སོ་སོར་བཤགས་པར་བྱ་བའི་སྡེ་བཤད་པ།
འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་པ། སྡོམ་ལ། གྲོང་དང་ཁྱིམ་གཞན་ཉིད་དང་ནི། །བསླབ་པ་རྣམས་དང་དགོན་པ་ནི། །སངས་རྒྱས་ཕན་པ་གསུང་བ་ཡིས། །སོ་སོར་བཤགས་པར་བྱ་བར་གསུངས། །སངས་རྒྱས་བཅོམ་ལྡན་འདས་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ། །རྡོ་འཇོག་ན་ཁྱིམ་བདག་ཕྱུག་པ། ནོར་མང་བ། ལོངས་སྤྱོད་ཆེ་བ། ཡོངས་སུ་གཟུང་བ་ཡངས་ཤིང་རྒྱ་ཆེ་བ། རྣམ་ཐོས་ཀྱི་བུའི་ནོར་དང་ལྡན་པ། རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས། དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་བུ་མོ་གཟུགས་བཟང་བ། བལྟ་ན་སྡུག་པ། མཛེས་པ། མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བ་ཞིག་བྱུང་ངོ་། །དེའི་ཉེ་དུ་དག་འདུས་ཤིང་ལྷགས་ནས་ཞག་བདུན་གསུམ་ཉི་ཤུ་གཅིག་ཏུ་བཙས་པའི་བཙས་སྟོན་རྒྱ་ཆེར་བྱས་ནས་བུ་མོ་འདིའི་མིང་ཅིར་གདགས་ཞེས་དེའི་མིང་འདོགས་པར་བྱེད་དོ། །ཉེ་དུ་དག་གིས་སྨྲས་པ། གང་གི་ཕྱིར་བུ་མོ་འདི་མིག་ཨུཏྤ་ལ་དང་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེ་འབྲུའི་མདོག་འདྲ་བ་དེའི་ཕྱིར་བུ་མོ་འདིའི་མིང་ཨུཏྤ་ལའི་མདོག་ཅེས་བྱ་བར་གདགས་སོ་ཞེས་དེའི་མིང་ཨུཏྤ་ལའི་མདོག་ཅེས་བྱ་བར་བཏགས་སོ། །དེ་བསྲིངས་ཤིང་བསྐྱེད་ནས་ཆེན་མོར་གྱུར་ཏོ། །དེའི་ཕ་ལ་བུ་མེད་ནས་དེས་བསམས་པ། བདག་གིས་བུ་མོ་འདི་སུ་ལ་ཡང་རིགས་ཀྱི་ཕྱིར་ཡང་མི་སྦྱིན། ནོར་གྱི་ཕྱིར་ཡང་མི་སྦྱིན། གཟུགས་ཀྱི་ཕྱིར་ཡང་མི་
སྦྱིན་གྱི། འདི་ལྟར་གང་བདག་གི་ཁྱིམ་ན་འདུག་པའི་མག་པར་འདུག་པ་དེ་ལ་བདག་གིས་སྦྱིན་པར་བྱའོ་སྙམ་མོ། །རྡོ་འཇོག་ན་ཁྱིམ་བདག་གཞན་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་དེའི་ཆུང་མ་ལ་དུས་གཞན་ཞིག་ན་སེམས་ཅན་ཞུགས་པར་གྱུར་ནས། དེ་ཟླ་བ་བརྒྱད་དམ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེ་ཡང་རིགས་དང་མཐུན་པའི་མིང་བཏགས་ནས་དེས་བསྲིངས་ཤིང་བསྐྱེད་དེ་ཆེན་པོར་གྱུར་ཏོ། །དུས་གཞན་ཞིག་ན་དེའི་ཕ་མ་གཉིས་དུས་ལ་བབ་ནས། དེ་ཕན་ཚུན་འཁྱམ་པ་ན་སྟེས་དབང་གིས་ཁྱིམ་བདག་དེའི་ཁྱིམ་དུ་ཕྱིན་པ་དང་། ཁྱིམ་བདག་དེས་སྨྲས་པ། བུ་ཁྱོད་སུའི། ཁྱིམ་བདག་ཆེ་གེ་མོ་ཞིག་གིའོ། །བུ་ཁྱོད་ཀྱི་ཕ་ག་རེ། དུས་ལ་བབ་བོ། །བུ་ཁྱོད་ཀྱི་མ་ག་རེ། དེ་ཡང་དུས་ལ་བབ་བོ། །བུ་གལ་ཏེ་དེ་ལྟ་ན་ཁོ་བོས་ཁྱོད་ལ་བུ་མོ་སྦྱིན་གྱིས། ཁྱོད་ཁོ་བོའི་ཁྱིམ་ན་འདུག་པའི་མག་པ་གྱིས་ཤིག །ཡབ་མ་ནོངས་ཏེ་བདག་ཀྱང་ཕ་མ་གཉིས་དང་བྲལ་ནས་ཕན་ཚུན་འཁྱམ་ཞིང་ཡི་ཆད་པར་གྱུར་ན། ཁྱོད་དེ་སྐད་གསུང་བ་མ་ནོངས་ཀྱིས་དེ་བཞིན་བགྱིའོ། །ཁྱིམ་བདག་དེས་དེ་ལ་ཨུཏྤ་ལའི་མདོག་བྱིན་ནས་ཉི་མ་དང་། ཚེས་གྲངས་དང་། ཡུད་ཙམ་གྱི་སྦྱོར་བས་བག་མར་བཏང་ནས་ཁྱེའུ་དེས་ཀྱང་ཁྱིམ་དེར་འདུག་པར་བརྩམས་སོ། །ཇི་ཙམ་ན་དུས་གཞན་ཞིག་ན་ཨུཏྤ་ལའི་མདོག་གི་ཕ་དུས་ལ་བབ་ནས་དེའི་མ་ཅི་དགའ་མགུར་གནས་པ་དང་། རྒྱུ་བའི་སྦྱོར་བས་ཟས་དང་གོས་བཟང་པོ་དག་གིས་རྟས་པས་ཉོན་མོངས་པ་དག་གིས་གནོད་པར་བརྩམས་པ་དང་། དེས་བསམས་པ། གལ་ཏེ་བདག་གིས་འདིར་སྐྱེས་པ་གཞན་བཀུག་ན་བདག་གི་མག་པ་འདིས་ཤེས་པར་འགྱུར་གྱིས། བདག་འདི་ཉིད་དང་ལྷན་ཅིག་རྩེ་བར་བྱ་བ་དང་། དགའ་བ་དང་། དགའ་མགུར་སྤྱད་པ་ཉམས་སུ་མྱོང་བར་བྱའོ་སྙམ་ནས་དེས་དེ་ལ་མཚན་མ་བསྟན་ཏོ། །བུད་མེད་ཀྱི་ཡུལ་ནི་དབང་པོ་དག་འཕྲོག་ཅིང་དོན་དུ་གཉེར་འདོད་པར་
འགྱུར་བ་ཡིན་པས་དེས་དེ་ལ་བརྟགས་པར་གྱུར་ཏོ། །ཡང་དེས་དེ་ལ་མཚན་མ་བསྟན་པ་དང་། དེ་དེ་དང་ལྷན་ཅིག་སྟེན་པར་གྱུར་ཏོ། །དེའི་ཚེ་ན་ཨུཏྤ་ལའི་མདོག་ལ་སེམས་ཅན་ཞུགས་པར་གྱུར་ཅིང་། དེ་བཙའ་བའི་དུས་ལ་བབ་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་སོང་ལ་ཡུམ་བོས་ཤིག །དེ་སོང་བ་དང་ཇི་ཙམ་ན་དེ་མག་པ་དང་ལྷན་ཅིག་དབེན་པ་ན་འདུག་པ་མཐོང་ནས་དེས་ཡུད་ཙམ་ཞིག་རྟོག་ཅིང་དེར་བསྡད་པ་དང་། ཇི་ཙམ་ན་དེ་ཕྱིར་བྱུང་ནས་དེས་སྨྲས་པ། ཨུཏྤ་ལའི་མདོག་ཁྱོད་ལ་འབོད་ཀྱིས་བཞུད་དོ། །དེ་དེར་སོང་བ་དང་། ཇི་ཙམ་ན་བུ་མོ་ཞིག་བཙས་ནས་ཨུཏྤ་ལའི་མདོག་གིས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱོད་ཅི་ཐོགས། དེས་སྨྲས་པ། ཁྱོད་ཀྱི་ཡུམ་དང་ཁྱིམ་ཐབ་ནད་མེད་པར་གྱུར་ཅིག །དེས་སྨྲས་པ། དེས་ཅི་ཉེས། དེས་ཇི་ལྟར་གྱུར་པ་བརྗོད་པ་དང་། དེས་སྨྲས་པ་བུ་མོ་ཁྱོད་ཁོ་མོའི་མ་དང་ཁྱིམ་ཐབ་ལ་སྐུར་པ་འདེབས་སམ། དེས་སྨྲས་པ། ཇོ་མོ་ཁྱོད་ཐུགས་མི་ཆེས་ན། བདག་གིས་ཁྱོད་ཀྱི་མངོན་སུམ་དུ་འགྱུར་བར་བགྱིའོ་ཞེས་དེ་དེ་གཉིས་ཀྱི་སྐབས་བཙལ་བ་དེ་ལྷུར་ལེན་ཅིང་འདུག་པ་དང་། ཇི་ཙམ་ན་དེ་གཉིས་དབེན་པར་འདུག་པར་གྱུར་ནས་དེས་མྱུར་བ་མྱུར་བར་སོང་སྟེ། ཨུཏྤ་ལའི་མདོག་ལ་སྨྲས་པ། ཚུར་སྤྱོན་ད་གཟིགས་ཤིག །དེ་ཡང་མྱུར་བ་མྱུར་བར་སོང་སྟེ་བལྟས་པ་དང་། དེ་གཉིས་སྟེན་པར་མཐོང་ནས། ཨུཏྤ་ལའི་མདོག་གིས་བསམས་པ། སྐལ་ཆད་མ་འདིས་རྡོ་འཇོག་ན་སྐྱེས་པ་གཞན་མ་མཐོང་ངམ་ཅི་ན། གང་གི་ཕྱིར་མག་པ་དང་ལྷན་ཅིག་སྟེན་པར་བྱེད། སྐལ་ཆད་པ་འདིས་ཀྱང་རྡོ་འཇོག་ན་བུད་མེད་གཞན་མ་མཐོང་ངམ་ཅི་ན། གང་གི་ཕྱིར་སྒྱུག་མོ་དང་ལྷན་ཅིག་སྟེན་པར་བྱེད་སྙམ་དུ་རིག་ནས་མི་བཟོད་པ་སྐྱེས་ནས་དེས་ཁྱིམ་ཐབ་ལ་སྐལ་ཆད་པ་ཁྱོད་ད་ཕྱིན་ཆད་འདི་དང་ལྷན་ཅིག་དགའ་མགུར་སྤྱོད་ཅིག་ཅེས་བུ་མོ་དེ་ཕའི་གན་དུ་འཕངས་པ་དང་། དེ་ཕའི་ལུས་ལས་འདྲིལ་ནས་སྒོའི་ཐེམ་པར་ལྷུང་སྟེ་ཀླད་པ་ཞོམ་མོ། །ཨུཏྤ་ལའི་མདོག་མགོ་གཡོགས་ཏེ་ཁྱིམ་ནས་བྱུང་བ་དང་། ཇི་ཙམ་ན་དོན་མཐུན་བཅོམ་བརླག་ཏུ་འཕགས་པ་མཐོང་
ནས། དེ་དེ་དང་ལྷན་ཅིག་འཕགས་པ་དང་། དེད་དཔོན་གྱིས་མཐོང་ནས། དེ་དེའི་གཟུགས་དང་ལང་ཚོ་མཛེས་པ་ལ་ཆགས་ནས། དེས་སྨྲས་པ། སྲུ་ཁྱོད་སུའི། དེད་དཔོན་ཁོ་མོ་གང་ཁོ་མོ་ལ་ཟས་དང་གོས་སྦྱིན་པ་དེའིའོ། །དེད་དཔོན་དེས་དེ་ཆུང་མར་བྱས་ནས་དོན་མཐུན་མཐར་གྱིས་བཅོམ་བརླག་ཏུ་ཕྱིན་པ་དང་། དེས་དེ་ཉིད་དུ་བཞག་གོ །དེ་དེ་ནས་དེད་དཔོན་དེས་ཟོང་བསྒྱུར་ནས་ཟོང་གི་རིན་ཁྱེར་ཏེ་ཕྱིར་རྡོ་འཇོག་ཏུ་འོངས་པ་དང་། དེ་ན་ཚོང་པ་དེ་དག་ཕན་ཚུན་ཁྱིམ་གཞན་དུ་མགྲོན་དུ་བོས་ཏེ་སྟོན་མོ་བྱེད་པ་ན། དེད་དཔོན་དེས་འགའ་ཡང་ཟན་མ་བྱིན་ནས་ཚོང་པ་དག་གིས་སྨྲས་པ། དེད་དཔོན་ཁྱོད་ཀྱིས་འགའ་ཡང་གཡར་དྲངས་ཏེ་འཚལ་མ་མ་སྩལ་ཏོ། །དེས་སྨྲས་པ། ཁྱེད་ཅག་ནི་ཁྱིམ་མི་མོ་དག་བདོག་པས་དེས་ན་སྟོན་མོ་བྱེད་མོད། ཁོ་བོ་ལ་ནི་གང་བསྙེན་བཀུར་བྱེད་པ་འགའ་ཡང་མེད་པས་ཁོ་བོས་ཇི་ལྟར་ཟན་སྦྱིན། དེ་དག་གིས་སྨྲས་པ། གལ་ཏེ་དེ་ལྟ་ན་ཅིའི་སླད་དུ་བུ་མོ་མི་ཚོལ། དེས་སྨྲས་པ། ཁོ་བོའི་ཆུང་མ་དང་འདྲ་བའི་བུ་མོ་འགའ་ཞིག་ཡོད་ན་དེ་བག་མར་བླང་ངོ་། །དེ་དག་གིས་སྨྲས་པ། ཇེ་ཁྱོད་ཀྱི་བཙུན་མོ་ཅི་འདྲ་བལྟས་གསུངས་ཤིག །དེས་ཨུཏྤ་ལའི་མདོག་གི་གཟུགས་དང་། ལང་ཚོ་མཛེས་པ་བརྗོད་པ་དང་། དེ་དག་གིས་སྨྲས་པ། དེད་དཔོན་དེ་ནི་བུད་མེད་རིན་པོ་ཆེ་ཞིག་སྟེ། འོན་ཀྱང་དེ་ལྟ་བུ་གཞན་འགའ་མཆིས་ཀྱང་གནས་བཙལ་ལོ་ཞེས་དེ་དག་གིས་བཙལ་བར་བརྩམས་པ་དང་། ཇི་ཙམ་ན་ཨུཏྤ་ལའི་མདོག་ཉིད་ཀྱི་བུ་མོ་དེ་དེ་འདྲ་བར་མཐོང་ནས་དེ་དག་གིས་བུ་མོ་སློང་ངོ་ཞེས་དེ་བསླངས་པ་དང་། དེ་དག་གིས་སྨྲས་པ། སུའི་ཕྱིར། དེད་དཔོན་ཆེ་གེ་མོ་ཞིག་ཡོད་པ་དེའི་ཕྱིར་རོ། །ཤེས་ལྡན་དག་བདག་ཅག་གིས་ནི་སྦྱིན་ལ་རག་ན། འདི་ལྟར་ཁྱེད་ལ་སྐྱོན་ཡོད་དེ་ཁྱེད་ཀྱིས་བག་མ་བླངས་ནས་བོར་ཏེ་འདོང་ངོ་། །མི་དོར་རོ། །གལ་ཏེ་དེ་ལྟ་ན་སྦྱིན་ནོ་དེ་དག་གིས་དེ་བསླངས་ནས་དེད་དཔོན་གྱིས་བག་མར་བླངས་སོ། །དེ་ནས་ཚོང་པ་དེ་དག་གིས་ཟོང་བསྒྱུར་ཏེ་ཟོང་རིན་ཁྱེར་ནས་ཡང་བཅོམ་བརླག་ཏུ་འཕགས་པ་དང་། ཇི་ཙམ་ན་མཐར་གྱིས་བཅོམ་བརླག་དང་ཧ་ཅང་མི་རིང་བ་ན་རི་བྲགས་ཤིག་ཡོད་པ་དེར་ཕྱིན་ཏོ། །དེད་དཔོན་དེས་ཟོང་དེ་དང་
བུ་མོ་དེ་རི་བྲགས་དེར་བཞག་ནས་ཉུང་ཤས་ཤིག་དང་བཅོམ་བརླག་ཏུ་སོང་བ་དང་། ཨུཏྤ་ལའི་མདོག་གིས་བྱོན་པ་ལེགས་སོ་ཞེས་བྱ་བའི་ཚིག་གིས་ཀུན་དུ་སྤྱད་དེ་སྨྲས་པ། དེད་དཔོན་བདེ་བར་བྱོན་ཏམ། དེས་སྨྲས་པ། བཟང་མོ་ག་ལ་བདེ་བར་འོངས། ཁོ་བོ་བཅོམ་མོ། །རྗེའི་སྲས་ཁྱོད་གསོན་པོར་བྱོན་པ་དགྱེས་མོད། ནོར་ལྟ་སླད་ཀྱིས་ཀྱང་མཆིས་པར་འགྱུར་རོ། །དེ་དུས་ཅུང་ཟད་ཅིག་འདུག་ནས་སྨྲས་པ། བཟང་མོ་ཁོ་བོ་བཅོམ་པའི་རྫས་ཚོལ་དུ་འགྲོའོ། །དེས་སྨྲས་པ། མ་ནོངས་ཀྱིས་བཞུད་ཅིག །དེ་སོང་མ་ཐག་ཁོ་ནར་དེའི་ཤེད་མཐུན་འོངས་ཏེ། ཨུཏྤ་ལའི་མདོག་ལ་དྲིས་པ། དེད་དཔོན་གར་སོང་དེས་སྨྲས་པ་བཅོམ་པའི་རྫས་ཚོལ་དུ་སོང་ངོ་། །དེ་གང་དུ་སུས་བཅོམ། བདག་ཀྱང་མི་ཤེས་ཏེ་དེ་ན་རེ་ཁོ་བོ་བཅོམ་གྱིས། བཅོམ་པའི་རྫས་ཚོལ་དུ་འགྲོའོ་ཞེས་ཟེར་རོ། །དེས་སྨྲས་པ། དེ་ད་ལྟར་ཇི་ལྟར་ཕུན་སུམ་ཚོགས་ཤིང་འོངས་པ་དེ་ལྟར་སྔོན་ལན་འགའ་ཡང་ཕུན་སུམ་ཚོགས་ཤིང་མ་འོངས་པས་དེས་ཁྱོད་བྲིད་དོ། །ཤེད་མཐུན་གཏམ་བྱོས་ཤིག །གཏམ་གཞན་ཅི་ཞིག་བྱ། དེས་རྡོ་འཇོག་ནས་ས་འཛིན་མ་འདི་ལྟ་བུ་ཞིག་ཁྲིད་དེ་འོངས་པས་ཁྱོད་དེའི་རྐང་པ་གཉིས་འཁྲུ་བར་ཡང་མི་རུང་ངོ་། །ཤེད་མཐུན་དེ་བདེན་ནམ། བདེན་ནོ། །དེས་སྡོད་ཅིག་ཅེས་བྱས་ཏེ་ཅང་མི་སྨྲ་བར་འདུག་གོ །ཇི་ཙམ་ན་དེད་དཔོན་དེ་འོངས་ནས་དེས་བརྙས་ཐབས་སྔོན་དུ་བཏང་སྟེ་སྨྲས་པ། རྗེའི་སྲས་ཁྱོད་ཀྱིས་བཅོམ་པའི་རྫས་བཙལ་ཏམ། བཟང་མོ་བཙལ་ཏོ། །རྗེའི་སྲས་ཁྱོད་ཀྱིས་ཁོ་མོ་བྲིད་དེ། ཁྱོད་གང་དུ་སུས་ཀྱང་མ་བཅོམ་གྱི། ཁོ་མོས་ཇི་ལྟར་ཁྱོད་ཀྱིས་རྡོ་འཇོག་ནས་ས་འཛིན་མ་ཞིག་ཁྲིད་དེ་འོངས་ཞེས་ཐོས་ཀྱིས་དེ་འདི་ཉིད་དུ་ཁྲིད་དེ་སྤྱོན་ཅིག །གང་གི་གནས་གཉིས་སུ་འགོད་པར་འགྱུར་བ་དེའི་ལོངས་སྤྱོད་དག་ནི་སྲབས་པ་ཉིད་དང་། ཡོངས་སུ་ཟད་པ་དང་། ཡོངས་སུ་མཐར་ཐུག་པར་འགྱུར་རོ། །བཟང་མོ་གལ་ཏེ་དེ་ལྟ་ཡིན་དུ་ཟིན་ཀྱང་ཁྱོད་ཀྱིས་གང་གི་ཁྱིམ་ན་ཆུང་མ་གཉིས་ཡོད་པ་དེས་ལན་འགའ་ཡང་སྐྱོ་མ་གྲང་མོ་མི་འཐུངས་ཤིང་ཐབ་མོ་དང་། མཚང་འདྲུ་བ་དང་། རྩོད་པ་དང་། འགྱེད་པར་འགྱུར་རོ་ཞེས་བྱ་བ་མ་ཐོས་སམ།
རྗེའི་སྲས་དེ་ཞི་བར་གྱུར་ཅིག །དེ་ལྟར་མི་འགྱུར་གྱིས་དེ་ཁྲིད་དེ་སྤྱོན་ཅིག །གལ་ཏེ་ནུ་མོ་ཙམ་ཞིག་ན་ནུ་མོའི་འདུ་ཤེས་ཉེ་བར་གཞག་པར་བགྱིའོ། །གལ་ཏེ་བུ་མོ་ཙམ་ཞིག་ན་བུ་མོའི་འདུ་ཤེས་ཉེ་བར་གཞག་པར་བགྱིའོ། །དེས་སྨྲས་པ། བཟང་མོ་གལ་ཏེ་དེ་ལྟ་ན་མ་ཉེས་ཀྱིས་ཁྲིད་དེ་འོང་ངོ་ཞེས་དེས་དེ་ཁྲིད་དེ་འོངས་པ་དང་། དེས་དེ་མཐོང་ནས་རྗེས་སུ་ཆགས་པ་སྐྱེས་སོ། །དུས་གཞན་ཞིག་ན་ཨུཏྤ་ལའི་མདོག་གིས་བུ་མོ་དེའི་སྐྲ་བྱ་བར་བརྩམས་པ་དང་། མགོ་ལ་སྒྲོས་ཡོད་པ་མཐོང་ངོ་། །མཐོང་ནས་ཀྱང་དྲིས་པ་བུ་མོ་འདི་ཅི་ཉེས། དེས་སྨྲས་པ། བདག་གིས་ཀྱང་མ་འཚལ་ཏེ། བདག་གི་ཕྱི་མོའི་མཆིད་ནས་ཁྱོད་ཀྱི་མ་ཕ་ལ་ཁྲོས་པས་ཁྱོད་འཕངས་པས་སྒོའི་ཐེམ་པར་ལྟུང་སྟེ། དེར་སྒྲོས་འདི་བྱུང་ངོ་ཞེས་མཆིའོ། །ཁྱོད་ཀྱི་ཕྱི་མོ་ཅི་མིང་། ཆེ་གེ་མོ་ཞིག་གོ །ཁྱོད་ཀྱི་མ་ཅི་མིང་། ཨུཏྤ་ལའི་མདོག་གོ །དེས་བསམས་པ་བདག་དེར་ནི་མ་དང་ཆེན་ཆུང་ངུ་གྱུར་ལ། འདིར་ནི་བུ་མོ་དང་ཆེན་ཆུང་ངུ་གྱུར་གྱིས་རྣམ་པ་ཐམས་ཅད་དུ་འགྲོ་བར་བྱའོ་སྙམ་ནས། དེ་མགོ་གཡོགས་ཏེ་ཁྱིམ་ནས་བྱུང་བ་དང་། ཇི་ཙམ་ན་དོན་མཐུན་ཡུལ་ཡངས་པ་ཅན་དུ་འཕགས་པ་མཐོང་ནས། དེ་ཡང་དེ་དང་ལྷན་ཅིག་འཕགས་པ་དང་དེ་ཚོང་པ་དག་དང་ལྷན་ཅིག་དགའ་མགུར་སྤྱོད་ཅིང་ཡངས་པ་ཅན་དུ་སོང་ངོ་། །ཡངས་པ་ཅན་ན་གནས་པའི་ཚོགས་ཅན་མ་དག་གིས་སྨྲས་པ། བཅོམ་བརླག་པའི་ཚོང་པ་འདི་དག་བདག་ཅག་དང་ལྷན་ཅིག་རྩེད་མོ་དང་། དགའ་བ་དང་དགའ་མགུར་སྤྱོད་པ་ཉམས་སུ་མྱོང་བར་མི་བྱེད་དོ། །དེ་ན་ཚོགས་ཅན་མ་གཅིག་གིས་སྨྲས་པ། དེ་དག་གིས་ས་འཛིན་མ་འདི་ལྟ་བུ་ཞིག་ཁྲིད་དེ་འོངས་པས་བདག་ཅག་དེའི་རྐང་པ་གཉིས་འཁྲུ་བར་ཡང་མི་རུང་བས་ཅིའི་ཕྱིར་དེ་དག་བདག་ཅག་དང་ལྷན་ཅིག་རྩེ་བ་དང་། དགའ་བ་དང་དགའ་མགུར་སྤྱོད་པ་ཉམས་སུ་མྱོང་བར་བྱེད། ཚོགས་ཅན་མ་དེ་དག་འདུས་ཏེ་ཨུཏྤ་ལའི་མདོག་གི་གན་དུ་དོང་ནས་སྨྲས་པ། ས་འཛིན་མ་ཁྱོད་ཁོ་མོ་ཅག་གི་འཚོ་བར་བྱེད་ན་ཅིའི་ཕྱིར་ཁོ་མོ་ཅག་གི་ནང་དུ་མི་འཇུག །དེས་མགོ་གཡོགས་པ་བཤུས་ཏེ་སྨྲས་པ། བདག་དེང་
