སྐྱེས་པ་རབས་ཀྱི་གླེང་གཞི།
རྒྱ་གར་སྐད་དུ། ཛཱ་ཏ་ཀ་ནི་དཱ་ནཾ། བོད་སྐད་དུ། སྐྱེས་པ་རབས་ཀྱི་གླེང་གཞི། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །
བཅོམ་ལྡན་འདས་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། གནས་བརྟན་ཆེན་པོ་དོན་མཐོང་བཅོམ་ལྡན་འདས་ཀྱི་ཐད་དུ་སོང་ནས། ཕྱག་བྱས་ཏེ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ཀྱི་ཐད་དུ་འདི་སྐད་ཅེས་གསོལ་ཏོ། །བཙུན་པ་བདག་ནི་སངས་རྒྱས་བཅོམ་ལྡན་འདས་ཀྱི་རྒྱུད་ཀྱི་ཆོས་ཐོས་པར་འཚལ་ལོ། །བཀའ་སྩལ་པ། དོན་མཐོང་ཡིད་ལ་ཟུང་ཤིག་དང་ངས་བཤད་པར་བྱའོ་ཞེས་འབྱུང་ངོ་། །དེ་ཡང་འདིར་སྡུད་པར་བྱེད་པ་པོ་རབ་ཏུ་རྟོག་པའི་ཤེས་རབ་དང་ཞི་བའི་དགྲ་བཅོམ་པ་རྣམས་ཀྱི་སྐྱེས་པ་རབས་ཀྱི་གླེང་གཞིའི་དོན་གྱི་བསྔགས་པ་བརྗོད་དོ། །རིང་བའི་གླེང་གཞི་དང། བརཔའི་གླེང་གཞི་དང། ཉེ་བའི་གླེང་གཞི་སྟེ། གླེང་གཞི་གསུམ་པོ་འདི་གཟིགས་ནས་བསྔགས་པ་གང་ཞིག་ཉན་པའོ། །དེ་ལ་དང་པོ་རེ་ཞིག་དེ་རྣམས་ཀྱི་གླེང་གཞི་ཡོངས་སུ་བཅད་པ་རྣམས་རིག་པར་བྱའོ། །མར་མེ་མཛད་ཀྱི་ཞབས་ཀྱི་དྲུང་འདིར་སེམས་པ་ཆེན་པོས་སྨོན་ལམ་བཏབ་བོ། །ཇི་སྲིད་ཐམས་ཅད་སྒྲོལ་གྱི་ལུས་སྤངས་པའི་བར་དང་དགའ་ལྡན་གྱི་གནས་སུ་འཁྲུངས་པའི་ཆོས་ཀྱི་གཏམ་གྱི་བར་གྱི་ལམ་ནི་རིང་པོའི་གླེང་གཞི་ཞེས་བྱའོ། །ཇི་སྲིད་དགའ་ལྡན་གྱི་གནས་ནས་འཕོས་ནས་བྱང་ཆུབ་ཀྱི་སྙིང་པོར་ཐམས་ཅད་མཁྱེན་པ་ཐོབ་ནས་ཆོས་ཀྱི་གཏམ་གྱི་བར་ནི་གླེང་གཞི་བར་པ་ཞེས་བྱ་བའོ། །གང་དང་གང་དུ་ཞུགས་ནས། དེ་དང་དེ་ཐོབ་པ་རྣམས་ནི་ཉེ་བའི་གླེང་གཞི་ཞེས་བྱ་བའོ། །དེ་ལ་འདིར་རིང་པོའི་གླེང་གཞི་ཞེས་བྱ་བ་ནི་འདི་ནས་བསྐལ་པ་གྲངས་མེད་པ་བཞི་དང་བསྐལ་པ་འབུམ་ཕྲག་གཅིག་ལྷག་པ་ནས་མགོ་བརྩམས་ནས་གྲོང་ཁྱེར་འཇིགས་མེད་ལྡན་ཞེས་བྱ་བ་བྱུང་ངོ་། །དེར་ཡང་བྲམ་ཟེ་བློ་གྲོས་བཟང་པོ་ཞེས་བྱ་བ་གནས་སོ། །ཕ་དང་མ་གཉིས་ཀའང་རིགས་བཟང་བའི་མངལ་དུ་ཞུགས་ཏེ་རིགས་བདུན་རྒྱུད་ཀྱི་བར་དུ་གཞན་གྱིས་རྩོད་པ་དང་དཔྱ་བ་དང་སྨོད་པ་མེད་ཅིང་རྣམ་པར་དག་གོ། །གཟུགས་བཟང་བ་བལྟ་ན་སྡུག་པ་རབ་ཏུ་མཛེས་པ་མཆོག་གི་ཁ་དོག་དང་ལྡན་པའི་སྐྱེས་བུ་ཅན་ནོ། །དེ་ཡང་ལས་གཞན་མི་བྱེད་པར་བྲམ་ཟེའི་ལས་འབའ་ཞིག་སློབ་བོ། །དེ་ཡང་ཁྱེའུ་གཞོན་ནུའི་དུས་སུ་ཕ་དང་མ་གཉིས་ཀ་དུས་ལས་འདས་སོ། །དེ་ནས་དེའི་ལོངས་སྤྱོད་སྤེལ་
བའི་བློན་པོས་ནོར་གྱི་ཡི་གེ་བླངས་ཏེ་གསེར་དང་དངུལ་དང་ནོར་བུ་དང་མུ་ཏིག་ལ་སོགས་པས་གང་བ་རྣམས་སྒོར་བཏོན་ཏེ་གཞོན་ནུ་འདི་རྣམས་མའི་ནོར་ཡིན་ནོ། །འདི་རྣམས་ཕའི་ནོར་ཡིན་ནོ། །འདི་དག་ནི་མེས་པོ་དང་ཡང་མེས་ཀྱི་ནོར་ཡིན་ནོ། །རིགས་བདུན་རྒྱུད་ཀྱི་བར་གྱི་ནོར་ཡིན་ནོ་ཞེས་སྨྲས་སོ། །འདི་རྣམས་སོ་སོར་བསྐྱང་བའི་ཕྱིར་སྨྲས་པ་ཡིན་ནོ། །མཁས་པ་བློ་གྲོས་བཟང་པོས་བསམས་པ། འདིའི་ནོར་རྣམས་བཟུང་ནས་བདག་གི་ཕ་དང་མེས་པོ་ལ་སོགས་པས་འཇིག་རྟེན་ཕ་རོལ་དུ་འགྲོ་བ་ན་གསེར་སེ་བ་གཅིག་ཀྱང་ཁྱེར་ནས་མ་སོང་གིས་བདག་ཉིད་ཀྱིས་ཁྱེར་ནས་འགྲོ་བར་རིག་པར་བྱའོ་ཞེས་རྒྱལ་པོ་ལ་སྨྲས་ནས། གྲོང་ཁྱེར་དུ་རོལ་མོ་བསྒྲགས་ཏེ། སྐྱེ་བོ་ཐམས་ཅད་ལ་སྦྱིན་པར་བྱིན་ནས། དཀའ་ཐུབ་པའི་རབ་ཏུ་བྱུང་བ་ལ་རབ་ཏུ་བྱུང་ངོ་། །འདིའི་ཡང་དོན་གསལ་བར་བྱ་བའི་ཕྱིར་གནས་འདིར་བློ་གྲོས་བཟང་པོས་གཏམ་བྱས་སོ། །དེ་ཡང་འདི་ཙམ་འབའ་ཞིག་མ་ཡིན་ཏེ། སངས་རྒྱས་ཀྱི་རྒྱུར་རྒྱུན་མི་འཆད་པར་གསུངས་ལ་སླར་ཡང་ཚིགས་སུ་བཅད་པས་བཅིངས་ཏེ་བཤད་ཀྱང་གོ་དཀའ་བས་དེ་དང་དེའི་བར་བར་དུ་ཚིགས་སུ་བཅད་པའི་ཚིག་གིས་གསལ་བ་དང་བཅས་པ་བཤད་པར་བྱའོ། །བསྐལ་པ་གྲངས་མེད་པ་བཞི་དང་བསྐལ་པ་འབུམ་ཕྲག་གཅིག་ལྷག་པ་ནས་མགོ་བརྩམས་ནས་སྒྲ་བཅུ་རྒྱུན་ཆད་མེད་པར་འཇིགས་མེད་ལྡན་གྱི་གྲོང་ཁྱེར་དེར་བྱུང་ངོ་། །དེའི་སངས་རྒྱས་ཀྱི་རྒྱུད་བཤད་དོ། །བསྐལ་པ་གྲངས་མེད་བཞི་དང་ནི། །འབུམ་ཕྲག་གཅིག་ནི་ལྷག་པ་ན། །གྲོང་ཁྱེར་འཇིགས་མེད་ལྡན་ཞེས་པ། །མཐོང་བ་ཡིས་ནི་དགའ་བར་བྱེད། །རྒྱུན་མི་འཆད་པ་སྒྲ་བཅུ་བཞི་ན། །བཟའ་དང་བཏུང་བ་ཡང་དག་ལྡན། །དེ་ལ་སྒྲ་བཅུ་རྒྱུན་མི་འཆད་པ་ནི། གླང་པོ་ཆེའི་སྒྲ་དང་རྟའི་སྒྲ་དང་ཤིང་རྟའི་སྒྲ་དང་རོལ་མོའི་སྒྲ་དང་རོལ་མོ་མྲྀ་དཾ་གའི་སྒྲ་དང་པི་བང་གི་སྒྲ་དང་གླུའི་སྒྲ་དང་རོལ་མོ་སམ་མའི་སྒྲ་དང་ཆ་ལང་གི་སྒྲ་དང་རྒོད་པ་དང་འཐུང་བ་དང་ཟ་བའི་སྒྲ་སྟེ། སྒྲ་བཅུ་པོ་འདི་རྣམས་ནི་རྒྱུན་མི་འཆད་པ་ཡིན་ནོ། །སྒྲ་དེ་རྣམས་ཕྱོགས་གཅིག་ཏུ་བྱ་སྟེ། གླང་པོའི་སྒྲ་དང་རྟ་ཡི་སྒྲ། །རོལ་མོ་དུང་དང་ཤིང་རྟའི་སྒྲ། །ཟ་དང་འཐུང་བ་དེ་ཉིད་དང། །
བཟའ་དང་བཏུང་བའི་སྒྲ་དང་ནི། །སངས་རྒྱས་རྒྱུད་དུ་ཚིགས་སུ་བཅད་པ་འདི་གསུངས་ནས། གྲོང་ཁྱེར་ཡན་ལག་ཉིང་ལག་ལྡན། །འདོད་པ་ཐམས་ཅད་ཉེ་རབ་གནས། །རིན་ཆེན་བདུན་པོ་ཡང་དག་ལྡན། །སྐྱེ་བོ་སྣ་ཚོགས་ཡང་དག་གང། །ལྷ་ཡི་གྲོང་ཁྱེར་ཕུན་ཚོགས་བཞིན། །བསོད་ནམས་ཅན་ནི་གནས་པའོ། །འཇིག་མེད་ལྡན་པའི་གྲོང་ཁྱེར་དུ། །བྲམ་ཟེ་བློ་བཟངས་ཞེས་བྱ་བས། །ལོངས་སྤྱོད་བྱ་བ་དུ་མ་བསགས། །ནོར་དང་འབྲུ་ནི་མང་པོ་ཡི། །ནང་གི་གསང་སྔགས་འཛིན་པ་དང། །རིག་བྱེད་གསུམ་གྱི་ཕ་རོལ་སོན། །མཚན་ཉིད་ཨི་ཐི་ཧ་ས་དང། །དམ་པའི་ཆོས་ཀྱི་ཕ་རོལ་སོན། །དེ་ནས་དེ་ཉིད་ཉི་མ་གཅིག་ལ་མཁས་པ་བློ་གྲོས་བཟང་པོ་དེ་ཁང་བཟང་མཆོག་གི་སྟེང་དུ་གཅིག་པུར་སྐྱིལ་མོ་ཀྲུང་བཅས་ནས་དབེན་པར་བཞུགས་ཏེ་བསམས་པ། མཁས་པ་སྐྱེ་བ་གཞན་དུ་མའི་མངལ་བཟུང་ན་སྡུག་བསྔལ་ལོ། །དེ་བཞིན་དུ་སྐྱེ་བའི་གནས་སུ་ལུས་འཇིག་གོ། །བདག་སྐྱེ་བའི་ཆོས་ཅན་དང་རྒ་བའི་ཆོས་ཅན་དང་ན་བའི་ཆོས་ཅན་དང་འཆི་བའི་ཆོས་ཅན་ནོ། །དེ་ལྟ་བུར་གྱུར་པས་བདག་ནི་སྐྱེ་བ་མེད་པ་དང། རྒས་པ་མེད་པ་དང་ན་བ་མེད་པ་དང་སྡུག་བསྔལ་མེད་པའི་བདེ་བ་དང་བསིལ་བ་དང་བདུད་རྩི་ལྟ་བུའི་མྱ་ངན་ལས་འདས་པ་ཆེན་པོ་ཚོལ་བར་རིགས་སོ། །ངེས་པར་སྲིད་པ་ལས་གྲོལ་བའི་མྱ་ངན་ལས་འདས་པར་འགྲོ་བའི་ལམ་གཅིག་པོ་ཡིན་པ་ལྟ་བུའོ། །དེའི་ཕྱིར་གསུངས་པ། དབེན་པར་གཅིག་པུར་གནས་ནས་ནི། །དེ་ཚེ་བདག་གིས་འདི་ལྟར་བསམས། །སྲིད་པར་སྐྱེ་བ་སྡུག་བསྔལ་ཞིང། །ལུས་ནི་ཡོངས་སུ་ཞིག་པ་ན། །སྐྱེ་བའི་ཆོས་དང་རྒས་པའི་ཆོས། །ན་བའི་ཆོས་དང་དེ་ཚེ་བདག །སྐྱེ་བ་མེད་དང་འཆི་མེད་བདེ། །མྱ་ངན་འདས་པ་ཡོངས་སུ་བཙལ། །གང་ཚེ་དྲི་ངན་ལུས་འདི་ནི། །སྣ་ཚོགས་མི་གཙང་གིས་གང་ཞིང། །དོན་མེད་ལྟོས་པ་མེད་པ་ཡི། །དོར་ནས་འགྲོ་བར་བྱ་བ་ཡིན། །དེ་ཡི་ལམ་ནི་ཡོད་དམ་སྙམ། །འབད་པ་མེད་པར་ལམ་མི་ཐོབ། །དེ་ཡི་ལམ་ནི་བཙལ་བར་བྱ། །སྲིད་པ་རྣམས་ལས་གྲོལ་འགྱུར་སྙམ། །དེ་ནས་ལྷག་པར་ཡང་བསམས་པ། ཇི་ལྟར་འཇིག་རྟེན་པས་སྡུག་བསྔལ་གྱི་མི་འཐུན་པའི་ཕྱོགས་སུ་གྱུར་པའི་བདེ་བ་ཞེས་
བྱ་བ་ཡོད་དོ། །དེ་ལྟར་མི་འཐུན་ཕྱོགས་སྲིད་པ་ཡོད་ན་མྱ་ངན་ལས་འདའ་བར་འགྱུར་རོ་སྙམ། དེ་ལྟར་ཡང་གདུང་བ་ཡོད་ན་དེ་ཞི་བར་བྱེད་པའི་བསིལ་བ་ཡོད་དོ། །དེ་བཞིན་དུ་འདོད་ཆགས་ལ་སོགས་པའི་མེ་ཞི་བར་བྱེད་པའི་མྱ་ངན་ལས་འདས་པ་ཡོད་པར་འགྱུར་རོ་སྙམ་མོ། །ཇི་ལྟར་ཡང་སྡིག་པ་དང་མི་འཐུན་པའི་ཕྱོགས་སུ་གྱུར་པ་ཁ་ན་མ་ཐོ་བ་མེད་པའི་དགེ་བའི་ཆོས་ཡོད་པར་འགྱུར་སྙམ་པ་ཉིད་དོ། །དེ་དང་དེ་ལྟ་བུ་ཉིད་ཀྱིས་སྡིག་པ་ཅན་ལ་སོགས་པའི་སྐྱེ་བ་ཡོད་ན། སྐྱེ་བ་ཐམས་ཅད་ཟད་པར་བྱེད་པའི་སྐྱེ་བ་མེད་པར་གྲགས་པའི་མྱ་ངན་ལས་འདས་པའང་ཡོད་པར་འགྱུར་སྙམ་པ་ཉིད་དོ། །དེའི་ཕྱིར་གསུངས་པ། ཇི་ལྟར་སྡུག་བསྔལ་ཡོད་པ་ན། །བདེ་བ་ཞེས་པའང་ཡོད་པ་ཡིན། །དེ་ལྟར་སྲེད་པ་ཡོད་པ་ན། །སྲིད་པ་མེད་པའང་ཡོད་པ་ཡིན། །ཇི་ལྟར་ཚ་བ་ཡོད་གྱུར་ན། །གྲང་བ་ཡང་ནི་ཡོད་པ་ཡིན། །དེ་ལྟར་མེ་གསུམ་ཡོད་གྱུར་ན། །མྱ་ངན་འདས་པའང་ཡོད་པ་ཡིན། །ཇི་ལྟར་སྡིག་པ་ཡོད་གྱུར་ན། །དགེ་བ་ཡང་ནི་ཡོད་པ་ཡིན། །དེ་ལྟར་སྐྱེ་བ་ཡོད་གྱུར་ན། །སྐྱེ་བ་མེད་པའང་ཡོད་པར་འདོད། །གཞན་ཡང་བསམས་པ། ཇི་ལྟར་བཤང་བའི་ཕུང་པོར་སྐྱེས་བུ་འགྱེལ་བར་གྱུར་པ་ཞིག་ཐག་རིང་པོ་ནས་ཁ་དོག་ལྔ་དང་ལྡན་པའི་པད་མ་དང་མཚོ་ཆེན་པོ་མཐོང་ན་ལམ་གང་ནས་འགྲོ་བར་བྱས་ནས་མཚོ་དེར་འཇུག་པར་རིགས་སོ། །དེའི་ལམ་དུ་མི་འགྲོ་ན་མཚོ་ཆེན་པོའི་སྐྱོན་མ་ཡིན་ནོ། །དེ་ལྟར་ཉོན་མོངས་པའི་དྲི་མ་འཁྲུད་པ་ན་འཆི་བ་མེད་པའི་མྱ་ངན་ལས་འདའ་བའི་མཚོ་ཆེན་པོ་ཡོད་པ་ན་དེར་མི་འཇུག་ན། འཆི་བ་མེད་པའི་མྱ་ངན་ལས་འདའ་བའི་མཚོ་ཆེན་པོའི་སྐྱོན་ནི་མ་ཡིན་ནོ། །ཇི་ལྟར་ཡང་ཆོམ་རྐུན་པས་ཡོངས་སུ་བསྐོར་བའི་སྐྱེས་བུ་འབྲོས་པའི་ལམ་ཡོད་པ་ལ་མྱུར་དུ་མི་འབྲོས་ན་ལམ་གྱི་སྐྱོན་མ་ཡིན་ཏེ་སྐྱེས་བུའི་སྐྱོན་ཡིན་ནོ། །དེ་ལྟར་ཉོན་མོངས་པས་ཡོངས་སུ་བསྐོར་ནས་བཟུང་བའི་སྐྱེས་བུ་ལ་ཞི་བ་མྱ་ངན་ལས་འདའ་བའི་ལམ་ཡོད་པར་གྱུར་པ་ན་ལམ་མི་ཚོལ་བ་ནི་ལམ་གྱི་སྐྱོན་མ་ཡིན་ཏེ་གང་ཟག་གི་སྐྱོན་ཡིན་ནོ། །ཇི་ལྟར་ནད་ཀྱིས་གཟིར་བའི་སྐྱེས་བུ་ལ་ནད་གསོ་བའི་སྨན་པ་ཡོད་པར་གྱུར་ན་གལ་ཏེ་དེའི་གནས་སུ་ནད་གསོ་བའི་སྨན་པ་མི་ཚོལ་ན་སྨན་པའི་སྐྱོན་མ་ཡིན་ཏེ་ནད་པའི་སྐྱོན་
ཡིན་ནོ། །དེ་ལྟར་ཉོན་མོངས་པའི་ནད་ཀྱིས་གཟིར་བའི་སྐྱེས་བུ་ལ་ཉོན་མོངས་པ་ཞི་བར་བྱེད་པའི་མཆོག་ཏུ་མཁས་པ་ཡོད་པར་གྱུར་ན། སློབ་དཔོན་ཚོལ་བར་མི་བྱེད་ན་དེ་ནི་སྐྱེས་བུའི་སྐྱོན་ཡིན་ཏེ་ཉོན་མོངས་པ་འཇོམས་པར་བྱེད་པའི་སློབ་དཔོན་གྱི་སྐྱོན་ནི་མ་ཡིན་ནོ། །དེའི་ཕྱིར་གསུངས་པ། ཇི་ལྟར་མི་གཙང་གོས་པའི་མི། །གང་བའི་མཚོ་ནི་མཐོང་བཞིན་དུ། །མཚོ་དེར་འཇུག་པར་མི་བྱེད་ན། །དེ་ནི་མཚོ་ཡི་སྐྱོན་མིན་ནོ། །དེ་ལྟར་ཉོན་མོངས་དྲི་འཁྲུད་པ། །བདུད་རྩིའི་མཚོ་ནི་ཡོད་པ་ཡི། །མཚོ་དེ་ལ་ནི་མི་འཇུག་ན། །བདུད་རྩི་མཚོ་ཡི་སྐྱོན་མིན་ནོ། །ཇི་ལྟར་ཆོམ་རྐུན་གྱིས་བསྐོར་བ། །འགྲོ་བའི་ལམ་ནི་ཡོད་པ་ལ། །སྐྱེས་བུ་འབྲོས་པར་མི་བྱེད་ན། །དེ་ནི་ལམ་གྱི་སྐྱོན་མ་ཡིན། །ཇི་ལྟར་ཉོན་མོངས་ཀྱིས་བསྐོར་ན། །ཞི་བའི་ལམ་ནི་ཡོད་པ་ལ། །དེ་ཡི་ལམ་དུ་མི་འཇུག་ན། །ཞི་བའི་ལམ་གྱི་སྐྱོན་མ་ཡིན། །ཇི་ལྟར་ནད་ཀྱིས་གཟིར་བའི་མི། །གསོ་དཔྱད་བྱེད་པ་ཡོད་གྱུར་པ། །ནད་ནི་ཞི་བར་མི་བྱེད་ན། །དེ་ནི་སྨན་པའི་སྐྱོན་མ་ཡིན། །དེ་ལྟར་ཉོན་མོངས་པ་ཡི་ནད། །གཟིར་ཅིང་སྡུག་བསྔལ་གྱུར་པའི་ཚེ། །སློབ་དཔོན་ཚོལ་བར་མི་བྱེད་ན། །སློབ་དཔོན་གྱི་ནི་སྐྱོན་མ་ཡིན། །གཞན་ཡང་བསམས་པ། ཇི་ལྟར་རྒྱན་གྱིས་བརྒྱན་པའི་སྐྱེས་བུའི་མགྲིན་པ་ལ་མི་གཙང་བ་བཅིངས་ན་དེ་དོར་ནས་བདེ་བར་འགྲོ་བ་བཞིན་དུ། དེ་ལྟར་བདག་ཀྱང་མི་གཙང་བའི་ལུས་སྤངས་ཏེ་ལྟོས་པ་མེད་པར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །གཞན་ཡང་ཇི་ལྟར་སྐྱེས་པ་དང་བུད་མེད་ཀྱིས་བཤང་བའི་གནས་སུ་བཤང་བ་དོར་བར་བྱས་ནས་སྣོད་དུ་བླུགས་ཏེ་ཁུར་ནས་འགྲོ་བར་བྱེད་པ་མ་ཡིན་གྱི། ལྟོས་པ་མེད་པར་སྐྱུག་བྲོ་བས་དོར་ནས་འགྲོའོ། །དེ་ལྟར་བདག་ཀྱང་མི་གཙང་བའི་ལུས་ལ་སོགས་པ་ལ་ལྟོས་པ་མེད་པར་དོར་ནས་འཆི་བ་མེད་པའི་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །གཞན་ཡང་ཇི་ལྟར་གྲུ་མཁན་རྣམས་ནི་གྲུ་རྡོལ་བ་རྣམས་ལ་ལྟོས་པ་མེད་པར་དོར་ནས་འགྲོ་བ་དེ་བཞིན་དུ་བདག་ཀྱང་སྒོ་དགུའི་རྨ་འདི་རྣམས་ཀྱི་ནང་ནས་འབབ་པའི་ལུས་འདི་དོར་ནས་ལྟོས་པ་མེད་པར་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །གཞན་ཡང་ཇི་ལྟར་སྐྱེས་བུ་སྣ་ཚོགས་པའི་རིན་
པོ་ཆེ་བླངས་ནས་ཆོམ་རྐུན་པ་དང་འགྲོགས་ཏེ། ལམ་དུ་འགྲོ་ན་རང་གི་རིན་པོ་ཆེ་བརླག་པར་དོགས་པའི་འཇིགས་པས་དེ་རྣམས་དོར་ནས་ལམ་བཟང་པོར་འཇུག་པ་བཞིན་ནོ། །དེ་ལྟར་བདག་ཀྱང་ལུས་མི་གཙང་བ་དུ་མ་ཅན་རིན་པོ་ཆེ་འཕྲོག་པའི་ཆོམ་རྐུན་བཞིན་དུ་གལ་ཏེ་སྲེད་པ་འདི་བྱེད་ན་འཕགས་པའི་ལམ་གྱི་དགེ་བའི་ཆོས་ཀྱི་རིན་པོ་ཆེ་བདག་གིས་བརླག་པར་དོགས་སོ། །དེའི་ཕྱིར་བདག་གིས་ཆོམ་རྐུན་ལྟ་བུའི་ལུས་འདི་དོར་ནས་མྱ་ངན་ལས་འདས་པའི་གྲོང་ཁྱེར་དུ་འཇུག་པར་རིགས་སོ། །དེའི་ཕྱིར་གསུངས་པ། ཇི་ལྟར་མི་ཡིས་དྲི་ང་བ། །མགུལ་ལ་བཅིངས་ན་སྐྱུག་བྲོ་སྟེ། །དེ་དག་སྤངས་ནས་འགྲོ་བྱེད་ན། །སྐྱུག་མི་བྲོ་ཞིང་བདེ་བར་འགྲོ། །དེ་བཞིན་དུ་ནི་དྲི་ང་ལུས། །སྣ་ཚོགས་པ་ཡིས་གང་གྱུར་པ། །སྤངས་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པའོ། །ཇི་ལྟར་བཤང་བའི་གནས་སུ་ནི། །སྐྱེས་པ་བུད་མེད་ཀྱིས་བཤངས་ནས། །དོར་ནས་འགྲོ་བར་བྱེད་པ་ནི། །དོན་མེད་ལྟོས་པ་མེད་པ་ཡིན། །དེ་ལྟར་བདག་གི་ལུས་འདི་ཡང། །མི་གཙང་སྣ་ཚོགས་ཀྱིས་གང་བ། །དོར་ནས་བདག་ཀྱང་འགྲོ་བར་བྱ། །ཇི་ལྟར་བཤང་བའི་གནས་བཞིན་ནོ། །ཇི་ལྟར་གྲུ་ནི་རྡོལ་གྱུར་ན། །ཆུ་ནི་ནང་དུ་འབྱུང་བར་འགྱུར། །དེ་ནི་གྲུ་མཁན་གྱིས་དོར་ནས། །དོན་མེད་ལྟོས་པ་མེད་པ་ཡིན། །དེ་ལྟར་བདག་གི་ལུས་འདི་ཡང། །བུ་ག་དགུ་ཡང་མི་རྟག་པས། །དོར་ནས་འགྲོ་བར་བྱེད་པ་ན། །གྲུ་མཁན་གྲུ་ནི་དོར་བ་བཞིན། །ཇི་ལྟར་ཆོམ་རྐུན་ལྷན་ཅིག་མི། །ནོར་ནི་ཁྱེར་ནས་འགྲོ་བ་ན། །ནོར་ཁྱེར་འཇིགས་པ་མཐོང་བ་ན། །འཇིགས་གནས་དོར་ནས་འགྲོ་བྱེད་བཞིན། །དེ་བཞིན་དུ་ནི་ལུས་འདི་ནི། །ཆོམ་རྐུན་ཆེན་པོ་དང་མཚུངས་ཞིང། །འདིར་ནི་དོར་ནས་འགྲོ་བ་ན། །དགེ་བ་སྤྱོད་པ་འཇིགས་མེད་དོ། །དེ་བཞིན་དུ་མཁས་པ་བློ་གྲོས་བཟང་པོས་སྣ་ཚོགས་པའི་དཔེ་འདི་ཡིས་ཕན་ཡོན་གྱི་དོན་ལ་རྣམ་པར་བསམས་ཤིང་རང་གི་ཁྱིམ་དུ་དཔག་ཏུ་མེད་པའི་ལོངས་སྤྱོད་ཀྱི་ཕུང་པོ་སྔར་ཇི་ལྟར་བརྗོད་པ་བཞིན་དུ་བཀྲེན་པ་ལ་སོགས་པ་རྣམས་ལ་སྦྱིན་པ་ཆེན་པོ་བྱིན་ཏེ། ནོར་གྱི་འདོད་པ་དང་ཉོན་མོངས་པའི་འདོད་པ་སྤངས་ནས། གྲོང་ཁྱེར་འཇིགས་མེད་ལྡན་གྱི་ཕྱི་རོལ་དུ་སོང་སྟེ། གཅིག་པུར་གངས་ཅན་ཆོས་ཀྱི་རི་ཞེས་
བྱ་བ་ལ་བརྟེན་ནས། དེར་ལོ་མའི་ཁང་པར་འཆག་པར་བྱེད་ཅིང་སྐྱོན་ལྔ་པོ་མ་བཟློག་ལ་མ་སྤངས་བཞིན་དུ་དེ་ལྟར་སེམས་མཉམ་པར་བཞག་པ་དང་པོ་དང་བྱེད་པ་བརྒྱད་དང་ལྡན་པའི་མངོན་པར་ཤེས་པས་སྨྲས་པ་དང། སྟོབས་ལེན་པ་དང་དེ་རུ་གནས་ཏེ་སྐྱོན་དགུ་དང་ལྡན་པ་གྱོན་པའི་གོས་སྤངས་ནས། ཡོན་ཏན་བཅུ་གཉིས་དང་ལྡན་པའི་ཤིང་ཤུན་གྱི་དུམ་བུའི་གོས་གྱོན་ནས། དྲང་སྲོང་གི་རབ་ཏུ་བྱུང་བ་ལ་རབ་ཏུ་བྱུང་སྟེ་དེ་ལྟར་རབ་ཏུ་བྱུང་ནས་སྐྱོན་བརྒྱད་དང་ལྡན་པའི་ལོ་མའི་ཁང་པ་དེ་སྤངས་ནས་ཡོན་ཏན་བཅུ་དང་ལྡན་པའི་ཤིང་གི་དྲུང་དུ་ཉེ་བར་གནས་སོ། །འབྱོར་པ་ཐམས་ཅད་སྤངས་ནས་ཤིང་གི་འབྲས་བུ་མཆོག་ཟ་ཞིང་འདུག་པའོ། །གནས་སུ་འཆག་པར་བྱེད་པའི་དཀའ་ཐུབ་བྱེད་དོ། །ཞག་བདུན་གྱི་ནང་དེ་ཉིད་དུ་བརྒྱད་ལ་སྙོམས་པར་འཇུག་ཅིང་མངོན་པར་ཤེས་པ་ལྔ་པོ་ཐོབ་པར་གྱུར་ཏོ། །དེ་བཞིན་དུ་དེས་དོན་དུ་གཉེར་བས་མངོན་པར་ཤེས་པའི་སྟོབས་ཐོབ་པར་གྱུར་ཏོ། །དེའི་ཕྱིར་གསུངས་པ། ཇི་ལྟར་བདག་གིས་བསམས་གྱུར་པ། །སྣ་ཚོགས་བྱེ་བ་བརྒྱ་ཡི་ནོར། །མགོན་དང་མགོན་མེད་རྣམས་ལ་སྦྱིན། །གངས་ཅན་ལ་ནི་ཉེ་བར་སོང། །གངས་ཅན་དང་ནི་མི་རིང་བར། །ཆོས་ཀྱི་རི་ཞེས་བྱ་བ་ལ། །བདག་གིས་དེ་ལ་མཆོག་ཏུ་བརྟེན། །ལོ་མའི་ཁང་པ་ལེགས་བྱས་སོ། །དེ་རུ་འཆག་པར་བྱེད་པ་དང། །སྐྱོན་ནི་ལྔ་པོ་རྣམ་པར་སྤངས། །ཡོན་ཏན་བརྒྱད་དང་ཡང་དག་ལྡན། །མངོན་པར་ཤེས་པའི་སྟོབས་ལྡན་ནོ། །སྐྱོན་དགུ་དང་ནི་ལྡན་པ་ཡི། །དེར་ནི་དེ་ཉིད་དོར་གྱུར་ནས། །ཤིང་ཤུན་དུམ་བུའི་གོས་གྱོན་ཏེ། །ཡོན་ཏན་བཅུ་གཉིས་ལྡན་པའོ། །སྐྱོན་ནི་བརྒྱད་དང་ལྡན་པ་ཡི། །ལོ་མའི་ཁང་པ་སྤངས་གྱུར་ནས། །ཤིང་གི་དྲུང་དུ་ཉེ་བར་འདུག །ཡོན་ཏན་བཅུ་དང་ལྡན་པ་ཡི། །རྨོས་དང་བསྐྲུན་པའི་འབྲུ་རྣམས་ནི། །ལྷག་མ་མེད་པར་དོར་བྱས་ནས། །ཡོན་ཏན་མ་ལུས་ལྡན་པ་ཡི། །ཤིང་ཏོག་མཆོག་ནི་དང་པོར་ཟོས། །དེ་རུ་དཀའ་ཐུབ་བྱས་ནས་ནི། །འདུག་དང་འཆག་པའི་གནས་རྣམས་སུ། །ཞག་བདུན་གྱི་ནི་ནང་ཉིད་དུ། །མངོན་པར་ཤེས་པའི་སྟོབས་ཐོབ་བོ། །འདིར་ཡང་གླེང་གཞི་ནི་མཁས་པ་བློ་གྲོས་བཟང་པོས་བརྟེན་པའི་ལོ་མའི་ཁང་པ་དང་འཆག་པ་ནི་རང་གི་ལག་གིས་བྱས་པ་ལྟར་བརྗོད་དོ། །
འདིར་ཡང་དོན་ནི་སེམས་པ་ཆེན་པོ་གངས་ཅན་གྱི་ནང་ནས་འོངས་པ་དང་དེ་རིང་ཆོས་ཀྱི་རིར་ཡོང་བ་མཐོང་ནས་ལྷའི་དབང་པོ་བརྒྱ་བྱིན་གྱིས་ལས་སྣ་ཚོགས་པའི་ལྷའི་བུ་ལ་མཁས་པ་བློ་གྲོས་བཟང་པོ་འདི་ནི་རབ་ཏུ་འབྱུང་བར་འདོད་པས་སོང་སྟེ། འདིའི་གནས་རྣམས་ཀྱིས་ཅིག་དེའི་ཚིག་ཐོས་ནས་དགའ་བའི་གནས་ཕུག་ལེགས་པའི་ལོ་མའི་ཁང་པར་འཆག་པའི་གནས་བྱས་སོ། །བཅོམ་ལྡན་འདས་ཀྱིས་ཡང་དེའི་ཚེ་བདག་གིས་བསམས་ནས་གོམས་པར་བྱས་པ་རྫོགས་པ་ལས་དེའི་དུས་སུ་དེའི་རྒྱུ་མཚན་གྱིས་ཤཱ་རིའི་བུ་དེ་ཆོས་ཀྱི་རི་དེར། གནས་བཟང་པོ་ནི་བདག་གིས་བྱས། ལོ་མའི་ཁང་པ་བཟང་པོར་ལྡན། །དེར་ནི་འཆག་ཅིང་གནས་ནས་ནི། །སྐྱོན་ལྔ་པོ་ནི་རྣམ་པར་སྤངས། །ཞེས་གསུངས་སོ། །འཆག་པའི་སྐྱོན་ལྔ་པོ་གང་ཞེ་ན། སྲ་ཞིང་མི་སྙོམས་པ་དང། ནང་ན་ཤིང་རད་རོད་ཅན་དང། ནགས་ཐིབས་པོ་དང་ཤིན་ཏུ་དོག་པ་དང། ཤིན་ཏུ་ཡངས་པའོ། །སྲ་ཞིང་མི་སྙོམས་པའི་སའི་ཆར་འཆག་ཅིང་འཆག་པ་ན། རྐང་པ་ལ་འབྲུམ་བུ་འབྱུང་བ་དང། སེམས་རྩེ་གཅིག་ཏུ་མི་གནས་པ་དང། ལས་བྱེད་པའི་གནས་མི་འགྲུབ་ལ། སའི་སྟེང་མཉམ་ཞིང་འཇམ་པར་འཆག་པ་ནི་བདེ་ཞིང་ལས་བྱེད་པའི་གནས་རྫོགས་པ་དེའི་ཕྱིར་ཚ་བ་དང་མི་སྙོམས་པའི་སའི་ཆ་ནི་སྐྱོན་གཅིག་ཏུ་རིག་པར་བྱའོ། །འཆག་པའི་བར་དང་ནང་དང་ཐ་མར་ཤིང་ཡོད་པ་ན་བག་མེད་པར་འོང་ཞིང་འཆག་པ་ན་དཔྲལ་བ་དང་མགོ་ལ་གནོད་པ་བྱེད་པ་ནི་ནང་གི་ཤིང་གི་གནོད་པ་གཉིས་པའོ། །རྩྭ་དང་འཁྲི་ཤིང་ལ་སོགས་པ་ནགས་ཚལ་ཐིབས་པོའི་འཆག་སར་བྱེད་པ་ན་མུན་པ་ནག་པོའི་དུས་སུ་སྦྲུལ་ལ་སོགས་པའི་སྲོག་ཆགས་རྐང་པས་བརྫིས་ནས་འཆི་བའམ། དེས་མཆེ་བས་རྨུགས་ནས་གནོད་པ་སྐྱེལ་བ་ནི་ནགས་ཐིབས་པོའི་སྐྱོན་གསུམ་པའོ། །ཤིན་ཏུ་དོག་སའི་འཆག་སའི་མཆུ་རུ་ཁྲུ་གཅིག་པའམ་ཁྲུ་ཕྱེད་པའི་འཆག་ས་བྱེད་ན་ནང་དུ་གཅོད་པ་དང་སེན་མོའམ་སོར་མོ་འཆད་པར་འགྱུར་བ་ནི་ཤིན་ཏུ་དོག་པའི་སྐྱོན་བཞི་པའོ། །ཤིན་ཏུ་ཡངས་པའི་འཆག་སར་འཆག་པ་ན་སེམས་གཡེངས་པར་གྱུར་པ་དང། སེམས་རྩེ་གཅིག་ཏུ་གནས་པ་མི་ཐོབ་པ་ནི་ཤིན་ཏུ་ཡངས་པའི་སྐྱོན་ལྔ་པའོ། །འཆག་སའི་མཐོ་ཚད་ཀྱི་སྟུགས་སུ་ཁྲུ་ཕྱེད་
དང་དོ་ངོས་གཉིས་སུ་ཁྲུ་གཅིག་ཙམ་དཀྱུས་སུ་ཁྲུ་དྲུག་ཅུ་པ་སའི་མཐིལ་འཇམ་པ་དང་མཚུངས་ཞིང་ཡངས་པ་བྱེ་མ་དང་བཅས་པའི་འཆག་ས་ནི་རིགས་སོ། །མཆོད་རྟེན་གྱི་རིགས་མར་མེ་ལྟར་གསལ་བ་གནས་བརྟན་ཆེན་པོ་དབང་ཆེན་གྱི་འཆག་ས་ལྟ་བུ་བྱ་བར་རིགས་སོ། །དེའི་ཕྱིར་གསུངས་པ། དེ་རུ་འཆག་ས་བྱས་ལ་སྐྱོན་ལྔ་པོ་སྤང་བར་བྱའོ། །ཡོན་ཏན་བརྒྱད་དང་ལྡན་པའི་དགེ་སྦྱོང་གི་བདེ་བ་བརྒྱད་དང་ལྡན་པའོ། །དགེ་སྦྱོང་གི་བདེ་བ་བརྒྱད་དང་ལྡན་པ་ཞེས་བྱ་བ་ནི་གང་ཞེ་ན། ནོར་དང་འབྲུ་ཡོངས་སུ་འཛིན་པའི་འདོད་པ་མེད་པ་དང། ཁ་ན་མ་ཐོ་བ་མེད་པའི་བསོད་སྙོམས་ལས་འདོད་པ་མེད་པ་དང། བཟའ་བ་བཙལ་བའི་འདོད་པ་མེད་པ་དང། ནོར་གཅེས་པའི་ཡུལ་མི་སྡུག་པར་བྱེད་པའམ་མགོ་རེ་རེའི་ཁྲལ་ལ་སོགས་པ་ལེན་ན་རྒྱལ་པོའི་རིགས་ཀྱིས་ཡུལ་འཁོར་གྱི་མི་སྡུག་བསྔལ་བ་མི་འདོད་པ་དང། ཉེ་བར་མཁོ་བ་ཐམས་ཅད་ལ་འདོད་པ་མེད་པ་དང། ཆོམ་རྐུན་གྱིས་འཕྲོག་པའི་འཇིགས་པ་མེད་པ་དང། རྒྱལ་པོ་དང་རྒྱལ་ཚབ་དང་བློན་པོའི་ཉེ་བར་འཚེ་བ་མེད་པ་དང། ཕྱོགས་བཞིར་འགྲོ་བ་ན་འཚེ་བ་མེད་པ་སྟེ། དེ་ལྟར་དེར་གནས་ན་བདེ་བ་བརྒྱད་པོ་ཉམས་སུ་མྱོང་བར་ནུས་སོ། །དེ་ལྟར་ཡོན་ཏན་བརྒྱད་དང་ལྡན་པ་འདིར་གནས་པར་བྱས་ནས་མངོན་པར་ཤེས་པའི་སྟོབས་ཐོབ་པར་འགྱུར་ཞིང། དེ་ནས་དེར་གནས་ཏེ། ཟད་པར་གྱི་ལས་རྣམས་བྱས་ནས་མངོན་པར་ཤེས་པ་དང་སྙོམས་པར་འཇུག་པ་རྣམས་བསྐྱེད་པའི་ཕྱིར་ཏེ། མི་རྟག་པ་དང་སྡུག་བསྔལ་བ་དང་ལྷག་མཐོང་བརྩམས་ནས་གནས་ཐོབ་པར་བྱེད་དོ། །ལྷག་མཐོང་གི་སྟོབས་བླངས་ནས་ཇི་ལྟར་གནས་ན་དེའི་སྟོབས་བླང་བར་ནུས་སོ། །དེ་ལྟར་དེར་གནས་ནས་དེའི་མངོན་པར་ཤེས་པའི་ཕྱིར་ལྷག་མཐོང་གི་སྟོབས་འཐུན་པར་བྱས་པ་ནི་ཁང་པ་བྱས་པའི་དོན་ཡིན་ནོ། །དེར་སྐྱོན་དགུ་དང་ལྡན་པའི་གོས་དོར་བ་ནི་འདིར་སྔར་རིམ་པ་བཞིན་དུ་བརྗོད་པ་དེ་རྣམས་དེའི་ཚེ་ཁང་མིག་ཆུང་བ་དང། ཁང་མིག་ཆེ་བ་དང་འཆག་ས་ལ་སོགས་པ་སོ་སོར་བརྒྱན་ནས་མེ་ཏོག་དང་འབྲས་བུ་དང། ཤིང་ལྗོན་པའི་ཚོགས་ཡིད་དགའ་བ་དང་བསམ་པ་ཆུ་ལྟར་ཡིད་དུ་འོང་བ་གདུག་པ་ཅན་གྱི་རི་དགས་མེད་པ་དང། གནོད་པར་བྱེད་པའི་བྱའི་
ཚོགས་མེད་པ་ཤིན་ཏུ་དབེན་པར་གནས་པར་བྱའོ། །འཆག་ས་བརྒྱན་པའི་ཕྱོགས་གཉིས་དང་དབུས་སུ་རྒྱབ་ཀྱི་རྟེན་གྱི་གཞི་ལ་བརྟེན་ནས་བཞུགས་པའི་ཆེད་དུ་འཆག་སའི་ནང་དུ་ས་གཞི་མཉམ་པ་ཁ་དོག་སེར་པོ་རྡོ་དང་བསྲེས་པ་ལོ་མའི་ཁང་པའི་ནང་དུ་རལ་པའི་ཁོར་ཡུག་དང་ཤིང་ཤུན་གྱི་དུམ་བུའི་ཆོས་གོས་དང་དབྱུ་གུ་གསུམ་དང་བུམ་པ་ལ་སོགས་པ་དཀའ་ཐུབ་པའི་ཡོ་བྱད་དང་ལྡན་པ་བསྟི་གནས་ཀྱི་ནང་དུ་ཆུ་དང་བུམ་པ་ཆེན་པོར་ཆུ་དང་དུང་ཆོས་ཀྱི་ཆུ་དང་ཁམ་ཕོར་དང་མེ་ཁང་དང་སྣོད་སོལ་བ་ཅན་དང་ཤིང་ལ་སོགས་པ་དེ་ལྟར་གང་དང་གང་དུ་རབ་ཏུ་འབྱུང་བ་ལ་རིགས་སོ། །དེ་ཐམས་ཅད་བྱས་ནས་ལོ་མའི་ཁང་པའི་ལོགས་ལ་གང་ཞིག་རབ་ཏུ་འབྱུང་བར་འདོད་པ་ན་འདིའི་ཡོ་བྱད་རྣམས་བླངས་ནས་རབ་ཏུ་བྱུང་བར་གྱིས་ཤིག་ཅེས་ཡི་གེར་བྲིས་ནས། ལས་སྣ་ཚོགས་པའི་ལྷའི་བུ་ལྷའི་འཇིག་རྟེན་དུ་སོང་ངོ་། །མཁས་པ་བློ་གྲོས་བཟང་པོས་གངས་ཅན་གྱི་རིའི་འགྲམ་ན་ཆུ་ཀླུང་རྗེས་སུ་འབྲང་བ་དང་བདག་ཉིད་ཀྱི་གནས་དང་འཐུན་པའི་གནས་སུ་བལྟ་ཞིང་ཆུ་ཀླུང་བཟློག་པའི་ལས་སྣ་ཚོགས་ལས་སྤྲུལ་ཞིང་བརྒྱ་བྱིན་གྱིས་བྱིན་པའི་གནས་ཡིད་ལ་དགའ་བ་མཐོང་ངོ་། །འཆག་སའི་དཀྱུས་ཀྱི་ཕྱོགས་གཅིག་ཏུ་འགྲོ་ཞིང་རྐང་པའི་རྗེས་མི་མཐོང་བར་རབ་ཏུ་བྱུང་བ་རྣམས་ཀྱིས་ཐག་རིང་པོའི་གྲོང་ནས་བསོད་སྙོམས་བཙལ་བས་ངལ་ཞིང་འོངས་ནས་ལོ་མའི་ཁང་པར་ཞུགས་ནས་གནས་སོ་སྙམ་དུ་བསམས་སོ། །དེ་མ་ཐག་ཏུ་མ་སླེབ་པར་དུས་རིང་པོར་མ་སླེབ་པར་སོ་སོར་ཤེས་དགོས་སོ། །ཤིང་གི་ཁང་པའི་ཁང་མིག་གི་སྒོར་ཞུགས་ཏེ་ནང་དུ་ཕྱིན་ནོ། །དེ་དང་དེ་བལྟས་པས་རྩིག་པ་ཆེན་པོ་ལ་ཡི་གེ་བྲིས་པ་བཀླགས་ནས་འདི་རྣམས་ཐམས་ཅད་བདག་གི་ཡོ་བྱད་དུ་བརྟག་པར་བྱའོ། །དེ་རྣམས་བླངས་ན་རབ་ཏུ་འབྱུང་ངོ་ཞེས་བསམས་སོ། །བདག་ཉིད་ཀྱི་སྟོད་གོས་དང་སྨད་གོས་ཟུང་དག་དོར་རོ། །དེའི་ཕྱིར་གསུངས་པ། དེར་གོས་དོར་རོ། །དེ་ལྟར་བཞུགས་ནས་ཤཱ་རིའི་བུ་བདག་དེའི་ལོ་མའི་ཁང་པ་དང་སྐྱོན་དགུ་དང་བཅས་པའི་གོས་དོར་རོ། །དེ་ཡང་སྐྱོན་དགུ་གསལ་བར་མཐོང་སྟེ། དཀའ་ཐུབ་པའི་རབ་ཏུ་བྱུང་བ་རྣམས་ལ་གོས་སྐྱོན་དགུ་དང་ལྡན་པ་ནི་རྙེད་དཀའ་བའི་སྐྱོན་དང། གཞན་འདོད་པ་སྐྱེ་བའི་
སྐྱོན་དང། ལོངས་སྤྱོད་པ་ན་མྱུར་དུ་དྲི་མ་དང་ལྡན་པའི་སྐྱོན་དང། དྲི་མ་ཅན་དུ་གྱུར་ན་འཁྲུད་པ་དང་ཚོས་བྱ་དགོས་པ་དང། ལོངས་སྤྱོད་པ་ན་འདྲལ་བའི་སྐྱོན་དང། རྙིངས་ན་འཚེམ་པ་དང་ལྷན་པ་འདེབས་དགོས་པ་དང་སླར་ཡང་ཚོལ་བ་ན་རྙེད་དཀའ་བའི་སྐྱོན་དང། དཀའ་ཐུབ་པའི་རབ་ཏུ་བྱུང་བ་ལ་མི་རིགས་པའི་སྐྱོན་དང། དགྲ་ལ་སོགས་པས་འཕྲོག་པར་འགྱུར་བའི་སྐྱོན་དང། ཇི་ལྟར་ཡང་གོས་ནི་དགྲ་ལ་སོགས་པས་མི་ལེན་པ་དེའི་ཕྱིར་དེ་བཞིན་དུ་སྦེད་དགོས་པ་དང། གྱོན་པ་ན་རྒྱན་དུ་འགྱུར་བའི་སྐྱོན་དང། ཁྱེར་ནས་འགྲོ་བ་ན་ལུས་ཀྱི་ཁུར་པོ་ཆེན་པོར་འགྲོ་བའི་སྐྱོན་ནོ། །ཤིང་ཤུན་གྱི་གོས་ཞེས་པ་ནི་དེའི་ཚེ་ཤཱ་རིའི་བུ། བདག་འདིའི་སྐྱོན་དགུ་མཐོང་ནས་གོས་དོར་རོ། །ཤིང་ཤུན་ལ་རྩྭ་མུན་ཛ་དུམ་བུ་དུམ་བུར་བྱས་ནས་སྦྱོར་ཞིང་སྒྲོག་པ་ནི་ཤིང་ཤུན་ལ་སྨད་གོས་དང་སྟོད་གོས་དོན་དུ་གཉེར་བའི་ཕྱིར་རོ། །ཡོན་ཏན་བཅུ་གཉིས་དང་ལྡན་པ་ཞེས་པ་ནི་ཕན་ཡོན་བཅུ་གཉིས་དང་ལྡན་པའི་ཤིང་ཤུན་གྱི་གོས་ཀྱི་ཕན་ཡོན་བཅུ་གཉིས་དང་ལྡན་པའི་རིན་ཆུང་བ་དང། བལྟ་ན་མཛེས་པ་དང། རུང་བ་དང་འདི་རྣམས་ནི་ཕན་ཡོན་གཅིག་དང། རང་གི་ལག་གིས་བྱ་བར་ནུས་པ་ནི་གཉིས་པ་དང། ལོངས་སྤྱོད་པ་ན་དྲི་མ་ཅན་དུ་གྱུར་ཀྱང་མྱུར་དུ་བཀྲུ་བར་ནུས་པ་ནི་གསུམ་པ་དང། ལོངས་སྤྱོད་པ་ན་རྙིངས་པར་གྱུར་ཀྱང་བཙེམ་པར་ནུས་པ་ནི་བཞི་པ་དང། སླར་ཡང་ཚོལ་བ་ན་བདེ་བར་བྱེད་ནུས་པ་ནི་ལྔ་པ་དང། དཀའ་ཐུབ་པའི་རབ་ཏུ་བྱུང་བ་ལ་རིགས་པ་ནི་དྲུག་པ་དང། ཆོམ་རྐུན་པ་ལ་མི་མཁོ་བ་ནི་བདུན་པ་དང། གྱོན་པ་ན་དཀའ་ཐུབ་པའི་རྒྱན་དུ་འགྱུར་བ་ནི་བརྒྱད་པ་དང། གྱོན་པ་ན་ཡང་བར་འགྱུར་བ་ནི་དགུ་པ་དང། ཆོས་གོས་སོ་སོ་ལ་འདོད་པ་ཆུང་བ་ནི་བཅུ་པ་དང། སློང་བ་ན་ཆོས་པ་ལ་ཁ་ན་མ་ཐོ་བ་མེད་པ་ནི་བཅུ་གཅིག་པ་དང། ཤིང་ཤུན་གྱི་གོས་སྟོར་ན་ཡང་ལྟོས་པ་མེད་པ་ནི་བཅུ་གཉིས་པའོ། །སྐྱོན་བརྒྱད་དང་ལྡན་པའི་ལོ་མའི་ཁང་པ་དོར་ཞེས་པ་ནི་ཇི་ལྟར་དོར། དེའི་གོས་མཆོག་གཉིས་ཀྱི་རིགས་སུ་གྱུར་པ་ཨ་ཎ་འོ་ཛའི་མེ་ཏོག་གི་ཕྲེང་བ་ལྟ་བུའི་གོས་དམར་པོ་བླངས་ནས་སྨད་དུ་གྱོན་ཏེ་སྟེང་དུ་གཞན་ཡང་ཁ་དོག་སེར་པོའི་ཤིང་ཤུན་གྱི་གོས་གྱོན་ནས། པུན་ནཱ་གའི་མེ་ཏོག་གི་སྟན་དང་འདྲ་བའི་རྐང་པ་དང་
བཅས་པའི་གཟིག་གི་པགས་པའི་གཡང་གཞི་གྱོན་ཏེ་རལ་པའི་ཁོར་ཡུག་མགོ་བོ་ལ་བཅིངས་ནས་གཙུག་ཕུད་བརྟན་པར་བྱ་བའི་ཕྱིར་དུ་མཁྲེགས་པའི་སྤྱི་ཁབ་བཙུགས་སོ། །མུ་ཏིག་གི་དྲ་བ་བཞིན་དུ་འཐེན་ཐག་བྱི་རུའི་ཁ་དོག་ལྟ་བུའི་བུམ་པ་ནང་དུ་བཅུག་སྟེ་གནས་གསུམ་གྱི་ཀྱོག་པོའི་ཤིང་དེ་བླངས་ནས་ཁུར་ཤིང་དེའི་ཕྱོགས་གཅིག་ལ་བུམ་པ་དང་ཕྱོགས་གཉིས་ལ་ལྕགས་ཀྱུ་དང་སྨྱུག་འཁུར་དང་དབྱུག་གུ་གསུམ་པ་ལ་སོགས་པ་བཟུང་ཞིང་ཁྱེར་ནས་ཕྲག་པའི་ཁུར་དུ་ཁྱེར་ཏེ་ལག་པ་གཡས་སུ་འཁར་བ་བཟུང་ནས་ལོ་མའི་ཁང་པ་ནས་བྱུང་སྟེ་ཁྲུ་དྲུག་ཅུ་པའི་འཆག་ས་ཆེན་པོར་ཕན་ཚུན་དུ་འཆག་པར་བྱེད་ཅིང་རང་གི་ཆ་ལུགས་ལ་བལྟས་ནས། བདག་གི་འདོད་པ་ཡོངས་སུ་རྫོགས་པར་ཐོབ་བོ། །བདག་ཉིད་མཛེས་པར་རབ་ཏུ་བྱུང་ནས་སངས་རྒྱས་དང་རང་སངས་རྒྱས་ལ་སོགས་པའི་སྐྱེས་བུ་དཔའ་བོས་བསྔགས་པ་དང་བསྟོད་ཅིང། རབ་ཏུ་བྱུང་བ་ཞེས་བྱ་བ་འདི་ནི་ཁྱིམ་གྱི་འཆིང་བ་སྤངས་ནས་བདག་གིས་ངེས་པར་བྱུང་ཞིང་རབ་ཏུ་བྱུང་བ་མཆོག་བདག་གིས་ཐོས་པས་དགེ་སྦྱོང་གི་ཆོས་བདག་གིས་བྱས་སོ། །བདེ་བའི་འབྲས་བུ་བདག་གིས་ཐོབ་ནས་སྤྲོ་བ་སྐྱེས་སོ། །ཁུར་དལ་བུས་ས་ལ་བཞག་ནས་འཆག་སའི་དབུས་སུ་ཁ་དོག་སེར་པོའི་རྡོའི་སྟེང་དུ་གསེར་གྱི་གཟུགས་བརྙན་ལྟ་བུ་བཞུགས་ཏེ་ཉིན་མོའི་ཆ་སོང་ནས་སྲོད་ཀྱི་དུས་སུ་ལོ་མའི་ཁང་པའི་ནང་དུ་བཞུགས་ནས། ཤིང་ཁྲི་ལེགས་པོའི་གཞོག་གི་སྟེང་དུ་ཉལ་ལོ། །ལུས་ལ་སེར་བུས་གོས་པར་བྱེད་ཅིང་ནམ་གྱི་ཆ་སྨད་ལ་ལངས་ཏེ་བདག་ཡོད་པའི་དོན་ལ་རྟོག་ཅིང་བདག་གིས་ཁྱིམ་གྱི་གནས་ཀྱི་སྐྱོན་མཐོང་ནས་བདུད་རྩི་ལ་ལོངས་སྤྱོད་པ་དང་གྲགས་པ་མཐའ་ཡས་པ་སྤངས་ནས་དགོན་པར་གནས་ཏེ་ངེས་པར་འབྱུང་བ་བཙལ་བའི་ཕྱིར་རབ་ཏུ་བྱུང་ངོ་། །དེ་ནས་བཟུང་ནས་བག་མེད་པའི་སྤྱོད་པའི་རྟོགས་པ་དང་རབ་ཏུ་དབེན་པ་སྤངས་ནས་འགྲོ་བ་ལོག་པའི་སྦྲང་མས་ཟ་བས་ད་ནི་བདག་གི་རབ་ཏུ་དབེན་པ་དོར་བར་རིགས་སོ། །བདག་གིས་ཀྱང་ཁྱིམ་པའི་གནས་ཟང་ཟིང་དང་བཅས་པར་མཐོང་སྟེ་ཕྱིན་ནས་ལོ་མའི་ཁང་པ་ཡིད་དུ་འོང་བ་འདི་ཡང་ཁ་དོག་སེར་པོས་ས་གཞི་ལ་ཞལ་བ་ལེགས་པར་བྱས་ནས། དངུལ་གྱི་ཁ་དོག་ལྟར་དཀར་བའི་རྩིག་པ་རྣམས་དང་ཐོག་
ཕུག་རོན་གྱི་རྐང་པའི་ཁ་དོག་ལྟར་དམར་བའི་ལོ་མའི་བླ་གབ་ཅན་ནོ། །སྣ་ཚོགས་པའི་ཁ་དོག་ཅན་གྱི་ཤིང་ཁྲིའི་སྟན་ལ་ཉལ་བ་དང་འདུག་པ་ན་བདེ་བར་བལྟ་བ་དེ་རྣམས་ནི་ཆེས་ཆེར་ལྷག་པར་ཁྱིམ་པའི་ཕུན་སུམ་ཚོགས་པ་དང་འདྲ་བར་མཐོང་ངོ་། །ལོ་མའི་ཁང་པའི་སྐྱོན་བལྟས་པས་སྐྱོན་བརྒྱད་མཐོང་སྟེ། ལོ་མའི་ཁང་པ་ལ་ལོངས་སྤྱོད་པ་ན་སྐྱོན་བརྒྱད་པོ་ནི། ཤིང་མང་པོ་ལ་ནོར་མང་པོ་དགོས་པ་དང་བསྡུས་ནས་ཁང་པ་བྱེད་ཅིང་ཚོལ་བ་ནི་སྐྱོན་གཅིག་པ་དང། རྩྭ་དང་ས་འཛད་པ་དང་ཡང་དང་ཡང་ཟད་པས་ན་བཅོས་དགོས་པ་རྒྱུན་མི་འཆད་པ་ནི་སྐྱོན་གཉིས་པ་དང། ཉལ་བའི་གནས་ཞེས་བྱ་བ་ནི་ཆེན་པོ་ལ་རིགས་ཏེ། དུས་མ་ཡིན་པར་སློང་དགོས་པས་སེམས་གཅིག་ཏུ་མི་གནས་པ་དང་འགྲོ་དགོས་པ་ནི་སྐྱོན་གསུམ་པ་དང། གྲང་བ་དང་དྲོ་བ་དང་འཇམ་པ་དང་ལུས་བདེ་བར་བྱེད་པ་ནི་སྐྱོན་བཞི་པ་དང། ཁང་པའི་ནང་དུ་ཞུགས་ནས་སྡིག་པ་བྱེད་པར་ནུས་པ་དང། ངོ་ཚ་བ་བཟློག་པ་ནི་སྐྱོན་ལྔ་པ་དང། བདག་གི་ཡིན་ནོ་ཞེས་བསྲུང་བ་ནི་སྐྱོན་དྲུག་པ་དང། ཁྱིམ་པ་ཡོད་ཞེས་པ་གཉིས་པའི་སྐྱོན་བདུན་པ་དང། ཤིག་དང་འདྲེ་ཤིག་དང་ཁྱི་ཤིག་ལ་སོགས་པའི་སྲོག་ཆགས་དུ་མ་གནས་པར་འགྱུར་བ་ནི་སྐྱོན་བརྒྱད་པའོ། །འདི་རྣམས་ཀྱི་སྐྱོན་བརྒྱད་པོ་རྣམས་མཐོང་ནས་སེམས་པ་ཆེན་པོས་ལོ་མའི་ཁང་པ་སྤངས་སོ། །དེའི་ཕྱིར་གསུངས་པ། སྐྱོན་བརྒྱད་དང་ནི་ལྡན་པ་ཡི། །ལོ་མའི་ཁང་པ་སྤངས་ཞེས་པ། །ཤིང་གི་དྲུང་དུ་གནས་གྱུར་ན། །ཡོན་ཏན་བཅུ་དང་ལྡན་པོ་ཡིན། །ཡིབ་པའི་གནས་རྣམས་སྤངས་པ་དང། །ཡོན་ཏན་བཅུ་དང་ལྡན་པ་ཡི། །ཤིང་གི་དྲུང་དུ་གནས་པའོ། །ཞེས་བརྗོད་པ་ནི་དེ་ལ་ཡོན་ཏན་བཅུ་པོ་འདི་བསྩག་མི་དགོས་པ་ནི་ཡོན་ཏན་གཅིག་དང། ཉལ་བར་གནས་པ་ཙམ་གྱིས་བསྲུང་མི་དགོས་པར་རྙེད་པ་ནི་གཉིས་པ་དང། དེར་བྱི་དོར་བྱེད་པ་མེད་པར་ལོངས་སྤྱོད་པ་དང་བདེ་བར་གནས་པ་དང་སློང་བ་མེད་པ་ནི་གསུམ་པ་དང། ངོ་ཚ་བ་ན་ཡིབ་པ་མེད་ཅིང་དེར་སྡིག་པ་བྱེད་པ་མེད་ལ་སྦེད་པ་མེད་པ་ནི་བཞི་པ་དང། བླ་གབ་མེད་པའི་གནས་བཞིན་དུ་ལུས་རྟག་ཏུ་སྡོད་པ་མེད་པ་ནི་ལྔ་པ་དང། ཡོངས་སུ་འཛིན་པར་མི་འདོད་པ་ནི་དྲུག་པ་དང། ཁྱིམ་གྱི་འདོད་པ་སྤངས་པ་ནི་བདུན་པ་དང། མང་པོ་དགོས་པའི་འཛིན་པ་མེད་པ་
དང་ཡོངས་སུ་བསྲུང་བ་མེད་པ་དང་འགྲོ་བ་ན་འདོད་པ་མེད་པ་ནི་བརྒྱད་པ་དང། སྡོད་པ་ན་དགའ་བ་དང་བཅས་པ་མེད་པ་ནི་དགུ་པ་དང། ཤིང་དྲུང་གི་གནས་ནི་སོང་ཞིང་སོང་བ་ན་རྙེད་སླ་བ་དང་ལྟོས་པ་མེད་པ་ནི་བཅུ་པའོ། །ཡོན་ཏན་བཅུ་པོ་འདི་མཐོང་སྟེ་ཤིང་གི་འགྲམ་དུ་གནས་ཞེས་བརྗོད་པ་དང། འདི་ལྟ་བུ་དེ་རྣམས་ནི་བྱེད་པར་བསམས་པའོ། །སེམས་པ་ཆེན་པོ་སང་གི་ཉི་མ་ལ་བསོད་སྙོམས་ལ་གཤེགས་པས་དེ་མ་ཐག་ཏུ་གྲོང་དུ་སླེབ་སྟེ་མི་རྣམས་སྤྲོ་བ་ཆེན་པོ་སྐྱེས་ནས་བསོད་སྙོམས་བྱིན་ནོ། །དེའི་གདུགས་ཚོད་ཐོན་ནས་གནས་སུ་བྱོན་ཏེ་སླེབ་ཅིང་བཞུགས་ནས་བསམས་པ། བདག་གིས་བསོད་སྙོམས་ཐོབ་པའི་ཕྱིར་རབ་ཏུ་བྱུང་བ་ནི་མ་ཡིན་ནོ། །ཟས་ཞིམ་པ་ཞེས་བྱ་བ་འདིས་ང་རྒྱལ་གྱི་རྒྱགས་པ་དང། སྐྱེས་བུ་འདོད་པའི་རྒྱགས་པ་འཕེལ་བ་དང། བཟའ་བའི་གཞི་ལ་བརྟེན་ནས་སྡུག་བསྔལ་མཐའ་མེད་དོ། །བདག་གིས་སླར་ཡང་བཏབ་པ་དང་བསྐྲུན་པ་ལས་སྐྱེས་པའི་འབྲུའི་བཟའ་བ་སྤངས་ནས། འབྲས་བུ་མཆོག་གི་བཟའ་བ་ལ་བརྟེན་པར་བྱའོ། །དེས་དེ་ནས་དེ་བླངས་ཏེ། དེ་ལྟར་བྱས་ནས་ལུས་སྡུག་བསྔལ་དུ་འབད་པ་བྱས་པ་དང་ཞག་བདུན་གྱི་ནང་དུ་སྙོམས་པར་འཇུག་པ་བརྒྱད་པོ་རྣམས་དང་མངོན་པར་ཤེས་པ་ལྔ་སྐྱེས་ཏེ་དེའི་ཕྱིར་གསུངས་པ། བཏབ་དང་བསྐྲུན་པའི་འབྲུ་རྣམས་ནི། །ལྷག་མ་མེད་པར་སྤངས་པ་དང། །ཡོན་ཏན་དུ་མ་དང་ལྡན་པའི། །འབྲས་བུ་སྩོགས་ལ་འཇུག་པའོ། །དེར་ནི་དཀའ་ཐུབ་ཀྱིས་གནས་དང། །སྡོད་དང་འཆག་པའི་གནས་རྣམས་སུ། །ཞག་བདུན་གྱི་ནི་ནང་ཉིད་དུ། །མངོན་པར་ཤེས་པའི་སྟོབས་ཐོབ་བོ། །དེ་ལྟར་མངོན་པར་ཤེས་པ་ཐོབ་ནས། བློ་གྲོས་བཟང་པོ་དཀའ་ཐུབ་པས་བདེ་བའི་སྙོམས་པར་འཇུག་པ་ལ་གནས་སོ། །དེའི་ཚེ་མར་མེ་མཛད་ཅེས་བྱ་བའི་སྟོན་པ་འཇིག་རྟེན་དུ་བྱོན་པར་གྱུར་ཏོ། །དེ་མངལ་དུ་ཞུགས་ནས་བལྟམ་པ་དང་བྱང་ཆུབ་པ་དང། ཆོས་ཀྱི་འཁོར་ལོ་བསྐོར་བ་ན། འཇིག་རྟེན་གྱི་ཁམས་སྟོང་ཕྲག་བཅུ་པོ་ཐམས་ཅད་གཡོས་སོ་རབ་ཏུ་གཡོས་སོ་སྒྲ་སྒྲོགས་སོ། །སྒྲ་ཆེར་སྒྲོགས་སོ། །སྔོན་གྱི་མཚན་མར་གྱུར་པ་སུམ་ཅུ་རྩ་གཉིས་དང། བློ་གྲོས་བཟང་པོ་དཀའ་ཐུབ་པས་སྙོམས་པར་འཇུག་པའི་
བདེ་བ་ལ་གནས་པས་དེ་རྣམས་ཀྱི་སྒྲ་མ་ཐོས་པ་དང་དེ་རྣམས་ཀྱི་སྔོན་གྱི་མཚན་མ་མ་མཐོང་ངོ་། །དེའི་ཕྱིར་གསུངས་པ། སྟན་གཅིག་ལ་ནི་རྟེན་ནས་སུ། །བདག་གིས་དེ་ལྟར་གྲུབ་པ་ཐོབ། །རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པར་གྱུར། །མངལ་དུ་ཞུགས་ནས་སྐྱེས་གྱུར་པ། །སངས་རྒྱས་ནས་ནི་ཆོས་བསྟན་པ། །མཚན་མ་བཞི་པོ་མཐོང་མ་གྱུར། །བསམ་གཏན་བདེ་བས་མ་ཐོས་སོ། །དེའི་ཚེ་སྟོབས་བཅུ་ལྡན་པའི་མར་མེ་མཛད་ཟག་པ་ཟད་པ་འབུམ་ཕྲག་བཞིའི་འཁོར་དང་བཅས་པ་གོ་རིམས་བཞིན་དུ་སེམས་ཅན་ལ་ཕན་པའི་ཕྱིར་འཆག་ཅིང་དགའ་བ་ཅན་ཞེས་བྱ་བའི་གྲོང་ཁྱེར་དུ་བྱོན་ཏེ། བལྟ་ན་སྡུག་ཅེས་བྱ་བའི་གཙུག་ལག་ཁང་ཆེན་པོར་བཞུགས་སོ། །དགའ་བ་ཅན་ཞེས་བྱ་བའི་གྲོང་ཁྱེར་ན་གནས་པའི་མར་མེ་མཛད་དགེ་སྦྱོང་གི་དབང་ཕྱུག་དེ་ཉིད་ཡང་དག་པར་རྫོགས་པའི་བྱང་ཆུབ་ཀྱི་མཆོག་ཐོབ་ནས་མཆོག་གི་ཆོས་ཀྱི་འཁོར་ལོ་བསྐོར་རོ། །དེ་ལྟར་རིམ་གྱིས་སེམས་ཅན་ལ་ཕན་པའི་དོན་དུ་འཆག་ཅིང་དགའ་བ་ཅན་གྱི་གྲོང་ཁྱེར་དུ་བྱོན་ཏེ། བལྟ་ན་སྡུག་གི་གཙུག་ལག་ཁང་ཆེན་པོར་བཞུགས་པ་དེ་དེ་ན་གནས་པ་རྣམས་ཀྱིས་ཐོས་ནས་མར་གསར་དང་ཞུན་མར་ལ་སོགས་པ་དང་སྨན་དང་གོས་དང་མལ་ཆ་ལ་སོགས་པ་དང་དྲིའི་ཕྲེང་བ་ལ་སོགས་པ་ལག་ཏུ་ཐོགས་ཏེ། གང་གིས་སངས་རྒྱས་དང་གང་གིས་ཆོས་དང་གང་གིས་དགེ་འདུན་དང་དེ་རྣམས་ལ་འདུད་ཅིང་དེ་ལ་དགའ་བ་དང་དེ་ལ་ཤིན་ཏུ་གུས་པ་དང་བཅས་པས་སྟོན་པའི་དྲུང་དུ་སོང་སྟེ། ཕྱག་བྱས་ནས་དྲི་ལ་སོགས་པའི་མཆོད་པ་བྱས་ཏེ། ཕྱོགས་གཅིག་ཏུ་འཁོད་ཅིང་ཆོས་བསྟན་པ་མཉན་ནས་སང་མགྲོན་དུ་གཉེར་ཏེ་རང་གི་ས་ནས་སོང་ངོ་། །དེ་རྣམས་བྱས་ནས་སང་སྦྱིན་པ་ཆེན་པོ་སྟ་གོན་བྱ་སྟེ་གྲོང་ཁྱེར་བརྒྱན། སྟོབས་བཅུ་པ་བྱོན་པའི་ལམ་བརྒྱན་ཏེ་ཆུ་ཡིས་ས་གཞི་མི་མཉམ་པའི་གནས་རྣམས་སུ་ས་བླུག་ནས་ས་གཞི་མཉམ་པར་བྱས་སོ། །དངུལ་གྱི་མདོག་ལྟ་བུའི་བྱེ་མས་སྤྲས་སོ། །མེ་ཏོག་གི་ཕྲེང་བ་ཉིད་དང་མེ་ཏོག་སིལ་མ་དགྲམ་པར་བྱས་སོ། །ཁ་དོག་སྣ་ཚོགས་པའི་གོས་ཀྱི་རྒྱལ་མཚན་དང་བ་དན་ལ་སོགས་པ་བསྒྲེང་བར་བྱས་སོ། །ཆུ་ཤིང་གི་ཤིང་དང་བུམ་པ་གང་བ་རྣམས་བསྒྲིགས་ནས་གཞག་པར་བྱས་སོ། །དེའི་ཚེ་བློ་གྲོས་བཟང་པོ་དཀའ་ཐུབ་
པས་རང་གི་གནས་ནས་སྟེང་དུ་འཕགས་ཏེ་མི་དེ་རྣམས་ཀྱི་སྟེང་གི་ཆའི་མཁའ་ལ་འགྲོ་བ་དེ་ལ་མི་རྣམས་དགའ་ཞིང་ཚིམ་པས་མཐོང་སྟེ་ནམ་མཁའ་ནས་ས་ལ་ཕྱོགས་གཅིག་ཏུ་འཁོད་པ་ལ་མི་རྣམས་ཀྱིས་དྲིས་སོ། །བསོད་ནམས་དང་ལྡན་པ་རྣམས་ལམ་འདི་རྣམས་སུ་ཞིག་གིས་བརྒྱན་པར་བྱས། དེའི་ཕྱིར་གསུངས་པ། ཡུལ་དང་ཕྱོགས་ཀྱི་མཐར་གནས་པའི། །དེ་བཞིན་གཤེགས་པ་མགྲོན་དུ་གཉེར། །དེ་ཉིད་བྱིན་ནས་ལམ་འདི་ནི། །སེམས་ནི་དགའ་བས་ལམ་ཕྱོགས་གཅིག །བདག་ནི་དེ་ཚེ་དེ་ཡི་དུས། །རང་གི་གནས་ནི་བྱེད་པ་དང། །ཤིང་ཤུན་གོས་ནི་རླུང་གིས་གཡོ། །དེ་ཚེ་བདག་ནི་མཁའ་ལ་འགྲོ། །དགའ་དང་ཚིམ་དང་བདེ་བ་ཡིས། །སྐྱེ་བོ་ལམ་འཕྱག་བྱེད་པ་མཐོང། །ནམ་མཁའ་ལས་ནི་བྱོན་ནས་སུ། །དེ་མ་ཐག་པར་མི་ལ་དྲིས། །དགའ་དང་ཚིམ་ལ་བདེ་བ་ཡི། །མཁས་ཤིང་རིག་པའི་སྐྱེ་བོ་ཆེ། །ལམ་ནི་སྙོམས་པར་བྱེད་པ་ན། །སུ་ཞིག་ཕྱིར་དུ་ལམ་འདི་འཆོས། །མི་རྣམས་ཀྱིས་སྨྲས་པ། བཙུན་པ་དཀའ་ཐུབ་པ་བློ་གྲོས་བཟང་པོ་ཉིད་ཀྱིས་མི་མཁྱེན་ནམ། སྟོབས་བཅུ་དང་ལྡན་པའི་མར་མེ་མཛད་ཀྱིས་ཡང་དག་པར་རྫོགས་པའི་སངས་རྒྱས་ཐོབ་ནས། ཆོས་ཀྱི་འཁོར་ལོ་བསྐོར་རོ། །སེམས་ཅན་རྣམས་ལ་ཕན་པའི་དོན་དུ་འཆག་ཅིང། བདག་ཅག་གི་གྲོང་ཁྱེར་དུ་བྱོན་ནས་བལྟ་ན་སྡུག་གི་གཙུག་ལག་ཁང་ཆེན་པོར་བཞུགས་ལ་བདག་ཅག་གིས་བཅོམ་ལྡན་འདས་དེ་མགྲོན་དུ་གཉེར་ཏོ། །དེའི་ཕྱིར་སངས་རྒྱས་བཅོམ་ལྡན་འདས་དེ་བྱོན་པའི་ལམ་བརྒྱན་པར་བྱའོ། །དཀའ་ཐུབ་པ་བློ་གྲོས་བཟང་པོས་བསམས་པ། སངས་རྒྱས་ཞེས་བྱ་བའི་སྒྲ་ཙམ་ཡང་འཇིག་རྟེན་དུ་རྙེད་པར་དཀའོ། །དེ་ལྟར་སངས་རྒྱས་བྱོན་པ་ལ་བདག་མི་འདི་རྣམས་དང་བཅས་པས་སྟོབས་བཅུ་པའི་ལམ་བརྒྱན་པར་བྱེད་པར་རིགས་སོ། །དེས་མི་རྣམས་ལ་གསུངས་པ། གལ་ཏེ་ཁྱོད་རྣམས་ཀྱིས་ལམ་འདི་རྣམས་སངས་རྒྱས་ཀྱི་ཆེད་དུ་བརྒྱན་པར་གྱིས་ཤིག །བདག་ལ་ཡང་གནས་གཅིག་སྦྱིན་པར་གྱིས་ཤིག །བདག་གིས་ཀྱང་ཁྱེད་རྣམས་དང་འགྲོགས་ནས་ལམ་བརྒྱན་པར་བྱའོ། །དེ་རྣམས་ཀྱིས་ལེགས་སོ་ཞེས་བསམས་ནས་དཀའ་ཐུབ་པ་བློ་གྲོས་བཟང་པོ་རྫུ་འཕྲུལ་དང་ལྡན་པར་ཤེས་ནས་ཆུ་ཡིས་གནོད་པར་བྱས་པའི་གནས་ཕན་ཚུན་དུ་བསམས་ནས་དེ་ལ་གནས་བརྒྱན་པར་གྱིས་ཤིག་ཅེས་བྱིན་ནོ། །བློ་གྲོས་
བཟང་པོ་སངས་རྒྱས་ལ་དགའ་ནས་བསམས་སོ། །བདག་གིས་གནས་འདིར་རྫུ་འཕྲུལ་གྱིས་བརྒྱན་པར་ནུས་སོ། །ཇི་ལྟར་བརྒྱན་པར་བྱས་ཀྱང་བདག་གི་ཡིད་ཚིམ་པ་མེད་དོ། །བདག་གིས་དེ་རིང་ལུས་དུབ་པར་བྱས་སོ། །ས་རྣམས་བླངས་ནས་གནས་དེར་བླུག་གོ། །དེ་དེའི་ཕྱོགས་དེ་བརྒྱན་པ་མ་གྲུབ་པར་སྟོབས་བཅུ་ལྡན་པའི་མར་མེ་མཛད་ཐུབ་པ་ཆེན་པོ་དང་མངོན་པར་ཤེས་པ་དྲུག་དང་ལྡན་པ་ཟག་པ་ཟད་པ་འབུམ་ཕྲག་བཞིའི་འཁོར་དང་བཅས་པ་རྣམས་ལ་ལྷ་རྣམས་ཀྱིས་ལྷའི་དྲི་བཟང་དང་མེ་ཏོག་གི་ཕྲེང་བ་ལ་སོགས་པས་མཆོད་པར་བྱེད་ཅིང་ལྷའི་གླུ་དབྱངས་དང་བཅས་པ་སྒྲོགས་སོ། །མི་རྣམས་ཀྱིས་མིའི་དྲི་བཟང་དང་མེ་ཏོག་གི་ཕྲེང་བ་ལ་སོགས་པས་མཆོད་པར་བྱེད་ཅིང་མཐའ་ཡས་པའི་སངས་རྒྱས་ཀྱི་རོལ་པའི་རི་མ་ནོ་ཤི་ལའི་སྟེང་དུ་སེང་གེ་སྒྲ་སྒྲོགས་པ་བཞིན་དུ། ལྷའི་ལམ་བརྒྱན་པར་བྱས་ནས་ལམ་དུ་བྱོན། བློ་གྲོས་བཟང་པོ་དཀའ་ཐུབ་པས་མིག་གིས་བལྟས་ནས་ལམ་བརྒྱན་པ་ལ་སྟོབས་བཅུ་པ་བྱོན་ནོ། །སྐྱེས་བུ་ཆེན་པོའི་མཚན་བཟང་པོ་སུམ་ཅུ་རྩ་གཉིས་ཀྱིས་བརྒྱན་པ། དཔེ་བྱད་བཟང་པོ་བརྒྱད་ཅུས་ཉེ་བར་གསལ་བ། འོད་འདོམ་གང་གིས་ཡོངས་སུ་བསྐོར་བ་དང་ནོར་བུའི་ཁ་དོག་ལྟ་བུ་ནམ་མཁའི་མཐིལ་ལ་སྣ་ཚོགས་པའི་རྣམ་པ་གློག་གི་འོད་ལྟ་བུ་དུས་དང་དུས་མ་ཡིན་པར་འབྱུང་བ་ཉིད་ཟུང་དང་ཟུང་དུ་གྱུར་པ་དང་ཁ་དོག་དྲུག་དང་ལྡན་པའི་ཚོགས་སངས་རྒྱས་ཀྱི་འོད་ཟེར་འཕྲོ་ཞིང་གཟུགས་མཆོག་ཐོབ་པའི་བདག་ཉིད་བལྟས་ནས་དེ་རིང་བདག་གིས་སྟོབས་བཅུ་པ་ལ་སྲོག་ཡོངས་སུ་གཏོང་བར་རིགས་སོ། །བཅོམ་ལྡན་འདས་འཇིམ་པའི་སྟེང་དུ་འགྲོ་བར་མི་རིགས་སོ། །ནོར་བུའི་སྤང་ལེབ་ཀྱི་ཟམ་པ་ལ་ཞབས་གནོན་ཅིང་གཤེགས་པ་ལྟ་བུར་ཟག་པ་ཟད་པ་འབུམ་ཕྲག་བཞི་དང་ལྷན་ཅིག་བདག་གི་རྒྱབ་གནོན་ཅིང་གཤེགས་སུ་གསོལ། དེ་ནི་བདག་ལ་ཡུན་རིང་པོར་ཕན་པ་དང་བདེ་བར་འགྱུར་རོ། །སྐྲ་བཀྲོལ་ཏེ་གཟིག་གི་པགས་པ་དང་ཤིང་ཤུན་གྱི་གོས་དང། འཇིམ་པ་ནག་པོའི་སྟེང་ནོར་བུའི་སྤང་ལེབ་ཀྱི་ཟམ་པ་ལྟ་བུའི་འཇིམ་པའི་སྟེང་དུ་ཉལ་ལོ། །དེའི་ཕྱིར་གསུངས་པ། བདག་གི་དེ་ལ་དྲི་ལུང་བསྟན། །འཇིག་རྟེན་འདས་པའི་སངས་རྒྱས་ནི། །རྒྱལ་བ་མར་མེ་མཛད་ཅེས་པ། །འཇིག་རྟེན་འདྲེན་པ་བྱོན་པ་ཡི། །མི་མཉམ་ལམ་ནི་འཆོས་པ་དང། །དེ་ཡི་ལམ་ནི་བྱི་དོར་བྱེད། །སངས་རྒྱས་
