དང་པོ། འཇིག་རྟེན་གྱི་དབང་པོ་ཐམས་ཅད་ཀྱི་རྒྱན་གྱི་ཚུལ་རབ་ཏུ་བྱུང་བ་ཞེས་བྱ་བའི་ལེའུ།
རྒྱ་གར་སྐད་དུ། བུདྡྷ་ཨ་བ་ཏང་ས་ཀ་ནཱ་མ་མ་ཧཱ་བཻ་པུ་ལྱཾ་སཱུ་ཏྲ། བོད་སྐད་དུ། སངས་རྒྱས་ཕལ་པོ་ཆེ་ཞེས་བྱ་བ་ཤིན་ཏུ་རྒྱས་པ་ཆེན་པོའི་མདོ། འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཐོག་མ་མངོན་པར་སངས་རྒྱས་པ། སངས་རྒྱས་ཀྱི་ཆོས་ཐམས་ཅད་ཤིན་ཏུ་རྣམ་པར་སངས་རྒྱས་པའི་ཐུགས་མངའ་བ། དུས་གསུམ་མཉམ་པ་ཉིད་དུ་ཐུགས་སུ་ཆུད་པའི་ཡེ་ཤེས་ཀྱི་སྐུ་མངའ་བ། འཇིག་རྟེན་གྱི་ཁམས་ཐམས་ཅད་དུ་སྐུས་ཤིན་ཏུ་ཁྱབ་པ། སངས་རྒྱས་ཀྱི་ཞིང་ཐམས་ཅད་དུ་དབྱངས་ཀྱི་ཡན་ལག་དང་གསུང་གི་ང་རོ་ཤིན་ཏུ་བསྒྲགས་པ། མཁའ་དང་ནམ་མཁའ་ལྟ་བུའི་མཚན་ཉིད་མཉམ་པ་ཉིད་དུ་རབ་ཏུ་སྣང་བའི་སྤྱོད་ཡུལ་ཅན་ནམ་མཁའ་ལྟར་འགྲོ་བ་ཐམས་ཅད་ཀུན་ཁྱབ་པའི་སྙིང་པོ་བྱང་ཆུབ་ཐམས་ཅད་ལ་བཞུགས་པའི་སྐུ་བྱང་ཆུབ་སེམས་དཔའ་རྒྱ་མཚོ་ཐམས་ཅད་ཀྱི་ནང་ན་རྣམ་པར་སྣང་བ། འཇིག་རྟེན་གྱི་ཁམས་ཐམས་ཅད་དུ་ཉི་མའི་དཀྱིལ་འཁོར་ལྟར་ཤར་བ། སངས་
རྒྱས་ཀྱི་ཞིང་ཐམས་ཅད་དུ་ཡོངས་སུ་སྐྱེ་བ་བསྟན་པ། རབ་ཏུ་སྤྲོས་པ་དུས་གསུམ་གྱི་བསོད་ནམས་རྒྱ་ཆེན་པོ་རྒྱ་མཚོ་ལྟ་བུས་སྤྱོད་ཡུལ་ཡོངས་སུ་དག་པ། འོད་ཀྱི་དཀྱིལ་འཁོར་དང་། འོད་ཟེར་ཁ་དོག་མཐའ་ཡས་པ་མངའ་བ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པའི་ཆོས་ཀྱི་སྤྲིན་ཐམས་ཅད་ཀྱིས་རྣམ་པར་འཕྲུལ་པ། འཇིག་རྟེན་གྱི་ཁམས་ཐམས་ཅད་དུ་བསྒྲིབས་པ་མེད་པ། སྐྲའི་རྩེ་མོ་ཐམས་ཅད་དུ་མཐའ་དང་དབུས་མེད་པར་རྣམ་པར་འཕྲུལ་པ་བྱིན་གྱིས་རློབ་པའི་མཐུ་མངའ་བ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་མངོན་དུ་གྱུར་པར་ཡོངས་སུ་སྟོན་པ། འཁོར་གྱི་དཀྱིལ་འཁོར་ཐམས་ཅད་དུ། འཕོས་པ་མེད་པར་གཤེགས་པ། ཡོངས་སུ་སྟོན་པས་ཁྱབ་པར་མཛད་པ། དངོས་པོ་མྱེད་པའི་དབྱིངས་ཀྱི་མཚན་ཉིད་ཐམས་ཅད་ཐུགས་སུ་ཆུད་པ། འོད་ཟེར་གྱི་སྒོ་ཐམས་ཅད་དུ་དུས་གསུམ་རྣམ་པར་སྤྲུལ་པའི་བྱིན་གྱི་རླབས་ཡོངས་སུ་སྟོན་པ། སངས་རྒྱས་ཀྱི་ཞིང་ཐམས་ཅད་དུ་བསྐལ་པ་རྒྱ་མཚོ་བསམ་གྱིས་མི་ཁྱབ་པར་བྱིན་གྱི་རླབས་ཤིན་ཏུ་བསྒྲུབས་པ། ཡུལ་མ་ག་ཏའི་ཆོས་ཀྱི་དགོན་པ་སྙིང་པོ་བྱང་ཆུབ་རྡོ་རྗེ་རིན་པོ་ཆེ་ཐམས་ཅད་ལྟར་གཞོམ་དུ་མི་ཆོམ་པར་སྲ་བའི་ས་ཕྱོགས་ནོར་བུ་རིན་པོ་ཆེ་ཐམས་ཅད་ཀྱི་མྱེ་ཏོག་གིས་ས་གཞི་བརྒྱན་པ་ནོར་བུའི་རྒྱལ་པོ་དྲི་མ་མྱེད་པར་འབར་བས་རབ་ཏུ་བསྒྲུབས་པ། རིན་པོ་ཆེ་མང་པོ་ཐམས་ཅད་ཀྱིས་རྣམ་པ་སྣ་ཚོགས་སུ་བརྒྱན་པ། ཡོན་ཏན་རྒྱ་མཚོ་མཐའ་ཡས་པའི་རྒྱན་རྣམ་པ་སྣ་ཚོགས་ཡང་དག་པར་བསྟན་པ། ནོར་བུའི་རྒྱལ་པོ་འོད་ཟེར་དང་། སྒྲ་དབྱངས་ཀྱི་རྒྱལ་མཚན་
ཐམས་ཅད་ཀྱིས་རབ་ཏུ་བསྒྲུབས་པ། སྤོས་དང་། མེ་ཏོག་དང་། རིན་པོ་ཆེའི་ཕྲེང་བ་དང་། དྲ་བ་མང་པོ་ཐམས་ཅད་རྣམ་པར་བྲེས་པ་རིན་པོ་ཆེའི་ཁ་དོག་ཟད་མྱི་ཤེས་པའི་ཆར་རབ་ཏུ་འབབ་པའི་རྣམ་པར་འཕྲུལ་པ་ཡང་དག་པར་སྟོན་པའི་ནོར་བུའི་རྒྱལ་པོས་ཤིན་ཏུ་བསྒྲུབས་པ། མེ་ཏོག་སྣ་ཚོགས་ཆུ་བོའི་ཀླུང་ལྟ་བུས་ཡོངས་སུ་བསྟན་པས་བརྒྱན་པ། རིན་པོ་ཆེའི་ཤིང་འོད་ཟེར་གྱི་ཁ་དོག་སྡུག་པོ་དང་ལྡན་པའི་ཡལ་གས་བརྒྱན་པ། རྒྱན་ཐམས་ཅད་དུ་སྣང་བ་ཤིན་དུ་འབར་བའི་བྱིན་གྱི་རླབས་ཀྱིས་རྣམ་པར་སྤྲུལ་པ། ཡང་དག་པར་བསྟན་པའི་སའི་སྙིང་པོ། རིན་པོ་ཆེའི་འབྲུ་ཐམས་ཅད་འབྱུང་བས་ཕྱོགས་ཀུན་དུ་སྦྱངས་ཤིང་བརྒྱན་པའི་སྙིང་པོ་བྱང་ཆུབ་ལ་བྱང་ཆུབ་ཆེན་པོའི་ཤིང་ནོར་བུ་རིན་པོ་ཆེ་རྡོ་རྗེའི་རྒྱན་སྣ་ཚོགས་ཀྱི་འབྲུས། བསྒྲུབས་པའི་སྡོང་པོ་དང་ལྡན་པ་བཻ་ཌཱུརྱ་དང་། ནོར་བུ་ཐམས་ཅད་ཀྱི་རིགས་འབྱུང་བའི་སྙིང་པོ་དང་ལྡན་པའི་ལྷུན་ཅན་ཡོངས་སུ་ཡོན་ཏན་མང་པོ་མཐའ་ཡས་པའི་ནོར་བུ་རིན་པོ་ཆེ་མང་པོའི་འབྲུས་ཤིན་ཏུ་བརྒྱན་ཅིང་རབ་ཏུ་འཕེལ་བའི་ཡལ་ག་ཅན་རིན་པོ་ཆེ་ཐམས་ཅད་ཀྱི་ལོ་མ་ཤིན་ཏུ་འོད་གསལ་བས་ཕྱོགས་ཀྱི་སྤྲིན་དུ་གྱུར་པ། ཡལ་ག་ཐམས་ཅད་ཀྱི་རྩེ་མོ་ལས་མེ་ཏོག་དང་། འབྲས་བུའི་དྲ་བ་ཡོན་ཏན་རྣམ་པ་སྣ་ཚོགས་ཅན་རབ་ཏུ་སྤྱངས་པ། རིན་པོ་ཆེའི་འབྲས་བུའི་སྣ་ཚོགས་ཤིན་ཏུ་འབར་བའི་སྙིང་པོས། ཤིང་གི་རྒྱན་མེ་ཏོག་ཐམས་ཅད་ཤིན་ཏུ་རྒྱས་ཤིང་རྣམ་པར་གསལ་བ། ཕྱོགས་བཅུར་འོད་ཀྱི་དཀྱིལ་འཁོར་རིན་པོ་ཆེ་རྒྱ་ཆེ་ཞིང་མང་བའི་འོད་ཟེར་ལྟ་བུར་རྣམ་པར་སྣང་བ་ནོར་བུའི་ཡོན་ཏན་ཟད་མི་ཤེས་པའི་ཆར་ཆེན་པོ་རྣམ་པར་སྤྲུལ་པས་ཡོངས་སུ་བསྟན་པ། ནོར་བུའི་སྒོ་ཐམས་ཅད་ནས་བྱང་ཆུབ་སེམས་དཔའི་སྤྲིན་འབྱུང་བ་ཤིན་ཏུ་བསྟན་པ། སངས་རྒྱས་ཀྱི་རྣམ་པར་འཕྲུལ་པ་དང་། བྱིན་གྱི་རླབས་ཀྱིས་ཟད་མི་ཤེས་པའི་དབྱངས་འབྱུང་བའི་དྲུང་ན། དེ་བཞིན་གཤེགས་པའི་གཞལ་མྱེད་ཁང་ཕྱོགས་ཐམས་ཅད་དུ་མངོན་པར་སྣང་བ། རབ་ཏུ་འཕེལ་བ། རིན་པོ་ཆེའི་རྒྱལ་པོ་སྣ་ཚོགས་ཡོན་ཏན་མཐའ་ཡས་པའི་ཀ་བ་བཀྱེ་བ། ལྷུན་རིན་པོ་ཆེའི་མེ་ཏོག་རྣམ་པ་སྣ་ཚོགས་ཐམས་ཅད་ཀྱི་རྒྱན་གྱིས་བརྒྱན་པ། རྒྱན་མཐའ་ཡས་
པས་ཤིན་ཏུ་ཀླུབས་པའི་འོད་ཟེར་སྣང་བས་སྤྲིན་ལྟར་ཁེབས་པ། ཕོ་བྲང་གི་མཚམས་ཐམས་ཅད་ནས་འོད་ཀྱི་རྒྱལ་མཚན་རབ་ཏུ་བཀྱེ་བ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་མཐའ་ཡས་པ། རྗེས་སུ་འདོད་པའི་སྙིང་པོ་ཅན་བསམ་གྱིས་མྱི་ཁྱབ་པ། གསུང་རྒྱ་ཆེན་པོའི་དབྱངས་དང་། སངས་རྒྱས་ཀྱི་འོད་ནོར་བུའི་རྒྱལ་པོ་ལྟ་བུའི་དྲ་བས་ཐམས་ཅད་ཡོག་པ། སངས་རྒྱས་ཀྱི་བྱིན་གྱི་རླབས་ཀྱིས་རྣམ་པར་སྤྲུལ་པའི་འཕྲུལ་པ། དམིགས་པ་ཐམས་ཅད་དུ་བྱུང་བ། སེམས་ཅན་ཐམས་ཅད་ཀྱི་ཁྱིམ་གྱི་གཟུགས་བརྙན་རབ་ཏུ་སྟོན་པ། སེམས་སྐད་ཅིག་གིས་སངས་རྒྱས་ཀྱི་བྱིན་གྱི་རླབས་ཐམས་ཅད་ཆོས་ཀྱི་དབྱིངས་འབྱམ་ཀླས་པར་འཕྲོ་བའི་སྙིང་པོ་ཅན་སེང་གེའི་ཁྲི་ཆེན་པོ་སངས་རྒྱས་ཀྱི་གདན་དུ་གྱུར་པ། རིན་པོ་ཆེ་ཐམས་ཅད་དང་། ཡིད་དུ་འོང་བའི་སྤོས་སྣ་ཚོགས་ཀྱི་སྙིང་པོ་ཅན་པདྨོའི་དྲ་བ་འོད་ཟེར་མཐའ་ཡས་པ་འབྱུང་བས་བརྟེན་པ། རིན་པོ་ཆེ་དྲི་མ་མྱེད་པའི་འཁོར་ལོའི་འོད་ཀུན་ཏུ་བརྡལ་བ། མེ་ཏོག་གི་ཕྲེང་བ་བཟང་ཞིང་ཡིད་དུ་འོང་བ་ཁ་དོག་མཐའ་ཡས་པས་ཀུན་ནས་ཀླུབས་པ། ནོར་བུའི་འབྲུ་སྣ་ཚོགས་ཀྱི་ཤིང་གི་ཡལ་ག་ལས་འོད་ཤིན་དུ་བཀྱེ་བ། རྟ་བབས་དང་། ཁྲི་ཁྲི་འཕང་དང་། སྐར་ཁུང་ཁང་པ་བརྩེགས་པ། རྣམ་པ་སྣ་ཚོགས་མཐའ་ཡས་ལེགས་པར་བརྒྱན་པ་ནོར་བུའི་རྒྱལ་པོ་འོད་ཟེར་འབར་བའི་སྙིང་པོའི་སྤྲིན་ཐམས་ཅད་དུ་འཕྲོས་པའི་རྒྱན་ཅན། བྱང་ཆུབ་སེམས་དཔའ་རྒྱ་མཚོ་རྒྱ་ཆེན་པོའི་གཙུག་གི་རིན་པོ་ཆེས་བཟུང་ཞིང་འོད་ཟེར་རྣམ་པར་སྣང་བ། ཕྱོགས་བཅུའི་མཚམས་ཐམས་ཅད་དུ། སངས་རྒྱས་ཀྱི་སྤྲུལ་པའི་འོད་ཀྱི་སྙིང་པོའི་ནོར་བུའི་རྒྱལ་པོས་ཤིན་ཏུ་བརྒྱན་པ། སངས་རྒྱས་ཀྱི་ཡུལ་གྱི་སྒྲ་དབྱངས་རྒྱ་ཆེན་པོས་ཆོས་ཀྱི་དབྱིངས་ཁྱབ་པའི་བྱིན་གྱི་རླབས་དང་ལྡན་པ་ལ་བཞུགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དང་། བྱང་ཆུབ་སེམས་དཔའི་སྤྱོད་པ་ཐབས་གཅིག་ཏུ་སྤྱོད་སྤྱོད་པའི་དགེ་བའི་རྩ་བ་ཅན། སངས་རྒྱས་ཀྱི་ཞིང་བཅུའི་རྡུལ་ཤིན་དུ་ཕྲ་བ་སྙེད་དང་ཐབས་གཅིག་སྟེ།
འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མ་མྱེད་པའི་གཟི་བརྗིད་ཀྱི་འོད་ཡིད་དུ་འོང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་འོད་མཆོག་ཀུན་དུ་སྒྲོན་མ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་འབར་བ་སེང་གེའི་རྒྱལ་མཚན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དཔལ་གྱི་འོད་ཟེར་ཀུན་ཏུ་འོད་འཕྲོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རྒྱ་མཚོ་ཀུན་ཏུ་དབྱངས་རྒྱལ་མཚན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་སྤྱོད་ཡུལ་ཡེ་ཤེས་ཀུན་ཏུ་སྣང་བའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཙུག་ན་རིན་ཆེན་ཀུན་ཏུ་རྒྱལ་མཚན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བའི་གསུང་ཀུན་ཏུ་འཇམ་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་མྱི་ཟད་དྲི་མྱེད་ཀུན་ཏུ་གཟི་བརྗིད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཚན་གྱི་འོད་ཟེར་ཀུན་ཏུ་སྣང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་གྱི་ང་རོ་རྒྱ་མཚོ་དྲི་མྱེད་འོད་ཀྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་འབྱུང་བ་ཡེ་ཤེས་དཔལ་གྱི་གཙུག་ཕུད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་ཆེན་འོད་འབར་བློ་གྲོས་དབང་ཕྱུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པདྨོ་རྣམ་པར་གནོན་པ་འོད་ཟེར་གཙུག་ཕུད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཡེ་ཤེས་སྤྲིན་གྱི་ཉི་མའི་རྒྱལ་མཚན་སྣང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་སྟོབས་བརྩོན་འགྲུས་རྡོ་རྗེ་ཡངས་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤོས་ཀྱི་འོད་འཕྲོ་ཤིན་ཏུ་འབར་བའི་འོད་ཀྱི་རྒྱལ་མཚན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་མཛད་ཡོན་ཏན་ཡངས་པའི་རྒྱལ་མཚན་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་ཡངས་པ་ཤིན་ཏུ་འཕགས་པའི་འོད་མཆོག་
ཡོན་ཏན་འབྱུང་བའི་བློ་གྲོས་དང་། དེ་དག་ལ་སྩོགས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཀྱང་། དེ་བཞིན་གཤེགས་པ་རྣམ་པར་སྣང་མཛད་དང་། དགེ་བའི་རྩ་བ་རྒྱ་མཚོ་གཅིག་གིས་བྱུང་བ་ཕ་རོལ་ཏུ་ཕྱིན་པ་ཐམས་ཅད་ཀྱི་འཁོར་ཡོངས་སུ་རྒྱས་པས་སྣང་བར་གྱུར་པ། ཡེ་ཤེས་ཀྱི་མིག་ཡོངས་སུ་དག་པ། དུས་གསུམ་གྱི་དབྱིངས་ཐམས་ཅད་དུ་སྣང་བས་གསལ་བར་གྱུར་པ། ཏིང་ངེ་འཛིན་གྱི་འཁོར་ཐམས་ཅད་ཡོངས་སུ་དག་པས་སྣང་བར་གྱུར་པ། ཐ་དད་པ་ཡང་དག་པར་ཤེས་པ། རྒྱ་མཚོ་ཡངས་ཤིང་ཟད་མི་ཤེས་པ་དང་། སངས་རྒྱས་ཀྱི་ཡོན་ཏན་དང་མཐུས་སྣང་བར་བྱས་པ། འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བརྩམ་པའི་ཡེ་ཤེས་མཉམ་པ་ཉིད་ཀྱིས་སྣང་བར་བྱས་པ། ཆོས་ཀྱི་དབྱིངས་ཀྱི་སྙིང་པོ་གཅིག་ཏུ་ཐ་མྱི་དད་པའི་ཡེ་ཤེས་ཀྱི་སྣང་བར་གྱུར་པ། སངས་རྒྱས་ཀྱི་རྣམ་པར་ཐར་པ་ཟབ་མོའི་ཡུལ་ཡངས་པ་ལ་ཡེ་ཤེས་ཀྱི་སྤྱོད་ཡུལ་གྱིས་སྣང་བར་བྱས་པ། ས་གཅིག་ལས་བྱུང་བ་ཡོངས་སུ་གནོན་པའི་རྗེས་སུ་འབྲང་བས་ཤིན་ཏུ་སྣང་བར་བྱས་པ། སྨོན་ལམ་གྱི་རྒྱ་མཚོ་ལ་འཇུག་པ་ཕྱི་མའི་མཐའི་བྱིན་གྱི་རླབས་ཀྱི་ཡེ་ཤེས་ཐམས་ཅད་ཀྱི་གནས་པས་སྣང་བར་གྱུར་པ། དེ་བཞིན་གཤེགས་པའི་གསང་བ་རྨད་དུ་བྱུང་བའི་དཀྱིལ་འཁོར་ཡངས་པ་ཡོངས་སུ་ཤེས་པས་སྣང་བར་གྱུར་པ། སངས་རྒྱས་ཀྱི་ཆོས་ཐམས་ཅད་མཉམ་པ་ཉིད་ལ་རྗེས་སུ་བརྟགས་པའི་ཡེ་ཤེས་ཀྱིས་ཤིན་ཏུ་སྣང་བར་གྱུར་པ། དེ་བཞིན་གཤེགས་པའི་ས་ཀུན་ཏུ་འོད་ཀྱི་དབྱིངས་དང་། གནས་སུ་རྣམ་པར་སྤྱོད་དུ་དབང་བ། ཏིང་ངེ་འཛིན་རྒྱ་མཚོ་མཐའ་ཡས་པའི་སྒོ་ཐམས་ཅད་དུ་རྣམ་པར་རྒྱུ་བས་སྣང་བར་གྱུར་པ། ཡེ་ཤེས་སྣང་བ་ཐམས་ཅད་ཀྱི་རྗེས་སུ་སོང་ཞིང་འགྲོ་བ་ཐམས་ཅད་ཀྱི་སྤྱོད་པ་རྒྱ་མཚོ་ལ་ཤིན་ཏུ་གནས་པ། ཆོས་རྒྱ་མཚོ་ཐམས་ཅད་ཀྱི་གཟུངས་དང་། ཐ་དད་པ་ཡང་དག་པར་ཤེས་པ་བསྟན་པ་དང་། ཡོངས་སུ་བསྟན་པ་ལ་མཁས་པ། སངས་རྒྱས་ཀྱི་ཡོན་ཏན་རྒྱ་མཚོར་གཏོགས་པ་ཐམས་ཅད་ཀྱིས་ཁྱབ་
པར་བྱེད་པའི་ལུས་ཅན་སྨོན་ལམ་རྒྱ་མཚོ་མངོན་པར་བསྒྲུབས་པས། སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་རྒྱས་པར་འགེངས་པ། སངས་རྒྱས་ཐམས་ཅད་མཆོད་པའི་སྦྱོར་བ་ལ་ཕྱི་མའི་མུར་ཐུག་པའི་བསྐལ་པར་དགའ་བའི་ཤུགས་ཀྱི་སྣང་བ་རབ་ཏུ་ཐོབ་པ། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་ཅིང་སྙིང་པོ་བྱང་ཆུབ་ཏུ་ཉེ་བར་འདོང་བ་ཡང་དག་པར་སྟོན་པ། ཀུན་ཏུ་བཟང་པོའི་སྨོན་ལམ་རྒྱ་མཚོས་སེམས་ཅན་མ་ལུས་པ་ཐམས་ཅད་ཀྱི་ཤེས་པ་ཡོངས་སུ་རྒྱས་པར་འགེངས་པའི་ལུས་ཅན་རྣམས་དང་ཐབས་གཅིག་གོ །སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ལག་ན་རྡོ་རྗེ་དག་དང་ཡང་ཐབས་གཅིག་སྟེ། འདི་ལྟར་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་དང་། ལག་ན་རྡོ་རྗེ་ཉི་མའི་ཤུགས་ཀྱི་རྒྱལ་མཚན་དང་། ལག་ན་རྡོ་རྗེ་རི་རབ་མེ་ཏོག་འོད་དང་། ལག་ན་རྡོ་རྗེ་རྣམ་དག་སྤྲིན་གྱི་དབྱངས་དང་། ལག་ན་རྡོ་རྗེ་དཔའ་བོ་ཤིན་ཏུ་མངའ་བ་དང་། ལག་ན་རྡོ་རྗེ་རྡོ་རྗེའི་འོད་ཡིད་དུ་འོང་བ་དང་། ལག་ན་རྡོ་རྗེ་ཤིང་གི་སྒྲ་དབྱངས་དང་། ལག་ན་རྡོ་རྗེ་སེང་གེའི་འོད་ཀྱི་རྒྱལ་པོ་དང་། ལག་ན་རྡོ་རྗེ་འོད་འཕྲོ་སྟུག་པའི་དཔལ་གྱི་མིག་དང་། ལག་ན་རྡོ་རྗེ་རིན་ཆེན་གཙུག་ཕུད་པད་མོའི་འོད་དང་། དེ་དག་ལ་སྩོགས་པ་ལག་ན་རྡོ་རྗེ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་། སྔོན་བསྐལ་པ་མཐའ་ཡས་པར་དེ་བཞིན་གཤེགས་པ་མཆོད་པར་སྨོན་པས་ཞམ་འབྲིང་ན་འབྲང་བར་གྱུར་པ། སངས་རྒྱས་བསྙེན་བཀུར་བའི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་དགེ་བ་དང་། བསོད་ནམས་ཀྱི་དཀྱིལ་འཁོར་མཐའ་ཡས་པ་ཡོངས་སུ་དག་པ། ཏིང་ངེ་འཛིན་གྱི་སྤྱོད་ཡུལ་ཡངས་པ་ལ་རྣམ་པར་སྤྱོད་པ། རྫུ་འཕྲུལ་དང་སྟོབས་དང་། དེ་བཞིན་གཤེགས་པའི་སྤྱོད་ཡུལ་མཐའ་ཡས་པ་ཁོང་དུ་ཆུད་པ་བསམ་གྱིས་མི་ཁྱབ་པའི་རྣམ་པར་ཐར་པའི་ཡུལ་ལ་ཞུགས་པ། འཁོར་གྱི་དཀྱིལ་འཁོར་ཐམས་ཅད་ཀྱི་ཟིལ་གྱིས་མི་ནོན་པའི་ལུས་ཅན་སེམས་ཅན་རྣམས་ཇི་ལྟར་འདུལ་བ་བཞིན་དུ་ལུས་ཤིན་ཏུ་སྟོན་པ། སངས་རྒྱས་ཀྱི་སྤྲུལ་པའི་སྐུ་ཐམས་ཅད་ཀྱི་འཕྲུལ་པ་རྗེས་སུ་རྟོགས་པ། སངས་རྒྱས་ཐམས་ཅད་ཀྱི་རྣམ་པར་སྤྱོད་པ་དང་། གནས་བསྲུང་བ་ལ་ཤིན་ཏུ་བརྩོན་པ་རྣམས་
དང་ཐབས་གཅིག་གོ །ལུས་ཀྱི་རིས་སུ་གཏོགས་པའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་གཅིག་སྟེ། འདི་ལྟར་ལྷ་ཁྲེལ་དང་། དགེ་བ་རྒྱས་པའི་འོད་དང་། འོད་ཟེར་ཕྱོགས་སུ་སྣང་བ་དང་། སྒྲས་འདུལ་བ་རྒྱ་མཚོའི་དཔལ་དང་། རྒྱན་བཟང་པོ་མེ་ཏོག་གཙུག་ཕུད་དང་། སྤྱོད་ཡུལ་མཐའ་ཡས་དཔལ་དང་། སྣང་བའི་ཕྲེང་བ་འཛིན་པའི་དཔལ་དང་། སྤོས་དྲི་མ་མྱེད་པའི་སྤྲིན་ལས་ཆར་འབབ་པའི་འོད་དང་། སྲུང་འཛིན་ཡོངས་སུ་སྡུད་པ་དང་། སྒོ་ཀུན་ནས་ཡོངས་སུ་གནོན་པ་ལ་མངོན་དུ་གྱུར་པའི་མིག་དང་ཁྲེལ་དང་དཔལ་མི་གཡོ་བའི་འོད་དང་། ལུས་ཀྱི་རིས་སུ་གཏོགས་པའི་ལྷ་དེ་དག་ལ་སྩོགས་པ་ཀུན་ཀྱང་། དེ་བཞིན་གཤེགས་པ་བསྙེན་བཀུར་བར་སྨོན་ལམ་བཏབ་པ་དང་ལྡན་པ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་ཐབས་གཅིག་གོ །རྐང་གིས་འགྲོ་བའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་གཅིག་སྟེ། འདི་ལྟར་རྐང་གིས་འགྲོ་རིན་ཆེན་དཔལ་གྱི་ཕྱག་རྒྱ་དང་། རྐང་གིས་འགྲོ་པད་མོ་སྣང་བའི་འོད་ཟེར་གྱི་འོད་དང་། རྐང་གིས་འགྲོ་མེ་ཏོག་གཙུག་ཕུད་ཀྱི་དཔལ་དྲི་མ་མྱེད་པ་དང་། རྐང་གིས་འགྲོ་ཤིན་ཏུ་མཛེས་པར་གནོན་པ་དང་། རྐང་གིས་འགྲོ་རིན་ཆེན་དཔལ་གྱི་རྒྱལ་མཚན་དང་། རྐང་གིས་འགྲོ་དགའ་བའི་དབྱངས་སྙན་པ་དང་། རྐང་གིས་འགྲོ་ཤིང་ཙན་དན་གྱི་འོད་དང་། རྐང་གིས་འགྲོ་པད་མོ་ཡིད་དུ་འོང་བའི་འོད་དང་། རྐང་གིས་འགྲོ་རྡུལ་གྱི་ཤུགས་ཀྱི་འོད་དང་། རྐང་གིས་འགྲོ་མྱེ་ཏོག་མང་པོའི་དཀྱིལ་འཁོར་དང་། དེ་དག་ལ་སོགས་པ་རྐང་གིས་འགྲོ་བའི་ལྷ། སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་ཀུན་ཀྱང་སྔོན་བསྐལ་པ་མཐའ་ཡས་པར་དེ་བཞིན་གཤེགས་པའི་རྗེས་སུ་འབྲང་བ་ཤ་སྟག་དང་ཐབས་གཅིག་གོ །སྙིང་པོ་བྱང་ཆུབ་ཀྱི་ལྷ་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་གཅིག་སྟེ་འདི་ལྟར། སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མྱེད་པའི་རྒྱན་གྱིས་བརྒྱན་པའི་རྒྱལ་མཚན་དང་། སྙིང་པོ་བྱང་ཆུབ་ཀྱི་ལྷ་རི་རབ་སྤོའི་རིན་པོ་ཆེའི་འོད་དང་། སྙིང་པོ་བྱང་ཆུབ་ཀྱི་ལྷ་དབྱངས་ཀྱི་འབྲུག་སྒྲ་སྒྲོགས་པའི་རྒྱལ་མཚན་དང་། མེ་ཏོག་གི་ཆར་
སྣ་ཚོགས་འབབ་པའི་མིག་དང་། འོད་འཕྲོ་མང་པོ་ཤིན་ཏུ་དྲི་མ་མྱེད་པ་དང་། མེ་ཏོག་གི་ཕྲེང་བ་འོད་ཀྱི་གཙུག་ཕུད་དང་། རིན་པོ་ཆེའི་རྒྱན་གྱི་ཆར་རབ་ཏུ་འབེབས་པ་དང་། མཐུ་དམ་པ་སྤོས་ཀྱི་མྱིག་དང་། རྡོ་རྗེ་སྣ་ཚོགས་ཀྱི་སྤྲིན་དང་། པད་མོའི་ཤིང་སྣང་བའི་འོད་དང་། སྙིང་པོ་བྱང་ཆུབ་ཀྱི་ལྷ་དགེ་བའི་ལྟ་བ་སྣ་ཚོགས་རྣམ་པར་སྟོན་པའི་འོད་དང་། དེ་དག་ལ་སྩོགས་པ་སྙིང་པོ་བྱང་ཆུབ་ཀྱི་ལྷ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་། སྔོན་སངས་རྒྱས་རྒྱ་ཆེན་མཆོད་པའི་སྨོན་ལམ་གྱི་ཡང་དག་པར་འབྱུང་བ་ཤ་སྟག་དང་ཐབས་གཅིག་གོ །ནམ་མཁའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་གཅིག་སྟེ། འདི་ལྟར་གྲོང་ཁྱེར་གྱི་ལྷ་རིན་ཆེན་རྩེ་མོའི་འོད་དང་། རྒྱན་རྣམ་པ་སྣ་ཚོགས་འབྱུང་བ་དང་། རིན་ཆེན་དྲི་མེད་ཤིན་ཏུ་དགའ་བ་དང་། སློས་པའི་མྱ་ངན་ཐམས་ཅད་སྤོང་བས་རྣམ་པར་སྣང་བ་དང་། སྒྲོན་མ་ཤིན་ཏུ་རྒྱས་པའི་མིག་དང་། འོད་འཕྲོ་བའི་དཔལ་མངོན་པར་འབར་བ་དང་། བསོད་ནམས་ཀྱི་ཤུགས་སྣང་བའི་འོད་དང་། ལུས་དྲི་མ་མྱེད་པས་མཉམ་པའི་འོད་དང་། སྤོས་ཀྱི་རྒྱལ་མཚན་གཙུག་ཕུད་ཀྱི་རྒྱན་དང་། གྲོང་ཁྱེར་གྱི་ལྷ་རིན་ཆེན་དཔལ་གྱི་འོད་དང་། དེ་དག་ལ་སྩོགས་པ་ནམ་མཁའི་ལྷ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་། བསྐལ་པ་བསམ་གྱིས་མི་ཁྱབ་པར་དེ་བཞིན་གཤེགས་པའི་གཞལ་མེད་ཁང་རབ་ཏུ་བརྒྱན་པ་ལ་བརྩོན་པ་ཤ་སྟག་དང་ཐབས་གཅིག་གོ །སའི་ལྷ་སངས་རྒྱས་ཀྱི་ཞིང་རྡུལ་ཤིན་ཏུ་ཕྲ་བ་སྙེད་དག་དང་ཡང་ཐབས་གཅིག་སྟེ། འདི་ལྟར་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པ་དྲི་མ་མྱེད་པ་དང་། བསོད་ནམས་བརྟན་པ་ཤིན་ཏུ་བསགས་པའི་འོད་དང་། ཤིང་གི་ཡལ་ག་སྣ་ཚོགས་ཀྱི་རྒྱན་དང་། སེམས་ཅན་རིན་པོ་ཆེས་རྒྱས་པ་དང་། དུས་དུས་སུ་དགེ་བའི་མིག་རབ་ཏུ་སྟོན་པ་དང་། གསེར་གྱི་མིག་གི་དཔལ་དང་། སྤུ་ལས་སྤོས་ཀྱི་འོད་རྣམ་པར་འགྱེད་པ་དང་། སྒྲ་དབྱངས་ཡིད་དུ་འོང་བ་སྒྲོག་པ་དང་། མེ་ཏོག་གི་གློང་སྣ་ཚོགས་ཀྱི་གཙུག་ཕུད་དང་། ཀུན་ནས་རྡོ་རྗེའི་རྡུལ་གྱི་རྒྱན་དང་སའི་ལྷ་ཁྱིམ་དྲི་མ་མྱེད་པའི་འོད་དང་། དེ་དག་
ལ་སོགས་པ་སའི་ལྷ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་བསོད་ནམས་ཀྱི་དབྱིངས་གཅིག་ཏུ་དེ་བཞིན་གཤེགས་པའི་སྔོན་གྱི་སྨོན་ལམ་དང་རབ་ཏུ་འབྲེལ་བ་ཤ་སྟག་དང་ཐབས་གཅིག་གོ །རིའི་ལྷ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་རིའི་ལྷ་རིན་པོ་ཆེའི་རྩེ་མོ་མེ་ཏོག་ཤིན་དུ་རྒྱས་པར་གནས་པ་དང་། ནགས་ཚལ་སྣ་ཚོགས་ཀྱི་མེ་ཏོག་ཤིན་ཏུ་རྒྱས་པའི་གཙུག་ཕུད་དང་། ཀུན་ནས་ཤིན་ཏུ་འཕགས་པས་རྣམ་པར་སྣང་བའི་རྒྱལ་མཚན་དང་། རྡུལ་ཐམས་ཅད་དང་། མི་གནས་པས་དྲི་མ་མྱེད་པའི་གཙུག་ཕུད་དང་། སྣང་བས་ཕྱོགས་སུ་གསལ་བའི་འོད་དང་། སྟོབས་ལ་ཐུབ་པ་མྱེད་པའི་སྣང་བའི་འོད་དང་། ཀུན་ནས་གཟི་བརྗིད་དཔལ་གྱི་དཀྱིལ་འཁོར་དང་། སྣང་བའི་རྡུལ་ཆུ་བོའི་དཀྱིལ་འཁོར་དང་ཀུན་ཏུ་མངོན་པར་ལྟ་བའི་མིག་དང་། རིའི་ལྷ་ཀུན་ནས་སྲ་བ་རྡོ་རྗེའི་མཚམས་ཀྱི་མིག་དང་། དེ་དག་ལ་སོགས་པ་རིའི་ལྷ་ཚད་མེད་པ་ཀུན་ཀྱང་ཚུལ་དྲི་མ་མྱེད་པའི་མིག་གི་སྒོ་རབ་ཏུ་ཐོབ་པ་ཤ་སྟག་དང་ཐབས་གཅིག་གོ །ནགས་ཚལ་གྱི་ལྷ་བསམ་གྱིས་མི་ཁྱབ་པ་དག་དང་ཡང་ཐབས་གཅིག་སྟེ། འདི་ལྟར་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་དང་། ནགས་ཚལ་གྱི་ལྷ་འོད་ཀྱི་ཕུང་པོ་སྣ་ཚོགས་ཀྱི་མིག་ཡིད་དུ་འོང་བའི་འོད་དང་། ལོ་མ་དྲི་མ་མྱེད་པའི་ཕྲེང་བའི་དཔལ་དང་། ཡན་ལག་རབ་ཏུ་འཕྱང་བའི་གཟི་བརྗིད་དང་། དགེ་བའི་འོད་སྣ་ཚོགས་དང་སྒྲ་སྐད་ཡིད་དུ་འོང་བའི་དབྱངས་དང་། ཀུན་ནས་སྤོས་མང་པོ་ལྡང་བའི་འོད་དང་། ཀུན་ནས་དཔལ་གྱི་འོད་རབ་ཏུ་འབྱུང་བའི་དཀྱིལ་འཁོར་དང་། ནགས་ཚལ་གྱི་ལྷ་མེ་ཏོག་དང་འབྲས་བུ་དང་རོའི་འོད་དང་། དེ་དག་ལ་སོགས་པ་ནགས་ཚལ་གྱི་ལྷ་བསམ་གྱིས་མི་ཁྱབ་པ་ཀུན་ཀྱང་དགའ་བའི་ཤུགས་མཐའ་ཡས་པས་གསལ་བར་གྱུར་པ་ཤ་སྟག་དང་ཐབས་གཅིག་གོ །སྨན་གྱི་ལྷ་མཐའ་ཡས་པ་དག་དང་ཡང་ཐབས་གཅིག་སྟེ། འདི་ལྟར་སྨན་གྱི་ལྷ་ཕུན་སུམ་ཚོགས་པ་དང་། ཙན་དན་གྱི་ནགས་ཚལ་གྱི་ཤུགས་འཆང་བ་དང་། འོད་རྡུལ་མྱེད་པ་དང་། མིང་ཀུན་ཏུ་གྲགས་པ་གླང་པོའི་རྒྱལ་མཚན་དང་། སྤུའི་ཀློང་ཀུན་ནས་འོད་འབྱུང་བ་དང་། མུན་པ་
རྣམ་པར་སེལ་ཅིང་རྣམ་པར་སྤྱོད་པ་དང་། སྒྲ་དབྱངས་ཀུན་ཏུ་འབྱུང་བ་དང་། ཉི་མའི་འོད་འགྲོ་བའི་མཆོག་གི་རྒྱལ་མཚན་དང་། ཕྱོགས་བཅུར་རྨོངས་པ་མེད་པར་ལྟ་བ་དང་། སྨན་གྱི་ལྷ་མདངས་བཟང་པོ་ཀུན་ཏུ་འགྱེད་པའི་མིག་དང་། དེ་དག་ལ་སོགས་པ་སྨན་གྱི་ལྷ་མཐའ་ཡས་པ་ཀུན་ཀྱང་སྙིང་རྗེ་དྲི་མ་མྱེད་པའི་དཀྱིལ་འཁོར་གྱིས་རབ་ཏུ་སྣང་བར་གྱུར་པ་ཤ་སྟག་དང་ཐབས་གཅིག་གོ །ལོ་ཏོག་གི་ལྷ་མཐའ་ཡས་པ་དག་དང་ཡང་ཐབས་གཅིག་སྟེ། འདི་ལྟར་ལོ་ཏོག་གི་ལྷ་དང་འཇམ་པའི་དཔལ་དང་། དུས་ཀྱི་མེ་ཏོག་རྣམ་པར་མཛེས་པའི་འོད་དང་། རྩལ་དམ་པའི་སྟོབས་དང་མདངས་ཀྱི་ངད་མཐའ་ཡས་པ་རབ་ཏུ་འགྱེད་པ་དང་། ས་ཀུན་གྱི་རྩ་བ་འབྲས་བུ་དང་། གཙུག་ཕུད་ཁ་དོག་སྣ་ཚོགས་དང་། ཡལ་ག་དྲི་མ་མྱེད་པར་གྲུབ་པ་དང་། སྤོས་སྣ་ཚོགས་ཤིན་ཏུ་གྲུབ་པ་དང་། བཟང་ཞིང་ཡིད་དུ་འོང་བར་སྣང་བ་དང་། ལོ་ཏོག་གི་ལྷ་ཁ་དོག་རྣམ་པར་དག་ཅིང་འོད་དྲི་མ་མྱེད་པ་དང་། དེ་དག་ལ་སྩོགས་པ་ལོ་ཏོག་གི་ལྷ་མཐའ་ཡས་པ་ཀུན་ཀྱང་དགའ་བ་དང་མགུ་བ་དང་རངས་པ་ཤིན་ཏུ་ཐོབ་པ་ཤ་སྟག་དང་ཐབས་གཅིག་གོ །ཆུ་ཀླུང་གི་ལྷ་མུ་མྱེད་པ་དག་དང་ཡང་ཐབས་གཅིག་སྟེ། འདི་ལྟར་ཆུ་ཀླུང་གི་ལྷ་ཆུ་བོ་ཀུན་དང་ལྡན་པ་དང་། རི་དང་ཆུ་ཀུན་ལ་རྟེན་པ་དང་། རྡུལ་ཐམས་ཅད་དྲི་མ་མྱེད་པར་རྣམ་པར་དག་པའི་མིག་དང་། ང་རོས་ཁྱབ་པར་བྱེད་པ་དང་། སྲོག་ཆགས་ཀྱི་རྒྱུད་མཐའ་ཡས་པ་སྐྱོབ་པ་དང་། གདུང་བ་མེད་པ་རྒྱ་མཚོ་གདུང་བ་མེད་པའི་འོད་དྲི་མ་མེད་པ་དང་། དགའ་བདེ་ཀུན་ནས་འབྱུང་བ་དང་། ཡོན་ཏན་གྱི་ཤུགས་ཡངས་པའི་རྒྱལ་མཚན་དང་། འཇིག་རྟེན་ཐམས་ཅད་ཀྱི་དཔལ་རྣམ་པར་སྣང་བ་དང་། ཆུ་ཀླུང་གི་ལྷ་ཚོགས་ཆེན་པོ་རྒྱ་མཚོའི་དཔལ་གྱི་འོད་དང་། དེ་དག་ལ་སོགས་པ་ཆུ་ཀླུང་གི་ལྷ་མུ་མེད་པ་ཀུན་ཀྱང་འགྲོ་བ་ཐམས་ཅད་ལ་ཕན་པའི་དོན་དུ་ཡིད་ལ་བྱེད་པ་ལ་བརྩོན་པ་ཤ་སྟག་དང་ཐབས་གཅིག་གོ །རྒྱ་མཚོའི་ལྷ་བསམ་གྱིས་མི་ཁྱབ་པ་དག་དང་ཡང་ཐབས་གཅིག་སྟེ། འདི་ལྟར་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་དང་། རྡོ་རྗེ་ཀུན་ནས་སྲ་ཞིང་མྱི་ཆོམས་པའི་རྒྱལ་མཚན་དང་ལྡན་པ་དང་། རྡུལ་དང་དྲི་མ་
མྱེད་པའི་གནས་དང་ལྡན་པ་དང་། ཀུན་ནས་ཆུ་དང་རི་བོ་དང་ཁྱིམ་གྱི་དཀྱིལ་འཁོར་དང་། སྐྱབས་རིན་པོ་ཆེ་མྱིག་གི་ཟླ་བའི་དཔལ་དང་། ཀླུའི་དཔལ་པད་མོ་སྣ་ཚོགས་ཀྱི་གཙུག་ཕུད་དང་། ཆུ་ལྟ་བུར་རོ་མཐུན་པར་འཛིན་པའི་འོད་དང་། རིན་པོ་ཆེའི་འོད་འཕྲོ་བའི་མེ་ཏོག་གི་ཚོན་གྱི་འོད་དང་། རི་རབ་སྲ་བའི་རྡོ་རྗེ་སྣ་ཚོགས་དང་། རྒྱ་མཚོའི་ལྷ་འབྲུག་སྒྲ་སྒྲོགས་པ་རྒྱ་མཚོའི་ཤུགས་ཀྱི་དབྱངས་དང་། དེ་དག་ལ་སོགས་པ་རྒྱ་མཚོའི་ལྷ་བསམ་གྱིས་མྱི་ཁྱབ་པ་ཀུན་ཀྱང་སངས་རྒྱས་ཀྱི་ཡོན་ཏན་རྒྱ་མཚོའི་མཐར་ཕྱིན་པར་རྒྱས་པར་བྱེད་པ་ཤ་སྟག་དང་ཐབས་གཅིག་གོ །མེའི་ལྷ་གྲངས་མེད་པ་དག་དང་ཡང་ཐབས་གཅིག་སྟེ། འདི་ལྟར་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་དང་། ཀུན་ཏུ་འབར་ཞིང་འཕྲོ་བའི་རྒྱལ་མཚན་གྱི་དཀྱིལ་འཁོར་དང་། འོད་རྒྱ་ཆེན་པོས་ཕྱོགས་རྒྱས་པར་བྱེད་པ་དང་། རྒྱལ་མཚན་གྱི་རྡུལ་གྱི་སྒོས་རྒྱས་པར་བྱེད་པ་དང་། གཟི་བརྗིད་མི་ཟད་པའི་གཙུག་ཕུད་དང་། དཀའ་ཐུབ་སྣ་ཚོགས་ཀྱི་མིག་གི་དཔལ་དང་། ཕྱོགས་ཁྱིམ་དུ་གྱུར་པའི་རི་རབ་ཀྱི་སྤོ་དང་། འོད་དྲག་ཤུལ་ཅན་གྱི་དབང་ཕྱུག་དང་། མུན་པ་དང་རབ་རིབ་སེལ་ཅིང་ཕྱོགས་རྣམ་པར་སྣང་བར་བྱེད་པ་དང་། མེའི་ལྷ་འོད་འཕྲོ་བའི་སྤྲིན་གྱི་དབང་ཕྱུག་དང་། དེ་དག་ལ་སོགས་པ་མེའི་ལྷ་གྲངས་མེད་པ་ཀུན་ཀྱང་སེམས་ཅན་ཐམས་ཅད་ཀྱི་གདུང་བ་སེལ་བའི་སྣང་བ་སྟོན་པ་ཤ་སྟག་དང་ཐབས་གཅིག་གོ །ཆུའི་ཕུང་པོའི་ལྷ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་ཆུའི་ཕུང་པོའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་དང་། སྤྲིན་སྒྲའི་ཤུགས་རྒྱ་མཚོའི་སྤྲིན་དང་། ཆུ་སྣ་ཚོགས་ཀྱི་གཙུག་ཕུད་དང་། བཟང་པོར་འཁྱིལ་བ་གྲུབ་པའི་དཔལ་དང་། ཀུན་ནས་སྤོས་དྲི་མ་མྱེད་པའི་མྱུ་གུའི་དཔལ་དང་། དབའ་རླབས་ཀྱི་སྒྲ་བསོད་ནམས་སྟེགས་ཀྱི་འོད་དང་། ཚིམ་པར་བྱ་བ་ལ་དབང་བྱེད་པ་ཡོངས་སུ་སྒྲུབ་པ་དང་། སའི་རྡུལ་སྙེད་ཀྱི་སྒོ་ནས་དབྱངས་འབྱུང་བ་དང་། འོད་ཀུན་ཏུ་འགྲོ་ཞིང་རྒྱས་པར་བྱེད་པ་དང་། ཆུའི་ཕུང་པོའི་ལྷ་རྒྱ་མཚོའི་དབྱངས་ཀྱི་ང་རོའི་འོད་དང་། དེ་དག་ལ་སྩོགས་པའི་ཆུའི་ཕུང་པོའི་ལྷ་ཚད་
མེད་པ་ཀུན་ཀྱང་འགྲོ་བ་ཐམས་ཅད་ལ་ཕན་པ་དང་བདེ་བའི་སྐྱབས་སུ་བརྩོན་པ་ཤ་སྟག་དང་ཐབས་གཅིག་གོ །རླུང་གི་ཕུང་པོའི་ལྷ་ཚད་མྱེད་པ་དག་དང་ཡང་ཐབས་གཅིག་སྟེ། འདི་ལྟར་རླུང་གི་ཕུང་པོའི་ལྷ་ཆགས་པ་མྱེད་པར་འགྲོ་བའི་འོད་དང་། ཀུན་ཏུ་རྒྱས་པར་འབྱུང་བའི་མཐུའི་དཔལ་དང་། ཀུན་ཏུ་རེག་པར་བྱེད་པའི་སྤྲིན་གྱི་རྒྱལ་མཚན་དང་། རྒྱན་ཡིད་དུ་འོང་ཞིང་བཟང་བའི་འོད་དང་། ཆུ་དྲག་པོའི་སྙིང་པོ་སྐེམས་པ་དང་། སྒྲ་ཆེན་པོས་འགྲོ་བའི་དབྱངས་དང་། ཤིང་གི་རྩེ་མོ་མེ་ཏོག་རབ་ཏུ་འཕྱང་བའི་གཙུག་ཕུད་དང་། ཐོགས་པ་མེད་པར་ཕྱོགས་ཀུན་ཏུ་རྒྱས་པར་འགྲོ་བ་དང་། རླུང་གི་ཕུང་པོ་རྣམ་པ་སྣ་ཚོགས་འབྱུང་བའི་སྤྲིན་གྱི་དཀྱིལ་འཁོར་དང་། རླུང་གི་ཕུང་པོའི་ལྷ་འཇིག་རྟེན་ཐམས་ཅད་ཀྱི་མུན་པ་ཀུན་ནས་སྣང་བར་བྱེད་པ་དང་། དེ་དག་ལ་སོགས་པ་རླུང་གི་ཕུང་པོའི་ལྷ་ཚད་མྱེད་པ་ཀུན་ཀྱང་སེམས་ཅན་ཐམས་ཅད་ཀྱི་སྔོན་གྱི་མཐའི་ང་རྒྱལ་རྣམ་པར་གཏོར་བ་ལ་བརྩོན་པ་ཤ་སྟག་དང་ཐབས་གཅིག་གོ །ནམ་མཁའི་ལྷ་མུ་མེད་པ་དག་དང་ཡང་ཐབས་གཅིག་སྟེ། འདི་ལྟར་ནམ་མཁའི་ལྷ་ཀུན་ནས་སྣང་བ་དྲི་མ་མྱེད་པའི་འོད་དང་། མཐའ་ཡས་ཤིང་ཟག་པ་ཀུན་ཏུ་རྒྱས་པར་བྱེད་པ་དང་། རླུང་ཀུན་ནས་འབྱུང་བའི་དཔལ་དང་། བསྒྲིབས་པ་ཐམས་ཅད་དང་མི་གནས་པའི་དཀྱིལ་འཁོར་དང་། རྒྱ་ཆེན་པོ་ཀུན་ཏུ་གནོན་པ་སྣ་ཚོགས་ཀྱི་གཙུག་ཕུད་དང་། འོད་ཟེར་སྣང་བའི་འོད་ཐོགས་པ་མྱེད་པ་དང་། སྟོབས་ཀྱི་རྒྱུན་ཐོགས་པ་མྱེད་པའི་དཔལ་དང་། ཕྱོགས་དྲི་མ་མྱེད་པར་སྣང་བའི་འོད་དང་། དབྱངས་ཤིན་ཏུ་འཕགས་ཤིང་ཟབ་པ་དང་ནམ་མཁའི་ལྷ་ཕྱོགས་བཅུར་མངོན་དུ་སྟོན་པའི་འོད་དང་། དེ་དག་ལ་སོགས་པ་ནམ་མཁའི་ལྷ་མུ་མྱེད་པ་ཐམས་ཅད་ཀྱང་སེམས་རྒྱ་མཚོ་དྲི་མ་མྱེད་ཅིང་ཡོངས་སུ་དག་པ་ཤ་སྟག་དང་ཐབས་གཅིག་གོ །ཕྱོགས་ཀྱི་ལྷ་མུ་མྱེད་པ་དག་དང་ཡང་ཐབས་གཅིག་སྟེ། འདི་ལྟར་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པ་དང་། མཉམ་པ་ཉིད་ལ་མངོན་དུ་ལྟ་བ་དང་། སྣང་བ་སྤྱོད་པའི་རྒྱན་དང་། ཀུན་ཏུ་རྒྱུ་ཞིང་རྗེས་སུ་འབྲང་བ་དང་། རྨོངས་
པ་མེད་པའི་གཙུག་ཡོངས་སུ་འགྲུབ་པ་དང་། ནམ་མཁའི་རྒྱུད་ཀུན་ཏུ་སྤྱོད་པ་དང་། རྣམ་པར་སྤྱོད་པའི་སྤྲིན་རྒྱ་ཆེན་པོའི་རྒྱལ་མཚན་དང་། མྱིག་ཐ་དད་པ་མེད་པའི་གཙུག་ཕུད་དང་། འཇིག་རྟེན་གྱི་བྱ་བ་ཀུན་ནས་སྤྱོད་པ་དང་། ཕྱོགས་ཀྱི་ལྷ་ཕྱོགས་སུ་རྣམ་པར་ལྟ་བ་ཕྲེང་བའི་འོད་དང་། དེ་དག་ལ་སོགས་པ་ཕྱོགས་ཀྱི་ལྷ་མུ་མེད་པ་ཀུན་ཀྱང་། སེམས་ཅན་གྱི་རྒྱུད་ཀྱི་ཕྱོགས་སྣང་བར་བྱ་བ་ལ་བརྩོན་པ་ཤ་སྟག་དང་ཐབས་གཅིག་གོ །མཚན་མོའི་ལྷ་ཚད་མྱེད་པ་དག་དང་ཡང་ཐབས་གཅིག་སྟེ། འདི་ལྟར་མཚན་མོའི་ལྷ་དཔལ་དྲི་མ་མྱེད་ཅིང་ཀུན་ནས་ཟབ་པའི་འོད་དང་། ཀུན་ནས་སྐྱོབ་པའི་མདངས་ཀྱི་དཔལ་དང་། རབ་ཏུ་དགའ་བའི་མིག་གིས་འགྲོ་བ་ལ་རྣམ་པར་ལྟ་བ་དང་། སྒྲས་ཞིང་རྒྱ་མཚོ་དང་ལྡན་པ་དང་། མཚན་མོ་ཐམས་ཅད་འབྱུང་བའི་དཔལ་དང་། ཤིང་ཐམས་ཅད་རབ་ཏུ་རྒྱས་པར་བྱེད་པའི་འོད་དང་། ཀུན་ནས་སྐྱོང་ཞིང་སྲུང་བའི་དཔལ་དང་། དགེ་བ་ཐམས་ཅད་ཀྱི་དགའ་བ་ལ་དབང་སྒྱུར་བ་དང་། མདུད་པར་འཛིན་པ་ཐམས་ཅད་ཞི་བ་བྱ་བས་དབང་པོ་རབ་ཏུ་དགའ་བ་དང་། མཚན་མོའི་ལྷ་དགེ་བའི་བསོད་ནམས་འབྱུང་བའི་དཔལ་སྟོན་པ་དང་། དེ་དག་ལ་སོགས་པ་མཚན་མོའི་ལྷ་ཚད་མྱེད་པ་ཀུན་ཀྱང་། ཆོས་ཀྱི་དགའ་བ་འབྱུང་བ་ལ་མོས་པར་གནས་པ་ལ་བརྩོན་པ་ཤ་སྟག་དང་ཐབས་གཅིག་གོ །ཉིན་མོའི་ལྷ་གཞལ་དུ་མེད་པ་དག་དང་ཡང་ཐབས་གཅིག་སྟེ། འདི་ལྟར་ཉིན་མོའི་ལྷ་ཁྱིམ་དང་། གཞལ་མེད་ཁང་གི་གཟུགས་ཤིན་ཏུ་སྟོན་པ་དང་། བརྩམ་པའི་བློ་གྲོས་མཚམས་སྦྱོར་བའི་དཀྱིལ་འཁོར་དང་། ཀུན་ནས་དགའ་བའི་དཔལ་གྱི་རྒྱན་དང་། མེ་ཏོག་དང་སྤོས་ཡིད་དུ་འོང་བའི་འོད་དང་། ཀུན་ནས་ཡིད་དུ་འོང་བའི་སྨན་སྟོན་པ་སྒྲུབ་པའི་དཔལ་དང་། དགའ་བའི་མིག་བཟང་པོས་ཚིམ་པར་བྱེད་པ་དང་། ཡུལ་རྒྱ་ཆེན་པོའི་ཕྱོགས་ཀུན་ནས་བྱུང་བའི་དཔལ་དང་། སྙིང་རྗེ་རྒྱ་ཆེན་པོའི་གཟི་བརྗིད་ཀྱི་འོད་དང་། སྣང་བ་རྒྱ་ཆེན་པོའི་དགེ་བའི་རྩ་བ་དང་མི་འབྲལ་བའི་འོད་དང་། ཉིན་མོའི་ལྷ་མེ་ཏོག་གི་ཕྲེང་བ་ཀུན་ནས་འཕྱང་བའི་དཔལ་
དང་། དེ་དག་ལ་སོགས་པ་ཉིན་མོའི་ལྷ་གཞལ་དུ་མེད་པ་ཀུན་ཀྱང་མོས་པའི་ཆོས་གཞལ་དུ་མེད་པའི་རྒྱན་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ལྷ་མ་ཡིན་གྱི་དབང་པོ་མཐའ་ཡས་པ་དག་དང་ཡང་ཐབས་གཅིག་སྟེ། འདི་ལྟར་ལྷ་མ་ཡིན་གྱི་དབང་པོ་སྒྲ་གཅན་དང་། ལྷ་མ་ཡིན་གྱི་དབང་པོ་ཐག་ཟངས་རིས་དང་། ལྷ་མ་ཡིན་གྱི་དབང་པོ་བདེ་བའི་མཆོག་དང་། ལྷ་མ་ཡིན་གྱི་དབང་པོ་མཚོན་ཅ་ཆེན་པོ་དང་། ལྷ་མ་ཡིན་གྱི་དབང་པོ་སྟོབས་ཅན་དང་། ལྷ་མ་ཡིན་གྱི་དབང་པོ་རྣམ་པར་སྣང་བ་དང་། ལྷ་མ་ཡིན་གྱི་དབང་པོ་རྡོ་རྗེ་སྲ་བ་སྣ་ཚོགས་ཀྱི་ཡན་ལག་དང་། ལྷ་མ་ཡིན་གྱི་དབང་པོ་སྟོབས་རྒྱ་ཆེན་པོའི་རྒྱུའི་བློ་གྲོས་དང་། ལྷ་མ་ཡིན་གྱི་དབང་པོ་དཔལ་གྱི་བེའུ་རབ་ཏུ་འབྱུང་བ་དང་། ལྷ་མ་ཡིན་གྱི་དབང་པོ་བརྟུལ་ཞུགས་བཟང་པོའི་དབྱངས་དང་། དེ་དག་ལ་སོགས་པ་ལྷ་མ་ཡིན་གྱི་དབང་པོ་ཀུན་ཀྱང་སྒྱུ་དང་། ང་རྒྱལ་དང་ཀུན་ནས་ཉོན་མོངས་པ་རབ་ཏུ་ཞི་བར་བྱ་བ་ལ་བརྩོན་པ་ཤ་སྟག་དང་ཐབས་གཅིག་གོ །ནམ་མཁའ་ལྡིང་གི་དབང་པོ་བསམ་གྱིས་མི་ཁྱབ་པ་དག་དང་ཡང་ཐབས་གཅིག་སྟེ། འདི་ལྟར་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་དང་། ནམ་མཁའ་ལྡིང་གི་དབང་པོ་མྱི་ཤིགས་པའི་སེམས་ཅན་རིན་ཆེན་གཙུག་ཕུད་དང་། ནམ་མཁའ་ལྡིང་གི་དབང་པོ་ཤུགས་དྲི་མ་མེད་པའི་དཔལ་དང་། ནམ་མཁའ་ལྡིང་གི་དབང་པོ་ཕྱིར་མི་ལྡོག་པའི་སེམས་ཀྱི་རྒྱན་དང་། ནམ་མཁའ་ལྡིང་གི་དབང་པོ་རྒྱ་མཚོ་ཆེན་པོའི་འོད་ཀྱི་ཚུལ་འཆང་བ་དང་། ནམ་མཁའ་ལྡིང་གི་དབང་པོ་ཆོས་བརྟེན་པ་དྲི་མ་མེད་པའི་འོད་དང་། ནམ་མཁའ་ལྡིང་གི་དབང་པོ་ཅོད་པན་སྣ་ཚོགས་དཔལ་གྱི་གཙུག་ཕུད་དང་། ནམ་མཁའ་ལྡིང་གི་དབང་པོ་བཞིན་ཀུན་ཏུ་ཁྱབ་པར་སྟོན་པའི་ཤུགས་དང་། ནམ་མཁའ་ལྡིང་གི་དབང་པོ་དགེ་བ་རྒྱ་མཚོ་ཀུན་ནས་ལྟ་བ་དང་། ནམ་མཁའ་ལྡིང་གི་དབང་པོ་ཀླུའི་སྒྲ་ཡངས་པ་ཀུན་ཏུ་ལྟ་བའི་དཀྱིལ་འཁོར་དང་། དེ་དག་ལ་སྩོགས་པ་ནམ་མཁའ་ལྡིང་གི་དབང་པོ་མཐའ་ཡས་པ་ཀུན་ཀྱང་སེམས་ཅན་ཐམས་ཅད་ཡོངས་སུ་བསྡུ་བའི་ཐབས་ཡངས་པ་རབ་ཏུ་ཐོབ་པ་ཤ་སྟག་དང་ཐབས་གཅིག་གོ །མིའམ་ཅིའི་དབང་
