རྩོད་པའི་དངོས་པོ་བཤད་པ།
དགེ་འདུན་གྱི་དབྱེན་གྱི་དངོས་པོ་བཤད་པ།
འདུ་བ་གཞུང་དམ་པ། བམ་པོ་ཉེར་གཅིག་པ། མདོར་ན། གསུམ་དུ་བྱས་པའི་གཟུ་བོ་དང་། །རྣམ་པར་ཞི་བའི་མཚན་དེ་བཞིན། །གསོ་སྦྱོང་དག་གི་མངོན་སུམ་དག་།འབྱུང་བ་དག་ཀྱང་དེ་བཞིན་ནོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། གཟུ་རྩོད་པ་བསྡུ་བ་ཤེ། རྩོད་པ་རྣམ་པར་ཞི་བ་ཤེས། རྩོད་པ་ཤིན་ཏུ་ཞི་བས་ཕྱིས་མི་འབྱུང་བར་ཤེས། འབྱུང་བ་ཤེས། བཅས་པ་ཤེས། རྫེས་སུ་བཅས་པ་ཤེས། དགག་པ་ཤེས། མངོན་པར་རྗེས་སུ་གནང་བ་ཤེས། ལས་བྱས་པ་དང་མ་བྱས་པ་ཤེས་པ་སྟེ། ཨུ་པ་ལི། ཆོས་བཅུ་གཅིག་བོ་འདི་དག་དང་ལྡན་པའི་གཟུ་བོ་ནི། འདུལ་བ་འཛིན་པ། རྩོད་པ་རྣམ་པར་ཞི་བར་བྱེད་ནུས་པ་ཡིན་ནོ། །གཞན་ཡང་ཆོས་བཅུ་གཅིག་སྟེ། བཅུ་གཅིག་པོ་གང་ཞེ་ན། ཉེས་པ་ཤེས། ཉེས་པ་མེད་པ་ཤེས། ཉེས་པ་ལྕི་བ་ཤེས། ཉེས་པ་ཡང་བ་ཤེས། ཉེས་པ་བྱུང་བ་ཤེས། ཉེས་པ་ལས་དབྱུང་བ་ཤེས། འདོད་པའི་ཕྱིར་མི་འགྲོ། ཞེ་སྡང་དང་། འཇིགས་པ་དང་། གཏི་མུག་གི་ཕྱིར་མི་འགྲོ་བ་དང་། ཆད་པའི་ལས་བྱ་བ་དང་མི་བྱ་བ་ཤེས་པ་སྟེ། ཨུ་པ་ལི། བཅུ་གཅིག་པོ་འདི་དག་གིས་རྣམ་པར་ཞི་བར་བྱ་བའི་བར་དུ་རྒྱས་པར་རོ། །གཞན་ཡང་ཆོས་བཅུ་གཅིག་གི་བར་དུ་སྟེ། བཅུ་གཅིག་པོ་གང་ཞེ་ན། མདོ་སྡེ་ལ་མཁས་པ་ཡིན། འདུལ་བ་ལ་མཁས་པ་ཡིན། རྣམ་པར་འབྱེད་པ་ལ་མཁས་པ་ཡིན། ལུང་ལ་ཞུགས་པ་ཡིན། མདོ་སྡེ་འབྱེད་པ་ཡིན། འཁྲུལ་བ་མི་འཛིན་པ་ཡིན། གསང་བའི་ཚིག་མི་འཛིན་པ་ཡིན། གདོན་མི་ཟ་བར་འཛིན་པ་ཡིན། ཚིག་མང་པོ་མི་འཛིན་པ་ཡིན། དམ་བཅས་པ་འཛིན་པ་ཡིན། ལན་གསུམ་གྱི་བར་དུ་གཞོག་པ་ཡིན་ཏེ། ཨུ་པ་ལི། ཆོས་བཅུ་གཅིག་པོ་འདི་དག་དང་ལྡན་པའི་གཟུ་བོ་ནི། འདུལ་བ་འཛིན་པ། རྩོད་པ་རྣམ་པར་ཞི་བར་བྱེད་ནུས་པ་ཡིན་ནོ། །ཆོས་དུ་དང་ལྡན་པས་རྩོད་པ་ཤིན་ཏུ་ཞི་བ་ལགས། ཨུ་པ་ལི། ཉི་ཤུ་རྩ་གཅིག་སྟེ། ཉི་ཤུ་རྩ་གཅིག་པོ་གང་ཞེ་ན། དགེ་འདུན་ལ་བསྒོ་བ་ཡིན། ཆོས་དང་བཅས་པས་རྒྱལ་པོའི་བཀའ་དང་
མཐུན་པ་ཡིན། ཕྱོགས་དང་ཕ་རོལ་གྱི་ཕྱོགས་ཀྱི་དགེ་སློང་དག་གོ་བར་བྱེད་པ་ཡིན། རྒོལ་བ་དང་ཕྱིར་རྒོལ་བའི་དགེ་སློང་ལ་ཆོས་དང་མཐུན་པས་རྒོལ་བ་དང་། ཕྱིར་རྒོལ་བའི་དགེ་སློང་ལ་འདུལ་བ་མ་ཉམས་པར་བྱེད་པ་ཡིན། མི་གཙང་བའི་གང་ཟག་གི་ཉེས་པ་དང་མ་བཅས་པ་ཡིན། བྱུང་བ་ཆུད་མ་གསན་པ་ཡིན། བཅས་པ་ཆུད་མ་གསན་པ་ཡིན། རྗེས་སུ་བཅས་པ་ཆུད་མ་གསན་པ་ཡིན། དགག་པ་ཆུད་མ་གསན་པ་ཡིན། མངོན་པར་རྗེས་སུ་གནང་བ་ཆུད་མ་གསན་པ་ཡིན། ཉེས་པ་ཆུད་མ་གསན་པ་ཡིན། རྒོལ་བའི་དགེ་སློང་གི་ཡི་དམ་ཤིན་ཏུ་བཟུང་བ་ཡིན། ལན་འདེབས་པའི་ཡི་དམ་ཤིང་ཏུ་བཟུང་བ་ཡིན། མདོ་སྡེའི་ཚིག་ཀྱང་བསྟན་པ་ཡིན། འདུལ་བ་དང་མཐུན་པ་ཡིན། ཆོས་ཀྱི་མིག་རྗེས་སུ་བཟུང་བ་ཡིན། བསྐོས་ནས་རྣམ་པར་ཞི་བར་བྱེད་པ་ཡིན། ཉེས་པ་སྟོན་པ་ཡིན། ཆད་པའི་ལས་དམིགས་སུ་བབ་པ་ཡིན། རྣམ་པར་དག་པ་སྟོན་པ་ཡིན། ཆོས་དང་། འདུལ་བ་དང་། སྟོན་པའི་བསྟན་པས་རྩོད་པ་རྣམ་པར་ཞི་བ་ཡིན་ཏེ། ཨུ་པ་ལི། ཆོས་ཉི་ཤུ་རྩ་གཅིག་པོ་འདི་རྣམས་དང་ལྡན་ན། རྩོད་པ་རྣམ་པར་ཞི་བ་ཞེས་བྱའོ། །བཙུན་པ། རྒོལ་བའམ། སླར་རྒོལ་བའི་དགེ་སློང་མཚན་འཕོས་ན། རྩོད་བཞི་བ་ཞེས་བགྱིའམ། ཨུ་པ་ལི། ཞི་བ་ཞེས་བྱའོ། །བཙུན་པ། བཅོམ་ལྡན་འདས་ཀྱིས་རྩོད་པ་བྱུང་བ་བྱུང་མ་ཐག་ཏུ་རྩོད་པ་ཞི་བར་བྱེད་པའི་ཆོས་བདུན་གྱིས་རྣམ་པར་ཞི་བར་བྱའོ། །ཞེས་གསུངས་ན། བཙུན་པ། རྩོད་པ་རྣམ་པ་བཞི་ལས་གང་ཡང་རུང་སྟེ། རྩོད་པ་ཞིག་བྱུང་ན། རྩོད་པ་ཞི་བར་བགྱིད་པའི་ཆོས་བདུན་པོ་ལས་གང་ཡང་རུང་བའི་རྩོད་པ་ཞི་བར་བགྱིད་པའི་ཆོས་ཀྱིས་རྣམ་པར་ཞི་བར་མ་བགྱིས་པར་རྣམ་པར་ཞི་བར་འགྱུར་བ་མཆིས་སམ། ཨུ་པ་ལི། ཡོད་དེ། དེ་ནི། མཐུན་པའི་གསོ་སྦྱོང་ངོ་། །བཙུན་པ། རྩོད་པ་བཞི་ལས་གང་ཡང་རུང་སྟེ་རྩོད་པ་ཞིག་བྱུང་ན། རྒོལ་བ་དང་། སླར་རྒོལ་བའི་དགེ་སློང་རྣམས་ལས་གང་གི་ཚིག་གཟུང་བར་བགྱི། རྒན་རིམ་གྱིས་གཟུང་ངོ་། །བཙུན་པ། དེ་སྟེ་གཉིས་ཀའི་ལོ་གྲངས་མཉམ་ན། གང་གི་ཚིག་གཟུང་བར་བགྱི། གང་མང་དུ་ཐོས་པ་ཡིན་ནོ། །བཙུན་པ། དེ་སྟེ་གཉིས་ཀའང་གཞུང་ལ་མཚུངས་པར་གྱུར་
ན། གང་གི་ཚིག་གཟུང་བར་བགྱི། གང་བྱང་བ་ཡིན་ནོ། །དེ་སྟེ་གཉིས་ཀ་བྱང་བར་གྱུར་ན། གང་གི་ཚིག་གཟུང་བར་བགྱི། གང་བྱང་བའི་ཤས་ཆེ་བ་ཡིན་ཏེ། དེའི་ཚིག་གིས་རྩོད་པ་རྣམས་རྣམ་པར་ཞི་བར་བྱའོ། །བཙུན་པ། བཅོམ་ལྡན་འདས་ཀྱིས་གང་ཚུལ་ཤིང་མང་པོས་རྩོད་པ་ཞི་བར་བྱ་བ་ལས། གང་གི་ཕྱོགས་སུ་ཚུལ་ཤིང་གཅིག་གིས་ཀྱང་ལྷག་པར་གྱུར་ན། དེའི་ཕྱོགས་དེས་རྣམ་པར་ཞི་བར་བྱའོ། །ཞེས་གསུངས་ན། བཙུན་པ། དེ་སྟེ་ཕྱོགས་གཉིས་ཀ་ཚུལ་ཤིང་མཉམ་པར་གྱུར་ན། གང་གི་དབང་གིས་རྩོད་པ་རྣམས་རྣམ་པར་ཞི་བར་བགྱི། ཨུ་པ་ལི། ཕྱོགས་གང་གི་དགེ་སློང་དག་ཕལ་ཆེར་བྱང་བའི་ཤས་ཆེ་བ་ཡིན་ནོ། །བཙུན་པ། གང་དགེ་སློང་རྣམས་རྩོད་པ་དགེ་སློང་རྣམས་ཀྱིས་རྣམ་པར་ཞི་བར་བགྱིད་མ་ནུས་ན། བཙུན་པ། དགེ་སློང་མས་རྣམ་པར་ཞི་བར་བགྱིར་རུང་ངམ། ཨུ་པ་ལི། རུང་ངོ་། །དེ་བཞིན་དུ་སྡེ་ལྔའི་རྣམས་ཕན་ཚུན་གཅིག་ལ་གཅིག་སྦྱར་བར་བྱའོ། །མདོར་ན། འཕྲིན་པ་སྤྲིང་ཡིན་ལག་བརྡ་དང་། །གཞན་ཟེར་བ་དང་གཅིག་ནས་གཅིག་།སྨྱོན་པ་སེམས་འཁྲུགས་ན་བ་དང་། །འོན་གླེན་ཁྱིམ་པ་དག་ལ་སོགས། །བསླབ་པ་བྱིན་པ་ཐ་མ་འོ། །བཙུན་པ། འཕྲིན་གྱིས་རྩོད་པ་རྣམ་པར་ཞི་བར་བགྱིས་ན། རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །དེ་བཞིན་དུ་སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། གཅིག་ནས་གཅིག་ཏུ་བརྒྱུད་དེ་རྣམ་པར་ཞི་བར་བགྱིས་ན། རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །བཙུན་པ། སྨྱོན་པ་ཞིག་གིས་རྩོད་པ་རྣམ་པར་ཞི་བར་བགྱིས་ན། རྩོད་པ་རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱིས་རྣམ་པར་ཞི་བར་བགྱིས་ན། རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །བཙུན་པ། ཁྱིམ་པ་ཞིག་གིས་རྩོད་པ་རྣམ་པར་ཞི་བར་བགྱིས་ན་རྣམ་པར་ཞི་བ་ཞེས་
བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །བཙུན་པ། དེ་བཞིན་དུ་མནིང་ནས་བསླབ་པ་སྩལ་པ་རྣམས་ཀྱི་བར་དུ་རྒྱས་པར་དེ་དག་གི་རྩོད་པ་རྣམ་པར་ཞི་བར་བགྱིས་ན། རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱ་སྟེ། དགེ་འདུན་ནི། འདས་པ་དང་བཅས་པའོ། །བཙུན་པ། རྒོལ་བའམ། སླར་རྒོལ་བ་དུས་བགྱིས་ན། རྩོད་པ་རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱའོ། །དེ་བཞིན་དུ་ཁྱིམ་པ་ལགས་པར་ཁས་བླངས་པ་ནས་བསླབ་པ་སྩལ་པ་ལགས་པའི་བར་དུ་རྒྱས་པར་ཁས་བླངས་ན། རྩོད་པ་རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱའོ། །བཙུན་པ། རྒོལ་བའམ། སླར་རྒོལ་བའི་དགེ་སློང་མཚན་འཕོས་ན། རྩོད་པ་རྣམ་པར་ཞི་བ་ཞེས་བགྱིའམ། ཨུ་པ་ལི། རྣམ་པར་ཞི་བ་ཞེས་བྱའོ། །རྩོད་པའི་དངོས་པོ་རྫོགས་སོ།། །།མདོར་ན། བྱེ་འབྱེད་དགེ་འདུན་ཅ་ཅོ་དང་། །ཐ་དད་པ་དང་ཚུལ་བཞིན་དང་། །བསྐལ་པ་ཁ་ན་མ་ཐོ་ལོག་དགེ་འདུན་དབྱེ་དང་མི་མཁས་པའོ། །བཙུན་པ། དགེ་འདུན་བྱེ་བ་ཞེས་ཀྱང་བགྱི། །བཙུན་པ། དགེ་འདུན་འདུས་པ་ཞེས་ཀྱང་བགྱི་ན། བཙུན་པ། དགེ་འདུན་བྱེ་བ་གང་ལགས། ཨུ་པ་ལི། གང་དབྱེན་བྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས། འདུལ་བ་མ་ཡིན་པ་ལ་འདུལ་བ་མ་ཡིན་པར་འདུ་ཤེས་པར་གྱུར་བཞིན་དུ་དེས་འདུ་ཤེས་བཅབས། བཟོད་པ་བཅབས། དད་པ་བཅབས། བློ་གྲོས་དང་། ལྟ་བ་དང་། རྟོག་པ་རྣམས་བཅབས་ཏེ་འདི་སྐད་དུ། འདི་ནི། ཆོས་སོ། །འདི་ནི། འདུལ་བའོ། །འདི་ནི། སྟོན་པའི་བསྟན་པའོ། །ཞེས་སྨྲས་ནས་དེས་དགེ་སློང་དག་ལ་བསྒོ། ཡང་དག་པར་བསྒོ། སློབ། ལེན་དུ་འཇུག་།བརྟུལ་ཞུགས་ཀྱི་གཞི་ལྔ་ཡང་རྗེས་སུ་བསྒྲགས་ཏེ། འདི་ལྟར། ཚེ་དང་ལྡན་པ། ཁྱེད་ཅག་ལག་གང་དད་ཅིང་བཟོད་དེ་མོས་པ་དེ་དག་གིས་ནི། ཚུལ་ཤིང་ལོངས་ཤིག་།དེ་གང་གིས་བརྟུལ་ཞུགས་ཀྱི་གནས་ལྔ་བསྒྲགས་ཏེ་གསོལ་བ་བྱས། ཚུལ་ཤིང་བྲིམས་ཏེ་མང་པོ་ཁྲིད་དེ་འགྲོ་བ་འདི་ནི། དགེ་འདུན་བྱེ་བ་ཞེས་བྱའོ། །དགེ་འདུན་
འདུས་པ་གང་ཞེ་ན། དགེ་སློང་མཚམས་ཀྱི་ནང་ན་ཇི་སྙེད་འཁོད་པར་གྱུར་པ་དེ་དག་ལས་བྱེད་པ་ན། དེ་དག་ཐམས་ཅད་འདུས་པར་གྱུར། མངོན་སུམ་དུ་གྱུར། དད་པ་བླང་བར་རིགས་པའི་རྣམས་ལས་དད་པ་བླངས་པར་གྱུར། དགེ་སློང་རྣམས་ཀྱང་འཐབ་པ་མེད། རྩོད་པ་མེད་ལ། དེ་དག་ཆོས་སུ་འདུ་ཤེས། འདུལ་བར་འདུ་ཤེས་ཏེ་གསོ་སྦྱོང་གི་ལས་བྱེད་པ་འདི་ནི། དགེ་འདུན་འདུས་པ་ཞེས་བྱའོ། །བཙུན་པ། དགེ་འདུན་འབྱེད་པས་བསྟིར་མེད་པའི་ཁ་ན་མ་ཐོབ་པ་བསྐྱེད་ལ་མཚམས་མེད་པའི་ལས་སུ་འགྱུར་བ་གང་ལགས། ཨུ་པ་ལི། ནམ་འབྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པ་ཡིན། བྱེ་བ་ལའང་ཆོས་མ་ཡིན་པར་འདུ་ཤེས་བཞིན་དུ་དེས་འདུ་ཤེས་བཅབས། བཟོད་པ་བཅབས། དད་པ་དང་། བློ་གྲོས་དང་། ལྟ་བ་དང་། རྟོག་པ་རྣམས་བཅབས་ཏེ་འདི་སྐད་དུ། ཆོས་ནི། འདིའོ། །འདུལ་བ་ནི། འདིའོ། །སྟོན་པའི་བསྟན་པ་ནི། འདིའོ།། ཞེས་སྨྲས་ནས་དེས་དགེ་སློང་དག་ལ་བསྒོ། ཡང་དག་པར་བསྒོ། སློབ། ལེན་དུ་འཇུག་།བརྟུལ་ཞུགས་ཀྱི་གཞི་ལྔ་ཡང་རྗེས་སུ་བསྒྲགས་ཏེ་གང་དབྱེན་བྱེད་པ་དེས་བརྟུལ་ཞུགས་ཀྱི་གཞི་ལྔ་རྗེས་སུ་བསྒྲགས་ཏེ་གསོལ་བ་བྱས། ཚུལ་ཤིང་བྲིམས་ནས་མང་པོ་ཁྲིད་དེ་སོང་བ་འདི་ནི། དགེ་འདུན་འབྱེད་པ་ཡིན་ཏེ། བསྟིར་མེད་པའི་ཁ་ན་མ་ཐོ་བའང་བསྐྱེད། ཡང་དག་པར་བསྒོ་བ་བླངས་ཤིང་ལེན་དུ་འཇུག་པས་མཚམས་མེད་པའི་ལས་སུ་འང་འགྱུར་རོ། །དགེ་འདུན་འབྱེད་པས་བསྟིར་མེད་པའི་ཁ་ན་མ་ཐོབ་ནི། སྐྱེ་ལ། དེ་མཚམས་མེད་པའི་ལས་སུ་མི་འགྱུར་བ་གང་ཞེ་ན། ཨུ་པ་ལི། གང་དབྱེན་བྱེད་པས་ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ། བྱེ་བ་ལ་ནི། ཆོས་སུ་འདུ་ཤེས་པ་དང་། ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ། བྱེ་བ་ལ་ཡང་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཆོས་མ་ཡིན་པར་འདུ་ཤེས་པར་གྱུར་ལ། བྱེ་བ་ལ་ཐེ་ཚོམ་ཟ་བ་དང་། ཆོས་མ་ཡིན་པ་ལ་ཆོས་སུ་འདུ་ཤེས་ལ། བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཆོས་སུ་འདུ་ཤེས་ལ། བྱེ་བ་ལ་ཡང་ཆོས་སུ་འདུ་ཤེས་པ་དང་།