ཕྱིན་ཆད་ཁྱེད་ཅག་གི་ནང་དུ་འཇུག་གོ་ཞེས་དེ་དེ་དག་གི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་ཚོགས་ཅན་མ་དེ་དག་ཆང་གྲལ་དུ་ཚོགས་ཤིང་གཏམ་ཟེར་བ་ན་སྨྲས་པ། བདག་ཅག་ལས་གང་གིས་ཚོང་པ་གང་ནོར་ཇི་ཙམ་དང་བྲལ་བར་བྱས། དེ་ན་གཅིག་གིས་སྨྲས་པ། ཁོ་མོས་ནི་ཚོང་པ་ཆེ་གེ་མོ་ཞིག་ནོར་འདི་ཙམ་དང་བྲལ་བར་བྱས་སོ། །གཞན་དག་གིས་སྨྲས་པ། ཁོ་མོ་ཅག་གིས་ནི་ཚོང་པ་ཆེ་གེ་མོ་དག་ནོར་འདི་ཙམ་དང་བྲལ་བར་བྱས་སོ། །ཡང་གཞན་དག་གིས་སྨྲས་པ། ཁོ་མོ་ཅག་གིས་ཀྱང་ཚོང་པ་ཆེ་གེ་མོ་དག་ནོར་འདི་ཙམ་དང་བྲལ་བར་བྱས་སོ། །ཡངས་པ་ཅན་ན་སྤོས་འཚོང་གི་ཁྱེའུ་མི་སྡུག་པ་ཐོབ་པ་ཞིག་འདུག་པ་དེ་ཚོགས་ཅན་མ་འགས་ཀྱང་རྗེས་སུ་འཇུག་པར་མ་བྱས་ནས་ཚོགས་ཅན་མ་དེ་དག་གིས་སྨྲས་པ། བདག་ཅག་ལས་གང་གིས་སྤོས་འཚོང་གི་ཁྱེའུ་ཆེ་གེ་མོ་ཞིག་རྗེས་སུ་འཇུག་པར་བྱེད་ནུས་པའི་བུད་མེད་དེ་ནི་བུད་མེད་ཀྱི་ཡོན་ཏན་དང་ལྡན་པར་བདག་ཅག་སྨྲའོ། །ཨུཏྤ་ལའི་མདོག་གིས་སྨྲས་པ། ཅི་དེ་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནམ། འོན་ཏེ་མ་ཡིན་དེ་དག་གིས་སྨྲས་པ། དེ་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནོ། །གལ་ཏེ་ཁོ་མོས་དེ་རྗེས་སུ་འཇུག་པར་བྱས་ན་ཁྱེད་ཀྱི་ཁོ་མོ་ཐུ་མོའི་གནས་སུ་གཞག་གམ། གཞག་གོ །གལ་ཏེ་ཁྱོད་ཀྱིས་དེ་རྗེས་སུ་འཇུག་པར་མ་ནུས་ན་ཁྱོད་ཇི་ལྟར་བྱ། ཁོ་མོས་ཁྱེད་ལ་ཀཱ་པ་ཤ་ཎ་དྲུག་བཅུ་གཞལ་ལོ། །མ་ཉེས་ཀྱིས་དེ་ལྟར་གྱིས་ཤིག །ཨུཏྤ་ལའི་མདོག་གི་ཁྱིམ་བདག་སྤོས་འཚོང་གི་ཁྱེའུ་དེའི་དྲུང་དུ་གླས་བླངས་པས་དེས་བུ་མོ་མངག་གཞུགས་མ་སློབ་ཏུ་བཅུག་སྟེ། བུ་མོ་ཁྱོད་ཀྱིས་སྤོས་འཚོང་གི་ཁྱེའུ་ཆེ་གེ་མོ་ཞིག་ལས་ཉི་མ་རེ་རེ་ཞིང་སྤོས་ཉོ་བར་བྱའོ། །གལ་ཏེ་སུའི་གན་དུ་ཁྱེར་ཞེས་ཟེར་ན། ཨུཏྤ་ལའི་མདོག་གི་གན་དུ་རིགས་ཀྱི་བུ་ཞིག་འོངས་པ་དེའི་གན་དུ་ཁྱེར་རོ་ཞེས་བརྗོད་པར་བྱའོ། །བུ་མོ་མངག་གཞུག་མ་དེ་སྤོས་འཚོང་གི་ཁྱེའུ་དེ་ལས་ཉི་མ་རེ་རེ་ཞིང་སྤོས་ཉོ་བར་བྱེད་དོ། །དེས་དེ་ལ་སྨྲས་པ། བུ་མོ་ཁྱོད་ཉི་མ་རེ་རེ་ཞིང་སུའི་གན་དུ་སྤོས་ཁྱེར་བར་བྱེད། དེས་སྨྲས་པ། ཨུཏྤ་ལའི་མདོག་གི་གན་དུ་རིགས་ཀྱི་བུ་ཞིག་འོངས་པ་དེའི་གན་དུ་ཁྱེར་རོ། །ཡང་ཨུཏྤ་ལའི་
མདོག་གིས་བུ་མོ་མངག་གཞུག་མ་དེ་ལ་སྨྲས་པ། བུ་མོ་སྤོས་འཚོང་གི་ཁྱེའུ་དེ་ལས་སྨན་བསྐ་བ་དང་། ཁ་བ་དང་། ཚ་བ་དག་ཉོ་བར་བྱའོ། །གལ་ཏེ་སུའི་གན་དུ་ཁྱེར་ཞེས་ཟེར་ན་རིགས་ཀྱི་བུ་དེ་ན་བས་དེའི་སྨན་གྱི་ཕྱིར་ཁྱེར་རོ་ཞེས་བརྗོད་པར་བྱའོ། །གལ་ཏེ་དབྱིག་སུའི་ཡིན་ཞེས་ཟེར་ན། ཨུཏྤ་ལའི་མདོག་གི་ཡིན་ནོ་ཞེས་བརྗོད་པར་བྱའོ། །བུ་མོ་མངག་གཞུག་མ་དེས་ཀཱ་པ་ཤ་ཎ་དག་ཁྱེར་ཏེ་སྤོས་འཚོང་གི་ཁྱེའུ་དེའི་གན་དུ་སོང་ནས་སྨྲས་པ། སྨན་བསྐ་བ་དང་། ཁ་བ་དང་། ཚ་བ་དག་བྱིན་ཅིག །དེས་སྨྲས་པ། སུའི་གན་དུ་ཁྱེར། དེས་སྨྲས་པ། རིགས་ཀྱི་བུ་དེ་ན་བས་ན་དེའི་སྨན་གྱི་ཕྱིར་ཁྱེར་རོ། །དེས་སྨྲས་པ། དབྱིག་སུའི་ཡིན། དེས་སྨྲས་པ། ཨུཏྤ་ལའི་མདོག་གིའོ། །དེས་བསམས་པ། དེ་ནི་ན་ཅུང་ཆེན་མོ་ཞིག་སྟེ། རང་གི་སྨན་གྱིས་བསྙེན་བཀུར་བྱེད་དོ། །སྙམ་ནས་དེ་དེ་ལ་རྗེས་སུ་ཆགས་པ་སྐྱེས་ནས། དེས་བུ་མོ་དེ་ལ་སྨྲས་པ། བུ་མོ་ཨུཏྤ་ལའི་མདོག་ལ་སྤོས་འཚོང་གི་ཁྱེའུ་དེ་ཁྱོད་ལྟ་བར་འདོད་དོ་ཞེས་གྱིས་ཤིག །བུ་མོ་དེས་ཨུཏྤ་ལའི་མདོག་ལ་བརྗོད་པ་དང་། དེས་སྨྲས་པ། བུ་མོ་སོང་ལ་འདི་སྐད་ཅེས། ད་དུང་རིགས་ཀྱི་བུ་དེ་མ་སོས་སོ་ཞེས་གྱིས་ཤིག །དེ་སོང་སྟེ་དེ་ལ་དེ་སྐད་བརྗོད་པ་དང་། དེ་ཡང་དང་ཡང་དུ་བུ་མོ་དེ་ལ་ཉི་མ་གང་ལ་འོང་བར་བྱ་ཞེས་འདྲིའོ། །དེས་ཨུཏྤ་ལའི་མདོག་ལ་བརྗོད་པ་དང་། དེས་བསམས་པ། དེ་ལྷག་པར་ཆགས་པར་གྱུར་གྱིས་ཐབས་ཀྱི་རྣམ་པ་ལེགས་པ་ཞིག་བྱའོ་སྙམ་ནས་དེ་རྩ་མི་ཞིག་བྱས་ཏེ། ཁྲིའི་སྟེང་དུ་བཞག་ནས་དུར་ཁྲོད་དུ་ཁྱེར་ཏེ་བསྲེགས་ནས་དེའི་འོག་ཏུ་སྐྲ་བཤིག་ཅིང་ངུ་བའི་བཞིན་གྱིས་སྤོས་འཚོང་གི་ཁྱེའུ་དེའི་ཚོང་ཁང་དང་ཧ་ཅང་ཐག་མི་རིང་བ་ནས་འགྲོ་བར་བརྩམས་པ་དང་། སྤོས་འཚོང་གི་ཁྱེའུ་དེས་དེ་མཐོང་ངོ་། །བཅོམ་ལྡན་འདས་ཀྱིས་བུད་མེད་ཀྱིས་སྐྱེས་པ་རྣམ་པ་བརྒྱད་ཀྱིས་འཆིང་བར་བྱེད་དེ། གར་དང་། གླུ་དང་། རོལ་མོ་དང་། གད་མོ་དང་། ངུ་བ་དང་། ལྟ་བ་དང་། རེག་པ་དང་། རྨ་འབྱེད་པས་སོ་ཞེས་གསུངས་པས་སྤོས་འཚོང་གི་ཁྱེའུ་དེ་དེ་ལ་ཤིན་ཏུ་ཆགས་པར་གྱུར་ནས་བུ་མོ་དེ་ལ་ཡང་སྨྲས་པ། བུ་མོ་ད་འོང་ངོ་། །དེས་ཨུཏྤ་ལའི་མདོག་ལ་བརྗོད་པ་དང་།
དེས་སྨྲས་པ། བུ་མོ་སོང་ལ་འདི་སྐད་ཅེས་རིགས་ཀྱི་བུ་དེ་དེར་དུས་ལ་བབ་སྟེ། ད་དུང་མྱ་ངན་མ་སངས་པས་མཐོང་བར་ག་ལ་འགྱུར་ཞེས་བྱོས་ཤིག །ཨུཏྤ་ལའི་མདོག་གིས་ཇི་ལྟ་ཇི་ལྟར་བསྐྱངས་པ་དེ་ལྟ་དེ་ལྟར་སྤོས་འཚོང་གི་ཁྱེའུ་དེ་ཆགས་པ་དང་བཅས་པས་མཐོང་འདོད་པར་གྱུར་ནས། ཨུཏྤ་ལའི་མདོག་གིས་དེ་ལ་སྡུམ་པར་མ་བྱོན་པར་སྐྱེད་མོས་ཚལ་ག་གེ་མོ་ཞིག་ཏུ་སྤྱོན་ཅིག་ཅེས་ཕྲིན་སྤྲིང་བ་དང་། སྤོས་འཚོང་གི་ཁྱེའུ་དེ་བཟའ་བ་དང་། བཏུང་བ་དང་གོས་དང་། ཕྲེང་བ་རྒྱུ་མང་པོ་ཐོགས་ཏེ་སྐྱེད་མོས་ཚལ་དེར་འོངས་ནས། དེས་ཨུཏྤ་ལའི་མདོག་དང་ལྷན་ཅིག་རེ་ཞིག་ཟོས་ཤིང་འཐུངས་པ་དང་། ཇི་ཙམ་ན་དེ་ར་རོ་ཞིང་ཆང་གི་དབང་གིས་བདག་ཉིད་མི་དྲན་པར་གྱུར་ནས་ཨུཏྤ་ལའི་མདོག་གིས་བསམས་པ། ད་ནི་འདི་སྐྱེ་བོ་མང་པོས་ཚོར་བར་བྱའོ་སྙམ་ནས། དེས་དེའི་མགོ་ལ་ཕྲེང་བ་བཏགས་ཏེ་གཉའ་བ་བསྒྲིལ་ནས་ཁྱིམ་དུ་ཁྲིད་པ་དང་། ཚོགས་ཅན་མ་དེ་དག་གིས་དེ་མཐོང་ནས་དེ་དག་མཆོག་ཏུ་ངོ་མཚར་སྐྱེས་ཏེ་སྨྲས་པ། ས་འཛིན་མ་འདིས་སྤོས་འཚོང་གི་ཁྱེའུ་མི་སྡུག་པ་ཐོབ་པ་རྗེས་སུ་འཇུག་པར་བྱས་པ་ལེགས་སོ་ཞེས་དེ་དག་གིས་དེ་ཐུ་མོའི་གནས་སུ་བཞག་གོ །དེ་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་ཇི་ཙམ་དུས་གཞན་ཞིག་ན་དེ་ལ་སེམས་ཅན་ཞུགས་པར་གྱུར་ཏོ། །ཡངས་པ་ཅན་ན་སྒོ་བ་གཉིས་ཡོད་དེ། ཤར་གྱི་དང་། ནུབ་ཀྱིའོ། །དེ་གཉིས་ཕན་ཚུན་བཤེས་པར་གྱུར་ནས་དེ་ན་གཅིག་གིས་སྨྲས་པ། ཤེད་མཐུན་གང་གིས་བདག་ཅག་གཉིས་ཤི་ཞིང་དུས་ལ་བབ་ཀྱང་བཤེས་པའི་རྒྱུན་མི་ཆད་པར་འགྱུར་བ་དེ་ལྟ་བུའི་ཐབས་ཅི་ཡོད། ཅིག་ཤོས་ཀྱིས་སྨྲས་པ། ཤེད་མཐུན་བདག་ཅག་གཉིས་ཀྱི་བུ་མོ་ཕན་ཚུན་ཤ་གླག་བྱ་སྟེ། གལ་ཏེ་ཁོ་བོ་ལ་བུ་ཡོད་ལ་ཁྱོད་ལ་བུ་མོ་ཡོད་ན་ཁྱོད་ཀྱི་བུ་མོ་ཁོ་བོའི་བུ་ལ་སྦྱིན་པར་བྱའོ། །གལ་ཏེ་ཁྱོད་ལ་བུ་ཡོད་ལ། ཁོ་བོ་ལ་བུ་མོ་ཡོད་ན་ཁོ་བོས་བུ་མོ་ཁྱོད་ཀྱི་བུ་ལ་སྦྱིན་པར་བྱ་སྟེ། དེས་ན་བདག་ཅག་གཉིས་ཤི་ཞིང་དུས་ལ་བབ་ན་ཡང་བཤེས་པའི་རྒྱུན་མི་འཆད་པར་འགྱུར་རོ། །མ་
ཉེས་ཀྱིས་དེ་ལྟར་བྱའོ། །ཨུཏྤ་ལའི་མདོག་ཟླ་བ་དགུ་འདས་ཏེ་བཙས་པ་ལས་ཁྱེའུ་ཞིག་བྱུང་ནས་དེས་བསམས་པ། བུད་མེད་གང་ལ་བུ་ཆུང་ངུ་ཡོད་པ་དེ་སྐྱེས་པ་དག་གིས་འདི་ཡོངས་སུ་སྤང་ངོ་། །ཞེས་ཡོངས་སུ་སྤོང་བར་རིག་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་ཁྱེའུ་འདི་དང་མར་མེ་ཁྱེར་ལ་ལམ་པོ་ཆེར་སོང་སྟེ་དེར་གནས་གཅིག་ཏུ་ཁྱེའུ་ཞོག་སྟེ། མར་མེ་ཚུགས་ལ་འགའ་ཞིག་གིས་བླངས་ཀྱི་བར་དུ་མཐའ་གཅིག་ཏུ་སྡོད་ཅིག །དེས་དེ་ཁྱེར་ཏེ་ཤར་གྱི་སྒོ་བ་དང་ཧ་ཅང་ཐག་མི་རིང་བའི་གནས་ཤིག་ཏུ་བཞག་སྟེ། མར་མེ་བཙུགས་ནས་མཐའ་གཅིག་ཏུ་བསྡད་པ་དང་། ཤར་གྱི་སྒོ་བ་དེས་མར་མེ་མཐོང་ནས་ཐེ་ཚོམ་ཟ་ཞིང་དེར་སོང་བ་དང་། ཇི་ཙམ་ན་ཁྱེའུ་དེ་མཐོང་ནས་དེས་དེ་བླངས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཀྱི་བུ་འདི་རེ། དེ་རབ་ཏུ་དགའ་བས་བླངས་སོ། །དེ་ནས་མཚན་མོ་ནམ་ནངས་པ་དང་ཀུན་དགའ་བར་འགྱུར་བ་བྱས་སོ། །ཁྱིམ་ཚེས་ཀྱི་སྐྱེ་བོ་དག་གིས་ཕན་ཚུན་སྨྲས་པ། ཤེས་ལྡན་དག་ཤར་གྱི་སྒོ་བ་འདིའི་ཁྱིམ་ན་ཅི་ཞིག་གིས་ཀུན་དགའ་བར་འགྱུར་བ་བྱུང་། དེ་ན་ཁ་ཅིག་གིས་སྨྲས་པ། འདིའི་བུ་བྱུང་ངོ་། །ཁ་ཅིག་གིས་སྨྲས་པ། འདིའི་ཆུང་མ་མི་སྦྲུམ་ན་འདིའི་བུ་ག་ལས་བྱུང་། ཁ་ཅིག་གིས་སྨྲས་པ། ཤེས་ལྡན་དག་བུད་མེད་ཁ་ཅིག་གི་མངལ་ན་གནས་པ་མི་མངོན་པ་ཡང་ཡོད་དོ། །ནུབ་ཀྱི་སྒོ་བས་ཐོས་ནས་དེས་བསམས་པ། དེའི་བུ་བྱུང་བས་གལ་ཏེ་བདག་ལ་བུ་མོ་ཡོད་པར་གྱུར་ན་དེ་བདག་གི་མག་པར་འགྱུར་རོ་སྙམ་ནས་དེས་དེ་ལ་གོས་དང་རྒྱན་དག་བསྐུར་རོ། །དེ་བསྲིངས་ཤིང་བསྐྱེད་དེ་ཆེན་པོར་གྱུར་ནས་ཇི་ཙམ་ན་དེ་དགའ་འདུན་གྱི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་ཡང་ཨུཏྤ་ལའི་མདོག་ལ་སེམས་ཅན་ཞུགས་པར་གྱུར་ནས་དེ་ཟླ་བ་དགུ་འདས་ཏེ་བཙས་པ་ལས་བུ་མོ་ཞིག་བྱུང་ནས་དེས་ཡང་བསམས་པ། བུད་མེད་གང་ལ་བུ་མོ་ཆུང་ངུ་ཡོད་པ་དེ་སྐྱེས་པ་དག་གིས་འདི་ཡོངས་སུ་སྤང་ངོ་ཞེས་ཡོངས་སུ་སྤོང་བར་རིག་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་བུ་མོ་འདི་དང་མར་མེ་ཁྱེར་ལ་ལམ་པོ་ཆེར་སོང་སྟེ། དེར་གནས་གཅིག་ཏུ་བུ་མོ་ཞོག་སྟེ། མར་མེ་ཚུགས་ལ་འགའ་ཞིག་གིས་བླངས་ཀྱི་
བར་དུ་མཐའ་གཅིག་ན་སྡོད་ཅིག །དེས་དེ་ཁྱེར་ཏེ་ནུབ་ཀྱི་སྒོ་བ་དང་ཧ་ཅང་ཐག་མི་རིང་བའི་གནས་ཤིག་ཏུ་བཞག་སྟེ། མར་མེ་བཙུགས་ནས་མཐའ་གཅིག་ཏུ་བསྡད་པ་དང་། ནུབ་ཀྱི་སྒོ་བ་དེས་མར་མེ་མཐོང་ནས་ཐེ་ཚོམ་ཟ་ཞིང་དེར་སོང་བ་དང་། ཇི་ཙམ་ན་བུ་མོ་དེ་མཐོང་ནས་དེས་དེ་བླངས་ཏེ་ཆུང་མའི་གན་དུ་སོང་ནས་སྨྲས་པ། བཟང་མོ་ཁྱོད་ཀྱི་བུ་མོ་འདིར། དེ་རབ་ཏུ་དགའ་བས་བླངས་སོ། །དེ་ནས་མཚན་མོ་ནམ་ནངས་པ་དང་། ཀུན་དགའ་བར་འགྱུར་བར་བྱས་སོ། །ཁྱིམ་ཚེས་ཀྱི་སྐྱེ་བོ་དག་གིས་ཕན་ཚུན་སྨྲས་པ། ཤེས་ལྡན་དག་ནུབ་ཀྱི་སྒོ་བ་འདིའི་ཁྱིམ་ན་ཅི་ཞིག་གིས་ཀུན་དགའ་བར་འགྱུར་བ་བྱུང་། དེ་ན་ཁ་ཅིག་གིས་སྨྲས་པ། འདིའི་བུ་མོ་བྱུང་ངོ་། །ཁ་ཅིག་གིས་སྨྲས་པ། འདིའི་ཆུང་མ་མི་སྦྲུམ་ན་འདིའི་བུ་མོ་ག་ལས་བྱུང་། ཁ་ཅིག་གིས་སྨྲས་པ། ཤེས་ལྡན་དག་བུད་མེད་ཁ་ཅིག་གི་མངལ་ན་གནས་པ་མི་མངོན་པ་ཡང་ཡོད་དོ། །ཤར་གྱི་སྒོ་བས་ཐོས་ནས་དེས་བསམས་པ། དེའི་བུ་མོ་བྱུང་བས་དེ་བདག་གི་མནའ་མར་འགྱུར་རོ་སྙམ་ནས་དེས་དེ་ལ་གོས་དང་རྒྱན་དག་བསྐུར་རོ། །དེ་བསྲིངས་ཤིང་བསྐྱེད་དེ་ཆེན་མོར་གྱུར་ནས་ཇི་ཙམ་ན་དེ་ཡང་དགའ་འདུན་མའི་ནང་དུ་ཞུགས་སོ། །ཇི་ཙམ་དུས་གཞན་ཞིག་ན་དགའ་འདུན་ལྔ་བརྒྱ་སྐྱེད་མོས་ཚལ་དུ་འཕགས་པ་དང་དེ་དག་གིས་གྲོས་བྱ་བར་བརྩམས་པ། བདག་ཅག་གྱི་ན་དེ་བཞིན་དུ་སྐྱེད་མོས་ཚལ་དུ་དོང་སྟེ་ཅིར་རུང་། འཇུད་མཐུན་མ་འགའ་ཞིག་བཀྲིའོ། །དེ་ལྟར་བྱའོ། །གང་བཀྲི། ས་འཛིན་མའོ། །མ་ཉེས་ཏེ་འདི་ལྟར་ཁྲིམས་སུ་བྱ་བ་བཅའ་སྟེ། བདག་ཅག་ལས་གང་དེ་དང་ལྷན་ཅིག་དགའ་མགུར་སྤྱོད་པར་མི་བྱེད་པ་དེ་ལ་དགའ་འདུན་དག་གིས་ཀཱ་པ་ཤ་ཎ་དྲུག་བཅུ་དབབ་བོ། །དེ་དག་གིས་ས་འཛིན་མ་ཨུཏྤ་ལའི་མདོག་ཀཱ་པ་ཤ་ཎ་ལྔ་བརྒྱས་གླས་ཏེ་སྐྱེད་མོས་ཚལ་དུ་ཁྲིད་ནས་དགའ་འདུན་དེ་དག་ཐམས་ཅད་ཀྱིས་རེས་ཀྱིས་དེ་དང་ལྷན་ཅིག་དགའ་མགུར་སྤྱོད་དོ། །ཤར་གྱི་སྒོ་བའི་བུ་དེ་དགའ་མགུར་སྤྱོད་པར་མི་འདོད་ནས་ཨུཏྤ་ལའི་མདོག་གིས་དེ་ལ་སྨྲས་པ། རྗེའི་སྲས་དགའ་མགུར་སྤྱོད་ཅིག །གཞན་དུ་ན་འདི་དག་གིས་ཁྱོད་ལ་ཀཱ་པ་ཤ་ཎ་དྲུག་བཅུ་ཕབ་པར་འགྱུར་རོ། །