པོ་དུ་མ་དག་དང་ཡང་ཐབས་གཅིག་སྟེ། འདི་ལྟར་མི་འམ་ཅིའི་དབང་པོ་ལྷའི་བློ་གྲོས་འོད་དང་། མིའམ་ཅིའི་དབང་པོ་མེ་ཏོག་དཔལ་གྱི་དཀྱིལ་འཁོར་དང་། མི་འམ་ཅིའི་དབང་པོ་རྒྱན་རྣམ་པ་སྣ་ཚོགས་དང་། མི་འམ་ཅིའི་དབང་པོ་ང་རོ་ཡིད་དུ་འོང་བའི་དབྱངས་དང་། མི་འམ་ཅིའི་དབང་པོ་ཤིང་རིན་པོ་ཆེའི་ཡལ་གའི་འོད་དང་། མི་འམ་ཅིའི་དབང་པོ་མཐོང་ན་དགའ་ཞིང་སྤྲོ་བར་བྱེད་པ་དང། མི་འམ་ཅིའི་དབང་པོ་རྒྱན་གྱི་དཔལ་གྱི་འོད་དང་། མི་འམ་ཅིའི་དབང་པོ་མེ་ཏོག་ཚོན་དབང་པོའི་རྒྱལ་མཚན་དང་། མི་འམ་ཅིའི་དབང་པོ་སའི་གཞིའི་དཔལ་དང་། མི་འམ་ཅིའི་དབང་པོ་དྲག་ཤུལ་གྱི་བདག་པོ་དང་། དེ་དག་ལ་སྩོགས་པ་མི་འམ་ཅིའི་དབང་པོ་དུ་མ་ཀུན་ཀྱང་ཆོས་ཐམས་ཅད་ལ་དགའ་བས་རྩེ་བ་ཡང་དག་པར་བསྐྱེད་པ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ལྟོ་འཕྱེ་ཆེན་པོའི་དབང་པོ་འཕྲུལ་པོ་ཆེ་ས་མཚམས་མེད་པ་དང་ཡང་ཐབས་གཅིག་སྟེ། འདི་ལྟར་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་དང་། ལྟོ་འཕྱེ་ཆེན་པོའི་དབང་པོ་གཟི་བརྗིད་ཀྱི་དབྱངས་ལ་རྡུལ་མྱེད་པ་དང་། ལྟོ་འཕྱེ་ཆེན་པོའི་དབང་པོ་བློ་གྲོས་སྣ་ཚོགས་མཆོག་གི་གཙུག་ཕུད་དང་། ལྟོ་འཕྱེ་ཆེན་པོའི་དབང་པོ་མིག་བཟང་པོའི་བདག་པོ་དང་། ལྟོ་འཕྱེ་ཆེན་པོའི་དབང་པོ་སྒྲོན་མའི་སྐྱབས་ཀྱི་རྒྱལ་པོ་དང་། ལྟོ་འཕྱེ་ཆེན་པོའི་དབང་པོ་སྣང་བ་ཤུགས་བཟང་པོའི་རྒྱལ་མཚན་དང་། ལྟོ་འཕྱེ་ཆེན་པོའི་དབང་པོ་སེང་གེའི་ཕྲུ་གུ་དང་། ལྟོ་འཕྱེ་ཆེན་པོའི་དབང་པོ་རྒྱན་སྣ་ཚོགས་ཀྱི་དབྱངས་དང་། ལྟོ་འཕྱེ་ཆེན་པོའི་དབང་པོ་རི་རབ་ཀྱི་བུ་དང་། ལྟོ་འཕྱེ་ཆེན་པོའི་དབང་པོ་འོད་ཡིད་དུ་འོང་བ་འབྱུང་བ་དང་། དེ་དག་ལ་སྩོགས་པ་ལྟོ་འཕྱེ་ཆེན་པོའི་དབང་པོ་ས་མཚམས་མེད་པ་ཀུན་ཀྱང་། སེམས་ཅན་གྱི་གཏི་མུག་གི་དྲ་བ་ཆེན་པོ་བསྩལ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །དྲི་ཟའི་བདག་པོ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་དྲི་ཟའི་རྒྱལ་པོ་གནས་སྲུང་པོ་དང་། དྲི་ཟའི་རྒྱལ་པོ་ཤིང་མི་འམ་ཅིའི་འོད་དང་། དྲི་ཟའི་རྒྱལ་པོ་མིག་གཙང་མ་དགའ་བ་རབ་ཏུ་སྐྱེ་བ་དང་། དྲི་ཟའི་རྒྱལ་པོ་མེ་
ཏོག་དང་། ཤིང་ཤིན་ཏུ་རྒྱས་པའི་ཅོད་པན་དང་། དྲི་ཟའི་རྒྱལ་པོ་དགའ་བས་སྤྱོད་པ་ཀུན་ཏུ་སྒྲོག་པ་དང་། དྲི་ཟའི་རྒྱལ་པོ་རབ་ཏུ་དགའ་བ་རྒྱུན་ཏུ་གནས་པའི་མྱིག་བཟང་པོ་དང་། དྲི་ཟའི་རྒྱལ་པོ་ཡིད་དུ་འོང་བའི་དབྱངས་སེང་གེའི་རྒྱལ་མཚན་དང་། དྲི་ཟའི་རྒྱལ་པོ་འོད་ཟེར་ཀུན་ཏུ་འགྱེད་པའི་འོད་དང་། དྲི་ཟའི་རྒྱལ་པོ་རྡོ་རྗེའི་ཤིང་གི་ཡལ་གའི་རྒྱལ་མཚན་དང་། དྲི་ཟའི་རྒྱལ་པོ་རྒྱན་ཐམས་ཅད་ལ་དགའ་བའི་རང་བཞིན་གྱི་ཚུལ་སྟོན་པ་དང་། དེ་དག་ལ་སྩོགས་པ་དྲི་ཟའི་རྒྱལ་པོ་ཚད་མེད་པ་ཀུན་ཀྱང་། མོས་པ་དང་དགའ་བ་ཆེན་པོ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །གྲུལ་བུམ་གྱི་བདག་པོ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་གྲུལ་བུམ་གྱི་དབང་པོ་འཕགས་སྐྱེས་པོ་དང་། གྲུལ་བུམ་གྱི་དབང་པོ་ཀླུ་བདག་དང་། གྲུལ་བུམ་གྱི་དབང་པོ་ལེགས་པར་སྤྱོད་པའི་རྒྱལ་མཚན་དང་། གྲུལ་བུམ་གྱི་དབང་པོ་ཕན་པར་སྤྱོད་པར་འཕར་བ་དང་། གྲུལ་བུམ་གྱི་དབང་པོ་འཇིགས་པ་ལས་སྒྲོལ་སྒྲོལ་བ་དང་། གྲུལ་བུམ་གྱི་དབང་པོ་ས་ལ་སྣ་ཚོགས་བཟང་པོ་དང་། གྲུལ་བུམ་གྱི་དབང་པོ་རི་རབ་ལེགས་པར་བྱུང་བ་དང་། གྲུལ་བུམ་གྱི་དབང་པོ་སྡེ་དཔའ་བ་དང་། གྲུལ་བུམ་གྱི་དབང་པོ་དགེ་བའི་མིག་གི་འོད་ཟེར་མཐའ་ཡས་པ་དང་། གྲུལ་བུམ་གྱི་དབང་པོ་ལྷ་དང་ལྷ་མ་ཡིན་སྒོ་མཐའ་ཡས་པའི་མིག་དང་། དེ་དག་ལ་སྩོགས་པ་གྲུལ་བུམ་གྱི་དབང་པོ་ཚད་མྱེད་པ་ཀུན་ཀྱང་ཆགས་པ་མེད་པའི་ཆོས་སྣང་བ་མངོན་པར་བསྒྲུབ་པ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ཀླུའི་བདག་པོ་མཐའ་ཡས་པ་དག་དང་ཡང་ཐབས་གཅིག་སྟེ། འདི་ལྟར་ཀླུའི་དབང་པོ་མིག་མྱི་བཟང་དང་། ཀླུའི་དབང་པོ་རྒྱ་མཚོ་དང་། ཀླུའི་དབང་པོ་སྤྲིན་སྒྲ་སྣ་ཚོགས་ཀྱི་རྒྱལ་མཚན་དང་། ཀླུའི་དབང་པོ་འོད་འཕྲོ་བའི་སྒོ་རྒྱ་མཚོ་རབ་ཏུ་སྣང་བ་དང་། ཀླུའི་དབང་པོ་ཀུན་ནས་རིའི་སྤྲིན་གྱི་རྒྱལ་མཚན་དང་། ཀླུའི་དབང་པོ་འཇོག་པོ་དང་། ཀླུའི་དབང་པོ་མཐའ་ཡས་པར་འགྲོ་བ་དང་། ཀླུའི་དབང་པོ་མཛོད་སྤུའི་གཟི་བརྗིད་དྲི་མ་མྱེད་པའི་ཤུགས་དང་། ཀླུའི་དབང་པོ་ཀུན་ཏུ་སྤྱོད་པ་རྒྱ་ཆེན་པོའི་དབྱངས་
དང་། ཀླུའི་དབང་པོ་མ་དྲོས་པ་དང་། དེ་དག་ལ་སོགས་པ་ཀླུའི་དབང་པོ་མཐའ་ཡས་པ་ཀུན་ཀྱང་སེམས་ཅན་གྱི་ཉོན་མོངས་པས་གདུང་བའི་ཚ་བ་ཆེན་པོ་ཆར་པའི་སྤྲིན་གྱིས་ཤིན་ཏུ་ཞི་བར་བྱ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །གནོད་སྦྱིན་གྱི་བདག་པོ་ཀུན་ཏུ་མཐའ་ཡས་པ་དག་དང་ཡང་ཐབས་གཅིག་སྟེ། འདི་ལྟར་གནོད་སྦྱིན་གྱི་དབང་པོ་ངལ་བསོ་པོ་དང་། གནོད་སྦྱིན་གྱི་དབང་པོ་དབྱངས་ཆེན་དབང་ཕྱུག་དང་། གནོད་སྦྱིན་གྱི་དབང་པོ་ས་ལ་ཤིན་ཏུ་གཏུམ་པའི་མཚོན་ཆ་དང་། གནོད་སྦྱིན་གྱི་དབང་པོ་བློ་གྲོས་ཆེན་པོ་དང་། གནོད་སྦྱིན་གྱི་དབང་པོ་མིག་འོད་འཕྲོ་བའི་བདག་པོ་དང་། གནོད་སྦྱིན་གྱི་དབང་པོ་མིག་རྡོ་རྗེ་ལྟར་བརྟན་པ་དང་། གནོད་སྦྱིན་གྱི་དབང་པོ་སྡེ་མཆོག་ཏུ་དཔའ་བ་དང་། གནོད་སྦྱིན་གྱི་དབང་པོ་སྡེའི་རྒྱན་ཆེན་པོས་རབ་ཏུ་གནོན་པ་དང་། གནོད་སྦྱིན་གྱི་དབང་པོས་དགེ་བའི་ཚོགས་དང་། གནོད་སྦྱིན་གྱི་དབང་པོ་རི་བོའི་སྟོབས་རབ་ཏུ་འཇོམས་པ་དང་། དེ་དག་ལ་སྩོགས་པ་གནོད་སྦྱིན་གྱི་དབང་པོ་ཀུན་ཏུ་མཐའ་ཡས་པ་ཀུན་ཀྱང་སེམས་ཅན་ཐམས་ཅད་ལ་ཕན་པ་དང་། ཡོངས་སུ་བསྲུང་བར་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ཟླ་བའི་རིས་སུ་གཏོགས་པའི་ལྷ་དུ་མ་དག་དང་ཡང་ཐབས་གཅིག་སྟེ། འདི་ལྟར་ལྷའི་བུ་ཟླ་བ་དང་། ལྷའི་བུ་འོད་ཀྱི་མེ་ཏོག་རྒྱལ་པོའི་གཙུག་ཕུད་དང་། ལྷའི་བུ་དཔལ་གྱི་ཚོགས་སྣ་ཚོགས་ཀྱི་རྒྱན་གྱི་འོད་དང་། ལྷའི་བུ་འཇིག་རྟེན་དགའ་བའི་བདེ་བ་སྣ་ཚོགས་དང་། ལྷའི་བུ་ཤིང་གི་དབང་པོའི་མྱིག་གི་འོད་དང་། ལྷའི་བུ་འོད་བཟང་པོ་སྟོན་པ་དང་། ལྷའི་བུ་ཀུན་ནས་སྤྱོད་པ་མི་སྒུལ་བའི་འོད་དང་། ལྷའི་བུ་སྐར་མའི་རྒྱལ་པོའི་བདག་པོ་དང་། ལྷའི་བུ་བློ་དྲི་མ་མྱེད་པའི་ཟླ་བ་དང་། ལྷའི་བུ་གཟི་བརྗིད་ཆེན་པོའི་འོད་ཟེར་མཛེས་པ་དང་། དེ་དག་ལ་སྩོགས་པ་ལྷའི་བུ་ཟླ་བའི་རིས་སུ་གཏོགས་པ་དུ་མ་ཀུན་ཀྱང་། སེམས་ཅན་ཐམས་ཅད་ཀྱི་སེམས་རིན་པོ་ཆེ་སྣང་བར་བྱ་བ་ལ་བརྩོན་པ་ཤ་སྟག་དང་ཐབས་གཅིག་གོ །ཉི་མའི་རིས་སུ་གཏོགས་པའི་ལྷའི་བུ་མུ་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་བུ་ཉི་མ་དང་། ལྷའི་བུ་གཟི་བརྗིད་ཀྱི་འོད་ཟེར་འབར་བའི་མིག་དང་། རི་བོའི་རྒྱལ་མཚན་
གྱི་འོད་དང་། རིན་ཆེན་དྲི་མེད་རྨད་དུ་བྱུང་བ་དང་། ཕྱིར་མི་ལྡོག་པར་རབ་ཏུ་གནོན་པ་དང་། མེ་ཏོག་གི་ཕྲེང་བའི་འོད་ཀྱི་དཔལ་དང་། འོད་ཀྱི་དཔལ་སྣང་བའི་རྒྱལ་མཚན་དང་རིན་ཆེན་གཙུག་ཕུད་རྣམ་པར་སྣང་བ་དང་མིག་ཀུན་ཏུ་སྣང་བ་དང་། སའི་དཔལ་གྱི་བེའུ་འཛིན་པ་དང་། ལྷའི་བུ་སྒོ་ཐམས་ཅད་དུ་སྐྱོམ་པའི་དཔལ་གྱི་འོད་དང་། དེ་དག་ལ་སོགས་པ་ལྷའི་བུ་ཉི་མའི་རིས་སུ་གཏོགས་པ་མུ་མེད་པ་ཀུན་ཀྱང་དགེ་བའི་རྩ་བ་ཤིན་ཏུ་སྦྱངས་པ་འགྲོ་བ་ཐམས་ཅད་ལ་ཕན་པ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །སུམ་ཅུ་རྩ་གསུམ་གྱི་རིས་སུ་གཏོགས་པ་བརྒྱ་བྱིན་ལྷའི་དབང་པོ་ལ་སོགས་པ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་དབང་པོ་བརྒྱ་བྱིན་དང་། ལྷའི་བུ་སྒྲ་ཀུན་ཏུ་གྲགས་པའི་དབང་ཕྱུག་དཀྱིལ་འཁོར་དང་། བྱམས་པར་ལྟ་བའི་གཙུག་ཕུད་དང་། རིན་པོ་ཆེའི་འོད་ཀུན་ཏུ་གྲགས་པའི་རྒྱལ་མཚན་དང་། དགའ་བདེ་འབྱུང་བའི་གཙུག་ཕུད་དང་། དྲན་པ་ཡིད་དུ་འོང་བ་དང་། རི་བོའི་སྒྲའི་དཔལ་དང་། དྲན་པ་དང་ལྡན་པ་དང་། མེ་ཏོག་དྲི་མ་མེད་ཅིང་ཡིད་དུ་འོང་བའི་འོད་དང་། ཡེ་ཤེས་ཉི་མའི་མིག་དང་། ལྷའི་བུ་ཡང་དག་པར་བསྐུལ་བའི་འོད་ཀྱི་དབང་ཕྱུག་དང་། དེ་དག་ལ་སོགས་པ་སུམ་ཅུ་རྩ་གསུམ་གྱི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཆོས་རྒྱ་ཆེན་པོའི་རང་བཞིན་དང་། འགྲོ་བ་ཐམས་ཅད་དུ་སྐྱེས་ཤིང་ཡང་དག་པར་བསྐུལ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །རབ་མཚེ་མ་ལ་སོགས་པ་མཚེ་མའི་ལྷའི་རྒྱལ་པོ་གྲངས་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་རྒྱལ་པོ་རབ་མཚེ་མ་དང་། དགའ་བ་བདེ་བའི་འོད་དང་། བློ་གྲོས་མི་ཟད་པའི་ཡོན་ཏན་དཔལ་དང་། འབྱུང་བ་བཟང་ཞིང་དགེ་བ་དང་། ས་དང་རི་བོའི་འོད་དང་། བསམ་གྱིས་མི་ཁྱབ་པའི་བློ་གྲོས་དང་། འཁོར་ལོའི་གཙུག་དང་། གཟི་བརྗིད་འོད་འཕྲོ་བ་དང་། འོད་རྣམ་པར་སྣང་བ་དང་། ལྷའི་རྒྱལ་པོ་གྲགས་པའི་ཕྱོགས་སུ་རྣམ་པར་ལྟ་བ་དང་། དེ་དག་ལ་སོགས་པ་མཚེ་མའི་ལྷའི་རྒྱལ་པོ་གྲངས་མེད་པ་ཀུན་ཀྱང་དགའ་བ་དང་སྤྲོ་བ་རྒྱ་ཆེན་པོ་མངོན་པར་བསྒྲུབ་པ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ལྷའི་རྒྱལ་པོ་རབ་དགའ་ལྡན་ལ་སོགས་པ་བསམ་གྱིས་མི་ཁྱབ་པ་དག་དང་
ཡང་ཐབས་གཅིག་སྟེ། འདི་ལྟར་ལྷའི་རྒྱལ་པོ་རབ་དགའ་ལྡན་དང་། དགའ་བ་རྒྱ་མཚོའི་གཙུག་ཕུད་དང་། ཡོན་ཏན་མཆོག་གི་རྒྱལ་མཚན་དང་། འོད་ཟེར་ཞི་བའི་འོད་དང་། རབ་ཏུ་དགའ་བའི་མིག་དང་། རིན་ཆེན་འོད་ཟེར་ཟླ་བ་དང་། རྣམ་པར་གནོན་པས་རབ་ཏུ་བརྩོན་པ་དང་། རྡོ་རྗེའི་མདོག་གི་འོད་བཟང་པོ་དང་། སྐར་མས་རྒྱན་པའི་དཔལ་དང་། ལྷའི་བུ་དགའ་བ་བཟང་པོ་སྣ་ཚོགས་དང་། དེ་དག་ལ་སོགས་པ་དགའ་ལྡན་གྱི་ལྷའི་རྒྱལ་པོ་བསམ་གྱིས་མི་ཁྱབ་པ་ཀུན་ཀྱང་། སངས་རྒྱས་གཅིག་ནས་གཅིག་ཏུ་འབྱུང་བ་ཐམས་ཅད་རྗེས་སུ་དྲན་པར་ཡིད་ལ་བྱ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །འཕྲུལ་དགའི་ལྷའི་རྒྱལ་པོ་མུ་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་རྒྱལ་པོ་རབ་འཕྲུལ་དགའ་དང་། སྒྲས་ཞི་བའི་འོད་དང་། སྟོབས་ཀྱི་འཕྲུལ་པའི་སྒྲའི་འོད་དང་། དབང་ཆེན་སྣ་ཚོགས་དང་། སྤྲིན་སྒྲ་ཤིན་ཏུ་འཕགས་པ་དང་། སྣང་བའི་སྤྱོད་པའི་དཔལ་དང་། གཙུག་ཕུད་ཡིད་དུ་འོང་བའི་འོད་དང་། དགའ་བའི་བློ་གྲོས་དང་། མེ་ཏོག་འོད་ཀྱི་གཙུག་ཕུད་དང་། ལྷའི་རྒྱལ་པོ་ཕྱོགས་ཤིན་ཏུ་སྣང་བ་དང་། དེ་དག་ལ་སོགས་པ་འཕྲུལ་དགའི་ལྷའི་རྒྱལ་པོ་མུ་མེད་པ་ཀུན་ཀྱང་རྣམ་པར་ཐར་པ་རབ་ཏུ་ཞི་བས་སེམས་ཅན་ཐམས་ཅད་གདུལ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །ལྷའི་རྒྱལ་པོ་དབང་སྒྱུར་ལ་སོགས་པ་བགྲང་དུ་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་རྒྱལ་པོ་དབང་སྒྱུར་དང་། ལྷའི་རྒྱལ་པོ་མིག་བཟང་པོའི་བློ་གྲོས་དང་། ཅོད་པན་སྣ་ཚོགས་ཀྱི་རྒྱལ་མཚན་དང་། བརྩོན་པའི་བློ་གྲོས་དང་། གོ་འཕང་རྣམ་པར་གནོན་པའི་སྒྲ་དབྱངས་སྣ་ཚོགས་དང་། འོད་ཡིད་དུ་འོང་བའི་རྒྱལ་མཚན་དང་། སྤྱོད་ཡུལ་ཞི་བའི་སྒོ་དང་། འཁོར་ལོའི་རི་མོ་བཟང་པོའི་རྒྱལ་མཚན་དང་། མེ་ཏོག་བློ་གྲོས་སེང་གེའི་དབང་ཕྱུག་དང་། ལྷའི་རྒྱལ་པོ་དབང་པོའི་སྟོབས་རི་མོ་བཟང་པོའི་འོད་དང་། དེ་དག་ལ་སོགས་པ་དབང་སྒྱུར་གྱི་ལྷའི་རྒྱལ་པོ་བགྲང་དུ་མེད་པ་ཀུན་ཀྱང་། ཆོས་ཀྱི་དབང་རྒྱ་ཆེན་པོ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ །བསམ་གྱིས་མི་ཁྱབ་པའི་ཚངས་པ་ཆེན་པོ་དག་དང་ཡང་ཐབས་གཅིག་སྟེ།
འདི་ལྟར་ཚངས་པ་ཆེན་པོ་རབ་ཏུ་སྣང་བ་དང་། བློ་གྲོས་ཀྱི་འོད་དང་། བློ་གྲོས་བཟང་པོའི་སེམས་སྣང་བ་དང་། ཀུན་ཏུ་དབྱངས་ཀྱི་སྤྲིན་དང་། འཇིག་རྟེན་དབང་པོའི་སྒྲ་དང་། མིག་རབ་ཏུ་ཞི་ཞིང་འོད་ཤིན་ཏུ་ཟབ་པ་དང་། ཕྱོགས་སུ་སྣང་བ་འགྱེད་པ་དང་། སྤྲུལ་པའི་སྒྲ་དབྱངས་དང་། མིག་གི་འོད་ཟེར་མངོན་པར་སྣང་བ་དང་། ཚངས་པ་ཆེན་པོ་དབྱངས་རྒྱ་མཚོ་ཡིད་དུ་འོང་བ་དང་། དེ་དག་ལ་སོགས་པ་ཚངས་པ་ཆེན་པོ་བསམ་གྱིས་མི་ཁྱབ་པ་ཀུན་ཀྱང་། སེམས་ཅན་ཐམས་ཅད་ཀྱི་སེམས་སྣང་བར་བྱ་བ་དང་། སིམ་པར་བྱ་བ་ལ་བྱམས་པ་ཆེན་པོ་ལ་གནས་པ་ཤ་སྟག་དང་ཐབས་གཅིག་གོ །ལྷའི་བུ་གྱ་ནོམ་སྣང་བའི་རིས་སུ་གཏོགས་པ་ཚད་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་བུ་སྣང་བས་དགའ་བ་དང་། དགེ་བ་སྣ་ཚོགས་ཀྱི་འོད་དང་། དབང་པོའི་དབྱངས་དང་། དྲན་པའི་བློ་དམ་པ་དང་། དགའ་བ་སྣ་ཚོགས་རྣམ་པར་དག་པའི་དབྱངས་དང་། ལེགས་པར་བསམ་པའི་དབྱངས་དང་། འོད་འགྱེད་པའི་དབྱངས་རྣམ་པར་སྣང་བ་དང་། དབྱངས་ཟབ་མོའི་འོད་དང་། གྲགས་པ་དྲི་མ་མེད་པའི་འོད་དང་། ལྷའི་བུ་འོད་དྲི་མ་མེད་པས་ཤིན་ཏུ་འཕགས་པ་དང་། དེ་དག་ལ་སོགས་པ་གྱ་ནོམ་སྣང་བའི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཞི་བ་དང་དགའ་བ་རྒྱ་ཆེན་པོའི་རྣམ་པར་ཐར་པ་ལ་གནས་པ་ཤ་སྟག་དང་ཐབས་གཅིག་གོ །དགེ་རྒྱས་ཀྱི་ལྷའི་བུ་གྲངས་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་བུ་དགེ་བར་གྲགས་པའི་བློ་གྲོས་དང་མཆོག་ཏུ་སྣང་བ་དང་། རབ་ཏུ་ཞི་བའི་དཔལ་དང་། དབྱངས་ཀྱི་རི་བོ་དང་། དྲན་པ་དགེ་བའི་མིག་དང་། དགའ་བ་དམ་པ་རྣམ་པར་སྣང་བ་དང་། འཇིག་རྟེན་དབྱངས་ཀྱི་བློ་གྲོས་དང་། གཟི་བརྗིད་འབར་བའི་བདག་པོ་དང་། ཆོས་ཀྱི་དགའ་བས་འཕྲུལ་པའི་སེམས་དང་། འཕྲུལ་པས་ཤིན་ཏུ་འཕགས་པ་དང་། དེ་དག་ལ་སོགས་པ་དགེ་རྒྱས་ཀྱི་རིས་སུ་གཏོགས་པའི་ལྷའི་བུ་གྲངས་མེད་པ་ཀུན་ཀྱང་སྒོ་ཡངས་པ་ལ་གནས་པས་འགྲོ་བར་འབྱུང་ཞིང་རྣམ་པར་འདུལ་བ་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་གོ། །ལྷའི་བུ་འབྲས་བུ་ཆེན་པོའི་རིས་སུ་གཏོགས་པ་ཚད་མྱེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་
བུ་ཆོས་ཀྱི་དཔལ་གཟི་བརྗིད་དགའ་བ་དང་། དྲི་མེད་སྣ་ཚོགས་རྒྱ་མཚོ་དང་། ཤེས་རབ་མཆོག་གི་འོད་དང་། ཡེ་ཤེས་དབང་པོའི་དཔལ་དང་། དགའ་བ་ཞི་བ་དང་། སྒོ་ཀུན་ནས་ཤེས་པའི་མྱིག་དང་། དགའ་བའི་གཙུག་གི་བློ་གྲོས་དང་། ཡོན་ཏན་བློ་གྲོས་བཟང་པོའི་འོད་དང་། འོད་ཞི་ཞིང་དྲི་མ་མེད་པ་དང་། ལྷའི་བུ་སྣང་བ་ཆེན་པོ་དྲི་མ་མེད་པ་དང་། དེ་དག་ལ་སོགས་པ་འབྲས་བུ་ཆེན་པོའི་རིས་སུ་གཏོགས་པའི་ལྷའི་བུ་ཚད་མེད་པ་ཀུན་ཀྱང་ཞི་བའི་ཆོས་ཀྱི་གཞལ་མེད་ཁང་ལ་ཀུན་ནས་རབ་ཏུ་གནས་པ་ཤ་སྟག་དང་ཐབས་གཅིག་གོ །ལྷའི་བུ་དབང་ཕྱུག་ཆེན་པོའི་རིས་སུ་གཏོགས་པ་གྲངས་མེད་པ་དག་དང་ཡང་ཐབས་གཅིག་སྟེ། འདི་ལྟར་ལྷའི་བུ་ཤིན་ཏུ་འོད་འཕྲོ་རྒྱ་མཚོ་དང་། ལྷའི་བུ་དབང་ཕྱུག་གྲགས་པ་རབ་ཏུ་སྣང་བ་དང་། ལྷའི་བུ་དགེ་བའི་མིག་དྲི་མ་མེད་པ་དང་། ལྷའི་བུ་ཤེས་རབ་ཆེན་པོས་དགའ་ཞིང་སྤྲོ་བ་དང་། ལྷའི་བུ་འོད་མི་སྒུལ་བའི་དབང་ཕྱུག་དང་། ལྷའི་བུ་མིག་ཤིན་ཏུ་མཉམ་པར་གཞག་པ་དང་། ལྷའི་བུ་སྣང་བ་ཤིན་ཏུ་སེམས་པ་དང་། ལྷའི་བུ་ཡེ་ཤེས་ཆེན་པོས་དགའ་བ་དང་། ལྷའི་བུ་སྣ་ཚོགས་ཀུན་ཏུ་དབྱངས་ཀྱི་རྒྱལ་མཚན་དང་། ལྷའི་བུ་གྲགས་པ་རྣམ་པར་སྣང་བའི་བརྟུལ་ཞུགས་བཟང་པོ་དང་། དེ་དག་ལ་སོགས་པ་དབང་ཕྱུག་ཆེན་པོའི་རིས་སུ་གཏོགས་པའི་ལྷའི་བུ་གྲངས་མེད་པ་ཀུན་ཀྱང་སྤྱོད་ཡུལ་མཚན་མ་མེད་པའི་མཉམ་པ་ཉིད་ལ་རབ་ཏུ་བརྩོན་པ་ཤ་སྟག་དང་ཐབས་གཅིག་སྟེ། དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་དེ་ནི་སེམས་ཅན་གྱི་རིས་ཐམས་ཅད་ཡང་དག་པར་གཞོལ་བའོ། །སེམས་ཅན་ཡོན་ཏན་མཐའ་ཡས་པ་འདུས་པ་ལས་ཡོངས་སུ་བྱུང་བའོ། །ཕྱོགས་ཀྱི་དབྱིངས་ཀུན་ན་ཤིན་ཏུ་གནས་པའོ། །འཁོར་གྱི་དཀྱིལ་འཁོར་སྣ་ཚོགས་ཀྱི་དབྱིངས་སུ་རྣམ་པར་གནས་པའོ། །ཕན་ཚུན་འདྲེས་པ་མེད་ཅིང་ཇི་ལྟར་འོངས་པའི་ཕྱོགས་ཀྱི་དབྱིངས་ལ་རབ་ཏུ་གནས་པའོ། །དེ་བཞིན་གཤེགས་པ་བལྟ་བ་ལ་མངོན་པར་ཕྱོགས་པའོ། །ཉོན་མོངས་པའི་བག་ཆགས་དང་། སེམས་ཀྱི་དྲི་མ་ཐམས་ཅད་དང་བྲལ་བའོ། །བསྒྲིབས་པ་ཐམས་ཅད་ཀྱི་རི་རྣམ་པར་འཐོར་བའོ། །སངས་རྒྱས་བལྟ་
བ་ལ་སྒྲིབ་པ་མྱེད་པས་སྣང་བར་གྱུར་པ་སྟེ། དེ་ནི་འདི་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྔོན་བསྐལ་པ་རྒྱ་མཚོ་ནས། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། བསྡུ་བའི་དངོས་པོ་བཞིས་ཡོངས་སུ་བསྡུས་ཏེ། དེ་བཞིན་གཤེགས་པ་དེ་དང་དེ་དག་གི་དྲུང་དུ་བཞུད་པའི་ཚེ། དགེ་བའི་རྩ་བ་ཡོངས་སུ་བཟུང་ཞིང་ཐབས་ཀྱི་སྒོ་དེ་དག་གིས་ཡོངས་སུ་སྨིན་པར་བྱས་ཏེ་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་ལ་བཀོད་ཅིང་། དགེ་བའི་རྩ་བ་ཚད་མེད་པ་རབ་ཏུ་བསྐྱེད་པས་བསོད་ནམས་ཆེན་པོའི་སྟོབས་དང་ཤུགས་རབ་ཏུ་ཐོབ་པ་དག་གོ །སྨོན་ལམ་གྱི་ཚུལ་རྒྱ་མཚོ་གཞན་དང་གཞན་ལ་རབ་ཏུ་ཞུགས་ཤིང་སྤྱོད་པའི་དཀྱིལ་འཁོར་གཞན་དང་གཞན་ཡོངས་སུ་དག་པས། ཡང་དག་པར་བྱུང་བ་འབྱུང་བའི་ལམ་གཞན་དང་གཞན་གྱིས་ཤིན་ཏུ་འབྱུང་བའི་དེ་བཞིན་གཤེགས་པ་གཞན་དང་གཞན་མཐོང་བས་སྣང་བར་གྱུར་པ་དག་སྟེ། དེ་དག་ནི་མོས་པའི་སྟོབས་གཞན་དང་གཞན་གྱིས་དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་གོ །སངས་རྒྱས་བལྟ་བའི་རྣམ་པར་ཐར་པའི་སྒོ་གཞན་དང་གཞན་གྱིས་རྣམ་པར་འཕྲུལ་ལོ། །དེ་ནི་འདི་ལྟ་སྟེ་ལྷའི་བུ་དབང་ཕྱུག་ཆེན་པོའི་རིས་སུ་གཏོགས་པ་ཤིན་ཏུ་འོད་འཕྲོ་རྒྱ་མཚོའི་རྣམ་པར་ཐར་པ་ནི་ཆོས་ཀྱི་དབྱིངས་དང་། ནམ་མཁའ་ལྟར་ཞི་བའི་ཚུལ་གྱི་མཐུ་ཞེས་བྱའོ། །ལྷའི་བུ་དབང་ཕྱུག་གྲགས་པ་རབ་ཏུ་སྣང་བའི་རྣམ་པར་ཐར་པ་ནི་ཆོས་ཐམས་ཅད་ལ་དབང་བའི་སྟོབས་ལ་ཡང་དག་པར་གཞོལ་ཞིང་ཀུན་ནས་རྗེས་སུ་འགྲོ་བས་རྣམ་པར་སྤྱོད་པ་ཞེས་བྱའོ། །ལྷའི་བུ་དགེ་བའི་མིག་དྲི་མ་མེད་པའི་རྣམ་པར་ཐར་པ་ནི། ཆོས་ཐམས་ཅད་འབྱུང་བ་མེད་པ་དང་། འགྲོ་བ་མེད་པ་དང་། བརྗོད་དུ་མེད་ཅིང་སྦྱར་བ་མེད་པ་ཞེས་བྱའོ། །ལྷའི་བུ་ཤེས་རབ་ཆེན་པོས་དགའ་ཞིང་སྤྲོ་བའི་རྣམ་པར་ཐར་པ་ནི། ཆོས་ཀྱི་ཚུལ་ཐམས་ཅད་ལ་མངོན་སུམ་དུ་གྱུར་པའི་ཤེས་རབ་རྒྱ་མཚོས་རྣམ་པར་དཔྱོད་པ་ལ་རབ་ཏུ་སྣང་བ་ཞེས་བྱའོ། །ལྷའི་བུ་འོད་མི་སྒུལ་བའི་དབང་ཕྱུག་གི་རྣམ་པར་ཐར་པ་ནི་སེམས་ཅན་ལ་བསམ་གཏན་གྱི་དགའ་བ་དང་བདེ་བ་མཐའ་ཡས་པ་ལ་མོས་པ་བསྟན་པ་རྒྱ་ཆེན་པོའི་ཚུལ་ཡང་དག་པར་འབྱུང་བ་ཞེས་བྱའོ། །ལྷའི་བུ་མིག་ཤིན་ཏུ་མཉམ་
པར་གཞག་པའི་རྣམ་པར་ཐར་པ་ནི། མི་ཤེས་པའི་མུན་ནག་དང་། འཇིགས་པ་རྣམ་པར་ཟློག་པའི་སྤྱོད་པ་རབ་ཏུ་ཞི་བ་ཞེས་བྱའོ། །ལྷའི་བུ་སྣང་བ་ཤིན་ཏུ་སེམས་དཔའི་རྣམ་པར་ཐར་པ་ནི། བསམ་པའི་ཡུལ་མཐའ་ཡས་པའི་ལས་སྲིད་པ་ཐམས་ཅད་དུ་མི་འབྱུང་བ་ལ་འཇུག་པ་ཞེས་བྱའོ། །ལྷའི་བུ་ཡེ་ཤེས་ཆེན་པོས་དགའ་བའི་རྣམ་པར་ཐར་པ་ནི། ཆོས་ཐམས་ཅད་ཀྱི་ཕྱོགས་སུ་འགྲོ་ཞིང་ཡོངས་སུ་གནོན་པ་དང་། བརྟེན་པའི་ཕྱོགས་ཀྱི་མཐུ་ཞེས་བྱའོ། །ལྷའི་བུ་སྣ་ཚོགས་ཀུན་ཏུ་དབྱངས་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་རབ་ཏུ་ཞི་བ་ལ་འཇུག་པ། ཀུན་ནས་ཁོང་དུ་ཆུད་པའི་གཙུག་རབ་ཏུ་སྣང་བ་ཞེས་བྱའོ། །ལྷའི་བུ་གྲགས་པ་རྣམ་པར་སྣང་བའི་བརྟུལ་ཞུགས་བཟང་པོའི་རྣམ་པར་ཐར་པ་ནི། རང་གི་གཞལ་མེད་ཁང་དང་། བློའི་ཡུལ་ནས་དམིགས་པ་ཚད་མེད་པའི་སངས་རྒྱས་ཀྱི་ཡུལ་རྒྱ་ཆེན་པོ་འབྱུང་བ་ཞེས་བྱའོ། །དེ་ནས་དབང་ཕྱུག་ཆེན་པོའི་རིས་སུ་གཏོགས་པའི་ལྷ་ཤིན་ཏུ་འོད་འཕྲོ་རྒྱ་མཚོས་སངས་རྒྱས་ཀྱི་མཐུས་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་ཟད་ཆོས་ཀྱི་དབྱིངས་ནི་མཐའ་ཡས་ཏེ། །ཀུན་ཀྱང་སངས་རྒྱས་སྐུ་ལ་རབ་ཏུ་གསལ། །དེ་ནི་གཟུགས་མེད་དངོས་མེད་རབ་ཏུ་ཞི། །འགྲོ་བའི་སྐྱབས་སུ་འབྱུང་བ་སྐྱེས་ཤིང་བྱུང་། །ཆོས་ཀྱི་སྒྲོན་མ་སངས་རྒྱས་ཤིན་ཏུ་སྟོན། །ཆོས་ལ་མངའ་རབ་མཛད་པ་འཇིག་རྟེན་བྱུང་། །དེ་ཡི་སྤྱོད་ཡུལ་མཐའ་ཡས་མི་ཟད་དེ། །དབང་ཕྱུག་གྲགས་པ་འདི་འདྲའི་ཆོས་ལ་འཇུག །བསམ་གྱིས་མི་ཁྱབ་སངས་རྒྱས་སྣང་བ་བྱེད། །དེ་ཡི་མཚན་ཉིད་ཕྱོགས་ན་མྱེད་པ་སྟེ། །རྣམ་དག་ལམ་ནི་སྐྱེ་བོ་དག་ལ་སྟོན། །ཤིན་ཏུ་དྲི་མེད་མིག་གིས་འདི་འདྲ་མཐོང་། །འགྲོ་བ་ཀུན་གྱིས་བསམ་དུ་མི་ནུས་ཏེ། །རྒྱལ་བའི་ཤེས་རབ་མཐའ་ཡས་གང་མངའ་བ། །གཏི་མུག་བསྒྲིབས་པའི་སེམས་ཅན་རྣམ་པར་སྦྱོང་། །དེ་ལ་ཤེས་རབ་ཆེན་པོ་རྣམ་པར་གནས། །སྐྱེ་དགུ་ཀུན་གྱིས་སངས་རྒྱས་བསམ་མི་ཁྱབ། །མཐོང་བ་ཙམ་གྱིས་ཉོན་མོངས་ཞི་བར་འགྱུར། །
འགྲོ་བའི་དགའ་བ་རྒྱ་ཆེན་རབ་ཏུ་སྐྱེད། །མི་སྒུལ་དབང་ཕྱུག་ལྷ་ཡིས་དེ་མཐོང་ངོ་། །སེམས་ཅན་རྒྱ་མཚོ་གཏི་མུག་མུན་བསྒྲིབས་ལ། །སངས་རྒྱས་ཆོས་ཉིད་རབ་ཏུ་ཞི་བ་སྟོན། །ཤེས་རབ་སྒྲོན་མ་འགྲོ་བ་འདི་བརྗོད་དེ། །དགེ་བའི་མྱིག་ནི་འདི་ཡི་ཚུལ་ལ་འཇུག །སངས་རྒྱས་ཀུན་ཀྱང་རྣམ་དག་སྐུ་སྟོན་ཅིང་། །ཐམས་ཅད་ཕྱོགས་སུ་ཤིན་ཏུ་འཕགས་པའི་སྐུ། །དེ་ཡང་དངོས་མེད་འཇིག་རྟེན་མི་གནས་ཏེ། །ཀུན་སྣང་སེམས་དཔའ་འདི་ནི་དེ་ལྟར་བལྟ། །མཐའ་ཡས་ཆགས་མེད་རྒྱལ་བ་རྣམས་ཀྱི་གསུང་། །སྣོད་དུ་གྱུར་པའི་སེམས་ཅན་དེ་དག་ཉན། །སངས་རྒྱས་རྣམས་ལས་འཕོ་བར་མི་སྣང་སྟེ། །འདི་ནི་ཤེས་པས་དགའ་བའི་རྣམ་ཐར་ཏོ། །ཐམས་ཅད་ཕྱོགས་སྒོ་ཀུན་ནས་སངས་རྒྱས་ཏེ། །མི་ཡི་དབང་པོ་རྣམ་ཐར་ཞི་ལ་བཞུགས། །སངས་རྒྱས་འཇིག་རྟེན་སྣང་ཞིང་རྣམ་པར་མཛེས། །འདི་ནི་སྣ་ཚོགས་རྒྱལ་མཚན་རྣམ་ཐར་ཏོ། །རྒྱལ་བ་བསྐལ་པ་རྒྱ་མཚོ་མཐའ་ཡས་སུ། །འགྲོ་བ་ཀུན་དོན་རྣམ་པར་བྱང་ཆུབ་ཅིང་། །སྣ་ཚོགས་རྣམ་པར་འཕྲུལ་པས་སེམས་ཅན་འདུལ། །རྣམ་པར་སྣང་བས་རྣམ་ཐར་འདི་མཐོང་ངོ་། །དེ་ལ་ལྷའི་རྒྱལ་པོ་ཆོས་ཀྱི་དཔལ་གཟི་བརྗིད་དགའ་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དབང་པོ་དང་ཐེ་ཙོམ་རྣམ་པར་བལྟ་བའི་ཆོས་ཀྱི་སྤྲིན་ལ་རབ་ཏུ་གཞོལ་བ་ཞེས་བྱའོ། །ལྷའི་རྒྱལ་པོ་དྲི་མེད་སྣ་ཚོགས་རྒྱ་མཚོའི་རྣམ་པར་ཐར་པ་ནི། སངས་རྒྱས་རྗེས་སུ་དྲན་པའི་རྣམ་པ་ཐམས་ཅད་ཡིད་ལ་བྱེད་པ་སྟོན་པ་སྦྱོར་བ་ཞེས་བྱའོ། །ལྷའི་རྒྱལ་པོ་ཤེས་རབ་མཆོག་གི་འོད་ཀྱི་རྣམ་པར་ཐར་པ་ནི། ཆོས་ཀྱི་རང་བཞིན་མཉམ་པ་ཉིད་ལ་གནས་པ་ལུས་ཀྱི་རྒྱན་ཅེས་བྱའོ། །ལྷའི་རྒྱལ་པོ་ཡེ་ཤེས་དབང་པོའི་དཔལ་གྱི་རྣམ་པར་ཐར་པ་ནི། འཇིག་རྟེན་གྱི་ཆོས་ཐམས་ཅད་རྣམ་པར་སྒོམ་པའི་སེམས་སྐད་ཅིག་ཏུ་བསམ་གྱིས་མི་ཁྱབ་རྒྱན་རྒྱ་མཚོ་ལ་རབ་ཏུ་གནས་པ་ཞེས་བྱའོ། །ལྷའི་དབང་པོ་དགའ་བ་ཞི་བའི་རྣམ་པར་ཐར་པ་ནི། སྐྲའི་སྦུབས་གཅིག་ཏུ་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ཡོད་དགུ་འཛུད་པ་ཞེས་བྱའོ། །ལྷའི་རྒྱལ་པོ་སྒོ་ཀུན་ནས་ཤེས་པའི་མིག་གི་རྣམ་
པར་ཐར་པ་ནི། ཆོས་ཀྱི་དབྱིངས་ལ་སྒོ་ཀུན་ནས་རྣམ་པར་བལྟ་བས་འཇུག་པ་ཞེས་བྱའོ། །ལྷའི་རྒྱལ་པོ་དགའ་བའི་གཙུག་གི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྐྱེ་བ་དང་བྱེད་པ་བསྐལ་པ་མཐའ་ཡས་པ་མངོན་པར་འབྱིན་པ་ཞེས་བྱའོ། །ལྷའི་རྒྱལ་པོ་ཡོན་ཏན་བློ་གྲོས་བཟང་པོའི་འོད་ཀྱི་རྣམ་པར་ཐར་པ་ནི། དམིགས་པ་ཐམས་ཅད་འཇིག་རྟེན་གྱི་དགོས་པ་ཐམས་ཅད་ཆོས་གཞལ་དུ་མེད་ཅིང་བསམ་གྱིས་མི་ཁྱབ་པས་རྣམ་པར་དཔྱོད་པ་ཞེས་བྱའོ། །ལྷའི་བུ་འོད་ཞི་ཞིང་དྲི་མ་མེད་པའི་རྣམ་པར་ཐར་པ་ནི། སེམས་ཅན་དང་ཆོས་དང་འབྱུང་བ་ཐམས་ཅད་ཀྱི་སྒོ་ལ་མངོན་སུམ་དུ་ཡང་དག་པར་སྤྱོད་པ་འབྱུང་བ་ཞེས་བྱའོ། །ལྷའི་རྒྱལ་པོ་སྣང་བ་ཆེན་པོ་དྲི་མ་མེད་པའི་རྣམ་པར་ཐར་པ་ནི། སེམས་ཅན་སྣོད་དུ་གྱུར་པ་ཐམས་ཅད་ལ་རྣམ་པར་བལྟ་ཞིང་སངས་རྒྱས་བསྐྱེད་པའི་ཆོས་ཉིད་ལ་འཇུག་པ་ཞེས་བྱའོ། །དེ་ནས་ལྷའི་རྒྱལ་པོ་ཆོས་དཔལ་རབ་ཏུ་སྣང་བ་ལ་མོས་པས། སངས་རྒྱས་ཀྱི་མཐུས་ཆེ་བ་དང་། ཆུང་ཟད་ཆེ་བ་དང་། ཚད་མེད་ཆེ་བ་དང་། འབྲས་བུ་ཆེ་བའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡུལ་རྣམས་ཀུན་ཀྱང་བསམ་མི་ཁྱབ། །སེམས་ཅན་ཀུན་ཀྱང་རྟོག་པར་ནུས་པ་མིན། །སེམས་ཅན་མོས་དང་བསམ་པ་ཡངས་པ་ནི། །མི་ཟད་པ་དག་སངས་རྒྱས་སྐྱེད་པ་མཛད། །སངས་རྒྱས་ལྟ་བར་སེམས་ཅན་སྣོད་གྱུར་ལ། །རྒྱལ་བ་རྣམས་ནི་བྱིན་གྱི་བརླབས་མཛད་དེ། །དེ་དག་རྟག་ཏུ་སངས་རྒྱས་མངོན་སུམ་མཐོང་། །འདི་ལྟར་སྣ་ཚོགས་རྒྱ་མཚོ་མཐོང་བ་ཡིན། །སངས་རྒྱས་ཆོས་ཉིད་གནས་པ་མེད་པ་དག །འགྲོ་བ་བཀང་ཞིང་སངས་རྒྱས་སྟོན་པ་མཛད། །རྒྱལ་བ་འབྱུང་མེད་གནས་པ་ཡོད་པ་མིན། །ཤེས་རབ་མཆོག་གི་འོད་ནི་འདི་སྒོམ་མོ། །སེམས་ཅན་སྙེད་ཀྱི་ཚུལ་དང་བསམ་པ་ཡང་། །བསམ་གྱིས་མི་ཁྱབ་གཞན་དང་གཞན་གྱི་
སྒོར། །སངས་རྒྱས་རྣམ་པར་འཕྲུལ་བས་ཚུལ་སྟོན་ཏེ། །དབང་པོ་དཔལ་གྱི་རྣམ་ཐར་རྒྱ་མཚོ་འོ། །དེ་བཞིན་གཤེགས་པའི་རྫུ་འཕྲུལ་རྣམས་དང་ནི། །མྱི་ཟད་འདས་པའི་ཞིང་རྣམས་ཐམས་ཅད་ཀྱང་། །དེ་དག་སྤྲུལ་པའི་དཀྱིལ་འཁོར་གཅིག་ཏུ་སྟོན། །ཆོས་ཀྱི་དཀྱིལ་འཁོར་སྒོ་མོ་གཅིག་ལ་ཡང་། །ཆོས་ཀྱི་སྒོ་མོ་མི་ཟད་རྒྱ་མཚོ་དག །སངས་རྒྱས་ཆོས་ཉིད་རབ་ཏུ་ངེས་སྒྲོགས་ཏེ། །ཤེས་པའི་མིག་ནི་འདི་ཡི་ཚུལ་ལ་འཇུག །ཕྱོགས་བཅུ་དག་ན་ཞིང་དབྱིངས་ཇི་སྙེད་པ། །དེ་དག་ཀུན་ཏུ་སངས་རྒྱས་ཆོས་སྟོན་ཀྱང་། །རྒྱལ་བ་དེ་ནི་གར་ཡང་འཕོ་མི་མཛད། །དགའ་བའི་གཙུག་གི་བློ་གྲོས་སྤྱོད་ཡུལ་ལོ། །དེ་བཞིན་གཤེགས་པའི་གཟུགས་བརྙན་འདྲ་བ་སྟེ། །མགོན་པོ་ཆོས་ཀྱི་གཞལ་མེད་ཁང་སྣང་བ། །ཆོས་ཉིད་རབ་ཏུ་ཞི་བ་ཡང་དག་སྟོན། །ཡོན་ཏན་བློ་གྲོས་བཟང་པོས་འདི་མཐོང་ངོ་། །རང་བྱུང་རྣམས་ཀྱི་སྤྱོད་ཡུལ་རྣམས་ལ་ལྟོས། །སེམས་ཅན་ཀུན་གྱི་དབང་པོའི་ཚུལ་བཞིན་དུ། །བསམ་ཡས་འབྱུང་བའི་སྒོ་མོས་ཆོས་ཆར་འབེབས། །འདི་ནི་ཞི་བའི་འོད་ཀྱི་ལྷ་སྟོན་ཏོ། །ཐུགས་རྗེ་རྒྱ་ཆེན་རབ་ཏུ་བསྐྱེད་བྱས་ཤིང་། །སེམས་ཅན་ཕན་ཕྱིར་མགོན་པོ་རྣམས་འབྱུང་སྟེ། །སྣོད་ཀྱི་ཚུལ་བཞིན་ཆོས་ཀྱི་ཆར་ཡང་འབེབས། །སྣང་བ་ཆེན་པོའི་བློ་གྲོས་འདི་སྟོན་ཏོ། །དེ་ལ་ལྷའི་རྒྱལ་པོ་དགེ་བར་གྲགས་པའི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་རྣམ་པར་ཐར་པའི་ཚོགས་ཀྱི་ཚུལ་ལ་རྣམ་པར་ལྟར་འཛུད་པ་ཞེས་བྱའོ། །ལྷའི་རྒྱལ་པོ་མཆོག་ཏུ་སྣང་བའི་རྣམ་པར་ཐར་པ་ནི། ལྷའི་བུ་རང་བཞིན་རྣམ་པར་རིག་པའི་འོད་ཅེས་བྱའོ། །ལྷའི་བུ་རབ་ཏུ་ཞི་བའི་དཔལ་གྱི་རྣམ་པར་ཐར་པ་ནི། ཐབས་ཀྱི་ཚུལ་དང་སྒོ་ཐམས་ཅད་ཀྱི་སངས་རྒྱས་ཀྱི་ཡུལ་ཡོངས་སུ་སྦྱོང་བ་ཞེས་བྱའོ། །ལྷའི་བུ་དབྱངས་ཀྱི་རི་བོའི་རྣམ་པར་ཐར་པ་ནི། འཁོར་བའི་རྒྱ་མཚོའི་ཕྱི་མའི་མཐའ་ཐམས་ཅད་དུ་འགྲོ་བ་ཡོངས་སུ་སྒྱུར་བ་ཞེས་བྱའོ། །ལྷའི་བུ་དྲན་པ་དགེ་བའི་མིག་གི་རྣམ་པར་ཐར་པ་ནི། དེ་བཞིན་གཤེགས་པའི་ཚུལ་རྗེས་སུ་དྲན་ཞིང་སེམས་ཅན་འདུལ་བའི་བྱིན་གྱི་རླབས་ཤེས་བྱའོ། །
ལྷའི་བུ་དགའ་བ་དམ་པས་རྣམ་པར་སྣང་བའི་རྣམ་པར་ཐར་པ་ནི། གཟུངས་རྒྱ་མཚོ་ལ་སྒོ་ཀུན་ནས་རབ་ཏུ་བརྟེན་པ་རྒྱ་མཚོའི་རྗེས་སུ་འགྲོ་བ་ཞེས་བྱའོ། །ལྷའི་བུ་འཇིག་རྟེན་དབྱངས་ཀྱི་བློ་གྲོས་ཀྱི་རྣམ་པར་ཐར་པ་ནི། སངས་རྒྱས་སྐྱེ་བ་ཤིན་ཏུ་དཀོན་པའི་བསམ་པ་བསྐྱེད་པས་མོས་པ་སྦྱོར་བའི་སྙིང་པོ་ཞེས་བྱའོ། །ལྷའི་བུ་གཟི་བརྗིད་འབར་བའི་བདག་པོའི་རྣམ་པར་ཐར་པ་ནི། སེམས་ཅན་ཐམས་ཅད་ལ་ཆོས་ཀྱི་ཤུགས་ཀྱིས་དགའ་བ་བསྐྱེད་ཅིང་སྒྲོལ་བ་ཞེས་བྱའོ། །ལྷའི་བུ་ཆོས་ཀྱི་དགའ་བས་འཕྲུལ་པའི་སེམས་ཀྱི་རྣམ་པར་ཐར་པ་ནི། བྱང་ཆུབ་སེམས་དཔའི་འདུལ་བ་མཐའ་ཡས་པ་ཐམས་ཅད་ནམ་མཁའ་ལྟར་ཟད་མི་ཤེས་པའི་སྒོ་རབ་ཏུ་འཇུག་པ་ཞེས་བྱའོ། །ལྷའི་བུ་འཕྲུལ་པས་ཤིན་ཏུ་འཕགས་པའི་རྣམ་པར་ཐར་པ་ནི། སེམས་ཅན་གྱི་ཉོན་མོངས་པ་མཐའ་ཡས་པའི་སྙིང་རྗེ་དང་། ཡེ་ཤེས་ཀྱིས་རྒྱས་པར་འགེངས་པ་ཞེས་བྱའོ། །དེ་ནས་ལྷའི་རྒྱལ་པོ་དགེ་བར་གྲགས་པའི་བློ་གྲོས་ཀྱིས་སངས་རྒྱས་ཀྱི་མཐུས། དགེ་ཆུང་དང་། ཚད་མེད་དགེ་བ་དང་། དགེ་རྒྱས་ཀྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆགས་མེད་སྤྱོད་པའི་ཆོས་ཉིད་འདི་ལ་ལྟོས། །མི་ཟད་ཕྱོགས་རྣམས་རབ་ཏུ་རྒྱས་བཀང་སྟེ། །བསམ་གྱིས་མི་ཁྱབ་སངས་རྒྱས་ཡུལ་ཡང་སྟོན། །རྣམ་ཐར་ཚུལ་གྱིས་རྒྱ་མཚོ་ཟད་མི་ཤེས། །བདེ་གཤེགས་འཇིག་རྟེན་ཀུན་ལ་མྱི་གནས་ཏེ། །ཆོས་དབྱིངས་དམ་པ་ཀུན་ནས་འབྱུང་བ་མེད། །མིག་ཡོར་སྤྱོད་ཡུལ་ཞིང་རྣམས་ཐམས་ཅད་དེ། །ཚུལ་འདི་མཆོག་ཏུ་སྣང་བའི་ལྷ་ཡི་འོ། །བསྐལ་པ་རྒྱ་མཚོར་ཐབས་ལ་གནས་པས་ན། །སངས་རྒྱས་འཇིག་རྟེན་ཀུན་ནས་རྣམ་པར་མཛེས། །ཆོས་དབྱིངས་དེ་བཞིན་ཉིད་ལ་རབ་ཏུ་གནས། །དེ་ལ་རབ་ཞི་དཔལ་གྱི་ལྷ་འཇུག་གོ །སེམས་ཅན་གཏི་མུག་རབ་རིབ་སྒྲིབས་པས་བསྒྲིབས། །འཁོར་བའི་སྤྱོད་ཡུལ་མདོངས་གྱུར་དེ་དག་ལ། །རྒྱལ་བ་དགེ་བའི་ལམ་རྣམས་རབ་སྟོན་ཏེ། །
རྣམ་ཐར་དེ་ལ་དབྱངས་ཀྱི་རི་བོ་འཇུག །དེ་བཞིན་གཤེགས་པའི་བླ་ན་མེད་པའི་ཚུལ། །སེམས་ཅན་ཀུན་གྱིས་བསམ་པར་མི་ནུས་ཏེ། །རྣམ་པ་ཐམས་ཅད་རྒྱལ་བས་རབ་ཏུ་སྟོན། །དེ་ནི་དྲན་པ་དགེ་བའི་མིག་གིས་མཐོང་། །ཞིང་རྣམས་རྒྱ་མཚོ་རྡུལ་དང་མཉམ་པ་ཡི། །གཟུངས་ཀྱི་སྒོ་རྣམས་མི་མགོན་རྟག་ཏུ་གསུང་། །སེམས་ཅན་ཐམས་ཅད་འདུལ་བ་རྣམ་པར་སྟོན། །དགའ་བ་རྣམ་པར་སྣང་བས་དེ་མཐོང་ངོ་། །སངས་རྒྱས་སྐྱེ་བ་ཤིན་ཏུ་དཀོན་པ་སྟེ། །བསྐལ་པ་རྒྱ་མཚོ་དག་ན་བར་འགའ་སྟེ། །དེ་ལ་མོས་པའི་དཀྱིལ་འཁོར་རབ་ཏུ་བསྐྱེད། །འཇིག་རྟེན་དབྱངས་ཀྱི་བློ་གྲོས་དེ་ལ་འཇུག །རྒྱལ་བ་ཆོས་མཐུ་རྒྱ་ཆེ་བསམ་ཡས་དག །སེམས་ཅན་ཀུན་ལ་རྣམ་པར་སྦྱོང་བ་མཛད། །དངོས་མེད་ཆོས་ཉིད་རྒྱལ་བ་སྟོན་པར་མཛད། །གཟི་བརྗིད་འབར་བའི་ལྷས་ནི་དེ་མཐོང་ངོ་། །དུས་གསུམ་བདེ་གཤེགས་ཕུན་སུམ་ཚོགས་པ་དག །དེ་དག་སེམས་ཅན་ཡུལ་དུ་བསམ་མི་ཁྱབ། །དྲན་ནས་བདག་གི་དགའ་བ་རབ་སྐྱེས་ཏེ། །དེ་དག་ཆོས་དགའ་སེམས་པ་རབ་ཏུ་སྟོན། །འགྲོ་བ་རྣམས་ནི་ཉོན་མོངས་རྒྱ་མཚོ་ལ། །གཏི་མུག་ལྟས་རྙོགས་འཇིགས་པ་ཆེན་པོར་བྱིང་། །སྙིང་རྗེ་བསྐྱེད་ཅིང་འགྲོ་བ་འགྲེལ་པ་ནི། །འཕྲུལ་པས་འཕགས་པ་སྤྱོད་ཡུལ་དེ་ལ་བལྟ། །འོད་ཟེར་དྲ་བ་རྒྱལ་བ་རྟག་ཏུ་འགྱེད། །འོད་ཟེར་སྒོ་ཀུན་རྒྱལ་བ་མི་ཟད་པ། །སེམས་ཅན་དབྱིངས་རྣམས་འདུལ་བ་རབ་ཏུ་འཇུག །སྣ་ཚོགས་དབྱངས་ཀྱི་ལྷས་ནི་དེ་མཐོང་ངོ་།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། དུམ་བུ་དང་པོ། བམ་པོ་གཉིས་སོ། །དེ་ལ་གྱ་ནོམ་སྣང་བའི་ལྷའི་རྒྱལ་པོ་སྣང་བས་དགའ་བའི་རྣམ་པར་ཐར་པ་ནི། དགའ་བ་དང་བདེ་བ་རབ་ཏུ་ཞི་བ་མྱོང་བར་བྱེད་ཅིང་། འགྲོ་བའི་སྡུག་བསྔལ་རབ་ཏུ་གཞིལ་བ་ལ་གཞོལ་བ་ཞེས་བྱའོ། །ལྷའི་བུ་དགེ་བ་སྣ་ཚོགས་ཀྱི་རྣམ་པར་ཐར་པ་ནི། སེམས་ཤིན་ཏུ་ཡངས་པ་དང་། འགྲོ་བ་ཐམས་ཅད་ཀྱི་རྣལ་འབྱོར་ཡངས་པ་རྒྱ་མཚོ་སྙིང་རྗེ་དང་། དགའ་བའི་སྙིང་པོ་ཞེས་བྱའོ། །ལྷའི་བུ་དབང་པོའི་དབྱངས་ཀྱི་རྣམ་པར་
ཐར་པ་ནི། བསྐལ་པ་མཐའ་ཡས་པའི་སྤྱོད་པ་དང་། སེམས་ཅན་ཐམས་ཅད་ཀྱི་བསོད་ནམས་ཀྱི་མཐུ་སེམས་ཀྱི་སྐད་ཅིག་གཅིག་གིས་མངོན་པར་སྒྲུབ་པ་ཞེས་བྱའོ། །ལྷའི་བུ་དྲན་པའི་བློ་དམ་པའི་རྣམ་པར་ཐར་པ་ནི། འཇིག་རྟེན་འབྱུང་བ་དང་། འཇིག་པ་དང་། གནས་པ་དང་བསོད་ནམས་སྣ་ཚོགས་ནམ་མཁའ་ལྟ་བུ་ཡོངས་སུ་སྦྱོང་བ་ཞེས་བྱའོ། །ལྷའི་བུ་དགའ་བ་སྣ་ཚོགས་དབྱངས་ཀྱི་རྣམ་པར་ཐར་པ་ནི་འཕགས་པའི་ཆོས་ཐམས་ཅད་ལ་དགའ་བ། མཚུངས་པ་མེད་པའི་ཤུགས་རྣམ་པར་སྤེལ་བས་རབ་ཏུ་ཚིམ་པར་བྱེད་པ་ཞེས་བྱའོ། །ལྷའི་བུ་ལེགས་པར་བསམ་པའི་དབྱངས་ཀྱི་རྣམ་པར་ཐར་པ་ནི། ཚུལ་གྱིས་ཐམས་ཅད་རྣམ་པར་དགོད་ཅིང་ཤིན་ཏུ་བསྟན་པའི་དོན་དུ་ཡང་དག་པར་གནས་པ་ཞེས་བྱའོ། །ལྷའི་བུ་འོད་འགྱེད་པའི་དབྱངས་ཀྱི་རྣམ་པར་ཐར་པ་ནི་དགའ་ལྡན་གྱི་ཕོ་བྲང་ནས་འཕོ་བའི་མཆོད་པ་ཤིན་ཏུ་རྒྱས་པ་མངོན་པར་སྒྲུབ་པ་ཞེས་བྱའོ། །ལྷའི་བུ་དབྱངས་ཟབ་མོའི་འོད་ཀྱི་རྣམ་པར་ཐར་པ་ནི། རྫུ་འཕྲུལ་ལ་རྨོངས་པ་མེད་པའི་ཤེས་རབ་རྒྱ་མཚོ་ལ་རྣམ་པར་སྤྱོད་པ་ཞེས་བྱའོ། །ལྷའི་བུ་གྲགས་པ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་རྒྱ་མཚོ་ཡོངས་སུ་ཐོབ་ཅིང་འགྲོ་བ་ལ་སྟོན་པའི་སྦྱོར་བ་ཞེས་བྱའོ། །ལྷའི་བུ་འོད་དྲི་མ་མེད་པ་ཤིན་ཏུ་འཕགས་པའི་རྣམ་པར་ཐར་པ་ནི། སྔོན་གྱི་སྨོན་ལམ་གྱི་བྱིན་གྱི་བརླབས་ཀྱིས་དགའ་བ་འབྱུང་བའི་ཤུགས་ཀྱི་སྙིང་པོ་ཞེས་བྱའོ། །དེ་ནས་གྱ་ནོམ་སྣང་བའི་ལྷའི་རྒྱལ་པོ་སྣང་བས་དགའ་བས་སངས་རྒྱས་ཀྱི་མཐུས། དགའ་བ་དང་སྣང་བ་དང་། འོད་ཆུང་དང་། འོད་གསལ་དང་། གྱ་ནོམ་པའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔོན་གྱི་རྒྱལ་བའི་སྤྱོད་པ་བདག་གིས་དྲན། །རྒྱལ་བའི་མཐའ་ཡས་གྲགས་པ་ཅེས་མཆོད་དང་། །ཇི་ལྟར་སྔོན་ཅད་དགའ་ཤུགས་ཡོངས་སུ་དག །དེ་ནི་རྒྱལ་བའི་མཐུ་ཡིས་བདག་གིས་མཐོང་། །རྒྱལ་བ་དྲི་མེད་མཚན་ཉིད་མེད་པའི་སྐུ། །འགྲོ་བའི་མྱ་
