱིས། །སེམས་ནི་མཐོ་རིས་གཞོལ་བར་གྱུར། །ངན་སོང་དག་ནས་ལེགས་ཕྱུང་ཞིང་། །ཁྱོད་ཀྱིས་མཐོ་རིས་ཐར་པ་ལ། །རབ་ཏུ་འབད་པས་བདག་བཞག་སྟེ། །ཁྱོད་ཀྱིས་དཀའ་བ་ལེགས་པར་མཛད། །ཚོང་པས་ཁེ་སྤོགས་རྙེད་པ་ལྟར། །མཐོ་རིས་རྙེད་པ་བདག་གིས་རྙེད། །དགེ་བའི་བཤེས་གཉེན་རྣམས་ལ་ནི། །ཉེ་བར་བརྟེན་པ་བཟང་བ་ལགས། དེ་ནས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་བུ་མོ་བཟང་མོ་དེ་བདེན་པ་དག་ལ་བཞག་ནས་སྨྲས་པ། ཡུམ་བལྟས་ལགས་ཀྱིས་བདག་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བདག་ལ་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་དེ་ལ་ཁར་བ་བྱིན་ནས་དེས་མཆོད་རྟེན་བྱས་ཏེ། དེར་བཙུགས་ནས་ཁར་བའི་མཆོད་རྟེན་ཁར་བའི་མཆོད་རྟེན་ཞེས་བྱ་བའི་མིང་དུ་གྱུར་ཏེ། དེང་སང་ཡང་དགེ་སློང་མཆོད་རྟེན་ལ་ཕྱག་འཚལ་བ་དག་ཕྱག་འཚལ་བར་བྱེད་དོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ཡུལ་དབུས་སུ་འགྲོ་འདོད་ནས་ཡུལ་སིན་
དུར་ཕྱིན་པ་དང་། དེ་ནས་བྱང་ལམ་ན་གནས་པའི་ལྷ་མོ་གང་ཡིན་པ་དེས་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བདག་ལ་ཡང་མཚན་མ་ཅུང་ཞིག་སྩོལ་ཅིག་དང་བདག་དེ་ལ་མཆོད་པ་བགྱིད་ཅིང་མཆིས་སོ། །དེས་བསམས་པ། བཅོམ་ལྡན་འདས་ཀྱིས་ཡུལ་དབུས་སུ་ལྷམ་སྒྲོག་གུ་ཅན་བཅང་བར་མི་བྱའོ་ཞེས་བཀའ་སྩལ་པས་འདི་དེ་ལ་སྦྱིན་ནོ་སྙམ་ནས། དེས་ལྷམ་སྒྲོག་གུ་ཅན་དེ་དེ་ལ་བྱིན་པ་དང་། དེས་གནས་གཞི་བྱེད་དུ་བཅུག་སྟེ་དེར་བཞག་པ་དང་། ཁ་ཅིག་གིས་ནི་ལྷམ་གྱི་དབང་ཕྱུག་ཅེས་བྱ་བར་ཤེས་སོ། །ཁ་ཅིག་གིས་ལྷམ་གྱི་གཞི་ཞེས་བྱ་བར་ཤེས་སོ། །ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་མཐར་གྱིས་མཉན་ཡོད་དུ་ཕྱིན་ནས་དགེ་སློང་རྣམས་ཀྱིས་མཐོང་ནས་སྨྲས་པ། ཚེ་དང་ལྡན་པ་འོངས་པ་ལེགས་སོ། །འོངས་པ་ལེགས་སོ། །ཇི་ལྟར་བདེ་བར་བརྒྱུས་སམ། དེས་སྨྲས་པ། ཚེ་དང་ལྡན་པ་དག་ཅུང་ཟད་བདེ་བར་ཡང་བརྒྱུས། ཅུང་ཟད་སྡུག་བསྔལ་བར་ཡང་བརྒྱུས་སོ། །དགེ་སློང་རྣམས་ཀྱིས་སྨྲས་པ། ཇི་ལྟར་བདེ་བར་བརྒྱུས། ཇི་ལྟར་སྡུག་བསྔལ་བར་བརྒྱུས། དེས་སྨྲས་པ། སེམས་ཅན་གྱི་བྱ་བ་བྱས་པ། གང་ཡིན་པ་དེ་དག་ནི་བདེ་བར་བརྒྱུས་པ་ཡིན་ནོ། །རྒྱལ་པོ་གཙུག་པུད་ཅན་དང་། གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་ཀྱིས་བདག་སས་མནན་པ་གང་ཡིན་པ་དང་། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཚེགས་ཆེན་པོས་བྲོས་པ་གང་ཡིན་པ་དེ་ནི་སྡུག་བསྔལ་བར་བརྒྱུས་པ་ཡིན་ནོ། །དགེ་སློང་དོན་ཉུང་ངུ་དག་གིས་སྨད་དེ་སྨྲས་པ། དེ་ནི་ཕ་གསོད་པ་ཡིན་ཏེ། དེས་ཚེ་དང་ལྡན་པ་ཨུ་ཏྲ་ཡ་ན་དགྲ་བཅོམ་པ་ཉིད་ཐོབ་པ་ཉེས་པ་མེད་པ་གནོད་པ་མི་བྱེད་པ་བསད་དེ། འདི་ནི་དེའི་མེ་ཏོག་ཙམ་ཡིན་གྱི་འབྲས་བུ་ནི་གཞན་འབྱུང་བར་འགྱུར་རོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཚེ་དང་ལྡན་པ་ཨུ་ཏྲ་ཡ་ནས་ལས་ཅི་བགྱིས་ན་དེས་ཕྱུག་པ་ནོར་མང་ལ་ལོངས་སྤྱོད་ཆེ་བའི་ཁྱིམ་དུ་སྐྱེས་ཤིང་། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་
མོངས་པ་ཐམས་ཅད་སྤངས་པས། དགྲ་བཅོམ་པ་ཉིད་མངོན་དུ་བགྱིས་ནས་མཚོན་གྱིས་བཀུམ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དགེ་སློང་ཨུ་ཏྲ་ཡ་ན་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཨུ་ཏྲ་ཡ་ན་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག །སྔོན་བྱུང་བ་འདས་པའི་དུས་ན་སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་དུ་རི་བྲགས་ཤིག་ན་རྔོན་པ་ཞིག་འདུག་སྟེ། རི་བྲགས་དེ་དང་ཧ་ཅང་མི་རིང་བ་ཞིག་ན་རི་དགས་དང་བྱ་མང་པོ་དག་གི་རྟེན་དུ་གྱུར་པ་མཚེའུ་ཞིག་ཡོད་པ་དེར་རྔོན་པ་དེ་ཉི་མ་རེ་རེ་ཞིང་རི་དགས་དང་བྱ་མང་པོ་དག་དྲུངས་དབྱུང་བའི་ཕྱིར་དང་། ཉམས་པར་བྱ་བའི་ཕྱིར་དང་། ཚུལ་མ་ཡིན་པས་སྡུག་བསྔལ་བར་བྱ་བའི་ཕྱིར་རྔོན་སྤྱད་དང་། རྙི་དང་རྙོང་མང་པོ་དག་འཛུགས་པར་བྱེད་དོ། །དེའི་རྔོན་སྤྱད་དང་། རྙི་དང་རྙོང་དེ་དག་ཀྱང་དོན་ཡོད་པ་ཡིན་ནོ། །ཇི་ཙམ་དུས་གཞན་ཞིག་ན་རང་སངས་རྒྱས་ཤིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས་ལྷའི་གནས་ཤིག་ཏུ་མཚན་མོ་གནས་པར་ཁས་བླངས་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་སོ། །དེར་བསོད་སྙོམས་
བརྒྱུས་ནས་བསམས་པ། ལྷའི་གནས་འདི་ཉིན་མོ་རྒྱུན་ལུགས་མོད་པ་ཡིན་གྱིས། རི་བྲགས་ཀྱི་ཕྱི་རོལ་གྱི་གནས་ཞི་བ་ཞིག་ཏུ་བསོད་སྙོམས་བཟའོ་སྙམ་ནས་དེ་རི་བྲགས་ནས་བྱུང་སྟེ། འདི་ནི་ཞི་བའོ། །འདི་ནི་ཞི་བའོ། །ཞེས་མཚེའུ་དེ་ག་ལ་བ་དེར་སོང་སྟེ། ཕྱིན་ནས་ལྷུང་བཟེད་དང་ཆུ་ཚགས་མཐའ་གཅིག་ཏུ་བཞག་སྟེ། རྐང་པ་གཉིས་བཀྲུས་ནས་ལག་པ་གཉིས་བསྙལ་ཏེ་ཆུ་བཙགས་ནས། ལོ་མ་ལྷགས་པ་དག་བླངས་ཏེ་འདུག་ནས་ཟས་ཀྱི་བྱ་བ་བྱས་ཏེ། ལག་པ་གཉིས་བསྙལ་ནས་ཁ་བཀྲུས་ཏེ་ལྷུང་བཟེད་དང་། ཆུ་ཚགས་གནས་ཇི་ལྟ་བ་བཞིན་དུ་བཞག་ནས། རྐང་པ་གཉིས་བཀྲུས་ཏེ་ཤིང་དྲུང་ཞིག་ཏུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་ཀྲུང་བཅས་ཏེ་སྤྱོད་ལམ་ཞི་བར་འདུག་པ་དང་། དེའི་ཉིན་མོ་མིའི་དྲིས་རི་དགས་གཅིག་ཀྱང་མ་ཟིན་ཏོ། །དེ་ན་རྔོན་པ་དེ་ནང་པར་སྔར་ལངས་ཏེ་མཚེའུ་དེ་ག་ལ་བ་དེར་སོང་ནས། དེས་རྔོན་སྤྱད་དང་། རྙི་དང་རྙོང་དེ་དག་བྱུལ་བར་བརྩམས་པ་དང་། རི་དགས་གཅིག་ཀྱང་མ་མཐོང་ནས་དེ་འདི་སྙམ་དུ་སེམས་ཏེ། བདག་གི་རྔོན་སྤྱད་དང་། རྙི་དང་རྙོང་འདི་དག་དོན་ཡོད་པ་ཡིན་ན། གང་གི་ཕྱིར་དེར་རི་དགས་གཅིག་ཀྱང་མ་ཟིན་པ་འདིའི་རྒྱུ་གང་ཡིན་སྙམ་ནས། དེས་མཚེའུ་དེའི་ཐེན་ཀོར་བྱུལ་བར་བརྩམས་པ་དང་མིའི་རྗེས་མཐོང་ནས། དེ་རྗེས་དེའི་ཕྱི་བཞིན་དུ་སོང་བ་དང་། རང་སངས་རྒྱས་སྤྱོད་ལམ་ཞི་བར་འདུག་པ་དེ་མཐོང་ནས་དེས་བསམས་པ། རབ་ཏུ་བྱུང་བ་སེམས་ཞི་བ་འདི་དག་གནས་འདི་ལྟ་བུ་དག་ཏུ་མངོན་པར་དགའ་བར་བྱེད་པས་གལ་ཏེ་བདག་གིས་འདིའི་སྲོག་གཅད་པ་མ་བྱས་ན་འདི་དག་གིས་ངེས་པར་བདག་གི་འཚོ་བ་གཅོད་པར་བྱེད་ཀྱིས་རྣམ་པ་ཐམས་ཅད་དུ་འདི་གསད་པར་བྱའོ་སྙམ་ནས། སྙིང་རྗེ་མེད་པའི་སེམས་དང་ལྡན་པ། འཇིག་རྟེན་ཕ་རོལ་བཏང་བ་དེས་མདའ་དུག་ཅན་གྱིས་གཞུ་རྔའི་དབྱིབས་འདྲ་བ་རྣ་དྲུང་དུ་ཐུག་པར་བཀང་སྟེ་རང་སངས་རྒྱས་དེའི་གནད་དུ་བསྣུན་ཏོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། རྔོན་པ་ཉོན་མོངས་པ་འདི་ཧ་ཅང་སྨས་པ་དང་། ཉམས་པར་གྱུར་ན་མི་རུང་གིས། འདི་ལ་ལག་ནས་
དྲང་བ་སྦྱིན་ནོ་སྙམ་ནས་དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་རྔོན་པ་དེ་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པ་གཉིས་ཀྱི་དྲུང་དུ་སྒྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་འདམ་དུ་བྱིང་བ་བདག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་རྔོན་པ་དེ་ལ་རྗེས་སུ་སྙིང་བརྩེ་བའི་ཕྱིར་སྟེང་གི་མཁའ་ལས་ཤོད་དུ་བབས་སོ། །དེ་ནས་རྔོན་པ་དེས་ཟུག་རྔུ་མེད་པར་བྱས་ཏེ། རྨ་ལྷན་གྱིས་གླན་ནས་སྨྲས་པ། འཕགས་པ་སྡུམ་པར་གཤེགས་སུ་གསོལ། གལ་ཏེ་འདིར་གསེར་གྱི་ལྷན་པས་གླན་པར་མཛད་ན་དེ་ཡང་བདག་གིས་སྦྱར་བར་བགྱིའོ། །རང་སངས་རྒྱས་ཀྱིས་བསམས་པ། བདག་གིས་རྣག་གི་ལུས་འདིས་ཐོབ་པར་བྱ་བ་གང་ཡིན་པ་ཐོབ་ཟིན་པས་དེའི་ཕྱིར་ད་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་པར་བྱའོ་སྙམ་ནས། དེ་རྔོན་པ་དེ་ཉིད་ཀྱི་མདུན་དུ་ཡང་ནམ་མཁའི་དཀྱིལ་དུ་འཕགས་ཏེ། ཆོ་འཕྲུལ་རྣམ་པ་སྣ་ཚོགས་དག་རྣམ་པར་བསྟན་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདས་སོ། །རྔོན་པ་དེ་ནོར་དང་ལྡན་པ་ཡིན་པས་དེས་སྤོས་ཀྱི་ཤིང་ཐམས་ཅད་ཀྱིས་ཕུང་པོར་བཅེར་ཏེ་བསྲེགས་ནས་ཕུང་པོ་དེ་འོ་མས་ཞི་བར་བྱས་ཏེ་རུས་པ་དེ་དག་གསེར་གྱི་བུམ་པར་བཅུག་ནས་ལམ་པོ་ཆེའི་བཞི་མདོར་ལུས་ཀྱི་མཆོད་རྟེན་རྩིག་ཏུ་བཅུག་སྟེ། གདུགས་དང་། རྒྱལ་མཚན་དང་། བ་དན་དག་བསྒྲེང་ཞིང་དྲི་དང་། ཕྲེང་བ་རྒྱུ་དང་། བདུག་སྤོས་དང་། ཕྱེ་མ་དང་། སིལ་སྙན་དག་གིས་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས། བདག་ཡོན་གནས་དམ་པར་གྱུར་པ་འདི་ལྟ་བུ་ལ་གནོད་པ་བྱས་པ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་
བར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཕྱུག་པ་ནོར་མང་བ། ལོངས་སྤྱོད་ཆེ་བར་སྐྱེ་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེ་ལ་དེའི་ཚེ་དེའི་དུས་ན་རྔོན་པ་གང་ཡིན་པ་དེ་ནི་དགེ་སློང་ཨུ་ཏྲ་ཡ་ན་ཡིན་ཏེ། དེས་རང་སངས་རྒྱས་ཀྱི་གནད་དུ་མདའ་དུག་ཅན་གྱིས་བསྣུན་པ་གང་ཡིན་པའི་ལས་དེའི་རྣམ་པར་སྨིན་པས་བསྐལ་པར་སེམས་ཅན་དམྱལ་བ་ཆེན་པོ་མནར་མེད་པར་གདུངས་ནས་ལས་དེ་ཉིད་ཀྱི་ལྷག་མས་ཚེ་རབས་ལྔ་བརྒྱར་མཚེའུ་དེ་ཉིད་དུ་རི་དགས་སུ་གྱུར་ནས་མདའ་དུག་ཅན་གྱིས་གནད་དུ་བསྣུན་ཅིང་དུས་ལ་བབ་སྟེ། ད་ལྟར་གྱི་བར་དུ་ཡང་དགྲ་བཅོམ་པ་ཐོབ་ཀྱང་དེ་མཚོན་གྱིས་ཡོངས་སུ་མྱ་ངན་ལས་འདས་སོ། །མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ཕྱུག་པ། ནོར་མང་བ། ལོངས་སྤྱོད་ཆེ་བར་སྐྱེས་ཤིང་ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་། འདིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒྱལ་པོ་གཙུག་པུད་ཅན་དང་། གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་དང་། ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོས་ལས་ཅི་བགྱིས་ན་དེས་དོག་སས་ནོན་པར་གྱུར། བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཀྱིས་ལས་ཅི་ཞིག་
བགྱིས་ན་བྲོས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང་། བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་ཁྱིམ་བདག་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་ཁྱེའུ་ཞིག་བྱུང་ངོ་། །ཡང་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེ་ལ་བུ་མོ་ཞིག་བྱུང་ནས། དེ་གཉིས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །བུ་མོ་དེ་དང་ན་མཉམ་པའི་བུ་མོ་དག་སློང་བ་འོངས་ན། བུ་མོ་དེ་ལ་སློང་བ་འགའ་ཡང་མ་འོངས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རང་སངས་རྒྱས་ཞིག་ལྗོངས་རྒྱུ་ཞིང་སོང་བ་ན་རི་བྲགས་དེར་ཕྱིན་ནས་བུ་མོ་དེས་ཁྱིམ་ཕྱགས་ནས་ཕྱག་དར་རིབ་མའི་སྟེང་ནས་བོར་བ་དེ་རང་སངས་རྒྱས་བསོད་སྙོམས་ལ་རྒྱུ་བ་དེའི་མགོ་ལ་ཕོག་གོ །བུ་མོ་དེས་དེར་ཕོག་པ་མཐོང་ནས་འགྱོད་པའི་སེམས་ཀྱང་མ་སྐྱེས་ལ། སྟེས་
དབང་གིས་དེ་ཉིད་ཀྱི་ཉིན་མོ་དེ་སློང་བ་འོངས་ནས་མིང་པོས་དེ་ལ་དྲིས་པ། དེང་ཁྱོད་ཀྱིས་ཅི་བྱས་ན་དེས་ན་ཁྱོད་སློང་བ་འོངས། དེས་སྨྲས་པ། བདག་གིས་དེང་རབ་ཏུ་བྱུང་བའི་སྟེང་དུ་ཕྱག་དར་བོར་རོ། །དེས་འཛུམ་ཕྱུང་བ་དང་། བུ་མོ་དེས་བུ་མོ་གཞན་དག་ལ་སྦྲན་ཅིང་དེས་ཀྱང་གཞན་དག་ལ་སྦྲན་ནས། འཇིག་རྟེན་ལ་བུ་མོ་གང་དང་གང་སློང་བ་མི་འོང་བ་དེས་རང་སངས་རྒྱས་ཀྱི་སྟེང་དུ་ཕྱག་དར་བོར་ན་དེ་ལ་སློང་བ་འོང་ངོ་། །ཞེས་སྡིག་པ་ཅན་གྱི་ལྟ་བའི་རྣམ་པ་དེ་ལྟ་བུ་བྱུང་ངོ་། །བདག་ཉིད་ཆེན་པོ་རྣམས་ནི་བསྙེན་བཀུར་མ་ཡིན་པས་འཇིགས་པས་རང་སངས་རྒྱས་དེ་རི་བྲགས་དེ་ནས་སོང་བ་དང་། དྲང་སྲོང་མངོན་པར་ཤེས་པ་ལྔ་དང་ལྡན་པ་རྣམས་ཀྱི་སྟེང་དུ་དོར་བར་བརྩམས་ནས་དེ་དག་ཀྱང་དོང་བ་དང་། ཕ་མ་དག་གི་སྟེང་དུ་བོར་བར་བརྩམས་སོ། །རི་བྲགས་དེ་ན་ཁྱིམ་བདག་དགེ་བའི་ཆོས་ཅན་གཉིས་ཤིག་འཁོད་པ་དེ་གཉིས་ཀྱིས་སྨྲས་པ། ཤེས་ལྡན་དག་དམ་པ་མ་ཡིན་པའི་ཆོས་འཕེལ་བ་འདི་བཟློག་པར་བྱའོ། །ཞེས་དེ་གཉིས་ཀྱིས་བཟློག་ཅིང་སྤངས་སོ། །དགེ་སློང་དག་དེའི་ཚེ་དེའི་དུས་ན་བུ་མོ་གང་གིས་རང་སངས་རྒྱས་ཀྱི་སྟེང་དུ་ཕྱག་དར་བོར་བ་དེ་ནི་རྒྱལ་པོ་གཙུག་པུད་ཅན་འདི་ཡིན་ནོ། །རི་བྲགས་དེ་ན་གནས་པའི་སྐྱེ་བོའི་ཚོགས་གང་ཡིན་པ་དེ་ནི་གྲོང་ཁྱེར་སྒྲ་སྒྲོགས་ན་གནས་པའི་སྐྱེ་བོའི་ཚོགས་འདི་དག་ཡིན་ཏེ། འདི་དག་གིས་རང་སངས་རྒྱས་དང་། དྲང་སྲོང་དང་། ཕ་མ་དག་གི་སྟེང་དུ་ཕྱག་དར་བོར་བ་གང་ཡིན་པ་དེའི་ལས་ཀྱི་རྣམ་པར་སྨིན་པས་སས་ནོན་པར་གྱུར་ཏོ། །ཁྱིམ་བདག་གཉིས་ཀྱིས་བཟློག་པ་གང་ཡིན་པ་དེ་ནི་བློན་པོའི་མཆོག་ཧེ་རུ་ཀ་དང་། བྷི་རུ་ཀ་གཉིས་ཡིན་ཏེ། ལས་དེའི་རྣམ་པར་སྨིན་པས་བྲོས་པར་གྱུར་ཏོ། །བུ་མོའི་མིང་པོ་གང་གིས་འཛུམ་ཕྱུང་བ་དེ་ནི་དགེ་སློང་ཀཱ་ཏྱཱ་ཡ་ན་ཆེན་པོ་ཡིན་ཏེ། དེས་འཛུམ་ཕྱུང་བ་གང་ཡིན་པའི་ལས་དེའི་རྣམ་པར་སྨིན་པས་སས་གཡོགས་ཏེ། གལ་ཏེ་དགེ་སློང་ཀཱ་ཏྱཱ་ཡ་ན་ཆེན་པོས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་དུ་ཟིན་ན། དགེ་སློང་ཀཱ་ཏྱཱ་ཡ་ན་ཆེན་པོ་ཡང་སས་ནོན་ཅིང་ཚུལ་མ་ཡིན་པས་སྡུག་བསྔལ་བར་འགྱུར་རོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་
པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་དང་འདྲེན་མ་རྣམས་སྤངས་ཏེ། ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱོད་ཀྱིས་དེ་ལྟར་བསླབ་པར་བྱའོ། །སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཀཽ་ཤཱམྦཱི་ན་ཁྱིམ་བདག་ནོར་བཟངས་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ་ཞིག་འདུག་པ་དེའི་ཁྱིམ་རྒྱལ་པོ་ཤར་པའི་དྲུང་ན་འདུག་ཅིང་དེ་ནང་པར་སྔར་ལངས་ཏེ་ལས་ཀྱི་མཐའ་དག་ལ་རྟོག་ཏུ་འགྲོའོ། །དེ་དབྱིག་གི་གདངས་ཅན་ཡིན་པས་རྒྱལ་པོ་ཤར་པས་སྒྲའི་གདངས་ལས་དེ་ལ་གསེར་བཞག་པ་འབུམ་ཡོད་པར་ཤེས་སོ། །ཇི་ཙམ་དུས་གཞན་ཞིག་ན་རྒྱལ་པོ་ཤར་པ་དོན་གྱི་གནས་ན་འདུག་པས་བློན་པོ་རྣམས་ལ་སྨྲས་པ། ཤེས་ལྡན་དག་ཁྱིམ་བདག་ནོར་བཟངས་ཉི་མ་རེ་རེ་ཞིང་ནང་པར་སྔར་ལངས་ཏེ་རང་ཉིད་ལས་ཀྱི་མཐའ་དག་ལ་རྟོག་ཏུ་འགྲོ་སྟེ། འདི་ལ་གསེར་བཞག་པ་འབུམ་ཡོད་ཅེས་གྲག་ན་ཅིའི་ཕྱིར་བདག་ཉིད་ངལ་བར་བྱེད། བློན་པོ་རྣམས་ཀྱིས་སྨྲས་པ། ལྷ་འདི་ལ་གསེར་བཞག་པ་འབུམ་ག་ལ་མཆིས་ཏེ། གལ་ཏེ་འདི་ལ་གསེར་བཞག་པ་འབུམ་མཆིས་ན་ཅིའི་སླད་དུ་བདག་ཉིད་ངལ་བར་བགྱིད། རྒྱལ་པོས་སྨྲས་པ། ཤེས་ལྡན་དག་གལ་ཏེ་ཁྱེད་ཅག་ཡིད་མི་ཆེས་ན་ཁྱིམ་བདག་ནོར་བཟངས་བོས་ཤིག་དང་དྲིའོ། །དེ་དག་གིས་ཁྱིམ་བདག་ནོར་བཟངས་བོས་ནས་རྒྱལ་པོས་དྲིས་པ། ཁྱིམ་བདག་ཁྱོད་ལ་གསེར་བཞག་པ་འབུམ་ཡོད་དམ། ལྷ་མཆིས་ཏེ། གལ་ཏེ་བཞེད་ན་བཞེས་སུ་གསོལ། ཁྱིམ་བདག་ང་ནི་གསེར་དོན་དུ་གཉེར་བ་མ་ཡིན་གྱི། འདི་ལྟར་ངས་ཁྱོད་ལ་ཅི་ཡོད་དམ་མེད་ཅེས་དྲི་བར་ཟད་དོ། །ལྷ་མཆིས་ཏེ་ལྷས་ཇི་ལྟར་མཁྱེན་པ་དེ་ཞུའོ། །རྒྱལ་པོས་སྨྲས་པ། ཁྱིམ་བདག་ཁྱོད་དབྱིག་གི་གདངས་
ཅན་ཡིན་པས་ངས་སྒྲའི་གདངས་ཤེས་སོ། །ཁྱིམ་བདག་ནོར་བཟངས་རྒྱལ་པོས་གདངས་ལས་ཤེས་པས་དེའི་མིང་ཁྱིམ་བདག་གདངས་ཅན་ཁྱིམ་བདག་གདངས་ཅན་ཞེས་བྱ་བར་གྱུར་ཏོ། །རྒྱལ་པོས་དེ་ལ་སྨྲས་པ། ཁྱིམ་བདག་ཁྱོད་ཕྱུག་པོར་གྱུར་པ་ཡིན་ན་ཅིའི་ཕྱིར་ཁྱོད་རང་གིས་ཞལ་ཏ་བྱས་ཏེ་ལས་ཀྱི་མཐའ་དག་བྱེད་དུ་འཇུག །དེས་སྨྲས་པ། ལྷ་གལ་ཏེ་བདག་གིས་རང་གི་ཞལ་ཏ་བགྱིས་ཏེ་ལས་ཀྱི་མཐའ་བགྱིད་དུ་མ་སྩལ་ན། བདག་གི་ལོངས་སྤྱོད་དག་འཕེལ་ཞིང་རྒྱས་པ་དང་། ཡངས་པར་ཡང་མི་འགྱུར་ལ། ལྷས་ཀྱང་བདག་དབྱིག་གི་གདངས་ཅན་ལགས་པར་མཁྱེན་པར་མི་འགྱུར་རོ། །རྒྱལ་པོས་སྨྲས་པ། ཁྱིམ་བདག་ཁྱོད་ཅིའི་ཕྱིར་གླང་པོ་ཆེ་དང་རྟ་དག་གིས་མི་འགྲོ། ལྷ་བདག་ཁྱིམ་ཁོལ་ལགས་པས་གླང་པོ་ཆེ་དང་རྟ་དག་གིས་མཆི་བ་བདག་གི་ཚུལ་དང་མཐུན་པ་མ་ལགས་སོ། །རྒྱལ་པོས་བསམས་པ། གྲོགས་འདི་ལྟ་བུས་རྒྱལ་སྲིད་བྱེད་དུ་གཞུག་པར་ནུས་ཀྱིས། འདི་བློན་པོ་ཁོ་ནར་གཞུག་གོ་སྙམ་དུ་རིག་ནས་སྨྲས་པ། ཁྱིམ་བདག་བློན་པོ་གྱིས་ཤིག་དང་། ལྷན་ཅིག་ཏུ་རྒྱལ་སྲིད་བྱེད་དུ་གཞུག་གོ །དེས་སྨྲས་པ། ལྷ་དེ་སྐད་བཀའ་སྩལ་པ་མི་རིགས་ཏེ། བདག་ནི་ཁྱིམ་ཁོལ་ལགས་པས་བདག་ཞིང་ལས་ཀྱི་མཐའ་རྗེས་སུ་བསྒྲུབ་པར་རིགས་ཀྱི། བློན་པོར་མི་རིགས་སོ། །རྒྱལ་པོས་དེ་ལྟ་དེ་ལྟར་ནན་གྱིས་མནན་ན་ཅི་ནས་ཀྱང་གདོན་མི་ཟ་བར་ཁས་ལེན་པར་ཤེས་ཏེ། ནན་གྱིས་མནན་ནས་དེས་ཀྱང་ཁས་བླངས་སོ། །དེ་ནས་རྒྱལ་པོས་དེ་བློན་པོར་བཅུག་ནས་ཁྱིམ་བདག་གདངས་ཅན་གྱིས་ཆོས་དང་། རིགས་པས་རྒྱལ་པོའི་བྱ་བ་དང་། རྒྱལ་པོའི་བྱེད་པ་དག་བྱ་བར་བརྩམས་ནས། དེས་བློན་པོ་གཞན་ཐམས་ཅད་ཟིལ་གྱིས་མནན་པ་དང་། དེ་དག་ཕྲག་དོག་སྐྱེས་ཏེ་ཡིད་མི་བདེ་བར་གྱུར་ནས་འདུས་ཏེ་སྨྲས་པ། ཤེས་ལྡན་དག་བདག་ཅག་འདི་ལྟར་ཁྱིམ་བདག་གདངས་ཅན་གྱིས་ཟིལ་གྱིས་མནན་པར་གྱུར་ན་འདི་ལ་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། འདི་ལ་ཅིའི་ཕྱིར་བསྒྲུབ་ཏུ་མེད། འདི་ཇི་སྲིད་དུ་གཏན་དུ་གཏིང་ཚུགས་པར་མ་གྱུར་པ་དེ་སྲིད་དུ་འདི་ལ་རྒྱལ་པོས་ཆད་པས་གཅོད་དུ་གཞུག་པར་བྱའོ། །
ཁ་ཅིག་གིས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེ་དག་ཐམས་ཅད་འདུས་ཏེ་རྒྱལ་པོའི་གན་དུ་དོང་ནས་སྨྲས་པ། ལྷ་རྒྱལ་པོ་སུ་ལགས། དེས་སྨྲས་པ། ཁྱེད་ཅག་ག་ལས་ཐེ་ཚོམ་ཟ། རྒྱལ་པོ་ང་ཡིན་མོད་གཞན་སུ་ཞིག་ཡིན། དེ་དག་གིས་སྨྲས་པ། ལྷ་གདངས་ཅན་རྒྱལ་པོ་ལགས་ཀྱི་ཁྱོད་ནི་མ་ལགས་ཏེ། གལ་ཏེ་དེ་འཚལ་བར་གྱུར་ན་ལྷ་བཀྲོངས་ཏེ་རང་ཉིད་ཅོད་པན་བཅིངས་ནས་རྒྱལ་སྲིད་ཀྱི་དབང་ཕྱུག་གི་བདག་པོ་བགྱིད་དུ་སྩོལ་བར་འགྱུར་རོ། །རྒྱལ་པོས་སྨྲས་པ། ཤེས་ལྡན་དག་ཅིའི་ཕྱིར་དེ་དེ་ལྟར་འགྱུར་ཏེ། དེ་ནི་ཆོས་གཙོ་བོར་བྱེད་པ་ཡིན་པས་ཇི་ལྟར་དེ་ལྟར་བྱེད་པར་འགྱུར། དེ་དག་གིས་སྨྲས་པ། བདག་ཅག་གིས་ལྷའི་མངོན་སུམ་དུ་འགྱུར་བར་བགྱིའོ། །ཇི་ཙམ་དུས་གཞན་ཞིག་ན་ཁྱིམ་བདག་གདངས་ཅན་རྒྱལ་པོས་ཉེ་བར་འཚོ་བའི་རྒོལ་བ་དང་། ཕྱིར་རྒོལ་བ་དག་གིས་ཡོངས་སུ་བསྐོར་ཅིང་རྒྱལ་པོའི་ཕོ་བྲང་དུ་ཞུགས་ནས། རྒྱལ་པོའི་ཕོ་བྲང་དུ་ཐམས་ཅད་སྐྱེ་བོའི་ཚོགས་ཀྱིས་གང་བར་དེས་རྒྱལ་པོའི་བྱ་བ་དང་། རྒྱལ་པོའི་བྱེད་པ་དག་བྱས་ནས་རྒྱལ་པོའི་ཕོ་བྲང་ནས་ཕྱིར་བྱུང་བ་དང་། རྒྱལ་པོས་ཉེ་བར་འཚོ་བ་སྔ་ན་འཁོད་པ་དག་ཀྱང་དེ་དང་ལྷན་ཅིག་ཕྱིར་བྱུང་སྟེ་རྒྱལ་པོའི་ཚོགས་མེད་པར་འདུག་པ་དང་། བློན་པོ་དེ་དག་གིས་རྒྱལ་པོ་ལ་སྨྲས་པ། ལྷ་གཟིགས་སམ། བདག་ཅག་གིས་གསོལ་པ་གང་ལགས་པ་དེ་ནི་འདི་ལགས་ཏེ། གལ་ཏེ་འདི་འཚལ་བར་གྱུར་ན་ལྷ་བཀྲོངས་ཏེ་རང་ཉིད་ཅོད་པན་བཅིངས་ནས་རྒྱས་སྲིད་ཀྱི་དབང་ཕྱུག་གི་བདག་པོ་བགྱིད་དུ་སྩོལ་བར་འགྱུར་རོ། །རྒྱལ་པོས་བསམས་པ། རེ་ཞིག་འདི་བརྟག་པར་བྱའོ་སྙམ་ནས། དེས་དེ་རྒྱུ་བ་དང་གནས་པ་ལས་བརྟག་པར་བརྩམས་པ་དང་། ཇི་ཙམ་ན་བྱང་ལམ་ནས་དེད་དཔོན་གྱིས་ཟོང་རྟ་དེད་དེ་ཀཽ་ཤཱམྦཱིར་ཕྱིན་ནས་རྒྱལ་པོས་གདངས་ཅན་ལ་བསྒོ་བ། གསེར་འབུམ་གྱིས་རྟ་དག་ཉོས་ཤིག །དེས་གསེར་འབུམ་གྱིས་རྟ་དག་ཉོས་པ་དང་། རྒྱལ་པོས་གདངས་ཅན་ལ་བསྒོ་བ། འབུམ་གྱི་ཕྱེད་བྱིན་ལ་འདི་སྐད་ཅེས་བདག་གིས་འབུམ་ཚང་བར་བྱིན་ཟིན་ཏོ། །ཞེས་བྱོས་ཤིག །དེས་སྨྲས་པ། ལྷ་དེ་མི་རིགས་ཏེ། གལ་ཏེ་དེ་ལྟར་བགྱིས་ན་སླན་ཅད་འདིར་ཆིབས་རྟ་འཚོང་བ་
དང་། གཞན་འགའ་ཡང་མཆི་བར་མི་འགྱུར་གྱིས་འདི་ལྟར་ལྷའི་དཀོར་ལས་འབུམ་ཕྱེད་སྩོལ་ཅིག་དང་བདག་གིས་འབུམ་ཕྱེད་སྩལ་ཏོ། །རྒྱལ་པོས་སྨྲས་པ། ཁྱིམ་བདག་ངའི་ཚིག་དེ་བཞིན་སྨྲས་ན་འདི་ཅི་འགལ། དེས་སྨྲས་པ། ལྷ་བདག་གིས་ཚེ་གཅིག་གི་སྡུག་བསྔལ་གྱི་དོན་དུ་ཚེ་རབས་མང་པོའི་སྡུག་བསྔལ་སྐྱེད་པར་རྔོ་མི་ཐོག་གོ །རྒྱལ་པོས་དེ་ལ་ལན་གསུམ་གྱི་བར་དུ་སྨྲས་ན་ཡང་དེ་མ་བཏུབ་ནས། དེ་ནས་རྒྱལ་པོས་བློན་པོ་རྣམས་ལ་སྨྲས་པ། ཤེས་ལྡན་དག་གང་གིས་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་བཀའ་ལན་གསུམ་གྱི་བར་དུ་བཅག་པ་དེའི་ཆད་པ་ཅི་ཡིན། བློན་པོ་རྣམས་ཀྱིས་སྨྲས་པ། ལྷ་དེའི་ཆད་པ་ནི་དགུམ་པ་ལགས་སོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ངས་ཁྱིམ་བདག་གདངས་ཅན་ཡོངས་སུ་བཏང་ངོ་། །བློན་པོ་རྣམས་ཀྱིས་མི་གཤེད་མ་པ་དག་ལ་བསྒོ་བ། ཤེས་ལྡན་དག་ལྷས་བཀའ་སྩལ་པ། ཁྱིམ་བདག་གདངས་ཅན་སོད་ཅིག་ཅེས་བྱུང་ངོ་། །རྒྱལ་པོས་མི་གཤེད་མ་པ་དེ་དག་ལ་གསང་སྟེ་བསྒོ་བ། ཁྱེད་ཀྱིས་ཁྱིམ་བདག་གདངས་ཅན་གསད་པར་མི་བྱ་བར་འདི་ལྟར་བསྡིགས་པར་བྱའོ། །དེ་དག་གིས་དེའི་མགྲིན་པར་ཀ་ར་བཱི་རའི་ཕྲེང་བ་བཏགས་ཏེ་གྲོང་ཁྱེར་གྱི་དབུས་ནས་གསོད་སར་ཁྲིད་པ་དང་། དེའི་ཉེ་དུ་དག་དོང་སྟེ་སྨྲས་པ། ཁྱིམ་བདག་འདི་ལ་ལྷས་བཀའ་ཅི་སྩལ་པ་དེ་ལྟར་གྱིས་ལ་བདག་ཉིད་གསོད་དུ་མ་གཞུག་ཤིག །དེས་སྨྲས་པ། ཁོ་བོས་ལྷའི་བཀའ་ཆོས་དང་ལྡན་པ་བཅག་གམ། ཅི་གལ་ཏེ་ལྷས་ཁོ་བོས་ཉེས་པ་མེད་པ་གནོད་པ་མི་བྱེད་པ་གསོད་ན་གསོད་དུ་ཟད། ཁོ་བོས་ཚེ་གཅིག་གི་སྡུག་བསྔལ་གྱི་ཕྱིར་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །མི་གཤེད་མ་པ་དེ་དག་གིས་དེ་གསོད་སར་ཁྲིད་དེ་སྨྲས་པ། ཁྱིམ་བདག་ལྷས་བཀའ་ཅི་སྩལ་པ་དེ་ལྟར་གྱིས་ལ་བདག་ཉིད་གསོད་དུ་མ་གཞུག་ཤིག། དེས་སྨྲས་པ། ཁོ་བོས་ལྷའི་བཀའ་ཆོས་དང་ལྡན་པ་བཅག་གམ་ཅི། གལ་ཏེ་ལྷས་ཁོ་བོ་ཉེས་པ་མེད་པ། གནོད་པ་མི་བྱེད་པ་གསོད་ན་གསོད་དུ་ཟད། ཁོ་བོས་ཚེ་གཅིག་གི་སྡུག་བསྔལ་གྱི་ཕྱིར་ཚེ་རབས་མང་པོའི་སྡུག་བསྔལ་སྐྱེད་པར་མི་ནུས་སོ། །མི་
གཤེད་མ་པ་དེ་དག་གིས་དེ་རྒྱལ་པོའི་གན་དུ་ཁྲིད་དེ་སྨྲས་པ། ལྷ་ཁྱིམ་བདག་གདངས་ཅན་འདི་འདི་སྐད་མཆིའོ། །རྒྱལ་པོས་སྨྲས་པ། ཁྱིམ་བདག་ང་ཁྱོད་གསོད་པར་འདོད་པ་མ་ཡིན་ཏེ། འདི་ལྟར་བརྟག་པར་འདོད་དོ། །དེས་སྨྲས་པ། ལྷས་བདག་བརྟག་པའི་དགོངས་པས་གནས་སྐབས་འདི་ལྟ་བུ་སྩལ་ན། གལ་ཏེ་བཀྱོན་ན་ཇི་ལྟར་བགྱིས་པར་འགྱུར། འདི་ལྟར་གལ་ཏེ་ལྷ་བདག་ལ་དགྱེས་ན་བདག་སྦྱིན་པ་དག་སྩོལ་ཅིང་། བསོད་ནམས་དག་བགྱིད་པར་ཅི་གནང་། རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་གནང་གིས་ཅི་དགར་སྦྱིན་པ་དག་བྱིན་ཅིག །བསོད་ནམས་དག་གྱིས་ཤིག །དེ་ནས་ཁྱིམ་བདག་གདངས་ཅན་གྱིས་སྦྱིན་པའི་ཁང་པ་རྩིག་ཏུ་བཅུག་སྟེ། སྦྱིན་པའི་ཞལ་ཏ་པ་མི་བསྐོ་ནས་སྨྲས་པ། ཤེས་ལྡན་དག་གལ་ཏེ་འདིར་སྔོན་མ་བྱུང་བའི་རྟགས་དང་། ཆ་ལུགས་ཅན་གྱི་དགེ་སྦྱོང་ངམ། བྲམ་ཟེའམ། གཞན་དག་འོངས་པར་གྱུར་ན་ཁོ་བོ་ལ་སྦྲོན་ཅིག །ཇི་ཙམ་ན་ལྷོ་ལམ་ནས་དྲང་སྲོང་ལྔ་བརྒྱ་ཙམ་ཡུལ་དབུས་སུ་འཕགས་པ་དེ་དག་མཐར་གྱིས་ལམ་དུ་འདོང་བ་ན་དགོན་པའི་ལམ་དུ་ཕྱིན་ནས་དེ་དག་དགོན་པའི་ནང་དུ་སོན་པ་ན་ཆུ་ཟད་ནས་དེ་དག་ཆུ་དང་བྲལ་བས་སྐོམ་གྱིས་གདུངས་ནས་དགོན་པའི་ལམ་དེར་ཕན་ཚུན་བྱུལ་བར་བརྩམས་པ་དང་། དེ་ཕན་ཚུན་ཉུལ་བ་དེ་དག་གིས་ཧ་ཅང་ཐག་མི་རིང་བ་ན་གསིང་མ་སྔོན་པོའི་ཕྱོགས་ན་ཤིང་ལྗོན་པ་ཞིག་མཐོང་ནས་དེ་ན་ཁ་ཅིག་གིས་སྨྲས་པ། ཤེས་ལྡན་དག་གསིང་མ་སྔོན་པོའི་ཕྱོགས་འདི་ན་ཤིང་ལྗོན་པ་ཞིག་སྣང་གིས་ཚུར་ཤེག་དང་། འདི་ན་ཆུ་ཡོད་པར་འགྱུར་གྱིས་ལྟར་འདོང་ངོ་། །གཞན་དག་གིས་སྨྲས་པ། ལེགས་ཀྱིས་དེ་བཞིན་བྱའོ་ཞེས་དེ་དག་དོང་བ་དང་ཅི་ཙམ་ན་ཆུ་མེད་པར་མཐོང་ནས་དེ་དག་གིས་གསོལ་བ་གདབ་པར་བརྩམས་ཏེ། ཤེས་ལྡན་དག་ས་ཕྱོགས་དང་ཤིང་ལྗོན་པ་འདི། ལྷའམ། ཀླུའམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟའམ། མིའམ་ཅིའམ། ལྟོ་འཕྱེ་ཆེན་པོ་གང་གནས་པ་དེས་བདག་ཅག་དྲང་སྲོང་ལྔ་བརྒྱ་སྐོམ་གྱིས་གདུངས་པ་རྣམས་ལ་ཆུ་བྱིན་ཅིག་ཅེས་སྨྲས་སོ། །ཇི་ཙམ་ན་ཤིང་ལྗོན་པ་དེ་ལས་ལག་པ་རྒྱན་ཐམས་ཅད་ཀྱིས་བརྒྱན་པ་
ཞིག་གསེར་གྱི་རིལ་བ་བྷྲིང་གར་ཐོགས་ཏེ་བྱུང་ནས་དྲང་སྲོང་རྣམས་ཀྱིས་སྙིམ་པ་བཟེད་དེ་ཆུ་བཏུང་བར་བརྩམས་ནས། ཇི་ཙམ་ན་མྱངས་ན་ཆུ་ཡན་ལག་བརྒྱད་དང་ལྡན་པ་ཡིན་ཏེ། བསིལ་བ་དང་། མངར་བ་དང་། ཡང་བ་དང་། འཇམ་པ་དང་། གསལ་བ་དང་། དྲི་ང་བ་མེད་པ་དང་། འཐུང་ན་མགུལ་ལ་མི་གནོད་པ་དང་། འཐུངས་པ་ན་ལྟོ་མི་ན་བ་ཡིན་ཏེ། དེ་དག་ཚིམ་པར་གྱུར་ནས་རིལ་བ་བཀང་སྟེ་ཤིས་པ་བརྗོད་ནས་འཕགས་ཏེ་དོང་བ་དང་། དེ་དག་ལ་བློ་སྐྱེས་པ། ཤེས་ལྡན་དག་བདག་ཅག་གིས་དེ་ལྟ་བུའི་ཡ་མཚན་མཐོང་ནས་དེ་ལ་ཁྱོད་སུ་ཡིན། ལས་གང་གིས་འདིར་སྐྱེས་ཞེས་མ་དྲིས་པ་ནི་བདག་ཅག་ཉམས་པ་ཡིན་གྱིས། ཚུར་ཤེག་ཕྱིར་ལོག་ལ་དྲིའོ་སྙམ་ནས་དེ་དག་ཐམས་ཅད་འདུས་ཏེ་ཕྱིར་ལོག་ནས་ཤིང་ལྗོན་པ་དེའི་དྲུང་དུ་འཁོད་དེ་སྨྲས་པ། ཤིང་ལྗོན་པ་དེ་ལ་ལྷའམ། ཀླུའམ། གནོད་སྦྱིན་ནམ་ནམ་མཁའ་ལྡིང་ངམ། དྲི་ཟའམ་མིའམ་ཅིའམ། ལྟོ་འཕྱེ་ཆེན་པོ་གང་གནས་པ་གང་གིས་བདག་ཅག་དགོན་པའི་ལམ་དུ་སོང་བ། གནོད་པ་དང་ཉམ་ང་བ་མི་བདེ་བར་གྱུར་ཅིང་འཆི་བའི་དབང་དུ་གྱུར་པ་རྣམས་ལ་ཆུ་ཡན་ལག་བརྒྱད་དང་ལྡན་པས་ཚིམ་པར་བྱས་པ་དེས་བདག་གང་ཡིན་པ་དང་། ལས་གང་གིས་འདིར་སྐྱེས་པ་སྨྲོས་ཤིག །ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བ་ཡིན་པས་ཁོ་བོ་སུ་ཡིན་པ་དང་། ལས་གང་གིས་འདིར་སྐྱེས་པ་ཡིད་ཆེས་པར་མི་འགྱུར་བས་ཇི་ལྟར་སྨྲ་བར་བྱ། དྲང་སྲོང་རྣམས་ཀྱིས་སྨྲས་པ། ཀྱེ་བདག་ཅག་གིས་མངོན་སུམ་ཁོ་ནར་མཐོང་ན་ཇི་ལྟར་ཡིད་ཆེས་པར་མི་འགྱུར། ཐེ་ཚོམ་མ་ཟ་བར་སྨྲོས་ཤིག །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཉོན་ཅིག་དང་། ཁོ་བོ་གང་ཡིན་པ་དང་། ལས་གང་གིས་འདིར་སྐྱེས་པ་སྨྲ་བར་བྱའོ། །ཡུལ་ཀོ་ས་ལ་དག་ན་གྲོང་ཁྱེར་མཉན་ཡོད་ཅེས་བྱ་བ་དེ་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་འདུག་པ་དེའི་ཁྱིམ་དྲུང་ན་ཁོ་བོ་བཟང་མཁན་བྱེད་ཅིང་འདུག་འདུག་སྟེ། དེ་མགོན་མེད་པ་རྣམས་ལ་ཟས་སྦྱིན་པར་བྱེད་པས་ཡུལ་ཐ་དད་པ་ན་གནས་པའི་སློང་མོ་བ་དག་ལྷགས་ཤིང་ལྷགས་ཤིང་ཁོ་བོ་ལ་ཁྱིམ་བདག་མགོན་
མེད་ཟས་སྦྱིན་གྱི་ཁྱིམ་གང་ཡིན་ཞེས་དྲིས་ནས། ཁོ་བོས་ལག་པ་གཡས་པ་བརྐྱང་སྟེ། དེ་དག་ལ་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་འདི་ཡིན་ནོ་ཞེས་སྨྲས་པ་དང་། དེ་དག་གིས་དེ་ནས་ལག་པ་གང་བ་དང་། སྣོད་གང་བ་དང་། འབྱོར་པ་ཐོབ་པ་དང་། རྙེད་པ་ཐོབ་ཅིང་འདོང་བ་དེ་དག་ཁོ་བོས་མཐོང་ངོ་། །མཐོང་ནས་མཆོག་ཏུ་དགའ་བ་སྐྱེད་པར་བྱེད་དེ། ཁོ་བོ་ལས་དེས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཤིང་། ཤིང་ལྗོན་པ་འདི་ལ་གནས་ཏེ། དེའི་ཕྱིར་ཁོ་བོའི་ལག་པ་གཡས་པ་ཤིན་ཏུ་ལྷམ་མེ། ལྷན་ནེ། ལྷང་ངེར་གྱུར་ཏོ། །དེ་དག་གིས་ཤིས་པ་བརྗོད་པས་བསྟོད་དེ་དོང་ངོ་། །ཇི་ཙམ་ན་ཕྱོགས་གཞན་ཞིག་ཏུ་ཕྱིན་ནས་བཟའ་བ་དང་བཏུང་བ་ཟད་དེ། དེ་དག་བཀྲེས་པས་གདུངས་ཤིང་སྐོམ་པས་གདུངས་ནས་ཀུན་དུ་བརྟག་པར་བརྩམས་པ་དང་། ཇི་ཙམ་ན་ཧ་ཅང་ཐག་མི་རིང་བ་ཞིག་ན་ཤིང་ལྗོན་པ་ཆེན་པོ་ལོ་མ་སྔོ་ཞིང་སྣུམ་པ་ཞིག་སྣང་ནས་དེ་དག་གིས་སྨྲས་པ། ཤེས་ལྡན་དག་ཤིང་ལྗོན་པ་ཆེན་པོ་ལོ་མ་སྔོ་ཞིང་སྣུམ་པ་འདི་ལྟ་བུ་སྣང་སྟེ། སྔར་ཡང་བདག་ཅག་གིས་ཤིང་ལྗོན་པ་འདི་ལྟ་བུ་ཁོ་ནས་ཆུ་གྲུབ་ཀྱིས་འདིར་འདོང་དང་གལ་ཏེ་ན་ཆུང་ཟད་འགྲུབ་པར་འགྱུར་རོ། །ཞེས་དེ་དག་དེར་དོང་སྟེ་གསོལ་བ་གདབ་པར་བརྩམས་པ། ཤེས་ལྡན་དག་ས་ཕྱོགས་དང་ཤིང་ལྗོན་པ་འདི་ལ་ལྷའམ། ཀླུའམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟའམ། མིའམ་ཅིའམ། ལྟོ་འཕྱེ་ཆེན་པོ་གང་གནས་པ་དེ་བདག་ཅག་དྲང་སྲོང་ལྔ་བརྒྱ་བཀྲེས་པས་གདུངས་པ་དང་སྐོམ་པས་གདུངས་པ་རྣམས་ལ་ཟས་དང་སྐོམ་བྱིན་ཅིག་ཅེས་སྨྲས་སོ། །ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་དེང་ཤིག་དང་འདི་ནས་ཧ་ཅང་མི་རིང་བ་ན་རྫིང་བུ་ཞིག་ཡོད་པ་དེའི་འགྲམ་ན་ཤིང་ལྗོན་པ་ཞིག་ཡོད་པ་དེའི་
དྲུང་ན་འབྲས་ཆན་གྱིས་བྲེ་བོ་གང་ཞིང་འདུག་པ་དེ་ལས་ཟོས་ཤིང་འཐུངས་ནས་བཟའ་བ་དང་བཏུང་བ་ཅི་འདོད་པ་ཁྱེར་ཅིག །དེ་དག་དོང་བ་དང་། ཇི་ཙམ་ན་རྫིང་བུ་བྱ་ངང་པ་དང་། ཀཱ་རཎྜ་བ་དང་། ངུར་པས་མཛེས་པར་བྱས་པ་ཞིག་འདུག་པ་དེའི་འགྲམ་ན་ཤིང་ལྗོན་པ་ཞིག་འདུག་པ་དེའི་དྲུང་ན་འབྲས་ཆན་ཚོད་མ་སྣ་ཚོགས་དང་བཅས་པས་གང་བ་ཞིག་འདུག་པ་མཐོང་ནས། དེ་དག་གིས་དེར་ཁྲུས་བྱས་ཏེ་ཟོས་ཤིང་ཆུ་འཐུངས་ནས་རིལ་བ་ཆུས་བཀང་སྟེ། བཟའ་བ་དང་བཏུང་བ་ཅི་འདོད་པ་ཁྱེར་ནས་ཤིས་པ་བརྗོད་དེ་དོང་བ་དང་། དེ་དག་ལ་བློ་སྐྱེས་པ། ཤེས་ལྡན་དག་བདག་ཅག་གིས་དེ་ལྟ་བུའི་ཡ་མཚན་མཐོང་ནས་དེ་ལ་ཁྱོད་སུ་ཡིན། ལས་གང་གིས་འདིར་སྐྱེས་ཞེས་མ་དྲིས་པ་ནི་བདག་ཅག་ཉམས་པ་ཡིན་གྱིས་ཚུར་ཤེག་ཕྱིར་ལོག་ལ་དྲིའོ་སྙམ་ནས། དེ་དག་ཐམས་ཅད་འདུས་ཏེ་ཕྱིར་ལོག་ནས་ཤིང་ལྗོན་པ་དེའི་དྲུང་དུ་འཁོད་དེ་སྨྲས་པ། ཤིང་ལྗོན་པ་འདི་ལ་ལྷའམ། ཀླུའམ། གནོད་སྦྱིན་ནམ། ནམ་མཁའ་ལྡིང་ངམ། དྲི་ཟའམ། མི་འམ་ཅིའམ། ལྟོ་འཕྱེ་ཆེན་པོ་གང་གནས་པ་གང་གིས་བདག་ཅག་དགོན་པའི་ལམ་དུ་སོང་བ་གནོད་པ་དང་། ཉམ་ང་བ་དང་། མི་བདེ་བར་གྱུར་ཅིང་འཆི་བའི་དབང་དུ་གྱུར་པ་རྣམས་ལ་ཆུ་ཡན་ལག་བརྒྱད་དང་ལྡན་པ་དང་། ཟས་ཀྱིས་ཚིམ་པར་བྱས་པ་དེས་བདག་གང་ཡིན་པ་དང་། ལས་གང་གིས་འདིར་སྐྱེས་པ་སྨྲོས་ཤིག །ཇི་ཙམ་ན་ཤིང་ལྗོན་པ་དེ་ལས་ཚིག་བྱུང་བ། ཤེས་ལྡན་དག་འཛམ་བུའི་གླིང་པའི་མི་རྣམས་ནི་ཡིད་ཆེས་པར་དཀའ་བ་ཡིན་པས་ཁོ་བོ་སུ་ཡིན་པ་དང་། ལས་གང་གིས་འདིར་སྐྱེས་པ་ཡིད་ཆེས་པར་མི་འགྱུར་བས་ཇི་ལྟར་སྨྲ་བར་བྱ། དྲང་སྲོང་རྣམས་ཀྱིས་སྨྲས་པ། ཀྱེ་བདག་ཅག་གིས་མངོན་སུམ་ཁོ་ནར་མཐོང་ན་ཇི་ལྟར་ཡིད་ཆེས་པར་མི་འགྱུར། ཐེ་ཚོམ་མ་ཟ་བར་སྨྲོས་ཤིག །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་ཉོན་ཅིག་དང་ཁོ་བོ་གང་ཡིན་པ་དང་། ལས་གང་གིས་འདིར་སྐྱེས་པ་སྨྲ་བར་བྱའོ། །ཡུལ་ཀོ་ས་ལ་དག་ན་གྲོང་ཁྱེར་མཉན་ཡོད་ཅེས་བྱ་བ་དེ་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་ཞིག་འདུག་པ་དེ་མགོན་མེད་པ་རྣམས་ལ་ཟས་སྦྱིན་པར་བྱེད་ནས་རི་བྲགས་ཤིག་ན་བྲམ་ཟེ་ཞིག་འདུག་པ་ལོངས་སྤྱོད་སྲབས་ནས་དེས་བསམ་པ། མཉན་ཡོད་ན་ཁྱིམ་བདག་མགོན་མེད་ཟས་སྦྱིན་འདུག་པ་དེ་མགོན་མེད་པ་རྣམས་ལ་ཟས་སྦྱིན་པར་བྱེད་ཀྱིས་དེའི་གན་དུ་སོང་ན་དེ་ལས་ཅུང་ཟད་འགྲུབ་པར་འགྱུར་རོ་སྙམ་ནས་དེ་དེའི་གན་དུ་སོང་བ་དང་། ཁྱིམ་བདག་
མགོན་མེད་ཟས་སྦྱིན་ཡང་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་གསོལ་བར་འདོད་ནས་རྒྱལ་བྱེད་ཀྱི་ཚལ་དུ་འཕགས་པ་ན། དེས་དེ་མཐོང་ནས་སྨྲས་པ། ཁྱིམ་བདག་བདག་ལ་ཟས་ཀྱི་མགྲོན་གྱིས་ཤིག །དེས་དེ་ལ་སྨྲས་པ། བྲམ་ཟེ་ཚུར་ཤོག །རྒྱལ་བྱེད་ཀྱི་ཚལ་དུ་འདོང་ལ་དེར་ཟོ་ཤིག །དེ་དེ་དང་ལྷན་ཅིག་འཕགས་པ་དང་། ཇི་ཙམ་ན་ཁྱིམ་བདག་མགོན་མེད་ཟས་སྦྱིན་གྱིས་ལམ་ཀར་ཞོའི་བུམ་པ་ཞིག་རྙེད་ནས་དེས་དེ་བྲམ་ཟེ་དེ་ལ་བྱིན་ནས་སྨྲས་པ། བྲམ་ཟེའི་ཞོའི་བུམ་པ་འདི་དགེ་འདུན་ལ་བྲིམས་ཤིག །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཞལ་ཟས་བསོད་པས་ཚིམ་པར་བྱས་པ་དང་། བྲམ་ཟེ་དེས་ཀྱང་ཞོའི་བུམ་པ་དེ་དགེ་འདུན་ལ་བྲིམས་སོ། །ཁྱིམ་བདག་མགོན་མེད་ཟས་སྦྱིན་གྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ནས་ཁྱིམ་པ་དག་ཟན་སྦྱིན་པར་བརྩམས་ཏེ། དེས་ཁྱིམ་པ་གཞན་དག་ལ་ནི་ཟས་བསོད་པ་བྱིན། བྲམ་ཟེ་དེ་ལ་ནི་ངན་པ་བྱིན་པ་དང་། དེས་དེ་ལ་སྨྲས་པ། ཁྱིམ་བདག་རབ་ཏུ་བྱུང་བ་རྣམས་ནི་བསླབ་པ་ཡང་དག་པར་བླངས་པ་ཡིན་པས་རེ་ཞིག་འདི་དག་ལ་ནི་བསོད་པ་སྦྱིན་པར་རིགས་ན། བདག་ཅག་ཁྱིམ་པ་བསླབ་པ་ཡང་དག་པར་མ་བླངས་པར་འདྲ་ན་ཅིའི་ཕྱིར་ཁྱིམ་པ་གཞན་དག་ལ་ནི་ཟས་བསོད་པ་སྦྱིན་ལ་བདག་ལ་ནི་ཟས་ངན་པ་སྦྱིན། དེས་དེ་ལ་སྨྲས་པ། བྲམ་ཟེ་ཁྱིམ་པ་འདི་དག་ཀྱང་བསླབ་པ་ཡང་དག་པར་བླངས་པ་ཡིན་ཏེ། འདི་དག་གིས་ཀྱང་ཡན་ལག་བརྒྱད་དང་ལྡན་པའི་གསོ་སྦྱོང་བླངས་སོ། །དེས་དེ་ལ་སྨྲས་པ། ཁྱིམ་བདག་གལ་ཏེ་བདག་གིས་ཀྱང་ཡན་ལག་བརྒྱད་དང་ལྡན་པའི་གསོ་སྦྱོང་ལེན་ན་བདག་ལ་ཡང་ཟས་བསོད་པ་སྦྱིན་ནམ། དེས་དེ་ལ་སྨྲས་པ་སྦྱིན་ནོ། །དེས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་པ་དང་། དེ་ནས་ཁྱིམ་བདག་མགོན་མེད་ཟས་སྦྱིན་གྱིས་དེ་ཟས་བསོད་པས་ཚིམ་པར་བྱས་ནས་དེས་ཟོས་ཏེ་འཕགས་པ་དང་། ཁྱིམ་བདག་མགོན་མེད་ཟས་སྦྱིན་གྱིས་སྨྲས་པ། བྲམ་ཟེ་ཡུད་ཙམ་ཞིག་སྡོད་ཅིག་དང་སྐོམ་འོང་བར་འགྱུར་རོ། །དེས་སྐོམ་
འཐུངས་ཏེ་སོང་བ་དང་། ཉི་མ་ནུབ་པའི་དུས་ལ་བབ་ནས་མཉན་ཡོད་དང་ཧ་ཅང་མི་རིང་བ་ན་རི་བྲགས་ཤིག་ཡོད་པ་དེར་བྲམ་ཟེའི་ཁྱིམ་ཞིག་ཏུ་གནས་པ་དང་། བྲམ་ཟེ་དེས་དེ་ལ་སྨྲས་པ། བྲམ་ཟེ་ཟན་ཟོ་ཞིག །དེས་སྨྲས་པ། ཁོ་བོས་ཟན་མི་ཟའོ། །དེས་སྨྲས་པ། ཅིའི་ཕྱིར། དེས་སྨྲས་པ། ཁོ་བོ་དགེ་སྦྱོང་གཽ་ཏ་མ་ལ་ཡན་ལག་བརྒྱད་དང་ལྡན་པའི་གསོ་སྦྱོང་བླངས་སོ། །དེས་དེ་ལ་སྨྲས་པ། བྲམ་ཟེ་གལ་ཏེ་རེ་ཞིག་ཟ་ན་དེ་ལྟ་ན་ལེགས། གལ་ཏེ་མི་ཟ་ན་ཁོ་བོའི་ཁྱིམ་དུ་གནས་པར་མི་བྱའོ། །དེས་དུས་མ་ཡིན་པར་ཟོས་ནས་གསོ་སྦྱོང་རལ་ལོ། །རི་བྲགས་ན་གནས་པའི་བྲམ་ཟེ་གང་ཡིན་པ་གང་གིས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ནས་དྲལ་བ་དེ་ནི་ཁོ་བོ་ཡིན་ཏེ། ཁོ་བོས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ཏེ། ཐམས་ཅད་མ་དྲལ་ན་ཁོ་བོ་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་འགྱུར་བ་ཞིག་ན། ཁོ་བོས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ནས་དུས་མ་ཡིན་པར་ཟོས་ཏེ། གསོ་སྦྱོང་དྲལ་བས་ཁོ་བོ་རྒྱལ་ཆེན་བཞིའི་ལྷ་རྣམས་ཀྱི་ནང་དུ་སྐྱེས་ཏེ། ཤིང་ལྗོན་པ་འདི་ལ་གནས་ཤིང་། དེའི་ཕྱིར་ཁོ་བོ་ལ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱིས་ལྷའི་བུ་རྫུ་འཕྲུལ་ཆེ་བ་མཐུ་ཆེ་བ་གསོ་སྦྱོང་རལ་ཞེས་བྱ་བར་ཤེས་སོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་གསུམ་པ། དྲང་སྲོང་དེ་དག་མཆོག་ཏུ་ངོ་མཚར་སྐྱེས་ཏེ་སྨྲས་པ། ཤེས་ལྡན་དག་བདག་ཅག་དྲང་སྲོང་རྣམས་ཀྱིས་དུས་འདི་སྲིད་དུ་བརྟུལ་ཞུགས་ལ་གནས་པས་ཀྱང་འདིའི་འབྲས་བུ་ཅིར་འགྱུར་མི་ཤེས་ན། ལྷའི་བུ་གསོ་སྦྱོང་རལ་འདིས་བྲམ་ཟེར་གྱུར་པ་ན་ཡན་ལག་བརྒྱད་དང་ལྡན་པའི་གསོ་སྦྱོང་བླངས་ཤིང་། དེ་དྲལ་ན་ཡང་འདི་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ནང་དུ་སྐྱེས་ཀྱིས། བདག་ཅག་ཀྱང་གང་དུ་འདིས་ཡན་ལག་བརྒྱད་དང་ལྡན་པའི་གསོ་སྦྱོང་བླངས་པ་དེར་འདོང་ངོ་། །དེ་ལྟར་བྱའོ་ཞེས་དེ་དག་གིས་གྲོས་བྱས་ཏེ། མཉན་ཡོད་དུ་འཕགས་ནས་ཇི་ཙམ་ན་མཐར་གྱིས་ཀཽ་ཤཱམྦཱིར་ཕྱིན་པ་དང་། ཁྱིམ་བདག་གདངས་ཅན་གྱི་སྦྱིན་པའི་ཞལ་ཏ་བྱེད་པའི་མི་རྣམས་ཀྱིས་དེ་དག་
མཐོང་ནས། དེ་དག་གིས་ཁྱིམ་བདག་གདངས་ཅན་ལ་སྦྲན་པ། ཁྱིམ་བདག་ཁྱོད་ཀྱིས་བདག་ཅག་ལ་བསྒོ་བ། སྔོན་མ་བྱུང་བའི་རྟགས་དང་ཆ་ལུགས་ཅན་དག་མཐོང་ན་ཁོ་བོ་ལ་སྦྲོན་ཅིག་ཅེས་བྱུང་བ་དེ་དག་ལྷགས་ཏེ་སྒོ་ན་སྡོད་དོ། །དེས་སྨྲས་པ། འཇུག་ཏུ་ཆུག་ཤིག །དེ་དག་གིས་འཇུག་ཏུ་བཅུག་པ་དང་། ཁྱིམ་བདག་གདངས་ཅན་གྱིས་དེ་དག་མཐོང་ནས་དྲིས་པ། ཤེས་ལྡན་དག་ཁྱེད་ཅག་གང་ནས་འོངས། དེ་དག་གིས་སྨྲས་པ། ཁྱིམ་བདག་ལྷོ་ལམ་ནས་སོ། །དེས་སྨྲས་པ། ཤེས་ལྡན་དག་ཁྱེད་ཀྱིས་ལྷོ་ལམ་དུ་ངོ་མཚར་བ་མཐོང་བ་དང་ཐོས་པ་ཅི་ཡོད། དེ་དག་གིས་སྨྲས་པ། ཁྱིམ་བདག་རེ་ཞིག་བདག་ཅག་གིས་སྔར་མཐོང་བ་དང་ཐོས་པའི་ངོ་མཚར་གཞན་དག་ལྟ་ཞོག་གི། ཏེ་པོར་མཐོང་བ་དང་ཐོས་པའི་ངོ་མཚར་གང་ཡིན་པ་དག་སྨྲ་བར་བྱས་ཉོན་ཅིག །དེས་སྨྲས་པ། ཤེས་ལྡན་དག་སྨྲོས་ཤིག་དང་ཁོ་བོ་ངོ་མཚར་དེ་དག་ཉན་ཏོ། །དེ་དག་གིས་ཁྱིམ་བདག་གདངས་ཅན་ལ་ཇི་ལྟར་གྱུར་པ་རྒྱས་པར་བརྗོད་པ་དང་། ཁྱིམ་བདག་གདངས་ཅན་གྱིས་ཐོས་ནས་མཆོག་ཏུ་ངོ་མཚར་སྐྱེས་ཏེ་དེ་དག་ཟན་བྱིན་ནས་སྨྲས་པ། ཤེས་ལྡན་དག་གང་དུ་འདེང་། དེ་དག་གིས་སྨྲས་པ། ཁྱིམ་བདག་མཉན་ཡོད་དུ་འདོང་ངོ་། །ཤེས་ལྡན་དག་དེ་ན་ཅི་ཡོད། ཁྱིམ་བདག་དེ་ན་ལྷའི་བུ་གསོ་སྦྱོང་རལ་གྱིས་གང་ལ་བརྟེན་ཏེ། ཡན་ལག་བརྒྱད་དང་ལྡན་པའི་གསོ་སྦྱོང་བླངས་པའི་ཁྱིམ་བདག་མགོན་མེད་ཟས་སྦྱིན་ཡོད་དོ། །དེས་སྨྲས་པ། ཤེས་ལྡན་དག་གལ་ཏེ་དེ་ལྟ་ན་དེ་ཁོ་བོའི་ཡང་མ་མཐོང་བའི་གྲོགས་ཡིན་གྱིས་འདི་ཉིད་དུ་དབྱར་གྱི་མཚན་མོ་གྱིས་ལ་དབྱར་འདས་ནས་ཁོ་བོ་དང་ལྷན་ཅིག་འདོང་ངོ་། །དེ་དག་དེ་ཉིད་དུ་དབྱར་གྱི་མཚན་མོ་གནས་ཏེ། དབྱར་འདས་ནས་མཉན་ཡོད་དུ་འཕགས་པ་དང་ཁྱིམ་བདག་གདངས་ཅན་གྱིས་བད་སའི་རྒྱལ་པོ་ཤར་པ་ལ་སྨྲས་པ། ལྷ་བདག་མཉན་ཡོད་དུ་བགྱི་བ་ཅུང་ཞིག་མཆིས་ན། གལ་ཏེ་ལྷས་གནང་ན་དེར་མཆིའོ། །རྒྱལ་པོས་སྨྲས་པ། ཁྱིམ་བདག་གལ་ཏེ་དེ་ལྟ་ན་སོང་ལ་ཁྱོད་ཀྱིས་དོན་བསྒྲུབ་པ་བྱས་ནས་མྱུར་དུ་ཕྱིར་ཤོག་ཤིག །དེ་རྒྱལ་པོས་གནང་ནས་དྲང་སྲོང་ལྔ་བརྒྱ་པོ་དེ་
དག་དང་ལྷན་ཅིག་འཕགས་ཏེ་མཐར་གྱིས་མཉན་ཡོད་དུ་ཕྱིན་ནས་སྐྱེད་མོས་ཚལ་ན་སྡོད་ཅིང་འདུག་གོ །ཁྱིམ་བདག་མགོན་མེད་ཟས་སྦྱིན་གྱིས་ཁྱིམ་བདག་གདངས་ཅན་འདིར་འོངས་ཏེ། སྐྱེད་མོས་ཚལ་ན་སྡོད་ཅིང་འདུག་གོ་ཞེས་ཐོས་སོ། །ཐོས་ནས་ཀྱང་དེས་བསམས་པ། བདག་གིས་ཁྱིམ་བདག་གདངས་ཅན་མ་ཚོར་བ་ཁོ་ནར་གནས་སུ་འཇུག་ཏུ་གཞུག་པ་ནི་བདག་གི་ཚུལ་དང་མཐུན་པ་མ་ཡིན་གྱིས། བཀུར་སྟི་ཆེན་པོས་འཇུག་ཏུ་གཞུག་གོ་སྙམ་ནས་དེས་དེ་བཀུར་སྟི་ཆེན་པོས་འཇུག་ཏུ་བཅུག་སྟེ་ལམ་གྱིས་དུབ་པའི་ངལ་བསོས་ནས་ཟན་བྱིན་ནོ། །དེ་ནས་དྲང་སྲོང་དེ་དག་ལྷགས་ནས་ཁྱིམ་བདག་མགོན་མེད་ཟས་སྦྱིན་གྱིས་འོངས་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། ཤེས་ལྡན་དག་ཁྱེད་ཅག་ག་ལས་འོངས། འདིར་ཅི་ལ་འོངས། དེ་དག་གིས་སྨྲས་པ། ཁྱིམ་བདག་ཁྱོད་ཀྱིས་ལྷའི་བུ་གསོ་སྦྱོང་རལ་ལ་གང་བྱིན་པ་དེ་བདག་ཅག་ལ་ཡང་བྱིན་ཅིག་དེས་སྨྲས་པ། ཤེས་ལྡན་དག་མི་དྲན་ནོ། །ཁྱིམ་བདག་བདག་ཅག་གིས་ཁྱོད་ལ་དྲན་པར་བྱའོ། །ཤེས་ལྡན་དག་ལེགས་སོ། །དེ་དག་གིས་དྲན་པར་བྱས་ནས་དེས་སྨྲས་པ། ཤེས་ལྡན་དག་ཅི་ཁོ་བོ་ལས་ལེན་ནམ། འོན་ཏེ་བཅོམ་ལྡན་འདས་ལས་ལེན། ཁྱིམ་བདག་ཁྱོད་ཀྱིས་སུ་ལས་བླངས། ཤེས་ལྡན་དག་བཅོམ་ལྡན་འདས་ལས་སོ། །ཁྱིམ་བདག་གལ་ཏེ་དེ་ལྟ་ན་བདག་ཅག་ཀྱང་དེ་ཁོ་ན་ལས་ལེན་ཏོ། །ཤེས་ལྡན་དག་ལེགས་ཀྱིས་དེ་ལྟར་གྱིས་ཤིག་ཅེས་དེས་དེ་དག་ཁྲིད་དེ་བཅོམ་ལྡན་འདས་ག་ལ་བ་དེར་སོང་ངོ་། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་ཕྲག་དུ་མའི་མདུན་ན་ཆོས་སྟོན་ཅིང་བཞུགས་སོ། །བཅོམ་ལྡན་འདས་ཀྱིས་ཁྱིམ་བདག་མགོན་མེད་ཟས་སྦྱིན་ཐག་རིང་པོ་ཁོ་ན་ནས་གཟིགས་སོ། །གཟིགས་ནས་ཀྱང་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱིམ་བདག་མགོན་མེད་ཟས་སྦྱིན་ཐག་རིང་པོ་ཁོ་ན་ནས་འོང་བ་མཐོང་ངམ། བཙུན་པ་མཐོང་ངོ་། །དགེ་སློང་དག་ཁྱིམ་བདག་མགོན་མེད་ཟས་སྦྱིན་འདི་སྐྱེས་དང་བཅས་པས་འོང་སྟེ། དེ་བཞིན་གཤེགས་པའི་སྐྱེས་ནི་འདི་ལྟར་གདུལ་བའི་སྐྱེས་ལྟ་བུ་གཞན་མེད་དོ། །དེ་ནས་ཁྱིམ་བདག་