ཆོས་མ་ཡིན་པ་ལ་ཆོས་སུ་འདུ་ཤེས་ལ། བྱེ་བ་ལ་ཐེ་ཚོམ་དུ་གྱུར་པ་དང་། ཆོས་ལ་ཆོས་སུ་འདུ་ཤེས་ལ། བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ། བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ། བྱེ་བ་ལ་ཐེ་ཚོམ་དུ་གྱུར་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ། བྱེ་བ་ལ་ཡང་ཆོས་མ་ཡིན་པར་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ། བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཆོས་མ་ཡིན་པར་འདུ་ཤེས་ལ། བྱེ་བ་ལ་ཐེ་ཚོམ་དུ་གྱུར་པ་དང་། ཆོས་དང་ཆོས་མ་ཡིན་པ་ལ་ཐེ་ཚོམ་དུ་གྱུར་ལ། བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་མ་ཡིན་པ་ལ་ཐེ་ཚོམ་དུ་གྱུར་ལ། བྱེ་བ་ལ་ཆོས་སུ་འདུ་ཤེས་པ་དང་། ཆོས་མ་ཡིན་པ་ལ་ཐེ་ཚོམ་དུ་གྱུར་ལ་བྱེ་བ་ལ་ཡང་ཐེ་ཚོམ་དུ་གྱུར་པ་དང་། ཆོས་ལ་ཐེ་ཚོམ་དུ་གྱུར་ལ། བྱེ་བ་ལ་ཆོས་མ་ཡིན་པར་འདུ་ཤེས་པ་དང་། ཆོས་ལ་ཐེ་ཚོམ་དུ་གྱུར་ལ། བྱེ་བ་ལ་ཆོས་སུ་འདུ་ཤེས་པ་དང་། ཆོས་ལ་ཐེ་ཚོམ་དུ་གྱུར་ལ། བྱེ་བ་ལ་ཡང་ཐེ་ཚོམ་དུ་གྱུར་པ་སྟེ། དེས་འདུ་ཤེས་བཅབས། བཟོད་པ་བཅབས། དད་པ་བཅབས། བློ་གྲོས་དང་། ལྟ་བ་དང་རྟོག་པ་རྣམས་བཅབས་ཏེ་འདི་སྐད་དུ། འདི་ནི། ཆོས་སོ། །འདི་ནི། འདུལ་བའོ། །འདི་ནི། སྟོན་པའི་བསྟན་པའོ། །ཞེས་སྨྲས་ནས་དེས་ཡང་དགེ་སློང་རྣམས་ལ་བསྒོ། ཡང་དག་པར་བསྒོ། སློབ། ལེན་དུ་འཇུག་།དགེ་འདུན་བྱེ་བའི་ཕྱིར་བརྩོན་པ་འདི་ནི། དགེ་འདུན་འབྱེད་པར་བྱེད་པ་སྟེ། བསྟིར་མེད་པའི་ཁ་ན་མ་ཐོ་བ་ནི། སྐྱེ་ལ། དེ་མཚམས་མེད་པའི་ལས་སུ་མི་འགྱུར་བ་ཞེས་བྱའོ། །བཙུན་པ། གང་ལ་ལ་དགེ་འདུན་བྱེ་བ་དེ་ཐམས་ཅད་དགེ་འདུན་ཅ་ཅོར་འགྱུར་རམ། དགེ་འདུན་བྱེ་ལ་དགེ་འདུན་ཅ་ཅོ་མེད་པ་ཡང་ཡོད། དགེ་འདུན་ཅ་ཅོར་གྱུར་ལ་དགེ་འདུན་མི་འབྱེ་བ་ཡང་ཡོད། དགེ་འདུན་ཡང་བྱེ་ལ་དགེ་འདུན་ཅ་ཅོར་ཡང་འགྱུར་བ་ཡོད། དགེ་འདུན་ཡང་མི་འབྱེ་ལ་དགེ་འདུན་ཅ་ཅོར་ཡང་མི་འགྱུར་བ་ཡོད་དེ། དགེ་འདུན་བྱེ་ལ་དགེ་འདུན་ཅ་ཅོ་མེད་པ་གང་ཞེ་ན། གང་ཆོས་སུ་འདུ་ཤེས་ལ་དགེ་འདུན་འབྱེད་
པའོ། །དགེ་འདུན་ཅ་ཅོར་གྱུར་ལ་དགེ་འདུན་མི་བྱེ་བ་གང་ཞེ་ན། དབྱེ་ན་དུ་འགྱུར་བའི་དངོས་པོ་བཅུ་བཞི་ལས་གང་ཡང་རུང་སྟེ། དབྱེན་དུ་འགྱུར་བའི་དངོས་པོ་ཞིག་ཤིན་ཏུ་གདོན་མི་ཟ་བར་བཟུང་བར་གྱུར་ལ། དགེ་འདུན་ནི། བྱེ་བར་མ་གྱུར་པའོ། །དགེ་འདུན་ཡང་བྱེ་ལ་དགེ་འདུན་གྱི་ཅ་ཅོར་ཡང་འགྱུར་པ་གང་ཞེ་ན། འདི་ལྟར་དགེ་འདུན་དེ་དག་བྱེ་བར་གྱུར་ལ། དབྱེན་དུ་འགྱུར་བའི་དངོས་པོ་བཅུ་བཞི་ལས་གང་ཡང་རུང་སྟེ། དབྱེན་དུ་འགྱུར་བའི་དངོས་པོ་ཞིག་ཤིན་ཏུ་གདོན་མི་ཟ་བར་བཟུང་བར་གྱུར་པའོ། །དགེ་འདུན་ཡང་མི་འབྱེ་ལ་དགེ་འདུན་གྱི་ཅ་ཅོར་ཡང་མི་འགྱུར་བ་གང་ཞེ་ན། རྣམ་པ་འདི་ལྟ་བུ་དག་མ་གཏོགས་པའོ། །བཙུན་པ། གང་དགེ་འདུན་བྱེ་བ་དེ་ཐམས་ཅད་དགེ་འདུན་ཐ་དད་པར་གྱུར་པ་ལགས་སམ། དགེ་འདུན་ཐ་དད་པར་འགྱུར་ལ། དགེ་འདུན་མི་འབྱེ་བ་ཡང་ཡོད། །དགེ་འདུན་བྱེ་ལ་དགེ་འདུན་ཐ་དད་པར་མི་འགྱུར་བ་ཡང་ཡོད། དགེ་འདུན་བྱེ་ལ་དགེ་འདུན་ཐ་དད་པར་འགྱུར་བ་ཡང་ཡོད། དགེ་འདུན་མི་འབྱེ་ལ་དགེ་འདུན་ཐ་དད་པར་མི་འགྱུར་བ་ཡང་ཡོད་དེ་དགེ་འདུན་ཐ་དད་པར་གྱུར་ལ་དགེ་འདུན་མི་དབྱེ་བ་ནི། འདི་ལྟར། དགེ་འདུན་རྣམ་གཉིས་སོ་སོའི་གཞི་ལ་གནས་པར་གྱུར། རྙེད་པ་ཡང་ཐ་དད། གནས་ཀྱང་ཐ་དད། མཚམས་ཀྱང་ཐ་དད་པར་གྱུར་ལ། དགེ་འདུན་ནི། མ་བྱེ་བའོ། །དགེ་འདུན་བྱེ་ལ་དགེ་འདུན་ཐ་དད་པར་མི་འགྱུར་བ་ནི། གང་ཆོས་སུ་འདུ་ཤེས་པས་དགེ་འདུན་ཕྱེ་བའོ། །དགེ་འདུན་བྱེ་ལ་དགེ་འདུན་ཐ་དད་པ་ནི། འདི་ལྟར་དགེ་འདུན་བྱེ་བར་གྱུར་ལ། དགེ་འདུན་རྣམ་གཉིས་སོ་སོ་ན་གནས་པར་གྱུར། རྙེད་པ་ཐ་དད་པ་དང་། གནས་ཐ་དད་པ་དང་། མཚམས་ཐ་དད་པར་གྱུར་པའོ། །དགེ་འདུན་མ་བྱེ་ལ་དགེ་འདུན་ཐ་དད་པར་ཡང་མ་གྱུར་པ་ནི། རྣམ་པ་དེ་ལྟ་བུ་དག་མ་གཏོགས་པའོ། །ཇི་ལྟར་དགེ་འདུན་ཐ་དད་པ་ལ་རྣམ་པ་བཞིར་གྱུར་པ་བཞིན་དུ་དགེ་འདུན་གྱི་ཚུལ་ལ་ཡང་རྣམ་པ་བཞིར་བརྗོད་པར་བྱའོ། །བཙུན་པ། གང་ལ་ལས་དགེ་འདུན་གྱི་དབྱེན་བགྱིད་པ་དེ་དག་ཐམས་ཅད་བསྐལ་པར་གནས་སམ། དགེ་འདུན་གྱི་དབྱེན་བྱས་ལ་བསྐལ་པར་མི་གནས་པ་ཡང་ཡོད། བསྐལ་པར་གནས་ལ་དགེ་འདུན་གྱི་དབྱེན་མ་བྱས་པའང་ཡོད། དགེ་འདུན་གྱི་
དབྱེན་བྱས་ལ་བསྐལ་པར་གནས་པའང་ཡོད། དགེ་འདུན་གྱི་དབྱེན་མ་བྱས་ལ་བསྐལ་པར་མི་གནས་པ་ཡང་ཡོད་དེ། དགེ་འདུན་གྱི་དབྱེན་བྱས་ལ་བསྐལ་པར་མི་གནས་པ་ནི། གང་གིས་ཆོས་སུ་འདུ་ཤེས་པས་དགེ་འདུན་ཕྱེ་བའོ། །བསྐལ་པར་གནས་ལ་དགེ་འདུན་གྱི་དབྱེན་མ་བྱས་པ་ནི། བླང་པོའི་རྒྱལ་པོ་ཨེ་ར་བ་ན་དང་། གླང་པོའི་རྒྱལ་པོ་ཤིན་ཏུ་བརྟན་པ་དང་། གླང་པོའི་རྒྱལ་པོ་ཡིད་དུ་འོང་བ་དང་། གླང་པོའི་རྒྱལ་པོ་གཤིན་རྗེ་དང་། ཚངས་ལྷ་ཉེ་ཕན་གྱི་ལྷ་རྣམས་སོ། །དགེ་འདུན་ཕྱེ་ལ་བསྐལ་བར་གནས་པ་ནི། ལྷ་སྦྱིན་ནོ། །དགེ་འདུན་ཡང་མ་ཕྱེ་ལ་བསྐལ་པར་ཡང་མི་གནས་པ་ནི། རྣམ་པ་འདི་ལྟ་བུ་དག་མ་གཏོགས་པའོ། །གང་ལ་ལས་དགེ་འདུན་ཕྱེ་ན། དེ་དག་ཐམས་ཅད་བསྐལ་པར་གནས་པའི་ཁ་ན་མ་ཐོ་བ་སྐྱེ་བ་ཡང་རྣམ་པ་བཞིར་བརྗོད་པར་བྱ་སྟེ། དེ་ཡང་དེ་བཞིན་དུ་དབྱེ་བར་བྱའོ། །གང་ལ་ལ་དགེ་འདུན་འབྱེད་པ་དེ་དག་ཐམས་ཅད་ལོག་པར་ངེས་པ་ལགས་སམ། དགེ་འདུན་འབྱེད་ལ་ལོག་པར་ངེས་པ་མ་ཡིན་པ་ཡང་ཡོད། ལོག་པར་ངེས་ལ་དགེ་འདུན་མི་འབྱེད་པའང་ཡོད། དགེ་འདུན་འབྱེད་ལ་ལོག་པར་ངེས་པའང་ཡོད། དགེ་འདུན་འབྱེད་པ་ཡང་མ་ཡིན་ལ་ལོག་པར་ངེས་པ་མ་ཡིན་པའང་ཡོད་དེ། དགེ་འདུན་འབྱེད་ལ་ལོག་པར་ངེས་པ་མ་ཡིན་པ་ནི། གང་ཆོས་སུ་འདུ་ཤེས་ཤིང་དགེ་འདུན་འབྱེད་པའོ། །ལོག་པར་ངེས་ལ་དགེ་འདུན་འབྱེད་པ་མ་ཡིན་པ་དེ་ནི། མཚམས་མེད་པ་བཞིའོ། །དགེ་འདུན་འབྱེད་ལ་ལོག་པར་ཡང་ངེས་པ་ནི། ལྷས་བྱིན་ནོ། །དགེ་འདུན་འབྱེད་པའང་མ་ཡིན་ལ་ལོག་པར་ངེས་པར་འང་མ་ཡིན་པ་ནི། རྣམ་པ་འདི་ལྟ་བུ་དག་མ་གཏོགས་པའོ། །གང་ལ་ལ་དགེ་འདུན་འབྱེད་པ་དེ་དག་ཐམས་ཅད་མི་མཁས་པ་དང་མ་རིག་པར་གྱུར་པ་ལགས་སམ། དགེ་འདུན་འབྱེད་ལ་མི་མཁས་པ་མ་ཡིན་ཞིང་མ་རིག་པར་གྱུར་པ་མ་ཡིན་པའང་ཡོད། མི་མཁས་པ་དང་མ་རིག་པ་ཡིན་ལ་དགེ་འདུན་མི་འབྱེད་པའང་ཡོད། དགེ་འདུན་འབྱེད་ལ་མི་མཁས་པ་དང་མ་རིག་པར་གྱུར་པའང་ཡོད། དགེ་འདུན་ཡང་མི་འབྱེད་ལ་མཁས་པའང་ཡིན་མ་རིག་པར་གྱུར་པ་མ་ཡིན་པའང་ཡོད་དེ། དགེ་འདུན་འབྱེད་ལ་
མི་མཁས་པའང་མ་ཡིན་མ་རིག་པར་གྱུར་པ་མ་ཡིན་པ་ནི། གང་ཆོས་སུ་འདུ་ཤེས་པས་དགེ་འདུན་འབྱེད་པའོ། །མི་མཁས་པ་དང་མ་རིག་པར་གྱུར་ལ་དགེ་འདུན་མི་འབྱེད་པ་ནི། སྟོན་པ་དྲུག་གོ །དགེ་འདུན་འབྱེད་ལ་མི་མཁས་པ་དང་མ་རིག་པ་ནི། ལྷས་བྱིན་ནོ། །དགེ་འདུན་ཡང་མི་འབྱེད་ལ་མི་མཁས་པའང་མ་ཡིན། མ་རིག་པར་གྱུར་པའང་མ་ཡིན་པ་ནི། རྣམ་པ་འདི་དག་མ་གཏོགས་པའོ། །མདོར་ན། ཕྱེ་བ་རྣམ་པ་དྲུག་ཏུ་བྱས། །རྒོལ་བ་རྣམ་བཞི་གསོ་སྦྱོང་དང་། །མཚམས་ལ་རྣམ་བཞི་གསུམ་པ་དང་། །བསྐལ་པ་བརྟན་མིན་དེ་བཞིན་ཏེ། །ཁྱིམ་པ་དག་ལ་སོགས་པ་དང་། །བསླབ་པ་བྱིན་པ་ཐ་མའོ། །བཙུན་པ། ཕྱེ་བ་དང་ལྡན་པ་གང་ལགས། ཁ་ན་མ་ཐོ་བ་གང་ལགས། ཨུ་པ་ལི། དགེ་འདུན་ནི། ཕྱེ་བ་དང་ལྡན་པའོ། །འབྱེད་པ་ནི། ཁ་ན་མ་ཐོ་བའོ། །བཙུན་པ། དགེ་འདུན་ཕྱེ་ན། ཅིར་འགྱུར། ཉེས་པ་སྦོམ་པོར་འགྱུར་རོ། །བཙུན་པ། དགེ་འདུན་ཕྱེ་ན། ནོངས་པ་གང་བཤགས་པར་བགྱི། ཉེས་པ་སྦོམ་པོའོ། །བཙུན་པ། འདི་ལྟར་དགེ་སློང་དག་གིས་དགེ་སློང་གི་དགེ་འདུན་འབྱེད་ཀྱི། དགེ་སློང་མས་མ་ལགས། དགེ་སློབ་མས་མ་ལགས། དགེ་ཚུལ་མས་མ་ལགས། དགེ་ཚུལ་ཕས་མ་ལགས་སམ། ཨུ་པ་ལི། དེ་བཞིན་ཏེ། དགེ་སློང་དག་གིས་དགེ་འདུན་འབྱེད་ཀྱི། དགེ་སློང་མས་མ་ཡིན། དགེ་སློབ་མས་མ་ཡིན། དགེ་ཚུལ་མས་མ་ཡིན། དགེ་ཚུལ་ཕས་མ་ཡིན་ནོ། །ཨུ་པ་ལི། དེ་བཞིན་དུ་དགེ་སློང་མ་དག་གིས་དགེ་སློང་མའི་དགེ་འདུན་འབྱེད་ཀྱི། དགེ་སློང་གིས་མ་ཡིན། དགེ་སློབ་མས་མ་ཡིན། དགེ་ཚུལ་མས་མ་ཡིན། དགེ་ཚུལ་ཕས་མ་ཡིན་ཏེ། འོན་ཀྱང་དགེ་འདུན་འབྱེད་པའི་ཕྱིར་ནི། རྩོལ་ལོ། །བཙུན་པ། བཅོམ་ལྡན་འདས་ཀྱིས་རྣམ་པ་གཉིས་ཀྱི་སླད་དུ་དགེ་འདུན་འབྱེད་དེ། རྗེས་སུ་བསྒྲགས་པ་དང་། ཚུལ་ཤིང་ལེན་པའོ། །ཞེས་གསུངས་ན། བཙུན་པ། གང་རྩེད་མོར་འཚལ་བའམ། མ་འཚལ་བ་ཞིག་གིས་རྗེས་སུ་བསྒྲགས་ཤིང་ཚུལ་ཤིང་བྲིམས་ན། དགེ་འདུན་ཕྱེ་བ་ཞེས་བགྱིའམ། ཨུ་པ་ལི། མ་ཡིན་ནོ། །འོ་ན། ཅིར་འགྱུར། ཉེས་བྱས་སོ། །དགེ་འདུན་འབྱེད་པའི་དགེ་སློང་གིས་དགེ་འདུན་འབྱེད་པ་ན་མཚན་འཕོས་ན། དགེ་འདུན་ཕྱེ་བ་ཞེས་བགྱིའམ། ཨུ་