ངན་མང་པོ་རྣམ་པར་ཟློག །བྱམས་དང་ཐུགས་བརྩེ་ཐུགས་རྗེའི་ས་ལ་བཞུགས། །རྣམ་ཐར་འདི་ཚུལ་སྣ་ཚོགས་འོད་འཇུག་གོ །སངས་རྒྱས་ཆོས་ཉིད་འདི་ནི་རྒྱ་ཆེ་སྟེ། །ཞིང་རྣམས་རྒྱ་མཚོ་མང་པོ་ཇི་ལྟ་བུར། །ཇི་ལྟར་འབྱུང་དང་ཇི་ལྟར་འཇིག་པ་སྟོན། །རྣམ་ཐར་འདི་ནི་དབང་པོའི་དབྱངས་ཀྱི་ཡིན། །རྒྱལ་བའི་རྫུ་འཕྲུལ་མཉམ་མེད་ཕྱོགས་ཀུན་གྱི། །ཞིང་གི་དབྱིངས་སུ་ཡངས་པ་ཤིན་ཏུ་བསྟན། །ད་ལྟར་བྱུང་བའི་རྒྱལ་བའི་དགེ་བ་དག །དྲན་པ་དམ་པའི་རྣམ་ཐར་ཚུལ་འདིའོ། །ཞིང་རྣམས་རྒྱ་མཚོ་མང་པོའི་རྡུལ་སྙེད་ཀྱི། །བདེ་གཤེགས་དེ་དག་དགའ་བའི་ཡིད་ཀྱིས་མཆོད། །དེ་ཕྱིར་ཉན་པ་རྡུལ་མེད་དོན་ཀྱང་ཡོད། །སྣ་ཚོགས་དབྱངས་ཀྱི་རྣམ་ཐར་འདི་ཡིན་ནོ། །བསྐལ་པ་རྒྱ་མཚོ་མང་པོ་ཡངས་པར་ཡང་། །ཚུལ་བཞིན་གྱིས་ནི་རྒྱལ་བ་རྒྱ་ཆེན་གསུང་། །རྒྱལ་བ་ཀུན་ལ་ཟད་མེད་མཐའ་ཡང་ཡས། །ལེགས་བསམ་དབྱངས་ཀྱི་རྣམ་ཐར་འདི་ཡིན་ནོ། །སངས་རྒྱས་རྣམ་འཕྲུལ་མཐའ་ཡས་དབྱངས་ཀྱི་རྣམས། །འཕོ་དང་རྣམ་པར་འཚང་རྒྱ་ཚུལ་ཡང་དག །སེམས་ཀྱི་སྐད་ཅིག་ཀུན་ལ་རབ་ཏུ་སྟོན། །འོད་འགྱེད་དབྱངས་ཀྱི་རྣམ་ཐར་སྒོ་འདི་ཡིན། །སངས་རྒྱས་བྱིན་རླབས་རྒྱ་ཆེན་བཤད་པ་ཡི། །རྫུ་འཕྲུལ་ཡུལ་ནི་བདེ་བར་གཤེགས་པ་སྟོན། །དབང་པོ་བསམ་པ་ཀུན་ཀྱང་རྣམ་པར་སྦྱོང་། །དབྱངས་ཟབ་འོད་ནི་འདི་ལ་རབ་ཏུ་འཇུག །རྒྱལ་བ་རྣམས་ཀྱི་ཡེ་ཤེས་མཐའ་ཡས་ཏེ། །མཉམ་མེད་ཆགས་མེད་སངས་རྒྱས་འཇིག་རྟེན་སྤྱོད། །སེམས་ཅན་ཀུན་ལ་མཆོག་སྦྱིན་མངོན་པར་གཟིགས། །གྲགས་པ་དྲི་མེད་ཚུལ་འདིར་རབ་ཏུ་འཇུག །རྒྱལ་བ་སྔོན་ཅད་བྱང་ཆུབ་སྤྱོད་མཛད་ཚེ། །སངས་རྒྱས་རྒྱ་མཚོ་ཡང་དག་མཆོད་པ་རྣམས། །དེ་དག་ཀུན་གྱི་སྨོན་ལམ་རབ་གྲུབ་པ། །དེ་ནི་འོད་འཕགས་དགའ་བ་རབ་ཏུ་ཉན། །དེ་ལ་ཚངས་པ་ཆེན་པོ་རབ་ཏུ་སྣང་བའི་རྣམ་པར་ཐར་པ་ནི། ཆོས་དྲི་མ་མྱེད་པའི་སྤྱོད་ཡུལ་ལ་གནས་ཤིང་ཕྱོགས་བཅུར་ཐོགས་པ་མྱེད་པའི་དབྱངས་ཀྱི་དཀྱིལ་འཁོར་གྱིས་རྒྱས་པར་འགེངས་པ་དྲི་མ་མེད་པ་ཞེས་བྱའོ། །ཚངས་
པ་ཆེན་པོ་བློ་གྲོས་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་བསམ་གཏན་དང་སྙོམས་པར་འཇུག་པ་ལ་རབ་ཏུ་གནས་པ་ཞེས་བྱའོ། །ཚངས་པ་ཆེན་པོ་བློ་གྲོས་བཟང་པོའི་སེམས་སྣང་བ་རྣམ་པར་ཐར་པ་ནི། ཆོས་ཀྱི་སྣང་བ་བསམ་གྱིས་མི་ཁྱབ་པ་ཐམས་ཅད་ལ་ཡང་དག་པར་གཞོལ་བའི་འོད་ཅེས་བྱའོ། །ཚངས་པ་ཆེན་པོ་ཀུན་ཏུ་དབྱངས་ཀྱི་སྤྲིན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་གསུང་གི་ཡན་ལག་རྒྱ་མཚོའི་དཀྱིལ་འཁོར་ལ་འཇུག་ཅིང་རྟོགས་པ་བྱེད་པ་ཞེས་བྱའོ། །ཚངས་པ་ཆེན་པོ་འཇིག་རྟེན་དབང་པོའི་སྒྲའི་རྣམ་པར་ཐར་པ་ནི། བྱང་ཆུབ་སེམས་དཔའི་སྤྱོད་པ་ཡང་དག་པར་འབྱུང་ཞིང་སེམས་ཅན་ཐམས་ཅད་བསྡུ་བ་དང་གདུལ་བ་རྗེས་སུ་དྲན་པའི་སྦྱོར་བ་ཞེས་བྱའོ། །ཚངས་པ་ཆེན་པོ་མིག་རབ་ཏུ་ཞི་ཞིང་འོད་ཤིན་ཏུ་ཟབ་པའི་རྣམ་པར་ཐར་པ་ནི། ལས་ཀྱིས་རྣམ་པར་ཕྱེ་བའི་འཇིག་རྟེན་གྱི་ཁམས་འབྱུང་བའི་དབྱིངས་ཤིན་ཏུ་སྟོན་པ་ཞེས་བྱའོ། །ཚངས་པ་ཆེན་པོ་ཕྱོགས་སུ་སྣང་བ་འགྱེད་པའི་རྣམ་པར་ཐར་པ་ནི། རྣམ་པ་ཐམས་ཅད་དུ་སེམས་ཅན་འདུལ་བ་ལ་མངོན་པར་ཕྱོགས་པ་ཞེས་བྱའོ། །ཚངས་པ་ཆེན་པོ་སྤྲུལ་པའི་སྒྲ་དབྱངས་ཀྱི་རྣམ་པར་ཐར་པ་ནི། ཆོས་ཐམས་ཅད་དགེ་བའི་མཚན་ཉིད་ཀྱི་སྒོ་དང་རབ་ཏུ་ཞི་བའི་ཆོས་ལ་སྤྱོད་པའི་དཀྱིལ་འཁོར་ལ་ཤིན་ཏུ་གནས་པ་ཞེས་བྱའོ། །ཚངས་པ་ཆེན་པོ་མིག་གི་འོད་ཟེར་མངོན་པར་སྣང་བའི་རྣམ་པར་ཐར་པ་ནི། དངོས་པོ་ཐམས་ཅད་ལ་ཆགས་པ་མེད་ཅིང་མཐའ་ཡས་པའི་བརྩམ་པ་ལ་བརྩོན་པ་ཞེས་བྱའོ། །ཚངས་པ་ཆེན་པོ་དབྱངས་རྒྱ་མཚོ་ཡིད་དུ་འོང་བའི་རྣམ་པར་ཐར་པ་ནི། མི་ཟད་པའི་ཆོས་གཞལ་དུ་མེད་པ་ལ་རྗེས་སུ་དཔྱད་པར་རྟག་ཏུ་ཕྱོགས་ཤིང་རྣམ་པར་ལྟ་བ་དང་རྣམ་པར་ཤེས་པ་ཞེས་བྱའོ། །དེ་ནས་ཚངས་པའི་དབང་པོ་ཆེན་པོ་ཡིད་དུ་འོང་བས་སངས་རྒྱས་ཀྱི་མཐུས་ཚངས་རིས་དང་ཚངས་ལྷ་ཉེ་ཕན་དང་། ཚངས་པ་ཀུན་འཁོར་དང་། ཚངས་ཆེན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །
རྒྱལ་བ་སྐུ་ནི་ཞི་ལ་རབ་ཏུ་ཞི། །འཇིག་རྟེན་ཀུན་ཏུ་དྲི་མེད་སྣང་ཞིང་མཛེས། །མཚན་ཉིད་མེད་ཅིང་གཟུགས་བརྙན་མེད་པའི་ཡུལ། །སྤྲིན་དང་མཉམ་པར་དེ་བཞིན་གཤེགས་པ་སྣང་། །འགྲོ་བ་ཀུན་གྱི་བསམ་དུ་མི་ནུས་ཏེ། །སངས་རྒྱས་སྐུ་དང་དེ་བཞིན་བསམ་གཏན་ཡུལ། །ཐམས་ཅད་ཚུལ་གྱི་སྒོ་ཡིས་བསམ་དུ་མེད། །ཚངས་པའི་བློ་གྲོས་འོད་ཀྱིས་འདི་མཐོང་ངོ་། །རྒྱ་མཚོའི་ཆོས་རྣམས་ཞིང་གི་རྡུལ་སྙེད་ཀྱང་། །སངས་རྒྱས་གསུང་གཅིག་ཡང་དག་བཀའ་སྩལ་ཏེ། །བསྐལ་པ་རྒྱ་མཚོར་གསུངས་ཀྱང་ཟད་པ་མེད། །སྣང་བ་སེམས་དཔའི་རྣམ་ཐར་འདི་ཡིན་ནོ། །སྔོན་གྱི་རྒྱལ་བའི་གསུང་གི་ཡན་ལག་ཀྱང་། །འགྲོ་བ་སྙེད་དེ་རྒྱུད་ཀུན་སེམས་ཅན་ཤེས། །རྒྱལ་བ་དེ་ལ་རྟོག་དང་དབྱངས་མི་མངའ། །ཚངས་པ་ཀུན་ཏུ་སྒྲ་དབྱངས་འདི་ལ་འཇུག །དེ་བཞིན་གཤེགས་པ་དུས་གསུམ་གཤེགས་པ་དག །བྱང་ཆུབ་སྤྱོད་པའི་ཚུལ་ལ་གང་བཞུགས་པ། །དེ་དག་རྒྱལ་བའི་སྐུ་ལ་ཐམས་ཅད་སྣང་། །རྣམ་ཐར་འདི་ལ་འཇིག་རྟེན་དབང་པོ་འཇུག །སེམས་ཅན་ཀུན་གྱི་ལས་དབང་གང་ཡིན་དང་། །སྣ་ཚོགས་རྒྱུ་ཡི་སྒོ་ཡིས་རྣམ་གྲོལ་བ། །འགྲོ་བ་བཀང་ཞིང་སངས་རྒྱས་ཡང་དག་སྟོན། །ཞི་བ་ཟབ་མོའི་མིག་ནི་འདི་ལ་འཇུག །རྣམ་པ་མཐའ་ཡས་སྒོ་ཡིས་རང་བྱུང་རྣམས། །ཕྱོགས་རྣམས་མ་ལུས་ཀུན་ཏུ་སེམས་ཅན་འདུལ། །སངས་རྒྱས་རྟོག་དང་རྣམ་རྟོག་མི་མངའ་སྟེ། །སྣང་བ་འགྱེད་པའི་སྤྱོད་ཡུལ་འདི་ཡིན་ནོ། །རྒྱལ་བའི་སྐུ་ནི་མི་ཟད་ནམ་མཁའ་བཞིན། །མཚན་ཉིད་མི་མངའ་ཕྱོགས་ལ་ཆགས་པ་མེད། །སྒྱུ་མར་གཏོགས་པའི་ཆོས་ཉིད་རབ་ཏུ་སྟོན། །ཀུན་ཏུ་འཕྲུལ་དགའི་སྤྱོད་ཡུལ་འདི་ཡིན་ནོ། །བདེ་གཤེགས་སྐུ་དང་ཡེ་ཤེས་རྣམ་པ་དང་། །དེ་བཞིན་དབྱངས་ཀྱི་དཀྱིལ་འཁོར་མཐའ་མེད་དེ། །ཆགས་མེད་སེམས་ཅན་སངས་རྒྱས་མངོན་དུ་བལྟ། །འོད་ཟེར་ཡིད་འོང་རྣམ་ཐར་འདི་ལ་འཇུག །ཆོས་རྗེ་ཆོས་ཀྱི་གཞལ་མེད་ཁང་བཞུགས་ཤིང་། །ཆོས་ཀྱི་སྐུ་ཡི་སངས་རྒྱས་རབ་ཏུ་སྣང་། །
ཆོས་ཀྱི་རང་བཞིན་གཞལ་ཡས་མཚན་ཉིད་མེད། །རྣམ་ཐར་འདི་ལ་རྒྱ་མཚོའི་འོད་འཇུག་གོ །དེ་ལ་ལྷའི་རྒྱལ་པོ་དབང་བསྒྱུར་གྱི་རྣམ་པར་ཐར་པ་ནི། མཐའ་ཡས་པའི་སེམས་ཅན་ཡོངས་སུ་སྨིན་པར་བྱ་བའི་སྒོ་ཡི་དབང་དང་སྤྱོད་པའི་སྙིང་པོ་ཞེས་བྱའོ། །ལྷའི་བུ་མིག་བཟང་པོའི་བློ་གྲོས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགའ་བ་དང་བདེ་བ་ལ་རྣམ་པར་ལྟ་བ་འཕགས་པའི་སྤྱོད་ཡུལ་གྱི་རྗེས་སུ་འཇུག་པ་ཞེས་བྱའོ། །ལྷའི་བུ་ཅོད་པན་སྣ་ཚོགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་འབྱུང་བ་སྣ་ཚོགས་དོན་ཐ་དད་པའི་དབྱིངས་སུ་ཡང་དག་གཞོལ་བ་ཞེས་བྱའོ། །ལྷའི་བུ་གོ་འཕང་རྣམ་པར་གནོན་པའི་སྒྲ་དབྱངས་སྣ་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བྱམས་པའི་སྒོ་རྗེས་སུ་དྲན་ཞིང་རང་གི་ཡུལ་ལ་རྣམ་པར་ལྟ་བ་ཞེས་བྱའོ། །ལྷའི་བུ་འོད་ཡིད་དུ་འོང་བའི་རྒྱལ་མཚན་གྱི་རྣམ་པར་ཐར་པ་ནི། ང་རྒྱལ་གྱི་རྒྱལ་མཚན་རབ་ཏུ་བསྙལ་བ་དང་། སྙིང་རྗེ་ཆེན་པོའི་སྒོ་ནས་རབ་ཏུ་ཞི་བ་འབྱུང་བ་ཞེས་བྱའོ། །ལྷའི་བུ་སྤྱོད་ཡུལ་ཞི་བའི་སྒོའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ཁོང་ཁྲོ་བ་ཡང་དག་པར་འདུལ་བ་རབ་ཏུ་བརྗོད་པ་ཞེས་བྱའོ། །ལྷའི་བུ་འཁོར་ལོ་རི་མོ་བཟང་པོའི་རྒྱལ་མཚན་གྱི་རྣམ་པར་ཐར་པ་ནི། ཕྱོགས་བཅུའི་མཐའ་ཡས་པའི་སངས་རྒྱས་ཡིད་ལ་བྱ་བ་མུ་མེད་པར་ཁེབས་པར་འགེངས་པ་ཞེས་བྱའོ། །ལྷའི་བུ་མེ་ཏོག་བློ་གྲོས་སེང་གེའི་དབང་ཕྱུག་གི་རྣམ་པར་ཐར་པ་ནི། དེ་བཞིན་གཤེགས་པའི་རྣམ་པར་འཕྲུལ་བ། རྣམ་པ་ཐམས་ཅད་རྗེས་སུ་དྲན་པ་མངོན་པར་འཚང་རྒྱ་བས་རྒྱས་པར་བྱེད་པ་ཞེས་བྱའོ། །ལྷའི་བུ་དབང་པོའི་སྟོབས་རི་མོ་བཟང་པོའི་འོད་སྣ་ཚོགས་ཀྱི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་ཆོས་ཉིད་ལ་ཡང་དག་པར་གཞོལ་བའི་བྱིན་རླབས་ཀྱི་ཁྱད་པར་ཞེས་བྱའོ། །དེ་ནས་ལྷའི་རྒྱལ་པོ་དབང་བྱེད་ཀྱིས་སངས་རྒྱས་ཀྱི་མཐུས། ལྷའི་བུ་དབང་བྱེད་ཀྱི་རིས་སུ་གཏོགས་པའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་
འདི་དག་སྨྲས་སོ། །ཆོས་དབྱིངས་མཐར་ཐུག་བདེ་བར་གཤེགས་པའི་སྐུ། །འགྲོ་བ་ཀུན་ན་མངོན་པར་རབ་ཏུ་སྣང་། །འབྱམ་ཀླས་ཐམས་ཅད་ཆོས་ཀྱིས་སེམས་ཅན་འདུལ། ། ཆོས་ཀྱི་མངའ་བདག་རྒྱལ་བ་འགྲོ་ལ་སྟོན། །འཇིག་རྟེན་བདེ་བ་སྣ་ཚོགས་མ་ལུས་པ། །ཇི་སྙེད་དེ་ནང་འཕགས་པ་དེ་མཆོག་ཡིན། །ཆོས་ཉིད་ཡངས་པ་རྒྱལ་བའི་གནས་ཡིན་ཏེ། །མིག་བཟང་བདག་པོ་འདི་ལ་རྣམ་པར་ལྟ། །འཇིག་རྟེན་ཕྱོགས་རྣམས་བཀང་ཞིང་སངས་རྒྱས་ཀྱིས། །བསམ་པའི་དབྱངས་ཀྱི་ཚུལ་བཞིན་ཆོས་སྟོན་པས། །སེམས་ཅན་ཀུན་གྱི་ནེམ་ནུར་དོགས་པ་གཅོད། །ཅོད་པན་སྣ་ཚོགས་རྒྱལ་མཚན་རྣམ་ཐར་ཏོ། །རྒྱལ་བའི་གསུང་གཅིག་མ་ལུས་གསུང་བ་ནི། །བསྐལ་པ་རྒྱ་མཚོར་ཡངས་པའི་ཆོས་སྒྲོག་སྟེ། །འགྲོ་བ་བཀང་ཞིང་སངས་རྒྱས་གསུང་བརྗོད་པ། །འདི་ནི་བརྩོན་པའི་བློ་གྲོས་རྣམ་ཐར་ཏོ། །འཇིག་རྟེན་བྱམས་པ་འབྱམ་ཀླས་རྒྱ་ཆེན་ཀུན། །བདེ་གཤེགས་བ་སྤུ་གཅིག་གི་དཔེར་མི་རུང་། །རྒྱལ་བའི་བྱམས་པ་མཁའ་བཞིན་ཟད་མི་ཤེས། །བཤད་པ་སྣ་ཚོགས་བློ་གྲོས་རྣམ་ཐར་ཏོ། །ང་རྒྱལ་རི་དང་མུན་སྤྲིན་སྒོ་འཇོམས་ཤིང་། །སྟོབས་བཅུ་འགྲོ་བ་ཀུན་ཏུ་ཁྱབ་བྱས་ནས། །རྒྱལ་བའི་ཐུགས་རྗེའི་འོད་ཟེར་རབ་ཏུ་འགྱེད། །རྣམ་ཐར་འདི་ནི་འོད་བཟང་རྒྱལ་མཚན་གྱིའོ། །བདེ་གཤེགས་མཐོང་བས་གཏི་མུག་རབ་ཏུ་འཇོམས། །འགྲོ་ལ་ཤེས་རབ་དཀྱིལ་འཁོར་དགེ་བ་སྟོན། །དེ་དག་ངན་འགྲོའི་ཚུལ་རྣམས་རྣམ་འདུལ་ཏེ། །ཞི་བ་སྤྱོད་ཡུལ་སྒོ་ཡི་རྣམ་ཐར་ཏོ། །སངས་རྒྱས་སྤུ་ཡི་ཁུང་ནས་འོད་བརྗོད་པ། །སེམས་ཅན་ཀུན་དང་མཐུན་པར་བདེ་གཤེགས་མཚན། །དེ་དག་བསམ་པ་ཇི་བཞིན་མཚན་ཀྱང་ཐོས། །འཁོར་ལོ་སྣ་ཚོགས་རྒྱལ་མཚན་རྣམ་ཐར་ཡིན། །རྒྱལ་བའི་རྣམ་པར་འཕྲུལ་པ་ཚད་མེད་པ། །དེ་དག་ཐམས་ཅད་འཁོར་འདིར་ཕྱིན་སྣང་ཞིང་། །ཆོས་དབྱིངས་ནམ་མཁའ་རྒྱལ་བས་རབ་རྒྱས་པ། །མེ་ཏོག་སེང་གེ་དཔལ་གྱི་རྣམ་ཐར་ཏོ། །བསྐལ་པ་རྒྱ་མཚོ་མང་པོ་ཚད་མེད་པར། །ཞིང་
རྣམས་ཀུན་ཏུ་རྒྱལ་བའི་ཡུལ་བརྗོད་ཀྱང་། །སངས་རྒྱས་གཤེགས་དང་བཞུད་པར་གྱུར་པ་མེད། །དབང་པོ་དཔལ་ཐོབ་རྣམ་ཐར་འདི་ཡིན་ནོ། །དེ་ལ་ལྷའི་རྒྱལ་པོ་རབ་འཕྲུལ་དགའི་རྣམ་པར་ཐར་པ་ནི། ཆོས་ཀྱི་རང་བཞིན་སྤྲུལ་པར་རྣམ་པར་སྒོམ་པའི་སྦྱོར་བ་ཞེས་བྱའོ། །ལྷའི་བུ་སྒྲས་ཞི་བའི་འོད་ཀྱི་རྣམ་པར་ཐར་པ་ནི། འཇིགས་པ་ཐམས་ཅད་རྣམ་པར་སྒོམ་པའི་རང་བཞིན་གྱི་སྦྱོར་བ་ཞེས་བྱའོ། །ལྷའི་བུ་སྟོབས་ཀྱིས་འཕྲུལ་པའི་སྒྲའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཏི་མུག་གིས་ཡོངས་སུ་མི་ཟད་ཅིང་རྨོངས་པ་མེད་པའི་དཀྱིལ་འཁོར་ཅེས་བྱའོ། །ལྷའི་བུ་དབང་ཆེན་སྣ་ཚོགས་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་གསུང་ལ་ཡང་དག་པར་འཇུག་ཅིང་དགའ་བ་ཚད་མེད་པས་རྣམ་པར་སྨིན་པ་ཞེས་བྱའོ། །ལྷའི་བུ་དྲན་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་མཚན་ཉིད་དང་། བསོད་ནམས་ཀྱི་ཚོགས་ལ་འཇུག་པ་ཟད་མི་ཤེས་པ་ཤིན་ཏུ་བསྟན་པ་ཞེས་བྱའོ། །ལྷའི་བུ་སྤྲིན་སྒྲ་ཤིན་ཏུ་འཕགས་པའི་རྣམ་པར་ཐར་པ་ནི། འདས་པའི་བསྐལ་པ་གཅིག་ནས་གཅིག་ཏུ་བརྒྱུད་པ་རྗེས་སུ་དྲན་ཞིང་སྤྱོད་པའི་བློ་གྲོས་ཞེས་བྱའོ། །ལྷའི་བུ་སྣང་བའི་སྤྱོད་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཤེས་རབ་ཚད་དང་བྲལ་བ་རྟོགས་པར་བྱེད་པའི་ཡེ་ཤེས་ལ་ཡང་དག་པར་འཇུག་པ་ཞེས་བྱའོ། །ལྷའི་བུ་གཙུག་ཕུད་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། ནམ་མཁའི་དབྱིངས་ཀྱི་མཐར་ཉི་མའི་ཤུགས་ཀྱི་རྒྱུ་བས་ཀུན་ཏུ་འགྲོ་བ་ཞེས་བྱའོ། །ལྷའི་བུ་དགའ་བའི་བློ་གྲོས་ཀྱི་རྣམ་པར་ཐར་པ་ནི། བརྩམ་པ་ཐམས་ཅད་ཟད་མི་ཤེས་པ་ལ་བརྩོན་འགྲུས་ཀྱི་སྟོབས་ཡང་དག་པར་འབྱུང་བ་ཞེས་བྱའོ། །ལྷའི་བུ་མེ་ཏོག་འོད་ཀྱི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལས་ལ་ལྟ་ཞིང་བདེ་བ་དང་། སྡུག་བསྔལ་བས་ཀུན་ཏུ་རྣམ་པར་ལྟ་བ་ཞེས་བྱའོ། །ལྷའི་བུ་ཕྱོགས་ཤིན་ཏུ་སྣང་བའི་རྣམ་པར་ཐར་པ་ནི། སེམས་ཅན་གྱི་ཚོགས་
བསམ་གྱིས་མི་ཁྱབ་པའི་རྣམ་པར་སྒྲུབ་པ་སྣ་ཚོགས་ཀྱི་དྲན་པས་མངོན་ཏུ་སྒྲུབ་པ་ཞེས་བྱའོ། །དེ་ནས་ལྷའི་རྒྱལ་པོ་རབ་འཕྲུལ་དགའ་སངས་རྒྱས་ཀྱི་མཐུས་འཕྲུལ་དགའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་ལས་ཀྱི་རང་བཞིན་བསམ་མི་ཁྱབ། །ཐམས་ཅད་འགྲོ་བ་འདིར་ཡང་ཤིན་ཏུ་བསྟན། །རྒྱུ་དང་རང་བཞིན་རྒྱལ་བ་སེམས་ཅན་ཚུལ། །འཇིག་རྟེན་འདི་ཀུན་ལས་ཀྱིས་རྣམ་པར་བྲིས། །ཐམས་ཅད་ཚུལ་དུ་རང་བྱུང་དངོས་པོ་མེད། །ཕྱོགས་རྣམས་ཀུན་ནའང་བཟུང་བ་ཡོད་པ་མིན། །ཆོས་ཀྱི་སྐུ་ལ་དངོས་མེད་དེ་ཡང་བསྟན། །སྒྲ་ཞི་འོད་ཀྱིས་རྣམ་ཐར་འདི་ཡང་མཐོང་། །རྒྱལ་བས་བསྐལ་པ་རྒྱ་མཚོར་སྤྱད་པའི་ཚེ། །འཇིག་རྟེན་གཏི་མུག་མུན་པ་རྣམ་པར་ཟློག །དེ་བས་སངས་རྒྱས་ཤིན་ཏུ་དྲི་མེད་སྣང་། །རྣམ་ཐར་འདི་ནི་སྟོབས་ཀྱི་འོད་ཀྱིས་ཤེས། །ཇི་སྙེད་འཇིག་རྟེན་སྒྲ་དབྱངས་ཞི་བའི་རྣམས། །ཀུན་ཀྱང་སངས་རྒྱས་སྒྲ་ལས་ཉེ་བར་འབྱུང་། །ཕྱོགས་རྣམས་ཞིང་དབྱིངས་སྣ་ཚོགས་རྣམ་པར་སྒྲོག །འདི་ནི་སྣ་ཚོགས་དབང་གི་རྣམ་ཐར་ཏོ། །འགྲོ་བའི་བསོད་ནམས་མཐུ་རྣམས་ཀུན་བསྩོགས་ཀྱང་། །རྒྱལ་བའི་མཚན་རབ་གཅིག་ཏུ་མི་འགྱུར་ཏེ། །རྒྱལ་བའི་བསོད་ནམས་ནམ་མཁའི་དཔེ་ལྟ་བུ། །དྲན་པའི་འོད་ཀྱིས་རྣམ་ཐར་འདི་མཐོང་ངོ་། །དུས་གསུམ་བསྐལ་པ་མཐའ་དང་མུ་མེད་པ། །སྤུ་གཅིག་རྩེ་ལ་རང་བྱུང་རྣམས་སྟོན་ཏོ། །དེ་དག་འབྱུང་འཇིག་ཇི་ལྟ་བ་ཡང་སྟོན། །འདི་ནི་འཕགས་པའི་དབྱངས་ཀྱིས་རབ་ཏུ་ཤེས། །ཕྱོགས་རྣམས་ནམ་མཁའི་མཐའ་ནི་རྙེད་པར་རུང་། །རྒྱལ་བའི་སྤུ་གཅིག་མཐའ་ནི་ཐུག་པ་མེད། །དེ་ལྟར་སངས་རྒྱས་ཆགས་མེད་བསམ་མི་ཁྱབ། །ཡིད་འོང་འོད་ཀྱི་གཙུག་གིས་དེ་མཐོང་ངོ་། །སྔོན་གྱི་རྒྱལ་བས་བསྐལ་པ་བསམ་ཡས་པར། །མི་སྐྱོའི་ཐུགས་ཀྱིས་བརྩོན་འགྲུས་རབ་བསྐྱེད་དེ། །ཕ་རོལ་ཕྱིན་པ་རྒྱ་ཆེན་རབ་ཏུ་བསྐང་། །དེ་ནི་དགའ་དང་ལྡན་པའི་རྣམ་ཐར་ཏོ། །འགྲོ་བ་རྣམས་ཀྱི་ལས་ཀྱི་རང་
བཞིན་རྒྱུ། །བསམ་གྱིས་མི་ཁྱབ་སངས་རྒྱས་མ་ལུས་གསུང་། །དྲི་མེད་རྣམ་དག་ཆོས་ཉིད་དེ་ཡང་སྟོན། །དེ་ལ་མེ་ཏོག་འོད་ཀྱི་གཙུག་ཕུད་འཇུག །རྒྱལ་བའི་སྤུ་གཅིག་རྩེ་ལ་འགྲོ་བ་རྣམས། །ཐམས་ཅད་སྙེད་ཀྱི་གཟུགས་ཀྱི་སྒོ་ལ་ལྟོས། །འོན་ཀྱང་འགྲོ་ཞིང་འོང་བ་དེ་ལ་མེད། །རྣམ་ཐར་དེ་ནི་ཕྱོགས་སུ་སྣང་བས་མཐོང་། །དེ་ལ་ལྷའི་རྒྱལ་པོ་རབ་དགའ་ལྡན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་མཚན་གྱི་འཁོར་ལོ་ཕུན་སུམ་ཚོགས་པ་མངོན་པར་བསྒྲུབ་པ་ལ་འཇུག་པ་ཞེས་བྱའོ། །ལྷའི་བུ་དགའ་བ་རྒྱ་མཚོའི་གཙུག་ཕུད་ཀྱི་རྣམ་པར་ཐར་པ་ནི། ནམ་མཁའི་དབྱིངས་དྲི་མ་མེད་པའི་འོད་ཅེས་བྱའོ། །ལྷའི་བུ་ཡོན་ཏན་མཆོག་གི་རྒྱལ་མཚན་གྱི་རྣམ་པར་ཐར་པ་ནི། སྨོན་ལམ་རྒྱ་མཚོ་དྲི་མ་མེད་པས་འགྲོ་བ་རབ་ཏུ་ཞི་བ་བྱེད་པ་ལ་འཇུག་པ་ཞེས་བྱའོ། །ལྷའི་བུ་འོད་ཟེར་ཞི་བའི་འོད་ཀྱི་རྣམ་པར་ཐར་པ་ནི། ཆོས་རྗེས་སུ་བསྲུང་བའི་སྒོ་ཀུན་ཏུ་བསྟན་པས་སྣང་བ་ཞེས་བྱའོ། །ལྷའི་བུ་རབ་ཏུ་དགའ་བའི་མིག་གི་རྣམ་པར་ཐར་པ་ནི། ཀུན་ནས་ཉོན་མོངས་པའི་ཁམས་ནམ་མཁའི་དབྱིངས་ལྟར་དྲི་མ་མེད་པར་ཡོངས་སུ་སྦྱོང་བ་ཞེས་བྱའོ། །ལྷའི་བུ་རིན་ཆེན་འོད་ཟེར་ཟླ་བའི་རྣམ་པར་ཐར་པ་ནི། འགྲོ་བ་རྣམ་པར་གདུལ་བ་ཟད་མི་ཤེས་པ་མངོན་པར་བསྒྲུབ་པའི་སྙིང་པོ་ཞེས་བྱའོ། །ལྷའི་བུ་རྣམ་པར་གནོན་པས་རབ་ཏུ་བརྩོན་པའི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡུལ་ལ་བརྩོན་ཞིང་ཡང་དག་པར་བྱང་ཆུབ་མངོན་པར་བསྒྲུབ་པ་ཞེས་བྱའོ། །ལྷའི་བུ་རྡོ་རྗེ་མདོག་གི་འོད་བཟང་པོའི་རྣམ་པར་ཐར་པ་ནི། བྱང་ཆུབ་ཀྱི་སེམས་བསྐྱེད་པ་མི་ཤིགས་པར་བརྟན་པའི་རྒྱུན་ཐམས་ཅད་དགའ་བས་ཡང་དག་པར་སྡུད་པ་ཞེས་བྱའོ། །ལྷའི་བུ་སྐར་མས་བརྒྱན་པའི་དཔལ་གྱི་རྣམ་པར་ཐར་པ་ནི། སངས་རྒྱས་འབྱུང་བ་ཐམས་ཅད་ཀྱི་དྲུང་དུ་ཉེ་བར་འགྲོ་ཞིང་ཕྱོགས་བཅུའི་སེམས་ཅན་རྩལ་གྱིས་རྣམ་པར་གནོན་པའི་འདུལ་བ་ཞེས་བྱའོ། །ལྷའི་བུ་དགའ་བ་བཟང་པོ་སྣ་ཚོགས་ཀྱི་རྣམ་པར་ཐར་པ་ནི། བསམ་པ་རྒྱ་མཚོ་མཐའ་དང་དབུས་མེད་པ་སེམས་
སྐད་ཅིག་གིས་ཡོངས་སུ་བསྟན་པ་ལ་མངོན་པར་ཕྱོགས་པའི་སྣོད་ཡང་དག་པར་སྟོན་པ་ཞེས་བྱའོ། །དེ་ནས་ལྷའི་རྒྱལ་པོ་རབ་དགའ་ལྡན་གྱིས་སངས་རྒྱས་ཀྱི་མཐུས་དགའ་ལྡན་གྱི་རིས་སུ་གཏོགས་པའི་ལྷའི་བུའི་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་དབྱིངས་དམ་པ་དེ་བཞིན་གཤེགས་པ་སྟེ། །སེམས་ཅན་ཀུན་དང་མཉམ་ཉིད་མཉམ་པར་འགྱུར། །བསམ་པ་སྣ་ཚོགས་རྒྱལ་བའི་ཆོས་ཉིད་དེ། །དྲི་མེད་བསམ་གྱིས་མི་ཁྱབ་རབ་ཏུ་འཇུག །སངས་རྒྱས་སྐུ་ནི་ཕྱོགས་ལ་ཐོགས་པ་མེད། །གཟུང་བ་མེད་ཅིང་ཆགས་པ་གང་ཡང་མེད། །འགྲོ་བའི་གཟུགས་ཀྱི་སྒོ་རྣམས་ཀུན་ལ་སྣང་། །རྣམ་ཐར་དེ་ལ་དགའ་བའི་གཙུག་ཕུད་འཇུག །སྨོན་ལམ་རྒྱ་མཚོས་ཇི་ལྟར་རྣམ་སྦྱངས་པའི། ། སྔོན་གྱི་རྒྱལ་བའི་སྤྱོད་པ་རྣམས་ལ་ལྟོས། །ཐམས་ཅད་ཆོས་ཀྱི་དཀྱིལ་འཁོར་ཡོངས་སུ་རྒྱས། །དེ་ཡི་ཚུལ་ལ་ཡོན་ཏན་རྒྱ་མཚོ་འཇུག །བདེ་གཤེགས་ཆོས་སྐུ་བསམ་གྱིས་མི་ཁྱབ་སྟེ། །ཆོས་ཀྱི་དབྱིངས་ནི་མིག་ཡོར་མཚན་ཉིད་དོ། །ཐམས་ཅད་ཆོས་ཀྱི་འོད་ཟེར་སྣང་བ་གཏོང་། །ཞི་བའི་འོད་ཟེར་སྣང་བས་འདི་ལྟར་མཐོང་། །འགྲོ་བ་ཉོན་མོངས་ལས་ཀྱི་མུན་པས་བསྒྲིབས། །འཇིགས་དོགས་བག་མེད་དྲེགས་པའི་ཡུལ་ཅན་ལ། །རྒྱལ་བ་ཞི་བའི་ཆོས་ཉིད་རབ་ཏུ་སྟོན། །དགའ་བ་བཟང་པོའི་མིག་གིས་དགའ་བར་མཐོང་། །མགོན་པོ་འཇིག་རྟེན་ཐམས་ཅད་སྐྱབས་གྱུར་ཅིང་། །གནས་དང་མགོན་དུ་གྱུར་པ་རབ་འབྱུང་སྟེ། །རྒྱལ་བ་སེམས་ཅན་ཀུན་ལ་བདེ་བ་སྟོན། །དེ་ཡི་ཚུལ་ལ་རྩེ་མོའི་ཟླ་བ་འཇུག །སངས་རྒྱས་ཐམས་ཅད་སྤྱོད་ཡུལ་བསམ་མི་ཁྱབ། །ཆོས་དབྱིངས་དམ་པ་དེ་བཞིན་གཤེགས་པ་སྟེ། །ཐམས་ཅད་ཆོས་དབྱིངས་ཕ་རོལ་ཕྱིན་པ་བརྙེས། །དེ་ནི་བརྩོན་པའི་བློ་གྲོས་དགའ་བའོ། །ཕྱོགས་བཅུ་དག་ན་སེམས་ཅན་སྣོད་གྱུར་ཅིང་། །བསོད་ནམས་རྒྱ་མཚོས་རྣམ་དག་སྤྱོད་ཡུལ་ཅན། །སངས་རྒྱས་ཡོན་ཏན་ཐོས་ཤིང་བྱང་ཆུབ་འཇུག །རྡོ་རྗེ་རྡུལ་གྱི་འོད་ནི་འདི་ལྟར་སེམས། །ཞིང་
རྣམས་རྒྱ་མཚོའི་རྡུལ་དང་མཉམ་པ་ཡི། །ཕྱོགས་བཅུའི་རྒྱལ་སྲས་རྟག་ཏུ་ཀུན་འདུ་ཞིང་། །རྒྱལ་བ་མཆོད་ཅིང་ཆོས་ཉིད་ཉན་པར་བྱེད། །བརྒྱན་པའི་དཔལ་ནི་རྣམ་ཐར་འདི་ལ་འཇུག །འགྲོ་བ་རྒྱ་མཚོའི་སེམས་ནི་བསམ་མི་ཁྱབ། །གནས་མེད་གཡོ་བ་མེད་ཅིང་རྟེན་པ་མེད། །ཐམས་ཅད་སྐད་ཅིག་གཅིག་ལ་རྒྱལ་བས་མཁྱེན། །དགའ་བ་སྣ་ཚོགས་དགའ་བར་འདི་མཐོང་ངོ་། །དེ་ལ་ལྷའི་རྒྱལ་པོ་རབ་མཚེ་མའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་མྱ་ངན་བསལ་བ་དགེ་བའི་སྒོ་ཡང་དག་པར་འབྱུང་བ་ཞེས་བྱའོ། །ལྷའི་བུ་དགའ་བ་བདེ་བའི་འོད་ཀྱི་རྣམ་པར་ཐར་པ་ནི། དམིགས་པ་ཐམས་ཅད་ཁྱབ་པར་བྱེད་པའི་ཡུལ་ཞེས་བྱའོ། །ལྷའི་བུ་བློ་གྲོས་མི་ཟད་པའི་ཡོན་ཏན་དཔལ་གྱི་རྣམ་པར་ཐར་པ་ནི། ནད་ཐམས་ཅད་རྣམ་པར་སེལ་ཅིང་ཕན་པར་སྙིང་རྗེ་བའི་དཀྱིལ་འཁོར་ཅེས་བྱའོ། །ལྷའི་བུ་འཕྲུལ་པ་བཟང་ཞིང་དགེ་བའི་རྣམ་པར་ཐར་པ་ནི། བུད་མེད་ཐམས་ཅད་འདུལ་བའི་བསམ་པ་རྗེས་སུ་རྟོགས་པའི་ཚུལ་ལ་འཇུག་པ་ཞེས་བྱའོ། །ལྷའི་བུ་ས་དང་རི་བོའི་འོད་ཀྱི་རྣམ་པར་ཐར་པ་ནི། ཆོས་ཐམས་ཅད་གཟུང་བ་ལ་རྨོངས་པ་མེད་པའི་གཟུངས་ཀྱི་སྒོ་བདེ་བར་སྣང་བ་ཞེས་བྱའོ། །ལྷའི་བུ་བསམ་གྱིས་མི་ཁྱབ་པའི་བློ་གྲོས་ཀྱི་རྣམ་པར་ཐར་པ་ནི། དམིགས་པའི་ཡུལ་ཐམས་ཅད་ལས་ཀྱི་རང་བཞིན་བསམ་གྱིས་མི་ཁྱབ་པའི་ཚུལ་ལ་འཇུག་པ་ཞེས་བྱའོ། །ལྷའི་བུ་འཁོར་ལོའི་གཙུག་གི་རྣམ་པར་ཐར་པ་ནི། ཆོས་ཀྱི་འཁོར་ལོའི་ཤུགས་ཀྱིས་སེམས་ཅན་ཡོངས་སུ་སྨིན་པར་བྱ་བ་བགྲང་བའི་ཚུལ་ལ་འཇུག་པ་ཞེས་བྱའོ། །ལྷའི་བུ་གཟི་བརྗིད་འོད་འཕྲོའི་རྣམ་པར་ཐར་པ་ནི། ཁམས་ཐམས་ཅད་ཀྱི་མཐར་འགྲོ་བས་མིག་ཤིན་ཏུ་ཡངས་པའི་དཀྱིལ་འཁོར་གྱིས་ཀུན་ཏུ་བལྟ་བ་ཞེས་བྱའོ། །ལྷའི་བུ་འོད་རྣམ་པར་སྣང་བའི་རྣམ་པར་ཐར་པ་ནི། ལས་ཀྱི་དམིགས་པ་དང་འགྲོགས་པའི་བདུད་ཀྱི་ལས་ཐམས་ཅད་ཟློག་པ་ཞེས་བྱའོ། །ལྷའི་བུ་གྲགས་པའི་ཕྱོགས་སུ་རྣམ་པར་ལྟ་བའི་རྣམ་པར་ཐར་པ་ནི། ལྷའི་གནས་
ཐམས་ཅད་ཀྱི་འཁོར་དུ་དགོས་པ་མྱོང་བར་བྱ་བ་ལ་སེམས་རབ་ཏུ་དང་བ་ཞེས་བྱའོ། །དེ་ནས་ལྷའི་རྒྱལ་པོ་རབ་མཚེ་མས་སངས་རྒྱས་ཀྱི་མཐུས་རབ་མཚེ་མའི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། བསྐལ་པ་རྒྱ་མཚོ་ཡངས་པ་རྒྱ་ཆེན་དུ། །འགྲོ་བའི་ཉོན་མོངས་རྒྱ་མཚོ་ཡོངས་སྦྱངས་པའི། །དྲི་མེད་ལམ་ནི་ཡེ་ཤེས་དཀྱིལ་འཁོར་རྣམས། །ཡང་དག་བརྙེས་པའི་སྒྲོན་མས་རབ་ཏུ་བསྟན། །རྒྱལ་བའི་སྐུ་ནི་མཐའ་ཡས་རྒྱ་ཆེ་སྟེ། །ཕྱོགས་བཅུར་མུ་མཐའ་རྙེད་པར་ཡོངས་མི་རུང་། །ཚུལ་རྣམས་ཀུན་གྱིས་སངས་རྒྱས་ཚད་མེད་དེ། །དེ་ལ་དགའ་བ་བདེ་བའི་འོད་འཇུག་གོ །ནད་དང་རྒ་བ་འཆི་བ་མྱ་ངན་གྱིས། །འཇིག་རྟེན་གཙེས་ཤིང་རབ་ཏུ་གདུང་བ་རྣམས། །དེ་དག་ཀུན་ལ་ཐུགས་རྗེའི་དཀྱིལ་འཁོར་ཅན། །སངས་རྒྱས་བློ་གྲོས་ཟད་པ་མེད་པས་མཐོང་། །ཡེ་ཤེས་སྒྱུ་མ་སངས་རྒྱས་ཐུགས་སུ་ཆུད། །དུས་གསུམ་ཀུན་ལ་ཆགས་པ་མི་མངའ་སྟེ། །འགྲོ་བ་ཐམས་ཅད་སྤྱོད་པ་རབ་ཏུ་མཁྱེན། །འདི་ནི་འཕྲུལ་པ་དགེ་བའི་སྤྱོད་ཡུལ་ལོ། །སངས་རྒྱས་དབུས་དང་མཐའ་མེད་གཟུགས་རྣམས་དང་། །ཐ་དད་ཡང་དག་ཤེས་པ་རྒྱ་མཚོ་གསུང་། །ཆོས་ཀྱི་འཁོར་ལོ་ཡང་དག་རབ་ཏུ་བསྐོར། །འདི་ནི་ས་ཡི་རི་འོད་རྣམ་ཐར་ཏོ། །སངས་རྒྱས་ཆོས་ཀྱི་རང་བཞིན་རྒྱ་ཆེན་སྟོན། །ཆོས་རྣམས་ཐུགས་སུ་ཆུད་པས་རྣམ་པར་དག །ཐམས་ཅད་ཆོས་ཀྱི་ཡུལ་ནི་བསམ་ཡས་ཏེ། །བློ་གྲོས་བསམ་ཡས་ཚུལ་ལས་འདི་ཡིན་ནོ། །སེམས་ཅན་ཐམས་ཅད་སྡུག་བསྔལ་ཞི་བྱེད་པའི། །བསམ་གྱིས་མི་ཁྱབ་ཚུལ་གྱི་འཁོར་ལོ་བསྐོར། །བྱང་ཆུབ་སྤྱོད་པ་རྒྱ་ཆེན་རྣམས་ཀྱང་སྟོན། །འཁོར་ལོ་ལྟ་བ་འདི་ཡི་ས་ལ་འཇུག །རྒྱལ་བའི་སྐུ་ནི་སེམས་ཅན་གྲངས་བཞིན་དུ། །སྤྲུལ་པས་འཇིག་རྟེན་ཡོངས་སུ་ཁྱབ་མཛད་དེ། །འགྲོ་བ་ཀུན་ལ་མངོན་པར་ཀུན་ན་གནས། །གཟི་བརྗིད་འོད་འཕྲོའི་སྤྱོད་ཡུལ་འདི་ཡིན་ནོ། །སངས་རྒྱས་མཐོང་བ་ཙམ་གྱིས་འགྲོ་བ་ཡི། །ལས་ཀྱི་སྒྲིབ་པ་ཐམས་ཅད་
བཟློག་པར་འགྱུར། །བདུད་ཀྱི་ལས་རྣམས་ཀུན་ཀྱང་དེ་བཞིན་སྤོང་། །རྣམ་སྣང་འོད་ཀྱི་སྤྱོད་ཡུལ་འདི་ཡིན་ནོ། །རྒྱ་མཚོའི་འཁོར་རྣམས་ཐམས་ཅད་ཀུན་ཏུ་ཡང་། །རྒྱལ་བ་བཞུགས་པས་མངོན་པར་རབ་ཏུ་མཛེས། །ཆོས་ཀྱི་སྤྲིན་ཆེན་ཆར་ཡང་རབ་འབེབས་ཏེ། །གྲགས་པ་ཀུན་ཏུ་གྲགས་པའི་རྣམ་ཐར་ཏོ། །དེ་ལ་ལྷའི་དབང་པོ་བརྒྱ་བྱིན་གྱི་རྣམ་པར་ཐར་པ་ནི། དུས་གསུམ་དུ་གཤེགས་པའི་དེ་བཞིན་གཤེགས་པ་སྐྱེ་བ་འབྱུང་བ་དང་། རྣམ་པར་འཇིག་པ་རྒྱ་ཆེན་པོ་རྗེས་སུ་དྲན་པ་ཡིད་ལ་བྱ་བ་དགའ་བ་ཆེན་པོའི་ཤུགས་ཤེས་བྱའོ། །ལྷའི་བུ་སྒྲ་ཀུན་ཏུ་གྲགས་པའི་དབང་ཕྱུག་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་གཟུགས་དེ་བཞིན་གཤེགས་པའི་གཟུགས་ཀྱི་སྐུའི་ཡོན་ཏན་ཏུ་ཡོངས་སུ་སྤྱོད་པའི་ཤུགས་ཀྱི་སྙིང་པོ་ཞེས་བྱའོ། །ལྷའི་བུ་བྱམས་པར་ལྟ་བའི་གཙུག་ཕུད་ཀྱི་རྣམ་པར་ཐར་པ་ནི། བྱམས་པའི་སྤྲིན་གྱིས་ཀུན་ཏུ་ཁེབས་པར་བྱེད་པའི་བྱིན་གྱི་རླབས་ཀྱིས་ཁྱབ་པར་བྱེད་པ་ཞེས་བྱའོ། །ལྷའི་བུ་རིན་པོ་ཆེའི་འོད་ཀུན་ཏུ་གྲགས་པའི་རྒྱལ་མཚན་གྱི་རྣམ་པར་ཐར་པ་ནི། འཇིག་རྟེན་ཐམས་ཅད་ཀྱི་ཡོན་ཏན་དང་། མཐུ་དང་སེམས་ཅན་གྱི་རྣམ་པ་སངས་རྒྱས་རྗེས་སུ་དྲན་པའི་སྒོ་ཀུན་ནས་འཇུག་པ་ཞེས་བྱའོ། །ལྷའི་བུ་དགའ་བདེ་འབྱུང་བའི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་གཞལ་མེད་ཁང་རྣམ་པར་བལྟ་བའི་བསོད་ནམས་ཡང་དག་པར་འབྱུང་བའི་བྱིན་གྱིས་རླབས་ཤེས་བྱའོ། །ལྷའི་བུ་དྲན་པ་ཡིད་དུ་འོང་བའི་རྣམ་པར་ཐར་པ་ནི། སངས་རྒྱས་སྐྱེ་བ་འབྱུང་བ་དང་སེམས་ཅན་ཡོངས་སུ་སྨིན་པར་བྱ་བ་རྗེས་སུ་དྲན་པ་རྣམ་པར་སྒོམ་པ་ཞེས་བྱའོ། །ལྷའི་བུ་རི་བོའི་སྒྲའི་དཔལ་གྱི་རྣམ་པར་ཐར་པ་ནི། འཇིག་རྟེན་འཇིག་པ་དང་། འདུ་བ་དང་བསྐལ་པའི་མེ་ཡོངས་སུ་འཕོ་བའི་ཡེ་ཤེས་ཀྱི་རྒྱན་ཅེས་བྱའོ། །ལྷའི་བུ་དྲན་པ་དང་ལྡན་པའི་རྣམ་པར་ཐར་པ་ནི། མ་འོངས་པའི་བྱང་ཆུབ་སེམས་དཔའི་སྤྱོད་པ་འབྱུང་བ་སེམས་ཅན་གདུལ་བའི་རྒྱུ་དྲན་པའི་རིམ་
པ་ཞེས་བྱའོ། །ལྷའི་བུ་མེ་ཏོག་དྲི་མ་མེད་ཅིང་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། ལྷའི་བུ་དགའ་བ་ཐམས་ཅད་ལ་རྩེ་བ་རྗེས་སུ་དྲན་པའི་རིམ་པ་ཞེས་བྱའོ། །ལྷའི་བུ་ཡེ་ཤེས་ཉི་མའི་མིག་གི་རྣམ་པར་ཐར་པ་ནི། ལྷའི་བུ་ཐམས་ཅད་སྐྱེ་བར་རབ་ཏུ་བརྗོད་པའི་དགེ་བ་ལ་རྨོངས་པ་མེད་པ་ཞེས་བྱའོ། །ལྷའི་བུ་ཡང་དག་པར་བསྐུལ་བའི་འོད་ཀྱི་དབང་ཕྱུག་གི་རྣམ་པར་ཐར་པ་ནི། ལྷའི་འཁོར་ཐམས་ཅད་ཡང་དག་པར་བསྐུལ་ཞིང་ཕན་ཚུན་དོགས་པའི་ཐེ་ཙོམ་རྣམ་པར་གདོན་མི་ཟ་བར་གཅོད་པ་ཞེས་བྱའོ། །དེ་ནས་ལྷའི་དབང་པོ་བརྒྱ་བྱིན་གྱིས་སངས་རྒྱས་ཀྱི་མཐུས་སུམ་ཅུ་རྩ་གསུམ་པའི་རིས་ཀྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དུས་གསུམ་བདེ་བར་གཤེགས་པ་ཐམས་ཅད་དང་། །དེ་དག་སྤྱོད་ཡུལ་རྒྱ་ཆེན་དེ་དག་དང་། །དེ་དག་ཞིང་འབྱུང་འཇིག་པ་ཇི་བཞིན་དྲན། །རྒྱལ་བའི་མཐུ་ཡིས་དེ་དག་དྲི་མེད་སྣང་། །སངས་རྒྱས་སྐུ་མང་ཕྱོགས་སུ་རྒྱས་བྱས་ཤིང་། །མཉམ་མེད་གཟུགས་ཀུན་འགྲོ་ལ་ཕན་པའི་ཕྱིར། །རྒྱལ་བ་ཀུན་ནས་ལྷམ་མེ་ལྷང་ངེ་སྟེ། །གྲགས་པའི་དཀྱིལ་འཁོར་འོད་ཀྱིས་འདི་མཐོང་ངོ་། །བྱམས་པ་རྒྱ་མཚོའི་ཚུལ་ནི་རྒྱ་ཆེ་ཞིང་། །ཤིན་ཏུ་ཡངས་པས་འགྲོ་བ་ཀུན་བཀང་ནས། །སྔོན་བསྒོམས་སེམས་ཅན་མཐའ་ཡས་ཁམས་ཀྱང་བཏུལ། །དྲི་མེད་མིག་གི་གཙུག་ཕུད་འདི་མཐོང་ངོ་། །བདེ་གཤེགས་ཡོན་ཏན་རྒྱ་མཚོ་དེ་དྲན་པས། །བདག་གི་དགའ་བ་ཡང་དག་འབྱུང་སྐྱེས་ཏེ། །སངས་རྒྱས་འཇིག་རྟེན་ཀུན་ན་མཉམ་མེད་མཆོག །འདི་ནི་གྲགས་རྒྱལ་དྲི་མེད་རྣམ་ཐར་ཏོ། །ལས་དགེ་རྒྱ་མཚོས་འགྲོ་བ་ཀུན་བཀང་ཞིང་། །དྲི་མེད་མ་ལུས་རྒྱལ་བས་བསྟན་པ་མཛད། ། དེ་ལས་བསོད་ནམས་ཡངས་པ་ཀུན་བྱུང་སྟེ། །དགའ་བདེ་གཙུག་ཕུད་ཚུལ་ནི་འདི་ཡིན་ནོ། །སངས་རྒྱས་སྐྱེ་བ་ཡངས་པས་ཕྱོགས་བཀང་ཞིང་། །བདེ་གཤེགས་འགྲོ་བ་རྒྱས་པས་མངོན་ཏུ་འགྱུར། །དེ་དག་རྒྱ་ཆེན་སེམས་ཅན་འདུལ་ལ་ལྟོས། །དེ་ཡི་ཚུལ་ལ་དྲན་པའི་རྒྱན་
འཇུག་གོ། །བདེ་གཤེགས་ཡེ་ཤེས་སྐུ་མངའ་སྤྱན་ཡངས་པ། །འབྱམ་ཀླས་ཞིང་རྣམས་ཐམས་ཅད་ཀུན་བཞུགས་པ། །འབྱམ་ཀླས་ཞིང་གི་རྡུལ་ལ་ཀུན་ཀྱང་བསྟན། །རྣམ་ཐར་འདི་ལ་སྤྲིན་གྱི་དབྱངས་འཇུག་གོ །རྒྱལ་བའི་སྲས་ཀྱི་བྱང་ཆུབ་སྤྱོད་པ་དག །ཇི་བཞིན་ཡངས་པ་སྤུ་ཡི་རྩེ་མོ་ལ། །རྒྱལ་བས་དེ་དག་ཚད་མེད་ཕུན་སུམ་བསྟན། །དྲན་པའི་བློ་གྲོས་འདི་ཡི་ཚུལ་མཐོང་ངོ་། །འགྲོ་བ་འདི་ན་རྩེ་དགའ་གང་བདེ་བ། །དེ་དག་ཐམས་ཅད་རྒྱལ་བའི་མཐུ་ཡིས་བྱུང་། །བསོད་ནམས་མཉམ་མེད་རྒྱལ་བ་བྱུང་ལ་ལྟོས། །འདི་ནི་མེ་ཏོག་སྣ་ཚོགས་དྲི་མེད་ཀྱིའོ། །སེམས་གཅིག་རྒྱུད་ལ་རྒྱལ་བའི་ཡོན་ཏན་གྱི། །བདེ་གཤེགས་ཤིན་ཏུ་རྒྱ་ཆེན་སུས་དྲན་པ། །དེ་ལ་ངན་སོང་ཀུན་གྱི་འཇིགས་པ་མེད། །ཡེ་ཤེས་ཉི་མའི་མིག་གི་རྣམ་ཐར་ཏོ། །རྒྱལ་བའི་རྫུ་འཕྲུལ་ཆོས་ཉིད་རྒྱ་ཆེ་ཞིང་། །བསམ་པའི་ལས་རྣམས་ཐམས་ཅད་ཀུན་ནས་གནས། །དེ་དག་ཐེ་ཙོམ་ནེམ་ནུར་ཐམས་ཅད་སེལ། །རྣམ་ཐར་འདི་ནི་བརྗོད་དབང་བློ་གྲོས་ཀྱིའོ། །དེ་ལ་ལྷའི་བུ་ཟླ་བའི་རྣམ་པར་ཐར་པ་ནི། འགྲོ་བ་ཐམས་ཅད་བསྡུ་ཞིང་རྣམ་པར་གདུལ་བའི་སྣང་བས་ཆོས་ཀྱི་དབྱིངས་ཀུན་ནས་དྲི་མ་མེད་པའི་དཀྱིལ་འཁོར་ཅེས་བྱའོ། །ལྷའི་བུ་འོད་ཀྱི་མེ་ཏོག་རྒྱལ་པོའི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཡུལ་རྣམ་པར་ལྟ་བ་དང་། མཐའ་ཡས་པའི་ཆོས་འབྱམ་ཀླས་པ་ལ་ཡང་དག་པར་འཇུག་པ་ཞེས་བྱའོ། །ལྷའི་བུ་དཔལ་གྱི་ཚོགས་སྣ་ཚོགས་ཀྱི་རྒྱན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སེམས་རྒྱ་མཚོ་ཡོངས་སུ་བཟློག་ཅིང་ཕན་ཚུན་གྱི་ཡུལ་དང་དམིགས་པ་ལ་ཡང་དག་པར་སྤྱོད་པ་ཞེས་བྱའོ། །ལྷའི་བུ་འཇིག་རྟེན་པའི་བདེ་བ་སྣ་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་བདེ་བ་བསམ་གྱིས་མི་ཁྱབ་པ་དང་། དགའ་བ་དང་རངས་པ་རྒྱ་ཆེན་པོ་སྐྱེད་པ་ཞེས་བྱའོ། །ལྷའི་བུ་ཤིང་གི་དབང་པོའི་མིག་གི་འོད་ཀྱི་རྣམ་པར་ཐར་པ་ནི། ལོ་ཏོག་ཐམས་ཅད་ཀྱི་མྱུ་གུ་
དང་ས་བོན་སྲུང་བ་དང་། དུས་ཡོངས་སུ་བསྒྱུར་བ་ཡང་དག་པར་སྟོན་པ་ཞེས་བྱའོ། །ལྷའི་བུ་འོད་བཟང་པོ་སྟོན་པའི་རྣམ་པར་ཐར་པ་ནི། འགྲོ་བ་ཐམས་ཅད་བདེ་བ་དང་སྡུག་བསྔལ་གྱི་ཚོར་བ་མྱོང་བ་ལ་བྱམས་པ་དང་། སྙིང་རྗེའི་སྒོས་ཡོངས་སུ་སྐྱོབ་པ་ཞེས་བྱའོ། །ལྷའི་བུ་ཀུན་ནས་སྤྱོད་པ་མི་སྒུལ་བའི་འོད་ཀྱི་རྣམ་པར་ཐར་པ་ནི། ཟླ་བ་དྲི་མ་མེད་པ་འཛིན་ཅིང་སྤྱོད་པས་ཕྱོགས་ཡོངས་སུ་འདུས་པ་ཞེས་བྱའོ། །ལྷའི་བུ་སྐར་མའི་རྒྱལ་པོའི་བདག་པོའི་རྣམ་པར་ཐར་པ་ནི། ཆོས་ཐམས་ཅད་སྒྱུ་མ་ལྟ་བུ་ནམ་མཁའི་རང་བཞིན་ལྟར་དངོས་པོ་མེད་པ་མཚན་ཉིད་མེད་པ་ཞེས་བྱའོ། །ལྷའི་བུ་བློ་དྲི་མ་མེད་པའི་ཟླ་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྐྱེ་བ་ཀུན་ཀྱང་ལས་ཀྱི་རང་བཞིན་དུ་ཡང་དག་པར་འཇུག་པ་ཞེས་བྱའོ། །ལྷའི་བུ་གཟི་བརྗིད་ཆེན་པོའི་འོད་ཟེར་མཛེས་པའི་རྣམ་པར་ཐར་པ་ནི། ལྷའི་དགོས་པ་ཐམས་ཅད་ལ་ཐེ་ཙོམ་ཡང་དག་པར་གཅོད་པ་བརྗོད་པ་ལ་འཇུག་པ་ཞེས་བྱའོ། །དེ་ནས་ལྷའི་བུ་ཟླ་བས་སངས་རྒྱས་ཀྱི་མཐུས་ཟླ་བའི་གཞལ་མེད་ཁང་དུ་གཏོགས་པའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འགྲོ་བ་ཐམས་ཅད་ཀུན་ཏུ་འོད་བཀྱེ་ཞིང་། །ཕྱོགས་བཅུའི་ཞིང་རྣམས་ཀུན་ཏུ་སངས་རྒྱས་སྣང་། །མུན་པ་ཆེན་པོས་རྨོངས་པའི་འཇིག་རྟེན་དུ། །བསམ་ཡས་རྒྱ་ཆེན་ཆོས་ཀྱི་སྣང་བ་འགྱེད། །སངས་རྒྱས་ཡུལ་ནི་མི་ཟད་མཐའ་ཡས་ཏེ། །འགྲོ་བ་འདིར་ནི་མཚུངས་མེད་བསྐལ་པར་འཇུག །རང་བྱུང་དེ་དག་སེམས་ཅན་ཀུན་ལ་མངོན། །རྒྱལ་བ་དེ་ལྟར་སྣང་བའི་གཙུག་གིས་མཐོང་། །རྒྱལ་བའི་ཡེ་ཤེས་རྒྱ་ཆེན་དེ་ལ་ལྟོས། །སེམས་ཀྱི་རྒྱ་མཚོ་ཚད་མེད་སྐད་ཅིག་ལ། །ཆོས་ཀྱི་འཁོར་ལོས་ཐམས་ཅད་ཚིམ་པར་མཛད། །ཆུ་བོ་དཔལ་གྱི་རྣམ་ཐར་འདི་ཡིན་ནོ། །འཕགས་པའི་བདེ་བ་མེད་པའི་འཇིག་རྟེན་རྣམས། །མཐའ་ཡས་སྡུག་བསྔལ་ཉམ་ངས་རྨོངས་པ་ལ། །རྒྱལ་བ་ཆོས་ཉིད་རྣམ་པར་དག་པ་སྟོན། །དགའ་བདེ་སེམས་དཔས་རྣམ་ཐར་འདི་མཐོང་ངོ་། །རྒྱལ་
བའི་ཐུགས་རྗེ་རྣམ་དག་ངོ་མཚར་ཆེ། །སྲིད་པའི་རྒྱུད་དུ་འགྲོ་ལ་ཕན་ཕྱིར་འཁོད། །དགེ་བ་རྣམ་པར་མི་འཇིག་སྟོན་མཛད་དེ། །ཤིང་གི་མིག་གི་འོད་ཀྱིས་འདི་མཐོང་ངོ་། །རྒྱལ་བའི་ཆོས་ཀྱིས་འོད་རྣམས་རབ་བཀྱེ་བ། །འཇིག་རྟེན་ལས་ཀྱི་རང་བཞིན་རྣམ་པར་འབྱེད། །དགེ་དང་མི་དགེའི་ལས་རྣམས་འཇིག་པ་མྱེད། །འོད་བཟང་མཐོང་བ་རྣམ་ཐར་འདི་ལ་འཇུག །འཇིག་རྟེན་ཀུན་ཏུ་རང་བྱུང་ས་ལྟ་བུ། །སེམས་ཅན་ཐམས་ཅད་བསོད་ནམས་གཞིས་བཟུང་ཞིང་། །ཆོས་ཀྱི་ཕྱོགས་རྣམས་མྱ་ངན་མེད་པ་སྟོན། །སྤྱོད་པ་མི་སྒུལ་ཚུལ་ནི་འདི་ཡིན་ནོ། །ཆོས་དབྱིངས་ཐུག་པ་མེད་པར་རྒྱལ་བས་ཁྱབ། །འགྲོ་དང་མཉམ་པར་བསམ་ཡས་སྐུ་བཀྱེ་སྟེ། །ཆོས་ཀྱི་ཚུལ་ནི་སེམས་ཅན་ཀུན་ལ་སྟོན། །དེ་ཡི་ཚུལ་ལ་གཟི་བརྗིད་བདག་པོ་འཇུག །ནམ་མཁའི་དངོས་ལྟར་དངོས་མེད་འགྲོ་བ་ན། །གཟུགས་བརྙན་མཉམ་པའི་སངས་རྒྱས་རྣམས་སྣང་བ། །འགྲོ་བ་ཀུན་ལ་ཕན་པའི་དོན་ཏུ་བྱུང་། །དགེ་བའི་དཔལ་གྱིས་རྣམ་ཐར་འདི་མཐོང་ངོ་། །སངས་རྒྱས་སྐུ་ཡི་སྤུ་རྩེ་ཀུན་ནས་ཀྱང་། ། འགྲོ་བ་ཀུན་ལ་ཆོས་སྤྲིན་མ་ལུས་གསུང་། །ཐོས་ནས་དགའ་བ་རྒྱ་ཆེན་རབ་ཏུ་བསྐྱེད། །རྣམ་ཐར་འདི་ལ་དག་པའི་སེམས་འཇུག་གོ །དེ་ལ་ལྷའི་བུ་ཉི་མའི་རྣམ་པར་ཐར་པ་ནི། སེམས་ཅན་གྱི་དགོས་པ་ཐམས་ཅད་ལ་ཕྱི་མའི་མཐར་ཐུག་པའི་བསྐལ་པ་དྲི་མ་མྱེད་པའི་སྣང་བས་ཕྱོགས་བཅུ་རྒྱས་པར་བྱེད་པའི་རྒྱན་ཅེས་བྱའོ། །ལྷའི་བུ་གཟི་བརྗིད་ཀྱི་འོད་ཟེར་འབར་བའི་མིག་གི་རྣམ་པར་ཐར་པ་ནི། སེམས་ཅན་ཀུན་ལ་དབང་བསྒྱུར་བ། རྗེས་སུ་བསྙགས་པའི་ཡོངས་སུ་སྦྱངས་པས། ཤིན་ཏུ་འཕགས་པ་ཞེས་བྱའོ། །ལྷའི་བུ་རི་བོའི་རྒྱལ་མཚན་གྱི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དབང་བསྒྱུར་བའི་ཡོན་ཏན་མཐའ་ཡས་པ་ཡོངས་སུ་སྦྱོང་བས་ཤིན་ཏུ་འཕགས་པ་ཞེས་བྱའོ། །ལྷའི་བུ་རིན་ཆེན་དྲི་མེད་རྨད་དུ་བྱུང་བའི་རྣམ་པར་ཐར་པ་ནི། བརྟུལ་ཞུགས་དང་དཀའ་ཐུབ་ཐམས་ཅད་ལ་བདེ་བར་འཇུག་པ་ཞེས་བྱའོ། །ལྷའི་བུ་