ཞེས་པ་བདག་གིས་ཐོས། །དེ་མ་ཐག་ཏུ་དགའ་བ་སྐྱེས། །སངས་རྒྱས་སངས་རྒྱས་ཞེས་བརྗོད་པ། །ཡིད་བདེ་དགའ་བ་སྐྱེས་པར་གྱུར། །ཚིམ་ཞིང་དགའ་བ་སྐྱེས་པའི་སེམས། །དེ་རུ་འཁོར་ཏེ་རྣམ་པར་བསམ། །འདིར་ནི་ས་བོན་བསྐྲུན་བྱས་ནས། །དེ་མ་ཐག་ཏུ་བདག་ལ་སྐྱེ། །གལ་ཏེ་སངས་རྒྱས་ཆེད་བྱི་དོར། །མ་བཅོས་གནས་གཅིག་བདག་ལ་བྱིན། །བདག་ཀྱང་བྱི་དོར་བྱེད་པ་ཡིན། །མི་མཉམ་པ་ནི་འཆོས་པའོ། །དེ་ཚེ་ལམ་ནི་བྱི་དོར་བྱ། །བདག་ལ་མ་བཅོས་གནས་གཅིག་བྱིན། །སངས་རྒྱས་སངས་རྒྱས་ཞེས་བསམ་ཞིང། །དེ་ཚེ་བདག་ནི་ལམ་འདི་འཆོས། །བདག་གི་གནས་ནི་མ་གྲུབ་པར། །ཐུབ་པ་ཆེན་པོ་མར་མེ་མཛད། །མངོན་ཤེས་དྲུག་པོ་མཚུངས་ལྡན་པར། །འབུམ་ཕྲག་བཞི་པོ་རྣམས་ལ་ནི། །དྲི་མ་མེད་ཅིང་ཟག་པ་ཟད། །རྒྱལ་བ་ལམ་དུ་བྱོན་པར་གྱུར། །བསུ་བ་བྱེད་པ་པོ་རྣམས་ནི། །རོལ་མོ་རྣམས་ནི་དཀྲོལ་བ་དང། །ལྷ་དང་མི་རྣམས་ཡི་རང་བྱེད། །ལེགས་སོ་ཞེས་པའི་ཚིག་བྱིན་ནོ། །ལྷ་ཡིས་མི་རྣམས་མཐོང་བ་དང། །མི་རྣམས་ཀྱིས་ཀྱང་ལྷ་རྣམས་མཐོང། །དེ་གཉིས་ཀྱིས་ནི་ཐལ་མོ་སྦྱོར། །དེ་བཞིན་གཤེགས་དང་ཐབས་ཅིག་འགྲོ། །ལྷ་དང་ལྷ་ཡི་རོལ་མོ་དང། །མི་དང་མི་ཡི་རོལ་མོ་དང། །གཉིས་ཀ་ཡང་ནི་རོལ་མོ་དཀྲོལ། །དེ་བཞིན་གཤེགས་དང་ཐབས་ཅིག་འགྲོ། །ལྷ་མི་མེ་ཏོག་མན་དཱ་ར། །པད་མ་པ་རི་ཚད་ཏྲ་ཀ། །ཕྱོགས་དང་མཚམས་སུ་མེ་ཏོག་འཐོར། །ལྷ་རྣམས་མཁའ་ལ་གནས་ནས་སོ། །ཙམ་པ་ཀྃ་ཤཱ་ལ་ལྃ་ནི་པཾ། །ནཱ་གཱ་པུནྣཱ་གཱ་ཀེ་ཏ་ཀྃ། །སྟེང་གི་ཕྱོགས་དང་མཚམས་སུ་འཐོར། །ས་སྟེང་འགྲོ་བ་མི་རྣམས་སོ། །དེར་ནི་བདག་གི་སྐྲ་བཀྲོལ་ནས། །ཤིང་ཤུན་ཆོས་གོས་གཟིག་ལྤགས་ནི། །འཇིམ་པའི་སྟེང་དུ་བཏིང་ནས་སུ། །ཁ་བུབ་ཏུ་ནི་བདག་གིས་ཉལ། །འཇིམ་པའི་སྟེང་ནས་མི་གཤེགས་པར། །བདག་ནི་གནོན་ཅིང་སངས་རྒྱས་རྣམས། །སློབ་མ་འཁོར་བཅས་གཤེགས་སུ་གསོལ། །བདག་ལ་ཕན་པར་འགྱུར་བ་ཡིན། །དེ་འཇིམ་པའི་སྟེང་དུ་ཉལ་ནས་སླར་ཡང་མིག་གིས་བལྟ་ཞིང་སྟོབས་བཅུ་དང་ལྡན་པའི་མར་མེ་མཛད་སངས་རྒྱས་ཀྱི་འབྱོར་པ་ཡང་དག་པར་བལྟས་ནས་དེ་ལྟར་བསམས་སོ། །གལ་ཏེ་བདག་གི་ཉོན་མོངས་པ་ཐམས་ཅད་གཞོམ་པར་འདོད་པ་དང། དགེ་འདུན་རྣམས་ཀྱི་གཞོན་ནུར་འགྱུར་བར་བྱ་བ་དང། དགའ་བ་ཅན་གྱི་གྲོང་ཁྱེར་
དུ་འཇུག་པར་འདོད་དོ། །གཞན་གྱི་ཆ་ལུགས་ཀྱིས་ཀྱང་ཉོན་མོངས་པ་འདི་གཞོམ་པར་བྱས་ནས་མྱ་ངན་ལས་འདས་པ་ཐོབ་པ་ལ་དོན་མེད་དོ། །སྟོབས་བཅུ་དང་ལྡན་པའི་མར་མེ་མཛད་བདག་གིས་ཇི་ལྟ་བ་བཞིན་དུ་བྱའོ། །མཆོག་གི་བྱང་ཆུབ་ཐོབ་ནས་སྐྱེ་བོ་མང་པོ་འཁོར་བའི་རྒྱ་མཚོ་ལ་གྲུར་ཞུགས་ནས་ཕ་རོལ་དུ་བསྒྲལ་བར་བྱས་ནས། ཕྱིས་མྱ་ངན་ལས་འདས་པ་ཐོབ་པར་བྱ་བ་འདི་ནི་བདག་གིས་རིགས་པའོ། །དེ་ནས་ཆོས་བརྒྱད་པོ་གཅིག་ཏུ་བསྡུ་སྟེ་སངས་རྒྱས་འདོད་པར་སྨོན་པས་སེམས་ལ་བལྟ་ཞིང་ཉལ་ལོ། །དེའི་ཕྱིར་གསུངས་པ། ས་གཞི་ལ་ནི་ཉལ་ནས་ནི། །བདག་གིས་དེ་ལྟར་བསམས་པ་ནས། །བདག་ནི་དེ་རིང་འདོད་པ་ཡི། །བདག་གིས་ཉོན་མོངས་གཞོམ་པའོ། །བདག་ནི་ཆ་ལུགས་གཞན་གྱིས་ཀྱང། །འདིར་ནི་ཆོས་འདི་མངོན་དུ་བྱ། །ཐམས་ཅད་མཁྱེན་པ་ཐོབ་གྱུར་ནས། །ལྷ་དང་བཅས་པ་སངས་རྒྱས་འགྱུར། །བདག་ཉིད་གཅིག་པུ་གྲོལ་ནས་ཅི། །སྐྱེས་བུ་མཐུ་ལྡན་མཐོང་བ་དང། །ཐམས་ཅད་མཁྱེན་པ་ཐོབ་གྱུར་ནས། །ལྷ་དང་མི་རྣམས་ཡང་དག་བསྒྲལ། །བདག་གི་འདི་ཡི་གཞི་ཡིས་ནི། །མཐུ་དང་ལྡན་པ་མཐོང་བ་དང། །ཐམས་ཅད་མཁྱེན་པ་ཐོབ་ནས་ནི། །སྐྱེ་བོ་མང་པོ་བདག་གིས་བསྒྲལ། །འཁོར་བའི་མདུད་པ་བཅད་ནས་ནི། །སྲིད་གསུམ་པོ་ནི་ཟད་བྱས་ལ། །ཆོས་ཀྱི་གྲུ་ཡི་ནང་ཞུགས་ནས། །ལྷ་དང་མི་རྣམས་ཡང་དག་བསྒྲལ། །གང་ཞིག་སླར་ཡང་སངས་རྒྱས་དོན་དུ་གཉེར་བའི་ཕྱིར་རོ། །མི་ཡི་ལུས་ནི་མཚན་མར་ལྡན། །སྟོན་པའི་ལྟ་བའི་རྒྱུ་དང་ནི། །རབ་བྱུང་ཡོན་ཏན་ལྡན་པ་དང། །རིགས་པ་དང་ནི་འདུན་པ་དང། །ཆོས་བརྒྱད་པོ་ནི་བསྡུས་ནས་སུ། །སྨོན་ལམ་མངོན་པར་འཕེལ་བའོ། །མིའི་ལུས་ལ་གནས་ཤིང་སངས་རྒྱས་ཉིད་དོན་དུ་གཉེར་བ་ནི་དོན་དུ་གཉེར་བ་ཕུན་སུམ་ཚོགས་པ་འགྲུབ་བོ། །ཀླུའམ་མཁའ་ལྡིང་ངམ་ལྷ་རྣམས་ཀྱིས་དེ་དོན་དུ་གཉེར་ཡང་མི་འགྲུབ་བོ། །མིའི་ལུས་སུ་གྱུར་ཅིང་སྐྱེས་བུའི་མཚན་གནས་པས་ནི་དེ་དོན་དུ་གཉེར་བ་འགྲུབ་བོ། །བུད་མེད་དམ་ཟ་མའམ་མ་ནིང་ངམ་མཚན་གཉིས་པས་ནི་འགྲུབ་པ་མ་ཡིན་ནོ། །སྐྱེས་བུར་གྱུར་ནས་དེའི་ལུས་སུ་འདོད་པ་དང་དགྲ་བཅོམ་པ་ཐོབ་པར་བྱ་བའི་ཕྱིར་དུ་ཡོངས་སུ་རྫོགས་པར་འགྲུབ་བོ། །གཞན་གྱིས་ནི་མ་ཡིན་ནོ། །སྒྱུ་དང་ལྡན་ཞིང་གལ་ཏེ་འཚོ་བ་དང་ལྡན་པའི་སངས་རྒྱས་ཀྱི་དྲུང་དུ་གཉེར་
ན་དོན་དུ་འགྲུབ་བོ། །སངས་རྒྱས་ཡོངས་སུ་མྱ་ངན་ལས་འདས་ནས་མཆོད་རྟེན་གྱི་དྲུང་དུའམ་བྱང་ཆུབ་ཤིང་གི་དྲུང་དུ་དོན་དུ་གཉེར་བས་ནི་མི་འགྲུབ་བོ། །སངས་རྒྱས་ཀྱི་དྲུང་དུ་དོན་དུ་གཉེར་ཀྱང་རབ་ཏུ་བྱུང་བའི་མཚན་མ་དང་ལྡན་པས་འགྲུབ་ཀྱི། ཁྱིམ་པའི་མཚན་མ་དང་ལྡན་པས་ནི་མ་ཡིན་ནོ། །རབ་ཏུ་བྱུང་ཡང་མངོན་པར་ཤེས་པ་ལྔ་དང་སྙོམས་པར་འཇུག་པ་བརྒྱད་ཐོབ་པས་འདོད་པར་འགྲུབ་ཀྱི། ཡོན་ཏན་འདི་རྣམས་དང་བྲལ་བས་ནི་མ་ཡིན་ནོ། །ཡོན་ཏན་དང་ལྡན་ཡང་གང་ཞིག་འཚོ་བ་དང་ལྡན་པའི་ལུས་སངས་རྒྱས་ལ་ཡོངས་སུ་བཏང་ན་འགྲུབ་ཀྱི། གཞན་དུ་ནི་མ་ཡིན་ནོ། །དེའི་གཞི་འདིས་གཞི་ཡོངས་སུ་རྫོགས་ནས་འགྲུབ་བོ། །གཞན་གྱིས་ནི་མ་ཡིན་ནོ། །གཞི་དང་ལྡན་ཡང་གང་ཞིག་སངས་རྒྱས་ཀྱི་ཆོས་ཀྱི་ཕྱིར་དུ་འདུན་པ་ཆེན་པོ་དང། སྤྲོ་བ་ཆེན་པོ་དང། རྩོལ་བ་ཆེན་པོ་དང། ཡོངས་སུ་འབད་པ་རྣམས་ཀྱིས་འགྲུབ་བོ། །གཞན་གྱིས་ནི་མ་ཡིན་ནོ། །དེ་ལ་འདིར་འདུན་པ་ཆེན་པོའི་དཔེ་ནི་གལ་ཏེ་འདི་ལྟར་གང་ཞིག་འཇིག་རྟེན་ཐམས་ཅད་ཀྱི་ཁོར་ཡུག་གི་ནང་ཆུ་ཡིས་གང་བར་གྱུར་པ་ལ་བདག་གི་ལག་པས་བརྐྱལ་ཏེ་ཕ་རོལ་དུ་འགྲོ་བར་ནུས་ན་དེས་སངས་རྒྱས་ཐོབ་པར་འགྱུར་རོ། །ཡང་ན་གང་དུ་གང་ཞིག་སླར་ཡང་ཐམས་ཅད་ཀྱི་ཁོར་ཡུག་གི་ནང་དུ་འོད་མ་མང་པོས་བཀང་སྟེ་རྐང་པས་ཉེད་ཅིང་རྡུལ་དུ་བྱེད་པས་ཕ་རོལ་དུ་འགྲོ་བར་ནུས་ན་དེ་ཡིས་སངས་རྒྱས་ཐོབ་པར་ནུས་སོ། །ཡང་ན་གང་ཞིག་སླར་ཡང་ཐམས་ཅད་ཀྱི་ཁོར་ཡུག་གི་ནང་དུ་མཚོན་ཆ་རྣམས་ཁ་གྱེན་ལ་བསྟན་པའི་མཚོན་རྩེ་མོ་བར་མེད་པས་ཡོངས་སུ་གང་བ་ལ་རྐང་པས་རྫི་ཞིང་ཕ་རོལ་དུ་འགྲོ་བར་ནུས་ན་དེས་སངས་རྒྱས་ཐོབ་པར་འགྱུར་རོ། །ཡང་ན་གང་ཞིག་གིས་སླར་ཡང་འཇིག་རྟེན་ཁོར་ཡུག་གི་ནང་དུ་སོལ་བ་འབར་བས་ཡོངས་སུ་གང་བར་བྱས་ནས་རྐང་པས་རྫི་ཞིང་ཕ་རོལ་དུ་འགྲོ་བར་ནུས་ན་དེ་ཡིས་སངས་རྒྱས་ཐོབ་པར་འགྱུར་རོ། །གང་ཞིག་དེ་རྣམས་ལས་གང་ཞིག་ལ་སྡུག་བསྔལ་བར་མི་སེམས་པར་བདག་གིས་འདི་རྣམས་ཀྱང་ཕ་རོལ་དུ་བསྒྲལ་བའམ་འགྲོ་བའམ་ཕ་རོལ་དུ་འགྲོ་བར་བྱའོ་ཞེས་ཤེས་སོ། །དེ་དེ་ལྟར་འདུན་པ་ཆེན་པོ་དང། སྤྲོ་བ་དང། རྩོལ་བ་དང། འབད་པ་རྣམས་དང་ཡང་དག་པར་ལྡན་ན་དེའི་དོན་དུ་གཉེར་བ་འགྲུབ་བོ། །གཞན་གྱིས་ནི་མ་ཡིན་ནོ། །བློ་གྲོས་བཟང་པོ་དཀའ་ཐུབ་པ་སླར་ཡང་ཆོས་བརྒྱད་པོ་འདི་རྣམས་
བསྡུས་ནས་སངས་རྒྱས་འདོད་པའི་སྨོན་ལམ་བཏབ་ནས་ཉལ་ལོ། །བཅོམ་ལྡན་འདས་མར་མེ་མཛད་ཀྱིས་ཀྱང་བྱོན་ནས་བློ་གྲོས་བཟང་པོ་དཀའ་ཐུབ་པའི་མགོའི་གམ་དུ་བཞུགས་ཏེ་ནོར་བུ་སེང་གེའི་ཁང་པའི་གཟེབ་ཀྱི་སྒོར་སྟོན་པ་བཞིན་དུ་ཁ་དོག་ལྔ་པ་རབ་ཏུ་དངས་པ་དང་ལྡན་པའི་སྤྱན་གྱིས་གཟིགས་ནས་འཇིམ་པའི་སྟེང་ན་ཉལ་བའི་བློ་གྲོས་བཟང་པོ་དཀའ་ཐུབ་པ་གཟིགས་སོ། །དཀའ་ཐུབ་པ་འདི་སངས་རྒྱས་ཐོབ་པའི་ཕྱིར་དུ་སྨོན་ལམ་འདེབས་ཤིང་ཉལ་ལོ། །འདིའི་དོན་དུ་གཉེར་བ་འགྲུབ་བམ་མི་འགྲུབ་སྙམ་དུ་དགོངས་ནས་མ་འོངས་པའི་ཡེ་ཤེས་ཀྱིས་རྟོག་ཅིང་དཔྱོད་དོ། །འདི་ནས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་ནས་གཽ་ཏམ་ཞེས་བྱ་བའི་སངས་རྒྱས་སུ་འགྱུར་ཞེས་རྟོགས་ནས་འཁོར་གྱི་ནང་དུ་ལུང་སྟོན་པས་བཀའ་སྩལ་པ། མཆོག་གི་དཀའ་ཐུབ་ཀྱི་དཀའ་ཐུབ་པ་འདི་འཇིམ་པའི་སྟེང་ན་ཉལ་བ་ཁྱེད་རྣམས་ཀྱིས་མཐོང་ངམ། གསོལ་པ། བཙུན་པ་དེ་བཞིན་དུ་མཐོང་ངོ། །བཀའ་སྩལ་པ། འདིས་སངས་རྒྱས་ཐོབ་པར་བསམས་ནས་ཉལ་ཏོ། །གསོལ་པ། འདིའི་དོན་དུ་གཉེར་བ་འགྲུབ་པར་འགྱུར་ལགས་སམ། བཀའ་སྩལ་པ། འདི་ནས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་འདས་ནས་གཽ་ཏམ་ཞེས་བྱ་བའི་སངས་རྒྱས་སུ་འགྱུར་རོ། །དེ་ལ་སླར་ཡང་གྲོང་ཁྱེར་སེར་སྐྱའི་གནས་སུ་འཁྲུངས་པར་འགྱུར་རོ། །ལྷ་མོ་སྒྱུ་འཕྲུལ་མ་ཆེན་མོ་ཞེས་བྱ་བ་ནི་ཡུམ་མོ། །རྒྱལ་པོ་ཟས་གཙང་མ་ཞེས་བྱ་བ་ནི་ཡབ་བོ། །ཉན་ཐོས་ཀྱི་མཆོག་ནི་གནས་བརྟན་ཉེ་རྒྱལ་དང་ཉན་ཐོས་གཉིས་པ་ནི་གནས་བརྟན་པང་ནས་སྐྱེས་སོ། །སངས་རྒྱས་ཀྱི་ཉེ་གནས་ནི་ཀུན་དགའ་བོ་ཞེས་བྱ་བའོ། །ཉན་ཐོས་མའི་མཆོག་ནི་གནས་བརྟན་མ་དགེ་མ་ཞེས་བྱ་བ་དང་ཉན་ཐོས་མ་གཉིས་པ་ནི་གནས་བརྟན་མ་ཨུད་པ་ལའི་མདོག་ཅན་ཞེས་བྱ་བར་འགྱུར་རོ། །ཡེ་ཤེས་ཡོངས་སུ་སྨིན་པར་གྱུར་ཏེ། ངེས་པར་འབྱུང་བ་ཆེན་པོ་བྱས་ནས་དཀའ་ཐུབ་ཆེན་པོ་རྫོགས་པར་བྱས་ཏེ། ནྱ་གྲོ་དྷའི་ཤིང་དྲུང་དུ་འོ་ཐུག་བླངས་ནས་ཆུ་ཀླུང་ནཻ་ར་ཛ་རའི་འགྲམ་དུ་གསོལ་ལོ། །བྱང་ཆུབ་ཀྱི་སྙིང་པོར་གཤེགས་ཏེ་ཨ་ཤྭཏྠའི་ཤིང་དྲུང་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །དེའི་ཕྱིར་གསུངས་པ། མར་མེ་མཛད་པ་འཇིག་རྟེན་མཁྱེན། །སེམས་ཅན་ཕན་ཕྱིར་འཇིག་རྟེན་བྱུང། །
བདག་གི་མགོ་བོའི་གམ་འདུག་སྟེ། །འདི་ལྟ་བུ་ཡི་ཚིག་གསུངས་སོ། །དཀའ་ཐུབ་པ་འདི་ལྟོས་ཤིག་དང། །དཀའ་བ་མཆོག་གི་རལ་པ་འཛིན། །འདི་ནི་བསྐལ་པ་མང་འདས་ནས། །འཇིག་རྟེན་དུ་ནི་སངས་རྒྱས་འགྱུར། །སེར་སྐྱ་དགའ་བའི་གྲོང་དུ་འཁྲུངས། །དེ་བཞིན་གཤེགས་པ་ངེས་པར་འབྱུང། །དཀའ་ཐུབ་གནས་སུ་གནས་ནས་ནི། །ཤིན་ཏུ་དཀའ་བའི་དཀའ་ཐུབ་སྤྱད། །ཨ་ཙ་པཱ་ལའི་ཤིང་དྲུང་དུ། །དེ་བཞིན་གཤེགས་པ་བཞུགས་ནས་སུ། །དེར་ནི་འོ་ཐུག་བླངས་ནས་ནི། །ནཻ་ར་ཛ་རའི་འགྲམ་གནས་ནས། །ནཻ་ར་ཛ་རའི་འགྲམ་དུ་ནི། །འོ་ཐུག་རྒྱལ་བས་ལོངས་སྤྱོད་དོ། །ལམ་གྱི་མཆོག་གི་ཆེད་དུ་ནི། །བྱང་ཆུབ་བཞིར་ནི་བྱོན་འགྱུར་རོ། །བླ་མེད་བྱང་ཆུབ་སྙིང་པོ་ལ། །དེ་ནས་བསྐོར་བ་བྱས་ནས་ནི། །ཨ་ཤྭཏྠ་ཡི་དྲུང་དུ་ནི། །གྲགས་ཆེན་ཞེས་པ་སངས་རྒྱས་འགྱུར། །འདི་ཡི་སྐྱེ་བའི་ཡུམ་གྱུར་པ། །སྒྱུ་མ་ཞེས་པར་འགྱུར་བ་ཡིན། །ཡབ་ནི་ཟས་གཙང་ཞེས་བྱའོ། །འདི་ནི་གཽ་ཏམ་ཞེས་པར་འགྱུར། །ཟག་པ་ཟད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །པང་ནས་སྐྱེས་དང་ཉེ་རྒྱལ་ནི། །ཉན་ཐོས་རྣམས་ཀྱི་མཆོག་ཡིན་ནོ། །ཉེ་གནས་ཀུན་དགའ་བོ་ཞེས་པས། །རྒྱལ་བ་དེ་ལ་ཞབས་ཏོག་བྱེད། །དགེ་མ་དང་ནི་ཨུད་པ་ལ་མདོག །ཉན་ཐོས་མ་ཡི་མཆོག་ཡིན་ནོ། །ཟག་པ་མེད་ཅིང་འདོད་ཆགས་བྲལ། །ཞི་བའི་སེམས་དང་མཚུངས་པར་ལྡན། །དེ་ཡི་བཅོམ་ལྡན་བྱང་ཆུབ་ཤིང། །ཨ་ཤྭཏྠ་ཞེས་བརྗོད་པའོ། །དེ་ཐོས་ནས་བློ་གྲོས་བཟང་པོ་དཀའ་ཐུབ་པ་བདག་གིས་དོན་དུ་གཉེར་བ་གྲུབ་པར་འགྱུར་བས་ཡིད་བདེ་བ་ཐོབ་པར་གྱུར་ཏོ། །སྐྱེ་བོ་མང་པོས་སྟོབས་བཅུ་དང་ལྡན་པའི་མར་མེ་མཛད་ཀྱི་གསུང་ཐོས་ནས། བློ་གྲོས་བཟང་པོ་དཀའ་ཐུབ་པ་སངས་རྒྱས་ཀྱི་ས་བོན་གྱི་མྱུ་གུར་གྱུར་པས་དགའ་བ་དང་བདེ་བ་སྐྱེས་སོ། །དེ་ལྟ་བུར་གྱུར་པའི་སེམས་ཀྱིས། ཇི་ལྟར་སྐྱེས་བུ་ཆུ་ཀླུང་གི་ཕ་རོལ་དུ་འགྲོ་བ་ན་མུ་འགྲམ་དྲང་པོ་ནས་ཕ་རོལ་དུ་འགྲོ་བར་མི་ནུས་ན་འོག་གི་ཆའི་མུ་གནས་ནས་ཕ་རོལ་དུ་འགྲོའོ། །དེ་ལྟར་འདི་ལྟར་བདག་གིས་སྟོབས་བཅུ་དང་ལྡན་པའི་མར་མེ་མཛད་ཀྱི་བསྟན་པ་ལ་ལམ་གྱི་འབྲས་བུ་མ་ཐོབ་པར་གྱུར་ན། གང་གི་ཚེ་ཁྱོད་མ་འོངས་པ་ན་སངས་རྒྱ་བར་འགྱུར་རོ་ཞེས་སོ། །དེའི་ཚེ་ཁྱོད་ཀྱིས་མངོན་སུམ་དུ་ལམ་འབྲས་བུ་མངོན་དུ་བྱེད་པ་བདག་གིས་ནུས་སོ། །དོན་དུ་གཉེར་
བར་བྱས་ནས་སྟོབས་བཅུ་དང་ལྡན་པའི་མར་མེ་མཛད་ཀྱིས་ཀྱང་བྱང་ཆུབ་སེམས་དཔའི་བསྔགས་པ་བརྗོད་ཅིང་མེ་ཏོག་སྙིམ་པ་བརྒྱད་ཀྱིས་གཏོར་ནས་བསྐོར་བ་བྱས་ཏེ་གཤེགས་སོ། །འབུམ་ཕྲག་བཞི་པོ་ཟག་པ་ཟད་པ་དེ་རྣམས་ཀྱིས་ཀྱང་བྱང་ཆུབ་སེམས་དཔའ་ལ་དྲི་བཟང་དང་མེ་ཏོག་གིས་མཆོད་ནས་བསྐོར་བ་བྱས་ཏེ་གཤེགས་སོ། །ལྷ་དང་མི་རྣམས་ཀྱིས་ཀྱང་དེ་བཞིན་དུ་མཆོད་ནས་ཕྱག་བཙལ་ཏེ་སོང་ངོ་། །བྱང་ཆུབ་སེམས་དཔས་ཐམས་ཅད་སོང་བའི་དུས་སུ་ཉལ་བའི་གནས་ནས་ལངས་ཏེ་ཕ་རོལ་དུ་ཕྱིན་པ་བསམ་པའི་ཕྱིར་མེ་ཏོག་གི་ཕུང་པོའི་སྟེང་དུ་སྐྱིལ་ཀྲུང་བཅས་ནས་བཞུགས་སོ། །དེ་ལྟར་བྱང་ཆུབ་སེམས་དཔའ་བཞུགས་ནས་འཇིག་རྟེན་གྱི་ཁམས་སྟོང་ཕྲག་བཅུའི་ཁོར་ཡུག་གི་ལྷ་རྣམས་ཀྱིས་ལེགས་སོ་ཞེས་བྱ་བ་བྱིན་ནོ། །འཕགས་པ་བློ་གྲོས་བཟང་པོ་དཀའ་ཐུབ་པ་སྔར་གྱི་བྱང་ཆུབ་སེམས་དཔའ་རྣམས་ཀྱིས་ཀྱང་སྐྱིལ་ཀྲུང་བཅས་ཏེ་ཕ་རོལ་དུ་ཕྱིན་པ་སེམས་ཤིང་སྔོན་གྱི་དུས་ན་བཞུགས་བཞིན་དུ་སྡུག་བསྔལ་གྱི་མཚན་མ་མཐོང་ནས་དེ་རྣམས་ཀྱི་མཚན་མ་རྣམས་ཀྱང་དེ་རིང་སྐྱེས་པར་གྱུར་ཏོ། །ཐེ་ཙོམ་མེད་པར་ཁྱོད་སངས་རྒྱས་སུ་འགྱུར་རོ་ཞེས་བདག་གིས་དེ་རྣམས་ཤེས་སོ། །གང་གིས་འདི་རྣམས་ཀྱི་མཚན་མ་མཐོང་བར་གྱུར་པས་དེ་ངེས་པར་སངས་རྒྱས་སུ་འགྱུར་རོ། །དེ་ལ་ཁྱོད་བདག་ཉིད་བརྩོན་འགྲུས་བརྟན་པོ་མཆོག་བཟུང་ནས་བྱང་ཆུབ་སེམས་དཔའ་རྣམས་ལ་སྣ་ཚོགས་པའི་བསྟོད་པ་བྱས་སོ། །དེའི་ཕྱིར་གསུངས་པ། འདི་ཡི་ཚིག་ནི་ཐོས་ནས་ནི། །མཚུངས་མེད་དྲང་སྲོང་ཆེན་པོ་ལ། །ལྷ་དང་མི་ནི་རྗེས་ཡི་རངས། །སངས་རྒྱས་ས་བོན་མྱུ་གུ་འདི། །སྒྲ་ནི་ཆེན་པོ་སྒྲོགས་བྱེད་ཅིང། །གསལ་བར་བཞད་པར་བྱེད་པ་དང། །ཐལ་མོ་སྦྱར་ནས་ཕྱག་བྱེད་པ། །སྟོང་ཕྲག་བཅུ་ཡི་ལྷ་དང་བཅས། །བསྟན་པ་འདི་ལ་འབྲས་མ་ཐོབ། །གལ་ཏེ་འཇིག་རྟེན་མགོན་པོ་འདི། །མ་འོངས་པ་རྣམས་འདས་གྱུར་ནས། །འདི་ནི་སྔོན་དུ་འགྱུར་བའོ། །ཇི་ལྟར་ཆུ་ཀླུང་ཕ་རོལ་མི། །འགྲོ་བ་པོ་ཡི་མུ་གནས་ལ། །འོག་གི་མུ་ནས་བཟུང་ནས་ནི། །ཆུ་ཀླུང་ཆེན་པོའི་ཕ་རོལ་འགྲོ། །དེ་ལྟར་འདི་ལྟར་བདག་གིས་ནི། །རྒྱལ་བ་འདི་ནི་གལ་ཏེ་ན། །མ་འོངས་པ་ནི་མང་སོང་ནས། །འདི་ནི་མངོན་སུམ་གྱུར་པ་ཡིན། །མར་མེ་མཛད་ནི་འཇིག་རྟེན་མཁྱེན། །འདི་ལྟར་འགྱུར་ཞེས་གསུངས་པ་
ཡིན། །བདག་གི་ལས་རྣམས་བསལ་བྱས་ནས། །རྐང་པ་གཡས་པ་བཏེག་བྱས་སོ། །གང་ཞིག་དེ་ལ་རྒྱལ་སྲས་ནི། །བདག་ལ་ཀུན་གྱིས་བསྐོར་བ་བྱས། །མི་དང་ཀླུ་དང་དྲི་ཟ་རྣམས། །ཕྱག་བྱས་ནས་ནི་གཤེགས་པར་གྱུར། །དགེ་འདུན་བཅས་པ་འཇིག་རྟེན་འདྲེན། །བདག་གིས་གཤེགས་པ་མཐོང་བ་ན། །དགའ་ཞིང་ཚིམ་པའི་སེམས་ཀྱིས་ནི། །དེ་ཚེ་བདག་གིས་སྟན་ལས་ལངས། །བདག་ནི་བདེ་ཞིང་བདེ་བར་འགྱུར། །དགའ་ཞིང་དགའ་བར་གྱུར་པ་སྟེ། །དགའ་དང་ལྡན་པར་སྐྱེ་བ་དང། །དེ་ཡི་ཚེ་ན་སྐྱིལ་ཀྲུང་བཅས། །སྐྱིལ་ཀྲུང་ལ་ནི་གནས་ནས་སུ། །དེ་ལ་བདག་གིས་འདི་ལྟར་བསམས། །བདག་གི་བསམ་གཏན་དབང་དུ་གྱུར། །ཡེ་ཤེས་ཀྱི་ནི་ཕ་རོལ་ཕྱིན། །སྟོང་ཕྲག་གི་ནི་འཇིག་རྟེན་ན། །ང་དང་མཚུངས་པའི་དྲང་སྲོང་མེད། །རྫུ་འཕྲུལ་ཆོས་ནི་བདག་མི་མཚུངས། །འདི་འདྲ་ཅི་བདེ་གཞན་མ་ཐོབ། །བདག་གིས་སྐྱིལ་ཀྲུང་བཅས་ནས་བདག །སྟོང་ཕྲག་བཅུ་ལྷག་གནས་ནས་སུ། །སྒྲ་ཆེན་པོ་ནི་སྒྲོགས་པར་བྱེད། །ངེས་པར་ཁྱོད་ནི་སངས་རྒྱས་འགྱུར། །གང་ཞིག་བྱང་སེམས་སྔོན་མ་རྣམས། །སྐྱིལ་ཀྲུང་དུ་ནི་བཞུགས་ནས་སུ། །མཚན་མ་རྣམས་ནི་མཐོང་བ་ནི། །དེ་རྣམས་དེ་རིང་མཐོང་བ་ཡིན། །གྲང་བ་རྣམས་ནི་མེད་པར་གྱུར། །དྲོ་བ་རྣམས་ནི་ཉེ་བར་ཞི། །དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །སྟོང་ཕྲག་བཅུ་ཡི་འཇིག་རྟེན་ཁམས། །ཕན་ཚུན་དུ་ནི་འཇིགས་མེད་གྱུར། །དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །རླུང་ཆེན་པོ་ནི་མི་ལྡང་ཞིང། །ཆུ་རྣམས་རྒྱུན་ལས་ལོག་པ་དང། །དེ་རྣམས་དེ་རིང་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །ཐང་སྐྱེས་ཆུ་སྐྱེས་མེ་ཏོག་རྣམས། །ཐམས་ཅད་དུ་ནི་མེ་ཏོག་བྱེ། །དེ་རྣམས་དེ་རིང་མེ་ཏོག་བྱེ། །ངེས་པར་ཁྱོད་ནི་སངས་རྒྱས་འགྱུར། །འཁྲི་ཤིང་ཡང་ན་ཤིང་གྱུར་པ། །དེ་མ་ཐག་ཏུ་འབྲས་བུར་གྱུར། །དེ་རྣམས་དེ་ཀུན་འབྲས་གྱུར་པ། །ངེས་པར་ཁྱོད་ནི་སངས་རྒྱས་འགྱུར། །ནམ་མཁའ་དང་ནི་ས་གཞི་ལ། །རིན་ཆེན་དེ་དག་འོད་འགྱེད་དོ། །དེ་རྣམས་དེ་རིང་འོད་འགྱེད་པས། །ངེས་པར་ཁྱོད་ནི་སངས་རྒྱས་འགྲོ། །ལྷ་རྣམས་དང་ནི་མི་རྣམས་ནི། །དེ་དག་རོལ་མོའི་སྒྲ་སྒྲོགས་སོ། །དེ་རྣམས་དེ་རིང་སྒྲ་འབྱིན་པས། །ཁྱོད་ནི་ངེས་པར་སངས་རྒྱས་འགྱུར། །
མེ་ཏོག་སྣ་ཚོགས་པ་ཡི་ཚོགས། །དེ་མ་ཐག་ཏུ་ཆར་པ་འབེབས། །དེ་རྣམས་དེ་རིང་ཆར་འབེབས་པས། །ངེས་པར་ཁྱོད་ནི་སངས་རྒྱས་འགྱུར། །རྒྱ་མཚོ་ཆེན་པོ་མ་གཡོ་ཞིང། །འཇིག་རྟེན་སྟོང་ཕྲག་བཅུ་པོ་གཡོ། །དེ་རྣམས་དེ་རིང་གྱུར་པས་ན། །ངེས་པར་ཁྱོད་ནི་སངས་རྒྱས་འགྱུར། །སྟོང་ཕྲག་བཅུ་ཡི་དམྱལ་བ་རྣམས། །དེ་མ་ཐག་ཏུ་བསྲེག་དང་བྲལ། །དེ་རྣམས་དེ་རིང་ཞི་བས་ན། །ངེས་པར་ཁྱོད་ནི་སངས་རྒྱས་འགྱུར། །ཉི་མ་དྲི་མ་མེད་པ་དང། །རྒྱུ་སྐར་ཐམས་ཅད་མཐོང་བ་དང། །དེ་རྣམས་དེ་རིང་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །ཆར་པ་འབབ་པར་མ་གྱུར་ཀྱང། །ས་ནི་སྣུམ་བག་བཅས་པ་དང། །དེ་རྣམས་དེ་རིང་ས་ལ་གྱུར། །ངེས་པར་ཁྱོད་ནི་སངས་རྒྱས་འགྱུར། །རྒྱུ་སྐར་ཚོགས་ནི་རྣམ་པར་གསལ། །ནམ་མཁའི་དབྱིངས་སུ་རྒྱུ་སྐར་རྣམས། །ཟླ་བ་དང་ནི་འགྲོགས་པ་བཞིན། །ངེས་པར་ཁྱོད་ནི་སངས་རྒྱས་འགྱུར། །ས་ཁུང་རི་ཁུང་སྲོག་ཆགས་རྣམས། །སེམས་གཅིག་པས་ནི་ཕ་རོལ་མཐོང། །དེ་རིང་དེ་རྣམས་སེམས་དགའ་བས། །ངེས་པར་ཁྱོད་ནི་སངས་རྒྱས་འགྱུར། །སེམས་ཅན་རྣམས་ནི་མི་དགའ་མེད། །དེ་མ་ཐག་ཏུ་དགའ་བར་འགྱུར། །དེ་རིང་དེ་རྣམས་དགའ་བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཚེ་ནད་རྣམས་ཉེ་བར་ཞི། །འདོད་པའི་ནད་ནི་མེད་པའོ། །དེ་རིང་དེ་རྣམས་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཚེ་ཆགས་པ་བསྲབས་པ་དང། །སྐྱོན་དང་རྨོངས་པ་རྣམ་པར་ཞིག །དེ་རིང་དེ་ཀུན་དོར་བས་ན། །ངེས་པར་ཁྱོད་ནི་སངས་རྒྱས་འགྱུར། །དེ་ཡི་ཚེ་ན་འཇིགས་མེད་པ། །དེ་རིང་དེ་རྣམས་མཐོང་བས་ན། །བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །སྟེང་འོག་རྡུལ་ནི་གོ་བཟློག་འགྲོ། །དེ་རིང་ཡང་ནི་དེ་རྣམས་མཐོང། །བདག་གི་རྟགས་དེ་ཀུན་གྱིས་ཤེས། །ངེས་པར་ཁྱོད་ནི་སངས་རྒྱས་འགྱུར། །དྲི་རྣམས་ངན་པ་སོང་བ་དང། །ལྷ་ཡི་དྲི་ནི་འོང་བ་དང། །དེ་རིང་དེ་རྣམས་དྲི་ལྡང་བས། །ངེས་པར་ཁྱོད་ནི་སངས་རྒྱས་འགྱུར། །ལྷ་རྣམས་ཐམས་ཅད་མཐོང་བ་དང། །གཟུགས་མེད་པ་རྣམས་སྤངས་པ་ནི། །དེ་རིང་དེ་ཀུན་མཐོང་བས་ན། །ངེས་པར་ཁྱོད་ནི་སངས་རྒྱས་འགྱུར། །དམྱལ་བ་རྣམས་ནི་ཇི་སྲིད་པ། །དེ་ཡི་ཚེ་ན་
ཐམས་ཅད་མཐོང། །དེ་རྣམས་དེ་རིང་ཀུན་མཐོང་བས། །ངེས་པར་ཁྱོད་ནི་སངས་རྒྱས་འགྱུར། །སྒོ་ཆུང་དང་ནི་རི་ཡི་རྣམས། །དེ་ཡི་ཚེ་ན་མི་མཐོང་མེད། །དེ་རིང་ནམ་མཁའ་བཞིན་དུ་མཐོང། །ངེས་པར་ཁྱོད་ནི་སངས་རྒྱས་འགྱུར། །རུམ་དུ་གནས་དང་འཐོན་པ་ནི། །སྐད་ཅིག་ཙམ་གྱིས་མ་ཡིན་ནོ། །དེ་རིང་དེ་རྣམས་སོ་སོར་མཐོང། །ངེས་པར་ཁྱོད་ནི་སངས་རྒྱས་འགྱུར། །བརྩོན་འགྲུས་བརྟན་པར་བྱས་ནས་ནི། །ངེས་པར་འབྱུང་བ་ལྡོག་མི་བྱ། །བདག་གིས་འདི་རྣམས་ལེགས་ཤེས་པས། །ངེས་པར་ཁྱོད་ནི་སངས་རྒྱས་འགྱུར། །བྱང་ཆུབ་སེམས་དཔས་སྟོབས་བཅུ་དང་ལྡན་པའི་མར་མེ་མཛད་དང་སྟོང་ཕྲག་བཅུའི་ཁོར་ཡུག་གི་ལྷ་རྣམས་ཀྱི་གསུང་ཐོས་ནས། ཡིད་བདེ་བ་ཆེར་སྐྱེས་ཏེ་བདག་ཉིད་སྤྲོ་བར་གྱུར་ནས་བསམས་པ། སངས་རྒྱས་རྣམས་ཀྱི་དོན་ཡོད་པའི་གསུང་ཞེས་བྱ་བ་ནི་སངས་རྒྱས་རྣམས་ཀྱི་གསུང་ལས་གཞན་དུ་མི་འགྱུར་བ་ཡིན་ནོ། །ཇི་ལྟར་ཡང་ནམ་མཁའ་ལ་རྡོ་འཕངས་ན་ལྷུང་བར་འགྱུར་བ་དང། སྐྱེས་ནས་འཆི་བར་འགྱུར་བ་དང། སྐྱ་རེངས་ཤར་ན་ཉི་མ་འཆར་བར་འགྱུར་བ་དང། གནས་ནས་སེང་གེ་ལངས་ནས་སྒྲ་ཕྱུང་སྟེ་འགྲོ་བ་དང། སྦྲུམ་མ་ཡོངས་སུ་སྨིན་ནས་སྐྱེ་བར་འགྱུར་བར་ངེས་སོ། །ངེས་པར་དེ་བཞིན་དུ་འདི་ལྟར་སངས་རྒྱས་རྣམས་ཀྱི་གསུང་ནི་ངེས་ཤིང་དོན་ཡོད་པར་འདོད་དོ། །ངེས་པར་བདག་ནི་སངས་རྒྱས་སུ་འགྱུར་རོ། །དེའི་ཕྱིར་གསུངས་པ། སངས་རྒྱས་ཀྱི་ནི་གསུང་ཐོས་ནས། །སྟོང་ཕྲག་བཅུ་དང་གཉིས་ཀ་ཡི། །ཚིམ་ཞིང་དགྱེས་ལ་རབ་ཏུ་དགའ། །བདག་གིས་དེ་ཚེ་འདི་ལྟར་བསམས། །གཉིས་ནི་མི་གསུང་སངས་རྒྱས་ནི། །རྒྱལ་བ་དོན་ཡོད་པ་ཡི་གསུང། །སངས་རྒྱས་རྣམས་ནི་གཞན་མི་གསུང། །བདག་ནི་ངེས་པར་སངས་རྒྱས་འགྱུར། །ཇི་ལྟར་མཁའ་ལ་རྡོ་འཕངས་པ། །ངེས་པར་ས་ལ་ལྷུང་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་སེམས་ཅན་ཐམས་ཅད་ནི། །ངེས་པར་འཆི་བར་འགྱུར་བའོ། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་ནམ་ནི་ཟད་པ་ན། །ངེས་པར་ཉི་མ་འཆར་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་སེང་གེའི་
གནས་ནས་ནི། །སེང་གེའི་སྒྲ་ནི་ངེས་པའོ། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ཇི་ལྟར་སྦྲུམ་མ་སྨིན་གྱུར་ན། །མངལ་ནས་ངེས་པར་སྐྱེ་བར་འགྱུར། །དེ་བཞིན་དུ་ནི་སངས་རྒྱས་ཀྱི། །གསུང་ནི་ངེས་པར་འགྱུར་བ་བཞིན། །ལེགས་སོ་བདག་ནི་སངས་རྒྱས་སུ་འགྱུར་རོ། །དེ་ལྟར་ངེས་པར་བྱས་ནས་སངས་རྒྱས་སུ་བྱེད་པའི་ཆོས་ཚོལ་བས་སངས་རྒྱས་སུ་འགྱུར་བའི་ཆོས་གང་ཞིག་ན་ཡོད། གལ་ཏེ་སྟེང་ན་ཡོད་དམ་འོག་ནའམ་ཕྱོགས་སམ་མཚམས་རྣམས་ན་ཡོད་དམ་ཅི། གོ་རིམས་བཞིན་དུ་ཆོས་ཀྱི་དབྱིངས་ཐམས་ཅད་ལ་བརྩམས་ནས་སྔར་གྱི་བྱང་ཆུབ་སེམས་དཔས་ཀྱང་བསྙེན་པ་དང་ངེས་པར་བརྟེན་པར་བྱ་བའི་དང་པོར་སྦྱིན་པའི་ཕ་རོལ་ཏུ་ཕྱིན་པ་གཟིགས་སོ། །དེ་ལྟར་བདག་གིས་ཀྱང་བདག་ལ་གདམས་པ། མཁས་པ་བློ་གྲོས་བཟང་པོ་ཁྱོད་ཀྱིས་ཀྱང་འདི་ནས་བཟུང་ནས་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་བྱའོ། །ཇི་ལྟར་ན་ཆུའི་བུམ་པ་ཁ་ཕུབ་ན་བུམ་པར་ཆུ་རྣམས་མི་གནས་པར་ས་ལ་བོ་བ་ཉིད་སླར་ཡང་བུམ་པ་ལ་མི་གནས་སོ། །དེ་ལྟར་འདི་ལྟར་ནོར་རམ་གྲགས་པའམ་བུ་དང་ཆུང་མའམ་ཡན་ལག་དང་ཉིང་ལག་རྣམས་ལྟོས་པ་མེད་པར་སློང་བ་རྣམས་ཀྱི་དོན་དུ་ཐམས་ཅད་གང་དང་གང་འདོད་པ་ལ་ལྷག་མ་མེད་པར་བྱས་ནས་སྦྱིན་ཏེ་བྱང་ཆུབ་ཀྱི་ཤིང་དྲུང་དུ་བཞུགས་ནས་སངས་རྒྱས་ཐོབ་བོ། །དང་པོར་སྦྱིན་པའི་ཕ་རོལ་ཏུ་ཕྱིན་པ་བརྟན་པར་བྱས་ནས་གནས་པར་བྱའོ། །དེའི་ཕྱིར་གསུངས་པ། བདག་གིས་སངས་རྒྱས་བྱེད་པའི་ཆོས། །གང་དང་དེ་རུ་བཙལ་བྱས་པ། །སྟེང་དང་འོག་དང་ཕྱོགས་བཅུ་དང། །ཆོས་ཀྱི་དབྱིངས་ཀྱི་བར་དུའོ། །དེ་ཚེ་བཙལ་བ་ན་ནི་མཐོང། །དང་པོར་སྦྱིན་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡི། །ལམ་ནི་ཕ་རོལ་རྗེས་སུ་འགྲོ། །འདི་ནི་རེ་ཞིག་ཁྱོད་ཀྱིས་ཀྱང། །བརྟན་པོར་བྱས་ནས་གཟུང་བར་གྱིས། །གལ་ཏེ་བྱང་ཆུབ་ཐོབ་འདོད་ན། །སྦྱིན་པའི་ཕ་རོལ་ཕྱིན་པར་གྱིས། །ཇི་ལྟར་བུམ་པ་གང་གྱུར་པ། །གང་གང་ཁ་ནི་ཕུབ་པ་ན། །ཆུ་ནི་ལྷག་མ་མེད་པར་འབོ། །བུམ་པའི་ནང་དུ་མི་གནས་སོ། །དེ་བཞིན་དུ་ནི་སློང་བ་མཐོང། །མཆོག་དམན་འབྲིང་པོ་གང་ཡིན་པ། །མ་ལུས་པར་ནི་སྦྱིན་པར་བྱ། །ཁ་ཕུབ་བུམ་པ་དེ་བཞིན་ནོ། །གཞན་ཡང་སངས་རྒྱས་སུ་བྱེད་པའི་ཆོས་འདི་
འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ནི་གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པར་བྱའོ། །དཔེར་ན་གཞན་ཡང་རྒོད་གཡག་ཞེས་བྱ་བ་སྲོག་ལ་མི་ལྟ་བར་རང་གི་མཇུག་མའི་རྔ་མ་ཉིད་བསྲུང་བ་དེ་བཞིན་དུ། ཁྱོད་ཀྱིས་ཀྱང་འདི་ནས་བཟུང་ནས་སྲོག་ལ་མི་ལྟ་བར་ཚུལ་ཁྲིམས་བསྲུངས་ན་ཁྱོད་ཀྱིས་སངས་རྒྱས་ཐོབ་པར་འགྱུར་རོ། །གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བརྟན་པར་བྱས་ཏེ་གནས་པར་བྱའོ། །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་ལ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །གཉིས་པ་ཚུལ་ཁྲིམས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་གཉིས་པ་འདི་ཡིས་ནི། །བརྟན་པོར་བྱས་ནས་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ཚུལ་ཁྲིམས་ཕ་རོལ་ཕྱིན་པར་གྱིས། །ཇི་ལྟར་རྒོད་གཡག་རྔ་མ་ནི། །གང་དང་གང་གིས་བཟུང་བ་ན། །ལྟོས་པ་མེད་པར་སྲོག་འདོར་རོ། །རྔ་མ་ལ་དགའ་ཁྲོ་བ་མེད། །དེ་བཞིན་དུ་ནི་ས་གཞི་རུ། །ཚུལ་ཁྲིམས་ཡོངས་སུ་རྫོགས་པ་དང། །རྟག་ཏུ་ཚུལ་ཁྲིམས་ཀུན་སྲུང་བྱེད། །རྒོད་གཡག་རྔ་མ་བསྲུང་བ་བཞིན། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་གསུམ་པ་ངེས་འབྱུང་གི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ངེས་པར་འབྱུང་བའི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །ཇི་ལྟར་བཙོན་རར་ཡུན་རིང་པོར་བཅིངས་ནས་བཞག་པའི་མི་དེ་ལ་འདོད་པར་མི་བྱེད་དོ། །གཞན་ཡང་ཤིན་ཏུ་སྡུག་བསྔལ་བའི་སེམས་དེ་ལ་དེ་བཞིན་དུ་གནས་པར་འདོད་པ་མེད་དོ། །དེ་ལྟར་འདི་ལྟར་ཁྱོད་ཀྱིས་ཀྱང་སྐྱེ་བ་ཐམས་ཅད་དུ་བཙོན་རར་བཅིངས་པ་བཞིན་བྱས་ནས་སྐྱེ་བ་ཐམས་ཅད་དུ་ཤིན་ཏུ་སྡུག་བསྔལ་བའི་སེམས་ཀྱིས་གྲོལ་བར་འདོད་
པའི་སེམས་ཀྱིས་ངེས་པར་འབྱུང་བ་མངོན་སུམ་དུ་འགྱུར་རོ། །དེ་ལྟར་བྱས་ན་སངས་རྒྱས་ཐོབ་པར་འགྱུར་རོ། །ངེས་པར་འབྱུང་བའི་ཕ་རོལ་ཏུ་ཕྱིན་པ་ལ་བརྟན་པར་བྱས་ཏེ་གནས་སོ། །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །གསུམ་པ་ངེས་འབྱུང་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་གསུམ་པ་འདི་ཡིས་ནི། །བརྟན་པོར་བྱས་ཏེ་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ངེས་འབྱུང་ཕ་རོལ་ཕྱིན་པར་གྱིས། །ཇི་ལྟར་སྐྱེས་བུ་བཙོན་རར་བཅིངས། །ཡུན་རིང་གནས་ཤིང་སྡུག་བསྔལ་བ། །དེ་ལ་དགའ་བར་མི་བྱེད་པར། །མྱུར་དུ་འགྲོལ་བར་འདོད་པར་སེམས། །དེ་བཞིན་ཁྱོད་ནི་སྐྱེ་ཀུན་དུ། །བཙོན་ར་བཞིན་དུ་བལྟ་བར་གྱིས། །ངེས་པར་འབྱུང་བ་སྔོན་དུ་ན། །སྐྱེ་བ་ལས་ནི་གྲོལ་བར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བཞི་པ་ཤེས་རབ་ཀྱི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །དམན་པ་དང་འབྲིང་པོ་དང་ཆེན་པོ་རྣམས་སུ་མི་སེམས་པར་དེ་རྣམས་ཀྱི་གནས་སུ་སོང་སྟེ་མཁས་པ་རྣམས་འདྲི་བར་བྱའོ། །ཇི་ལྟར་ན་བསོད་སྙོམས་ལ་འགྲོ་བའི་དགེ་སློང་དམན་པ་ལ་སོགས་པའི་གནས་སུ་སོང་སྟེ། རིགས་ཀྱི་དབྱེ་བ་མ་སྤངས་པར་གོ་རིམས་བཞིན་དུ་བསོད་སྙོམས་ལ་འགྲོ་བ་མྱུར་དུ་རང་གི་བཟའ་བའི་ཚད་ཐོབ་པར་འགྱུར་རོ། །དེ་བཞིན་དུ་ཁྱོད་ཀྱིས་ཀྱང་མཁས་པ་ཐམས་ཅད་ཀྱི་དྲུང་དུ་སོང་སྟེ་དྲི་བར་བྱས་ན་སངས་རྒྱས་ཐོབ་བོ། །བཞི་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟན་པར་བྱ་སྟེ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །བཞི་པ་ཤེས་རབ་ཕ་རོལ་ཕྱིན། །སྔོན་
གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་བཞི་པ་འདི་ཡིས་ནི། །བརྟན་པོར་བྱ་སྟེ་གཟུང་བར་བྱ། །གལ་ཏེ་བྱང་ཆུབ་ཐོབ་འདོད་ན། །ཤེས་རབ་ཕ་རོལ་ཕྱིན་པར་གྱིས། །ཇི་ལྟར་དགེ་སློང་བསོད་སྙོམས་པ། །དམན་དང་འབྲིང་དང་ཆེན་པོ་ཡི། །རིགས་རྣམས་དཔྱོད་པར་མི་བྱེད་པར། །དེ་ལྟར་བཟའ་བའི་ཟས་ཐོབ་བོ། །དེ་བཞིན་ཁྱོད་ཀྱིས་དུས་ཀུན་དུ། །སྐྱེ་བོ་མཁས་ལ་ཡོངས་སུ་དྲིས། །ཤེས་རབ་ཕ་རོལ་ཕྱིན་སོང་བས། །བྱང་ཆུབ་ཐོབ་པར་འགྱུར་བ་ཡིན། །གཞན་ཡང་སངས་རྒྱས་སུ་བྱེད་པའི་ཆོས་ནི་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་བཙལ་ན་ལྔ་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཐོབ་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །ཇི་ལྟར་རི་དགས་ཀྱི་རྒྱལ་པོ་སེང་གེ་དུས་ཐམས་ཅད་དུ་བརྩོན་འགྲུས་བརྟན་པོ་དང་ལྡན་པ་དེ་བཞིན་དུ་ཁྱོད་ཀྱིས་ཀྱང་སྐྱེ་བ་ཐམས་ཅད་དུ་བརྩོན་འགྲུས་བརྟན་པར་བྱའོ། །ཞུམ་པ་མེད་པའི་བརྩོན་འགྲུས་བྱས་ན་སངས་རྒྱས་ཐོབ་པར་འགྱུར་རོ། །ལྔ་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་བྱེད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །ལྔ་པ་བརྩོན་འགྲུས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་ལྔ་པོ་འདི་ཡིས་ནི། །གལ་ཏེ་བྱང་ཆུབ་མཆོག་འདོད་ན། །བརྩོན་འགྲུས་ཕ་རོལ་ཕྱིན་པར་གྱིས། །བརྟན་པོར་བྱས་ཏེ་གཟུང་བར་བྱ། །ཇི་ལྟར་རི་དགས་རྒྱལ་པོ་ནི། །སྡོད་དང་འགྲོ་བའི་གནས་རྣམས་སུ། །ཞུམ་པ་མེད་པའི་བརྩོན་འགྲུས་ཀྱིས། །ཡིད་ནི་རྟག་ཏུ་བརྟན་པ་ཡིན། །དེ་བཞིན་ཁྱོད་ཀྱིས་དུས་ཀུན་དུ། །བརྩོན་འགྲུས་བརྟན་པོར་གྱིས་ལ་ཟུང། །བརྩོན་འགྲུས་ཕ་རོལ་ཕྱིན་གྱུར་ནས། །བྱང་ཆུབ་ཐོབ་པར་འགྱུར་བ་ཡིན། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་
བར་བྱའོ། །ལྷག་པར་ཚོལ་བ་ན་དྲུག་པ་བཟོད་པའི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བཟོད་པའི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །བཟང་པོ་དང་ངན་པར་བྱས་པ་ལ་བཟོད་པར་བྱའོ། །ཇི་ལྟར་སའི་སྟེང་དུ་གཙང་བ་དང་མི་གཙང་བ་གོས་པར་བྱས་ནས་གཞི་ཁྲོ་བར་མི་བྱེད་པ་བཞིན་དུ་བཟོད་ཅིང་སྲན་པ་དང་ལྷག་པར་གནས་པ་དེ་བཞིན་དུའོ། །དེ་ལྟར་འདི་ལྟར་ཁྱོད་ཀྱིས་ཀྱང་གནོད་པ་དང་ཕན་པར་བྱས་ཀྱང་བཟོད་ཅིང་སྲན་པར་བྱས་ན་སངས་རྒྱས་ཐོབ་པར་འགྱུར་རོ། །དྲུག་པ་བཟོད་པའི་ཕ་རོལ་ཏུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་པ། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །དྲུག་པ་བཟོད་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་དྲུག་པ་འདི་ཡིས་ནི། །དེ་ལ་ཞེ་སྡང་མ་བྱས་ན། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་ཡང་ནི་ས་གཞི་ལ། །གཙང་དང་མི་གཙང་བྱུགས་པ་ན། །ཐམས་ཅད་བླུགས་ཀྱང་བཟོད་པར་བྱེད། །སྐྱུག་བྲོ་བ་ནི་བྱེད་པ་མེད། །དེ་བཞིན་ཁྱོད་ཀྱིས་ཐམས་ཅད་ལ། །ཕན་དང་གནོད་པ་བྱེད་པ་ན། །བཟོད་པའི་ཕ་རོལ་ཕྱིན་གྱུར་ནས། །བྱང་ཆུབ་ཡང་དག་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བདུན་པ་བདེན་པའི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བདེན་པའི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །ཐོག་མགོ་ལ་ལྷུང་བར་གྱུར་ན་ཡང་ནོར་ལ་སོགས་པའི་ཕྱིར་དུ་འདུན་པ་ལ་སོགས་པའི་དབང་གིས་ཤེས་ནས་བརྫུན་མི་སྨྲའོ། །ཇི་ལྟར་ན་ཐ་སྐར་ལ་སོགས་པའི་རྒྱུ་སྐར་དུས་ཐམས་ཅད་དུ་རང་རང་འགྲོ་བའི་ལམ་དོར་ནས་ལམ་གཞན་ནས་མི་འགྲོ་བར་རང་གི་ལམ་ཉིད་ནས་འགྲོ་བའོ། །དེ་ལྟར་འདི་ལྟར་ཁྱོད་ཀྱིས་ཀྱང་བདེན་པ་བཟུང་ནས་བརྫུན་མི་བྱེད་
པས་ནི་སངས་རྒྱས་ཐོབ་པར་འགྱུར་རོ། །བདུན་པ་བདེན་པའི་ཕ་རོལ་ཏུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །བདུན་པ་བདེན་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་བདུན་པ་འདི་ཡིས་ནི། །བརྟན་པར་བྱས་ནས་གནས་པར་གྱིས། །དེ་ལ་བརྫུན་ནི་མི་སྨྲ་བས། །ཡང་དག་བྱང་ཆུབ་ཐོབ་པར་གྱིས། །ཇི་ལྟར་ཐ་སྐར་ཞེས་བྱ་བ། །ལྷ་དང་མི་རྣམས་མཚུངས་པར་ནི། །དུས་ཀྱི་ལོ་ཡི་དུས་སུ་ནི། །ལམ་གཞན་དུ་ནི་མི་འགྲོའོ། །ཁྱོད་ཀྱིས་ཀྱང་ནི་དེ་བཞིན་བདེན། །བདེན་པ་བཟུང་ནས་མི་འགྲོ་བ། །བདེན་པའི་ཕ་རོལ་ཕྱིན་གྱུར་པས། །བྱང་ཆུབ་ཡང་དག་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བརྒྱད་པ་ལྷག་པར་གནས་པའི་ཕ་རོལ་ཏུ་ཕྱིན་པ་མཐོང་ནས་འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་ལྷག་པར་གནས་པའི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །གང་ཞིག་ལྷག་པར་གནས་པར་གྱིས་ལ་དེ་ལ་ལྷག་པར་གནས་ན་གཡོ་བ་མེད་པར་འགྱུར་རོ། །ཇི་ལྟར་ན་རི་བོ་ནི་ཕྱོགས་ཐམས་ཅད་ནས་རླུང་གིས་བསྐྱོད་ཀྱང་གཡོ་བར་མི་འགྱུར་ཞིང་བསྐྱོད་པར་མི་འགྱུར་ཅིང། རང་གི་གནས་ཞིག་ཏུ་གནས་སོ། །དེ་ལྟར་འདི་ལྟར་ཁྱོད་ཀྱིས་ཀྱང་བདག་ཉིད་ལྷག་པར་གནས་པ་རྣམས་མི་གཡོ་བར་གྱུར་ན་སངས་རྒྱས་ཐོབ་པར་འགྱུར་རོ། །བརྒྱད་པ་ལྷག་པར་གནས་པའི་ཕ་རོལ་ཏུ་ཕྱིན་པ་བརྟན་པར་བྱས་ནས་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །བརྒྱད་པ་ལྷག་གནས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་བརྒྱད་པ་འདི་ཡིས་ནི། །བརྟན་པར་བྱ་སྟེ་གནས་
པར་གྱིས། །དེ་ལ་ཁྱོད་ནི་གཡོ་མེད་པས། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་རི་བོའི་བྲག་ཆེན་པོ། །གཡོ་བ་མེད་ཅིང་ལེགས་པར་གནས། །རླུང་ཆེན་པོས་ནི་གཡོ་བ་མེད། །རང་གི་གནས་སུ་གནས་པ་ཉིད། །དེ་བཞིན་ཁྱོད་ཀྱིས་ལྷག་གནས་པར། །ཐམས་ཅད་དུ་ནི་མི་གཡོ་བར། །ལྷག་གནས་ཕ་རོལ་ཕྱིན་གྱུར་པས། །ཡང་དག་བྱང་ཆུབ་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་དགུ་པ་བྱམས་པའི་ཕ་རོལ་ཏུ་ཕྱིན་པ་མཐོང་བས་དེ་ལྟ་བུའི་ཁམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བྱམས་པའི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །ཕན་པ་དང་མི་ཕན་པར་གྱུར་ཀྱང་སེམས་གཅིག་ཏུ་བྱའོ། །ཇི་ལྟར་ཆུ་ནི་སྡིག་པ་ཅན་གྱི་སྐྱེ་བོ་དང་དགེ་བའི་སྐྱེ་བོས་ཀྱང་བསིལ་བར་གྱུར་ཅིང་གཅིག་ཏུ་མཚུངས་པར་བྱས་ནས་རེག་གོ། །དེ་ལྟར་ན་འདི་ལྟར་ཁྱོད་ཀྱིས་ཀྱང་སེམས་ཅན་ཐམས་ཅད་ལ་བྱམས་པའི་སེམས་གཅིག་ཏུ་གྱུར་ནས་སངས་རྒྱས་ཐོབ་པར་འགྱུར་རོ། །དགུ་པ་བྱམས་པའི་ཕ་རོལ་ཏུ་ཕྱིན་པ་བརྟན་པར་བྱས་ཏེ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་བྱ། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །དགུ་པ་བྱམས་པའི་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པའོ། །རེ་ཞིག་དགུ་པ་འདི་ཡིས་ནི། །བྱམས་པར་བྱས་ཏེ་གནས་པར་གྱིས། །གལ་ཏེ་བྱང་ཆུབ་ཐོབ་འདོད་ན། །བྱམས་པ་མཚུངས་པ་མེད་པར་འགྱུར། །ཇི་ལྟར་ཆུ་ཞེས་བྱ་བ་ལ། །དགེ་འམ་སྡིག་པའི་སྐྱེ་བོ་ནི། །མཚུངས་པར་བསིལ་བར་གྱུར་ལ་རེག །རྡུལ་དང་དྲི་མ་སྤོང་བར་བྱེད། །དེ་ལྟར་ཁྱོད་ཀྱིས་མི་ཕན་དང། །ཕན་ལའང་མཚུངས་པར་བྱམས་པར་བྱ། །བྱམས་པའི་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །གཞན་ཡང་སངས་རྒྱས་སུ་བྱེད་པའི་ཆོས་འདི་འབའ་ཞིག་མ་ཡིན་པར་བལྟ་བར་བྱའོ། །ལྷག་པར་ཚོལ་བ་ན་བཅུ་པ་བཏང་སྙོམས་ཀྱི་ཕ་རོལ་ཏུ་ཕྱིན་པ་མཐོང་ནས་
འདི་ལྟ་བུའི་སེམས་སུ་གྱུར་ཏོ། །མཁས་པ་བློ་གྲོས་བཟང་པོ་དཀའ་ཐུབ་པ་ཁྱོད་ཀྱིས་འདི་ནས་བཟུང་ནས་བཏང་སྙོམས་ཀྱི་ཕ་རོལ་ཏུ་ཕྱིན་པ་ཡང་རྫོགས་པར་བྱའོ། །བདེ་བའམ་སྡུག་བསྔལ་ཡང་བར་མ་ལ་གནས་པར་བྱའོ། །ཇི་ལྟར་ས་གཞི་ལ་གཙང་བ་དང་མི་གཙང་བས་བྱུགས་ཀྱང་བར་མར་གནས་པར་འགྱུར་རོ། །དེ་ལྟར་འདི་ལྟར་ཁྱོད་ཀྱིས་ཀྱང་བདེ་བ་དང་སྡུག་བསྔལ་བ་ལ་བར་མར་གནས་པར་གྱུར་ན་སངས་རྒྱས་ཐོབ་པར་འགྱུར་རོ། །བཅུ་པ་བཏང་སྙོམས་ཀྱི་ཕ་རོལ་ཏུ་ཕྱིན་པ་བརྟན་པར་བྱས་ལ་གནས་པར་གྱིས་ཤིག །དེའི་ཕྱིར་གསུངས་པ། འདི་ཙམ་འབའ་ཞིག་མ་ཡིན་གྱི། །གང་ཞིག་བྱང་ཆུབ་ཐོབ་འདོད་ཆོས། །གཞན་པ་ཡང་ནི་བཙལ་བར་གྱིས། །གང་ཞིག་ཆོས་ནི་ཐོབ་བྱེད་པ། །དེ་ཡི་ཚེ་ན་ཚོལ་བ་མཐོང། །བཅུ་པ་བཏང་སྙོམས་ཕ་རོལ་ཕྱིན། །སྔོན་གྱི་སྐྱེས་བུ་ཆེན་པོ་ཡིས། །བསྙེན་དང་བརྟེན་པར་བྱས་པས་སོ། །རེ་ཞིག་བཅུ་པ་འདི་ཡིས་ནི། །བརྟན་པར་བྱས་ནས་གནས་པར་གྱིས། །སྲང་ནི་གང་བར་འགྱུར་བ་བཞིན། །ཡང་དག་བྱང་ཆུབ་ཐོབ་པར་འགྱུར། །ཇི་ལྟར་ས་གཞི་ཞེས་བྱ་ལ། །གཙང་དང་མི་གཙང་བྱུགས་པ་ན། །ལྟོས་པ་མེད་ཅིང་བཏང་སྙོམས་པས། །ཁྲོ་བ་མེད་པར་སྤོང་བ་ཡིན། །ཇི་ལྟར་ཁྱོད་ཀྱིས་ཀྱང་བདེ་སྡུག །དུས་རྣམས་ཀུན་ཏུ་སྲང་བཞིན་དུ། །བཏང་སྙོམས་ཕ་རོལ་ཕྱིན་གྱུར་ནས། །ཡང་དག་བྱང་ཆུབ་ཐོབ་པར་འགྱུར། །དེ་ནས་བསམས་པ་འཇིག་རྟེན་པ་འདི་རྣམས་བྱང་ཆུབ་སེམས་དཔའ་ལ་བྱང་ཆུབ་རྫོགས་པར་བྱེད་པ་དང་སངས་རྒྱས་སུ་བྱེད་པའི་ཆོས་དེ་རྣམས་ཉིད་དོ། །ཕ་རོལ་ཏུ་ཕྱིན་པ་བཅུ་དོར་ན་གཞན་མེད་དོ། །ཕ་རོལ་ཏུ་ཕྱིན་པ་བཅུ་པོ་འདི་ནི་སྟེང་གི་ནམ་མཁའ་ན་ཡང་མེད་དོ། །འོག་གི་ས་གཞི་ལ་ཡང་མེད་དོ། །ཤར་ལ་སོགས་པའི་ཕྱོགས་རྣམས་ན་ཡང་མེད་དོ། །བདག་ཉིད་ཁོ་ནའི་སྙིང་གི་ཤའི་ནང་ན་གནས་སོ། །དེ་ལྟར་དེའི་སྙིང་ལ་སོ་སོར་གནས་པ་མཐོང་ནས་ཐམས་ཅད་བརྟན་པར་བྱ་སྟེ་གནས་པར་བྱའོ། །ཡང་དང་ཡང་དུ་དྲན་པར་བྱ་སྟེ་ལུགས་ལས་བྱུང་བ་དང་ལུགས་ལས་བཟློག་པ་བརྟན་པར་བྱེད་དོ། །ཐ་མ་ནས་བཟུང་སྟེ་ཐོག་མའི་བར་བསམ་པར་བྱའོ། །དང་པོ་ནས་བཟུང་ནས་ཐ་མའི་བར་བསམ་མོ། །དབུས་ནས་
བཟུང་ནས་ཐོག་མ་དང་ཐ་མའི་བར་བསམ་པར་བྱའོ། །ཐོག་མ་དང་ཐ་མ་ནས་བཟུང་ནས་དབུས་ཀྱི་བར་བལྟ་བར་བྱའོ། །ལུས་ཡོངས་སུ་གཏོང་བ་ནི་ཕ་རོལ་ཏུ་ཕྱིན་པ་ཞེས་བྱ་བའོ། །ཕྱིའི་ལོངས་སྤྱོད་ཡོངས་སུ་གཏོང་བ་ནི་ཉེ་བའི་ཕ་རོལ་ཏུ་ཕྱིན་པ་ཞེས་བྱ་བའོ། །སྲོག་ཡོངས་སུ་གཏོང་བ་ནི་དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བའོ། །ཕ་རོལ་ཏུ་ཕྱིན་པ་བཅུ་པོ་དང། ཉེ་བའི་ཕ་རོལ་ཏུ་ཕྱིན་པ་བཅུ་པོ་དང། དོན་དམ་པའི་ཕ་རོལ་ཏུ་ཕྱིན་པ་བཅུ་པོའོ། །མེའི་སྟེངས་སུ་འབྲུ་མར་བསྐོལ་བ་བཞིན་དུ་ཁོར་ཡུག་གི་ནང་དུ་རྒྱ་མཚོ་ཆེན་པོ་རི་བོ་མཆོག་རབ་ཀྱིས་བསྲུབ་པ་བཞིན་དུ་དྲན་པར་བྱ་སྟེ། དེའི་ཕ་རོལ་ཏུ་ཕྱིན་པ་བཅུ་དྲན་པར་བྱས་ནས་ཆོས་ཀྱི་གཟིས་འབུམ་ཕྲག་གཉིས་དང་སྟོང་ཕྲག་བཞི་བཅུ་ལྷག་པའི་ས་ཆེན་པོ་འདིའི་སྟུགས་ལ་གླང་པོ་ཆེས་རྐང་པས་གནོན་ཅིང་སྨྱུག་མ་འཆག་པ་བཞིན་དུའོ། །བུར་ཤིང་གི་འཁྲུལ་འཁོར་བཞིན་དུ་བཙིར་བ་དང་སྒྲ་ཆེན་པོ་སྒྲོགས་པ་བཞིན་དུ་ཡང་དག་པར་སྒྲོགས་སོ། །རབ་ཏུ་གཡོས་སོ། །ཡང་དག་པར་རབ་ཏུ་གཡོས་ཏེ་རྫ་མཁན་གྱི་འཁོར་ལོ་བཞིན་ནོ། །འབྲུ་མར་གྱི་འཁྲུལ་འཁོར་བཞིན་དུ་ཡོངས་སུ་བསྐོར་རོ། །དེའི་ཕྱིར་གསུངས་པ། འདི་ཡི་འཇིག་རྟེན་དེ་རྣམས་ཉིད། །གང་ཞིག་བྱང་ཆུབ་ཐོབ་བྱེད་ཆོས། །འདི་ནི་སྟེང་དང་གཞན་ནའང་མེད། །བརྟན་པར་བྱ་སྟེ་སེམས་ལ་ཞོག །རང་བཞིན་གྱིས་ནི་གཡོ་མེད་པར། །འདི་ཡི་ཆོས་ནི་དྲན་པར་བྱེད། །ཆོས་ཀྱི་གཞི་ཡི་ས་གཞི་ནི། །འཇིག་རྟེན་སྟོང་ཕྲག་རབ་ཏུ་གཡོས། །སེམས་མེད་པ་ཡི་ས་གཞི་ནི། །བུར་ཤིང་འཁྲུལ་འཁོར་བཞིན་དུ་བཙིར། །འབྲུ་མར་འཁྲུལ་འཁོར་བཞིན་དུ་འཁོར། །དེ་ལྟར་ས་ནི་རབ་ཏུ་གཡོས། །ས་ཆེན་པོ་འདི་གཡོས་པས་དགའ་བ་ཅན་གྱི་གྲོང་ཁྱེར་ན་གནས་པའི་མི་རྣམས་ལྡང་བར་མ་ནུས་ཏེ། བསྐལ་པའི་མཐའ་ཡི་རླུང་གིས་བསྐྱོད་པའི་སའི་ཤིང་ཆེན་པོ་གཡོས་པ་བཞིན་བརྒྱལ་བ་དང་བག་མེད་པས་འགྱེལ་བར་གྱུར་ཏོ། །བུམ་པ་ལ་སོགས་པའི་སྣོད་ནི་འཛད་པ་དང་ཕན་ཚུན་དུ་ཕྲད་པའི་སྒྲ་དང་ཕྱེ་མ་དང་དུམ་བུར་གྱུར་ཏོ། །སྐྱེ་བོ་ཐམས་ཅད་འཇིགས་པར་གྱུར་ནས་སྟོན་པའི་དྲུང་དུ་ཉེ་བར་སོང་ངོ་། །བཅོམ་ལྡན་འདས་ཅི་ལགས་འདིའི་ཀླུ་འཁྲུགས་པའམ་འདིའི་འབྱུང་པོའམ་གནོད་སྦྱིན་
