འདུལ་བ་གཞུང་དམ་པ་ལས་མ་ལྟ་བུ་བཤད་པ།
སངས་རྒྱས་བཅོམ་ལྡན་འདས་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་་་་དགའ་ར་བ་ན་བཞུགས་སོ། །དེ་ནས་ཚེ་དང་ལྡན་པ་ཨུ་པཱ་ལི་སངས་རྒྱས་བཅོམ་ལྡན་འདས་གང་ན་བ་དེར་སོང་སྟེ་དྲུང་དུ་ཕྱིན་པ་དང་། ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས། སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཨུ་པཱ་ལིས་འདི་སྐད་ཅེས་གསོལ་ཏོ། །བཙུན་པ་འདུལ་བའི་ཕུང་པོ་དུ་མཆིས། ཨུ་པཱ་ལི་གསུམ་སྟེ། བསྙེན་པར་རྫོགས་པའི་ཕུང་པོ་དང་། རབ་ཏུ་ལྡན་པའི་ཕུང་པོ་དང་། འཚོ་བའི་ཕུང་པོའོ། །བསྙེན་པར་རྫོགས་པའི་ཕུང་པོ་གང་ཞེ་ན། བསྙེན་པར་རྫོགས་པར་འོས་པ་དང་། བསྙེན་པར་རྫོགས་པར་མི་འོས་པ་དང་། བསྙེན་པར་རྫོགས་པར་བྱ་བ་དང་། བསྙེན་པར་རྫོགས་པར་མི་བྱ་བ་དང་། བསྙེན་པར་རྫོགས་པ་དང་། བསྙེན་པར་མ་རྫོགས་པ་དང་། ལས་དང་ལས་ཀྱི་དངོས་པོ་དང་། གཞག་པར་འོས་པའི་ལས་དང་། མི་གཞག་པར་འོས་པའི་
ལས་དང་། དབྱུང་བའི་ལས་དང་། བཟོད་པ་གསོལ་བའི་ལས་དང་། བསྡིགས་པའི་དངོས་པོ་དང་། གླེང་བའི་དངོས་པོ་དང་། གདུལ་བའི་དངོས་པོ་དང་། ཞི་བར་བྱ་བའི་དངོས་པོ་དང་། རྒྱུའི་དངོས་པོ་དང་། བསླབ་པ་དང་། བསླབ་པ་མ་ཕུལ་བ་དང་། བསླབ་པ་ཕུལ་བ་དང་། བསླབ་པ་ཉམས་པར་བརྗོད་པ་དང་། རྩོད་པ་དང་། རྩོད་་་པར་བསྡུ་བ་དང་། རྩོད་པ་ཞི་བ་དང་། རྩོད་པ་རབ་ཏུ་ཞི་བ་དང་། ཀློག་པ་དང་། མི་ཀློག་པ་དང་། བྱིན་གྱིས་བརླབ་པ་དང་། སྨྱོས་པའི་སྡོམ་པ་དང་། དད་པས་བྱིན་པ་མ་རུང་བར་བྱེད་པ་དང་། ལས་དང་། ལས་མ་ཡིན་པ་དང་། འདུལ་བ་དང་། ལྟ་བ་བརྗོད་པ་དང་། གསོལ་བ་དང་། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་དང་། བསྡིགས་པའི་ལས་དང་། སྨད་པའི་ལས་དང་། བསྐྲད་པའི་ལས་དང་། སླར་བསྡུམ་པའི་ལས་དང་། མ་མཐོང་བའི་ཕྱིར་སྤངས་པའི་ལས་དང་། སླར་ལས་མི་བྱེད་པའི་ཕྱིར་སྤང་བའི་ལས་དང་། སྡིག་པར་ལྟ་བ་སླར་མ་བཏང་བའི་ཕྱིར་སྤང་བའི་ལས་དང་། ཆད་པས་གཅད་པ་དང་། གཞི་ནས་བསླང་བ་དང་། ཡིད་མགུ་བར་བྱེད་པ་དང་། དབྱུང་བ་དང་། དྲི་བ་དང་། ཆོས་བཞིན་པ་དང་། ཆད་པའི་ཡོན་ཏན་གང་ཡིན་པ་དང་། གཞི་ནས་བཟླས་པ་དང་། ཡིད་མགུ་བ་ཅི་ཕྱིར་བྱ་བ་དང་། དབྱུང་བའི་ཡོན་ཏན་གང་ཡིན་པ་དང་། དེའི་ངོ་བོ་ཉིད་ཚོལ་བས་ཆད་པ་གཅད་པ་དང་། ཉེས་པ་དང་། ཉེས་པ་མེད་པ་དང་། ལྕི་བའི་ཉེས་པ་དང་། ཡང་བའི་ཉེས་པ་དང་། ལྷག་མར་བཅས་པའི་ཉེས་པ་དང་། ལྷག་མ་མེད་པའི་ཉེས་པ་དང་། ཉེས་པ་སྦོམ་པོའི་ཉེས་པ་དང་། ཉེས་པ་སྦོམ་པོ་མ་ཡིན་པའི་ཉེས་པ་དང་། ལས་སུ་བཅས་པའི་ཉེས་པ་དང་། ལས་མེད་པའི་ཉེས་པ་དང་། ཉེས་པར་གྱུར་པའི་ལས་དང་། ཉེས་པ་མེད་པའི་ལས་དང་། ཉེས་པ་དབྱུང་བ་དང་། གླེང་བ་དང་། དྲན་པར་བྱ་བ་དང་། བརྩད་པ་ཡོད་པའི་ལས་དང་། འཚེ་བའི་ལས་དང་། ལུང་མི་བསྒོ་བ་དང་། ལུང་བསྒོ་བ་དགག་
པ་དང་། ལུང་བསྒོ་བ་རྫོགས་པར་མི་བྱ་བ་དང་། སྐབས་འབྱེད་པ་དང་། སྐབས་དབྱེ་བའི་ལས་དང་། སྐབས་དབྱེ་བར་གསོལ་བ་དང་། གསོ་སྦྱིན་འགོག་པ་དང་། སྐབས་དབྱེ་བ་དགག་པ་དང་། ནང་དུ་བཞག་པ་དང་། ནང་དུ་བཙོས་པ་དང་། བདག་གིས་བཙོས་པ་དང་། དགེ་སློང་གིས་བཙོས་པ་དང་། བླངས་པ་དང་། སླར་མ་བླངས་པ་དང་། བླངས་ནས་སླར་ལེན་པའོ། །སྔ་དྲོའི་ཟས་ཀྱི་ཚེ་བྱིན་ལེན་བྱས་པ་དང་། དེའི་ལྷག་མ་ཁྱེར་བ་དང་། ནགས་ཀྱི་ཚིག་གུ་ཅན་དང་། རྫིང་གི་དང་། བཏིང་བ་དང་། མ་བཏིང་བ་དང་། ཕྱུང་བ་དང་། མ་ཕྱུང་བ་དང་། རིན་ཆེ་བའི་ཡོ་བྱད་དང་། ཆུང་བའི་ཡོ་བྱད་དང་། བགོ་བར་བྱ་བའི་ཡོ་བྱད་དང་། མི་བགོ་བའི་ཡོ་བྱད་དང་། མིའི་ཡོ་བྱད་དང་། མི་མ་ཡིན་པའི་ཡོ་བྱད་དང་། དབང་བའི་ཡོ་བྱད་དང་། མི་དབང་བའི་ཡོ་བྱད་དང་། བྱིན་ལེན་བྱ་བའི་ཡོ་བྱད་དང་། བྱིན་ལེན་མི་བྱ་བའི་ཡོ་བྱད་དང་། ཤི་བའི་ཆོས་གོས་དང་། དངོས་པོའི་གོས་དང་། ཕྱག་དར་ཁྲོད་པའི་གོས་དང་། སྣའི་ལས་དང་། མས་བཏང་བའི་ལས་དང་། མཚོན་གྱི་ལས་དང་། བྲེག་པའི་ལས་དང་། སྐྲ་བྲེག་པའི་ལས་དང་ཆེད་དུ་བྱས་པའི་བཟའ་བ་དང་། འབྲས་བུ་ཟ་བ་དང་། མིའི་ཟ་བ་དང་། མི་མ་ཡིན་པའི་ཟ་བ་དང་། ལྔ་བརྒྱས་འདུལ་བ་བསྡུས་པ་དང་། བདུན་བརྒྱས་འདུལ་བ་བསྡུས་པ་དང་། འདུལ་བ་ཡང་དག་པའི་མདོ་དང་། ནག་པོར་སྟོན་པ་དང་། ཆེར་སྟོན་པ་དང་། འདྲེས་པ་དང་། ཤིན་ཏུ་འདྲེས་པ་དང་། ཀུན་དགའི་རུང་བ་དང་། ནགས་སུ་རུང་བ་དང་། འཁོར་གྱི་རུང་བ་དང་། ཡུལ་གྱི་རུང་བ་དང་། ཕྱོགས་ཀྱི་རུང་བ་དང་། ལྗོངས་སུ་རུང་བ་དང་། གོས་ཀྱི་རུང་བ་དང་། ཁུ་བ་སྐྱུར་པོ་རུང་བའོ། །བསྙེན་པར་རྫོགས་པར་འོས་པ་གང་ཞེ་ན། ཁས་བླངས་ནས་གྲུབ་པས་ན་བསྙེན་པར་རྫོགས་པ་སྟེ། བསྙེན་པར་རྫོགས་པར་འོས་པ་ལ་རྣམ་པ་བཅུའོ། །དེ་བཞིན་གཤེགས་པ་རང་བྱུང་དང་རང་སངས་རྒྱས་ནི་སློབ་དཔོན་མེད་པས་བསྙེན་པར་རྫོགས་པ་དང་། ལྔ་པོ་རྣམས་ཡེ་ཤེས་མངོན་དུ་ཆུད་
པས་བསྙེན་པར་རྫོགས་པ་དང་། ཚེ་དང་ལྡན་པ་འོད་སྲུང་ཆེན་པོ་སྟོན་པར་ཁས་བླངས་པས་བསྙེན་པར་རྫོགས་པ་དང་། ཚེ་དང་ལྡན་པ་འཆར་ལྡན་དྲིས་ནས་ལུང་བསྟན་པས་བསྙེན་པར་རྫོགས་པ་དང་། དགེ་སློང་ཚུར་ཤོག་ཅེས་གསུངས་པས་བསྙེན་པར་རྫོགས་པ་དང་། སྐྱབས་སུ་འགྲོ་བའི་ཚིག་གསུམ་གྱིས་བསྙེན་པར་རྫོགས་པ་དང་། ཡུལ་མཐའ་འཁོབ་ན་འདུལ་བ་འཛིན་པ་དང་། ལྔའི་དགེ་འདུན་ལས་བསྙེན་པར་རྫོགས་པ་དང་། ཡུལ་གྱི་དབུས་སུ་བཅུ་འདུས་པ་དང་དེ་ལས་ལྷག་པ་ལས་བསྙེན་པར་རྫོགས་པ་དང་། བླ་མའི་ཆོས་ཁས་བླངས་པ་དང་། ཕོ་ཉས་བསྙེན་པར་རྫོགས་པ་དང་། དགེ་འདུན་སྡེ་གཉིས་ལས་བསྙེན་པར་རྫོགས་པའོ། །དེ་ལ་གང་གསོལ་བ་དང་བཞིའི་ལས་ཀྱིས་མ་བཅས་པ་ན་སྐྱབས་སུ་འགྲོ་བའི་ཚིག་གསུམ་གྱིས་བསྙེན་པར་རྫོགས་པ་ནི་ལེགས་པར་བསྙེན་པར་རྫོགས་པ་ཞེས་བྱའོ། །གང་གིས་གསོལ་བ་དང་བཞིའི་ལས་བཅས་པ་དེ་ནི་སྐྱབས་སུ་འགྲོ་བའི་ཚིག་གསུམ་གྱིས་བསྙེན་པར་རྫོགས་པ་ནི་བསྙེན་པར་མ་རྫོགས་པའོ། །དགེ་སློང་ཚུར་ཤོག་ཅེས་པས་ནི་ཐོག་མ་དང་ཐ་མར་འདྲ་སྟེ། བསྙེན་པར་རྫོགས་པ་དེ་ནི་ལེགས་པར་བསྙེན་པར་རྫོགས་པའོ། །དེ་ཅིའི་ཕྱིར་ཞེ་ན། ཨུ་པཱ་ལི་དགེ་སློང་ཚུར་ཤོག་ཅེས་བྱ་བ་ནི། ངས་མངོན་སུམ་དུ་བསྙེན་པར་རྫོགས་པ་སྟེ། དགེ་སློང་ཚུར་ཤོག་ཅེས་བྱ་བ་དེ་ཐམས་ཅད་ཀྱང་སྲིད་པ་ཐ་མ་པ་སྟེ། དགེ་སློང་ཚུར་ཤོག་ཅེས་བྱ་བ་དག་ནི་སློབ་བཞིན་དུ་དུས་འདའ་བ་མ་ཡིན་ཏེ། དེ་ལྟ་བས་ན་དེ་དག་ལེགས་པར་བསྙེན་པར་རྫོགས་པ་ཞེས་བྱའོ། །དེ་ལས་དགེ་སློང་མ་དག་ནི་རྣམ་པ་གསུམ་གྱིས་བསྙེན་པར་རྫོགས་པར་འོས་པ་སྟེ། བླ་མའི་ཆོས་ཁས་བླངས་པ་དང་། ཕྲིན་པ་དང་། དགེ་འདུན་སྡེ་གཉིས་ལས་སོ། །བླ་མའི་ཆོས་ཁས་བླངས་པ་ནི་ཇི་ལྟར་སྐྱེ་་་དགུའི་བདག་མོ་ཆེན་མོ་ལ་སོགས་པ་སྟེ། རྒྱས་པར་ནི་མདོ་ལས་འབྱུང་བ་་་བཞིན་བརྗོད་དོ། །ཕྲིན་ནི་སྐྱེ་བོའི་དགེ་བ་ཅན་མ་དང་འདྲ་བ་གང་ཕྱིར་བྱུང་ན་བར་ཆད་དུ་འགྱུར་བ་དེ་ལ་ཡང་ཕོ་ཉས་ལས་སུ་བྱའོ། །ཕྲིན་གྱིས་བསླབ་པ་ཉན་ཏེ་དེ་དག་ལ་ཟློས་ལ་ཆེ་ཞེ་
ཁྱོད་ལེགས་པར་བསྙེན་པར་རྫོགས་པ་ནི་ཆོས་སྦྱིན་མ་དང་འདྲའོ། །ལུང་བསྒོ་བ་ནི་རྒྱས་པར་སྦྱར་ཏེ། ཇི་ལྟར་འདུལ་བ་ལས་འབྱུང་བ་བཞིན་ནོ། །དེ་ལས་ཐུ་བ་དག་ནི་དགེ་འདུན་སྡེ་གཉིས་ཀྱིས་བསྙེན་པར་རྫོགས་པར་གྱིས་ཤིག །སྐྱོ་བ་མེད། གཞག་པ་མེད་པར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་དེ་ནི་བསྙེན་པར་རྫོགས་པ་ཞེས་ནི་བྱ་སྟེ། གཞན་ཡང་གསུང་རབ་འདི་ལ་བསྙེན་ནས་ལེན་ཅིང་ཤིན་ཏུ་ཁས་བླངས་ནས་ཐོབ་སྟེ་བདེ་བ་མྱོང་ནས་མངོན་དུ་བྱེད་པ་སྟེ། དེ་ལྟ་བས་ན་བསྙེན་པར་རྫོགས་པའོ། །ཞེས་གསུངས་སོ། །བསྙེན་པར་རྫོགས་པར་མི་རིགས་པ་གང་ཞེ་ན། དེ་ལ་སླར་ལོག་ན་བསྙེན་པར་མ་རྫོགས་པ་སྟེ། གསུང་རབ་དེ་ལ་བསྙེན་ཅིང་ཁས་མ་བླངས་ན་ཤིན་ཏུ་ཁས་མ་བླངས་པས་མ་ཐོབ་སྟེ། བདེ་བར་མ་མྱོང་ནས་མངོན་དུ་མི་བྱེད་པ་འདི་ནི་བསྙེན་པར་མ་རྫོགས་པ་ཞེས་བྱའོ། །བསྙེན་པར་རྫོགས་པར་བྱ་བ་གང་ཞེ་ན། མིའི་སྐྱེས་པ་འཚོ་བ་དང་ལྡན་པ་བར་ཆད་མེད་པ་དང་། མིའི་བུད་མེད་འཚོ་བ་དང་ལྡན་པ་བར་ཆད་མེད་པ་དེ་དག་ནི་བསྙེན་པར་རྫོགས་པར་བྱའོ། །བསྙེན་པར་རྫོགས་པར་མི་བྱ་བ་གང་ཞེ་ན། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། སློབ་དཔོན་མེད་པ་དང་། མཁན་པོ་མེད་པ་དང་། ལྷུང་བཟེད་དང་། ཆོས་གོས་མེད་པ་དང་། ཆད་པའི་ལས་མི་བྱེད་པ་དང་། མུ་སྟེགས་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། ཐ་དད་དུ་སོ་སོར་གནས་པ་དང་། མི་གནས་པ་དང་། ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ལོ་ཉི་ཤུ་མ་ཚང་བ་དང་། ཡི་དམ་སྨྲ་བ་དང་། མ་རུང་བར་བྱས་པ་དང་། མ་རུང་བར་བྱ་བར་རིགས་པ་དང་། མི་མ་ཡིན་པ་ཐམས་ཅད་དེ་འདི་དག་ནི་བསྙེན་པར་རྫོགས་པར་མི་བྱ་བ་སྟེ། དེ་སྟེ་བསྙེན་པར་རྫོགས་པར་བྱས་ན་ཡང་བསྙེན་པར་རྫོགས་པ་མ་ཡིན་ཏེ། བསྙེན་པར་རྫོགས་པར་བྱེད་པ་ཡང་འདས་པ་དང་བཅས་པར་འགྱུར་རོ། །དེ་ཅིའི་ཕྱིར་ཞེ་ན།
གང་ཟག་དེ་དག་ནི་འཁོར་སུན་ཕྱུང་བར་བྱེད་པ་ཞེས་བྱ་སྟེ། ཐམས་ཅད་ཀྱང་འཁོར་སུན་པར་བྱེད་པ་སྟེ། བསྙེན་པར་རྫོགས་པར་བྱ་བ་མ་ཡིན་པའོ། །བསྙེན་པར་རྫོགས་པ་གང་ཞེ་ན། གང་ཟག་འདི་ཞེས་བྱ། མིང་འདི་ཞེས་བྱ། རིགས་འདི་ཞེས་བྱ། རུས་འདི་ཞེས་བྱ། འདི་ལྟར་ཆོས་བཞིན་འདུས་པའི་དགེ་འདུན་གྱིས་བསྙེན་པར་རྫོགས་པར་བྱས་པ་སྟེ། མངོན་དུ་སྐྱོ་བ་མེད་པ་དང་། གཞག་པ་མེད་པར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་འདི་ནི་བསྙེན་པར་རྫོགས་པ་ཞེས་བྱ་སྟེ། གང་རྗེས་སུ་གནང་བཞིན་བསྙེན་པར་རྫོགས་པ་ནི་ལེགས་པར་བསྙེན་པར་རྫོགས་པའོ། །བསྙེན་པར་མ་རྫོགས་པ་གང་ཞེ་ན། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། ཐ་དད་དུ་གནས་པ་དང་། ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། སྔར་ཉམས་པ་འདི་དག་ནི་བསྙེན་པར་མ་རྫོགས་པ་ཞེས་བྱ་སྟེ། འདི་ནི་ཆོས་དང་འདུལ་བ་འདི་ལ་མི་སྐྱེ་བའི་ཆོས་ཅན་ནོ། །ཅིའི་ཕྱིར་ན་བསྙེན་པར་མ་རྫོགས་པ་ཞེས་བྱ་ཞེ་ན། མཚུངས་པར་བསླབ་པ་མ་ཐོབ་པ་སྟེ། དེའི་ཕྱིར་བསྙེན་པར་མ་རྫོགས་པ་ཞེས་བྱའོ། །གང་ཟག་བཅུ་གསུམ་པོ་འདི་མ་གཏོགས་པ་རྣམས་ནི་བསྙེན་པར་རྫོགས་པར་བྱའོ། །དེ་སྟེ་བསྙེན་པར་རྫོགས་པར་བྱས་ན་བསྙེན་པར་རྫོགས་པ་ཞེས་ཀྱང་མི་བྱ་ལ། བསྙེན་པར་རྫོགས་པར་བྱེད་པའང་འདས་པ་དང་བཅས་པར་འགྱུར་སྟེ། དེ་ལྟ་བས་ན་ངས་བསྙེན་པར་མ་རྫོགས་པ་ཞེས་གསུངས་སོ། །ལས་གང་ཞེ་ན། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་སོ། །ཅིའི་ཕྱིར་ན་ལས་ཞེས་བྱ་ཞེ་ན། རྣམ་པ་གཉིས་ཀྱི་ཕྱིར་ལས་ཞེས་བྱ་སྟེ། ཆད་པས་གཅད་པའི་ལས་དང་སྨ་དབབ་པའི་ལས་དང་། ཆོས་དཀར་པོ་ལ་ཡི་དམ་འཆའ་བའི་ལས་སོ། །ཆད་པའི་ལས་དང་སྨ་དབབ་པའི་ལས་གང་ཞེ་ན། འདི་ལྟ་སྟེ། བསྡིགས་པ་དང་། སྨད་པ་དང་། བསྐྲད་པ་དང་།
སླར་བསྡུམ་པ་དང་། སྤངས་པའི་ལས་དང་། ཆད་པ་དང་། གཞི་ནས་སློང་བ་དང་། ཡིད་མགུ་བར་བྱེད་པ་དང་། གཞི་ནས་ཡིད་མགུ་བར་བྱེད་པའོ། །གཞན་ཡང་ཆད་པའི་ལས་སྨ་དབབ་པའི་ལས་སུ་བྱེད་པའོ། །ཆོས་དཀར་པོ་ལ་ཡི་དམ་འཆའ་བའི་ལས་གང་ཞེ་ན། འདི་ལྟ་སྟེ། གསོ་སྦྱིན་དང་། སྐབས་་འབྱེད་པ་དང་། བསྙེན་པར་རྫོགས་པ་དང་། དབྱུང་བ་དང་། རྩྭ་བཏིང་བ་དང་། གཞན་གང་ཡང་རུང་ཆོས་དཀར་པོ་ལ་ཡི་དམ་འཆའ་བའི་ལས་བྱེད་པ་དེ་དག་ནི་ལས་སུ་བྱེད་པ་སྟེ། དེ་ལྟ་བས་ན་ལས་ཞེས་གསུངས་སོ། །ལས་ཀྱི་དངོས་པོ་གང་ཞེ་ན། རྒྱུ་གང་རྐྱེན་གང་གིས་དངོས་པོ་གང་ལ་ལས་བྱེད་པ་སྟེ། རྒྱུ་དེ་དང་རྐྱེན་དེས་དངོས་པོ་དེ་ལ་ལས་བྱེད་པ་ནི་ལས་ཀྱི་དངོས་པོ་ཞེས་བྱའོ། །གཞག་པར་རིགས་པའི་ལས་གང་ཞེ་ན། ལས་གང་གསོལ་བ་ཉམས་པ། བསྒྲགས་པ་ཉམས་པ། ཆོས་བཞིན་མ་ཡིན་པ། དགེ་འདུན་མ་འདུས་པར་བྱས་པ་སྟེ། བསྐྱོས་པ་དེ་ནི་གཞག་པར་རིགས་པའི་ལས་ཞེས་བྱའོ། །གཞག་པར་མི་རིགས་པའི་ལས་གང་ཞེ་ན། ལས་གང་གསོལ་བར་ལྡན་པ། བསྒྲགས་པ་དང་ལྡན་པ། ཆོས་བཞིན་དུ་དགེ་འདུན་འདུས་པར་བྱས་པ་སྟེ། མ་བསྐྱོས་པ་འདི་ནི་གཞག་པར་མི་རིགས་པའི་ལས་ཞེས་བྱའོ། །དབྱུང་བའི་ལས་གང་ཞེ་ན། དབྱུང་ཞེས་བྱ་བ་ནི་སྤངས་པ་ཡིན་ཏེ། སྤངས་པ་དང་དགེ་སློང་དག་ཏུ་ལྷན་ཅིག་ལས་མི་བྱ་སྟེ། གསོ་སྦྱིན་ཡང་མ་ཡིན། སྐབས་དབྱེ་བ་མ་ཡིན། གནས་མ་ཡིན། ལྷན་ཅིག་སྤྱད་པ་མ་ཡིན། ལྷན་ཅིག་ཏུ་གཏམ་བྱ་བ་མ་ཡིན། མཐུན་པ་མ་ཡིན་པ་དེ་ནི་དབྱུང་བའི་ལས་ཞེས་བྱའོ། །ཅིའི་ཕྱིར་དབྱུང་བའི་ལས་ཞེས་བྱ་ཞེ་ན། དགེ་འདུན་གྱིས་ཕྱུང་བས་ན་དེའི་ཕྱིར་ཕྱུང་བའི་ལས་ཞེས་བྱའོ། །བཟོད་པ་གསོལ་བའི་ལས་གང་ཞེ་ན། ལས་གང་བྱས་པ་ལས་སླར་ཡང་དགེ་འདུན་དང་ལྷན་ཅིག་ཏུ་གནས་པ་དང་། སྤྱོད་པ་གཅིག་པ་དང་། འཐམ་པ་གཅིག་པ་དང་། འདུག་པ་གཅིག་པར་འགྱུར་བ་དེ་ནི་བཟོད་པ་གསོལ་བའི་ལས་ཞེས་བྱའོ། །བསྡིགས་པའི་དངོས་པོ་གང་ཞེ་ན། དགེ་སློང་གང་འཐབ་པར་བྱེད་པ་དང་། མཚང་འདྲུ་བར་བྱེད་པ་དང་། འཁྲུག་པར་བྱེད་པ་དང་།
ཁོན་པར་བྱེད་པ་དང་། རྩོད་པར་བྱེད་པ་འདི་ནི་བསྡིགས་པའི་དངོས་པོ་ཞེས་བྱའོ། །གླེང་བའི་དངོས་པོ་གང་ཞེ་ན། གླེང་བའི་དངོས་པོ་གསུམ་སྟེ། མཐོང་བ་དང་། ཐོས་པ་དང་། དོགས་པ་སྟེ། བྱུང་བར་གྱུར། ཉེས་པ་ཡིན་་ལ། དེ་ཡང་བདེན་པ་སྟེ། བརྫུན་པས་མ་ཡིན། དུས་སུ་ཡིན་གྱིས་དུས་མ་ཡིན་པར་མ་ཡིན། དོན་དང་ལྡན་པར་ཡིན་གྱི་དོན་དང་མི་ལྡན་པར་མ་ཡིན། འཇམ་པར་ཡིན་གྱི་རྩུབ་པ་མ་ཡིན། བྱམས་པར་ཡིན་གྱི་ཞེ་སྡང་དུ་མ་ཡིན་པ་འདི་ནི་གླེང་བའི་དངོས་པོ་ཞེས་བྱའོ། །འདུལ་བའི་དངོས་པོ་གང་ཞེ་ན། ནན་ཏན་གྱི་ལས་ལྔ་སྟེ། བསྡིགས་པའི་ལས་དང་། སྨད་པའི་ལས་ནས་ཡིད་མགུ་བར་བྱ་བའི་བར་དུ་སྔ་མ་བཞིན་དུ་འདི་ནི་འདུལ་བའི་དངོས་པོ་ཞེས་བྱའོ། །ཞི་བར་བྱ་བའི་དངོས་པོ་གང་ཞེ་ན། རྒྱུ་གང་དང་རྐྱེན་གང་གིས་རྩོད་པ་བྱུང་བ་རྣམས་འདུལ་བར་འགྱུར་བ་སྟེ། ཞི་བ་དང་རྣམ་པར་ཞི་བའི་ཕྱིར་རོ། །འདི་ལྟ་སྟེ། སྤུ་སྙལ་བ་དང་། འབྱུང་བར་བྱེད་པ་དང་། བཏུད་པས་སྟོན་པ་དང་། ཕྱག་འཚལ་བས་སྟོན་པ་འདི་ནི་ཞི་བར་བྱ་བའི་དངོས་པོ་ཞེས་བྱའོ། །རྒྱུའི་དངོས་པོ་གང་ཞེ་ན། རྒྱུ་གང་དང་རྐྱེན་གང་གིས་རྒྱུ་གང་ལ་བརྟེན་ནས་་་ལས་བྱེད་པ་སྟེ། ཇི་ལྟར་མདོ་སྡེ་བྷ་དཱ་ལ་ལས་འབྱུང་བ་བཞིན་བྱེད་པ་སྟེ། འདིའི་འོག་ཏུ་དགེ་འདུན་གྱིས་སྤྱད་པར་བྱ་བ་ཇི་ལྟར་མདོ་སྡེ་བྷ་དཱ་ལ་ལས་འབྱུང་བ་བཞིན་རྒྱས་པར་བརྗོད་དེ། འདི་ནི་རྒྱུའི་དངོས་པོ་ཞེས་བྱའོ། །བསླབ་པ་གང་ཞེ་ན། བསླབ་པ་གསུམ་སྟེ། ལྷག་པའི་ཚུལ་ཁྲིམས་སུ་བསླབ་པ་དང་། ལྷག་པའི་སེམས་དང་། ལྷག་པའི་ཤེས་རབ་ཏུ་བསླབ་པའོ། །གཞན་ཡང་བསླབ་པ་གསུམ་སྟེ། ལྷག་པར་སྤྱོད་པར་བསླབ་པ་དང་། ལྷག་པར་འདུལ་བ་དང་། ལྷག་པར་སོ་སོར་ཐར་པ་ལ་བསླབ་པའོ། །ཇི་ཙམ་གྱིས་ན་བསླབ་པ་མ་ཕུལ་བ་ཞེས་བགྱི། སྨྱོན་པའི་དྲུང་དུ་བསླབ་པ་ཕུལ་བ་ནི་བསླབ་པ་མ་ཕུལ་བ་ཞེས་བྱའོ། །སེམས་འཁྲུགས་པ་དང་། ནད་ཀྱིས་གཟིར་བའི་དྲུང་དུ་བསླབ་པ་ཕུལ་བ་ནི་བསླབ་པ་མ་ཕུལ་བ་ཞེས་བྱའོ། །གླེན་པ་དང་། ལྐུགས་པ་དང་། འོན་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པ་དང་།
ར་རོ་བ་དང་། རབ་ཏུ་ར་རོ་བ་དང་། ཁྲོས་པའམ། རྒོད་པ་ལ་ཞུགས་པ་དང་། མི་ཤེས་པ་དང་། འགྲོ་བ་གཞན་དུ་གནས་པའི་དྲུང་དུ་བསླབ་པ་ཕུལ་བ་ནི་བསླབ་པ་མ་ཕུལ་བ་ཞེས་བྱའོ། །ཕྲིན་གྱིས་བསླབ་པ་འབུལ་ན་ཡང་བསླབ་པ་མ་ཕུལ་བ་ཞེས་བྱའོ། །སྤྲིང་ཡིག་དང་། ལག་བརྡ་དང་། གཞན་ཟེར་བ་དང་། བརྡ་དང་། མཚན་མས་བསླབ་པ་འབུལ་ན་ཡང་བསླབ་པ་མ་ཕུལ་བ་ཞེས་བྱའོ། །འཕགས་པས་འཕགས་པའི་སྐད་ཀྱིས་མཐའ་འཁོབ་པའི་དྲུང་དུ་བསླབ་པ་ཕུལ་ན་མཐའ་འཁོབ་པ་དེས་ཀྱང་འཕགས་པའི་སྐད་མི་ཤེས་ན་བསླབ་པ་མ་ཕུལ་བ་ཞེས་བྱའོ། །འཕགས་པས་མཐའ་འཁོབ་པའི་སྐད་ཀྱིས་འཕགས་པའི་དྲུང་དུ་བསླབ་པ་འབུལ་ན་འཕགས་པ་དེས་ཀྱང་མཐའ་འཁོབ་པའི་སྐད་མི་ཤེས་ན་བསླབ་པ་མ་་་ཕུལ་བ་ཞེས་བྱའོ། །མཐའ་འཁོབ་པས་འཕགས་པའི་སྐད་ཀྱིས་མཐའ་འཁོབ་པའི་དྲུང་དུ་བསླབ་པ་འབུལ་ན་མཐའ་འཁོབ་པ་དེས་ཀྱང་འཕགས་པའི་སྐད་མི་ཤེས་་ན་བསླབ་པ་མ་ཕུལ་བ་ཞེས་བྱའོ། །མཐའ་འཁོབ་པས་མཐའ་འཁོབ་པའི་སྐད་ཀྱིས་འཕགས་པའི་དྲུང་དུ་བསླབ་པ་འབུལ་ན་འཕགས་པ་དེས་ཀྱང་མཐའ་འཁོབ་པའི་སྐད་མི་ཤེས་ན་བསླབ་པ་མ་ཕུལ་བ་ཞེས་བྱའོ། །མི་དབེན་པ་ལ་དབེན་པར་འདུ་ཤེས་ཤིང་བསླབ་པ་འབུལ་ན་བསླབ་པ་མ་ཕུལ་བ་ཞེས་བྱའོ། །དབེན་པ་ལ་དབེན་པར་འདུ་ཤེས་ཤིང་བསླབ་པ་ཕུལ་ནའང་བསླབ་པ་མ་ཕུལ་བ་ཞེས་བྱའོ། །དབེན་པ་ལ་མི་དབེན་པར་འདུ་ཤེས་ཤིང་བསླབ་པ་ཕུལ་ན་ཡང་བསླབ་པ་མ་ཕུལ་བ་ཞེས་བྱའོ། །མི་དབེན་པ་ལ་མི་དབེན་པར་འདུ་ཤེས་ཤིང་བསླབ་པ་ཕུལ་ན་བསླབ་པ་མ་ཕུལ་བ་ཞེས་བྱའོ། །ཅ་ཅོ་ཅན་གྱི་ནང་དུ་བསླབ་པ་ཕུལ་ན་བསླབ་པ་མ་ཕུལ་བ་ཞེས་བྱའོ། །འཇིག་རྟེན་ཚུལ་བཞིན་གནས་པ་་་མ་ཡིན་པ་ལ་བསླབ་པ་འབུལ་བར་སྨྲས་ཀྱང་བསླབ་པ་མ་ཕུལ་བ་ཞེས་བྱའོ། །མདོའམ་རྒྱས་པར་ཀྱང་རུང་སྟེ། བཟོད་པ་གསོལ་བའི་སེམས་ཀྱང་མི་བྱེད་ལ། དགེ་སློང་གི་དངོས་པོ་ལ་ནི་དགོས་པར་བྱེད། ཁྱིམ་པའི་དངོས་
པོ་ལ་ནི་མི་་དགོས་པར་བྱེད་ལ་རང་བཞིན་དུ་གནས་པ་མ་ཡིན་པ་ལ་ཚིག་ཏུ་སྨྲས་ཀྱང་བསླབ་པ་ཕུལ་བ་མ་ཡིན་ཏེ་འདི་ནི་བསླབ་པ་མ་ཕུལ་བ་ཞེས་བྱའོ། །བསླབ་པ་ཕུལ་བ་གང་ཞེ་ན། འདི་ལྟ་སྟེ། དགེ་སློང་དེ་ཆགས་པར་གྱུར་ལ་མི་དགའ་བའམ། འདོད་དམ། དགེ་སྦྱོང་གི་ལ་མི་དགོས་པར་གྱུར་ཏམ། དགེ་སློང་གི་གཏོང་བར་བྱེད་དམ། སྨོད་དམ། ངོ་ཚ་བའམ། ཁྲེལ་ལམ། འགྱོད་ཀྱང་རུང་སྟེ། དེ་དགེ་སློང་གི་དྲུང་དུ་སོང་ནས་བསླབ་པ་འབུལ་ལོ་ཞེས་སྨྲས་ན་བསླབ་པ་ཕུལ་བ་ཞེས་བྱའོ། །སངས་རྒྱས་དང་། ཆོས་དང་། དགེ་འདུན་དང་། མདོ་སྡེ་དང་། འདུལ་བ་དང་། མ་ལྟ་བུ་དང་། མཁན་པོ་དང་། སློབ་དཔོན་རྣམས་དང་། བདག་ལ་་ཁྱིམ་པར་ཟུང་ཤིག །དགེ་ཚུལ་དང་། མ་ནིང་དང་། ཟ་མ་དང་། དགེ་སློང་མ་སུན་ཕྱུང་བ་དང་། ཕ་དང་། མ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བགྱིས་པ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སོ་སོར་གནས་པ་དང་། མི་གནས་པར་ཟུང་ཤིག་ཅེས་ཟེར་རམ། ཆུང་ངུ་ནི་འདི་སྐད་དུ་ཁྱོད་ཅག་དང་ཆོས་མཚུངས་པ་དང་། ཚངས་པ་མཚུངས་པར་སྤྱད་པས་ཆོག་གོ་ཞེས་སྨྲས་ན་ཡང་བསླབ་པ་ཕུལ་བ་ཞེས་བྱ་སྟེ། གང་དེ་ལྟར་ཆགས་ཤིང་མི་དགའ་འམ་འབབ་པར་འདོད་ཀྱང་རུང་སྟེ། དེས་ངག་དང་། ཚིག་དང་། བརྗོད་པ་དང་། སྐད་དང་། དབྱངས་དང་། ངེས་པའི་ཚིག་དང་། ངག་གི་ལམ་དང་། ངག་གི་སྒྲ་དང་། ངག་གི་ལས་དང་། ངག་གི་དམིགས་པས་བརྗོད་པ་འདི་ནི་བསླབ་པ་ཕུལ་བ་ཞེས་བྱའོ། །ཚུལ་ཁྲིམས་ཉམས་པར་བརྗོད་པ་གང་ཞེ་ན། འདི་ལྟ་སྟེ་དགེ་སློང་དེ་ཆགས་པར་གྱུར་པ་ནས། འགྱོད་པའི་བར་དུ་སྔ་མ་བཞིན་ཏེ། དེ་དགེ་སློང་གི་དྲུང་དུ་སོང་ནས་འདི་སྐད་ཅེས་ཚངས་པར་སྤྱོད་པ་ནི་སྤྱད་དཀའོ། །རབ་ཏུ་དབེན་པ་ནི་ཤིན་ཏུ་དཀའོ། །གཅིག་པུ་མངོན་པར་དགའ་བའང་དཀའོ། །ནགས་དང་ཚལ་ན་
གནས་པ་དང་། བས་མཐར་གནས་ཤིང་མངོན་དུ་ཆུད་པ་ཡང་དཀའོ། །ནམ་འཚོའི་བར་དུ་བདག་གཅིག་པུ་དགོན་པ་ན་གནས་ཤིང་གཅན་གཟན་ཁྲོ་བོ་དང་། ལྷན་ཅིག་ཏུ་གནས་པར་བྱ་བ་དང་། རྩྭ་བཏིང་བའམ་ལོ་མ་བཏིང་བ་ལ་མལ་སྟན་དུ་སྦྱར་བའང་དཀའོ། །ནམ་འཚོའི་བར་དུ་བདག་དང་གཞན་ལ་འཚོ་བ་ལྟོས་པའང་དཀའ། ནམ་འཚོའི་བར་དུ་གོས་དང་། ཟས་དང་། མལ་སྟན་དང་། ན་བའི་རྐྱེན་གྱི་སྨན་དང་ཡོ་བྱད་རྣམས་གཞན་ལས་བཙལ་བར་བྱ་བའང་སྡུག་བསྔལ་ལོ། །མ་དྲན་ནོ། །ཕ་དང་། ཕུ་ནུ་དང་། སྲིང་མོ་རྣམས་ཀྱང་དྲན་ནོ་ཞེས་ཟེར་བ་དང་། བདག་ནི་བཟོ་སློབ་ཏུ་ཆུག་ཤིག །ལས་རྣམས་ལ་ཆུག་ཤིག །རིགས་པའི་ཕྱོགས་སུ་བདག་ཞོག་ཤིག །དགེ་བའི་རིགས་ལ་བདག་ཆོར་ཅིག །གང་དེ་ལྟར་ཆགས་པ་ནས་སྔ་མ་བཞིན་དུ་ངག་གིས་བརྗོད་པའི་བར་དུ་སྟེ། འདི་ནི་བསླབ་པ་ཉམས་པར་བརྗོད་པ་ཞེས་བྱའོ། །བསླབ་པ་ཕུལ་བ་དང་། བསླབ་པ་ཉམས་པར་བརྗོད་པ་ལ་ཁྱད་པར་ཅི་མཆིས། ཡི་གེ་ལ་ཡང་ཁྱད་པར་མེད། སྡོམ་པ་སྤོང་བ་ལ་ཡང་ཁྱད་པར་མེད་དེ། གཅིག་གིས་ཀྱང་སྡོམ་པ་བཏང་བར་གྱུར། གཉིས་ཀྱིས་ཀྱང་དེ་བཞིན་ནོ། །རྩོད་པ་གང་ཞེ་ན། རྩོད་པ་རྣམ་པ་བཞི་སྟེ། འཁྲུག་པས་རྩོད་པ་དང་། ལུང་མི་བསྒོ་བའི་རྩོད་པ་དང་། ཉེས་པས་རྩོད་པ་དང་། བྱ་བའི་རྩོད་པ་སྟེ། འདི་ནི་རྩོད་པ་ཞེས་བྱའོ། །ཅིའི་ཕྱིར་རྩོད་པ་ཞེས་བགྱི། དེ་དག་གི་མཐུས་འཐབ་པ་འབྱུང་སྟེ། དེའི་ཕྱིར་རྩོད་པ་ཞེས་བྱའོ། །རྩོད་པར་བསྡུ་བ་གང་ཞེ་ན། རྒྱུ་གང་དང་རྐྱེན་གང་གིས་རྒྱུའི་དབང་དུ་བྱས་ཏེ་རྩོད་པ་བྱུང་བ་དེ་ནི་རྩོད་པ་སྡུད་པ་ཞེས་བྱའོ། །རྩོད་པ་ཞི་བ་གང་ཞེ་ན། རྩོད་པ་ཞི་བའི་ཆོས་བདུན་ཏེ། མངོན་སུམ་གྱིས་འདུལ་བ་དང་། དྲན་པས་འདུལ་བ་དང་། མི་གཡེངས་པས་འདུལ་བ་དང་། དེའི་རང་བཞིན་་་རྩོད་པ་དང་། གང་མང་དུ་བྱ་བ་དང་། ཡི་དམ་འཆར་གཞུག་པ་དང་། རྩྭ་བཏིང་བ་ལྟ་བུ་དེ་ནི་རྩོད་པ་ཞི་བར་བྱེད་པ་ཞེས་བྱའོ། །དེ་ཅིའི་ཕྱིར་ན་རྩོད་པ་ཞི་བ་ཞེས་བགྱི། རྩོད་པ་བཞི་པོ་དེ་དག་ནི་ཆོས་བདུན་གྱིས་འདུལ་བར་འགྱུར་བ་དང་། ཞི་བ་དང་། རྣམ་
པར་ཞི་བ་དང་། འདུལ་བ་དང་། སྤོང་བ་དང་། འགོག་པའི་ཕྱིར་ཏེ། དེ་ལྟར་ན་རྩོད་པ་ཞི་བའི་ཆོས་ཞེས་བྱའོ། །རྩོད་པ་རབ་ཏུ་མ་ཞི་བ་གང་ཞེ་ན། ཆོས་ལྔ་དང་ལྡན་ན་རྩོད་པ་ལེགས་པར་ཞི་བར་མི་འགྱུར་ཏེ། ལྔ་གང་ཞེ་ན། དགེ་འདུན་ལ་མ་གསོལ་བ་ཡིན། རྒྱལ་བའི་གསུང་དང་མི་མཐུན་པ་ཡིན། ཕྱོགས་དང་མཐུན་པའི་ཕྱོགས་ཀྱིས་དགེ་སློང་རྣམས་ལ་མ་བསྒོ་བ་ཡིན། ཆོས་མཐུན་པར་རྒོལ་བ་དང་། ལན་ལོན་པའི་དགེ་སློང་རྣམས་གུས་པར་མ་བཟློག་པ་ཡིན། ཉེས་པ་བྱུང་བའི་དགེ་སློང་གིས་ཉེས་པ་མ་སྦྱངས་པའང་ཡིན་ཏེ། ཆོས་འདི་ལྔ་དང་ལྡན་ན་རྩོད་པ་ལེགས་པར་ཞི་བ་མ་ཡིན་ནོ། །ཆོས་ལྔ་དང་ལྡན་ན་རྩོད་པ་ལེགས་པར་ཞི་བ་ཡིན་ཏེ། ལྔ་གང་ཞེ་ན། དགེ་འདུན་ལ་གསོལ་བ་བྱས་པ་ཡིན། རྒྱལ་བའི་གསུང་དང་མཐུན་པ་ཡིན། ཕྱོགས་དང་ཕྱོགས་མི་མཐུན་པའི་དགེ་སློང་རྣམས་ལ་བསྒོ་བ་ཡིན། ཆོས་མཐུན་པར་རྒོལ་བ་དང་ལན་ལྡོན་པའི་དགེ་སློང་རྣམས་གུས་པར་བཟློག་པ་ཡིན། ཉེས་པ་བྱུང་བའི་དགེ་སློང་གི་ལྟུང་བ་སྦྱངས་པ་ཡིན་ཏེ། ཆོས་དེ་ལྔ་དང་ལྡན་ན་རྩོད་པ་ལེགས་པར་ཞི་བ་ཡིན་ཏེ་དེ་ནི་རྩོད་པ་རབ་ཏུ་ཞི་བ་ཞེས་བྱའོ། །ཀློག་པ་གང་ཞེ་ན། གང་བཞི་པའམ་བཅུ་གསུམ་པའང་སྟེ། རྒྱས་པར་ཀློག་པ་དེ་ནི་ཀློག་པའོ་ཞེས་བྱའོ། །མི་ཀློག་པ་གང་ཞེ་ན། གནས་གང་ན་སོ་སོར་ཐར་པའི་མདོ་ཀློག་པའི་དགེ་སློང་གིས་སོ་སོར་ཐར་པའི་མདོ་མི་ཀློག་ན་དེའི་རྗེས་ནས་ཀློག་པ་གཞན་གྱིས་ཀློག་པར་བྱའོ། །དེས་ཀྱང་མ་བཀླགས་ལ་མི་སྤོབས་ན། དེའི་ཡང་རྗེས་ནས་ཟློས་པ་གཞན་གྱིས་ལྷོགས་ཤིག །དེས་ཀྱང་མི་ནུས་ལ་མ་སྤོབས་ཏེ། དེ་བཞིན་དུ་རྗེས་ནས་ཟློས་པའི་མཐར་ཕྱིན་གྱི་བར་དུ་གང་གིས་ཀྱང་སྤོབས་པ་མེད་ན་དེ་མ་བཀླགས་པ་ཞེས་བྱའོ། །བྱིན་གྱིས་བརླབ་པ་གང་ཞེ་ན། དགེ་སློང་གང་གནས་ན་གཅིག་པུ་འདུག་ན་དེས་བཅོ་ལྔའི་གསོ་སྦྱིན་དེ་ཉིད་དུ་སྔར་ལངས་ཏེ་མཆོད་རྟེན་དང་ཁང་པར་ཕྱག་དར་བྱ། ཁྱམས་ཀྱང་ཕྱག་དར་བྱ། གསོ་སྦྱིན་གྱི་གནས་ཀྱང་ཕྱག་དར་བྱས་ལ་ཤིན་ཏུ་གསར་པའི་བ་ལང་གི་ལྕི་བས་འཇམ་
པོར་བྱུགས་ཏེ། དུས་སུ་རིམ་བཞིན་དུ་སྟན་རྣམས་བཏིང་ལ། ཆུ་གཙང་མའི་རིལ་བ་རྣམས་དང་། བཤང་སའི་རིལ་བའང་ཆུས་དགང་བར་བྱ། མེ་ཡང་ཉེ་བར་གཞག་པར་བྱ། མེ་མར་དང་། མེ་མར་གྱི་ཀོང་བུ་དང་། མེ་མར་གྱི་སྡོང་བུ་དང་། ལག་གི་ཚུལ་ཤིང་ཡང་ཉེ་བར་གཞག་པར་བྱ་སྟེ། གལ་ཏེ་གསོ་སྦྱིན་མ་བྱས་པའི་དགེ་སློང་དག་འོངས་ན་དེ་དང་ལྷན་ཅིག་ཏུ་གསོ་སྦྱིན་བྱ་ཞིང་སོ་སོར་ཐར་པའི་མདོ་བཀླགས་པའང་བསྒྲག་པར་བྱའོ། །གལ་ཏེ་མ་འོངས་ནས་ཕྱོགས་མཐོ་བ་དེར་འཛེགས་ཏེ། དེར་འགྲེངས་ནས་ཕྱོགས་བཞི་ཀུན་ཏུ་བལྟས་ལ་དེ་སྟེ་འགའ་ཞིག་འོངས་ན། དེས་ཚེ་དང་ལྡན་པ་མྱུར་དུ་ཤོག་ཤིག །གསོ་སྦྱིན་བྱའོ་ཞེས་བོད་དེ། དེ་སྟེ་སུའང་མི་འོང་ན་དེས་དེ་ནས་བབས་ཏེ་དུས་ཀྱི་མཐར་གྱུར་གྱི་བར་དུ་སྡོད་ལ་འདུག་སྟེ། རྐྱང་པ་གསུམ་པ་བརྗོད་པར་བྱ། སྦྱིན་པའི་ཡོན་ཏན་བཀླག་པར་བྱ་སེམས་བསྐྱེད་པར་བྱ། ཁ་ནས་ཀྱང་དེང་ནི་དགེ་འདུན་གྱི་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བྱ་བའི་ཡང་དེང་བཅོ་ལྔའི་གསོ་སྦྱིན་ཏེ། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གིས་ལྷ་རྣམས་ཀྱིས་ཀྱང་བདག་དགེ་སློང་མིང་འདི་ཞེས་བགྱི་བ་ཡོངས་སུ་དག་པར་ཟུང་ཤིག །འདིར་ནི་ཚུལ་ཁྲིམས་ཀྱི་ཕུང་པོ་ཡོངས་སུ་བསྐང་བའི་ཕྱིར་གསོ་སྦྱིན་བྱིན་གྱིས་བརླབ་པར་བྱ་སྟེ། ནམ་དགེ་འདུན་མཐུན་པར་ཚོགས་པ་དེ་ནི་གསོ་སྦྱིན་རྒྱས་པར་མྱོང་བ་དང་སོ་སོར་ཐར་པའི་མདོ་ཡང་མྱང་བར་བྱའོ་ཞེས་དེ་ལྟར་ལན་གཉིས་ལན་གསུམ་དུ་བརྗོད་པར་་་བྱའོ། །ཇི་ལྟར་དགེ་སློང་གཅིག་ལ་དེ་བཞིན་དུ་དགེ་སློང་གཉིས་སམ། གསུམ་གནས་ཀྱང་རུང་སྟེ། དེ་བཞིན་དུ་མངོན་དུ་སྦྱང་བར་བྱ། སེམས་བསྐྱེད་པར་བྱའོ། །གཅིག་ལ་གཅིག་བརྗོད་པར་བྱ། དེ་ལྟར་བྱས་ན་གསོ་སྦྱིན་བྱས་པ་ཡིན་ཏེ། འདི་ནི་བྱིན་གྱིས་བརླབ་པ་ཞེས་བྱའོ། །སྨྱོས་པའི་སྡོམ་པ་གང་ཞེ་ན། དགེ་སློང་གང་མྱོས་པར་གྱུར་ལ་སེམས་འཁྲུགས་ཤིང་ནད་ཀྱིས་གཟིར་བ་དེ་ལ་་་སྨྱོས་པའི་སྡོམ་པ་གསོལ་བ་དང་གཉིས་ཀྱི་ལས་ཀྱིས་སྦྱིན་པར་བྱ་བ་ནི་ཇི་ལྟར་ཚེ་དང་ལྡན་པ་བྱེ་མ་ཅན་བཞིན་རྒྱས་པར་སྦྱར་ཏེ།
ཇི་ལྟར་འདུལ་བ་དེ་ནི་སྨྱོས་པའི་སྡོམ་པ་ཞེས་བྱའོ། །མ་སྨྱོས་པའི་སྡོམ་པ་གང་ཞེ་ན། སྨྱོས་པའི་སྡོམ་པ་དེ་དག་མ་གཏོགས་པར་དེ་ལས་གཞན་པའི་སྡོམ་པ་དེ་ནི་མ་སྨྱོས་པའི་སྡོམ་པ་ཞེས་་་་བྱའོ། །དད་པས་བྱིན་པ་མ་རུང་བར་བྱེད་པ་གང་ཞེ་ན། ཚུལ་ཁྲིམས་ཉམས་པ་ལ་བྱིན་ན་དད་པས་བྱིན་པ་མ་རུང་བ་ཞེས་བྱའོ། །ཡང་དག་པར་བྱིན་པ་ལ་ཞུགས་པ་ལས་ལོག་པར་ཞུགས་པ་ལ་བྱིན་ན་ཁམ་གཅིག་ཀྱང་རུང་དད་པས་་བྱིན་པ་མ་རུང་བར་བྱས་པ་ཞེས་བྱ་སྟེ། དེ་ན་དད་པས་བྱིན་པ་མ་རུང་བར་བྱེད་པ་ཞེས་བྱའོ། །ལས་རྣམས་གང་ཞེ་ན། ལས་མངོན་སུམ་དུ་མ་གྱུར་ནས་བྱ་བའི་ལས་བཅུའོ། །དེ་འདི་ལྟ་སྟེ། ལྷུང་བཟེད་ཁས་ཕུབ་པ་དང་། ལྷུང་བཟེད་བཀན་པ་དང་། བསླབ་པ་ལ་སྡོམ་པ་དང་། བསླབ་པའི་སྡོམ་པ་བཀྲོལ་བ་དང་། གཙུག་ལག་ཁང་གི་སྡོམ་པ་དང་། དགེ་ཚུལ་གྱི་སྡོམ་པ་དང་། སྨྱོན་པའི་སྡོམ་པ་དང་། མི་སྨྲ་བའི་སྡོམ་པ་དང་། ཕྱག་མི་བྱ་བར་རིགས་པའི་སྡོམ་པ་དང་། སྤྱོད་པ་མི་གཅིག་པའི་སྡོམ་པ་སྟེ། འདི་དག་ནི་ལས་རྣམས་ཞེས་བྱའོ། །ལས་མ་ཡིན་པ་གང་ཞེ་ན། བཞི་འདུས་ཏེ་ལས་སུ་བྱ་བ་ལ་བཞི་མ་འདུས་པར་བྱེད་ན་དེ་ལས་མ་ཡིན་ཏེ། དེ་ལྟར་ནི་མི་བྱའོ། །ཁྱིམ་པས་བཞིར་བསྐངས་ཏེ་བྱིན་ན་ལས་མ་ཡིན་ཏེ། དེ་ལྟར་ཡང་མི་བྱའོ། །དགེ་ཚུལ་ཕ་དང་། ཟ་མ་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་ཕྱེ་བ་དང་། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔར་ཉམས་པ་དང་། སྔར་འཁྲུགས་པ་དང་། རྒྱུད་གཞན་དུ་གནས་པ་དང་། མི་གནས་པ་དང་། ཐ་དད་དུ་གནས་པ་དང་། གནས་པར་མི་བྱ་བ་དང་། བསླབ་པ་བྱིན་པ་དང་། ཆད་པ་བྱེད་པ་དང་། ཆད་པ་མ་བྱས་པ་དང་། ཡིད་མགུ་བར་མ་བྱས་པ་དང་། ཡིད་མགུ་བར་མི་བྱེད་པ་དང་། བསླབ་པ་བྱིན་པ་རྣམས་ཀྱིས་བྱེད་པ་ནི་ལས་མ་ཡིན་ཏེ།
དེ་ལྟར་ཡང་མི་བྱའོ། །ཇི་ལྟར་བཞི་འདུས་ནས་ལས་སུ་བྱ་བ་དེ་བཞིན་དུ་ལྔ་འདུས་ནས་བྱ་བ་དང་། བཅུ་འདུས་ནས་བྱ་བ་དང་། ཉི་ཤུ་འདུས་ནས་ལས་སུ་བྱ་བ་ནི་རྒྱས་པར་སྦྱར་ཏེ། འདི་ནི་ལས་མ་ཡིན་པ་རྣམས་ཞེས་བྱའོ། །འདུལ་བ་ཞེས་བྱ་བ་གང་ཞེ་ན། འདི་ལྟར་འདུལ་བ་ལས་བྱུང་བ་བཞིན་ཏེ། འདུལ་བ་རྒྱས་པར་བྱ་བ་དེ་ནི་འདུལ་བ་ཞེས་བྱའོ། །ལྟ་བ་བརྗོད་པ་གང་ཞེ་ན། ལྟ་བ་བརྗོད་པ་ཆོས་བཞིན་མ་ཡིན་པ་ལྔ་དང་། ཆོས་བཞིན་པ་ལྔའོ། །ལྟ་བ་བརྗོད་པ་ཆོས་བཞིན་མ་ཡིན་པ་གང་ཞེ་ན། མི་གནས་པའི་དྲུང་དུ་ལྟ་བ་བརྗོད་པ་དང་། སོ་སོར་གནས་པའི་དྲུང་དུ་ལྟ་བ་བརྗོད་པ་དང་། ཉེ་བར་ཕྱོགས་པའི་དྲུང་དུ་ལྟ་བ་བརྗོད་པ་དང་། བསྙེན་པར་མ་རྫོགས་པའི་དྲུང་དུ་ལྟ་བ་བརྗོད་པ་དང་། ལྷག་མ་མ་ལུས་པའི་དྲུང་དུ་ལྟ་བ་བརྗོད་པ་དེ་ནི་ཆོས་བཞིན་མ་ཡིན་པར་ལྟ་བ་བརྗོད་པ་ལྔའོ། །ཆོས་བཞིན་དུ་ལྟ་བ་བརྗོད་པ་ལྔ་པོ་གང་ཞེ་ན། མི་གནས་པའི་དྲུང་དུ་ལྟ་བ་མ་བརྗོད་པ་དང་། སོ་སོར་གནས་པའི་དྲུང་དུ་ལྟ་བ་མ་བརྗོད་པ་དང་། ཉེ་བར་ཕྱོགས་པའི་དྲུང་དུ་ལྟ་བ་མ་བརྗོད་པ་དང་། བསྙེན་པར་མ་རྫོགས་པའི་དྲུང་དུ་ལྟ་བ་མ་བརྗོད་པ་དང་། དངོས་པོའི་ལྷག་མ་མ་ལུས་པའི་དྲུང་དུ་ལྟ་བ་མ་བརྗོད་པ་འདི་ནི་ཆོས་བཞིན་དུ་ལྟ་བ་བརྗོད་པ་དང་ལྔའོ། །གསོལ་བ་གང་ཞེ་ན། གསོལ་བ་ཞེས་བྱ་བ་ནི་གོ་བར་བྱ་བའི་ཚིག་གི་ལས་ཏེ། ཇི་ལྟར་བྱེད་པའི་ཚེ་གོ་བར་བྱ་བ་ཡིན། ཇི་ལྟར་གང་ལ་དེའི་དོན་ཚིག་གིས་བརྗོད་པ་ནི་གསོལ་བ་ཞེས་བྱའོ། །གསོལ་བའི་ལས་གང་ཞེ་ན། གསོལ་བ་དང་ལས་ཀྱིས་དགེ་འདུན་ལ་བསྒོ་བ་སྟེ། ཇི་ལྟར་སྐབས་དབྱེ་བ་དང་། དབྱུང་བ་དང་། ལྷུང་བཟེད་བྲིམ་པ་དང་། རྩྭ་བཏིང་བའམ། གཞན་ཡང་གསོལ་བའི་ལས་ཀྱིས་བྱ་བ་དེ་ལྟ་བུ་ཐམས་ཅད་ནི་གསོལ་བའི་ལས་སུ་བལྟ་སྟེ། དེ་ནི་གསོལ་བའི་ལས་ཞེས་བྱའོ། །གསོལ་བ་དང་གཉིས་ཀྱི་ལས་གང་ཞེ་ན། གསོལ་བ་བྱས་ན་རྗེས་སུ་བསྒྲགས་པ་གཅིག་པུ་བྱེད་པ་ནི་གསོལ་བ་དང་གཉིས་པ་ཡིན་ཏེ། འདི་ནི་གསོལ་བ་དང་གཉིས་ཀྱི་ལས་ཞེས་བྱའོ། །
གསོལ་བ་དང་བཞིའི་ལས་གང་ཞེ་ན། གསོལ་བ་བྱས་ལ་རྗེས་སུ་བསྒྲགས་པ་གསུམ་བརྗོད་པ་དེ་ནི་གསོལ་བ་དང་བཞི་པ་ཡིན་ཏེ། དེ་ནི་གསོལ་བ་དང་བཞིའི་ལས་ཞེས་བྱའོ། །གསོལ་བར་བྱ་བའི་ལས་ལ་གསོལ་བ་མ་བྱས་པར་བྱེད་ན་ཉེས་པའོ། །གསོལ་བ་མ་བྱས་པར་རྗེས་སུ་བསྒྲགས་པ་བྱེད་ན་ཉེས་པའོ། །གསོལ་བ་དང་གཉིས་ཀྱི་ལས་ལ་གསོལ་བ་མ་བྱས་པར་རྗེས་སུ་བསྒྲགས་པ་བྱེད་ན་ཉེས་པའོ། །གསོལ་བ་བྱས་ལ་རྗེས་སུ་མ་བསྒྲགས་ན་ཉེས་བྱས་སོ། །རྗེས་སུ་བསྒྲགས་པ་བྱས་ལ་གསོལ་བ་མ་བྱས་ནའང་ཉེས་པའོ། །གསོལ་བ་དང་བཞིའི་ལས་ལ་གསོལ་བ་མ་བྱས་པར་རྗེས་སུ་བསྒྲགས་པ་བྱས་ན་ཉེས་པའོ། །གསོལ་བ་བྱས་ལ་རྗེས་སུ་བསྒྲགས་པ་མ་བྱས་ན་ཉེས་པའོ། །རྗེས་སུ་བསྒྲགས་པར་བྱས་ལ་གསོལ་བ་མ་བྱས་ན་ཉེས་པའོ། །གསོལ་བའི་ལས་ལ་གསོལ་བ་བྱས་ན་ཉེས་པ་མེད་དོ། །གསོལ་བ་བྱས་ལ་རྗེས་སུ་བསྒྲགས་པ་བྱས་ན་ཉེས་པ་མེད་དོ། །གསོལ་བ་དང་གཉིས་ཀྱི་ལས་ལ་གསོལ་བ་བྱས་ན་རྗེས་སུ་བསྒྲགས་པ་གཅིག་་་བྱས་ན་ཉེས་པ་མེད་དོ། །གསོལ་བ་བྱས་ནས་རྗེས་སུ་བསྒྲགས་པ་མང་པོ་བྱས་ན་ཉེས་པ་མེད་དོ། །གསོལ་བ་དང་བཞིའི་ལས་ལ་གསོལ་བ་བྱས་ནས་རྗེས་སུ་་བསྒྲགས་པ་མང་པོ་བྱེད་ན་ཉེས་པ་མེད་དོ། །དེ་དག་དེ་ལྟ་བུའི་ཚུལ་དུ་སྦྱར་རོ། །དེ་ལྟར་ལས་མང་པོ་བྱས་ཀྱང་ཉེས་པ་མེད་དོ། །ཕྱུང་བར་བྱས་པ་ཞེས་བྱའོ། །དེ་སྟེ་གསོལ་བ་བྱས་ནས་རྗེས་སུ་བསྒྲགས་པ་སྒྲོགས་པའི་ཚེ་དགེ་འདུན་དག་རྣམ་གྲངས་གཞན་ཞིག་གི་ཕྱིར་སྟན་ལས་ལངས་ཏེ་འདོད་ན་མ་ལངས་པ་ཕྱི་མའི་འཁོར་རྣམས་ལ་དེ་བཞིན་གསོལ་བ་བྱོས་ཤིག །དེ་སྟེ་གསོལ་བ་གཞན་དུ་བྱ་འདོད་པར་གྱུར་ན་རྗེས་སུ་བསྒྲགས་པ་ཉེས་པ་མེད་པར་བྱོས་ཤིག །ཚིག་གིས་ཀྱང་དགེ་འདུན་ལ་བཙུན་པ་རྣམས་གསོལ་བ་སླར་བགྱིད་དོ། །རྗེས་སུ་བསྒྲགས་པ་ཡང་བགྱིད་དོ་ཞེས་གསོལ་བ་བྱོས་ཤིག །དེ་སྟེ་དེས་གསོལ་བ་རྫོགས་པར་མ་གྱུར་ན་སུ་ལ་བསྡིགས་པའི་ལས་བགྱི། དགེ་སློང་དག་ཐབ་མོ་བྱེད་པ་དང་རྩེད་མོ་བྱེད་པ་ལ་གསོལ་བ་དང་བཞིའི་ལས་ཀྱིས་མི་བསྐྱོ་མི་གཞག་པར་རིགས་པས་བྱ་སྟེ། འདི་ནི་བསྡིགས་པའི་ལས་ཞེས་བྱའོ། །སྨད་པའི་ལས་གང་
ཞེ་ན། དགེ་སློང་གང་ལྟུང་བ་ཕྱི་ཕྱིར་བྱུང་བར་གྱུར་པ་དེ་ལ་སྨད་པའི་ལས་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་། གཞག་པ་མེད་པར་་བྱས་ཏེ། འདི་ནི་སྨད་པའི་ལས་ཞེས་བྱའོ། །བསྐྲད་པའི་ལས་གང་ཞེ་ན། དགེ་སློང་གང་རིགས་སུན་པར་གྱུར་པ་དེ་ལ་བསྐྲད་པའི་ལས་གསོལ་བ་དང་་་བཞིའི་ལས་བསྐྱོ་བ་མེད་པ་དང་། གཞག་པ་མེད་པར་བྱ་སྟེ། དེ་ནི་བསྐྲད་པའི་ལས་ཞེས་བྱའོ། །སླར་བསྡུམ་པའི་ལས་གང་ཞེ་ན། དགེ་སློང་གང་ཁྱིམ་པ་ལ་སྨོད་པར་གྱུར་པ་དེ་ལ་བསྡུམ་པའི་ལས་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་གཞག་པ་མེད་པར་བྱ་སྟེ། འདི་ནི་བསྡུམ་པའི་ལས་ཞེས་བྱའོ། །མ་མཐོང་བའི་ཕྱིར་སྤང་བའི་ལས་གང་ཞེ་ན། དགེ་སློང་གང་ལྟུང་བ་བྱུང་བ་ལས་ལྟུང་བ་བྱུང་བ་མ་མཐོང་ངོ་ཞེས་ཟེར་བ་དེ་ལ་མ་མཐོང་བའི་ཕྱིར་སྤང་བའི་ལས་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་། གཞག་པ་མེད་པར་བྱས་ཏེ། དེ་ནི་མ་མཐོང་བའི་ཕྱིར་སྤང་བའི་ལས་ཞེས་བྱའོ། །སླར་ལས་མི་བྱེད་པའི་ཕྱིར་སྤང་བའི་ལས་གང་ཞེ་ན། གང་ལྟུང་བ་བྱུང་བ་ལས་ཆོས་བཞིན་དུ་སླར་ལས་མི་བྱེད་པ་སྤང་བའི་ཕྱིར་གསོལ་བ་དང་བཞིའི་ལས་ཀྱིས་་་བསྐྱོ་བ་མེད་པ་དང་། གཞག་པ་མེད་པར་བྱ་བ་དེ་ནི་སླར་ལས་མི་བྱེད་པའི་ཕྱིར་་སྤང་བའི་ལས་ཞེས་བྱའོ། །སྡིག་པར་ལྟ་བ་སླར་མ་བཏང་བའི་ཕྱིར་སྤང་བའི་ལས་གང་ཞེ་ན། དགེ་སློང་གང་སྡིག་པར་ལྟ་བ་བྱུང་བར་གྱུར་པ་བཟུང་ནས་རབ་ཏུ་འཛིན་པ་སྤྱོད་དེ་སླར་མི་གཏོང་བ་དེ་ལ་སྡིག་པར་ལྟ་བ་དེ་སླར་མ་བཏང་བའི་ཕྱིར་སྤང་བའི་ལས་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་། གཞག་པ་མེད་པར་བྱེད་པ་དེ་ནི་སྡིག་པར་ལྟ་བ་སླར་མ་བཏང་བའི་ཕྱིར་སྤང་་་བའི་ལས་ཞེས་བྱའོ། །ཆད་པས་གཅད་པ་གང་ཞེ་ན། མུ་སྟེགས་ཅན་གང་གཞན་ཞིག་ཐོག་མ་མུ་སྟེགས་ཅན་ལས་དགེ་བར་གསུངས་པའི་ཆོས་འདུལ་བ་ལ་་་རབ་ཏུ་བྱུང་ཞིང་བསྙེན་པར་རྫོགས་ནས་དགེ་སློང་གི་དངོས་པོར་འདོད་པ་དེ་ལ་་མཁན་པོས་སྔར་གོས་སྦྱོར་ཞིང་ཟླ་བ་བཞིའི་བར་དུ་ཆད་པས་བཅད་ལ། གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་གཞག་པ་མེད་པར་བྱའོ། །ཆད་པས་གཅད་པ་ཡང་འདི་ལྟར་བྱ་
སྟེ། དགེ་སློང་གང་དངོས་པོ་བཅུ་གསུམ་ལས་གང་ཡང་རུང་དངོས་པོ་གཅིག་བྱས་ཏེ། བཅབས་ན། དེས་ཇི་སྲིད་དུ་བཅབས་པར་ཤེས་པ་དེ་སྲིད་དུ་མ་དད་བཞིན་ཆད་པས་གཅད་པ་དེ་ལ་་ཡང་ཆད་པས་གཅད་པ་ཡང་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་དང་། གཞག་པ་མེད་པར་སྦྱིན་པར་བྱ་བ་ནི་ཆད་པས་གཅད་པ་ཞེས་བྱའོ། །གཞི་ནས་་བསླང་བས་གཅད་པ་གང་ཞེ་ན། དགེ་སློང་གང་ཆད་པ་བྱེད་དེ། ཆད་པ་བྱེད་བཞིན་པའི་སྐབས་སུ་ཉེས་པ་དེས་གཞི་ནས་བསླང་བའི་ལས་བྱ་བར་གསོལ་བ་དང་བཞིའི་ལས་ཀྱིས་བསྐྱོ་བ་མེད་པ་ཡང་། གཞག་པ་མེད་པར་གཅད་པས་དགེ་སློང་དེས་སླར་ཡང་ཆད་པ་བྱ་སྟེ། སྔ་མ་མ་བྱས་པའི་ཕྱིར་རོ། །རྣམ་གྲངས་གཞན་དུ་ན་ཆད་པ་བྱས་ཀྱང་རུང་། མ་བྱས་ཀྱང་རུང་ལས་དེ་ཉིད་གཞི་ནས་ཟློས་སུ་གཞུག་པ་ཡོད་དེ། དེ་ནི་གཞི་ནས་ཟློས་པས་གཅད་པ་ཞེས་བྱའོ། །ཡིད་མགུ་བར་བྱེད་པས་གཅད་པ་གང་ཞེ་ན། དགེ་སློང་གང་དགེ་འདུན་གྱི་ལྷག་མའི་ཆོས་བཅུ་གསུམ་ལས་གང་ཡང་རུང་བྱས་པ་ལས་མ་་་་བཅབས་སམ། ཆད་པ་བྱས་པར་གྱུར་ཀྱང་རུང་དེ་ལ་ཞག་དྲུག་ཏུ་ཡིད་མགུ་བར་བྱེད་པ་གསོལ་བ་དང་། བཞིའི་ལས་ཀྱིས་བསྐྱོ་བ་མེད་ཅིང་། གནས་པ་མེད་པས་གཅད་པ་སྟེ། དགེ་སློང་དེས་ཀྱང་དགེ་སློང་ཐམས་ཅད་ལ་ཡིད་མགུ་བར་བྱེད་པ་དེ་ནི་ཡིད་མགུ་བས་གཅད་པ་ཞེས་བྱའོ། །དབྱུང་བ་གང་ཞེ་ན། དགེ་སློང་གང་ཆད་པ་ཁོར་ནས་ཞག་དྲུག་ཏུ་ཡིད་མགུ་བ་བྱ་བའང་སྤྱད་པར་གྱུར་ན། དེ་ལ་གསོལ་བ་དང་བཞིའི་ལས་ཀྱིས་བསྐྱོ་བ་མེད་ཅིང་གཞག་པ་མེད་པར་བྱ་སྟེ། དེ་ནི་དབྱུང་བ་ཞེས་བྱའོ། །ཅིའི་ཕྱིར་ན། དབྱུང་བ་ཞེས་བྱ་ཞེ་ན། མི་དགེ་བའི་གནས་ནས་ཕྱུང་སྟེ། དགེ་བའི་གནས་སུ་རབ་ཏུ་བཞག་པ་སྟེ། དེ་ལྟ་བུའི་ཕྱིར་ན་དབྱུང་བ་ཞེས་བྱའོ། །དྲི་ཞེས་བྱ་བ་ནི་ཆོས་རྣམས་ལའོ། །ཆད་པ་བགྱིད་པ་ལ་ཡོན་ཏན་ཅི་མཆིས། ཅིའི་སླད་དུ་གཞི་ནས་བཟླས་པར་བགྱི། ཡིད་མགུ་བར་བགྱི་བ་ལ་ཡོན་ཏན་ཅི་མཆིས། ཅིའི་སླད་དུ་ན་དབྱུང་། ཆོས་རྣམས་བཅབས་པ་ལ་ཆད་པ་བྱེད་པ་ནི་ཡོན་ཏན་ནོ། །ཆད་པ་བྱས་པ་ལ་ཡིད་མགུ་བར་བྱེད་པ་ནི་ཡོན་ཏན་ནོ། །ཅིའི་ཕྱིར་ན་གཞི་ནས་བཟླས་ཞེས་བྱ་བ་ནི་ནན་ཏུར་དུ་བྱ་བའི་ཕྱིར་གཞི་ནས་
ཟློས་པའོ། །ཡིད་མགུ་བར་བྱ་བའི་ཕྱིར་ཡོན་ཏན་ནི་དབྱུང་བར་བྱ་བའོ། །ཅིའི་ཕྱིར་ན་དབྱུང་ཞེས་བྱ་ཞེ་ན། དབྱུང་བ་ནི་རྣམ་པར་དག་པའི་ཕྱིར་རོ། །ཅིའི་སླད་དུ་ན་ཆད་པ་བགྱིས་པས་ཡིད་མགུ་བ་བྱ་བའི་ཡོན་ཏན་དུ་འགྱུར། ཆད་པ་བྱས་པའི་དགེ་སློང་ཚེགས་མི་ཆེ་བར་དགེ་སློང་རྣམས་ལ་ཡིད་མགུ་བར་བྱེད་དོ། །ཡིད་མགུ་བར་བྱས་ན་དགེ་སློང་རྣམས་དེ་ལ་ཡིད་མགུ་བར་བྱས་སོ་བར་སེམས་ཏེ། དེ་ལྟ་བུའི་ཕྱིར་ན་ཆད་པས་བྱས་པ་ནི་ཡིད་མགུ་བའི་ཡོན་ཏན་ནོ། །ཅིའི་སླད་དུ་ན་གཞི་ནས་བཟླས་པས་ནན་ཏུར་དུ་འགྱུར། གཞི་ནས་བཟླས་ན་གང་ཟག་ལ་ནན་ཏུར་བྱས་པ་ཡིན་ཏེ། འཇིགས་པས་ཕྱིན་ཆད་དེ་ལྟ་བུ་མི་བྱེད་པ་དང་། དགེ་སློང་རྣམས་ཀྱིས་ཀྱང་ཤེས་པར་འགྱུར་ཏེ། དེ་ལྟར་ན་ཉོན་མོངས་པ་ཆེ་བ་ཚེ་དང་ལྡན་པ་ངོ་ཚ་བའི་ཕྱིར་ཕྱིས་མི་བྱེད་པར་འགྱུར་ཏེ། དེ་ལྟ་བུའི་ཕྱིར་ན་གཞི་ནས་བཟླས་པ་ནི་ནན་ཏུར་བྱས་པར་འགྱུར་རོ། །ཅིའི་སླད་དུ་ན་ཡིད་མགུ་བས་དབྱུང་བའི་ཡོན་ཏན་དུ་འགྱུར། དགེ་སློང་ཡིད་མགུ་བ་སྤྱོད་པའི་ཚེ་ཚེགས་མི་ཆེ་བར་དགེ་སློང་རྣམས་ལ་ཡིད་མགུ་བར་བྱེད་དེ། ཡིད་མགུ་བར་བྱས་པས་དགེ་སློང་རྣམས་དེ་ལ་དབྱུང་བར་སེམས་ཏེ། ཚེ་དང་ལྡན་པ་འདི་ནི་ཕྱིན་པར་འདོད་ཀྱིས་ཚེ་དང་ལྡན་པ་འདི་ནི་ཉོན་མོངས་པ་མི་འདོད་དོ་ཞེས་ནས་ཚེ་དང་ལྡན་པ་འདི་ནི་དགེའོ་ཞེས་སྩོལ་ཏེ། ཚེ་དང་ལྡན་པ་འདི་ནི་དབྱུང་བར་བྱའོ་ཞེས་བྱ་བའོ་ཞེས་བྱ་བའི་ཕྱིར་ཏེ། དེ་ལྟ་བུ་ན་ཡིད་མགུ་བར་བྱ་བ་ནི་དབྱུང་བའི་ཡོན་ཏན་ནོ། །ཅིའི་སླད་དུ་ན་དབྱུང་བར་བགྱི། རྣམ་པར་དག་པའི་ཕྱིར་དབྱུང་བར་བྱ་སྟེ། ཕྱུང་ན་དགེ་སློང་དེ་རྣམ་པར་དག་པར་འགྱུར་ཞིང་ལྟུང་བ་མེད་དོ། །ཇི་ལྟར་གང་ཟག་འདི་གཉིས་ནི་རྣམ་པར་དག་པ་དང་། ཉོན་མི་མོངས་པ་ཡིན་ནོ་ཞེས་གསུངས་ཏེ། གང་ལ་ལྟུང་བ་མི་འབྱུང་བ་དང་། གང་ལ་བྱུང་ནའང་ཇི་ལྟར་ཆོས་བཞིན་སླར་བྱེད་པ་ཡིན་ཏེ། ཕྱུང་བ་ཡང་དེ་ལ་དག་པར་འགྱུར་ཏེ། དེའི་ཕྱིར་ན་དབྱུང་བ་ཡང་རྣམ་པར་དག་པའི་ཕྱིར་རོ། །དེའི་ངོ་བོ་ཉིད་ཚོལ་བའི་ཕྱིར་སྦྱིན་པ་གང་ཞེ་ན། དགེ་སློང་གང་ཉེས་པ་ལས་བསྙོན། བསྙོན་པ་ལས་ཁས་བླངས། ཁས་བླངས་པ་ལས་ཡང་བསྙོན། ཡང་བསྙོན་པ་དེ་ལ་ནི་ངོ་བོ་ཉིད་ཚོལ་བའི་ཕྱིར་གསོལ་བ་
དང་བཞིའི་ལས་ཀྱིས་བསྐྱོ་བ་མེད་ཅིང་གཞག་པ་མེད་པར་བྱ་སྟེ། འདི་ངོ་བོ་ཉིད་ཚོལ་བའི་ཕྱིར་ཆད་པས་གཅད་པ་ཞེས་བྱའོ། །ཉེས་པ་གང་ཞེ་ན། ཉེས་པ་སྡེ་ལྔ་པོ་ནི་ཉེས་པའི་ཕུང་པོ་ཞེས་བྱ་སྟེ། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་འཆགས་པ་དང་། ཉེས་བྱས་ཏེ། གང་དེ་རྣམས་ལ་སྤྱོད་ཅིང་བྱས་པས་བསྐྱོ་བར་མི་བྱེད་པ་དེ་ནི་ཉེས་པ་ཞེས་བྱའོ། །ཉེས་པ་མེད་པ་གང་ཞེ་ན། ཉེས་པའི་རིགས་ལྔ་པོ་དེ་དག་ཉེས་པ་མེད་པས་ན་ཉེས་པ་མེད་པའི་ཕུང་པོ་ཞེས་བྱ་སྟེ། ཕས་ཕམ་པ་དང་། དགེ་འདུན་གྱི་ལྷག་མ་དང་། ལྟུང་བ་དང་། སོ་སོར་གནས་པ་དང་། ཉེས་བྱས་དག་ལས་ཀྱང་ལས་མི་བྱེད་དེ། མ་སྤྱད་ཅིང་མ་བྱས་པས་བསྒོ་བ་འདི་ནི་ཉེས་པ་མེད་པ་ཞེས་བྱའོ། །ཉེས་པ་ལྕི་བ་གང་ཞེ་ན། གང་དབྱུང་དུ་མེད་པའོ། །ཉེས་པ་ཡང་བ་གང་ཞེ་ན། གང་དབྱུང་དུ་ཡོད་པའོ། །ལྷག་མར་བཅས་པའི་ཉེས་པ་གང་ཞེ་ན། ཉེས་པའི་རིགས་འོག་མ་རྣམས་ཏེ། དགེ་འདུན་གྱི་ལྷག་མ་དང་། ལྟུང་བ་དང་སོ་སོར་འཆགས་པ་དང་། ཉེས་བྱས་སོ། །ལྷག་མ་མེད་པའི་ཉེས་པ་གང་ཞེ་ན། ཉེས་པའི་རིས་དང་པོ་ལྟུང་བ་བཞི་པོའོ། །ཉེས་པ་སྦོམ་པོའི་ཉེས་པ་གང་ཞེ་ན། ཕས་ཕམ་པའི་དང་། དགེ་འདུན་གྱི་ལྷག་མའིའོ། །ཅིའི་ཕྱིར་ན་ཉེས་པ་སྦོམ་པའི་ཉེས་པ་ཞེས་བྱ་ཞེ་ན། རྣམ་པ་གཉིས་ཀྱི་ཕྱིར་ན་ཉེས་པ་སྦོམ་པོ་ཞེས་བྱ་སྟེ། ཉེས་པ་སྦོམ་པོ་བས་ན་ཉེས་པ་སྦོམ་པོ་ཞེས་བྱ་བ་དང་། རང་བཞིན་གྱིས་ཉེས་པ་སྦོམ་པོ་བས་ན་ཉེས་པ་སྦོམ་པ་སྟེ། དེ་ནི་ཉེས་པ་སྦོམ་པོ་ཞེས་བྱའོ། །ཉེས་པ་སྦོམ་པོ་མེད་པའི་ཉེས་པ་གང་ཞེ་ན། ཉེས་པའི་རིས་ལྷག་མ་གསུམ་པོ་སྟེ། ལྟུང་བ་དང་། སླར་འཆགས་པ་དང་། ཉེས་བྱས་ཏེ། འདི་ནི་ཉེས་པ་སྦོམ་པོ་མེད་པའི་ཉེས་པ་ཞེས་བྱའོ། །ལས་དང་བཅས་པའི་ཉེས་པ་གང་ཞེ་ན། བཤགས་པར་བྱ་བ་དང་། བསྡམ་པར་བྱའོ། །ལས་སུ་མི་བྱ་བའི་ཉེས་པ་གང་ཞེ་ན། ཉེས་པ་དང་པོ་རྣམས་སོ།། །།འདུལ་བ་གཞུང་དམ་པ། བམ་པོ་་བཞི་བཅུ་རྩ་བརྒྱད་པ། ཉེས་པ་སླར་ལས་བྱ་བ་གང་ཞེ་ན། དགེ་སློང་གང་བཞི་པོའམ། ལྔ་པའི་ཆོས་ནང་དུ་དྲན་པ་ཉེ་བར་འཇོག་ཅིང་དད་པས་ཉེས་པ་ཇི་ལྟར་
ཆོས་བཞིན་དུ་སླར་བྱེད་པ་དེ་ནི་ཉེས་པ་སླར་ལས་བྱ་བའོ། །ཉེས་པ་སླར་ལས་མི་བྱ་བ་གང་ཞེ་ན། དགེ་སློང་གང་ཆོས་བཞི་པ་ཡང་མེད། ཆོས་ལྔ་པ་ཡང་མེད་ལ་ནང་དུ་དྲན་པ་ཉེ་བར་་་བཞག་ཅིང་དད་པས་ཉེས་པ་ཇི་ལྟར་ཆོས་བཞིན་དུ་སླར་མི་བྱེད་པ་དེ་ནི་ཉེས་པ་་་སླར་ལས་མི་བྱ་བ་ཞེས་བྱའོ། །ཉེས་པ་བསླང་བ་གང་ཞེ་ན། རྣམ་པ་གཅིག་གིས་ན་ཉེས་པ་ཐམས་ཅད་བསྡུས་པར་འགྱུར་ཏེ་དེ་ནི་སྡོམ་པའོ། །རྣམ་པ་གཅིག་གིས་ན་ཉེས་པ་ཐམས་ཅད་མ་བསྡུས་པར་གྱུར་ཏེ། དེ་ནི་སྡོམ་པ་མེད་པའོ། །དེ་ནི་ཉེས་པ་བསླང་བ་ཞེས་བྱའོ། །གླེང་བ་གང་ཞེ་ན། དེ་འདི་ལྟར་དགེ་སློང་དེ་འདི་སྐད་དུ་ཚེ་དང་ལྡན་པ་ཁྱོད་ལ་འདི་དང་འདི་ལྟ་བུའི་ཉེས་པ་བྱུང་བ་དེ་སླར་མཐོལ་ཅིག །ཤོགས་ཤིག །ཇི་ལྟར་ཆོས་བཞིན་དུ་སླར་བྱོས་ཤིག་ཅེས་སྨྲ་བ་དེ་ནི་གླེང་བའོ། །དྲན་པར་བྱེད་པ་གང་ཞེ་ན། འདི་ལྟ་སྟེ་དགེ་སློང་དེས་དགེ་སློང་ལ་འདི་སྐད་དུ་ཚེ་དང་ལྡན་པ་འདི་དང་འདི་ལྟ་བུའི་ཉེས་པ་བྱུང་བ་མི་དྲན་ནམ་ཞེས་སྨྲས་པ་དེ་ནི་དྲན་པར་བྱེད་པའོ། །ཚིག་དང་བཅས་པའི་ལས་གང་ཞེ་ན། གང་ཚིག་དང་བཅས་པའི་ལས་སོ། །དེ་ཡང་གང་ཞེ་ན། དེ་འདི་ལྟར་དགེ་སློང་གིས་དགེ་སློང་ལ་ཚིག་དང་བཅས་པས་ཚེ་དང་ལྡན་པ་ལ་རྨ་བ་ཞིག་ཡོད་ཀྱིས་ཁྱོད་གནས་འདི་ནས་ང་ལ་མ་སྦྲན་གྱི་བར་དུ་མ་འགྲོ་ཤིག །ཚེ་དང་ལྡན་པ་ཁྱོད་ང་དང་ལྷན་ཅིག་ཏུ་བརྩད་པ་ཞིག་ཡོད་དོ་ཞེས་སྨྲས་པ་ནི་ཚིག་དང་བཅས་པའི་ལས་ཞེས་བྱའོ། །ཚིག་འཇེབས་པའི་ལས་གང་ཞེ་ན། ཚིག་འཇེབས་པའི་ལས་རྣམ་པ་ལྔ་སྟེ། གང་ཟག་གི་སྐབས་ཕྱེ་བ་ལ་འདི་སྐད་ཅེས་ཟེར་ཏེ། ཁྱོད་ཀྱི་དངོས་པོ་དེ་འདི་ལྟ་བུ་ཞིག་སྨྲས་པའོ་ཞེས་ཚིག་འཇེབས་པར་བྱེད་པ་དང་། ཁྱོད་ཀྱི་དངོས་པོ་དེ་འདི་ལྟ་བུའི་གནས་དེར་སྨྲའོ་ཞེས་ཚིག་འཇེབས་པར་བྱེད་པ་དང་། ཁྱོད་ཀྱི་དངོས་པོ་དེ་གནས་འདིར་སྨྲའོ་ཞེས་ཚིག་འཇེབས་པར་བྱེད་པ་དང་། ཁྱོད་ཀྱི་དངོས་པོ་དང་གང་དུ་དགའ་བ་དེར་སྨྲའོ། །ཞེས་ཚིག་འཇེབས་པར་བྱེད་པ་དང་། མི་སྨོས་པར་བྱེད། དེ་ལ་ཉེས་པ་སྐྱེད། ཉེས་པ་སྟོན། ཚིག་འཇེབས་པ་དང་། ཚིག་གསོབ་ཏུ་བྱས་ནས་གཏོང་བའོ། །འདི་ལྟ་སྟེ་དཔེར་ན། ཁ་ལོ་སྒྱུར་བས་གང་དེའི་རྟ་མ་རུངས་པ་འདུལ་བའི་གནས་སུ་འགྲོ་བར་མི་་་བཏུབ་པ་དེ་ལ་ཁ་ལོ་སྒྱུར་བ་དེ་ཉིད་ཀྱིས་