པ་ལི་མ་ཡིན་ནོ། །བཙུན་པ། དགེ་སློང་མའི་དགེ་འདུན་བྱེ་ནས་ཕྱོགས་དང་། ཕ་རོལ་གྱི་ཕྱོགས་སུ་གནས་ན། དགེ་སློང་མ་ལ་ཟླ་བ་ཕྱེད་ཕྱེད་ཅིང་བསྟན་པའི་ལུང་སྩལ་ཏམ། ཨུ་པ་ལི། མ་སྦྱིན་པར་འདི་སྐད་དུ། སྲིང་མོ་རྣམས་རྗེས་སུ་མཐུན་པར་གྱིས་ཤིག་།ཅེས་སྒོས་ཤིག་།བཙུན་པ། དགེ་སློང་གི་དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་ན། དགེ་སློང་མས་ཟླ་བ་ཕྱེད་ཕྱེད་ཅིང་བསྟན་པའི་ལུང་གསོལ་བར་བགྱིའམ། ཨུ་པ་ལི། གསོལ་བར་བྱའོ། །གང་ལས་གསོལ། རྗེས་སུ་མ་ཕྱོགས་པ་རྣམས་ལས་སོ། །བཙུན་པ། དགེ་སློང་གི་དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་ན། དགེ་སློང་མ་ལ་བསྟན་པའི་ལུང་སྩལ་བར་བགྱིའམ། ཨུ་པ་ལི། དགེ་སློང་མ་ཡང་བྱེ་བར་མི་འགྱུར་བའི་ཕྱིར་བས་ན། བྱིན་ཅིག་།བཙུན་པ། དགེ་སློང་མའི་དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་པ་ལ་གང་གིས་དགེ་སློང་མ་ལ་ལུང་སྩལ་བར་བགྱི། རྗེས་སུ་མ་ཕྱོགས་པ་རྣམས་ཀྱིས་སྦྱིན་ནོ། །བཙུན་པ། དགེ་སློང་གི་དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་ན། དགེ་སློང་མས་གསོ་སྦྱོང་བགྱིའམ། ཨུ་པ་ལི། བྱའོ། །བཙུན་པ། དགེ་སློང་གི་དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་ན། ཉེ་བར་ཕྱོགས་པའི་དགེ་སློང་རྣམས་ཀྱིས་གསོ་སྦྱོང་བགྱིའམ། ཨུ་པ་ལི། མ་ཡིན་ནོ། །དེ་ཅིའི་ཕྱིར་ཞེ་ན། དགེ་འདུན་འདུས་པ་ལས་གསོ་སྦྱོང་བྱའོ། །བཙུན་པ། ཉེ་བར་ཕྱོགས་པས་ཉེ་བར་མ་ཕྱོགས་པ་རྣམས་ཀྱི་མཚམས་བཀྲོལ་ན། མཚམས་བཀྲོལ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། ཉེ་བར་མ་ཕྱོགས་པ་རྣམས་ཀྱིས་ཉེ་བར་ཕྱོགས་པ་རྣམས་ཀྱི་མཚམས་བཀྲོལ་ན། མཚམས་བཀྲོལ་བ་ཞེས་བགྱིའམ། ཨུ་པ་ལི། བཀྲོལ་བ་ཞེས་བྱའོ། །བཙུན་པ། གང་ལ་ལ་ཞིག་ཉེ་བར་ཕྱོགས་པ་དེ་དག་ཐམས་ཅད་སོ་སོར་གནས་པ་ཞེས་བགྱིའམ། རྣམ་པ་བཞིར་རྒྱས་པར་བརྗོད་དོ། །བཙུན་པ། གང་ལ་ལ་ཞིག་ཉེ་བར་ཕྱོགས་ནས་དེ་དག་ཐམས་ཅད་མི་གནས་པ་ཞེས་བགྱིའམ། རྣམ་པ་བཞིར་རྒྱས་པར་བརྗོད་དོ། །བཙུན་པ། གང་ལ་ལ་སོ་སོར་གནས་ན། དེ་དག་ཐམས་ཅད་མི་གནས་པ་ཞེས་བགྱིའམ། རྣམ་པ་བཞིར་རྒྱས་པར་
བརྗོད་དོ། །བཙུན་པ། བཅོམ་ལྡན་འདས་ཀྱིས་ལྕགས་རྣམ་པར་བརྒྱར་གྱེས་པའི་དུམ་བུ་ཡང་སྩལ་བར་བྱའོ། །ཞེས་གསུངས་ན། ལྕགས་ཀྱི་དུམ་བུ་ཞེས་བགྱི་བ་གང་ལགས། དད་པ་སྩལ་བར་བྱ་བ་དང་། མོས་པ་སྩལ་བར་བྱ་བ་དང་། འདུན་པ་སྩལ་བར་བྱ་བ་དང་། དགེ་འདུན་འདུས་པ་སྩལ་བར་བྱ་སྟེ། དགེ་འདུན་དབྱེ་བའི་ཕྱིར་ནི་སྩལ་བར་མི་བྱའོ། །བཙུན་པ། དགེ་འདུན་བྱེ་སྟེ་ཕྱོགས་དང་། ཕ་རོལ་གྱི་ཕྱོགས་སུ་གནས་ན། གཏན་པ་གང་གིས་དབྱུང་བར་བགྱི། ཉེ་བར་མ་ཕྱོགས་པ་རྣམས་ཀྱིས་སོ། །བཙུན་པ། མ་ནིང་ཞིག་གིས་དགེ་འདུན་ཕྱེ་ན། དགེ་འདུན་ཕྱེ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། དེ་བཞིན་དུ་དགེ་སློང་མ་སུན་ཕྱུང་བ་ནས་བསླབ་པ་སྩལ་བའི་བར་དུ་རྒྱས་པར་དེ་དག་གིས་དགེ་འདུན་ཕྱེ་ན། དགེ་འདུན་ཕྱེ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། སྨྱོན་པ་ཞིག་གིས་དགེ་འདུན་ཕྱེ་ན། དགེ་འདུན་ཕྱེ་བ་ཞེས་བགྱིའམ། ཨུ་པ་ལི། མ་ཡིན་ནོ། །བཙུན་པ། དེ་བཞིན་དུ་སེམས་འཁྲུགས་པ་དང་། ནད་ཀྱིས་གཟིར་བ་དང་། གླེན་པ་དང་། ལྐུགས་པ་དང་། འོན་པ་རྣམས་ཀྱིས་དགེ་འདུན་ཕྱེ་ན། དགེ་འདུན་ཕྱེ་བ་ཞེས་བགྱིའམ། ཨུ་པ་ལི། མ་ཡིན་ནོ། །དེ་ཅིའི་ཕྱིར་ཞེ་ན། ཨུ་པ་ལི། རང་བཞིན་དུ་གནས་པ་མ་ཡིན་པས་ན། དགེ་འདུན་དབྱེ་བར་མི་ནུས་སོ། །ཇི་ལྟར་དགེ་འདུན་འབྱེད་པ་དེ་བཞིན་དུ་གྲངས་སུ་མི་འགྱུར་བར་ཡང་བརྗོད་པར་བྱའོ། །དགེ་འདུན་གྱི་དབྱེན་གྱི་དངོས་པོ་རྫོགས་ཏེ། ཨུ་པ་ལིས་ཞུས་པ་རྫོགས་སོ།། །།
འདུལ་བར་བྱེད་པ་བཤད་པ། སྟོད་ཆ།
མདོར་ན། བཟང་སྦྱིན་རྡོ་རྗེ་འདུ་ཤེས་དང་། །བལ་གླང་མོ་དང་རྒོད་མ་དང་། །བ་དང་རྔ་མོ་རི་དྭགས་མོ། །བོང་ལུག་ཁྱི་ཕག་མོ་རྣམས་སོ། །སངས་རྒྱས་བཅོམ་ལྡན་འདས་གྲོང་ཁྱེར་ཡངས་པ་ཅན་ན་སྤྲེའུ་རྫིང་འགྲམ་གྱི་ཁང་བུ་བརྩེགས་པ་ན་བཞུགས་སོ། །ཀ་ལནྡ་ཀའི་བུ་བཟང་སྦྱིན་ལ་བསླབ་པའི་གནས་བཅས་པས་ལས་དང་པོ་བ་ལ་ཉེས་པ་མེད་པ་ནི། བདག་གིས་བསླབ་པ་མ་བཅས་པའི་ཚེ་ལན་མང་དུ་མི་ཚངས་པར་སྤྱོད་པ་འཁྲིག་པའི་ཆོས་བྱས་ནས་བདག་གི་ལས་དང་པོ་པ་གང་ཡིན་ཞེས་ཐེ་ཚོམ་དུ་གྱུར་ནས་སེམས་ལ་དོགས་པ་དང་། འགྱོད་པ་རྣམས་སྐྱེས་ཏེ། དེས་དེ་ལྟ་བུར་གྱུར་པ་དགེ་སློང་རྣམས་ལ་སྨྲས་ནས་དགེ་སློང་རྣམས་ཀྱིས་
བཅོམ་ལྡན་འདས་ལ་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།བསླབ་པའི་གནས་མ་བཅས་པ་ན། ཀ་ལནྡ་ཀའི་བུ་བཟང་སྦྱིན་གྱིས་ཤིན་ཏུ་འདས་པར་གྱུར་བ་ནི། ཐམས་ཅད་ཀྱང་ལས་དང་པོ་པ་ཡིན་ཏེ། ལས་དང་པོ་པ་ལ་ནི། ཉེས་པ་མེད་དོ། །དགེ་སློང་རྡོ་རྗེའི་བུ་ཞེས་བྱ་བས་བསླབ་པ་མ་ཕུལ་བསླབ་པ་ཉམས་པ་མ་བཤགས་པར་ཁྱིམ་པར་གྱུར་ཏེ། དེས་དེ་ན་མི་ཚངས་པར་སྤྱོད་པ་འཁྲིག་པའི་ཆོས་བྱས་ནས་དེ་འདི་སྙམ་དུ་གྱུར་ཏོ། །རེ་ཞིག་དགེ་སློང་རྣམས་ལ་དྲིས་ལ། དེ་སྟེ་བདག་རབ་ཏུ་འབྱུང་ཞིང་བསྙེན་པར་རྫོགས་པར་རུང་ན་ནི། རབ་ཏུ་འབྱུང་ངོ་། །དེ་སྟེ་མི་རུང་ན། འདི་ཉིད་ན་འདུག་གོ། སྙམ་དུ་བསམ་ནས་དེས་དེ་ལྟར་གྱུར་པ་ནས་བཅོམ་ལྡན་འདས་ཀྱིས་བཀའ་སྩལ་པའི་བར་དུ་རྒྱས་པར་བྱ་སྟེ། དགེ་སློང་དག་།བསླབ་པ་མ་ཕུལ། བསླབ་པ་ཉམས་པ་མ་བཤགས་པར་ཁྱིམ་པའི་དངོས་པོར་གྱུར་ཏེ་མི་ཚངས་པར་སྤྱོད་པ་འཁྲིག་པའི་ཆོས་ལ་བརྟེན་ན། གང་ཟག་དེ་སླར་ཡང་རབ་ཏུ་འབྱུང་ཞིང་བསྙེན་པར་རྫོགས་པར་མི་རུང་གི། དེ་བཞིན་དུ་བསླབ་པའི་གནས་བཤད་པར་བྱའོ། །ཡང་དགེ་སློང་གང་བསླབ་པ་མ་ཕུལ། བསླབ་པ་ཉམས་པ་མ་བཤགས་བཞིན་དུ་མི་ཚངས་པར་སྤྱོད་པ་འཁྲིག་པའི་ཆོས་བྱས་ན། དགེ་སློང་དེ་ཡང་ཕས་ཕམ་པ་ཡིན་གྱི། ལྷན་ཅིག་མ་གནས་ཤིག་།དགེ་སློང་གཅིག་པུ་ཞིག་དགོན་པ་ན་འདུག་སྟེ། དེ་ལས་མི་རིང་བ་ན་བལ་གླང་མོ་ཞིག་ལ་བུ་བྱུང་སྟེ། བལ་གླང་མོ་དེ་ལས་བེའུ་མོ་ཞིག་བྱུང་ངོ་། །དེའི་མ་དེ་ནི། ཟས་ལ་སོང་ནས་དགེ་སློང་དེས་རྩྭ་བླངས་ཏེ་དེ་ལ་རྩྭ་བྱིན། ཆུ་བླུད་པ་དང་། དེས་དེ་འདུག་པ་ལ་མོ་མཚན་བྱེ་བར་མཐོང་སྟེ། དེས་དེ་མཐོང་ནས་ཆགས་པར་གྱུར་ཏེ་དེར་ལོག་པར་ཞུགས་པ་དང་། དེ་ངོ་ཚ་བའི་ཆོས་སུ་གྱུར་ནས་དེས་བདག་ཕས་ཕམ་པའི་ཉེས་པ་མ་བྱུང་གྲང་སྙམ་དུ་བསམ་ནས་ཐེ་ཚོམ་སྐྱེས་ཏེ་དེས་དེ་ལྟ་བུར་གྱུར་པ་དགེ་སློང་རྣམས་ལ་སྨྲས་པ་ནས་རྒྱས་པར་བརྗོད་དེ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།དེར་རེག་པར་མ་གྱུར་པས་ཕས་ཕམ་པའི་ཉེས་པ་ནི། མེད་ཀྱི། ཉེས་པ་སྦོམ་པོར་འགྱུར་རོ། །ནམ་བལ་གླང་གི་ཕྲུ་གུ་དེ་ཆེན་པོར་གྱུར་པ་དང་། དེས་དེའི་
མོ་མཚན་མཐོང་སྟེ། དེས་དེ་མཐོང་ནས་ཆགས་པ་དང་། དེས་དེར་གཞུག་སྙམ་ནས་མོ་མཚན་གྱི་ཁར་བཙུགས་པ་དང་། དེས་དེ་ལ་ཕྲ་བ་གཅིག་བརྒྱབ་ནས་སྐྲག་པར་གྱུར་ཏེ། བདག་ལ་ཕས་ཕམ་པའི་ལྟུང་བ་མ་བྱུང་གྲང་སྙམ་བསམ་ནས་དེས་དེ་ལྟ་བུར་གྱུར་པ་རྒྱས་པར་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།སྐྲག་པ་ལ་ནི། ཆགས་པ་མེད་པས་ཕས་ཕམ་པའི་ཉེས་པ་ནི། མེད་ཀྱི། ཉེས་པ་སྦོམ་པོར་འགྱུར་རོ། །ཇི་ལྟར་བལ་གླང་མོ་བཞིན་དུ་རྒོད་མ་དང་། རྔ་མོ་དང་། རི་དྭགས་མོ་དང་ཁོང་མོ་དག་ལུག་མོ་དང་། ཁྱི་མོ་དང་། ཕག་མོ་རྣམས་ཀྱང་དེ་བཞིན་ནོ། །མདོར་ན། སྨྱོན་པར་གྱུར་དང་སེམས་འཁྲུགས་པ་དང་། །ནད་ཀྱིས་གཟིར་དང་མི་རྣམས་དང་། །ལམ་མིན་ལམ་དུ་འདུ་ཤེས་དང་། །ལམ་གསུམ་རབ་ཏུ་བསྒྲགས་པའོ། །བཙུན་པ། བཅོམ་ལྡན་འདས་ཀྱིས་སྨྱོན་པ་ལ་ནོངས་པ་མ་མཆིས་སོ། །ཞེས་གསུངས་ན། ཇི་ཙམ་གྱིས་ན། སྨྱོན་པ་ཞེས་བགྱི། རྣམ་པ་ལྔས་སྨྱོན་པར་འགྱུར་ཏེ། གཉེན་བཤེས་ཟད་པ་དང་། ལོངས་སྤྱོད་ཟད་པ་དང་། ནོར་ཟད་པ་དང་། ཁམས་མ་མཉམ་པ་དང་། མི་མ་ཡིན་པས་བརླམས་པ་དང་། སྔོན་གྱི་ལས་ཀྱི་རྣམ་པར་སྨིན་པ་སྟེ། རྣམ་པ་འདི་ལྔས་སྨྱོན་པར་འགྱུར་རོ། །དེ་སྟེ་དགེ་སློང་གི་དངོས་པོར་ཤེས་ན་ནི། དངོས་པོ་ཇི་ལྟ་བ་བཞིན་ནོ། །དེ་སྟེ་དགེ་སློང་གི་དངོས་པོར་མི་ཤེས་ན། སྨྱོན་པ་ལ་ཉེས་པ་མེད་དོ། །བཙུན་པ། བཅོམ་ལྡན་འདས་ཀྱིས་སེམས་འཁྲུགས་པ་ལ་ནོངས་པ་མ་མཆིས་སོ། །ཞེས་གསུངས་ན། ཇི་ཙམ་གྱིས་ན། སེམས་འཁྲུགས་པ་ཞེས་བགྱི། རྣམ་པ་ལྔས་ནི། སེམས་འཁྲུགས་པ་ཞེས་བྱ་སྟེ། མི་མ་ཡིན་པས་དེའི་སེམས་དཀྲུགས་པ་དང་། མི་མ་ཡིན་པས་དེ་ལ་བརླམས་པ་དང་། མི་མ་ཡིན་པས་དེའི་མདངས་འཕྲོག་པ་དང་། ཁམས་མ་མཉམ་པ་དང་། སྔོན་གྱི་ལས་ཀྱི་རྣམ་པར་སྨིན་པ་སྟེ། རྣམ་པ་འདི་ལྔས་ནི། སེམས་འཁྲུགས་པ་ཞེས་བྱ་སྟེ། རྒྱས་པར་རོ། །བཙུན་པ། བཅོམ་ལྡན་འདས་ཀྱིས་ནད་ཀྱིས་གཟིར་བ་ལ་ནོངས་པ་མ་མཆིས་སོ། །ཞེས་གསུངས་ན། ཇི་ཙམ་གྱིས་ན། ནད་ཀྱིས་གཟིར་བ་ཞེས་བགྱི། རྣམ་
པ་ལྔས་ནི། ནད་ཀྱིས་གཟིར་བ་ཞེས་བྱ་སྟེ། དེ་ལ་རླུང་གིས་བསྐྱོད་པ་དང་། མཁྲིས་པ་དང་། བད་ཀན་དང་། འདུས་པ་དང་། དུས་གྱུར་པ་རྣམས་ཏེ། རྣམ་པ་འདི་ལྔ་ནི། ནད་ཀྱིས་གཟིར་བ་ཞེས་བྱའོ། །དགེ་སློང་གིས་ལམ་ལ་ལམ་མ་ཡིན་པར་འདུ་ཤེས་ནས་མི་ཚངས་པར་སྤྱོད་པ་འཁྲིག་པའི་ཆོས་བྱས་ཏེ་དགེ་སློང་དེ་ལ་བདག་ལ་ཕས་ཕམ་པའི་ཉེས་པ་མ་བྱུང་གྲང་སྙམ་བསམ་སྟེ། ཐེ་ཚོམ་སྐྱེས་ནས་དེས་དེ་ལྟར་གྱུར་པ་རྒྱས་པར་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལམ་ལ་ལམ་མ་ཡིན་པར་འདུ་ཤེས་ན། ཕས་ཕམ་པར་འགྱུར་རོ། །ལམ་ལ་ཐེ་ཚོམ་ཟ་བར་འདུ་ཤེས་ནའང་ཕས་ཕམ་པར་འགྱུར་རོ། །ལམ་མ་ཡིན་པ་ལ་ལམ་དུ་འདུ་ཤེས་ན། ཉེས་པ་སྦོམ་པོར་འགྱུར་རོ། །ལམ་མ་ཡིན་པ་ལ་ཐེ་ཚོམ་ཟ་བར་འདུ་ཤེས་ན། ཉེས་པ་སྦོམ་པོར་འགྱུར་རོ། །ལམ་གསུམ་ལ་བཤང་བའི་ལམ་དང་། གཅི་བའི་ལམ་དང་། ཁའི་ལམ་མོ། །དགེ་སློང་གིས་གཅི་བའི་ལམ་དུ་དཀྲིས་ཏེ་ཁ་ཤུན་འདས་ན། ཕས་ཕམ་པར་འགྱུར་རོ། །དགེ་སློང་གིས་བཤང་བའི་ལམ་དུ་དཀྲིས་ཏེ་རྐུབ་ཁ་འདས་ན། ཕས་ཕམ་པར་འགྱུར་རོ། །དགེ་སློང་གིས་ཁའི་ལམ་དུ་དཀྲིས་ཏེ་སོ་འདས་ན། ཕས་ཕམ་པར་འགྱུར་རོ། །མདོར་ན། སྤྲེའུ་མོ་སེངྒེ་ཁྲུང་ཁྲུང་མོ། །རྨ་བྱ་ཁྱིམ་བྱའང་དེ་བཞིན་ཏེ། །མཚན་རིང་དང་ནི་རྒྱབ་མཉེན་དང་། །ནན་དིཀ་དང་ཁྲ་གཉིས་སོ། །ཉེས་པ་སྦོམ་པོ་བཞི་སྟེ། སྤྲེའུ་མོ་དང་། མཚན་རིང་ནི། ཇི་ལྟར་རྣམ་པར་འབྱེད་པ་ལས་བྱུང་བ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པར་འགྱུར་རོ། །རྒྱབ་མཉེན་ཀྱང་ཕས་ཕམ་པར་འགྱུར་རོ། །ནན་དི་ཀ་ལ་ཡང་བསླབ་པ་བྱིན་པ་ཇི་ལྟར་འདུལ་བ་བཞིན་ནོ། །དགེ་སློང་ཞིག་བླ་གབ་མེད་པར་འདུག་ནས་སྒྲེན་མོར་ཁྲུས་བྱེད་དེ། དེའི་ཉེ་གཡོག་ནི། མི་བཞི་ཞིག་བྱེད་དེ། དེའི་ལུས་ལ་རེག་པས་ཕོ་མཚན་ལས་སུ་རུང་བར་གྱུར་ཏེ་འདོད་ཆགས་ཀུན་ཏུ་གནས་པ་དང་། དགེ་སློང་གཞན་ཞིག་མདུན་ན་འདུག་པར་གྱུར་པ་དེས་དེའི་ཕོ་མཚན་བདག་གི་ཁར་བཅུག་པ་དང་། དེས་ཀྱང་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་ཐེ་ཚོམ་སྐྱེས་ནས་བདག་