དེས་ཆད་པས་འཇིགས་པས་དགའ་མགུར་སྤྱད་པ་དང་། དེ་ཨུཏྤ་ལའི་མདོག་ལ་རྗེས་སུ་ཆགས་པ་སྐྱེས་ནས་དེས་དེ་གཅིག་པུས་ཆུང་མ་ཁུད་པར་བྱས་སོ། །ལིཙྪ་བཱི་དག་ཁྲོས་ནས་ཤར་གྱི་སྒོ་བའི་བུ་དེས་ཚོགས་ཀྱིས་སྤྱད་པར་བྱ་བའི་བུད་མེད་དེ་གཅིག་པུས་ཆུང་མ་ཁུད་པར་བྱས་ཀྱིས་དེ་གསོད་དུ་འདོང་ངོ་ཞེས་ཟེར་རོ། །འཇིག་རྟེན་ནི་མཛའ་བཤེས་དང་དགྲ་བོ་དང་ཐ་མལ་པ་ཡིན་པས་གཞན་ཞིག་ཤར་གྱི་སྒོ་བ་དེའི་གན་དུ་སོང་སྟེ་ཇི་ལྟར་གྱུར་པ་སྨྲས་པ་དང་། ཤར་གྱི་སྒོ་བ་དེ་སྐྲག་ནས་ལིཙྪ་བཱི་རྣམས་ཀྱི་གན་དུ་སོང་སྟེ་རྐང་པ་གཉིས་ལ་གཏུགས་ནས་སྨྲས་པ། བུའི་སློང་མོ་སྩོལ་ཅིག །དེ་དག་གིས་སྨྲས་པ། ཀྭའི་ནང་རྗེ་དེ་ཅི་ཉེས། དེས་དེ་དག་ལ་རྒྱས་པར་བརྗོད་པ་དང་། དེ་ནས་ཁ་ཅིག་གིས་སྨྲས་པ། ཤེས་ལྡན་དག་ཤར་གྱི་སྒོ་བ་འདི་བདག་ཅག་ལ་ཡུན་རིང་པོ་ནས་ཕན་པ་བྱེད་བྱེད་པ་ཡིན་གྱིས། གལ་ཏེ་འདིའི་བུ་ཚོགས་ཅན་མ་འདོད་ན་སྦྱིན་ནོ། །གཞན་དག་གིས་སྨྲས་པ། མ་ཉེས་ཀྱིས་དེ་བཞིན་བྱའོ་ཞེས་དེ་དག་གིས་དེ་ལ་ཨུཏྤ་ལའི་མདོག་བྱིན་ནོ། །ཤར་གྱི་སྒོ་བའི་བུ་དེས་ཚོགས་ལས་ཐོབ་པས་བག་ཚ་བ་མེད་པར་ཨུཏྤ་ལའི་མདོག་ཆུང་མར་བླངས་སོ། །དེ་ནས་དེའི་ཕས་ནུབ་ཀྱི་སྒོ་བ་ལ་སྨྲས་པ། ཤེད་མཐུན་ཁྱེའུ་ལ་བུ་མོ་བག་མར་ཐོང་ཤིག །དེས་སྨྲས་པ། ཤེད་མཐུན་ཁྱོད་ཀྱི་བུས་ཆུང་མ་བླངས་ཟིན་ན་བག་མ་གཞན་གྱིས་ཅི་བྱ། དེས་སྨྲས་པ། ཤེད་མཐུན་སྔར་འཐམས་ཟིན་གྱིས་ད་བྱིན་ཅིག་དང་། གལ་ཏེ་ཁོ་བོ་ལ་འབྱོར་པ་ཡོད་པར་གྱུར་ན་ཁོ་བོའི་བུའི་ཆུང་མའི་འཁོར་རྣམ་པར་འཇོག་པར་བྱེད་དོ། །ནུབ་ཀྱི་སྒོ་བས་སྔར་འཐམས་པའི་ཕྱིར་ཤར་གྱི་སྒོ་བའི་བུ་ལ་བུ་མོ་བྱིན་ནོ། །ཤར་གྱི་སྒོ་བའི་བུ་དེས་ཀྱང་ཉི་མ་དང་། ཚེས་གྲངས་དང་། ཡུད་ཙམ་གྱི་སྦྱོར་བས་དེ་བག་མར་བླངས་སོ། །དེའི་ཚེ་ན་ཚེ་དང་ལྡན་པ་མཽད་གལ་གྱི་བུ་ཆེན་པོ་ཤར་གྱི་སྒོ་བ་དེའི་ཁྱིམ་དུ་འགྲོ་བས་དེས་བུ་མོ་དེ་ལ་སྨྲས་པ། བུ་མོ་ཁྱོད་ཀྱི་ཆེན་མ་གང་ཡིན་པ་དེ་ནི་ཁྱོད་ཀྱི་མའོ། །ཁྱོད་ཀྱི་ཁྱིམ་ཐབ་གང་ཡིན་པ་འདི་ནི་ཁྱོད་ཀྱི་མིང་པོ་ཡིན་གྱིས། མ་ལ་རབ་ཏུ་སྡང་བའི་སེམས་མ་སྐྱེད་ཅིག །སེམས་ཅན་དམྱལ་བ་ལ་གཞོལ་བར་འགྱུར་བར་མ་བྱེད་ཅིག །ཨུཏྤ་ལའི་
མདོག་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་པ་ལས་བུ་བྱུང་ནས་བུ་མོ་དེས་ཁྱེའུ་དེ་སྒོ་ཁང་གི་ཕྱི་རོལ་དུ་རྩེར་གཞུག་པར་བརྩམས་པ་དང་། ཇི་ཙམ་ན་བྲམ་ཟེ་ཞིག་ལམ་དེ་ནས་འགྲོ་བ་དེས་མཐོང་ནས་དེས་ཚིགས་སུ་བཅད་པ་སྨྲས་པ། མི་རྣམས་ནང་ན་མཆོག་གི་རབ་ཀྱི་མཆོག །མཚུངས་མེད་རྒྱལ་བ་སྐྱོབ་པའི་ཉན་ཐོས་མ། །མེ་ཏོག་མན་དཱ་ར་ཀ་རབ་འདྲ་བ། །སྲིང་མོ་ཁྱེའུ་འདི་ཁྱོད་ཀྱི་ཅི་ཞིག་ཡིན། །དེས་ཀྱང་ཚིགས་སུ་བཅད་པ་སྨྲས་པ། བྲམ་ཟེ་འདི་ནི་བདག་གི་མིང་པོ་དང་། །མིང་པོའི་བུ་དང་བུ་དང་སྐུད་པོ་ཡིན། །འདི་ཡི་ཕ་དེ་བདག་གི་ཕ་ཡིན་ཏེ། །མིང་པོར་གྱུར་ནས་ད་ལྟར་ཁྱོ་འདི་ཡིན། །ཨུཏྤ་ལའི་མདོག་གིས་ཐོས་ནས་དེས་བུ་མོ་མངག་གཞུག་མ་ལ་སྨྲས་པ། བུ་མོ་འདི་གཉིས་ཅི་ཟེར། དེས་སྨྲས་པ། འདི་གཉིས་མད་པ་མཆིའོ། །ཤོ་བེ་མི་མཆིའོ། །འདི་ལ་ཅི་བདེན། ཁྱོད་ཀྱི་བུ་བདག་གིས་ཤར་སྒོར་བོར་བ་གང་ལགས་པ་དེ་ནི་ད་ལྟར་ཁྱོད་ཀྱི་ཁྱིམ་ཐབ་འདི་ལགས་སོ། །ཁྱོད་ཀྱི་བུ་མོ་བདག་གིས་ནུབ་སྒོར་བོར་བ་གང་ལགས་པ་དེ་ནི་ད་ལྟར་ཁྱོད་ཀྱི་ཆུན་མ་འདི་ལགས་སོ། །ཨུཏྤ་ལའི་མདོག་གིས་བསམས་པ། སྔོན་ནི་བདག་མ་དང་ཆེན་ཆུང་དུ་གྱུར་ནས་ཡང་བུ་མོ་དང་ཆེན་ཆུང་དུ་གྱུར། ད་ཡང་བདག་བུ་མོ་དང་ཆེན་ཆུང་དུ་གྱུར་ཅིང་བུ་ཁྱིམ་ཐབ་ཏུ་གྱུར་གྱིས། རྣམ་པ་ཐམས་ཅད་དུ་འགྲོ་བར་བྱའོ་སྙམ་ནས། དེ་མགོ་གཡོགས་ཏེ་ཁྱིམ་ནས་བྱུང་བ་དང་། ཇི་ཙམ་ན་དོན་མཐུན་རྒྱལ་པོའི་ཁབ་ཏུ་འཕགས་པ་མཐོང་ནས་དེ་དེ་དང་ལྷན་ཅིག་རྒྱལ་པོའི་ཁབ་ཏུ་སོང་ངོ་། །དེར་ཡང་འཇུད་མཐུན་མའི་འཚོ་བས་འཚོ་བར་བྱེད་དོ། །ཇི་ཙམ་ན་དགའ་འདུན་ལྔ་བརྒྱ་སྐྱེད་མོས་ཚལ་དུ་འཕགས་ནས་དེ་དག་གིས་གྲོས་བྱ་བར་བརྩམས་པ། ཤེས་ལྡན་དག་བདག་ཅག་གྱི་ན་དེ་བཞིན་དུ་སྐྱེད་མོས་ཚལ་དུ་དོང་སྟེ་ཅི་རུང་། འཇུད་མཐུན་མ་འགའ་ཞིག་བཀྲིའོ། །དེ་ལྟར་བྱའོ། །གང་བཀྲི། ས་འཛིན་མའོ། །མ་ཉེས་སོ་ཞེས་དེ་དག་གིས་ས་འཛིན་མ་ཨུཏྤ་ལའི་མདོག་ཀཱ་པ་ཤ་ཎ་ལྔ་བརྒྱས་གླས་ཏེ་སྐྱེད་མོས་ཚལ་དུ་ཁྲིད་དོ། །དེ་དག་ཟོས་
ཤིང་འཐུངས་ནས་དེ་དང་ལྷན་ཅིག་རྩེ་བར་བྱེད། དགའ་བར་བྱེད། དགའ་མགུར་སྤྱོད་པར་བྱེད་དོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་ཨུཏྤ་ལའི་མདོག་གདུལ་བའི་དུས་ཤེས་ནས་དེ་དག་དང་ཧ་ཅང་ཐག་མི་རིང་བ་ན་ཤིང་ལྗོན་པ་ཞིག་གི་དྲུང་ན་འཆག་ཅིང་འདུག་གོ །དེ་ན་དགའ་འདུན་གཅིག་གིས་སྨྲས་པ། འཕགས་པ་མཽད་གལ་གྱི་བུ་ཆེན་པོ་འདི་ནི་ཉོན་མོངས་པའི་འཆིང་བ་འདི་ལྟ་བུ་ལས་གྲོལ་བ་ཡིན་གྱི་བདག་ཅག་ནི་འདོད་པའི་འདམ་དུ་བྱིང་བ་ཡིན་ནོ། །ཨུཏྤ་ལའི་མདོག་གིས་སྨྲས་པ། བདག་གིས་ཡངས་པ་ཅན་དུ་སྤོས་འཚོང་གི་ཁྱེའུ་མི་སྡུག་པ་ཐོབ་པ་རྗེས་སུ་འཇུག་པར་བྱས་སོ། །དགའ་འདུན་དེས་སྨྲས་པ། སྨྲས་པ་དེའི་དོན་ཅི་འདི་ཡང་རྗེས་སུ་འཇུག་པར་བྱེད་འདོད་དམ། དེས་སྨྲས་པ། ཅི་འདི་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནམ། འདི་སྐྱེས་པ་སྐྱེས་པའི་དབང་པོ་དང་ལྡན་པ་ཡིན་ནོ། །ཁོ་མོས་གལ་ཏེ་འདི་རྗེས་སུ་འཇུག་པར་བྱ་ན་ཁྱེད་ལ་ཅི་དབབ། ཀཱ་པ་ཤ་ཎ་ལྔ་བརྒྱའོ། །གལ་ཏེ་ཁྱོད་ཀྱིས་འདི་རྗེས་སུ་འཇུག་པར་མ་ནུས་ན་ཁྱོད་ལ་ཅི་དབབ། ཁྱོད་གཅིག་པུའི་ཆུང་མ་ཁུད་པའོ། །མ་ཉེས་ཀྱིས་དེ་ལྟར་གྱིས་ཤིག །ཨུཏྤ་ལའི་མདོག་གིས་ཁས་བླངས་ནས་དེ་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་སོང་སྟེ་ཕྱིན་ནས་བུད་མེད་ཀྱི་གཡོ་དག་དང་། བུད་མེད་ཀྱི་གྱ་གྱུ་དག་དང་། བུད་མེད་ཀྱི་ཡ་ཡོ་དག་དང་། བུད་མེད་ཀྱི་སྒྱུ་གང་དག་ཡིན་པ་དེ་དག་ཉེ་བར་བསྟན་པར་བརྩམས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དབང་པོ་དག་ཕབ་སྟེ་འདུག་གོ །དེས་བསམས་པ། བུད་མེད་ཀྱི་ཡུལ་གྱི་རེག་པ་ནི་དུག་ཡིན་པས་བདག་གིས་འཁྱུད་ན་འདི་བདག་གི་དབང་དུ་འགྱུར་རོ་སྙམ་ནས། དེས་འཁྱུད་པར་བརྩམས་པ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་ཚིགས་སུ་བཅད་པ་དག་སྨྲས་པ། རུས་པའི་འཁྲུལ་འཁོར་སྤྱིལ་བུ་ལ། །ཆུ་བས་ཡོངས་སུ་དཀྲིས་གྱུར་ཅིང་། །མི་གཙང་རུལ་བ་དྲི་ང་བ། །གཞན་ལ་སྟེན་ཅིང་བདག་གིར་བྱེད། །བཙོག་པས་གང་བའི་རྐྱལ་པ་ཁྱོད། །གསོང་ལྡོང་ཕོལ་མིག་ངལ་སྐྱེན་ལྡན། །རྒྱུན་ལམ་དགུ་ནས་རྟག་ཏུ་ནི། །མི་
གཙང་རབ་ཏུ་འཛག་པ་ཡིན། །ཇི་ལྟར་ཁོ་བོས་ཁྱོད་ཤེས་ལྟར། །སྐྱེ་བོས་ཁྱོད་ནི་ཤེས་གྱུར་ན། །དབྱར་དུས་ཕྱི་སའི་གནས་བཞིན་དུ། །ཐག་རིང་རྣམ་པར་སྤོང་བར་འགྱུར། །གང་ཕྱིར་བྱིས་པ་གཏི་མུག་གིས། །མུན་པས་བསྒྲིབས་པས་མི་ཤེས་པ། །དེ་ཕྱིར་རྫབ་ལ་གླང་རྒན་བཞིན། །དེ་དག་ཁྱོད་ལ་ཆགས་པར་བྱེད། །ཨུཏྤ་ལའི་མདོག་གིས་ཀྱང་ཚིགས་སུ་བཅད་པ་དག་སྨྲས་པ། སྐལ་བ་ཆེན་པོ་དེ་ལྟ་ལགས། །འཕགས་པས་ཇི་སྐད་གསུངས་པ་བཞིན། །རུས་པའི་འཁྲུལ་འཁོར་སྤྱིལ་བུ་ལ། །ཆུ་བས་ཡོངས་སུ་དཀྲིས་གྱུར་ཅིང་། །མི་གཙང་རུས་པ་དྲི་ང་བ། །གཞན་ལ་སྟེན་ཅིང་བདག་གིར་བགྱིད། །བཙོག་པས་བལྟམ་པའི་རྐྱལ་པ་བདག །གསོང་ལྡོང་ཕོལ་མིག་ངལ་སྐྱེན་ལྡན། །རྒྱུན་ལམ་དགུ་ནས་རྟག་ཏུ་ནི། །མི་གཙང་རབ་ཏུ་འཛག་པ་ལགས། །ཇི་ལྟར་འཕགས་པས་བདག་མཁྱེན་ལྟར། །སྐྱེ་བོས་བདག་ནི་འཚལ་གྱུར་ན། །དབྱར་དུས་སླང་སའི་གནས་བཞིན་དུ། །ཐག་རིང་རྣམ་པར་སྤོང་བར་འགྱུར། །གང་ཕྱིར་བྱིས་པ་གཏི་མུག་གི །མུན་པས་བསྒྲིབས་པས་མ་འཚལ་བ། །དེ་ཕྱིར་རྫབ་ལ་གླང་རྒན་བཞིན། །དེ་དག་བདག་ལ་ཆགས་པར་བགྱིད། །སྐལ་བ་ཆེན་པོ་མར་གཤེགས་ཏེ། །འཕགས་པ་ཆོས་ནི་བསྟན་དུ་གསོལ། །ཤེས་རབ་མཆོག་གི་བསྟན་པ་ལ། །བདག་གིས་ཁྱོད་ཀྱི་ཉན་ཐོས་བགྱི། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་སྟེང་གི་ནམ་མཁའི་དཀྱིལ་ནས་བབས་ནས་དེས་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་ཁོང་དུ་ཆུད་ནས། འདི་ལྟར་ཨུཏྤ་ལའི་མདོག་གིས་སྟན་དེ་ཉིད་ལ་འདུག་བཞིན་དུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པ་དེ་ལྟར་འཕགས་པའི་བདེན་པ་བཞི་ཡང་དག་པར་སོ་སོར་རྟོགས་པར་བྱེད་པའི་ཆོས་བསྟན་པ་བྱས་སོ། །དེས་བདེན་པ་མཐོང་ནས་སྨྲས་པ། འཕགས་པ་བདག་གིས་དགེ་བའི་བཤེས་གཉེན་འཕགས་པ་ལ་བརྟེན་ནས་འཕགས་པས་བདག་ལ་གང་མཛད་པ་འདི་ལྟ་བུ་ནི་བདག་ལ་ཕས་ཀྱང་མ་བགྱིས། མས་ཀྱང་མ་བགྱིས།
རྒྱལ་པོས་ཀྱང་མ་བགྱིས། ལྷ་རྣམས་ཀྱིས་ཀྱང་མ་བགྱིས། སྔོན་གྱི་ཕ་མེས་དག་གིས་ཀྱང་མ་བགྱིས། དགེ་སྦྱོང་དང་བྲམ་ཟེ་དག་གིས་ཀྱང་མ་བགྱིས། བྱམས་པ་དང་མཛའ་བཤེས་དང་རྩ་ལག་གི་ཚོགས་ཀྱིས་ཀྱང་མ་བགྱིས་ཏེ། ཁྲག་དང་མཆི་མའི་རྒྱ་མཚོ་ནི་བསྐམས། རུས་པའི་རི་དག་ལས་ནི་བསྒྲལ། ངན་སོང་གི་སྒོ་དག་ནི་བཀུམ། མཐོ་རིས་དང་ཐར་པའི་སྒོ་དག་ནི་ཕྱེ། སེམས་ཅན་དམྱལ་བ་དང་དུད་འགྲོ་དང་ཡི་དགས་ནས་ནི་རྐང་པ་ཕྱུང་། ལྷ་དང་མི་རྣམས་ཀྱི་ནང་དུ་ནི་བཞག །ཐོག་མ་མ་མཆིས་པའི་དུས་ནས་བསགས་པའི་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་སྟེ་རྒྱུན་དུ་ཞུགས་པའི་འབྲས་བུ་ནི་ཐོབ་སྟེ། འཕགས་པ་བདག་ནི་མངོན་པར་ཞུགས་པ་ལགས་སོ། །འཕགས་པ་བདག་ནི་མངོན་པར་ཞུགས་པ་ལགས་ཏེ། འཕགས་པ་བདག་བཅོམ་ལྡན་འདས་དང་། ཆོས་དང་དགེ་སློང་གི་དགེ་འདུན་ལ་སྐྱབས་སུ་མཆི་ཡིས། བདག་དགེ་བསྙེན་མར་གཟུང་དུ་གསོལ། དེང་སླན་ཆད་ནས་ཇི་སྲིད་དུ་འཚོའི་བར་དུ་གློ་བ་ཐག་པ་ནས་རབ་ཏུ་དང་བས་སྐྱབས་སུ་མཆིའོ། །དེ་ནས་རིགས་ཀྱི་བུ་མོ་ཨུཏྤ་ལའི་མདོག་གིས་ཚེ་དང་ལྡན་པ་མཽད་གལ་གྱི་བུ་ཆེན་པོའི་རྐང་པ་གཉིས་ལ་གཏུགས་ཏེ་སྨྲས་པ། བཙུན་པ་མཽད་གལ་གྱི་བུ་ཆེན་པོ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཐོབ་ན། བདག་བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་དོ། །དེས་སྨྲས་པ། སྲིང་མོ་སོང་ལ་ཁྱིམ་ཐབ་དག་ལ་གསོལ་ཅིག །དེ་དེ་དག་གི་གན་དུ་སོང་སྟེ་སྨྲས་པ། རྗེའི་སྲས་དག་བདག་རབ་ཏུ་འབྱུང་བར་ཅི་གནང་། དེ་དག་གིས་སྨྲས་པ། ས་འཛིན་མ་ཅིའི་ཕྱིར་ཁོ་བོ་ཅག་ལ་ཅོ་འདྲི་བར་བྱེད། དེས་སྨྲས་པ། མད་པར་རབ་ཏུ་འབྱུང་སྟེ་ཅོ་འདྲི་བར་མི་བགྱིད་དོ། །དེ་དག་གིས་སྨྲས་པ། གལ་ཏེ་དེ་ལྟ་ན་རབ་ཏུ་བྱུང་ཤིག །དེ་དེ་དག་གིས་གནང་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ག་ལ་བ་དེར་སོང་བ་དང་། དེས་དེ་ཁྲིད་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་
འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ །མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཙུན་པ་ཨུཏྤ་ལའི་མདོག་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། མ་ཉེས་ཀྱིས་རབ་ཏུ་འབྱུང་བ་ལེགས་སོ་ཞེས་བཀའ་སྩལ་ནས། རང་ཉིད་ཀྱིས་སྐྱེ་དགུའི་བདག་མོ་ཆེན་མོ་ལ་ཕྲིན་ཡིག་བྲི་བར་བརྩམས་སོ། །བཅོམ་ལྡན་འདས་ཕྲིན་ཡིག་མཛད་པ་ན་རྒྱལ་པོ་གཟུགས་ཅན་སྙིང་པོ་འོངས་ཏེ་གསོལ་པ། བཅོམ་ལྡན་འདས་འཇུད་མཐུན་མ་འདི་ཅིའི་སླད་དུ་འདིར་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་སྐད་མ་ཟེར་ཅིག །ཁྱོད་ཀྱི་ཆོས་ཀྱི་སྲིང་མོ་འདི་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་མའི་དངོས་པོ་འདོད་དོ། །བཅོམ་ལྡན་འདས་གང་དུ་ཕྲིན་ཡིག་མཛད། རྒྱལ་པོ་ཆེན་པོ་མཉན་ཡོད་དུ་སྐྱེ་དགུའི་བདག་མོ་ཆེན་མོ་ལའོ། །བཅོམ་ལྡན་འདས་བདག་གིས་ཀྱང་འདི་ལ་བསེལ་བ་སྩལ་བར་བགྱིའོ། །རྒྱལ་པོ་ཆེན་པོ་མ་ཉེས་སོ། །རྒྱལ་པོས་དེའི་བསེལ་བ་བསྐོས་སོ། །ཨུཏྤ་ལའི་མདོག་གིས་ཕྲིན་ཡིག་མནོས་ཏེ་མཉན་ཡོད་དུ་སོང་བ་དང་། སྐྱེ་དགུའི་བདག་མོ་ཆེན་མོ་གཽ་ཏ་མཱིས་དེ་རབ་ཏུ་ཕྱུང་རྫོགས་པར་བསྙེན་པར་བྱས་ཏེ། གདམས་ངག་བྱིན་ནས་དེ་གཅིག་ཏུ་དབེན་པ་བག་ཡོད་པ་རྟུན་པ་དང་ལྡན་པ། བདག་ཉིད་བཏང་བར་གནས་པ་ན་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ་འདུ་བྱེད་ཀྱི་རྣམ་པ་ཐམས་ཅད་ཉམས་པ་དང་། ལྟུང་བ་དང་རྣམ་པར་འཐོར་བ་དང་། །རྣམ་པར་འཇིག་པའི་ཆོས་ཉིད་ཀྱིས་ཟིལ་གྱིས་མནན་ནས་ཉོན་མོངས་པ་ཐམས་ཅད་སྤངས་པས་རིགས་ཀྱི་བུ་མོ་དག་གང་གི་ཕྱིར་སྐྲ་བྲེགས་ཏེ་གོས་ངུར་སྨྲིག་དག་བགོས་ནས་ཡང་དག་པ་ཁོ་ནར་དད་པས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བྱེད་པ་ཚངས་པར་སྤྱོད་པའི་མཐའ་བླ་ན་མེད་པ་དེ་ཚེ་དེ་ཉིད་ལ་རང་གི་
མངོན་པར་ཤེས་པས་མངོན་སུམ་དུ་བྱས་ཏེ་བསྒྲུབས་ནས་བདག་གི་སྐྱེ་བ་ཟད་དོ། །ཚངས་པར་སྤྱོད་པ་སྤྱད་དོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ་ཞེས་གོ་བར་བྱེད་ཅིང་དགྲ་བཅོམ་པ་ཁམས་གསུམ་པ་ལས་འདོད་ཆགས་དང་བྲལ་བ། བོང་བ་དང་གསེར་དུ་མཉམ་པ། ནམ་མཁའ་དང་ལག་མཐིལ་དུ་མཚུངས་པའི་སེམས་དང་ལྡན་པ། ཙནྡན་བཞག་པ་ལྟ་བུ་རིག་པས་སྒོ་ངའི་སྦུབས་དྲལ་བར་གྱུར་ཅིང་། རིག་པ་དང་མངོན་པར་ཤེས་པ་དང་། སོ་སོ་ཡང་དག་པར་རིག་པ་ཐོབ་པ། སྲིད་པ་དང་འདོད་པའི་རྙེད་པ་དང་བཀུར་སྟི་ལ་རྒྱབ་ཀྱིས་ཕྱོགས་པ། དབང་པོ་དང་ཉེ་དབང་དང་བཅས་པའི་ལྷ་རྣམས་ཀྱིས་མཆོད་པར་བྱ་བ་དང་། རྗེད་པར་བྱ་བ་དང། མངོན་དུ་སྨྲ་བར་བྱ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ངའི་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་ནང་ན་འདི་ལྟ་སྟེ། དགེ་སློང་མ་ཨུཏྤ་ལའི་མདོག་འདི་མཆོག་ཡིན་ནོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་ལས་ཅི་ཞིག་བགྱིས་ན་དེས་མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེའུ་འབྲུའི་མདོག་འདྲ་བར་གྱུར། ལས་ཅི་ཞིག་བགྱིས་ན་དེས་སྐྱེས་པ་དག་གིས་ཕོངས་པ་མ་མཆིས་པར་གྱུར་ཅིང་། བཅོམ་ལྡན་འདས་ཀྱི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བགྱིས། ལས་ཅི་ཞིག་བགྱིས་ན་དེ་ཉན་ཐོས་མ་རྫུ་འཕྲུལ་ཆེ་བ་མཐུ་ཆེ་བ་རྣམས་ཀྱི་མཆོག་ཏུ་བསྟན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཨུཏྤ་ལའི་མདོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་ཨུཏྤ་ལའི་མདོག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་
གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི། འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་ཁྱིམ་བདག་ཅིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད། །དགའ་བར་བྱེད། །དགའ་མགུར་སྤྱོད་པར་བྱེད་དོ། །དེ་དུས་གཞན་ཞིག་ན་ཟོང་ཐོགས་ཏེ་ཡུལ་གཞན་དུ་སོང་ངོ་། །དེའི་ཆུང་མ་གོས་དང་ཟས་བཟང་བས་ཉོན་མོངས་པ་དག་གིས་གནོད་པར་གྱུར་ནས་དེ་དང་ཧ་ཅང་ཐག་མི་རིང་བ་ན་འཇུད་མཐུན་མའི་ཁྱིམ་ཞིག་འདུག་པ་དེར་སྐྱེས་པ་གཞན་དག་འཇུག་ཅིང་གཞན་དག་འབྱུང་བ་མཐོང་ནས་དེས་བསམས་པ། བུད་མེད་འདི་ནི་བསོད་ནམས་བྱས་པ་ཡིན་པས་འདི་སྐྱེས་པ་དག་གིས་ཕོངས་པ་མེད་པ་ཡིན་ན། བདག་ཀྱང་གང་གིས་སྐྱེས་པ་དག་གིས་ཕོངས་པ་མེད་པར་འགྱུར་བ་དེ་ལྟ་བུའི་ཐབས་ཅི་ཡོད་སྙམ་ནས་དེ་དེ་ལྟར་སེམས་པ་ན། དེར་གཅེར་བུ་པའི་ཉན་ཐོས་མ་ཞིག་འོངས་ནས་དེས་དེ་ལ་སྨྲས་པ། ཕུ་ནུ་མོ་གང་གིས་གང་སེམས་པ་དང་གང་སྒྲུབ་པ་དེ་ཐམས་ཅད་འགྲུབ་པར་འགྱུར་བ་དེ་ལྟ་བུའི་ཐབས་ཅི་ཡོད། །དེས་སྨྲས་པ། ཕུ་ནུ་མོ་ཁོ་མོའི་མིང་པོ་རབ་ཏུ་བྱུང་བ་བརྟུལ་ཞུགས་གྲུབ་པ་བདག་ཉིད་ཆེན་པོ་ཞིག་ཡོད་པ་དེ་ལ་ཟན་བྱིན་ལ་སྨོན་ལམ་ཐོབ་ཤིག་དང་། ཁྱོད་གང་སེམས་པ་དང་གང་སྒྲུབ་པ་དེ་ཐམས་ཅད་གྲུབ་པར་འགྱུར་རོ། །དེས་སྨྲས་པ། ཕུ་ནུ་མོ་གལ་ཏེ་དེ་ལྟ་ན་སོང་ལ་བདག་ཉིད་ཆེན་པོ་དེ་ཁོ་མོའི་ཁྱིམ་དུ་ཟན་ལ་བོས་ཤིག །དེས་དེ་ཟན་ལ་བོས་སོ། །ཁྱིམ་བདག་གི་ཆུང་མ་དེས་ཀྱང་ཟན་སྦྱར་ཅིང་། ཨུཏྤ་ལ་དག་གིས་ལག་པ་སྟ་གོན་བྱས་སོ། །གཅེར་བུ་པ་དག་ནི་དུས་སུ་ཡང་ཟན་ཟ་ལ། དུས་མ་ཡིན་པར་ཡང་ཟ་བས་དེ་ཡུན་རིང་ཞིག་
ཐོགས་སོ། །སངས་རྒྱས་རྣམས་འབྱུང་བ་མེད་པའི་ཚེ། རང་སངས་རྒྱས་དམན་པ་དང་བཀྲེན་པ་ལ་རྗེས་སུ་སྙིང་བརྩེ་བ། བས་མཐའི་གནས་མལ་ལ་དགའ་བ། བསེ་རུ་ལྟ་བུ་གཅིག་པུ་འཇིག་རྟེན་གྱི་ཡོན་གནས་སུ་གྱུར་པ་དག་འཇིག་རྟེན་དུ་བྱུང་ངོ་། །ཇི་ཙམ་ན་རང་སངས་རྒྱས་ཤིག་ལྗོངས་རྒྱུ་བ་ན་རི་བྲགས་དེར་ཕྱིན་ནས་དེ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་བསོད་སྙོམས་ལ་རྒྱུ་བ་ན་ཁྱིམ་དེར་ཞུགས་པ་དང་། ཁྱིམ་བདག་གི་ཆུང་མ་དེས་ལུས་མཛེས་པ། སེམས་མཛེས་པ་དེ་མཐོང་ནས་དེས་བསམས་པ། འདི་ནི་བརྟུལ་ཞུགས་གྲུབ་པ། བདག་ཉིད་ཆེན་པོ་དེ་ཡིན་གྱིས་ཟན་སྦྱིན་ནོ་སྙམ་ནས། དེས་དེ་ཟས་བསོད་པས་ཚིམ་པར་བྱས་ཤིང་དེ་ལ་ཨུཏྤ་ལ་དག་གིས་ཀྱང་མཆོད་པ་བྱས་སོ། །བདག་ཉིད་ཆེན་པོ་དེ་དག་ནི་ལུས་ཀྱིས་ཆོས་སྟོན་གྱི་ཚིག་གིས་ཆོས་མི་སྟོན་པས་རང་སངས་རྒྱས་དེ་ཟས་ཀྱི་བྱ་བ་བྱས་ནས། དེ་ལ་སྙིང་བརྩེ་བའི་ཕྱིར་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པར་བྱེད་པ་ཡིན་པས་ཁྱིམ་བདག་གི་ཆུང་མ་དེས་གུས་པར་བསྒྲིམ་པ་དང་བཅས་པས་དེའི་རྐང་པ་གཉིས་ལ་ཕྱག་འཚལ་ཏེ་སྨོན་ལམ་བཏབ་པ། བདག་གིས་ཡོན་གནས་ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་སྐྱེས་པ་དག་གིས་ཕོངས་པ་མེད་པར་འགྱུར་ཞིང་འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་བཏབ་བོ། །དགེ་སློང་དག་དེའི་ཚེ་དེའི་དུས་ན་ཁྱིམ་བདག་གི་ཆུང་མ་གང་ཡིན་པ་དེ་ནི་ཨུཏྤ་ལའི་མདོག་འདི་ཡིན་ཏེ། འདིས་རང་སངས་རྒྱས་ལ་ཟན་བྱིན་ཏེ་ཨུཏྤ་ལ་དག་གིས་མཆོད་པ་བྱས་པ་གང་ཡིན་པའི་ལས་དེའི་རྣམ་པར་སྨིན་པས་ནི་ད་ལྟར་མིག་ཨུཏྤ་ལ་འདྲ་བ། ཨུཏྤ་ལའི་དྲི་དང་ལྡན་པ། ཨུཏྤ་ལའི་ཟེའུ་འབྲུའི་མདོག་འདྲ་བར་གྱུར་ཏོ། །བདག་གིས་ཡོན་གནས་
ཡང་དག་པར་གྱུར་པ་འདི་ལྟ་བུ་ལ་མཆོད་པ་བྱས་པ་གང་ཡིན་པའི་དགེ་བའི་རྩ་བ་འདིས་བདག་སྐྱེས་པ་དག་གིས་ཕོངས་པ་མེད་པར་འགྱུར་ཞིང་། འདི་བས་ཆེས་ཁྱད་པར་དུ་འཕགས་པའི་སྟོན་པ་མཉེས་པར་བྱེད་ཅིང་ཐུགས་བྱུང་བར་མི་བྱེད་པའི་ཡོན་ཏན་གྱི་རྣམ་པ་དེ་ལྟ་བུ་དག་ཀྱང་ཐོབ་པར་གྱུར་ཅིག་ཅེས་སྨོན་ལམ་བཏབ་པ་དེས་ནི་སྐྱེས་པ་དག་གིས་ཕོངས་པ་མེད་པར་གྱུར་ཅིང་། ངའི་བསྟན་པ་ལ་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་སུམ་དུ་བྱས་ཤིང་། འདིས་རང་སངས་རྒྱས་བྱེ་བ་ཕྲག་འབུམ་བས་ཆེས་ཁྱད་པར་དུ་འཕགས་པའི་སྟོན་པ་ང་མཉེས་པར་བྱས་ཤིང་ཐུགས་བྱུང་བར་མ་བྱས་སོ། །ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པ་གང་ཡིན་པ་དེ་ནི་སྨོན་ལམ་གྱི་དབང་གིས་ཏེ། གང་དུ་སྨོན་ལམ་བཏབ་ཅེ་ན། དགེ་སློང་དག་སྔོན་བྱུང་བ་བསྐལ་པ་ཆེན་པོ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འོད་སྲུང་འཇིག་རྟེན་དུ་བྱུང་སྟེ། དེ་བཱ་རཱ་ཎ་སཱི་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ། །དེའི་བསྟན་པ་ལ་འདི་རབ་ཏུ་བྱུང་ནས་དགེ་སློང་མ་གང་གིས་དེ་རབ་ཏུ་ཕྱུང་བའི་དགེ་སློང་མ་དེ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་ཏོ། །དེ་ན་འདིས་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་ནས། དེའི་འོག་ཏུ་འཆི་བའི་ཚེ་སྨོན་ལམ་འདི་སྐད་ཅེས་བདག་གིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཡོན་གནས་བླ་ན་མེད་པ་འོད་སྲུང་ལ་ཚེ་ཇི་སྲིད་པར་ཚངས་པར་སྤྱོད་པ་སྤྱད་ན་ཡོན་ཏན་གྱི་ཚོགས་འགའ་ཡང་མ་ཐོབ་སྟེ། བདག་གིས་ཚེ་ཇི་སྲིད་པར་ཚངས་པར་
སྤྱོད་པ་སྤྱད་པའི་དགེ་བའི་རྩ་བ་འདིས་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་བྲམ་ཟེའི་ཁྱེའུ་བླ་མ་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་བསྟན་པ་ལ་བདག་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱེད་ཅིང་། ཇི་ལྟར་མཁན་མོ་འདི་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་འོད་སྲུང་གིས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པ་དེ་བཞིན་དུ། བདག་ཀྱང་བཅོམ་ལྡན་འདས་ཤཱཀྱ་ཐུབ་པ། ཤཱཀྱའི་སེང་གེ། ཤཱཀྱའི་རྒྱལ་པོའི་གཙོ་བོ་དེས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་པར་གྱུར་ཅིག་ཅེས་གདབ་པར་བརྩམས་པས་སྨོན་ལམ་དེའི་དབང་གིས་ད་ལྟར་དེ་བཞིན་གཤེགས་པས་ཉན་ཐོས་མ་རྫུ་འཕྲུལ་ཆེ་བ། མཐུ་ཆེ་བ་རྣམས་ཀྱི་མཆོག་ཏུ་བསྟན་ཏོ། །ཡང་དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཨུཏྤ་ལའི་མདོག་གིས་ལས་ཅི་ཞིག་བགྱིས་ན་དེས་ཚོལ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཨུཏྤ་ལའི་མདོག་ཉིད་ཀྱིས་ལས་ཚོགས་རྙེད་པ། རྐྱེན་ཡོངས་སུ་བསྒྱུར་བ། འོད་པ་བཞིན་དུ་ཉེ་བར་གནས་པ། གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པ། ཨུཏྤ་ལའི་མདོག་ཉིད་ཀྱིས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར། དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར། ཆུའི་ཁམས་ལ་མི་འགྱུར། མེའི་ཁམས་ལ་མི་འགྱུར། རླུང་གི་ཁམས་ལ་མི་འགྱུར་གྱི།
འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་། ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་བའང་ཚོགས་དང་དུས། །རྙེད་ན་ལུས་ཅན་རྣམས་ལ་ནི། །འབྲས་བུ་དག་ཏུ་འགྱུར་བ་ཉིད། །དགེ་སློང་དག་སྔོན་བྱུང་བ་རི་བྲགས་ཤིག་ན་འདི་བུད་མེད་སྨྱན་བྱེད་པ་ཞིག་ཏུ་གྱུར་ནས་དེ་ན་འདིས་བུ་ལྟ་བུ་མང་པོ་དག་མ་ལྟ་བུ་དག་དང་ལྷན་ཅིག་བསྡུས་ཤིང་། མིང་པོ་ལྟ་བུ་མང་པོ་དག་ཀྱང་སྲིང་མོ་ལྟ་བུ་དག་དང་ལྷན་ཅིག་བསྡུས་པས་ལས་དེའི་རྣམ་པར་སྨིན་པས་ད་ལྟར་ཚོལ་བར་གྱུར་ཏོ། །དགེ་སློང་དག་དེ་ལྟར་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ། ལས་གཅིག་ཏུ་དཀར་བ་རྣམས་ཀྱི་རྣམ་པར་སྨིན་པ་ཡང་གཅིག་ཏུ་དཀར་བ་ཡིན། ལས་འདྲེན་མ་རྣམས་ཀྱི་རྣམ་པར་སྨིན་པ་ཡང་འདྲེན་མ་ཡིན་ནོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་། འདྲེན་མ་རྣམས་སྤངས་ནས་ལས་གཅིག་ཏུ་དཀར་བ་རྣམས་ལ་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟར་བསླབ་པར་བྱའོ། །ཨུཏྤ་ལའི་མདོག་གི་ཀུན་དུ་སྤྱོད་པ་ནི་བསོད་སྙོམས་བརྒྱུས་ནས་བསོད་སྙོམས་ཀྱི་ཕུད་དང་པོར་དགེ་འདུན་ལ་འབུལ་ཞིང་ཕྱིས་གཞན་དུ་བརྒྱུས་ཏེ་བདག་ཉིད་ཟ་བར་བྱེད་དེ། ཇི་ཙམ་དུས་གཞན་ཞིག་ན་དེ་བསོད་སྙོམས་ལ་ཞུགས་ནས་དེས་བསོད་སྙོམས་ཀྱི་ཕུད་དགེ་འདུན་ལ་ཕུལ་ནས། དེའི་འོག་ཏུ་བདག་ཉིད་ཀྱི་དོན་དུ་བརྒྱུས་པ་དང་། དགེ་སློང་གློ་བུར་དུ་འོངས་པ་ཞིག་བསོད་སྙོམས་ལ་ཞུགས་པ་ན་དེ་སྤྱོད་ཡུལ་ལ་མི་མཁས་པས་ཅི་ཡང་མ་རྙེད་པ་དེ་ཨུཏྤ་ལའི་མདོག་གིས་མཐོང་ནས་སྨྲས་པ། འཕགས་པ་ཅི་ཡང་མ་བརྙེས་སམ། འཕགས་མ་ཅི་ཡང་མ་རྙེད་དོ། །དེས་བདག་ཉིད་ཀྱི་བསོད་སྙོམས་དེ་བསོད་སྙོམས་པ་དེ་ལ་ཕུལ་ནས་དེའི་ཟན་ཆད་པར་གྱུར་ཏོ། །ཉེ་དགའས་དེ་མཐོང་ནས་དེས་བསམས་པ། སྲིང་མོ་འདི་ནི་དགེ་འདུན་ལ་མངོན་པར་དད་པ་འབའ་ཞིག་ཏུ་མ་ཟད་ཀྱི་གང་ཟག་ལ་ཡང་མངོན་པར་དད་པ་འདྲ་ན། འདི་བགམ་པར་བྱའོ་སྙམ་ནས་ཕྱི་དེ་ཉིན་པར་ཨུཏྤ་