ཐག་པ་དང་བཅས། ཁ་ལྕགས་དང་བཅས་པས་གནོད་པ་དང་བཅས་ནས་བཏགས་ཏེ་བོར་བ་ལྟ་བུ་འདི་ནི་ཚིག་་་་འཇེབས་པའི་ལས་ཞེས་བྱའོ། །ལུང་མི་བསྒོ་བ་གང་ཞེ་ན། གང་ལུང་དུ་མི་བསྒོ་བ་དེ་ནི་ཚིག་ཏུ་མི་བརྗོད་པ་སྟེ། མཐོང་བའམ་ཐོས་པའམ། དོགས་པའི་ཕྱིར་མི་སྨྲ་བ་སྟེ། དེ་ནི་ལུང་དུ་མི་བསྒོ་བ་ཞེས་བྱའོ། །ལུང་བསྒོ་བ་ལ་འགོག་པ་གང་ཞེ་ན། གང་ལུང་དུ་མི་བསྒོ་བ་དེ་ལ་བརྩོན་པའོ། །ལུང་དུ་བསྒོ་བ་ཡོངས་སུ་རྫོགས་པར་མི་བྱ་བ་གང་ཞེ་ན། གང་དེས་ལུང་དུ་མི་བསྒོ་བ་ལ་ཕྱལ་བར་བོར་བའོ། །སྐབས་འབྱེད་པ་གང་ཞེ་ན། སྐབས་ཕྱེ་ནས་བཟོད་པར་གླེང་བར་བྱ། དྲན་པར་བྱ་བ་འདི་ནི་སྐབས་འབྱེད་པ་ཞེས་བྱའོ། །སྐབས་དབྱེ་བའི་ལས་གང་ཞེ་ན། སྐབས་དབྱེ་བའི་ལས་ལྔ་སྟེ། འདི་སྐད་དུ་ཁྱོད་ཀྱིས་ང་ལ་སྐབས་ཕྱེ་ཤིག་དང་། ངས་ཁྱོད་ལ་སྨྲའོ། །ཁྱོད་ལ་བརྗོད་དོ། །ཁྱོད་ལ་གླེང་ངོ་། །ཁྱོད་ལ་དྲན་པར་བྱའོ་ཞེས་ཟེར་བ་འདི་ནི་སྐབས་འབྱེད་པ་ཞེས་བྱའོ། །སྐབས་འབྱེད་་པའི་ལས་དང་གསོལ་བ་གང་ཞེ་ན། སྐབས་འབྱེད་པའི་ལས་དེ་དག་གིས་གཞན་ལ་གསོལ་བའོ། །གསོ་སྦྱིན་འགོག་པ་གང་ཞེ་ན། ཆོས་བཞིན་མ་ཡིན་པ་བཅུ་ནི་གསོ་སྦྱིན་འགོག་པའོ། །ཆོས་བཞིན་པ་ཡང་བཅུའོ། །ཆོས་བཞིན་མ་ཡིན་་པས་གསོ་སྦྱིན་འགོག་པ་བཅུ་གང་ཞེ་ན། ཕས་ཕམ་པར་གྱུར་པ་མ་ཡིན། ཕས་ཕམ་པར་གཏམ་དུ་བརྗོད་པ་མ་ཡིན། བསླབ་པ་ཕུལ་བ་མ་ཡིན། བསླབ་པ་ཕུལ་བར་གཏམ་དུ་བརྗོད་པ་མ་ཡིན། དགེ་འདུན་ལ་སྨོད་པ་མ་ཡིན། དགེ་འདུན་ལ་སྨོད་པར་གཏམ་དུ་བརྗོད་པ་མ་ཡིན། ཚུལ་ཁྲིམས་ཉམས་པ་མ་ཡིན། ལྟ་བ་ཉམས་པ་མ་ཡིན། སྤྱོད་པ་ཉམས་པ་མ་ཡིན། འཚོ་བ་ཉམས་པ་མ་ཡིན་པའོ། །ཇི་ལྟར་ན་ཕས་ཕམ་པར་གྱུར་པ་མ་ཡིན་པ་གང་ཞེ་ན། གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་དགེ་སློང་དེ་ཕས་ཕམ་པ་བྱེད་པར་འགྱུར་བ་དེ་ལྟ་བུའི་རྣམ་པ་དང་། མཚན་མ་དང་། རྟགས་ཀྱིས་དགེ་སློང་དེ་ཕས་ཕམ་པའི་ཉེས་པར་མ་མཐོང་ན། དེས་དེ་ལ་གསོ་སྦྱིན་འགོག་པ་ནི་ཆོས་བཞིན་མ་ཡིན་པར་འགོག་པ་སྟེ། དེ་ལྟར་ན་ཕས་ཕམ་པའི་མ་ཡིན་
པའོ། །ཇི་ལྟར་ན་ཕས་ཕམ་པར་གཏམ་དུ་བརྗོད་པ་མ་ཡིན་པ་གང་ཞེ་ན། དེ་ལྟར་གཙུག་ལག་ཁང་གི་ནང་ངམ་ཕྱི་རོལ་དུའང་རུང་དགེ་སློང་མང་པོ་ལྷན་ཅིག་འདུས་ཤིང་འཁོད་ནས། དེ་དག་ཀྱང་དེ་ལས་བྱུང་ངམ། དེའི་རང་བཞིན་དུ་དེ་ལས་མཐུན་པའི་གཏམ་དུ་བརྗོད་པ་ཡང་མ་ཡིན་དད་པ་ལས་ཐོས་པའང་མེད་དེ། རང་གི་རྣམ་པ་ལ་རྣམ་པར་རྟོག་པ་ལས་བྱུང་བའང་མེད་དེ། དེས་ཐོས་པ་མེད་བཞིན་དུ་གསོ་སྦྱིན་འགོག་པ་ནི་ཆོས་བཞིན་མ་ཡིན་པར་གསོ་སྦྱིན་འགོག་པ་སྟེ། དེ་ལྟ་བུ་ནི་ཕས་ཕམ་པར་གཏམ་དུ་བརྗོད་པ་མ་ཡིན་པའོ། །ཇི་ལྟར་ན་བསླབ་པ་ཕུལ་བ་མ་ཡིན་པ་གང་ཞེ་ན། དགེ་སློང་གིས་གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་བསླབ་པ་ཕུལ་བར་འགྱུར་བ་དེ་ལྟ་བུའི་རྣམ་པ་དང་དེའི་མཚན་མ་དང་། དེའི་རྟགས་སུ་དགེ་སློང་གིས་མཐོང་བ་མེད་བཞིན་དུ་བསླབ་པ་ཕུལ་བ་ཡིན་ནོ་ཞེས་དེས་དེ་མ་མཐོང་བར་གསོ་སྦྱིན་འགོག་ན་ཆོས་བཞིན་དུ་གསོ་སྦྱིན་འགོག་པ་མ་ཡིན་ཏེ། དེ་ལྟར་ན་བསླབ་པ་ཕུལ་བ་མ་ཡིན་ནོ། །ཇི་ལྟར་ན་བསླབ་པ་ཕུལ་བར་གཏམ་དུ་བརྗོད་པ་མ་ཡིན་པ་གང་ཞེ་ན། དེ་འདི་ལྟར་གཙུག་ལག་ཁང་གི་ནང་ངམ་ཕྱི་རོལ་ཏུའང་རུང་། དགེ་སློང་མང་པོ་ལྷན་ཅིག་འདུས་ཤིང་འཁོད་ནས་དེ་དག་ཀྱང་དེ་ལས་བྱུང་བའམ། དེའི་རང་བཞིན་ནམ། མཐུན་པའི་གཏམ་དུ་བརྗོད་པའང་མ་ཡིན། དད་པ་ལས་ཐོས་པའང་མེད་དེ། རང་གི་རྣམ་པ་ལ་རྣམ་པར་རྟོག་པ་ལས་བྱུང་བའང་མེད་དེ། དེས་དེ་ཐོས་པའང་མེད་དེ། དོགས་པའང་མེད་བཞིན་དུ་གསོ་སྦྱིན་འགོག་པ་ནི་ཆོས་བཞིན་མ་ཡིན་པར་གསོ་སྦྱིན་འགོག་པ་སྟེ། དེ་ལྟ་བུ་ནི་བསླབ་པ་ཕུལ་བར་གཏམ་དུ་བརྗོད་པ་མ་ཡིན་ནོ། །ཇི་ལྟར་ན་དགེ་འདུན་ལ་སྨོད་པ་མ་ཡིན་ཞེ་ན། དགེ་སློང་གིས་གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་དགེ་སློང་དེ་དགེ་འདུན་ལ་སྨོད་པར་བྱེད་པ་དེ་ལྟ་བུའི་རྣམ་པ་དང་། མཚན་མ་དང་། དེའི་རྟགས་ཀྱིས་དགེ་སློང་དེ་དགེ་འདུན་ལ་སྨོད་པར་བྱེད་པ་མ་མཐོང་ན་དེས་དེ་ལ་གསོ་སྦྱིན་འགོག་པ་ནི། ཆོས་བཞིན་མ་ཡིན་པར་གསོ་སྦྱིན་འགོག་པ་སྟེ། དེ་ལྟ་བུ་ནི་དགེ་འདུན་ལ་སྨོད་པ་མ་ཡིན་པ་ཞེས་བྱའོ། །ཇི་ལྟར་ན་དགེ་འདུན་ལ་སྨོད་
པར་གཏམ་དུ་བརྗོད་པ་མ་ཡིན་ཞེ་ན། འདི་ལྟ་སྟེ། དེའི་གཙུག་ལག་ཁང་གི་ནང་ངམ་ཕྱི་རོལ་དུའང་རུང་། དགེ་སློང་མང་པོ་ལྷན་ཅིག་འདུས་ཤིང་འཁོད་ནས་དེ་དག་ཀྱང་དེ་ལས་བྱུང་བའམ། དེའི་རང་བཞིན་ནམ། དེ་ལས་མཐུན་པའི་གཏམ་དུ་བརྗོད་པའང་མེད། དད་པ་ལས་ཐོས་པའང་མེད། དེ་རང་གི་རྣམ་པ་ལ་རྣམ་པར་རྟོག་པ་ལས་བྱུང་བའང་མེད། ཐོས་པའང་མེད། དོགས་པའང་མེད་བཞིན་དུ་གསོ་སྦྱིན་འགོག་པ་ནི་ཆོས་བཞིན་མ་ཡིན་པར་གསོ་སྦྱིན་འགོག་པ་སྟེ། དེ་ལྟ་བུ་ནི་དགེ་འདུན་ལ་སྨོད་པར་གཏམ་དུ་བརྗོད་པ་མ་ཡིན་པའོ། །ཇི་ལྟར་ན་ཚུལ་ཁྲིམས་ཉམས་པ་མ་ཡིན་་་པ་གང་ཞེ་ན། ཕས་ཕམ་པའི་ཆོས་བཞིའི་ནང་ནས་གང་ཡང་རུང་། ཕས་ཕམ་པའི་ཆོས་ལས་འདས་པར་མ་གྱུར་པ་སྟེ། དེ་ལྟ་བུ་ནི་ཚུལ་ཁྲིམས་ཉམས་པ་མ་ཡིན་པའོ། །ཇི་ལྟར་ན་ལྟ་བ་ཉམས་པ་མ་ཡིན་ཞེ་ན། ལྟ་བ་དྲུག་བཅུ་རྩ་གཉིས་སུ་གཏོགས་པའི་ལྟ་བ་ལས་ལྟ་བ་གང་ལའང་རུང་། དེར་མ་གྱུར་པ་ཡིན་ཏེ། དེ་ལྟ་བུ་ནི་ལྟ་བ་མ་ཉམས་པའོ། །ཇི་ལྟར་ན་སྤྱོད་པ་མ་ཉམས་པ་ཡིན་ཞེ་ན། མི་སྤྱོད་པ་མི་སྤྱོད་ཅིང་དགེ་སློང་གི་བསླབ་པ་ལ་ཡང་སློབ་པ་སྟེ། དེ་ལྟ་བུ་ནི་སྤྱོད་པ་མ་ཉམས་པ་ཞེས་བྱའོ། །ཇི་ལྟར་ན་འཚོ་བ་མ་ཉམས་པ་ཡིན་ཞེ་ན། འཚོ་བ་ཡོངས་སུ་དག་པ་ཡིན་ཏེ། དེ་ལྟ་བུ་ནི་འཚོ་བ་མ་ཉམས་པ་ཞེས་བྱ་སྟེ། འདི་དག་ནི་ཆོས་བཞིན་མ་ཡིན་པས་གསོ་སྦྱིན་འགོག་པ་བཅུའོ། །ཆོས་བཞིན་གྱིས་གསོ་སྦྱིན་འགོག་པ་བཅུ་གང་ཞེ་ན། ཕས་ཕམ་པར་གྱུར་པ་དང་། ཕས་ཕམ་པ་གཏམ་དུ་བརྗོད་པར་གྱུར་པ་དང་། བསླབ་པ་ཕུལ་བར་གྱུར་པ་དང་། བསླབ་པ་ཕུལ་བར་གཏམ་དུ་བརྗོད་པར་གྱུར་པ་དང་། དགེ་འདུན་ལ་སྨོད་པར་གྱུར་པ་དང་། དགེ་འདུན་ལ་སྨོད་པ་གཏམ་དུ་བརྗོད་པར་གྱུར་པ་དང་། ཚུལ་ཁྲིམས་ཉམས་པར་གྱུར་པ་དང་། ལྟ་བ་ཉམས་པར་གྱུར་པ་དང་། སྤྱོད་པ་ཉམས་པར་གྱུར་པ་དང་། འཚོ་བ་ཉམས་པར་གྱུར་པའོ། །ཇི་ལྟར་ན་ཕས་ཕམ་པར་གྱུར་ཅེ་ན། གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་དགེ་སློང་དེ་ཕས་ཕམ་པ་བྱེད་པར་གྱུར་པ་དེ་ལྟ་
བུའི་རྣམ་པ་དང་། མཚན་མ་དང་། རྟགས་ཀྱིས་དགེ་སློང་དེ་ཕས་ཕམ་པའི་ཉེས་པ་བྱེད་པར་མཐོང་ན་དེས་དེ་ལ་གསོ་སྦྱིན་འགོག་པ་ནི་ཆོས་བཞིན་དུ་གསོ་སྦྱིན་འགོག་པ་སྟེ། དེ་ལྟ་བུ་ནི་ཕས་ཕམ་པར་གྱུར་པའོ། །ཇི་ལྟར་ན་ཕས་ཕམ་པར་གཏམ་དུ་བརྗོད་པར་གྱུར་པ་གང་ཞེ་ན། དེ་འདི་ལྟར་གཙུག་ལག་ཁང་གི་ནང་ངམ་ཕྱི་རོལ་དུའང་རུང་། དགེ་སློང་མང་པོ་དང་ལྷན་ཅིག་འདུས་ཤིང་འཁོད་ནས། དེ་དག་ཀྱང་དེ་ལས་བྱུང་བ་དང་། དེའི་རང་བཞིན་དང་། དེ་དང་མཐུན་པའི་གཏམ་དུའང་བརྗོད། དད་པ་ལས་ཐོས་པ་ཡང་ཡོད་དེ། རང་གི་རྣམ་པར་རྟོག་པ་ལས་བྱུང་བའང་ཡིན། དེས་ཐོས་པའང་ཡིན། དོགས་པའང་ཡིན། གཞན་དུ་གསོ་སྦྱིན་འགོག་པ་ནི་ཆོས་བཞིན་དུ་གསོ་སྦྱིན་འགོག་པ་ཞེས་བྱ་སྟེ། དེ་ལྟ་བུ་ནི་ཕས་ཕམ་པར་གཏམ་དུ་བརྗོད་པ་ཞེས་བྱའོ། །ཇི་ལྟར་ན་བསླབ་པ་ཕུལ་བ་ཡིན་ཞེ་ན། དགེ་སློང་གིས་གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་བསླབ་པ་ཕུལ་བ་དེའི་རྣམ་པ་དང་། དེའི་མཚན་མ་དང་། དེའི་རྟགས་ཀྱིས་དགེ་སློང་དེ་བསླབ་པ་ཕུལ་བ་མཐོང་ན། དེས་དེ་ལ་གསོ་སྦྱིན་འགོག་པ་ནི་ཆོས་བཞིན་དུ་གསོ་སྦྱིན་འགོག་པ་སྟེ། དེ་ལྟ་བུ་ནི་བསླབ་པ་ཕུལ་བ་ཞེས་བྱའོ། །ཇི་ལྟར་ན་བསླབ་པ་ཕུལ་བར་གཏམ་དུ་བརྗོད་པ་ཡིན་ཞེ་ན། དེ་འདི་ལྟར་གཙུག་ལག་ཁང་གི་ནང་ངམ་ཕྱི་རོལ་དུའང་རུང་། དགེ་སློང་མང་པོ་འདུས་ཤིང་འཁོད་ནས་དེ་དག་ཀྱང་དེ་ལས་བྱུང་བའམ། དེའི་རང་བཞིན་ནམ། དེ་དང་མཐུན་པའི་གཏམ་དུའང་བརྗོད། དད་པ་ལས་ཐོས་པའང་ཡིན། རང་གི་རྣམ་པ་ལས་རྣམ་པར་རྟོག་པ་ལས་བྱུང་བའང་ཡིན་ཏེ། དེས་ཐོས་པའང་ཡིན། དོགས་པའང་ཡིན་བཞིན་དུ་གསོ་སྦྱིན་འགོག་པ་སྟེ། དེ་ལྟ་བུ་ནི་བསླབ་པ་ཕུལ་བར་གཏམ་དུ་བརྗོད་པ་ཞེས་བྱའོ། །དགེ་འདུན་ལ་སྨོད་པར་གྱུར་པ་གང་ཞེ་ན། དགེ་སློང་གིས་གང་གི་རྣམ་པ་དང་། གང་གི་མཚན་མ་དང་། གང་གི་རྟགས་ཀྱིས་དགེ་སློང་དེ་དགེ་འདུན་ལ་སྨོད་པར་གྱུར་པ་དེ་ལྟ་བུའི་རྣམ་པ་དང་། དེའི་མཚན་མ་དང་། དེའི་རྟགས་ཀྱིས་དགེ་སློང་དེ་དགེ་འདུན་ལ་སྨོད་པར་བྱེད་པ་མཐོང་ན་དེས་དེ་ལ་གསོ་སྦྱིན་འགོག་པ་ནི་ཆོས་བཞིན་དུ་གསོ་སྦྱིན་
འགོག་པ་སྟེ། དེ་ལྟ་བུ་ནི་དགེ་འདུན་ལ་སྨོད་པར་གྱུར་པ་ཞེས་བྱའོ། །དགེ་འདུན་ལ་སྨོད་པར་གཏམ་དུ་བརྗོད་པར་གྱུར་པ་གང་ཞེ་ན། དེ་འདི་ལྟར་གཙུག་ལག་ཁང་གི་ནང་ངམ་ཕྱི་རོལ་དུའང་རུང་། དགེ་སློང་མང་པོ་ལྷན་ཅིག་ཏུ་འདུས་ཤིང་འཁོད་ནས་དེ་དག་ཀྱང་དེ་ལས་བྱུང་བའམ། དེའི་རང་བཞིན་ནམ། དེ་ལས་མཐུན་པའི་ལས་སུ་བརྗོད་པའང་ཡིན། དད་པ་ལས་ཐོས་པའང་ཡིན། རང་གི་རྣམ་པ་ལ་རྣམ་པར་རྟོག་པ་ལས་བྱུང་བའང་ཡིན། དེས་ཐོས་པའང་་་ཡིན། དོགས་པའང་ཡིན་བཞིན་དུ་གསོ་སྦྱིན་འགོག་པ་སྟེ། དེ་ལྟ་བུ་ནི་དགེ་འདུན་ལ་སྨོད་པར་གཏམ་དུ་བརྗོད་པར་གྱུར་པ་ཞེས་བྱའོ། །ཚུལ་ཁྲིམས་ཉམས་པར་གྱུར་པ་གང་ཞེ་ན། ཕས་ཕམ་པའི་ཆོས་བཞི་ལས་གང་ཡང་རུང་བའི་ཕས་ཕམ་པའི་ཆོས་ཞིག་བྱུང་བར་གྱུར་པ་དེ་ལྟ་བུ་ནི་ཚུལ་ཁྲིམས་ཉམས་པ་ཞེས་བྱའོ། །ལྟ་བ་ཉམས་པར་གྱུར་པ་གང་ཞེ་ན། ལྟ་བ་དྲུག་བཅུ་རྩ་གཉིས་སུ་གཏོགས་པའི་ལྟ་བ་ལས་གང་ཡང་རུང་ལྟ་བར་གྱུར་པ་དེ་ལྟ་བུ་ནི་ལྟ་བ་ཉམས་པ་ཞེས་བྱའོ། །སྤྱོད་པ་ཉམས་པ་གང་ཞེ་ན། མི་སྤྱོད་ཅིང་དགེ་སློང་གི་བསླབ་པ་ལ་མི་སློབ་པ་དེ་ལྟ་བུ་ནི་སྤྱོད་པ་ཉམས་པ་ཞེས་བྱའོ། །འཚོ་བ་ཉམས་པ་གང་ཞེ་ན། འཚོ་བ་ཡོངས་སུ་མ་དག་པ་ཡིན་ཏེ། དེ་ལྟ་བུ་ནི་འཚོ་བ་ཉམས་པ་ཞེས་བྱ་སྟེ། འདི་བཅུ་ནི་ཆོས་བཞིན་དུ་གསོ་སྦྱིན་འགོག་པར་བྱེད་པའོ། །སྐབས་འབྱེད་པ་འགོག་པར་བྱེད་པ་གང་ཞེ་ན། ཆོས་བཞིན་མ་ཡིན་པར་སྐབས་འབྱེད་པ་འགོག་པ་བཞི་དང་། ཆོས་བཞིན་སྐབས་འབྱེད་པ་འགོག་པ་བཞིའོ། །ཆོས་བཞིན་མ་ཡིན་པར་སྐབས་འབྱེད་པ་ལ་འགོག་པར་བྱེད་པ་བཞི་གང་ཞེ་ན། ཚུལ་ཁྲིམས་ཉམས་པའི་རྩ་བ་མེད་བཞིན་སྐབས་འབྱེད་པ་འགོག་པ་ནི་ཆོས་བཞིན་མ་ཡིན་པར་སྐབས་་་འབྱེད་པ་འགོག་པའོ། །ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའི་རྩ་བ་མེད་པར་སྐབས་འབྱེད་པ་འགོག་པ་ནི་ཆོས་བཞིན་མ་ཡིན་པར་སྐབས་འབྱེད་པ་འགོག་པ་སྟེ། རྣམ་པ་དེ་བཞི་ནི་ཆོས་བཞིན་མ་ཡིན་པར་སྐབས་འབྱེད་པ་ལ་འགོག་པའོ། །ཆོས་བཞིན་སྐབས་འབྱེད་པ་ལ་
འགོག་པར་བྱེད་པ་བཞི་གང་ཞེ་ན། ཚུལ་ཁྲིམས་ཉམས་པའི་རྩ་བ་ཡོད་པས་སྐབས་འབྱེད་པ་་་འགོག་པ་ནི་ཆོས་བཞིན་སྐབས་འབྱེད་པ་འགོག་པའོ། །ལྟ་བ་ཉམས་པ་དང་། སྤྱོད་པ་ཉམས་པ་དང་། འཚོ་བ་ཉམས་པའི་རྩ་བ་ཡོད་པ་ལ་སྐབས་འབྱེད་པ་་་འགོག་པ་ནི་ཆོས་བཞིན་དུ་སྐབས་འབྱེད་པ་འགོག་པ་སྟེ། འདི་བཞི་ནི་ཆོས་བཞིན་དུ་སྐབས་འབྱེད་པ་འགོག་པའོ། །ནང་དུ་བཞག་པ་གང་ཞེ་ན། ཀུན་དགའི་ནང་དུ་རུང་བའི་སར་མ་བསྐོས་པར་བཞག་པར་གྱུར་པ་དེ་ནི་བསྙེན་པར་རྫོགས་པའི་དགེ་སློང་རྣམས་ཀྱིས་བཟར་མི་རུང་བའོ། །རུང་བའི་སར་བསྐོས་པ་ནི་བཟར་རུང་བའོ། །ནང་དུ་བཙོས་པའི་བཟའ་བ་དང་བཅའ་བ་གང་ཞེ་ན། གང་ནང་དུ་བཙོས་པའི་བཅའ་བ་དང་བཟའ་བ་རྣམས་བསྙེན་པར་རྫོགས་་་པའི་དགེ་སློང་གིས་བཟར་མི་རུང་བའོ། །བཟར་མི་རུང་བ་དེ་ནི་ནང་དུ་བཙོས་པ་ཞེས་བྱའོ། །རང་གིས་བཙོས་པ་གང་ཞེ་ན། ཡངས་པའི་གྲོང་ཁྱེར་དུ་ལོ་ཉེས་པས་དཀོན་ཞིང་རྙེད་དཀའ་བར་གྱུར་པ་ན་བྲམ་ཟེ་དང་ཁྱིམ་བདག་་་དག་གིས་དགེ་འདུན་གྱི་ཟས་སྦྱར་བར་འདོད་པར་གྱུར་ནས། དེ་དག་འདི་སྙམ་དུ་སེམས་ཏེ། ཇི་སྟེ་ཁྱིམ་དུ་གཡོས་བྱས་ན་ནི་གཉེན་མང་པོ་དང་། མཛའ་བོ་མང་པོ་དང་། སྐྱེ་བོ་མང་པོ་ལ་སྦྱིན་པར་བྱ་དགོས་པར་འགྱུར་ཏེ། དེ་དག་གིས་དགེ་སློང་རྣམས་ལ་གནོད་པར་མཐོང་ནས། དེ་དག་གིས་དགེ་སློང་རྣམས་ཀྱི་དྲུང་དུ་སོང་ནས། བཙུན་པ་རྣམས་གང་གཙུག་ལག་ཁང་གི་ནང་དུ་གཡོས་བྱས་ཏེ། འབྲིམ་པར་བྱ་ན་ཉེས་པར་ཅིར་འགྱུར་ཞེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་གི་ཕྱི་རོལ་དུ་གཡོས་བྱས་ལ་བྲིམ་པར་ནི་གནང་ངོ་། །བཅོམ་ལྡན་འདས་ཀྱིས་གཙུག་ལག་ཁང་གི་ཕྱི་རོལ་དུ་གཡོས་བྱོས་ལ་བྲིམ་པར་བྱོས་ཤིག་ཅེས་གསུངས་པ་དང་། དེར་དུད་པ་ཆེ་ཞིང་མི་དབེན་པར་གྱུར། སྐྱེ་བོ་མང་པོ་དག་འོང་བས་ལང་ལོང་དུ་གྱུར་ནས་དགེ་སློང་དེ་དག་གིས་ཀུན་ལ་བགོས་པ་དང་། དགེ་སློང་དེ་དག་ལ་ཤིན་
དུ་ཉུང་བར་གྱུར་པས་དགེ་སློང་དེ་དག་རྨྱ་བར་གྱུར་ཏོ། །དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གཙུག་ལག་ཁང་གི་ནང་དུ་བརྟགས་པའི་ས་བསྐོས་ཏེ། དེར་གཡོས་བྱོས་ལ་བྲིམ་པར་བྱོས་ཤིག །བཅོམ་ལྡན་འདས་ཀྱིས་གཙུག་ལག་ཁང་གི་ནང་དུ་བརྟགས་པའི་ས་བསྐོས་ལ་དེར་གཡོས་བྱོས་ལ་བྲིམས་ཤིག་ཅེས་གསུངས་ནས། དགེ་སློང་དེ་དག་གིས་དེ་བཞིན་དུ་བྱས་པ་དང་། དེར་གཙུག་ལག་ཁང་གི་མི་དང་། དགེ་ཚུལ་ཕ་རྣམས་ཀྱིས་སྔར་རང་གི་དོན་དུ་དེ་བླངས་ནས་དེའི་འོག་ཏུ་གཡོས་བྱ་བའི་དགེ་སློང་རྣམས་ལ་ཅི་ཐོབ་ཐོབ་ཏུ་བྱིན་པ་དང་། དགེ་སློང་དེ་དག་གི་ཉུང་བར་གྱུར་ནས་དགེ་སློང་དེ་དག་རྨྱ་བར་གྱུར་ཏེ། དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུའི་ལོ་ཉེས་པ་ལ་དཀོན་ཞིང་རྙེད་དཀའ་བའི་ཚེ་རང་གི་གཡོས་བྱ་ཞིང་བཟའ་བར་རྗེས་སུ་གནང་ངོ་། །དེ་ཡང་བརྟགས་པའི་སར་བསྐོས་ན་དེར་ནི་ནང་དུ་འཇོག་པ་དང་། ནང་དུ་འཚོ་བའི་གནས་གཉིས་སུ་བདེ་བར་འགྱུར་རོ། །དེ་ལྟ་བུའི་ལོ་ཉེས་པས་དཀོན་པའི་རྙེད་དཀའ་བར་གྱུར་པ་མ་གཏོགས་པར་གང་་་རུང་བའི་སར་བསྐོས་པ་དང་མ་བསྐོས་པར་ཡང་རུང་སྟེ། རང་གིས་བཙོས་པ་ནི་བཟའ་མི་རུང་སྟེ། དེ་ནི་རང་གིས་བཙོས་པ་ཞེས་བྱའོ། །དགེ་སློང་གིས་འཚེད་པ་གང་ཞེ་ན། དགེ་སློང་ལ་ལ་ནི་མང་དུ་ཟ་བར་གྱུར། ལ་ལ་ནི་ཉུང་ངུ་ཟ་བ་སྟེ། དེ་ལ་གང་མང་དུ་ཟ་བ་དེ་དག་ལ་ནི་མི་འགྲངས་གང་ཉུང་ངུ་ཟ་བ་དེ་དག་ནི་ལྷག་ནས་དེ་གཞན་དག་ལ་བྱིན་ན། དེ་དག་བཅོམ་ལྡན་འདས་ཀྱིས་ཟར་མ་གནང་བས་ན་མི་ཟའོ། །དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བུའི་ལོ་ཉེས་ཤིང་དཀོན་ལ་དཀའ་ན་ནི་དགེ་སློང་གིས་བཙོས་པ་ཟར་གནང་་་ངོ་། །དེ་ཡང་གང་ཞེ་ན། གང་བསྙེན་པར་རྫོགས་པའི་དགེ་སློང་གིས་བཙོས་པ་སྟེ། འདི་ནི་དགེ་སློང་གིས་བཙོས་པ་ཞེས་བྱའོ། །བླངས་པ་གང་ཞེ་ན། གང་ངོ་
ཚ་བའི་དགེ་སློང་གིས་ཤེས་བཞིན་དུ་བླངས་པར་གྱུར་པ་སྟེ་འདི་ནི་བླངས་པ་་་ཞེས་བྱའོ། །བྱིན་ལེན་མ་བྱས་པ་གང་ཞེ་ན། གང་བུད་མེད་དམ། སྐྱེས་པའམ། མ་ནིང་ངམ། ཟ་མའམ། མཚན་གཉིས་སུ་ཡང་རུང་སྟེ། བྱིན་ལེན་མ་བྱས་པ་འདི་ནི་བྱིན་ལེན་མ་བྱས་པ་ཞེས་བྱའོ། །བླངས་པ་སླར་ལེན་པ་གང་ཞེ་ན། གང་བདག་གིས་སླར་བླངས་པ་ལས་ཕྱིས་གཞན་ལས་བྱིན་ལེན་བྱེད་པ་ནི་བླངས་པ་ལས་སླར་ལེན་པ་ཞེས་བྱའོ། །སྔ་དྲོའི་བྱིན་ལེན་གང་ཞེ་ན། གང་མ་ཟོས་པར་བྱིན་ལེན་བྱེད་པ་ཡིན་ཏེ། བཅོམ་ལྡན་འདས་ཀྱིས་ཡངས་པའི་གྲོང་ཁྱེར་དེ་ཉིད་དུ་གནང་བ་ནི་དེ་ལྟ་བུའི་ལོ་ཉེས་ཤིང་དཀོན་པ་རྙེད་དཀའ་བའི་ཚེ་དགེ་སློང་གིས་ཆོག་གོ་བར་བྱས་པ་ལས་སྔ་དྲོའི་བྱིན་ལེན་བྱས་པའི་འོག་ཏུ་ལྷག་མར་མ་བྱས་་་ཀྱང་བླས་ཟོ་ཞིག །འདི་ནི་སྔ་དྲོའི་དུས་སུ་བྱིན་ལེན་བྱས་པ་ཞེས་བྱའོ། །དེ་ནས་སླར་ཁྱེར་བ་གང་ཞེ་ན། དགེ་སློང་གང་དེར་ཟོས་ནས་ཀྱང་ཟས་ཁྱེར་ཞིང་འགྲོ་བ་སྟེ། དེ་ཡང་བཅོམ་ལྡན་འདས་ཀྱིས་ཡངས་པའི་གྲོང་ཁྱེར་དེ་ཉིད་ན་གནང་བ་ནི་དེ་ལྟ་བུའི་ལོ་ཉེས་ཤིང་དཀོན་པ་རྙེད་དཀའ་བར་གྱུར་པའི་ཚེ་ན་ནི་དགེ་སློང་གིས་སླར་ཁྱེར་ལ་ལྷག་མར་མ་བྱས་ཀྱང་ཟོ་ཞིག་ཅེས་གསུངས་པ་དེ་ནི་སླར་ཁྱེར་བ་ཞེས་བྱའོ། །ནགས་ཀྱི་ཚིག་གུ་ཅན་གང་ཞེ་ན། ནགས་ཀྱི་ཚིག་གུ་ཅན་ཞེས་བྱ་བ་ནི་་སྟ་རྒ་དང་། ཨོ་རུ་མ་ན་དང་། བྷ་ཏ་མ་ལ་སོགས་པ་གང་གཞན་ཡང་ནགས་ཀྱི་ཚིག་གུ་ཅན་གྱི་བཟའ་ཤིང་གི་འབྲས་བུ་རྣམས་ཏེ་དེ་དག་ཀྱང་བཅོམ་ལྡན་འདས་ཀྱིས་ཡངས་པའི་གྲོང་ཁྱེར་ན་གནང་བར་གསུངས་ཏེ། དེ་འདྲ་བའི་ལོ་ཉེས་པའི་དཀོན་པ་རྙེད་དཀའ་བའི་ཚེ་ན་དགེ་སློང་གིས་ཆོག་པར་བྱས་ཀྱང་ནགས་ཀྱི་ཚིག་གུ་དེ་ལྷག་མར་མ་བྱས་པར་ཡང་ཟོ་ཞིག་ཅེས་གསུངས་པ་ནི་ནགས་ཀྱི་ཚིག་གུ་ཅན་ཞེས་བྱའོ། །རྫིང་བུ་གང་ཞེ་ན། ཚེ་དང་ལྡན་པ་ཤཱ་རིའི་བུ་མཁྲིས་པ་དམར་པོའི་ནད་ཀྱིས་གཟིར་བ་ལ་སྨན་པས་པད་མོའི་རྩ་བའི་བཟའ་བའི་ཕྱིར་རུང་བར་ཐབས་བསྟན་ནས། དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་པད་མོ་ཅན་གྱི་རྫིང་བུ་ནས་པད་མོའི་རྩ་བ་བླངས་ནས་ཚེ་དང་ལྡན་པ་ཤཱ་རིའི་བུ་ལ་བྱིན་པ་དང་། དེས་ཀྱང་ཅུང་ཟད་ཅིག་ཟོས་ནས་ཕལ་
ཆེར་མ་འདོད་དེ། དགེ་སློང་རྣམས་ལ་བྱིན་པ་དང་། དགེ་སློང་རྣམས་ཀྱིས་ཀྱང་བདག་ཅག་ཆོག་པར་བྱས་ཟིན་གྱིས་མི་ཟའོ་ཞེས་སྨྲས་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟར་ལོ་ཉེས་ཤིང་དཀོན་པ་རྙེད་དཀའ་བའི་ཚེ་ནི་དགེ་སློང་གིས་ཆོག་པར་བྱས་ཀྱང་རྫིང་བུའི་ལྷག་མར་མ་བྱས་ཀྱང་ཟོ་ཞིག །དེ་ཡང་གང་ཞེ་ན། འདི་ལྟ་སྟེ། རི་ཤི་གྷ་ཏི་ཀ་དང་། ཁར་ཀ་ཏི་ཀ་དང་། ཀར་ཤིང་ག་ཀ་ཏ་ལ་སོགས་ཏེ། གང་གཞན་ཡང་ཆུའི་ནང་གི་འབྲས་བུ་རྣམས་སོ་ཞེས་བྱ་བ་འདི་ནི་རྫིང་བུ་ནས་སྐྱེས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་དེ་ལྟར་ལོ་ཉེས་ཤིང་དཀོན་པ་རྙེད་དཀའ་བའི་ཚེ་ཡངས་པ་ཅན་ན་ཇི་སྲིད་དགྱེས་ཀྱི་བར་དུ་བཞུགས་ནས་མཉན་དུ་ཡོད་པ་གང་ན་བ་དེར་སྤྱོད་ཅིང་གཤེགས་སོ། །རིམ་གྱིས་སྤྱོད་པ་སྤྱད་ནས་མཉན་དུ་ཡོད་པར་བྱོན་པ་དང་། མཉན་དུ་ཡོད་པ་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེར་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ངས་གང་ཡངས་པའི་གྲོང་ཁྱེར་ཆེན་པོ་ན་ལོ་ཉེས་ཤིང་དཀོན་ལ་རྙེད་དཀའ་བའི་ཚེ་དགེ་སློང་རྣམས་ལ་དངོས་པོ་བརྒྱད་གནང་བ་ནི་འདི་ལྟ་སྟེ། ནང་དུ་བཞག་པ་དང་། ནང་དུ་བཙོས་པ་དང་། རང་གིས་བཙོས་པ་དང་། དགེ་སློང་གིས་བཙོས་པ་དང་། སྔ་དྲོའི་དུས་སུ་བྱིན་ལེན་བྱས་པ་དང་། དེ་ནས་སླར་ཁྱེར་བ་དང་། ནགས་ཀྱི་ཚིག་གུ་ཅན་དང་། རྫིང་བུའི་རྣམས་གནང་ན་དངོས་པོ་དེ་དག་ཅི་ད་དུང་ཡང་དེར་རུང་བ་བཞིན་དུ་ཟའམ། བཙུན་པ་ཁ་ཅིག་ནི་འཚལ། ཁ་ཅིག་ནི་མི་འཚལ་ལོ། །དེ་ནས་བཅོམ་ལྡན་འདས་ཀྱིས་གླེང་གཞི་དེ་ཉིད་ཀྱི་ཕྱིར་དགེ་སློང་གི་དགེ་འདུན་བསྡུས་ནས་དགེ་སློང་རྣམས་ལ་བཀའ་སྩལ་པ། དགེ་སློང་རྣམས་གང་ཡངས་པའི་གྲོང་ཁྱེར་དུ་དེ་ལྟར་ལོ་ཉེས་ཤིང་དཀོན་པ་རྙེད་དཀའ་བའི་ཚེ་དངོས་པོ་བརྒྱད་པོ་འདི་དག་བརྩེ་བའི་ཕྱིར་དགེ་སློང་རྣམས་ཀྱིས་ཆོག་པར་བྱས་ཀྱང་རྗེས་སུ་གནང་བ་དག་ནི་ལོ་ཉེས་པའི་ཚེ་ནི་ཟོ་ཞིག །ལོ་ལེགས་པའི་ཚེ་ནི་བཟའ་བར་མི་
བྱའོ། །གང་གིས་ཟོས་པ་དེ་ནི་འདས་པ་དང་བཅས་པར་འགྱུར་རོ། །བཏིང་བ་གང་ཞེ་ན། སེམས་བསྐྱེད་པ་དགུས་ན་གཏན་པ་བཏིང་བར་འགྱུར་རོ། །དེ་ཡང་གང་ཞེ་ན། གཏན་པ་བཏིང་བའི་དགེ་སློང་གིས་ཐོག་མ་ནས་དེ་ལྟར་གཏན་པ་ལེན་པ་དང་། བཀྲུ་བ་དང་། འཚེད་པ་དང་། བརྒྱད་པ་དང་། འདྲ་བ་དང་། འཚེམ་པ་ན་སེམས་རྣམ་པ་གསུམ་བསྐྱེད་དེ། དགེ་སློང་བདག་མིང་འདི་ཞེས་བགྱི་བས་གོས་འདི་དགེ་འདུན་གྱི་གཏན་པ་བཏིང་བར་འགྱུར་རོ། །གདིང་བར་བྱའོ། །བདག་གིས་བཏིང་ངོ་། །བར་དུ་ཡང་སེམས་གསུམ་བསྐྱེད་པར་བྱ་སྟེ། བདག་དགེ་སློང་མིང་འདི་ཞེས་བྱ་བས་གོས་འདི་དགེ་འདུན་གྱི་གཏན་པ་བཏིང་བར་འགྱུར་རོ། །གདིང་བར་བྱའོ། །བདག་གིས་བཏིང་ངོ་། །ཟིན་པའི་མཇུག་གི་ཁབ་སོའི་ཚེ་ཡང་སེམས་རྣམ་པ་གསུམ་བསྐྱེད་པར་བྱ་སྟེ། བདག་དགེ་སློང་མིང་འདི་ཞེས་བྱ་བས་གོས་འདི་དགེ་འདུན་གྱི་གཏན་པ་བཏིང་བར་འགྱུར་རོ། །གདིང་བར་བྱའོ། །བདག་གིས་གདིང་ངོ་། །འདི་ལྟར་ཡང་གནས་གང་ན་དགེ་འདུན་འཁོད་པས་ཐོག་མར་གཏན་པ་བཏིང་བའི་ཚེ། མཚམས་དེའི་ནང་ནས་དགེ་སློང་ཇི་སྙེད་མཚུངས་པར་གནས་པ་རྒྱུད་ཤིན་དུ་ཡོངས་སུ་དག་པའི་རྣམས་ཀྱིས་ཀྱང་དགེ་་་འདུན་གྱིས་གཏན་པ་བཏིང་ངོ་ཞེས་ཐོས་པ་ལས་ཀྱང་རྗེས་སུ་ཡི་རངས་ན། དེ་དག་ཐམས་ཅད་ཀྱིས་ཀྱང་གཏན་པ་བཏིང་བ་ཞེས་བྱ་སྟེ། དེ་ལྟར་ན་བཏིང་བ་ཞེས་བྱའོ། །མ་བཏིང་བ་གང་ཞེ་ན། དེ་ལས་བཟློག་པ་ནི་མ་བཏིང་བ་སྟེ། འདི་ལྟར་ཡང་ཟླ་བ་གསུམ་མ་ཚང་བར་དགེ་འདུན་རྣམས་ཀྱིས་གཏན་པ་བཏིང་ན་གཏན་པ་མ་བཏིང་བ་ཞེས་བྱ་སྟེ། འདི་ནི་གཏན་པ་མ་བཏིང་བ་ཞེས་བྱའོ། །ཕྱུང་བ་གང་ཞེ་ན། མ་ལྟ་བུའི་ཚིག་བརྒྱད་ཀྱིས་ནི་གཏན་པ་ཕྱུང་བར་འགྱུར་ཏེ། དེ་ཡང་གང་ཞེ་ན། འདི་ལྟ་སྟེ་ཕྱུང་སྟེ་སོང་བ་དང་། ཟིན་པ་དང་། ཀུན་ཟིན་པ་དང་། ཉམས་པ་དང་། ཐོས་པ་དང་། མཚམས་ལས་འདས་པ་དང་། བསམ་པ་ཆད་པ་དང་། གསོལ་བའི་ལས་དང་ཚིག་བརྒྱད་དེ། འདི་ནི་ཕྱུང་བ་ཞེས་བྱའོ། །མ་ཕྱུང་བ་གང་ཞེ་ན། འདི་ལས་བཟློག་པ་ནི་མ་ཕྱུང་བ་སྟེ། འོན་ཀྱང་བར་དུ་
གཅོད་པ་བརྒྱད་ཀྱི་ནང་ནས་གང་ཡང་རུང་བ་བྱུང་བ་སྟེ། དགེ་སློང་བཏིང་བའི་གནས་ནས་དམིགས་བཞིན་དུ་བྱུང་སྟེ་སོང་ན་ཡང་གཏན་པ་མ་ཕྱུང་བ་ཞེས་བྱ་སྟེ། དེ་ལྟར་ན་གཏན་པ་མ་ཕྱུང་བ་ཞེས་བྱའོ། །ལྕི་བའི་ཡོ་བྱད་གང་ཞེ་ན། གང་བགོ་བར་མི་རིགས་པའོ། །ཡང་བའི་ཡོ་བྱད་གང་ཞེ་ན། གང་བགོ་བར་རིགས་པའོ། །བགོ་བར་རིགས་པའི་ཡོ་བྱད་གང་ཞེ་ན། གང་དགེ་སློང་ཤི་བའི་རྫས་རྣམས་བགོ་བར་བྱ་སྟེ། དེ་ཡང་གང་ཞེ་ན། གང་ཤི་བའི་ཆོས་གོས་མ་གཏོགས་པར་གང་དེ་ལས་གཞན་པ་ཡང་བའི་ཡོ་བྱད་རྣམས་ཏེ། འདི་ནི་བགོ་བར་རིགས་པའི་ཡོ་བྱད་ཅེས་བྱའོ། །བགོ་བར་མི་རིགས་པའི་ཡོ་བྱད་གང་ཞེ་ན། གང་དགེ་སློང་ཤི་བའི་རྫས་མི་བགོ་བར་བྱ་བ་རྣམས་ཏེ། དེ་ཡང་གང་ཞེ་ན། ཤི་བའི་ཆོས་གོས་མ་གཏོགས་པར་གང་དེ་ལས་གཞན་པའི་ལྕི་བ་རྣམས་ཏེ། འདི་ནི་བགོ་བར་མི་རིགས་པའི་ཡོ་བྱད་ཅེས་བྱའོ། །དེ་ལས་ཆོས་གོས་ཀྱི་སྨོད་པས་ལྕི་བའི་ཡོ་བྱད་དུ་གཞག་པ་ནི་ནད་གཡོག་གི་ཆོས་གོས་ཏེ། གང་དེ་ལས་གཞན་པའི་ཡོ་བྱད་ཡང་བ་ལྕགས་ལས་བྱས་པའི་སྣོད་ལྷུང་བཟེད་དང་། ལྷུང་བཟེད་ཆུང་ངུ་དང་། ལྷུང་བཟེད་མ་ཡིན་པ་རྣམས་ཀྱང་བགོ་བར་རིགས་པའི་ཡོ་བྱད་དོ། །ཁར་བ་ལས་བྱས་པ་དང་། ཆོལ་ཟངས་དང་། ལྡེ་མིག་དང་། གྲི་ཁབ་དང་། སེན་མོ་གཅད་པ་དང་། ནལ་ཟེ་དང་། ཞུགས་ལིང་དང་། སྟ་རེ་དང་། ཐལ་ཕྱགས་དང་། ཆུ་ཚགས་དང་འདི་རྣམས་ནི་བགོ་བར་རིགས་པའི་ཡོ་བྱད་དོ། །གང་ཡང་དེ་བས་ཡང་བའི་ཡོ་བྱད་དེ་དག་ཀྱང་བགོ་བར་རིགས་པའོ། །གང་ཡང་དེ་ལས་གཞན་པའི་ལྕི་བའི་ཡོ་བྱད་དེ་དག་ནི་བགོ་བར་མི་རིགས་པ་སྟེ། དེ་ཐམས་ཅད་ཕྱོགས་བཞིའི་དགེ་འདུན་གྱི་ཕྱིར་གཞག་པར་བྱའོ། །ཤིང་གི་སྣོད་རྣམས་ལས་ཡང་མིག་དང་། ཆོས་ཀྱི་ཆུ་ཚགས་དང་། ཕོར་བུ་ཆེན་པོ་དང་། ཁམ་པའི་ཕོར་བུ་དང་། འདི་རྣམས་ཀྱང་བགོ་བར་རིགས་པའི་ཡོ་བྱད་དོ། །གང་དེ་ལས་གཞན་པའི་ཡོ་བྱད་ཡང་བ་རྣམས་དེ་དག་ཀྱང་བགོ་བར་རིགས་པའོ། །གང་དེ་ལས་གཞན་པའི་ཡོ་བྱད་ལྕི་བ་རྣམས་དེ་དག་ནི་བགོ་བར་མི་རིགས་པ་སྟེ། ཐམས་ཅད་ཕྱོགས་བཞིའི་དགེ་འདུན་
གྱི་ཕྱིར་གཞག་པར་བྱའོ། །ཁམ་པའི་སྣོད་དུ་གཏོགས་པ་ལྷུང་བཟེད་དང་། ལྷུང་བཟེད་ཆུང་ངུ་དང་། ལྷུང་བཟེད་མ་ཡིན་པ་དང་། རྫ་མ་དང་། བུམ་པ་དང་། བུམ་བུ་དང་། རིལ་བ་སྤྱི་བླུགས་དང་། འདི་རྣམས་ནི་བགོ་བར་རིགས་པའི་ཡོ་བྱད་དོ། །གང་དེ་ལས་གཞན་པའི་ཡོ་བྱད་ཡང་བའི་རྣམས་དེ་དག་ནི་བགོ་བར་རིགས་པའོ། །གང་ཡང་དེ་ལས་ལྕི་བའི་ཡོ་བྱད་དེ་དག་ཀྱང་བགོ་བར་མི་རིགས་པ་སྟེ། ཐམས་ཅད་ཕྱོགས་བཞིའི་དགེ་འདུན་གྱི་ཕྱིར་གཞག་པར་བྱའོ། །ཚོན་རྩི་གང་བསྐོལ་བར་གྱུར་པ་ནི་ཕྱོགས་བཞིའི་དགེ་འདུན་གྱི་གོས་བཙོ་བར་བྱའོ། །གང་ཡང་མ་བསྐོལ་བའི་ཚོན་རྩི་ནི་བགོའོ། །ཚོན་ཆེན་པོ་ལྔ་ནི་མི་བགོ་བའོ། །རིན་པོ་ཆེ་རྣམས་ཀྱི་ཁྲི་ཡིན་ན་བསྒྱུར་ལ་བགོ་བར་བྱའོ། །ཆུང་ངུ་ན་གལ་ཏེ་ལྕགས་ལས་བྱས་པ་ཡིན་ན་ཡོ་བྱད་དུ་རུང་ན་ནི་གཞག་གོ །དེ་ལས་གཞན་དུ་ལྕི་བའི་ཡོ་བྱད་ཡིན་ན་དེ་ནི་བགོ་བར་མི་རིགས་པའོ། །གཞན་ཡང་གང་མི་འཚོང་བ་རྣམས་དང་། གང་མི་འཆང་བ་རྣམས་དང་། གང་མི་དགོས་པ་རྣམས་དང་། མི་བགོ་བ་རྣམས་དང་། གང་གཞན་དུ་མི་སྦྱིན་པ་རྣམས་དང་། གང་སུ་ལ་ཡང་སྦྱིན་དུ་མི་རུང་བའི་དངོས་པོ་ལྔ་ཡོད་དེ། དེ་ཡང་གང་ཞེ་ན། གཙུག་ལག་ཁང་གི་དངོས་པོ་དང་། གནས་ཁང་གི་དངོས་པོ་དང་། ཀུན་དགའི་དྲི་གཙང་ཁང་དང་། མལ་སྟན་དང་། མིའི་ཡོ་བྱད་དོ། །མིའི་ཡོ་བྱད་གང་ཞེ་ན། བཅོམ་ལྡན་འདས་ཀྱིས་གསུངས་པ། དགེ་འདུན་གྱིའམ། མཆོད་རྟེན་གྱི་ཡང་རུང་། འདི་ནི་མིའི་ཡོ་བྱད་ཅེས་བྱའོ། །མི་མ་ཡིན་པའི་ཡོ་བྱད་གང་ཞེ་ན། བལ་གླང་དང་། ར་དང་། ལུག་དང་། མ་ཧེ་སྟེ། དེ་དག་ཀྱང་དགེ་འདུན་གྱི་ཡང་རུང་མཆོད་རྟེན་གྱི་ཡང་རུང་སྟེ། བཅོམ་ལྡན་འདས་ཀྱིས་གནང་བར་གསུངས་པའོ། །འདི་ནི་མི་མ་ཡིན་པའི་ཡོ་བྱད་ཅེས་བྱའོ། །ཡོངས་སུ་ཟིན་པའི་ཡོ་བྱད་གང་ཞེ་ན། གང་གྲོང་ངམ། ནགས་ཚལ་ཏེ། གང་བུད་མེད་དམ། སྐྱེས་བུའམ། མ་ནིང་ངམ། ཟ་མའམ། མཚན་གཉིས་པ་ཡང་རུང་སྟེ། གཞན་གྱིས་ཟིན་པ་འདི་ནི་ཡོངས་སུ་ཟིན་པའི་ཡོ་བྱད་ཅེས་བྱའོ། །ཡོངས་སུ་མ་ཟིན་པའི་ཡོ་བྱད་གང་ཞེ་ན། གྲོང་ངམ། ནགས་ཚལ་ཏེ། བུད་མེད་དམ། སྐྱེས་་བུའམ། མ་ནིང་ངམ། ཟ་མའམ། མཚན་གཉིས་པ་གང་གིས་ཀྱང་ཡོངས་སུ་མ་ཟིན་པར་
གྱུར་པ་འདི་ནི་ཡོངས་སུ་མ་ཟིན་པའི་ཡོ་བྱད་ཅེས་བྱའོ། །བྱིན་ལེན་བྱ་བའི་ཡོ་བྱད་གང་ཞེ་ན། གང་དགེ་སློང་རྣམས་ཀྱིས་གཞན་ལས་བྱིན་ལེན་བྱས་ཤིང་བཟའ་བ་སྟེ། དེ་ཡང་གང་ཞེ་ན། ཆུ་དང་སོ་ཤིང་མ་གཏོགས་པར་གང་དེ་ལས་གཞན་པའི་ཁར་བཟའ་བ་ཐམས་ཅད་བྱིན་ལེན་བྱ་བའི་ཡོ་བྱད་དེ། འདི་ནི་བྱིན་ལེན་བྱ་བའི་ཡོ་བྱད་ཅེས་བྱའོ། །བྱིན་ལེན་མི་བྱ་བའི་ཡོ་བྱད་གང་ཞེ་ན། གང་དགེ་སློང་རྣམས་ལ་གཞན་གྱིས་མ་བྱིན་ཀྱང་བཟའ་བའི་རྣམས་ཏེ། དེ་ཡང་གང་ཞེ་ན། ཡོངས་སུ་སྤྱད་པའི་ཡོ་བྱད་ཐམས་ཅད་དང་། ཁར་བཟའ་བ་ཆུ་དང་སོ་ཤིང་སྟེ། འདི་ནི་བྱིན་ལེན་མི་བྱ་བའི་ཡོ་བྱད་ཅེས་བྱའོ། །ཤི་བའི་ཆོས་གོས་གང་ཞེ་ན། གང་སྡེ་ལྔ་རྣམས་ཤི་བའི་ཆོས་གོས་དེ་ནི་བཅོམ་ལྡན་འདས་ཀྱིས་སྡེ་ལྔ་རྣམས་ལ་དབྱར་གྱི་ནང་དུའམ། དབྱར་གྱི་ཕྱི་རོལ་མ་གཏོགས་པར་ཡང་ཤི་བའི་ཆོས་གོས་སོ་ཞེས་དུས་ཐམས་ཅད་དུ་ཡང་བགོ་བར་བྱའོ་ཞེས་གནང་་་་བར་གསུངས་ཏེ། འདི་ནི་ཤི་བའི་ཆོས་གོས་ཞེས་བྱའོ། །མཚན་མའི་ཆོས་གོས་གང་ཞེ་ན། ལོ་ལྔ་པའིའམ། ལོ་དྲུག་པའམ། དུས་ཆེན་པོའམ། བརྟད་པ་ན་ཐོབ་པའི་ཆོས་གོས་གང་རྙེད་པ་དེ་ནི་བཅོམ་ལྡན་འདས་ཀྱིས་དབྱར་གྱི་ནང་་་་དུའམ། དབྱར་གྱི་ཕྱི་རོལ་དུ་ཡང་རུང་སྟེ། དུས་ཐམས་ཅད་དུ་ཡང་བགོ་བར་བྱའོ་ཞེས་གནང་བར་གསུངས་ཏེ། འདི་ནི་མཚན་མའི་ཆོས་གོས་ཞེས་བྱའོ། །ཕྱག་དར་ཁྲོད་པའི་གོས་གང་ཞེ་ན། དགེ་སློང་རྣམས་ཀྱིས་ཕྱག་དར་ཁྲོད་པའི་གོས་ལྔ་འཆང་དུ་གནང་སྟེ། མེས་ཚིག་པ་དང་། བལ་གླང་གིས་ཟོས་པ་དང་། བྱི་བས་ཟོས་པ་དང་། སླར་འོངས་པའི་གོས་དང་། རུལ་བ་སྟེ། འདི་ནི་ཕྱག་དར་ཁྲོད་པའི་གོས་ཞེས་བྱའོ། །སྣ་ནས་བླུགས་པའི་ལས་གང་ཞེ་ན། སྣ་ནས་བླུགས་པའི་ལས་སུ་བཅོམ་ལྡན་འདས་ཀྱིས་དགེ་སློང་རྣམས་ལ་གནང་བ་ནི་མིག་་་ནད་ཀྱིས་ན་བའི་རྣམས་ཏེ། ཇི་ལྟར་ཚེ་དང་ལྡན་པ་པི་ལིན་དའི་བུ་ལ་གནང་བ་བཞིན་རྒྱས་པར་ཇི་ལྟར་འདུལ་བ་ལས་འབྱུང་བ་བཞིན་ཏེ། དེ་ནི་སྣ་ནས་་་བླུགས་པའི་ལས་ཞེས་བྱའོ། །བཤང་ལམ་ནས་བླུགས་པའི་ལས་གང་ཞེ་ན། དགེ་སློང་རྣམས་ཀྱིས་བྱ་བའི་ཐབས་གཞན་ཡོད་ཀྱི་བར་དུ་བཤང་ལམ་ནས་་་བླུགས་པའི་མི་བྱ་སྟེ། བྱེད་ན་ཉེས་པ་སྦོམ་པོར་འགྱུར་རོ། །བྱ་བའི་ཐབས་
གཞན་མེད་ན་གདོད་བྱ་སྟེ། འདི་ནི་བཤང་ལམ་དུ་བླུགས་པའི་ལས་ཞེས་བྱའོ། །མཚོན་གྱི་ལས་གང་ཞེ་ན། དགེ་སློང་རྣམས་ཀྱིས་བྱ་བའི་ཐབས་གཞན་ཡོད་བཞིན་དུ་གདོང་ལ་མཚོན་གྱི་ལས་བྱ་བར་མི་བྱའོ། །བྱས་ན་ཉེས་བྱས་སུ་འགྱུར་རོ། །བྱ་བའི་ཐབས་གཞན་མེད་ན་བྱ་བར་བྱ་སྟེ། འདི་ནི་མཚོན་གྱི་ལས་ཞེས་བྱའོ། །འབྲེག་པའི་ལས་གང་ཞེ་ན། དགེ་སློང་རྣམས་ཀྱིས་སྐྲ་དང་ཁ་སྤུ་མ་གཏོགས་པར་དེ་ལས་གཞན་པའི་ཡན་ལག་གི་སྤུ་རྣམས་མི་བྲེག་གོ །དེ་སྟེ་བྲེགས་ན་ཉེས་བྱས་སུ་འགྱུར་རོ། །འདི་ནི་འབྲེག་པའི་ལས་ཞེས་བྱའོ། །སྐྲ་བྲེག་པའི་ལས་གང་ཞེ་ན། དགེ་སློང་རྣམས་ཀྱིས་བབ་བབ་ཏུ་སྐྲ་བྲེག་པར་མི་བྱ་སྟེ། ཕྱོགས་གཅིག་ཏུ་སྐྲ་བྲེག་པར་བྱ་ཞིང་རྒན་རིམས་བཞིན་དུ་བྲེག་པར་བྱའོ། །ཡང་ན་སྤུ་གྲི་སོ་གང་གིས་བྲེགས་པར་གྱུར་ན་ཡང་བསླང་བར་མི་བྱའོ། །དེ་སྟེ་བསླངས་ན་ཉེས་བྱས་སུ་འགྱུར་ཏེ། འདི་ནི་སྐྲ་འབྲེག་པའི་ལས་ཞེས་་་བྱའོ། །ཆེད་དུ་བྱས་ཏེ་བཟའ་བ་གང་ཞེ་ན། ས་བོན་གྱི་རིགས་ལྔ་རྣམས་ལ་རུང་བའི་ཚད་ལྔས་རུང་བར་བྱས་ཏེ་བཟའ་བར་བྱའོ། །བཏུང་བ་བརྒྱད་ལ་ནི་ཆུས་བླུག་པར་བྱའོ། །གོས་བཅུ་རྣམས་ནི་ཁ་དོག་ངན་པར་བྱ་བ་གསུམ་གྱིས་ཁ་དོག་ངན་པར་བྱས་ཏེ་བཅང་བར་བྱའོ། །དེ་ལྟར་ན་ཆེད་དུ་བྱས་ཏེ་བགོ་བར་བྱའོ། །འབྲས་བུ་ཟ་བ་གང་ཞེ་ན། ཡངས་པའི་གྲོང་ཁྱེར་ན་འབྲས་བུ་མང་པོ་ཞིག་དགེ་སློང་རྣམས་གང་ཟག་གིར་བཟའ་བར་བྱས་ནས་ཟོས་པ་དང་བཅོམ་་་ལྡན་འདས་ཀྱིས་བཀའ་སྩལ་པ། གང་ཟག་གིར་བཟའ་བར་བྱས་ནས་བཟའ་བར་མི་བྱའི་དགེ་འདུན་ལ་བྲིམ་པར་བྱའོ། །བཅོམ་ལྡན་འདས་ཀྱིས་དགེ་འདུན་ལ་བྲིམ་པར་བྱོས་ཤིག་ཅེས་གསུངས་པ་དང་། དེ་ནས་གཅིག་གམ་གཉིས་སམ་གསུམ་རྣམས་ཀྱིའང་ལེན་པ་དང་། ཁ་ཅིག་གིས་ནི་མ་ཐོབ། ཁ་ཅིག་ལ་ནི་ལྷག་ནས་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། ཐམས་ཅད་ལ་སྙོམས་པར་བྲིམ་པར་བྱའོ། །དེ་དག་ཡང་བདམས་ཤིང་བདམས་ཤིང་བྲིམས་པ་དང་། བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་བལྟས་ནས་བདམ་ཞིང་བདམ་ཞིང་བྲིམ་པར་མི་བྱའོ། །དེ་དག་ཡང་སོར་མོས་སྟོན་ཅིང་
ལེན་པ་དང་། བཅོམ་ལྡན་འདས་ཀྱིས་བཀའ་སྩལ་པ། སོར་མོས་སྟོན་ཅིང་བླང་བར་མི་བྱའོ། །དེ་དག་གིས་ཐམས་ཅད་ལ་སྙོམས་པར་བྲིམ་མ་ནུས་ནས་འཁྲུགས་པར་གྱུར་པ་དང་། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། གསོལ་བ་ཉི་ཚེ་བ་བྱོས་ལ་གང་ཡོངས་སུ་བཟའ་བར་་འདོད་པས་རུང་བར་བྱེད་པ་དེས་དགེ་སློང་གི་རུང་བར་བྱེད་པ་ལྔས་རུང་བར་་་བྱས་ཏེ། བྱིན་ལེན་བྱོས་ལ་བཟའ་བར་བྱའོ། །འདི་ནི་འབྲས་བུའི་ཡོངས་སུ་སྤྱོད་པ་ཞེས་བྱའོ། །མིའི་ལས་ཡོངས་སུ་སྤྱད་པ་གང་ཞེ་ན། མིའི་སྟན་གསེར་ལས་བྱས་པའམ། དངུལ་ལས་བྱས་པའམ། ཤེལ་ལས་བྱས་པའམ། བཻ་ཌཱུརྱ་ལས་བྱས་པ་ཡང་རུང་། དགེ་སློང་སྟན་ལ་འདུག་ཅིང་སྣོད་དུ་བཟར་མི་རུང་སྟེ། འདི་ནི་མིའི་ལས་ཡོངས་སུ་སྤྱད་པ་ཞེས་བྱའོ། །མི་མ་ཡིན་པའི་ལས་སྤྱད་པ་གང་ཞེ་ན། ལྷའི་ཁང་པར་རམ། ཀླུའི་ཁང་པར་རམ། གནོད་སྦྱིན་གྱི་ཁང་པར་ཡང་རུང་སྟེ། གསེར་ལས་བྱས་པའམ། དངུལ་ལས་བྱས་པའམ། ཤེལ་ལས་བྱས་པའམ། བཻ་ཌཱུརྱ་ལས་བྱས་པའི་ས་གཞི་ལས་འགྲོ་བ་དང་། སྐས་ལ་འཛེག་པ་དང་། སྟན་ལ་འདུག་པ་དང་། སྣོད་ལ་ཡོངས་སུ་སྤྱོད་པ་ནི་དགེ་སློང་རྣམས་ཀྱིས་རུང་བ་བྱས་ཏེ། འདི་ནི་མི་མ་ཡིན་པའི་ལས་ཡོངས་སུ་སྤྱོད་པ་ཞེས་བྱའོ། །འདུལ་བ་སྡུད་པ་ལྔ་བརྒྱ་པ་གང་ཞེ་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་རིང་པོར་མ་ལོན་པ་ན་རྒྱལ་པོའི་ཁབ་ཀྱི་གྲོང་ཁྱེར་དུ་དགེ་སློང་ལྔ་བརྒྱ་འདུས་ན་མདོ་སྡེ་ཐམས་ཅད་དང་། འདུལ་བ་ཐམས་ཅད་དང་། མངོན་པའི་ཆོས་ཐམས་ཅད་བསྡུས་པར་བྱས་པ་འདི་ནི་འདུལ་བ་བསྡུས་པ་ལྔ་བརྒྱ་པ་ཞེས་བྱའོ། །བདུན་བརྒྱས་འདུལ་བ་སྡུད་པ་བདུན་བརྒྱ་པ་གང་ཞེ་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་དང་བཅུའི་འོག་ཏུ་གྲོང་ཁྱེར་ཡངས་པ་ཅན་དུ་ཡངས་པ་་་ཅན་ན་གནས་པའི་དགེ་སློང་རྣམས་ཀྱིས་མི་རུང་བའི་དངོས་པོ་བཅུ་རྣམས་ཕྱུང་སྟེ་མདོ་སྡེ་ངན་པ་དང་། འདུལ་བ་ངན་པ་དང་། སྟོན་པས་བསྟན་པ་ངན་པ་དང་། མདོ་སྡེ་ལས་འགལ། འདུལ་བ་ལས་མི་འབྱུང་། ཆོས་ཉིད་དང་མི་མཐུན་པ་ཡངས་པའི་དགེ་སློང་
རྣམས་ཀྱིས་འདི་ནི་རུང་བའོ་ཞེས་ཏེ་སྤྱོད་པར་བྱེད། ཤིན་དུ་སྤྱོད་པར་བྱེད། བསྒྲགས་པར་བྱེད་པ་དེ་ཡང་དགེ་སློང་བདུན་བརྒྱ་རྣམས་གཅིག་ཏུ་འདུས་ནས་འདི་ནི་ཆོས་མ་ཡིན་ནོ། །འདི་ནི་འདུལ་བ་མ་ཡིན་ནོ། །འདི་ནི་སྟོན་པས་བསྟན་པ་མ་ཡིན་ནོ་ཞེས་ཏེ། མངོན་དུ་ཞི་བར་བྱས་པ་འདི་ནི་འདུལ་བ་སྡུད་པ། བདུན་བརྒྱ་པའོ། །འདུལ་བ་བྱུང་བ་གང་ཞེ་ན། སོ་སོར་ཐར་པ་གཉིས་རྣམ་པར་འབྱེད་པ་དང་བཅས་པ་འདུལ་བའི་དངོས་པོ་བཅྭ་བརྒྱད་རྣམས་དང་། འདུལ་བ་གཅིག་གིས་ལྷག་པ་དང་། འདུལ་བའི་མ་ལྟ་བུ་དང་། འདུལ་བ་ལྔ་པ་དང་། འདུལ་བ་བཅུ་དྲུག་པ་དང་། འདུལ་བ་མ་ཎ་བ་ཀུ་ཞེས་བྱ་བ་དང་། འདུལ་བ་ཕྲན་ཚེགས་དང་། ཉི་ཚེ་བ་དང་། གླེང་གཞི་དང་། གཏམ་གྱི་དངོས་པོ་དང་། ཨུ་པཱ་ལིས་ཞུས་པ་དང་། ཐུན་མོང་བ་དང་། ཐུན་མོང་མ་ཡིན་པ་རྣམས་དང་། བསླབ་པའི་གནས་དང་། ལུང་བསྒོ་བ་ལྔ་བརྒྱ་དང་། སྐྱེས་པ་རབས་ཀྱི་སྡེ་ལྔ་བརྒྱ་དང་། སྔོན་གྱི་སྦྱོར་བ་ལྔ་བརྒྱ་པོ་འདི་རྣམས་ནི་འདུལ་བ་བྱུང་བ་ཞེས་བྱའོ། །ནག་པོར་སྟོན་པ་གང་ཞེ་ན། ནག་པོར་སྟོན་པ་བཞི་སྟེ། བཞི་གང་ཞེ་ན། འདིར་དགེ་སློང་ཞིག་འོངས་པ་ལ་དེ་འདི་སྐད་དུ་ངས་དེ་ཉིད་མངོན་སུམ་དུ་བཅོམ་ལྡན་འདས་ཀྱི་དྲུང་ནས་ཐོས་ཏེ། མངོན་སུམ་དུ་བླངས་པ་ནི་འདི་ལྟ་སྟེ། ཆོས་འདི་དང་། འདུལ་བ་འདི་སྟེ། འདི་ནི་སྟོན་པས་བསྟན་པའོ་ཞེས་སྨྲས་པ་དང་། དེས་དགའ་བར་ཡང་མི་བྱ། སྨད་པར་ཡང་མི་བྱའོ། །དགའ་བར་ཡང་མི་བྱེད། སྨོད་པར་ཡང་མི་བྱེད་ཅིང་རྣ་བས་མཉན་ལ་ཆོས་ཀྱི་ཚིག་དང་། ཡི་གེ་རྣམས་བླངས་ནས་མདོ་སྡེ་དང་་བསྟུན་པར་བྱ་འདུལ་བ་དང་བསྟུན་པར་བྱ་སྟེ། གལ་ཏེ་མདོ་སྡེ་དང་ཡང་བསྟུན། འདུལ་བ་དང་ཡང་བསྟུན་ན་མདོ་སྡེ་དང་ཡང་མི་མཐུན། འདུལ་བ་ལྟར་ཡང་མི་སྣང་། ཆོས་ཉིད་དང་ཡང་མི་མཐུན་ཏེ། དེ་ལྟ་བུར་གྱུར་ན་ཚིག་འདི་སྐད་ཅེས་སྨྲ་བར་བྱའོ། །ཚེ་དང་ལྡན་པ་དེ་ལྟར་འདི་ལྟ་བུའི་ཆོས་ནི་བཅོམ་ལྡན་འདས་ཀྱིས་ཀྱང་མ་གསུངས། ཚེ་དང་ལྡན་པས་ཀྱང་འདྲ་བ་ཉིད་ཆོས་ཉིད་དུ་མ་བཟུང་ཤིག །དེ་ལྟ་བུའི་ཆོས་ནི་བདག་གིས་མདོ་སྡེ་དང་བསྟུན་འདུལ་བ་དང་བསྟུན་ན་མདོ་སྡེ་དང་ཡང་མི་མཐུན། འདུལ་བ་ལྟར་ཡང་མ་གྱུར། ཆོས་ཉིད་དང་ཡང་འགལ་ཏེ། འདི་ནི་ཆོས་མ་ཡིན། འདི་
ནི་འདུལ་བ་མ་ཡིན་ནོ། །སྟོན་པས་ཀྱང་དེ་ལྟར་མ་བསྟན་ཏོ་ཞེས་ཤེས་པར་བྱ་སྟེ་དོར་བར་བྱའོ། །གཞན་ཡང་དགེ་སློང་ཞིག་འོངས་པ་ལ་དེས་འདི་སྐད་ཅེས་ཟེར་ཏེ། གནས་འདི་ཞེས་བྱ་བ་ན་དགེ་སློང་གི་དགེ་འདུན་ཆེན་པོ་དག་ཅིག་གནས་བརྟན་དང་བཅས། སོ་སོར་ཐར་པ་དང་བཅས་ཤིང་འཁོད་པའི་དགེ་སློང་གི་དགེ་འདུན་གྱི་དྲུང་ནས་བདག་མངོན་སུམ་དུ་ཐོས་ནས་མངོན་སུམ་དུ་བླངས་པ་ནི་འདི་ལྟ་སྟེ། ཆོས་ནི་འདིའོ་ཞེས་བྱ་བ་ནས་སྔ་མ་བཞིན་ནོ། །དེ་ལྟ་བུ་དེ་ལ་འདི་སྐད་སྨྲ་བར་བྱ་སྟེ། ཚེ་དང་ལྡན་པ་དེ་ལྟར་འདི་ལྟ་བུའི་ཆོས་དག་ནི་དགེ་སློང་གི་དགེ་འདུན་དེ་དག་གིས་ཆོས་སུ་འདུ་ཤེས་འདུལ་བར་འདུ་ཤེས་ཏེ། ཆོས་མ་ཡིན་པ་དང་། འདུལ་བ་མ་ཡིན་པར་སྨྲས་པས། ཚེ་དང་ལྡན་པ་ཁྱོད་ཀྱིས་དེ་ལྟར་ཆོས་མ་ཡིན་པར་བླངས་སོ་ཞེས་བྱ་བ་ནས་སྔ་མ་བཞིན་དུ་དོར་བར་བྱའོ། །གཞན་ཡང་དགེ་སློང་ཞིག་འོངས་པ་ལ་དེ་དག་འདི་སྐད་དུ་ཟེར་ཏེ། གནས་འདི་ཞེས་བྱ་བ་ན་མདོ་སྡེ་འཛིན་པ་དང་། འདུལ་བ་འཛིན་པ་དང་། མ་ལྟ་བུ་འཛིན་པའི་དགེ་སློང་རབ་ཏུ་མང་བ་ཞིག་་་འཁོད་པའི་དགེ་སློང་དེ་དག་གི་དྲུང་ནས་བདག་གིས་མངོན་སུམ་དུ་ཐོས་ནས་་་མངོན་སུམ་དུ་བླངས་པ་ནི་འདི་ལྟ་སྟེ། འདི་ནི་ཆོས་སོ་ཞེས་བྱ་བ་ནས་སྔ་མ་་བཞིན་དུ་སྨྲ་བ་ལ་འདི་སྐད་དུ་སྨྲ་བར་བྱ་སྟེ། ཚེ་དང་ལྡན་པ་དེ་ལྟར་འདི་ལྟ་བུའི་ཆོས་དག་ནི་དགེ་སློང་དེ་དག་གིས་ཆོས་སུ་འདུ་ཤེས། འདུལ་བར་འདུ་་ཤེས་ཏེ། ཆོས་མ་ཡིན་པ་དང་། འདུལ་བ་མ་ཡིན་པ་སྨྲས་པ་ལས་ཚེ་དང་ལྡན་པས་ལོག་པའི་ཆོས་བླངས་སོ་ཞེས་བྱ་བ་ནས་སྔ་མ་བཞིན་དུ་དོར་བར་བྱའོ། །གཞན་ཡང་དགེ་སློང་ཞིག་འོངས་པ་ལ་དེས་འདི་སྐད་དུ་སྨྲས་ཏེ། གནས་འདི་ཞེས་བྱ་བ་ན་དགེ་སློང་གནས་བརྟན་དང་། གནས་བརྟན་གང་ཡང་རུང་བ་དང་། ཤེས་པ་དང་། ཤེས་པ་གང་ཡང་རུང་བ་དང་། གཙོ་བོ་དང་གཙོ་བོ་གང་ཡང་རུང་བ་དག་གནས་པའི་དགེ་སློང་དེ་དག་ལས་བདག་གིས་མངོན་སུམ་དུ་ཐོས་ནས་མངོན་སུམ་དུ་བླངས་སོ་ཞེས་བྱ་བ་ནས་སྔ་མ་བཞིན་དུ་སྟེ། དེས་འདི་སྐད་དུ་སྨྲ་བར་བྱའོ། །ཚེ་དང་ལྡན་པ་དེ་ལྟར་དགེ་སློང་དེས་ཆོས་སུ་འདུ་ཤེས། འདུལ་བར་འདུ་ཤེས་ཏེ།
ཆོས་མ་ཡིན་པ་དང་། འདུལ་བ་མ་ཡིན་པར་སྨྲས་པ་ལས་ཚེ་དང་ལྡན་པས་དེ་ལྟར་ཆོས་མ་ཡིན་པར་བླངས་སོ་ཞེས་བྱ་བ་ནས་སྔ་མ་བཞིན་དུ་དོར་བར་བྱའོ། །ཅིའི་ཕྱིར་ནག་པོར་སྟོན་པ་ཞེས་བྱ་ཞེ་ན། དེ་དང་དེ་དག་ནི་ནག་པོར་སྟོན་པས་ནག་པོར་བསྟན་པ་སྟེ། ནག་པོར་བསྟན་པའོ། །འཕགས་པ་མ་ཡིན་པར་བསྟན་པའོ། །དེའི་ཕྱིར་ནག་པོར་བསྟན་པ་ཞེས་བྱའོ། །ཅིའི་ཕྱིར་ན་དེས་དེ་དག་སྨྲས་ཆོས་མ་ཡིན་པ་ཚར་གཅད་པ་དང་། ཆོས་བསྡུ་བ་དང་། དམ་པའི་ཆོས་ཀྱི་གཟུགས་བརྙན་སོ་སོར་བསལ་བའི་ཕྱིར་འཇིགས་པ་མེད་པས་ཉན་ཐོས་སུ་འགྱུར་བ་ནི་འདི་ལྟ་སྟེ། སངས་རྒྱས་ཀྱི་གསུང་འདིས་སོ། །འདི་ནི་ནག་པོར་སྟོན་པ་ཞེས་བྱའོ། །ཆེར་སྟོན་པ་གང་ཞེ་ན། ཆེར་སྟོན་པ་བཞི་སྟེ། བཞི་གང་ཞེ་ན། འདིར་དགེ་སློང་ཞིག་འོངས་ན་དེས་འདི་སྐད་དུ་སྨྲ་སྟེ། བཅོམ་ལྡན་འདས་ཀྱི་དྲུང་ནས་བདག་གིས་མངོན་སུམ་དུ་ཐོས་ནས་མངོན་སུམ་དུ་བླངས་པ་ནི་འདི་ལྟ་སྟེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་དེས་འདི་སྐད་དུ་སྨྲས་པ་ལ་དགའ་བར་ཡང་་མི་བྱ། སྨོད་པར་ཡང་མི་བྱའོ། །དགའ་བར་ཡང་མི་བྱ། སྨད་པར་ཡང་མི་བྱ་བར་རྣ་བས་མཉན་ལ་ཆོས་ཀྱི་ཚིག་དང་། ཡི་གེ་རྣམས་བླངས་ཏེ། མདོ་སྡེ་དང་ཡང་བསྟུན་པར་བྱ། འདུལ་བ་དང་བསྟུན་པར་བྱ་སྟེ། དེ་སྟེ་མདོ་སྡེ་དང་བསྟུན་འདུལ་བ་དང་བསྟུན་ན་ཡང་མདོ་སྡེ་དང་མཐུན། འདུལ་བ་ལས་སྣང་། ཆོས་ཉིད་དང་ཡང་མི་འགལ་ན། དེས་དེ་ལ་འདི་སྐད་དུ་སྨྲ་བར་བྱ་སྟེ། ཚེ་དང་ལྡན་པ་དེ་ལྟར་འདི་ལྟ་བུའི་ཆོས་ནི་བཅོམ་ལྡན་འདས་ཀྱིས་གསུངས་ཏེ། ཚེ་དང་ལྡན་པས་ཀྱང་ཆོས་དེ་བཞིན་དུ་བླངས་སོ། །བདག་གིས་ཀྱང་དེ་བཞིན་དུ་ཆོས་དེ་མདོ་སྡེ་དང་ཡང་བསྟུན། འདུལ་བ་དང་ཡང་བསྟུན་ན་མདོ་སྡེ་དང་མཐུན། འདུལ་བ་ལས་ཀྱང་འབྱུང་ཆོས་ཉིད་དང་ཡང་མི་འགལ་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་སྙམ་དུ་ཤེས་པར་བྱ་སྟེ། བཅང་བར་བྱའོ། །གཞན་ཡང་དགེ་སློང་ཞིག་འོངས་ནས་དེ་འདི་སྐད་སྨྲ་སྟེ།
གནས་འདི་ཞེས་བྱ་བ་ན་དགེ་སློང་ཆེན་པོའི་དགེ་འདུན་དག་ཅིག་གནས་བརྟན་་་དང་བཅས། སོ་སོར་ཐར་པ་དང་བཅས་ཤིང་འཁོད་པའི་དགེ་སློང་གི་དགེ་འདུན་དེ་དག་ལས་བདག་གིས་མངོན་སུམ་དུ་ཐོས་ནས། མངོན་སུམ་དུ་བླངས་པ་ཞེས་བྱ་བ་ནས་སྔ་མ་བཞིན་དུ་སྟེ། དེ་སྐད་སྨྲས་པ་དེ་ལ་དེས་འདི་སྐད་སྨྲ་སྟེ། ཚེ་དང་ལྡན་པ་དེ་ལྟར་ཆོས་འདི་ནི་དགེ་སློང་གི་དགེ་འདུན་དེས་ཆོས་སུ་འདུ་ཤེས། འདུལ་བར་འདུ་ཤེས་ཏེ། ཆོས་དང་འདུལ་བ་སྨྲས་པ་ལས་ཚེ་དང་ལྡན་པས་་་ཀྱང་ཆོས་འདི་བཞིན་དུ་ལེགས་པར་བླངས་སོ་ཞེས་བྱ་བ་ནས་སྔ་མ་བཞིན་དུ་བཅང་བར་བྱའོ། །གཞན་ཡང་དགེ་སློང་ཞིག་འོངས་ནས་དེས་འདི་སྐད་དུ་སྨྲས་ཏེ། གནས་འདི་ཞེས་བྱ་བ་ན་མདོ་སྡེ་འཛིན་པ། འདུལ་བ་འཛིན་པ། མ་ལྟ་བུ་འཛིན་པའི་དགེ་སློང་རབ་ཏུ་མང་པོ་དག་ཅིག་འཁོད་པའི་དགེ་སློང་དེ་དག་་་ལས་བདག་གིས་མངོན་སུམ་དུ་ཐོས་ནས། མངོན་སུམ་དུ་བླངས་པ་ནི་འདི་ལྟ་སྟེ། ཆོས་འདིའོ་ཞེས་བྱ་བ་ནས། སྔ་མ་བཞིན་དུ་དེ་སྐད་སྨྲ་བ་ལ། དེས་འདི་སྐད་སྨྲ་བར་བྱ་སྟེ། ཚེ་དང་ལྡན་པ་དེ་ལྟར་ཆོས་འདི་ནི་དགེ་སློང་དག་གིས་ཆོས་སུ་འདུ་ཤེས། འདུལ་བར་འདུ་ཤེས་ཏེ། ཆོས་དང་འདུལ་བར་སྨྲས་པ་ལས་ཚེ་དང་ལྡན་པས་ཀྱང་དེ་ལྟ་བུའི་ཆོས་དགེ་བར་བླངས་སོ་ཞེས་བྱ་བ་ནས་སྔ་མ་་་བཞིན་དུ་བཅང་བར་བྱའོ། །གཞན་ཡང་དགེ་སློང་ཞིག་འོངས་ནས་དེས་འདི་སྐད་དུ་སྨྲ་སྟེ། གནས་འདི་ཞེས་བྱ་བ་ན་དགེ་སློང་གནས་བརྟན་དང་། གནས་བརྟན་གང་ཡང་རུང་བ་དང་། ཤེས་པ་དང་། ཤེས་པ་གང་ཡང་རུང་བ་དང་། གཙོ་བོ་དང་། གཙོ་བོ་གང་ཡང་རུང་བ་ཞིག་གནས་པའི་དགེ་སློང་དེ་དག་ལས་བདག་གིས་མངོན་སུམ་དུ་ཐོས་ནས་མངོན་སུམ་དུ་བླངས་པ་ནི་འདི་ལྟ་སྟེ། ཆོས་འདིའོ་ཞེས་བྱ་བ་ནས་སྔ་མ་བཞིན་དུ་སྟེ། དེ་སྐད་སྨྲས་པ་ལ་དེས་འདི་སྐད་དུ་སྨྲ་བར་བྱ་སྟེ། ཚེ་དང་ལྡན་པ་དེ་ལྟར་ཆོས་འདི་ནི་དགེ་སློང་དེས་ཆོས་སུ་འདུ་ཤེས། འདུལ་བར་འདུ་ཤེས་ཏེ། ཆོས་དང་འདུལ་བར་སྨྲས་པ་ལས་ཚེ་དང་ལྡན་པས་ཀྱང་ཆོས་འདི་ནི་ལེགས་པར་བླངས་སོ་ཞེས་བྱ་བ་ནས་སྔ་མ་་་བཞིན་དུ་བཅང་བར་བྱའོ། །ཅིའི་ཕྱིར་ན་ཆེར་སྟོན་པ་ཞེས་