ལ་ཕས་ཕམ་པའི་ཉེས་པ་མ་བྱུང་གྲང་སྙམ་དུ་བསམ་སྟེ། དེས་དེ་ལྟར་གྱུར་པ་ནས་བཅོམ་ལྡན་འདས་ཀྱིས་བཀའ་སྩལ་པའི་བར་དུ་རྒྱས་པར་བྱ་སྟེ། དེ་ལ་ཕས་པམ་པའི་ཉེས་པ་ནི། མེད་མོད་ཀྱི། བླ་གབ་མེད་པ་ལ་འགྲེང་ངམ་འདུག་ཀྱང་རུང་གཞན་ལས་བྱེད་པ་བདག་གིར་མ་བྱེད་ཅིག་།དགེ་སློང་ཞིག་འདོད་ཆགས་ཀུན་ཏུ་གནས་པས་གཟིར་བ་དང་། དེ་ལ་དགེ་སློང་མཛའ་བོ་ཞིག་ཡོད་དེ། དེ་དེའི་དྲུང་དུ་སོང་ནས་དེས་དེ་ལ། ཚེ་དང་ལྡན་པ། འདོད་ཆགས་ཀྱིས་ཀུན་ཏུ་ཁེབས་ཤིང་གཟིར་ཏོ། །ཞེས་སྨྲས་ན། དེ་ན་རེ། སོང་ལ་མི་ཚངས་པར་སྤྱོད་ཅིག་།ཅེས་བསྒོས་པ་དང་། དེ་ཡང་སོང་ནས་མི་ཚངས་པར་སྤྱོད་པ་བྱས་སོ། །དེ་ལ་བསྒོ་བས་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི། མེད་ཀྱི། ཉེས་པ་སྦོམ་པོར་འགྱུར་རོ། །སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པ་ལིས་ཞུས་པ། བཙུན་པ། ཉེས་པ་སྦོམ་པོ་ཇི་ལྟར་མཐོལ་བར་བགྱི། ཨུ་པ་ལི། ཉེས་པ་སྦོམ་པོ་ནི། འདི་བཞི་སྟེ། ཕས་ཕམ་པ་ལས་བྱུང་བ་ལྕི་བ་དང་། ཕས་ཕམ་པ་ལས་བྱུང་བ་ཡང་བ་དང་། དགེ་འདུན་གྱི་ལྷག་མ་ལས་བྱུང་བ་ལྕི་བ་དང་། དགེ་འདུན་གྱི་ལྷག་མ་ལས་བྱུང་བ་ཡང་བ་རྣམས་ཏེ། དེ་ལ་ཨུ་པ་ལི། གང་ཕས་ཕམ་པ་ལས་བྱུང་བའི་ཉེས་པ་སྦོམ་པོ་ལྕི་བ་དེ་ནི། མཚམས་ཀྱི་ནང་དུ་དགེ་འདུན་ཐམས་ཅད་ཀྱི་མདུན་དུ་བཤགས་པར་བྱའོ། །གང་ཕས་ཕམ་པ་ལས་བྱུང་བའི་ཡང་བ་དེ་ནི། མཚམས་ཀྱི་ཕྱི་རོལ་ཏུ་དགེ་སློང་བཞིའི་མདུན་དུ་བཤགས་པར་བྱའོ། །དགེ་འདུན་གྱི་ལྷག་མ་ལས་བྱུང་བའི་ཉེས་པ་སྦོམ་པོ་ལྕི་བ་ནི། མཚམས་ཀྱི་ཕྱི་རོལ་ཏུ་དགེ་སློང་བཞིའི་མདུན་དུ་བཤགས་པར་བྱའོ། །དགེ་འདུན་གྱི་ལྷག་མ་ལས་བྱུང་བའི་ཡང་བ་ནི། མཚམས་ཀྱི་ནང་དུ་དགེ་སློང་གཅིག་གི་མདུན་དུ་བཤགས་པར་བྱའོ། །མདོར་ན། གླལ་དང་ལས་སུ་རུང་བར་གྱུར། །མ་དང་དུར་ཁྲོད་གནས་པ་དང་། །འོད་བཟང་དང་ནི་བཟང་སྐྱེས་དང་། །ཤིན་ཏུ་བཟང་བ་སྨྱུགས་པ་དང་། །རབ་ཏུ་བཟང་ཞེས་བྱ་བའོ། །དགེ་སློང་གིས་མ་
བཀག་པར་གླལ་བ་དང་། འདོད་ཆགས་ཀྱིས་ཀུན་ཏུ་གཟིར་བའི་དགེ་སློང་ཞིག་དེའི་མདུན་ན་འདུག་པས་ཕོ་མཚན་དེའི་ཁར་བཅུག་ནས་དེ་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི། མ་བྱུང་མོད་ཀྱི། ད་ཕན་ཆད་དགེ་སློང་གིས་མ་བཀབ་པར་གླལ་བར་མ་བྱེད་ཅིག་།གླལ་ན། ཉེས་བྱས་སུ་འགྱུར་རོ། །དགེ་སློང་ཞིག་ཕོ་མཚན་བསྒྲེང་བཞིན་ལས་སུ་རུང་བར་གྱུར་ནས། དེས་བདག་གིས་མོ་མཚན་གྱི་ནང་དུ་བཅུག་ཀྱང་ཉེས་པར་མི་འགྱུར་རོ། །སྙམ་དུ་བསམ་སྟེ་དེས་བུད་མེད་ཀྱི་མོ་མཚན་དུ་བཅུག་ནས་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ། ཕས་ཕམ་པར་འགྱུར་རོ། །དགེ་སློང་ཞིག་འདོད་ཆགས་ཀྱིས་ཀུན་ཏུ་ཁེབས་ཤིང་གཟིར་བ་དང་། དེ་མའི་དྲུང་དུ་སོང་ནས་འདི་སྐད་ཅེས། མ། འདོད་ཆགས་ཀུན་ཏུ་གནས་པས་གཟིར་ཏོ། །ཞེས་སྨྲས་པ་དང་། མ་ན་རེ། བུ། ཁྱོད་ནི། འདི་ཉིད་ནས་བྱུང་བ་ཡིན་གྱི། དའང་འདི་ཉིད་དུ་ཆུག་ཅིག་།ཅེས་སྨྲས་པ་དང་། དེས་དེ་ཉིད་དུ་གཞུག་སྙམ་སྟེ་རྨ་ཁར་བཙུགས་ནས་དེ་ངོ་ཚ་བའི་ཆོས་སུ་གྱུར་ཏོ། །དགེ་སློང་དེ་བདག་ལ་ཕས་ཕམ་པའི་ཆོས་སུ་མ་གྱུར་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ངོ་ཚ་བ་ལ་ནི། ཆགས་པ་མེད་པས། ཕས་ཕམ་པའི་ཉེས་པ་མེད་མོད་ཀྱི། དེ་ཉེས་པ་སྦོམ་པོར་འགྱུར་རོ། །དགེ་སློང་ཞིག་མི་རོ་བརྟག་པའི་ཕྱིར་དུར་ཁྲོད་དུ་སོང་བ་དང་། དེས་དེ་ན་བུད་མེད་རྒྱན་གྱིས་བརྒྱན་བཞིན་དུ་བོར་བའི་རོ་ཞིག་མཐོང་ངོ་། །དེས་དེ་མཐོང་ནས་ཆགས་པའི་ཆོས་སྐྱེས་ཏེ། དེས་དེའི་ནང་དུ་གཞུག་ཅེས་རྨ་ཁར་བཙུགས་པ་དང་། དེའི་ནང་དུ་ཡང་སྲིན་བུས་གང་ཞིང་འདུག་སྟེ། དགེ་སློང་དེ་བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ཉམས་པ་དེ་ལ་རྣམ་པ་གཉིས་ཏེ། ནང་ཉམས་པ་དང་། ཕྱི་ཉམས་པ་སྟེ།
ཕས་ཕམ་པའི་ཉེས་པ་ནི། མེད་མོད་ཀྱི། ཉེས་པ་སྦོམ་པོར་འགྱུར་རོ། །འོད་བཟང་མ་ཞེས་བྱ་བའི་དགེ་བསྙེན་མ་ཞིག་ནུབ་མོ་དུས་བྱས་ནས་དེ་བརྒྱན་བཞིན་དུ་དུར་ཁྲོད་དུ་བོར་བ་དང་། དགེ་སློང་ཞིག་མི་རོ་ལ་བརྟག་པའི་ཕྱིར་དུར་ཁྲོད་དུ་སོང་བ་དེས་དེ་མཐོང་ནས་དེ་ལ་ཆགས་པའི་ཆོས་སྐྱེས་ཏེ། དེས་དེའི་ནང་དུ་གཞུག་ཅེས་རྨ་ཁར་བཙུགས་པ་དང་། དེའང་ལངས་ཏེ་འདུག་ནས་དགེ་སློང་དེ་འཇིགས་པར་གྱུར་ཏེ། བདག་ལ་ཕས་ཕམ་པའི་ཉེས་པ་མ་བྱུང་གྲང་ཞེས་ཐེ་ཚོམ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཇིགས་པ་ལ་ནི། ཆགས་པ་མེད་པས་ཕས་ཕམ་པའི་ཉེས་པ་ནི། མེད་མོད་ཀྱི། ཉེས་པ་སྦོམ་པོར་འགྱུར་རོ། །ཁྱིམ་བདག་བཟང་སྐྱེས་ཞེས་བྱ་བའི་ཆུང་མ་དེའི་གྲོང་དུ་ཉེ་བར་འགྲོ་བ་དགེ་སློང་ཞིག་ཡོད་པ་དེར་སོང་ནས་དེ་ལ་འདི་སྐད་དུ་ཁྱིམ་བདག་གི་ཆུང་མ། འདོད་ཆགས་ཀྱིས་ཁེབས་ཤིང་གཟིར་ཏོ། །ཞེས་སྨྲས་པ་དང་། མོས་སྨྲས་པ། འོག་མར་སྨྱུགས་ལ་སྟེང་མར་ཁུ་བ་ཐོངས་ཤིག་།སྟེང་མར་སྨྱུགས་ལ་འོག་མར་ཁུ་བ་ཐོངས་ཤིག། དེ་ལ་ཁོ་མོས་མི་ཚངས་པར་སྤྱོད་པར་མི་ཤེས་སོ། །ཞེས་སྨྲས་པ་དང་། དེས་ཀྱང་འདི་སྙམ་དུ་བསྙམ་སྟེ་འདི་ནི། བཟང་ངོ་། །འདི་ནི། ལེགས་སོ། །དེ་ལྟ་བུར་ནི། རུང་ངོ་། །སྙམ་དུ་བསམ་ནས་འོག་པར་སྨྱུགས་ཏེ་སྟེང་མར་ཁུ་བ་བཏང་བ་དང་། དགེ་སློང་དེ་ཐེ་ཚོམ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕས་ཕམ་པར་འགྱུར་རོ། །ཤིན་ཏུ་བཟང་མོའི་གླེང་གཞི་ནི། ཇི་ལྟར་རྣམ་པར་འབྱེད་པ་ལས་འབྱུང་བ་བཞིན་ནོ། །རབ་ཏུ་བཟང་ཞེས་བྱ་བའི་དགེ་སློང་ཞིག་གཅིག་བུ་དགོན་པ་ལ་གནས་ཏེ། དེ་ནས་རྒྱང་མི་རིང་བ་ཞིག་ན་བྲམ་ཟེའི་ཞིང་ཞིག་ཡོད་དེ། བྲམ་ཟེ་དེ་ཞིང་ལ་རྟག་ཏུ་འོང་བས་མཐོང་སྟེ། དེ་མཐོང་ནས་དད་པ་སྐྱེས་སོ། །དེས་དེ་ཟན་ལ་མགྲོན་དུ་བོས་ནས་དེས་ཀྱང་དེ་ལ་ཁས་བླངས་སོ། །དེས་ནང་པར་སྔར་ཟས་རྣམས་སྦྱར་ཏེ། བུ་མོ་ཆུང་ངུ་སྒྲེན་མོར་སྤྱོད་པ་ཞིག་འབོད་དུ་བཏང་བ་དང་། དེས་དེའི་མོ་མཚན་མཐོང་ངོ་། །དེས་མཐོང་ནས་ཆགས་བ་སྐྱེས་ཏེ་བྱས་པ་དང་།
དེའི་མོ་མཚན་རལ་ནས་དེ་ཐེ་ཚོམ་སྐྱེས་ཏེ་བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་མི་ཚངས་པར་སྤྱད་པས་དགའ་བ་ཚོར་ན་ནི། ཕས་ཕམ་པར་འགྱུར་རོ། །དེ་སྟེ་མ་ཚོར་ན་ནི། ཉེས་པ་སྦོམ་པོར་འགྱུར་རོ། །མདོར་ན། ལས་སུ་མི་རུང་གཉིད་ལོག་ལ། །གནོད་པ་དང་ནི་ར་རོ་དང་། །ནད་ཀྱིས་གཟིར་དང་མི་འདོད་བཞིན། །སྐྱེས་པ་དང་ནི་མ་ནིང་ངོ་། །དགེ་སློང་ཞིག་རང་བཞིན་གྱིས་ཕོ་མཚན་ལས་སུ་མི་རུང་སྟེ། གང་ལས་སུ་རུང་བཞིན་དུ་བཅུག་ན། ཕས་ཕམ་པའི་ཉེས་པར་འགྱུར་གྱི། ལས་སུ་མི་རུང་བཞིན་དུ་བཅུག་ན། ཉེས་པར་མི་འགྱུར་རོ། །སྙམ་ནས་དེས་མ་བསྒྲེང་བཞིན་དུ་བཅུག་པ་དང་། ཐེ་ཚོམ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་མོད་ཀྱི། ཉེས་པ་སྦོམ་པོར་འགྱུར་རོ། །དགེ་སློང་གིས་བུད་མེད་གཉིད་ལོག་པ་ལ་བྱས་པ་དང་། དགེ་སློང་དེ་ཐེ་ཚོམ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་ལག་པས་ནི། ལག་པར། རྐང་པས་ནི། རྐང་པར། བརླས་ནི། བརླར། འདྲོང་གིས་ནི། འདྲོང་ལ་འབྱར་ན། ཕས་ཕམ་པར་འགྱུར་རོ། །མ་འབྱར་ན་ནི། ཉེས་པ་སྦོམ་པོར་འགྱུར་རོ། །ཇི་ལྟར་གཉིད་ལོག་པ་དེ་བཞིན་དུ། ར་རོ་བ་དང་། ནད་ཀྱིས་གཟིར་བ་མི་འདོད་བཞིན་པའོ། །ཇི་ལྟར་བུད་མེད་ལ་རྣམ་པ་བཞིར་བརྗོད་པ་སྐྱེས་པ་དང་། མ་ནིང་ལ་ཡང་དེ་བཞིན་ནོ།། །།འདུལ་བ་གཞུང་དམ་པ། བམ་པོ་ཉེར་གཉིས་པ། མདོར་ན། རྣམ་པ་བཞི་དང་ལྔ་པ་དང་། །ལམ་རྣམས་ཀུན་དང་གཉིད་ལོག་པ། །ལན་གཅིག་གསུམ་པ་བྱས་པ་དང་། །བུད་མེད་སྐྱེས་པ་མ་ནིང་ངོ་། །དགེ་སློང་ཉལ་བ་ལ་བུད་མེད་ཀྱིས་བྱས་ཏེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་། ཁྱོད་ཀྱིས་ཅི་དགའ་བར་ཚོར་རམ། གསོལ་པ། དགའ་བ་ཚོར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་སམ། སྨྲས་པ། འཚལ་བ་ནི། མ་མཆིས་ཏེ། བདག་གཡོས་པ་ཙམ་དུ་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གཉིད་ཀྱིས་
ལོག་པ་གཡོས་པ་ཙམ་དུ་གྱུར་པ་ལ་ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་ཉལ་བ་ན་བུད་མེད་ཀྱིས་བྱས་ཏེ། དེ་འགྱོད་པ་སྐྱེས་པ་དང་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་། ཁྱོད་ཀྱིས་ཅི་དགའ་བ་ཚོར་རམ། གསོལ་པ། དགའ་བ་མ་ཚོར་རོ། །བཅོམ་ལྡན་འདས་ཀྱིས་བཀའ་སྩལ་པ། དགའ་བ་མ་ཚོར་ན། ཉེས་པ་མེད་དོ། །དགེ་སློང་ཉལ་ཞིང་འདུག་པ་ལ་བུད་མེད་ཀྱིས་བྱས་ཏེ། དེ་འགྱོད་བསྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་། ཅི། ཁྱོད་ཀྱིས་ཤེས་སམ། གསོལ་པ། མ་འཚོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་པ་མེད་ན། ཉེས་པ་མེད་དོ། །དགེ་སློང་ཉལ་ཞིང་འདུག་པ་ལ་བུད་མེད་ཀྱིས་བྱས་ཏེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཅི། དགེ་སློང་ཁྱོད་ཀྱིས་ཤེས་པའམ། དགའ་བ་ཚོར་བ་ཡོད་དམ། གསོལ་པ། འཚལ་བའང་མ་མཆིས། དགའ་བ་ཚོར་བའང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤེས་པ་མེད་པ་དང་། དགའ་བ་ཚོར་བ་མེད་པ་ལ་ཉེས་པ་མེད་དོ། །དགེ་སློང་ལ་ཇི་ལྟ་བར་དགེ་སློང་མ་དང་། དགེ་སློབ་མ་དང་། དགེ་ཚུལ་མ་དང་། དགེ་ཚུལ་ཕ་ལ་ཡང་དེ་བཞིན་ནོ། །སྡིག་པ་ཅན་གྱི་དགེ་སྦྱོང་གསུམ་པོས་བུད་མེད་བཟུང་སྟེ་ལམ་ཀུན་ཏུ་བྱས་ཀྱང་ཉེས་པར་མི་འགྱུར་རོ། །ཞེས་སྨྲས་ནས། དེ་དག་གིས་དེའི་ལམ་ཀུན་ཏུ་བྱས་པ་དང་། དེ་དག་ཐེ་ཚོམ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། བཅུག་མཐག་ཏུ་ཕས་ཕམ་པར་འགྱུར་རོ། །བུད་མེད་ལ་ཇི་ལྟ་བར་སྐྱེས་པ་དང་། མ་ནིང་ཐམས་ཅད་ལའང་དེ་བཞིན་ནོ། །མདོར་ན། བུད་མེད་སྐྱེས་པ་མ་ནིང་དང་། །སུན་ཕྱུང་དགའ་བ་མ་ཚོར་དང་། །དགོན་པ་གསུམ་དང་རབ་བྱུང་ལྔའོ། །དགེ་སློང་ཞིག་ཉལ་བ་ལ་བུད་མེད་ཀྱིས་བྱས་ཏེ་དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་། ཅི་ཁྱོད་ཀྱིས་ཤེས་སམ། གསོལ་པ། མ་འཚལ་ཏོ། །མ་ཤེས་པ་ལ་ཉེས་པ་