མགོན་མེད་ཟས་སྦྱིན་དྲང་སྲོང་ལྔ་བརྒྱའི་འཁོར་དང་བཅས་པས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་གྱིས་འདི་སྐད་ཅེས་གསོལ་ཏོ། །བཙུན་པ་དྲང་སྲོང་ལྔ་བརྒྱ་པོ་འདི་དག་བཅོམ་ལྡན་འདས་ལས་ཡན་ལག་བརྒྱད་དང་ལྡན་པའི་གསོ་སྦྱོང་ལེན་པར་འཚལ་ན། དེའི་སླད་དུ་བཅོམ་ལྡན་འདས་ཀྱིས་འདི་དག་ཅི་ནས་ཀྱང་སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་མཆི་བ་དང་། དགེ་བསྙེན་ཉིད་དུ་འཚལ་བར་འགྱུར་བ་དེ་ལྟར་ཆོས་བསྟན་དུ་གསོལ། དེ་ནས་བཅོམ་ལྡན་འདས་ཀྱིས་དྲང་སྲོང་ལྔ་བརྒྱ་པོ་དེ་དག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་དྲང་སྲོང་ལྔ་བརྒྱ་པོ་དེ་དག་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེ་དག་གིས་བདེན་པ་མཐོང་ནས། བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་གསོལ་པ། བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་། རྫོགས་པར་བསྙེན་པ་དགེ་སློང་གི་དངོས་པོ་འཐོབ་ཅིང་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་པས་རབ་ཏུ་ཕྱུང་ཞིང་དགེ་སློང་དག་ཚུར་ཤོག །ཚངས་པར་སྤྱད་པ་སྤྱོད་ཅིག་ཅེས་བཀའ་སྩལ་པ་དང་། དེ་དག་བཅོམ་ལྡན་འདས་ཀྱི་བཀའི་མཇུག་ཁོ་ནར་སྐྲ་བྱི་བ་དང་། སྣམ་སྦྱར་གྱོན་པར་གྱུར་ཏེ། སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་། ལག་པ་ལྷུང་བཟེད་དང་། བྱ་མ་བུམ་གྱིས་འབྲེལ་པ་དང་། དགེ་སློང་རྫོགས་པར་བསྙེན་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ། །ཡང་སྨྲས་པ། དེ་བཞིན་གཤེགས་པས་ཚུར་ཤོག་བཀའ་སྩལ་པས། །སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་། །མོད་ལ་དབང་པོ་རབ་ཞིར་གནས་གྱུར་ཏེ། །སངས་རྒྱས་དགོངས་པས་ལུས་གཟུགས་བཀབ་
པར་གྱུར། །བཅོམ་ལྡན་འདས་ཀྱིས་དེ་དག་ལ་གདམས་ངག་བྱིན་ནས་དེ་དག་གིས་སྤྲོ་བ་དང་། འབད་པ་དང་། བརྩལ་བ་དག་གིས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས་ཤིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙན་དན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་རིག་པ་དང་། མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་། འདོད་པའི་རྙེད་པ་དང་། བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་། ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང་། མངོན་དུ་སྨྲ་བར་བྱ་བར་གྱུར་ཏོ། །དེ་ནས་ཁྱིམ་བདག་གདངས་ཅན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་གདངས་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་ཅིང་། སངས་རྒྱས་བཅོམ་ལྡན་འདས་རྣམས་ཀྱི་དུས་སྔར་མཛད་པའི་ཆོས་དང་ལྡན་པའི་བཀའ་མཆིད་གང་ཡིན་པ་འདི་ལྟ་སྟེ། སྦྱིན་པའི་བཀའ་མཆིད་དང་། ཚུལ་ཁྲིམས་ཀྱི་བཀའ་མཆིད་དང་། མཐོ་རིས་ཀྱི་བཀའ་མཆིད་དང་། འདོད་པ་རྣམས་ཀྱི་རོ་མྱང་བའི་ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་ཕན་ཡོན་དང་། རྣམ་པར་བྱང་བའི་ཕྱོགས་དང་མཐུན་པའི་ཆོས་དག་རྒྱ་ཆེར་སྟོན་པར་མཛད་དོ། །གང་གི་ཚེ་བཅོམ་ལྡན་འདས་ཀྱིས་དེ་སེམས་རངས་པ་དང་། སེམས་ཉམས་བདེ་བ་དང་། སེམས་དགའ་བ་དང་། སེམས་ལ་སྒྲིབ་པ་མེད་པ་དང་། ཡང་དག་ཕུལ་གྱི་ཆོས་བསྟན་པ་ཀུན་ཤེས་པའི་སྐལ་བ་དང་ལྡན་ཞིང་མཐུ་ཡོད་པར་གཟིགས་པ་དེའི་ཚེ་ན་སངས་རྒྱས་བཅོམ་ལྡན་འདས་རྣམས་ཀྱིས་
ཡང་དག་ཕུལ་གྱི་ཆོས་བསྟན་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དག་རྒྱ་ཆེར་སྟོན་པར་མཛད་དོ། །འདི་ལྟ་སྟེ་དཔེར་ན་གོས་དག་པ་ནག་ནོག་མེད་པ་ཁ་བསྒྱུར་དུ་རུང་བ། ཚོན་དུ་བཅུག་ན་ཚོན་ལེགས་པར་འཇེན་པར་འགྱུར་བ་དེ་བཞིན་དུ། ཁྱིམ་བདག་གདངས་ཅན་གྱིས་ཀྱང་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་མངོན་པར་རྟོགས་པར་གྱུར་ཏོ། །དེ་ནས་ཁྱིམ་བདག་གདངས་ཅན་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཚོམ་ལས་རྒལ་བ་དང་། སྟོན་པའི་བསྟན་པ་ལ་གཞན་གྱི་དྲིང་མི་འཇོག་པ་དང་གཞན་གྱིས་མི་བཀྲི་ཞིང་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས་བདག་དགེ་བསྙེན་དུ་གཟུང་དུ་གསོལ། དེང་སླན་ཅད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་མངོན་པར་དད་པས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་བཀའ་སྩལ་པ། ཁྱིམ་བདག་ཁྱོད་མིང་ཅི། བཙུན་པ་བདག་ནོར་བཟངས་ཞེས་བགྱི་བ་ལས་རྒྱལ་པོ་ཤར་པས་བདག་གདངས་ལས་འཚལ་བས་དེའི་སླད་དུ་བདག་སྐྱེ་བོ་དག་གིས་ཁྱིམ་བདག་གདངས་ཅན་ཞེས་བགྱི་བར་འཚལ་ཏོ། །བཅོམ་ལྡན་འདས་ཀཽ་ཤཱམྦཱིར་གཤེགས་པར་གསོལ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ཇི་སྲིད་འཚོའི་བར་དུ་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་
གིས་བསྙེན་བཀུར་འཚལ་ལོ། །ཁྱིམ་བདག་ཀཽ་ཤཱམྦཱི་ན་གཙུག་ལག་ཁང་ཡོད་དམ། བཙུན་པ་མ་མཆིས་སོ། །ཁྱིམ་བདག་དགེ་སློང་དག་ནི་གང་ན་གཙུག་ལག་ཁང་ཡོད་པ་དེར་བགྲོད་པ་དང་། འགྲོ་བ་དང་། གནས་པར་སེམས་སོ། །བཅོམ་ལྡན་འདས་གཤེགས་སུ་གསོལ་དང་། བདག་གིས་ཇི་ལྟར་ཀཽ་ཤཱམྦཱི་ན་གཙུག་ལག་ཁང་མཆིས་པར་འགྱུར་བ་དང་། དགེ་སློང་རྣམས་ཀྱང་བགྲོད་པ་དང་། མཆི་བ་དང་། གནས་པར་སེམས་པར་འགྱུར་བ་དེ་ལྟར་བགྱིའོ། །བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ནས། དེ་ལ་མཉན་ཡོད་ན་བྱ་བའམ། བྱེད་པ་ཅི་ཡོད་པ་ཐམས་ཅད་བྱས་ཤིང་བསྒྲུབས་ནས་ཡང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་གྲོགས་དགེ་སློང་འགའ་ཞིག་སྩོལ་ཅིག་དང་བདག་གིས་དེ་དང་ལྷན་ཅིག་བཅོམ་ལྡན་འདས་ཀྱི་སླད་དུ་གཙུག་ལག་ཁང་རྩིག་ཏུ་སྩལ་བར་བགྱིའོ། །བཅོམ་ལྡན་འདས་ཀྱིས་ཁྱིམ་བདག་གདངས་ཅན་འཁོར་དང་བཅས་པ་དང་། ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་དག་དགེ་སློང་གང་གི་གདུལ་བ་ཡིན་སྙམ་དུ་དགོངས་ན་དགེ་སློང་སྐུལ་བྱེད་ཆེན་པོའི་གདུལ་བ་ཡིན་པར་གཟིགས་ནས། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་སྐུལ་བྱེད་ཆེན་པོ་ལ་བཀའ་སྩལ་པ། སྐུལ་བྱེད་ཁྱིམ་བདག་གདངས་ཅན་འཁོར་དང་བཅས་པ་དང་། ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་ལ་སོམས་ཤིག །ཚེ་དང་ལྡན་པ་སྐུལ་བྱེད་ཆེན་པོས་བཅོམ་ལྡན་འདས་ལས་ཅང་མི་སྨྲ་བས་དང་དུ་བླངས་སོ། །དེ་ནས་ཚེ་དང་ལྡན་པ་སྐུལ་བྱེད་ཆེན་པོ་དེ་ཉིད་ཀྱི་མཚན་མོ་འདས་ནས་སྔ་དྲོ་ཤམ་ཐབས་བགོས་ལྷུང་བཟེད་དང་། ཆོས་གོས་ཐོགས་ཏེ། མཉན་ཡོད་དུ་བསོད་སྙོམས་ལ་
ཞུགས་སོ། །མཉན་ཡོད་དུ་བསོད་སྙོམས་ལ་བརྒྱུས་ནས་ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ལྷུང་བཟེད་དང་། ཆོས་གོས་ཐོགས་ནས་ཁྱིམ་བདག་གདངས་ཅན་དང་འགྲོགས་ཏེ། ཀཽ་ཤཱམྦཱི་ག་ལ་བ་དེ་ལོགས་སུ་སོང་ནས་མཐར་གྱིས་རྒྱུ་ཞིང་འགྲོ་བ་ན་ཀཽ་ཤཱམྦཱིར་ཕྱིན་ཏོ། །དེ་ནས་ཁྱིམ་བདག་གདངས་ཅན་ཀཽ་ཤཱམྦཱིར་མ་ཞུགས་པ་ཁོ་ནར་ཀུན་དགའ་ར་བ་ནས་ཀུན་དགའི་ར་བར་སྐྱེད་མོས་ཚལ་ནས་སྐྱེད་མོས་ཚལ་དུ། ཚལ་ནས་ཚལ་དུ་དང་གོལ་བར་སོང་སྟེ། གང་དུ་བདག་གིས་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྩིག་ཏུ་གཞུག་པའི་ས་ཕྱོགས་ཀཽ་ཤཱམྦཱི་ནས་ཧ་ཅང་ཡང་མི་རིང་ཧ་ཅང་ཡང་མི་ཉེ་བ་ཉིན་མོ་རྒྱུན་ལུགས་ཉུང་ཞིང་ཀླག་ཅོར་ཆུང་བ། མཚན་མོ་སྒྲ་ཆུང་ཞིང་འུར་སྒྲ་ཆུང་བ། ཤ་སྦྲང་དང་། སྦྲང་བུ་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པ་ཉུང་བ་དེ་ལྟ་བུ་ཅི་ཡོད་ཅེས་བཙལ་ན། ཁྱིམ་བདག་གདངས་ཅན་གྱིས་རང་གི་ཀུན་དགའ་ར་བ་ཀཽ་ཤཱམྦཱི་ནས་ཧ་ཅང་ཡང་མི་རིང་ཧ་ཅང་ཡང་མི་ཉེ་བ་ཉིན་མོ་རྒྱུན་ལུགས་ཉུང་ཞིང་ཀླག་ཅོར་ཆུང་བ། མཚན་མོ་སྒྲ་ཆུང་ཞིང་འུར་སྒྲ་ཆུང་བ། ཤ་སྦྲང་དང་། སྦྲང་བུ་དང་། རླུང་དང་། ཉི་མ་དང་། སྡིག་སྦྲུལ་གྱི་རེག་པ་ཉུང་བར་མཐོང་ངོ་། །མཐོང་ནས་ཀྱང་འདི་སྙམ་དུ་སེམས་ཏེ། ས་ཕྱོགས་འདི་བཟང་གིས་འདིར་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྩིག་ཏུ་གཞུག་གོ་སྙམ་མོ། །དེ་ན་ཁྱིམ་བདག་གདངས་ཅན་དང་། ཚེ་དང་ལྡན་པ་སྐུལ་བྱེད་ཆེན་པོས། སྐྱེད་མོས་ཚལ་དེར་བཅོམ་ལྡན་འདས་ཀྱི་ཕྱིར་གཙུག་ལག་ཁང་རྟ་བབས་མཐོན་པོ་དང་ལྡན་པ། སྐར་ཁུང་དང་། སྐར་ཁུང་ཟླུམ་པོ་དང་། ལན་ཀན་གྱིས་བརྒྱན་པ་རྩིག་ཏུ་བཅུག་གོ །དེ་ནས་གཙུག་ལག་ཁང་བྱས་ཤིང་ཟིན་ནས་ཁྱིམ་བདག་གདངས་ཅན་གྱིས་ཚེ་དང་ལྡན་པ་སྐུལ་བྱེད་ཆེན་པོ་ལ་འདི་སྐད་ཅེས་སྨྲས་སོ། །འཕགས་པ་བཅོམ་ལྡན་འདས་ཤུལ་དུ་གཤེགས་པའི་གཤེགས་དགོངས་ཀྱི་ཚད་ཅི་ཙམ། ཁྱིམ་བདག་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་
པོ་དང་འདྲའོ། །འཕགས་པ་འཁོར་ལོས་སྒྱུར་བའི་རྒྱལ་པོའི་ཇི་ཙམ། ཁྱིམ་བདག་འཁོར་ལོས་སྒྱུར་བའི་རྒྱལ་པོ་ལམ་དུ་འགྲོ་བའི་དགོངས་མལ་ནི་རྒྱང་གྲགས་བཅུའོ། །ཁྱིམ་བདག་གདངས་ཅན་གྱིས་རྒྱང་གྲགས་བཅུ་བཅུར་གཤེགས་དགོངས་ས་དག་ཤོམ་དུ་བཅུག་ནས། བཅོམ་ལྡན་འདས་ཀྱི་སྤྱན་སྔར་ཕོ་ཉ་བཏང་སྟེ། བཅོམ་ལྡན་འདས་ཀཽ་ཤཱམྦཱིར་གཤེགས་སུ་གསོལ། བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཇི་སྲིད་འཚོའི་བར་དུ་ན་བཟའ་དང་། བསོད་སྙོམས་དང་། གནས་མལ་དང་། བསྙུང་བའི་རྐྱེན་དང་། སྨན་གྱི་ཡོ་བྱད་དག་གིས་བསྙེན་བཀུར་བགྱིའོ་ཞེས་གསོལ་ཏོ། །ཕོ་ཉས་ཀྱང་བཅོམ་ལྡན་འདས་ཀྱི་སྤྱན་སྔར་སོང་སྟེ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་དགེ་སློང་རྣམས་ལ་དགེ་སློང་དག་བཅོམ་ལྡན་འདས་བད་ས་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་བད་ས་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོ་ཤིག །ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་རྣམས་ལ་ཚེ་དང་ལྡན་པ་དག་བཅོམ་ལྡན་འདས་བད་ས་དག་ཏུ་ལྗོངས་རྒྱུར་གཤེགས་ཀྱིས་ཁྱེད་ཅག་ལས་གང་དེ་བཞིན་གཤེགས་པ་དང་ཐབས་ཅིག་བད་ས་དག་ཏུ་ལྗོངས་རྒྱུར་འགྲོ་བར་སྤྲོ་བ་དེས་ཆོས་གོས་དག་ལོང་ཤིག་ཅེས་བསྒོའོ། །དེ་ནས་བཅོམ་ལྡན་འདས་དུལ་བ་འཁོར་དུལ་བ་དང་ལྡན་པ། ཞི་བ་འཁོར་ཞི་བ་དང་ལྡན་པ། གྲོལ་བ་འཁོར་གྲོལ་བ་དང་ལྡན་པ། དབུགས་ཕྱིན་པ་འཁོར་དབུགས་ཕྱིན་པ་དང་ལྡན་པ། ཐུལ་བ་འཁོར་ཐུལ་བ་དང་ལྡན་པ། དགྲ་བཅོམ་པ་འཁོར་དགྲ་བཅོམ་པ་དང་ལྡན་པ། འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ་དང་ལྡན་པ། མཛེས་པ་འཁོར་མཛེས་པ་དང་ལྡན་པ། ཁྱུ་མཆོག་ལྟར་བ་ལང་གི་ཚོགས་ཀྱིས་ཡོངས་སུ་བསྐོར་བ། གླང་པོ་ཆེ་ལྟར་གླང་པོ་ཆེའི་ཕྲུག་གུའི་ཚོགས་ཀྱིས་ཡོངས་སུ་བསྐོར་བ། སེང་གེ་ལྟར་མཆེ་བ་ཅན་གྱི་ཚོགས་ཀྱིས་
ཡོངས་སུ་བསྐོར་བ། ངང་པའི་རྒྱལ་པོ་ལྟར་ངང་པའི་ཚོགས་ཀྱིས་ཡོངས་སུ་བསྐོར་བ། ནམ་མཁའ་ལྡིང་ལྟར་བྱའི་ཚོགས་ཀྱིས་ཡོངས་སུ་བསྐོར་བ། བྲམ་ཟེ་ལྟར་སློབ་མའི་ཚོགས་ཀྱིས་ཡོངས་སུ་བསྐོར་བ། སྨན་པ་མཁས་པ་ལྟར་ནད་པའི་ཚོགས་ཀྱིས་ཡོངས་སུ་བསྐོར་བ། དཔའ་བོ་ལྟར་རུ་པའི་ཚོགས་ཀྱིས་ཡོངས་སུ་བསྐོར་བ། ས་མཁན་ལྟར་ལམ་དུ་ཞུགས་པའི་ཚོགས་ཀྱིས་ཡོངས་སུ་བསྐོར་བ། དེད་དཔོན་ལྟར་ཚོང་པའི་ཚོགས་ཀྱིས་ཡོངས་སུ་བསྐོར་བ། ཚོང་དཔོན་ལྟར་འཁོར་གྱི་ཚོགས་ཀྱིས་ཡོངས་སུ་བསྐོར་བ། མཁར་གྱི་རྒྱལ་པོ་ལྟར་བློན་པོའི་ཚོགས་ཀྱིས་ཡོངས་སུ་བསྐོར་བ། འཁོར་ལོས་སྒྱུར་བ་ལྟར་བུ་སྟོང་གི་ཚོགས་ཀྱིས་ཡོངས་སུ་བསྐོར་བ། ཟླ་བ་ལྟར་རྒྱུ་སྐར་གྱི་ཚོགས་ཀྱིས་ཡོངས་སུ་བསྐོར་བ། ཉི་མ་ལྟར་འོད་ཟེར་སྟོང་གི་ཚོགས་ཀྱིས་ཡོངས་སུ་བསྐོར་བ། ཡུལ་འཁོར་སྲུང་ལྟར་དྲི་ཟའི་ཚོགས་ཀྱིས་ཡོངས་སུ་བསྐོར་བ། འཕགས་སྐྱེས་པོ་ལྟར་གྲུལ་བུམ་གྱི་ཚོགས་ཀྱིས་ཡོངས་སུ་བསྐོར་བ། མིག་མི་བཟང་ལྟར་ཀླུའི་ཚོགས་ཀྱིས་ཡོངས་སུ་བསྐོར་བ། ནོར་སྦྱིན་ལྟར་གནོད་སྦྱིན་གྱི་ཚོགས་ཀྱིས་ཡོངས་སུ་བསྐོར་བ། ཐགས་ཟངས་རིས་ལྟར་ལྷ་མ་ཡིན་གྱི་ཚོགས་ཀྱིས་ཡོངས་སུ་བསྐོར་བ། བརྒྱ་བྱིན་ལྟར་སུམ་བཅུ་རྩ་གསུམ་པའི་ཚོགས་ཀྱིས་ཡོངས་སུ་བསྐོར་བ། ཚངས་པ་ལྟར་ཚངས་རིས་ཀྱི་ཚོགས་ཀྱིས་ཡོངས་སུ་བསྐོར་བ། དབང་པོ་རྣམས་ཀྱིས་ཤིན་ཏུ་དུལ་བ། སྤྱོད་ལམ་དང་སྤྱོད་པ་མ་འཁྲུགས་པ། ཆུ་གཏེར་ལྟར་ཏིང་ངེ་བ། སྤྲིན་ལྟར་ཆུ་དང་བཅས་པ། གླང་པོ་ཆེའི་རྒྱལ་པོ་ལྟར་དྲེགས་པ་དང་བྲལ་བ། སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ལེགས་པར་བརྒྱན་པ། དཔེ་བྱད་བཟང་པོ་བརྒྱད་བཅུས་སྐུ་རྣམ་པར་མཛེས་པ། འོད་འདོམ་གང་གིས་གཟུགས་ཅན་བརྒྱན་པ། ཉི་མ་སྟོང་བས་ལྷག་པའི་འོད་དང་ལྡན་པ། རིན་པོ་ཆེའི་རི་བོ་འགྲོ་བ་ལྟར་ཀུན་ཏུ་བཟང་བ། སྟོབས་བཅུ་དང་། མི་འཇིགས་པ་བཞི་དང་། མ་འདྲེས་པའི་དྲན་པ་ཉེ་བར་གཞག་པ་གསུམ་དང་། ཐུགས་རྗེ་ཆེན་པོ་དང་ལྡན་པ་ཀུན་ཤེས་ཀཽཎྜི་ནྱ་དང་།
རླངས་པ་དང་། མིང་ཆེན་དང་། མ་འགགས་པ་དང་། ཤཱ་རིའི་བུ་དང་། མཽད་གལ་གྱི་བུ་དང་། འོད་སྲུང་དང་། ཀུན་དགའ་བོ་དང་། ནམ་གྲུ་ལ་སོགས་པ་ཉན་ཐོས་ཆེན་པོ་དག་དང་། གཞན་ཡང་དགེ་སློང་གི་དགེ་འདུན་མང་པོས་བསྐོར་ཏེ། ཀཽ་ཤཱམྦཱི་ག་ལ་བ་དེར་རྒྱུ་ཞིང་གཤེགས་ནས་མཐར་གྱིས་རྒྱུ་ཞིང་གཤེགས་པ་ན་ཀཽ་ཤཱམྦཱིར་བྱོན་ཏོ། །དེ་ནས་ཁྱིམ་བདག་གདངས་ཅན་གྱིས་གཙུག་ལག་ཁང་ཡོ་བྱད་ཐམས་ཅད་དང་ལྡན་པ་དེ་བཅོམ་ལྡན་འདས་ཉན་ཐོས་ཀྱི་ལྟར་དགེ་འདུན་དང་བཅས་པ་ལ་ཕུལ་ནས། འདི་ལྟར་གནས་བརྟན་དག་གིས་ཀྱང་། བཅོམ་ལྡན་འདས་ཀཽ་ཤཱམྦཱི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ་ཞེས་མདོ་སྡེའི་མཐའ་ཉེ་བར་སྦྱར་ཏོ། །དེ་ནས་ཁྱིམ་བདག་གདངས་ཅན་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་གཙུག་ལག་ཁང་ཕུལ་ནས་དགའ་བ་དང་མཆོག་ཏུ་དགའ་བ་སྐྱེས་ཏེ་རང་གི་ཁྱིམ་དུ་སོང་ངོ་། །དེ་ནས་ཚེ་དང་ལྡན་པ་སྐུལ་བྱེད་ཆེན་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཆེན་པོས་འདི་སྐད་ཅེས་གསོལ་ཏོ། །བཙུན་པ་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ། རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གདགས་སུ་རུང་ངམ། བཅོམ་ལྡན་འདས་ཀྱིས་དེ་ལ་བཀའ་སྩལ་པ། སྐུལ་བྱེད་རུང་སྟེ། སྐུལ་བྱེད་བདུན་པོ་འདི་དག་ནི་གང་དག་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་
ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དག་ཡིན་ཏེ། བདུན་གང་ཞེ་ན། སྐུལ་བྱེད་འདི་ལ་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའི་ར་བ་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། ལྟར་སྣང་བ་ཆེ་བ། རྒྱས་པ་ཆེ་བ་དང་པོ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་ཀུན་དགའི་ར་བ་དེ་ཉིད་དུ་གཙུག་ལག་ཁང་རྩིག་ཏུ་འཇུག་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གཉིས་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་གཙུག་ལག་ཁང་དེ་ཉིད་དུ་གནས་མལ་འདི་ལྟ་སྟེ། ཁྲི་དང་། ཁྲིའུ་དང་། སྟན་ནང་ཚངས་ཅན་དང་། ལ་བ་དང་། སྔས་དང་། གོར་བུ་དག་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་
གསུམ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་གཙུག་ལག་ཁང་དེ་ཉིད་དུ་གཏན་གྱི་རྐྱེན་རིས་རྗེས་སུ་མཐུན་པའི་མཆོད་སྦྱིན་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ། བཞི་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་གློ་བུར་དུ་འོངས་པ་དང་འགྲོ་བར་ཆས་པ་ལ་སྦྱིན་པ་སྦྱིན་པར་ལྟར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་ལྔ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་ནད་པ་དང་ནད་གཡོག་ལ་སྦྱིན་པ་སྦྱིན་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དྲུག་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པས་རླུང་ལངས་པའམ། ཡུལ་ངན་བྱུང་བའམ། ཆར་པ་བབ་པའམ། ལྷགས་པ་བྱུང་བ་གང་དག་ཡིན་པ་དེ་ལྟ་བུའི་རླུང་ལངས་པའམ།
ཡུལ་ངན་བྱུང་བའམ། ཆར་བབ་པའམ། ལྷགས་པ་བྱུང་བའི་ཚེ་དགེ་འདུན་ལ་འབྲས་ཆན་དག་གམ། སྐྱོ་མ་དག་གམ། ཐུག་པའི་བཏུང་བ་དག་བསྐྱལ་ཏེ། འདིས་འཕགས་པ་འདི་དག་ལུས་མི་རླན་པ་དང་། ཆོས་གོས་མི་གཤེར་བ་དང་། ལོངས་སྤྱད་ན་བདེ་བ་ལ་རེག་པར་འགྱུར་རོ་སྙམ་པས་འབུལ་བར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་བདུན་པ་ཡིན་ནོ། །སྐུལ་བྱེད་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུའམ། ལྟར་བསོད་ནམས་ཀྱི་འབྲས་བུ་རྣམ་པར་སྨིན་པ་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་འདི་ལྟ་སྟེ་དཔེར་ན་གང་དུ་ཆུ་ཀླུང་ཆེན་པོ་ལྔ་པོ་འདི་ལྟ་སྟེ་གང་གཱ་དང་། ཡ་མུ་ན་དང་། ས་ར་ཡུ་དང་། གནས་ཅན་དང་། མ་ཧི་ཞེས་བྱ་བ་ཐ་མི་དད་པར་འབབ་པར་འགྱུར་བ་དེ་ལ་ནི་ཆུའམ། ཆུའི་བུམ་པའམ། ཆུའི་བུམ་པ་བརྒྱ་ཕྲག་གམ། ཆུའི་བུམ་པ་སྟོང་ཕྲག་གམ། ཆུའི་བུམ་པ་འབུམ་ཕྲག་འདི་སྙེད་ཡོད་དོ་ཞེས་ཆུའི་ཚད་གཟུང་བར་མི་ནུས་སོ། །སྐུལ་བྱེད་དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུའམ། བསོད་ནམས་ཀྱི་འབྲས་བུ་རྣམ་པར་སྨིན་པ་ཡང་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །དེ་སྐད་
ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་སྐུལ་བྱེད་ཆེན་པོས་འདི་སྐད་ཅེས་གསོལ་ཏོ། །བཙུན་པ་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ལགས་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གདགས་སུ་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། སྐུལ་བྱེད་རུང་སྟེ། སྐུལ་བྱེད་བདུན་པོ་འདི་དག་ནི་གང་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དག་ཡིན་ཏེ། བདུན་གང་ཞེ་ན། སྐུལ་བྱེད་འདི་ལ་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་ལྟར་གཤེགས་པའམ། དེ་བཞིན་གཤེགས་པའི་ཉན་ཐོས་གྲོང་ཚིགས་ག་གེ་མོ་ཞིག་ན་ཉེ་བར་བརྟེན་ཅིང་བཞུགས་པ་ཐོས་ཤིང་ཐོས་ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དང་པོ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་དེ་ཉིད་དུ་ཚུར་གཤེགས་པར་རྩོལ་བར་ཐོས་ཤིང་ཐོས་
ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གཉིས་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་དེ་ཉིད་ཤུལ་དུ་ཞུགས་པ་ཐོས་ཤིང་ཐོས་ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན། རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་གསུམ་པ་ཡིན་ནོ། ། ལྟར་སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་དེ་ཉིད་གྲོང་ཚིགས་དེ་ཉིད་དུ་བྱོན་པར་ཐོས་ཤིང་ཐོས་ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དེ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ།
རྒྱས་པ་ཆེ་བ་བཞི་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་དེ་ཉིད་ལ་བལྟ་བ་དང་། བསྙེན་བཀུར་བྱ་བའི་ཕྱིར་འགྲོ་ཞིང་མཐོང་ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་ལྔ་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་དེ་ཉིད་ཀྱི་དྲུང་ནས་ཆོས་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་པ་ཉན་ཅིང་ཐོས་ནས་ཀྱང་དགའ་བ་དང་། མཆོག་ཏུ་དགའ་བ་རྒྱ་ཆེན་པོ་དགེ་བ་ངེས་པར་འབྱུང་བ་དང་ལྡན་པ་ཐོབ་པར་བྱེད་པ་འདི་ནི་སྐུལ་བྱེད་གང་དང་ལྡན་ན་རིགས་ཀྱི་བུའམ། རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། ལྟར་མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་དྲུག་པ་ཡིན་ནོ། །སྐུལ་བྱེད་གཞན་ཡང་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པས་དེ་བཞིན་གཤེགས་པའམ་དེ་བཞིན་གཤེགས་པའི་ཉན་ཐོས་དེ་ཉིད་ཀྱི་དྲུང་ནས་ཆོས་ཐོས་ནས་སངས་རྒྱས་ལ་སྐྱབས་སུ་འགྲོ། ཆོས་དང་དགེ་འདུན་ལ་སྐྱབས་སུ་འགྲོ་ཞིང་བསླབ་པའི་གཞི་དག་ལེན་པར་བྱེད་པ་འདི་ནི།
སྐུལ་བྱེད་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་རྒྱུ་བའམ། གནས་པའམ། ཉལ་བའམ། མི་ཉལ་བ་ལས་རྟག་ཏུ་རྒྱུན་མི་འཆད་པར་བསོད་ནམས་འབའ་ཞིག་མངོན་པར་འཕེལ་བ་དང་། བསོད་ནམས་འབའ་ཞིག་ཉེ་བར་སྐྱེ་བ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་ཤིན་ཏུ་འབྲས་བུ་ཆེ་བ། ཕན་ཡོན་ཆེ་བ། སྣང་བ་ཆེ་བ། རྒྱས་པ་ཆེ་བ་བདུན་པ་ཡིན་ནོ། །སྐུལ་བྱེད་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པའི་བསོད་ནམས་སམ། བསོད་ནམས་ཀྱི་འབྲས་བུའམ། བསོད་ནམས་ཀྱི་འབྲས་བུ་རྣམ་པར་སྨིན་པ་ནི་འདི་ཙམ་མོ་ཞེས་བསོད་ནམས་ཀྱི་ཚད་གཟུང་བར་མི་ནུས་ཏེ་འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་འདི་ལྟ་སྟེ་དཔེར་ན་གང་དུ་ཆུ་ཀླུང་ཆེན་པོ་ལྔ་པོ་འདི་ལྟ་སྟེ་གང་གཱ་དང་། ཡ་མུ་ན་དང་། ས་ར་ཡུ་དང་། གནས་ཅན་དང་། མ་ཧི་ཞེས་བྱ་བ་ཐ་མི་དད་པར་འབབ་པར་འགྱུར་བ་དེ་ལ་ནི་ཆུའམ། ཆུའི་བུམ་པའམ། ཆུའི་བུམ་པ་བརྒྱ་ཕྲག་གམ། ཆུའི་བུམ་པ་སྟོང་ཕྲག་གམ། ཆུའི་བུམ་པ་འབུམ་ཕྲག་འདི་སྙེད་ཅིག་ཡོད་དོ། །ཞེས་ཆུའི་ཚད་གཟུང་བར་མི་ནུས་ཏེ། འདི་ལྟར་ཆུ་མང་བའི་ཕྱིར་ཆུའི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །སྐུལ་བྱེད་དེ་བཞིན་དུ་རྫས་ལས་བྱུང་བ་མ་ཡིན་པའི་བསོད་ནམས་བྱ་བའི་གཞི་བདུན་པོ་འདི་དག་དང་ལྡན་པའི་རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པའི་བསོད་ནམས་སམ། ལྟར་བསོད་ནམས་ཀྱི་འབྲས་བུའམ་བསོད་ནམས་ཀྱི་འབྲས་བུ་རྣམ་པར་སྨིན་པ་ཡང་འདི་ཙམ་མོ་ཞེས་ཚད་གཟུང་བར་མི་ནུས་ཏེ། འདི་ལྟར་བསོད་ནམས་མང་བའི་ཕྱིར་བསོད་ནམས་ཀྱི་ཕུང་པོ་ཆེན་པོ་ཞེས་བྱ་བའི་གྲངས་སུ་འགྲོའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །མི་དང་རི་དགས་ཚོགས་ཀྱིས་བསྟེན་པ་ཡི། །ཆུ་ཀླུང་ཐ་དད་འབབ་པར་གྱུར་པ་
དག། མཚོ་མཆོག་བཀྲ་ཤིས་གཙང་མ་ངོགས་བདེ་བ། །རིན་ཆེན་འབྱུང་གནས་རྒྱ་མཚོར་འབབ་པ་ལྟར། །དེ་བཞིན་བསོད་ནམས་རྒྱུན་ཀྱང་རྣམ་ཀུན་ཏུ། །སྦྱིན་བདག་གོས་སྦྱིན་ཟས་སྐོམ་སྦྱིན་པ་དང་། །མལ་ཆ་སྟན་དང་གདིང་སྦྱིན་མི་ལ་འབབ། །ཆུ་ཀླུང་ཆུ་འབབ་རྒྱ་མཚོར་ཇི་བཞིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་སྐུལ་བྱེད་ཆེན་པོ་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །དེ་ནས་ཁྱིམ་བདག་གདངས་ཅན་ནི་དད་པ་དང་ལྡན་ལ་དེའི་འཁོར་ནི་མ་དད་ནས་དེས་བསམས་པ། བདག་གི་འཁོར་འདི་མ་དད་ན་བདག་གི་གཙུག་ལག་ཁང་དུ་ཇི་ལྟར་སྤྱོད་པ་ཇེ་བརྟག་གོ་སྙམ་ནས་དེ་ཆ་ལུགས་མི་མངོན་པར་བྱས་ཏེ་ཤམ་ཐབས་དམའ་བར་བགོས་ནས་གཙུག་ལག་ཁང་དུ་སོང་སྟེ་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་འཇུག་པར་བརྩམས་པ་དང་། རྒན་ཞུགས་ཤིག་སྒོ་ཁང་ན་འདུག་ནས་དེས་དེའི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པར་བགྱིད་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། དེས་སྨྲས་པ། ཁྱིམ་བདག་གདངས་ཅན་གྱིའོ། །འཕགས་པ་ཅི་འདི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས་གཙུག་ལག་ཁང་ནི་ཇི་ལྟ་བུ། ཕོངས་པ་ནི་ཇི་ལྟ་བུ། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་ལ། གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འདི་ཕོངས་པ་ཡིན་ནོ། །ཇི་ལྟར་གྱུར། ཁྱིམ་བདག་དེ་ནི་དད་པ་དང་ལྡན་པ་ཡིན་ན་དེའི་འཁོར་མ་དད་པས་མཁོ་བ་ལྟར་མི་སྟོབས་སོ། །འདི་ལྟར་ཁྱིམ་བདག་དེ་ལ་བུ་མོ་མངག་གཞུག་མ་མགུ་བྱེད་ཅེས་བྱ་བ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཞིག་ཡོད་ན། འོན་ཀྱང་དེའི་ཁྱིམ་དེ་ན་དབང་མེད་དེ། གལ་ཏེ་དེ་ལ་དབང་ཡོད་པར་གྱུར་ན་དེ་དགེ་སློང་རྣམས་ལ་མཁོ་བ་སྟོབས་པར་བྱེད་པས་འདི་གཙུག་ལག་ཁང་དུ་འགྱུར་རོ། །ཁྱིམ་བདག་གདངས་ཅན་གྱིས་བསམས་པ།
ད་ལྟར་བདག་གསོན་པ་ཉིད་ན་ཡང་བདག་གི་གཙུག་ལག་ཁང་ན་དགེ་སློང་རྣམས་ཀྱི་གནས་སྐབས་འདི་འདྲ་ན་བདག་ཤི་ན་ཅི་འདྲ་བར་འགྱུར་སྙམ་དུ་རིག་ནས་དགེ་སློང་དེའི་རྐང་པ་ལ་ཕྱག་འཚལ་ཏེ། རང་གི་ཁྱིམ་དུ་སོང་ནས་ནང་མི་རྣམས་ལ་སྨྲས་པ། ཁྱེད་ཅག་ལས་གང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བྱེད་པར་སྤྲོ་བ་དེས་ཚུལ་ཤིང་ལོང་ཤིག །དེའི་ཚེ་ན་མགུ་བྱེད་བུམ་པ་ཐོགས་ཏེ་ཆུ་བཅུ་བའི་ཕྱིར་ཕྱིར་བྱུང་བ་དང་། དེས་དེར་རས་མ་ཞིག་རྙེད་ནས། བཅོམ་ལྡན་འདས་ཀྱང་དེ་ལ་ཕན་གདགས་པའི་སླད་དུ་ཕྱོགས་དེར་གཤེགས་པ་དང་། དེས་བཅོམ་ལྡན་འདས་ལ་བརྟག་པར་བརྩམས་སོ། །བཅོམ་ལྡན་འདས་ཀྱིས་རྫུ་འཕྲུལ་གྱིས་ན་བཟའ་ཆོས་གོས་ཀྱི་གྲྭ་རྡོལ་བར་དེ་ལ་བསྟན་པ་དང་། དེས་བསམས་པ། གལ་ཏེ་བཅོམ་ལྡན་འདས་ཀྱིས་བདག་གི་རས་མ་འདི་བཞེས་སུ་གནང་ན་བདག་གིས་འདི་བཅོམ་ལྡན་འདས་ལ་དབུལ་ལོ་སྙམ་མོ། །བཅོམ་ལྡན་འདས་ཀྱིས་དེའི་སེམས་ཐུགས་ཀྱིས་མཁྱེན་ནས་བཀའ་སྩལ་པ། མགུ་བྱེད་གལ་ཏེ་ཁྱོད་ཀྱིས་ཡོངས་སུ་བཏང་ན་ཕུལ་ཅིག །དེས་བཅོམ་ལྡན་འདས་ལ་སེམས་མངོན་པར་དད་པ་བྱས་ནས་གུས་པ་བསྐྱེད་དེ་ཕུལ་ལོ། །བཅོམ་ལྡན་འདས་ཀྱིས་དེ་དེ་ཉིད་ཀྱི་མདུན་དུ་ན་བཟའ་ཆོས་གོས་ཀྱི་གྲྭ་གླན་ཏེ་བཙེམས་པ་དང་། ཁ་དོག་མཐུན་པར་གྱུར་ཏོ། །དེ་དད་པ་སྐྱེས་པས་ཞབས་གཉིས་ལ་གཏུགས་ཏེ་སྨོན་ལམ་བཏབ་པ། དགེ་བའི་རྩ་བ་འདིས་བདག་བྲན་མོར་མ་གྱུར་ཅིག །དབུལ་བར་མ་གྱུར་ཅིག་ཅེས་སྨྲས་ནས་བུམ་པ་ཆུས་བཀང་སྟེ་ཁྱིམ་དུ་སོང་ངོ་། །ཁྱིམ་བདག་གདངས་ཅན་གྱིས་ནང་མི་ལ་ཚུལ་ཤིང་བྲིམས་པ་དང་། མགུ་བྱེད་ཀྱིས་སྨྲས་པ། ལྟར་ཁྱིམ་བདག་འདི་ཅི་ལགས། གདངས་ཅན་གྱིས་སྨྲས་པ། མགུ་བྱེད་ཁྱེད་ཅག་ལས་གང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བྱེད་པར་སྤྲོ་བ་དེས་ཚུལ་ཤིང་ལོང་ཤིག་དང་ཁོ་བོ་ལ་ལོངས་སྤྱོད་རྒྱ་ཆེན་པོ་དག་ཡོད་དོ། །དེས་མྱུར་བ་མྱུར་བར་ཆུའི་བུམ་པ་བཞག་སྟེ་ཚུལ་ཤིང་བླངས་ནས་སྨྲས་པ། བདག་སངས་
རྒྱས་ལ་སོགས་པ་དགེ་སློང་གི་དགེ་འདུན་ལ་བསྙེན་བཀུར་བགྱིད་པར་སྤྲོ་སྟེ། བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཡོ་བྱད་ཐམས་ཅད་ཀྱིས་བསྙེན་བཀུར་བགྱི་ཡིས་ཁྱོད་ཐུགས་ལས་ཆུང་ངུར་མཛོད་ཅིག་ཅེས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་བསྟབས་ཏེ་གུས་པར་བསྙེན་བཀུར་བྱ་བར་བརྩམས་སོ། །ཁྱིམ་བདག་གདངས་ཅན་གྱིས་ཡང་ཆ་ལུགས་མི་མངོན་པར་བྱས་ཏེ་ཤམ་ཐབས་དམའ་བར་བགོས་ནས་གཙུག་ལག་ཁང་དུ་སོང་སྟེ་ཚིགས་སུ་བཅད་པའི་དབྱངས་ཀྱིས་མཆོད་རྟེན་ལ་ཕྱག་འཚལ་ནས་གཙུག་ལག་ཁང་དུ་འདུག་པར་བརྩམས་པ་དང་། ཡང་རྒན་ཞུགས་གཞན་ཞིག་སྒོ་ཁང་ན་འདུག་ནས་དེས་དེའི་རྐང་པ་ལ་ཕྱག་འཚལ་ཏེ་སྨྲས་པ། འཕགས་པ་གཙུག་ལག་ཁང་སྙིང་དང་མིག་འཕྲོག་པར་བགྱིད་པ་མཐོ་རིས་ཀྱི་ཐེམ་སྐས་སུ་གྱུར་པ་འདི་སུའི་ལགས། དེས་སྨྲས་པ། ཁྱིམ་བདག་གདངས་ཅན་གྱིའོ། ། འཕགས་པ་ཅི་གཙུག་ལག་ཁང་ལགས་སམ། འོན་ཏེ་ཕོངས་པ་ལགས། བཞིན་བཟངས། གཙུག་ལག་ཁང་ནི་ཇི་ལྟ་བུ། ཕོངས་པ་ནི་ཇི་ལྟ་བུ། འཕགས་པ་གང་ན་ཡོ་བྱད་ཕུན་སུམ་ཚོགས་པ་ནི་གཙུག་ལག་ཁང་ལགས་ལ། གང་ན་ཡོ་བྱད་མ་མཆིས་པ་ནི་ཕོངས་པ་ལགས་སོ། །བཞིན་བཟངས་འདི་སྔོན་ནི་ཕོངས་པར་གྱུར་པ་ལས་ད་ནི་གཙུག་ལག་ཁང་དུ་གྱུར་ཏོ། །ཇི་ལྟར་གྱུར། བཞིན་བཟངས་ཁྱིམ་བདག་གདངས་ཅན་ལ་བུ་མོ་མངག་གཞུག་མ་མགུ་བྱེད་ཅེས་བྱ་བ། དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཞིག་ཡོད་པ་ལྟར་དེ་ཁྱིམ་བདག་དེས་འདིར་ལས་སུ་བསྐོས་ཏེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་སྟོབས་ཤིག་ཅེས་བསྒོ་ནས། ད་ལྟར་དེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་པས་དེས་ན་འདི་གཙུག་ལག་ཁང་ཡིན་ཏེ་ཕོངས་པ་མ་ཡིན་ནོ། །ཁྱིམ་བདག་གདངས་ཅན་གྱིས་ཐོས་ནས་དགའ་སྟེ་ཁྱིམ་དུ་སོང་ནས་དེས་བུ་མོ་མགུ་བྱེད་ཀྱི་ལག་ཏུ་ལྡེ་མིག་དང་། ལྡེ་མིག་ཀྱོག་པོ་གཏད་ནས་
ནང་མི་རྣམས་ལ་སྨྲས་པ། ཁྱེད་ཅག་མགུ་བྱེད་ཀྱིས་ཅི་བྱིན་པ་དེས་གནས་པར་གྱིས་ཤིག །ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་རྣམས་ཀྱང་བསྡུས་ཏེ་སྨྲས་པ། ཤེས་ལྡན་དག་ཁོ་བོས་བུ་མོ་མགུ་བྱེད་འདི་བྲན་མོ་ལས་ཕྱུང་སྟེ་ཁྱིམ་གྱི་བདག་མོར་བཅུག་གོ་ཞེས་བསྒྲགས་སོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཁྱིམ་བདག་གདངས་ཅན་རྒྱལ་པོ་ཤར་པས་གདངས་ལས་འཚལ་བ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ་འདི་ལྟར་འདས་པའི་དུས་ན་ཡང་ཁྱིམ་བདག་གདངས་ཅན་འདི་རྒྱལ་པོ་ཤར་པས་གདངས་ལས་ཤེས་པར་གྱུར་ཏེ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱིས་རྒྱལ་སྲིད་བྱེད་དུ་བཅུག་གོ །ཇི་ཙམ་དུས་གཞན་ཞིག་ན་ལྟས་པ་དག་གིས་ལོ་བཅུ་གཉིས་སུ་ཆར་མི་འབབ་པར་ལུང་བསྟན་ནས་རྒྱལ་པོ་ཚངས་བྱིན་གྱིས་རང་གི་ཡུལ་དུ་དྲིལ་བསྒྲག་པ་བྱེད་དུ་བཅུག་སྟེ་ཕྱོགས་སུ་བསྒོ་བ། ངའི་ཡུལ་ན་གནས་པ་དང་། ཕོ་བྲང་འཁོར་གྱི་མི་དག་ཉོན་ཅིག །ལྟས་པ་དག་གིས་ལོ་བཅུ་གཉིས་སུ་ཆར་ལྟར་མི་འབབ་པར་ལུང་བསྟན་གྱིས་དེའི་ཕྱིར་ཁྱེད་ཅག་ལས་གང་དག་ལ་ལོ་བཅུ་གཉིས་ཀྱི་ཟན་བདོག་པ་དེ་དག་གིས་ནི་འཁོད་པར་བྱའོ། །གང་དག་ལ་མི་བདོག་པ་དེ་དག་གིས་ནི་གཞན་དུ་འདོང་བར་བྱ་ཞིང་ལོ་བཅུ་གཉིས་འདས་ནས་ཕྱིར་འོང་བར་བྱའོ། །དེའི་ཚེ་ན་བཱ་རཱ་ཎ་སཱི་ན་ཁྱིམ་བདག་གཟུངས་བྱེད་ཅེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ་ཞིག་འདུག་པ་དེས་མཛོད་པ་བོས་ཏེ་སྨྲས་པ།
ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པའི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རང་སངས་རྒྱས་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ། ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང་། རབ་ཏུ་བྱུང་བ་ལྔ་བརྒྱ་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་དེར་འཁོད་དོ། །ཇི་ཙམ་ན་རང་སངས་རྒྱས་གཞན་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཀྱང་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཁྱེད་ལ་གསོལ་ལགས་ན། ཅིའི་སླད་དུ་ཡང་སྒྲུབ་པར་མཛད། ཁྱིམ་བདག་དེ་དག་ཀྱང་གཞན་ལ་ཁོ་བོ་ཅག་ཀྱང་གཞན་ནོ། །འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་ལྟར་བོས་ཏེ་སྨྲས་པ། ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང་། རབ་ཏུ་བྱུང་བ་སྟོང་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་ཀྱང་དེར་འཁོད་དོ། །ཁྱིམ་བདག་གཟུངས་བྱེད་
ཀྱིས་སྦྱིན་པའི་ཁང་པ་རྩིག་ཏུ་བཅུག་སྟེ། སྦྱིན་པའི་ཞལ་ཏ་པའི་མི་དག་དང་སྤྱན་འདྲེན་བསྐོས་ནས། སྤྱན་འདྲེན་དེས་ཉི་མ་རེ་རེ་ཞིང་སོང་སྟེ་གདུགས་ཚོད་ལ་འབོད་པར་བྱེད་དོ། །སྤྱན་འདྲེན་དེས་ཁྱི་ཞིག་གསོས་པ་དེ་ཉི་མ་རེ་རེ་ཞིང་སྤྱན་འདྲེན་དེ་དང་ལྷན་ཅིག་འགྲོ་བར་བྱེད་དོ། །ཇི་ཙམ་དུས་གཞན་ཞིག་ན་སྤྱན་འདྲེན་དེ་ལ་བྲེལ་བ་ཞིག་བྱུང་ནས། དེས་ཇེ་འདི་བསྒྲུབས་ཏེ་ཕྱིས་སྤྱན་དྲང་བར་བྱའོ་སྙམ་ནས་དེ་གཞན་དུ་སོང་བ་དང་། ཁྱི་དེས་དེ་མ་རྙེད་ནས་སྔོན་གོམས་པས་རང་སངས་རྒྱས་རྣམས་ཀྱི་གན་དུ་སོང་བ་དང་། དེར་ཡང་དེ་མ་མཐོང་ནས་དེས་སྐད་ཕྱུང་ངོ་། །རང་སངས་རྒྱས་དེ་དག་གི་དགེ་འདུན་གྱི་གནས་བརྟན་གང་ཡིན་པ་དེས་སྨྲས་པ། ཚེ་དང་ལྡན་པ་དག་སྤྱན་འདྲེན་དུས་ལས་ཡོལ་ནས་ཁྱི་འདིས་སྤྱན་དྲངས་ཀྱིས་ཚུར་སྤྱོན་བཞུད་དོ། །དེ་ལྟར་བགྱིའོ་ཞེས་དེ་དག་འཕགས་པ་དང་། སྤྱན་འདྲེན་འོངས་ཏེ་ཁྱི་དེས་དེ་མཐོང་ནས་སྐད་དབྱུང་བར་བརྩམས་པ་དང་། སྤྱན་འདྲེན་གྱིས་བསམས་པ། འདིས་འདི་དག་སྤྱན་དྲངས་པས་དེས་ན་བདག་ཉིད་ཆེན་པོ་འདི་དག་བྱོན་གོར་མ་ཆག་སྙམ་དུ་རིག་ནས་སྨྲས་པ། འཕགས་པ་དག་ཁྱེད་སུས་སྤྱན་དྲངས། དེ་དག་གིས་སྨྲས་པ། བཞིན་བཟངས་ཁྱི་འདིས་སོ། །དེས་སྨྲས་པ། འཕགས་པ་དག་མ་ནོངས་ཀྱིས་སླད་ཀྱིས་ཀྱང་གང་གི་ཚེ་བདག་ལ་བྲེལ་བ་འགའ་ཞིག་བྱུང་བ་དེའི་ཚེ་ན་འདི་ཉིད་ཁྱེད་སྤྱན་འདྲེན་པར་འགྱུར་གྱིས་ཁྱེད་ཅག་གཤེགས་སུ་གསོལ། དགེ་སློང་དག་དེའི་ཚེ་དེའི་དུས་ན་ཁྱིམ་བདག་གཟུངས་བྱེད་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་མཛོད་པ་གང་ཡིན་པ་དེ་ནི་ཁྱིམ་བདག་མགོན་མེད་ཟས་སྦྱིན་ཡིན་ནོ། །དེའི་ཚེ་དེའི་དུས་ན་སྤྱན་འདྲེན་གང་ཡིན་པ་དེ་ནི་བད་སའི་རྒྱལ་པོ་ཤར་པ་ཡིན་ནོ། །དེའི་ཚེ་དེའི་དུས་ན་ཁྱི་གང་ཡིན་པ་དེ་ནི་ཁྱིམ་བདག་གདངས་ཅན་ཡིན་ཏེ། ཁྱིམ་བདག་གདངས་ཅན་ལྟར་འདི་དེའི་ཚེ་ཡང་རྒྱལ་པོ་ཤར་པས་གདངས་ལས་ཤེས་པར་གྱུར་ལ། དེ་ལྟར་ཡང་འདི་དེས་གདངས་ལས་ཤེས་སོ། །རྒྱལ་པོ་གཟུགས་ཅན་སྙིང་པོའི་གན་དུ་མི་སྟོང་ཐུབ་གཅིག་འོངས་ནས་རྒྱལ་པོས་དེ་ལ་སྨྲས་པ། ཀྭའི་ནང་རྗེ་
ཁྱོད་སུ་ཡིན། དེས་སྨྲས་པ། ལྷ་བདག་སྟོང་ཐུབ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྟོང་ཐུབ་ལ་འཚོ་བ་བྱིན་ཅིག །དེ་དག་གིས་དེ་ལ་འཚོ་བ་བྱིན་ནོ། །གང་གི་ཚེ་བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལྷ་བརྒྱད་ཁྲི་དང་མ་ག་དྷཱ་པའི་བྲམ་ཟེ་དང་། ཁྱིམ་བདག་འབུམ་ཕྲག་དུ་མ་དང་ལྷན་ཅིག་བདེན་པ་དག་ལ་བཞག་པ་དེའི་ཚེ་ན་དེས་རྒྱལ་པོའི་ཁབ་ཏུ་དྲིལ་བསྒྲགས་པ་བྱེད་དུ་བཅུག་སྟེ་བསྒོ་བ། རྒྱལ་པོའི་ཁབ་ན་གནས་པ་དང་། ཕོ་བྲང་འཁོར་གྱི་མི་དང་། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་ཤེས་ལྡན་དག་ཉོན་ཅིག །ངའི་ཡུལ་དུ་སུས་ཀྱང་རྐུན་པོ་མི་བྱའོ། །ངའི་ཡུལ་དུ་གང་རྐུན་པོ་བྱེད་པ་དེ་ངས་ཡུལ་མེད་པར་བྱ་ཞིང་བརྐུས་པ་རྣམས་ཀྱི་ནོར་ནི་ང་རང་གི་མཛོད་དང་བང་བ་ནས་སྦྱིན་ནོ་ཞེས་བསྒོའོ། །གང་གི་ཚེ་བཅོམ་ལྡན་འདས་ཀྱིས་ཀོ་ས་ལར་བྱུང་བའི་རྒྱལ་པོ་གསལ་རྒྱལ་གཞོན་ནུའི་དཔེའི་མདོས་བཏུལ་བ་དེའི་ཚེ་ན་དེས་ཀྱང་མཉན་ཡོད་དུ་དྲིལ་བསྒྲགས་པ་བྱེད་དུ་བཅུག་སྟེ་བསྒོ་བ། ངའི་ཡུལ་དུ་སུས་ཀྱང་རྐུན་པོ་མི་བྱའོ། །ངའི་ཡུལ་དུ་གང་རྐུན་པོ་བྱེད་པ་དེ་ངས་གསད་པར་བྱ་ཞིང་བརྐུས་པ་རྣམས་ཀྱི་ནོར་ནི་ང་རང་གི་མཛོད་དང་བང་བ་ནས་སྦྱིན་ནོ་ཞེས་བསྒོའོ། །བར་དུ་ཡུལ་མ་ག་དྷཱ་ན་གནས་པའི་ཆོམ་རྐུན་པ་གང་དག་ཡིན་པ་དང་། ཡུལ་ཀོ་ས་ལ་ན་གནས་པའི་ཆོམ་རྐུན་པ་གང་དག་ཡིན་པ་དེ་དག་མཚམས་ཀྱི་བར་དུ་དོང་སྟེ་འཁོད་ཅིང་ཡུལ་མ་ག་དྷཱ་ནས་དོན་མཐུན་པ་གང་དག་འོང་བ་དེ་དག་ཀྱང་འཇོམས་པར་བྱེད། ཡུལ་ཀོ་ས་ལ་ནས་དོན་མཐུན་པ་གང་དག་འོང་བ་དེ་དག་ཀྱང་འཇོམས་པར་བྱེད་ནས་ཐམས་ཅད་དུ་ཡུལ་མ་ག་དྷཱ་ན་འཁོད་པའི་ཆོམ་རྐུན་པ་གང་དག་ཡིན་པ་དང་། ཡུལ་ཀོ་ས་ལ་ན་འཁོད་པའི་ཆོམ་རྐུན་པ་གང་དག་ཡིན་པ་དེ་དག་མཚམས་ཀྱི་བར་དུ་དོང་སྟེ་འཁོད་ཅིང་དོན་མཐུན་འཇོམས་པར་བྱེད་པས་དོན་མཐུན་འགྲོ་བ་དང་འོང་བ་རྒྱུན་ཆད་དེ། རྒྱལ་པོའི་དཔྱ་དང་ལོ་ཐང་མི་འདུའོ་ལྟར་ཞེས་བྱ་བ་དེ་ལྟ་བུའི་སྒྲ་གྲགས་པར་གྱུར་ཏོ། །རྒྱལ་པོ་གཟུགས་ཅན་སྙིང་པོས་དེ་ཐོས་ནས་རུ་གཅིག་བཏང་ན་དེ་བཅོམ་ཞིང་རབ་ཏུ་བཅོམ་སྟེ་ཕྱིར་འོངས་
སོ། །དེ་བཞིན་དུ་རུ་གཉིས་པ་དང་། རུ་གསུམ་པ་བཏང་ན་དེ་ཡང་བཅོམ་ཞིང་རབ་ཏུ་བཅོམ་སྟེ་ཕྱིར་འོངས་སོ། །ཇི་ཙམ་ན་ཡུལ་མ་ག་དྷཱ་ནས་དོན་མཐུན་ཡུལ་ཀོ་ས་ལར་འཕགས་པ་དེ་ཆོམ་རྐུན་པས་འཇིགས་པས་རྒྱལ་པོའི་ཁབ་ཏུ་ཞུགས་ཏེ་བསེལ་བ་ཚོལ་བར་བྱེད་ནས་བློན་པོ་རྣམས་ཀྱིས་རྒྱལ་པོ་ལ་སྨྲས་པ། ལྷ་སྟོང་ཐུབ་འདི་ལྷའི་འཚོ་བས་འཚོ་ན་ཅིའི་སླད་དུ་དོན་མཐུན་གྱི་བསེལ་མི་བགྱིད། རྒྱལ་པོས་སྨྲས་པ། དེ་འགྲོ་ལ་རག་གིས་ཐོང་ཤིག །བློན་པོ་རྣམས་ཀྱིས་དེ་བོས་ཏེ་སྨྲས་པ། ཀྭའི་ནང་རྗེ་ཁྱོད་རྒྱལ་པོའི་འཚོ་བས་འཚོ་ལ་ཅིའི་ཕྱིར་རྒྱལ་པོའི་བཀའ་བཞིན་མི་བྱེད། དེས་སྨྲས་པ། ཁྱེད་ཀྱིས་བསྒོ་བ་གང་ཞིག་ཁོ་བོས་མ་བྱས་ན་དེ་སྐད་དུ་སྤྱོ་བར་བྱེད། དེ་དག་གིས་སྨྲས་པ། དོན་མཐུན་འདི་ཡུལ་ཀོ་ས་ལར་འགྲོས་འདིའི་བསེལ་གྱིས་ཤིག །དེས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེས་མདའ་ལྔ་བརྒྱ་པའི་དོང་པ་གཉིས་ཐོགས་ཏེ་ཤིང་རྟར་ཞུགས་ནས་དོན་མཐུན་གྱི་མདུན་དུ་འཕགས་སོ། །ཆོམ་རྐུན་པ་རྣམས་ཀྱིས་དེ་དོན་མཐུན་གྱི་མདུན་ནས་འོང་བ་ཐག་རིང་པོ་ཁོ་ན་ནས་མཐོང་ནས། དེ་ལ་ཕོ་ཉ་བཏང་སྟེ་བསྒོ་བ། ཆོམ་རྐུན་པའི་དམག་དཔོན་ན་རེ་ཤིང་རྟ་ཕྱིར་ཟློག་ཤིག །གནོད་པ་ཐོབ་པར་གྱུར་ཏ་རེ་ཞེས་ཟེར་རོ། །དེས་སྨྲས་པ། དཔའ་བོ་ལ་དཔའ་བོའི་ཡོངས་སུ་སྤང་བ་བྱིན་ཅིག །ཆོམ་རྐུན་པའི་ཕོ་ཉས་སྨྲས་པ། ཅི་ཁྱོད་གཅིག་པུ་དཔའ་བོ་ཡིན་ནམ། ཁོ་བོ་ཅག་ཀྱང་དཔའ་བོ་ཡིན་གྱིས་ཕྱིར་ལོག་ཤིག །དེ་ནས་ཕན་ཚུན་མདའ་ཁར་དགྱེ་བར་བརྩམས་ནས་དེས་ཆོམ་རྐུན་པའི་ཕོ་ཉའི་གནད་དུ་བསྣུན་ནས་དེ་ཕྱིར་ལོག་གོ །དེ་བཞིན་དུ་ཆོམ་རྐུན་པ་གཉིས་དང་། བཞི་དང་། བརྒྱད་དང་། བཅུ་དྲུག་དང་། སུམ་བཅུ་རྩ་གཉིས་དང་། དྲུག་བཅུ་རྩ་བཞི་ནས་ཆོམ་རྐུན་པ་ལྔ་བརྒྱའི་བར་དག་ལྷགས་ནས་དེས་དེ་དག་གི་གནད་དུ་བསྣུན་ནས་དེ་དག་ཕྱིར་ལོག་གོ། །དེ་བཞིན་དུ་ཆོམ་རྐུན་པ་གཞན་ལྔ་བརྒྱ་ལྷགས་ནས་དེས་དེ་དག་ལ་སྨྲས་པ། ངས་ཁྱེད་ཀྱི་ཆོམ་རྐུན་པ་ལྔ་བརྒྱ་བསད་ལྟར་ན་ཁྱེད་ཅག་ཀྱང་སྲོག་གིས་འགེབས་པར་མི་འདོད་དམ། ཕྱིར་ལོག་ཤིག །
ཆོམ་རྐུན་པ་རྣམས་ཀྱིས་སྨྲས་པ། ངེད་ཀྱི་གཅིག་ཀྱང་མ་སོད་ན་ཅིའི་ཕྱིར་ངེད་ཕྱིར་ལྡོག་ཁྱོད་ཀྱང་རུང་ངེད་ཀྱང་རུང་ངོ་། །དེས་སྨྲས་པ། གལ་ཏེ་ཁྱེད་ཅག་ཡིད་མི་ཆེས་ན་གང་དག་ངས་བསྣུན་པ་དེ་དག་གི་གོ་ཕུད་ཅིག །དེ་དག་གིས་གོ་འབུད་པར་བརྩམས་པ་དང་། གང་གིས་ཇི་ལྟར་གོ་ཕུད་པ་དེ་དེ་ལྟར་དུས་ལ་བབ་ནས་ཆོམ་རྐུན་པ་དེ་དག་མི་འདི་ནི་གནོད་སྦྱིན་ཞིག་གོ་ཞེས་བྱེར་ཏེ་དོང་ངོ་། །སྟོང་ཐུབ་མཚམས་ཀྱི་བར་ན་འདུག་ཅིང་དེ་དོན་མཐུན་ཡུལ་ཀོ་ས་ལ་ནས་འོང་བ་གང་ཡིན་པ་དེའི་བསེལ་ཡང་བྱེད། ཡུལ་མ་ག་དྷཱ་ནས་འོང་བ་གང་ཡིན་པ་དེའི་བསེལ་ཡང་བྱེད་དོ། །དེས་བསམས་པ། བདག་གིས་ཅིའི་ཕྱིར་ཕར་འགྲོ་ཚུར་འགྲོ་བྱ་འདི་ཉིད་དུ་འདུག་པར་བྱའོ་སྙམ་ནས་དེས་དེར་ཁྱིམ་བརྩིགས་ཏེ་འདུག་ནས་དོན་མཐུན་གཉི་གའི་བསྟི་གནས་སུའང་གྱུར། དེ་འབྲོག་ན་གནས་པ་ཡིན་པས་འབྲོག་གནས་འབྲོག་གནས་ཞེས་བྱ་བའི་མིང་དུ་གྱུར་ཏོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་བཞི་པ། འབྲོག་གནས་སུ་དོན་མཐུན་དག་ལྷགས་ནས་ཁ་ཅིག་གིས་ནི་འབྲས་བཙོང་བར་བརྩམས་སོ། །ཁ་ཅིག་གིས་ནི་ཕྱེ་བཙོང་བར་བརྩམས་ཁ་ཅིག་གིས་ནི་བེ་རེག །ཁ་ཅིག་གིས་ནི་ཁུར་བ། ཁ་ཅིག་གིས་ནི་རིལ་བུ་བཙོང་བར་བརྩམས་སོ། །ཆང་འཚོང་དག་གིས་ཀྱང་ཆང་བཙོང་བར་བརྩམས་ཏེ། དེ་ཉིད་དུ་འཁོད་ནས་དེར་ཚོང་འདུས་ཆགས་པར་གྱུར་ཏོ། །འབྲོག་གནས་ཀྱིས་རྒྱལ་པོ་གཟུགས་ཅན་སྙིང་པོ་ལ་ཕྲིན་ཡིག་ལྷ་བདག་གིས་འདིར་ཚོང་འདུས་བཙུགས་ཀྱིས་ལྷས་འདིར་ཞལ་ཏ་པ་བཏང་བའི་རིགས་སོ་ཞེས་སྤྲིང་ངོ་། །རྒྱལ་པོས་བསམས་པ། གང་དུ་བདག་གི་རུ་གསུམ་བཅོམ་ཞིང་རབ་ཏུ་བཅོམ་ཞིང་འོངས་པ་དེར་དེས་ཚོང་འདུས་བཙུགས་པས་དེ་ནི་དེ་ཉིད་ཀྱིར་གྱུར་ཅིག་སྙམ་ནས་དེས་དེ་ལ་ཕྲིན་ཡིག་ངས་ཚོང་འདུས་དེ་ཁྱོད་ལ་བྱིན་གྱིས་དེར་དཔྱ་དང་ལོ་ཐང་ཅི་འདུ་བ་དེ་དག་ཁྱོད་ཉིད་ཅི་དགར་སྤྱོད་ཅིག་ཅེས་སྤྲིང་ངོ་། །འབྲོག་གནས་སུ་ཚོང་འདུས་བཙུགས་ནས་འབྲོག་གནས་འབྲོག་གནས་ཞེས་ལྟར་བྱ་བའི་མིང་དུ་གྱུར་ཏོ། །འབྲོག་གནས་ན་