བྱ་ཞེ་ན། ཚིག་འདི་ཆེར་སྟོན་པ་སྟེ། ཆེར་སྟོན་པས་བསྟན་པའོ། །དེ་དག་ནི་འཕགས་པ་ལྟར་ཡང་སྟོན་པ་སྟེ། དེའི་ཕྱིར་ན་ཆེར་སྟོན་པ་ཞེས་བྱའོ། །ཅིའི་ཕྱིར་ན་དེ་དག་སྨྲས་ཞེ་ན། ཆོས་མ་ཡིན་པ་ཚར་གཅད་པ་དང་། ཆོས་བསྡུ་བ་དང་། དམ་པའི་ཆོས་ཀྱི་གཟུགས་བརྙན་སོ་སོར་བསལ་བའི་ཕྱིར་མི་འཇིགས་པས་བདག་ནི་ཉན་ཐོས་སུ་འགྱུར་བ་སྟེ། འདི་ལྟ་སྟེ་ཆོས་མ་ཡིན་པ་ཚར་གཅད་པ་དང་། ཆོས་བསྡུ་བའི་ཕྱིར་འདི་ནི་ཆེར་སྟོན་པ་ཞེས་བྱའོ། །དེ་ལ་དགེ་སློང་རྣམས་གང་འདི་སྔ་མའི་ནག་པོར་སྟོན་པ་བཞི་པོ་རྣམས་ནི་དགེ་སློང་རྣམས་ཀྱིས་ལེགས་པར་ཤིན་ཏུ་ཡང་དག་པའི་རྗེས་སུ་སྦྱོར། ཡང་དག་པའི་རྗེས་སུ་བསྟན་ཏེ། འདི་ནི་ཆོས་མ་ཡིན། འདི་ནི་འདུལ་བ་མ་ཡིན། འདི་ནི་སྟོན་པས་བསྟན་པ་མ་ཡིན་པའོ་ཞེས་ཤེས་པར་བྱས་ཏེ། དོར་བར་བྱའོ། །དེ་ལ་གང་འདི་ཕྱི་མའི་ཆེར་སྟོན་པ་བཞི་པོ་ནི་དགེ་སློང་རྣམས་ཀྱིས་ལེགས་པར་ཤིན་ཏུ་ཡང་དག་པའི་རྗེས་སུ་སྦྱོར། ཡང་དག་པའི་རྗེས་སུ་བསྟན་ཏེ། འདི་ནི་ཆོས་སོ། །འདི་ནི་འདུལ་བའོ། །འདི་ནི་སྟོན་པས་བསྟན་པའོ་ཞེས་ཤེས་པར་བྱ་སྟེ་བཅང་བར་བྱའོ། །འདྲེས་པ་གང་ཞེ་ན། གང་རྩ་བ་དང་སྡོང་བུ་དང་། ལོ་མ་དང་། མེ་ཏོག་དང་། འབྲས་བུའི་སྨན་རྣམས་སུ་སོ་སོར་རྣམ་པར་བཞག་པའི་རྒྱུ་ལས་འདྲེས་པར་གྱུར་པ་ནི་འདྲེས་པ་ཞེས་བྱའོ། །ཤིན་ཏུ་འདྲེས་པ་གང་ཞེ་ན། དེ་ནས་བླངས་ནས་སྔ་དྲོའི་དང་། དེ་ནས་བླངས་ནས་ཕྱི་དྲོའི་དང་། ཞག་བདུན་གྱི་དང་། ནམ་འཚོའི་བར་གྱི་སྟེ། ཕན་ཚུན་དུ་འདྲེས་ཏེ་སྔ་དྲོ་བཟའ་བར་བྱའོ། །སྔ་དྲོ་བར་གཏོགས་པ་ལས་སྔ་དྲོ་འདས་ན་བཟའ་བར་མི་བྱའོ། །དེ་ནས་བླངས་ནས་ཕྱི་དྲོའི་དང་། དེ་ནས་བླངས་ནས་ཞག་བདུན་པའི་དང་། ནམ་འཚོའི་བར་དུ་ཕན་ཚུན་འདྲེས་ན་ཕྱི་དྲོ་བཟའ་སྟེ། ཕྱི་དྲོ་ལས་འདས་ན་བཟའ་བར་མི་བྱའོ། །དེ་ནས་བླངས་ནས་ཞག་བདུན་པའི་དང་། དེ་ནས་བླངས་ནས་ནམ་འཚོའི་བར་དུ་ཕན་ཚུན་དུ་འདྲེས་ནས་ཞག་བདུན་པར་བཟའ་བར་བྱའོ། །ཞག་བདུན་པ་ལས་ཞག་བདུན་འདས་ན་བཟའ་བར་མི་བྱའོ། །ནམ་འཚོའི་བར་དུ་ནི་ནམ་འཚོའི་བར་དུ་
དེ་བཞིན་དུ་བཟའ་བར་བྱའོ། །འདི་ནི་ཤིན་ཏུ་འདྲེས་པ་ཞེས་བྱའོ། །ཀུན་དགར་རུང་བ་གང་ཞེ་ན། དགེ་སློང་གིས་རུང་བ་ནི་ཀུན་དགའི་ནང་དུ་འདུག་པའམ། ཀུན་དགའི་གནས་ཁང་གི་འདུག་པ་བླངས་སམ། ལེན་དུ་བཅུག་ཀྱང་རུང་སྟེ། འདི་ནི་སུའི་ཡིན་པ་དེ་ལ་འདི་སྦྱིན་ནོ་ཞེས་དེ་ལྟ་བུས་བླངས་ན་ནི་ཀུན་དགར་རུང་བ་ཞེས་བྱའོ། །ནགས་སུ་རུང་བ་གང་ཞེ་ན། ནགས་ཞེས་བྱ་བ་ནི་ཤིང་གི་ནགས་ཏེ། དེ་ལ་ཇི་སྙེད་ཀྱི་ཡལ་ག་དང་། ལོ་མ་དང་། འདབ་མ་དང་། མེ་ཏོག་རྣམས་ལ་གཅིག་ལ་གཅིག་ཁྱབ་པར་གྱུར་པ་རྒྱང་གྲགས་གཅིག་གི་མཐའ་ཚུན་ཆད་ལ་དེར་དགེ་སློང་་་གིས་གང་དུ་དགའ་བར་ཆོས་གོས་རྣམས་བཞག་ལ་དེ་ལ་གང་དུ་དགའ་བར་སྐྱ་་་རེངས་ཤར་གྱི་བར་དུ་གནས་པར་བྱ་སྟེ། འདི་ནི་ནགས་སུ་རུང་བ་ཞེས་བྱའོ། །འཁོར་གྱི་རུང་བ་གང་ཞེ་ན། དགེ་འདུན་གྱི་གཙུག་ལག་ཁང་ན་སོ་སོའི་ཁང་པའི་འཁོར་མང་དུ་གྱུར་ཏེ། དེ་དག་ཏུ་ཇི་ལྟར་རྙེད་པ་སོ་སོར་བྱིན་གྱིས་བརླབས་པ་བཞིན་བགོས་ཤིང་སྤྱད་པར་བྱ་བ་ནི་འཁོར་གྱི་རུང་བ་ཞེས་བྱའོ། །ཡུལ་གྱི་རུང་བ་གང་ཞེ་ན། འཛམ་བུའི་གླིང་གི་དུས་སུ་བྱང་གི་སྒྲ་མི་སྙན་གྱི་གླིང་དུ་དགེ་སློང་ཟན་རུང་སྟེ། ཡུལ་གྱིས་རུང་བ་ནི་འཛམ་བུའི་གླིང་འདིའི་དུས་ཀྱི་ཚེ་དེ་ན་བྱང་གི་སྒྲ་མི་སྙན་གྱི་གླིང་ནི་ནམ་ཕྱེད་དེ་ཇི་ལྟར་འཛམ་བུའི་གླིང་གི་དུས་ཀྱི་ཚེ་གླིང་བཞི་པོ་ཀུན་དུ་ཡང་སྦྱར་ཞིང་ཡུལ་དེར་ཟར་རུང་བ་ནི་ཡུལ་གྱི་རུང་བ་ཞེས་བྱའོ། །ཕྱོགས་ཀྱི་རུང་བ་གང་ཞེ་ན། སྨོད་པ་ཅན་གྱི་ལྗོངས་སུ་ལེན་པ་དང་བླངས་ནས་ཟ་བ་ནི་དགེ་སློང་གིས་རུང་བ་སྟེ། རྫུ་འཕྲུལ་ཆེན་པོ་དང་། མཐུ་ཆེན་པོའི་དགེ་སློང་རྣམས་སྨོད་པ་ཅན་གྱི་ལྗོངས་སུ་དེར་བསོད་སྙོམས་ཀྱི་ཕྱིར་་་དོང་བ་དང་། དེ་དག་ལ་སྨོད་པ་ཅན་གྱི་མི་རྣམས་ཀྱིས་རང་གི་ལག་ནས་བྱིན་ལེན་མི་བྱེད་པར་མདུན་དུ་འདོར་བར་བྱེད་པ་དང་། དགེ་སློང་དེ་རྣམས་ཇི་ལྟར་གྲུབ་པ་མི་ཤེས་ནས་དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། བྱིན་ལེན་ནི་རྣམ་པ་ལྔས་ཤེས་པར་བྱ་སྟེ། བྱིན་ལེན་རྣམ་པ་ལྔ་གང་ཞེ་ན། ལུས་ཀྱིས་ལུས་ལ་བྱ་བ་དང་། ལུས་ཀྱང་ལུས་ལ་ཟིན་པ་ལ་བྱ་བ་དང་། ལུས་ཀྱིས་
ཟིན་པས་ལུས་ལ་བྱ་བ་དང་། ལུས་ཀྱིས་ཟིན་པས་ལུས་ཀྱིས་ཟིན་པ་ལ་བྱ་བ་དང་། བོར་བ་དང་། བྱིན་ལེན་བྱས་པ་དང་ལྔ་སྟེ། འདི་ནི་ཕྱོགས་ཀྱི་རུང་བ་ཞེས་བྱའོ། །ལྗོངས་ཀྱི་རུང་བ་གང་ཞེ་ན། ཁ་བ་ཅན་གྱི་ལྗོངས་སུ་ལྷམ་ཡུ་བ་ཅན་དང་། ཡུ་མེད་གནང་བར་གསུངས་ཏེ། ལྗོངས་གཞན་དུ་ནི་མི་གནང་ངོ་། །ལྗོངས་ཨུ་སྨ་པ་རན་ཏ་ཀར་ནི་པགས་པ་དང་རྟག་ཏུ་ཁྲུས་གནང་བར་གསུངས་ཏེ། ལྗོངས་གཞན་དུ་ནི་མ་ཡིན་ནོ། །མཐའ་འཁོབ་ཀྱི་ལྗོངས་སུ་ནི་དགེ་འདུན་མང་པོ་་བཅུར་ལོངས་པ་མེད་ན་འདུལ་བ་འཛིན་པ་དང་ལྔས་བསྙེན་པར་རྫོགས་པར་་་གནང་བར་གསུངས་ཏེ། ལྗོངས་གཞན་དུ་ནི་མ་ཡིན་ནོ། །འདི་ནི་ལྗོངས་ཀྱི་རུང་བ་ཞེས་བྱའོ། །གོས་ཀྱི་རུང་བ་གང་ཞེ་ན། གོས་རྣམ་པ་བཅུ་མཚོན་གྱིས་བཅད་ཅིང་ཁ་དོག་ངན་པར་བྱས་ཏེ་བཅང་བ་ནི་དགེ་སློང་གིས་རུང་བ་སྟེ། འདི་ལྟ་སྟེ་བལ་དང་། ལྡུམ་བུ་ཤ་ན་ཀ་དང་། ཟར་མ་དང་། རྩྭ་དུ་ཀུ་ལ་དང་། རས་བལ་དང་། སྲིན་བལ་དང་། གོས་འཇམ་པོ་དང་། ཁ་ཆེ་དར་དང་། རྩྭ་ཀོ་ཏམ་བྷ་ཀ་དང་། ཀེ་ཡུ་ར་ཀ་དང་དེ་བཅུའོ། །གཞན་ཡང་དགེ་སློང་གི་གོས་སུ་རུང་བ་རྣམ་པ་བདུན་རུང་བར་བྱ་མི་དགོས་པར་བཅང་དུ་རུང་བ་ནི་འདི་ལྟ་སྟེ། སྦྱར་མ་དང་། བླ་གོས་དང་། མཐང་གོས་དང་། སྟེང་གཡོགས་དང་། དབྱར་གྱི་རས་ཆེན་དང་། གཡན་པའི་གཡོགས་མ་དང་། ཡོ་བྱད་ཀྱི་གོས་དང་། འདི་བདུན་ཏེ་འདི་ནི་གོས་ཀྱི་རུང་བ་ཞེས་བྱའོ། །ཁུ་བ་སྐྱུར་པོ་རུང་བ་གང་ཞེ་ན། དགེ་སློང་ན་བར་གྱུར་ནས་སྨན་པ་ལ་དྲིས་པ་དང་། སྨན་པས་ཁུ་བ་སྐྱུར་པོ་བཏུང་བར་བྱའོ་ཞེས་སྨྲས་པ་དང་། དགེ་སློང་དེ་དག་གིས་ཇི་ལྟར་བསྒྲུབ་པ་མ་ཤེས་ནས། དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ལ་རྗེས་སུ་གནང་བ་ནི་དྲོད་ཆུང་ཞིང་ཡི་ག་འཆུས་པར་གྱུར་པ་ལ་ཁུ་བ་སྐྱུར་པོ་་བྱོས་ཏེ་འཐུང་ཤིག །ཁུ་བ་སྐྱུར་པོ་ཇི་ལྟར་བྱ་ཞེ་ན། འབྲས་ཅན་བཙོས་པའི་ཁུ་བ་དང་། འབྲས་བཀྲུས་པའི་ཁུ་བ་དང་། ཞབས་ཀྱི་ཚིགས་པ་ལྷན་ཅིག་ཏུ་ཆུ་དྲོན་པོའི་ནང་དུ་བསྲེས་ལ་ཇི་ལྟར་རྩབས་བཞིན་དུ་སྐྱུར་བ་ན་བཏུང་བར་བྱ་སྟེ། དེ་ནི་དགེ་སློང་རྣམས་
ཀྱིས་དུས་མ་ཡིན་པའི་ཡང་དགོས་པར་འགྱུར་བ་སྟེ། བཅོམ་ལྡན་འདས་ཀྱིས་བཀའ་སྩལ་པ། དེ་ཡང་རྗེས་སུ་གནང་གིས་སླ་ཞིང་གསལ་བ་དང་རྙོག་པ་མེད་པ་ལས་རས་ལ་བཙགས་ཏེ་ཆུས་བསླད་ལ་ཉིན་པར་དང་མཚན་མོའི་ཐུན་དང་པོའི་བར་དུ་བཏུང་བར་བྱ་སྟེ། འདི་ནི་ཁུ་བ་སྐྱུར་པོའི་རུང་བའོ། །འདུལ་བ་གཞུང་དམ་པ་ལས་མ་ལྟ་བུའི་བསྙེན་པར་རྫོགས་པའི་ཕུང་པོ་དང་པོ་རྫོགས་སོ།། །།འདུལ་བ་གཞུང་དམ་པ། བམ་པོ་བཞི་བཅུ་རྩ་དགུ་པ། རབ་ཏུ་ལྡན་པའི་ཕུང་པོ་གང་ཞེ་ན། སྐབས་འབྱེད་པའི་རབ་ཏུ་ལྡན་པ་དང་། སྐབས་ཕྱེ་བ་འབུལ་བའི་རབ་ཏུ་ལྡན་པ་དང་། སྐབས་ཕྱེ་བ་ལེན་པའི་རབ་ཏུ་ལྡན་པ་དང་། སྐབས་ཕྱེ་བར་སྒྲོགས་པའི་རབ་ཏུ་ལྡན་པ་དང་། གསོ་སྦྱིན་གྱི་རབ་ཏུ་ལྡན་པ་དང་། གསོ་སྦྱིན་འབུལ་བའི་རབ་ཏུ་ལྡན་པ་དང་། གསོ་སྦྱིན་ལེན་པའི་རབ་ཏུ་ལྡན་པ་དང་། གསོ་སྦྱིན་སྒྲོགས་པའི་རབ་ཏུ་ལྡན་པ་དང་། དད་པའི་རབ་ཏུ་ལྡན་པ་དང་། དད་པ་ཕུལ་བའི་རབ་ཏུ་ལྡན་པ་དང་། དད་པ་ལེན་པའི་རབ་ཏུ་ལྡན་པ་དང་། དད་པ་སྒྲོགས་པའི་རབ་ཏུ་ལྡན་པ་དང་། ཡོངས་སུ་དག་པའི་རབ་ཏུ་ལྡན་པ་དང་། ཡོངས་སུ་དག་པ་འབུལ་བའི་རབ་ཏུ་ལྡན་པ་དང་། ཡོངས་སུ་དག་པ་ལེན་པའི་རབ་ཏུ་ལྡན་པ་དང་། ཡོངས་སུ་དག་པ་སྒྲོགས་པའི་རབ་ཏུ་ལྡན་པ་དང་། དད་པ་དང་ཡོངས་སུ་དག་པའི་རབ་ཏུ་ལྡན་པ་དང་། དད་པ་དང་ཡོངས་སུ་དག་པ་འབུལ་བའི་རབ་ཏུ་ལྡན་པ་དང་། དད་པ་དང་ཡོངས་སུ་དག་པ་ལེན་པའི་རབ་ཏུ་ལྡན་པ་དང་། དད་པ་དང་ཡོངས་སུ་དག་པ་སྒྲོགས་པའི་རབ་ཏུ་ལྡན་པ་དང་། མཆོད་རྟེན་གྱི་རབ་ཏུ་ལྡན་པ་དང་། མཆོད་རྟེན་གྱི་དངོས་པོའི་རབ་ཏུ་ལྡན་པ་དང་། མཆོད་རྟེན་གྱི་ཁྱམས་ཀྱི་ཕྲེང་གི་རབ་ཏུ་ལྡན་པ་དང་། མཆོད་རྟེན་གྱི་མི་ཟད་པའི་རབ་ཏུ་ལྡན་པ་དང་། མཆོད་རྟེན་སླར་བཅོས་པའི་རབ་ཏུ་ལྡན་པ་དང་། མཆོད་རྟེན་གྱི་རྒྱན་གྱི་རབ་ཏུ་ལྡན་པ་དང་། མཆོད་རྟེན་ལ་མཆོད་པའི་རབ་ཏུ་ལྡན་པ་དང་། ཟས་ཀྱི་རབ་ཏུ་ལྡན་པ་དང་། ཟས་དང་བཅས་པའི་རབ་ཏུ་ལྡན་པ་དང་། ཐུག་པའི་རབ་ཏུ་ལྡན་
པ་དང་། བཅའ་བའི་རབ་ཏུ་ལྡན་པ་དང་། མྱང་བའི་རབ་ཏུ་ལྡན་པ་དང་། བཟའ་བའི་རབ་ཏུ་ལྡན་པ་དང་། ལྷུང་བཟེད་ཀྱི་རབ་ཏུ་ལྡན་པ་དང་། གོས་ཀྱི་རབ་ཏུ་ལྡན་པ་དང་། གདིང་བའི་རབ་ཏུ་ལྡན་པ་དང་། ཁབ་ཀྱི་རབ་ཏུ་ལྡན་པ་དང་། ཁབ་རལ་གྱི་རབ་ཏུ་ལྡན་པ་དང་། གནས་འཆའ་བའི་རབ་ཏུ་ལྡན་པ་དང་། གནས་འཆའ་བ་བླངས་པའི་རབ་ཏུ་ལྡན་པ་དང་། གནས་འཆའ་བ་སྦྱིན་པའི་རབ་ཏུ་ལྡན་པ་དང་། གནས་འཆའ་བ་སོ་སོར་བཏང་བའི་རབ་ཏུ་ལྡན་པ་དང་། མཁན་པོའི་རབ་ཏུ་ལྡན་པ་དང་། ལྷན་ཅིག་སྤྱོད་པའི་རབ་ཏུ་ལྡན་པ་དང་། སློབ་དཔོན་གྱི་རབ་ཏུ་ལྡན་པ་དང་། ཉེ་གནས་ཀྱི་རབ་ཏུ་ལྡན་པ་དང་། མཁན་པོ་དང་སློབ་དཔོན་དང་ལྷན་ཅིག་སྤྱོད་པ་དང་ཉེ་གནས་ཀྱི་རབ་ཏུ་ལྡན་པ་དང་། དགེ་སློང་གི་རབ་ཏུ་ལྡན་པ་དང་། དགེ་ཚུལ་གྱི་རབ་ཏུ་ལྡན་པ་དང་། དངོས་པོའི་རབ་ཏུ་ལྡན་པ་དང་། གཙུག་ལག་ཁང་གི་རབ་ཏུ་ལྡན་པ་དང་། མལ་སྟན་གྱི་རབ་ཏུ་ལྡན་པ་དང་། ལས་གསར་གྱི་རབ་ཏུ་ལྡན་པ་དང་། ལས་གསར་དུ་བྱེད་པ་དང་རབ་ཏུ་ལྡན་པ་དང་། ཕྱག་འཚལ་བའི་རབ་ཏུ་ལྡན་པ་དང་། ཁུ་བ་སྐྱུར་པོའི་རབ་ཏུ་ལྡན་པ་དང་། ཕྱེ་མའི་རབ་ཏུ་ལྡན་པ་དང་། སྨན་གྱི་རབ་ཏུ་ལྡན་པ་དང་། བཏུང་བའི་རབ་ཏུ་ལྡན་པ་དང་། པགས་པའི་རབ་ཏུ་ལྡན་པ་དང་། ལྷམ་གྱི་རབ་ཏུ་ལྡན་པ་དང་། ཤིང་ལྷམ་གྱི་རབ་ཏུ་ལྡན་པ་དང་། དྲུད་པའི་རབ་ཏུ་ལྡན་པ་དང་། ཁར་བའི་རབ་ཏུ་ལྡན་པ་དང་། དྲ་བའི་རབ་ཏུ་ལྡན་པ་དང་། ཁབ་དང་དྲ་བའི་རབ་ཏུ་ལྡན་པ་དང་། སྒོག་སྐྱའི་རབ་ཏུ་ལྡན་པ་དང་། སྤུ་གྲིའི་རབ་ཏུ་ལྡན་པ་དང་། སྤུ་གྲིའི་ཤུབས་རབ་ཏུ་ལྡན་པ་དང་། ལྡེ་མིག་ཀྱོག་པའི་རབ་ཏུ་ལྡན་པ་དང་། སྒོ་ལྕགས་ཀྱི་རབ་ཏུ་ལྡན་པ་དང་། བཞོན་པའི་རབ་ཏུ་ལྡན་པ་དང་། གདུགས་ཀྱི་རབ་ཏུ་ལྡན་པ་དང་། བསིལ་ཡབ་ཀྱི་རབ་ཏུ་ལྡན་པ་དང་། རྔ་མའི་སྦྲང་ཡབ་ཀྱི་རབ་ཏུ་ལྡན་པ་དང་། སྦྲང་ཡབ་ཀྱི་ཡུ་བའི་རབ་ཏུ་ལྡན་པ་དང་། མེ་ལོང་གི་རབ་ཏུ་ལྡན་པ་དང་། ཕྲེང་བ་དང་དྲི་དང་བྱུག་པའི་རབ་ཏུ་ལྡན་པ་དང་། གར་དང་གླུ་དང་རོལ་མོ་བརྡུང་བའི་རབ་ཏུ་ལྡན་པ་དང་། ཚུལ་ཤིང་གི་རབ་ཏུ་ལྡན་པ་དང་། མིག་སྨན་གྱི་རབ་
ཏུ་ལྡན་པ་དང་། མིག་སྨན་གྱི་ཐུར་མའི་རབ་ཏུ་ལྡན་པ་དང་། མིག་སྨན་གྱི་སྣོད་ཀྱི་རབ་ཏུ་ལྡན་པ་དང་། གཏུན་དང་རབ་ཏུ་ལྡན་པ་དང་། ཉལ་བ་དང་རབ་ཏུ་ལྡན་པ་དང་། འདུག་པའི་རབ་ཏུ་ལྡན་པ་དང་། པུས་འཁྱུད་ཀྱི་རབ་ཏུ་ལྡན་པ་དང་། བརྡུང་བའི་ཤིང་གི་རབ་ཏུ་ལྡན་པ་དང་། སྐ་རགས་ཀྱི་རབ་ཏུ་ལྡན་པ་དང་། འུ་རྡོའི་རབ་ཏུ་ལྡན་པ་དང་། གོས་དཀྲིས་ཤིང་མདུད་པ་བོར་བའི་རབ་ཏུ་ལྡན་པ་དང་། སའི་རབ་ཏུ་ལྡན་པ་དང་། སྐྱེད་ཤིང་གི་རབ་ཏུ་ལྡན་པ་དང་། དངོས་པོའི་རབ་ཏུ་ལྡན་པ་དང་། ཚལ་གྱི་རབ་ཏུ་ལྡན་པ་དང་། རྩོད་པའི་རབ་ཏུ་ལྡན་པ་དང་། དབྱེན་གྱི་རབ་ཏུ་ལྡན་པ་དང་། འདུས་པའི་རབ་ཏུ་ལྡན་པ་དང་། བཏུད་པའི་རབ་ཏུ་ལྡན་པའོ། །མ་ལྟ་བུ་ལས་དངོས་པོ་གཉིས་ཀྱི་ལེའུ་སྟེ་རྫོགས་སོ།། །།སྐབས་འབྱེད་པའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་གྱིས་སྐབས་ཕྱེ་ཤིག་པར་རྗེས་སུ་གནང་སྟེ། དབྱར་གནས་པའི་དགེ་སློང་རྣམས་གཅིག་ཏུ་འདུས་ནས་མཐོང་བ་དང་། ཐོས་པ་དང་། དོགས་པའི་ཕྱིར་དགེ་འདུན་ལ་སྐབས་དབྱེ་བར་བྱའོ། །ཅིའི་ཕྱིར་ན་སྐབས་དབྱེ་བར་རྗེས་སུ་གནང་། དགེ་སློང་ལ་ངན་གྲོགས་སུ་འགྱུར་བའི་ཕྱིར་ཏེ། གཅིག་ལ་གཅིག་གླེང་བར་བྱེད། དྲན་པར་བྱེད། བརྗོད་པ་དང་རྗེས་སུ་སྟོན་པར་བྱེད་ཅིང་དེ་དག་ལ་མཐུས་ཆད་པ་དང་། བསྡིགས་པ་དང་། འཇིགས་པས་བསྡིགས་ན་གཙང་བ་དང་། ཉེས་པ་མེད་པ་ཁ་ན་མ་ཐོ་བ་མེད་པར་དེས་དེ་མ་ཐག་ཏུ་བྱས་པར་འགྱུར་ཏེ། འདི་ལྟར་བདག་ནི་དག་པའོ། །བདག་ནི་ཉེས་པ་མེད་པའོ་ཞེས་ཟེར་བ་འདི་ནི་སྐབས་འབྱེད་པའི་རབ་ཏུ་ལྡན་པ་ཞེས་བྱའོ། །སྐབས་ཕྱེ་བ་འབུལ་བའི་རབ་ཏུ་ལྡན་པ་གང་ཞེ་ན། དགེ་སློང་གང་ནད་པ་སྐབས་འབྱེད་པའི་གནས་སུ་འགྲོ་མི་ནུས་པ་ནི་སྐབས་ཕྱེ་བ་དབུལ་བར་བྱའོ། །གལ་ཏེ་ནད་པ་མ་ཡིན་པ་ལས་མ་སོང་ན་ཉེས་བྱས་སུ་འགྱུར་རོ། །གལ་ཏེ་དེ་ལ་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་འཇིགས་པར་འགྱུར་བ་ཞིག་མངོན་སུམ་དུ་གནས་པ་ཡོད་ན་དེས་་་ཀྱང་སྐབས་ཕྱེ་བ་དབུལ་
བར་བྱའོ། །གཞན་གྱིས་བཟུང་སྟེ་དབང་མེད་པར་གྱུར་པས་ཀྱང་སྐབས་ཕྱེ་བ་དབུལ་བར་བྱའོ། །དབུལ་བ་ནི་འདི་ལྟར་བྱ་སྟེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ཏེ། ལྷམ་ཕུད་ལ་དགེ་སློང་གི་མདུན་དུ་ཙོག་པུར་འདུག་སྟེ། ཐལ་མོ་རབ་ཏུ་སྦྱར་ལ་འདི་སྐད་ཅེས་སྨྲ་བར་བྱའོ། །ཚེ་དང་ལྡན་པ་དགོངས་ཤིག་དེང་ནི་དགེ་འདུན་གྱི་བཅྭ་ལྔའི་སྐབས་འབྱེད་པ་སྟེ། བདག་དགེ་སློང་མིང་འདི་ཞེས་བགྱི་བ་ལ་ཡང་དེང་བཅྭ་ལྔའི་སྐབས་དབྱེ་བ་དེ་ལ་བདག་དགེ་སློང་མིང་འདི་ཞེས་བགྱི་བ་ལ་ཡང་མཐོང་བ་དང་། ཐོས་པ་དང་། དོགས་པའི་གནས་གསུམ་དུ་བཙུན་པའི་དགེ་འདུན་ལ་སྐབས་འབྱེད་ཀྱིས། ཚེ་དང་ལྡན་པ་བདག་ལ་བརྩེ་བར་གྱིས་ཤིག །བརྩེ་བ་ཅན་བརྩེ་བའི་ཕྱིར་ཉེས་པ་ཤེས་པ་དང་མཐོང་བ་རྣམས་ཚེ་དང་ལྡན་པས་བདག་ལ་སྨྲོས་ཤིག །ཚེ་དང་ལྡན་པ་བདག་ལ་རྗེས་སུ་སྟོན་ཅིག་དང་ཆོས་བཞིན་དུ་སླར་བགྱིའོ་ཞེས་དེ་ལྟར་ལན་་་གཉིས་ལན་གསུམ་དུ་སྨྲ་བར་བྱའོ། །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །དེ་སྟེ་དེ་ལྟར་ནུས་ན་ནི་ལེགས་མི་ནུས་ན་འདུག་སྟེ་དབུལ་བར་བྱའོ། །འདུག་ཀྱང་མི་ནུས་ན་ཉལ་ཏེ་དབུལ་བར་བྱའོ། །ཉལ་ཏེ་ཡང་མི་ནུས་ན་ཆུང་ངུའང་འདི་སྐད་དུ་སྐབས་ཕྱེ་བ་འབུལ་ལོ་ཞེས་སྨྲས་ན་ཡང་སྐབས་ཕྱེ་བ་ཕུལ་བ་ཡིན་ནོ། །བདག་གི་ཕྱིར་སྐབས་ཕྱེ་བར་རྗོད་ཅིག་ཅེས་སྨྲས་ན་ཡང་སྐབས་ཕྱེ་བ་ཕུལ་བ་ཡིན་ནོ། །གང་གིས་ཀྱང་སྐབས་ཕྱེ་བ་འབུལ་མི་ནུས་ན་ལུས་ཀྱི་དམིགས་པས་ཕུལ་ན་ཡང་སྐབས་ཕྱེ་བ་ཕུལ་བ་ཞེས་བྱའོ། །ལུས་ཀྱིས་ཀྱང་མི་ནུས་ན་ཚིག་གི་བརྡ་ཙམ་གྱིས་ཕུལ་ན་ཡང་སྐབས་ཕྱེ་བ་ཞེས་བྱའོ། །ལུས་ཀྱི་དམིགས་པས་ཀྱང་མི་ནུས། ཚིག་གིས་ཀྱང་མི་ནུས་ན་དགེ་འདུན་ཐམས་ཅད་དེར་དེང་ཤིག །ཡང་དགེ་སློང་དེ་ཚུར་ཁུག་ཤིག །དགེ་འདུན་ཐམས་ཅད་དེར་མ་འདོང་ལ་དགེ་སློང་དེ་ཡང་དེར་མ་བཀུག་ན་དགེ་་་འདུན་གྱིས་ལས་མ་འདུས་པར་བྱས་པས་འདས་པ་དང་བཅས་པར་འགྱུར་རོ། །སྐབས་ཕྱེ་བ་ལེན་པའི་དགེ་སློང་གིས་སྐབས་ཕྱེ་བ་བླངས་པ་ལས་དེས་དུས་བྱས་ཏེ་ཤི་ན། སྐབས་ཕྱེ་བ་མ་ཕུལ་བ་ཞེས་བྱ་སྟེ། གཞན་ལ་སྐབས་ཕྱེ་བ་དབུལ་བར་བྱའོ། །དེ་ཡང་བདག་ཉིད་ཁྱིམ་པ་ཡིན་པར་ཁས་བླངས་ན་ཡང་སྐབས་ཕྱེ་བ་མ་ཕུལ་བ་
ཞེས་བྱ་སྟེ། གཞན་ལ་སྐབས་ཕྱེ་བ་དབུལ་བར་བྱའོ། །དེ་ཡང་དགེ་སྦྱོང་ངམ། མ་ནིང་ངམ། དགེ་སློང་མ་སུན་ཕྱུང་བའམ། ཕ་བསད་པའམ། མ་བསད་པའམ། དགྲ་བཅོམ་པ་བསད་པ་དང་། དགེ་འདུན་ལ་དབྱེན་བྱས་པའམ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་དུ་སོང་བའམ། རྐུན་གནས་ཅན་ནམ། སྔོན་དུ་ཉམས་པའམ། སྔར་ཉེས་པ་བྱུང་བའམ། འགྲོ་བ་གཞན་དུ་གནས་པ་རྣམས་ཡིན་པར་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་ཕུལ་བ་ཡིན་ཏེ། གཞན་ལ་སྐབས་ཕྱེ་བ་དབུལ་བར་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ན་ཡང་སྐབས་བྱེ་བ་མ་ཕྱེ་བ་ཞེས་བྱའོ། །དགེ་འདུན་གྱི་དབྱེན་བྱས་པ་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པ་རྣམས་ཡིན་པར་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་ཕུལ་བ་ཞེས་བྱ་སྟེ། འདི་ནི་སྐབས་ཕྱེ་བ་འབུལ་བའི་རབ་ཏུ་ལྡན་པ་ཞེས་བྱའོ། །སྐབས་ཕྱེ་བ་ལེན་པའི་རབ་ཏུ་ལྡན་པ་གང་ཞེ་ན། དགེ་སློང་གང་དགེ་འདུན་གྱི་དྲུང་ནས་སྐབས་ཕྱེ་བ་ལེན་པ་ན་དེས་འདི་ལྟར་བླང་བར་བྱའོ། །གཅིག་གིས་གཅིག་གིའམ། གཅིག་གིས་གཉིས་ཀྱིའམ། གཅིག་གིས་མང་པོའི་ཡང་རུང་སྟེ། ཇི་སྙེད་ཀྱི་མིང་སྨོས་ནུས་པ་དེ་སྙེད་ཀྱི་བླང་བར་བྱའོ། །སྐབས་ཕྱེ་བ་ལེན་པའི་དགེ་སློང་གིས་སྐབས་ཕྱེ་བ་བླངས་ནས་བརྒྱུག་པར་མི་བྱའོ། །མཆོང་བར་མི་བྱ། འཕར་བར་མི་བྱ། སའི་འོག་ནས་འགྲོ་བར་མི་བྱ། ནམ་མཁའ་ལས་འགྲོ་བར་མི་བྱ། མཚམས་ཀྱི་ཕྱི་རོལ་དུ་སྐབས་ཕྱེ་བ་བླང་བར་མི་བྱ། མཚམས་ཀྱི་ནང་ནས་ཤེས་བཞིན་པས་སྐབས་ཕྱེ་བ་བླང་བར་བྱའོ། །དེ་སྟེ་་་་མཚམས་ཀྱི་ཕྱི་རོལ་ནས་ལེན་ན་ཉེས་བྱས་སུ་འགྱུར་རོ། །དེ་སྟེ་མཚམས་ཀྱི་ནང་ནས་བླང་བ་ལས་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་སུམ་དུ་གནས་པར་གྱུར་ན་དེས་མཚམས་ཀྱི་ཕྱི་རོལ་ནས་འོངས་ཀྱང་ཉེས་པ་མེད་དེ།
འདི་ནི་སྐབས་ཕྱེ་བ་ལེན་པའི་རབ་ཏུ་ལྡན་པ་ཞེས་བྱའོ། །སྐབས་ཕྱེ་བ་བརྗོད་པའི་རབ་ཏུ་ལྡན་པ་གང་ཞེ་ན། སྐབས་ཕྱེ་བ་བརྗོད་པའི་དགེ་སློང་དགེ་འདུན་གྱི་ནང་དུ་མ་འོངས་པ་ལས་དུས་འདས་ན་སྐབས་ཕྱེ་བ་མ་བརྗོད་པ་ཞེས་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་བརྗོད་པ་ཞེས་བྱའོ། །དགེ་སྦྱོང་དང་། མ་ནིང་དང་། དགེ་སློང་མ་སུན་ཕྱུང་བ་དང་། ཕ་བསད་པ་དང་། མ་བསད་པ་དང་། དགྲ་བཅོམ་པ་བསད་པ་དང་། དགེ་འདུན་གྱི་དབྱེན་བྱས་པ་དང་། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བ་དང་། མུ་སྟེགས་ཅན་དང་། མུ་སྟེགས་ཅན་དུ་སོང་བ་དང་། རྐུན་གནས་དང་། སྔོན་ཉམས་པའམ། སྔར་ཉེས་པ་བྱུང་བའམ། འགྲོ་བ་གཞན་དུ་གནས་པ་རྣམས་སུ་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་བརྗོད་པ་ཞེས་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་བརྗོད་པ་ཞེས་བྱའོ། །དགེ་འདུན་ལ་དབྱེན་བྱས་པ་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པར་བདག་ཉིད་ཀྱིས་ཁས་བླངས་ན་ཡང་སྐབས་ཕྱེ་བ་མ་བརྗོད་པ་ཞེས་བྱའོ། །སྐབས་ཕྱེ་བར་བརྗོད་པའི་དགེ་སློང་གི་སྐབས་ཕྱེ་བ་བླངས་ནས་ཉལ་བར་མི་བྱ། སྙོམས་པར་འཇུག་པར་མི་བྱ་སྟེ། ཤེས་བཞིན་དུ་སྐབས་ཕྱེ་བར་བརྗོད་པར་བྱའོ། །དེ་ཡང་འདི་ལྟར་བརྗོད་དེ། གསོལ་བ་བྱས་པའི་འོག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ལ་སྐབས་འབྱེད་པའི་དགེ་སློང་གི་དྲུང་དུ་ཙོག་ཙོག་པོར་འདུག་ལ་ཐལ་མོ་རབ་ཏུ་སྦྱར་ཏེ་འདི་སྐད་སྨྲོས་ཤིག །དགོངས་ཤིག་ཚེ་དང་ལྡན་པ་དེང་དགེ་འདུན་གྱི་བཅོ་ལྔའི་སྐབས་འབྱེད་པ་སྟེ། དགེ་སློང་མིང་འདི་ཞེས་བགྱི་བའི་ཡང་དེང་བཅོ་ལྔའི་སྐབས་འབྱེད་པ་ལགས་ན་དགེ་སློང་མིང་འདི་ཞེས་བགྱི་བ་དེ་ལ་མཐོང་བ་དང་། ཐོས་པ་དང་། དོགས་པའི་གནས་གསུམ་དུ་བཙུན་པ་དགེ་འདུན་ལ་སྐབས་འབྱེད་ཀྱིས། ཚེ་དང་ལྡན་པ་བདག་ལ་བརྩེ་བར་གྱིས་ཤིག །བརྩེ་བ་ཅན་བརྩེ་བའི་ཕྱིར་བདག་གི་ཉེས་པ་ཤེས་དང་། མཐོང་བ་རྣམས་ཚེ་དང་ལྡན་པས་བདག་ལ་སྨྲོས་
ཤིག །ཚེ་དང་ལྡན་པས་བདག་ལ་རྗེས་སུ་སྟོན་ཅིག་དང་། ཆོས་བཞིན་དུ་སླར་བགྱིའོ་ཞེས་དེ་ལྟར་ལན་གཉིས་ལན་གསུམ་དུ་སྨྲ་བར་བྱ་སྟེ། དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །རྣམ་པ་བཞིས་ནི་སྐབས་ཕྱེ་བ་མ་བརྗོད་པ་ཞེས་བྱ་སྟེ། བཞི་གང་ཞེ་ན། ངོ་ཚ་མེད་པ་དང་། བག་མེད་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པའོ། །དེ་ལས་གང་ངོ་ཚ་མེད་པ་དང་། བག་མེད་པ་དང་། རྣམ་པ་གཉིས་ལ་ནི་ཉེས་པ་དང་བཅས་པར་འགྱུར་རོ། །དེ་ལ་གང་གཉིད་ཀྱིས་ལོག་པ་དང་། སྙོམས་པར་ཞུགས་པ་དང་རྣམ་པ་གཉིས་ལ་ནི་ཉེས་པ་མེད་པར་འགྱུར་ཏེ། འདི་ནི་སྐབས་དབྱེ་བ་བརྗོད་པའི་རབ་ཏུ་ལྡན་པ་ཞེས་བྱའོ། །གསོ་སྦྱིན་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གསོ་སྦྱིན་རྗེས་སུ་གནང་བ་ནི་ཟླ་བ་ཕྱེད་ཕྱེད་ཅིང་དགེ་སློང་རྣམས་གཅིག་ཏུ་འདུས་ནས་རང་གི་རྒྱུད་ལ་སོ་སོར་བལྟ་བར་བྱ་སྟེ། མཚན་མོའི་རྒྱུད་དང་ཉིན་པར་གྱི་རྒྱུད་དང་ཟླ་བ་གཅིག་གི་རྒྱུད་ལ་བདག་གིས་དེའི་བར་སྐབས་སུ་ལྟུང་བ་འགའ་ཞིག་བྱུང་ངམ་མ་བྱུང་། དེ་སྟེ་བྱུང་བར་གྱུར་ན་ཡིད་བརྟན་པའི་དགེ་སློང་ཞིག་རྙེད་ན་མཐོལ་བར་བྱའོ། །མ་རྙེད་ན་སེམས་ཀྱིས་བསྔོ་བར་བྱའོ་སྙམ་པ་འདི་ནི་གསོ་སྦྱིན་གྱི་རབ་ཏུ་ལྡན་པ་ཞེས་བྱ་སྟེ། ཅིའི་ཕྱིར་གསོ་སྦྱིན་ཞེས་བྱ་ཞེ་ན། སྡིག་པ་མི་དགེ་བའི་ཆོས་དང་། ཉོན་མོངས་པ་དང་། རྣམ་པར་མ་བྱུང་བ་དང་། རང་བཞིན་གྱིས་མ་དག་པའི་རྣམས་ངེས་པར་སྤོང་བར་འགྱུར་ཞིང་དག་པའི་རང་བཞིན་ཉེ་བར་ཐོབ་པར་འགྱུར་ཏེ། དེ་ལྟ་བུའི་ཕྱིར་གསོ་སྦྱིན་ཞེས་བྱའོ། །འདི་ནི་གསོ་སྦྱིན་གྱི་རབ་ཏུ་ལྡན་པ་ཞེས་བྱའོ། །གསོ་སྦྱིན་དབུལ་བའི་རབ་ཏུ་ལྡན་པ་གང་ཞེ་ན། དགེ་སློང་གང་ནད་པ་གསོ་སྦྱིན་གྱི་གནས་སུ་འགྲོ་མི་ནུས་པ་ནི་གསོ་སྦྱིན་དབུལ་བ་ཞེས་བྱའོ། །ནད་པ་མ་ཡིན་པར་མ་སོང་ན་ཉེས་བྱས་སུ་འགྱུར་རོ། །གལ་ཏེ་དེའི་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་སུམ་དུ་གནས་པར་གྱུར་ན་དེས་ཀྱང་གསོ་སྦྱིན་དབུལ་བར་བྱའོ། །དབང་
མེད་པ་ཞིག་ཏུ་ཟིན་པར་གྱུར་ཀྱང་གསོ་སྦྱིན་དབུལ་བར་བྱའོ། །དེ་ཡང་འདི་ལྟར་དབུལ་ཏེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ཏེ། དགེ་་སློང་གི་མདུན་དུ་ཙོག་ཙོག་པོར་འདུག་ནས་ཐལ་མོ་རབ་ཏུ་སྦྱར་ཏེ་ཚིག་འདི་་་སྐད་ཅེས་བརྗོད་དོ། །དགོངས་ཤིག་ཚེ་དང་ལྡན་པ་དེང་དགེ་འདུན་གྱི་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བགྱི་བའི་ཡང་བཅོ་ལྔའི་གསོ་སྦྱིན་ན། བདག་དགེ་སློང་མིང་འདི་ཞེས་བགྱི་བ་གསོ་སྦྱིན་ལ་དད་པ་དང་ཡོངས་སུ་དག་པ་དབུལ་ལོ། །དེ་བཞིན་ལན་གཉིས་ལན་གསུམ་དུ་བརྗོད་ཅིག །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །དེ་ལྟར་སྦྱིན་ནུས་ན་ནི་ལེགས། མི་ནུས་ན་འདུག་ལ་གསོ་སྦྱིན་ཕུལ་ཅིག །དེ་ཡང་ཕུལ་བ་ཞེས་བྱའོ། །འདུག་སྟེ་ཡང་མི་ནུས་ན་ཉལ་བས་ཀྱང་ཕུལ་བ་ཞེས་བྱའོ། །དེར་ཡང་མི་ནུས་ན་ཆུང་ངུ་ན་གསོ་སྦྱིན་འབུལ་ལོ་ཞེས་སྨྲས་ན་ཡང་ཕུལ་བ་ཡིན་ནོ། །བདག་གི་ཕྱིར་རྗོད་ཅིག་ཅེས་ཟེར་ན་ཡང་གསོ་སྦྱིན་ཕུལ་བ་ཡིན་ནོ། །གང་གིས་མ་ཡིན་གྱི་ལུས་ཀྱིས་དམིགས་ན་ཡང་གསོ་སྦྱིན་ཕུལ་བ་ཡིན་ནོ། །ལུས་ཀྱིས་མ་ཡིན་ངག་གིས་བརྗོད་ན་ཡང་གསོ་སྦྱིན་ཕུལ་བ་ཡིན་ནོ། །ལུས་ཀྱིས་ཀྱང་མ་ཡིན་ཚིག་གིས་ཀྱང་མ་ཡིན་ན་དགེ་འདུན་ཐམས་ཅད་དེའི་དྲུང་དུ་དེང་ཤིག །ཡང་ན་དེ་དགེ་འདུན་གྱི་ནང་དུ་ཁུག་ཤིག །དགེ་འདུན་ཡང་དེར་མ་དོང་ངམ་དེའང་དགེ་འདུན་གྱི་ནང་དུ་མ་བཀུག་པར་དགེ་འདུན་གྱིས་མ་འདུས་་་པར་ལས་བྱས་ན་འདས་པ་དང་བཅས་པར་འགྱུར་ཏེ། འདི་ནི་གསོ་སྦྱིན་དབུལ་བའི་རབ་ཏུ་ལྡན་པ་ཞེས་བྱ་སྟེ། གསོ་སྦྱིན་ལེན་པའི་གང་ཟག་གསོ་སྦྱིན་བླངས་ནས་དེ་ཉིད་དུ་དུས་འདས་ན་གསོ་སྦྱིན་མ་ཕུལ་བ་ཡིན་ཏེ། གཞན་ལ་དབུལ་བར་བྱའོ། །བདག་ཉིད་ཁྱིམ་པར་ཁས་བླངས་ན་གསོ་སྦྱིན་མ་ཕུལ་བ་ཡིན་ཏེ། གཞན་ལ་གསོ་སྦྱིན་དབུལ་བར་བྱའོ། །དགེ་སྦྱོང་ངམ། མ་ནིང་ངམ། དགེ་སློང་མ་སུན་ཕྱུང་བའམ། ཕ་བསད་པའམ། མ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པའི་སྐུ་ལ་ངན་སེམས་ཀྱིས་ཁྲག་ཕྱུང་བའམ། མུ་སྟེགས་ཅན་ནམ། མུ་སྟེགས་ཅན་དུ་
སོང་བའམ། རྐུན་གནས་དང་། སྔོན་ཉམས་པའམ། སྔར་ཉེས་པ་བྱུང་བའམ། འགྲོ་བ་གཞན་དུ་གནས་པར་བདག་ཉིད་ཁས་བླངས་ན་གསོ་སྦྱིན་མ་ཕུལ་བ་ཡིན་ཏེ། གཞན་ལ་གསོ་སྦྱིན་དབུལ་བར་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ན་ཡང་གསོ་སྦྱིན་མ་ཕུལ་བ་ཡིན་ཏེ། གཞན་ལ་དབུལ་བར་བྱའོ། །མི་གནས་པ་དང་། སོ་སོར་གནས་པ་དང་། བསླབ་པ་བྱིན་པ་བདག་ཉིད་ཀྱིས་ཁས་བླངས་ན་ཡང་གསོ་སྦྱིན་ཕུལ་བ་མ་ཡིན་ཏེ། གསོ་སྦྱིན་གཞན་ལ་ཕུལ་བར་བྱ་སྟེ། འདི་ནི་གསོ་སྦྱིན་དབུལ་བའི་རབ་ཏུ་ལྡན་པ་ཞེས་བྱའོ། །གསོ་སྦྱིན་ལེན་པའི་རབ་ཏུ་ལྡན་པ་གང་ཞེ་ན། གསོ་སྦྱིན་ལེན་པའི་དགེ་སློང་གིས་གསོ་སྦྱིན་བླངས་ནས་བརྒྱུག་པར་མི་བྱ། མཆོང་བར་མི་བྱ། འཕར་བར་མི་བྱ། སའི་འོག་ནས་འགྲོ་བར་མི་བྱ། ནམ་མཁའ་ལས་འགྲོ་བར་མི་བྱ། མཚམས་ཀྱི་ཕྱི་རོལ་དུ་གསོ་སྦྱིན་བླང་བར་མི་བྱ། མཚམས་ཀྱི་ནང་ནས་ཤེས་བཞིན་པས་གསོ་སྦྱིན་བླང་བར་བྱའོ། །དེ་སྟེ་མཚམས་ཀྱི་ཕྱི་རོལ་ནས་ལེན་ན་ཉེས་བྱས་སུ་འགྱུར་རོ། །དེ་སྟེ་དེས་མཚམས་ཀྱི་ནང་ནས་ལེན་པ་ལ་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་སུམ་དུ་གནས་པར་གྱུར་ན་དེས་མཚམས་ཀྱི་ཕྱི་རོལ་ནས་ལེན་ཀྱང་ཉེས་པ་མེད་དེ། འདི་ནི་གསོ་སྦྱིན་ལེན་པའི་རབ་ཏུ་ལྡན་པ་ཞེས་བྱའོ། །གསོ་སྦྱིན་བརྗོད་པའི་རབ་ཏུ་ལྡན་པ་གང་ཞེ་ན། གསོ་སྦྱིན་བརྗོད་པའི་དགེ་སློང་དེ་དགེ་འདུན་གྱི་ནང་དུ་མ་འོངས་པ་ལས་དུས་་་འདས་ཏེ་ཤི་ན་གསོ་སྦྱིན་མ་བརྗོད་པ་ཞེས་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ནའང་གསོ་སྦྱིན་མ་བརྗོད་པ་ཞེས་བྱའོ། །དགེ་སྦྱོང་ངམ། མ་ནིང་ངམ། དགེ་སློང་མ་སུན་ཕྱུང་བའམ། ཞེས་བྱ་བ་ནས་འགྲོ་བ་གཞན་དུ་གནས་པ་ཞེས་བྱ་བའི་བར་དུ་སྔ་མ་བཞིན་ཏེ། བདག་ཉིད་ཀྱིས་ཁས་བླངས་ནའང་གསོ་སྦྱིན་མ་བརྗོད་པ་ཞེས་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ནའང་གསོ་
སྦྱིན་མ་བརྗོད་པ་ཞེས་བྱའོ། །དགེ་འདུན་ལ་དབྱེན་བྱས་པ་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པར་བདག་ཉིད་ཀྱིས་ཁས་བླངས་ནའང་གསོ་སྦྱིན་མ་བརྗོད་པ་ཞེས་བྱ་སྟེ། འདི་ནི་གསོ་སྦྱིན་བརྗོད་པའི་རབ་ཏུ་ལྡན་པ་ཞེས་བྱའོ། །དད་པའི་རབ་ཏུ་ལྡན་པ་གང་ཞེ་ན། དད་པ་ཞེས་བྱ་བ་ནི་དགེ་འདུན་གྱི་ཆོས་བཞིན་དུ་བྱ་བ་རྣམས་ལ་ལྟ་བ་དང་། བློ་གྲོས་དང་། འདོད་པ་དང་། བསམ་པས་དད་པ་དབུལ་བ་དང་། དགེ་འདུན་གྱི་ཆོས་བཞིན་དུ་བྱ་བ་རྣམས་ལ་རྗེས་སུ་ཡི་རང་བ་དང་། ཉེ་བར་ཕྱོགས་པ་དང་། ཁས་བླངས་པ་དང་། ཁས་བླངས་ལེན་པར་བྱེད་པ་འདི་ནི་དད་པའི་རབ་ཏུ་ལྡན་པ་ཞེས་བྱའོ། །དད་པ་དབུལ་བའི་རབ་ཏུ་ལྡན་པ་གང་ཞེ་ན། དགེ་སློང་གང་ནད་པ་གསོ་སྦྱིན་གྱི་གནས་སུ་འགྲོ་མི་ནུས་པས་ནི་དད་པ་དབུལ་བར་བྱའོ། །དེ་སྟེ་མི་ན་བར་མ་སོང་ན་ཉེས་བྱས་སུ་འགྱུར་རོ། །གལ་ཏེ་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ཀྱི་ནང་ནས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་དུ་གནས་པར་གྱུར་ན་དེས་ཀྱང་དད་པ་དབུལ་བར་བྱའོ། །དབང་མེད་པས་ཟིན་པར་གྱུར་པ་ཡང་དད་པ་དབུལ་བར་བྱའོ། །དེ་ཡང་འདི་ལྟར་དབུལ་བར་བྱའོ། །སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་དགེ་སློང་གི་མདུན་དུ་ཙོག་ཙོག་པོར་འདུག་སྟེ་ཐལ་མོ་རབ་ཏུ་སྦྱོར་ལ་འདི་སྐད་སྨྲོས་ཤིག །དགོངས་ཤིག་ཚེ་དང་ལྡན་པ། བདག་དགེ་སློང་མིང་འདི་ཞེས་བགྱི་བ་ཡང་དགེ་འདུན་གྱི་ཆོས་བཞིན་དུ་བྱ་བ་ལ་དད་པ་དབུལ་ལོ། །དགེ་འདུན་གྱི་ཆོས་བཞིན་དུ་བྱ་བ་རྣམས་ལ་རྗེས་སུ་ཡི་རང་ངོ་ཁས་ལེན་ནོ། །ཁས་བླང་བར་བགྱིའོ་ཞེས་དེ་ལྟར་ལན་གཉིས་ལན་གསུམ་དུ་སྨྲ་བར་བྱའོ། །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །དེ་སྟེ་དེ་ལྟར་དབུལ་ནུས་ན་ནི་ལེགས། མི་ནུས་ན་འདུག་སྟེ་དབུལ་བར་བྱའོ། །འདུག་སྟེ་ཡང་མི་ནུས་ན་ཉལ་ཏེ་དབུལ་བར་བྱའོ། །ཉལ་ཏེ་ཡང་མི་ནུས་ན་ཆུང་ངུ་ན་འདི་སྐད་དུ་དད་པ་དབུལ་ལོ་ཞེས་སྨྲས་ནའང་དད་པ་ཕུལ་བ་ཡིན་ནོ། །
བདག་གི་ཕྱིར་ཡང་དད་པ་བརྗོད་ཅིག་ཅེས་ཟེར་ནའང་དད་པ་ཕུལ་བ་ཡིན་ནོ། །ངག་གིས་མ་ནུས་ཏེ་ལུས་ཀྱི་དམིགས་པས་བྱས་ནའང་དད་པ་ཕུལ་བ་ཡིན་ནོ། །ལུས་ཀྱིས་མ་ནུས་ཏེ་ཚིག་གིས་བརྡ་བྱས་ན་ཡང་དད་པ་ཕུལ་བ་ཡིན་ནོ། །ལུས་དང་ཚིག་གཉི་གས་བརྡ་བྱས་ན་ཡང་དད་པ་བྱིན་པ་ཡིན་ནོ། །ལུས་ཀྱིས་ཀྱང་མི་ནུས་ཚིག་གིས་ཀྱང་མི་ནུས་ན་དེར་དགེ་འདུན་ཐམས་ཅད་དེང་ཤིག །ཡང་ན་དགེ་འདུན་ཐམས་ཅད་ཀྱིས་དེ་ཁུག་ཤིག །དགེ་འདུན་ཐམས་ཅད་ཀྱང་དེར་མ་དོང་ལ་དགེ་སློང་དེའང་དེར་མ་བཀུག་ན་མ་འདུས་པར་བྱས་པ་སྟེ། དགེ་འདུན་ལས་བྱེད་པ་རྣམས་ཀྱང་འདས་པ་དང་བཅས་པར་འགྱུར་རོ། །དད་པ་ལེན་པའི་དགེ་སློང་གིས་དད་པ་བླངས་ནས་དེ་ཉིད་དུ་དུས་འདས་ཏེ་ཤི་ན་དད་པ་མ་ཕུལ་བ་ཞེས་བྱ་སྟེ། གཞན་ལ་དད་པ་དབུལ་བར་བྱ། ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ན་ཡང་དད་པ་མ་ཕུལ་བ་ཞེས་བྱ་སྟེ། གཞན་ལ་དད་པ་དབུལ་བར་བྱ། དགེ་སྦྱོང་ངམ། མ་ནིང་ངམ། དགེ་སློང་མ་སུན་ཕྱུང་བ་ཞེས་བྱ་བ་ནས། འགྲོ་བ་གཞན་དུ་གནས་པའི་བར་དུ་སྔ་མ་བཞིན་བདག་ཉིད་ཀྱིས་ཁས་བླངས་ནའང་དད་པ་མ་ཕུལ་བ་ཞེས་བྱ་སྟེ་གཞན་ལ་དད་པ་དབུལ་བར་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ནའང་དད་པ་མ་ཕུལ་བ་ཞེས་བྱའོ། །དགེ་འདུན་ཕྱེ་བའམ། མི་གནས་པའམ། སོ་སོར་གནས་པའམ། ཉེ་བར་ཕྱོགས་པའམ། བསླབ་པ་བྱིན་པར་བདག་ཉིད་ཀྱིས་ཁས་བླངས་ན་ཡང་དད་པ་མ་ཕུལ་བ་ཞེས་བྱ་སྟེ། འདི་ནི་དད་པ་དབུལ་བའི་རབ་ཏུ་ལྡན་པ་ཞེས་བྱའོ། །དད་པ་ལེན་པའི་རབ་ཏུ་ལྡན་པ་གང་ཞེ་ན། དགེ་སློང་གང་དགེ་སློང་གི་དྲུང་ནས་དད་པ་ལེན་པ་དེས་འདི་ལྟར་བྱ་སྟེ། གཅིག་གིས་གཅིག་གིའམ། གཅིག་གིས་གཉིས་ཀྱིའམ། གཅིག་གིས་མང་པོའིའམ། ཇི་སྙེད་ཀྱི་མིང་སྨོས་ནུས་པ་དེ་སྙེད་ཀྱི་བླང་བར་བྱའོ། །དད་པ་ལེན་པའི་དགེ་སློང་གིས་དད་པ་བླངས་ནས་བརྒྱུག་པར་མི་བྱ། མགྱོགས་པར་འགྲོ་བར་མི་བྱ། མཆོང་བར་མི་བྱ། འཕར་བར་མི་བྱ། སའི་འོག་ནས་འགྲོ་བར་མི་བྱ། ནམ་མཁའ་ལས་འགྲོ་བར་མི་བྱ། མཚམས་ཀྱི་ཕྱི་རོལ་ནས་བླང་བར་མི་བྱ།
མཚམས་ཀྱི་ནང་ནས་ཤེས་བཞིན་པས་དད་པ་བླང་བར་བྱའོ། །དེ་སྟེ་མཚམས་ཀྱི་ཕྱི་རོལ་ནས་ལེན་ན་ཉེས་བྱས་སུ་འགྱུར་རོ། །དེ་སྟེ་མཚམས་ཀྱི་ནང་ནས་ལེན་དུ་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་དུ་གནས་པར་གྱུར་ན། དེས་མཚམས་ཀྱི་ཕྱི་ནས་བླངས་ཀྱང་ཉེས་པ་མེད་དེ། འདི་ནི་དད་པ་ལེན་པའི་རབ་ཏུ་ལྡན་པ་ཞེས་བྱའོ། །དད་པ་བརྗོད་པའི་རབ་ཏུ་ལྡན་པ་གང་ཞེ་ན། དད་པ་བྱིན་པའི་དགེ་སློང་དགེ་འདུན་གྱི་ནང་དུ་མ་འོངས་པ་ལས་དུས་འདས་ཏེ་ཤི་ན་དད་པ་མ་བརྗོད་པ་ཞེས་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ན་དད་པ་མ་བརྗོད་པ་ཞེས་བྱའོ། །དགེ་སྦྱོང་ངམ། མ་ནིང་ངམ། དགེ་སློང་མ་སུན་ཕྱུང་བ་ཞེས་བྱ་བ་ནས་འགྲོ་བ་གཞན་དུ་གནས་པའི་བར་དུ་སྔ་མ་བཞིན་དུ་སྟེ། བདག་ཉིད་ཀྱིས་ཁས་བླངས་ནའང་དད་པ་མ་བརྗོད་པ་ཞེས་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ནའང་དད་པ་མ་བརྗོད་པ་ཞེས་བྱའོ། །དགེ་འདུན་ཕྱེ་བའམ། མི་གནས་པའམ། སོ་སོར་གནས་པའམ། ཉེ་བར་ཕྱོགས་པའམ། བསླབ་པ་བྱིན་པར་བདག་ཉིད་ཀྱིས་ཁས་བླངས་ནའང་དད་པ་མ་བརྗོད་པ་ཞེས་བྱའོ། །དད་པ་བརྗོད་པའི་དགེ་སློང་གིས་དད་པ་བླངས་ནས་མི་ཉལ་བར་བྱ། སྙོམས་པར་འཇུག་པར་མི་བྱའོ། །ཤེས་བཞིན་པས་དད་པ་བརྗོད་པར་བྱ། དེ་ཡང་འདི་ལྟ་བུར་བརྗོད་པར་བྱའོ། །སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ནས་དགེ་སློང་གི་མདུན་དུ་ཙོག་ཙོག་པོར་འདུག་སྟེ་ཐལ་མོ་རབ་ཏུ་སྦྱར་ལ་འདི་སྐད་དུ་སྨྲ་བར་བྱ་སྟེ། དགོངས་ཤིག་ཚེ་དང་ལྡན་པ། བདག་དགེ་སློང་མིང་འདི་ཞེས་བགྱི་བ་དགེ་འདུན་གྱི་ཆོས་བཞིན་དུ་མཛད་པ་ལ་དད་པ་དབུལ་ལོ། །དགེ་འདུན་གྱི་ཆོས་བཞིན་མཛད་པ་ལ་རྗེས་སུ་ཡི་རང་ངོ་། །རྗེས་སུ་མངོན་པར་འགྲོའོ་ཞེས་དེ་ལྟར་ལན་གཉིས་ལན་གསུམ་དུ་སྨྲ་བར་བྱའོ། །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །རྣམ་པ་བཞིས་ན་དད་པ་མ་བརྗོད་པ་ཞེས་བྱའོ། །བཞི་གང་ཞེ་ན།
ངོ་ཚ་མེད་པ་དང་། བག་མེད་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པའོ། །དེ་ལ་གང་ངོ་ཚ་མེད་པ་དང་། བག་མེད་པ་དང་ལྡན་པ་རྣམ་པ་འདི་གཉིས་ནི་ཉེས་པ་དང་བཅས་པར་འགྱུར་རོ། །གང་གཉིད་ཀྱིས་ལོག་པ་དང་། གང་སྙོམས་པར་ཞུགས་པ་རྣམ་པ་འདི་གཉིས་ནི་ཉེས་པ་མེད་པར་འགྱུར་བ་སྟེ། འདི་ནི་དད་པ་བརྗོད་པའི་རབ་ཏུ་ལྡན་པའོ། །ཡོངས་སུ་དག་པའི་རབ་ཏུ་ལྡན་པ་གང་ཞེ་ན། འདི་ལྟར་བདག་ནི་ཉེས་པ་མེད་པ། འདི་ལྟར་བདག་ནི་དག་པ། འདི་ལྟར་བདག་ནི་ཉེས་པ་མ་བྱུང་མོད་ཀྱིས་འོན་ཀྱང་ཟླ་བ་ཕྱེད་ཕྱེད་ཅིང་དགེ་སློང་གིས་སེམས་རྩེ་གཅིག་པས་བདག་གི་སེམས་ལ། བདག་གིས་ཇི་ལྟར་བླངས་པའི་ཚུལ་ཁྲིམས་ཀྱི་ཕུང་པོ་དང་ལྡན་པ་ལས་མ་གོད་དམ། མ་ཉམས་སམ། མ་རལ་ལམ། འདྲེས་པར་མ་བྱས་སམ། ཡོངས་སུ་དག་གམ། བདག་ལ་ཉེས་པ་མ་བྱུང་ངམ། ཉེས་པ་མེད་པ་ཡིན་ནམ་བརྟག་པར་བྱ་སྟེ། འདི་ནི་ཡོངས་སུ་དག་པའི་རབ་ཏུ་ལྡན་པ་ཞེས་བྱའོ། །ཡོངས་སུ་དག་པ་དབུལ་བའི་རབ་ཏུ་ལྡན་པ་གང་ཞེ་ན། དགེ་སློང་གང་ནད་པ་གསོ་སྦྱིན་གནས་སུ་འགྲོ་མི་ནུས་པས་ནི་ཡོངས་སུ་དག་པ་དབུལ་བར་བྱའོ། །དེ་སྟེ་མི་ན་བར་མ་སོང་ན་ཉེས་བྱས་སུ་འགྱུར་རོ། །ཇི་སྟེ་དེའི་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་དུ་གནས་པར་གྱུར་ན་དེས་ཀྱང་་ཡོངས་སུ་དག་པ་དབུལ་བར་བྱའོ། །དབང་མེད་པས་ཟིན་པར་གྱུར་པ་ཡང་ཡོངས་སུ་དག་པ་དབུལ་བར་བྱའོ། །དེ་ཡང་འདི་ལྟར་དབུལ་བར་བྱ་སྟེ། སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ཏེ་དགེ་སློང་གི་མདུན་དུ་ཙོག་ཙོག་་པོར་འདུག་ལ་ཐལ་མོ་སྦྱར་ཏེ་འདི་སྐད་དུ་སྨྲོས་ཤིག །དགོངས་ཤིག་ཚེ་དང་ལྡན་པ་དེང་དགེ་འདུན་གྱི་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བགྱི་བའི་ཡང་དེང་བཅོ་ལྔའི་གསོ་སྦྱིན་ཏེ། བདག་གི་བར་ཆད་ཀྱི་ཆོས་་རྣམས་ཀྱང་ཡོངས་སུ་དག་ན། ཚེ་དང་ལྡན་པས་ཀྱང་བདག་ལ་ཡོངས་སུ་དག་་པ་ཟུང་ཤིག་དང་། དགེ་
སློང་མིང་འདི་ཞེས་བགྱི་བ་ཡང་གསོ་སྦྱིན་གྱི་ཕྱིར་ཡོངས་སུ་དག་པ་དབུལ་གྱིས། གང་གི་ཕྱིར་ཚེ་དང་ལྡན་པས་དད་པ་འབུལ་བའི་ཚེ་ལོང་ལ་ཡོངས་སུ་དག་པར་བརྗོད་ཅིག་བརྗོད་པས་ན་གོ་བར་འགྱུར་རོ་ཞེས་དེ་ལྟར་ལན་གཉིས་ལན་གསུམ་དུ་སྨྲོས་ཤིག །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །དེ་སྟེ་དེ་ལྟར་དབུལ་ནུས་ན་ནི་ལེགས། མི་ནུས་ན་འདུག་སྟེ་དབུལ་བར་བྱའོ། །འདུག་སྟེའང་མི་ནུས་ན་ཉལ་ཏེ་དབུལ་བར་བྱའོ། །ཉལ་ཏེའང་མི་ནུས་ན་ཆུང་ངུ་ན་འདི་སྐད་ཡོངས་སུ་དག་པ་སྦྱིན་ནོ་ཞེས་སྨྲས་ན་ཡོངས་སུ་དག་པ་ཕུལ་བ་ཞེས་བྱའོ། །བདག་གིས་ཡོངས་སུ་དག་པ་རྗོད་ཅིག་ཅེས་ཟེར་ན་ཡང་ཡོངས་སུ་དག་པ་ཕུལ་བ་ཞེས་བྱའོ། །ཚིག་གིས་མི་ནུས་ཏེ་ལུས་ཀྱི་དམིགས་པས་ཕུལ་ན་ཡང་ཡོངས་སུ་དག་པ་དབུལ་བ་ཞེས་བྱའོ། །ལུས་ཀྱིས་མི་ནུས་ཏེ་ཚིག་གིས་བརྡ་བྱས་ན་ཡོངས་སུ་དག་པ་ཕུལ་བ་ཞེས་བྱའོ། །ལུས་དང་ངག་གཉི་གས་བརྡ་བྱས་ན་ཡང་ཡོངས་སུ་དག་པ་ཕུལ་བ་ཞེས་བྱའོ། །ལུས་དང་ངག་གིས་བརྡ་བྱེད་མི་ནུས་ན་དགེ་འདུན་ཐམས་ཅད་དེར་དེང་ཤིག །ཡང་ན་དགེ་སློང་དེ་ཚུར་ཁུག་ཤིག །དགེ་འདུན་ཐམས་ཅད་ཀྱང་དེར་མ་དོང་ལ་དགེ་སློང་ཡང་དེར་མ་བཀུག་ན་ལས་མ་འདུས་པར་བྱས་པ་སྟེ། དགེ་འདུན་རྣམས་ཀྱང་འདས་པ་དང་བཅས་པར་འགྱུར་རོ། །ཡོངས་སུ་དག་པ་ལེན་པའི་དགེ་སློང་གིས་ཡོངས་སུ་དག་པ་བླངས་པ་ལས་དེ་ཉིད་དུ་དུས་འདས་ཏེ་ཤི་ན་ཡོངས་སུ་དག་པ་མ་ཕུལ་བ་ཞེས་བྱ་སྟེ། གཞན་ལ་ཡོངས་སུ་དག་པ་དབུལ་བར་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་མ་ཕུལ་བ་ཞེས་བྱ་སྟེ། གཞན་ལ་ཡོངས་སུ་དག་པ་དབུལ་བར་བྱའོ། །དགེ་ཚུལ་ཕའམ། མ་ནིང་ངམ། དགེ་སློང་མ་སུན་ཕྱུང་བ་ཞེས་བྱ་བ་ནས། འགྲོ་བ་གཞན་དུ་གནས་པའི་བར་སྔ་མ་བཞིན་ཏེ། བདག་ཉིད་ཀྱིས་ཁས་བླངས་ན་ཡང་ཡོངས་སུ་དག་པ་མ་ཕུལ་བ་ཞེས་བྱ་སྟེ། ཡོངས་སུ་དག་པ་གཞན་ལས་དབུལ་བར་བྱའོ། །དེ་སྟེ་མ་ནིང་ཡིན་པར་བདག་ཉིད་ཀྱིས་ཁས་བླངས་ན་ཡང་ཡོངས་སུ་དག་པ་མ་ཕུལ་བ་ཞེས་བྱའོ། །དགེ་འདུན་ཕྱེ་བའམ།
མི་གནས་པའམ། སོ་སོར་གནས་པའམ། ཉེ་བར་ཕྱོགས་པའམ། བསླབ་པ་བྱིན་པར་བདག་ཉིད་ཀྱིས་ཁས་བླངས་ན་ཡང་ཡོངས་སུ་དག་པ་མ་ཕུལ་བ་ཞེས་བྱ་སྟེ། འདི་ནི་ཡོངས་སུ་དག་པ་དབུལ་བའི་རབ་ཏུ་ལྡན་པ་ཞེས་བྱའོ། །ཡོངས་སུ་དག་པ་ལེན་པའི་རབ་ཏུ་ལྡན་པ་གང་ཞེ་ན། དགེ་སློང་གང་དགེ་སློང་གི་དྲུང་ནས་ཡོངས་སུ་དག་པ་ལེན་ན་དེས་འདི་ལྟར་ལེན་པར་བྱ་སྟེ། གཅིག་གིས་གཅིག་གིའམ། གཅིག་གིས་གཉིས་ཀྱིའམ། གཅིག་གིས་མང་པོའི་རྣམས་ཀྱིའམ། ཇི་སྙེད་ཀྱི་མིང་སྨོས་ནུས་ན་དེ་སྙེད་ཀྱི་བླང་བར་བྱའོ། །ཡོངས་སུ་དག་པ་ལེན་པའི་དགེ་སློང་གིས་ཡོངས་སུ་དག་པ་བླངས་ནས་བརྒྱུག་པར་མི་བྱ། མགྱོགས་སུ་འགྲོ་བར་མི་བྱ། མཆོང་བར་མི་བྱ། འཕར་བར་མི་བྱ། སའི་འོག་ནས་འགྲོ་བར་མི་བྱ། ནམ་མཁའ་ལས་འགྲོ་བར་མི་བྱ། མཚམས་ཀྱི་ཕྱི་རོལ་ནས་ཡོངས་སུ་དག་པ་བླང་བར་མི་བྱ། གལ་ཏེ་མཚམས་ཀྱི་ཕྱི་རོལ་ནས་ལེན་ན་ཉེས་བྱས་སུ་འགྱུར་རོ། །དེ་སྟེ་མཚམས་ཀྱི་ནང་ནས་ལེན་དུ་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པ་ཞིག་མངོན་དུ་གནས་པར་གྱུར་ན་དེས་མཚམས་ཀྱི་ཕྱི་རོལ་ནས་བླངས་ཀྱང་ཉེས་པ་མེད་དོ། །འདི་ནི་ཡོངས་སུ་དག་པ་ལེན་པའི་རབ་ཏུ་ལྡན་པ་ཞེས་བྱའོ། །ཡོངས་སུ་དག་པ་བརྗོད་པའི་རབ་ཏུ་ལྡན་པ་གང་ཞེ་ན། ཡོངས་སུ་དག་པ་ལེན་པའི་དགེ་སློང་གིས་ཡོངས་སུ་དག་པ་བླངས་ནས། དགེ་འདུན་གྱི་ནང་དུ་མ་འོངས་པ་ལས་དུས་འདས་ཏེ་ཤི་ན་ཡོངས་སུ་དག་པ་མ་བརྗོད་པ་ཞེས་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་མ་བརྗོད་པ་ཞེས་བྱའོ། །དགེ་སྦྱོང་དང་། མ་ནིང་དང་། དགེ་སློང་མ་སུན་ཕྱུང་བ་ཞེས་བྱ་བ་ནས། འགྲོ་བ་གཞན་དུ་གནས་པའི་བར་དུ་སྔ་མ་བཞིན་ཏེ། བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་མ་བརྗོད་པ་ཞེས་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་མ་བརྗོད་པ་ཞེས་བྱའོ། །དགེ་འདུན་ཕྱེ་བའམ།
མི་གནས་པའམ། སོ་སོར་གནས་པའམ། ཉེ་བར་ཕྱོགས་པའམ། བསླབ་པ་བྱིན་པར་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་མ་བརྗོད་པ་ཞེས་བྱའོ། །ཡོངས་སུ་དག་པ་བརྗོད་པའི་དགེ་སློང་དེས་ཡོངས་སུ་དག་པ་བླངས་ནས་ཉལ་བར་མི་བྱ། སྙོམས་པར་འཇུག་པར་མི་བྱ་སྟེ། ཤེས་བཞིན་པས་ཡོངས་སུ་དག་པ་བརྗོད་པར་བྱ་སྟེ། དེའང་སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱོས་ལ་དགེ་སློང་གི་མདུན་དུ་ཙོག་ཙོག་པོར་འདུག་སྟེ་ཐལ་མོ་རབ་ཏུ་སྦྱོར་ལ་ཚིག་འདི་སྐད་སྨྲོས་ཤིག །དགོངས་ཤིག་ཚེ་དང་ལྡན་པ། དེང་དགེ་འདུན་གྱི་བཅོ་ལྔའི་གསོ་སྦྱིན་ཏེ། དགེ་སློང་མིང་འདི་ཞེས་བགྱི་བའི་ཡང་བཅོ་ལྔའི་གསོ་སྦྱིན་ཏེ། དགེ་སློང་མིང་འདི་ཞེས་བྱ་བའི་བར་ཆད་ཀྱི་ཆོས་རྣམས་ཀྱང་དག་གོ་ཞེས་བདག་ཉིད་མཆི་སྟེ། དེས་གསོ་སྦྱིན་ལ་ཡོངས་སུ་དག་པའང་དབུལ་ན་བདག་གིས་དེའི་མིང་ནས་བརྗོད་པར་བྱའོ། །ཚུལ་ཤིང་ཡང་ལོང་ཤིག་ཅེས་དེ་ལྟར་ལན་གཉིས་ལན་གསུམ་དུ་སྨྲོས་ཤིག །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །རྣམ་པ་བཞིས་ནི་ཡོངས་སུ་དག་པ་མ་བརྗོད་པ་ཞེས་བྱའོ། །བཞི་གང་ཞེ་ན། ངོ་ཚ་མེད་པ་དང་། བག་མེད་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པའོ། །དེ་ལ་གང་ངོ་ཚ་མེད་པ་དང་། གང་བག་མེད་པ་དང་རྣམ་པ་འདི་གཉིས་ནི་ཉེས་པ་དང་བཅས་པར་འགྱུར་རོ། །གང་གཉིད་ཀྱིས་ལོག་པ་དང་། སྙོམས་པར་ཞུགས་པ་དང་། རྣམ་པ་འདི་གཉིས་ནི་ཉེས་པ་མེད་པར་འགྱུར་བ་སྟེ། འདི་ནི་ཡོངས་སུ་དག་པ་བརྗོད་པའི་རབ་ཏུ་ལྡན་པ་ཞེས་བྱའོ། །དད་པ་དང་ཡོངས་སུ་དག་པའི་རབ་ཏུ་ལྡན་པ་གང་ཞེ་ན། གང་དུ་གསོ་སྦྱིན་དང་དགེ་འདུན་གྱི་ལས་བྱེད་པ་ན་དེར་དད་པ་དང་ཡོངས་སུ་དག་པ་བསྲེས་ཏེ་དབུལ་བར་བྱ་སྟེ། འདི་ནི་དད་པ་དང་ཡོངས་སུ་དག་པའི་རབ་ཏུ་ལྡན་པ་ཞེས་བྱའོ། །དད་པ་དང་ཡོངས་སུ་དག་པ་དབུལ་བའི་རབ་ཏུ་ལྡན་པ་གང་ཞེ་ན། དགེ་སློང་གང་ནད་པ་གསོ་སྦྱིན་གྱི་གནས་སུ་འགྲོ་མི་ནུས་པ་ནི་དད་པ་དང་ཡོངས་སུ་དག་པ་དབུལ་བར་བྱའོ། །དེ་སྟེ་མི་ན་བར་མ་སོང་
ན་ཉེས་བྱས་སུ་འགྱུར་རོ། །དེ་སྟེ་དེའི་འཚོ་བའི་བར་དུ་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ལས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་སུམ་དུ་གནས་པར་གྱུར་ན་དེས་ཀྱང་དད་པ་དང་ཡོངས་སུ་དག་པ་དབུལ་བར་བྱའོ། །དབང་མེད་པས་ཟིན་པར་གྱུར་པ་ཡང་དད་པ་དང་ཡོངས་སུ་དག་པ་དབུལ་བར་བྱའོ། །དེ་ཡང་འདི་ལྟར་དབུལ་བར་བྱ་སྟེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ཏེ། ལྷམ་ཕུད་ལ་དགེ་སློང་གི་མདུན་དུ་ཙོག་ཙོག་པོར་འདུག་སྟེ་ཐལ་མོ་རབ་ཏུ་སྦྱོར་ཏེ་ཚིག་འདི་སྐད་དུ་སྨྲོས་ཤིག །དགོངས་ཤིག་ཚེ་དང་ལྡན་པ། དེང་དགེ་འདུན་གྱི་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བགྱི་བའི་ཡང་བཅོ་ལྔའི་གསོ་སྦྱིན་ན། བར་ཆད་ཀྱི་ཆོས་རྣམས་ཀྱང་ཡོངས་སུ་དག་གིས་ཚེ་དང་ལྡན་པས་ཀྱང་བདག་ལ་ཡོངས་སུ་དག་པར་ཟུང་ཤིག །བདག་དགེ་སློང་མིང་འདི་ཞེས་བགྱི་བ་དགེ་འདུན་གྱི་ཆོས་བཞིན་བྱ་བ་ལ་དད་པ་དང་། གསོ་སྦྱིན་དང་། ཡོངས་སུ་དག་པའང་དབུལ་གྱིས་བདག་གི་ཕྱིར་ཚེ་དང་ལྡན་པས་ཚུལ་ཤིང་ལོང་ལ་ཡོངས་སུ་དག་པ་རྗོད་ཅིག །བརྗོད་ན་དེ་བཞིན་ཤེས་སོ། །དེ་ལྟར་ལན་གཉིས་ལན་གསུམ་དུ་སྨྲོས་ཤིག །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །དེ་སྟེ་དེ་ལྟར་དབུལ་ནུས་ན་ནི་ལེགས། མི་ནུས་ན་འདུག་སྟེ་དབུལ་བར་བྱའོ། །འདུག་སྟེ་ཡང་མི་ནུས་ན་ཉལ་ཏེ་དབུལ་བར་བྱའོ། །ཉལ་ཏེའང་མི་ནུས་ན་ཆུང་ངུ་ན་འདི་སྐད་ཀྱང་དད་པ་དང་ཡོངས་སུ་དག་པ་་་དབུལ་ལོ་ཞེས་སྨྲས་ན་ཡང་དད་པ་དང་ཡོངས་སུ་དག་པ་ཕུལ་བ་ཞེས་བྱའོ། །བདག་གི་དད་པ་དང་ཡོངས་སུ་དག་པ་རྗོད་ཅིག་ཅེས་སྨྲས་ནའང་དད་པ་དང་་་ཡོངས་སུ་དག་པ་བརྗོད་པ་ཞེས་བྱའོ། །ཚིག་གིས་མ་ཡིན་པར་ལུས་ཀྱི་དམིགས་པས་བྱེད་ནའང་དད་པ་དང་ཡོངས་སུ་དག་པ་བརྗོད་པ་ཞེས་བྱའོ། །ལུས་ཀྱིས་མ་ཡིན་ཏེ་ངག་གིས་དམིགས་ན་ཡང་དད་པ་དང་ཡོངས་སུ་དག་པ་་བརྗོད་པ་ཞེས་བྱའོ། །ལུས་དང་ཚིག་གཉི་གས་བརྡ་བྱེད་ནའང་དད་པ་དང་ཡོངས་སུ་དག་པ་བྱིན་པ་ཞེས་བྱའོ། །ལུས་དང་ཚིག་གཉི་གས་བརྡ་བྱེད་མི་