ལའི་མདོག་བསོད་སྙོམས་ལ་ཞུགས་ནས། དེས་བསོད་སྙོམས་ཀྱི་ཕུད་དགེ་འདུན་ལ་ཕུལ་ནས་བདག་ཉིད་ཀྱི་དོན་དུ་གཉིས་པ་བསྒྲུབས་པ་དང་། ཉེ་དགའ་ཡང་འོངས་ནས་སྨྲས་པ། འཕགས་མ་རྙེད་པ་ཅུང་ཟད་ཡོད་དམ། དེས་སྨྲས་པ། འཕགས་པ་མཆིས་ན་གསོལ་ན་བཞེད་དམ། ལྷའི་གནས་ཀྱི་ལྷག་མ་ཇི་ལྟ་བ་བཞིན་ནོ། །འཕགས་པ་གལ་ཏེ་དེ་ལྟ་ན་ལྷུང་བཟེད་བཟེད་དུ་གསོལ། དེས་ལྷུང་བཟེད་བཟེད་པ་དང་། དེས་བསོད་སྙོམས་དེ་དེའི་ལྷུང་བཟེད་དུ་ཕུལ་ལོ། །ཨུཏྤ་ལའི་མདོག་ཉི་མ་གཉིས་སུ་ཟན་ཆད་པས་ཉམ་ཆུང་བའི་སྦྱོར་བས་བརྒྱལ་ཏེ་ས་ལ་སྒྱེལ་བ་དང་། མ་དད་པ་དག་གིས་གླགས་རྙེད་ནས། ཤེས་ལྡན་དག་ཨུཏྤ་ལའི་མདོག་འདི་འདོད་ཆགས་དང་བྲལ་ལོ་ཞེས་གྲག་ན། ཤཱཀྱ་གཞོན་ནུ་གཟུགས་བཟང་བ་འདི་མཐོང་ནས་འདོད་ཆགས་ཀྱིས་བརྒྱལ་ཏེ་ས་ལ་སྒྱེལ་བར་གྱུར་པ་དེ་ཇི་ལྟ་ཞེས་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ། ཉེ་དགའ་ཁྱོད་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་
ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་བཅའ་བ་དང་། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ནི་སོ་སོར་བཤགས་པར་བྱ་བའོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་ཞེས་བྱ་བ་ནི་ཆོས་འདི་པའོ། །ཉེ་དུ་མ་ཡིན་པ་ཞེས་བྱ་བ་ནི་ཕྱི་མོ་དང་། མེས་པོ་དང་། ཕྲུགས་ལས་བརྟེན་པའི་བདུན་པ་ཚུན་ཅད་ནི་ཉེ་དུ་ཡིན་ལ་དེ་ཕན་ཅད་ནི་ཉེ་དུ་མ་ཡིན་ནོ། །ལམ་པོ་ཆེ་ན་འདུག་པ་ཞེས་བྱ་བ་ནི་སྲང་དུ་སོང་བའོ། །བསོད་སྙོམས་ཀྱི་ཕྱིར་གྲོང་དུ་འགྲོ་བ་ཞེས་བྱ་བ་ལ། གྲོང་ཞེས་བྱ་བ་ནི་གང་ན་ལམ་པོ་ཆེ་དང་སྲང་དང་བཞི་མདོ་དང་སུམ་མདོ་དག་ཡོད་པའོ། །ལས་ཞེས་བྱ་བ་ནི་གན་ནས་སོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །རང་གི་ལག་གིས་ཞེས་བྱ་བ་ནི་ལག་གིས་ལག་ཏུའོ། །བླངས་ཏེ་ཞེས་བྱ་བ་ནི་བྱིན་ལེན་སྟོབས་སུ་བཅུག་སྟེའོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཞེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་ལའོ། །ཚེ་དང་ལྡན་པ་བདག་ལ་སྨད་པའི་གནས་ཞེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །བྱུང་གིས་ཞེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་
འཆགས་སོ་ཞེས་བྱ་བ་ནི་མཐོལ་ལོ་ཞེས་སོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་མཐོལ་བར་བྱ་སྟེའོ། །ཆོས་འདི་ནི་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ནི་མཐོལ་བར་བྱ་བ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་དགེ་སློང་མ་ཉེ་དུ་མ་ཡིན་པ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་ཉེ་དུ་མ་ཡིན་པར་འདུ་ཤེས་པས་བཅའ་བ་དང་། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །ཉེ་དུ་མ་ཡིན་པ་ལ་ཡིད་གཉིས་ཟ་བས་བཅའ་བ་དང་། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །དགེ་སློང་གིས་དགེ་སློང་མ་ཉེ་དུ་ལམ་པོ་ཆེ་ན་འདུག་པ་བསོད་སྙོམས་ཀྱི་ཕྱིར་གྲོང་དུ་འགྲོ་བ་ལས་ཉེ་དུ་མ་ཡིན་པར་འདུ་ཤེས་པས་བཅའ་བ་དང་བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ཉེ་དུ་ལ་ཡིད་གཉིས་ཟ་བས་བཅའ་བ་དང་། བཟའ་བ་རང་གི་ལག་གིས་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ལས་དང་པོ་པ་དང་། སྨྱོས་པ་དང་། སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོ་རྫོགས་སྷོ།། །།འདུལ་བ་རྣམ་པར་འབྱེད་པ། བམ་པོ་བརྒྱད་བཅུ་རྩ་གཅིག་པ། སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ན་མུ་གེ་ཉམ་ང་བ་དགོན་པ་སློང་མོ་པས་ཟས་རྙེད་པར་དཀའ་ཞིང་། ཕ་མ་དག་ཀྱང་རང་གི་བུ་དག་ལ་ཟས་སྦྱིན་པ་དང་བྱ་བར་སེམས་པ་དཀའ་ན་སློང་མོ་པ་དག་ལ་ལྟ་སྨོས་ཀྱང་ཅི་དགོས་པ་བྱུང་ངོ་། །དྲུག་སྡེ་དག་སྔ་དྲོ་ཤམ་ཐབས་བགོས་ལྷུང་བཟེད་དང་། ཆོས་གོས་ཐོགས་ཏེ་མཉན་ཡོད་དུ་བསོད་སྙོམས་ལ་ཞུགས་པ་དང་། ལ་ལ་ནས་ཐོབ། ལ་ལ་ནས་མ་ཐོབ་ནས་དེ་དག་བཀྲེས་པས་ཉེན་ནས་བཅུ་གཉིས་སྡེ་དག་གི་གན་དུ་དོང་བ་དང་། དེ་དག་གིས་འཕགས་
པ་དག་བཞུགས་སུ་གསོལ་ཞེས་སྟན་དག་བཤམས་སོ། །དེ་དག་འཁོད་པ་དང་བཅུ་གཉིས་སྡེ་དག་གིས་རྐང་པ་ལ་ཕྱག་འཚལ་ཏེ་མདུན་དུ་འཁོད་ནས་སྨྲས་པ། འཕགས་པ་དག་འཚོའམ། སྲིང་མོ་དག་འདི་ན་ཇི་ལྟར་འཚོ། ཁོ་བོ་ཅག་བཀྲེས་པས་ཉེན་ཏོ། །འཕགས་པ་དག་གལ་ཏེ་དེ་ལྟ་ན་སང་སྤྱོན་ཅིག་དང་ཞལ་ཚུས་གསོལ་ལོ། །སྲིང་མོ་དག་སང་ཁྱེད་ཀྱིས་སྦྱིན་ན་གནངས་སུས་སྦྱིན། འཕགས་པ་དག་བདག་ཅག་ཉིད་ཀྱིས་གསོལ་ལོ། །སྲིང་མོ་དག་དེ་ལྟས་འཚོ་བར་མི་ནུས་ཀྱིས། འདི་ལྟར་སངས་རྒྱས་ལ་སོགས་པ་དགེ་སློང་གི་དགེ་འདུན་གང་དུ་སྤྱན་དྲངས་པ་དེར་ཁྱེད་ཅག་གིས་ཞལ་ཏ་གྱིས་ལ་ཁོ་བོ་ཅག་ལ་ཡང་དང་ཡང་དུ་བྱིན་ཅིག་དང་། དེ་ལྟ་ན་ཁོ་བོ་ཅག་འཚོ་བར་འགྱུར་རོ། །སྦོམ་དགའ་མོས་སྨྲས་པ། འཕགས་པ་དག་དེ་ལྟར་བགྱིར་རུང་ངམ། །སྲིང་མོ་དག་ལེགས་པར་རུང་ངོ་། །ཤིན་ཏུ་རུང་ངོ་། །སུས་བཀག །གང་དུ་བཀག །དེས་སྨྲས་པ། འཕགས་པ་དག་གལ་ཏེ་རུང་ན་མ་ནོངས་ཀྱིས་དེ་བཞིན་བགྱིའོ། །དེ་དག་གིས་ཨ་རོག་གྱ་ཞེས་བྱས་ཏེ་དོང་ངོ་། །ཇི་ཙམ་ན་ཁྱིམ་བདག་ཅིག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཁྱིམ་གཞན་དུ་གདུགས་ཚོད་ལ་སྤྱན་དྲངས་པ་དང་། དགེ་སློང་གི་དགེ་འདུན་ནི་ཞུགས་སོ། །བཅོམ་ལྡན་འདས་ནི་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབས་སོ། །སངས་རྒྱས་བཅོམ་ལྡན་འདས་རྣམས་ནི་རྒྱུ་ལྔས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་བསྒྲུབ་པར་མཛད་དེ། ལྔ་གང་ཞེ་ན། ནང་དུ་ཡང་དག་འཇོག་བཞེད་པ་དང་། ལྷ་རྣམས་ལ་ཆོས་སྟོན་པར་བཞེད་པ་དང་། ནད་པ་ལ་ལྟ་བར་བཞེད་པ་དང་། གནས་མལ་ལ་རྟོགས་པར་བཞེད་པ་དང་། འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བཞེད་པའོ། །དོན་འདིར་ནི་སངས་རྒྱས་བཅོམ་ལྡན་འདས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་བཞེད་པས་རྫས་ལས་བྱུང་བ་ན་བཞུགས་ཤིང་བསོད་སྙོམས་མངོན་པར་སྒྲུབ་པར་མཛད་དོ། །ཁྱིམ་བདག་དེ་ནང་མི་དང་བཅས་པས་དགེ་སློང་གི་དགེ་
འདུན་ལ་བྲིམ་པར་བརྩམས་པ་དང་། སྦོམ་དགའ་མོ་རྒན་པའི་མཐའ་ལོགས་སུ་འདུག་སྟེ། སྨྲས་པ། ཁྱིམ་བདག་འདི་ནི་འཕགས་པ་དགའ་བོ་སྟེ། ཤཱཀྱ་ལས་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས་འདི་ལ་ཡང་གསོལ་ཅིག །འདི་ནི་འཕགས་པ་ཉེ་དགའོ། །འདི་ནི་འགྲོ་མགྱོགས་སོ། །འདི་ནི་ནབ་སོའོ། །འདི་ནི་འདུན་པ་སྟེ། འདི་དག་ཀྱང་ཤཱཀྱ་ལས་རབ་ཏུ་བྱུང་བ་སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས་འདི་དག་ལ་ཡང་ཡང་གསོལ་ཅིག །འདི་ནི་འཕགས་པ་འཆར་ཀ་སྟེ། བྲམ་ཟེ་མདུན་ན་འདོན་གྱི་བུ་རབ་ཏུ་བྱུང་བ། སྡེ་སྣོད་གསུམ་དང་ལྡན་པ། ཆོས་སྒྲོགས་པ། རིགས་པ་དང་གྲོལ་བའི་སྤོབས་པ་ཅན་ཡིན་གྱིས་འདི་ལ་ཡང་ཡང་གསོལ་ཅིག །ཁྱིམ་བདག་དེས་དེ་བཞིན་དུ་དེ་དག་ལ་ཡང་དང་ཡང་དུ་བྱིན་ནོ། །དེ་བཞིན་དུ་སྦོམ་དགའ་མོས་འབྲིམ་མཁན་དག་ལ་ཡང་སྨྲས་ནས། དེ་དག་གིས་ཀྱང་དེ་བཞིན་དུ་དེ་དག་ལ་ཡང་དང་ཡང་དུ་བྱིན་ནོ། །དེ་ན་དགེ་སློང་ཁ་ཅིག་ལ་ནི་འབྲས་ཅན་ཆད། ཁ་ཅིག་ལ་ནི་ཚོད་མ་ཆད། ཁ་ཅིག་ལ་ནི་བཅའ་བ་ཆད། ཁ་ཅིག་ལ་ནི་བཟའ་བ་ཆད། ཁ་ཅིག་གིས་ནི་ཟས་ཅུང་ཟད་ཐོབ་ནས་ཟན་ཆད་པར་གྱུར། ཁ་ཅིག་གིས་ནི་ཟན་མ་ཐོབ་པར་ཟན་ཆད་པར་གྱུར་ཏོ། །དེ་ན་དགེ་སློང་གང་དག་འཆིང་བ་མཐའ་དག་ཡོད་པ་དེ་དག་གིས་ཁྱིམ་བདག་དེ་ལ་ཐོ་བཙམས་པ། ཁྱིམ་བདག་གལ་ཏེ་ཁྱོད་ལ་འབྱོར་པ་མེད་ན་ཅིའི་ཕྱིར་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་འདྲེན་པར་བྱེད། དེས་སྨྲས་པ། འཕགས་པ་དག་བདག་གིས་ཞལ་ཟས་མང་པོ་སྟ་གོན་བགྱིས་ན་སྦོམ་དགའ་མོ་བགྲེས་པའི་མཐའ་ལོགས་སུ་མཆིས་པས་བགྲེས་པའི་མཐའ་ལོགས་སུ་འབའ་ཞིག་ཏུ་ཡང་དང་ཡང་དུ་སྟོབས་སུ་སྩལ་བས་དེ་ལ་བདག་གིས་ཇི་ལྟར་བགྱི་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་། སྐབས་འདི་ལ་དགེ་སློང་གི་དགེ་
འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་ཀྱིས་མི་མཛེས་པ་དེ་ལྟ་བུ་དེ་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་སློང་རབ་ཏུ་མང་པོ་ཁྱིམ་རྣམས་སུ་མགྲོན་དུ་བོས་ནས་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་འདི་ལ་ནི་བཅའ་བ་བྱིན་ཅིག །འདི་ལ་ནི་འབྲས་ཆན་བྱིན་ཅིག །འདི་ལ་ནི་སྲན་ཚོད་བྱིན་ཅིག །འདི་ལ་ནི་ཡང་བྱིན་ཅིག་ཅེས་སྒོ་ཞིང་འདུག་ན་དགེ་སློང་མ་དེ་ལ་དགེ་སློང་དེ་རྣམས་ཀྱིས་འདི་སྐད་ཅེས་སྲིང་མོ་ཁྱོད་དགེ་སློང་ཟན་ཟ་བའི་བར་དུ་རེ་ཞིག་སྡོད་ཅིག་ཅེས་བསྒོ་བར་བྱའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་སྨྲ་མ་སྤོབས་ན་དགེ་སློང་དེ་དག་ཐམས་ཅད་ཀྱིས་ཕྱི་རོལ་ཀུན་དགའི་ར་བར་དོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ཅག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །དགེ་སློང་རབ་ཏུ་མང་པོ་ཞེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོའོ། །ཁྱིམ་རྣམས་སུ་ཞེས་བྱ་བ་ནི་བྲམ་ཟེ་དང་། ཁྱིམ་བདག་གི་ཁྱིམ་རྣམས་སུའོ། །མགྲོན་དུ་བོས་ནས་ཞེས་བྱ་བ་ནི་ཟན་གྱི་ཕྱིར་རོ། །ཟན་ཟ་བའི་ཚེ་ཞེས་བྱ་བ་ནི་བཅའ་བ་ལྔ་དང་། བཟའ་བ་ལྔ་དག་གོ། །
དེ་ལ་གལ་ཏེ་དགེ་སློང་མ་ཞིག་ཅེས་བྱ་བ་ནི་སྦོམ་དགའ་མོའམ། གཞན་ཡང་དེ་ལྟ་བུ་གང་ཡིན་པའོ། །དགེ་སློང་མ་དེ་ལ་ཞེས་བྱ་བ་ནི་སྦོམ་དགའ་མོའམ། གཞན་ཡང་དེ་ལྟ་བུ་གང་ཡིན་པ་ལའོ། །དགེ་སློང་དེ་རྣམས་ཀྱིས་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ཀྱིས་སོ། །འདི་སྐད་ཅེས་ཞེས་བྱ་བ་ནི་འདི་སྐད་ཅེས་བསྒོ་བར་བྱ་བའོ། །སྲིང་མོ་ཁྱོད་དགེ་སློང་རྣམས་ཟན་ཟ་བའི་བར་དུ་རེ་ཞིག་སྡོད་ཅིག་ཅེས་བསྒོ་བར་བྱའོ་ཞེས་བྱ་བ་ནི་སྲིང་མོ་ཁྱོད་དགེ་སློང་རྣམས་ཟན་ཟ་བའི་བར་དུ་རེ་ཞིག་ཡུད་ཙམ་ཞིག་ཁ་རོག་པར་སྡོད་ཅིག་ཅེས་བརྗོད་པར་བྱ་བའོ། །གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་སྨྲ་མ་སྤོབས་ན་ཞེས་བྱ་བ་ནི་གལ་ཏེ་དགེ་སློང་གཅིག་གིས་ཀྱང་དགེ་སློང་མ་དེ་ལ་དེ་སྐད་མ་སྨྲས་ནའོ། །དགེ་སློང་དེ་དག་ཐམས་ཅད་ཀྱིས་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་དེ་དག་ཐམས་ཅད་ཀྱིས་སོ། །ཕྱི་རོལ་ཀུན་དགའ་ར་བར་དོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་དོང་སྟེའོ། །དགེ་སློང་རྣམས་ལ་ཚེ་དང་ལྡན་པ་དག་བདག་ཅག་ལ་སྨད་པའི་གནས་ཞེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །བྱུང་གིས་ཞེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་མཐོལ་ལོ་ཞེས་བྱ་བའོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་མཐོལ་བར་བྱ་སྟེའོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་མཐོལ་བར་བྱ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་རྣམས་ཁང་ཏོག་ན་ཟན་ཟ་ཞིང་གཞན་དག་བར་ཁང་ན་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་སྒོ་ཞིང་འདུག་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ། །གང་དག་བར་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོའམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སུ་འགྱུར་རོ། །དགེ་སློང་རྣམས་