གནས་པའི་སྐྱེ་བོའི་ཚོགས་རྣམས་ཀྱིས་བསམས་པ། ཤེས་ལྡན་དག་བདག་ཅག་གང་ཅུང་ཟད་བདེ་བར་གནས་པ་གང་ཡིན་པ་དེ་ཐམས་ཅད་འབྲོག་གནས་ཀྱི་མཐུ་ཡིན་པས་བདག་ཅག་གིས་འདི་ལ་ཕན་པ་ཅུང་ཟད་བྱ་གོར་མ་ཆག་གོ་སྙམ་མོ། །དེ་ན་ཁ་ཅིག་གིས་སྨྲས་པ། མ་ཉེས་ཀྱིས་དེ་བཞིན་བྱའོ། །ཅི་ཞིག་བྱ། དེ་ན་ཁ་ཅིག་གིས་སྨྲས་པ། བདག་ཅག་ལས་གང་སུ་ཡང་རུང་བ་བག་མ་གཏོང་བའམ། བག་མ་ལེན་པ་དེས་དེ་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་ཡང་བསྐོན་པར་བྱའོ། །མ་ཉེས་ཀྱིས་དེ་ལྟར་བྱའོ་ཞེས་དེ་དག་ལས་གང་བག་མ་གཏོང་བའམ། བག་མ་ལེན་པ་དེས་འབྲོག་གནས་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་བསྐོན་པར་བྱེད་དོ། །ཇི་ཙམ་ན་མི་དབུལ་པོ་ཞིག་བག་མ་ལེན་དུ་ཉེ་ནས་དེ་འདི་སྙམ་དུ་སེམས་ཏེ། བདག་ལ་འབྲོག་གནས་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་བསྐོན་པའི་འབྱོར་པ་ག་ལ་ཡོད་ཀྱིས། འདི་ལྟར་བདག་གིས་བག་མ་དེ་བླངས་ནས་དང་པོ་ཁོ་ནར་འབྲོག་གནས་ལ་དགའ་མགུར་སྤྱོད་དུ་ཕུལ་ལ། དེས་དགའ་མགུར་སྤྱད་ནས་དེའི་འོག་ཏུ་བདག་གིས་སྤྱད་པར་བྱའོ་སྙམ་དུ་རིག་ནས། དེ་འབྲོག་གནས་ཀྱི་གན་དུ་སོང་སྟེ་མགོ་བོས་ཕྱག་འཚལ་ནས་སྨྲས་པ། གྲོང་དཔོན་བདག་བག་མ་ལེན་དུ་ཉེ་ན་བདག་ལ་ཁྱོད་འཁོར་དང་བཅས་པ་བཤོས་གསོལ་ཞིང་ན་བཟའ་ཕྲུགས་རེ་གསོལ་བའི་འབྱོར་པ་མ་མཆིས་ཀྱིས། འདི་ལྟར་བདག་གིས་བག་མ་དེ་བླངས་ནས་དང་པོ་ཁོ་ནར་ཁྱོད་ལ་དགའ་མགུར་སྤྱོད་དུ་འབུལ་གྱིས། ཁྱོད་ཀྱིས་དགའ་མགུར་སྤྱད་ནས་དེའི་འོག་ཏུ་བདག་གིས་སྤྱད་པར་བགྱིའོ། །འབྲོག་གནས་ཀྱིས་སྨྲས་པ། ཀྱེ་ནང་རྗེ་གང་ཡང་རུང་བ་བག་མ་ལེན་པའམ། བག་མ་གཏོང་བ་དེ་ཐམས་ཅད་ཀྱིས་ཁོ་བོ་འཁོར་དང་བཅས་པ་ཟན་སྦྱིན་ཞིང་གོས་ཕྲུགས་རེ་བསྐོན་མི་དགོས་ཀྱིས་ཁྱོད་སོང་ལ་བག་ཡངས་སུ་བག་མ་ལོང་ཤིག །གྲོང་དཔོན་དེ་ལྟ་ལགས་མོད་ཀྱི་འོན་ཀྱང་བདག་འདི་ལྟར་དགའས་དང་དུ་བཞེས་ཤིག །བུད་མེད་ཀྱི་ཡུལ་ནི་དབང་པོ་རྣམས་འཕྲོག་ཅིང་དོན་དུ་
གཉེར་བར་འགྱུར་བ་ཡིན་པས་འབྲོག་གནས་ཀྱིས་དང་དུ་བླངས་སོ། །དེས་ཀྱང་བག་མ་བླངས་ནས་དང་པོ་ཁོ་ནར་ལྟར་འབྲོག་གནས་ལ་ཕུལ་ནས་དེས་ཀྱང་དགའ་མགུར་སྤྱད་དོ། །འབྲོག་གནས་འདོད་པ་ལ་འདོད་ཆགས་ཀྱིས་ལྷག་པར་ཆགས་པས་མི་དེ་ལ་བྱམས་པར་བྱ་བར་བརྩམས་སོ། །གཞན་ཞིག་གིས་དེ་ལ་སྨྲས་པ། ཀྱེ་ནང་རྗེ་ཁྱོད་ལ་འབྲོག་གནས་ཏེ་པོར་བྱམས་པར་གྱུར་པ་འདི་ལ་རྒྱུ་ཅི་ཡོད། དེས་ཇི་ལྟར་གྱུར་པ་སྨྲས་པ་དང་། དེས་ཀྱང་དེ་བཞིན་བྱ་བར་བརྩམས་སོ། །གཞན་ཞིག་གིས་དེ་ལ་དྲིས་པ་དང་། དེས་ཀྱང་དེ་ལ་ཇི་ལྟར་གྱུར་པ་བརྗོད་པ་དང་། དེས་ཀྱང་དེ་བཞིན་བྱ་བར་བརྩམས་སོ། །གཞན་ཞིག་གིས་ཀྱང་དེ་ལ་དྲིས་པ་དང་། དེས་ཀྱང་དེ་ལ་ཇི་ལྟར་གྱུར་པ་བརྗོད་པ་ནས་དེས་ཀྱང་དེ་བཞིན་བྱ་བར་བརྩམས་ཏེ། དེ་ལྟ་བུའི་ཚུལ་གྱིས་དེ་ན་དམ་པ་མ་ཡིན་པའི་ཆོས་འཕེལ་བར་གྱུར་ཏོ། །འབྲོག་གནས་ཀྱིས་ཚོང་འདུས་དེར་ལྷ་ཁང་རྩིག་ཏུ་བཅུག་ནས་དེ་ན་གང་ཡང་རུང་བས་བག་མ་བླངས་པ་དེས་བུ་མོ་དེ་ལྷ་ཁང་དེ་བསྐོར་དུ་བཅུག་ནས་འབྲོག་གནས་ཀྱི་གན་དུ་གཏོང་ཞིང་འབྲོག་གནས་ཀྱིས་དེ་དང་པོར་དགའ་མགུར་སྤྱོད་པར་བྱེད་དོ། །ཇི་ཙམ་དུས་གཞན་ཞིག་ན་གཞོན་ནུ་མ་ཆེན་མོ་ཞིག་བག་མར་འགྲོར་ཉེ་ནས་དེས་བསམས་པ། བདག་ལ་ཡང་དང་པོར་འབྲོག་གནས་དགའ་མགུར་སྤྱོད་པར་འགྱུར་ཞིང་ཕྱིས་ཁྱིམ་ཐབ་སྤྱོད་པར་འགྱུར་ན་མི་རུང་གིས་ཅི་ནས་ཀྱང་འབྲོག་གནས་འདི་གསད་པར་འགྱུར་བ་དེ་ལྟ་བུའི་ཐབས་ཀྱི་རྣམ་པ་ཞིག་བྱའོ་སྙམ་ནས་དེས་ཇི་ཙམ་ནས་ཕྱོགས་ཤིག་ཏུ་སྐྱེ་བོ་ཕལ་པོ་ཆེའི་ཚོགས་འདུག་ཅིང་མཐུན་པར་གྱུར་པ་དེ་ལོགས་སུ་ཁ་བལྟས་ཏེ་སྒྲེན་མོར་བྱུང་ནས་གཅིན་རྒྱང་བྱས་པ་དང་། སྐྱེ་བོ་ཕལ་པོ་ཆེའི་ཚོགས་ཀྱིས་དེ་མཐོང་ནས་དེ་དག་མི་དགའ་བར་སེམས་པར་གྱུར་ཏེ་སྨྲས་པ། བུ་མོ་ངོ་ཚ་དང་ཁྲེལ་མེད་པ་སྐྱེ་བོ་ཕལ་པོ་ཆེའི་ཚོགས་ལ་མདུན་གྱིས་ཕྱོགས་ཏེ་སྒྲེན་མོར་བྱུང་ནས་གཅིན་རྒྱང་བྱེད་པ་འདི་སུའི་ཡིན། བུ་མོ་དེས་དེ་ཐོས་ནས་སྨྲས་པ། ཁྱེད་ཅག་ཀྱང་ཕོ་ཡིན་ནམ། འོ་ན་ངེད་ཅི་ཡིན། ཁྱེད་ཅག་ཕོ་མ་ཡིན་གྱི་འབྲོག་གནས་འབའ་ཞིག་
ཕོ་ཡིན་པས་དེས་ཁྱེད་ཀྱི་ཆུང་མ་བླངས་སོ་ཅོག་དང་པོར་དགའ་མགུར་སྤྱད་དེ། ཁྱེད་ཅག་ཕྱིས་དེའི་མི་གཙང་བ་འཁྲུ་བར་བྱེད་དོ། །དེ་དག་གིས་སྨྲས་པ། ཤེས་ལྡན་དག་འདིས་བདག་ལྟར་ཅག་གནས་སུ་སྤྱོས་ན། འདི་ལ་བདག་ཅག་གིས་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། འདི་ལ་གཞན་བསྒྲུབ་ཏུ་ཅི་ཡོད་འབྲོག་གནས་གསད་པར་བྱའོ། །གཞན་དག་གིས་སྨྲས་པ། དེ་ཇི་ལྟར་གསད་པར་བྱ་བ་དཔྱད་པར་བྱའོ་ཞེས་དེ་དག་དེ་ལྟར་གྲོས་བྱེད་པ་ན་ཁྱིམ་བདག་གཞན་ཞིག་གི་རྫིང་བུ་འབུལ་བ་ཉེ་བར་གྱུར་ནས། དེ་དག་གིས་སྨྲས་པ། ཤེས་ལྡན་དག་ཁྱིམ་བདག་ཆེ་གེ་མོ་ཞིག་གི་རྫིང་བུ་འབུལ་བ་ཉེ་བར་གྱུར་པས་དེར་དེ་མགྲོན་དུ་བོས་པའི་ཚེ་གསད་པར་བྱའོ། །ཇི་ཙམ་ན་ཁྱིམ་བདག་དེས་རྫིང་བུ་འབུལ་བའི་ཚེ་དེ་མགྲོན་དུ་བོས་པ་དང་། དེས་ཀྱང་དང་དུ་བླངས་སོ། །རྒྱལ་པོ་གཟུགས་ཅན་སྙིང་པོས་དྲིལ་བསྒྲག་པ་བྱེད་དུ་བཅུག་སྟེ། ཕྱོགས་སུ་བསྒོ་བ། ངའི་ཡུལ་དུ་དགེ་སློང་གང་ལ་ལ་ཞིག་འོང་བར་གྱུར་ན། དེ་གལ་ཏེ་ངའི་མཛོད་དང་། ཁྱིམ་ན་བཟའ་བ་དང་བཏུང་བ་ཡོད་ན་ཟན་སྦྱིན་པར་བྱའོ། །གལ་ཏེ་མེད་ན་སུས་མཐོང་བ་རང་གིས་བྱིན་ཅིག་དང་ཕྱིས་སྐྱིན་པ་ཉིས་གྱུར་ཏུ་སྦྱིན་ནོ་ཞེས་བཙིགས་ཡིག་ཏུ་ཡང་བྲིས་ཏེ་བཞག་གོ །བར་དུ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་མ་ག་དྷཱ་དག་ཏུ་ལྗོངས་རྒྱུ་ཞིང་འདོང་བ་ན་འབྲོག་གནས་སུ་ཕྱིན་ཏོ། །གྲོང་དཔོན་འབྲོག་གནས་ཀྱིས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་མ་ག་དྷཱ་དག་ཏུ་ལྗོངས་རྒྱུ་ཞིང་འདོང་བ་ན་འབྲོག་གནས་སུ་ཕྱིན་ཅེས་ཐོས་སོ། །ཐོས་ནས་ཀྱང་དེ་འདི་སྙམ་དུ་སེམས་ཏེ། རྒྱལ་པོ་གཟུགས་ཅན་སྙིང་པོ་དེ་བསོད་ནམས་དག་གིས་ངོམས་མི་མྱོང་བས་སྦྱིན་པ་དག་སྦྱིན་བསོད་ནམས་དག་བྱེད་ན། བདག་གིས་ཀྱང་ཅིའི་ཕྱིར་སྦྱིན་པ་དག་མི་སྦྱིན། བསོད་ནམས་དག་མི་བྱ་སྙམ་དུ་རིག་ནས་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་ག་ལ་བ་དེར་སོང་སྟེ་ཕྱིན་ནས་རྐང་པ་གཉིས་ལ་མགོ་
བོས་ཕྱག་འཚལ་ཏེ་ཆོས་མཉན་པའི་ཕྱིར་མདུན་དུ་འདུག་གོ །དེ་གཉིས་ཀྱིས་དེ་ལ་ཆོས་བསྟན་ནས། དེས་དེ་གཉིས་བསོད་སྙོམས་ལ་བོས་ཏེ་ཟན་བྱིན་ནོ། །ཁྱིམ་བདག་དེས་འབྲོག་གནས་གཡར་འདྲེན་གྱིས་བོས་པ་དང་། དེས་ཡོན་བཤད་པ་མ་མཉན་པ་ཁོ་ནར་རྫིང་བུ་འབུལ་བར་སོང་ངོ་། །འབྲོག་གནས་ན་གནས་པའི་སྐྱེ་བོའི་ཚོགས་ཀྱིས་ཀྱང་བརྡ་བྱས། མཚོན་ཐོགས་ནས་དེར་དོང་སྟེ། དེ་དག་གིས་འབྲོག་གནས་ལྟར་རྫིང་བུར་ཞུགས་པ་དང་། སྐྲ་བཀྲུའོ་ཞེས་འགྱུར་བྱེད་ཚ་བ་མགོར་བླུགས་ནས་མིག་ཆུ་འཛག་པར་གྱུར་ཏེ་ཅུང་ཟད་ཀྱང་མི་མཐོང་བ་དང་། དེ་ནས་དེའི་སྟེང་དུ་འཁོར་ལོ་དང་། རྡོ་རྗེ་རྩེ་གཅིག་དང་། མདའ་བོ་ཆེ་དང་། མཚོན་རྩེ་གཅིག་པ་ལ་སོགས་པའི་མཚོན་དག་འཕང་བར་བརྩམས་ཏེ། དེ་གསད་པར་བཤམས་པ་ན་དེས་སྨྲས་པ། ཤེས་ལྡན་དག་ཁོ་བོས་ཁྱེད་ལ་ཉེས་པ་ཅི་བྱས། དེ་དག་གིས་སྨྲས་པ། ཁྱེད་ཀྱིས་ཁོ་བོ་ཅག་གི་བག་མ་དང་པོར་དགའ་མགུར་སྤྱད་ཅིང་ཕྱིས་ཁོ་བོ་ཅག་གིས་སྤྱད་དོ། །དེས་སྨྲས་པ། ཁྱེད་ཅག་ཉིད་ཀྱིས་དམ་པ་མ་ཡིན་པའི་ཆོས་འདི་ཕྱུང་བས་འདི་ལ་ཁོ་བོས་ཅི་ཉེས། མ་གསད་པར་ཐོང་ཤིག །དེ་དག་གིས་དེ་དེ་ལྟར་ཤགས་འདེབས་བཞིན་དུ་གསད་པར་བརྩམས་པ་དང་། དེས་སྲོག་དང་འབྲལ་ཀར་གནད་འཆད་ཀ་དང་ཚིག་འགྲོལ་ཀར་སེམས་བསྐྱེད་དེ་སྨོན་ལམ་བཏབ་པ། བདག་གིས་འཕགས་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་ལྷ་དང་མིས་མཆོད་པ་གཉིས་ལ་བསོད་སྙོམས་ཕུལ་བའི་དགེ་བའི་རྩ་བ་དེས་བདག་གང་དུ་འདི་དག་གསོད་པར་འགྱུར་བ་དེར་སྐྱེ་བར་གྱུར་ཅིག་ཅེས་བཏབ་བོ། །ཆོས་ཉིད་ཀྱིས་ན་མར་འབྲི་བའི་དུས་ཀྱི་ཚེ་ན་སྨོན་ལམ་ལོག་པ་བཏབ་པ་དེ་ནི་མྱུར་དུ་འགྲུབ་པ་ཡིན་པས་དེས་སྨོན་ལམ་ལོག་པ་བཏབ་སྟེ། ཤི་ཞིང་དུས་ལ་བབ་ནས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་སོ། །དེ་ནས་དེ་གནས་འདོད་པས་རྒྱལ་པོ་ཆེན་པོ་རྣམ་ཐོས་ཀྱི་བུའི་གན་དུ་སོང་སྟེ་སྨྲས་པ། བཟོད་ལྡན་བདག་ལ་གནས་སྩོལ་ཅིག །དེས་སྨྲས་པ། འབྲོག་གནས་ཁྱེད་ཀྱི་གནས་འབྲོག་གནས་དེ་ཉིད་ཡིན་གྱིས་སོང་ཤིག །དེ་འབྲོག་གནས་
སུ་འོངས་ནས་མི་ངས་ཕྱུང་སྟེ་སྐྱེ་བོ་མང་པོ་ཤི་བར་གྱུར་ནས་ཁྲི་དང་ཁྲིར་འདོམ་པར་བྱས་སོ། །འབྲོག་གནས་ན་གནས་པའི་སྐྱེ་བོའི་ཚོགས་ཀྱིས་ལྟས་པ་དག་བཀུག་སྟེ་དྲིས་པ། ཤེས་ལྡན་དག་གང་གི་ཕྱིར་འདི་ལྟ་བུའི་ཡམས་བྱུང་བར་གྱུར་པ་འདི་ལ་རྒྱུ་ཅི་ཡོད། དེ་དག་གིས་སྨྲས་པ། ཤེས་ལྡན་དག་ཁྱེད་ཀྱིས་འབྲོག་གནས་བསད་པ་གང་ཡིན་པ་དེས་སྨོན་ལམ་ལོག་པ་བཏབ་པས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་ཏེ་དེས་འདི་ལྟ་བུའི་ཡམས་ཕྱུང་ངོ་། ། དེ་དག་གིས་ཤིང་རྟ་དང་ཤིང་རྟ་བཅས་ཏེ་འབྲོས་པར་བརྩམས་པ་དང་། དེས་ཀྱང་འཇིགས་པ་དང་འཇིགས་སུ་རུང་བ་ཆེན་པོར་བདག་ཉིད་མངོན་པར་སྤྲུལ་ནས་འབྲོག་གནས་ན་གནས་པའི་སྐྱེ་བོའི་ཚོགས་འབྲོས་པའི་མདུན་དུ་འདུག་སྟེ་སྨྲས་པ། ད་གར་འདོང་དེང་ཁྱེད་ཅག་ཐམས་ཅད་བཟའོ། །དེ་དག་ཀུན་དུ་སྐྲག་པར་གྱུར་ཏེ་སྨྲས་པ། གྲོང་དཔོན་བདག་ཅག་སྡིག་པ་བྱེད་པ་རྣམས་ལ་བཟོད་པ་མཛོད་ཅིག །དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ང་ལ་ཉི་མ་རེ་རེ་ཞིང་མི་སྟོང་སྟོང་འབུལ་ན་བཟོད་དོ། །དེ་དག་གིས་སྨྲས་པ། གྲོང་དཔོན་གལ་ཏེ་ཁྱོད་ལ་ཉི་མ་རེ་རེ་ཞིང་མི་སྟོང་སྟོང་ཕུལ་ན་རིང་པོ་མི་ཐོགས་པར་འབྲོག་གནས་འདི་མི་སྣང་བར་འགྱུར་གྱིས་དངན་དུས་འདི་ཐོང་ལ་བདག་ཅག་ཕྱག་འཚལ་བ་རྣམས་ལ་བཟོད་པ་མཛོད་ཅིག །དེས་སྨྲས་པ། ཤེས་ལྡན་དག་ཁོ་བོ་ཡུན་རིང་པོ་ནས་སྨོན་པ། ཀྱེ་མ་འབྲོག་གནས་འདི་མི་སྣང་བར་གྱུར་ཅིག་སྙམ་མོད་ཀྱི། འོན་ཀྱང་ཁོ་བོ་ལ་ཉི་མ་རེ་རེ་ཞིང་མི་ལྔ་བརྒྱ་ལྔ་བརྒྱ་ཕུལ་ཅིག་དང་བཟོད་པར་བྱའོ། །དེ་དག་གིས་ཡང་དེ་བཞིན་གསོལ་ནས་དེས་ཀྱང་མི་ཉིས་བརྒྱ་ལྔ་བཅུ་དང་བརྒྱའི་བར་དུ་ཕུལ་ཅིག་ཅེས་སྨྲས་སོ། །དེ་དག་གིས་སྨྲས་པ། གྲོང་དཔོན་དེ་ལྟ་ན་ཡང་བདག་ཅག་ཉམས་པར་གྱུར་གྱིས་མང་པོས་ཅི་བྱ། བདག་ཅག་གིས་ཁྱོད་ལ་ཉི་མ་རེ་རེ་ཞིང་བ་ལང་དྲུག་དང་ལྡན་པའི་ཤིང་རྟ་ཟས་ཀྱིས་བཀང་བ་དང་། དེ་ཁྲིད་པའི་མི་གཅིག་དབུལ་གྱིས་བཟོད་པ་མཛོད་ཅིག །དེས་སྨྲས་པ། དེ་རུང་གིས་འདི་ལྟར་ཁྱེད་ཀྱིས་ངུ་བ་དག་གིས་དབུལ་
བར་མི་བྱ་བར་བྲོ་དང་། གླུ་དང་། སིལ་སྙན་གྱི་སྒྲས་དབུལ་བར་བྱའོ། །དེ་དག་གིས་ཀྱང་ཁས་བླངས་སོ། །དེ་ནས་འབྲོག་གནས་ན་གནས་པའི་སྐྱེ་བོའི་ཚོགས་ཐམས་ཅད་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་གནོད་སྦྱིན་གྱིས་བདག་ཅག་གནས་སྐབས་དེ་ལྟར་བྱས་ན་འདི་ལ་ཇི་ལྟར་བསྒྲུབ་པར་བྱ། དེ་ན་ཁ་ཅིག་གིས་སྨྲས་པ། རེས་ཀྱིས་རེས་ཀྱིས་དབུལ་བར་བྱའོ། །ཁ་ཅིག་གིས་སྨྲས་པ། གང་ལ་རེས་བབ་པར་གྱུར་པ་དེ་ལ་བརྗོད་པ་ན་འཁྲུག་པ་སྐྱེ་བར་འགྱུར་གྱིས། འདི་ལྟར་ཁྱིམ་བྱང་བྲིས་ཏེ་རྫ་མར་བཅུག་ལ། གང་གི་ཁྱིམ་བྱང་བྱུང་བ་དེ་འགྲོ་བར་བྱ་སྟེ། དེས་ཀྱང་མི་ཚལ་ཟ་དག་མི་གཏོང་བར་བདག་ཉིད་འགྲོ་བར་བྱ་བའམ། བུ་གཏང་བར་བྱའོ། །གང་ལ་བྲེལ་བ་བྱུང་སྟེ་མ་འདུས་པ་དེ་ལ་བབ་ན་དེའི་ཁྱིམ་དུ་ཁྱིམ་བྱང་དཔྱངས་ཏེ་བཞག་གོ །དེའི་ཚེ་ན་འབྲོག་གནས་ན་ཁྱིམ་བདག་ཅིག་འདུག་པ་དེ་ལ་བུ་མེད་ནས་དེ་ཡུན་རིང་པོ་ནས་ཀྱེ་མ་བདག་ལ་བུ་ཡོད་པར་གྱུར་ཅིག་ཅེས་སྨོན་ནས་སྟེས་དབང་གིས་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །ཆུང་མ་དེ་བཙའ་བའི་དུས་ཀྱི་ཚེ་ཁྱིམ་བདག་དེ་བྱ་བ་ཞིག་ལ་ཕྱི་རོལ་དུ་བྱུང་བ་དང་། དེའི་ཉིན་མོ་དེ་ལ་གནོད་སྦྱིན་ལ་གཏོར་མ་སྦྱིན་པའི་ཁྱིམ་བྱང་བྱུང་ནས་དེའི་རེས་སྦྲོན་པར་བསྐོས་པའི་མི་དག་གིས་དེའི་ཁྱིམ་བྱང་སྒོར་དཔྱངས་ཏེ་བཞག་གོ །སྐབས་དེར་ཆུང་མ་དེ་བཙས་པ་ལས་ཁྱེའུ་ཞིག་བྱུང་ངོ་། །ཇི་ཙམ་ན་ཁྱིམ་བདག་དེ་ཕྱིར་འོངས་པ་དང་། དེས་ཁྱིམ་དུ་འཇུག་ཀར་ཁྱིམ་བྱང་དེ་མཐོང་ནས་དེ་སྡུག་བསྔལ་ཞིང་ཡིད་མི་བདེ་བར་གྱུར་ཏེ། ཁྱིམ་དུ་ཞུགས་ནས་ཅང་མི་སྨྲ་བར་འདུག་གོ །ཆུང་མས་དེ་ལ་སྨྲས་པ། རྗེའི་སྲས་དགྱེས་པ་སྐྱེད་ཅིག །ཁྱོད་ཀྱི་སྲས་བལྟམ་མོ། །དེ་ལྟ་ན་ཡང་དེ་ཅང་མི་སྨྲ་བ་ཁོ་ནར་འདུག་གོ །ཆུང་མས་དེ་ལ་ལན་གསུམ་གྱི་བར་དུ་དེ་སྐད་སྨྲས་ཀྱང་དེ་ཅང་མི་སྨྲ་བ་ཁོ་ནར་འདུག་ནས་ཡང་ཆུང་མས་སྨྲས་པ། རྗེའི་སྲས་ཁྱོད་ཡུན་རིང་པོ་ནས་ཀྱེ་མ་བདག་ལ་བུ་ཡོད་པར་གྱུར་ཅིག་ཅེས་སྨོན་པ་གང་ལགས་པ་དེ་ད་བཙས་ན་ཅིའི་སླད་དུ་ཅང་མི་གསུང་བར་བཞུགས། མཆོག་ཏུ་དགྱེས་པ་
སྐྱེད་ཅིག །དེས་སྨྲས་པ། བཟང་མོ་འདི་ནི་སྐྱེས་ན་ཁོ་བོ་ནི་མ་སྐྱེས་སོ། །རྗེའི་སྲས་ཅི་ནོངས། བཟང་མོ་གནོད་སྦྱིན་ལ་གཏོར་མ་དབུལ་བའི་ཕྱིར་ཁྱིམ་བྱང་འོངས་སོ། །རྗེའི་སྲས་གལ་ཏེ་དེ་ལྟ་ན་ཁྱོད་ཀྱི་སྲས་མཆི་བར་བས་མོད། སྐོལ་ཅག་ཡང་མཇལ་ན་ཁྱོད་ལ་སྲས་མཆིས་པར་འགྱུར་རོ། །བཟང་མོ་འདི་ནི་ཁྲག་གི་ཐིགས་པ་ཡིན་པས་འདི་ཇི་ལྟར་གཏང་བར་བྱ། རྗེའི་སྲས་ཚོགས་པས་ཁྲིམས་སུ་བགྱི་བ་རྣམ་པར་བཞག་པ་ལས་བདག་ཉིད་འགྲོ་བར་བྱ་བའམ། བུ་གཏང་བར་བྱའོ་ཞེས་མི་འབྱུང་ངམ། འདི་ཁྱོད་ཀྱི་སྲས་ལགས་པས་བདག་ཉིད་དང་མཉམ་པའི་སྡུག་པ་གཞན་མ་མཆིས་ཀྱིས་སྲས་འདི་ཐོང་ཤིག །དེས་གལ་ཏེ་ཁྱོད་དགའ་ན་སོང་ཤིག་ཅེས་དང་དུ་བླངས་སོ། །དེ་ནས་ཁྱིམ་བདག་གི་ཆུང་མ་དེས་མཚན་མོའི་མིག་ལམ་ཆད་པ་དང་། མར་མེ་དང་། བདུག་སྤོས་དང་། ཕྲེང་བ་རྒྱུ་དང་། མེ་ཏོག་དག་གིས་མཆོད་པ་བྱས་ནས་ཁ་ཤར་ཕྱོགས་སུ་བལྟས་ཏེ་གསོལ་བ་གདབ་པར་བརྩམས་པ། འཇིག་རྟེན་དགེ་དུལ་ཞི་བ་དང་། །དབང་ཐུལ་རྣམས་ཀྱིས་མི་སྟོང་བས། །བུ་ཡི་དོན་དུ་དེར་འདུད་ཀྱིས། །བདག་གི་བྱིས་པ་བསྐྱབ་ཏུ་གསོལ། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང་། མ་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ་སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས་སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་
དག་པར་འདས་པ། ཡན་ལག་དྲུག་དང་ལྡན་པ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་དབང་སྒྱུར་བ་ལས་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ། མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས་གང་ནི་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་། མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ་མཐོ་རིས་དང་། ཐར་པ་དང་། འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པ་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་
ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། ཁྱེའུ་དེ་ནི་སྔོན་གྱི་སངས་རྒྱས་རྣམས་ལ་བྱ་བ་ལྷག་པར་བྱས་པ་ཡིན་པས་དེ་ལ་ཕན་གདགས་པར་བྱ་ཞིང་། གནོད་སྦྱིན་འབྲོག་གནས་ཀྱང་གདུལ་བར་བྱའོ་སྙམ་དུ་རིག་ནས་མ་ག་དྷཱ་དག་ཏུ་ལྗོངས་རྒྱུ་ཞིང་གཤེགས་ནས་འབྲོག་གནས་སུ་བྱོན་ཏེ་གནོད་སྦྱིན་འབྲོག་གནས་ཀྱི་གནས་སུ་མཚན་མོ་གནས་པར་ཞལ་གྱིས་བཞེས་སོ། །དེའི་ཚེ་ན་གནོད་སྦྱིན་འབྲོག་གནས་གནོད་སྦྱིན་རྣམས་ཀྱི་གནོད་སྦྱིན་འདུ་བར་སོང་བར་གྱུར་ཏོ། །གནོད་སྦྱིན་བོང་བུ་བས་བཅོམ་ལྡན་འདས་གནོད་སྦྱིན་འབྲོག་གནས་ཀྱི་གནས་སུ་མཚན་མོ་གནས་པར་ཞལ་གྱིས་བཞེས་པ་མཐོང་ངོ་། །མཐོང་ནས་ཀྱང་གནོད་སྦྱིན་འབྲོག་གནས་ག་ལ་བ་དེར་སོང་སྟེ་ཕྱིན་ནས་གནོད་སྦྱིན་འབྲོག་གནས་ལ་འདི་སྐད་ཅེས་སྨྲས་སོ། །གྲོང་དཔོན་ཁྱོད་ཀྱི་གནས་སུ་བཅོམ་ལྡན་འདས་མཚན་མོ་གནས་པར་ཞལ་གྱིས་བཞེས་པ་གང་ཡིན་པ་དེ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །གྲོང་དཔོན་མིར་གྱུར་པ་ཡང་བདག་གི་གནས་སུ་མཚན་མོ་གནས་པར་ཁས་ལེན་ཏམ། གྲོང་དཔོན་དེ་དེ་བཞིན་ནོ། །དེ་དེ་བཞིན་ཏེ། འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ། །གྲོང་དཔོན་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་ནམ། འོན་ཏེ་མ་ཡིན་པ་ད་ཤེས་པར་བྱའོ། །དེ་ནས་གནོད་སྦྱིན་འབྲོག་གནས་ཀྱིས་གནོད་སྦྱིན་རྣམས་ཀྱི་གནོད་སྦྱིན་འདུ་བ་ཟིལ་གྱིས་མནན་ནས་རང་གི་གནས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག །བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ་། །དགེ་སྦྱོང་ཞུགས་ཤིག །བཅོམ་ལྡན་འདས་རྒྱགས་པ་དང་། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ལན་
གཉིས་སུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག །བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ་། །དགེ་སྦྱོང་ཞུགས་ཤིག །བཅོམ་ལྡན་འདས་རྒྱགས་པ་དང་། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ལན་གསུམ་དུ་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག །བཅོམ་ལྡན་འདས་ཀྱིས་འདི་ནི་གཞན་གྱིས་ཡོངས་སུ་བཟུང་བའོ་སྙམ་དུ་དགོངས་ནས་སླར་བྱུང་ངོ་། །དགེ་སྦྱོང་ཞུགས་ཤིག །བཅོམ་ལྡན་འདས་རྒྱགས་པ་དང་། ང་རྒྱལ་ངེས་པར་བཅོམ་པའི་ཕྱིར་ཞུགས་སོ། །གནོད་སྦྱིན་འབྲོག་གནས་ཀྱིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སྦྱོང་ཕྱིར་བྱུང་ཤིག །དེ་ནས་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །གྲོང་དཔོན་ཁྱོད་ཀྱིས་ང་ལན་གསུམ་གྱི་བར་དུ་གནས་སུ་སྤྱན་དྲངས་པས་ད་ནི་མི་འབྱུང་ངོ་། །དགེ་སྦྱོང་དེའི་ཕྱིར་ཁྱོད་ལ་དྲི་བ་དྲིས། དྲི་བ་ལན་གདབ་པ་དེས་གལ་ཏེ་ཁོ་བོའི་སེམས་རངས་པར་བྱེད་ན་དེ་ལྟ་ན་ལེགས། གལ་ཏེ་སེམས་རངས་པར་མི་བྱེད་ན་ཁྱོད་ཀྱི་སེམས་གཡེངས་པའམ། སྙིང་དགའས་པའམ། ཁ་ནས་ཁྲག་ཚ་བ་སྐྱུག་པའམ། ལག་པ་གཉིས་ནས་བཟུང་སྟེ་ཆུ་ཀླུང་སྐལ་ལྡན་ཤིང་རྟའི་ཕ་རོལ་གྱི་འགྲམ་དུ་འཕང་བར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་ངས་འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང་བྲམ་ཟེའི་སྐྱེ་དགུ་དང་བཅས་པ། ལྷ་དང་མི་དང་བཅས་པའི་ནང་ན་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སེམས་གཡེངས་པའམ། ཐུགས་དགའས་པའམ། ཞལ་ནས་ཁྲག་ཚ་བ་བསྒྲལ་བའམ། ཕྱག་གཉིས་ནས་བཟུང་སྟེ་ཆུ་ཀླུང་སྐལ་ལྡན་ཤིང་རྟ་པའི་ཕ་རོལ་གྱི་འགྲམ་དུ་འཕེན་པ་ཡང་དག་པར་རྗེས་སུ་མ་མཐོང་གིས་གྲོང་དཔོན་འདི་ལྟར་ཅི་དང་ཅི་འདོད་པ་
ཞུས་ཤིག དེ་ནས་འབྲོག་གནས་ཀྱིས་དེའི་ཚེ་ཚིགས་སུ་བཅད་པ་གསོལ་པ།། །།བར་སྡོམ་ལ། གང་དང་ཇི་ལྟར་དུ་དང་ནི། །གང་ཞིག་རྒལ་དང་ཅི་ཡིས་རྒལ། །འདི་ན་སྐྱེས་བུའི་ནོར་མཆོག་གང་། །ཅི་ཞིག་ལེགས་སྤྱད་བདེ་སྤྱོད་འགྱུར། །རོ་རྣམས་ནང་ན་མངར་མཆོག་ཅི། །ཇི་ལྟར་འཚོ་ན་འཚོ་མཆོག་བསྟན། །བཅོམ་ལྡན་འདས་ཀྱིས་བཀའ་སྩལ་པ། དད་པ་སྐྱེས་བུའི་ནོར་མཆོག་ཡིན། །ཆོས་ལ་ལེགས་སྤྱོད་བདེ་སྤྱོད་འགྱུར། །བདེན་པའི་རོ་རྣམས་མངར་མཆོག་ཡིན། །ཤེས་པས་འཚོ་ན་འཚོ་མཆོག་བསྟན། །གནོད་སྦྱིན་གྱིས་གསོལ་པ། ཇི་ལྟར་གྲགས་དང་ལྡན་པར་འགྱུར། །ལོངས་སྤྱོད་ལྡན་པར་ཇི་ལྟར་འགྱུར། །ཇི་ལྟར་སྙན་པ་ཐོབ་འགྱུར་ཞིང་། །མཛའ་བཤེས་ཇི་ལྟར་རྙེད་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། ཚུལ་ཁྲིམས་ཀྱིས་ནི་གྲགས་ལྡན་འགྱུར། །སྦྱིན་པས་ལོངས་སྤྱོད་ལྡན་པར་འགྱུར། །བདེན་པས་སྙན་པ་ཐོབ་འགྱུར་ཏེ། །སྙིང་རྗེས་མཛའ་བཤེས་རྙེད་པར་འགྱུར། །གནོད་སྦྱིན་གྱིས་གསོལ་པ། དུ་ཞིག་གིས་ནི་འཇིག་རྟེན་འབྱུང་། །དུ་ཡིས་འདྲིས་པ་ཐོབ་པར་འགྱུར། །དུ་ཞིག་གིས་ནི་འཇིག་རྟེན་བཀུར། །དུ་ཡིས་འཇིག་རྟེན་ཟིལ་གནོན་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དྲུག་གིས་འཇིག་རྟེན་འབྱུང་འགྱུར་ཏེ། །དྲུག་གིས་འདྲིས་པ་ཐོབ་པར་འགྱུར། །དྲུག་གིས་འཇིག་རྟེན་བཀུར་འགྱུར་ཏེ། །དྲུག་གིས་འཇིག་རྟེན་ཟིལ་གནོན་འགྱུར། །གནོད་སྦྱིན་གྱིས་གསོལ་པ། གདུགས་མཚན་གཡེལ་བ་མ་མཆིས་པ། །གང་ཞིག་འོང་བ་འདི་ལས་རྒལ། །དམིགས་མེད་རྟེན་པ་མ་མཆིས་པ། །ཟབ་མོར་གང་ཞིག་འབྱེད་མི་འགྱུར། །བཅོམ་ལྡན་འདས་ཀྱིས་བཀའ་སྩལ་པ། རྣམ་ཀུན་ཚུལ་ཁྲིམས་ལྡན་པ་དང་། །ལེགས་མཉམ་བཞག་ཅིང་ཤེས་རབ་ལྡན། །ནང་དུ་སེམས་ཤིང་དྲན་ལྡན་པ། །ཤིན་ཏུ་རྒལ་དཀའ་འདི་ལས་རྒལ། །འདོད་པའི་འདུ་ཤེས་ཆགས་བྲལ་ཞིང་། །གཟུགས་ཀྱི་ཀུན་སྦྱོར་མཐར་གྱུར་པ། །དེ་ནི་དམིགས་མེད་རྟེན་
མེད་པའི། །ཟབ་མོར་འབྱིང་བར་མི་འགྱུར་རོ། །གནོད་སྦྱིན་གྱིས་གསོལ་པ། ཅི་ཡིས་འོད་པ་རྒལ་བར་འགྱུར། །ཅི་ཞིག་གིས་ནི་རྒྱ་མཚོ་རྒལ། །ཅི་ཡིས་སྡུག་བསྔལ་སྤོང་བར་འགྱུར། །ཅི་ཞིག་གིས་ནི་ཡོངས་དག་འགྱུར། །བཅོམ་ལྡན་འདས་ཀྱིས་བཀའ་སྩལ་པ། དད་པས་འོད་པ་རྒལ་བར་འགྱུར། །བག་ཡོད་པས་ནི་རྒྱ་མཚོ་རྒལ། །བརྩོན་པས་སྡུག་བསྔལ་སྤོང་བར་འགྱུར། །ཤེས་རབ་ཀྱིས་ནི་ཡོངས་དག་འགྱུར། །བདེན་དུལ་གཏོང་བ་མ་གཏོགས་པའི། །ཆོས་གཞན་འབའ་ཞིག་ཡོད་དམ་ཞེས། །དགེ་སྦྱོང་བྲམ་ཟེ་སོ་སོ་ལ། །གཞན་དང་གཞན་དུ་ཁྱོད་དྲིས་ཤིག །གནོད་སྦྱིན་གྱིས་གསོལ་པ། དགེ་སྦྱོང་བྲམ་ཟེ་སོ་སོ་ལ། །ཅི་སླད་བཞིན་དུ་བདག་འདྲི་བགྱིད། །འདི་ལྟར་དཔའ་ཆེན་ཁྱོད་ཀྱིས་ནི། །ཆོས་འདི་ལེགས་པར་རབ་ཏུ་བཤད། །ཀྱེ་མ་གནོད་སྦྱིན་བོང་བུ་པ། །གང་གིས་དེད་དཔོན་བླ་ན་མེད། །སངས་རྒྱས་བདག་ལ་བསྟན་གྱུར་པ། །ཁྱོད་ལ་ཁོ་བོ་བྱས་པ་གཟོ། །འདི་ནས་ཁོ་བོ་གྲོང་ནས་གྲོང་། །ཁྱིམ་ནས་ཁྱིམ་དུ་རྫོགས་སངས་དང་། །ཆོས་ཀྱི་ཆོས་ཉིད་བཟང་པོ་ལ། །འདུད་བཞིན་དུ་ནི་སྤྱད་པར་བྱ། །དེ་ནས་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །བཞིན་བཟངས་ཁྱོད་ཀྱིས་དགེ་སློང་ཤཱ་རིའི་བུ་དང་། མཽད་གལ་གྱི་བུ་གཉིས་ཟན་བྱིན་པས་སུམ་བཅུ་རྩ་གསུམ་པའི་ལྷ་རྣམས་ཀྱི་ནང་དུ་སྐྱེ་བར་བྱ་བ་ལས་ཁྱོད་ཀྱིས་སྨོན་ལམ་ལོག་པ་བཏབ་པས་གནོད་སྦྱིན་གདུག་པ་རྣམས་ཀྱི་ནང་དུ་སྐྱེས་ཏེ། ད་ལྟར་དྲག་ཤུལ་ཅན། ལག་པ་ཁྲག་གིས་གོས་པ། ཉམས་པ་དང་རབ་ཏུ་ཉམས་པ་ལ་ཞེན་པ། གཞན་གྱི་སྲོག་འཕྲོག་པ། གཞན་གྱི་སྲོག་གཅོད་པས་འཚོ་བར་བྱེད་དེ། འདི་ནས་ཤི་འཕོས་ན་ཁྱོད་ཀྱི་འགྲོ་བ་ནི་ཅིར་འགྱུར། སྐྱེ་བ་ནི་ཅིར་འགྱུར། ཚེ་ཕྱི་མ་ནི་ཅིར་འགྱུར། དེས་གསོལ་པ། བཅོམ་ལྡན་འདས་བདག་གིས་ཅི་བགྱི་བ་བཀའ་སྩལ་དུ་གསོལ། བཞིན་བཟངས་ཚུར་ཤོག །ཁྱོད་ངའི་སྤྱན་སྔར་སྐྱབས་སུ་འགྲོ་བ་དང་། བསླབ་
པའི་གཞི་དག་ལོང་ལ་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་བྱིན་ཅིག །བཙུན་པ་བདག་བཅོམ་ལྡན་འདས་ཀྱི་སྤྱན་སྔར་སྐྱབས་སུ་མཆི་བ་དང་། བསླབ་པའི་གཞི་དག་ལེན་ཅིང་དེང་སླན་ཅད་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་སྩོལ་ཏོ། །དེས་བཅོམ་ལྡན་འདས་ཀྱི་སྤྱན་སྔར་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་ཏེ། དེས་བསླབ་པའི་གཞི་དག་བླངས་ནས་ཚིགས་སུ་བཅད་པ་སྨྲས་པ། ཀྱེ་མ་སྟོན་པ་བདག་དོན་དུ། །སྡུམ་པར་ཡང་དག་གཤེགས་གྱུར་ཏེ། །བདག་གིས་དེ་རིང་ཕྱི་མ་ཡི། །དོན་ནི་རབ་ཏུ་ཤེས་པར་གྱུར། །དེ་ནས་ཁྱིམ་བདག་དེས་བ་ལང་དྲུག་དང་ལྡན་པའི་ཤིང་རྟ་ཟས་ཀྱིས་བཀང་སྟེ་ཁྱེའུ་དེ་ཡང་ཤིང་རྟར་བཅུག་ནས་བྲོ་དང་། གླུ་དང་རོལ་མོའི་སྒྲས་གནོད་སྦྱིན་གྱི་དྲུང་དུ་འཕགས་པ་དང་། བྲམ་ཟེ་དང་། ཁྱིམ་བདག་ཁ་ཅིག་གིས་ཐོས་ནས་སྨྲས་པ། ཤེས་ལྡན་དག་བྲོ་དང་། གླུ་དང་། རོལ་མོའི་སྒྲ་འདི་ཅི་ཡིན། ཁ་ཅིག་གིས་སྨྲས་པ། ཁྱེད་ཀྱིས་མི་ཤེས་སམ། འདི་ནི་ཁྲག་གི་ཐིགས་པ་དེ་གནོད་སྦྱིན་གྱི་གན་དུ་ཁྱེར་བ་ཡིན་ནོ། །སྐྱེ་བོ་ཕལ་པོ་ཆེའི་ཚོགས་འདུས་ཏེ་སྨྲས་པ། ཤེས་ལྡན་དག་ཁྲག་གི་ཐིགས་པ་འདིས་གནོད་སྦྱིན་མི་མགུ་བས་གལ་ཏེ་འདི་མ་བཟློག་ན་གདོན་མི་ཟ་བར་གནོད་སྦྱིན་འཁྲུགས་པར་འགྱུར་ཞིང་། བདག་ཅག་ཐམས་ཅད་ལ་གནོད་པར་བྱེད་པར་འགྱུར་གྱིས། འདི་བཟློག་པར་བྱའོ་ཞེས་དེ་དག་གིས་དེ་བཟློག་པར་བརྩམས་པ་དང་། དེས་སྨྲས་པ། ཤེས་ལྡན་དག་ཚོགས་ཀྱིས་ཁྲིམས་སུ་བྱ་བ་བཅས་པ་ལས་བདག་ཉིད་འགྲོ་བར་བྱ་བའམ། བུ་གཏང་བར་བྱའི་ཞེས་འབྱུང་བས་འདི་ཁོ་བོའི་བུ་ཡིན་ན་ཅིའི་ཕྱིར་ཟློག་པར་བྱེད། མི་ལྡོག་པར་འགྲོའོ། །དེ་དག་ཅང་མི་སྨྲ་བར་འཁོད་དོ། །བཅོམ་ལྡན་འདས་ཀྱིས་བྲོ་དང་། གླུ་དང་རོལ་མོའི་སྒྲ་དེ་གསན་ཏོ། །གསན་ནས་ཀྱང་གནོད་སྦྱིན་འབྲོག་གནས་ལ་བཀའ་སྩལ་པ། གྲོང་དཔོན་བྲོ་དང་། གླུ་དང་རོལ་མོའི་སྒྲ་འདི་ཅི་ཡིན། བཙུན་པ་བདག་དམ་པ་མ་ལགས་པའི་ཆོས་སྡིག་པ་དེ་
ལས་སླར་ལོག་ཀྱང་སྐྱེ་བོ་དག་གིས་ད་དུང་དེ་བཞིན་དུ་འཛིན་པར་བགྱིད་ན་ཇི་ལྟར་བསྒྲུབ་པར་བགྱི་མ་འཚལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་འདི་ཅི་ཡིན། དེས་ཇི་ལྟར་གྱུར་པ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གྲོང་དཔོན་དེང་ཟས་དང་། སྐོམ་ལོང་ལ་མི་ཡང་མ་ལེན། གླང་ཡང་མ་ལེན་ཅིག །དེས་བསམས་པ། འོངས་ཀྱང་རུང་གིས་བདག་གི་ཟན་ཐ་མ་འདི་བཅོམ་ལྡན་འདས་ལ་བསོད་སྙོམས་དབུལ་ལོ་སྙམ་མོ། །ཁྱིམ་བདག་དེས་ཁྱེའུ་དེ་ཤིང་རྟ་ནས་ཕྱུང་སྟེ་གནོད་སྦྱིན་ལ་བྱིན་ནོ། །གནོད་སྦྱིན་གྱིས་ཀྱང་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་ཀྱང་ཕ་ལ་སྩལ་ཏོ། །དེ་ནས་ཕས་གསོལ་པ། བཅོམ་ལྡན་འདས་ཁྱེའུ་འདི་མིང་ཅིར་གདགས། བཅོམ་ལྡན་འདས་ཀྱིས་ཚིགས་སུ་བཅད་པའི་དབྱངས་ཀྱིས་བཀའ་སྩལ་པ། བྱིས་པ་གང་ཚེ་གནོད་སྦྱིན་གྱི། །ལག་ནས་ང་ཡི་ལག་ཏུ་ཐོབ། །ང་ཡི་ལག་ནས་ཕ་ཡི་ལག །དེ་ཡི་ཕྱིར་ན་ལག་བརྒྱུད་ཡིན། །དེའི་མིང་ལག་བརྒྱུད་ཅེས་བྱ་བར་བཏགས་སོ། །ཁྱིམ་བདག་དེས་དེ་ཁྱེར་ཏེ་འབྲོག་གནས་སུ་སོང་བ་དང་། སྐྱེ་བོའི་ཚོགས་ཀྱིས་མཐོང་ནས་སྨྲས་པ། ཤེས་ལྡན་དག་འདི་འདི་ལྟར་གྱུར་ཅིང་། ཁྲག་གི་ཐིགས་པ་དེ་ཁྱེར་ཏེ་འོངས་པ་ལས་ན། གོར་མ་ཆག་པར་འདིས་གནོད་སྦྱིན་འཁྲུགས་པར་བྱས་སོ། །དེས་སྨྲས་པ། ཤེས་ལྡན་དག་གནོད་སྦྱིན་ག་ལ་འཁྲུགས་ཏེ། བཅོམ་ལྡན་འདས་ཁྱེའུ་འདི་ལ་ཐུགས་བརྩེ་བའི་སླད་དུ་དེའི་གནས་སུ་མཚན་མོ་གནས་པར་ཞལ་གྱིས་བཞེས་ནས། བཅོམ་ལྡན་འདས་ཀྱིས་དེ་བཏུལ་ཏེ་སྐྱབས་སུ་འགྲོ་བ་དང་བསླབ་པའི་གཞི་དག་ལ་བཞག་ནས། དེས་འབྲོག་གནས་ན་གནས་པའི་སྐྱེ་བོའི་ཚོགས་ལ་མི་འཇིགས་པ་བྱིན་གྱིས་འཚེར་འགྲིབ་མེད་པར་གྱིས་ཤིག །དེ་དག་ཤིན་ཏུ་དགའ་སྟེ་སྨྲས་པ། ཁྱེའུ་འདི་སྐྱེས་མ་ཐག་ཏུ་གནོད་སྦྱིན་འབྲོག་གནས་བཏུལ་བས་ཁྱེའུ་འདིའི་མིང་ལག་བརྒྱུད་འབྲོག་གནས་ཞེས་བྱའོ་ཞེས་དེའི་མིང་ལག་བརྒྱུད་འབྲོག་གནས་ཞེས་བྱ་བར་བཏགས་སོ། །དེ་
ཆེན་པོར་གྱུར་ནས་ཡི་གེ་དང་ཡིག་འབྲུ་དག་དང་། སྒྱུ་རྩལ་གཞན་དག་ལ་ཡང་ཤིན་ཏུ་མཁས་པར་གྱུར་ཏོ། །གང་གི་ཚེ་སྔོ་བསངས་ཅན་མགོ་བསྒྱུར་རན་པར་གྱུར་པ་དེའི་ཚེ་ན་དེ་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་དེད་དཔོན་དག་དང་། ཤཱཀྱ་དག་དང་། ཀཽ་དྱ་དག་དང་། ལིཙྪ་བཱི་དག་དང་། གཞན་ཡང་མང་པོ་དག་ལྷགས་པར་གྱུར་ནས། ཁྱིམ་བདག་གདངས་ཅན་འདི་སྙམ་དུ་མང་པོ་དག་སྔོ་བསངས་ཅན་སློང་སྟེ། གང་དག་ལམ་བྱིན་པ་དེ་དག་བདག་གི་དགྲ་བོར་འགྱུར་རོ་སྙམ་ནས་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་གོ །སྔོ་བསངས་ཅན་གྱིས་དེ་མཐོང་ནས་སྨྲས་པ། ཡབ་ཁྱོད་ཅིའི་སླད་དུ་ཕྱག་ལ་ཞལ་གཏད་དེ་སེམས་ཁོང་དུ་ཆུད་ཅིང་བཞུགས། དེས་སྨྲས་པ། བུ་མོ་ཁྱོད་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཤཱཀྱ་དག་དང་། ཀཽ་དྱ་དག་དང་། ལིཙྪ་བཱི་དག་དང་། གཞན་ཡང་མང་པོ་དག་ལྷགས་པས་གང་དག་ལ་ཁྱོད་མ་བྱིན་པ་དེ་དག་ངའི་དགྲར་འགྱུར་ན། ཁོ་བོ་ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་མི་འདུག་ཏུ་རུང་། དེས་སྨྲས་པ། ཡབ་གལ་ཏེ་དེ་ལྟ་ན་མི་དགྱེས་པར་མ་མཛད་ཅིག་དང་། དེང་ནས་གདུགས་བདུན་ན་ངན་བུ་རང་གིས་གནས་བཙལ་བར་བགྱིའོ། །དེས་སྨྲས་པ། བུ་མོ་དེ་ལྟར་གྱིས་ཤིག །འོན་ཀྱང་རེ་ཞིག་ལྷ་ལ་ཞུ་བར་བྱའོ་ཞེས་དེ་བད་སའི་རྒྱལ་པོ་ཤར་པའི་གན་དུ་སོང་སྟེ་སྨྲས་པ། ལྷ་དེང་ནས་གདུགས་བདུན་ན་སྔོ་བསངས་ཅན་རང་གིས་གནས་ཚོལ་བར་འགྱུར་གྱིས་ལྷས་གནང་བར་མཛོད་ཅིག །རྒྱལ་པོས་བསམས་པ། དེས་ང་མ་གཏོགས་པ་གཞན་སུ་ཞིག་ལ་གནས་ཚོལ་བར་འགྱུར་སྙམ་ནས་གནང་ངོ་། །དེས་གནང་ནས་བློན་པོ་རྣམས་ལ་བསྒོ་བ། ཤེས་ལྡན་དག་གྲོང་ཁྱེར་མཛེས་པར་བྱེད་དུ་ཆུག་ལ། འདི་སྐད་ཅེས་དེང་ནས་ཉི་མ་བདུན་ནས་སྔོ་བསངས་ཅན་རང་གིས་གནས་ཚོལ་བར་འགྱུར་རོ་ཞེས་དྲིལ་སྒྲོགས་ཤིག །བློན་པོ་རྣམས་ཀྱིས་གྲོང་ཁྱེར་དེ་རྡོ་བ་དང་། གསེག་མ་དང་། གྱོ་མོ་མེད་པར་རྣམ་
པར་བཞག་ནས་ཙན་དན་གྱི་ཆུས་ཆག་ཆག་བཏབ་སྟེ། བདུག་སྤོས་དྲི་ཞིམ་པོའི་སྣོད་ཉེ་བར་བཞག་ནས་དར་གྱི་ཆུན་པོ་དཔྱངས་ཏེ། རྒྱལ་མཚན་དང་། བ་དན་བསྒྲེངས་ནས་མེ་ཏོག་སྣ་ཚོགས་བཀྲམ་སྟེ། ལྷའི་སྐྱེད་མོས་ཚལ་ལྟར་དགའ་བར་འགྱུར་བར་བྱས་ནས་དྲིལ་བསྒྲག་པ་བྱེད་དུ་བཅུག་སྟེ། འདི་སྐད་ཅེས་ཀཽ་ཤཱམྦཱི་ན་གནས་པ་དང་། ཕོ་བྲང་འཁོར་གྱི་མི་དང་། ཡུལ་ཐ་དད་པ་དག་ནས་ལྷགས་པའི་སྐྱེ་བོའི་ཚོགས་ཤེས་ལྡན་དག་ཉོན་ཅིག །དེང་ནས་ཉི་མ་བདུན་ན་སྔོ་བསངས་ཅན་རང་གིས་གནས་ཚོལ་བར་འགྱུར་གྱིས། དེའི་ཕྱིར་ཁྱེད་ཅག་གིས་འབྱོར་པ་ཇི་ལྟ་བ་བཞིན་དུ་འདུ་བར་བྱའོ་ཞེས་བསྒོའོ། །དེ་ནས་སྲོག་ཆགས་འབུམ་ཕྲག་དུ་མ་དག་འདུས་པར་གྱུར་པ་ན་ཉི་མ་བདུན་པ་ལ་སྔོ་བསངས་ཅན་རྒྱན་ཐམས་ཅད་ཀྱིས་བཀླུབས་ཏེ། ཤིང་རྟ་ལ་ཞོན་ནས་མེ་ཏོག་ཕྲེང་གི་ཆུན་པོ་ཐོགས་ཏེ་ཕྱིར་བྱུང་ནས་སྐྱེ་བོ་ཕལ་པོ་ཆེའི་ཚོགས་ལ་བརྟག་པར་བརྩམས་པ་དང་། བད་སའི་རྒྱལ་པོ་ཤར་པ་འདི་སྙམ་དུ། འདིས་གོར་མ་ཆག་པར་བདག་གི་སྟེང་དུ་མེ་ཏོག་ཕྲེང་གི་ཆུན་པོ་འཕེན་པར་འགྱུར་རོ་སྙམ་ནས། སེམས་བསྡུས་ཏེ་བག་ཡོད་པར་རྟོག་ཅིང་འདུག་གོ །སྔོ་བསངས་ཅན་གྱིས་ཀུན་དུ་སྐྱེ་བོའི་ཚོགས་ལ་རྣམ་པར་བལྟས་ནས་དྲིས་པ། ཤེས་ལྡན་དག་གླང་པོ་ཆེའི་རྒྱབ་ཏུ་ཞོན་པ་འདི་དག་གང་གང་ཡིན། དེ་དག་གིས་སྨྲས་པ། འདི་ནི་རྒྱལ་པོ་གཟུགས་ཅན་སྙིང་པོའོ། །འདི་ནི་རྒྱལ་པོ་གསལ་རྒྱལ་ལོ། །འདི་ནི་རྒྱལ་པོ་ཚངས་བྱིན་ནོ། །འདི་ནི་བད་སའི་རྒྱལ་པོ་ཤར་པའོ། །དེ་བཞིན་དུ་ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀཽ་དྱ་དག་དང་། ཤཱཀྱ་དག་དང་། ལིཙྪ་བཱི་དག་དང་། གཞན་ཡང་མང་པོ་ཐམས་ཅད་སོ་སོར་དྲིས་ནས། དེའི་འོག་ཏུ་སྨྲས་པ། ཤེས་ལྡན་དག་ལག་བརྒྱུད་འབྲོག་གནས་ཞེས་བྱ་བ་གང་ཡིན་པ་བཅོམ་ལྡན་འདས་ཀྱིས་གནོད་སྦྱིན་ལས་ཐར་བར་བྱས་པ་དེ་འདིར་ཤོག་ཤིག །སྐྱེ་བོའི་ཚོགས་ཀྱིས་སྨྲས་པ། དེ་མ་འོངས་སོ། །དེ་ཕྱོགས་གང་ན་འདུག །ག་གེ་མོ་ཞིག་ནའོ། །དེས་དེའི་ཕྱོགས་སུ་ཁ་བལྟས་ཏེ། དེ་བདག་གི་
ཁྱིམ་ཐབ་ཡིན་ནོ་ཞེས་མེ་ཏོག་ཕྲེང་གི་ཆུན་པོ་འཕངས་པ་དང་། རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀཽ་དྱ་དག་དང་། ཤཱཀྱ་དག་དང་། ལིཙྪ་བཱི་དག་དང་། གཞན་ཡང་མང་པོ་འདུས་པ་དག་ཕྱིར་ཕྱོགས་ཏེ་རང་རང་གི་ཡུལ་དུ་དོང་ངོ་། །ཁྱིམ་བདག་གདངས་ཅན་བག་ཚ་ཞིང་ཡིད་མི་བདེ་ནས་སྔོ་བསངས་ཅན་ལ་སྨྲས་པ། བུ་མོ་གལ་ཏེ་ཁྱོད་ཀྱིས་ལག་བརྒྱུད་བདམས་པས་ཁོ་བོ་ལ་རྒྱལ་པོ་དག་གནོད་པ་བྱེད་པར་གྱུར་ན་མི་རུང་གིས་མྱུར་དུ་སོང་ཤིག །དེས་སྨྲས་པ། ཡབ་མ་ནོངས་ཀྱིས་དེ་བཞིན་བགྱིའོ། །ཁྱིམ་བདག་གདངས་ཅན་གྱིས་དེ་བཞོན་པ་བཟང་པོ་སྦྱར་ཏེ་རྒྱན་རྣམ་པ་སྣ་ཚོགས་ཀྱིས་བརྒྱན་ནས་འཁོར་དང་བཅས་ཏེ་འབྲོག་གནས་སུ་བཏང་ངོ་། །དེའི་སྐབས་སུ་སངས་རྒྱས་བཅོམ་ལྡན་འདས་རྣམས་ལ་ནི་མི་མཁྱེན་པ་དང་། མ་གཟིགས་པ་དང་། མ་རིག་པ་དང་། རྣམ་པར་མི་མཁྱེན་པ་ཅུང་ཟད་ཀྱང་མི་མངའ་བས་ཐུགས་རྗེ་ཆེན་པོ་དང་ལྡན་པ། འཇིག་རྟེན་ལ་ཕན་པར་ཞུགས་པ། སྲུང་བ་གཅིག་པུ་པ། ཉག་གཅིག་དཔའ་བ། གཉིས་པ་མེད་པ། གཉིས་སུ་མི་གསུང་བ། ཞི་གནས་དང་ལྷག་མཐོང་གིས་བཞུགས་པ། རིག་པ་གསུམ་གསལ་བར་མཛད་པ། བསླབ་པ་གསུམ་ལ་ལེགས་པར་བསླབས་པ། དུལ་བའི་གནས་གསུམ་གྱི་གཞི་ལ་མཁས་པ། ཆུ་བོ་བཞི་ལས་རྒལ་བ། རྫུ་འཕྲུལ་གྱི་རྐང་པ་བཞིས། སྤྱོད་པའི་གཞི་ལ་ལེགས་པར་གནས་པ། བསྡུ་བའི་དངོས་པོ་བཞི་ལ་ཡུན་རིང་པོ་ནས་ཡོངས་སུ་སྦྱང་བ་མཛད་པ། མི་འཇིགས་པ་བཞིས་བསྙེངས་པ་མི་མངའ་བ། ཡན་ལག་ལྔ་སྤངས་པ། འགྲོ་བ་ལྔ་ལས་ཡང་དག་པར་འདས་པ་ཡན་ལག་དྲུག་དང་ལྡན་པ། ཕ་རོལ་དུ་ཕྱིན་པ་དྲུག་ཡོངས་སུ་རྫོགས་པ། རྟག་ཏུ་གནས་པ་དྲུག་གིས་གནས་པ། བྱང་ཆུབ་ཀྱི་ཡན་ལག་བདུན་གྱི་མེ་ཏོག་གིས་ཕྱུག་པ། ལམ་གྱི་ཡན་ལག་བརྒྱད་སྟོན་པ། མཐར་གྱིས་སྙོམས་པར་འཇུག་པ་དགུ་ལ་མཁས་པ། སྟོབས་བཅུའི་སྟོབས་དང་ལྡན་པ། ཕྱོགས་བཅུར་སྙན་པས་ཡང་དག་པར་རྒྱས་པ། བརྒྱ་ཕྲག་བཅུར་
དབང་སྒྱུར་བ་ལ་ཁྱད་པར་དུ་འཕགས་པ་རྣམས་ཀྱི་ཆོས་ཉིད་ནི་ཉིན་ལན་གསུམ་མཚན་ལན་གསུམ་སངས་རྒྱས་ཀྱི་སྤྱན་གྱིས་འཇིག་རྟེན་ལ་རྣམ་པར་གཟིགས་ནས། གང་ནི་ཉམས་པར་གྱུར། གང་ནི་འཕེལ་བར་གྱུར། གང་ནི་གནོད་པར་གྱུར། གང་ནི་ཉམ་ང་བར་གྱུར། གང་ནི་མི་བདེ་བར་གྱུར། གང་ནི་གནོད་པ་དང་། ཉམ་ང་བ་དང་མི་བདེ་བར་གྱུར། གང་ནི་ངན་སོང་ལ་གཞོལ། གང་ནི་ངན་སོང་ལ་འབབ། གང་ནི་ངན་སོང་ལ་བབ། ངས་གང་ནི་ངན་སོང་གི་ལམ་ནས་བསླང་སྟེ་མཐོ་རིས་དང་། ཐར་པ་དང་འབྲས་བུ་ལ་གཞག་པར་བྱ། འདོད་པའི་འདམ་དུ་བྱིང་བ་གང་གི་ལག་ནས་ནི་དྲང་བར་བྱ། འཕགས་པའི་ནོར་གྱི་དབྱིག་དང་བྲལ་བ་གང་ནི་འཕགས་པའི་ནོར་གྱི་དབང་ཕྱུག་ལ་གཞག་པར་བྱ། གང་གི་སངས་རྒྱས་འབྱུང་བས་བརྒྱན་པའི་འཇིག་རྟེན་ནི་འབྲས་བུ་དང་བཅས་པར་བྱ། གང་གི་དགེ་བའི་རྩ་བ་དག་མ་བསྐྱེད་པ་ནི་བསྐྱེད་པར་བྱ། གང་གི་དགེ་བའི་རྩ་བ་དག་བསྐྱེད་པ་ནི་ཡོངས་སུ་སྨིན་པར་བྱ། ཡོངས་སུ་སྨིན་པ་གང་ནི་རྣམ་པར་གྲོལ་བར་བྱ་ཞེས་མཁྱེན་པ་དང་གཟིགས་པ་འཇུག་གོ །སྨྲས་པ། ཆུ་སྲིན་གནས་ཀྱི་དུག་ཅན་པ། །དུས་ལས་འདའ་བར་འགྱུར་སྲིད་ཀྱི། །སངས་རྒྱས་གདུལ་ལ་བྱམས་པ་ནི། །དུས་ལས་འདའ་བར་མི་འགྱུར་རོ། །ཇི་ལྟར་མ་ནི་བུ་སྡུག་གཅིག་པུ་ལ། །རྟོག་ཅིང་དེ་སྲོག་སྲུང་བར་བྱེད་པ་ལྟར། །དེ་བཞིན་གཤེགས་པའང་གདུལ་བའི་སྐྱེ་བོ་ལ། །རྟོག་པར་མཛད་ཅིང་དེ་སྲོག་སྲུང་བར་མཛད། །ཀུན་མཁྱེན་རྒྱུད་ལ་མངའ་བའི་ཐུགས་རྗེ་ཡི། །བཞོན་མ་གདུལ་བའི་བེའུ་ཚོལ་མི་སྐྱོ་སྟེ། །སྲིད་དང་ངན་འགྲོས་ཉམས་ལ་བྱམས་པ་ནི། །རབ་ཉམས་བེའུ་ལ་བྱམས་པའི་བ་བཞིན་ནོ། །བཅོམ་ལྡན་འདས་ཀྱིས་དགོངས་པ། གལ་ཏེ་ལག་བརྒྱུད་འབྲོག་གནས་ཀྱིས་བདེན་པ་མ་མཐོང་བར་སྔོ་བསངས་ཅན་མཐོང་བར་གྱུར་ན་བདེན་པ་དག་གི་སྣོད་དུ་མི་འགྱུར་གྱིས། དེ་ལ་ཕན་གདགས་པའི་ཕྱིར་འབྲོག་གནས་སུ་འགྲོའོ་སྙམ་དུ་རིག་ནས། མ་ག་དྷཱ་དག་ཏུ་ལྗོངས་རྒྱུ་ཞིང་གཤེགས་པ་ན་འབྲོག་གནས་སུ་བྱོན་ནས་འབྲོག་གནས་སུ་མཚན་མོ་བ་ལང་
གི་ལམ་དུ་རྩྭ་བཏིང་བ་ལ་གནས་པར་ཞལ་གྱིས་བཞེས་སོ། །བ་ལང་རྫི་དག་དང་། ཕྱུགས་རྫི་དག་དང་། རྩྭ་ཐུན་དག་དང་། ཤིང་ཐུན་དག་དང་། ལམ་གྱིས་འཚོ་བ་དག་དང་། ལམ་གོལ་བས་འཚོ་བའི་མི་དག་གིས་བཅོམ་ལྡན་འདས་མཚན་མོ་བ་ལང་གི་ལམ་ན་རྩྭ་བཏིང་བ་ལ་གནས་པར་ཞལ་གྱིས་བཞེས་པ་མཐོང་ངོ་། །མཐོང་ནས་ཀྱང་མྱུར་བ་མྱུར་བར་ལག་བརྒྱུད་འབྲོག་གནས་ཀྱི་གན་དུ་དོང་སྟེ་སྨྲས་པ། ཁྱིམ་བདག་གང་གིས་ཁྱོད་གནོད་སྦྱིན་ལས་ཐར་བར་མཛད་པའི་བཅོམ་ལྡན་འདས་དེ་འབྲོག་གནས་སུ་བྱོན་ནས་མཚན་མོ་བ་ལང་གི་ལམ་ན་རྩྭ་བཏིང་བ་ལ་གནས་པར་ཞལ་གྱིས་བཞེས་སོ། །ལག་བརྒྱུད་འབྲོག་གནས་ཀྱིས་བསམས་པ། གལ་ཏེ་སང་འགྲོ་བར་བྱ་ན། བཅོམ་ལྡན་འདས་གཞན་དུ་གཤེགས་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་ང་ཉིད་འགྲོའོ་སྙམ་དུ་རིག་ནས། མྱུར་བ་མྱུར་བར་འཕགས་པ་དང་ཇི་ཙམ་ན་སྒོ་ཆོད་དོ། །དེའི་སྐབས་སུ་སྔོ་བསངས་ཅན་ཡང་སྒོ་དྲུང་དུ་ཕྱིན་པ་དང་། དེས་ཀྱང་ནང་དུ་མ་ཆུད་དེ་སྒོ་དྲུང་དུ་མཚན་མོ་གནས་པར་ཁས་བླངས་སོ། །ནམ་ནངས་ནས་ལག་བརྒྱུད་འབྲོག་གནས་མྱུར་བ་མྱུར་བ་ཁོ་ནར་ཤིང་རྟ་ལ་ཞོན་ཏེ་འབྲོག་གནས་ནས་ཕྱིར་བྱུང་བ་དང་། སྔོ་བསངས་ཅན་ཡང་ཤིང་རྟ་ལ་ཞོན་ཏེ། ནང་དུ་འཇུག་པ་ན་ལག་བརྒྱུད་འབྲོག་གནས་ཀྱིས་སྨྲས་པ། ཤིང་རྟ་ཟུར་ཅིག །སྔོ་བསངས་ཅན་གྱིས་ཀྱང་སྨྲས་པ། ཁྱོད་ཀྱི་ཤིང་རྟ་ཟུར་ཅིག །དེས་ཀྱང་མ་བཟུར། ཅིག་ཤོས་ཀྱིས་ཀྱང་མ་བཟུར་ནས། སྔོ་བསངས་ཅན་གྱིས་བརྟགས་ཏེ་སྨྲས་པ། ཁྱོད་ལག་བརྒྱུད་འབྲོག་གནས་ཡིན་ནམ། དེས་སྨྲས་པ། ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །ལག་བརྒྱུད་འབྲོག་གནས་ཀྱིས་ཀྱང་སྨྲས་པ། ཁྱོད་ཀྱང་སྔོ་བསངས་ཅན་ཡིན་ནམ། དེས་ཀྱང་སྨྲས་པ། བདག་སྐྱེ་བོ་དག་གིས་དེ་ལྟར་ཤེས་སོ། །ལག་བརྒྱུད་འབྲོག་གནས་ཀྱིས་སྨྲས་པ། ཁོ་བོ་བཅོམ་ལྡན་འདས་ཀྱི་སྤྱན་སྔར་འགྲོས་ཤིང་རྟ་ཟུར་ཅིག །ཁྱོད་ཀྱང་རེ་ཞིག་ཁྱིམ་དུ་སོང་ཤིག །སྔོ་བསངས་ཅན་གྱིས་སྨྲས་པ། སྐྱེས་བུ་དམ་པའི་གན་དུ་སོང་ཤིག་ཅེས་སྔོ་བསངས་
ཅན་གྱི་ཤིང་རྟ་མཐའ་གཅིག་ཏུ་བཟུར་ཏོ། །ལག་བརྒྱུད་འབྲོག་གནས་ཀྱང་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་ཁྱིམ་བདག་གི་སོ་སོར་ཀུན་དགའ་བར་བྱ་བས། བཅོམ་ལྡན་འདས་ཇི་ལྟ་བདེ་བར་གཟིམས་སམ་ཞེས་སོ་སོར་ཀུན་དགའ་བར་བྱས་སོ། །དེ་ནས་བཅོམ་ལྡན་འདས་ཀྱིས་ལག་བརྒྱུད་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །ལག་བརྒྱུད་འཇིག་རྟེན་ན་གང་དག་བདེ་བར་ཉལ་བར་བྱེད་པ་དེ་དག་གི་ནང་ན་ང་ཡང་འགའ་ཞིག་ཡིན་ནོ། །བཙུན་པ་དོག་ས་སྲ་ཞིང་བ་ལང་གི་རྩིད་པའི་གཞི་ཅན་དུ་རས་སྲབ་མོའི་གདན་བཤམས་ཤིང་དགུན་སྨད་ཀྱི་དུས་ཀྱི་ཚེ་ཚེས་བརྒྱད་ཀྱི་བར་ལ་འོད་མ་འགས་པའི་བསེར་མ་དག་ལྡང་ལ། ཁྱོད་ཀྱི་ན་བཟའ་ངུར་སྨྲིག་འདི་དག་ནི་སྲབ་པས་སྐུ་ཡོངས་སུ་གདུང་བར་བགྱིད་ཀྱང་། བཅོམ་ལྡན་འདས་དེ་སྐད་ཅེས་འཇིག་རྟེན་ན་གང་དག་བདེ་བར་ཉལ་བར་བྱེད་པ་དེ་དག་གི་ནང་ན་ང་ཡང་འགའ་ཞིག་ཡིན་ནོ་ཞེས་གསུང་ངམ། ལག་བརྒྱུད་དེའི་ཕྱིར་ཁྱོད་ཉིད་ལ་དྲིས། ཁྱོད་ཀྱིས་ཇི་ལྟར་བཟོད་པ་དེ་ལྟར་ལན་ཐོབ་ཤིག །ལག་བརྒྱུད་འདི་ལྟ་སྟེ་དཔེར་ན་འདི་ན་ཁྱིམ་བདག་གམ། ཁྱིམ་བདག་གི་བུ་ཕྱུག་པ། ནོར་མང་བ། ལོངས་སྤྱོད་ཆེ་བ་འགའ་ཞིག་ཡོད་པར་གྱུར་ལ། དེའི་དོན་དུ་ཁང་བཟངས་རྩིག་ཏུ་བཅུག་ཅིང་ཁང་བཟངས་དེར་ཁང་པ་བརྩེགས་པ་རྩིག་ཏུ་བཅུག་ལ། ཁང་པ་བརྩེགས་པ་དེར་ཁྲི་ཤུར་བུས་བླས་པ་སྟན་སྦྱར་མ་བཏིང་བ། སྟན་ནང་ཚངས་ཅན་བཏིང་བ། སྟན་ཁྲ་བོ་བཏིང་བ། སྟན་ཆེན་པོ་བཏིང་བ། སྟན་བཟང་པོ་བཏིང་བ། སུམ་ཚན་གྱི་གོས་ཀྱི་སྟེང་གཡོགས་བཏིང་བ། སྟེང་ནས་བགོ་བའི་གོས་དང་བཅས་པ་གཉིས་སུ་རྒྱབ་རྟེན་དམར་པོ་བཞག་པ་བཤམས་ཤིང་ཏིལ་མར་གྱི་མར་མེ་མཚན་ཐུབ་བཙུགས་ནས་ཆུང་མ་ཡིད་དུ་འོང་བ་ཞིག་འདི་ལྟ་སྟེ། དགའ་མགུར་སྤྱད་པར་བྱ་བའི་ཕྱིར་ཉེ་བར་བཞག་ན་ལག་བརྒྱུད་འདི་ཇི་སྙམ་དུ་སེམས། མི་དེའི་མལ་བཅས་པ་བདེ་བའམ། སྡུག་བསྔལ་བ་ཡིན་སྙམ། བཙུན་པ་བདག་འདི་སྙམ་བགྱིད་དེ། འཇིག་རྟེན་ན་གང་དག་བདེ་བར་མཆིས་ཉལ་བ་དེ་དག་