ནུས་ན་དེར་དགེ་འདུན་ཐམས་ཅད་དེང་ཤིག །ཡང་ན་དགེ་སློང་དེ་དེར་ཁུག་ཤིག །དགེ་འདུན་ཐམས་ཅད་ཀྱང་དེར་མ་དོང་ལ། དགེ་སློང་དེ་ཡང་དེར་མ་བཀུག་ན་ལས་མ་འདུས་པར་བྱས་པ་སྟེ། དགེ་འདུན་ཐམས་ཅད་འདས་པ་དང་བཅས་པར་འགྱུར་རོ། །དད་པ་དང་། ཡོངས་སུ་དག་པ་ལེན་པའི་དགེ་སློང་གིས་དད་པ་དང་ཡོངས་སུ་དག་པ་བླངས་ནས་དེ་ཉིད་དུ་དུས་འདས་ཏེ་ཤི་ན་དད་པ་དང་་་ཡོངས་སུ་དག་པ་མ་ཕུལ་བ་ཞེས་བྱ་སྟེ། དད་པ་དང་ཡོངས་སུ་དག་པ་གཞན་ལ་དབུལ་བར་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཁས་བླངས་ནའང་དད་པ་དང་ཡོངས་སུ་དག་པ་མ་ཕུལ་བ་ཞེས་བྱ་སྟེ། གཞན་ལ་དད་པ་དང་ཡོངས་སུ་དག་པ་དབུལ་བར་བྱའོ། །དགེ་ཚུལ་ཕའམ། མ་ནིང་ངམ། དགེ་སློང་མ་སུན་ཕྱུང་བ་ཞེས་བྱ་བ་ནས། འགྲོ་བ་གཞན་དུ་གནས་པ་ཞེས་བྱ་བའི་བར་དུ་སྔ་མ་བཞིན་ཏེ། བདག་ཉིད་ཀྱིས་ཁས་བླངས་ནའང་དད་པ་དང་ཡོངས་སུ་དག་པ་མ་ཕུལ་བ་ཞེས་བྱ་སྟེ། གཞན་ལ་དད་པ་དང་ཡོངས་སུ་དག་པ་དབུལ་བར་བྱའོ། །དེ་སྟེ་ཟ་མ་ཡིན་པར་བདག་ཉིད་ཀྱིས་ཁས་བླངས་ནའང་དད་པ་དང་ཡོངས་སུ་དག་པ་མ་ཕུལ་བ་ཞེས་བྱའོ། །དགེ་འདུན་ཕྱེ་བ་དང་། མི་གནས་པ་དང་། སོ་སོར་གནས་པ་དང་། ཉེ་བར་ཕྱོགས་པ་དང་། བསླབ་པ་བྱིན་པར་བདག་ཉིད་ཀྱིས་ཁས་བླངས་ནའང་དད་པ་དང་ཡོངས་སུ་དག་པ་ཕུལ་བ་མ་ཡིན་པ་ཞེས་བྱ་སྟེ། འདི་ནི་དད་པ་དང་ཡོངས་སུ་དག་པ་དབུལ་བའི་རབ་ཏུ་ལྡན་པ་ཞེས་བྱའོ། །དད་པ་དང་ཡོངས་སུ་དག་པ་ལེན་པའི་རབ་ཏུ་ལྡན་པ་གང་ཞེ་ན། དགེ་སློང་གང་དགེ་སློང་གི་དྲུང་ནས་ཡོངས་སུ་དག་པ་དང་དད་པ་ལེན་པ་དེས་འདི་ལྟར་བླང་བར་བྱའོ། །གཅིག་གིས་གཅིག་གིའམ། གཅིག་གིས་གཉིས་ཀྱིའམ། གཅིག་གིས་མང་པོའམ། ཇི་སྙེད་ཀྱི་མིང་སྨོས་ནུས་པ་དེ་སྙེད་ཀྱི་བླང་བར་བྱ། དད་པ་དང་ཡོངས་སུ་དག་པ་ལེན་པའི་དགེ་སློང་གིས་དད་པ་དང་ཡོངས་སུ་དག་པ་བླངས་ནས་བརྒྱུག་པར་མི་བྱ། མགྱོགས་པར་འགྲོ་བར་མི་བྱ། འཕར་བར་མི་བྱ། མཆོང་བར་མི་བྱ། སའི་འོག་ནས་འགྲོ་བར་མི་བྱ། ནམ་མཁའ་ལས་འགྲོ་བར་མི་བྱ། མཚམས་ཀྱི་ཕྱི་རོལ་
ནས་ཡོངས་སུ་དག་པ་དང་དད་པ་བླང་བར་མི་བྱ། མཚམས་ཀྱི་ནང་ནས་ཤེས་བཞིན་པས་དད་པ་དང་ཡོངས་སུ་དག་པ་བླང་བར་་་བྱ། དེ་སྟེ་མཚམས་ཀྱི་ཕྱི་རོལ་ནས་དད་པ་དང་ཡོངས་སུ་དག་པ་བླངས་ན་ཉེས་བྱས་སུ་འགྱུར་རོ། །དེ་སྟེ་མཚམས་ཀྱི་ནང་ནས་ལེན་དུ་འཚོ་བའི་བར་དུ་་གཅོད་པའམ། ཚངས་པར་སྤྱོད་པའི་བར་དུ་གཅོད་པའམ། བར་དུ་གཅོད་པ་བརྒྱད་ཀྱི་ནང་ནས་གང་ཡང་རུང་བའི་བར་དུ་གཅོད་པས་འཇིགས་པར་འགྱུར་བ་ཞིག་མངོན་སུམ་དུ་གནས་ན་དེ་མཚམས་ཀྱི་ཕྱི་རོལ་ནས་བླངས་ཀྱང་ཉེས་པ་མེད་དོ། །འདི་ནི་ཡོངས་སུ་དག་པ་དང་དད་པ་ལེན་པའི་རབ་ཏུ་ལྡན་པ་ཞེས་བྱའོ། །དད་པ་དང་ཡོངས་སུ་དག་པ་བརྗོད་པའི་རབ་ཏུ་ལྡན་པ་གང་ཞེ་ན། ཡོངས་སུ་དག་པ་དང་དད་པ་བརྗོད་པའི་དགེ་སློང་གིས་དགེ་འདུན་གྱི་ནང་དུ་མ་འོངས་ནས་དུས་འདས་ཏེ་ཤི་ན་ཡོངས་སུ་དག་པ་དང་དད་པ་མ་བརྗོད་པ་ཞེས་བྱའོ། །ཁྱིམ་པ་ཡིན་པར་བདག་ཉིད་ཀྱིས་ཤེས་པར་ཁས་བླངས་ནའང་ཡོངས་སུ་དག་པ་་་དང་དད་པ་མ་བརྗོད་པ་ཞེས་བྱའོ། །དགེ་སྦྱོང་མའམ། མ་ནིང་ངམ། དགེ་སློང་མ་སུན་ཕྱུང་བ་ཞེས་བྱ་བ་ནས་འགྲོ་བ་གཞན་དུ་གནས་པའོ་ཞེས་བྱ་བའི་བར་དུ་སྔ་མ་བཞིན་ཏེ། བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་དང་དད་པ་མ་བརྗོད་པ་ཞེས་བྱའོ། །དེ་སྟེ་མ་ནིང་དུ་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་དང་དད་པ་མ་བརྗོད་པ་ཞེས་བྱའོ། །དགེ་འདུན་ཕྱེ་བའམ། མི་གནས་པའམ། སོ་སོར་གནས་པའམ། ཉེ་བར་ཕྱོགས་པའམ། བསླབ་པ་བྱིན་པར་བདག་ཉིད་ཀྱིས་ཁས་བླངས་ནའང་ཡོངས་སུ་དག་པ་དང་དད་པ་མ་བརྗོད་པ་ཞེས་བྱའོ། །ཡོངས་སུ་དག་པ་དང་དད་པ་བརྗོད་པའི་དགེ་སློང་གིས་ཡོངས་སུ་དག་པ་དང་དད་པ་བླངས་ནས་ཉལ་བར་མི་བྱ། སྙོམས་པར་ཞུགས་པར་མི་བྱ། ཤེས་བཞིན་པས་ཡོངས་སུ་དག་པ་དང་དད་པ་བརྗོད་པར་བྱའོ། །དེ་ཡང་འདི་ལྟ་བུར་བརྗོད་པར་བྱ་སྟེ། སྟན་ལས་ལངས་ནས་བླ་གོས་ཕྲག་པ་གཅིག་ཏུ་བྱས་ནས་དགེ་སློང་གི་མདུན་དུ་ཙོག་ཙོག་པོར་འདུག་ནས་ཐལ་མོ་རབ་ཏུ་་སྦྱོར་ལ་འདི་སྐད་དུ་སྨྲོས་ཤིག །དགོངས་ཤིག་ཚེ་དང་ལྡན་པ། དེང་དགེ་འདུན་གྱི་བཅོ་ལྔའི་
གསོ་སྦྱིན་ཏེ་དགེ་སློང་མིང་འདི་ཞེས་བྱ་བའི་ཡང་་བཅོ་ལྔའི་གསོ་སྦྱིན་ཏེ། བདག་དགེ་སློང་མིང་འདི་ཞེས་བྱ་བས་ཡོངས་སུ་དག་པར་བདག་ཉིད་སྨྲ་སྟེ། བར་ཆད་ཀྱི་ཆོས་རྣམས་ཀྱང་མེད་དེ། དགེ་འདུན་གྱི་ཆོས་བཞིན་གྱི་བྱ་བ་ལ་དད་པ་དང་། གསོ་སྦྱིན་དང་། ཡོངས་སུ་དག་པ་འབུལ་ལོ་ཞེས་དེ་ལྟར་ལན་གཉིས་ལན་གསུམ་སྨྲོས་ཤིག །དེས་ཀྱང་རིགས་སོ་ཞེས་སྨྲོས་ཤིག །གཉིས་པས་ནི་ལེགས་སོ་ཞེས་བྱའོ། །རྣམ་པ་བཞིས་ན་ཡོངས་སུ་དག་པ་དང་དད་པ་མ་བརྗོད་པ་ཞེས་བྱའོ། །བཞི་གང་ཞེ་ན། ངོ་ཚ་མེད་པ་དང་། བག་མེད་པ་དང་། གཉིད་ཀྱིས་ལོག་པ་དང་། སྙོམས་པར་ཞུགས་པའོ། །དེ་ལ་ངོ་ཚ་མེད་པ་དང་། བག་མེད་པ་དང་རྣམ་པ་འདི་གཉིས་ནི་ཉེས་པ་དང་བཅས་པར་འགྱུར་བའོ། །གཉིད་ཀྱིས་ལོག་པ་དང་། སྙོམས་པར་ཞུགས་པ་དང་རྣམ་པ་འདི་གཉིས་ནི་ཉེས་པ་མེད་པར་འགྱུར་བའོ། །འདི་ནི་ཡོངས་སུ་དག་པ་དང་དད་པ་བརྗོད་པའི་རབ་ཏུ་ལྡན་པ་ཞེས་བྱའོ། །མཆོད་རྟེན་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་གསུངས་པའི་དབུ་སྐྲའི་མཆོད་རྟེན་དང་། སེན་མོའི་མཆོད་རྟེན་ཏེ། ཇི་ལྟར་འདུལ་བ་ལས་མགོན་མེད་པ་ལ་ཟས་སྦྱིན་པའི་ཁྱིམ་བདག་གིས་མཆོད་རྟེན་གྱི་རབ་ཏུ་ལྡན་པ་་་བཞིན་དུ་རྒྱ་ཆེར་བརྗོད་པར་བྱ་སྟེ། དེ་ཡང་སེམས་ཅན་ལ་ཕན་པའི་ཕྱིར་བཅོམ་ལྡན་འདས་ཀྱིས་དབུ་སྐྲའི་མཆོད་རྟེན་དང་། སེན་མོའི་མཆོད་རྟེན་དུ་གསུངས་པའོ། །དེ་ལ་སངས་རྒྱས་བཅོམ་ལྡན་འདས་ཀྱི་མཆོད་རྟེན་ནི་ཐམས་ཅད་དུ་རྫོགས་པར་བྱའོ། །རང་སངས་རྒྱས་ཀྱི་ནི་བུམ་པ་སུལ་ཅན་མེད་པར་བྱའོ། །དགྲ་བཅོམ་པའི་ནི་ཕང་ལོ་བཞི་པའོ། །ཕྱིར་མི་འོང་བའི་ནི་ཕང་ལོ་གསུམ་པའོ། །ལན་གཅིག་ཕྱིར་འོང་བའི་ནི་ཕང་ལོ་གཉིས་པའོ། །རྒྱུན་དུ་ཞུགས་པའི་ནི་ཕང་ལོ་གཅིག་པའོ། །སོ་སོའི་སྐྱེ་བོ་དགེ་བ་ཅན་དག་གི་ནི་མགོ་ཡུ་བོར་བྱའོ། །མཆོད་རྟེན་གྱི་ཕྱི་རོལ་གྱི་དག་རའི་ཕྱིར་མགོན་མེད་པ་ལ་ཟས་སྦྱིན་པའི་ཁྱིམ་བདག་རབ་ཏུ་དད་པ་མངོན་པར་དད་པ་ཅན་དེ་བཅོམ་ལྡན་འདས་གང་ན་བ་དེར་སོང་ནས་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །
ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་ཁྱིམ་བདག་མགོན་མེད་ཟས་སྦྱིན་པས་གང་གི་ཚེ་ན་བཅོམ་ལྡན་འདས་ལྗོངས་རྒྱུ་ཞིང་གཤེགས་པར་གྱུར་པ་དེའི་ཚེ་བཅོམ་ལྡན་འདས་ཀྱི་ཞལ་མི་མཐོང་བས་ཤིན་ཏུ་ཡོངས་སུ་གདུང་བར་འགྱུར་ན་བཅོམ་ལྡན་འདས་ཀྱི་དབུ་སྐྲ་དང་། སེན་མོ་་་བདག་ལ་སྩལ་ན་བདག་གིས་མཆོད་དོ་ཞེས་གསོལ་པ་དང་། བཅོམ་ལྡན་འདས་་་ཀྱིས་དེ་ལ་ཁྱོད་ཀྱི་མཆོད་གནས་འདིའོ་ཞེས་བྱ་བ་ནས་དེ་ལ་དབུ་སྐྲ་དང་། སེན་མོ་བྱིན་པ་དང་། དེས་འདི་སྐད་ཅེས་སྨྲས་སོ། །གལ་ཏེ་བཅོམ་ལྡན་འདས་ཀྱིས་བཀས་གནང་ན་དབུ་སྐྲ་དང་། སེན་མོ་ལས་མཆོད་རྟེན་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་དབུ་སྐྲའི་མཆོད་རྟེན་དང་། སེན་མོའི་མཆོད་རྟེན་ཀྱང་བྱོས་ཤིག །འདི་ནི་མཆོད་རྟེན་གྱི་རབ་ཏུ་ལྡན་པ་ཞེས་བྱའོ། །མཆོད་རྟེན་གྱི་དངོས་པོའི་རབ་ཏུ་ལྡན་པ་གང་ཞེ་ན། གང་མཆོད་རྟེན་གྱི་ཞིང་ངམ། ནགས་ཚལ་ལམ། གང་དུ་རུང་བའི་ཕྱོགས་སུ་ཐོག་མར་མཆོད་རྟེན་གཞག་པར་བྱས་ཏེ། མཆོད་རྟེན་དེའི་དངོས་པོའི་ཁོ་ར་ཁོར་ཡུག་ཏུ་མཆོད་རྟེན་གྱི་དངོས་པོར་གཞག་པར་བྱ་སྟེ། འདི་ནི་མཆོད་རྟེན་གྱི་དངོས་པོའི་རབ་ཏུ་ལྡན་པ་ཞེས་བྱའོ། །མཆོད་རྟེན་གྱི་ཁྱམས་ཀྱི་ཕྲེང་གི་རབ་ཏུ་ལྡན་པ་གང་ཞེ་ན། མཆོད་རྟེན་གྱི་ཁྱམས་དང་ཀ་བ་ནི་བཅོམ་ལྡན་འདས་ཀྱིས་ཇི་ལྟར་འདུལ་བ་ལས་གསུངས་པ་བཞིན་དུ་རྒྱ་ཆེར་བརྗོད་པར་བྱ་སྟེ། འདི་ནི་མཆོད་རྟེན་གྱི་ཁྱམས་ཀྱི་ཕྲེང་གི་རབ་ཏུ་ལྡན་པ་ཞེས་བྱའོ། །མཆོད་རྟེན་གྱི་མི་ཟད་པའི་རབ་ཏུ་ལྡན་པ་གང་ཞེ་ན། ཡངས་པའི་གྲོང་ཁྱེར་གྱི་ཚོང་པས་བཅོམ་ལྡན་འདས་ཀྱི་མཆོད་རྟེན་ཞིག་བྱས་ནས་མཆོད་རྟེན་གྱི་ཁྱམས་ཀྱང་བྱས་ཏེ། དགེ་སློང་རྣམས་ལ་མཆོད་རྟེན་གྱི་མི་ཟད་པ་ཕུལ་བ་དང་། དགེ་སློང་རྣམས་ཐེ་ཚོམ་དུ་གྱུར་ནས་སོ་སོར་མ་བླངས་པ་དང་། དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་ཀུན་དགའ་ར་བ་ན་གནས་པའམ། དགེ་བསྙེན་གྱིས་མཆོད་རྟེན་མི་ཟད་པ་དེ་ལོང་ཤིག །
མཆོད་རྟེན་ལ་རིམ་གྲོར་བྱ་བའི་ཕྱིར་སྤེལ་བར་བྱ་སྟེ། གང་དེའི་རྙེད་པ་སྐྱེས་ནས་དེས་མཆོད་རྟེན་ལ་མཆོད་པར་བྱ། གང་དེ་ལས་ཀྱང་ལྷག་ན་དེས་མཆོད་རྟེན་ལ་ཡོན་དུ་དབུལ་བར་བྱ་སྟེ། འདི་ནི་མཆོད་རྟེན་གྱི་མི་ཟད་པའི་རབ་ཏུ་ལྡན་པ་ཞེས་བྱའོ། །མཆོད་རྟེན་སླར་བཅོས་པའི་རབ་ཏུ་ལྡན་པ་གང་ཞེ་ན། འཇིམ་པའི་གོང་བུའམ། རྡོ་ཐལ་གྱི་གོང་བུའམ། ས་མར་གྱི་གོང་བུས་མཆོད་རྟེན་སླར་བཅོས་པར་བྱ་སྟེ། འདི་ནི་མཆོད་རྟེན་སླར་བཅོས་པའི་རབ་ཏུ་ལྡན་པ་ཞེས་བྱའོ། །མཆོད་རྟེན་གྱི་རྒྱན་གྱི་རབ་ཏུ་ལྡན་པ་གང་ཞེ་ན། མཆོད་རྟེན་བརྒྱན་པར་བྱ། གདུགས་དང་། རྒྱལ་མཚན་དང་། བ་དན་ལ་སོགས་པ་དཔྱང་བ་རྣམས་དང་། དྲིལ་བུ་དང་། འཁོར་ལོ་དང་། གཡུང་དྲུང་རིས་དང་། དཔལ་གྱི་གྲུ་གུ་རིས་དང་། དགའ་བ་ཅན་གྱིས་བསྐོར་བ་དང་། ཕྲེང་བ་དང་། སེ་མོ་དོ་དང་། མུ་ཏིག་གི་ཕྲེང་བ་དང་། དར་དང་། སེང་དར་དང་། ཀོ་ཤོན་དང་། རས་བལ་དང་། སྲིན་བལ་དང་། གསེར་དང་། དངུལ་དང་། བཻ་ཌཱུརྱ་དང་། ཤེལ་དང་། དུང་དང་། མན་ཤེལ་དང་། བྱི་རུ་དང་། དངུལ་དང་། ས་ལེ་སྦྲམ་དང་། ཨསྨ་གར་བ་དང་། མུ་སར་གལྦ་དང་། མུ་ཏིག་དམར་པོ་དང་། གཡས་སུ་འཁྱིལ་བས་བསྐོར་བ་ཞེས་བྱ་བ་ལ་སོགས་ཏེ། གང་གཞན་ཡང་འཇིག་རྟེན་ན་རྒྱན་དུ་བྱ་བའི་རབ་ཏུ་སྦྱོར་བ་ཐམས་ཅད་ཀྱིས་མཆོད་རྟེན་ལ་བརྒྱན་པར་བྱ་སྟེ། འདི་ནི་མཆོད་རྟེན་གྱི་རྒྱན་གྱི་རབ་ཏུ་ལྡན་པ་ཞེས་བྱའོ། །མཆོད་རྟེན་ལ་མཆོད་པའི་རབ་ཏུ་ལྡན་པ་གང་ཞེ་ན། མཆོད་རྟེན་ལ་མཆོད་པར་བྱ་བ་ནི་ཕྲེང་བ་དང་། དྲི་དང་། བྱུག་པ་དང་། བདུག་པ་དང་། མེ་ཏོག་དང་། གུར་གུམ་གྱི་ཆག་ཆག་དང་། ལྡོང་རོས་དང་། ཡུངས་མར་གྱི་བྱུག་པ་དང་། མེ་ཏོག་གི་ཕྲེང་བ་དང་། མེ་མར་གྱི་ཕྲེང་བ་དང་། དྲིའི་ཕྲེང་བ་དང་། ཨ་རུ་རའི་ཕྱེ་མ་དང་། ཨ་ག་རུའི་ཕྱེ་མ་དང་། ཙན་དན་གྱི་ཕྱེ་མ་དང་། ཀ་ལ་ནུ་ས་རི་དང་། གསེར་གྱི་མེ་ཏོག་དང་། དངུལ་གྱི་མེ་ཏོག་དང་། རིན་པོ་ཆེའི་མེ་ཏོག་དང་། རོལ་མོ་ལ་སོགས་པ་དང་། གང་ཡང་གཞན་ཡང་འཇིག་རྟེན་པའི་མཆོད་པའི་ཡོ་
བྱད་དུ་སྦྱོར་བ་ཐམས་ཅད་ཀྱིས་ཀྱང་མཆོད་རྟེན་ལ་མཆོད་པར་བྱ། ཕྱི་ཕྱིར་ཞིང་ཕྱག་དར་བྱ། ཕྱག་འཚལ་བར་བྱའོ། །མཆོད་རྟེན་ལ་ཕྲེང་བའི་ཆུན་པོ་གདགས་པའམ། མཆོད་རྟེན་གྱི་ཕྱིར་རྣམ་པ་གཞན་དུ་བྱེད་ཅིང་འཇོག་པ་ནི་དགེ་སློང་གི་རུང་བ་སྟེ། འདི་ནི་མཆོད་རྟེན་ལ་མཆོད་པའི་རབ་ཏུ་ལྡན་པ་ཞེས་བྱའོ། །ཟས་ཀྱི་རབ་ཏུ་ལྡན་པ་གང་ཞེ་ན། གཙུག་ལག་ཁང་གང་དུ་ཡང་རུང་སྟེ། དགེ་སློང་གནས་པ་ལ་དེར་ཟས་ཤིག་འཐོབ་པར་བྱེད་པ་འདི་ནི་ཟས་ཀྱི་རབ་ཏུ་ལྡན་པ་ཞེས་བྱའོ། །ཟས་དང་བཅས་པའི་རབ་ཏུ་ལྡན་པ་གང་ཞེ་ན། དགེ་སློང་གང་བཟའ་བ་ཞིག་ཆོས་དང་བཅས་པར་རྙེད་ན་དེའི་རྐྱེན་གྱིས་ཕྱིར་འདུས་ཏེ་ཟ་བ་དང་། ཡང་ཡང་ཟ་བ་ཡོད་ན་ཡང་གནས་གཉི་གར་བག་ཡངས་སུ་ཟ་བ་སྟེ། འདི་ནི་ཟས་དང་བཅས་པའི་རབ་ཏུ་ལྡན་པ་ཞེས་བྱའོ། །ཐུག་པའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཐུག་པ་རྣམ་པ་བཅུ་གསུངས་པ་ནི་འདི་ལྟ་སྟེ། འོ་མའི་ཐུག་པ་དང་། ཞོའི་ཐུག་པ་དང་། དར་བའི་ཐུག་པ་དང་། ཤའི་ཐུག་པ་དང་། མར་གྱི་ཐུག་པ་དང་། འབྲུ་མར་གྱི་ཐུག་པ་དང་། ཏིལ་གྱི་ཐུག་པ་དང་། བལ་སྲན་གྱི་ཐུག་པ་དང་། སེའུའི་ཐུག་པ་དང་། ཆུའི་ཐུག་པ་དང་། ཐུག་པ་འདི་རྣམས་བཅུ་ནི་དགེ་སློང་རྣམས་ཀྱིས་ཤེས་བཞིན་དུ་སྒྲ་ཆུང་བ་དང་། ཧུབ་ཧུབ་མེད་པ་དང་། ན་བའི་འདུ་ཤེས་དང་། རྐྱེན་གྱི་འདུ་ཤེས་ཉེ་བར་བཞག་སྟེ་བཏུང་བར་བྱའོ། །གཞན་ཡང་ཐུག་པ་ལ་ཡོན་ཏན་རྣམ་པ་གཉིས་ཡོད་དེ། བཀྲེས་པ་གཞོམ་པ་དང་། སྐོམ་པ་གཞོམ་པ་ཞེས་བྱའོ། །བཅའ་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་བཅའ་བ་རྣམ་པ་དགུ་གསུངས་པ་ནི། འདི་ལྟ་སྟེ། རྩ་བའི་བཅའ་བ་དང་། སྡོང་བུའི་བཅའ་བ་དང་། ལོ་མའི་བཅའ་བ་དང་། མེ་ཏོག་གི་བཅའ་བ་དང་། འབྲས་བུའི་བཅའ་བ་དང་། ཁ་རའི་བཅའ་བ་དང་། ཏིལ་གྱི་བཅའ་བ་དང་། འབྲས་ཁུར་གྱི་བཅའ་བ་དང་། བུ་རམ་གྱི་བཅའ་བ་དང་། བཅའ་བ་འདི་རྣམས་དགུ་ནི་དགེ་སློང་རྣམས་ཀྱིས་ཤེས་བཞིན་པས་སྒྲ་ཆུང་ངུ་དང་། བལྕག་སྒྲ་མེད་པར་ན་བའི་འདུ་ཤེས་དང་། སྨན་གྱི་འདུ་ཤེས་དང་།
ཕྱིར་ཕན་པའི་འདུ་ཤེས་དང་། རྐྱེན་གྱི་འདུ་ཤེས་ཉེ་བར་བཞག་སྟེ་བཅའ་བར་བྱའོ། །འདི་ནི་བཅའ་བའི་རབ་ཏུ་ལྡན་པ་ཞེས་བྱའོ། །མྱང་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མྱང་བ་རྣམ་པ་ལྔ་རྣམས་གསུངས་པ་འདི་ལྟ་སྟེ། མར་དང་། འབྲུ་མར་དང་། སྦྲང་རྩི་དང་། བུ་རམ་དང་། མར་སར་དང་། མྱང་བ་འདི་ལྔ་རྣམས་ནི་དགེ་སློང་རྣམས་ཀྱིས་ཤེས་བཞིན་དུ་སྒྲ་ཆུང་བ་དང་། བལྕག་སྒྲ་མེད་པས་ན་བའི་འདུ་ཤེས་དང་། སྨན་གྱི་འདུ་ཤེས་དང་། ཕྱིར་ཕན་པའི་འདུ་ཤེས་དང་། རྐྱེན་གྱི་འདུ་ཤེས་སུ་ཉེ་བར་བཞག་སྟེ་མྱང་བར་བྱའོ། །འདི་ནི་མྱང་བའི་རབ་ཏུ་ལྡན་པ་ཞེས་བྱའོ། །བཟའ་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་བཟའ་བ་རྣམ་པ་ལྔ་གསུངས་པ་འདི་ལྟ་སྟེ། འབྲས་ཆན་དང་། ནས་ཆན་དང་། འབྲས་ཕྱེ་དང་། ཤ་དང་། ཁུར་བ་དང་། བཟའ་བ་འདི་ལྔ་སྟེ། དགེ་སློང་རྣམས་ཀྱིས་ཤེས་བཞིན་དུ་སྒྲ་ཆུང་བ་དང་། བལྕག་སྒྲ་མེད་པར་ན་བའི་འདུ་ཤེས་དང་། སྨན་གྱི་འདུ་ཤེས་དང་། རྐྱེན་གྱི་འདུ་ཤེས་དང་། ཕྱིར་ཕན་པའི་འདུ་ཤེས་ཉེ་བར་བཞག་སྟེ་བཟའ་བར་བྱའོ། །འདི་ནི་བཟའ་བའི་རབ་ཏུ་ལྡན་པ་ཞེས་བྱའོ། །ལྷུང་བཟེད་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ལྷུང་བཟེད་རྣམ་པ་གཉིས་གསུངས་ཏེ། ལྕགས་ལས་བྱས་པ་དང་། ཁམ་པ་ལས་བྱས་པའོ། །ལྷུང་བཟེད་རྣམ་པ་བརྒྱད་ནི་མི་གནང་བ་སྟེ། གསེར་དང་། དངུལ་དང་། བཻ་ཌཱུརྱ་ལས་བྱས་པ་དང་། ཤེལ་ལས་བྱས་པ་དང་། ཤིང་ལས་བྱས་པ་དང་། རྡོ་ལས་བྱས་པ་དང་། མཆིང་བུ་ལས་བྱས་པ་དང་། ཁར་བ་ལས་བྱས་པ་སྟེ། འདི་ནི་ལྷུང་བཟེད་ཀྱི་རབ་ཏུ་ལྡན་པ་ཞེས་བྱའོ། །གོས་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གོས་རྣམ་པ་བཅུ་གསུམ་གསུངས་ཏེ། འདི་ལྟ་སྟེ། སྦྱར་མ་དང་། སྟོད་གཡོགས་དང་། མཐང་གོས་དང་། གདིང་བ་དང་། ཁྲུས་རས་དང་། གཡན་པ་གཡོགས་པ་དང་། སྟོད་ཆགས་དང་། སྟོད་ཆགས་ཀྱི་འཐེབ་དང་། སྨད་གཡོགས་དང་། སྨད་གཡོགས་ཀྱི་འཐེབ་དང་། ལུས་ཕྱི་བ་དང་།
སྐྲ་བཟེད་པ་དང་། དབྱར་གྱི་རས་ཆེན་དང་། ཡོ་བྱད་ཀྱི་གོས་བཅུ་གསུམ་སྟེ། ཆོས་གོས་བཅུ་གསུམ་པོ་འདི་རྣམས་དགེ་སློང་རྣམས་ཀྱིས་མཚོན་གྱིས་གཅད་ཅིང་ཁ་དོག་་་བསྒྱུར་ཏེ་རུང་བར་བྱ་མི་དགོས་པར་བྱིན་གྱིས་བརླབས་པའི་དབང་གིས་ཡོངས་སུ་སྤྱད་པར་བྱའོ། །འདི་ནི་གོས་ཀྱི་རབ་ཏུ་ལྡན་པ་ཞེས་བྱའོ། །སྟེང་གཡོགས་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མལ་སྟན་དགབ་པའི་ཕྱིར་སྟེང་གཡོགས་གཉིས་སུ་གསུངས་ཏེ། སྟུག་ན་ནི་ཆིག་རིམ། སྲབ་ན་ནི་སྦྱར་མའོ། །འདི་ནི་སྟེང་གཡོགས་ཀྱི་རབ་ཏུ་ལྡན་པ་ཞེས་བྱའོ། །ཁབ་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གོས་འཚེམ་པའི་ཕྱིར་ལྕགས་དང་། ཁར་བ་དང་། ཟངས་དང་། ར་གན་གྱི་ཁབ་གནང་སྟེ། འདི་ནི་ཁབ་ཀྱི་རབ་ཏུ་ལྡན་པ་ཞེས་བྱའོ། །ཁབ་རལ་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཁབ་སྦ་བའི་ཕྱིར་ཁབ་རལ་གནང་སྟེ། འདི་ནི་ཁབ་རལ་གྱི་རབ་ཏུ་ལྡན་པ་ཞེས་བྱའོ།། །།འདུལ་བ་གཞུང་དམ་པ། བམ་པོ་ལྔ་བཅུ་པ། གནས་འཆའ་བའི་རབ་ཏུ་ལྡན་པ་གང་ཞེ་ན། སངས་རྒྱས་བཅོམ་ལྡན་འདས་ཀྱིས་གློ་བུར་དུ་ལྷགས་པའི་དགེ་སློང་གིས་གནས་བཅའ་བའི་དོན་གྱི་ཕྱིར་དགེ་འདུན་གྱི་གཙུག་ལག་ཁང་དུ་འོངས་མ་ཐག་ཏུ་གནས་མ་བཅས་ཀྱི་བར་དུ་རྐང་པའི་རྡུལ་མ་ཕྱི་ཤིག །ཆུ་སྣོད་མ་ལེན་ཅིག་ཅེས་གསུངས་པ་དང་། དགེ་སློང་གཞན་ཞིག་གློ་བུར་དུ་འོངས་པས་གནས་བཅའ་བའི་དོན་གྱི་ཕྱིར་གཙུག་ལག་ཁང་དུ་འོངས་ན་དེས་བཅོམ་ལྡན་་་འདས་ཀྱིས་དགེ་སློང་གློ་བུར་དུ་འོངས་པས་གནས་བཅའ་བའི་དོན་གྱི་ཕྱིར་དགེ་་་འདུན་གྱི་གཙུག་ལག་ཁང་དུ་འོངས་ན་གནས་མ་བཅས་ཀྱི་བར་དུ་རྐང་པའི་རྡུལ་མ་འཕྱི་ཤིག །ཆུ་སྣོད་ཀྱང་མ་ལེན་ཅིག་ཅེས་བསླབ་པའི་གནས་བཅས་སོ་ཞེས་པ་ཐོས་ནས་དེས་གནས་བཅའ་བའི་ཕྱིར་ལུས་ངལ། ལུས་ཚེགས་ཆེ། ལུས་དུབ་བཞིན་དུ་ཕན་ཚུན་དུ་བརྒྱུགས་པ་ལས་བརྒྱལ་ཏེ་ས་ལ་འགྱེལ་ནས་དུས་འདས་་་སོ། །དེ་ལྟ་བུར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས་བཅོམ་
ལྡན་འདས་ཀྱིས་བཀའ་སྩལ་པ། ལྷུང་བཟེད་དང་ཆོས་གོས་ཞོག་ལ་རྐང་པའི་རྡུལ་ཕྱིས་ཆུ་སྣོད་ལོང་ལ་གདོད་གནས་ཆོས་ཤིག །དགེ་སློང་དེ་དག་སུ་ལས་ཀྱང་རུང་གནས་བབ་བབ་ཏུ་བཅའ་བ་དང་། དགེ་བའི་ཆོས་ཡལ་བར་་གྱུར་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། གནས་འཆའ་བའི་དགེ་སློང་གིས་གནས་འཆའ་བར་འདོད་ན་རིང་ཐབས་བབ་བབ་ཏུ་གནས་མ་འཆའ་བར་ཞག་གསུམ་གྱི་བར་དུ་བསམ་པ་ཤིན་ཏུ་སོམས། བརྟག་པ་ཤིན་ཏུ་རྟོགས། དཔྱད་པ་ཤིན་ཏུ་དཔྱད་ནས་གདོད་གནས་བཅའ་བར་བྱའོ། །གང་ལས་གནས་འཆའ་བར་འདོད་པ་དགེ་སློང་དེའི་སྤྱོད་པ་ཅི་འདྲ་བ་དང་། འཁོར་ཅི་འདྲ་བ་དང་། དེའི་གཉིས་པོ་ཕྱི་བཞིན་འབྲང་བའི་གྲོགས་རྣམས་ཅི་འདྲ་བ་དང་། ལུང་བསྒོའམ་མི་བསྒོ་བ་དང་། རྗེས་སུ་སྟོན་ནམ་མི་སྟོན་པ་དྲིས་ཤིག །བདག་དགེ་སློང་དེ་ལ་འཇིགས་པ་དང་རིམ་གྲོ་བཀུར་སྟི་བྱེད་པར་འགྱུར་རམ་མི་འགྱུར། དགེ་བའི་ཆོས་རྣམས་སྐྱེའམ། དེ་སྟེ་འགྲིབ་པར་འགྱུར་ཞེས་བསམ་པ་ཤིན་ཏུ་སོམས། བརྟག་པ་ཤིན་ཏུ་རྟོགས། དཔྱད་པ་ཤིན་ཏུ་དཔྱོད་ལ། གདོད་གནས་ཆོས་ཤིག །གནས་སྦྱིན་པའི་དགེ་སློང་གིས་ཀྱང་གནས་སྦྱིན་པར་འདོད་ན། གང་ལའང་རུང་རིངས་པར་བབ་བབ་ཏུ་མ་སྦྱིན་པར་ཞག་གསུམ་གྱི་བར་དུ་ཤིན་ཏུ་སོམས། བརྟག་པ་ཤིན་ཏུ་རྟོགས། དཔྱད་པ་ཤིན་ཏུ་དཔྱོད་ལ་གདོད་གནས་བྱིན་ཅིག །གང་ལ་གནས་སྦྱིན་པར་འདོད་པའི་དགེ་སློང་དེའི་སྤྱོད་པ་ཅི་འདྲ་བ་དང་། དེའི་སྤྱོད་ལམ་ཅི་འདྲ་བ་དང་། ཀུན་ཏུ་སྤྱོད་པ་ཅི་འདྲ་བ་དྲིས་ཤིག །དགེ་སློང་དེ་བདག་ལ་འཇིགས་པ་དང་། རིམ་གྲོ་བཀུར་སྟི་བྱེད་པ་དང་། དགེ་བའི་ཆོས་སྐྱེ་བར་འགྱུར་རམ། དེ་སྟེ་འགྲིབ་པར་འགྱུར། དགེ་སློང་དེ་བདག་ལ་འཇིགས་པར་འགྱུར་རམ་མི་འགྱུར། མོས་ཤིང་བཀུར་སྟི་དང་དགེ་བའི་ཆོས་འཕེལ་ལམ་མི་འཕེལ་ཤིན་ཏུ་བསམས་པ་བསམས། བརྟག་པ་ཤིན་ཏུ་བརྟགས། དཔྱད་པ་ཤིན་ཏུ་དཔྱོད་ལ་དེ་སྟེ་སེམས་མགུ་བར་བྱེད་ན་གདོད་དེ་ལ་གནས་བྱིན་ཅིག །དེ་ནི་གནས་འཆའ་བའི་རབ་ཏུ་ལྡན་པ་ཞེས་བྱའོ། །
གནས་འཆའ་བ་བླང་བའི་རབ་ཏུ་ལྡན་པ་གང་ཞེ་ན། གནས་འཆའ་བ་ལེན་པར་འདོད་པའི་དགེ་སློང་གིས་གནས་བཅའ་བ་བླང་བར་འདོད་ན་འདི་་་བཞིན་དུ་གནས་ལོང་ཤིག །སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱོས། ལག་པ་གཉིས་ཀྱིས་རྐང་པ་གཉིས་ལས་བཟུང་སྟེ་ལན་གཉིས་སུ་ཚིར་ལ་ཚིག་འདི་སྐད་དུ་སྨྲོས་ཤིག་དགོངས་ཤིག་བཙུན་པ། བདག་དགེ་སློང་མིང་འདི་ཞེས་བགྱི་བ་བཙུན་པ་ལས་གནས་འཆའ་བར་གསོལ་ན། བཙུན་པས་བདག་ལ་་གནས་བཅའ་བ་སྩོལ་ཅིག །བདག་བཙུན་པ་ལ་གནས་འཆའ་ཞིང་མཆིས་སོ་ཞེས་དེ་བཞིན་ལན་གཉིས་ལན་གསུམ་དུ་སྨྲོས་ཤིག །དེས་ཀྱང་རིགས་སོ་ཞེས་སྨྲོས་ཤིག །དེས་ཡང་སླར་ལེགས་སོ་ཞེས་སམ་ཤིན་ཏུ་ལེགས་སོ་ཞེས་བྱའོ། །སླར་ཡང་བག་ཡོད་པར་སྒྲུབས་ཤིག །ཅེས་པ་འདི་ནི་གནས་འཆའ་བ་བླང་བའི་རབ་ཏུ་ལྡན་པ་ཞེས་བྱའོ། །གནས་འཆའ་བ་སྦྱིན་པའི་རབ་ཏུ་ལྡན་པ་གང་ཞེ་ན། དགེ་སློང་ལོ་བཅུ་མ་ལོན་པས་གནས་འཆའ་བ་མི་སྦྱིན་ནོ། །ལོ་བཅུ་ལོན་དུ་ཟིན་ཀྱང་མི་ཤེས་པ་གླེན་པ། མི་གསལ་བ། མི་མཁས་པར་གྲགས་ན་དེས་ཀྱང་གནས་འཆའ་བ་མ་སྦྱིན་ཅིག །ཆོས་ལྔ་དང་ལྡན་པའི་དགེ་སློང་གིས་གནས་འཆའ་བ་སྦྱིན་པར་བྱ་སྟེ། ཉེས་པ་ཤེས་པ་དང་། ཉེས་པ་མེད་པ་ཤེས་པ་དང་། ལྕི་བ་ཤེས་པ་དང་། ཡང་བ་ཤེས་པ་དང་། སོ་སོར་ཐར་པའི་མདོ་དང་རྒྱས་པ་ཤེས་པར་གྱུར་པ་སྟེ། དེ་ནི་གནས་འཆའ་བ་སྦྱིན་པའི་རབ་ཏུ་ལྡན་པ་ཞེས་་་བྱའོ། །གནས་བཅའ་བ་སོ་སོར་བཏང་བའི་རབ་ཏུ་ལྡན་པ་གང་ཞེ་ན། ཆོས་ལྔ་དང་ལྡན་ན་གནས་བཅའ་བ་བཏང་བར་གྱུར་ཏེ། ལྔ་གང་ཞེ་ན། དད་པ་མེད་པ་ཡིན། ལེ་ལོ་ཅན་དང་། བཀུར་སྟི་མེད་པ་དང་། ཚིག་ངན་དུ་སྨྲ་བ་དང་། སྡིག་པའི་གྲོགས་པོ་ཅན་ཡིན་ནོ། །གཞན་ཡང་རྒྱུ་ལྔ་དང་རྐྱེན་ལྔས་ན་གནས་འཆའ་བ་བཏང་བར་འགྱུར་ཏེ། སྤྱོ་བ་དང་། སོང་བ་དང་། ཕྱོགས་ལས་གཞན་གྱི་ཕྱོགས་སུ་སོང་བ་དང་། མཁན་པོ་མཐོང་མ་ཐག་ཏུ་གནས་འཆའ་བ་བཏང་བར་འགྱུར་བ་དང་། གཉིས་ཀས་ཀྱང་བཏང་བ་དེ་ནི་་་གནས་འཆའ་བ་བཏང་བའི་རབ་ཏུ་ལྡན་པ་ཞེས་བྱའོ། །
མཁན་པོའི་རབ་ཏུ་ལྡན་པ་གང་ཞེ་ན། དགེ་སློང་དེ་དག་མཁན་པོ་མེད་པར་རབ་ཏུ་བྱུང་ཞིང་བསྙེན་པར་རྫོགས་པར་བྱས་པས་ན་མ་དུལ་བར་གྱུར། ངན་པར་དུལ་བ་དང་། ཚུལ་དང་མི་ལྡན་པ། སྨད་གཡོགས་མི་སྡུག་པར་གྱོན། བླ་གོས་མི་སྡུག་པར་གྱོན། སྤྱོད་པ་ཉམས་ཤིང་མི་སྡུག་པར་སྤྱོད་པ་ལ་ཞུགས་པ་དང་། ཆ་ལུགས་ངན། ཆ་ལུགས་མི་སྡུག་པ་ལ་ཞུགས་ནས་དེ་ལ་སུ་ཡང་ནད་གཡོག་མི་བྱེད་པར་གྱུར་པ་་་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། མཁན་པོ་ཡོད་པ་དང་། དེས་དེ་དག་འདུལ་བར་བྱེད། ལུང་བསྒོ་བར་བྱེད། རྗེས་སུ་ཡང་སྟོན་པར་བྱེད། འཆོས་པར་བྱེད་ན་ཡང་བསྙེན་བཀུར་དང་ནད་གཡོག་བྱེད་པར་འགྱུར་རོ་ཞེས་གསུངས་སོ། །བཅོམ་ལྡན་འདས་ཀྱིས་བསྙེན་བཀུར་བྱོས་ཤིག་ཅེས་གསུངས་པ་འདི་ནི་མཁན་པོའི་རབ་ཏུ་ལྡན་པ་ཞེས་བྱའོ། །ལྷན་ཅིག་སྤྱོད་པའི་རབ་ཏུ་ལྡན་པ་གང་ཞེ་ན། དེ་དགེ་སློང་གི་རབ་ཏུ་ཕྱུང་བསྙེན་པར་རྫོགས་པར་བྱས་ན་མཁན་པོ་ལ་རིམ་གྲོ་མི་བྱེད་ནས་དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་་་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷན་ཅིག་སྤྱོད་པས་ནི་མཁན་པོ་ལ་རིམ་གྲོ་བྱོས་ཤིག །གཞར་བར་བྱོས་ཤིག །བལྟ་བར་བྱོས་ཤིག །མགུ་བར་བྱོས་ཤིག །རྗེས་བཞིན་དུ་འབྲང་བར་བྱོས་ཤིག །བསྙེན་བཀུར་བྱོས་ཤིག །བྱ་བ་ཐམས་ཅད་ཀྱང་མཁན་པོ་ལ་མ་དྲིས་ཀྱི་བར་དུ་མ་བྱེད་ཅིག །རྣམ་པ་གསུམ་མ་གཏོགས་ཏེ། བཤང་གཅི་དང་། སོ་ཤིང་དོར་བ་དང་། མཚམས་ཀྱི་ནང་ནས་མཆོད་རྟེན་ལ་ཕྱག་འཚལ་བ་མ་གཏོགས་སོ། །ལྷན་ཅིག་སྤྱོད་པ་དང་ལྡན་པས་ཀྱང་བྱ་བ་ཐམས་ཅད་མཁན་པོ་ལ་དྲིས་ཤིང་བྱོས་ཤིག །བཤང་གཅི་དང་། སོ་ཤིང་དོར་བ་དང་། མཚམས་ཀྱི་ནང་དུ་མཆོད་རྟེན་ལ་ཕྱག་འཚལ་བ་མ་གཏོགས་སོ། །ལྷན་ཅིག་སྤྱོད་པ་དང་ལྡན་པ་དག་གིས་ཀྱང་ལྷན་ཅིག་སྤྱོད་པའི་མཁན་པོ་ལ་བཀུར་སྟི་བྱོས་ཤིག །བླ་མར་བྱོས་ཤིག །མཆོད་པར་བྱོས་ཤིག །མགུ་བར་བྱོས་ཤིག །དེའི་བྱ་བ་ཞིག་ཡོད་ན་ཡང་ལེ་ལོ་
མི་བྱ་ཞིང་ཤེས་བཞིན་དུ་མྱུར་དུ་གྱིས་ཤིག །རིམ་གྲོ་དང་བཅས། འཛེམ་པ་དང་བཅས། འཇིགས་པ་དང་བཅས་པར་འགྱུར་བར་བྱོས་ཤིག །ངོ་ཚ་བ་དང་། སེམས་དམན་པ་དང་། བདག་གི་དགེ་བ་ཅིར་འགྱུར་སྙམ་པ་དང་། དེ་ལོག་པ་ཞིག་ལ་འཇུག་ན་ཡང་མཁན་པོས་བཟློག་པར་གྱིས་ཤིག །མཁན་པོ་ལ་ཡང་དེས་བཟློག་པར་གྱིས་ཤིག །མཁན་པོ་ན་ན་དེས་ནད་གཡོག་གུས་པར་བྱ། བདག་གི་དོན་ཀྱང་མ་ཉམས་པར་བྱ་བ་དེ་ནི་ལྷན་ཅིག་སྤྱོད་པའི་རབ་ཏུ་ལྡན་པ་ཞེས་བྱའོ། །སློབ་དཔོན་གྱི་རབ་ཏུ་ལྡན་པ་གང་ཞེ་ན། དགེ་སློང་དེ་དག་སློབ་དཔོན་མེད་པར་རབ་ཏུ་བྱུང་ཞིང་བསྙེན་པར་རྫོགས་པར་བྱས་པས་ན་མ་དུལ་བར་གྱུར། ངན་པར་དུལ་བ་དང་། ཚུལ་དང་མི་ལྡན། ཤམ་ཐབས་མི་སྡུག་པར་གྱོན། བླ་གོས་མི་རན་པར་གྱོན། སྤྱོད་པ་ཉམས་ཤིང་མི་སྡུག་པར་སྤྱོད་པ་ལ་ཞུགས་པ་དང་། ཆ་ལུགས་མི་སྡུག །ཆ་ལུགས་ལོག་པ་ལ་ཞུགས་ནས། དེ་ལ་སུ་ཡང་ནད་གཡོག་མི་བྱེད་པར་གྱུར་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སློབ་དཔོན་ཡོད་ཀྱང་དེས་དེ་དག་དུལ་བར་བྱེད། ལུང་བསྒོ་བར་བྱེད། རྗེས་སུ་ཡང་སྟོན་པར་བྱེད། འཆོས་པར་བྱེད། ན་ན་ཡང་བསྙེན་བཀུར་དང་ནད་གཡོག་བྱེད་པར་འགྱུར་རོ་ཞེས་གསུངས་སོ། །བཅོམ་ལྡན་འདས་ཀྱིས་བསྙེན་བཀུར་བྱོས་ཤིག་ཅེས་གསུངས་པ་འདི་ནི་སློབ་དཔོན་གྱི་རབ་ཏུ་ལྡན་པ་ཞེས་བྱའོ། །ཉེ་གནས་ཀྱི་རབ་ཏུ་ལྡན་པ་གང་ཞེ་ན། དེ་དགེ་སློང་དག་གིས་རབ་ཏུ་ཕྱུང་བསྙེན་པར་རྫོགས་པར་བྱས་ན་སློབ་དཔོན་ལ་རིམ་གྲོ་མི་བྱེད་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཉེ་གནས་ཀྱིས་ནི་སློབ་དཔོན་ལ་རིམ་གྲོ་བྱོས་ཤིག །གཞར་བར་བྱོས་ཤིག །བལྟ་བར་བྱོས་ཤིག །མགུ་བར་བྱོས་ཤིག །རྗེས་བཞིན་དུ་འབྲང་བར་བྱོས་ཤིག །བསྙེན་བཀུར་བྱོས་ཤིག །བྱ་བ་ཐམས་ཅད་ཀྱང་སློབ་དཔོན་ལ་མ་དྲིས་ཀྱི་བར་དུ་མ་བྱེད་ཅིག །རྣམ་པ་གསུམ་མ་གཏོགས་ཏེ། བཤང་
གཅི་དང་། སོ་ཤིང་དོར་བ་དང་། མཚམས་ཀྱི་ནང་དུ་མཆོད་རྟེན་ལ་ཕྱག་འཚལ་བ་མ་གཏོགས་སོ། །ཉེ་གནས་དང་ལྡན་པས་ཀྱང་བྱ་བ་ཐམས་ཅད་སློབ་དཔོན་ལ་དྲིས་ཤིང་བྱོས་ཤིག །བཤང་གཅི་དང་། སོ་ཤིང་དོར་བ་དང་། མཚམས་ཀྱི་ནང་དུ་མཆོད་རྟེན་ལ་ཕྱག་འཚལ་བ་མ་གཏོགས་སོ། །ཉེ་གནས་དང་ལྡན་པ་དག་གིས་ཀྱང་ཉེ་གནས་ཀྱིས་སློབ་དཔོན་ལ་བཀུར་སྟིར་བྱོས་ཤིག །བླ་མར་བྱོས་ཤིག །མཆོད་པར་བྱོས་ཤིག །མགུ་བར་བྱོས་ཤིག །དེའི་བྱ་བ་ཞིག་ཡོད་ན་ཡང་ལེ་ལོ་མི་བྱ་ཞིང་ཤེས་བཞིན་དུ་མྱུར་དུ་གྱིས་ཤིག །རིམ་གྲོ་དང་བཅས། འཛེམ་པ་དང་བཅས། འཇིགས་པ་དང་བཅས་པར་བྱོས་ཤིག །ངོ་ཚ་བ་དང་། སེམས་དམན་པ་དང་། བདག་གི་དགེ་བ་ཅིར་འགྱུར་སྙམ་པ་དང་། དེ་ལོག་པ་ཞིག་ལ་འཇུག་པ་ན་ཡང་སློབ་དཔོན་གྱིས་བཟློག་པར་གྱིས་ཤིག །སློབ་དཔོན་ལ་ཡང་དེས་བཟློག་པར་གྱིས་ཤིག །སློབ་དཔོན་ན་ན་དེས་ནད་གཡོག་གུས་པར་བྱ། བདག་གི་དོན་ཀྱང་མ་ཉམས་པར་བྱ་བ་དེ་ནི་ཉེ་གནས་ཀྱི་རབ་ཏུ་ལྡན་པ་ཞེས་བྱའོ། །མཁན་པོ་དང་སློབ་དཔོན་དང་ལྷན་ཅིག་སྤྱོད་པ་དང་ཉེ་གནས་ཀྱི་རབ་ཏུ་ལྡན་པ་གང་ཞེ་ན། མཁན་པོ་དང་སློབ་དཔོན་གྱིས་ལྷན་ཅིག་སྤྱོད་པ་དང་ཉེ་གནས་ལ་བུ་ལྟ་བུའི་འདུ་ཤེས་མངོན་དུ་ཞོག་ཤིག །ལྷན་ཅིག་སྤྱོད་པ་དང་ཉེ་གནས་ཀྱིས་ཀྱང་མཁན་པོ་དང་སློབ་དཔོན་ལ་ཕར་འདུ་ཤེས་མངོན་དུ་དགའ་བར་བྱ་སྟེ། འདི་ནི་མཁན་པོ་དང་སློབ་དཔོན་དང་ལྷན་ཅིག་སྤྱོད་པ་དང་ཉེ་གནས་ཀྱི་རབ་ཏུ་ལྡན་པ་ཞེས་བྱའོ། །དགེ་སློང་གི་རབ་ཏུ་ལྡན་པ་དགེ་ཚུལ་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་དགེ་ཚུལ་ཕ་་་ཆོངས་ཤིག་པར་གནང་སྟེ། ཐ་མ་ནི་བྱ་རོག་སྐྲོད་ནུས་ལ་ལོ་བདུན་པའོ། །དེ་ལ་ཉེས་པའི་དམིགས་ཤིག་བྱུང་ན་དགེ་བསྙེན་དད་པའི་མདུན་དུ་སྤྱོ་ཞིང་སྤོངས་་་ཤིག །སྒྲེན་མོར་མ་སྤང་ཤིག །གོས་གཅིག་པར་མ་སྤང་བར་སྟོད་གཡོགས་མཐང་གོས་དང་ལྡན་པར་སྤང་སྟེ། འདི་ནི་དགེ་ཚུལ་གྱི་རབ་ཏུ་ལྡན་པ་ཞེས་བྱའོ། །དངོས་པོའི་རབ་ཏུ་ལྡན་པ་གང་ཞེ་ན། ཕྱོགས་གར་ཐོག་མ་གཙུག་ལག་ཁང་རྩིག་པ་དེར་ལས་གསར་དུ་བྱེད་པའི་དགེ་
སློང་གིས་རྟོགས་ཤིག །སྔར་་་གཙུག་ལག་ཁང་གི་དངོས་པོ་བརྟག་པ་ནི་འོད་པ་དང་ལྡན་ནམ། སྐྱེད་ཤིང་དང་ལྡན་ནམ། ཆུ་དང་ལྡན་ནམ། འཆག་ས་དང་ལྡན་ནམ། ཉེ་འཁོར་དང་ལྡན་ནམ། རྩོད་པ་མེད་དམ། དོག་པ་མེད་དམ། སྤྱོད་ཡུལ་དང་མི་རིང་ངམ། ཧ་ཅང་ཡང་མི་ཉེའམ། ཉིན་པར་ལྡུགས་མི་མང་ངམ། འཁྲུག་པ་མི་ཆེའམ། མཚན་མོ་ཡང་སྒྲ་མི་ཆེའམ། ཅ་ཅོ་མི་ཆེའམ། གདུག་པའི་སྲོག་ཆགས་དང་སྦྲང་བུ་དང་སྦྲུལ་དང་རླུང་དང་ཚ་བས་མི་བདེ་བ་ལྟ་མེད་དམ། ཞི་བ་དབེན་པ་བསམ་གཏན་གྱི་རྗེས་སུ་མཐུན་ནམ། ནང་དུ་ཡང་དག་འཇོག་པའི་གཞིར་རུང་ངམ་མི་རུང་ཞེས་ཤིན་ཏུ་རྟོགས་པར་བྱས་ལ་གདོད་གཙུག་ལག་ཁང་་་བརྩིག་གོ །ལས་གསར་བྱེད་པའི་དགེ་སློང་གིས་ཤིན་ཏུ་མ་བརྟགས་པར་གཙུག་ལག་ཁང་བརྩིགས་ན་འདས་པ་དང་བཅས་པར་འགྱུར་ཏེ། འདི་ནི་དངོས་པོའི་རབ་ཏུ་ལྡན་པ་ཞེས་བྱའོ། །གཙུག་ལག་ཁང་གི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གཙུག་ལག་ཁང་རབ་ཏུ་གནང་བ་ནི་་ཁང་བཟངས་ཁྱམས་བཞི་པ་དང་། ཁང་བཟངས་ཁྱམས་བཅུ་གཉིས་པོ་དེ་སྒོ་ཁང་ནི་བཞི་རྩེག་གམ་བདུན་རྩེག་གོ །ཁང་བུ་བརྩེགས་པ་དང་། བསྲོ་གང་དང་། ཚང་མང་དང་། བཀད་ས་དང་། འཆག་ས་དང་། དུགས་ཁང་དང་། རྐང་པའི་བཀྲུ་ཁང་དང་། གནས་ཁང་དང་། སྔ་ཁང་དང་། ཁང་པ་འཁོར་དུ་བཅས་པ་དང་། ཁང་པ་གློ་འབུར་ཏེ། དགེ་འདུན་གྱི་ཡང་རུང་། གང་ཟག་གི་ཡང་རུང་། སློབ་པ་དང་མི་སློབ་པའི་ཡང་རུང་སྟེ། སྤྱོད་ལམ་བཞིར་རུང་བར་འགྱུར་བ་ནི་གཙུག་ལག་ཁང་གི་རབ་ཏུ་ལྡན་པ་ཞེས་བྱའོ། །མལ་སྟན་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མལ་སྟན་རྗེས་སུ་གནང་བ་ནི་འདི་ལྟ་སྟེ། ཁྲི་དང་། ཁྲིའུ་དང་། སྟན་ནང་ཚངས་ཅན་དང་། ལ་བ་དང་། སྔས་རྟེན་དང་། གྲུ་བཞི་པ་སྟེ། དགེ་འདུན་གྱིའང་རུང་གང་ཟག་གི་ཡང་རུང་། གདིང་བ་དང་། བགོ་བ་འདི་ནི་མལ་སྟན་གྱི་རབ་ཏུ་ལྡན་པ་ཞེས་བྱའོ། །ལས་གསར་གྱི་རབ་ཏུ་ལྡན་པ་གང་ཞེ་ན། དེ་འདི་ལྟར་བཅོམ་ལྡན་འདས་ཀྱིས་གང་གི་ཚེ་གཙུག་ལག་ཁང་བྱོས་ཤིག་པར་རྗེས་སུ་གནང་བ་དེ་ན། དགེ་སློང་རྣམས་
ཀྱིས་ཇི་ལྟར་དགའ་བ་བཞིན་དུ་ལས་གསར་པ་བྱེད་དེ། དེ་ལ་ཁ་ཅིག་གིས་ནི་བརྩམས་པ་ལས་དུས་འདས་པར་གྱུར། ཁ་ཅིག་གིས་ནི་བརྩམས་ནས་དོང་། ཁ་ཅིག་གིས་ནི་ཟིན་པར་བྱེད་དོ། །སངས་རྒྱས་བཅོམ་ལྡན་འདས་འབྲོག་དགོན་པ་ན་འབྲོག་དགོན་པའི་མཆོག་གི་ནགས་ན་བཞུགས་ཏེ། དེའི་ཚེ་ན་དགོན་པའི་གཙུག་ལག་ཁང་རྣམས་ཞིག་ཀྱང་ལས་གསར་པ་མི་བྱེད་དེ། དགོན་པའི་གཙུག་ལག་ཁང་ཞིག་ཀྱང་ལས་གསར་པ་མི་བྱེད་པར་བཅོམ་ལྡན་འདས་ཀྱིས་གཟིགས་སོ། །དེ་ལྟར་གཟིགས་ནས་ཡང་། ཚེ་དང་ལྡན་པ་ཀུན་དགའ་བོ་ལ་ཀུན་དགའ་བོ་ཅིའི་རྒྱུ་ཅིའི་རྐྱེན་གྱིས་ན་དགོན་པ་འདི་དག་ལས་གསར་པ་མི་བྱེད་ཅེས་གསུངས་པ་དང་། བཙུན་པ་དེ་འདི་ལྟར་དགོན་པའི་དགེ་སློང་དག་ལས་ཁ་ཅིག་ནི་དུས་ལས་འདས། ཁ་ཅིག་ནི་དོང་། ཁ་ཅིག་ནི་ལེགས་པར་བགྱིད་པས་ན་བཙུན་པ་རྒྱུ་དེ་དང་རྐྱེན་དེ་ལྟ་བུའི་ཕྱིར་དགོན་པ་པ་དག་ལས་གསར་པ་མི་བྱེད་དོ་ཞེས་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལས་གསར་དུ་བྱེད་པའི་དགེ་སློང་སྐོས་ཤིག །དེ་ཡང་རིམ་བཞིན་དུ་མ་ཡིན་གྱི་གང་རང་བཞིན་གྱིས་དགེ་བ་ལ་བརྩོན་ཞིང་ལེ་ལོ་་་མེད་པ་བརྩོན་འགྲུས་ཀྱི་ནན་ཏན་དང་ལྡན་པ་ལས་གསར་དུ་བྱེད་ནུས་པ། ལས་གསར་པ་ལ་དོན་བྱེད་པ་དེ་ལྟ་བུ་ནི་ལས་གསར་དུ་བྱེད་པར་གསོལ་བ་་་དང་། གཉིས་ཀྱི་ལས་ཀྱིས་བསྐོ་བར་བྱའོ། །དེ་ན་དགེ་སློང་རྣམས་འདི་ལྟར་རྩིག་པ་རལ་བ་ལས་སླར་བརྩིག་པ་ཙམ་མམ། བལ་གླང་གི་ལྕི་བ་བྱུགས་པ་ཙམ་དང་། གང་ཅི་ཡང་རུང་བ་ཞག་གཅིག་ཙམ་གྱི་ཕྱིར་ཡང་ལས་གསར་དུ་བྱེད་པའི་དགེ་སློང་བསྐོ་བ་དང་། བཅོམ་ལྡན་འདས་ཀྱིས་བཀའ་སྩལ་པ། གང་ཅིའི་ལ་ཡང་རུང་ཞག་གཅིག་ཙམ་གྱི་ཕྱིར་ལས་གསར་པ་བྱེད་པའི་དགེ་་་སློང་མ་བསྐོ་བར། གང་མཆོད་རྟེན་ནམ། གཙུག་ལག་ཁང་རྙིང་པ་སླར་བཅོས་སམ། དེ་སྟེ་གསར་པ་བྱེད་ཀྱང་རུང་གིས་དེའི་ཕྱིར་ལས་གསར་པ་བྱེད་པ་སྐོས་ཤིག །དེ་དག་ནམ་འཚོ་བའི་བར་དུ་བསྐོས་ཏེ། དུད་པ་ཅན་གྱི་ནང་དེ་ཉིད་དུ་འཁོད་པར་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། ནམ་འཚོ་བའི་བར་དུ་མ་བསྐོ་ཤིག །དུད་པ་ཅན་གྱི་ནང་ན་འཁོད་པར་ཡང་མ་བྱེད་ཅིག །ལས་
གསར་དུ་བྱེད་པ་ཡང་གནས་ཁང་རྙིང་པ་འཆོས་ན་ལོ་དྲུག་ཏུ་སྐོས་ཤིག །གནས་ཁང་གསར་པ་ལ་ནི་ལོ་བཅུ་གཉིས་སོ། །ལས་གསར་དང་རབ་ཏུ་ལྡན་པའི་དགེ་སློང་དེས་ཀྱང་གཙུག་ལག་ཁང་གང་ན་་་གནས་པར་དགེ་སློང་དེས་གཙུག་ལག་ཁང་དེར་དུས་དུས་སུ་ཀུན་ཏུ་བྱུལ་ཞིང་་་རྟོགས་ཤིག །དེ་སྟེ་གཙུག་ལག་ཁང་དེ་ན་རལ་ཞིང་ཞིག་པར་མཐོང་ན་དེ་སྟེ་བདག་ཉིད་ཀྱིས་ནུས་པར་གྱུར་ན་ནི་བདག་ཉིད་ཀྱིས་སླར་གསོ་བར་བྱོས་ཤིག །བདག་ཉིད་ཀྱིས་བྱ་བ་མི་ནུས་ན་ཚངས་པ་མཚུངས་པར་སྤྱོད་པ་གཞན་དག་ལ་སྟོན་ཅིག །སྟོན་ལ་བདག་གིས་མངོན་སུམ་དུ་ཞལ་ཏ་གྱིས་ལ་སླར་ཆོས་ཤིག །དེ་ཡལ་བར་མ་དོར་ཅིག །ཕྱལ་བར་བོར་ན་འདས་པ་དང་བཅས་པར་འགྱུར་ཏེ། འདི་ནི་ལས་གསར་གྱི་རབ་ཏུ་ལྡན་པ་ཞེས་བྱའོ། །ལས་གསར་དུ་བྱེད་པར་རབ་ཏུ་ལྡན་པ་གང་ཞེ་ན། དེ་ལ་ལས་གསར་དུ་བྱེད་པའི་དགེ་སློང་གིས་དགེ་འདུན་གྱི་ལས་གསར་དུ་བྱེད་པ་ལ་ཞུགས་ན་དེ་དགེ་འདུན་གྱི་ལས་ཀྱིས་་་རྨོངས་པས་ན་ལས་གསར་དུ་བྱ་བ་ཡང་ཤོར་བར་གྱུར་ནས། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ངས་རྗེས་སུ་གནང་གིས་ལས་གསར་དུ་བྱེད་པའི་དགེ་སློང་ལ་དགེ་འདུན་གྱི་ལས་མ་བསྐོ་ཤིག །གཙུག་ལག་ཁང་རྙིང་པ་སླར་གསོ་བ་དེ་ལ་ནི་ལོ་གཉིས་སུ་ལས་ཀྱི་རེས་སུ་མི་བསྐོ་སྟེ། ནམ་བརྩིགས་གཡོགས་སྐྱོང་ནུལ་ཟིན་གྱི་བར་དུའོ། །གང་གིས་གནས་ཁང་བཞི་པའི་གཙུག་ལག་ཁང་ཞིག་རྩིག་ན་དེ་ལ་ལོ་བཞིའི་བར་དུ་ལས་སུ་མི་བསྐོ་སྟེ། ནམ་བརྩིགས་གཡོགས་སྐྱོང་ནུལ་ཟིན་གྱི་བར་དུའོ། །གང་གནས་ཁང་བརྒྱད་པའི་གཙུག་ལག་ཁང་རྩིག་ན་དེ་ལ་ལོ་བརྒྱད་ཀྱི་བར་དུ་ལས་ཀྱི་རེས་སུ་མི་བསྐོ་སྟེ། ནམ་བརྩིགས་གཡོགས་སྐྱོང་ནུལ་ཟིན་གྱི་བར་དུའོ། །གནས་ཁང་ཁྱམས་བཅུ་གཉིས་པའི་གཙུག་ལག་ཁང་ཞིག་རྩིག་ན་དེ་ལ་ལོ་བཅུ་གཉིས་ཀྱི་བར་དུ་ལས་ཀྱི་རེས་སུ་མི་བསྐོ་སྟེ། ནམ་་་བརྩིགས་གཡོགས་སྐྱོང་ནུལ་ཟིན་གྱི་བར་དུའོ། །གང་མཆོད་རྟེན་དང་བཅས་པའི་དགེ་འདུན་ཀུན་དགའ་ར་བ་ཞིག་རྩིག་ལ་མལ་སྟན་རྣམས་ཀྱང་སྦྱོར་བར་བྱེད་ན་ནམ་
འཚོའི་བར་དུ་ལས་ཀྱི་རེས་སུ་མི་བསྐོ་སྟེ། ལས་གསར་གྱི་རབ་ཏུ་ལྡན་པ་དེ་ཡང་ཆོས་ལྔ་དང་ལྡན་པའི་དགེ་སློང་ལས་གསར་ལ་མ་བསྐོས་ན་ནི་མ་བསྐོ་ཤིག །བསྐོས་ན་ནི་ཕྱུང་ཤིག །ལྔ་གང་ཞེ་ན། མི་བརྩོན་པ་དང་། ལེ་ལོ་ཅན་དང་། ནན་ཏན་དུ་མི་བྱེད་པ་དང་། མྱུར་དུ་མི་བྱེད་པ་དང་། ལས་གསར་པ་བྱས་པ་དང་མ་བྱས་པ་མི་ཤེས་པའོ། །ཆོས་རྣམ་པ་ལྔ་དང་ལྡན་པའི་དགེ་སློང་ལས་གསར་པ་བྱེད་པར་མ་བསྐོས་ན་ནི་བསྐོས་ཤིག །བསྐོས་ན་ནི་མ་ཕྱུང་ཤིག །ལྔ་གང་ཞེ་ན། བརྩོན་པ་ཅན་དང་། ལེ་ལོ་མེད་པ་དང་། ནན་ཏན་དང་ལྡན་པ་དང་། མྱུར་བར་བྱེད་པ་དང་། ལས་གསར་པ་བྱས་པ་དང་མ་བྱས་པ་ཤེས་པའོ། །ལས་གསར་པ་བྱེད་པའི་དགེ་སློང་གིས་ཀྱང་གཙུག་ལག་ཁང་དུས་དུས་སུ་བྱུལ་ཅིག །ཅི་ནས་གཙུག་ལག་ཁང་ལས་བྱེད་པ་དེས་ཀུན་ཏུ་སྤྲོ་བར་བྱ་བ་ནི་ཇི་ལྟར་གཙུག་ལག་ཁང་ཐམས་ཅད་ལ་ལས་གསར་པ་བྱས་པ་ཉམས་པར་མི་འགྱུར་བ་དེ་ལྟ་བུར་སྤྲོ་བ་བསྐྱེད་པར་བྱ་སྟེ། དེ་ལྟར་བྱས་ན་ནི་ལེགས། དེ་ལྟར་མ་བྱས་ན་འདས་པ་དང་བཅས་པར་འགྱུར་ཏེ། དེ་ལྟ་བུ་ནི་ལས་གསར་དུ་བྱེད་པ་དང་རབ་ཏུ་ལྡན་པ་ཞེས་བྱའོ། །ཕྱག་འཚལ་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཕྱག་འཚལ་བ་རྣམ་པ་གཉིས་གནང་སྟེ། དགེ་སློང་ལ་ཕྱག་བྱ་བ་དང་། སྟོན་པ་ལ་ཕྱག་བྱ་བའོ། །དགེ་སློང་གིས་ནི་ཇི་ལྟར་རྒན་རིམས་ཀྱི་དགེ་སློང་ལ་མངོན་དུ་ཚིག་སྙན་པ་དང་། ཕྱག་བྱ་བ་དང་། མངོན་དུ་ལྡང་བ་དང་། ཐལ་མོ་སྦྱར་བ་དང་། ཕྱག་བྱ་བར་བྱ་སྟེ། མགོས་རྐང་པ་ལ་ཕྱག་བྱ་བ་དང་། ལག་པ་གཉིས་ཀྱིས་རྐང་པ་གཉིས་ནས་བཟུང་ཞིང་བཙིར་བའོ། །དེ་བཞིན་གཤེགས་པ་ལ་ནི་དཀྱིལ་འཁོར་ལྔས་ཕྱག་བྱ་སྟེ། དེ་ནི་ཕྱག་བྱ་བའི་རབ་ཏུ་ལྡན་པ་ཞེས་བྱའོ། །ཁུ་བ་སྐྱུར་པོའི་རབ་ཏུ་ལྡན་པ་གང་ཞེ་ན། ཁུ་བ་སྐྱུར་པོ་ནི་དགེ་སློང་ན་བ་དང་། རླུང་ནད་ཅན་རྣམས་ལ་སྟེ། ཇི་ལྟར་ཚེ་དང་ལྡན་པ་ཤཱ་རིའི་བུ་ལ་གནང་བ་བཞིན་ནོ། །རྫས་གང་ལ་ཁུ་བ་སྐྱུར་པོ་བྱ་ཞེ་ན། རྩ་བ་དང་། སྡོང་བུ་དང་། ལོ་མ་དང་། མེ་ཏོག་དང་། སྨན་དང་། ས་བོན་ཐམས་ཅད་དེ་དག་གཅིག་ཏུ་སྦངས་ནས་ནམ་སྐྱུར་བར་གྱུར་པ་དེ་ན་
དང་བ། མ་རྙོགས་པ། དར་ཚགས་ཀྱིས་བཙགས་ལ་ཆུས་བསླད་དེ་དང་བར་བྱས་ནས་ཉིན་པར་དང་སྲོད་ཀྱི་བར་དུ་བཏུང་སྟེ། དེ་ནི་ཁུ་བ་སྐྱུར་པོའི་རབ་ཏུ་ལྡན་པའོ། །ཕྱེ་མའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཕྱེ་མ་རྣམ་པ་གཉིས་ཡོངས་སུ་གནང་སྟེ། སྨན་གྱི་ཕྱེ་མ་དང་། བཀྲུ་བའི་ཕྱེ་མའོ། །སྨན་གྱི་ཕྱེ་མ་རྣམས་ནད་གཞིལ་བའི་ཕྱིར་གནང་ངོ་། །བཀྲུ་བའི་ཕྱེ་མ་དགེ་སློང་རྣམས་ལ་གནང་བ་ནི་རྒྱགས་པའི་ཕྱིར་མ་ཡིན། དྲེགས་པའི་ཕྱིར་མ་ཡིན། མཛེས་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན་གྱི་ལུས་ཀྱི་དྲི་མ་བསལ་བའི་ཕྱིར་རོ། །ཅི་ལས་བཀྲུ་བའི་ཕྱེ་མ་བྱ་ཞེ་ན། སྲན་གྲེའུ་དང་། སྲན་མཱ་ཥ་དང་། རྒྱ་སྲན་དང་། སྲན་མ་དང་། དེ་རྣམས་ཀྱི་ཕྱི་ཤུན་དང་། འབྲུ་ཧྲི་མིན་ཏ་རྣམས་ལ་བྱ་སྟེ། དགེ་སློང་རྣམས་ལ་དྲི་སྣ་ཚོགས་ཀྱིས་སྦགས་པ་དེ་བརྒྱན་པའི་ཕྱིར་མ་ཡིན་གྱི་བཀྲུ་བའི་ཕྱེ་མར་ཡོངས་སུ་སྤྱད་པར་བྱའོ། །མ་བསླངས་པར་དྲི་དང་སྦགས་པ་ཞིག་རྙེད་པར་གྱུར་ན་ཉེས་པ་མེད་དེ། དེ་དང་མཐུན་པའི་སྨན་རྣམས་ཀྱིས་རང་གིས་ཀྱང་སྦགས་ཤིང་སྤྱོད་ན་དེ་བཞིན་ཏེ། དེ་ནི་ཕྱེ་མའི་རབ་ཏུ་ལྡན་པ་ཞེས་བྱའོ། །སྨན་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་ནད་པ་རྣམས་ལ་ནད་གཞིལ་བའི་ཕྱིར་སྨན་རྗེས་སུ་གནང་སྟེ། སྔ་དྲོ་དང་། ཕྱི་དྲོ་དང་། བདུན་པ་དང་། ནམ་འཚོའི་བར་དུ་སྟེ། རྩྭ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་ནོ། །དགེ་སློང་མི་ན་བས་ནི་ན་བའི་སྨན་ཡོངས་སུ་མི་སྤྱད་དེ། འདི་ནི་སྨན་གྱི་རབ་ཏུ་ལྡན་པ་ཞེས་བྱའོ། །བཏུང་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་དྲང་སྲོང་ཀཻ་ནྱ་ཡ་ཞེས་བྱ་བ་ལས་ཏེ་དགེ་སློང་རྣམས་ལ་བཏུང་བ་རྣམ་པ་བརྒྱད་རྗེས་སུ་གནང་ངོ་། །དེ་དག་གང་ཞེ་ན། འདི་ལྟ་སྟེ། ཤིང་ཏོག་ཙོ་ཙའི་དང་། མོ་ཙའི་དང་། རྒྱ་ཤུག་གི་དང་། འབྲ་གོའི་དང་། པ་རུ་ཤ་དང་། ཨ་ཤྭཏྠའི་དང་། ཨུ་དུམ་བཱ་རའི་དང་། རྒུན་འབྲུམ་གྱི་སྟེ། བཏུང་བ་རྣམ་པ་བརྒྱད་པོ་འདི་དག་ནི་དགེ་སློང་རྣམས་
ལ་གནང་གིས་ཁ་ཟས་མ་འབགས་པ་དང་། མི་མྱོས་པ་དང་། མི་སྐྱུར་བ་དང་། སངས་པ་དང་། དང་བ་དང་། མ་རྙོགས་པར་དར་ཚགས་ཀྱིས་ཚོགས་ལ་ཆུས་སློད་དེ་ཕྱི་དྲོའི་བྱས་པ་བཏང་སྟེ། འདི་ནི་བཏུང་བའི་རབ་ཏུ་ལྡན་པ་ཞེས་བྱའོ། །པགས་པའི་རབ་ཏུ་ལྡན་པ་གང་ཞེ་ན། དགེ་སློང་གིས་པགས་པ་གཞག་པར་མི་བྱ། བཅང་བར་མི་བྱ། བྱིན་གྱིས་བརླབ་པར་མི་བྱ། གདིང་བར་མི་བྱ། དེ་ལ་འདུག་པར་མི་བྱ། སྟན་དུ་གདིང་བར་མི་བྱ། དེ་ལ་འཇུག་པར་མི་བྱ། དེ་ལ་འདྲེས་པར་མི་བྱ། ལྷམ་གོང་རལ་སྦུ་བུ་ཅན་དང་། མཆིལ་ཅན་དང་། གོང་ཅད་དང་། ཡུ་ཐུང་སྟེ། ཁྱིམ་པའི་ནང་དུ་དེ་འདྲ་བའི་རྐྱེན་ཅིག་བྱུང་ན་ནི་པགས་པ་ལ་འདུག་པར་བྱའོ། །ནད་པས་ནི་པགས་པ་ལ་འདུག་པར་བྱ་སྟེ། འདི་ནི་པགས་པའི་རབ་ཏུ་ལྡན་པ་ཞེས་བྱའོ། །ལྷམ་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ལྷམ་རྣམ་པ་གཉིས་གནང་སྟེ། ལྷམ་མཆིལ་རིམ་གཅིག་པ་དང་། ཁྱིམ་པའི་ལྷམ་རིམ་མང་པོ་ཡང་རུང་ངོ་། །དགེ་སློང་གིས་རི་མོར་བྲིས་པའི་ལྷམ་མ་འཆང་ཤིག །དེ་ནི་ལྷམ་གྱི་རབ་ཏུ་ལྡན་པ་ཞེས་བྱའོ། །ཤིང་ལྷམ་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཤིང་ལྷམ་རྣམ་པ་གཉིས་གནང་སྟེ། བཤང་གཅིའི་ཤིང་ལྷམ་དང་། ཁྲི་རྟེན་གྱི་ཤིང་ལྷམ་མོ། །དགེ་སློང་གིས་དེ་མ་ཡིན་པར་གཞན་དུ་ཤིང་ལྷམ་མི་བཅང་སྟེ། གཞན་དུ་་་བཅངས་ན་འདས་པ་དང་བཅས་པར་འགྱུར་ཏེ། འདི་ནི་ཤིང་ལྷམ་གྱི་རབ་ཏུ་ལྡན་པ་ཞེས་བྱའོ། །དྲུད་པའི་རབ་ཏུ་ལྡན་པ་གང་ཞེ་ན། དགེ་སློང་གིས་རྟའི་དྲུད་པའམ། མཚོའི་དབུ་བའམ། གྱོ་མོས་རྐང་པ་དྲུད་པ་མ་འཆང་ཤིག །དེ་ནི་དྲུད་པའི་རབ་ཏུ་ལྡན་པ་ཞེས་བྱའོ། །ཁར་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་ནད་པ་དང་། རྒན་པོ་ལ་ཁར་བ་རྗེས་སུ་་་་གནང་ངོ་། །དེ་སྟེ་རྩ་བར་གས་ན་ནི་ལྕགས་ཀྱིས་བསྐོར་ཅིག །རྩེ་མོར་གས་ན་ནི་སྦུ་བུར་ཆུག་ཤིག །དེ་ནི་ཁར་བའི་རབ་ཏུ་ལྡན་པ་ཞེས་བྱ་སྟེ། རྒྱལ་པོའི་ཁབ་ཀྱི་གྲོང་ཁྱེར་གྱི་བསིལ་བའི་ཚལ་གྱི་དུར་ཁྲོད་ན་སྦྲུལ་ཡོད་དེ།
དགེ་སློང་རྣམས་དུར་ཁྲོད་ཀྱི་ནང་དུ་དོང་བ་དང་། སྦྲུལ་གྱིས་རེག་པར་གྱུར་ནས་དེ་ལྟ་བུར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། སྦྲུལ་རྣམས་བསྐྲད་པའི་ཕྱིར་སྒྲ་དང་བཅས་པའི་་ཁར་བ་འཆང་བར་གནང་སྟེ། འདི་ནི་ཁར་བའི་རབ་ཏུ་ལྡན་པ་ཞེས་བྱའོ། །དྲ་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་ན་བ་དང་རྒས་པ་ལ་དྲ་བ་གནང་སྟེ། དགེ་སློང་གིས་ཚོན་སྣ་ཚོགས་ཀྱིས་དྲ་བ་བརྒྱན་པའི་ཕྱིར་མ་འཆང་ཤིག །འདི་ནི་དྲ་བའི་རབ་ཏུ་ལྡན་པ་ཞེས་བྱའོ། །ཁར་བ་དང་དྲ་བའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་ན་བ་དང་རྒས་པ་ལ་ཁར་བ་དང་དྲ་བའི་སྡོམ་པ་གསོལ་བ་དང་གཉིས་ཀྱི་ལས་ཀྱིས་བྱིན་ཅིག་པར་རྗེས་སུ་གནང་སྟེ། རྒྱས་པར་ནི་འདུལ་བ་ལས་འབྱུང་བ་བཞིན་ཏེ། འདི་ནི་ཁར་བ་དང་དྲ་བའི་རབ་ཏུ་ལྡན་པ་ཞེས་བྱའོ། །སྒོག་སྐྱའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་ན་བ་རླུང་ནད་ཅན་ལ་སྒོག་སྐྱ་རྗེས་སུ་གནང་སྟེ། ཇི་ལྟར་ཚེ་དང་ལྡན་པ་ཤཱ་རིའི་བུ་ལ་གནང་བ་བཞིན་ནོ། །དགེ་སློང་མི་ན་བར་སྒོག་སྐྱ་མ་ཟ་ཤིག །ཟ་ན་འདས་པ་དང་བཅས་པར་འགྱུར་རོ། །དེ་སྟེ་ན་ཟོ་ལ་ཚུལ་བཞིན་དུ་བྱོས་ཤིག །སྒོག་པའི་ཚུལ་དེ་ནི་འདི་ལྟ་བུ་སྟེ་དགེ་སློང་གིས་སྒོག་སྐྱ་ཟོས་ན་སྟོན་པ་ལ་ལྟར་མ་འགྲོ་ཤིག །མཁན་པོ་དང་སློབ་དཔོན་གྱི་དྲུང་དུ་མ་འགྲོ་ཤིག །བླ་མ་ལ་ཡང་མ་ཡིན། བླ་མའི་གནས་སུ་གྱུར་པ་ཡང་མ་ཡིན་སྟོན་པར་ཡང་མ་བྱེད་ཅིག །ནོད་པར་ཡང་མ་བྱེད་ཅིག །དྲན་པར་ཡང་མ་ཡིན། འདྲི་བར་ཡང་མ་ཡིན། གྲོང་དུ་ཡང་མ་འཇུག་ཤིག །ཟས་ལ་གྲལ་དུ་ཡང་མི་བཀད། ཐུག་པ་འཐུང་བར་ཡང་མ་ཡིན། སྐྱོ་མ་འཐུང་བར་ཡང་མ་ཡིན། ཆོས་ཉན་པར་ཡང་མ་ཡིན། དགེ་སློང་རྣམས་དང་ལྷན་ཅིག་ཏུ་འདུག་པར་ཡང་མ་བྱེད་ཅིག །འདུ་བར་ཡང་མ་ཡིན། གཞན་ཅིའི་དོན་ལ་ཡང་རུང་སྟེ། ལྷན་ཅིག་མི་འདུག །གནས་ཁང་དབེན་པར་འདུག་པར་བྱ། དེ་སྟེ་གང་ཟག་གི་གདིང་བ་དང་བགོ་བ་མེད་པར་གྱུར་ན་ཕྱོགས་བཞིའི་དགེ་འདུན་གྱི་ངན་པ་ལས་ལོང་ཤིག །བཤང་གཅིའི་ས་ཡང་ལོགས་ཤིག་ཏུ་བྱོས་ཤིག །དེ་