འོག་ཁང་ན་ཟན་ཟ་ཞིང་གཞན་དག་སྒོ་ཁང་ན་ཟན་ཟ་བའི་ཚེ་དེ་ན་གལ་ཏེ་དགེ་སློང་མ་ཞིག་བསྒོ་ཞིང་འདུག་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་བྱ་བར་འགྱུར་རོ། །གང་དག་སྒོ་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོའམ་ཞེས་དྲི་བར་བྱའོ། །མ་དྲིས་པར་ཟོས་ན་ཉེས་བྱས་སུ་འགྱུར་རོ། །དགེ་སློང་ཁ་ཅིག་ཟོས་ཏེ་ཕྱིར་འབྱུང་ཞིང་གཞན་དག་ནང་དུ་འཇུག་ན་དེ་ན་གང་དག་ནང་དུ་འཇུག་པ་དེ་དག་གིས་དགེ་སློང་མ་དེ་ལ་བསྒོའམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སུ་འགྱུར་རོ། །དེའི་ངོར་མགྲོན་དུ་བོས་པ་དང་། ཡང་དག་པར་འཛིན་དུ་འཇུག་པ་ལ་ལྟུང་བ་མེད་དོ། །བྱུག་རིས་སྟོན་པ་དང་། མ་བྱིན་པ་ལ་སྦྱིན་དུ་འཇུག་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་། སེམས་འཁྲུག་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །གྲལ་རིམས་སུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་སྟེ་གཉིས་པ་རྫོགས་སྷོ།། །།སངས་རྒྱས་བཅོམ་ལྡན་འདས་ཡངས་པ་ཅན་ན་སྤྲེའུ་རྫིང་གི་འགྲམ་ཁང་པ་བརྩེགས་པའི་ཁང་བཟངས་ན་བཞུགས་སོ། །གང་གི་ཚེ་དམག་དཔོན་སེང་གེས་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་བ་དེའི་ཚེ་དེས་ཆ་གཅིག་བཟུང་ནས་འདི་ལྟར་ཁྱུ་མཆོག་རླབས་པོ་ཆེའི་ཚིག་སྨྲས་ཤིང་འཁོར་གྱི་ནང་དུ་སེང་གེའི་སྒྲ་ཡང་དག་པར་བསྒྲགས་ཏེ། དེང་ཕྱིན་ཅད་གཅེར་བུ་པ་དག་དང་། གཅེར་བུ་མ་དག་དང་། གཅེར་བུ་པའི་ཉན་ཐོས་དག་དང་། གཅེར་བུ་པའི་ཉན་ཐོས་མ་དག་གི་སྒོ་ནི་བཅད། བཅོམ་ལྡན་འདས་ཀྱི་ཉན་ཐོས་དགེ་སློང་དག་དང་། དགེ་སློང་མ་དག་དང་། དགེ་བསྙེན་དག་དང་། དགེ་བསྙེན་མ་དག་གི་སྒོ་ནི་ཕྱེའོ་ཞེས་བསྒྲགས་ཤིང་ཞིང་ལས་ཀྱི་མཐའ་དག་ཀྱང་ཁ་ན་མ་ཐོ་བ་དང་བཅས་པ་ཡིན་ནོ་ཞེས་ཡོངས་སུ་བཏང་ངོ་། །དེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་
ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མེད་དེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་ཟད་དེ། ཡོངས་སུ་མཐར་ཐུག་པར་གྱུར་ཏོ། །དེའི་སྐབས་སུ་ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་ལྗོངས་རྒྱུ་ཞིང་འདོང་བ་ན་ཡངས་པ་ཅན་དུ་ཕྱིན་ནས་དམག་དཔོན་སེང་གེས་དེ་གཉིས་ཁྱིམ་གཞན་དུ་ཟན་ལ་མགྲོན་དུ་བོས་ནས་དེ་དེ་གཉིས་ཀྱི་ཟན་སྦྱར་བའི་ཕྱིར་བདག་ཉིད་སྲང་དུ་སོང་བ་དང་གཅེར་བུ་པ་དག་གིས་མཐོང་ནས། དེ་དག་ཤེས་ལྡན་དག་གང་གི་ཚེ་དམག་དཔོན་སེང་གེ་བདག་ཅག་ལ་མངོན་པར་དད་པ་དེའི་ཚེ་ན་འདིའི་ཐམས་ཅད་ཕུན་སུམ་ཚོགས་པར་གྱུར་ན། ད་ལྟར་ཤཱཀྱའི་བུའི་དགེ་སྦྱོང་དག་ལ་མངོན་པར་དད་པས་འདི་ལ་བཅར་ཡང་མེད་བཟར་ཡང་མེད་དེ་བདག་ཉིད་ཁྱིམ་གྱི་ལས་བྱེད་དོ་ཞེས་སྨོད་པ་ལ་ཞུགས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཁྱེད་ཀྱིས་དམག་དཔོན་སེང་གེ་དང་གཞན་ཡང་དེ་ལྟ་བུ་གང་ཡིན་པ་ལ་བསླབ་པའི་སྡོམ་པ་བྱིན་ཅིག །འདི་ལྟར་སྦྱིན་པར་བྱ་སྟེ། གནས་མལ་བཤམ་པ་བྱས་ནས། གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་འབའ་ཞིག་གི་ལས་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དམག་དཔོན་སེང་གེ་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དམག་དཔོན་སེང་གེ་ལ་བསླབ་པའི་སྡོམ་པ་སྩོལ་ཏོ། །འདི་ནི་གསོལ་བའོ། །དགེ་འདུན་གྱིས་གང་ལ་བསླབ་པའི་སྡོམ་པ་བྱིན་པ་དེར་དགེ་སློང་གིས་ཁྱིམ་དུ་འགྲོ་བར་
མི་བྱ། སྟན་ལ་ལོངས་སྤྱད་པར་མི་བྱ། བསོད་སྙོམས་བཟའ་བར་མི་བྱ། ཆོས་བསྟན་པར་མི་བྱའོ། །བཅོམ་ལྡན་འདས་ཀྱིས་གང་ལ་དགེ་འདུན་གྱིས་བསླབ་པའི་སྡོམ་པ་བྱིན་པ་དེར་དགེ་སློང་གིས་ཁྱིམ་དུ་འགྲོ་བར་མི་བྱ། སྟན་ལ་ལོངས་སྤྱད་པར་མི་བྱ། བསོད་སྙོམས་བཟའ་བར་མི་བྱ། ཆོས་བསྟན་པར་མི་བྱའོ་ཞེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་སྔར་མགྲོན་དུ་བོས་པ་ཡང་དེའི་ཁྱིམ་དུ་མ་དོང་ངོ་། །དེ་ནས་དམག་དཔོན་སེང་གེས་ཁ་ཟས་སྟ་གོན་བྱས་ནས། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་ཆེན་པོ་གཉིས་ག་ལ་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ཀྱི་རྐང་པ་ལ་མགོ་བོས་ཕྱག་འཚལ་ཏེ་འདི་སྐད་ཅེས་སྨྲས་སོ། །འཕགས་པ་གཉིས་གདུགས་ཚོད་གཡར་དགོངས་འཚལ་ན་ད་དེའི་དུས་ལ་བབ་པར་དགོངས་སུ་གསོལ། དེ་གཉིས་ཀྱིས་སྨྲས་པ། ཁྱིམ་བདག་ཁྱོད་ལ་དགེ་འདུན་གྱིས་བསླབ་པའི་སྡོམ་པ་བྱིན་གྱིས་མི་འགྲོའོ། །དེས་སྨྲས་པ། འཕགས་པ་གཉིས་བདག་གིས་ཁྱེད་གཉིས་སྔར་སྤྱན་དྲངས་ཀྱིས་གཤེགས་སུ་གསོལ། དེ་གཉིས་ཀྱིས་སྨྲས་པ། ཁྱིམ་བདག་འོ་ན་བཅོམ་ལྡན་འདས་ལ་ཞུའོ་ཞེས་དེ་གཉིས་ཀྱིས་སྐབས་དེ་བཅོམ་ལྡན་འདས་ལ་རྒྱས་པར་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྔར་མགྲོན་དུ་བོས་པ་གང་ཡིན་པ་དེས་བཟའ་བར་བྱ་སྟེ་འདི་ལ་འགྱོད་པར་མི་བྱའོ། །དེ་གཉིས་དམག་དཔོན་སེང་གེའི་ཁྱིམ་དུ་འཕགས་པ་དང་། དྲུག་སྡེ་དག་གིས་དེ་གཉིས་མཐོང་ནས། དེ་དག་གིས་སྨྲས་པ། ཁྱོད་གཉིས་གར་བཞུད། དམག་དཔོན་སེང་གེའི་ཁྱིམ་དུའོ། །དེ་ལ་དགེ་འདུན་གྱིས་བསླབ་པའི་སྡོམ་པ་མ་བྱིན་ནམ། གང་ལ་བྱིན་པ་དེ་ལ་བྱིན་གྱིས་ཁོ་བོ་ཅག་གཉིས་སྔར་མགྲོན་དུ་བོས་སོ། །གལ་ཏེ་དེ་ལྟ་ན་ཁོ་བོ་ཅག་ཆེས་སྔར་མགྲོན་དུ་བོས་ཏེ། གང་གི་ཚེ་དམག་དཔོན་སེང་གེས་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་བ་དེའི་ཚེ་ན། དེས་ཆ་གཅིག་བཟུང་ནས། འདི་ལྟར་ཁྱུ་མཆོག་རླབས་པོ་ཆེའི་ཚིག་སྨྲས་ཤིང་འཁོར་གྱི་ནང་དུ་སེང་གེའི་སྒྲ་ཡང་དག་པར་བསྒྲགས་
ཏེ། དེང་ཕྱིན་ཅད་གཅེར་བུ་པ་དག་དང་། གཅེར་བུ་མ་དག་དང་། གཅེར་བུ་པའི་ཉན་ཐོས་དག་དང་། གཅེར་བུ་མའི་ཉན་ཐོས་མ་དག་གི་སྒོ་ནི་བཅད་དོ། །བཅོམ་ལྡན་འདས་ཀྱི་ཉན་ཐོས་དགེ་སློང་དག་དང་། དགེ་སློང་མ་དག་དང་། དགེ་བསྙེན་དག་དང་། དགེ་བསྙེན་མ་དག་གི་སྒོ་ནི་ཕྱེའོ་ཞེས་བསྒྲགས་པས་དེའི་ཕྱིར་ཁོ་བོ་ཅག་ཆེས་སྔར་མགྲོན་དུ་བོས་སོ། །དེ་གཉིས་ཅང་མི་སྨྲ་བར་དོང་བ་དང་དེ་དག་ཀྱང་དེ་གཉིས་ཀྱི་ཕྱི་བཞིན་ཕྱི་བཞིན་དུ་རྗེས་སུ་འབྲང་བ་ན་དམག་དཔོན་སེང་གེས་དགེ་སློང་རབ་ཏུ་མང་པོ་དག་འོང་བ་མཐོང་ནས་མཆོག་ཏུ་དགའ་བ་བསྐྱེད་དེ་ཁྱིམ་མི་ལ་དགོས་པ་གང་དག་ཡིན་པ་དེ་དག་ཀྱང་དགེ་སློང་རྣམས་ལ་བྲིམས་སོ། །དེ་དག་གིས་ཟོས་ཏེ་དོང་བ་དང་དེའི་བུ་དག་གིས་ཟས་བསླང་བར་བརྩམས་པ་ན་དེས་སྨྲས་པ། བུ་དག་ཁྱིམ་མི་ལ་དགོས་པ་གང་ཡིན་པ་དེ་དག་ཀྱང་དགེ་སློང་རྣམས་ལ་བྲིམས་ཀྱིས་གཞན་སྒྲུབ་ཀྱི་བར་དུ་རེ་ཞིག་སྡོད་ཅིག །དེ་དག་གིས་ངུ་བར་བརྩམས་པ་ཐོས་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དག་ཏུ་སྔར་མགྲོན་དུ་མ་བོས་པར་དོང་སྟེ་རང་གི་ལག་གིས་བཅའ་བ་དང་། བཟའ་བ་བླངས་ནས་འཆའ་བར་བྱེད། ཟ་བར་བྱེད་ཅེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་། སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་དག་ཏུ་སྔར་མགྲོན་དུ་མ་བོས་པར་དོང་སྟེ། རང་གི་ལག་གིས་བཅའ་བ་དང་། བཟའ་བ་བླངས་ནས་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་
ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པར་གྱུར་ལ། ཡང་དགེ་སློང་གང་སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་སྔར་མགྲོན་དུ་མ་བོས་པར་སོང་སྟེ་རང་གི་ལག་གིས་བཅའ་བ་དང་། བཟའ་བ་བླངས་ནས་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའི་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས་ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ། ཆོས་འདི་ཡང་སོ་སོར་བཤགས་པར་བྱ་བའོ། །གང་གི་ཚེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་པ་དེའི་ཚེ་ན་དགེ་སློང་འགའ་ཡང་དམག་དཔོན་སེང་གེའི་ཁྱིམ་དུ་མི་འགྲོའོ། །དེ་ནས་དམག་དཔོན་སེང་གེའི་ཆུང་མས་དམག་དཔོན་སེང་གེ་ལ་འདི་སྐད་ཅེས་སྨྲས་སོ། །རྗེའི་སྲས་མཁྱེན་པར་མཛོད་ཅིག །དགེ་འདུན་གྱིས་སྐོལ་ཅག་ལ་བསླབ་པའི་སྡོམ་པ་སྩལ་ནས། དགེ་སློང་འགའ་ཡང་མི་མཆི་བས་དོན་གྱིས་ན་དགེ་འདུན་གྱིས་ཚུལ་ཤིང་གིས་སྐོལ་གྱི་དགེ་སློང་རྣམས་ཀྱི་བཤོས་ཤིན་ཏུ་བཀག་ཀྱང་གདན་གྱི་ལོངས་སྤྱོད་དང་། ཆོས་སྟོན་པ་ལ་ནོངས་པ་ཅི་མཆིས་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་དམག་དཔོན་སེང་གེའི་ཁྱིམ་དུ་འགྲོ་བར་བྱ། སྟན་ལ་ལོངས་སྤྱད་པར་བྱ། ཆོས་བསྟན་
པར་བྱ་ཞིང་བསོད་སྙོམས་བླང་བར་ནི་མི་བྱའོ། །དགེ་སློང་དག་ལྷུང་བཟེད་སྟོང་པ་ཁོ་ནས་དང་པོར་དེའི་ཁྱིམ་དུ་འཇུག་ཅིང་འབྱུང་ནས། དམག་དཔོན་སེང་གེའི་ཆུང་མས་དེ་མཐོང་བ་དང་། སྔོན་ནི་འཕགས་པ་འདི་དག་ལྷུང་བཟེད་སྟོང་པ་ཁོ་ནས་དང་པོར་བདག་གི་ཁྱིམ་དུ་ཞུགས་ནས་ལྷུང་བཟེད་གང་བ་དང་ལག་པ་གང་བ་དག་གིས་འབྱུང་ན། ད་ནི་ལྷུང་བཟེད་སྟོང་པ་དང་ལག་པ་སྟོང་པ་དག་གིས་འབྱུང་ངོ་ཞེས་ངུ་བར་བརྩམས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་ལྷུང་བཟེད་སྟོང་པ་ཁོ་ནས་དང་པོར་དེའི་ཁྱིམ་དུ་འཇུག་པར་མི་བྱའོ། །དགེ་སློང་དག་གིས་བསོད་སྙོམས་བརྒྱུས་ནས་ལྷུང་བཟེད་གང་བས་དེའི་ཁྱིམ་དུ་འཇུག་པར་བརྩམས་པ་དང་། དེའི་བུ་བྱིས་པ་ཁྱེའུ་དག་བཅའ་བ་དག་སློང་བ་ན་དགེ་སློང་རྣམས་ཀྱིས་མ་བྱིན་ནས། བཅོམ་ལྡན་འདས་ཀྱིས་བཀའ་སྩལ་པ། སྦྱིན་པར་བྱའོ། །དགེ་སློང་དག་གིས་རིལ་པོར་སྦྱིན་པར་བརྩམས་པ་དང་། བྱིས་པ་ཁྱེའུ་དག་གིས་བླངས་ནས་འཆའ་ཞིང་ཕྱིར་བྱུང་བ་གཅེར་བུ་པ་དག་གིས་མཐོང་ནས། དྲིས་པ་ཁྱེའུ་དག་ཁྱེད་ཅག་གིས་བཅའ་བ་ག་ལས་རྙེད། འཕགས་པ་དག་གིས་བྱིན་ནོ། །མ་ཉེས་སོ་བུམ་པས་བུམ་པ་འགེངས་ཏེ། ཁྱེད་ཀྱང་དེ་དག་ལ་སྦྱིན་ལ། དེ་དག་ཀྱང་ཁྱེད་ལ་སྦྱིན་ནོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་བཅའ་བ་རིལ་པོར་མི་སྦྱིན་པར་དུམ་བུར་བྱས་ཏེ་སྦྱིན་པར་བྱའོ། །ཇི་ཙམ་དུས་གཞན་ཞིག་ན་དམག་དཔོན་སེང་གེའི་ཆུང་མས་དགེ་སློང་འོངས་པ་རྣམས་ལ་ག་གོན་དང་ལ་ཕུག་ལ་སོགས་པ་འབྲས་བུ་དང་། རྩ་བ་དག་དང་། ལྡམ་ལྡུམ་ལ་སོགས་པ་ཚོད་མ་དག་ཕུལ་བ་དང་། དགེ་སློང་དག་མི་ལེན་ནས་དེས་སྨྲས་པ། འཕགས་པ་དག་འདི་དག་གིས་བདག་ཅག་གི་མཛོད་དང་། བང་བ་དག་བས་པར་འགྱུར་རམ་ཅི་བཞེས་ཤིག་ཅེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ།