ཕྱིར་མི་ལྡོག་པར་རབ་ཏུ་གནོན་པའི་རྣམ་པར་ཐར་པ་ནི། ཉི་མའི་འོད་ཆགས་པ་མེད་པས་ཀུན་ཏུ་རྒྱས་པར་བྱེད་ཅིང་འགྲོ་བ་ཐམས་ཅད་ཀྱི་མདངས་ཡང་དག་པར་འབྱུང་བ་ཞེས་བྱའོ། །ལྷའི་བུ་མེ་ཏོག་ཕྲེང་བའི་འོད་ཀྱི་དཔལ་གྱི་རྣམ་པར་ཐར་པ་ནི། ཉི་མའི་འོད་དྲི་མ་མེད་པས་སེམས་ཅན་གྱི་དགོས་པ་ལ་སྣང་བ་རྒྱ་ཆེན་པོ་དང་དགའ་བའི་ཤུགས་དང་མོས་པ་རྒྱ་མཚོ་ཡང་དག་པར་འབྱུང་བ་ཞེས་བྱའོ། །ལྷའི་བུ་འོད་ཀྱི་དཔལ་སྣང་བའི་རྒྱལ་མཚན་གྱི་རྣམ་པར་ཐར་པ་ནི། འཇིག་རྟེན་ཐམས་ཅད་ཀྱི་འོད་རྣམ་པ་སྣ་ཚོགས་བསོད་ནམས་ཀྱི་ཚོགས། རྣམ་པ་ཐ་དད་པས་ཡང་དག་པར་བསྒྲུབ་པ་ཞེས་བྱའོ། །ལྷའི་བུ་རིན་ཆེན་གཙུག་ཕུད་རྣམ་པར་སྣང་བའི་རྣམ་པར་ཐར་པ་ནི། རྒྱ་མཚོའི་དབྱིངས་སུ་རིན་པོ་ཆེ་སྣ་ཚོགས་ཐམས་ཅད་འགྲེམས་ཤིང་ཡུལ་དུ་མའི་གཟུགས་ཡང་དག་པར་སྟོན་པ་ཞེས་བྱའོ། །ལྷའི་བུ་མིག་ཀུན་ཏུ་སྣང་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མིག་གི་དབང་པོ་ཡོངས་སུ་སྦྱོང་ཞིང་རྣམ་པར་ལྟ་བའི་ཆོས་ཀྱི་དབྱིངས་ཀྱི་སྙིང་པོ་ཞེས་བྱའོ། །ལྷའི་བུ་དཔལ་གྱི་བེའུ་འཛིན་པའི་རྣམ་པར་ཐར་པ་ནི། ཆུའི་རྒྱུད་ཐམས་ཅད་ཡོངས་སུ་སྦྱོང་ཞིང་རྣམ་པར་འཇིག་པ་མེད་པ་འབྱུང་བ་ཞེས་བྱའོ། །ལྷའི་བུ་སྒོ་ཐམས་ཅད་སྐྱོམ་པའི་དཔལ་གྱི་འོད་ཀྱི་རྣམ་པར་ཐར་པ་ནི། ཉི་མའི་གཞལ་མེད་ཁང་གིས་ཕྱོགས་སུ་འཇུག་པ་དང་། སེམས་ཅན་ཐམས་ཅད་ཀྱི་དགོས་པ་ལ་སྣང་བ་ཡོངས་སུ་སྐྱོབ་པ་ཞེས་བྱའོ། །དེ་ནས་ལྷའི་བུ་ཉི་མས་སངས་རྒྱས་ཀྱི་མཐུས་ཉི་མའི་རིས་སུ་གཏོགས་པའི་ལྷའི་བུའི་འཁོར་དུ་གཏོགས་པའི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བདེ་གཤེགས་ཡེ་ཤེས་ཤིན་ཏུ་ཡངས་པའི་འོད། །ཕྱོགས་རྣམས་ཀུན་ཏུ་ཐམས་ཅད་ཞིང་བཀང་ཞིང་། །འགྲོ་བ་ཐམས་ཅད་སངས་རྒྱས་མངོན་བསྟན་ཏེ། །ཐབས་ཀྱི་སྒོ་ནས་སེམས་ཅན་རྣམ་པར་འདུལ། །རྒྱལ་བའི་ཡོན་ཏན་རྒྱ་མཚོ་རྣམས་ཡངས་པ། །བསམ་པ་ཐམས་ཅད་ཡོངས་སུ་བཀང་བསྟན་ཞིང་། །འགྲོ་བ་འདིར་ནི་ཤེས་
རབ་མཉམ་མེད་བརྗོད། །གཟི་བརྗིད་འོད་ཀྱིས་རྣམ་ཐར་འདི་མཐོང་ངོ་། །རྒྱལ་བ་སངས་རྒྱས་ཀུན་ཏུ་རབ་འཕགས་པ། །ཕྱོགས་རྣམས་རྒྱས་པར་ཀུན་ནས་མཛེས་ཤིང་སྣང་། །རྒྱལ་བའི་སྐུ་ནི་མི་མཉམ་དཔག་ཏུ་མེད། །རི་རབ་འོད་མཆོག་རྣམ་ཐར་འདི་ཡིན་ནོ། །མཐའ་ཡས་སྲིད་པར་བསྐལ་པ་རྒྱ་མཚོར་ཡང་། །རྒྱལ་བས་འགྲོ་དོན་བརྟུལ་ཞུགས་སྤྱད་པས་ན། །དེ་ཕྱིར་སངས་རྒྱས་འོད་ནི་ནམ་མཁའ་བཞིན། །ཟླ་བའི་དཔལ་གྱིས་རྒྱལ་བའི་སྐུ་མཐོང་ངོ་། །རྒྱལ་བའི་གསུང་མཆོག་ཆགས་མེད་རྣམ་གྲོལ་བས། །ཕྱོགས་དང་ཞིང་རྣམས་ཐམས་ཅད་མ་ལུས་རྒྱན། །འགྲོ་བར་ཆོས་ཀྱི་རོ་རྣམས་བསགས་པའི་རྒྱུ། །འདི་དག་བརྩོན་འགྲུས་བཟང་པོས་རབ་ཏུ་ཤེས། །འོད་ཀྱི་དྲ་བ་བསམ་ཡས་བཏང་བས་ན། །ཕྱོགས་རྣམས་ཀུན་ཏུ་སེམས་ཅན་རྣམ་པར་སྤྱོད། །མོས་པ་རྒྱ་ཆེན་ཡངས་པ་རབ་ཏུ་བསྐྱེད། །ཕྲེང་བ་སྣང་བའི་དཔལ་གྱི་རྣམ་ཐར་ཏོ། །འགྲོ་བ་དག་ན་ཇི་སྙེད་འོད་ཡོད་པ། །དེ་དག་རྒྱལ་བའི་སྤུ་གཅིག་དཔེར་མི་རུང་། །སངས་རྒྱས་འོད་རྣམས་དེ་ལྟར་བསམ་མི་ཁྱབ། །འདི་ནི་སྣང་བའི་འོད་ཀྱི་རྣམ་ཐར་ཏོ། །རྒྱལ་བ་ཀུན་གྱི་ཆོས་ཉིད་འདི་འདྲ་སྟེ། །ཐམས་ཅད་ཕྱོགས་སུ་བྱང་ཆུབ་ཤིང་དབང་དྲུང་། །ལམ་ངན་སོང་ལ་ལམ་རྣམས་མངོན་དུ་སྟོན། །གཙུག་ཕུད་སྣ་ཚོགས་རྣམ་པར་སྣང་བས་མཐོང་། །འགྲོ་བ་གཏི་མུག་མུན་པར་ནུབ་གྱུར་པ། །སྡུག་བསྔལ་ཅན་ལ་རྒྱལ་བ་མིག་སྐྱེས་ཤིང་། །དེ་དག་ཡེ་ཤེས་སྒྲོན་མས་རབ་ཏུ་བསྟན། །རྣམ་ཐར་འདི་ནི་མིག་བཟང་སྣང་བས་མཐོང་། །ཐམས་ཅད་ཚུལ་གྱིས་རྣམ་ཐར་རང་བྱུང་བ། །གང་དུ་གང་ཚེ་མཆོད་པ་གཟིགས་པ་ན། །ཐར་པའི་འབྲས་བུ་རིམ་གྱིས་རབ་ཏུ་སྟོན། །འདི་ནི་སྣང་བའི་དཔལ་གྱི་ཚུལ་དང་ས། །ཆོས་རྣམས་གཅིག་གི་སྒོ་ནས་མཐའ་ཡས་པའི། །བསྐལ་པ་སྟོང་དུ་མི་མགོན་རབ་ཏུ་སྣང་། །ཆོས་ཀྱི་དོན་ཡངས་ཕྱོགས་རྣམས་ཀུན་ཏུ་སྟོན། །འདི་ནི་ཀུན་ཏུ་དཔལ་གྱི་རྣམ་ཐར་ཏོ། །དེ་ལ་དྲི་
ཟའི་རྒྱལ་པོ་གནས་སྲུང་པོའི་རྣམ་པར་ཐར་པ་ནི། ཀུན་ཏུ་རྩེ་བའི་ཐབས་ཐམས་ཅད་ཀྱིས་སེམས་ཅན་སྡུད་པའི་སྤྱོད་པ་ཞེས་བྱའོ། །དྲི་ཟའི་དབང་པོ་ཤིང་མི་འམ་ཅིའི་འོད་ཀྱི་རྣམ་པར་ཐར་པ་ནི། ཆགས་པ་ཐམས་ཅད་ཀྱི་ཡོན་ཏན་རྣམ་པར་བརྒྱན་པས་ཀུན་ཏུ་སྣང་བ་ཞེས་བྱའོ། །དྲི་ཟའི་དབང་པོ་མིག་གཙང་མ་དགའ་བ་རབ་ཏུ་སྐྱེ་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མྱ་ངན་རྣམ་པར་ཟློག་པས་དགའ་བའི་སྙིང་པོ་ཞེས་བྱའོ། །དྲི་ཟའི་དབང་པོ་མེ་ཏོག་དང་ཤིང་ཤིན་ཏུ་རྒྱས་པའི་ཅོད་པན་གྱི་རྣམ་པར་ཐར་པ་ནི། འགྲོ་བའི་ལྟ་བ་དང་ཉོན་མོངས་པ་ཐམས་ཅད་རྣམ་པར་འཇིལ་བ་ཞེས་བྱའོ། །དྲི་ཟའི་དབང་པོ་དགའ་བས་སྤྱོད་པ་ཀུན་ཏུ་སྒྲོག་པའི་རྣམ་པར་ཐར་པ་ནི། སེམས་ཅན་ཐམས་ཅད་དབུགས་དབྱུང་བ་ལ་ཁ་ན་མ་ཐོ་བ་མེད་པའི་སྤྲིན་གྱི་འོད་ཅེས་བྱའོ། །དྲི་ཟའི་དབང་པོ་རབ་ཏུ་དགའ་བ་རྒྱུན་དུ་གནས་པའི་མིག་བཟང་པོའི་རྣམ་པར་ཐར་པ་ནི། དགའ་བ་ཐམས་ཅད་རབ་ཏུ་གནས་པ་ཡངས་པ་ལ་མོས་པའི་སྙིང་པོ་ཞེས་བྱའོ། །དྲི་ཟའི་དབང་པོ་ཡིད་དུ་འོང་བའི་དབྱངས་སེང་གེའི་རྒྱལ་མཚན་གྱི་རྣམ་པར་ཐར་པ་ནི། རིན་པོ་ཆེ་དགྲམ་པས་ཕྱོགས་ཐམས་ཅད་ཁྱབ་པ་ཞེས་བྱའོ། །དྲི་ཟའི་དབང་པོ་འོད་ཟེར་ཀུན་ཏུ་འགྱེད་པའི་འོད་ཀྱི་རྣམ་པར་ཐར་པ་ནི། དགེ་བའི་ལུས་ཐམས་ཅད་ཡང་དག་པར་བསྟན་པས་དགའ་བ་ཤིན་ཏུ་རྒྱས་པའི་འོད་ཅེས་བྱའོ། །དྲི་ཟའི་དབང་པོ་རྡོ་རྗེ་ཤིང་གི་ཡལ་གའི་རྒྱལ་མཚན་གྱི་རྣམ་པར་ཐར་པ་ནི། ཤིང་ཐམས་ཅད་ཀྱི་མདངས་འབྱུང་བས་རབ་ཏུ་དགའ་བའི་མིག་ཀུན་ཏུ་སྣང་བ་ཞེས་བྱའོ། །དྲི་ཟའི་དབང་པོ་རྒྱན་ཐམས་ཅད་ལ་དགའ་བའི་རང་བཞིན་གྱི་ཚུལ་སྟོན་པའི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཐམས་ཅད་རྣམ་པར་དཔྱོད་ཅིང་སེམས་ཅན་གྱི་སྒོ་རབ་ཏུ་བརྗོད་པ་ཞེས་བྱའོ། །དེ་ནས་དྲི་ཟའི་དབང་པོ་གནས་སྲུང་པོས་སངས་རྒྱས་ཀྱི་མཐུས་དྲི་ཟའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྤྱོད་ཡུལ་མཐའ་ཡས་སྒོ་ཅན་ཡང་། །འགྲོ་བ་ཀུན་གྱིས་འཇུག་པར་ནུས་པ་མིན། །བདེ་གཤེགས་
ནམ་མཁའི་རང་བཞིན་དྲི་མ་མེད། །རྒྱལ་བ་འགྲོ་བ་ཀུན་ཏུ་ལམ་ཡང་སྟོན། །རྒྱལ་བའི་ཡོན་ཏན་རྒྱ་མཚོ་ཚད་མེད་དེ། །བ་སྤུ་ཁུང་བུ་ཀུན་ནའང་ཤིན་ཏུ་ཡང་། །འགྲོ་བ་ཀུན་ལ་ཕན་དང་བདེ་དོན་མཛད། །ཡིད་འོང་ཤིང་གི་འོད་ནི་འདི་སྟོན་ཏོ། །འགྲོ་བའི་དོན་ནི་རྒྱ་མཚོ་ཡངས་མང་དང་། །སྡུག་བསྔལ་མ་ལུས་རྒྱལ་བས་ཟློག་པ་མཛད། །ཐབས་དང་ཐུགས་རྗེ་རྣམ་པ་སྣ་ཚོགས་མངའ། །དགེ་བའི་མིག་ནི་རྣམ་ཐར་འདི་སྟོན་ཏོ། །ཕྱོགས་རྣམས་རྒྱ་མཚོ་མཐའ་ཡས་ཞིང་གི་རྣམས། །ཀུན་ཏུ་རྒྱལ་བའི་འོད་རབ་སྣང་བར་འཆར། །སེམས་ཅན་ལྟ་བའི་དྲི་མ་རྣམ་པར་སྦྱོང་། །མེ་ཏོག་ཤིང་གི་གཙུག་ཕུད་ཅོད་པན་ཚུལ། །སྔོན་ཅད་རྒྱལ་བ་རྒྱ་མཚོ་རབ་མང་བར། །བྱམས་པའི་ཚུལ་ཡང་ཡོངས་སུ་བསྒོམས་པས་ན། །རྒྱལ་བ་འགྲོ་བ་ཀུན་གྱི་དབུགས་ཀྱང་འབྱིན། །ཀུན་ཏུ་སྒྲ་དབྱངས་འདི་ཡི་ཚུལ་ལ་འཇུག །རྒྱལ་བ་མཐོང་བས་དགའ་བ་ཀུན་དགེ་དང་། །འགྲོ་བ་འདིར་ནི་མི་ཟད་བདེ་བ་འབྱུང་། །ཐར་པའི་འབྲས་བུ་རྒྱུ་རྣམས་རིམ་གྱིས་སྟོན། །མུ་ཏིག་ཅོད་པན་རྣམ་ཐར་འདི་སྟོན་ཏོ། །སྒྲིབ་དང་རབ་རིབ་གཏི་མུག་སྟུག་པོར་ནི། །སེམས་ཅན་འཁོར་ཚེ་རྟག་ཏུ་ཤིན་ཏུ་རྨོངས། །དེ་ལ་རྒྱལ་བ་ཆོས་ཉིད་ཡངས་པ་སྟོན། །སེང་གེའི་རྒྱལ་མཚན་འདི་ལ་རབ་ཏུ་འཇུག །འགྲོ་བ་ཀུན་དང་མཉམ་པ་མཐའ་ཡས་ཀྱང་། །བདེ་གཤེགས་གཟུགས་རྣམས་རབ་ཏུ་ཡངས་པ་སྟོན། །འགྲོ་བར་ཐབས་རྣམས་སྣ་ཚོགས་སྒོ་ནས་སྣང་། །དེ་ལྟར་དབྱངས་སྙན་བདེ་བར་གཤེགས་པ་མཐོང་། །ཐམས་ཅད་མཁྱེན་པའི་ཚུལ་གྱིས་ཕྱོགས་མཐའ་ཡས། །སེམས་ཅན་དག་ལ་རྒྱས་པར་རྒྱལ་བས་བསྟན། །བྱང་ཆུབ་སྤྱོད་མཆོག་འཇུག་པའི་ཚུལ་ཡིན་ཏེ། །རྡོ་རྗེ་ཤིང་གི་རྒྱལ་མཚན་རྣམ་པར་སེམས། །སྐད་ཅིག་གཅིག་གིས་བསྐལ་པ་བརྒྱ་མང་བ། །སངས་རྒྱས་སྟོན་ཀྱང་འཕོ་བ་ཡོད་མེད་དེ། །སེམས་ཅན་རྣམས་ཀྱི་བདེ་བ་ཐམས་ཅད་སྐྱེད། །དགའ་བ་མཐོང་བའི་རྣམ་ཐར་ཚུལ་འདི་ཡིན། །དེ་ལ་གྲུལ་བུམ་གྱི་དབང་པོ་འཕགས་
སྐྱེས་པོའི་རྣམ་པར་ཐར་པ་ནི། མདུད་པར་འཛིན་པ་བྱུང་བ་ཐམས་ཅད་རབ་ཏུ་ཞི་བར་བྱེད་པའི་འོད་ཅེས་བྱའོ། །གྲུལ་བུམ་གྱི་དབང་པོ་ཀླུ་བདག་གི་རྣམ་པར་ཐར་པ་ནི། སྒོ་མཐའ་ཡས་པར་སྤྱོད་པ་རྒྱ་མཚོ་ལ་སྤྱོད་པ་ཞེས་བྱའོ། །གྲུལ་བུམ་གྱི་དབང་པོ་ལེགས་པར་སྤྱད་པའི་རྒྱལ་མཚན་གྱི་རྣམ་པར་ཐར་པ་ནི། རྒྱུད་ཐམས་ཅད་དུ་འཇིག་རྟེན་གྱི་བསམ་པ་རྒྱ་མཚོ་སྙེད་ཀྱི་སྒོ་ཞེས་བྱའོ། །གྲུལ་བུམ་གྱི་དབང་པོ་ཕན་པར་སྤྱོད་པར་འཕར་བའི་རྣམ་པར་ཐར་པ་ནི། སྣང་བ་དྲི་མ་མེད་པའི་བྱ་བ་ལ་ཀུན་ནས་སྤྱོད་པར་གནས་པ་ཞེས་བྱའོ། །གྲུལ་བུམ་གྱི་དབང་པོ་འཇིགས་པ་ལས་བསྒྲལ་བའི་རྣམ་པར་ཐར་པ་ནི། འགྲོ་བ་ཐམས་ཅད་གདོན་པའི་ལམ་འཇིགས་པ་མེད་པའི་རྒྱན་ཅེས་བྱའོ། །གྲུམ་བུམ་གྱི་དབང་པོ་རྩལ་སྣ་ཚོགས་བཟང་པོའི་རྣམ་པར་ཐར་པ་ནི། འགྲོ་བ་མཐའ་ཡས་པའི་སྲེད་པ་རྒྱ་མཚོས་ཡོངས་སུ་གདུང་བ་ཞི་བར་བྱེད་པ་ཞེས་བྱའོ། །གྲུལ་བུམ་གྱི་དབང་པོ་རི་རབ་ལེགས་པར་བྱུང་བའི་རྣམ་པར་ཐར་པ་ནི། འགྲོ་བ་རྒྱུད་ཐམས་ཅད་དུ་སྣང་བའི་སྤྲིན་ཡང་དག་པར་འབྱུང་བ་ཞེས་བྱའོ། །གྲུལ་བུམ་གྱི་དབང་པོ་སྡེ་དཔའི་རྣམ་པར་ཐར་པ་ནི། ཀུན་ནས་སྣང་བས་སྒྲིབ་པའི་རི་ཡང་དག་པར་འཇོམ་པ་ཞེས་བྱའོ། །གྲུལ་བུམ་གྱི་དབང་པོ་དགེ་བའི་མིག་གི་འོད་ཟེར་མཐའ་ཡས་པའི་རྣམ་པར་ཐར་པ་ནི། སྙིང་རྗེ་ཆེན་པོ་ཕྱིར་མི་ལྡོག་པའི་སྙིང་པོ་འབྱུང་བ་ཞེས་བྱའོ། །གྲུལ་བུམ་གྱི་དབང་པོ་ལྷ་དང་ལྷ་མ་ཡིན་སྒོ་མཐའ་ཡས་པའི་མིག་གི་རྣམ་པར་ཐར་པ་ནི། རྒྱུད་ཀུན་ཏུ་ལུས་ཡང་དག་པར་སྟོན་པར་འགྲོ་བའི་ཡུལ་ཞེས་བྱའོ། །དེ་ནས་གྲུལ་བུམ་གྱི་དབང་པོ་འཕགས་སྐྱེས་པོས་སངས་རྒྱས་ཀྱི་མཐུས། གྲུལ་བུམ་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་མགོན་པོ་བཟོད་པའི་སྟོབས་དང་ལྡན། །འགྲོ་ལ་ཕན་དོན་བསྐལ་པ་བསམ་ཡས་སྤྱོད། །ང་རྒྱལ་དྲེགས་མྱོས་སྤངས་པས་འཇིག་རྟེན་ཁམས། །ཀུན་ན་རྒྱལ་བའི་སྐུ་གསལ་རབ་ཏུ་མཛེས། །སྔོན་ཅད་རྒྱལ་བས་སྤྱོད་པ་རྒྱ་མཚོ་དག །སྤྱད་དེ་ཐབས་མང་ཚོགས་པས་
ཕན་བསྐྱེད་ནས། །ཕྱོགས་བཅུར་མཐའ་ཡས་སེམས་ཅན་སྨིན་པར་མཛད། །རྣམ་པར་ཐར་པ་འདི་ནི་ཀླུ་བདག་གིའོ། །སངས་རྒྱས་ཡེ་ཤེས་ཡངས་པ་འགྲོ་བའི་མགོན། །དེ་ནི་སེམས་ཅན་བསམ་པ་ཀུན་ཀྱང་གསལ། །སྣ་ཚོགས་འཕྲུལ་སྒོས་སེམས་ཅན་རྣམ་པར་འདུལ། །རྒྱལ་བ་མཐོང་བས་སྣ་ཚོགས་རྒྱལ་མཚན་དགའ། །སངས་རྒྱས་རྫུ་འཕྲུལ་ཡུལ་དག་གཟུགས་བརྙན་འདྲ། །འཇིག་རྟེན་ཀུན་ན་ཕྱི་མཐའི་བསྐལ་པར་གནས། །ཆོས་ཀྱི་འཁོར་ལོ་མཁའ་འདྲ་ཡང་དག་དངོས། །དེ་ནི་ཕན་སྤྱོད་རྒྱུ་བས་མཐོང་བ་ཡིན། །མི་བཟད་རབ་རིབ་བསྒྲིབས་པའི་འཇིག་རྟེན་དུ། །རྒྱལ་བའི་འོད་བསྟན་རྣམ་ཐར་ལམ་དགེ་སྟོན། །མགོན་དང་སྐྱབས་གྱུར་སྡུག་བསྔལ་ཐམས་ཅད་སྤོང་། །འཇིགས་ལས་སྒྲོལ་བས་རྣམ་ཐར་འདི་མཐོང་ངོ་། །སྲེད་པ་རྒྱ་མཚོས་གདུངས་འགྲོ་སྡུག་བསྔལ་བ། །རྒྱལ་བའི་ཡེ་ཤེས་འོད་ཀྱིས་མ་ལུས་ཞི། །སྦྱངས་ཤིང་རྒྱལ་བ་སངས་རྒྱས་ཆོས་ཉིད་སྟོན། །སྣ་ཚོགས་ཁྱིམ་ནི་རྣམ་ཐར་འདི་ལ་འཇུག །འགྲོ་བ་འབྱམ་ཀླས་ཀུན་ན་སངས་རྒྱས་སྐུ། །ཐབས་སྒོ་ཚོགས་པས་སེམས་ཅན་འདུལ་བ་སྣང་། །ཆོས་སྤྲིན་ཆར་འབེབས་གསུང་གི་འབྲུག་སྒྲ་སྒྲོག །རྣམ་ཐར་འདི་ནི་རི་རབ་བློ་གྲོས་ཀྱིའོ། །སངས་རྒྱས་འོད་ནི་དྲི་མེད་འགྲོ་ཀུན་ཏུ། །དོན་ཡོད་འགྲོ་བའི་སྒྲིབ་ཀུན་ཀུན་ནས་སེལ། །སངས་རྒྱས་ཡོན་ཏན་སྣང་མཛད་སྒྲ་ཡང་འབྱིན། །རྣམ་ཐར་མཐའ་ཡས་ཚུལ་འདི་དཔའ་སྡེས་མཐོང་། །བསྐལ་པ་སྔ་ཚེ་ཐུགས་རྗེའི་སྒོ་མང་བ། །འགྲོ་ཀུན་ཕན་བདེའི་དོན་ཏུ་རྒྱལ་བས་བསྒོམས། །འབྱམ་ཀླས་སྣ་ཚོགས་ཐབས་ཀྱིས་སྡུག་བསྔལ་བསལ། །དེ་ནི་མཐའ་ཡས་དགེ་བའི་ཟེར་གྱིས་མཐོང་། །རྒྱལ་བའི་སྐུ་ནི་མཐའ་ཡས་ཀུན་ཏུ་རྒྱུ། །འཇིག་རྟེན་ཀུན་ཏུའང་བྱོན་དང་བཞུད་མི་མངའ། །ཀུན་ནས་རང་བྱུང་རྣམ་པར་འཕྲུལ་པ་སྣང་། །དེ་ནི་ལྷ་དབང་མཐའ་ཡས་སྒོ་ཡིས་མཐོང་། །དེ་ལ་ཀླུའི་དབང་པོ་མིག་མི་བཟང་གི་རྣམ་པར་ཐར་པ་ནི། ཀླུའི་འགྲོ་བའི་རྒྱུད་ཐམས་
ཅད་ཀྱི་འབར་བ་ཞི་བར་བྱས་པས་ཡོངས་སུ་སྐྱོབ་པ་ཞེས་བྱའོ། །ཀླུའི་རྒྱལ་པོ་རྒྱ་མཚོའི་རྣམ་པར་ཐར་པ་ནི། སེམས་སྐད་ཅིག་གིས་བསམ་གྱིས་མི་ཁྱབ་པའི་སེམས་ཅན་དང་ཀླུ་རབ་ཏུ་ཞི་བར་བྱ་བའི་ལུས་དང་། ཁ་དོག་རབ་ཏུ་སྟོན་པ་ཞེས་བྱའོ། །ཀླུའི་རྒྱལ་པོ་སྤྲིན་སྒྲ་སྣ་ཚོགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སྲིད་པའི་རྒྱུད་ཐམས་ཅད་དུ་མིང་གི་འཁོར་ལོ་རྒྱ་མཚོ་མཐའ་ཡས་པ་དགེ་བའི་ང་རོར་སྒྲོག་པ་ཞེས་བྱའོ། །ཀླུའི་རྒྱལ་པོ་འོད་འཕྲོ་བའི་སྒོ་རྒྱ་མཚོས་རབ་ཏུ་སྣང་བའི་རྣམ་པར་ཐར་པ་ནི། འཇིག་རྟེན་གྱི་ཁམས་རབ་ཏུ་བཀོད་ཅིང་རྣམ་པར་དབྱེ་བ་དང་། སངས་རྒྱས་ཀྱི་ཞིང་མཐའ་ཡས་པ་ལ་དམིགས་པ་ཡང་དག་པར་སྟོན་པའི་སྦྱོར་བ་ཞེས་བྱའོ། །ཀླུའི་རྒྱལ་པོ་ཀུན་ནས་རིའི་སྤྲིན་གྱི་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ལ་བསོད་ནམས་རྒྱ་མཚོ་ཡང་དག་པར་བསྟན་པའི་དགའ་བའི་ཤུགས་ཤིན་ཏུ་ཡངས་པ་ཞེས་བྱའོ། །ཀླུའི་རྒྱལ་པོ་འཇོག་པོའི་རྣམ་པར་ཐར་པ་ནི། འཇིགས་པའི་སྒྲ་སྐད་ཐམས་ཅད་ཡོངས་སུ་སྐེམ་པའི་སྐྱབས་དྲི་མ་མེད་པ་ཞེས་བྱའོ། །ཀླུའི་རྒྱལ་པོ་མཐའ་ཡས་པར་འགྲོ་བའི་རྣམ་པར་ཐར་པ་ནི། གཟུགས་ཀྱི་སྤྲིན་རྒྱ་ཆེན་པོ་ཤིན་ཏུ་སྟོན་ཅིང་བསྐལ་པར་བྱིན་གྱི་རློབ་པའི་བརྩོན་འགྲུས་ཤེས་བྱའོ། །ཀླུའི་རྒྱལ་པོ་མཛོད་སྤུའི་གཟི་བརྗིད་དྲི་མ་མེད་པའི་ཤུགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དགའ་བའི་ཤུགས་ཡངས་པ་དང་ཡང་དག་པར་མོས་པ་རྒྱ་མཚོ་ཤིན་ཏུ་འབྱུང་བ་ཞེས་བྱའོ། །ཀླུའི་རྒྱལ་པོ་ཀུན་ཏུ་སྤྱོད་པ་རྒྱ་ཆེན་པོའི་དབྱངས་ཀྱི་རྣམ་པར་ཐར་པ་ནི། སྒྲ་ཐམས་ཅད་འབྱུང་བ་ལ་ཡང་དག་པར་གཞོལ་ཞིང་ཡིད་དུ་འོང་བས་ཐོགས་པ་མེད་པར་ཀུན་ཏུ་རྒྱས་པར་བྱེད་པ་ཞེས་བྱའོ། །ཀླུའི་རྒྱལ་པོ་མ་དྲོས་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྡུག་བསྔལ་རྒྱ་མཚོ་ལ་སྙིང་རྗེའི་སྒོ་ཀུན་ནས་སྤྲིན་གྱིས་འགེངས་ཤིང་རབ་ཏུ་ཞི་བ་དང་། ཡོངས་སུ་དག་པར་བྱེད་པ་ཞེས་བྱའོ། །དེ་ནས་ཀླུའི་རྒྱལ་པོ་ཆེན་པོ་མིག་མི་བཟང་གིས་སངས་རྒྱས་ཀྱི་མཐུས། ཀླུའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་
སུ་བཅད་པ་འདི་དག་སྨྲས་སོ། །རྒྱལ་བ་ཀུན་གྱི་ཆོས་ཉིད་དེ་དག་ལྟོས། །དྲང་སྲོང་ཆེན་པོ་འགྲོ་བ་ཀུན་གྱི་སྐྱབས། །མི་བཟད་ཀླུ་ཡི་རྒྱུད་དུ་ལྷུང་བ་རྣམས། །བྱམས་པའི་སྟོབས་ཀྱིས་རིམ་གྱིས་འདོན་པ་མཛད། །འགྲོ་བ་ཀུན་སྙེད་གཟུགས་ཀྱི་སྒོ་རྣམས་ཀྱང་། །རྒྱལ་བས་སྤུ་གཅིག་རྩེ་ལ་མངོན་པར་བསྟན། །ཐམས་ཅད་རྡུལ་ལ་འཕྲུལ་གྱིས་མངོན་པར་འཕྲུལ། །རྒྱལ་བའི་རྣམ་ཐར་རྒྱ་མཚོའི་ཀླུ་ཡིས་མཐོང་། །རྒྱལ་བ་དེ་ཡི་རྫུ་འཕྲུལ་མཐའ་ཡས་ཏེ། །སངས་རྒྱས་མཚན་ཀྱང་འགྲོ་སྙེད་རྒྱ་མཚོ་འོ། །དེ་དག་སེམས་ཅན་བསམ་པ་ཇི་བཞིན་ཉན། །སྤྲིན་སྒྲའི་རྒྱལ་མཚན་དེ་འདྲའི་རྣམ་ཐར་ལྡན། །ཁྲོ་བ་རྒྱ་མཚོར་འགྲོ་བ་འདི་དག་ཀུན། །བསྒྲིབས་ཤིང་གཡོགས་པའང་ཁྲོ་བའི་རྒྱ་མཚོར་ཏེ། །དེ་ལ་རང་བྱུང་བྱམས་དང་ཐུགས་རྗེས་འཛིན། །འདི་ནི་འོད་འཕྲོ་སྒོ་ཡི་ཀླུ་ཡིས་མཐོང་། །འགྲོ་བ་ཀུན་གྱི་བསོད་ནམས་མཐུ་ཡི་རྣམས། །སངས་རྒྱས་སྤུ་གཅིག་རྩེ་ལ་མངོན་པར་སྟོན། །བསོད་ནམས་འཇུག་པ་རྒྱ་མཚོ་ཀུན་ཀྱང་བསྟན། །འདི་ནི་རི་བོ་སྤྲིན་གྱི་ཀླུ་ཡིས་མཐོང་། །འཇིགས་པ་ཆེས་མནར་སེམས་ཅན་སྡུག་བསྔལ་བ། །རྒྱལ་བའི་འོད་ཆེན་ཤིན་ཏུ་ཡངས་པས་བསྐྱབས། །སྤུ་ཡི་སྒོ་ནས་ཡིད་འོང་སྒྲ་ཡང་འབྱུང་། །རྣམ་ཐར་འདི་ནི་འཇོག་པོ་ཀླུ་ཡིས་མཐོང་། །དུས་གསུམ་གཤེགས་པ་རྒྱལ་བ་ཐམས་ཅད་ཀྱི། །སྐུ་ནི་སངས་རྒྱས་ཉིད་ཀྱི་སྐུ་ལ་བསྟན། །དེ་བཞིན་བསྐལ་པ་བརྒྱུད་པའི་ཞིང་མང་ཡང་། །མཐའ་ཡས་གོམས་པའི་ཀླུ་ཡིས་དེ་མཐོང་ངོ་། །རྒྱལ་བས་སྤུ་གཅིག་རྫུ་འཕྲུལ་མཐའ་ཡས་བཀང་། །ཞིང་མང་མཐའ་ཡས་ཀུན་ཀྱང་དེར་ཞུགས་ཏེ། །དེ་ན་བཞུགས་པར་རྒྱལ་བ་འཁོར་གྱིས་མཐོང་། །རྣམ་ཐར་དེ་ནི་འོད་འབར་ཀླུ་ཡི་འོ། །ཇི་སྙེད་རྒྱལ་བ་རྒྱ་མཚོ་མཆོད་བྱས་པའི། །སྔོན་གྱི་རྒྱལ་བའི་ཆོས་ཉིད་རབ་མཐོང་ཞིང་། །དེ་ལ་དགའ་བ་རྒྱ་མཚོ་རྣམ་པར་བསྐྱེད། །ཤུགས་ལམ་ཀླུ་ནི་འདི་ལ་རབ་ཏུ་འཇུག །རང་བྱུང་གསུང་གི་ཡན་ལག་ཐམས་ཅད་ཀྱི། །འགྲོ་བ་ཐམས་ཅད་ཆོས་
ཀྱིས་ངོམས་པར་མཛད། །རྒྱལ་བའི་གསུང་ནི་ཞི་ཞིང་དགའ་འགྱུར་བ། །དེ་ནི་ཀུན་ཏུ་སྤྱོད་པའི་ཀླུས་ཐོས་སོ། །སྲིད་པ་ཀུན་ཏུ་སྡུག་བསྔལ་གཟིར་མཐོང་ནས། །ཉོན་མོངས་ལས་ཀྱིས་འཁོར་ཞིང་མགོན་མེད་པ། །སངས་རྒྱས་ཐུགས་རྗེ་ཆེན་པོས་རབ་ཏུ་འགྲོལ། །རྣམ་ཐར་འདི་ནི་མ་དྲོས་ཀླུས་མཐོང་ངོ་། །དེ་ལ་རྒྱལ་པོ་ཆེན་པོ་ངལ་བསོས་པོའི་རྣམ་པར་ཐར་པ་ནི། དགའ་བའི་སྒོ་རྣམ་པར་བལྟ་བའི་ཡུལ་གྱི་རྒྱུད་ཀྱིས་ཕན་པར་སྦྱོར་བ་ཞེས་བྱའོ། །གནོད་སྦྱིན་གྱི་དབང་པོ་དབྱངས་ཆེན་དབང་ཕྱུག་གི་རྣམ་པར་ཐར་པ་ནི། སྒོ་ཐམས་ཅད་ལ་དབང་བྱེད་པས་རྣམ་པར་ལྟ་ཞིང་། སེམས་ཅན་ལ་ཕན་པར་སྦྱོར་བས་ཡོངས་སུ་སྐྱོབ་པ་ཞེས་བྱའོ། །གནོད་སྦྱིན་གྱི་དབང་པོ་ས་ལ་ཤིན་ཏུ་གཏུམ་པའི་མཚོན་ཆའི་རྣམ་པར་ཐར་པ་ནི། གཏུམ་པ་དང་དྲག་ཤུལ་གྱི་རྒྱུན་ལས་བསྲུང་བ་ཀུན་ནས་མང་པོ་འབྱུང་བ་ཞེས་བྱའོ། །གནོད་སྦྱིན་གྱི་དབང་པོ་བློ་གྲོས་ཆེན་པོའི་རྣམ་པར་ཐར་པ་ནི། འཕགས་པའི་ཡོན་ཏན་གྱི་དཀྱིལ་འཁོར་ཐམས་ཅད་ཀྱི་རྗེས་སུ་མཐོང་བ་ལ་རྣམ་པར་བལྟ་བས་དགའ་བ་དང་མོས་པར་སྤྱོད་པ་ཞེས་བྱའོ། །གནོད་སྦྱིན་གྱི་དབང་པོ་མིག་འོད་འཕྲོ་བའི་བདག་པོའི་རྣམ་པར་ཐར་པ་ནི། སེམས་ཅན་ཐམས་ཅད་ལ་ཤེས་རབ་དང་ཡེ་ཤེས་དང་། སྙིང་རྗེ་རྣམ་པར་ལྟ་བ་ཞེས་བྱའོ། །གནོད་སྦྱིན་གྱི་དབང་པོ་མིག་རྡོ་རྗེ་ལྟར་བརྟན་པའི་རྣམ་པར་ཐར་པ་ནི། འགྲོ་བ་ཐམས་ཅད་ལ་ཕན་པ་དང་བདེ་བ་སྣ་ཚོགས་སུ་སྦྱོར་བ་དང་། བསྲུང་བ་མངོན་པར་བསྒྲུབ་པ་ཞེས་བྱའོ། །གནོད་སྦྱིན་གྱི་དབང་པོ་སྡེ་མཆོག་ཏུ་དཔའ་བའི་རྣམ་པར་ཐར་པ་ནི། ཆོས་ཐམས་ཅད་ཀྱི་དོན་གྱི་དབྱིངས་ལ་ཡང་དག་པར་འཇུག་པའི་མཐུ་ཞེས་བྱའོ། །གནོད་སྦྱིན་གྱི་དབང་པོ་སྡེའི་རྒྱན་ཆེན་པོས་རབ་ཏུ་གནོན་པའི་རྣམ་པར་ཐར་པ་ནི། འགྲོ་བ་ཐམས་ཅད་ལམ་ལ་དགོད་པར་གཏི་མུག་མེད་པས་བསྲུང་བ་ཕུན་སུམ་ཚོགས་པ་ཞེས་བྱའོ། །གནོད་སྦྱིན་གྱི་དབང་པོ་དགེ་བའི་ཚོགས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསོད་ནམས་ཀྱི་དཀྱིལ་འཁོར་རྣམ་པར་སྤེལ་བས་ཀུན་ཏུ་དགའ་བ་མྱོང་བ་ཞེས་བྱའོ། །གནོད་སྦྱིན་གྱི་
དབང་པོ་རི་བོའི་སྟོབས་རབ་ཏུ་འཇོམས་པའི་རྣམ་པར་ཐར་པ་ནི། སངས་རྒྱས་ཀྱི་སྟོབས་ཡང་དག་པར་འབྱུང་བ་རྗེས་སུ་ཡེ་ཤེས་ཀྱི་འོད་ཅེས་བྱའོ། །དེ་ནས་རྒྱལ་པོ་ཆེན་པོ་ངལ་བསོས་པོས་སངས་རྒྱས་ཀྱི་མཐུས། གནོད་སྦྱིན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ལྷ་དབང་སེམས་ཅན་མ་རུང་གང་དག་གིས། །བསྐལ་པ་བརྒྱ་མང་སངས་རྒྱས་མི་མཐོང་ཞིང་། །སྲིད་པ་དག་ན་འཁོར་ཞིང་སྡུག་བསྔལ་བ། ། དེ་དག་ཡོངས་སུ་དགྲོལ་བར་སངས་རྒྱས་བྱུང་། །སངས་རྒྱས་སེམས་ཅན་ཕན་དང་བསྐྱབ་པའི་ཕྱིར། །འགྲོ་བ་ཀུན་ལ་མངོན་པར་ཀུན་ན་བཞུགས། །ཉམ་ང་འགྲོ་བའི་འཁོར་ལོ་དག་ནས་འདོན། །འདི་ལ་དབྱངས་ཀྱི་དབང་ཕྱུག་གནོད་སྦྱིན་འཇུག །མི་བཟད་ལས་ཀྱིས་བསྒྲིབས་པའི་སེམས་ཅན་ལ། །རྒྱལ་བས་ཞི་བའི་ཚུལ་རྣམས་ཤིན་ཏུ་བསྟན། །འགྲོ་བ་རྣམས་ལ་ཆོས་ཀྱི་སྒྲོན་མ་འཛིན། །རྣམ་ཐར་འདི་ནི་གཏུམ་པའི་མཚོན་ཆས་མཐོང་། །རང་འབྱུང་བསྐལ་པ་རྒྱ་མཚོར་སྤྱོད་པའི་ཚེ། །རྒྱལ་བའི་ཡོན་ཏན་ཕྱོགས་བཅུ་ཀུན་ཏུ་གྲགས། །དེ་བས་རྒྱལ་བའི་གྲགས་པ་ཀུན་ཏུ་གྲགས། །འདི་ནི་བློ་ཆེན་གནོད་སྦྱིན་བདག་པོས་མཐོང་། །རྒྱལ་བའི་ཤེས་རབ་མཁའ་འདྲ་མཐའ་ཡས་ཏེ། །སངས་རྒྱས་ཆོས་སྐུ་བསམ་གྱིས་མི་ཁྱབ་པོ། །དེ་བས་ཐམས་ཅད་ཕྱོགས་སུ་རྣམ་པར་མཛེས། །འོད་འཕྲོ་མིག་གི་བདག་པོའི་རྣམ་ཐར་ཏོ། །མི་ཡི་དབང་པོ་འགྲོ་བ་ཐམས་ཅད་དུ། །ཡིད་འོང་དབྱངས་སྒྲོག་སྡུག་བསྔལ་ཞི་བར་མཛད། །ཕན་དོན་སྐྱབས་མཛད་ཆོས་རྣམས་ཤིན་ཏུ་བསྟན། །ཚུལ་འདིར་རྡོ་རྗེའི་མིག་ལེགས་རབ་ཏུ་འཇུག །དོན་དབྱིངས་རྒྱ་ཆེན་ཇི་སྙེད་དེ་དག་ཀུན། །རྒྱ་མཚོའི་མདོ་ཚུལ་འགྲོ་བའི་གྲངས་སྙེད་རྣམས། །མི་ཡི་དབང་པོ་དབྱིངས་གཅིག་སྒོ་ནས་བསྟན། །འདི་ནི་བློ་གྲོས་དཔའ་བོའི་རྣམ་ཐར་ཏོ། །འགྲོ་བ་ལམ་ངན་གནས་པ་ཐམས་ཅད་ལ། །སངས་རྒྱས་བསམ་གྱིས་མི་ཁྱབ་ལམ་
སྟོན་ཏེ། །སྣོད་དུ་གྱུར་པའི་འགྲོ་བ་ཀུན་ན་བཞུགས། །འདི་ལ་སློབ་པ་སྡེ་ཡི་རྒྱན་ཡིན་ནོ། །འགྲོ་བའི་བསོད་ནམས་རྒྱུ་བ་ཇི་སྙེད་པ། །རྒྱལ་བའི་འོད་ལ་ཐམས་ཅད་རབ་ཏུ་སྣང་། །སངས་རྒྱས་ཡེ་ཤེས་རྒྱ་མཚོ་བསམ་མི་ཁྱབ། །རྣམ་ཐར་འདི་ནི་གནོད་སྦྱིན་ནོར་བདག་མཐོང་། །རྒྱལ་བའི་སྟོབས་རྣམས་གང་དུ་ཡོངས་དག་སྟེ། །བདེ་གཤེགས་སྟོབས་རྣམས་ཡོངས་སུ་རྫོགས་པ་ཡི། །སྔོན་གྱི་བསྐལ་པ་བསམ་གྱིས་མི་ཁྱབ་དྲན། །འདི་ནི་རི་བོ་སྟོབས་འཇོམས་རྣམ་ཐར་ཏོ། །དེ་ལ་མི་འམ་ཅིའི་དབང་པོ་ལྷའི་བློ་གྲོས་འོད་ཀྱི་རྣམ་པར་ཐར་པ་ནི། བྱ་བ་ཐམས་ཅད་ལ་ཡང་དག་པར་རྫོགས་པར་འཇུག་པ་དགའ་བ་འབྱུང་བ་ཞེས་བྱའོ། །མི་འམ་ཅིའི་དབང་པོ་མེ་ཏོག་དཔལ་གྱི་དཀྱིལ་འཁོར་གྱི་རྣམ་པར་ཐར་པ་ནི། དགའ་བ་ཐམས་ཅད་ཀྱི་བདེ་བ་མྱོང་བ་ལས་བླ་ན་མེད་པའི་ཆོས་ཀྱི་དགའ་བ་འབྱུང་བ་ཞེས་བྱའོ། །མི་འམ་ཅིའི་དབང་པོ་རྒྱན་རྣམ་པ་སྣ་ཚོགས་ཀྱི་རྣམ་པར་ཐར་པ་ནི། ཡོན་ཏན་ཐམས་ཅད་ཀྱིས་ཡང་དག་པར་ངོམས་པས་མོས་པ་རྒྱ་ཆེན་པོ་སྦྱོང་བའི་སྙིང་པོ་ཞེས་བྱའོ། །མི་འམ་ཅིའི་དབང་པོ་ང་རོ་ཡིད་དུ་འོང་བའི་དབྱངས་ཀྱི་རྣམ་པར་ཐར་པ་ནི། སྒྲ་སྙན་ཅིང་ཡིད་དུ་འོང་བ་ལ་ཐོགས་པ་མེད་པས་ཀུན་ཏུ་སྒྲུབ་པ་ཞེས་བྱའོ། །མི་འམ་ཅིའི་དབང་པོ་ཤིང་རིན་པོ་ཆེའི་ཡལ་གའི་འོད་ཀྱི་རྣམ་པར་ཐར་པ་ནི། སྙིང་རྗེའི་རྒྱུད་ལ་འགྲོ་བ་དགོད་ཅིང་སེམས་ཅན་ཐམས་ཅད་ཡང་དག་པར་བསྐུལ་བ་ལ་དམིགས་པ་ཞེས་བྱའོ། །མི་འམ་ཅིའི་དབང་པོ་མཐོང་ན་དགའ་ཞིང་སྤྲོ་བར་བྱེད་པའི་རྣམ་པར་ཐར་པ་ནི། གཟུགས་ཀྱི་ལུས་དགེ་བ་ཐམས་ཅད་མངོན་པར་བསྒྲུབ་པ་ཞེས་བྱའོ། །མི་འམ་ཅིའི་དབང་པོ་རྒྱན་གྱི་དཔལ་གྱི་འོད་ཀྱི་རྣམ་པར་ཐར་པ་ནི། ཁྱུ་མཆོག་གི་མཐུ་ཕྱུང་བའི་རྒྱན་ཐམས་ཅད་ཀྱིས་མདངས་རབ་ཏུ་སྐྱེད་པའི་རང་བཞིན་གྱིས་དགའ་བའི་འོད་ཅེས་བྱའོ། །མི་འམ་ཅིའི་དབང་པོ་མེ་ཏོག་ཚོན་བཟང་པོའི་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ལས་ཀྱི་རིགས་ལ་རྣམ་པར་ལྟ་ཞིང་ཡང་དག་པར་སྒྲུབ་པའི་འོད་ཅེས་བྱའོ། །མི་འམ་ཅིའི་དབང་པོ་ས་གཞིའི་དཔལ་གྱི་
རྣམ་པར་ཐར་པ་ནི། འགྲོ་བ་ཐམས་ཅད་རྩལ་གྱིས་མངོན་པར་སྒྲུབ་པ་ལ་རབ་ཏུ་བརྩོན་པ་ཞེས་བྱའོ། །མི་འམ་ཅིའི་དབང་པོ་དྲག་ཤུལ་གྱི་བདག་པོའི་རྣམ་པར་ཐར་པ་ནི། མི་འམ་ཅིའི་འཁོར་ཐམས་ཅད་ཀྱི་སེམས་ལ་རྣམ་པར་བལྟ་ཞིང་འདྲེན་པའི་འོད་ཅེས་བྱའོ། །དེ་ནས་མི་འམ་ཅིའི་དབང་པོ་ལྷའི་བློ་གྲོས་འོད་ཀྱིས་སངས་རྒྱས་ཀྱི་མཐུས། མི་འམ་ཅིའི་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་སྙེད་འགྲོ་བ་དག་ན་བདེ་འབྱུང་བ། །དེ་དག་ཐམས་ཅད་རྒྱལ་བ་མཐོང་བས་འབྱུང་། །མགོན་པོ་དེ་ནི་སྐྱབས་དང་མགོན་ཡིན་ཏེ། །སེམས་ཅན་ཐམས་ཅད་གནས་ཡིན་ཕན་མཛད་པའོ། །སེམས་ཅན་ཀུན་གྱི་མི་ཟད་བདེ་བའི་རྣམས། །ཇི་སྙེད་འབྱུང་བ་རབ་ཏུ་ཡོད་པ་ཀུན། །དེ་དག་ཀུན་ལ་འདྲེན་པ་དོན་ཡོད་དོ། །དེ་ནི་དཔལ་གྱི་དཀྱིལ་འཁོར་མི་ཅིས་མཐོང་། །སངས་རྒྱས་ཡོན་ཏན་རྒྱ་མཚོ་མི་ཟད་པ། །དེ་ཡི་མཐའ་ནི་འགྲོ་བས་མི་རྙེད་དེ། །ཕྱོགས་རྣམས་ཀུན་ཏུ་རྣམ་པར་མཛེས་ཤིང་འབར། །སྣ་ཚོགས་རྒྱན་གྱི་རྣམ་ཐར་འདི་འདྲ་འོ། །སེམས་ཅན་ཀུན་གྱི་ཡིད་དུ་འོང་བ་ཡི། །སྒྲ་དབྱངས་སངས་རྒྱས་ཡང་དག་རྣམ་སྒྲོག་ཅིང་། །མྱ་ངན་མེད་པའི་ཆོས་ཉིད་སྟོན་པ་ནི། །སྒྲ་སྙན་ཡིད་དུ་འོང་བ་མི་ཅིས་ཐོས། །སྔོན་ཅད་དེ་བཞིན་གཤེགས་པས་སྤྱད་པ་ཡི། །རྒྱལ་བའི་རྣམ་པར་འཕྲུལ་པ་བདག་གིས་མཐོང་། །རྒྱ་ཆེན་ཐུགས་རྗེས་རྣམ་པར་ཤིན་ཏུ་སྦྱངས། །ཤིང་གི་འོད་ཀྱི་མི་འམ་ཅི་ཡིས་མཐོང་། །དེ་བཞིན་གཤེགས་པ་མཐོང་ཞིང་ཐོས་པ་ནི། །འགྲོ་བ་རྣམས་ལ་བསྐལ་པ་བྱེ་བར་དཀོན། །སངས་རྒྱས་མཚན་གྱིས་ཀུན་ནས་ཤིན་ཏུ་བརྒྱན། །དགའ་བདེ་མོས་པར་བྱེད་པས་འདི་མཐོང་དོན། །བདེ་བར་གཤེགས་པའི་ཡེ་ཤེས་འབྱུང་བ་ནི། །སེམས་ཅན་ཀུན་ཀྱི་བསམ་པ་གཞལ་མཛད་དེ། །ཐམས་ཅད་མཁྱེན་པ་ཉིད་ཀྱི་ལམ་ཡང་སྟོན། །འདི་ནི་རྒྱན་དབང་མི་འམ་ཅི་ཡིས་མཐོང་། །འབྱམ་ཀླས་ལས་ནི་བསམ་གྱིས་
མི་ཁྱབ་སྟེ། །དེ་ཕྱིར་སེམས་ཅན་བདེ་དང་སྡུག་བསྔལ་ཀུན། །བདེ་བར་གཤེགས་པས་ཐམས་ཅད་རབ་ཏུ་བསྟན། །མེ་ཏོག་རྒྱལ་མཚན་འདི་ནི་མི་ཅིས་མཐོང་། །སངས་རྒྱས་གཤེགས་ཐབས་རྣམ་པར་འཕྲུལ་པ་ཡང་། །སེམས་ཅན་ཀུན་གྱིས་ཤེས་པར་མི་ནུས་ཏེ། །ས་རྣམས་ཐམས་ཅད་གཅིག་ཏུ་འདུས་པར་འགྱུར། །དེ་ལྟར་ས་ཡི་འོད་ཀྱི་མི་ཅིས་མཐོང་། །འཁོར་དུ་རྒྱལ་བ་རྣམ་པར་འཕྲུལ་མཛད་ཅིང་། །རྒྱལ་བའི་སྤྱོད་ཡུལ་ཐམས་ཅད་སྟོན་མཛད་དེ། །འོད་ཟེར་འཁོར་གྱིས་བསྐུལ་བའང་དེ་བཞིན་མཛད། །འདི་ནི་དྲག་ཤུལ་བདག་པོའི་སྤྱོད་ཡུལ་ལོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་གསུམ་མོ། །དེ་ལ་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་ཀྱི་རྣམ་པར་ཐར་པ་ནི། རྫུ་འཕྲུལ་གྱི་དབྱིངས་ཐམས་ཅད་རབ་ཏུ་གནོན་པའི་ཡོན་ཏན་གྱི་རྒྱན་ཅེས་བྱའོ། །ལྟོ་འཕྱེ་ཆེན་པོའི་དབང་པོ་གཟི་བརྗིད་ཀྱི་དབྱངས་ལ་རྡུལ་མེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྣམ་པར་བྱང་བས་ཚིམ་པར་བྱེད་ཅིང་། ཡོངས་སུ་སྦྱོང་བ་འབྱུང་བའི་རྒྱན་ཅེས་བྱའོ། །ལྟོ་འཕྱེ་ཆེན་པོའི་དབང་པོ་བློ་གྲོས་སྣ་ཚོགས་མཆོག་གི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་རྣམ་པར་དཔྱོད་པ་དགེ་བ་ལ་ཀུན་ནས་ཡང་དག་པར་གཞོལ་བས་མོས་པར་བྱེད་ཅེས་བྱའོ། །ལྟོ་འཕྱེ་ཆེན་པོའི་དབང་པོ་མིག་བཟང་པོའི་བདག་པོའི་རྣམ་པར་ཐར་པ་ནི། ཆགས་པའི་བསོད་ནམས་ཕུན་སུམ་ཚོགས་པ་ཐམས་ཅད་མཉམ་པ་ཉིད་ཀྱི་མཚན་ཉིད་དུ་རྣམ་པར་སྒོམ་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོའི་སྒྲོན་མའི་སྐྱབས་ཀྱི་རྒྱལ་པོའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་མུན་པ་རྣམ་པར་ལྡོག་ཅིང་ལམ་གྱི་ཕྱོགས་ཡང་དག་པར་སྟོན་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་སྣང་བ་ཤུགས་བཟང་པོའི་རྒྱལ་མཚན་གྱི་རྣམ་པར་ཐར་པ་ནི། དེ་བཞིན་གཤེགས་པ་ཐམས་ཅད་ཀྱི་བསྟན་པ་དང་། འཕགས་པའི་ཡོན་ཏན་
ལ་འཇུག་པས་དགའ་བ་འབྱུང་བ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་སེང་གེའི་ཕྲུ་གུའི་རྣམ་པར་ཐར་པ་ནི། སྟོབས་དང་བརྩོན་པ་ཁ་ན་མ་ཐོ་བ་མེད་པས་སེམས་ཅན་སྐྱོབ་པའི་བདག་པོ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་རྒྱན་སྣ་ཚོགས་ཀྱི་དབྱངས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བདེ་བ་དང་དགའ་བ་མཐའ་ཡས་པ་རྗེས་སུ་དྲན་པ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་རི་རབ་ཀྱི་བུའི་རྣམ་པར་ཐར་པ་ནི། སྒྲིབ་པ་ཐམས་ཅད་རབ་ཏུ་རྟོགས་པ་མི་སྐུལ་བས་ཕ་རོལ་ཏུ་འགྲོ་ཞིང་དགའ་བ་ཀུན་ནས་འབྱུང་བ་ཞེས་བྱའོ། །ལྟོ་འཕྱེ་ཆེན་པོའི་དབང་པོ་འོད་ཡིད་དུ་འོང་བ་འབྱུང་བའི་རྣམ་པར་ཐར་པ་ནི། སེམས་ཅན་གྱི་རྒྱུད་མཉམ་པ་དང་མི་མཉམ་པ་ལ་མཉམ་པ་ཉིད་ཀྱི་ལམ་གྱི་ཕྱོགས་སྟོན་པ་ཞེས་བྱའོ། །དེ་ནས་ལྟོ་འཕྱེ་ཆེན་པོའི་དབང་པོ་བློ་གྲོས་བཟང་པོའི་གཟི་བརྗིད་ཀྱིས་སངས་རྒྱས་ཀྱི་མཐུས། ལྟོ་འཕྱེ་ཆེན་པོའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཆོས་ཉིད་རྒྱ་ཆེན་ཡངས་ལ་ལྟོས། །སེམས་ཅན་ཀུན་གྱི་མདངས་དང་བདེ་བ་འབྱུང་། །ནད་མེད་འཆི་མེད་ལམ་ཡང་ཤིན་ཏུ་སྟོན། །སྡུག་བསྔལ་ཐམས་ཅད་རབ་ཞི་གནས་ཀྱང་མེད། །རྒྱལ་བའི་རྫུ་འཕྲུལ་ཆོས་ཉིད་དེ་ཡང་ལྟོས། །ཕྱོགས་རྣམས་ཀུན་ཏུ་མངོན་པར་རབ་ཏུ་འཕགས། །འཇིག་རྟེན་ཀུན་ཏུ་ཐུབ་པ་མངོན་པར་མཛེས། །ལྟོ་འཕྱེ་ཆེན་པོ་འོད་མཛེས་འདི་ལ་འཇུག །ཉོན་མོངས་ལས་ཀྱི་སྒྲིབ་པས་སྟུག་བསྒྲིབས་ཤིང་། །སྲིད་པའི་རྒྱ་མཚོ་གཏིང་རིང་ནུབ་པ་ཡི། ། སེམས་ཅན་རྣམས་ལ་ཞི་བའི་སྤྱོད་ཡུལ་སྟོན། །གཟི་བརྗིད་རྡུལ་མེད་དབྱངས་ཀྱིས་འདི་མཐོང་ངོ་། །སངས་རྒྱས་ཡེ་ཤེས་མཉམ་མེད་བསམ་མི་ཁྱབ། །འགྲོ་བའི་བསམ་པ་མ་ལུས་ཐུགས་སུ་ཆུད། །དེ་དག་ཀུན་ལ་རྣམ་དག་ཆོས་ཉིད་སྟོན། །ལྟོ་འཕྱེ་ཆེན་པོའི་སྣ་ཚོགས་གཙུག་ཕུད་འཇུག །བསམ་གྱིས་མི་ཁྱབ་བསོད་ནམས་རྒྱ་མཚོའི་དབྱིངས། །
མཐའ་ཡས་ཡང་དག་འབྱུང་བ་རྒྱལ་བས་གཟིགས། །དེ་བཞིན་གཤེགས་པ་འཇིག་རྟེན་བསོད་ནམས་ཞིང་། །མིག་བཟང་བདག་པོ་ལྟོ་འཕྱེ་ཆེན་པོས་མཐོང་། །སེམས་ཅན་ཀུན་གྱི་སྡུག་བསྔལ་འཇིགས་པ་རྣམས། །ཇི་སྙེད་དེ་དག་རྒྱལ་བས་ཀུན་ནས་སྐྱབས། །རྒྱལ་བ་ཆོས་དབྱིངས་ནམ་མཁའ་ལྟ་བུ་སྟེ། །དེ་ནི་སྒྲོན་མ་སྐྱབས་ཀྱི་སྤྱོད་ཡུལ་ལོ། །སངས་རྒྱས་བ་སྤུ་རེ་རེའི་ཡོན་ཏན་ཡང་། །འཇིག་རྟེན་ཀུན་གྱིས་ཤེས་པར་མི་ནུས་ཏེ། །མགོན་པོ་རྣམས་ནི་མི་ཟད་ནམ་མཁའ་བཞིན། །འདི་ནི་ཤུགས་ཀྱི་རྒྱལ་མཚན་རྣམ་པར་མཐོང་། །ཐམས་ཅད་ཆོས་དང་སྟོབས་ཀྱི་མཐར་ཕྱིན་པས། །སངས་རྒྱས་རི་བོ་ལྟ་བུར་བསྐྱོད་མི་ནུས། །དེ་ཡི་ཆོས་ཉིད་རྒྱལ་བ་རབ་ཏུ་མཛེས། །སེང་གེའི་ཕྲུག་པ་དཔལ་ནི་འདི་ལ་འཇུག །རྒྱལ་བ་རྣམས་ཀྱིས་རྣམ་ཐར་ལ་དགའ་བ། །བསྐལ་པ་སྔ་ཚེ་རྒྱ་ཆེ་སྤེལ་བས་ན། །དེ་ཕྱིར་འགྲོ་བ་ཀུན་བལྟས་ཡིད་དུ་འོང་། །སྣ་ཚོགས་སྒྲ་དབྱངས་རྣམ་ཐར་འདི་ལ་འཇུག །རྒྱལ་བའི་ཕ་རོལ་ཕྱིན་པ་རྒྱ་མཚོ་རྣམས། །ཡོངས་བསྐང་ཆོས་དབྱིངས་སྐུ་དང་སྤྱོད་ཡུལ་མེད། །འཇིག་རྟེན་ཐམས་ཅད་སྐྱབས་གྱུར་སྒྲོན་མ་སྟེ། །རི་རབ་བུ་ནི་ཚུལ་བཟང་འདི་ལ་འཇུག །དེ་ལ་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་ཀྱི་རྣམ་པར་ཐར་པ་ནི། ཐོགས་པ་མེད་པའི་མིག་ལ་སྒྲིབ་པ་མེད་པས་སེམས་ཅན་གྱི་ཁམས་རྣམ་པར་ལྟ་བ་ཞེས་བྱའོ། །ནམ་མཁའ་ལྡིང་གི་དབང་པོ་མི་ཤིགས་པའི་སེམས་རིན་ཆེན་གཙུག་ཕུད་ཀྱི་རྣམ་པར་ཐར་པ་ནི། ཕྱོགས་བཅུའི་སེམས་ཅན་ཡོངས་སུ་སྨིན་པར་བྱ་བས། ཆོས་ཀྱི་དབྱིངས་ལ་རབ་ཏུ་གནས་པ་ཞེས་བྱའོ། །ནམ་མཁའ་ལྡིང་གི་དབང་པོ་ཤུགས་དྲི་མ་མེད་པའི་དཔལ་གྱི་རྣམ་པར་ཐར་པ་ནི། སྒོ་ཀུན་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་རབ་ཏུ་འབྱུང་བ་ཞེས་བྱའོ། །ནམ་མཁའ་ལྡིང་གི་དབང་པོ་ཕྱིར་མི་ལྡོག་པའི་སེམས་ཀྱི་རྒྱན་གྱི་རྣམ་པར་ཐར་པ་ནི། དེ་བཞིན་གཤེགས་པའི་ཤུགས་ཀྱི་མཐུས་འཇུག་པའི་འོད་ཅེས་བྱའོ། །