སྟེ་ཞག་གཅིག་སྒོག་སྐྱ་ཟོས་ན་ཞག་བདུན་གྱི་བར་དུ་སོང་ཤིག །བདུན་དུ་ཟོས་ན་ཡང་བདུན་དུ་སོང་ཤིག །བདུན་འདས་ནས་ནི་གདིང་བ་དང་བགོས་པ་ཡང་ཁྲུས་ཤིག །གནས་ཁང་ཡང་བྱི་བདར་གྱིས་ཤིག །གནས་ཁང་གི་ཟླ་རྣམས་ཀྱང་ཕྱག་དར་ཕྱོགས་ཤིག །ཞལ་ཞལ་གྱིས་འཇམ་པོར་གྱིས་ཤིག །བ་ལང་གི་ལྕི་བས་ཡུགས་ཤིག །བཤང་གཅི་སར་ཡང་བྱི་བདར་གྱིས་ཤིག །ཆོས་གོས་ཁྲུས་ཤིག །ཁྲུས་བྱོས་ཤིག །དེའི་འོག་ཏུ་ཅི་བདེར་སྟོན་པ་ལ་ལྟར་སོང་ཤིག །མཁན་པོ་དང་སློབ་དཔོན་དང་། བླ་མའི་གནས་སུ་འགྱུར་བ་རྣམས་ལ་ལྟར་སོང་ཤིག །སྟོན་པ་ཡང་བྱིན་ཅིག །ནོད་པ་དང་དྲན་པར་བྱ་བ་དང་། དྲི་བ་ཡང་བྱོས་ཤིག །གྲོང་དུ་ཡང་ཞུགས་ཤིག །ཟས་ལ་གྲལ་དུ་ཡང་བཀད་པར་བྱའོ། །སྐྱོ་མ་དང་ཐུག་པ་འཐུང་བའི་གྲལ་དུ་ཡང་བཀད་པར་བྱ། ཆོས་མཉན་པར་བྱ། དགེ་སློང་དང་ལྷན་ཅིག་ཏུ་འདུག་པར་བྱའོ། །སྒོག་སྐྱ་ཟ་བའི་དགེ་སློང་གིས་ཇི་ལྟར་མཚུངས་པར་སྤྱད་པའི་ཆོས་བཅས་པ་བཞིན་མཚུངས་པར་མ་་་སྤྱད་ན་འདས་པ་དང་བཅས་པར་འགྱུར་ཏེ། འདི་ནི་སྒོག་སྐྱའི་རབ་ཏུ་ལྡན་པ་ཞེས་བྱའོ། །སྤུ་གྲིའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྐྲ་བྲེག་པའི་ཕྱིར་སྤུ་གྲི་རྗེས་སུ་གནང་བ་དེ་ནི་སྤུ་གྲིའི་རབ་ཏུ་ལྡན་པ་ཞེས་བྱའོ། །སྤུ་གྲིའི་ཤུབས་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྤུ་གྲིའི་ཚས་ཀྱི་ཕྱིར་སྤུ་གྲིའི་ཤུབས་རྗེས་སུ་གནང་བ་དེ་ནི་སྤུ་གྲིའི་ཤུབས་རབ་ཏུ་ལྡན་པ་ཞེས་བྱའོ། །ལྡེ་མིག་ཀྱོག་པོའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མལ་སྟན་དྲུབ་པ་དང་། དགེ་འདུན་ལ་བདེ་བ་དང་། དགེ་འདུན་ལ་དགེ་བར་སྤྱོད་པའི་ཕྱིར་ལྡེ་མིག་ཀྱོག་པོ་རྗེས་སུ་གནང་སྟེ། འདི་ནི་ལྡེ་མིག་ཀྱོག་པོའི་རབ་ཏུ་ལྡན་པ་ཞེས་བྱའོ། །སྒོ་ལྕགས་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྒོ་ལྕགས་རྗེས་སུ་གནང་བ་ནི་འཁྲུལ་འཁོར་བྱས་པ་ལྡེ་མིག་གིས་རབ་ཏུ་དབྱེ་བ་སྟེ། འདི་ནི་སྒོ་ལྕགས་ཀྱི་རབ་ཏུ་ལྡན་པ་ཞེས་བྱའོ། །བཞོན་པའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་
རྒན་པ་དང་། རྒན་འཁོགས་པ་དང་། ན་བ་དང་། རྩོལ་མི་ནུས་པ་དང་། དར་ལ་བབ་པ་རྣམས་ཀྱི་ཕྱིར་བཞོན་པ་རྗེས་སུ་གནང་སྟེ། དགེ་སློང་གིས་བརྒྱན་པའི་རི་མོ་བྲིས་པའི་བཞོན་པ་ལ་མ་ཞོན་ཅིག །བཞོན་པ་མོ་ལ་རང་གི་བཞོན་པར་མ་བྱེད་ཅིག །འདི་ནི་བཞོན་པའི་རབ་ཏུ་ལྡན་པ་ཞེས་བྱའོ། །གདུགས་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཆར་དང་ཚ་བའི་གཉེན་པོའི་ཕྱིར་གདུགས་རྗེས་སུ་གནང་སྟེ། གདུགས་བྲིས་པ་རི་མོ་ཅན་བརྒྱན་པའི་ཕྱིར་མ་འཆང་ཤིག །ཡུ་བ་རིང་པོ་མ་འཆང་ཤིག །གདུགས་ཐོགས་བཞིན་དུ་གྲོང་དུ་འགྲོ་བར་མི་བྱ་སྟེ། འདི་ནི་གདུགས་ཀྱི་རབ་ཏུ་ལྡན་པ་ཞེས་བྱའོ། །བསིལ་ཡབ་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཚ་བའི་གཉེན་པོའི་ཕྱིར་བསིལ་ཡབ་གནང་སྟེ། དགེ་སློང་གིས་བསིལ་ཡབ་རི་མོ་ཅན་བརྒྱན་པའི་ཕྱིར་མ་འཆང་ཤིག །དེ་ནི་བསིལ་ཡབ་ཀྱི་རབ་ཏུ་ལྡན་པ་ཞེས་བྱའོ། །རྔ་མའི་སྦྲང་ཡབ་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྲོག་ཆགས་གདུག་པ་དང་སྦྲང་བུ་བསྐྲད་པའི་ཕྱིར་རྔ་མའི་སྦྲང་ཡབ་གནང་སྟེ། སྦྲང་ཡབ་རྔ་མ་གང་ལས་བྱ་ཞེ་ན། རྔ་མོ་དང་། རི་དགས་དང་། སྐུད་པའམ། ར་ད་ལས་ཏེ། དགེ་སློང་གིས་སྦྲང་ཡབ་རི་མོ་ཅན་བརྒྱན་པའི་ཕྱིར་མ་འཆང་ཤིག །སྦྲང་ཡབ་ནི་རྣམ་པ་གཉིས་ཏེ། གཅིག་ནི་རང་བཞིན་གྱིས་པའོ། །གཅིག་ནི་སྨུག་པའོ། །འདི་ནི་རྔ་མའི་སྦྲང་ཡབ་ཀྱི་རབ་ཏུ་ལྡན་པ་ཞེས་བྱའོ། །སྦྲང་ཡབ་ཀྱི་ཡུ་བའི་རབ་ཏུ་ལྡན་པ་གང་ཞེ་ན། དགེ་སློང་གིས་རྔ་ཡབ་ཀྱི་ཡུ་བ་རིང་པོ་མ་འཆང་ཤིག །དེ་སྟེ་རྙེད་ན་ལོང་ཤིག །ལོང་ལ་སངས་རྒྱས་ཀྱི་མཆོད་རྟེན་ནམ། ཉན་ཐོས་ཀྱི་མཆོད་རྟེན་ལ་དབུལ་ཏེ། འདི་ནི་སྦྲང་ཡབ་ཀྱི་ཡུ་བའི་རབ་ཏུ་ལྡན་པ་ཞེས་བྱའོ། །མེ་ལོང་གི་རབ་ཏུ་ལྡན་པ་གང་ཞེ་ན། དགེ་སློང་རྣམས་མེ་ལོང་ངམ། ལྷུང་བཟེད་ཀྱི་མེ་ལོང་ངམ། ཆུ་ལོང་ལ་གདོང་མ་ལྟ་ཞིག །དེ་སྟེ་གདོང་ལ་རྨ་ཡོད་དམ། གདོང་སྔོན་གྱི་དད་དའང་ཅི་འདྲ་བའི་ཕྱིར་ལྟའམ། གདོང་གི་གཉེར་མ་དང་སྐྲ་དཀར་ལ་ལྟའམ། འདུས་བྱས་ཀྱི་དངོས་པོ་འདི་རྙིངས་པར་འགྱུར་བའོ། །
འཇིག་པར་འགྱུར་བའོ་སྙམ་དུ་ལྟ་འདོད་པ་ལ་ནི་ཉེས་པ་མེད་དེ་འདི་ནི་མེ་ལོང་གི་རབ་ཏུ་ལྡན་པ་ཞེས་བྱའོ། །ཕྲེང་བ་དང་། དྲི་དང་། བྱུག་པའི་རབ་ཏུ་ལྡན་པ་གང་ཞེ་ན། དགེ་སློང་གིས་ཕྲེང་བ་དང་། དྲི་དང་། བྱུག་པ་རང་ལ་ཡང་མ་འཆང་ཤིག །གཞན་ལ་ཡང་མ་སྦྱིན་ཅིག །དེ་སྟེ་རྙེད་ན་ཡང་ལོང་ཤིག །ལོང་ལ་སངས་རྒྱས་ཀྱི་མཆོད་རྟེན་ནམ། ཉན་ཐོས་ཀྱི་མཆོད་རྟེན་ལ་ཕུལ་ཅིག །འདི་ནི་ཕྲེང་བ་དང་། དྲི་དང་། བྱུག་པའི་རབ་ཏུ་ལྡན་པ་ཞེས་བྱའོ། །གར་དང་གླུ་དང་རོལ་མོ་བརྡུང་བའི་རབ་ཏུ་ལྡན་པ་གང་ཞེ་ན། དགེ་སློང་གིས་གར་དང་གླུ་དང་བརྡུང་བ་རང་གིས་ཀྱང་མ་བྱེད་ཅིག །གཞན་ལ་ཡང་བྱེད་དུ་མ་འཇུག་ཤིག །བལྟར་ཡང་མ་འགྲོ་ཤིག །ཅི་ནས་གར་དང་གླུ་དང་བརྡུང་བ་སྤང་བར་བྱ་སྟེ། འདི་ནི་གར་དང་གླུ་དང་རོལ་མོ་བརྡུང་བའི་རབ་ཏུ་ལྡན་པ་ཞེས་བྱའོ། །ཚུལ་ཤིང་གི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་བགྲང་བའི་ཕྱིར་ཚུལ་ཤིང་རྗེས་སུ་གནང་སྟེ། ཚུལ་ཤིང་ཤིན་ཏུ་རིང་བ་ཡང་མ་ཡིན། ཐུང་བ་ཡང་མ་ཡིན། སྦོམ་པ་ཡང་མ་ཡིན། ཕྲ་བ་ཡང་མ་ཡིན། འཁྱོར་བ་ཡང་མ་ཡིན། རྩུབ་པ་ཡང་མ་ཡིན་པར་སྙོམས་པར་བྱ། དྲང་བ་དང་། འཇམ་པ་དང་། བཞིན་གནང་བ་ལྟ་བུར་བྱའོ། །འདི་ནི་ཚུལ་ཤིང་གི་རབ་ཏུ་ལྡན་པ་ཞེས་བྱའོ། །མིག་སྨན་གྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་མིག་ན་བ་ལ་མིག་སྨན་རྣམ་པ་ལྔ་གནང་བ་ནི་འདི་ལྟ་སྟེ། མེ་ཏོག་གི་མིག་སྨན་དང་། ཕྱེ་མའི་མིག་སྨན་དང་། རིལ་བུའི་མིག་སྨན་དང་། བྲོའི་མིག་སྨན་དང་། མིག་སྨན་ནག་པོའོ། །དགེ་སློང་རྣམས་སྒེག་ཅིང་ཆ་བའི་ཕྱིར་ནི་མིག་སྨན་མི་འཆང་བར་བྱའོ། །དེ་སྟེ་ན་བར་གྱུར་ན་རྗེས་སུ་མཐུན་པའི་སྨན་དེ་བསྐུ་བར་བྱའོ། །དེ་ནི་མིག་སྨན་གྱི་རབ་ཏུ་ལྡན་པ་ཞེས་བྱའོ། །མིག་སྨན་གྱི་ཐུར་མའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མིག་སྨན་དང་ཐུར་མ་གནང་བ་ནི་ཇི་ལྟར་འདུལ་བ་ལས་རྒྱས་པར་འབྱུང་བ་བཞིན་ཏེ།
དེ་ནི་མིག་སྨན་གྱི་ཐུར་མའི་རབ་ཏུ་ལྡན་པ་ཞེས་བྱའོ། །མིག་སྨན་གྱི་སྣོད་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མིག་སྨན་གྱི་སྣོད་གནང་བ་ནི་ཇི་ལྟར་འདུལ་བ་ལས་རྒྱས་པར་འབྱུང་བ་བཞིན་ཏེ། དེ་ནི་མིག་སྨན་གྱི་སྣོད་དང་རབ་ཏུ་ལྡན་པ་ཞེས་བྱའོ། །གཏུན་དང་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྨན་འཐག་པའི་ཕྱིར་གཏུན་དང་གཏུན་བུ་གནང་བ་དེ་ནི་གཏུན་གྱི་རབ་ཏུ་ལྡན་པ་ཞེས་བྱའོ། །ཉལ་བ་དང་རབ་ཏུ་ལྡན་པ་གང་ཞེ་ན། དགེ་སློང་རྣམས་ཉིན་པར་མི་ཉལ། མེ་མར་འབར་བ་ལ་ཡང་མ་ཡིན། དེ་སྟེ་སྟུར་བ་ཅན་ཞིག་ཡིན་ན་ནི་ལངས་ཏེ་བཅག་པར་བྱ། དེ་སྟེ་མི་ནུས་ན་གཞན་དུ་འགྲོ་བར་བྱའོ། །དེའི་རྐྱེན་གྱིས་གཞན་ལ་ཡང་མི་གནོད་པར་བྱ་བ་དེ་ནི་ཉལ་བ་དང་རབ་ཏུ་ལྡན་པ་ཞེས་བྱའོ། །འདུག་པའི་རབ་ཏུ་ལྡན་པ་གང་ཞེ་ན། ཉིན་པར་འཆག་གམ། འདུག་པའི་ཚེ་སྒྲིབ་པའི་ཆོས་རྣམས་སེམས་ལ་ཡོངས་སུ་སྦྱང་བར་བྱའོ། །ཉིན་པར་འཆག་ཅིང་འདུག་པའི་ཚེ་སྒྲིབ་པའི་ཆོས་རྣམས་སེམས་ལ་ཡོངས་སུ་སྦྱངས་་་ནས་མཚན་མོ་མེལ་ཚེ་དང་པོ་ལ་འཆག་ཅིང་འགྲོ་བའི་ཚེ་ཡང་སྒྲིབ་པའི་ཆོས་རྣམས་སེམས་ལ་ཡོངས་སུ་སྦྱང་བར་བྱ། མེལ་ཚེ་དང་པོའི་ཚེ་འཆག་ཅིང་འགྲོ་བ་ན་སྒྲིབ་པའི་ཆོས་རྣམས་སེམས་ལ་ཡོངས་སུ་སྦྱངས་ནས་མཚན་མོ་མེལ་ཚེ་བར་མའི་ཚེ་་་གཙུག་ལག་ཁང་གི་ཕྱི་རོལ་དུ་བྱུང་སྟེ་རྐང་པ་བཀྲུས་ནས་གནས་ཁང་དུ་ཞུགས་ཏེ་བླ་གོས་བཞི་ལྟབ་ཏུ་བལྟབ་སྟེ་བཏིང་། སྦྱར་མ་སྟུག་པོར་བལྟབ་སྟེ་སྔས་སུ་བཅུག་ལ་གཡས་ཕྱོགས་ཀྱིས་ཉལ་བར་བྱ་སྟེ། རྐང་པ་ལ་རྐང་པས་མནན་ཏེ་ཡན་ལག་མི་དབྲལ་བ་དང་། སེམས་མི་གཡེང་བ་དང་། གོས་མ་གྱེས་པ་དང་། གནང་བར་འདུ་ཤེས་པ་དང་དྲན་ཞིང་ཤེས་པ་དང་ལྡང་བའི་འདུ་ཤེས་ཡིད་ལ་བྱ་སྟེ། ཐོ་རངས་མྱུར་ཞིང་རིངས་པར་ལངས་ཏེ་འཆག་གམ་འདུག་པའི་ཚེ་སྒྲིབ་པའི་ཆོས་རྣམས་སེམས་ལ་ཡོངས་སུ་སྦྱོང་བའི་དེ་ནི་འདུག་པའི་རབ་ཏུ་ལྡན་པ་ཞེས་བྱའོ། །པུས་འཁྱུད་ཀྱི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ན་བ་དང་རྒྱབ་ན་བའི་ཕྱིར་ཇི་ལྟར་ཚེ་དང་ལྡན་པ་ཤཱ་རིའི་བུ་ལ་པུས་འཁྱུད་གནང་བ་བཞིན་ཏེ། དགེ་སློང་གིས་པུས་འཁྱུད་རི་མོ་ཅན་བརྒྱན་པའི་ཕྱིར་མི་བཅང་བར་བྱ་སྟེ། དེ་ནི་པུས་འཁྱུད་ཀྱི་རབ་ཏུ་ལྡན་པ་ཞེས་བྱའོ། །བརྡུང་ཤིང་གི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་ལ་
ཆོས་གོས་བརྡུང་བའི་ཕྱིར་ཤིང་གི་བརྡུང་གཞི་དང་བརྡུང་ཐོ་གནང་བ་དེ་ནི་བརྡུང་ཤིང་གི་རབ་ཏུ་ལྡན་པ་ཞེས་བྱའོ། །སྐ་རགས་ཀྱི་རབ་ཏུ་ལྡན་པ་གང་ཞེ་ན། སྐ་རགས་ལ་རྣམ་པ་གསུམ་སྟེ། བཅོམ་ལྡན་འདས་ཀྱིས་དགེ་སློང་རྣམས་ལ་འདི་ལྟ་སྟེ། སྐ་རགས་ལྷས་མ་དང་རྒྱ་ཅང་དང་ལྕག་པོད་རྣམས་་་་གནང་སྟེ། དགེ་སློང་རྣམས་བརྒྱན་པའི་ཕྱིར་སྐ་རགས་ཁྲ་བོ་མ་འཆང་ཤིག །སྐ་རགས་མེད་པར་གྲོང་དུ་མ་འགྲོ་ཤིག །མདུད་པ་གཅིག་བོར་བ་ཡང་གྲོང་དུ་མ་འགྲོ་ཤིག །སོང་ན་ཉེས་བྱས་སུ་འགྱུར་ཏེ། དེ་ནི་སྐ་རགས་ཀྱི་རབ་ཏུ་ལྡན་པ་ཞེས་བྱའོ། །འུ་རྡོའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་སྒྲས་རྐུན་པོ་རྣམས་བསྐྲད་པར་བྱ་བའི་ཕྱིར་ནི་འུ་རྡོ་གནང་སྟེ། རྣམ་གྲངས་ཀྱིས་ཀྱང་ཕོག་པར་མི་བྱ་སྟེ། དེ་ནི་འུ་རྡོའི་རབ་ཏུ་ལྡན་པ་ཞེས་བྱའོ། །གོས་དཀྲིས་ཤིང་མདུད་པ་བོར་བའི་རབ་ཏུ་ལྡན་པ་གང་ཞེ་ན། དགེ་སློང་རྣམས་གོས་དཀྲིས་ཤིང་མདུད་པ་བོར་ཏེ་འགྲོ་བར་མ་བྱེད་ཅིག །ཁང་སྟེང་ན་ལས་བྱེད་པ་ནི་མ་གཏོགས་ཏེ་དེ་ནི་གོས་དཀྲིས་ཤིང་མདུད་པ་བོར་བའི་རབ་ཏུ་ལྡན་པ་ཞེས་བྱའོ། །སའི་རབ་ཏུ་ལྡན་པ་གང་ཞེ་ན། ས་ལ་རྣམ་པ་གཉིས་ཏེ། བཅོམ་ལྡན་འདས་ཀྱིས་དགེ་སློང་རྣམས་ལ་འཆག་པའི་ས་དང་། ལྷ་ཁང་གི་ས་ནི་རྗེས་སུ་གནང་ངོ་། །དེ་ནི་སའི་རབ་ཏུ་ལྡན་པ་ཞེས་བྱའོ། །སྐྱེད་ཤིང་གི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ལ་དགེ་སློང་དག་གིས་རི་བྱ་རྒོད་་འཕུངས་པའི་ཤུལ་དེར་ཤིང་དག་མ་མཆིས་ལ་ནམ་མཁའ་མ་བསྒྲིབས་པས་བྱ་་རྒོད་འཕུངས་པའི་རི་ལ་འཛེག་ཅིང་འབབ་པའི་ཚེ་ཚ་བས་རྨྱ་བར་གྱུར་ཏོ་ཞེས་་་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེར་གྲིབ་མར་འགྱུར་བའམ། མེ་ཏོག་དུ་འགྱུར་བའམ། འབྲས་བུར་འགྱུར་བ་དེ་དག་བསྐྱེད་པར་གནང་ངོ་། །དེ་དང་དེ་དག་ཏུ་སྐྱེད་ཤིང་བསྲུང་བའི་ཕྱིར་འོད་མའི་ར་བས་ཀྱང་བསྐོར་བ་དེ་ནི་སྐྱེད་ཤིང་གི་རབ་ཏུ་ལྡན་པ་ཞེས་བྱའོ། །དངོས་པོའི་རབ་ཏུ་ལྡན་པ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ལྡུམ་རའི་ཕྱིར་ཞིང་རྗེས་སུ་གནང་ངོ་། །ལྡུམ་ར་ནི་བཅོམ་ལྡན་འདས་ཀྱིས་གཙུག་ལག་ཁང་གི་ཕྱིར་རྗེས་སུ་གནང་། ཞིང་གི་དངོས་པོ་དང་ལྡུམ་ར་དང་གཙུག་ལག་ཁང་བཅོམ་
ལྡན་འདས་ཀྱིས་དགེ་སློང་གི་ཕྱིར་རྗེས་སུ་གནང་སྟེ། དེ་ནི་དངོས་པོའི་རབ་ཏུ་ལྡན་པ་ཞེས་བྱའོ། །ཚལ་གྱི་རབ་ཏུ་ལྡན་པ་གང་ཞེ་ན། ཚལ་ཞེས་བྱ་བ་ནི་སྐྱེད་ཤིང་གི་ཚལ་ཏེ་དེར་ཇི་ལྟར་རྒན་རིམས་བཞིན་དུ་བྱ་བ་ནི་རྒྱས་པར་འདུལ་བ་་་ལས་འབྱུང་བ་བཞིན་ཏེ། དེ་ནི་ཚལ་གྱི་རབ་ཏུ་ལྡན་པ་ཞེས་བྱའོ། །རྩོད་པའི་རབ་ཏུ་ལྡན་པ་གང་ཞེ་ན། རྩོད་པ་ཞེས་བྱ་བ་ནི་འཐབ་པ་དང་། མཚང་འདྲུ་བ་དང་། འཁྲུག་པ་དང་། རྩོད་པ་དང་། ཕྲ་མ་དང་། རྣར་གསང་བ་དང་། ཕན་ཚུན་ཚིག་མི་འཕྲོད་པ་དང་། མི་འདུམ་པ་དང་། མི་མཐུན་པ་དང་། ཡིད་མི་གཅིག་པ་དང་། དགེ་འདུན་དབྱེ་བ་དང་། དགེ་འདུན་སྒྲོགས་པ་དང་། དགེ་འདུན་གཉིས་སུ་ཆད་པ་དང་། དགེ་འདུན་ཐ་དད་དུ་གྱུར་པ་དང་། དགེ་འདུན་གཅིག་ཏུ་མི་སྦྱོར་བ་དང་། དགེ་འདུན་གཅིག་ཏུ་མི་སྦྱོར་བའི་གཙོར་གྱུར་པ་དང་། དུས་མ་ཡིན་པར་མི་བྱ་བ་དང་། གནོད་པར་འགྱུར་བར་མི་བྱ་བ་དང་། མཐུ་མེད་ན་ཆོས་བཞིན་དུ་མི་བྱ་བ་དང་། ཕྱོགས་མེད་དམ་གྲོགས་མེད་ན་ཡང་མི་བྱ་བ་དང་། འཁོར་མེད་ན་ཡང་མི་བྱ་བ་དང་། བདག་ཉིད་ལ་གནོད་པར་གྱུར་ན་ཡང་རྩོད་པར་མི་བྱ། ཕ་རོལ་ལའང་འཇིགས་པ་དང་གནོད་པར་འགྱུར་བས་རྩོད་པར་མི་བྱའོ། །འདི་ལྟ་བུ་དང་གཞན་ལ་གཟིགས་ནས་ཉེས་པའི་དམིགས་སུ་གྱུར་ཏེ་རྩོད་པ་མི་བྱ་བ་དེ་ནི་རྩོད་པའི་རབ་ཏུ་ལྡན་པ་ཞེས་བྱའོ། །དབྱེན་གྱི་རབ་ཏུ་ལྡན་པ་གང་ཞེ་ན། དབྱེན་ལ་རྣམ་པ་གཉིས་ཏེ་དགེ་འདུན་གྱི་དབྱེན་དང་འཁོར་ལོའི་དབྱེན་ནོ། །འཁོར་ལོའི་དབྱེན་མ་ཡིན་གྱི་དགེ་འདུན་གྱི་དབྱེན་གང་ཞེ་ན། དབྱེན་དུ་འགྱུར་བའི་དངོས་པོ་བཅུ་བཞིའི་ནང་ནས་གང་ཡང་རུང་དངོས་པོ་གཅིག་ལ་ཤིན་ཏུ་ལེགས་སོ་ཞེས་འཛིན་པ་ཡིན་ཏེ། ཆོས་བཞིན་ཀྱང་རུང་། ཆོས་བཞིན་མ་ཡིན་ཀྱང་རུང་། འདུལ་བ་བཞིན་ཀྱང་རུང་། འདུལ་བ་བཞིན་མ་ཡིན་ཀྱང་རུང་། ལྟུང་བ་ཡང་རུང་། ལྟུང་བ་མ་ཡིན་ཀྱང་རུང་། ལྕི་བ་ཡང་རུང་། ཡང་བ་ཡང་རུང་། ལྷག་མ་བཅས་པ་ཡང་རུང་། ལྷག་མ་མ་ལུས་པ་ཡང་རུང་། བཤགས་པར་བྱ་བ་ཡང་རུང་། བསྡམ་པར་བྱ་བ་ཡང་རུང་། འདུལ་བ་ལས་ཤིན་ཏུ་འདའ་བ་ཡང་རུང་། མི་སྙན་པར་སྨྲ་བ་ལས་བྱུང་བ་ཡང་རུང་སྟེ།
དགེ་སློང་རྣམས་མཚམས་ཀྱི་ནང་ན་མཚུངས་པར་གནས་པ་རྣམས་འདུས་པར་དགེ་འདུན་གྱི་ལས་བྱེད་དེ། དགེ་འདུན་གྱིས་བྱ་བའི་གསོ་སྦྱིན་དང་། སྐབས་དབྱེ་བ་དང་། གསོལ་བ་དང་། གསོལ་བ་དང་གཉིས་དང་། གསོལ་བ་དང་བཞིའི་ལས་བྱེད་པ་དེ་ནི་དགེ་འདུན་གྱི་དབྱེན་ཞེས་བྱའི་འཁོར་ལོའི་དབྱེན་མ་ཡིན་ནོ། །འཁོར་ལོའི་དབྱེན་གང་ཞེ་ན། དེ་འདི་ལྟར་དགེ་སློང་བདག་ཉིད་སྟོན་པར་རྣམ་པར་འཇོག་སྟེ། ཚུལ་ཤིང་བྲིམས་ནས་གསོལ་བ་བྱས་ཏེ་འཁོར་དེ་ནས་འགྲོ་བ་ནི་འཁོར་ལོའི་དབྱེན་ཞེས་བྱ་སྟེ། འཕགས་པའི་ལམ་གྱི་ཡན་ལག་བརྒྱད་པ་ལས་དེ་སྤངས་ནས་གཞན་གྱི་ལམ་དུ་འཇོག་པ་འདི་ནི་འཁོར་ལོའི་དབྱེན་ཞེས་བྱ་སྟེ། སྔ་མ་དགེ་འདུན་གྱི་དབྱེན་དང་། འཁོར་ལོའི་དབྱེན་གཉིས་གཅིག་ཏུ་བསྡུས་པ་དེ་ནི་དབྱེན་གྱི་རབ་ཏུ་ལྡན་པ་ཞེས་བྱའོ། །འདུས་པའི་རབ་ཏུ་ལྡན་པ་གང་ཞེ་ན། འདུས་པ་ཞེས་བྱ་བ་ནི་དགེ་འདུན་འདུས་པ་སྟེ། དགེ་སློང་ཇི་སྙེད་པ་མཚམས་ཀྱི་ནང་ན་འཁོད་པ་དང་ལས་ལ་འདུ་བ་དེ་དག་ཐམས་ཅད་འདུས་ཤིང་འཁོད་པ་ཡིན་ཏེ། དད་པ་ལེན་པས་ཀྱང་དད་པ་བླངས་པ་ཡིན། གང་གིས་བསྐྱོད་པ་དང་། གང་གིས་གཞག་པར་བྱས་ན་ཡང་བརྩན་པར་འགྱུར་བའི་དགེ་སློང་རྣམས་ཀྱིས་ཀྱང་བསྐྱོད་པ་ཡང་མེད། གཞག་པར་བྱ་བ་ཡང་མེད་དེ། ལས་ཀྱང་བྱེད་པ་འདི་ནི་འདུས་པའི་རབ་ཏུ་ལྡན་པ་ཞེས་བྱའོ། །ཕྱག་གི་རབ་ཏུ་ལྡན་པ་གང་ཞེ་ན། དེ་བཞིན་གཤེགས་པ་ལ་འདི་ལྟར་ཕྱག་བྱའོ། །དེ་ལྟར་མཁན་པོ་ལ་ཡང་དེ་བཞིན། སློབ་དཔོན་ལ་ཡང་དེ་བཞིན། བླ་མ་ལ་ཡང་དེ་བཞིན་བླ་མའི་གནས་སུ་གྱུར་པ་ལ་ཡང་དེ་བཞིན། རྒན་རིམས་རྣམས་ལ་ཡང་དེ་བཞིན། གཞོན་ནུ་རྣམས་ལ་ཡང་དེ་བཞིན་ཏེ། དེ་ལྟར་ན་ཐམས་ཅད་དུ་ཡང་ཕྱག་བྱས་ལ་མཁས་པར་བྱ་བ་དེ་ནི་ཕྱག་གི་རབ་ཏུ་ལྡན་པ་ཞེས་བྱའོ། །མ་ལྟ་བུའི་རབ་ཏུ་ལྡན་པའི་ཕུང་པོ་ཞེས་བྱ་བ་ཕུང་པོ་གཉིས་པ་རྫོགས་སོ།། །།བྱ་བའི་ཕུང་པོ་གང་ཞེ་ན། ཕྱུང་བས་བྱ་བ་དང་། སོ་སོར་གནས་པས་་་བྱ་བ་དང་། གཟུ་བོས་བྱ་བ་དང་། དེའི་ངོ་བོ་ཉིད་ཚོལ་བས་བྱ་བ་དང་། བསླབ་པ་བྱིན་པས་བྱ་བ་དང་། མཚམས་མ་བཅད་པའི་གནས་བརྟན་གྱི་བྱ་བ་དང་། ཀུན་དགའ་
ར་བའི་བྱ་བ་དང་། ཀུན་དགའ་ར་བའི་གནས་བརྟན་གྱི་བྱ་བ་དང་། གནས་ཁང་གི་བྱ་བ་དང་། གནས་ཁང་གི་གནས་བརྟན་གྱི་བྱ་བ་དང་། ཁང་པ་འཁོར་དུ་བཅས་པའི་བྱ་བ་དང་། ཁང་པ་འཁོར་དུ་བཅས་པའི་གནས་བརྟན་གྱི་བྱ་བ་དང་། ནགས་ཀྱི་བྱ་བ་དང་། མལ་སྟན་གྱི་བྱ་བ་དང་། སྒོ་ལེབ་ཀྱི་བྱ་བ་དང་། འཁོར་ལོའི་བྱ་བ་དང་། གནས་སྟོང་པའི་བྱ་བ་དང་། གནས་སྟོང་པའི་གནས་བརྟན་གྱི་བྱ་བ་དང་། ལྷུང་བཟེད་ཀྱི་བྱ་བ་དང་། ཆོས་གོས་ཀྱི་བྱ་བ་དང་། གདིང་བའི་བྱ་བ་དང་། ཁབ་ཀྱི་བྱ་བ་དང་། ཁབ་རལ་གྱི་བྱ་བ་དང་། ཐུག་པའི་བྱ་བ་དང་། ཆུའི་བྱ་བ་དང་། ཆུ་རྫའི་བྱ་བ་དང་། ཡོངས་སུ་སྦྱར་བའི་ཆུ་རྫའི་བྱ་བ་དང་། གཙང་མའི་རིལ་བའི་བྱ་བ་དང་། ཟས་ཀྱི་བྱ་བ་དང་། བཟའ་བའི་བྱ་བ་དང་། ཟས་གཏད་པའི་བྱ་བ་དང་། བསོད་སྙོམས་ཀྱི་བྱ་བ་དང་། བསོད་སྙོམས་སྤྱོད་པའི་བྱ་བ་དང་། ཟན་ནོད་པའི་བྱ་བ་དང་། དགོན་པའི་བྱ་བ་དང་། དགོན་པའི་གནས་བརྟན་གྱི་བྱ་བ་དང་། གྲོང་འདབ་ཀྱི་བྱ་བ་དང་། གྲོང་འདབ་ཀྱི་གནས་བརྟན་གྱི་བྱ་བ་དང་། གློ་བུར་དུ་འོངས་པའི་བྱ་བ་དང་། གློ་བུར་དུ་འོངས་པའི་གནས་བརྟན་གྱི་བྱ་བ་དང་། འགྲོ་བའི་བྱ་བ་དང་། འགྲོ་བའི་གནས་བརྟན་གྱི་བྱ་བ་དང་། རྐང་པ་བཀྲུ་བའི་བྱ་བ་དང་། རྐང་པ་བཀྲུ་བའི་གནས་བརྟན་གྱི་བྱ་བ་དང་། འདུག་པའི་བྱ་བ་དང་། འདུག་པའི་གནས་བརྟན་གྱི་བྱ་བ་དང་། ཆོས་འཆད་པའི་བྱ་བ་དང་། ཆོས་འཆད་པའི་གནས་བརྟན་གྱི་བྱ་བ་དང་། དུས་ཀྱི་བྱ་བ་དང་། དུས་མ་ཡིན་པའི་བྱ་བ་དང་། དུས་མ་ཡིན་པར་དགེ་་འདུན་འདུ་བའི་བྱ་བ་དང་། དུས་མ་ཡིན་པར་དགེ་འདུན་འདུ་བའི་གནས་་་བརྟན་གྱི་བྱ་བ་དང་། སྨྲ་བའི་བྱ་བ་དང་། མི་སྨྲ་བའི་བྱ་བ་དང་། དབྱར་ཚུལ་དུ་འཇུག་པའི་བྱ་བ་དང་། དབྱར་ཚུལ་དུ་ཞུགས་པའི་བྱ་བ་དང་། དབྱར་ཚུལ་དུ་ཞུགས་པའི་གནས་བརྟན་གྱི་བྱ་བ་དང་། དབྱར་ཚུལ་ན་གནས་པའི་བྱ་བ་དང་། འཁོར་གྱི་བྱ་བ་དང་། འཁོར་གྱི་ནང་དུ་འགྲོ་བའི་བྱ་བ་དང་། འཁོར་གྱི་ནང་དུ་ཞུགས་པའི་བྱ་བ་དང་། འཁོར་གྱི་ནང་དུ་ཞུགས་པའི་གནས་བརྟན་གྱི་བྱ་བ་དང་། གསོ་སྦྱིན་གྱི་བྱ་བ་དང་། གསོ་སྦྱིན་མངོན་དུ་བྱ་བ་དང་། གསོ་སྦྱིན་གྱི་ལས་ཀྱི་བྱ་བ་དང་། སོ་སོར་ཐར་པའི་བྱ་བ་དང་།
སོ་སོར་ཐར་པ་ཀློག་པའི་བྱ་བ་དང་། སོ་སོར་ཐར་པ་ཀློག་པར་བྱེད་པའི་བྱ་བ་དང་། གནས་བརྟན་གྱི་བྱ་བ་དང་། བར་མའི་བྱ་བ་དང་། གསར་བུའི་བྱ་བ་དང་། གནས་བརྟན་གྱི་དང་བར་མ་དང་གསར་བུའི་བྱ་བ་དང་། དུགས་ཁང་དུ་བྱ་བ་དང་། དུགས་ཁང་དུ་ཁྲུས་བྱ་བ་དང་། དུགས་ཁང་དུ་གནས་བརྟན་གྱི་བྱ་བ་དང་། མཁན་པོའི་བྱ་བ་དང་། ལྷན་ཅིག་སྤྱོད་པའི་བྱ་བ་དང་། སློབ་དཔོན་གྱི་བྱ་བ་དང་། ཉེ་གནས་ཀྱི་བྱ་བ་དང་། དགེ་ཚུལ་གྱི་བྱ་བ་དང་། ནན་ཏན་དུ་བྱ་བ་དང་། ཕྱི་བཞིན་འབྲང་བའི་དགེ་སྦྱོང་གི་བྱ་བ་དང་། གྲོང་དུ་ཉེ་བར་འགྲོ་བའི་བྱ་བ་དང་། གྲོང་དུ་ཉེ་བར་འགྲོ་བའི་གནས་བརྟན་གྱི་བྱ་བ་དང་། གྲོང་དུ་ཉེ་བར་སོང་བའི་བྱ་བ་དང་། གྲོང་དུ་ཉེ་བར་སོང་བའི་གནས་བརྟན་གྱི་བྱ་བ་དང་། གཞི་ན་གནས་པའི་བྱ་བ་དང་། ངལ་བསོ་བའི་བྱ་་བ་དང་། བར་སྣང་གི་བྱ་བ་དང་། གཏན་པའི་བྱ་བ་དང་། ཆུ་ཚགས་ཀྱི་བྱ་བ་དང་། འཆག་སའི་བྱ་བ་དང་། འཆག་པའི་བྱ་བ་དང་། འཕྱེན་གྱི་བྱ་བ་དང་། གཞར་བའི་བྱ་བ་དང་། བཤང་བའི་བྱ་བ་དང་། བཤང་སའི་བྱ་བ་དང་། བཤང་སའི་ཁུང་བུའི་བྱ་བ་དང་། བཤང་སར་གནས་བརྟན་གྱི་བྱ་བ་དང་། བཤང་སའི་ཁོར་ཡུག་གི་བྱ་བ་དང་། གཅི་བའི་བྱ་བ་དང་། གཅི་བའི་སའི་བྱ་བ་དང་། གཅི་ས་ཁུང་གི་བྱ་བ་དང་། གཅི་སར་གནས་བརྟན་གྱི་བྱ་བ་དང་། གཅི་སའི་འཁོད་ཕྱོགས་ཀྱི་བྱ་བ་དང་། བཀྲུ་བའི་བྱ་བ་དང་། བཀྲུ་བའི་སའི་བྱ་བ་དང་། ཁྲུས་ཀྱི་སའི་བུ་གུའི་བྱ་བ་དང་། ཁྲུས་ཀྱི་སར་གནས་བརྟན་གྱི་བྱ་བ་དང་། ཁྲུས་སའི་འཁོར་གྱི་བྱ་བ་དང་། མཆིལ་མའི་བྱ་བ་དང་། མཆིལ་མའི་སྣོད་ཀྱི་བྱ་བ་དང་། སོ་ཤིང་གི་བྱ་བ་དང་། སོ་དྲུད་པའི་བྱ་བ་དང་། ལྕེ་བཞར་བའི་བྱ་བ་དང་། རྣ་སྤབས་བྲུ་བའི་བྱ་བ་དང་། སྤྱད་པ་དང་མི་སྤྱད་པའོ། །མ་ལྟ་བུའི་དུམ་བུ་གསུམ་པོའི་དངོས་པོ་རྫོགས་སོ།། །།འདུལ་བ་གཞུང་དམ་པ། བམ་པོ་ལྔ་བཅུ་རྩ་གཅིག་པ། ཕྱུང་བས་བྱ་བ་གང་ཞེ་ན། ཕྱུང་བ་ཞེས་བྱ་བ་ནི་སྤངས་པ་ཡིན་ཏེ། སྤངས་པའི་དགེ་སློང་གིས་ནི་བྱ་བ་འདི་ལྟ་བུ་ལ་འཇུག་པར་བྱའོ། །སྤངས་པའི་དགེ་སློང་གིས་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གནས་
སྦྱིན་པར་མི་བྱ། ལུང་བསྟན་པར་མི་བྱ། དྲན་པར་མི་བྱ། དྲི་བར་མི་བྱ། དགེ་ཚུལ་ཕ་ཉེ་བར་མི་གཞག །དགེ་སློང་མ་ལ་ལུང་སྟོན་པར་མི་བསྐོ། སྡོམ་པ་མི་བསྐོ། སྔར་བསྐོས་ན་ཡང་དགེ་སློང་མ་ལ་སྟོན་ཅིང་ལས་མ་བྱེད་ཅིག །དགེ་སློང་དེ་ལས་བྱེད་པར་མི་བསྐོ། ལས་བསྐོ་བར་མ་བྱེད་ཅིག །ལས་བྱེད་པའི་དགེ་སློང་ལ་དགག་པར་མ་བྱེད་ཅིག །འདུལ་བ་འཛིན་པ་གཞན་ཡོད་ན་དགེ་འདུན་གྱི་ནང་དུ་འདུལ་བ་མ་འཆད་ཅིག །སོ་སོར་ཐར་པའི་མདོ་ཀློག་པ་གཞན་ཡོད་ན་དགེ་འདུན་གྱི་ནང་དུ་སོ་སོར་ཐར་པའི་མདོ་ཀློག་པར་མ་བྱེད་ཅིག །ཆོས་འཆད་པ་གཞན་ཡོད་ན་དགེ་འདུན་གྱི་ནང་དུ་ཆོས་མ་འཆད་ཅིག །ཚུལ་བཞིན་དུ་གནས་པའི་དགེ་སློང་ལུང་སྟོན་པ་ལ་འགོག་པར་མ་བྱེད་ཅིག །ཚུལ་བཞིན་གནས་པའི་དགེ་སློང་ལ་གསོ་སྦྱིན་བསྒོ་བར་མ་བྱེད་ཅིག །ཚུལ་བཞིན་གནས་པའི་དགེ་སློང་ལ་སྐབས་འབྱེད་པ་འགོག་པར་མ་བྱེད་ཅིག །ཚུལ་བཞིན་གནས་པའི་དགེ་སློང་་ལ་མ་གླེང་ཤིག །དྲན་པར་མ་བྱེད་ཅིག །དེ་དག་དང་ལྷན་ཅིག་སྟེན་པར་མ་བྱེད་ཅིག །གང་དགེ་འདུན་གྱིས་ཕྱུང་བའི་ལས་བྱས་པ་དང་། གང་དེ་དང་འདྲ་བ་གཞན་ཡང་རུང་། དེས་དེ་ལྟ་བུའི་ཉེས་པ་ཕྱིས་ཀྱང་མ་བྱེད་ཅིག །དེ་ལས་ཐུ་བ་ཡང་མ་བྱེད་ཅིག །དེས་ཕྱི་ཕྱིར་སྤུ་ཉལ་བ་ལྟ་བུར་བྱ། འབྱུང་བ་ལ་འཇུག་པར་བྱ། ཕྱག་འཚལ་བ་ཉེ་བར་བསྟན་པར་བྱ། ཚུལ་བཞིན་གནས་པའི་དགེ་སློང་གིས་ལྷུང་བཟེད་བྱིན་ན་ཡང་དེས་མ་ལེན་ཅིག །ཆོས་གོས་ཀྱང་མ་ལེན་ཅིག །ཟས་ཀྱང་མ་ལེན་ཅིག །དེ་ལ་སྐྲ་བྲེག་པ་ཡང་མ་འཆོལ་ཅིག །དུགས་ཁང་དུ་ཡང་ལས་མ་བྱེད་ཅིག །མི་ན་བའི་བར་དུ་ལས་ཐམས་ཅད་ལའང་ཚུལ་བཞིན་གནས་པའི་དགེ་སློང་གི་ལས་ཉམས་སུ་བླང་བར་མི་བྱའོ། །དགེ་འདུན་ཐམས་ཅད་འདུས་ཤིང་འཁོད་པས་གཅེས་སུ་གསང་བའི་གནས་སུ་སྡོམ་པས་མི་བསྐོ། དབང་གི་གནས་ཐམས་ཅད་དུ་ཡང་སྡོམ་པས་མི་བསྐོ། གང་ཟག་བཅུ་གཉིས་ཀྱི་གནས་སུ་ཡང་སྡོམ་པས་བྱིན་གྱིས་བརླབ་པར་མི་བྱ་བ་ནི་ཕྱུང་བས་བྱ་བ་ཞེས་བྱའོ། །སོ་སོར་གནས་པས་བྱ་བ་གང་ཞེ་ན། སོ་སོར་གནས་པ་ལ་རྣམ་
པ་གཉིས་ཏེ། གང་བདག་ཉིད་ཀྱིས་བདག་སོ་སོར་གནས་པར་བྱེད་པ་དང་། དགེ་འདུན་གྱི་ཆོས་བཞིན་དུ་བྱས་པའོ། །བདག་ཉིད་ཀྱིས་བདག་སོ་སོར་གནས་པར་བྱེད་པ་གང་ཞེ་ན། བསམས་བཞིན་དུ་ཆོས་ཀྱི་ཕྱོགས་པ་ལས་ཆོས་མ་ཡིན་པའི་ཕྱོགས་སུ་སོང་བ་སྟེ། དེ་ལྟར་ན་བདག་ཉིད་ཀྱིས་བདག་སོ་སོར་གནས་པར་བྱེད་པའོ། །དགེ་འདུན་གྱིས་ཆོས་བཞིན་དུ་བྱས་པ་གང་ཞེ་ན། དགེ་འདུན་གྱིས་བསྐྱོ་བ་མེད་པ། གཞག་པ་མེད་པར་རིགས་པའི་གསོལ་བ་དང་བཞིའི་ལས་ཀྱིས་ཆོས་བཞིན་དུ་འདུས་པའི་དགེ་འདུན་གྱིས་སྤངས་པ་ཡིན་ཏེ། དེ་ལྟར་ན་དགེ་འདུན་གྱིས་ཆོས་བཞིན་དུ་སྤངས་པའོ། །མཚུངས་པར་ལྷན་ཅིག་གནས་པ་ཡང་གཉིས་ཏེ། བདག་ཉིད་ཀྱིས་བདག་ཉིད་ལྷན་ཅིག་གནས་པར་བྱེད་པ་དང་། དགེ་འདུན་གྱིས་ཆོས་བཞིན་དུ་བྱས་པའོ། །བདག་ཉིད་ཀྱིས་བདག་ཉིད་ལྷན་ཅིག་གནས་པར་བྱེད་པ་གང་ཞེ་ན། བསམས་བཞིན་ཆོས་མ་ཡིན་པའི་ཕྱོགས་ལས་ཆོས་ཀྱི་ཕྱོགས་སུ་འོངས་པ་སྟེ། དེ་ལྟར་ན་བདག་ཉིད་ཀྱིས་བདག་ཉིད་ལྷན་ཅིག་ཏུ་གནས་པར་བྱེད་པའོ། །དགེ་འདུན་གྱིས་ཆོས་བཞིན་དུ་བྱས་པ་གང་ཞེ་ན། དགེ་འདུན་གྱིས་མི་བསྐྱོབ་གཞག་པར་མི་རིགས་པས་ཆོས་བཞིན་དུ་འདུས་པའི་དགེ་འདུན་གྱིས་སྤངས་པ་སྟེ། མངོན་སུམ་དུ་གསོལ་བ་དང་བཞིའི་ལས་ཀྱིས་ཕྱུང་བ་ཡིན་ཏེ། དེ་ལྟར་ན་དགེ་འདུན་གྱིས་ཆོས་བཞིན་དུ་བྱས་པའི་སོ་སོར་གནས་པའི་དགེ་སློང་དེས་རབ་ཏུ་དབྱུང་བར་མི་བྱ་བ་ནས། སྔ་མ་བཞིན་ཏེ། ཇི་ལྟར་དགེ་འདུན་གྱིས་གང་ལ་སྤངས་པའི་ལས་བྱས་པ་དང་། གཞན་དེ་དང་འདྲ་བ་སྟེ། དེས་དེ་ལྟ་བུའི་ཉེས་པར་ཡང་མི་བྱ། དེ་ལས་ཡང་ཐུ་བར་ཡང་མི་བྱ་བའི་བར་དུ་སྟེ། གང་ཟག་བཅུ་གཉིས་ལས་སུ་ཡང་སྡོམ་པས་ཀྱང་མི་བསྐོ། སོ་སོར་གནས་པའི་དགེ་སློང་གིས་ཚངས་པ་མཚུངས་པར་སྤྱོད་པའི་གནས་བརྟན་དང་། བར་མ་དང་། གསར་བུ་པའང་རུང་བ་དབབ་པར་བྱ། ཉེས་པ་མི་བྱ། ཉེས་པ་ཞིག་བྱས་ན་ཡང་སླར་འབྱུང་བའི་ཚུལ་དུ་བྱའོ། །དེ་སྟེ་སླར་འབྱུང་བའི་ཚུལ་དུ་མི་བྱེད་ན་སོ་སོར་གནས་པར་བྱ་བ་ཉིད་ཡིན་ཏེ། དེ་ལ་འདི་སྐད་ཅེས་བསྒོ་བར་བྱའོ། །དགེ་འདུན་གྱིས་ཁྱོད་ལ་
ཐིག་བཏབ་པ་བཞིན་བྱེད་དོ། །ཕུར་པ་བཙུགས་པ་བཞིན་བྱེད་དོ། །ཉེས་པ་དེ་ཡང་དགེ་འདུན་ལ་འདི་ཉིད་དུ་བཤགས་པར་བྱའི་འདི་ལས་ཕྱི་རོལ་དུ་ནི་མ་ཡིན་ནོ། །ཁྱོད་ཀྱི་ལས་དེ་ཡང་དགེ་འདུན་དེ་དག་ཉིད་ཀྱིས་སླར་བདེ་བར་བྱེད་ཀྱིས་འདི་ལས་ཕྱི་རོལ་དུ་ནི་མ་ཡིན་ནོ། །ཁྱོད་ཀྱིས་ཉེས་པ་དེ་ཡང་མ་བཤགས་སམ་སླར་མ་བྱས་ན་ནི་ཚངས་པ་མཚུངས་པར་སྤྱོད་པ་ཤེས་པ་དག་གིས་གང་དུ་འདོད་པ་དེར་གླེང་བར་བྱེད་དོ། །དེ་སྟེ་ཡང་དེ་བཞིན་དུ་བྱས་པ་ལས་ཀྱང་དུལ་བར་མ་གྱུར་ན་གང་ཟག་དེ་ཐིག་བཏབ་པ་བཞིན་བྱས་ཕུར་པ་བཙུགས་པ་བཞིན་དུ་བྱས་ལ་སྤང་བར་བྱའོ། །དེ་འདི་ལྟ་སྟེ། རྟ་རྒོད་བཞིན་ཏེ། དེ་ནི་སོ་སོར་གནས་པར་བྱ་བ་ཞེས་བྱའོ། །གཟུ་བོས་བྱ་བ་གང་ཞེ་ན། རྩོད་པ་ཞི་བར་བྱེད་པའི་ཕྱིར་དགེ་སློང་གཟུ་བོ་ཆོས་ཉི་ཤུ་རྩ་གཉིས་དང་ལྡན་པ་བཙལ་བར་བྱའོ། །ཉི་ཤུ་རྩ་གཉིས་གང་ཞེ་ན། ཚུལ་ཁྲིམས་དང་ལྡན་ཞིང་སྔར་བསྙེན་པར་རྫོགས་པར་གྱུར་པ་དང་། ངོ་ཚ་ཞིང་འགྱོད་པ་ཅན་དང་། སྡོམ་ཞིང་བསླབ་པ་ལ་མོས་པ་དང་། མང་དུ་ཐོས་ལ་མང་དུ་ཐོས་པ་འཛིན་ཅིང་མང་དུ་ཐོས་པ་བསགས་པ་དང་། གཞུང་ཁ་དོན་ལོབས་པ་དང་། འདུལ་བ་དང་འདུལ་བ་ལྷག་པ་ཤིན་ཏུ་རྟོགས་པ་དང་། རྩོད་པ་ལ་མཁས་པ་དང་། རྩོད་པ་བྱུང་བ་ལ་མཁས་པ་དང་། རྩོད་པ་ཞི་བར་བྱ་བ་ལ་མཁས་པ་དང་། རྩོད་པ་ཞི་བར་གྱུར་པ་ཕྱིས་མི་འབྱུང་བར་མཁས་པ་དང་། བསྟན་བཅོས་ལ་མཁས་པ་དང་། དངོས་པོ་ལ་མཁས་ཤིང་དངོས་པོ་སྤྱོད་པ་ལ་མཁས་པ་དང་། ཁྲོ་བ་མེད་པ་ཁྲོ་བཞིན་མི་སྨྲ་བ་ཁྲོ་བར་མི་འགྱུར་བ་དང་། འཇམ་བཞིན་སྤྱོད་པ་དང་། ལུས་དང་། ངག་དང་། བསྒོ་བ་ཡང་རྟོགས་པར་བྱེད་པ་དང་། རྫོགས་པར་བསྒོ་ཞིང་རྫོགས་པར་བྱེད་པ་དང་། གོ་བར་བྱེད་ཅིང་གོ་བར་བྱས་པས་ཡང་ཆུད་པར་བྱེད་པ་དང་། བརྟགས་ནས་སྨྲ་ཞིང་བརྟགས་ནས་སྨྲས་པ་རྟོགས་པར་བྱེད་པ་དང་། འདོད་པར་མི་འགྲོ་བ་དང་། ཞེ་སྡང་དུ་མི་འགྲོ་བ་དང་། གཏི་མུག་ཏུ་མི་འགྲོ་བ་དང་། འཇིགས་པར་མི་འགྲོ་བ་སྟེ། གཟུ་བོ་དགེ་སློང་ཆོས་ཉི་ཤུ་རྩ་གཉིས་པོ་འདི་དང་ལྡན་ན་གཞན་ལ་མི་རྟེན་པ་ཡིན་ཞིང་ཕྱོགས་གཉི་ག་ལ་ཡང་ཆོས་ཀྱི་ལོངས་སྤྱོད་དུ་འགྱུར་རོ། །འདི་ལྟར་ཡང་གཟུ་བོའི་དགེ་སློང་
གིས་རྒོལ་བ་དང་ལན་གློན་པའི་དགེ་སློང་རྣམས་ལས་སྙན་ཚིག་ཏུ་སྨྲ་བ་དང་། ཕྱག་བྱེད་པ་དང་། སྔར་ལྡང་བ་དང་། ཐལ་མོ་སྦྱོར་བ་དང་། ཕྱག་བྱས་པར་་གྱུར་པ་རྣམས་བདག་གིར་མ་བྱེད་ཅིག །དེ་དག་བསྙེན་བཀུར་བྱེད་ན་ཡང་ཉམས་སུ་མ་ལེན་ཅིག །ལྷུང་བཟེད་འབུལ་ན་ཡང་མི་བླང་། ཆོས་གོས་འབུལ་ན་ཡང་མི་བླང་། ཟས་འབུལ་ན་ཡང་མི་བླང་། ཡོ་བྱད་གཞན་ཅི་ཡང་རུང་དབུལ་བ་བདག་གིར་མི་བྱའོ། །དེས་ཀྱང་དེ་དག་ལ་བསྙེན་བཀུར་མི་བྱ། ལྷུང་བཟེད་མི་སྦྱིན། ཆོས་གོས་མི་སྦྱིན། དེ་དག་ལས་ལུང་སྟོན་པར་ཡང་མི་བླང་། དྲན་པར་བྱ་བ་ཡང་མ་ཡིན། རྣལ་འབྱོར་ཡང་མ་ཡིན། ཡིད་ལ་བྱ་བ་ཡང་མ་འདྲི་ཤིག །དེས་ཀྱང་དེ་དག་ལ་ལུང་བསྟན་པ་མ་སྦྱིན་ཅིག །དྲན་པར་བྱ་བ་མ་ཡིན། ཀུན་དྲི་བ་མ་ཡིན། རྣལ་འབྱོར་མ་ཡིན། ཡིད་ལ་བྱ་བ་ཡང་མི་བསྒོའོ། །སྟན་གཅིག་ལ་འདུག་པར་མི་བྱ། འཆག་ས་གཅིག་ཏུ་འཆག་པར་མི་བྱ། གནས་ཁང་གཅིག་ཏུ་འཁོད་པར་མི་བྱ། གཞན་དུ་ཚིག་འདི་སྐད་ཅེས་བརྗོད་དོ། །ཚེ་དང་ལྡན་པ་ཁྱེད་ཀྱིས་འདི་ལྟ་བུ་ལས་ལེགས་པར་རྙེད་པ་ཅི་ཡོད་ན་འདི་ལྟར་ཁྱེད་ཀྱིས་ལེགས་པར་གསུངས་པ་ཆོས་འདུལ་བ་ལས་རབ་ཏུ་་་བྱུང་ན་ཐབ་མོ་བྱེད་པ་ལ་ཞུགས་ཤིང་རྣམ་པར་བཟུང་ནས་རྩོད་པ་ལ་ཞུགས་ཏེ། ཚེ་དང་ལྡན་པ་རྣམས་རྩོད་པ་གཉིས་སུ་གྱུར་པ་ནི་གཉི་ག་རྒྱལ་བར་མི་འགྱུར་གྱི། དེ་དག་གཏན་ལ་ཕབ་ན་གཅིག་ནི་རྒྱལ་བར་འགྱུར། གཅིག་ནི་ཕམ་པར་འགྱུར་གྱིས་ཚེ་དང་ལྡན་པ་རྣམས་འདི་ལྟར་སོ་སོར་རྩོད་པ་དང་། རྣམ་པར་རྩོད་པ་དང་། མི་མཐུན་པར་སྨྲ་བ་དེ་ལྟ་བུ་དེ་ཐོང་ཤིག་ཅེས་བྱ་བ་དེ་ནི་གཟུ་བོས་བྱ་བ་ཞེས་བྱའོ། །དེའི་ངོ་བོ་ཉིད་ཚོལ་བ་བྱིན་པས་བྱ་བ་གང་ཞེ་ན། དགེ་སློང་གང་གིས་ཉེས་པ་སྤྱོད་པ་དེ་ཁས་ལེན་ཁས་བླངས་པ་ལས་བསྙོན། བསྙོན་པ་ལས་ཀྱང་སླར་ཁས་ལེན་པ་དེ་ལ་དགེ་འདུན་གྱིས་བཞག་པ་མ་ཡིན་པ་བསྐྱོ་བ་མ་ཡིན་པ་གསོལ་བ་དང་བཞིའི་ལས་ཀྱིས་དེའི་ངོ་བོ་ཉིད་ཚོལ་བ་བྱིན་ཅིག །དེའི་ངོ་བོ་ཉིད་ཚོལ་བ་བྱིན་པའི་དགེ་སློང་གིས་བྱ་བ་འདི་ལྟ་བུ་ལ་འཇུག་པར་བྱའོ། །དེའི་ངོ་བོ་ཉིད་ཚོལ་བ་བྱིན་པའི་དགེ་སློང་གིས་རབ་ཏུ་དབྱུང་བར་མི་བྱ་བ་ནས་སྔ་མ་བཞིན་ཏེ། གང་ལ་དགེ་འདུན་གྱིས་
དེའི་ངོ་བོ་ཉིད་ཚོལ་བ་བྱིན་པ་དང་། གང་དེ་དང་འདྲ་བས་ཀྱང་རུང་སྟེ། ཉེས་པ་དེ་ལྟ་བུ་བྱུང་བ་མི་བྱ། དེ་བས་ཐུ་བ་ཡང་མ་བྱེད་ཅིག་པའི་བར་དུ་སྟེ། སྔ་མ་བཞིན་འདི་ལྟར་གང་ཟག་བཅུ་གཉིས་ཀྱིར་སྡོམ་པས་མི་བསྒོ་བ་དེ་ནི་དེའི་ངོ་བོ་ཉིད་ཚོལ་བ་བྱིན་པས་བྱ་བ་ཞེས་བྱའོ། །བསླབ་པ་བྱིན་པས་བྱ་བ་གང་ཞེ་ན། དགེ་སློང་གང་མི་ཚངས་པར་སྤྱོད་པ་འཁྲིག་པའི་ཆོས་བྱས་ཀྱང་དེ་ལ་སེ་གོལ་གཅིག་གཏོགས་པ་ཙམ་དུ་ཡང་་་བཅབ་པའི་སེམས་མ་སྐྱེས་པ་སྟེ། དེ་ལ་དགེ་འདུན་གྱིས་བསྐྱོ་བ་མེད། གཞག་པ་མེད་པར་གསོལ་བ་དང་། བཞིའི་ལས་ཀྱིས་བསླབ་པ་སྦྱིན་པར་བྱ་སྟེ། ཇི་ལྟར་ཚེ་དང་ལྡན་པ་དགའ་ལྡན་བཞིན་པ་ནི་རྒྱས་པར་འདུལ་བ་དང་སྦྱར་རོ། །བསླབ་པ་བྱིན་པའི་དགེ་སློང་གིས་རབ་ཏུ་དབྱུང་བར་མི་བྱ་བ་ནས་སྔ་མ་བཞིན་ཏེ། གང་ལ་དགེ་འདུན་གྱིས་བསླབ་པ་བྱིན་པ་དང་གང་དེ་དང་འདྲ་བ་གཞན་དག་ཀྱང་རུང་སྟེ། ཉེས་པ་དེ་ལྟ་བུའི་ལྟུང་བ་ཕྱིས་ཀྱང་མ་བྱེད་ཅིག །དེ་བས་ཐུ་བ་ཡང་མ་བྱེད་ཅིག་པའི་བར་དུ་སྟེ། སྔ་མ་བཞིན་ཏེ་དེ་འདི་ལྟར་གང་ཟག་བཅུ་གཉིས་ཀྱིས་སྡོམ་པས་མི་བསྐོའོ། །བསླབ་པ་བྱིན་པའི་དགེ་སློང་གིས་དགེ་སློང་གི་བསླབ་པ་ཐམས་ཅད་ལ་བསླབ་པར་བྱའོ། །དགེ་འདུན་གྱི་མཐར་འདུག་པར་བྱའོ། །དེས་བསྙེན་པར་རྫོགས་པའི་རྣམས་ལ་བྱིན་ལེན་བྱོས་ཤིག །དེ་ལ་བསྙེན་པར་མ་རྫོགས་པས་བྱིན་ལེན་བྱོས་ཤིག །དེ་བསྙེན་པར་རྫོགས་པ་དང་ལྷན་ཅིག་ཉལ་བ་བསྒྱུར་ཞིང་གུད་དུ་ཕྱུང་ཤིག །བསླབ་པ་བྱིན་པའི་དགེ་སློང་གིས་ལས་རྣམ་པ་གཉིས་བྱས་ཏེ། གསོ་སྦྱིན་དང་། སྐབས་དབྱེ་བའོ། །བསླབ་པ་བྱིན་པས་གྲངས་སུ་བསྐངས་ཏེ་གསོ་སྦྱིན་མ་བྱེད་ཅིག །དགེ་འདུན་གྱི་ལས་གཞན་ལ་ཡང་དེ་བཞིན་ནོ། །དེ་སྟེ་བསླབ་པ་བྱིན་པ་གསོ་སྦྱིན་གྱི་ནང་དུ་འོངས་ན་ནི་མ་བསྐྱོ་ཤིག །དེ་སྟེ་འགྲོ་ན་ཡང་མ་གཟུང་ཤིག །དེ་ཅིའི་ཕྱིར་ཞེ་ན། དགེ་འདུན་མ་འདུས་པར་ཡང་མི་འགྱུར། འདུས་པར་ཡང་མི་འགྱུར་ཏེ། འདི་ནི་བསླབ་པ་བྱིན་པས་བྱ་བ་ཞེས་བྱའོ། །མཚམས་མ་བཅད་པའི་གནས་བརྟན་གྱི་བྱ་བ་གང་ཞེ་ན། མཚམས་མ་བཅད་པའི་གནས་བརྟན་གྱི་
དགེ་སློང་གིས་བྱ་བ་འདི་ལྟ་བུ་ལ་འཇུག་པར་བྱའོ། །དེ་ལ་གང་གསར་བུའི་དགེ་སློང་འཁོད་པ་རྣམས་དེས་དེ་དག་ཀུན་ཤེས་པར་བྱ། བསྐྱང་བར་བྱ། རྗེས་སུ་བསྟན་པར་བྱ། སྡིག་པ་ལས་བཟློག་པར་བྱ། དགེ་བ་ལ་གཞུག་པར་བྱ། ཁ་ཏོན་བྱེད་པ་དང་། ཀུན་འདྲི་བ་དང་། སྤོང་བ་དང་། སོ་སོར་དབེན་པར་འཇུག་པ་དང་། རྣལ་འབྱོར་དང་། ཡིད་ལ་བྱེད་པའི་རྣམས་དེ་དག་ལ་སོ་སོར་ལུང་བསྒོ་བར་བྱ། ཀུན་མཚུངས་པར་སྤྱོད་པ་ལ་གཞུག་པར་བྱ། བསླབ་པར་བྱ་བ་ལ་སོ་སོར་བརྟག་པར་བྱ། རྙེད་པ་གྲུབ་པར་བྱ། ནམ་སོ་སོར་བགེད་པའི་ཚེ་སོ་སོར་བགོ་སྐལ་སྙོམས་པར་མིག་སྔར་བགོའོ། །ནད་པ་ལ་བལྟ་བར་བྱ། ནད་པའི་ནད་གཡོག་ཏུ་དགེ་སློང་རྣམས་སྤྲོ་བར་བྱ། ནད་པ་རྣམས་ལ་ཆོས་ཀྱི་གཏམ་བྱ། ལམ་དང་ལམ་མ་ཡིན་པ་ཡང་དག་པར་བསྒྲག་པར་བྱ། མཐོང་བ་རྣམ་པར་སྤྱོད་པའི་རྒྱུད་མི་གཏང་བར་བྱ། རྣམ་པ་ཐམས་ཅད་དུ་ཡང་ནད་པ་ལ་གཡེལ་བར་མི་བྱ། མཚམས་མ་བཅད་པའི་གནས་སུ་དགེ་སློང་རྣམས་ལྷགས་པ་ལ་གང་གཞན་ཅི་ཡང་རུང་བྱ་བར་འགྱུར་བ་དེ་་་ཐམས་ཅད་ལ་དགེ་སློང་གནས་བརྟན་གྱིས་ཐོག་མར་འཇུག་པར་བྱ་སྟེ། འདི་ནི་མཚམས་མ་བཅད་པའི་གནས་བརྟན་གྱི་བྱ་བ་ཞེས་བྱའོ། །ཀུན་དགའ་ར་བའི་བྱ་བ་གང་ཞེ་ན། ཀུན་དགའ་ར་བའི་ཞེས་བྱ་བ་ནི་དགེ་འདུན་རྣམས་ཀུན་ཏུ་དགའ་བའི་གནས་ཏེ་དེ་སོ་སོ་ནས་དགེ་སློང་དག་ལྷགས་པ་རྣམས་བྱ་བར་་བཅས་པ་ཡང་ཐ་དད་པས་ན་དགེ་སློང་དེས་འདི་དག་གིས་བྱ་བ་བཅས་པ་དེ་་་ཆོས་བཞིན་ཡིན་ནམ། འོན་ཏེ་ཆོས་བཞིན་མ་ཡིན་ཞེས་བརྟག་པར་བྱའོ། །དེ་སྟེ་ཆོས་བཞིན་ཡིན་ལ་བདག་ལ་ཡང་གནོད་པར་མི་འགྱུར། གཞན་ལ་ཡང་་གནོད་པར་མི་འགྱུར་ན་གཡེལ་བར་གཞག་གོ །དེ་སྟེ་ཆོས་བཞིན་མ་ཡིན་ལ་བདག་ལ་ཡང་གནོད་པར་འགྱུར། གཞན་ལ་ཡང་གནོད་པར་འགྱུར་བར་ཤེས་ལ་བདག་ཅག་གི་ཕྱོགས་མཐུ་དང་ལྡན། གྲོགས་དང་ལྡན། འཁོར་དང་ལྡན་པར་གྱུར་ཅིང་དེ་ལྟ་བུའི་ཕྱིར་དགེ་འདུན་གྱི་དབྱེན་དང་། དགེ་འདུན་འཁྲུགས་པ་དང་། དགེ་འདུན་གཉིས་སུ་ཆད་པ་དང་། དགེ་འདུན་སོ་སོར་ཡང་མི་འགྱུར། བདག་གིས་ཆོས་བཞིན་མ་ཡིན་པར་བྱ་བ་ལ་བཅས་པ་
དེ་ཕྱུང་ནས་ཆོས་བཞིན་་་བྱའོ། །ཆོས་བཞིན་བྱའོ་སྙམ་དུ་ནུས་པ་དང་། དེས་དགེ་འདུན་རྣམས་ལ་ཀྱེ་འདི་ནི་ཆོས་བཞིན་དུ་བྱ་བར་བཅས་པ་མ་ཡིན་གྱིས་འདི་ཕྱུང་ལ་ཆོས་བཞིན་པ་གཞན་བྱའོ་ཞེས་གོ་བར་སྒོ་ཤིག། དེ་སྟེ་བདག་ཅག་གི་ཕྱོགས་མཐུ་ཆུང་ངམ། འགྲོན་པ་མེད་དམ་འཁོར་མེད་པར་གྱུར་པ་དེའི་ཕྱིར་དགེ་འདུན་ཀྱང་འབྱེད། དགེ་འདུན་ཀྱང་འཁྲུགས་དགེ་འདུན་སོ་སོར་ཡང་འགྱུར་ཞིང་། བདག་གིས་ཆོས་མ་ཡིན་པར་བཅའ་བ་འདི་ཕྱུང་ལ་ཆོས་བཞིན་དུ་བྱ་བར་མི་ནུས་པར་ཤེས་པ་དེ་ཅང་མ་ཟེར་བར་འདུག་ཤིག །ཡང་ན་གུད་དུ་སོང་ཤིག །དེ་ལྟ་བུའི་རྐྱེན་གྱིས་རྣམ་པར་འཛིན་ཅིང་མ་འདུག་ཤིག །ཀུན་དགའ་ར་བ་ཞེས་བྱ་་་བ་ནི་འདི་རྣམས་ཀྱང་ཡིན་ཏེ། ཀུན་དགའ་ར་བའི་ནང་ན་ཁང་ཕྲན་དང་། ཁང་པ་དང་། ཁང་བུ་བརྩེགས་པ་དང་། ཁང་པ་འཁོར་དུ་བཅས་པ་དང་། སྤྱིལ་པོ་དང་། སྤྱིལ་བུའི་དངོས་པོ་དང་། འཆག་ས་དང་། སྐྱེད་ཤིང་དང་། གསིང་མ་རྣམས་ཐམས་ཅད་ཀྱང་ཇི་ལྟར་རྒན་རིམས་བཞིན་དུ་བསྒོ་བར་བྱའོ། །ཕྱི་བདར་བྱ་བ་དེ་ནི་ཀུན་དགའ་ར་བའི་བྱ་བ་ཞེས་བྱའོ། །ཀུན་དགའ་ར་བའི་གནས་བརྟན་གྱི་བྱ་བ་གང་ཞེ་ན། ཀུན་དགའ་ར་བའི་དགེ་སློང་གནས་བརྟན་གྱིས་བྱ་བ་དེ་ལྟ་བུ་ལ་འཇུག་པར་བྱ། ཀུན་དགའ་ར་བའི་དགེ་སློང་གི་གནས་བརྟན་གྱིས་བཞིན་མདོག་གསལ་བར་བྱ། ཁྲོ་གཉེར་མེད་པར་བྱ། སྔར་འཛུམ་པར་བྱ། སྔར་སྨྲ་བར་བྱའོ། །སྙན་པར་སྨྲ་བར་བྱ། ཚུར་ཤོག་བདེ་བར་འོངས་སམ་ཞེས་སྙན་ཚིག་སྨྲ་བར་བྱ། ཚིག་སྙན་ཅིང་མི་རྩུབ་པ་མགུ་ཞིང་རངས་པར་སྨྲ་བར་བྱ། གང་དེ་ན་དགེ་སློང་གཞོན་ནུ་གསར་བུ་འཁོད་པར་གྱུར་པ་དེ་དག་ནི་ཤེས་པར་བྱ་བ་ནས་སྔ་མ་བཞིན་ཏེ། ཐམས་ཅད་དུའང་དགེ་སློང་གནས་བརྟན་གྱིས་ཐོག་མར་འཇུག་པར་བྱ། རྒྱུད་མི་གཏང་བར་བྱ་བའི་བར་དུ་སྟེ། འཐབ་པ་དང་། མཚང་འདྲུ་བ་དང་། འཁྲུག་པ་དང་། རྩོད་པའི་རྣམས་བྱུང་བར་གྱུར་ན་གདུལ་བའི་ཕྱིར་རིག་པར་བྱ། ཞི་བའི་ཕྱིར་རྣམ་པར་ཞི་བར་རིག་པར་བྱ། འདི་ལྟར་ཡང་དགེ་སློང་ཀུན་དགའ་ར་བའི་གནས་བརྟན་གྱིས་ཐོག་མར་བཟའ་བའམ། བཅའ་བའམ། སྐྱོ་མའམ། ཐུག་པའམ། ནང་
པར་བསྒོའམ། གཎྜཱི་བརྡུངས་སམ། སྔར་མྱུར་དུ་འགྲོ་བར་བྱ། སྔར་འདུག་པར་བྱ། བཀུར་སྟིར་བཅས། སྤྱི་དམའ་བར་བཅས། འཇིགས་པའི་དབང་དུ་བཅས། སེམས་དམན་པ་དང་། རྡུལ་འཕྱག་པའི་སེམས་ལྟ་བུར་བྱས་ལ་དགེ་འདུན་གྱི་མདུན་དུ་འགྲོ་བར་བྱའོ། །སོང་ནས་ཀྱང་རྒན་རིམས་ཀྱི་མཐར་ཕྱག་བྱས་ལ་རང་གི་སྟན་ག་ལ་བ་དེར་འདུག་པར་བྱའོ། །གནས་བརྟན་དང་། བར་མ་དང་། གསར་བུ་ལ་བྱམས་པའི་སེམས་དང་། ཕན་པའི་སེམས་དང་། རྗེས་སུ་བརྩེ་བའི་སེམས་དང་། ཕ་དང་མ་དང་ཕུ་ནུ་བོར་འདུ་ཤེས་བསྐྱེད་དེ། འཁོར་ཐམས་ཅད་ལ་བརྟག་པར་བྱ་སྟེ། ལེགས་པ་བཟང་པོར་བཅས་སམ། སུ་ལེགས་པར་བགོས། སུ་ལེགས་པར་མ་བགོས་་བརྟགས་ཏེ། གང་བཟང་ཞིང་ལེགས་པར་ཆས་པ་དེ་དག་ལ་ནི་གཡེལ་བར་གཞག །གང་ལེགས་པར་མ་ཆས་ཤིང་མི་སྡུག་པ་དེ་དག་ནི་བསྒོ་ཞིང་བཅོས་པར་བྱ། ལེགས་པར་བགོས་པ་ནི་དེས་གཡེལ་བར་གཞག །ལེགས་པར་མ་བགོས་པ་དེ་ལ་ནི་བརྡ་དང་མཚན་མ་བྱ། དེས་མཚན་མ་མ་ཚོར་ན་ཡང་དྲུང་ན་འདུག་པ་ལ་མཚན་མ་བྱ། དྲུང་ན་འདུག་པས་ཀྱང་མ་ཚོར་ན་དེར་དགེ་སློང་གནས་བརྟན་ཉིད་ཀྱིས་ཇི་ནས་ལེགས་པར་གྱོན་པ་དང་། སྒྲ་མ་ཆེ་བར་སྒོ་ཤིག །དགེ་སློང་གནས་བརྟན་གྱིས་རྒན་རིམས་སུ་གཟར་བུ་ཐོགས་ནས་ཁ་ཟས་འབྲིམ་པར་ཤོམ་པའི་ཚེ་རུང་བར་བྱས་སམ། མ་བྱས་ཞེས་སྨྲོས་ཤིག་འབྱོར་ཚོགས་ཤེས་མ་བྱུང་གི་བར་དུ་སྐད་ཅིག་སྡོད་ལ་ཐམས་ཅད་ལ་སྙོམས་པར་བྲིམས་ཤིག་ཅེས་སྨྲ་བར་བྱའོ། །དགེ་སློང་གནས་བརྟན་གྱིས་གནས་བརྟན་དང་བར་མ་དང་གསར་བུ་དག་གི་རྗེས་སུ་མཐུན་པར་བྱ། གནས་བརྟན་དང་བར་མ་དང་གསར་བུས་ཀྱང་དེའི་རྗེས་སུ་མཐུན་པར་གྱིས་ཤིག །དེ་སྟེ་དད་པའི་བྲམ་ཟེ་དང་ཁྱིམ་བདག་རྣམས་ལྷགས་ན་དེ་དག་ལ་ཡང་མཚུངས་པར་བགོ་ཞིང་སྦྱིན་པར་་་བྱའོ། །དེ་སྟེ་དེ་བགོར་མ་དད་དམ། དད་པའི་བྲམ་ཟེ་དང་ཁྱིམ་བདག་མ་འདོད་ན་ཡང་དགེ་སློང་གནས་བརྟན་གྱིས་ཆོས་ཀྱི་གཏམ་ཡང་དག་པར་བསྟན་་་པར་བྱ། བསྟབ་པར་བྱ། ཡང་དག་པར་གཟེངས་བསྟོད་པར་བྱ།
ཡང་དག་པར་དགའ་བར་བྱས་ལ། བདག་ཅག་ལ་ནི་འདི་ཡོད་དོ་ཞེས་སྨྲ་བར་བྱ་སྟེ། འདི་ནི་ཀུན་དགའ་ར་བའི་གནས་བརྟན་གྱི་བྱ་བ་ཞེས་བྱའོ། །གནས་ཁང་གི་བྱ་བ་གང་ཞེ་ན། དགེ་སློང་གང་གནས་ཁང་ན་འདུག་པ་དེས་གནས་ཁང་དེ་དུས་དུས་སུ་ཆག་ཆག་གདབ། ཕྱག་དར་བྱ། ཕྱགས་པ་དོར་བར་བྱ། ལྕི་བས་ཤིན་ཏུ་འཇམ་པོར་བྱུག་པར་བྱ། སྔོ་ཅུང་ཟད་བྱུང་ན་ཡང་མེད་པར་བྱ། གས་པ་དང་། ཞིགས་པ་དང་། གོགས་པ་རྣམས་སླར་བཅོས་པར་བྱ། བུམ་པ་ཆུས་བཀང་སྟེ་གཞག་པར་བྱ་སྟེ། ཡོངས་སུ་སྤྱད་པའི་བུམ་པ་དང་། གཙང་མའི་རིལ་བ་དང་། སྣམ་ཕྱི་སའི་རིལ་བ་དང་། རྐང་པ་བཀྲུ་བ་རྣམས་བཀང་སྟེ་བཞག་པ་དེ་ནི་གནས་ཁང་གི་བྱ་བ་ཞེས་བྱའོ། །གནས་ཁང་གི་གནས་བརྟན་གྱི་བྱ་བ་གང་ཞེ་ན། གནས་ཁང་གི་དགེ་སློང་གནས་བརྟན་གྱི་བྱ་བ་ནི་དེས་འདི་ལྟ་བུ་ལ་འཇུག་པར་བྱའོ། །དགེ་སློང་གསར་བུ་གང་དག་དེ་ན་འཁོད་པར་གྱུར་པ་དེ་དག་ཤེས་པར་བྱ་བ་ནས་སྔ་མ་བཞིན་ཏེ། དགེ་སློང་གནས་བརྟན་གྱིས་ཐམས་ཅད་ལ་ཐོག་མར་འཇུག་པར་བྱ། རྒྱུད་མི་གཏང་བར་བྱ་བའི་བར་དུ་སྟེ། འདི་ནི་གནས་ཁང་གི་དགེ་སློང་གནས་བརྟན་གྱི་བྱ་བ་ཞེས་བྱའོ། །ཁང་པ་འཁོར་དུ་བཅས་པའི་བྱ་བ་གང་ཞེ་ན། ཁང་པ་འཁོར་དང་བཅས་པ་དེ་ན་དགེ་སློང་གང་འདུག་པ་དེས་ཁང་པ་འཁོར་དང་བཅས་པ་དེ་དུས་དུས་སུ་བྱི་བདར་བྱ་བ་ནི་སྔ་མ་བཞིན་ཏེ། རྐང་པ་བཀྲུ་བའི་རྣམས་བཀང་སྟེ་གཞག་པའི་བར་དུའོ། །ཁང་པ་འཁོར་དང་བཅས་པ་དེ་ན་དགེ་སློང་གྲོགས་པོ་གང་འཁོད་པའི་རྣམས་ལ་ཡང་བྱམས་པའི་ལུས་ཀྱི་ལས་ཀྱིས་མཚུངས་པར་སྤྱད་པར་བྱ། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཀྱང་མཚུངས་པར་སྤྱད་པར་བྱ། དེར་ཡང་ཐབ་མོ་མི་དབྱུང་བར་བྱ། མཚང་འདྲུ་བ་དང་། འཁྲུག་པ་དང་། རྩོད་པ་མི་དབྱུང་བར་བྱ། དེ་སྟེ་དེར་འཐབ་པ་དང་། སྨོད་པ་དང་། འཁྲུག་པ་དང་། རྩོད་པ་ཞིག་བྱུང་ན་ཞི་བར་ནུས་ན་ནི་དེ་བཞིན་ལེགས། དེ་སྟེ་ཡང་མི་ནུས་ན་གུད་དུ་སོང་ཤིག །འདི་ནི་ཁང་པ་འཁོར་དུ་བཅས་པའི་བྱ་བ་ཞེས་བྱའོ། །ཁང་པ་འཁོར་དུ་བཅས་པའི་གནས་བརྟན་
གྱི་བྱ་བ་གང་ཞེ་ན། ཁང་པ་འཁོར་དུ་བཅས་པའི་དགེ་སློང་གནས་བརྟན་གྱི་བྱ་བ་ནི་དེས་འདི་ལྟ་བུ་ལ་་་འཇུག་པར་བྱའོ། །དེ་ན་དགེ་སློང་གསར་བུ་གང་འཁོད་པར་གྱུར་པ་དེ་དག་ཀུན་ཤེས་པར་བྱས་ནས། སྔ་མ་བཞིན་ཏེ། ཐམས་ཅད་དུ་ཡང་དགེ་སློང་གནས་བརྟན་ཐོག་མར་འཇུག་པར་བྱ་བ་དང་། རྒྱུད་མི་གཏང་བར་བྱ་བའི་བར་དུ་སྟེ། འདི་ནི་ཁང་པའི་འཁོར་དང་བཅས་པའི་གནས་བརྟན་གྱི་བྱ་བ་ཞེས་བྱའོ། །ནགས་ཀྱི་བྱ་བ་གང་ཞེ་ན། ནགས་ཞེས་བྱ་བ་ནི་སྐྱེད་ཤིང་གི་ནགས་དེ་ན་དགེ་སློང་འཁོད་པ་རྣམས་ཀྱིས་བདག་ཅག་གནས་འདི་ན་འཁོད་ལ་འཚོ་བའི་བར་ཆད་དུ་འགྱུར་བའམ། ཚངས་པར་སྤྱོད་པའི་བར་ཆད་དུ་འགྱུར་བ་ལྟ་ཡོད་དམ་མེད་ཅེས་རྒྱང་གྲགས་གཅིག་ཚུན་ཆད་འཁོར་ཡུག་ཏུ་བརྟག་པར་བྱའོ། །དེ་སྟེ་ཡོད་པར་མཐོང་ན་རིང་དུ་དོར་བར་བྱའོ། །དེ་སྟེ་མེད་པར་མཐོང་ལ་དགོས་པར་གྱུར་དང་རྒྱང་གྲགས་གཅིག་ཚུན་ཆད་དུ་སྡོམ་པ་བསྐོ་བར་བྱ། རུང་བའི་ས་ཡང་བསྐོ་བར་བྱ། གསོ་སྦྱིན་གྱི་གནས་ཀྱང་བསྐོ་བར་བྱ། དེ་ན་ཕན་ཚུན་ཁ་ཟས་ཀྱི་ལོངས་སྤྱོད་དང་། ཆོས་ཀྱི་ལོངས་སྤྱོད་ཀྱིས་སྤྲོ་བ་བསྐྱེད་པར་བྱ། དེ་ན་འཐབ་པ་མི་འབྱུང་བ་དང་། མཚང་འདྲུ་བ་མི་འབྱུང་བ་དང་། ཁོན་པ་མི་འབྱུང་བ་དང་། རྩོད་པ་མི་འབྱུང་བར་བྱ་བ་དེ་ནི་ནགས་ཀྱི་བྱ་བ་ཞེས་བྱའོ། །མལ་སྟན་གྱི་བྱ་བ་གང་ཞེ་ན། དགེ་སློང་རྣམས་ཀྱིས་མལ་སྟན་དུས་དུས་སུ་བརྟག་པར་བྱ། བསྐམ་པར་བྱ། སྤྲུག་པར་བྱ། བགྲང་བར་བྱ། སྦ་བར་བྱ། དེ་སྟེ་དྲི་མ་ཅན་དུ་གྱུར་ན་བཀྲུ་བར་བྱ། རྡོལ་ཏམ་ཟད་པའི་ཆོས་སུ་གྱུར་ན་ཅི་ནུས་སུ་བཙེམ་ཞིང་གླན་པར་བྱ། འཚེམ་ཞིང་གློན་དུ་གཞུག་པར་བྱ། དགེ་སློང་གིས་ཕྱོགས་བཞིའི་དགེ་འདུན་གྱི་གོས་བགོས་ནས་བཤང་བའི་སར་འགྲོ་་་བར་མི་བྱ། གཅི་བའི་སར་མི་འགྲོ། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན། ཚང་མང་དུ་མ་ཡིན། ཆར་འབབ་པ་ལ་གྱོན་ཏེ་འདུག་པར་མི་བྱ། ཉི་མ་ཚ་བ་ལ་མ་ཡིན་བསྲོ་ཁང་དུ་གཞག་པར་མི་བྱ། ཅི་ནས་གནོད་པར་འགྱུར་བའི་ས་ཐམས་ཅད་དུ་ཕྱོགས་བཞིའི་དགེ་འདུན་གྱི་གོས་དང་འཇུག་་་པར་མི་བྱ། བགོ་བར་མི་བྱ། གཞག་པར་མི་བྱ། དགེ་སློང་