ནམ་ལྷ་རྣམས་སམ་གཞན་རྣམས་འཁྲུགས་སམ་བདག་ཅག་གིས་འཚལ་བར་མ་གྱུར་ཏོ། །གཞན་ཡང་འདིའི་སྐྱེ་བོ་ཆེན་པོ་ཐམས་ཅད་ལ་ཉེ་བར་འཚེ་བར་གྱུར་ཏོ། །ཅིའི་རྒྱུ་འདིའི་འཇིག་རྟེན་གྱི་སྡིག་པ་ལས་གྱུར་རམ། ཡང་ན་དགེ་བ་ལས་གྱུར་བདག་ཅག་ལ་འདི་རྣམས་ཀྱི་རྒྱུ་མཚན་རྣམས་གསུང་དུ་གསོལ་ཞེས་ཞུས་སོ། །སྟོན་པས་དེ་རྣམས་ཀྱི་གཏམ་ཐོས་ནས། །ཁྱེད་རྣམས་འཇིགས་པར་མ་བྱེད་ཅིག །ཁྱེད་རྣམས་ཅུང་ཟད་ཀྱང་མ་སེམས་ཤིག །མཚན་མ་འདི་རྣམས་ལ་ཁྱེད་རྣམས་ལ་འཇིགས་པ་མེད་དོ། །གང་ཚེ་བདག་གིས་དེ་རིང་མཁས་པ་བློ་གྲོས་བཟང་པོ་དཀའ་ཐུབ་པ་མ་འོངས་པ་ན་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །དེ་ནི་འདིར་ཕ་རོལ་ཏུ་ཕྱིན་པ་དྲན་པར་བྱེད་དོ། །དེས་ཕ་རོལ་ཏུ་ཕྱིན་པ་དྲན་པར་བྱེད་ཅིང་དཔྱོད་དོ། །དེའི་ཆོས་ཀྱི་གཟི་བརྗིད་ཀྱིས་སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་སྐད་ཅིག་ཙམ་གྱིས་གཡོ་བ་དང་སྒྲ་འབྱིན་ནོ་ཞེས་གསུང་ངོ་། །དེའི་ཕྱིར་གསུངས་པ། ཇི་སྲིད་འཁོར་རྣམས་ཡོད་པ་ལ། །སངས་རྒྱས་ཀྱི་ནི་སྦྲེལ་བས་ན། །དེ་ནི་དེ་རུ་སྡུག་བསྔལ་སེམས། །བརྒྱལ་བར་གྱུར་ནས་ས་ལ་ཉལ། །བུམ་པ་སྟོང་ཕྲག་དུ་མ་དང། །སྣོད་ཆེན་བརྒྱ་ཕྲག་མང་པོ་རྣམས། །དེར་ནི་ཕྱེ་མ་ཞིབ་མོར་གྱུར། །ཕན་ཚུན་ཐུག་ཅིང་འཆག་པས་སོ། །བརྒྱལ་དང་སྐྲག་དང་འཇིགས་པ་དང། །གནོད་ཅིང་གཟིར་བའི་སེམས་ཀྱིས་འགྱེལ། །སྐྱེ་བོ་ཐམས་ཅད་གཅིག་ཏུ་འདུས། །མར་མེ་མཛད་ཀྱི་དྲུང་དུ་སོང། །འཇིག་རྟེན་པ་རྣམས་ཅི་ཕྱིར་གྱུར། །དགེ་བའམ་ཡང་ན་སྡིག་གམ་ཅི། །འཇིག་རྟེན་ཀུན་ལ་ཉེར་འཚེ་བྱུང། །སྤྱན་ལྡན་ལེགས་པར་གསུང་དུ་གསོལ། །དེ་རྣམས་ཀུན་ལ་ཆོས་བསྟན་ཅིང། །ཐུབ་པ་ཆེན་པོ་མར་མེ་མཛད། །འཇིགས་པར་མ་བྱེད་དབུགས་དབྱུང་གིས། །འདི་ཡི་ས་གཞི་གཡོ་བས་ནི། །གང་ཞིག་དེ་རིང་བདག་ལུང་བསྟན། །འཇིག་རྟེན་པ་རྣམས་སངས་རྒྱས་འགྱུར། །དེ་ནི་ཆོས་ནི་དྲན་པར་བྱེད། །སྔོན་གྱི་རྒྱལ་བ་བསྟེན་བྱས་ཤིང། །དེ་ཡི་ཆོས་རྣམས་དྲན་བྱེད་པས། །སངས་རྒྱས་ས་ནི་མ་ལུས་པ། །དེས་ན་འདི་ཡི་ས་རྣམས་གཡོས། །ལྷ་དང་བཅས་
པ་སྟོང་ཕྲག་བཅུ། །སྐྱེ་བོ་ཆེན་པོ་རྣམས་ཀྱིས་དེ་བཞིན་གཤེགས་པའི་གསུང་ཐོས་པས་དགའ་བ་དང་ཚིམ་པ་སྐྱེས་ནས་མེ་ཏོག་དང་དྲི་བཟང་དང། བྱུག་པ་རྣམས་བླངས་ཏེ་དགའ་བ་ཅན་གྱི་གྲོང་ཁྱེར་ནས་འཐོན་ནས་བྱང་ཆུབ་སེམས་དཔའི་དྲུང་དུ་སོང་སྟེ་མེ་ཏོག་ལ་སོགས་པས་མཆོད་ནས་ཕྱག་དང་བསྟོད་པ་བྱས་ཏེ་དགའ་བ་ཅན་གྱི་གྲོང་ཁྱེར་ཉིད་དུ་གནས་སོ། །བྱང་ཆུབ་སེམས་དཔས་ཀྱང་ཕ་རོལ་ཏུ་ཕྱིན་པ་བཅུ་དྲན་པར་བྱས་ནས་བརྩོན་འགྲུས་བརྟན་པར་བྱ་སྟེ་ལྷག་པར་གནས་ནས་སྟན་ལས་ལངས་སོ། །དེའི་ཕྱིར་གསུངས་པ། སངས་རྒྱས་ཀྱི་ནི་གསུང་ཐོས་ནས། །དེ་མ་ཐག་ཏུ་འཇིགས་མེད་སེམས། །ཐམས་ཅད་བདག་གི་དྲུང་དུ་འོངས། །སླར་ཡང་ཕྱག་ནི་བྱས་ནས་སོ། །སངས་རྒྱས་ཡོན་ཏན་སེམས་པར་བྱེད། །དེ་ཚེ་བདག་གིས་སྟན་ལས་ལངས། །མར་མེ་མཛད་ལ་ཕྱག་བྱས་སོ། །དེ་ནས་བྱང་ཆུབ་སེམས་དཔའ་སྟན་ལས་ལངས་པ་ན་སྟོང་ཕྲག་བཅུའི་ལྷ་ཐམས་ཅད་འདུས་ནས་ལྷའི་མེ་ཏོག་དང་དྲི་བཟང་གིས་མཆོད་པ་བྱས། འཕགས་པ་བློ་གྲོས་བཟང་པོ་དཀའ་ཐུབ་པ་དེ་ཡིས་དེ་རིང་སྟོབས་བཅུ་དང་ལྡན་པའི་མར་མེ་མཛད་ཀྱི་ཞབས་དྲུང་དུ་དོན་ཆེན་པོ་དོན་དུ་གཉེར་བའི་ཕྱིར་དོན་དུ་གཉེར་ཏོ། །དེ་ཡིས་དེ་རྣམས་ལ་བར་གཅོད་མེད་ཅིང་རྫོགས་པར་འགྱུར་རོ། །དེ་ལ་འཇིགས་པ་མེད་པ་དང། ཞུམ་པ་མེད་པར་འགྱུར་རོ། །སྐུ་ལ་ནད་ཅུང་ཟད་ཀྱང་མི་འབྱུང་ཞིང་མྱུར་དུ་ཕ་རོལ་ཏུ་ཕྱིན་པ་རྫོགས་པར་བྱས་ནས་ཡང་དག་པར་རྫོགས་པའི་སངས་རྒྱས་གྲུབ་པར་གྱིས་ཤིག །ཇི་ལྟར་མེ་ཏོག་ཅན་གྱི་ཤིང་ངམ་འབྲས་བུ་ཅན་གྱི་ཤིང་དུས་སུ་མེ་ཏོག་སྨིན་པ་དང་འབྲས་བུ་སྨིན་པ་ཉིད་དོ། །དེ་བཞིན་དུ་ཁྱོད་ཀྱིས་ཀྱང་དེའི་དུས་སུ་ལྷག་པར་གནས་པར་བྱེད་པ་ལ་མྱུར་དུ་མཆོག་རྫོགས་པར་བྱེད་པ་ལ་སོགས་པའི་བསྟོད་པ་དང་བཀྲ་ཤིས་པས་བསྟོད་དོ། །དེ་བཞིན་དུ་བསྟོད་པ་བྱས་ནས་ལྷ་རྣམས་རང་རང་གི་གནས་སུ་སོང་ངོ་། །བྱང་ཆུབ་སེམས་དཔས་ཀྱང་ལྷ་ལ་སོགས་པའི་བསྟོད་པ་ཐོས་པར་བྱས་ནས། བདག་གིས་ཕ་རོལ་ཏུ་ཕྱིན་པ་བཅུ་རྫོགས་པར་བྱས་ཏེ་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་པའི་མཐར་སངས་རྒྱས་ཐོབ་པར་འགྱུར་བས་བརྩོན་འགྲུས་
བརྟན་པོ་ལྷག་པར་གནས་ནས་ནམ་མཁའ་ལ་འཕགས་ཏེ་གངས་ཅན་གྱི་གནས་ཉིད་ལ་གཤེགས་སོ། །དེའི་ཕྱིར་གསུངས་པ། ལྷ་དང་མི་ཡི་མེ་ཏོག་རྣམས། །ལྷ་དང་མི་རྣམས་གཉིས་ཀ་ཡིས། །སྟན་ལས་ལངས་པར་གྱུར་ནས་ནི། །མེ་ཏོག་མཚུངས་པར་བསྡུས་ནས་སོ། །ལྷ་དང་མི་རྣམས་གཉིས་ཀ་ཡང། །ཐམས་ཅད་ཞི་བར་གྱུར་ཞེས་བསྟོད། །ཁྱོད་ཀྱིས་ཆེན་པོ་དོན་དུ་གཉེར། །ཇི་ལྟར་འདོད་པ་དེ་ཐོབ་བོ། །དུས་མིན་འཆི་བ་རིང་དུ་སོང། །ནད་རྣམས་ཐམས་ཅད་ཉམས་པར་གྱུར། །ཁྱོད་ལ་བར་ཆད་མི་འབྱུང་ངོ་། །མཆོག་གི་བྱང་ཆུབ་མྱུར་དུ་ཐོབ། །ཇི་ལྟར་དུས་སུ་སླེབ་པ་ན། །ལྗོན་ཤིང་མེ་ཏོག་བྱེ་བར་གྱུར། །དེ་བཞིན་ཁྱོད་ཀྱི་དཔའ་ཆེན་པོས། །སངས་རྒྱས་ཡེ་ཤེས་མེ་ཏོག་གྱུར། །གང་ཞིག་ཇི་ལྟར་རྫོགས་སངས་རྒྱས། །ཕ་རོལ་ཕྱིན་བཅུ་རྫོགས་པར་བྱས། །དེ་བཞིན་ཁྱོད་ཀྱི་དཔའ་ཆེན་པོས། །ཕ་རོལ་ཕྱིན་བཅུ་རྫོགས་པར་གྱིས། །ཇི་ལྟར་གང་ཞིག་རྫོགས་སངས་རྒྱས། །བྱང་ཆུབ་སྙིང་པོ་རྫོགས་པར་གྱུར། །དེ་བཞིན་ཁྱོད་ཀྱི་དཔའ་ཆེན་པོས། །རྒྱལ་བའི་བྱང་ཆུབ་རྫོགས་པར་གྱིས། །གང་ཞིག་ཇི་ལྟར་རྫོགས་སངས་རྒྱས། །ཆོས་ཀྱི་འཁོར་ལོ་བསྐོར་བར་གྱུར། །དེ་བཞིན་ཁྱོད་ཀྱི་དཔའ་ཆེན་པོས། །ཆོས་ཀྱི་འཁོར་ལོ་བསྐོར་བར་གྱིས། །ཇི་ལྟར་ཟླ་བ་ཉ་བ་བཞིན། །ཡོངས་སུ་དག་པས་འོད་འགྱེད་པ། །དེ་བཞིན་ཁྱོད་ཀྱིས་བསམ་རྫོགས་པའི། །སྟོང་ཕྲག་བཅུ་ཡི་འོད་ཕྱུང་ཅིག །ཉི་མ་སྒྲ་གཅན་ལས་གྲོལ་བ། །ཚ་ཞིང་འོད་ཟེར་རབ་ཏུ་འགྱེད། །དེ་བཞིན་འཇིག་རྟེན་གྲོལ་བྱས་ནས། །ཁྱོད་ཀྱི་དཔལ་ལྡན་འོད་ཟེར་ཕྱུང། །གང་ཞིག་ཇི་ལྟར་ཆུ་ཀླུང་ནི། །རྒྱ་མཚོ་ཆེན་པོའི་རྗེས་སུ་འགྲོ། །དེ་ལྟར་ལྷ་མིའི་འཇིག་རྟེན་ཚོགས། །ཁྱོད་ཀྱི་རྗེས་སུ་འཇུག་པར་འགྱུར། །དེ་རྣམས་ཁྱོད་ལ་བསྟོད་ཅིང་བསྔགས། །ཆོས་བཅུ་པོ་ལ་གནས་བྱས་ནས། །དེ་ཡི་ཆོས་རྣམས་རྫོགས་བྱེད་ཅིང། །དེ་ཚེ་ནགས་ཚལ་ཆེན་པོར་ཕྱིན། །མཁས་པ་བློ་གྲོས་བཟང་པོའི་གཏམ་དུ་བྱ་བ་རྫོགས་སོ།། །།དགའ་བ་ཅན་གྱི་གྲོང་ཁྱེར་དུ་གནས་པ་རྣམས་གྲོང་ཁྱེར་དུ་ཞུགས་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་ལ་
སྦྱིན་པ་ཆེན་པོ་གཏང་ངོ་། །སྟོན་པས་དེ་རྣམས་ལ་ཆོས་བསྟན་ཅིང་བསྟན་ནས་སྐྱེ་བོ་མང་པོ་སྐྱབས་སུ་འགྲོ་བ་ལ་གནས་པར་བྱས་ཏེ། དགའ་བ་ཅན་གྱི་གྲོང་ཁྱེར་ནས་འཐོན་ཏེ། ལྷག་པར་གནས་པ་ཇི་སྲིད་འཚོའི་བར་དེ་སྲིད་དུ་གནས་ནས་སངས་རྒྱས་ཀྱི་འཕྲིན་ལས་ཐམས་ཅད་བྱེད་ཅིང་གོ་རིམས་བཞིན་དུ་ལྷག་མ་མེད་པར་ཡོངས་སུ་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །དེ་ལ་ཅུང་ཟད་བརྗོད་པས་དེ་ཐམས་ཅད་ལ་སངས་རྒྱས་ཀྱི་རྒྱུད་ལ་བརྗོད་པའི་རིགས་པ་དེ་བཞིན་རིག་པར་བྱའོ། །དེ་ལ་གསུངས་པ། དེ་ཚེ་ཁྱོད་རྣམས་མཆོད་སྟོན་བྱེད། །དགེ་འདུན་དང་བཅས་འཇིག་རྟེན་འདྲེན། །དེ་ལ་སྐྱབས་སུ་འགྲོ་བ་ཡིན། །སྟོན་པ་མར་མེ་མཛད་པ་ལ། །དེ་བཞིན་གཤེགས་པས་ངེས་གསུངས་པའི། །གང་ཞིག་སྐྱབས་སུ་འགྲོ་བར་གྱུར། །གང་ཞིག་ཚུལ་ཁྲིམས་ལྔ་དང་ལྡན། །གཞན་ཡང་ཚུལ་ཁྲིམས་བཅུ་པོ་ཡི། །གང་ཞིག་ལ་ནི་གཞན་ཕྱིན་པ། །མཆོག་གི་འབྲས་བུ་བཞི་པོ་དང། །གང་ཞིག་ལ་ནི་མཚུངས་མེད་ཆོས། །སོ་སོ་ཡང་དག་རིག་པ་བྱིན། །ཕུན་ཚོགས་མཆོག་ནི་གང་ཞིག་ལ། །བརྒྱན་ནས་མི་ཡི་ཁྱུ་མཆོག་བྱིན། །གང་ཞིག་ལ་ནི་རིག་པ་གསུམ། །མངོན་པར་ཤེས་པ་དྲུག་ལ་ཞུགས། །དེ་ཡིས་རིག་པ་སྐྱེ་བོའི་ཚོགས། །ཐུབ་པ་ཆེན་པོའི་གདམས་པ་བྱིན། །དེ་ཡིས་རྒྱ་ཆེན་པོར་ནི་གྱུར། །འཇིག་རྟེན་མགོན་པོའི་བསྟན་ལའོ། །ཁྱུ་མཆོག་ཕྲག་པ་འགྲམ་ཆེན་པོ། །མར་མེ་མཛད་ཀྱི་མཚན་དང་ལྡན། །སྐྱེ་བོ་མང་པོ་སྒྲོལ་བར་བྱེད། །ངན་འགྲོ་ཡོངས་སུ་གྲོལ་བར་བྱེད། །གྲོལ་བའི་ཕྱིར་དུ་སྐྱེ་བོ་མཐོང། །སྟོང་ཕྲག་བརྒྱ་ཡི་དཔག་ཚད་དུ། །སྐད་ཅིག་ཙམ་གྱི་ཉེ་བར་སོང། །ཐུབ་པ་ཆེན་པོ་དེ་མཁྱེན་ཕྱིར། །དང་པོར་འདུས་པའི་སངས་རྒྱས་ཀྱིས། །བྱེ་བ་བརྒྱ་པོ་རྟོགས་པར་བྱས། །མགོན་པོ་འདུས་པ་གཉིས་པ་ནི། །འབུམ་ཕྲག་གཅིག་གིས་རྟོགས་པར་བྱས། །གང་ཚེ་ལྷ་ཡི་གནས་སུ་ནི། །སངས་རྒྱས་ཀྱིས་ནི་ཆོས་བསྟན་ནོ། །བྱེ་བ་སྟོང་ཕྲག་དགུ་བཅུ་ཡི། །འདུས་པ་གསུམ་པ་ལ་ནི་གྱུར། །དེ་རྣམས་འདུས་པ་གསུམ་དུ་གྱུར། །སྟོན་པ་མར་མེ་མཛད་ཀྱིའོ། །བྱེ་བ་སྟོང་ཕྲག་བརྒྱ་ཡིས་ནི། །དང་པོ་ཡི་ནི་འདུས་པ་
ཡིན། །སླར་ཡང་ནཱ་ར་དྷ་ཡི་ཕུར། །རྒྱལ་བ་གཅིག་པུར་བཞུགས་པ་ནི། །ཟག་པའི་དྲི་མ་ཟད་པ་ཡི། །བྱེ་བ་བརྒྱ་ནི་ཞི་བ་དང། །དཔའ་བོ་ཆེན་པོ་ཇི་སྲིད་བཞུགས། །རི་ཡི་སྟེང་ན་བལྟ་ན་སྡུག །སྟོང་ཕྲག་བྱེ་བ་དགུ་བཅུ་ཡིས། །དེ་ཚེ་ཐུབ་པ་ཡི་ནི་འཁོར། །བདག་གིས་དེ་ཡི་དུས་སུ་ནི། །སྡོམ་བརྩོན་དཀའ་ཐུབ་པ་ཡི་མཆོག །བདག་ནི་བར་སྣང་ལ་ནི་འགྲོ། །མངོན་ཤེས་ལྔ་ཡི་ཕ་རོལ་སོན། །སྟོང་ཕྲག་བཅུ་དང་ཉི་ཤུ་ནི། །ཆོས་ལ་འདུས་པར་གྱུར་པའོ། །གཅིག་དང་གཉིས་ཀྱི་འདུས་པ་ནི། །བགྲང་དུ་མེད་ཅིང་གྲངས་མེད་དོ། །རྒྱ་ཆེ་དེད་དཔོན་ཅང་ཤེས་པ། །དེ་ཚེ་རྫུ་འཕྲུལ་ལྡན་ཞིང་རྫོགས། །བཅོམ་ལྡན་འདས་ནི་མར་མེ་མཛད། །བསྟན་པ་ཤིན་ཏུ་དག་ཅིང་མཛེས། །འབུམ་ཕྲག་བཞི་པོ་རྣམས་ལ་ནི། །མངོན་ཤེས་དྲུག་དང་རྫུ་འཕྲུལ་ལྡན། །མར་མེ་མཛད་ནི་འཇིག་རྟེན་མཁྱེན། །རྟག་ཏུ་འཁོར་རྣམས་ཡོངས་དག་ལྡན། །གང་ཞིག་དེ་ཡི་དུས་སུ་ནི། །མི་རྣམས་དངོས་པོ་གཏོང་བ་དང། །སེམས་ཀྱི་ལྷག་མ་མ་ཐོབ་པ། །དེ་རྣམས་སྐུར་པ་འདེབས་པར་གྱུར། །མེ་ཏོག་བཟང་པོའི་ཚིག་རྙེད་པ། །དགྲ་བཅོམ་རྣམས་ནི་དེ་དང་མཚུངས། །དྲི་མ་མེད་ཅིང་ཟག་པ་ཟད། །ལྷ་དང་མི་རྣམས་ཉེ་བར་མཛེས། །གྲོང་ཁྱེར་དགའ་བ་ཅན་ཞེས་པ། །བློ་གྲོས་བཟང་པོ་རྒྱལ་པོའི་རིགས། །ཡུམ་ནི་བློ་གྲོས་བཟང་མོ་ཡིན། །སྟོན་པ་མར་མེ་མཛད་ཡིན་ནོ། །བཀྲ་ཤིས་བཟང་པོ་ཉེ་རྒྱལ་ནི། །ཉན་ཐོས་རྣམས་ཀྱི་མཆོག་ཡིན་ནོ། །ལེགས་འོངས་ཞེས་པ་ཉེ་གནས་ཡིན། །སྟོན་པ་མར་མེ་མཛད་པའོ། །དགའ་བ་ཉིད་དང་ཤིན་ཏུ་དགའ། །ཉན་ཐོས་མ་ཡི་མཆོག་ཡིན་ནོ། །བཅོམ་ལྡན་དེ་ཡི་བྱང་ཆུབ་ཤིང། །བིམ་པ་ལ་ཞེས་བྱ་བ་ཡིན། །མཐོ་ཚད་ཁྲུ་ནི་བརྒྱད་ཅུ་པ། །ཐུབ་པ་ཆེན་པོ་མར་མེ་མཛད། །ཤིང་བཞིན་རབ་ཏུ་འབར་བ་ཡི། །མེ་ཏོག་སཱ་ལའི་ཤིང་རྒྱས་བཞིན། །ལོ་ནི་སྟོང་ཕྲག་བརྒྱ་རུ་ནི། །དྲང་སྲོང་ཆེན་པོ་དེ་ཡི་ཚེ། །དེ་སྲིད་དུ་ནི་གནས་པ་སྟེ། །སྐྱེ་བོ་མང་པོ་སྒྲོལ་བར་བྱེད། །ཆོས་ཀྱི་སྣང་བར་བྱས་ནས་ནི། །སྐྱེ་བོ་མང་པོ་ཡང་དག་སྒྲོལ། །མེ་ཡི་ཕུང་པོ་བཞིན་དུ་གསལ། །དེ་ནས་ཉན་ཐོས་དང་བཅས་
འདས། །དེ་ཡང་རྫུ་འཕྲུལ་དེ་གྲགས་པ། །རིན་ཆེན་འཁོར་ལོ་དེ་ཞབས་ལ། །ཐམས་ཅད་ཀུན་ནས་བྲལ་བ་དང། །འདུས་བྱས་ཆོས་རྣམས་གཏོང་བའོ། །མར་མེ་མཛད་ཀྱི་འོག་ཏུ་ནི། །འདྲེན་པ་ཀཽཎྜི་ནྱ་ཞེས་པ། །གཟི་བརྗིད་དཔག་མེད་མཐའ་ཡས་གྲགས། །རིང་ལ་སེམས་པ་གཞལ་དུ་མེད། །སླར་ཡང་བཅོམ་ལྡན་འདས་མར་མེ་མཛད་ཀྱི་འོག་གི་ཆར་བསྐལ་པ་གྲངས་མེད་པ་གཅིག་འདས་ནས། སྟོན་པའི་འདྲེན་པ་ཀཽཎྜི་ནྱ་ཞེས་བྱ་བ་བྱོན་ནོ། །དེའི་ཡང་ཉན་ཐོས་འདུས་པ་གསུམ་དུ་གྱུར་ཏོ། །འདུས་པ་དང་པོ་ལ་བྱེ་བ་སྟོང་ཕྲག་བརྒྱའོ། །འདུས་པ་གཉིས་པ་ལ་བྱེ་བ་སྟོང་ཕྲག་གཅིག་གོ། །འདུས་པ་གསུམ་པ་ལ་ནི་བྱེ་བ་ཕྲག་དགུ་བཅུའོ། །དེའི་ཚེ་བྱང་ཆུབ་སེམས་དཔའ་རྣམ་པར་རྒྱལ་བ་ཞེས་བྱ་བ་འཁོར་ལོས་སྒྱུར་བའི་རྒྱལ་པོར་གྱུར་ཏོ། །བྱེ་བ་སྟོང་ཕྲག་བརྒྱའི་གྲངས་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ཆེན་པོ་རྣམས་ལ་སྦྱིན་པ་ཆེན་པོ་གཏོང་ངོ་། །སྟོན་པས་བྱང་ཆུབ་སེམས་དཔའ་སངས་རྒྱས་སུ་འགྱུར་རོ་ཞེས་ལུང་བསྟན་པར་བྱས་ནས་ཆོས་བསྟན་ནོ། །དེས་སྟོན་པའི་ཆོས་ཐོས་ནས་རྒྱལ་སྲིད་སྤངས་ནས་རབ་ཏུ་བྱུང་ངོ་། །དེས་སྡེ་སྣོད་གསུམ་པོ་བསླབས་ནས་སྙོམས་པར་འཇུག་པ་བརྒྱད་དང་མངོན་པར་ཤེས་པ་ལྔ་བསྐྱེད་དོ། །བསམ་གཏན་མ་བོར་བར་ཚངས་པའི་འཇིག་རྟེན་དུ་སྐྱེས་སོ། །སླར་ཡང་སངས་རྒྱས་ཀཽཎྜི་ནྱ་དེའི་གྲོང་ཁྱེར་དགའ་བ་ཅན་ཡིན་ནོ། །ཤིན་ཏུ་དགའ་བའི་རྒྱལ་པོ་ནི་ཡབ་བོ། །རིགས་བཟང་ལྷ་མོ་ནི་ཡུམ་མོ། །བཟང་པོ་དང་ལེགས་བཟང་གཉིས་ནི་ཉན་ཐོས་རྣམས་ཀྱི་མཆོག་གོ། །མི་འགལ་བ་ཞེས་བྱ་བ་ནི་ཉེ་གནས་སོ། །རྒྱལ་མ་དང་ཉེ་རྒྱལ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་དགེ་བའི་ཤིང་ནི་ཤཱལྱའོ། །སྐུའི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་བརྒྱའོ། །དེའི་འོག་གི་ཆར་བསྐལ་པ་གྲངས་མེད་པ་གཅིག་འདས་ནས་བསྐལ་པ་གཅིག་གི་ནང་དེ་ཉིད་དུ་སངས་རྒྱས་བཞི་བྱོན་པར་གྱུར་ཏོ། །བཀྲ་ཤིས་བཟང་པོ་དང། ཐུགས་བཟང་པོ་དང། ནམ་གྲུ་ཅན་དང། མ་ངེས་པ་ཅན་ནོ། །བཅོམ་ལྡན་འདས་བཀྲ་ཤིས་བཟང་པོའི་ཉན་ཐོས་ཀྱི་འདུས་པ་གསུམ་དུ་
འགྱུར་ཏེ། དེའི་འདུས་པ་དང་པོ་ནི་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་སྟོང་ཕྲག་གཅིག་གོ། །གསུམ་པ་ལ་བྱེ་བ་ཕྲག་དགུ་བཅུའོ། །མའི་སྤུན་གྱི་གཞོན་ནུ་ཀུན་དགའ་བོ་ཞེས་བྱ་བ་བྱེ་བ་ཕྲག་དགུ་བཅུའི་འཁོར་དང་བཅས་པ་ནི་ཆོས་ཉན་པའི་ཕྱིར་དུའོ། །སྟོན་པའི་ཉེ་བར་གནས་པ་རྣམས་སོང་ངོ་། །སྟོན་པ་དེའི་སྔོན་གྱི་གཏམ་རྣམས་གོ་རིམས་བཞིན་དུ་བརྗོད་པར་བྱའོ། །དེ་འཁོར་དང་བཅས་པ་སོ་སོ་ཡང་དག་པར་རིག་པ་དང་དགྲ་བཅོམ་པ་ཐོབ་བོ། །སྟོན་པ་དེས་རིགས་ཀྱི་བུ་རྣམས་ལ་སྔར་གྱི་སྤྱོད་པ་རྣམས་ལ་བལྟ་ཞིང་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་རྣམས་གཟིགས་ཏེ། ཕྱག་གཡས་པ་བརྐྱང་ནས་དགེ་སློང་རྣམས་ཚུར་ཤོག་ཅིག་ཅེས་གསུངས་པ་དང། ཐམས་ཅད་དེ་མ་ཐག་ཉིད་དུ་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་བཟུང་ནས་གནས་བརྟན་ལོ་དྲུག་ཅུ་ལོན་པ་བཞིན་དུ་གྱུར་ཏེ། ཆོ་ག་ཕུན་སུམ་ཚོགས་པར་གྱུར་ནས་སྟོན་པ་ལ་ཕྱག་བྱས་ཏེ་འཁོར་དུ་གྱུར་ཏོ། །ཇི་ལྟར་གཞན་ཡང་སངས་རྒྱས་གཞན་རྣམས་ལ་ཀུན་ནས་ཁྲུ་བརྒྱད་ཅུ་པའི་སྐུ་ཚད་ཉིད་ཀྱི་འོད་དུ་གྱུར་ཏོ། །བཅོམ་ལྡན་འདས་དེ་ཉིད་ཀྱི་སྐུའི་འོད་དེ་ལྟ་བུ་ཉིད་མ་ཡིན་གྱི། དུས་རྟག་ཏུ་སྟོང་ཕྲག་བཅུའི་འཇིག་རྟེན་གྱི་ཁམས་སུ་འཕྲོ་ཞིང་གནས་ཏེ། ཤིང་དང་ས་དང་རི་དང་རྒྱ་མཚོ་ལ་སོགས་པའི་ཕྱོགས་ལྷག་མ་རྣམས་དང་ཚང་བང་ལ་སྩོགས་པ་གསེར་གྱིས་སྤྲས་པ་བཞིན་ནོ། །སྐུ་ཚེའི་ཚད་ནི་སྟོང་ཕྲག་དགུ་བཅུའོ། །དེ་རྣམས་ཀྱི་ལུས་ལ་ཟླ་བ་དང་ཉི་མ་ལ་སོགས་པ་ལ་རང་གི་འོད་ཀྱི་སྣང་བའི་ནུས་པ་མེད་དོ། །མཚན་མོ་དང་ཉིན་མོའི་བྱེ་བྲག་མི་ཤེས་སོ། །སེམས་ཅན་རྣམས་ཀྱི་ཉིན་མོ་ཉི་མ་ཤར་བ་བཞིན་དུ་སངས་རྒྱས་ཀྱི་འོད་ཀྱིས་རྟག་ཏུ་འགྲོ་བར་བྱེད་དོ། །མཚན་མོ་མེ་ཏོག་ཟུམ་པ་དང་སྔ་དྲོའི་དུས་སུ་བྱ་རྣམས་སྐད་འབྱིན་པ་ལ་སོགས་པ་ལ་བརྟེན་ནས་འཇིག་རྟེན་པས་ཉིན་མཚན་ཤེས་པར་བྱེད་དོ། །ཡང་དག་པར་རྫོགས་པའི་སངས་རྒྱས་གཞན་རྣམས་ལ་ཅིའི་ཕྱིར་འདི་ལྟ་བུ་མེད་པ་ཡིན་ནམ། མེད་པ་ནི་མ་ཡིན་ཏེ། དེ་རྣམས་ཀྱིས་ཀྱང་དགོངས་པར་གྱུར་ན་སྟོང་ཕྲག་བཅུའི་འཇིག་རྟེན་གྱི་ཁམས་སུ་གྱུར་པའམ་དེ་བས་ལྷག་པར་ཡང་འོད་འཕྲོ་བར་
བྱེད་དོ། །སླར་ཡང་བཅོམ་ལྡན་འདས་བཀྲ་ཤིས་བཟང་པོ་སྔར་གྱི་དོན་དུ་གཉེར་བའི་དབང་གིས་ཏེ། གཞན་གྱི་འོད་འདོམ་གང་བ་བཞིན་ནོ། །སྐུའི་འོད་ཀྱིས་རྒྱུན་མི་འཆད་པ་ཉིད་དུ་སྟོང་ཕྲག་བཅུའི་འཇིག་རྟེན་གྱི་ཁམས་ཁྱབ་པར་བྱས་ནས་གནས་སོ། །དེའི་བྱང་ཆུབ་སེམས་དཔའི་སྤྱོད་པའི་དུས་ན་ཐམས་ཅད་སྒྲོལ་བཞིན་དུ་བདག་ཉིད་གནས་སོ། །དེའི་བུ་དང་བུ་མོར་བཅས་པ་རི་བོ་བྷ་ག་བཞིན་དུ་རི་ལ་བཞུགས་སོ། །དེ་ནས་མཆེ་བ་གཅིག་པ་གདུག་པ་ཅན་གྱི་གནོད་སྦྱིན་ཞིག་གིས་སྐྱེས་བུ་ཆེན་པོ་སྦྱིན་པ་གཏོང་ཞེས་ཐོས་ནས་བྲམ་ཟེའི་གཟུགས་ཀྱིས་ཉེ་བར་སོང་སྟེ་སེམས་དཔའ་ཆེན་པོའི་དྲུང་དུ་བུ་དང་བུ་མོ་སློང་ངོ་། །སེམས་དཔའ་ཆེན་པོས་བྲམ་ཟེ་ལ་བུ་དང་བུ་མོ་སྦྱིན་ནོ་ཞེས་བསམས་ནས་དགའ་བ་དང་ཚིམ་པས་ཆུའི་མཐར་ཐུག་པའི་ས་རྣམས་གཡོས་སོ། །དེ་ནས་གནོད་སྦྱིན་འཆག་པའི་གནས་ཀྱི་མཐར་ཙོག་པུར་རྒྱབ་རྟེན་ལ་འདུག་སྟེ་སེམས་དཔའ་ཆེན་པོ་ལ་ལྟ་ཞིང་འདུག་གོ། །དེ་ལ་དེས་བུ་དང་བུ་མོ་བྱིན་པ་དང་དེས་ལ་ཕུག་ཟ་བ་བཞིན་དུ་བུ་དང་བུ་མོ་ཟོས་ནས། གནོད་སྦྱིན་གྱིས་སྐྱེས་བུ་ཆེན་པོ་དེ་ལ་བལྟ་སྟེ། ཁ་གདངས་ནས་མེ་འབར་བ་བཞིན་དུ་ཁྲག་གི་རྒྱུན་འབབ་བོ། །།དེའི་ཁ་མཐོང་ནས་ཀྱང་སྐྲའི་རྩེ་མོ་ཙམ་གྱི་ཡིད་མི་བདེ་བ་ཡང་མ་སྐྱེས་པར་ངས་བྱིན་པ་ཤིན་ཏུ་ལེགས་པ་གཅིག་གོ་ཞེས་སེམས་སོ། །སླར་ཡང་ལུས་ལ་མཆོག་ཏུ་དགའ་བ་ཆེན་པོ་སྐྱེས་སོ། །དེ་དག་འདི་ལ་བྱིན་པའི་བསོད་ནམས་ཀྱི་ཕན་ཡོན་གྱིས་མ་འོངས་པ་ན་འདི་ལྟ་བུའི་རིམ་པའི་འོད་ཟེར་འཕྲོ་བར་དོན་དུ་གཉེར་རོ། །དེ་ལ་དོན་དུ་གཉེར་བའི་རྒྱུ་མཚན་གྱིས་སངས་རྒྱས་སུ་གྱུར་ནས་སྐུའི་འོད་དེ་ཕྱི་རོལ་དུ་འཕྲོ་ཞིང་དེ་རྣམས་ལ་ཁྱབ་པར་གནས་སོ། །གཞན་ཡང་འདིའི་སྔར་གྱི་མཛད་པ་ཡོད་པས་དེ་བྱང་ཆུབ་སེམས་དཔའི་དུས་སུ་སངས་རྒྱས་གཅིག་གི་སྐུ་གདུང་གི་མཆོད་རྟེན་མཐོང་ནས་སངས་རྒྱས་འདིའི་སྐུ་གདུང་ལ་བདག་གིས་འཚོ་བ་ཡོངས་སུ་བཏང་ན་རིགས་ས་སྙམ་ནས་ཤིང་རས་ཀྱིས་དཀྲིས་པ་བཞིན་དུ་ལུས་ཐམས་ཅད་གོས་གཞན་གྱིས་དཀྲིས་ཤིང་རིན་པོ་ཆེའི་ཅོད་པན་གྱོན་ནས་འབུམ་ཕྲག་གཅིག་རི་བའི་གསེར་གྱི་སྣོད་དུ་མར་གྱིས་བཀང་སྟེ་དེར་རས་འདེ་སྟོང་ཕྲག་བརྒྱ་བཙུགས་ནས་མར་མེ་སྦར་ཏེ་མགོའི་སྟེང་དུ་བཞག་ཅིང་ལུས་ཐམས་ཅད་ཀྱང་འབར་
བར་བྱས་ནས་སྐུ་གདུང་གི་མཆོད་རྟེན་ལ་བསྐོར་བ་བྱེད་དོ། །དེ་ལྟར་མཚན་ཐོག་ཐག་སྔ་དྲོའི་སྐྱ་རེངས་ཤར་གྱི་བར་དུ་འབད་པ་བྱེད་པ་ཉིད་ཀྱི་བ་སྤུའི་ཁུང་བུ་ཙམ་ཡང་དྲོ་བར་མ་གྱུར་ཏེ་པད་མའི་ཚལ་དུ་བཞུགས་པ་བཞིན་ནོ། །ཆོས་ཞེས་བྱ་བ་འདི་རང་ཉིད་བསྲུང་ན་ཆོས་བསྲུངས་པར་འགྱུར་རོ། །དེའི་ཕྱིར་གསུངས་པ། ཆོས་བཞིན་བསྲུང་ན་ཆོས་སྤྱོད་དེ། །ཆོས་ཀྱིས་བསྒྲལ་ན་ཆོས་བཞིན་ཐོབ། །ལེགས་པར་བསྒྲལ་ན་ཆོས་ཕན་ཡོན། །ཆོས་སྤྱོད་ངན་འགྲོར་མི་འགྲོའོ། །འདིའི་ལས་ཀྱི་འབྲས་བུ་བཅོམ་ལྡན་འདས་དེའི་སྐུའི་འོད་ཀྱིས་སྟོང་ཕྲག་བཅུའི་འཇིག་རྟེན་གྱི་ཁམས་ཁྱབ་ཅིང་གནས་སོ། །དེའི་ཚེ་བདག་ཅག་ནི་བྱང་ཆུབ་སེམས་དཔའ་ཤིན་ཏུ་སྲེད་པ་ཞེས་བྱ་བའི་བྲམ་ཟེར་གྱུར་ཏོ། །དེས་སྟོན་པ་མགྲོན་དུ་གཉེར་བའི་ཕྱིར་དྲུང་དུ་སོང་སྟེ་ཆོས་སྙན་པོའི་བཤད་པ་ཐོས་ནས་བཙུན་པ་སང་བདག་གི་གདུགས་ཚོད་ལ་བྱོན་པར་ཞུ་ཞེས་ཞུས་སོ། །བྲམ་ཟེས་དགེ་སློང་དུ་ཙམ་དགོས་ཞེས་གསུངས་པ་དང། བཙུན་པ་འཁོར་དང་བཅས་པའི་དགེ་འདུན་དུ་ཙམ་བདོག་ཅེས་ཞུས་སོ། །དེའི་ཚེ་སྟོན་པའི་འདུས་པ་དང་པོ་ཉིད་ཙམ་ཡོད་དོ། །དེའི་ཕྱིར་བྱེ་བ་སྟོང་ཕྲག་བརྒྱ་ཡོད་ཅེས་གསུངས་སོ། །བཙུན་པ་འཁོར་ཐམས་ཅད་དང་བཅས་པ་བདག་གི་ཁང་པར་གདུགས་ཚོད་ལ་བྱོན་པར་ཞུ་ཞེས་ཞུས་པ་དང། བཅོམ་ལྡན་འདས་ཀྱིས་གནང་སྟེ་བྲམ་ཟེས་སང་དོན་དུ་གཉེར་ཅིག །ཁང་པར་འགྲོ་ཞིང་བསམས་པ། བདག་གིས་དགེ་སློང་འདི་རྣམས་ལ་ཐུག་པ་དང་ཟན་དང་གོས་ལ་སོགས་པ་འབུལ་བར་ནུས་སོ། །བཞུགས་པའི་གནས་ཇི་ལྟ་བུ་ཞེས་བསམས་སོ། །དཔག་ཚད་བརྒྱད་ཁྲི་བཞི་སྟོང་གི་སྟེང་ན་གནས་པའི་ལྷའི་རྒྱལ་པོའི་ལ་བ་དམར་པོའི་རྡོ་ལེབ་ལ་བཞུགས་པ་ན་དྲོ་བར་གྱུར་ཏེ། བརྒྱ་བྱིན་གང་ཞིག་བདག་གི་གནས་འདི་འདོར་བའི་སེམས་སུ་ཞིག་ལ་ཡོད་སྙམ་པ་དང། ལྷའི་དབང་པོས་ལྷའི་མིག་གིས་བལྟས་པས་སྐྱེས་བུ་ཆེན་པོ་དེ་མཐོང་ནས། འདི་ལྟར་ཤིན་ཏུ་སྲེད་པའི་བྲམ་ཟེས་སངས་རྒྱས་ལ་སོགས་པ་དགེ་སློང་གི་དགེ་འདུན་མགྲོན་དུ་གཉེར་ཏེ། བཞུགས་པའི་གནས་ཀྱང་བསམས་ཀྱི། བདག་ཀྱང་དེར་ཕྱིན་ནས་བསོད་ནམས་ཀྱི་ཆ་ལེན་པར་རིགས་སོ་སྙམ་ནས་ཤིང་མཁན་གྱི་གཟུགས་སུ་སྤྲུལ་ཏེ། སྟེའུ་
དང་དགྲ་སྟ་བླངས་ཏེ་སྐྱེས་བུ་ཆེན་པོའི་མདུན་དུ་གནས་པར་གྱུར་ནས། གང་སུ་ཞིག་ཁོ་བོ་ལ་གླ་བྱིན་ཏེ་ལས་ཀ་བྱེད་པ་ཡོད་ཅེས་སྨྲས་སོ། །སྐྱེས་བུ་ཆེན་པོས་གཟིགས་ཏེ། གང་ཞིག་ལས་ཀ་བྱེད་ནུས་ཞེས་གསུང་བ་དང། བདག་གིས་མི་ཤེས་པའི་བཟོ་མེད་དོ། །ཁང་པའམ། བསྟི་གནས་སམ། གང་ཞིག་ཅུང་ཟད་བྱེད་པའི་བཟོ་དེ་བདག་གིས་བྱེད་ཀྱང་ཡང་ནུས་སོ་ཞེས་ཟེར་རོ། །བྱང་ཆུབ་སེམས་དཔས་སྨྲས་པ། དེའི་ཕྱིར་ང་ལ་ལས་སུ་བྱ་བ་ཡོད་དོ། །ཁོ་བོས་སང་འཕགས་པ་ལས་བྱེ་བ་ཕྲག་བརྒྱ་པའི་དགེ་སློང་གི་དགེ་འདུན་མགྲོན་དུ་གཉེར་ཏོ། །དེ་རྣམས་བཞུགས་པའི་གནས་བྱེད་པར་ནུས་སམ། སྨྲས་པ་བདག་གིས་བགྱིའོ། །བདག་ལ་གླ་སྟེར་བར་ནུས་སམ། བུ་བདག་གིས་ནུས་སོ། །ལེགས་སོ་ཞེས་བྱ་བ་ལེགས་པར་བྱས་སོ། །ཕྱིན་ནས་ས་ཕྱོགས་གཅིག་བལྟས་ནས་དཔག་ཚད་བཅུ་གཉིས་སམ་བཅུ་གསུམ་པའི་ཚད་ཀྱིས་ཕྱོགས་གཅིག་ཏུ་ཟད་པར་སྔོན་པོའི་དཀྱིལ་འཁོར་བཞིན་དུ་སྟེང་མཉམ་པར་བྱས་སོ། །དེས་འདི་རྣམས་ཀྱི་གནས་ཙམ་དུ་རིན་པོ་ཆེ་སྣ་བདུན་ལས་བྱུང་བའི་བསྟི་གནས་ས་འོག་ནས་ཕྱུང་ནས་བྱའོ་ཞེས་བསམ་ཞིང་བལྟའོ། །དེ་མ་ཐག་པར་ས་གཞི་བརྟོལ་ནས་བསྟི་གནས་གྲུབ་བོ། །དེ་ནི་གསེར་ལས་བྱུང་བའི་ཀ་བ་རྣམས་ལ་དངུལ་ལས་བྱུང་བའི་ཀ་ཞུའི་སྟེང་དུ་གསེར་ལས་བྱུང་བའི་གདུང་ངོ་། །ནོར་བུའི་ཀ་བ་ལ་བྱི་རུའི་རང་བཞིན་ནོ། །བྱི་རུའི་ཀ་བ་ལ་ནོར་བུའི་རང་བཞིན་ནོ། །རིན་པོ་ཆེ་སྣ་བདུན་ལས་བྱུང་བའི་ཀ་བ་ལ་རིན་པོ་ཆེ་སྣ་བདུན་ལས་བྱུང་བའི་ཀ་ཞུ་ཉིད་དོ། །དེ་ནས་བསྟི་གནས་ཀྱི་བར་བར་དུ་གཡེར་ཁའི་དྲ་བ་འཕྱང་བ་ལ་བལྟ་ཞིང་དེ་བལྟས་ཙམ་ཉིད་ན་དྲ་བ་འཕྱང་བ། གང་ལ་རླུང་གིས་བསྐྱོད་པ་དེ་ལ་ཡན་ལག་ལྔ་པའི་རོལ་མོ་སྒྲ་སྙན་སྒྲོགས་ཏེ། ལྷའི་གླུ་དབྱངས་སྒྲོགས་པ་བཞིན་ནོ། །བར་བར་དུ་སྤོས་ཀྱི་ཕྲེང་བ་དང་མེ་ཏོག་གི་ཕྲེང་བ་འཕྱང་བ་ལ་སེམས་ཤིང་ཕྲེང་བ་འཕྱང་བ་ལའོ། །བྱེ་བ་སྟོང་ཕྲག་བརྒྱའི་དགེ་སློང་གི་དགེ་འདུན་གྱི་གྲངས་ཀྱིས་སྟན་དང་རྒྱབ་རྟེན་རྣམས་ས་གཞི་ལ་བརྟེན་ནས་བྱུང་བར་བསམས་སོ། །དེ་མ་ཐག་ཏུ་སའི་སྟེང་དུ་གྲུབ་བོ། །མཚམས་དང་མཚམས་རྣམས་སུ་རེ་རེར་ཆུའི་སྣོད་
ཆེན་པོ་གྲུབ་པ་བསམས་སོ། །ཆུའི་སྣོད་ཆེན་པོ་དེ་རྣམས་གྲུབ་བོ། །དེ་དག་ཐམས་ཅད་སྤྲུལ་ནས་བྲམ་ཟེའི་དྲུང་དུ་སོང་ནས་འཕགས་པ་འདིར་བྱོན་ལ་བསྟི་གནས་གཟིགས་མཛོད། བདག་ལ་གླ་སྦྱིན་པར་རིགས་སོ་ཞེས་ཞུས་ནས་སྐྱེས་བུ་ཆེན་པོ་གཤེགས་ཏེ་བསྟི་གནས་གཟིགས་ནས་དེ་མ་ཐག་ཏུ་བརྒྱ་བྱིན་མི་སྣང་བར་གྱུར་ཏོ། །གཟིགས་པ་ཙམ་ན་ལུས་ཐམས་ཅད་ཁ་དོག་ལྔ་དང་ལྡན་པ་ལ་དགའ་བ་རྒྱུན་མི་འཆད་པར་འཕྲོ་བར་གྱུར་ཏོ། །དེ་ནས་བསྟི་གནས་གཟིགས་ནས་འདི་ལྟར་ཡིད་ལ་བསམས་སོ། །བསྟི་གནས་འདི་མིར་གྱུར་པས་བསྒྲུབས་པ་མ་ཡིན་ནོ། །སླར་ཡང་བདག་གི་ལྷག་པའི་བསམ་པ་དང་བདག་གི་ཡོན་ཏན་རྟོགས་པས་ངེས་པར་བརྒྱ་བྱིན་གྱི་སྟན་དྲོ་བར་གྱུར་ནས་བརྒྱ་བྱིན་ལྷའི་རྒྱལ་པོས་བསྟི་གནས་འདི་བྱས་པར་གྱུར་ཏོ། །དེ་ནས་སླར་ཡང་འདི་ལྟ་བུའི་ཚུལ་གྱི་བསྟི་གནས་སུ་ཉི་མ་གཅིག་ཉིད་ལ་སྦྱིན་པ་གཏོང་བ་ནི་བདག་གི་རིགས་པ་མ་ཡིན་ནོ། །ཉི་མ་བདུན་དུ་བདག་གིས་སྟེར་བར་བསམས་སོ། །ཕྱི་རོལ་གྱི་སྦྱིན་པས་ཇི་ཙམ་གྱིས་ཀྱང་བྱང་ཆུབ་སེམས་དཔའ་རྣམས་དགྱེས་པར་མི་ནུས་སོ། །རྒྱན་གྱིས་བརྒྱན་པའི་མགོ་བོ་བཅད་པ་དང་དྲི་མ་མེད་པའི་མིག་བཏོན་པ་དང་སྙིང་གི་ཤ་བྲེགས་པའམ་བཅད་ནས་བྱིན་པའི་དུས་སུ་བྱང་ཆུབ་སེམས་དཔའ་བཏང་བའི་དགྱེས་པར་འགྱུར་རོ། །བདག་ཅག་བྱང་ཆུབ་སེམས་དཔའ་རྣམས་ཀྱི་ཡང་ཤ་སི་བིའི་སྐྱེས་རབས་ལས་ཉི་མ་རེ་རེར་དོང་ཙེ་ཁལ་ལྔ་ལྔ་རི་བའི་རིན་གྱིས་ཉོས་ནས་སྒོ་བཞི་དང་གྲོང་ཁྱེར་གྱི་དབུས་སུ་སྦྱིན་པ་གཏོང་ངོ་། །དེའི་སྦྱིན་པ་དེ་གཏོང་བས་ཡོངས་སུ་ཚིམ་པ་མེད་དོ། །སླར་ཡང་གང་གི་ཚེ་བརྒྱ་བྱིན་ལྷའི་རྒྱལ་པོ་བྲམ་ཟེའི་གཟུགས་ཀྱིས་འོངས་ནས་མིག་བསླངས་སོ། །དེའི་ཚེ་དེའི་མིག་བཏོན་ནས་སྟེར་བ་ཉིད་ཀྱིས་དགྱེས་པར་འགྱུར་རོ། །སྐྲའི་རྩེ་མོ་ཙམ་ཡང་སེམས་ལ་སྡུག་བསྔལ་བར་མི་འགྱུར་རོ། །དེ་བཞིན་དུ་སྦྱིན་པའི་རྒྱུས་བྱང་ཆུབ་སེམས་དཔའ་ལ་ཚིམ་པ་མེད་དོ། །དེའི་ཕྱིར་སྐྱེས་བུ་ཆེན་པོ་དེ་ཡང་ཞག་བདུན་དུ་བདག་གིས་བྱེ་བ་སྟོང་ཕྲག་བརྒྱའི་གྲངས་ཀྱི་དགེ་སློང་གི་དགེ་འདུན་རྣམས་ལ་སྦྱིན་པ་གཏོང་བར་རིགས་སོ་ཞེས་བསམས་
སོ། །དེའི་བསྟི་གནས་སུ་བཞུགས་ནས་ཞག་བདུན་དུ་དགའ་བ་པཱ་ན་ཞེས་བྱ་བའི་སྦྱིན་པ་བྱིན་ནོ། །དགའ་བ་ཅན་ཞེས་པ་ནི་ཆེས་ཆེ་བའི་སྣོད་ཤིན་ཏུ་ཆེ་བ་འོ་མས་བཀང་ནས་ཚང་བང་ཆེན་པོའི་སྟེང་དུ་བཞག་ནས་མེས་འོ་མ་ཤིན་ཏུ་བསྐ་བར་བསྐོལ་ཏེ་འབྲས་ཅུང་ཟད་བཏབ་ནས་བཙོས་ཏེ་སྦྲང་དང་དཀར་བའི་ཕྱེ་མ་དང་མར་གསར་པ་རྣམས་བཙོས་པའི་བཟའ་བའི་འོ་ཐུག་ནི་དགའ་བ་བཱ་ན་ཞེས་བརྗོད་དོ། །མི་རྣམས་ཀྱིས་འདྲེན་པར་མ་ནུས་ན་ལྷ་རྣམས་ཀྱིས་ཀྱང་བར་བར་དུ་འདྲེན་ནོ། །དཔག་ཚད་བཅུ་གཉིས་སམ་བཅུ་གསུམ་པའི་ཚད་ཀྱི་གནས་སུ་དགེ་སློང་རྣམས་མ་ཤོང་ན། སླར་ཡང་དགེ་སློང་དེ་རྣམས་རང་རང་གི་མཐུས་བཞུགས་སོ། །ཞག་བདུན་གྱི་མཐར་དགེ་སློང་ཐམས་ཅད་ཀྱི་ལྷུང་བཟེད་བཀྲུས་ནས་སྨན་གྱི་ཕྱིར་དུ་མར་གསར་པ་དང་ཞུན་མར་དང་སྦྲང་དང་བུ་རམ་བསྐོལ་བའི་ཆུ་རྣམས་ཀྱིས་ལྷུང་བཟེད་བཀང་ནས་ཆོས་གོས་གསུམ་དང་བཅས་པ་ཕུལ་ལོ། །དགེ་འདུན་གཞོན་ནུ་རྣམས་ཀྱིས་དགེ་སློང་གིས་ཐོབ་པའི་ཆོས་གོས་ཀྱི་རྒྱུའི་རས་འབུམ་ཕྲག་གཅིག་རི་བ་ཐོབ་པར་གྱུར་ཏོ། །སྟོན་པས་རྗེས་སུ་ཡི་རང་བ་མཛད་དོ། །སྐྱེས་བུ་འདིས་འདི་ལྟ་བུའི་ཚུལ་གྱིས་སྦྱིན་པ་ཆེན་པོ་བྱིན་ནོ། །གང་གི་དོན་དུ་འགྱུར་ཞེས་རྟོག་པར་བྱེད་དོ། །མ་འོངས་པའི་བསྐལ་པ་འབུམ་ཕྲག་གཅིག་ལྷག་པའི་གྲངས་མེད་པ་གཉིས་འདས་པ་ན་གཽ་ཏ་མ་ཞེས་བྱ་བའི་སངས་རྒྱས་སུ་འགྱུར་ཞེས་གཟིགས་ཏེ། སྐྱེས་བུ་ཆེན་པོ་བོས་ནས་ཁྱོད་ཀྱི་དུས་འདི་རྣམས་འདས་ནས་གོོ་ཏ་མ་ཞེས་བྱ་བའི་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །སྐྱེས་བུ་ཆེན་པོས་ལུང་བསྟན་པ་ཐོས་ནས་བདག་ནི་སངས་རྒྱས་སུ་འགྱུར་བས། བདག་ཁྱིམ་ན་གནས་པ་ལ་དོན་མེད་ཀྱིས་རབ་ཏུ་འབྱུང་ངོ་སྙམ་དུ་བསམས་སོ། །དེ་དེ་ལྟ་བུའི་ཚུལ་དང་ལྡན་པས་མཆིལ་མ་དོར་བ་བཞིན་དུ་ཁྱིམ་སྤངས་ནས་སྟོན་པའི་དྲུང་དུ་རབ་ཏུ་བྱུང་ཞིང་བྱུང་ནས་སངས་རྒྱས་ཀྱི་གསུང་རབ་བསླབས་ནས་མངོན་པར་ཤེས་པ་དང། སྙོམས་པར་འཇུག་པ་བསྐྱེད་དེ། ཚེའི་མཐར་ཚངས་པའི་འཇིག་རྟེན་དུ་སྐྱེས་སོ། །གཞན་ཡང་བཅོམ་ལྡན་འདས་བཀྲ་ཤིས་བཟང་པོའི་གྲོང་
ཁྱེར་མཆོག་ཅེས་བྱ་བར་གྱུར་ཏོ། །ཡབ་ནི་མཆོག་གི་རྒྱལ་པོའོ། །ཡུམ་ནི་མཆོག་མ་ཞེས་བྱ་བའོ། །ལྟང་བཟང་དང་ཆོས་ཀྱི་སྡེ་གཉིས་ནི་ཉན་ཐོས་ཀྱི་མཆོག་གོ། །བསྐྱང་བ་ཞེས་བྱ་བ་ནི་ཉེ་གནས་སོ། །ཞི་བྱེད་ལེན་དང། མྱ་ངན་མེད་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཤིང་ནི་ཀླུ་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་པའོ། །སྟོང་ཕྲག་དགུ་བཅུའི་ལོ་ནི་སྐུ་ཚེའི་ཚད་དོ། །སྟོང་ཕྲག་དགུ་བཅུ་བཞུགས་ནས་མྱ་ངན་ལས་འདས་སོ། །སངས་རྒྱས་མྱ་ངན་ལས་འདས་ནས་སླར་ཡང་དེ་མ་ཐག་པར་སྟོང་ཕྲག་བཅུའི་ཁོར་ཡུག་གི་ཕྱོགས་ཀུན་མུན་པར་གྱུར་ཏོ། །ཁོར་ཡུག་ཐམས་ཅད་ཀྱི་མི་རྣམས་ཆོ་ངེས་ཆེན་པོ་འདེབས་སོ། །ཀཽཎྜི་ནྱ་འོག་ཏུ་ནི། །འཇིག་རྟེན་འདྲེན་པ་བཀྲ་ཤིས་བཟང། །འཇིག་རྟེན་ནང་གི་མུན་བསལ་ནས། །ཆོས་ཀྱི་སྣང་བའི་འོད་བཀྱེའོ། །དེ་བཞིན་དུ་སྟོང་ཕྲག་བཅུའི་འཇིག་རྟེན་གྱི་ཁམས་མུན་ནག་ཏུ་བྱས་ནས་མྱ་ངན་ལས་འདས་སོ། །བཅོམ་ལྡན་འདས་དེའི་འོག་གི་ཆར་ཡིད་བཟངས་ཞེས་བྱ་བའི་སྟོན་པ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་སྟེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །འདུས་པ་གཉིས་པ་ལ་གསེར་གྱི་རི་ལ་བྱེ་བ་སྟོང་ཕྲག་དགུ་བཅུའོ། །གསུམ་པ་ལ་བྱེ་བ་སྟོང་ཕྲག་བརྒྱད་ཅུའོ། །དེའི་ཚེ་སེམས་དཔའ་ཆེན་པོ་ཀླུའི་རྒྱལ་པོ་མཉམ་མེད་ཅེས་བྱ་བར་གྱུར་ཏོ། །རྫུ་འཕྲུལ་གྱི་མཐུ་དང་ལྡན་ཞིང་དེས་སངས་རྒྱས་བྱོན་པ་ཐོས་ནས་གཉེན་གྱི་གྲོགས་རྣམས་འཁོར་དུ་བྱས་ཏེ། ཀླུའི་གནས་ནས་འཐོན་ཏེ། བྱེ་བ་སྟོང་ཕྲག་བརྒྱའི་དགེ་སློང་གི་འཁོར་དང་བཅས་པའི་བཅོམ་ལྡན་འདས་ལ་ལྷའི་རོལ་མོས་ཉེ་བར་མཆོད་ནས་སྦྱིན་པ་ཆེན་པོ་ཕུལ་ལོ། །སོ་སོ་ལ་ལྷའི་གོས་གཉིས་གཉིས་ཕུལ་བས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །དེ་ཡང་སྟོན་པ་དེས་མ་འོངས་པ་ན་སངས་རྒྱས་སུ་འགྱུར་བར་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་དགེ་བ་ཅན་ཞེས་བྱ་བར་གྱུར་ཏེ། ལེགས་བྱིན་ཞེས་བྱ་བའི་རྒྱལ་པོ་ནི་ཡབ་བོ། །དཔལ་ལྡན་མ་ཞེས་བྱ་བ་ནི་ཡུམ་མོ། །ངེས་འགྲོ་དང་གོམས་བྱེད་ནི་ཉན་ཐོས་ཀྱི་མཆོག་གོ། །འཆར་བྱེད་ནི་ཉེ་གནས་སོ། །ཉན་པ་དང་ཉེ་བར་ཉན་པ་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ངོ་། །སྐུའི་མཐོ་ཚད་དུ་ཁྲུ་དྲུག་ཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །བཀྲ་ཤིས་བཟང་པོའི་འོག་ཏུ་ནི། །འདྲེན་པ་ཐུགས་བཟང་ཞེས་
བྱ་བ། །ཆོས་རྣམས་ཀུན་ལ་མཚུངས་མེད་པ། །སེམས་ཅན་ཀུན་གྱི་མཆོག་ཡིན་ནོ། །དེའི་ཡང་འོག་གི་ཆར་ནམ་གྲུ་ཅན་གྱི་སྟོན་པ་ཞེས་བྱ་བ་བྱོན་ནོ། །དེའི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བགྲང་དུ་མེད་པ་ཞེས་བྱ་བའོ། །གཉིས་པ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །དེ་བཞིན་དུ་གསུམ་པ་ཡང་ངོ་། །དེའི་ཚེ་བྱང་ཆུབ་སེམས་དཔའ་ལྷག་པའི་ལྷ་ཞེས་བྱ་བའི་བྲམ་ཟེར་གྱུར་ཏོ། །སྟོན་པའི་ཆོས་བཤད་པ་ཐོས་ནས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །མགོའི་སྟེང་དུ་ཐལ་མོ་སྦྱར་ནས་སྟོན་པ་ལ་དེའི་ཉོན་མོངས་རྣམས་སྤོང་བའི་བསྔགས་པ་བརྗོད་ནས་བླ་གོས་ཀྱིས་མཆོད་པས་དེ་ཡང་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །སླར་ཡང་དེའི་བཅོམ་ལྡན་འདས་ཀྱི་གྲོང་ཁྱེར་ནི་ནམ་གྲུ་བཟང་ལྡན་ཞེས་བྱ་བར་གྱུར་ཏོ། །ཡབ་ནི་ཤིན་ཏུ་རྒྱས་པ་ཞེས་བྱ་བའི་རྒྱལ་པོའོ། །ཡུམ་ནི་ཤིན་ཏུ་རྒྱས་མ་ཞེས་བྱ་བའོ། །ཆུ་ལྷ་དང་ལྷ་ཚངས་པ་ནི་ཉན་ཐོས་ཀྱི་མཆོག་གོ། །ཡང་དག་འབྱུང་ཞེས་བྱ་བ་ནི་ཉེ་གནས་སོ། །བཟང་མོ་དང་ལེགས་བཟང་མོ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ངོ་། །སྐུ་མཐོ་ཚད་དུ་ཁྲུ་བརྒྱད་ཅུའོ། །སྐུ་ཚེའི་ཚད་ནི་ལོ་སྟོང་ཕྲག་དྲུག་ཅུའོ། །ཐུགས་བཟང་གི་ནི་འོག་ཏུ་ནི། །འདྲེན་པ་ནམ་གྲུ་ཅན་ཞེས་བྱ། །མཚུངས་པ་མེད་ཅིང་དཔེ་མེད་པར། །རྒྱལ་བ་མཉམ་མེད་མཆོག་ཏུ་གྱུར། །དེའི་འོག་གི་ཆར་མཛེས་བྱེད་ཅེས་བྱ་བའི་སྟོན་པ་བྱོན་ནོ། །དེའི་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་མི་ཕམ་པ་ཞེས་བྱ་བའི་བྲམ་ཟེར་གྱུར་ཏོ། །སྟོན་པའི་ཆོས་བསྟན་པ་ཐོས་ནས་སྐྱབས་སུ་འགྲོ་བའི་ཚུལ་ཁྲིམས་ལ་གནས་སོ། །སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་བཏང་ངོ་། །དེས་ཡང་སངས་རྒྱས་སུ་འགྱུར་བར་ལུང་བསྟན་ནོ། །སླར་ཡང་བཅོམ་ལྡན་འདས་དེའི་གྲོང་ཁྱེར་ཆོས་བཟང་ཞེས་བྱ་བར་གྱུར་ཏོ། །ཡབ་ནི་ཆོས་བཟང་རྒྱལ་པོའོ། །ཡུམ་ནི་ཆོས་བཟང་མ་ཞེས་བྱ་བའོ། །མཚུངས་མེད་དང་ལེགས་སྤྱན་ནི་ཉན་ཐོས་ཀྱི་མཆོག་གོ། །ཡིད་ལྡན་ནི་ཉེ་གནས་སོ། །རིག་མ་དང་ལེགས་སྐྱེས་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀླུ་ཤིང་ཉིད་དོ། །སྐུ་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །ནམ་གྲུ་ཅན་གྱི་འོག་ཏུ་ནི། །འདྲེན་པ་མཛེས་བྱེད་ཅེས་བྱ་བ། །མཉམ་
པར་བཞག་ཅིང་ཐུགས་ནི་ཞི། །གང་ཟག་ཟླ་མེད་མཚུངས་མེད་དོ། །དེའི་འོག་གི་ཆར་བསྐལ་པ་གྲངས་མེད་པ་གཅིག་འདས་ནས་བསྐལ་པ་གཅིག་གི་ནང་དུ་སངས་རྒྱས་གསུམ་བྱོན་ནོ། །ཐུགས་ལྡན་མཐོང་བ་དང། པད་མ་དང་མི་སྦྱིན་ནོ། །བཅོམ་ལྡན་འདས་ཐུགས་ལྡན་མཐོང་གི་འདུས་པ་གསུམ་དུ་གྱུར་ཏེ། དང་པོ་ལ་དགེ་སློང་འབུམ་ཕྲག་གཅིག་གོ། །གཉིས་པ་ལ་འབུམ་ཕྲག་བདུན་ནོ། །གསུམ་པ་ལ་འབུམ་ཕྲག་དྲུག་གོ། །དེ་ནས་བྱང་ཆུབ་སེམས་དཔའ་གནོད་སྦྱིན་གཅིག་ཏུ་གྱུར་ཏོ། །རྫུ་འཕྲུལ་དང་མཐུ་ཆེན་པོ་དང་ལྡན་པའི་བྱེ་བ་སྟོང་ཕྲག་བརྒྱ་དུ་མའི་གནོད་སྦྱིན་རྣམས་ཀྱི་བདག་པོར་གྱུར་ཏོ། །དེས་བཅོམ་ལྡན་འདས་བྱོན་པ་ཐོས་ནས་འོངས་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་བཏང་ངོ་། །སྟོན་པས་ཀྱང་མ་འོངས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །གཞན་ཡང་བཅོམ་ལྡན་འདས་ཐུགས་ལྡན་མཐོང་གི་གྲོང་ཁྱེར་ནི་ལ་བ་ཅན་ཞེས་བྱ་བར་འགྱུར་རོ། །ཡབ་ནི་གྲགས་ལྡན་རྒྱལ་པོའོ། །ཡུམ་ནི་གྲགས་འཛིན་མའོ། །ངེས་བཟང་དང་ཡིད་ལྡན་ནི་ཉན་ཐོས་ཀྱི་མཆོག་གོ། །ཆུ་ལྷ་ནི་ཉེ་གནས་སོ། །ལེགས་མཛེས་དང་ཡིད་བཟང་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྲིད་སྒྲུབ་ཀྱི་ཤིང་ངོ་། །སྐུའི་མཐོ་ཚད་ཁྲུ་ལྔ་བཅུ་རྩ་བརྒྱད་དོ། །འབུམ་ཕྲག་གཅིག་གི་ལོ་ནི་སྐུ་ཚེའི་ཚད་དོ། །མཛེས་བྱེད་ཀྱི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །ཐུགས་བཟང་མཐོང་དང་འཆི་མེད་གྲགས། །གཟི་བརྗིད་ལྡན་ཞིང་རིང་མཐོང་ངོ་། །དེའི་འོག་གི་ཆར་པད་མ་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་འབུམ་ཕྲག་གསུམ་མོ། །གསུམ་པ་ལ་གྲོང་མེད་པའི་དགོན་པར་གནས་ཚལ་ཆེན་པོ་ན་དགེ་སློང་འབུམ་ཕྲག་གཉིས་གནས་སོ། །དེའི་ཚེ་དེ་བཞིན་གཤེགས་པ་ཡང་དེའི་ནགས་ཚལ་ཆེན་པོར་བཞུགས་པའི་ཚེ་བྱང་ཆུབ་སེམས་དཔའ་སེང་གེར་སྐྱེས་པར་གྱུར་ཏོ། །སྟོན་པས་འགོག་པ་ལ་སྙོམས་པར་ཞུགས་སོ། །ཞུགས་པར་མཐོང་ནས་སེམས་རབ་ཏུ་དང་བས་ཕྱག་བྱས་ནས་བསྐོར་བ་བྱས་ཏེ། དགའ་བ་དང་ཡིད་བདེ་བ་སྐྱེས་སོ། །ལན་གསུམ་དུ་སེང་གེའི་སྒྲ་སྒྲོགས་སོ། །ཞག་བདུན་དུ་སངས་རྒྱས་ཀྱི་ཕྱིར་དུ་དགའ་བ་མ་སྤངས་པས་དགའ་བ་དང་བདེ་བ་ཉིད་ཀྱི་སྤྱོད་ཡུལ་དུ་མ་ཕྱིན་པར་སྲོག་ཡོངས་སུ་བཏང་ངོ་སྙམ་སྟེ་
བལྟ་ཞིང་འདུག་གོ། །སྟོན་པ་ཞག་བདུན་ནས་འགོག་པའི་སྙོམས་པར་འཇུག་པ་ལས་ལངས་ནས། སེང་གེ་ལ་བལྟ་ཞིང་དགེ་སློང་གི་དགེ་འདུན་རྣམས་ཀྱིས་ཀྱང་སེམས་དང་བར་བྱས་ནས་དགེ་འདུན་ལ་ཕྱག་བྱེད་དོ་ཞེས་བརྗོད་ཅིང་དགེ་སློང་གི་དགེ་འདུན་ཤོག་ཅེས་བསམས་ཏེ་དགེ་སློང་རྣམས་དེ་མ་ཐག་ཏུ་བྱོན་ནོ། །སེང་གེས་དགེ་འདུན་ལ་སེམས་རབ་ཏུ་དང་བར་བྱེད་དོ། །སྟོན་པས་དེའི་སེམས་ལ་བརྟགས་ཏེ་མ་འོངས་པ་ན་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །སླར་ཡང་བཅོམ་ལྡན་འདས་པད་མའི་གྲོང་ནི་ཙམ་པ་ཀ་ཞེས་བྱ་བར་འགྱུར་རོ། །ཡབ་ནི་པད་མའི་རྒྱལ་པོའོ། །ཡུམ་ནི་མཚུངས་མེད་མ་ཞེས་བྱའོ། །སཱ་ལ་དང་ཨུ་པ་སཱ་ལ་ནི་ཉན་ཐོས་ཀྱི་མཆོག་གོ། །ཆུ་ལྷ་ཞེས་བྱ་བ་ནི་ཉེ་གནས་སོ། །དགའ་མ་དང་ཤིན་ཏུ་དགའ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྲོ་ནའི་ཤིང་ངོ་། །སྐུའི་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་གཅིག་གོ། །ཐུགས་ལྡན་མཐོང་གི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་པད་མ་ཞེས་བྱ་བ། །གང་ཟག་ཟླ་མེད་མཚུངས་མེད་དོ། །དེའི་འོག་ཏུ་མི་སྦྱིན་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་འབུམ་ཕྲག་དགུ་བཅུའོ། །གསུམ་པ་ལ་བྱེ་བ་བརྒྱད་ཅུ་དང་འབུམ་ཕྲག་གཅིག་གོ། །དེའི་ཚེ་བྱང་ཆུབ་སེམས་དཔའ་དྲང་སྲོང་གིས་རབ་ཏུ་བྱུང་སྟེ་མངོན་པར་ཤེས་པ་ལྔ་དང་སྙོམས་པར་འཇུག་པ་བརྒྱད་པོ་དབང་དུ་གྱུར་ཏེ་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་བཏང་ནས། ཙན་དན་དམར་པོས་མཆོད་ནས་དེ་ཡང་དེས་མ་འོངས་པ་ན་སངས་རྒྱས་པར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་འབྱོར་ལྡན་ཞེས་བྱ་བར་འགྱུར་རོ། །ཡབ་ནི་བློ་གྲོས་བཟང་པོ་ཞེས་བྱ་བའི་རྒྱལ་པོའོ། །ཡུམ་ནི་ཡིད་ལྡན་མ་ཞེས་བྱ་བའོ། །སཱ་ལ་བཟང་པོ་དང་རྒྱལ་བྱེད་བཤེས་གཉེན་ནི་ཉན་ཐོས་ཀྱི་མཆོག་གོ། །གནས་མཆོག་ནི་ཉེ་གནས་སོ། །མཆོག་མ་དང་འབྲས་བུ་ཅན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྲོ་ན་ཆེན་པོའོ། །སྐུའི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་པའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །པད་མ་ཡི་ནི་
འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་མི་སྦྱིན་ཞེས་བྱ་བ། །གང་ཟག་ཟླ་མེད་མཚུངས་མེད་དོ། །སངས་རྒྱས་མི་སྦྱིན་གྱི་འོག་གི་ཆར་འདི་ནས་བསྐལ་པ་འབུམ་ཕྲག་གཅིག་གི་མགོ་ནས་བརྩམས་ཏེ་བསྐལ་པ་གཅིག་ཉིད་ཀྱི་ནང་དུ་སངས་རྒྱས་པད་མ་མཆོག་ཅེས་བྱ་བ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བེེ་བྷཱ་རའི་རི་ལ་བྱེ་བ་སྟོང་ཕྲག་དགུ་བཅུའོ། །གསུམ་པ་ལ་བྱེ་བ་སྟོང་ཕྲག་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་རལ་པ་ཅན་ཞེས་བྱ་བའི་ཡུལ་འཁོར་ཆེན་པོར་སྐྱེས་སོ། །སངས་རྒྱས་ལ་སོགས་པའི་དགེ་འདུན་རྣམས་ལ་ཆོས་གོས་དང་བཅས་པའི་སྦྱིན་པ་ཆེན་པོ་བཏང་ངོ་། །དེ་ཡང་དེས་མ་འོངས་པ་ན་སངས་རྒྱས་པར་འགྱུར་རོ་ཞེས་ལུང་བསྟན་ནོ། །གཞན་ཡང་བཅོམ་ལྡན་འདས་པད་མ་མཆོག་གི་དུས་སུ་མུ་སྟེགས་ཞེས་བྱ་བའི་མིང་ཡང་མེད་དོ། །ལྷ་དང་མི་ཐམས་ཅད་སངས་རྒྱས་ལ་སྐྱབས་སུ་འགྲོ་བའོ། །དེའི་གྲོང་ཁྱེར་ནི་དང་བ་ལྡན་ཞེས་བྱ་བར་འགྱུར་རོ། །ཡབ་ནི་ཀུན་དགའ་བོ་ཞེས་བྱ་བའི་རྒྱལ་པོའོ། །ཡུམ་ནི་ལེགས་མ་ཞེས་བྱ་བའོ། །ལྷའི་སྤྱན་དང་ལེགས་སྐྱེས་ནི་ཉན་ཐོས་ཀྱི་མཆོག་གོ། །ཡིད་བཟང་ཞེས་བྱ་བ་ནི་ཉེ་གནས་སོ། །གྲོགས་མེད་མ་དང་མཚུངས་མེད་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཤཱ་ལའི་ཤིང་ཉིད་དོ། །སྐུའི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་དོ། །སྐུའི་འོད་ཀུན་ནས་འཁོར་བ་ལ་དཔག་ཚད་བཅུ་གཉིས་སོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །མི་སྦྱིན་གྱི་ནི་འོག་ཉིད་དུ། །རྐང་གཉིས་མཆོག་གི་རྫོགས་སངས་རྒྱས། །རྒྱལ་བ་པད་མ་མཆོག་ཞེས་པ། །མི་འཁྲུགས་རྒྱ་མཚོ་ལྟ་བུའོ། །དེའི་འོག་གི་ཆར་བསྐལ་པ་སྟོང་ཕྲག་གསུམ་འདས་ནས། བློ་གྲོས་བཟང་པོ་དང་ལེགས་སྐྱེས་ཞེས་བྱ་བ་ནི་བསྐལ་པ་གཅིག་གི་ནང་དུ་སངས་རྒྱས་གཉིས་སུ་གྱུར་ཏོ། །བློ་གྲོས་བཟང་པོའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་གྲོང་ཁྱེར་བལྟ་ན་སྡུག་ཅེས་བྱ་བ་ན་བྱེ་བ་བརྒྱའི་ཟག་པ་ཟད་པའོ། །འདུས་པ་གཉིས་པ་ལ་ཡང་བྱེ་བ་དགུ་བཅུར་འགྱུར་རོ། །འདུས་པ་གསུམ་པ་ལ་ནི་བྱེ་བ་བརྒྱད་ཅུའོ། །དེའི་ཚེ་
བྱང་ཆུབ་སེམས་དཔའ་ལུས་མཆོག་ཅེས་བྱ་བ་བྲམ་ཟེའི་ཁྱེའུར་གྱུར་ཏོ། །སའི་འོག་ཏུ་གཏེར་དུ་བཅུག་པ་ཉིད་བྱེ་བ་བརྒྱད་ཅུའི་ནོར་རྣམས་སྤེལ་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་ལ་སྦྱིན་པ་ཆེན་པོ་ཕུལ་ཏེ་ཆོས་མཉན་ནས་སྐྱབས་སུ་འགྲོ་བའི་སྡོམ་པ་ལ་གནས་སོ། །རབ་ཏུ་བྱུང་ནས་ནགས་ཚལ་དུ་བྱོན་ནོ། །དེ་ཡང་མ་འོངས་པ་ན་སངས་རྒྱ་བར་ལུང་བསྟན་ནོ། །བཅོམ་ལྡན་འདས་བློ་གྲོས་བཟང་པོའི་གྲོང་ཁྱེར་ནི་བལྟ་ན་སྡུག་ཅེས་བྱ་བར་གྱུར་ཏོ། །ཡབ་ནི་ལེགས་སྦྱིན་ཞེས་བྱ་བའི་རྒྱལ་པོའོ། །ཡུམ་ནི་ལེགས་སྦྱིན་མ་ཞེས་བྱ་བའོ། །ངེས་འབྱུང་དང་ཐམས་ཅད་འདོད་ནི་ཉན་ཐོས་ཀྱི་མཆོག་གོ། །རྒྱ་མཚོ་ཞེས་བྱ་བ་ནི་ཉེ་གནས་སོ། །དགའ་མ་དང་ཤིན་ཏུ་དགའ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཤིང་ནཱི་པ་ཆེན་པོའོ། །སྐུ་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །པད་མ་མཆོག་གི་འོག་ཏུ་ནི། །འདྲེན་པ་བློ་བཟང་ཞེས་བྱ་བ། །འོད་ཟེར་དྲག་ཅིང་རིང་ལ་སེམས། །ཐུབ་པ་འཇིག་རྟེན་ཀུན་གྱི་མཆོག །དེའི་འོག་གི་ཆར་ལེགས་སྐྱེས་ཞེས་བྱ་བའི་སྟོན་པ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་དགེ་སློང་སྟོང་ཕྲག་དྲུག་ཅུའོ། །གཉིས་པ་ལ་སྟོང་ཕྲག་ལྔ་བཅུའོ། །གསུམ་པ་ལ་སྟོང་ཕྲག་བཞི་བཅུའོ། །དེའི་ཚེ་བྱང་ཆུབ་སེམས་དཔའ་འཁོར་ལོས་སྒྱུར་བའི་རྒྱལ་པོར་གྱུར་ཏེ། སངས་རྒྱས་བྱོན་ཞེས་ཐོས་ནས་ཉེ་བར་སོང་སྟེ། ཆོས་ཐོས་ནས་སངས་རྒྱས་ལ་སོགས་པའི་དགེ་འདུན་ལ་རིན་པོ་ཆེ་སྣ་བདུན་དང་བཅས་པའི་གླིང་ཆེན་པོ་བཞིའི་རྒྱལ་སྲིད་སྦྱིན་པར་བཏང་ནས། སྟོན་པའི་དྲུང་དུ་རབ་ཏུ་བྱུང་ངོ་། །ཡུལ་ཐམས་ཅད་ན་གནས་པའི་ཡུལ་དུ་སྐྱེས་པའི་ནོར་བླངས་ནས་གཙུག་ལག་ཁང་རྣམས་རྫོགས་པར་བྱ་སྟེ། སངས་རྒྱས་ལ་སོགས་པའི་དགེ་སློང་རྣམས་ལ་སྦྱིན་པ་ཆེན་པོ་ཕུལ་ལོ། །དེ་ཡང་མ་འོངས་པ་ན་སྟོན་པས་སངས་རྒྱས་པར་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བཀྲ་ཤིས་བཟང་པོ་ཞེས་བྱ་བར་གྱུར་ཏོ། །ཡབ་ནི་དྲག་པོ་ཞེས་བྱ་བའི་རྒྱལ་པོའོ། །ཡུམ་ནི་འོད་ལྡན་མ་ཞེས་བྱ་བའོ། །བལྟ་ན་སྡུག་དང་ལྷ་གཉིས་ནི་ཉན་ཐོས་ཀྱི་མཆོག་གོ། །མི་སྦྱིན་ནི་ཉེ་གནས་སོ། །གླུ་མ་དང་གླུ་མའི་ཕྲེང་བ་
དང་བཅས་པ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་འོད་མ་ཆེན་པོའོ། །དེའི་ནང་བུག་པ་ཕྲ་མོ་ཅན་ནོ། །སྡོང་པོ་ནི་སྡུག་པོའོ། །སྟེང་ན་ཡལ་ག་རྨ་བྱའི་གདུགས་ལྟར་མཛེས་པའི་འདབ་མ་ཅན་ནོ། །བཅོམ་ལྡན་འདས་དེའི་སྐུའི་མཐོ་ཚད་དུ་ཁྲུ་ལྔ་བཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །སྙིང་པོའི་བསྐལ་པ་དེ་ཉིད་ལ། །འདྲེན་པ་ལེགས་སྐྱེས་ཞེས་བྱ་བ། །ཁྱུ་མཆོག་དཔུང་པ་སེང་གེའི་འགྲམ། །རིང་ལ་སེམས་ཞིང་གཞལ་དུ་མེད། །དེའི་འོག་གི་ཆར་འདི་ནས་བསྐལ་པ་བརྒྱ་དང་བཅྭ་བརྒྱད་ཀྱི་མགོ་ནས་བརྩམས་ནས་བསྐལ་པ་གཅིག་ལ་དགའ་མཐོང་དང། དོན་མཐོང་དང། ཆོས་མཐོང་སྟེ་སངས་རྒྱས་གསུམ་བྱོན་ནོ། །དགའ་མཐོང་གི་ཡང་ཉན་ཐོས་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་སྟོང་ཕྲག་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་འོད་སྲུང་ཞེས་བྱ་བའི་བྲམ་ཟེའི་ཁྱེའུར་གྱུར་ཏོ། །རིག་བྱེད་གསུམ་གྱི་ཕ་རོལ་ཏུ་ཕྱིན་ནས་སྟོན་པའི་ཆོས་བསྟན་པ་ཐོས་ཏེ་བྱེ་བ་སྟོང་ཕྲག་བརྒྱའི་ནོར་ཡོངས་སུ་བཏང་ནས་དགེ་འདུན་གྱི་གཙུག་ལག་ཁང་བྱེད་ཅིང་སྐྱབས་སུ་སོང་ནས་ཚུལ་ཁྲིམས་ལ་གནས་སོ། །དེ་ནས་སྟོན་པས་བསྐལ་པ་བརྒྱ་དང་བཅྭ་བརྒྱད་འདས་ནས་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་ཡིད་ལྡན་ཞེས་བྱ་བར་གྱུར་ཏོ། །ཡབ་ནི་ལེགས་སྦྱིན་ཞེས་བྱ་བའི་རྒྱལ་པོའོ། །ཡུམ་ནི་ཟླ་བ་མ་ཞེས་བྱ་བའོ། །བསྐྱངས་པ་དང་ཀུན་མཐོང་གཉིས་ནི་ཉན་ཐོས་ཀྱི་མཆོག་གོ། །མཛེས་བྱེད་ནི་ཉེ་གནས་སོ། །ལེགས་སྐྱེས་མ་དང་ཆོས་སྦྱིན་མ་གཉིས་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པྲི་ཡཾ་ཀུའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་ཅུའོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །ལེགས་སྐྱེས་ཀྱི་ནི་འོག་ཏུ་ནི། །རང་བྱུང་འཇིག་རྟེན་འདྲེན་པ་ཉིད། །མཚུངས་དང་མི་མཚུངས་རིང་དུ་སེམས། །དགའ་མཐོང་གྲགས་པ་ཆེན་པོའོ། །དེའི་འོག་གི་ཆར་བཅོམ་ལྡན་འདས་དོན་མཐོང་ཞེས་བྱ་བ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་དགུ་བཅུ་རྩ་བརྒྱད་ཀྱི་དགེ་སློང་ངོ་། །གཉིས་པ་ལ་འབུམ་ཕྲག་བརྒྱད་ཅུ་རྩ་
བརྒྱད་དོ། །དེ་བཞིན་དུ་གསུམ་པ་ལ་ཡང་ངོ་། །དེའི་ཚེ་བྱང་ཆུབ་སེམས་དཔའ་མཚམས་བཟང་ཞེས་བྱ་བ་རྫུ་འཕྲུལ་དང་ལྡན་པའི་དཀའ་ཐུབ་པར་གྱུར་ཏོ། །ལྷའི་འཇིག་རྟེན་གྱི་མན་དཱ་ར་བའི་མེ་ཏོག་གི་གདུགས་བླངས་ནས་སྟོན་པ་ལ་མཆོད་དོ། །དེ་ཡང་དེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་མཛེས་བྱེད་ཅེས་བྱ་བར་གྱུར་ཏོ། །ཡབ་ནི་རྒྱ་མཚོ་ཞེས་བྱ་བའི་རྒྱལ་པོའོ། །ཡུམ་ནི་བལྟ་ན་སྡུག་མའོ། །ཞི་བ་དང་ཉེ་བར་ཞི་བ་ནི་ཉན་ཐོས་ཀྱི་མཆོག་གོ། །འཇིགས་མེད་ནི་ཉེ་གནས་སོ། །ཆོས་མ་དང་ཆོས་བཟང་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཙམ་པ་ཀའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་ཅུ་རྩ་བརྒྱད་དོ། །སྐུའི་འོད་ཀུན་ནས་འཁོར་བ་ལ་དུས་ཐམས་ཅད་དུ་དཔག་ཚད་གཅིག་གི་བར་དུ་ཁྱབ་ཅིང་གནས་སོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །སྙིང་པོའི་བསྐལ་པ་དེ་ཉིད་ལ། །དོན་མཐོང་མི་ཡི་ཁྱུ་མཆོག་ནི། །མུན་པ་ཆེན་པོ་བསལ་ནས་ནི། །ཡང་དག་བྱང་ཆུབ་མཆོག་ཐོབ་བོ། །དེའི་འོག་གི་ཆར་ཆོས་མཐོང་ཞེས་བྱ་བའི་སྟོན་པ་བྱོན་ནོ། །དེའི་ཡང་ཉན་ཐོས་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་བདུན་ཅུའོ། །གསུམ་པ་ལ་བྱེ་བ་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་ལྷའི་རྒྱལ་པོ་བརྒྱ་བྱིན་དུ་གྱུར་ཏོ། །ལྷའི་དྲི་བཟང་དང་མེ་ཏོག་དང་ལྷའི་རོལ་མོ་རྣམས་ཀྱིས་མཆོད་དེ། དེ་ཡང་མ་འོངས་པ་ན་སངས་རྒྱ་བར་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་སྐྱབས་ཞེས་བྱ་བར་གྱུར་ཏོ། །ཡབ་ནི་སྐྱབས་ཀྱི་རྒྱལ་པོ་ཞེས་བྱའོ། །ཡུམ་ནི་ཤིན་ཏུ་དགའ་མ་ཞེས་བྱ་བའོ། །པད་མ་དང་ལྷར་གྱུར་པ་ནི་ཉན་ཐོས་ཀྱི་མཆོག་གོ། །ལེགས་སྤྱན་ཞེས་བྱ་བ་ནི་ཉེ་གནས་སོ། །དགེ་མ་དང་བདེན་མ་ཞེས་བྱ་བ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པིམ་པ་ཛཱ་ལའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་ཅུའོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །སྙིང་པོའི་བསྐལ་པ་དེ་ཉིད་ལ། །ཆོས་མཐོང་གྲགས་པ་ཆེན་པོ་ཡིས། །མུན་པ་ཆེན་པོ་བཅོམ་ནས་ནི། །ལྷ་དང་བཅས་པ་སྣང་བར་མཛད། །དེའི་འོག་གི་ཆར་འདི་ནས་བསྐལ་པ་དགུ་བཅུ་རྩ་བཞི་ནས་མགོ་
བརྩམས་ནས་བསྐལ་པ་གཅིག་ལ་དོན་གྲུབ་ཞེས་བྱ་བའི་སངས་རྒྱས་གཅིག་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་བྱེ་བ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་གཟི་བརྗིད་དྲག་པོ་དང། མངོན་པར་ཤེས་པའི་སྟོབས་དང་ལྡན་པའི་དཀའ་ཐུབ་པ་བཀྲ་ཤིས་བཟང་པོ་ཞེས་བྱ་བར་གྱུར་ཏོ། །ཤིང་འཛམ་བུ་ཆེན་པོའི་འབྲས་བུ་བླངས་ནས་དེ་བཞིན་གཤེགས་པ་ལ་ཕུལ་ལོ། །སྟོན་པས་འབྲས་བུ་དེ་གསོལ་ནས་བསྐལ་པ་དགུ་བཅུ་རྩ་བཞིའི་འོག་ཏུ་བྱང་ཆུབ་སེམས་དཔའ་མ་འོངས་པ་ན་སངས་རྒྱས་སུ་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བེེ་བྷཱ་ར་ཞེས་བྱ་བར་གྱུར་ཏོ། །ཡབ་ནི་རྒྱལ་བའི་སྡེ་ཞེས་བྱ་བའི་རྒྱལ་པོའོ། །ཡུམ་ནི་ལེགས་གྱུར་མ་ཞེས་བྱ་བའོ། །མང་དུ་འབྱུང་དང་བཤེས་གཉེན་བཟང་པོ་ནི་ཉན་ཐོས་ཀྱི་མཆོག་གོ། །ནམ་གྲུ་ཅན་ནི་ཉེ་གནས་སོ། །ཞི་བྱེད་ལེན་མ་དང་ལེགས་བརྟན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཀརྣི་ཀའི་ཤིང་ངོ་། །སྐུའི་མཐོ་ཚད་ནི་ཁྲུ་དྲུག་ཅུའོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །ཆོས་མཐོང་གི་ནི་འོག་ཉིད་དུ། །འཇིག་རྟེན་འདྲེན་པ་དོན་གྲུབ་ཀྱི། །མུན་པ་ཐམས་ཅད་བཅོམ་ནས་ནི། །ནམ་མཁར་ཉི་མ་ཤར་བ་བཞིན། །དེའི་འོག་གི་ཆར་འདི་ནས་བསྐལ་པ་འབུམ་ཕྲག་དགུ་བཅུ་རྩ་གཉིས་ནས་མགོ་བརྩམས་ནས་བསྐལ་པ་གཅིག་ལ་དཀར་རྒྱལ་དང་གྱུར་པ་ཞེས་བྱ་བའི་སངས་རྒྱས་གཉིས་བྱོན་ནོ། །བཅོམ་ལྡན་འདས་དཀར་རྒྱལ་དེའི་ཡང་འདུས་པ་གསུམ་དུ་འགྱུར་ཏེ།འདུས་པ་དང་པོ་ལ་བྱེ་བ་བརྒྱའི་དགེ་སློང་ངོ་། །གཉིས་པ་ལ་བྱེ་བ་དགུ་བཅུའོ། །གསུམ་པ་ལ་བྱེ་བ་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་ལོངས་སྤྱོད་ཆེན་པོ་དང་གྲགས་པ་ཆེན་པོ་དང་ལྡན་པའི་ལེགས་སྐྱེས་ཞེས་བྱ་བའི་རྒྱལ་རིགས་སུ་གྱུར་པ་དཀའ་ཐུབ་པའི་རབ་ཏུ་བྱུང་བ་ལ་རབ་ཏུ་བྱུང་ནས་རྫུ་འཕྲུལ་དང་ལྡན་པར་གྱུར་ཏེ་སངས་རྒྱས་བྱོན་པ་ཐོས་ནས་ལྷའི་མེ་ཏོག་མན་དཱ་ར་བ་དང་པད་མ་དང་པཱ་རི་ཙྪཏྟྲའི་མེ་ཏོག་རྣམས་བླངས་ནས་འཁོར་བཞིའི་ནང་དུ་གཤེགས་པའི་དེ་བཞིན་གཤེགས་པ་ལ་མཆོད་ནས། ནམ་མཁའ་མེ་ཏོག་གི་བླ་རེས་བྲེས་སོ། །སངས་རྒྱས་དེས་ཡང་འདི་ནས་བསྐལ་པ་དགུ་བཅུ་རྩ་གཉིས་ནས་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་དགེ་མ་ཞེས་བྱ་བའོ། །ཡབ་ནི་སྐྱེ་བོ་དད་པ་ཅན་
ཞེས་བྱ་བའི་རྒྱལ་པོའི་རིགས་སོ། །ཡུམ་ནི་པད་མ་ཞེས་བྱ་བའོ། །ཚངས་པའི་ལྷ་དང་འཆར་བྱེད་ནི་ཉན་ཐོས་ཀྱི་མཆོག་གོ། །ཡང་དག་མཆོག་ནི་ཉེ་གནས་སོ། །མྱུར་མ་དང་ལེགས་སྦྱིན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཨ་ས་ནའི་ཤིང་ངོ་། །སྐུའི་མཐོ་ཚད་ལ་ཁྲུ་དྲུག་ཅུའོ། །སྐུ་ཚེའི་ཚད་ནི་ལོ་འབུམ་ཕྲག་གཅིག་གོ། །དོན་གྲུབ་ཀྱི་ནི་འོག་ཉིད་དུ། །གང་ཟག་ཟླ་མེད་མཚུངས་མེད་པ། །ཚུལ་ཁྲིམས་དཔག་མེད་མཐའ་ཡས་གྲགས། །འཇིག་རྟེན་འདྲེན་པ་དཀར་རྒྱལ་མཆོག །དེའི་འོག་གི་ཆར་གྱུར་པ་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་དྲུག་ཅུའི་དགེ་སློང་ངོ་། །གཉིས་པ་ལ་འབུམ་ཕྲག་ལྔ་བཅུའོ། །གསུམ་པ་ལ་འབུམ་ཕྲག་སུམ་ཅུ་རྩ་གཉིས་སོ། །དེའི་ཚེ་བྱང་ཆུབ་སེམས་དཔའ་རྣམ་པར་རྒྱལ་བྱེད་ཞེས་བྱ་བའི་རྒྱལ་རིགས་སུ་གྱུར་ཏེ། རྒྱལ་པོ་ཆེན་པོའི་རྒྱལ་རིགས་སྤངས་ནས་ནི་སྟོན་པའི་དྲུང་དུ་རབ་ཏུ་བྱུང་སྟེ་སྡེ་སྣོད་གསུམ་བསླབས་ནས་སྐྱེ་བོ་མང་པོ་ལ་དམ་པའི་ཆོས་སྟོན་ཅིང་འཆད་པ་དང་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པར་བྱས་ནས་དེ་ཡང་དེ་བཞིན་དུ་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །བཅོམ་ལྡན་འདས་དེའི་གྲོང་ཁྱེར་ནི་གསལ་ལྡན་ཞེས་བྱ་བར་གྱུར་ཏོ། །ཡབ་ནི་རྒྱལ་བའི་སྡེ་ཞེས་བྱ་བའི་རྒྱལ་པོའོ། །ཡུམ་ནི་དཔལ་ལྡན་མ་ཞེས་བྱའོ། །ལེགས་བསྲངས་དང་ཆོས་ཀྱི་སྡེ་ནི་ཉན་ཐོས་ཀྱི་མཆོག་གོ། །འཇིགས་བཅས་ནི་ཉེ་གནས་སོ། །ཕྲེང་བ་མ་དང་ཉེ་བའི་ཕྲེང་བ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སྐྱུ་རུ་རའི་ཤིང་ངོ་། །སྐུའི་མཐོ་ཚད་དུ་ཁྲུ་ལྔ་བཅུ་རྩ་བརྒྱད་དོ། །སྐུ་ཚེའི་ཚད་ནི་ལོ་སྟོང་ཕྲག་དགུ་བཅུའོ། །སྙིང་པོའི་བསྐལ་པ་དེ་ཉིད་ལ། །སྟོན་པ་བླ་ན་མེད་པར་གྱུར། །མཚུངས་དང་མི་མཚུངས་དཔེ་མེད་པ། །འཇིག་རྟེན་མཆོག་གི་འདྲེན་པར་གྱུར། །དེའི་འོག་གི་ཆར་འདི་ནས་བསྐལ་པ་དགུ་བཅུ་རྩ་གཅིག་ལ་བཅོམ་ལྡན་འདས་རྣམ་པར་གཟིགས་ཞེས་བྱ་བ་བྱོན་ནོ། །དེའི་ཡང་འདུས་པ་གསུམ་དུ་གྱུར་ཏེ། འདུས་པ་དང་པོ་ལ་དགེ་སློང་འབུམ་ཕྲག་དགུ་བཅུ་རྩ་བརྒྱད་དོ། །གཉིས་པ་ལ་འབུམ་ཕྲག་གཅིག་གོ། །གསུམ་པ་ལ་སྟོང་ཕྲག་བརྒྱད་ཅུའོ། །དེའི་ཚེ་བྱང་ཆུབ་སེམས་དཔའ་རྫུ་འཕྲུལ་ལྡན་ཞིང་མཐུ་ཆེ་བས་མཚུངས་པ་མེད་པའི་ཀླུའི་རྒྱལ་པོར་གྱུར་ཏེ། རིན་པོ་ཆེ་སྣ་བདུན་གྱིས་བརྒྱན་པའི་གསེར་གྱི་བ་དན་ཆེན་པོ་བཅོམ་ལྡན་འདས་ལ་ཕུལ་ལོ། །དེས་ཡང་འདི་ནས་བསྐལ་པ་དགུ་
བཅུ་རྩ་གཅིག་ནས་སངས་རྒྱ་བར་འགྱུར་རོ་ཞེས་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་བློ་གྲོས་གཉེན་ཞེས་བྱ་བར་གྱུར་ཏོ། །ཡབ་ནི་གཉེན་གྱི་རྒྱལ་པོ་ཞེས་བྱ་བའོ། །ཡུམ་ནི་བློ་གྲོས་གཉེན་མ་ཞེས་བྱ་བའོ། །ཕུང་པོ་དང་དཀར་རྒྱལ་ནི་ཉན་ཐོས་ཀྱི་མཆོག་གོ། །མྱ་ངན་མེད་ནི་ཉེ་གནས་སོ། །ཟླ་བ་མ་དང་ཟླ་བའི་བཤེས་གཉེན་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པཱ་ཊི་ལིའི་ཤིང་ངོ་། །སྐུའི་མཐོ་ཚད་དུ་ཁྲུ་བརྒྱད་ཅུའོ། །སྐུའི་འོད་ལ་རྟག་ཏུ་དཔག་ཚད་བདུན་དུ་འཕྲོ་ཞིང་གནས་སོ། །སྐུ་ཚེའི་ཚད་ནི་ལོ་སྟོང་ཕྲག་བརྒྱད་ཅུའོ། །གྱུར་པ་ཡི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་རྣམ་པར་གཟིགས་ཞེས་བྱ། །སྤྱན་ལྡན་འཇིག་རྟེན་བསྐྱེད་པའོ། །དེའི་འོག་གི་ཆར་འདི་ནས་བསྐལ་པ་སུམ་ཅུ་རྩ་གཉིས་ནས་གཙུག་ཏོར་ཅན་དང་ཐམས་ཅད་སྐྱོབ་ཅེས་པའི་སངས་རྒྱས་བྱོན་ནོ། །གཙུག་ཏོར་ཅན་གྱི་ཡང་ཉན་ཐོས་ཀྱི་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་གཅིག་གི་དགེ་སློང་ངོ་། །གཉིས་པ་ལ་འབུམ་ཕྲག་བརྒྱད་ཅུའོ། །གསུམ་པ་ལ་འབུམ་ཕྲག་བཅུའོ། །དེའི་ཚེ་བྱང་ཆུབ་སེམས་དཔའ་སྒྲའི་དབང་པོ་ཞེས་བྱ་བའི་རྒྱལ་པོར་གྱུར་ཏེ། སངས་རྒྱས་དང་བཅས་པའི་དགེ་འདུན་རྣམས་ལ་ཆོས་གོས་དང་བཅས་པའི་སྦྱིན་པ་ཆེན་པོ་ཕུལ་ལོ། །རིན་པོ་ཆེ་སྣ་བདུན་གྱིས་སོ་སོར་བརྒྱན་པའི་གླང་པོ་ཆེ་ཕུལ་ནས། གླང་པོ་ཆེའི་ཚད་ཙམ་རི་ཞིང་རུང་བའི་ཡོ་བྱད་རྣམས་ཕུལ་ལོ། །དེས་ཡང་འདི་ནས་བསྐལ་པ་སུམ་ཅུ་རྩ་གཅིག་ནས་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །གཞན་ཡང་བཅོམ་ལྡན་འདས་དེའི་གྲོང་ཁྱེར་ནི་སྐྱ་རེངས་ལྡན་ཞེས་བྱ་བར་གྱུར་ཏོ། །ཡབ་ནི་སྐྱ་རེངས་ལྡན་ཞེས་བྱ་བའི་རྒྱལ་པོའོ། །ཡུམ་ནི་འོད་ལྡན་མ་ཞེས་བྱ་བའོ། །མངོན་འབྱུང་དང་ཡང་དག་འབྱུང་ནི་ཉན་ཐོས་ཀྱི་མཆོག་གོ། །དགེ་བར་བྱེད་པ་ནི་ཉེ་གནས་སོ། །མ་གི་ལ་དང་པད་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་པུ་ཎ་ཌ་རཱི་ཀའི་ཤིང་ངོ་། །སྐུའི་མཐོ་ཚད་དུ་ཁྲུ་སུམ་ཅུ་རྩ་བདུན་དུ་འགྱུར་རོ། །སྐུའི་འོད་དཔག་ཚད་གསུམ་དུ་འཕྲོ་ཞིང་གནས་སོ། །སྐུ་ཚེའི་ཚད་ནི་
ལོ་སྟོང་ཕྲག་སུམ་ཅུ་རྩ་བདུན་ནོ། །རྣམ་པར་གཟིགས་ཀྱི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚུངས་མེད་རྒྱལ་བ་གཙུག་ཏོར་ཅན། །གང་ཟག་ཟླ་མེད་མཚུངས་མེད་དོ། །དེའི་འོག་གི་ཆར་ཐམས་ཅད་སྐྱོབ་ཅེས་བྱ་བའི་སངས་རྒྱས་བྱོན་ནོ། །དེའི་ཡང་འདུས་པ་གསུམ་དུ་འགྱུར་ཏེ། འདུས་པ་དང་པོ་ལ་འབུམ་ཕྲག་བརྒྱད་ཅུའི་དགེ་སློང་ངོ་། །གཉིས་པ་ལ་འབུམ་ཕྲག་སུམ་ཅུ་རྩ་བདུན་ནོ། །གསུམ་པ་ལ་འབུམ་ཕྲག་དྲུག་ཅུའོ། །དེའི་ཚེ་བྱང་ཆུབ་སེམས་དཔའ་བལྟ་ན་སྡུག་ཅེས་བྱ་བའི་རྒྱལ་པོར་གྱུར་ཏེ། སངས་རྒྱས་ལ་སོགས་པའི་དགེ་འདུན་ལ་ཆོས་གོས་དང་བཅས་པའི་སྦྱིན་པ་ཆེན་པོ་ཕུལ་ནས་དེའི་དྲུང་དུ་རབ་ཏུ་བྱུང་སྟེ། སྤྱོད་པ་དང། ཡོན་ཏན་དང་ལྡན་པས་སངས་རྒྱས་དཀོན་མཆོག་ལ་རི་མོར་བྱས་ཏེ་དགའ་བར་གྱུར་ཏོ། །དེ་ཡང་བཅོམ་ལྡན་འདས་ཀྱིས་འདི་ནས་བསྐལ་པ་སུམ་ཅུ་རྩ་གཅིག་ནས་སངས་རྒྱས་སུ་འགྱུར་ཞེས་ལུང་བསྟན་ཏོ། །གཞན་ཡང་བཅོམ་ལྡན་འདས་དེའི་གྲོང་ཁྱེར་ནི་ཡིད་ལྡན་ཞེས་བྱ་བར་གྱུར་ཏོ། །ཡབ་ནི་ལེགས་པར་གནས་ཞེས་བྱ་བའི་རྒྱལ་པོའོ། །ཡུམ་ནི་གྲགས་ལྡན་མ་ཞེས་བྱ་བའོ། །ཉན་པ་དང་མཆོག་ནི་ཉན་ཐོས་ཀྱི་མཆོག་གོ། །ཉེ་བར་ཞི་བ་ནི་ཉེ་གནས་སོ། །ཕྲེང་བ་མ་དང་ཕྲེང་བ་དང་བཅས་པ་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་སཱ་ལའི་ཤིང་ངོ་། །སྐུའི་མཐོ་ཚད་ནི་ཁྲུ་དྲུག་ཅུར་འགྱུར་རོ། །སྐུ་ཚེའི་ཚད་ནི་ལོ་སྟོང་ཕྲག་དྲུག་ཅུའོ། །སྙིང་པོའི་བསྐལ་པ་དེ་ཉིད་ལ། །གང་ཟག་ཟླ་མེད་མཚུངས་པ་མེད། །མཚན་ནི་ཐམས་ཅད་སྐྱོབ་ཅེས་པ། །རྒྱལ་བ་དེ་ནི་འཇིག་རྟེན་བསྐྱེད། །དེའི་ཡང་འོག་གི་ཆར་བསྐལ་པ་འདི་ལ་སངས་རྒྱས་བཞི་བྱོན་ནོ། །ལོག་པར་དད་སེལ་དང་གསེར་ཐུབ་དང་འོད་སྲུང་དང་བདག་ཅག་གི་བཅོམ་ལྡན་འདས་སོ། །གཞན་ཡང་བཅོམ་ལྡན་འདས་ལོག་པར་དད་སེལ་གྱི་ཉན་ཐོས་ཀྱི་འདུས་པ་ནི་གཅིག་གོ། །དེ་ལ་སྟོང་ཕྲག་བཞི་བཅུའི་དགེ་སློང་ངོ་། །དེའི་ཚེ་བྱང་ཆུབ་སེམས་དཔའ་དགེ་བ་ཞེས་བྱ་བའི་རྒྱལ་པོར་གྱུར་ཏོ། །སངས་རྒྱས་ལ་སོགས་པ་དགེ་འདུན་ལ་ལྷུང་བཟེད་ཆོས་གོས་དང་བཅས་པའི་སྦྱིན་པ་ཉིད་དང། མིག་སྨན་དང་སྨན་ལ་སོགས་པ་ཕུལ་ནས་སྟོན་པའི་ཆོས་བསྟན་པ་ཐོས་ནས་རབ་ཏུ་
བྱུང་ངོ་། །དེ་ཡང་སྟོན་པས་ལུང་བསྟན་ཏོ། །གཞན་ཡང་བཅོམ་ལྡན་འདས་ལོག་པར་དད་སེལ་དེའི་གྲོང་ཁྱེར་དགེ་བ་ཞེས་བྱ་བར་འགྱུར་རོ། །ཡབ་ནི་མི་སྦྱིན་བྲམ་ཟེ་ཞེས་བྱ་བའོ། །ཡུམ་ནི་བྲམ་ཟེ་མོ་གྲོགས་མའོ། །པི་དྷུ་ར་དང་ཡང་དག་འཚོ་ནི་ཉན་ཐོས་ཀྱི་མཆོག་གོ། །བྲམ་ཟེ་བློ་གྲོས་ནི་ཉེ་གནས་སོ། །མཉམ་བྱེད་དང་ཙམ་པ་ཀ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཤིང་ཤི་རི་ཥ་ཆེན་པོའོ། །སྐུའི་མཐོ་ཚད་ལ་ཁྲུ་བཞི་བཅུར་འགྱུར་རོ། །སྐུ་ཚེའི་ཚད་ནི་ལོ་སྟོང་ཕྲག་བཞི་བཅུའོ། །ཐམས་ཅད་སྐྱོབ་ཀྱི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་ལོག་པར་དད་སེལ་ཞེས། །གཞལ་མེད་རིང་ལ་སེམས་པའོ། །དེའི་འོག་གི་ཆར་སྟོན་པ་གསེར་ཐུབ་ཅེས་བྱ་བ་བྱོན་ནོ། །དེའི་ཡང་ཉན་ཐོས་ཀྱི་འདུས་པ་གཅིག་སྟེ། དེ་ལ་སྟོང་ཕྲག་སུམ་ཅུའི་དགེ་སློང་དུ་འགྱུར་རོ། །དེའི་ཚེ་བྱང་ཆུབ་སེམས་དཔའ་རི་ཞེས་བྱ་བའི་རྒྱལ་པོར་གྱུར་ཏོ། །བློན་པོའི་ཚོགས་མང་པོ་འཁོར་དང་བཅས་པ་ཆོས་བསྟན་པ་ཐོས་ནས་སངས་རྒྱས་ལ་སོགས་པའི་དགེ་སློང་གི་དགེ་འདུན་རྣམས་མགྲོན་དུ་གཉེར་ནས་སྦྱིན་པ་ཆེན་པོ་ཕུལ་ཏེ་སྟོན་པའི་དྲུང་དུ་སོང་སྟེ། །ལྷུང་བཟེད་དང། རྒྱའི་དར་དང། གྲོང་ཁྱེར་གསལ་ལྡན་གྱི་ཡུལ་གྱི་རས་དང། ལ་བ་དང། དུ་ཀུ་ལའི་རས་དང། དར་གོས་གསེར་མ་རྣམས་ཕུལ་ཏེ། སྟོན་པའི་དྲུང་དུ་རབ་ཏུ་བྱུང་ངོ་། །དེ་ཡང་སངས་རྒྱས་སུ་འགྱུར་བར་ལུང་བསྟན་ནོ། །བཅོམ་ལྡན་འདས་དེའི་གྲོང་ཁྱེར་ནི་མཛེས་ལྡན་ཞེས་བྱ་བར་འགྱུར་རོ། །ཡབ་ནི་གནོད་སྦྱིན་ཞེས་བྱ་བའི་བྲམ་ཟེའོ། །ཡུམ་ནི་མཆོག་མ་ཞེས་བྱ་བའི་བྲམ་ཟེ་མོའོ། །འཇིགས་བྱེད་དང་མཆོག་ནི་ཉན་ཐོས་ཀྱི་མཆོག་གོ། །བཀྲ་ཤིས་ཞེས་བྱ་བ་ནི་ཉེ་གནས་སོ། །རྒྱ་མཚོ་མ་དང་མཆོག་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ཨུ་དུམ་བཱ་རའི་ཤིང་ངོ་། །སྐུའི་མཐོ་ཚད་ལ་ཁྲུ་ཉི་ཤུའོ། །སྐུ་ཚེའི་ཚད་ནི་ལོ་སྟོང་ཕྲག་སུམ་ཅུའོ། །ལོག་པར་དད་སེལ་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་རྒྱལ་བ་གསེར་ཐུབ་བོ། །མི་ཡི་ཁྱུ་མཆོག་འཇིག་རྟེན་གཙོ། །དེའི་འོག་གི་ཆར་འོད་སྲུང་ཞེས་བྱ་བའི་སྟོན་པ་བྱོན་ནོ། །དེའི་ཡང་འདུས་པ་གཅིག་སྟེ། དེ་ལ་དགེ་སློང་སྟོང་ཕྲག་ཉི་ཤུའོ། །དེའི་ཚེ་བྱང་ཆུབ་སེམས་དཔའ་འོད་བསྐྱོར་ཞེས་བྱ་བའི་བྲམ་ཟེའི་ཁྱེའུར་གྱུར་ནས། རིག་བྱེད་གསུམ་གྱི་ཕ་རོལ་དུ་སོན་ཏེ། ས་དང་བར་སྣང་ཐམས་ཅད་
ལ་གྲགས་སོ། །བུམ་པ་བྱེད་པའི་རྫ་མཁན་གྱི་གྲོགས་པོར་གྱུར་ཏོ། །བྱང་ཆུབ་སེམས་དཔའ་རྫ་མཁན་དང་འགྲོགས་ཏེ་སྟོན་པའི་དྲུང་དུ་ཉེ་བར་སོང་སྟེ། ཆོས་ཀྱི་གཏམ་ཐོས་ནས་རབ་ཏུ་བྱུང་ངོ་། །བརྩོན་འགྲུས་ཆེར་བསྐྱེད་ནས་སྡེ་སྣོད་གསུམ་བསླབས་ཏེ་སྤྱོད་པ་དང་ལྡན་པས་སངས་རྒྱས་ཀྱི་བསྟན་པ་མཛེས་པར་བྱེད་དོ། །དེ་ཡང་སྟོན་པས་ལུང་བསྟན་ནོ། །བཅོམ་ལྡན་འདས་དེའི་བལྟམ་པའི་གྲོང་ཁྱེར་ནི་བཱ་རཱ་ཎ་སཱི་ཞེས་བྱ་བའོ། །ཡབ་ནི་ཚངས་བྱིན་ཞེས་བྱ་བའི་བྲམ་ཟེའོ། །ཡུམ་ནི་འབྱོར་ལྡན་མ་ཞེས་བྱ་བའི་བྲམ་ཟེ་མོའོ། །དཀར་རྒྱལ་དང་བྷཱ་ར་དྷྭ་ཛ་ནི་ཉན་ཐོས་ཀྱི་མཆོག་གོ། །ཐམས་ཅད་བཤེས་གཉེན་ནི་ཉེ་གནས་སོ། །རྗེས་སུ་ལེན་མ་དང་སྟོང་རྒྱས་མ་ནི་ཉན་ཐོས་མའི་མཆོག་གོ། །བྱང་ཆུབ་ཀྱི་ཤིང་ནི་ནྱ་གྲོ་ཏའི་ཤིང་ངོ་། །སྐུའི་མཐོ་ཚད་དུ་ཁྲུ་ཉི་ཤུ་པར་གྱུར་ཏོ། །སྐུ་ཚེའི་ཚད་ནི་ལོ་སྟོང་ཕྲག་ཉི་ཤུའོ། །གསེར་ཐུབ་ཀྱི་ནི་འོག་ཏུ་ནི། །རྐང་གཉིས་མཆོག་གི་རྫོགས་སངས་རྒྱས། །མཚན་ནི་རྒྱལ་བ་འོད་སྲུང་ངོ་། །ཆོས་ཀྱི་རྒྱལ་པོ་འོད་མཛད་དོ། །གཞན་ཡང་བསྐལ་པ་གང་ལ་སྟོབས་བཅུ་དང་ལྡན་པའི་མར་མེ་མཛད་པ་དེ་ལ། གཞན་ཡང་སངས་རྒྱས་གསུམ་བྱོན་པར་གྱུར་ཏེ། དེ་རྣམས་ཀྱི་དྲུང་དུ་བྱང་ཆུབ་སེམས་དཔའ་ལུང་མ་བསྟན་ནོ། །དེའི་ཕྱིར་འདིར་ཡང་མ་བསྟན་ཏེ། གཞན་ཡང་དོན་གྱི་གཏམ་འདིའི་བསྐལ་པ་ནས་བཟུང་ནས་སངས་རྒྱས་ཐམས་ཅད་མཐོང་བའི་དོན་དུ་འདིར་བཤད་དོ། །སྲེད་མཛད་དང་ནི་བློ་གྲོས་མཛད། །དེ་ནས་སྐྱབས་ནི་མཛད་པ་ཡིན། །མར་མེ་མཛད་ནི་རྫོགས་སངས་རྒྱས། །རྐང་གཉིས་མཆོག་ནི་ཀཽ་ཌི་ནྱ། །བཀྲ་ཤིས་དང་ནི་ཐུགས་བཟང་དང། །ཐུབ་པ་ནམ་གྲུ་མཛེས་བྱེད་དང། །ཐུགས་ལྡན་མཐོང་དང་པད་མ་དང། །མི་སྦྱིན་དང་ནི་པད་མའི་མཆོག །བློ་གྲོས་བཟང་དང་ལེགས་སྐྱེས་དང། །གྲགས་ཆེན་བལྟ་ན་སྡུག་པ་དང། །དོན་མཐོང་དང་ནི་ཆོས་མཐོང་དང། །འཇིག་རྟེན་འདྲེན་པ་དོན་གྲུབ་དང། །རྫོགས་སངས་རྒྱས་ནི་དཀར་རྒྱལ་གྱུར། །རྣམ་གཟིགས་གཙུག་ཏོར་ཐམས་ཅད་སྐྱོབ། །ལོག་དད་སེལ་དང་གསེར་ཐུབ་དང། །འདྲེན་པ་འོད་སྲུང་ཞེས་བྱའོ། །ཡང་དག་རྫོགས་སངས་དེ་རྣམས་ནི། །མཉམ་པར་བཞག་ཅིང་འདོད་ཆགས་བཅོམ། །འོད་ཟེར་བརྒྱ་པ་བཞིན་དུ་འཁྲུངས། །མུན་པ་ཆེན་པོ་རྣམ་པར་འཇོམས། །མེ་ཡི་ཕུང་པོ་བཞིན་
དུ་འབར། །ཉན་ཐོས་དང་བཅས་མྱ་ངན་འདས། །དེ་ལ་བདག་ཅག་གི་བྱང་ཆུབ་སེམས་དཔའ་མར་མེ་མཛད་ལ་སོགས་པའི་སངས་རྒྱས་ཉི་ཤུ་རྩ་བཞིའི་དྲུང་དུ་སྨོན་ལམ་བཏབ་ནས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་པ་ནས་བྱོན་ནོ། །གཞན་ཡང་བཅོམ་ལྡན་འདས་འོད་སྲུང་དེའི་འོག་གི་ཆར་གནས་ཏེ་ཡང་དག་པར་རྫོགས་པའི་སངས་རྒྱས་འདི་ལས་སངས་རྒྱས་གཞན་མེད་དོ་ཞེས་མར་མེ་མཛད་ལ་སོགས་པའི་སངས་རྒྱས་ཉི་ཤུ་རྩ་བཞིའི་དྲུང་དུ་ལུང་བསྟན་པ་ཐོབ་བོ། །གཞན་ཡང་བྱང་ཆུབ་སེམས་དཔའ་གང་དེས། མི་ཡི་བདག་ཉིད་རྟགས་དང་ལྡན། །སྒྱུ་དང་སྟོན་པའི་ལྟ་བ་དང། །རབ་ཏུ་བྱུང་ཞིང་ཡོན་ཏན་ལྡན། །གཞི་རྣམས་དང་ནི་འདུན་པ་དང། །ཆོས་བརྒྱད་པོ་ནི་ཚོགས་པ་དང། །སྨོན་ལམ་རྣམས་ནི་ཡང་དག་རྫོགས། །ཆོས་བརྒྱད་པོ་འདི་རྣམས་ཚོགས་པར་བྱས་ནས་མར་མེ་མཛད་ཀྱི་ཞབས་དྲུང་དུ་སྨོན་ལམ་བཏབ་ཅིང་སངས་རྒྱས་སུ་བྱེད་པའི་ཆོས་འདི་རྣམས་གང་དང་གང་དུ་ཚོལ་བའི་སྤྲོ་བ་སྐྱེས་སོ། །བཙལ་བ་དེ་རྣམས་མཐོང་བས་ན། །དང་པོ་སྦྱིན་པའི་ཕ་རོལ་ཕྱིན། །སྦྱིན་པའི་ཕ་རོལ་ཏུ་ཕྱིན་པ་ལ་སོགས་པས་སངས་རྒྱས་ཐོབ་པར་བྱེད་པའི་ཆོས་རྫོགས་པར་བྱེད་པ་ཉིད་ཐམས་ཅད་སྒྲོལ་གྱི་བདག་ཉིད་བྱོན་ནོ། །བྱོན་ནས་གང་དེ་རྣམས་བྱས་པའི་སྨོན་ལམ་བྱང་ཆུབ་སེམས་དཔའ་རྣམས་ཀྱིས་ཕན་ཡོན་བསྔགས་པར་མཛད་དོ། །དེ་བཞིན་ཡན་ལག་ཐམས་ཅད་ལྡན། །མི་ཡི་བྱང་ཆུབ་ངེས་པ་དང། །འཁོར་བ་ཡུན་རིང་གཞི་མེད་པ། །བསྐལ་པ་བྱེ་བ་བརྒྱ་ཉིད་དམ། །མནར་མེད་དུ་ནི་མི་སྐྱེའོ། །དེ་བཞིན་དུ་ནི་འཇིག་རྟེན་པར། །བཀྲེས་སྐོམ་སྲེད་དང་འབར་བ་དང། །ཡན་ལག་ཐམས་ཅད་མི་འཆད་འགྱུར། །སྲོག་ཆགས་ཕྲ་མོར་མི་འགྱུར་ཞིང། །ངན་འགྲོ་རྣམས་སུ་སྐྱེ་མི་འགྱུར། །མི་རུ་སྐྱེས་པར་གྱུར་པ་ན། །དེ་ནི་དམུས་ལོང་མི་འགྱུར་ཞིང། །འོན་པར་ཡང་ནི་མི་འགྱུར་ལ། །ལྐུགས་དང་གཞོགས་ཕྱེད་ན་མི་འགྱུར། །བུད་མེད་དུ་ནི་སྐྱེ་མི་འགྱུར། །ཟ་མ་མ་ནིང་མཚན་གཉིས་དང། །མཐའ་འཁོབ་ཏུ་ནི་སྐྱེ་མི་འགྱུར། །མི་ཡི་བྱང་ཆུབ་ངེས་པ་ཡིན། །མཚམས་མེད་པ་ལས་གྲོལ་བ་དང། །དག་པའི་སྤྱོད་ཡུལ་ཐམས་ཅད་དུ། །ལོག་པའི་ལྟ་བ་མི་བརྟེན་ནོ། །ལས་ཀྱི་བྱ་བ་མཐོང་བ་དང། །མཐོ་རིས་ལ་ནི་གནས་ནས་སུ། །འདུ་ཤེས་མེད་པར་སྐྱེ་
མི་འགྱུར། །གཙང་མ་རིས་ཀྱི་ལྷ་རྣམས་སུ། །སྒྱུ་དང་མིང་ནི་སྐྱེ་བ་མེད། །སྐྱེས་བུ་དམ་པ་ངེས་འབྱུང་སེམས། །དངོས་དང་དངོས་མེད་ལྡན་པ་མེད། །གང་ཞིག་འཇིག་རྟེན་དོན་དུ་འགྲོ། །ཕ་རོལ་ཕྱིན་ཀུན་རྫོགས་པར་བྱེད། །ཕན་ཡོན་དེ་རྣམས་ལྷག་པར་ཐོབ་པའམ་དེས་ཕ་རོལ་ཏུ་ཕྱིན་པ་རྫོགས་པར་བྱེད་དོ། །གྲགས་པ་དང་ལྡན་པའི་བྲམ་ཟེའི་དུས་སུ་དང། དུང་གི་བྲམ་ཟེའི་དུས་སུ་དང། ནོར་རྒྱལ་གྱི་རྒྱལ་པོའི་དུས་སུ་དང། བལྟ་ན་སྡུག་ཆེན་པོའི་རྒྱལ་པོའི་དུས་སུ་དང། ཁྱབ་འཇུག་ཆེན་པོའི་དུས་སུ་དང། རྒྱུ་མཚན་གྱི་རྒྱལ་པོའི་དུས་སུ་དང། ཟླ་བ་གཞོན་ནུའི་དུས་སུ་དང། ཡུལ་གྱི་མཆོག་གི་དུས་སུ་དང། ཤི་བི་པའི་རྒྱལ་པོའི་དུས་སུ་དང། ཐམས་ཅད་སྒྲོལ་གྱི་དུས་སུ་ནི་སྦྱིན་པའི་ཕ་རོལ་ཏུ་ཕྱིན་པ་རྫོགས་པའི་བདག་ཉིད་དེ་ཚད་མེད་པ་ཞེས་བྱའོ། །མཐའ་གཅིག་ཏུ་ཡང་དང་ཡང་བྱང་ཆུབ་སེམས་དཔའ་མཁས་པ་རི་བོང་གི་སྐྱེས་རབས་ལས། ཉེར་འོངས་སློང་བ་མཐོང་བ་ན། །རང་གི་ལུས་ནི་ཡོངས་སུ་བཏང། །བདག་གི་སྦྱིན་ལ་མཉམ་པ་མེད། །འདི་རྣམས་སྦྱིན་པའི་ཕ་རོལ་ཕྱིན། །དེ་ལྟར་ལུས་ཡོངས་སུ་གཏོང་བར་བྱེད་པས་སྦྱིན་པའི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་ཚུལ་ཁྲིམས་དང་ལྡན་པའི་ཀླུའི་རྒྱལ་པོའི་དུས་སུ་དང། ཙམ་པོ་སྤྱའི་ཀླུའི་རྒྱལ་པོའི་དུས་སུ་དང། ས་སྦྱིན་ཀླུའི་རྒྱལ་པོའི་དུས་སུ་དང། མཆེ་བ་དྲུག་པའི་གླང་པོའི་རྒྱལ་པོའི་དུས་སུ་དང། རྒྱལ་བ་དང་མཚུངས་པའི་རྒྱལ་པོའི་བུ་ཞུམ་པ་མེད་པའི་དགྲ་གཞོན་ནུའི་དུས་སུ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་རྫོགས་པར་སྐྱེས་པ་ལ་ཚད་མེད་དོ། །མཐའ་གཅིག་ཏུ་གཞན་ཡང། དེ་ཡི་དུང་སྐྱོང་སྐྱེས་རབས་ལས། གསལ་ཤིང་གིས་ནི་ཕུག་ནས་ནི། །མཚོན་ཆ་བླངས་ནས་རྡེག་པ་དང། །གྲོང་དཔོན་བུ་ལ་ཁྲོ་མི་བྱེད། །ཚུལ་ཁྲིམས་ཕར་ཕྱིན་བདག་གི་འདི། །དེ་བཞིན་དུ་ལུས་ཡོངས་སུ་གཏོང་བར་བྱེད་པ་ནི། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་ཡིད་བཟངས་གཞོན་ནུའི་དུས་སུ་དང། གླང་ཆེན་ནོར་སྐྱོང་གཞོན་ནུའི་དུས་སུ་དང།
ལྕགས་ཁྱིམ་མཁས་པའི་དུས་སུ་ནི། རྒྱལ་སྲིད་ཆེན་པོ་སྤངས་ནས་ངེས་པར་འབྱུང་བའི་ཕ་རོལ་ཏུ་ཕྱིན་པ་བདག་ཉིད་ལ་སྐྱེས་པ་ནི་ཚད་མེད་དོ། །གཞན་ཡང་མཐའ་གཅིག་ཏུ་དེའི་བུ་ཞི་བ་ཆུང་ངུའི་སྐྱེས་རབས་ལས། རྒྱལ་པོ་ཆེན་པོ་ལག་ཏུ་ཐོབ། །མཆིལ་མའི་དབུ་བ་བཞིན་དུ་སྤངས། །རྒྱལ་སྲིད་སྤངས་ཀྱང་ཞེན་པ་མེད། །བདག་གི་ངེས་འབྱུང་ཕར་ཕྱིན་འདི། །དེ་བཞིན་དུ་ངེས་པར་བདག་གི་རྒྱལ་སྲིད་སྤངས་ནས་ངེས་པར་འབྱུང་བའི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་མཁས་པ་བི་དྷུ་རའི་དུས་སུ་དང། མཁས་པ་ཁྱབ་འཇུག་ཆེན་པོའི་དུས་སུ་དང། མཁས་པ་ཏོག་ཙེ་པའི་དུས་སུ་དང། མཁས་པ་ཨ་རའི་དུས་སུ་དང། ཀུན་དུ་རྒྱུ་བྱང་ཆུབ་ཀྱི་དུས་སུ་དང། མཁས་པ་སྨན་ཆེན་པོའི་དུས་སུ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་རྫོགས་པར་བདག་ལ་སྐྱེས་པ་ལ་ཚད་མེད་དོ། །གཞན་ཡང་མཐའ་གཅིག་ཏུ་དེའི་སྡེ་སྣོད་ཀྱི་སྐྱེས་རབས་ལས། མཁས་པ་སྡེ་ཅན་གྱི་དུས་སུ། བདག་གིས་ཤེས་རབ་ཚོལ་བ་ན། །བྲམ་ཟེའི་སྡུག་བསྔལ་གྲོལ་བ་དང། །བདག་གི་ཤེས་རབ་མཚུངས་པ་མེད། །བདག་གི་ཤེས་རབ་ཕར་ཕྱིན་འདི། །ཕ་ཚིའི་ནང་གི་སྦྲུལ་བདག་གིས་བལྟ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །དེ་བཞིན་དུ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རྫོགས་པར་བདག་ལ་སྐྱེས་པ་ཚད་མེད་དོ། །གཞན་ཡང་མཐའ་གཅིག་ཏུ་དེའི་སྐྱེ་བོ་ཆེན་པོ་ཅན་གྱི་སྐྱེས་རབས་ལས། །ངོགས་མ་མཐོང་བའི་རྒྱ་མཚོའི་དབུས། །མི་རྣམས་ཐམས་ཅད་ཤི་བར་གྱུར། །སྡུག་བསྔལ་མེད་པའི་སེམས་ཀྱིས་ནི། །བདག་གི་བརྩོན་འགྲུས་ཕར་ཕྱིན་འདི། །རྒྱ་མཚོ་ཆེན་པོ་ལས་སྒྲོལ་བར་བྱེད་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །བཟོད་པར་སྨྲ་བའི་སྐྱེ་རབས་ལས། སེམས་མེད་པ་ལ་གཅོད་པ་བཞིན། །བདག་ལ་རྣོ་བའི་དགྲ་སྟ་ཡིས། །གསལ་ལྡན་རྒྱལ་པོ་ལ་མི་ཁྲོ། །བདག་གི་བཟོད་པའི་ཕར་ཕྱིན་འདི། །དེ་ལྟར་སེམས་མེད་པའི་དངོས་པོ་བཞིན་དུ་བདག་སྡུག་བསྔལ་ཆེན་པོ་ལ་ལྷག་པར་གནས་པ་ནི་བཟོད་
པའི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །བུ་ཞི་བ་ཆེན་པོའི་སྐྱེས་རབས་ལས། བདེན་པའི་ཚིག་ནི་རྗེས་སུ་བསྲུང། །བདག་གི་སྲོག་ནི་སྤངས་ནས་སུ། །རྒྱལ་རིགས་བརྒྱ་ཕྲག་གྲོལ་བར་བྱས། །བདག་གི་བདེན་པའི་ཕར་ཕྱིན་འདི། །དེ་ལྟར་སྲོག་སྤངས་ནས་བདེན་པ་རྗེས་སུ་བསྲུང་བ་དེ་ནི་བདེན་པའི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །ལྐུགས་པ་དང་གཞོགས་ཕྱེད་ན་བའི་ཚུལ་གྱི་སྐྱེས་རབས་ལས། ཕ་མ་བདག་ལ་མི་དགོས་ཤིང། །ནོར་དང་གྲགས་པའང་དགོས་པ་མེད། །བདག་ནི་ཐམས་ཅད་མཁྱེན་ལ་དགའ། །དེ་ཕྱིར་བརྟུལ་ཞུགས་གནས་པའོ། །དེ་ལྟར་སྲོག་གི་འདོད་པ་ཡོངས་སུ་བཏང་ནས་བརྟུལ་ཞུགས་ལ་ལྷག་པར་གནས་པ་ནི། ལྷག་པར་གནས་པའི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །རྒྱལ་པོ་གཅིག་གི་སྐྱེས་རབས་ལས། གང་ཞིག་བདག་ལ་སྐྲག་བྱེད་མེད། །བདག་གིས་གང་ལའང་འཇིགས་མ་བྱས། །བྱམས་པའི་སྟོབས་ཀྱི་སྟེང་གནས་ཞིང། །དེ་ཚེ་སྟོང་པ་ཉིད་ལ་དགའ། །དེ་ལྟར་སྲོག་ཡོངས་སུ་གཏོང་བ་ལ་མི་བལྟ་ཞིང་བྱམས་པར་བྱེད་པ་དེའི་བྱམས་པ་ནི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །ངང་པའི་སྤུ་ཡི་སྐྱེ་རབས་ལས། དུར་ཁྲོད་དུ་ནི་གནས་པར་སེམས། །རུས་གོང་ལ་ནི་བརྟེན་བྱས་ནས། །བདག་གི་གནས་སུ་ཉེ་བར་འོངས། །གཟུགས་ལ་ལྟ་བ་ཉུང་བ་མེད། །དེ་ལྟར་གྲོང་གི་ཁྱེའུ་ལ་རྡོ་ལ་སོགས་པ་བླངས་ནས་རྡུང་བ་ཉིད་དང། མེ་ཏོག་ཕྲེང་བ་དང། སྤོས་ཀྱིས་ཉེ་བར་སྤྱོད་པ་ལ་སོགས་པས་བདེ་བ་དང། སྡུག་བསྔལ་བསྐྱེད་ཀྱང་བཏང་སྙོམས་སུ་འདོར་བ་དེ་ནི་བཏང་སྙོམས་ཀྱི་ཕ་རོལ་ཏུ་ཕྱིན་པ་སྟེ། དོན་དམ་པའི་ཕ་རོལ་ཏུ་ཕྱིན་པ་ཞེས་བྱ་བ་སྐྱེས་སོ། །དེ་རྣམས་འདིར་མདོར་བསྡུས་པའོ། །རྒྱ་ཆེར་ཡང་སླར་འདིའི་དོན་སྤྱོད་པའི་སྡེ་སྣོད་ལས་བླང་བར་བྱའོ། །དེ་ལྟར་ཕ་རོལ་ཏུ་ཕྱིན་པ་རྫོགས་ནས་ཐམས་ཅད་སྒྲོལ་གྱི་བདག་ཉིད་དུ་གནས་སོ། །སེམས་མེད་པ་ཡི་ས་གཞི་ཡིས། །བདེ་དང་སྡུག་བསྔལ་མི་ཤེས་ཀྱང། །བདག་གི་སྦྱིན་པའི་སྟོབས་དེ་ཡིས། །ལན་བདུན་དུ་ནི་རབ་ཏུ་གཡོས། དེ་ལྟར་ས་གཞི་ཆེན་པོ་གཡོ་
བ་ལ་སོགས་པ་བསོད་ནམས་ཆེན་པོ་བྱེད་ཅིང་ཚེའི་མཐར་ཤི་འཕོས་ཏེ་དགའ་ལྡན་དུ་སྐྱེས་སོ་ཞེས་པ་མར་མེ་མཛད་ཀྱི་ཞབས་དྲུང་ནས་བཟུང་སྟེ་ཇི་སྲིད་དགའ་ལྡན་དུ་སྐྱེས་པ་དེ་རྣམས་ཀྱི་བར་ནི་རིང་པོའི་གཞི་ཞེས་བྱ་བར་རིག་པར་བྱའོ། །གཞན་ཡང་བྱང་ཆུབ་སེམས་དཔའ་དགའ་ལྡན་དུ་བཞུགས་པ་ཉིད་ནས་སངས་རྒྱས་ཀྱི་སྒྲ་ཆེར་སྒྲོགས་པ་ཞེས་བྱ་བ་སྐྱེས་པ་ན་འཇིག་རྟེན་འདིར་སྒྲ་ཆེར་སྒྲོགས་པ་གསུམ་བྱུང་སྟེ། བསྐལ་པའི་སྒྲ་ཆེར་སྒྲོགས་པ་དང། སངས་རྒྱས་ཀྱི་སྒྲ་ཆེར་སྒྲོགས་པ་དང། འཁོར་ལོས་སྒྱུར་བའི་སྒྲ་ཆེར་སྒྲོགས་པའོ། །དེ་ལ་ལོ་འབུམ་ཕྲག་གཅིག་གི་མཐར་བསྐལ་པ་འཇིག་པར་འགྱུར་རོ་ཞེས་པ་འཇིག་རྟེན་གྱི་མིང་དུ་བརྗོད་པ་ནི་འདོད་པ་ན་སྤྱོད་པའི་ལྷ་མགོ་གཡོགས་ཀྱིས་མ་བསྒྲིབས་པ་དང། སྐྲ་གྲོལ་བ་དང། ངུ་བའི་ཁ་ཅན་ལག་པས་མིག་གི་མཆི་མ་འཕྱི་བ་གོས་དམར་པོ་གྱོན་པ་ལྷག་པར་གཟུགས་མི་སྡུག་པའི་ཆ་བྱད་འཛིན་པར་གྱུར་པའི་མི་རྣམས་ལམ་ལ་འགྲོ་ཞིང་འདི་ལྟར་བརྗོད་དོ། །འཇིག་རྟེན་པ་འདི་ནས་ལོ་འབུམ་ཕྲག་གཅིག་འདས་ནས་བསྐལ་པ་འཇིག་པར་འགྱུར་རོ། །འདི་ཡི་འཇིག་རྟེན་རྣམས་འཇིག་པར་འགྱུར་རོ། །རྒྱ་མཚོ་ཆེན་པོ་ཡང་བསྐམས་པར་འགྱུར་རོ། །ས་གཞི་ཆེན་པོ་འདི་དང་རིའི་རྒྱལ་པོ་རི་རབ་ཀྱང་ཐལ་བར་འགྱུར་ཅིང་འཇིག་གོ། །ཚངས་པའི་འཇིག་རྟེན་གྱི་བར་དུ་འཇིག་རྟེན་འཇིག་པར་འགྱུར་རོ་ཞེས་བརྗོད་དོ། །འཇིག་རྟེན་པ་རྣམས་བྱམས་པ་སྒོམས་ཤིག །སྙིང་རྗེ་སྒོམས་ཤིག །དགའ་བ་སྒོམས་ཤིག །བཏང་སྙོམས་སྒོམས་ཤིག །མ་ལ་རིམ་གྲོ་གྱིས་ཤིག །ཕ་ལ་རིམ་གྲོ་གྱིས་ཤིག །རིགས་ཀྱི་གཙོ་བོ་ལ་རིམ་གྲོ་གྱིས་ཤིག་ཅེས་པ་འདི་ནི་བསྐལ་པའི་སྒྲ་ཆེར་སྒྲོགས་པ་ཞེས་བྱ་བའོ། །ལོ་སྟོང་ཕྲག་གཅིག་འདས་ནས་སླར་ཡང་སངས་རྒྱས་ཐམས་ཅད་མཁྱེན་པ་འཇིག་རྟེན་དུ་བྱོན་ནོ་ཞེས་བརྗོད་པ་འདི་འཇིག་རྟེན་སྐྱོང་བའི་ལྷ་རྣམས་འདི་ནས་འཇིག་རྟེན་པ་རྣམས་ལོ་སྟོང་ཕྲག་གཅིག་འདས་ནས་གཞན་ཡང་སངས་རྒྱས་འཇིག་རྟེན་དུ་བྱོན་ནོ་ཞེས་རྗོད་ཅིང་སྒྲ་ཆེར་སྒྲོགས་པས་རྒྱུ་བ་འདི་ནི་སངས་རྒྱས་ཀྱི་སྒྲ་ཆེར་སྒྲོགས་པ་ཞེས་བྱ་བ་ཡིན་ནོ། །གཞན་ཡང་ལོ་བརྒྱ་འདས་ནས་འཁོར་
ལོས་སྒྱུར་བའི་རྒྱལ་པོ་བྱོན་ནོ་ཞེས་བརྗོད་པ་ནི་ལྷ་ཉིད་དེ། འཇིག་རྟེན་པ་རྣམས་ལོ་བརྒྱ་འདས་ནས་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱོན་ཞེས་སྒྲ་ཆེར་རྗོད་ཅིང་རྒྱུ་བ་འདི་ནི་འཁོར་ལོས་སྒྱུར་བའི་སྒྲ་ཆེར་སྒྲོགས་པ་ཞེས་བྱ་བ་ཡིན་ནོ། །གསུམ་པོ་འདི་ནི་སྒྲ་ཆེར་སྒྲོགས་པ་ཡིན་ནོ། །དེ་རྣམས་ལས་སངས་རྒྱས་ཀྱི་སྒྲ་ཆེར་སྒྲོགས་པ་ཐོས་ནས་སྟོང་ཕྲག་བཅུའི་ཁོར་ཡུག་གི་ལྷ་ཐམས་ཅད་གནས་གཅིག་ཏུ་འདུས་ཏེ། ཆེ་གེ་མོ་ཞེས་བྱ་བའི་བྱང་ཆུབ་སེམས་དཔའ་སངས་རྒྱས་སུ་འགྱུར་བར་རྟོགས་ནས་ཞུ་བའི་ཕྱིར་ཉེ་བར་སོང་སྟེ། ཞུས་ནས་ཀྱང་སྔར་གྱི་མཚན་མ་སྐྱེས་པ་ལ་ཞུས་སོ། །དེའི་ཚེ་སླར་ཡང་ཐམས་ཅད་ཀྱི་རེ་རེའི་ཁོར་ཡུག་གི་རྒྱལ་པོ་ཆེན་པོ་བཞིའི་རིས་དང། བརྒྱ་བྱིན་དང་འཐབ་བྲལ་དང་དགའ་ལྡན་དང་འཕྲུལ་དགའ་དང་གཞན་འཕྲུལ་དབང་བྱེད་དང། ཚངས་པ་ཆེན་པོ་དང་བཅས་པའི་ལྷ་དང། ཁོར་ཡུག་གི་ལྷ་རྣམས་འདུས་པའོ། །དགའ་ལྡན་གྱི་གནས་སུ་བྱང་ཆུབ་སེམས་དཔའི་དྲུང་དུ་སོང་སྟེ། དྲང་སྲོང་ཆེན་པོ་ཁྱོད་ཀྱིས་ཕ་རོལ་དུ་ཕྱིན་པ་བཅུ་རྫོགས་པ་ནི་བརྒྱ་བྱིན་གྱི་ཕུན་སུམ་ཚོགས་པར་བྱ་བའི་ཕྱིར་མ་ཡིན། བདུད་ཀྱི་ཕྱིར་མ་ཡིན། ཚངས་པའི་ཕྱིར་དོན་དུ་གཉེར་བ་རྫོགས་པར་བྱ་བའི་ཕྱིར་མ་ཡིན་འཁོར་ལོས་སྒྱུར་བའི་ཕུན་སུམ་ཚོགས་པའི་ཕྱིར་དོན་དུ་གཉེར་བ་རྫོགས་པར་བྱ་བའི་ཕྱིར་མ་ཡིན་ནོ། །གཞན་ཡང་འཇིག་རྟེན་བསྒྲལ་བའི་ཕྱིར་དང། ཐམས་ཅད་མཁྱེན་པ་དོན་དུ་གཉེར་བའི་ཕྱིར་རྫོགས་པར་བྱེད་དོ། །དེ་རྣམས་ནི་ད་ལྟའི་དུས་ནས་དྲང་སྲོང་ཆེན་པོ་སངས་རྒྱས་སུ་འགྱུར་བའི་དུས་ནི་དྲང་སྲོང་ཆེན་པོ་སངས་རྒྱས་སུ་འགྱུར་ཞེས་ཞུས་སོ། །སེམས་དཔའ་ཆེན་པོ་ལྷ་ལ་གནང་བ་མ་བྱིན་ཏེ། དུས་དང་གླིང་དང་ཡུལ་དང་རིགས་དང་ཡུམ་དང། ཚེ་དང་ཚེའི་བྱེ་བྲག་ལྷག་མ་ལས་མེད་དོ། །ཆེན་པོ་ལྔ་པོ་ཞེས་བྱ་བ་ལེགས་པར་གཟིགས་ཤིང་གཟིགས་སོ། །དེ་ལ་དུས་དང་དུས་མ་ཡིན་པ་ཞེས་བྱ་བ་སྟེ། དང་པོ་དུས་ལ་གཟིགས་སོ། །དེ་ལ་ལོ་འབུམ་ཕྲག་གཅིག་གི་ཐོག་མ་ནས་འཕེལ་བ་ནི་ཚེའི་དུས་དང་དུས་མ་ཡིན་པའོ། །གང་གི་ཕྱིར་དེའི་ཚེ་སེམས་ཅན་རྣམས་ཀྱི་སྐྱེ་བ་དང་རྒ་བ་དང་ན་བ་དང་འཆི་བ་རྣམས་ལ་གཟིགས་སོ། །
སངས་རྒྱས་རྣམས་ཀྱི་ཆོས་སྟོན་པ་ནི་མཚན་ཉིད་ལྔ་སྤངས་ནས་གཞན་པ་ནི་མེད་དོ། །དེ་རྣམས་ནི་མི་རྟག་པ་དང། སྡུག་བསྔལ་བ་དང། བདག་མེད་པ་སྟོན་ཅིང་འདི་རྣམས་ཅིའི་ཕྱིར་འཆད་པ་ཉིད་མི་ཉན་པ་དང་མི་དད་པ་དང་མི་སེམས་པའོ། །དེ་ནི་དུས་མ་ཡིན་ནོ། །དེའི་ཕྱིར་མི་སེམས་པ་དང་མ་ངེས་པའི་བསྟན་པ་ཡིན་ནོ། །དེའི་ཕྱིར་དེ་ནི་དུས་མ་ཡིན་པའོ། །ལོ་བརྒྱ་པ་དམན་པས་ཚེའི་དུས་ཀྱང་དེའི་དུས་མ་ཡིན་ནོ། །གང་གི་ཕྱིར་དེའི་ཚེ་སེམས་ཅན་ཉོན་མོངས་པ་ཤིན་ཏུ་ཆེ་བ་ཡིན་ནོ། །ཉོན་མོངས་པ་ཤིན་ཏུ་ཆེ་བས་གདམས་པ་བྱིན་ནོ། །གདམས་པ་ལ་མི་གནས་ན་ཆུ་ལ་དབྱུག་པ་རྒྱབ་པའི་རི་མོ་བཞིན་མྱུར་དུ་འགག་གོ། །དེའི་ཕྱིར་དེ་ཡང་དུས་མ་ཡིན་པའོ། །ལོ་འབུམ་ཕྲག་གཅིག་ནས་བཟུང་བའི་འོག་ཏུ་ལོ་བརྒྱ་བའི་མགོར་ཚེའི་དུས་ཏེ་དུས་ཞེས་བྱ་བ་ཡིན་ནོ། །དེའི་ཚེ་ཡང་ལོ་བརྒྱ་པ་ཡིན་ནོ། །དེ་ནས་སེམས་དཔའ་ཆེན་པོ་སྐྱེ་བར་རིགས་སོ་ཞེས་དུས་ལ་གཟིགས་སོ། །དེ་ནས་གླིང་ལ་གཟིགས་ཏེ་གླིང་བཞི་འཁོར་དང་བཅས་པ་ལ་གཟིགས་ནས་གླིང་གསུམ་པོ་རྣམས་སུ་སངས་རྒྱས་མི་འབྱོན་ནོ། །འཛམ་བུའི་གླིང་ཉིད་དུ་འབྱོན་ནོ། །གླིང་ལ་གཟིགས་པའོ། །དེ་ནས་འཛམ་བུའི་གླིང་ཞེས་བྱ་བ་དཔག་ཚད་སྟོང་ཕྲག་བཅུའི་ཚད་ཀྱིས་ཆེ་བའོ། །ཡུལ་གྱི་ཕྱོགས་གང་ཞིག་ཏུ་སངས་རྒྱས་འབྱོན་པར་འགྱུར་ཞེས་ཡངས་ཤིང་གྲོལ་བའི་གནས་བལྟ་ཞིང་ཡུལ་དབུས་ལ་གཟིགས་ཏེ་ཡུལ་དབུས་ཞེས་བྱ་བ་ནི་ཤར་གྱི་ཕྱོགས་ན་ཀ་ཛཾ་ག་ལ་ཞེས་བྱ་བའི་གྲོང་རྡལ་ལོ། །དེའི་ཕ་རོལ་ན་ཤིང་སཱ་ལ་ཆེན་པོའོ། །དེ་ནས་གཞན་ཡང་བས་མཐའི་ལྗོངས་ཉེ་བའི་ནང་ངོ་། །ཤར་ལྷོའི་མཚམས་སུ་སཱ་ལ་ཅན་ཞེས་བྱ་བའི་ཆུ་ཀླུང་ངོ་། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །ལྷོ་ཕྱོགས་སུ་སོོ་ཏ་ཀར་ཎི་ཀ་ཞེས་བྱ་བའི་གྲོང་རྡལ་ལོ། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །ནུབ་ཕྱོགས་ཀ་པ་ཞེས་བྱ་བ་བྲམ་ཟེའི་གྲོང་རྡལ་ལོ། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །བྱང་གི་ཕྱོགས་ཨུ་ཤི་རའི་རིའོ། །དེ་ནས་གཞན་ཡང་བས་མཐའི་ལྗོངས་དང་ཉེ་བའི་ནང་ངོ་། །འདི་ལྟར་འདུལ་བར་བཤད་ཅིང་བསྟན་ནོ། །དཀྱུས་སུ་