མེད་དོ། །བུད་མེད་ལ་ཇི་ལྟ་བར་སྐྱེས་པ་དང་། མ་ནིང་ལ་ཡང་དེ་བཞིན་ནོ། །དགོན་པའི་དགེ་སློང་སྡིག་ཅན་གྱིས་དགེ་སློབ་མ་ཁྲིད་ནས་ཁྱོད་ནི། བསྙེན་པར་མ་རྫོགས་པས་མི་ཚངས་པར་སྤྱོད་ན། བདག་ཅག་གཉི་ག་ལ་ཉེས་པར་མི་འགྱུར་རོ། །ཞེས་སྨྲས་པ་དང་། དེས་ཁས་བླངས་སོ། །དེས་ཁས་བླངས་ནས་འགྱོད་པ་སྐྱེས་པ་དང་། དེས་དེ་མ་དད་བཞིན་དུ་བྱས་ནས་དགེ་སློབ་མ་དེ། བདག་ནི། དགེ་སློབ་མ་མ་ཡིན་པར་མ་གྱུར་གྲང་སྙམ་དུ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ།བསླབ་པ་ཉམས་ཀྱི། སླར་ཡང་བྱིན་ཅིག་།ཉེས་བྱས་སུ་འགྱུར་རོ། །དགོན་པའི་སྡིག་ཅན་མས་དགེ་ཚུལ་ཕ་བྲིད་ནས་ཁྱོད་ནི། བསྙེན་པར་མ་རྫོགས་པས་མི་ཚངས་པར་སྤྱོད་ཀྱང་བདག་ཅག་གཉིས་ཀ་ལ་ཉེས་པར་མི་འགྱུར་རོ། །ཞེས་སྨྲས་པ་ནས་རྒྱས་པར་ཏེ། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་ཕ་ལ་ཉེས་བྱས་སུ་འགྱུར་ཏེ། དགེ་ཚུལ་མ་ལ་ཡང་དེ་བཞིན་ནོ། །དགོན་པའི་སྡིག་ཅན་མས་ལོར་མ་ལོན་པ་ལ་ཁྱོད་བསྙེན་པར་རྫོགས་ནས་རིང་པོར་མ་ལོན་གྱི། མི་ཚངས་པར་སྤྱད་ཀྱང་བདག་ཅག་ལ་ཉེས་པར་མི་འགྱུར་རོ། །ཞེས་སྨྲས་ནས་དེས་ཀྱང་དེ་ལ་ཁས་བླངས་ཏེ། དེས་ཁས་བླངས་ནས་སླར་འགྱོད་པ་སྐྱེས་པ་དང་། དེས་དེ་ལ་མ་དད་བཞིན་དུ་བྱས་ནས་དགེ་སློང་དེ་འདི་སྙམ་དུ། བདག་ལ་ཕས་ཕམ་པའི་ཉེས་པ་མ་བྱུང་གྲང་སྙམ་སྟེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགའ་བ་མི་ཚོར་བ་ལ་ནི། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་དགེ་སློང་ཞིག་ཉལ་བ་ལ་བྱས་པ་དང་། དགེ་སློང་དེས་ཐོག་མ་དང་། བར་དང་། ཐ་མ་རྣམས་མ་ཤེས་ན། དགེ་སློང་གང་གིས་བྱས་པ་དེ་མ་རུང་བར་བྱོས་ཤིག་།རྒྱས་པར་ནི། རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ། །མདོར་ན། བཞི་པ་གཟུགས་བརྙན་ཀླུ་མོ་དང་། གནོད་སྦྱིན་ལྷ་མོ་དྲི་ཟ་མོ། །ལྷ་མིན་ཡི་དྭགས་མི་ཟ་མོ། །ཤ་ཟ་མོ་ཡང་དེ་བཞིན་ནོ། །དགེ་སློང་ཞིག་གིས་ཤིང་གི་གཟུགས་བརྙན་བྱས་པ། གཟུགས་ལེགས་
པ། བལྟ་ན་སྡུག་པ། མཛེས་པ་ཞིག་མཐོང་སྟེ། དེ་མཐོང་བ་དང་འདོད་པའི་ཆོས་སྐྱེས་ནས་དེ་ཉིད་དུ་གཞུག་སྙམ་སྟེ། རྨ་ཁར་བཅུག་པ་དང་། དེས་ཀྱང་ཕྱེ་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་ཡན་ལག་ཐམས་ཅད་རེག་པར་བྱས་ན། ཕས་ཕམ་པར་འགྱུར་རོ། །འོན་ཏེ་མོ་མཚན་སྤྲད་པ་ཙམ་གྱིས་ནི། ཉེས་པ་སྦོམ་པོར་འགྱུར་རོ། །ཇི་ལྟར་ཤིང་ལས་བྱས་པ་དེ་བཞིན་དུ་ས་ལས་བྱས་པ་དང་། རྡོ་ལས་བྱས་པ་དང་། གོས་ལས་བྱས་པ་རྣམས་ཀྱང་དེ་བཞིན་ནོ། །ཀླུའི་བུ་མོ་ཞིག་དགེ་སློང་གི་དྲུང་དུ་འོངས་ནས་བཙུན་པ། མི་ཚངས་པར་སྤྱད་ཀྱི། ཚུར་སྤྱོན་ཞེས་སྨྲས་པ་དང་། དེས་ཁས་བླངས་ནས་དེས་དེར་གཞུག་ཅེས་རྨ་ཁར་བཅུག་པ་དང་། དེ་ཡང་ལུས་རིང་མོ་གྱུར་ནས་དགེ་སློང་དེ་འཇིགས་པར་གྱུར་ནས། འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཇིགས་པ་ལ་ཆགས་པ་མེད་པས་ན། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དེ་བཞིན་དུ་གནོད་སྦྱིན་གྱི་བུ་མོའི་བར་དུ་རྒྱས་པར་ཏེ། དེ་ཡང་མི་སྣང་བར་གྱུར་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །ལྷའི་བུ་མོ་དང་། དྲི་ཟའི་བུ་མོ་དང་། ལྷ་མ་ཡིན་གྱི་བུ་མོ་རྣམས་ཀྱང་དེ་བཞིན་དུ་རྒྱས་པར་ཏེ། ཇི་ལྟར་ཀླུའི་བུ་མོ་བཞིན་དུ་ལུས་ཆེར་གྱུར་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་འཇིགས་པ་ལ་ནི། འདོད་ཆགས་མེད་པས་ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དེ་བཞིན་དུ་ཡི་དྭགས་ཀྱི་བུ་མོ་དེའི་མོ་མཚན་ཆེར་གྱུར་པ་དང་། དེས་དེར་རྐང་པ་བཅུག་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་གཅིག་བུ་དགོན་པ་ལ་གནས་པ་དང་། དེར་མི་ཟ་མོ་ཞིག་
འོངས་ཏེ་བཙུན་པ། མི་ཚངས་པར་སྤྱད་ཀྱི། ཚུར་སྤྱོན་ཅེས་སྨྲས་ན། དགེ་སློང་དེ་ཚུལ་ཁྲིམས་དང་ལྡན་པས་སྤྲོ་བ་མ་བསྐྱེད་པ་དང་། དེས་སྨྲས་པ། བཙུན་པ། སྤྲོ་བ་སྐྱེད་ཅིག་།ཁྱོད་མ་རུངས་པར་བྱས་ས་རེ། དེས་དེ་ལ་ཅི་དགའ་བར་བྱོས་ཤིག་།སྤྲོ་བ་མི་བསྐྱེད་དོ། །ཞེས་སྨྲས་པ་དང་། མོས་དགེ་སློང་དེ་ཉལ་བ་ལ་ཕྱར་བས་དཀྲིས་ཏེ་རྒྱལ་པོ་བཙུན་མོ་དང་ལྷན་ཅིག་ཏུ་གཟིམས་པའི་མཆན་དུ་བཅུག་པ་དང་། རྒྱལ་པོ་དེས་དགེ་སློང་དེ་མཐོང་ནས་ཁྱོད་འདིར་ཅི་ལ་འོངས། དེས་སྨྲས་པ། བདག་གཅིག་པུ་དགོན་པ་ན་གནས་པ་དང་། དེར་མི་ཟ་མོ་ཞིག་མཆིས་ནས་བདག་ལ་བཙུན་པ། མི་ཚངས་པར་སྤྱད་ཀྱི། ཚུར་སྤྱོན་ཅེས་མཆིས་ནས་བདག་གིས་སྤྲོ་བ་མ་བསྐྱེད་པ་དང་། དེས་བཙུན་པ། སྤྲོ་བ་སྐྱེད་ཅིག་།ཁྱོད་མ་རུངས་པར་བྱས་ས་རེ་ཞེས་མཆི་ནས་དེ་ལ་བདག་གིས་ཅི་དགའ་བར་བྱོས་ཤིག་།སྤྲོ་བ་ནི། མི་བསྐྱེད་དོ། །ཞེས་དེ་སྐད་སྨྲས་པ་དང་། བདག་ཉལ་བ་ལ་དེས་ཕྱར་བས་དཀྲིས་ཏེ་འདིར་བཞག་གོ །རྒྱལ་པོས་བཙུན་པ་གང་དུ་འདི་ལྟ་བུར་འཇིགས་པར་འགྱུར་བ་དེ་ལྟ་བུའི་དགོན་པར་ཅིའི་ཕྱིར་གནས་ཞེས་སྨྲས་ནས་དགེ་སློང་བསྐྲད་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཕྱིན་ཆད་གང་དུ་འདི་ལྟར་འཇིགས་པར་འགྱུར་བ་དེ་ལྟ་བུའི་དགོན་པར་མ་གནས་ཤིག་།དེ་བཞིན་དུ་ཤ་ཟ་མོས་ཀྱང་བྱས་ཏེ་དེས་ཀྱང་ཉལ་བ་ལ་ཕྱར་བས་དཀྲིས་ནས་ཆང་འཚོང་པའི་སྤྱིལ་བུར་བཅུག་གོ །ཆང་འཚོང་བ་དེས་སྤྱིལ་བུར་བལྟས་པ་དང་། དགེ་སློང་མཐོང་ནས་རྒྱས་པར་ནི། ཇི་ལྟར་མི་ཟ་མོས་བྱས་པ་བཞིན་ནོ། །མདོར་ན། ཨུཏྤ་ལ་ཁ་དོག་དགའ་མོ་དང་། །ཕྲུ་གུ་གཉིས་དང་ཤ་སྣག་དང་། ཁྱི་མོ་ཝ་མོ་བྱ་རོག་མོ། །མི་མ་ཡིན་དང་ཆུ་རྒལ་དང་། །ཉ་དང་སྲམ་དང་ཤིང་ཐུན་མོའོ། །བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དགེ་སློང་མ་ཨུཏྤ་ལའི་ཁ་དོག་མ་སྔ་དྲོ་ཤམ་ཐབས་བགོས་ཏེ་མཉན་དུ་ཡོད་པར་བསོད་སྙོམས་ལ་ཞུགས་པ་ནས་རྒྱས་པར་རྐང་པ་བཀྲུས་ཏེ་ནང་དུ་ཡང་དག་པར་འཇོག་ལ་
འཇུག་པའི་ཕྱིར་གནས་ཁང་དུ་ཞུགས་པ་དང་། སྒོ་ཕྱེ་སྟེ་འཕྲེས་ནས་ཚ་བའི་དུས་ལ་བབ་པས་གཉིད་ཀྱིས་ལོག་ཅིང་ཉལ་བ་དང་། གཡོན་ཅན་སྲང་ཕྲན་ནས་རྒྱུ་ཞིང་འདོང་བ་རྣམས་ཀྱིས་མཐོང་སྟེ་དེ་དག་གིས་ཉལ་བ་ལ་བྱས་སོ། །དེ་དག་གིས་བྱས་ནས་དོང་བ་དང་། དེ་ཡང་སད་ནས་དགེ་སློང་མ་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་དགེ་སློང་མས་སྒོ་མ་བཅད་པར་མ་འཕྲེས་ཤིག་།འཕྲེས་ན། ཉེས་བྱས་སུ་འགྱུར་རོ། །དེ་བཞིན་དུ་སྙོམས་པར་ཞུགས་པ་ལ་བྱས་ན་ཡང་ཉེས་པ་མེད་དེ། ཕྱིན་ཆད་དགེ་སློང་མ་སྒོམ་བཅད་པར་སྙོམས་པར་མ་འཇུག་ཅིག་།སྙོམ་པར་ཞུགས་ན། ཉེས་བྱས་སུ་འགྱུར་རོ། །དགེ་སློང་ཞིག་མཉན་དུ་ཡོད་པར་བསོད་སྙོམས་ལ་ཞུགས་པ་དང་། དེ་ཁྱིམ་བདག་གང་གི་ཁྱིམ་དུ་ཞུགས་པ་ཁྱིམ་བདག་དེའི་ཕག་གི་ཕྲུ་གུ་ཞིག་ཕུར་བ་ལ་བཏགས་པས་དེ་ཕུར་པ་དེ་ལ་འཁོར་ཞིང་འདུག་པ་དང་། དགེ་སློང་དེས་སྙིང་རྗེ་སྐྱེས་ནས་དེ་ཕུར་པ་ལས་བཀྲོལ་ཏེ་བཏང་བ་དང་། ཁྱིམ་བདག་དེས་དགེ་སློང་དེ་མཐོང་ནས་དེས་བརྒྱུགས་ཏེ་དགེ་སློང་དེའི་གོང་བ་ནས་བཟུང་སྟེ་ཁྱོད་ཀྱིས་ཁོ་བོའི་ཕག་གི་ཕྲུ་གུ་བཏང་བས་ན། ཁྱོད་ནི། རྐུ་བའོ། །ཁྱོད་ནི། གླེན་པའོ། །ཁྱོད་ནི། དགེ་སྦྱོང་སྡིག་ཅན་ནོ། །ཞེས་སྨྲས་པ་དང་། དེ་འདི་སྙམ་དུ་བདག་གིས་ཕག་གི་ཕྲུ་གུ་བཏང་བས་ན། བདག་ནི། རྐུ་བ། བདག་ནི། གླེན་པ། བདག་ནི། དགེ་སྦྱོང་སྡིག་ཅན་དུ་གྱུར་གྱི། བདག་སོང་ལ་མི་ཚངས་པར་སྤྱད་དོ། །སྙམ་དུ་བསམ་ནས་དེ་སོང་སྟེ་མི་ཚངས་པར་སྤྱད་པ་བྱས་པ་དང་། དེས་འདི་སྙམ་དུ། དགེ་སློང་དག་ལ་དྲིས་ལ། དེ་སྟེ་བདག་རབ་ཏུ་བྱུང་ནས་བསྙེན་པར་རྫོགས་པ་འཆགས་ན་ནི། བདག་རབ་ཏུ་འབྱུང་ངོ་། །མི་འཆགས་ན་ནི། འདི་ཉིད་དུ་གནས་སོ། །སྙམ་དུ་བསམ་ནས་དེས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།སྔ་མ་ལ་ཉེས་པ་མེད་ཀྱི། ཕྱི་མ་ལ་ནི། ཉེས་པར་གྱུར་ཏོ། །དེ་ལྟར་བྱ་གག་གི་ཕྲུ་གུ་ཡང་དེ་བཞིན་ནོ། །ཁྱིམ་བདག་ཅིག་གིས་ཤ་སྣག་གུ་ཞིག་ཁྱེར་ཏེ་
སོང་བ་བྱ་འོལ་པས་འཕྲོག་སྟེ་ཁྱེར་ནས་ཤ་སྣག་གུ་དེ་འོལ་བའི་ལག་ནས་ཤོར་ཏེ་དགེ་སློང་བསོད་སྙོམས་ལ་སྤྱོད་པ་དེའི་ལྷུང་བཟེད་དུ་ལྷུང་ངོ་། །ཁྱིམ་བདག་དེས་ཤ་སྣག་གུ་དེ་དགེ་སློང་དེའི་ལྷུང་བཟེད་ན་འདུག་པ་མཐོང་བ་དང་། དེས་དགེ་སློང་དེའི་གོང་པ་ནས་བཟུང་སྟེ་ཁོ་པའི་ཤ་སྣག་གུ་དེ་འོལ་བས་ཁྱེར་བ་ལ་ཁྱོད་ཀྱི་ལྷུང་བཟེད་ནས་ཟིན་པས་ན། ཁྱོད་ནི། རྐུ་བའོ། །ཁྱོད་ནི། གླེན་པའོ། །ཁྱོད་ནི། དགེ་སྦྱོང་སྡིག་ཅན་ནོ། །ཞེས་སྨྲས་པ་དང་། དེ་འདི་སྙམ་དུ། འདིའི་ཤ་སྣག་གུ་དེ་བདག་གི་ལྷུང་བཟེད་ནས་ཟིན་པས་ན། བདག་ནི། རྐུ་བའོ། །བདག་ནི། གླེན་པའོ། །བདག་ནི། དགེ་སྦྱོང་སྡིག་ཅན་དུ་གྱུར་གྱི། བདག་སོང་ལ་མི་ཚངས་པར་སྤྱད་པར་བྱའོ། །སྙམ་དུ་བསམ་མོ། །རྒྱས་པར་ནི། ཇི་ལྟར་ཕག་གི་ཕྲུ་གུ་བཞིན་ནོ། །དགེ་སློང་ཞིག་གིས་ཁྱི་མོའི་མདུན་དུ་གཅི་བ་བྱས་པ་དང་། དེས་དེའི་ཕོ་མཚན་ཁར་བཅུག་ནས་དེས་ཁུ་བ་བྱུང་སྟེ། ལུས་ཀྱང་བཏུད་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཕྱིན་ཆད་དགེ་སློང་གིས་ཁྱི་མོའི་མདུན་དུ་གཅི་བ་མ་བྱེད་ཅིག་།ཡང་ན། དེ་སྐྲོད་ཅིག་།ཡང་ན། གུད་དུ་སོང་ཞིག་།དགེ་སློང་ཞིག་འཆག་པ་ན་ཝ་མོ་ཞིག་སྒྲ་འབྱིན་ཅིང་ཕྱག་དར་ཁྲོད་ཀྱི་གོས་འདྲལ་ལོ། །དེ་ནས་དེ་འདི་སྙམ་དུ། བདག་གི་ཕྱག་དར་ཁྲོད་ཀྱི་གོས་འདྲལ་བ་དེ་སུ་ཡིན་པ་སོང་སྟེ་བལྟའོ། །སྙམ་དུ་བསམ་ནས་དེ་ཕྱག་དར་ཁྲོད་ཀྱི་གོས་ཀྱིས་དཀྲིས་ཏེ་འདུག་པ་དང་། ཝ་མོ་དེ་ཡང་འོངས་ནས་དགེ་སློང་དེའི་སྟེང་དུ་ཞོན་པ་དང་། དེས་ཕྱག་དར་ཁྲོད་ཀྱི་གོས་ཀྱིས་ཝ་དེ་དཀྲིས་ཏེ་བཟུང་ནས་དེ་འདི་སྙམ་དུ། ཝ་འདི་ཕོའམ། མོ་ཡིན་བ་བལྟའོ། །ཞེས་བསམ་ནས་དེས་དེའི་མོ་མཚན་མཐོང་ངོ་། །དེས་མཐོང་ནས་འདོད་པའི་ཆོས་སྐྱེས་ཏེ། དེས་དེ་ཉིད་ཀྱི་ནང་དུ་གཞུག་གོ །སྙམ་དུ་བསམ་ནས་རྨ་ཁར་བཙུགས་པ་དང་། མོས་སླར་ལོག་སྟེ་སོས་བཏབ་ནས་དགེ་སློང་དེ་སྐྲག་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྐྲག་པ་ལ་ཕས་པམ་པའི་ཉེས་པ་མེད་དེ། ཉེས་པ་སྤོམ་པོར་འགྱུར་རོ། །དགེ་སློང་ཞིག་གཅིག་བུ་ནགས་སྟུག་པོ་ན་གནས་པ་དང་། དེ་དེ་ནས་མིའམ་ཅི་མོས་ཁྲིད་ནས་དེས་དེ་བྲག་ཕུག་ཏུ་བཅུག་སྟེ།