རྣམས་ཀྱིས་མལ་སྟན་རྣམ་པ་འདི་ལྔར་སྤྱད་པར་མི་བྱ་སྟེ། ལྔ་གང་ཞེ་ན། དུད་པ་དང་། རྡུལ་དང་། ཆུ་དང་། བཤལ་བ་དང་། དྲུད་པའོ། །དགེ་སློང་རྣམས་ཀྱིས་ཕྱོགས་བཞིའི་དགེ་འདུན་གྱི་གོས་བགོས་བཞིན་གཙུག་ལག་ཁང་ཆག་ཆག་མི་གདབ། ས་མི་ཕྱག །ཕྱག་དར་མི་དོར། ལྕི་བས་ཞལ་ཞལ་མི་བྱ། ཆུའི་བུམ་པ་དགང་བར་མི་བྱ། ཡོངས་སུ་སྤྱོད་པའི་བུམ་པར་མ་ཡིན། གཙང་མའི་རིལ་བར་མ་ཡིན། བཤང་བའི་རིལ་བར་མ་ཡིན། རྐང་པ་བཀྲུ་བའི་བུམ་པ་དགང་བར་མི་བྱ། སྣོད་འབྲིམ་པར་མ་ཡིན། གཙུག་ལག་ཁང་སྐྱོང་དུ་མ་ཡིན། ལྷུང་བཟེད་ཀྱི་ལས་བྱེད་པར་མ་ཡིན། གོས་ཀྱི་ལས་བྱེད་པར་མ་ཡིན། དགེ་སློང་རྣམས་ཀྱིས་ཕྱོགས་བཞིའི་དགེ་འདུན་གྱི་གོས་ལུས་ཀྱི་མཐང་ལ་བགོ་བར་མི་བྱ། རྔུལ་ཟན་མེད་པར་བགོ་བར་མི་བྱ། དགེ་སློང་དག་གིས་ཕྱོགས་བཞིའི་དགེ་འདུན་གྱི་མལ་སྟན་རྣམས་བླ་གབ་མེད་པ་ལ་བཏིང་བ་དང་། སྒོ་ཁང་ཕན་ཆད་ཉེ་འཁོར་འདོམ་བཞི་བཅུ་རྩ་དགུའི་བར་དུ་བོར་ཏེ་མ་འགྲོ་ཤིག །དེ་སྟེ་བཤང་བའམ། གཅི་བའི་སར་འགྲོ་ན་ཡང་དགེ་སློང་འཁོད་པའི་རྣམས་ལ་བསྒོ་ལ་སོང་ཤིག །ཇི་ལྟར་བདག་ཉིད་ཀྱིས་ལྷུང་བཟེད་དང་ཆོས་གོས་དང་ལུས་ཀྱི་པགས་པ་བཞིན་དུ་དགེ་སློང་དག་གིས་ཕྱོགས་བཞིའི་དགེ་འདུན་གྱི་མལ་སྟན་རྣམས་ཡོངས་སུ་་་བསྲུང་བར་བྱའོ། །དགེ་སློང་དག་གིས་ཅིའི་མཐའ་ནས་ཀྱང་ཕྱོགས་བཞིའི་དགེ་འདུན་གྱི་མལ་སྟན་ཡལ་བར་མི་བྱ་སྟེ། འདི་ནི་དགེ་འདུན་གྱི་མལ་སྟན་གྱི་བྱ་བ་ཞེས་བྱའོ། །སྒོ་ལེབ་ཀྱི་བྱ་བ་གང་ཞེ་ན། སྒོ་ལེབ་ཅེས་བྱ་བ་ནི་སྒོའི་འཕར་མ་སྟེ། དགེ་སློང་གིས་དེ་ལ་རྡུང་ན་ཡུན་རིང་དུ་བརྡུང་བར་མི་བྱ། སྔར་ནང་ན་འཁོད་པའི་རྣམས་ཀྱིས་ཚོར་བར་བྱ་བའི་ཕྱིར་དལ་ནས་བགས་ཀྱིས་བརྡུང་བར་བྱའོ། །དབྱེ་བའི་ཚེ་ཡང་དྲག་ཏུ་མི་དབྱེ་གཅོད་པའི་ཚེའང་དྲག་ཏུ་མི་གཅད། ཤེས་བཞིན་དུ་དལ་ནས་བགས་ཀྱིས་འཇུག་ཅིང་འབྱུང་བར་བྱ། སྒོའི་ཕྱོགས་གཉི་གར་ཀྱང་མི་འདྲུད་བཞིན་འབྱུང་བར་བྱ་སྟེ། འདི་ནི་སྒོ་ལེབ་ཀྱི་བྱ་བ་ཞེས་བྱའོ། །འཁོར་ལོའི་བྱ་བ་གང་ཞེ་ན། འཁོར་ལོ་ཞེས་བྱ་བ་
ནི་སྒོའི་སྟེན་པ་བླ་འོག་སྟེ། དེ་ཤིན་ཏུ་འབྱོར་པར་བྱའོ། །དགེ་སློང་གཙུག་ལག་ཁང་ནས་གུད་དུ་འདོང་ན་བླ་འོག་གཉི་ག་ཆུག་ལ་དེང་ཤིག་དང་། གཙུག་ལག་ཁང་རུབ་པར་འགྱུར་རོ། །གཙུག་ལག་ཁང་རུབ་ན་བདག་ཅག་ཉིད་དང་། ལྷུང་བཟེད་དང་། ཆོས་གོས་དང་། མལ་སྟན་རྣམས་ཀྱང་རུབ་པར་འགྱུར་ཏེ། འདི་ནི་འཁོར་ལོའི་བྱ་བ་ཞེས་བྱའོ། །གནས་སྟོང་པའི་བྱ་བ་གང་ཞེ་ན། དགེ་སློང་གིས་གནས་སྟོང་པ་དེ་ཆག་ཆག་གདབ་པར་བྱ། ས་ཕྱག་པར་བྱ། ཕྱག་དར་དོར་བར་བྱ། ཅི་ནུས་སུ་ལྕི་བས་ཞལ་ཞལ་འཇམ་པོར་བྱ། གས་པ་དང་། ཞིགས་པ་དང་། གོགས་པ་རྣམས་སླར་བཅོས་པར་བྱ། དེ་སྟེ་སྣོད་རྣམས་སོ་སོ་ནས་འདུག་པར་གྱུར་ན་ཡང་སྤྱད་དུ་བཟོད་ན་ནི་བཀྲུ་ཞིང་གཞག་པར་བྱ། མི་བཟོད་ན་དོར་བར་བྱ། དེ་སྟེ་རུང་བར་བྱེད་པ་ཡོད་ན་ཡང་རྩྭ་སྔོན་པོ་རྣམས་རེགས་ཤིག །ཁྱིམ་པ་དག་ལྷགས་ན་དེ་དག་ལ་ཆོས་ཀྱི་གཏམ་བྱ་བར་བྱ། དགེ་སློང་གིས་གནས་སྟོང་པར་ཞུགས་ན་ཡང་ཡལ་བར་དོར་བར་མི་བྱ། དེ་སྟེ་གནས་པར་མི་འདོད་ན། དེས་ག་ལས་གར་འགྲོ་བརྟག་པར་བྱ། འགྲོ་བའི་ཉེ་འཁོར་དང་། བཤང་ས་དང་། གཅི་ས་དང་། སྐས་ཀ་དང་། ཐེམ་སྐས་དང་། སྒོ་བཅད་པ་དང་། སྤྱོད་ཡུལ་རྣམས་ཀྱང་བརྟགས་ལ་གནས་པར་བྱའོ། །ཇི་ལྟར་དེ་དག་གིས་ཕྱིར་བྲེལ་བ་དང་། གནོད་པར་མི་འགྱུར་བར་བྱ་སྟེ། དེ་ནི་གནས་སྟོང་པའི་བྱ་བ་ཞེས་བྱའོ། །གནས་སྟོང་པའི་གནས་བརྟན་གྱི་བྱ་བ་གང་ཞེ་ན། གནས་སྟོང་པའི་དགེ་སློང་གནས་བརྟན་གྱི་བྱ་བ་ནི་དེས་འདི་ལྟ་བུ་ལ་འཇུག་པར་བྱའོ། །གནས་སྟོང་པའི་དགེ་སློང་གནས་བརྟན་གྱི་བཞིན་གསལ་བ་དང་། ཁྲོ་གཉེར་མེད་པར་བྱ་བ་ནས་སྔ་མ་བཞིན། ཐབ་མོ་དང་། མཚང་འདྲུ་བ་དང་། ཁོན་པ་དང་། རྩོད་པའི་རྣམས་བྱུང་བར་གྱུར་པ་གདུལ་བར་ནན་ཏན་བྱ། ཞི་བར་བྱ། རྣམ་པར་ཞི་བར་བྱ་བའི་བར་དུ་སྟེ། འདི་ནི་གནས་སྟོང་པའི་གནས་བརྟན་གྱི་བྱ་བ་ཞེས་བྱའོ། །ལྷུང་བཟེད་ཀྱི་བྱ་བ་གང་ཞེ་ན། དགེ་སློང་གིས་ཐལ་བ་མ་བཙགས་པ་ལྷུང་བཟེད་བཀྲུ་བར་མི་བྱ། ལྕི་བ་གསེག་མ་ཅན་གྱིས་བཀྲུ་བ་
མ་ཡིན། བྱེ་མ་དང་འདྲེས་པའི་སས་མ་ཡིན། བྱེ་མ་དང་འདྲེས་པའི་ལྕི་བའི་རིལ་བུས་མ་ཡིན་གྱི་སྲན་ཕྱེས་ལྷུང་བཟེད་བཀྲུ་བར་བྱའོ། །ལྷུང་བཟེད་ལངས་ཏེ་བཀྲུ་བར་མི་བྱ། བསྐམ་པར་མི་བྱ། སྣོད་དུ་གཞུག་པར་མི་བྱ། སྦ་བར་མི་བྱ། ལམ་དུ་འགྲོ་བ་མ་ཡིན། ཆུ་རྒལ་བ་ལ་མ་ཡིན། ས་མི་བདེ་བར་ལྷུང་བཟེད་གཞག་པར་མི་བྱ། དགེ་སློང་གིས་ལྷུང་བཟེད་ཀྱིས་གནས་ཁང་དུ་ཆག་ཆག་གདབ་པར་མི་བྱ། ཕྱག་དར་དོར་བར་མི་བྱ། ལྕི་བས་ཞལ་ཞལ་འཇོམ་པོར་བྱུག་པར་མི་བྱ། ལག་པ་བཀྲུ་བའི་ཆུ་བླང་བར་མི་བྱ། རྐང་པ་བཀྲུ་བའི་ཆུ་ལ་མ་ཡིན། གདོང་བཀྲུ་བའི་ཆུ་ལ་མ་ཡིན། ལུས་བཀྲུ་བའི་ཆུ་ལ་མ་ཡིན། དེས་ཆུའི་བུམ་པ་དགང་བར་མི་བྱ། དགེ་སློང་གིས་ལྷུང་བཟེད་བཤང་སར་བཀུར་བར་མི་བྱ། གཅི་བའི་སར་མ་ཡིན། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན་ཏེ། ཅི་ནས་དགེ་སློང་གིས་ས་མི་གཙང་བ་ཐམས་ཅད་དུ་ལྷུང་བཟེད་བཀུར་བར་མི་བྱ། དགེ་སློང་ལྷུང་བཟེད་ཐོགས་བཞིན་དུ་མཆོད་རྟེན་ལ་ཕྱག་བྱ་བར་མི་བྱ། གླན་པའི་རིགས་ན་གླན་པར་མི་བྱ། ཤིན་ཏུ་གཤེར་བཞིན་གཞག་པར་མི་བྱ། ཤིན་ཏུ་སྐམ་པར་གཡེལ་བར་མི་བྱ། དལ་ནས་བགས་ཀྱིས་ཤེས་བཞིན་དུ་ཡོངས་སུ་སྤྱད་པར་བྱ་སྟེ། ནམ་ཞིགས་པའི་མཐར་ཐུག་གི་བར་དུ་བཅང་བར་བྱ་སྟེ། དགེ་སློང་གིས་ལྷུང་བཟེད་དེ་མིག་བཞིན་དུ་བསྲུང་བར་བྱའོ། །ཅི་ནས་ཀྱང་ཕྱིན་ཆད་བཙལ་མི་དགོས་པར་བྱས་ཏེ། དེ་ནི་ལྷུང་བཟེད་ཀྱི་བྱ་བ་ཞེས་བྱའོ། །ཆོས་གོས་ཀྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ཀྱི་ཆོས་གོས་གསུམ་རྗེས་སུ་གནང་སྟེ། དྲེགས་པའི་ཕྱིར་མ་ཡིན། རྒྱགས་པ་བསྐྱེད་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན། བཞག་པའི་ཕྱིར་མ་ཡིན་གྱི། དེ་འདི་ལྟར་དགེ་སློང་རྣམས་བདེ་བར་སྤྱོད་པའི་ཕྱིར་ཏེ། སྦྲང་བུ་དང་། སྦྲང་མ་དང་། རླུང་དང་། ཚ་བ་དང་། སྦྲུལ་ལ་སོགས་པ་རེག་ན་མི་བདེ་བའི་གཉེན་པོའི་ཕྱིར་ངོ་ཚ་བ་དང་། ཁྲེལ་བ་གཡོག་པའི་ཕྱིར་རོ། །དེ་ཡང་དགེ་སློང་རྣམས་ཀྱིས་ཇི་ལྟར་ཡོངས་སུ་སྤྱད་པ་བཞིན་ཡོངས་
སུ་སྤྱད་པར་བྱའོ། །དེ་ལ་སྦྱར་མ་ཡང་སྦྱར་མའི་སྤྱད་པ་བཞིན་སྤྱད་པར་བྱའོ། །སྟོད་གཡོགས་ཀྱང་སྟོད་གཡོགས་ཀྱི་སྤྱད་པ་བཞིན་སྤྱད་པར་བྱ། མཐང་གོས་ཀྱང་མཐང་གོས་ཀྱི་སྤྱད་པ་བཞིན་སྤྱད་པར་བྱའོ། །དེ་ལ་སྦྱར་མས་མི་སྤྱད་པ་ནི་འདི་རྣམས་ཏེ། དགེ་སློང་རྣམས་སྦྱར་མ་གོན་བཞིན་གཙུག་ལག་ཁང་དུ་ཆག་ཆག་གདབ་པར་མི་བྱ། ས་ཕྱག་པར་མི་བྱ། ཕྱག་དར་དོར་བར་མི་བྱ། ལྕི་བས་ཞལ་ཞལ་འཇམ་པོར་བྱུག་པར་མི་བྱ། ཆུའི་སྣོད་དགང་བར་མི་བྱ། སྤྱད་པའི་བུམ་པར་མ་ཡིན། གཙང་བའི་རིལ་བར་མ་ཡིན། བཤང་བའི་རིལ་བར་མ་ཡིན། རྐང་པ་བཀྲུ་བའི་སར་མ་ཡིན། སྣོད་བགེད་པར་མ་ཡིན། གཙུག་ལག་ཁང་སྐྱོང་དུ་མ་ཡིན། ལྷུང་བཟེད་ཀྱི་ལས་སུ་མ་ཡིན། ཆོས་གོས་ཀྱི་ལས་སུ་མ་ཡིན། ཁྲུས་མི་བྱ། སྦྱར་མ་བགོས་ནས་རྩྭའམ། ཤིང་ངམ། ལྕི་བའམ་སའང་རུང་བཀུར་བར་མི་བྱ། སྦྱར་མ་བགོས་ནས་བཤང་སར་མི་འཇུག་གཅི་སར་མི་འཇུག །དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན་ཏེ། ཅི་ནས་སྦྱར་མ་བགོས་ལ་མི་གཙང་བའི་ས་ཐམས་ཅད་དུ་འགྲོ་བར་མི་བྱ། མཐང་ལ་བགོ་བར་མི་བྱ། གདིང་བར་མི་བྱ། དེ་རྒྱུན་དུ་བགོ་བར་མི་བྱ། སྦྱར་མ་ལ་འཇུག་པར་མི་བྱ། ཉལ་བར་མི་བྱ་སྟེ། འདི་ནི་སྦྱར་མ་དེ་ལྟ་བུར་མི་སྤྱོད་པའོ། །སྦྱར་མ་འདི་ལྟར་སྤྱད་པར་བྱ་སྟེ། དགེ་སློང་མ་སྦྱར་མ་བགོས་ནས་བསོད་སྙོམས་ལ་འཇུག་པར་བྱ། གྲོང་དུ་འཇུག་པར་བྱ། སྤྱོད་ཡུལ་དུ་འཇུག་པར་བྱ། ཟས་ལ་འཇུག་པར་བྱ། སྐྱོ་མ་དང་ཐུག་པ་ལ་འཇུག་པར་བྱ། འདི་ལྟར་ཡང་སྦྱར་མ་ནི་རྣམ་པ་གཉིས་སུ་སྤྱད་པ་བཞིན་སྤྱད་པར་བྱ་སྟེ། ཡང་ན་སྟེང་དུ་བགོ་བར་བྱ། ཡང་ན་སྔས་སུ་གཞུག་པར་བྱའོ། །སྟོད་གཡོགས་སྤྱད་པ་ཡང་འདི་ལྟར་སྤྱད་དེ། དགེ་སློང་རྣམས་སྟོད་གཡོགས་བགོས་ནས། གཙུག་ལག་ཁང་དུ་ཆག་ཆག་གདབ་པར་མི་བྱ། ས་ཕྱག་པར་མི་བྱ། ཕྱག་དར་དོར་བར་མི་བྱ། ལྕི་བས་ཞལ་ཞལ་འཇམ་པོར་བྱུག་པར་མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། བཀྲུ་བར་མི་བྱ། སྟོད་གཡོགས་
བགོས་བཞིན་དུ་རྩྭའམ། ཤིང་ངམ། ས་བཀུར་བར་མི་བྱ། སྟོད་གཡོགས་དང་བཤང་བའི་སར་འཇུག་པར་མི་བྱ། གཅི་བའི་སར་འཇུག་པར་མི་བྱ། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན་ཏེ། སྟོད་གཡོགས་དང་བཅས་མི་གཙང་བ་ཐམས་ཅད་དུ་འཇུག་པར་མི་བྱའོ། །ལུས་ཀྱི་མཐང་ལ་བགོ་བར་མི་བྱ། རྔུལ་ཟན་དུ་གདིང་བ་མི་བྱ། རྒྱུན་དུ་སྤྱད་ཅིང་བགོ་བར་མི་བྱ་སྟེ། འདི་ནི་སྟོད་གཡོགས་ཏེ་འདི་ལྟར་ནི་སྟོད་གཡོགས་མི་སྤྱད་པའོ། །སྟོད་གཡོགས་དེ་འདི་ལྟར་སྤྱད་དེ། སྟོད་གཡོགས་བགོས་ནས་ཆུའི་རྫ་མ་དགང་བར་བྱ། སྤྱད་པའི་རྫ་མ་དགང་། གཙང་མའི་རིལ་བ་དགང་། བཤང་སའི་རིལ་བ་དགང་། རྐང་པ་བཀྲུ་བའི་རིལ་བ་ཡང་དགང་བར་བྱ། སྣོད་བགོ་བར་བྱ། གཙུག་ལག་ཁང་སྐྱོང་བྱ། གཞན་གང་ཡང་རུང་སྟེ་རུང་བར་འགྱུར་བ་ཐམས་ཅད་ལའང་སྟོད་གཡོགས་བགོ་བར་བྱའོ། །མཐང་གོས་ནི་ཐམས་ཅད་དུ་བགོས་ཏེ། ལུས་ཀྱི་མཐང་ལ་བགོ། རྟག་ཏུ་ཡང་བགོ་ཞིང་སྤྱད་པར་བྱའོ། །དགེ་སློང་གིས་མི་གཙང་བའི་སར་ཆོས་གོས་གཞག་པར་མི་བྱ། ལྗིད་ཀྱིས་མནན་པར་མི་བྱ། དྲུབ་པར་རིགས་ན་དྲུབ་པར་བྱ། བཀྲུ་བར་རིགས་ན་བཀྲུ་བར་བྱ། ཁ་བསྒྱུར་བར་རིགས་ན་ཁ་བསྒྱུར་བར་བྱ། དགེ་སློང་གིས་ཚོན་ཆེན་པོ་རྣམ་པ་ལྔ་པོ་ཉིད་བཅང་བར་མི་བྱ་སྟེ། ཚོན་ཆེན་པོ་རྣམ་པ་ལྔ་གང་ཞེ་ན། འདི་ལྟ་སྟེ། ཐིང་ཤིང་དང་། ལེ་བརྒན་རྩི་དང་། རྒྱ་སྐྱེགས་དང་། གུར་གུམ་དང་། མཚལ་ལོ། །ཤུན་ཕྲགས་ཀྲི་མ་ཤ་མ་གཏོགས་ཏེ། གཞན་ཁ་དོག་ངུར་སྨྲིག་ཏུ་འགྱུར་བ་ཤིང་གི་ཤུན་ཕྲགས་ལ་ཁ་དོག་ཅན་ཆོངས་ཤིག །དེ་ཡང་གཞན་མེད་པར་གྱུར་ན་གདོད་ཉེས་པ་མེད་དོ། །སྦྱར་མ་ངེས་པར་མཚན་མ་ཅན་དུ་བྱའོ། །སྟོད་གཡོགས་ལ་ངེས་པར་མེད་ལ་མཐང་གོས་ལ་ཡང་ངེས་པར་མེད་དོ། །དགེ་སློང་ལ་ཆོས་གོས་ངན་ནམ་ཉུང་ན་ཚལ་བུས་ལོགས་ཤིག་ནས་གླན་པར་བྱ་སྟེ། ལྔའམ། བདུན་ནམ། དགུའམ། བཅུའམ། བཅུ་གཅིག་གམ། ལྷག་པར་ཡང་རུང་སྟེ། དེ་ལྟར་དགེ་སློང་གིས་སྦྱར་མ་སྤྱད་པ་ནི་སྦྱར་མར་སྤྱོད་ཅིག །
སྟོད་གཡོགས་སུ་སྤྱད་པ་ནི་སྟོད་གཡོགས་སུ་སྤྱོད་ཅིག །མཐང་གོས་སུ་སྤྱད་པ་ནི་མཐང་གོས་སུ་སྤྱོད་ཅིག །དགེ་སློང་གིས་ཇི་ལྟར་རང་གི་པགས་པ་བཞིན་དུ་ཆོས་གོས་ལ་བསྲུང་བར་བྱའོ། །ཅི་ནས་དེ་ཕྱི་ཕྱིར་བཙལ་མི་དགོས་པར་བྱ་སྟེ། འདི་ནི་ཆོས་གོས་ཀྱི་བྱ་བ་ཞེས་བྱའོ། །གདིང་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་གདིང་བ་རྣམ་པ་གཉིས་རྗེས་སུ་གནང་སྟེ། མལ་སྟན་ལ་བདེ་བའི་ཕྱིར་རོ། །སྟུག་ན་རིམ་གཅིག་བྱ། སྲབ་ན་ནི་རིམ་པ་གཉིས་སུ་བྱའོ། །དགེ་སློང་གིས་གདིང་བ་མ་བཏིང་གི་བར་དུ་འདུག་པར་མི་བྱ། ཉལ་བར་མི་བྱ། གདིང་བ་གཅིག་རྐྱང་ལ་བསྔོ་བར་མི་བྱ། གདིང་བ་མེད་པར་ཞག་ཏུ་གནས་པར་མི་བྱ། དགེ་སློང་གིས་གདིང་བ་ལ་ནན་ཏན་དུ་བྱ། ལེགས་པར་བྱ། ཅི་ནས་དེ་ཕྱི་ཕྱིར་དེ་བཙལ་མི་དགོས་པར་བྱས་ཏེ། འདི་ནི་གདིང་བའི་བྱ་བ་ཞེས་བྱའོ། །ཁབ་ཀྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཁབ་རྣམ་པ་གཉིས་རྗེས་སུ་གནང་སྟེ། ཆོས་གོས་དྲུབ་པའི་ཕྱིར་ཏེ། ལྕགས་དང་། ཟངས་ཀྱིའོ། །དགེ་སློང་རྣམས་ཀྱིས་ཁབ་མེད་བཞིན་ལྗོངས་ཀྱི་སྤྱད་པ་མ་སྤྱོད་ཅིག །དགེ་སློང་གིས་ཁབ་ལེགས་པར་ཞོག་ཤིག །ལེགས་པར་བྱོས་ཤིག །ཅི་ནས་ཕྱི་ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཁབ་ཀྱི་བྱ་བ་ཞེས་བྱའོ། །ཁབ་རལ་གྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཁབ་རལ་རྗེས་སུ་གནང་སྟེ། ཁབ་རྣམས་སྦ་བའི་ཕྱིར་རོ། །དགེ་སློང་གིས་ངོ་ཚ་མེད་པའི་དགེ་ཚུལ་རྣམས་ལ་ཁབ་རལ་མ་གཞག་ཅིག །མི་སྟོར་བར་བྱ། བསྙེན་པར་རྫོགས་ཀྱང་ཡིད་མི་ཆེས་ན་མ་ཡིན། འདི་ལྟར་ཡང་གང་ཟག་ལྔ་ལ་ཁབ་རལ་གཞག་པར་མི་བྱ་སྟེ། ངོ་ཚ་མེད་པ་དང་། ཁོན་ཡོད་པ་དང་། མི་མཛའ་བ་དང་། དྲན་པ་ཉམས་པ་དང་། ཚུལ་བཞིན་མི་གནས་པ་ལའོ། །དགེ་སློང་གིས་ཁབ་རལ་ལེགས་པར་གཞག་པར་བྱ། ནན་ཏན་དུ་བྱ། ཅི་ནས་ཕྱི་ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཁབ་རལ་གྱི་བྱ་བ་ཞེས་བྱའོ། །ཐུག་པའི་བྱ་བ་གང་ཞེ་ན། བཅོམ་ལྡན་འདས་ཀྱིས་
དགེ་སློང་རྣམས་ལ་ཐུག་པ་རྗེས་སུ་གནང་སྟེ་བདེ་བར་སྤྱོད་པའི་ཕྱིར་དང་། སྦྱིན་པ་དང་སྦྱིན་བདག་རྣམས་ལ་བྱིན་པའི་ཆོས་རྣམས་ཡོངས་སུ་སྤྱོད་པའི་ཕྱིར་རོ། །དགེ་སློང་གིས་སྒྲ་འབྱིན་བཞིན་དུ་ཐུག་པ་མ་འཐུང་ཤིག །ཤེས་བཞིན་དུ་ཐུག་པ་སྒྲ་བསྐྱུངས་ཏེ་འཐུང་བར་བྱ། དྲེགས་པའི་ཕྱིར་མ་ཡིན། ང་རྒྱལ་གྱི་ཕྱིར་མ་ཡིན། སྙེམས་པའི་ཕྱིར་མ་ཡིན། བཟང་བའི་ཕྱིར་མ་ཡིན་གྱི་ལུས་འདི་རྨ་གསོ་བའི་ཕྱིར་་དང་གཟུང་བའི་ཕྱིར་ཏེ། འདི་ནི་ཐུག་པའི་བྱ་བ་ཞེས་བྱའོ། །ཆུའི་བྱ་བ་གང་ཞེ་ན། དགེ་སློང་གིས་ཆུ་ཤིན་ཏུ་བརྟག་པར་བྱ། དང་བ། གསལ་བ། མ་རྙོགས་པ། མ་འདྲེས་པ། སངས་པ། གཙང་མ་ཡོངས་སུ་སྤྱད་པར་བྱ་སྟེ། འདི་ནི་ཆུའི་བྱ་བ་ཞེས་བྱའོ། །ཆུ་རྫའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཆུ་སྣོད་རྗེས་སུ་གནང་སྟེ། དགེ་འདུན་དང་གང་ཟག་ལ་ཡང་རུང་ཞབས་རྟེན་དང་ཆུ་དགབ་པའི་ཁ་གབ་ཏུ་བཅས་པའོ། །དགེ་སློང་རྣམས་ཀྱིས་ཤིན་ཏུ་ལེགས་པར་ཁྲུས་ཏེ་སྐོམས་ལ་གཙང་མར་བྱ་སྟེ་བཅང་བར་བྱ། ལག་པ་རུང་བ་དང་། གོས་རུང་བས་ཆུ་གཞག་པར་བྱ། བྲིམ་པར་བྱ། བྲམ་ཟེ་དང་ཁྱིམ་བདག་ལྷགས་ན་ཡང་བླུད་པར་བྱ། དགེ་སློང་རྣམས་ཀྱིས་ཆུ་རྫ་ཤིན་ཏུ་སྦ་བར་བྱ། ནན་ཏན་དུ་བྱ། ཅི་ནས་ཕྱི་ཕྱིར་བཙལ་མི་དགོས་པར་བྱ་སྟེ། འདི་ནི་ཆུ་སྣོད་ཀྱི་བྱ་བ་ཞེས་བྱའོ། །ཡོངས་སུ་སྤྱད་པའི་ཆུ་རྫའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་ཡོངས་སུ་སྤྱད་པའི་ཆུ་རྫ་རྗེས་སུ་གནང་སྟེ། ཤིན་ཏུ་བཀྲུས། བསྐམས་ལ་གཙང་མར་བྱས་ཏེ་བཅང་བར་བྱ། བཀང་ནས་གཙུག་ལག་ཁང་གི་སྒོར་གཞག་པར་བྱ། ཡོངས་སུ་སྤྱད་པའི་རྫ་མ་དེ་དགེ་སློང་རྣམས་ཀྱིས་དབེན་པར་བྱ། ནན་ཏན་དུ་བྱ། ཅི་ནས་ཕྱི་ཕྱིར་དེ་བཙལ་མི་དགོས་པར་བྱ་སྟེ། འདི་ནི་ཡོངས་སུ་སྤྱད་པའི་ཆུའི་རྫ་མའི་བྱ་བ་ཞེས་བྱའོ། །གཙང་མའི་རིལ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་རིལ་བ་རྗེས་སུ་གནང་སྟེ། དེ་མཆོད་རྟེན་གྱི་དྲུང་དུ་གཞག་པར་མི་བྱ། དགེ་སློང་གིས་དེ་དུས་དུས་སུ་བརྟག་
པར་བྱ། བསྐམ་པར་བྱ། དགང་བར་བྱ་སྟེ། འདི་ནི་གཙང་མའི་རིལ་བའི་བྱ་བ་ཞེས་བྱའོ། །ཟས་ཀྱི་བྱ་བ་གང་ཞེ་ན། བཅའ་བ་ལྔ་དང་། བཟའ་བ་ལྔ་སྟེ། དགེ་སློང་རྣམས་ཀྱིས་བཅའ་བ་དང་། བཟའ་བ་རྣམས་ལས་གང་ཡང་རུང་སྟེ། བཟའ་བའི་ཚེ་དྲན་པ་མངོན་པར་གཞག་པར་བྱ། ཟས་ལ་བརྟག་པར་བྱ། བཙལ་བའོ། །ནན་ཏན་གྱིས་བསྒྲུབས་པའོ། །དེ་དང་འདྲ་བའོ། །ཡོངས་སུ་སྤྱད་པའོ། །ཉམ་དུ་འགྱུར་བའོ། །འགྱེས་པའོ་སྙམ་དུ་ཤེས་པར་བྱས་ལ་བཟའ་བར་བྱའོ། །དྲན་པ་ཉེ་བར་བཞག་ཅིང་སེམས་མི་གཡེང་བར་ཟས་ལ་རྒྱུ་མཐུན་པར་འདུ་ཤེས། ནད་པར་འདུ་ཤེས། གཞན་ལ་རག་ལས་པར་འདུ་ཤེས། རྐྱེན་དུ་འདུ་ཤེས། རྟེན་ཅིང་འབྲེལ་བར་འབྱུང་བར་འདུ་ཤེས། མངོན་དུ་བཞག་ལ་ཟས་བཟའ་བར་བྱ། འདུས་ཏེ་ཟ་བ་དང་། ཡང་ཡང་ཟ་བ་དང་། ཆོག་པར་བྱ་བ་ལའང་དྲན་པ་མངོན་དུ་གཞག་པར་བྱ་སྟེ། དེ་ནི་ཟས་ཀྱི་བྱ་བ་ཞེས་བྱའོ། །བཟའ་བའི་བྱ་བ་གང་ཞེ་ན། དགེ་སློང་གིས་ཟན་བཟའ་བའི་ཚེའམ། སྐྱོ་མའི་ཚེའམ། ཐུག་པ་བཏུང་བའི་ཚེ་ཡང་རུང་དུས་བསྒོ་བའམ། གཎྜཱི་བརྡུངས་མ་ཐག་ཏུ་མྱུར་དུ་འོང་བར་བྱ། མྱུར་དུ་འདུ་བར་བྱ། ཤེས་བཞིན་དུ་འགྲེང་བར་བྱ། ཤེས་བཞིན་དུ་འདུག་པར་བྱ། ཤེས་བཞིན་དུ་བཟའ་བར་བྱ། དྲན་པ་ཉེ་བར་བཞག་ཅིང་སེམས་མི་གཡེང་བར་བྱ་བ་དང་། ཆས་བཟང་བ་དང་། སྤྱོད་ལམ་དུ་ལྡན་པ་དང་། ཤིན་ཏུ་བསྡམས་ཤིང་རབ་ཏུ་དབེན་པར་བྱས་ལ། སྒྲ་བསྐྱུངས་ཤིང་མིག་མི་གཡེང་ལ་མིག་གཉའ་ཤིང་གང་ཙམ་དུ་བལྟ། རིམ་གྲོར་བཅས། བདག་དམན་པར་བཅས། འཇིགས་པ་དང་། གཞན་གྱི་དབང་དུ་ཡིད་ལ་བསམས་ནས་རྡུལ་ཕྱག་གོ་སྙམ་པའི་སེམས་དང་། གནས་བརྟན་དང་། བར་མ་དང་། གསར་བུ་རྣམས་ལ་བྱམས་པའི་སེམས་དང་། བརྩེ་བའི་སེམས་དང་། ཕ་དང་། བུ་དང་། ཕུ་ནུ་བོར་འདུ་ཤེས་མངོན་དུ་བཞག་སྟེ་སྟན་ལ་འདུག་པ་མཁས་པར་བྱ། བཟའ་བ་ལ་མཁས་པར་བྱ་སྟེ། འདི་ནི་བཟའ་བའི་བྱ་བ་ཞེས་བྱའོ། །ཟས་བཏང་བའི་བྱ་བ་གང་ཞེ་ན། དགེ་སློང་གིས་ཟས་བླངས་
ནས་སླར་གཏང་བར་མི་བྱ། བབ་བབ་ཏུ་གཏང་བར་མི་བྱ། ཟས་གང་ལ་གཏང་བར་བྱ་ཞེ་ན། མ་ལ་སྦྱིན་པར་བྱ། ཕ་དང་། ཕུ་ནུ་བོ་དང་། སྲིང་མོ་ལ་སྦྱིན་པར་བྱ། གཉེན་ལའང་སྦྱིན་པར་བྱ། ཀུན་དགའ་ར་བའི་ནང་དུ་ཁྱིམ་པ་འོངས་པ་ལའང་སྦྱིན་པར་བྱ། ཕན་བཏགས་པ་ལ་སྦྱིན་པར་བྱ། མི་ཕན་པ་ལའང་སྦྱིན་པར་བྱ། ནད་པ་དང་། བཟུང་བ་དང་། བྲེལ་བར་གྱུར་པ་ལའང་སྦྱིན་པར་བྱ། དེ་སྟེ་བུད་མེད་སྦྲུམ་པ་ཞིག་འོངས་ན་ཡང་དྲན་པ་ཉེ་བར་བཞག་སྟེ་སྦྱིན་པར་བྱ། བྱོལ་སོང་ལའང་ཟས་ཆང་གཅིག་སྦྱིན་པར་བྱ། རབ་ཏུ་འབྱུང་བར་འདོད་པ་ལའང་སྦྱིན་པར་བྱ། དེ་ཡང་དུམ་བུར་བྱས། ལྷག་མར་བྱས་ལ་སྦྱིན་པ་སྟེ། འདི་ནི་ཟས་གཏང་བའི་བྱ་བ་ཞེས་བྱའོ། །བསོད་སྙོམས་ཀྱི་བྱ་བ་གང་ཞེ་ན། དགེ་སློང་གིས་བསོད་སྙོམས་གུས་པར་བླང་བར་བྱ། རིམ་བཞིན་དུ་བླང་བར་བྱ་མུ་དང་མཉམ་པར་མ་ཡིན། ཚོད་མ་དང་མཉམ་པར་མ་ཡིན། ཤེས་བཞིན་པ་དང་། དྲན་པ་ཉེ་བར་གཞག་པ་དང་། སེམས་མི་གཡེང་བ་དང་། མི་བོ་བ་དང་། ཇི་ཙམ་གྱིས་དེ་ཆོག་པར་འགྱུར་བ་དེ་ཙམ་དུ་བླང་བར་བྱ་སྟེ། འདི་ནི་བསོད་སྙོམས་ཀྱི་བྱ་བ་ཞེས་བྱའོ། །བསོད་སྙོམས་སྤྱོད་པའི་བྱ་བ་གང་ཞེ་ན། བསོད་སྙོམས་སྤྱོད་པའི་དགེ་སློང་གིས་ཤེས་བཞིན་དུ་འཇུག་པར་བྱ། ཤེས་བཞིན་དུ་འདུག་པར་བྱ། ཤེས་བཞིན་དུ་འགྲེང་བར་བྱ། དྲན་པ་ཉེ་བར་གཞག་པ་དང་། སེམས་མི་གཡེང་བ་དང་། མཛེས་པ་དང་། སྤྱོད་ལམ་དུ་ལྡན་པ་དང་། ཤིན་ཏུ་བསྡམས་པ་དང་། ཤིན་ཏུ་གཡོགས་པ་དང་། སྒྲ་བསྐྱུངས་པ་དང་། མིག་མི་གཡེང་ཞིང་གཉའ་ཤིང་གང་དུ་བརྟག་པ་དང་། དབང་པོ་བསྡམ་པ་དང་། ཡིད་ཕྱིར་མི་གཡེང་བ་དང་། སྔ་ཕྱིར་འདུ་ཤེས་པ་དང་། མ་ལྟ་བུའི་བུད་མེད་མཐོང་ན་མར་འདུ་ཤེས་ཉེ་བར་གཞག །སྲིང་མོ་ལྟ་བུའི་བུད་མེད་མཐོང་ན་སྲིང་མོར་འདུ་ཤེས་ཉེ་བར་གཞག །བུ་མོ་ལྟ་བུའི་བུད་མེད་མཐོང་ན་བུ་མོར་འདུ་ཤེས་མངོན་པར་གཞག །བསོད་སྙོམས་སྤྱོད་པའི་དགེ་སློང་གིས་སྲང་དང་། ཚོང་འདུས་དང་། བཞི་མདོ་དང་། སུམ་མདོ་དང་། སྒོ་
ཁང་དག་གི་མཚན་མ་གཟུང་བར་བྱ། ཁྱིམ་གྱི་སྒོར་སོང་ནས་ཁར་གསིལ་དཀྲོགས་ཏེ་དལ་ནས་བགས་ཀྱིས་སྒོ་ལ་གཏུགས་པར་བྱ། དེ་སྟེ་བུད་མེད་གཉིད་ལོག་ན་སེ་གོལ་གཏོགས་ལ་སད་པར་བྱ་སྟེ། རྡུང་བ་ཞིག་ལ་ཞུགས་ན་གཏུན་བུ་ཐབས་གཉིས་གསུམ་རྡུང་བའི་བར་དུ་བསྡད་པར་བྱ། འོན་ཏེ་སྲེག་པ་ཞིག་ལ་ཞུགས་ན་ཁུར་བ་གཅིག་བསྲེགས་ཀྱི་བར་དུ་བསྡད་པར་བྱ། དེ་སྟེ་འཐག་པ་ཞིག་ཏུ་གྱུར་ན། ལན་གཉིས་གསུམ་བསྐོར་གྱི་བར་དུ་བསྡད་པར་བྱ། དྲན་པ་ཉེ་བར་གཞག་པར་བྱ། སེམས་མི་གཡེལ་བར་བསོད་སྙོམས་བླང་བར་བྱ། ཇི་ཙམ་ཆོག་པ་དེ་ཙམ་བླང་བར་བྱ། དེ་སྟེ་དགེ་སློང་བསོད་སྙོམས་སྤྱོད་པས་འདོད་ན་དགེ་འདུན་གྱི་ནང་དུ་བཟའ་བར་བྱ། མགྲོན་དུ་བོས་ན་ཡང་བདག་གིར་བྱས་ཏེ། བསོད་སྙོམས་སྤྱོད་པའི་བྱ་བ་ནི་དེས་གཏང་བར་བྱ་སྟེ། འདི་ནི་བསོད་སྙོམས་སྤྱོད་པའི་བྱ་བ་ཞེས་བྱའོ། །ཟས་ནོད་པའི་བྱ་བ་གང་ཞེ་ན། ཟས་ནོད་པའི་དགེ་སློང་གིས་དུས་དང་ཚོད་རིག་པར་བྱོས་ལ་བསོད་སྙོམས་ལོང་ཤིག །ཤེས་པར་བྱ། དྲན་པ་མངོན་པར་གཞག་པར་བྱ། སེམས་མི་གཡེལ་བར་བྱ། མི་རྙོགས་པར་བྱ། མི་འདྲེས་པར་བྱ། ཅི་ནས་ཀྱང་མཛེས་ཤིང་དབེན་པར་བྱ། ཅི་ནས་ཀྱང་དེ་ལ་མི་གཙང་བ་འབགས་པ་དང་། རིངས་ཤིང་བརྟུན་པའི་ཚུལ་དུ་མི་བྱ། གཙང་ཞིང་མཛེས་པར་བྱ། རིངས་ཤིང་འདུན་པ་ལྟར་འོང་བར་བྱ། སྐབས་སུ་མ་བབ་པའི་དོན་གཞན་མི་གཉེར། གཙུག་ལག་ཁང་དུ་སོང་ནས་དགེ་སློང་དེ་ལ་བཞིན་གྱི་མདངས་བཟང་བ་དང་། ཁྲོ་གཉེར་མེད་པ་དང་། ཚིག་སྙན་པ་དང་། མགུ་བར་བྱོས་ལ་ཟན་ལོང་ཤིག །འདི་ནི་ཟས་ནོད་པའི་བྱ་བ་ཞེས་བྱའོ། །དགོན་པའི་བྱ་བ་གང་ཞེ་ན། དགོན་པའི་དགེ་སློང་གིས་མདངས་བཟང་བར་བྱ། ཁྲོ་གཉེར་མེད་པར་བྱ། དྲན་པ་མངོན་པར་གཞག །ཐོག་མར་སྙན་ཚིག་བྱ། ཚུར་ཤོག་བདེ་བར་འོངས་སམ་ཞེས་ཚིག་སྙན་པས་བསུ། ཁྱེད་ཅག་ལེགས་པར་གནས་སམ། ལེགས་པར་སྤྱད་དམ། ལེགས་པར་བྱ་བ་བྱས་སམ། ཞེས་ཐོག་མར་དྲིས་ཤིག །དགོན་པའི་དགེ་སློང་
རྣམས་ཀྱིས་ཆུ་ལེགས་པར་གཟོས་ཏེ་ཞོག་ཤིག །ཆུ་སྣོད་ཀྱང་ཞོག་ཤིག །ཁ་ཟས་ཀྱང་གཟོས་ལ་ཞོག་ཤིག །ཟས་ཀྱི་སྣོད་ཀྱང་ཞོག་ཤིག །མེ་ཡང་གཟོས་ཏེ་ཞོག་ཤིག །ཞུགས་ལིང་ཡང་གཟོས་ཏེ་ཞོག་ཤིག །མར་མེ་དག་ཀྱང་གཟོས་ཏེ་ཞོག་ཤིག །མེ་མར་གྱི་སྣོད་ཀྱང་གཟོས་ཏེ་ཞོག་ཤིག །མེ་མར་གྱི་སྙིང་པོ་ཡང་གཟོས་ཏེ་ཞོག་ཤིག །མར་དང་། འབྲུ་མར་དང་། སྦྲང་རྩི་དང་། སྣད་པའི་བཅིང་བ་ཡང་ཤོམས་ཏེ་ཞོག་ཤིག །ཀོ་བའི་དུམ་བུ་ཡང་ཤོམས་ཏེ་ཞོག་ཤིག །རྒྱུས་པ་དང་། འབྲེང་བུ་དང་། སྨྱུང་བུ་ཡང་ཤོམས་ཏེ་ཞོག་ཤིག །ཁབ་དང་། གྲི་དང་། སྐུད་པ་དང་། ཟས་རྣམས་ཀྱང་ཤོམས་ཏེ་ཞོག་ཤིག །སྨན་རྣམས་ཀྱང་ཆོངས་ཤིག །བརྟན་པའི་ཁར་བ་ཡང་ཆོངས་ཤིག །དགོན་པའི་དགེ་སློང་རྣམས་ཀྱིས་མེ་ཤེལ་དང་། ཆུ་ཤེལ་གཞན་ལ་མ་བསྟན་ཅིག །དགོན་པའི་དགེ་སློང་གིས་ཁྲོན་པ་རྒྱུས་ཤེས་པར་གྱིས་ཤིག །ཉེ་སྤྱོད་ལ་མཁས་པ་དང་། མཚན་མོ་ལ་མཁས་པ་དང་། ཡུལ་ཕྱོགས་ལ་མཁས་པ་དང་། དགོན་པའི་དགེ་སློང་གིས་མདོ་སྡེ་ལ་མཁས་པར་བྱ། འདུལ་བ་ལ་མཁས་པར་བྱ། མ་ལྟ་བུ་ལ་མཁས་པར་བྱ། སྨྲ་བ་ལ་མཁས་པ་དང་། ཆོས་སྟོན་པ་ལ་མཁས་པ་དང་། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་ལ་མཁས་པར་བྱ། དགོན་པའི་དགེ་སློང་རྣམས་ཀྱིས་ཆོས་ཤེས་པར་བྱ། དོན་ཤེས་པར་བྱ། དུས་ཤེས་པ་དང་། ཚོད་ཤེས་པ་དང་། །བདག་ཉིད་ཤེས་པ་དང་། འཁོར་ཤེས་པ་དང་། གང་ཟག་ཤེས་པ་དང་། གང་ཟག་གི་ཁྱད་པར་ཤེས་པར་བྱ། དགོན་པའི་དགེ་སློང་རྣམས་ཀྱིས་དྲེགས་པ་མི་བསྐྱེད། གཅམ་བུར་མི་བྱ། བཀུར་སྟིར་བཅས། དབང་གཞན་ལ་རག་ལས་པར་བཅས། ཁ་མི་རྒོད། ཚིག་བརྟན་པར་བྱ། ངོ་ཚ་དང་ཁྲེལ་ཡོད་པར་བྱ། གཏམ་མི་མང་བ་དང་། ཐབ་མོར་འགྱུར་བའི་རྣམས་མི་སྨྲ། བརྩོན་འགྲུས་སུ་བྱ། ལེ་ལོར་
མི་བྱ། དྲན་པ་ཅན་དང་ཤེས་བཞིན་དུ་སྤྱོད་པར་བྱ། དབང་པོ་དབེན་པར་བྱ། ཟས་ལ་ཚོད་ཟིན་པར་བྱ། བདག་གི་ཤེས་པར་མི་བྱ། སྲོད་དང་། ཐོ་རངས་ཀྱི་ཚེ་རྣལ་འབྱོར་བྱ་བ་ལ་ནན་ཏན་དུ་བྱ། གཉིད་ཀྱི་བདེ་བ་དང་། འཕྲེས་པའི་བདེ་བ་དང་། མལ་སྟན་གྱི་བདེ་བ་ཉམས་སུ་མི་བླང་། དུས་སུ་སྤྱོད་པ་དང་། དུས་མ་ཡིན་པར་སྤྱོད་པ་ཤེས་པར་བྱ། སྟན་ལ་འདུག་པ་ལ་མཁས་པ་དང་། དགེ་སློང་གནས་བརྟན་རྣམས་ལ་མི་སྨོད་པ་དང་། དགེ་སློང་གསར་བུ་རྣམས་ལའང་མི་སྨོད་པ་དང་། དགོན་པའི་དགེ་སློང་གིས་བརྩོན་འགྲུས་ཡལ་བར་མི་བྱ། མ་ཐོབ་པ་ཐོབ་པ་དང་། མ་ཆུད་པ་ཆུད་པ་དང་། མངོན་དུ་མ་བྱས་པ་མངོན་དུ་བྱ་བ་དང་། དགོན་པ་ལ་གནས་པའི་དགེ་སློང་གིས་ཆོས་ཀྱི་དབྱུག་པ་དང་། རིལ་བུ་དང་། ཕོ་ལོང་གིས་སྲོད་དང་ཐོ་རངས་ལ་རྣལ་འབྱོར་བྱོས་ཤིག །དགོན་པའི་དགེ་སློང་གིས་མཚུངས་པར་སྤྱད་པའི་ཆོས་བཅས་པ་བཞིན་དུ་རྫོགས་པར་མ་བྱས་ན་འདས་པ་དང་བཅས་པར་འགྱུར་ཏེ། །འདི་ནི་དགོན་པའི་བྱ་བ་ཞེས་བྱའོ། །དགོན་པའི་གནས་བརྟན་གྱི་བྱ་བ་གང་ཞེ་ན། དགོན་པའི་དགེ་སློང་གིས་བྱ་བ་དེ་ལྟ་བུ་ལ་འཇུག་པར་བྱའོ། །དགེ་སློང་གསར་བུ་རྣམས་དེ་ན་འཁོད་པ་ཀུན་ཤེས་པར་བྱ་བ་ནས་སྔ་མ་བཞིན་ཏེ། ཐམས་ཅད་དུ་ཡང་དགེ་སློང་གནས་བརྟན་གྱིས་ཐོག་མར་འཇུག་པར་བྱའོ། །རྒྱུད་གཏང་བར་མི་བྱ་བའི་བར་དུ་སྟེ། དགོན་པ་ན་བྱ་བའི་རྣམས་གཟུང་བར་བྱ། དགོན་པའི་བྱ་བ་རྣམས་ལ་གཟུད་པར་བྱ། དེ་དག་གིས་ཀྱང་དེས་རྗེས་སུ་བསྟན་པའི་ཚིག་ལ་མཉན་ཅིང་བསྒྲུབ་པར་བྱ་སྟེ། འདི་ནི་དགོན་པའི་གནས་བརྟན་གྱི་བྱ་བ་ཞེས་བྱའོ། །གྲོང་འདབ་ཀྱི་བྱ་བ་གང་ཞེ་ན། གྲོང་འདབ་ཀྱི་དགེ་སློང་གིས་མདངས་བཟང་བར་བྱ་བ་ནས། སྔ་མ་བཞིན་ཏེ། བདེ་བར་སྤྱོད་པའི་བར་དུའོ། །དགེ་སློང་དག་འོངས་ཤིང་ལྷགས་པའི་རྣམས་ལ་བདེ་བར་ཕྱིན་ཏམ་ཞེས་དྲི་བར་བྱ། ཇི་ལྟར་རྒན་རིམས་པ་དང་། ཇི་ལྟར་རིགས་པར་ངལ་བསོ་བར་བྱ། མལ་སྟན་དག་ཀྱང་ཇི་ལྟ་བུ་ཡོད་པ་སྦྱིན་པར་བྱ། དེ་སྟེ་སྔ་དྲོ་ལྷགས་ན་ནི་ཁ་ཟས་ཅི་འབྱོར་
པ་བཞིན་བགོ་ཞིང་སྦྱིན་པར་བྱ། དེས་ཟས་ཀྱི་འོག་ཏུ་འོངས་ན་བཏུང་བ་དང་། བུ་རམ་དང་། ཤ་ཁར་དང་། ཧྭགས་དང་། ཧ་སེ་རྣམས་ཅི་འབྱོར་པ་སྦྱིན་ཞིང་ཚིམ་པར་བྱ། ནུབ་མོ་མལ་སྟན་ཀྱང་བགོ་ཞིང་སྦྱིན་པར་བྱ། རྐང་པ་བཀྲུ་བ་དང་། རྐང་པ་བསྐུ་བ་ཡང་སྦྱིན་པར་བྱ། ཀུན་དགའ་ར་བའི་ཕྱིར་འབྱུང་བ་དང་། ནང་དུ་འཇུག་པ་དང་། ཉེ་འཁོར་དང་། བཤང་བའི་ས་དང་། གཅི་བའི་ས་དང་། སྐས་ཀ་དང་། ཐེམ་སྐས་དང་། གཅད་པ་དང་། དབྱེ་བའི་རྣམས་སོ་སོར་སྟོན་ཅིག །དགེ་འདུན་གྱི་བྱ་བ་བཅས་པ་རྣམས་ཀྱང་སྒྲོགས་ཤིག །དེ་སྟེ་བསོད་སྙོམས་པ་ཞིག་ཡིན་ན་ཡང་སྤྱོད་ཡུལ་རྣམས་རིག་པར་སྟོན་ཅིག །འོངས་པ་ལ་ཡང་ཁ་ཟས་དང་སྐོམ་རྣམས་སྦྱར་བར་བྱ། དེ་སྟེ་འདུག་པར་གྱུར་ན་དེ་ལ་དྲིས་ཏེ་གནས་པར་གྱུར་ན། གནས་ཁང་དང་། ཁང་བུ་བརྩེགས་པ་ཡང་རུང་དབེན་པར་རུང་བ་བྱིན་ཅིག །དེ་སྟེ་འགྲོ་བར་གྱུར་ན་རབ་ཏུ་མགུ་བར་བྱོས་ལ་ཕྱི་བཞིན་དུ་བསྐྱལ་བར་གྱིས་ཤིག །དེ་སྟེ་ཁྱིམ་པ་དག་ལྷགས་ན་ཡང་གྲོང་འདབ་པའི་དགེ་སློང་གིས་མགུ་བའི་བཞིན་དང་། ཁྲོ་གཉེར་མེད་པར་གྱིས་ལ་མདུན་དུ་བསུ་སྟེ་ཚིག་སྙན་པར་གྱིས་ཤིག །སྟན་ཐིང་ཤིག །དེ་སྟེ་ཁ་ཟས་དང་སྐོམ་དགོས་ན་ཡང་བྱིན་ཅིག །ཉལ་ན་ཡང་མལ་སྟན་བྱིན་ཅིག །དེ་སྟེ་ཆོས་ཉན་པར་འདོད་ན་དེས་ནུས་ན་བདག་ཉིད་ཀྱིས་ཆོས་ཀྱི་གཏམ་བྱོས་ཤིག །དེ་སྟེ་བདག་ཉིད་ཀྱིས་མི་ནུས་ན་དགེ་སློང་གཞན་སྐོས་ཏེ་ཆོས་ཀྱི་གཏམ་སྒྲོགས་ཤིག །གྲོང་མཐའི་དགེ་སློང་གིས་བྲམ་ཟེ་དང་ཁྱིམ་བདག་གི་རྣམས་འོངས་ཤིང་ལྷགས་པ་ལ་སྦྱིན་པ་དང་། སྦྱིན་པ་ལ་འཇུག་པ་དང་། སྐྱབས་སུ་འགྲོ་བ་དང་། བསླབ་པའི་གཞི་འཛིན་པར་བསྟབས་པར་བྱོས་ཤིག །སྤོས་དང་། དྲི་དང་། མེ་ཏོག་ཀྱང་སྦྱིན་པར་བྱོས་ཤིག །མཆོད་རྟེན་ལ་སྐོར་ཞིང་ཕྱག་འཚལ་དུ་ཆུག་ཤིག །ཅི་ནུས་སུ་བསླབས་བསྟན་ཏེ་གཏང་བར་བྱས་ཏེ་འདི་ནི་གྲོང་འདབ་ཀྱི་བྱ་བ་་་ཞེས་བྱའོ། །གྲོང་འདབ་ཀྱི་གནས་བརྟན་གྱི་བྱ་བ་གང་ཞེ་ན། གྲོང་འདབ་ཀྱི་གནས་བརྟན་གྱིས་བྱ་བ་དེ་འདི་ལྟ་བུ་ལ་འཇུག་པར་བྱའོ། །དགེ་སློང་གསར་བུ་དེ་ན་གང་
འཁོད་པ་དེ་ཀུན་ཤེས་པར་བྱ་བ་ནས་སྔ་མ་བཞིན་ཏེ། གྲོང་འདབ་ཀྱི་དགེ་སློང་གནས་བརྟན་གྱིས་ཐམས་ཅད་དུ་ཡང་ཐོག་མར་འཇུག་པར་བྱ། རྒྱུད་མི་གཏང་བར་བྱ་བའི་བར་དུ་སྟེ། གྲོང་འདབ་ཀྱི་བྱ་བ་རྣམས་ལ་དེ་དག་གཟུད་པར་བྱ། གྲོང་འདབ་པའི་བྱ་བ་རྣམས་ལ་འཛིན་པ་གཞུག་པར་བྱ། བྱ་བ་བཟང་པོ་ལ་གཟུད་པར་བྱ། འདི་སྐད་ཅེས་བསྒོ་བར་བྱ་སྟེ། ཚེ་དང་ལྡན་པ་རྣམས་དྲན་པ་ཉེ་བར་ཞོག་ལ་གྲོང་འདབ་དུ་གནས་པར་བྱ་སྟེ། ཀུན་དགའ་ར་བ་ཕ་དང་། དགེ་ཚུལ་ཕ་དང་། བུད་མེད་རྣམས་ལ་རྒྱུན་དུ་ལྟ་བ་སྤང་བར་བྱས་ལ་ལྟ་ན་ཡང་དྲན་པ་ཉེ་བར་བཞག་ལ་བལྟ་ཞིང་སྨྲ་བར་གྱིས་ཤིག །དྲེགས་པར་མ་བྱེད་ཅིག །དུས་དུས་སུ་ཆོས་ཀྱི་གཏམ་བྱ་བར་བྱ། སྤྱོད་ཡུལ་མ་ཡིན་པ་རྣམས་ལས་ནི་བཟློག་པར་བྱ། སྤྱོད་ཡུལ་རྣམས་ལ་ནི་གཟུད་པར་བྱ། དེ་དག་གིས་ཀྱང་དེས་བསྒོ་བ་དང་། བསྟན་པའི་ཚིག་རྣམས་མཉན་ཅིང་འཇུག་པར་བྱ་སྟེ། འདི་ནི་གྲོང་འདབ་ཀྱི་དགེ་སློང་གནས་བརྟན་གྱི་བྱ་བ་ཞེས་བྱའོ། །གློ་བུར་དུ་འོངས་པའི་བྱ་བ་གང་ཞེ་ན་། གློ་བུར་དུ་འོངས་པའི་དགེ་སློང་གིས་བབ་བབ་ཏུ་ཀུན་དགའ་ར་བའི་ནང་དུ་འཇུག་པར་མི་བྱ། ཀུན་དགའ་ར་བའི་སྒོ་ཀར་ལྷུང་བཟེད་དང་ཆོས་གོས་ཞོག་ལ་དེ་སྟེ་ཆུ་ཡོད་ན་ནི་རྐང་པ་ཁྲུས་ཤིག །ཆུ་མེད་ན་ནི་རྡུལ་ཕྱི་བའི་ར་དའམ། ལོ་མ་དང་། ལོ་མ་རྙིས་པས་རྡུལ་ཕྱིས་ཤིག །བཤང་བ་བྲོའམ་གཅི་བ་བྲོ་ན་ཡང་གཤོང་ཤིག །གཅིས་ཤིག །དེ་ནས་ཆོས་གོས་གྱོན་ལ་ཕྲག་པ་གཡོན་པས་ཆོས་གོས་ཀྱི་ཚད་ཐུར་དང་། ལྷུང་བཟེད་ཀྱི་སྣོད་རྣམས་ཐོགས་ཤིག །ལག་པ་གཡས་པས་ནི་ཁར་གསིལ་ཐོགས་ཤིག །ལག་པ་གཡོན་པས་ནི་ལྷམ་ཁྱེར་ཅིག །དེ་སྟེ་ཀུན་དགའ་ར་བ་རྩིག་པས་བསྐོར་ཏམ། ཤིང་ཐགས་ཀྱིས་བསྐོར་ཏམ། འོབས་ཀྱིས་བསྐོར་བར་གྱུར་ན་ཤེས་བཞིན་དུ་སྒོ་ལ་མི་འདྲུད་བཞིན་དུ་ནང་དུ་ཞུགས་ཤིག །མཆོད་རྟེན་རྣམས་ལ་བསྐོར་བར་བྱ། ཤེས་བཞིན་དུ་དྲན་པ་ཉེ་བར་བཞག་ལ་སེམས་མི་གཡེང། སྤྱོད་ལམ་མཛེས་པས་སྦྱར་ཞིང་། རབ་ཏུ་བཀབ་ནས་སྒྲ་བསྐྱུངས་ལ་མིག་མི་གཡེང་ཞིང་གཉའ་ཤིང་གང་ཙམ་
དུ་ལྟ་ཞིང་གཙུག་ལག་ཁང་གི་ནང་དུ་ཞུགས་ལ་སྣང་གཡེལ་ཆེ་བའི་ཕྱོགས་སུ་འདུག་ཤིག་དང་། ཅི་ནས་གཞི་ན་གནས་པའི་དགེ་སློང་དག་གིས་མཐོང་ནས་དགེ་སློང་འདི་ནི་གློ་བུར་དུ་འོངས་པ་ཞིག་གོ་ཞེས་ནས་དེ་དག་གིས་ངལ་བསོ་བར་བྱ་བར་འགྱུར། གློ་བུར་དུ་འོངས་པའི་དགེ་སློང་གཙུག་ལག་ཁང་གི་ནང་དུ་ཞུགས་པ་དང་། གང་རིགས་པར་ཆོས་གོས་ཀྱི་ཚད་ཐུར་དང་། ལྷུང་བཟེད་ཀྱི་སྣོད་དང་། རིལ་བ་དང་། ལྷམ་རྣམས་གཞག་པར་བྱའོ། །དེ་ནས་དགེ་སློང་གནས་བརྟན་དག་ལ་བཀུར་སྟིར་བཅས། རི་མོར་བཅས། འཇིགས་པའི་དབང་དུ་གྱིས་ལ་རྐང་པ་ལ་ཕྱག་བྱོས་ཤིག །དགེ་སློང་གསར་བུ་རྣམས་ལ་ཚིག་སྙན་པས་དགའ་བར་བྱོས་ཤིག །སྟན་ཇི་ལྟ་བུ་ཐོབ་པ་དེ་ལ་འདུག་པར་བྱ། གློ་བུར་དུ་འོངས་པའི་དགེ་སློང་ཟས་ཀྱི་ཚེའམ། བཏུང་བའི་ཚེའམ། ཐུག་པ་བཏུང་བའི་ཚེའམ། ཕྱག་བྱ་བའི་ཚེའང་རུང་། བསྒོའམ། གཎྜཱི་བརྡུངས་ནས་དགེ་འདུན་འདུ་བའི་ཁར་འདུས་ཤིག །ལོ་གྲངས་དྲིས་ལ་གར་བབ་པའི་རིམ་བཞིན་དུ་འདུག་ཤིག །དེ་སྟེ་མལ་སྟན་འབྲིམ་ན་ཤིན་ཏུ་རྟོགས་ལ་ལོང་ཤིག །གནས་ཁང་བསྐོས་ན་ཅི་འདི་ན་གནས་སམ་མི་གནས་ཞེས་དྲིས་ཤིག །དེ་སྟེ་གནས་ན་ནི་ཅི་བདེ་ཞེས་བྱོས་ཤིག །དེ་སྟེ་མི་གནས་པ་ཞིག་ཡིན་ན་ནི་དེས་ལྷུང་བཟེད་དང་ཆོས་གོས་ཕྱོགས་གཅིག་ཏུ་ཞོག་ལ་ཕྱག་དར་བྱ་བའི་ཕྱིར་ཕྱགས་མ་ཚོལ་ཅིག །ཆུ་རྫ་དང་ཤིང་སྟན་ཀྱང་ཚོལ་ཅིག །གནས་ཁང་གི་སྒོ་དྲུང་དུ་འོངས་ན་ཡང་དལ་ནས་རྡུངས་ཤིག །འོན་ཏེ་དེ་ན་སྦྲུལ་ལམ། སྡིག་པའམ། རྐང་མངས་སམ། ཏྲི་མ་པུ་ཀའམ། ཏྲེ་ལ་ཏ་ཀའམ། སྲོག་ཆགས་གདུག་པ་གཞན་དག་ཀྱང་རུང་སྟེ་ཡོད་ན་ཚོར་བར་བྱས་པར་འགྱུར་རོ། །དེ་སྒོའི་དཔྱིས་བླ་འོག་ཏུ་རྟོགས་ཤིག །སྒོ་འཕར་ལའང་རྟོགས་ཤིག །དེ་ནས་སྒོ་དལ་ནས་ཕྱེ་སྟེ་ཤེས་བཞིན་དུ་ནང་དུ་ཞུགས་ལ་དབུས་སུ་འདུག་ནས་གྲྭ་བཞིར་སྦྲུལ་གྱི་གནས་སམ། སྡིག་པའི་གནས་སམ། སྲིན་བུའམ། སྦྲང་མའམ། གྲོག་སྦུར་གཞན་གྱི་གནས་ལྟོས་ཏེ། ཡོད་པར་གྱུར་ན་
དེ་དག་མི་གནོད་པའི་ཚུལ་དུ་ལོགས་ཤིག་ཏུ་འགྲོ་བར་གྱིས་ཤིག །དེ་ནས་གནས་ཁང་དུ་ཆག་ཆག་ཐོབ་ཤིག །ཕྱག་དར་བྱོས་ཤིག །ཕྱག་དར་འོར་ཅིག །ལྕི་བས་ཞལ་ཞལ་འཇམ་པོར་ཡུགས་ཤིག །དེ་ན་འདི་ལྟ་སྟེ། མལ་སྟན་ཁྲིའམ། ཁྲིའུ་ཤིང་ངམ། ཁྲིའུ་འམ། ལ་བའམ། སྟན་ནང་ཚངས་ཅན་ནམ། གྲུ་བཞི་པ་དག་ཡོད་ན་ཕྱིར་བྱུང་ནས་དེ་སྟེ་རྒན་པོ་ཞིག་སྔར་འདུག་ན་ནི་སྐད་ཅིག་སྡོད་ཅིག། མ་ཡིན་ན་སེ་གོལ་གྱིས་དལ་ནས་གཏོགས་ཏེ་ཤེས་བཞིན་དུ་ནང་དུ་ཞུགས་ལ་རྐང་པ་ཁྲུས་ཤིག །གློ་བུར་དུ་འོངས་པའི་དགེ་སློང་གིས་གཞི་ན་གནས་པའི་དགེ་སློང་རྣམས་ལ་འདི་ན་བསྡིགས་པའི་ལས་བྱས་པའམ། སྨད་པའི་ལས་བྱས་པའམ། བསྐྲད་པའི་ལས་བྱས་པའམ། སླར་བསྡུམ་པའི་ལས་བྱས་པའམ། མ་མཐོང་བས་སྤངས་པའི་ལས་བྱས་པའམ། སླར་ལས་མ་བྱས་པའི་ཕྱིར་སྤངས་པའི་ལས་བྱས་པའམ། སྡིག་པ་ལ་ལྟ་བ་མ་བཏང་བའི་ཕྱིར་སྤངས་པའི་ཕྱིར་ལས་བྱས་པའམ། ཆད་པ་བྱེད་པའམ། གཞི་ནས་བསླང་སྟེ་ཆད་པ་བྱེད་པའམ། ཡིད་མགུ་བར་བྱེད་པའམ། གཞི་ནས་བསླང་སྟེ་ཡིད་མགུ་བར་བྱེད་པ་ཡང་རུང་སྟེ། དེ་ལྟ་བུ་དག་ཡོད་དམ་མེད་དྲིས་ཤིག །དེ་སྟེ་ཡོད་ན་ཡང་དེ་དང་དེ་ལྟ་བུར་སྤང་བར་བྱའོ། །གཙུག་ལག་ཁང་ནས་ཕྱིར་འབྱུང་བ་དང་། ནང་དུ་འཇུག་པ་དང་། ཉེ་འཁོར་དང་། སྣམ་ཕྱི་ས་དང་། གཅི་ས་དང་། སྐས་དང་། ཐེམ་སྐས་དང་། སྒོ་བཅད་པ་དེ་དབྱེ་བ་ལ་སོགས་པ་རྟོགས་ཤིག །དྲིས་ཤིག །དགེ་འདུན་གྱི་བྱ་བ་བཅས་པ་ཇི་ལྟ་བུ་དྲིས་ཤིག །གནས་ཁང་དུ་ཞུགས་ཏེ་སྟན་ཐིང་ལ་སྐྱིལ་མོ་ཀྲུང་ཆོས་ཏེ་ལུས་དྲང་པོར་སྲོང་ལ་དྲན་པ་མངོན་དུ་བཞག་སྟེ་རེག་པར་བྱ་བ་བརྒྱད་ལ་སྤང་བར་བྱའོ། །དེ་ནི་འདི་ལྟ་སྟེ། ནད་དོ། །སྐྲན་ནོ། །མཚོན་ནོ། །དུག་གོ །མི་རྟག་པའོ། །སྡུག་བསྔལ་བའོ། །སྟོང་པ་ཉིད་དོ། །བདག་མེད་པའོ་སྙམ་དུ་སོམས་ཏེ་འདུག་ལ། དེ་སྟེ་ནུས་ན་ནི་ཇི་སྲིད་ནུས་བཞིན་འདུག །འོན་ཏེ་ཡང་མི་ནུས་ན་ལངས་ཏེ་བཀླག་པ་གསུམ་བཀླག་གོ། །སྦྱིན་པའི་ཡོན་ཏན་བརྗོད་ལ་སྦྱིན་པའི་ཡོན་ཏན་བརྗོད་ནས་གཡས་ཕྱོགས་སུ་་་འཕྲེས་པར་བྱའོ། །རྐང་པས་རྐང་པ་མནན་ཏེ་སྣང་བའི་དྲན་པ་མངོན་དུ་
བཞག་ནས་ལྡང་བར་ཤེས་བཞིན་དུ་འདུ་ཤེས་བཞག་ནས་ཡིད་ལ་བྱེད་བཞིན་མཚན་མོ་ཟད་པའི་ཐོ་རངས་ཀྱི་ཚེ་རིངས་ཤིང་མྱུར་བར་ལོངས་ལ་དེ་ནས་སྐྱིལ་མོ་ཀྲུང་བཅས་ཤིང་ལུས་དྲང་པོར་བསྲངས་ཏེ་འདུག་ལ་སེམས་དྲན་པ་མངོན་དུ་བྱས་ཏེ་ལུས་འདིས་རེག་པར་བྱ་བ་བརྒྱད་སྤང་བར་བྱ་སྟེ། འདི་ལྟ་སྟེ། ནད་དོ། །སྐྲན་ནོ། །དུག་གོ །མཚོན་ནོ། །མི་རྟག་པའོ། །སྡུག་བསྔལ་བའོ། །སྟོང་པ་ཉིད་དོ། །བདག་མེད་པའོ་སྙམ་དུ་སོམས་ཏེ། དེ་ནས་ནམ་ནངས་ན་སོ་ཤིང་ཟོ་ལ་འོར་ཅིག །དེ་ནས་བྱ་བ་རྣམས་བྱོས་ལ་ཅི་དེང་དགེ་འདུན་གྱི་བཤོས་མགྲོན་དུ་བཞུད་དམ། འོན་ཏེ་བསོད་སྙོམས་ལ་འཇུག་ཅེས་དྲིས་ཤིག །དེ་སྟེ་དགེ་འདུན་གྱི་བཤོས་མགྲོན་དུ་བཞུད་ན་དགེ་བའི་ཕྱོགས་ཅི་བདེར་སྤྱོད་ལ་་བསོད་སྙོམས་གྱིས་ཤིག །དེ་སྟེ་བསོད་སྙོམས་ལ་འཇུག་ན་དེ་ནས་གྲོང་དང་། སྤྱོད་ཡུལ་དང་། དད་པའི་རིགས་གང་ཡིན་པ་དང་། མ་དད་པའི་རིགས་གང་ཡིན་པ་དང་། རིགས་འདིར་བསླབ་པ་བྱིན་པ་མ་ཡིན་ནམ་ཞེས་དྲིས་ཤིག །ལྷུང་བཟེད་ཁས་ཕུབ་མ་ཡིན་ནམ་ཞེས་དྲིས་ཤིག །རྟ་མ་རུངས་པ་དང་། བ་ལང་མ་རུངས་པ་མེད་དམ་ཞེས་དྲིས་ཤིག །དེ་ནས་སྔ་དྲོ་ཤམ་ཐབས་བགོས། ལྷུང་བཟེད་དང་ཆོས་གོས་ཁྱེར་ཏེ། ཤེས་བཞིན་དུ་བསོད་སྙོམས་ལ་འཇུག་པར་བྱའོ། །བསོད་སྙོམས་བསྐོར་ནས་ཟས་ཀྱི་བྱ་བ་བྱས་ཏེ། ཕྱིས་བསོད་སྙོམས་བླང་བ་དང་། ཟས་ཀྱི་བྱ་བ་སྤངས་ནས་ཆོས་གོས་དང་ལྷུང་བཟེད་བཞག་ནས་ཅི་བདེར་འདུག་པར་བྱ་བ་འདི་ནི་གློ་བུར་དུ་འོངས་པའི་བྱ་བ་ཞེས་བྱའོ། །གློ་བུར་དུ་འོངས་པའི་གནས་བརྟན་གྱི་བྱ་བ་གང་ཞེ་ན། གློ་བུར་དུ་འོངས་པའི་དགེ་སློང་གནས་བརྟན་གྱིས་གློ་བུར་དུ་ལྷགས་པའི་དགེ་སློང་རྣམས་རིག་པར་བྱ། དེ་དག་ལའང་མདངས་བཟང་བར་བྱ། ཁྲོ་གཉེར་མེད་པར་བྱ། ཚིག་སྙན་པས་སྔར་དགེ་སློང་རྣམས་ལ་མགུ་བར་བྱ། གློ་བུར་དུ་ལྷགས་པའི་དགེ་སློང་རྣམས་ཀྱི་ཕྱིར་མལ་སྟན་བརྙ་བར་བྱ། འདུག་འདུག་པ་ལས་མགྲོན་རྣམ་པ་ལྔར་བསྒོ་བར་བྱ་སྟེ། གཙུག་ལག་ཁང་དུ་གནས་ཁང་འདི་ཡིན་གྱིས་ལྟོས་ཤིག་ཅེས་བསྒོ་བ་དང་མལ་སྟན་འདི་ཡིན་ན་སྟན་ལྟོས་ཤིག་ཅེས་པ་དང་། ལྡེ་མིག་འདི་ཡིན་ནོ། །ཞེས་བསྒོ་ཞིང་གཏད་པ་དང་ལྔ་སྟེ། འདི་
ནི་གློ་བུར་དུ་འོངས་པའི་གནས་བརྟན་གྱི་བྱ་བ་ཞེས་བྱའོ།། །།འདུལ་བ་གཞུང་དམ་པ། བམ་པོ་ལྔ་བཅུ་རྩ་གཉིས་པ། འགྲོ་བའི་བྱ་བ་གང་ཞེ་ན། འགྲོ་བའི་དགེ་སློང་དེས་ཡུལ་ཕྱོགས་གང་ལོགས་སུ་འགྲོ་བ་དེའི་ཡུལ་ཕྱོགས་བརྟག་པར་བྱ། དེ་ཕྱོགས་ནས་འོངས་པའི་དགེ་སློང་རྣམས་ལ་བར་ཆད་དུ་འགྱུར་བ་བརྒྱད་ལས་གང་ཡང་རུང་བར་ཆད་དུ་འགྱུར་བ་མི་འབྱུང་ངམ་ཞེས་དྲི་བར་བྱ། བདག་དེར་སོང་ནས་བསོད་སྙོམས་དང་ན་བའི་སྨན་དང་། བསྙེན་བཀུར་བྱེད་པས་བྲེལ་བར་མི་འགྱུར་རམ། བདག་ལ་བསོད་སྙོམས་དང་། ན་བའི་སྨན་དང་། བསྙེན་བཀུར་བྱེད་པས་ཀྱང་རུང་བྲེལ་ཅིང་མ་རྙེད་པར་གྱུར་ན་ལུས་ཉམས་ཤིང་དུས་འདའ་བར་མི་འགྱུར་རམ་བདག་དེར་་སོང་ན་ལུས་བདེ་བ་དང་སེམས་ལ་བདེ་བར་འགྱུར་རམ། བདག་དེར་སོང་ནས་དགེ་བའི་ཆོས་རྣམས་འཕེལ་བར་འགྱུར་རམ། བདག་དེར་སོང་ན་དགེ་སློང་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། དེས་པ་དགེ་བའི་ཆོས་ཅན། ལྟ་བ་མཚུངས་པ། གནས་པ་མཚུངས་པར་འགྱུར་རམ། བདག་ཐེ་ཚོམ་མ་སྐྱེས་པ་དེ་དག་མི་སྐྱེ་བར་བྱེད་དམ། སྐྱེས་པ་ཡང་སླར་སེལ་བར་བྱེད་དམ། སྡིག་པར་ལྟ་བ་མ་སྐྱེས་པ་མི་སྐྱེ་བར་བྱེད་དམ། སྐྱེས་པའི་རྣམས་སླར་ལྡོག་པར་བྱེད་དམ། བདག་དང་ཚེ་དང་ལྡན་པ་དེ་དག་དང་ལྷན་ཅིག་ལུས་བདེ་བ་དང་སེམས་བདེ་བར་འགྱུར་རམ། བདག་ཚེ་དང་ལྡན་པ་དེ་དག་དང་ལྷན་ཅིག་ཏུ་དགེ་བའི་ཆོས་རྣམས་ལ་འཕེལ་བར་འགྱུར་རམ་ཞེས་དྲི་བར་བྱ་སྟེ། དེ་ལྟར་ན་ཡུལ་ཕྱོགས་བརྟག་པར་བྱ་བའོ། །གྲོགས་རྣམས་ལ་བརྟག་པར་བྱ་སྟེ། ཚེ་དང་ལྡན་པ་འདི་དག་ཚུལ་ཁྲིམས་དང་ལྡན་ནམ། ཡོན་ཏན་དང་ལྡན་ནམ། དེས་པ་དགེ་བའི་ཆོས་ཅན་ཡིན་ནམ། ལྟ་བ་མཚུངས་སམ། གནས་པ་མཚུངས་སམ། གལ་ཏེ་འདི་ལྟར་བདག་ལ་ཐེ་ཚོམ་མ་སྐྱེས་པ་ལ་མི་སྐྱེ་བར་བྱེད་དམ། སྐྱེས་པ་སླར་སེལ་བར་བྱེད་དམ། སྡིག་པར་ལྟ་བ་ལ་ཡང་མ་སྐྱེས་པ་ལས་མི་སྐྱེ་བར་བྱེད་དམ། བདག་ཚེ་དང་ལྡན་པ་དེ་དང་ལྷན་ཅིག་ཏུ་ལུས་དང་སེམས་བདེ་བར་འགྱུར་རམ། བདག་ཚེ་དང་ལྡན་པ་དེ་དག་དང་ལྷན་ཅིག་ཏུ་
དགེ་བའི་ཆོས་འཕེལ་བར་འགྱུར་རམ། གལ་ཏེ་ཚེ་དང་ལྡན་པ་འདི་དག་གིས་བདག་ལམ་དུ་ནད་ཀྱིས་བཏབ་ན་མི་འབོར་བར་འགྱུར་རམ་སྙམ་དུ་གྲོགས་པོ་ལ་བརྟགས་ནས། ལམ་ལ་བརྟག་པར་བྱ་སྟེ། བདག་ལམ་དེར་བར་ཆད་དུ་འགྱུར་བ་བརྒྱད་ལས་གང་ཡང་རུང་བ་འབྱུང་བར་མི་འགྱུར་རམ། བདག་ལམ་དེར་བསོད་སྙོམས་དང་། ན་བའི་སྨན་དང་། བསྙེན་བཀུར་བྱེད་པས་བྲེལ་བར་མི་འགྱུར་རམ། དེ་སྟེ་བསོད་སྙོམས་དང་བསྙེན་བཀུར་བྱེད་པ་མེད་ན་གནོད་ཅིང་དུས་འདས་པར་མི་་་འགྱུར་རམ། བདག་ལམ་དེ་ན་ལུས་ལ་བདེའམ། སེམས་ལ་བདེ་བར་འགྱུར་རམ། བདག་ལམ་དེར་དགེ་བའི་ཆོས་རྣམས་འཕེལ་བར་འགྱུར་རམ། དེ་སྟེ་བྲེལ་བར་མི་འགྱུར་ན་འགྲོ་བར་བྱའོ། །དེ་ལྟ་བུར་ཡུལ་ཕྱོགས་དང་། གྲོགས་དང་ལམ་རྣམས་བརྟགས་ལ་དེ་སྟེ་སང་འགྲོའོ་སྙམ་ན། དེས་མཁན་པོ་དང་། སློབ་དཔོན་རྣམས་ལ་བལྟ་བར་བྱ་དེ་སྟེ་བདག་ཡུལ་ཕྱོགས་ནི་འདི་ལྟ་བུར། གྲོང་ཁྱེར་ནི་འདི་ལྟ་བུར་མཆིའོ་ཞེས་ཞུའོ། །མཁན་པོ་དང་། སློབ་དཔོན་གྱིས་ཀྱང་དེའི་ཡུལ་ཕྱོགས་བརྟག་པར་བྱ། ལམ་བརྟག་པར་བྱ། དགེ་སློང་གྲོགས་པོ་རྣམས་ལ་བརྟག་པར་བྱ་སྟེ། འདིའི་གྲོགས་པོ་དགེ་སློང་རྣམས་ཅི་འདྲ། འདིའི་འཁོར་ཅི་འདྲ། འདིའི་གྲོགས་པོ་རྗེས་བཞིན་དུ་འདོང་བ་ཅི་འདྲ་བའི་རྣམས་རྟོགས་ལ་དེ་སྟེ་མཐུན་པར་གྱུར་ན་ནི་ཞུ་བ་ཡང་བྱིན་ཅིག །མཐུན་པར་མ་གྱུར་ན་མ་སྦྱིན་ཅིག །འགྲོ་བའི་དགེ་སློང་གིས་མ་ཞུས་པར་སོང་ན་འདས་པ་དང་བཅས་པར་འགྱུར་རོ། །དེ་སྟེ་ན་དགེ་བའི་ཆོས་འཕེལ་བ་ཞིག་ཏུ་འགྱུར་ལ་མཁན་པོ་དང་སློབ་དཔོན་ཡང་ཚུལ་བཞིན་པ་ཞིག་མ་ཡིན་ན་མ་ཞུས་པར་སོང་ན་ཡང་བླའོ། །གནས་ཁང་ན་གནས་པའི་གནས་ཁང་དེ་ཆག་ཆག་གིས་གདབ་པར་བྱ། ཕྱག་དར་བྱ། ཕྱག་དར་དོར་བར་བྱ། ལྕི་བས་ཞལ་ཞལ་འཇམ་པོར་བྱུག་པར་བྱ། ནང་པར་སྔར་རྐྱང་པ་གསུམ་བཀླགས་བཀླགས་ནས་སྦྱིན་པའི་ཡོན་ཏན་བརྗོད་པར་བྱ། ནམ་ལངས་ནས་མལ་སྟན་རྣམས་ཇི་ལྟ་བུར་དགས་པ་དེ་རྣམས་བསྔོས་ལ་གྲོངས་ཏེ་སྤྲུག་ཅིང་བརྡབ་པར་བྱའོ། །དེ་ནས་རྩིག་པ་ལས་སོར་བཞི་ཙམ་གྱིས་སྤོགས་ལ་བཅེར་ཏེ་བཞག་ནས་སྒོ་བཅད་དེ་ནང་གཏན་དང་། བླ་གཏན་ཆུག་ལ་དེ་ན་གནས་པ་དང་། གཞི་ན་
གནས་པའི་དགེ་སློང་རྣམས་ལ་གདོད་དེ་ལྟོས་ཤིག་ཅེས་བསྒོ་ནས་འགྲོ་བར་བྱའོ། །མལ་སྟན་ལ་སོགས་པ་ལ་ལྟོས་ཤིག་ཅེས་བསྒོ་བ་ལ་རྣམ་པ་ལྔ་སྟེ། གནས་ཁང་འདི་ལའོ། །གནས་ཁང་འདི་ལ་ལྟོས་ཤིག །མལ་སྟན་རྣམས་ལའོ། །མལ་སྟན་འདི་རྣམས་ལ་ལྟོས་ཤིག །ལྡེ་མིག་གཏད་པ་དང་ལྔ་ཡིན་ནོ། །ཀུན་དགའ་ར་བའི་ཕྱི་རོལ་དུ་བྱུང་ན་དགེ་སློང་གྲོགས་པོ་རྣམས་ལ་བརྟག་པར་བྱ་སྟེ། རིང་དུ་མ་སོང་བར་སུ་ལ་ཡང་རུང་། བརྗེད་ཅིང་ལུས་པ་མེད་དམ་ཞེས་ཕན་ཚུན་དུ་དྲིས་ཤིག །དེ་སྟེ་བརྗེད་ཅིང་ལུས་པ་ཞིག་ཡོད་ན་དགེ་སློང་དེ་སླར་ལོག་ལ་བླངས་ཏེ། འོངས་ཀྱི་བར་དུ་བསྡད་པར་བྱ་བ་འདི་ནི་འགྲོ་བའི་བྱ་བ་ཞེས་བྱའོ། །འགྲོ་བའི་གནས་བརྟན་གྱི་བྱ་བ་གང་ཞེ་ན། འགྲོ་བའི་གནས་བརྟན་གྱིས་ནང་པར་སྔར་ལངས་ནས་འདོང་བའི་དགེ་སློང་རྣམས་ལ་ཆར་གཞུག །དེ་དག་ལ་ཚེ་དང་ལྡན་པའི་རྣམས་ལྷུང་བཟེད་དང་ཆོས་གོས་རྣམས་ལེགས་པར་ལོང་ལ་ཁྱེར་ཏེ་འདོང་ངོ་། །སུས་ཀྱང་བརྗེད་པར་མ་བྱེད་ཅིག་ཅེས་བསྒོ་བར་བྱ། དོང་བའི་འོག་ཏུ་དགེ་་སློང་གནས་བརྟན་ཉིད་ཀྱིས་དེ་དག་གིས་བརྗེད་པ་ལྟ་ཡོད་དམ་མེད་ཅེས་བརྟག་་་པར་བྱས་ལ་ཐམས་ཅད་ཀྱིས་མཇུག་ནས་འགྲོ་བར་བྱའོ། །རིང་པོར་མ་འཕགས་པར་དེ་དག་ལ་སུའི་ཡང་རུང་བརྗེད་ཅིང་ལུས་པ་ཅི་ཡོད་ཅེས་སྨྲ་བར་བྱ། དགེ་སློང་གནས་བརྟན་གྱིས་དགེ་སློང་དེ་ཐམས་ཅད་ལ་རྗེས་སུ་བསྟན་པར་བྱ་སྟེ། ཚེ་དང་ལྡན་པའི་རྣམས་ལས་གང་ཡང་རུང་སྔོན་དུ་འདོར་ཏེ་མ་འདོང་ཞིག །ཕྱིར་ནུར་ཏེ་མ་འཁོད་ཅིག །ཐམས་ཅད་ལྷན་ཅིག་ཏུ་འདུས་ལ་ཕན་ཚུན་དུ་ལྟ་རྟོག་བཞིན་དུ་འདོང་བར་བྱའོ། །དགེ་སློང་གནས་བརྟན་གྱིས་ལམ་དུ་ཞུགས་པའི་ཚེ་བདེ་བ་དང་ལྡན་མི་ལྡན་རིག་པར་བྱས་ལ་བདག་ཉིད་ཀྱིས་འདི་དག་ལ་སྔོན་དུ་་་འདོར་ཏེ་འདོང་བ་ལྟ་ཡོད་དམ་མེད། ཕྱིར་ནུར་ཏེ་ལུས་པ་ལྟ་ཡོད་དམ་མེད། དེ་སྟེ་སྔོན་དུ་འདོར་ཏེ་འདོང་བ་ལྟ་ཡོད་ན་ཡང་དེ་དག་བསྐུལ་ཞིང་འདོང་བར་བྱ། བདག་ཉིད་ཀྱང་དགེ་སློང་རྣམས་ཀྱི་དབུས་སུ་ཞུགས་ལ་འགྲོ་བར་བྱ། དེ་སྟེ་འགྲོ་མི་ཕོད་ན་ཉིད་ཀྱིས་ལྷུང་བཟེད་དང་ཆོས་གོས་ལ་སོགས་དགེ་སློང་དེ་་་དག་ལ་བསྒོས་ཤིང་བསྐུར་བར་བྱ། དེ་སྟེ་འགྲོ་མི་