གི་ནང་ན་མི་དེ་འགའ་ཞིག་ལགས་སྙམ་བགྱིད་དོ། །ལག་བརྒྱུད་འདི་ཇི་སྙམ་དུ་སེམས། འདི་ལྟར་མི་དེ་ལྟ་བུའི་བདེ་བ་དང་། དེ་ལྟ་བུའི་ཡིད་དུ་འོང་བ་དང་ལྡན་པ་དེ་ལ་འདོད་པ་ལས་སྐྱེས་པའི་ཡོངས་སུ་གདུང་བ་དང་། ཞེ་སྡང་ལས་སྐྱེས་པ་དང་། གཏི་མུག་ལས་སྐྱེས་པའི་ཡོངས་སུ་གདུང་བ་དག་སྐྱེ་ཞིང་ཡོངས་སུ་གདུང་བ་དེ་དག་གིས་ཡོངས་སུ་གདུངས་པ་ན་མི་དེ་སྡུག་བསྔལ་བར་ཉལ་ཞིང་བདེ་བར་མི་ཉལ་བའི་འདོད་པ་ལས་སྐྱེས་པའི་ཡོངས་སུ་གདུང་བ་དང་། ཞེ་སྡང་དང་། གཏི་མུག་ལས་སྐྱེས་པའི་ཡོངས་སུ་གདུང་བ་དེ་དག །དེ་བཞིན་གཤེགས་པས་ཡོངས་སུ་མཁྱེན་ཅིང་རྩ་བ་ནས་བཅད་དེ་ཏ་ལའི་མགོ་བཞིན་དུ་མི་སྣང་བ་དང་། གཞི་མེད་པ་དང་། ཕྱིས་ཀྱང་མི་སྐྱེ་བའི་ཆོས་ཉིད་དུ་མཛད་པས་དེའི་ཕྱིར་ང་དེ་སྐད་ཅེས་འཇིག་རྟེན་ན་གང་དག་བདེ་བར་ཉལ་བ་དེ་དག་གི་ནང་ན་ཡང་འགའ་ཞིག་ཡིན་ནོ་ཞེས་ཟེར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་དག་བཀའ་སྩལ་པ། བྲམ་ཟེ་མྱ་ངན་ཡོངས་འདས་པ། །གང་ཞིག་འདོད་པས་མ་གོས་ཤིང་། །ཕུང་པོ་དག་ལས་རྣམ་གྲོལ་བ། །རྣམ་ཀུན་བདེ་བར་ཉལ་བ་ཡིན། །འདི་ལ་འདོད་པ་ཀུན་བཅད་ཅིང་། །སྙིང་གི་རིམས་ནད་བསལ་གྱུར་པ། །ཉེར་ཞི་ཞི་བ་ཐོབ་པ་ཡི། །སེམས་ཀྱིས་བདེ་བར་ཉལ་བ་ཡིན། །དེ་ནས་བཅོམ་ལྡན་འདས་ལག་བརྒྱུད་འབྲོག་གནས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་ཅིང་སངས་རྒྱས་བཅོམ་ལྡན་འདས་རྣམས་ཀྱི་དུས་སྔར་མཛད་པའི་ཆོས་དང་ལྡན་པའི་བཀའ་མཆིད་གང་ཡིན་པ་འདི་ལྟ་སྟེ། སྦྱིན་པའི་བཀའ་མཆིད་དང་། ཚུལ་ཁྲིམས་ཀྱི་བཀའ་མཆིད་དང་། མཐོ་རིས་ཀྱི་བཀའ་མཆིད་དང་། འདོད་པ་རྣམས་ཀྱི་རོ་མྱང་བའི་ཉེས་དམིགས་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་དང་། ངེས་པར་འབྱུང་བ་དང་། རབ་ཏུ་དབེན་པའི་ཕན་ཡོན་དང་། རྣམ་པར་བྱང་བའི་ཕྱོགས་དང་མཐུན་པའི་ཆོས་དག་རྒྱ་ཆེར་སྟོན་
པར་མཛད་དོ། །གང་གི་ཚེ་བཅོམ་ལྡན་འདས་ཀྱིས་དེ་སེམས་རངས་པ་དང་། སེམས་ཉམ་བདེ་བ་དང་། སེམས་དགའ་བ་དང་། སེམས་ལ་སྒྲིབ་པ་མེད་པ་དང་། ཡང་དག་ཕུལ་གྱི་ཆོས་བསྟན་པ་ཀུན་ཤེས་པའི་སྐལ་བ་དང་ལྡན་ཞིང་མཐུ་ཡོད་པར་གཟིགས་པ་དེའི་ཚེ་ན་སངས་རྒྱས་བཅོམ་ལྡན་འདས་རྣམས་ཀྱི་ཡང་དག་ཕུལ་གྱི་ཆོས་བསྟན་པ་གང་ཡིན་པ་འདི་ལྟ་སྟེ། འཕགས་པའི་བདེན་པ་བཞི་པོ་སྡུག་བསྔལ་དང་། ཀུན་འབྱུང་བ་དང་། འགོག་པ་དང་། ལམ་དག་རྒྱ་ཆེར་སྟོན་པར་མཛད་དོ། འདི་ལྟ་སྟེ་དཔེར་ན་གོས་དག་པ། ནག་ནོག་མེད་པ་ཁ་སྒྱུར་དུ་རུང་བ་ཚོན་དུ་བཅུག་ན། ཚོན་ལེགས་པར་འཇེན་པར་འགྱུར་བ་དེ་བཞིན་དུ་ལག་བརྒྱུད་འབྲོག་གནས་ཀྱིས་ཀྱང་སྟན་དེ་ཉིད་ལ་འདུག་བཞིན་དུ་འཕགས་པའི་བདེན་པ་བཞི་པོ་འདི་ལྟ་སྟེ། སྡུག་བསྔལ་དང་། ཀུན་འབྱུང་བ་དང་། འགོག་པ་དང་ལམ་མངོན་པར་རྟོགས་པར་གྱུར་ཏོ། །དེ་ནས་ལག་བརྒྱུད་འབྲོག་གནས་ཆོས་མཐོང་བ་དང་། ཆོས་ཐོབ་པ་དང་། ཆོས་རིག་པ་དང་། ཆོས་ཀྱི་གཏིང་སླེབས་པ་དང་། སོམ་ཉི་ལས་རྒལ་བ་དང་། ཐེ་ཙོམ་ལས་རྒལ་བ་དང་། སྟོན་པའི་བསྟན་པ་ལ་གཞན་གྱི་དྲིང་མི་འཇོག་པ་དང་། གཞན་གྱིས་མི་བཀྲི་ཞིང་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་དུ་གཟུང་དུ་གསོལ། དེང་སླན་ཅད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་མངོན་པར་དད་པས་སྐྱབས་སུ་མཆིའོ། །དེ་ནས་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་ནས་ཕྱིར་མི་འོང་བའི་འབྲས་བུ་ཐོབ་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བདག་དེང་ཁོ་ན་
སྔོ་བསངས་ཅན་གྱིས་བཙལ་ཅིང་བདག་གིས་དེང་ཁོ་ན་ཕྱིར་མི་འོང་བའི་འབྲས་བུ་མངོན་སུམ་དུ་བགྱིས་ན་འདི་ལ་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ལག་བརྒྱུད་སོང་ཤིག །ཁྱོད་ཀྱི་བསླབ་པ་ནི་འདི་ཡིན་ནོ། །སྔོ་བསངས་ཅན་ཡང་ཇི་ལྟར་ཁས་བླངས་པ་བཞིན་ཟས་དང་། གོས་ཀྱིས་མཁོ་བ་སྟོབས་ཤིག །དེ་ནི་འཇིག་རྟེན་གྱི་ཆོས་ཉིད་ཡིན་ནོ། །དེ་ནས་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་རང་གི་ཁྱིམ་དུ་སོང་ནས། དེས་སྔོ་བསངས་ཅན་ལ་སྨྲས་པ། ཁོ་བོ་དེང་ཁོ་ན་ཁྱོད་ཀྱིས་བཙལ་ན། ཁོ་བོས་ཀྱང་དེང་ཁོ་ན་བཅོམ་ལྡན་འདས་ཀྱི་སྤྱན་སྔ་ནས་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་ཤིང་ཕྱིར་མི་འོང་བའི་འབྲས་བུ་ཐོབ་པར་གྱུར་གྱིས། དེའི་ཕྱིར་གལ་ཏེ་ཁྱོད་འདོད་ན་ཕའི་ཁྱིམ་དུ་སོང་ཤིག །གལ་ཏེ་མི་འདོད་ན་འདི་ཉིད་དུ་འདུག་ཤིག་དང་ཟས་དང་གོས་ཀྱིས་མཁོ་བ་བསྟབ་པར་བྱའོ། །དེས་བསམས་པ། གལ་ཏེ་སོང་བར་གྱུར་ན་སྐྱེ་བོ་དག་ལག་བརྒྱུད་ཀྱིས་འདི་བཀྲ་མི་ཤིས་པར་རིག་ནས་མ་བླངས་སོ་ཞེས་ཟེར་གྱིས། འདི་ནི་སངས་རྒྱས་ཀྱི་སྲས་ཡིན་པས་འདི་ཉིད་ལ་བསྙེན་བཀུར་བྱེད་ཅིང་འདིར་འདུག་གོ་སྙམ་ནས། དེ་དེ་ཉིད་དུ་འདུག་གོ །ལག་བརྒྱུད་འབྲོག་གནས་ཀྱིས་ཀྱང་ཡོ་བྱད་ཐམས་ཅད་དང་ལྡན་པའི་གཙུག་ལག་ཁང་རྩིག་ཏུ་བཅུག་སྟེ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་ཕུལ་ནས་འདི་ལྟར་གནས་བརྟན་དག་གིས་ཀྱང་བཅོམ་ལྡན་འདས་འབྲོག་གནས་ན་འབྲོག་གི་ནགས་མཆོག་ན་བཞུགས་སོ་ཞེས་མདོ་སྡེའི་མཐའ་ཉེ་བར་སྦྱར་བ་བྱས་སོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་ལྔ་པ། དེ་ནས་དུས་གཞན་ཞིག་ན་ལག་བརྒྱུད་འབྲོག་གནས་ནད་ཀྱིས་བཏབ་སྟེ། སྡུག་བསྔལ་ཞིང་ནད་ཚབས་ཆེ་བར་གྱུར་ནས། དེ་ནས་ལག་བརྒྱུད་འབྲོག་གནས་ནད་དེ་ཉིད་ཀྱིས་དུས་ལ་བབ་བོ། །དེ་དུས་ལ་བབ་མ་ཐག་ཏུ་མི་གདུང་བའི་ལྷ་རིས་སུ་སྐྱེས་སོ། །དེ་ནས་ལྷའི་བུ་ལག་བརྒྱུད་འབྲོག་གནས་འདི་སྙམ་དུ་སེམས་ཏེ།
གང་གི་ཕྱིར་བདག་ཡོངས་སུ་གནས་པ་བསྟེན་ཏེ། བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱི། བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་། བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་ལྷའི་བུ་ལག་བརྒྱུད་འབྲོག་གནས་འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམས་པ་ལས་བརྐྱང་བའམ། བརྐྱང་བ་ལས་བསྐུམས་པ་ཙམ་གྱིས་མི་གདུང་བའི་ལྷའི་རིས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འདུག་པ་དང་། འདི་ལྟར་ལྷའི་བུ་ལག་བརྒྱུད་འབྲོག་གནས་ཀྱི་ལུས་ས་ལ་མི་ཐོགས་ཤིང་ཐིམ་པར་གྱུར་ཏེ། འདི་ལྟ་སྟེ་དཔེར་ན་ཞུན་མར་རམ། འབྲུ་མར་བྱེ་མའམ། ཐལ་བའི་སྟེང་དུ་བླུགས་པ་མི་ཐོགས་ཤིང་ཐིམ་པར་འགྱུར་བ་བཞིན་ནོ། །དེ་ནས་བཅོམ་ལྡན་འདས་ཀྱིས་ལྷའི་བུ་ལག་བརྒྱུད་འབྲོག་གནས་ལ་བཀའ་སྩལ་པ། ལག་བརྒྱུད་རེ་ཞིག་ལུས་རགས་པར་མངོན་པར་སྤྲུལ་ལ་སའི་འདུ་ཤེས་བསྐྱེད་དེ། འདུག་པའི་མཚན་མ་ཡིད་ལ་གྱིས་ཤིག །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་ལུས་རགས་པར་མངོན་པར་སྤྲུལ་ཏེ་སའི་འདུ་ཤེས་བསྐྱེད་ཅིང་འདུག་པའི་མཚན་མ་ཡིད་ལ་བྱས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་པ་དང་། འདི་ལྟར་ལྷའི་བུ་ལག་བརྒྱུད་འབྲོག་གནས་ཀྱི་ཁ་དོག་གི་མཐུས་འབྲོག་གི་ནགས་མཆོག་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །མཐའ་གཅིག་ཏུ་འདུག་ནས་བཅོམ་ལྡན་འདས་ཀྱིས་ལྷའི་བུ་ལག་བརྒྱུད་འབྲོག་གནས་ལ་འདི་སྐད་ཅེས་བཀའ་སྩལ་ཏོ། །ལྷའི་བུ་ཇི་ལྟར་ཁྱོད་སྔོན་མིར་གྱུར་པ་ན་ཆོས་གང་དག་བཏོན་ཅིང་ལོབས་པ་དེ་དག་ད་ལྟར་ལོབས་སམ། བཙུན་པ་བདག་སྔོན་མིར་གྱུར་པ་ན་ཆོས་གང་དག་བཏོན་ཅིང་ལོབས་པ་དེ་དག་ད་ལྟར་ཏེ་པོར་ལོབས་ཏེ། བཙུན་པ་བདག་སྔོན་མིར་གྱུར་པ་ན་ཆོས་གང་དག་བཏོན་ཅིང་མ་ལོབས་པ་དེ་དག་ཀྱང་ད་ལྟར་ལོབས་པར་གྱུར་
ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པའི་ཆོས་ནི་བདེ་བར་གྱུར་པས་མངོན་པར་བརྗོད་པར་བགྱིད་དོ། །ཇི་ལྟར་བཅོམ་ལྡན་འདས་འཛམ་བུའི་གླིང་ན་འཁོར་བཞི་པོ་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་རྣམས་ཀྱིས་བསྐོར་ཅིང་བཞུགས་པ་ན། བཅོམ་ལྡན་འདས་བདག་ཅག་ལ་ཆོས་གང་དང་གང་སྟོན་པར་འགྱུར་བའི་ཆོས་དེ་དང་དེ་བདག་ཅག་གིས་མཉན་ནས་དེ་ལྟ་དེ་ལྟར་བསྒྲུབ་པར་བྱ་སྟེ། དེ་ནི་བདག་ཅག་ལ་ཡུན་རིང་པོའི་དོན་དང་། ཕན་པ་དང་བདེ་བར་འགྱུར་རོ་སྙམ་པ་དེ་བཞིན་དུ། བཙུན་པ་བདག་ཀྱང་མི་གདུང་བའི་ལྷའི་རིས་ན་མི་གདུང་བའི་རིས་ཀྱི་ལྷ་རྣམས་ཀྱིས་ཡོངས་སུ་བསྐོར་ཅིང་མཆིས་པ་ན། ལྷའི་བུ་ལག་བརྒྱུད་འབྲོག་གནས་བདག་ཅག་ལ་ཆོས་གང་དང་གང་སྟོན་པར་འགྱུར་བའི་ཆོས་དེ་དང་དེ་དག་བདག་ཅག་གིས་མཉན་ནས་དེ་ལྟ་དེ་ལྟར་བསྒྲུབ་པར་བྱ་སྟེ། དེ་ནི་བདག་ཅག་ལ་ཡུན་རིང་པོའི་དོན་དང་ཕན་པ་དང་། བདེ་བར་འགྱུར་རོ་སྙམ་དུ་སེམས་སོ། །ལག་བརྒྱུད་ཁྱོད་ཆོས་དུ་དག་གིས་མ་ངོམས་ཤིང་ཕྱིར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་པར་གྱུར། བཙུན་པ་བདག་ཆོས་གསུམ་གྱིས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་ཏེ། གསུམ་གང་ལགས་ཤེ་ན། བཙུན་པ་བདག་བཅོམ་ལྡན་འདས་ལ་ལྟ་བས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་སོ། །བཙུན་པ་བདག་ཆོས་མཉན་པས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་སོ། །བཙུན་པ་བདག་དགེ་འདུན་ལ་བསྙེན་བཀུར་བགྱི་བས་མ་ངོམས་ཤིང་སླར་མ་སྤངས་པས་ལུས་ཞིག་ནས་མི་གདུང་བའི་ལྷའི་རིས་སུ་སྐྱེས་སོ། །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་དེའི་ཚེ་ཚིགས་སུ་བཅད་པ་དག་སྨྲས་པ། བདག་ནི་བཅོམ་ལྡན་བལྟ་བ་དང་། །དམ་ཆོས་ཉན་དང་དགེ་འདུན་ལ། །བསྙེན་བཀུར་བགྱིད་པས་ལན་འགའ་ཡང་། །ངོམས་ཤིང་ཕྱིར་སྤོང་མ་མྱོང་ངོ་། །འཕགས་པའི་
ཆོས་རྣམས་ཡང་དག་བླངས། །སེར་སྣ་འདུལ་ལ་བརྩོན་གྱུར་ཅིང་། །ཆོས་གསུམ་ཆོག་མི་ཤེས་པ་ཡིས། །ལག་བརྒྱུད་མི་གདུང་སྐྱེས་པར་གྱུར། །དེ་ནས་ལྷའི་བུ་ལག་བརྒྱུད་འབྲོག་གནས་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རངས་པ་བྱས་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་མཆི་བ་དང་། བསླབ་པའི་གཞི་དག་ལ་བཀོད་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་ང་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་དག་ལས་ཡོངས་སུ་གྲོལ་ཞིང་། ཐམས་ཅད་མཁྱེན་པ། ཐམས་ཅད་གཟིགས་པ། མཁྱེན་པ་དང་ཤེས་བྱ་ཐམས་ཅད་ལ་མངའ་བརྙེས་པ་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་པ་འདི་ལ་ངོ་མཚར་ཅི་ཆེ། ང་འདས་པའི་དུས་ན་འདོད་ཆགས་དང་བཅས་པ། ཞེ་སྡང་དང་བཅས་པ། གཏི་མུག་དང་བཅས་པ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་དག་ལས་ཡོངས་སུ་མ་གྲོལ་བས་ཀྱང་གནོད་སྦྱིན་འབྲོག་གནས་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་སྟེ་དེ་ཉོན་ཅིག །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་དེད་དཔོན་དཔའ་ཆེན་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་
འགྲན་པ་ཞིག་བྱུང་བར་གྱུར་ཏེ། དེ་དུས་གཞན་ཞིག་ན་ཚོང་པ་ལྔ་བརྒྱ་དང་ལྷན་ཅིག་དགོན་པའི་ལམ་དུ་ཞུགས་པ་དང་། ལམ་དེ་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་པར་གྱུར་ནས། དེད་དཔོན་དཔའ་ཆེན་དོན་མཐུན་གྱི་མདུན་དུ་འགྲོ་བར་བརྩམས་པ་དང་། ཇི་ཙམ་ན་སྲིན་པོ་སྤུ་རལ་ཅན་དེ་བྲམ་ཟེའི་ཆ་ལུགས་སུ་མངོན་པར་སྤྲུལ་ནས་ལམ་གར་འདུག་སྟེ། དེད་དཔོན་དཔའ་ཆེན་ལ་སྨྲས་པ། དེད་དཔོན་ལམ་འདི་སྲིན་པོ་སྤུ་རལ་ཅན་གྱིས་བསྡིགས་ཤིང་བགགས་ནས་ཁོ་བོ་ཡང་ཚེགས་ཆེན་པོས་འོངས་ཀྱིས་ལམ་གཞན་དུ་སོང་ཤིག། དེས་སྨྲས་པ། བྲམ་ཟེ་སྙིང་ལས་ཆུང་ངུར་གྱིས་ཤིག །དེས་ཁོ་བོ་ལ་བྱར་ཅི་ཡོད་འགྲོའོ། །དེ་སྐད་ཅེས་སྨྲས་པ་དང་། སྲིན་པོ་སྤུ་རལ་ཅན་དེ་འཁྲུགས་ནས་བཞིན་བསྒྱུར་ཏེ། ལག་པ་གཉིས་བརྐྱང་ནས་རལ་པ་ས་ལ་བླགས་ཏེ། མིག་དམར་པོ་བྱས་ནས་མིག་གཉིས་བགྲད་དེ་སྨྲས་པ། དེད་དཔོན་ཇེ་ཁོ་བོ་ལ་རྒོལ་ལ་ཕྱིས་སོང་ཤིག། དེ་ནས་དེད་དཔོན་དཔའ་ཆེན་གྱིས་ཤིན་ཏུ་འཇིགས་སུ་རུང་བ་དེ་མཐོང་ནས་གཞུ་རྣ་དྲུང་དུ་ཐུག་པར་བཀང་སྟེ་མདའ་དག་འཕང་བར་བརྩམས་པ་དང་། དེ་དག་ཐམས་ཅད་རལ་པ་དག་ལ་ཐོགས་སོ། །གཞུ་འཕངས་པ་དང་། དེ་ཡང་ཐོགས་སོ། །དེ་བཞིན་དུ་ཤིང་དང་བོང་བ་ལ་སོགས་པ་དག་འཕངས་ན་དེ་དག་ཀྱང་རལ་པ་དག་ལ་ཐོགས་སོ། །དེ་ནས་ཚམ་ཚོམ་མེད་པར་མཐུས་བརྒལ་བ་དང་། ལུས་ཐམས་ཅད་རལ་པ་དག་ལ་ཐོགས་ནས་སྲིན་པོས་ཚིགས་སུ་བཅད་པ་སྨྲས་པ། ཁྱོད་ཀྱིས་ལག་གཉིས་རྐང་གཉིས་དང་། །ལྔ་པ་མགོ་ཡང་ཐོགས་གྱུར་ཅིང་། །ལུས་ཀྱང་ང་ཡི་ལུས་ལ་ཐོགས། །ཕྱི་ན་མ་ཐོགས་ཅི་ཞིག་ཡོད། །དེད་དཔོན་གྱིས་ཀྱང་ཚིགས་སུ་བཅད་པ་དག་སྨྲས་པ། ང་ཡི་ལག་གཉིས་རྐང་གཉིས་དང་། །ལྔ་པ་མགོ་ཡང་ཐོགས་གྱུར་ཅིང་། །ལུས་ཀྱང་ཁྱོད་ཀྱི་ལུས་ལ་ཐོགས། །ཕྱི་ན་མ་ཐོགས་སེམས་ཡོད་དོ། །གསང་བ་ཇི་སྲིད་ཁོ་བོ་ཡི། །སེམས་དང་བརྩོན་འགྲུས་མ་ཉམས་པ། །དེ་སྲིད་ཁྱོད་དང་འགྱེད་བྱ་སྟེ། །བརྟན་བྱོས་ང་ལ་མི་གནོད་དོ། །སྲིན་པོས་ཀྱང་ཚིགས་
སུ་བཅད་པ་དག་སྨྲས་པ། གང་གིས་བརྩོན་འགྲུས་འདི་འདྲ་བ། །དཔའ་ཆེན་ཁྱོད་ལ་ཕྱག་འཚལ་ལོ། །ཁྱོད་ཀྱི་བརྩོན་འགྲུས་འདི་འདྲ་བས། །སྡུག་བསྔལ་ཀུན་ལས་འབྲོས་པར་ནུས། །དཔའ་ཆེན་ཁྱོད་དང་འདྲ་བ་ཡི། །གང་ཟག་མེད་པར་བདག་གིས་ཤེས། །ཁྱོད་ཀྱི་མཐུ་ཡིས་ཚོང་པ་དག །བདེ་ལེགས་སུ་ནི་འདོང་ལ་རག །འབྱུང་པོ་ཀུན་ལ་སྙིང་བརྩེ་བ། །དེད་དཔོན་ཁྱོད་ལ་ཕྱག་འཚལ་ལོ། །ཁྱོད་ཀྱི་མཐུ་ཡིས་ཚོང་པ་དག །ཞི་བ་ཉིད་དུ་འདོང་ལ་རག །དེ་ལྟར་དེ་ན་དེད་དཔོན་དཔའ་ཆེན་གྱིས་སྲིན་པོ་སྤུ་རལ་ཅན་ལ་གང་ཐོས་ནས་སྲིན་པོ་སྤུ་རལ་ཅན་ལས་དྲི་མ་ཅན་དང་ཕྲལ་ཏེ་བརྟུལ་ཞུགས་ལྔ་པོ་དག་ལ་བཞག་པ་དེ་འདྲ་བའི་ཆོས་བསྟན་པ་བྱས་སོ། །དགེ་སློང་དག་དེའི་ཚེ་དེའི་དུས་ན་དེད་དཔོན་དཔའ་ཆེན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་སྲིན་པོ་སྤུ་རལ་ཅན་གང་ཡིན་པ་དེ་ནི་གནོད་སྦྱིན་འབྲོག་གནས་ཡིན་ཏེ། དེའི་ཚེ་ཡང་ངས་འདི་ལས་དྲི་མ་ཅན་དང་ཕྲལ་ཏེ་བརྟུལ་ཞུགས་ལྔ་ལ་བཞག་ལ། ད་ལྟར་ཡང་ངས་འདི་ལས་དྲི་མ་ཅན་དང་ཕྲལ་ཏེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་གོ །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ལག་བརྒྱུད་འབྲོག་གནས་ཀྱིས་ལས་ཅི་བགྱིས་ན་དེས་སྐྱེས་མ་ཐག་ཏུ་གནོད་སྦྱིན་གྱི་གཏོར་མར་སྩལ་ཅིང་། བཅོམ་ལྡན་འདས་དེ་ཐར་བར་བགྱི་བའི་སླད་དུ་བརྩོན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལག་བརྒྱུད་འབྲོག་གནས་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ལག་བརྒྱུད་འབྲོག་གནས་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་ཏེ། འདི་
ལྟར་ལས་དགེ་བ་དང་། མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་། སྐྱེ་མཆེད་དག་ཁོ་ན་ལ་རྣམ་པར་སྨིན་པར་འགྱུར་རོ། །ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་དགེ་བསྙེན་དུ་གྱུར་ཏོ། །རི་བྲགས་ཤིག་ན་རྒྱལ་པོ་ཞིག་འདུག་པ་དེ་ཤིན་ཏུ་བྱ་གག་ལ་དགའ་ནས་གང་ཡང་རུང་བ་ལ་རྒྱལ་པོའི་ཕོ་བྲང་དུ་བྱ་བ་ཅུང་ཟད་བྱུང་ན་དེ་སུག་ཏུ་བྱ་གག་ཐོགས་ཏེ་རྒྱལ་པོའི་གན་དུ་འགྲོའོ། །ཇི་ཙམ་དུས་གཞན་ཞིག་ན་དགེ་བསྙེན་དེ་ལ་རྒྱལ་པོའི་ཕོ་བྲང་དུ་བྱ་བ་ཅུང་ཞིག་བྱུང་ནས་དེ་དེ་བཞིན་སོང་བ་དང་། རྒྱལ་པོ་དེས་དེའི་དགོས་པ་མ་བསྒྲུབས་ནས་གཞན་དག་གིས་དེ་ལ་སྨྲས་པ། རྒྱལ་པོ་འདི་བྱ་གག་ལ་དགའ་བས་གལ་ཏེ་ཁྱོད་ལ་དགོས་པ་འགྲུབ་པ་དགོས་ན། དེ་ལ་བྱ་གག་ཕུལ་ཅིག །དེས་རྒྱལ་པོ་ལ་བྱ་གག་གཅིག་ཕུལ་བ་དང་། རྒྱལ་པོས་དེ་ཕྱག་ཙང་གི་ཚང་མང་དུ་གཏད་ནས། དགེ་བསྙེན་དེའི་དགོས་པ་ཡང་བསྒྲུབས་སོ། །དགེ་བསྙེན་དེས་བསམས་པ། བདག་གིས་བྱ་གག་ཕུལ་བ་མ་ལེགས་པ་བྱས་ཀྱི་སོང་ལ་རིན་གྱིས་བླུའོ་སྙམ་ནས། དེས་ཕྱག་ཙང་གི་ལག་པར་རིན་བྱིན་ཏེ། བྱ་གག་ཐར་བར་བྱས་ནས་སྨོན་ལམ་བཏབ་པ། བདག་གིས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་ལས་དེའི་ཆ་དང་མཐུན་པར་མི་འགྱུར་བར་བདག་གིས་བྱ་གག་ཕོངས་པར་གྱུར་པ་ཐར་བར་བྱས་པའི་དགེ་བའི་རྩ་བ་འདིས་བདག་
ཕོངས་པར་གྱུར་པ་ཐར་བར་བྱ་བའི་ཕྱིར་བཅོམ་ལྡན་འདས་བརྩོན་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་དགེ་བསྙེན་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ཏེ། དེས་རྙེད་པ་འདོད་པའི་ཕྱིར་རྒྱལ་པོ་ལ་བྱ་གག་ཕུལ་བ་གང་ཡིན་པའི་ལས་དེའི་རྣམ་པར་སྨིན་པས་གནོད་སྦྱིན་གྱི་གཏོར་མར་བྱིན་ནོ། །ཕྱིས་འགྱོད་པ་སྐྱེས་ནས་ཐར་བར་བྱས་ཤིང་སྨོན་ལམ་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་ང་འདི་ཐར་བར་བྱ་བའི་ཕྱིར་བརྩོན་པར་གྱུར་ཅིང་ངས་འདི་གནོད་སྦྱིན་ལས་ཐར་བར་བྱས་སོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་ལག་བརྒྱུད་འབྲོག་གནས་སྔོ་བསངས་ཅན་ལས་ཐར་བར་མཛད་ནས་ཕྱིར་མི་འོང་བའི་འབྲས་བུ་ལ་བཞག་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་གཟུགས་ཅན་མ་ལས་ཐར་བར་བྱས་ནས་མངོན་པར་ཤེས་པ་ལྔ་ལ་བཞག་སྟེ། དེ་ཉོན་ཅིག །དགེ་སློང་དག་སྔོན་བྱུང་བ་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་ནང་འཁྲུག་རབ་ཏུ་ཞི་བ། ཆོམ་རྐུན་དང་མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པའི་ཆོས་ཀྱི་རྒྱལ་པོས་ཆོས་ཀྱིས་རྒྱལ་སྲིད་བྱེད་དུ་བཅུག་གོ །དེའི་མདུན་ན་འདོན་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་འབྲེལ་བ་ཞིག་
བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་འབྲེལ་བ་དེའི་ཕྱིར་ཁྱེའུའི་མིང་རྐང་ལག་དྲ་བ་ཅན་ཞེས་བྱའོ་ཞེས་དེའི་མིང་རྐང་ལག་དྲ་བ་ཅན་ཞེས་བྱ་བར་བཏགས་སོ། །ཡང་དེ་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས་དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་ཁྱེའུ་རྐང་ལག་དྲ་བས་མ་འབྲེལ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱས་པར་བྱས་ནས་ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེ་དག་འདི་སྙམ་དུ་སེམས་ཏེ། གང་གི་ཕྱིར་ཁྱེའུ་འདི་རྐང་ལག་དྲ་བས་འབྲེལ་བ་མེད་པ་དེའི་ཕྱིར་ཁྱེའུའི་མིང་རྐང་ལག་དྲ་བ་མེད་ཅེས་བྱའོ་ཞེས་དེའི་མིང་རྐང་ལག་དྲ་བ་མེད་ཅེས་བྱ་བར་བཏགས་སོ། །དེ་གཉིས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །ཇི་ཙམ་ན་བུ་ཐུ་བོ་རྐང་ལག་དྲ་བ་ཅན་གྱིས་ཕ་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པ་མཐོང་ནས། དེས་བསམས་པ། བདག་འདི་འདས་ནས་མདུན་ན་འདོན་དུ་གྱུར་ན་བདག་ཀྱང་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་འཇུག་པར་འགྱུར་ན། བདག་ཆོས་དང་ཆོས་མ་ཡིན་པས་མདུན་ན་འདོན་བྱེད་དུ་བཅུག་ནས་སེམས་ཅན་དམྱལ་བ་ལ་གཞོལ་བར་འགྱུར་ན་མི་རུང་གིས་རྣམ་པ་ཐམས་ཅད་དུ་རབ་ཏུ་འབྱུང་ངོ་སྙམ་ནས། དེ་ཕའི་གན་དུ་སོང་སྟེ་སྨྲས་པ། ཡབ་བདག་རབ་ཏུ་འབྱུང་བར་ཅི་གནང་། ཕས་སྨྲས་པ། བུ་གང་གི་ཕྱིར་མཆོད་སྦྱིན་སྦྱིན་པར་བྱེད། སྦྱིན་སྲེག་སྲེག་པར་བྱེད། དཀའ་ཐུབ་ཀྱིས་གདུང་བར་བྱེད་པའི་མདུན་ན་འདོན་དེ་ཁྱོད་ཀྱི་ལག་མཐིལ་དུ་འོངས་ན་ཅིའི་ཕྱིར་རབ་ཏུ་འབྱུང་བར་བྱེད། དེས་ཚིགས་སུ་བཅད་པ་སྨྲས་པ། ནགས་ན་ཤིང་ཤུན་ཤུན་པའི་གོས་གྱོན་འབྲས་བུ་ཟ། །རི་དགས་གདུག་པ་
རྣམས་དང་ལྷན་ཅིག་གནས་བླ་ཡི། །མཁས་པ་འཇིག་རྟེན་ཕ་རོལ་འཇིགས་པས་རྒྱལ་སྲིད་ཕྱིར། །གསད་དང་བཅིང་དང་བརྡེག་པའི་ལས་དག་བྱར་མི་རུང་། །ཕས་དེ་དུས་ཀྱིས་འཆུ་བར་ཤེས་ནས་གནང་བ་དང་། དེ་དྲང་སྲོང་རྣམས་ཀྱི་ནང་དུ་སོང་སྟེ་རབ་ཏུ་བྱུང་ནས་དེས་སྤྲོ་བ་དང་། འབད་པ་དང་། བརྩལ་བ་བྱས་པས་མངོན་པར་ཤེས་པ་ལྔ་བསྐྱེད་པར་གྱུར་ཏོ། །བུ་གཉིས་པ་རྐང་ལག་དྲ་བ་མེད་ནི་གསང་ཚིག་གི་ཕྱིར་གསང་ཚིག་ཚོལ་དུ་ཡུལ་གཞན་དུ་སོང་ངོ་། །ལྷོ་ལམ་ན་རི་བྲགས་ཤིག་ན་བྲམ་ཟེ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལས་བུ་མོ་ཞིག་བཙས་ནས། དེས་བསམས་པ། བདག་གིས་བུ་མོ་འདི་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། རིགས་བྱེད་བཞི་བཀླགས་པ་ལ་སྦྱིན་པར་བྱ་སྟེ། གང་གིས་བདག་གི་དྲུང་ནས་རིག་བྱེད་བཞི་བཀླགས་པ་དེ་ལ་བདག་གིས་བུ་མོ་འདི་སྦྱིན་ནོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་རྐང་ལག་དྲ་བ་མེད་དེ་ཕན་ཚུན་འཁོར་བ་ན་ལྷོ་ལམ་དུ་ཕྱིན་ནས་དེས་ཕྱོགས་གཞན་ཞིག་ཏུ་ལམ་གྱིས་དུབ་པ་ངལ་བསོས་ཏེ་ཐོས་པ་གཅིག་ནས་གཅིག་ཏུ་བརྒྱུད་པས་བྲམ་ཟེ་དེ་ཐོས་ནས་དེའི་གན་དུ་སོང་སྟེ། མངོན་དུ་སྨྲ་བ་བྱས་ནས་སྨྲས་པ་བདག་མཁན་པོའི་ཞབས་ལ་བསྙེན་བཀུར་བགྱིད་པར་འཚལ་ལོ། །ཅིའི་ཕྱིར། རིག་བྱེད་བཀླག་པའི་སླད་དུའོ། །བུ་དེ་བཞིན་གྱིས་ཤིག །དེས་དེའི་གན་དུ་རིག་བྱེད་བཀླག་པར་བརྩམས་པ་དང་། དེ་སྤྱོད་པ་གསལ་བས་དེའི་དྲུང་ནས་དུས་ཅུང་ཟད་ཅིག་གིས་རིག་བྱེད་བཞི་ལྷོགས་སོ། །ལྷོགས་ནས་བྲམ་ཟེ་དེས་དེ་ལ་བུ་མོ་བྱིན་ནོ། །བྲམ་ཟེའི་ཁྱེའུ་དེ་དེ་དང་ལྷན་ཅིག་ཁང་ཏོག་ན་ཉལ་བའི་ཚེ་ཇི་ཙམ་ན་བུ་མོ་དེའི་བསིལ་ཡབ་ཤོད་དུ་ལྷུང་བ་དང་། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེས་བླངས་པ་དང་། དེས་དེ་མཐོང་ནས་སྔངས་པར་གྱུར་ཏོ། །ཡང་མར་མེ་ཤི་ལ་ཐུག་པ་དང་། དེས་ལག་པ་གླང་པོ་ཆེའི་སྣ་ལྟ་བུ་བརྐྱང་སྟེ་དེ་
གསོས་སོ། །དེ་ཡང་དེས་མཐོང་ནས་ཡང་རྒྱ་ཆེར་སྔངས་པར་གྱུར་ཏེ། དེ་དང་ལྷན་ཅིག་བག་ཡངས་སུ་དགའ་མགུར་སྤྱོད་པར་མི་བྱེད་དོ། །བུ་མོས་སྨྲས་པ། རྗེའི་སྲས་ཁྱོད་ཅིའི་ཕྱིར་བདག་མཐོང་ན་དབང་པོ་རྣམས་སྡུད་ཅིང་བདག་དང་ལྷན་ཅིག་བག་ཡངས་སུ་གཅུགས་པར་མི་བྱེད། ཁྱེའུས་སྨྲས་པ། ཁྱོད་ཀྱིས་འཆི་བདག་དང་ལྷན་ཅིག་གཅུགས་པར་བྱེད་པ་འགའ་མཐོང་ངམ། བུ་མོས་སྨྲས་པ། རྗེའི་སྲས་མ་འཇིགས་ཤིག་དང་། ཁོ་མོ་ཁྱིམ་ཐབ་ལ་འཁུ་བའི་སེམས་མི་བསྐྱེད་དོ། །ཁྱེའུས་སྨྲས་པ། འདི་ལ་ཁོ་བོས་དུས་ཤེས་པར་བྱའོ། །བུ་མོ་དེ་སྐྱེངས་ནས་དེ་གཉིད་ལོག་པ་ལ་སྡོད་ཅིང་འདུག་གོ །ཁྱེའུ་དེས་གཉིད་མ་ལོག་བཞིན་དུ་གཉིད་ལོག་པའི་ཆ་ལུགས་སུ་བྱས་ཏེ་འདུག་པ་དང་། བུ་མོ་དེས་དེ་གཉིད་ལོག་པར་རིག་ནས་གཟུགས་ཅན་མ་རྣམས་ཀྱི་ནང་དུ་སོང་ངོ་། །ཁྱེའུ་དེ་ཡང་དལ་བུས་ལངས་ཏེ་དེའི་རྗེས་བཞིན་དུ་སོང་བ་དང་། ཇི་ཙམ་གཟུགས་ཅན་མ་དེ་དག་ཐམས་ཅད་སྒྲེན་མོར་བྱུང་ཞིང་སྐྲ་བཤིག་སྟེ། འཇིགས་འཇིགས་ལྟར་འདུག་པ་དག་མཐོང་ནས་དེ་ཤིན་ཏུ་སྔངས་ཤིང་སྐྲག་ནས་ཕྱིར་ལོག་གོ །དེ་ཡང་དེའི་རྗེས་བཞིན་དུ་འོངས་པ་དང་། དེས་སྨྲས་པ། བཟང་མོ་ཁོ་བོ་འདུག་མི་ཕོད་ཀྱིས་འགྲོའོ། །དེས་དེ་གདོན་མི་ཟ་བར་དུས་ཀྱིས་འཆུ་བར་ཤེས་ནས་སྨྲས་པ། རྗེའི་སྲས་གལ་ཏེ་ངེས་པ་ཁོ་ནར་འགྲོ་འདོད་ན་སོང་ལ་སུ་ལ་ཡང་མ་ཟེར་ཅིག །དེ་ཅང་མི་ཟེར་བར་བྲམ་ཟེ་དེའི་གན་དུ་སོང་སྟེ་སྨྲས་པ། མཁན་པོ་ཁྱོད་བལྟས་ཀྱིས་མཆིའོ། །དེས་སྨྲས་པ། བུ་གལ་ཏེ་དེ་ལྟ་ན་བུ་མོ་ཡང་ཁྲིད་ལ་སོང་ཤིག །མཁན་པོ་བདག་དེ་ཉིད་ཀྱིས་འཇིགས་པས་མཆིའོ། །བུ་ཅིའི་ཕྱིར་ཁྱོད་དེས་འཇིགས། མཁན་པོ་དེ་གཟུགས་ཅན་མ་ལགས་སོ། །བུ་ཅིའི་ཕྱིར་དེ་དེ་ལྟར་འགྱུར། དེ་ཅང་མི་སྨྲ་བར་སོང་ངོ་། །བྲམ་ཟེ་དེས་བུ་མོ་ལ་སྨྲས་པ། བུ་མོ་ཁྱོད་ཁྱིམ་ཐབ་ཀྱང་རྗེས་སུ་མི་སྲུང་ངམ། ཡབ་དེ་ཇི་སྐད་མཆི། བུ་དེ་ན་རེ་ཁྱོད་གཟུགས་ཅན་མ་ཡིན་ཞེས་ཟེར་རོ། །ཡབ་བདག་གཟུགས་ཅན་མ་མ་ལགས་ཏེ། དེས་བདག་ལ་ཤོ་བེས་སྐུར་པ་བཏབ་
སྟེ་མཆིས་སོ། །དེ་ཅང་མི་སྨྲ་བར་འདུག་གོ །གཟུགས་ཅན་མ་དེ་ཡང་ཀུན་ནས་དཀྲིས་པ་དྲག་པོས་ཀུན་ནས་དཀྲིས་པར་གྱུར་ནས། རྐང་ལག་དང་མིག་བསྒྱུར་ཏེ་ལམ་གར་སོང་ནས། དེའི་མདུན་དུ་འདུག་སྟེ་སྨྲས་པ། བུ་ཟན་མའི་བུ་ཁྱོད་ལ་ཁོ་མོས་སུ་ལ་ཡང་མ་ཟེར་ཅིག་ཅེས་བྱས་ན། ཁྱོད་ཀྱིས་ཁོ་མོའི་ཕ་ཉིད་ལ་བྱས་ཀྱིས་ད་ནི་ཁྱོད་ལ་མཚམས་ཆེན་པོ་གཅད་པར་བྱའོ། །ཞེས་དེས་དེ་ལ་གནོད་པ་བྱ་བར་བརྩམས་པ་དང་། དེ་སྐྲག་པས་སྒྲ་ཆེན་པོ་ཕྱུང་སྟེ་འཕགས་པ་རྐང་ལག་དྲ་བ་ཅན་ལ་ཕྱག་འཚལ་ལོ། །འཕགས་པ་རྐང་ལག་དྲ་བ་ཅན་ལ་ཕྱག་འཚལ་ལོ། །ཕྱག་འཚལ་ལོ་ཞེས་བརྗོད་པ་དང་། དེ་ནས་རྐང་ལག་དྲ་བ་ཅན་ལ་མངོན་པར་དགའ་བའི་ལྷ་མོ་གང་ཡིན་པ་དེ་མྱུར་བ་མྱུར་བར་སོང་སྟེ་རྐང་ལག་དྲ་བ་ཅན་ལ་སྨྲས་པ། འཕགས་པ་ཁྱོད་ཀྱི་གཅུང་པོ་གནོད་པ་དང་། ཉམ་ང་བ་དང་། མི་བདེ་བར་གྱུར་གྱིས་དེ་ལ་དགོངས་སུ་གསོལ། དེ་རྫུ་འཕྲུལ་གྱིས་དེའི་གན་དུ་སོང་སྟེ་སྨྲས་པ། བུ་མོ་འདི་ལ་གནོད་པ་མ་བྱེད་ཅིག །འདི་ཁྱོད་ལ་ཅི་ཉེས་བདག་གིས་འདི་བཟློག་ན་འདིས་བདག་གི་ཕ་ལ་བདག་གཟུགས་ཅན་མ་ལགས་སོ་ཞེས་བགྱིས་ཀྱིས་བདག་གིས་འདི་བཟས་ཁྱོད་བཞུད་ཅིག །དེས་སྨྲས་པ། སྲིན་མོ་འདི་ནི་བཀྲེན་པ་ཡིན་པས་འཁྲུག་པས་ཆོག་གིས་ཐོང་ཤིག །དེས་སྨྲས་པ། འཕགས་པ་དམ་ཚིག་གིས་གཏང་བར་བགྱི་སྟེ། གལ་ཏེ་རབ་ཏུ་འབྱུང་ནའོ། །དེས་སྨྲས་པ། སྲིང་མོ་ཐོང་ཤིག་དང་རབ་ཏུ་དབྱུང་ངོ་། །དེས་དེ་བཏང་ནས་དེས་ཀྱང་དེ་རབ་ཏུ་ཕྱུང་སྟེ། གདམས་ངག་བྱིན་ནས་དེས་སྤྲོ་བ་དང་། འབད་པ་དང་། བརྩལ་བ་བྱས་པས་མངོན་པར་ཤེས་པ་ལྔ་བསྒྲུབ་པར་གྱུར་ཏོ། །དགེ་སློང་དག་དེའི་ཚེ་དེའི་དུས་ན་མདུན་ན་འདོན་གྱི་བུ་ཐུ་བོ་རྐང་ལག་དྲ་བ་ཅན་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་དེའི་ནུ་བོ་རྐང་ལག་དྲ་བ་མེད་གང་ཡིན་པ་དེ་ནི་ལག་བརྒྱུད་འབྲོག་གནས་འདི་ཡིན་ནོ། །དེའི་ཚེ་དེའི་དུས་ན་གཟུགས་ཅན་མ་གང་ཡིན་པ་དེ་ནི་སྔོ་བསངས་ཅན་འདི་ཡིན་ཏེ། ངས་དེའི་ཚེ་ཡང་ལག་བརྒྱུད་འབྲོག་གནས་འདི་གཟུགས་ཅན་མ་ལས་ཐར་བར་
བྱས་ཏེ་མངོན་པར་ཤེས་པ་ལྔ་ལ་བཞག་ལ། ད་ལྟར་ཡང་ངས་འདི་སྔོ་བསངས་ཅན་ལས་ཐར་བར་བྱས་ཏེ་ཕྱིར་མི་འོང་བའི་འབྲས་བུ་ལ་བཞག་གོ །གང་གི་ཚེ་ལག་བརྒྱུད་འབྲོག་གནས་དུས་ལ་བབ་པ་དེའི་ཚེ་ན་སྔོ་བསངས་ཅན་ཀཽ་ཤཱམྦཱིར་སོང་ནས། ཀཽ་ཤཱམྦཱི་བའི་སྐྱེ་བོའི་ཚོགས་ཀྱིས་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་པས་བུ་མོ་དེ་མ་སྨས་པ་ཁོ་ནར་འདིར་འོངས་སོ། །ཞེས་ཐོས་ནས་ཐོས་པ་གཅིག་ནས་གཅིག་ཏུ་བརྒྱུད་པས་བད་སའི་རྒྱལ་པོ་ཤར་པས་ཐོས་པ་དང་། དེས་ཁྱིམ་བདག་གདངས་ཅན་བོས་ཏེ་སྨྲས་པ། ཁྱིམ་བདག་གང་གི་ཉིན་མོ་སྔོ་བསངས་ཅན་གྱིས་ལག་བརྒྱུད་འབྲོག་གནས་བཙལ་བ་དེའི་ཉིན་མོ་ལག་བརྒྱུད་འབྲོག་གནས་ཀྱིས་ཕྱིར་མི་འོང་བའི་འབྲས་བུ་ཐོབ་ནས་བུ་མོ་དེ་མ་སྨས་པ་ཁོ་ནར་འདིར་འོངས་ཞེས་གྲག་ན། ཅི་དེ་བདེན་ནམ། འོན་ཏེ་བརྫུན། དེས་སྨྲས་པ། ལྷ་མད་དོ། །གལ་ཏེ་དེ་ལྟ་ན་ཅིའི་ཕྱིར་ང་ལ་མི་སྦྱིན། ལྷ་གསོལ་ལོ། །རྒྱལ་པོས་བཙུན་མོའི་འཁོར་གྱི་ནང་དུ་བཅུག་སྟེ་བསྙེན་བཀུར་མ་ལྔ་བརྒྱ་ཡང་བྱིན། ཉི་མ་རེ་རེ་ཞིང་དྲི་དང་ཕྲེང་བ་རྒྱུའི་རིན་ཀཱ་པ་ཤ་ཎ་སྟོང་སྟོང་ཡང་བྱིན། ཁང་བཟངས་མེ་ཏོག་གི་སོ་ཞེས་བྱ་བ་ཡང་བྱིན་ནོ། །དེ་ལ་བུ་མོ་མངག་གཞུག་མ་སྒུར་མཆོག་ཅེས་བྱ་བ་ཞིག་ཡོད་པ་དེ་ཉི་མ་རེ་རེ་ཞིང་ཀཱ་པ་ཤ་ཎ་སྟོང་སྟོང་གིས་དྲི་དང་ཕྲེང་བ་རྒྱུ་དག་ཉོ་བར་བྱེད་དོ། །དེ་དུས་གཞན་ཞིག་ན་སྤོས་འཚོང་གི་ཁྱེའུ་ཞིག་དང་ལྷན་ཅིག་སྟེན་པར་གྱུར་ནས་དེས་ཀཱ་པ་ཤ་ཎ་ལྔ་བརྒྱས་ནི་དྲི་དང་མེ་ཏོག་ཕྲེང་བ་དག་ཉོ་བར་བྱེད། ལྔ་བརྒྱ་ནི་དེ་དང་ལྷན་ཅིག་ཟ་བར་བྱེད་དོ། །སྤོས་འཚོང་གི་ཁྱེའུ་དེ་དད་པ་ཅན་ཡིན་པས་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ནས་དེས་སྒུར་མཆོག་ལ་སྨྲས་པ། ཁོ་བོས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་ཀྱིས་ཁྱོད་ཀྱང་ཤོག་ལ་བྲིམས་ཤིག །དེས་དེའི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་སྟ་
གོན་བྱས་ནས་ནང་བར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ་སྤྱན་འདྲེན་བཏང་ནས། བཅོམ་ལྡན་འདས་ལ་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་སོ། །དེ་ནས་བཅོམ་ལྡན་འདས་ཤམ་ཐབས་གསོལ་ལྷུང་བཟེད་དང་ཆོས་གོས་བསྣམས་ཏེ། དགེ་སློང་གི་ཚོགས་ཀྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ཏེ། སྤོས་འཚོང་གི་ཁྱེའུའི་བཀད་ས་ག་ལ་བ་དེར་གཤེགས་ནས། དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ། །དེ་ནས་སྤོས་འཚོང་གི་ཁྱེའུ་སྒུར་མཆོག་དང་བཅས་པས་སངས་རྒྱས་ལ་སོགས་པ་དགེ་སློང་གི་དགེ་འདུན་བདེ་བར་བཞུགས་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད་སྟོབས་པར་བྱེད་དོ། །རྣམ་གྲངས་དུ་མར་བཅའ་བ་དང་བཟའ་བ་གཙང་ཞིང་བསོད་པས་རང་གི་ལག་ནས་ཚིམ་པར་བྱས་ཤིང་བསྟབས་ནས། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས། ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་བླངས་ཏེ་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ །བཅོམ་ལྡན་འདས་ཀྱིས་སྒུར་མཆོག་གི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་སྒུར་མཆོག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ། རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་གསོལ་པ། བཙུན་པ་བདག་གིས་དགེ་བའི་བཤེས་གཉེན་བཅོམ་ལྡན་འདས་ལ་བརྟེན་ནས། བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་
ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་། བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་དེ་གཉིས་ལ་ཆོས་བསྟན་པ་མཛད་ནས་གཤེགས་སོ། །སྒུར་མཆོག་གིས་སྤོས་འཚོང་གི་ཁྱེའུ་དེ་ལ་སྨྲས་པ། རྗེའི་སྲས་ད་ནི་བདག་གིས་གཞན་གྱི་ཏིལ་གྱི་ཕུབ་མ་ཡང་མ་བྱིན་པར་ལེན་པའི་རྔོ་མི་ཐོག་གིས་ཀཱ་པ་ཤ་ཎ་སྟོང་གི་ཡོ་བྱད་དག་སྩོལ་ཅིག། དེས་སྨྲས་པ། མ་ཉེས་ཀྱིས་ཤེས་དེས་དེ་ལ་ཀཱ་པ་ཤ་ཎ་སྟོང་གི་ཡོ་བྱད་དག་བྱིན་ནོ། །དེས་དེ་ཁྱེར་ཏེ་སྔོ་བསངས་ཅན་གྱི་གན་དུ་སོང་བ་དང་། དེས་སྨྲས་པ། སྒུར་མཆོག་ཁྱོད་ཀྱིས་དེང་འདི་མགོ་ཕྱིར་བསྟན་ཏེ་ཉལ་བ་གང་ལས་ཐོབ། དེས་སྨྲས་པ། ཇོ་མོ་སྔོན་ནི་བདག་གིས་བརྐུས་ཀྱིས། ད་ནི་བདག་གི་སླན་ཅད་ཉོན་མོངས་པ་དེ་ལྟ་བུ་དག་ཀུན་དུ་སྤྱོད་པར་མི་འགྱུར་བའི་ཡོན་ཏན་གྱི་རྣམ་པ་དེ་ལྟ་བུ་རྟོགས་སོ། །ཁྱོད་ཀྱིས་དེང་ཅི་བྱས། དེ་ཐོས་པ་འཛིན་པ་ཡིན་པས་སྐབས་དེ་རྒྱས་པར་སྨྲས་པ་དང་། དེས་སྨྲས་པ། སྒུར་མཆོག་ཁྱོད་ཀྱིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་
ཁོ་མོ་ལ་སྨྲོས་ཤིག །ཁྱོད་ཀྱི་ལས་ནི་དེ་ཡིན་ནོ། །དེས་སྨྲས་པ། མ་ནོངས་ཀྱིས་དེ་ལྟར་བགྱིའོ། །དེ་ནས་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་དེ་ལ་བརྗོད་དོ། །བཅོམ་ལྡན་འདས་ཀྱིས་སྒུར་མཆོག་ལ་རྨས་པ། སྒུར་མཆོག་ཁྱོད་བཙུན་མོའི་འཁོར་ལ་ཆོས་སྟོན་ཏམ། བཅོམ་ལྡན་འདས་སྟོན་ཏོ། །ཇི་ལྟར་སྟོན་བཅོམ་ལྡན་འདས་བདག་ནི་འགྲེང་སྟེ་སྟོན་ལ། དེ་དག་ནི་མཆིས་ཏེ་ཉན་ཏོ། །བཀའ་སྩལ་པ། གལ་ཏེ་དེ་དག་སྒུར་མཆོག་ཆོས་སྟོན་ཅིག་ཅེས་ཟེར་ན་མི་བསྟན་ཏོ་ཞེས་བརྗོད་པར་བྱའོ། །ཅིའི་ཕྱིར་ཞེས་ཟེར་ན། འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱོད་པ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་པ་ཡིན་ན། བདག་ཁྱེད་ཅག་གུས་པ་མེད་པ། རྗེ་ས་མེད་པ། སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན་ཅེས་བརྗོད་པར་བྱའོ། །ཇི་ཙམ་དུས་གཞན་ཞིག་ན་སྒུར་མཆོག་གིས་བཅོམ་ལྡན་འདས་ཀྱི་སྤྱན་སྔ་ནས་ཆོས་མཉན་ནས་བཙུན་མོའི་འཁོར་གྱི་ནང་དུ་སོང་བ་དང་། དེ་དག་གིས་དེ་ལ་སྨྲས་པ། སྒུར་མཆོག་ཆོས་སྟོན་ཅིག །དེས་སྨྲས་པ། མི་སྟོན་ཏོ། །ཅིའི་ཕྱིར་འདི་ལྟར་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱིས་དཀའ་བ་སྤྱད་པ་འབུམ་ཕྲག་དུ་མ་དག་གིས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་མཛད་ནས་བླ་ན་མེད་པའི་མཁྱེན་པ་ཐུགས་སུ་ཆུད་ན། བདག་ཁྱེད་ཅག་གུས་པ་མེད་པ་དང་། རྗེ་ས་མེད་པ་སྟན་ཆེས་མཐོན་པོ་ལ་འཁོད་པ་རྣམས་ལ་ག་ལ་སྟོན། སྔོ་བསངས་ཅན་གྱིས་ཐོས་ནས་སེང་གེའི་ཁྲི་བཙུགས་སོ། །གཞན་དག་གིས་ཀྱང་སྟན་ནང་ཚངས་ཅན་བཏིང་ངོ་། །གཞན་དག་གིས་ཀྱང་བཏེག་སྟེ་དེ་ལྟར་བཞག་ནས། སྒུར་མཆོག་སེང་གེའི་ཁྲི་ལ་འདུག་སྟེ། དེ་དག་ལ་གང་ཐོས་ནས་སྔོ་བསངས་ཅན་ལ་སོགས་པ་བུད་མེད་ལྔ་བརྒྱས་ཁྱད་པར་ཆེན་པོ་རྟོགས་ཏེ། ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས། ཁ་ཅིག་གིས་ནི་ལན་
གཅིག་ཕྱིར་འོང་བའི་འབྲས་བུ། ཁ་ཅིག་གིས་ནི་ཕྱིར་མི་འོང་བའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེ་དག་སྒུར་མཆོག་ལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེས་ནས་དེ་དག་གིས་བད་སའི་རྒྱལ་པོ་ཤར་པ་ལ་སྨྲས་པ། ལྷ་བདག་ཅག་སངས་རྒྱས་མཐོང་བར་འཚལ་ལོ། །དེས་སྨྲས་པ། དེ་ལྟར་བྱ་སྟེ། བཅོམ་ལྡན་འདས་ཀྱི་སྤྱན་སྔར་ཇེ་འགྲོའོ་ཞེས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་བད་སའི་རྒྱལ་པོ་ཤར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་མཆིས་འབྲང་གི་འཁོར་བཅོམ་ལྡན་འདས་མཐོང་བར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་བཙུན་མོའི་འཁོར་གྱི་ནང་དུ་མི་འཇུག་གོ །དེས་སོང་སྟེ་དེ་དག་ལ་སྨྲས་པ་དང་། སྔོ་བསངས་ཅན་གྱིས་སྨྲས་པ། ལྷ་གལ་ཏེ་བཅོམ་ལྡན་འདས་བཙུན་མོའི་འཁོར་གྱི་ནང་དུ་མི་གཤེགས་ན་ཁང་བཟངས་མེ་ཏོག་གི་སོ་ལ་སྐར་ཁུང་མང་པོ་དག་གདོད་ཅིང་། བདག་ཅག་སྐར་ཁུང་དག་ནས་བཅོམ་ལྡན་འདས་ལ་ལྟ་བར་ཅི་གནང་། རྒྱལ་པོས་ཁང་བཟངས་མེ་ཏོག་གི་སོ་ལ་སྐར་ཁུང་ལྔ་བརྒྱ་བཏོད་དོ། །གང་གི་ཚེ་བཅོམ་ལྡན་འདས་ཕྱོགས་དེར་གཤེགས་པ་དེའི་ཚེ་ན་བཙུན་མོའི་འཁོར་དེ་དག་གིས་བཅོམ་ལྡན་འདས་སྐར་ཁུང་ནས་མཐོང་ནས། མཆོད་པ་དང་བསྙེན་བཀུར་བྱེད་ཅིང་མེ་ཏོག་དག་དང་། སྤོས་དག་དང་། ན་བཟའ་དག་དང་། མེ་ཏོག་ཕྲེང་གི་ཆུན་པོ་དག་ཀྱང་འཐོར་བར་བྱེད་དོ། །སྣ་ཚོགས་གདུལ་ན་ཀུན་དུ་རྒྱུ་མ་དུ་ཞེས་བྱ་བ་དེ་ལ་ཆུང་མ་བུར་མ་ཞེས་བྱ་བ་ཞིག་ཡོད་པ་དེ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་། ཉིང་ལག་ཐམས་ཅད་དང་ལྡན་པ་ཞིག་བཙས་ནས། དེའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་སོ། །
དེའི་ཉེ་དུ་དག་འདུས་ཤིང་ལྷགས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོའི་མིང་ཅིར་གདགས་ཞེས་དེའི་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། བུ་མོ་འདི་གཟུགས་བཟང་བ། བལྟ་ན་སྡུག་པ། མཛེས་པ། ཡན་ལག་དང་ཉིང་ལག་ཐམས་ཅད་དང་ལྡན་ཞིང་། འདིའི་རུས་པ་དག་ཕྲ་ཞིང་ཤིན་ཏུ་ཕྲ་ལ་དཔེ་བྱ་བར་མི་ནུས་པས་བུ་མོ་འདི་ལ་དཔེ་མེད་པས་འདིའི་མིང་དཔེ་མེད་མ་ཞེས་བྱ་བར་གདགས་སོ་ཞེས་དེའི་མིང་དཔེ་མེད་མ་ཞེས་བྱ་བར་བཏགས་སོ། །དེ་བསྲིངས་ཤིང་བསྐྱེད་ནས་ཆེན་མོར་གྱུར་ཏོ། །མ་དུས་བསམས་པ། བདག་གི་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན། ཐོས་པའི་ཕྱིར་ཡང་མི་སྦྱིན་གྱི། བདག་གིས་གང་འདི་དང་གཟུགས་མཉམ་པའམ། ལྷག་པ་དེ་ལ་སྦྱིན་ནོ་སྙམ་མོ། །དེའི་སྐབས་སུ་བཅོམ་ལྡན་འདས་སྒྲ་མི་སྙན་དག་ཏུ་ལྗོངས་རྒྱུ་ཞིང་གཤེགས་པ་ན་སྣ་ཚོགས་གདུལ་དུ་བྱོན་ནས་སྣ་ཚོགས་གདུལ་ན་སྒྲ་མི་སྙན་གྱི་གྲོང་རྡལ་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་གསོལ། ལྷུང་བཟེད་དང་ཆོས་གོས་བསྣམས་ཏེ་སྣ་ཚོགས་གདུལ་དུ་བསོད་སྙོམས་ལ་ཞུགས་སོ། །སྣ་ཚོགས་གདུལ་དུ་བསོད་སྙོམས་བརྒྱུས་ནས་ཟས་ཀྱི་བྱ་བ་མཛད་དེ། ཕྱི་མའི་ཟས་ཀྱི་བསོད་སྙོམས་ལས་སླར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། ཤིང་ལྗོན་པ་ཞིག་གི་དྲུང་དུ་བརྟེན་ནས་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་བཞུགས་སོ། །དེའི་ཚེ་ན་ཀུན་ཏུ་རྒྱུ་མ་དུ་མེ་ཏོག་དང་། ཡམ་སྲེག་ཤིང་གི་ཕྱིར་ཕྱི་རོལ་དུ་བྱུང་བ་དང་། ཀུན་དུ་རྒྱུ་མ་དུས་ཐག་རིང་པོ་ཁོ་ན་ནས་བཅོམ་ལྡན་འདས་ཤིང་ལྗོན་པ་ཞིག་གི་དྲུང་དུ་རྟེན་ཅིང་བྲང་འགྲོའི་རྒྱལ་པོ་ཉལ་བའི་ལུས་བསྐྱིལ་བ་ལྟར་སྐྱིལ་མོ་ཀྲུང་བཅས་ཏེ་བཞུགས་པ་མཛེས་པ། དད་པར་འགྱུར་བ། དབང་པོ་ཞི་བ། ཐུགས་ཞི་བ། མཆོག་ཏུ་སེམས་དུལ་བ། ཉེ་བར་ཞི་བ་དང་ལྡན་པ། གསེར་གྱི་མཆོད་སྡོང་ལྟར་འབར་བ་མཐོང་ངོ་། །མཐོང་
ནས་ཀྱང་དགའ་བ་དང་མཆོག་ཏུ་དགའ་བ་སྐྱེས་ཏེ་བསམས་པ། དགེ་སྦྱོང་མཛེས་པ་དད་པར་བྱ་བ་འདི་ལྟ་བུ་འདི་ནི་འཛམ་བུའི་གླིང་མཐའ་དག་གི་བདག་པོར་འོས་པ་ཡིན་ན། དཔེ་མེད་མའི་བདག་པོར་ལྟ་སྨོས་ཀྱང་ཅི་དགོས་ཏེ། བདག་གིས་མག་པ་རྙེད་དོ་སྙམ་དུ་རིག་ནས། རང་གི་ཁྱིམ་ག་ལ་བ་དེར་སོང་སྟེ་ཕྱིན་ནས་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག །ངས་བུ་མོའི་མག་པ་རྙེད་ཀྱིས་རྒྱན་བྱོས་ཤིག་དང་དཔེ་མེད་མ་སྦྱིན་ནོ། །དེས་སྨྲས་པ། སུ་ལ་སྦྱིན། དེས་སྨྲས་པ། དགེ་སྦྱོང་གཽ་ཏ་མ་ལའོ། །དེས་སྨྲས་པ། ཇི་ལྟར་འདོང་ངོ་ཞེས་དེ་མ་དུ་དང་ལྷན་ཅིག་འཕགས་པ་དང་། ལམ་གར་དེ་ལ་དྲན་པ་སྐྱེས་ནས་དེས་ཚིགས་སུ་བཅད་པ་སྨྲས་པ། བྲམ་ཟེ་བདག་གིས་དྲང་སྲོང་ཆེན་པོ་དེ། །སྣ་ཚོགས་གདུལ་དུ་བསོད་སྙོམས་ཞུགས་མཐོང་ནས། །དེས་མནན་ས་ཕྱོགས་མཐོན་པོ་དམར་འགྱུར་ཞིང་། །བཏེག་ན་དམའ་བའང་མཐོན་པོ་ཉིད་དུ་འགྱུར། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། ། དེས་དཔེ་མེད་མ་གོས་དང་རྒྱན་དག་གིས་བརྒྱན་ཏེ་འཕགས་པ་དང་། བཅོམ་ལྡན་འདས་ཀྱང་ནགས་ཁྲོད་དེ་ནས་ནགས་ཁྲོད་གཞན་དུ་གཤེགས་སོ། །ཀུན་དུ་རྒྱུ་མ་དུས་བཅོམ་ལྡན་འདས་ཀྱི་གདན་རན་བཏིང་བ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་ཤེས་པར་གྱིས་ཤིག །འདི་ནི་བུ་མོའི་མག་པའི་སྟན་རྩྭ་བཏིང་བ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པར་གྱུར་པའི་མལ་ནི་འཁྲུགས་པར་འགྱུར། །སྡང་བའི་མལ་ནི་གྱ་ཚོམ་བུར་མར་འགྱུར། །རྨོངས་པའི་མལ་ནི་རྐང་པའི་མཐར་འགྲོ་འགྱུར། །འདི་ནི་ཤིན་ཏུ་ཆགས་བྲལ་གནས་ཡིན་ཏེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་
བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ཡི་ཕྱིར་ཡང་འདོད་ཡོན་སྟེན་པར་འགྱུར། །ཀུན་དུ་རྒྱུ་མ་དུས་བཅོམ་ལྡན་འདས་ཀྱི་ཞབས་ཀྱི་རྗེས་དག་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པའི་རྗེས་དག་ཡིན་ནོ། །དེས་ཚིགས་སུ་བཅད་པ་སྨྲས་པ། སྐྱེས་བུ་ཆགས་པའི་རྗེས་ནི་གསལ་མི་འགྱུར། །ཞེ་སྡང་ལྡན་པའི་རྗེས་ནི་ཟབ་པ་ཡིན། །རྨོངས་པར་གྱུར་པའི་རྗེས་ནི་ནོགས་པར་འགྱུར། །ཤིན་ཏུ་ཆགས་བྲལ་རྗེས་ནི་འདི་འདྲ་སྟེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་གསུང་བསལ་བའི་སྒྲ་མཛད་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་ཀྱི་གསུང་བསལ་བའི་སྒྲ་ཐོས་སོ། །ཐོས་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པའི་སྐད་བསལ་བའི་སྒྲ་གྲག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ཡི་སྐད་ནི་ངར་ངར་པོ། །སྡང་བའི་མི་ཡི་སྐད་ནི་རྩུབ་པ་ཡིན། །རྨོངས་པའི་མི་ཡི་སྐད་ནི་འཁྲུགས་པར་འགྱུར། །ཚངས་པའི་རྔ་སྒྲ་འདི་ནི་སངས་རྒྱས་ཏེ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་ཀྱིས་ཐག་རིང་པོ་ཁོ་ན་ནས་ཀུན་དུ་རྒྱུ་མ་དུ་ལ་གཟིགས་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་གཟིགས་པ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པ་ལྟ་བ་ཡིན་
ནོ། །དེས་ཚིགས་སུ་བཅད་པ་སྨྲས་པ། ཆགས་པའི་མི་ནི་རིག་རིག་ལྟ་བར་བྱེད། །སྡང་བའི་མི་ནི་དུག་དྲག་སྦྲུལ་བཞིན་ལྟ། །རྨོངས་པའི་མི་ནི་མུན་ཁྲོད་རྟོག་བཞིན་ལྟ། །ཤིན་ཏུ་ཆགས་བྲལ་གཉའ་ཤིང་ཙམ་དུ་ལྟ། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །བཅོམ་ལྡན་འདས་འཆག་པར་མཛད་པ་དང་། ཀུན་དུ་རྒྱུ་མ་དུས་བཅོམ་ལྡན་འདས་འཆག་པ་མཐོང་ངོ་། །མཐོང་ནས་ཀྱང་ཆུང་མ་ལ་སྨྲས་པ། བཟང་མོ་འདི་ནི་བུ་མོའི་མག་པ་འཆག་པ་ཡིན་ནོ། །དེས་ཚིགས་སུ་བཅད་པ་སྨྲས་པ། ཇི་ལྟར་འདི་སྤྱན་ཇི་ལྟར་གཟིགས་པ་དང་། །ཇི་ལྟར་འདི་སྐུ་བརྟན་པར་གཤེགས་པ་དང་། །ཇི་ལྟར་འདི་ཡི་སྒྲོས་དང་ཞལ་དག་ནི། །རྡུལ་དང་བྲལ་བ་ཉིད་དུ་སྣང་བ་ལས། །ཁྱིམ་ཐབ་དེ་ནི་གཞོན་ནུ་མི་སྟེན་གྱིས། །ཕྱིར་ལོག་རང་གི་སྡུམ་པ་ཉིད་དུ་འདོང་། །དེས་ཀྱང་ཚིགས་སུ་བཅད་པ་དག་སྨྲས་པ། ཀྱེ་མ་བུར་མ་བཀྲ་མི་ཤིས་པ་ཁྱོད། །བཀྲ་ཤིས་དུས་སུ་བཀྲ་ཤིས་མ་ཡིན་སྨྲ། །གལ་ཏེ་བརྟུལ་ཞུགས་ཐབས་ཀྱིས་བླངས་གྱུར་ན། །དེ་ནི་ཕྱིར་ཡང་འདོད་ཡོན་སྟེན་པར་འགྱུར། །གནས་འཇོག་གསེར་མདོག་ཨོ་ཏ་ལ་དག་ཀྱང་། །བུ་ཡི་དོན་དུ་འདོད་པས་རྨོངས་གྱུར་ཏེ། །འདི་ནི་ཆོས་བཞིན་ཕུལ་བས་ཐུབ་རྣམས་ཀྱིས། །རྟག་པར་རྒྱུན་དུ་བུ་དག་བསྐྱེད་པར་གྱུར། །དེ་ནས་ཀུན་དུ་རྒྱུ་མ་དུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གི་བུ་མོ་དམ་པ་གཟུགས་ལྡན་ཞིང་། །དར་བ་བརྒྱན་པ་འདོད་པ་དོན་གཉེར་བ། །ཁྱོད་ལ་འབུལ་བ་འདི་ལ་ཁྱོད་གཟིགས་ཤིང་། །མཁའ་ལ་དགུང་ཟླ་སྨིན་དྲུག་མཇལ་བ་ལྟར། །འདི་དང་ལྷན་ཅིག་ལེགས་པར་ཁྱོད་དགྱེས་མཛོད། །བཅོམ་ལྡན་འདས་ཀྱིས་དགོངས་པ། གལ་ཏེ་ངས་
དཔེ་མེད་མ་ལ་རྗེས་སུ་ཆགས་པའི་ཚིག་བརྗོད་ན་དཔེ་མེད་མ་འདོད་ཆགས་ཀྱིས་གདུངས་ཏེ་དུས་བྱེད་པར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གྱིས་བདག་གིས་འདི་ལ་ཁོང་ཁྲོ་བའི་ཚིག་བརྗོད་པར་བྱའོ་སྙམ་དུ་རིག་ནས་ཚིགས་སུ་བཅད་པ་བཀའ་སྩལ་པ། བྲམ་ཟེ་ང་ཡིས་བདུད་ཀྱི་བུ་མོ་ནི། །སྲེད་མ་དགའ་བྱེད་དེ་བཞིན་དགའ་མོ་དག །ཕམ་བྱས་འདོད་པ་དག་ལ་ལན་འགའ་ཡང་། །ང་ཡིས་འདུན་པའི་སེམས་བསྐྱེད་མ་གྱུར་པས། །བཤང་དང་གཅི་བས་གང་བ་འདི་ལ་ནི། །རྐང་པས་རེག་པར་སྤྲོ་བའང་མི་སྐྱེད་དོ། །མ་དུས་ཚིགས་སུ་བཅད་པ་གསོལ་པ། བདག་གི་བུ་མོ་ཡན་ལག་ཉམས་གྱུར་ཅིང་། །འདོད་ལྡན་ཡོན་ཏན་བྲལ་བར་གཟིགས་སམ་ཅི། །ཇི་སླད་འདོད་སྤྱོད་ཡིད་འོང་གཟུགས་དག་ལ། །འདུན་དྲག་བགྱིད་ལྟར་འདི་ལ་ཁྱོད་མི་མཛད། །བཅོམ་ལྡན་འདས་ཀྱིས་ཀྱང་ཚིགས་སུ་བཅད་པ་དག་བཀའ་སྩལ་པ། བྲམ་ཟེ་རྨོངས་པ་གང་ཞིག་ཡུལ་འདོད་པ། །དེ་ནི་ཁྱོད་ཀྱི་བུ་མོ་འདི་སྒྲུབ་ཅིང་། །ཡུལ་ལ་ཆགས་ཤིང་ཁྲོ་བར་ཞུགས་གྱུར་པ། །འདི་ལ་རབ་རྨོངས་སྐྱེ་བོ་ཆགས་བྲལ་མིན། །ང་ནི་སངས་རྒྱས་ཐུབ་གཙོ་མངའ་བདག་སྟེ། །ང་ཡིས་བྱང་ཆུབ་བླ་མེད་ཞི་བ་བརྙེས། །ཇི་ལྟར་པད་མ་ཆུས་མི་ཆགས་པ་ལྟར། །ཆགས་པ་མེད་པ་ཉིད་དུ་འཇིག་རྟེན་རྒྱུ། །ཨུཏྤལ་སྔོན་པོ་རྫབ་དང་ཆུ་ནང་ན། །རྫབ་དང་ཆུ་ཡིས་གོས་པ་མེད་པ་ལྟར། །བྲམ་ཟེ་དེ་བཞིན་ང་ཡིས་འཇིག་རྟེན་ན། །འདོད་པ་དག་ལ་རྣམ་གྲོལ་སེམས་ཀྱིས་སྤྱོད། །དེ་ནས་དཔེ་མེད་མ་བཅོམ་ལྡན་འདས་ཀྱིས་བཤང་བ་དང་གཅི་བ་ཞེས་བྱ་བའི་ཚིག་གིས་ཀུན་དུ་སྤྱད་པས་རངས་པ་དང་བྲལ་ཏེ། ཡིད་མི་བདེ་བར་གྱུར་ནས་དེའི་འདོད་ཆགས་ཀྱི་ཀུན་ནས་དཀྲིས་པ་གང་ཡིན་པ་དེ་མེད་པར་གྱུར་ཅིང་། ཞེ་སྡང་གི་ཀུན་ནས་དཀྲིས་པ་སྐྱེས་པས་རུས་པ་དག་སྦོམ་པོར་གྱུར་ཅིང་། མིག་གཉིས་ཀྱང་མཆིང་བུ་ལྟ་བུར་གྱུར་ཏོ། །དེའི་ཚེ་ན་རྒན་ཞུགས་ཤིག་བཅོམ་ལྡན་འདས་ཀྱི་སྣམ་ལོགས་ན་འདུག་པར་གྱུར་ཏོ། །དེ་ནས་བཅོམ་ལྡན་འདས་ལ་རྒན་ཞུགས་དེས་འདི་སྐད་ཅེས་གསོལ་ཏོ། །ཀུན་ཏུ་གཟིགས་
པ་བུད་མེད་བླང་མཛད་དེ། །བཅོམ་ལྡན་དེ་ནི་བདག་ལ་སྩལ་དུ་གསོལ། །དཔའ་བོ་བདག་གིས་དྲེགས་པས་བརྒྱན་པ་འདི། །ཅི་ནས་རྗེས་སུ་མཐུན་པ་སྤྱད་པར་བགྱི། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་རྒན་ཞུགས་དེ་ལ་འདི་སྐད་ཅེས་བཀའ་སྩལ་ཏོ། །མི་གཏི་མུག་ཅན་ངའི་མདུན་ན་མ་འདུག་པར་ཕར་སོང་ཤིག །དེ་ཁྲོས་ཏེ་ཚིགས་སུ་བཅད་པ་སྨྲས་པ། ཁྱོད་ཀྱི་ལྷུང་བཟེད་འདི་དང་ཆོས་གོས་འདི། །ཁར་བ་རིལ་བ་འདི་ཡང་ཟད་གྱུར་ཅིག །བསླབ་པ་འདི་ཡང་ཇི་ལྟར་མ་མ་ཡི། །པང་པར་གཞོན་ནུ་འཛིན་ལྟར་རང་སྲེལ་ཅིག །རྒན་ཞུགས་དེས་དེ་སྐད་ཅེས་སྨྲས་ནས་བསླབ་པ་ཕུལ་ཏེ་ཉམས་པའི་ཕྱིར་ཞུགས་ནས་ཀུན་དུ་རྒྱུ་མ་དུ་ག་ལ་བ་དེར་སོང་སྟེ་ཕྱིན་ནས་ཀུན་དུ་རྒྱུ་མ་དུ་ལ་འདི་སྐད་ཅེས་སྨྲས་སོ། །མ་དུ་དཔེ་མེད་མ་ཁོ་བོ་ལ་བྱིན་ཅིག །དེས་ཁྲོས་ཏེ་སྨྲས་པ། རྒན་ཞུགས་ཁྱོད་ལ་བལྟ་བ་ཡང་མི་སྦྱིན་ན་རེག་པ་ལྟ་སྨོས་ཀྱང་ཅི་དགོས། དེ་སྐད་ཅེས་སྨྲས་པ་དང་། རྒན་ཞུགས་དེས་ཀུན་དུ་རྒྱུ་མ་དུ་ལ་འདི་ལྟ་བུའི་ཀུན་ནས་དཀྲིས་པ་སྐྱེས་ཏེ་དེས་ཁྲག་ཚ་བ་སྐྱུགས་ནས་དུས་ལ་བབ་སྟེ་སེམས་ཅན་དམྱལ་བ་རྣམས་སུ་སྐྱེས་སོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་དྲུག་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་བཅོམ་ལྡན་འདས་ཀྱིས་དཔེ་མེད་མ་བརྙེས་པ་ནམ་བཞེས་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་ངས་འདི་རྙེད་པ་ན་མ་བླངས་ཏེ་དེ་ཉོན་ཅིག །དགེ་སློང་དག་སྔོན་བྱུང་བ་རི་བྲགས་ཤིག་ན་ལྕགས་མགར་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་བུ་མོ་གཟུགས་
བཟང་བ། བལྟ་ན་སྡུག་པ། མཛེས་པ་ཞིག་བྱུང་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ། །ལྕགས་མགར་དེས་བསམས་པ། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། འདི་ལྟར་གང་བདག་དང་བཟོས་མཉམ་པའམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་སྙམ་མོ། །ཇི་ཙམ་ན་བྲམ་ཟེའི་ཁྱེའུ་ཞིག་སློང་མོའི་དོན་དུ་དེའི་ཁྱིམ་དུ་ཞུགས་པ་དང་། བུ་མོ་དེས་ཟས་ཁྱེར་ཏེ་ཕྱིར་བྱུང་བ་ན་བྲམ་ཟེའི་ཁྱེའུ་དེས་མཐོང་ནས་སྨྲས་པ། བུ་མོ་ཁྱོད་འགའ་ཞིག་ལ་བྱིན་ནམ། འོན་ཏེ་མ་བྱིན། དེས་སྨྲས་པ། བདག་གི་ཕ་ཇི་སྐད་ཟེར་བ་དང་སྦྱར་ན་དེས་བདག་སུ་ལ་ཡང་སྦྱིན་པར་དཀའོ། །ཁྱོད་ཀྱི་ཕ་ཇི་སྐད་ཟེར། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན་གྱི། འདི་ལྟར་གང་བདག་དང་བཟོས་མཉམ་པའམ་ལྷག་པ་དེ་ལ་བདག་གིས་འདི་སྦྱིན་པར་བྱའོ་ཞེས་ཟེར་རོ། །ཁྱོད་ཀྱི་ཕ་བཟོ་ཇི་ལྟ་བུ་ཤེས། ཁབ་གང་ཆུའི་སྟེང་ན་འཕྱོ་བ་དེ་ལྟ་བུ་ཤེས་སོ། །བྲམ་ཟེའི་ཁྱེའུ་དེས་བསམས་པ། འདི་ལྟར་བདག་འདི་དོན་དུ་མི་གཉེར་མོད་ཀྱི་འདིའི་ང་རྒྱལ་བཅག་པར་བྱའོ་སྙམ་ནས། དེ་མཁས་པ་ཡིན་པས་དེས་བཟོའི་གནས་དང་། ལས་ཀྱི་གནས་དེ་དང་དེ་དག་ནས་ལྕགས་མགར་གྱི་མགར་སྤྱད་དག་བརྙས་ཏེ་ཁབ་གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་བརྡུངས་ཤིང་ཁབ་སྦོམ་པོ་གཅིག་བརྡུངས་ནས་དེའི་མིག་ཏུ་ཁབ་ཕྲ་མོ་བདུན་བཅུག་ན་དེ་དང་ལྷན་ཅིག་ཆུའི་སྟེང་ན་འཕྱོ་བ་བརྡུངས་སོ། ། དེས་དེ་དག་བརྡུངས་ནས་ལྕགས་མགར་དེའི་ཁྱིམ་དུ་འོངས་ཏེ་སྨྲས་པ། ཁབ་སུ་ཉོ་ཁབ་སུ་ཉོ་ཞེས་བྱས་པ་དང་། བུ་མོ་དེས་མཐོང་ནས་ཚིགས་སུ་བཅད་པ་སྨྲས་པ། གྲོགས་པོ་ཁྱོད་ནི་སྨྱོས་པ་འམ། །འོན་ཏེ་སེམས་མེད་གྱུར་པ་ཡིན། །གང་ཕྱིར་ལྕགས་མགར་ཁྱིམ་དུ་ཁྱོད། །ཁབ་དག་འཚོང་དུ་འོངས་པར་གྱུར། །དེས་ཀྱང་ཚིགས་སུ་བཅད་པ་དག་སྨྲས་པ། བཟང་མོ་ཁོ་བོ་སྨྱོས་པ་མིན། །སེམས་མེད་གྱུར་པའང་མ་ཡིན་ཏེ། །ང་རྒྱལ་
བཅག་པར་བྱ་བའི་ཕྱིར། །ཁོ་བོས་བཟོ་དག་ཉེ་བར་བསྒྲུབས། །གལ་ཏེ་ཁོ་བོའི་བཟོ་འདྲ་བ། །ཁྱོད་ཀྱི་ཕ་ཡིས་ཤེས་གྱུར་ན། །ཁྱོད་དང་ནོར་གྱི་རྣམ་པ་ནི། །མང་པོ་གཞན་ཡང་སྦྱིན་པར་གྱིས། །དེས་སྨྲས་པ། ཁྱོད་ཀྱིས་བཟོ་ཇི་ལྟ་བུ་ཤེས། ཁབ་གང་དག་ཆུའི་སྟེང་ན་འཕྱོ་བ་དེ་ལྟ་བུ་དག་ཤེས་སོ། །དེས་མ་ལ་སྦྲན་པ། ཡུམ་བཟོ་བོའི་བུ་ཞིག་མཆིས་སོ། །དེས་སྨྲས་པ། འཇུག་ཏུ་ཆུག་ཤིག །དེས་འཇུག་ཏུ་བཅུག་པ་དང་། ལྕགས་མགར་གྱི་ཆུང་མས་སྨྲས་པ། ཁྱོད་བཟོ་ཇི་ལྟ་བུ་ཤེས། དེས་སྨྲས་པ་དང་། དེས་ཁྱིམ་ཐབ་ལ་སྦྲན་པ། རྗེའི་སྲས་བཟོ་བོའི་ཁྱེའུ་འདིས་བཟོ་འདི་ལྟ་བུ་འཚལ་ཏོ། །དེས་སྨྲས་པ། གལ་ཏེ་དེ་ལྟ་ན་ཆུ་འོན་ཅིག་དང་བལྟའོ། །དེས་ཆུས་སྣོད་བཀང་སྟེ་ཕུལ་བ་དང་། དེས་ཁབ་གཅིག་བཅུག་ན་དེ་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང་། གསུམ་པ་ནས་བདུན་པའི་བར་དུ་བཅུག་ན་དེ་ཡང་འཕྱོ་བར་བརྩམས་སོ། །དེས་ཁབ་སྦོམ་པོ་དེ་བཅུག་ན་དེ་ཡང་འཕྱོ་བར་བརྩམས་སོ། །ཡང་དེར་ཁབ་གཅིག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །དེ་བཞིན་དུ་ཁབ་གཉིས་པ་དང་། གསུམ་པ་ནས་བདུན་པའི་བར་དག་བཅུག་སྟེ་བཅུག་ན་དེ་ལྟ་ན་ཡང་འཕྱོ་བར་བརྩམས་སོ། །ལྕགས་མགར་གྱིས་བསམས་པ། འདི་བདག་པས་བཟོ་ཆེས་ལྷག་པ་ཡིན་གྱིས་འདི་ལ་བུ་མོ་སྦྱིན་ནོ་སྙམ་དུ་རིག་ནས། བུ་མོ་དེ་རྒྱན་ཐམས་ཅད་ཀྱིས་བཀླུབས་ཏེ་ལག་པ་གཡོན་པས་བཟུང་ནས་ལག་པ་གཡས་པས་རིལ་བ་བྷྲིང་གར་ཐོགས་ཏེ་བྲམ་ཟེའི་ཁྱེའུ་དེའི་མདུན་དུ་འདུག་ནས་སྨྲས་པ། བྲམ་ཟེའི་ཁྱེའུ་ཁྱོད་ལ་ཁོ་བོས་བུ་མོ་འདི་ཆུང་མར་སྦྱིན་ནོ། །དེས་སྨྲས་པ། ཁོ་བོ་འདི་དོན་དུ་མི་གཉེར་ཏེ། འདི་ལྟར་ཁོ་བོས་ཁྱོད་ཀྱི་ང་རྒྱལ་བཅག་པར་བྱ་བའི་ཕྱིར་བཟོ་ཉེ་བར་བསྟན་ཏོ། །དགེ་སློང་དག་དེའི་ཚེ་དེའི་དུས་ན་བྲམ་ཟེའི་ཁྱེའུ་གང་ཡིན་པ་དེ་ནི་ང་ཉིད་ཡིན་ནོ། ། དེའི་ཚེ་དེའི་དུས་ན་ལྕགས་མགར་གང་ཡིན་པ་དེ་ནི་ཀུན་དུ་རྒྱུ་མ་དུ་འདི་ཡིན་ནོ། །དེའི་ཚེ་དེའི་དུས་ན་ལྕགས་མགར་གྱི་ཆུང་མ་གང་ཡིན་པ་དེ་ནི་བུར་མ་འདི་ཡིན་ནོ། །དེའི་ཚེ་དེའི་དུས་ན་ལྕགས་
མགར་གྱི་བུ་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། དེའི་དུས་ན་ཡང་ངས་དཔེ་མེད་མ་འདི་རྙེད་པ་ན་མ་བླངས་ལ་ད་ལྟར་ཡང་ངས་འདི་རྙེད་པ་ན་མ་བླངས་སོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་རྒན་ཞུགས་འདི་དཔེ་མེད་མ་ལ་བརྟེན་ནས་ཚུལ་མ་ལགས་པས་སྡུག་བསྔལ་བར་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ད་ལྟར་དུ་མ་ཟད་དེ། འདི་ལྟར་འདས་པའི་དུས་ན་ཡང་འདི་དཔེ་མེད་མ་ལ་བརྟེན་ནས་བཙུན་མོའི་འཁོར་དང་བཅས་པ་ཚུལ་མ་ཡིན་པས་སྡུག་བསྔལ་བར་གྱུར་ཏེ་དེ་ཉོན་ཅིག །དགེ་སློང་དག་སྔོན་བྱུང་བ་རྒྱལ་པོའི་ཕོ་བྲང་སེང་གེ་ལྟ་བུ་ན་རྒྱལ་པོ་སེང་གེ་རལ་པ་ཅན་གྱིས་རྒྱལ་སྲིད་འབྱོར་པ། རྒྱས་པ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་འཐབ་པ་དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །དེའི་ཚེ་ན་རྒྱལ་པོའི་ཕོ་བྲང་སེང་གེ་ལྟ་བུ་ན་དེད་དཔོན་སེང་གེ་ཞེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པ་དེའི་ཆུང་མ་ལ་སེམས་ཅན་ཞུགས་པར་གྱུར་ཏོ། །བུད་མེད་ཀྱི་ཡུལ་མཁས་པའི་རང་བཞིན་ཅན་ལ་ལ་ལ་མ་འདྲེས་པའི་ཆོས་ལྔ་ཡོད་དེ། ལྔ་གང་ཞེ་ན། སྐྱེས་པ་ཆགས་པར་གྱུར་པ་ཤེས་ཤིང་ཆགས་པ་དང་བྲལ་བ་ཤེས་པ་དང་དུས་ཤེས་ཤིང་ཟླ་མཚན་ཤེས་པ་དང་། མངལ་ན་གནས་པ་ཞུགས་པ་ཤེས་པ་དང་། གང་ལས་མངལ་ན་གནས་པ་ཞུགས་པ་དེ་ཤེས་པ་དང་། ཁྱེའུ་ཤེས་
ཤིང་བུ་མོ་ཤེས་པ་སྟེ། གལ་ཏེ་ཁྱེའུ་ཡིན་ན་དཀུ་གཡས་པར་རྟེན་ཅིང་འདུག་ལ། གལ་ཏེ་བུ་མོ་ཡིན་ན་དཀུ་གཡོན་པར་རྟེན་ཅིང་འདུག་པའོ། །དེ་ཡིད་དགའ་ཞིང་ཡིད་དགའ་ནས་ཁྱིམ་ཐབ་ལ་སྨྲས་པ། རྗེའི་སྲས་མཁྱེན་པར་མཛོད་ཅིག །བདག་ལ་སེམས་ཅན་ཞུགས་པར་གྱུར་པ་ནི་འདི་ལྟར་བདག་གི་དཀུ་གཡས་པར་རྟེན་ཅིང་མཆིས་པས་ངེས་པར་ཁྱེའུར་འགྱུར་རོ། །དེ་ཡང་ཡིད་དགའ་ཞིང་ཡིད་དགའ་ནས་འདི་སྐད་ཅེས་ཁོ་བོ་ཡུན་རིང་པོ་ནས་མངོན་པར་འདོད་པ་བུའི་ངོ་མཐོང་བ་དང་། ཁོ་བོ་དང་མཐུན་པར་སྐྱེ་ཞིང་མི་མཐུན་པར་མི་སྐྱེ་བ་དང་། ཁོ་བོའི་བྱ་བ་དག་བྱེད་པ་དང་། གསོས་པས་ཕྱིར་གསོ་བ་དང་། བགོ་སྐལ་ལ་སྤྱོད་པ་དང་། ཁོ་བོའི་རིགས་རྒྱུད་ཡུན་རིང་དུ་གནས་པར་འགྱུར་བ་དང་། བདག་ཅག་ཤི་ཞིང་དུས་ལ་བབ་པ་དག་ལ་ཉུང་ངུའམ་མང་པོ་ཡང་རུང་བའི་སྦྱིན་པ་དག་བྱིན་ཞིང་བསོད་ནམས་དག་བྱས་ནས། འདི་དེ་གཉིས་གང་དུ་སྐྱེས་པར་འགྲོ་ཞིང་རྗེས་སུ་འགྲོ་བར་གྱུར་ཅིག་ཅེས་མིང་གིས་ཡོན་བཤད་པ་བྱེད་པར་གྱུར་ཅིག་ཅེས་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ལ་སེམས་ཅན་ཞུགས་པར་རིག་ནས་འདི་ལྟ་སྟེ། མངལ་ན་གནས་པ་ཡོངས་སུ་སྨིན་པར་བྱ་བའི་ཕྱིར་སྟེང་གི་ཁང་བཟངས་ཀྱི་གཞིར་གཏོགས་པར་གྲང་བ་ན་གྲང་བའི་ཡོ་བྱད་དག་དང་། དྲོ་བ་ན་དྲོ་བའི་ཡོ་བྱད་དག་དང་། སྨན་པས་བཅས་པའི་ཟས་ཧ་ཅང་མི་ཁ་བ་དང་། ཧ་ཅང་མི་སྐྱུར་བ་དང་། ཧ་ཅང་ལན་ཚྭ་མི་ཆེ་བ་དང་། ཧ་ཅང་མི་མངར་བ་དང་། ཧ་ཅང་མི་ཚ་བ་དང་། ཧ་ཅང་མི་བསྐ་བ་དང་། ཁ་བ་དང་། སྐྱུར་བ་དང་། ལན་ཚྭ་དང་། མངར་བ་དང་། ཚ་བ་དང་། བསྐ་བ་རྣམ་པར་སྤངས་པའི་ཟས་དག་དང་། དོ་ཤལ་དང་། སེ་མོ་དོ་དང་། རྒྱན་གྱིས་བཀླུབས་པའི་ལུས་ལྷའི་བུ་མོ་དགའ་བའི་ཚལ་ན་རྣམ་པར་སྤྱོད་པ་ལྟ་བུ་དང་། ཁྲི་ནས་ཁྲིར་དང་། ཁྲིའུ་ནས་ཁྲིའུར་དང་། ཤོད་ཀྱིས་གཞིར་མི་འབབ་པ་དང་། དེས་སྒྲ་ཡིད་དུ་མི་འོང་བ་ཅུང་ཟད་ཀྱང་མི་ཐོས་པར་གནོད་པ་མེད་པ་ཉིད་དུ་རིམ་གྲོ་བྱེད་དུ་འཇུག་གོ །དེ་ཟླ་བ་བརྒྱད་དམ་དགུ་འདས་ཏེ་
བཙས་པ་ལས་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། གསལ་བ། གསེར་གྱི་མདོག་འདྲ་བ། མགོ་གདུགས་ལྟ་བུ་དང་ལྡན་པ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ། སྣའི་གཟངས་མཐོ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས། ཁྱེའུའི་མིང་ཅིར་གདགས་ཞེས་མིང་འདོགས་པར་བྱེད་དོ། །དེའི་ཉེ་དུ་དག་གིས་སྨྲས་པ། གང་གི་ཕྱིར་ཁྱེའུ་འདི་དེད་དཔོན་སེང་གེའི་བུ་ཡིན་པ་དེའི་ཕྱིར་ཁྱེའུ་འདིའི་མིང་སིང་ག་ལ་ཞེས་བྱའོ། །ཞེས་དེའི་མིང་སིང་ག་ལ་ཞེས་བྱ་བར་བཏགས་སོ། །ཁྱེའུ་སིང་ག་ལ་མ་མ་བརྒྱད་པོ་པང་ན་འཚོ་བའི་མ་མ་གཉིས་དང་། ནུ་མ་སྣུན་པའི་མ་མ་གཉིས་དང་། དྲི་མ་འཕྱི་བའི་མ་མ་གཉིས་དང་། རྩེན་གྲོགས་ཀྱི་མ་མ་གཉིས་ལ་རྗེས་སུ་གཏད་དོ། །དེ་མ་མ་བརྒྱད་པོ་དག་གིས་འོ་མ་དང་། ཞོ་དང་། མར་དང་ཞུན་མར་དང་། མར་གྱི་སྙིང་ཁུ་དང་། གཞན་ཡང་ཡོ་བྱད་ཀྱི་བྱེ་བྲག་གཙོ་བོ་གཙོ་བོ་དག་གིས་སྲིང་བར་བྱེད། སྐྱེད་པར་བྱེད་ཅིང་རྫིང་ན་གནས་པའི་པད་མ་བཞིན་དུ་མྱུར་དུ་སྐྱེད་པར་བྱེད་དོ། །དེ་གང་གི་ཚེ་ཆེན་པོར་གྱུར་པ་དེའི་ཚེ་ཡི་གེ་དང་། གྲངས་དང་རྩིས་དང་། ལག་རྩིས་དང་། དབྱུང་བ་དང་། གཞུག་པ་དང་། གཞག་པ་ལ་ཉེ་བར་ཞུགས་ནས། དེའི་ཡི་གེ་མཐར་ཕྱིན་ཅིང་འབྱེད་པ་དང་། ཀློག་པ་དང་། མཁས་པ་དང་། སྤྱོད་པ་གསལ་བ་དང་། བརྟག་པ་བརྒྱད་པོ་འདི་ལྟ་སྟེ། རིན་པོ་ཆེ་བརྟག་པ་དང་། གཞི་བརྟག་པ་དང་། གོས་བརྟག་པ་དང་། ཤིང་རྟ་བརྟག་པ་དང་། གླང་པོ་ཆེ་བརྟག་པ་དང་། རྟ་བརྟག་པ་དང་། བུད་མེད་བརྟག་པ་དང་། སྐྱེས་པ་བརྟག་པ་ལ་མཁས་པར་གྱུར་ཏོ། །ཕས་དེའི་ཆུང་མའི་འཁོར་གསུམ་པོ་རབ་དང་། འབྲིང་དང་། ཐ་མ་དག་རྣམ་པར་བཞག་གོ། །འདུག་པའི་གནས་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ། །
སྐྱེད་མོས་ཚལ་གསུམ་པོ་དགུན་གྱི་དང་། དཔྱིད་ཀྱི་དང་། དབྱར་གྱི་དག་བྱེད་དུ་བཅུག་གོ །དེ་སྟེང་གི་ཁང་བཟངས་ཀྱི་གཞིར་གཏོགས་པ་ན་སྐྱེས་པ་མེད་པར་སིལ་སྙན་གྱིས་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་ཕ་ལ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་པར་ཅི་གནང་། དེས་སྨྲས་པ། བུ་རེ་ཞིག་ཁོ་བོ་ལ་ནོར་གྱི་རྣམ་པ་མང་དུ་ཡོད་དེ། གལ་ཏེ་ཁྱོད་ཏིལ་དང་། འབྲས་དང་རྒྱ་ཤུག་དང་། རྒྱ་སྲན་ལ་སོགས་པ་ལ་སྤྱོད་པ་བཞིན་དུ་རིན་པོ་ཆེ་དག་ལ་སྤྱོད་པར་བྱེད་ཀྱང་དེ་ལྟ་ན་ཡང་ཁོ་བོའི་ལོངས་སྤྱོད་སྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་གཏུགས་པར་མི་འགྱུར་གྱིས། དེའི་ཕྱིར་ཇི་སྲིད་དུ་ཁོ་བོ་གསོན་པ་དེ་སྲིད་དུ་ཁྱོད་རྩེ་བར་གྱིས། དགའ་བར་གྱིས། དགའ་མགུར་སྤྱོད་པར་གྱིས་ལ་ཁོ་བོ་འདས་པ་དང་ནོར་བསྒྲུབ་པར་གྱིས་ཤིག །དེས་ཡང་དང་ཡང་དུ་སྨྲས་པ། ཡབ་བདག་རྒྱ་མཚོ་ཆེན་པོར་འཇུག་པར་ཅི་གནང་། དེས་གདོན་མི་ཟ་བར་དུས་ཀྱིས་འཆུ་བར་ཤེས་ནས་སྨྲས་པ། བུ་དེ་ལྟར་གྱིས་ཤིག །འདི་ལྟར་ཁྱོད་ཀྱིས་འཇིགས་པ་དང་། འཇིགས་སུ་རུང་བ་དག་བཟོད་པར་བྱའོ། །དེས་རྒྱལ་པོའི་ཕོ་བྲང་སེང་གེ་ལྟ་བུར་དྲིལ་བསྒྲགས་པ་བྱེད་དུ་བཅུག་སྟེ། རྒྱལ་པོའི་ཕོ་བྲང་སེང་གེ་ལྟ་བུ་ན་གནས་པ་དང་། ཡུལ་ཐ་དད་པ་ནས་ལྷགས་པའི་ཚོང་པ་ཤེས་ལྡན་དག་ཉོན་ཅིག །དེད་དཔོན་སིང་ག་ལ་རྒྱ་མཚོ་ཆེན་པོར་འཇུག་པར་འགྱུར་གྱིས། ཁྱེད་ཅག་ལས་གང་དེད་དཔོན་སིང་ག་ལ་དང་ལྷན་ཅིག་ཤོ་གམ་མེད་པ་དང་། ལ་གཅན་མེད་པ་དང་། གྲུ་བཙས་མེད་པར་རྒྱ་མཚོ་ཆེན་པོར་འཇུག་པར་འདོད་པ་དེས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་གྱིས་ཤིག་ཅེས་བསྒོའོ། །ཚོང་པ་ལྔ་བརྒྱས་རྒྱ་མཚོ་ཆེན་པོར་འགྲོ་བའི་ཟོང་སྟ་གོན་བྱས་སོ། །དེ་ནས་དེད་དཔོན་སིང་ག་ལས་ཕ་མ་དང་། གཞན་ཡང་སྙིང་དུ་སྡུག་ཅིང་འབྲེལ་བའི་རྩ་ལག་དག་ལ་བལྟས་ནས་ཉི་མ་དང་། ཚེས་གྲངས་དང་། ཡུད་ཙམ་དང་། སྦྱོར་བས་དགེ་མཚན་དང་། བཀྲ་ཤིས་དང་། བདེ་ལེགས་སུ་འགྱུར་བ་བྱས་ནས། ཤིང་རྟ་དག་དང་། ཁུར་དག་དང་། གླེ་བ་དག་དང་། སྤྱད་དག་དང་། རྔ་
མོ་དག་དང་། བ་ལང་དག་དང་། བོང་བུ་མང་པོ་དག་གིས་རྒྱ་མཚོ་ཆེན་པོར་འགྲོ་བའི་ཟོང་ཁྱེར་ཏེ་ཚོང་པ་ལྔ་བརྒྱའི་འཁོར་དང་ལྷན་ཅིག་འཕགས་སོ། །དེ་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་དང་། ཡུལ་འཁོར་དང་། རྒྱལ་པོའི་ཕོ་བྲང་དག་ཏུ་ཚོང་རྡལ་དག་ལ་རྣམ་པར་ལྟ་ཞིང་འགྲོ་བ་ན་རྒྱ་མཚོ་ཆེན་པོའི་འགྲམ་དུ་ཕྱིན་ཏོ། །དེས་རྙིང་པ་ལྔ་བརྒྱས་གྲུ་སྦྱར་ནས་ཞོ་ཤས་འཚོ་བ་ལྔ་པོ་སྟོབས་པར་བྱེད་པ་དང་། སེལ་བར་བྱེད་པ་དང་། གྲུ་པ་དང་། རྐྱལ་ཆེན་པ་དང་། རླུང་ཡོར་ཐོགས་པ་དག་ཁྲིད་དེ་ལན་གསུམ་དྲིལ་བསྒྲགས་པ་བྱས་ཏེ་རྒྱ་མཚོ་ཆེན་པོར་འཇུག་པར་བརྩམས་སོ། །དེ་ནས་ཚོང་པ་དེ་དག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བ་ཤེས་པར་དཀས། བདག་ཅག་ནོར་སྒྲུབ་པ་དག་གིས་སོ་སོ། སོ་སོ་དག་ནས་ཕོངས་པའི་དོན་དུ་ཆུར་རྐྱལ་པ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ཁ་ཅིག་གིས་ནི་ཀུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་དག་བཀུར་རོ་སྙམ་ནས། དེ་ནས་ནོར་སྒྲུབ་པ་དེ་དག་གིས་དེ་ལྟར་སོ་སོར་བརྟགས་ནས་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ། ཁ་ཅིག་གིས་ནི་ཤལ་མ་ལའི་སྤང་ལེབ་དག །ཁ་ཅིག་གིས་ནི་སྔས་ཤིང་བལ་ཅན་དག །ཁ་ཅིག་གིས་ནི་ཀུ་བའི་གཟིངས་དག །ཁ་ཅིག་གིས་ནི་ར་རྐྱལ་དག་ཁྱེར་ཏེ་རྒྱ་མཚོ་ཆེན་པོར་ཞུགས་སོ། །དེ་དག་རྒྱ་མཚོ་ཆེན་པོའི་ནང་དུ་དོང་བ་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ །དེ་དག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་པ་དག་ལ་ཞོན་ཏེ་འདི་ལྟ་སྟེ། ཁ་ཅིག་གིས་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་གིས་ནི་སྔས་ཤིང་བལ་ཅན་དག་ལ་ཞོན། ཁ་ཅིག་གིས་ནི་ཀུ་བའི་གཟིངས་དག་ལ་ཞོན། ཁ་ཅིག་གིས་ནི་ར་རྐྱལ་དག་ལ་ཞོན་ཏེ་
ཆུའི་སྟེང་ན་འཕྱོའོ། །དེ་དག་གི་ལས་ཀྱི་རྣམ་པར་སྨིན་པས་བྱང་ཕྱོགས་ནས་རླུང་ལངས་ནས་དེས་དེ་དག་ལྷོ་ཕྱོགས་ཀྱི་འགྲམ་དུ་བདས་པ་དང་། ཟངས་གླིང་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་དག་འཁོད་པ་དེ་དག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་རྒྱལ་མཚན་དགའ་བའི་གནས་དང་མཐུན་པ་དང་། ཕོངས་པའི་གནས་དང་མཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་མཐུན་པའི་རྒྱལ་མཚན་གཡོ་བར་བརྩམས་པ་དང་། དེ་དག་གིས་སྨྲས་པ། ཕུ་ནུ་མོ་དག་དགའ་བའི་གནས་དང་མཐུན་པའི་རྒྱལ་མཚན་གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ་འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང་། ཇི་ཙམ་ན་སྐྱེ་བོ་ཕལ་པོ་ཆེའི་ཚོགས་ཆུར་རྐྱལ་བ་སྣ་ཚོགས་དག་གིས་རྐྱལ་ཞིང་འོང་བ་མཐོང་ངོ་། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས་རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང་། ཕྲེང་བརྒྱུས་བཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག །འདི་དག་ནི་ཁྱེད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་གྱི་གནས་དག་དང་། ཀུན་དགའི་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་།
མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས། ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱོད་པར་མཛོད་ཅིག །ཁྱེད་ཅག་ལས་འགའ་ཡང་ཤིན་ཏུ་མྱོས་པར་གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བཅོམ་ལྡན་འདས་ཀྱིས་དགེ་སློང་དག་ངས་འདི་ལྟ་སྟེ། སྐྱེས་པ་ལ་བུད་མེད་ཀྱི་གཟུགས་ཇི་ལྟར་ཆགས་པར་འགྱུར་བ་དང་། རྒྱགས་པར་འགྱུར་བ་དང་། འདོད་པར་འགྱུར་བ་དང་། སྡུག་པར་འགྱུར་བ་དང་། བྱམས་པར་འགྱུར་བ་དང་། རྔོད་པར་འགྱུར་བ་དང་། བརྒྱལ་བར་འགྱུར་བ་དང་། འཆིང་བར་འགྱུར་བ་དང་། སྒྲུབ་པར་འགྱུར་བ་དང་། ཀུན་དུ་སྦྱར་བར་འགྱུར་བ་དེ་ལྟ་བུའི་གཟུགས་གཞན་ཅིག་ཀྱང་ཡང་དག་པར་རྗེས་སུ་མ་མཐོང་ངོ་ཞེས་གསུངས་པས། དེ་དག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆེན་པོ་ལས་རྒལ་ཏེ་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །དེ་དག་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ་། །དེ་ནས་དེད་དཔོན་སིང་ག་ལ་འདི་སྙམ་དུ་སེམས་ཏེ། ཅིའི་ཕྱིར་བུད་མེད་འདི་དག་ལྷོ་ལམ་ཤིན་ཏུ་སྲུང་བར་སེམས། བདག་བུད་མེད་འདི་དང་ལྷན་ཅིག་ཉལ་ཞིང་དེ་གཉིད་ལོག་པ་དང་མལ་དུ་ཞུགས་པར་རིག་ནས་ཁད་ཀྱིས་དལ་བུ་དལ་བུས་མལ་ཆེན་པོ་ལས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་འགྲོའོ་སྙམ་མོ། །དེ་ནས་དེད་དཔོན་སིང་ག་ལ་བུད་མེད་གང་དང་ལྷན་ཅིག་ཉལ་བ་དེ་གཉིད་ལོག་ཅིང་མལ་དུ་ཞུགས་པར་རིག་ནས། ཁད་ཀྱིས་དལ་བུ་དལ་བུས་མལ་ཆེན་པོ་ནས་བབས་ཏེ། རལ་གྲི་རྣོན་པོ་མཆན་དུ་བཅུག་ནས་ལྷོ་ལམ་དུ་སོང་བ་དང་། དེས་དེ་ན་སྐྱེ་བོ་ཕལ་པོ་ཆེ་སྨྲེ་སྔགས་འདོན་པའི་སྒྲ་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང་། ཀྱི་ཧུད་འཛམ་བུའི་གླིང་
དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཟེར་བ་ཐོས་སོ། །ཐོས་ནས་ཀྱང་དེ་འཇིགས་པ་དང་། སྐྲག་པ་དང་། སྔངས་པ་དང་། སྤུ་ཟིང་ཞེས་བྱེད་པར་གྱུར་ཏོ། ། དེ་ནས་དེད་དཔོན་སིང་ག་ལ་ཡུད་ཙམ་ཞིག་ཅང་མི་སྨྲ་བར་འདུག་སྟེ། འཇིགས་པ་དང་། སྐྲག་པ་དང་། སྔངས་པ་དང་། སྤུ་ཟིང་ཞེས་བྱེད་པ་དེ་དག་བསལ་ནས་ལྷོ་ལམ་དེ་ཉིད་དུ་སོང་བ་དང་། དེས་དེ་ན་ལྕགས་ཀྱི་གྲོང་ཁྱེར་ཆེན་པོ་འཕང་མཐོ་བ། ཐག་གྲུ་ཆེ་བ་ཞིག་མཐོང་ནས་དེས་གྲོང་ཁྱེར་དེ་ལ་སྒེའུ་ཆུང་འགའ་ཞིག་ཡོད་དམ་སྙམ་ནས་ཁོ་ར་ཁོར་ཡུག་ཏུ་བྱུལ་ན། དེས་གྲོང་ཁྱེར་དེའི་ཁོ་ར་ཁོར་ཡུག་ཏུ་བྱུལ་བ་ན་གྲོང་ཁྱེར་དེ་ལ་ཐ་ན་བྱི་ལ་འཛུལ་བ་ཙམ་གྱི་སྒེའུ་ཆུང་ཡང་མ་རྙེད་དོ། །དེའི་བྱང་ཕྱོགས་ཀྱི་ངོས་ན་ཤིང་ལྗོན་པ་ཤི་རི་ཤ་ཆེན་པོ་འཕང་མཐོ་བ། ཐག་གྲུ་ཆེ་བ་དག་ཡོད་ནས། དེ་ཤིང་ལྗོན་པ་ཤི་རི་ཤ་ཆེན་པོ་འཕང་མཐོ་བ། ཐག་གྲུ་ཆེ་བ་དེ་ལ་འཛེགས་ཏེ་སྐྱེ་བོ་ཕལ་པོ་ཆེའི་ཚོགས་དེ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁྱེད་ཅིའི་ཕྱིར་ཀྱི་ཧུད་ཕ། ཀྱི་ཧུད་མ། ཀྱི་ཧུད་ཕུ་ནུ། ཀྱི་ཧུད་བུ་སྲིང་། ཀྱི་ཧུད་འཛམ་བུའི་གླིང་དགའ་བར་འགྱུར་བ་སྣ་ཚོགས། འཛམ་བུའི་གླིང་དགའ་བར་འགྱུར་བ་ཁྱོད་ཀྱིས་བདག་ཅག་སྤངས་སམ་ཞེས་ཤིན་ཏུ་སྨྲེ་སྔགས་འདོན་པར་བྱེད། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ནི་འཛམ་བུའི་གླིང་པའི་ཚོང་པ་ནོར་སྒྲུབ་པ་རྒྱ་མཚོའི་གྲུ་བསྒྲུབས་ཏེ་རྒྱ་མཚོ་ཆེན་པོར་འཇུག་འདོད་ནས་ཁོ་བོ་ཅག་འདི་སྙམ་དུ་སེམས་ཏེ། ཤེས་ལྡན་དག་བདག་ཅག་རྒྱ་མཚོ་ཆེན་པོའི་ནང་དུ་དོང་བ་རྣམས་ལ་འདི་ལྟ་སྟེ། ཕན་ཚུན་བདེ་བ་ཉིད་ཀྱིས་ངེས་པར་རྒལ་བར་ཤེས་པར་དཀས་བདག་ཅག་ནོར་སྒྲུབ་པ་དག་གིས་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་དག་ཐོགས་ཏེ་རྒྱ་མཚོ་ཆེན་པོར་འཇུག་པར་བྱས། བདག་ཅག་ལས་ཁ་ཅིག་གིས་ནི་ཤལ་མ་ལའི་སྤང་ལེབ་དག་བཀུར། ཁ་ཅིག་གིས་ནི་སྔས་ཤིང་བལ་ཅན་དག་བཀུར། ཁ་ཅིག་གིས་ནི་ཀུ་བའི་གཟིངས་དག་བཀུར། ཁ་ཅིག་གིས་ནི་ར་རྐྱལ་
དག་བཀུར་རོ་སྙམ་ནས། དེ་ནས་ནོར་སྒྲུབ་པ་བདག་ཅག་གིས་དེ་ལྟར་སོ་སོར་བརྟགས་ནས། སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁ་ཅིག་གིས་ཤལ་མ་ལའི་སྤང་ལེབ་དག །ཁ་ཅིག་གིས་ནི་སྔས་ཤིང་བལ་ཅན་དག །ཁ་ཅིག་གིས་ནི་ཀུ་བའི་གཟིངས་དག །ཁ་ཅིག་གིས་ནི་ར་རྐྱལ་དག་ཁྱེར་ནས་རྒྱ་མཚོ་ཆེན་པོར་ཞུགས་སོ། །བདག་ཅག་རྒྱ་མཚོ་ཆེན་པོའི་ནང་དུ་དོང་བ་ན་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་གོ །བདག་ཅག་རྒྱ་མཚོའི་གྲུ་བཅག་པ་ན་སོ་སོ་སོ་སོ་དག་ནས་ཕོངས་པའི་དོན་དུ་ཆུར་རྐྱལ་བ་ཁྱེར་ཏེ་འོངས་པ་དག་ལ་ཞོན་ཏེ་འདི་ལྟ་སྟེ། ཁ་ཅིག་ནི་ཤལ་མ་ལའི་སྤང་ལེབ་དག་ལ་ཞོན། ཁ་ཅིག་ནི་སྔས་ཤིང་བལ་ཅན་དག་ལ་ཞོན། ཁ་ཅིག་ནི་ཀུ་བའི་གཟིངས་དག་ལ་ཞོན། ཁ་ཅིག་ནི་ར་རྐྱལ་དག་ལ་ཞོན་ཏེ་ཆུའི་སྟེང་ན་འཕྱོའོ། །བདག་ཅག་གི་ལས་ཀྱི་རྣམ་པར་སྨིན་པས་བྱང་ཕྱོགས་ནས་རླུང་ལངས་ནས་དེས་བདག་ཅག་ལྷོ་ཕྱོགས་ཀྱི་འགྲམ་དུ་བདས་པ་དང་། ཟངས་གླིང་འདི་ན་སྲིན་མོ་ཁྲུང་ཁྲུང་གཞོན་ནུ་མ་ཞེས་བྱ་བ་འཁོད་པ་དེ་དག་བདག་ཅག་ཚོང་པ་གྲུ་ཆག་པ་རྣམས་ལ་གཏམ་སྙན་པ་དང་དགའ་བའི་ཚུལ་གྱིས་སླུ་བར་བྱེད་དོ། །དེ་དག་ལ་རྒྱལ་མཚན་དགའ་བའི་གནས་དང་མཐུན་པ་དང་། ཕོངས་པའི་གནས་དང་མཐུན་པ་གཉིས་ཡོད་དེ། ཇི་ཙམ་ན་དགའ་བའི་གནས་དང་མཐུན་པའི་རྒྱལ་མཚན་གཡོ་བར་བརྩམས་པ་དང་། དེ་དག་གིས་སྨྲས་པ། ཕུ་ནུ་མོ་དག་དགའ་བའི་གནས་དང་མཐུན་པའི་རྒྱལ་མཚན་གཡོས་པས་འཛམ་བུའི་གླིང་པའི་ཚོང་པ་དག་གི་རྒྱ་མཚོའི་གྲུ་ཆུ་སྲིན་ཉའི་རིགས་ཀྱིས་བཅག་སྟེ། འོང་གོར་མ་ཆག་གིས་བཙལ་ལོ་ཞེས་དེ་དག་གིས་རྒྱ་མཚོའི་འགྲམ་དུ་བཙལ་བར་བརྩམས་པ་དང་། ཇི་ཙམ་ན་བདག་ཅག་ཚོང་པ་ཕལ་པོ་ཆེའི་ཚོགས་ཆུར་རྐྱལ་བ་སྣ་ཚོགས་དག་གིས་རྐྱལ་ཞིང་འོང་བ་མཐོང་ངོ་། །མཐོང་ནས་ཀྱང་བདག་ཉིད་གཟུགས་བཟང་མོར་མངོན་པར་སྤྲུལ་ནས། རྒྱན་སྣ་ཚོགས་ཀྱིས་བརྒྱན་ཏེ། ལྷའི་གོས་དང་། ཕྲེང་བ་རྒྱུས་བཀླུབས་ནས་རྒྱ་མཚོའི་འགྲམ་ནས་བོད་པར་བརྩམས་པ། ཇོ་བོ་དག་ཚུར་སྤྱོན། བཞིན་
བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག །འདི་དག་ནི་ཁྱེད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་གྱི་གནས་དག་དང་། ཀུན་དགའ་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས་ཁྱེད་ཅག་ཚུར་སྤྱོན་བདག་ཅག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱོད་པ་མཛོད་ཅིག །ཁྱེད་ཅག་ལས་འགའ་ཡང་ཤིན་ཏུ་མྱོས་པར་གྱུར་ཀྱང་ལྷོ་ལམ་དུ་འགྲོ་བར་མི་བྱའོ་ཞེས་ཟེར་རོ། །བདག་ཅག་སྲིན་མོ་དེ་དག་གིས་བརྔོད་པ་ན་རྒྱ་མཚོ་ཆེན་པོ་ལས་རྒལ་ཏེ། དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །བདག་ཅག་དེ་དག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དག་ལ་བསྟེན་པའི་རྒྱུ་ལས་བུ་དང་བུ་མོ་དག་ཀྱང་བྱུང་ངོ་། །བུད་མེད་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ན་ཇི་སྲིད་དུ་འཛམ་བུའི་གླིང་པའི་ཚོང་པ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་མ་ཐོས་ཀྱི་བར་དུ་དེ་དག་བདག་ཅག་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །གང་གི་ཚེ་དེ་དག་གིས་འཛམ་བུའི་གླིང་
པའི་ཚོང་པ་རབ་ཏུ་མང་པོ་གཞན་དག་ཆུ་སྲིན་ཉའི་རིགས་ཀྱིས་རྒྱ་མཚོའི་གྲུ་བཅག་སྟེ་འོང་བར་ཐོས་པ་དེའི་ཚེ་ན་དེ་དག་བདག་ཅག་གི་གན་དུ་འོངས་ཤིང་བདག་ཅག་ལས་གཞན་དག་ཟོས་ནས། འདི་ལྟར་སྐྱེས་བུ་ཟ་བ་ན་སྐྲ་དང་། སྤུ་དང་། སེན་མོ་དང་། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟ་བར་བྱེད་ཅིང་། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་བཞིན་དུ་ཁར་འཇུག་པར་བྱེད་དོ། །མ་ཟོས་པ་དེ་དག་གི་ལྷག་མ་ནི་ཁོ་བོ་ཅག་ཡིན་ཏེ། ལྕགས་ཀྱི་མཁར་ཆེན་པོ་འདིར་བཅུག་སྟེ། བཟོད་ལྡན་བུད་མེད་དེ་དག་ནི་སྲིན་མོ་ཡིན་གྱིས་བཟོད་ལྡན་ཁྱོད་ཀྱང་བདག་ཉིད་སྲུངས་ཤིག །སིང་ག་ལས་སྨྲས་པ། ཤེས་ལྡན་དག་གང་གིས་ཁྱེད་ཅག་དང་ཁོ་བོ་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡོད་དམ། དེ་དག་གིས་སྨྲས་པ། བཟོད་ལྡན་ཁོ་བོ་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །དེ་ཅིའི་ཕྱིར་ཞེ་ན། བདག་ཅག་གིས་གལ་ཏེ་འདི་སྙམ་དུ་ཀྱེ་མ་བདག་ཅག་ལྕགས་ཀྱི་གྲོང་ཁྱེར་འདིའི་འོག་བརྟོལ་ཏེ་འབྲོས་སོ་སྙམ་ན། དེ་འོག་ཉིས་འགྱུར་སུམ་འགྱུར་དུ་སྐྱེལ། གལ་ཏེ་འདི་སྙམ་དུ་ཀྱེ་མ་བདག་ཅག་ལྕགས་ཀྱི་གྲོང་ཁྱེར་འདིའི་སྟེང་ནས་རྒལ་ཏེ་འབྲོས་སོ་སྙམ་ན། དེའི་སྟེང་ཉིས་འགྱུར་སུམ་འགྱུར་དུ་སྐྱེ་བའི་ཕྱིར་ཏེ། བཟོད་ལྡན་དེའི་ཕྱིར་ཁོ་བོ་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་འགའ་ཡང་མེད་དོ། །ཁྱེད་ཅག་ལ་ནི་གང་གིས་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་ཡོད་དོ། ། ཤེས་ལྡན་དག་གང་གིས་ཁོ་བོ་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་དེ་གང་ཡིན། བཟོད་ལྡན་འདི་ན་བདག་ཅག་གིས་སྟེང་ན་ལྷ་དག་རྣམ་པར་རྒྱུ་བའི་སྒྲ་ཐོས་པ། ཀྱེ་འཛམ་བུའི་གླིང་པའི་ཚོང་པ་བྱིས་པ་དག་
འདི་ཉིད་ཀྱི་གསོ་སྦྱོང་བཅྭ་ལྔ་པ་ལ་བྱང་ལམ་དུ་དེང་ཤིག་དང་། དེ་ན་རྟའི་རྒྱལ་པོ་སྤྲིན་གྱི་ཤུགས་ཅན་ཞེས་བྱ་བ་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང་། ནད་མེད་པ་དང་། སྟོབས་དང་ལྡན་པ་དང། དབང་པོ་ཚིམ་པས་རོ་སྟོད་བསྲང་སྟེ་ཕ་རོལ་དུ་སུ་འགྲོ། ཕ་རོལ་དུ་སུ་འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱ་ཞེས་ལན་གསུམ་ཆེད་དུ་བརྗོད་པ་ཆེད་དུ་རྗོད་པར་བྱེད་ཀྱིས། ཁྱེད་ཅག་དེའི་གན་དུ་སོང་ལ་འདི་སྐད་ཅེས་བདག་ཅག་ཕ་རོལ་དུ་འགྲོའོ། ། བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག །བདག་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱའོ་ཞེས་ཟེར་བ་ཐོས་ཀྱིས། བཟོད་ལྡན་གང་གིས་ཁྱེད་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་བའི་ཐབས་ནི་དེ་ཡིན་ནོ། །དེ་ནས་དེད་དཔོན་སིང་ག་ལ་སྐྱེ་བོ་ཕལ་པོ་ཆེའི་ཚོགས་ཀྱིས་སྨྲས་པའི་ཚིག་དེ་ལེགས་པར་ཤིན་ཏུ་བཟུང་སྟེ། ཀུན་ཆུབ་པར་བྱས་ནས་ཁད་ཀྱིས་དལ་བུ་དལ་བུས་ཤིང་ལྗོན་པ་ཤི་རི་ཤ་ཆེན་པོ་དེ་ལས་བབས་ནས་ཡང་མལ་དེ་ཉིད་དུ་སོང་ངོ་། །དེ་ནས་དེད་དཔོན་སིང་ག་ལས་བུད་མེད་གང་དང་ལྷན་ཅིག་ཉལ་བ་དེ་གཉིད་ལོག་ཅིང་མལ་དུ་ཞུགས་པར་རིག་ནས་ཁད་ཀྱིས་དལ་བུ་དལ་བུས་ཉལ་ལོ། །དེ་ནས་དེད་དཔོན་སིང་ག་ལ་ནང་པར་སྔར་ལངས་ཏེ་འཛམ་བུའི་གླིང་པའི་ཚོང་པ་རབ་ཏུ་མང་པོ་ག་ལ་བ་དེར་སོང་སྟེ་ཕྱིན་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཚུར་ཤེག །སྐྱེད་མོས་ཚལ་དབེན་པ་ཞིག་ཡོད་པ་དེར་ཁོ་བོ་ཁྱེད་ཅག་དང་ཕག་ཏུ་གསང་སྟེ་སྨྲ་བ་ཅུང་ཞིག་ཡོད་ཀྱིས་ཁྱེད་ཅག་ལས་གང་གིས་ཀྱང་ཤིན་ཏུ་མྱོས་པར་གྱུར་ན་ཡང་ཁྱེའུ་དང་བུ་མོ་དག་ཁྲིད་དེ་མ་འོང་ཤིག །དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་ནང་པར་སྔར་ལངས་ནས་སྐྱེད་མོས་ཚལ་དབེན་པ་ག་ལ་བ་དེར་སོང་ངོ་། །དེ་ནས་དེད་དཔོན་སིང་ག་ལས་
འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་སྐྱེ་བོ་ཕལ་པོ་ཆེའི་ཚོགས་དེ་དང་བར་སྐབས་སུ་གཏམ་ཅི་བྱས་པ་དེ་དག་ཐམས་ཅད་རྒྱས་པར་བརྗོད་ནས་སྨྲས་པ། ཤེས་ལྡན་དག་འདི་དག་གི་ནི་བུད་མེད་མ་ཡིན་གྱི། འདི་དག་ནི་སྲིན་མོ་ཡིན་གྱིས་བདག་ཉིད་སྲུངས་ཤིག །དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་དག །དེ་ཉིད་ཀྱི་གསོ་སྦྱོང་བཅྭ་ལྔ་པ་ལ་བྱང་ལམ་དུ་དོང་ངོ་། །དེའི་ཚེ་ན་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟ་ཞིང་འདུག་གོ །ཚོང་པ་རྟག་པའི་རང་བཞིན་ཅན་ཞིག་གིས་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟ་ཞིང་འདུག་པ་མཐོང་ངོ་། །མཐོང་ནས་ཀྱང་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་རྟའི་རྒྱལ་པོ་སྤྲིན་གྱི་ཤུགས་ཅན་འདི་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟ་ཞིང་འདུག་གིས་འདིའི་གན་དུ་སོང་ལ་འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག །བདག་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག །ཅེས་བརྗོད་པར་བྱའོ། །དེ་ནས་དེད་དཔོན་སིང་ག་ལས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་འདི་སྐད་ཅེས་སྨྲས་སོ། །ཤེས་ལྡན་དག་ཁོ་བོས་སྐྱེ་བོ་ཕལ་པོ་ཆེའི་ཚོགས་དེའི་སྨྲས་པའི་དོན་ཤེས་པས་ད་དུང་བདག་ཅག་རྟའི་རྒྱལ་པོ་སྤྲིན་གྱི་ཤུགས་ཅན་གྱི་གན་དུ་སོང་སྟེ། འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག །བདག་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱ་བའི་དུས་ལ་མ་བབ་བོ། །འདི་ལྟར་ཁོ་བོས་སྐྱེ་བོ་ཕལ་པོ་ཆེའི་ཚོགས་དེའི་སྨྲས་པའི་དོན་ཤེས་ཏེ། གང་གི་ཚེ་རྟའི་རྒྱལ་པོ་སྤྲིན་གྱི་ཤུགས་ཅན་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང་། ནད་མེད་པ་དང་། སྟོབས་དང་ལྡན་པ་དང་། དབང་པོ་ཚིམ་པས་རོ་སྟོད་བསྲང་སྟེ། ཕ་རོལ་དུ་སུ་འགྲོ། ཕ་རོལ་དུ་སུ་
འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱ་ཞེས་ལན་གསུམ་ཆེད་དུ་བརྗོད་པ་ཆེད་དུ་རྗོད་པར་བྱེད་པ་དེའི་ཚེ་ན་བདག་ཅག་རྟའི་རྒྱལ་པོ་སྤྲིན་གྱི་ཤུགས་ཅན་གྱི་གན་དུ་སོང་སྟེ། འདི་སྐད་ཅེས་བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཤིག །བདག་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག་ཅེས་བརྗོད་པར་བྱའོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་མ་རྨོས་མ་བཏབ་པའི་འབྲས་སཱ་ལུའི་འབྲུ་ཟོས་ནས་བདེ་བ་དང་། ནད་མེད་པ་དང་། སྟོབས་དང་ལྡན་པ་དང་། དབང་པོ་ཚིམ་པས་རོ་སྟོད་བསྲང་སྟེ། ཕ་རོལ་དུ་སུ་འགྲོ། ཕ་རོལ་དུ་སུ་འགྲོ། སུ་ཞིག་ཕ་རོལ་དུ་བཀུར་བར་བྱ། སུ་ཞིག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་བྱའོ། །ཞེས་ལན་གསུམ་ཆེད་དུ་བརྗོད་པ་ཆེད་དུ་རྗོད་པར་བྱེད་དོ། །དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་རྟའི་རྒྱལ་པོ་སྤྲིན་གྱི་ཤུགས་ཅན་ག་ལ་བ་དེར་དོང་སྟེ་ཕྱིན་ནས། བླ་གོས་ཕྲག་པ་གཅིག་ཏུ་བྱས་ཏེ་པུས་མོ་གཡས་པའི་ལྷ་ང་ས་ལ་བཙུགས་ཏེ་རྟའི་རྒྱལ་པོ་སྤྲིན་གྱི་ཤུགས་ཅན་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྟའི་རྒྱལ་པོ་སྤྲིན་གྱི་ཤུགས་ཅན་ལ་འདི་སྐད་ཅེས་སྨྲས་སོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་འགྲོའོ། །བདག་ཅག་ཕ་རོལ་དུ་ཁྱེར་ཅིག །བདག་ཅག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱིས་ཤིག །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་ཤེས་ལྡན་དག་བུད་མེད་དེ་དག་ཆེས་གཟུགས་བཟང་བ་དང་། ཆེས་བལྟ་ན་སྡུག་པ་དང་། ཆེས་མཛེས་པར་བསྒྱུར་ནས་ཁྱེའུ་དང་བུ་མོ་དག་ཐོགས་ཏེ་འདི་སྐད་ཅེས་ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་
ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག །འདི་དག་ནི་ཁྱེད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་གྱི་གནས་དག་དང་། ཀུན་དགའ་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས་ཚུར་སྤྱོན། ཁྱེད་ཅག་བདག་ཅག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱད་པ་མཛོད་ཅིག །གལ་ཏེ་ཁྱེད་ཅག་ལས་སུ་ཡང་བདག་ཅག་དོན་དུ་མི་གཉེར་ན་རེ་ཞིག་རང་རང་གི་ཁྱེའུ་དང་བུ་མོ་འདི་དག་སྣོམས་ཏེ་བཞུད་ཅིག་ཅེས་ཟེར་བར་འགྱུར་གྱིས། དེ་ལ་ཁྱེད་ཅག་ལས་གང་དག་འདི་སྙམ་དུ་བདག་གི་ཆུང་མའམ། བུའམ་བུ་མོའམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ་ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ཡིན་ནོ་སྙམ་དུ་སེམས་པ་དེ་དག་ནི་ངའི་གཤུལ་ལམ་རྒྱབ་ཏུ་ཞོན་པར་གྱུར་དུ་ཟིན་ཀྱང་དེ་དག་ཤིང་ཏོག་སྨིན་པ་རྩེ་དག་ལས་འབྲུལ་བ་བཞིན་དུ་ལྟུང་བར་འགྱུར་ཞིང་བུད་མེད་དེ་དག་འོངས་ཤིང་འོངས་
ཤིང་ཟ་བར་འགྱུར་ཏེ། འདི་ལྟར་སྐྱེས་བུ་ཟ་བ་ན་སྐྲ་དང་། སྤུ་དང་སེན་མོ་དང་། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟ་བར་འགྱུར་ལ། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་པར་ཁར་འཇུག་པར་འགྱུར་རོ། །དེ་ལ་ཁྱེད་ཅག་ལས་གང་དག་འདི་སྙམ་དུ་བདག་གི་ཆུང་མའམ། བུའམ་བུ་མོའམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ཡིན་ནོ་སྙམ་དུ་མི་སེམས་པ་དེ་དག་ནི་ངའི་སྤུ་དག་ལ་འཇུས་པར་གྱུར་དུ་ཟིན་ཀྱང་དེ་དག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་འགྱུར་རོ་ཞེས་ལེགས་པར་ཤིན་ཏུ་ཡང་དག་པར་བསྒོ། ཡང་དག་པར་བསྟན་ཏོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་འཛམ་བུའི་གླིང་པའི་ཚོང་པ་རབ་ཏུ་མང་པོ་ལ་ལེགས་པར་ཤིན་ཏུ་ཡང་དག་པར་བསྒོ། ཡང་དག་པར་བསྟན་ནས་རྒྱབ་བཟེད་པ་དང་། དེ་ནས་འཛམ་བུའི་གླིང་པའི་ཚོང་པ་རབ་ཏུ་མང་པོ་དེ་དག་ལས་ཁ་ཅིག་ནི་རྟའི་རྒྱལ་པོ་སྤྲིན་གྱི་ཤུགས་ཅན་གྱི་རྒྱབ་ཏུ་ཞོན། ཁ་ཅིག་ནི་གཤུལ་དུ་ཞོན། ཁ་ཅིག་ནི་སྤུ་དག་ལ་འཇུས་སོ། །དེ་ནས་རྟའི་རྒྱལ་པོ་སྤྲིན་གྱི་ཤུགས་ཅན་གྱིས་མཐར་གྱིས་ལུས་ཀྱི་མཐུ་དང་སྟོབས་བསྐྱེད་ནས། དེའི་འོག་ཏུ་སྟེང་གི་ནམ་མཁའ་ལ་སོང་ངོ་། །སྲིན་མོ་དེ་དག་གི་ཕོངས་པའི་གནས་དང་མཐུན་པའི་རྒྱལ་མཚན་གཡོ་བར་བརྩམས་པ་དང་། དེ་དག་གིས་བསམས་པ། འདི་ལྟར་བདག་ཅག་གི་ཕོངས་པའི་གནས་དང་