དཔག་ཚད་སུམ་བརྒྱའོ། །ཞེང་དུ་དཔག་ཚད་ཕྱེད་དང་སུམ་བརྒྱའོ། །མཐའ་བསྐོར་ལ་དཔག་ཚད་དགུ་བརྒྱའོ། །ཡུལ་ཕྱོགས་དེ་རྣམས་སུ་ནི་སངས་རྒྱས་དང། རང་སངས་རྒྱས་དང་ཉན་ཐོས་མཆོག་རྣམས་དང། ཉན་ཐོས་ཆེན་པོ་བརྒྱད་ཅུ་དང། འཁོར་ལོས་སྒྱུར་བའི་རྒྱལ་པོ་དང། གཞན་ཡང་སྐྱེས་བུ་ཆེན་པོར་གྲགས་པའི་རིགས་དང། བྲམ་ཟེའི་རིགས་དང། ཤིང་སཱ་ལ་ཆེན་པོ་ལྟ་བུའི་ཁྱིམ་བདག་རྣམས་འཁྲུངས་པའི་གནས་སོ། །དེ་རྣམས་ལས་གྲོང་ཁྱེར་སེར་སྐྱ་ཞེས་བྱ་བ་འདིའོ། །དེར་བདག་འཁྲུང་བར་རིགས་སོ་ཞེས་ཐུགས་ཀྱིས་ངེས་པར་བྱས་སོ། །དེ་ནས་རིགས་ལ་གཟིགས་པ་ཞེས་བྱ་བ་ནི་སངས་རྒྱས་ཞེས་བྱ་བ་རྗེའུའི་རིགས་སམ། གདོལ་པའི་རིགས་ལ་མི་འཁྲུང་ངོ་། །སླར་ཡང་འཇིག་རྟེན་པ་མོས་པའི་རྒྱལ་རིགས་སམ་བྲམ་ཟེའི་རིགས་གཉིས་ལ་འཁྲུང་ངོ་། །ད་ལྟ་ནི་རྒྱལ་རིགས་ལ་འཇིག་རྟེན་པ་སེམས་སོ། །དེ་ལ་འཁྲུང་ངོ་། །བདག་གི་ཡབ་ནི་ཟས་གཙང་མ་ཞེས་བྱ་བའི་རྒྱལ་པོ་ཡིན་ཏེ་རིགས་ལ་གཟིགས་སོ། །དེ་ནས་ཡུམ་ལ་གཟིགས་ཏེ་འདོད་པ་དང་ཆང་ལ་དགའ་བ་ནི་སངས་རྒྱས་ཀྱི་ཡུམ་ཞེས་བྱ་བ་མ་ཡིན་ནོ། །གཞན་ཡང་བསྐལ་པ་འབུམ་ཕྲག་གཅིག་ལ་ཕ་རོལ་ཏུ་ཕྱིན་པ་རྫོགས་པར་བྱས་ནས་འཁྲུང་ངོ་། །ཉམས་པ་མེད་པའི་ཚུལ་ཁྲིམས་ལྔ་པོ་ཉིད་ལེན་ནོ། །ལྷ་མོ་སྒྱུ་འཕྲུལ་ཆེན་མོ་ཞེས་བྱ་བ་འདི་དེ་དང་འདྲ་བ་བདག་གི་ཡུམ་ཡིན་ནོ། །གཞན་ཡང་གང་དེ་ཙམ་གྱི་ཚེའོ། །ཟླ་བ་བཅུའི་མགོ་ནས་ཞག་བདུན་དུ་གཟིགས་སོ། །འདི་ནི་ཆེན་པོ་ལྔ་ལ་གཟིགས་སོ། །གཟིགས་ནས་དྲང་སྲོང་ཆེན་པོ་བདག་གི་དུས་ཏེ་སངས་རྒྱས་སུ་འགྱུར་བའི་ལྷ་རྣམས་ཀྱིས་ཚིག་གིས་གནང་ངོ་། །ཁྱེད་རྣམས་གཤེགས་པར་ཞུ་ཞེས་ལྷ་དེ་རྣམས་བཏང་ནས་དགའ་ལྡན་གྱི་ལྷ་རྣམས་ཀྱིས་ཡོངས་སུ་བསྐོར་ཏེ། དགའ་ལྡན་གྱི་དགའ་བའི་ཚལ་དུ་ཞུགས་སོ། །འཇིག་རྟེན་གྱི་ལྷ་ཐམས་ཅད་དགའ་བའི་ཚལ་ན་ཡོད་པ་ཉིད་དོ། །དེ་ལ་འདིའི་ལྷ་འདི་ནས་ཤི་འཕོས་ནས་བདེ་བའི་འགྲོ་བར་སྐྱེས་ཏེ་འདི་ནས་ཤི་འཕོས་ནས་བདེ་བའི་འགྲོ་བར་སྐྱེས་སོ། །སྔར་བྱས་པའི་དགེ་བའི་ལས་བྱས་པ་རྗེས་སུ་དྲན་ཞིང་རྒྱུའོ། །དེ་དེ་ལྟར་ལྷ་རྣམས་ཀྱིས་དགེ་བ་རྗེས་སུ་དྲན་པ་རྣམས་འཁོར་
དུ་བྱས་ཤིང་དེར་རྒྱུའོ། །ཤི་འཕོས་ནས་ལྷ་མོ་སྒྱུ་འཕྲུལ་མ་ཆེན་མོའི་མངལ་དུ་ཞུགས་སོ། །དེ་ལ་ལེགས་པར་བརྗོད་པའི་ཕྱིར་འདི་གོ་རིམས་བཞིན་དུ་སྔོན་གྱི་གཏམ་བརྗོད་དོ། །དེའི་ཚེ་གྲོང་ཁྱེར་སེར་སྐྱར་དབྱར་ཟླ་འབྲིང་པོའི་རྒྱུ་སྐར་དུ་བརྗོད་པར་སྐྱེ་བོ་ཐམས་ཅད་རྒྱུ་སྐར་ལ་རྩེ་ཞིང་ལྷ་མོ་སྒྱུ་འཕྲུལ་ཆེན་པོ་ཡང་ཉའི་སྔུན་དུ་ཞག་བདུན་ནས་མེ་ཏོག་གི་ཕྲེང་བ་དང་སྤོས་ཀྱི་འབྱོར་པ་དང་ལྡན་པས་རྒྱུ་སྐར་ལ་རྩེ་ཞིང་ལོངས་སྤྱོད་དོ། །ཞག་བདུན་གྱི་མཐར་སྔ་དྲོ་ལངས་ནས་དྲི་བཟང་གི་ཆུས་ཁྲུས་བྱས་ཏེ། འབུམ་ཕྲག་བཞིའི་ལོངས་སྤྱོད་སྤེལ་ཏེ་སྦྱིན་པ་ཆེན་པོ་བཏང་ནས་རྒྱན་ཐམས་ཅད་ཀྱིས་བརྒྱན། ཁ་ཟས་བཟང་པོ་ཟོས་ཏེ། གསོ་སྦྱོང་ཡན་ལག་བརྒྱད་པ་ལ་གནས་སོ། །རྒྱན་དུ་བྱེད་པ་ལ་རིགས་པའི་དཔལ་གྱི་ཁང་པའི་ནང་དུ་ཞུགས་ནས་དཔལ་གྱི་མལ་ཆ་ལ་ཉལ་ཏེ་གཉིད་དུ་སོང་ནས་འདི་ལྟ་བུའི་རྨི་ལམ་མཐོང་ངོ་། །རྒྱལ་པོ་ཆེན་པོ་བཞི་པོས་མལ་སྟན་དང་བཅས་པ་ཉིད་བླངས་ནས་གངས་ཅན་གྱི་ནང་དུ་སོང་ངོ་། །དཔག་ཚད་དྲུག་ཅུ་པའི་མན་ཤི་ལའི་སྟེང་དུ་དང་དཔག་ཚད་བདུན་པའི་ཤིང་སཱ་ལ་ཆེན་པོའི་འོག་ཏུ་བཞག་ནས་ཕྱོགས་གཅིག་ཏུ་འཁོད་དོ། །དེ་ནས་དེའི་ལྷ་མོ་འོངས་ནས་ལྷ་མོ་སྒྱུ་འཕྲུལ་མ་ཆེན་མོ་མཚོ་མ་དྲོས་པར་ཁྲིད་དོ། །མིའི་དྲི་མ་བསལ་བའི་ཕྱིར་ཁྲུས་བྱས་ཏེ། ལྷའི་གོས་གྱོན་ནས་དྲི་བཟང་པོས་བྱུག་ཅིང་ལྷའི་མེ་ཏོག་འདོགས་སོ། །དེ་ནས་མི་རིང་བར་དངུལ་གྱི་རི་དེའི་ནང་ན་གསེར་གྱི་གཞལ་ཡས་ཁང་འདུག་གོ། །དེར་ཤར་དུ་མགོ་བསྟན་པའི་ལྷའི་མལ་ཆ་ལ་དེར་ཉོལ་ཞེས་ཟེར་ནས་ཉལ་ལོ། །དེ་ནས་བྱང་ཆུབ་སེམས་དཔའ་གླང་པོ་ཆེ་དཀར་པོ་ཅིག་ཏུ་གྱུར་ཏོ། །དེ་ནས་མི་རིང་བར་གསེར་གྱི་རི་ཅིག་ལ་དེར་འཛེག་ཅིང་དེ་ནས་མར་བབས་ནས། དངུལ་གྱི་རི་ལ་འཛེག་གོ། །བྱང་གི་ཕྱོགས་ནས་འོངས་ཏེ། དངུལ་གྱི་ཕྲེང་བ་དང་མཚུངས་པའི་གླང་པོ་ཆེའི་སྣས་པད་མ་དཀར་པོ་འཛིན་ཅིང། གླང་པོ་ཆེའི་སྒྲ་སྒྲོགས་པས་གསེར་གྱི་གཞལ་ཡས་ཁང་དུ་ཞུགས་ཏེ། རང་གི་མལ་ཆ་ལ་ལན་གསུམ་དུ་བསྐོར་བ་བྱས་ནས་གློ་གཡས་པ་ཕུག་ནས་ལྟོར་ཞུགས་པ་བཞིན་དུ་གྱུར་ཏོ། །དེ་ལྟར་བྲེའི་སྐར་མ་མཆོག་ལ་ལྷུམས་སུ་ཞུགས་སོ། །ཉི་མ་གཉིས་པ་ལ་དེའི་སྔ་དྲོ་སད་དེ་ལྷ་མོས་རྒྱལ་པོ་ལ་རྨི་ལམ་རྣམས་སྨྲས་སོ། །རྒྱལ་པོས་བྲམ་ཟེ་དྲུག་ཅུ་རྩ་བཞི་བོས་ནས་མེ་ཏོག་ཕྲེང་བ་ལ་སོགས་པ་དང། བཀྲ་ཤིས་དང་བསྟི་སྟང་
བྱེད་ཅིང་ས་ལ་མལ་སྟན་ཆེན་པོ་བཤམས་ཏེ་དེ་ལ་བཞུགས་པའི་བྲམ་ཟེ་རྣམས་ལ་མར་གསར་དང་སྦྲང་རྩི་དང་ཀ་ར་རྣམས་དང་བསྲེས་པའི་འོ་ཐུག་རྣམས་གསེར་དང་དངུལ་ལས་བྱས་པའི་སྡེར་མ་བཀང་སྟེ་གསེར་དང་དངུལ་གྱི་སྡེར་མས་སོ་སོར་བཀབ་ནས་བྲམ་ཟེ་རྣམས་ལ་ཕུལ་ལོ། །གཞན་ཡང་རྒྱལ་པོ་གྱོན་པ་དང་མཚུངས་པའི་གོས་དང་གསེར་རྒྱ་མ་ལ་སོགས་པ་བྱིན་ནས་དེ་རྣམས་ཚིམ་པར་བྱས་སོ། །དེ་ནས་དེ་ཐམས་ཅད་འདོད་པ་ཐམས་ཅད་ཀྱིས་ཚིམ་པར་གྱུར་ནས་རྨི་ལམ་བཤད་དེ་ཅི་འདྲ་བར་འགྱུར་ཞེས་དྲིས་སོ། །བྲམ་ཟེ་རྣམས་ཀྱིས་སྨྲས་པ། རྒྱལ་པོ་ཆེན་པོ་འཇིགས་པར་མ་བྱེད་ཅིག །ཁྱོད་ཀྱི་ལྷ་མོའི་ལྟོའི་ནང་དུ་སེམས་ཅན་ཞུགས་ཏེ། དེ་ཡང་ནང་གི་དེ་སྐྱེས་བུའོ། །མངལ་གྱི་ནང་གི་དེ་བུ་མོ་ནི་མ་ཡིན་ནོ། །དེ་ཁྱེད་ཀྱི་སྲས་པོར་འགྱུར་རོ། །དེ་གལ་ཏེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །གལ་ཏེ་ཁྱིམ་སྤངས་ནས་རབ་ཏུ་བྱུང་ན་སངས་རྒྱ་བར་འགྱུར་རོ། །འཇིག་རྟེན་དུ་བཟློག་ནས་སླར་ཁྱིམ་ན་གནས་ནས་སྐྱེ་བ་མེད་དོ། །གཞན་ཡང་བྱང་ཆུབ་སེམས་དཔའ་ཡུམ་གྱི་མངལ་དུ་ཞུགས་པ་དེ་མ་ཐག་ཏུ་ཐུན་གཅིག་ཉིད་ལ་སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་ཡང་དག་པར་གཡོས་སོ། །ཡང་དག་པར་རབ་ཏུ་གཡོས་སོ། །ཡང་དག་པར་སྒྲ་སྒྲོགས་སོ། །མཚན་མ་སུམ་ཅུ་རྩ་གཉིས་སྔོན་གྱི་མཚན་མར་གྱུར་ཏོ། །སྟོང་ཕྲག་བཅུའི་ཁོར་ཡུག་རྣམས་སུ་སྣང་བ་ཚད་མེད་པར་ཁྱབ་ཅིང་གནས་སོ། །དེ་ཡང་དེའི་དཔལ་བལྟ་བ་འདི་ལྟ་བུ་སྟེ་ལོང་བ་རྣམས་ཀྱིས་མིག་ཐོབ་བོ། །འོན་པ་རྣམས་ཀྱིས་རྣ་བས་སྒྲ་ཐོས་སོ། །ལྐུགས་པ་རྣམས་ཀྱིས་སྨྲ་ཤེས་སོ། །སྒུར་པོ་རྣམས་དྲང་པོར་གྱུར་ཏོ། །གོང་པོ་རྣམས་ཀྱིས་འགྲོ་ཤེས་པར་གྱུར་ཏོ། །བཅིངས་པའི་སེམས་ཅན་ཐམས་ཅད་ནི་རྗེས་སུ་བཅིངས་པ་ལས་གྲོལ་བར་གྱུར་ཏོ། །དམྱལ་བ་ཐམས་ཅད་ཀྱི་མེ་ཞི་བར་གྱུར་ཏོ། །ཡི་དགས་ཀྱི་ཡུལ་པ་རྣམས་བཀྲེས་པ་དང་སྐོམ་པ་ཞི་བར་གྱུར་ཏོ། །དུད་འགྲོ་རྣམས་ཕན་ཚུན་འཇིགས་པ་མེད་པར་གྱུར་ཏོ། །སེམས་ཅན་ཐམས་ཅད་ཀྱི་ནད་ཞི་བར་གྱུར་ཏོ། །སེམས་ཅན་ཐམས་ཅད་དགའ་བཞིན་དུ་སྨྲ་བར་གྱུར་ཏོ། །རྟ་རྣམས་སྐད་སྙན་པའི་རྣམ་པར་གྱུར་ཏོ། །གླང་པོ་རྣམས་ནི་སྒྲ་སྒྲོགས་སོ། །རོལ་མོ་རྣམས་རང་བྱུང་གི་སྒྲ་སྒྲོགས་སོ། །མི་རྣམས་ཀྱི་རྐང་པ་དང་ལག་པའི་རྒྱན་རང་
རང་མ་རེག་པར་སོ་སོར་འབྱིན་ཏོ། །ཕྱོགས་ཐམས་ཅད་རབ་ཏུ་དངས་པར་གྱུར་ཏོ། །སེམས་ཅན་རྣམས་བདེ་བ་བསྐྱེད་པའི་ཕྱིར་རླུང་འཇམ་པོ་ལྡང་བར་གྱུར་ཏོ། །དུས་མ་ཡིན་པར་སྤྲིན་ལ་ཆར་འབབ་བོ། །ས་ལ་ཆུ་བྱུང་ནས་ཕྱོགས་ཐམས་ཅད་ཆུར་གྱུར་ཏོ། །བྱ་རྣམས་ནམ་མཁའ་ལ་འགྲོ་བ་སྤོང་ངོ་། །ཆུ་ཀླུང་རྣམས་འགྲོ་བ་མེད་པར་གནས་སོ། །རྒྱ་མཚོ་ཆེན་པོའི་ཆུ་ནི་དངར་བར་གྱུར་ཏོ། །གནས་ཐམས་ཅད་ཉིད་དུ་ཁ་དོག་ལྔ་པའི་པད་མས་སའི་སྟེང་ཐམས་ཅད་ཁྱབ་པར་གྱུར་ཏོ། །ཐང་དང་ཆུ་ལས་སྐྱེས་པའི་མེ་ཏོག་རྣམས་ཁ་བྱེ་བར་གྱུར་ཏོ། །ལྗོན་ཤིང་རྣམས་ཀྱི་སྡོང་པོ་ལ་སྡོང་པོའི་པད་མའི་མེ་ཏོག་གོ། །ཡལ་ག་རྣམས་ལ་ཡལ་གའི་པད་མའི་མེ་ཏོག་གོ། །འཁྲི་ཤིང་རྣམས་ལ་འཁྲི་ཤིང་གི་པད་མའི་མེ་ཏོག་ཁ་བྱེའོ། །ཐང་དང་རྡོའི་སྟེང་དུ་བརྟོལ་ནས་སྟེང་ནས་སྟེང་དུ་བདུན་བདུན་དུ་གྱུར་ནས་དན་དྲ་པད་མ་ཞེས་བྱ་བ་ཕྱུང་ངོ་། །ནམ་མཁའ་ནས་ཐུར་དུ་པད་མ་འཕྱང་ངོ་། །ཐམས་ཅད་དུ་མེ་ཏོག་གི་ཆར་འབབ་བོ། །ནམ་མཁའ་ལ་ལྷའི་རོལ་མོའི་སྒྲ་སྒྲོགས་སོ། །སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་མེ་ཏོག་དང་བདུག་སྤོས་དང་དྲི་ཆབ་མཆོག་ཏུ་སྐལ་བ་བཟང་བར་གྱུར་ཏོ། །འདི་ལྟར་བྱང་ཆུབ་སེམས་དཔའ་མངལ་དུ་ཞུགས་པ་ཉིད་ནས་བྱང་ཆུབ་སེམས་དཔའ་དང། བྱང་ཆུབ་སེམས་དཔའི་ཡུམ་གྱི་ཉེ་བར་འཚེ་བ་བཟློག་པའི་ཕྱིར་རལ་གྲི་ལག་ཏུ་ཐོགས་པའི་ལྷའི་བུ་བཞིས་སྲུང་བར་བྱེད་དོ། །བྱང་ཆུབ་སེམས་དཔའི་ཡུམ་ནི་སྐྱེས་པ་ལ་འདོད་ཆགས་མི་སྐྱེ་ཞིང། རྙེད་པ་དང་གྲགས་པ་ཐོབ་པར་གྱུར་ཏོ། །སྐྱིད་པ་སྐུ་ལ་དུབ་པ་མེད་པར་བྱང་ཆུབ་སེམས་དཔའ་དེ་ཡང་རུམ་དུ་ཞུགས་ནས། ནོར་བུ་རིན་པོ་ཆེ་རབ་ཏུ་དངས་པ་སྲད་བུ་དམར་པོ་ལ་བརྒྱུས་པ་བཞིན་དུ་མཐོང་ངོ་། །གང་གི་ཕྱིར་ཡང་བྱང་ཆུབ་སེམས་དཔའ་ཞུགས་པའི་རུམ་ཞེས་བྱ་བ་ནི་མཆོད་རྟེན་གྱི་ནང་བཞིན་དུ་སེམས་ཅན་གཞན་གྱིས་རེག་པ་དང་ལོངས་སྤྱོད་པར་མི་ནུས་སོ། །དེའི་ཕྱིར་བྱང་ཆུབ་སེམས་དཔའི་ཡུམ་བྱང་ཆུབ་སེམས་དཔའ་འཁྲུངས་ནས་ཞག་བདུན་ནས་དུས་ལས་འདས་ནས་དགའ་ལྡན་དུ་སྐྱེ་བར་འགྱུར་རོ། །ཇི་ལྟར་ཡང་བུད་མེད་གཞན་ཟླ་བ་བཅུ་ལས་དམན་པའམ། ལྷག་པའམ། འདུག་པའམ། ཉལ་ནས་སྐྱེའོ། །བྱང་ཆུབ་སེམས་དཔའི་ཡུམ་ནི་དེ་ལྟ་བུ་མ་ཡིན་ཏེ། དེ་ཡང་བྱང་ཆུབ་སེམས་དཔའ་ཟླ་བ་བཅུར་རུམ་དུ་བསྲུངས་
ནས་འགྲེང་བ་ལ་སྐྱེའོ། །འདི་ནི་བྱང་ཆུབ་སེམས་དཔའི་ཡུམ་ཐམས་ཅད་ཀྱི་ཆོས་ཉིད་དོ། །ལྷ་མོ་སྒྱུ་འཕྲུལ་མ་ཆེན་མོ་ཡང་སྣོད་ཀྱི་ནང་གི་འབྲུ་མར་བཞིན་དུ་བྱང་ཆུབ་སེམས་དཔའ་ཟླ་བ་བཅུར་རུམ་དུ་འཚོ་ཞིང་རུམ་ཡོངས་སུ་རྫོགས་ནས་གཉེན་གྱི་གྲོང་དུ་འགྲོའོ་ཞེས་རྒྱལ་པོ་ཆེན་པོ་ཟས་གཙང་གི་དྲུང་དུ་སྨྲས་སོ། །ལྷ་རིགས་ཀྱི་རྒྱུད་ཀྱི་གྲོང་ཁྱེར་ཆེན་པོ་ལྷ་བསྟན་དུ་བདག་འགྲོ་བར་འདོད་དོ། །རྒྱལ་པོས་ལེགས་སོ་ཞེས་བརྗོད་ནས་གནང་ངོ་། །སེར་སྐྱའི་གཞི་དང། གྲོང་ཁྱེར་ལྷ་བསྟན་གཉིས་ཀྱི་བར་གྱི་ལམ་མཚུངས་པར་བྱས་ནས། ཆུ་ཤིང་དང། བུམ་པ་གང་བ་དང། རྒྱལ་མཚན་དང་བ་དན་ལ་སོགས་པའི་རྒྱན་འཛུགས་སུ་བཅུག་ནས་ལྷ་མོ་གསེར་གྱི་དོ་ལི་ལ་བཞུགས་ཏེ། བློན་པོ་སྟོང་ཕྲག་གཅིག་གིས་བཏེག་སྟེ་འཁོར་མང་པོ་དང་བཅས་པ་བཏང་ངོ་། །གྲོང་ཁྱེར་གཉིས་ཀྱི་བར་དུ་ཡང་གཉིས་ཀའི་གྲོང་ཁྱེར་པ་གནས་པའི་ལུམྦི་ནཱིའི་ཚལ་ཞེས་བྱ་བ་ལ་བཀྲ་ཤིས་པའི་ཤིང་སཱ་ལའི་ཤིང་ཡོད་དོ། །དེའི་དུས་སུ་རྩ་བ་ནས་རྩེ་མོའི་ཡལ་གའི་བར་ཐམས་ཅད་དུ་བར་མ་ཆད་པར་མེ་ཏོག་ཁ་བྱེ་བར་གྱུར་ཏོ། །ཡལ་གའི་བར་ཉིད་དང། མེ་ཏོག་གི་བར་ཁ་དོག་སྣ་ལྔ་པའི་བུང་བ་མང་པོ་ལྡིང་བ་དང། རྣམ་པ་སྣ་ཚོགས་པའི་བྱ་མང་པོའི་ཚོགས་ནི་སྙན་པའི་སྒྲ་དབྱངས་སྒྲོགས་ཤིང་སྤྱོད་དོ། །ལུམྦི་ནཱིའི་ཚལ་ཐམས་ཅད་ནི་ཤིང་རྟ་སྣ་ཚོགས་པའི་ཚལ་བཞིན་དུ་མཐུ་དང་དབང་ཕྱུག་ནི་རྒྱལ་པོའི་མཛེས་པར་བྱས་པའི་འདུན་ས་ལྟ་བུ་དེ་ལྷ་མོས་གཟིགས་ནས་ཤིང་སཱ་ལའི་ཚལ་དུ་རྩེ་བར་བསམས་པ་སྐྱེས་སོ། །བློན་པོ་རྣམས་ཀྱིས་ལྷ་མོ་བཏེག་ནས་ཤིང་སཱ་ལའི་ཚལ་དུ་བཞུགས་སོ། །དེ་བཀྲ་ཤིས་པའི་ཤིང་སཱ་ལའི་རྩ་བར་གཤེགས་པ་ཏེ་དེས་ཤིང་སཱ་ལའི་ཡལ་ག་གཟུང་བར་སེམས་པར་གྱུར་ཏེ། དེས་ཤིང་སཱ་ལའི་ཡལ་ག་ཤིན་ཏུ་ལེགས་པ་མེ་ལ་བསྲོས་ནས་བཀུག་པ་བཞིན་དུ་མདུད་པ་ལ་ལྷ་མོའི་ལག་པར་ཉེ་བར་འཕྱང་ངོ་། །དེའི་ལག་པ་བརྐྱང་ནས་ཡལ་གའི་རྩེ་མོ་བཟུང་ངོ་། །དེ་མ་ཐག་ཏུ་ལས་ཀྱི་རླུང་གིས་བསྐྱོད་དོ། །དེ་ནས་དེའི་ཕྱོགས་ཀུན་དུ་ཡོལ་བ་བྱས་ནས་སྐྱེ་བོ་ཐམས་ཅད་ཕྱིར་རིང་དུ་གྱུར་ཏེ་ཤིང་སཱ་ལའི་ཡལ་ག་བཟུང་ནས་འདུག་པ་ཉིད་ལ་དེ་ལྟར་དེའི་མངལ་ནས་བལྟམས་པར་གྱུར་ཏོ། །དེ་མ་ཐག་རྣམ་པར་དག་པའི་སེམས་དང་ལྡན་པའི་ཚངས་པ་བཞི་པོས་གསེར་གྱི་དྲ་བ་བླངས་ནས་སླེབ་བོ། །དེ་རྣམས་ཀྱིས་དེར་
གསེར་གྱི་དྲ་བས་བྱང་ཆུབ་སེམས་དཔའ་བླངས་ཏེ་ཡུམ་གྱི་མདུན་ན་འདུག་གོ། །ལྷ་མོ་སེམས་སྡུག་བསྔལ་བར་མ་བྱེད་ཅིག །ཁྱེད་ཀྱི་སྲས་དབང་ཕྱུག་དང་གྲགས་པ་དང་བཅས་པ་བལྟམས་སོ་ཞེས་སྨྲས་སོ། །དེ་ལྟར་ཡང་སེམས་ཅན་གཞན་རྣམས་མའི་རུམ་ནས་འཐོན་པ་ན་མི་གཙང་བས་གོས་ཤིང་སྐྱུག་བྲོ་བ་ཅན་འཐོན་ནོ། །བྱང་ཆུབ་སེམས་དཔའ་ནི་དེ་ལྟ་བུ་མ་ཡིན་ནོ། །གཞན་ཡང་ཆོས་ཀྱི་ཁྲི་ནས་ཆོས་འཆད་པ་འབབ་པ་བཞིན་དང་སྐས་ལ་འབབ་པའི་སྐྱེས་བུ་བཞིན་དུ་ལག་པ་གཉིས་དང་རྐང་པ་གཉིས་བརྐྱང་ནས་འདུག་པ་ཉིད་བཞིན་ནོ། །མའི་རུམ་ནས་མི་གཙང་བ་ཅུང་ཟད་ཀྱིས་ཀྱང་མ་གོས་པར་དག་ཅིང་འཇིགས་པ་མེད་པ་བཞིན་ནོ། །ཡུལ་ཀ་ཤི་ཀའི་རས་ཀྱི་ནང་དུ་ནོར་བུ་རིན་པོ་ཆེ་བཅུག་པ་བཞིན་དུ་འོད་འགྱེད་ཅིང་ཡུམ་གྱི་རུམ་ནས་འཐོན་ནོ། །དེ་ལྟར་གྱུར་པའི་བྱང་ཆུབ་སེམས་དཔའ་དེ་དང་བྱང་ཆུབ་སེམས་དཔའི་ཡུམ་དེ་དག་པར་བྱ་བའི་ཕྱིར་ནམ་མཁའ་ནས་ཆུའི་རྒྱུན་གཉིས་བབས་པས་བྱང་ཆུབ་སེམས་དཔའ་དང་ཡུམ་གྱི་སྐུ་དག་པར་བྱས་སོ། །དེ་ཡང་གསེར་གྱི་དྲ་བས་བླངས་ནས་ཚངས་པ་འདུག་པའི་ལག་ནས་རྒྱལ་པོ་ཆེན་པོ་བཞི་པོ་རྣམས་ཀྱིས་བཀྲ་ཤིས་པ་དང། བདེ་བ་ལ་རེག་པར་གནས་པར་བྱ་བའི་ཕྱིར་གཟིག་གི་པགས་པས་སྔར་གྱི་བཞིན་དུ་བླངས་སོ། །དེ་རྣམས་ཀྱི་ལག་ནས་མི་རྣམས་ཀྱིས་དུ་གུ་ལའི་རས་ཀྱི་སྟེང་དུ་བླངས་སོ། །མི་རྣམས་ཀྱི་ལག་ཏུ་བཏང་ནས་ས་ལ་གནས་སོ། །ཤར་ཕྱོགས་ལ་གཟིགས་ཏེ་སྟོང་ཕྲག་དུ་མའི་ཁོར་ཡུག་རྣམས་ཕན་ཚུན་དུ་མཐོང་ངོ་། །དེའི་ལྷ་དང་མི་རྣམས་ཀྱིས་མེ་ཏོག་གི་ཕྲེང་བ་དང་སྤོས་ལ་སོགས་པས་མཆོད་ཅིང་སྐྱེས་བུ་ཆེན་པོ་ཁྱོད་ལྟ་བུ་འདི་ན་མེད་ཁྱོད་ཀྱི་གོང་ན་གཞན་སུ་ཡང་མེད་དོ་ཞེས་སྨྲས་སོ། །དེ་བཞིན་དུ་ཕྱོགས་བཞི་དང་མཚམས་བཞི་དང་འོག་དང་སྟེང་སྟེ་ཕྱོགས་བཅུ་པོ་ཐམས་ཅད་ལེགས་པར་གཟིགས་ནས་བདག་དང་མཚུངས་པ་མེད་པར་མཐོང་ངོ་། །དེ་ནས་བྱང་གི་ཕྱོགས་སུ་གོམ་པ་བདུན་བགྲོད་དོ། །ཚངས་པ་ཆེན་པོའི་གདུགས་དཀར་པོ་འཛིན་ཅིང་འཐབ་བྲལ་བས་རྔ་ཡབ་གཡོབ་པ། ལྷ་གཞན་རྣམས་ཀྱིས་རྒྱལ་པོ་ལ་ཉེ་བར་མཁོ་བའི་དངོས་པོ་མ་ལུས་པ་ལག་ཏུ་ཐོགས་ནས་རྗེས་སུ་འགྲོའོ། །དེ་ནས་གོམ་པ་བདུན་པ་ལ་གནས་པ་ན་འཇིག་རྟེན་པ་རྣམས་ལས་བདག་མཆོག་གོ་ཞེས་པ་ལ་སོགས་པའི་ཤིས་པ་བརྗོད་པའི་གཏམ་བརྗོད་ཅིང།
སེང་གེའི་སྒྲ་སྒྲོགས་སོ། །བྱང་ཆུབ་སེམས་དཔས་ཀྱང་སྐྱེ་བ་གསུམ་དུ་རུམ་ནས་འཐོན་ཙམ་ན་གཏམ་དུ་བརྗོད་དོ། །སྨན་ཆེན་པོར་སྐྱེས་པ་དང་ཐམས་ཅད་སྒྲོལ་དུ་སྐྱེས་པ་དང་འདིར་སྐྱེས་པའོ། །སྨན་ཆེན་པོ་སྐྱེས་པ་ན་ཡུམ་གྱི་རུམ་ནས་འཐོན་མ་ཐག་ཉིད་དུ་བརྒྱ་བྱིན་ལྷའི་རྒྱལ་པོ་འོངས་ཏེ་ཙན་དན་གྱི་སྙིང་པོ་ལག་ཏུ་ཐོགས་ནས་སོང་ངོ་། །དེ་དེ་རྣམས་ཀྱི་ཁུ་ཚུར་དུ་བཅུག་ནས་འཐོན་ནོ། །དེ་ནས་ཡང་ཡུམ་གྱིས་དྲིས་པ། བུ་ཅི་ཁྱེར་ནས་འོངས། མ་སྨན་ཡིན་ནོ། །འདིས་སྨན་ཁྱེར་ནས་འོངས་པའི་ཕྱིར་སྨན་གྱི་ཁྱེའུ་ཞེས་བྱ་བར་མིང་བཏགས་སོ། །དེས་སྨན་བླངས་ནས་ཆུའི་སྣོད་ཀྱི་ནང་དུ་བཅུག་གོ། །འོངས་ཤིང་འོངས་པའི་ལོང་བ་དང་འོན་པ་ལ་སོགས་པ་དེ་རྣམས་དེ་ཉིད་ཀྱིས་ནད་ཐམས་ཅད་ཉེ་བར་ཞི་བས་ན་སྨན་པར་གྱུར་ཏོ། །དེ་ནས་སྨན་ཆེན་པོ་སྨན་ཆེན་པོ་ཞེས་བརྗོད་ཅིང་སྐྱེས་པའི་ཚིག་གི་རྒྱུས་སྨན་ཆེན་པོ་ཉིད་དེའི་མིང་དུ་གྱུར་ཏོ། །གཞན་ཡང་ཐམས་ཅད་སྒྲོལ་དུ་སྐྱེས་པ་ན་མའི་རུམ་ནས་སྐྱེས་ཙམ་ན་ལག་པ་གཡས་པ་བརྐྱང་ནས་ཡུམ་བདག་ཅག་གི་ཁྱིམ་ན་སྦྱིན་པ་བཏང་རྒྱུ་འདྲ་བདོག་གེ་ཞེས་བརྗོད་ཅིང་འཐོན་ནོ། །དེ་ནས་དེའི་མས། བུ་འབྱོར་པ་དང་ལྡན་པའི་རིགས་སུ་ཁྱོད་སྐྱེས་སོ། །བུའི་ལག་པ་རང་གི་ལག་པའི་སྟེང་དུ་བཞག་སྟེ་ནོར་བུ་རིན་པོ་ཆེ་སྟོང་ཕྲག་གཅིག་གི་སྣོད་བཞག་གོ། །གཞན་ཡང་འདི་སྐྱེས་པ་ན་འདིས་སེང་གེའི་སྒྲ་སྒྲོགས་སོ། །དེ་བཞིན་དུ་བྱང་ཆུབ་སེམས་དཔའ་སྐྱེ་བ་གསུམ་དུ་མའི་རུམ་ནས་སྐྱེས་ཙམ་ནས་གཏམ་བརྗོད་དོ། །ཇི་ལྟར་ཡང་རུམ་དུ་ཞུགས་ཙམ་དང་བལྟམས་ཙམ་ན་སུམ་ཅུ་རྩ་གཉིས་སྔོན་གྱི་མཚན་མ་བཞིན་དུ་སྐྱེས་པར་གྱུར་ཏོ། །གཞན་ཡང་གང་གི་ཚེ་བདག་ཅག་གི་བྱང་ཆུབ་སེམས་དཔའ་ལུམྦི་ནཱིའི་ཚལ་དུ་བལྟམས་སོ། །དེ་མ་ཐག་ཏུ་ལྷ་མོ་སྒྲ་གཅན་འཛིན་གྱི་མ་དང། བློན་པོ་འདུན་པ་དང། བློན་པོ་ནག་པོ་འཆར་ཀ་དང། རྟའི་རྒྱལ་པོ་བསྔགས་ལྡན་དང། བྱང་ཆུབ་ཀྱི་ཤིང་དང། གཏེར་བཞིའི་བུམ་པ་སྐྱེས་སོ། །དེ་ལ་གཅིག་ལ་རྒྱང་གྲགས་བཞི་དང། གཅིག་ལ་རྒྱང་གྲགས་བརྒྱད་དང། གཅིག་ལ་རྒྱང་གྲགས་བཅུ་གཉིས་དང། གཅིག་ལ་རྒྱང་གྲགས་བཅུ་དྲུག་གོ། །བདུན་པོ་འདི་ལྷན་ཅིག་ཏུ་སྐྱེས་པ་ཡིན་ནོ། །གྲོང་ཁྱེར་གཉིས་ན་གནས་པའི་མི་རྣམས་ཀྱིས་བྱང་ཆུབ་སེམས་དཔའ་ཁྲིད་ནས་གྲོང་ཁྱེར་སེར་སྐྱའི་གཞི་ཁོ་ནར་ཕྱིན་ནོ། །ཉི་མ་དེ་ཉིད་
ལ་གྲོང་ཁྱེར་སེར་སྐྱའི་གཞི་ལ་རྒྱལ་པོ་ཆེན་པོ་ཟས་གཙང་གི་སྲས་པོར་བལྟམས་སོ། །གཞོན་ནུ་འདི་བྱང་ཆུབ་ཤིང་གི་དྲུང་དུ་བཞུགས་ནས་སངས་རྒྱས་སུ་འགྱུར་རོ་ཞེས་པ་ལ་སུམ་ཅུ་རྩ་གསུམ་གྱི་གནས་ཀྱི་ལྷ་རྣམས་ཀྱིས་དགའ་བ་དང་ཚིམ་པས་ལག་པ་གྱེན་དུ་བསྐྱོད་ནས་རྩེ་ཞིང་བསྟོད་པ་བྱེད་དོ། །དེའི་ཚེ་རྒྱལ་པོ་ཆེན་པོ་ཟས་གཙང་གི་མཆོད་གནས་སྙོམས་པར་འཇུག་པ་བརྒྱད་ཐོབ་པའི་དཀའ་ཐུབ་པ་ནག་པོ་ལྷ་ལེན་ཞེས་བྱ་བ་ཁ་ཟས་བཟང་པོ་ལ་ལོངས་སྤྱོད་དོ། །ཉིན་མོ་ཉི་མ་ལ་མི་གནས་པའི་ཕྱིར་སུམ་ཅུ་རྩ་གསུམ་གྱི་གནས་སུ་འགྲོ་ཞིང་དེར་བདེ་བར་འདུག་ནས་ལྷ་དེ་རྣམས་བལྟའོ། །ཁྱེད་རྣམས་ཅིའི་ཕྱིར་འདི་ལྟར་དགའ་བའི་སེམས་ཀྱིས་རྩེ། བདག་ཀྱང་འདི་རྣམས་ཀྱི་ཆེད་དུ་བྱ་བ་ཁོ་བོ་ལ་སྟོན་ཅིག་ཅེས་དྲིས་སོ། །ལྷ་རྣམས་ཀྱིས་སྨྲས་པ། དྲང་སྲོང་ཆེན་པོ་རྒྱལ་པོ་ཆེན་པོ་ཟས་གཙང་གི་སྲས་བལྟམས་སོ། །དེས་བྱང་ཆུབ་ཤིང་གི་དྲུང་དུ་བཞུགས་ནས་སངས་རྒྱས་སུ་གྱུར་ནས་ཆོས་ཀྱི་འཁོར་ལོ་བསྐོར་རོ། །དེ་ནས་མཐའ་ཡས་པའི་སངས་རྒྱས་ཀྱི་རོལ་མོ་བལྟ་བ་དང། ཆོས་ཐམས་ཅད་ཐོབ་བོ་སྙམ་པ་འདི་རྣམས་ཀྱི་རྒྱུ་མཚན་གྱིས་དགའ་བར་གྱུར་ཏོ། །དཀའ་ཐུབ་པས་དེའི་ཚིག་ཐོས་ནས་མྱུར་དུ་ལྷའི་ཡུལ་ནས་བབས་ཏེ་རྒྱལ་པོའི་གནས་སུ་འོངས་ནས། གདན་བཤམས་པ་ལ་འདུག་སྟེ། བུ་རྣམས་རྒྱལ་པོ་ཆེན་པོའི་སྲས་སུ་གྱུར་པ་དེ་བདག་གིས་བལྟའོ་ཞེས་སྨྲས་སོ། །རྒྱལ་པོས་རྒྱན་དང་ལྡན་པའི་གཞོན་ནུ་བླངས་ནས་དཀའ་ཐུབ་པ་ལ་ཕྱག་བྱ་བའི་ཕྱིར་བྱང་ཆུབ་སེམས་དཔའི་ཞབས་ཀྱིས་བསྐོར་ནས་དཀའ་ཐུབ་པའི་རལ་པའི་སྟེང་ན་འདུག་གོ། །བྱང་ཆུབ་སེམས་དཔས་ཀྱང་དེ་རྣམས་ཀྱི་ལུས་ཀྱིས་ཕྱག་བྱེད་པར་རིག་པ་གཞན་མེད་དོ། །གལ་ཏེ་མི་ཤེས་པས་བྱང་ཆུབ་སེམས་དཔའི་དབུ་ལ་དཀའ་ཐུབ་པའི་རྐང་པ་བཞག་ན་དེའི་མགོ་ཚལ་པ་བདུན་དུ་འགས་པར་འགྱུར་རོ། །དཀའ་ཐུབ་པས་བདག་ཉམས་པའི་ཕྱིར་དུ་རིགས་པ་མ་ཡིན་ནོ། །སྟན་ལས་ལངས་ནས་བྱང་ཆུབ་སེམས་དཔའ་ལ་ཐལ་མོ་སྦྱར་རོ། །རྒྱལ་པོས་ཡ་མཚན་ཆེ་བ་གཟིགས་ནས་རང་གི་སྲས་ལ་ཕྱག་བྱས་སོ། །དཀའ་ཐུབ་པས་འདས་པའི་བསྐལ་པ་བཞི་བཅུ་དང་མ་འོངས་པའི་བསྐལ་པ་བཞི་བཅུ་སྟེ། བསྐལ་པ་བརྒྱད་ཅུ་རྗེས་སུ་དྲན་ནོ། །བྱང་ཆུབ་སེམས་དཔའི་མཚན་ཉིད་ཕུན་སུམ་ཚོགས་པ་མཐོང་ནས་སངས་རྒྱ་བར་འགྱུར་རམ་མི་འགྱུར་
ཞེས་བརྟགས་པས་ཐེ་ཚོམ་མེད་པར་སངས་རྒྱས་སུ་འགྱུར་བར་རྟོགས་ཏེ། འདི་ཡ་མཚན་ཆེ་བའི་སྐྱེས་བུ་ཡིན་ནོ་ཞེས་བསམས་ནས་བགད་དོ། །དེ་ནས་འདི་ནས་སངས་རྒྱས་ནས་བདག་གིས་མཐོང་ངམ་མི་མཐོང་ཞེས་བརྟགས་པས་མི་མཐོང་ངོ་། །བར་དུ་དུས་ལས་འདས་ནས་སངས་རྒྱས་བརྒྱ་འམ་སངས་རྒྱས་སྟོང་གཤེགས་ནས་བརྟག་པར་མི་ནུས་པའི་གཟུགས་མེད་པའི་གནས་སུ་སྐྱེ་བར་ངེས་པར་མཐོང་ངོ་། །འདི་ལྟ་བུའི་ཚུལ་གྱི་ཡ་མཚན་ཆེ་བའི་སྐྱེས་བུ་མཐོང་བར་མི་ནུས་སོ་སྙམ་སྟེ་བདག་གི་སེམས་ཤིན་ཏུ་སྡུག་བསྔལ་བར་གྱུར་ནས་ངུས་སོ། །དེ་མི་རྣམས་ཀྱིས་མཐོང་སྟེ། བདག་ཅག་གི་འཕགས་པ་རེས་འགའ་ནི་དགོད་རེས་འགའ་ནི་ངུ་བའི་རྒྱུ་མཚན་ཅི་ལགས། བདག་ཅག་གི་སྲས་འཕགས་པ་ལ་བར་དུ་གཅོད་པ་འོང་ངམ་ཞེས་དྲིས་སོ། །འདི་ལ་བར་དུ་གཅོད་པ་མི་འབྱུང་ཞིང་ཐེ་ཚོམ་མེད་པར་སངས་རྒྱས་སུ་འགྱུར་རོ་ཞེས་སྨྲས་སོ། །འོ་ན་གང་གི་ཕྱིར་ངུ་ཞེས་དྲིས་སོ། །འདི་ལྟ་བུའི་ཚུལ་གྱིས་སྐྱེས་བུ་སངས་རྒྱ་བར་འགྱུར་བ་བདག་གིས་མཐོང་བར་མི་འགྱུར་བས་བདག་ཤིན་ཏུ་ངེས་པར་སྡུག་བསྔལ་ལོ། །དེའི་ཕྱིར་རང་གི་ཆེད་དུ་མྱ་ངན་གྱིས་ངུའོ་ཞེས་སྨྲས་སོ། །དེས་ན་ཅིའི་ཕྱིར་རང་གི་ཉེ་དུ་རྣམས་ལས་འགའ་ཞིག་གིས་འདི་སངས་རྒྱས་སུ་གྱུར་ནས་མཐོང་བར་འགྱུར་རམ་མི་འགྱུར་ཞེས་བརྟགས་པས་ཚ་བོ་ནཱ་ལ་ཀའི་གཞོན་ནུས་མཐོང་ངོ་། །དེ་སྲིང་མོའི་ཁང་པར་སོང་སྟེ། ནཱ་ལ་ཀ་གཞོན་ནུ་དེ་གང་ན་ཡོད། འཕགས་པ་ཁང་པ་ན་ཡོད་དོ། །དེ་བོས་ལ་ཤོག །དེ་རང་གི་གནས་སུ་འོངས་ནས་ནཱ་ལ་ཀ་ལ་སྨྲས་སོ། །ཚ་བོ་རྒྱལ་པོ་ཆེན་པོ་ཟས་གཙང་གི་རིགས་ཀྱི་བུ་འཁྲུངས་སོ། །འདི་ནི་སངས་རྒྱས་ཀྱི་མྱུ་གུའོ། །ལོ་སུམ་ཅུ་རྩ་ལྔ་འདས་ནས་སངས་རྒྱས་སུ་འགྱུར་ཞིང་ཁྱོད་ཀྱིས་འདི་མཐོང་བར་འགྱུར་བས་ད་ལྟ་ཉིད་དུ་རབ་ཏུ་བྱུང་བ་གྱིས་ཤིག་ཅེས་སྨྲས་སོ། །བྱེ་བ་བརྒྱད་ཅུ་རྩ་བདུན་གྱི་ནོར་གྱི་རིགས་ལ་སྐྱེས་པའི་གཞོན་ནུས་ཞང་པོ་འདིས་བདག་ལ་དོན་མེད་ཅིང་དགོས་པ་མེད་དོ་ཞེས་བརྗོད་པར་བསམས་སོ། །དེ་མ་ཐག་ཏུ་རང་གི་ཚོང་གནས་སུ་ངུར་སྨྲིག་གི་གོས་ཉིད་དང་སའི་ལྷུང་བཟེད་བླངས་ནས་སྐྲ་དང་ཁ་སྤུ་བྲེགས་ཏེ། ངུར་སྨྲིག་གི་གོས་གྱོན་ནས་གང་ཞིག་འཇིག་རྟེན་པའི་གང་ཟག་གི་མཆོག་གི་མཆོག་ལ་བསམས་ཤིང་བདག་རབ་ཏུ་འབྱུང་བར་འགྱུར་རོ་ཞེས་བསམས་ཏེ་བྱང་ཆུབ་སེམས་དཔའི་ཕྱོགས་སུ་ཐལ་མོ་སྦྱར་ནས་ཡན་ལག་ལྔས་
ཕྱག་བྱེད་དོ། །ལྷུང་བཟེད་སྣོད་དུ་བཅུག་ནས་ཕྲག་པ་ལ་གཟེར་ཏེ་གངས་ཅན་དུ་གཤེགས་ནས་དགེ་སྦྱོང་གི་ཆོས་བྱེད་དོ། །དེས་མཆོག་ཏུ་མངོན་པར་རྫོགས་པར་སངས་རྒྱས་པའི་དེ་བཞིན་གཤེགས་པའི་དྲུང་དུ་ཉེ་བར་སོང་སྟེ། ནཱ་ལ་ཀའི་སོ་སོའི་རྟོགས་པའི་གཏམ་ཐོས་ནས་སླར་ཡང་གངས་ཅན་དུ་གཤེགས་ཏེ་དགྲ་བཅོམ་པ་ཐོབ་བོ། །མཆོག་ཏུ་རྟོགས་དཀའ་བ་རྟོགས་ནས་ཟླ་བ་བདུན་ཉིད་ཀྱི་ནང་དུ་ཚེ་འདས་ཏེ་གསེར་གྱི་རི་གཅིག་ལ་བརྟེན་ནས་འདུག་དེ་ལྷག་མ་མེད་པར་ཡོངས་སུ་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ། །བྱང་ཆུབ་སེམས་དཔའ་ཡང་ཞག་ལྔ་ནས་དབུ་འཁྲུ་བར་བྱེད་ཅིང་མིང་འདོགས་པར་རིགས་སོ་ཞེས་བསམས་ནས་རྒྱལ་པོའི་ཕོ་བྲང་ལ་དྲི་བཞིའི་རིགས་ཀྱིས་བྱུག་པ་བྱས་ཏེ། རིན་པོ་ཆེ་ལྔའི་མེ་ཏོག་གཅལ་དུ་བཀྲམ་ནས་ཆུ་མེད་པའི་འོ་མ་བཙོས་པའི་འོ་ཐུག་འཚོད་ཅིང་རིག་བྱེད་གསུམ་གྱི་ཕ་རོལ་ཏུ་སོན་པའི་བྲམ་ཟེ་བརྒྱ་རྩ་བརྒྱད་མགྲོན་དུ་གཉེར་ཏེ་རྒྱལ་པོའི་ཕོ་བྲང་དུ་བཞུགས་ནས་ཁ་ཟས་བཟང་པོ་ལ་ལོངས་སྤྱོད་ཅིང་བཀུར་སྟི་ཆེན་པོ་བྱས་ནས་མཚན་ཉིད་ཇི་ལྟ་བུ་ཞེས་དྲིས་སོ། །དེ་རྣམས་ལས་དགའ་བྱེད་དང། རྒྱལ་མཚན་དང་མཚན་ཉིད་དང་རིགས་ཀྱི་སྔགས་པ་དང། ཀཽཎྜི་ནྱ་དང་ལག་པ་ཅན་དང་གཤིན་རྗེ་བཟང་དང། ལེགས་སྦྱིན་ཏེ་དེ་རྣམས་དེའི་ཚེ་བྲམ་ཟེ་བརྒྱད་ཡིན་ནོ། །ཡན་ལག་དྲུག་གི་སྔགས་བརྡ་སྤྲད་ནས་བྲམ་ཟེ་བརྒྱད་པོ་འདི་ལྟ་བུ་ཉིད་ཀྱི་མཚན་ཉིད་སོ་སོར་བརྗོད་ནས་དགའ་ལྡན་གནས་ནས་མའི་མངལ་དུ་ཞུགས་པའི་མཚན་ཉིད་འདི་རྣམས་ཀྱིས་བཤད་དོ། །དེ་རྣམས་ལས་བྲམ་ཟེ་བདུན་གྱིས་མཛུབ་མོ་གཉིས་བསྒྲེངས་ཏེ་དོན་གཉིས་ལུང་བསྟན་ནོ། །མཚན་ཉིད་འདི་དང་ལྡན་པས་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོར་འགྱུར་རོ། །རབ་ཏུ་བྱུང་ན་སངས་རྒྱ་བར་འགྱུར་རོ། །འཁོར་ལོས་སྒྱུར་བའི་ཕུན་སུམ་ཚོགས་པ་ཐམས་ཅད་བཤད་པ་རྫོགས་ནས་གཞན་དེ་རྣམས་ཀྱི་ནང་ནས་ཐམས་ཅད་ཀྱི་གཞོན་ཤོས་ཀྱི་རིགས་ནི་ཀཽཎྜི་ནྱ་བྲམ་ཟེའི་ཁྱེའུའོ་ཞེས་བྱ་བའོ། །བྱང་ཆུབ་སེམས་དཔའ་དེའི་མིང་ཚད་མཆོག་རྣམས་རྫོགས་པར་བཏགས་སོ། །འདི་ནི་ཁྱིམ་ན་གནས་པའི་རྒྱུ་མེད་པས་མཐའ་གཅིག་ཉིད་དུ་ཁྱིམ་ན་མི་གནས་པར་སངས་རྒྱའོ། །མཛུབ་མོ་གཅིག་བསྒྲེངས་ཏེ་འདི་ལྟར་ལུང་བསྟན་ནོ། །འདི་ནི་སྔར་གྱི་གཞི་བྱས་པས་ཕྱིས་མིར་གྱུར་པ་ན་ཤེས་རབ་དང་ལྡན་ནོ། །བྲམ་ཟེ་
བདུན་ལས་ལྷག་པར་གྱུར་ནས་འདིའི་མཚན་ཉིད་རིག་པར་ལྡན་ནས་ཁྱིམ་དུ་གནས་པའི་མིང་ཡང་མེད་དོ། །ཐེ་ཚོམ་མེད་པར་སངས་རྒྱ་བར་འགྱུར་ཏེ་འགྲོ་བ་གཅིག་ལས་གཞན་མ་མཐོང་ངོ་། །དེའི་ཕྱིར་མཛུབ་མོ་གཅིག་བསྒྲེངས་ཏེ་འདི་ལྟར་ལུང་བསྟན་ནོ། །དེ་ནས་བྲམ་ཟེ་དེ་རྣམས་རང་གི་ཁྱིམ་དུ་འགྲོ་ཞིང་བུ་རྣམས་བོས་ཏེ། བུ་བདག་ཅག་རྣམས་རྒན་པོར་གྱུར་པས་རྒྱལ་པོ་ཆེན་པོ་ཟས་གཙང་གི་སྲས་ཐམས་ཅད་མཁྱེན་པ་ཐོབ་པར་གྱུར་པ་ན་བདག་ཅག་དང་མཇལ་བར་འགྱུར་རམ་མི་འགྱུར་ཆ་མེད་ཀྱིས། ཁྱོད་དེའི་སྲས་ཀྱིས་ཐམས་ཅད་མཁྱེན་པ་ཐོབ་པར་གྱུར་ནས་དེའི་བསྟན་པ་ལ་རབ་ཏུ་བྱུང་ཅིག་ཅེས་སྨྲས་སོ། །བྲམ་ཟེ་བདུན་པོ་རྣམས་ཀྱིས་ཀྱང་ཇི་སྲིད་ཚེ་གནས་ཀྱི་བར་ཇི་ལྟར་བྱས་པའི་ལས་རྟོགས་སོ། །བྲམ་ཟེའི་ཁྱེའུ་ཀཽཎྜི་ནྱ་ཉིད་ནད་མེད་པར་གྱུར་ནས་གནས་སོ། །དེའི་སེམས་དཔའ་ཆེན་པོ་བློ་དང་ལྡན་པ་ངེས་པར་འབྱུང་བ་ཆེན་པོས་མངོན་པར་བྱུང་ནས་གོ་རིམས་བཞིན་དུ་ལྟེང་རྒྱས་སུ་སོང་ངོ་། །ས་ཕྱོགས་འདི་ནི་ཉམས་དགའ་བས་རིགས་ཀྱི་བུས་ཕྱོགས་འདི་དཀའ་བ་སྤྱོད་པའི་གནས་སུ་རིག་པར་སེམས་སྐྱེས་པས་དེར་གནས་ཏེ་སྐྱེས་བུ་ཆེན་པོ་རབ་ཏུ་བྱུང་ངོ་ཞེས་ཐོས་ནས་བྲམ་ཟེའི་བུའི་གནས་སུ་ཉེ་བར་སོང་ངོ་ཞེས་སྨྲས་སོ། །གཞོན་ནུ་དོན་གྲུབ་རབ་ཏུ་བྱུང་ནས་ཐེ་ཚོམ་མེད་པར་དེ་སངས་རྒྱ་བར་འགྱུར་རོ། །གལ་ཏེ་ཁྱེད་རྣམས་ཀྱི་ཕ་ནད་མེད་པར་གནས་ན་དེ་རིང་ཕྱིན་ནས་རབ་ཏུ་བྱུང་བ་བྱེད་དོ། །གལ་ཏེ་ཁྱོད་ཀྱང་འདོད་ན་འདིར་འོངས་ནས་བདག་གིས་སྐྱེས་བུ་དེའི་རྗེས་སུ་རབ་ཏུ་འབྱུང་བར་བགྱིའོ། །དེ་ཐམས་ཅད་འདུན་པ་གཅིག་པར་མ་ནུས་པར་སྐྱེ་བོ་བཞི་པོ་ལས་ཀཽཎྜི་ནྱས་གཙོ་བོ་བྱས་ནས་སྐྱེ་བོ་ལྔ་པོ་རབ་ཏུ་བྱུང་སྟེ། དེ་རྣམས་ཀྱི་སྐྱེ་བོ་ལྔ་པོ་ནི་གནས་བརྟན་ལྔ་སྡེ་ཞེས་བྱ་བའི་རིགས་སུ་གྱུར་ཏོ། །གཞན་ཡང་དེའི་ཚེ་རྒྱལ་པོ་འདི་སྐད་དུ་གང་མཐོང་ནས་བདག་གི་བུ་རབ་ཏུ་འབྱུང་ཞེས་འདྲིའོ། །སྔོན་གྱི་མཚན་མ་བཞི་མཐོང་བས་དེ་གང་དང་རྒས་ཤིང་འཁོགས་པ་དང་ན་བ་དང་འཆི་བ་དང་རབ་ཏུ་བྱུང་བའོ། །རྒྱལ་པོས་འདི་རྣམས་བཟུང་ནས་འདི་ལྟ་བུའི་ཚུལ་བདག་གི་བུ་དང་ཉེ་བར་འོང་དུ་མ་འཇུག་ཅིག་བདག་གི་སྲས་ཀྱིས་སངས་རྒྱས་ཐོབ་ཀྱང་དོན་མེད་དོ། །བདག་གི་སྲས་སྟོང་ཕྲག་གཉིས་ཀྱི་གླིང་འཁོར་དང་བཅས་པའི་གླིང་ཆེན་པོ་བཞི་པོ་རྣམས་ཀྱི་དབང་ཕྱུག་གི་བདག་པོའི་རྒྱལ་པོ་བྱེད་ཅིང་དཔག་ཚད་སུམ་ཅུ་རྩ་དྲུག་གི་ཁོར་ཡུག་
གི་འཁོར་ནམ་མཁའི་དབྱིངས་སུ་གཤེགས་པ་ལ་བལྟ་བར་འདོད་དོ། །སླར་ཡང་འདི་ལྟར་བརྗོད་ཅིང་འདི་ལྟ་བུའི་རྣམ་པ་བཞིའི་སྐྱེས་བུ་གཞོན་ནུའི་མིག་ལམ་དུ་འོང་བ་བསྲུང་ཞིང་ཕྱོགས་བཞིར་རྒྱང་གྲགས་བཞི་བཞིར་བསྲུང་བ་བཞག་གོ། །དེའི་ཉི་མ་ལ་ཡང་བཀྲ་ཤིས་པའི་གནས་སུ་འདུས་པའི་རིགས་ཀྱི་ཉེ་དུ་སྟོང་ཕྲག་བརྒྱད་ཅུ་པོ་རེ་རེའི་བུ་བརྒྱ་ཡོངས་སུ་སྟེར་བར་བསམས་སོ། །འདི་སངས་རྒྱས་སུ་འགྱུར་རམ་རྒྱལ་པོར་འགྱུར་རམ་བདག་གི་བུ་རེ་རེ་སྟེར་རོ། །གལ་ཏེ་སངས་རྒྱས་པར་གྱུར་ན་རྒྱལ་རིགས་ཀྱི་དགེ་སྦྱོང་ཉིད་ཀྱིས་མདུན་རྒྱབ་ཐམས་ཅད་དུ་བསྐོར་ནས་འགྲོ་བ་ཡིན་ནོ། །གལ་ཏེ་རྒྱལ་པོར་གྱུར་ན་རྒྱལ་རིགས་ཀྱི་གཞོན་ནུ་ཉིད་ཀྱིས་མདུན་རྒྱབ་ཀུན་ནས་བསྐོར་ནས་འགྲོའོ་ཞེས་སྨྲ་ཞིང་འབུལ་ལོ། །རྒྱལ་པོས་ཀྱང་བྱང་ཆུབ་སེམས་དཔའ་ལ་གཟུགས་མཆོག་དང་ལྡན་པ་སྐྱོན་ཐམས་ཅད་སྤངས་པའི་ནུ་མ་སྣུན་པ་ཉིད་གནས་པ་བྱིན་ནོ། །བྱང་ཆུབ་སེམས་དཔའ་འཁོར་མཐའ་ཡས་པ་དཔལ་དང་སྐལ་བ་འཕེལ་བ་དང་ལྡན་ནོ། །དེ་ནས་ཉི་མ་གཅིག་ལ་རྒྱལ་པོའི་འབྲས་འདེབས་པ་ལ་བཀྲ་ཤིས་བྱེད་དོ། །དེའི་ཉི་མ་ལ་གྲོང་ཁྱེར་ཐམས་ཅད་དུ་ལྷ་གཤེགས་པ་བཞིན་དུ་བརྒྱན་ནོ། །བྲན་དང་ལས་བྱེད་པ་ལ་སོགས་པས་གོས་ལེགས་པོ་གྱོན་ནས་སྤོས་དང་མེ་ཏོག་གི་ཕྲེང་བ་ལ་སོགས་པས་བརྒྱན་པར་བྱས་ནས་རྒྱལ་པོའི་ཕོ་བྲང་གི་ནང་དུ་འདུས་སོ། །རྒྱལ་པོའི་གཞིས་རྣམས་ལ་ཞིང་རྨོ་བ་སྟོང་ཕྲག་གཅིག་རིགས་སོ། །སླར་ཡང་དེའི་ཉི་མ་ལ་གཅིག་གིས་དམན་པའི་ཞིང་རྨོ་བ་བརྒྱད་བརྒྱ་དང་བཅས་པའི་གླང་གི་གཉའ་ཤིང་གི་ཐག་པ་དངུལ་ལས་བྱས་པ་དང། རྒྱལ་པོ་འཛིན་པའི་ཞིང་རྨོ་བའི་ཐོང་པ་སླར་ཡང་གསེར་ལས་བྱས་པར་གྱུར་ཏོ། །གླང་གི་རྭ་གཉིས་ལ་གསེར་གྱིས་བསྐུས་སོ། །ཁ་དང་སྐེའི་ཐག་པ་ནི་གསེར་ལའང་བྱས་སོ། །རྒྱལ་པོའི་འཁོར་ཆེན་པོ་དང་བཅས་པ་བྱོན་ནས་སྲས་བླངས་ཏེ་གཤེགས་སོ། །གཞིས་ཁའི་གནས་ན་ཤིང་འཛམ་བུ་གཅིག་ལ་ལོ་མ་མང་པོས་གྲིབ་མ་སྟུག་པོར་གྱུར་པ་ཞིག་ཡོད་པའི་འོག་ཏུ་གཞོན་ནུའི་མལ་སྟན་ཆེན་པོ་བྱས་ནས་སྟེང་དུ་བླ་རེས་གསེར་གྱི་སྐར་མ་དང་མཚུངས་པ་བྲེས་ཏེ། ལྕགས་རི་ལྟར་ཡོལ་བས་ཕྱོགས་ཀུན་ནས་བསྐོར་ཏོ། །རྒྱལ་པོ་རྒྱན་ཐམས་ཅད་ཀྱིས་བརྒྱན་པར་བྱས་ནས་བློན་པོ་འཁོར་དང་བཅས་པ་ཞིང་རྨོ་བའི་གནས་སུ་གཤེགས་ཏེ།
དེར་རྒྱལ་པོས་གསེར་གྱི་ཐོང་པ་བཟུང་ངོ་། །གཅིག་གིས་དམན་པའི་བརྒྱད་བརྒྱའི་དངུལ་གྱི་ཐོང་པ་བློན་པོས་བཟུང་སྟེ་སོ་ནམ་བྱེད་པའི་སྐྱེ་བོ་རྣམས་ཀྱིས་ཐོང་པ་ལྷག་མ་རྣམས་བསླངས་སོ། །དེ་རྣམས་ཀྱིས་ཐོང་པ་བཟུང་ནས་དེ་དང་དེར་སྒལ་རྨོའོ། །རྒྱལ་པོས་སླར་ཡང་འདི་ནས་ཕར་འགྲོ་ཞིང་ཕ་རོལ་ནས་ཚུར་འོངས་སོ། །དེའི་གནས་ཕུན་སུམ་ཚོགས་པར་འགྱུར་རོ་ཞེས་བསམས་ནས་བྱང་ཆུབ་སེམས་དཔའ་འཁོར་དང་བཅས་པ་བཞུགས་པའི་ནུ་མ་སྣུན་པ་རྣམས་རྒྱལ་པོའི་ཕུན་སུམ་ཚོགས་པར་བལྟའོ། །ཡོལ་བའི་ནང་ནས་ཕྱིར་འཐོན་ནོ། །བྱང་ཆུབ་སེམས་དཔའ་དེ་དང་དེར་གཟིགས་པས་གཅིག་ཀྱང་མི་སྣང་ངོ་། །མྱུར་བར་ལངས་ནས་སྐྱིལ་ཀྲུང་བཅས་ཏེ། རླུང་འབྱུང་བ་དང་རྔུབ་ཅིང་བཟུང་བས་བསམ་གཏན་དང་པོ་སྐྱེས་སོ། །ནུ་མ་སྣུན་པ་རྣམས་ཁ་ཟས་ཟ་བའི་ཕྱིར་ཕན་ཚུན་དུ་འགྲོ་ཞིང་དེ་མ་ཐག་ཅུང་ཟད་ཐོགས་པར་གྱུར་ཏོ། །ཤིང་གཞན་རྣམས་ཀྱི་གྲིབ་མ་མི་ལྡོག་ཅིང་གཞན་ཡང་ཤིང་དེའི་གྲིབ་མ་རྣམས་ཀུན་ནས་གནས་སོ། །ནུ་མ་སྣུན་པ་རྣམས་ཀྱིས་སྲས་འཕགས་པ་ཞེས་གཅིག་ཏུ་བརྗོད་ཅིང་མྱུར་དུ་ཡོལ་བ་སྟེང་དུ་བརྫེས་ཏེ་ནང་དུ་ཞུགས་ནས་བྱང་ཆུབ་སེམས་དཔའ་མ་ལ་སྟན་ལ་སྐྱིལ་ཀྲུང་གིས་བཞུགས་པ་དེའི་ཆོ་འཕྲུལ་མཐོང་ནས་སོང་སྟེ་རྒྱལ་པོ་ལ་ཞུས་སོ། །ལྷ་གཞོན་ནུ་འདི་ལྟ་བུའི་ཚུལ་གྱིས་བཞུགས་སོ། །འདི་ལྟར་ཤིང་གཞན་རྣམས་གྲིབ་མ་མི་བཟློག་གོ། །ཤིང་འཛམ་བུའི་གྲིབ་མ་ནི་ཀུན་ནས་གནས་སོ། །རྒྱལ་པོ་མྱུར་དུ་བྱོན་ནས་ཆོ་འཕྲུལ་བལྟ་སྟེ། སྲས་འདི་ལ་ཕྱག་གཉིས་པ་སྟེ་ཞེས་བརྗོད་ནས་སྲས་ལ་ཕྱག་བཙལ་ལོ། །དེ་ནས་གོ་རིམས་བཞིན་དུ་བྱང་ཆུབ་སེམས་དཔའ་ལོ་བཅུ་དྲུག་པའི་ན་ཚོད་དུ་གྱུར་ཏོ། །རྒྱལ་པོས་བྱང་ཆུབ་སེམས་དཔའ་ལ་དུས་གསུམ་དུ་རྗེས་སུ་རིགས་པར་ཁང་བཟངས་གསུམ་བྱས་ནས་གཅིག་དགུ་ཐོག་གཅིག་ལ་བདུན་ཐོག་གཅིག་ལ་ལྔ་ཐོག་གོ། །སྟོང་ཕྲག་བཞི་བཅུའི་གར་བྱེད་པའི་བུད་མེད་རྣམས་ཉེ་བར་གནས་པར་བྱས་སོ། །བྱང་ཆུབ་སེམས་དཔའ་ནི་ལྷ་བཞིན་དུ་ལྷ་དང་འདྲ་བའི་བུད་མེད་རྣམས་འཁོར་དུ་བྱས་ནས་རྒྱན་གྱིས་བརྒྱན་པའི་བུད་མེད་དུ་མ་དང་བཅས་པ་སྐྱེས་པ་མེད་པའི་རོལ་མོ་སྒྲོགས་པ་འཁོར་དུ་བྱ་སྟེ་ཕུན་སུམ་ཚོགས་པ་ཆེན་པོ་རྗེས་སུ་མྱོང་བར་བྱེད་དོ། །དུས་ཀྱི་རེས་དང་དུས་ཀྱི་རེས་ལ་དེ་དང་དེའི་ཁང་བཟངས་སུ་
བཞུགས་སོ། །གཞན་ཡང་སྒྲ་གཅན་འཛིན་གྱི་མ་དེ་ཉིད་བཙུན་མོ་རྣམས་ཀྱི་གཙོ་མོར་གྱུར་ཏོ། །དེའི་དེ་བཞིན་དུ་ཕུན་སུམ་ཚོགས་པ་ཆེན་པོ་རྗེས་སུ་མྱོང་བར་བྱེད་དོ། །ཉི་མ་གཅིག་ལ་ཉེ་དུའི་ནང་དུ་འདི་ལྟ་བུའི་གཏམ་བྱུང་ངོ་། །དོན་གྲུབ་རྩེད་མོས་བརྗེད་ནས་གཤེགས་ཤིང་བཟོ་ཅུང་ཟད་ཀྱང་མི་སློབ་བོ། །གཡུལ་སོ་སོ་ནས་ཉེ་བར་གྱུར་ན་ཅི་བྱེད། དེའི་ཚེ་བྱང་ཆུབ་སེམས་དཔའ་བོས་ནས་བུ་ཁྱོད་ཀྱི་ཉེ་དུ་རྣམས་དོན་གྲུབ་བཟོ་ཅུང་ཟད་ཀྱང་མི་སློབ་ཅིང་རྩེད་མོས་གཤེགས་ནས་འགྲོའོ་ཞེས་ཟེར་རོ། །འདིར་གཡུལ་བྱུང་ན་ཇི་ལྟར་བྱེད་ཅེས་བས་ནས། ལྷ་ངས་བཟོ་བསླབས་པ་ལ་དགོས་པ་མེད་དོ། །གྲོང་ཁྱེར་གྱི་མི་རྣམས་བདག་གི་བཟོ་བལྟ་བའི་སེམས་ཡོད་ན་དྲིལ་སྒྲོགས་ཤིག །འདི་ནས་ཞག་བདུན་པ་ལ་ཉེ་དུ་རྣམས་ལ་བཟོ་བསྟན་པར་བགྱིའོ། །རྒྱལ་པོས་དེ་བཞིན་དུ་བྱས་སོ། །བྱང་ཆུབ་སེམས་དཔས་སྒྲ་ལ་འཕེན་པ་དང། སྤུན་ལ་འཕེན་པ་དང། གཞུ་ཐོགས་པ་འདུས་པར་བྱས་ནས་སྐྱེ་བོ་མང་པོའི་ནང་དུ་གཞན་གཞུ་ཐོགས་པ་དང་ཐུན་མོང་མ་ཡིན་པ་ཉེ་དུ་རྣམས་ལ་བཟོ་བཅུ་གཉིས་བསྟན་ནོ། །དེ་རྣམས་མདའ་འཇོམས་པའི་སྐྱེས་རབས་ལས་འབྱུང་བའི་ཚུལ་བཞིན་དུ་རིག་པར་བྱའོ། །དེའི་ཉེ་དུ་རྣམས་ཀྱི་ཐེ་ཚོམ་སེལ་ལོ། །གཞན་ཡང་བྱང་ཆུབ་སེམས་དཔའ་སྐྱེད་མོས་ཚལ་དུ་གཤེགས་པར་བསམས་ནས་ཁ་ལོ་སྒྱུར་བ་བོས་ཏེ། ཤིང་རྟ་ཆས་སུ་ཆུག་ཅིག་ཅེས་སྨྲས་སོ། །དེས་ལེགས་སོ་ཞེས་བརྗོད་ཅིང་ཚིག་ཐོས་ནས་ཤིང་རྟ་ཆེན་པོའི་འཁོར་ལོའི་མཆོག་ལ་ཇི་ལྟར་རིགས་པའི་རྒྱན་ཐམས་ཅད་ཀྱིས་བརྒྱན་ནས་ཀུ་མུ་དའི་འདབ་མའི་མདོག་དང་འདྲ་བའི་བཀྲ་ཤིས་པའི་རྟ་བཞིས་ཤིང་རྟ་ཁྲིད་ནས་བྱང་ཆུབ་སེམས་དཔའ་གཤེགས་སོ། །ཞེས་སྨྲས་སོ། །བྱང་ཆུབ་སེམས་དཔའ་ལྷའི་གཞལ་མེད་ཁང་བཞིན་དུ་ཤིང་རྟ་ལ་ཞོན་ནས་སྐྱེད་མོས་ཚལ་གྱི་ཕྱོགས་སུ་གཤེགས་སོ། །ལྷ་རྣམས་ཀྱིས་གཞོན་ནུ་དོན་གྲུབ་ཀྱི་མངོན་པར་རྫོགས་པར་བྱང་ཆུབ་པའི་དུས་ནི་ཉེ་བར་གྱུར་ཏོ། །སྔར་གྱི་མཚན་མ་རྣམས་བལྟ་བར་རིགས་སོ། །ལྷའི་བུ་ཅིག་གིས་རྒས་པ་འཁོགས་པ་སོ་བྱི་བ་སྐྲ་དཀར་བ་སྒུར་བ་རྒྱབ་གྲུམ་པའི་ལུས་ཅན་ལག་ཏུ་འཁར་བ་ཐོགས་པ་སྐད་འཛེར་བར་བྱེད་པ་བསྟན་ནོ། །དེ་བྱང་ཆུབ་སེམས་དཔའ་དང་ཁ་ལོ་སྒྱུར་བས་མཐོང་ངོ་། །དེ་ནས་
བྱང་ཆུབ་སེམས་དཔས་ཁ་ལོ་སྒྱུར་བ་ལ་དྲིས་སོ། །སྐྱེས་བུ་འདི་གང་ཞིག་ཡིན། སྐྲ་ཡང་གཞན་དང་མི་འདྲ་བ་ཇི་ལྟ་བུ། གཙོ་བོ་ཆེན་པོའི་མདོ་ནས་བྱུང་བ་བཞིན་འདྲི་བར་བྱའོ། །དེའི་ཚིག་ཐོས་ནས་སྐྱེ་བ་མི་རྟག་ཅིང་སྐྱེས་པར་གྱུར་པ་ཐམས་ཅད་རྒས་པར་འགྱུར་རོ་ཞེས་སེམས་སྡུག་བསྔལ་ཞིང་དེ་ཉིད་དུ་བཟློག་ནས་རང་གི་ཁང་བཟངས་ཉིད་དུ་གཤེགས་སོ། །རྒྱལ་པོས་རྒྱུ་མཚན་ཅིའི་ཕྱིར་བདག་གི་སྲས་པོ་མྱུར་དུ་ལྡོག་པ་ཅིའི་ཕྱིར་དྲིས་སོ། །ལྷ་རྒས་ཤིང་འཁོགས་པའི་མི་གཅིག་མཐོང་བས་རབ་ཏུ་འབྱུང་ངོ་། །མྱུར་དུ་བུ་ལ་གར་བྱེད་པ་རྣམས་སྟ་གོན་གྱིས་ཤིག །ཕུན་སུམ་ཚོགས་པ་ཉམས་སུ་མྱོང་བར་བྱས་པས་རབ་ཏུ་འབྱུང་བ་རྗེས་སུ་དྲན་པར་མི་འགྱུར་རོ་ཞེས་སྨྲས་ནས་སྲུང་བར་བྱེད་པ་སྤེལ་ཏེ་ཕྱོགས་ཐམས་ཅད་དུ་རྒྱང་གྲགས་བརྒྱད་བརྒྱད་དུ་བཞག་གོ། །གཞན་ཡང་ཉི་མ་གཅིག་ལ་བྱང་ཆུབ་སེམས་དཔའ་དེ་བཞིན་དུ་སྐྱེད་མོས་ཚལ་དུ་གཤེགས་པ་ན་ལྷས་སྤྲུལ་པའི་ནད་པ་གཅིག་མཐོང་ནས་སྔར་བཞིན་དུ་དྲིས་སོ། །སེམས་སྡུག་བསྔལ་བར་གྱུར་ཏེ་སླར་ཡང་བཟློག་ནས་རང་གི་ཁང་བཟངས་སུ་གཤེགས་སོ། །རྒྱལ་པོས་ཡང་དྲིས་པ་སྔར་དེ་བཞིན་དུ་བྱས་ནས་སླར་ཡང་སྤེལ་ཏེ་ཐམས་ཅད་དུ་རྒྱང་གྲགས་བཅུ་གཉིས་ཀྱི་སའི་ཆར་སྲུང་བར་བྱེད་པ་བཞག་གོ། །ཡང་ཉི་མ་གཞན་ལ་བྱང་ཆུབ་སེམས་དཔའ་དེ་བཞིན་དུ་སྐྱེད་མོས་ཚལ་དུ་གཤེགས་པ་ན་ལྷས་སྤྲུལ་པའི་དུས་ལ་འདས་པ་གཅིག་མཐོང་ནས་སྔར་བཞིན་དུ་དྲིས་ཏེ་སེམས་སྡུག་བསྔལ་བར་གྱུར་ནས། སླར་ཡང་བཟློག་སྟེ་ཁང་བཟངས་སུ་གཤེགས་ནས་རྒྱལ་པོས་དྲིས་པ་སྔར་བཞིན་དུ་བྱས་ནས། སླར་ཡང་བསྲུང་བ་སྤེལ་ཏེ་ཀུན་ནས་བསྐོར་བར་དཔག་ཚད་གཅིག་གི་ཚད་ལ་བསྲུང་བ་བཞག་གོ། །སླར་ཡང་ཉི་མ་གཞན་ལ་སྐྱེད་མོས་ཚལ་དུ་གཤེགས་པ་ན་དེ་བཞིན་དུ་ལྷས་སྤྲུལ་པའི་གོས་བཟང་པོ་ལེགས་པ་གྱོན་པའི་རབ་ཏུ་བྱུང་བ་གཅིག་གཟིགས་ནས། འདིའི་མིང་ཅི་ཞེས་ཁ་ལོ་བ་ལ་དྲིས་སོ། །གང་དུ་ཡང་སངས་རྒྱས་བྱོན་པར་མ་གྱུར་ཅིང་རབ་ཏུ་བྱུང་བའི་ཡོན་ཏན་མི་ཤེས་ལྷའི་མཐུས་སླར་ཡང་ལྷ་རབ་ཏུ་བྱུང་བ་ཡིན་ཞེས་བརྗོད་དོ། །རབ་ཏུ་བྱུང་བའི་ཡོན་ཏན་ལ་བསྔགས་པ་བརྗོད་དོ། །བྱང་ཆུབ་སེམས་དཔའ་རབ་ཏུ་བྱུང་བ་ལ་འདུན་པ་སྐྱེས་ནས་དེའི་ཉིན་མོ་སྐྱེད་མོས་ཚལ་དུ་གཤེགས་སོ། །སློབ་དཔོན་ཁ་ཅིག་
འདི་སྐད་ཟེར་ཏེ། སྔུན་གྱི་མཚན་མ་བཞི་པ་ཉི་མ་གཅིག་ཉིད་ལ་མཐོང་ངོ་ཞེས་ཟེར་རོ། །དེ་ནི་མི་འཐད་དོ། །དེ་ལ་ཉིན་མོའི་ཆར་རྩེ་ཞིང་བཀྲ་ཤིས་པའི་རྫིང་བུར་ཁྲུས་བྱས་ནས་ཉི་མ་ནུབ་པ་ན་བཀྲ་ཤིས་པའི་རྡོ་ལེབ་ཀྱི་སྟན་ལ་བཞུགས་སོ། །རང་ལ་རྒྱན་གྱིས་བརྒྱན་པར་སེམས་སོ། །དེ་ནས་རྗེས་སུ་འབྲང་བའི་སྐྱེས་བུ་རྣམས་ཁ་དོག་སྣ་ཚོགས་པའི་གོས་དང་རྒྱན་རྣམ་པ་སྣ་ཚོགས་པས་བརྒྱན། མེ་ཏོག་གི་ཕྲེང་བ་དང་སྤོས་དང་བྱུག་པ་ལ་སོགས་པ་བསླངས་ནས་ཕྱོགས་ཀུན་དུ་བསྐོར་ནས་འདུག་གོ། །དེ་མ་ཐག་པར་བརྒྱ་བྱིན་སྡོད་པའི་གདན་དྲོ་བར་གྱུར་ཏོ། །གང་ཞིག་བདག་གི་གནས་འདོར་བའི་སེམས་སུ་ཞིག་ལ་སྐྱེས་པར་གྱུར་ཞེས་བརྟགས་སོ། །བྱང་ཆུབ་སེམས་དཔའི་རྒྱན་བྱེད་པའི་དུས་མཐོང་ངོ། །ལས་ཐམས་ཅད་པ་བོས་སོ། །ལས་ཐམས་ཅད་པ་གཞོན་ནུ་དོན་གྲུབ་དེ་རིང་གི་མཚན་ཕྱེད་ཀྱི་དུས་སུ་ངེས་པར་འབྱུང་བ་ཆེན་པོས་འཐོན་ནོ། །འདི་དེའི་ཕྱི་མའི་རྒྱན་ཡིན་ནོ། །སྐྱེད་མོས་ཚལ་དུ་སོང་ལ་སྐྱེས་བུ་ཆེན་པོ་ལྷའི་རྒྱན་གྱིས་བརྒྱན་པར་གྱིས་ཤིག །དེས་དེ་ཐོས་ནས་ལེགས་སོ་ཞེས་བརྗོད་དེ་ལྷའི་མཐུས་དེ་མ་ཐག་པར་ཉེ་བར་སོང་སྟེ། དེའི་རིམ་གྲོ་པ་དང་མཚུངས་པར་གྱུར་ནས་རིམ་གྲོ་པའི་ལག་ཏུ་རས་བསླངས་ནས་བྱང་ཆུབ་སེམས་དཔའི་དབུ་ལ་བཅིངས་སོ། །བྱང་ཆུབ་སེམས་དཔས་མགོ་ལ་ལག་པས་རེག་པ་ན་འདི་མི་མ་ཡིན་ཏེ་ལྷའི་བུ་ཡིན་པར་ཤེས་སོ། །བཅིངས་པ་ཙམ་ན་བཅིངས་པའི་དབུའི་ཅོད་པན་ནོར་བུ་རིན་པོ་ཆེའི་རྣམ་པ་ལ་སྟོང་ཕྲག་གཅིག་གི་དུ་གུ་ལའི་རས་ཀྱིས་བཅིངས་སོ། །སླར་ཡང་འཆིང་བ་ན་དུ་གུ་ལའི་རས་སྟོང་ཕྲག་གཅིག་གིས་ལན་བཅུ་དཀྲིས་ནས་སྟོང་ཕྲག་བཅུས་དུ་གུ་ལའི་རས་བཅིངས་སོ། །དབུ་ནི་ཆུང་ཞིང་དུ་གུ་ལའི་རས་ནི་མང་བས་ཇི་ལྟར་བཅིང་ཞེས་མི་བསམ་མོ། །དེ་རྣམས་ཐམས་ཅད་ལ་ཁྲི་ཞིང་སཱ་ཀ་ལའི་མེ་ཏོག་གི་ཚད་ཙམ་ཆེ་བའོ། །ཡང་ན་ཀུ་བའི་མེ་ཏོག་གི་ཚད་ཙམ་དུ་གྱུར་ཏོ། །བྱང་ཆུབ་སེམས་དཔའི་དབུ་ཀི་ཛ་ལ་ཀའི་མེ་ཏོག་ལྟར་མཚུངས་པའོ། །ཡང་ན་གུ་སྤྱ་ཀའི་མེ་ཏོག་ལྟར་གྱུར་པའོ། །དེ་ནས་རྒྱན་ཐམས་ཅད་ཀྱིས་སོ་སོར་བརྒྱན་ནས་རོལ་མོ་ཐམས་ཅད་རང་རང་གི་སྒྲ་འབྱིན་ཞིང་བྲམ་ཟེ་རྣམས་རྒྱལ་བར་གྱུར་ཅིག་དགའ་བར་གྱུར་ཅིག་ཅེས་རྣམ་པ་སྣ་ཚོགས་པའི་བཀྲ་ཤིས་ཀྱིས་བསྟོད་