ནམ་མཁའ་ལྡིང་གི་དབང་པོ་ཆོས་བརྟན་པ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སེམས་ཅན་མཐའ་ཡས་པ་ཡོངས་སུ་སྨིན་པར་བྱ་བའི་ཡེ་ཤེས་རབ་ཏུ་ཕྱེ་བ་ཞེས་བྱའོ། །ནམ་མཁའ་ལྡིང་གི་དབང་པོ་ཅོད་པན་སྣ་ཚོགས་ཀྱི་དཔལ་གྱི་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་གྲོང་ཁྱེར་རབ་ཏུ་བརྒྱན་པ་ཡང་དག་པར་སྟོན་པ་ཞེས་བྱའོ། །ནམ་མཁའ་ལྡིང་གི་དབང་པོ་གཞི་ཀུན་ཏུ་ཁྱབ་པར་སྟོན་པའི་ཤུགས་ཀྱི་རྣམ་པར་ཐར་པ་ནི། སྟོབས་ཀུན་ནས་ཡང་དག་པར་བསྒྲུབ་པས་ཐུབ་པ་མེད་པའི་རྒྱན་ཅེས་བྱའོ། །ནམ་མཁའ་ལྡིང་གི་དབང་པོ་དགེ་བ་རྒྱ་མཚོ་ཀུན་ནས་ལྟ་བའི་རྣམ་པར་ཐར་པ་ནི། སེམས་ཅན་གྱི་རིས་ཐམས་ཅད་རྣམ་པར་བསྒོམ་པའི་ཚུལ་མངོན་པར་བསྒྲུབ་པ་ཞེས་བྱའོ། །ནམ་མཁའ་ལྡིང་གི་དབང་པོ་ཀླུའི་སྒྲ་ཡངས་པ་ཀུན་ཏུ་ལྟ་བའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་མཐའ་ཡས་སྐྱེ་བ་དང་། འཆི་འཕོ་བ་ཤེས་པའི་ཡེ་ཤེས་ལ་ཡང་དག་པར་འཇུག་པ་ཞེས་བྱའོ། །དེ་ནས་ནམ་མཁའ་ལྡིང་གི་དབང་པོ་མཐུ་སྟོབས་ཆེན་པོའི་ཤུགས་ཀྱིས་སངས་རྒྱས་ཀྱི་མཐུས་འདབ་མ་བཟང་པོའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་བཅུའི་ཞིང་རྣམས་མ་ལུས་དབྱིངས་བཀང་ཞིང་། །འཇིག་རྟེན་མགོན་པོ་རྒྱ་ཆེན་སྤྱན་གྱིས་གཟིགས། །སེམས་ཅན་འདུལ་བ་དེ་ལ་ཚད་ཀྱང་མེད། །རང་བྱུང་རྣམ་ཐར་རྒྱ་ཆེན་ཤིན་ཏུ་ཡངས། །འཇིག་རྟེན་མགོན་གྱི་འཕྲུལ་སྟོབས་ཆགས་པ་མེད། །ཕྱོགས་བཅུའི་སྙིང་པོ་བྱང་ཆུབ་ཀུན་ན་བཞུགས། །རྒྱལ་བའི་མདོ་སྡེ་སྤྲིན་རྣམས་ཐམས་ཅད་ཀྱང་། །རིན་ཆེན་སྣ་ཚོགས་གཙུག་ཕུད་མཁའ་ལྡིང་ཉན། །སྔོན་གྱི་བདེ་བར་གཤེགས་པའི་སྤྱོད་པ་རྣམས། །ཕ་རོལ་ཕྱིན་པ་རྒྱ་ཆེན་བྱང་བ་མཐོང་། །སངས་རྒྱས་ཀུན་ལ་མཆོད་པ་ཡང་དག་བྱེད། །འདབ་མ་བཟང་པོ་ཤུགས་བཟང་དེ་བརྗོད་དོ། །སྐད་ཅིག་སེམས་ལ་བྱང་ཆུབ་སྤྱོད་མཐའ་ཡས། །ཐམས་ཅད་རྒྱལ་བའི་སྤུ་རྩེ་ཀུན་ན་སྣང་། །
རྒྱལ་བའི་སྤྱོད་ཡུལ་ཚད་མེད་ཅི་འདྲ་བ། །དེ་ནི་རྒྱན་བཟང་ནམ་མཁའ་ལྡིང་གིས་མཐོང་། །རྒྱལ་བའི་སྤྱོད་ཡུལ་ཡངས་པ་བསམ་མི་ཁྱབ། །འགྲོ་བ་ཀུན་གྱིས་བསམ་པར་སླ་བ་མིན། །ཡེ་ཤེས་ཡོན་ཏན་རྒྱ་མཚོ་འཇིག་རྟེན་མགོན། །རྣམ་ཐར་འདི་ནི་མཁའ་ལྡིང་འགྲོ་འཛིན་གྱི། །དེ་བཞིན་གཤེགས་པའི་ཡེ་ཤེས་མཐའ་ཡས་འོད། །འགྲོ་བ་གཏི་མུག་དྲ་བ་མ་ལུས་སེལ། །རྒྱལ་བ་འཇིག་རྟེན་ཐམས་ཅད་ཀུན་གྱི་མགོན། །དེ་འདྲ་ཆོས་བསྟན་འཛིན་པ་འདབ་བཟང་སྟོན། །ཆོས་ཀྱི་གྲོང་ཁྱེར་མི་ཟད་ཐམས་ཅད་ནས། །སངས་རྒྱས་རྒྱ་ཆེན་འཇིག་རྟེན་ཀུན་ཏུ་སྟོན། །མཐའ་ཡས་ཆོས་ཀྱི་སྒོ་མོ་དུ་མ་ནས། །འདབ་བཟང་སྣ་ཚོགས་གཙུག་ཕུད་འདི་ལ་འཇུག །ཐམས་ཅད་སྟོབས་ལ་རང་བྱུང་རབ་ཏུ་ཞུགས། །རྒྱལ་བ་ཀུན་དང་སྐུ་གཅིག་ཆོས་ཀྱི་སྐུ། །དེ་བཞིན་ཉིད་དངོས་རྣམ་པར་རྟོག་མི་མངའ། །ཀུན་ཏུ་རྒྱུ་བའི་འདབ་བཟང་འདི་བརྗོད་དོ། །རྒྱལ་བའི་འོད་ཟེར་འཇིག་རྟེན་ཀུན་བཀྱེ་བ། །སྣ་ཚོགས་ཐབས་ཀྱིས་སེམས་ཅན་ཁམས་ཀྱང་འདུལ། །སྲིད་པ་སྔ་ཚེ་བསྡུས་པ་རྣམ་པར་སྤྱོད། ། རྣམ་ཐར་འདི་ནི་མིག་བཟང་དམ་པའོ། །དྲི་མེད་རྒྱ་མཚོའི་ལས་ལ་གནས་པ་ཡིས། །ཞིང་གི་དབྱིངས་རྣམས་མ་ལུས་སངས་རྒྱས་གཟིགས། །དེ་དག་ཀུན་ཏུ་རྒྱལ་བ་ཆོས་ཆར་འབེབས། །རྒྱ་མཚོ་རྒྱུ་བའི་མཁའ་ལྡིང་འདི་ལྟར་ལྟ། །དེ་ལ་ལྷ་མ་ཡིན་གྱི་དབང་པོ་སྒྲ་གཅན་གྱི་རྣམ་པར་ཐར་པ་ནི། དབང་པོ་ཆེན་པོས་ཤིན་ཏུ་འཕགས་ཤིང་ཟིལ་གྱིས་མི་ནོན་པ་ཞེས་བྱའོ། །ལྷ་མ་ཡིན་གྱི་དབང་པོ་ཐགས་ཟངས་རིས་ཀྱི་རྣམ་པར་ཐར་པ་ནི། སྒོ་ཀུན་ནས་བྱིན་གྱིས་རློབས་པ་རྣམ་པར་གཞོག་པ་རབ་ཏུ་འབྱུང་བ་ཞེས་བྱའོ། །ལྷ་མ་ཡིན་གྱི་དབང་པོ་བདེ་བའི་མཆོག་གི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྡུག་བསྔལ་ཞི་བར་བྱེད་པ་རྡུལ་མེད་པ་ཞེས་བྱའོ། །ལྷ་མ་ཡིན་གྱི་དབང་པོ་མཚོན་ཆ་ཆེན་པོའི་རྣམ་པར་ཐར་པ་ནི། བརྟུལ་ཞུགས་དང་དཀའ་ཐུབ་ཐམས་ཅད་ལ་གནས་པའི་རྒྱན་ཅེས་བྱའོ། །ལྷ་མ་ཡིན་གྱི་དབང་པོ་སྟོབས་ཅན་
གྱི་རྣམ་པར་ཐར་པ་ནི། ཕྱོགས་བཅུ་རབ་ཏུ་བསྐུལ་བའི་ཡུལ་མཐའ་ཡས་པ་ཞེས་བྱའོ། །ལྷ་མ་ཡིན་གྱི་དབང་པོ་རྣམ་པར་སྣང་བའི་རྣམ་པར་ཐར་པ་ནི། འཇིག་རྟེན་ཐམས་ཅད་རབ་ཏུ་དགོད་པའི་སྦྱོར་བ་རྣམ་པ་སྣ་ཚོགས་ཤེས་བྱའོ། །ལྷ་མ་ཡིན་གྱི་དབང་པོ་རྡོ་རྗེ་སྲ་བ་སྣ་ཚོགས་ཀྱི་ཡན་ལག་གི་རྣམ་པར་ཐར་པ་ནི། དགེ་བའི་རྩ་བ་ཆགས་པ་ཐམས་ཅད་ཀྱིས་མི་ཤིགས་པའི་དཀྱིལ་འཁོར་ཡོངས་སུ་སྦྱང་བ་ལ་ཡང་དག་པར་འཇུག་པ་ཞེས་བྱའོ། །ལྷ་མ་ཡིན་གྱི་དབང་པོ་སྟོབས་རྒྱ་ཆེན་པོའི་རྒྱུའི་བློ་གྲོས་ཀྱི་རྣམ་པར་ཐར་པ་ནི། སྙིང་རྗེ་ཆེན་པོ་མངོན་དུ་བྱ་བའི་སྟོབས་ལ་གཏི་མུག་མེད་པ་ཞེས་བྱའོ། །ལྷ་མ་ཡིན་གྱི་དབང་པོ་དཔལ་གྱི་བེའུ་འབྱུང་བའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་ཀྱི་དཀྱིལ་འཁོར་རྣམ་པར་སྦྱོང་ཞིང་སངས་རྒྱས་མཉེས་པར་བྱེད་པ་ཞེས་བྱའོ། །ལྷ་མ་ཡིན་གྱི་དབང་པོ་བརྟུལ་ཞུགས་བཟང་པོའི་དབྱངས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་འཁོར་ལོ་ཡང་དག་པར་འཇུག་ཅིང་གཏི་མུག་མེད་པ་ལ་ཡང་དག་པར་འཇུག་པ་ཞེས་བྱའོ། །དེ་ནས་ལྷ་མ་ཡིན་གྱི་དབང་པོ་སྒྲ་གཅན་གྱིས་སངས་རྒྱས་ཀྱི་མཐུས། ལྷ་མ་ཡིན་གྱི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕྱོགས་རྣམས་རྒྱ་ཆེ་དེ་དག་ཐམས་ཅད་དུ། །རྒྱལ་བའི་ཟིལ་གྱིས་འབྱམ་ཀླས་འཁོར་ཀྱང་གནོན། །ནམ་མཁའི་མཚན་ཉིད་ཀུན་ཏུ་འོད་འཕྲོ་སྟེ། །ཐམས་ཅད་སྒོ་ནས་འགྲོ་བར་མངོན་པར་མཛེས། །སྐད་ཅིག་སེམས་ཀྱིས་བསྐལ་པ་བརྒྱ་མང་གི །སངས་རྒྱས་ཡུལ་རྣམས་མ་ལུས་ཐམས་ཅད་སྟོན། །འདུལ་བ་ཀུན་ལ་འོད་རྣམས་རབ་ཏུ་འགྱེད། །རྣམ་ཐར་དེ་ནི་ཐགས་ཟངས་རིས་ཀྱིས་མཐོང་། །སངས་རྒྱས་སྤྱོད་ཡུལ་གཞལ་མེད་བདག་གིས་མཐོང་། །སྣ་ཚོགས་སྒོ་ནས་སེམས་ཅན་དོན་ཀྱང་མཛད། །སྡུག་བསྔལ་ཐམས་ཅད་བདེ་གཤེགས་ཞིར་མཛད་དེ། །རྣམ་ཐར་འདི་ལ་བདེ་བའི་མཆོག་འཇུག་གོ །འགྲོ་
བའི་དོན་དུ་བརྟུལ་ཞུགས་དཀའ་ཐུབ་རྣམས། །དགེ་བ་རྒྱལ་བས་བསྐལ་པ་བརྒྱར་སྤྱད་དེ། །དེ་ཕྱིར་རྒྱལ་བའི་ཡེ་ཤེས་ཀུན་ཏུ་སྒོ། །དྲ་བ་བཟང་པོ་སངས་རྒྱས་འདི་ལྟར་བརྗོད། །ཞིང་དབྱིངས་ཐམས་ཅད་རྒྱལ་བ་གཡོ་བར་མཛད། །འཇིགས་པ་མི་སྟོན་སྐྲག་པ་ཡོད་པ་མིན། །བདེ་གཤེགས་རྫུ་འཕྲུལ་ཆགས་མེད་གཞལ་དུ་མེད། །ལྷ་མིན་དབང་པོ་སྟོབས་ཅན་དེ་ལྟར་སྟོན། །སངས་རྒྱས་སྐྱེ་བ་བདེ་བར་འབྱུང་བ་རྣམས། །འགྲོ་བ་ཀུན་གྱི་སྡུག་བསྔལ་ཞི་བར་མཛད། །ཐམས་ཅད་མཁྱེན་གྱི་ཡེ་ཤེས་ཕྱོགས་ཀྱང་སྟོན། །རྣམ་པར་སྣང་བ་འདི་ནི་རབ་ཏུ་བརྗོད། །འགྲོ་བའི་བསོད་ནམས་རྒྱ་ཆེན་དགེ་བ་དག །རྒྱལ་བའི་མཐུ་ཡིས་དེ་དག་བྱུང་བ་སྟེ། ། ཐར་པའི་ཕྱོགས་ཀྱི་ལམ་ཡང་རྒྱལ་བ་སྟོན། །ཆོས་དཔལ་འདི་མཐོང་འདི་ལ་རབ་ཏུ་འཇུག །བདེ་གཤེགས་ཐུགས་རྗེ་སྐུ་ནི་མཉམ་པ་མེད། །ཆགས་མེད་སྤྱོད་པ་ཐམས་ཅད་ཀུན་ཏུ་སྣང་། །འགྲོ་བ་ཐམས་ཅད་མིག་ཡོར་མཚན་ཉིད་དེ། །རྒྱུ་ཡི་བློ་གྲོས་སངས་རྒྱས་ཡོན་ཏན་བརྗོད། །སངས་རྒྱས་ཡུལ་ནི་ངོ་མཚར་མཉམ་པ་མྱེད། །སངས་རྒྱས་རྫུ་འཕྲུལ་ཆོས་ཀྱི་དབྱིངས་ཀྱི་ཀློང་། །བྱང་ཆུབ་ཤིང་དྲུང་ཀུན་ན་རབ་ཏུ་བཞུགས། །དཔལ་གྱི་བེ་འུ་ལྷ་མིན་བདག་པོས་མཐོང་། །འགྲོ་བ་ཀུན་གྱི་འཁོར་ལོ་དབྱིངས་དག་ཏུ། །སྔན་ཅད་བདེ་གཤེགས་སྤྱོད་པ་སྤྱོད་པའི་ཚེ། །འགྲོ་བའི་སྡུག་བསྔལ་མ་ལུས་རབ་ཏུ་བཀྲོལ། །དེ་ལྟར་ལྷ་མིན་སྒྲ་དབྱངས་རབ་ཏུ་བརྗོད། །དེ་ལ་ཉིན་མོའི་ལྷ་ཁྱིམ་དང་གཞལ་མེད་ཁང་གི་གཟུགས་ཤིན་ཏུ་སྟོན་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་རྒྱུད་ལ་ཡང་དག་པར་འཇུག་པ་ཞེས་བྱའོ། །ཉིན་མོའི་ལྷ་བརྩམ་པའི་བློ་གྲོས་མཚམས་སྦྱོར་བའི་དཀྱིལ་འཁོར་གྱི་རྣམ་པར་ཐར་པ་ནི་སེམས་ཅན་གྱི་དོན་ཐམས་ཅད་ཡོངས་སུ་རྒྱས་པར་བྱས་པས་ཤིན་ཏུ་ཚིམ་པར་བྱ་བ་ལ་རྣམ་པར་དཔྱོད་པ་ཞེས་བྱའོ། །ཉིན་མོའི་ལྷ་ཀུན་ནས་དགའ་བའི་དཔལ་
གྱི་རྒྱན་གྱི་རྣམ་པར་ཐར་པ་ནི། དགའ་བ་དང་མགུ་བ་མཐའ་ཡས་པའི་ཆོས་ཀྱི་སྣང་བ་ཞེས་བྱའོ། །ཉིན་མོའི་ལྷ་མེ་ཏོག་དང་སྤོས་ཡིད་དུ་འོང་བའི་རྣམ་པར་ཐར་པ་ནི། སེམས་ཅན་མཐའ་ཡས་པའི་མོས་པ་ཡང་དག་པར་རྒྱས་པ་ལ་རྣམ་པར་ལྟ་བ་ཞེས་བྱའོ། །ཉིན་མོའི་ལྷ་ཀུན་ནས་ཡིད་དུ་འོང་བའི་སྨན་སྟོན་པ་སྒྲུབ་པའི་དཔལ་གྱི་རྣམ་པར་ཐར་པ་ནི། ཀུན་ཏུ་འོད་ཀྱི་སྟོབས་ཡང་དག་པར་བསྒྲུབ་པ་རྣམ་པར་སྟོན་པའི་རྒྱན་ཅེས་བྱའོ། །ཉིན་མོའི་ལྷ་ལྷག་པའི་མིག་བཟང་པོས་ཚིམ་པར་བྱེད་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བདེ་བ་དང་། སྡུག་བསྔལ་ཆོས་ཀྱི་དགའ་བས་སྣང་བར་བྱེད་པ་ཞེས་བྱའོ། །ཉིན་མོའི་ལྷ་ཚུལ་རྒྱ་ཆེན་པོའི་ཕྱོགས་ཀུན་ནས་བྱུང་བའི་དཔལ་གྱི་རྣམ་པར་ཐར་པ་ནི། ཆོས་ཀྱི་དབྱིངས་ཀྱི་ཕྱོགས་ཐ་མི་དད་པའི་སྙིང་པོ་ཞེས་བྱའོ། །ཉིན་མོའི་ལྷ་སྙིང་རྗེ་རྒྱ་ཆེན་པོའི་གཟི་བརྗིད་ཀྱི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བདེ་བ་ཡང་དག་པར་སྟོན་ཅིང་སྐྱོབ་པའི་སྟོབས་ལ་ཤིན་ཏུ་བརྩོན་པ་ཞེས་བྱའོ། །ཉིན་མོའི་ལྷ་སྣང་བ་རྒྱ་ཆེན་པོའི་དགེ་བའི་རྩ་བ་དང་མི་འབྲལ་བའི་འོད་ཀྱི་རྣམ་པར་ཐར་པ་ནི། མཉམ་པ་ཉིད་ཀྱིས་དགའ་བའི་ཡོན་ཏན་ཀུན་ནས་རབ་ཏུ་འབྱུང་བ་ཞེས་བྱའོ། །ཉིན་མོའི་ལྷ་མེ་ཏོག་གི་ཕྲེང་བ་ཀུན་ནས་འཕྱང་བའི་དཔལ་གྱི་རྣམ་པར་ཐར་པ་ནི། འགྲོ་བས་མཐོང་ན་དོན་ཡོད་པའི་གྲགས་པའི་དཀྱིལ་འཁོར་ཅེས་བྱའོ། །དེ་ནས་ཉིན་མོའི་ལྷ་ཁྱིམ་དང་གཞལ་མེད་ཁང་གི་གཟུགས་ཤིན་ཏུ་སྟོན་པས་སངས་རྒྱས་ཀྱི་མཐུས་ཉིན་མོའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་ཀུན་གྱི་སྤྱོད་པ་རྒྱལ་བས་མཁྱེན། །རྒྱལ་བ་དུས་གསུམ་མཉམ་པ་ཉིད་ལ་བཞུགས། །རྒྱལ་བའི་ཡེ་ཤེས་མི་ཟད་ནམ་མཁའ་བཞིན། །རྒྱལ་བའི་འོད་ཀྱིས་ཕྱོགས་རྒྱས་ཤིན་ཏུ་སྣང་། །འགྲོ་བ་ཀུན་གྱི་བསམ་པ་ཐུགས་སུ་ཆུད། །དོན་གྱི་ཚིག་རྣམས་གཞན་དང་གཞན་དག་ཀྱང་། །རྣམ་ཕྱེ་རྒྱ་
ཆེན་ཚིག་གིས་རྒྱལ་བ་གསུང་། །ཕུན་སུམ་ཚོགས་པའི་བློ་གྲོས་ལྷ་ཡིས་མཐོང་། །རྒྱལ་བའི་འོད་ཀྱིས་སེམས་ཅན་ཀུན་དགའ་སྟེ། །རྒྱལ་བ་མཐོང་ཐོས་དོན་ཏུ་འགྱུར་བ་ཡིན། །གོ་འཕང་དམ་པ་རྒྱ་ཆེན་ཞི་བ་སྟོན། །དཔལ་གྱི་འོད་ནི་དེ་ཡིས་རབ་ཏུ་དགའ། །སངས་རྒྱས་མཐོང་བ་འགྲོ་བ་རྒྱ་ཆེན་གྱི། །དགའ་བ་ཚད་མེད་དགེ་ཆོས་ཀུན་ཀྱང་འབྱུང་། །ཆོས་སྤྲིན་གཞལ་མེད་རྒྱལ་བ་ཆར་འབེབས་ཏེ། །དེ་ལ་མེ་ཏོག་རྒྱན་པའི་ལྷ་དགའ་བོ། །ཆོས་ཀྱི་དཀྱིལ་འཁོར་སྟོབས་ལ་འཇུག་པ་རྣམས། །སེམས་ཅན་བསྡུ་བའི་སྒོ་ལ་རྣམ་དཔྱོད་ཅིང་། །རབ་ཡངས་སྤྱད་པ་སྤྱོད་ཚེ་རྒྱལ་བས་སྦྱངས། །འདི་ནི་ཡིད་འོང་འབྱུང་བའི་ལྷས་མཐོང་ངོ་། །རྒྱལ་བ་མཐོང་ཞིང་ཐོས་པ་དོན་མེད་མིན། །དགའ་དང་བདེ་བ་སྤྲོ་བ་ཡངས་པ་སྐྱེད། །འབྱམ་ཀླས་ཐབས་རྣམས་ཀུན་གྱིས་སེམས་ཅན་འདུལ། །དེས་ནི་མིག་བཟང་དེའི་དགའ་སྐྱེད་བྱེད། །ཆོས་དབྱིངས་འབྱམ་ཀླས་ཕྱོགས་སུ་རབ་ཏུ་འཇུག །འགྲོ་བར་སྟོབས་བཅུས་མ་ལུས་བསྟན་མཛད་དེ། །བདེ་གཤེགས་དངོས་ཡོད་མ་ཡིན་དངོས་མེད་མིན། །འཕགས་པའི་དཔལ་གྱི་ཉིན་མོའི་ལྷ་ཡིས་མཐོང་། །སེམས་ཅན་མི་བདེ་ཐིབས་པོར་ནུབ་པ་རྣམས། །གཟིགས་ནས་རྒྱལ་བ་འཇིག་རྟེན་མཆོད་པ་མཛད། །སྡུག་བསྔལ་རྒྱུ་རྣམས་ཐམས་ཅད་རྒྱལ་བས་བསྩལ། །འདི་ལ་སྙིང་རྗེ་གཟི་བརྗིད་ལྷ་འཇུག་གོ །འགྲོ་བ་འདི་དག་ཉོན་མོངས་ལས་བསྒྲིབས་པར། །དགའ་བ་འབྱུང་བའི་བདེ་བ་རྒྱལ་བ་གསུང་། །ཆོས་ཀྱི་དགའ་བ་རབ་ཀྱིས་སྡུག་བསྔལ་འཇིག །བསོད་ནམས་ཤུགས་ནི་རྣམ་ཐར་འདི་ལ་འཇུག །མཁའ་འདྲ་རྒྱལ་བའི་བསོད་ནམས་དཀྱིལ་འཁོར་རྣམས། །འཇིག་རྟེན་དགེ་བས་གཙོ་བོ་མཆོག་བྱུང་སྟེ། །ཆོས་རྣམས་ཀུན་ལ་བདེ་གཤེགས་འཁྲུལ་མི་མངའ། །མེ་ཏོག་ཕྲེང་གི་རྣམ་ཐར་འདི་ཡིན་ནོ། །དེ་ལ་མཚན་མོའི་ལྷ་དཔལ་དྲི་མ་མེད་ཅིང་ཀུན་ནས་ཟབ་པའི་འོད་ཀྱི་རྣམ་པར་ཐར་པ་ནི། བསམ་གཏན་རབ་ཏུ་ཞི་བའི་བདེ་བ་ཀུན་ནས་རྣམ་པར་གནོན་པ་ཞེས་བྱའོ། །མཚན་མོའི་
ལྷ་ཀུན་ནས་སྐྱོབ་པའི་མདངས་ཀྱི་དཔལ་གྱི་རྣམ་པར་ཐར་པ་ནི། སྣང་བ་འཇིག་རྟེན་ཐམས་ཅད་ལ་མངོན་ཏུ་ལྟ་ཞིང་འགྲོ་བ་འདུལ་བ་སྟོན་པ་ཞེས་བྱའོ། །མཚན་མོའི་ལྷ་རབ་ཏུ་དགའ་བའི་མིག་གིས་འགྲོ་བ་ལ་རྣམ་པར་ལྟ་བའི་རྣམ་པར་ཐར་པ་ནི། ཀུན་ནས་དགའ་བ་རྒྱ་ཆེན་པོ་དྲི་མ་མེད་པའི་མཚན་ཉིད་ཞེས་བྱའོ། །མཚན་མོའི་ལྷ་སྒྲས་ཞི་བ་རྒྱ་མཚོ་དང་ལྡན་པའི་རྣམ་པར་ཐར་པ་ནི། དགའ་བ་ཡངས་པ་འབྱུང་བའི་སེམས་ཀྱི་མཚན་ཉིད་ཀྱི་རྒྱན་ཅེས་བྱའོ། །མཚན་མོའི་ལྷ་མཚན་མོ་ཐམས་ཅད་འབྱུང་བའི་དཔལ་གྱི་རྣམ་པར་ཐར་པ་ནི། ཡིད་དུ་འོང་བའི་སྒྲ་ཟབ་མོས་རྣམ་པར་འཕྲུལ་པ་ལ་འཇུག་པ་ཞེས་བྱའོ། །མཚན་མོའི་ལྷ་ཤིང་ཐམས་ཅད་རབ་ཏུ་རྒྱས་པར་བྱེད་པའི་འོད་ཀྱི་རྣམ་པར་ཐར་པ་ནི། དགའ་བ་དང་སྨོན་ལམ་དང་མོས་པ་རྒྱ་ཆེན་པོའི་འོད་ཅེས་བྱའོ། །མཚན་མོའི་ལྷ་ཀུན་ནས་སྐྱོང་ཞིང་སྲུང་བའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དགེ་བའི་རྩ་བ་ཡང་དག་པར་བརྗོད་པ་ཞེས་བྱའོ། །མཚན་མོའི་ལྷ་དགེ་བའི་ཐམས་ཅད་ཀྱི་དགའ་བར་རྩེ་བ་ལ་དབང་སྒྱུར་བའི་རྣམ་པར་ཐར་པ་ནི། བྱམས་པ་མཐའ་ཡས་པ་འགྲོ་བ་ཡོངས་སུ་སྐྱོབ་པ་ཞེས་བྱའོ། །མཚན་མོའི་ལྷ་མདུད་པར་འཛིན་པ་ཐམས་ཅད་ཞི་བར་བྱ་བས་དབང་པོ་རབ་ཏུ་དགའ་བའི་རྣམ་པར་ཐར་པ་ནི། སྙིང་རྗེའི་སྒོ་ནས་ཆར་འབེབས་པའི་རྒྱན་ཅེས་བྱའོ། །མཚན་མོའི་ལྷ་དགེ་བའི་བསོད་ནམས་འབྱུང་བའི་དཔལ་སྟོན་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བསམ་པ་ཡོངས་སུ་ཚིམ་པར་བྱ་བས་ཀུན་ཏུ་རྒྱས་པར་འགེངས་པ་ཞེས་བྱའོ། །དེ་ནས་མཚན་མོའི་ལྷ་དཔལ་དྲི་མ་མེད་ཅིང་ཀུན་ནས་ཟབ་པའི་འོད་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་མཚན་མོའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྤྱོད་ཡུལ་ཤིན་ཏུ་ཡངས་ལ་ལྟོས། །སྟོང་པ་ཞི་བ་ནམ་མཁའི་མཚན་ཉིད་དེ། །དགའ་བ་རྒྱ་མཚོ་
རྣམ་པར་སྦྱང་བྱས་ཤིང་། །རྒྱལ་བ་དྲི་མེད་ཕྱོགས་སུ་རྣམ་པར་མཛེས། །ཐུབ་པ་འཇིག་རྟེན་ཀུན་བལྟ་དགའ་བ་སྟེ། །བསྐལ་པ་རྒྱ་མཚོ་དག་ན་བར་འགའ་སྣང་། །ཐུགས་རྗེ་ཀུན་ཏུ་རྒྱས་བྱས་མགོན་པོ་བྱུང་། །འགྲོ་བ་ལྟ་བ་ལྷ་ཡིས་འདི་མཐོང་ངོ་། །འདྲེན་པ་འགྲོ་བའི་སྐྱབས་སུ་གྱུར་པ་སྟེ། །འགྲོ་བ་དག་ན་མངོན་ཏུ་ཀུན་ན་སྣང་། །ལམ་གྱི་རྒྱུད་རྣམས་ཐམས་ཅད་རྣམ་པར་སྦྱོང་། །སྐྱོབ་པའི་མདངས་ཀྱི་དཔལ་ནི་འདི་ལ་སེམས། །དགའ་བ་རྒྱ་མཚོ་བསམ་གྱིས་མི་ཁྱབ་པ། །རབ་ཏུ་ཡངས་པ་སྔན་ཅད་བསྒོམས་པས་ན། །དེ་ཕྱིར་རྒྱལ་བ་འཇིག་རྟེན་ལྟ་ན་མཛེས། །ཞིང་དབྱངས་མཚན་མོའི་ལྷས་ནི་འདི་མཐོང་ངོ་། །སངས་རྒྱས་སྤྱོད་ཡུལ་བསམ་གྱིས་མི་ཁྱབ་སྟེ། །ཕྱོགས་རྣམས་བཀང་ཞིང་ཞི་བའི་འབྲུག་སྒྲ་སྒྲོག །སེམས་ཅན་བསམ་པ་རྒྱ་ཆེན་རྣམ་པར་སྦྱོང་། །མཚན་མོ་འབྱུང་བའི་དཔལ་ནི་འདི་ལ་དགའ། །དེ་བཞིན་གཤེགས་པའི་འགྲོ་བའི་བསོད་ནམས་སྐྱེད། །བསོད་ནམས་དཀྱིལ་འཁོར་རྣམ་པར་ཡངས་པ་སྟོན། །དྲི་མེད་ཞི་བའི་ས་ཡང་སྟོན་མཛད་དེ། །འདི་ལ་རྒྱས་པའི་འོད་ནི་རབ་ཏུ་འཇུག །སངས་རྒྱས་འཕྲུལ་གྱིས་ཕྱོགས་རྣམས་རབ་བཀང་སྟེ། །སེམས་ཅན་ཐམས་ཅད་རྣམ་པར་འདུལ་བ་སྟོན། །ཐམས་ཅད་གཟུགས་སུ་སངས་རྒྱས་འཇིག་རྟེན་སྣང་། །མཚན་མོའི་ལྷ་ནི་དཔལ་གྱིས་འདི་མཐོང་ངོ་། །འདྲེན་པས་སེམས་ཀྱི་སྐད་ཅིག་ཀུན་ན་སྣང་། །བྱམས་པ་རྒྱ་མཚོའི་ཚུལ་རྣམས་རྣམ་སྦྱངས་ཏེ། །འཇིག་རྟེན་ཐམས་ཅད་མ་ལུས་རྒྱས་པར་མཛད། །བསོད་ནམས་རྩེ་བ་མཚན་མོའི་ལྷས་མཐོང་ངོ་། །སེམས་ཅན་གཏི་མུག་ཐིབས་པོས་འཁྲུགས་པ་དང་། །གཏུམ་སེམས་འཁོན་འཛིན་དམ་པོས་བསྒྲིབས་གཟིགས་ཤིང་། །ཐུགས་རྗེ་བསྐྱེད་ནས་རྒྱལ་བ་འབྱུང་བར་གྱུར། །འཁོན་འཛིན་ཞི་བ་མཚན་མོའི་ལྷ་དགའ་འོ། །སེམས་ཅན་ཀུན་གྱི་བསམ་པ་རྫོགས་བྱས་ཤིང་། །མགོན་པོ་སྔན་ཅད་སྤྱོད་པ་སྤྱད་པས་ན། །དེ་ཕྱིར་རྒྱལ་བ་ཡོན་ཏན་མཚན་རྒྱས་སོ། །བསོད་ནམས་བལྟ་བའི་བདག་
པོའི་སྤྱོད་ཡུལ་ཡིན། །དེ་ལ་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པའི་རྣམ་པར་ཐར་པ་ནི། ཀུན་ཏུ་སྐྱོབ་པས་འགྲོ་བའི་རྒྱན་བྱེད་པ་ཞེས་བྱའོ། །ཕྱོགས་ཀྱི་ལྷ་མཉམ་པ་ཉིད་ལ་མངོན་དུ་ལྟ་བའི་རྣམ་པར་ཐར་པ་ནི། དགོས་པ་ཐམས་ཅད་དང་རྫུ་འཕྲུལ་གྱི་ཚོགས་ཀྱི་འོད་ཅེས་བྱའོ། །ཕྱོགས་ཀྱི་ལྷ་སྣང་བ་སྤྱོད་པའི་རྒྱན་གྱི་རྣམ་པར་ཐར་པ་ནི། ཆགས་པའི་མུན་པ་ཐམས་ཅད་རྣམ་པར་སེལ་བའི་སྣང་བས་དགའ་བ་དང་བདེ་བ་འབྱུང་བ་ཞེས་བྱའོ། །ཕྱོགས་ཀྱི་ལྷ་ཀུན་ཏུ་རྒྱུ་ཞིང་རྗེས་སུ་འབྲང་བའི་རྣམ་པར་ཐར་པ་ནི། ཐམས་ཅད་ཀྱི་རྗེས་སུ་སོང་བའི་སངས་རྒྱས་ཀྱི་ཡོན་ཏན་རྗེས་སུ་དྲན་པ་དོན་ཡོད་པ་སྟོན་པ་ཞེས་བྱའོ། །ཕྱོགས་ཀྱི་ལྷ་རྨོངས་པ་བྱེད་པའི་གཙུག་ཡོངས་སུ་འགྲུབ་པའི་རྣམ་པར་ཐར་པ་ནི། འགྲོ་བ་ཐམས་ཅད་མིང་གི་ཕྱོགས་ཀྱི་འཁོར་ལོ་ལ་རྣམ་པར་ལྟ་བའི་འོད་ཅེས་བྱའོ། །ཕྱོགས་ཀྱི་ལྷ་ནམ་མཁའི་རྒྱུད་ཀུན་ཏུ་སྤྱོད་པའི་རྣམ་པར་ཐར་པ་ནི། སྒྲ་དབྱངས་ཡིད་དུ་འོང་བ་ཐམས་ཅད་མྱོང་བར་བྱེད་པས་དགའ་བ་རྣམ་པར་སྒོམ་པ་ཞེས་བྱའོ། །ཕྱོགས་ཀྱི་ལྷ་རྣམ་པར་དཔྱོད་པའི་སྤྲིན་རྒྱ་ཆེན་པོའི་རྒྱལ་མཚན་གྱི་རྣམ་པར་ཐར་པ་ནི། ཀླུའི་སྤྲིན་འབྱུང་བ་དགའ་བ་སྦྱོར་བ་ཞེས་བྱའོ། །ཕྱོགས་ཀྱི་ལྷ་མིག་ཐ་དད་པ་མེད་པའི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ལས་ཐ་དད་པ་མེད་པ་ལ་ཡང་དག་པར་ལྟ་བའི་བདག་པོའི་རྒྱན་ཅེས་བྱའོ། །ཕྱོགས་ཀྱི་ལྷ་འཇིག་རྟེན་གྱི་བྱ་བ་ཀུན་ནས་སྤྱོད་པའི་རྣམ་པར་ཐར་པ་ནི། སྐྱེ་བ་སྣ་ཚོགས་དང་ལས་རྣམ་པ་ཐ་དད་པ་ལ་རྣམ་པར་ལྟ་བ་ཞེས་བྱའོ། །ཕྱོགས་ཀྱི་ལྷ་ཕྱོགས་སུ་རྣམ་པར་ལྟ་བ་འཕྲེང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགོས་པའི་ཕ་རོལ་ཏུ་ཕྱིན་པར་བྱ་བས་རབ་ཏུ་དགའ་བ་བརྩོན་པ་འབྱུང་བ་ཞེས་བྱའོ། །དེ་ནས་ཕྱོགས་ཀྱི་ལྷ་ཕྱོགས་ཀྱི་དབྱིངས་ན་རབ་ཏུ་གནས་ཤིང་ཀུན་ཏུ་རྒྱས་པར་འགེངས་པས། སངས་རྒྱས་ཀྱི་མཐུས་ཕྱོགས་ཀྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། ། འགྲོ་བ་ཐམས་ཅད་ཡོངས་སུ་སྨིན་བྱའི་ཕྱིར། །སངས་རྒྱས་རང་བྱུང་འཇིག་རྟེན་སྤྱོད་པ་བྱུང་། །ཐམས་ཅད་མཁྱེན་པར་ཡོངས་
སུ་སྨིན་བྱའི་ཕྱིར། །ཆོས་ཀྱི་ཕྱོགས་ལ་རབ་ཏུ་འཇུག་པ་སྟོན། །རྫུ་འཕྲུལ་སྟོབས་ནི་འགྲོ་བ་ཀུན་དང་མཉམ། །རྣམ་པ་དུ་མ་སེམས་ཅན་བསམ་པ་སྟོན། །རྒྱལ་བ་མཐོང་བས་འགྲོ་བའི་སྡུག་བསྔལ་འགྲོལ། །ཀུན་ཏུ་མངོན་པར་ལྟ་བའི་སྤྱོད་ཡུལ་ལོ། །སེམས་ཅན་རྒྱ་མཚོ་མུན་པས་བསྒྲིབས་པ་ལ། །སངས་རྒྱས་ཆོས་ཀྱི་སྒྲོན་མ་སྣང་བ་སྟོན། །རྣམ་པར་སྣང་བའི་སངས་རྒྱས་འོད་ཀྱང་མཐོང་། །སྣང་བ་སྤྱོད་པ་རྣམ་ཐར་འདི་ལ་དགའ། །ཆོས་ཀྱི་འཁོར་ལོ་ཐམས་ཅད་ཀུན་ཏུ་བསྐོར། །སེམས་ཅན་ཉོན་མོངས་ཞི་མཛད་ཐོགས་པ་མེད། །དབྱངས་ཀྱི་ཡན་ལག་ཐམས་ཅད་ཡོངས་སུ་རྒྱས། །ཀུན་ནས་འཁྱིལ་པའི་དཔལ་གྱིས་རབ་ཏུ་ཐོས། །འགྲོ་བའི་མིང་གི་འཁོར་ལོ་ཇི་སྙེད་པ། །སངས་རྒྱས་མཚན་གྱིས་དེ་དག་ཐམས་ཅད་འཐོན། །སེམས་ཅན་རྣམས་ཀྱི་གཏི་མུག་རྣམ་པར་ཟློག །འདི་ནི་གཏི་མུག་རྣམ་དག་སྤྱོད་ཡུལ་ལོ། །སངས་རྒྱས་མངོན་སུམ་སེམས་ཅན་གང་འགྲོ་བ། །དེ་དག་ཐམས་ཅད་སངས་རྒྱས་གསུང་སྙན་ནི། །དགའ་བ་རྒྱ་ཆེན་ཤིན་ཏུ་ཡངས་པ་ཐོབ། །འདི་ནི་ནམ་མཁའ་རྒྱུད་ཀྱི་རྣམ་ཐར་ཏོ། །སྐད་ཅིག་སེམས་རྒྱུད་ཀུན་ལ་ཚད་མེད་པའི། །ཆོས་ཀྱི་སྤྲིན་ཆར་རྒྱལ་བ་འབེབས་པ་མཛད། །འགྲོ་བའི་ཉོན་མོངས་ཐམས་ཅད་རབ་ཏུ་འཇིལ། །འདི་ལ་སྤྲིན་གྱི་རྒྱལ་མཚན་ལྷ་འཇུག་གོ །སེམས་ཅན་ཀུན་གྱི་རྒྱ་མཚོའི་ལས་རྣམས་ཀུན། །སངས་རྒྱས་རྣམ་པ་གཞན་མིན་ཡང་དག་སྟོན། །སེམས་ཅན་ཉོན་མོངས་ལས་ལ་རབ་ཏུ་དགྲོལ། །འཇིག་རྟེན་བྱ་བ་སྤྱོད་བདག་སྤྱོད་ཡུལ་ལོ། །སངས་རྒྱས་སྔན་ཅད་སྤྱད་པ་སྤྱོད་པའི་ཚེ། །སེམས་ཅན་དོན་དུ་ཐུགས་རྗེ་རབ་བསྐྱེད་དེ། །ཕ་རོལ་ཕྱིན་པ་ཐམས་ཅད་རྒྱས་པར་བཀང་། །སྣ་ཚོགས་ཕྲེང་བའི་འོད་ནི་འདི་ལ་དགའ། །ཕྱོགས་རྣམས་སེམས་ཅན་རྒྱལ་བས་སྣང་མཛད་པས། །བསམ་པ་རྒྱ་མཚོ་རྣམ་པ་སྣ་ཚོགས་ཀྱིས། །དེ་དག་མཐའ་ཡས་ཕྱོགས་ཀྱི་ཆོས་འཇུག་གོ །མིག་བཟངས་གཙུག་ཕུད་ཚུལ་འདིར་རབ་ཏུ་འཇུག །དེ་ལ་
ནམ་མཁའི་ལྷ་ཀུན་ནས་སྣང་བ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། འགྲོ་བ་རྒྱ་མཚོ་མཐའ་ཡས་པའི་བསམ་པ་ལ་རྣམ་པར་ལྟ་བ་ཞེས་བྱའོ། །ནམ་མཁའི་ལྷ་མཐའ་ཡས་ཤིང་ཟབ་པ་ཀུན་ཏུ་རྒྱས་པར་བྱེད་པའི་རྣམ་པར་ཐར་པ་ནི། ཆོས་ཀྱི་དབྱིངས་རྒྱ་ཆེན་པོ་དང་། སངས་རྒྱས་ཀྱི་ཡེ་ཤེས་ཟབ་མོ་ལ་ཡང་དག་པར་འཇུག་པ་ཞེས་བྱའོ། །ནམ་མཁའི་ལྷ་རླུང་ཀུན་ནས་འབྱུང་བའི་དཔལ་གྱི་རྣམ་པར་ཐར་པ་ནི། ཡུལ་མཐའ་ཡས་པ་རྣམ་པར་བསྒོམ་པའི་མཚན་ཉིད་ཀྱི་ལུས་ཞེས་བྱའོ། །ནམ་མཁའི་ལྷ་བསྒྲིབས་པ་ཐམས་ཅད་དང་མི་གནས་པའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལས་དང་ཉོན་མོངས་པའི་སྒྲིབ་པ་ཡོངས་སུ་སྦྱངས་པའི་རྒྱན་ཅེས་བྱའོ། །ནམ་མཁའི་ལྷ་རྒྱ་ཆེན་པོ་ཀུན་ཏུ་གནོན་པ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་རྒྱ་མཚོ་ཆེན་པོ་ལ་རྣམ་པར་ལྟ་ཞིང་རྣམ་པར་སྤྱོད་པ་ཞེས་བྱའོ། །ནམ་མཁའི་ལྷ་འོད་ཟེར་སྣང་བའི་འོད་ཐོགས་པ་མེད་པའི་རྣམ་པར་ཐར་པ་ནི། འགྲོ་བ་ལོག་པར་ལྟུང་བ་ཐམས་ཅད་སྙིང་རྗེའི་འོད་ཀྱིས་སྐྱོབ་པ་ཞེས་བྱའོ། །ནམ་མཁའི་ལྷ་སྟོབས་ཀྱི་རྒྱུན་ཐོགས་པ་མེད་པའི་དཔལ་གྱི་རྣམ་པར་ཐར་པ་ནི། བསོད་ནམས་ཐམས་ཅད་ཀྱི་སྟོབས་དང་། དགའ་བ་བསྡུ་བ་ལ་ཡང་དག་པར་གཞོལ་བ་ཞེས་བྱའོ། །ནམ་མཁའི་ལྷ་ཕྱོགས་དྲི་མ་མེད་པར་སྣང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་དྲི་མ་མྱེད་པའི་སེམས་ཀྱིས་སྒྲིབ་པ་རྣམ་པར་ཟློག་པར་གནས་པའི་དབང་པོ་ཞེས་བྱའོ། །ནམ་མཁའི་ལྷ་དབྱངས་ཤིན་ཏུ་འཕགས་ཤིང་ཟབ་པའི་རྣམ་པར་ཐར་པ་ནི། ཡེ་ཤེས་ཀྱི་དཀྱིལ་འཁོར་གྱི་འོད་རབ་ཏུ་འཕགས་པས་ཕྱོགས་ཀུན་ཏུ་རྣམ་པར་ལྟ་བ་ཞེས་བྱའོ། །ནམ་མཁའི་ལྷ་ཕྱོགས་བཅུར་མངོན་ཏུ་སྟོན་པའི་འོད་ཀྱི་རྣམ་པར་ཐར་པ་ནི། སྒོ་ཐམས་ཅད་ནས་ཕྱོགས་ཐམས་ཅད་དུ་འཕོ་བ་མེད་པའི་དཀྱིལ་འཁོར་ཅེས་བྱའོ། །དེ་ནས་ནམ་མཁའི་ལྷ་ཀུན་ནས་སྣང་བ་དྲི་མ་མེད་པའི་འོད་ཀྱིས་སངས་རྒྱས་
ཀྱི་མཐུས་ནམ་མཁའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་སྤྱན་ནི་རྒྱ་ཆེན་ཡངས་པ་ཡིས། །སེམས་ཅན་རྒྱ་མཚོ་མ་ལུས་ཀུན་གཟིགས་ཏེ། །འགྲོ་བ་ཀུན་ལ་མངོན་པར་རབ་ཏུ་བཞུགས། །སངས་རྒྱས་དྲི་མེད་ནམ་མཁའ་རབ་ཏུ་འདྲ། །སངས་རྒྱས་སྐུ་ཡི་རྒྱ་ཆེན་འོད་ཀྱི་རྣམས། །ཕྱོགས་བཅུའི་འགྲོ་བ་ཁྱབ་ཅིང་རྣམ་པར་མཛེས། །ཐམས་ཅད་ཕྱོགས་སུ་མངོན་པར་རབ་ཏུ་གནས། །ཀུན་ཏུ་རྒྱས་པའི་འོད་ཀྱིས་འདི་མཐོང་ངོ་། །རྒྱལ་བ་ནམ་མཁའི་མཚན་ཉིད་འབྱུང་བ་མེད། །འདི་ལ་གཟུང་བ་སྣང་བ་གང་ཡང་མེད། །ཐོབ་པ་མེད་ཅིང་རང་བཞིན་མེད་པ་སྟེ། །རླུང་གི་འོད་ཀྱིས་རྣམ་ཐར་འདི་མཐོང་ངོ་། །བསྐལ་པ་རྒྱ་མཚོ་བརྒྱ་ཕྲག་མང་པོར་ཡང་། །སངས་རྒྱས་སེམས་ཅན་སྒྲིབ་པ་སེལ་བར་མཛད། །ལམ་ཡངས་རྣམ་པར་ཐར་པ་རབ་ཏུ་སྟོན། །འདི་ནི་དཔའ་བོ་དཀྱིལ་འཁོར་འོད་ཀྱིའོ། །སྔན་ཅད་སངས་རྒྱས་བྱང་ཆུབ་སྤྱོད་པའི་རྣམས། །འགྲོ་བ་ཀུན་ལ་ཕན་དང་བདེ་དོན་དུ། །ཇི་ལྟར་བྱུང་བ་དེ་དག་བདག་གིས་མཐོང་། །འདི་ནི་སྣ་ཚོགས་གཙུག་ཕུད་སྤྱོད་ཡུལ་ལོ། །འཁོར་བ་རྒྱ་མཚོ་ཀུན་ཏུ་རྒྱུ་བ་ཡི། །སེམས་ཅན་ལོག་པར་ལྟུང་ཞིང་འཁོར་བ་ལ། །སངས་རྒྱས་འོད་ནི་སྡུག་བསྔལ་ཞི་བའི་རྒྱུ། །སྣང་བའི་འོད་ཀྱིས་རྣམ་ཐར་འདི་མཐོང་ངོ་། །བསོད་ནམས་དགེ་བ་ཐམས་ཅད་སྙིང་པོ་སྟེ། །ཆགས་མེད་སྟོབས་དང་ཡེ་ཤེས་རྒྱ་ཆེན་མཁྱེན། །འགྲོ་བ་ཐམས་ཅད་བསོད་ནམས་ཞིང་གྱུར་པ། །སངས་རྒྱས་དེ་ལྟར་ཆགས་མེད་སྟོབས་སེམས་སོ། །མུན་པ་སྟུག་པོ་སྤྱོད་ཡུལ་རྣམ་རྒྱུ་བའི། །སེམས་ཅན་བསྒྲིབས་པས་རབ་ཏུ་སློང་བ་ལ། །དེ་བཞིན་གཤེགས་པ་སྣང་བ་རབ་འགྱེད་དེ། །དྲི་མེད་ཕྱོགས་སྣང་ལྷས་ནི་དེ་མཐོང་ངོ་། །སངས་རྒྱས་ཡེ་ཤེས་ཤིན་ཏུ་འཕགས་པ་ཡི། །མཐའ་དང་དབུས་ཡང་དམིགས་པས་མི་རུང་སྟེ། །ཞིང་ཀུན་འགྲོ་ལ་
མངོན་པར་འོད་ཀྱང་སྣང་། །ཟབ་མོའི་འོད་ཀྱིས་དེ་ལྟར་སངས་རྒྱས་མཐོང་། །ཕྱོགས་རྣམས་རྒྱ་མཚོ་ཀུན་ན་སྤྱོད་པ་ཡིས། །སེམས་ཅན་ཐམས་ཅད་ཡོངས་སུ་དགྲོལ་བའི་ཕྱིར། །སངས་རྒྱས་སྨོན་ལམ་རྒྱ་ཆེན་ཤིན་ཏུ་ཡངས། །མངོན་པར་ལྟ་བས་རྣམ་ཐར་འདི་མཐོང་ངོ་། །དེ་ལ་རླུང་གི་ཕུང་པོའི་ལྷ་ཆགས་པ་མེད་པར་འགྲོ་བའི་འོད་ཀྱི་རྣམ་པར་ཐར་པ་ནི། འཇིག་རྟེན་གྱི་བྱ་བ་ཐམས་ཅད་སངས་རྒྱས་ཀྱི་ཆོས་སུ་ཡང་དག་པར་འཇུག་པ་ཞེས་བྱའོ། །རླུང་གི་ལྷ་ཀུན་ཏུ་རྒྱས་པར་འབྱུང་བའི་མཐུའི་དཔལ་གྱི་རྣམ་པར་ཐར་པ་ནི། སངས་རྒྱས་མཆོད་པའི་ཡུལ་མཐའ་ཡས་པ་རྒྱ་ཆེན་པོ་མངོན་པར་སྒྲུབ་པ་སྟོན་པ་ཞེས་བྱའོ། །རླུང་གི་ལྷ་ཀུན་ཏུ་རེག་པར་བྱེད་པའི་སྤྲིན་གྱི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ནད་རབ་ཏུ་ཞི་བར་བྱེད་པ་ཞེས་བྱའོ། །རླུང་གི་ལྷ་རྒྱན་ཡིད་དུ་འོང་ཞིང་བཟང་བའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་བསྒྲིབས་པའི་རི་འཇོམས་པའི་དགེ་བའི་རྩ་བ་རབ་ཏུ་འབྱུང་བ་ཞེས་བྱའོ། །རླུང་གི་ལྷ་ཆུ་དྲག་པོའི་སྙིང་པོ་སྐེམས་པའི་རྣམ་པར་ཐར་པ་ནི། བདུད་ཀྱི་འཁོར་ལོ་སྒོ་ཀུན་ནས་འཇོམས་པ་ཞེས་བྱའོ། །རླུང་གི་ལྷ་སྒྲ་ཆེན་པོས་འགྲོ་བའི་དབྱངས་ཀྱི་རྣམ་པར་ཐར་པ་ནི། སེམས་ཅན་མཐའ་ཡས་པའི་འཇིགས་པ་རྣམ་པར་ཟློག་ཅིང་ཞི་བར་བྱེད་པ་ཞེས་བྱའོ། ། རླུང་གི་ལྷ་ཤིང་གི་རྩེ་མོའི་མེ་ཏོག་རབ་ཏུ་འཕྱང་བའི་གཙུག་ཕུད་ཀྱི་རྣམ་པར་ཐར་པ་ནི། ཆོས་ཐམས་ཅད་ཀྱི་ཚུལ་ཐ་དད་པ་མེད་པར་ཡང་དག་པར་ཤེས་པ་རྒྱ་མཚོ་ལ་འཇུག་པ་ཞེས་བྱའོ། །རླུང་གི་ལྷ་ཐོགས་པ་མེད་པར་ཕྱོགས་ཀུན་ཏུ་རྒྱས་པར་འགྲོ་བའི་རྣམ་པར་ཐར་པ་ནི། འགྲོ་བ་ཐམས་ཅད་མཉམ་པར་དགོད་པའི་ཚུལ་གྱིས་འདུལ་བའི་སྙིང་པོ་ཞེས་བྱའོ། །རླུང་གི་ལྷ་རླུང་གི་ཕུང་པོ་རྣམ་པ་སྣ་ཚོགས་འབྱུང་བའི་སྤྲིན་གྱི་དཀྱིལ་འཁོར་གྱི་རྣམ་པར་ཐར་པ་ནི། བསམ་གཏན་གྱི་སྒོ་རབ་ཏུ་ཞི་བའི་ཤུགས་ཀྱི་གཏི་མུག་རབ་ཏུ་ཞི་བར་བྱེད་པ་ཞེས་བྱའོ། །རླུང་གི་ལྷ་འཇིག་རྟེན་ཐམས་ཅད་ཀྱི་མུན་པ་ཀུན་
ནས་སྣང་བར་བྱེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་སྙེགས་པས་ཐོགས་པ་མེད་པའི་རྒྱན་ཅེས་བྱའོ། །དེ་ནས་རླུང་གི་ལྷ་ཆགས་པ་མེད་པར་འགྲོ་བའི་འོད་ཀྱིས་སངས་རྒྱས་ཀྱི་མཐུས། རླུང་གི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་ཀུན་གྱི་ཆོས་ཉིད་ཟབ་མོ་འཛིན་པ་སྟེ། །ཆགས་མེད་ཐམས་ཅད་ཚུལ་གྱིས་དེ་ལ་འཇུག །འགྲོ་བ་ཀུན་ལ་སངས་རྒྱས་མངོན་ཏུ་བཞུགས། །དེ་ནི་མཚན་མེད་གཟུགས་བརྙན་ཡོད་པ་མིན། །སངས་རྒྱས་ཐམས་ཅད་མཐུ་ལ་རྣམ་པར་ལྟོས། །བྱང་ཆུབ་སྤྱད་པ་མཐའ་ཡས་སྤྱོད་པའི་ཚེ། །སྐད་ཅིག་གཅིག་ལ་སངས་རྒྱས་མཆོད་ཅིང་བསྟོད། །དེ་ལ་རྒྱས་བྱེད་འོད་ཀྱི་ལྷ་འཇུག་གོ །སངས་རྒྱས་བསམ་གྱིས་མི་ཁྱབ་འགྲོ་བའི་མགོན། །ཚུལ་རྣམས་ཀུན་གྱི་སྦྱོར་བ་ཆུད་ཟ་མེད། །སྡུག་བསྔལ་ཀུན་ལས་སེམས་ཅན་མ་ལུས་སྐྱོབ། །རྒྱལ་མཚན་རེག་པས་རྣམ་ཐར་འདི་མཐོང་ངོ་། །འགེབས་དང་སྒྲིབ་པ་ཤིན་ཏུ་སྟུག་པོ་ཡི། །མི་བདེས་བསྒྲིབས་ཤིང་བསོད་ནམས་མེད་པ་ཡི། །སེམས་ཅན་སྡུག་བསྔལ་ཀུན་ལས་བཀྲོལ་བར་འགྱུར། །རྒྱན་གྱིས་བརྒྱན་པའི་ལྷས་ནི་འདི་མཐོང་ངོ་། །རྒྱལ་བའི་རྫུ་འཕྲུལ་རྣམ་པར་འཕྲུལ་ལ་ལྟོས། །རྣམ་པ་ཀུན་གྱིས་བདུད་རྣམས་ཤིན་ཏུ་འཇོམས། །ཚུལ་གྱིས་འདུལ་བ་དེ་ལ་རབ་ཏུ་སྒྲོགས། །གཟི་བརྗིད་དྲག་པོའི་མཐུས་ནི་འདི་མཐོང་ངོ་། །རྒྱལ་བའི་བ་སྤུའི་སྒོ་རྣམས་ཐམས་ཅད་ནས། །འགྲོ་བ་ཀུན་འགེངས་སྒྲ་ཡི་དབྱངས་འབྱུང་བ། །དེ་དག་སྡུག་བསྔལ་འཇིགས་པ་ཐམས་ཅད་མེད། །འདི་ནི་སྒྲ་སྒྲོགས་ལྷ་ཡིས་རབ་ཏུ་ཤེས། །འགྲོ་བ་ཀུན་མཉམ་རྒྱ་མཚོའི་ཞིང་རྣམས་སུ། །ཐ་དད་ཡང་དག་མཁྱེན་པས་བདེ་བར་གཤེགས། །མཐའ་ཡས་བསྐལ་པར་རང་བྱུང་ཡང་དག་སྟོན། །ཤིང་གི་གཙུག་ཕུད་འབྱུང་བ་དེ་ལ་འཇུག །རྒྱལ་བའི་ཡེ་ཤེས་ཐབས་རྣམས་ཀུན་སྒོ་ནས། །ཀུན་ཏུ་ཆགས་ཤིང་ཐོགས་པ་མེད་པ་སྟེ། །
སྤྱོད་ཡུལ་གཞན་ཡང་ཀུན་ཏུ་མཐའ་ཡས་མེད། །འདི་ནི་ཆགས་མེད་འགྲོ་བའི་རྣམ་ཐར་ཏོ། །རྒྱལ་བའི་སྤྱོད་ཡུལ་མཐའ་ཡས་དག་ལ་ལྟོས། །རབ་ཞི་སྐུ་མངའ་མཚན་མེད་སངས་རྒྱས་ཏེ། །ཐབས་སྒོ་ཀུན་ནས་འོད་ཀྱང་རབ་ཏུ་སྣང་། །ཕུང་པོ་སྣ་ཚོགས་བདག་པོའི་རྣམ་ཐར་ཏོ། །མི་མངོན་བསྐལ་པ་མཐའ་ཡས་སྤྱོད་པའི་ཚེ། །དེ་འདྲའི་ཆོས་ཀྱིས་འགྲོ་ཀུན་ཚིམ་མཛད་པས། །ཐམས་ཅད་སྟོབས་ལ་སངས་རྒྱས་རབ་ཏུ་བཞུགས། །འཇིག་རྟེན་སྟོབས་འཛིན་ལྷ་ཡིས་འདི་མཐོང་ངོ་། །དེ་ལ་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དབའ་རླབས་ཐམས་ཅད་དང་མུན་པ་ཐམས་ཅད་དང་མི་གནས་པ་ཞེས་བྱའོ། །མེའི་ལྷ་ཀུན་ཏུ་འབར་ཞིང་འཕྲོ་བའི་རྒྱལ་མཚན་གྱི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དབའ་རླབས་དང་རབ་ཏུ་གདུང་བ་རྣམ་པར་ཟློག་པ་ཞེས་བྱའོ། །མེའི་ལྷ་འོད་རྒྱ་ཆེན་པོས་ཕྱོགས་རྒྱས་པར་བྱེད་པའི་རྣམ་པར་ཐར་པ་ནི། བསོད་ནམས་ཀྱི་སྟོབས་མི་སྒུལ་བ་དང་། སྙིང་རྗེ་བ་དང་། བྱམས་པའི་སྙིང་པོ་ཞེས་བྱའོ། །མེའི་ལྷ་རྒྱལ་མཚན་གྱི་རྡུལ་གྱི་སྒོས་རྒྱས་པར་བྱེད་པའི་རྣམ་པར་ཐར་པ་ནི། ཉོན་མོངས་པའི་རྡུལ་གྱིས་གཡོགས་པ་རྣམ་པར་སེལ་བ་ཞེས་བྱའོ། །མེའི་ལྷ་གཟི་བརྗིད་མི་ཟད་པའི་གཙུག་ཕུད་ཀྱི་རྣམ་པར་ཐར་པ་ནི། ནམ་མཁའ་མཐའ་ཡས་པ་སྣང་བས་གསལ་བར་བྱེད་པའི་འོད་ཅེས་བྱའོ། །མེའི་ལྷ་དཀའ་ཐུབ་སྣ་ཚོགས་ཀྱི་མིག་དཔལ་གྱི་རྣམ་པར་ཐར་པ་ནི། དགེ་བ་དང་། བསོད་ནམས་སྣ་ཚོགས་རྣམ་པར་སྣང་བའི་འོད་རབ་ཏུ་ཞི་བ་ཞེས་བྱའོ། །མེའི་ལྷ་ཕྱོགས་ཁྱིམ་དུ་གྱུར་པའི་རི་རབ་ཀྱི་སྤོའི་རྣམ་པར་ཐར་པ་ནི། འཇིག་རྟེན་གྱི་རྒྱུད་ཐམས་ཅད་མེ་ལྟར་འབར་བའི་སེམས་ཅན་སྡུག་བསྔལ་རབ་ཏུ་ཞི་བར་བྱེད་པ་ཞེས་བྱའོ། །མེའི་ལྷ་འོད་དྲག་ཤུལ་གྱི་དབང་ཕྱུག་གི་རྣམ་པར་ཐར་པ་ནི། འཇིག་རྟེན་ཐམས་ཅད་ལ་དབང་སྒྱུར་བའི་བརྩམ་པས་རབ་ཏུ་གནོན་
པ་ཞེས་བྱའོ། །མེའི་ལྷ་མུན་པ་དང་རབ་རིབ་སེལ་ཅིང་ཕྱོགས་རྣམ་པར་སྣང་བའི་རྣམ་པར་ཐར་པ་ནི། ཆགས་པར་ལྟ་བའི་གཏི་མུག་ཐམས་ཅད་རྣམ་པར་སྤོང་བའི་འོད་སྣང་བ་ཞེས་བྱའོ། །མེའི་ལྷ་འོད་འཕྲོ་བའི་སྤྲིན་གྱི་དབང་ཕྱུག་གི་རྣམ་པར་ཐར་པ་ནི་ཆགས་པ་ཐམས་ཅད་ལ་མི་གནས་པའི་སྟོབས་འབྱུང་བ་ཡང་དག་པར་བསྒྲུབ་པའི་ང་རོ་ཞེས་བྱའོ། །དེ་ནས་མེའི་ལྷ་གཟི་བརྗིད་འབར་ཞིང་འཕྲོ་བའི་འོད་ཀྱིས་སངས་རྒྱས་ཀྱི་མཐུས། མེའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་བརྩོན་འགྲུས་སྟོབས་ལ་རྣམ་པར་ལྟོས། །བསྐལ་པ་བྱེ་བ་རྒྱ་ཆེན་བསམ་ཡས་པར། །འགྲོ་བའི་དོན་དུ་ཕན་པ་རབ་བརྩམས་ཏེ། །སེམས་ཅན་ཀུན་གྱི་མུན་པ་རྣམ་པར་བསལ། །ཉོན་མོངས་དབའ་རླབས་ལྡན་པའི་འགྲོ་བ་རྣམས། །ལྟ་ལ་གནས་ཤིང་གཏི་མུག་བསྒྲིབས་པ་ཡི། །ཉོན་མོངས་མེ་ནི་མགོན་པོས་ཞི་བར་མཛད། །དེ་ལ་རྒྱལ་མཚན་དཀྱིལ་འཁོར་རབ་ཏུ་དགའ། །རྒྱལ་བའི་སྤྱོད་ཡུལ་རྒྱ་ཆེན་བདག་གིས་མཐོང་། །ཕྱི་མའི་མཐའ་ཡི་བསྐལ་པ་རྒྱ་མཚོར་ཡང་། །རྒྱལ་བའི་བྱིན་གྱིས་རླབ་རྣམས་རབ་ཏུ་འཇུག །མཐོང་ནས་སྣང་བའི་འོད་ནི་རབ་ཏུ་དགའ། །རྒྱལ་བའི་བསོད་ནམས་མི་ཟད་ནམ་མཁའ་བཞིན། །དེ་ཡི་མཐའ་ནི་ཀུན་ཏུ་མི་རྙེད་དེ། །རྒྱལ་བའི་ཐུགས་རྗེས་བསྐྱོད་དུ་ཡོངས་མི་ནུས། །འདི་ལ་དཔལ་གྱི་སྤྲིན་སྒྲར་རབ་ཏུ་འཇུག །བསྐལ་པ་བྱེ་བར་སྤྱད་པ་སྤྱོད་པའི་ཚེ། །ཆོས་ཚུལ་གང་རྣམས་བསྟན་པ་དེ་དག་གིས། །མཐའ་ནི་ནམ་ཡང་རྙེད་པར་སླ་བ་མིན། །རྣམ་ཐར་འདི་ནི་གཟི་བརྗིད་གཙུག་ཕུད་ཀྱིའོ། །ཕྱོགས་བཅུའི་འཁོར་རྣམས་ཤིན་ཏུ་ཡང་དག་པར། །སངས་རྒྱས་མགོན་པོ་ཐམས་ཅད་མངོན་དུ་ལྟ། །འགྲོ་བ་ཀུན་ལ་ཐུབ་པ་རྣམ་པར་མཛེས། །འདི་ལ་དཀའ་ཐུབ་འོད་འཕྲོ་དཔལ་འཇུག་གོ །འགྲོ་བ་ཀུན་ན་ཐུབ་པ་རབ་ཏུ་འཕགས། །ཁང་ཁྱིམ་ཐམས་ཅད་དག་ན་བཞུགས་པར་སྣང་། །རྣམ་པར་ཡངས་པའི་ཆོས་ཀྱི་ཆར་ཡང་འབེབས། །འདི་ནི་