མཐུན་པའི་རྒྱལ་མཚན་གཡོས་པ་ལས་ན་འཛམ་བུའི་གླིང་པའི་ཚོང་པ་རབ་ཏུ་མང་པོ་དག་བྱེར་བར་གྱུར་གོར་མ་ཆག་སྙམ་ནས། དེ་དག་དེ་ནས་ཆེས་གཟུགས་བཟང་བ་དང་། ཆེས་བལྟ་ན་སྡུག་པ་དང་། ཆེས་མཛེས་པར་བསྒྱུར་ནས། ཁྱེའུ་དང་བུ་མོ་དག་ཐོགས་ཏེ་འདི་སྐད་ཅེས་ཇོ་བོ་དག་ཚུར་སྤྱོན། བཞིན་བཟངས་དག་ཚུར་སྤྱོན། བདག་ཅག་ཁྱིམ་ཐབ་མ་མཆིས་པ་རྣམས་ཀྱི་ཁྱིམ་ཐབ་མཛོད་ཅིག །བདག་པོ་མ་མཆིས་པ་རྣམས་ཀྱི་བདག་པོ་མཛོད་ཅིག །གནས་མ་མཆིས་པ་རྣམས་ཀྱི་གནས་མཛོད་ཅིག །གླིང་མ་མཆིས་པ་རྣམས་ཀྱི་གླིང་མཛོད་ཅིག །སྐྱོབ་པ་མ་མཆིས་པ་རྣམས་ཀྱི་སྐྱོབ་པ་མཛོད་ཅིག །སྐྱབས་མ་མཆིས་པ་རྣམས་ཀྱི་སྐྱབས་མཛོད་ཅིག །དཔུང་གཉེན་མ་མཆིས་པ་རྣམས་ཀྱི་དཔུང་གཉེན་མཛོད་ཅིག ། འདི་དག་ནི་ཁྱོད་ཀྱི་ཟས་ཀྱི་གནས་དག་དང་། སྐོམ་གྱི་གནས་དག་དང་། གོས་ཀྱི་གནས་དག་དང་། གནས་མལ་གྱི་གནས་དག་དང་། ཀུན་དགའ་ར་བ་དགའ་བར་འགྱུར་བ་དག་དང་། ནགས་ཚལ་དགའ་བར་འགྱུར་བ་དག་དང་། རྫིང་བུ་དགའ་བར་འགྱུར་བ་དག་དང་། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ་ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ལགས་ཀྱིས་ཚུར་སྤྱོན། ཁྱེད་ཅག་བདག་ཅག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱད་པ་མཛོད་ཅིག །གལ་ཏེ་ཁྱེད་ཅག་ལས་སུ་ཡང་བདག་ཅག་དོན་དུ་མི་གཉེར་ན་རེ་ཞིག་རང་རང་གི་ཁྱེའུ་དང་བུ་མོ་འདི་དག་སྣོམས་ཏེ་བཞུད་ཅིག་ཅེས་ཟེར་རོ། །དེ་ལ་དེ་དག་ལས་གང་དག་འདི་སྙམ་དུ་བདག་གི་ཆུང་མའམ། བུའམ་བུ་མོའམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་
འདི་ལྟ་སྟེ། །ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ཡིན་ནོ་སྙམ་དུ་སེམས་པ་དེ་དག་ནི་དེའི་གཤུལ་ལམ་རྒྱབ་ཏུ་ཞོན་པར་གྱུར་དུ་ཟིན་ཀྱང་དེ་དག་ཤིང་ཏོག་སྨིན་པ་རྩེ་དག་ལས་འབྲུལ་བ་བཞིན་དུ་ལྷུང་བར་གྱུར་ཅིང་བུད་མེད་དེ་དག་འོངས་ཤིང་འོངས་ཤིང་ཟོས་པར་གྱུར་ཏེ། འདི་ལྟར་སྐྱེས་བུ་ཟ་བ་ན་སྐྲ་དང་། སྤུ་དང་། སེན་མོ་དང་། སོའི་ལྷག་མ་གང་དག་ཡིན་པ་དེ་དག་ཀྱང་མ་ལུས་པར་ཟོས་པར་གྱུར་ལ། དེ་དག་སྐྱེས་བུ་ཟ་བ་ན་ཁྲག་དྲོན་མོའི་ཐིགས་པ་ས་ལ་ལྷུང་བ་གང་དག་ཡིན་པ་དེ་དག་ཀྱང་སོར་མོའི་རྩེ་མོས་བྱོགས་ཤིང་བྱོགས་ཤིང་ས་དང་བཅས་པར་ཁར་བཅུག་པར་གྱུར་ཏོ། །དེ་ལ་དེ་དག་ལས་གང་དག་འདི་སྙམ་དུ་བདག་གི་ཆུང་མའམ། བུའམ་བུ་མོའམ། ཟས་ཀྱི་གནས་དག་གམ། སྐོམ་གྱི་གནས་དག་གམ། གོས་ཀྱི་གནས་དག་གམ། གནས་མལ་གྱི་གནས་དག་གམ། ཀུན་དགའ་ར་བ་དགའ་བར་འགྱུར་བ་དག་གམ། ནགས་ཚལ་དགའ་བར་འགྱུར་བ་དག་གམ། རྫིང་བུ་དགའ་བར་འགྱུར་བ་དག་གམ། འཛམ་བུའི་གླིང་པའི་རིན་པོ་ཆེ་མང་པོ་འདི་ལྟ་སྟེ། ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། དངུལ་དག་དང་། གསེར་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་པ་དག་ཡིན་ནོ་སྙམ་དུ་མི་སེམས་པ་དེ་དག་ནི་དེའི་སྤུ་དག་ལ་འཇུས་པར་གྱུར་དུ་ཟིན་ཀྱང་དེ་དག་བདེ་ལེགས་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་པར་གྱུར་ཏོ། །དགེ་སློང་དག་དེ་བཞིན་དུ་ཁྱེད་ཅག་ལས་གང་དག་བདག་མིག་གོ །བདག་གི་མིག་གོ །བདག་རྣ་བའོ། །སྣའོ། །ལྕེའོ། །ལུས་སོ། །ཡིད་དོ། །བདག་གི་ཡིད་དོ། །བདག་གཟུགས་སོ། །བདག་གི་གཟུགས་སོ། །བདག་སྒྲའོ། །དྲིའོ། །རོའོ། །རེག་བྱའོ། །ཆོས་སོ། །བདག་གི་ཆོས་སོ། །བདག་
སའི་ཁམས་སོ། །བདག་གི་སའི་ཁམས་སོ། །བདག་ཆུའི་ཁམས་སོ། །མེའི་ཁམས་སོ། །རླུང་གི་ཁམས་སོ། །ནམ་མཁའི་ཁམས་སོ། །རྣམ་པར་ཤེས་པའི་ཁམས་སོ། །བདག་གི་རྣམ་པར་ཤེས་པའི་ཁམས་སོ། །བདག་གཟུགས་ཀྱི་ཕུང་པོའོ། །བདག་གི་གཟུགས་ཀྱི་ཕུང་པོའོ། །བདག་ཚོར་བའི་ཕུང་པོའོ། །འདུ་ཤེས་ཀྱི་ཕུང་པོའོ། །འདུ་བྱེད་ཀྱི་ཕུང་པོའོ། །རྣམ་པར་ཤེས་པའི་ཕུང་པོའོ། །བདག་གི་རྣམ་པར་ཤེས་པའི་ཕུང་པོའོ་སྙམ་དུ་སེམས་པ་དེ་དག་ནི་སྲིན་མོ་རྣམས་ཀྱིས་ཚོང་པ་དག་སྡུག་བསྔལ་བར་འགྱུར་བ་ཇི་བཞིན་ནོ། །དགེ་སློང་དག་ཁྱེད་ཅག་ལས་གང་དག་བདག་མིག་གོ །བདག་གི་མིག་གོ །བདག་རྣ་བའོ། །སྣའོ། །ལྕེའོ། །ལུས་སོ། །ཡིད་དོ། །བདག་གི་ཡིད་དོ། །བདག་གཟུགས་སོ། །བདག་གི་གཟུགས་སོ། །བདག་སྒྲའོ། །དྲིའོ། །རོའོ། །རེག་བྱའོ། །ཆོས་སོ། །བདག་གི་ཆོས་སོ། །བདག་སའི་ཁམས་སོ། །བདག་གི་སའི་ཁམས་སོ། །བདག་ཆུའི་ཁམས་སོ། །མེའི་ཁམས་སོ། །རླུང་གི་ཁམས་སོ། །ནམ་མཁའི་ཁམས་སོ། །རྣམ་པར་ཤེས་པའི་ཁམས་སོ། །བདག་གི་རྣམ་པར་ཤེས་པའི་ཁམས་སོ། །བདག་གཟུགས་ཀྱི་ཕུང་པོའོ། །བདག་གི་གཟུགས་ཀྱི་ཕུང་པོའོ། །བདག་ཚོར་བའི་ཕུང་པོའོ། །འདུ་ཤེས་ཀྱི་ཕུང་པོའོ། །འདུ་བྱེད་ཀྱི་ཕུང་པོའོ། །རྣམ་པར་ཤེས་པའི་ཕུང་པོའོ། །བདག་གི་རྣམ་པར་ཤེས་པའི་ཕུང་པོའོ་སྙམ་དུ་མི་སེམས་པ་དེ་དག་ནི། སྤྲིན་ཤུགས་ཅན་གྱི་ཚོང་པ་དག །བདེ་ལེགས་ཕ་རོལ་འགྲོ་བ་བཞིན། །མི་གང་བྱིས་པ་འདྲ་བ་དག། སངས་རྒྱས་བསྟན་ལ་མ་དད་པ། །སྲིན་མོ་རྣམས་ཀྱིས་ཚོང་པ་དག །སྡུག་བསྔལ་འགྱུར་བ་ཇི་བཞིན་ནོ། །མི་གང་ཤེས་རབ་ལྡན་པ་དག །སངས་རྒྱས་བསྟན་ལ་དད་བྱེད་པ། །སྤྲིན་ཤུགས་ཅན་གྱི་ཚོང་པ་དག །བདེ་ལེགས་ཕ་རོལ་འགྲོ་བ་བཞིན། །ཚོང་པ་དེ་དག་ཐམས་ཅད་རྟའི་རྒྱལ་པོ་སྤྲིན་གྱི་ཤུགས་ཅན་ལས་ལྷུང་ནས་སྲིན་མོ་དེ་དག་གིས་ཟོས་སོ། །དེད་དཔོན་སིང་ག་ལ་འབའ་ཞིག་བདེ་ལེགས་པ་དང་། བདེ་བ་དག་ཏུ་འཛམ་བུའི་གླིང་དུ་ཕྱིན་ཏོ།། །།འདུལ་བ་རྣམ་པར་འབྱེད་པ། བམ་པོ་
བདུན་བཅུ་རྩ་བདུན་པ། དེད་དཔོན་སིང་ག་ལའི་ཆུང་མ་སྲིན་མོ་དེ་ལ་སྲིན་མོ་གཞན་དག་གིས་སྨྲས་པ། ཁོ་མོ་ཅག་གིས་ནི་རང་རང་གི་ཁྱིམ་ཐབ་དག་ཟོས་ན་ཁྱོད་ཀྱིས་རང་གི་ཁྱིམ་ཐབ་བཏང་གིས་གལ་ཏེ་ཇེ་ཁྲིད་དེ་འོངས་ན་དེ་ལྟ་ན་ལེགས། གལ་ཏེ་མི་འོང་ན་ཁྱོད་ཉིད་བཟའ་བར་བྱའོ། །དེ་སྐྲག་ནས་སྨྲས་པ། གལ་ཏེ་ཁྱོད་ཅག་དེ་ལྟར་དང་ན་དུས་བྱེད་ན་མི་རིངས་པར་སྡོད་ཅིག་དང་ཁྲིད་དེ་འོང་ངོ་། །དེ་དག་གིས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག །དེ་མཆོག་ཏུ་འཇིགས་སུ་རུང་བའི་གཟུགས་སུ་སྤྲུལ་ནས་མྱུར་བ་མྱུར་བ་ཁོ་ནར་སོང་སྟེ་དེད་དཔོན་སིང་ག་ལའི་མདུན་དུ་འདུག་པ་དང་། དེད་དཔོན་སིང་ག་ལས་རལ་གྲི་ཤུབས་ནས་ཕྱུང་སྟེ་བསྡིགས་པ་དང་དེ་སྐྲག་སྟེ་བྲོས་སོ། །ཇི་ཙམ་ན་ཡུལ་དབུས་ནས་དོན་མཐུན་འོངས་པ་དང་། སྲིན་མོ་དེས་དེད་དཔོན་གྱི་རྐང་པ་གཉིས་ལ་གཏུགས་ཏེ་སྨྲས་པ། དེད་དཔོན་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་མཆིས་འབྲང་དུ་སྩལ་བ་ལགས་ན་རྒྱ་མཚོ་ཆེན་པོའི་ནང་དུ་མཆིས་པའི་གྲུ་ཆུ་སྲིན་ཉའི་རིགས་ཀྱིས་བཅག་ནས་དེས་བདག་བཀྲ་མི་ཤིས་སོ་ཞེས་བོར་ན། དེའི་སླད་དུ་བདག་ལ་ཐུགས་བརྩེ་བས་བཟོད་པ་བགྱིད་དུ་སྩལ་བར་ཅི་གནང་། དེས་བཟོད་པ་བྱེད་དུ་གཞུག་གོ་ཞེས་དང་དུ་བླངས་སོ། །དེ་དེའི་གན་དུ་སོང་ནས་བག་དབབ་པའི་གཏམ་བརྗོད་པས་ཡུད་ཙམ་ཞིག་བསྡད་དེ་སྨྲས་པ། ཤེད་མཐུན་ཁྱོད་ཀྱིས་ཟངས་གླིང་གི་རྒྱལ་པོའི་བུ་མོ་བླངས་པ་དེ་གནས་མ་ཡིན་པར་ཡོངས་སུ་མ་དོར་བར་བཟོད་པ་གྱིས་ཤིག །དེས་སྨྲས་པ། ཤེད་མཐུན་དེ་ནི་དེའི་རྒྱལ་པོའི་བུ་མོ་མ་ཡིན་ཏེ། ཟངས་གླིང་ནས་འོངས་པའི་སྲིན་མོ་ཡིན་ནོ། །འོ་ན་འདིར་ཇི་ལྟར་འོངས། དེས་ཇི་ལྟར་གྱུར་པ་བརྗོད་པ་དང་དེ་ཅང་མི་སྨྲ་བར་འདུག་གོ། །དེད་དཔོན་སིང་ག་ལ་མཐར་གྱིས་རང་གི་ཁྱིམ་དུ་ཕྱིན་པ་དང་། སྲིན་མོ་དེ་ཡང་བུ་ཐོགས་ཏེ་རྒྱལ་པོའི་ཕོ་བྲང་སེང་གེ་ལྟ་བུར་ཕྱིན་ནས་དེད་དཔོན་སིང་ག་ལའི་ཁྱིམ་གྱི་སྒོ་དྲུང་ན་སྡོད་དོ། །སྐྱེ་བོའི་ཚོགས་ཀྱིས་ཁྱེའུ་དེ་མཐོང་ནས་བཞིན་གཟུགས་ལས་ངོ་ཤེས་ནས་དེ་དག་གིས་སྨྲས་པ། ཤེས་ལྡན་དག་ཁྱེའུ་འདི་ནི་དེད་དཔོན་སིང་ག་ལའི་བུ་ཡིན་པར་ཤེས་སོ། །སྲིན་
མོས་སྨྲས་པ། ཤེས་ལྡན་དག་ཁྱེད་ཀྱིས་ཤེས་ཏེ་འདི་ནི་དེའི་བུ་ཡིན་ནོ། །དེ་དག་གིས་སྨྲས་པ། སྲིན་མོ་ཁྱོད་ག་ལས་འོངས། ཁྱོད་སུའི་ཡིན། དེས་སྨྲས་པ། ཤེས་ལྡན་དག་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་ཆུང་མར་བྱིན་པ་ཡིན་ན། དེ་རྒྱ་མཚོ་ཆེན་པོར་སོང་བའི་གྲུ་ཆུ་སྲིན་ཉའི་རིགས་ཀྱིས་བཅག་ནས་དེས་བདག་བཀྲ་མི་ཤིས་སོ་ཞེས་གནས་མ་ཡིན་པར་བོར་ནས་འདིར་ཇི་ལྟ་ཞིག་ཏུ་ཕྱིན་ཏེ། བུ་ཆུང་ངུ་དང་བདག་ལ་དེད་དཔོན་སིང་ག་ལ་བཟོད་པ་བགྱིད་དུ་སྩལ་བའི་རིགས་སོ། །དེ་དག་གིས་དེའི་ཕ་མ་གཉིས་ལ་སྦྲན་པ་དང་། དེ་གཉིས་ཀྱིས་དེ་ལ་སྨྲས་པ། བུ་རྒྱལ་པོའི་བུ་མོ་དེ་མ་དོར་བར་བུ་ཆུང་ངུ་དང་ཉོན་མོངས་པ་འདི་ལ་བཟོད་པ་གྱིས་ཤིག ། ཡབ་ཡུམ་གཉིས་འདི་ནི་རྒྱལ་པོའི་བུ་མོ་མ་ལགས་ཏེ། འདི་ནི་ཟངས་གླིང་ནས་མཆིས་པའི་སྲིན་མོ་ལགས་སོ། །དེ་གཉིས་ཀྱིས་སྨྲས་པ། བུ་བུད་མེད་ལྟ་ཞིག་ཐམས་ཅད་ཀྱང་སྲིན་མོ་ཡིན་གྱིས་བཟོད་པ་གྱིས་ཤིག །དེས་སྨྲས་པ། ཡབ་ཡུམ་གཉིས་གལ་ཏེ་ཁྱེད་ཅག་འདི་ལ་དགྱེས་ན་འདི་ཁྱིམ་དུ་སྲེལ་ཅིག །བདག་ནི་གཞན་དུ་མཆིའོ། །དེ་གཉིས་ཀྱིས་སྨྲས་པ། བུ་ངེད་ཀྱིས་ཁྱེད་ཀྱི་དོན་དུ་འདི་ཤིན་ཏུ་སྲེལ་བ་ཡིན་ན། གལ་ཏེ་ཁྱོད་འདི་མི་འདོད་ན་ངེད་ཀྱིས་འདི་ཅིའི་ཕྱིར་མི་བསྐྲད་ཅེས་དེ་གཉིས་ཀྱིས་དེ་བསྐྲད་དོ། །དེ་ནས་སྲིན་མོ་དེ་རྒྱལ་པོ་སེང་གེ་རལ་པ་ཅན་གྱི་གན་དུ་སོང་བ་དང་། བློན་པོ་རྣམས་ཀྱིས་རྒྱལ་པོ་ལ་སྦྲན་པ། ལྷ་བུད་མེད་གཟུགས་འདི་ལྟ་བུ་ལང་ཚོ་ལ་བབ་པ་ཞིག་རྒྱལ་པོའི་ཆབ་སྒོ་ན་སྡོད་དོ། །རྒྱལ་པོས་སྨྲས་པ། བལྟས་འཇུག་ཏུ་ཆུག་ཤིག །དེ་དག་གིས་དེ་འཇུག་ཏུ་བཅུག་གོ །བུད་མེད་ཀྱི་གཟུགས་ནི་དབང་པོ་རྣམས་འཕྲོག་པ་ཡིན་པས་རྒྱལ་པོས་དེ་མཐོང་ནས་འདོད་ཆགས་ཀྱིས་གཟིར་བས་འོངས་པ་ལེགས་སོ་ཞེས་བྱ་བའི་ཀུན་དུ་སྤྱད་པས་དེ་ལ་ཀུན་དུ་སྤྱད་ནས་སྨྲས་པ། བཟང་མོ་ཁྱོད་ག་ལས་འདིར་འོངས། ཁྱོད་སུའི་ཡིན། དེས་རྐང་པ་གཉིས་ལ་གཏུགས་ཏེ་སྨྲས་པ། ལྷ་བདག་ནི་ཟངས་གླིང་གི་རྒྱལ་པོའི་བུ་མོ་དེད་དཔོན་སིང་ག་ལའི་མཆིས་འབྲང་དུ་སྩལ་བ་ལགས་ན། དེ་རྒྱ་མཚོ་ཆེན་པོའི་ནང་དུ་མཆིས་
པའི་གྲུ་ཆུ་སྲིན་ཉའི་རིགས་ཀྱིས་བཅག་ནས། དེས་བདག་བཀྲ་མི་ཤིས་སོ་ཞེས་གནས་མ་ལགས་པར་བོར་ཏེ། ཇི་ལྟ་ཞིག་ཏུ་འདིར་མཆིས་ན། ལྷས་བུ་ཆུང་ངུ་དང་བདག་ལ་དེད་དཔོན་སིང་ག་ལ་བཟོད་པ་བགྱིད་དུ་སྩལ་བར་ཅི་གནང་། རྒྱལ་པོས་དེའི་བག་ཕབ་ནས་བློན་པོ་རྣམས་ལ་བསྒོ་བ། ཤེས་ལྡན་དག་དེང་ལ་དེད་དཔོན་སིང་ག་ལ་བོས་ཤིག ། དེ་དག་གིས་དེ་བོས་པ་དང་། རྒྱལ་པོས་དེ་ལ་སྨྲས་པ་དང་། སིང་ག་ལ་རྒྱལ་པོའི་བུ་མོ་འདི་མ་དོར་བར་བུ་ཆུང་ངུ་དང་། འདི་ལ་བཟོད་པ་གྱིས་ཤིག །དེས་སྨྲས་པ། ལྷ་འདི་ནི་རྒྱལ་པོའི་བུ་མོ་མ་ལགས་ཏེ། འདི་ནི་ཟངས་གླིང་ནས་མཆིས་པའི་སྲིན་མོ་ལགས་སོ། །རྒྱལ་པོས་སྨྲས་པ། དེད་དཔོན་བུད་མེད་ལྟ་ཞིག་ཐམས་ཅད་ཀྱང་སྲིན་མོ་ཡིན་གྱིས་འདི་ལ་བཟོད་པ་གྱིས་ཤིག །འོན་ཏེ་ཁྱོད་མི་འདོད་ན་ནི་ང་ལ་བྱིན་ཅིག །དེས་སྨྲས་པ། ལྷ་འདི་ནི་སྲིན་མོ་ལགས་པས་བདག་མི་དབུལ་མི་ཟློག་གོ །རྒྱལ་པོས་དེ་བཙུན་མོའི་འཁོར་གྱི་ནང་དུ་བཅུག་ནས་དེས་རྒྱལ་པོ་དབང་དུ་བྱས་སོ། །ཇི་ཙམ་དུས་གཞན་ཞིག་ན་དེས་རྒྱལ་པོ་བཙུན་མོའི་འཁོར་དང་བཅས་པ་གཉིད་ལོག་པར་བྱས་ནས་ཟངས་གླིང་དུ་སྲིན་མོ་དེ་དག་གི་ནང་དུ་སོང་སྟེ་སྨྲས་པ། ཕུ་ནུ་མོ་དག་ཁྱེད་ལ་དེད་དཔོན་སིང་ག་ལས་ཅི་བྱ། ཁོ་མོས་རྒྱལ་པོ་སེང་གེ་རལ་པ་ཅན་བཙུན་མོའི་འཁོར་དང་བཅས་པ་གཉིད་ལོག་པར་བྱས་ཀྱིས་ཚུར་ཤེག་དེ་བཟའ་བར་བྱའོ། །དེ་དག་གིས་རྐང་ལག་དང་མིག་བསྒྱུར་ཏེ་བདག་ཉིད་འཇིགས་པ་དང་། འཇིགས་སུ་རུང་བ་ཆེན་མོར་མངོན་པར་སྤྲུལ་ནས་མཚན་མོ་རྒྱལ་པོའི་ཕོ་བྲང་སེང་གེ་ལྟ་བུར་ལྷགས་ཏེ། དེ་དག་གིས་རྒྱལ་པོ་སེང་གེ་རལ་པ་ཅན་འཁོར་དང་བཅས་པ་ཟོས་སོ། །མཚན་མོ་ནམ་ནངས་པ་ན་རྒྱལ་པོའི་ཕོ་བྲང་གི་སྒོ་འབྱེད་པ་མེད་དེ། མ་ཕྱེད་པ་ན་རྒྱལ་པོའི་ཕོ་བྲང་གི་སྟེང་ནས་མི་རོ་ཟ་བའི་བྱ་མང་པོ་དག་རྒྱུ་བར་བརྩམས་སོ། །བློན་པོ་དང་། ཁྲོམ་གྱི་རུ་སྣ་དང་། གྲོང་རྡལ་གྱི་མི་དང་། ཡུལ་གྱི་མི་དག་ཀྱང་རྒྱལ་པོའི་ཕོ་བྲང་གི་སྒོ་ན་སྡོད་དོ། །རྒྱལ་པོའི་ཕོ་བྲང་སེང་གེ་ལྟ་བུ་ཀུན་དུ་སྒྲ་འདི་སྐད་ཅེས་རྒྱལ་པོའི་ཕོ་བྲང་གི་སྒོ་
འབྱེད་པ་མེད་དེ། མ་ཕྱེད་པ་ན་རྒྱལ་པོའི་ཕོ་བྲང་གི་སྟེང་ནས་མི་རོ་ཟ་བའི་བྱ་མང་པོ་དག་རྒྱུ་ཞིང་བློན་པོ་དང་། ཁྲོམ་གྱི་རུ་སྣ་དང་། གྲོང་རྡལ་གྱི་མི་དང་། ཡུལ་གྱི་མི་དག་ཀྱང་རྒྱལ་པོའི་ཕོ་བྲང་གི་སྒོ་ན་སྡོད་ཅིང་འཁོད་དོ་ཞེས་བྱ་བ་དེ་ལྟ་བུ་གྲགས་པར་གྱུར་ཏོ། །དེད་དཔོན་སིང་ག་ལས་དེ་ཐོས་ནས་དེ་མྱུར་བ་མྱུར་བ་ཁོ་ནར་རལ་གྲི་མཆན་དུ་བཅུག་སྟེ་སོང་ནས་སྨྲས་པ། ཤེས་ལྡན་དག་སྲིན་མོ་དེས་རྒྱལ་པོ་ཟོས་ཀྱིས་ཐབས་སོམས་ཤིག །བློན་པོ་རྣམས་ཀྱིས་སྨྲས་པ། འདི་ལ་ཇི་ལྟར་བསྒྲུབ་པར་བྱ། ཡ་གད་འོན་ཅིག་དང་འཛེགས་ཏེ་བལྟ་བར་བྱའོ། །དེ་དག་གིས་ཁྱེར་ཏེ་འོངས་པ་དང་། དེད་དཔོན་སིང་ག་ལ་རལ་གྲི་ཐོགས་ཏེ་འཛེགས་ནས་དེས་དེ་དག་བསྡིགས་པ་དང་། སྲིན་མོ་དེ་དག་ཁ་ཅིག་ནི་མིའི་རྐང་ལག་དག་ཐོགས་ཏེ་བྱེར། ཁ་ཅིག་ནི་མགོ་དག་ཐོགས་ཏེ་བྱེར་རོ། །དེ་ནས་དེད་དཔོན་སིང་ག་ལས་རྒྱལ་པོའི་ཕོ་བྲང་གི་སྒོ་དག་ཕྱེ་ནས་བློན་པོ་རྣམས་ཀྱིས་རྒྱལ་པོའི་ཕོ་བྲང་བྱི་དོར་བྱས་ནས། ཕོ་བྲང་འཁོར་གྱི་མི་དང་། བློན་པོ་དང་། ཡུལ་མི་དག་བསྡུས་ཏེ་སྨྲས་པ། ཤེས་ལྡན་དག་རྒྱལ་པོ་བཙུན་མོའི་འཁོར་དང་བཅས་པ་སྲིན་མོས་ཟོས་ཏེ་གཞོན་ནུ་ཡང་མེད་ན་སུ་ཞིག་རྒྱལ་པོར་དབང་བསྐུར་བར་བྱ། དེ་ན་ཁ་ཅིག་གིས་སྨྲས་པ། གང་སྙིང་སྟོབས་ཅན་ཤེས་རབ་དང་ལྡན་པའོ། །ཁ་ཅིག་གིས་སྨྲས་པ། དེད་དཔོན་སིང་ག་ལ་ལས་སྙིང་སྟོབས་ཅན་ཤེས་རབ་དང་ལྡན་པ་སུ་ཞིག་ཡོད་ཀྱི་དེད་དཔོན་སིང་ག་ལ་རྒྱལ་པོར་དབང་བསྐུར་བར་བྱའོ། །དེ་ལྟར་བྱའོ། །ཞེས་དེ་དག་གིས་དེད་དཔོན་སིང་ག་ལ་ལ་སྨྲས་པ། དེད་དཔོན་རྒྱལ་སྲིད་ལོང་ཤིག །དེས་སྨྲས་པ། ཁོ་བོ་ནི་ཚོང་པའི་ཐ་སྙད་ཀྱིས་འཚོ་བ་ཡིན་པས་ཁོ་བོ་ལ་རྒྱལ་སྲིད་ཀྱིས་ཅི་བྱ། དེ་དག་གིས་སྨྲས་པ། དེད་དཔོན་གཞན་གྱིས་རྒྱལ་སྲིད་བྱེད་དུ་འཇུག་མི་ནུས་ཀྱིས་ལོང་ཤིག །དེས་སྨྲས་པ། དམ་ཚིག་གིས་བླང་བར་བྱ་སྟེ། གལ་ཏེ་ཁྱེད་ཅག་ཁོ་བོའི་ཚིག་བཞིན་བྱེད་ནའོ། །དེ་དག་གིས་སྨྲས་པ། བྱེད་ཀྱིས་ལོང་ཤིག །མ་ཉེས་སོ། །དེ་དག་གིས་གྲོང་ཁྱེར་མཛེས་པར་བྱས་ནས་དེད་དཔོན་སིང་ག་ལ་བཀུར་སྟི་ཆེན་པོས་རྒྱལ་སྲིད་ལ་
དབང་བསྐུར་ཏོ། །རྒྱལ་པོ་སིང་ག་ལས་ཡུལ་ཐ་དད་པ་ན་གནས་པའི་རིག་སྔགས་སྨྲ་བ་དག་བོས་ཏེ་རིག་སྔགས་རྒྱ་ཆེར་སློབ་ཏུ་བཅུག་གོ །དེ་བཞིན་དུ་ཡུལ་ཐ་དད་པ་ན་གནས་པའི་འཕོང་གི་སློབ་དཔོན་དག་ཀྱང་བོས་ཏེ་རྒྱ་ཆེར་འཕོང་སློབ་ཏུ་བཅུག་ནས་བློན་པོ་རྣམས་ལ་བསྒོ་བ། ཤེས་ལྡན་དག་དཔུང་གི་ཚོགས་ཡན་ལག་བཞི་པ་གོ་སྐོན་ཅིག །སྲིན་མོ་དེ་དག་ཟངས་གླིང་ནས་སྐྲོད་དུ་འདོང་ངོ་། །བློན་པོ་རྣམས་ཀྱིས་དཔུང་གི་ཚོགས་ཡན་ལག་བཞི་པ་གོ་བསྐོན་ནས་རྒྱལ་པོ་སིང་ག་ལས་དཔུང་གི་ཚོགས་ཡན་ལག་བཞི་པ་གླང་པོ་ཆེ་བའི་ཚོགས་དང་། རྟ་པའི་ཚོགས་དང་། ཤིང་རྟ་པའི་ཚོགས་དང་། དཔུང་བུ་ཆུང་གི་ཚོགས་གྲུར་བཙུད་དེ་ཟངས་གླིང་དུ་འཕགས་སོ། །མཐར་གྱིས་རྒྱ་མཚོའི་འགྲམ་དུ་ཕྱིན་པ་དང་། སྲིན་མོ་དེ་དག་གི་ཕོངས་པའི་གནས་དང་མཐུན་པའི་རྒྱལ་མཚན་གཡོ་བར་བརྩམས་ནས་དེ་དག་གིས་གྲོས་བྱ་བར་བརྩམས་པ། ཕུ་ནུ་མོ་དག་ཕོངས་པའི་གནས་དང་མཐུན་པའི་རྒྱལ་མཚན་གཡོས་པ་ལས་ན་འཛམ་བུའི་གླིང་པའི་མི་གཡུལ་འགྱེད་པར་འདོད་པ་དག་ལྷགས་གོར་མ་ཆག་གིས་བལྟའོ་ཞེས་དེ་དག་རྒྱ་མཚོའི་འགྲམ་དུ་དོང་བ་དང་། ཇི་ཙམ་ན་གྲུ་བོ་ཆེ་བ་དུ་མ་དག་རྒྱ་མཚོའི་འགྲམ་དུ་ཕྱིན་པ་མཐོང་ངོ་། །མཐོང་ནས་སྲིན་མོ་དེ་དག་གིས་ཀྱང་གཡུལ་བཤམས་པ་དང་། དེ་ནས་རིག་སྔགས་སྨྲ་བ་དག་གིས་རིག་སྔགས་དག་གིས་ཕབ་ནས་འཕོང་གི་སློབ་དཔོན་དག་གིས་ཕལ་ཆེར་བསད་དོ། །ལྷག་མ་རྣམས་ཀྱིས་རྒྱལ་པོ་སིང་ག་ལའི་རྐང་པ་གཉིས་ལ་གཏུགས་ཏེ་སྨྲས་པ། ལྷ་བཟོད་པར་གསོལ། དེས་སྨྲས་པ། དམ་ཚིག་གིས་བཟོད་པར་བྱ་སྟེ། གལ་ཏེ་ཁྱེད་ཅག་གི་གྲོང་ཁྱེར་འདི་ཕྱུང་སྟེ། གཞན་དུ་འདོང་ཞིང་ངའི་ཡུལ་དུ་གནོད་པ་འགའ་ཡང་མི་བྱེད་ན་བཟོད་དོ། །དེ་དག་གིས་སྨྲས་པ། དེ་ལྟར་བགྱིའོ། །མ་ཉེས་སོ། །དེ་དག་གིས་གྲོང་ཁྱེར་དེ་དག་ཕྱུང་ནས་གཞན་དུ་དོང་སྟེ་འཁོད་དོ། །རྒྱལ་པོ་སིང་ག་ལས་ཀྱང་དེར་གྲོང་ཁྱེར་བརྩིགས་ནས་རྒྱལ་པོ་སིང་ག་ལས་གནས་བཅས་པས་སིང་ག་ལའི་གླིང་སིང་ག་ལའི་གླིང་ཞེས་བྱ་བའི་མིང་དུ་
གྱུར་ཏོ། །དགེ་སློང་དག་དེའི་ཚེ་དེའི་དུས་ན་དེད་དཔོན་སིང་ག་ལ་གང་ཡིན་པ་དེ་ནི་ང་ཉིད་ཡིན་ནོ། །དེའི་ཚེ་དེའི་དུས་ན་རྒྱལ་པོ་སེང་གེ་རལ་པ་ཅན་གང་ཡིན་པ་དེ་ནི་རྒན་ཞུགས་འདི་ཉིད་ཡིན་ནོ། །དེའི་ཚེ་དེའི་དུས་ན་སྲིན་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། དེའི་ཚེ་ཡང་དཔེ་མེད་མ་འདིས་འདི་བཙུན་མོའི་འཁོར་དང་བཅས་པ་ཚུལ་མ་ཡིན་པས་སྡུག་བསྔལ་བར་བྱས་ལ། ད་ལྟར་ཡང་འདིས་འདི་ཚུལ་མ་ཡིན་པས་སྡུག་བསྔལ་བར་བྱས་སོ། །ཀུན་དུ་རྒྱུ་མ་དུས་དཔེ་མེད་མ་ཁྲིད་དེ་ཀཽ་ཤཱམྦཱིར་འོངས་ནས་སྐྱེད་མོས་ཚལ་ཞིག་ན་འདུག་གོ །སྐྱེད་མོས་ཚལ་སྲུང་བའི་མིས་རྒྱལ་པོ་ཤར་པ་ལ་སྦྲན་པ། ལྷ་བུད་མེད་གཟུགས་བཟང་བ། བལྟ་ན་སྡུག་པ། མཛེས་པ་ཞིག་སྐྱེད་མོས་ཚལ་ན་མཆིས་ཏེ། དེ་ནི་ལྷ་ལ་འོས་པ་ལགས་སོ། །རྒྱལ་པོས་ཐོས་ནས་སྐྱེད་མོས་ཚལ་དུ་སོང་བ་དང་དེས་མཐོང་ངོ་། །བུད་མེད་ཀྱི་ཡུལ་ནི་དབང་པོ་རྣམས་འཕྲོག་པ་ཡིན་པས་མཐོང་མ་ཐག་ཏུ་ཆགས་པར་གྱུར་ནས། དེས་ཀུན་དུ་རྒྱུ་མ་དུ་ལ་སྨྲས་པ། མ་དུ་འདི་སུའི་བུ་མོ་ཡིན། ལྷ་བདག་གི་བུ་མོ་ལགས་སོ། །སུ་ལ་བྱིན། ལྷ་སུ་ཡང་མ་སྩལ་ཏོ། །ང་ལ་ཅིའི་ཕྱིར་མི་སྦྱིན། ལྷ་གསོལ་ལོ། །རྒྱལ་པོས་བག་མར་བླངས་ཏེ། བཙུན་མོའི་འཁོར་གྱི་ནང་དུ་བཅུག་ནས་དེ་ལ་ཁང་བཟངས་མེ་ཏོག་གི་སོའི་ཕྱེད་ཀྱང་བྱིན། བསྙེན་བཀུར་མ་ལྔ་བརྒྱ་ཡང་བྱིན། ཉི་མ་རེ་རེ་ཞིང་དྲི་དང་། ཕྲེང་བ་རྒྱུའི་རིན་ཀཱ་པ་ཤ་ཎ་ལྔ་བརྒྱ་ལྔ་བརྒྱ་ཡང་བྱིན་ནོ། །ཀུན་དུ་རྒྱུ་མ་དུ་ཡང་བློན་པོའི་མཆོག་ཏུ་བཅུག་གོ །དེའི་ཚེ་ན་བད་སའི་རྒྱལ་པོ་ཤར་པ་ལ་བློན་པོའི་མཆོག་གསུམ་ཡོད་དེ། སྦྱོར་བ་འཛིན་དང་། གདངས་ཅན་དང་། མ་དུའོ། །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པའི་གན་དུ་མི་ཞིག་འོངས་ནས་རྒྱལ་པོས་དྲིས་པ། ཁྱོད་སུ་ཡིན། དེས་སྨྲས་པ། ལྷ་བདག་སྙན་སྨྲ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་སྙན་སྨྲ་ལ་འཚོ་བ་བྱིན་ཅིག །དེ་དག་གིས་དེ་ལ་འཚོ་བ་བྱིན་ནོ། །ཇི་ཙམ་ན་ཡང་རྒྱལ་པོའི་གན་དུ་མི་ཞིག་འོངས་ནས་རྒྱལ་པོས་དེ་ལ་དྲིས་པ། ཁྱོད་སུ་ཡིན། དེས་སྨྲས་པ། ལྷ་བདག་མི་སྙན་
སྨྲ་ལགས་སོ། །རྒྱལ་པོས་བློན་པོ་རྣམས་ལ་བསྒོ་བ། ཤེས་ལྡན་དག་མི་སྙན་སྨྲ་ལ་འཚོ་བ་བྱིན་ཅིག །དེ་དག་གིས་སྨྲས་པ། ལྷ་གལ་ཏེ་ན་ལྷས་མི་སྙན་པ་གསན་པར་འགྱུར་ཡང་གདའ་བས་འདི་ལ་འཚོ་བ་མི་སྩལ་ཏོ། །རྒྱལ་པོས་སྨྲས་པ། ཤེས་ལྡན་དག་རྒྱལ་པོའི་བྱ་བ་དག་ནི་རྒྱ་ཆེས་བྱིན་ཅིག །དེ་དག་གིས་དེ་ལ་ཡང་འཚོ་བ་བྱིན་ནོ། །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པ་བཙུན་མོ་སྔོ་བསངས་ཅན་དང་། དཔེ་མེད་མ་དང་ལྷན་ཅིག་འདུག་པ་ན་དེ་ན་རྒྱལ་པོ་སྦྲིད་པ་བྱུང་བ་དང་། སྔོ་བསངས་ཅན་གྱིས་སངས་རྒྱས་ལ་ཕྱག་འཚལ་ལོ་ཞེས་སྨྲས་པ་དང་། དཔེ་མེད་མས་ལྷ་ལ་ཕྱག་འཚལ་ལོ་ཞེས་བྱས་ཏེ་སྨྲས་པ། ལྷ་སྔོ་བསངས་ཅན་ལྷའི་འཚལ་མ་འཚལ་ཞིང་དགེ་སྦྱོང་གཽ་ཏ་མ་ལ་ཕྱག་འཚལ་བ་ལ་གཟིགས། རྒྱལ་པོས་སྨྲས་པ། དཔེ་མེད་མ་འདི་ལ་ཉེས་པ་མེད་དེ། སྔོ་བསངས་ཅན་དགེ་བསྙེན་མ་ཡིན་པས་ལོས་ཀྱང་དགེ་སྦྱོང་གཽ་ཏ་མ་ལ་ཕྱག་འཚལ་མོད། དེ་ཅང་མི་སྨྲ་བར་འདུག་གོ །དེས་བུ་མོ་མངག་གཞུག་མ་ལ་སྨྲས་པ། བུ་མོ་གང་གི་ཚེ་ལྷ་སྔོ་བསངས་ཅན་དང་། ཁོ་མོ་དང་ལྷན་ཅིག་དབེན་པ་ན་བཞུགས་པ་དེའི་ཚེ་ན་ཁྱོད་ཀྱིས་ཐེམ་སྐས་ནས་ཁར་ཕོར་རྦབ་ཏུ་ཐོང་ཤིག །དེས་ཇོ་མོ་བཀའ་བཞིན་འཚལ་ཞེས་གང་གི་ཚེ་དེ་དག་ལྷན་ཅིག་འདུག་པ་དེའི་ཚེ་ན་ཐེམ་སྐས་ནས་ཁར་ཕོར་རྦབ་ཏུ་བཏང་བ་ན། སྔོ་བསངས་ཅན་གྱིས་སངས་རྒྱས་ལ་ཕྱག་འཚལ་ལོ་ཞེས་སྨྲས་པ་དང་། དཔེ་མེད་མས་ལྷ་ལ་ཕྱག་འཚལ་ལོ་ཞེས་བྱས་ཏེ་སྨྲས་པ། ལྷ་སྔོ་བསངས་ཅན་ལྷའི་འཚལ་མ་འཚལ་ཞིང་དགེ་སྦྱོང་གཽ་ཏ་མ་ལ་ཕྱག་འཚལ་བ་ལ་གཟིགས། རྒྱལ་པོས་སྨྲས་པ། དཔེ་མེད་མ་ཐོང་ཤིག །ཉེས་རྩོམ་མ་བྱེད་ཅིག །འདི་ལ་ཉེས་པ་མེད་དེ། སྔོ་བསངས་ཅན་དགེ་བསྙེན་མ་ཡིན་པས་ལོས་ཀྱང་དགེ་སྦྱོང་གཽ་ཏ་མ་ལ་ཕྱག་འཚལ། དེ་ཅང་མི་སྨྲ་བར་འདུག་གོ །རྒྱལ་པོ་ཤར་པ་ཉི་མ་གཅིག་ནི་སྔོ་བསངས་ཅན་གྱི་གན་དུ་ཟན་ཟ་ལ། ཉི་མ་གཉིས་པ་ལ་ནི་དཔེ་མེད་མའི་གན་དུ་ཟན་ཟའོ། །དཔེ་མེད་མས་བྱ་པ་ལ་བསྒོ་བ། གང་གི་ཉིན་མོ་ལྷ་སྔོ་
བསངས་ཅན་གྱི་གན་དུ་བཤོས་གསོལ་བའི་རེས་བབ་པ་དེའི་ཉིན་མོ་གོང་མ་སྲེག་གསོན་པོ་དབུལ་བར་བྱའོ། །བྱ་པས་གང་གི་ཉིན་མོ་རྒྱལ་པོ་སྔོ་བསངས་ཅན་གྱི་གན་དུ་ཟན་ཟ་བ་དེའི་ཉིན་མོ་རྒྱལ་པོ་ལ་གོང་མ་སྲེག་གསོན་པོ་ཕུལ་བ་དང་། རྒྱལ་པོས་སྨྲས་པ། དཔེ་མེད་མ་ལ་གཏོད་ཅིག །དཔེ་མེད་མས་ཐོས་ནས་དེས་སྨྲས་པ། ལྷ་བདག་གི་རེས་མ་ལགས་ཏེ། སྔོ་བསངས་ཅན་གྱི་རེས་ལགས་སོ། །རྒྱལ་པོས་སྨྲས་པ། ཀྭའི་བྱ་པ་སོང་ལ་སྔོ་བསངས་ཅན་ལ་གཏོད་ཅིག །དེས་སྔོ་བསངས་ཅན་ལ་ཕུལ་ཏེ་སྨྲས་པ། ལྷའི་དོན་དུ་གཡོས་མཛོད་ཅིག །དེས་སྨྲས་པ། ཅི་ཁོ་མོ་བྱ་པ་མོའམ། ཁོ་མོ་སྲོག་གཅོད་པར་མི་བྱེད་ཀྱིས་སོང་ཤིག །དེས་རྒྱལ་པོའི་གན་དུ་སོང་སྟེ་སྨྲས་པ། ལྷ་སྔོ་བསངས་ཅན་གྱི་མཆིད་ནས། ཅི་ཁོ་མོ་བྱ་པ་མོའམ། ཁོ་མོ་སྲོག་གཅོད་པར་མི་བྱེད་ཀྱིས་སོང་ཞིག་ཅེས་མཆིའོ། །དཔེ་མེད་མས་ཐོས་ནས་སྨྲས་པ། ལྷ་གལ་ཏེ་དེ་ལ་དགེ་སྦྱོང་གཽ་ཏ་མའི་སླད་དུ་གཡོས་གྱིས་ཤིག་ཅེས་བགྱིས་ན་ནི་ད་ཙམ་འཁོར་དང་བཅས་ཏེ་གཡོས་བགྱིད་པར་འགྱུར་རོ། །རྒྱལ་པོས་བསམས་པ། དེ་ལྟར་འགྱུར་བ་སྙམ་ཞེས་དེས་མི་དེ་ལ་སྨྲས་པ། ཀྭའི་བྱ་པ་སོང་ལ་འདི་སྐད་ཅེས་བཅོམ་ལྡན་འདས་ཀྱི་ཕྱིར་གཡོས་གྱིས་ཤིག་ཅེས་བྱོས་ཤིག །དེ་འཕགས་པ་དང་། དཔེ་མེད་མས་ལྐོག་ཏུ་སོད་ལ་ཕུལ་ཅིག་ཅེས་བསྒོ་ནས། དེས་བསད་དེ་སྔོ་བསངས་ཅན་ལ་ཕུལ་ནས་སྨྲས་པ། ལྷའི་ཞལ་ནས་བཅོམ་ལྡན་འདས་ཀྱི་ཕྱིར་གཡོས་གྱིས་ཤིག་ཅེས་བྱུང་ངོ་། ། སྔོ་བསངས་ཅན་འཁོར་དང་བཅས་པས་གཡོས་བྱ་བར་བརྩམས་སོ། །བྱ་པས་སོང་སྟེ་རྒྱལ་པོ་ལ་སྨྲས་པ། ལྷ་སྔོ་བསངས་ཅན་འཁོར་དང་བཅས་པས་གཡོས་བགྱི་བར་བརྩམས་སོ། །དཔེ་མེད་མས་སྨྲས་པ། ལྷས་གསན་ཏམ། གལ་ཏེ་སྲོག་གཅོད་པར་མི་བགྱིད་ན་ནི་དགེ་སྦྱོང་གཽ་ཏ་མའི་སླད་དུ་ཡང་མི་བགྱིད་ལ། ལྷའི་སླད་དུ་ཡང་མི་བགྱིད་པའི་རིགས་ན། དགེ་སྦྱོང་གཽ་ཏ་མའི་སླད་དུ་ནི་བགྱིད་ལ། ལྷའི་སླད་དུ་ནི་མི་བགྱིད་པ་དེ་ཇི་ལྟ་བུ་ཞིག །རྒྱལ་པོ་ཁྲོས་པར་གྱུར་ནས་གཞུ་བཀང་སྟེ་འཕགས་སོ། །འཇིག་རྟེན་ནི་མཛའ་བཤེས་དང་། དགྲ་བོ་དང་ཐ་
མལ་པ་ཡིན་པས་ཁ་ཅིག་གིས་ནི་སྔོ་བསངས་ཅན་ལ་སྨྲས་པ། ལྷ་ཤིན་ཏུ་ཁྲོས་ནས་གཞུ་བཀང་སྟེ་འོང་གིས་ཐབས་སོམས་ཤིག །དེས་རང་གི་འཁོར་ལ་སྨྲས་པ། ནུ་མོ་དག་ཁྱེད་ཅག་ཐམས་ཅད་བྱམས་པ་ལ་སྙོམས་པར་ཞུགས་ཤིག །དེ་དག་ཐམས་ཅད་བྱམས་པ་ལ་སྙོམས་པར་ཞུགས་སོ། །རྒྱལ་པོས་གཞུ་རྣ་དྲུང་དུ་ཐུག་པར་བཀང་སྟེ་མདའ་འཕངས་པ་དང་། དེ་ལམ་ཕྱེད་དུ་ལྟུང་ངོ་། །མདའ་གཉིས་པ་འཕངས་པ་དང་། དེ་ཕྱིར་ལོག་སྟེ་རྒྱལ་པོའི་དྲུང་དུ་ལྟུང་ངོ་། །མདའ་གསུམ་པ་འཕང་བར་བརྩམས་པ་དང་། སྔོ་བསངས་ཅན་གྱིས་སྨྲས་པ། ལྷ་མ་འཕེན་ཅིག །ཁྱོད་ཐམས་ཅད་ཀྱི་ཐམས་ཅད་དུ་མ་མཆིས་པར་འགྱུར་བ་མ་མཛད་ཅིག །རྒྱལ་པོ་སྐྲག་སྟེ་སྨྲས་པ། ཁྱོད་ལྷ་མོའམ། ཀླུ་མོའམ། གནོད་སྦྱིན་མོའམ། དྲི་ཟ་མོའམ། ནམ་མཁའ་ལྡིང་མོའམ། མིའམ་ཅི་མོའམ། ལྟོ་འཕྱེ་ཆེན་མོའམ་སུ་ཡིན། དེས་སྨྲས་པ། ལྷ་བདག་ནི་ལྷ་མོ་ཡང་མ་ལགས། ཀླུ་མོ་ཡང་མ་ལགས། གནོད་སྦྱིན་མོ་ཡང་མ་ལགས། དྲི་ཟ་མོ་ཡང་མ་ལགས། མིའམ་ཅི་ཡང་མ་ལགས། ལྟོ་འཕྱེ་ཆེན་མོ་ཡང་མ་ལགས་སོ། །འོ་ན་ཁྱོད་སུ་ཡིན། ལྷ་བདག་ནི་བཅོམ་ལྡན་འདས་ཀྱི་ཉན་ཐོས་མ་ཕྱིར་མི་འོང་བ་སྟེ། བདག་གིས་བཅོམ་ལྡན་འདས་ཀྱི་དྲུང་ནས་ཕྱིར་མི་འོང་བའི་འབྲས་བུ་མངོན་སུམ་དུ་བགྱིས་སོ། །བུད་མེད་ལྔ་བརྒྱ་པོ་འདི་དག་གིས་ཀྱང་བདེན་པ་དག་མཐོང་ངོ་། །རྒྱལ་པོ་མངོན་པར་དད་པར་གྱུར་ནས་སྨྲས་པ། ཁྱོད་ལ་དམ་པ་ཅི་ཞིག་སྦྱིན་པར་བྱ་བ་སྨྲོས་ཤིག །དེས་སྨྲས་པ། གལ་ཏེ་ལྷ་བདག་ལ་མངོན་པར་དད་ན་གང་གི་ཚེ་ལྷ་བཙུན་མོའི་འཁོར་གྱི་ནང་དུ་གཤེགས་པ་དེའི་ཚེ་ན་བདག་ལ་སྲིང་མོའི་འདུ་ཤེས་ཉེ་བར་ཞོག་ཤིག །རྒྱལ་པོས་སྨྲས་པ། མ་ཉེས་ཀྱིས་དེ་བཞིན་བྱའོ། །རྒྱལ་པོ་དེ་དཔེ་མེད་མ་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱོད་པར་བྱེད་པ་ཉམས་སུ་མྱོང་བར་བྱེད་དོ། །སྔོ་བསངས་ཅན་ལ་ཆོས་ཀྱི་རྒྱུ་ལས་བྱུང་བའི་དད་པ་སྐྱེད་པར་བྱེད་ཅིང་། དེ་ལ་ལོ་ཏོག་སར་པ་དང་། འབྲས་བུ་སར་པ་དང་། དུས་ཚིགས་སར་པ་པ་གང་དག་
འགྲུབ་པ་དེ་དག་ཀྱང་དང་པོ་ཁོ་ནར་སྔོ་བསངས་ཅན་ལ་འབུལ་བར་བྱེད་དོ། །བུད་མེད་ཀྱི་ཡུལ་ནི་ཕྲག་དོག་གི་རང་བཞིན་ཅན་ཡིན་པས་དཔེ་མེད་མས་བསམས་པ། རྒྱལ་པོ་འདི་བདག་དང་ལྷན་ཅིག་རྩེ་བ་དང་། དགའ་བ་དང་། དགའ་མགུར་སྤྱོད་པར་བྱེད་པ་ཉམས་སུ་མྱོང་བར་བྱེད་ལ། འདི་ལ་ལོ་ཏོག་སར་པ་དང་། འབྲས་བུ་སར་པ་དང་། དུས་ཚིགས་སར་པ་པ་གང་དག་འགྲུབ་པ་དེ་དག་ནི་དང་པོ་ཁོ་ནར་སྔོ་བསངས་ཅན་ལ་འབུལ་བར་བྱེད་པས་གང་གིས་སྔོ་བསངས་ཅན་འདི་གསད་པར་འགྱུར་བ་དེ་ལྟ་བུའི་ཐབས་ཀྱི་རྣམ་པ་ཞིག་བྱའོ་སྙམ་ནས། དེ་གསད་པའི་ཕྱིར་ཀླན་ཀ་ཚོལ་ཞིང་དེ་ལྷུར་ལེན་ཅིང་འདུག་གོ །ཇི་ཙམ་དུས་གཞན་ཞིག་ན་བད་སའི་རྒྱལ་པོ་ཤར་པའི་རི་བྲགས་པ་ཞིག་ལོག་ནས། དེས་དེར་རུ་གཅིག་བཏང་ན་དེ་བཅོམ་ཞིང་རབ་ཏུ་བཅོམ་སྟེ་འོངས་སོ། །དེ་བཞིན་དུ་རུ་གཉིས་པ་དང་། གསུམ་པ་བཏང་ན་དེ་ཡང་བཅོམ་ཞིང་རབ་ཏུ་བཅོམ་སྟེ་འོངས་ནས། བློན་པོ་རྣམས་ཀྱིས་སྨྲས་པ། ལྷའི་དཔུང་ནི་ཉམས་ཤིང་རི་བྲགས་པའི་དཔུང་ནི་སྐྱེས་ཏེ། གལ་ཏེ་ལྷ་རང་ཉིད་མ་གཤེགས་ན་དེ་ཕེབས་དཀའ་བར་འགྱུར་བ་གང་ལགས་པ་དེ་ལྟ་བུའི་གནས་མཆིས་པར་འགྱུར་རོ། །དེས་ཀཽ་ཤཱམྦཱིར་དྲིལ་བསྒྲག་པ་བྱེད་དུ་བཅུག་སྟེ། ངའི་ཡུལ་ན་གང་དག་མཚོན་ཆས་འཚོ་བ་ཇི་སྙེད་འཁོད་པ་དེ་དག་ཐམས་ཅད་ཀྱིས་འདོང་བར་བྱའོ་ཞེས་བསྒོ་སྟེ་དེ་ནས་འཕགས་སོ། །རྒྱལ་པོས་སྦྱོར་བ་འཛིན་ལ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག །དེས་སྨྲས་པ། ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་ཅིག་མཆིའོ། །རྒྱལ་པོས་གདངས་ཅན་ལ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག །དེས་ཀྱང་སྨྲས་པ། ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་ཅིག་མཆིའོ། །རྒྱལ་པོས་མ་དུ་བཞག་སྟེ་སྨྲས་པ། ཁྱོད་སྔོ་བསངས་ཅན་ལ་མཁོ་བ་སྟོབས་ཤིང་འདི་ཉིད་ན་འདུག་ཤིག་ཅེས་བསྒོ་སྟེ་འཕགས་པ་དང་། དེས་ཀྱང་ཕྱི་བཞིན་སྐྱེལ་བཞིན་དུ་ལྷ་དེ་ལྟར་མི་རུང་སྟེ། བདག་ཀྱང་ལྷ་ཉིད་དང་ཐབས་ཅིག་མཆིའོ་ཞེས་ལན་གསུམ་གྱི་བར་དུ་གསོལ་ཀྱང་
རྒྱལ་པོས་མ་གནང་ནས་དེས་ཁས་བླངས་སོ། །མ་དུ་དཔེ་མེད་མའི་གན་དུ་སོང་བ་དང་། དེས་དྲིས་པ། ཡབ་ལྷས་འདིར་སུ་བཞག །བདག་བཞག་གོ །དེས་བསམས་པ། མ་ཉེས་ཀྱིས་གྲོགས་འདིས་ཁོན་གྱི་ཤ་གླན་པར་ནུས་སོ་སྙམ་དུ་རིག་ནས་སྨྲས་པ། ཡབ་སྔོ་བསངས་ཅན་བདག་གི་ཅིར་འོང་མཁྱེན་ཏམ། བུ་མོ་འཚལ་ཏེ་ཆེན་མའོ། །ཡབ་བུད་མེད་ཀྱི་ཡུལ་ལ་ཆོས་གང་ཤིན་ཏུ་གནོད་པ་མཁྱེན་ཏམ། བུ་མོ་འཚལ་ཏེ། ཕྲག་དོག་དང་སེར་སྣའོ། །ཡབ་གལ་ཏེ་དེ་ལྟ་ན་སྔོ་བསངས་ཅན་ཁུམ་ཤིག། བུ་མོ་ཅི་བདག་ལ་མགོ་གཉིས་མཆིས་སམ། རྒྱལ་པོས་ལན་གསུམ་གྱི་བར་དུ་སྔོ་བསངས་ཅན་ལ་མཁོ་བ་སྟོབས་ཤིག་ཅེས་བཀའ་སྩལ་གྱི། ཁྱོད་ཀྱི་མིང་ཡང་མ་སྨོས་སོ། །དེས་སྨྲས་པ། ཡབ་ཁྱོད་འདི་ལྟར་གླེན་ནམ། བུ་མོའི་དོན་དུ་ཕ་ལ་ཅུང་ཟད་འཚོལ་བ་སུ་ཡོད་དེ། རྒྱུ་མེད་པར་ཡང་དེ་ལ་བྱམས་པར་བྱེད་དོ། །དེའི་ཕྱིར་གལ་ཏེ་ཇེ་དེ་གསོད་ན་དེ་ལྟ་ན་ལེགས། གལ་ཏེ་མི་གསོད་ན་ཁོ་མོས་ཁྱོད་སྔོན་གྱི་གནས་ཉིད་དུ་གཞག་པར་བྱའོ། །དེ་སྐྲག་སྟེ་བསམས་པ། རྒྱལ་པོ་དེ་བུད་མེད་ཀྱི་དབང་དུ་སོང་བ་ཡིན་པས་དེ་ལྟར་འགྱུར་རོ་སྙམ་དུ་རིག་ནས། སྨྲས་པ། བུ་མོ་གྱི་ན་དེ་བཞིན་དུ་གསད་པར་མི་ནུས་ཏེ། འདི་ལྟར་ཐབས་ཀྱི་རྣམ་པ་ཞིག་བྱའོ། །དེས་སྨྲས་པ། མ་ཉེས་ཀྱིས་དེ་བཞིན་གྱིས་ཤིག །དེས་སྔོ་བསངས་ཅན་ལ་སྨྲས་པ། ལྷ་མོ་ཅི་བགྱི་བཀའ་སྩོལ་ཅིག །དེས་སྨྲས་པ། མ་དུ་བྱ་བ་ཅུང་ཟད་ཀྱང་མེད་དེ། འདི་ལྟར་བུ་མོ་འདི་དག་མཚན་མོ་མེ་མར་ལ་སངས་རྒྱས་ཀྱི་བཀའ་ཀློག་པས་དེར་གྲོ་བ་དང་། འབྲུ་མར་དང་། སྣག་ཚ་དང་། སྨྱུ་གུ་དང་ཤིང་བལ་དགོས་སོ། །དེས་སྨྲས་པ། ལྷ་མོ་མ་ནོངས་ཀྱིས་སྦྱོར་དུ་སྩལ་ཏོ་ཞེས་དེས་མང་པོ་སྦྱོར་དུ་བཅུག་སྟེ་ནང་དུ་བསྐྱས་ནས་སྒོ་ཁང་དུ་ཕུང་པོར་བཅེར་ཏེ་བཞག་གོ །སྔོ་བསངས་ཅན་གྱིས་སྨྲས་པ་མ་དུ་ཆོག་གིས་ཐོང་ཤིག་མ་དུས་སྨྲས་པ། ལྷ་མོ་འཇུག་སྩལ་ཏེ་སླན་ཆད་ཡང་དང་ཡང་དུ་འཇུག་ཏུ་མི་སྩལ་བར་བགྱིའོ་ཞེས་དེའི་འཇུག་ཏུ་བཅུག་ནས་གྲོ་བའི་ཁུར་ཕྱི་མར་མེ་བཅུག་སྟེ་འཇུག་ཏུ་བཅུག་པ་དང་། མེ་འབར་བ་དེས་སྒོ་ཁང་ལ་
མཆེད་ནས་ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་དང་། མ་དུས་རལ་གྲི་ཤུབས་ནས་ཕྱུང་སྟེ། ཁྱེད་ཅག་ཅིའི་ཕྱིར་རྒྱལ་པོའི་བཙུན་མོའི་འཁོར་གྱི་ནང་དུ་འཇུག་པར་འདོད། སྡོད་ཅིག་ཅེས་སྐྱེ་བོའི་ཚོགས་ཕྱིར་བཟློག་པར་བརྩམས་སོ། །འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྨྲས་པ། ཁོ་བོས་སྒོ་ཁང་མེ་མཆེད་པ་འདི་འཁྲུལ་འཁོར་གྱིས་གནས་གཞན་དུ་སྤོ་བར་བྱའོ། །མ་དུས་དེ་ཡང་དེ་བཞིན་དུ་ཕྱིར་བཟློག་གོ །སྔོ་བསངས་ཅན་རྫུ་འཕྲུལ་གྱིས་ནམ་མཁའ་ལ་གྱེན་དུ་འཕགས་ཏེ་སྨྲས་པ། ནུ་མོ་དག་བདག་ཅག་གིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་བདག་ཅག་གིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། བཅོམ་ལྡན་འདས་ཀྱིས་ཀྱང་། བར་སྣང་རྒྱ་མཚོའི་ནང་དང་ནི། །རི་ཡི་སུལ་དུ་ཞུགས་གྱུར་ཏམ། །གང་དུ་གནས་ན་ལས་རྣམས་ཀྱིས། །མི་ཚུགས་འགྱུར་བའི་ས་ཕྱོགས་མེད། །ཅེས་གསུངས་པས་བདག་ཅག་ལ་ལས་དེ་གཞོལ་བར་འགྱུར་རོ་ཞེས་སྨྲས་ནས་ཚིགས་སུ་བཅད་པ་སྨྲས་པ། བདག་གིས་རྩིག་ངོས་སྐར་ཁུང་ནས། །བཅོམ་ལྡན་འདས་ནི་མཐོང་འགྱུར་ཏེ། །སངས་རྒྱས་ཀྱི་ནི་བསྟན་པ་ལ། །བདེན་པ་དག་ནི་ཀུན་ཤེས་བྱས། །དེ་དག་ཕྱེ་མ་ལེབ་བཞིན་དུ་གྱེན་དུ་མཆོང་ཞིང་མཆོང་ཞིང་མེར་ལྷུང་བར་གྱུར་ཏོ། །དེ་ན་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ནི་ཚིག་གོ །སྒུར་མཆོག་ནི་ཆུའི་སྟོར་ཁུང་ནས་བྲོས་སོ། །མ་དུས་བུད་མེད་ལྔ་བརྒྱ་པོ་དེ་དག་གི་རོ་དུར་ཁྲོད་དུ་བོར་ནས་རྒྱལ་པོའི་ཕོ་བྲང་ནང་དང་ཕྱི་རོལ་དང་བཅས་པའི་བྱི་དོར་བྱས་ཏེ། ཀཽ་ཤཱམྦཱི་ན་གནས་པ་དང་། ཡུལ་ཐ་དད་པ་ནས་ལྷགས་པའི་སྐྱེ་བོའི་ཚོགས་དུ་བ་དག་བཟློག་གོ །དེ་ནས་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཐོགས་ཏེ། ཀཽ་ཤཱམྦཱིར་བསོད་སྙོམས་ལ་ཞུགས་པ་དང་། དགེ་སློང་རབ་ཏུ་མང་པོ་དག་ཀཽ་ཤཱམྦཱིར་བསོད་སྙོམས་ལ་རྒྱུ་བས། བད་སའི་རྒྱལ་པོ་
ཤར་པ་ལྗོངས་སུ་སོང་བའི་བཙུན་མོའི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་མེས་ཚིག་ཅེས་ཐོས་སོ། །ཐོས་ནས་ཀྱང་ཀཽ་ཤཱམྦཱིར་བསོད་སྙོམས་བརྒྱུས་ནས། ཟས་ཀྱི་བྱ་བ་བྱས་ཏེ། ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་ལོངས་སྤྱད་པའི་གནས་མལ་མཁོས་སུ་ཕབ་སྟེ། རྐང་པ་གཉིས་བཀྲུས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འདུག་ནས་བཅོམ་ལྡན་འདས་ལ་དགེ་སློང་རབ་ཏུ་མང་པོ་དག་གིས་འདི་སྐད་ཅེས་གསོལ་ཏོ། །བཙུན་པ་འདི་ན་བདག་ཅག་དགེ་སློང་རབ་ཏུ་མང་པོ་དག་སྔ་དྲོ་ཤམ་ཐབས་འཚལ་ལྷུང་བཟེད་དང་ཆོས་གོས་ཐོགས་ཏེ་ཀཽ་ཤཱམྦཱིར་བསོད་སྙོམས་ལ་ཞུགས་པ་ན། བཙུན་པ་བདག་ཅག་དགེ་སློང་རབ་ཏུ་མང་པོ་ཀཽ་ཤཱམྦཱིར་བསོད་སྙོམས་ལ་རྒྱུ་བ་དག་གིས་བད་སའི་རྒྱལ་པོ་ཤར་པ་ལྗོངས་སུ་མཆིས་པའི་མཆིས་འབྲང་གི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་ཞུགས་ཀྱིས་དྲལ་ཅེས་ཐོས་སོ། །དགེ་སློང་དག་གང་གིས་བད་སའི་རྒྱལ་པོ་ཤར་པ་ལྗོངས་སུ་སོང་བའི་བཙུན་མོའི་འཁོར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཙམ་མེས་བསྲེགས་པའི་མི་གཏི་མུག་ཅན་དེས་བསོད་ནམས་མ་ཡིན་པ་མང་པོ་བསྐྱེད་དོ། །དགེ་སློང་དག་འདི་ལྟར་མི་གཏི་མུག་ཅན་དེས་བསོད་ནམས་མ་ཡིན་པ་མང་པོ་བསྐྱེད་མོད་ཀྱི། བུད་མེད་དེ་དག་ནི་འབྲས་བུ་མེད་པར་དུས་ལ་བབ་པ་མ་ཡིན་ནོ། །དེ་ཅིའི་ཕྱིར་ཞེ་ན། བཙུན་མོའི་འཁོར་དེ་ན་བུད་མེད་གང་དག་གིས་ཐ་མའི་ཆ་དང་མཐུན་པའི་ཀུན་དུ་སྦྱོར་བ་ལྔ་སྤངས་པས་རྫུས་ཏེ་སྐྱེ་ཞིང་། དེར་ཡོངས་སུ་མྱ་ངན་ལས་འདའ་བ་ཕྱིར་མི་འོང་བ་ཡང་འཇིག་རྟེན་འདིར་ཕྱིར་མི་ལྡོག་པའི་ཆོས་ཅན་དེ་ལྟ་བུའི་བུད་མེད་དག་བཙུན་མོའི་འཁོར་དེ་ན་ཡོད་པ་དང་། བཙུན་མོའི་འཁོར་དེ་ན་བུད་མེད་གང་དག་གིས་ཀུན་དུ་སྦྱོར་བ་གསུམ་སྤངས་པས་འདོད་ཆགས་དང་ཞེ་སྡང་དང་། གཏི་མུག་སྲབས་པའི་ཕྱིར་ལན་གཅིག་ཕྱིར་འོང་བ་ལན་གཅིག་འཇིག་རྟེན་འདིར་འོངས་ནས་སྡུག་བསྔལ་མཐར་བྱེད་པར་འགྱུར་བ་དེ་ལྟ་བུའི་བུད་
མེད་དག་ཀྱང་བཙུན་མོའི་འཁོར་དེ་ན་ཡོད་པ་དང་། བཙུན་མོའི་འཁོར་དེ་ན་བུད་མེད་གང་དག་གིས་ཀུན་དུ་སྦྱོར་བ་གསུམ་སྤངས་པས་རྒྱུན་དུ་ཞུགས་པ་ལོག་པར་མི་ལྟུང་བའི་ཆོས་ཅན་རྫོགས་པའི་བྱང་ཆུབ་ལ་ངེས་པར་གཞོལ་བ་རེ་ལྟར་ཐོགས་ན་སྲིད་པ་ལན་བདུན་པ་ལན་བདུན་ལྷ་དང་མི་རྣམས་སུ་མཚམས་སྦྱར་ནས་སྡུག་བསྔལ་མཐར་བྱེད་པར་འགྱུར་བ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པ་དང་། བཙུན་མོའི་འཁོར་དེ་ན་བུད་མེད་གང་དག་རང་གི་སྲོག་གི་ཕྱིར་ཡང་བསླབ་པ་དག་ལས་འདའ་བར་མི་བྱེད་པ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པ་དང་། བཙུན་མོའི་འཁོར་དེ་ན་བུད་མེད་གང་དག་ང་ལ་སེམས་དད་པས་དུས་བྱས་ཤིང་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བ་དེ་ལྟ་བུའི་བུད་མེད་དག་ཀྱང་བཙུན་མོའི་འཁོར་དེ་ན་ཡོད་པའི་ཕྱིར་རོ། །དགེ་སློང་དག་ཚུར་ཤེག་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་པོ་དག་གི་རོ་ག་ལ་བ་དེར་འདོང་ངོ་། །དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ཏོ། །དེ་ནས་བཅོམ་ལྡན་འདས་དགེ་སློང་རབ་ཏུ་མང་པོ་དག་དང་ཐབས་ཅིག་བུད་མེད་ལྔ་བརྒྱ་པོ་དེ་དག་གི་རོ་ག་ལ་བ་དེར་གཤེགས་ཏེ་བྱོན་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་བུད་མེད་ལྔ་བརྒྱའི་རོ་འདི་དག་ནི་གང་ལ་བད་སའི་རྒྱལ་པོ་ཤར་པ་ཆགས་པ་དང་། ཞེན་པ་དང་། འཆུམས་པ་དང་། མདུད་པ་བོར་བ་དང་། བརྒྱལ་བ་དང་། ལྷག་པར་ཆགས་པ་དང་། ལྷག་པར་ཆགས་ཤིང་འདུག་པ་དག་ཡིན་ན། ད་ནི་འདི་དག་ལ་རྐང་པ་དག་གིས་རེག་པར་ཡང་སུ་ཞིག་བྱེད། ཚིགས་སུ་བཅད་པ་ཡང་བཀའ་སྩལ་པ། འཇིག་རྟེན་སྙིང་པོ་མེད་བྲེལ་ལ། །སྐལ་ལྡན་སུ་ཞིག་ལྟ་བར་བྱེད། །བྱིས་པ་ཉོན་མོངས་བཅིངས་གྱུར་ཅིང་། །མུན་པ་ཡོངས་སུ་བསྐོར་བ་དག །དམ་པ་མིན་ལ་དམ་པར་ལྟ། །མཐོང་བ་རྣམས་ལ་ཅི་ཡང་མེད། །དགེ་སློང་དག་དེ་ལྟ་བས་ན་ཁྱེད་ཀྱིས་འདི་ལྟར་བསླབ་པར་བྱ་སྟེ། ཀ་བ་ཚིག་པ་གང་ཡིན་པ་ལ་ཡང་སེམས་རབ་ཏུ་སྡང་བར་མི་བྱ་ན། རྣམ་
པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས་ཏེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཀཽ་ཤཱམྦཱི་ན་གནས་པ་དང་། ཕོ་བྲང་འཁོར་གྱི་མི་དག་འདུས་ཏེ་གྲོས་བྱ་བར་བརྩམས་པ། ཤེས་ལྡན་དག་རྒྱལ་པོ་ལ་གནོད་པ་འདི་ལྟ་བུ་བྱུང་ན་དེ་བདག་ཅག་ལས་གང་གིས་རྒྱལ་པོ་ལ་བརྗོད་པར་བྱ། དེ་ན་ཁ་ཅིག་གིས་སྨྲས་པ། མི་སྙན་སྨྲ་གང་ཡིན་པ་དེ་རྗོད་དུ་གཞུག་གིས་དེ་བོད་དོ། །གཞན་དག་གིས་སྨྲས་པ། མ་ཉེས་ཀྱིས་དེ་ལྟར་བྱའོ་ཞེས་དེ་དག་གིས་དེ་བོས་ཏེ་སྨྲས་པ། ལྷ་ལ་མི་སྙན་པ་འདི་གོ་རིམས་བཞིན་དུ་གསོལ་ཅིག །དེས་སྨྲས་པ། དེའི་ཚེ་ཁྱེད་ཅག་ན་རེ་ཅིའི་ཕྱིར་མི་སྙན་སྨྲ་ལ་འཚོ་བ་སྦྱིན་པར་བྱ་ཞེས་ཟེར་ན། ད་དེའི་དུས་འདི་ཡིན་གྱིས་ཁྱེད་ཅག་ཉིད་ཀྱིས་གསོལ་ཅིག །དེ་དག་གིས་སྨྲས་པ། དེའི་དོན་ཉིད་དུ་ཁྱོད་ལ་འཚོ་བ་བྱིན་པ་ཡིན་ན་གཞན་སུ་ཞིག་གསོལ་བར་བྱེད། ཁྱོད་ཀྱིས་གསོལ་ཅིག །དེས་སྨྲས་པ། དམ་ཚིག་གིས་གསོལ་བར་བྱ་སྟེ། ཁོ་བོ་ཅི་ཟེར་བ་དེ་བཞིན་གྱིས་ཤིག་དང་གསོལ་བར་བྱའོ། །སྨྲོས་ཤིག་དང་། དེ་བཞིན་བྱའོ། །གོ་རིམས་འདི་ལྟར་གསོལ་བར་བྱ་སྟེ། ཁོ་བོ་ལ་གླང་པོ་ཆེ་ལྔ་བརྒྱ་དང་། བལ་གླང་མོ་ལྔ་བརྒྱ་དང་། རྟ་ལྔ་བརྒྱ་དང་། རྒོད་མ་ལྔ་བརྒྱ་དང་། གཞོན་ནུ་ལྔ་བརྒྱ་དང་། གཞོན་ནུ་མ་ལྔ་བརྒྱ་དང་། གསེར་འབུམ་དང་། རས་ལ་ཀཽ་ཤཱམྦཱིའི་གནས་དང་། ཁང་བཟངས་མེ་ཏོག་གི་སོ་དང་། ཇི་ལྟར་མ་དུས་གྲོ་བ་དང་། འབྲུ་མར་དང་། སྣག་ཚ་དང་། སྨྱུ་གུ་དང་། ཤིང་བལ་བསྐྱས་ཤིང་གྲོ་བའི་ཁུར་ཕྱི་མའི་ནང་དུ་མེ་བཅུག་པ་དང་། ཇི་ལྟར་སྒོ་ཁང་ལ་མེ་མཆེད་པ་དང་། ཇི་ལྟར་ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་ན་མ་དུས་རལ་གྲི་ཤུབས་ནས་ཕྱུང་སྟེ། ཕྱིར་བཟློག་པ་དང་། ཇི་ལྟར་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྒོ་ཁང་ལ་མེ་མཆེད་པ་འཁྲུལ་འཁོར་གྱིས་གནས་གཞན་དུ་སྤོའོ་ཞེས་ཟེར་བ་ན་མ་དུས་དེ་བཞིན་དུ་ཕྱིར་བཟློག་པ་དང་། ཇི་ལྟར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་མཆོང་ཞིང་མཆོང་ཞིང་མེར་ལྷུང་བ་དག་རི་མོར་བྲིས་ཏེ་བྱིན་ཅིག །དེ་དག་