ནུས་པ་ཞིག་ཏུ་གྱུར་ན་དགེ་སློང་དེ་དག་གིས་དགེ་སློང་དེ་ཕྲག་པའམ་ཁུར་དུ་ཁྱེར་ཏེ། དགོན་པ་དེ་ལས་ཕྱུང་ལ་གྲོང་འདབ་ཏུ་ཕྱིན་པར་གྱིས་ཤིག །དགེ་སློང་དེ་ལ་ཉེ་གནས་ཀྱི་དགེ་སློང་དེ་ཡང་བྱིན་ཅིག །ཉེ་གནས་དགེ་སློང་དེས་ཀྱང་དེའི་ཟན་དང་སྨན་གཞན་ལས་ཚོལ་ཅིག །དེ་སྟེ་ལམ་དེ་འཇིགས་པ་དང་བཅས་པར་གྱུར་ན་རིངས་ཤིང་མྱུར་བར་དོང་སྟེ། དེ་ནས་བྱུང་བ་དང་ངལ་བསོ་བར་གྱིས་ཤིག །དེ་སྟེ་ཡང་ནུས་པར་གྱུར་ན་ནི་གང་ན་ཆུ་འགྲམ་མམ། ནགས་མཐའ་འམ། གསིང་མ་སྔོན་པོའམ། ས་ཕྱོགས་གར་དགའ་བ་ཞིག་ཏུ་རྟོགས་ཏེ་དགེ་སློང་རྣམས་ངལ་བསོར་གཞུག་པར་བྱ། ངལ་བསོས་ནས་ཀྱང་འདོང་བར་བྱ་སྟེ། དགེ་སློང་གནས་བརྟན་གྱིས་དེ་དག་ཀུན་ལ་ཀྱེ་ཐམས་ཅད་ཀྱིས་ཀྱང་འདིར་སྦྱིན་པའི་ཡོན་་་ཏན་རེ་རེ་རྗོད་ཅིག་ཅེས་བསྒོ་བར་བྱ། དགེ་སློང་ཐམས་ཅད་ཀྱིས་སྦྱིན་པའི་ཡོན་ཏན་གྱི་ཚིགས་བཅད་བཀླགས་ཟིན་པ་དང་། དགེ་སློང་གནས་བརྟན་གྱིས་མཇུག་ཏུ་བྱིན་པའི་ཡོན་ཏན་གྱི་ཚིགས་བཅད་ལྷོགས་ཏེ་ས་ཕྱོགས་སུ་ལན་གཉིས་སམ་གསུམ་བརྟགས་ཏེ་འགྲོ་བར་བྱའོ། །གྲོང་འདབ་ཏུ་ཕྱིན་ན་ཡང་དེས་དགེ་སློང་རྣམས་ཀྱི་ཕྱིར་གནས་བཙལ་བར་བྱ། མལ་སྟན་བཙལ་བར་བྱ། ཡང་ན་རྩྭ་དང་ལོ་མ་བཙལ་ཏེ། དེ་སྟེ་ཡང་འབྱོར་པར་གྱུར་ན་རྐང་པ་བཀྲུ་བ་དང་། རྐང་པ་བསྐུ་བ་དང་། བཙགས་པའི་བཏུང་བ་དང་། བུ་རམ་དང་། ཁན་ད་ལ་སོགས་པ་བསླང་བར་བྱའོ། །གཅི་བ་དང་བཤང་བའི་ས་ཡང་དྲིས་བརྟགས་ལ་མཚན་མོ་གནས་པར་བྱའོ། །ཁྱིམ་གྱི་ལྷ་རྣམས་ཀྱི་ཕྱིར་ཡང་རྐྱང་པ་གསུམ་དང་། སྦྱིན་པའི་ཡོན་ཏན་བརྗོད་པར་བྱ། དེར་གནས་ན་ཡང་དགེ་སློང་གནས་བརྟན་གྱིས་དེ་དག་གི་ཟན་དང་ཐུག་པ་དང་སྐྱོ་མ་རྣམས་བསྟབས་ཤིང་་་བཙལ་ནས་དགེ་སློང་རྣམས་ལ་བསྙོད་པར་བྱ། དེ་ན་དགེ་སློང་གསར་བུ་འཁོད་པ་རྣམས་ལ་སྨྲ་བར་བྱ། ཡང་དག་པར་སྨྲ་བར་བྱ། ཀུན་ཤེས་པར་བྱ། རྟོགས་པར་བྱ། བསྟན་པར་བྱ། རྗེས་སུ་བསྟན་པར་བྱ་སྟེ། ཅི་ནས་དེ་དག་དྲེགས་པ་ཅན་དང་། མི་རིགས་པ་དང་། རྩེད་མོ་ལས་བཟློག་པར་བྱ།
འགྲོ་བའི་དགེ་སློང་གནས་བརྟན་གྱིས་ཇི་ལྟར་མཚུངས་པར་སྤྱད་པའི་ཆོས་བཅས་པ་་་བཞིན་དུ་མི་བྱེད་ན་འདས་པ་དང་བཅས་པར་འགྱུར་རོ། །འདི་ནི་འགྲོ་བའི་་གནས་བརྟན་གྱི་བྱ་བ་ཞེས་བྱའོ། །རྐང་པ་བཀྲུ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་རྐང་པ་བཀྲུ་བའི་ཕྱིར་རྐང་པ་བཀྲུ་བ་རྗེས་སུ་གནང་སྟེ། དེ་དགེ་སློང་དག་རྗེས་སུ་དེ་དག་གིས་སྣོད་སྟོང་པར་མཐོང་ན་བདག་ཅག་ཉིད་ཀྱིས་དགང་བར་གྱིས་ཤིག །ཡང་ན་དགེ་སློང་གིས་ཀུན་དགའ་ར་བ་ན་གནས་པ་རྣམས་ལ་ཁོངས་ཤིག་པར་སྒོ་ཤིག །རྐང་པ་བཀྲུ་བར་བྱ་བ་འདི་ཡང་ཡིན་ཏེ། དགེ་སློང་གིས་རྐང་པ་བཀྲུར་འདོད་ན་ཤེས་བཞིན་དུ་རྐང་པ་བཀྲུ་བའི་སར་འགྲོ་བར་བྱ། དེ་སྟེ་རྒན་པ་ཞིག་སྔ་ན་འདུག་ན་སྐད་ཅིག་སྡོད་ཅིག །སུ་ཡང་མེད་ན་ཤེས་བཞིན་དུ་ཞུགས་ལ་རྐང་པ་བཀྲུ་བར་བྱ། དགེ་སློང་གིས་རྐང་པ་བཀྲུ་བའི་སར་ཡུན་རིང་དུ་འདུག་པར་མི་བྱ། སྙོམས་པ་ལ་འཇུག་པར་མི་བྱ། ལུང་བསྒོ་བར་མི་བྱ། དྲན་པར་མི་བྱ། འདྲི་བར་མི་བྱ། གཏམ་ལ་ཞུགས་ཤིང་མི་འདུག །མྱུར་དུ་རྐང་པ་བཀྲུས་ནས་ཤེས་བཞིན་དུ་སླར་འབྱུང་བར་བྱ་སྟེ། འདི་ནི་རྐང་པ་བཀྲུ་བའི་བྱ་བ་ཞེས་བྱའོ། །རྐང་པ་བཀྲུ་བའི་གནས་བརྟན་གྱི་བྱ་བ་གང་ཞེ་ན། རྐང་པ་བཀྲུ་བའི་དགེ་སློང་གནས་བརྟན་གྱིས་དགེ་སློང་རྐང་པ་འཁྲུ་བ་ལ་ཞུགས་ནས་ཡང་མ་ཟིན་གྱི་བར་དུ་བསླང་ཞིང་དབྱུང་བར་མ་བྱེད་ཅིག །རྐང་པ་འཁྲུ་བ་ལ་ཞུགས་པ་ཞེས་བྱ་བ་ནི་ཆུང་ངུ་ན་རྐང་པ་ཆུས་གཤེར་བ་ཙམ་དུ་གྱུར་པའོ། །དེ་སྟེ་དགེ་སློང་དག་སྤྱོད་ལམ་མི་མཛེས་པར་གྱུར་ཏམ། གཏམ་ལ་ཞུགས་ཤིང་འཁོད་ན་དགེ་སློང་གནས་བརྟན་གྱིས་དེ་དག་ཟློག་ཤིག །ལུང་བསྒོ་བར་བྱ། རྗེས་སུ་བསྟན་པར་བྱ། སྤྱོད་ལམ་མཛེས་པ་ལ་གཟུད་པར་བྱ། ཇི་ལྟར་རྐང་པ་བཀྲུ་བའི་གནས་བརྟན་གྱིས་མཚུངས་པར་སྤྱད་པའི་ཆོས་ལ་གཟུད་པར་བྱ། འདི་ནི་རྐང་པ་བཀྲུ་བའི་གནས་བརྟན་གྱི་བྱ་བ་ཞེས་བྱའོ། །འདུག་པའི་བྱ་བ་གང་ཞེ་ན། གནས་དང་གཞི་ན་གནས་པའི་དགེ་སློང་གིས་ཚེས་བརྒྱད་དང་། བཅུ་བཞི་དང་། བཅོ་ལྔ་ལ་གཅིག་ཏུ་འདུས་ཏེ་སངས་རྒྱས་ཀྱིས་གསུངས་པའམ།
ཉན་ཐོས་ཀྱིས་གསུངས་པའི་ཆོས་ཀྱང་རུང་སྟེ་སྨྲ་བར་བྱའོ། །དེ་དག་ནང་པར་སྔར་སྒོའམ། གཎྜཱི་བརྡུངས་མ་ཐག་ཏུ་འདུ་བར་བྱ་སྟེ། མྱུར་དུ་འདུས་ནས་ཤེས་བཞིན་དུ་འཁོད་པར་བྱ། ཤེས་བཞིན་དུ་འཁོད་ནས་དྲན་པ་ཉེ་བར་གཞག་པར་བྱ། སེམས་མི་གཡེང་བར་བྱ། སྤྱོད་ལམ་ཚོགས་ཤིང་ཕུན་སུམ་དུ་ལྡན་པར་བྱ། ཤིན་ཏུ་བསྡམ་པར་བྱ། ཤིན་ཏུ་དགའ་བར་བྱ། སྒྲ་བསྐྱུད་པར་བྱ། མིག་མི་གཡེང་ཞིང་གཉའ་ཤིང་གང་ཙམ་དུ་བལྟ་བར་བྱ། བཀུར་སྟིར་བཅས། བདག་དམན་པར་བཅས། འཇིགས་པ་དང་དབང་དུ་འགྱུར་བར་བཅས། ཡིད་དམན་པ་ཕྱགས་མ་དང་འདྲ་བའི་སེམས་སུ་བྱ། གནས་བརྟན་དང་། བར་མ་དང་། གསར་བུའི་རྣམས་ལ་བྱམས་པའི་སེམས་སུ་བྱ། ཕན་པའི་སེམས་སུ་བྱ། རྗེས་སུ་བརྩེ་བའི་སེམས་སུ་བྱ་བ་དང་། ཕུ་ནུ་བོ་དང་། བུར་འདུ་ཤེས་པ་ཉེ་བར་གཞག་པར་བྱ། སྟན་ལ་འདུག་པ་ལ་མཁས་པ་དང་། འདུག་ནས་ཡང་ཕྱི་ཕྱིར་ངེས་པའི་ཆོས་ཀྱི་གཏམ་གྱིས་མཚན་མོ་ནམ་ཟད་པར་བྱའོ། །དེ་སྟེ་མི་བདེ་ན་ཡང་སྤྱོད་ལམ་གཉིས་ཀྱིས་ནམ་ཟད་པར་བྱ་སྟེ། འཆག་པ་དང་། འགྲེང་བས་སོ། །དགེ་སློང་རྣམས་འདུས་ནས་འཁོད་ན་ཡང་དུས་སུ་ཆོས་མཉན་པར་བྱ་སྟེ་བཀུར་་སྟི་བྱ། མཉན་པར་བྱ། སྨད་པར་མི་བྱ། ཚུལ་བཞིན་དུ་འཇུག་པར་བྱ། གླགས་མི་བཙལ་བར་བྱ། ཆོས་ལ་བཀུར་སྟི་མངོན་དུ་གཞག་པར་བྱ། ཆོས་སྨྲ་བའི་གང་ཟག་ལ་ཡང་བརྙས་པར་མི་བྱ། བདག་ཉིད་ལ་སྨད་པར་མི་བྱ། སེམས་གཅིག་ཏུ་ཐུབ་པ་དང་བཀའ་ཡིན་ནོ་བར་བསམ་པ་དང་། རྣ་བ་མི་གཡེང་བ་དང་། སེམས་གུས་པ་དང་། སེམས་ཐམས་ཅད་གཅིག་ཏུ་ཐུབ་པར་བསྡུས་ལ་ཆོས་མཉན་པར་བྱའོ། །དེའི་འོག་ཏུ་ལྷ་རྣམས་དང་། རྒྱལ་པོ་དང་། ཡོན་བདག་དང་། སྦྱིན་པ་བྱེད་པ་རྣམས་ཀྱི་ཕྱིར་སྦྱིན་པའི་ཡོན་ཏན་གྱི་ཚིགས་བཅད་བཀླག་པར་བྱ་སྟེ། འདི་ནི་འདུག་པའི་བྱ་བ་ཞེས་བྱའོ། །འདུག་པའི་གནས་བརྟན་གྱི་བྱ་བ་གང་ཞེ་ན། འདུག་པའི་དགེ་སློང་གནས་བརྟན་གྱིས་སྔར་སྒོའམ་གཎྜཱི་བརྡུངས་ཀྱང་རུང་སྟེ།
དེ་ཐོག་མར་འགྲོ་བར་བྱ། ཐོག་མར་འགྲེང་བར་བྱ། ཐོག་མར་འདུག་པར་བྱ། འདུག་ནས་ཡང་སྐད་ཅིག་ཅང་མི་སྨྲ་བར་བྱ། དེ་ནས་བདག་ཉིད་ཀྱིས་ཆོས་སྨྲ་བར་བྱ། ཡང་ན་ནུས་པའི་དགེ་སློང་ལ་ཆོས་སྨྲོས་ཤིག་པར་བསྒོ་བར་བྱ། བདག་ཉིད་ཀྱིས་ཆོས་མ་སྨྲས་སམ། དགེ་སློང་ནུས་པ་ཡང་མ་བསྒོ་ན་འདས་པ་དང་བཅས་པར་འགྱུར་རོ། །དེ་སྟེ་འཁོད་པ་ལ་ཡང་བྲམ་ཟེ་དང་ཁྱིམ་བདག་དག་ལྷགས་ན་དེས་དེ་དག་ལ་ཡང་ཆོས་ཀྱི་གཏམ་བྱ། དེ་སྟེ་གཞན་མུ་སྟེགས་ཅན་ཀུན་ཏུ་རྒྱུ་བ་སྐབས་ཚོལ་ལམ་གླགས་ཚོལ་ཞིང་ལྷགས་ན་དེ་དག་ལ་ཡང་ཆོས་ཀྱིས་བརྒལ་བ་ལ་འཇུག་པར་བྱ། འདི་ནི་མི་རིགས་པའོ། །འདི་ནི་མི་འདྲ་བའོ། །འདི་ནི་མ་གྲུབ་པའོ་ཞེས་རིགས་པའི་ཆོས་ཀྱིས་གདུལ་བར་བྱ། ཁྲོ་བ་མི་བསྐྱེད་པར་བྱ། མ་ཁྲོས་པར་བྱ། མི་སྨད་པར་བྱས་ཏེ། འདི་ནི་འདུག་པའི་གནས་བརྟན་གྱི་བྱ་བ་ཞེས་བྱའོ། །ཆོས་འཆད་པའི་བྱ་བ་གང་ཞེ་ན། ཆོས་འཆད་པའི་དགེ་སློང་གིས་བཀུར་སྟིར་བཅས། བདག་ཉིད་དམན་པར་བཅས་འཇིགས་པ་དང་དབང་དུ་འགྱུར་བར་བཅས། ཡིད་དམན་ཞིང་ཕྱགས་མ་དང་འདྲ་བའི་སེམས་སུ་བྱ་སྟེ། འཁོར་གྱི་ནང་དུ་ཞུགས་ལ་ཆོས་བཤད་པར་བྱ་བ་ནི་རིགས་པ་དང་། གསལ་བའི་ཚིག་དང་། འབྲུ་དང་། མ་འཁྲུགས་པ་དང་། མ་འདྲེས་པ་དང་། འབྲེལ་བ་དང་། མ་འཁྲུལ་བ་དང་། སེམས་མི་གཡེང་བ་དང་། ཟང་ཟིང་གི་སེམས་སུ་མ་ཡིན་པ་དང་། ཆོས་ཉིད་ལ་ཡང་བཀུར་སྟི་མངོན་དུ་བྱ། ཆོས་ཉན་པ་རྣམས་ལ་ཡང་བཀུར་སྟི་མངོན་དུ་བྱ། ཆོས་ལ་བརྙས་པ་མི་བྱ། ཆོས་ཉན་པ་རྣམས་ལ་ཡང་བརྙས་པ་མི་བྱ། བདག་ཉིད་ལའང་སྨད་པར་མི་བྱ། ཆོས་རྣམས་ལའང་ཆོས་ཉིད་དང་རྟེན་ཅིང་འབྲེལ་པ་ཡིན་པར་ཆུད་པར་བྱ་སྟེ། བྱམས་པའི་ཚུལ་དུ་བྱ། རྗེས་སུ་བརྩེ་བ་དང་ཆོས་འདི་ཡུན་རིང་དུ་གནས་པར་འགྱུར་བར་བྱ། ཆོས་ཉིད་ལ་རྟེན་གྱི་ཟང་ཟིང་ལ་རྟེན་ཏེ་ཆོས་བཤད་པར་མི་བྱ། བཀུར་སྟིའི་ཐོག་མར་འཇུག་ལ་རྗེས་སུ་མཐུན་པ་དང་། རྗེས་སུ་འབྱོར་པར་བྱ། རིམས་སུ་བྱ་སྟེ། མགུ་བ་དང་། དད་པ་དང་། རངས་པ། སྤྲོ་བ་དང་།
མོས་པ་དང་། རིགས་པར་ལྡན་པ་དང་། འཁྲུག་པ་མ་ཡིན་པར་ཆོས་བཤད་པར་བྱ། ཇི་ལྟར་འཁོར་རྣམས་ལ་བྱམས་པའི་སེམས་དང་། རྗེས་སུ་བརྩེ་བའི་སེམས་སུ་གནས་པར་བྱ། རྙེད་པ་དང་བཀུར་སྟི་དང་གྲགས་པ་ནི་མ་ཡིན་ནོ། །ཆོས་འཆད་པའི་ཚེ་བདག་ཉིད་ལ་བསྟོད་པར་མི་བྱ། གཞན་ལ་སྨད་པར་ཡང་མི་བྱ་སྟེ། འདི་ནི་ཆོས་འཆད་པའི་བྱ་བ་ཞེས་བྱའོ། །ཆོས་འཆད་པའི་གནས་བརྟན་གྱི་བྱ་བ་གང་ཞེ་ན། ཆོས་འཆད་པའི་གནས་བརྟན་གྱིས་གང་ན་ཆོས་འཆད་པ་དེར་འགྲོ་བར་བྱ། དགེ་སློང་འདི་ཆོས་བཞིན་དུ་འཆད་པའམ་འོན་ཏེ་ཆོས་བཞིན་མ་ཡིན་པར་འཆད་མཉན་ལ། དེ་སྟེ་ཆོས་བཞིན་འཆད་ན་ནི་སྤྲོ་བ་བསྐྱེད་པར་བྱ། ཆོས་མ་ཡིན་པར་འཆད་ན་ནི་སླར་བཅོས་པར་བྱ་སྟེ། དེ་སྟེ་སླར་བཅོས་ནུས་ན་ལེགས། དེ་སྟེ་མི་ནུས་ན་ཇི་ལྟར་ནུས་ཤིང་ཅི་ཐུབ་ཐུབ་ཀྱིས་སྨད་པར་བྱ་སྟེ། དགེ་སློང་འདི་ནི་ཆོས་མ་ཡིན། འདུལ་བ་མ་ཡིན། སྟོན་པས་བསྟན་པ་མ་ཡིན་གྱིས། བཅོམ་ལྡན་འདས་ཀྱི་ཆོས་ཀྱི་གཞི་མ་གཞིག་ཅིག །ཆོས་ཀྱི་སྤྱན་མ་གཞར་ཅིག །ཅེས་སྨྲོས་ལ། སྟན་ལས་ལངས་ཏེ་འགྲོ་བར་བྱ་བ་འདི་ནི་ཆོས་འཆད་པའི་གནས་བརྟན་གྱི་བྱ་བ་ཞེས་བྱའོ། །དུས་ཀྱི་བྱ་བ་གང་ཞེ་ན། དགེ་སློང་རྣམས་དུས་དུ་འགྲོ་བར་བྱ་སྟེ། འདི་ནི་དུས་ཀྱི་བྱ་བ་ཞེས་བྱའོ། །དུས་མ་ཡིན་པའི་བྱ་བ་གང་ཞེ་ན། དགེ་སློང་གིས་དུས་མ་ཡིན་པར་གྲོང་དུ་འཇུག་པར་མི་བྱ། དེ་འདྲ་བའི་རྐྱེན་བྱུང་བ་མ་གཏོགས་ཏེ། འཁོད་པའི་དགེ་སློང་ལ་མ་བསྒོ་བར་མི་འགྲོ་བ་ནི་དུས་མ་ཡིན་པའི་བྱ་བ་ཞེས་བྱའོ། །དུས་མ་ཡིན་པར་དགེ་འདུན་འདུ་བའི་བྱ་བ་གང་ཞེ་ན། ཚེས་བརྒྱད་དང་། ཚེས་བཅུ་བཞི་དང་། ཚེས་བཅོ་ལྔ་ལ་དགེ་འདུན་འདུ་བ་མ་གཏོགས་པར་དེ་ལས་གཞན་གྱི་ཕྱིར་དགེ་འདུན་འདུ་ཞིང་དགེ་འདུན་གྱི་ལས་་་དང་། དགེ་འདུན་གྱི་བྱ་བ་དང་། དགེ་འདུན་གྱི་བྱེད་པ་རྣམས་ཡིན་ཏེ། དེ་ལ་སྔར་བསྒོའམ། གཎྜཱི་བརྡུངས་ཀྱང་རུང་མྱུར་དུ་འདུ་བར་བྱ། ཤེས་བཞིན་དུ་འདོང་བར་བྱ་བ་ནས་སྔ་མ་བཞིན་ཏེ། འདུག་པ་ལ་མཁས་པར་བྱ་བའི་བར་དུ་དེར་དགེ་འདུན་གྱི་གནས་
བརྟན་གྱིས་རྒན་རིམས་སུ་ཕྱག་བྱས་ནས་བདག་གི་སྟན་གང་ན་བར་འདུག་པར་བྱ། གནས་བརྟན་གཉིས་པོས་ཀྱང་དགེ་འདུན་གྱི་གནས་བརྟན་ལ་ཕྱག་བྱས་ནས་རང་གི་སྟན་གང་ན་བར་འདུག་པར་བྱ། དེ་བཞིན་དུ་གནས་བརྟན་གསུམ་པོ་དང་། བཞི་པོ་ནས་དགེ་སློང་གསར་བུའི་བར་དུ་སྟེ། རྒན་རིམས་སུ་ཕྱག་བྱས་ནས་རང་གི་སྟན་གང་ན་བར་འཁོད་པར་བྱའོ། །དེར་དགེ་སློང་གནས་བརྟན་དང་། བར་མ་དང་། གསར་བུ་རྣམས་ཀྱིས་ཇི་ལྟར་ཆོས་བཞིན། ཇི་ལྟར་འདུལ་བ་བཞིན། ཇི་ལྟར་སྟོན་པས་བསྟན་པ་བཞིན་དུ་དེ་ལྟ་བུར་དགེ་འདུན་གྱི་ལས་བྱ་དགེ་སློང་གནས་བརྟན་གྱིས་དགེ་སློང་རྣམས་་ལ་སྤྱོ་བར་མི་བྱ། སྨད་པར་མི་བྱ། མ་གུས་པར་མི་བྱ་སྟེ། འདི་ནི་དུས་མ་ཡིན་པར་དགེ་འདུན་འདུ་བའི་བྱ་བའོ། །དུས་མ་ཡིན་པར་དགེ་འདུན་འདུ་བའི་གནས་བརྟན་གྱི་བྱ་བ་གང་ཞེ་ན། དུས་མ་ཡིན་པར་དགེ་འདུན་འདུ་བའི་དགེ་སློང་གནས་བརྟན་གྱིས་དུས་མ་ཡིན་པར་འདུ་བ་ན་སྔར་བསྒོའམ། གཎྜཱི་་་བརྡུངས་ཀྱང་རུང་སྟེ། ཐོག་མར་འགྲོ་བར་བྱ། ཐོག་མར་འགྲེང་བར་བྱ། ཐོག་མར་འདུག་པར་བྱ་སྟེ། བཀུར་སྟིར་བཅས། ཡིད་དམའ་བར་བཅས། འཇིགས་ཤིང་དབང་དུ་འགྱུར་བར་བཅས། ཡིད་ཕབ་ལ་ཕྱགས་མ་ལྟ་བུའི་སེམས་སུ་བཅས་ལ་དགེ་འདུན་གྱི་ནང་དུ་འགྲོ་བར་བྱ། རྒན་རིམས་སུ་ཕྱག་བྱས་ནས་རང་གི་སྟན་ལ་རབ་ཏུ་འཇུག་པར་བྱ། གནས་བརྟན་དང་། བར་མ་དང་། གསར་བུའི་རྣམས་ལ་ཡང་བྱམས་པའི་སེམས་སུ་བྱ། ཕན་པའི་སེམས་སུ་བྱ། རྗེས་སུ་བརྩེ་བའི་སེམས་སུ་བྱ། ཕ་དང་། ཕུ་ནུ་བོ་དང་། བུར་འདུ་ཤེས་མངོན་དུ་བཞག །འཁོར་རྣམས་ལ་ཡང་བལྟ་བར་བྱས་ཏེ། གང་ཆས་སྡུག །གང་ཆས་མི་སྡུག །གང་མཛེས་པར་གྱུར། གང་མི་མཛེས་པར་གྱུར། གང་གིས་ལེགས་པར་བགོས། གང་གིས་མི་སྡུག་པར་བགོས། གང་གིས་མཛེས་པར་ཆས་པ་དེ་དག་ལ་ནི་གཡེལ་བར་གཞག །གང་གིས་མི་མཛེས་པར་ཆས་པ་དེ་དག་ལ་ནི་སྦྲན་པར་བྱ། བསྒོ་བར་བྱ། གང་གིས་ལེགས་པར་བསྒོས་པ་དེ་དག་ལ་ཡལ་བར་གཞག །གང་གིས་མི་སྡུག་པར་བགོས་པ་དེ་དག་ལ་ནི་བརྡ་བྱ། དེས་
བརྡ་མ་ཚོར་ན་དྲུང་ན་འདུག་པ་ལ་བརྡ་བྱ། དྲུང་ན་འདུག་པས་ཀྱང་མ་ཚོར་ན་དགེ་སློང་གནས་བརྟན་གྱིས་དེར་ཅི་ནས་མི་འཁྲུལ་བའི་ཚུལ་དུ་སྦྲན་པར་བྱ། ཇི་ནས་ལེགས་པར་བགོས་པ་དང་། སྒྲ་ཆེར་མི་དབྱུང་བར་བྱའོ། །དགེ་སློང་གནས་བརྟན་གྱིས་འཁོར་གྱི་ནང་དུ་བརྟག་པར་བྱ་བ་ནི་ཅི་འཁོར་་་འདི་དག་ཆོས་བཞིན་དུ་བྱེད་དམ། འོན་ཏེ་ཆོས་བཞིན་མ་ཡིན། དེ་སྟེ་ཆོས་བཞིན་ཡིན་ན་ཅི་བདེར་བྱོས་ཤིག་ཅེས་ལས་ཐམས་ཅད་དུ་བྱེད་དུ་ཆུག་ཤིག །དེ་སྟེ་ཆོས་བཞིན་མ་ཡིན་ན་ཆོས་བཞིན་པའི་ཕྱོགས་སུ་གནས་པར་བྱ། ཆོས་བཞིན་དུ་འདྲི་བ་ལ་སྦྱིན། ཡང་ཅང་མི་སྨྲ་བར་སྟན་ལས་ལངས་ཏེ་འགྲོ་བར་བྱ། དེའི་ཕྱིར་རྩོད་པ་དང་། འཁྲུག་པ་རྗེས་སུ་འབྱུང་བར་མི་བྱ་བ་འདི་ནི་དུས་མ་ཡིན་པར་དགེ་འདུན་འདུ་བའི་གནས་བརྟན་གྱི་བྱ་བ་ཞེས་བྱའོ། །སྨྲ་བའི་བྱ་བ་གང་ཞེ་ན། རྒྱལ་པོའི་ཁབ་ཀྱི་གྲོང་ཁྱེར་ན་མུ་སྟེགས་ཅན་ཀུན་ཏུ་རྒྱུ་བ་གཞན་དག་ཅིག་ཚེས་བརྒྱད་དང་། བཅུ་བཞི་དང་། བཅོ་ལྔའི་ཚེ། གཅིག་ཏུ་འདུས་ནས་ཆོས་སྨྲ་བ་དང་། དེ་ན་དེར་སྐྱེ་བོ་མང་པོ་འདུས་ནས་དེ་དག་ལ་རྙེད་པ་དག་ཀྱང་རྙེད་པར་གྱུར། བཀུར་སྟི་བྱེད། དེ་དག་གི་འཁོར་དག་ཀྱང་མང་དུ་འཕེལ་བར་གྱུར་པ་དང་། ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོ་གསུང་རབ་འདི་ལ་དད་པར་གྱུར་ནས་དེས་འདི་སྙམ་དུ་བསམས་སོ། །མུ་སྟེགས་ཅན་ཀུན་ཏུ་རྒྱུ་བ་འདི་དག་ཚེས་བརྒྱད་ཅེས་བྱ་བ་ནས། དེ་དག་གི་འཁོར་དག་ཀྱང་མང་དུ་གྱུར་ཅེས་བྱ་བའི་བར་དུ་སྔ་མ་བཞིན་ནོ། །འདི་ལྟར་དགེ་སློང་ཡང་ཚེས་བརྒྱད་དང་། བཅུ་བཞི་དང་། བཅོ་ལྔ་ལ་གཅིག་ཏུ་འདུག་ནས་ཆོས་སྨྲ་ན་བདག་ཀྱང་དེར་འགྲོ་སྟེ། རྒྱལ་པོ་ཡང་འགྲོའོ་སྙམ་ནས་སྐྱེ་བོ་མང་པོ་དག་ཀྱང་འདུ་བར་འགྱུར། དགེ་སློང་རྣམས་ཀྱིས་རྙེད་པ་ཡང་རྙེད་ལ་བཀུར་སྟི་ཡང་འབྱུང་། འཁོར་རྣམས་ཀྱང་མང་དུ་་་་འཕེལ་བར་འགྱུར། སྐྱེ་བོ་མང་པོ་ལའང་བསོད་ནམས་མང་དུ་འཕེལ། དགེ་སློང་རྣམས་ཀྱང་མི་འཇིགས་པར་འགྱུར། བསྟན་པ་ཡང་རྒྱས་པར་འགྱུར། དམ་པའི་ཆོས་ཀྱང་ཡུན་རིང་དུ་གནས་པར་འགྱུར། ཆོས་ཀྱི་སྒྲོན་
མ་ཡང་འབར་བར་འགྱུར། ཕྱི་མའི་སྐྱེ་བོ་རྣམས་ལའང་སྣང་བར་བྱས་པར་འགྱུར་རོ་སྙམ་ནས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོ་བཅོམ་ལྡན་འདས་གང་ན་བ་དེར་སོང་ནས་དྲུང་དུ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་སྟེ། ཡུལ་མཉམ་དཀའི་རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་མུ་སྟེགས་ཅན་ཀུན་ཏུ་རྒྱུ་བ་གཞན་ནི་ཚེས་བརྒྱད་ནས། དེ་དག་གིས་འཁོར་དག་ཀྱང་མང་དུ་གྱུར་ཏོ་ཞེས་བྱ་བའི་བར་དུ་སྔ་མ་བཞིན་ནོ། །འདི་ལྟར་དགེ་སློང་རྣམས་ཀྱང་ཚེས་བརྒྱད་ནས་ཕྱི་མའི་སྐྱེ་བོ་རྣམས་ལ་སྣང་བར་བགྱིས་པར་འགྱུར་ན་དགོངས་པར་ཅི་གནང་ཞེས་བྱ་བའི་བར་དུ་སྔ་མ་བཞིན་ནོ། །བཅོམ་ལྡན་འདས་ཀྱིས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོ་ལ་ཅང་མི་གསུང་བཞིན་དགོངས་སོ། །དེ་ནས་ཡུལ་མཉམ་དཀའི་རྒྱལ་པོ་མཁས་པ་ཅན་གཟུགས་ཅན་སྙིང་པོས་བཅོམ་ལྡན་འདས་ཅང་མི་གསུང་བཞིན་་་དགོངས་པར་ཤེས་ནས། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་དྲུང་ནས་སོང་ངོ་། །དེ་ནས་བཅོམ་ལྡན་འདས་ཀྱིས་ཡུལ་མཉམ་དཀའི་རྒྱལ་པོ་མཁས་པ་གཟུགས་ཅན་སྙིང་པོ་སོང་ནས་རིང་པོ་མ་ལོན་པར་མཁྱེན་ཏེ། དགེ་སློང་རྣམས་ལ་བཀའ་སྩལ་པ། དེ་ལྟ་བས་ན་དགེ་སློང་རྣམས་ངས་རྗེས་སུ་གནང་གིས་ཚེས་བརྒྱད་དང་། བཅུ་བཞི་དང་བཅོ་ལྔ་ལ་གཅིག་ཏུ་འདུས་ནས་ཆོས་སྨྲ་བར་བྱའོ། །དེ་ཡང་འདི་ལྟ་བུར་སྨྲ་བར་བྱ་སྟེ། ཆོས་སྨྲ་བའི་དགེ་སློང་གིས་དོན་དང་ཚིག་གིས་འཁོར་རྣམས་གོ་བར་བྱོས་ཤིག །དེ་ན་དགེ་སློང་དག་ཚིག་ཐ་མལ་པར་སྨྲ་སྟེ་ཚིག་ཐ་མལ་པར་སྨྲས་པས་འཁོར་རྣམས་གོ་བར་མ་གྱུར་པ་དང་། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་དབྱངས་ཀྱིས་ཆོས་སྨྲ་བར་བྱའོ། །དེ་དག་གིས་ཇི་ལྟ་བུར་འདུག་བཞིན་དུ་སྨྲས་པ་དང་། འཁོར་དེ་དག་གིས་གོ་བར་མ་གྱུར་ཏེ། བཅོམ་ལྡན་འདས་ཀྱིས་
བཀའ་སྩལ་པ། རྗེས་སུ་གནང་གིས་སྟན་མཐོན་པོ་ཆོས་ཤིག །དེ་དག་གིས་མདོ་སྡེ་ཆེན་པོ་བསྡུས་ཤིང་སྨྲས་པ་དང་། ཐེ་ཚོམ་དུ་གྱུར་རྒྱས་པར་ཡང་མི་བྱེད་ལ་དེ་ཉིད་ཀྱིས་ཉི་མ་ཟད་པར་བྱེད་དེ། འཁོར་རྣམས་སྐྱོ་བར་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་དོན་གྱི་དབང་དུ་ཅི་བདེར་རྒྱས་པར་བྱོས་ཤིག །དེ་དག་མདོ་སྡེའི་ལས་དོན་ཉི་ཚེ་ཐུས་ཏེ་གཏམ་བརྗོད་པར་བྱ། གསུངས་པའི་བཞིན་དུ་གཞུང་འཆའ་བར་འདོད་པ་དང་། དེ་དག་མདོ་སྡེའི་མཐའ་མ་རུང་བར་མི་འགྱུར་རམ། སྙམ་དུ་ཐེ་ཚོམ་དུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་གནང་གིས་མདོ་སྡེའི་དོན་ཉི་ཚེ་ཐུས་ལ་སྐབས་སྐབས་སུ་གཏམ་རྒྱུད་དུ་ཡང་བྱ། གསུངས་པ་ཡང་གཞུང་བཞིན་བྱོས་ཏེ་དོན་དང་ཚིག་ཏུ་འབྲེལ་བས་འཁོར་རྣམས་གོ་བར་གྱིས་་་ཤིག །མདོ་སྡེ་དེ་དག་ཀྱང་དེ་བཞིན་དུ་གཟུང་བར་བྱའོ། །དེ་དག་གཉིས་འཁོར་ལྷན་ཅིག་ཏུ་འཁོར་གཅིག་ལ་འཆད་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་གཅིག་གི་ནང་དུ་གཉིས་ལྷན་ཅིག་མ་འཆད་ཅིག །གང་འཆད་པ་དེ་ནི་ཉེས་བྱས་སུ་འགྱུར་རོ། །དེ་དག་འཁོར་འཁོར་དུ་འཆད་ནས་དེ་དག་འཁྲུགས་པར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་འཁོར་དུ་མ་འཆད་ཅིག །འཆད་ན་འདས་པ་དང་བཅས་པར་འགྱུར་རོ། །དེ་ཡང་འཁོར་གཉིས་ལ་ཅིག་ཅར་འཆད་པར་གྱུར་པ་དང་། བཅོམ་ལྡན་འདས་ཀྱིས་བཀའ་སྩལ་པ། འཁོར་གཉིས་ལ་ཅིག་ཅར་མ་འཆད་ཅིག །གང་འཆད་པ་དེ་ཉེས་བྱས་སུ་འགྱུར་རོ། །འདི་ལྟར་འཆད་པ་ལས་གཉིས་པོ་འཁྲུག་པར་མི་འགྱུར་བ་དེ་ལྟ་བུར་བཤད་པར་བྱའོ། །དེ་དག་འཁོར་དེད་ཅིང་འདོང་ནས། བཅོམ་ལྡན་འདས་ཀྱིས་བཀའ་སྩལ་པ། འཁོར་དེད་ཅིང་མ་འདོང་ཤིག །གང་འཁོར་དེད་ཅིང་འདོང་ན་འདས་པ་དང་བཅས་པར་འགྱུར་རོ། །བདག་ཅག་ཉིད་དང་དེ་འདོང་བ་ལ་ནི་ཉེས་པ་མེད་དོ། །དེ་དག་ཆོས་ཀྱི་སྒོ་ནས་རྙེད་པ་ཚོལ་ཏེ། ཆོས་འཚོང་བས་འཚོ་བར་བྱེད་པ་དང་། བཅོམ་ལྡན་འདས་ཀྱིས་བཀའ་སྩལ་པ། ཆོས་ཀྱི་
སྒོ་ནས་རྙེད་པ་ཡང་མ་ཚོལ་ཅིག །ཆོས་འཚོང་ཞིང་འཚོ་བར་ཡང་མ་བྱེད་ཅིག །དེ་ནས་སྨྲ་བ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། རྗེས་སུ་དྲན་པར་བྱེད་པས་རྗེས་སུ་དྲན་པར་གྱིས་ཤིག །རྗེས་སུ་དྲན་པར་བྱེད་པའང་མེད་ནས་རིམ་གྱིས་སྨྲ་བར་གྱིས་ཤིག །ཚིགས་བཅད་དང་དབྱངས་སུ་སྦྱར་ཞིང་་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། བདག་ཉིད་ཀྱིས་སྨྲོས་ཤིག །ཡང་ན་དགེ་སློང་གཞན་ལ་ཆོལ་ཅིག །བཅོལ་བའི་གང་ཟག་ཀྱང་རིག་པར་བྱ། བདག་ཉིད་ཀྱིས་མི་སྨྲ། ཡང་ན་དགེ་སློང་གཞན་ལ་མ་བཅོལ། བཅོལ་བའི་གང་ཟག་ཀྱང་ཤེས་པར་མ་བྱས་ན་འདས་པ་དང་བཅས་པར་འགྱུར་རོ། །དེ་དག་རིམ་བཞིན་དུ་བསྐོས་པ་དང་། འདི་ལྟར་ཞར་བ་དང་། གླེན་པ་དང་། སྒུར་པོ་དག་ལ་མུ་སྟེགས་ཅན་ཀུན་ཏུ་རྒྱུ་བ་གཞན་དག་དགེ་སྦྱོང་་་ཤཱཀྱའི་བུའི་ནང་ན་འདི་དག་འདི་ནི་སྐྱེས་བུ་དམ་པའོ། །སྐྱེས་བུ་གཙོ་བོའོ། །སྐྱེས་བུ་མཆོག་གོ །ཞེས་ཉེས་པ་ངོར་བརྗོད་ཅིང་འཕྱས་འདོགས་མི་སྙན་པ་ཟེར་བར་གྱུར་ཏོ། །ཇི་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ནུས་པ་ཡོད་ན་ཆོས་སྨྲ་བ་རིམས་སུ་མ་བསྐོ་ཤིག །གང་ནུས་པ་དེ་བསྐོ་བར་བྱའི། འཁོར་འཁྲུག་པར་མི་འགྱུར་བ་དེ་ལྟ་བུ་བསྐོ་བར་བྱའོ། །སྨྲ་བའི་བྱ་བ་གཞན་ཡང་དུས་གང་དང་་་གང་དུ་ཡང་རུང་སྟེ། དགེ་སློང་རྣམས་འདུས་ཤིང་འཁོད་པ་དང་ཆོས་ཀྱི་གཏམ་ངེས་པ་རྣམས་བརྗོད་པར་བྱའོ། །དེ་སྟེ་མི་ཤེས་ནའང་གཅིག་ལ་གཅིག་དྲི་བར་བྱ། གཅིག་ལ་གཅིག་ཞུ་བར་བྱ། བགམ་པར་མི་བྱ། གླགས་བཙལ་བའི་ཕྱིར་མི་བྱ། འཕྱས་བྱ་བའི་ཕྱིར་མི་བྱ། ཉམས་བསྐྱོད་པར་མི་བྱའི་ཅི་ནས་ཆོས་ལ་རིམ་གྲོ་དང་བཀུར་སྟིའི་ཕྱིར་དྲི་བར་བྱ། ཞུ་བར་བྱ་སྟེ། ཅི་དགེ་བའམ། འོན་ཏེ་མི་དགེ་བའམ། ཅི་ཁ་ན་མ་ཐོ་བ་དང་བཅས་པའམ། འོན་ཏེ་ཁ་ན་མ་ཐོ་བ་མེད་པ་ཡིན། ཇི་ལྟར་བྱས་ན་དགེ་བར་འགྱུར་རམ། འོན་ཏེ་སྡིག་པར་འགྱུར་བ་ཞེས་བྱ་བ་འདི་ནི་སྨྲ་བའི་བྱ་བའོ། །མི་སྨྲ་བའི་བྱ་བ་གང་ཞེ་ན། གནས་གང་ན་དགེ་སློང་
རྣམས་སྨྲ་ཞིང་གཞན་ལ་བརྗོད་པར་མི་འདོད་པ་དེ་དག་གིས་ཇི་ལྟ་བུར་ཡིད་ལ་བྱ་བ་གྲུབ་པ་དེ་བཞིན་དུ་བསྒོམ་པར་བྱ། སྤྱོད་ལམ་བཞི་ལ་འཇུག་པར་བྱ། ཕན་ཚུན་དུ་མི་སྨྲ་བར་འཇུག་པ་ལ་རྒྱས་པར་བྱ་བ་ནི་འདི་ལྟ་སྟེ། ཀླུང་དགའ་ལྡན་གྱི་དགེ་སློང་རྣམས་ཇི་ལྟ་བ་བཞིན་དུ་བྱ་སྟེ། འདི་ནི་མི་སྨྲ་བའི་བྱ་བ་ཞེས་བྱའོ། །དབྱར་ཚུལ་དུ་འཇུག་པའི་བྱ་བ་གང་ཞེ་ན། དབྱར་ཚུལ་དུ་འཇུག་པར་འདོད་པའི་དགེ་སློང་གིས་བསམ་པ་ཤིན་ཏུ་བསམས། བརྟག་པ་ཤིན་ཏུ་བརྟགས། ཤིན་ཏུ་དཔྱད་པ་བཞིན་དཔྱད་དེ། ཚུལ་དུ་འཇུག་པར་བྱ་སྟེ། བདག་གནས་དེ་ན་དགེ་སློང་ཇི་ལྟར་ཚུལ་ཁྲིམས་དང་ལྡན། ཡོན་ཏན་དང་ལྡན། མཁས་པ་དང་ལྡན། དགེ་བའི་ཆོས་དང་ལྡན། ལྟ་བ་མཚུངས། གནས་པ་མཚུངས། གྲོགས་སུ་མཚུངས། ཡིད་གཅུགས་པ་དག་དང་ལྷན་ཅིག་གང་བདེ་བར་འགྱུར་བ་ནི་འདི་ལྟ་སྟེ། འགྲོ་ན་ཡང་རུང་། སྨྲ་ཡང་རུང་བ་དག་གནས་དེ་ན་དགེ་སློང་མདོ་སྡེ་འཛིན་པ། འདུལ་བ་འཛིན་པ། མ་ལྟ་བུ་འཛིན་པ་གང་བདག་ཐེ་ཚོམ་མ་སྐྱེས་པ་ལས་ནི་མི་སྐྱེད། སྐྱེས་པ་ནི་དུལ་བར་བྱེད། སྡིག་པ་ལྟ་བུ་མ་སྐྱེས་པ་ལས་ནི་མི་སྐྱེད། སྐྱེས་པ་ལས་ནི་དུལ་བར་བྱེད་པ་ཡོད་དམ། གནས་དེ་ན་བདག་ན་བ་དང་རྗེས་སུ་མཐུན་པའི་སྨན་དང་། ཟས་དང་། ཡོ་བྱད་དང་། བསྙེན་བཀུར་བྱེད་པར་འབྱོར་པར་འགྱུར་རམ། གནས་དེ་ན་བདག་གི་ལུས་ཀྱང་རུང་། སེམས་ཀྱང་རུང་བདེ་བར་འགྱུར་རམ། གནས་དེ་ན་དགེ་སློང་དག་ཐབ་མོ་བྱེད་པ། མཚང་འདྲུ་བར་བྱེད། འཁྲུག་པར་བྱེད། རྩོད་པ་གླེང་བར་བྱེད་པ་ལྟ་མི་གནས་གྲང་། དེས་བདག་ལ་མ་ཐོབ་པ་ལས་ཐོབ་པ་དང་། མ་ཆུད་པ་ལས་ཆུད་པར་བྱ་བ་དང་། མངོན་དུ་མ་བྱས་པ་ལས་མངོན་དུ་བྱེད་པའི་བར་ཆད་དུ་མི་འགྱུར། གནས་དེ་ན་་་དབྱར་གྱི་ནང་དུ་དགེ་འདུན་འབྱེ་བར་མི་འགྱུར་གྲང་ཞེས་དེ་བཞིན་དུ་བསམ་པ་ཤིན་ཏུ་བསམས། བརྟག་པ་ཤིན་ཏུ་བརྟགས། དཔྱད་པ་ཤིན་ཏུ་དཔྱད་དེ། ན་བའི་བསྙེན་བཀུར་བའི་གྲོགས་མཐུན་པ་དང་འགྲོ་བར་བྱ་སྟེ། འདི་ནི་དབྱར་ཚུལ་དུ་འཇུག་པའི་
བྱ་བ་ཞེས་བྱའོ། །དབྱར་ཚུལ་དུ་ཞུགས་པའི་བྱ་བ་གང་ཞེ་ན། དབྱར་ཚུལ་དུ་ཞུགས་པའི་དགེ་སློང་གིས་དོན་མེད་པའི་ཕྱིར་ཞག་གཅིག་ཀྱང་་་མཚམས་ཀྱི་ཕྱི་རོལ་དུ་འགྲོ་བར་མི་བྱ། དོན་ཅིག་ཡོད་པར་གྱུར་ན་དེས་ཞག་་་བདུན་ནམ། ཞག་བཞི་བཅུར་བྱིན་གྱིས་བརླབས་ལ་འགྲོ་བར་བྱ། དེ་ཡང་དོན་གྱི་ཕྱིར་ཏེ། དོན་གང་གི་ཕྱིར་ཞེ་ན། དགེ་སློང་གི་དོན་ནམ། དགེ་སློང་མའི་དོན་ནམ། དགེ་ཚུལ་ཕའི་འམ། དགེ་ཚུལ་མའི་འམ། དགེ་བསྙེན་ཕའི་འམ། དགེ་བསྙེན་མའི་དོན་ཀྱང་རུང་། གཉེན་གྱི་དོན་ཀྱང་རུང་། བདག་གི་དོན་ཀྱང་རུང་། དེ་སྟེ་སངས་རྒྱས་ལའམ། ཆོས་ལའམ། དགེ་འདུན་ལའམ། སྡུག་བསྔལ་ལའམ། ཀུན་འབྱུང་ལའམ། འགོག་པ་ལའམ། ལམ་ལ་ཡང་རུང་། ཐེ་ཚོམ་དུ་གྱུར་ཏམ། ཡིད་གཉིས་སུ་གྱུར་ཏམ། དོགས་པར་གྱུར་ཀྱང་རུང་། མ་ཐོབ་པ་ལས་ཐོབ་པའི་འདུ་ཤེས་སུ་གྱུར། མ་ཆུད་པ་ལས་ཆུད་པའི་འདུ་ཤེས་དང་། མངོན་དུ་མ་བྱས་པ་ལས་མངོན་དུ་བྱ་བའི་འདུ་ཤེས་ཏེ། དེ་འདི་ལྟར་མུ་སྟེགས་ཅན་ཀུན་ཏུ་རྒྱུ་བ་གཞན་དག་གི་དོན་ལ་ཡང་རུང་། དེ་སྟེ་དགེ་སློང་དེས་གནས་དེར་དབྱར་དགེ་འདུན་འབྱེ་བར་འགྱུར་རམ། མཆོད་རྟེན་ནམ། གཙུག་ལག་ཁང་ཡང་རུང་འདྲལ་བར་འགྱུར་རམ། ཚིག་པར་འགྱུར་བ་ཡང་རུང་སྟེ། དེར་དགེ་སློང་དེས་སངས་རྒྱས་ཀྱང་རུང་། ཆོས་སམ། དགེ་འདུན་གྱི་དོན་ལ་ཡང་རུང་སྟེ། ཞག་བདུན་ནམ། ཞག་བཞི་བཅུར་བྱིན་གྱིས་རློབས་ལ་འགྲོ་བར་བྱ་སྟེ། དེར་སོང་བ་ལས་ཞག་བདུན་ནམ། ཞག་བཞི་བཅུར་ཡང་རུང་ལོན་པར་གྱུར་ན་དགེ་སློང་དབྱར་ཆད་པའི་ཉེས་པ་འབྱུང་བར་མི་འགྱུར་ཏེ། དེ་ནི་དབྱར་ཚུལ་དུ་ཞུགས་པའི་བྱ་བ་ཞེས་བྱའོ། །དབྱར་ཚུལ་དུ་ཞུགས་པའི་གནས་བརྟན་གྱི་བྱ་བ་གང་ཞེ་ན། དབྱར་ཚུལ་དུ་ཞུགས་པའི་དགེ་སློང་གནས་བརྟན་གྱིས་གཙུག་ལག་ཁང་གི་རྣམས་དང་། མཆོད་རྟེན་གྱི་རྣམས་ཤེས་པར་བྱ། ཇི་ལྟ་བུར་རལ་ཚེམས་བྱ་བ་དང་། སུ་བྱེད་པ་ལ་སྤྲོ་བ་བསྐྱེད་པར་བྱ། བསྒྲག་པར་བྱ། སུ་མི་བྱེད་པ་དེ་ལ་ནི་བསྐུལ་བར་བྱ། དྲན་པར་བྱ་བ་འདི་ནི་དབྱར་ཚུལ་དུ་ཞུགས་པའི་གནས་བརྟན་གྱི་བྱ་བ་ཞེས་བྱའོ། །
དབྱར་ཚུལ་ན་གནས་པའི་བྱ་བ་གང་ཞེ་ན། དབྱར་ཚུལ་ན་གནས་པའི་དགེ་སློང་རྣམས་ཀྱིས་ལས་རྣམ་པ་གསུམ་བྱ་སྟེ། དབྱར་གང་དུ་གནས་པའི་གནས་ཁང་དེ་དག་གས་པ་དང་ཞིག་པའི་རྣམས་བཅོས་སུ་གཞུག་པར་བྱ། མཚན་རྟོག་པར་བྱ། མཚན་རྟོག་པར་བྱེད་དུ་གཞུག །གནས་དེར་གོས་གང་རྙེད་པའི་གོས་དེ་གཏན་པར་གདིང་བར་བྱ། ཡང་ན་གདིང་དུ་གཞུག་པར་བྱ་བ་འདི་ནི་དབྱར་ཚུལ་ན་གནས་པའི་བྱ་བ་ཞེས་བྱའོ། །འཁོར་གྱི་བྱ་བ་གང་ཞེ་ན། འཁོར་གྱི་གཙོ་བོ་དེས་དུས་དུས་སུ་འཁོར་རྣམས་ལ་གང་ལེགས་པར་སྤྱོད། གང་ལེགས་པར་མི་སྤྱོད་པ་དང་། གང་མཛེས་པར་སྒྲུབ་གང་མི་མཛེས་པར་སྒྲུབ་བརྟགས་ཏེ་གང་ལེགས་པར་སྤྱོད་ཅིང་མཛེས་པར་སྒྲུབ་པ་དེ་ལ་ནི་ཡོངས་སུ་བསྐྱང་བར་བྱ་སྟེ། ཚེ་དང་ལྡན་པ་ལེགས་སོ་ལེགས་སོ། །ཇི་ལྟར་ཁྱོད་སྤྱོད་པ་དེ་ལྟ་བུར་སྤྱད་པར་བྱའོ་ཞེས་སྤྲོ་བ་བསྐྱེད་པར་བྱ། ཡང་དག་པར་དགའ་བར་བྱ། དེ་དུས་དུས་སུ་ཕྱི་ཕྱིར་བསྟན་པར་བྱ། བསླབ་པར་བྱའོ། །གང་ལེགས་པར་མི་སྤྱོད་དམ་མཛེས་པར་མི་སྒྲུབ་པ་དེ་ལ་གང་ལ་ཇི་ལྟ་བུར་འོས་པ་དེ་ལྟ་བུར་ཆད་པས་གཅད་པར་བྱ་བ་ནི་འཁོར་གྱི་བྱ་བ་ཞེས་བྱའོ། །འཁོར་གྱི་ནང་དུ་བྱ་བ་གང་ཞེ་ན། དགེ་སློང་འཁོར་གྱི་ནང་དུ་དྲན་པ་ཉེ་བར་བཞག་ནས་འཁོར་གྱི་ནང་དུ་འགྲོ་བར་བྱ་སྟེ། འདི་ནི་རྒྱལ་རིགས་ཀྱི་འཁོར་ཏོ། །འདི་ནི་བྲམ་ཟེའི་འཁོར་ཏོ། །འདི་ནི་ཁྱིམ་བདག་གི་འཁོར་ཏོ། །འདི་ནི་དགེ་སྦྱོང་གི་འཁོར་ཡིན་ཏེ། དེར་བདག་འདི་ལྟ་བུར་འགྲོ་བར་བྱ། འདི་ལྟ་བུར་འགྲེང་བར་བྱ། འདི་ལྟ་བུར་འདུག་པར་བྱ་སྟེ། འདི་ལྟ་བུར་སྨྲ་བར་བྱ། འདི་ལྟ་བུར་སྨྲ་བར་མི་བྱའོ་ཞེས་བྱ་བ་དེ་ནི་འཁོར་གྱི་ནང་དུ་འགྲོ་བའི་བྱ་བ་ཞེས་བྱའོ། །འཁོར་གྱི་ནང་དུ་ཞུགས་པའི་བྱ་བ་གང་ཞེ་ན། དགེ་སློང་འཁོར་གྱི་ནང་དུ་ཞུགས་ན་དེས་གཏམ་སྣ་ཚོགས་མི་བྱ། གཏམ་མི་རིགས་པའི་རྣམས་མི་བྱ། འཁོར་རྣམས་རིགས་པར་བྱས་ལ་དེ་དག་དང་མཐུན་པའི་གཏམ་བྱ་བར་བྱ། གཏམ་བྱས་ནས་སྟན་ལས་ལྡང་བར་བྱ་བ་དེ་ནི་འཁོར་གྱི་ནང་དུ་ཞུགས་པའི་བྱ་བ་ཞེས་བྱའོ། །འཁོར་གྱི་ནང་དུ་ཞུགས་པའི་གནས་
བརྟན་གྱི་བྱ་བ་གང་ཞེ་ན། འཁོར་གྱི་ནང་དུ་ཞུགས་པའི་དགེ་སློང་གནས་བརྟན་གྱིས་འཁོར་རྣམས་ལ་འདི་དག་ཇི་ལྟ་བུའི་གཏམ་ལ་དགའམ། འོན་ཏེ་ཅང་མི་སྨྲ་བ་ལ་དགའ་ཞེས་འཁོར་རྣམས་ལ་བརྟག་པར་བྱའོ། །དེ་སྟེ་གཏམ་ལ་དགའ་བ་དག་ཅིག་ཡིན་ན་ནི་དེ་དག་ལ་དེ་དང་མཐུན་པའི་གཏམ་བྱའོ། །དེ་སྟེ་མི་སྨྲ་བ་ལ་དགའ་བ་དག་ཅིག་ཡིན་ན་ནི་དེར་ཅང་མི་སྨྲ་བར་འདུག་པར་བྱ་སྟེ། འདི་ནི་འཁོར་གྱི་ནང་དུ་ཞུགས་པའི་གནས་བརྟན་གྱི་བྱ་བ་ཞེས་བྱའོ། །གསོ་སྦྱིན་གྱི་བྱ་བ་གང་ཞེ་ན། བཅུ་བཞིའམ། བཅོ་ལྔའི་གསོ་སྦྱོང་དེ་ཉིད་ཀྱི་ཚེ་རང་གི་རྒྱུད་ལ་བརྟག་པར་བྱ་སྟེ། མཚན་མོའི་རྒྱུད་དང་། ཉིན་པར་གྱི་རྒྱུད་དེར་བདག་ལ་སྐབས་དེར་ལྟུང་བ་ལྟ་བྱུང་ངམ། དེ་སྟེ་བྱུང་བ་ཡོད་ན་དགེ་སློང་ཡིད་བརྟན་པ་ཞིག་རྙེད་ན་ནི་དེའི་མདུན་དུ་བཤགས་པར་བྱ། དེ་སྟེ་མ་རྙེད་ན་སེམས་ཀྱི་བྱིན་གྱིས་བརླབ་པ་དང་། དེ་སྟེ་ཉེས་པ་མ་བྱུང་ན་ནི་སེམས་བསྐྱེད་པར་བྱ་སྟེ། བདག་ནི་ལྟུང་བ་དེ་ལས་ཡོངས་སུ་དག་གོ་ཞེས་ཚིག་ཏུ་བརྗོད་པར་བྱ། གསོ་སྦྱིན་ནི་ཚུལ་ཁྲིམས་ཡོངས་སུ་དག་པར་བྱེད་པ་སྟེ། འདི་ནི་གསོ་སྦྱིན་གྱི་བྱ་བ་ཞེས་བྱའོ། །གསོ་སྦྱིན་མངོན་དུ་བྱ་བའི་བྱ་བ་གང་ཞེ་ན། དགེ་སློང་གསོ་སྦྱིན་མངོན་དུ་བྱུང་ལ་མིན་ན་དད་བཞིན་དུ་ཡང་འགྲོ་བར་བྱ་སྟེ། དེ་ཡང་ཤེས་བཞིན་དུ་འགྲོ་བར་བྱ་བ་ནས་སྔ་མ་བཞིན་ཏེ་འདུག་པ་ལ་མཁས་པར་བྱ་བའི་བར་དུའོ། །འདུག་ནས་ཀྱང་སོ་སོར་ཐར་པའི་མདོ་སྡེ་ལ་སྟོན་པའོ་སྙམ་དུ་འདུ་ཤེས་མངོན་དུ་གཞག་པར་བྱ། བཀུར་སྟི་བྱ། རིམ་གྲོར་བྱས་ལ་མཉན། བླ་མར་བྱ། གཅེས་པར་བྱ། ཡིད་ལ་གཟུང་བར་བྱ། སེམས་གཅིག་ཏུ་བྱ། རྣ་བ་མི་གཡེལ་བར་བྱ། སེམས་ཐམས་ཅད་གཅིག་ཏུ་དམིགས་ནས་མཉན་པར་བྱའོ། །མཉན་ནས་ཀྱང་དེ་ལྟ་བུར་ནན་ཏན་བྱ། བསྒྲུབ་པར་བྱ་བ་དེ་ནི་གསོ་སྦྱིན་མངོན་དུ་བྱ་བའི་བྱ་བ་ཞེས་བྱའོ། །གསོ་སྦྱིན་གྱི་ལས་ཀྱི་བྱ་བ་གང་ཞེ་ན། གསོ་སྦྱིན་གྱི་བྱ་བ་ལ་རྣམ་པ་ལྔ་སྟེ། གདོན་པ་དང་། བསྔོ་བ་དང་། དད་པ་ཡོངས་སུ་དག་པ་དང་། སྐབས་དབྱེ་བ་དང་། སེམས་ཀྱིས་བྱིན་གྱིས་བརླབ་པའོ། །གཞན་ཡང་གསོ་སྦྱིན་གྱི་ལས་ལ་རྣམ་པ་བཞི་སྟེ། ཆོས་བཞིན་མ་
ཡིན་ལ་མ་འདུས་པར་བྱེད་པ་དང་། ཆོས་བཞིན་མ་ཡིན་ལ་འདུས་པར་བྱེད་པ་དང་། ཆོས་བཞིན་ལ་མ་འདུས་པར་བྱེད་པ་དང་། ཆོས་བཞིན་ལ་འདུས་པར་བྱེད་པའོ། །དེ་ལས་ཆོས་བཞིན་བྱེད་པའི་གསོ་སྦྱིན་གྱི་ལས་དེ་ནི་འདི་ལྟ་སྟེ། ཆོས་བཞིན་བྱེད་པ་ཡིན་ནོ། །དེ་ནི་གསོ་སྦྱིན་གྱི་ལས་ཀྱི་བྱ་བ་ཞེས་བྱའོ། །སོ་སོར་ཐར་པའི་བྱ་བ་གང་ཞེ་ན། བཅུ་བཞིའམ། བཅོ་ལྔའི་གསོ་སྦྱིན་དེ་ཉིད་ཀྱི་ཚེ་མཚམས་དང་ལས་ཀྱི་ནང་དུ་ཕྱིན་པའི་དགེ་སློང་ཇི་སྙེད་པ་དེ་དག་ཐམས་ཅད་་་གཅིག་ཏུ་འདུས་ཤིང་འཁོད་པ་དང་། དགེ་འདུན་གྱི་གནས་བརྟན་དགེ་སློང་གིས་སོ་སོར་ཐར་པའི་མདོ་སྡེ་བཀླག་པར་བྱ། སོ་སོར་ཐར་པའི་མདོ་ལ་ཡང་སྟོན་་པར་འདུ་ཤེས་མངོན་པར་གཞག་པར་བྱ། བཀུར་སྟི་དང་རིམ་གྲོར་བྱས་ལ་མཉན། བླ་མར་བྱ། གཅེས་པར་བྱ། ཡིད་ལ་གཟུང་བར་བྱ། མཚམས་གཅིག་ཏུ་བྱ། རྣ་བ་མི་གཡེལ་བར་བྱ། གཞན་ཐམས་ཅད་གཅིག་ཏུ་ཐུབ་པར་བྱས་ལ་མཉན་པར་བྱ། ཐོས་ནས་ཡང་དེ་བཞིན་དུ་ནན་ཏན་བྱ། བསྒྲུབ་པར་བྱ་སྟེ། དེ་ནི་སོ་སོར་ཐར་པའི་བྱ་བ་ཞེས་བྱའོ། །སོ་སོར་ཐར་པ་ཀློག་པའི་བྱ་བ་གང་ཞེ་ན། སོ་སོར་ཐར་པ་ཀློག་པ་ལ་རྣམ་པ་ལྔ་སྟེ། གསོལ་བ་བྱས་ནས་གླེང་གཞི་བཀླགས་ཏེ། ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲག་པར་བྱ་བ་དང་། དེ་ཡང་སོ་སོར་ཐར་པ་བསྒྲགས་ན་སོ་སོར་ཐར་པ་བཀླགས་པ་ཞེས་བྱ་སྟེ། འདི་ནི་སོ་སོར་ཐར་པ་ཀློག་པ་དང་པོའོ། །གསོལ་བ་བྱས་ནས་གླེང་གཞི་བཀླགས། ཕས་ཕམ་པ་བཞི་བཀླགས་པ་ལ་ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲག་པར་བྱ་སྟེ། དེ་ཡང་སོ་སོར་ཐར་པ་ཀློག་པ་གཉིས་པའོ། །གསོལ་བ་བྱས་ལ་གླེང་གཞི་ཡང་བཀླགས། ཕས་ཕམ་པ་བཞི་ཡང་བཀླགས། དགེ་འདུན་གྱི་ལྷག་མ་བཅུ་གསུམ་ཡང་བཀླགས་ནས་ལྷག་མ་ནི་ཐོས་པ་བཞིན་ནོ་ཞེས་བསྒྲགས་པ་ནི་སོ་སོར་ཐར་པ་བཀླགས་པ་ཡིན་ཏེ། འདི་ནི་སོ་སོར་ཐར་པ་ཀློག་པ་གསུམ་པའོ། །གསོལ་བ་བྱས་ལ་གླེང་གཞི་བཀླགས། ཕས་ཕམ་པ་བཞི་ཡང་བཀླགས། དགེ་འདུན་གྱི་ལྷག་མ་བཅུ་གསུམ་
ཡང་བཀླགས། མི་མངོན་པའི་ཆོས་གཉིས་པོ་ཡང་བཀླགས་ལ་ལྷག་མ་རྣམས་ནི་ཐོས་པ་བཞིན་ནོ་ཞེས་བསྒྲགས་པ་ཡང་སོ་སོར་ཐར་པ་བཀླགས་པ་ཡིན་ཏེ། འདི་ནི་སོ་སོར་ཐར་པ་ཀློག་པ་བཞི་པའོ། །རྒྱས་པར་སོ་སོར་ཐར་པ་ཀློག་པ་དང་ལྔ་སྟེ། འདི་ནི་སོ་སོར་ཐར་པ་ཀློག་པའི་བྱ་བའོ། །སོ་སོར་ཐར་པ་ཀློག་པར་བྱེད་པའི་བྱ་བ་གང་ཞེ་ན། སོ་སོར་ཐར་པ་ཀློག་པའི་དགེ་སློང་གིས་སོ་སོར་ཐར་པའི་མདོ་དེ་ཁ་ཏོན་དུ་གསལ་པོར་བྱང་བར་བྱ། དྲན་པར་བྱ། གཏན་ལ་ཕེབས་པར་བྱ། ནམ་ཀློག་པའི་ཚེ་མི་འཁྲུལ་བར་ལེགས་པར་ཀློག་པར་བྱ། དེས་བདག་གི་རྒྱུད་ཀྱང་བརྟག་པར་བྱ་སྟེ། མཚན་མོའི་རྒྱུད་དང་ཉིན་པར་གྱི་རྒྱུད་ལས། བདག་དེའི་སྐབས་སུ་ཉེས་པ་ལྟ་བྱུང་ངམ་མ་བྱུང་བར་བརྟག་སྟེ། དེ་སྟེ་ཉེས་པ་བྱུང་བར་གྱུར་ལ་ཡིད་བརྟན་པའི་དགེ་སློང་ཡོད་ན་དེའི་དྲུང་དུ་བཤགས་པར་བྱ། དེ་སྟེ་མེད་ན་རེ་ཞིག་གསོ་སྦྱིན་བྱས་ལ་དེའི་འོག་ཏུ་བདག་གིས་ལྟུང་བ་ཇི་ལྟར་ཆོས་བཞིན་སླར་བཤགས་་་པར་བྱའོ། །སྙམ་དུ་སེམས་ཀྱིས་བྱིན་གྱིས་བརླབ་པར་བྱའོ། །ཇི་ལྟར་སོ་སོར་ཐར་པའི་མདོ་ལས་འབྱུང་བ་བཞིན་དུ་དེས་ནན་ཏན་དུ་བྱ་བ་དེ་ནི་སོ་སོར་ཐར་པ་ཀློག་པར་བྱེད་པའི་བྱ་བ་ཞེས་བྱའོ། །གནས་བརྟན་གྱི་བྱ་བ་གང་ཞེ་ན། དེ་སྟེ་དགེ་སློང་རྣམས་ཁྱིམ་པའི་དེར་ཟན་ལ་མགྲོན་དུ་བོས་ན་དེའི་ཚེ་དགེ་སློང་གནས་བརྟན་གྱིས་སྔ་ཟད་དུ་ཤམ་ཐབས་བགོ་བར་བྱ། དག་རར་བྱུང་སྟེ་འདུག་པར་བྱ་བ་དེ་ནི་གནས་བརྟན་གྱི་བྱ་བ་ཞེས་བྱའོ། །བར་མའི་བྱ་བ་གང་ཞེ་ན། དགེ་སློང་བར་མས་དགེ་སློང་གནས་བརྟན་མདུན་དུ་བྱས་ནས་གྲོང་དུ་འཇུག་པར་བྱ། དེ་སྟེ་གནས་བརྟན་བཤང་བའམ་གཅི་བ་ཞིག་ཏུ་ཐོགས་ནས་དེས་མི་རིང་བ་ཞིག་ཏུ་སོང་ལ་བསྡད་པར་བྱ། དེ་སྟེ་རིང་དུ་སོང་ན་གྲོང་འདབ་ཏུ་སོང་ལ་བསྡད་པར་བྱ། དེ་སྟེ་བྲམ་ཟེ་དང་ཁྱིམ་བདག་དག་གིས་སྤྱན་འདྲེན་པ་བཏང་ན་ཡང་གནས་བརྟན་འོངས་ཀྱི་བར་དུ་ཅུང་ཟད་བསྡད་དེ་བྱའོ་ཞེས་སྨྲ་བར་བྱ། དེ་སྟེ་ལག་ཆུ་བཏང་ན་གནས་བརྟན་ལ་བསྡད་དོ་ཞེས་སྨྲ་བར་བྱ། དེ་སྟེ་གནས་བརྟན་འོངས་པར་གྱུར་ན་ཡང་འཁོད་པ་ཐམས་ཅད་ལྡང་བར་བྱ་སྟེ། འདི་ནི་བར་མའི་བྱ་བ་ཞེས་བྱའོ། །གསར་
བུའི་བྱ་བ་གང་ཞེ་ན། དགེ་སློང་གསར་བུས་གཙུག་ལག་ཁང་ཆག་ཆག་གདབ་པར་བྱ། ས་ཕྱག་པར་བྱ། ཕྱག་དར་དོར་བར་བྱ། ལྕི་བས་ཞལ་ཞལ་འཇམ་པོར་བྱུག་པར་བྱ། ཆུ་རྣམས་སོ་སོར་བཅུ་ཞིང་གཞག་པར་བྱ། སྟན་རྣམས་གདིང་བར་བྱ། ཟན་རྣམས་སྐོ་སར་དྲང་བར་བྱ། དུགས་ཁང་དུ་བསྒྲུབ་པའི་རྣམས་བྱས་ཏེ། དེར་ཤིང་བསྐྱ་བར་བྱ། འབྲུ་མར་གཞག་པར་བྱ། ས་དང་ཕྱེ་མ་གཞག་པར་བྱ། ཆུ་གཞག་པར་བྱ། དགེ་སློང་གང་ལས་ཁས་ལེན་པ་དེ་དག་ལ་ལས་བྱ་བར་བྱ། གཞན་མཚུངས་པར་སྤྱད་པ་གང་ཡང་རུང་སྟེ། ཐམས་ཅད་གསར་བུས་བྱ་བར་བྱ། འདི་ལྟར་ཡང་དགེ་སློང་གསར་བུས་དགེ་སློང་གནས་བརྟན་རྣམས་ལ་ཕ་དང་ཕུ་བོ་ལྟ་བུར་འདུ་ཤེས་ཉེ་བར་གཞག་ཅིང་བཀུར་སྟིར་བཅས། བདག་ལ་དབངབཅས། འཇིགས་པ་དང་དབང་དུ་འགྱུར་བར་བཅས། སངས་རྒྱས་དང་ཆོས་དང་དགེ་འདུན་ལ་དམིགས་བཞིན་པའི་སེམས་མངོན་དུ་གཞག་པར་བྱ། མཚུངས་པར་སྤྱད་པའི་ཆོས་རྣམས་ཇི་ལྟ་བུར་བཅས་པ་བཞིན་དུ་རྫོགས་པར་བྱ་བ་འདི་ནི་་་གསར་བུའི་བྱ་བ་ཞེས་བྱའོ། །གནས་བརྟན་དང་བར་མ་དང་གསར་བུའི་བྱ་བ་གང་ཞེ་ན། དགེ་སློང་གནས་བརྟན་དང་བར་མ་དང་གསར་བུ་ཐམས་ཅད་ཀྱིས་ཀྱང་རབ་ཏུ་བྱུང་བའོ་སྙམ་དུ་སེམས་མངོན་དུ་གཞག་པར་བྱ། སངས་རྒྱས་བཅོམ་ལྡན་འདས་མགོན་མཛད་པ་ལ་མགོན་པོའོ་སྙམ་དུ་འདུ་ཤེས་མངོན་དུ་གཞག་པར་བྱ། མྱ་ངན་འདའ་བ་ལ་གཞོལ་བར་བྱ། བསླབ་པའི་གཞི་ཇི་ལྟ་བུར་བཅས་པ་ལ་མཚུངས་པར་སྤྱད་པར་བྱ། བླ་མའི་ཁྱད་པར་དུ་ཆུད་པའི་ཕྱིར་ནན་ཏན་དུ་བྱ་སྟེ། འདི་ནི་གནས་བརྟན་དང་བར་མ་དང་གསར་བུའི་བྱ་བ་ཞེས་བྱ་བའོ། །དུགས་ཁང་དུ་བྱ་བ་གང་ཞེ་ན། དགེ་སློང་དུགས་ཁང་དུ་འཇུག་པར་འདོད་ན་དེས་ཤེས་བཞིན་དུ་ནང་དུ་འགྲོ་བར་བྱ། ཤེས་བཞིན་དུ་ནང་དུ་འགྲེང་བར་བྱ། ཤེས་བཞིན་དུ་འདུག་པར་བྱ། དྲན་པ་མངོན་དུ་གཞག་ཅིང་སེམས་མི་གཡེང་བར་བྱ། སྤྱོད་ལམ་བཟང་བ་དང་། ཤིན་ཏུ་མཛེས་པ་དང་། ཤིན་ཏུ་བསྡམས་པ་དང་། སྒྲ་བསྐྱུང་བ་དང་། བཀུར་སྟིར་
བཅས། འཇིགས་པ་དང་དབང་དུ་འགྱུར་བར་བཅས། ཡིད་དམན་པའི་སེམས་ཕྱགས་མ་ལྟ་བུར་བྱ། གནས་བརྟན་དང་བར་མ་དང་གསར་བུ་ལ་ཡང་བྱམས་པའི་སེམས་སུ་བྱ། ཕན་པའི་སེམས་དང་རྗེས་སུ་བརྩེ་བའི་སེམས་སུ་བྱ། ཕ་དང་བུ་དང་ཕུ་ནུ་བོ་ལྟ་བུར་འདུ་ཤེས་མངོན་དུ་གཞག་པར་བྱ། དགེ་སློང་དུགས་ཁང་གི་ནང་དུ་ཞུགས་ནས། གཏམ་སྣ་ཚོགས་མི་བྱ། གཏམ་མི་རིགས་པ་མི་བྱ། སྤྱོད་ལམ་གཉིས་ལ་འཇུག་པར་བྱ་སྟེ། འཕགས་པའི་ཅང་མི་སྨྲ་བའམ། དེས་པའི་ཆོས་ཀྱི་གཏམ་ལ་སྟེ། དེ་ནི་དུགས་ཁང་གི་བྱ་བ་ཞེས་བྱའོ། །དགེ་སློང་དུགས་ཁང་དུ་ཁྲུས་བྱ་བའི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་དུགས་ཁང་དུ་རྗེས་སུ་གནང་བ་ཡང་རྒྱགས་པའི་ཕྱིར་མ་ཡིན། དྲེགས་པའི་ཕྱིར་མ་ཡིན། བརྒྱན་པའི་ཕྱིར་མ་ཡིན། འཁྲུལ་བའི་ཕྱིར་མ་ཡིན་གྱི་ལུས་འདི་གསོ་བའི་ཕྱིར་རོ། །དུགས་ཁང་ལ་ཡོན་ཏན་རྣམ་པ་ལྔ་སྟེ། རྔུལ་དང་དྲི་་མ་འབྱང་། པགས་པ་དང་མདངས་གསལ། པགས་པ་ལ་ནད་ཡོད་པ་རྣམས་འབྱིན། རླུང་དང་བད་ཀན་རྣམས་མེད་པར་བྱེད། དུགས་ཁང་ནི་ནད་མེད་པར་བྱེད་པའོ། །གཞན་ཡང་ཡོན་ཏན་རྣམ་པ་ལྔ་སྟེ། རྔུལ་དང་དྲི་མ་འབྱང་། པགས་པ་དང་མདངས་གསལ། པགས་པ་ལ་ནད་ཡོད་པ་རྣམས་འབྱིན། རླུང་དང་བད་ཀན་རྣམས་མེད་པར་བྱེད། དུགས་ཁང་དུ་སྐྱོ་བ་བསྐྱེད་པར་བྱ་བའོ། །དགེ་སློང་གིས་དུགས་ཁང་དུ་ཁྲུས་བྱེད་པར་འདོད་ན་དེས་སྔར་མཁན་པོ་ལ་ཞུ་བར་བྱེད་བཀྲུ་བའི་དུས་སུ་བཟོད་པར་བྱ། ཤེས་བཞིན་དུ་དུགས་ཁང་གི་ནང་དུ་འཇུག་པར་བྱ། སྐྱིལ་མོ་ཀྲུང་བཅས་ཏེ་འདུག་ལ་ན་བའི་འདུ་ཤེས་མངོན་དུ་གཞག་པར་བྱ། ཁྲུས་བྱ་མདུན་དུ་འདུག་ལ་མི་བདེ་བར་མི་བྱ། དྲན་པ་མངོན་དུ་བཞག་ལ་ལས་བྱ། དགེ་སློང་དག་ལས་་ཀྱང་ལས་བྱེད་པ་ཉམས་སུ་བླང་བར་བྱ། མཁན་པོ་དང་སློབ་དཔོན་ལ་མ་ཞུས་་་ཀྱི་བར་དུ་མཚུངས་པ་རྣམས་ལ་ལས་མི་བྱ། བྱེད་པ་ཡང་བདག་གིར་མི་བྱ། མཁན་པོ་དང་སློབ་དཔོན་དག་ཏུ་ཁོན་ཡོད་ན་དེ་དེ་དག་གི་དྲུང་དུ་མི་བསྐོར། དེ་སྟེ་ཆུ་བླུགས་པར་འདོད་ན་ཆུ་གྲང་མོ་དང་བསྲེས་ལ་ལུགས་ཤིག །
དེ་སྟེ་ཆུ་ཚ་ན་གྲོགས་ལ་ཡང་ཆུ་ཚའོ་ཞེས་སྦྲོན་ཅིག །ཤེས་བཞིན་དུ་ཁྲུས་བྱས་ལ་དུགས་ཁང་དེ་ན་ཁྲིའུ་དང་། རིལ་བ་དང་། ཉ་ཕྱིས་དང་། ཁྲུས་རས་དང་། དུགས་ཁང་གི་སྣོད་སྤྱད་གཞན་ཅི་ཡོད་ཀྱང་རུང་ལེགས་པར་བཀྲུས་ཏེ་གནས་་་གནས་སུ་གཞག་པར་བྱ་བ་འདི་ནི་དུགས་ཁང་དུ་ཁྲུས་བྱེད་པའི་བྱ་བ་ཞེས་བྱའོ། །དུགས་ཁང་དུ་གནས་བརྟན་གྱི་བྱ་བ་གང་ཞེ་ན། དུགས་ཁང་དུ་དགེ་སློང་་་གནས་བརྟན་གྱིས་གསར་བུ་རྣམས་ལ་ཡོ་བྱད་ལ་ཞུགས་ན་བསླང་བར་མི་བྱ། དུགས་ཁང་དེར་ཆུང་ངུ་ན་ལུས་ལས་རྔུལ་བྱུང་བ་ཙམ་ཡང་བསླང་བར་མི་བྱ། དེ་སྟེ་དེ་ན་དགེ་སློང་རྣམས་སྤྱོད་ལམ་རྣམས་མི་མཛེས་སམ། མི་བཟང་བར་འདུག་གམ། འོན་ཏེ་གཏམ་རྒྱུད་ལ་ཞུགས་ལ་དགེ་སློང་གནས་བརྟན་གྱིས་སླར་ཟློག་ཅིང་སྒོ་ཤིག །རྗེས་སུ་བསྟན་པར་བྱ། མཛེས་ཤིང་བཟང་བ་ལ་གཟུད་པར་བྱ། ཇི་ལྟ་བུ་དེར་སྤྱད་པའི་ཆོས་བཅས་པ་དེ་ལྟ་བུར་གཟུད་པར་བྱ། དེ་དག་ཆོས་ཀྱི་གཏམ་ལ་གཟུད་པར་བྱ་བ་དེ་ནི་དུགས་ཁང་དུ་གནས་བརྟན་གྱི་བྱ་བ་ཞེས་བྱའོ། །མཁན་པོའི་བྱ་བ་གང་ཞེ་ན། མཁན་པོས་ལྷན་ཅིག་སྤྱོད་པའི་རྣམས་བསླབ་པར་བྱ། གསལ་བར་བྱ། བསྒོ་བར་བྱ། རྗེས་སུ་བསྟན་པར་བྱ། སྡིག་པ་ལས་བཟློག་པར་བྱ། དགེ་བ་ལ་གཟུད་པར་བྱ། སྡིག་པའི་གྲོགས་པོ་ལས་བསྐལ་བར་བྱ། དགེ་བའི་བཤེས་གཉེན་ལ་གཞར་བར་བྱ། ལྷུང་བཟེད་ཀྱིས་བསྡུ་བར་བྱ། ཆོས་གོས་དང་། དྲ་བ་དང་། ཕོར་བུ་དང་། སྐ་རགས་དང་། རྗེས་སུ་དྲན་པ་དང་། སླར་འདྲི་བ་དང། ལུང་བསྒོ་བ་དང་། ཁ་ཐོན་ལ་གཞུག་པ་དང་། ཡིད་ལ་བྱེད་པ་ལ་གཞུག་པར་བྱ། ཉེས་པ་ལས་བསླང་བ་དང་། ན་ན་ནད་གཡོག་བྱ་བ་དང་། སྤོང་བ་ལ་གཞུག་པར་བྱ་བ་དང་། ནང་དུ་ཡང་དག་འཇོག་ལ་འཇུག་པ་དང་། བླ་མའི་ཁྱད་་་པར་ཆུད་པར་བྱ་བ་ལ་མཚུངས་པར་སྤྱོད་དུ་གཞུག་པར་བྱ། ལྷན་ཅིག་སྤྱོད་པ་་་ཕྱོགས་གང་ན་མི་བདེ་བར་གནས་པ་དེ་ནས་དབྱུང་བར་བྱ་བ་དེ་ནི་མཁན་པོའི་བྱ་བ་ཞེས་བྱའོ།། །།འདུལ་བ་གཞུང་དམ་པ། བམ་པོ་ལྔ་བཅུ་རྩ་གསུམ་པ། ལྷན་ཅིག་སྤྱོད་པའི་བྱ་བ་གང་ཞེ་ན། ལྷན་
ཅིག་སྤྱོད་པས་མཁན་པོ་ལ་སྟོན་པའོ་སྙམ་དུ་འདུ་ཤེས་མངོན་དུ་གཞག་པར་བྱ། རིམ་གྲོ་བྱ། མྱུར་དུ་ལྡང་བར་བྱ། མྱུར་དུ་འགྲོ་བར་བྱ། གུས་པར་བྱ། ཞུ་བར་བྱ་སྟེ། ལྷན་ཅིག་སྤྱོད་པས་མཁན་པོ་ལ་མ་ཞུས་ཀྱི་བར་དུ་སྤྱད་འབྲིམ་པའི་ལས་མི་བྱ། གཙུག་ལག་ཁང་སྐྱོང་གི་རེས་མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། སྔ་རེས་མི་བྱ། ཕྱད་རེས་མི་བྱ། ཟླ་རེས་མི་བྱ། ཀླུང་ལ་སྤྱོད་པར་མི་བྱ། རི་ལ་སྤྱོད་པར་མི་བྱ། དུར་ཁྲོད་དུ་སྤྱོད་པར་མི་བྱ། ལྗོངས་རྒྱུ་བར་མི་བྱ། རྐང་པ་བཀྲུ་བར་མི་བྱ། མལ་བཅའ་བར་མི་བྱ། ཆུ་བཅུ་བར་མི་བྱ། གྲོང་དུ་འཇུག་པར་མི་བྱ། མཚམས་ཀྱི་ཕྱི་རོལ་དུ་འགྲོ་བར་མི་བྱ། མི་རིགས་པའི་གང་ཟག་ལ་གཞར་བར་མི་བྱ། དེ་ལྟ་བུའི་དྲུང་དུ་འདུག་པ་ཡང་བདག་གིར་མི་བྱ། དེ་འདྲ་བའི་དྲུང་ནས་བསྙེན་བཀུར་ཡང་བདག་གིས་བླང་བར་མི་བྱ། ལྷུང་བཟེད་ཀྱང་བླང་བར་མི་བྱ། ཆོས་གོས་བླང་བར་མི་བྱ། ཟས་བླང་བར་མི་བྱ། སྨན་བླང་བར་མི་བྱ། ཡོ་བྱད་གཞན་གང་ཡང་རུང་བྱིན་ན་བདག་གིར་མི་བྱའོ། །དེ་ལྟ་བུ་ལ་བསྙེན་བཀུར་ཡང་མི་བྱ། ལྷུང་བཟེད་སྦྱིན་པར་མི་བྱ། ཟས་སྦྱིན་པར་མི་བྱ། སྨན་སྦྱིན་པར་མི་བྱ། ཡོ་བྱད་གང་ཡང་རུང་སྦྱིན་པ་བདག་གིར་མི་བྱ། དེ་འདྲ་བའི་གང་ཟག་གི་དྲུང་ནས་ལུང་བསྒོ་བ་མི་བླང་། དྲན་པར་བྱ་བ་མ་ཡིན། ཡོངས་སུ་དྲི་བར་བྱ་བ་མ་ཡིན། ཡིད་ལ་བྱ་བ་མི་དྲི། དེ་ལྟ་བུ་དག་ལ་ཡང་ལུང་བསྒོ་བ་མི་སྦྱིན། དྲན་པ་མ་ཡིན། ཡོངས་སུ་དྲི་བ་མ་ཡིན། ཡིད་ལ་བྱ་བ་ཡང་མི་བསྟན་ཏེ། བྱའོ་ཅོག་ཐམས་ཅད་ཀྱང་མཁན་པོ་ལ་མ་ཞུས་ཀྱི་བར་དུ་མི་བྱའོ། །ལས་རྣམ་པ་གསུམ་ནི་མ་གཏོགས་ཏེ། བཤང་གཅི་དང་། སོ་ཤིང་དོར་བ་དང་། མཚམས་ཀྱི་ནང་དུ་མཆོད་རྟེན་ལ་ཕྱག་བྱ་བའོ། །དེ་སྟེ་མཁན་པོའི་ལྷུང་བཟེད་བཀྲུའམ། སྲེག་པ་ཞིག་ཏུ་གྱུར་ན་ཡང་དེ་ལ་ཅི་ནས་མཁན་པོའི་ལྷུང་བཟེད་ཀྱི་ལས་བདག་གིས་བྱའོ་སྙམ་མམ། གཞན་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པ་དེས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོའི་ཆོས་གོས་དྲུབ་པར་གྱུར་ཏམ། ཁ་བཀྲུ་བར་གྱུར་