པའི་དབྱངས་བྱེད་དོ། །རྒྱན་ཐམས་ཅད་ཀྱིས་བརྒྱན་ནས་མཆོག་གི་ཤིང་རྟ་ལ་ཆིབས་སོ། །དེའི་ཚེ་གྲགས་འཛིན་མ་ལ་བུ་བཙས་སོ། །རྒྱལ་པོ་ཟས་གཙང་གིས་ཐོས་ནས་བདག་གི་བུ་དགའ་བར་བྱ་བའི་ཕྱིར་ཕོ་ཉ་བ་བཏང་ངོ་། །བྱང་ཆུབ་སེམས་དཔས་དེ་ཐོས་ནས་སྒྲ་གཅན་འཛིན་སྐྱེས་པས་འཆིང་བ་སྐྱེས་སོ་ཞེས་གསུངས་སོ། །རྒྱལ་པོ་བདག་གི་བུ་ལ་ཅིའི་ཕྱིར་འདྲི། དེའི་ཚིག་ཐོས་ཏེ་འདི་ནས་བཟུང་སྟེ་བདག་གི་ཚ་བོ་གཞོན་ནུ་སྒྲ་གཅན་འཛིན་ཉིད་མིང་དུ་གྱུར་ཏོ་ཞེས་སྨྲས་སོ། །བྱང་ཆུབ་སེམས་དཔས་ཀྱང་གྲགས་པ་ཆེན་པོས་ཤིན་ཏུ་དགའ་བ་དང་དཔལ་དང་སྐལ་བ་བཟང་པོ་དང་ལྡན་པའི་གྲོང་ཁྱེར་དུ་གཤེགས་སོ། །དེའི་ཚེ་གཽ་ཏ་མཱི་སྐེམ་མོ་ཞེས་བྱ་བ་རྒྱལ་རིགས་ཀྱི་བུ་མོ་ཁང་བཟངས་ཀྱི་སྟེང་དུ་འདུག་པས་གྲོང་ཁྱེར་ལ་བསྐོར་བ་བྱེད་པའི་བྱང་ཆུབ་སེམས་དཔའི་དཔལ་དང་ལྡན་པའི་གཟུགས་མཐོང་ནས། དགའ་བ་དང་ཡིད་བདེ་བ་སྐྱེས་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ། །དེ་ཡི་མ་ནི་ཞི་བར་གྱུར། །དེ་ཡི་ཕ་ནི་ངེས་པར་ཞི། །དེ་ཡི་བུད་མེད་ངེས་ཞིར་གྱུར། །དེ་ཡི་ཡང་ནི་དེ་བདག་མཚུངས། །བྱང་ཆུབ་སེམས་དཔས་ཐོས་ནས་བསམས་པ། འདི་འདི་ལྟ་བུར་སྨྲ་བ། འདི་ལྟ་བུའི་ཚུལ་གྱི་བདག་ཉིད་ཀྱི་ལུས་མཐོང་བས་མའི་སེམས་ཞི་བར་གྱུར། ཕའི་སེམས་ཞི་བར་གྱུར། སྐྱེ་དགུ་དང་སྐྱེ་དགུའི་བདག་མོའི་སེམས་ཞི་བར་གྱུར་ཞེས་སྨྲའོ། །ཅིའི་ཕྱིར་སེམས་ཞི་བ་ཞེས་བྱ་བའི་དོན་གང། དེ་ནས་ཉོན་མོངས་པའི་ཆགས་པ་མེད་པའི་སེམས་ལ་དེ་སྐད་བརྗོད་དོ། །འདོད་ཆགས་ཀྱི་མེ་ཞི་བར་གྱུར་པ་ནི་ཞི་བའི་མིང་དུ་གྱུར་ཏོ། །སྐྱོན་གྱི་མེ་དང་གཏི་མུག་གི་མེ་ཞི་བར་གྱུར་པ་ནི་ཞི་བའི་མིང་དུ་གྱུར་ཏོ། །ང་རྒྱལ་དང་ལྟ་བ་ལ་སོགས་པའི་ཉོན་མོངས་པ་ཀུན་སྐྱེས་པ་ཐམས་ཅད་ཞི་བ་ནི་ཞིབའི་མིང་དུ་བརྗོད་དོ། །འདི་བདག་ལ་ཚིག་སྙན་པ་བརྗོད་ཅིང་བདག་ནི་མྱ་ངན་ལས་འདས་པ་ཚོལ་དུ་འགྲོ་ཞིང་ཚོལ་ལོ། །དེ་རིང་ཉིད་ནས་བདག་ཁྱིམ་ན་གནས་པ་སྤངས་ནས་ངེས་པར་འབྱུང་བས་རབ་ཏུ་བྱུང་ནས་མྱ་ངན་ལས་འདས་པ་ཚོལ་བར་རིགས་སོ། །འདི་ནི་བདག་གིས་སློབ་དཔོན་མར་གྱུར་ཏོ། །གཽ་ཏ་མཱི་སྐེམ་མོ་ལ་འབུམ་ཕྲག་གཅིག་རི་བའི་མུ་ཏིག་གི་དྲ་བ་མགྲིན་པ་ནས་བཀྲོལ་ཏེ་བསྐུར་རོ། །དེས་དོན་གྲུབ་གཞོན་ནུ་བདག་ལ་ཆགས་ཤིང་ཞེན་པར་གྱུར་པས་སེམས་རྟེན་བསྐུར་བ་ཡིན་པས་དེས་སེམས་བདེ་བ་སྐྱེས་པར་གྱུར་ཏོ། །བྱང་
ཆུབ་སེམས་དཔའ་ནི་དཔལ་དང་ལྡན་སྐལ་བ་བཟང་པོ་དང་ལྡན་པའི་རང་གི་ཁང་བཟངས་སུ་གཤེགས་ནས་དཔལ་གྱི་མལ་སྟན་ལ་གཟིམས་སོ། །དེ་མ་ཐག་ཏུ་རྒྱན་ཐམས་ཅད་ཀྱིས་བརྒྱན་པའི་གླུ་དང་གར་རྣམས་ལེགས་པར་བསླབས་པའི་ལྷའི་བུ་མོ་དང་འདྲ་བའི་གཟུགས་མཆོག་དང་ལྡན་པའི་བུད་མེད་རྣམས་ཀྱིས་རྣམ་པ་སྣ་ཚོགས་པའི་རོལ་མོ་བཟུང་ནས་དེ་ལ་ཡོངས་སུ་བསྐོར་ནས་མངོན་པར་དགའ་བར་བྱེད་ཅིང་གར་དང་གླུ་དང་རོལ་མོ་ལ་སོགས་པ་བྱེད་པར་རྩོམ་མོ། །བྱང་ཆུབ་སེམས་དཔའ་ཉོན་མོངས་པ་ལ་མི་དགའ་བའི་སེམས་ཀྱིས་གར་ལ་སོགས་པ་ལ་མངོན་པར་དགའ་བ་མེད་པས་ཡུད་ཙམ་གྱིས་མནལ་དུ་བཞུད་དོ། །བུད་མེད་དེ་རྣམས་ཀྱང་གང་གི་དོན་དུ་ངེད་རྣམས་ཀྱིས་གར་ལ་སོགས་པ་བྱེད་པ་ལ་དེ་མནལ་དུ་གཤེགས་སོ། །ད་ནི་ཅིའི་ཕྱིར་བདག་ཅག་ངལ་བར་བྱེད་གང་དང་གང་བསླབས་པའི་རོལ་མོ་རྣམས་ས་ལ་བཞག་ནས་ཉལ་ལོ། །དྲི་བཟང་དང་ལྡན་པའི་འབྲུ་མར་གྱི་མར་མེ་དང་ལྡན་པའི་བྱང་ཆུབ་སེམས་དཔའ་རབ་ཏུ་སད་ནས་མལ་གྱི་སྟེང་དུ་སྐྱིལ་ཀྲུང་གིས་བཞུགས་ནས་གཟིགས་པས་བུད་མེད་རྣམས་རོལ་མོ་བཞག་ནས་གཉིད་དུ་སོང་བ་གཟིགས་སོ། །ཁ་ཅིག་མཆིལ་མ་ལུག་པ་དང། ཁ་ཅིག་ནི་ལུས་ལ་མཆིལ་མས་གོས་པའི་དྲི་མ་ཅན་དུ་གྱུར་པ་དང། ཁ་ཅིག་ནི་སོ་འཆའ་བ་དང། ཁ་ཅིག་ནི་ངར་ངར་འབྱིན་པ་དང། ཁ་ཅིག་ནི་རྙ་མ་རྨི་འཆད་པ་དང། ཁ་ཅིག་ནི་ཁ་གདངས་པ་དང། ཁ་ཅིག་ནི་གོས་ཞུས་པ་དང། འགའ་ཞིག་གི་ནི་མཚན་མ་སྣང་ངོ་། །བྱང་ཆུབ་སེམས་དཔས་དེ་རྣམས་ཀྱི་རྣམ་འགྱུར་གཟིགས་ནས་ཐུགས་འཇིགས་པས་འདོད་པ་ལ་མི་དགའ་བར་གྱུར་ཏོ། །དེའི་རྒྱན་དུ་བྱས་པ་ནི་ཉེ་བར་ལྡན་པ་བརྒྱ་བྱིན་གྱི་ཕོ་བྲང་དང་མཚུངས་པའི་ཁང་བཟངས་ཆེན་པོ་ཡངས་ཤིང་རྣམ་པ་སྣ་ཚོགས་པའི་དྲི་ང་བས་གང་བའི་རོ་དང་ལྡན་པའི་དུར་ཁྲོད་དང་མཚུངས་པར་བསམས་སོ། །སྲིད་པ་གསུམ་པོ་མེ་འབར་བའི་ཁྱིམ་དང་མཚུངས་པར་བསམས་སོ། །བདག་ལ་གནོད་པར་བྱེད་པ་དང། འཚེ་བར་བྱེད་པའོ་ཞེས་ཆེད་དུ་བརྗོད་པ་འཆད་ཅིང་ཤིན་ཏུ་རབ་ཏུ་འབྱུང་བར་འདོད་པར་གྱུར་ཏོ། །དེ་བདག་གི་དེ་རིང་ནས་ངེས་པར་འབྱུང་བ་ཆེན་པོས་འཐོན་པར་བསམས་ཏེ་མལ་ནས་བཞེངས་ནས་སྒོ་དང་ཉེ་བར་གཤེགས་ཏེ་འདི་ན་སུ་ཡོད་ཅེས་དྲིས་སོ། །བློན་པོ་འདུན་པ་ཐེམ་པ་ལ་
སྔས་བྱས་ནས་ཉལ་ལོ། །འཕགས་པ་བུ་བདག་བློན་པོ་འདུན་པ་ཡིན་ནོ་ཞེས་སྨྲས་སོ། །ད་ནི་ངེས་པར་འབྱུང་བ་ཆེན་པོས་འཐོན་པར་འདོད་དོ། །བདག་གི་རྟ་གཅིག་ལ་སྒ་གྱིས་ཤིག །དེས་ལྷ་ལེགས་སོ་ཞེས་བརྗོད་ནས་རྟའི་སྒ་ཁྱེར་ཏེ་རྟ་རར་སོང་ནས་དྲི་བཟང་པོ་དང་ལྡན་པའི་འབྲུ་མར་གྱི་མར་མེ་སྤར་བ་སུ་མ་ནའི་མེ་ཏོག་ཅན་གྱི་དར་གྱི་བླ་རེས་ཀྱི་འོག་ན་ཤིན་ཏུ་དགའ་བའི་ས་ཕྱོགས་ལ་སྡོད་པའི་རྟའི་རྒྱལ་པོ་བསྔགས་ལྡན་མཐོང་ངོ་། །ད་ནི་བདག་གིས་འདི་ཉིད་ཀྱི་སྒ་བྱ་བར་རིག་ནས་བསྔགས་ལྡན་ལ་སྒ་སྒྲོན་ནོ། །དེས་སྒ་སྒྲོན་པར་ཤེས་ནས་འདི་སྒ་སྒྲོན་པ་ན་གློ་བསྡམས་སོ། །ཉི་མ་གཞན་ལ་སྐྱེད་མོས་ཚལ་དུ་རྩེད་མོ་ལ་འགྲོ་བའི་དུས་སུ་སྒ་འདི་ལྟར་མ་བྱས་སོ། །བདག་གི་སྲས་འཕགས་པ། ད་ནི་ངེས་པར་འབྱུང་བ་ཆེན་པོས་འཐོན་པར་འདོད་པར་གྱུར་ཏོ་སྙམ་ནས་སེམས་དགའ་བས་རྟ་སྐད་ཚེར་ཚེར་འདོན་པ་དེའི་སྒྲ་གྲོང་ཁྱེར་ཐམས་ཅད་དུ་གྲག་པར་བྱེད་པ་སླར་ཡང་ལྷ་རྣམས་ཀྱིས་དེའི་སྒྲ་བཀག་ནས་སུས་ཀྱང་མི་ཐོས་པར་བྱས་སོ། །བྱང་ཆུབ་སེམས་དཔས་ཀྱང་བློན་པོ་འདུན་པ་རྟའི་གནས་སུ་བཏང་ནས་རེ་ཞིག་བུ་ལ་བལྟ་བར་བསམས་སོ། །གྲགས་འཛིན་མའི་གནས་སུ་གཤེགས་ཏེ་སྒོ་ཕྱེ་ནས་དེ་མ་ཐག་པར་ཉལ་སའི་ནང་དུ་དྲི་བཟང་པོ་དང་ལྡན་པའི་འབྲུ་མར་གྱི་མར་མེ་སྤར་བ་གྲགས་འཛིན་མ་སུ་མ་ནའི་མེ་ཏོག་དང། མལ་ལི་ཀའི་མེ་ཏོག་ལ་སོགས་པའི་མེ་ཏོག་མལ་གྱི་སྟེང་དུ་ཁལ་གཅིག་ཙམ་བཀྲམ་པའི་སྟེང་དུ་བུའི་མགོའི་སྟེང་དུ་ལག་པ་བཞག་ནས་གཉིད་དུ་སོང་བ་ལ་བྱང་ཆུབ་སེམས་དཔས་སྒོའི་ཐེམ་པའི་སྟེང་དུ་ཞབས་ཡ་གཅིག་བཞག་སྟེ་འཁོད་པས་གཟིགས་སོ། །གལ་ཏེ་བདག་གིས་ལྷ་མོའི་ལག་པ་ནས་འཐེན་ནས་རང་གི་བུ་བསླང་བར་བསམས་ཏེ། ལྷ་མོ་གཉིད་སད་ན་བདག་ཉིད་འགྲོ་བའི་བར་གཅོད་དུ་འགྱུར་ཞིང་སངས་རྒྱས་སུ་གྱུར་ནས་བུ་བལྟའོ་སྙམ་དུ་སེམས་ཏེ་ཁང་བཟངས་ནས་བབས་སོ། །སླར་ཡང་སློབ་དཔོན་ཁ་ཅིག་འདི་ལྟར་སྨྲ་སྟེ། དེའི་ཚེ་བྱང་ཆུབ་སེམས་དཔའ་གཤེགས་པའི་སྔོན་རོལ་གྱི་ཉི་མ་བདུན་གྱི་གོང་དུ་སྐྱེས་སོ་ཞེས་ཟེར་རོ། །དེ་འདྲ་གཞན་དུ་མ་བཤད་པས་དེའི་ཕྱིར་འདི་ཁོ་ན་གཟུང་བར་བྱའོ། །འདི་ལྟར་བྱང་ཆུབ་སེམས་དཔའ་ཁང་བཟངས་ནས་བབས་ནས་རྟའི་ར་བ་ཉིད་དུ་གཤེགས་ཏེ་འདི་ལྟར་གསུངས་སོ། །བུ་བསྔགས་ལྡན་ཁྱོད་ཀྱིས་ད་ནི་ནུབ་གཅིག་བསྒྲལ་བར་གྱིས་ཤིག །
བདག་ཁྱོད་ཀྱི་དྲིན་གྱིས་སངས་རྒྱས་སུ་གྱུར་ནས་ལྷ་དང་བཅས་པའི་འཇིག་རྟེན་ཐམས་ཅད་བསྒྲལ་བར་བྱའོ། །དེ་ནས་བསྔགས་ལྡན་གྱི་རྒྱབ་ཏུ་ཆིབས་སོ། །བསྔགས་ལྡན་གྱི་སྐེ་ནས་བཟུང་ནས་མཆུ་རུ་ཁྲུ་བཅྭ་བརྒྱད་པ། དེ་དང་འཐུན་པའི་མཐོ་ཚད་དང་ལྡན་ཞིང་མཐུ་དང་མགྱོགས་པ་དང་ལྡན་ལ་དུང་ཕྱིས་པའི་ཁ་དོག་ལྟར་ཐམས་ཅད་དཀར་བ་དང་མཚུངས་པའོ། །གལ་ཏེ་ཚེར་ཚེར་སྒྲོགས་པའམ་རྨིག་པའི་སྒྲ་སྒྲོགས་པའི་སྒྲས་གྲོང་ཁྱེར་ཐམས་ཅད་གྲག་པར་འགྱུར་བའོ། །དེའི་ཕྱིར་ལྷ་རང་གི་མཐུས་དེ་སུས་ཀྱང་མི་ཐོས་པར་དེ་འདི་ལྟར་སྒྲ་སྒྲོགས་པ་བཀག་གོ། །ཁྲབ་ཁྲབ་འགྲོ་བའི་རྐང་ལག་གི་རྨིག་པ་རེ་རེ་ལྷའི་ལག་པའི་མཐིལ་དུ་ཉེ་བར་བཞག་གོ། །བྱང་ཆུབ་སེམས་དཔས་རྟའི་རྒྱབ་ཀྱི་དབུས་སུ་བཞུགས་སོ། །བློན་པོ་འདུན་པ་རྟའི་མཇུག་མ་ནས་ཟུང་ཅིག་ཅེས་མཚན་ཕྱེད་ཀྱི་དུས་སུ་སྒོ་ཆེན་པོ་དང་ཉེ་བར་ཕྱིན་ཏོ། །དེའི་ཚེ་སླར་ཡང་འདི་ལྟར་རྒྱལ་པོ་ཆེན་པོས་འདི་ལྟར་བྱང་ཆུབ་སེམས་དཔའ་གང་གི་དུས་སུ་ཡང་གྲོང་ཁྱེར་ཆེན་པོའི་སྒོ་ཕྱེ་ནས་ཕྱི་རོལ་དུ་འགྲོ་བར་མི་ནུས་པར་ཕྱེད་སྒ་ོམའི་སྒོ་གླེགས་རེ་རེ་ལ་མི་སྟོང་ཕྲག་རེ་རེས་དབྱེ་དགོས་པར་བསྐོསསོ། །བྱང་ཆུབ་སེམས་དཔའ་སྟོབས་དང་ལྡན་པས་གླང་པོ་ཆེའི་གྲངས་བྱེ་བ་སྟོང་ཕྲག་བཅུའི་གླང་པོ་ཆེའི་སྟོབས་འཛིན་ནོ། །མིའི་གྲངས་ཀྱིས་མི་བྱེ་བ་འབུམ་ཕྲག་གཅིག་གི་མིའི་སྟོབས་འཛིན་ནོ། །བྱང་ཆུབ་སེམས་དཔས་བསམས་པ། གལ་ཏེ་སྒོ་མ་ཕྱེད་ན་ད་ནི་བསྔགས་ལྡན་གྱི་རྒྱབ་ཏུ་བཞུགས་པ་ཉིད་ནི་བློན་པོ་འདུན་པས་རྔ་མ་ནས་བཟུང་བ་དང་ལྷན་ཅིག་ཉིད་དུ་བསྔགས་ལྡན་བརླ་བཙིར་ནས་ཁྲུ་བཅྭ་བརྒྱད་པའི་ལྕགས་རིའི་མཐོ་ཚད་ལ་མཆོངས་ཏེ་འདའ་བར་བསམས་སོ། །བློན་པོ་འདུན་པས་བསམས་པ། གལ་ཏེ་སྒོ་མ་ཕྱེད་ན་བདག་གིས་འཕགས་པ་སྲས་དཔུང་པ་ལ་ཁྱེར་ནས་ལག་པ་གཡས་པས་བསྔགས་ལྡན་གྱི་གསུས་པ་མཆན་ཁུང་དུ་བཅུག་ནས་ལྕགས་རི་ལ་མཆོངས་ཏེ་འདའ་བར་བསམས་སོ། །བསྔགས་ལྡན་གྱིས་བསམས་པ། གལ་ཏེ་སྒོ་མ་ཕྱེད་ན་བདག་གིས་རང་གི་བདག་པོ་ཇི་ལྟར་རྒྱབ་ཏུ་བཞུགས་པ་དེ་བཞིན་ཉིད་དུ་བློན་པོ་འདུན་པས་རྔ་མ་ནས་བཟུང་ནས་ལྷན་ཅིག་ཏུ་གནས་པ་ཉིད་དུ་ཁུར་ནས་ལྕགས་རི་ལ་མཆོངས་ཏེ་འདའ་བར་བསམས་སོ། །གལ་ཏེ་སྒོ་མ་ཕྱེད་པར་གྱུར་ན་ཇི་ལྟར་བསམས་པ་དེ་བཞིན་དུ་གསུམ་
པོའི་ནང་ནས་གང་ཡང་རུང་བ་གཅིག་ངེས་པར་འགྱུར་རོ། །སླར་ཡང་སྒོ་སྲུང་བའི་ལྷ་རྣམས་ཀྱིས་སྒོ་ཕྱེའོ། །དེ་མ་ཐག་ཉིད་དུ་བདུད་ཀྱིས་བྱང་ཆུབ་སེམས་དཔའ་བཟློག་པར་བསམས་ནས་འོངས་ཏེ་ནམ་མཁའ་ལ་འདུག་ནས་སྨྲས་པ། དྲང་སྲོང་ཆེན་པོ་ངེས་པར་འབྱུང་བས་མ་འགྲོ་ཅིག །འདི་ནས་ཉི་མ་བདུན་པ་ལ་ཁྱོད་ཀྱིས་རིན་པོ་ཆེའི་འཁོར་ལོ་ཐོབ་པར་འགྱུར་རོ། །གླིང་ཕྲན་སྟོང་ཕྲག་གཉིས་ཀྱིས་ཡོངས་སུ་བསྐོར་བའི་གླིང་ཆེན་པོ་བཞིའི་རྒྱལ་སྲིད་བྱེད་པར་འགྱུར་རོ། །དྲང་སྲོང་ཆེན་པོ་ཟློག་ཅིག་ཅེས་སྨྲས་སོ། །ཁྱོད་སུ་ཞིག་ཡིན་ཞེས་དྲིས་སོ། །བདག་ནི་འཇིག་རྟེན་གྱི་དབང་པོ་ཡིན་ཞེས་སྨྲས་སོ། །བདུད་རིན་པོ་ཆེའི་འཁོར་ལོ་བདག་ལ་ཡོང་བར་བདག་གིས་ཤེས་ཏེ་བདག་ལ་རྒྱལ་པོའི་དགོས་པ་མེད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་སུ་སྒྲ་སྒྲོགས་ཤིང་སངས་རྒྱ་བར་འགྱུར་རོ་ཞེས་བརྗོད་དོ། །བདུད་ཀྱིས་སྨྲས་པ། འདི་ནས་བཟུང་ནས་འདོད་པའི་རྣམ་པར་རྟོག་པའམ། གནོད་སེམས་ཀྱི་རྣམ་པར་རྟོག་པའམ། རྣམ་པར་འཚེ་བའི་རྣམ་པར་རྟོག་པ་སེམས་ལ་བསམས་པའི་དུས་བུ་བདག་གིས་ཤེས་སོ་ཞེས་སྨྲས་སོ། །གྲོགས་དང་མ་བྲལ་བར་གྲིབ་མ་བཞིན་དུ་རྗེས་སུ་འབྲེལ་བར་འགྲོའོ། །བྱང་ཆུབ་སེམས་དཔའ་ཡང་འཁོར་ལོས་སྒྱུར་བའི་རྒྱལ་སྲིད་ལག་ཏུ་ཐོགས་ཀྱང་མཆིལ་མའི་ཐལ་བ་བཞིན་དུ་ལྟས་པ་མེད་པར་དོར་ནས་བཀུར་སྟི་ཆེན་པོས་གྲོང་ཁྱེར་ནས་ཕྱིར་འཐོན་ནོ། །དབྱར་ཟླ་འབྲིང་པོའི་ཉ་ལ་མཆོག་གི་སྐར་མ་བྲེའི་དུས་སུ་ཕྱིར་འཐོན་ནས་སླར་ཡང་གྲོང་ཁྱེར་ལ་བཟློག་ནས་བལྟ་བར་བརྗོད་པར་བསམས་སོ། །འདི་ལྟར་བྱང་ཆུབ་སེམས་དཔའི་ཐུགས་ལ་འཁྲུངས་ཙམ་ཉིད་ནའོ། །སྐྱེས་བུ་ཆེན་པོ་ཁྱོད་ཀྱིས་ལོག་ནས་བལྟ་བའི་ལས་ཀྱི་བསོད་ནམས་ཁྱོད་ཀྱིས་བྱས་པ་མེད་དམ་ཞེས་བརྗོད་པ་བཞིན་དུ་ས་གཞི་ཆེན་པོ་རྫ་མཁན་གྱི་འཁོར་ལོ་བཞིན་དུ་ཕུག་ནས་བཟློག་གོ། །བྱང་ཆུབ་སེམས་དཔའ་གྲོང་ཁྱེར་ལ་སྔོན་དུ་ཕྱོགས་ཤིང་འཁོད་ནས་གྲོང་ཁྱེར་ལ་གཟིགས་ཏེ་དེའི་ས་ཕྱོགས་ཞིག་ཏུ་བསྔགས་ལྡན་ལྡོག་པའི་མཆོད་རྟེན་གྱི་གནས་གཅིག་བསྟན་ནོ། །བསྔགས་ལྡན་འགྲོ་བའི་ལམ་ལ་མངོན་དུ་ཕྱོགས་པར་བྱས་ནས་བྱོན་ནོ། །བཀུར་སྟི་ཆེན་པོ་དང་དཔལ་དང་སྐལ་བ་བཟང་པོ་དང་ལྡན་ནོ། །དེའི་ཚེ་ལྷ་རྣམས་ཀྱིས་དེའི་མདུན་དུ་སྟོང་ཕྲག་དྲུག་ཅུའི་མར་མེ་ཆེན་པོ་སྤར་རོ། །
རྒྱབ་ཀྱི་ཕྱོགས་སུ་ཡང་མར་མེ་ཆེན་པོ་སྟོང་ཕྲག་དྲུག་ཅུ་སྤར་རོ། །གཡས་ཀྱི་ཕྱོགས་སུ་ཡང་མར་མེ་ཆེན་པོ་སྟོང་ཕྲག་དྲུག་ཅུ་སྤར་རོ། །གཡོན་གྱི་ཕྱོགས་སུ་ཡང་མར་མེ་ཆེན་པོ་སྟོང་ཕྲག་དྲུག་ཅུ་སྤར་རོ། །ལྷ་གཞན་རྣམས་ཀྱིས་ཀྱང་ཁོར་ཡུག་གི་རིའི་སྟེང་དུ་གྲངས་མེད་པའི་མར་མེ་སྟོང་ཕྲག་མང་པོ་སྤར་རོ། །ལྷ་གཞན་རྣམས་དང་ཀླུ་དང་འདབ་བཟངས་ལ་སོགས་པས་ལྷའི་སྤོས་དང་མེ་ཏོག་གི་ཕྲེང་བ་དང་ཕྱེ་མ་དང་བདུག་པ་ལ་སོགས་པས་མཆོད་ཅིང་འགྲོའོ། །པཱ་རི་ཙྪཏྟའི་མེ་ཏོག་ཉིད་དང་མན་དཱ་ར་འི་མེ་ཏོག་སྤྲིན་ལྟར་མཐུག་པ་རྒྱུན་དུ་འབབ་པ་བཞིན་དུ་ནམ་མཁའ་ལས་རྒྱུན་མི་འཆད་པར་མེ་ཏོག་གི་ཆར་བབས་པར་གྱུར་ཏོ། །ལྷའི་གླུ་དབྱངས་སྒྲོགས་པར་གྱུར་ཏོ། །ཀུན་ནས་བསྐོར་བར་སྟོང་ཕྲག་དྲུག་ཅུ་རྩ་བརྒྱད་ཀྱི་རོལ་མོའི་སྒྲ་སྒྲོགས་སོ། །རྒྱ་མཚོའི་དབུས་སུ་འབྲུག་གི་སྒྲ་སྒྲོགས་པ་བཞིན་ནོ། །རི་བོ་གཉའ་ཤིང་འཛིན་གྱི་འགྲམ་དུ་རྒྱ་མཚོའི་སྒྲ་སྒྲོགས་པའི་དུས་བཞིན་དུ་འཇུག་གོ། །འདི་ནི་དཔལ་དང་སྐལ་བ་བཟང་པོ་དང་ལྡན་པའི་བྱང་ཆུབ་སེམས་དཔའ་གཤེགས་པའི་མཚན་གཅིག་ལ་རྒྱལ་སྲིད་གསུམ་སྤངས་ནས་དཔག་ཚད་སུམ་ཅུའི་མཐར་ཡིད་ལྡན་ཞེས་བྱ་བའི་ཆུ་ཀླུང་གི་འགྲམ་དུ་བཞུད་དོ། །ཅིའི་ཕྱིར་ཡང་རྟ་འདིའི་ཕ་རོལ་དུ་ཡང་འགྲོ་བར་མི་ནུས་སམ། མི་ནུས་པ་ནི་མ་ཡིན་ཏེ། དེ་ནི་ཁོར་ཡུག་གཅིག་གི་ནང་དུ་སྔ་དྲོ་གཅིག་ལ་སོང་ནས་བསྐོར་ཏེ་དེ་མ་ཐག་ཏུ་སྔ་དྲོ་ཉིད་དུ་འོངས་ཤིང་རང་གི་མདུན་དུ་ཁ་ཟས་བྱིན་པ་ཟ་བར་ནུས་སོ། །དེའི་ཚེ་སླར་ཡང་ལྷ་དང་ཀླུ་དང་འདབ་བཟངས་ལ་སོགས་པ་ནམ་མཁའ་ལ་འཁོད་ནས་སྤོས་དང་མེ་ཏོག་གི་ཕྲེང་བ་ལ་སོགས་པ་བབས་ཏེ། ཇི་སྲིད་རྟའི་བརླའི་བར་དུ་ལུས་ནུབ་པས་འཐོན་པར་མི་ནུས་པ་སྤོས་དང་མེ་ཏོག་གི་ཕྲེང་བ་ལ་སོགས་པ་ནི་རལ་པ་ལྟར་གདོན་པར་མི་ནུས་པར་ཤིན་ཏུ་ཐོགས་པར་གྱུར་ཏོ། །དེའི་ཕྱིར་དཔག་ཚད་སུམ་ཅུ་རྩ་གཉིས་སུ་སོང་ངོ་། །དེ་ནས་བྱང་ཆུབ་སེམས་དཔའ་ཆུ་ཀླུང་གི་འགྲམ་དུ་འཁོད་ནས་བློན་པོ་འདུན་པ་ལ་དྲིས་པ། ཆུ་ཀླུང་འདིའི་མིང་ཅི། ལྷ་ཡིད་ལྡན་ཞེས་བགྱི་བ་ལགས་སོ། །བདག་ཀྱང་རབ་ཏུ་འབྱུང་བ་ལ་ཡིད་དང་ལྡན་པ་ཞེས་བྱ་བར་གྱུར་ཏོ། །ཞབས་ཀྱིས་བརྒྱབ་སྟེ་རྟ་བསྐུལ་བ་བྱས་ཏེ། རྟ་ཡིས་མཆོངས་ནས་གླང་བརྒྱད་ཀྱི་སྐད་ཙམ་གྱི་ཆུ་ཀླུང་གི་ཞེང་འགྲམ་གྱི་ཕ་རོལ་དུ་འཁོད་
དོ། །བྱང་ཆུབ་སེམས་དཔའ་རྟའི་རྒྱབ་ནས་བབས་ཏེ་དངུལ་དང་མཚུངས་པའི་བྱེ་མའི་ཕུང་པོའི་སྟེང་དུ་འཁོད་དོ། །འདུན་པ་བོས་ནས་ཁྱོད་ཀྱིས་བདག་གི་རྒྱན་རྣམས་དང་བསྔགས་ལྡན་ཁྲིད་ལ་སོང་ཅིག །བདག་རབ་ཏུ་འབྱུང་བར་འགྱུར་རོ། །ལྷ་བདག་ཀྱང་རབ་ཏུ་འབྱུང་དུ་གསོལ། བྱང་ཆུབ་སེམས་དཔས་ཁྱོད་ཀྱིས་རབ་ཏུ་འབྱུང་བ་མི་འཐོབ་པས་སོང་ཅིག །ལན་གསུམ་དུ་ཞུས་ཀྱང་མ་གནང་ངོ་། །རྒྱན་དང་བསྔགས་ལྡན་ལག་པས་གཏད་དེ་བསམས་པ། བདག་གི་སྐྲ་འདི་དགེ་སྦྱོང་དང་མི་འཐུན་ནོ་སྙམ་ནས་བྱང་ཆུབ་སེམས་དཔའ་གཞན་གྱིས་ཀྱང་སྐྲ་བྲེག་པར་རུང་བ་གཞན་མེད་དོ། །དེ་ནས་བདག་ཉིད་ཀྱི་རལ་གྲིས་བྲེག་པར་བསམས་སོ། །ཕྱག་གཡས་པས་རལ་གྲི་བཟུང་ནས་ཕྱག་གཡོན་པས་ཅོད་པན་དང་བཅས་པའི་ནོར་བུ་བཟུང་སྟེ་བཅད་དོ། །དབུ་སྐྲ་ནི་སོར་གཉིས་པར་གྱུར་ཅིང་གཡས་ཕྱོགས་ནས་འཁྱིལ་བས་དབུ་ལ་གནས་སོ། །དེ་རྣམས་ཇི་སྲིད་འཚོའི་བར་དེ་ཉིད་ཀྱི་ཚད་དུ་གྱུར་ཏོ། །ཁ་སྤུ་ཡང་མེད་པར་གྱུར་ཏོ། །སླར་དབུ་སྐྲ་དང་ཁ་སྤུ་བཞར་མི་དགོས་པར་གྱུར་ཏོ། །བྱང་ཆུབ་སེམས་དཔས་ཅོད་པན་དང་བཅས་པའི་ནོར་བུ་བཟུང་ནས་གལ་ཏེ་བདག་སངས་རྒྱ་བར་འགྱུར་ན་ནམ་མཁའ་ལ་འཁོད་ཅིག །མ་ཡིན་ན་ས་ལ་ལྷུང་བར་གྱུར་ཅིག་ཅེས་ནམ་མཁའ་ལ་དོར་རོ། །དེ་ནི་གཙུག་གི་ནོར་བུ་བཅིངས་པ་དཔག་ཚད་གཅིག་གི་ཚད་ཙམ་དུ་སོང་ནས་ནམ་མཁའ་ལ་འཁོད་དོ། །ལྷའི་རྒྱལ་པོ་བརྒྱ་བྱིན་གྱི་ལྷའི་མིག་གིས་བལྟས་པས་དཔག་ཚད་གཅིག་གི་ཚད་ཙམ་གྱི་རིན་པོ་ཆེའི་ཟ་མ་ཏོག་གི་ནང་དུ་བཅུག་ནས་སུམ་ཅུ་རྩ་གསུམ་གྱི་ཕོ་བྲང་དུ་གཙུག་གི་ནོར་བུ་བཞུགས་པའི་མཆོད་རྟེན་བཞེངས་སོ། །མཆོག་གི་དྲི་ཡིས་བསྒོས་པའི་གཙུག་ཕུད་བཅད། །གང་ཟག་མཆོག་གིས་ནམ་མཁའ་ལ་ནི་དོར། །མིག་སྟོང་པ་ཡིས་དབུ་སྐྲ་མགོ་སྟེང་བཟུང། །གསེར་གྱི་ཟ་མ་ཏོག་ཏུ་ལྷ་གནས་ཁྱེར། །སླར་ཡང་བྱང་ཆུབ་སེམས་དཔས་བསམས་པ། ཡུལ་ཀ་ཤི་ཀའི་རས་འདི་དགེ་སྦྱོང་བདག་གི་ཚུལ་དང་འཐུན་པ་མ་ཡིན་ནོ་ཞེས་བསམས་སོ། །དེ་ནས་སངས་རྒྱས་འོད་སྲུང་གི་དུས་སུ་སྔོན་གྱི་གྲོགས་པོ་རྫ་མཁན་ཚངས་པ་ཆེན་པོར་གྱུར་ཏོ། །སངས་རྒྱས་གཅིག་གི་བར་དུ་གྲོགས་པོ་དང་མ་ཕྲད་དོ་ཞེས་བསམས་ཏེ་དེ་ནི་བདག་གི་གྲོགས་པོ་ངེས་པར་འབྱུང་བ་ཆེན་པོས་འཐོན་
ནོ། །དགེ་སྦྱོང་གི་ཡོ་བྱད་འདི་བཟུང་ནས་འགྲོའོ་ཞེས་བསམས་སོ། །ཆོས་གོས་གསུམ་དང་ལྷུང་བཟེད་དང། །སྤུ་གྲི་ཁབ་དང་སྐ་རགས་དང། །ཆུ་ཚགས་དང་བཅས་བརྒྱད་ཡིན་ནོ། །དགེ་སྦྱོང་རྣམས་ལ་རིགས་ཤིང་མཁོ། །དགེ་སྦྱོང་གི་མཁོ་བའི་ཡོ་བྱད་བརྒྱད་པོ་འདི་བསླངས་ནས་ཕུལ་ལོ། །བྱང་ཆུབ་སེམས་དཔས་མཆོད་པར་འོས་པའི་རྒྱལ་མཚན་གྱོན་ནས་རབ་ཏུ་འབྱུང་བ་མཆོག་གི་ཆ་བྱད་བསླངས་ཏེ་འདུན་པ་ལ་བདག་གི་ཚིག་གིས་མ་དང་ཡབ་ལ་བདག་ལ་ནད་མེད་པར་གྱུར་ཏོ་ཞེས་སྨྲོས་ཤིག་ཅེས་པས་བཏང་ངོ་། །འདུན་པས་བྱང་ཆུབ་སེམས་དཔའ་ལ་ཕྱག་བྱས་བསྐོར་བ་བྱས་ནས་སོང་ངོ་། །སླར་ཡང་བསྔགས་ལྡན་གྱིས་འདུན་པ་དང་བྱང་ཆུབ་སེམས་དཔའ་གསུང་གླེང་བྱེད་ཅིང་འདུག་པ་ཐོས་ན། བདག་ནི་ཇོ་བོ་དང་ཕྲད་པར་མི་འགྱུར་ཞེས་བསམས་སོ། །མིག་ལམ་དུ་སྤངས་ནས་མྱ་ངན་ལ་ཤིན་ཏུ་གནས་པ་བསྲན་པར་མ་ནུས་ཏེ་སྙིང་གས་ནས་དུས་ལས་འདས་ཏེ་སུམ་ཅུ་རྩ་གསུམ་གྱི་གནས་སུ་བསྔགས་ལྡན་ཞེས་བྱ་བའི་ལྷའི་བུར་སྐྱེས་སོ། །འདུན་པ་ལ་དང་པོའི་མྱ་ངན་དུ་གྱུར་པ་གཅིག་གོ། །སླར་ཡང་བསྔགས་ལྡན་དུས་ལས་འདས་པའི་རྒྱུ་མཚན་གྱིས་མྱ་ངན་གཉིས་པས་གཟིར་ཏེ། ངུ་ཞིང་སྨྲེ་སྔགས་འདོན་ཞིང་གྲོང་ཁྱེར་དུ་སོང་ངོ་། །བྱང་ཆུབ་སེམས་དཔའ་དེའི་ཕྱོགས་ཉིད་དུ་རྗེས་སུ་དགའ་བ་ཞེས་བྱ་བའི་ཨ་མྲའི་ཚལ་ཡོད་དོ། །དེར་ཉི་མ་བདུན་ནས་རབ་ཏུ་འབྱུང་བའི་བདེ་བས་གནས་ཤིང་ཉིན་མཚན་འདའོ། །ཉི་མ་གཅིག་ཉིད་ལ་དཔག་ཚད་སུམ་ཅུའི་ལམ་དུ་ཞབས་ཀྱིས་གཤེགས་ནས་རྒྱལ་པོའི་ཁབ་ཏུ་བྱོན་ནོ། །བྱོན་ནས་སྒོ་མཐར་ཆགས་སུ་བསོད་སྙོམས་ལ་གཤེགས་ཏེ་གྲོང་ཁྱེར་པ་ཐམས་ཅད་ཀྱིས་བྱང་ཆུབ་སེམས་དཔའི་སྐུ་མཐོང་ནས་གླང་པོ་ཆེ་ནོར་སྐྱོང་ཞུགས་པའི་རྒྱལ་པོའི་ཁབ་བཞིན་དང་ལྷ་མ་ཡིན་གྱི་དབང་པོ་ཞུགས་པའི་ལྷའི་གྲོང་ཁྱེར་བཞིན་དུ་ཀུན་དུ་འཁྲུགས་པར་གྱུར་ཏེ། རྒྱལ་པོའི་མི་འོངས་ཤིང། ལྷ་འདི་ལྟ་བུའི་གཟུགས་ཀྱི་སེམས་ཅན་གཅིག་གྲོང་ཁྱེར་ན་བསོད་སྙོམས་བྱེད་དེ། ལྷ་འམ་མིའམ་འདབ་བཟངས་ཏེ་འདི་གང་ཡིན་བདག་ཅག་གིས་མ་ཤེས་སོ་ཞེས་སྨྲས་སོ། །རྒྱལ་པོ་ཁང་བཟངས་ཀྱི་སྟེང་དུ་འཁོད་ནས་སྐྱེས་བུ་ཆེན་པོ་མཐོང་སྟེ་ཡ་མཚན་དང་རྨད་དུ་བྱུང་བ་སྐྱེས་སོ། །མི་གཅིག་བོས་ནས་སོང་ལ་རྟོགས་ཤིག །
གལ་ཏེ་མི་མ་ཡིན་པར་གྱུར་ན་གྲོང་ཁྱེར་ནས་ཕྱི་རོལ་དུ་སོང་སྟེ་མི་སྣང་བར་འགྱུར་རོ། །གལ་ཏེ་ལྷ་ཡིན་པར་གྱུར་ན་ནམ་མཁའ་ལ་འགྲོའོ། །གལ་ཏེ་ཀླུ་ཡིན་ན་སའི་འོག་ཏུ་འགྲོ་བར་འགྱུར་རོ། །གལ་ཏེ་མི་ཡིན་ན་ཇི་ལྟར་ཐོབ་པའི་ཁ་ཟས་ཟའོ་ཞེས་བསྒོའོ། །སྐྱེས་བུ་ཆེན་པོས་ཀྱང་ཁ་ཟས་འདྲེས་པ་རྣམས་བསྡུས་ནས་བདག་ལ་འདི་ཙམ་གྱིས་ཆོག་པར་རྟོགས་ཏེ། ཞུགས་པའི་སྒོ་ཉིད་ནས་གྲོང་ཁྱེར་གྱི་ཕྱི་རོལ་དུ་འཐོན་ཏེ། རི་སྐྱ་བོའི་གྲིབ་མ་ལ་ཤར་དུ་སྔུན་དུ་ཕྱོགས་པས་བཞུགས་ནས་ཁ་ཟས་ལ་ལོངས་སྤྱོད་པར་བརྩམས་སོ། །དེ་ནས་གང་གི་སྒྱུ་མ་ཕྱིན་ཅི་ལོག་སྟེ་ཁ་ནས་འཐོན་པའི་རྣམ་པར་བསམས་པར་གྱུར་ཏོ། །དེ་ནས་དེའི་བདག་ཉིད་ཀྱི་ལུས་ཀྱིས་འདི་ལྟ་བུའི་ཚུལ་གྱི་ཁ་ཟས་མིག་གིས་མཐོང་བ་ཡང་དཀོན་ནོ། །དེའི་ཕྱིར་རིགས་སོ་སོའི་ཁ་ཟས་ལ་མི་དགའ་བར་བསམས་ནས་འདི་ལྟར་རང་ལ་རང་གིས་གདམས་སོ། །དོན་གྲུབ་ཁྱོད་རྙེད་སླ་བའི་བཟའ་བ་དང་བཏུང་བའི་རིགས་ལོ་གསུམ་པའི་འབྲས་དྲི་ཞིམ་པོའི་བཟའ་བ་སྣ་ཚོགས་པའི་རོ་དང་བཅས་པའི་བཟའ་བའི་གནས་སུ་སྐྱེས་པར་གྱུར་ནས་ཕྱག་དར་ཁྲོད་པ་གཅིག་མཐོང་སྟེ། ནམ་དུའང་བདག་ནི་འདི་ལྟ་བུའི་ཚུལ་དུ་གྱུར་ནས་བསོད་སྙོམས་ལ་འགྲོ་ཞིང་ཁ་ཟས་ལོངས་སྤྱོད་དོ། །དེའི་དུས་སུ་བདག་ལ་དེ་ལྟར་འགྱུར་རོ་ཞེས་བསམས་ནས་འཐོན་ནོ། །ད་ནི་འདི་ཅི་བྱེད་པ་ཡིན་ཞེས་འདི་ལྟར་རང་ལ་རང་གིས་གདམས་ནས་རྟོག་པ་མེད་པར་ཁ་ཟས་ལ་ལོངས་སྤྱོད་དོ། །རྒྱལ་པོའི་མིས་འདིའི་འཇུག་པ་མཐོང་ནས་སོང་སྟེ་རྒྱལ་པོ་ལ་སྨྲས་སོ། །རྒྱལ་པོས་ཕོ་ཉ་པའི་གཏམ་ཐོས་ནས་མྱུར་བར་གྲོང་ཁྱེར་གྱི་ཕྱི་རོལ་དུ་འཐོན་ནས་བྱང་ཆུབ་སེམས་དཔའ་དང་ཉེ་བར་སོང་སྟེ་སྤྱོད་ལམ་ལ་དད་པར་གྱུར་ཏོ། །བྱང་ཆུབ་སེམས་དཔའ་ལ་དབང་ཕྱུག་ཐམས་ཅད་རྫོགས་པར་ཕུལ་ལོ། །བྱང་ཆུབ་སེམས་དཔས་རྒྱལ་པོ་ཆེན་པོ་བདག་ལ་དངོས་པོའི་འདོད་པའམ་ཉོན་མོངས་པའི་འདོད་པའི་དོན་མེད་དོ། །བདག་ནི་མཆོག་གི་མངོན་པར་རྫོགས་པར་བྱང་ཆུབ་པ་དོན་དུ་གཉེར་བས་འོངས་སོ། །རྒྱལ་པོས་རྣམ་པ་སྣ་ཚོགས་པའི་སྦྱིན་པ་བྱིན་ཡང་དེའི་ཐུགས་ལ་མི་འཕྲོད་དོ། །ངེས་པར་ཁྱོད་སངས་རྒྱ་བར་འགྱུར་རོ། །སངས་རྒྱས་སུ་གྱུར་ནས་སླར་ཡང་དང་པོར་བདག་གི་གྲོང་ཁྱེར་དུ་བྱོན་པར་ཞུ་ཞེས་དམ་བཅའ་བཟུང་ངོ་། །འདི་ནི་འདིར་མདོར་བསྡུས་པ་སྟེ།
རྒྱས་པར་ནི་སླར་ཡང་འདི་རབ་ཏུ་འབྱུང་བའི་མདོ་དང་བཅས་པར་དོན་དང་གཏམ་འདི་ནི་བལྟ་ཞིང་རིག་པར་བྱའོ། །བྱང་ཆུབ་སེམས་དཔས་ཀྱང་རྒྱལ་པོ་ལ་དམ་བཅའ་བྱིན་ནས་གོ་རིམས་བཞིན་དུ་སྤྱོད་པ་ལ་གཤེགས་ཤིང་ཀུན་ནས་ཚོན་དང་ནག་པོ་ཅན་དང། འཆར་བྱེད་གསེར་དང། དགའ་བྱེད་བུའི་གནས་སུ་ཉེ་བར་གཤེགས་ནས་སྙོམས་པར་འཇུག་པ་བསྐྱེད་དེ་སངས་རྒྱས་ཐོབ་པའི་ལམ་ནི་འདི་མ་ཡིན་ནོ། །དེ་ལ་སྙོམས་པར་འཇུག་པ་སྐྱེས་ཀྱང་དགྱེས་པར་མ་གྱུར་ནས་ལྷ་དང་བཅས་པའི་འཇིག་རྟེན་པའི་རང་གི་སྟོབས་དང་བརྩོན་འགྲུས་རྣམས་ལ་ལེགས་པར་བལྟ་བར་འདོད་པས་དཀའ་བ་ཆེན་པོ་སྤྱོད་པའི་བསམ་པས་ལྟེང་རྒྱས་སུ་བྱོན་ཏེ་ས་ཕྱོགས་འདི་ནི་ཤིན་ཏུ་དགའ་བ་ཡིན་ནོ་སྙམ་ནས་དེ་ཉིད་དུ་ཉེ་བར་གནས་པར་བྱས་ཏེ་དཀའ་བ་ཆེན་པོ་སྤྱོད་དོ། །དེ་ཡང་ཀཽཎྜི་ནྱ་ལ་སོགས་པ་རབ་ཏུ་བྱུང་བ་ལྔ་གྲོང་དང་གྲོང་རྡལ་དང་རྒྱལ་པོའི་ཕོ་བྲང་རྣམས་སུ་བསོད་སྙོམས་ལ་རྒྱུ་ཞིང་བྱང་ཆུབ་སེམས་དཔའི་གནས་དེར་འོངས་སོ། །དེ་ནས་ལོ་དྲུག་ཏུ་དཀའ་བ་ཆེན་པོ་སྤྱད་དོ། །ད་ནི་སངས་རྒྱས་སུ་འགྱུར་རོ་ད་ནི་སངས་རྒྱས་སུ་འགྱུར་རོ་ཞེས་ཞུས་པའི་གནས་ལ་བྱི་དོར་ལ་སོགས་པ་བྱེད་ཅིང་སྐུ་ལ་རིམ་གྲོ་བྱེད་པར་གྱུར་ཏེ་ཉེ་བར་གནས་པར་གྱུར་ཏོ། །བྱང་ཆུབ་སེམས་དཔའ་ཡང་ཕྱི་མའི་མཐར་ཐུག་པར་དཀའ་བ་སྤྱད་པར་བསམས་སོ། །ཏིལ་གཅིག་དང་འབྲས་ཀྱི་ཉག་མ་གཅིག་ལ་སོགས་པའི་ཉི་མ་འདའ་ཞིང་ཐམས་ཅད་དུ་ཡང་ཁ་ཟས་ཐམས་ཅད་སྤངས་སོ། །ལྷ་རྣམས་ཀྱིས་ཀྱང་བ་སྤུའི་བུ་ག་རེ་རེ་ནས་མདངས་སྟོན་ཏོ། །དེ་ནས་དེའི་ཁ་ཟས་མེད་པར་སྐུ་རིད་པར་གྱུར་ཏེ། གསེར་གྱི་ཁ་དོག་ཅན་གྱི་སྐུ་ཡང་ནག་པོར་གྱུར་ཏོ། །སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱང་མི་སྣང་བར་གྱུར་ཏོ། །ཉི་མ་གཞན་ལ་ཡང་རླུང་དལ་བུས་བསམ་གཏན་བྱེད་ཅིང་སྐུ་ལ་ཟུག་གཟེར་ཆེན་པོ་སྐྱེས་ནས་འདུ་ཤེས་མེད་པར་གྱུར་ཏེ་འཆག་པའི་གནས་སུ་འགྱེལ་ལོ། །དེ་ནས་ལྷ་གཅིག་གིས་དགེ་སྦྱོང་གཽ་ཏ་མ་དུས་ལས་འདས་སོ་ཞེས་བརྗོད་དོ། །གཅིག་གིས་འགྱེལ་བ་ན་དགྲ་བཅོམ་པ་ཐོབ་བོ་ཞེས་བརྗོད་དོ། །དེར་གང་ཞིག་གིས་དུས་ལས་འདས་སོ་ཞེས་བརྗོད་ནས་དེ་སོང་སྟེ་རྒྱལ་པོ་ཆེན་པོ་ཟས་གཙང་ལ་སྨྲས་པ་ཁྱེད་ཀྱི་སྲས་དུས་ལས་འདས་སོ། །བདག་གི་སྲས་སངས་རྒྱས་མ་ཐོབ་པར་དུས་ལས་འདས་སམ།
ཐོབ་ནས་དུས་ལས་འདས་ཞེས་དྲིས་སོ། །སངས་རྒྱས་ཐོབ་པར་མ་ནུས་སོ། །དཀའ་བ་སྤྱོད་པའི་གནས་སུ་འགྱེལ་ནས་དུས་ལས་འདས་སོ། །འདི་ཐོས་ནས་རྒྱལ་པོ་ཡིད་མ་ཆེས་པར་གྱུར་ཏོ། །བདག་གི་སྲས་སངས་རྒྱས་མ་ཐོབ་པར་དུས་ལས་འདའ་བ་མེད་དོ་ཞེས་བཀག་གོ། །གང་གི་ཕྱིར་སླར་ཡང་རྒྱལ་པོ་ཡིད་མ་ཆེས་ནས་དཀའ་ཐུབ་པ་ནག་པོ་ལྷ་ལེན་གྱིས་ཕྱག་བྱེད་པའི་དུས་དང་འཛམ་བུའི་ཤིང་གི་དྲུང་ཉིད་དུ་ཆོ་འཕྲུལ་མཐོང་བའི་རྒྱུ་མཚན་ཉིད་ཀྱིས་སོ། །སླར་ཡང་བྱང་ཆུབ་སེམས་དཔས་འདུ་ཤེས་ཐོབ་ནས་བཞེངས་སོ། །ལྷ་དེ་སོང་ནས་རྒྱལ་པོ་ཆེན་པོ་ཁྱོད་ཀྱི་སྲས་པོ་དེ་ནད་མེད་པར་གྱུར་ཏོ་ཞེས་སྨྲས་སོ། །རྒྱལ་པོས་སྲས་པོ་མི་ན་བར་བདག་གིས་ཤེས་སོ་ཞེས་སྨྲས་སོ། །སེམས་དཔའ་ཆེན་པོ་ལོ་དྲུག་ཏུ་དཀའ་བ་བྱེད་ཅིང་འདི་ལྟ་བུའི་སེམས་སུ་གྱུར་ཏེ། འདི་ལྟ་བུའི་དཀའ་ཐུབ་སྤྱོད་པ་ཞེས་བྱ་བ་ནི་བྱང་ཆུབ་ཀྱི་ལམ་མ་ཡིན་ནོ་ཞེས་བསམས་ནས་ཁ་ཟས་ཅུང་ཟད་ལ་ལོངས་སྤྱོད་པར་བྱེད་ཅིང་གྲོང་དང་གྲོང་རྡལ་རྣམས་སུ་བསོད་སྙོམས་ལ་རྒྱུ་བས་བསོད་སྙོམས་སྤྱོད་དོ། །དེ་ནས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་གསལ་བར་གྱུར་ཏོ། །སྐུ་གསེར་གྱི་ཁ་དོག་ལྟ་བུར་གྱུར་ཏོ། །དགེ་སློང་ལྔ་སྡེ་ན་རེ་འདིས་ལོ་དྲུག་ཏུ་དཀའ་བ་སྤྱད་ཀྱང་ཐམས་ཅད་མཁྱེན་པའི་ཡེ་ཤེས་ཐོབ་པར་མ་གྱུར་ཏོ། །ད་ནི་གྲོང་ལ་སོགས་པར་བསོད་སྙོམས་སྤྱོད་ཅིང་ཁ་ཟས་བསླངས་ནས་ཟ་སྟེ། རོ་ལ་ཆགས་པར་གྱུར་ན་ཅི་ནུས་འདིས་དཀའ་བ་སྤྱད་པར་འཁྲུལ་ལོ། །ལུས་ལ་ཁྲུས་བྱེད་པར་འདོད་པས་ལུས་ཀྱི་བ་སྤུ་རེ་རེའི་སྒོར་ཆུ་ཞུགས་ནས་འདོད་པའི་ཐིག་ལེར་གྱུར་པ་དང་མཚུངས་སོ། །བདག་ཅག་དེའི་འདོད་པའི་རྣམ་པར་རྟོག་པ་ཡོད་པའི་གནས་སུ་འདུག་པས་ཅི་ཞིག་བྱ། སྐྱེས་བུ་ཆེན་པོ་སྤངས་ཤིང་རང་རང་གི་ཆོས་གོས་དང་ལྷུང་བཟེད་ཐོགས་ནས་དཔག་ཚད་བཅྭ་བརྒྱད་ཀྱི་ལམ་དུ་སོང་སྟེ་དྲང་སྲོང་ལྷུང་བའི་ཚལ་དུ་གནས་སོ། །དེའི་ཚེ་དེའི་དུས་སུ་ལྟེང་རྒྱས་ན་སྡེ་ཅན་གྱི་གྲོང་རྡལ་བ་ཞིང་པའི་ཁྱིམ་དུ་སྐྱེས་པའི་ལེགས་སྐྱེས་མ་ཞེས་བྱ་བའི་བུ་མོ་ན་ཚོད་ལྡན་པར་གྱུར་ཏེ་ནྱ་གྲོ་དྷའི་ཤིང་གཅིག་དོན་དུ་གཉེར་ཏོ། །གལ་ཏེ་བདག་དང་མཉམ་པར་སྐྱེས་པའི་རིགས་ཀྱི་ཁྱིམ་དུ་སོང་ནས་དང་པོར་མངལ་ཆགས་ཏེ། བུ་རྙེད་ན་དེ་ལ་ལོ་སོ་སོར་འབུམ་ཕྲག་གཅིག་རི་བའི་གཏོར་མའི་ལས་བྱའོ། །དེའི་དོན་དུ་གཉེར་བ་འགྲུབ་བོ། །དེས་སེམས་དཔའ་ཆེན་པོ་ལོ་
དྲུག་གི་མཐར་དཀའ་བ་སྤྱོད་པ་རྫོགས་པར་བྱེད་དོ། །དཔྱིད་ཟླ་ཐ་ཆུང་གི་ཉ་ལ་གཏོར་མའི་ལས་བྱེད་པར་སེམས་སོ། །དེའི་སྔུན་ཉིད་དུ་སྟོང་ཕྲག་གཅིག་གི་བ་བཞོན་མ་ཤིང་མངར་གྱི་ནགས་སུ་ཤིང་མངར་ཟ་བ་དེ་རྣམས་ཀྱི་འོ་མ་བཞོས་ནས་བཞོན་མའི་བ་ལྔ་བརྒྱ་ལ་བྱིན་ནོ། །དེ་རྣམས་ཀྱི་འོ་མ་བཞོས་ནས་བ་བཞོན་མ་ཕྱེད་དང་སུམ་བརྒྱ་ལ་བྱིན་ནོ། །དེ་བཞིན་དུ་བ་བཞོན་མ་བཅུ་དྲུག་གི་འོ་མ་བཞོས་ནས་བ་བཞོན་མ་བརྒྱད་ལ་བྱིན་ནོ། །དེ་སྲིད་ཀྱི་འོ་མ་བསྐ་མོ་དང་མངར་བ་དང་མདངས་དང་མདོག་དང་ལྡན་པ་དོན་དུ་གཉེར་བར་འདོད་ཅིང་འོ་མ་བསྐོལ་ལོ། །དེས་དཔྱིད་ཟླ་ཐ་ཆུང་གི་ཉའི་ཉིན་མོའི་སྔ་དྲོ་གཏོར་མའི་ལས་བྱེད་པར་སེམས་ཤིང་མཚན་མོའི་ནམ་ལངས་ཀའི་དུས་སུ་བ་འཇོ་མཁན་ལངས་ནས་བ་བཞོན་མ་བརྒྱད་པོ་འཇོ་རུ་སོང་བ། བེའུ་བའི་ནུ་མ་ལ་ཉེ་བར་མ་གྱུར་པར་ཡང། བའི་ནུ་མའི་གམ་དུ་སྣོད་སར་པ་ཉེ་བར་གནས་པ་བྱས་པ་ཙམ་ན་རང་གི་ཆོས་ཉིད་ཀྱིས་འོ་མའི་རྒྱུན་གྱིས་སྣོད་གང་བར་གྱུར་ཏོ། །ལེགས་སྐྱེས་མས་ཡ་མཚན་ཆེ་བ་དེ་མཐོང་སྟེ། འོ་མ་རང་གི་ལག་པས་ཁྱེར་ནས་སྣོད་གསར་པར་བླུགས་པ་ལ་རང་གི་ལག་གིས་མེ་བཏང་སྟེ་འཚོད་པར་བརྩམས་ནས། དེར་འོ་ཐུག་བསྐོལ་བས་ལྦུ་བ་ཆེན་པོ་འཐོན་ནས་གཡས་ཕྱོགས་སུ་འཁོར་ཞིང་ཐུར་མ་གཅིག་ཙམ་ཡང་ས་ལ་མ་ལྷུང་ལ། ཐབ་ན་དུ་བ་ཅུང་ཟད་ཀྱང་མེད་དོ། །དེའི་ཚེ་འཇིག་རྟེན་སྐྱོང་བ་བཞི་པོ་འོངས་ནས་ཐབ་སྲུན་པར་བྱེད་དོ། །ཚངས་པ་ཆེན་པོས་ནི་གདུགས་འཛིན་ནོ། །བརྒྱ་བྱིན་གྱིས་ནི་ཇི་ལྟར་རིགས་པའི་མེ་གཏོང་བར་བྱེད་དོ། །སྟོང་ཕྲག་གཉིས་ཀྱིས་ཡོངས་སུ་བསྐོར་བའི་གླིང་ཆེན་པོ་བཞིའི་ལྷ་དང་མི་རྣམས་ཀྱིས་ཇི་ལྟར་རིགས་པའི་མདངས་རྣམས་ལྷ་རང་རང་གི་མཐུས་བསྡུས་ནས་བཅུག་གོ། །མི་རྣམས་ཀྱིས་ཀྱང་དེ་བཞིན་དུ་བྱས་ནས་དུས་གཞན་ལ་ལྷ་རྣམས་ཟན་གྱི་གོང་བུ་རེ་རེས་མདངས་འཇུག་གོ། །སླར་ཡང་བྱང་ཆུབ་པའི་ཉིན་མོ་དང་ཡོངས་སུ་མྱ་ངན་ལས་འདའ་བའི་ཉིན་མོ་སྣོད་ཉིད་དུ་འཇུག་པར་བྱེད་དོ། །ལེགས་སྐྱེས་མས་ཉི་མ་གཅིག་ཉིད་ལ་དེར་རང་ཉིད་གསལ་བར་གྱུར་ནས་ཡ་མཚན་ཆེ་བ་དུ་མ་མཐོང་སྟེ་བྲན་མོ་རྫོགས་མ་ཞེས་བྱ་བ་བོས་ནས། རྫོགས་མ་དེ་རིང་བདག་ཅག་གི་ལྷ་ཤིན་ཏུ་དགྱེས་པར་གྱུར་ཏེ། བདག་གིས་དེ་རྣམས་ཀྱི་དུས་སུ་འདི་ལྟ་བུའི་
ཚུལ་གྱི་ཡ་མཚན་ཆེ་བ་མ་མཐོང་བས་མྱུར་དུ་སོང་ལ་ལྷའི་གནས་སུ་བྱི་དོར་ལེགས་པར་གྱིས་ཤིག །དེས་ལེགས་སོ་ཞེས་བརྗོད་ནས་འཕགས་མ་དེའི་ཚིག་བཟུང་སྟེ་མྱུར་བ་མྱུར་བར་ཤིང་གི་དྲུང་དུ་ཕྱིན་ནོ། །བྱང་ཆུབ་སེམས་དཔས་ཀྱང་དེའི་མཚན་མོའི་ཆ་ལ་རྨི་ལམ་ཆེན་པོ་ལྔ་གཟིགས་པ་ཡོངས་སུ་རྟོག་ཅིང་ཐེ་ཚོམ་མེད་པར་བདག་དེ་རིང་སངས་རྒྱས་ཐོབ་པར་འགྱུར་བར་བྱའོ་སྙམ་དུ་ཐུགས་བརྟན་པོར་མཛད་ནས། དེའི་ནུབ་མོ་འདས་ཏེ་སྐུའི་བྱི་དོར་མཛད་ནས་བསོད་སྙོམས་ལ་གཤེགས་པའི་དུས་ཀྱི་སྔ་དྲོ་བྱོན་ཏེ། ཤིང་ནྱ་གྲོ་དྷའི་དྲུང་དུ་བཞུགས་ནས་རང་གི་འོད་ཀྱིས་ཤིང་ཐམས་ཅད་སྣང་བར་མཛད་དོ། །དེ་ནས་ཡང་རྫོགས་མ་དེ་འོངས་ནས་བྱང་ཆུབ་སེམས་དཔའ་ཤིང་གི་དྲུང་ན་ཤར་ཕྱོགས་ཀྱི་འཇིག་རྟེན་གྱི་ཁམས་ལ་གཟིགས་ཤིང་གཟིགས་པ་མཐོང་ལ་སྐུ་ལ་འོད་ཟེར་འཐོན་པའི་འོད་ཀྱིས་ཤིང་ཐམས་ཅད་གསེར་གྱི་ཁ་དོག་ཏུ་མཐོང་ངོ་། །དེས་འདི་ལྟར་བསམས་ཏེ། དེ་རིང་བདག་ཅག་གི་ལྷ་ཤིང་ལ་བབས་ནས་རང་གི་ལག་ཉིད་ཀྱིས་གཏོར་མ་ལེན་ཅིང་བཞུགས་སོ་ཞེས་བསམས་པས་སེམས་ཚིམ་པ་ཐོབ་ནས་མྱུར་དུ་སོང་སྟེ་ལེགས་སྐྱེས་མ་ལ་དོན་དེ་རྣམས་སྨྲས་སོ། །ལེགས་སྐྱེས་མས་དེའི་ཚིག་ཐོས་ནས་སེམས་ཚིམ་པར་གྱུར་ཏེ། དེ་རིང་ནས་བཟུང་ནས་བདག་གི་བུ་མོ་ཆེན་མོ་གནས་སུ་སྡོད་ཅིག་ཅེས་བུ་མོ་ལ་ཇི་ལྟར་རིགས་པའི་རྒྱན་ཐམས་ཅད་བྱིན་ནོ། །སླར་ཡང་གང་གི་ཕྱིར་སངས་རྒྱས་ཀྱི་ཡོངས་སུ་རྫོགས་པར་ཐོབ་པའི་ཉིན་མོ་འབུམ་ཕྲག་གཅིག་གི་གྲངས་ཀྱང་གསེར་གྱི་སྡེར་མ་ཆེན་པོ་ཐོབ་པར་རིགས་སོ། །དེའི་ཕྱིར་གསེར་གྱི་སྡེར་མ་ཆེན་པོའི་ནང་དུ་འོ་ཐུག་ལྡུགས་པའི་སེམས་སྐྱེས་ནས་འབུམ་ཕྲག་གཅིག་རི་བའི་གསེར་གྱི་སྡེར་མ་ཆེན་པོ་བསླངས་ཏེ། འོ་ཐུག་བཙོས་པའི་ནང་དུ་ཁ་སྦུབ་ནས་བླུག་གོ། །འོ་ཐུག་ཐམས་ཅད་པད་མའི་འདབ་མའི་ནང་གི་ཆུ་བཞིན་དུ་ཆུའི་ཐིགས་པ་གཅིག་ཏུ་གྱུར་ནས་གསེར་གྱི་སྡེར་དུ་བྱུང་ངོ་། །གསེར་གྱི་སྡེར་མ་གཅིག་གང་བའི་ཚད་ཙམ་དུ་གྱུར་ཏོ། །དེས་གསེར་གྱི་སྣོད་དེ་ལ་གསེར་གྱི་སྣོད་གཞན་གྱིས་བཀབ་ནས་གོས་ཀྱིས་དྲིལ་ལོ། །ལེགས་སྐྱེས་མ་རྒྱན་གྱིས་ལུས་ཐམས་ཅད་བརྒྱན་ནས་གསེར་གྱི་སྡེར་མ་དེ་རང་གི་མགོར་བཞག་སྟེ། མཐུ་ཆེན་པོས་ཤིང་ནྱ་གྲོ་དྷའི་དྲུང་དུ་ཕྱིན་པ་དང། བྱང་ཆུབ་སེམས་དཔའ་མཐོང་ནས་ཤིན་ཏུ་ཡིད་བདེ་བ་སྐྱེས་པར་
གྱུར་ཏེ། ཤིང་གི་ལྷ་ཡིན་ནམ་ཞེས་བསམས་ནས་བལྟ་བའི་གནས་སུ་དུད་ཅིང་དུད་ཅིང་སོང་སྟེ་མགོའི་སྟེང་གི་གསེར་གྱི་སྡེར་མ་ཕབ་ནས་ཁ་ཕྱེས་ཏེ། གསེར་གྱི་རིལ་བ་སྤྱི་བླུགས་ཀྱིས་དྲི་བཟང་པོས་བསྒོས་པའི་ཆུ་བཟུང་ནས་བྱང་ཆུབ་སེམས་དཔའ་དང་ཉེ་བར་སོང་སྟེ་འཁོད་དོ། །གྲོགས་པོ་རྫ་མཁན་ཚངས་པ་ཆེན་པོར་གྱུར་པས་ཕུལ་བའི་སའི་ལྷུང་བཟེད་ནི་དེ་རྣམས་ཀྱི་དུས་སུ་བྱང་ཆུབ་སེམས་དཔས་མ་སྤངས་ཀྱང་དེ་དེ་མ་ཐག་ཏུ་མི་སྣང་བར་གྱུར། བྱང་ཆུབ་སེམས་དཔས་ལྷུང་བཟེད་མ་གཟིགས་སོ། །ཕྱག་གཡས་པ་བརྐྱང་ནས་ཆུ་བསླངས་ཏེ། ལེགས་སྐྱེས་མས་སྣོད་དང་བཅས་པ་ཉིད་ཀྱི་འོ་ཐུག་སྐྱེས་བུ་ཆེན་པོའི་ཕྱག་ཏུ་ཕུལ་ལོ། །སྐྱེས་བུ་ཆེན་པོས་ལེགས་སྐྱེས་མ་ལ་བརྟགས་པ་ན། དེས་རྣམ་འགྱུར་ཤེས་ནས་འཕགས་པ་བདག་གིས་ཉིད་ལ་ཡོངས་སུ་ཕུལ་གྱིས་བཞེས་ལ་ཇི་ལྟར་བཞེད་པ་བཞིན་གཤེགས་པར་ཞུ་ཞེས་ཕྱག་བྱས་ནས། ཇི་ལྟར་བདག་གི་འདོད་པ་ཡོངས་སུ་རྫོགས་པར་གྱུར་ཏོ། །འདི་ལྟར་ཉིད་ཀྱིས་ཀྱང་བསམ་པ་ཡོངས་སུ་རྫོགས་པར་གྱུར་ཅིག་ཅེས་སྨྲས་སོ། །འབུམ་ཕྲག་གཅིག་རི་བའི་གསེར་གྱི་སྡེར་མ་ཆེན་པོ་གཅིག་ཤིང་གི་ལོ་མ་རྙིངས་པ་བཞིན་དུ་ལྟོས་པ་མེད་པར་སོང་ངོ་། །བྱང་ཆུབ་སེམས་དཔའ་བཞུགས་པ་ལས་བཞེངས་ནས་ཤིང་ལ་བསྐོར་ཏེ། གསེར་གྱི་སྡེར་མ་བསླངས་ནས་ཆུ་ཀླུང་ནཻ་ར་ཉྫ་ནའི་འགྲམ་དུ་གཤེགས་ཏེ། བྱང་ཆུབ་སེམས་དཔའ་གྲངས་མེད་པ་འབུམ་ཕྲག་མང་པོ་རྣམས་ཀྱིས་མངོན་པར་བྱང་ཆུབ་པའི་ཉིན་མོ་བབས་ནས་ཁྲུས་བྱེད་པའི་གནས་སུ་ལེགས་པར་རབ་ཏུ་གནས་པའི་མུ་གནས་ཞེས་བྱ་བ་ཡོད་དོ། །དེའི་འགྲམ་དུ་སྡེར་མ་བཞག་སྟེ་བབས་ནས་ཁྲུས་མཛད་དོ། །འབུམ་ཕྲག་དུ་མའི་སངས་རྒྱས་རྣམས་ཀྱིས་ན་བཟའ་དང་མཆོད་པར་འོས་པ་གྱོན་ནས་ཤར་ཕྱོགས་སུ་སྔོན་དུ་ཕྱོགས་པས་བཞུགས་ནས་ཏ་ལའི་ཤིང་ཏོག་གི་ནང་གི་རུས་པ་གཅིག་གི་ཚད་ཙམ་དང་མཉམ་པ་གཅིག་གིས་དམན་པའི་ལྔ་བཅུའི་གོང་བུ་བྱས་ནས་ཆུ་མེད་ཅིང་དངར་བའི་འོ་ཐུག་ཐམས་ཅད་གསོལ་ལོ། །དེ་འདི་ལྟར་གང་གིས་སངས་རྒྱས་སུ་གྱུར་ནས་ཞག་བཞི་བཅུ་ཞེ་དགུ་རུ་བྱང་ཆུབ་ཀྱི་སྙིང་པོར་བཞུགས་ཏེ་ཞག་བཞི་བཅུ་ཞེ་དགུའི་ཁ་ཟས་སུ་གྱུར་ཏོ། །དེ་རྣམས་ཀྱི་དུས་སུ་ཁ་ཟས་གཞན་མེད་པ་དང། ཁྲུས་བྱེད་
པ་མེད་པ་དང། ཞལ་ཤོལ་བ་མེད་པ་དང། སྐུ་ལུས་ཀྱི་བྱ་བ་བྱེད་པ་མེད་དོ། །བསམ་གཏན་གྱི་བདེ་བ་དང། ལམ་གྱི་བདེ་བ་དང། འབྲས་བུའི་བདེ་བ་ཉིད་ཀྱིས་ཉིན་མཚན་འདའོ། །གཞན་ཡང་དེའི་འོ་ཐུག་གསོལ་ནས་གསེར་གྱི་སྡེར་མ་ཕྱག་ཏུ་བཞེས་ཏེ། གལ་ཏེ་བདག་ནི་དེ་རིང་སངས་རྒྱས་སུ་འགྱུར་ནུས་ན་སྡེར་མ་འདི་ཆུའི་སྟེང་དུ་གྱེན་དུ་འགྲོ་བར་གྱུར་ཅིག །མ་ཡིན་ན་ཐུར་ལ་འགྲོ་བར་གྱུར་ཅིག་ཅེས་ཆུ་ལ་དོར་རོ། །དེས་ཆུའི་རྒྱུན་གྱི་རླབས་ཆུ་ཀླུང་གི་དབུས་སུ་སོང་ནས་དབུས་དབུས་ཀྱི་གནས་ཉིད་དུ་རྟ་མགྱོགས་པོར་འགྲོ་བ་བཞིན་དུ། ཁྲུ་བརྒྱད་ཅུའི་ཚད་ཙམ་གྱི་སྟེང་དུ་སོང་ཞིང། ཆུ་ལན་ཅིག་འཁྱིལ་བས་བྱིང་ནས་ཀླུའི་རྒྱལ་པོ་ནག་པོའི་གནས་སུ་སོང་ངོ་། །དེ་ནས་སངས་རྒྱས་གསུམ་པོ་རྣམས་ཀྱིས་བཤོས་གསོལ་བའི་གསེར་གྱི་སྡེར་མ་ཆེན་པོ་སིལ་སིལ་ཞེས་སྒྲ་སྒྲོགས་པར་བྱེད་ཅིང་ཕྱོགས་གཅིག་ཏུ་དེ་རྣམས་ཐམས་ཅད་ཀྱི་འོག་ཏུ་གྱུར་ནས་གནས་སོ། །ཀླུའི་རྒྱལ་པོ་ནག་པོས་དེའི་སྒྲ་ཐོས་ནས་ཁ་སང་སངས་རྒྱས་གཅིག་ཐོབ་པར་གྱུར་ཅིང། སླར་ཡང་དེ་རིང་སངས་རྒྱས་ཉིད་ཐོབ་པར་གྱུར་ནས་མང་པོས་བསྟོད་པར་བྱེད་པར་གྱུར་ཏོ། །བྱང་ཆུབ་སེམས་དཔས་ནི་ཆུ་ཀླུང་གི་འགྲམ་ཤིང་སཱ་ལའི་ཚལ་དུ་ཉིན་མོ་བཞུགས་ནས་སྲོད་ཀྱི་དུས་སུ་མེ་ཏོག་ཀུ་མུ་ད་ཁ་འབྱེ་བའི་དུས་ལ་ལྷ་རྣམས་ཀྱིས་བརྒྱན་པར་བྱས་ནས། ཞེང་ལ་གླང་གི་སྐད་བརྒྱད་ཀྱིས་ཐོས་པའི་ཚད་དུ་ལམ་བྱེད་པ་ལ་སེང་གེ་བཞིན་དུ་སྒྲ་བསྒྲགས་ནས། བྱང་ཆུབ་ཀྱི་ཤིང་ལ་སྔུན་པར་ཕྱོགས་པས་བཞུད་དོ། །ཀླུ་དང་གནོད་སྦྱིན་དང་འདབ་བཟངས་ལ་སོགས་པ་རྣམས་ཀྱིས་ལྷའི་སྤོས་དང་མེ་ཏོག་ལ་སོགས་པ་དང་། ལྷའི་གླུ་དབྱངས་ལ་སོགས་པས་མཆོད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་རྣམས་དྲི་བཟང་པོར་གྱུར་ཅིང་མེ་ཏོག་གི་ཕྲེང་བར་གྱུར་ནས་ཐམས་ཅད་ལེགས་སོ་ཞེས་བརྗོད་པར་གྱུར་ཏོ། །དེའི་ཚེ་རྩྭ་འཚོང་བཀྲ་ཤིས་ཞེས་བྱ་བས་རྩྭ་བླངས་ནས་ལམ་གྱི་སྔོན་དུ་འོངས་ཏེ་སྐྱེས་བུ་ཆེན་པོའི་རྣམ་འགྱུར་རྟོགས་ནས་རྩྭ་སྤར་མོ་བརྒྱད་ཕུལ་ལོ། །བྱང་ཆུབ་སེམས་དཔས་རྩྭ་བླངས་ནས་བྱང་ཆུབ་ཀྱི་སྙིང་པོ་དང་ཉེ་བར་གཤེགས་ཏེ་ལྷོ་ཕྱོགས་ཀྱི་ཆར་ཞལ་བྱང་དུ་མངོན་པར་ཕྱོགས་པས་འཁོད་དོ། །དེ་མ་ཐག་པར་ལྷོ་ཕྱོགས་ཀྱི་ཁོར་ཡུག་གིས་བྱིང་ནས་འགྲོ་བ་ནི་འོག་མནར་མེད་པའི་བར་དུ་གྱུར་པ་བཞིན་ནོ། །ལྷོ་
ཕྱོགས་ཀྱི་ཁོར་ཡུག་སྟེང་དུ་ལངས་ནས་འགྲོ་བ་ནི་སྲིད་པའི་རྩེ་མོར་གྱུར་པ་བཞིན་ནོ། །བྱང་ཆུབ་སེམས་དཔས་འདི་ཡང་དག་པར་རྫོགས་པའི་སངས་རྒྱས་ཐོབ་པའི་གནས་མ་ཡིན་ནོ་ཞེས་དགོངས་ཞིང་བསྐོར་ནས་ནུབ་ཀྱི་ཕྱོགས་ཀྱི་ཆར་གཤེགས་ཏེ་ཤར་ཕྱོགས་སུ་མངོན་དུ་ཕྱོགས་པས་འཁོད་དོ། །དེ་ནས་ནུབ་ཕྱོགས་ཀྱི་ཁོར་ཡུག་འོག་ཏུ་བྱིང་ནས་འགྲོ་བ་ནི་མནར་མེད་པའི་བར་དུ་གྱུར་པ་བཞིན་ནོ། །ཤར་ཕྱོགས་ཀྱི་ཁོར་ཡུག་སྟེང་དུ་ལངས་ནས་འགྲོ་བ་ནི་སྲིད་པའི་རྩེ་མོར་གྱུར་པ་བཞིན་ནོ། །བྱང་ཆུབ་སེམས་དཔའ་འཁོད་ཅིང་འཁོད་པའི་གནས་ནི་མུ་ཁྱུད་ཀྱི་མཐར་ཐུག་པར་མནན་ཞིང་སོ་སོར་གནས་པའི་ཤིང་རྟའི་འཁོར་ལོ་ཆེན་པོ་ལྟ་བུར་ས་གཞི་ཆེན་པོ་ལ་བྱིང་ཞིང་བྱིང་ནས་འགྲོ་བར་གྱུར་ཏོ། །བྱང་ཆུབ་སེམས་དཔས་འདི་ནི་བྱང་ཆུབ་ཐོབ་པའི་གནས་མ་ཡིན་ནོ་ཞེས་བསྐོར་ནས་བྱང་ཕྱོགས་ཀྱི་ཆར་གཤེགས་ཏེ། ལྷོ་ཕྱོགས་སུ་སྔུན་དུ་ཕྱོགས་པས་འཁོད་དོ། །དེ་ནས་བྱང་གི་ཁོར་ཡུག་ས་ལ་བྱིང་ནས་མནར་མེད་ཀྱི་བར་དུ་གྱུར་པ་བཞིན་ནོ། །བྱང་གི་ཁོར་ཡུག་གྱེན་དུ་ལངས་ནས་སྲིད་པའི་རྩེ་མོའི་བར་དུ་གྱུར་པ་བཞིན་ནོ། །བྱང་ཆུབ་སེམས་དཔས་འདི་ནི་བྱང་ཆུབ་ཐོབ་པའི་གནས་མ་ཡིན་ནོ་ཞེས་བསམས་ཏེ་བསྐོར་ནས་ཤར་ཕྱོགས་ཀྱི་ཆར་གཤེགས་ནས་ནུབ་ཕྱོགས་སུ་སྔུན་དུ་ཕྱོགས་པས་འཁོད་དོ། །སླར་ཡང་ཤར་ཕྱོགས་ཀྱི་ཆར་སངས་རྒྱས་ཐམས་ཅད་ཀྱིས་སྐྱིལ་ཀྲུང་བཅས་པའི་གནས་དེ་གཡོ་བར་མི་འགྱུར་ཞིང་མི་ལྡེག་གོ། །སེམས་དཔའ་ཆེན་པོས་འདི་ནི་སངས་རྒྱས་ཐམས་ཅད་ཀྱིས་མ་སྤངས་ཤིང་མི་གཡོ་བའི་གནས། ཉོན་མོངས་པའི་དྲ་བ་ཐམས་ཅད་རྣམ་པར་འཇོམས་པའི་གནས་སུ་རྟོགས་སོ། །དེའི་རྩྭ་རྣམས་རྩེ་མོ་ནས་བཟུང་སྟེ་བཀྲམ་ནས་དེ་མ་ཐག་ཏུ་ཁྲུ་བཅུ་བཞི་པའི་ཚད་ཙམ་གྱི་གདན་དུ་གྱུར་ཏོ། །དེ་ཡང་དེ་ལྟ་བུའི་ཚུལ་གྱིས་ཇི་ལྟར་བཞག་པ་དེ་བཞིན་དུ་མི་གནས་སོ། །ཇི་ལྟར་གཟུགས་ལ་མཁས་པའི་རི་མོ་བྱེད་པ་རྣམས་ཀྱིས་རི་མོ་བྲིས་པ་བཞིན་དུ་བྱང་ཆུབ་སེམས་དཔས་བྱང་ཆུབ་ཤིང་གི་སྡོང་པོ་ལ་སྐུ་རྒྱབ་བརྟེན་པར་བྱས་ནས་ཞལ་ཤར་དུ་མངོན་དུ་ཕྱོགས་པར་མཛད་དོ། །བརྟན་པའི་སེམས་སུ་གྱུར་ནས་བདག་གི་པགས་པ་དང་རྒྱུས་པ་དང་རུས་པ་དང་ཁྲག་དང་ཤ་རྣམས་སྐམས་པར་གྱུར་ཀྱང་ཡང་དག་པར་རྫོགས་པའི་སངས་རྒྱས་མ་ཐོབ་བར་དུ་ནི་སྟན་འདི་ལས་ལུས་བསྐྱོད་པར་མི་བྱའོ། །ཐོག་བརྒྱ་