དེ་ལྟ་བས་ན་དགེ་སློང་དག་གིས་ག་གོན་དང་ལ་ཕུག་ལ་སོགས་པ་འབྲས་བུ་དང་། རྩ་བ་དག་དང་། ལྡམ་ལྡུམ་ལ་སོགས་པ་ཚོད་མ་ཁྱིམ་ནས་འབྱུང་བ་བླང་བར་བྱའོ། །དེའི་ཚེ་ན་ཡངས་པ་ཅན་གྱི་ལིཙྪ་བཱི་དག་དཔོང་སའི་ཁང་པ་ན་གཏམ་འདྲེ་ཞིང་འཁོད་པ་དེ་དག་གིས་དགེ་སློང་དེ་དག་དམག་དཔོན་སེང་གེའི་ཁྱིམ་ནས་བྱུང་བ་མཐོང་ནས་དེ་ན་གང་དག་མ་དད་པ་དེ་དག་གིས་སྨྲས་པ། ཤེས་ལྡན་དག་གང་གི་ཚེ་དམག་དཔོན་སེང་གེ་དགེ་སྦྱོང་གཽ་ཏ་མ་ལ་མངོན་པར་དད་པར་གྱུར་པ་དེ་ཚུན་ཆད་ནས་དེའི་ལོངས་སྤྱོད་དག་སྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་ཏོ། །དད་པ་ཅན་དག་གིས་སྨྲས་པ། ཤེས་ལྡན་དག་གང་བཅོམ་ལྡན་འདས་ལ་མངོན་པར་དད་པ་དེའི་ལོངས་སྤྱོད་དག་སྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་ག་ལ་འགྱུར། འདི་ལྟར་དམག་དཔོན་སེང་གེས་ནི་བཅོམ་ལྡན་འདས་ཀྱི་སྤྱན་སྔ་ནས་བདེན་པ་དག་མཐོང་ནས་དེའི་ཞིང་ལས་ཀྱི་མཐའ་དག་ཁ་ན་མ་ཐོ་བ་དང་བཅས་པ་ཡིན་ནོ་ཞེས་རྒྱུན་བཅད་པས་དེས་ན་དེའི་ལོངས་སྤྱོད་དག་སྲབས་པ་དང་། ཡོངས་སུ་ཟད་པ་དང་། ཡོངས་སུ་གཏུགས་པར་གྱུར་ཏོ། །ཡངས་པ་ཅན་གྱི་ལིཙྪ་བཱི་དག་གིས་གྲོས་བྱས་ནས། དམག་དཔོན་སེང་གེའི་ཞིང་པ་དག་ལ་སྨྲས་པ། ཤེས་ལྡན་དག་ཁྱེད་ཅིའི་ཕྱིར་དམག་དཔོན་སེང་གེའི་ཞིང་ལས་ཀྱི་མཐའ་དག་མི་བྱེད། གླ་མ་ཐོབ་བམ་ཅི། དེ་དག་གིས་སྨྲས་པ། ཤེས་ལྡན་དག་གླ་མ་ཐོབ་པ་མ་ཡིན་ཏེ། དམག་དཔོན་གྱིས་བདག་ཅག་བཀག་ན་ཇི་ལྟར་བྱ། ཁྱེད་ཅག་ལ་ཚོགས་ཀྱིས་བསྒོས། དེང་ལ་དམག་དཔོན་གྱི་ཞིང་ལས་ཀྱི་མཐའ་དག་གྱིས་ཤིག །དེ་དག་གིས་ཡངས་པ་ཅན་གྱི་ལིཙྪ་བཱི་དག་གི་ཚིག་གིས་དམག་དཔོན་སེང་གེའི་ཞིང་ལས་ཀྱི་མཐའ་དག་བྱ་བར་བརྩམས་པ་དང་། ལྷས་དུས་སུ་ཆར་གྱི་རྒྱུན་ལེགས་པར་ཕབ་ནས་ལོ་ཏོག་གི་འབྱོར་པ་ཆེན་པོ་སྐྱེས་པར་གྱུར་ཏོ། །དམག་དཔོན་སེང་གེ་ཡང་ལོངས་སྤྱོད་དག་གིས་མཐོ་བར་གྱུར་ནས་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ། །མཐའ་
གཅིག་ཏུ་འདུག་ནས་བཅོམ་ལྡན་འདས་ལ་དམག་དཔོན་སེང་གེས་འདི་སྐད་ཅེས་གསོལ་ཏོ། །བཙུན་པ་སྔོན་བདག་གི་ལོངས་སྤྱོད་དག་སྲབས་པ་དང་། ཡོངས་སུ་བས་པ་དང་། ཡོངས་སུ་གཏུགས་པར་གྱུར་ནས་དགེ་འདུན་དོན་བཞེད་པ། ཕན་པ་བཞེད་པ་བདག་ལ་བསླབ་པའི་སྡོམ་པ་སྩལ་ན། ད་ནི་ཡངས་པ་ཅན་གྱི་ལིཙྪ་བཱིའི་ཚོགས་ཀྱིས་བདག་གི་ལོངས་སྤྱོད་བསྒྲུབས་ནས་ལོངས་སྤྱོད་དག་འཕེལ་བར་གྱུར་ན། བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ལ་བསླབ་པའི་སྡོམ་པ་གཞིག་པ་མཛད་ན་ལེགས་སོ། །བཅོམ་ལྡན་འདས་ཀྱིས་དམག་དཔོན་སེང་གེ་ལ་ཅང་མི་གསུང་བས་གནང་ངོ་། །དེ་ནས་དམག་དཔོན་སེང་གེས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་དམག་དཔོན་སེང་གེ་དང་གཞན་ཡང་དེ་ལྟ་བུ་གང་ཡིན་པའི་བསླབ་པའི་སྡོམ་པ་གཞིག་པར་བྱའོ་འདི་ལྟར་གཞིག་པར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་དམག་དཔོན་སེང་གེས་ཕྱག་བྱས་ཏེ་རྒན་པའི་མཐའ་ལོགས་སུ་ཙོག་ཙོག་པོར་འདུག་ནས་ཐལ་མོ་སྦྱར་ཏེ་འདི་སྐད་ཅེས་བརྗོད་པར་བྱའོ། །དགེ་འདུན་བཙུན་པ་རྣམས་གསན་དུ་གསོལ། བདག་དམག་དཔོན་སེང་གེ་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། བདག་གིས་འདི་ལྟ་སྟེ། སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། བདག་གིས་དེ་ལྟར་ཕུལ་ཞིང་དེ་ལྟར་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ནས་དགེ་འདུན་དོན་བཞེད་པ། ཕན་པ་བཞེད་པས་བདག་ལ་བསླབ་པའི་སྡོམ་པ་སྩལ་བ་ལས་བདག་དམག་དཔོན་སེང་གེ་ཡང་
ལོངས་སྤྱོད་འཕེལ་ནས། བདག་དམག་དཔོན་སེང་གེ་བསླབ་པའི་སྡོམ་པ་སྩལ་བ། བསླབ་པའི་སྡོམ་པ་གཞིག་པར་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་བསླབ་པའི་སྡོམ་པ་གཞིག་པ་སྩལ་དུ་གསོལ། དེ་སྐད་ལན་གཉིས་ལན་གསུམ་དུ་བཟླས་སོ། །དེ་ནས་དམག་དཔོན་སེང་གེ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་བཞག་ནས་དགེ་སློང་གཅིག་གིས་གསོལ་བ་འབའ་ཞིག་གི་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དམག་དཔོན་སེང་གེ་དེ་ནི་དད་པ་དང་ལྡན་ཞིང་བཟང་ལ་དགེ་བའི་བསམ་པ་ཅན་ཏེ། དེས་སངས་རྒྱས་སམ། ཆོས་སམ། དགེ་འདུན་ནམ། ཡིད་དུ་འཐད་པའི་དགེ་སློང་རྣམས་ལ་མ་ཕུལ་བའམ། ཡོངས་སུ་མ་བཏང་བ་ཅི་ཡང་མ་མཆིས་ཏེ། དེས་དེ་ལྟར་ཕུལ་ཞིང་ཡོངས་སུ་བཏང་བས་ལོངས་སྤྱོད་སྲབས་ཤིང་ཡོངས་སུ་བས་ཏེ་ཡོངས་སུ་མཐར་ཐུག་ནས་དེ་ལ་དགེ་འདུན་དོན་བཞེད་པ། ཕན་པ་བཞེད་པས་བསླབ་པའི་སྡོམ་པ་སྩལ་བ་ལས་དམག་དཔོན་སེང་གེ་དེ་ཡང་ལོངས་སྤྱོད་འཕེལ་ཏེ། དམག་དཔོན་སེང་གེ་བསླབ་པའི་སྡོམ་པ་སྩལ་བ་དགེ་འདུན་ལས་སྡོམ་པ་གཞིག་པར་གསོལ་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དམག་དཔོན་སེང་གེ་ལ་བསླབ་པའི་སྡོམ་པ་གཞིག་པ་མཛད་དོ། །འདི་ནི་གསོལ་བའོ། །དགེ་འདུན་གྱིས་གང་ལ་བསླབ་པའི་སྡོམ་པ་བཤིག་པ་དེར་དགེ་སློང་རྣམས་ཀྱིས་འགྲོ་བར་བྱ། སྟན་ལ་ལོངས་སྤྱད་པར་བྱ། བསོད་སྙོམས་བླང་བར་བྱ། ཆོས་བསྟན་པར་བྱའོ། །སློབ་པ་དག་གི་ཞེས་བྱ་བ་ལ། སློབ་པ་དག་ཅེས་བྱ་བ་ནི་རྒྱུན་དུ་ཞུགས་པ་དག་དང་། ལན་གཅིག་ཕྱིར་འོང་བ་དག་དང་། ཕྱིར་མི་འོང་བ་དག་གོ །ཁྱིམ་གང་དག་ཅེས་བྱ་བ་ནི་བྲམ་ཟེ་དང་། ཁྱིམ་བདག་གི་ཁྱིམ་དག་གོ །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །བསླབ་པའི་སྡོམ་པས་བསྡམས་པར་གྱུར་ལ་ཞེས་བྱ་བ་ནི་གསོལ་བའི་ལས་ཀྱིས་སོ། །ཡང་དགེ་སློང་གང་ཞེས་བྱ་བ་ནི་དྲུག་
སྡེའམ། གཞན་ཡང་དེ་ལྟ་བུ་གང་ཡིན་པའོ། །སློབ་པ་དག་གི་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་ཞེས་བྱ་བ་ནི་ཇི་སྐད་བསྟན་པ་ལྟ་བུ་དག་ཏུའོ། །སྔར་མགྲོན་དུ་མ་བོས་པར་ཞེས་བྱ་བ་ནི་སྔར་མ་བསྟབས་པར་རོ། །སོང་སྟེ་ཞེས་བྱ་བ་ནི་སོང་ནས་སོ། །རང་གི་ལག་གིས་ཞེས་བྱ་བ་ནི་ལག་པས་ལག་པར་རོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །བླངས་ན་ཞེས་བྱ་བ་ནི་བྱིན་ལེན་སྟོབས་སུ་བཅུག་ནས་སོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཞེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ལའོ། །ཚེ་དང་ལྡན་པ་དག་བདག་ལ་སྨད་པའི་གནས་ཞེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །བྱུང་གིས་ཞེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་མཐོལ་ལོ་ཞེས་སོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་མཐོལ་བར་བྱ་སྟེའོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་མཐོལ་བར་བྱ་བ་སྟེ། དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ཇི་ཙམ་ཅུང་ཟད་སློབ་པ་དག་གིས་ཁྱིམ་གང་དག་དགེ་འདུན་གྱི་བསླབ་པའི་སྡོམ་པས་བསྡམས་པ་དེ་ལྟ་བུ་དག་ཏུ་སྔར་མགྲོན་དུ་མ་བོས་པར་སོང་སྟེ་རང་གི་ལག་གིས་བཅའ་བ་དང་བཟའ་བ་བླངས་ནས་འཆའ་འམ་ཟ་ན་ཐམས་ཅད་དུ་སོ་སོར་བཤགས་པར་བྱ་བར་འགྱུར་རོ། །སྔར་མགྲོན་དུ་བོས་པ་ལ་ལྟུང་བ་མེད་དོ། །ལས་དང་པོ་པ་དང་། སྨྱོས་པ་དང་སེམས་འཁྲུགས་པ་དང་། ཚོར་བ་དག་གིས་ཉེན་པ་ལ་ལྟུང་བ་མེད་དོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པ་རྫོགས་སྷོ།། །།སངས་
རྒྱས་བཅོམ་ལྡན་འདས་སེར་སྐྱའི་གནས་ན་སེར་སྐྱའི་གནས་ཀྱི་ནགས་སུ་དབྱར་གནས་པར་ཞལ་གྱིས་བཞེས་སོ། །བཅོམ་ལྡན་འདས་ཀྱིས་དགེ་སློང་རྣམས་ཀྱིས་ཞག་བདུན་ནམ་བརྒྱད་ན་དགག་དབྱེ་འབྱུང་བར་འགྱུར་བ་ན་སྤྱོད་ཡུལ་གྱི་གྲོང་དུ་ཞག་འདི་སྙེད་ན་དགག་དབྱེ་འབྱུང་བར་འགྱུར་རོ། །ཞེས་བརྗོད་པར་བྱའོ་ཞེས་བཀའ་སྩལ་ནས་དགེ་སློང་རྣམས་དོང་སྟེ་བརྗོད་དོ། །དེ་ནས་སེར་སྐྱའི་གནས་ན་གནས་པའི་ཤཱཀྱ་དག་དེ་གཉིས་ཀྱི་དགག་དབྱེ་བཅྭ་ལྔ་པ་ལ་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འཁོད་དོ། །མཐའ་གཅིག་ཏུ་འཁོད་ནས་བཅོམ་ལྡན་འདས་སེར་སྐྱའི་གནས་ན་གནས་པའི་ཤཱཀྱ་རྣམས་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དོ། །རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་སེར་སྐྱའི་གནས་ན་གནས་པའི་ཤཱཀྱ་རྣམས་ཀྱིས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་བ་དང་རྗེས་སུ་ཡི་རང་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་སང་འདི་ཉིད་དུ་བདག་ཅག་གི་གདུགས་ཚོད་གསོལ་བར་ཅི་གནང་། སང་དགེ་སློང་འགས་ཀྱང་བསོད་སྙོམས་ལ་འཇུག་པར་མི་བགྱི་སྟེ། བདག་ཅག་བསོད་སྙོམས་འཚལ་ཏེ་མཆི་ཞིང་། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ལ་རང་གི་སུག་པ་ནས་ཚིམ་ཞིང་སྟོབས་པར་བགྱིད་དོ། །བཅོམ་ལྡན་འདས་ཀྱིས་སེར་སྐྱའི་གནས་ན་གནས་པའི་ཤཱཀྱ་རྣམས་ལ་ཅང་མི་གསུང་བས་གནང་ངོ་། །དེ་ནས་སེར་སྐྱའི་གནས་ན་གནས་པའི་ཤཱཀྱ་རྣམས་ཀྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་
ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔ་ནས་དོང་ངོ་། །དེ་དག་གིས་སེར་སྐྱའི་གནས་སུ་དོང་སྟེ། དེ་ཉིད་ཀྱི་མཚན་མོ་བཅའ་བ་དང་བཟའ་བ་གཙང་ཞིང་བསོད་པ་དག་སྟ་གོན་བྱས་ནས་དེ་ནས་ནང་པར་སྔར་ལངས་ཏེ་བཅའ་བ་དང་བཟའ་བ་དག་གིས་ཤིང་རྟ་དག་བཀང་ནས་ཤཱཀྱ་མོ་རྣམས་ལ་སྨྲས་པ། ཁྱེད་ཅག་ཇེ་ཤིང་རྟ་དག་ཞོན་ལ་དེངས་ཤིག་དང་ཁོ་བོ་ཅག་ཀྱང་ཕྱི་བཞིན་འོང་ངོ་། །དེ་ནས་དེ་དག་རྒྱན་ཐམས་ཅད་ཀྱིས་བརྒྱན་ཏེ་ཤིང་རྟ་དག་ལ་ཞོན་ནས་འཕགས་སོ། །སེར་སྐྱའི་གནས་ཀྱི་ཉེན་ཀོར་ཐིབས་པོ་ཡིན་པས་དེ་དག་ལམ་ཀར་ཆོམ་རྐུན་པ་དག་གིས་མཐོང་ནས་དེ་དག་གིས་སྨྲས་པ། ཤེས་ལྡན་དག་ཤཱཀྱ་མོ་རྒྱན་ཐམས་ཅད་ཀྱིས་བརྒྱན་པ་འདི་དག་འདོང་གིས་ཚུར་ཤེག་གཞོམ་མོ། །ཆོམ་རྐུན་པའི་དམག་དཔོན་གྱིས་སྨྲས་པ། ཤེས་ལྡན་དག་འདོང་དུ་ཟད་མོད་ཁྱེད་ཅག་ལ་འདི་དག་བཅོམ་པས་ཅི་བྱ། ཤཱཀྱ་གདུག་པ་ཕ་རོལ་གནོན་པ་དག་གནོན་པ་བྱེད་པར་འགྱུར་གྱིས་ཐོང་ཤིག །དེ་དག་གིས་སྨྲས་པ། དམག་དཔོན་ཟླ་བའི་རྒྱབ་སུས་མཐོང་། གཞོམ་མོ་ཞེས་དེ་དག་གིས་དེའི་ཚིག་ཚིག་མ་ཡིན་པར་བྱས་ཏེ་དེ་དག་བཅོམ་ནས། གོས་དང་རྒྱན་ཐམས་ཅད་ཕྲོགས་ཏེ་དོང་ངོ་། །ཤཱཀྱ་མོ་དེ་དག་ཀྱང་འཇིགས་ཤིང་སྐྲག་ནས་སྒྲེན་མོར་ཚང་ཚིང་དང་ནགས་མ་དག་གི་ནང་དུ་ཡིབ་སྟེ་འཁོད་དོ། །ཤིང་རྟ་དེད་པ་དག་ཀྱང་སྐྲག་ནས་བྱེར་རོ། །གླང་དག་ཀྱང་ཆུ་དག་བཅད་ནས་ཅི་དགར་ཡན་ཅིང་འཁོད་དོ། །ཤིང་རྟ་དག་ཀྱང་ཤིང་རྟའི་མདའ་དང་བྲལ་ཏེ་འདུག་གོ །དྲུག་སྡེ་དག་གིས་ཕན་ཚུན་གྲོས་བྱ་བར་བརྩམས་པ། དགའ་བོ་ཉེ་དགའ་ཤཱཀྱ་བག་མེད་པ་དག་ཡུན་རིང་དུ་ཐོགས་པས་བདག་ཅག་གིས་ཟན་གཅད་པར་བྱའམ་ཅི། བསོད་སྙོམས་ལ་འདོང་ངོ་། །དེ་ལྟར་བྱའོ་ཞེས་དེ་དག་ལྷུང་བཟེད་དང་ཆོས་གོས་ཐོགས་ཏེ་འཕགས་པ་དང་། ཇི་ཙམ་ན་ལམ་ཀ་ན་ཤིང་རྟ་བཅའ་བ་དང་། བཟའ་བས་གང་བ་ཤིང་རྟའི་མདའ་དང་བྲལ་བ་དག་འདུག་པ་དང་། གླང་དག་ཆུ་དག་བཅད་དེ་ཅི་དགར་ཡན་ཅིང་འཁོད་པ་དག་མཐོང་ནས་དེ་དག་གིས་ཕན་ཚུན་རྣམ་པར་