གིས་སྨྲས་པ། དེ་ལྟར་བྱའོ་ཞེས་དེ་དག་གིས་དེ་ལ་གླང་པོ་ཆེ་ལྔ་བརྒྱ་དང་། བལ་གླང་མོ་ལྔ་བརྒྱ་དང་། རྟ་ལྔ་བརྒྱ་དང་། རྒོད་མ་ལྔ་བརྒྱ་དང་། གཞོན་ནུ་ལྔ་བརྒྱ་དང་། གཞོན་ནུ་མ་ལྔ་བརྒྱ་དང་། གསེར་འབུམ་དང་། རས་ལ་ཀཽ་ཤཱམྦཱིའི་གནས་དང་། ཁང་བཟངས་མེ་ཏོག་གི་སོ་དང་། ཇི་ལྟར་མ་དུས་གྲོ་བ་དང་། འབྲུ་མར་དང་། སྣག་ཚ་དང་། སྨྱུ་གུ་དང་། ཤིང་བལ་བསྐྱས་ཤིང་གྲོ་བའི་ཁུར་ཕྱི་མའི་ནང་དུ་མེ་བཅུག་པ་དང་། ཇི་ལྟར་སྒོ་ཁང་ལ་མེ་མཆེད་པ་དང་། ཇི་ལྟར་ཀཽ་ཤཱམྦཱི་ན་གནས་པའི་སྐྱེ་བོའི་ཚོགས་ཀྱིས་མེ་གསོད་དུ་བརྒྱུགས་པ་ན་མ་དུས་རལ་གྲི་ཤུབས་ནས་ཕྱུང་སྟེ་ཕྱིར་བཟློག་པ་དང་། ཇི་ལྟར་འཁྲུལ་འཁོར་གྱི་སྒྱུ་རྩལ་གྱི་སློབ་དཔོན་གྱིས་སྒོ་ཁང་ལ་མེ་མཆེད་པ་འཁྲུལ་འཁོར་གྱིས་གནས་གཞན་དུ་སྤོའོ་ཞེས་ཟེར་བ་ན་མ་དུས་དེ་བཞིན་དུ་ཕྱིར་བཟློག་པ་དང་། ཇི་ལྟར་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་མཆོང་ཞིང་མཆོང་ཞིང་མེར་ལྷུང་བ་དག་རི་མོར་བྲིས་ཏེ་བྱིན་ནོ། །དེ་ནས་མི་སྙན་སྨྲས་བློན་པོ་རྣམས་ལ་ཡི་གེ་སྤྲིང་སྟེ། རྒྱལ་པོ་ལ་གནོད་པ་འདི་ལྟ་བུ་བྱུང་བ་ཁོ་བོས་ཐབས་འདིས་བརྗོད་པར་བྱས། ཁྱེད་ཀྱིས་གྲོགས་གྱིས་ཤིག་ཅེས་བྱས་སོ། །དེས་དེ་དག་ལ་ཡི་གེ་སྤྲིང་ནས་དཔུང་གི་ཚོགས་ཡན་ལག་བཞི་པ་གོ་བསྐོན་ཏེ་ཕྱོགས་གཞན་ཞིག་ཏུ་སོང་ནས་དེར་བསྡད་དེ། རྒྱལ་པོ་ཤར་པ་ལ་ཕྲིན་ཡིག་འདི་སྐད་ཅེས་ལྷ་བདག་ནི་ཡུལ་ག་གེ་མོ་ཞིག་གི་རྒྱལ་པོ་སྟེ། བདག་གི་བུ་འཆི་བདག་གིས་ཕྲོགས་ནས་དེའི་ཕྱིར་བདག་དེ་དང་ལྷན་ཅིག་གཡུལ་སྤྲོད་པར་བྱེད་དེ། གལ་ཏེ་རེ་ཞིག་གཡུལ་སྤྲད་པས་དེ་ཕམ་པར་ནུས་ན་དེ་ལྟ་ན་ལེགས། གལ་ཏེ་མ་ནུས་ན་གླང་པོ་ཆེ་ལྔ་བརྒྱ་དང་། བལ་གླང་མོ་ལྔ་བརྒྱ་དང་། རྟ་ལྔ་བརྒྱ་དང་། རྒོད་མ་ལྔ་བརྒྱ་དང་། གཞོན་ནུ་ལྔ་བརྒྱ་དང་། གཞོན་ནུ་མ་ལྔ་བརྒྱ་དང་། གསེར་འབུམ་ཕུལ་ནས་བུ་བླངས་ཏེ་འོང་ངོ་ཞེས་བྲིས་ཏེ་བསྐུར་རོ། །རྒྱལ་པོ་ཤར་པའི་རི་བྲགས་པ་དེ་དཔུང་དང་ལྡན་པས་མ་ཕེབས་ནས། དེས་བློན་པོ་རྣམས་ལ་སྨྲས་པ་ཤེས་ལྡན་དག་རྒྱལ་པོ་དེ་འདི་ལྟར་བླུན་པ་ལ་ལྟོས། འཆི་བདག་གིས་བུ་ཕྲོགས་པ་ཕྱིར་འཁྲུག་པར་ནུས་པ་འགའ་ཡང་ཡོད་རེ་སྐན།
དེ་ནི་མཇལ་གྱིས་དེ་ལ་ཕྲིན་ཡིག་འདི་སྐད་ཅེས་ཁོ་བོའི་རི་བྲགས་པ་ཞིག་ལོག་པ་མ་ཕེབས་ཀྱིས་ཇེ་ཁོ་བོའི་གྲོགས་གྱིས་ཤིག་དང་། ཁོ་བོས་ཀྱང་ཕྱིས་ཁྱོད་ཀྱི་གྲོགས་བྱའོ་ཞེས་བྲིས་ཏེ་སྐུར་ཅིག །བློན་པོ་རྣམས་ཀྱིས་དེ་ལ་ཕྲིན་ཡིག་དེ་སྐད་ཅེས་བྲིས་ཏེ་བསྐུར་བ་དང་། དེས་ཕྲིན་ཡིག་བཀླགས་ནས་བཀླགས་མ་ཐག་ཏུ་རི་བྲགས་དེར་འོངས་ནས་དེ་ཧ་ཅང་ཐག་མི་རིང་བ་ཞིག་ན་འདུག་པ་དང་། རི་བྲགས་པ་དག་གིས་ཐོས་ནས་བསམས་པ། བདག་ཅག་རྒྱལ་པོ་དག་གིས་ཕྱོགས་བཅུ་དག་ནས་བསྐོར་བར་ཆད་དེ། རྒྱལ་པོ་གཉིས་པ་འདི་ཡང་ཉེ་བར་འོངས་ཀྱིས་ཡུལ་ནི་རྣམ་པ་ཐམས་ཅད་དུ་ཕྱིར་འཐོབ་པར་ཡང་རུང་གི། སྲོག་ནི་ཕྱིར་འཐོབ་པར་མི་རུང་གིས་ཕྱིར་འབྱུང་ངོ་སྙམ་ནས། དེ་དག་རལ་གྲི་མགུལ་ནས་ཕོག་སྟེ་ཕྱིར་བྱུང་ནས། རྒྱལ་པོ་ཤར་པའི་རྐང་པ་གཉིས་ལ་གཏུགས་པ་དང་། རྒྱལ་པོ་ཤར་པས་དེ་དག་ལོ་ཐང་དང་། དཔྱ་འཇལ་དུ་བཅུག་གོ །དེ་ནས་མི་སྙན་སྨྲ་རྒྱལ་པོའི་ཡོ་ལང་གིས་རྒྱལ་པོ་ཤར་པའི་གན་དུ་སོང་སྟེ་སྨྲས་པ། ལྷ་བདག་གི་བུ་འཆི་བདག་གིས་ཕྲོགས་ཏེ་ལྷས་བདག་གི་གྲོགས་གྱིས་ཤིག་དང་། བདག་དེ་དང་ལྷན་ཅིག་གཡུལ་སྤྲོད་པར་བྱེད་དོ། །གལ་ཏེ་རེ་ཞིག་གཡུལ་སྤྲད་པས་དེ་ཕམ་པར་ནུས་ན་དེ་ལྟ་ན་ལེགས། གལ་ཏེ་མ་ནུས་ན་དེ་ལ་གླང་པོ་ཆེ་ལྔ་བརྒྱ་དང་། བལ་གླང་མོ་ལྔ་བརྒྱ་དང་། རྟ་ལྔ་བརྒྱ་དང་། རྒོད་མ་ལྔ་བརྒྱ་དང་། གཞོན་ནུ་ལྔ་བརྒྱ་དང་། གཞོན་ནུ་མ་ལྔ་བརྒྱ་དང་། གསེར་འབུམ་ཕུལ་ཏེ་བླང་བར་བྱའོ། །རྒྱལ་པོ་ཤར་པས་སྨྲས་པ། ཤེད་མཐུན་ཁྱོད་གླེན་པ་ཞིག་སྟེ། འཆི་བདག་ལས་ཕྱིར་ལེན་པར་ནུས་པ་འགའ་ཡང་ཡོད་རེ་སྐན། དེས་སྨྲས་པ། ལྷ་མི་ནུས་སམ། མི་ནུས་སོ། །གལ་ཏེ་དེ་ལྟ་ན་རི་མོ་འདི་ལྟོས་ཤིག །དེས་རི་མོ་བརྐྱང་སྟེ། རྒྱལ་པོས་རི་མོ་བརྟགས་ནས་གནད་དུ་བསྣུན་པ་དང་འདྲ་བར་གདུང་བཞིན་དུ་སྨྲས་པ། ཀྱེ་ཇི་སྐད་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་མེས་ཚིག་ཅེས་ཟེར་རམ། དེས་ཅོད་པན་དང་། ཐོར་ཚུགས་ཕོག་སྟེ་ཚིགས་སུ་བཅད་པ་སྨྲས་པ། བདག་ནི་རྒྱལ་པོ་མ་ལགས་རྒྱལ་སྲིད་མིན། །
ལྷ་ཁྱོད་ཞབས་འབྲིང་ཞབས་ཀྱིས་འཚོ་བ་སྟེ། །མི་སྙན་དོན་འདི་ཁྱོད་ལ་གསོལ་སླད་དུ། །བདག་འདིར་ཁྱོད་ཀྱི་ཞབས་ཀྱི་དྲུང་དུ་མཆིས། །རྒྱལ་པོ་ཤིན་ཏུ་བརྟགས་ནས་འདི་ནི་གྲོང་ཁྱེར་ཀཽ་ཤཱམྦཱིའོ། །འདི་ནི་རྒྱལ་པོའི་ཕོ་བྲང་ངོ་། །འདི་ནི་ཁང་བཟངས་མེ་ཏོག་གི་སོའོ། །འདི་ནི་མ་དུའོ། །འདི་ནི་གྲོ་བ་ལ་སོགས་པའི་སྦྱོར་བས་སྲེག་པའོ། །འདི་དག་ནི་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་ཕྱེ་མ་ལེབ་བཞིན་དུ་གྱེན་དུ་མཆོང་ཞིང་མཆོང་ཞིང་མེར་ལྷུང་བ་དག་གོ་ཞེས་རྣམ་པར་དཔྱོད་པར་བྱེད་དོ། །རྣམ་པར་དཔྱད་ནས་སྨྲས་པ། ཀྭའི་ནང་རྗེ་ཇི་སྐད་སྔོ་བསངས་ཅན་ལ་སོགས་པ་བུད་མེད་ལྔ་བརྒྱ་མེས་ཚིག་ཅེས་ཟེར་རམ། ལྷ་བདག་དེ་སྐད་མི་མཆིའོ། །འདི་ལྟར་ལྷ་ཉིད་དེ་སྐད་གསུང་ངོ་། །ཀྭའི་ནང་རྗེ་ཁྱོད་ཀྱིས་ང་ལ་ཐབས་ཀྱིས་གསོལ་བར་ཟད་ཀྱི་གཞན་དུ་ན་ངས་ཁྱོད་ཀྱི་མགོ་དྲུངས་ནས་བཅད་དེ། ས་ལ་བསྒྱེལ་བར་འགྱུར་རོ་ཞེས་སྨྲས་ནས། རྒྱལ་པོ་བརྒྱལ་ཏེ་ས་ལ་སྒྱེལ་ཏོ། །དེ་ནས་ཆུས་གདབ་པས་དབུགས་ཕྱིར་བྱུང་ནས་སྨྲས་པ། ཤེས་ལྡན་དག་དཔུང་གི་ཚོགས་ཡན་ལག་བཞི་པ་གོ་སྐོན་ཅིག །ཀཽ་ཤཱམྦཱིར་འདོང་ངོ་། །བློན་པོ་རྣམས་ཀྱིས་དཔུང་གི་ཚོགས་ཡན་ལག་བཞི་པོ་གོ་བསྐོན་ནས་རྒྱལ་པོ་ཀཽ་ཤཱམྦཱིར་འཕགས་ཏེ་མཐར་གྱིས་ཀཽ་ཤཱམྦཱིར་ཕྱིན་པ་དང་། དེས་ཕོ་བྲང་འཁོར་གྱི་མི་རྣམས་ཀྱི་ནང་ན་ཆེས་རྒྱུས་མཁས་པ་ཐམས་ཅད་སྨྲས་སོ། །དེ་ནས་བློན་པོའི་མཆོག་སྦྱོར་བ་འཛིན་ལ་བསྒོ་བ། སྦྱོར་བ་འཛིན་སོང་ལ་མ་དུ་རྒྱ་སྐྱེགས་ཀྱི་ཁང་པར་ཆུག་ལ་སྲེགས་ཤིག །དཔེ་མེད་མ་ཡང་རྟེའུ་མ་དུལ་བའི་རྐང་པ་ལ་ཐོགས་ལ་འོར་ཅིག །སྦྱོར་བ་འཛིན་གྱིས་མ་དུ་རྒྱ་སྐྱེགས་ཀྱི་ཁང་པར་བཅུག་སྟེ་བསྲེགས་སོ། །དེ་ནས་བསམས་པ། དཔེ་མེད་མ་ནི་གལ་ཏེ་རྒྱལ་པོས་བསམས་ནས་དཔེ་མེད་མ་འོན་ཅིག་ཅེས་ཟེར་ན་བདག་གིས་ཇི་ལྟར་བྱས། རེ་ཞིག་སྡོད་ཅིག་སྙམ་ནས་དེས་དཔེ་མེད་མ་ས་ཁང་དུ་བཅུག་སྟེ་བཞག་གོ །རྒྱལ་པོ་ཉི་མ་བདུན་པ་ལ་མྱ་ངན་སངས་ནས་དེ་མྱ་ངན་སངས་པས་སྨྲས་པ། སྦྱོར་བ་འཛིན་དཔེ་མེད་མ་ག་རེ། དེས་ལྷ་བདག་གིས་རྟེའུ་མ་ཐུལ་བའི་རྐང་པ་ལ་བཏགས་ཏེ་
བོར་རོ། །རྒྱལ་པོས་སྨྲས་པ། མ་ཉེས་སོ། །མ་དུས་ནི་སྔོ་བསངས་ཅན་བསད་ལ། ཁྱོད་ཀྱིས་ཀྱང་དཔེ་མེད་མ་བསད་ཀྱིས་ད་ང་རབ་ཏུ་འབྱུང་བར་བྱའོ། །སྦྱོར་བ་འཛིན་གྱིས་སྨྲས་པ། ལྷ་དེ་ཉིད་ཀྱི་སླད་དུ་བདག་གིས་དཔེ་མེད་མ་ས་ཁང་དུ་སྩལ་ཏེ་བཞག་གོ །གལ་ཏེ་གསོན་ན་བལྟའོ། །དེས་དེ་ས་ཁང་ནས་ཕྱུང་བ་དང་། གནས་སྐབས་དེ་ཁོ་ན་བཞིན་དུ་ཉོན་མོངས་པ་ཅན་མ་ཡིན་པ་དང་། ལུས་མ་རྙིས་པར་འདུག་གོ །རྒྱལ་པོས་མཐོང་ནས་བསམས་པ། ཇི་ལྟར་འདི་གནས་སྐབས་དེ་ཁོ་ན་བཞིན་དུ་ཉོན་མོངས་ཅན་མ་ཡིན་པ་དང་། ལུས་མ་རྙིས་པར་འདུག་ལ། ན་ཡང་མིན། ཟས་ཀྱང་མི་ཟ་བ་ལས་ན་གོར་མ་ཆག་པར་སྐྱེས་པ་གཞན་དང་ལྷན་ཅིག་དགའ་མགུར་སྤྱད་དོ་སྙམ་དུ་རིག་ནས་སྨྲས་པ། དཔེ་མེད་མ་ཁྱོད་ཀྱིས་འཁྲུལ་པ་བྱས་སོ། །དེས་སྨྲས་པ། ལྷ་སྡིག་པ་ཅི་ཞིག །བདག་དེ་ལྟར་མི་བགྱིད་དོ། །ཅི་མངོན། ལྷ་ཁྱོད་བཅོམ་ལྡན་འདས་ལ་མངོན་པར་དད་དམ། རྒྱལ་པོས་སྨྲས་པ། དེ་ནི་མཇལ་ཏེ། ཁྱོད་དེའི་ཚེ་ན་ནི་དགེ་སྦྱོང་གཽ་ཏ་མ་ཞེས་ཟེར་ལ། ད་ནི་བཅོམ་ལྡན་འདས་ཞེས་ཟེར་མོད། འདི་ལྟར་ང་རོ་དང་འདྲ་བ་ཁྱོད་ཀྱི་ཕྱིར་བཅོམ་ལྡན་འདས་ལ་མི་ཞུའི། སྔོ་བསངས་ཅན་གྱི་དོན་དུ་བཅོམ་ལྡན་འདས་ལ་ཞུའོ་ཞེས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་བད་སའི་རྒྱལ་པོ་ཤར་པས་འདི་སྐད་ཅེས་གསོལ་ཏོ། །བཙུན་པ་སྔོ་བསངས་ཅན་ལ་སོགས་པ་བུད་མེད་ལྔ་བརྒྱས་ལས་ཅི་བགྱིས་ན། དེས་ཞུགས་ཀྱིས་དྲལ་ཅིང་། སྒུར་མཆོག་ནི་ཆབ་ཀྱི་སྟོར་ཁུང་ནས་བྲོས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་དག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་དག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། རྒྱལ་
པོ་ཆེན་པོ་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །རྒྱལ་པོ་ཆེན་པོ་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ་རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་། ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་། མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་། བཀྲེན་པ་ལ་རྗེས་སུ་སྙིང་བརྩེ་བ་དང་། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རང་སངས་རྒྱས་ཞིག་ལྗོངས་རྒྱུ་ཞིང་འགྲོ་བ་ན་བཱ་རཱ་ཎ་སཱིར་ཕྱིན་ནས་དེ་སྐྱེད་མོས་ཚལ་ཞིག་ན་སྤྱིལ་བུ་ན་གནས་སོ། །རྒྱལ་པོ་ཚངས་བྱིན་གྱི་བཙུན་མོའི་འཁོར་ལྔ་བརྒྱ་སྐྱེད་མོས་ཚལ་དེར་བྱུང་ནས། བཙུན་མོའི་འཁོར་དེ་དག་རྩེད་མོའི་རྫིང་དུ་ཁྲུས་བྱས་ནས་གྲང་བས་སྦྲེབས་ནས། དེ་ན་བཙུན་མོ་དམ་པས་བུ་མོ་མངག་གཞུག་མ་ལ་སྨྲས་པ། བུ་མོ་ཤིན་ཏུ་གྲང་བས་སྦྲེབས་ཀྱིས་སོང་ལ། སྤྱིལ་བུ་འདི་ལ་མེ་ཐོང་ཤིག། དེས་སྒྲོན་མེ་སྦར་ཏེ་སོང་བ་དང་། རང་སངས་རྒྱས་དེ་མཐོང་ནས་དེས་བཙུན་མོའི་མཆོག་ལ་སྨྲས་པ། ལྷ་མོ་འདི་ན་རབ་ཏུ་བྱུང་བ་ཞིག་མཆིས་སོ། །དེས་སྨྲས་པ་རབ་ཏུ་བྱུང་བ་འདུག་ཀྱང་རུང་། གཞན་འདུག་ཀྱང་རུང་གིས་མེ་ཐོང་ཤིག །དེས་མ་བཏང་བར་བྲོས་པ་དང་། དེ་ནས་
བཙུན་མོའི་མཆོག་དེ་འཁྲུགས་ནས་དེ་རང་གིས་མེ་བཏང་བ་དང་། རང་སངས་རྒྱས་དེ་ཕྱིར་བྱུང་ངོ་། །བཙུན་མོའི་འཁོར་གཞན་དག་གིས་ཀྱང་ལྷ་མོ་ཁྱོད་ཀྱིས་ཞུགས་བཏང་བ་ལེགས་པ་བགྱིས་ཏེ་བདག་ཅག་ཐམས་ཅད་ཞུགས་འདེའོ་ཞེས་རྗེས་སུ་ཡི་རངས་པ་བྱས་སོ། །རང་སངས་རྒྱས་བདག་ཉིད་ཆེན་པོ་དེས་བསམས་པ། བཙུན་མོའི་འཁོར་ཉོན་མོངས་པ་འདི་དག་ཧ་ཅང་སྨས་པ་དང་། ཉམས་པར་གྱུར་ན་མི་རུང་གིས་འདི་དག་ལ་ལག་ནས་དྲང་བ་སྦྱིན་ནོ་སྙམ་ནས། དེས་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབ་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་བཙུན་མོའི་འཁོར་དེ་དག་ཤིང་ལྗོན་པ་རྩ་བ་ནས་བཅད་པ་བཞིན་དུ་རང་སངས་རྒྱས་དེའི་རྐང་པའི་དྲུང་དུ་འགྱེལ་ནས་སྨྲས་པ། ཡོན་གནས་ཡང་དག་པར་གྱུར་པ་མར་གཤེགས་སུ་གསོལ། མར་གཤེགས་སུ་གསོལ། ཉོན་མོངས་པའི་འདམ་དུ་བྱིང་བ་བདག་ཅག་གི་སུག་པ་ནས་དྲང་བ་སྩལ་དུ་གསོལ། རང་སངས་རྒྱས་དེ་བཙུན་མོའི་འཁོར་དེ་དག་ལ་རྗེས་སུ་སྙིང་བརྩེ་བའི་ཕྱིར་སྟེང་གི་ནམ་མཁའ་ལས་ཤོད་དུ་བབས་སོ། །དེ་དག་གིས་དེ་ལ་མཆོད་པ་བྱས་ནས་རྐང་པ་གཉིས་ལ་ཕྱག་འཚལ་ཏེ་སྨོན་ལམ་འདི་སྐད་ཅེས་བདག་ཅག་ཡོན་གནས་ཡང་དག་པར་གྱུར་པ་འདི་ལྟ་བུ་ལ་གནོད་པར་བྱས་པ་གང་ཡིན་པའི་ལས་དེའི་ཆ་དང་མཐུན་པར་མ་གྱུར་པར་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་ཅག་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་། ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་ཐོབ་པར་གྱུར་ཅིག་ཅེས་བཏབ་བོ། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་ཚངས་བྱིན་གྱི་བཙུན་མོ་དམ་པ་གང་ཡིན་པ་དེ་ནི་སྔོ་བསངས་ཅན་འདི་ཡིན་ནོ། །དེའི་ཚེ་དེའི་དུས་ན་བུད་མེད་གཞན་བཞི་བརྒྱ་དགུ་བཅུ་རྩ་དགུ་པོ་གང་དག་ཡིན་པ་དེ་དག་ནི་བུད་མེད་བཞི་བརྒྱ་དགུ་བཅུ་རྩ་དགུ་པོ་འདི་དག་ཡིན་ནོ། །དེའི་ཚེ་
དེའི་དུས་ན་བུ་མོ་མངག་གཞུག་མ་གང་ཡིན་པ་དེ་ནི་སྒུར་མཆོག་འདི་ཡིན་ནོ། །དེ་དག་གིས་རང་སངས་རྒྱས་ཀྱི་སྤྱིལ་བུ་བསྲེགས་ཤིང་རྗེས་སུ་ཡི་རངས་པ་བྱས་པ་གང་ཡིན་པའི་ལས་དེའི་རྣམ་པར་སྨིན་པས་ལོ་མང་པོ་དག་ཏུ་སེམས་ཅན་དམྱལ་བ་ཆེན་པོ་རྣམས་སུ་བསྲེགས་ནས་ད་ལྟར་བདེན་པ་མཐོང་གི་བར་དུ་ཡང་མེས་ཚིག་པར་གྱུར་ཏོ། །སྒུར་མཆོག་མེ་གཏོང་དུ་མ་བཏུབས་པས་ནི་ད་ལྟར་ཆུའི་སྟོར་ཁུང་ནས་བྲོས་པར་གྱུར་ཏོ། །དེ་དག་གིས་རང་སངས་རྒྱས་ལ་མཆོད་པ་བྱས་ནས་སྨོན་ལམ་བཏབ་པ་གང་ཡིན་པ་དེས་ནི་ད་ལྟར་ངའི་དྲུང་དུ་བདེན་པ་མཐོང་བར་བྱས་ཤིང་། དེ་དག་གིས་རང་སངས་རྒྱས་བྱེ་བ་ཕྲག་འབུམ་པས་ཆེས་ཁྱད་པར་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །རྒྱལ་པོ་ཆེན་པོ་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །རྒྱལ་པོ་ཆེན་པོ་དེ་ལྟ་བས་ན་ལས་གཅིག་ཏུ་གནག་པ་རྣམས་དང་། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། རྒྱལ་པོ་ཆེན་པོ་ཁྱོད་ཀྱིས་དེ་ལྟར་བསླབ་པར་བྱའོ། །དེ་ནས་བད་སའི་རྒྱལ་པོ་ཤར་པས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རངས་པ་བྱས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་བརྒྱད་པ། དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར་མཆོག་གིས་ལས་ཅི་བགྱིས་ན་དེས་ན་སྒུར་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་
ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། དེ་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་གྲོང་ཁྱེར་བཱ་རཱ་ཎ་སཱི་ན་རྒྱལ་པོ་ཚངས་བྱིན་ཞེས་བྱ་བས་རྒྱལ་སྲིད་འབྱོར་པ། རྒྱས་པ། བདེ་བ་ལོ་ལེགས་པ། སྐྱེ་བོ་དང་མི་མང་པོས་གང་བ། ཐབ་མོ་དང་། འཐབ་པ་དང་། ཕྱི་དགྲ་དང་། ནང་འཁྲུག་རབ་ཏུ་ཞི་བ། ཆོམ་རྐུན་དང་། མུ་གེ་དང་ནད་དང་བྲལ་བ། སཱ་ལུ་དང་། བུ་རམ་ཤིང་གི་ཕྲེང་བ་དང་། བ་ལང་དང་མ་ཧེ་ཕུན་སུམ་ཚོགས་པ་བྱེད་དུ་བཅུག་སྟེ། ཆོས་དང་ལྡན་པ་ཆོས་ཀྱི་རྒྱལ་པོས་ཆོས་ཀྱི་རྒྱལ་སྲིད་བྱེད་དུ་བཅུག་གོ །ཇི་ཙམ་དུས་གཞན་ཞིག་ན་ལྟས་པ་དག་གིས་ལོ་བཅུ་གཉིས་སུ་ཆར་མི་འབབ་པར་ལུང་བསྟན་ནས། རྒྱལ་པོ་ཚངས་བྱིན་གྱིས་བཱ་རཱ་ཎ་སཱིར་དྲིལ་བསྒྲག་པ་བྱེད་དུ་བཅུག་སྟེ། འདི་སྐད་ཅེས་གང་ལ་ལོ་བཅུ་གཉིས་ཀྱི་ཟན་ཡོད་པ་དེས་ནི་གནས་པར་བྱའོ། །གང་ལ་མེད་པ་དེས་ནི་གཞན་དུ་འགྲོ་བར་བྱ་ཞིང་ལོ་བཅུ་གཉིས་འདས་ནས་ཕྱིར་ཡང་འོང་བར་བྱའོ་ཞེས་བསྒོའོ། །དེའི་ཚེ་བཱ་རཱ་ཎ་སཱི་ན་ཁྱིམ་བདག་གཟུངས་བྱེད་ཅེས་བྱ་བ་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་མཛོད་པ་བོས་ཏེ་སྨྲས་པ། ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པའི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་
ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ་བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རང་སངས་རྒྱས་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ། ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང་། རབ་ཏུ་བྱུང་བ་ལྔ་བརྒྱ་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །ཁྱིམ་བདག་གཟུངས་བྱེད་ཀྱིས་རང་སངས་རྒྱས་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་དེ་ཉིད་དུ་འཁོད་དོ། །ཇི་ཙམ་ན་རང་སངས་རྒྱས་གཞན་ལྔ་བརྒྱ་ལྗོངས་རྒྱུ་ཞིང་འདོང་བ་ན་བཱ་རཱ་ཎ་སཱིར་ཕྱིན་ནས་དེ་དག་ཀྱང་ཁྱིམ་བདག་གཟུངས་བྱེད་ཀྱི་གན་དུ་དོང་སྟེ་ཕྱིན་ནས་སྨྲས་པ། ཁྱིམ་བདག་ཁྱོད་ཀྱིས་ཁོ་བོ་ཅག་རབ་ཏུ་བྱུང་བ་ལྔ་བརྒྱ་ལ་ལོ་བཅུ་གཉིས་སུ་མཁོ་བ་སྟོབས་པར་ནུས་སམ། དེས་སྨྲས་པ། འཕགས་པ་དག་ཁྱེད་ཅག་ལ་གསོལ་ལགས་ན་ཅིའི་སླད་དུ་ཡང་སྒྲུབ་པར་མཛད། ཁྱིམ་བདག་དེ་དག་ཀྱང་གཞན་ལ་ཁོ་བོ་ཅག་ཀྱང་གཞན་ནོ། །འཕགས་པ་དག་ཇེ་མཛོད་པ་ལ་རྨས་ཏེ་སླད་ཀྱིས་གསོལ་ལོ་ཞེས་དེས་མཛོད་པ་བོས་ཏེ་སྨྲས་པ། ཀྭའི་ནང་རྗེ་མཛོད་པ་ཁོ་བོ་འཁོར་དང་བཅས་པ་དང་། རབ་ཏུ་བྱུང་བ་སྟོང་པོ་འདི་དག་གི་ལོ་བཅུ་གཉིས་ཀྱི་ཟན་ཡོད་དམ། དེས་སྨྲས་པ། ཇོ་བོ་མཆིས་སོ། །དེས་རབ་ཏུ་བྱུང་བ་གཞན་ལྔ་བརྒྱ་པོ་དེ་དག་ལ་སྨྲས་པ། འཕགས་པ་དག་མཆིས་ཀྱིས་བཞུགས་ཤིག་དང་གསོལ་ལོ། །དེ་དག་ཀྱང་དེར་འཁོད་དོ། །དེས་སྦྱིན་པའི་ཁང་པ་རྩིག་ཏུ་བཅུག་སྟེ། དེས་སྦྱིན་པའི་ཞལ་ཏ་པའི་མི་དང་སྤྱན་འདྲེན་ཡང་བསྐོས་སོ། །དེར་ཉི་མ་རེ་རེ་ཞིང་རང་སངས་རྒྱས་སྟོང་སྟོང་ཟན་ཟའོ། །དེ་ན་རང་སངས་རྒྱས་གཅིག་ན་བར་གྱུར་ནས་དེ་དེའི་ཉིན་མོ་མ་འོངས་པ་དང་། ཁྱིམ་བདག་
གཟུངས་བྱེད་ལ་བུ་མོས་སྨྲས་པ། ཡབ་དེང་རབ་ཏུ་བྱུང་བ་གཅིག་མ་མཆིས་སོ། །དེས་སྨྲས་པ། བུ་མོ་ཇི་ལྟ་བུ་ཞིག །དེས་རྒྱབ་བཏུད་དེ་སྨྲས་པ། ཡབ་འདི་ལྟ་བུ་ཞིག་གོ །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གཟུངས་བྱེད་ཀྱི་བུ་མོ་གང་ཡིན་པ་དེ་ནི་སྒུར་མཆོག་འདི་ཡིན་ཏེ། འདིས་རང་སངས་རྒྱས་ལ་ཐོ་བཙམས་པ་གང་ཡིན་པའི་ལས་དེའི་རྣམ་པར་སྨིན་པས་སྒུར་པོར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར་མཆོག་གིས་ལས་ཅི་བགྱིས་ན་དེས་ན་ཐོས་པ་འཛིན་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་ཁྱིམ་བདག་གཟུངས་བྱེད་ཀྱི་སྦྱིན་གནས་རང་སངས་རྒྱས་སྟོང་པོ་དེ་དག་ཉིད་ཀྱི་དགེ་འདུན་གྱི་གནས་བརྟན་གང་ཡིན་པ་དེ་རླུང་ནད་ཅན་ཡིན་པས་དེ་ལག་པ་འདར་བས་ཟན་ཟ་བ་ན་ལྷུང་བཟེད་འགུལ་ནས་གཟུངས་བྱེད་ཀྱི་བུ་མོ་དེས་རང་གི་ལག་པ་ལས་གདུ་བུ་རྒྱན་ཅན་ཕུད་དེ་རང་སངས་རྒྱས་དེ་ལ་ཕུལ་ཏེ་སྨྲས་པ། འཕགས་པ་འདིའི་སྟེང་དུ་ལྷུང་བཟེད་བཞག་ཏུ་གསོལ། དེས་དེའི་སྟེང་དུ་ལྷུང་བཟེད་བཞག་པ་དང་། མི་གཡོ་བ་ཉིད་དུ་འདུག་ནས། དེས་དེའི་
རྐང་པ་གཉིས་ལ་གཏུགས་ཏེ་སྨོན་ལམ་བཏབ་པ་ཇི་ལྟར་ལྷུང་བཟེད་འདི་མི་གཡོ་བར་འདུག་པ་དེ་བཞིན་དུ་བདག་གི་རྒྱུད་ལ་ཆོས་གང་དག་ཞུགས་པ་དེ་དག་ཀྱང་མི་གཡོ་བ་ཉིད་དུ་གྱུར་ཅིག་ཅེས་བཏབ་བོ། །ལས་དེའི་རྣམ་པར་སྨིན་པས་འདི་ད་ལྟར་ཐོས་པ་འཛིན་པར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་སྒུར་མཆོག་གིས་ལས་ཅི་བགྱིས་ན་དེས་བྲན་མོར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་སྒུར་མཆོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་དེ་ཉིད་ན་འདི་དབང་ཕྱུག་གི་དྲེགས་པས་རྒྱགས་པས་འཁོར་གྱི་མི་རྣམས་ལ་བྲན་གྱི་ཚིག་གིས་ཀུན་དུ་སྤྱད་པས་ལས་དེའི་རྣམ་པར་སྨིན་པས་ད་ལྟར་བྲན་མོར་གྱུར་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་དཔེ་མེད་མས་ལས་ཅི་བགྱིས་ན་དེས་གདུགས་བདུན་དུ་ཟན་མ་མཆིས་པར་ས་ཁང་དུ་སྩལ་ཅིང་ཉོན་མོངས་པ་ཅན་མ་ལགས་པ་དང་། ལུས་མ་རྙིས་པར་ཕྱུང་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དཔེ་མེད་མ་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་
བྱས་ཤིང་བསགས་པས་དེ་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི་འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་། སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་རྒྱལ་རིགས་ཀྱི་བུ་མོ་ཞིག་དང་། བྲམ་ཟེའི་བུ་མོ་ཕན་ཚུན་བཤེས་པ་གཉིས་ཤིག་འཁོད་དོ། །སངས་རྒྱས་རྣམས་འབྱུང་བ་མེད་པའི་ཚེ་རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་དུ་ན་རང་སངས་རྒྱས་ཤིག་ས་ཕྱོགས་ཞི་བ་ཞིག་ཏུ་མཚན་མོ་གནས་པར་ཁས་བླངས་ནས་ཕྱི་དེ་ཉིན་པར་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རི་བྲགས་དེར་བསོད་སྙོམས་ལ་ཞུགས་པ་དང་། རྒྱལ་རིགས་ཀྱི་བུ་མོ་དེས་དེའི་ཉིན་མོ་དེ་ལ་བསོད་སྙོམས་བྱིན་ཏོ། །དེ་བཞིན་དུ་ཉི་མ་གཉིས་པ་དང་། གསུམ་པ་དང་། ཉིན་གཅིག་མི་ཆད་པར་ཡང་དེ་ལ་བསོད་སྙོམས་སྦྱིན་པར་བརྩམས་སོ། །རྒྱལ་རིགས་ཀྱི་བུ་མོ་དེ་དུས་གཞན་ཞིག་ན་བྲམ་ཟེའི་བུ་མོ་དེས་མགྲོན་དུ་བོས་ནས་དེའི་ཁྱིམ་དུ་སོང་བ་དང་། རང་སངས་རྒྱས་དེ་ཡང་བསོད་སྙོམས་ལ་རྒྱུ་ཞིང་རྒྱལ་རིགས་ཀྱི་བུ་མོ་དེའི་ཁྱིམ་དུ་ཞུགས་པ་ན་དེ་མེད་ནས། མཐར་གྱིས་བྲམ་ཟེའི་བུ་མོ་དེའི་ཁྱིམ་དུ་ཞུགས་པ་དང། རྒྱལ་རིགས་ཀྱི་བུ་མོ་དེས་མཐོང་ནས་དེས་བྲམ་ཟེའི་བུ་མོ་དེ་ལ་སྨྲས་པ། བུ་མོ་འཕགས་པ་འདི་ལ་བསོད་སྙོམས་ཕུལ་ཅིག །དེས་སྨྲས་པ། ཇི་སྲིད་དུ་ལྷ་དང་། བྲམ་ཟེ་དང་། སྙིང་དུ་སྡུག་ཅིང་འབྲེལ་བའི་རྩ་
ལག་དག་ལ་མ་ཕུལ་གྱི་བར་དུ་དགེ་སྦྱོང་མགོ་རེག་འདི་ལ་ག་ལ་སྦྱིན། དེས་སྨྲས་པ། ནུ་མོ་གལ་ཏེ་དེ་ལྟ་ན་ཁོ་མོ་རེ་ཞིག་འདི་ལ་བསོད་སྙོམས་འབུལ་དུ་འགྲོས་ཕུལ་ནས་ཕྱིར་འོང་ངོ་། །དེས་སྨྲས་པ། ཆེ་ཞེ་གལ་ཏེ་དེ་ལྟ་ན་འདུག་ཅིག་དང་། བདག་གིས་འདི་ལ་བསོད་སྙོམས་དབུལ་ལོ། །དེས་དེ་ལ་བསོད་སྙོམས་ཕུལ་ནས་སྨོན་ལམ་ལོག་པ་བཏབ་སྟེ། བདག་གིས་དགེ་སྦྱོང་མགོ་རེག་འདི་ལ་བསོད་སྙོམས་ཕུལ་བ་གང་ཡིན་པ་འདི་དག་ལ་འཇིག་རྟེན་འདིར་ཡང་རྣམ་པར་སྨིན་པར་མ་གྱུར་ལ། འཇིག་རྟེན་ཕ་རོལ་དུ་ཡང་རྣམ་པར་སྨིན་པར་མ་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་བྲམ་ཟེའི་བུ་མོ་གང་ཡིན་པ་དེ་ནི་དཔེ་མེད་མ་འདི་ཡིན་ཏེ། འདིས་རང་སངས་རྒྱས་ལ་བསོད་སྙོམས་ཕུལ་ནས་སྨོན་ལམ་ལོག་པ་འདི་སྐད་ཅེས་བདག་གིས་དགེ་སྦྱོང་མགོ་རེག་འདི་ལ་བསོད་སྙོམས་ཕུལ་བ་གང་ཡིན་པ་འདི་འཇིག་རྟེན་འདིར་ཡང་རྣམ་པར་སྨིན་པར་མ་གྱུར་ལ། འཇིག་རྟེན་ཕ་རོལ་དུ་ཡང་རྣམ་པར་སྨིན་པར་མ་གྱུར་ཅིག་ཅེས་བཏབ་པ་གང་ཡིན་པའི་ལས་དེའི་རྣམ་པར་སྨིན་པས་འདི་ཉི་མ་བདུན་དུ་ཟན་མེད་པར་ས་ཁང་དུ་བཅུག་ཅིང་ཉོན་མོངས་པ་ཅན་མ་ཡིན་པ་དང་ལུས་མ་རྙིས་པར་ཕྱུང་ངོ་། །དུས་གཞན་ཞིག་ན་མགུ་བྱེད་རྒས་པར་གྱུར་ནས་དེས་འཆི་བའི་དུས་ཀྱི་ཚེ་སྨོན་ལམ་བཏབ་པ། བདག་གིས་དགེ་སློང་གི་དགེ་འདུན་ལ་ཇི་སྲིད་འཚོའི་བར་དུ་བསྙེན་བཀུར་བྱས་པའི་དགེ་བའི་རྩ་བ་གང་ཡིན་པ་འདིས་བདག་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེ་ཞིང་སྔོ་བསངས་ཅན་གྱི་ཆུ་ཞེང་ཅི་འདྲ་བ་དེ་ལྟ་བུར་བདག་ཀྱང་གྱུར་ཏེ། བད་སའི་རྒྱལ་པོ་ཤར་པ་བདག་གི་ཁྱིམ་ཐབ་ཏུ་གྱུར་ཅིག་ཅེས་བཏབ་བོ། །དེ་ཤི་ཞིང་དུས་ལ་བབ་ནས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་སོ། །གང་གི་ཉིན་མོ་སྐྱེས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས་སྣང་བར་གྱུར་ཏོ། །དེ་ཟླ་བ་བརྒྱད་དམ། དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། བལྟ་ན་སྡུག་པ་མཛེས་པ་ཞིག་བྱུང་ངོ་། །བྱུང་མ་ཐག་ཏུ་ཡང་དེས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་ཏོ། །དེའི་ཉེ་དུ་དག་འདུས་ཤིང་ལྷགས་ནས་ཉི་མ་བདུན་གསུམ་ཉི་ཤུ་
གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་མིང་འདོགས་པར་བྱེད་དོ། །ཉེ་དུ་རྣམས་ཀྱིས་སྨྲས་པ། གང་གི་ཕྱིར་བུ་མོ་འདི་གང་གི་ཉིན་མོ་མའི་མངལ་དུ་ཞུགས་པ་དེ་ཉིད་ཀྱི་ཉིན་མོ་ཁྱིམ་དེ་དཔལ་དག་གིས་སྣང་བར་གྱུར་ལ། བཙས་པ་ན་ཡང་འདིས་ཕའི་ཁྱིམ་རྒྱ་ཆེར་དཔལ་དག་གིས་སྣང་བར་གྱུར་པ་དེའི་ཕྱིར་བུ་མོ་འདིའི་མིང་དཔལ་ལྡན་དུ་གདགས་སོ་ཞེས་དེའི་མིང་དཔལ་ལྡན་ཞེས་བྱ་བར་བཏགས་སོ། །གང་གི་ཚེ་དེ་སྨྲ་ཤེས་པར་གྱུར་པ་དེའི་ཚེ་ན་དགེ་སློང་གང་དག་ཁྱིམ་དེར་བསོད་སྙོམས་ལ་ཞུགས་པ་དེ་དག་གི་གན་དུ་སོང་སྟེ། རྐང་པ་ལ་ཕྱག་འཚལ་ནས་སྙུན་གསོལ་བར་བྱེད་དོ། །ཇི་ཙམ་ན་ཚེ་དང་ལྡན་པ་ཀུན་དགའ་བོ་དེར་བསོད་སྙོམས་ལ་ཞུགས་པ་དང་། དེ་དེའི་གན་དུ་སོང་སྟེ་རྐང་པ་གཉིས་ལ་ཕྱག་འཚལ་ནས་སྨྲས་པ། བཙུན་པ་ཀུན་དགའ་བོ་ཇི་ལྟར་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་ཆེ་གེ་མོ་དག་གནོད་པ་ཆུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོའམ། སྟོབས་དང་ལྡན་ནམ། བདེའམ། ཁ་ན་མ་ཐོ་བ་མ་མཆིས་སམ། བདེ་བ་ལ་རེག་པར་གནས་སམ། དེས་སྨྲས་པ། སྲིང་མོ་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་ཆེ་གེ་མོ་དག་གནོད་པ་ཆུང་། ཉམ་ང་བ་ཉུང་། བསྐྱོད་པ་ཡང་། འཚོ་བ་སྟོབས་དང་ལྡན། བདེ། ཁ་ན་མ་ཐོ་བ་མེད། བདེ་བ་ལ་རེག་པར་གནས་སོ། །དེ་སྨྲས་པའི་ཚིག་ཐོས་ནས་ཁྱིམ་བདག་གདངས་ཅན་གྱི་ནང་མི་དག་མཆོག་ཏུ་ངོ་མཚར་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཨ་རོག་གྱ་ཞེས་བྱས་ཏེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་གསོལ་པ། བཅོམ་ལྡན་འདས་ཁྱིམ་བདག་གདངས་ཅན་གྱི་བུ་མོ་བྱིས་པ་ཞིག་བཅོམ་ལྡན་འདས་དང་། དགེ་སློང་གནས་བརྟན་གནས་བརྟན་དག་ལ་སྙུན་གསོལ་ཞིང་། ཁྱིམ་བདག་གདངས་ཅན་གྱི་ནང་མི་དག་གིས་དེ་ཐོས་ནས་མཆོག་ཏུ་ངོ་མཚར་སྐྱེས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་བུ་མོ་དེ་མི་ཤེས་
སམ། བཅོམ་ལྡན་འདས་མ་འཚལ་ཏོ། །ཀུན་དགའ་བོ་དེ་ནི་མགུ་བྱེད་ཡིན་ཏེ། སྨོན་ལམ་གྱི་དབང་གིས་ཁྱིམ་བདག་གདངས་ཅན་གྱི་ཆུང་མའི་མཆོག་གི་མངལ་དུ་སྐྱེས་ཏེ་ད་ལྟར་བུ་མོ་དཔལ་ལྡན་ཞེས་བྱའོ། །གང་གི་ཚེ་དཔལ་ལྡན་ཆེན་མོར་གྱུར་པ་དེའི་ཚེ་ན་དེ་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀཽ་དྱ་དག་དང་། ཤཱཀྱ་དག་དང་། ལིཙྪ་བཱི་དག་དང་། གཞན་ཡང་མང་པོ་དག་འོང་བར་བརྩམས་སོ། །ཁྱིམ་བདག་གདངས་ཅན་འདི་སྙམ་དུ་དཔལ་ལྡན་སློང་བ་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་རོ་སྙམ་ནས། དེ་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་འདུག་གོ །དཔལ་ལྡན་གྱིས་དེ་མཐོང་ནས་སྨྲས་པ། ཡབ་ཁྱོད་ཅིའི་སླད་དུ་ཕྱག་ལ་ཞལ་གཏད་དེ་སེམས་ཁོང་དུ་ཆུད་ཅིང་བཞུགས། དེས་སྨྲས་པ། བུ་མོ་ཁྱོད་སློང་བ་རྒྱལ་པོ་དག་དང་། ནོར་ཅན་དག་དང་། ཚོང་དཔོན་དག་དང་། དེད་དཔོན་དག་དང་། ཀཽ་དྱ་དག་དང་། ཤཱཀྱ་དག་དང་། ལིཙྪ་བཱི་དག་དང་། གཞན་ཡང་མང་པོ་དག་འོང་སྟེ། གང་དག་ལ་མ་བྱིན་པ་དེ་དག་བདག་གི་དགྲར་འགྱུར་ན། ཇི་ལྟར་ལག་པ་ལ་འགྲམ་པ་གཏད་དེ་སེམས་ཁོང་དུ་ཆུད་ཅིང་མི་འདུག་ཏུ་རུང་། དེས་སྨྲས་པ། ཡབ་ཐུགས་ངན་མ་མཛད་ཅིག །བདག་གིས་ཁྱིམ་ཐབ་འཚལ་ལགས་སོ། །བུ་མོ་གང་། ཡབ་བད་སའི་རྒྱལ་པོ་ཤར་པའོ། །བུ་མོ་གལ་ཏེ་དེ་ལྟ་ན་ཇེ་གོ་རིམས་བྱའོ། །ཡབ་གོ་རིམས་ཇི་ལྟ་བུ་ལགས། བུ་མོ་ཁོ་བོས་བད་སའི་རྒྱལ་པོ་ཤར་པ་འདི་ཉིད་དུ་སྤྱན་དྲང་གིས། གང་གི་ཚེ་དེས་བཤོས་གསོལ་བ་དེའི་ཚེ་ན་ཁྱོད་སྟེང་གི་ཁང་བཟངས་ཀྱི་གཞི་ན་འདུག་པས་ཕོ་ལོང་འཕང་བར་བྱའོ། །ཡབ་མ་ནོངས་ཀྱིས་དེ་བཞིན་བགྱིའོ། །དེས་བད་སའི་རྒྱལ་པོ་ཤར་པ་ཁྱིམ་གཞན་དུ་མགྲོན་དུ་བོས་ཏེ་ཟན་ཟོས་པ་དང་། དཔལ་ལྡན་སྟེང་གི་ཁང་བཟངས་ཀྱི་གཞི་ན་འདུག་པས་ཕོ་ལོང་འཕངས་སོ། །རྒྱལ་པོས་སྟེང་དུ་བརྟག་པར་བརྩམས་པ་དང་། རྒྱལ་པོས་དེ་མཐོང་ནས་སྨྲས་པ། གདངས་ཅན་ཁྱོད་ན་རེ་སྔོ་བསངས་ཅན་དུས་ལ་བབ་ཅེས་ཟེར་ན་འདི་ན་འདུག་པ་འདི་མ་ཡིན་
ནམ། ལྷ་འདི་ནི་སྔོ་བསངས་ཅན་མ་ལགས་སོ། །འོ་ན་འདི་ཅི་མིང་། ལྷ་འདི་ནི་སྔོ་བསངས་ཅན་གྱི་ནུ་མོ་དཔལ་ལྡན་ཞེས་བགྱིའོ། །ཅི་འགའ་ཞིག་ལ་བྱིན་ནམ། ལྷ་སུ་ལ་ཡང་མ་སྩལ་ཏོ། །གལ་ཏེ་དེ་ལྟ་ན་ང་ལ་ཅིའི་ཕྱིར་མི་སྦྱིན། ལྷ་གསོལ་ལོ། །ཁྱིམ་བདག་གདངས་ཅན་གྱིས་བྱིན་ནས་བད་སའི་རྒྱལ་པོ་ཤར་པས་དཔལ་གྱི་འབྱོར་པས་བག་མར་བླངས་ཏེ་བཙུན་མོའི་འཁོར་གྱི་ནང་དུ་བཅུག་གོ །དུས་གཞན་ཞིག་ན་དེས་རྒྱལ་པོ་ལ་སྨྲས་པ། ལྷ་བདག་དགེ་སློང་མཐོང་བར་འཚལ་ལོ། །རྒྱལ་པོས་སྨྲས་པ། ཁྱོད་འདོད་མོད་ཀྱི། དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ །ལྷ་དེ་ལྟ་ན་བདག་རྣམ་པ་ཐམས་ཅད་དུ་བཙོན་རར་སྩལ་དུ་བས་མོད། གལ་ཏེ་དགེ་སློང་མཐོང་བར་མི་གནང་ན། དེང་སླན་ཅད་འཚལ་མ་ཡང་མི་འཚལ། ཕྱག་ཀྱང་མི་འཚལ་ལོ། །དེས་ཟན་གཅད་པ་ལ་ཞུགས་པ་དང་། རྒྱལ་པོས་ཁྱིམ་བདག་གདངས་ཅན་ལ་སྨྲས་པ། ཁྱིམ་བདག་ཁྱོད་སོ་སོར་མི་རྟོག་གམ། ལྷ་ཅི་ལགས། དཔལ་ལྡན་ཟན་གཅད་པ་ལ་ཞུགས་སོ། །ལྷ་ཅིའི་སླད་དུ་དགེ་སློང་མཐོང་བར་འདོད་ན་དགེ་སློང་དག་རྒྱལ་པོའི་ཕོ་བྲང་དུ་མི་འཇུག་གོ །ལྷ་འོ་ན་འདི་ལ་ཇི་ལྟར་བསྒྲུབ་པར་བགྱི། ཁྱིམ་བདག་དེའི་ཕྱིར་ཁྱོད་ཀྱིས་བདག་ཉིད་ཀྱི་མིང་གིས་ར་བར་དགེ་སློང་གི་དགེ་འདུན་སྤྱན་དྲོངས་ཏེ། བར་དུ་སྒོ་ཐོད་ལ་བཤོས་གསོལ་ཅིག །ཁྱིམ་བདག་གདངས་ཅན་གྱི་ཁྱིམ་རྒྱལ་པོ་དང་འདབ་ཆགས་སུ་འདུག་པས་དེས་ར་བའི་བར་དུ་སྒོ་གཏོད་ནས་སའི་བྱི་དོར་བྱེད་དུ་བཅུག་གོ །དེ་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ཁྱིམ་བདག་གདངས་ཅན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་
གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་བདག་གི་སྡུམ་པར་གདུགས་ཚོད་གསོལ་བར་ཅི་གནང་། བཅོམ་ལྡན་འདས་ཀྱིས་ཁྱིམ་བདག་གདངས་ཅན་ལ་ཅང་མི་གསུང་བས་གནང་ངོ་། །དེ་ནས་ཁྱིམ་བདག་གདངས་ཅན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་ཁྱིམ་བདག་གདངས་ཅན་གྱིས་དེ་ཉིད་ཀྱི་མཚན་མོ་བཟའ་བ་དང་། བཅའ་བ་གཙང་ཞིང་བསོད་པ་དག་སྟ་གོན་བྱས་ནས་ནང་པར་སྔར་ལངས་ཏེ་གདན་བཤམས་ནས་ཆུ་ར་བཞག་སྟེ། བཅོམ་ལྡན་འདས་ལ་སྤྱན་འདྲེན་གྱིས་བཙུན་པ་གདུགས་ཚོད་གཡར་དགོངས་འཚལ་ན། བཅོམ་ལྡན་འདས་ཀྱིས་ད་དེའི་དུས་ལ་བབ་པར་དགོངས་སུ་གསོལ་ཞེས་སྤྱན་དྲངས་པ་དང་། ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་བོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང་། ལྷ་རྣམས་ལ་ཆོས་སྟོན་པར་བཞེད་པ་དང་། ནད་པ་ལ་ལྟ་བར་བཞེད་པ་དང་། གནས་མལ་ལ་རྟོག་པར་བཞེད་པ་དང་། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །ཚེ་དང་ལྡན་པ་ཤཱ་རིའི་བུ་འཇུག་པ་ན་རྒྱལ་པོ་བཙུན་མོའི་འཁོར་དང་བཅས་པ་འདུག་ནས་དེའི་ཕྱིར་ལྡོག་པར་བརྩམས་པ་དང་། རྒྱལ་པོས་མཐོང་ནས་སྨྲས་པ། འཕགས་པ་ཤཱ་རིའི་
བུ་གཤེགས་སུ་གསོལ། དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་རྣམས་ལ་སྨྲས་པ་ཚེ་དང་ལྡན་པ་དག་བཞི་པོ་དག་གི་ཚིག་ནི་མི་གཅག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་། དགེ་སློང་དགྲ་བཅོམ་པ་ཟག་པ་ཟད་པའི་ཚིག་དང་། དགེ་སྐོས་ཀྱི་ཚིག་དང་། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་ཡིན་གྱིས། ཚེ་དང་ལྡན་པ་དག་དྲན་པ་ཉེ་བར་ཞོག་ཤིག་དང་འཇུག་པར་བྱའོ་ཞེས་དེ་ཞུགས་ནས། དགེ་སློང་གི་དགེ་འདུན་གྱི་གོང་དུ་སྟན་བཤམས་པ་ཉིད་ལ་འདུག་གོ །དེ་ནས་བཙུན་མོ་དཔལ་ལྡན་གྱིས་ཚེ་དང་ལྡན་པ་ཤཱ་རིའི་བུ་ལ་སོགས་པ་དགེ་སློང་གི་དགེ་འདུན་བདེ་བར་འཁོད་པར་རིག་ནས། རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱེད། སྟོབས་པར་བྱེད་དོ། །རྣམ་གྲངས་དུ་མར་རང་གི་ལག་ནས་བཅའ་བ་དང་། བཟའ་བ་གཙང་ཞིང་བསོད་པས་ཚིམ་པར་བྱས་ཤིང་བསྟབས་ནས། ཚེ་དང་ལྡན་པ་ཤཱ་རིའི་བུ་ལ་སོགས་པ། དགེ་སློང་གི་དགེ་འདུན་གདུགས་ཚོད་གསོལ་ཅིང་ཕྱག་བཅབས་ལྷུང་བཟེད་བཞག་པར་རིག་ནས། སྟན་ཆེས་དམའ་བ་ཞིག་བླངས་ཏེ། ཆོས་མཉན་པའི་ཕྱིར་ཚེ་དང་ལྡན་པ་ཤཱ་རིའི་བུའི་མདུན་དུ་འདུག་གོ །དེ་ནས་ཚེ་དང་ལྡན་པ་ཤཱ་རིའི་བུ་བཙུན་མོ་དཔལ་ལྡན་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག་པར་བྱེད། ཡང་དག་པར་གཟེངས་སྟོད་པར་བྱེད། ཡང་དག་པར་རབ་ཏུ་དགའ་བར་བྱེད་དོ། །རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་བྱེད་ན་དེས་བདེན་པ་དག་མ་མཐོང་ངོ་། །ཚེ་དང་ལྡན་པ་ཤཱ་རིའི་བུས་བསམས་པ། ཅི་འདི་ལ་དགེ་བའི་རྩ་བ་དག་ཡོད་དམ། འོན་ཏེ་མེད་སྙམ་ན། ཡོད་པར་མཐོང་ངོ་། །སུ་ལ་རག་ལས་སྙམ་ན། བདག་ཉིད་ལ་རག་ལས་པར་མཐོང་ནས། དེ་དེ་ལ་ཆོས་སྟོན་ཅིང་རྣམ་པར་དཔྱོད་པ་ན་ཉི་མ་ནུབ་པའི་དུས་ལ་བབ་ནས་དགེ་སློང་རྣམས་སྟན་ལས་ལངས་ཏེ་དོང་ངོ་། །ཚེ་དང་ལྡན་
པ་ཤཱ་རིའི་བུས་བསམས་པ་འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི། འདི་ཉིད་རྐྱེན་དུ་མཛད་ནས་གནང་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་རོ། །སྙམ་ནས། དེ་གདུལ་བ་ལ་ལྟོས་པས་དེ་ཉིད་དུ་འདུག་གོ །ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་གྱི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། གང་ཐོས་ནས་བཙུན་མོ་དཔལ་ལྡན་གྱིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་ཆོས་བསྟན་པ་བྱས་སོ། །དེས་བདེན་པ་མཐོང་ནས་སྨྲས་པ། འཕགས་པ་བདག་གིས་དགེ་བའི་བཤེས་གཉེན་འཕགས་པ་ཤཱ་རིའི་བུ་ལ་བརྟེན་ནས་འཕགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་དག་གིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །འཁོར་བ་ནི་མཐར་བགྱིས། ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། བཙུན་པ་བདག་ནི་མངོན་པར་ཞུགས་པ་ལགས་སོ། །བཙུན་པ་བདག་ནི་མངོན་པར་ཞུགས་པ་ལགས་ཏེ། བཙུན་པ་བདག་བཅོམ་ལྡན་འདས་དང་། ཆོས་དང་། དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་ཚེ་དང་ལྡན་པ་ཤཱ་རིའི་བུས་བཙུན་མོ་དཔལ་ལྡན་བདེན་པ་དག་ལ་བཞག་
སྟེ་སོང་ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་ཚེ་དང་ལྡན་པ་ཤཱ་རིའི་བུས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ་ལེགས་སོ། །བདུན་པོ་དག་གི་ཚིག་ནི་མི་གཅག་པ་ཡིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་། དགེ་སློང་དགྲ་བཅོམ་པ་ཟག་པ་ཟད་པའི་ཚིག་དང་། དགེ་འདུན་གྱི་གནས་བརྟན་གྱི་ཚིག་དང་། དགེ་སྐོས་ཀྱི་ཚིག་དང་། མཁན་པོའི་ཚིག་དང་། སློབ་དཔོན་གྱི་ཚིག་དང་། རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཚིག་གོ །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ནམ་མ་ནངས། སྐྱ་རེངས་མ་ཤར། རིན་པོ་ཆེ་དག་གམ། རིན་པོ་ཆེར་སྨོས་པ་དག་མ་བསྡུས་པར་རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་སྒོ་གཏན་ནམ། སྒོ་གཏན་གྱི་ཉེན་ཀོར་ལས་འདའ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་འཆར་ཀའམ། གཞན་ཡང་དེ་ལྟ་བུ་གང་ཡིན་པའོ། །ནམ་མ་ནངས་ཞེས་བྱ་བ་ནི་ནམ་ནངས་པར་མ་གྱུར་པའོ། །སྐྱ་རེངས་ཞེས་བྱ་བ་ནི་སྐྱ་རེངས་གསུམ་པོ། སྐྱ་རེངས་དང་པོ་དང་། སྐྱ་རེངས་བར་མ་དང་། སྐྱ་རེངས་ཐ་མའོ། །དེ་ལ་སྐྱ་རེངས་དང་པོ་ནི་སྔོན་པོར་སྣང་བའོ། །སྐྱ་རེངས་བར་མ་ནི་སེར་པོར་སྣང་བའོ། །སྐྱ་རེངས་ཐ་མ་ནི་དམར་པོར་སྣང་བ་སྟེ། འདིར་ནི་སྐྱ་རེངས་ཐ་མ་ཡིན་
པར་དགོངས་སོ། །མ་ཤར་ཅེས་བྱ་བ་ནི་མ་བྱུང་བའོ། །རིན་པོ་ཆེ་དག་ཅེས་བྱ་བ་ལ། རིན་པོ་ཆེ་དག་ཅེས་བྱ་བ་ནི་ནོར་བུ་དག་དང་། མུ་ཏིག་དག་དང་། བཻ་ཌཱུརྱ་དག་དང་། མན་ཤེལ་དཀར་པོ་དག་དང་། བྱི་རུ་དག་དང་། གསེར་དག་དང་། དངུལ་དག་དང་། རྡོའི་སྙིང་པོ་དག་དང་། སྤུག་དག་དང་། དམར་པོ་དག་དང་། གཡས་སུ་འཁྱིལ་བ་དག་གོ །རིན་པོ་ཆེར་སྨོས་པ་དག་ཅེས་བྱ་བ་ལ། རིན་པོ་ཆེར་སྨོས་པ་དག་ཅེས་བྱ་བ་ནི་གཡུལ་ངོར་སྤྱད་པའི་མཚོན་ཆ་ཐམས་ཅད་དང་། རོལ་མོར་སྤྱད་པའི་ཆ་སྤྱད་ཐམས་ཅད་དོ། །མ་བསྡུས་པ་ཞེས་བྱ་བ་ནི་མ་བརྟུལ་བར་རོ། །རྒྱལ་པོ་རྒྱལ་རིགས་སྤྱི་བོར་དབང་བསྐུར་བའི་ཞེས་བྱ་བ་ནི་འདི་ལྟ་སྟེ། བུད་མེད་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ལ། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་རྒྱལ་སྲིད་ལ་དབང་བསྐུར་བས་དབང་བསྐུར་བར་གྱུར་ན་དེ་ཡང་རྒྱལ་པོ་རྒྱལ་རིགས་སྤྱི་བོར་དབང་བསྐུར་བ་ཡིན་ནོ། །སྒོ་གཏན་ནམ་ཞེས་བྱ་བ་ནི་སྒོ་གཏན་རྣམ་པ་གསུམ་སྟེ། གྲོང་ཁྱེར་གྱི་སྒོ་གཏན་དང་། རྒྱལ་པོའི་ཕོ་བྲང་གི་སྒོ་གཏན་དང་། བཙུན་མོའི་འཁོར་གྱི་སྒོ་གཏན་ནོ། །སྒོ་གཏན་གྱི་ཉེན་ཀོར་ལས་ཞེས་བྱ་བ་ནི་དེའི་དྲུང་ལས་སོ། །འདའ་ན་ཞེས་བྱ་བ་ནི་འགྲོ་ནའོ། །དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་སྟེའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ནམ་མ་ནངས་པ་ལ་ནམ་མ་ནངས་པར་འདུ་ཤེས་པས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །
ནམ་ནངས་པ་ལ་ནམ་མ་ནངས་པར་འདུ་ཤེས་པས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ཡིད་གཉིས་ཟ་བས་གྲོང་ཁྱེར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །དགེ་སློང་གིས་ནམ་མ་ནངས་པ་ལ་ནམ་ནངས་པར་འདུ་ཤེས་པས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ནམ་མ་ནངས་པར་འདུ་ཤེས་པས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ཡིད་གཉིས་ཟ་བས་རྒྱལ་པོའི་ཕོ་བྲང་གི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །དགེ་སློང་གིས་ནམ་མ་ནངས་པ་ལ་ནམ་མ་ནངས་པར་འདུ་ཤེས་པས་བཙུན་མོའི་འཁོར་གྱི་སྒོ་གཏན་ལས་འདའ་ན་ལྟུང་བྱེད་དུ་འགྱུར་རོ། །ནམ་མ་ནངས་པ་ལ་ཡིད་གཉིས་ཟ་བས་བཙུན་མོའི་འཁོར་གྱི་སྒོ་གཏན་ལས་འདའ་ན་ལྟུང་བྱེད་དུ་འགྱུར་རོ། །ནམ་ནངས་པ་ལ་ནམ་མ་ནངས་པར་འདུ་ཤེས་པས་བཙུན་མོའི་འཁོར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །ནམ་ནངས་པ་ལ་ཡིད་གཉིས་ཟ་བས་བཙུན་མོའི་འཁོར་གྱི་སྒོ་གཏན་ལས་འདའ་ན་ཉེས་བྱས་སུ་འགྱུར་རོ། །རྒྱལ་པོ་དང་། བཙུན་མོ་དང་། གཞོན་ནུ་དང་། བློན་པོ་དག་གིས་བོས་པ་དང་། བར་ཆད་བརྒྱད་པོ་རྒྱལ་པོ་དང་ཆོམ་རྐུན་དང་། མི་དང་མི་མ་ཡིན་པ་དང་། གདུག་པ་དང་། མེ་དང་ཆུ་དང་ཀླུ་དག་ཉེ་བར་གནས་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་དེ། བརྒྱད་བཅུ་རྩ་གཉིས་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་གདོན་པར་བྱའོ་ཞེས་བཀའ་སྩལ་པ་དང་། ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་དྲུག་སྡེ་དག་གུས་པར་
བྱས་ཏེ། ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང་དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གདོད་ཤེས་སོ་ཞེས་ཟེར་ནས་དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་གིས་སོ་སོར་ཐར་པའི་མདོ་གདོན་པ་འདོན་པ་ད་གདོད་ཐོས་སམ་ཅི་ན་གང་གི་ཕྱིར་དེ་སྐད་ཟེར། དེ་དག་གིས་སྨྲས་པ། ཚེ་དང་ལྡན་པ་དག་ཅི་ཁོ་བོ་ཅག་ལ་ལས་དེ་ཙམ་འབའ་ཞིག་ཏུ་ཟད་དམ། འདོད་པའི་རྣམ་པར་རྟོག་པ་ལ་ཡང་རྣམ་པར་བརྟག་དགོས་སོ། །གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་ལ་ཡང་རྣམ་པར་བརྟག་དགོས་སོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང་། དགེ་སློང་རྣམས་ལ་ཡང་འདི་སྐད་ཅེས། ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གཟོད་ཤེས་སོ་ཞེས་ཟེར་ནས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཟླ་བ་ཕྱེད་ཕྱེད་ཅིང་སོ་སོར་
ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང་། དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་ཅག་གིས་ད་གདོད་ཤེས་སོ་ཞེས་ཟེར་བ་བདེན་ནམ་བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ་ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ལ། དེ་ལ་གལ་ཏེ་དགེ་སློང་རྣམས་ཀྱིས་ཀྱང་ཚེ་དང་ལྡན་པ་འདི་སྔོན་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ཤིང་ལན་མང་དུ་ལྟ་ཅི་སྨོས་ན། ཚེ་དང་ལྡན་པ་དེ་མི་ཤེས་པས་མི་འགྲོལ་བས་དེ་ལྟུང་བ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་གི་སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་པས་ཚེ་དང་ལྡན་པ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་དེ།
ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ། །ཚེ་དང་ལྡན་པ་དེ་ལ་འགྱོད་པར་བྱ་བ་ནི་དེ་ཡིན་ཏེ་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ། གཞན་ཡང་དེ་ལྟ་བུ་གང་ཡིན་པའོ། །ཟླ་བ་ཕྱེད་ཕྱེད་ཅིང་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པ་ཞེས་བྱ་བ་ལ་སོ་སོར་ཐར་པ་ཞེས་བྱ་བ་ནི་ཕམ་པར་འགྱུར་བའི་ཆོས་བཞི་དང་། དགེ་འདུན་ལྷག་མའི་ཆོས་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བྱེད་ཀྱི་ཆོས་སུམ་བཅུ་དང་། ལྟུང་བྱེད་ཀྱི་ཆོས་དགུ་བཅུ་དང་། སོ་སོར་བཤགས་པར་བྱ་བའི་ཆོས་བཞི་དང་། བསླབ་པའི་ཆོས་མང་པོ་དང་། རྩོད་པ་ཞི་བར་བྱ་བའི་ཆོས་བདུན་པོ་དག་གོ །མདོ་གདོན་པ་ཞེས་བྱ་བ་ལ། མདོ་གདོན་པ་ཞེས་བྱ་བ་ནི་ཡང་དག་པར་སྦྱོར་བའོ། །འདོན་པའི་ཚེ་ཞེས་བྱ་བ་ནི་རབ་ཏུ་སྟོན་པའི་ཚེའོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ། །ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ་ཞེས་ཟེར་ལ་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པའི་ཆོས་འདི་ཡང་ངོ་། །དེ་ལ་གལ་ཏེ་དགེ་སློང་རྣམས་ཀྱིས་ཀྱང་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ཀྱིས་ཀྱང་ངོ་། །ཚེ་དང་ལྡན་པ་འདི་ཞེས་བྱ་བ་ནི་དགེ་སློང་གང་ཡིན་པ་འདིའོ། །སྔོན་གསོ་སྦྱོང་གི་ལས་གཉིས་སམ། གསུམ་གྱི་ཚེ་འདུག་པར་ཤེས་ཤིང་ཞེས་བྱ་བ་ནི་འདིས་སོ་སོར་ཐར་པ་ལན་གཉིས་སམ། གསུམ་ཐོས་པར་ཤེས་ཤིང་ངོ་། །ལན་མང་དུ་ལྟ་ཅི་སྨོས་ན་ཞེས་བྱ་བ་ནི་ལན་མང་དུ་འདུག་པར་ཤེས་པ་ལྟ་ཅི་སྨོས་ནའོ། །ཚེ་དང་ལྡན་པ་དེ་མི་ཤེས་པས་མི་འགྲོལ་བས་ཞེས་བྱ་བ་ནི་དེ་དེས་ལྟུང་བ་ལས་མི་འགྲོལ་བས་དེ་ལྟུང་བ་དང་བཅས་པ་ཉིད་ཡིན་པའོ། །དེ་ལ་ལྟུང་བ་གང་བྱུང་བ་ཞེས་བྱ་བ་ནི་ལྟུང་བྱེད་དོ། །དེ་ཆོས་བཞིན་དུ་བྱེད་དུ་གཞུག་ཅེས་བྱ་བ་ནི་འཆགས་སུ་གཞུག་པའོ། །སྟེང་དུ་ཁྱོད་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་འདོན་པའི་ཚེ་གུས་པར་བྱས་ཏེ་ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་
ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་པས་ཚེ་དང་ལྡན་པ་ཁྱོད་ཀྱིས་མ་རྙེད་དེ། རྙེད་པ་མ་ཡིན་ཞིང་ཉེས་པ་རྙེད་དེ། ལེགས་པ་རྙེད་པ་མ་ཡིན་ནོ་ཞེས་འགྱོད་པར་བྱའོ། །ཞེས་བྱ་བ་ནི་འགྱོད་དུ་གཞུག་པར་བྱའོ། །ཚེ་དང་ལྡན་པ་དེ་ལ་འགྱོད་པར་བྱ་བ་ནི་འདི་ཡིན་ཏེ་ཞེས་བྱ་བ་ནི་དེ་ལྟར་འགྱོད་པར་བྱའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་ཕམ་པར་འགྱུར་བའི་ཆོས་བཞི་དང་། དགེ་འདུན་ལྷག་མའི་ཆོས་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བྱེད་ཀྱི་ཆོས་སུམ་བཅུ་དང་། ལྟུང་བྱེད་ཀྱི་ཆོས་དགུ་བཅུ་དང་། སོ་སོར་བཤགས་པར་བྱ་བའི་ཆོས་བཞི་དང་། བསླབ་པའི་ཆོས་མང་པོ་དང་། རྩོད་པ་ཞི་བར་བྱ་བའི་ཆོས་བདུན་པོ་དག་གདོན་པ་འདོན་པའི་ཚེ་གུས་པར་བྱས་ཏེ། ཆོས་ཉན་པར་མི་བྱེད། བླ་མར་བྱས་ཏེ་མི་བྱེད། རུ་ཤིང་ལྟར་བྱས་ཏེ་མི་བྱེད། ཡིད་ལ་བྱས་ཏེ་མི་བྱེད། སེམས་རྩེ་གཅིག་ཏུ་མི་བྱེད། རྣ་བླགས་ཏེ་མི་བྱེད། སེམས་ཐམས་ཅད་ཀྱིས་བསམས་ཏེ་ཆོས་ཉན་པར་མི་བྱེད་ཅིང་། འདི་སྐད་ཅེས་ཚེ་དང་ལྡན་པ་དག་འདི་ལྟར་ཆོས་འདི་ཡང་མདོའི་ནང་དུ་གཏོགས། མདོའི་ནང་དུ་འདུས་པར་བདག་གིས་ད་གདོད་ཤེས་སོ། །ཞེས་ཟེར་ན་ཐམས་ཅད་དུ་ལྟུང་བྱེད་དུ་འགྱུར་རོ། །ལམ་གོལ་བར་རྒས་པར་གྱུར་ཅིང་ཡང་དག་པ་ཁོ་ནར་མི་ཤེས་ན་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པའི་གཞིའི་དངོས་པོ་ལ་ཁྱད་དུ་གསོད་པའི་ལྟུང་བྱེད་དེ། བརྒྱད་བཅུ་རྩ་གསུམ་པ་རྫོགས་སོ།། །།འདུལ་བ་རྣམ་པར་འབྱེད་པ། བམ་པོ་བདུན་བཅུ་རྩ་དགུ་པ། སངས་རྒྱས་བཅོམ་
ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །མཉན་ཡོད་ན་གཅེར་བུ་པའི་ཉན་ཐོས་ཆོས་ཞེས་བྱ་བ་བ་སོ་མཁན་ཞིག་འདུག་པ་དེ་གཅེར་བུ་པ་དག་ལ་ཤིན་ཏུ་མངོན་པར་དད་དོ། །དེ་དུས་གཞན་ཞིག་ན་དགེ་སློང་བསོད་སྙོམས་པ་ཞིག་གིས་ཆོས་བསྟན་པས་བཏུལ་ནས། དེས་ཀྱང་དེ་ལས་སྐྱབས་སུ་འགྲོ་བ་དང་། བསླབ་པའི་གཞི་དག་བླངས་སོ། །ཡང་བསོད་སྙོམས་པ་དེས་དེ་ལ་རྫས་ལས་བྱུང་བའི་བསོད་ནམས་བྱ་བའི་གཞི་བདུན་གྱི་བསྔགས་པ་རྒྱ་ཆེར་བརྗོད་པ་དང་། དེ་མངོན་པར་དད་པར་གྱུར་ནས་སྨྲས་པ། འཕགས་པ་བདག་གིས་ཀྱང་རྫས་ལས་བྱུང་བའི་བསོད་ནམས་བྱ་བའི་གཞི་ཅུང་ཟད་ཅིག་ཡང་དག་པར་བཀླགས་ཏེ་འཇུག་པར་བགྱིའོ། །བཞིན་བཟངས་ཅི་ཞིག་བྱེད། འཕགས་པ་དགེ་སློང་གི་དགེ་འདུན་ལ་རང་གི་བཟོས་བསྙེན་བཀུར་བགྱིའོ། །མ་ཉེས་ཀྱིས་དེ་བཞིན་གྱིས་ཤིག །བསོད་སྙོམས་པས་གཙུག་ལག་ཁང་དུ་སོང་སྟེ། དགེ་སློང་རྣམས་ལ་སྨྲས་པ། ཚེ་དང་ལྡན་པ་དག་བདག་གིས་གཅེར་བུ་པའི་ཉན་ཐོས་ཆོས་ཞེས་བྱ་བ་བ་སོ་མཁན་དེ་སྐྱབས་སུ་འགྲོ་བ་དང་། བསླབ་པའི་གཞི་དག་ལ་བཞག་ནས་དེ་དགེ་སློང་གི་དགེ་འདུན་ལ་རང་གི་བཟོས་བསྙེན་བཀུར་བྱེད་ཀྱིས་སུ་ཅི་འདོད་པ་དེས་དེ་བྱེད་དུ་ཆུག་ཤིག །ཇི་ཙམ་ན་དགེ་སློང་ཞིག་ལ་ཁབ་རལ་མེད་ནས་དེ་དེའི་གན་དུ་སོང་སྟེ་སྨྲས་པ། བཞིན་བཟངས་ཁོ་བོ་ལ་ཁབ་རལ་མེད་ཀྱིས་དེ་གྱིས་ཤིག །འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ངོ་། །བཞིན་བཟངས་བ་སོ་ལས་བྱས་པ་གྱིས་ཤིག །དེས་དེའི་ཁབ་རལ་བ་སོ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང་། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང་། གཞན་གྱིས་ཀྱང་བྱེད་དུ་བཅུག །གཞན་གྱིས་ཀྱང་བྱེད་དུ་བཅུག་པས་དེའི་བ་སོ་ཟད་པར་གྱུར་ཏོ། །དགེ་སློང་གཞན་ཞིག་ཀྱང་འོངས་ཏེ་སྨྲས་པ། བཞིན་བཟངས་ཁོ་བོའི་ཁབ་རལ་གྱིས་ཤིག །འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ན་བ་སོ་དེ་ནི་བས་སོ། །གལ་ཏེ་བཞེད་ན་
རུས་པ་ལས་བགྱིས་པ་བགྱིའོ། །བཞིན་བཟངས་མ་ཉེས་ཀྱིས་གྱིས་ཤིག །དེས་དེའི་ཁབ་རལ་རུས་པ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང་། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང་། གཞན་གྱིས་ཀྱང་བྱེད་དུ་བཅུག །གཞན་གྱིས་ཀྱང་བྱེད་དུ་བཅུག་པས་དེའི་རུས་པ་ཡང་ཟད་པར་གྱུར་ཏོ། །དགེ་སློང་གཞན་ཞིག་ཀྱང་འོངས་ཏེ་སྨྲས་པ། བཞིན་བཟངས་ཁོ་བོའི་ཁབ་རལ་གྱིས་ཤིག །འཕགས་པ་ཇི་ལྟ་བུ་ཞིག་བགྱི། གང་བཟང་བའོ། །འཕགས་པ་བ་སོ་ལས་བགྱིས་པ་བཟང་ན་བ་སོ་དེ་ནི་བས་སོ། །བཞིན་བཟངས་གལ་ཏེ་དེ་ལྟ་ན་རུས་པ་ལས་བྱས་པ་གྱིས་ཤིག །འཕགས་པ་རུས་པ་ཡང་བས་སོ། །གལ་ཏེ་བཞེད་ན་རྭ་ལས་བགྱིས་པ་བགྱིའོ། །བཞིན་བཟངས་མ་ཉེས་ཀྱིས་གྱིས་ཤིག །དེས་དེའི་ཁབ་རལ་རྭ་ལས་བྱས་པ་བྱས་ཏེ་བྱིན་ནོ། །དགེ་སློང་དེས་དེ་དགེ་སློང་རྣམས་ལ་བསྟན་པ་དང་། དགེ་སློང་གཞན་གྱིས་ཀྱང་དེ་ལྟ་བུ་བྱེད་དུ་བཅུག་ཅིང་། གཞན་གྱིས་ཀྱང་དེ་ལྟ་བུ་བྱེད་དུ་བཅུག །གཞན་གྱིས་ཀྱང་དེ་ལྟ་བུ་བྱེད་དུ་བཅུག་པས་དེའི་རྭ་ཡང་ཟད་པར་གྱུར་ཏོ། །དེ་རང་གི་ཟན་དང་། རང་གི་ཡོ་བྱད་དག་གིས་དགེ་སློང་རྣམས་ཀྱི་ལས་བྱེད་པ་ནི་དབུལ་པོར་གྱུར་ཏོ། །གཅེར་བུ་པ་དག་ཆོས་འདི་གང་གི་ཚེ་ཁོ་བོ་ཅག་ལ་མངོན་པར་དད་པར་གྱུར་པ་དེའི་ཚེ་ན་འདི་ཐམས་ཅད་ཕུན་སུམ་ཚོགས་པར་གྱུར་ན། འདི་ད་ལྟར་ཤཱཀྱའི་བུའི་དགེ་སྦྱོང་རྣམས་ལ་མངོན་པར་དད་པས་ཟན་ཡང་སློང་བར་བྱེད་དོ་ཞེས་འཕྱ་བ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ཁྱེད་བ་སོ་ལས་བྱས་པ་དང་། རུས་པ་ལས་བྱས་པ་དང་། རྭ་ལས་བྱས་པའི་ཁབ་རལ་བྱེད་དུ་འཇུག་
པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང་། ཆོག་མི་ཤེས་པ་དང་། གསོ་དཀའ་བ་དང་། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང་། ཆོག་ཤེས་པ་དང་། གསོ་སླ་བ་དང་། དགང་སླ་བ་དང་། ཕྲི་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། མཛེས་པ་དང་། དྲོད་རིག་པ་ཉིད་ཀྱི་བསྔགས་པ་བརྗོད་པ་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བ་སོའམ། རུས་པའམ། རྭའི་ཁབ་རལ་བྱེད་དུ་འཇུག་ན་བཅག་ནས་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཆོས་འདི་པའོ། །བ་སོའམ་ཞེས་བྱ་བ་ནི་བ་སོ་ཉིད་དོ། །རུས་པའམ་ཞེས་བྱ་བ་ཡང་རུས་པ་ཉིད་དོ། །རྭའི་ཞེས་བྱ་བ་ཡང་རྭ་ཉིད་ཀྱིའོ། །ཁབ་རལ་ཞེས་བྱ་བ་ནི་ཁབ་རལ་གཉིས་ཏེ། སྦུབ་བུ་ཅན་དང་། ཆང་པ་ལྟ་བུའོ། །དོན་འདི་ནི་གཉི་ག་ཡིན་པར་དགོངས་སོ། །བྱེད་དུ་འཇུག་ན་ཞེས་བྱ་བ་ནི་རང་གིས་སམ་གཞན་ནོ། །བཅག་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅག་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ། །ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་བ་སོའམ། རུས་པའམ། རྭའི་ཁབ་རལ་བྱེད་དམ། བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅག་གམ། ཞེས་དྲི་བར་
བྱའོ། །མ་དྲིས་པར་འཆགས་པ་དང་དུ་ལེན་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁབ་རལ་འཆོས་པའི་ལྟུང་བྱེད་དེ་བརྒྱད་བཅུ་རྩ་བཞི་པ་རྫོགས་སྷོ།། །། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་དགེ་སློང་ཞིག་ལྗོངས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ནས་མཉན་ཡོད་དུ་ལམ་གྱིས་དུབ་པའི་ངལ་བསོས་ཏེ། རྒྱལ་བྱེད་ཀྱི་ཚལ་དུ་སོང་ནས་དེ་སྒོ་ཁང་དུ་འདུག་གོ །དེ་ཁྲི་དམའ་བ་ཞིག་རྙེད་ནས་དེས་དེ་ཉིད་ཀྱི་མདུན་དུ་རྐང་པ་གཉིས་བཀྲུས་ནས་སྐྱིལ་མོ་ཀྲུང་བཅས་ཏེ་འདུག་གོ །སོས་ཀའི་ཚ་བའི་དུས་ལ་བབ་པས་སྦྲུལ་དུག་མྱུར་དུ་ཁྱབ་པར་བྱེད་པ་ཚ་བས་གདུངས་པས་བསིལ་བ་འདོད་པ་ཞིག་ཕྱོགས་དེར་བསྐྱིལ་ཏེ་ཉལ་བ་དང་། ཇི་ཙམ་ན་དགེ་སློང་དེ་ལམ་གྱིས་དུབ་པས་ཡུར་བར་བརྩམས་ནས་དེའི་ལུས་ཡུད་ཙམ་ཡུད་ཙམ་ཞིང་མཆོག་པས་ཁྲི་ཡང་སྒྲ་ཙེག་ཙེག་ཟེར་རོ། །སྦྲུལ་དུག་མྱུར་དུ་ཁྱབ་པར་བྱེད་པ་དེས་བསམས་པ། འདི་བདག་ལ་འཚེའོ་སྙམ་ནས། དེས་གདེངས་ཀ་བྱས་ཏེ་འདུག་གོ །ཇི་ཙམ་ན་ཡང་དེ་ལུས་མཆོག་ཅིང་ཁྲི་སྒྲ་ཙེག་ཙེག་ཟེར་ནས་དེས་དེའི་འཕྲལ་བར་བཟུང་སྟེ། སྤྱོད་ལམ་དེ་ཉིད་ཀྱིས་ཤི་ཞིང་དུས་ལ་བབ་ནས་སུམ་བཅུ་རྩ་གསུམ་པའི་ལྷའི་རིས་བཟང་པོ་རྣམས་ཀྱི་ནང་དུ་སྐྱེས་སོ། །དེའི་གན་དུ་ལྷའི་བུ་མོ་དག་ལྷགས་པ་དང་། དེས་སེ་གོལ་གྱི་སྒྲས་དེ་དག་ཕྱིར་བཟློག་ནས་དེ་དག་ལྷའི་དབང་པོ་བརྒྱ་བྱིན་གྱི་གན་དུ་སོང་སྟེ་སྨྲས་པ། ལྷ་འདི་ནི་ལྷའི་བུ་སྐྱེས་ནས་རིང་པོ་མ་ལགས་པ་ཞིག་སྐྱིལ་མོ་ཀྲུང་བཅས་ཏེ་མཆིས་ནས་བདག་ཅག་དེའི་དྲུང་དུ་མཆིས་པ་དང་། དེས་སེ་གོལ་གྱི་སྒྲས་བདག་ཅག་སླར་བཟློག་གོ །བརྒྱ་བྱིན་གྱིས་སྨྲས་པ། ལྷ་མོ་དག་དེ་ནི་སྔོན་དགེ་སློང་ཡིན་གྱིས་དེའི་མདུན་དུ་མེ་ལོང་ཟུང་ཤིག་དང་། དྲན་པ་རྙེད་པར་འགྱུར་རོ། །དེ་དག་གིས་དེའི་མདུན་དུ་མེ་ལོང་བཟུང་བ་དང་། དེས་བདག་ཉིད་དཔུང་རྒྱན་དང་། རྣ་ཆ་གདུབ་ཀོར་དང་། ཕྲེང་བ་རྒྱུ་དང་། རྒྱན་སྣ་
ཚོགས་ཀྱིས་བརྒྱན་པར་མཐོང་ནས་དྲན་པ་རྙེད་དོ། །དེ་ནས་དེས་དེ་དག་འདོད་པར་བརྩམས་པ་དང་། དེ་དག་གིས་སྨྲས་པ། བཟོད་ལྡན་བདག་ཅག་དེ་བཞིན་དུ་བསྙེན་བཀུར་མི་བྱེད་དེ། གང་ལྷའི་དབང་པོ་བརྒྱ་བྱིན་ལ་ཕྱག་འཚལ་བ་དེ་ལ་བདག་ཅག་བསྙེན་བཀུར་བྱེད་དོ། །དེས་བསམས་པ། བདག་གིས་བཅོམ་ལྡན་འདས་འདོད་པའི་དྲི་ང་བ་མེད་པ་ལ་ཕྱག་བྱས་ནས་ད་ཇི་ལྟར་ལྷའི་དབང་པོ་བརྒྱ་བྱིན་འདོད་པའི་ལོངས་སྤྱོད་ཅན་ལ་ཕྱག་བྱ་སྙམ་དུ་རིག་ནས་སྨྲས་པ། སྲིང་མོ་དག་གང་གིས་ལྷའི་དབང་པོ་བརྒྱ་བྱིན་ལ་ཕྱག་འཚལ་བར་མི་བྱེད་པ་དེ་ལྟ་བུའི་ཐབས་འགའ་ཡོད་དམ། བཟོད་ལྡན་ཡོད་དེ། གང་ན་ལྷའི་དྲང་སྲོང་དག་ཚངས་པར་སྤྱད་པ་སྤྱོད་ཅིང་འཁོད་པ་དེ་དག་གི་ནང་དུ་གང་ཚངས་པར་སྤྱད་པ་སྤྱོད་པར་བྱེད་པ་དེ་ནི་ལྷའི་དབང་པོ་བརྒྱ་བྱིན་ལ་ཕྱག་མི་འཚལ་ཏེ། ལྷའི་དབང་པོ་བརྒྱ་བྱིན་ཉིད་དེ་ལ་ཕྱག་འཚལ་ལོ། །དེ་དེ་དག་གི་ནང་དུ་ཞུགས་པ་དང་། ལྷའི་དབང་པོ་བརྒྱ་བྱིན་གྱིས་ཇི་ལྟར་དེ་ལྷའི་དྲང་སྲོང་གི་ནང་དུ་ཞུགས་ཏེ་ཚངས་པར་སྤྱད་པ་སྤྱོད་པ་ཐོས་ནས་ལྷའི་དབང་པོ་བརྒྱ་བྱིན་དེའི་གན་དུ་སོང་སྟེ་ཕྱིན་ནས་རྐང་པ་ལ་ཕྱག་འཚལ་ཏེ་སོང་ངོ་། །དེ་ནས་སྔོན་དགེ་སློང་ལྷའི་བུ་དེ་འདི་སྙམ་དུ་སེམས་ཏེ། གང་གི་ཕྱིར་བདག་ཡོངས་སུ་གནས་པ་བསྟེན་ཏེ། བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོ་བ་ནི་བདག་གི་ཚུལ་དང་མཐུན་པ་མ་ཡིན་གྱིས་བདག་ཡོངས་སུ་གནས་པ་མ་བསྟེན་པ་ཁོ་ནར་བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་ཉེ་བར་འགྲོའོ་སྙམ་མོ། །དེ་ནས་སྔོན་དགེ་སློང་ལྷའི་བུ་རྣ་ཆ་གདུབ་ཀོར་གཡོ་ཞིང་དྲི་མ་མེད་པ་ཐོགས་ཏེ། དོ་ཤལ་དང་། སེ་མོ་དོས་བརྒྱན་པའི་ལུས་ཀྱིས་ལྷའི་ཨུཏྤ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དག་གིས་ཐུ་བ་བཀང་སྟེ། ཁ་དོག་ཤིན་ཏུ་འདས་པས་མཚན་མོ་ལ་བབ་པ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་མེ་ཏོག་དག་གིས་མངོན་པར་གཏོར་ཏེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་མཐའ་གཅིག་ཏུ་འདུག་པ་དང་། འདི་ལྟར་སྔོན་དགེ་སློང་ལྷའི་
བུའི་ཁ་དོག་གི་མཐུས་རྒྱལ་བྱེད་ཀྱི་ཚལ་ཐམས་ཅད་སྣང་བ་རྒྱ་ཆེན་པོས་ཁྱབ་པར་གྱུར་ཏོ། །དེ་ནས་སྔོན་དགེ་སློང་ལྷའི་བུས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། རྨོངས་པ་ཞེས་བགྱིའི་ཚལ་དེ་ནི། །ལྷ་མོའི་ཚོགས་ཀྱིས་ཀུན་བསྒྲགས་ཤིང་། །ཤ་ཟ་མོ་བཞིན་ཡོངས་བསྐོར་ན། །ཇི་ལྟར་འཆི་བ་འབྱུང་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །དྲང་པོ་ཞེས་བྱའི་ལམ་དེ་ནས། །འཇིགས་མེད་ཕྱོགས་ཞེས་བྱ་བ་དེར། །སྒྲ་མེད་ཅེས་བྱའི་ཤིང་རྟ་ནི། །ཆོས་ཀྱི་རྟོག་པས་བསྐྱོད་གྱུར་པ། །དེ་ཡི་དམིགས་པ་ངོ་ཚ་ཤེས། །དྲན་པ་དེ་ཡི་འཁོར་ཡིན་ཏེ། །ཁ་ལོ་སྒྱུར་བ་ཤེས་རབ་ཡིན། །སྣ་འདྲེན་ཡང་དག་ལྟ་ཞེས་བྱ། །སྐྱེས་པའམ་བུད་མེད་གང་ལའང་རུང་། །བཞོན་པ་འདི་འདྲ་ཡོད་གྱུར་ཅིང་། །དེ་འདྲའི་བཞོན་པ་ཞོན་གྱུར་ན། །དེ་ནི་འཇིགས་མེད་ཕྱོགས་སུ་འགྲོ། །དེ་ནས་བཅོམ་ལྡན་འདས་ཀྱིས་སྔོན་དགེ་སློང་ལྷའི་བུའི་བསམ་པ་དང་བག་ལ་ཉལ་དང་། ཁམས་དང་། རང་བཞིན་ཐུགས་སུ་ཆུད་ནས་གང་ཐོས་ནས་དགེ་སློང་ལྷའི་བུས་སྟན་དེ་ཉིད་ལ་འདུག་བཞིན་དུ་འཇིགས་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟ་བུར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་མཛད་དོ། །དེས་བདེན་པ་མཐོང་ནས་བཙུན་པ་བཅོམ་ལྡན་འདས་ཀྱིས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས། རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་། བྲམ་ཟེ་དག་གིས་ཀྱང་མ་བགྱིས། བྱམས་པ་དང་། མཛའ་བཤེས་དང་། རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་། དུད་འགྲོ་དང་། ཡི་དགས་དག་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག་གོ། །
ཞེས་ལན་གསུམ་ཆེད་དུ་བརྗོད་པ་ཆེད་དུ་བརྗོད་དོ། །ཡང་སྨྲས་པ། ཁྱོད་མཐུས་རབ་དྲག་ཉེས་པ་མང་ལྡན་པའི། །ངན་སོང་ཤུལ་བཀག་བསོད་ནམས་རབ་ལྡན་པའི། །མཐོ་རིས་འགྲོ་བ་ཕྱེ་ཞིང་བདག་གིས་ནི། །མྱ་ངན་འདས་པའི་ཤུལ་ཡང་ཐོབ་པར་གྱུར། །ཤིན་ཏུ་རྣམ་དག་ཁྱོད་བརྟེན་བདག་གིས་ནི། །དེ་རིང་སྐྱོན་བྲལ་དག་པའི་མིག་འཐོབ་ཅིང་། །གོ་འཕང་ཞི་བ་འཕགས་པ་དགྱེས་ཐོབ་སྟེ། །སྡུག་བསྔལ་རྒྱ་མཚོའི་ཕ་རོལ་རྒལ་བར་གྱུར། །འགྲོ་བར་ལྷ་མིན་མི་དང་ལྷས་མཆོད་པ། །སྐྱེ་དང་རྒ་དང་ན་འཆི་བྲལ་བ་པོ། །སྲིད་པ་སྟོང་དུ་མཐོང་བ་རབ་དཀོན་ན། །ཐུབ་པ་དེ་རིང་ཁྱོད་མཐོང་འབྲས་བུ་མཆིས། །དེ་ནས་གདུད་བྱས་དོ་ཤལ་རབ་འཕྱང་བས། །ཞབས་ལ་ཕྱག་འཚལ་རངས་པ་སྐྱེས་གྱུར་ནས། །དགྲ་ཐུལ་གཡས་ནས་ཡོངས་སུ་བསྐོར་བྱས་ཏེ། །ལྷ་ཡི་འཇིག་རྟེན་མངོན་ཕྱོགས་མཁའ་ལ་སོང་། །དེ་ནས་སྔོན་དགེ་སློང་ལྷའི་བུ་ཚོང་པ་ཁེ་སྤོགས་རྙེད་པ་ལྟ་བུ་དང་། ཞིང་པ་ལོ་ཏོག་འབྱོར་པ་ལྟ་བུ་དང་། དཔའ་བོ་གཡུལ་ལས་རྣམ་པར་རྒྱལ་བ་ལྟ་བུ་དང་། ནད་པ་ནད་ཐམས་ཅད་ལས་ཡོངས་སུ་ཐར་བ་ལྟ་བུར་གྱུར་ཏེ། ཆ་ལུགས་གང་གིས་བཅོམ་ལྡན་འདས་ཀྱི་སྤྱན་སྔར་འོངས་པའི་ཆ་ལུགས་དེ་ཉིད་ཀྱིས་རང་གི་གནས་སུ་སོང་ངོ་། །ཇི་ཙམ་ན་མཚན་མོ་ནམ་ནངས་ནས་ཁང་སྐྱོང་གིས་སྒོ་ཕྱེ་སྟེ་ཕྱགས་མ་ཐོགས་ནས་སྒོ་ཁང་ཕྱག་པར་བརྩམས་པ་དང་། དེ་སྐྱིལ་མོ་ཀྲུང་གིས་འདུག་པ་མཐོང་ནས་དེས་སྨྲས་པ། ཚེ་དང་ལྡན་པ་ལོངས་ཤིག །ཅི་ཁྱོད་ཀྱང་སྔར་བསམ་གཏན་བྱེད་པ་ཡིན་ནམ། དེ་ཚིག་མི་སྨྲ་ནས། དེས་དེའི་ལག་པ་གཉིས་ནས་བཟུང་སྟེ་བསྒུལ་བར་བརྩམས་པ་དང་། ཇི་ཙམ་ན་དུས་ལ་བབ་པར་མཐོང་ངོ་། །དེས་འདི་ཅི་ཞིག་གིས་དུས་ལ་བབ་ཅེས་བརྟག་པར་བརྩམས་པ་དང་། ཇི་ཙམ་ན་ཁྲི་འོག་ན་སྦྲུལ་དུག་མྱུར་དུ་ཁྱབ་པར་བྱེད་པ་འདུག་པ་མཐོང་ནས་དེ་སྔངས་ཏེ། དགེ་སློང་རྣམས་ཀྱི་གན་དུ་སོང་སྟེ་སྨྲས་པ། ཚེ་དང་ལྡན་པ་དག་དགེ་སློང་སྒོ་ཁང་དུ་ཉལ་བ་གང་ཡིན་པ་དེ་སྦྲུལ་དུག་མྱུར་དུ་ཁྱབ་པར་བྱེད་པས་བཟུང་སྟེ་དུས་ལ་བབ་བོ། །དགེ་སློང་རྣམས་ཀྱིས་དེ་དུར་ཁྲོད་དུ་བསྐྱལ་ཏེ་
བསྲེགས་ནས་ཕྱིར་ལྷགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ། ཉེས་དམིགས་གང་ཅུང་ཟད་ཅི་བྱུང་བ་དེ་ཐམས་ཅད་དགེ་སློང་དག་ཁྲི་དམའ་བ་ལ་མལ་འཆའ་ཞིང་དེའི་མདུན་དུ་རྐང་པ་གཉིས་འཁྲུས་པ་ལས་གྱུར་པ་ཡིན་ནོ། །སྙམ་དུ་དགོངས་ནས་བཀའ་སྩལ་པ། དེ་ལྟ་བས་ན་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱ་ཞིང་ཁྲིའི་མདུན་དུ་རྐང་པ་གཉིས་བཀྲུ་བར་མི་བྱའོ། །བཅོམ་ལྡན་འདས་ཀྱིས་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱ་ཞིང་ཁྲིའི་མདུན་དུ་རྐང་པ་གཉིས་བཀྲུ་བར་མི་བྱའོ། །ཞེས་བཀའ་སྩལ་ནས་དགེ་སློང་གཞན་དག་ལ་མཆིལ་ལྷམ་མི་བདོག་པ་དེ་དག་ལ་གནོད་པར་གྱུར་ནས་བཅོམ་ལྡན་འདས་ཀྱིས་བཀའ་སྩལ་པ། གང་དག་ལ་མཆིལ་ལྷམ་མི་བདོག་པ་དེ་དག་གིས་མགོ་ལོགས་དང་རྐང་པ་ལོགས་སུ་རྐང་པ་གཉིས་བཀྲུ་བར་བྱ་སྟེ་འདི་ལ་འགྱོད་པར་མི་བྱའོ། །དྲུག་སྡེ་དག་གིས་དགེ་སློང་ཁྲི་དམའ་བ་ལ་ཉལ་བ་སྦྲུལ་དུག་མྱུར་དུ་ཁྱབ་པར་བྱེད་པས་ཟིན་ཏེ་དུས་ལ་བབ་ནས་བཅོམ་ལྡན་འདས་ཀྱིས་དགེ་སློང་གིས་ཁྲི་དམའ་བ་ལ་མལ་བཅའ་བར་མི་བྱའོ། །ཞེས་བཀག་པ་ཐོས་ནས་དེ་དག་གིས་ཁྲི་རྐང་པ་ཁྲུ་བཅུ་གཉིས་པ་བཅས་ཏེ་ཡ་གད་མཐོན་པོ་བཙུགས་པ་དང་། དགེ་སློང་རྣམས་ཀྱིས་དེ་དག་ལ་སྨྲས་པ། ཚེ་དང་ལྡན་པ་དག་ཅི་ཁྱེད་ཅག་བྱ་ར་བྱེད་དམ། དེ་དག་གིས་སྨྲས་པ། སུ་ཞིག་བྱ་ར་བྱེད། ཁྱེད་ཀྱིས་དགེ་སློང་སྦྲུལ་དུག་མྱུར་དུ་ཁྱབ་པར་བྱེད་པས་ཟིན་ཏེ་དུས་ལ་བབ་པ་མ་མཐོང་ངམ་ཅི། ཁྱེད་དྲུག་སྡེ་དག་ཀྱང་སྦྲུལ་དུག་མྱུར་དུ་ཁྱབ་པར་བྱེད་པས་བཟུང་སྟེ་དུས་ལ་བབ་ཅིང་། ཁོ་བོ་ཅག་ཤི་བའི་ཡོ་བྱད་དག་འགེད་པར་འདོད་དམ། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་བཟློག་པ་ན་དེ་དང་། དེ་སྐད་ཟེར་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་
དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་དགེ་སློང་རྣམས་ཀྱིས་བཟློག་པ་ན་དེ་དང་དེ་སྐད་ཟེར་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ། ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་དགེ་འདུན་གྱི་ཁྲིའམ་ཁྲིའུ་བྱེད་དུ་འཇུག་ན་རྩ་བ་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །ཚེ་དང་ལྡན་པ་འཆར་ཀ་ཚད་ལས་ཤིན་ཏུ་འདས་པ་ཡིན་པས་དེའི་པུས་མོ་གཉིས་ཀོ་སྐོ་ལ་རེག་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་བུ་གར་གཞུག་པ་མ་གཏོགས་སོ། །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས། དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་
པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་དགེ་འདུན་གྱི་ཁྲིའམ། ཁྲིའུ་བྱེད་དུ་འཇུག་ན་རྩ་བ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཁྲིའམ་ཞེས་བྱ་བ་ནི་ཁྲི་ཉིད་ཀྱིའོ། །ཁྲིའུ་ཞེས་བྱ་བ་ཡང་ཁྲིའུ་ཉིད་དོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ། གཞན་ནོ། །རྩ་བ་བུ་གར་གཞུག་པ་མ་གཏོགས་པར་ཞེས་བྱ་བ་ནི་རྩ་བ་བུ་གར་གཞུག་པ་བཞག་སྟེའོ། །བདེ་བར་གཤེགས་པའི་སོར་བརྒྱད་ཀྱི་ཚད་དུ་བྱེད་དུ་གཞུག་པར་བྱའོ་ཞེས་བྱ་བ་ལ་བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་སོར་བརྒྱད་གང་དག་ཡིན་པ་དེ་ལ་ནི་ཚད་དང་ལྡན་པའི་ཁྲུ་གང་ངོ་། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་ཁྲིའམ། ཁྲིའུ་རྩ་བ་བུ་གར་གཞུག་པ་མ་གཏོགས་པར་བདེ་བར་གཤེགས་པའི་སོར་བརྒྱད་ཀྱི་ཚད་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ་ལས་དང་པོ་པ་དང་སྨྱོས་པ་དང་། སེམས་འཁྲུགས་པ་དང་།
ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཁྲི་རྐང་འཆོས་པའི་ལྟུང་བྱེད་དེ་བརྒྱད་བཅུ་རྩ་ལྔ་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཉེ་དགའ་གསར་བུ་ཡིན་པས་དེའི་ཁྲི་ཐོབ་བོ་ཅོག་ཆེས་རྒན་པས་ཕྲོགས་ཤིང་གནས་མལ་སྐོ་བའི་དུས་ལ་ཡང་བབ་ནས་དེས་བསམས་པ། གང་གིས་བདག་གི་ཁྲི་མི་ཕྲོགས་པའི་ཐབས་དེ་ལྟ་བུ་ཅི་ཡོད་སྙམ་པ་དང་། དེས་བྱ་བ་འགའ་ཞིག་གི་ཕྱིར་ཤིང་བལ་དག་ཀྱང་བླངས་ནས་དེ་ལ་བློ་སྐྱེས་པ། ཤིང་བལ་གྱིས་བདལ་ཏེ་བཞག་གོ་སྙམ་ནས་དེས་ཁྲིའི་སྟེང་དུ་ཤིང་བལ་བདལ་ཏེ་བཞག་གོ །ཇི་ཙམ་ན་དགེ་སློང་ཆེས་རྒན་པ་ཞིག་འོངས་ནས་དེས་སྨྲས་པ། ཚེ་དང་ལྡན་པ་འདི་སུའི། ཉེ་དགའས་སྨྲས་པ། ཁོ་བོའི་ཤིང་བལ་ལོ། །དེ་ནས་དགེ་སློང་ཞིག་འདུག་པ་དེས་སྨྲས་པ། ཉེ་དགའ་ཇི་སྐད་ཟེར་བ་དེ་བཞིན་ཏེ། ཤིང་བལ་ནི་ཉེ་དགའི་ཡིན་ནོ། །འདི་ལྟར་ཁྲི་ནི་དགེ་འདུན་གྱི་ཡིན་ནོ། །དེ་སྐད་ཅེས་སྨྲས་པ་དང་། ཉེ་དགའ་ཁྲོས་ནས་དེས་ཤིང་བལ་ཁྱེར་ཏེ་ཁྲི་དེའི་སྟེང་དུ་ཤིང་བལ་ཅུང་ཟད་ཅུང་ཟད་བདལ་ཏེ་བཞག་གོ །དགེ་སློང་དེས་སོ་སོར་མ་བརྟགས་པ་ཉིད་དུ་དེར་ཉལ་ནས་མཚན་མོ་ནམ་ནངས་ཏེ་ལངས་པ་དང་གོས་ཐམས་ཅད་ཤིང་བལ་གྱིས་སྐྱ་བོར་གྱུར་ནས་དགེ་སློང་རྣམས་ཀྱིས་དེ་ལ་སྨྲས་པ། ཅི་ཁྱོད་གཡུལ་གྱི་གཞིར་ཉལ་ལམ། དེས་ཇི་ལྟར་གྱུར་པ་བརྗོད་པ་དང་། དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་ཁྲིའམ། ཁྲིའུ་ལ་ཤིང་བལ་བདལ་ཏེ་འཇོག་པར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ། །ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་
ཚེ་དང་ལྡན་པ་ཉེ་དགའ་ལ་རྨས་པ། ཉེ་དགའ་ཁྱོད་དགེ་འདུན་གྱི་ཁྲི་ལ་ཤིང་བལ་བདལ་ཏེ་འཇོག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ། །ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས། དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་འདུན་གྱི་ཁྲིའམ་ཁྲིའུ་ལ་ཤིང་བལ་འདལ་ལམ། འདལ་དུ་འཇུག་ན་བསྡུས་ནས་ལྟུང་བྱེད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །ཁྲིའམ་ཞེས་བྱ་བ་ནི་ཁྲི་ཉིད་དོ། །ཁྲིའུ་ལ་ཞེས་བྱ་བ་ཡང་ཁྲིའུ་ཉིད་ལའོ། །ཤིང་བལ་ཞེས་བྱ་བ་ནི་ལྔ་པོ་ཤལ་མ་ལིའི་དང་། ཨ་ཀའི་དང་། ཀ་ཤའི་དང་། བུ་ཀའི་དང་། ཨེ་ར་ཀའི་ཤིང་བལ་དག་ལས་གང་ཡང་རུང་བའོ། །བདལ་ལམ་ཞེས་བྱ་བ་ནི་བདག་ཉིད་ཀྱིས་སོ། །བདལ་དུ་འཇུག་ན་ཞེས་བྱ་བ་ནི་གཞན་ནོ། །བསྡུས་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བསྡུས་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དགེ་འདུན་གྱི་
ཁྲིའམ་ཁྲིའུ་ལ་ཤིང་བལ་འདལ་ལམ་འདལ་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བསྡུས་སམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །ཤིང་བལ་གྱིས་གོས་པར་བྱས་པའི་ལྟུང་བྱེད་དེ། བརྒྱད་བཅུ་རྩ་དྲུག་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ནས། དགེ་སློང་དག་ཚད་ལས་ཧ་ཅང་ལྷག་པ་བྱེད་དུ་འཇུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་ཚད་ལས་ཧ་ཅང་ལྷག་པར་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང་གིས་གདིང་བ་བྱེད་དུ་གཞུག་གོ་ཞེས་བཀའ་སྩལ་ན། ཁྱེད་ཅག་ཚད་ལས་ཧ་ཅང་ལྷག་པར་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང་། ཆོག་མི་ཤེས་པ་དང་། གསོ་དཀའ་བ་དང་། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང་། ཆོག་ཤེས་པ་དང་། གསོ་
སླ་བ་དང་། དགང་སླ་བ་དང་། ཕྲི་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། མཛེས་པ་དང་། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། །ཞེང་དུ་མཐོ་ཕྱེད་དང་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ། །ཚེ་དང་ལྡན་པ་འཆར་ཀ་ཚད་ལས་ཧ་ཅང་ལྷག་པས་དེའི་གདིང་བ་དེས་མི་ཆོག་ནས་དེས་གནས་མལ་སྲུང་བའི་ཕྱིར་རྐང་པའི་མཐའ་ལོགས་སུ་ལོ་མའི་ཆུན་པོ་དག་བཞག་གོ །སངས་རྒྱས་བཅོམ་ལྡན་འདས་འཚོ་ཞིང་བཞུགས་ལ་གསོན་ཞིང་གཞེས་པ་རྣམས་ཀྱི་ཆོས་ཉིད་ནི་གདུལ་བར་གྱུར་པའི་སྐྱེ་བོ་ལ་རྗེས་སུ་ཐུགས་བརྩེ་བས་དུས་དང་དུས་སུ་སེམས་ཅན་དམྱལ་བ་རྒྱུར་གཤེགས་པ་དང་། དུད་འགྲོ་རྒྱུ་བ་དང་། ཡི་དགས་རྒྱུ་བ་དང་། ལྷ་རྒྱུ་བ་དང་། ལྗོངས་རྒྱུ་བ་དང་། ཆུ་ཀླུང་རྒྱུ་བ་དང་། རི་རྒྱུ་བ་དང་། དུར་ཁྲོད་རྒྱུ་བ་དང་། གཙུག་ལག་ཁང་རྒྱུར་གཤེགས་པས་དོན་འདིར་ནི་སངས་རྒྱས་བཅོམ་ལྡན་འདས་གཙུག་ལག་ཁང་རྒྱུར་གཤེགས་པར་བཞེད་ནས་བཅོམ་ལྡན་འདས་ཚེ་དང་ལྡན་པ་འཆར་ཀའི་གཙུག་ལག་ཁང་ག་ལ་བ་དེར་གཤེགས་སོ། །བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀའི་རྐང་པའི་མཐའ་ལོགས་ན་ལོ་མའི་ཆུན་པོ་དག་བཞག་པ་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་འདི་སུའི་མལ། བཙུན་པ་ཚེ་དང་ལྡན་པ་འཆར་ཀའིའོ། །འོ་ན་ཅིའི་ཕྱིར་རྐང་པའི་མཐའ་ལོགས་སུ་ལོ་མའི་ཆུན་པོ་དག་བཞག །བཙུན་
པ་བཅོམ་ལྡན་འདས་ཀྱིས་དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་མཐོ་ཕྱེད་དང་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་ནས་ཚེ་དང་ལྡན་པ་འཆར་ཀ་ཚད་ལས་ཧ་ཅང་ལྷག་པས་དེའི་གདིང་བ་དེས་མི་འཚལ་ནས་དེས་གནས་མལ་སྲུང་བའི་སླད་དུ་སུག་པའི་མཐའ་ལོགས་སུ་ལོ་མའི་ཆུན་པོ་དག་བཞག་གོ །ཀུན་དགའ་བོ་དེ་ལྟ་བས་ན་སྲིད་དུ་མཐོ་གང་གིས་སྲིངས་ཤིག །དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་། བསླབ་པ་ལ་གུས་པ་དང་། བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་། དེའི་ཤས་ཆེ་བ་དང་། དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ་དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གདིང་བ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་མཐོ་ཕྱེད་དང་དོའོ། །སྲིད་དུ་མཐོ་གང་གིས་སྲིངས་ཤིག །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །གདིང་བ་ཞེས་བྱ་བ་ནི་སྟེང་རིམ་དུ་གདིང་བའོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་འཇུག་ཅེས་བྱ་བ་ནི་གདིང་བའི་ཚད་གང་ཡིན་པ་དེ་བཞིན་དུའོ། །དེ་ལ་གདིང་བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དོ། ཞེང་དུ་མཐོ་ཕྱེད་དང་དོ་ཞེས་བྱ་བ་ལ་སྲིད་དུ་ཞེས་བྱ་བ་ནི་ཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་མོ། །ཞེང་དུ་ཞེས་བྱ་བ་ནི་རྒྱར་རོ། །མཐོ་ཕྱེད་དང་
ངོ་ཞེས་བྱ་བ་ལ་བདེ་བར་གཤེགས་པའི་མཐོ་ཕྱེད་དང་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དོ་དང་སོར་དྲུག་གོ །སྲིད་དུ་མཐོ་གང་གིས་སྲིངས་ཤིག་ཅེས་བྱ་བ་ནི་མི་ཆོག་ན་སྲིད་དུ་བདེ་བར་གཤེགས་པའི་མཐོ་གང་གིས་བསྲིང་བ་སྟེ། བདེ་བར་གཤེགས་པའི་མཐོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་ཕྱེད་དང་དོ་སྟེ། དེས་ན་གདིང་བའི་སྲིད་ཀྱི་ཚད་ནི་ཚད་དང་ལྡན་པའི་ཁྲུ་ཕྱེད་དང་ལྔའོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་སྤངས་པའི་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གདིང་བའི་སྲིད་དུ་ཁྲུ་ཕྱེད་དང་ལྔ། ཞེང་དུ་ཁྲུ་དོ་དང་སོར་དྲུག་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གདིང་བ་ལས་གྱུར་པའི་ལྟུང་བྱེད་དེ་བརྒྱད་བཅུ་རྩ་བདུན་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་གཡན་པ་དགབ་པ་བྱེད་དུ་གཞུག་གོ་ཞེས་བཀའ་སྩལ་པ། དགེ་སློང་དག་ཚད་ལས་ཧ་ཅང་ལྷག་པ་བྱེད་དུ་འཇུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་གཡན་པ་དགབ་པ་བྱེད་དུ་
གཞུག་གོ་ཞེས་བཀའ་སྩལ་ནས། དགེ་སློང་དག་ཅིའི་ཕྱིར་ཚད་ལས་ཧ་ཅང་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང་གིས་གཡན་པ་དགབ་པ་བྱེད་དུ་གཞུག་གོ་ཞེས་བཀའ་སྩལ་ན། ཁྱེད་ཅག་ཚད་ལས་ཧ་ཅང་ལྷག་པ་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང་། ཆོག་མི་ཤེས་པ་དང་། གསོ་དཀའ་བ་དང་། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང་། ཆོག་ཤེས་པ་དང་། གསོ་སླ་བ་དང་། དགང་སླ་བ་དང་། ཕྲི་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། མཛེས་པ་དང་། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་གཡན་པ་དགབ་པ་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག །དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི། ཞེང་དུ་མཐོ་དོའོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །གཡན་པ་དགབ་པ་ཞེས་བྱ་བ་ནི་ན་བའི་གོས་སོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་ཆུག་ཤིག་ཅེས་བྱ་བ་ནི་གཡན་
པ་དགབ་པའི་ཚད་གང་ཡིན་པ་དེ་བཞིན་དུའོ། །དེ་ལ་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་བཞི། ཞེང་དུ་མཐོ་དོའོ་ཞེས་བྱ་བ་ལ། སྲིད་དུ་ཞེས་བྱ་བ་ནི་ཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་བཞི་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དྲུག་གོ །ཞེང་དུ་ཞེས་བྱ་བ་ནི་རྒྱར་རོ། །མཐོ་དོའོ་ཞེས་བྱ་བ་ལ། བདེ་བར་གཤེགས་པའི་མཐོ་དོ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་མོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད་ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་གཡན་པ་དགབ་པ་སྲིད་དུ་ཁྲུ་དྲུག །ཞེང་དུ་ཁྲུ་གསུམ་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱི་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པ་མ་ཡིན་པས་ཡང་བཤགས་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གཡན་པ་དགབ་པ་ལས་གྱུར་པའི་ལྟུང་བྱེད་དེ། བརྒྱད་བཅུ་རྩ་བརྒྱད་པ་རྫོགས་སྷོ།། །།སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ནས། དགེ་སློང་དག་ཧ་ཅང་ཚད་ལས་ལྷག་པ་བྱེད་དུ་འཇུག་ནས་དགེ་
སློང་དོན་ཉུང་ངུ་དག་བཅོམ་ལྡན་འདས་ཀྱིས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ན། ཅིའི་ཕྱིར་དགེ་སློང་དག་ཧ་ཅང་ཚད་ལས་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་ལ་རྨས་པ། དགེ་སློང་དག་ངས་དགེ་སློང་གིས་དབྱར་གྱི་གོས་རས་ཆེན་བྱེད་དུ་གཞུག་གོ་ཞེས་བཀའ་སྩལ་ན་ཁྱེད་ཚད་ལས་ཧ་ཅང་ལྷག་པ་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་འདོད་པ་ཆེ་བ་དང་། ཆོག་མི་ཤེས་པ་དང་། གསོ་དཀའ་བ་དང་། དགང་དཀའ་བ་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་འདོད་པ་ཆུང་བ་དང་། ཆོག་ཤེས་པ་དང་། གསོ་སླ་བ་དང་། དགང་སླ་བ་དང་། ཕྲི་བ་དང་། ཡོ་བྱད་བསྙུངས་པ་དང་། སྦྱངས་པའི་ཡོན་ཏན་དང་། མཛེས་པ་དང་། དྲོད་རིག་པ་ཉིད་ཀྱི་བསྔགས་པ་བརྗོད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་གིས་དབྱར་གྱི་གོས་རས་ཆེན་བྱེད་དུ་འཇུག་ན་ཚད་བཞིན་དུ་བྱེད་དུ་ཆུག་ཤིག །དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དྲུག །ཞེང་དུ་མཐོ་ཕྱེད་དང་གསུམ་མོ། །དེ་ལས་ལྷག་པ་བྱེད་དུ་འཇུག་ན་བཅད་ནས་ལྟུང་བྱེད་དོ། །དགེ་སློང་གིས་ཞེས་བྱ་བ་ནི་ཆོས་འདི་པས་སོ། །དབྱར་གྱི་གོས་རས་ཆེན་
ཞེས་བྱ་བ་ནི་ཆར་པ་སྐྱོབ་པའི་གོས་སོ། །བྱེད་དུ་འཇུག་ན་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །ཚད་བཞིན་དུ་བྱེད་དུ་ཆུག་ཤིག་ཅེས་བྱ་བ་ནི་དབྱར་གྱི་གོས་རས་ཆེན་གྱི་ཚད་གང་ཡིན་པ་དེ་བཞིན་དུའོ། །དེ་ལ་དབྱར་གྱི་གོས་རས་ཆེན་གྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོའི་མཐོ་དྲུག །ཞེང་དུ་མཐོ་ཕྱེད་དང་གསུམ་མོ་ཞེས་བྱ་བ་ལ་སྲིད་དུ་ཞེས་བྱ་བ་ནི་ཆུར་རོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་མཐོའི་མཐོ་དྲུག་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དགུའོ། །ཞེང་དུ་ཞེས་བྱ་བ་ནི་རྒྱར་རོ། །མཐོ་ཕྱེད་དང་གསུམ་མོ་ཞེས་བྱ་བ་ལ། བདེ་བར་གཤེགས་པའི་མཐོ་ཕྱེད་དང་གསུམ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་གསུམ་དང་སོར་བཅྭ་བརྒྱད་དོ། །དེ་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེ་ལས་གོང་མའོ། །བཅད་ནས་ལྟུང་བྱེད་དོ་ཞེས་བྱ་བ་ནི་དངོས་པོ་དེ་བཅད་ནས་ལྟུང་བྱེད་ཀྱི་ལྟུང་བ་བཤགས་པར་བྱ་བའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན། དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་དབྱར་གྱི་གོས་རས་ཆེན་སྲིད་དུ་ཁྲུ་དགུ་དང་། ཞེང་དུ་ཁྲུ་གསུམ་དང་སོར་བཅྭ་བརྒྱད་ལས་ལྷག་པ་བྱེད་དུ་འཇུག་ན་ཐམས་ཅད་དུ་ལྟུང་བྱེད་དུ་འགྱུར་རོ། །གང་གི་མདུན་དུ་འཆགས་པར་བྱེད་པ་དེས་ཁྱོད་ཀྱིས་དངོས་པོ་དེ་བཅད་དམ་ཞེས་དྲི་བར་བྱའོ། །མ་དྲིས་པར་འཆགས་པ་དང་དུ་ལེན་པར་བྱེད་ན་ཉེས་བྱས་སུ་འགྱུར་རོ། །ལྟུང་བ་དེ་ཡང་མ་བཤགས་པ་ཡིན་པས་ཡང་བཤགས་པར་བྱའོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དབྱར་གྱི་རས་ཆེན་ལས་གྱུར་པའི་ལྟུང་བྱེད་དེ། བརྒྱད་བཅུ་རྩ་དགུ་པ་རྫོགས་སྷོ།། །།སངས་རྒྱས་བཅོམ་ལྡན་
འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཚེ་དང་ལྡན་པ་ཉེ་དགའ་བཟོ་མཁན་གྱི་གན་དུ་སོང་སྟེ། ཡུད་ཙམ་ཞིག་གཏམ་འདྲེ་བས་འདུག་ནས་སྨྲས་པ། བཞིན་བཟངས་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་འཚེམ་ནུས་སམ། དེས་སྨྲས་པ། འཕགས་པ་ཁྱོད་ལ་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་ཀྱིས་ཅི་བྱ། དེས་སྨྲས་པ། བཀྲེན་པ་ཁྱོད་ལ་འདིར་ཅི་འགོད། གལ་ཏེ་གླ་འདོད་ན་ཚེམས་ཤིག །དེས་བསམས་པ། འདི་ཟེར་བ་མ་ཉེས་ཏེ། བདག་ལ་འདིར་ཅི་འགོད། བདག་ལ་གླ་དགོས་ཀྱིས་བཙེམ་མོ་སྙམ་དུ་རིག་ནས་སྨྲས་པ། འཕགས་པ་བཙེམ་མོ། །དེས་དེ་ལ་རས་དང་གླ་བྱིན་པ་དང་། དེས་དེ་བཙེམས་སོ། །ཉེ་དགའ་དེ་ལས་ཅུང་ཞིག་གྱོན་ཏེ་ལྷག་མ་ཕྲག་པས་ཁྱེར་ཏེ་འཕགས་པ་དང་། དེ་དགེ་སློང་ཞིག་གིས་མཐོང་ནས་དེས་སྨྲས་པ། གནས་བརྟན་གཏུར་བུ་གཟིགས་ཤིག་དང་། ངལ་སོར་གཞུག་གོ །ཉེ་དགའས་སྨྲས་པ། ཚེ་དང་ལྡན་པ་འདི་གཏུར་བུ་མ་ཡིན་ནོ། །འོ་ན་ཅི་ལགས། བདེ་བར་གཤེགས་པའི་ཆོས་གོས་སོ། །གནས་བརྟན་ཁྱོད་བདེ་བར་གཤེགས་པའི་ཆོས་གོས་གྱོན་དུ་རུང་ངམ། དགྲ་བོ་དག་གི་གཉའ་བ་རྡོག་པས་མནན་ན་རུང་ངོ་། །གནས་བརྟན་ལ་ཡང་དགྲ་བོ་དག་ཡོད་དམ། ཇེ་དང་པོར་ཁྱོད་ཁོ་བོའི་དགྲ་བོའི་ཐུ་བོ་ཡིན་ཏེ། དེས་ན་ཁོ་བོ་བདེ་བར་གཤེགས་པའི་ཆོས་གོས་གྱོན་པ་མི་བཟོད་དོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་འཆང་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་
དགའ་ལ་རྨས་པ། ཉེ་དགའ་ཁྱོད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ་རྗེས་སུ་མཐུན་པ་མ་ཡིན་པ་རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བར་མཛད་དོ། །བཅོམ་ལྡན་འདས་ཀྱིས་ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་པ་དང་། ཚེ་དང་ལྡན་པ་ཉེ་དགའས་ལྷག་པ་བྱེད་དུ་བཅུག་ནས་དགེ་སློང་དོན་ཉུང་ངུ་དག་བཅོམ་ལྡན་འདས་ཀྱིས་ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་བྱེད་དུ་འཇུག་ན་ལྟུང་བྱེད་དོ་ཞེས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་ན། ཅིའི་ཕྱིར་དགེ་སློང་དག་དེ་བས་ལྷག་པ་བྱེད་དུ་འཇུག་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ། འདི་ནི་རྗེས་སུ་བཅས་པ་ཡིན་ཏེ། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་
གོས་བྱེད་དུ་འཇུག་གམ། བདེ་བར་གཤེགས་པའི་ཆོས་གོས་ལས་ལྷག་པ་བྱེད་དུ་འཇུག་ན་ལྟུང་བྱེད་དོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཅུ། ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །བདེ་བར་གཤེགས་པ་ཞེས་བྱ་བ་ནི་སྟོན་པའོ། །དེའི་ཆོས་གོས་ཀྱི་ཚད་ཀྱི་ཞེས་བྱ་བ་ནི་བདེ་བར་གཤེགས་པའི་ཆོས་གོས་ཀྱི་ཚད་གང་ཡིན་པ་དེའིའོ། །ཆོས་གོས་ཞེས་བྱ་བ་ནི་བདུན་པོ་བལ་གོས་དང་། ཤ་ནའི་གོས་དང་། ཟར་མའི་གོས་དང་། ཀོ་ཏམ་པའི་གོས་དང་། དུ་གུ་ལའི་གོས་དང་། རས་བལ་གྱི་གོས་དང་། ཉི་འོག་གི་གོས་དག་ལས་གང་ཡང་རུང་བའོ། །བྱེད་དུ་འཇུག་གམ་ཞེས་བྱ་བ་ནི་བདག་ཉིད་ཀྱིས་སམ་གཞན་ནོ། །བདེ་བར་གཤེགས་པའི་ཆོས་གོས་ལས་ལྷག་པ་བྱེད་དུ་འཇུག་ན་ཞེས་བྱ་བ་ནི་དེའི་གོང་མའོ། །ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་། དུད་འགྲོ་དང་། ཡི་དགས་ངན་སོང་དང་། ངན་འགྲོ་དང་། ལོག་པར་ལྟུང་བ་དག་ཏུ་སྲེག་པར་བྱེད། འཚོད་པར་བྱེད། ལྟུང་བར་བྱེད་པའོ། །གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ། དེས་ན་ལྟུང་བྱེད་དོ་ཞེས་གསུངས་སོ། །དེ་ལ་བདེ་བར་གཤེགས་པའི་ཆོས་གོས་ཀྱི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཅུ། ཞེང་དུ་མཐོ་དྲུག་སྟེ། དེ་ལ་འདི་ནི་བདེ་བར་གཤེགས་པའི་ཆོས་གོས་ཀྱི་ཚད་དོ་ཞེས་བྱ་བ་ལ། བདེ་བར་གཤེགས་པའི་མཐོ་བཅུ་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་བཅྭ་ལྔའོ། །བདེ་བར་གཤེགས་པའི་མཐོ་དྲུག་གང་ཡིན་པ་དེ་ལ་ནི་ཚད་དང་ལྡན་པའི་ཁྲུ་དགུའོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་བདེ་བར་གཤེགས་པའི་ཆོས་གོས་ཀྱི་ཚད་ཀྱི་ཆོས་གོས་སམ། བདེ་བར་གཤེགས་པའི་ཆོས་གོས་ལས་ལྷག་པའི་ཆོས་གོས་བྱེད་དུ་འཇུག་
ན་ཐམས་ཅད་དུ་ལྟུང་བྱེད་དུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དེ་དགུ་བཅུ་པ་རྫོགས་སྷོ།། །།ལྟུང་བྱེད་འབའ་ཞིག་ཏུ་འགྱུར་བ་རྣམས་རྫོགས་སྷོ།། །།