ཕྲག་བབས་ཀྱང་མི་ཕྱེད་ཅིང་ཕ་རོལ་གྱིས་མི་ཚུགས་པར་སྟན་ལ་སྐྱིལ་ཀྲུང་གིས་བཞུགས་སོ། །དེའི་ཚེ་ལྷའི་བུའི་བདུད་ཀྱིས་གཞོན་ནུ་དོན་གྲུབ་བདག་གི་དབང་དུ་བྱེད་པར་འདོད་པས་ད་ནི་བདག་ལས་འདའ་བར་བྱེད་དུ་མི་སྟེར་རོ་ཞེས་བསམས་ནས་བདུད་ཀྱི་དམག་དང་ཉེ་བར་སོང་སྟེ། དོན་འདི་སྨྲས་ཤིང་བདུད་ཀྱི་སྒྲ་ཞེས་པས་སྒྲ་བསྒྲགས་ནས་བདུད་ཀྱི་དམག་ཁྲིད་དེ་འཐོན་ནས། བདུད་ཀྱི་སྡེ་བདུད་ཀྱི་མདུན་དུ་དཔག་ཚད་བཅུ་གཉིས་ཀྱི་སར་འགྲོའོ། །གཡས་ཕྱོགས་གཡོན་ཕྱོགས་རྣམས་སུ་དཔག་ཚད་བཅུ་གཉིས་འགྲོའོ། །རྒྱབ་ཕྱོགས་སུ་ཇི་སྲིད་ཁོར་ཡུག་གི་མཐར་ཐུག་པར་བྱས་ནས་གནས་སོ། །སྟེང་དུ་དཔག་ཚད་དགུའོ། །འཁོར་ཐམས་ཅད་ཀྱི་གཏམ་བྱེད་པའི་སྒྲ་དཔག་ཚད་སྟོང་ཕྲག་གཅིག་གི་བར་དུ་ས་གཞི་འབུགས་པ་ཙམ་གྱི་སྒྲ་ཐོས་སོ། །དེ་ནས་ལྷའི་བུའི་བདུད་དཔག་ཚད་ཕྱེད་དང་ཉིས་བརྒྱའི་རིའི་འོག་པག་ཞེས་བྱ་བའི་གླང་པོ་ཆེའི་རྒྱབ་ཏུ་ཞོན་ནས་ལག་པ་སྟོང་ཕྲག་གཅིག་སྤྲུལ་ནས་མཚོན་ཆ་སྣ་ཚོགས་པ་བླངས་སོ། །གཞན་ཡང་བདུད་ཀྱི་འཁོར་གྱི་གྲོགས་གཉིས་གཅིག་དང་མཚུངས་པར་མཚོན་ཆའི་རིགས་གཉིས་མི་ལེན་ནོ། །ཁ་དོག་རྣམ་པ་སྣ་ཚོགས་པ་དང་རྣམ་པ་སྣ་ཚོགས་པའི་གདོང་ཅན་སེམས་དཔའ་ཆེན་པོ་གཞོམ་པར་བྱ་བའི་ཕྱིར་འོངས་སོ། །སྟོང་ཕྲག་བཅུའི་ཁོར་ཡུག་གི་ལྷ་རྣམས་སླར་ཡང་སེམས་དཔའ་ཆེན་པོ་ལ་བསྟོད་པ་བྱེད་ཅིང་གནས་སོ། །བརྒྱ་བྱིན་ལྷའི་རྒྱལ་པོས་རྣམ་པར་རྒྱལ་བ་བླ་ན་མེད་པའི་དུང་འབུད་ཅིང་འཁོད་དོ། །སླར་ཡང་དུང་དེ་ཁྲུ་བརྒྱ་ཉི་ཤུར་གྱུར་ཏོ། །གལ་ཏེ་ལེགས་པར་བུས་ན་ཟླ་བ་བཞིའི་བར་དུ་རྒྱུན་མི་འཆད་ཅིང་དེ་ནས་རྒྱུན་འཆད་དོ། །ཀླུའི་རྒྱལ་པོ་ནག་པོ་ཆེན་པོས་བརྒྱ་ཕྲག་དུ་མའི་བསྟོད་པ་བྱེད་ཅིང་གནས་སོ། །ཚངས་པ་ཆེན་པོ་གདུགས་དཀར་པོ་བཟུང་ནས་གནས་སོ། །སླར་ཡང་བདུད་ཀྱི་དམག་བྱང་ཆུབ་ཀྱི་སྙིང་པོར་འོངས་ཤིང་འོངས་སོ། །ལྷ་དེ་རྣམས་གཅིག་ཏུ་འཁོད་པར་མ་ནུས་པས་རང་གི་གནས་སུ་བྲོས་ནས་སོང་ངོ་། །ཀླུའི་རྒྱལ་པོ་ནག་པོ་ས་ལ་བྱིང་ནས་དཔག་ཚད་ལྔ་བརྒྱའི་སྙེ་མ་ཅན་གྱི་ཀླུའི་ཕོ་བྲང་དུ་སོང་སྟེ། ལག་པ་གཉིས་ཁ་ལ་བཀབ་ནས་ཉལ་ལོ། །བརྒྱ་བྱིན་གྱི་རྣམ་པར་རྒྱལ་བ་བླ་ན་མེད་པའི་དུང་རྒྱབ་ཏུ་བཀལ་ཏེ་ཁོར་ཡུག་གི་སྟེང་དུ་འཁོད་དོ། །ཚངས་པ་ཆེན་པོས་
གདུགས་དཀར་པོ་ཁོར་ཡུག་གི་སྟེང་དུ་བཙུགས་ནས་ཚངས་པའི་འཇིག་རྟེན་དུ་སོང་ངོ། །ལྷ་གཅིག་གིས་ཀྱང་འཁོད་པར་མ་ནུས་ཏེ། སྐྱེས་བུ་ཆེན་པོ་ཉིད་གཅིག་པུ་བཞུགས་སོ། །བདུད་ཀྱིས་རང་གི་འཁོར་ལ་སྨྲས་པ། བུ་ཟས་གཙང་གི་བུ་དོན་གྲུབ་དང་འདྲ་བའི་སྐྱེས་བུ་གཞན་མེད་པས། བདག་གིས་དེའི་མདུན་དུ་གཡུལ་འགྱེད་པར་མི་ནུས་ཀྱིས། རྒྱབ་ཀྱི་ཕྱོགས་སུ་གཡུལ་བགྱིའོ་ཞེས་སྨྲས་སོ། །སྐྱེས་བུ་ཆེན་པོས་ཀྱང་ཕྱོགས་གསུམ་ལ་གཟིགས་པས་ལྷ་ཐམས་ཅད་བྲོས་པའི་ཕྱིར་གནས་ཐམས་ཅད་སྟོང་པར་མཐོང་ངོ་། །གཞན་ཡང་བྱང་ཕྱོགས་སུ་གཟིགས་པས་བདུད་ཀྱི་དམག་རྣམས་བདག་གཞོམ་པའི་ཕྱིར་འོང་བ་གཟིགས་སོ། །འདི་རྣམས་ཀྱི་དམག་གི་ཚོགས་བདག་གཅིག་པུའི་ཕྱིར་རྩོལ་བ་ཆེན་པོས་ཕ་རོལ་གནོན་པར་བྱེད་ཅིང་གནས་འདིར་འོངས་ཏེ། བདག་གི་མའམ་ཕའམ་སྤུན་ནམ་སུ་ཡང་རུང་བའི་གཉེན་ལས་གཞན་མེད་དོ། །གཞན་ཡང་གང་གི་ཕྱིར་ཕ་རོལ་དུ་ཕྱིན་པ་བཅུ་པོ་ཉིད་བདག་གིས་དུས་ཡུན་རིང་པོར་གཉེར་ལ་དགའ་བ་བཞིན་གོམས་པ་དེའི་ཕྱིར་བདག་གིས་ཕ་རོལ་དུ་ཕྱིན་པ་ཉིད་ཀྱིས་ཕུབ་བྱས་ནས། ཕ་རོལ་དུ་ཕྱིན་པ་ཉིད་ཀྱི་མཚོན་ཐོགས་ཏེ། འདིའི་དམག་གི་ཚོགས་རྣམས་གཞོམ་པར་རིགས་སོ་སྙམ་ནས་ཕ་རོལ་དུ་ཕྱིན་པ་བཅུ་པོ་ཐུགས་ལ་བསམས་ནས་བཞུགས་སོ། །དེ་ནས་ལྷའི་བུའི་བདུད་ཀྱིས་དོན་གྲུབ་དེ་མ་ཐག་ཏུ་འབྲོས་པར་བྱེད་པར་རིགས་སོ་ཞེས་སྨྲས་ནས་རླུང་གི་དཀྱིལ་འཁོར་ཉེ་བར་གནས་ནས་འོངས་སོ། །དེ་མ་ཐག་ཁོ་ནར་ཤར་ཕྱོགས་ལ་སོགས་པའི་རླུང་གི་དཀྱིལ་འཁོར་རྣམས་ལངས་ནས་འོངས་ཏེ་དཔག་ཚད་ཕྱེད་དང་ཡང་གཉིས་ལ་སོགས་པའི་ཚད་ཀྱི་རིའི་ཕུང་པོ་བླངས་ནས་ནགས་ཐིབས་པོ་དང་ཤིང་ལ་སོགས་པ་ས་ལ་བཏོན་ཞིང། ཐམས་ཅད་དུ་གྲོང་དང་གྲོང་རྡལ་ཕྱེ་མ་དང་རྣམ་པར་ཕྱེ་མར་བྱེད་པའི་ནུས་པ་ནི་སྐྱེས་བུ་ཆེན་པོའི་བསོད་ནམས་ཀྱི་གཟི་བརྗིད་ཀྱི་མཐུས་གྱེས་ཏེ། བྱང་ཆུབ་སེམས་དཔའི་དྲུང་དུ་འོངས་ནས་བླ་གོས་ཀྱི་གྲྭ་ཙམ་ཡང་བསྒུལ་བར་མི་ནུས་སོ། །དེ་ནས་ཆུ་ཡིས་གཞོམ་པའི་ཕྱིར་འོངས་ནས་གསོད་པར་བསམས་པ་ན་ཆར་པཆེན་པོ་འབབ་ཅིང་གནས་སོ། །དེའི་མཐུས་སྟེང་ནས་སྟེང་དུ་བརྒྱ་ཕྲག་དུ་མ་བརྩེགས་པ་དང། སྟོང་ཕྲག་དུ་མ་བརྩེགས་པའི་སྤྲིན་ཆེན་པོ་འདུས་ནས་ཆར་འབེབས་སོ། །ཆར་པའི་རྒྱུན་
གྱི་ཤུགས་ཀྱིས་ས་གཞི་འབུགས་པར་གྱུར་ཏོ། །ནགས་ཚལ་དང་ཤིང་ལ་སོགས་པའི་སྟེང་གི་ཆར་སྤྲིན་ཆེན་པོ་འོངས་ནས་སེམས་དཔའ་ཆེན་པོ་ཆུ་ཐིགས་གཅིག་ཙམ་གྱིས་ཀྱང་སྦང་བར་མ་ནུས་སོ། །དེ་ནས་རྡོའི་ཆར་བཀུག་ནས་ཆེས་ཆེ་བའི་རིའི་ཕུང་པོ་དུ་བར་བྱེད་ཅིང་འབར་བར་བྱས་ནས་ནམ་མཁའ་ནས་འོངས་ཏེ་བྱང་ཆུབ་སེམས་དཔའི་དྲུང་དུ་འོངས་ནས། ལྷའི་མེ་ཏོག་གི་ཆུན་བུའི་གཟུགས་འབབ་བོ། །དེ་ནས་མཚོན་ཆའི་ཆར་ཐམས་ཅད་བཀུག་ནས་མཚོན་སོ་གཅིག་པ་དང་སོ་གཉིས་པ་དང་རལ་གྲི་དང་མདུང་ཐུང་དང་སྤུ་གྲི་ལ་སོགས་པའི་མཚོན་ཆ་རྣམས་དུ་བར་བྱེད་ཅིང་འབར་བར་བྱས་ནས་ནམ་མཁའ་ལས་འོངས་ཏེ། བྱང་ཆུབ་སེམས་དཔའི་དྲུང་དུ་འོངས་ནས་ལྷའི་མེ་ཏོག་ཏུ་གྱུར་ཏོ། །དེ་ནས་སོལ་བའི་ཆར་བཀུག་ནས་རྒྱ་སྐྱེགས་ཀྱི་མེ་ཏོག་གི་ཁ་དོག་ཅན་གྱི་སོལ་བ་ནམ་མཁའ་ནས་འོངས་ནས་བྱང་ཆུབ་སེམས་དཔའི་ཞབས་དྲུང་དུ་ལྷའི་མེ་ཏོག་ཏུ་གྱུར་ནས་འབབ་བོ། །དེ་ནས་ཐལ་བའི་ཆར་པ་རྣམས་བཀུག་ནས་ཤིན་ཏུ་དྲོ་བ་མེའི་ཁ་དོག་ཅན་གྱི་ཐལ་བ་ནམ་མཁའ་ནས་འོངས་ནས་བྱང་ཆུབ་སེམས་དཔའི་ཞབས་དྲུང་དུ་ཙན་དན་གྱི་ཕྱེ་མ་ལྟར་གྱུར་པའི་ཆར་འབབ་བོ། །དེ་ནས་བྱེ་མའི་མར་བཀུག་ནས་ཤིན་ཏུ་ཕྲ་བའི་བྱེ་མ་རྣམས་དུ་བར་བྱེད་ཅིང་འབར་བར་བྱས་ནས་ནམ་མཁའ་ནས་འོངས་ཏེ་བྱང་ཆུབ་སེམས་དཔའི་ཞབས་དྲུང་དུ་ལྷའི་ཕྱེ་མ་ལྟར་གྱུར་ནས་ཆར་འབབ་བོ། །དེ་ནས་འཇིམ་པའི་ཆར་པ་རྣམས་བཀུག་ནས་འཇིམ་པ་རྣམས་དུ་བར་བྱེད་ཅིང་འབར་བར་བྱས་ནས་ནམ་མཁའ་ནས་འོངས་ཏེ་བྱང་ཆུབ་སེམས་དཔའི་ཞབས་དྲུང་དུ་ལྷའི་བྱུག་པར་གྱུར་ནས་འབབ་བོ། །དེ་ནས་འདི་བཞིན་དུ་འཇིགས་པར་བྱེད་པས་དོན་གྲུབ་འབྲོས་པར་བྱ་བའི་ཕྱིར་མུན་པ་ཉེ་བར་གནས་པར་བྱའོ། །དེ་ནི་ཡན་ལག་བཞི་དང་ལྡན་པའི་མུན་ནག་ཆེན་པོར་གྱུར་ནས་བྱང་ཆུབ་སེམས་དཔའི་དྲུང་དུ་སླེབ་ནས་ཉི་མའི་འོད་ཀྱིས་མུན་པ་བཅོམ་པ་བཞིན་དུ་མི་སྣང་བར་གྱུར་ནས་འདི་ལྟར་བདུད་དགུ་པོ་འདི་རླུང་དང་ཆར་དང་རྡོ་དང་མཚོན་ཆ་དང་སོལ་བ་དང་ཐལ་བ་དང་བྱེ་མ་དང་འཇིམ་པ་དང་མུན་པ་སྟེ། དེ་རྣམས་ཆར་དུ་བབས་ནས་བྱང་ཆུབ་སེམས་དཔའ་འབྲོས་པར་བྱེད་པར་མ་ནུས་སོ། །ཅིས་བརྗོད་ཅིང་ཅིའི་ཕྱིར་སྡོད། གཞོན་ནུ་འདི་ལ་ཟུང་ཅིག་རྒྱོབ་ཅིག་ཐོན་ཅིག་ཅེས་འཁོར་རྣམས་བོས་ནས་རང་གིས་ཀྱང་རིའི་འོག་པག་གླང་པོ་ཆེའི་རྒྱབ་ཏུ་
ཞོན་ནས་འཁོར་ལོའི་མཚོན་ཆ་བསླངས་ཏེ། བྱང་ཆུབ་སེམས་དཔའི་དྲུང་དུ་ཉེ་བར་འོངས་ནས་དོན་གྲུབ་སྟན་ལས་ལོངས་ཤིག །འདི་ཁྱོད་ལ་རིགས་པ་མ་ཡིན་གྱི་ངེད་ལ་རིགས་པ་ཡིན་ནོ་ཞེས་སྨྲས་སོ། །སེམས་དཔའ་ཆེན་པོས་དེའི་ཚིག་ཐོས་ནས་འདི་ལྟར་སྨྲས་སོ། །བདུད་ཁྱོད་ཀྱིས་ཕ་རོལ་ཏུ་ཕྱིན་པ་བཅུ་མ་རྫོགས་པ་དང། ཉེ་བའི་ཕ་རོལ་དུ་ཕྱིན་པ་མ་རྫོགས་པ་དང། དོན་དམ་པའི་ཕ་རོལ་དུ་ཕྱིན་པ་མ་རྫོགས་པ་དང། ཆེན་པོ་ལྔ་ཡོངས་སུ་གཏོང་བ་མེད་པ་དང། གཉེན་གྱི་དོན་དུ་སྤྱོད་པ་མེད་པ་དང། འཇིག་རྟེན་གྱི་དོན་གྱི་སྤྱོད་པ་མེད་པ་དང། སངས་རྒྱས་ཀྱི་སྤྱོད་པ་ཡོངས་སུ་མ་རྫོགས་པས་སྟན་འདི་ཁྱོད་ལ་རིགས་པ་མ་ཡིན་ནོ། །སྟན་འདི་བདག་ཁོ་ན་ལ་རིགས་པ་ཡིན་ནོ། །བདུད་ཁྲོས་པར་གྱུར་ནས་ཁྲོས་པའི་ཤུགས་བསྲན་པར་མ་ནུས་ཏེ། སྐྱེས་བུ་ཆེན་པོ་ལ་མཚོན་ཆའི་འཁོར་ལོ་འཕངས་སོ། །དེའི་ཕ་རོལ་དུ་ཕྱིན་པ་བཅུ་སེམས་པར་བྱེད་ཅིང་བཞུགས་པ་ན་སྟེང་གི་ཆར་མེ་ཏོག་གི་ཕྲེང་བའི་བླ་རེས་བྲེས་པ་བཞིན་དུ་གྱུར་ཏོ། །དེའི་འཁོར་ལོའི་མཚོན་ཆ་གཞན་ལ་དེ་ཤིན་ཏུ་ཁྲོས་པས་འཕངས་ཏེ་རྡོ་བ་མཐུག་པོའམ། རྡོ་བ་མཐུག་པོའི་ཀ་བ་འབུགས་ཤིང་འགྲོ་བའོ། །སླར་ཡང་དེ་ནི་དེའི་མེ་ཏོག་གི་བླ་རེས་སུ་གྱུར་ནས་གནས་པ་ན་བདུད་ཀྱི་འཁོར་ལྷག་མ་རྣམས་དེ་ནས་སྟན་ལས་ལངས་ཏེ་འགྲོ་བར་བསམས་ནས་ཆེས་ཆེ་བའི་རིའི་ཕུང་པོ་འཕངས་སོ། །དེ་རྣམས་ཀྱང་སྐྱེས་བུ་ཆེན་པོའི་ཕ་རོལ་དུ་ཕྱིན་པ་བཅུ་ལ་སེམས་ཤིང་བཞུགས་པ་ན་མེ་ཏོག་གི་ཆུན་པོར་གྱུར་ནས་ས་ལ་ལྷུང་ངོ་། །ལྷ་རྣམས་ཁོར་ཡུག་གི་མཐར་འཁོད་པ་རྣམས་སྐེ་བཏེག་ནས་བལྟ་ཞིང། མགོ་བོ་བཏེག་ཅིང་བཏེག་ནས་དོན་གྲུབ་གཞོན་ནུ་མཆོག་གི་སྐུའི་བདག་ཉིད་ཉམས་སམ་སྙམ་ནས་ཅི་བྱེད་ན་ཞེས་བསམས་ཤིང་བལྟའོ། །དེ་ནས་སྐྱེས་བུ་ཆེན་པོས་ཕ་རོལ་དུ་ཕྱིན་པ་རྫོགས་པའི་བྱང་ཆུབ་སེམས་དཔའ་རྣམས་མངོན་པར་རྫོགས་པར་བྱང་ཆུབ་པའི་ཉིན་མོ་ཐོབ་པའི་སྟན་བདག་ལ་རིགས་པ་ཡིན་ནོ་ཞེས་བཤད་ནས། འཁོད་པའི་བདུད་ལ་སྨྲས་སོ། །བདུད་ཁྱོད་ཀྱིས་སྦྱིན་པ་བཏང་བའི་དཔང་པོ་སུ་ཡོད་ཅེས་སྨྲས་སོ། །བདུད་འདི་རྣམས་ཐམས་ཅད་བདག་གི་དཔང་པོ་ཡིན་ནོ་ཞེས་བདུད་ཀྱི་དམག་རྣམས་ལ་ལག་པ་བརྐྱང་ངོ་། །དེ་མ་ཐག་པར་བདུད་ཀྱི་འཁོར་རྣམས་ང་ཡང་དཔང་པོ་ཡིན་ང་
ཡང་དཔང་པོ་ཡིན་ཞེས་བརྗོད་པའི་སྒྲས་ས་གཞི་ཡང་རལ་བ་བཞིན་དུ་བརྗོད་པའི་སྒྲར་གྱུར་ཏོ། །དེ་ནས་བདུད་ཀྱིས་སྐྱེས་བུ་ཆེན་པོ་ལ་སྨྲས་པ། དོན་གྲུབ་ཁྱོད་ཀྱིས་སྦྱིན་པ་བཏང་བའི་དངོས་པོ་ལ་དཔང་པོ་སུ་ཡོད་ཅེས་སྨྲས་སོ། །སྐྱེས་བུ་ཆེན་པོ་ཁྱོད་ཀྱིས་རེ་ཞིག་སྦྱིན་པ་བྱིན་པའི་དངོས་པོ་ལ་སེམས་དང་བཅས་པ་རྣམས་དཔང་པོ་ཡིན་ནོ། །སླར་ཡང་བདག་ལ་གནས་འདི་ན་སེམས་དང་བཅས་པའི་དཔང་པོ་སུ་ཡང་མེད་པས་བདག་ཉིད་ཀྱིས་སྐྱེ་བའི་མཐར་སྦྱིན་པ་བཏང་བ་དེ་སྲིད་གནས་པ་ཐམས་ཅད་སྒྲོལ་གྱི་ལུས་ཀྱི་བདག་ཉིད་ལ་གནས་ནས་སྦྱིན་པ་ཆེན་པོ་བདུན་བརྒྱ་པ་བདུན་བྱིན་པའི་དངོས་པོ་ལ་སེམས་མེད་པའི་ས་གཞི་ཆེན་པོ་མཐུག་པོ་འདི་དཔང་པོ་ཡིན་ནོ་ཞེས་ཆོས་གོས་ཀྱི་ནང་ནས་ཕྱག་གཡས་པ་བཏོན་ཏེ། ཐམས་ཅད་སྒྲོལ་གྱི་བདག་ཉིད་ཀྱི་ལུས་སུ་གནས་ནས་བདག་གིས་སྦྱིན་པ་བདུན་བརྒྱ་པ་བདུན་བྱིན་པའི་དངོས་པོ་དེ་ལ་ཁྱོད་ཀྱིས་དཔང་པོ་ཡིན་ནམ་མ་ཡིན་པ་སྨྲོས་ཤིག་ཅེས་ས་ཆེན་པོ་ལ་མངོན་དུ་ཕྱོགས་པས་ཕྱག་བརྐྱང་བ་དང། ས་ཆེན་པོས་བདག་ནི་དེའི་ཚེ་དཔང་པོ་ཡིན་ནོ་ཞེས་སྒྲ་སྒྲོགས་པར་གྱུར་ནས། སྒྲ་ཆེན་པོ་སྒྲོགས་པ་བརྒྱ་དང་སྟོང་ཕྲག་གཅིག་དང། སྒྲ་ཆེན་པོ་འབུམ་ཕྲག་གཅིག་པོ་རྣམས་ཀྱིས་བདུད་ཀྱི་དམག་གི་སྒྲ་རྣམས་ཟིལ་གྱིས་མནན་པ་བཞིན་དུ་གྱུར་ཏོ། །དེ་ནས་སྐྱེས་བུ་ཆེན་པོ་དོན་གྲུབ་ཀྱི་སྦྱིན་པ་ཆེན་པོ་བྱིན་པ་ནི་མཆོག་གི་སྦྱིན་པའོ་ཞེས་ཐམས་ཅད་སྒྲོལ་གྱི་སྦྱིན་པ་དྲན་པར་བྱེད་ཅིང་དཔག་ཚད་ཕྱེད་དང་ཉིས་བརྒྱའི་རིའི་འོག་པག་གི་གླང་པོ་ཆེ་པུས་མོ་ས་ལ་བཙུགས་ནས་འཁོད་དོ། །བདུད་ཀྱི་འཁོར་རྣམས་ཕྱོགས་དང་མཚམས་རྣམས་སུ་བྲོས་ནས་གཉིས་ལམ་གཅིག་ལ་འགྲོ་བ་མེད་དོ། །མགོའི་རྒྱན་ཉིད་དང་གྱོན་པའི་གོས་དང་པོར་དོར་ནས་རང་གི་ཕྱོགས་ཕྱོགས་ཉིད་དུ་འབྲོས་སོ། །དེ་ནས་ལྷའི་ཚོགས་རྣམས་ཀྱིས་བདུད་བྲོས་ནས་འགྲོ་བ་མཐོང་སྟེ། བདུད་རྣམས་ཕམ་པས་དོན་གྲུབ་གཞོན་ནུ་རྒྱལ་བར་གྱུར་ཏོ་ཞེས་རྒྱལ་བའི་མཆོད་པ་བྱེད་པར་སེམས་སོ། །ཀླུ་ནི་ཀླུ་རྣམས་ལ་བསྐུལ་ལོ། །འདབ་བཟངས་ནི་འདབ་བཟངས་རྣམས་ལའོ། །ལྷ་ནི་ལྷ་རྣམས་ལའོ། །ཚངས་པས་ནི་ཚངས་པ་རྣམས་བསྐུལ་ལོ། །སྤོས་དང་མེ་ཏོག་གི་ཕྲེང་བ་ལ་སོགས་པ་ལག་ཏུ་ཐོགས་ནས་བྱང་ཆུབ་ཤིང་གི་དྲུང་དུ་སྐྱིལ་ཀྲུང་གིས་བཞུགས་པའི་སྐྱེས་བུ་ཆེན་པོ་དང་ཉེ་བར་འོངས་སོ། །དེ་ལྟར་བདུད་རྣམས་བྲོས་
ནས་སོང་ངོ་། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །དེ་ཚེ་དྲང་སྲོང་ཀླུ་ཚོགས་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །འདབ་བཟངས་ཚོགས་ཀྱི་དྲང་སྲོང་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །ལྷ་ཚོགས་དེ་ཚེ་དྲང་སྲོང་རྒྱལ། །དཔལ་ལྡན་སངས་རྒྱས་རྒྱལ་བར་གྱུར། །སྡིག་ཅན་བདུད་ནི་ཕམ་པར་གྱུར། །རབ་དགའ་བྱང་ཆུབ་སྙིང་པོར་སྒྲོགས། །ཚངས་ཚོགས་དེ་ཚེ་རྒྱལ་བར་སྒྲོགས། །མཐར་སྟོང་ཕྲག་བཅུའི་ཁོར་ཡུག་གི་ལྷ་རྣམས་ཀྱིས་མེ་ཏོག་དང་སྤོས་དང་བྱུག་པ་རྣམས་ཀྱིས་མཆོད་པར་བྱེད་དོ། །རྣམ་པ་སྣ་ཚོགས་པའི་བསྟོད་པ་བྱེད་ཅིང་འཁོད་དོ། །འདི་ལྟར་སྐྱེས་བུ་ཆེན་པོ་ཉི་མ་ནུབ་པའི་ཚེ་བདུད་རྣམ་པར་བཅོམ་ནས་ཆོས་གོས་ཀྱི་སྟེང་དུ་བྱང་ཆུབ་ཀྱི་ཤིང་གི་འདབ་མ་མྱུ་གུ་ལྟ་བུ་ལྷུང་ཞིང་བྱི་རུ་དམར་པོས་མཆོད་པར་བྱེད་པ་ལྟ་བུའོ། །ཐུན་དང་པོ་ལ་སྔོན་གྱི་གནས་རྗེས་སུ་དྲན་པ་ཡེ་ཤེས་ཀྱིས་རྟོགས་པ་དང། ཐུན་བར་པ་ལ་ལྷའི་སྤྱན་རྣམ་པར་དག་པས་ཡེ་ཤེས་ཐོབ་པ་དང། ཐུན་ཐ་མ་ལ་རྟེན་ཅིང་འབྲེལ་པར་འབྱུང་བའི་ཡེ་ཤེས་ཐོབ་བོ། །དེ་ནས་རྟེན་འབྲེལ་བཅུ་གཉིས་ཀྱི་རྐྱེན་གྱིས་རྣམ་པར་འཇུག་པ་དང་མི་འཇུག་པའི་ལུགས་ལས་འབྱུང་བ་དང་ལུགས་ལས་བཟློག་པ་དྲན་པར་བྱེད་ཅིང་དྲན་པར་བྱེད་དོ། །སྟོང་ཕྲག་བཅུའི་འཇིག་རྟེན་གྱི་ཁམས་ཆུའི་མཐར་ཐུག་པར་བྱས་ནས་ལན་བཅུ་གཉིས་སུ་ཡང་དག་པར་གཡོས་སོ། །སླར་ཡང་སྐྱེས་བུ་ཆེན་པོས་སྟོང་ཕྲག་བཅུའི་འཇིག་རྟེན་གྱི་ཁམས་སུ་སྒྲ་ཆེན་པོ་སྒྲོགས་ཤིང་སྐྱ་རེངས་ཤར་བའི་དུས་སུ་ཐམས་ཅད་མཁྱེན་པའི་ཡེ་ཤེས་སོ་སོར་མྱོང་ངོ་། །སྟོང་ཕྲག་བཅུའི་འཇིག་རྟེན་གྱི་ཁམས་ཐམས་ཅད་བརྒྱན་བཞིན་དུ་རིགས་པར་གྱུར་ཏོ། །ཤར་ཕྱོགས་ཀྱི་ཁོར་ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་ནུབ་ཀྱི་ཁོར་ཡུག་གི་སྟེང་དུ་ཆགས་སོ། །དེ་བཞིན་དུ་ནུབ་ཀྱི་ཕྱོགས་ཀྱི་ཁོར་ཡུག་གི་མཐའི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་ཤར་གྱི་ཁོར་ཡུག་གི་སྟེང་དུ་ཆགས་སོ། །བྱང་གི་ཕྱོགས་ཀྱི་ཁོར་
ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་ལྷོའི་ཁོར་ཡུག་གི་སྟེང་དུ་ཆགས་སོ། །ལྷོའི་ཕྱོགས་ཀྱི་ཁོར་ཡུག་གི་སྟེང་དུ་རྒྱལ་མཚན་དང་བ་དན་བཙུགས་པའི་ཤམ་བུས་བྱང་གི་ཁོར་ཡུག་གི་སྟེང་དུ་ཆགས་སོ། །ས་གཞི་ལས་ལངས་པའི་རྒྱལ་མཚན་དང་བ་དན་ཚངས་པའི་གནས་སུ་ཆགས་སོ། །ཚངས་པའི་འཇིག་རྟེན་གྱི་གནས་སུ་བཅིངས་པའི་རྒྱལ་མཚན་དང་བ་དན་ས་གཞིའི་སྟེང་དུ་ཆགས་སོ། །སྟོང་ཕྲག་བཅུའི་ཁོར་ཡུག་ལ་མེ་ཏོག་གི་ཤིང་ལ་མེ་ཏོག་ཁ་བྱེའོ། །འབྲས་བུའི་ཤིང་ལ་འབྲས་བུ་མང་པོར་གྱུར་ཏོ། །སྡོང་པོ་རྣམས་ལ་སྡོང་པོའི་པད་མའི་མེ་ཏོག་ཁ་བྱེའོ། །ཡལ་ག་རྣམས་ལ་ཡལ་གའི་པད་མའི་མེ་ཏོག་གོ། །འཁྲི་ཤིང་རྣམས་ལ་འཁྲི་ཤིང་གི་པད་མའི་མེ་ཏོག་གོ། །ནམ་མཁའ་ནས་ཐུར་དུ་པད་མའི་མེ་ཏོག་འཕྱང་ངོ་། །ཐང་དང་རྡོའི་སྟེང་དུ་བརྟོལ་ནས་སྟེང་ནས་སྟེང་དུ་བདུན་བདུན་དུ་གྱུར་ཏེ་རྒྱུན་ཆགས་པའི་པད་མའི་མེ་ཏོག་ཅེསབྱ་བ་ཕྱུང་ངོ་། །སྟོང་ཕྲག་བཅུའི་འཇིག་རྟེན་གྱི་ཁམས་ཁྱད་པར་དུ་འཕགས་པའི་མེ་ཏོག་གི་གདན་བཞིན་དུ་གྱུར་ཏོ། །ཁོར་ཡུག་གི་བར་དཔག་ཚད་སྟོང་ཕྲག་བརྒྱད་ཀྱི་འཇིག་རྟེན་གྱི་བར་གྱི་དམྱལ་བ་ཉི་མ་བདུན་གྱི་འོད་ཀྱིས་ཀྱང་སྣང་བར་བྱེད་པ་མེད་པས་ན་དཀོན་ནོ། །དེ་དང་མཚུངས་པའི་འཇིག་རྟེན་གྱི་བར་གྱི་དམྱལ་བ་དེ་མ་ཐག་ཏུ་སྣང་བར་གྱུར་ཏོ། །དཔག་ཚད་བརྒྱད་ཁྲི་བཞི་སྟོང་ཙམ་གྱིས་ཟབ་པའི་རྒྱ་མཚོ་ཆེན་པོའི་ཆུ་དངར་པོར་གྱུར་ཏོ། །ཆུ་ཀླུང་རྣམས་ནི་འགྲོ་བར་གནས་སོ། །དམུས་ལོང་རྣམས་ཀྱི་མིག་གིས་གཟུགས་མཐོང་ངོ་། །འོན་པ་རྣམས་ཀྱི་རྣ་བས་སྒྲ་ཐོས་སོ། །གོང་པོ་རྣམས་ཀྱིས་འགྲོ་ཤེས་པར་གྱུར་ཏོ། །བཅིངས་པའི་སེམས་ཅན་རྣམས་ནི་རྗེས་སུ་བཅིངས་པ་ལས་གྲོལ་བར་གྱུར་ཏོ། །འདི་ལྟར་ཚད་མེད་པའི་དཔལ་དུ་གྱུར་ནས་མཆོད་པ་དང་ཡ་མཚན་པའི་ཆོས་རབ་ཏུ་སྐྱེས་སོ། །ཐམས་ཅད་མཁྱེན་པའི་ཡེ་ཤེས་སོ་སོར་རིག་གོ། །སངས་རྒྱས་ཐམས་ཅད་ཀྱི་བཤད་པ་ཆེད་དུ་བརྗོད་པ་ཆེད་དུ་བརྗོད་དོ། །སྐྱེ་བའི་འཁོར་བ་མ་ལུས་པ། །དུག་མེད་རྣམ་པར་དུག་མེད་ཚོལ། །ཁྱིམ་མེད་པ་ནི་ཚོལ་བ་ན། །སྐྱེ་བའི་སྡུག་བསྔལ་ཡང་ཡང་དང། །ཁྱིམ་མེད་པ་ནི་མཐོང་བར་གྱུར། །སླར་ཡང་ཁྱིམ་ནི་བྱེད་པ་མེད། །དེ་ཡི་སྡུག་བསྔལ་ཐམས་ཅད་བཅོམ། །དུག་གི་མིང་ཅན་ཁྱིམ་
གྱི་ཕུང། །སེམས་ནི་འདུ་བྱེད་པ་ལས་གྲོལ། །སྲེད་པ་ཟད་ནས་མེད་པར་གྱུར། །ཞེས་པ་འདི་ནི་དགའ་ལྡན་གྱི་ཕོ་བྲང་དུ་གནས་པ་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་འདིར་ཐམས་ཅད་མཁྱེན་པ་ཐོབ་པ་དེ་རྣམས་ཀྱི་གནས་ནི་གླེང་གཞི་བར་མ་ཞེས་བྱ་བ་ཡིན་ནོ།། །།གཞན་ཡང་ཉེ་བའི་གླེང་གཞི་ནི་བཅོམ་ལྡན་འདས་མཉན་ཡོད་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བའི་གནས་སུ་བཞུགས་པ་དང། ཡངས་པ་ཅན་གྱི་ནགས་ཚལ་ཆེན་པོ་ཁང་པ་བརྩེགས་པའི་གནས་སུ་བཞུགས་སོ། །དེ་ལྟར་དེ་དང་དེའི་གནས་རྣམས་སུ་བཞུགས་ཤིང་དེ་དང་དེའི་གནས་ཉིད་ཐོབ་ཅེས་བརྗོད་དོ། །གང་ཅི་ཡང་འདི་ལྟར་བརྗོད་པ་དེ་ནས་ཡང་དེ་དང་པོ་ནས་བཟུང་ནས་འདི་ལྟར་རིག་པར་བྱའོ། །བཅོམ་ལྡན་འདས་བཞུགས་ནས་ཆེད་དུ་བརྗོད་ཅིང་ཆེད་དུ་བརྗོད་པ་དེ་ལྟ་བུའི་སེམས་སྐྱེས་སོ། །བདག་གིས་བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་ལྷག་པ་ནས་སྐྱིལ་ཀྲུང་བཅས་པ་འདིའི་ཆེད་དུ་དུས་འདི་རྣམས་ལ་བདག་གི་མགོ་རྒྱན་གྱིས་བརྒྱན་པའི་མགྲིན་པ་ནས་བྲེགས་ཏེ་སྦྱིན་པར་བཏང་བ་དང། སྤྱན་བཟང་པོ་བཏང་བ་དང། སྙིང་གི་ཤ་བྲེགས་ནས་བཏང་བ་དང། གཞོན་ནུ་དྲ་བ་འཛིན་དང་འདྲ་བའི་བུ་སྦྱིན་པར་བཏང་བ་དང། ཀྲིཥྞ་ཛི་ནའི་གཞོན་ནུ་མ་དང་མཚུངས་པའི་བུ་མོ་སྦྱིན་པར་བཏང་བ་དང། ལྷ་མོ་མ་ཀྲི་དང་མཚུངས་པའི་ཆུང་མ་རྣམས་གཞན་གྱི་བྲན་གྱི་ཕྱིར་སྦྱིན་པར་བཏང་ངོ་། །འདི་ནི་བདག་གི་འདུག་སྟངས་ཡིན་ནོ། །རྒྱལ་བའི་འདུག་སྟངས་ཡིན་ནོ། །མཆོག་གི་འདུག་སྟངས་ཡིན་ནོ། །འདི་ལ་བདག་བཞུགས་ནས་བསམ་པ་ཐམས་ཅད་ཡོངས་སུ་རྫོགས་སོ། །རེ་ཞིག་སྟན་འདི་ལས་བདག་མི་ལྡང་ངོ་སྙམ་དུ་བསམས་ནས་བྱེ་བ་འབུམ་ཕྲག་དུ་མ་ལ་སྙོམས་པར་ཞུགས་ནས་མཉམ་པར་གནས་ཏེ་ཞག་བདུན་དུ་དེ་ཉིད་དུ་བཞུགས་སོ། །དེའི་ཕྱིར་སངས་རྒྱས་ཞེས་བརྗོད་དོ། །དེ་ནས་བཅོམ་ལྡན་འདས་ཀྱིས་ཞག་བདུན་དུ་འདུག་སྟངས་གཅིག་གིས་བཞུགས་སོ། །རྣམ་པར་གྲོལ་བ་དང་བདེ་བ་སོ་སོར་རིག་ཅིང་བཞུགས་སོ། །གཞན་ཡང་ལྷ་གང་དང་གང་ཞིག་ད་དུང་ཡང་ངེས་པར་དོན་གྲུབ་ལ་བྱ་བ་ཡོད་དམ་འདུག་སྟངས་འདི་ལ་ཞེན་པ་མ་སྤང་བ་དང་རྣམ་པར་རྟོག་པ་ཡོངས་སུ་བསྐྱེད་དོ་ཞེས་བསམས་ནས་སྟོན་པས་ལྷ་རྣམས་ཀྱི་རྣམ་པར་རྟོག་པ་མཁྱེན་ནས། དེ་རྣམས་ཀྱི་རྣམ་པར་རྟོག་པ་ཉེ་
བར་ཞི་བར་བྱ་བའི་ཕྱིར་སྟེང་གི་ནམ་མཁའ་ལ་འདུག་ནས་སོ་སོར་ཆོ་འཕྲུལ་བསྟན་ཏོ། །བྱང་ཆུབ་ཀྱི་སྙིང་པོར་མཛད་པའི་ཆོ་འཕྲུལ་དང། ཉེ་དུ་དང་འདུས་པའི་དུས་སུ་མཛད་པའི་ཆོ་འཕྲུལ་དང། ཀློག་པའི་མདོ་དང་འདུས་པར་མཛད་པའི་ཆོ་འཕྲུལ་ཐམས་ཅད་ཨ་མྲ་སྲུང་བ་དང་ཨ་མྲའི་ཤིང་གི་དྲུང་དུ་མཛད་པའི་སོ་སོའི་ཆོ་འཕྲུལ་དང་མཚུངས་པར་གྱུར་ཏོ། །འདི་ལྟར་སྟོན་པས་འདི་ལྟ་བུའི་ཆོ་འཕྲུལ་མཛད་ནས་ལྷ་རྣམས་ཀྱི་རྣམ་པར་རྟོག་པ་ཉེ་བར་ཞི་བར་མཛད་དོ། །འདུག་སྟངས་ཀྱིས་བྱང་ཤར་གྱི་ཆར་འཁོད་དེ་འདིའི་འདུག་སྟངས་ཀྱིས་ཐམས་ཅད་མཁྱེན་པའི་ཡེ་ཤེས་སོ་སོར་རྟོག་པར་བྱེད་དོ། །བསྐལ་པ་གྲངས་མེད་པ་བཞི་དང་འབུམ་ཕྲག་གཅིག་གིས་ཕ་རོལ་དུ་ཕྱིན་པ་ཡོངས་སུ་རྫོགས་པའི་འབྲས་བུ་ལྷག་པར་རྟོགས་པའི་འདུག་སྟངས་ཀྱིས་མིག་མི་འཛུམས་པར་ལྟ་ཞིང་ཞག་བདུན་དུ་འཁོད་དོ། །དེའི་གནས་སུ་མིག་མི་འཛུམས་པའི་མཆོད་རྟེན་ཞེས་བྱ་བ་བྱུང་ངོ་། །དེ་ནས་འདུག་སྟངས་ལ་འཁོད་པའི་གནས་ཀྱི་བར་དུ་འཆག་པར་བྱས་ནས་ཤར་དང་ནུབ་ཏུ་རིན་པོ་ཆེ་ལ་འཆག་པས་ཞག་བདུན་དུ་འཁོད་དོ། །གནས་དེར་རིན་པོ་ཆེ་ལ་འཆག་པའི་མཆོད་རྟེན་ཞེས་བྱ་བ་བྱུང་ངོ་། །གཞན་ཡང་ཞག་བདུན་པ་བཞི་པ་ལ་བྱང་ཆུབ་ཤིང་གི་བྱང་ཤར་གྱི་ཆར་ལྷ་རྣམས་ཀྱིས་རིན་པོ་ཆེའི་ཁང་པ་སྤྲུལ་ལོ། །དེར་འདུག་སྟངས་ཀྱིས་བཞུགས་ནས་ཆོས་མངོན་པའི་སྡེ་སྣོད་མ་ལུས་པར་འདི་རྣམས་མཐའ་ཡས་པའི་ཚུལ་གྱིས་ཀུན་གནས་པར་སེམས་ཤིང་ཞག་བདུན་བཞུགས་སོ། །ཆོས་མངོན་པ་པ་སླར་ཡང་འདི་སྐད་སྨྲའོ། །རིན་པོ་ཆེའི་ཁང་པ་ཞེས་བྱ་བ་རིན་པོ་ཆེ་ལས་བྱུང་བའི་ཁང་པ་ཡིན་ནོ་ཞེས་ཟེར་རོ། །སྡུད་པར་བྱེད་པ་པོ་རྣམས་སླར་ཡང་འདི་སྐད་གསུང་སྟེ། རབ་ཏུ་བྱེད་པ་བདུན་གྱི་ཆོས་མངོན་པ་རྗེས་སུ་དྲན་པར་བྱེད་པའི་རིན་པོ་ཆེའི་ཁང་པ་ཡིན་ཞེས་གསུང་ངོ་། །གང་གི་ཕྱིར་སླར་ཡང་འདིར་ཚིག་གཉིས་ཀ་ཡང་འཐད་དོ། །དེའི་ཕྱིར་འདི་གཉིས་ཀ་ཡང་གཟུང་བར་བྱའོ། །དེ་ནས་སླར་ཡང་གནས་དེ་རིན་པོ་ཆེའི་ཁང་པའི་མཆོད་རྟེན་ཞེས་བྱ་བ་བྱུང་ངོ་། །འདི་ལྟར་བྱང་ཆུབ་ཤིང་དང་ཉེ་བ་ཉིད་དུ་ཞག་བདུན་པ་བཞི་པ་སོང་ནས་ཞག་བདུན་པ་ལྔ་པ་ལ་བྱང་ཆུབ་ཤིང་གི་དྲུང་ནས་ར་ལུག་སྐྱོང་བའི་ཤིང་ནྱ་གྲོ་དྷ་དང་ཉེ་བར་གཤེགས་ནས་དེར་ཡང་ཆོས་ལ་
རྣམ་པར་སེམས་པ་ཉིད་ཀྱིས་རྣམ་པར་གྲོལ་བ་དང་བདེ་བས་སོ་སོར་རིག་པར་མཛད་ནས་བཞུགས་སོ། །དེའི་ཚེ་ལྷའི་བུའི་བདུད་དུས་འདི་རྣམས་ཀྱི་ཕྱི་མ་ལ་གྲིབ་མ་བཞིན་དུ་ཕྱོགས་གང་དུའང་མ་སྤངས་སོ། །བྱང་ཆུབ་སེམས་དཔའ་ལ་སྐྱོན་ཅུང་ཟད་ཀྱང་མ་མཐོང་ངོ་། །ད་ནི་ངའི་དབང་དུ་བྱ་བ་ལས་འདས་པས་ཡིད་མི་བདེ་བ་ཐོབ་པར་གྱུར་ཅིང་ལམ་ཆེན་པོར་གནས་ནས་རྣམ་པ་བཅུ་དྲུག་གི་རྒྱུ་མཚན་ལ་སེམས་ཤིང་ས་ལ་རི་མོ་བཅུ་དྲུག་འདྲིའོ། །བདག་གིས་འདི་བཞིན་དུ་སྦྱིན་པའི་ཕ་རོལ་དུ་ཕྱིན་པ་མ་རྫོགས་པ་དེའི་ཕྱིར་བདག་འདི་དང་འདྲ་བར་མ་གྱུར་ཏོ་ཞེས་རི་མོ་གཅིག་བྲིས་སོ། །དེ་བཞིན་དུ་བདག་འདི་དང་མཚུངས་པར་ཚུལ་ཁྲིམས་ཀྱི་ཕ་རོལ་དུ་ཕྱིན་པ་དང། ངེས་འབྱུང་གི་ཕ་རོལ་དུ་ཕྱིན་པ་དང། ཤེས་རབ་ཀྱི་ཕ་རོལ་དུ་ཕྱིན་པ་དང། བརྩོན་འགྲུས་ཀྱི་ཕ་རོལ་དུ་ཕྱིན་པ་དང། བཟོད་པའི་ཕ་རོལ་དུ་ཕྱིན་པ་དང། བདེན་པའི་ཕ་རོལ་དུ་ཕྱིན་པ་དང། ལྷག་པར་གནས་པའི་ཕ་རོལ་དུ་ཕྱིན་པ་དང། བྱམས་པའི་ཕ་རོལ་དུ་ཕྱིན་པ་དང། བཏང་སྙོམས་ཀྱི་ཕ་རོལ་དུ་ཕྱིན་པ་རྣམས་མ་རྫོགས་སོ། །དེའི་ཕྱིར་བདག་འདི་དང་མཚུངས་པར་མ་གྱུར་ཏོ་སྙམ་ནས་རི་མོ་བཅུ་བྲིས་སོ། །བདག་འདི་དང་མཚུངས་པའི་ཐུན་མོང་མ་ཡིན་པའི་དབང་པོ་མཆོག་གི་གོང་མའི་ཡེ་ཤེས་སོ་སོར་རིག་པ་ཉེ་བར་གནས་པར་གྱུར་པའི་ཕ་རོལ་དུ་ཕྱིན་པ་བཅུ་མ་རྫོགས་པ་དེའི་ཕྱིར་བདག་འདི་དང་མཚུངས་པར་མ་གྱུར་ཏོ་སྙམ་ནས་རི་མོ་བཅུ་དྲུག་བྲིས་སོ། །དེ་བཞིན་དུ་བདག་འདི་དང་མཚུངས་པའི་ཐུན་མོང་མ་ཡིན་པའི་བསམ་པའི་བག་ལ་ཉལ་དང་ཡེ་ཤེས་ཀྱི་ཐུགས་རྗེ་ཆེན་པོ་དང། སྙོམས་པར་འཇུག་པའི་ཡེ་ཤེས་དང། སོ་སོར་ཆོ་འཕྲུལ་གྱི་ཡེ་ཤེས་དང་སྒྲིབ་པ་མེད་པའི་ཡེ་ཤེས་དང། ཐམས་ཅད་མཁྱེན་པའི་ཡེ་ཤེས་སོ་སོར་གནས་པ་ཉེ་བར་གནས་པར་གྱུར་པའི་ཕ་རོལ་དུ་ཕྱིན་པ་བཅུ་མ་རྫོགས་པའི་དེའི་ཕྱིར་བདག་འདི་དང་མཚུངས་པར་མ་གྱུར་ཏོ་སྙམ་ནས་རི་མོ་བཅུ་དྲུག་བྲིས་སོ། །འདི་ལྟར་འདིའི་རྒྱུ་མཚན་སེམས་ཤིང་ལམ་ཆེན་པོར་རི་མོ་བཅུ་དྲུག་བྲིས་ནས་གནས་སོ། །དེའི་ཚེ་སྲེད་མ་དང། ཀུན་དུ་དགའ་མ་དང། དགའ་མ་སྡེ་གསུམ་པོ་ནི་བདུད་ཀྱི་བུ་མོ་བདག་ཅག་གི་ཕ་ནི་མ་མཐོང་བར་གྱུར་པས་དེ་མ་ཐག་པར་གན་ཡོད་དམ་ཞེས་བལྟ་ཞིང་རྒྱུ་བ་ན་དེ་ཡིད་མི་བདེ་བ་ཐོབ་པར་གྱུར་ཏེ། ས་
ལ་རི་མོ་བྱེད་པ་མཐོང་ནས་ཕ་དང་ཉེ་བར་སོང་སྟེ་ཕ་གང་གི་ཕྱིར་སྡུག་བསྔལ་ཞིང་ཡིད་མི་བདེ་བར་བྱེད་ཅེས་དྲིས་སོ། །བུ་མོ་དགེ་སྦྱོང་ཆེན་པོ་འདི་བདག་གི་དབང་དུ་བྱེད་པ་ལས་འདས་སོ་ཞེས་འདི་རྣམས་ཀྱི་དུས་སུ་བལྟས་པས་སྐྱོན་ཅུང་ཟད་ཀྱང་མ་མཐོང་ངོ་། །དེའི་ཕྱིར་བདག་སྡུག་བསྔལ་ཞིང་ཡིད་མི་བདེ་བ་སྐྱེས་སོ། །འདི་ལྟར་གྱུར་ན་དེ་ལྟར་མ་བསམས་ཤིག །བདག་ཅག་གསུམ་གྱིས་དེ་དབང་དུ་བྱས་ནས་ཁྲིད་ལ་འོང་ངོ་། །སྨྲས་པ། བུ་མོས་མི་ནུས་ཏེ་སུས་ཀྱང་དབང་དུ་བྱ་བར་མི་ནུས་པས་སྐྱེས་བུ་འདི་ནི་མི་གཡོ་བའི་དད་པ་ལ་གནས་སོ། །སྨྲས་པ། ཕ་བདག་ཅག་བུད་མེད་ཡིན་པས་ད་ལྟ་ཉིད་དུ་དེ་ལ་འདོད་ཆགས་ཀྱི་ཞགས་པས་བཅིངས་ཏེ་ཁྲིད་ལ་འོང་ངོ་། །ཁྱེད་མ་སེམས་ཤིག །དེ་ནས་བུད་མེད་དེ་རྣམས། བཅོམ་ལྡན་འདས་དང་ཉེ་བར་སོང་སྟེ་དགེ་སྦྱོང་ཁྱེད་ཀྱི་ཞབས་ལ་བསྙེན་བཀུར་བདག་ཅག་གིས་བགྱིའོ་ཞེས་སྨྲས་སོ། །བཅོམ་ལྡན་འདས་ཉིད་ཀྱིས་དེ་རྣམས་ཀྱི་ཚིག་ལ་ཐུགས་མ་གཏད་དོ། །སྤྱན་རྣམ་པར་གྲོལ་བ་ཡང་མ་གཟིགས་སོ། །ཇི་ལྟར་དེ་བླ་ན་མེད་པའི་ཉེ་བར་སྐྱེ་བ་ཟད་པ་རྣམ་པར་གྲོལ་བའི་བསམ་པས་དབེན་པའི་བདེ་བ་ཉིད་ལ་ཉམས་སུ་མྱོང་བར་མཛད་ཅིང་བཞུགས་སོ། །གཞན་ཡང་བདུད་ཀྱི་བུ་མོ་བསམ་པ་མང་ཞིང་སྐྱེས་བུ་དང་མཚུངས་པའི་སེམས་སོ། །གང་དང་གང་གཞོན་ནུ་ལ་དགའ་བར་གྱུར་པ་དང། གང་དང་གང་ཞིག་ན་ཚོད་དང་པོར་གྱུར་པ་ལ་དགའ་བ་དང། གང་དང་གང་ཞིག་ན་ཚོད་བར་མར་གྱུར་པ་ལ་དགའ་བ་དང། གང་དང་གང་ཞིག་ན་ཚོད་ཕྱི་མར་གྱུར་པ་ལ་དགའ་བའོ། །བདག་གིས་དེ་ལྟ་བུའི་རྣམ་པ་སྣ་ཚོགས་པའི་འོད་ལ་ཆགས་པར་བགྱིའོ་ཞེས་སྨས་ནས། བུ་མོ་རེ་རེས་གཞོན་ནུ་མའི་གཟུགས་ལ་སོགས་པའི་བརྒྱ་ཕྲག་བརྒྱ་ཕྲག་གིས་བདག་ཉིད་ཀྱི་ལུས་སྤྲུལ་ལོ། །གཞོན་ནུ་མའི་གཟུགས་དང་ལང་ཚོ་མའི་གཟུགས་དང། དང་པོ་བུ་དང་བུ་མོ་ལན་ཅིག་སྐྱེས་པའི་གཟུགས་དང། བར་མའི་བུད་མེད་ཀྱི་གཟུགས་དང། ལུས་རགས་མོར་གྱུར་ནས་ལན་དྲུག་ཏུ་བཅོམ་ལྡན་འདས་དང་ཉེ་བར་སོང་ནས་དགེ་སྦྱོང་ཁྱོད་ཀྱི་ཞབས་ལ་བདག་ཅག་གིས་བསྙེན་བཀུར་བགྱིའོ་ཞེས་སྨྲས་སོ། །བཅོམ་ལྡན་འདས་ཀྱིས་དེ་རྣམས་ཀྱི་ཚིག་ལ་ཡང་ཐུགས་མ་གཏད་དོ། །ཇི་ལྟར་དེ་བླ་ན་མེད་པའི་ཉེ་བར་སྐྱེ་བ་རྣམ་པར་གྲོལ་ལོ། །གཞན་ཡང་སློབ་དཔོན་
གང་ཞིག་འདི་སྐད་སྨྲའོ། །དེ་རྫུ་འཕྲུལ་དང་ལྡན་པས་བུད་མེད་འོངས་པ་ལ་བལྟ་ཞིང་བཅོམ་ལྡན་འདས་འདི་ལྟ་བུའི་གཟུགས་ཀྱིས་འདི་རྣམས་སོ་བྱི་བ་དང། སྐྲ་དཀར་པོར་གྱུར་པར་བྱིན་གྱིས་བརླབས་སོ་ཞེས་ཟེར་རོ། །དེའི་ཚིག་གཟུང་བར་མི་བྱའོ། །སྟོན་པས་འདི་ལྟ་བུའི་གཟུགས་སུ་བྱིན་གྱིས་བརླབས་པར་མ་མཛད་དོ། །གཞན་ཡང་བཅོམ་ལྡན་འདས་ཀྱིས་ཅི་མཐོང་འདི་ལྟ་བུའི་འབད་པ་བྱེད་པ་ད་སོང་ཅིག །འདི་ལྟ་བུའི་ཚུལ་གྱིས་འདོད་ཆགས་དང་མ་བྲལ་བ་ལ་སོགས་པའི་མདུན་དུ་བྱ་བར་རིགས་སོ། །དེ་བཞིན་གཤེགས་པས་སླར་ཡང་འདོད་ཆགས་སྤངས་ཤིང་ཉེས་པ་སྤངས་པ་དང་གཏི་མུག་སྤངས་པས་རང་གི་འདོད་ཆགས་སྤངས་པའི་ཕྱིར་རོ། །གང་ཞིག་རྒྱལ་བ་དེ་ལ་རྒྱལ་མི་ནུས། །གང་ཞིག་འཇིག་རྟེན་འདིར་ནི་རྒྱལ་མི་འགྱུར། །མཐའ་ཡས་སངས་རྒྱས་སྤྱོད་ཡུལ་དེ་མི་གནས། །རྐང་མེད་ཀྱིས་ནི་རྐང་ཡོད་ལ་མི་ནུས། །གང་གི་སྲིད་པའི་དྲ་བ་བཏོན་གྱུར་ནས། །དེ་ལ་སྲེད་པ་རྣམས་ནི་ཅུང་ཟད་མེད། །མཐའ་ཡས་སངས་རྒྱས་སྤྱོད་ཡུལ་དེ་ཉིད་ལ། །རྐང་མེད་དེ་ཡིས་རྐང་ཡོད་ལ་མི་ནུས། །འདི་ནི་སངས་རྒྱས་ཀྱི་ཆོས་མཆོག་གི་སྡེ་ལས་ཚིགས་སུ་བཅད་པ་གཉིས་གསུངས་ནསཆོས་བསྟན་ཏོ། །བུ་མོ་རྣམས་ལ་ཕ་ཟེར་བ་ཡང་བདེན་པ་ཡིན་ནོ། །དགྲ་བཅོམ་པ་བདེ་བར་གཤེགས་པ་འཇིག་རྟེན་མིའི་མཆོག་ཡིན་ནོ་ཞེས་སྨྲས་ནས་ལྷ་དང་ཉེ་བར་སོང་ངོ་། །བཅོམ་ལྡན་འདས་ཀྱིས་ཀྱང་འདིར་ཞག་བདུན་བཞུགས་ནས་བཏང་བཟུང་གི་གནས་སུ་གཤེགས་སོ། །དེར་ཞག་བདུན་དུ་སྐུ་ལ་ཡུལ་ངན་དང་གྲང་བ་ཞི་བར་བྱ་བའི་ཕྱིར་ཀླུའི་རྒྱལ་པོ་བཏང་བཟུང་ཞེས་བྱ་བས་ལུས་ཀྱིས་ལན་བདུན་དུ་དཀྲིས་ནས་གདེངས་ཀ་བྱས་སོ། །དྲིའི་གཙང་ཁང་ཤིན་ཏུ་ཡངས་པར་བཞུགས་པ་བཞིན་རྣམ་པར་གྲོལ་བ་དང་བདེ་བ་སོ་སོར་རིག་པར་བྱེད་ཅིང་ཞག་བདུན་དུ་བཞུགས་ནས་ཤིང་རཱ་ཛ་ཡ་ཏ་ན་དང་ཉེ་བར་གཤེགས་སོ། །དེར་ཡང་རྣམ་པར་གྲོལ་བ་དང་བདེ་བ་སོ་སོར་རིག་པར་བྱེད་པ་ཉིད་ཀྱིས་བཞུགས་སོ། །དེ་རྣམས་ཀྱིས་རེ་ཞིག་ཞག་བདུན་ཕྲག་བདུན་ཡོངས་སུ་རྫོགས་སོ། །དེ་རྣམས་ཀྱི་བར་དུ་ཞལ་ཤོལ་བ་མེད་པ་དང་སྐུ་ལ་བྱི་དོར་བྱེད་པ་མེད་པ་དང་ཞལ་ཟས་གསོལ་བ་མེད་པར་གྱུར་ཏོ། །བསམ་གཏན་གྱི་བདེ་བ་དང།
ལམ་གྱི་བདེ་བ་དང། འབྲས་བུའི་བདེ་བ་ཉིད་ཀྱིས་ཉིན་མཚན་འདའོ། །དེ་ནས་དེའི་བདུན་ཕྲག་བདུན་གྱི་མཐར་གཅིག་གིས་དམན་པའི་ལྔ་བཅུའི་མཐའི་ཉི་མ་ལ་དེར་བཞུགས་ནས་ཞལ་ཤོལ་བའི་ཐུགས་སྐྱེས་སོ། །ལྷའི་དབང་པོ་བརྒྱ་བྱིན་གྱིས་ཨ་རུ་ར་མཆོག་བླངས་ནས་ཕུལ་ལོ། །སྟོན་པས་དེ་གསོལ་བས་སྐུ་དངས་པར་གྱུར་ཏོ། །དེ་ནས་བརྒྱ་བྱིན་ཉིད་ཀྱིས་སོ་རྩིའི་སོ་ཤིང་ཉིད་ཀྱི་སོ་ཤིང་དང། ཞལ་ཤོལ་བའི་ཆུ་ཕུལ་ལོ། །སྟོན་པས་སོ་ཤིང་བླངས་ནས་ས་བྲུད་དེ་མཚོ་ཆེན་པོ་མ་དྲོས་པའི་ཆུས་ཞལ་བཤལ་ལོ། །དེ་ཉིད་དུ་ཤིང་རཱ་ཛ་ཡ་ཏ་ནའི་དྲུང་དུ་བཞུགས་སོ། །དེའི་ཚེ་ག་གོན་དང་བཟང་པོ་ཞེས་བྱ་བའི་ཚོང་དཔོན་གཉིས་ཤིང་རྟ་ལྔ་བརྒྱ་དང་བཅས་པ་ལྷོ་ཕྱོགས་ཀྱི་ལྗོངས་ནས་ཡུལ་དབུས་སུ་འགྲོ་བ་ན་རང་ཉིད་ཀྱི་སྔར་གྱི་གཉེན་ལྷར་གྱུར་པས་ཤིང་རྟ་ཐམས་ཅད་བྱིང་ནས་འགྲོ་བར་མི་ནུས་པར་བྱིན་གྱིས་བརླབས་པས་སྟོན་པ་ལ་ཁ་ཟས་སྟེར་བའི་ཕྱིར་སྤྲོ་བ་སྐྱེས་སོ། །སྦྲང་བསྲུབས་པའི་ཁུར་བའི་གོང་བུ་བླངས་ནས་བཙུན་པ་བཅོམ་ལྡན་འདས་བཟའ་བ་འདི་ཐུགས་རྗེ་ཆེན་པོ་སྐྱེད་ལ་སོ་སོར་བཞེས་པར་ཞུ་ཞེས་སྟོན་པའི་དྲུང་དུ་ཉེ་བར་འཁོད་དོ། །བཅོམ་ལྡན་འདས་འོ་ཐུག་བཞེས་པའི་ཉིན་མོ་ཉིད་ལྷུང་བཟེད་མི་སྣང་བའི་ཕྱིར་དེ་བཞིན་གཤེགས་པ་རྣམས་ཀྱི་ཡང་ཕྱག་གིས་ལེན་ནམ་འོན་ཀྱང་ལྷུང་བཟེད་ཀྱིས་བླང་ཞེས་བསམས་སོ། །དེ་ནས་སེམས་ཀྱིས་ཤེས་ནས་ཕྱོགས་བཞིའི་རྒྱལ་པོ་ཆེན་པོ་བཞི་པོ་རྣམས་ཀྱིས་ནོར་བུ་ཨིན་དྲ་ནཱི་ལའི་ལྷུང་བཟེད་བླངས་པ། བཅོམ་ལྡན་འདས་ཀྱིས་མ་གནང་ངོ། །སླར་ཡང་སྲན་མ་མུད་གའི་ཁ་དོག་ཅན་གྱི་རྡོ་ལས་བྱུང་བའི་ལྷུང་བཟེད་བཞི་ཕུལ་ལོ། །བཅོམ་ལྡན་འདས་ཀྱིས་ལྷའི་བུ་བཞི་པོ་རྣམས་ལ་རྗེས་སུ་བརྩེ་བས་ལྷུང་བཟེད་བཞི་པོ་བཞེས་ཏེ་སྟེང་ནས་སྟེང་དུ་བརྩེགས་ནས་བཞག་སྟེ་གཅིག་ཏུ་འགྱུར་བར་བྱིན་གྱིས་བརླབས་སོ། །བཞི་པོ་ཡང་བལྟ་བའི་ཕྱིར་དུ་ཁ་ལ་རི་མོ་བཞིར་གྱུར་ཏེ་ལྷུང་བཟེད་འབྲིང་པོའི་ཚད་གཅིག་ཏུ་གྱུར་ཏོ། །བཅོམ་ལྡན་འདས་ལ་དེའི་སོ་སོར་ཕུལ་བ་རིན་ཐང་མེད་པའི་རྡོ་ལས་བྱུང་བའི་ལྷུང་བཟེད་དུ་བཟའ་བའི་ཕྱིར་དུ་བཞེས་ནས་ཡོངས་སུ་ལོངས་སྤྱད་ནས་རྗེས་སུ་ཡི་རང་བར་མཛད་དོ། །ཚོང་དཔོན་སྤུན་གཉིས་སངས་རྒྱས་དང་ཆོས་ལ་སྐྱབས་སུ་འགྲོ་ཞིང་ཚིགས་གཉིས་པའི་དགེ་བསྙེན་དུ་གྱུར་ཏོ། །དེ་ནས་དེ་རྣམས་ཀྱིས་བཙུན་པ་མཆོད་པ་
བྱ་བར་རིགས་པའི་དངོས་པོ་གཅིག་བསླང་ཞེས་ཞུས་སོ། །དེ་ནས་ཕྱག་གཡས་པ་རང་གི་མགོ་ལ་བྱུགས་ནས་སྐྲའི་གདུང་གནང་ངོ་། །དེ་དག་གིས་རང་གི་གྲོང་ཁྱེར་དུ་ཁྱེར་སོང་ནས་མཆོད་རྟེན་བཞེངས་སོ། །ཡང་དག་པར་རྫོགས་པའི་སངས་རྒྱས་ཀྱིས་ཀྱང་དེ་ནས་བཞེངས་ནས་སླར་ཡང་ར་ལུག་སྐྱོང་བའི་ཤིང་ནྱ་གྲོ་དྷ་ཉིད་དུ་གཤེགས་ནས་ནྱ་གྲོ་དྷའི་དྲུང་དུ་བཞུགས་སོ། །དེ་ནས་དེ་ཉིད་དུ་བཞུགས་ཙམ་ཉིད་ན་རང་གིས་ལྷག་པར་རྟོགས་པའི་ཟབ་མོའི་ཆོས་སོ་སོར་བསམ་ཞིང་སངས་རྒྱས་རྣམས་ཀྱིས་ལྷག་པར་རྟོགས་པ་འདི་ནི་ཆོས་སོ། །གཞན་གྱིས་ཆོས་སྟོན་པར་མི་ནུས་པར་བསམས་ནས་རབ་ཏུ་འཇུག་པའི་རྣམ་པའི་རྣམ་པར་རྟོག་པ་སྐྱེས་སོ། །དེ་ནས་མི་མཇེད་ཀྱི་བདག་པོ་ཚངས་པ་འཇིག་རྟེན་ཉམས་པར་འགྱུར་བའི་ཕྱིར་རོ་ཞེས་བསམས་ནས་སྟོང་ཕྲག་བཅུའི་ཁོར་ཡུག་གི་བརྒྱ་བྱིན་དང། འཐབ་བྲལ་བཟང་པོ་དང། དགའ་ལྡན་དང། འཕྲུལ་དགའ་དང། གཞན་འཕྲུལ་དབང་ཕྱུག་དང། ཚངས་པ་ཆེན་པོ་རྣམས་ཁྲིད་ནས་སྟོན་པའི་དྲུང་དུ་ཕྱིན་ནས། བཙུན་པ་བཅོམ་ལྡན་འདས་ཆོས་བསྟན་དུ་གསོལ། དང་པོའི་ཚུལ་གྱིས་ཆོས་བསྟན་དུ་གསོལ་ཞེས་ཞུས་སོ། །སྟོན་པས་དེ་རྣམས་ལ་གནང་བ་བྱིན་ནོ། །གང་ཞིག་ལ་བདག་གིས་དང་པོར་ཆོས་བསྟན་པར་བྱའོ་ཞེས་དགོངས་ཤིང་མཁས་པ་ཀུན་ལེན་དེའི་ཆོས་འདི་མྱུར་དུ་ཤེས་པར་འགྱུར་བའི་ཐུགས་སྐྱེས་སོ། །སླར་ཡང་གཟིགས་ཏེ་དེ་དུས་ལས་འདས་ནས་ཞག་བདུན་ལོན་པར་རྟོགས་སོ། །འཆར་བྱེད་ལ་བརྟགས་པས་དེ་ཡང་དུས་ལས་འདས་པར་མཁྱེན་ནོ། །དགེ་སློང་ལྔ་སྡེས་བདག་ལ་བསྙེན་བཀུར་མང་པོ་བྱས་པས་ལྔ་སྡེའི་ཆེད་དུ་བསམས་ནས་དེ་རྣམས་གང་ན་གནས་པ་ཡིན་ཞེས་བརྟགས་སོ། །གྲོང་ཁྱེར་བཱ་རཱ་ཎ་སཱིའི་རི་དགས་རྒྱུ་བའི་ནགས་ཚལ་ན་ཡོད་པར་མཁྱེན་ནོ། །དེར་གཤེགས་ནས་ཆོས་ཀྱི་འཁོར་ལོ་བསྐོར་རོ་ཞེས་དགོངས་ནས་ཞག་འགའ་ཞིག་ཏུ་བྱང་ཆུབ་ཀྱི་སྙིང་པོ་ཀུན་དུ་ཉེ་བ་ཉིད་དུ་བསོད་སྙོམས་མཛད་ཅིང་བཞུགས་ནས་དབྱར་ཟླ་འབྲིང་པོའི་ཉ་ལ་གྲོང་ཁྱེར་བཱ་རཱ་ཎ་སཱིར་གཤེགས་པར་དགོངས་ནས་ཚེས་བཅུ་བཞིའི་མཚན་གྱི་མཐར་ནམ་ལངས་པ་ན་ཤིན་ཏུ་སྔ་བ་ཉིད་དུ་ལྷུང་བཟེད་དང་སྣམ་སྦྱར་བསྣམས་ནས་དཔག་ཚད་བཅྭ་བརྒྱད་ཡོད་པའི་ལམ་ལ་གཤེགས་ཤིང་ལམ་གྱི་བར་དུ་ཉེ་བར་གནས་པ་ཞེས་བྱ་བའི་འཚོ་བྱེད་གཅིག་གཟིགས་སོ། །དེ་ལ་རང་གི་སངས་རྒྱས་སུ་གྱུར་པ་བཤད་
དོ། །ཉི་མ་དེ་ཉིད་ལ་སྲོད་ཀྱི་དུས་སུ་དྲང་སྲོང་ལྷུང་བའི་གནས་སུ་གཤེགས་སོ། །གནས་བརྟན་ལྔ་སྡེས་དེ་བཞིན་གཤེགས་པ་བྱོན་པ་རིང་པོ་ཉིད་ནས་མཐོང་སྟེ། དགེ་སྦྱོང་གཽ་ཏ་མ་འདི་བཟའ་བ་མང་པོའི་ཕྱིར་ལུས་ཡོངས་སུ་རྫོགས་པར་གྱུར། དབང་པོ་ཡོངས་སུ་རྫོགས་པར་གྱུར། གསེར་གྱི་ཁ་དོག་ཏུ་གྱུར་ནས་འོངས་ཀྱིས། འདི་ལ་ཕྱག་ལ་སོགས་པ་མི་བྱའོ། །འདི་རིགས་ཆེན་པོར་སྐྱེས་པ་ཡིན་པས་གདན་ཤོམ་པ་ཙམ་འོས་སོ། །དེའི་ཕྱིར་གདན་ཙམ་རིགས་སོ་ཞེས་གཏམ་བྱེད་དོ། །བཅོམ་ལྡན་འདས་ལ་ལྷ་དང་བཅས་པའི་འཇིག་རྟེན་རྣམས་ཀྱི་སེམས་དང་སྤྱོད་པ་ཤེས་པར་ནུས་པའི་ཡེ་ཤེས་ཡོད་དོ། །དེ་ཡང་འདི་རྣམས་ཇི་ལྟར་སེམས་པ་ཡིན་ཞེས་བསམས་ནས་སེམས་ཤེས་པ་ཡིན་ནོ། །དེ་ནས་ལྷ་དང་མི་ཐམས་ཅད་ལ་མཐོང་བ་མེད་པའི་དབང་གིས་ཐམས་ཅད་དུ་ཁྱབ་པར་ནུས་པའི་བྱམས་པའི་སེམས་ཡང་དག་པར་བསྡུས་ནས། མ་མཐོང་བའི་དབང་གིས་བྱམས་པའི་སེམས་ཀྱིས་ཁྱབ་པར་བཅོམ་ལྡན་འདས་ཀྱིས་བསྒོམས་ནས་དེ་བཞིན་གཤེགས་པ་ཉེ་བར་གཤེགས་ཤིང་གཤེགས་པ་ན། སྔར་གྱི་བཅའ་ཁྲིམས་རྣམས་གནས་པར་མི་ནུས་པས་ཕྱག་ཕུལ་ཞིང་བསྲུང་བ་དང་བསྙེན་བཀུར་ཐམས་ཅད་བྱས་སོ། །གཞན་ཡང་དགེ་སློང་དེ་རྣམས་ཡང་དག་པར་རྫོགས་པའི་སངས་རྒྱས་གྲུབ་པ་མི་ཤེས་པའི་ཕྱིར་མིང་བརྗོད་པ་ན་ཚེ་དང་ལྡན་པ་ཞེས་སྨྲ་བ་ཐ་མལ་པའི་ཚིག་གིས་རྗོད་པར་བྱེད་དོ། །དེ་ནས་བཅོམ་ལྡན་འདས་ཀྱིས་དགེ་སློང་དག་བཅོམ་ལྡན་འདས་དང་དེ་བཞིན་གཤེགས་པའི་མིང་དང་ཚེ་དང་ལྡན་པ་ཞེས་ཐ་མལ་པའི་ཚིག་བརྗོད་པར་མི་རུང་ངོ་། །དགེ་སློང་དག་ང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སོ་ཞེས་བདག་ཉིད་སངས་རྒྱས་སྒྲུབ་པར་བྱེད་པ་དང་གདན་བཤམས་པ་མཆོག་ལ་སངས་རྒྱས་བཞུགས་ཏེ། རྒྱུ་སྐར་བྲེ་མཆོག་གསུམ་འཛོམ་པ་ལ་བྱེ་བ་ཕྲག་བཅྭ་བརྒྱད་ཀྱི་ཚངས་པའི་འཁོར་གྱིས་བསྐོར་ནས་གནས་བརྟན་ལྔ་སྡེ་བོས་ཏེ་ཆོས་ཀྱི་འཁོར་ལོ་བསྐོར་བའི་མདོའི་མཐར་བཤད་དོ། །དེ་རྣམས་ལ་གནས་བརྟན་ཀུན་ཤེས་ཀཽཌི་ནྱས་བཤད་པའི་རྗེས་སུ་འབྲངས་ནས་ཡེ་ཤེས་ཐོབ་པ་མདོའི་མཐར་བྱེ་བ་ཕྲག་བཅྭ་བརྒྱད་ཀྱི་ཚངས་པ་རྣམས་ཀྱིས་རྒྱུན་དུ་ཞུགས་པའི་འབྲས་བུ་ཐོབ་བོ། །སྟོན་པས་དེ་ཉིད་དུ་དབྱར་བཞུགས་སོ། །སྔར་ཡང་ཉི་མ་གཉིས་པ་ལ་
གནས་བརྟན་བརླངས་པ་ལ་ཆོས་སྦྱིན་ནོ་ཞེས་གཙུག་ལག་ཁང་དུ་བཞུགས་སོ། །ལྷག་མ་བཞི་པོ་བསོད་སྙོམས་ལ་སོང་ངོ་། །གནས་བརྟན་བརླངས་པས་ཉི་མ་ཕྱེད་ཀྱི་ནང་དུ་རྒྱུན་དུ་ཞུགས་པའི་འབྲས་བུ་ཐོབ་བོ། །འདི་ལྟ་བུའི་ཐབས་ཉིད་ཀྱིས་སླར་ཡང་ཉི་མ་ཕྱི་མ་ལ་གནས་བརྟན་བཟང་ལྡན་དང། སླར་ཡང་ཉི་མ་ཕྱི་མ་ལ་གནས་བརྟན་མིང་ཅན་དང། སླར་ཡང་ཉི་མ་ཕྱི་མ་ལ་གནས་བརྟན་རྟ་ཐུལ་རྣམས་དེ་ཐམས་ཅད་ཀྱིས་རྒྱུན་དུ་ཞུགས་པའི་འབྲས་བུ་ཐོབ་པར་བྱས་ནས་ཚེས་ཉི་ཤུ་ལ་དགེ་སློང་ལྔ་པོ་འདུས་པ་ལ་བདག་མེད་པའི་མཚན་ཉིད་ཀྱི་མདོ་སྡེ་རྣམས་བཤད་དོ། །བཤད་པའི་མཐར་གནས་བརྟན་ལྔ་སྡེས་དགྲ་བཅོམ་པའི་འབྲས་བུ་ཐོབ་བོ། །དེ་ནས་སྟོན་པས་རིགས་ཀྱི་བུ་གྲགས་པ་ཉེ་བར་མི་རྟེན་པར་གཟིགས་ནས། དེའི་མཚན་མོའི་ཆར་སྡུག་བསྔལ་བའི་སེམས་ཀྱིས་ཁྱིམ་སྤངས་ནས་འཐོན་པ་ལ་གྲགས་པ་འདིར་ཤོག་ཅེས་བོས་ནས་མཚན་མོ་དེ་ཉིད་ཀྱི་ཆ་ལ་རྒྱུན་དུ་ཞུགས་པའི་འབྲས་བུ་དང་སླར་ཡང་ཉི་མ་གཉིས་པ་ལ་དགྲ་བཅོམ་པའི་འབྲས་བུ་གྲུབ་པར་བྱེད་དོ། །གཞན་ཡང་སླར་དེའི་གྲོགས་པོ་ལྔ་བཅུ་རྩ་བཞིས་རབ་ཏུ་བྱུང་ཞིང་དགེ་སློང་དུ་གྱུར་ནས་དགྲ་བཅོམ་པ་བྱེད་དོ། །འདི་ལྟར་འཇིག་རྟེན་དུ་དགྲ་བཅོམ་པ་དྲུག་ཅུ་རྩ་གཅིག་ཏུ་གྱུར་ཏོ། །སྟོན་པས་དབྱར་བཞུགས་ནས་དགག་དབྱེ་བྱས་ཏེ་དགེ་སློང་དྲུག་ཅུ་པོ་རྣམས་ཕྱོགས་ཕྱོགས་སུ་བཏང་ནས། རང་ཉིད་ལྟེང་རྒྱས་སུ་གཤེགས་པའི་བར་གྱི་ལམ་ན་རས་བལ་ཅན་གྱི་ཚལ་ནི་དཔག་ཚད་བཅུ་པའོ། །གཞོན་ནུ་བཟང་སྡེ་བཏུལ་ལོ། །དེ་རྣམས་ལས་ཐམས་ཅད་ཀྱི་མཐའི་ཕྱི་མ་རྒྱུན་དུ་ཞུགས་པར་གྱུར་ལ། ཐོག་མ་ནི་ཕྱིར་མི་འོང་དུ་གྱུར་ཏོ། །དེ་རྣམས་ཀྱང་དགེ་སློང་གི་གཟུགས་ཀྱིས་རབ་ཏུ་བྱུང་བ་བགྱིས་ནས་ཕྱོགས་ཕྱོགས་སུ་བཏང་སྟེ་ལྟེང་རྒྱས་སུ་གཤེགས་སོ། །སྟོང་ཕྲག་ཕྱེད་དང་གསུམ་གྱི་ཆོ་འཕྲུལ་ལྟ་ཞིང་ལྟེང་རྒྱས་འོད་སྲུང་ལ་སོགས་པའི་སྤུན་གསུམ་པོ་དང་རལ་པ་ཅན་སྟོང་ཕྲག་གཅིག་བཏུལ་བ་དགེ་སློང་གི་གཟུགས་ཀྱིས་རབ་ཏུ་བྱུང་བར་བྱས་ནས་རི་བོ་ག་ཡའི་རྩེ་མོ་ན་སྡོད་པ་རྣམས་ལ་ཉི་མའི་རྣམ་གྲངས་ཀྱི་མདོ་སྡེ་བསྟན་ནས་དགྲ་བཅོམ་པར་བྱས་ཏེ། དེས་དགྲ་བཅོམ་པ་སྟོང་ཕྲག་རྣམས་འཁོར་དུ་བྱས་ནས་རྒྱལ་པོ་གཟུགས་ཅན་སྙིང་པོ་ལ་ཁས་བླངས་བྱིན་པ་དགྲོལ་བར་བྱ་བའི་དགོངས་པས་རྒྱལ་པོའི་ཁབ་ཀྱི་གྲོང་ཁྱེར་དང་ཉེ་བའི་ཤིང་དངར་གྱི་ཚལ་དུ་བྱོན་ནོ། །སྐྱེད་མོས་ཚལ་སྐྱོང་
བ་རྣམས་ཀྱིས་སྟོན་པ་བྱོན་ནོ་ཞེས་རྒྱལ་པོ་ལ་སྨྲས་སོ། །རྒྱལ་པོས་ཐོས་ཏེ། ཁྲི་ཕྲག་བཅུ་གཉིས་ཀྱི་བྲམ་ཟེ་དང་ཁྱིམ་བདག་འཁོར་དུ་བྱས་ནས་སྟོན་པ་དང་ཉེ་བར་སོང་སྟེ་འཁོར་ལོ་སྣ་ཚོགས་པའི་སྟེང་དུ་གསེར་གྱི་བླ་རེ་དང་འདྲ་བའི་འོད་ཟེར་ཕྱོགས་ཕྱོགས་སུ་འཕྲོ་ཞིང་བཞུགས་པའི་དེ་བཞིན་གཤེགས་པའི་ཞབས་ལ་མགོ་བོས་ཕྱག་ལེགས་པར་བྱས་ནས་འཁོར་དང་བཅས་པ་ཕྱོགས་གཅིག་ཏུ་འཁོད་དོ། །དེ་ནས་ཡང་བྲམ་ཟེ་རྣམས་དང་ཁྱིམ་བདག་ལ་སོགས་པ་འདི་ལྟ་བུའི་སེམས་སུ་གྱུར་ཏེ། འོན་ཀྱང་དགེ་སྦྱོང་ཆེན་པོས་ལྟེང་རྒྱས་འོད་སྲུང་གི་རྗེས་སུ་ཚངས་པར་སྤྱོད་པ་སྤྱད་དམ། ཡང་ན་ལྟེང་རྒྱས་འོད་སྲུང་གིས་དགེ་སྦྱོང་ཆེན་པོའི་རྗེས་སུ་ཚངས་པར་སྤྱོད་པ་སྤྱད་ཅེས་བསམས་སོ། །བཅོམ་ལྡན་འདས་ཀྱིས་དེ་རྣམས་སེམས་ཀྱི་རྟོག་པ་ཐུགས་ཀྱིས་མཁྱེན་ནས་གནས་བརྟན་ལ་ཚིགས་སུ་བཅད་པ་གསུངས་སོ། །ལྟེང་རྒྱས་གནས་སུ་གནས་ནས་ཅི་ཞིག་མཐོང། །སྦྱིན་སྲེག་འདོར་བའི་རྒྱུ་མཚན་ཅི་ཞིག་སྨྲ། །འོད་སྲུང་འདི་ཡི་དོན་ནི་དྲི་བར་བྱ། །ཁྱོད་ཀྱིས་ཇི་ལྟར་སྦྱིན་སྲེག་སྤོང་བ་ཡིན། །གནས་བརྟན་གྱིས་ཀྱང་བཅོམ་ལྡན་འདས་ཀྱི་དགོངས་པ་ཤེས་ནས། གཟུགས་དང་སྒྲ་དང་དེ་བཞིན་རོ་དང་དྲི། །བུད་མེད་འདོད་པ་ཡང་ནི་མཆོད་སྦྱིན་སྤྱོད། །འདི་རྣམས་དྲི་མ་ལེགས་པར་རྟོགས་བྱས་ནས། །དེ་ཕྱིར་མེ་ཡི་སྦྱིན་སྲེག་འདི་སྤངས་སོ། །ཚིགས་སུ་བཅད་པ་འདི་བརྗོད་ནས་རང་ཉིད་ཉན་ཐོས་ཀྱི་འདོད་པ་བསལ་བར་བྱ་བའི་ཕྱིར་དེ་བཞིན་གཤེགས་པའི་ཞབས་ཀྱི་བོལ་དུ་མགོ་བོས་རེག་ནས། བདག་སྟོན་པ་བཙུན་པ་བཅོམ་ལྡན་འདས་ཀྱི་ཉན་ཐོས་ཡིན་ནོ་ཞེས་སྨྲས་སོ། །ཤིང་ཏཱ་ལ་གཅིག་དང་ཤིང་ཏཱ་ལ་གཉིས་དང་ཤིང་ཏཱ་ལ་གསུམ་དང་ཇི་སྲིད་དུ་ཤིང་ཏཱ་ལ་བདུན་ཙམ་དུ་ནམ་མཁའ་ལ་འཕགས་ནས་བབས་ཏེ་དེ་བཞིན་གཤེགས་པ་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། །དེའི་ཆོ་འཕྲུལ་ལྟ་ཞིང་མི་མང་པོ་རྣམས་ཀྱིས་ཨེ་མ་ཧོ་སངས་རྒྱས་ཀྱི་མཐུ་ཆེན་པོ་འདི་ལྟ་བུའི་ལྟ་བ་བསྟན་པས། དགྲ་བཅོམ་པ་ཞེས་བྱ་བ་ལ་སེམས་ཤིང། ལྟེང་རྒྱས་འོད་སྲུང་གི་ལྟ་བའི་དྲ་བ་བཅད་དེ་དེ་བཞིན་གཤེགས་པས་བཏུལ་ནས་སྟོན་པའི་ཡོན་ཏན་ཉིད་བརྗོད་དོ། །བཅོམ་ལྡན་འདས་ཀྱིས་ཁོ་བོས་ཀྱང་ད་ལྟ་ཁོ་ན་མ་ཡིན་པར་