ཏམ། ཁ་བསྒྱུར་བ་ཞིག་ཏུ་གྱུར་ན་ཡང་དེ་ལ་བདག་གིས་མཁན་པོའི་ཆོས་གོས་ཀྱི་ལས་རང་གིས་་་བྱའོ་སྙམ་མམ། གཞན་ལ་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱ། དེ་སྟེ་མཁན་པོ་ན་བ་ཞིག་ཏུ་གྱུར་ན་ཡང་དེ་ལ་བདག་ཉིད་ཀྱིས་མཁན་པོ་ན་བའི་ནད་གཡོག་བྱའོ་སྙམ་མམ། གཞན་ལ་ནད་གཡོག་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱ། དེ་སྟེ་མཁན་པོ་ལ་ཐེ་ཚོམ་ཞིག་སྐྱེས་པར་གྱུར་ན། དེ་ལ་ཅི་ནས་བདག་གིས་མཁན་པོའི་ཐེ་ཚོམ་སྐྱེས་པ་དེ་བདག་ཉིད་ཀྱིས་སླར་བསལ་ལོ་སྙམ་མམ། གཞན་མཁན་པོའི་ཐེ་ཚོམ་སེལ་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་སྡིག་པ་ལ་ལྟ་བར་གྱུར་ན་ཡང་དེ་ལ་ཅི་ནས་བདག་གིས་མཁན་པོ་སྡིག་པ་ལ་ལྟ་བར་གྱུར་པ་དེ་སླར་གཏང་བར་བྱའོ་སྙམ་མམ། གཞན་ལ་སླར་གཏོང་བར་བྱེད་དུ་གཞུག་གོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་ལ་ཆད་པའི་ལས་ཤིག་མངོན་དུ་འབྱུང་ངམ་བྱུང་བར་གྱུར་ན། དེ་ལ་ཅི་ནས་བདག་གིས་མཁན་པོ་ཆད་པའི་ལས་ཀྱིས་གཅོད་པར་བྱེད་དམ་་་བཅད་ཀྱང་རུང་སྟེ། དབྱུང་བར་བྱའོ་སྙམ་དུ་ལྷན་ཅིག་སྤྱོད་པས་སྤྲོ་བ་མྱུར་དུ་བསྐྱེད་པར་བྱའོ། །དེ་སྟེ་མཁན་པོ་ལ་སྤང་བའི་ལས་ཤིག་མངོན་དུ་བྱེད་པར་་འགྱུར་རམ། བྱས་པར་གྱུར་ཀྱང་རུང་སྟེ། དེར་ཅི་ནས་བདག་གིས་མཁན་པོ་ལ་སྤང་བའི་ལས་ཤིག་མངོན་དུ་བྱེད་ཀྱང་རུང་བྱས་ཀྱང་རུང་སྟེ། དབྱུང་ངོ་སྙམ་དུ་ལྷན་ཅིག་སྤྱོད་པས་མྱུར་དུ་སྤྲོ་བ་བསྐྱེད་པར་བྱའོ། །དེ་སྟེ་མཁན་པོ་ལ་དགེ་འདུན་གྱི་ལྷག་མའི་ཉེས་པ་ཞིག་བྱུང་བར་གྱུར་ན། དེ་ལ་ཅི་ནས་བདག་གིས་མཁན་པོ་ལ་ཆད་པར་བྱེད་པ་བྱིན་ཅིག་པ་དང་། གཞི་ནས་བསླང་བའི་ཆད་པའམ། ཆད་པ་བྱས་ཟིན་ནས་ཡིད་མགུ་བར་བྱ་བ་བྱིན་ཅིག་པའམ། གཞི་ནས་བསླང་སྟེ་ཡིད་མགུ་བར་བྱ་བའམ། ཡིད་མགུ་བར་སྤྱད་ནས་དབྱུང་བ་བྱིན་ཅིག་པར་ལྷན་ཅིག་གནས་པས་སྤྲོ་བ་བསྐྱེད་པར་གྱུར་ན་ནི་ལེགས། སྤྲོ་བ་མ་བསྐྱེད་ན་འདས་པ་དང་བཅས་པར་འགྱུར་རོ། །དེ་ལྟར་
ལྷན་ཅིག་སྤྱོད་པས་མཁན་པོ་ལ་བྱ་བ་ཅི་དང་ཅི་ཡོད་ཀྱང་རུང་སྤྲོ་བ་བསྐྱེད་པར་བྱ་བ་དེ་བཞིན་དུ་་་མཁན་པོས་ཀྱང་ལྷན་ཅིག་སྤྱོད་པ་ལ་བྱ་བ་ཅི་དང་ཅི་ཡོད་ཀྱང་རུང་སྤྲོ་བ་བསྐྱེད་་་པར་བྱ་སྟེ། ཞུ་བ་རྣམས་ནི་མ་གཏོགས་སོ། །ལྷན་ཅིག་སྤྱོད་པས་མཁན་པོའི་སྟན་གདིང་བར་བྱ། རྐང་པ་བཀྲུ་བའི་ཆུ་དང་། ལྷམ་ཡང་བཤམས་ཏེ་ཕྱོགས་གཅིག་ཏུ་གཞག་པར་བྱ། རྐང་པ་བཀྲུ་བར་བྱ། བསྐུ་བར་བྱ། མལ་བྱའོ། །གཅི་བའི་སྣོད་དང་བཤང་བའི་སྣོད་བཤམས་ཏེ་གཞག་པར་བྱ། དེ་སྟེ་ལུང་ཞིག་མནོད་དགོས་པར་གྱུར་ན་ཡང་ལུང་མནོད་པར་བྱ། ཡིད་ལ་བྱེད་པ་ཞིག་་མནོད་དགོས་པར་གྱུར་ནའང་ཡིད་ལ་བྱེད་པ་མནོད་པར་བྱ། ཕྱོགས་གཅིག་ཏུ་སོང་སྟེ་འདུག་ནས་བསྒོམ་པར་བྱའོ། །ནང་པར་ལངས་ནས་གཅི་བའི་སྣོད་དང་བཤང་བའི་སྣོད་དབྱུང་བར་བྱ། མཁན་པོའི་རྐང་པ་ལ་མགོ་བོས་ཕྱག་བྱས་ཏེ། མཁན་པོ་བདེ་བར་མཛད་དམ། བདེ་བར་བགྱིས་སམ། བདེ་བར་སྤྱད་དམ་ཞེས་དྲི་བར་བྱ། དེ་སྟེ་ན་བར་གྱུར་ན་ཡང་ན་བའི་སྨན་དང་། ནད་གཡོག་ལ་སྤྲོ་བ་བསྐྱེད་པར་བྱ། དེ་སྟེ་མི་ན་ན་ནི་བདེ་བར་ཡལ་བར་གཞག །དེ་སྟེ་དགེ་འདུན་གྱི་ཟས་ཤིག་གམ་མགྲོན་དུ་བོས་པའི་ཟས་ཀྱང་རུང་སྟེ། དགེ་འདུན་གྱི་ཟས་ནི་མཁན་པོ་དང་དགེ་འདུན་གྱི་ཟས་མཆིས་ཀྱིས་དེང་དགེ་བ་་་བདེ་བར་སྤྱོད་ཅིག །དེ་སྟེ་བསོད་སྙོམས་ཀྱི་ཟས་ན་ཡང་མཁན་པོ་བསོད་སྙོམས་ལ་གཤེགས་ཀྱིས་ཆོས་ཤིག་ཅེས་བསྒོའོ། །ལྷན་ཅིག་སྤྱོད་པས་མཁན་པོ་ལ་སོ་ཤིང་དང་བདེ་བའི་ཆུ་དང་། ལྕི་བ་དང་། ཕྱེ་མ་དབུལ་བར་བྱ། ནམ་མཁན་པོས་ལས་དེ་རྣམས་ཟིན་པ་དེ་ན་ལྷུང་བཟེད་དང་ཆོས་གོས་བསྟབ་པར་བྱ། དེ་སྟེ་དགེ་འདུན་དང་ལྷན་ཅིག་བསོད་སྙོམས་ལ་འཇུག་ན་ནི་མཁན་པོ་མདུན་དུ་བཏང་ལ་བདག་གིས་གྲལ་གང་དུ་བབ་པ་ནས་འགྲོ་བར་བྱ། དེ་སྟེ་གང་ཟག་གི་བསོད་སྙོམས་ལ་འཇུག་ན་ནི་མཁན་པོའི་སྦྱར་མ་དང་ལྷུང་བཟེད་དང་ཁར་་་གསིལ་དབུལ་བར་བྱ། དེ་སྟེ་རླུང་དང་ཆར་པ་དང་དུས་གྲང་བ་ཞིག་ཏུ་གྱུར་ན་མཁན་པོའི་སྦྱར་མ་འོག་ཏུ་ཆུག་ལ་བདག་གི་སྟེང་དུ་ཕྱུང་ཤིག །དེ་སྟེ་ཡུལ་དྲོ་ན་བདག་གི་སྦྱར་མ་འོག་ཏུ་ཆུག་ལ་མཁན་པོའི་སྟེང་
དུ་ཕྱུང་ཤིག །ལྷན་ཅིག་སྤྱོད་པ་མཁན་པོའི་མདུན་དུ་སོང་ལ་ཟིལ་པ་ལ་སོགས་པ་བསལ་བར་བྱ། དེ་སྟེ་ཆུ་འགྲམ་མམ་གང་གཡང་ས་ཞིག་ན་མཁན་པོའི་ལག་པ་ནས་བཟུང་ཞིང་བརྟེན་པར་བྱ། དོང་ནས་གྲོང་འདབ་ཏུ་ཕྱིན་ན་སྦྱར་མ་དང་ལྷུང་བཟེད་དང་ཁར་གསིལ་དབུལ་བར་བྱ། ཕུལ་ཏེ་མཁན་པོའི་མདུན་དུ་བཏང་ལ་གྲོང་གི་ནང་དུ་འཇུག་པར་བྱའོ། །དེ་སྟེ་སྐས་སམ། ཐེམ་སྐས་ཤིག་འཛེག་ན་ཡང་ལྷན་ཅིག་སྤྱོད་ལ་སྔོན་དུ་འཛེགས་ལ་ལག་ནས་དྲང་བར་བྱ། དེ་ན་ཆོས་བཞིན་གྱི་རྙེད་པ་ཞིག་གྲུབ་ན་ཡང་བདག་གིས་བླང་བར་བྱ། བསོད་སྙོམས་སྤྱད་དེ་སླར་གྲོང་གི་ཕྱི་རོལ་དུ་བྱུང་ན་མཁན་པོའི་སྦྱར་མ་དང་ལྷུང་བཟེད་དང་ཁར་གསིལ་བླངས་ལ་་་མཁན་པོའི་མདུན་དུ་བཏང་ནས་གཙུག་ལག་ཁང་དུ་འདོང་བར་བྱའོ། །དེར་ལྷགས་ནས་ལྷུང་བཟེད་དང་ཆོས་གོས་བཞག་སྟེ་མཁན་པོའི་རྐང་པ་བཀྲུ་བའི་ཆུ་དང་ལྷམ་བསྙེན་ཏེ་བཞག་ལ་རྐང་པ་བཀྲུ་བར་བྱའོ། །དེ་ནས་དུས་ལ་བབ་པར་གྱུར་ན་མཁན་པོའི་ལྷུང་བཟེད་ཀྱི་གཞི་གདིང་ཞིང་ལྷུང་བཟེད་དབུལ་བར་བྱའོ། །བདག་གིས་ཟས་བཟང་བ་དང་ཞིམ་པ་དང་། དམ་པ་ཅི་ཡོད་པ་མཁན་པོ་ལ་དབུལ་བར་བྱ། མཁན་པོས་ཀྱང་ཚོད་རིག་པར་བྱ། ཟས་ཀྱི་བྱ་བ་བྱས་པ་དང་། མཁན་པོ་ལ་བདེ་བའི་ཆུ་བསྙེན་པར་བྱ་ལྕི་བ་དང་ཕྱེ་མས་ལྷུང་བཟེད་བཀྲུས་ལ་ལྷུང་བཟེད་དང་ཆོས་གོས་སླར་གཞུག་པར་བྱ། མཁན་པོ་ལ་ཕྱག་བྱས་ནས་མཁན་པོ་འདི་བཞིན་བཞུགས་སམ། ཉིན་པར་སྤྱོད་པར་གཤེགས་སམ་ཞེས་དྲི་བར་བྱ། དེ་སྟེ་ཉིན་པར་སྤྱོད་པར་འགྲོ་ན་ཡང་མཁན་པོའི་ཁྲིའུ་དང་གདིང་བ་དང་། རིལ་བ་སྤྱི་རིངས་ཁྱེར་ལ་མཁན་པོ་མདུན་དུ་བཅུག་སྟེ་ཉིན་པར་གང་ན་སྤྱོད་པར་འགྲོའོ། །སོང་ནས་མཁན་པོའི་སྟན་བཏིང་ལ་ལུང་མནོད་དགོས་ན་ཡང་ལུང་མནོད་པར་བྱ། ཡིད་ལ་བྱེད་པ་མནོད་དགོས་ན་ཡང་ཡིད་ལ་བྱེད་པ་མནོས་ལ་ཕྱོགས་གཅིག་ཏུ་སོང་ནས་བསྒོམ་པར་བྱའོ། །དེ་ནས་དུས་ལ་བབ་ན་མཁན་པོའི་ཁྲིའུ་དང་། གདིང་བ་དང་། རིལ་བ་སྤྱི་རིངས་ཁྱེར་ཏེ། མཁན་པོ་མདུན་དུ་བྱས་ལ་འགྲོ་བར་བྱའོ། །དེ་སྟེ་གསོ་སྦྱིན་གྱི་དུས་
ལ་བབ་སྟེ། འདུ་བར་གྱུར་ན་ཡང་མཁན་པོའི་སྟན་ལྟེབས་ན་བརྐྱང་བར་བྱ། བརྐྱང་ན་ནི་ལེགས་པར་གདིང་བར་བྱ། དེ་ནས་དུས་སུ་བསྒོའམ། གཎྜཱི་བརྡུངས་ཀྱང་རུང་སྟེ། ལག་པ་གཡོན་པས་ནི་མཁན་པོའི་ལག་པ་ནས་བཟུང་། ལག་པ་གཡས་པས་ནི་མར་མེ་ཐོགས་ཏེ་མཁན་པོ་མདུན་དུ་བྱས་ལ་གསོ་སྦྱིན་གྱི་གནས་སུ་འདོང་བར་བྱའོ། །སོ་སོར་ཐར་པའི་མདོ་བཀླགས་ཟིན་ན་མཁན་པོའི་དྲུང་དུ་སོང་ལ། མཁན་པོ་ཅི་གཤེགས་སམ། ཆོས་གསན་ཅིང་བཞུགས་ཞེས་དྲི་བར་བྱ། དེ་སྟེ་འགྲོ་ན་ལག་པ་གཡོན་པས་མཁན་པོ་གཟུང་། ལག་པ་གཡས་པར་ནི་་་མར་མེ་ཐོགས་ཏེ་མཁན་པོ་མདུན་དུ་བྱས་ལ་གཙུག་ལག་ཁང་དུ་འདོང་བར་བྱའོ། །དེ་སྟེ་དུགས་ཁང་དུ་ཁྲུས་བྱེད་པ་ཞིག་ཏུ་གྱུར་ན་ནང་པར་སྔར་ལངས་ནས་མཁན་པོ་དེང་དུགས་ཁང་དུ་ཁྲུས་མཛད་ཀྱིས་ཆར་གསོལ་ཞེས་བསྒོ་བར་བྱ། ལྷན་ཅིག་སྤྱོད་པས་མཁན་པོའི་ཕྱིར་དུགས་ཁང་དུ་སྟན་དང་ཁྲིའུ་དང་། རིལ་བ་སྤྱི་་རིངས་དང་། ཁྲུས་རས་དང་དུགས་ཁང་གི་ཡོ་བྱད་གཞན་གང་ཡང་རུང་སྟེ་ཁྱེར་ཏེ་མཁན་པོ་མདུན་དུ་བྱས་ནས་དུགས་ཁང་དུ་འདོང་བར་བྱ། འོངས་ནས་ཀྱང་ཆོས་གོས་ཕྱོགས་གཅིག་ཏུ་བཞག་ལ་མཁན་པོ་ལས་མི་ཉེ་མི་རིང་བར་འདུག་པར་བྱ། ནམ་མཁན་པོ་རྔུལ་བར་གྱུར་ན་དེ་ན་ལྷན་ཅིག་སྤྱོད་པ་དེས་དེ་ལ་རིམ་བཞིན་རྗེས་སུ་ལས་རྣམས་བྱ་སྟེ་བཀྲུ་བར་བྱའོ། །བཀྲུས་ནས་མདུན་དུ་བཅུག་སྟེ། གཙུག་ལག་ཁང་དུ་བསྐྱལ་བར་བྱ། དེའི་འོག་ཏུ་བདག་ཉིད་བཀྲུ་བར་བྱ། དེ་སྟེ་ལྷན་ཅིག་སྤྱོད་པ་དེ་མཁན་པོའི་དྲུང་ནས་དགེ་བའི་ཆོས་མི་འཕེལ་བར་གྱུར་ན་མཁན་པོ་ལ་བདག་དགེ་སློང་མིང་འདི་ཞེས་བགྱི་བ་འདི་ལ་གཏད་དུ་གསོལ་ཞེས་སྨྲོས་ཤིག །མཁན་པོས་ཀྱང་དགེ་སློང་དེ་ལ་དགེ་སློང་འདི་ཅི་འདྲ། དེའི་རྗེས་སུ་འབྲང་བ་དང་དྲུང་ན་འདུག་པ་ཅི་འདྲ། འདིའི་ལུང་རྣམས་སྟོན་ཏམ། དེ་སྟེ་མི་སྟོན། རྗེས་སུ་སྟོན་ཏམ། དེ་སྟེ་མི་སྟོན་པ་བརྟག་པར་བྱ། དཔྱད་པར་བྱ། དེ་བཞིན་དུ་བརྟགས་དཔྱད་ནས་དེ་སྟེ་རུང་བ་ཞིག་ཏུ་གྱུར་ན། དེ་ལ་གཏད་པར་བྱ། དེ་སྟེ་རུང་བ་མ་ཡིན་ན་གཞན་ལ་
གཏད་པར་བྱའོ། །དེ་སྟེ་མཁན་པོ་ཉིད་རུང་བ་མ་ཡིན་ལ་ཚུལ་དང་མི་ལྡན་ན་མ་ཞུས་པར་སོང་ཡང་བླ་སྟེ། འདི་ནི་ལྷན་ཅིག་སྤྱོད་པའི་བྱ་བ་ཞེས་བྱའོ། །སློབ་དཔོན་གྱི་བྱ་བ་གང་ཞེ་ན། སློབ་དཔོན་གྱིས་ཉེ་གཡོག་རྣམས་ཤེས་པར་བྱ་བ་ནས་སྔ་མ་བཞིན་ཏེ། ཕྱོགས་གང་ན་ཉེ་གཡོག་དེ་ཉོན་མོངས་ཤིང་འདུག་པ་ཞིག་ཏུ་གྱུར་ན་ཕྱོགས་དེ་ནས་དགུག་པར་བྱ། དགུག་ཏུ་གཞུག་པར་བྱ་སྟེ། འདི་ནི་སློབ་དཔོན་གྱི་བྱ་བ་ཞེས་བྱའོ། །ཉེ་གཡོག་གི་བྱ་བ་གང་ཞེ་ན། ཉེ་གཡོག་གིས་སློབ་དཔོན་ལ་སྟོན་པའོ་སྙམ་དུ་འདུ་ཤེས་མངོན་དུ་བཞག་ལ་རིམ་གྲོ་བྱ་བ་ནས། སྔ་མ་བཞིན་མ་ཞུས་ཀྱང་འགྲོ་བར་བྱ་བའི་བར་དུ་སྟེ། དེ་ནི་ཉེ་གཡོག་གི་བྱ་བ་ཞེས་བྱའོ། །དགེ་ཚུལ་གྱི་བྱ་བ་གང་ཞེ་ན། དགེ་ཚུལ་གྱིས་མཁན་པོ་དང་སློབ་དཔོན་ལ་སྟོན་པའོ་སྙམ་དུ་འདུ་ཤེས་མངོན་དུ་བཞག་ལ་རིམ་གྲོ་བྱ་བ་ནས་སྔ་མ་བཞིན་ནོ། །དེ་སྟེ་མཁན་པོའམ། སློབ་དཔོན་སྡིག་པ་ལྟ་བར་གྱུར་ན་རང་གིས་སླར་གཏང་བར་བྱ། ཡང་ན་་་་གཏོང་དུ་འཇུག་པར་བྱ་སྟེ། དེ་ལྟར་སྤྲོ་བ་སྐྱེས་ན་ནི་དེ་བཞིན་ལེགས། མ་སྐྱེས་ན་འདས་པ་དང་བཅས་པར་འགྱུར་རོ། །དེར་ཡང་དགེ་ཚུལ་ཕས་ཇི་ལྟར་མཁན་པོ་དང་། སློབ་དཔོན་ལ་བྱུང་ཞིང་གྱུར་པའི་རྣམས་ཇི་ལྟར་གྱིས་ཤིག་ཅེས་སྤྲོ་བ་བསྐྱེད་པར་བྱ་བ་དེ་བཞིན་དུ་མཁན་པོ་དང་། སློབ་དཔོན་གྱིས་ཀྱང་དགེ་ཚུལ་ཕ་ལ་བྱུང་ཞིང་གྱུར་པའི་རྣམས་ཇི་ལྟར་བྱ་ཞེས་སྤྲོ་བ་བསྐྱེད་པར་བྱའོ། །དེ་ལ་ཞུ་བ་རྣམས་ནི་མ་གཏོགས་སོ། །དགེ་ཚུལ་ཕས་མཁན་པོ་དང་། སློབ་དཔོན་གྱི་སྟན་གདིང་བ་ལ་སོགས་པ་བྱ་བ་སྔ་མ་བཞིན་ཏེ་བདག་ཉིད་ཐ་མར་བཀྲུ་བར་བྱ་བའི་བར་དུའོ། །འདི་ལྟར་དགེ་ཚུལ་ཕས་རྩྭ་སྔོན་པོ་མེད་པར་བྱ། མེ་ཏོག་རྣམས་བཏོག །འབྲས་བུ་རྣམས་བཏོག །སོ་ཤིང་རྣམས་སྦྱིན། ལྷུང་བཟེད་ཀྱི་གཞི་ལོ་མ་རྣམས་སྦྱིན། རུང་བར་བྱ། དགེ་སློང་རྣམས་ལ་བྱིན་ལེན་དུ་གཞུག་པར་བྱ། མཛེས་པ་དང་། བག་ཡོད་པར་བསྒྲུབ་པར་བྱ། དེ་སྟེ་དགེ་ཚུལ་ཕ་དེ་མཁན་པོ་དང་སློབ་དཔོན་གྱི་དྲུང་ནས་དགེ་བའི་ཆོས་འཕེལ་བར་མི་་་འགྱུར་བ་ནས། སྔ་མ་བཞིན་མ་ཞུས་ཀྱང་སོང་
ཡང་བླ་བའི་བར་དུ་སྟེ། འདི་ནི་དགེ་ཚུལ་ཕའི་བྱ་བ་ཞེས་བྱའོ། །ནན་ཏན་དུ་བྱ་བ་གང་ཞེ་ན། དེ་སྟེ་དགེ་འདུན་གྱི་ཀུན་དགའ་ར་བར་གནོད་པ་ཞིག་བྱུང་ན་དེར་དགེ་སློང་གིས་ཇི་ལྟར་དེ་མི་ཤོར་ཞིང་ཟིན་པར་བྱ། དེ་སྟེ་རྣམ་གྲངས་གང་གིས་ཀྱང་ཟིན་པར་མ་གྱུར་ན་གཞན་དག་ལ་ནི་བབ་བབ་ཏུ་སྨྲ་བར་མི་བྱའི། ཐོག་མར་རྒྱལ་པོའི་གནང་བ་རྣམས་ལ་བསྒོ་བར་བྱ། དེའི་འོག་ཏུ་བཙུན་མོ་དང་། གཞོན་ནུ་དང་། བློན་པོ་དང་། དེད་དཔོན་དང་། ཞང་བློན་དང་། ཞབས་འབྲིང་བ་རྣམས་ལ་བསྒོ་བར་བྱ། དེ་ལ་ནན་ཏན་དུ་བྱ་བ་ནི་ཇི་ནས་ཚིག་གིས་བསྟན་པ་ཙམ་གྱིས་་ཐར་བར་འགྱུར་གྱིས་དེ་ལ་གསང་བའི་ལས་རྣམས་མི་འབྱུང་བར་བྱ་སྟེ། དེ་ནི་ནན་ཏན་དུ་བྱ་བ་ཞེས་བྱའོ། །ཕྱི་བཞིན་འབྲང་བའི་དགེ་སྦྱོང་གི་བྱ་བ་གང་ཞེ་ན། ཕྱི་བཞིན་འབྲང་བའི་དགེ་སྦྱོང་གིས་སྔ་ན་མོའི་དགེ་སྦྱོང་ལས་རིང་ནས་ཀྱང་མ་ཡིན། ཤིན་ཏུ་བསྙེན་དེ་ཡང་མ་ཡིན། ཕྲག་པ་སྦྱར་ཞིང་ཡང་མི་འགྲོ་བར་བྱ། ཁྱིམ་གྱི་ནང་དུ་འཇུག་ན་ཡང་གཏམ་གློ་བུར་དུ་དེ་ལ་མི་བྱ། ཕྱི་ནས་སྨྲ་བར་བྱ། དེས་བསྒོ་བ་རྣམས་བྱ། བཀུར་སྟིར་བྱ། བདག་དམན་པར་བྱ། འཇིགས་པ་དང་དབང་དུ་འགྱུར་བར་བྱ། དགེ་སྦྱོང་སྔ་ན་པོ་ཆོས་མ་ཡིན་པ་ཞིག་སྨྲ་ན་སླར་དགག་པར་བྱ། ཆོས་བཞིན་དུ་སྨྲ་ན་རྗེས་སུ་ཡི་རང་བར་བྱ། དེ་ལ་ཆོས་བཞིན་པའི་རྙེད་པ་ཞིག་བྱུང་ན་བླང་བར་བྱ་སྟེ་འདི་ནི་ཕྱི་བཞིན་འབྲང་་་བའི་དགེ་སྦྱོང་གི་བྱ་བ་ཞེས་བྱའོ། །གྲོང་དུ་ཉེ་བར་འགྲོ་བའི་བྱ་བ་གང་ཞེ་ན། རིགས་སུ་སྟོན་པའི་དགེ་སློང་གིས་དྲེགས་པར་མི་བྱ། ང་རྒྱལ་མི་བསྐྱེད། མི་བརྟན་པར་མི་བྱ། བྱུང་རྒྱལ་དུ་མི་སྨྲ། མི་གཙིགས་པར་མི་བྱ། ཡང་དག་པར་ཤེས་པར་བྱ། ཉེ་བར་གཞག་པར་བྱ། སེམས་མི་གཡེང་བར་བྱ། དགའ་བར་འགྱུར་བ་དང་། སྤྱོད་ལམ་མཛེས་པར་བྱ། ཤིན་ཏུ་བསྡམ་པ་དང་། ཤིན་ཏུ་བཀབ་པ་དང་། སྒྲ་ཆུང་བ་དང་། མིག་གཉའ་ཤིང་གང་ཙམ་ལས་མི་གཡེང་བར་བྱ། བཀུར་སྟིར་བཅས། བདག་ཉིད་དམན་པར་བཅས། འཇིགས་པ་དང་། དབང་དུ་འགྱུར་བར་བཅས། ཡིད་དམན་པ་དང་། སེམས་ཕྱགས་མ་དང་འདྲ་བར་བྱ། རྙེད་པ་དང་བཀུར་སྟི་ལ་འདོད་པར་
མི་བྱ། ཕན་པར་བྱེད་པ་དེ་ནི་གྲོང་དུ་འགྲོ་བར་བྱེད་པའི་བྱ་བ་ཞེས་བྱའོ། །གྲོང་དུ་འགྲོ་བའི་བྱ་བ་གང་ཞེ་ན། དགེ་སློང་གྲོང་དུ་འགྲོར་འདོད་ན་ཤེས་བཞིན་དུ་འགྲོ་བར་བྱ། དྲན་པ་ཉེ་བར་གཞག་པར་བྱ། སེམས་མི་གཡེང་བར་བྱ། དབང་པོ་བསྡམ་པར་བྱ། ཡིད་མི་གཡེང་བར་བྱ། སྔ་ཕྱི་ལ་འདུ་ཤེས་པ་དང་། བླ་འོག་ལ་འདུ་ཤེས་གཞག །དགེ་སློང་དྲན་པ་ཉམས་བཞིན་དུ་གྲོང་དུ་འགྲོ་ན་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། དགེ་སློང་འཁོད་པ་རྣམས་ལ་མ་བསྒོ་བཞིན་དུ་གྲོང་དུ་དུས་མ་ཡིན་པར་འཇུག་པ་དང་། མ་བརྟགས་པར་སྟན་ལ་འདུག་པ་དང་། རིག་པའི་སྐྱེས་པ་མེད་བཞིན་དུ་བུད་མེད་ལ་ཆོས་ཚིག་ལྔའམ་དྲུག་ལས་ལྷག་པར་སྟོན་པ་དང་། བུད་མེད་དང་ལྷན་ཅིག་གཉིས་སུ་སྐྱབས་ཡོད་པ་དབེན་པ་ན་འདུག་པར་བྱེད་པ་དང་། སྨན་དང་ནད་དུ་བཅས་པའི་གྲོང་དུ་ནན་གྱིས་སྟན་ལ་འདུག་པར་བྱེད་པའོ། །དགེ་སློང་དྲན་པ་ཉམས་བཞིན་དུ་གྲོང་དུ་འགྲོ་ན་གཞན་ཡང་ཉེས་པའི་དམིགས་རྣམ་པ་ལྔར་རིག་པར་བྱ་སྟེ། ཕྱི་ཕྱིར་བུད་མེད་ལ་བལྟ་བ་དང་། ལྟ་བ་ལས་ཀྱང་གཏམ་དུ་འཛེར་བ་དང་། གཏམ་ཟེར་བ་ལས་ཆགས་པར་གྱུར་པ་དང་། ཆགས་པར་གྱུར་པ་ལས་ཚུལ་བཞིན་མི་བྱེད་པ་དང་། ཚུལ་བཞིན་ཡིད་ལ་མི་བྱེད་པས་ན་མ་དད་བཞིན་མི་ཚངས་པར་་སྤྱོད་པར་འགྱུར་ཏེ། ཉེས་པ་འབྱུང་བར་འགྱུར་བའམ། ཡང་ན་བསླབ་པ་ཕུལ་ནས་སླར་བབས་པར་འགྱུར་རོ། །དྲན་པ་ཉེ་བར་བཞག་བཞིན་དུ་གྲོང་གི་ནང་དུ་འཇུག་ན་ཉེས་པའི་དམིགས་དེ་ལྟ་བུ་འབྱུང་བར་མི་འགྱུར་ཏེ། དེ་ནི་གྲོང་དུ་འགྲོ་བའི་བྱ་བ་ཞེས་བྱའོ། །གྲོང་དུ་ཉེ་བར་སོང་བའི་བྱ་བ་གང་ཞེ་ན། གྲོང་དུ་སོང་བའི་དགེ་སློང་གིས་གཏམ་སྣ་ཚོགས་མི་སྨྲ། གཏམ་ངན་པ་མི་བྱ། ཆོས་ཀྱི་གཏམ་སྨྲ་བར་བྱ། གཏམ་རྒྱུད་མི་ཆད་པར་བྱ། ཁྱིམ་པའི་རྣམས་ལ་ཆོས་ཀྱི་གཏམ་ཡང་དག་པར་བསྟན། བསྟབས། ཡང་དག་པར་གཟེངས་བསྟོད་པར་བྱ། རབ་ཏུ་མགུ་བར་བྱ། སྐྱབས་སུ་འགྲོ་བའི་བསླབ་པའི་གནས་འཛིན་དུ་གཞུག །དུས་ཁྲིམས་ལ་
གནས་པ་དང་། ཚངས་པར་སྤྱོད་པ་ལ་གནས་པ་དང་། སྦྱིན་པ་དང་། དུལ་བ་དང་། སྡོམ་པ་དང་། སྐྱེས་བུ་དམ་པ་བསྙེན་པའི་ཆོས་ཉན་པ་དང། ཚུལ་བཞིན་ཡིད་ལ་བྱེད་པ་དང་། ཆོས་དང་རྗེས་སུ་མཐུན་པའི་ཆོས་ལ་ནན་ཏན་དུ་བྱེད་པ་དང་། ལམ་མ་ཡིན་པ་ལ་ལམ་མ་ཡིན་པར་དེ་ལྟར་ཡང་དག་པར་བསྒྲག་པར་བྱ། ཡེ་ཤེས་དང་ལྟ་བ་རྣམ་པར་སྦྱང་བར་བྱ་སྟེ། དེ་ནི་གྲོང་དུ་ཉེ་བར་སོང་བའི་བྱ་བ་ཞེས་བྱའོ། །གྲོང་དུ་ཉེ་བར་སོང་བའི་གནས་བརྟན་གྱི་བྱ་བ་གང་ཞེ་ན། གྲོང་དུ་སོང་བའི་དགེ་སློང་གནས་བརྟན་གྱིས་དེ་ན་དགེ་སློང་གསར་བུ་རྣམས་ལ་བསྒོ་བར་བྱ། རྗེས་སུ་བསྟན་པར་བྱ། ཅི་རྒྱགས་པ་དང་། དྲེགས་པ་དང་། ལུས་ལ་འཚོག་པ་དང་། རྩེད་མོ་མི་བྱེད་པར་བྱ། དགའ་བར་འགྱུར་བ་ལ་གཞུག་པར་བྱ། ཇི་ལྟར་མཚུངས་པར་སྤྱོད་པ་བཅས་པ་ལ་གཞུག་པར་བྱ། དེ་དག་གིས་ཀྱང་དེས་ཇི་ལྟར་བསྒོ་བ་དང་། རྗེས་སུ་བསྟན་པའི་ཚིག་རྣམས་ལ་མཉན་པར་བྱ་སྟེ། དེ་གྲོང་དུ་སོང་བའི་གནས་བརྟན་གྱི་བྱ་བ་ཞེས་བྱའོ། །གཞི་ན་གནས་པའི་བྱ་བ་གང་ཞེ་ན། གཞི་ན་གནས་པའི་དགེ་སློང་གིས་མདངས་བཟང་བ་དང་། ཁྲོ་གཉེར་དང་བྲལ་བར་བྱ། དྲན་པ་ཐོག་མར་འགྲོ་བ་དང་། ཐོག་མར་སྨྲ་བར་བྱ་སྟེ། ཚུར་སྤྱོན་བདེ་བར་བྱོན་ནམ་ཞེས་ཚིག་སྙན་པ་དང་། ཚིག་ཡིད་དུ་འོང་བ་དང་། མགུ་བར་འགྱུར་བས་སྨྲ་བར་བྱ། གློ་བུར་དུ་ལྷགས་པའི་དགེ་སློང་དག་མཐོང་ནས་མཛའ་བའི་ཚུལ་གྱིས་མདུན་དུ་བསུ་བར་བྱ། སྙན་པའི་ཚིག་གིས་རབ་ཏུ་དགའ་བར་བྱ། བདེ་བ་ལ་རེག་པར་སྤྱོད་དམ། བདེ་བར་ལྷགས་སམ་ཞེས་དྲི་བར་བྱ། དེ་སྟེ་རྒན་པ་ཞིག་ཡིན་ན་ནི་དེ་ལ་ཕྱག་བྱས་ནས་ལྷུང་བཟེད་དང་ཆོས་གོས་བླངས་ཏེ་གཙུག་ལག་ཁང་གི་ནང་དུ་བཅུག་ལ་སྟན་ལ་གཞག་པར་བྱ། རྐང་པ་བཀྲུ་ཞིང་བླ་མར་བྱ། སྐོམ་ན་ཆུ་གྲང་མོ་བླུད་པར་བྱ། ཇི་ལྟར་ནུས་ཤིང་མགུ་བར་འགྱུར་བའི་ཆོས་བཞིན་བསྒྱུར་བར་བྱ། ཇི་ལྟར་རིགས་པ་བཞིན་མལ་སྟན་རྣམས་ཀྱང་སྦྱིན་པར་བྱ། ཇི་སྲིད་དུ་འདུག་པ་དེ་ལ་ཕ་དང་། ཕུ་ནུ་དང་། བུ་ལྟར་འདུ་ཤེས་མངོན་དུ་གཞག་ཅིང་གཟུང་བར་བྱའོ། །
ན་ན་ཡང་གཡེལ་བར་མི་དོར་ཏེ། དེ་ནི་གཞི་ན་གནས་པའི་བྱ་བ་ཞེས་བྱའོ། །ངལ་བསོ་བའི་བྱ་བ་གང་ཞེ་ན། གློ་བུར་དུ་འོངས་པའི་དགེ་སློང་གིས་གཙུག་ལག་ཁང་དུ་འོངས་ན་དེས་གཞི་ན་གནས་པའི་དགེ་སློང་དག་ལས་མལ་སྟན་གྱི་རྣམས་་བརྐམ་ཞིང་རིངས་ཐབས་སུ་དགུག་པར་མི་བྱ། སྣང་བའི་གནས་སུ་འདུག་པར་བྱ། སྤྱོད་ལམ་བཟང་བར་བྱ། ལེགས་པར་བགོ་བར་བྱ། ལེགས་པར་བསྡམ་པར་བྱའོ། །འདི་ཡང་ངལ་བསོ་བའི་བྱ་བ་ཡིན་ཏེ། གཞི་ན་གནས་པའི་དགེ་སློང་དག་གིས་དགེ་སློང་གློ་བུར་དུ་ལྷགས་པ་མཐོང་ན་དེ་སྟེ་ངོ་ཤེས་ན་ངལ་བསོ་བར་བྱ། ཇི་ལྟར་མཚུངས་པར་སྤྱོད་པའི་ཆོས་བཅས་པ་བཞིན་དུ་མཚུངས་པར་སྤྱད་པར་བྱ། དེ་སྟེ་ངོ་མི་ཤེས་ན་བབ་བབ་ཏུ་ངལ་བསོ་བར་མི་བྱ། དགེ་སློང་དག་ལ་ཡང་ཚེ་དང་ལྡན་པ་འདི་སུའི་ལྷན་ཅིག་སྤྱོད་པ་ཡིན། འདི་སྤྱོད་པ་ཇི་ལྟ་བུ་ཞེས་དྲི་བར་བྱའོ། །དེ་སྟེ་དེའི་སྤྱོད་པ་དང་། སྤྱོད་ཡུལ་དང་། ཚུལ་ཁྲིམས་དང་། སྡོམ་པ་དང་། མཚུངས་པར་སྤྱོད་པའི་རྣམས་རྟོགས་ན་གདོད་ངལ་བསོ་བར་བྱའོ། །དེ་གཅིག་པུ་ལ་གཙུག་ལག་ཁང་གཏད་པར་མི་བྱ། དགེ་འདུན་གྱི་མཛོད་དང་། བང་བ་དང་། དགེ་འདུན་གྱི་མལ་ལ་དབང་དུ་གཞུག་པར་མི་བྱ། ཤིན་ཏུ་རྟོགས་པར་བྱས་ལ་གདོད་ཡིད་གཅུགས་པར་བྱ་བ་དེ་ནི་ངལ་བསོ་བའི་བྱ་བ་ཞེས་བྱའོ། །བར་སྣང་གི་བྱ་བ་གང་ཞེ་ན། བར་སྣང་ཐམས་ཅད་ནི་མཚམས་གཅིག་པ་མ་ཡིན་ཏེ། དེར་གནས་པ་དང་། འདི་ན་གནས་པ་ལྷན་ཅིག་ཏུ་ལས་བྱ་ཞིང་བསྐྱོ་བ་ཡང་མི་བརྩན། འདི་ན་གནས་པ་དང་དེ་ན་གནས་པ་དག་ལྷན་ཅིག་ཏུ་ལས་བྱས་པར་མི་འགྱུར། བསྐྱོས་པ་ཡང་མི་བརྩན་ནོ། །དགེ་སློང་སྐྱ་རེངས་མ་ཤར་བར་ཆོས་གོས་མེད་བཞིན་དུ་སྟེང་དུ་མི་འབྱུང་། དབྱར་ཚུལ་དུ་ཞུགས་ན་ཡང་ཞག་བདུན་ནམ། ཞག་བཞི་བཅུར་བྱིན་གྱིས་མ་བརླབས་པར་ནམ་མཁའ་ལ་བྱུང་ཞིང་གནས་པར་མི་བྱའོ། །དེ་སྟེ་བྱུང་ཞིང་གནས་ན་ཆོས་གོས་དང་བྲལ་བར་འགྱུར་ལ་དབྱར་ཀྱང་ཞིག་པར་འགྱུར་ཏེ། འདི་ནི་བར་སྣང་གི་བྱ་བ་ཞེས་བྱའོ། །གཏན་པའི་བྱ་བ་གང་ཞེ་ན། གཏན་
པ་ལ་ཡོན་ཏན་ལྔ་སྟེ། ཞག་གཅིག་གིས་བྲལ་བ་མེད། ཞག་བཅུའི་འདའ་བ་མེད། ཟླ་བ་གཅིག་གིས་འདའ་བ་མེད། ཇི་སྙེད་དུ་དགོས་པའི་གོས་རྣམས་བྱིན་གྱིས་མ་བརླབས་ཀྱང་འཆང་དུ་རུང་། སྟོད་གཡོགས་དང་་་མཐང་གོས་ཀྱིས་ལྗོངས་རྒྱུ་བར་རུང་ངོ་། །གཞན་ཡང་གཏན་པ་ལ་ཡོན་ཏན་རྣམ་པ་ལྔ་སྟེ། འདུས་ཤིང་ཟ་བ་མེད། ཡང་ཡང་ཟ་བ་མེད། ཕྱི་མ་ལ་མ་བསྒོ་བར་འགྲོ་བ་མེད་ཆོས་གོས་ཇི་དགོས་པ་ཚོལ་དུ་རུང་། སྟོན་ཟླ་ཐ་ཆུངས་ནས་དཔྱིད་ཟླ་ར་བའི་བར་དུ་དབྱར་ཚུལ་དུ་ཞུགས་པའི་དགེ་སློང་དགེ་འདུན་གྱི་རྙེད་པ་མ་བགོས་ཤིང་བཞག་པ་དེ་ཡང་གཏན་པ་བཏིང་བ་རྣམས་ཀྱིས་མ་དད་ན་་་གཞན་ལ་མི་སྦྱིན་ནོ། །དེ་ནི་གཏན་པའི་བྱ་བ་ཞེས་བྱའོ། །ཆུ་ཚགས་ཀྱི་བྱ་བ་གང་ཞེ་ན། དགེ་སློང་ཆུ་ཚགས་མེད་ན་ལམ་དུ་ཞུགས་ཤིང་འགྲོ་བར་མི་བྱའོ། །དེ་སྟེ་ཆུ་རྒྱུན་དུ་འབབ་ལ་དེ་ཡང་རུང་བར་གྱུར་དེ་ཆུ་གཞན་དང་མ་འདྲེས་པ་་་ཞིག་གམ། ཁྲོན་པ་རུང་བ་ཞིག་གམ། རྒྱང་གྲགས་ཕྱེད་ཕྱེད་དུ་གཙུག་ལག་ཁང་རྒྱུན་ཆགས་པར་ཡོད་པ་མ་གཏོགས་ཏེ་དེ་ནི་ཆུ་ཚགས་ཀྱི་བྱ་བ་ཞེས་བྱའོ། །འཆག་སའི་བྱ་བ་གང་ཞེ་ན། བཅོམ་ལྡན་འདས་ཀྱིས་འཆག་ས་རྣམ་པ་གཉིས་རྗེས་སུ་གནང་སྟེ། བསམ་གཏན་ལ་ཞུགས་པ་དང་། ཁ་ཏོན་ལ་ཞུགས་པའོ། །བསམ་གཏན་ལ་ཞུགས་པའི་འཆག་ས་ནི་ཁྲུ་བཅོ་བརྒྱད་དོ། །ཁ་ཏོན་ལ་ཞུགས་པའི་འཆག་ས་ནི་ཁྲུ་བཅུ་གཉིས་ཏེ་དེ་ནི་འཆག་སའི་བྱ་བ་ཞེས་བྱའོ། །འཆག་པའི་བྱ་བ་གང་ཞེ་ན། དགེ་སློང་འཆག་པར་འདོད་ན་དེས་དྲག་ཏུ་ཡང་མ་ཡིན། དལ་ནས་འཆག་པར་བྱ། ཤེས་བཞིན་དུ་འཆག་པར་བྱ། དྲན་པ་ཉེ་བར་གཞག །དབང་པོ་ནང་དུ་གཞག །ཡིད་ཕྱིར་མི་དབྱུང་བར་བྱ། རྡེག་མི་འཆོས་པར་བྱ། ཕན་ཚུན་མི་འཁྱོར་བར་བྱ། དྲང་པོར་འཆག་པར་བྱ། དེ་སྟེ་དྲང་པོར་འཆག་མི་ནུས་ན་སྲད་བུ་བྲེ་བར་བྱ། སྲད་བུ་བྲེས་པ་ལ་སྦུ་བུ་བཅུག་ནས་དེ་ལ་འཇུ་ཞིང་འཆག་པར་བྱ་སྟེ། འདི་ནི་འཆག་པའི་བྱ་བ་ཞེས་བྱའོ། །འཕྱེན་གྱི་བྱ་བ་གང་ཞེ་ན། སྟོན་པའི་མདུན་དུ་མི་གཏང་། མཆོད་རྟེན་གྱི་དྲུང་དུ་མ་ཡིན། མཁན་པོ་དང་སློབ་
དཔོན་གྱི་དྲུང་དུ་མ་ཡིན། བླ་མའི་དྲུང་དུ་མ་ཡིན། བླ་མར་བྱ་བའི་དྲུང་དུ་མ་ཡིན། གྲོང་གི་ནང་དུ་སྐྱེ་བོའི་མདུན་དུ་མ་ཡིན། ཕྱི་ཕྱིར་གཏང་བར་མི་བྱ། དེ་སྟེ་ཡང་ཕྱི་ཕྱིར་གཏོང་བ་ཞིག་ཏུ་གྱུར་ན་གནས་གུད་དུ་སོང་ལ་གཏང་བར་བྱའི། དེའི་རྐྱེན་གྱིས་གཞན་ལ་མི་བདེ་བར་འགྱུར་བར་མི་བྱ་སྟེ། འདི་ནི་འཕྱེན་གྱི་བྱ་བ་ཞེས་བྱའོ། །གཞར་བའི་བྱ་བ་གང་ཞེ་ན། དགེ་སློང་གཞར་འདོད་ན་རྣོ་བའི་ཡོ་བྱད་ཀྱིས་གཞར་བར་མི་བྱ། རྩྭ་བསྡུས་པས་མི་བྱ། ལོ་མའམ། ར་དའམ། འཇམ་པ་གཞན་གྱིས་གཞར་བར་བྱ་སྟེ། དེ་ནི་གཞར་བའི་བྱ་བ་ཞེས་བྱའོ། །བཤང་བའི་བྱ་བ་གང་ཞེ་ན། དགེ་སློང་གིས་བབ་བབ་ཏུ་བཤང་བར་མི་བྱ། རྩིག་པའི་དྲུང་དུ་མ་ཡིན། ཤིང་གི་དྲུང་དུ་མ་ཡིན། ཤེས་བཞིན་དུ་ཕྱོགས་གཅིག་ཏུ་བཤང་བར་བྱའོ། །དེ་སྟེ་ཕྱི་ཕྱིར་བཤང་བ་ཞིག་ཏུ་གྱུར་ན་བཤང་བའི་གྱོ་མོ་དྲུང་དུ་གཞག་པར་བྱ། ཡང་ན་ཁུང་བུ་བརྐོ་བར་བྱ་སྟེ། འདི་ནི་བཤང་བའི་བྱ་བ་ཞེས་བྱའོ། །བཤང་སའི་བྱ་བ་གང་ཞེ་ན། དགེ་སློང་བཤང་སར་འགྲོ་བར་འདོད་པས་སྔ་ན་འདུག་པས་ཚོར་བར་བྱ་བའི་ཕྱིར་སེ་གོལ་གཏོགས་པར་བྱ། སྔོན་དུ་ཞུགས་པས་ལུད་པ་དབྱུང་བར་བྱ། ཤེས་བཞིན་དུ་ནང་དུ་འགྲོ་བར་བྱ། ཆོས་གོས་ལེགས་པར་བརྫེས་ནས་འདུག་པར་བྱ། བཤང་སའི་ཁུང་བུར་རྐང་རྟེན་གཉིས་ལ་ལེགས་པར་བརྟགས་ནས་དབུས་སུ་འདུག་པར་བྱ། བཤང་བ་མི་འོང་བ་ལ་ནན་གྱིས་གཟིར་བར་མི་བྱ། འོང་བ་ལའང་དགག་པར་མི་བྱ་སྟེ། དེ་ནི་བཤང་སའི་བྱ་བ་ཞེས་བྱའོ། །བཤང་སའི་ཁུང་བུའི་བྱ་བ་གང་ཞེ་ན། དགེ་སློང་བཤང་བར་འདོད་ན་དལ་ནས་བགས་ཀྱིས་ཤེས་བཞིན་དུ་བཤང་བར་བྱ། བཤང་སའི་ཁུང་ཁ་རྣམས་སུ་གོས་ཤིང་ཆགས་པར་མི་བྱ་སྟེ། འདི་ནི་བཤང་སའི་ཁུང་བུའི་བྱ་བ་ཞེས་བྱའོ། །བཤང་སར་གནས་བརྟན་གྱི་བྱ་བ་གང་ཞེ་ན། བཤང་སར་དགེ་སློང་གནས་བརྟན་གྱིས་གསར་བུ་འདུག་པ་སླར་བསླང་བར་མི་བྱ། བཤང་སར་འདུག་པ་ལས་སླར་བསླང་བར་མི་བྱ་བ་ནི་ཆུང་ངུ་བཤང་སའི་ནང་དུ་ཞུགས་པ་ལས་སླར་བཟློག་པར་མི་བྱ་སྟེ། དེ་ནི་བཤང་
སར་གནས་བརྟན་གྱི་བྱ་བ་ཞེས་བྱའོ། །བཤང་སའི་ཁོར་ཡུག་གི་བྱ་བ་གང་ཞེ་ན། དགེ་སློང་བཤང་སའི་ཉེ་འཁོར་ན་འགྲེང་བར་མི་བྱ། འདུག་པར་མི་བྱ། འཆག་པར་མི་བྱ། ལུང་བསྒོ་བར་མི་བྱ། ལུང་ནོད་པར་མི་བྱ། དྲན་པར་མི་བྱ། སླར་འདྲི་བར་མི་བྱ། རྣལ་འབྱོར་དང་ཡིད་ལ་བྱེད་པ་མི་བྱ། གཏམ་ལ་ཞུགས་ཤིང་མི་བྱ། ལྷུང་བཟེད་ཀྱི་ལས་མི་བྱ། ཆོས་གོས་ཀྱི་ལས་མི་བྱ། སོ་ཤིང་འཆའ་བར་མི་བྱ། ལག་པ་དང་རྐང་པ་བཀྲུ་བར་མི་བྱ། བྱའོ་ཅོག་ཐམས་ཅད་ཀྱང་བཤང་སའི་ཕྱོགས་ཀུན་ཏུ་མི་བྱའོ། །བཤང་སའི་གནས་སུ་ངེས་པར་བྱ་བའི་རྣམས་ནི་མ་གཏོགས་ཏེ། འདི་ནི་བཤང་སའི་ཉེ་འཁོར་གྱི་བྱ་བ་ཞེས་བྱའོ། །གཅི་བའི་བྱ་བ་གང་ཞེ་ན། དགེ་སློང་གིས་བབ་བབ་ཏུ་གཅི་བར་མི་བྱ། རྩིག་དྲུང་དུ་གཅི་བར་མི་བྱ། ཤིང་དྲུང་དུ་གཅི་བར་མི་བྱ། ཤེས་བཞིན་དུ་ཕྱོགས་གཅིག་ཏུ་གཅི་བར་བྱའོ། །དེ་སྟེ་གཅིན་སྙི་བར་གྱུར་ན་གཅིན་སྣོད་གྱོ་མོ་གཏད་པར་བྱ། ཡང་ན་ཁུང་བུ་བརྐོ་བར་བྱ་སྟེ། འདི་ནི་གཅི་བའི་བྱ་བ་ཞེས་བྱའོ། །གཅི་བའི་སའི་བྱ་བ་གང་ཞེ་ན། དགེ་སློང་གཅི་སར་འཇུག་པར་འདོད་ན་དེས་སྔ་ན་འདུག་པས་ཚོར་བར་བྱ་བའི་ཕྱིར་སེ་་་གོལ་གཏོགས་ནས་སྔ་མ་བཞིན་ཏེ། མི་བྲོ་བ་ལ་ནི་མི་གཟིར། བྲོ་བ་ལ་ནི་མི་དགག་པའི་བར་དུ་སྟེ། འདི་ནི་གཅི་བའི་སའི་བྱ་བ་ཞེས་བྱའོ། །གཅི་བའི་ཁུང་གི་བྱ་བ་གང་ཞེ་ན། དགེ་སློང་གིས་གཅི་སའི་ཁུང་ཁར་བགས་ཀྱིས་ཤེས་བཞིན་དུ་གཅི་བར་བྱ། གཅིན་ཁུང་གི་ཁར་མི་གཏོར་བ་དང་། མི་སྦྲེས་པར་བྱ་སྟེ། དེ་ནི་གཅི་སའི་བྱ་བ་ཞེས་བྱའོ། །གཅི་སར་གནས་བརྟན་གྱི་བྱ་བ་གང་ཞེ་ན། གཅི་སར་དགེ་སློང་གནས་བརྟན་གྱིས་གཅི་སར་དགེ་སློང་གསར་བུ་གཅི་ཞིང་་་འདུག་པ་བསླང་བར་མི་བྱ། གཅི་སར་འདུག་པ་ལས་མི་བསླང་བར་བྱ་བ་ནི་ཆུང་ངུ་ན་གཅི་སར་ཞུགས་པ་ཡང་བཟློག་པར་མི་བྱ་སྟེ། འདི་ནི་གཅི་སར་གནས་བརྟན་གྱི་བྱ་བ་ཞེས་བྱ་བའོ། །གཅི་སའི་ཉེ་འཁོར་གྱི་བྱ་བ་གང་ཞེ་ན། དགེ་སློང་གཅི་སའི་ཉེ་འཁོར་དུ་འགྲེང་བར་མི་བྱ་བ་ནས་སྔ་མ་བཞིན་ཏེ། གཅི་བའི་ཉེ་འཁོར་གྱི་
བྱ་བ་ནི་མ་གཏོགས་སོ་ཞེས་བྱ་བའི་བར་དུ་སྟེ། དེ་ནི་གཅི་བའི་སའི་ཉེ་འཁོར་གྱི་བྱ་བ་ཞེས་བྱའོ། །བཀྲུ་བའི་བྱ་བ་གང་ཞེ་ན། དགེ་སློང་གིས་མ་བཀྲུས་ཀྱི་བར་དུ་སྟོན་པ་ལ་ལྟར་འགྲོ་བར་མི་བྱ། མཆོད་རྟེན་ལ་མ་ཡིན། མཁན་པོ་དང་། སློབ་དཔོན་ལ་མ་ཡིན། བླ་མ་ལ་མ་ཡིན། བླ་མར་བྱ་བ་ལ་མ་ཡིན་ཏེ། ཕྱག་མི་བྱ། ཁ་ཏོན་མི་བྱ། ལུང་མི་བསྒོ། བླང་བར་མི་བྱ། དྲན་པར་མི་བྱ། ཀུན་དྲི་བར་མི་བྱ། གྲོང་དུ་འཇུག་པར་མི་བྱ། ཟས་ལ་འདུག་པར་མི་བྱ། སྐྱོ་མ་ལ་འདུག་པར་མི་བྱ། ཐུག་པ་ལ་འདུག་པར་མི་བྱ། འཐུང་བ་ལ་འདུག་པར་མི་བྱ། ཆོས་བཤད་པ་ལ་འདུག་པར་མི་བྱ། ཕྱོགས་བཞིའི་དགེ་འདུན་གྱི་མལ་སྟན་ལ་འདུག་པར་མི་བྱ། ན་བར་གྱུར་ན་ནི་ཉེས་པ་མེད་དེ། ཡང་ན་མིའི་ལྷ་ཆུ་ཡིན་པར་གྱུར་ཏམ། དེ་སྟེ་ཆུ་མ་འབྱོར་ཏམ། དེ་སྟེ་བཀྲུ་བར་མི་རུང་བའི་སྨན་ཅིག་བཏང་བ་ནི་མ་གཏོགས་ཏེ། དེ་ནི་བཀྲུ་བའི་བྱ་བ་ཞེས་བྱའོ། །བཀྲུ་བའི་གནས་ཀྱི་བྱ་བ་གང་ཞེ་ན། བཀྲུ་བའི་གནས་སུ་འགྲོ་བའི་དགེ་སློང་གིས་སེ་གོལ་གཏོགས་ནས་སྔ་མ་བཞིན་བཀྲུ་བའི་གནས་ཀྱི་དབུས་སུ་འདུག་པར་བྱ་བའི་བར་དུ་སྟེ། འདི་ནི་བཀྲུ་བའི་གནས་ཀྱི་བྱ་བ་ཞེས་བྱའོ། །བཀྲུ་བའི་གནས་སུ་རྐང་པ་བཞག་པའི་གནས་ཀྱི་བྱ་བ་གང་ཞེ་ན། ཁྲུས་བྱེད་པར་འདོད་པའི་དགེ་སློང་གིས་བཀྲུ་བའི་ཚེ་བཀྲུ་བའི་གནས་སུ་ཁ་ཆུས་མི་དགང་བ་་་དང་། ཆུས་མ་གཤེར་བར་བྱ་སྟེ། འདི་ནི་བཀྲུ་བའི་གནས་ཀྱི་རྐང་པ་བཞག་པའི་གནས་ཀྱི་བྱ་བ་ཞེས་བྱའོ། །ཁྲུས་ཀྱི་སར་གནས་བརྟན་གྱི་བྱ་བ་གང་ཞེ་ན། ཁྲུས་སར་དགེ་སློང་གནས་བརྟན་གྱིས་ཁྲུས་སར་དགེ་སློང་གསར་བུ་བསླང་བར་མི་བྱ། ཁྲུས་ལ་ཞུགས་པ་ལས་མི་བསླང་བ་ནི་ཆུང་ངུ་ན་ཁྲུས་སར་ཞུགས་པ་ལས་བཟློག་པར་མི་བྱ་སྟེ། དེ་ནི་ཁྲུས་སར་གནས་བརྟན་གྱི་བྱ་བ་ཞེས་བྱའོ། །ཁྲུས་སའི་ཉེ་འཁོར་གྱི་བྱ་བ་གང་ཞེ་ན། དགེ་སློང་གིས་ཁྲུས་སའི་ཉེ་འཁོར་དུ་འགྲེང་ཞིང་འདུག་པར་མི་བྱ་བ་ནས་སྔ་མ་བཞིན་ཁྲུས་སའི་ཉེ་འཁོར་དུ་བྱ་བའི་རྣམས་ནི་མ་
གཏོགས་པའི་བར་དུ་སྟེ། དེ་ནི་ཁྲུས་སའི་ཉེ་འཁོར་གྱི་བྱ་བ་ཞེས་བྱའོ། །མཆིལ་མའི་བྱ་བ་གང་ཞེ་ན། དེ་ནི་དགེ་སློང་གིས་སྒྲ་དང་བཅས་པར་མཆིལ་མ་དོར་བར་མི་བྱ། ལྕེ་དྲིལ་བར་སོས་མནན་པར་མི་བྱ། སྟོན་པའི་སྤྱན་སྔར་མ་ཡིན། མཆོད་རྟེན་གྱི་དྲུང་དུ་མ་ཡིན། མཁན་པོ་དང་། སློབ་དཔོན་གྱི་དྲུང་དུ་མ་ཡིན། བླ་མའི་དྲུང་དུ་མ་ཡིན། བླ་མར་གྱུར་པའི་དྲུང་དུ་མ་ཡིན། ཟན་ཟ་བ་ན་མ་ཡིན། འཐུང་བ་ལ་མ་ཡིན། ཡོངས་སུ་ལས་བྱ་བའི་སར་མ་ཡིན། དགེ་སློང་གིས་བབ་བབ་ཏུ་མཆིལ་མ་དོར་བར་མི་བྱ། མཆིལ་མ་བོར་ནས་ཕྱལ་བར་མི་བྱ་སྟེ། ཡང་ན་རྐང་པས་ཉེས་ཤིག །ཡང་ན་སས་ཁོབ་ཤིག །དགེ་སློང་གིས་མཆིལ་མ་ཕྱི་ཕྱིར་དོར་བར་མི་བྱའོ། །དེ་སྟེ་ཕྱི་ཕྱིར་འདོར་ན་དེའི་རྐྱེན་གྱིས་གཞན་མི་བདེ་བར་མི་འགྱུར་བའི་ཕྱིར་གནས་གཞན་དུ་འགྲོ་བར་བྱ་སྟེ། དེ་ནི་མཆིལ་མའི་བྱ་བ་ཞེས་བྱའོ། །མཆིལ་མའི་སྣོད་ཀྱི་བྱ་བ་གང་ཞེ་ན། བཅོམ་ལྡན་འདས་ཀྱིས་དགེ་སློང་རྣམས་ལ་མཆིལ་མ་དོར་བའི་ཕྱིར་མཆིལ་མའི་སྣོད་རྣམ་པ་གཉིས་གནང་སྟེ། རྫ་མཁན་གྱིས་བྱས་པ་དང་། བདག་ཉིད་ཀྱིས་བྱས་པའོ། །དགེ་སློང་གིས་མཆིལ་མའི་སྣོད་དུས་དུས་སུ་བརྟག་པར་བྱ། བསྐམ་པར་བྱ། དབེན་པར་གཞག་པར་བྱ། ཤིན་ཏུ་བཀྲུ་བར་བྱ། ཅི་ནས་དེའི་རྐྱེན་གྱིས་ཕྱི་ཕྱིར་ཚོལ་བར་མི་འགྱུར་བར་བྱ་སྟེ། དེ་ནི་མཆིལ་མའི་སྣོད་ཀྱི་བྱ་བ་ཞེས་བྱའོ། །སོ་ཤིང་གི་བྱ་བ་གང་ཞེ་ན། དགེ་སློང་གིས་སོ་ཤིང་རིང་པོ་བཅའ་བར་མི་བྱ། ཤིན་ཏུ་ཐུང་བའང་མ་ཡིན། ཤིན་ཏུ་སྦོམ་པ་ཡང་མ་ཡིན། ཤིན་ཏུ་ཕྲ་བ་ཡང་མ་ཡིན། ཡུན་རིང་དུ་ཡང་མ་ཡིན། སྟོན་པའི་སྤྱན་སྔར་མ་ཡིན། མཆོད་རྟེན་གྱི་དྲུང་དུ་ཡང་མ་ཡིན། མཁན་པོ་དང་། སློབ་དཔོན་གྱི་ཐད་དུ་ཡང་མ་ཡིན། བླ་མའི་ཐད་དུ་ཡང་མ་ཡིན། བླ་མར་གྱུར་པའི་དྲུང་དུ་མ་ཡིན། མེ་ཁང་དུ་མ་ཡིན། བཀད་སར་མ་ཡིན། འཆག་སར་མ་ཡིན། དུགས་ཁང་དུ་མ་ཡིན། རྐང་པ་བཀྲུ་བའི་སར་མ་ཡིན། གནས་ཁང་དུ་མ་ཡིན། རིམ་ཁང་དུ་མ་
ཡིན། སྒོ་ཁང་དུ་མ་ཡིན། བཤང་སར་མ་ཡིན། རྩིག་པའི་དྲུང་དུ་མ་ཡིན། ཤིང་དྲུང་དུ་མ་ཡིན། གཙུག་ལག་ཁང་གི་ཕྱག་དར་བྱ་བའི་ཁོར་ཡུག་ཏུ་མ་ཡིན། སྐྱེ་བོ་མང་པོ་འདུ་བ་ཐམས་ཅད་དུ་ཡང་སོ་ཤིང་འདོར་བར་མི་བྱ། དགེ་སློང་གིས་རྣམ་པ་གསུམ་དབེན་པར་བྱ་སྟེ། བཤང་བ་དང་། གཅི་བ་དང་། སོ་ཤིང་བཅའ་བའོ། །དགེ་སློང་གིས་སོ་ཤིང་འཆོས་ནས། དེ་བཞིན་དུ་མི་དོར་གྱི་ཆུས་བཀྲུ་བར་བྱ། ཡང་ན་རྡོག་པས་མཉེ་བར་བྱ། ས་ལ་དྲུད་པར་བྱས་ཏེ། འདི་ནི་སོ་ཤིང་གི་བྱ་བ་ཞེས་བྱའོ། །སོ་དྲུད་པའི་བྱ་བ་གང་ཞེ་ན། དགེ་སློང་གིས་སོ་ཤིང་རྣོན་པོས་དྲུད་པར་མི་བྱ། བག་མེད་པར་ནང་དུ་གཞུག་པར་མི་བྱ། དལ་ནས་བགས་ཀྱིས་ཤེས་བཞིན་དུ་དྲུད་པར་བྱ། སོ་རྙིལ་དྲུད་པར་མི་བྱ་སྟེ། འདི་ནི་སོ་དྲུད་པའི་བྱ་བ་ཞེས་བྱའོ། །ལྕེ་བཞར་བའི་བྱ་བ་གང་ཞེ་ན། དགེ་སློང་གིས་ལྕེ་བཞར་བ་རྣོན་པོས་བཞར་བར་མི་བྱ། བག་མེད་པར་ནང་དུ་གཞུག་པར་མི་བྱ། བགས་ཀྱིས་དལ་ནས་ཤེས་བཞིན་དུ་ལྕེ་བཞར་བར་བྱ། ལྕེའི་ཤ་བཞར་བར་མི་བྱ་སྟེ། འདི་ནི་ལྕེ་བཞར་བའི་བྱ་བ་ཞེས་བྱའོ། །རྣ་སྤབས་བྲུ་བའི་བྱ་བ་གང་ཞེ་ན། དགེ་སློང་གིས་རྩེ་མོ་རྣོན་པོས་རྣ་སྤབས་བྲུ་བར་མི་བྱ། བག་མེད་པར་ནང་དུ་གཞུག་པར་མི་བྱ། བགས་ཀྱིས་དལ་ནས་ཤེས་བཞིན་དུ་རྣ་སྤབས་བྲུ་བར་བྱ། རྣ་བའི་ཤ་བྲུ་བར་མི་བྱ་སྟེ། འདི་ནི་རྣ་སྤབས་བྲུ་བའི་བྱ་བ་ཞེས་བྱའོ། །ཀུན་སྤྱད་པ་གང་ཞེ་ན། དགེ་སྦྱོང་གི་ཡོ་བྱད་ཐམས་ཅད་མཚུངས་པར་སྤྱོད་པ་ནི་སྤྱད་པའོ། །མི་སྤྱད་པ་གང་ཞེ་ན། དེ་ལྟར་བཟློག་པ་ནི་མི་སྤྱད་པའོ། །མ་ལྟ་བུའི་བྱ་བའི་ཕུང་པོ་ཞེས་བྱ་བའི་ཕུང་པོ་གསུམ་པ་རྫོགས་ཏེ། མ་ལྟ་བུ་རྫོགས་སོ།། །།བཙུན་པ་འདུལ་བའི་ལུས་གང་ལགས། དམིགས་པ་གང་ལགས། བྱིན་གྱིས་བརླབས་པ་གང་ལགས། མཚན་ཉིད་གང་ལགས། གླེང་གཞི་གང་ལགས། ངོ་བོ་ཉིད་གང་ལགས། འབྲས་བུ་གང་ལགས། ཨུ་པཱ་ལི་འདུལ་བའི་ལུས་ནི་དམིགས་པའོ། །དམིགས་པ་ནི་ནན་ཏན་ནོ། །བྱིན་གྱིས་བརླབ་
པ་ནི་ལུས་དང་ངག་དང་ཡིད་དོ། །མཚན་ཉིད་ནི་ལས་སོ། །གླེང་གཞི་ནི་བསྒྲགས་པའོ། །ངོ་བོ་ཉིད་ནི་ཉེས་པའོ། །འབྲས་བུ་ནི་མཐོ་རིས་དང་ཐར་པའོ། །འདུལ་བ་གཞུང་དམ་པ་རྫོགས་ཏེ། ཨུ་པཱ་ལིས་ཀུན་དྲིས་པ་རྫོགས་སོ།། །།ཐམས་ཅད་མཁྱེན་པ་ལ་ཕྱག་འཚལ་ལོ། །འདུལ་བ་གཞུང་ནི་དམ་པ་འདི། །འཕགས་པ་ཉེ་བ་འཁོར་གྱིས་ནི། །མ་འོངས་པ་ཡི་གང་ཟག་གི །མ་རྟོགས་ལ་སོགས་བསལ་བའི་ཕྱིར། །གཞི་དང་རྣམ་འབྱེད་ལ་སོགས་ཀྱི། །འགྲེལ་བཤད་ངེས་པ་དོན་གྱི་ལུང་། །ཞུས་ནས་རྒྱལ་བས་བཀའ་སྩལ་ཏོ། །དེ་དག་རྣམས་ཀྱང་གང་ཞེ་ན། །སྤྱིའི་སྡོམ་ལ། ཞུ་བ་འདུལ་བྱེད་གཅིག་ལས་འཕྲོས། །ལྔ་ཚན་བཅུ་དྲུག་ཚན་དང་ནི། །གླེང་གཞི་རྐྱང་པ་གཏམ་གྱི་གཞི། །མ་ན་པི་ཀ་མ་མོ་དང་། །ལུས་སོགས་སྟོན་པ་ཐ་མ་སྟེ། །ལེའུ་དག་ཏུ་ཡང་དག་འདོད། །ཐོག་མར་ཞུས་པ་དེ་ཡང་ནི། །རྣམ་འབྱེད་ལྟུང་བ་སྡེ་བཞི་དང་། །རང་བྱུང་ལ་སོགས་གཞི་རྣམས་ཀྱི། །གཏན་ལ་འབེབས་པ་དག་ཏུ་འདོད། །དེ་ཉིད་དྲིས་ལན་ཞེས་ཀྱང་བསྒྲགས། །དེ་ནས་འདུལ་བྱེད་དག་ཡིན་ཏེ། །ཕམ་པ་བཞི་དང་ལྷག་མ་ཡི། །སྨྱན་གྱི་ལྟུང་བ་ཡན་ཆད་དག །གཏན་ལ་འབེབས་པར་བྱེད་པ་ཡིན། །དེ་ནས་གཅིག་ལས་འཕྲོས་པ་སྟེ། །གཅིག་ནས་བཅུ་ཡི་བར་དུ་ཡིན། །གཅིག་ལས་འཛེགས་པ་ཞེས་ཀྱང་བསྒྲགས། །དེ་ནས་འདུལ་བ་ལྔ་ཚན་ཏེ། །ལྔ་ལྔ་སྟོན་ཕྱིར་ལྔ་ཚན་ནོ། །བཅུ་དྲུག་སྡེ་ཚན་སྟོན་པའི་ཕྱིར། །དེ་ནས་འདུལ་བ་བཅུ་དྲུག་ཚན། །གླེང་གཞི་ལ་ནི་སྒོ་ལྔ་ལས། །དང་པོ་བཞི་ལ་སྡོམ་གྱི་ནི། །ཚིགས་བཅད་བཅུ་བཅུའོ་ལྔ་པ་ལ། །སྡོམ་གྱི་ཚིགས་བཅད་དྲུག་ཡོད་དེ། །གླེང་གཞི་དག་ལ་བརྟེན་པའི་ཕྱིར། །གླེང་གཞི་ཞེས་ནི་བཏགས་པ་ཡིན། །རྐྱང་པ་སྒོ་བཞི་རེ་རེ་ཡང་། །ཚིགས་བཅད་བཅུ་བཅུའོ་དེ་ཉིད་ལ། །སིལ་བུ་ཞེས་བྱ་བསླབ་པའི་གཞི། །རིགས་མི་མཐུན་པ་ཕྲ་མོ་རྣམས། །སྟོན་ཕྱིར་དོན་དང་ལྡན་པ་ཡིན། །འདུལ་བ་གཏམ་གྱི་དངོས་པོ་ནི། །ལྡེབས་ཀྱི་ཚུལ་དུ་བྱུང་བ་སྟེ། །སྡོམ་གྱི་ཚིག་གིས་བསྡུས་
པ་མེད། །མཱུ་ལ་ཞེས་པའི་སྒྲ་ཡི་དོན། །གཞི་དང་རྩ་བ་དངོས་པོ་ལའང་། །འཇུག་ཕྱིར་གཏམ་གྱི་གཞིར་ཡང་འགྱུར། །མ་ན་པི་ཀའི་སྒོ་དང་པོ། །ཚིགས་བཅད་བཅུ་ཡིན་གཉིས་པ་ལ། །ཚིགས་བཅད་བཅུ་དང་ལྷག་ཙམ་ཡོད། །ཤིན་ཏུ་ཕྲ་ཞིབ་ཆེ་བས་ན། །བྲམ་ཟེའི་བུ་མོ་ལྟ་བུ་ཞེས། །དོན་དང་མཐུན་པའི་མཚན་ཡིན་ནོ། །འདུལ་བ་མ་མོ་ལྟ་བུ་ལ། །བསྙེན་པར་རྫོགས་པའི་ཕུང་པོ་དང་། །རབ་ཏུ་ལྡན་དང་བྱ་བ་ཡི། །ཕུང་པོ་གསུམ་དུ་ཤེས་པར་བྱ། །མ་དང་འདྲ་ཕྱིར་མ་མོ་འོ། །ལུས་དང་དམིགས་པ་བྱིན་བརླབ་དང་། །མཚན་ཉིད་གླེང་གཞི་ངོ་བོ་དང་། །འབྲས་བུའི་དོན་རྣམས་ཐ་མ་སྟེ། །ཨུ་པཱ་ལི་ཡིས་ཞུས་པ་ནི། །དེ་དག་རྣམས་ཀྱིས་རྫོགས་པ་ཡིན། །མཚན་གྱི་གྲངས་ཀྱི་རིམ་པ་དང་། །མཚན་གྱི་བཤད་པ་དེ་ཡིན་པས། །དེ་ལྟར་བསྡོགས་ནས་བལྟ་བར་བྱ། །དེ་ལྟར་ན་གཞུང་དམ་པའི་བརྗོད་བྱ་དོན་གྱི་ལུས་ནི་དེ་དག་ཉིད་ཡིན་ལ། རྗོད་བྱེད་གཞུང་གི་ལུས་ནི་ཞུ་བ་མ་རྫོགས་པ་ལ་འགྲེལ་པར། འཕགས་པ་ཉེ་བ་འཁོར་གྱིས་ཞུས་པའི་གཞུང་རྒྱ་གར་ཡུལ་པ་ཡང་ཤ་ལོ་ཀ་ཉིས་སྟོང་ཙམ་གྱི་ཚད་ཅིག་ལ་ལན་སྤྱོད་པ་ཁོ་ནའོ་ཞེས་ཡུལ་ཁ་ཅིག་ན་ཞུ་བ་མ་རྫོགས་པ་ལ་ཤ་ལོ་ཀ་ཉིས་སྟོང་ལས་མེད་པའང་བཤད་མོད་ཀྱི། བོད་དུ་འགྱུར་བའི་ཞུ་བ་མ་རྫོགས་པ་ལ་ཤ་ལོ་ཀ་སུམ་སྟོང་དྲུག་བརྒྱ་སྟེ་བམ་པོ་བཅུ་གཉིས་དང་། ཞུ་བ་རྫོགས་པ་ལ་ཤ་ལོ་ཀ་ཁྲི་ལྔ་སྟོང་དགུ་བརྒྱ་སྟེ། བམ་པོ་ལྔ་བཅུ་རྩ་གསུམ་ཡོད་པས་སྤྱིར་བསྡོམས་ན་ཤ་ལོ་ཀ་ཁྲི་དགུ་སྟོང་ལྔ་བརྒྱ་སྟེ། བམ་པོ་དྲུག་བཅུ་རྩ་ལྔ་ཡོད་དོ།། །།བསོད་ནམས་ཆེན་པོའི་དཔལ་གྱིས་ཕྱོགས་ལས་རྣམ་པར་རྒྱལ་བ་སྟོབས་ཀྱི་་་འཁོར་ལོས་སྒྱུར་བའི་རྒྱལ་པོ་དང་མཚུངས་པ་རྒྱལ་པོ་ཆེན་པོའི་བླའི་མཆོད་གནས་བདེ་བར་གཤེགས་པའི་གཞུང་ལུགས་མང་དུ་ཐོས་པ། རིག་པ་དང་གྲོལ་བའི་སྤོབས་པ་དགེ་བ་ཅན། ལུང་དང་རིགས་པའི་དབང་ཕྱུག །གངས་ཅན་གྱི་རྒྱུད་ཀྱི་མཁས་པ་ཆེན་པོ། སྡོམ་བརྩོན་དམ་པ་ཤཱཀྱའི་དགེ་སློང་འཇམ་པའི་དབྱངས་ཀྱིས། བཀའ་འགྱུར་ལེགས་
པར་བཞེངས་པ་རྣམས་ལས་འདི་དག་ནི་མཁན་པོ་ཆེན་པོ་མཆིམས་ཀྱིས་དགེ་བའི་བཤེས་གཉེན་རྒྱ་འདུལ་བ་འཛིན་པ་ཞལ་བཞུགས་པའི་དུས་ན། དགེ་བའི་བཤེས་གཉེན་འདུལ་བ་འཛིན་པ་ཞིང་མོ་ཆེ་བ་བྱང་ཆུབ་སེང་གེས་གཉེར་མཛད་ནས། ལུང་ཕྲན་ཚེགས་ཀྱི་བམ་པོ་བཅུ་གཉིས་མ་ཚང་བ་དང་། གཞུང་བླ་མའི་ཞུ་བ་མ་རྫོགས་པ་བམ་པོ་བཅུ་གཉིས་དང་། སྡོམ་ཚིག་ཡི་གེ་ཚར་གཉིས་མ་ཚང་བ་རྣམས་བསམ་ཡས་མཆིམས་ཕུ་ལ་སོགས་པ་དབུས་་་གཙང་གི་གཙུག་ལག་ཁང་རྣམས་ནས་བཙལ་ཏེ། ལ་སྟོད་འོལ་རྒོད་ཀྱི་གཙུག་ལག་ཁང་དུ་གནས་བརྟན་དྷརྨཱ་སེང་གེས་ལུང་སྡེ་བཞི་ཚང་བར་བཞེངས་པ་སྣར་ཐང་གི་གཙུག་ལག་ཁང་དུ་གདན་དྲངས་ཏེ། དེ་ལ་དཔེ་ཕྱི་མཛད་ནས་བཞེངས་པ་དང་། གཞན་ཡང་ཆུ་མིག་རིང་མོའི་གཙུག་ལག་ཁང་དང་། རུང་ཀླུང་ཤོད་གྲོག་གི་གཙུག་ལག་ཁང་གི་འདུལ་བ་ལུང་ལ་སོགས་པ་རྣམས་ལ་གཏུགས་ཏེ་སྔ་ཞུས་ལེགས་པར་བགྱིས་ནས་བཞེངས་པ་སངས་རྒྱས་ཀྱི་བསྟན་པའི་རྩ་བ་ལེགས་པར་གསུངས་པ་དམ་པའི་ཆོས་འདུལ་བ་ལུང་སྡེ་བཞིའོ། །དེའི་བཀའ་འགྱུར་གྱི་དཔེ་ཕྱི་རྣམ་པར་དག་པ་རྣམས། མཁས་པའི་འབྱུང་གནས་དཔལ་སྣར་ཐང་གི་གཙུག་ལག་ཁང་ནས་གདན་དྲངས་ཏེ། འཕགས་པ་འཇིག་རྟེན་དབང་ཕྱུག་གི་སྤྲུལ་པའི་སྐུ་ཆོས་རྒྱལ་སྲོང་བཙན་སྒམ་པོའི་ནང་བློན་ཆེན་པོ་མགར་སྟོང་བཙན་ཡུལ་ཟུངས་ཀྱི་རྒྱུད་པ། གཙུག་ལག་གཉིས་ཀྱི་མཛད་པས། བསྟན་པ་རིན་པོ་ཆེའི་ཞབས་ཏོག་ལ་གཡེལ་བ་མི་མངའ་ཞིང་། འགྲོ་བ་མང་པོའི་མགོན་སྐྱབས་དམ་པར་གྱུར་པ་དཔལ་ལྡན་རྒྱལ་བའི་སྡེ་ཡིས། འགྲོ་བ་མ་ལུས་པའི་གནས་སྐབས་དང་། མཐར་ཐུག་གི་ཕན་བདེ་མ་ལུས་པའི་འབྱུང་གནས་རྒྱལ་བའི་བསྟན་པ་རིན་པོ་ཆེ་ཡུན་རིང་དུ་གནས་ཤིང་། ཕྱོགས་ཀུན་ཏུ་དར་ཞིང་རྒྱས་པར་བྱ་བའི་ཕྱིར། བོད་ཁམས་སུ་སྨོན་ལམ་གྱི་སྟོབས་ཅན་མངའ་བདག་ལྷ་བཙན་པོ་བྱང་ཆུབ་སེམས་དཔའ་་་རྣམས་དང་། ལོ་པཎ་སྐྱེས་མཆོག་ཁྱད་པར་ཅན་རྣམས་ཀྱི་བདག་
རྐྱེན་ལ་བརྟེན་ནས། བདེ་བར་གཤེགས་པའི་གསུང་རབ་ཐོག་མཐའ་བར་དུ་དགེ་ཞིང་སྒྲོ་སྐུར་གྱི་མཐའ་དང་བྲལ་ལ་གཞུང་ལུགས་ངན་པའི་དྲི་མས་དབེན་པ་མདོ་སྡེ་དང་། རྒྱུད་སྡེའི་ཕྱོགས་སྔ་ཕྱིར་བོད་དུ་འགྱུར་རོ་ཅོག་རྣམས་མིའི་དབང་པོ་ཐོ་གེ་ན་ཐེ་མུར་གྱི་རིང་ལ། ཏི་ཤྲི་ཀུན་དགའ་རྒྱལ་མཚན་དཔལ་བཟང་པོ་བསྟན་པ་སྐྱོང་བའི་དུས། རྒྱལ་བའི་བསྟན་པ་ལྔ་བརྒྱ་བདུན་པའི་མཐར་ཉེ་བ། འགྲོ་བའི་བླ་མ་སྟོན་པ་གདུལ་བྱའི་ངོར་ཞི་བར་གཤེགས་པའི་ཚུལ་བསྟན་ནས། ལོ་སུམ་སྟོང་བཞི་བརྒྱ་བརྒྱད་བཅུ་འདས་པ་མེ་མོ་ཕག་གི་ལོ་གསར་གྱི་ཟླ་བ་ཚེས་གྲངས་གཟའ་སྐར་བཟང་པོ་ལ་དབུ་བཙུགས་ཏེ། རྒྱལ་བའི་སྲས་པོ་རིག་པ་འཛིན་པ་བྱང་ཆུབ་དཔལ་ལྡན་གྱིས། བསྟན་པ་ལ་ཤེས་ནས་མི་ཕྱེད་པའི་དད་པ་བརྟན་པོས་ཀུན་ནས་བསླང་ནས་ཞལ་ཏའི་རིམ་པ་རྣམས་དང་། རྒྱུའི་དངོས་པོ་བཟང་ཞིང་མང་ལ་ཁ་ན་མ་ཐོ་བ་མེད་པས་མཐུན་པའི་རྐྱེན་བསྒྲུབས་ནས། བསྟན་པའི་འབྱུང་གནས་དཔལ་ན་ལེན་དྲ་དང་མཚུངས་པ་སྤྲུལ་པའི་རྒྱལ་པོ་སེ་ཆེན་གན་གྱི་དགོས་ཀྱི་ལྷ་ཁང་དཔལ་གུང་ཐང་གི་གཙུག་ལག་ཁང་ཆེན་པོར་ལེགས་པར་བཞེངས་ཏེ། སྡེ་སྣོད་ཀྱི་ཚུལ་ལ་ཅུང་ཟད་བློ་ཁ་ཕྱོགས་པ་ཐང་པོ་ཆེ་བའི་བཙུན་པ་ཀུན་དགའ་་་འབུམ་གྱིས་ཁ་ཏ་དང་། ཞུས་དག་གི་དང་དོས་པ་བགྱིས་ཤིང་། གཞན་ཡང་དད་པ་དང་བརྩོན་འགྲུས་ཆེ་ཞིང་བློ་གྲོས་གསལ་བའི་སྡོམ་བརྩོན་དམ་པ་མང་དུ་་་ཐོས་ཤིང་སྡེ་སྣོད་འཛིན་པ་མཁས་པ་རྣམས་ཀྱིས། རྒྱ་གར་སྐད་ལ་སོགས་པ་་་ལེགས་པར་སྦྱར་བའི་སྐད་སོར་བཞག་རྣམས་ནི་སྔོན་གྱི་ལོཙྪ་བ་ཆེན་པོ་རྣམས་་་ཀྱིས་མཛད་པའི་བྱེ་བྲག་ཏུ་རྟོགས་བྱེད་ཆེན་པོ་དང་། སྒྲ་སྦྱོར་བམ་པོ་གཉིས་པ་ལ་སོགས་པ་ལ་བརྟེན་ནས་དག་པར་བྱས་ཤིང་། བོད་སྐད་རྣམས་ནི་ཡུལ་སྐད་དང་། འཕྲལ་སྐད་ངན་པ་རྣམས་དང་མ་འདྲེས་པར་བོད་ཡུལ་གྱི་སྔོན་གྱི་བརྡ་མེས་་་་མཁན་པོ་རྣམས་དང་། སྒྱུར་བྱེད་དམ་པ་སྔ་ཕྱིར་བྱོན་པ་རྣམས་ཀྱི་བརྡ་གསར་རྙིང་དང་། སྐད་གསར་བཅད་ལ་སོགས་པའི་རྗེས་སུ་འབྲངས་ནས་ད་དྲག་དང་། མ་མྱ་དང་། ས་སྩོགས་ལ་སོགས་པ་ཡོད་མེད་
རྣམས་མཁས་པ་རྣམས་ཀྱིས་ཇི་ལྟར་མཛད་པ་ལྟར་བརྡ་དོན་མ་ནོར་བར་དག་པར་བགྱིས་ནས། གཞི་དུང་གི་ས་གཞི་ལྟར་དཀར་འཇམ་མཁྲེགས་པ་ལྷོ་རྒྱལ་པོ་ལྷ་ཁང་གི་ཤོ་གུ་ལ། དམ་ཆེ་ཞིང་མདངས་གསལ་བ་ཨུཏྤལ་སྔོན་པོ་ལྟ་བུ་རྒྱ་ནག་ཆེན་པོ་ལས་འོངས་པའི་་་སྣག་ཚས། འབུར་དཀྱུས་ཚུགས་གསུམ་ལ་མཁས་པའི་མཐར་ཕྱིན་པས་ཡི་གེའི་རིག་བྱེད་ལ་སློབ་དཔོན་གྱི་གོ་འཕང་ཐོབ་པས་དག་སྙོམས་མཛེས་པར་བཞེངས་པ་དཔོན་དཔལ་བཟང་རིན་ཆེན་དང་། སངས་རྒྱས་གྲགས་ལ་སོགས་པ་དབུས་་གཙང་གི་ཡི་གེ་པ་ཡིད་གཞུངས་ཤིང་མཁས་པ་རྣམས་ཀྱིས་ལེགས་པར་བྲིས་པ་ལ་ཞུས་དག་ལན་གསུམ་དུ་བགྱིས་ཏེ་བཞེངས་པ་རྣམས། ས་མོ་གླང་གི་ལོ་བཀྲ་ཤིས་ལོ་གསར་གྱི་ཟླ་བ་ལ་ལེགས་པར་གྲུབ་ཅིང་། འབྲས་བུ་དང་བསྒྲུབ་པའི་དུས་ཀྱི་ལྔ་བརྒྱ་ཕྲག་དྲུག་དང་། ལུང་མངོན་པའི་དུས་ཀྱི་བཞི་བརྒྱ་བརྒྱད་བཅུ་རྩ་གཉིས་འདས་ལ། ལྷག་མ་མངོན་པའི་ལོ་བཅོ་བརྒྱད་དང་། མདོ་སྡེ། འདུལ་བ། རྟགས་ཙམ་འཛིན་པའི་ལྔ་བརྒྱ་ཕྲག་གསུམ་སྟེ། སྟོང་ལྔ་བརྒྱ་བཅོ་བརྒྱད་བསྟན་པའི་ལྷག་མར་ཡོད་པའི་དུས་སུ་བཀའ་འགྱུར་ལེགས་པར་གྲུབ་པ་རྣམས་ལས་འདི་དག་ནི་ལུང་སྡེ་བཞིའོ། །འདུལ་བ་ལུང་ཕལ་ཆེ་བ་ལ་དགེ་སློང་ཕ་མའི་སོ་སོར་ཐར་པ་དང་། ཞུ་བ་མ་རྫོགས་པ་བཞེངས་པ་མེད་མོད་ཀྱི་འོན་ཀྱང་སོ་སོར་ཐར་པ་གཉིས་རྣམ་འབྱེད་གཉིས་ཀྱི་རྩ་བ་ཡིན་ཞིང་། རྣམ་འབྱེད་གཉིས་ནི་སོ་སོར་ཐར་པ་རྣམ་པ་གཉིས་ཀྱི་འགྲེལ་པ་ཡིན་ལ། ཞུ་བ་མ་རྫོགས་པ་ནི་ཞུ་བ་དག་ཤོས་ཡིན་པའི་ཕྱིར་ལུང་རྣམ་འབྱེད་སོ་སོའི་དབུ་དང་། གཞུང་བླ་མ་མ་རྫོགས་པ་དབུ་ཉིད་དུ་བཞེངས་སོ། །ལུང་སྡེ་བཞིའི་གོ་རིམས་ནི་གཞི་དང་། རྣམ་པར་འབྱེད་པ་དང་། དེ་དག་གི་དཀའ་བའི་གནས་ཞུས་ལན་གྱིས་གཏན་ལ་འབེབས་པ་གཞུང་བླ་མ་དང་། དེ་དག་ཏུ་མ་ཚང་བ་ཁ་སྐོང་བ་ཕྲན་ཚེགས་སོ། །དོན་གྱི་གོ་རིམས་དེ་ལྟར་ཡིན་ཡང་མཁས་པ་རྣམས་ཀྱིས་གཞི་དང་། རྣམ་པར་འབྱེད་པའི་རྗེས་ལ་ཕྲན་ཚེགས་དང་། དེའི་རྗེས་ལ་གཞུང་དམ་པ་ཉིད་
བྲིས་ཤིང་། ཀ་ཅོག་ལ་སོགས་པས་མཛད་པའི་མཚན་བྱང་དཀར་ཆག་ལས་ཀྱང་རིམ་པ་དེ་ཁོ་ན་ལྟར་འབྱུང་བས་འདིར་ཡང་གཞུང་དམ་པ་མཇུག་ཉིད་དུ་བྲིས་སོ། །འདི་རྣམས་ཀྱི་བམ་པོའི་གྲངས་ནི་ཤ་ལོ་ཀ་སུམ་བརྒྱ་ལ་བམ་པོ་རེར་བྱས་ནས་ལུང་གཞི་ལ་བམ་པོ་བརྒྱ་དང་དགུ། དགེ་སློང་ཕའི་རྣམ་འབྱེད་ལ་བམ་པོ་བརྒྱད་བཅུ་རྩ་གསུམ་དང་བམ་པོ་སུམ་ཆ། དགེ་སློང་མའི་རྣམ་འབྱེད་ལ་བམ་པོ་ཉི་ཤུ་རྩ་བརྒྱད། ཕྲན་ཚེགས་ལ་བམ་པོ་ལྔ་བཅུ་རྩ་དགུ། གཞུང་བླ་མའི་ཞུ་བ་མ་རྫོགས་པ་ལ་བམ་པོ་བཅུ་གཉིས། ཞུ་བ་རྫོགས་པའི་གཞུང་དམ་པ་ལ་བམ་པོ་ལྔ་བཅུ་རྩ་གསུམ་སྟེ། བསྡོམས་ན་གཞུང་དམ་པ་ལ་བམ་པོ་དྲུག་བཅུ་རྩ་ལྔ་ཡོད་པས་སྤྱིར་ལུང་སྡེ་བཞི་་་ཆད་པ་ལ་བམ་པོ་སུམ་བརྒྱ་བཞི་བཅུ་རྩ་བཞི་དང་བམ་པོ་སུམ་ཆ་ཡོད་དོ། །སྔར་མ་ཚང་བ་རྣམས་ཚང་བར་བཞེངས་པའི་ཚུལ་ནི་ཕྲན་ཚེགས་དང་། ཞུ་བ་མ་རྫོགས་པའི་མཇུག་དག་ཏུ་བྲིས་ཟིན་པའི་ཕྱིར་དེ་དག་ཏུ་བལྟ་བར་བྱའོ།། །།ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུན་ཏེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བྃ་བཱ་དཱི་མ་ཧཱ་ཤྲ་མ་ཎ།