དེས་ཅི་ནས་ཀྱང་འདུ་ཤེས་གྱུར་པ་དེ་ལྟར་བྱས་སོ། །དེས་དེ་འདུ་ཤེས་བསྒྱུར་ཏེ་སྤྱོད་ཡུལ་གྱི་ཕྱིར་སོང་བ་དང་། དགེ་སློང་དེ་འདུ་ཤེས་ཐོབ་ནས་དེ་གནས་དེ་ནས་ལངས་ཏེ་བྲོས་སོ། །དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་དགེ་སློང་གིས་གང་དུ་འདི་ལྟ་བུར་འཇིགས་པར་འགྱུར་བའི་དགོན་པར་མ་གནས་ཤིག་།དགེ་སློང་ཞིག་སྒྲེན་མོར་ཆུ་ཀླུང་བརྒལ་བ་ལས་དེའི་ཕོ་མཚན་ཉས་བཟུང་བ་དང་། དེས་ཀྱང་ལུས་བཏུད་དེ་ཁུ་བ་ཕྱུང་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཕྱིན་ཆད་འདི་ལྟ་བུར་འཇིགས་པར་འགྱུར་བའི་ཆུ་ཀླུང་གང་ཡིན་པ་ལ་སྒྲེན་མོར་མ་རྒལ་ཅིག་།བུད་མེད་ཅིག་སྒྲེན་མོར་ཤིང་ཐགས་ཀྱི་ནང་ན་ཁུ་ལེ་ལྟ་བུས་ཆུ་འཆུ་ཤིང་འདུག་པ་ལ་དགེ་སློང་ཞིག་གིས་ཤིང་ཐགས་ཀྱི་གསེབ་ནས་དེའི་མོ་མཚན་མཐོང་ངོ་། །དེས་མཐོང་ནས་ཆགས་པ་དང་། དེའི་མོ་མཚན་ལ་དེའི་ཕོ་མཚན་གྱིས་རེག་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་ནི། མེད་དེ་ཉེས་པ་སྡོམ་པོར་འགྱུར་རོ། །བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དགེ་སློང་དག་གིས་བྱ་བ་བྱས་ནས་འཆག་ཅིང་ཉིན་པར་སྤྱོད་པའི་གནས་སུ་སོང་སྟེ། དེས་དེར་གདན་བཏིང་ནས་སྐྱིལ་མོ་ཀྲུང་བཅས་ཏེ་འདུག་པ་དང་ཚ་བའི་དུས་ལ་བབ་པས་དེས་དེར་འཕྲེས་ཏེ་ཉལ་བ་དང་གཉིད་ཀྱིས་ལོག་གོ །དེ་ཉལ་བ་ན་ཤམ་ཐབས་བསྙིལ་ནས་ཕོ་མཚན་ལས་སུ་རུང་བར་གྱུར་ཏེ། བུད་མེད་ཤིང་ཐུན་ཞིག་ཤིང་ཚོལ་ཞིང་གནས་དེར་འོངས་པ་དང་། དེས་དགེ་སློང་དེ་མི་སྡུག་པར་ཉལ་བ་མཐོང་ངོ་། །དེས་མཐོང་ནས་ཤིན་ཏུ་ཆགས་ཏེ། དེས་དགེ་སློང་དེ་ལ་ཉལ་པོ་བྱས་སོ། །ཉལ་པོ་བྱས་ནས་དེ་སོང་བ་དང་། དགེ་སློང་དེ་ཡང་སད་ནས་དེས། འཕགས་པ། བདག་གི་ཁྱིམ་འདི་ཞེས་བགྱི་བ་ན་མཆིས་ཀྱི། དེ་སྟེ་ཡང་བཞེད་ན། དེར་སྤྱོན་ཅིག་།ཅེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་ཅི་ཁྱོད་ཀྱིས་ཤེས་སམ། གསོལ་པ། མ་
འཚལ་ཏེ། མི་ཤེས་ན། ཉེས་པ་མེད་དེ། བླ་གབ་མེད་པར་གཅིག་པུ་འཕྲེས་ཏེ་མ་འདུག་ཅིག་།འདུག་ན། ཉེས་བྱས་སུ་འགྱུར་རོ། །མདོར་ན། པ་ལ་ཤ་ཡི་རྩྭ་རྔ་མ། །ཙམ་པ་ཀ་ཡི་རྒྱུ་ལྔ་དང་། །རྒྱལ་པོའི་ཁབ་ན་སྨན་དཔྱད་དང་། །བྷ་རུ་ཀད་ཙའི་སྨད་འཚོང་མའོ། །བཅོམ་ལྡན་འདས་ཀེ་ཏའི་ཤིང་པ་ལ་ཤའི་ནགས་ན་བཞུགས་སོ། །དེ་ནས་དགེ་སློང་གཞན་ཞིག་ལ་རྩྭ་རྔམ་ཞིག་གིས་རྒྱས་པར་ནི། ཇི་ལྟར་ཤིང་ཐུན་མ་བཞིན་ནོ། །གྲོང་ཁྱེར་ཙམ་པར་ནད་གཡན་པས་བཏབ་པ་དང་། རྒྱུ་ལྔ་དང་རྐྱེན་ལྔས་ཕོ་མཚན་ལས་སུ་རུང་བ་འགྱུར་ཏེ། རྣམ་པར་འབྱེད་པ་ལས་ཇི་སྐད་འབྱུང་བ་བཞིན་ནོ། །བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དགེ་སློང་ཞིག་ཕོ་མཚན་ནད་ཀྱིས་གཟིར་བ་དང་འཚོ་བྱད་ཀྱི་ཕ་མཚན་ཡང་ནད་ཀྱིས་གཟིར་བར་གྱུར་བ་ན། དེས་བུད་མེད་ཀྱིས་ཁར་བཅུག་པ་དང་། དེ་ནད་དེ་ལས་ཐར་ཏོ། །ཞེས་དེས་ཐོས་ནས་དེས་འདི་སྙམ་དུ། བཅོམ་ལྡན་འདས་ཀྱིས་ནད་པའི་སྨན་དཔྱད་དུ་གནང་གི་།བུད་མེད་ཀྱི་ཁར་གཞུག་གོ །སྙམ་དུ་བསམ་སྟེ། དེས་བུད་མེད་ཀྱི་ཁར་བཅུག་ནས་ནད་དེ་ལས་ཐར་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། བཅུག་མ་ཐག་ཏུ་ཕས་ཕམ་པར་འགྱུར་རོ། །ཡུལ་བྷ་རུ་ཀད་ཙའི་སྨད་འཚོང་མ་ཞིག་གི་ཁྱིམ་དུ་རྐུན་པོ་གཅིག་ཅིག་གནས་ཏེ། དེ་དེ་ནས་བྱུང་ཞིང་མི་དག་ལ་གནོད་པ་བྱེད་པ་དང་། དེ་དག་གིས་རྒྱལ་པོ་ལ་གསོལ་ནས། རྒྱལ་པོས་སྨད་འཚོང་མ་བོས་ནས། ཅི། ཁྱོད་ཀྱི་ཁྱིམ་ན་རྐུན་པོ་གནས་སམ་ཞེས་དྲིས་པ་དང་། ལྷ། སུ་ཡང་མ་མཆིས་སོ། །དེ་སྟེ་བཙལ་ཏེ་རྙེད་ན་ནི། ཁྱོད་ཀྱིས་བཅགས་ཏེ་སྤས་པས་ཆད་པས་གཅད་དོ། །མི་དེ་དག་གིས་རྐུན་པོ་དེ་བཟུང་སྟེ་ཁྲིད་ནས་རྒྱལ་པོ་ལ་གསོལ་བ་དང་། རྒྱལ་པོས་བཀའ་སྩལ་པ། ཁྱོད་སོང་ལ་སྨད་འཚོང་མ་འདི་རྐང་པའི་མཁྲིག་མ་ནས་འབྲེང་པས་ཐོགས་ལ་ལྟག་པར་སྤྲེལ་ཏེ་དུར་ཁྲོད་དུ་འོར་ཅིག་།སུ་གང་ཞིག་གིས་འདི་བཏང་ན། དེ་ཆད་པ་འདི་ཉིད་ཀྱིས་གཅད་དོ། །དེ་སྟེ་གསོན་ན་ནི། ཁྱི་རྣམས་ལ་སྦྱིན་ནོ། །དེ་དག་གིས་དེའི་རྐང་པའི་མཁྲིག་མ་ནས་འབྲེང་པས་བཏགས་ནས་ལྟག་
པར་སྤྲེལ་ཏེ་དུར་ཁྲོད་དུ་བོར་བ་དང་། དགེ་སློང་ཞིག་དུར་ཁྲོད་ན་མི་རོལ་རྟོག་ཅིང་འདུག་པ་དེས་མཐོང་སྟེ། འདོད་པའི་ཆོས་སྐྱེས་ནས་དེས་འདི་ལྟར་དེ་ཉིད་དུ་གཞུག་སྙམ་སྟེ་རྨ་ཁར་བཙུགས་པ་དང་། དེའང་ལངས་ཏེ་འདུག་ནས་བཙུན་པ་སྔོན་དུ་ཆུ་ཞིག་སྩོལ་ཅིག་།ཅེས་སྨྲས་པ་དང་། དེས་དེ་ལ་ཆུ་བླུད་ནས་དེས་སྨྲས་པ། བཙུན་པ། །ཁོ་མོའི་ལུས་དང་མངལ་མི་གཙང་བ་འདི་ཅིར་དགོས། དེས་དེ་ན་གནས་ཀྱིས་བར་དུ་བཟུང་བ་དང་། དེའི་གཉེན་བཤེས་རྣམས་འོང་བ་དགེ་སློང་དེས་རྒྱང་མ་ནས་མཐོང་སྟེ་ངོ་ཚ་བས་ཕྱོགས་གཅིག་ཏུ་སོང་བ་དང་། དེས་གཉེན་བཤེས་དེ་དག་ལ་སྨྲས་པ། ཁོ་མོ་འདི་ལྟར་ཅུང་ཟད་འཚོ་བ་དེ་དག་ཐམས་ཅད་དགེ་སློང་འདིའི་མཐུ་ཡིན་གྱི། དེ་པོས་ཤིག་།ཅེས་དེས་སྨྲས་པ་དང་། དེ་དག་གིས་བོས་ནས་དེས་སྨྲས་པ། བཙུན་པ། ཁོ་མོ་ཅུང་ཟད་འཚོ་བ་དེ་ཐམས་ཅད་ནི། ཁྱོད་ཀྱི་དྲིན་ཏེ། འདི་དག་ནི། ཁོ་མོའི་གཉེན་བཤེས་ལགས་ན། འདི་དག་གིས་གསོས་ཏེ་སོས་པ་དང་། དེ་སྟེ་ཁོ་མོ་ལ་བགྱི་བ་མཆིས་ན། ཁྱི་འདི་ན་མཆིས་ཀྱི། དེར་སྤྱོན་ཅིག་།ཅེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྤོམ་འཁོར་འགྱུར་རོ། །མདོར་ན། བ་ལང་ནང་དང་ཁྲོན་པ་དང་། །རེག་དང་གྲུ་ཡང་ནུབ་པ་དང་། །སྐྱེས་པ་དག་དང་སེར་སྐྱ་དང་། །བུད་མེད་བུ་དང་སེར་སྐྱ་དང་། །བཟང་སྐྱེས་ནོར་ཅན་ཕོ་བྲང་སྐྱོང་། །དགེ་སློང་ཕོ་བྲང་འཁོར་སྐྱོང་བ་བ་ལང་གི་ནང་དུ་སོང་བ་དང་། དེ་གླང་མི་སྲུན་པས་བརྡུངས་ནས་བུད་མེད་ཀྱི་སྟེང་དུ་འགྱེལ་བ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། །ཤེས་པར་བྱོས་ལ་བ་ལང་གི་ནང་དུ་སོང་ཞིག་། དགེ་སློང་ཞིག་ཁྲོན་པ་ཞིག་ཏུ་བལྟས་པ་དང་། དེར་ལྷུང་ནས་དེར་སྔར་ཡང་བུད་མེད་ཅིག་ལྷུང་བས་དེའི་མགུལ་ནས་འཇུས་སོ། །ཁྱིམ་བདག་དག་གིས་ཐག་པ་བླངས་ཏེ་དགེ་སློང་དེ་ཕྱུང་བ་དང་། དེའི་མགུལ་ནས་བུད་མེད་ཅིག་གིས་འཇུས་པར་མཐོང་ནས་དེ་དག་གིས་བུད་མེད་འདི་ག་ལས་འོངས་ཞེས་སྨྲས་པ་དང་། དགེ་སློང་གིས། འདི་ནི། སྔར་ལྷུང་བས་ཁོ་བོའི་མགུལ་ནས་
འཇུས་སོ། །ཞེས་སྨྲས་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོལ་ལ་ཁྲོན་པར་ལྟོས་ཤིག་།དགེ་སློང་ཞིག་བསོད་སྙོམས་སྤྱོད་པ་ལས་སྒོ་ཁང་དོག་པ་ཞིག་ནས་བྱུང་བ་དང་། བུད་མེད་ཅིག་ཀྱང་ནང་དུ་འཇུག་པ་དེའི་མོ་མཚན་གྱིས་དེའི་ཕོ་མཚན་ལ་རེག་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་གྲོང་དུ་བསོད་སྙོམས་སྤྱོད་ཅིག་།དགེ་སློང་ཞིག་གྲུ་ལས་ཀླུང་བརྒལ་བ་ན་གྲུ་དེ་ནུབ་པ་དང་། བུད་མེད་ཅིག་ཀྱང་དེ་ན་ཡོད་དེ། དེས་དེའི་མགུལ་ནས་འཇུས་སོ། །དགེ་སློང་བརྒལ་བ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བག་ཡོད་པར་བྱོས་ལ་ཀླུང་རྒོལ་ཅིག་།སྐྱེས་པ་སེར་སྐྱ་བྱ་བ་ཞིག་དགེ་སློང་མའི་དྲུང་དུ་སོང་སྟེ་འདི་སྐད་དུ། འཕགས་མ། བདག་ཏུ་ཕྱུང་ཞིག་།ཅེས་སྨྲས་པ་དང་། དེ་དེ་དག་གིས་མ་བརྟགས་པར་རབ་ཏུ་བྱུང་སྟེ། དེས་དགེ་སློང་མ་ལ་རེག་པ་དང་། དེ་དག་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤིན་ཏུ་བརྟགས་ལ་རབ་ཏུ་དབྱུང་བར་བྱོས་ཤིག་སྦོམ་མོ་དགའ་ལྡན་མོ་ཡང་རྒྱས་པར་གཞན་གྱི་བུ་བོར་བ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མས་བུ་དོར་བར་མ་བྱེད་ཅིག་།བོར་ན་ཉེས་པ་སྦོམ་པོར་འགྱུར་རོ། །སེར་སྐྱ་བཟང་མོའི་གླེང་གཞི་རྒྱས་པར་བྱས་པ་དང་། བཅོམ་ལྡན་འདས་ཀྱིས་བཀའ་སྩལ་པ། བཟང་མོ། ཅི་ཁྱོད་ཀྱིས་དགའ་བ་ཚོར་རམ། བཙུན་པ། བདག་གིས་དགའ་བ་ལྟ་ག་ལ་ཚོར་གྱི། ཇི་ལྟར་ཐོང་ལྕགས་བསྲེགས་པ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། བུད་མེད་ཀྱི་མོ་མཚན་གྱི་ཕྱོགས་ནི། ལས་རྣམ་པར་སྨིན་པ་ལས་སྐྱེས་ཏེ། ནན་གྱིས་བྱས་པ་ལ་ཉེས་པ་མེད་དོ། །དགེ་སློང་མ་བཟང་མོ་སྐྱེས་ཞེས་བྱ་བ་དེ་གཡོན་ཅན་རྣམས་ཀྱིས་བཟུང་ནས་ཁ་བཀབ་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་སླར་བཏང་བ་ལས་དགེ་སློང་མ་དག་གིས་གནས་
ནས་བསྐྲད་པ་དང་། དེས་སྨྲས་པ། འཕགས་མ། བདག་གིས་ནི། དགའ་བ་ཚོར་རོ། །ཁྱོད་གཡོན་ཅན་གྱིས་བཟུང་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་སླར་བཏང་བ་ཡིན་ན། ཅིའི་ཕྱིར་དགའ་བ་མ་ཚོར། དེ་ལྟར་གུར་པ་དགེ་སློང་མ་རྣམས་ཀྱིས་དགེ་སློང་རྣམས་ལ་སྨྲས་པ་དང་། དགེ་སློང་དག་གིས་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ། ཅི། ཁྱོད་ཀྱིས་དགའ་ཚོར་རམ། བཙུན་པ། བདག་འགྲེས་ལྡོག་སུག་པ་གཡབས་ན། དགའ་བ་ལྟ་ག་ལ་ཚོར་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།བུད་མེད་ཀྱི་མོ་མཚན་གྱི་ཕྱོགས་ནི། ལ་རྣམ་པར་སྨིན་པ་ལས་སྐྱེས་ཏེ། འགྲོ་བ་དང་། ལྡོག་པ་དང་། ལག་པ་གཡོ་བ་པ་ལ་ནི། ནན་གྱིས་བཟུང་བཞེས་བྱ་སྟེ། ནན་གྱིས་བཟུང་བ་ལ་ནི། ཉེས་པ་མེད་དོ། །དགེ་སློང་མ་ནོར་ཅན་མོ་ཞེས་བྱ་བ་ཞིག་མཉན་དུ་ཡོད་པར་བསོད་སྙོམས་སྤྱོད་པ་ན། གཡོན་ཅན་རྣམས་ཀྱིས་བཟུང་སྟེ་ནགས་སྟུག་པོར་ཁྲིད་ནས་སུན་བྱུང་སྟེ་བཏང་བ་དང་། དགེ་སློང་མ་དག་གིས་གནས་ནས་བསྐྲད་ནས། འཕགས་མ། བདག་གིས་དགའ་བ་མ་ཚོར་རོ། །ཞེས་སྨྲས་པ་དང་། ཁྱོད་གཡོན་ཅན་རྣམས་ཀྱིས་བཅིངས་ཏེ་ནགས་སྟུག་པོར་ཁྲིད་ནས་སུན་ཕྱུང་སྟེ་བཏང་བ་ཡིན་ན། ཅིའི་ཕྱིར་དགའ་བ་མཚོར། དེ་ལྟར་གྱུར་པ་དགེ་སློང་མ་དག་གིས་དགེ་སློང་དག་ལ་སྨྲས་པ་དང་། དགེ་སློང་དག་གིས་ཀྱང་བཅོམ་ལྡན་འདས་ལ་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ། ཅི། ཁྱོད་ཀྱིས་དགའ་བ་ཚོར་རམ། བཙུན་པ། བདག་གིས་དུས་ནས་བོས་དཀྲོགས་ཏེ་བདག་ལ་མ་འཛིན་ཅིག་།ཅེས་སྨྲས་ན། དགའ་བ་ལྟ་གལ་ཚོར། བཅོམ་ལྡན་འདས་ཀྱིས་བཀའ་སྩལ་པ། བུད་མེད་ཀྱི་མོ་མཚོན་གྱི་ཕྱོགས་ནི། ལས་རྣམ་པར་སྨིན་པ་ལས་སྐྱེས་ཏེ། དུ་བཞིན་པ་ནི། ནན་གྱིས་བཟུང་བ་ཞེས་བྱའོ། །བོས་དཀྲོགས་ནས་བདག་ལ་མ་འཛིན་ཅིག་།ཅེས་སྨྲ་བ་ནི། ནན་གྱིས་བཟུང་བ་ཞེས་བྱ་བ་སྟེ། ནན་གྱིས་བཟུང་བ་ལ་ཉེས་པ་མེད་དོ། །དགེ་སློང་མ་ཕོ་བྲང་སྐྱོང་ཞེས་བྱ་བ་ཞིག་མཉན་དུ་ཡོད་པར་བསོད་སྙོམས་སྤྱོད་པ་ན་གཡོན་