ལྟེང་རྒྱས་འོད་སྲུང་བཏུལ་ལོ། །འདས་པ་ཉིད་དུའང་འདི་ངས་བཏུལ་ལོ་ཞེས་བརྗོད་ནས་དོན་འདི་འདས་པ་ན་མི་སྦྱིན་ཆེན་པོ་འོད་སྲུང་གི་སྐྱེས་རབས་སུ་བཤད་པའི་བདེན་པ་བཞི་པོ་གསལ་བར་བསྟན་ནོ། །དེའི་མོད་ལ་ཡུལ་མ་ག་དྷཱའི་རྒྱལ་པོ་འཁོར་ཁྲི་ཕྲག་བཅུ་གཅིག་དང་བཅས་པས་རྒྱུན་དུ་ཞུགས་པའི་འབྲས་བུ་ཐོབ་བོ། །ཁྲི་ཕྲག་གཅིག་དགེ་བསྙེན་དུ་གྱུར་ཏོ། །རྒྱལ་པོ་སྟོན་པ་དང་ཉེ་བ་ཉིད་དུ་འདུག་སྟེ་བསླབ་པའི་གཞི་ལྔ་སོ་སོར་རབ་ཏུ་ཐོས་ནས་སྐྱབས་སུ་སོང་སྟེ་སང་གི་གདུགས་ཚོད་ལ་མགྲོན་དུ་གཉེར་ནས། སྟན་ལས་ལངས་ཏེ་བཅོམ་ལྡན་འདས་ལ་བསྐོར་བ་བྱས་ནས་སོང་ངོ་། །སླར་ཡང་སང་གི་སྔ་དྲོ་ཉིད་བཅོམ་ལྡན་འདས་མཐོང་བ་དང་མ་མཐོང་བ་རྒྱལ་པོའི་ཁབ་ན་གནས་པ་རྣམས་ཀྱིས་བྱེ་བ་ཕྲག་བཅྭ་བརྒྱད་ཀྱི་གྲངས་ཀྱི་མི་རྣམས་དེ་བཞིན་གཤེགས་པ་བལྟ་བར་འདོད་པས་སྔ་དྲོ་ཉིད་རྒྱལ་པོའི་ཁབ་ནས་ཤིང་དངར་གྱི་ཚལ་དུ་སོང་སྟེ་རྒྱང་གྲགས་བཅུ་གཉིས་སུ་མི་ཤོང་བར་ཤིང་དངར་གྱི་ཚལ་ཐམས་ཅད་རྒྱུན་མི་འཆད་པར་གྱུར་ཏོ། །མི་ཐམས་ཅད་ཀྱིས་སྟོབས་བཅུ་པའི་གཟུགས་མཆོག་ཐོབ་པར་འདོད་པ་བདག་ཉིད་ཀྱི་སྐུ་ལ་བལྟ་བས་ཚིམ་པར་མ་ནུས་སོ། །འདི་ལྟ་བུའི་ས་གཞིའི་ཁ་དོག་ཡིན་ནོ། །འདི་ལྟ་བུའི་གཟུགས་ཀྱི་གནས་སུ་དེ་བཞིན་གཤེགས་པའི་མཚན་དང་དཔེ་བྱད་བཟང་པོ་ལ་སོགས་པའི་རབ་ཏུ་བྱེད་པ་ཐམས་ཅད་ཀྱང་གཟུགས་ཀྱི་སྐུ་དཔལ་གྱིས་བསྔགས་པར་བྱ་བར་འོས་སོ། །འདི་ལྟར་གཟུགས་མཆོག་ཐོབ་པའི་སྟོབས་བཅུ་པའི་སྐུ་བལྟ་བའི་ཕྱིར་མི་མང་པོ་རྒྱུན་མི་འཆད་དོ། །སྐྱེད་མོས་ཚལ་དང་ལམ་དུ་དགེ་སློང་གཅིག་གིས་ཀྱང་ཕྱི་རུ་འཐོན་པའི་སྐབས་མེད་དོ། །ཉི་མ་དེའི་དུས་ན་བཅོམ་ལྡན་འདས་ཀྱི་གདུགས་ཚོད་ཡོལ་བ་ལྟ་བུར་གྱུར་ཏོ། །དེ་མ་ཐག་པར་བརྒྱ་བྱིན་སྡོད་པའི་སྟན་དྲོ་བའི་རྣམ་པར་མཐོང་སྟེ་དེས་རྣམ་པར་བརྟགས་སོ། །དེའི་རྒྱུ་མཚན་ཤེས་ནས་བྲམ་ཟེའི་ཁྱེའུའི་གཟུགས་སུ་མངོན་པར་སྤྲུལ་ཏེ། སངས་རྒྱས་དང་ཆོས་དང་དགེ་འདུན་སོ་སོ་ལ་ཇི་ལྟར་རིགས་པའི་བསྟོད་པ་རྗོད་པར་བྱེད་དོ། །སྟོབས་བཅུ་པའི་སྔུན་དུ་ཆས་ནས་ལྷའི་མཐུ་ཡིས་ལམ་ཐོབ་པར་བྱས་སོ། །འདུལ་ཞིང་འདུལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང། །སེང་གེའི་གཟུགས་ཀྱིས་འཐོན་ནས་ནི། །བཅོམ་ལྡན་རྒྱལ་
པོའི་ཁབ་ནང་བྱོན། །གྲོལ་ཞིང་གྲོལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང། །སེང་གེའི་གཟུགས་ཀྱིས་འཐོན་ནས་ནི། །བཅོམ་ལྡན་རྒྱལ་པོའི་ཁབ་ནང་བྱོན། །བསྒྲལ་ཞིང་བསྒྲལ་བའི་གྲོགས་སྔོན་བཅས། །བྲམ་ཟེ་རྣམ་གྲོལ་རལ་པ་དང། །སེང་གེའི་གཟུགས་ཀྱིས་འཐོན་ནས་ནི། །རྒྱལ་པོའི་ཁབ་ནང་བཅོམ་ལྡན་བྱོན། །བཅུ་པོ་གསུང་བའི་སྟོབས་བཅུ་པ། །ཆོས་བཅུ་ལ་མཁས་བཅུ་ལ་གནས། །སྟོང་ཕྲག་བཅུ་ཡི་འཁོར་དང་ལྡན། །བཅོམ་ལྡན་རྒྱལ་པོའི་ཁབ་ནང་བྱོན། །ཚིགས་སུ་བཅད་པ་འདིས་ནི་སྟོན་པ་ལ་བསྔགས་པས་བསྟོད་ཅིང་སྔུན་དུ་འགྲོ་བའི་མི་རྣམས་ཀྱིས་བྲམ་ཟེའི་ཁྱེའུའི་གཟུགས་ཀྱི་དཔལ་མཐོང་ནས་བྲམ་ཟེའི་ཁྱེའུ་འདི་ཤིན་ཏུ་གཟུགས་བཟང་བའོ། །སླར་ཡང་སྔར་མཐོང་བ་མེད་དོ་ཞེས་བསམས་ནས་བྲམ་ཟེའི་ཁྱེའུ་འདི་གང་ན་གནས་པ་ཡིན། གང་ཞིག་གི་ཡིན་ཞེས་སྨྲས་སོ། །དེ་ཐོས་ནས་བྲམ་ཟེའི་ཁྱེའུས་སྨྲས་པ། གང་ཞིག་བསྟན་པ་ཐམས་ཅད་འདུལ། །གང་ཟག་ཟླ་མེད་སངས་རྒྱས་ཏེ། །དགྲ་བཅོམ་བདེ་གཤེགས་འཇིག་རྟེན་དུ། །དེ་ནི་བདག་གི་ཉེ་བར་གནས། །ཚིགས་སུ་བཅད་པ་བརྗོད་དེ་སྟོན་པས་བརྒྱ་བྱིན་གྱིས་སྐབས་ཕྱེ་བའི་ལམ་དུ་དགེ་སློང་སྟོང་ཕྲག་གཅིག་འཁོར་དུ་བྱས་ནས་རྒྱལ་པོའི་ཁབ་ཀྱི་ནང་དུ་གཤེགས་སོ། །རྒྱལ་པོས་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །བཙུན་པ་བདག་དཀོན་མཆོག་གསུམ་སྤངས་ནས་སྡོད་པར་མི་ནུས་སོ། །དུས་དང་དུས་མ་ཡིན་པར་བཅོམ་ལྡན་འདས་དང་ཉེ་བར་འོང་བར་འདོད་དོ། །ཤིང་དངར་ཅན་གྱི་སྐྱེད་མོས་ཚལ་ཤིན་ཏུ་ཐག་རིང་ངོ། །སླར་ཡང་བདག་ཅག་གི་འོད་མའི་ཚལ་ཞེས་བྱ་བ་འདི་ཤིན་ཏུ་ཉེ་བས་གཤེགས་པ་དང། འོང་བ་ཤིན་ཏུ་ཉེ་བས་སངས་རྒྱས་ལ་འོས་པའི་གནས་ལགས་པས་བཞེས་པར་ཞུ། དེས་གསེར་གྱི་རིལ་བ་སྤྱི་བླུགས་ལ་མེ་ཏོག་གི་དྲིས་བསྒོས་ཏེ། ནོར་བུའི་ཁ་དོག་ཅན་གྱི་ཆུ་བླངས་ནས་འོད་མའི་ཚལ་ཡོངས་སུ་གཏོང་ཞིང་སྟོབས་བཅུ་པའི་ཕྱག་ཏུ་ཆུ་སྦྲེང་ནས། དེར་ཀུན་དགའ་ར་བ་བཞེས་ནས་སངས་རྒྱས་ཀྱི་བསྟན་པའི་གཞི་ཞེས་བརྗོད་ཅིང་ས་གཞི་ཆེན་པོ་གཡོས་སོ། །འཛམ་བུའི་གླིང་གི་ནང་ནས་འོད་མའི་ཚལ་སྤངས་པའི་ས་གཞི་གཡོས་
པ་འདི་བཞེས་ཏེ་སྡེ་གཞན་ནི་མེད་དོ། །སིཾ་གྷ་གླིང་གི་གཙུག་ལག་ཁང་ཆེན་པོ་སྤངས་ནས་ས་གཞི་ཆེན་པོ་གཡོས་པ་འདི་བཞེས་ཏེ། སྡེ་གཞན་ནི་མེད་དོ། །སྟོན་པས་འོད་མའི་ཚལ་གྱི་ཀུན་དགའ་ར་བ་བཞེས་ནས་རྒྱལ་པོ་ལ་རྗེས་སུ་ཡི་རང་བར་མཛད་ཅིང་སྟན་ལས་བཞེངས་ཏེ། དགེ་སློང་གི་དགེ་འདུན་འཁོར་དུ་བྱས་ནས་འོད་མའི་ཚལ་དུ་བྱོན་ནོ། །དེའི་ཚེ་དེའི་དུས་ན་ཤཱ་རིའི་བུ་དང། མཽད་གལ་གྱི་བུ་ཀུན་དུ་རྒྱུ་གཉིས་པོ་རྒྱལ་པོའི་ཁབ་ལ་བརྟེན་ནས་གནས་ཤིང་བདུད་རྩི་ཚོལ་བར་སེམས་སོ། །དེའི་ནང་ནས་ཤཱ་རིའི་བུས་གནས་བརྟན་རྟ་ཐུལ་བསོད་སྙོམས་ལ་ཞུགས་པ་མཐོང་བས་སེམས་རབ་ཏུ་དངས་པར་གྱུར་ཏེ་བཟའ་བ་བྱིན་ནས་ཆོས་རྣམས་གང་དག་རྒྱུ་ལས་བྱུང་བ་དང་ཞེས་པའི་ཚིགས་བཅད་ཐོས་པས་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །རང་གི་གྲོགས་པོ་ཀུན་དུ་རྒྱུ་མཽད་གལ་ལ་ཡང་ཚིགས་སུ་བཅད་པ་དེ་ཉིད་སྨྲས་སོ། །དེས་ཀྱང་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་གཉིས་ཀྱིས་ཀྱང་རང་ཉིད་རྒྱལ་བ་ལ་བལྟས་ནས་རང་གི་འཁོར་དང་བཅས་པ་སྟོན་པའི་དྲུང་དུ་རབ་ཏུ་བྱུང་ངོ། །དེ་རྣམས་ལས་མཽད་གལ་གྱི་བུ་ཆེན་པོ་ཞག་བདུན་ནས་དགྲ་བཅོམ་པ་ཐོབ་བོ། །གནས་བརྟན་ཤཱ་རིའི་བུས་ཟླ་བ་ཕྱེད་ནས་དགྲ་བཅོམ་པ་ཐོབ་སྟེ་དེ་གཉིས་པོ་ཡང་སྟོན་པའི་ཉན་ཐོས་ཀྱི་མཆོག་ཏུ་གནས་པར་བཟུང་ངོ། །གནས་བརྟན་ཤཱ་རིའི་བུས་དགྲ་བཅོམ་པ་ཐོབ་པའི་ཉིན་མོ་ཉིད་བཅོམ་ལྡན་འདས་ཀྱི་ཉན་ཐོས་ཀྱི་འདུས་པ་དང་པོར་བྱས་སོ། །སླར་ཡང་དེ་བཞིན་གཤེགས་པས་འོད་མའི་ཚལ་དེ་ཉིད་དུ་བཞུགས་སོ། །དེའི་ཚེ་རྒྱལ་པོ་ཆེན་པོ་ཟས་གཙང་གིས་བདག་གི་སྲས་ལོ་དྲུག་ཏུ་དཀའ་བ་སྤྱད་ནས་མཆོག་གི་ཡང་དག་པར་རྫོགས་པའི་བྱང་ཆུབ་སྟེ། ཆོས་ཀྱི་འཁོར་ལོ་བསྐོར་ནས་རྒྱལ་པོའི་ཁབ་ཀྱི་འོད་མའི་ཚལ་དུ་བཞུགས་སོ་ཞེས་པ་ཐོས་ནས་བློན་པོ་ཕན་ཚུན་རྣམས་བོས་ཏེ་འདིར་ཤོག་ཅིག་སྐྱེས་བུ་སྟོང་ཕྲག་གཅིག་གིས་འཁོར་ཁྲིད་དེ་རྒྱལ་པོའི་ཁབ་ཏུ་སོང་ལ་ངའི་ཚིག་གིས་ཁྱེད་ཀྱི་ཡབ་རྒྱལ་པོ་ཟས་གཙང་ཁྱེད་བལྟ་བར་འདོད་ཅེས་བརྗོད་པས་བདག་གི་སྲས་ཁྲིད་ལ་ཤོག་ཅེས་སྨྲས་སོ། །བློན་པོས་ཀྱང་ལྷ་དེ་བཞིན་དུ་བགྱིའོ་ཞེས་རྒྱལ་པོའི་གསུང་སྤྱི་བོས་བླངས་ནས་སྐྱེས་བུ་སྟོང་ཕྲག་གཅིག་གི་འཁོར་
དེ་ཁྲིད་དེ་མྱུར་བ་ཉིད་དུ་དཔག་ཚད་དྲུག་ཅུའི་ལམ་དུ་སོང་ནས་སྟོབས་བཅུ་པ་འཁོར་བཞིའི་ནང་དུ་བཞུགས་ནས་ཆོས་སྟོན་པའི་དུས་སུ་གཙུག་ལག་ཁང་དུ་ཞུགས་སོ། །དེ་རྒྱལ་པོས་བཏང་བའི་དོན་རེ་ཞིག་བཞག་ནས་འཁོར་ཐམས་ཅད་ཀྱི་མཐར་འཁོད་དེ་སྟོན་པའི་ཆོས་བསྟན་པ་ཐོས་ནས་ཇི་ལྟར་འཁོད་པ་ཉིད་བཞིན་དུ་སྐྱེས་བུ་སྟོང་ཕྲག་གཅིག་དང་ལྷན་ཅིག་ཏུ་དགྲ་བཅོམ་པ་ཐོབ་ནས་རབ་ཏུ་འབྱུང་བར་ཞུགས་སོ། །བཅོམ་ལྡན་འདས་ཀྱིས་བཙུན་པ་རྣམས་འདིར་ཤོག་ཅིག་ཅེས་ཕྱག་བརྐྱང་ངོ་། །ཐམས་ཅད་དེ་ཉིད་དུ་རྫུ་འཕྲུལ་ལས་བྱུང་བའི་ལྷུང་བཟེད་དང་ཆོས་གོས་གསུམ་བཟུང་ནས། ལོ་བརྒྱ་ལོན་པའི་གནས་བརྟན་ལྟ་བུར་གྱུར་ཏོ། །དགྲ་བཅོམ་པ་ཐོབ་པའི་དུས་ནས་བཟུང་སྟེ། སླར་ཡང་འཕགས་པ་ཞེས་བྱ་བ་རེ་ཞིག་བར་མར་གནས་པར་གྱུར་ཏོ། །རྒྱལ་པོས་བཏང་བའི་སྤྲིང་ཡིག་སྟོབས་བཅུ་པ་ལ་མ་བརྗོད་དོ། །རྒྱལ་པོས་བཏང་བའི་མི་རྣམས་ལས་གཅིག་ཀྱང་མ་བྱུང་ཞིང་སྤྲིང་ཡིག་ཀྱང་མ་ཐོས་སོ། །འདིར་ཤོག་ལ་ཁྱེད་སོང་ཞིག་དང་དེ་ལྟ་བུའི་ངེས་པས་བློན་པོ་གཞན་གཅིག་བཏང་ངོ། །དེས་སོང་ནས་ཡང་སྔར་བཞིན་དུ་འཁོར་དང་བཅས་པ་དགྲ་བཅོམ་པ་ཐོབ་ནས་ཅང་མི་གསུང་བར་གནས་སོ། །རྒྱལ་པོས་དེ་ལྟ་བུར་ངེས་པས་སྐྱེས་བུ་སྟོང་ཕྲག་རེ་རེའི་འཁོར་དང་བཅས་པའི་བློན་པོ་དགུ་བཏང་ངོ། །ཐམས་ཅད་རང་གི་དོན་རྫོགས་པར་བྱས་ནས་ཅང་མི་སྨྲ་བར་གྱུར་ཏེ་དེ་ཉིད་དུ་གནས་སོ། །རྒྱལ་པོས་སྤྲིང་ཡིག་ཙམ་གྱི་ལོ་རྒྱུས་ཀྱང་མ་ཐོབ་པོ་ཞེས་བསམས་ནས་མི་འདི་རྣམས་ང་ལ་མི་དགའ་བའི་རྒྱུ་མཚན་གྱིས་སྤྲིང་ཡིག་ཙམ་གྱི་ལོ་རྒྱུས་ཀྱང་མི་བརྗོད་དོ། །སུ་ཞིག་ངའི་ཚིག་བཞིན་བྱེད་པར་སེམས། རྒྱལ་པོས་མི་ཐམས་ཅད་ལ་བརྟགས་པས་ནག་པོ་འཆར་ཀ་མཐོང་ངོ། །དེ་ཡང་རྒྱལ་པོའི་དོན་ཐམས་ཅད་སྒྲུབ་པར་བྱེད་པའི་བློན་པོ་ཡིན་ནོ་ནང་མི་ཡིན་ནོ། །ཤིན་ཏུ་ཐུགས་ཆེས་པ་ཡིན་ནོ། །དེ་བཞིན་གཤེགས་པ་དང་ལྷན་ཅིག་ལ་ཉིན་གཅིག་ཏུ་སྐྱེས་པ་ཡིན་ནོ། །དེ་དང་ལྷན་ཅིག་ཏུ་བརྩེ་བའི་གྲོགས་པོ་ཡིན་ནོ། །དེ་ནས་བློན་པོ་རྒྱལ་པོས་བོས་ཏེ། བུ་ནག་པོ་འཆར་ཀ་བདག་གི་སྲས་བལྟ་བར་འདོད་པས་སྐྱེས་བུ་སྟོང་ཕྲག་དགུ་བཏང་སྟེ་མི་གཅིག་ཀྱང་མ་འོངས་ནས་སྤྲིང་ཡིག་ཙམ་གྱི་ལོ་རྒྱུས་ཅི་
ཡང་མ་བྱུང། སླར་ཡང་ཐམས་ཅད་ནད་ཀྱིས་ཐེབས་པ་ཡིན་ནམ་ཚེའི་བར་ཆད་དུ་གྱུར་པ་ཡིན་ནམ། བདག་འཚོ་བ་ཉིད་ཀྱི་བར་དུ་སྲས་པོ་བལྟ་བར་འདོད་དེ་བདག་གི་བུ་བལྟ་བར་ནུས་སམ་ཞེས་སྨྲས་སོ། །ལྷ་ནུས་ལགས་སོ། །གལ་ཏེ་རབ་ཏུ་ཕྱུང་ཡང་བལྟ་བར་ནུས་སོ། །བུ་ཁྱོད་རབ་ཏུ་བྱུང་བའམ་མ་བྱུང་ཡང། ང་སྲས་པོ་བལྟའོ་ཞེས་སྨྲས་སོ། །དེས་ལྷ་ལེགས་སོ་ཞེས་རྒྱལ་པོའི་གསུང་བླངས་ནས་རྒྱལ་པོའི་ཁབ་ཏུ་སོང་སྟེ། སྟོན་པ་ཆོས་སྟོན་པའི་དུས་སུ་འཁོར་རྣམས་ཀྱི་མཐར་འཁོད་དེ་ཆོས་ཐོས་ནས་འཁོར་དང་བཅས་པ་དགྲ་བཅོམ་པའི་འབྲས་བུ་ཐོབ་པར་གྱུར་ཏེ་དགེ་སློང་གི་དངོས་པོར་སོ་སོར་གནས་སོ། །སྟོན་པ་སངས་རྒྱས་སུ་གྱུར་ནས་དང་པོའི་ལོ་ལ་དྲང་སྲོང་ལྷུང་བའི་གནས་སུ་དབྱར་བཞུགས་ཏེ། དགག་དབྱེ་བྱས་ནས་ལྟེང་རྒྱས་སུ་གཤེགས་ཤིང་དེར་ཟླ་བ་གསུམ་བཞུགས་ཏེ། རལ་པ་ཅན་སྤུན་རྣམས་བཏུལ་ནས་དགེ་སློང་སྟོང་ཕྲག་གཅིག་གི་འཁོར་དང་བཅས་པ་དགུན་ཟླ་འབྲིང་པོའི་ཉ་ལ་རྒྱལ་པོའི་ཁབ་ཏུ་གཤེགས་ནས་ཟླ་བ་གཉིས་བཞུགས་སོ། །དེ་རྣམས་ནི་གྲོང་ཁྱེར་བཱ་རཱ་ཎ་སཱི་ནས་འོངས་པའི་བར་ཏེ། ཟླ་བ་ལྔ་སོང་ཞིང་དགུན་གྱི་དུས་ཐམས་ཅད་འདས་སོ། །གནས་བརྟན་འཆར་ཀ་འོངས་ནས་ཞག་བདུན་དང་བརྒྱད་སོང་ངོ། །དེས་དཔྱིད་ཟླ་ར་བའི་ཉ་ལ་བསམས་པ། དགུན་གྱི་དུས་འདས་ནས་དཔྱིད་ཀའི་དུས་སུ་སླེབ་པ་དང། མི་རྣམས་ཀྱིས་འབྲུ་རྣམས་བླངས་ཏེ། ཕྱོགས་ཕྱོགས་ནས་ལམ་དུ་བྱུང་བས་རྩྭ་རྣམས་ལྗང་གུར་གྱུར་ཏོ། །ས་གཞི་དང་ནགས་ཚལ་གྱི་ཤིང་ལ་སོགས་པ་མེ་ཏོག་ཤིན་ཏུ་མང་བ་ཁ་བྱེ་བ་ནི་ལམ་དུ་འགྲོ་བའི་དུས་སོ། །སྟོབས་བཅུ་པའི་ཉེ་དུ་དང་ཕྲད་པར་བྱེད་པའི་ལམ་དུ་འགྲོ་བའི་དུས་ཡིན་ནོ། །དེ་ནས་བཅོམ་ལྡན་འདས་ཀྱི་དྲུང་དུ་ཉེ་བར་སོང་ནས། བཙུན་པ་ལྗོན་ཤིང་དེ་ནི་ལྗང་གུར་གྱུར། །ཤིང་གི་ལོ་མ་ས་ལ་དུད་པ་དང། །དེ་རྣམས་བར་ནས་འོད་ཟེར་འགྱེད་པ་ཡིན། །དཔའ་བོ་ཆེན་པོ་གཉེན་གནས་གཤེགས་པའི་དུས། །ཧ་ཅང་མི་དྲོ་མི་གྲང་ཞིང། །མུ་གེ་དང་ནི་བཀྲེས་པ་མེད། །ས་སྟེང་ཤིང་རྣམས་ལྗང་གུར་གྱུར། །ཐུབ་པ་ཆེན་པོ་དུས་འདིར་གྱུར། །ཚིགས་སུ་བཅད་པ་དྲུག་ཅུ་ཙམ་གྱིས་སྟོབས་བཅུ་པ་ལ་རིགས་ཀྱི་གྲོང་ཁྱེར་དུ་
གཤེགས་པའི་ཕྱིར་བསྔགས་པར་འོས་པའི་བསྔགས་པ་བརྗོད་པའོ། །དེ་ནས་སྟོན་པ་ལ་འཆར་ཀས་དབྱངས་སྙན་པོས་གཤེགས་པའི་བསྔགས་པར་འོས་པའི་བསྔགས་པ་གསུངས་སོ། །བཙུན་པ་ཁྱེད་ཀྱི་ཡབ་རྒྱལ་པོ་ཆེན་པོ་ཟས་གཙང་བལྟ་བར་འདོད་པས་ཉེ་དུ་རྣམས་རྗེས་སུ་འཛིན་པར་ཞུ། ལེགས་སོ་འཆར་ཀ་ཉེ་དུ་རྣམས་རྗེས་སུ་གཟུང་བར་བགྱིའོ། །ཞེས་དགེ་སློང་གི་དགེ་འདུན་ལ་སྨྲོས་ཤིག། །གཤེགས་པའི་གནས་ཐམས་ཅད་ལ་བྱི་དོར་གྱིས་ཤིག་ཅེས་སྨྲོས་ཤིག །བཙུན་པ་ལེགས་སོ་ཞེས་གནས་བརྟན་སོང་ནས་སྨྲས་སོ། །བཅོམ་ལྡན་འདས་ཀྱིས་ཡུལ་ཨོཾ་གྷ་དང་མ་ག་དྷཱ་ན་གནས་པའི་རིགས་ཀྱི་བུ་རྣམས་སྟོང་ཕྲག་བཅུ་དང་བཅས་པ་གྲོང་ཁྱེར་སེར་སྐྱའི་གཞི་ན་གནས་པའི་སྟོང་ཕྲག་བཅུ་པོ་ཐམས་ཅད་ཟག་པ་ཟད་པའི་དགེ་སློང་འཁོར་དུ་བྱས་ནས་རྒྱལ་པོའི་ཁབ་ནས་ཕྱི་རོལ་དུ་འཐོན་ཏེ། ཉི་མ་རེ་རེ་ལ་དཔག་ཚད་རེ་རེ་བགྲོད་ཅིང་རྒྱལ་པོའི་ཁབ་ནས་དཔག་ཚད་དྲུག་ཅུའི་གྲོང་ཁྱེར་སེར་སྐྱའི་གཞིར་ཟླ་བ་གཉིས་ཀྱིས་སླེབ་པར་དགོངས་ཤིང་བུལ་བ་ཡང་མ་ཡིན་མྱུར་བ་ཡང་མ་ཡིན་པར་འབྲིང་པོར་གཤེགས་སོ། །གནས་བརྟན་གྱིས་ཀྱང་བཅོམ་ལྡན་འདས་བྱོན་ནོ་ཞེས་རྒྱལ་པོའི་དྲུང་དུ་སྨྲའོ་ཞེས་བསམས་ནས་ནམ་མཁའ་ལ་སོང་སྟེ་རྒྱལ་པོའི་གནས་སུ་སླེབ་པར་གྱུར་ཏོ། །རྒྱལ་པོས་གནས་བརྟན་གཟིགས་ནས་ཐུགས་ཚིམ་པར་གྱུར་ཏེ། གདན་བཤམས་པ་ལ་བཞུགས་སུ་བཅུག་གོ། །རང་ལ་བྱེད་པ་བཞིན་བཅོས་ནས་རོ་སྣ་ཚོགས་པའི་བཟའ་བས་ལྷུང་བཟེད་བཀང་ནས་ཕུལ་ལོ། །གནས་བརྟན་ལངས་ནས་འགྲོ་བར་བསམས་པ་དང། བུ་བཞུགས་ལ་གསོལ་ཅིག །རྒྱལ་པོ་ཆེན་པོ་སྟོན་པ་དང་ཉེ་བར་སོང་སྟེ་བཟའོ། །སླར་ཡང་བུ་སྟོན་པ་ག་ན་ཡོད། སྟོང་ཕྲག་ཉི་ཤུའི་དགེ་སློང་འཁོར་དུ་བྱས་ནས་རྒྱལ་པོ་ཆེན་པོ་ཉིད་བལྟ་བའི་ཕྱིར་བྱོན་ནོ། །རྒྱལ་པོ་ཐུགས་ཚིམ་པར་གྱུར་ནས་སྨྲས་པ། ཁྱེད་འདི་གསོལ་ལ་བདག་གི་སྲས་གྲོང་ཁྱེར་འདིར་མ་བྱོན་གྱི་བར་ལ་འདི་ཉིད་ནས་ལྷུང་བཟེད་དུ་བཟའ་བ་ཁྱེར་ལ་སོང་ཅིག་ཅེས་སྨྲས་སོ། །གནས་བརྟན་གྱིས་རྒྱལ་པོའི་གསུང་མཉན་ཏེ་རྒྱལ་པོས་གནས་བརྟན་གྱི་བཟའ་བ་གསོལ་ཟིན་པ་དང་ལྷུང་བཟེད་བཀྲུས་ནས། དྲི་བཟང་པོའི་ཕྱེ་མས་བྱུགས་ཏེ་བཟའ་བ་མཆོག་
གིས་གང་བར་བྱས་ནས་དེ་བཞིན་གཤེགས་པ་ལ་ཕུལ་ཅིག་ཞེས་སྨྲས་ནས་གནས་བརྟན་གྱི་ལག་པར་བྱིན་ནོ། །གནས་བརྟན་མི་ཐམས་ཅད་ཀྱིས་མཐོང་བ་དང་ལྷུང་བཟེད་ནམ་མཁའ་ལ་འཕངས་སོ། །རང་ཉིད་ཀྱང་ནམ་མཁའ་ལ་གཤེགས་ནས་བཟའ་བའི་ལྷུང་བཟེད་བཟུང་སྟེ། སྟོན་པའི་ཕྱག་ཏུ་ཕུལ་ནས་སྟོན་པས་ཀྱང་དེར་བཟའ་བ་ལ་ལོངས་སྤྱོད་དོ། །གནས་བརྟན་ཐབས་འདིའི་ཉི་མ་རེ་རེ་བཞིན་དུ་བཟའ་བ་ཕུལ་ལོ། །སྟོན་པས་ཀྱང་ལམ་གྱི་བར་དུ་རྒྱལ་པོ་ཉིད་ཀྱི་གདུགས་ཚོད་ལ་ལོངས་སྤྱོད་དོ། །གནས་བརྟན་གྱིས་ཀྱང་གདུགས་ཚོད་ལ་ལོངས་སྤྱོད་པའི་མཐར་ཉི་མ་རེ་རེ་བཞིན་དུ་དེ་རིང་འདི་ཙམ་ནས་བཅོམ་ལྡན་འདས་བྱོན་ནོ། །དེ་རིང་འདི་ཙམ་དུ་བཅོམ་ལྡན་འདས་བྱོན་ཞེས་པ་དང། སངས་རྒྱས་ཀྱི་ཡོན་ཏན་ཡང་དག་པར་ལྡན་པ་ཉིད་བརྗོད་ཅིང་རྒྱལ་རིས་ཐམས་ཅད་སྟོན་པ་མ་མཐོང་བ་ཉིད་ཀྱིས་སྟོན་པའི་དྲུང་དུ་རང་ཉིད་ཀྱི་སེམས་དངས་པར་མཛད་དོ། །དེའི་རྒྱུ་མཚན་གྱིས་གནས་བརྟན་ལ་བཅོམ་ལྡན་འདས་ཀྱིས་དགེ་སློང་དག་བདག་གི་ཉན་ཐོས་ཀྱི་ནང་ནས་རིགས་དད་པར་བྱེད་པ་རྣམས་ཀྱི་མཆོག་གང་ཡིན་ན་འདི་ནི་འཆར་ཀ་ཞེས་པའོ། །འདི་མཆོག་ཏུ་བཟུང་བས་ཤཱཀྱ་བ་རྣམས་ཀྱིས་ཀྱང་བཅོམ་ལྡན་འདས་རྗེས་སུ་བྱོན་པའི་སྔུན་ལ་བདག་ཅག་གི་ཉེ་དུའི་གཙོ་བོ་བལྟའོ་ཞེས་འདུས་ནས་བཅོམ་ལྡན་འདས་བཞུགས་པའི་གནས་རྟོག་ཅིང་ཤཱཀྱ་ནྱ་གྲོ་དྷའི་ཀུན་དགའ་ར་བ་ཡིད་དུ་འོང་བ་སྟ་གོན་བྱས་སོ། །དེར་ཐམས་ཅད་ཉེར་བསྡོགས་བྱས་ནས་སྤོས་དང་མེ་ཏོག་སོ་སོ་ལག་ཏུ་ཐོགས་ཏེ། བསུ་བ་བྱེད་ཅིང་རྒྱན་ཐམས་ཅད་ཀྱིས་སོ་སོར་བརྒྱན་ནས་གཞོན་ནུ་དང་གཞོན་ནུ་མ་གྲོང་ཁྱེར་གྱི་ཁྱེའུ་དང་བུ་མོ་སྔར་དང་པོར་བཏང་བ་རྣམས་དང། དེ་ནས་རྒྱལ་པོའི་གཞོན་ནུ་དང་གཞོན་ནུ་མ་དག་དེ་རྣམས་ཀྱི་བར་རང་རང་གིས་སྤོས་དང་མེ་ཏོག་དང་ཕྱེ་མ་ལ་སོགས་པས་མཆོད་པ་བྱེད་ཅིང། བཅོམ་ལྡན་འདས་ཀྱིས་བཞེས་ནས་ནྱ་གྲོ་དྷའི་ཀུན་དགའ་ར་བ་ཉིད་དུ་བྱོན་ནོ། །དེར་བཅོམ་ལྡན་འདས་ཀྱིས་སྟོང་ཕྲག་ཉི་ཤུའི་ཟག་པ་ཟད་པའི་དགེ་སློང་འཁོར་དུ་བྱས་ནས་གདན་བཤམས་པ་མཆོག་ལ་སངས་རྒྱས་བཞུགས་སོ། །ཤཱཀྱའི་རིགས་ནི་ང་རྒྱལ་དང་ལྡན་པ་ཡིན། སེམས་རྩུབ་པ་ཡིན་པས་འདི་ནི་དོན་གྲུབ་གཞོན་ནུ་ངེད་དང་ལྷན་ཅིག་གཞོན་ནུ་
ཡིན་ནོ། །ངེད་ནི་ཕུ་བོ་ཡིན་ནོ། །འདི་ནི་སྲིང་མོའི་བུ་ཡིན་ནོ། །འདི་ནི་ཚ་བོ་ཡིན་ནོ་ཞེས་བསམས་ནས་ཁྱེའུ་དང་རྒྱལ་པོའི་གཞོན་ནུ་ཞེས་སྨྲས་ཏེ། ཁྱེད་ཀྱི་ཕྱག་གིས་བདག་ཁྱེད་ཀྱི་རྒྱབ་ཏུ་སྡོད་དོ་ཞེས་བསམས་སོ། །དེ་རྣམས་དེ་བཞིན་དུ་གནས་ནས། བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་གཟིགས་ནས་གཉེན་རྣམས་བདག་ལ་ཕྱག་མི་བྱེད་པར་འདོད་ཀྱང་ད་ལྟ་ཕྱག་བྱེད་དུ་གཞུག་དགོས་ཏེ། མངོན་པར་ཤེས་པའི་གཞི་དང་ཡེ་ཤེས་དང་བསམ་གཏན་དང་སྙོམས་པར་འཇུག་པ་བསྐྱེད་དགོས་སོ་སྙམ་སྟེ། བཞེངས་ནས་ནམ་མཁའ་ལ་གཤེགས་སོ། །དེ་རྣམས་ཀྱི་མགོ་ལ་ཞབས་ཀྱི་རྡུལ་ལྷུང་བ་བཞིན་དུ་ཨ་མྲ་སྲུང་བའི་ཨ་མྲའི་ཤིང་གི་དྲུང་དུ་སོ་སོའི་ཆོ་འཕྲུལ་དང་མཚུངས་པར་ཆོ་འཕྲུལ་མཛད་དོ། །རྒྱལ་པོས་དེའི་ཡ་མཚན་ཆེ་བ་མཐོང་ངོ་ཞེས་སྨྲས་སོ། །བཅོམ་ལྡན་འདས་ཁྱེད་འཁྲུངས་པའི་ཉིན་མོ་དཀའ་ཐུབ་པ་ནག་པོ་ལྷ་ལེན་གྱིས་ཕྱག་བྱེད་ཅིང་ཉེ་བར་གནས་པས་ཁྱེད་ཀྱིས་ཞབས་བསྐྱོད་པ་བྲམ་ཟེའི་སྤྱི་བོ་ལ་ཉེ་བར་གནས་སོ། །དེ་མཐོང་ནས་བདག་གིས་ཀྱང་ཁྱེད་ལ་ཕྱག་བྱས་སོ། །འདི་ནི་བདག་གི་ཕྱག་དང་པོ་ཡིན་ནོ། །བཀྲ་ཤིས་པའི་འབྲུ་འདེབས་པའི་ཉིན་མོ་འཛམ་བུའི་ཤིང་གི་གྲིབ་མའི་དཔལ་གྱི་མལ་སྟན་ལ་ཁྱེད་བཞུགས་པ་ན་ཤིང་འཛམ་བུའི་གྲིབ་མས་མ་བཏང་བར་མཐོང་བའི་ཚེ་ཡང་ཞབས་ལ་ཕྱག་བྱས་སོ། །འདི་ནི་བདག་གི་ཕྱག་གཉིས་པ་ཡིན་ནོ། །ད་ལྟ་ནི་བདག་གིས་སྔར་མ་མཐོང་བའི་ཆོ་འཕྲུལ་ཡང་མཐོང་བས་ཁྱེད་ཀྱི་ཞབས་ལ་ཕྱག་བགྱིད་དོ། །འདི་ནི་བདག་གི་ཕྱག་གསུམ་པ་ཡིན་ནོ། །སླར་ཡང་རྒྱལ་པོས་བཅོམ་ལྡན་འདས་ལ་ཕྱག་བྱེད་ཅིང་ཕྱག་བྱེད་པར་མི་ནུས་པའི་ཤཱཀྱའི་རིགས་གཅིག་ཀྱང་མེད་དོ། །ཐམས་ཅད་ཀྱིས་ཀྱང་ཕྱག་བྱེད་པ་ཉིད་དོ། །དེ་ནས་བཅོམ་ལྡན་འདས་ལ་ཉེ་དུ་རྣམས་ཀྱིས་ཕྱག་བྱེད་ཅིང་ནམ་མཁའ་ལས་བབས་ནས་གདན་བཤམས་པའི་མཆོག་གི་གུང་ལ་བཞུགས་སོ། །བཅོམ་ལྡན་འདས་བཞུགས་ནས་ཉེ་དུ་རྣམས་དང་འདུས་པར་གྱུར་པ་ལ་ཐམས་ཅད་སེམས་གཅིག་ཏུ་གནས་སོ། །དེ་ནས་སྤྲིན་ཆེན་པོ་ལས་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་སོ། །ཆུ་ཟངས་ཀྱི་མདོག་
ཅན་ས་ལ་སྒྲ་སྒྲོགས་ཤིང་འབབ་བོ། །འབང་བར་འདོད་པ་རྣམས་འབང་ངོ་། །འབང་བར་མི་འདོད་པ་རྣམས་མི་འབང་ངོ་། །ཐིགས་པ་ཙམ་ཡང་མི་ལྟུང་ངོ་། །དེ་མཐོང་ནས་ཐམས་ཅད་དུ་ཡ་མཚན་པ་དང་རྨད་དུ་བྱུང་བ་སྐྱེས་སོ། །ཨེ་མ་ཧོ་ངོ་མཚར་ཆེ། ཨེ་མ་ཧོ་རྨད་དུ་བྱུང་ངོ་ཞེས་རྗོད་པར་བྱེད་དོ། །སྟོན་པས་འདི་ཁོ་ནམ་ཡིན་གྱི་བདག་གི་ཉེ་དུ་དང་ཕྲད་པ་ན་པད་མའི་འདབ་མ་ལ་ཆུ་མི་འཆགས་པ་ལྟ་བུའི་ཆར་འབེབས་ཤིང་འདས་པའི་དུས་སུའང་ངས་ཕབ་བོ། །འདིའི་དོན་བྱུང་བ་ནི་ཐམས་ཅད་སྒྲ་ལ་གྱི་སྐྱེས་རབས་སུ་བཤད་དོ། །ཆོས་བསྟན་པ་ཐོས་ནས་ཐམས་ཅད་ལངས་ཏེ་ཕྱག་བྱས་ནས་སོང་ངོ་། །གཅིག་གིས་ཀྱང་རྒྱལ་པོ་དང་རྒྱལ་ཚབ་དང་བློན་པོ་རྣམས་སང་བདག་གི་གནས་སུ་བསོད་སྙོམས་ཁྱེར་འོང་ངོ་ཞེས་སྨྲ་བ་སོང་བ་དེ་རྣམས་ལས་གཅིག་ཀྱང་མ་བྱུང་ངོ་། །སྟོན་པས་སླར་ཉི་མ་གཉིས་པ་ལ་སྟོང་ཕྲག་ཉི་ཤུའི་དགེ་སློང་འཁོར་དུ་བྱས་ནས་གྲོང་ཁྱེར་སེར་སྐྱའི་གཞིར་བསོད་སྙོམས་ལ་བཞུད་དོ། །གང་ཞིག་མགྲོན་དུ་གཉེར་བ་དང། ལྷུང་བཟེད་ཁྱེར་བ་སུ་ཡང་མེད་དོ། །བཅོམ་ལྡན་འདས་སྒོ་དྲུང་དུ་འཁོད་དེ་རྣམ་པར་བརྟགས་པས་ཇི་ལྟར་སྔོན་གྱི་སངས་རྒྱས་རྣམས་ཀྱི་རིགས་ཀྱི་གྲོང་ཁྱེར་དུ་བྱོན་ནས་བསོད་སྙོམས་མཛད་པ་བཞིན་དུ་གང་ཇི་ལྟར་རིགས་པར་མི་ཆེན་པོའི་ཁྱིམ་དུ་འགྲོ་ཞིང་ཡང་ན་གོ་རིམས་བཞིན་དུ་བསོད་སྙོམས་སྤྱོད་དོ། །དེ་ནས་སངས་རྒྱས་གཅིག་གིས་ཀྱང་ཇི་ལྟར་རིགས་པར་གཤེགས་པ་མ་མཐོང་བས་བདག་གིས་ཀྱང་ང་ནི་འདིའི་རིགས་སོ། །འདི་སྔོན་གྱི་སངས་རྒྱས་ཀྱི་རིགས་བཞིན་དུ་བདག་གིས་ཀྱང་རིགས་པར་གཟུང་བར་བྱའོ། །བདག་གི་ཉན་ཐོས་ཀྱང་བདག་ཉིད་བཞིན་རྗེས་སུ་སློབ་ཅིང་བསོད་སྙོམས་ལ་རྫོགས་པར་བྱོན་ནོ། །འཁོད་པའི་ཁྱིམ་ནས་བཟུང་ནས་གོ་རིམས་བཞིན་དུ་བསོད་སྙོམས་ལ་སྤྱོད་དོ། །འཕགས་པ་གཞོན་ནུ་དོན་གྲུབ་བསོད་སྙོམས་ལ་གཤེགས་སོ་ཞེས་བརྗོད་དོ། །ཉིས་ཐོག་དང་སུམ་ཐོག་ལ་སོགས་པའི་ཁང་བཟངས་རྣམས་སུ་སྟེང་གི་སྒོ་ཆུང་ཕྱེ་ནས་མི་ཐམས་ཅད་བལྟ་བར་གྱུར་ཏེ་ལྷ་མོ་སྒྲ་གཅན་འཛིན་གྱི་ཡུམ་ཡང་འཕགས་པའི་བུ་གྲོང་ཁྱེར་འདི་ཉིད་དུ་རྒྱལ་པོ་ཆེན་པོའི་མཐུས་གསེར་གྱི་དོ་ལི་ལ་སོགས་པ་ལ་ཞོན་ཏེ་དེ་རིང་ནས་སྐྲ་དང་ཁ་སྤུ་
བྲེགས་ཤིང་ངུར་སྨྲིག་གི་གོས་གྱོན་ནས་སྣོད་ལག་ཏུ་ཁྱེར་ཏེ། བསོད་སྙོམས་ལ་འགྲོ་བ་མཛེས་སམ་མི་མཛེས་ཞེས་སྟེང་གི་སྒོ་ཆུང་ཕྱེ་ནས་བལྟའོ། །སྣ་ཚོགས་པའི་འདོད་ཆགས་དང་བྲལ་བ་ཡང་དག་པར་འབར་ཞིང་སྐུ་ལུས་ཀྱི་འོད་ཀྱིས་གྲོང་ཁྱེར་གྱི་སྟེང་ཐམས་ཅད་སྣང་བར་མཛད་དེ། འདོམ་གང་བའི་འོད་ཀུན་ནས་བསྐོར་ཞིང་རབ་ཏུ་གསལ་བ་དཔེ་བྱད་བཟང་པོ་བརྒྱད་ཅུ་དང་ལྡན་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ་སངས་རྒྱས་ཀྱི་དཔལ་དཔེ་མེད་པར་རྣམ་པར་གསལ་བ་མཐོང་ངོ་། །གཙུག་ཏོར་ནས་བཟུང་ནས་ཞབས་ཀྱི་མཐིལ་གྱི་བར་དེ་སྲིད་དོ། །དབུ་སྐྲ་གཡས་འཁྱིལ་འཇམ་གནག་སྣུམ་པ་དང། དཔྲལ་བ་དྲི་མེད་ཉི་མའི་མཐིལ་བཞིན་ནོ། །སྐུ་དང་འཚམ་པའི་ཤངས་ནི་མཐོ་བ་དང། །མི་ཡི་སེང་གེ་འོད་ཟེར་གསལ་བར་མཛད། །འདི་ལྟ་བུ་ལ་སོགས་པའི་མིའི་སེང་གེ་ལ་ཚིགས་སུ་བཅད་པས་མངོན་པར་བསྟོད་དོ། །ཁྱེད་ཀྱི་སྲས་པོ་བསོད་སྙོམས་ལ་སྤྱོད་དོ་ཞེས་རྒྱལ་པོ་ལ་སྨྲས་སོ། །རྒྱལ་པོའི་སེམས་སྡུག་བསྔལ་བས་གོས་ནས་བཟུང་སྟེ་མྱུར་ཞིང་མྱུར་བར་ཕྱིར་འཐོན་ཏ་བཅོམ་ལྡན་འདས་ཀྱི་དྲུང་དུ་འཁོད་ནས་སྨྲས་པ་ཅི་བཙུན་པ་བདག་ཅག་ངོ་ཚ་བས་ཅིའི་དོན་དུ་བསོད་སྙོམས་མཛད། དགེ་སློང་འདི་རྣམས་ཀྱི་བཟའ་བ་བདག་གིས་སྟེར་བར་མི་ཤེས་བསམས་པ་ཡིན་ནམ་ཅི་ལགས། རྒྱལ་པོ་ཆེན་པོའི་རིགས་ཀྱི་སྤྱོད་པ་ཡིན་ནོ། །བཙུན་པ་བདག་ཅག་ཤཱཀྱའི་རིགས་ཞེས་བྱ་བའི་རིགས་སོ། །དེ་ལ་རྒྱལ་རིགས་གཅིག་ཀྱང་བསོད་སྙོམས་བྱེད་པའི་མིང་ཙམ་ཡང་མེད་དོ། །རྒྱལ་པོ་ཆེན་པོའི་རིགས་ཞེས་བྱ་བ་ནི་ཁྱོད་ཀྱི་རིགས་འདི་ཡིན་ནོ། །བཀའ་སྩལ་པ། རྒྱལ་པོ་ཆེན་པོ་མི་དགྱེས་པ་མ་མཛད་ཅིག །སླར་ཡང་བདག་ཅག་གམར་མེ་མཛད་དང་ཀཽཌི་ནྱ་དང་འོད་སྲུངཞེས་བྱ་བ་འདི་སངས་རྒྱས་ཀྱི་རིགས་ཡིན་ནོ། །འདི་རྣམས་དང་གཞན་སངས་རྒྱས་སྟོང་ཕྲག་དུ་མས་ཀྱང་བསོད་སྙོམས་སྤྱོད་ཅིང་འཚོ་བར་མཛད་ལ། སྲང་གི་དབུས་སུ་འཁོད་པ་ཉིད་དོ། །བག་མེད་ལྷག་མར་བྱེད་པ་མེད། །ཆོས་ལ་སྤྱོད་ཅིང་ལེགས་པར་སྤྱོད། །ཆོས་ལ་སྤྱད་ན་བདེ་བ་འབྱུང། །འཇིག་རྟེན་འདི་དང་ཕྱི་མར་བ་དེ། །ཆོས་ཀྱི་རྐང་པའི་ཚིགས་སུ་བཅད་པ་འདི་བསྟན་ཅིང་བཤད་དོ། །ཚིགས་སུ་བཅད་
པའི་མཐར་རྒྱལ་པོས་རྒྱུན་དུ་ཞུགས་པའི་འབྲས་བུ་ཐོབ་བོ། །ཆོས་སྤྱོད་པ་ནི་ལེགས་པར་སྤྱོད། །ཉེས་པར་སྤྱོད་པ་མི་བྱ་ཞིང། །ཆོས་སྤྱད་པ་ཡིས་བདེ་བ་འབྱུང། །འཇིག་རྟེན་འདི་དང་ཕ་རོལ་དུའོ། །སླར་ཡང་ཆོས་ཀྱི་རྐང་པའི་ཚིགས་སུ་བཅད་པ་འདི་ཐོས་ནས་ལན་ཅིག་ཕྱིར་འོང་གི་འབྲས་བུ་ཐོབ་པར་གྱུར་ཏོ། །ཆོས་སྐྱོང་བའི་སྐྱེས་རབས་ཐོས་ནས་ཕྱིར་མི་འོང་བའི་འབྲས་བུ་ཐོབ་པར་གྱུར་ཏོ། །འཆི་བའི་དུས་སུ་གདུགས་དཀར་པོའི་འོག་ཏུ་དཔལ་གྱི་མལ་སྟན་གྱི་སྟེང་དུ་གཟིམས་པ་ཉིད་ན་དགྲ་བཅོམ་པ་ཐོབ་པར་གྱུར་ཏོ། །དགོན་པར་གནས་ནས་དཀའ་ཐུབ་སྤྱོད་པ་རྒྱལ་པོ་ལ་དགོས་པ་མེད་དོ། །རྒྱུན་དུ་ཞུགས་པའི་འབྲས་བུ་མངོན་དུ་བྱས་ནས་སླར་ཡང་བཅོམ་ལྡན་འདས་ཀྱི་ལྷུང་བཟེད་བཟུང་སྟེ། འཁོར་དང་བཅས་པ་ཁང་བཟངས་ཆེན་པོའི་སྟེང་དུ་སྤྱན་དྲངས་ནས་གྱ་ནོམ་པའི་བཟའ་བ་དང་བཅའ་བ་རྣམས་དྲངས་སོ། །གདུགས་ཚོད་ཟིན་པའི་མཐར་སྒྲ་གཅན་འཛིན་གྱི་མ་མ་གཏོགས་པའི་བཙུན་མོ་འཁོར་དང་བཅས་པ་ཐམས་ཅད་འོངས་ནས་བཅོམ་ལྡན་འདས་ལ་ཕྱག་བྱས་སོ། །གཞན་ཡང་དེས་འཁོར་གྱི་མི་རྣམས་ལ་འཕགས་པའི་བུ་ལ་ཕྱག་གྱིས་ཞེས་བརྗོད་ནས། གལ་ཏེ་ཁོ་མོ་ལ་ཡོན་ཏན་ཡོད་ན་འཕགས་པའི་བུ་རང་ཉིད་ཀྱི་གནས་སུ་འབྱོན་ནོ། །བྱོན་པ་ཉིད་ན་དེ་ལ་ཕྱག་བྱེད་དོ་ཞེས་བརྗོད་ནས་མ་འོངས་སོ། །རྒྱལ་པོས་ལྷུང་བཟེད་བཟུང་ནས་བཅོམ་ལྡན་འདས་ཉན་ཐོས་མཆོག་གཉིས་དང་བཅས་པ་རྒྱལ་པོའི་བུ་མོའི་ཁང་བཟངས་སུ་གཤེགས་ཏེ། རྒྱལ་པོའི་བུ་མོ་རང་ཉིད་ཇི་ལྟར་མོས་པའི་ཕྱག་བྱེད་ཅིང་གཞན་དང་འགལ་བ་ཅུང་ཟད་ཀྱང་མ་བྱེད་ཅེས་ནས་གདན་བཤམས་པ་མཆོག་གི་གུང་ལ་བཞུགས་སོ། །དེ་མྱུར་དུ་འོངས་ནས་བྱིན་པ་བཟུང་སྟེ། ཞབས་ཀྱི་སྟེང་དུ་མགོ་བོ་བཞག་ནས་ཇི་ལྟར་འདོད་པའི་ཕྱག་བྱས་སོ། །རྒྱལ་པོ་དང་རྒྱལ་པོའི་བུ་མོས་བཅོམ་ལྡན་འདས་ལ་དགའ་བ་མང་པོས་ཡོན་ཏན་ལ་སོགས་པས་ཡོན་ཏན་དང་ལྡན་པར་བརྗོད་ནས། བཙུན་པ་བདག་གི་བུ་མོས་ཉིད་ཀྱིས་གོས་ངུར་སྨྲིག་གྱོན་པ་ཐོས་ནས། དེ་ནས་བཟུང་སྟེ་དེང་གི་བར་དུ་གོས་ངུར་སྨྲིག་གྱོན་ནོ། །ཉིད་ཀྱིས་གདུགས་ཚོད་ལན་ཅིག་གསོལ་བ་ཐོས་ནས་བུ་མོས་ཀྱང་བཟའ་བ་ལན་ཅིག་ཟོས་སོ། །ཉིད་ཀྱིས་མལ་སྟན་ཆེན་པོ་སྤངས་པ་ཐོས་ནས། ཉལ་ཁྲི་
ཆུང་བ་ལ་ཉལ་ལོ། །ཉིད་ཀྱིས་མེ་ཏོག་གི་ཕྲེང་བ་དང་སྤོས་ལ་སོགས་པ་ལ་སྲེད་པ་མེད་པ་ཐོས་ནས། མེ་ཏོག་གི་ཕྲེང་བ་དང་སྤོས་ལ་སོགས་པ་ལ་ཆགས་པ་མེད་པ་སྐྱེས་སོ། །རང་གི་ཉེ་དུ་རྣམས་བདག་གིས་གསོའོ་ཞེས་འཕྲིན་བསྐུར་ནས། གཉེན་གཅིག་ལ་ཡང་བལྟ་བ་མི་འདུག་གོ། །བཅོམ་ལྡན་འདས་འདི་ལྟ་བུའི་ཡོན་ཏན་དང་ལྡན་པ་ནི་བདག་གི་བུ་མོ་ཡིན་ནོ་ཞེས་གསོལ་ཏོ། །རྒྱལ་པོ་ཆེན་པོ་ཡ་མཚན་མི་ཆེའོ། །འདི་ད་ལྟ་ཁྱེད་སྲུང་བར་བྱེད་པའི་རྒྱལ་པོའི་བུ་མོ་ཡེ་ཤེས་ཡོངས་སུ་མ་སྨིན་པ་རང་གིས་བསྲུང་ངོ། །སྔར་བསྲུང་བ་མེད་ཅིང་རི་ལ་སོགས་པ་ལ་འགྲོ་བ་ན། ཡེ་ཤེས་ཡོངས་སུ་མ་རྫོགས་པ་རང་གིས་བསྲུངས་སོ་ཞེས་གསུངས་ནས། མི་འམ་ཅི་ཟླ་བའི་སྐྱེས་རབས་གསུངས་ཏེ་སྟན་ལས་བཞེངས་ནས་གཤེགས་སོ། །ཉི་མ་གཉིས་པ་ལ་རྒྱལ་བུ་གཞོན་ནུ་དགའ་བོ་རྒྱལ་པོར་དབང་བསྐུར་བ་དང། ཁང་པ་གསར་པའི་ནང་དུ་ཞུགས་ཏེ་བཀྲ་ཤིས་པའི་བག་མ་བླངས་ནས་ཉེ་བར་གནས་སོ། །དེའི་ཁྱིམ་དུ་གཤེགས་ནས་གཞོན་ནུ་ལྷུང་བཟེད་ཟུང་ཤིག་ཅེས་རབ་ཏུ་དབྱུང་བར་དགོངས་ནས་བཀྲ་ཤིས་བརྗོད་དེ། གདན་ལ་བཞེངས་ནས་གཤེགས་སོ། །ལྗོངས་ཀྱི་དགེ་བའི་བུ་མོས་འགྲོ་བ་མཐོང་ངོ། །འཕགས་པའི་བུ་མྱུར་དུ་ཤོག་ཅེས་བརྗོད་ནས་བལྟའོ། །དེས་ཀྱང་བཅོམ་ལྡན་འདས་ཀྱི་ལྷུང་བཟེད་གཟུང་བར་མ་ནུས་ནས་གཙུག་ལག་ཁང་ཉིད་དུ་གཤེགས་སོ། །བཅོམ་ལྡན་འདས་དེ་ལ་འདོད་པ་མེད་པ་ཉིད་ཀྱིས་རབ་ཏུ་འབྱུང་བ་བྱེད་དོ། །འདི་ལྟར་བཅོམ་ལྡན་འདས་གྲོང་ཁྱེར་སེར་སྐྱར་གཤེགས་ཤིང་ཉི་མ་གསུམ་པ་ལ་དགའ་བོ་རབ་ཏུ་བྱུང་བར་བྱས་སོ། །ཉི་མ་བདུན་པ་ལ་སྒྲ་གཅན་འཛིན་གྱི་མས་གཞོན་ནུ་རྒྱན་གྱིས་བརྒྱན་ནས། བཅོམ་ལྡན་འདས་ཀྱི་དྲུང་དུ་བཏང་ངོ་། །བུ་སྟོང་ཕྲག་ཉི་ཤུའི་དགེ་སློང་འཁོར་དང་བཅས་པ་འདི་རྣམས་ལྟོས། གསེར་གྱི་ཁ་དོག་ཅན་གྱི་ཚངས་པའི་གཟུགས་ཀྱི་མདོག་ཅན་དགེ་སྦྱོང་འདི་ནི་ཁྱེད་ཀྱི་ཡབ་བོ། །འདི་ལ་གཏེར་ཆེན་པོ་ཡོད་ཅིང་དེ་འཐོན་པ་ནས་བཟུང་ནས་གཏེར་མཐོང་བ་མེད་དོ། །སོང་ལ་ནོར་སློངས་ཤིག །བདག་ཁྱེད་ཀྱི་བུ་གཞོན་ནུ་ཡིན་ནོ། །རྒྱལ་པོར་དབང་བསྐུར་བ་ཐོབ་ནས་འཁོར་ལོས་སྒྱུར་བ་ལ་དབང་བྱེད་པར་འགྱུར་རོ། །བདག་ལ་ནོར་གྱི་དོན་དུ་
ནོར་སྩལ་དུ་གསོལ། ཡབ་ཀྱི་ནོར་བུ་བདག་ཡིན་ནོ་ཞེས་གསོལ་ཅིག་ཅེས་སྨྲས་པ་དང། གཞོན་ནུ་བཅོམ་ལྡན་འདས་དང་ཉེ་བར་སོང་སྟེ། ཡབ་ཀྱི་དྲུང་དུ་དགའ་བ་སྐྱེས་སོ། །སེམས་སྤྲོ་བར་གྱུར་ཏོ། །དགེ་སྦྱོང་དེས་ཁྱེད་ཀྱི་གྲིབ་མ་ནི་དེའོ་ཞེས་བརྗོད་ནས། གཞན་ཡང་རང་གི་རིགས་པས་བརྗོད་ཅིང་འཁོད་དོ། །བཅོམ་ལྡན་འདས་གདུགས་ཚོད་ཀྱི་མཐར་རྗེས་སུ་ཡི་རང་བ་མཛད་ནས་གདན་ལས་བཞེངས་ཏེ་གཤེགས་སོ། །གཞོན་ནུས་བདག་ལ་དགེ་སློང་ནོར་སྩལ་དུ་གསོལ། བདག་ལ་དགེ་སློང་ནོར་སྩལ་དུ་གསོལ། བཅོམ་ལྡན་འདས་ཀྱི་རྗེས་སུ་འབྲངས་ནས། བཅོམ་ལྡན་འདས་ཀྱིས་གཞོན་ནུ་ཕྱིར་ལོག་ལ་ངའི་རྗེས་སུ་མ་འགྲོ་ཞེས་པ་དང། རྗེས་སུ་འབྲང་བ་རྣམས་ཀྱང་བཅོམ་ལྡན་འདས་དང་འགྲོགས་ནས་བྱོན་ཏེ་ལྡོག་པར་མ་ནུས་ནས། གཞོན་ནུ་བཅོམ་ལྡན་འདས་དང་ལྷན་ཅིག་ཀུན་དགའ་ར་བ་ཉིད་དུ་ཕྱིན་ནོ། །དེ་ནས་བཅོམ་ལྡན་འདས་ཀྱིས་བསམས་པ། འདི་ཡབ་ཀྱི་ནོར་འདོད་ཅིང་འཇིག་རྟེན་པའི་ནོར་ནི་འཚེ་བ་དང་བཅས་པ་ཡིན། ད་ནི་གཞོན་ནུ་ལ་བྱང་ཆུབ་སྙིང་པོ་དེས་ཐོབ་པའི་འཕགས་པའི་ནོར་རྣམ་པ་བདུན་བྱིན་ན་འཇིག་རྟེན་ལས་འདས་པའི་ནོར་གྱི་བདག་པོ་བྱེད་པར་འགྱུར་བར་དགོངས་ནས། ཚེ་དང་ལྡན་པ་ཤཱ་རིའི་བུ་བོས་ཏེ། དེའི་ཕྱིར་ན་ཤཱ་རིའི་བུ་ཁྱོད་ཀྱིས་གཞོན་ནུ་སྒྲ་གཅན་འཛིན་རབ་ཏུ་ཕྱུང་ཞེས་བརྗོད་ནས་རབ་ཏུ་བྱུང་བ་བྱས་སོ། །སླར་ཡང་རྒྱལ་པོ་གཞོན་ནུའི་སྡུག་བསྔལ་ཆེར་སྐྱེས་ཏེ་བསྲན་པར་མ་ནུས་ནས། བཅོམ་ལྡན་འདས་ཀྱི་གནས་སུ་ཕྱིན་ཏེ། བཙུན་པ་འཕགས་པ་མ་དང་ཕ་ཡིས་རྗེས་སུ་མ་གནང་བའི་བུ་རབ་ཏུ་འབྱུང་བར་བྱེད་པ་མ་ལེགས་སོ་ཞེས་དམ་པ་བསླངས་སོ། །བཅོམ་ལྡན་འདས་ཀྱིས་དེ་ལ་དམ་པ་བྱིན་ནོ། །སླར་ཡང་ཉི་མ་གཉིས་པ་ལ་རྒྱལ་པོའི་གནས་སུ་གདུགས་ཚོད་གསོལ་ནས་ཕྱོགས་གཅིག་ཏུ་འཁོད་དོ། །རྒྱལ་པོས་བཙུན་པ་ཉིད་དཀའ་བ་སྤྱོད་པའི་དུས་སུ་ལྷ་ཅིག་བདག་གི་དྲུང་དུ་ཉེ་བར་འོངས་ནས་ཁྱེད་ཀྱི་བུ་དུས་ལས་འདས་སོ་ཞེས་སྨྲས་སོ། །དེའི་ཚིག་ལ་ཡིད་ཆེས་པ་མེད་ཅིང་བདག་གི་སྲས་བྱང་ཆུབ་མ་ཐོབ་བར་དུ་དུས་ལས་འདའ་བར་མི་བྱེད་དོ། །དེའི་ཚིག་བདག་གིས་བཀག་གོ་ཞེས་བརྗོད་དོ། །བཅོམ་ལྡན་འདས་ཀྱིས་བཀའ་སྩལ་པ། ད་ལྟ་ཇི་ལྟར་ཁྱོད་ཡིད་ཆེས་པར་བྱེད། སླར་རུས་པ་མཐོང་ནས་ཁྱེད་ཀྱི་བུ་
ཤིའོ་ཞེས་ཟེར་བ་ལ་ཡིད་ཆེས་པར་མ་བྱས་སོ། །འདིའི་དོན་འབྱུང་བ་ནི་ཆོས་སྐྱོང་བ་ཆེན་པོའི་སྐྱེས་རབས་སུ་བཤད་དོ། །གཏམ་གྱི་མཐར་རྒྱལ་པོས་ཕྱིར་མི་འོང་བའི་འབྲས་བུ་ལ་གནས་སོ། །དེ་ལྟར་བཅོམ་ལྡན་འདས་ཀྱི་ཡབ་འབྲས་བུ་གསུམ་ལ་སོ་སོར་གནས་ནས་དགེ་སློང་གི་དགེ་འདུན་འཁོར་དུ་བྱས་སོ། །སླར་ཡང་རྒྱལ་པོའི་ཁབ་ཏུ་གཤེགས་ནས་བསིལ་བའི་ཚལ་དུ་བཞུགས་སོ། །དེའི་ཚེ་ཁྱིམ་བདག་མགོན་མེད་ཟས་སྦྱིན་གྱིས་ཤིང་རྟ་ལྔ་བརྒྱའི་ནོར་ཁྱེར་ནས་རྒྱལ་པོའི་ཁབ་ཏུ་རང་ཉིད་དགའ་བའི་གྲོགས་ཀྱི་ཁང་པར་སོང་སྟེ། དེས་སངས་རྒྱས་བཅོམ་ལྡན་འདས་བྱོན་ནོ་ཞེས་པ་ཐོས་ནས་ཤིན་ཏུ་སྔ་བར་ལྷའི་མཐུས་སྒོ་ཕྱེ་སྟེ། སྟོན་པའི་དྲུང་དུ་ཉེ་བར་སོང་ནས་ཆོས་ཐོས་ཏེ་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །ཉི་མ་གཉིས་པ་ལ་སངས་རྒྱས་ལ་སོགས་པའི་དགེ་འདུན་ལ་སྦྱིན་པ་ཆེན་པོ་ཕུལ་ལོ། །མཉན་ཡོད་དུ་གཤེགས་པའི་ཕྱིར་དུ་སྟོན་པའི་དྲུང་དུ་དམ་བཅའ་བླངས་ནས་བར་གྱི་ལམ་དཔག་ཚད་བཞི་བཅུ་རྩ་ལྔའི་གནས་སུ་འབུམ་ཕྲག་རེ་རེའི་ནོར་བྱིན་ནས་དཔག་ཚད་རེ་རེའི་གཙུག་ལག་ཁང་བྱས་སོ། །རྒྱལ་བྱེད་ཚལ་བྱེ་བ་ཕྲག་བཅྭ་བརྒྱད་ཀྱི་དབྱིག་གིས་ཉོས་ནས་ལས་ཁ་གསར་པ་བྱེད་ཅིང་དབུས་སུ་སྟོབས་བཅུ་པའི་དྲིའི་གཙང་ཁང་བྱེད་དོ། །དེ་ལ་བསྐོར་བ་རྣམས་ལ་གནས་བརྟན་ཆེན་པོ་བརྒྱད་ཅུའི་བཞུགས་གནས་སོ། །ཆིག་ཐོག་དང་ཉིས་ཐོག་དང་ཁང་པ་རིང་པོ་དང། བསྟི་གནས་ལ་སོགས་པའི་བཞུགས་གནས་དང། རྫིང་བུ་དང། འཆག་ས་དང། མཚན་མོའི་བཞུགས་གནས་དང། ཉིན་མོའི་བཞུགས་གནས་སོ། །བྱེ་བ་ཕྲག་བཅྭ་བརྒྱད་ཀྱི་ནོར་སྤེལ་ཏེ་ཡིད་དུ་འོང་བའི་ས་ཕྱོགས་ཡིད་ལ་འཐད་པའི་གཙུག་ལག་ཁང་བྱེད་དོ། །སྟོབས་བཅུ་པ་བྱོན་པའི་ཕྱིར་དུ་ཕོ་ཉ་བ་བཏང་ངོ། །སྟོན་པས་ཕོ་ཉ་བའི་འཕྲིན་གསན་ནས་དགེ་སློང་གི་དགེ་འདུན་ཆེན་པོའི་འཁོར་དུ་བྱས་ཏེ་རྒྱལ་པོའི་ཁབ་ནས་ཕྱིར་བྱོན་ཏེ་གོ་རིམས་བཞིན་དུ་གྲོང་ཁྱེར་མཉན་ཡོད་དུ་བྱོན་ནོ། །གཙོ་བོ་ཆེན་པོ་གཙུག་ལག་ཁང་ཆེན་པོ་སྟ་གོན་བྱས་ནས་དེ་བཞིན་གཤེགས་པ་རྒྱལ་བྱེད་ཚལ་དུ་བྱོན་པའི་ཉིན་མོ་བུ་རྒྱན་ཐམས་ཅད་ཀྱིས་བརྒྱན་ནོ། །སླར་ཡང་བརྒྱན་པ་ཉིད་ཀྱི་གཞོན་ནུ་ལྔ་བརྒྱ་དང་བཅས་པ་བཏང་ངོ། །དེ་
འཁོར་དང་བཅས་པ་ཁ་དོག་ལྔའི་གོས་ཡང་དག་པར་འབར་བའི་རྒྱལ་མཚན་ལྔ་བརྒྱ་ཐོགས་ནས་སྟོབས་བཅུ་པའི་མདུན་དུ་སོང་བར་གྱུར་ཏོ། །དེ་རྣམས་ཀྱི་ཕྱི་མ་ལ་ལེགས་བཟངས་ཆེན་མོ་དང། ལེགས་བཟངས་མ་ཆུང་བ་སྟེ་བུ་མོ་གཉིས་གཞོན་ནུ་མ་ལྔ་བརྒྱ་དང་བཅས་པ་གསེར་གྱིས་གང་བའི་བུམ་པ་ལག་པར་ཐོགས་ནས་ཕྱིར་འཐོན་ནོ། །དེའི་ཕྱི་མ་ལ་ཚོང་དཔོན་གྱི་ཆུང་མ་རྒྱན་ཐམས་ཅད་ཀྱིས་བརྒྱན་ནས་བུད་མེད་ལྔ་བརྒྱ་དང་བཅས་པ་གསེར་གྱིས་གང་བའི་སྡེར་མ་ཆེན་པོ་ཐོགས་ནས་ཕྱིར་འཐོན་ཏོ། །ཐམས་ཅད་ཕྱིན་ནས་ཚོང་དཔོན་རང་ཉིད་གོས་བཟང་པོ་གྱོན་ནོ། །དེ་བཞིན་དུ་གོས་བཟང་པོ་གྱོན་པའི་ཚོང་དཔོན་ལྔ་བརྒྱ་དང་བཅས་པ་བཅོམ་ལྡན་འདས་ཀྱི་དྲུང་དུ་སོང་ངོ་། །བཅོམ་ལྡན་འདས་ཀྱི་འཁོར་དགེ་བསྙེན་འདི་རྣམས་མདུན་དུ་བྱས་ནས། དགེ་སློང་གི་དགེ་འདུན་ཆེན་པོ་རྣམས་འཁོར་དུ་བྱས་ཏེ། རང་ཉིད་ཀྱི་སྐུ་ལུས་ཀྱི་འོད་ཀྱིས་གསེར་གྱི་བཅུད་ཀྱི་གོང་བུ་ལྟ་བུ་དང་མཚུངས་པ་དང། ནགས་ཚལ་གྱི་བར་དུ་སྣང་བར་མཛད་ཅིང་མཐའ་ཡས་པའི་སངས་རྒྱས་ཀྱི་རོལ་པ་སངས་རྒྱས་ཀྱི་དཔལ་ཟླ་མེད་ཅིང་མཚུངས་པ་མེད་པ་རྒྱལ་བྱེད་ཚལ་གྱི་ནང་དུ་བྱོན་ནོ། །དེ་ནས་མགོན་མེད་ཟས་སྦྱིན་གྱིས་ཞུས་པ། བཙུན་པ་གཙུག་ལག་ཁང་འདི་ཇི་ལྟ་བུ་ལ་དབུལ་བར་བགྱི། ཁྱིམ་བདག་གཙུག་ལག་ཁང་འདི་འོང་བ་དང་འགྲོ་བའི་དགེ་སློང་གི་དགེ་འདུན་རྣམས་ལ་ཕུལ་ཅིག །ལེགས་སོ་བཅོམ་ལྡན་འདས་ཞེས་ཚོང་དཔོན་ཆེན་པོས་གསེར་གྱི་རིལ་བ་སྤྱི་བླུགས་བླངས་ནས་སྟོབས་བཅུ་པའི་ཕྱག་ཏུ་ཆུ་སྦྲེང་སྟེ། རྒྱལ་བྱེད་ཚལ་གྱི་གཙུག་ལག་ཁང་འདི་འགྲོ་བ་དང་འོང་བའི་ཕྱོགས་བཞིའི་སངས་རྒྱས་ལ་སོགས་པའི་དགེ་འདུན་ལ་སྦྱིན་ཞེས་ཕུལ་ལོ། །སྟོན་པས་གཙུག་ལག་ཁང་བཞེས་ནས་རྗེས་སུ་ཡི་རང་བ་མཛད་དོ། །གྲང་དང་དྲོ་བས་མི་ཉམས་ཤིང། །དེ་ལྟར་རི་དགས་ལ་སོགས་པའི། །སྡིག་སྦྲུལ་དང་ནི་སྦྲང་བུ་དང། །བ་མོ་དང་ནི་ཆར་པས་སོ། །དེ་ལྟར་རླུང་དང་ཤིན་ཏུ་དྲོ། །སོ་སོར་ལུས་ལ་གོས་པ་དང། །ཁང་ནང་གནས་ནས་བདེ་བ་སྐྱེས། །ཁང་པར་བསམ་གཏན་ལྷག་མཐོང་རྣམས། །དགེ་འདུན་གཙུག་ལག་ཁང་འབུལ་བ། །སངས་རྒྱས་མཆོག་གིས་བསྔགས་པར་མཛད། །སྐྱེས་བུ་མཁས་པས་དེ་ཡི་ཕྱིར། །བདག་
ཉིད་ཀྱི་ནི་ཕྱིར་དུ་ནི། །དགའ་བས་གཙུག་ལག་ཁང་བྱེད་པ། །མང་དུ་ཐོས་པ་གནས་པ་ཡིན། །དེ་རྣམས་ཀྱི་ནི་བཟའ་དང་བཏུང། །གོས་དང་མལ་ཆ་སྟན་དང་ནི། །དེ་རྣམས་སེམས་ནི་དྲང་པོས་འབུལ། །རབ་ཏུ་དང་བའི་སེམས་ཀྱིས་སོ། །དེས་ནི་དེ་ལ་ཆོས་བསྟན་ཏོ། །སྡུག་བསྔལ་ཐམས་ཅད་ཉེར་ཞིའི་ཕྱིར། །གང་དེའི་ཆོས་ནི་རྟོགས་པ་དང། །རྟེན་མེད་མྱ་ངན་འདས་པར་བྱེད། །ཅེས་བྱ་བའི་གཙུག་ལག་ཁང་གི་ཕན་ཡོན་བཤད་དོ། །མགོན་མེད་ཟས་སྦྱིན་གྱིས་ཉི་མ་གཉིས་པ་ནས་བཟུང་ནས་སྦྱིན་པ་གཏོང་བའི་མགོ་བརྩམས་སོ། །ས་ཁམས་བྱས་པའི་ཁང་བཟངས་ནི་ཟླ་བ་བཞིས་གྲུབ་བོ། །སླར་ཡང་མགོན་མེད་ཟས་སྦྱིན་གྱི་གཙུག་ལག་ཁང་ཆེན་པོ་ཟླ་བ་དགུས་གྲུབ་བོ། །གཙུག་ལག་ཁང་ཆེན་པོ་ལ་ཡང་བྱེ་བ་སྟོང་ཕྲག་བཅྭ་བརྒྱད་ཉིད་སོང་ངོ། །འདི་ལ་གཙུག་ལག་ཁང་ཆེན་པོ་འདི་ཉིད་ལ་བྱེ་བ་ཕྲག་ལྔ་བཅུ་རྩ་བཞིའི་ནོར་ཡོངས་སུ་བཏང་ངོ། །སླར་ཡང་འདས་པའི་བཅོམ་ལྡན་འདས་རྣམ་པར་གཟིགས་ཀྱི་དུས་སུ་ཚོང་དཔོན་ཀུན་གྱི་གྲོགས་ཞེས་བྱ་བས་གསེར་གྱི་གླང་པོའི་རྐང་པའི་རྨིག་རྗེས་ལྟ་བུའི་ས་གཞི་ཉོས་ནས། གནས་འདི་ཉིད་དུ་དཔག་ཚད་གཅིག་གི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གཙུག་ཏོར་ཅན་གྱི་དུས་སུ་དཔལ་འཕེལ་ཞེས་བྱ་བའི་ཚོང་དཔོན་གྱི་བུས་གསེར་གྱི་སྡེར་མ་རྒྱུན་མི་འཆད་པས་ཉོས་པའི་ས་གཞིའི་གནས་དེ་ཉིད་དུ་རྒྱང་གྲགས་བཅུ་གཉིས་ཀྱི་ཚད་ཙམ་གྱི་དགེ་འདུན་གྱིཀུན་དགའ་ར་བ་བྱས་སོ། །བཅོམ་ལྡན་འདས་ཐམས་ཅད་སྐྱོབ་ཀྱི་དུས་སུ་ཚོང་དཔོན་བཀྲ་ཤིས་ཞེས་བྱ་བས་གསེར་གྱི་ས་གཞི་གསེར་གྱི་རྐང་པའི་རྗེས་ལྟ་བུའི་ས་གཞི་ཉོས་ནས་གནས་དེ་ཉིད་དུ་དཔག་ཚད་ཕྱེད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་ལོག་པར་དད་སེལ་གྱི་དུས་སུ་ཚོང་དཔོན་འཕོ་བ་མེད་པ་ཞེས་བྱ་བས་གསེར་གྱི་ཕ་གུ་ལྟ་བུ་རྒྱུན་མི་འཆད་པའི་ས་གཞི་ཉོས་ནས་གནས་ཉིད་དུ་རྒྱང་གྲགས་བཞིའི་ཚད་ཀྱི་དགེ་འདུན་གྱི་ཀུན་དགའ་ར་བ་བྱས་སོ། །བཅོམ་ལྡན་འདས་གསེར་ཐུབ་ཀྱི་དུས་སུ་ཚོང་དཔོན་དྲག་པོ་ཞེས་བྱ་བས་གསེར་གྱི་རུས་སྦལ་རྒྱུན་མི་འཆད་པ་ལྟ་བུའི་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་གཉིས་ཀྱི་ཚད་ཀྱི་ཀུན་དགའ་ར་བ་བྱས་སོ། །བཅོམ་ལྡན་འདས་འོད་སྲུང་གི་
དུས་སུ་ཚོང་དཔོན་བཀྲ་ཤིས་བཟང་པོ་ཞེས་བྱ་བས་གསེར་གྱི་ཕ་གུ་རྒྱུན་མི་འཆད་པ་ལྟ་བུས་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་གཅིག་གི་ཚད་ཀྱི་ཀུན་དགའ་ར་བ་བྱས་སོ། །སླར་ཡང་བདག་ཅག་གི་བཅོམ་ལྡན་འདས་ཀྱི་དུས་སུ་ཚོང་དཔོན་མགོན་མེད་ཟས་སྦྱིན་གྱིས་བྱེ་བ་ཕྲག་བཅྭ་བརྒྱད་ཀྱི་དབྱིག་གིས་གསེར་གྱི་འདྲ་མེན་དུ་བྱས་པ་རྒྱུན་མི་འཆད་པ་ལྟ་བུས་ས་གཞི་ཉོས་ནས་གནས་དེ་ཉིད་དུ་རྒྱང་གྲགས་ཕྱེད་ཀྱི་ཀུན་དགའ་ར་བ་བྱས་སོ། །གནས་འདི་སངས་རྒྱས་ཐམས་ཅད་ཀྱིས་མ་སྤངས་པའི་གནས་ཡིན་ནོ། །འདི་ལྟར་བྱང་ཆུབ་ཆེན་པོའི་སྙིང་པོའི་དྲུང་དུ་ཐམས་ཅད་མཁྱེན་པའི་ཡེ་ཤེས་ཐོབ་པ་ཇི་སྲིད་པ་ནས་ཡོངས་སུ་མྱ་ངན་ལས་འདས་པའི་མཐར་ཐུག་པ་དེ་སྲིད་དུ་གང་དང་གང་གི་གནས་སུ་བཅོམ་ལྡན་འདས་བདག་བཞུགས་པ་འདི་ནི་ཉེ་བའི་གླེང་གཞི་ཞེས་བྱ་བའོ། །དེའི་ལུགས་ཀྱིས་སྐྱེས་རབས་ཐམས་ཅད་དུ་བསྔགས་པར་མཛད་དོ། །སྐྱེས་པ་རབས་ཀྱི་གླེང་གཞིའི་བཤད་པ་རྫོགས་སྷོ།། །།པཎྜི་ཏ་ཨཱ་ནནྡ་ཤྲཱིའི་ཞལ་སྔ་ནས་དང། མང་དུ་ཐོས་པའི་ལོཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།སའི་སྟེང་དུ་ཉི་ཟླ་ལྟར་གྱུར་ཅིག།