ཕྱོགས་སྣང་བྱེད་པའི་སྤྱོད་ཡུལ་ལོ། །རྒྱལ་བ་ཉིད་ཀྱི་ཆོས་རྣམས་ཟབ་པ་སྟེ། །ཐམས་ཅད་ཆོས་ཀྱི་འགྲོ་བར་རང་བྱུང་ཞིང་། །ངོ་བོ་ཉིད་ཀྱི་ཆོས་ཉིད་སྟོན་པ་མཛད། །དེ་ལ་དྲག་ཤུལ་འོད་ནི་རབ་ཏུ་དགའ། །ལྟ་བའི་མུན་ནག་གཏི་མུག་སྒྲིབ་པ་ཡི། །འཇིག་རྟེན་བག་མེད་འཁྲུགས་པ་ཐམས་ཅད་ལ། །རྒྱལ་བས་ཆོས་ནི་རབ་ཏུ་བསྟན་མཛད་དེ། །དེ་ལ་རྣམ་པར་སྣང་བའི་ལྷ་དགའ་འོ། །རྒྱལ་བའི་སྨོན་ལམ་སྔན་ཅད་བྱུང་བའི་རྣམས། །ཅི་འདྲ་བསམ་གྱིས་ཁྱབ་པར་མི་རུང་སྟེ། །སྟོབས་དང་ཕ་རོལ་ཕྱིན་པས་རྣམ་པར་སྦྱང་། །འོད་འཕྲོ་སྤྲིན་ནི་འདི་ལ་འདི་ལྟར་འཇུག །དེ་ལ་ཆུའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་བྱམས་པའི་ཚུལ་ལ་ཡང་དག་པར་འཇུག་པ་ཞེས་བྱའོ། །ཆུའི་ལྷ་སྤྲིན་སྒྲའི་ཤུགས་རྒྱ་མཚོའི་སྤྲིན་གྱི་རྣམ་པར་ཐར་པ་ནི། ཆོས་ཀྱི་སྤྲིན་མཐའ་ཡས་པ་འབྱུང་བའི་རྒྱན་ཅེས་བྱའོ། །ཆུའི་ལྷ་ཆུ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་སྣོད་དུ་གྱུར་པ་ཐམས་ཅད་ལ་རྣམ་པར་ལྟ་ཞིང་། སྡུད་པའི་སྦྱོར་བ་ཞེས་བྱའོ། །ཆུའི་ལྷ་བཟང་པོར་ཁྱིལ་བ་གྲུབ་པའི་དཔལ་གྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཟབ་མོའི་འོད་ཀྱི་ཆར་པའི་བྱིན་གྱི་རླབ་ཤེས་བྱའོ། །ཆུའི་ལྷ་ཀུན་ནས་སྤོས་དྲི་མ་མེད་པའི་མྱུ་གུའི་དཔལ་གྱི་རྣམ་པར་ཐར་པ་ནི། སངས་རྒྱས་ཀྱི་འོད་དྲི་མ་མེད་པ་རྣམ་པར་ལྟ་བ་ལ་ཡང་དག་པར་འཇུག་པའི་བྱིན་གྱི་རླབ་ཤེས་བྱའོ། །ཆུའི་ལྷ་དབའ་རླབས་ཀྱི་སྒྲ་བསོད་ནམས་སྟེགས་ཀྱི་འོད་ཀྱི་རྣམ་པར་ཐར་པ་ནི། ཆོས་ཀྱི་དབྱིངས་མཚན་ཉིད་མེད་ཅིང་དྲི་མ་མེད་པ་ཞེས་བྱའོ། །ཆུའི་ལྷ་ཚིམ་པར་བྱ་བ་ལ་དབང་བྱེད་པ་ཡོངས་སུ་སྒྲུབ་པའི་རྣམ་པར་ཐར་པ་ནི། སྙིང་རྗེ་རྒྱ་མཚོ་མི་ཟད་པའི་སྒོར་འཇུག་པ་ཞེས་བྱའོ། །ཆུའི་ལྷ་སའི་རྡུལ་སྙེད་ཀྱི་སྒོ་ནས་དབྱངས་འབྱུང་བའི་རྣམ་པར་ཐར་པ་ནི། སངས་རྒྱས་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་དགའ་བའི་ཤུགས་འབྱུང་བའི་
སྙིང་པོ་ཞེས་བྱའོ། །ཆུའི་ལྷ་འོད་ཀུན་ཏུ་འགྲོ་ཞིང་རྒྱས་པར་བྱེད་པའི་རྣམ་པར་ཐར་པ་ནི། བསོད་ནམས་ཆགས་པ་མེད་པ་ཤིན་ཏུ་རྒྱས་པར་རབ་ཏུ་སྣང་བར་བྱེད་པའི་དཀྱིལ་འཁོར་ཅེས་བྱའོ། །ཆུའི་ལྷ་རྒྱ་མཚོའི་དབྱིངས་ཀྱི་ང་རོའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་འདུལ་བའི་སྦྱོར་བ་ནམ་མཁའ་ལྟ་བུས་འདུལ་བར་སྦྱོར་བ་ཞེས་བྱའོ། །དེ་ནས་ཆུའི་ལྷ་སྤྲིན་དང་ན་བུན་ཀུན་ཏུ་གྲུབ་པའི་རྒྱལ་མཚན་གྱིས་སངས་རྒྱས་ཀྱི་མཐུས། ཆུའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་མཚན་རྣམས་རེ་རེ་ཐམས་ཅད་ཀྱང་། །སངས་རྒྱས་ཞིང་གི་རྡུལ་དང་མཉམ་པ་ཡི། །བྱམས་པ་མངོན་དུ་གྱུར་པས་བྱུང་བ་བཟང་། །སེམས་ཅན་ཀུན་གྱིས་བལྟས་ཤིང་མི་ངོམས་སོ། །འགྲོ་བ་ཀུན་ཏུ་རྒྱལ་བ་རྣམས་དྲུང་དུ། །སྐྱོ་བ་མེད་པར་སྤྱད་ཅིང་རྣམ་སྦྱངས་ཏེ། །རྣམ་པ་སྣ་ཚོགས་ཆོས་ཀྱི་སྒོ་ཡང་སྟོན། །རྒྱ་མཚོ་ཤུགས་ནི་འདི་ཡི་ཚུལ་ལ་འཇུག །རྒྱལ་བ་རྣམས་ནི་འཕོ་བར་མི་སྣང་སྟེ། །ཕྱོགས་རྣམས་བཅུ་ནས་བྱོན་པར་སྣང་བ་མེད། །སྣོད་ཀྱི་ཚུལ་བཞིན་སེམས་ཅན་རྣམས་ཀྱང་ལྟ། །ཆུ་ཡི་གཙུག་ཕུད་དཀྱིལ་འཁོར་དེ་ལ་ལྟ། །དེ་བཞིན་གཤེགས་པའི་ཡུལ་ནི་གཞལ་དུ་མེད། །སེམས་ཅན་ཀུན་གྱིས་བསམ་པར་མི་ནུས་ཏེ། །ཕྱོགས་རྣམས་ཀུན་ཏུ་ཁྱབ་པར་སྒྲ་སྒྲོག་གོ །འདི་ནི་སྙན་པའི་གཙུག་ཕུད་ཡུལ་ཡིན་ནོ། །སངས་རྒྱས་འོད་ནི་མི་ཟད་གནས་པ་སྟེ། །བསམ་གྱིས་མི་ཁྱབ་ཆོས་ཀྱི་དབྱིངས་ཀྱིས་ཀྱང་། །སེམས་ཅན་ཐམས་ཅད་འདུལ་བ་རབ་ཏུ་སྟོན། །སྤོས་ཀྱི་ཕུང་པོ་སྣ་ཚོགས་ལྷ་ཡིས་མཐོང་། །དེ་བཞིན་གཤེགས་པ་ནམ་མཁའ་མཉམ་པ་སྟེ། །ཕྱོགས་རྣམས་ཀུན་ཏུ་དྲི་མེད་མཚན་ཉིད་མེད། །ཕྱོགས་རྣམས་ཀུན་ནའང་བཞུགས་པར་རབ་ཏུ་སྣང་། །དབའ་རླབས་སྒྲའི་བསོད་ནམས་འོད་ཀྱིས་མཐོང་། །སྙིང་རྗེའི་སྒོ་ནི་རྒྱ་མཚོ་ལྟ་བུ་སྟེ། །སེམས་ཅན་ཀུན་དང་མཉམ་པར་སྔོན་བཤད་དོ། །སྤྲིན་དང་འདྲ་བར་འགྲོ་བར་མངོན་
སུམ་མོ། །དེ་ལྟར་དེ་ནས་དགའ་བ་འབྱུང་བས་མཐོང་། །ཕྱོགས་བཅུའི་ཞིང་རྣམས་ཅི་སྙེད་གང་ཡོད་པ། །དེ་དག་ཀུན་ན་སངས་རྒྱས་གདན་བཞུགས་སྣང་། །ཤིན་ཏུ་རྒྱས་པའི་བྱང་ཆུབ་མངོན་སངས་རྒྱས། །དགའ་བ་རྡུལ་མེད་དབྱངས་ཀྱིས་དེ་མཐོང་ངོ་། །སངས་རྒྱས་སྤྱོད་ཡུལ་ཆགས་པ་མེད་པ་སྟེ། །ཤིན་ཏུ་རྒྱ་ཆེ་ཕྱོགས་རྣམས་ཀུན་ཏུ་གནས། །རྣམ་པར་འཕྲུལ་པ་རྒྱལ་བ་སྟོན་མཛད་དེ། །དེ་ལ་འཕྲོ་བའི་འོད་ཀྱི་ལྷ་འཇུག་གོ །སྦྱོར་བའི་སྤྱོད་པ་རྣམས་ལ་མཐའ་མེད་དེ། །འགྲོ་བ་ཀུན་དབྱིངས་ཐུབ་པ་མེད་པར་འཇུག །རྒྱལ་བའི་བྱིན་གྱི་རླབས་ནི་འདི་འདྲ་སྟེ། །ང་རོས་འགེངས་པ་རྣམ་ཐར་འདི་ལ་འཇུག །དེ་ལ་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་གྱི་རྣམ་པར་ཐར་པ་ནི། འགྲོ་བ་ཐམས་ཅད་དང་མཉམ་པའི་བསོད་ནམས་རྒྱ་མཚོ་རིན་པོ་ཆེ་འབྱུང་བའི་རྒྱན་ཅེས་བྱའོ། །རྒྱ་མཚོའི་ལྷ་རྡོ་རྗེ་ཀུན་ནས་སྲ་ཞིང་མི་ཆོམས་པའི་རྒྱལ་མཚན་དང་ལྡན་པའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་བསྲུང་བའི་སྦྱོར་བ་ཞེས་བྱའོ། །རྒྱ་མཚོའི་ལྷ་རྡུལ་དང་དྲི་མ་མེད་པའི་གནས་དང་ལྡན་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྒྱ་མཚོ་མང་པོ་རྣམ་པར་སེལ་བ་ཞེས་བྱའོ། །རྒྱ་མཚོའི་ལྷ་ཀུན་ནས་ཆུ་དང་རི་བོ་དང་ཁྱིམ་གྱི་དཀྱིལ་འཁོར་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ངན་སོང་དང་ངན་འགྲོའི་ལམ་རྣམ་པར་ཟློག་པ་ཞེས་བྱའོ། །རྒྱ་མཚོའི་ལྷ་སྐྱབས་རིན་པོ་ཆེ་མིག་གི་ཟླ་བའི་དཔལ་གྱི་རྣམ་པར་ཐར་པ་ནི། ཤུགས་ཆེན་པོས་གཏི་མུག་རྣམ་པར་སེལ་བ་ཞེས་བྱའོ། །རྒྱ་མཚོའི་ལྷ་ཀླུའི་དཔལ་པད་མོ་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། རྒྱུད་ཐམས་ཅད་ཀྱི་སྡུག་བསྔལ་རབ་ཏུ་ཞི་བར་བྱེད་ཅིང་བདེ་བ་འབྱུང་བར་བྱེད་པ་ཞེས་བྱའོ། །རྒྱ་མཚོའི་ལྷ་ཆུ་ལྟ་བུར་རོ་མཐུན་པར་འཛིན་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ལྟ་བ་དང་། རྨོངས་པའི་རང་བཞིན་དྲི་མ་མེད་པ་ཞེས་བྱའོ། །རྒྱ་མཚོའི་ལྷ་རིན་པོ་ཆེ་འོད་འཕྲོ་བའི་མེ་ཏོག་གི་ཚོན་གྱི་འོད་ཀྱི་རྣམ་པར་ཐར་པ་ནི། རིན་པོ་ཆེའི་རིགས་ཐམས་
ཅད་འབྱུང་ཞིང་། བྱང་ཆུབ་ཀྱི་སེམས་རབ་ཏུ་སྐྱེ་བ་ཞེས་བྱའོ། །རྒྱ་མཚོའི་ལྷ་རི་རབ་སྲ་བའི་རྡོ་རྗེ་སྣ་ཚོགས་ཀྱི་རྣམ་པར་ཐར་པ་ནི། སེམས་རྒྱ་མཚོ་མི་སྒུལ་བའི་བསོད་ནམས་ལ་རྣམ་པར་ལྟ་བ་ཞེས་བྱའོ། ། རྒྱ་མཚོའི་ལྷ་འབྲུག་སྒྲ་སྒྲོག་པ་རྒྱ་མཚོའི་ཤུགས་ཀྱི་དབྱངས་ཀྱི་རྣམ་པར་ཐར་པ་ནི། ཏིང་ངེ་འཛིན་གྱི་དཀྱིལ་འཁོར་ཐམས་ཅད་ཆོས་ཀྱི་དབྱིངས་སུ་ཡང་དག་པར་འཇུག་པའི་རྒྱལ་མཚན་ཅེས་བྱའོ། །དེ་ནས་རྒྱ་མཚོའི་ལྷ་རིན་པོ་ཆེའི་འོད་འབྱུང་བའི་དཔལ་གྱིས་སངས་རྒྱས་ཀྱི་མཐུས། རྒྱ་མཚོའི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསྐལ་པ་རྒྱ་མཚོ་བསམ་གྱིས་མི་ཁྱབ་པར། །སངས་རྒྱས་རྒྱ་མཚོ་རྒྱ་ཆེན་མང་མཆོད་ཅིང་། །འགྲོ་བ་དག་ལ་བསོད་ནམས་མཚོ་སྤེལ་བས། །དེ་ཕྱིར་རྒྱལ་བ་ལྷ་མེ་ལྷ་ངེའོ། །འགྲོ་བ་ཀུན་ཏུ་རྒྱལ་བ་མངོན་པར་མཛེས། །སེམས་ཅན་ཀུན་གྱི་དབང་པོ་བསམ་རྒྱུད་དུ། །ཆོས་ཀྱི་རྒྱ་མཚོ་རྒྱ་ཆེན་སྟོན་པ་མཛད། །རྡོ་རྗེ་སེམས་དཔའ་སྲ་བའི་དཔའ་དགའ་འོ། །འགྲོ་བ་ཀུན་ཏུ་འཇིག་རྟེན་མགོན་པོ་ནི། །ཆོས་ཀྱི་སྤྲིན་ལས་ཆར་ཆེན་ཡངས་པ་འབེབས། །སྡུག་བསྔལ་རྒྱ་མཚོ་ཞི་མཛད་ཟད་མི་ཤེས། །རྡུལ་དང་དྲི་མེད་འདིའི་ཚུལ་ལ་འཇུག །སེམས་ཅན་ཐམས་ཅད་མཉམ་མེད་ཉོན་མོངས་བསྒྲིབས། །ལམ་རྒྱུད་རྒྱ་མཚོའི་སྡུག་བསྔལ་ནང་ན་འཁོར། །དེ་དག་ལ་ནི་རྒྱལ་བའི་ཡུལ་སྟོན་ཏེ། །དཔལ་བཅུའི་ལྷ་ནི་འདི་ལ་རབ་ཏུ་དགའ། །བསྐལ་པ་རྒྱ་མཚོ་མང་པོ་བསམ་ཡས་སུ། །རྒྱལ་བས་སྤྱོད་པ་མི་ཟད་རྣམས་སྤྱད་དེ། །འགྲོ་བའི་གཏི་མུག་དཀྱིལ་འཁོར་རྣམ་པར་ཟློག །རིན་ཆེན་ཟླ་བའི་དཔལ་ནི་འདི་ལ་འཇུག །འཁོར་བའི་རྒྱ་མཚོ་སྡུག་བསྔལ་ཆེན་པོ་ན། །སེམས་ཅན་འཁོར་ཞིང་མི་བདེ་ཀུན་གཟིགས་ནས། །རྒྱལ་བས་བླ་ན་མེད་པའི་ལམ་ཡང་བསྟན། །ཀླུ་དཔལ་པདྨོ་གཙུག་ཕུད་འདི་ལ་དགའ། །སངས་རྒྱས་སྤྱོད་ཡུལ་བསམ་གྱིས་མི་ཁྱབ་ལྟོས། །ཆོས་ཀྱི་དབྱིངས་དང་ནམ་མཁའི་མཚན་ཉིད་དེ། །
འགྲོ་བའི་གཏི་མུག་དྲ་བ་རྣམ་པར་སྦྱོང་། །དེ་སྐད་ཆུ་འཛིན་ཤུགས་ནི་སྨྲ་ཞིང་བརྗོད། །སངས་རྒྱས་དྲི་མེད་བསམ་གྱིས་མི་ཁྱབ་སྤྱད། །འཇིག་རྟེན་ཀུན་གྱི་ཡུལ་དུ་རྣམ་པར་མཛེས། །སྤྱོད་པའི་དཀྱིལ་འཁོར་འགྲོ་བ་ཀུན་ལ་སྟོན། །སྣ་ཚོགས་དཔལ་གྱི་མེ་ཏོག་སྤྱོད་ཡུལ་ལོ། །བདུད་ཀྱི་དཀྱིལ་འཁོར་མི་ཟད་རྒྱ་ཆེ་བའང་། །འབྱམ་ཀླས་ཐུགས་ཀྱི་སྐད་ཅིག་གཅིག་གིས་བརྟུལ། །རྒྱལ་བ་བསམ་གྱིས་མི་ཁྱབ་མི་གཡོ་སྟེ། །རྡོ་རྗེ་རྡུལ་འཛིན་ཚུལ་ནི་འདི་ཡིན་ནོ། །ཆོས་ཀྱི་དབྱིངས་ནི་འབྱམ་ཀླས་ཀུན་བཀང་ཞིང་། །ཕྱོགས་བཅུ་རྣམས་སུ་རྒྱལ་བའི་གསུང་ཡང་གྲག །སངས་རྒྱས་སྤྱོད་ཡུལ་ཏིང་ངེ་འཛིན་ལས་སྐྱེས། །འདི་ལྟར་འདི་ལ་སྤྲིན་འབྱུང་རབ་ཏུ་འཇུག །དེ་ལ་ཆུ་ཀླུང་གི་ལྷ་ཆུ་བོ་ཀུན་དང་ལྡན་པའི་རྣམ་པར་ཐར་པ་ནི། ཆོས་ཀྱི་ཆུ་བོ་མཐའ་མེད་པས་རྒྱས་པར་འགེངས་པ་ཞེས་བྱའོ། །ཆུ་ཀླུང་གི་ལྷ་རི་དང་ཆུ་ཀུན་ལ་རྟེན་པའི་རྣམ་པར་ཐར་པ་ནི། ཉོན་མོངས་པ་ཐམས་ཅད་སྤང་བ་ལ་ཡང་དག་པར་འཇུག་པ་ཞེས་བྱའོ། །ཆུ་ཀླུང་གི་ལྷ་རྡུལ་ཐམས་ཅད་དྲི་མ་མེད་པར་རྣམ་པར་དག་པའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་རྡུལ་དང་འགྲོགས་པའི་སྙིང་རྗེའི་ཚུལ་གྱིས་ཀུན་ཏུ་རྒྱས་པར་འགེངས་པ་ཞེས་བྱའོ། །ཆུ་ཀླུང་གི་ལྷ་ང་རོས་ཁྱབ་པར་བྱེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་སྒྲ་ཡིད་དུ་མི་འོང་བ་ཟློག་ཅིང་ཕན་པ་སྐྱེད་པ་ཞེས་བྱའོ། །ཆུ་ཀླུང་གི་ལྷ་སྲོག་ཆགས་ཀྱི་རྒྱུད་མཐའ་ཡས་པ་སྐྱོབ་པའི་རྣམ་པར་ཐར་པ་ནི། སེམས་ཅན་ཐམས་ཅད་ལ་འཚེ་བ་མེད་པའི་བྱམས་པ་འབྱུང་བ་ཞེས་བྱའོ། །ཆུ་ཀླུང་གི་ལྷ་གདུང་བ་མེད་པ་རྒྱ་མཚོ་གདུང་བ་མེད་པའི་འོད་དྲི་མ་མེད་པའི་རྣམ་པར་ཐར་པ་ནི། དགེ་བའི་རྩ་བ་ཐམས་ཅད་གདུང་བར་མི་ནུས་པའི་སྒོ་ཀུན་ནས་སྟོན་པ་ཞེས་བྱའོ། ། ཆུ་ཀླུང་གི་ལྷ་དགའ་བདེ་ཀུན་ནས་འབྱུང་བའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་འཇུངས་པ་སེལ་ཅིང་གཏོང་བ་ཕུན་སུམ་ཚོགས་པ་ཡོངས་སུ་སྤྱོད་པ་
ཞེས་བྱའོ། །ཆུ་ཀླུང་གི་ལྷ་ཡོན་ཏན་གྱི་ཤུགས་ཡངས་པའི་རྒྱལ་མཚན་གྱི་རྣམ་པར་ཐར་པ་ནི། ཐམས་ཅད་ཚིམ་པར་བྱེད་པའི་བསོད་ནམས་ཀྱི་ཞིང་རབ་ཏུ་འབྱུང་བ་ཞེས་བྱའོ། །ཆུ་ཀླུང་གི་ལྷ་འཇིག་རྟེན་ཐམས་ཅད་ཀྱི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པ་རྣམ་པར་བྱང་བར་བྱེད་ཅིང་། འཁོན་དུ་འཛིན་པ་དམ་པོ་དང་། ཁྲོ་བའི་ཤུགས་དང་བར་བྱེད་པ་ཞེས་བྱའོ། །ཆུ་ཀླུང་གི་ལྷ་ཚོགས་ཆེན་པོ་རྒྱ་མཚོ་དཔལ་གྱི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་བདེ་བ་ཕུན་སུམ་ཚོགས་པ་མྱོང་བར་བྱེད་ཅིང་ཐར་པ་རྒྱ་མཚོ་ལ་འཛུད་པ་ཞེས་བྱའོ། །དེ་ནས་ཆུ་ཀླུང་གི་ལྷ་ཆུ་བོ་ཀུན་དང་ལྡན་པས་སངས་རྒྱས་ཀྱི་མཐུས། ཆུ་ཀླུང་གི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་རྣམས་རྒྱ་མཚོ་མཐའ་ཡས་སྤྱོད་པ་དག །སྔན་ཅད་རྒྱལ་བས་སེམས་ཅན་དོན་དུ་སྦྱངས། །འཇིག་རྟེན་བཀང་ཞིང་ཉོན་མོངས་གདུངས་པའི་རྣམས། །སྤྲིན་ཆེན་ཆར་བཞིན་རབ་ཏུ་ཞི་བར་མཛད། །བསྐལ་པ་བརྗོད་དུ་མེད་པར་རྒྱལ་བས་སྔོན། །སྨོན་ལམ་འོད་ཀྱིས་སེམས་ཅན་དབྱིངས་ཤེས་ཤིང་། །འགྲོ་བ་ཡོངས་སྨིན་དབང་པོ་ཆོས་ཀྱང་མཁྱེན། །འཁྱིལ་པ་ཞེས་བྱ་ཆུ་ཀླུང་ལྷ་དགའ་འོ། །འགྲོ་དང་མཉམ་པའི་སྙིང་རྗེའི་ཚུལ་བསྒོམས་ཤིང་། །མགོན་པོ་སེམས་ཅན་ཉོན་མོངས་དྲི་མ་སྦྱོང་། །ཡོངས་སྨིན་སེམས་ཅན་རྒྱལ་བ་མངོན་དུ་ལྟ། །དེ་ལ་དྲི་མེད་མིག་གི་ལྷ་ཡང་མོས། །དེ་བཞིན་གཤེགས་པའི་དབྱངས་སྙན་རྒྱ་ཆེན་ནི། །ཀུན་ཏུ་བསྒྲགས་པས་འགྲོ་བའི་སྡུག་བསྔལ་ཞི། །སངས་རྒྱས་དབྱངས་སྙན་ཐོས་ནས་དགའ་མགུ་ཡིད། །རྣམ་ཐར་འདི་ནི་སྒྲ་དབྱངས་སྒྲོག་པས་ཐོས། །བསྐལ་པ་རྒྱ་མཚོར་འགྲོ་ལ་ཕན་དོན་དུ། །སྔན་ཅད་བྱང་ཆུབ་སྤྱོད་པ་སྤྱད་མཐོང་ན། །དེ་ཕྱིར་དེ་ནི་ཕྱོགས་བཀང་འཇིག་རྟེན་མཛེས། །ལམ་རྒྱུད་སྐྱོབ་པ་རྗེས་སུ་དྲན་ཞིང་དགའ། །རྒྱལ་བ་སྔན་ཅད་སྤྱད་པ་སྤྱོད་
པའི་ཚེ། །སྣ་ཚོགས་སྒོ་ནས་སེམས་ཅན་སྨིན་པར་མཛད། །དེ་དག་བསོད་ནམས་རྒྱ་མཚོས་སྡུག་བསྔལ་འཇིལ། །ཞི་བྱེད་ཆུ་ཀླུང་ལྷ་ནི་དེས་དགའ་འོ། །སྦྱིན་པའི་སྒོ་མོ་ཚད་མེད་མི་ཟད་མང་། །འགྲོ་བ་འདོད་པ་ཀུན་ལ་ཡོངས་བཏང་ཞིང་། །རྒྱལ་བས་འགྲོ་བའི་འཇུངས་པ་ཡོངས་སུ་བསྩལ། །ཀུན་ནས་དགའ་དཔལ་རྣམ་ཐར་འདི་མཐོང་ངོ་། །ཐབས་ཚུལ་རྒྱ་མཚོ་ཐམས་ཅད་བསྒོམས་པས་ན། །ཡོན་ཏན་མང་པོ་བརྒྱ་ཕྲག་མང་པོས་བྱུང་། །རྒྱལ་བས་འགྲོ་བ་ཐམས་ཅད་ཚིམ་མཛད་དེ། །རྒྱ་ཆེན་སྒྲ་དབྱངས་ཤུགས་ལྡན་ལྷ་ཡང་དགའ། །སྒྲིབ་པའི་ཀློང་དང་འགྲོ་བའི་ཉོན་མོངས་དྲི། །འགྲོ་བ་རྣམས་ལ་བྱམས་པ་བསྐྱེད་སྦྱངས་པས། །མཁའ་མཉམ་འོད་ཀྱིས་སངས་རྒྱས་རྣམ་པར་མཛེས། །རྣམ་པར་མཛེས་པའི་ཆུ་ཀླུང་ལྷ་དགའ་འོ། །སངས་རྒྱས་རང་བྱུང་ཡོན་ཏན་རྒྱ་མཚོ་སྟེ། །བསོད་ནམས་ཞིང་ནི་འདུས་བྱས་སྡུག་བསྔལ་འདོར། །བྱང་ཆུབ་ལམ་ལ་རིམ་གྱིས་ཡོངས་སྨིན་མཛད། །རྒྱ་མཚོའི་ཚོགས་དཔལ་རྣམ་ཐར་འདི་ཡིན་ནོ། །དེ་ལ་ལོ་ཏོག་གི་ལྷ་དང་འཇམ་པའི་དཔལ་གྱི་རྣམ་པར་ཐར་པ་ནི། རོ་དང་མདངས་ཐམས་ཅད་སྐྱེད་ཅིང་། སེམས་ཅན་ཐམས་ཅད་སངས་རྒྱས་ཀྱི་གཟུགས་ཀྱི་སྐུ་རབ་ཏུ་ཐོབ་པ་ཞེས་བྱའོ། །ལོ་ཏོག་གི་ལྷ་དུས་ཀྱི་མེ་ཏོག་རྣམ་པར་མཛེས་པའི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཉེ་བར་འཚོ་བས་དགའ་བ་ཆེན་པོའི་ཤུགས་ཀྱི་ཚིམ་པ་སྐྱེད་པ་ཞེས་བྱའོ། །ལོ་ཏོག་གི་ལྷ་རྩལ་དམ་པའི་སྟོབས་ཀྱི་རྣམ་པར་ཐར་པ་ནི། ཆོས་ཐམས་ཅད་ཀྱི་དབྱིངས་ཡོངས་སུ་རྒྱས་པས་ཤིན་ཏུ་དག་པའི་སྤྱོད་ཡུལ་ཞེས་བྱའོ། །ལོ་ཏོག་གི་ལྷ་མདངས་ཀྱི་ངད་མཐའ་ཡས་པ་རབ་ཏུ་འགྱེད་པའི་རྣམ་པར་ཐར་པ་ནི། སྙིང་རྗེ་མཐའ་ཡས་པའི་སྒོ་ནས། སངས་རྒྱས་ཀྱི་རྣམ་པར་འཕྲུལ་པ་རབ་ཏུ་འགྱེད་ཅིང་རྗེས་སུ་དྲན་པ་ཞེས་བྱའོ། །ལོ་ཏོག་གི་ལྷ་ཀུན་གྱི་རྩ་བ་འབྲས་བུའི་རྣམ་པར་ཐར་པ་ནི། སངས་རྒྱས་ཐམས་ཅད་མངོན་དུ་ལྟ་ཞིང་། སངས་རྒྱས་རྣམས་ལ་ཡོན་ཏན་ཡང་དག་པར་
བསྐྱེད་པ་སྟོན་པ་ཞེས་བྱའོ། །ལོ་ཏོག་གི་ལྷ་གཙུག་ཕུད་ཁ་དོག་སྣ་ཚོགས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་མོས་པའི་མེ་ཏོག་ཡོངས་སུ་སྦྱོང་བ་ཞེས་བྱའོ། །ལོ་ཏོག་གི་ལྷ་ཡལ་ག་དྲི་མ་མེད་པར་གྲུབ་པའི་རྣམ་པར་ཐར་པ་ནི། སེམས་ཅན་ལ་ཕན་པའི་བྱམས་པ་དང་། བསོད་ནམས་རྒྱ་མཚོ་རྒྱ་ཆེན་པོ་རྣམ་པར་འཕེལ་བར་བྱེད་པ་ཞེས་བྱའོ། །ལོ་ཏོག་གི་ལྷ་སྤོས་སྣ་ཚོགས་ཤིན་ཏུ་གྲུབ་པའི་རྣམ་པར་ཐར་པ་ནི། ཆོས་ཐམས་ཅད་ལ་སྤྱོད་པ་ཀུན་ཏུ་གནོན་པས་རྩོམ་པ་ཞེས་བྱའོ། །ལོ་ཏོག་གི་ལྷ་བཟང་ཞིང་ཡིད་དུ་འོང་བར་སྣང་བའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་ཞུམ་པ་དང་། ཡིད་དུ་མི་འོང་བ་རྣམ་པར་ཟློག་ཅིང་། ཆོས་ཀྱི་དབྱིངས་ཐམས་ཅད་ཡོངས་སུ་དག་པར་བྱེད་པ་ཞེས་བྱའོ། །ལོ་ཏོག་གི་ལྷ་ཁ་དོག་རྣམ་པར་དག་ཅིང་། འོད་དྲི་མ་མེད་པའི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་དགེ་བའི་རྩ་བ་ལ་རྣམ་པར་ལྟ་ཞིང་ཆོས་ཀྱིས་འཁོར་གྱི་དབང་པོ་ཚིམ་པར་བྱེད་པ་ཞེས་བྱའོ། །དེ་ནས་ལོ་ཏོག་གི་ལྷ་དང་འཇམ་པའི་དཔལ་གྱིས་སངས་རྒྱས་ཀྱི་མཐུས་ལོ་ཏོག་གི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རང་བྱུང་ཡེ་ཤེས་སྒྲོན་མ་སྐྱེས་པ་ནི། །འགྲོ་བ་ཀུན་གྱི་སྐྱབས་དང་མགོན་གྱུར་ཏེ། །མ་ལུས་འགྲོ་བའི་བདེ་བ་ཡང་དག་སྐྱེད། །བསོད་ནམས་རྒྱ་མཚོ་སངས་རྒྱས་བླ་ན་མེད། །སངས་རྒྱས་མཉན་ན་དོན་ཡོད་ཡོན་ཏན་སྤྲིན། །འགྲོ་བ་ཀུན་གྱི་སྡུག་བསྔལ་ཞི་བར་མཛད། །ཆོས་རྒྱ་ཆེན་པོ་མི་ཟད་རབ་ཏུ་བསྐྱེད། །དུས་ཀྱི་དཀྱིལ་འཁོར་ལྷ་ནི་འདི་ལ་འཇུག །བདེ་གཤེགས་སྟོབས་ནི་མ་ལུས་ཡོངས་སུ་རྒྱས། །འགྲོ་བ་དག་ནི་ཆོས་ཀྱི་ལེགས་པས་མཛེས། །འགྲོ་བ་ཀུན་འདུལ་ཀུན་ཏུ་རྣམ་པར་སྣང་། །སྟོབས་དང་གཟུགས་ཀྱི་མཐུ་ཡིས་དེ་མཐོང་ངོ་། །སེམས་ཀྱི་སྐད་ཅིག་ཀུན་ལ་འགྲོ་མཉམ་པའི། །ཐུགས་རྗེས་རྒྱ་མཚོ་སྔན་ཅད་རྣམ་སྦྱངས་པས། །དེ་ཕྱིར་རྫུ་འཕྲུལ་རྣམས་ནི་མཐའ་ཡས་སོ། །དེ་ནི་མདངས་མཐོང་ལྷ་ཡིས་རབ་ཏུ་མཐོང་། །ཐབས་རྣམས་ཀུན་གྱི་སྒོ་རྣམས་
དོན་ཡོད་པར། །སངས་རྒྱས་འཇིག་རྟེན་ཀུན་ཏུ་ཁྱབ་གྱུར་ཅིང་། །འགྲོ་བ་ཀུན་གྱི་ཉོན་མོངས་དག་པར་མཛད། །འདི་ནི་ཐམས་ཅད་སྒོ་མོའི་རྣམ་ཐར་ཏོ། །འགྲོ་བ་འདི་ན་མོས་ཡངས་གང་ཡོད་པ། །དེ་དག་ཐམས་ཅད་རྒྱལ་བའི་མཐུས་བྱུང་སྟེ། །དེ་བཞིན་གཤེགས་པའི་ཡེ་ཤེས་རྒྱ་མཚོ་འོ། །ནགས་ཚལ་རྒྱན་གྱིས་གཙུག་ཕུད་དེ་ལ་འཇུག །འཇིག་རྟེན་རྣམས་ལ་བྱམས་པ་ཆེ་བསྐྱེད་དེ། །སེམས་ཅན་རྣམས་ལ་ཕན་ཕྱིར་རང་བྱུང་སྐྱེས། །ལམ་རབ་དགེ་བ་ཞི་བ་རབ་ཏུ་སྟོན། །ཞི་བ་སྣ་ཚོགས་དཔལ་གྱི་རྣམ་ཐར་ཏོ། །ཕྱོགས་སུ་སེམས་ཅན་ཡོངས་སུ་སྨིན་བྱེད་པའི། །བདེ་གཤེགས་སྤྱོད་པ་ཇི་ལྟར་རྣམ་དག་པ། །བྱང་ཆུབ་ཤིང་ལས་དེ་དག་སྒྲ་ཡང་འབྱུང་། །སྤོས་ཞིམ་དཔལ་གྱི་ལྷ་ཡིས་དེ་ཐོས་སོ། །རྒྱལ་བའི་འཇིག་རྟེན་ཡིད་དུ་འོང་བ་སྤོང་། །དགེ་བ་མ་ལུས་རྣམས་ཀྱང་རབ་ཏུ་སྐྱེད། །འགྲོ་བ་ཀུན་གྱི་དབང་པོ་རྣམ་པར་སྦྱོང་། །དགེ་བར་སྣང་བའི་ལྷ་ཡིས་དེ་མཐོང་ངོ་། །འགྲོ་བ་ཀུན་ན་སངས་རྒྱས་ཤིན་ཏུ་འཕགས། །སྐྱེ་བོ་ཀུན་གྱི་བསམ་པ་དེ་མཁྱེན་ཏེ། །སྣ་ཚོགས་སྒོ་ནས་འགྲོ་བ་ཡོངས་སྨིན་མཛད། །རྣམ་དག་ཁ་དོག་འོད་ཀྱི་རྣམ་ཐར་ཏོ། །དེ་ལ་སྨན་གྱི་ལྷ་ཕུན་སུམ་ཚོགས་པའི་རྣམ་པར་ཐར་པ་ནི། བསམ་པ་ཀུན་ནས་རྣམ་པར་ལྟ་བའི་གནོན་པས་འགྲོ་བ་རབ་ཏུ་གནོན་པ་ཞེས་བྱའོ། །སྨན་གྱི་ལྷ་ཙན་དན་གྱི་ནགས་ཚལ་གྱི་ཤུགས་འཆང་བའི་རྣམ་པར་ཐར་པ་ནི། བལྟ་བ་དོན་ཡོད་པས་སེམས་ཅན་འདྲེན་པའི་འོད་ཅེས་བྱའོ། །སྨན་གྱི་ལྷ་འོད་རྡུལ་མེད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཉོན་མོངས་པ་རབ་ཏུ་ཞི་བས་རྡུལ་དང་བྲལ་བའི་སྦྱོར་བ་ཞེས་བྱའོ། །སྨན་གྱི་ལྷ་མིང་ཀུན་ཏུ་གྲགས་པའི་གླང་པོའི་རྒྱལ་མཚན་གྱི་རྣམ་པར་ཐར་པ་ནི། མིང་བསྒྲགས་པས་དགེ་བའི་རྩ་བ་རྒྱ་མཚོ་ཡང་དག་པར་འཕེལ་བ་ཞེས་བྱའོ། །སྨན་གྱི་ལྷ་སྤུའི་གློང་ཀུན་ནས་འོད་བྱུང་བའི་རྣམ་པར་ཐར་པ་ནི། ནད་ཐམས་ཅད་ལ་སྙིང་རྗེའི་དཀྱིལ་འཁོར་གྱི་ཤུགས་
ཀྱི་རྒྱལ་མཚན་ཞེས་བྱའོ། །སྨན་གྱི་ལྷ་མུན་པ་རྣམ་པར་སེལ་ཅིང་རྣམ་པར་སྦྱོང་བའི་རྣམ་པར་ཐར་པ་ནི། འགྲོ་བ་མདོངས་པ་ལྟ་བུ་ཐམས་ཅད་ཀྱི། ཡེ་ཤེས་ཀྱི་མིག་རྣམ་པར་དག་པར་བྱེད་པ་ཞེས་བྱའོ། །སྨན་གྱི་ལྷ་སྒྲ་དབྱངས་ཀུན་ཏུ་འབྱུང་བའི་རྣམ་པར་ཐར་པ་ནི། སངས་རྒྱས་ཀྱི་ཆོས་རབ་ཏུ་བསྒྲགས་པས། དོན་གྱི་དབྱིངས་འབྱུང་བ་ཞེས་བྱའོ། །སྨན་གྱི་ལྷ་ཉི་མའི་འོད་འགྲོ་བའི་མཆོག་གི་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ལ་དགེ་བའི་བཤེས་སུ་སྟོན་ཅིང་དགེ་བའི་རྩ་བས་ཡང་དག་པར་བསྐུལ་བ་ཞེས་བྱའོ། །སྨན་གྱི་ལྷ་ཕྱོགས་བཅུར་རྨོངས་པ་མེད་པའི་རྣམ་པར་ཐར་པ་ནི། མོས་པའི་ཚུལ་གྱིས་རྣམ་པར་དག་པའི་སྙིང་རྗེའི་སྙིང་པོ་ཞེས་བྱའོ། །སྨན་གྱི་ལྷ་མདངས་བཟང་པོ་ཀུན་ཏུ་འགྱེད་པའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ནད་རབ་ཏུ་ཞི་བར་བྱེད་ཅིང་། སངས་རྒྱས་རྗེས་སུ་དྲན་པར་སྦྱོར་བ་ཞེས་བྱའོ། །དེ་ནས་སྨན་གྱི་ལྷ་ཕུན་སུམ་ཚོགས་པས་སངས་རྒྱས་ཀྱི་མཐུས། སྨན་གྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡེ་ཤེས་བསམ་གྱིས་མི་ཁྱབ་ལྟོས། །འགྲོ་བ་ཀུན་གྱི་བསམ་པ་རབ་ཏུ་མཁྱེན། །ཐབས་ཀྱི་རྣམ་པ་སྣ་ཚོགས་སྒོ་དག་ནས། །སྡུག་བསྔལ་ཀུན་ལས་སེམས་ཅན་རབ་ཏུ་འགྲོལ། །སངས་རྒྱས་ཆོས་ཉིད་དེ་ལྟར་བསམ་མི་ཁྱབ། །དེ་ཡི་མཐུ་ནི་ཐམས་ཅད་དོན་ཀྱང་ཡོད། །སྐྱེ་དགུ་རྣམས་ཀྱི་སྡུག་བསྔལ་ཞི་བར་མཛད། །ཙན་དན་ཤུགས་དང་ལྡན་པའི་རྣམ་ཐར་ཏོ། །སྔན་ཅད་རྒྱལ་བའི་ཆོས་ཉིད་དག་ལ་ལྟོས། །བསྐལ་པ་རྒྱ་མཚོ་མཐའ་མེད་སྤྱོད་པ་ན། །སྲིད་པ་ཀུན་ལ་ཆགས་པ་གང་ཡང་མེད། །དེ་ལ་རྡུལ་མེད་འོད་ཀྱི་ལྷ་འཇུག་གོ །རྒྱལ་བ་བསྐལ་པ་སྟོང་ཕྲག་བརྒྱ་དག་ཏུ། །མཐོང་ཞིང་མཚན་ཉིད་དེ་བཞིན་ཤིན་ཏུ་དཀོན། །ཚུལ་རྣམས་ཀུན་ཏུ་རང་བྱུང་དོན་ཡོད་དེ། །དེ་ལ་རྒྱལ་མཚན་མཆོག་ནི་དེ་ལྟར་འཇུག །རྒྱལ་
བའི་སྤུ་ཡི་སྒོ་རྣམས་ཀུན་ནས་ཀྱང་། །ནད་ལས་རབ་ཏུ་གྲོལ་བའི་འོད་བཀྱེ་བས། །འཇིག་རྟེན་ཉོན་མོངས་མ་ལུས་ཞི་བར་མཛད། །སྤུ་མདངས་རྒྱུན་གྱི་རྣམ་ཐར་འདི་ཡིན་ནོ། །སྡུག་བསྔལ་ལས་དང་ཉོན་མོངས་སྣ་ཚོགས་པས། །འགྲོ་བ་མདོངས་ཤིང་རབ་ཏུ་རྨོངས་གྱུར་རྣམས། །སངས་རྒྱས་ཡེ་ཤེས་འོད་ཀྱིས་རྣམ་པར་སྤྱོད། །དེ་ནི་མུན་དང་བྲལ་བའི་ལྷས་མཐོང་ངོ་། །རྒྱལ་བའི་གསུང་གཅིག་ལས་ནི་མཐའ་ཡས་པའི། །ཆོས་ཀྱི་སྒོ་མོ་ཐམས་ཅད་ཀུན་ཀྱང་འབྱུང་། །དེ་ནི་སེམས་ཅན་མ་ལུས་ཀུན་ཀྱང་ཤེས། །འདི་ནི་སྒྲ་དང་ལྡན་པའི་རྣམ་ཐར་ཏོ། །རྒྱལ་བའི་ཡེ་ཤེས་བསམ་གྱིས་མི་ཁྱབ་ལྟོས། །སྲིད་པར་སེམས་ཅན་ཡོངས་སུ་སྨིན་བྱས་པ། །དེ་ལ་འགྲོ་ཀུན་མི་མགོན་མངོན་དུ་སྣང་། །ཉི་འོད་ཞི་བའི་ལྷ་ཡིས་དེ་མཐོང་ངོ་། །སངས་རྒྱས་ཐུགས་རྗེའི་ཚུལ་ནི་རྒྱ་མཚོ་སྟེ། །འགྲོ་བ་ཀུན་ལ་ཕན་དོན་དེ་སྐྱེས་སོ། ། འགྲོ་བ་ཀུན་ལ་ལམ་རྣམས་ཤིན་ཏུ་སྟོན། །དེ་ནི་ཕྱོགས་སུ་སྣང་བའི་ལྷས་ཤེས་སོ། །སངས་རྒྱས་འགྲོ་དབང་རྣམས་ཀྱི་འོད་ཡངས་པ། །ཕྱོགས་རྣམས་ཐམས་ཅད་མ་ལུས་ཀུན་ཏུ་གང་། །སངས་རྒྱས་རྗེས་སུ་དྲན་པའི་གཟི་བརྗིད་བསྐྱེད། །མདངས་ཀྱི་འོད་དུ་ལྡན་པའི་རྣམ་ཐར་ཏོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཞི་པ། དེ་ལ་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་གྱི་རྣམ་པར་ཐར་པ་ནི། ཡེ་ཤེས་རྒྱ་མཚོ་ཡངས་ཤིང་མཐའ་ཡས་པའི་སྙིང་པོ་ཞེས་བྱའོ། །ནགས་ཚལ་གྱི་ལྷ་འོད་ཀྱི་ཕུང་པོ་སྣ་ཚོགས་ཀྱི་མིག་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི་དགེ་བ་རྒྱ་ཆེན་པོ་ཀུན་ནས་སྤུངས་པའི་ཤུགས་ཤེས་བྱའོ། །ནགས་ཚལ་གྱི་ལྷ་མྱུ་གུ་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། མོས་པ་སྣ་ཚོགས་ཀྱི་མྱུ་གུ་རྣམ་པར་འཕེལ་བ་དང་། ཡོངས་སུ་དག་པར་བྱེད་པ་ཞེས་བྱའོ། །ནགས་ཚལ་གྱི་ལྷ་ལོ་མ་དྲི་མ་མེད་པའི་ཕྲེང་བའི་དཔལ་
གྱི་རྣམ་པར་ཐར་པ་ནི། ཡོན་ཏན་གྱི་དཀྱིལ་འཁོར་ཐམས་ཅད་ཀྱི་རྒྱན་ཡོངས་སུ་སྦྱོང་ཞིང་རྣམ་པར་སྒོམ་པ་ཞེས་བྱའོ། །ནགས་ཚལ་གྱི་ལྷ་ཡན་ལག་རབ་ཏུ་འཆང་བའི་གཟི་བརྗིད་ཀྱི་རྣམ་པར་ཐར་པ་ནི། ཤེས་རབ་དྲི་མ་མེད་པའི་སྒོ་ནས་ཆོས་ཀྱི་དབྱིངས་ལ་དམིགས་ཤིང་། ཀུན་ནས་རྣམ་པར་དམིགས་པས་རྒྱས་པར་འགོངས་པ་ཞེས་བྱའོ། །ནགས་ཚལ་གྱི་ལྷ་དགེ་བའི་འོད་སྣ་ཚོགས་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྤྱོད་པ་རྒྱ་མཚོ་ལ་ཡང་དག་པར་འཇུག་པའི་ཆོས་ཀྱི་སྤྲིན་མངོན་པར་སྒྲུབ་པ་ཞེས་བྱའོ། །ནགས་ཚལ་གྱི་ལྷ་སྒྲ་སྐད་ཡིད་དུ་འོང་བའི་དབྱངས་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཡིད་དུ་མི་འོང་བའི་སྒྲ་ལ་བཟོད་པ་རབ་ཏུ་ཐོབ་པས་ཆོས་ཀྱི་སྣང་བ་དྲི་མ་མེད་པ་ཞེས་བྱའོ། །ནགས་ཚལ་གྱི་ལྷ་ཀུན་ནས་སྤོས་མང་པོ་ལྡང་བའི་འོད་ཀྱི་རྣམ་པར་ཐར་པ་ནི། སྤྱོད་པ་རྒྱ་ཆེན་པོའི་དཀྱིལ་འཁོར་སྤྱོད་པས་ཡོངས་སུ་དག་པར་བྱེད་ཅིང་ཕྱོགས་ཀུན་ཏུ་རྣམ་པར་སྣང་བ་ཞེས་བྱའོ། །ནགས་ཚལ་གྱི་ལྷ་ཀུན་ནས་དཔལ་གྱི་འོད་རབ་ཏུ་འབྱུང་བའི་དཀྱིལ་འཁོར་གྱི་རྣམ་པར་ཐར་པ་ནི། འགྲོ་བ་ལ་ཕན་པའི་དོན་ཆོས་ཐམས་ཅད་ཀྱི་ཡོན་ཏན་གྱིས་རྒྱས་པར་ཡང་དག་པར་སྦྱོང་བ་ཞེས་བྱའོ། །ནགས་ཚལ་གྱི་ལྷ་མེ་ཏོག་དང་འབྲས་བུ་དང་རོའི་འོད་ཀྱི་རྣམ་པར་ཐར་པ་ནི། སངས་རྒྱས་སྐྱེ་བ་ཐམས་ཅད་ལ་དགའ་བར་ལྟ་ཞིང་རྗེས་སུ་དྲན་པའི་ཡོན་ཏན་གྱི་རྒྱན་གྱི་སྙིང་པོ་ཞེས་བྱའོ། །དེ་ནས་ནགས་ཚལ་གྱི་ལྷ་ཡལ་ག་སྣ་ཚོགས་ཀྱི་སྤྲིན་གྱིས་སངས་རྒྱས་ཀྱི་མཐུས་ནགས་ཚལ་གྱི་ལྷའི་འཁོར་གྱི་དཀྱིལ་འཁོར་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསོད་ནམས་སྟོབས་དང་ཡེ་ཤེས་སྟོབས་རྣམས་དང་། །སྔོན་ཚེ་བྱང་ཆུབ་སྤྱོད་པས་སངས་རྒྱས་བྱུང་། །སྟོབས་རྣམས་ཀུན་གྱི་རང་བྱུང་ཕ་རོལ་ཕྱིན། །འགྲོ་བ་ཀུན་ན་འཕགས་ཤིང་རྣམ་པར་མཛེས། །འགྲོ་བ་ཐམས་ཅད་སྙེད་ཀྱི་ཐུགས་རྗེའི་སྒོ། །དེ་བཞིན་གཤེགས་པས་སྔོན་ཚེ་
རབ་ཏུ་སྦྱངས། །རང་བྱུང་དེ་བས་འགྲོ་བའི་དོན་མཛད་དོ། །སྣ་ཚོགས་སྤུངས་འོད་རྣམ་ཐར་འདི་ལ་འཇུག །སེམས་ཅན་ཀུན་གྱིས་བདེ་གཤེགས་མཐོང་མ་ཐག །མོས་པ་རྒྱ་མཚོ་རྣམ་པར་དག་པར་འགྱུར། །རྒྱལ་བ་ཀུན་གྱི་ལམ་ཡང་ཡང་དག་སྟོན། །མྱུ་གུ་ཡིད་འོང་འོད་ཀྱི་རྣམ་ཐར་ཡིན། །རྒྱལ་བ་ཀུན་གྱི་བ་སྤུའི་ཡོན་ཏན་འཁོར། །བསྐལ་པ་རྒྱ་མཚོར་ཟད་པར་མི་ནུས་ཏེ། །འགྲོ་བ་ཀུན་གྱིས་སངས་རྒྱས་བསམ་མི་ཁྱབ། །རྣམ་ཐར་འདི་ནི་ཕྲེང་བའི་དཔལ་གྱིས་མཐོང་། །སྔན་ཅད་རྒྱལ་བས་སངས་རྒྱས་གང་གི་རྣམས། །ཞིང་མང་རྡུལ་སྙེད་མཆོད་པ་དེ་དག་དྲན། །ཀུན་ཏུ་ཤེས་རབ་དཀྱིལ་འཁོར་རྣམ་པར་སྦྱངས། །ཡལ་ག་འོད་ཀྱི་བརྗིད་ཀྱིས་འདི་མཐོང་ངོ་། །འགྲོ་བ་ཀུན་གྱི་སྤྱོད་པ་རྒྱ་མཚོ་དག །སྐད་ཅིག་གཅིག་གིས་སངས་རྒྱས་ཐུགས་སུ་ཆུད། །རྒྱལ་བའི་ཡེ་ཤེས་ཆགས་མེད་ཤིན་ཏུ་ཡངས། །སྣ་ཚོགས་འགྱུར་སྤུངས་འོད་ཀྱིས་འདི་མཐོང་ངོ་། །བདེ་གཤེགས་གསུང་ནི་ཞི་བ་རབ་ཞིར་གསུང་། །དགའ་བ་ཡངས་པ་ཆེན་པོ་རྣམ་པར་སྐྱེད། །སེམས་ཅན་མོས་པ་ཇི་བཞིན་དེ་དག་ཤེས། །འདི་ནི་སྒྲ་རྣམས་སྒྲོགས་པའི་དབྱངས་ཀྱིས་ཐོས། །ཕྱོགས་བཅུའི་ཞིང་གི་དབྱིངས་རྣམས་རྒྱས་བྱས་ཤིང་། །སངས་རྒྱས་བྱིན་རླབས་རྒྱ་ཆེན་རབ་ཏུ་འབྱུང་། །རྒྱལ་བའི་སྔོན་གྱི་སྤྱོད་པ་དག་ཀྱང་སྟོན། །ཀུན་ཏུ་དྲི་ཞིམ་འོད་དཔལ་འདི་ལ་འཇུག །མ་རུངས་སེམས་ཅན་ཡོན་ཏན་མེད་པའི་རྣམས། །མྱོས་ཤིང་འཁོར་བ་ཀུན་ཏུ་འཁོར་བ་དག །དེ་དག་ལ་ནི་ཐམས་ཅད་མཁྱེན་ལམ་སྟོན། །འཕགས་པའི་འོད་ཀྱི་འཁོར་གྱིས་འདི་མཐོང་ངོ་། །སེམས་ཅན་མ་རུངས་སྦྱོར་བ་སྤྱོད་པ་རྣམས། །བསྐལ་པ་བྱེ་བས་སངས་རྒྱས་མཐོང་བར་འགྱུར། །གཞན་ནི་བདེ་གཤེགས་སྐད་ཅིག་གཅིག་གིས་ལྟ། །རིའི་འོད་ཀྱི་ལྷ་ཡིས་འདི་མཐོང་ངོ་། །དེ་ལ་རིའི་ལྷ་རིན་པོ་ཆེའི་རྩེ་མོའི་མེ་ཏོག་ཤིན་ཏུ་རྒྱས་པར་གནས་པའི་རྣམ་པར་ཐར་པ་ནི། བསམ་གཏན་
ཞི་ཞིང་ཡངས་ལ་དབེན་པའི་སྣང་བ་ལ་རབ་ཏུ་འཇུག་པ་ཞེས་བྱའོ། །རིའི་ལྷ་ནགས་ཚལ་སྣ་ཚོགས་མེ་ཏོག་ཤིན་ཏུ་རྒྱས་པའི་གཙུག་ཕུད་ཀྱི་རྣམ་པར་ཐར་པ་ནི། འགྲོ་བ་བསམ་གྱིས་མི་ཁྱབ་པའི་དགེ་བའི་རྩ་བ་ཡོངས་སུ་སྨིན་པར་བྱེད་པའི་བྱམས་པ་སྒོམ་པའི་རྒྱན་ཅེས་བྱའོ། །རིའི་ལྷ་ཀུན་ནས་ཤིན་ཏུ་འཕགས་པས་རྣམ་པར་སྣང་བའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསམ་པ་རྣམ་པར་ལྟ་བའི་དབང་པོ་ལ་འཇུག་པས་མངོན་པར་སྣང་བ་ཞེས་བྱའོ། །རིའི་ལྷ་རྡུལ་ཐམས་ཅད་དང་མི་གནས་པས་དྲི་མ་མེད་པའི་གཙུག་ཕུད་ཀྱི་རྣམ་པར་ཐར་པ་ནི། བསྐལ་པ་རྒྱ་མཚོ་མཐའ་ཡས་པར་མི་སྐྱོ་བའི་བརྩོན་འགྲུས་ཀྱིས་རབ་ཏུ་སྦྱོར་བ་ཞེས་བྱའོ། །རིའི་ལྷ་སྣང་བས་ཕྱོགས་སུ་གསོལ་བའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་མཐའ་ཡས་པའི་སྣང་བ་རྣམ་པར་བསྟན་པ་སྟོན་པ་ཞེས་བྱའོ། །རིའི་ལྷ་སྟོབས་ལ་ཐུབ་པ་མེད་པའི་སྣང་བའི་འོད་ཀྱི་རྣམ་པར་ཐར་པ་ནི། སེམས་ཅན་ཡོངས་སུ་སྨིན་པར་བྱ་བའི་ཕྱིར་གཏི་མུག་ཡོངས་སུ་སེལ་བའི་འོད་ཅེས་བྱའོ། །རིའི་ལྷ་ཀུན་ནས་གཟི་བརྗིད་དཔལ་གྱི་དཀྱིལ་འཁོར་གྱི་རྣམ་པར་ཐར་པ་ནི། ཆགས་པ་ཐམས་ཅད་དང་མཉམ་པའི་རྒྱན་གྱི་སྡུག་བསྔལ་ཡང་དག་པར་འཇོམས་པ་ཞེས་བྱའོ། །རིའི་ལྷ་སྣང་བའི་རྡུལ་ཆུ་བོའི་དཀྱིལ་འཁོར་གྱི་རྣམ་པར་ཐར་པ་ནི། དེ་བཞིན་གཤེགས་པ་ཐམས་ཅད་ཀྱི་བསྟན་པའི་ཡོན་ཏན་སྣང་བ་ཡང་དག་པར་སྟོན་པ་ཞེས་བྱའོ། །རིའི་ལྷ་ཀུན་ཏུ་མངོན་པར་ལྟ་བའི་མིག་གི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་རྨི་ལམ་གྱི་མཐར་ཡང་དགེ་བའི་རྩ་བ་རྣམ་པར་འཕེལ་བར་བྱེད་པ་ཞེས་བྱའོ། །རིའི་ལྷ་ཀུན་ནས་སྲ་བའི་རྡོ་རྗེའི་མཚམས་ཀྱི་མིག་གི་རྣམ་པར་ཐར་པ་ནི། དོན་རྒྱ་མཚོ་རྒྱ་ཆེན་པོ་མཐའ་ཡས་པ་དང་འགྲོགས་པ་ཞེས་བྱའོ། །དེ་ནས་རིའི་ལྷ་རིན་པོ་ཆེའི་རྩེ་མོ་མེ་ཏོག་ཤིན་ཏུ་རྒྱས་པར་གནས་པས། སངས་རྒྱས་ཀྱི་མཐུས། རིའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་རྣམ་
འཕྲུལ་མི་ཟད་ཚད་མེད་ལྟོས། །སྔོན་ཚེ་སྤྱོད་རབ་མཐའ་ཡས་རྒྱལ་བས་སྤྱོད། །རྣམ་ཐར་ཞིང་གི་རྡུལ་སྙེད་སྒོམ་མཛད་པས། །འགྲོ་བ་མ་ལུས་དགའ་བའི་ཤུགས་ཀྱང་སྐྱེད། །སངས་རྒྱས་སྤུ་ནས་དྲི་མ་མེད་དཔལ་བཀྱེ། །ཡན་ལག་མཚན་བརྒྱན་འགྲོ་བ་ཀུན་བཀང་ཞིང་། །བྱམས་ཚུལ་མཐའ་ཡས་འཇིག་རྟེན་ཀུན་ལ་སྟོན། །ནགས་ཚལ་རྒྱས་པའི་གཙུག་གི་རྣམ་ཐར་ཏོ། །སངས་རྒྱས་སྐུ་ནི་མཐའ་ཡས་འགྲོ་བར་མངོན། །འཇིག་རྟེན་ཀུན་ཏུ་ཕྱོགས་བཅུ་བཀང་ཞིང་འཕགས། །དབང་པོ་དང་བའི་སེམས་ཅན་རངས་ཤིང་དགའ། །རྣམ་ཐར་འདི་ལ་འཕགས་པའི་རྒྱལ་མཚན་འཇུག །རང་བྱུང་མཁའ་མཉམ་འཇིག་རྟེན་ཀུན་མ་ཆགས། །བསྐལ་པ་ཀུན་སྤྱོད་བརྩོན་འགྲུས་སྟོབས་མི་སྐྱོ། །སྣ་ཚོགས་མཁས་འགྲོ་སྦྱོར་བ་མ་ལུས་འདུལ། །དགའ་བ་དྲི་མེད་གཙུག་ཕུད་རྣམ་ཐར་ཏོ། །འཇིག་རྟེན་ཀུན་ནི་མདོངས་གྱུར་མུན་སྡུག་ཞུགས། །ཐུགས་རྗེས་དེར་བསྐྱེད་སངས་རྒྱས་འོད་བཀྱེ་ཞིང་། །འགྲོ་ཁམས་ཡུན་རིང་ཉལ་བ་སད་པར་མཛད། །རིགས་ནས་དགའ་འོད་ལྷའི་རྣམ་ཐར་ཏོ། །སྲིད་པའི་རྒྱ་མཚོར་སྤྱད་པ་སྔོན་སྤྱོད་ཚེ། །ཞིང་རྡུལ་མཉམ་པའི་སེམས་ཅན་གཙོ་མཆོད་པས། །དེ་དག་དགྱེས་བཞིན་སེམས་ཅན་བྱང་ཆུབ་བཀོད། །ཞི་བའི་ས་འདི་སྟོབས་འཆང་ལྷ་འཇུག་གོ །ལས་ཀྱི་སྤྲིན་སྒྲིབ་གཡོགས་ཤིང་བསྒྲིབས་པ་རྣམས། །སྲིད་པར་སེམས་ཅན་སྡུག་བསྔལ་འཁོར་གཟིགས་ནས། །དེ་དག་མུན་པ་ཡེ་ཤེས་འོད་ཀྱིས་བསྩལ། །གཟི་བརྗིད་དཔལ་འོད་རྣམ་ཐར་འདི་སེམས་སོ། ། རྒྱལ་བའི་སྤུ་ལས་སངས་རྒྱས་ཡོན་ཏན་ཀུན། །ཕྱོགས་དབྱིངས་སེམས་ཅན་བསམ་པ་བཞིན་དུ་གྲགས། །རྫུ་འཕྲུལ་རྣམ་པ་བསྐལ་པ་ཀུན་ཏུ་གནས། །འོད་མང་རྡུལ་གྱི་ཆུ་བོའི་ལྷ་འཇུག་གོ །སེམས་ཅན་ཀུན་སྤྱད་དགེ་བ་རྒྱ་མཚོ་ཀུན། །དེ་ལ་ཕྱོགས་བཀང་སངས་རྒྱས་མངོན་པར་སྣང་། །སྣ་ཚོགས་ཐབས་ཀྱིས་འཇིག་རྟེན་ཆོས་ཀྱང་སྟོན། །ཚུལ་མངོན་མིག་གི་ལྷ་ཡིས་དེ་ཐོས་སོ། །ཆོས་སྒོ་རྒྱ་མཚོ་མི་ཟད་
ཚད་མེད་པ། །སངས་རྒྱས་གསུང་གཅིག་སེམས་ཅན་ཀུན་ལ་གསུང་། །བསྐལ་པ་ཀུན་བརྗོད་འཇིག་རྟེན་མང་ལ་སྟོན། །རྡོ་རྗེ་ཚུལ་མིག་འདི་ཡི་གནས་ལ་འཇུག །དེ་ལ་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པ་དྲི་མ་མེད་པའི་རྣམ་པར་ཐར་པ་ནི། སྐད་ཅིག་སྐད་ཅིག་ཅིང་སེམས་ཅན་ཐམས་ཅད་ལ་བྱམས་པ་དང་། སྙིང་རྗེའི་དཀྱིལ་འཁོར་གྱིས་རྣམ་པར་ལྟ་བ་ཞེས་བྱའོ། །སའི་ལྷ་བསོད་ནམས་བརྟེན་པ་ཤིན་ཏུ་བསགས་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསོད་ནམས་ཀྱི་སྟོབས་དང་ཤུགས་ཀྱི་རྒྱན་ཅེས་བྱའོ། །སའི་ལྷ་སེམས་ཅན་རིན་པོ་ཆེས་རྒྱས་པའི་རྣམ་པར་ཐར་པ་ནི། ཏིང་ངེ་འཛིན་སྣ་ཚོགས་བསྒོམས་པ་རྣམ་པར་འབྱེད་པ་དྲི་མ་མེད་པ་ཞེས་བྱའོ། །སའི་ལྷ་དུས་དུས་སུ་དགེ་བའི་མིག་རབ་ཏུ་སྟོན་པའི་རྣམ་པར་ཐར་པ་ནི། སེམས་ཅན་ཐམས་ཅད་དགའ་ཞིང་བདེ་བ་དང་རྩེ་བའི་སྦྱོར་བ་ཞེས་བྱའོ། །སའི་ལྷ་གསེར་གྱི་མིག་གི་དཔལ་གྱི་རྣམ་པར་ཐར་པ་ནི། ལུས་ཐམས་ཅད་ཡོངས་སུ་དག་པར་བྱེད་པའི་ཚུལ་སྟོན་པ་ཞེས་བྱའོ། །སའི་ལྷ་སྤུ་ལས་སྤོས་ཀྱི་འོད་རྣམ་པར་འགྱེད་པའི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡོན་ཏན་རྒྱ་མཚོ་ཐམས་ཅད་རྣམ་པར་སྒོམ་པ་བརྗོད་པ་ཞེས་བྱའོ། །སའི་ལྷ་སྒྲ་དབྱངས་ཡིད་དུ་འོང་བ་སྒྲོག་པའི་རྣམ་པར་ཐར་པ་ནི། འགྲོ་བ་ཐམས་ཅད་སྨྲ་བའི་སྒྲ་རྒྱ་མཚོ་བྱིན་གྱིས་རློབ་པ་ཞེས་བྱའོ། །སའི་ལྷ་མེ་ཏོག་གི་ཀློང་སྣ་ཚོགས་ཀྱི་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཞིང་ཕུན་སུམ་ཚོགས་པའི་རང་བཞིན་དྲི་མ་མེད་པ་ཞེས་བྱའོ། །སའི་ལྷ་ཀུན་ནས་རྡོ་རྗེའི་རྡུལ་གྱི་རྒྱུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཆོས་ཐམས་ཅད་ཀྱི་འཁོར་ལོ་བྱིན་གྱི་རླབས་ཀུན་ནས་རྒྱུ་ཞིང་འབྱུང་བ་ཞེས་བྱའོ། །སའི་ལྷ་ཁྱིམ་དྲི་མ་མེད་པའི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཞིང་ཐམས་ཅད་ཀྱི་ཚུལ་ལ་ཡང་དག་པར་འཇུག་པའི་ཆོས་ཀྱི་རྒྱན་བསྒོམ་པ་འབྱུང་བ་ཞེས་བྱའོ། །དེ་ནས་སའི་ལྷ་དཔལ་གྱི་མེ་ཏོག་ཀུན་ནས་ཤིན་ཏུ་རྒྱས་པ་དྲི་མ་མེད་པས། སངས་རྒྱས་ཀྱི་མཐུས་སའི་ལྷའི་འཁོར་
གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔན་ཅད་སྐད་ཅིག་སྐད་ཅིག་བདེ་གཤེགས་ཀྱིས། །བརྗོད་དུ་མེད་པའི་སྙིང་རྗེའི་སྒོ་རྣམས་དང་། །བྱམས་པའི་སྒོ་ཡང་མི་ཟད་བསྒོམས་པས་ན། །དེ་ཚེ་སངས་རྒྱས་སྐུ་ནི་མི་ཤིགས་སྲ། །དུས་གསུམ་གཏོགས་པའི་སེམས་ཅན་བསོད་ནམས་དང་། །ཇི་སྙེད་བྱང་ཆུབ་སེམས་དཔའི་བསོད་ནམས་དག །རྒྱལ་བའི་སྤུ་གཅིག་དེ་སྙེད་བསོད་ནམས་འོད། །བསོད་ནམས་དེ་མཐོང་རབ་ཏུ་དགའ་བར་འགྱུར། །འབྱུང་བ་མེད་ཅིང་བྱོན་པ་གང་ཡང་མེད། །ཏིང་འཛིན་ཞི་བ་རྒྱ་མཚོ་རབ་ཏུ་ཞུགས། །སེམས་ཅན་རྒྱན་གྱི་ས་འདི་རབ་ཏུ་སྟོན། །འདི་ནི་སྣ་ཚོགས་ཤིང་གི་ཟེ་བའི་ས་ཡིན་ནོ། །སྔན་ཅད་ཐུབ་པས་སྤྱོད་པ་སྤྱད་པ་དང་། །འགྲོ་བའི་སྒྲིབ་པ་རྣམ་པར་ཟློག་པ་ནི། །རིན་ཆེན་བཀྲམ་པའི་འོད་ཀྱི་ས་ཡིན་ཏེ། །རྣམ་ཐར་དེ་ལ་དགའ་བར་ལྷ་ལྟའོ། །དེ་བཞིན་གཤེགས་པའི་ས་ནི་མཐའ་ཡས་ཏེ། །འཇིག་རྟེན་ཀུན་ཏུ་སྐད་ཅིག་གཅིག་ལ་སྟོན། །དུས་ཚོད་ཡང་དག་སྟོན་པའི་ས་ཡི་ལྷ། །དགའ་བར་སངས་རྒྱས་ཡུལ་ལ་རྣམ་པར་ལྟ། །སངས་རྒྱས་གསུང་ནི་མཐའ་ཡས་བསམ་མི་ཁྱབ། །སེམས་ཅན་ཀུན་བསྒྲགས་ཉོན་མོངས་ཞི་བར་མཛད། །གསེར་འོད་མིག་གི་དཔལ་ནི་རབ་དགའ་བ། །སངས་རྒྱས་ཡོན་ཏན་མཐའ་ཡས་མངའ་བ་སྟེ། །སངས་རྒྱས་སྤྲུལ་པས་རྣམ་པར་ཀུན་གཟུགས་སུ། །ཕྱོགས་ཀུན་ཆོས་ཀྱི་དབྱིངས་སུ་རྒྱས་པར་མཛད། །སྤུ་ལས་དྲི་ཞིམ་འོད་ཀྱི་ས་ཡི་ལྷ། །སངས་རྒྱས་སེམས་ཅན་འདུལ་བ་དེ་ལ་ལྟ། །ཕྱོགས་རྣམས་ཡིད་འོང་དབྱངས་ཀྱིས་གང་བྱས་ཤིང་། །འགྲོ་བ་འདི་ནི་ཕྱི་མཐའི་བསྐལ་པར་བརྗོད། །ཡིད་དུ་འོང་བའི་སྒྲ་དབྱངས་སའི་ལྷ། །རབ་ཏུ་དགའ་བར་སངས་རྒྱས་དབྱངས་ལ་ཉན། །རྒྱལ་བའི་སྤུ་ལས་སེམས་ཅན་མཉམ་པ་ཡི། །སྤོས་ཀྱི་འོད་བཀྱེ་འཇིག་རྟེན་ཀུན་བཀང་ཞིང་། །སེམས་ཅན་མ་ལུས་ཡོངས་སུ་སྨིན་མཛད་
ཅིང་། །མེ་ཏོག་གཙུག་ཕུད་འཕྱང་བས་ཡང་དག་མཐོང་། །དེ་བཞིན་གཤེགས་སྐུ་རྡོ་རྗེ་ལྟ་བུ་སྟེ། །མཚམས་སུ་མི་ཕྱེད་སྲ་བའི་རི་བོ་འདྲ། །འགྲོ་བ་ཀུན་གྱིས་སངས་རྒྱས་བསྐྱོད་མི་ནུས། །རྡོ་རྗེ་རྡུལ་གྱི་ལྷ་ནི་དེས་དགའ་འོ། །དེ་ལ་གྲོང་ཁྱེར་གྱི་ལྷ་རིན་ཆེན་རྩེ་མོའི་འོད་ཀྱི་རྣམ་པར་ཐར་པ་ནི། སེམས་ཅན་ལ་ཕན་པ་ཡང་དག་པར་སྦྱར་བ་འབྱུང་བ་ཞེས་བྱའོ། །གྲོང་ཁྱེར་གྱི་ལྷ་རྒྱན་རྣམ་པ་སྣ་ཚོགས་འབྱུང་བའི་རྣམ་པར་ཐར་པ་ནི། འགྲོ་བའི་དབང་པོ་ཡོངས་སུ་སྨིན་པར་བྱེད་པའི་འདུལ་བ་འབྱུང་བ་ཞེས་བྱའོ། །གྲོང་ཁྱེར་གྱི་ལྷ་རིན་ཆེན་དྲི་མེད་ཤིན་ཏུ་དགའ་བའི་རྣམ་པར་ཐར་པ་ནི། སེམས་ཅན་ཐམས་ཅད་བསོད་ནམས་དང་དགའ་བ་མྱོང་བར་བྱེད་པ་ཞེས་བྱའོ། །གྲོང་ཁྱེར་གྱི་ལྷ་སློས་པའི་མྱ་ངན་ཐམས་ཅད་སྤོང་བས་རྣམ་པར་སྣང་བའི་རྣམ་པར་ཐར་པ་ནི། སྐྱོབ་པ་དང་མི་འཇིགས་པ་དང་། སྙིང་རྗེ་ཆེན་པོ་ཞེས་བྱའོ། །གྲོང་ཁྱེར་གྱི་ལྷ་སྒྲོན་མ་ཤིན་ཏུ་རྒྱས་པའི་མིག་གི་རྣམ་པར་ཐར་པ་ནི། ཤེས་རབ་ཀྱི་ཀུན་ཏུ་རྣམ་པར་འབྱེད་པ་ཞེས་བྱའོ། །གྲོང་ཁྱེར་གྱི་ལྷ་འོད་འཕྲོ་བའི་དཔལ་མངོན་པར་འབར་བའི་རྣམ་པར་ཐར་པ་ནི། ཐབས་ཀྱི་སྒོ་ཀུན་ནས་སྟོན་པའི་མཐུ་ཞེས་བྱའོ། །གྲོང་ཁྱེར་གྱི་ལྷ་བསོད་ནམས་ཀྱི་ཤུགས་སྣང་བའི་འོད་ཀྱི་རྣམ་པར་ཐར་པ་ནི། འགྲོ་བ་ཀུན་གྱི་བསོད་ནམས་འབྱུང་བའི་སྣང་བ་ཞེས་བྱའོ། །གྲོང་ཁྱེར་གྱི་ལྷ་ལུས་དྲི་མ་མེད་པས་མཉམ་པའི་འོད་ཀྱི་རྣམ་པར་ཐར་པ་ནི། སེམས་ཅན་རྨོངས་པ་ཐམས་ཅད་ལ་རྨི་ལམ་རྣམ་པར་སྟོན་པའི་འོད་ཅེས་བྱའོ། །གྲོང་ཁྱེར་གྱི་ལྷ་སྤོས་ཀྱི་རྒྱལ་མཚན་གཙུག་ཕུད་ཀྱི་རྒྱན་གྱི་རྣམ་པར་ཐར་པ་ནི། ཉོན་མོངས་པ་དང་མི་དགེ་བའི་དྲི་མ་རྣམ་པར་སེལ་ཅིང་ཐམས་ཅད་མཁྱེན་པ་ཉིད་ཀྱི་དྲི་ཡང་དག་པར་བསྐྱེད་པ་ཞེས་བྱའོ། །གྲོང་ཁྱེར་གྱི་ལྷ་རིན་ཆེན་དཔལ་གྱི་འོད་ཀྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྒྲིབ་པའི་རི་རྣམ་པར་འཇོམས་པའི་འོད་ཅེས་བྱའོ། །དེ་ནས་གྲོང་ཁྱེར་གྱི་ལྷ་རིན་པོ་ཆེའི་རྩེ་མོའི་འོད་ཀྱིས་སངས་རྒྱས་ཀྱི་མཐུས། གྲོང་ཁྱེར་གྱི་ལྷའི་འཁོར་གྱི་
དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མགོན་པོའི་ཆོས་ཉིད་བསམ་གྱིས་མི་ཁྱབ་སྟེ། །སྣང་བ་བརྙེས་ཤིང་ཕྱོགས་སུ་རྣམ་པར་མཛེས། །སེམས་ཅན་མཐའ་ཡས་ཡོངས་སུ་སྨིན་མཛད་པའི། །སངས་རྒྱས་འགྲོ་བ་ཀུན་ལ་མངོན་དུ་སྣང་། །སེམས་ཅན་ཐམས་ཅད་དབང་པོ་སྣ་ཚོགས་ཏེ། །དེ་དག་མ་ལུས་རྒྱལ་བས་འགྲོ་བར་མཁྱེན། །རྣམ་ཐར་འདི་ནི་རབ་ཏུ་ཐོབ་པའི་ཕྱིར། །སྣ་ཚོགས་འོད་འབྱུང་ལྷ་ཡང་རབ་ཏུ་དགའ། །རྒྱལ་བས་བསྐལ་པ་མཐའ་ཡས་ཡང་དག་སྤྱད། །སྔན་ཅད་རྒྱལ་བས་ཆོས་ཀྱང་ཡང་དག་བཟུང་། །དགའ་བའི་ཡིད་ཀྱིས་རྟག་ཏུ་དེ་དག་བླངས། །རྣམ་ཐར་འདི་ནི་དགའ་བའི་འོད་ཀྱིས་མཐོང་། །འགྲོ་བ་འདིར་ནི་ཐུགས་རྗེ་བྱམས་བསྐྱེད་ཅིང་། །དེ་བཞིན་གཤེགས་པས་སྔན་ཅད་སེམས་ཅན་རྣམས། །ཀུན་གྱི་མྱ་ངན་མཐའ་ཡས་རྣམ་པར་ཟློག །ཉོན་མོངས་ཡོངས་སུ་སྦྱང་བ་འདི་ལ་དགའ། །རྒྱལ་བའི་ཤེས་རབ་རྒྱ་ཆེ་མཐའ་ཡས་ཏེ། །ཚད་མེད་ནམ་མཁའ་འདྲ་ཞིང་མཚུངས་པ་ཡིན། །དེ་བཞིན་གཤེགས་པའི་ཤེས་རབ་རྣམ་སྤྱོད་པས། །མར་མེའི་མེ་ཏོག་འོད་ཀྱི་ལྷ་དགའ་འོ། །དེ་བཞིན་གཤེགས་པས་འགྲོ་མཉམ་སྐུ་གཟུགས་རྣམས། །འགྲོ་བ་ཀུན་གྱི་བསམ་པ་རྣམས་ལ་བསྟན། །དེ་འདྲའི་ཚུལ་ལ་རབ་ཏུ་བསྒོམས་པ་ཡིས། །མངོན་འོད་འཕྲོ་བའི་ལྷ་དེ་རབ་ཏུ་དགའ། །བསོད་ནམས་རྒྱ་མཚོ་རྒྱ་ཆེན་མཐའ་ཡས་པ། །སྔན་ཅད་དེ་བཞིན་གཤེགས་པས་ཡོངས་སུ་སྦྱངས། །དེ་འདྲའི་རྣམ་པར་ཐར་ལ་རྣམ་ལྟ་བས། །བསོད་ནམས་དཔལ་གྱི་འོད་དེ་རབ་ཏུ་དགའ། །སྲིད་པར་རབ་ཏུ་རྨོངས་པའི་སེམས་ཅན་རྣམས། །འཁོར་གྱུར་རབ་རིབ་མདོངས་པ་གཟིགས་པས་ན། །དེ་དག་ཕན་ཕྱིར་སངས་རྒྱས་མངོན་དུ་བྱུང་། །དྲི་མེད་འོད་ཀྱིས་རྣམ་ཐར་འདི་ཐོབ་པོ། །དེ་བཞིན་གཤེགས་པའི་རྫུ་འཕྲུལ་སྟོབས་ལ་ལྟོས། །འགྲོ་ལ་སྤྲིན་འདྲ་མཐའ་དང་དབུས་ཡང་མེད། །དེ་དག་བསྟན་ཅིང་འགྲོ་བ་
རྣམ་པར་འདུལ། །སྤོས་ཀྱི་རྒྱལ་མཚན་འོད་ཀྱིས་འདི་མཐོང་ངོ་། །སེམས་ཅན་རྨོངས་པ་མུན་པས་མདོངས་གྱུར་ཅིང་། །རྣམ་པ་སྣ་ཚོགས་སྒྲིབ་པས་བསྒྲིབས་གྱུར་པ། །སངས་རྒྱས་འོད་ཀྱིས་རྣམ་པར་ཀུན་ཤེས་འགྱུར། །རྩེ་མོའི་འོད་ཀྱི་ལྷ་ནི་འདི་ལ་འཇུག །དེ་ལ་སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མེད་པའི་རྒྱན་གྱིས་བརྒྱན་པའི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་མང་པོ་མཆོད་པ་ཡང་དག་པར་འབྱུང་ཞིང་། སྔོན་གྱི་སྨོན་ལམ་གྱི་རྒྱན་སྟོན་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རི་རབ་སྤོའི་རིན་པོ་ཆེའི་འོད་ཀྱི་རྣམ་པར་ཐར་པ་ནི་འགྲོ་བ་ཐམས་ཅད་དང་མངོན་སུམ་དུ་བྱང་ཆུབ་ཀྱི་སྤྱོད་པ་ཡང་དག་པར་སྒྲུབ་ཅིང་འབྱུང་བ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་དབྱངས་ཀྱི་འབྲུག་སྒྲ་སྒྲོག་པའི་རྒྱལ་མཚན་གྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བསམ་པ་ལ་སངས་རྒྱས་སྟོན་ཅིང་རྨི་ལམ་གྱི་མཐར། སངས་རྒྱས་ཀྱི་ཆོས་ཀྱི་འབྲུག་སྒྲ་སྒྲོག་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མེ་ཏོག་གི་ཆར་སྣ་ཚོགས་འབབ་པའི་མིག་གི་རྣམ་པར་ཐར་པ་ནི། དགའ་བ་ཐམས་ཅད་ཡོངས་སུ་གཏོང་ཞིང་རིན་པོ་ཆེའི་ཆར་འབེབ་པའི་རྒྱན་ཅེས་བྱའོ། །སྙིང་པོ་བྱང་ཆུབ་ཀྱི་ལྷ་འོད་འཕྲོ་མང་པོ་ཤིན་ཏུ་དྲི་མ་མེད་པའི་རྣམ་པར་ཐར་པ་ནི། འདུལ་བའི་སེམས་ཅན་ཡོངས་སུ་སྨིན་པར་བྱེད་ཅིང་སྙིང་པོ་བྱང་ཆུབ་ཀྱི་ཕུན་སུམ་ཚོགས་པ་སྣ་ཚོགས་སྟོན་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མེ་ཏོག་གི་ཕྲེང་བ་འོད་ཀྱི་གཙུག་ཕུད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དབང་པོ་བཞིན་དུ་ཆོས་ཀྱི་ཚུལ་ཟབ་མོ་དྲན་པ་སྟོན་པ་འབྱུང་བ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རིན་པོ་ཆེའི་རྒྱན་གྱི་ཆར་རབ་ཏུ་འབེབས་པའི་རྣམ་པར་ཐར་པ་ནི། དགའ་བ་ཡང་དག་པར་མྱོང་བ་མཐའ་ཡས་པ་ལ་ཡང་དག་པར་འཇུག་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་མཐུ་དམ་པ་སྤོས་ཀྱི་མིག་གི་རྣམ་པར་ཐར་པ་ནི། སངས་རྒྱས་ཀྱི་ཡོན་ཏན་དང་ལེགས་པ་རབ་ཏུ་བརྗོད་པའི་བྱིན་གྱི་རླབས་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་རྡོ་རྗེ་སྣ་ཚོགས་ཀྱི་སྤྲིན་གྱི་རྣམ་པར་ཐར་པ་ནི། སྙིང་པོ་བྱང་ཆུབ་རྣམ་པ་མཐའ་ཡས་
པ་ཡང་དག་པར་སྟོན་པའི་རྒྱན་ཅེས་བྱའོ། །སྙིང་པོ་བྱང་ཆུབ་ཀྱི་ལྷ་པདྨོའི་ཤིང་སྣང་བའི་འོད་ཀྱི་རྣམ་པར་ཐར་པ་ནི། བྱང་ཆུབ་ཀྱི་ཤིང་ཡོངས་སུ་ཞི་བས་ཕྱོགས་རྒྱས་པར་བྱེད་པ་ཞེས་བྱའོ། །སྙིང་པོ་བྱང་ཆུབ་ཀྱི་ལྷ་དགེ་བའི་ལྟ་བ་སྣ་ཚོགས་རྣམ་པར་སྟོན་པའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་སྟོབས་སྣ་ཚོགས་ཡང་དག་པར་རྒྱུ་བ་ཞེས་བྱའོ། །དེ་ནས་སྙིང་པོ་བྱང་ཆུབ་ཀྱི་ལྷ་དགེ་བ་དྲི་མ་མེད་པའི་རྒྱན་གྱིས་བརྒྱན་པའི་རྒྱལ་མཚན་གྱིས་སངས་རྒྱས་ཀྱི་མཐུས། སྙིང་པོ་བྱང་ཆུབ་ཀྱི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསྐལ་པ་མང་པོ་མཐའ་དང་དབུས་མེད་པར། །དེ་བཞིན་གཤེགས་པས་ཇི་ལྟར་སྔོན་སྤྱད་དྲན། །སངས་རྒྱས་ཐམས་ཅད་མཆོད་ཅིང་བསྒྲུབས་པས་ན། །དེ་ཕྱིར་དེ་ཡི་བསོད་ནམས་ནམ་མཁའི་ཚད། །ཞིང་རྣམས་མཐའ་ཡས་ཚད་མེད་འདྲ་མེད་པར། །མི་ཟད་གཏོང་བའི་སྒོ་ནས་སྔོན་བཏང་བས། །རི་བོའི་སྤོའི་འོད་ཀྱི་ལྷ་དེ་ནི། །བདེ་གཤེགས་དྲན་ཞིང་རབ་ཏུ་དགའ་བར་འགྱུར། །བདེ་གཤེགས་སྤྲུལ་པ་རྣམ་པ་མཐའ་ཡས་པ། །དེ་དག་ཞིང་རྣམས་ཀུན་ཏུ་རབ་ཏུ་རྒྱུ། །འགྲོ་བར་སངས་རྒྱས་རྨི་ལམ་བཞིན་སྟོན་ཅིང་། །སྤྲིན་གྱི་སྒྲ་དབྱངས་ལྷ་དེ་རབ་ཏུ་དགའ། །མཐའ་ཡས་བསྐལ་པར་དཀའ་བ་རབ་སྤྱད་དེ། །དང་བའི་སྤྱན་གྱིས་འགྲོ་ལ་ཕན་པའི་ཕྱིར། །རྒྱ་མཚོའི་སྤྱན་ཡང་ཡོངས་སུ་སྔོན་བཏང་སྟེ། །དེ་ལ་མེ་ཏོག་མིག་གི་ལྷ་དགའ་འོ། །ཡོན་ཏན་རིན་ཆེན་འོད་འཕྲོ་མཐའ་ཡས་སྤྲིན། །འགྲོ་བ་ཀུན་ཏུ་སྙིང་པོ་བྱང་ཆུབ་ནས། །རབ་ཏུ་བཀྱེ་བའི་སངས་རྒྱས་རྫུ་འཕྲུལ་གྱིས། །འོད་འཕྲོ་འགྱེད་པའི་ལུས་ཀྱི་ལྷ་ཡང་དགའ། །སེམས་ཅན་རྣམས་ཀྱི་སྤྱོད་པ་རྒྱ་མཚོ་སྟེ། །དེ་ལ་རྒྱལ་བ་ཆོས་ཀྱི་ཆར་ཡང་འབེབས། །ཇི་ལྟར་མོས་པར་ནེམ་ནུར་རྣམ་པར་སེལ། །དེ་ཡིས་གཙུག་ཕུད་འཕྱང་བ་དགའ་བ་ཐོབ། །རྒྱན་གྱི་ཆར་འབེབས་མིག་བཟང་ལྷ་དེ་ནི། །སེམས་ཀྱི་སྐད་ཅིག་གཅིག་གིས་ཚད་མེད་པའི། །ཆོས་དོན་དབྱིངས་ཀྱི་བྱེ་བྲག་མཐའ་ཡས་
པ། །རྒྱ་མཚོ་ཐ་དད་ཡང་དག་ཤེས་པས་འཇུག །ཞིང་རྣམས་བརྗོད་དུ་མེད་པ་ཐམས་ཅད་དུ། །འགྲོ་བ་ཀུན་ལ་སངས་རྒྱས་ལེགས་བརྗོད་པས། །དེ་ཕྱིར་ཡོན་ཏན་སངས་རྒྱས་ཞིང་ཀུན་གྲགས། །དེ་ནི་རྗེས་སུ་སྤོས་མིག་ལྷ་ཡང་དྲན། ། མཐའ་ཡས་ཤིང་གི་རྣམ་པ་སྣ་ཚོགས་གཟུགས། །བྱང་ཆུབ་ཤིང་ལ་ཀུན་ཀྱང་མ་ལུས་བསྟན། །རྡོ་རྗེ་སྣ་ཚོགས་སྤྲིན་གྱི་ལྷ་དེ་ནི། །བྱང་ཆུབ་ཤིང་ལ་དགའ་བར་རྣམ་པར་ལྟ། །སངས་རྒྱས་ཡེ་ཤེས་སྙིང་པོ་བྱང་ཆུབ་ལ། །ཕྱོགས་རྣམས་ཀུན་ཏུ་མཐའ་དང་མུ་མེད་དེ། །པདྨོ་སྣང་ཞིང་གསལ་བའི་ལྷ་དེ་ནི། །རྣམ་ཐར་རྣམ་ཡངས་འདི་ལ་རབ་དགའ་འོ། །སངས་རྒྱས་སྟོབས་རྣམས་ཡོངས་དག་བསམ་མི་ཁྱབ། །སྙིང་པོ་བྱང་ཆུབ་འདིར་ནི་ཀུན་ཀྱང་གྲག །ཡང་དག་བསྒྲུབས་པས་བྱུང་བ་དེ་དག་ནི། །ཐམས་ཅད་སྣ་ཚོགས་སྣང་བའི་འོད་ཉན་ཏོ། །དེ་ལ་རྐང་གིས་འགྲོ་རིན་ཆེན་དཔལ་གྱི་ཕྱག་རྒྱའི་རྣམ་པར་ཐར་པ་ནི། དགའ་བ་ཡངས་པ་རིན་པོ་ཆེའི་ཆར་གྱིས་ཀུན་ཏུ་ཁྱབ་པ་ཞེས་བྱའོ། །རྐང་གིས་འགྲོ་པདྨོ་སྣང་བའི་འོད་ཟེར་གྱི་འོད་ཀྱི་རྣམ་པར་ཐར་པ་ནི། སངས་རྒྱས་ཀྱི་སྐུ་འོད་ཟེར་གྱི་ཁ་དོག་པདྨོའི་དྲ་བ་ཐམས་ཅད་དུ་སྟོན་པས་དགའ་བར་བྱེད་པ་ཞེས་བྱའོ། །རྐང་གིས་འགྲོ་མེ་ཏོག་གཙུག་ཕུད་ཀྱི་དཔལ་དྲི་མ་མེད་པའི་རྣམ་པར་ཐར་པ་ནི། སེམས་ཀྱི་སྐད་ཅིག་ཐམས་ཅད་ལ་དེ་བཞིན་གཤེགས་པའི་འཁོར་གྱི་དཀྱིལ་འཁོར་གྱི་དབྱིབས་དང་རྒྱན་འབྱུང་བ་ཞེས་བྱའོ། །རྐང་གིས་འགྲོ་ཤིན་ཏུ་མཛེས་པར་གནོན་པའི་རྣམ་པར་ཐར་པ་ནི། གོམ་པ་འདོར་བ་ཐམས་ཅད་མཐའ་ཡས་པ་འདུལ་བའི་རྒྱན་ཅེས་བྱའོ། །རྐང་གིས་འགྲོ་རིན་ཆེན་དཔལ་གྱི་རྒྱལ་མཚན་གྱི་རྣམ་པར་ཐར་པ་ནི། སྐད་ཅིག་གཅིག་གིས་པདྨོའི་དྲ་བ་སྣ་ཚོགས་སྤྲུལ་པ་བྱེད་ཅིང་རིན་པོ་ཆེའི་ཆར་པ་དང་དབྱངས་དང་སྣང་བ་ཀུན་ཏུ་འགྱེད་པ་ཞེས་བྱའོ། །རྐང་གིས་འགྲོ་དགའ་བའི་དབྱངས་སྙན་པའི་རྣམ་པར་ཐར་པ་ནི། དགའ་བའི་ཤུགས་དང་ཉམས་བདེ་བའི་རྒྱ་མཚོ་མཐའ་ཡས་པ་འབྱུང་བ་ཞེས་བྱའོ། །རྐང་གིས་འགྲོ་ཤིང་ཙན་དན་གྱི་འོད་ཀྱི་རྣམ་པར་ཐར་པ་ནི། འཁོར་གྱི་དཀྱིལ་འཁོར་ཐམས་ཅད་དུ་
སྤོས་ཀྱི་ངད་སྤྲིན་དུ་ལྡང་བ་ཞེས་བྱའོ། །རྐང་གིས་འགྲོ་པདྨོ་ཡིད་དུ་འོང་བའི་འོད་ཀྱི་རྣམ་པར་ཐར་པ་ནི། པདྨོའི་གསེབ་ཐམས་ཅད་ནས་ཡིད་དུ་འོང་བའི་ཆོས་ཀྱི་དབྱངས་འབྱུང་བས་སྣང་བ་སྐྱེད་པ་ཞེས་བྱའོ། །རྐང་གིས་འགྲོ་རྡུལ་གྱི་ཤུགས་ཀྱི་འོད་ཀྱི་རྣམ་པར་ཐར་པ་ནི། ལུས་ཀྱི་འོད་ཟེར་རྣམ་པ་སྣ་ཚོགས་ཐམས་ཅད་ཀྱི་དྲ་བས་སྣང་བ་བྱེད་པ་ཞེས་བྱའོ། །རྐང་གིས་འགྲོ་མེ་ཏོག་མང་པོའི་དཀྱིལ་འཁོར་གྱི་རྣམ་པར་ཐར་པ་ནི། སེམས་ཅན་ཐམས་ཅད་ལ་དགེ་བའི་རྩ་བ་རྒྱ་མཚོས་ཡང་དག་པར་སྐུལ་བ་འབྱུང་བ་ཞེས་བྱའོ། །དེ་ནས་རྐང་གིས་འགྲོ་རིན་ཆེན་དཔལ་གྱི་ཕྱག་རྒྱས་སངས་རྒྱས་ཀྱི་མཐུས། རྐང་གིས་འགྲོ་བའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དགའ་བ་རྒྱ་མཚོའི་ཚུལ་གྱིས་ཤུགས་བསྐྱེད་ཅིང་། །བསྐལ་པ་མཐའ་ཡས་སྔན་ཅད་སྤྱོད་པ་མཛད། །ཞིང་རྣམས་ཀུན་རྡུལ་ཤིན་ཏུ་ཕྲ་མཉམ་པའི། །སངས་རྒྱས་རྣམས་ཀྱང་དགྱེས་པའི་ཐུགས་ཀྱིས་མཆོད། །སྐད་ཅིག་སེམས་ལ་པདྨོ་བརྗོད་ཡངས་པ། །དྲི་ཞིམ་སྣ་ཚོགས་མངོན་པར་སྤྲུལ་མཛད་ནས། །ཞིང་རྣམས་ཀུན་ཏུ་རྒྱལ་བ་གཤེགས་མཛད་པ། །སྣང་བའི་འོད་ཟེར་ལྷ་དེས་རབ་ཏུ་མཐོང་། །འདྲེན་པ་རྣམས་ཀྱི་ཆོས་ཉིད་བསམ་མི་ཁྱབ། །འཁོར་རྣམས་ཀུན་ཏུ་འབྱམ་ཀླས་མཐའ་ཡས་པའི། །རྣམ་པར་འཕྲུལ་པ་མི་ཟད་རབ་ཏུ་སྟོན། །མེ་ཏོག་གཙུག་ཕུད་ལྷ་དེས་དེ་མཐོང་ངོ་། །ཕྱོགས་བཅུའི་ཞིང་གི་དབྱིངས་རྣམས་མ་ལུས་པ། །ཐམས་ཅད་ཀུན་ཏུ་གཤེགས་ཤིང་བཞུད་པ་ཡིས། །སེམས་ཅན་མཐའ་ཡས་ཡོངས་སུ་སྨིན་པར་མཛད། །ཤིན་ཏུ་མཛེས་པས་དགའ་བར་དེ་མཐོང་ངོ་། །སེམས་ཅན་སྙེད་ཀྱི་སྤྲུལ་པ་ཀུན་འཕྲོས་པས། །རེ་རེའི་སྐུ་ཡིས་ཆོས་ཀྱི་དབྱིངས་ཀྱང་འགེངས། །རིན་ཆེན་དྲི་མེད་འོད་ཀྱང་རབ་ཏུ་གཏོང་། །རྐང་འགྲོ་དཔལ་གྱི་མཚན་གྱིས་འདི་མཐོང་ངོ་། །དེ་བཞིན་གཤེགས་པའི་སྤྱོད་ཡུལ་མཐའ་ཡས་ཏེ། །འཁོར་དུ་རྒྱལ་བ་ཆོས་ཀྱི་ཆར་ཡང་
འབེབས། །བདེ་གཤེགས་དེ་ཡི་འཁོར་ན་དགར་གནས་ཤིང་། །དགའ་སྒྲ་དབྱངས་ཀྱི་རྣམ་ཐར་དེ་མཐོང་ངོ་། །སངས་རྒྱས་དབྱངས་ནི་མཁའ་དང་མཉམ་པ་སྟེ། །དབྱངས་ཀྱི་ཡན་ལག་ཡོན་ཏན་ཀུན་དང་ལྡན། །འཇིག་རྟེན་ཀུན་བཀང་སེམས་ཅན་རྣམ་པར་འདུལ། །ཙན་དན་ཤིང་གི་འོད་ནི་དེ་ལ་ཉན། །སྤུ་རྩེ་ཀུན་ནས་རྒྱལ་བ་རྣམ་འཕྲུལ་དང་། །དུས་གསུམ་གཤེགས་པའི་རྒྱལ་བའི་མཚན་རྣམས་ཀྱི། །སྒྲ་བསྒྲོགས་ཐོས་ཤིང་དགའ་བ་སྐྱེར་འགྱུར་ཏེ། །དེ་ནི་རྡོ་རྗེ་འོད་ཀྱི་ལྷས་མཐོང་ངོ་། །དེ་བཞིན་གཤེགས་སྐུ་བསམ་གྱིས་མི་ཁྱབ་སྟེ། །གོམ་པ་གོམ་པར་ཡོན་ཏན་རྒྱ་མཚོ་སྟོན། །དེ་དག་སེམས་ཅན་ཇི་ལྟར་མོས་པས་མཐོང་། །རྡུལ་གྱི་འོད་ཀྱི་ལྷས་ནི་དེ་མཐོང་ངོ་། །འཇིག་རྟེན་མགོན་པོ་རྣམ་འཕྲུལ་རྣམ་མང་གིས། །ཕྱོགས་བཅུར་སེམས་ཅན་ཡང་དག་སྐུལ་བ་མཛད། །མེ་ཏོག་འཁོར་མང་རྐང་པས་འགྲོ་བའི་ལྷ། །མཐོང་ཞིང་དགའ་བ་ཡངས་པ་རབ་ཏུ་འཐོབ། །དེ་ལ་ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དགེ་བས་རྒྱས་པའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པ་རྣམས་ཀྱི་སྔོན་གྱི་སྨོན་ལམ་རྗེས་སུ་དྲན་པས་རྣམ་པར་དཔྱོད་པ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་འོད་ཟེར་ཕྱོགས་སུ་སྣང་བའི་རྣམ་པར་ཐར་པ་ནི། འཇིག་རྟེན་གྱི་ཁམས་མུ་མེད་པར་སངས་རྒྱས་ཀྱི་འོད་རྣམ་པར་སྟོན་པའི་རྒྱན་ཅེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྒྲས་འདུལ་བ་རྒྱ་མཚོའི་དཔལ་གྱི་རྣམ་པར་ཐར་པ་ནི་སངས་རྒྱས་ཀྱི་གསུང་འདུལ་བའི་སེམས་ཅན་ཐམས་ཅད་ལ་བརྗོད་ཅིང་ཡང་དག་པར་སྐུལ་བས་དགའ་བ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་རྒྱན་བཟང་པོའི་མེ་ཏོག་གཙུག་ཕུད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་སྐུ་ནམ་མཁའི་མཚན་ཉིད་ཀྱི་བྱིན་གྱི་རླབས་ཀུན་ནས་རབ་ཏུ་གནས་པ་འབྱུང་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤྱོད་ཡུལ་མཐའ་ཡས་དཔལ་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་ཡུལ་འགྲོ་བ་རྣམས་ལ་ཡང་དག་པར་སྟོན་པའི་མཐུ་ཞེས་བྱའོ། །
ལུས་ཀྱི་རིས་སུ་གཏོགས་པའི་ལྷ་སྣང་བའི་ཕྲེང་བ་འཛིན་པའི་དཔལ་གྱི་རྣམ་པར་ཐར་པ་ནི། སེམས་ཅན་ཐམས་ཅད་གསལ་བ་དང་འདྲེས་པའི་མདངས་ཀྱིས་དགའ་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྤོས་དྲི་མ་མེད་པའི་སྤྲིན་ལས་ཆར་འབབས་པའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་ཉོན་མོངས་པའི་དྲི་མ་མངོན་པར་སེལ་བའི་སྦྱོར་བ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྲུང་འཛིན་ཡོངས་སུ་སྡུད་པའི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་བདུད་ཀྱི་ལས་དང་རྨོངས་པ་རྣམ་པར་ཟློག་པ་ཞེས་བྱའོ། །ལུས་ཀྱི་རིས་སུ་གཏོགས་པའི་ལྷ་སྒོ་ཀུན་ནས་ཡོངས་སུ་གནོན་པ་ལ་མངོན་དུ་གྱུར་པའི་མིག་གི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་གནས་སུ་རྒྱལ་བ་རྣམ་པར་དམིགས་པར་མངོན་དུ་སྟོན་པའི་རྒྱན་ཅེས་བྱའོ། །ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དཔལ་མི་གཡོ་བའི་འོད་ཀྱི་རྣམ་པར་ཐར་པ་ནི། སེམས་ཅན་ཐམས་ཅད་ཀྱི་དགེ་བའི་ཤུགས་ཐམས་ཅད་ཡང་དག་པར་འཛིན་ཅིང་། ཡང་དག་པར་སྦྱོང་བ་ཞེས་བྱའོ། །དེ་ནས་ལུས་ཀྱི་རིས་སུ་གཏོགས་པའི་ལྷ་ཁྲེལ་དང་དགེ་བས་རྒྱས་པའི་འོད་ཀྱིས་སངས་རྒྱས་ཀྱི་མཐུས། ལུས་ཀྱི་རིས་སུ་གཏོགས་པའི་ལྷའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རི་རབ་རྡུལ་ཕྲན་ཤིན་ཏུ་ཕྲ་སྙེད་ཀྱི། །བསྐལ་པ་དེ་དག་ཕ་སྔའི་བསྐལ་པ་ནི། །རྡུལ་ཅེས་བྱ་བར་འོད་མཛེས་འོད་ཟེར་རྒྱལ། །མཆོད་དེ་སྨོན་ལམ་བཏབ་པ་བདག་གིས་དྲན། །སངས་རྒྱས་སྐུ་ལས་འོད་འཕྲོ་རབ་བཀྱེ་བ། །དེའི་འོད་ཟེར་ཆོས་ཀྱི་དབྱིངས་སུ་རྒྱུ། །རྒྱལ་བའི་འོད་ཟེར་དྲ་བ་སེམས་ཅན་འདུལ། །འོད་འཕྲོ་འོད་ཟེར་ལྷ་ཡིས་དེ་མཐོང་ངོ་། །དབྱངས་ཀྱི་ཡན་ལག་ཡོན་ཏན་ཀུན་རྒྱས་པའི། །སངས་རྒྱས་གསུང་ནི་ཞིང་རྣམས་ཀུན་ཏུ་སྒྲོགས། །འགྲོ་བ་མ་ལུས་ཐམས་ཅད་ཡང་དག་བསྐུལ། །དབྱངས་ཀྱིས་འདུལ་
བ་དེ་ལ་དགའ་བས་ཉན། །རྒྱལ་བའི་སྐུ་ནི་རབ་ཏུ་ཞི་བ་ལྟོས། །སྐུ་གཟུགས་དུ་མའང་མཚན་ཉིད་མི་མངའ་སྟེ། །འགྲོ་བ་ཀུན་ནའང་བཞུགས་པར་རབ་ཏུ་སྣང་། །མེ་ཏོག་གཙུག་གིས་ཇི་བཞིན་ཉིད་དུ་མཐོང་། །འདྲེན་པའི་ཆོས་ཉིད་བསམ་གྱིས་མི་ཁྱབ་སྟེ། །སེམས་ཅན་དེ་དག་དད་པ་ཅི་བཞིན་དུ། །ལ་ལ་བཞུགས་དང་བཞེངས་དང་གཤེགས་པར་མཐོང་། །དེ་ཡང་སྤྱོད་ལམ་འབྱུང་བའི་ལྷས་མཐོང་ངོ་། །རྒྱལ་བའི་ཚེམས་ཀྱི་མཚམས་རྣམས་ཐམས་ཅད་ནས། །དྲི་ཞིམ་འོད་འཕྲོ་སྒྲོན་མའི་སྤྲིན་བཀྱེ་བས། །འགྲོ་བ་ཀུན་གྱི་ཉོན་མོངས་ཞི་བར་འགྱུར། །དྲི་མེད་སྤོས་ཀྱི་སྤྲིན་གྱིས་དེ་མཐོང་ངོ་། །སངས་རྒྱས་མགོན་པོ་འགྲོ་བའི་སྐྱབས་སུ་བྱུང་། །ཉོན་མོངས་ཤིན་ཏུ་སྡུག་བསྔལ་གཟིར་བ་རྣམས། །མགུ་བར་མཛད་ཅིང་ཉོན་མོངས་ཐམས་ཅད་བསལ། །སྣང་བའི་ཕྲེང་བ་འཆང་བས་འདི་མཐོང་ངོ་། །འདྲེན་པ་བསྐལ་པ་བརྒྱར་ཡང་ཤིན་ཏུ་དཀོན། །རང་བྱུང་འཇིག་རྟེན་དོན་མཛད་སྐྱེས་པ་ནི། །འཇིག་རྟེན་ཀུན་གྱི་དབུལ་བ་རྣམ་པར་སེལ། །ཁྲེལ་ཡོད་དཔལ་གྱི་འོད་སྣང་དེ་སྐད་སྨྲ། །སེམས་ཅན་ཉོན་མོངས་སྒྲིབ་པས་ཉོན་མོངས་ཤིང་། །བདུད་ཀྱི་ལས་ཀྱིས་དཀྲུགས་ཏེ་འཕྱེན་པའི་རྣམས། །དེ་དག་རྒྱལ་བ་རྣམ་ཐར་ལམ་སྟོན་ཏེ། །སྲུང་ཞིང་སྐྱོང་བའི་དཔལ་གྱིས་དེ་མཐོང་ངོ་། །དེ་བཞིན་གཤེགས་པའི་རྣམ་པར་འཕྲུལ་པ་ལྟོས། །སངས་རྒྱས་སྤྲིན་གྱིས་ཆོས་ཀྱི་དབྱིངས་མནན་ཅིང་། །འཇིག་རྟེན་དབང་པོ་གནས་སུ་སེམས་ཅན་འདུལ། །ཀུན་སྒོའི་མིག་གི་དཔལ་གྱི་སྤྱོད་ཡུལ་ལོ། །དེ་ལ་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱི་རྣམ་པར་ཐར་པ་ནི། ཡོན་ཏན་མཐའ་ཡས་པ་དང་། གཟུགས་ཀྱི་སྐུ་རྣམ་པར་དཔྱོད་པ་ཡང་དག་པར་སྟོན་པ་ཞེས་བྱའོ། །ལག་ན་རྡོ་རྗེ་ཉི་མའི་ཤུགས་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཐམས་ཅད་ཀྱི་བ་སྤུ་ལས་ཉི་མའི་དཀྱིལ་འཁོར་གྱི་སྤྲིན་སྣ་ཚོགས་ཀྱི་རྒྱན་འབྱུང་བ་ཞེས་བྱའོ། ། ལག་ན་རྡོ་རྗེ་རི་རབ་མེ་ཏོག་འོད་ཀྱི་རྣམ་པར་ཐར་པ་ནི། རྣམ་པར་འཕྲུལ་པ་རྒྱ་ཆེན་པོ་བསྟན་པས།
ཡོན་ཏན་མཐའ་ཡས་པའི་ལུས་སུ་འཕྲུལ་པ་ཞེས་བྱའོ། །ལག་ན་རྡོ་རྗེ་རྣམ་དག་སྤྲིན་གྱི་དབྱངས་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་དབྱངས་མཐའ་ཡས་ཚད་མེད་པའི་རྗེས་སུ་སོང་བ་ཞེས་བྱའོ། །ལག་ན་རྡོ་རྗེ་དབང་པོ་ཤིན་ཏུ་མང་བའི་རྣམ་པར་ཐར་པ་ནི། འཇིག་རྟེན་གྱི་དབང་པོ་ཐམས་ཅད་ཀྱི་རྣམ་པར་འཕྲུལ་པ་སྟོན་ཅིང་། སངས་རྒྱས་ཀྱི་བྱིན་གྱི་རླབས་ཀྱིས་ཡང་དག་པར་སྐུལ་བ་ཞེས་བྱའོ། །ལག་ན་རྡོ་རྗེ་རྡོ་རྗེའི་འོད་ཡིད་དུ་འོང་བའི་རྣམ་པར་ཐར་པ་ནི། སངས་རྒྱས་ཀྱི་ཆོས་ཀྱི་དབྱིངས་རབ་ཏུ་ཕྱེ་བ་ཐམས་ཅད་མ་ལུས་པ་ལ་ཡང་དག་པར་སྤྱོད་པ་ཞེས་བྱའོ། །ལག་ན་རྡོ་རྗེ་ཤིང་གི་སྒྲ་དབྱངས་ཀྱི་རྣམ་པར་ཐར་པ་ནི། ཤིང་གི་ལྷ་ཐམས་ཅད་འདྲེན་པའི་རྒྱན་ཡིད་དུ་འོང་བས་བརྒྱན་པ་ཞེས་བྱའོ། །ལག་ན་རྡོ་རྗེ་སེང་གེའི་འོད་ཀྱི་རྒྱལ་པོའི་རྣམ་པར་ཐར་པ་ནི། དེ་བཞིན་གཤེགས་པའི་བསོད་ནམས་ཀྱི་དཀྱིལ་འཁོར་ཡངས་པའི་ཚོགས་ཀྱི་རྗེས་སུ་འབྲང་བའི་འོད་ཅེས་བྱའོ། །ལག་ན་རྡོ་རྗེ་འོད་འཕྲོ་སྟུག་པོའི་དཔལ་གྱི་མིག་གི་རྣམ་པར་ཐར་པ་ནི། སེམས་ཅན་མ་རུངས་པའི་རྒྱུད་ལ་ལུས་འཇིགས་འཇིགས་ལྟར་རབ་ཏུ་སྟོན་ཅིང་ཀུན་ཏུ་རྣམ་པར་ལྟ་བ་ཞེས་བྱའོ། །ལག་ན་རྡོ་རྗེ་རིན་ཆེན་གཙུག་ཕུད་པདྨོའི་འོད་ཀྱི་རྣམ་པར་ཐར་པ་ནི། བྱང་ཆུབ་སེམས་དཔའི་རྒྱན་ཐམས་ཅད་ཀྱིས་བརྒྱན་པའི་གཙུག་གི་ནོར་བུ་རིན་པོ་ཆེ་ཐམས་ཅད་ཀྱི་ཆར་མངོན་པར་འབེབས་པ་ཞེས་བྱའོ། །དེ་ནས་ལག་ན་རྡོ་རྗེ་མཐུ་ཆེན་ཁ་དོག་བཟང་པོའི་འོད་ཀྱིས་སངས་རྒྱས་ཀྱི་མཐུས། ལག་ན་རྡོ་རྗེའི་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་རྒྱལ་ཆོས་ཀྱིས་མཛེས་པ་ཡི། །ཆོས་ཉིད་དེ་ལ་རྣམ་པར་ལྟོས། །ཡོན་ཏན་མཐའ་ཡས་སྐུ་གཟུགས་ཀྱིས། །འཇིག་རྟེན་ཀུན་ཏུ་རྣམ་པར་མཛེས། །སངས་རྒྱས་བ་སྤུ་ཐམས་ཅད་ནས། །འོད་ཟེར་དྲ་བ་བསམ་མྱི་ཁྱབ། །ཉི་མའི་དཀྱིལ་འཁོར་འདྲ་བ་སྟེ། །ཕྱོགས་བཅུ་ཀུན་ཏུ་རྣམ་པར་མཛེས། །སངས་རྒྱས་རྣམ་འཕྲུལ་དེ་དག་གིས། །ཆོས་ཀྱི་དབྱིངས་སུ་ཁྱབ་བྱས་ཤིང་། །འགྲོ་བ་ཀུན་
ལ་མངོན་སུམ་དུ། །མི་ཟད་སྐུ་ནི་ཤིན་ཏུ་སྟོན། །སངས་རྒྱས་གསུང་གི་དཀྱིལ་འཁོར་ནི། །ཞིང་རྣམས་ཀུན་ཏུ་རབ་ཏུ་སྒྲོག །གསུང་གིས་སེམས་ཅན་ཐམས་ཅད་ཀྱི། །བསམ་པ་ཐམས་ཅད་རབ་ཏུ་འགེངས། །འཇིག་རྟེན་དབང་པོ་ཀུན་གནས་ན། །ཐུབ་པ་རབ་ཏུ་བཞུགས་པར་སྣང་། །དེ་དག་ཐམས་ཅད་འཁོར་རྣམས་ལ། །འདྲེན་པ་དག་གི་ཆོས་སྟོན་མཛད། །རྒྱ་མཚོ་ཆོས་ཀྱི་སྒོ་བསྐུལ་བས། །གཞན་དང་གཞན་གྱི་ཚུལ་དག་གིས། །ཐམས་ཅད་ཆོས་ཀྱི་བྱེ་བྲག་དོན། །རྒྱལ་བ་ཟད་མེད་རབ་ཏུ་སྟོན། །རྒྱ་ཆེན་མཐའ་མེད་ཚུལ་དག་ལ། །རྒྱ་མཚོ་འཁོར་རྣམ་རབ་ཏུ་འཇུག །སངས་རྒྱས་འོད་ཟེར་རབ་འདྲེས་པས། །ཀུན་གྱིས་འདྲེན་པ་མཐོང་བར་འགྱུར། །ཞིང་རྣམས་བྱེ་མའི་རྡུལ་སྙེད་དུ། །རྫོགས་པའི་སངས་རྒྱས་ཀུན་མཆོད་པས། །བསོད་ནམས་རྒྱ་ཆེན་ནམ་མཁའ་བཞིན། །ཀུན་གྱིས་འདྲེན་པ་རབ་ཏུ་མཐོང་། །སངས་རྒྱས་རྫུ་འཕྲུལ་མ་འདྲེས་པ། །ཐམས་ཅད་ཞིང་དུ་སྟོན་པ་མཛད། །འགྲོ་ལ་སངས་རྒྱས་མངོན་སུམ་དུ། །བྱང་ཆུབ་སྙིང་པོར་རྣམ་པར་མཛེས། །འོད་ཟེར་སྣ་ཚོགས་དཀྱིལ་འཁོར་གྱི། །འོད་འཕྲོ་སྤྲིན་ནི་ཀུན་ཏུ་སྣང་། །ཆོས་དབྱིངས་ཀུན་ཏུ་ཁྱབ་བྱས་ཤིང་། །སངས་རྒྱས་སྤྱོད་ཡུལ་རབ་ཏུ་སྟོན། །དེ་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ནི། ཚུལ་རྒྱ་མཚོ་བསམ་གྱིས་མི་ཁྱབ་པས། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་སྟེ། འདི་ལྟར་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་དང་། འགྲོ་བ་གདུལ་བ་ལ་མཐར་ཐུག་པར་མངོན་པར་སྒྲུབ་པ་ཞེས་བྱ་བའི་རྣམ་པར་ཐར་པ་དང་། དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་ཕྱིན་པས། ཡོན་ཏན་གྱི་ཚོགས་ཐམས་ཅད་ཀྱི་ཡུལ་ཞེས་བྱ་བའི་རྣམ་པར་ཐར་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ས་ནས་སར་སྨོན་ལམ་རྒྱ་མཚོས་རབ་ཏུ་གནས་པ་འབྱུང་བ་ཞེས་བྱ་བའི་རྣམ་པར་ཐར་པ་དང་། སྒོ་ཐམས་ཅད་ནས་ཆོས་ཀྱི་དབྱིངས་སུ་བདག་གི་ལུས་ཀྱི་སྤྲིན་རྡུལ་སྙེད་མཐའ་ཡས་པས་རྒྱས་པར་འགེངས་པ་ཞེས་བྱ་བའི་རྣམ་པར་ཐར་པ་དང་། ཞིང་ཐམས་ཅད་དུ་
རང་གི་མིང་བསམ་གྱིས་མི་ཁྱབ་པའི་འཁོར་ལོ་སྒྲོག་པའི་བྱིན་གྱི་རླབས་ཤེས་བྱ་བའི་རྣམ་པར་ཐར་པ་དང་། རྡུལ་ཤིན་ཏུ་ཕྲ་བའི་ཐམས་ཅད་ཀྱི་སྦུབས་སུ་བྱང་ཆུབ་སེམས་དཔའི་ཡུལ་དང་། རྣམ་པར་འཕྲུལ་པ་མཐའ་དང་དབུས་མེད་པ་ཡང་དག་པར་སྟོན་པ་ཞེས་བྱ་བའི་རྣམ་པར་ཐར་པ་དང་། དུས་གསུམ་གྱི་བསྐལ་པ་སྐད་ཅིག་གཅིག་ཏུ་སྟོན་པས་འབྱུང་བ་དང་། འཇིག་པ་རབ་ཏུ་འབྱུང་བ་ཞེས་བྱ་བའི་རྣམ་པར་ཐར་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་པོ་རྒྱ་མཚོའི་ཡུལ་ཕན་ཚུན་དུ་འཇུག་པ་ཡང་དག་པར་སྟོན་པ་ཞེས་བྱ་བའི་རྣམ་པར་ཐར་པ་དང་། གང་འདི་ཆོས་ཀྱི་དབྱིངས་མཐའ་དང་དབུས་མེད་པ་རང་གི་ལུས་ཀྱི་སྤྲུལ་པས་རྒྱས་པར་རྣམ་པར་འཕྲུལ་པའི་བྱིན་གྱི་རླབས་ཤེས་བྱ་བའི་རྣམ་པར་ཐར་པ་དང་། གང་འདི་བྱང་ཆུབ་སེམས་དཔའི་ཆོས་ཐམས་ཅད་ཀྱི་ཚུལ་ཕན་ཚུན་དུ་སྟོན་པ་རྒྱ་ཆེན་པོས་ཐམས་ཅད་མཁྱེན་པ་ཉིད་ཀྱི་ཚུལ་ལ་འཇུག་པ་ཞེས་བྱ་བའི་རྣམ་པར་ཐར་པ་དག་གོ །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་རྣམ་པར་ཐར་པའི་ཚུལ་རྒྱ་མཚོ་བསམ་གྱིས་མི་ཁྱབ་པ་དག་གིས། དེ་བཞིན་གཤེགས་པའི་ཡོན་ཏན་རྒྱ་མཚོ་ལ་འཇུག་ཅིང་སངས་རྒྱས་ཀྱི་མཐུས། འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱལ་བས་དྲི་མེད་རྣམ་པར་སྦྱངས། །མཁའ་ཡངས་རྡུལ་བཞིན་ཡོན་ཏན་ཚད་ཀྱང་མྱེད། །སྔོན་གྱི་རྒྱལ་བའི་སྲས་པོ་དྲི་མེད་ཀྱིས། །དེ་ལ་བསམ་ཡས་ཆོས་སྤྲིན་ཆར་ཡང་ཕབ། །ཇི་ལྟར་རྒྱལ་བ་གདན་ལ་བཞུགས་སྣང་བ། །དེ་བཞིན་རྡུལ་སྦུབས་མ་ལུས་ཀུན་ནང་སྐྱེ། །འོན་ཀྱང་བདེ་གཤེགས་གཤེགས་དང་འཕོ་བ་མེད། །ཞིང་རྣམས་ཀུན་ཏུ་ཡུལ་ཡང་རབ་ཏུ་སྟོན། །ས་ཡི་ཚུལ་ལ་འཇུག་པ་ཚད་མེད་དེ། །སྤྱོད་པ་ཐུབ་པས་བྱང་ཆུབ་སེམས་དཔའ་བསྟན། །བསམ་གྱིས་མི་ཁྱབ་ཚུལ་ནི་ཀུན་གསུངས་པས། །རྒྱལ་སྲས་རྣམས་ནི་ཆོས་ཀྱི་དབྱིངས་ལ་འཇུག །ཆོས་དབྱིངས་འཇུག་ཚུལ་རྣམ་པ་རྒྱ་ཆེ་སྟེ། །མཐའ་ཡས་ཕྱོགས་སུ་མཐའ་དང་དབུས་
མེད་སྒོ། །རྡུལ་ཕྲན་སྦུབས་སུ་རྒྱལ་བ་འཕྲུལ་བ་སྤྲོས། །འགྲོ་བའི་བསམ་པ་ཀུན་ཀྱང་རབ་ཏུ་མཁྱེན། །ཕྱོགས་རྣམས་ཐམས་ཅད་ཞིང་རྣམས་ཀུན་ཏུ་ཡང་། །འཇིག་རྟེན་གཙོ་མཚན་འགྲོ་དང་མཉམ་པར་བྱུང་། །ཐམས་ཅད་ཚུལ་སྒོར་སངས་རྒྱས་དོན་ཡོད་དེ། །འདུལ་བས་སེམས་ཅན་ཐམས་ཅད་རྣམ་པར་སྤྱོད། །རྡུལ་སྦུབས་ཀུན་ཏུ་མཐའ་དང་དབུས་མེད་པའི། །རྣམ་འཕྲུལ་ཡངས་པ་རང་བྱུང་ཤིན་ཏུ་སྟོན། །སྔན་ཅད་ཐུབ་པའི་བྱང་ཆུབ་སྤྱོད་པ་རྣམས། །ཅི་བཞིན་ཀུན་ཀྱང་སྙིང་པོ་བྱང་ཆུབ་བརྗོད། །ཡངས་དུས་བསྐལ་པ་ཇི་སྙེད་ཡོད་པའི་རྣམས། །སྐད་ཅིག་སྐད་ཅིག་སངས་རྒྱས་མ་ལུས་སྟོན། །དེར་ནི་སེམས་ཅན་འབྱུང་ཞིང་འཇིག་པའང་བསྟན། །འཇིག་རྟེན་གཙོ་བོ་ཡེ་ཤེས་མཐའ་ཡས་ལྟོས། །འབྱམ་ཀླས་མི་ཟད་མཐའ་ཡས་ལོ་གྲངས་པས། །རྒྱལ་སྲས་ཐམས་ཅད་སངས་རྒྱས་དེ་ལྟ་སྟེ། །ཐམས་ཅད་སྒོར་ཡང་སངས་རྒྱས་མཐའ་དབུས་མེད། །རྒྱལ་སྲས་ཀུན་གྱིས་ཤེས་པར་སླ་བ་མིན། །སངས་རྒྱས་མཁའ་འདྲ་རྣམ་པར་མི་རྟོག་སྟེ། །ཆོས་ཉིད་མི་གནས་ཆོས་ཀྱི་སྤྲིན་དག་གིས། ། སྤྲུལ་པས་སྤྱོད་ཚེ་ཀུན་ཏུ་རྒྱས་མཛད་ཅིང་། །ཤིང་མཆོག་ཀུན་དྲུང་བྱང་ཆུབ་འཚང་རྒྱ་བསྟན། །སངས་རྒྱས་གསུང་དེ་རབ་ཏུ་བརྗོད་པས་ན། །ཆོས་གནས་ཐམས་ཅད་མ་ལུས་བརྗོད་པ་ཡིན། །འགྲོ་བ་ཐམས་ཅད་རེ་རེའི་སྒོ་དག་ནས། །སངས་རྒྱས་ཆོས་རྣམས་ཀུན་ལ་རབ་ཏུ་འཇུག །དེ་ལ་བྱང་ཆུབ་སེམས་དཔའ་དགེ་བ་དྲི་མ་མྱེད་པའི་གཟི་བརྗིད་ཀྱི་འོད་ཡིད་དུ་འོང་བའི་རྣམ་པར་ཐར་པ་ནི། ཆོས་ཀྱི་དབྱིངས་ཐམས་ཅད་དུ་མངོན་པར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་འགྲོ་བའི་རྒྱན་བྱེད་པ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་འོད་མཆོག་ཀུན་ཏུ་སྒྲོན་མའི་རྣམ་པར་ཐར་པ་ནི། སེམས་སྐད་ཅིག་གིས་མངོན་པར་རྫོགས་པར་བྱང་ཆུབ་པའི་སྒོ་ཟད་མི་ཤེས་པ་སྟོན་ཅིང་། ཆོས་སྟོན་ཀྱི་དབྱིངས་བསམ་གྱིས་མི་ཁྱབ་པས་ཡོངས་སུ་སྨིན་པ་དང་རྣམ་པར་འདུལ་བར་བྱེད་པའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་འབར་བ་
སེང་གེའི་རྒྱལ་མཚན་གྱི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་ཀྱི་ཚོགས་དང་ཞིང་ཡང་དག་པར་འབྱུང་བ་ལ་རྣམ་པར་ལྟ་བ་ཞེས་བྱའོ། །བྱང་ཆུབ་སེམས་དཔའ་དཔལ་གྱི་འོད་ཟེར་ཀུན་ཏུ་འོད་འཕྲོའི་རྣམ་པར་ཐར་པ་ནི། རྫུ་འཕྲུལ་གྱི་ཡུལ་གྱི་རྣམ་པར་སྤྱོད་པ་དོན་ཡོད་པ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རྒྱ་མཚོ་ཀུན་ཏུ་སྒྲ་དབྱངས་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ཀྱི་ཞིང་གི་རྒྱན་ཐམས་ཅད་འཁོར་གྱི་དཀྱིལ་འཁོར་དུ་ཡང་དག་པར་སྟོན་པ་ཞེས་བྱའོ། །བྱང་ཆུབ་སེམས་དཔའ་དེ་བཞིན་གཤེགས་པའི་སྤྱོད་ཡུལ་ཡེ་ཤེས་ཀུན་ཏུ་སྣང་བའི་འོད་ཀྱི་རྣམ་པར་ཐར་པ་ནི། དེ་བཞིན་གཤེགས་པའི་རྗེས་སུ་ཀུན་ནས་སོང་ཞིང་ཆོས་ཀྱི་དབྱིངས་ལ་རྣམ་པར་སྤྱོད་པའི་སྤྲིན་ཆེན་པོའི་སྙིང་པོ་ཞེས་བྱའོ། །བྱང་ཆུབ་སེམས་དཔའ་གཙུག་ན་རིན་ཆེན་ཀུན་ཏུ་རྒྱལ་མཚན་གྱི་རྣམ་པར་ཐར་པ་ནི། འགྲོ་བ་ཐམས་ཅད་ཀྱི་སྤྱོད་པ་ལ་རབ་ཏུ་ཞུགས་ཤིང་བྱང་ཆུབ་སེམས་དཔའི་སྤྱོད་པ་མཐའ་ཡས་པ་ཤིན་ཏུ་འབྱུང་བ་ཞེས་བྱའོ། །བྱང་ཆུབ་སེམས་དཔའ་རྒྱལ་བའི་གསུང་ཀུན་ཏུ་འཇམ་དབྱངས་ཀྱི་རྣམ་པར་ཐར་པ་ནི། སངས་རྒྱས་ཐམས་ཅད་བསྙེན་བཀུར་ཞིང་མཆོད་པར་ཉེ་བར་འགྲོ་བའི་སྙིང་པོ་ཞེས་བྱའོ། །བྱང་ཆུབ་སེམས་དཔའ་བསོད་ནམས་མི་ཟད་དྲི་མེད་ཀུན་ཏུ་གཟི་བརྗིད་ཀྱི་རྣམ་པར་ཐར་པ་ནི། རྫུ་འཕྲུལ་དང་རྣམ་པར་འཕྲུལ་པ་ཐམས་ཅད་ཀྱི་བྱིན་གྱི་རླབས་རྒྱ་ཆེན་པོ་འབྱུང་བ་ཞེས་བྱའོ། །བྱང་ཆུབ་སེམས་དཔའ་མཚན་གྱི་འོད་ཟེར་ཀུན་ཏུ་སྣང་བའི་རྣམ་པར་ཐར་པ་ནི། དེ་བཞིན་གཤེགས་པའི་སྐུ་མེད་པ་ལས་སངས་རྒྱས་ཀྱི་ཡུལ་ཐམས་ཅད་འབྱུང་བ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་དྲི་མ་མེད་པའི་གཟི་བརྗིད་ཀྱི་འོད་ཡིད་དུ་འོང་བས་སངས་རྒྱས་ཀྱི་མཐུས། བྱང་ཆུབ་སེམས་དཔའི་རྣམ་པར་ཐར་པ་རྒྱ་མཚོའི་ཕྱོགས་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་སྙེད་གང་དག་ཕྱོགས་རྣམས་ཀུན་