ཅན་རྣམས་ཀྱིས་བཟུང་སྟེ་ནགས་སྟུག་པོར་ཁྲིད་ནས་སུན་ཕྱུང་སྟེ་བཏང་བ་ལ་དེ་དགེ་སློང་མ་དག་གིས་ཀྱང་གནས་ནས་བསྐྲད་པ་དང་། དེས་སྨྲས་པ། བདག་གིས་དགའ་བ་ནི། མ་ཚོར་རོ། །འོན་ཀུན་དགའ་བོའི་དྲུང་དུ་སོང་ཞིག་།ཅེས་སྨྲས་ནས་དེ་དེའི་དྲུང་དུ་སོང་བ་དང་། གནས་བརྟན་གྱིས་ཀྱང་མཐོང་ནས་དེས་གུས་པའི་ཚིག་ཏུ་མ་སྨྲས་པ་དང་། གནས་བརྟན་གྱིས་ཀྱང་བསྐྲད་ནས་དེ་འདི་སྙམ་དུ། བདག་འདི་འདྲ་བར་འཚོ་ཞིང་འདུག་པ་བས། སོང་ལ་བུམ་པ་བྱེ་མས་བཀད་བ་མགུལ་དུ་བཏགས་ཏེ་ཀླུང་ཨ་ཛིར་བ་ཏིར་མཆོང་ངོ་། །སྙམ་དུ་བསམ་ནས་དེས་བུམ་པ་བྱེ་མས་བཀང་བ་མགུལ་དུ་བཏགས་ཏ་ཀླུང་ཨ་ཛི་ར་བ་ཏིར་མཆོངས་པ་དང་། ཐ་གུ་ངན་པ་ཞིག་པས་ཆད་དེ་བྱིང་ཞིང་ནུབ་པ་གཡོན་ཅན་རྣམས་ཀྱིས་མཐོང་ནས་དེ་དག་གིས་ཕྱུང་སྟེ་བཞག་ནས་ནམ་འདུ་ཤེས་སླར་རྙེད་པ་དང་། དེ་ལ་སུན་འབྱིན་ཏོ། །དགེ་སློང་མ་དག་ཀྱང་ཚོལ་ཞིང་གནས་དེར་ལྷགས་པ་དང་། དེ་དག་གིས་དེ་ལ་སུན་འབྱིན་པར་མཐོང་ནས་དེས་སྨྲས་པ། འདི་སྔོན་ནི། དགེ་སློང་མ་ཡིན་ན། ད་དུང་ཡང་དགེ་སློང་མ་ཡིན་ནམ་ཞེས་སྨྲས་ནས་དེ་ལྟར་གྱུར་པ་དགེ་སློང་རྣམས་ལ་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཅི། ཁྱོད་ཀྱིས་དགའ་བ་ཚོར་རམ། བཙུན་པ། འགྲེས་ལྡོག་སུག་པ་གཡབས་ནས་བདག་ལ་མ་འཛིན་ཅིག་།ཅེས་སྨྲས་ན། དགའ་བ་ལྷག་ལ་ཚོར། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།བུད་མེད་ཀྱི་མོ་མཚན་གྱི་ཕྱོགས་ནི། ལས་རྣམ་པར་སྨིན་པ་ལས་སྐྱེས་ཏེ། འགྲེ་བ་ནི། ནན་གྱིས་བཟུང་བ་ཞེས་བྱ་བ་ནས་བདག་ལ་མ་འཛིན་ཅིག་།ཅེས་སྨྲ་བ་ནི་།ནན་གྱིས་བཟུང་བ་ཞེས་བྱ་བའི་བར་དུ་རྒྱས་པར་ཏེ། ནན་གྱིས་བཟུང་བ་ལ་ནི། ཉེས་པ་མེད་དོ།། །།མདོར་ན། ནོར་ཅན་དགོན་པར་འདུ་ཤེས་དང་། །བསོད་སྙོམས་བཅུ་དང་རྐུན་པོ་བཅུ། །གཞན་ཡང་ཤོ་གམ་གནས་ཀྱི་བཅུ། །སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །སྔོན་གྱི་རྫབ་དགེ་སློང་ནོར་ཅན་བསླབ་པའི་གནས་མ་བཅས་པས་
ལས་དང་པོ་པ་ལ་ནི། ཉེས་པ་མེད་དེ། བདག་གིས་ནི། ཤིང་མང་ཞིག་མ་བྱིན་པར་བླངས་ཏེ་འོངས་ན། གང་ལ་བདག་ལས་དང་པོ་པར་འགྱུར་ཞེས་སེམས་ལ་གདུང་ཞིང་འགྱོད་དེ། འགྱོད་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དང་། བསླབ་པའི་གནས་མ་བཅས་པས་སྔོན་གྱི་རྫ་བ་དགེ་སློང་ནོར་ཅན་ནི། ཀུན་ལས་ཀྱང་འདས་ཏེ་ཐམས་ཅད་དུ་ལས་དང་པོ་པ་ཡིན་པས་ལས་དང་པོ་པ་ལ་ཉེས་པ་མེད་དོ། །དགེ་སློང་ཞིག་དགོན་པ་ལ་བདག་པོ་མེད་པའི་ཡོ་བྱད་ལ་བདག་པོ་ཡོད་པར་འདུ་ཤེས་ནས་མ་བྱིན་པར་བླངས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། བདག་པོ་ཡོད་པ་ལ་བདག་པོ་ཡོད་པར་འདུ་ཤེས་ན། ཕས་ཕམ་པར་འགྱུར་རོ། །བདག་པོ་ཡོད་པ་ལ་ཐེ་ཚོམ་དུ་གྱུར་ན། ཕས་ཕམ་པར་འགྱུར་རོ། །བདག་པོ་མེད་པ་ལ་བདག་པོ་ཡོད་པར་འདུ་ཤེས་ན། ཉེས་པ་སྦོམ་པོར་འགྱུར་རོ། །བདག་པོ་མེད་པ་ལ་བདག་པོ་མེད་པར་འདུ་ཤེས་ན། ཉེས་པ་མེད་དོ། །དགེ་སློང་གིས་བསོད་སྙོམས་འབྲས་ཆན་ཞིག་མི་དབང་བར་བླངས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །བསོད་སྙོམས་འབྲས་ཆན་ལ་ཇི་ལྟ་བ་བཞིན་དུ་བསོད་སྙོམས་ཕྱེ་དང་ཕྱེ་ཚལ་བཙོས་པའི་བསོད་སྙོམས་དང་། བསོད་སྙོམས་ཤ་དང་། བསོད་སྙོམས་བག་ཚོས་རྣམས་ཐམས་ཅད་ཀྱང་དེ་བཞིན་དུ་ཉེས་པ་སྦོམ་པོར་འགྱུར་རོ། །དགེ་སློང་ཞིག་མགྲོན་དུ་མ་བོས་པར་ཟན་ཟོས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་བྱས་སུ་འགྱུར་རོ། །ལྗོངས་ཀོ་ས་ལར་དགེ་འདུན་གྱིས་བཤོས་བགོད་པ་ན་དགེ་སློང་གཞི་པ་ཞིག་གྲོང་གཞན་དུ་སོང་བ་དང་། དེ་དང་ལྷན་ཅིག་སྤྱོད་པ་གཉིས་ཤིག་ཡོད་དེ། དེ་གཉིས་ཀས་མཁན་པོའི་ཟན་སོ་སོར་མནོས་པ་དང་། དེ་གཉིས་འདི་སྙམ་དུ། ཁྱོད་ཀྱིས་ཀྱང་མནོས། ཁོ་བོས་ཀྱང་མནོས་ན། གང་གིས་མི་དབང་བར་བླངས་
མི་ཤེས་ཏེ། ཕས་ཕམ་པའི་ཉེས་པར་མ་གྱུར་གྲང་སྙམ་དུ་བསམ་པ་དང་། བཅོམ་ལྡན་འདས་ཀྱིས་བཀའ་སྩལ་པ། བླངས་པ་ལ་ཉེས་པ་མེད་དེ། གཞན་ཤེས་པར་བྱོས་ཤིག་།ལྗོངས་ཀོ་ས་ལར་དགེ་འདུན་གྱིས་བཤོས་བགོད་པ་ན། དགེ་སློང་གཞི་པ་ཞིག་གྲོང་གཞན་དུ་སོང་ནས་དགེ་སློང་དེའི་མཛའ་བོ་དེས་དེའི་ཟན་མནོས་པ་དང་། དེ་འོངས་ནས་སྨྲས་པ། ཚེ་དང་ལྡན་པ། ཁྱོད་ཀྱིས་ཁོ་བོའི་ཟན་མནོས་སམ། སྨྲས་པ། མནོས་སོ། །དགེ་སློང་དེས་ངས་མ་བཅོལ་བར་ཁྱོད་ཀྱིས་ཅི་ཕྱིར་མནོས་ཞེས་སྨྲས་པ་དང་། དགེ་སློང་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། མ་བཅོལ་བར་ནི། མ་ནོད་ཅིག་།ལྗོངས་ཀོ་ས་ལར་དགེ་འདུན་གྱི་བཤོས་བགོད་པ་ན། དགེ་སློང་ནད་པ་ཞིག་ཡོད་དེ། དེའི་ནད་གཡོག་གིས་ཟན་མནོས་ཏེ། དེས་མནོས་ནས་སོང་བ་དང་། དགེ་སློང་དེའང་དུས་འདས་ནས་དེས་ཇི་ལྟར་བྱ་བ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་སྔར་དུས་ལས་འདས་ལ། ཕྱིས་མནོས་ན་ནི། དེ་ཉིད་དུ་སླར་ཕུལ་ཅིག་།འོན་ཏེ་སྔར་མནོས་ལ་ཕྱིས་དུས་ལས་འདས་ན། ཡོ་བྱད་གཞན་ཇི་ལྟ་བ་དེ་ལྟར་བྱོས་ཤིག་།དགེ་སློང་ཞིག་གིས་དགེ་སློང་ཞིག་ལ་འདི་སྐད་དུ། ཚེ་དང་ལྡན་པ། ཚུར་ཤོག་།རྐུན་པོ་ལ་འདོང་ངོ་། །ཞེས་སྨྲས་ནས་དེ་གཉིས་དོང་སྟེ་ ལམ་གྱི་ཕྱེད་དུ་ཕྱིན་པ་དང་། བདག་ཅག་ནི། དགེ་བར་གསུངས་པའི་ཆོས་འདུལ་བ་ལ་རབ་ཏུ་བྱུང་བས་རྐུན་པོ་བྱས་ན་ནི། བདག་ཅག་གཉིས་མི་མཛེས་ཤིང་མི་རིགས་སོ། །སྙམ་སྟེ་ངོ་ཚ་བའི་ཆོས་དང་ལྡན་པར་གྱུར་ནས་དེ་གཉིས་དེར་མ་དོང་བ་དང་། དེ་གཉིས་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་བྱས་སུ་འགྱུར་རོ། །དེ་དགེ་སློང་ཞིག་གིས་དགེ་སློང་དག་ཅིག་ལ་ཚེ་དང་ལྡན་པ་དག་།ཚུར་ཤོག་།རྐུན་པོ་ལ་འདོང་ཞེས་དེ་སྐད་སྨྲས་པ་དང་། དེ་དག་དོང་ནས་ལམ་གྱི་ཕྱེད་དུ་ཕྱིན་པ་དང་། བདག་ཅག་ནི། མི་མཛེས་སོ། །སྙམ་ནས་ངོ་ཚ་བའི་ཆོས་དང་ལྡན་པར་གྱུར་ཏེ་དེ་དེར་མ་དོང་བ་དང་། དགེ་སློང་དེ་དག་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་
ཕམ་པའི་ཉེས་པ་མེད་དེ། ཉེས་བྱས་སུ་འགྱུར་རོ། །དེ་དག་བཞིན་དུ་བྱས་པ་ལས་གཅིག་ནི། ངོ་ཚ་བའི་ཆོས་དང་ལྡན་ནས་དེ་འདི་སྙམ་དུ། དེ་སྟེམ་སོང་ན་ནི། དེ་དག་གིས་བདག་འཚོ་བ་དང་ཕྲལ་བར་འགྱུར་གྱི། བདག་སོང་ལ་བདག་གིས་མ་བྱིན་པར་མི་བླང་ཞིང་བདག་གི་སྐལ་བ་མི་བཀུར་རོ། །སྙམ་དུ་བསམ་ནས་དེས་དེར་མ་བྱིན་པར་མ་བླངས། སྐལ་པ་ཡང་མ་ཁྱེར་བ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་བཞི་ཉེས་པ་མེད་དེ། ཉེས་བྱས་སུ་འགྱུར་རོ། །དགེ་སློང་དག་གིས་དགེ་སློང་དག་ལ་ཚེ་དང་ལྡན་པ། ཚུར་ཤོག་།རྐུན་པོ་ལ་འདོང་ངོ་། །ཞེས་སྨྲས་ནས་དེ་དག་དེར་དོང་བ་དང་། དེ་དག་ལས། ཕྱེད་ནི། ལས་བྱེད། ཕྱེད་ནི། ལམ་སྲུང་ངོ་། །དེ་དག་ལས་ལམ་སྲུང་བ་གང་ཡིན་པ་དེ་དག་འདི་སྙམ་དུ། བདག་ཅག་གིས་ནི། མ་བླངས་ཤིང་། མ་བརྐུས་པས་ཉེས་པར་མི་འགྱུར་རོ། །སྙམ་དུ་བསམ་པ་དང་། དེ་ལྟར་གྱུར་པ་དགེ་སློང་དག་གིས་ཐོས་ནས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེ་སྟེ་དངོས་པོ་ཚང་ན། ཕས་ཕམ་པར་འགྱུར་རོ། །དངོས་པོ་མ་ཚང་ན། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་དགེ་སློང་ཞིག་ལ་ཚེ་དང་ལྡན་པ། ཚུར་ཤོག་།རྐུན་པོ་ལ་འདོང་ངོ་། །ཞེས་སྨྲས་ནས་དེ་དག་གིས་མ་བྱིན་པར་བླངས་པ་དང་། གཞན་དུ་ནི། དངོས་པོ་མ་ཚང་གི། དེ་གཉིས་ཀྱིས་གང་ནས་བླངས་པ་དེ་ཉིད་དུ་དངོས་པོ་ཚང་ནས་དགེ་སློང་དེ་གཉིས་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། གནས་གང་ནས་བསྐྱོད་པ་དེའི་རིན་ཐང་བརྩི་བར་བྱའོ། །དགེ་སློང་ཞིག་གིས་དགེ་སློང་དག་ཅིག་ལ་ཚེ་དང་ལྡན་པ་དག་།ཚུར་ཤོག་།རྐུན་པོ་ལ་འདོང་ངོ་། །གང་གིས་ཅི་ཐོབ་པ་དེ་དེ་ཉིད་དབང་ངོ་། །ཞེས་སྨྲས་ནས་དེ་དག་དེར་དོང་བ་དང་། དེ་དག་ལས་ཁ་ཅིག་གིས་ནི། ཐོབ། ཁ་ཅིག་གིས་ནི། མ་ཐོབ་ནས་དེ་དག་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ།། དགེ་སློང་དེ་དག་ལ་རྐུན་པོས་ཀྱང་བྱིན།ཐུན་མོང་བ་དང་། སྲུང་བ་དག་གིས་ཀྱང་བྱིན་ན། དེ་དག་འགྱོད་པ་སྐྱེས་ནས་མ་བླངས་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་