བལྟས་ནས་བོད་པར་བརྩམས་པ། ཤེས་ལྡན་དག་འདི་ན་སུ་འཁོད། དེ་དག་གིས་སྐད་ཕྱུང་བ་དང་། དྲུག་སྡེ་དག་གིས་སྨྲས་པ་ཁྱེད་ཅག་སུ་ཡིན། འཕགས་པ་དག་བདག་ཅག་ཤཱཀྱ་མོ་དག་གོ་ཚུར་ཤེག་ཁོ་བོ་ཅག་ལ་བྲིམས་ཤིག །འཕགས་པ་དག་བདག་ཅག་ཆོམ་རྐུན་པ་དག་གིས་བཅོམ་སྟེ་སྒྲེན་མོར་མཆིས་སོ། །ཁོ་བོ་ཅག་གདུགས་ཚོད་ཡོལ་གྱིས་ཚུར་ཤེག་ཁྱེད་ཅག་གི་ཡན་ལག་དང་ཉིང་ལག་དག་ལས་ཁོ་བོ་ཅག་གིས་སྔོན་མ་མཐོང་བ་གང་ཡོད་ཚུར་ཤེག་དེ་དག་ལོ་མ་དག་གིས་གཡོགས་ཏེ་བྱུང་ནས་བྲིམ་པར་བརྩམས་པ་དང་། དྲུག་སྡེ་དག་གིས་སྨྲས་པ། དགའ་བོ་ཉེ་དགའ་ལྟོས་ཤིག་ཤཱཀྱ་མོ་འདི་དག་གི་མིག་ཅི་འདྲ། སྣ་ཅི་འདྲ་མཆུ་ཅི་འདྲ་ནུ་མ་ཅི་འདྲ་ལག་པ་ཅི་འདྲ་རྐེད་པ་ཅི་འདྲ། རྐང་པ་ཅི་འདྲ་ལྟོས་ཤིག །དེ་དག་དེ་ལྟར་གཙེས་པ་ན་ངོ་ཚ་ནས་ཚང་ཚིང་དང་ནགས་མ་དེ་དག་ཉིད་ཀྱི་ནང་དུ་ཡིབ་སྟེ་འཁོད་དོ། །བསེལ་བ་དག་གིས་ཤཱཀྱ་རྣམས་ལ་ཤཱཀྱ་མོ་རྣམས་བཅོམ་མོ་ཞེས་སྦྲན་པ་དང་། དེ་ནས་ཤཱཀྱ་དག་མདའ་གཞུ་ལག་ན་ཐོགས་ཤིང་མཚོན་གཟས་པ་དག་གིས་ལམ་ཀར་དོང་སྟེ། ལམ་བགགས་ནས་དེ་དག་གིས་ཆོམ་རྐུན་པ་དེ་དག་བཟུང་ངོ་། །དེ་ན་ཁ་ཅིག་གིས་སྨྲས་པ། འདི་དག་ལ་བཏང་སྙོམས་བྱར་ཅི་ཡོད་གསད་དོ་ཁ་ཅིག་གིས་སྨྲས་པ། རེ་ཞིག་དེར་ཁྲིད་ལ་ཤཱཀྱ་མོ་རྣམས་ལ་དྲིས་ཏེ། གང་ལ་ཡན་ལག་གང་གིས་ཉེས་པ་བྱས་པ་དེའི་དེ་གཅད་པར་བྱའོ། །དེ་དག་གིས་དེ་དག་ཁྲིད་ནས་ཤཱཀྱ་མོ་རྣམས་ཀྱི་གན་དུ་དོང་སྟེ་སྨྲས་པ། ཚུར་ཤེག་ཆོམ་རྐུན་པ་འདི་དག་ལས་གང་གིས་ཁྱེད་ཅག་ལ་ཡན་ལག་གང་གིས་ཉེས་པ་བྱས་པ་སྨྲོས་ཤིག །དེ་དག་གིས་སྨྲས་པ། ཆོམ་རྐུན་པའི་དམག་དཔོན་འདི་ནི་ཉེས་པ་མེད་པ་གནོད་པ་མི་བྱེད་པ་ཡིན་ཏེ། འདིས་དེ་དག་བཟློག་ན་དེ་དག་མ་བཏུབ་པས་འདི་ནི་ཐོང་ཤིག །དེ་དག་གིས་དེ་བཏང་ངོ་དེ་སྲོག་དེའུ་ཆད་པ་ལས་ཕྱིར་ཐོབ་ནས་དེས་དེ་དག་གི་རྐང་པ་ལ་གཏུགས་ཏེ་སྨྲས་པ། ཤེས་ལྡན་དག་ཁྱེད་ཅག་དད་པ་སྐྱེས་ཏེ། སངས་རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་དུ་འགྲོ་བ་ཡིན་ན་འདི་དག་བསད་པས་ཁྱེད་ལ་ཅི་བྱ།
ཉེས་པ་བྱེད་པ་འདི་དག་ཀྱང་བཏང་བར་གསོལ། དེ་དག་གིས་དེ་དག་ལས་བཅོམ་པའི་རྫས་དག་ཕྱིར་བཀུག་སྟེ་བཏང་ངོ་། །དེ་ནས་ཤཱཀྱ་དེ་དག་གིས་ཤཱཀྱ་མོ་དེ་དག་གོས་བསྐོན་ཅིང་རྒྱན་ཐོགས་སུ་བཅུག་ནས་ཤིང་རྟ་དག་ཀྱང་ཆུ་དག་བཏགས་ཏེ་ཤིང་རྟ་ལ་ཞོན་ནས་བཅོམ་ལྡན་འདས་ཀྱི་སྤྱན་སྔར་དོང་ངོ་། །བཅོམ་ལྡན་འདས་དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་པ་དང་། ཤཱཀྱ་དང་ཤཱཀྱ་མོ་རྣམས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བྲིམ་པར་བརྩམས་སོ། །ཤཱཀྱ་མོ་རྣམས་དྲུག་སྡེ་དག་ལ་ཟས་མི་སྦྱིན་ནས་ཤཱཀྱ་རྣམས་ཀྱིས་སྨྲས་པ། ཅིའི་ཕྱིར་འཕགས་པ་དག་ལ་ཞལ་ཟས་མི་གསོལ། དེ་དག་གིས་སྨྲས་པ། འདི་དག་གིས་ཟོས་ཟིན་ཏོ། །གང་དུ་གསོལ། དེ་ཉིད་དུའོ་སུས་བྲིམས། ཁོ་མོ་ཅག་གིས་སོ། །ཁྱེད་ཅག་སྒྲེན་མོ་དག་གིས་ཇི་ལྟར་བྲིམས། དེའི་ཕྱིར་འདི་དག་གིས་ཁོ་མོ་ཅག་ཐོ་བཙམས་ཏེ་ཇི་ལྟར་ཁོ་མོ་ཅག་ལོ་མ་དག་གིས་གཡོགས་ཏེ་ཚང་ཚིང་དང་ནགས་མ་དག་གི་ནང་ནས་བྱུང་སྟེ་བྲིམ་པར་བརྩམས་པ་དང་། འདི་དག་གིས་ཐོ་བཙམས་ཏེ་འདི་ལྟར་བརྗོད་པར་བྱ་བ་མང་དུ་ཡོད་དོ། །དེ་ནི་མཇལ་གྱིས་འདི་དག་ནི་གནས་ངན་ལེན་ཀུན་དུ་སྤྱོད་པ་ཡིན་གྱིས་འདི་དག་ལ་ཟས་མི་སྦྱིན་ནོ། །དེ་དག་ཅང་མི་སྨྲ་བར་འཁོད་དོ། །དེ་ནས་དེ་དག་གིས་དགེ་སློང་གི་དགེ་འདུན་ལ་བྲིམས་ནས་སྨྲས་པ། འཕགས་པ་དག་ཀྱེ་མ་ཁྱེད་ཀྱིས་ལམ་འདི་འཇིགས་པ་དང་བཅས་པ་ཡིན་ནོ་ཞེས་བཀའ་སྩལ་ན་བདག་ཅག་བག་བགྱིད་ཅིང་མཆིའོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་ནགས་ཉུལ་བ་བསྐོ་བར་བྱ་སྟེ། དགེ་སློང་ནགས་ཉུལ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ལ། བསྐོས་པ་ཡང་དབྱུང་བར་བྱ་སྟེ། ལྔ་གང་ཞེ་ན་འདུན་པས་འགྲོ་བ་དང་ཞེ་སྡང་གིས་འགྲོ་བ་དང་གཏི་མུག་གིས་འགྲོ་བ་དང་། འཇིགས་པས་འགྲོ་བ་དང་། ནགས་བྱུལ་བ་དང་མ་བྱུལ་བ་མི་ཤེས་པའོ། །ནགས་ཉུལ་བ་ཆོས་ལྔ་དང་ལྡན་པ་ནི་མ་བསྐོས་པ་ཡང་
བསྐོ་བར་བྱ་ལ། བསྐོས་པ་ཡང་དབྱུང་བར་མི་བྱ་སྟེ། ལྔ་གང་ཞེ་ན་འདུན་པས་མི་འགྲོ་བ་དང་། ཞེ་སྡང་གིས་མི་འགྲོ་བ་དང་། གཏི་མུག་གིས་མི་འགྲོ་བ་དང་། འཇིགས་པས་མི་འགྲོ་བ་དང་། ནགས་བྱུལ་བ་དང་མ་བྱུལ་བ་ཤེས་པའོ། །འདི་ལྟར་བསྐོ་བར་བྱ་སྟེ། གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་ཇེ་དང་པོར་སྤྲོ་བར་བྱ་སྟེ། མིང་འདི་ཞེས་བྱ་བ་ཁྱོད་དགེ་འདུན་གྱི་ནགས་ཉུལ་བར་སྤྲོའམ། གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ། །དེ་ནས་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ། །དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་བར་སྤྲོ་ན་གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་། དགེ་འདུན་གྱིས་དགེ་སློང་མིང་འདི་ཞེས་བགྱི་བ་དགེ་འདུན་གྱི་ནགས་ཉུལ་བར་བསྐོ་སྟེ། དགེ་སློང་ནགས་ཉུལ་བ་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ལོ། །འདི་ནི་གསོལ་བའོ་ལས་ནི་འདི་ལྟར་བྱ་སྟེ། དགེ་འདུན་བཙུན་པ་རྣམས་གསན་དུ་གསོལ། དགེ་སློང་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་བར་སྤྲོ་ན། དེའི་སླད་དུ་དགེ་འདུན་གྱིས་མིང་འདི་ཞེས་བགྱི་བ་ནགས་ཉུལ་བར་བསྐོས་ཏེ་མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ན། ཚེ་དང་ལྡན་པ་གང་དག་མིང་འདི་ཞེས་བགྱི་བ་ནགས་ཉུལ་བར་བསྐོ་བར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུང་ཤིག་དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་མིང་འདི་ཞེས་བགྱི་བ་ནགས་ཉུལ་བར་བསྐོས་ལགས་སོ། །མིང་འདི་ཞེས་བགྱི་བ་འདི་དགེ་འདུན་གྱི་ནགས་ཉུལ་ཏེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ། །ངས་དགེ་སློང་ནགས་ཉུལ་བའི་ཀུན་དུ་སྤྱོད་པའི་ཆོས་དག་བཅའ་བར་བྱ་སྟེ། དགེ་སློང་ནགས་ཉུལ་བས་དཔག་ཚད་ཕྱེད་ནས་བཟུང་སྟེ་ཁོ་ར་ཁོར་ཡུག་ཏུ་ནགས་བྱུལ་བར་བྱའོ། །བཅོམ་ལྡན་
འདས་ཀྱིས་དགེ་སློང་ནགས་ཉུལ་བས་དཔག་ཚད་ཕྱེད་ནས་བཟུང་སྟེ་ཁོ་ར་ཁོར་ཡུག་ཏུ་ནགས་བྱུལ་བར་བྱའོ། །ཞེས་བཀའ་སྩལ་ནས་དེ་ལམ་གྱིས་དུབ་ཅིང་གཅིག་པུ་འཇིགས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་གལ་ཏེ་འདོད་ན་ཁྱེའུ་སུས་སྦྱིན་པར་བྱ་ཞིང་གྲོགས་ཀྱང་སྦྱིན་པར་བྱའོ། །གལ་ཏེ་ནགས་འཇིགས་པ་དང་བཅས་པ་ཉིད་ཡིན་ན་དེས་དུད་བརྡ་གཏུལ་བར་བྱའོ། །བ་དན་སྔོན་པོ་བསྒྲེང་བར་བྱའོ། །འདབ་མའི་ཆང་བུ་དག་ལམ་ཀར་གཞག་པར་བྱའོ། །གལ་ཏེ་ནགས་འཇིགས་པ་མེད་པ་ཉིད་ཡིན་ན་བ་དན་དཀར་པོ་བསྒྲེང་བར་བྱའོ། །དགེ་སློང་ནགས་ཉུལ་བས་ཀུན་དུ་སྤྱོད་པའི་ཆོས་ཇི་ལྟར་བཅས་པ་དག་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་ནགས་སྔར་མ་བྱུལ་བར་ཀུན་དགའི་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་ཞིང་ཟ་ཞེས་སྨོད་པར་བྱེད། ཕྱར་ཀ་གཏོང་བར་བྱེད། ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང་། གླེང་གཞི་འདི་དང་སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ། སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ། དགེ་སློང་དག་ཁྱེད་སྔར་ནགས་མ་བྱུལ་བར་ཀུན་དགའི་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་ཞིང་ཟ་བ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ། རྗེས་སུ་མཐུན་པ་མ་ཡིན་པ། རུང་བ་མ་ཡིན་པ། ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ། །དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་
ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ། །ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལ། ཡང་དགེ་སློང་གང་དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་ཏུ་སྔར་མ་བྱུལ་བར་ཀུན་དགའི་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་དགེ་སློང་དེས་ཕྱི་རོལ་ཀུན་དགའ་ར་བར་སོང་སྟེ། དགེ་སློང་རྣམས་ལ་ཚེ་དང་ལྡན་པ་དག་བདག་ལ་སྨད་པའི་གནས་མི་རིགས་པ་སོ་སོར་བཤགས་པར་བྱ་བ་བྱུང་གིས། ཆོས་དེ་སོ་སོར་འཆགས་སོ་ཞེས་སོ་སོར་བཤགས་པར་བྱ་སྟེ་ཆོས་འདི་ཡང་སོ་སོར་བཤགས་པར་བྱ་བའོ། །དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ། །གནས་མལ་དགོན་པ་གང་དག་ཅེས་བྱ་བ་ལ་དགོན་པ་ཞེས་བྱ་བ་ནི་རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ་རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ །ཆུ་རྡུལ་དྲུག་ལ་ལྕགས་རྡུལ་གཅིག་གོ །ལྕགས་རྡུལ་དྲུག་ལ་རི་བོང་གི་རྡུལ་གཅིག་གོ །རི་བོང་གི་རྡུལ་དྲུག་ལ་ལུག་རྡུལ་གཅིག་གོ །ལུག་རྡུལ་དྲུག་ལ་གླང་རྡུལ་གཅིག་གོ །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ །སྲོ་མ་དྲུག་ལ་ཤིག་གཅིག་གོ །ཤིག་དྲུག་ལ་ནས་གཅིག་གོ །ནས་དྲུག་ལ་སོར་གཅིག་གོ། །སོར་བཞི་དྲུག་ལ་ཁྲུ་གང་ངོ་། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །གཞུ་ལྔ་བརྒྱ་ལ་རྒྱང་གྲགས་གཅིག་སྟེ། གྲོང་ནས་རྒྱང་གྲགས་གཅིག་ནི་དགོན་པ་སྟེ། དེ་ན་གཙུག་ལག་ཁང་གང་ཡོད་པ་དེ་ནི་གནས་མལ་དགོན་པ་ཡིན་ནོ། །དོགས་པ་དང་བཅས་པར་གྲགས་པ་ཞེས་བྱ་བ་ནི་ཆོམ་རྐུན་པ་དང་གཡོན་ཅན་
གྱིས་འཇིགས་པར་གྲགས་པའོ། །འཇིགས་པ་དང་བཅས་པར་གྲགས་པ་ཞེས་བྱ་བ་ནི་སེང་གེ་དང་། སྟག་དང་གུང་གིས་འཇིགས་པར་གྲགས་པའོ། །འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལ་ཞེས་བྱ་བ་ནི་ཤ་སྦྲང་དང་སྦྲང་བུ་མཆུ་རིངས་དང་། རླུང་དང་ཉི་མ་དང་སྡིག་སྦྲུལ་གྱི་འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པར་གྱུར་ལའོ། །ཡང་དགེ་སློང་གང་ཞེས་བྱ་བ་ནི་དྲུག་སྡེའམ་གཞན་ཡང་དེ་ལྟ་བུ་གང་ཡིན་པའོ། །དགེ་འདུན་གྱི་གནས་མལ་དགོན་པ་གང་དག་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་དེ་ལྟ་བུ་དག་ཏུ་ཞེས་བྱ་བ་ནི་ཇི་སྐད་བསྟན་པ་ལྟ་བུ་དག་ཏུའོ། །སྔར་མ་བྱུལ་བར་ཞེས་བྱ་བ་ནི་ནགས་ཉུལ་བས་སྔར་མ་བྱུལ་བར་རོ། །ཀུན་དགའ་ར་བའི་ཕྱི་རོལ་དུ་ཞེས་བྱ་བ་ནི་གཙུག་ལག་ཁང་གི་ཕྱི་རོལ་དུའོ། །བཅའ་བ་དང་བཟའ་བ་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །བླངས་ཏེ་ཞེས་བྱ་བ་ནི་བྱིན་ལེན་སྟོབས་སུ་བཅུག་སྟེའོ། །འཆའ་འམ་ཟ་ན་ཞེས་བྱ་བ་ནི་མགུལ་དུ་མིད་ནའོ། །དགེ་སློང་དེས་ཞེས་བྱ་བ་ནི་དགེ་སློང་གང་ཡིན་པ་དེས་སོ། །ཕྱི་རོལ་ཀུན་དགའ་ར་བར་སོང་སྟེ་ཞེས་བྱ་བ་ནི་གྲོང་གི་ཕྱི་རོལ་གཙུག་ལག་ཁང་དུ་སོང་སྟེའོ། །དགེ་སློང་རྣམས་ལ་ཞེས་བྱ་བ་ནི་དེ་ན་དགེ་སློང་གང་དག་འཁོད་པ་རྣམས་ལའོ། །ཚེ་དང་ལྡན་པ་དག་བདག་ལ་སྨད་པའི་གནས་ཞེས་བྱ་བ་ནི་སྨད་པར་བྱ་བའོ། །མི་རིགས་པ་ཞེས་བྱ་བ་ནི་ཚུལ་དང་མི་མཐུན་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །བྱུང་གིས་ཞེས་བྱ་བ་ནི་ལྟུང་བ་བྱུང་གིས་སོ། །ཆོས་དེ་ཞེས་བྱ་བ་ནི་ཆོས་མ་ཡིན་པ་ཆོས་ཀྱི་སྒྲར་གསུངས་པ་དེའོ། །སོ་སོར་འཆགས་སོ་ཞེས་བྱ་བ་ནི་མཐོལ་ལོ་ཞེས་པའོ། །སོ་སོར་བཤགས་པར་བྱ་སྟེ་ཞེས་བྱ་བ་ནི་མཐོལ་བར་བྱ་སྟེའོ། །ཆོས་འདི་ཡང་སོ་སོར་བཤགས་པར་བྱ་བའོ་ཞེས་བྱ་བ་ནི་ཆོས་འདི་ཡང་མཐོལ་བར་བྱ་བ་སྟེ་དེས་ན་སོ་སོར་བཤགས་པར་བྱ་བའོ་ཞེས་གསུངས་སོ། །དེ་ལ་ལྟུང་བར་ཇི་ལྟར་འགྱུར་ཞེ་ན། དགེ་སློང་གིས་ནགས་མ་བྱུལ་བ་ལ་མ་བྱུལ་བར་འདུ་ཤེས་པས་ཀུན་དགའ་ར་
བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །ནགས་མ་བྱུལ་བ་ལ་ཡིད་གཉིས་ཟ་བས་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་སོ་སོར་བཤགས་པར་བྱ་བར་འགྱུར་རོ། །དགེ་སློང་གིས་ནགས་བྱུལ་བ་ལ་མ་བྱུལ་བར་འདུ་ཤེས་པས་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ནགས་བྱུལ་བ་ལ་ཡིད་གཉིས་ཟ་བས་ཀུན་དགའ་ར་བའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆའ་འམ་ཟ་ན་ཉེས་བྱས་སུ་འགྱུར་རོ། །ནགས་ཉུལ་བ་ཤི་འམ་བྲོས་ན་ལྟུང་བ་མེད་དོ། །ལས་དང་པོ་པ་དང་སྨྱོས་པ་དང་། སེམས་འཁྲུགས་པ་དང་ཚོར་བ་དག་གིས་ཉེན་པ་ལ་ལྟུང་བ་མེད་དོ། །ནགས་བརྟག་པ་ལས་གྱུར་པའི་སོ་སོར་བཤགས་པར་བྱ་བ་སྟེ་བཞི་པ་རྫོགས་སྷོ། །སོ་སོར་བཤགས་པར་བྱ་བ་རྣམས་རྫོགས་སྷོ།། །།