གནང་བ་ནི། སྦྱིན་པར་བྱེད་པ་ལ་སྦྱིན་བདག་ཏུ་སེམས་ཉེ་བར་བཞག་སྟེ་ལོངས་ཤིག་།དགེ་སློང་ཞིག་གི་ལྷན་ཅིག་སྤྱོད་པ་དེ་རྐུན་པོས་ཁྲིད་པ་དང་། དེ་དེ་ནས་བོས་ཏེ་འོངས་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་བདག་ཉིད་ཀྱིས་བདག་རྐུར་རུང་གི་།ཉེས་པ་མེད་དོ། །དགེ་སློང་ཞིག་ལ་ཤོ་གམ་བཅད་པའི་རྫས་ཤིག་ལག་ན་ཡོད་ན། དེ་སྟེ་ཤོ་གམ་གྱི་གནས་ལས་འདས་ན་ནི། ཕས་ཕམ་པར་འགྱུར་རོ། །དེ་འདི་སྙམ་དུ། འདི་ནི། བདག་གི་མའིའོ། །འདི་ནི། བདག་གི་ཕའིའོ། །འདི་ནི། བདག་གི་ཕུ་བོའིའོ། །འདི་ནི། བདག་གི་སྲིང་མོ་དང་། མཁན་པོ་དང་། སློབ་དཔོན་དང་། མཆོད་རྟེན་དང་། དགེ་འདུན་རྣམས་ཀྱིའོ། །སྙམ་དུ་བསམ་ནས་མང་པོ་ལ་བསྔོས་ཏེ་འདས་ན། ཉེས་པ་སྦོམ་པོར་འགྱུར་རོ། །ནམ་མཁའ་ལས་འདས་ན་ནི། ཉེས་པ་མེད་དོ། །མདོར་ན། ཁྲིའུ་དང་གླེགས་བམ་སེང་རས་དང་། །ཆང་དང་ཤ་དང་གོས་དང་ནང་། །ཕྱག་དར་ཁྲོད་དང་དུར་ཁྲོད་དང་། །དུར་ཁྲོད་ཀྱི་ནི་གནས་གཉིས་སོ། །དགེ་སློང་ཞིག་གིས་ཁྲིའུ་ཞིག་བརྙས་ནས་ཁྱེར་ཏེ་འོངས་ནས་དེས་སླར་མི་སྦྱིན་ནོ། །སྙམ་དུ་བསམ་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕས་ཕམ་པའི་ཉེས་པ་མེད་དེ། ཉེས་པ་སྦོམ་པོར་འགྱུར་རོ། །དགེ་སློང་ཞིག་གིས་གླེགས་བམ་ཞིག་བརྙས་ནས་ཁྱེར་ཏེ་འོངས་པ་དང་། དེ་ཡང་རྒྱས་པར་དེ་བཞིན་ནོ། །དགེ་སློང་ཞིག་གིས་སེང་རས་ཤིག་མ་བྱིན་པར་བླངས་ཏེ། དེས་དེ་བརྐུས་ནས་བཤིག་པ་དང་། དེའི་ནང་ནས་དར་རིན་ཐང་ཆེན་པོ་ཞིག་བྱུང་སྟེ། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། སེང་རས་ཀྱི་རིན་ཐང་བརྩི་བར་བྱའོ། །རྐུན་པོ་དག་གིས་ཆང་ཞིག་ཁྱེར་ཏེ་དགོན་པ་ལ་དོང་ནས་ཆང་ཁ་ཅིག་ནི། འཐུངས། ཁ་ཅིག་ནི། སྦས་ཏེ་དོང་བ་དང་། དགེ་སློང་དག་ཀྱང་གནས་དེར་ཉིན་པར་སྤྱོད་པའི་ཕྱིར་དོང་པ་དང་། དེ་དག་གིས་དེ་མཐོང་ནས་དེ་དག་གིས་ཚྭར་འགྱུར་གྱི། སོང་ལ་གཙུག་ལག་ཁང་དུ་སྐྱོལ་ཅིང་།ཅེས་སྨྲས་ནས། དེ་གཙུག་ལག་ཁང་དུ་བསྐྱལ་ཏོ། །རྐུན་པོ་དག་ཀྱང་སྐོམ་ནས་དེར་སོང་སྟེ་བཙལ་བ་དང་། མ་རྙེད་ནས་དེ་དག་གིས་དགེ་སློང་དེ་དག་མཐོང་སྟེ་
དེ་དག་ལ་བཙུན་པ། ཀྱེ་ཁྱེད་ཀྱིས་ཆང་ཞིག་མ་བསྣམས་སམ་ཞེས་དྲིས་པ་དང་། དགེ་སློང་དེ་དག་གིས་ཁྱེར་རོ། །ཞེས་སྨྲས་པ་དང་། རྐུན་པོས་བཙུན་པ། ཁོ་བོ་ཅག་གི་ཆང་བརྐུས་པས་ཁྱེད་ནི། རྐུན་མའོ། །ཞེས་སྨྲས་པ་དང་། དགེ་སློང་དེ་དག་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། བདག་པོ་ཡོད་དམ་མེད་ཤིན་ཏུ་བརྟགས་ལ་བླང་བར་བྱའོ། །དེ་ལྟར་ཤ་ལའང་དེ་བཞིན་ནོ། །རྐུན་པོས་གྲོང་བཅོམ་ནས་རམ་མདར་བསྙེགས་པ་དང་། གཙུག་ལག་ཁང་དུ་ཕྱིན་ཏེ་དེ་དག་སྐྲག་པས་གཙུག་ལག་ཁང་དུ་སོང་ནས་གོས་ཀྱང་དགེ་སློང་དག་ལ་ཕུལ་ནས་དགོན་པ་ལ་བྲོས་པ་དང་། ཁྱིམ་བདག་དེ་དག་གིས་གཙུག་ལག་ཁང་དེ་བསྐོར་ནས་དེ་དག་གཙུག་ལག་ཁང་དུ་དོང་བ་དང་དེ་དག་གིས་དགེ་སློང་དག་གི་ལག་པ་ན་གོས་དེ་དག་འདུག་པར་མཐོང་ནས་དེ་དག་གིས་གོས་འདི་ནི། བདག་ཅག་གིའོ། །ཞེས་སྨྲས་པ་དང་། དགེ་སློང་དེ་དག་གིས་ཁོ་བོ་ཅག་ལ་རྐུན་པོས་བྱིན་ནོ། །ཞེས་སྨྲས་པ་དང་། དགེ་སློང་དེ་དག་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། རྐུན་པོས་བརྐུས་ནས་བསྟབ་པའི་ནོར་མ་ལེན་ཅིག་།འོན་ཏེ་རྐུན་པོ་རྒྱལ་མཚན་ཅན་ཞིག་གིས་བྱིན་ན་ནི། དེ་ལས་བླངས་པར་བྱོས་ལ། གོས་གྲིས་དྲོས་ལ་ཁ་དོག་བསྒྱུར་ཏེ་ཆོངས་ཤིག་།དེ་ཁ་དོག་བསྒྱུར་ཀྱང་སླར་སློང་ན། དེའང་བྱིན་ཅིག་།བཙོ་བླག་མཁན་ཞིག་གིས་གོས་ཐལ་ཆུའི་ནང་དུ་བཅུག་པ་དང་། དེས་བརྗེད་དེ་གྲོང་དུ་སོང་ངོ་། །དེས་ཡང་གོས་དྲན་པར་གྱུར་ནས་དེ་སླར་ལོག་སྟེ་སོང་བ་དང་། དགེ་སློང་ཞིག་ཀྱང་ཕྱག་དར་ཁྲོད་ཀྱི་གོས་ཚོལ་ཞིང་གནས་དེར་ཕྱིན་ནས་དེ་གོས་དེ་མཐོང་སྟེ་དགེ་སློང་དེས་གོས་དེ་བླངས་ནས་སོང་བ་དང་། བཙོ་བླག་མཁན་དེས་མཐོང་ནས་བཙུན་པ། གོས་མ་བརྐུ་ཞེས་སྨྲས་པ་དང་། དགེ་སློང་གིས་ཁོ་བོ་ཕྱག་དར་ཁྲོད་ཀྱི་གོས་ཚོལ་བ་ལས་འདི་མཐོང་ན། ཁྱོད་ལ་འདི་ཅིར་དགོས་ཞེས་སྨྲས་པ་དང་། བཙོ་བླག་མཁན་གྱིས་བཙུན་པ། ཁོ་བོས་གོས་འདི་ཐལ་སྐྱོར་བཅུག་པ་ལས་བརྗེད་དེ། འདི་ནི། བདག་གི་གོས་ལགས་ཀྱི། མ་བརྐུ་ཞིག་།ཁྱོད་ཀྱིས་ནི། མ་བྱིན་པར་བླངས་སོ། །ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་
མེད་དེ། བདག་པོ་གཞན་ཡོད་དམ་མེད་ཤིན་ཏུ་བརྟགས་ལ་བླང་བར་བྱའོ། །བཙོ་བླག་མཁན་གྱིས་གོས་ཤིག་བཀྲུས་ཏེ་ཤིང་དྲུང་དུ་འདུག་པ་དང་། ཕྱག་དར་ཁྲོད་པ་ཞིག་ཕྱག་དར་ཁྲོད་པའི་གོས་ཚོལ་ཞིང་གནས་དེར་ཕྱིན་ཏེ། དེས་གོས་དེ་མཐོང་ནས་གོས་དེ་བླངས་ཏེ་སོང་བ་དང་། བཙོ་བླག་མཁན་དེས་མཐོང་ནས་བཙུན་པ། འདི་ནི། བདག་གིས་གོས་ལགས་ཀྱི། མ་བརྐུ་ཞིག་།ཅེས་སྨྲས་པ་དང་། དེ་སྟེ་ཁྱོད་ཀྱི་ཡིན་ན། སླར་ཁྱེར་ཅིག་།དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བརྟག་པར་བྱ་བ་རྒྱས་པར་རོ། །ཁྱིམ་བདག་ཅིག་གིས་གོས་བཞག་སྟེ་བཤང་བ་བྱེད་པ་དང་། ཕྱག་དར་ཁྲོད་པ་ཞིག་ཕྱག་དར་ཁྲོད་པའི་གོས་ཚོལ་ཞིང་གནས་དེར་ཕྱིན་པ་དེས་མཐོང་ནས་དེས་དེ་ཁྱེར་ཏེ་སོང་བ་དང་། ཁྱིམ་བདག་དེའང་ལངས་ཏེ་བཙུན་པ། འདི་ནི། བདག་གི་བགོ་བ་ལགས་ཀྱི། མ་བརྐུ་ཞིག་།ཅེས་སྨྲས་པ་དང་། དེ་སྟེ་ཁྱོད་ཀྱི་ཡིན་ན། སླར་ཁྱེར་ཅིག་།དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤིན་ཏུ་རྟོགས་ལ་ཁྱེར་ཅིག་།ཛེ་ཏའི་ཚལ་ནས་ཤིན་ཏུ་མི་རིང་བ་ཞིག་ན་ཞིང་རྨེད་པའི་ལས་བྱེད་པ་ཞིག་གོས་རྣམས་བཞག་སྟེ་ཞིང་རྨེད་པ་དང་། དགེ་སློང་ཕྱག་དར་ཁྲོད་པ་ཞིག་ཕྱག་དར་ཁྲོད་ཀྱི་གོས་ཚོལ་ཞིང་གནས་དེར་ཕྱིན་ཏེ་དེས་གོས་དེ་མཐོང་ནས་དེས་གོས་དེ་ཁྱེར་ཏེ་སོང་བ་དང་། ཞིང་རྨེད་པའི་ལས་བྱེད་པ་དེས་མཐོང་ནས་བཙུན་པ། གོས་མ་བརྐུ་ཞིག་།ཅེས་སྨྲས་པ་དང་། དེས་དེ་ལ་མ་ཉན་པ་དང་། དེས་ཀྱང་བརྒྱུགས་ཏེ་བཟུང་ནས་བཙུན་པ། རིགས་སམ། གོས་དེ་མ་བྱིན་པར་མ་བླང་ཞིག་།འདི་ནི། ཁོ་བོ་ཕྱག་དར་ཁྲོད་ཀྱི་གོས་ཚོལ་བ་ན་མཐོང་སྟེ་ཁྱོད་ལ་འདི་ཅིར་དགོས། བཙུན་པ། གོས་འདི་བཞག་ནས་བདག་ཞིང་རྨེད་དེ། གོས་འདི་ནི། བདག་གིའོ། །ཞེས་སྨྲས་ནས་དེ་སྟེ་ཁྱོད་ཀྱི་ཡིན་ན། སླར་ཁྱེར་ཅིག་།དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤིན་ཏུ་བརྟགས་པར་བགྱིས་ཏེ་ལོངས་ཤིག་།ཁྱིམ་བདག་ཅིག་གིས་དགེ་སྦྱོང་ཤཱཀྱའི་བུ་རྣམས་ནི། ལྟུང་བའི་གོས་རྣམས་ཕྱར་དར་གྱི་གོས་སོ། །ཞེས་ཁྱེར་རོ། །ཞེས་ཐོས་པ་དང་། དེས་རེས་རིན་ཆེ་བ་ཞིག་ལ་ཀརྴ་
པ་ཎ་བརྒྱད་ཕུར་པ་ཕུར་ཏེ་ཕྱག་དར་སྤུངས་པའི་ཁྲོད་དུ་བརྐོས་ནས་སྦས་ཏེ་ཁ་ཚར་ཙམ་ཞིག་སྣང་བར་བྱས་ཏེ་སོང་བ་དང་། དགེ་སློང་ཞིག་ཕྱག་དར་ཁྲོད་ཀྱི་གོས་ཚོལ་ཞིང་གནས་དེར་ཕྱིན་ཏེ། དེས་ཁ་ཚར་མཐོང་ནས་དེས་དེ་ནས་དྲངས་ཏེ་ཁྱེར་བ་དང་། ཁྱིམ་བདག་དེས་མཐོང་ནས་བཙུན་པ། རས་མ་བརྐུ་ཞིག་།ཅེས་སྨྲས་པ་དང་། དགེ་སློང་གིས། ངས་འདི་ནི། ཕྱག་དར་ཁྲོད་ཀྱི་གོས་ཚོལ་བ་ལས་རྙེད་ན། དེ་ཁྱོད་ལ་ཅིར་དགོས་ཞེས་སྨྲས་པ་དང་། བཙུན་པ། བདག་གིས་ནི། དགེ་སྦྱོང་ཤཱཀྱའི་བུ་རྣམས་ཀྱིས་ལྟུང་བའི་གོས་གང་རྙེད་པ་དེ། ཕྱག་དར་ཁྲོད་པའོ། །ཞེས་ཏེ་ཁྱེར་རོ། །ཞེས་ཐོས་ནས་བདག་གིས་རས་ལ་ཀརྴ་པ་ཎ་བརྒྱད་ཕུར་པ་ཕུར་ཏེ་ཕྱག་དར་སྤུངས་པར་སྦས་པའོ། །དགེ་སློང་དེས་ཀརྴ་པ་ཎ་བརྒྱད་པོ་དེ་མཐོང་ནས་དེ་སྟེ་ཁྱོད་ཀྱི་ཡིན་ན། ཁྱེར་ཅིག་།ཅེས་སྨྲས་ནས་དགེ་སློང་དེ་འགྱོད་པ་སྐྱེས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤིན་ཏུ་བརྟགས་ལ་བཀུར་བར་བྱའོ། །ཁྱིམ་བདག་གི་ཁྱེའུ་ཞིག་གིས་སྲང་དུ་གོས་བཞག་སྟེ་རྩེད་མོ་རྩེའོ། །དེ་རྩེས་ནས་ཁྱིམ་དུ་སོང་བ་དང་། དགེ་སློང་ཞིག་ཕྱག་དར་ཁྲོད་ཀྱི་གོས་ཚོལ་ཞིང་གནས་དེར་འོངས་པ་དང་། དེས་གོས་དེ་མཐོང་ནས་དེས་དེ་བླངས་ཏེ་སོང་བ་དང་། བུད་མེད་ཅིག་ཀྱང་ཁྱིམ་དེ་ནས་བྱུང་སྟེ་དེས་ཀྱང་དགེ་སློང་དེ་མཐོང་ནས་བཙུན་པ། གོས་མ་བརྐུ་ཞིག་།ཅེས་སྨྲས་པ་དང་། འདི་ནི། ཁོ་བོས་ཕྱག་དར་ཁྲོད་ཀྱི་གོས་ཚོལ་བ་ན་རྙེད་དོ། །བཙུན་པ། ཁོ་མོའི་ཁྱེའུ་རྩེ་བ་ན་གོས་བརྗེད་དེ་ཁྱིམ་དུ་མཆིས་སོ། །ཞེས་སྨྲས་པ་དང་། དེ་སྟེ་ཁྱོད་ཀྱི་ཡིན་ན། ཁྱེར་ཅིག་།དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བརྟགས་ལ་བླང་བར་བྱོས་ཤིག་།དགེ་སློང་ཞིག་གིས་ཕྱག་དར་ཁྲོད་པའི་གོས་སྦས་ཏེ་མཉན་དུ་ཡོད་པར་བསོད་སྙོམས་ལ་ཞུགས་པ་དང་། དགེ་སློང་གཞན་ཞིག་ཀྱང་ཕྱག་དར་ཁྲོད་ཀྱི་གོས་ཚོལ་ཞིང་གནས་དེར་ཕྱིན་ནས་དེས་དེ་མཐོང་སྟེ་བཀྲུས་པ་དང་། དགེ་སློང་དེས་ཀྱང་ཕྱག་དར་ཁྲོད་ཀྱི་གོས་བཙལ་ན་མ་རྙེད་ནས་དེས་དགེ་སློང་དེ་འཁྲུ་བ་མཐོང་
ནས་དེས་ཚེ་དང་ལྡན་པ། ཁྱོད་ལ་ནི། ཕས་ཕམ་པའི་ཉེས་པ་བྱུང་ངོ་། །ཞེས་སྨྲས་པ་དང་། ཅིའི་ཕྱིར། ཁོ་བོའི་ཕྱག་དར་ཁྲོད་ཀྱི་གོས་འདི་མ་བྱིན་པར་བླངས་པའི་ཕྱིར་རོ། །འདི་ལ་ནི། བདག་པོ་ཡོད་པར་ཁོ་བོས་མ་ཤེས་སོ། །ཞེས་སྨྲས་པ་དང་། དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ། ཤིན་ཏུ་བརྟགས་ལ་བླང་བར་གྱིས་ཤིག་།དགེ་སློང་དེ་དག་གིས་ཀྱང་མི་གཙང་བས་རེག་པའི་ཕྱག་དར་ཁྲོད་ཀྱི་གོས་བཅངས་པ་དང་། ལྷ་ཕྲན་རྣམས་འཕྱ་ནས་བཅོམ་ལྡན་འདས་ཀྱིས་བཀའ་སྩལ་པ། ཕྱག་དར་ཁྲོད་ཀྱི་གོས་ནི། ཤིན་ཏུ་བཀྲུས་ཏེ་ལེགས་པར་བཙེ་མས་ལ་བཅང་བར་བྱ་ཡི། དགེ་སློང་དག་གིས་མི་གཙང་བས་རེག་པའི་ཕྱག་དར་ཁྲོད་ཀྱི་གོས་མ་འཆང་ཞིག་།འཆང་བ་གང་ཡིན་པ་དེ་ནི། ཉེས་བྱས་སུ་འགྱུར་རོ། །དགེ་སློང་དེ་དག་གིས་བདག་པོ་ཡོད་པའི་དུར་ཁྲོད་ནས་གོས་བླངས་པ་དང་། རིགས་ངན་རྣམས་ཀྱིས་གང་ཅུང་ཟད་བདག་ཅག་གིས་ལས་སུ་བྱ་བ་ཐམས་ཅད་འདི་དག་གི་ཕྱིར་བྱེད་ན། འདི་ནས་གོས་མ་བརྐུ་ཞིག་།ཅེས་དེ་སྐད་མི་སྙན་པར་སྨྲ་བ་དང་། བཅོམ་ལྡན་འདས་ཀྱིས་བཀའ་སྩལ་པ། བདག་པོ་དང་བཅས་པའི་དུར་ཁྲོད་ནས་གོས་མ་ལེན་ཅིག་།བླངས་ན། ཉེས་པ་སྦོམ་པོར་འགྱུར་རོ། །དུར་ཁྲོད་ནས་ཤིན་ཏུ་མི་རིང་བ་ཞིག་ན་ལོག་པའི་ལྷ་ཁང་ཞིག་ཡོད་དེ། དེ་ནས་རས་ཤིག་རླུང་གིས་ཁྱེར་ནས་དུར་ཁྲོད་དུ་ལྷུང་བ་དང་། དགེ་སློང་ཞིག་ཕྱག་དར་ཁྲོད་ཀྱི་གོས་ཚོལ་ཞིང་དུར་ཁྲོད་དུ་འོངས་པ་དེས་རས་དེ་རྙེད་ནས་དེ་བླངས་ཏེ་ཁྱེར་བ་དང་། ལོག་པའི་ལྷ་ཁང་ན་གནས་པ་དེ་དག་གིས་མཐོང་ནས་བཅུན་པ། བདག་གི་རས་འདི་ལོག་པའི་ལྷ་ཁང་ནས་དུར་ཁྲོད་དུ་ལྷུང་བ་ཡིན་གྱི། རས་འདི་མ་བརྐུ་ཞིག་།ཅེས་སྨྲས་པ་དང་། དེ་སྟེ་ཁྱོད་ཀྱི་ཡིན་ན། སླར་ཁྱེར་ཅིག་།དགེ་སློང་དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། བདག་པོ་གཞན་ཡོད་མེད་ཤིན་ཏུ་རྟོགས་ལ་ལོངས་ཤིག།། །།སརྦ་མངྒ་ལཾ།། །།