གྱི་ཞིང་། །རྒྱལ་བས་དེ་ཀུན་སྐད་ཅིག་ཐུགས་ཀྱིས་སྦྱངས། །འགྲོ་བ་ཀུན་ཏུ་ཞི་བ་མེད་པའི་གསུང་། །སངས་རྒྱས་ཆོས་ཀྱི་འཁོར་ལོ་རྒྱ་ཆེན་བསྐོར། །སྐད་ཅིག་ཐུགས་ཀྱི་ཆོས་དབྱིངས་ཀུན་བཀང་སྟེ། །མཐའ་ཡས་སྤྱོད་ཡུལ་དབྱིངས་རྣམས་རྒྱལ་བ་སྟོན། །འགྲོ་བ་ཀུན་ལམ་སྙིང་པོ་བྱང་ཆུབ་ཏུ། །བྱང་ཆུབ་འཚང་རྒྱ་རྣམ་པར་འཕྲུལ་པ་མཛད། །བསྐལ་པ་བརྒྱ་ཕྲག་སྟོང་རྣམས་ཚད་མེད་དུ། །དེ་བཞིན་གཤེགས་པས་སྔན་ཅད་སྤྱོད་སྤྱད་དེ། །ནམ་མཁའ་འདྲ་བར་བྱས་ནས་རབ་བཀྱེ་ཞིང་། །སངས་རྒྱས་ཞིང་འདི་སྔོན་ཚེ་རབ་ཏུ་སྦྱངས། །མཐའ་དང་དབུས་མེད་བསྐལ་པར་ལ་ལ་ཡིས། །སྐྱོ་བ་མེད་པར་རྒྱལ་བའི་ཡུལ་བསམས་ཀྱང་། །སངས་རྒྱས་རྫུ་འཕྲུལ་སྟོབས་ལ་དབུས་མེད་པ། །ཕྱི་མའི་མཐའ་ཡི་བསྐལ་པ་ཀུན་ཏུ་འགེངས། །རྒྱལ་བའི་རྫུ་འཕྲུལ་ཡུལ་ལ་རྣམ་པར་ལྟོས། །ཕྱོགས་བཅུའི་ཞིང་རྒྱན་དེ་དག་རྣམ་དག་པ། །རྒྱལ་བས་འདིར་ནི་ཀུན་ཀྱང་རབ་ཏུ་བསྟན། །སྐད་ཅིག་སྐད་ཅིག་སྣ་ཚོགས་གཟུགས་ཀྱང་སྣང་། །བསྐལ་པ་བརྒྱ་སྟོང་ཚད་མེད་པ་དག་ཏུ། །རྒྱལ་བའི་བ་སྤུ་གཅིག་མཐའ་ཤེས་པར་དཀའ། །ཚུལ་རྣམས་ཀུན་སྒོར་སངས་རྒྱས་ཆགས་པ་མེད། །འགྲོ་བ་འདི་ན་རྒྱ་ཆེན་བསམ་ཡས་མཛེས། །སྔོན་ཚེ་བསྐལ་པར་རྒྱལ་བས་འགྲོ་ཀུན་ཏུ། །སངས་རྒྱས་རྒྱ་མཚོ་རྒྱ་ཆེན་བསྙེན་བཀུར་བས། །དེ་བས་འཇིག་རྟེན་གཙོ་ལ་ཆོས་དབྱིངས་རྣམས། །ཀུན་ནས་མཆོད་པ་མང་པོ་རྒྱ་ཆེན་འབྱུང་། །ཕྱོགས་རྣམས་བཀང་སྟེ་སངས་རྒྱས་འབྱུང་བ་དག །རྡུལ་གྱི་སྦུབས་སུ་ཚད་མེད་ཞིང་ཡང་སྟོན། །དེ་དག་ཡུལ་དུ་མི་ཟད་མཐའ་ཡས་པའི། །བསྐལ་པ་རྒྱ་མཚོར་བྱིན་གྱིས་རློབ་པ་མཛད། །སྔོན་ཚེའི་བསྐལ་པར་རྒྱལ་བས་འགྲོ་དོན་སྤྱད། །ཐུགས་རྗེའི་རྒྱ་མཚོ་ཚད་མེད་རབ་སྐྱེད་ཅིང་། །འགྲོ་བ་རྒྱ་མཚོ་ཀུན་ནས་འཁོར་བ་ཡི། །འཁོར་རྣམས་རྒྱ་མཚོ་མཐའ་ཡས་ཀུན་ཀྱང་སྦྱངས། །སངས་རྒྱས་མཚན་མེད་སྐུ་མེད་རྡུལ་དང་བྲལ། །དེ་བཞིན་ཉིད་གནས་ཆོས་དབྱིངས་སྙིང་པོ་སྟེ། །འགྲོ་བ་ཀུན་ན་མཐའ་ཡས་
གཟུགས་སུ་སྣང་། །འགྲོ་བ་ཀུན་གྱི་སྡུག་བསྔལ་ཀུན་ཞི་མཛད། །དེ་ལ་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བའི་རྣམ་པར་ཐར་པ་ནི། ཕ་རོལ་ཏུ་ཕྱིན་པ་དང་སའི་ཤུགས་ཀྱིས་སེམས་ཅན་གྱི་ཁམས་ཀྱི་ཚུལ་དང་། སངས་རྒྱས་ཀྱི་ཞིང་རྣམ་པར་དག་པ་ཡང་དག་པར་འབྱུང་བ་ཞེས་བྱའོ། །བྱང་ཆུབ་སེམས་དཔའ་སྤྲིན་གྱི་ང་རོ་རྒྱ་མཚོ་དྲི་མེད་འོད་ཀྱི་སྙིང་པོའི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་སེམས་སྐད་ཅིག་ལ་ཆོས་ཀྱི་དབྱིངས་ཀྱི་ཚུལ་གྱིས་ཁྱིམ་སྣ་ཚོགས་ལ་རྣམ་པར་ལྟ་བ་ཞེས་བྱའོ། །བྱང་ཆུབ་སེམས་དཔའ་ཡོན་ཏན་རིན་ཆེན་འབྱུང་བ་ཡེ་ཤེས་དཔལ་གྱི་གཙུག་ཕུད་ཀྱི་རྣམ་པར་ཐར་པ་ནི། བསྐལ་པ་བསམ་གྱིས་མི་ཁྱབ་པར་འགྲོ་བ་རྣམས་ལ་མངོན་སུམ་དུ་ཡོན་ཏན་དྲི་མ་མེད་པས་ཡོངས་སུ་དག་པ་སྒྲུབ་པ་ཞེས་བྱའོ། །བྱང་ཆུབ་སེམས་དཔའ་རྒྱ་ཆེན་འོད་འབར་བློ་གྲོས་དབང་ཕྱུག་གི་རྣམ་པར་ཐར་པ་ནི། བྱང་ཆུབ་སེམས་དཔའ་ཐམས་ཅད་ཀྱི་སྙིང་པོ་བྱང་ཆུབ་ཏུ་ཐོག་མ་འགྲོ་བའི་ཡེ་ཤེས་ཀྱི་ཕྱོགས་ཡང་དག་པར་འབྱུང་བའི་རྒྱུན་ཅེས་བྱའོ། །བྱང་ཆུབ་སེམས་དཔའ་པདྨོ་རྣམ་པར་གནོན་པ་འོད་ཟེར་གཙུག་ཕུད་ཀྱི་རྣམ་པར་ཐར་པ་ནི། སངས་རྒྱས་ཀྱི་ཆོས་ཐམས་ཅད་ཐ་མྱི་དད་པར་འགྲོ་བ་ཐམས་ཅད་ཀྱི་དབང་པོ་དང་། མོས་པ་རྒྱ་མཚོའི་འོད་ཅེས་བྱའོ། །བྱང་ཆུབ་སེམས་དཔའ་ཀུན་ཏུ་ཡེ་ཤེས་སྤྲིན་གྱི་ཉི་མའི་རྒྱལ་མཚན་སྣང་བའི་རྣམ་པར་ཐར་པ་ནི། སངས་རྒྱས་ཀྱི་ཡེ་ཤེས་བསྒྲུབ་པར་བསྐལ་པ་མཐའ་ཡས་པ་དག་ཏུ་བྱིན་གྱིས་རློབ་ཅིང་རྣམ་པར་སྤྱོད་པ་ཞེས་བྱའོ། །བྱང་ཆུབ་སེམས་དཔའ་མཐུ་སྟོབས་བརྩོན་འགྲུས་རྡོ་རྗེ་ཡངས་པའི་སྙིང་པོའི་རྣམ་པར་ཐར་པ་ནི། ཆོས་ཐམས་ཅད་ཀྱི་ཕྱག་རྒྱ་མཐའ་དང་དབུས་མེད་པ་ལ་ཡང་དག་པར་འཇུག་པ་ཞེས་བྱའོ། །བྱང་ཆུབ་སེམས་དཔའ་སྤོས་ཀྱི་འོད་འཕྲོ་ཤིན་ཏུ་འབར་བའི་འོད་ཀྱི་རྒྱལ་མཚན་གྱི་རྣམ་པར་ཐར་པ་ནི། སངས་རྒྱས་ད་ལྟར་བྱུང་བ་ཐམས་ཅད་ཀྱི་ཐོག་མའི་བྱང་ཆུབ་སེམས་དཔའི་སྤྱོད་པ་ཤེས་པའི་དཀྱིལ་འཁོར་ཡང་དག་པར་སྒྲུབ་པ་ཞེས་བྱའོ། །
བྱང་ཆུབ་སེམས་དཔའ་རྣམ་པར་སྣང་མཛད་ཡོན་ཏན་ཡངས་པའི་རྒྱལ་མཚན་གྱི་རྣམ་པར་ཐར་པ་ནི། རྣམ་པར་སྣང་མཛད་ཀྱི་སྨོན་ལམ་རྒྱ་མཚོ་ཐམས་ཅད་ཀྱི་དབྱིངས་ལ་རབ་ཏུ་གནས་པ་ཞེས་བྱའོ། །བྱང་ཆུབ་སེམས་དཔའ་བསོད་ནམས་ཡངས་པ་ཤིན་ཏུ་འཕགས་པའི་འོད་མཆོག་ཡོན་ཏན་འབྱུང་བའི་བློ་གྲོས་ཀྱི་རྣམ་པར་ཐར་པ་ནི། སངས་རྒྱས་ཀྱི་ཡུལ་ཟབ་མོ་ཆོས་ཀྱི་དབྱིངས་ཐམས་ཅད་ལ་ཀུན་ནས་རབ་ཏུ་གནས་པ་རྣམ་པར་སྤྱོད་པ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་ཟེར་རྒྱ་མཚོ་འོད་ཆེན་དཔལ་གྱི་ཟླ་བས། སངས་རྒྱས་ཀྱི་མཐུས་བྱང་ཆུབ་སེམས་དཔའ་རྣམ་པར་ཕྱེ་བ་རྒྱ་མཚོ་མཐའ་ཡས་པ་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཕ་རོལ་ཕྱིན་པ་རྒྱ་མཚོ་བསམ་ཡས་དང་། །ས་ཡི་དཀྱིལ་འཁོར་རྒྱ་ཆེན་ཀུན་ཀྱང་ཡོངས་སུ་རྒྱས། །ཚད་མེད་སེམས་ཅན་རྣམ་པར་འདུལ་བའི་ཚེ། །སངས་རྒྱས་ཞིང་ཡངས་རྣམས་ཀྱང་རྣམ་པར་སྦྱངས། །ཕྱོགས་བཅུའི་སངས་རྒྱས་ཞིང་ཀུན་རྒྱས་བྱས་ཏེ། །སངས་རྒྱས་སེམས་ཅན་ཁམས་སྦྱིན་འདུལ་མཛད་པ། །སྐད་ཅིག་ཐུགས་ཀྱིས་ཆོས་ཀྱི་འཁོར་ལོ་དག །མཐའ་ཡས་འགྲོ་མཉམ་བསམ་པ་ཚིམ་པར་སྟོན། །བསྐལ་པ་རྒྱ་ཆེ་མི་ཟད་མུ་མེད་པར། །རྒྱལ་བ་འགྲོ་ལ་མངོན་སུམ་ཀུན་ནས་བཞུགས། །མགོན་པོས་སྔན་ཅད་ཇི་ལྟར་སྦྱངས་ཚུལ་དུ། །རྒྱལ་བས་སྤྱོད་ཡུལ་རྣམ་དག་རབ་ཏུ་བསྟན། །ཆོས་རྒྱལ་དེ་དག་ཇི་ལྟར་རྣམ་འཕྲུལ་པ། །ཕྱོགས་རྣམས་རྒྱ་མཚོ་མ་ལུས་ཀུན་ན་སྣང་། །སྙིང་པོ་བྱང་ཆུབ་ཀུན་ནའང་རྒྱལ་བ་དག །འཁོར་གྱིས་བསྐོར་ཅིང་ཆོས་རྣམས་གསུང་བ་སྣང་། །འགྲོ་བའི་བསམ་པ་ཐམས་ཅད་ཚིམ་མཛད་ཅིང་། །འཇིག་རྟེན་དག་ན་སངས་རྒྱས་ཚུལ་ཀུན་མཛེས། །དབང་པོ་ཇི་བཞིན་ཆོས་ཀྱི་ཆར་ཡང་འབེབས། །སངས་རྒྱས་ཆོས་སྐུ་ཡངས་པ་རྣམ་པར་མཛེས། །དེ་བཞིན་ཉིད་ལྟར་མཚན་ཉིད་ལུས་མེད་དེ། །རྒྱལ་བ་དྲི་མེད་འོད་གསལ་ཆོས་ཀྱི་སྐུ། །ཡེ་ཤེས་ཞི་བའི་སྐུ་ནི་ཚད་མེད་དེ། །ཕྱོགས་དབྱིངས་ཀུན་བཀང་ཆོས་ཀྱི་ཆར་
ཡང་འབེབས། །ཆོས་རྗེ་ཐམས་ཅད་སྟོབས་ཀྱིས་རྣམ་པར་དག །བདེ་གཤེགས་ཡེ་ཤེས་མཁའ་འདྲ་མཐའ་ཡས་ཏེ། །རྒྱ་ཆེན་འགྲོ་བ་མཐའ་དབུས་མྱེད་བཀང་ཞིང་། །རྒྱལ་བ་སྟོབས་ལ་འཇུག་པ་རབ་ཏུ་སྟོན། །སངས་རྒྱས་འོད་ཀྱིས་ཆོས་དབྱིངས་ཀུན་བཀང་ཞིང་། །སངས་རྒྱས་སྤྱོད་པ་ཐམས་ཅད་རྫོགས་པར་བསྟན། །རྒྱལ་བས་སྔོན་ཚེ་ཇི་ལྟར་རྣམ་སྦྱངས་པ། །དེ་བཞིན་ཡེ་ཤེས་ས་རྣམས་རྒྱལ་བས་བསྟན། །ཕྱོགས་རྣམས་ཀུན་ཏུ་རང་བྱུང་རྣམ་པར་མཛེས། །སྨོན་ལམ་རྣམ་པར་འཕྲུལ་པ་མ་ལུས་སྟོན། །ཇི་ལྟར་སྔོན་ཚེ་རྒྱལ་བས་ཡོངས་སྦྱངས་པ། །རྒྱལ་བའི་འོད་ཟེར་དྲ་བ་ཀུན་ནས་སྒྲོག །སངས་རྒྱས་ཡུལ་ནི་ཕྱོགས་སུ་ཟད་པ་མེད། །དབུས་དང་མཐའ་མེད་གཞལ་མེད་མཐའ་ཡས་དབྱིངས། །ཆོས་དབྱིངས་ཀུན་ཏུ་ཆགས་མེད་བརྙེས་པ་ནི། །སངས་རྒྱས་ཞིང་རྣམས་ཀུན་ན་ཤིན་ཏུ་མཛེས། །དེའི་ཚེ་བཅོམ་ལྡན་འདས་ཀྱི་སེང་གེའི་ཁྲི་དང་། པད་མོའི་ཟེ་བའི་དྲི་ཐམས་ཅད་དང་། ནོར་བུའི་རྒྱལ་པོ་ཐམས་ཅད་ཀྱི་ངོས་དང་། འཁོར་ལོའི་ལྟེ་བ་ཐམས་ཅད་དང་། མེ་ཏོག་གི་ཟེ་བའི་དྲི་ཐམས་ཅད་དང་། སྟེགས་བུའི་ངོས་ཐམས་ཅད་དང་། རྟ་བབས་ཀྱི་སྒོ་ཐམས་ཅད་དང་། ནོར་བུའི་གཟུགས་ཀྱི་ངོས་ཐམས་ཅད་དང་། རིན་པོ་ཆེ་འོད་འཕྲོ་བའི་སྒོ་ཐམས་ཅད་དང་། འོད་ཟེར་སྒྲོན་མའི་སྒོ་ཐམས་ཅད་དང་། སེང་གེའི་ཁྲིའི་རྒྱན་གྱི་སྒོ་ཐམས་ཅད་ནས། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའ་མང་པོ་འཐོན་པར་གྱུར་ཏེ། འདི་ལྟར་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་པའི་ཡེ་ཤེས་མངོན་པར་ཤེས་པའི་རྒྱལ་པོ་ཞེས་བྱ་བ་དང་། བྱང་ཆུབ་སེམས་དཔའ་སྒྲ་དབྱངས་ཀུན་ཏུ་སྒྲོག་པ་དང་། བྱང་ཆུབ་སེམས་དཔའ་ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དཀྱིལ་འཁོར་གཙུག་ཕུད་དང་། བྱང་ཆུབ་སེམས་དཔའ་ཡེ་ཤེས་ཆེན་པོ་ཉི་མས་རབ་ཏུ་གནོན་པའི་བློ་གྲོས་དང་། བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོའི་དཔལ་དང་། བྱང་ཆུབ་སེམས་དཔའ་མིག་
བརྒྱ་པ་པདྨོའི་སྣ་ཚོགས་ཀྱི་གཙུག་ཕུད་དང་། བྱང་ཆུབ་སེམས་དཔའ་ནམ་མཁའི་ཚུལ་པདྨོ་སྣ་ཚོགས་ཀྱི་གཙུག་ཕུད་དང་། བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་དང་། བྱང་ཆུབ་སེམས་དཔའ་ཀུན་ཏུ་སྒྲ་ཆོས་ཀྱི་དབྱིངས་ཀྱི་དབྱངས་དང་། བྱང་ཆུབ་སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བ་དང་། དེ་དག་ལ་སྩོགས་པ་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་མཆོད་པའི་སྤྲིན་རྣམ་པ་སྣ་ཚོགས་རབ་ཏུ་འགྱེད་ཅིང་། འདི་ལྟར་ནོར་བུ་རིན་པོ་ཆེའི་མེ་ཏོག་གི་སྤྲིན་ཐམས་ཅད་ནི་རབ་ཏུ་འབྱིན། སྤོས་ཀྱི་སྤྲིན་ཐམས་ཅད་ནི་ཤིན་ཏུ་འགྱེད། རིན་པོ་ཆེའི་འོད་ཀྱི་དཀྱིལ་འཁོར་གྱི་སྤྲིན་ཐམས་ཅད་ནི་མངོན་པར་འབྱིན། ཡུལ་མཐའ་ཡས་པའི་སྤོས་ཀུན་ཏུ་འཕྲོ་བའི་བདུག་པའི་སྤྲིན་ནི་རྣམ་པར་འགྱེད་ཅིང་། ནོར་བུ་ཉི་མའི་སྙིང་པོ་འཁོར་ལོའི་འོད་ཀྱི་དཀྱིལ་འཁོར་གྱི་སྤྲིན་ནི་རབ་ཏུ་གཏོང་། སིལ་སྙན་གྱི་སྒྲ་དབྱངས་ཡིད་དུ་འོང་བའི་སྤྲིན་ནི་རབ་ཏུ་སྒྲོག །རིན་པོ་ཆེ་འོད་འཕྲོ་བ་ཁ་དོག་མཐའ་ཡས་པའི་སྒྲོན་མའི་སྤྲིན་གྱིས་ནི་རབ་ཏུ་སྣང་བར་བྱེད། ནོར་བུ་སྣ་ཚོགས་ཀྱི་ཤིང་གི་ཡལ་ག་ལས་མེ་ཏོག་གི་དོག་པ་ནི་རྣམ་པར་སྤྱོད། རིན་པོ་ཆེའི་འོད་དྲི་མ་མེད་པ་ཟད་མི་ཤེས་པའི་ནོར་བུའི་རྒྱལ་པོའི་ཆར་ནི་རབ་ཏུ་འབེབས། རྒྱན་མཛེས་པ་ཐམས་ཅད་ཡང་དག་པར་སྟོན་པའི་ནོར་བུའི་རྒྱལ་པོའི་སྤྲིན་གྱི་ཆར་ནི་རབ་ཏུ་འབེབས་ཤིང་། དེ་ལྟ་བུ་དག་ལ་སྩོགས་པ་བྱང་ཆུབ་སེམས་དཔའ་རེ་རེ་ཞིང་ཡང་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་མཆོད་པའི་སྤྲིན་གྱི་ཆར་རབ་ཏུ་འབེབས་པར་བྱེད་ཅིང་ལྷགས་པར་གྱུར་ཏེ། བཅོམ་ལྡན་འདས་ལ་ལན་བརྒྱ་སྟོང་དུ་མར་གཡས་ཕྱོགས་སུ་བསྐོར་བ་བྱས་ཏེ། འཁོར་གྱི་དཀྱིལ་འཁོར་རྒྱ་མཚོ་ཡོད་པ་ཐམས་ཅད་དུ་མཆོད་པའི་སྤྲིན་རྒྱུན་མི་འཆད་པའི་ཆར་མངོན་པར་ཕབ་ནས་གང་ནས་འོངས་པའི་ཕྱོགས་སུ་བརྟེན་ཏེ། དེ་བཞིན་གཤེགས་པ་ལ་མངོན་དུ་བལྟས་ནས་སེང་གེའི་ཁྲི་རིན་པོ་ཆེ་སྣ་ཚོགས་དུ་མའི་པདྨོའི་སྙིང་པོ་ཅན་དག་མངོན་པར་སྤྲུལ་ཏེ། སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་སྤྱོད་ཡུལ་རྒྱ་
མཚོ་རྒྱ་ཆེན་པོ་ཡོངས་སུ་དག་པ་རྣམས་སོ། ། སྒོ་ཀུན་ནས་ཆོས་ཀྱི་སྣང་བ་རབ་ཏུ་ཐོབ་པ་རྣམས་སོ། །དེ་བཞིན་གཤེགས་པའི་སྤྱོད་ཡུལ་ཆགས་པ་མེད་པའི་རྗེས་སུ་འབྲང་བ་རྣམས་སོ། །ཐ་དད་པ་ཡང་དག་པར་ཤེས་པ་ཐམས་ཅད་ཀྱིས་ཆོས་རྒྱ་མཚོ་ལ་ཞུགས་པ་རྣམས་སོ། །རྣམ་པར་ཐར་པ་བསམ་གྱིས་མི་ཁྱབ་པའི་སྣང་བ་རབ་ཏུ་ཐོབ་པ་རྣམས་སོ། །སྒོ་ཀུན་ནས་དེ་བཞིན་གཤེགས་པའི་སའི་དབྱིངས་རབ་ཏུ་ཐོབ་པ་རྣམས་སོ། །གཟུངས་ཀྱི་སྒོ་རྒྱ་མཚོ་ཐམས་ཅད་ཀྱིས་ཆོས་རྒྱ་མཚོ་རབ་ཏུ་འཛིན་པ་རྣམས་སོ། །དུས་གསུམ་མཉམ་པ་ཉིད་ཀྱི་ཡེ་ཤེས་ཀྱི་ས་ལ་རབ་ཏུ་གནས་པ་རྣམས་སོ། །དགའ་བའི་ཤུགས་རྒྱ་ཆེན་པོ་རབ་ཏུ་ཐོབ་པ་རྣམས་སོ། །བསོད་ནམས་ཀྱི་དཀྱིལ་འཁོར་མུ་མེད་པ་ཡོངས་སུ་དག་པའི་རྣམས་ཏེ། ཆོས་ཀྱི་དབྱིངས་དང་ནམ་མཁའ་ལ་རྣམ་པར་རྒྱུ་ཞིང་སངས་རྒྱས་ཐམས་ཅད་མཆོད་པ་མངོན་པར་བསྒྲུབ་པ་ལ་རབ་ཏུ་བརྩོན་པ་ཤ་སྟག་གོ །དེ་ནས་བྱང་ཆུབ་སེམས་དཔའ་རྒྱ་མཚོའི་བློ་གྲོས་རྣམ་པར་རོལ་པའི་ཡེ་ཤེས་མངོན་པར་ཤེས་པའི་རྒྱལ་པོས་སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམ་པར་སངས་རྒྱས་མཉམ་ཉིད་མཁྱེན། །ཆགས་མེད་རྙེད་པས་ནམ་མཁའ་ལྟ་བུ་སྟེ། །ཕྱོགས་རྣམས་ཞིང་ཀུན་རབ་ཏུ་སྣང་བྱས་ནས། །འབྱམ་ཀླས་འཁོར་ན་བཞུགས་པ་རྣམ་པར་མཛེས། །བདེ་གཤེགས་རང་བྱུང་མཐའ་དང་དབུས་མེད་དེ། །ཐམས་ཅད་ཕྱོགས་ཀྱི་ཆོས་དབྱིངས་ཀུན་རྒྱས་པར། །དབང་ཕྱུག་ཆེན་པོ་ཀུན་གྱིས་མཆོད་བསྐོར་ཅིང་། །ཤིང་གི་རྒྱལ་པོ་ཀུན་གྱི་དྲུང་ན་བཞུགས། །དེ་བཞིན་གཤེགས་པའི་རྫུ་འཕྲུལ་སྟོབས་དག་གིས། །སྐད་ཅིག་སེམས་ལ་ཟད་མེད་ཡོན་ཏན་གཟུགས། །རྣམ་ཐར་གཞན་དང་གཞན་དག་ཐོབ་པས་མཐོང་། །དེ་བཞིན་གཤེགས་པའི་ཡུལ་ནི་མཐའ་ཡས་སོ། །བསྐལ་པ་རྒྱ་མཚོར་སྔན་ཅད་སྤྱོད་པའི་ཚེ། །དེ་བཞིན་གཤེགས་
པས་སྲིད་པ་རྒྱ་མཚོ་འདིར། །སྣ་ཚོགས་ཐབས་ཀྱིས་སེམས་ཅན་སྨིན་བྱས་པ། །དེ་དག་རྒྱལ་བ་དེ་ཡི་ཆོས་འཛིན་ཏོ། །ཡོངས་དག་དྲི་མེད་འཁོར་རྣམས་འཁོད་པ་དག །ཐམས་ཅད་སངས་རྒྱས་ལྟ་ཞིང་རྣམ་པར་གནས། །པདྨོའི་སྙིང་པོ་པདྨོ་གདན་བཞུགས་པ། །ཚོགས་ཀྱི་ནང་ན་རྒྱལ་བ་མངོན་པར་མཛེས། །སངས་རྒྱས་གང་ན་བཞུགས་པའི་སེང་གེའི་ཁྲི། །རིན་ཆེན་ནོར་བུའི་རྒྱལ་པོའི་འོད་འཕྲོ་ཞིང་། །སྤོས་འཕྲོ་སྤྲིན་རྣམས་མཐའ་ཡས་རབ་ཏུ་འབྱུང་། །སྙིང་པོ་དུ་མའི་མེ་ཏོག་ཕྲེང་སྤྱངས་པའོ། །རིན་ཆེན་འོད་འཕྲོའི་སྤྲིན་ནི་རྟག་ཏུ་འགྱེད། །འོད་ཟེར་སྒྲོན་མ་རྒྱ་ཆེན་རབ་ཏུ་འབར། །རྟ་བབས་རྣམ་པ་སྣ་ཚོགས་རྣམས་ཀྱིས་བརྒྱན། །ཐུབ་པ་དེ་བཞུགས་མངོན་པར་རབ་ཏུ་མཛེས། །སྒྲ་དབྱངས་ཡིད་དུ་འོང་བ་རབ་ཏུ་འགྱེད། །རིན་ཆེན་ཚོན་དུ་སྣ་ཚོགས་པདྨོ་འཕྱང་། །ནོར་བུའི་རྒྱལ་པོས་སྐར་ཁུང་ཀུན་གནས་བརྒྱན། །སངས་རྒྱས་དེ་བཞུགས་རྣམ་པར་རབ་ཏུ་མཛེས། །ཟླ་གམ་རིན་ཆེན་མང་པོས་ཡོངས་སུ་བཟུང་། །རྡོ་རྗེ་འོད་འཕྲོ་སྣང་བའི་སྙིང་པོས་བརྒྱན། །གཙུག་ན་ནོར་བུའི་བྱང་ཆུབ་སེམས་དཔས་བཟུང་། །སངས་རྒྱས་དེ་བཞུགས་རྣམ་པར་ཤིན་ཏུ་མཛེས། །ཕྱོགས་བཅུར་སྤྲུལ་པའི་དྲ་བ་རབ་བཀྱེ་ཞིང་། །དེ་བཞིན་གཤེགས་པའི་སྨོན་ལམ་སྒྲ་ཡང་སྒྲོག །གཟུགས་བརྙན་བཞིན་དུ་ཞིང་རྣམས་ཀུན་ན་སྣང་། །ཐུབ་པ་དེ་འདྲའི་སེང་གེའི་གདན་ལ་བཞུགས། །དེ་ནས་བྱང་ཆུབ་སེམས་དཔའ་སྒྲ་དབྱངས་ཀུན་ཏུ་སྒྲོག་པས། སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་དུ་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདི་ནི་བདེ་གཤེགས་སངས་རྒྱས་བྱིན་རླབས་ཏེ། །བྱང་ཆུབ་སྤྱོད་པ་སྔན་ཆད་སྤྱད་པ་དང་། །སངས་རྒྱས་མཆོད་པའི་མཆོད་པ་དུ་མ་དག ། རྒྱལ་བའི་གདན་ལས་དེ་དག་ཐམས་ཅད་སྣང་། །སྤོས་འོད་སྣང་བ་ནོར་བུའི་རྒྱལ་པོ་ཅན། །མེ་ཏོག་སྙིང་པོ་སེང་གེའི་གདན་གྱི་འཁོར། །རྒྱན་རྣམས་ཐམས་ཅད་གཟུགས་བརྙན་གྱུར་པ་དང་། །འཁོར་རྣམས་དེ་དག་ཐམས་
ཅད་ཀུན་བཀང་སྟེ། །སྐད་ཅིག་སྐད་ཅིག་རྒྱན་གྱི་ཁ་དོག་ཀུན། །རྣམ་པ་དུ་མར་སངས་རྒྱས་གདན་ལས་སྣང་། །སེམས་ཅན་ཇི་ལྟར་མོས་པ་དེ་དག་ཀྱང་། །འཁོད་ཅིང་སངས་རྒྱས་ཚད་མེད་གདན་ལ་ལྟ། །རིན་ཆེན་ལྡ་ལྡི་པདྨོ་མང་བཏགས་པ། །ཕྱི་ཞིང་བྱང་ཆུབ་སེམས་དཔའ་མང་པོ་རྣམས། །སྒྲ་དབྱངས་ཡིད་དུ་འོང་བ་རབ་འབྱིན་ཅིང་། །སངས་རྒྱས་གདན་ལ་བཞུགས་ལ་སྟོད་པ་བྱེད། །སངས་རྒྱས་བསོད་ནམས་ཚད་མེད་ནམ་མཁའ་བཞིན། །འདི་དག་རྒྱན་ཀུན་དེ་ལས་རབ་ཏུ་བྱུང་། །ས་རྣམས་རེ་རེའི་རྒྱན་རྣམས་གང་ཡོད་པ། །འགྲོ་བ་ཀུན་གྱིས་དེ་དག་བསམ་མི་ནུས། །མི་ཕྱེད་མཚམས་ཀྱི་རྡོ་རྗེ་སྣ་ཚོགས་པ། །འཁོར་ཡངས་རྣམ་དག་ཤིན་ཏུ་མཉམ་པ་སྟེ། །ནོར་བུའི་དྲ་བ་སྣ་ཚོགས་ཀུན་ཏུ་བཀྲམ། །བྱང་ཆུབ་ཤིང་གི་ས་ཡི་འཁོར་ཀུན་ཏོ། །ས་ཕྱོགས་གང་ན་རྒྱལ་བའི་གདན་ཡོད་པ། །ཁ་དོག་མཐའ་ཡས་རྒྱ་ཆེན་སྣ་ཚོགས་ཏེ། །མེ་ཏོག་མངོན་གཏོར་རིན་ཆེན་རྣམ་པར་བཀྲམ། །གསེར་ཚོན་མཛེས་པས་དེ་ནི་རབ་ཏུ་བརྒྱན། །ས་ཡི་ལྷ་མོ་དེ་དག་རབ་དགའ་ཞིང་། །སྐད་ཅིག་སེམས་ཀྱིས་མི་ཟད་ས་ཡང་སྟོན། །ཀུན་ཀྱང་རྒྱལ་བའི་ཞལ་དུ་མངོན་ལྟ་ཞིང་། །ཁ་དོག་ཐམས་ཅད་རྒྱན་གྱི་སྤྲིན་གཏོང་ངོ་། །རིན་ཆེན་སྒྲོན་མ་མང་པོ་གསལ་བར་འབར། །སྤོས་མང་དྲི་ཞིམ་མང་པོ་རྟག་ཏུ་འབྱུང་། །དུས་དང་ཚོད་ཀྱི་རྣམ་པ་མང་སྟོན་ཅིང་། །ལྷ་རྣམས་ཀུན་ཀྱང་སངས་རྒྱས་མཆོད་པ་བྱེད། །ཕྱོགས་རྣམས་བཅུ་ན་ཞིང་རྣམས་ཇི་སྙེད་པ། །དེ་དག་ས་རྒྱན་ཕུན་སུམ་ཚོགས་ཡོད་པ། །དེ་དག་ཀུན་ཀྱང་ས་དཀྱིལ་འདི་ན་སྣང་། །སངས་རྒྱས་བྱིན་རླབས་མཉམ་པ་མེད་པས་བྱུང་། །དེ་ནས་བྱང་ཆུབ་སེམས་དཔའ་ནོར་བུ་རིན་པོ་ཆེ་སྣ་ཚོགས་ཀྱི་འོད་ཀྱི་དཀྱིལ་འཁོར་གཙུག་ཕུད་ཀྱིས་སངས་རྒྱས་ཀྱི་མཐུས་འོད་ཀྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྔན་ཅད་སྤྱད་པ་སྤྱོད་པའི་ཚེ་དེ་དག །
ཞིང་ཀུན་ཕུན་སུམ་ཚོགས་པ་མཐོང་བ་རྣམས། །སྙིང་པོ་བྱང་ཆུབ་འཁོར་གྱི་ས་འདི་ལ། །མྱི་ཟད་ས་དང་དེ་དག་རབ་ཏུ་སྣང་། །རྣམ་པར་ཡངས་པ་གང་ན་སྣང་བ་ཡི། །ས་ལ་རིན་ཆེན་མཛེས་ཀུན་རྣམ་པར་བཀྲམ། །རིན་ཆེན་མང་པོས་དཀྱིལ་འཁོར་ཀུན་ཏུ་གཏོར། །སངས་རྒྱས་འོད་ཀྱི་སྤྲིན་ཀྱང་རབ་ཏུ་སྣང་། །ས་རྣམས་ཀུན་བརྒྱན་ཤིང་གི་དམ་པའི་དྲུང་། །ཀུན་ནས་ནོར་བུའི་རྒྱལ་པོས་རྒྱན་བྱས་ལས། །བསོད་ནམས་འོད་ཀྱི་དབྱངས་ཀྱི་འབྲུག་སྒྲ་འབྱུང་། །སངས་རྒྱས་རྫུ་འཕྲུལ་ཚུལ་ཡང་རབ་ཏུ་བརྗོད། །རིན་ཆེན་མང་པོ་སྒྲོན་མའི་ཆར་ཕབ་ཅིང་། །རིན་ཆེན་མཛེས་པར་བཀོད་པ་རྣམ་པར་མཛེས། །སྒྲ་དབྱངས་ཀུན་གྱི་འབྲུག་སྒྲ་ཤིན་ཏུ་སྒྲོག །ས་ཡི་ལྷ་རྣམས་ས་ཡང་ཡང་དག་སྟོན། །རིན་ཆེན་འོད་འཕྲོ་སྒྲོན་མ་རྣམ་པར་སྣང་། །འོད་ཟེར་སྤྲིན་ནི་ས་ལས་རབ་ཏུ་འབྱུང་། །ནོར་བུ་དྲ་བ་སིལ་མ་ཀུན་ནས་བཀྲམ། །རིན་ཆེན་སྣ་ཚོགས་རིགས་ཀྱི་ཡན་ལག་བརྒྱན། །ས་རྣམས་ཀུན་ནས་མཛེས་པ་འདི་དག་ལྟོས། །རིན་ཆེན་མང་པོ་ཚོན་བཟང་རྒྱན་དུ་བཀྱེ། །འགྲོ་བ་དག་ལ་ཆོས་ཀྱི་རྒྱ་མཚོ་སྒྲོག །དེ་དག་ཆོས་ཉིད་རྣམ་པར་དག་པ་མཐོང་། །མ་ལུས་ཕྱོགས་ན་སངས་རྒྱས་ཐམས་ཅད་ཀྱི། །བྱང་ཆུབ་ཤིང་གི་ཕུན་སུམ་ཚོགས་པ་དག །ས་ཡི་དཀྱིལ་འཁོར་འདི་ན་ཀུན་སྣང་སྟེ། །དེ་དག་ཆོས་ཉིད་རྣམ་པར་དག་པ་བརྗོད། །སངས་རྒྱས་གདན་ལས་ཆོས་རྣམས་རྒྱ་མཚོ་ཡི། །ཆོས་སྒོ་བདེ་བར་གཤེགས་པས་གང་གསུངས་པ། །སེམས་ཅན་ཀུན་ཀྱི་བསམ་པ་ཇི་བཞིན་དུ། །ས་འཁོར་རྣམས་ཀྱང་ཀུན་ནས་རབ་ཏུ་འབྱུང་། །དྲི་ཞིམ་འོད་རྣམས་རྟག་ཏུ་འབྱུང་བས་ན། །དེ་དག་ཇི་བཞིན་སྣོད་ཀྱི་འགྲོ་བ་འགེངས། །སྲོག་ཆགས་རྣམས་ཀྱི་ཉོན་མོངས་ཞི་བར་བྱེད། །ས་འཁོར་དེ་ནས་དེ་འདྲ་རབ་ཏུ་སྒྲོག །སངས་རྒྱས་རྫུ་འཕྲུལ་ཕུན་སུམ་གང་དག་དང་། །དྲི་མེད་ས་ནི་གང་གིས་མཛེས་གྱུར་པའི། །ཕུན་སུམ་ཚོགས་པའི་རྒྱན་རྣམས་རེ་རེ་ཞིང་། །བསྐལ་པ་བྱེ་བ་དག་ཏུའང་བརྗོད་མྱི་ནུས། །དེ་ནས་བྱང་ཆུབ་
སེམས་དཔའ་ཡེ་ཤེས་ཆེན་པོའི་ཉི་མས་རབ་ཏུ་གནོན་པའི་བློ་གྲོས་ཀྱིས། སངས་རྒྱས་ཀྱི་མཐུས་འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ལྔ་པ། འཇིག་རྟེན་ཀུན་གྱི་བསམ་པ་ཚིམ་མཛད་ཅིང་། །སངས་རྒྱས་ཆོས་ཀྱི་གཞལ་མེད་ཁང་ན་མཛེས། །འབྱམ་ཀླས་ཕྱོགས་རྣམས་ཀུན་ཏུ་མངོན་སུམ་དུ། །སངས་རྒྱས་འགྲོ་གཙོ་གཞལ་མེད་ཁང་ན་སྣང་། །རིན་ཆེན་ཀུན་གྱི་སྙིང་པོ་རབ་ཏུ་བརྒྱན། །རྒྱན་རྣམས་ཀུན་གྱིས་དེ་བཞིན་མཛེས་ཤིང་འབར། །སངས་རྒྱས་ཕོ་བྲང་འོད་ནི་བསམ་མྱི་ཁྱབ། །དེ་ན་བཞུགས་ཤིང་སངས་རྒྱས་རབ་ཏུ་མཛེས། །ཀ་བའི་རྒྱན་ནི་ནོར་བུ་སྣ་ཚོགས་ཏེ། །ཕྱོགས་རྣམས་ཀུན་སྒོར་རྟ་བབས་སྤྲིན་ཀྱང་བྲིས། །སྟེགས་བུའི་ཕྲེང་བ་ཀུན་ནས་རྒྱན་དུ་བཀོད། །གསེར་གྱི་དྲིལ་བུའི་སྤྲིན་ཀྱང་རྣམ་པར་བརྒྱུས། །མེ་ཏོག་བླ་རེ་རྣམ་པ་སྣ་ཚོགས་ལྟོས། །རིན་ཆེན་ཤིང་སྡོང་དར་གྱི་བླ་རེ་བྲེས། །ནོར་བུ་ཐམས་ཅད་སྒོ་ནས་ཕྲེང་བ་འབྲུལ། །དེ་ནས་ཡེ་ཤེས་རྒྱ་མཚོར་རབ་ཏུ་མཛེས། །སྤོས་དྲི་རྒྱལ་མཚན་རིན་ཆེན་དྲ་བ་སྟེ། །འོད་ཟེར་སྒྲོན་མའི་སྤྲིན་གྱིས་ཀུན་ཏུ་གཡོགས། །རྒྱན་རྣམས་སྣ་ཚོགས་ཀུན་ནས་ཤིན་ཏུ་བྲེས། །དེ་ན་སངས་རྒྱས་རབ་ཏུ་འཕགས་པ་བཞུགས། །ཕྱོགས་རྣམས་ཀུན་སྒོ་སྤྲུལ་པའི་སྤྲིན་གྱི་རྣམས། །དབྱངས་ཀྱིས་འཇིག་རྟེན་ཁྱབ་པར་གྲག་བྱེད་ཅིང་། །འབྱམ་ཀླས་ཕྱོགས་ཀྱི་སེམས་ཅན་རྣམ་འདུལ་བ། །སངས་རྒྱས་ཕོ་བྲང་འདི་ན་དེ་དག་གྲག །མེ་ཏོག་ཤིང་དང་རིན་ཆེན་སྤུངས་སྤེལ་བ། །འཕགས་པ་ཕྱོགས་རྣམས་ཀུན་ཏུ་མངོན་པར་མཛེས། །དེ་ལས་དུས་གསུམ་ཞིང་རྣམས་ཐམས་ཅད་ཀྱང་། །གཟུགས་བརྙན་གྱུར་པར་དེ་དག་རབ་ཏུ་སྣང་། །ཕྱོགས་རྣམས་ཀུན་ཏུ་རིན་ཆེན་མང་བཀྱེ་བ། །དེ་དག་སྣ་ཚོགས་མཛེས་པར་རྣམ་པར་འབར། །ཕྱོགས་རྣམས་ཀུན་ཏུ་སྐར་ཁུང་
མཛེས་པར་བརྒྱན། །རྟ་བབས་མདའ་ཡབ་སྣ་ཚོགས་མང་པོས་བརྒྱན། །དྲི་མེད་འོད་ཟེར་ཀུན་ནས་སྣང་བ་ཡི། །སངས་རྒྱས་ཕོ་བྲང་རྣམ་པ་བསམ་ཡས་ཏེ། །གཞལ་མེད་ཁང་མང་ཐམས་ཅད་དེ་ལ་སྣང་། །དེ་དག་ཀུན་ནའང་རྒྱལ་བ་བཞུགས་ཤིང་མཛེས། །ཕྱོགས་རྣམས་ཀུན་ན་འཁོར་རྣམས་ཇི་སྙེད་པ། །རྒྱལ་བའི་ཕོ་བྲང་འདིར་ནི་ཀུན་བཞུགས་ཀྱང་། །མཐའ་མེད་དབུས་མྱེད་མུ་ཡང་དེ་བཞིན་དུ། །རང་བྱུང་སངས་རྒྱས་ཕོ་བྲང་དེ་ན་བཞུགས། །དེ་ནས་བྱང་ཆུབ་སེམས་དཔའ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པ་ཡེ་ཤེས་རྒྱ་མཚོ་དཔལ་གྱིས། སངས་རྒྱས་ཀྱི་མཐུས། འཁོར་གྱི་དཀྱིལ་འཁོར་རྒྱ་མཚོ་ཡོད་པ་དེ་དག་ཐམས་ཅད་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཞིང་རྡུལ་ཤིན་ཏུ་ཕྲ་སྙེད་ཀྱི། །བསོད་ནམས་རྒྱ་མཚོ་རྣམ་པར་རབ་སྦྱངས་ཏེ། །སངས་རྒྱས་རྫུ་འཕྲུལ་སྨོན་ལམ་ཡང་དག་བྱུང་། །སྙིང་པོ་བྱང་ཆུབ་དྲི་མེད་རྣམ་པར་མཛེས། །སྤོས་ཞིམ་ཐམས་ཅད་རྩ་བ་ཡང་དག་རྒྱུ། །ཡིད་བཞིན་ནོར་མཆོག་རྒྱལ་པོས་ཀུན་ནས་བརྒྱན། །རྡོ་རྗེ་ཕྱེ་མའི་ནོར་བུའི་རྒྱལ་པོ་བྲིས། །ཤིང་སྡོང་རྩ་བ་རིན་ཆེན་ཀུན་ལས་བྱས། །རྡོ་རྗེ་ཕྱེ་མའི་ནོར་བུ་འཁོར་ལོ་འབྱུང་། །ལྷུན་རྣམས་ཐམས་ཅད་རིན་ཆེན་རྒྱན་གྱིས་བརྒྱན། །ཡལ་ག་སྟུག་པོ་སྤྲིན་ལྟར་ཀུན་ནས་འཁྱིལ། ། སྙིང་པོ་བྱང་ཆུབ་དེ་ན་རྒྱལ་བ་མཛེས། །ཡལ་ག་དོག་པ་ཀུན་ནས་མངོན་པ་སྟེ། །འཁོར་རྣམས་སྣུམ་འཇམ་ཕྱོགས་རྣམས་ཀུན་ཏུ་འཕགས། །མེ་ཏོག་འབྲས་བུ་རྒྱུན་རྣམས་ཀུན་ཀྱང་འགྱེད། །སྙིང་པོ་བྱང་ཆུབ་རྒྱ་ཆེན་བསམ་མྱི་ཁྱབ། །འོད་རྣམས་བཀྱེ་བ་ཕྱོགས་སུ་རྣམ་པར་མཛེས། །དྲི་མ་མེད་པའི་འོད་འབར་ཟད་མི་ཤེས། །ཡལ་གའི་སྒོ་ནས་སྤྲིན་ཀུན་ཆར་ཡང་འབེབས། །སྙིང་པོ་བྱང་ཆུབ་སྨོན་ལམ་ཡངས་པ་བྱུང་། །མེ་ཏོག་ནོར་དང་རིན་ཆེན་མི་ཟད་ནོར། །མུ་ཏིག་ནོར་བུ་ཕྱོགས་རྣམས་ཀུན་ནས་བརྒྱུས། །ཕྱེ་མ་ནོར་གྱི་གནས་ཀྱི་སྤྲིན་འགྱེད་དེ། །སྙིང་པོ་བྱང་ཆུབ་ཕྱོགས་རྣམས་ཀུན་ཏུ་འབྱིན། །བདེ་གཤེགས་
སྙིང་པོ་བྱང་ཆུབ་འདི་ལ་ལྟོས། །པདྨོའི་དྲ་བ་ནོར་བུ་དྲི་མེད་མང་། །རིན་ཆེན་འོད་ཟེར་དཀྱིལ་འཁོར་ཀུན་ནས་འཕྲོ། །དྲིལ་བུའི་དྲ་བ་སྤྲིན་གྱི་སྒྲ་དབྱངས་འབྱིན། །ཕྱོགས་བཅུའི་ཤིང་བཟང་གཟུགས་རྣམས་གང་ཡོད་པ། །འབྱམ་ཀླས་ཞིང་གི་མ་ལུས་ཐམས་ཅད་དག །བྱང་ཆུབ་ཤིང་ལ་དེ་དག་ཀུན་ནས་སྣང་། །དེ་དྲུང་སངས་རྒྱས་དྲི་མེད་རྣམ་པར་མཛེས། །ཡལ་ག་ཀུན་ནས་རིན་ཆེན་མི་ཟད་ནོར། །བྱང་ཆུབ་སེམས་དཔའ་དག་ཀྱང་རྟག་འབྱུང་ཞིང་། །བསོད་ནམས་རྒྱ་ཆེན་དཀྱིལ་འཁོར་ཆར་ཕབ་སྟེ། །ཕྱོགས་བཅུར་རྒྱལ་བ་མཆོད་ཕྱིར་དེ་དག་འདོང་། །དེ་བཞིན་གཤེགས་པ་སྔན་ཅད་ཅིར་གྱུར་དང་། །བྱང་ཆུབ་སྤྱོད་ལས་བྱུང་བ་འདི་དག་ལྟོས། །ཡལ་ག་ཀུན་ནས་རིན་ཆེན་ནོར་མི་ཟད། །སངས་རྒྱས་ཡུལ་ཀུན་བསམ་གྱིས་མྱི་ཁྱབ་པོ། །དེ་ནས་བྱང་ཆུབ་སེམས་དཔའ་མྱིག་བརྒྱ་པ་པད་མོ་སྣ་ཚོགས་ཀྱི་གཙུག་ཕུད་ཀྱིས། སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དུས་གསུམ་གཤེགས་པའི་རྒྱལ་བའི་རྣམ་འཕྲུལ་བ། །དེ་དག་རིན་ཆེན་སྒོ་ནས་ཀུན་ཀྱང་གྲགས། །དེ་ནི་མཐའ་དང་དབུས་ཡང་མྱེད་པ་སྟེ། །སྙིང་པོ་བྱང་ཆུབ་འདི་ལ་ཀུན་སྣང་ངོ་། །མེ་ཏོག་མང་པོའི་ཕྲེང་བ་སྦྱངས་བཀྱེ་ཞིང་། །འོད་ཟེར་སྤྲིན་གྱིས་ཕྱོགས་རྣམས་ཀུན་བཀང་སྟེ། །བྱང་ཆུབ་ཤིང་ལ་གནས་པའི་ལྷ་ཡི་རྣམས། །སངས་རྒྱས་བལྟ་ཞིང་རྟག་ཏུ་མཆོད་པ་བྱེད། །སྤོས་ཀྱི་རྒྱལ་མཚན་ནོར་བུ་སྣ་ཚོགས་འབར། །སྤོས་ཀྱི་འོད་འཕྲོ་བདུག་སྤོས་རྟག་ཏུ་འབྱུང་། །འཁོར་གྱི་རྒྱ་མཚོ་ཀུན་ལ་ཁྱབ་པར་ཞིམ། །ཤིང་གི་རྒྱལ་པོ་དེ་ཕྱིར་ཕྱོགས་སུ་མཛེས། །པདྨོ་འབྲུལ་བ་སྟུག་ཅིང་གསེར་མདོག་འདྲ། །རྒྱལ་བའི་སྤྲིན་སྒྲ་རྟག་པར་རབ་ཏུ་འགྱེད། །ཕྱོགས་བཅུའི་ཞིང་རྣམས་མ་ལུས་ཁྱབ་བྱས་ཤིང་། །སེམས་ཅན་རྣམས་ཀྱི་ཉོན་མོངས་གདུང་བ་སེལ། །རྒྱལ་བའི་འཁོར་ནི་ཚད་མེད་རྒྱ་ཆེ་སྟེ། །ཕྱོགས་རྣམས་ཀུན་
ནས་སྙིང་པོ་བྱང་ཆུབ་ལ། །གཟུགས་བརྙན་སྣང་ཞིང་དྲི་མེད་འོད་མཆོག་འགྱེད། །བྱང་ཆུབ་ཤིང་གི་རྣམ་འཕྲུལ་འདི་དག་ལྟོས། །སྨོན་ལམ་སྒྲ་དང་དབྱངས་ཀྱི་མར་མེ་རྣམས། །རིན་ཆེན་སྣ་ཚོགས་ཡལ་ག་ཀུན་ནས་འབར། །སྲིད་པ་རྒྱ་མཚོ་ཀུན་ན་སྔན་ཅད་དུ། །རྒྱལ་བའི་སྤྱོད་པ་ཇི་ལྟར་བྱུང་བ་སྟོན། །བྱང་ཆུབ་ལྷ་རྣམས་ཞིང་གི་རྡུལ་སྙེད་དོ། །དེ་དག་ཐམས་ཅད་སྙིང་པོ་བྱང་ཆུབ་གནས། །ཐུབ་པའི་བྱང་ཆུབ་ཤིང་ལ་སྐད་ཅིག་ཅིང་། །རྣམ་ཐར་གཞན་དང་གཞན་མང་དེ་དག་སྟོན། །རང་བྱུང་སྤྱད་པ་ཐམས་ཅད་སྤྱོད་པའི་ཚེ། །སྔོན་ཆད་དེ་བཞིན་གཤེགས་པ་གང་མཆོད་པ། །དེ་དག་མཚན་བཅས་སྔོན་གྱི་སྦྱོར་བཅས་པ། །ཐམས་ཅད་རིན་ཆེན་སྒོ་ནས་རབ་ཏུ་འབྱུང་། །ཕྱོགས་བཅུའི་སེམས་ཅན་ཇི་སྙེད་སྣོད་གྱུར་པ། །དེ་དག་ཐམས་ཅད་འདི་ལས་སྒྲ་འབྱུང་སྟེ། །དེ་དག་ཅིས་འདུལ་རྣམ་དག་ཅི་འདྲ་བའང་། །སྙིང་པོ་བྱང་ཆུབ་འདི་ལས་ཀུན་བརྗོད་དོ། །བྱང་ཆུབ་ཤིང་རྣམས་མཐའ་ཡས་ཕྱོགས་ཀུན་ན། །བསམ་གྱིས་མྱི་ཁྱབ་རྒྱན་གྱི་སྤྲིན་ཅན་དག །མཐའ་ཡས་སྣ་ཚོགས་རྒྱན་པ་ཐམས་ཅད་ཀྱང་། །སྔན་ཅད་དེ་བཞིན་གཤེགས་པས་ཡོངས་སྦྱངས་པའོ། །དེ་ནས་བྱང་ཆུབ་སེམས་དཔའ་གསེར་གྱི་འོད་འཕྲོ་གཟི་བརྗིད་དཀྱིལ་འཁོར་གྱི་འོད་ཀྱིས་སངས་རྒྱས་ཀྱི་མཐུས། འཁོར་གྱི་དཀྱིལ་འཁོར་ཡོད་པ་ཐམས་ཅད་ལ་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྲིད་པའི་རྒྱ་མཚོར་བྱང་ཆུབ་སྤྱོད་མཛད་ཚེ། །མོས་པའི་དཀྱིལ་འཁོར་ཡོངས་སུ་སྨོན་དག་ཅིང་། །གནས་དང་གནས་མིན་སྟོབས་རྣམས་ཐུགས་ཆུད་པའི། །བདེ་གཤེགས་སྟོབས་རྣམས་རྣམ་པར་དག་པ་མཐོང་། །བསྐལ་པ་ཀུན་ཏུ་རྒྱ་མཚོའི་ལས་སྦྱངས་ཏེ། །མཉམ་ཉིད་ཆོས་བསྒོམས་ཇི་ལྟར་བསྒྲུབས་པ་རྣམས། །སངས་རྒྱས་འོད་ལས་དེ་བཞིན་ཕྱོགས་བཀང་ཞིང་། །ལས་རྣམས་རྒྱ་མཚོ་དེ་བཞིན་རབ་ཏུ་བརྗོད། །སྣ་ཚོགས་ཐབས་ཀྱིས་འབྱམ་ཀླས་སྟོབས་སྤྱོད་ཚེ། །བསྐལ་པ་སྔ་མར་འགྲོ་བའི་དབང་པོ་བཞིན། །
ཡོངས་སུ་སྨིན་བྱས་དེ་བས་འཁོར་ཀུན་ཀྱང་། །སེམས་དག་སངས་རྒྱས་དབང་པོའི་སྟོབས་ལ་འཇུག །འཇིག་རྟེན་ཀུན་གྱི་མོས་པ་སྣ་ཚོགས་དང་། །བསམ་པ་ཇི་བཞིན་སྦྱོར་བ་རྣམ་སྤྱོད་པ། །དེ་དག་ཇི་བཞིན་རྒྱལ་བ་ཆོས་སྟོན་ཏེ། །རང་བྱུང་མོས་པ་མཁྱེན་པའི་སྟོབས་སྟོན་ཏོ། །ཕྱོགས་རྣམས་མ་ལུས་ཞིང་རྣམས་རྒྱ་མཚོ་དང་། །འབྱམ་ཀླས་སེམས་ཅན་ཁམས་དང་ཆོས་ཀྱི་ཁམས། །ནམ་མཁའི་ཁམས་རྣམས་མཉམ་ཉིད་མཁྱེན་མི་རྟོག །རང་བྱུང་སྤུ་རྩེར་ཁམས་མཁྱེན་སྟོབས་ཀྱང་བསྟོན། །བདེ་གཤེགས་ཡེ་ཤེས་རྒྱ་ཆེན་ཀུན་ཏུ་འགྲོ། །སྐད་ཅིག་གཅིག་གིས་དུས་གསུམ་མ་ལུས་འགེངས། །ཕྱོགས་དང་ཞིང་དང་བསྐལ་པ་འགྲོ་བཀང་ཞིང་། །སེམས་ཅན་ཀུན་ལ་སྟོབས་འཇུག་མངོན་པར་བསྟན། །བསམ་གཏན་རྣམ་ཐར་སྟོབས་མཐའ་དབུས་མེད་པ། །ཏིང་འཛིན་རྒྱ་མཚོའི་ཚུལ་ནི་འགྲོ་ཀུན་སྙེད། །ཐམས་ཅད་རྒྱལ་བའི་སྐུ་ལ་བསྟན་པས་ན། །སེམས་ཅན་བསམ་པའི་ཆོས་ཀྱི་ཉོན་མོངས་སེལ། །སངས་རྒྱས་ཡེ་ཤེས་དུས་གསུམ་སྒྲིབ་པ་མེད། །སྐད་ཅིག་ཀུན་ལ་དུས་གསུམ་སྤུ་རྩེར་བསྟན། །ཞིང་དང་སེམས་ཅན་སངས་རྒྱས་དེ་བཞིན་ཆོས། ། དེ་ལྟར་རྒྱལ་བས་རྗེས་སུ་དྲན་སྟོབས་བསྟན། །ཐུབ་པའི་སྤྱན་ནི་ནམ་མཁའ་མཉམ་པ་སྟེ། །དེ་ནས་ཆོས་དབྱིངས་མ་ལུས་གསལ་བར་གཟིགས། །ཐམས་ཅད་ཚུལ་གྱིས་ཆགས་མེད་གཞལ་ཡས་ཁང་། །བརྙེས་པས་ཡེ་ཤེས་སྤྱན་ནི་རྣམ་མང་བསྟན། །འཇིག་རྟེན་ཀུན་གྱི་སྦྱོར་མང་ཇི་སྙེད་དང་། །འགྲོ་བའི་བག་ཆགས་བག་ཉལ་མ་ལུས་པར། །ཐབས་སྒོ་ཀུན་ནས་ཉོན་མོངས་ཞི་མཛད་ཅིང་། །རྒྱལ་བ་འཇིག་རྟེན་གང་བར་ཀུན་ནས་བྱུང་། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱི་དབྱངས་ཀུན་ནས་སྒྲོག་པས། སངས་རྒྱས་ཀྱི་མཐུས་འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱ་ཆེན་སངས་རྒྱས་བྱིན་རླབས་ཕྱོགས་ཀུན་
ཏུ། །སངས་རྒྱས་སྟོན་ཀྱང་རྟོག་པ་མི་མངའ་སྟེ། །ཕ་རོལ་ཕྱིན་པ་རྒྱ་ཆེན་ཡོངས་བཀང་བ། །བྱང་ཆུབ་སྤྱོད་པ་རྒྱ་ཆེན་དེ་དག་སྣང་། །འགྲོ་བ་རྣམས་ལ་ཐུགས་རྗེ་ཆེ་བསྐྱེད་ཅིང་། །སྦྱིན་པའི་མཐར་ཕྱིན་སྔོན་ཆད་སྦྱངས་པས་ན། །དེ་ཕྱིར་ཐུབ་པའི་སྐུ་ནི་མཚན་གྱིས་རྒྱས། །འགྲོ་བ་ཀུན་གྱིས་བལྟ་ཞིང་དགའ་བ་བསྐྱེད། །བསྐལ་པ་རྒྱ་མཚོ་མང་པོ་མཐའ་ཡས་སྟོན། །ཚུལ་ཁྲིམས་ཕ་རོལ་ཕྱིན་པ་ཡོངས་སྦྱངས་པས། །དེ་ཕྱིར་བསྐལ་པ་ཕྱོགས་སུ་དྲི་མེད་ཅིང་། །ཤིན་ཏུ་འཕགས་པར་འཇིག་རྟེན་སྡུག་བསྔལ་སེལ། །མ་ལོག་མཉམ་པ་ཉིད་ལ་དད་བསྐྱེད་དེ། །སྔོན་ཆད་བཟོད་པའི་དཀྱིལ་འཁོར་རྣམ་སྦྱངས་པས། །འགྲོ་དང་མཚུངས་མཉམ་ཡོན་ཏན་ཀུན་སྟོན་ཏོ། །དེ་བས་ཕྱོགས་སུ་འོད་རྣམས་ཤིན་ཏུ་འཕྲོ། །བསྐལ་པ་རྒྱ་མཚོ་མང་པོར་སྔོན་སྤྱོད་ཚེ། །འགྲོ་བ་རྣམས་ཀྱི་སྒྲིབ་པ་འཐིབས་པོ་བསལ། །དེ་ཕྱིར་ཕྱོགས་བཅུའི་འགྲོ་བ་ཀུན་བཀང་སྟེ། །ཞིང་རབ་དྲུང་ན་རྒྱལ་བ་མངོན་པར་མཛེས། །བསམ་གཏན་ཡན་ལག་རྒྱ་མཚོ་སྤྱོད་པའི་ཚེ། །བསྐལ་པ་ཡངས་པར་རྒྱལ་བ་རབ་ཏུ་སྤྱད། །དེ་བས་འགྲོ་བའི་གཞལ་མེད་དགའ་བ་བསྐྱེད། །ཉོན་མོངས་དྲི་མས་བསྒྲིབས་པ་ཀུན་ཀྱང་སེལ། །སངས་རྒྱས་རྒྱ་མཚོའི་དྲུང་དུ་སྔོན་སྤྱད་ཅིང་། །ཤེས་རབ་མཐར་ཕྱིན་རྒྱལ་བས་སྔོན་བཀང་སྟེ། །འགྲོ་བའི་གཏི་མུག་མུན་པ་ཡོངས་སུ་བསལ། །དེ་བས་རྒྱལ་བ་ཀུན་ཏུ་རྣམ་པར་མཛེས། །འགྲོ་བ་ཀུན་མཉམ་ཐབས་སྒོ་ཐམས་ཅད་ཀྱིས། །ཡང་དག་བྱུང་ཞིང་འགྲོ་བ་རྣམ་སྦྱངས་པས། །ཕྱོགས་རྣམས་ཀུན་ན་ཀུན་ལ་མངོན་པར་བཞུགས། །ཕྱི་མའི་བསྐལ་པར་འགྲོ་བ་མངོན་དུ་ལྟ། །སྨོན་ལམ་ཕ་རོལ་ཕྱིན་པ་རབ་སྤྱོད་ཚེ། །བསྐལ་པ་རྒྱ་མཚོ་ཤིན་ཏུ་རྒྱ་ཆེ་ཞིང་། །ཕྱི་མའི་བསྐལ་པ་འགྲོ་བའི་སྤྲིན་མཉམ་པར། །སྤྱད་པས་དེ་ཕྱིར་འགྲོ་བ་ཀུན་ན་མཛེས། །རྒྱལ་བས་ཆོས་ཀུན་སྟོབས་ཀྱི་མཐར་ཕྱིན་པ། །བསྐལ་པ་གཞལ་ཡས་མང་པོར་ཡོངས་སུ་སྦྱངས། །དེ་ཕྱིར་རང་བྱུང་སྟོབས་ཀྱི་ཕ་རོལ་ཕྱིན། །
ཕྱོགས་ཀྱི་ཞིང་རྣམས་ཀུན་ན་དེ་ཕྱིར་འཕགས། །ཐམས་ཅད་མཁྱེན་ཉིད་ནམ་མཁའ་མཚུངས་མཉམ་པའི། །ཡེ་ཤེས་ཀུན་གྱི་སྒོ་ནས་སྔོན་སྦྱངས་པས། །དེ་ཕྱིར་ཆགས་མེད་ཡེ་ཤེས་ཕ་རོལ་ཕྱིན། །ཕྱོགས་བཅུ་ཀུན་ན་རྒྱལ་བ་མངོན་པར་མཛེས། །དེ་ནས་བྱང་ཆུབ་སེམས་དཔའ་སྤྲིན་ཡིད་དུ་འོང་བ་དྲི་མ་མེད་པའི་ཟླ་བས་སངས་རྒྱས་ཀྱི་མཐུས། འཁོར་རྒྱ་མཚོ་ཡོད་པ་ཐམས་ཅད་ལ་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྫུ་འཕྲུལ་ཡུལ་ནི་ཕྱོགས་རྣམས་ཀྱི། །འགྲོ་བའི་རྒྱུད་དབྱིངས་ནམ་མཁའ་མཉམ་པར་སྣང་། །ས་རྣམས་ཡངས་པ་ཇི་ལྟར་སྔོན་བསྐྱེད་པ། །དེ་བཞིན་ཀུན་ཀྱང་རིན་ཆེན་སྒོ་ནས་བརྗོད། །དང་པོའི་ས་ནི་དགའ་བའི་ཤུགས་ཀྱི་ཡུལ། །ཆོས་དབྱིངས་ཀུན་གྱི་བདེ་གཤེགས་རྣམས་མཐོང་ཞིང་། །གཞལ་མེད་བསྐལ་པར་དྲི་མེད་ཡོངས་གསུངས་པས། །ཆོས་དབྱིངས་ཡངས་ལ་ཡེ་ཤེས་རབ་ཏུ་བྱུང་། །ཐམས་ཅད་ཆོས་ལ་དྲི་མྱེད་ས་གཉིས་ཏེ། །བསྐལ་པ་རྒྱ་མཚོ་མང་པོར་རྣམ་སྤྱད་ཅིང་། །རྒྱལ་བ་ཚད་མེད་རྒྱ་མཚོ་མཆོད་བྱས་ནས། །འགྲོ་བ་ཚད་མེད་དྲི་མེད་སྦྱངས་པས་བྱུང་། །བསོད་ནམས་དཀྱིལ་འཁོར་འོད་ནི་ས་གསུམ་སྟེ། །སྙིང་པོ་བཟོད་པའི་དཀྱིལ་འཁོར་ལྷག་མཐོང་བརྟེན། །གང་དུ་དེ་སྐྱེས་རིན་ཆེན་སྒོ་དག་ནས། །ཆོས་ཀྱི་སྤྲིན་ནི་རྒྱ་ཆེན་རབ་ཏུ་ཐོས། །འོད་འཕྲོ་རྒྱ་མཚོ་ལྡན་པ་གཞལ་མེད་ས། །མཐུ་ཡི་འཁོར་འོད་སྙིང་པོ་སྙིང་རྗེ་སྟེ། །ཞིང་རྣམས་ཀུན་ཏུ་སྒྲིབ་དང་མཉམ་པའི་ལུས། །འགྲོ་བའི་ཉོན་མོངས་ཀུན་ནས་རྣམ་སྦྱངས་པའོ། །དགའ་རྒྱལ་སྙིང་པོ་མཉམ་དབྱིངས་མཉམ་ཉིད་དེ། །ཞིང་རྣམས་ཀུན་ཏུ་འགྲོ་ཞིང་ཞི་ལ་གཞོལ། །ས་རྣམས་ཆོས་ཡུལ་ཀུན་ནས་རབ་ཏུ་སྐྱེས། །དེ་ཡང་རྣམ་དག་ཇི་བཞིན་རྒྱལ་བས་བསྟན། །ཤེས་རབ་རྒྱ་མཚོ་ཡངས་པའི་སྤྲིན་ལ་སྤྱོད། །འབྱམ་ཀླས་ཆོས་ཀྱི་མཐར་ཐུག་རྣམ་པ་ཀུན། །ཞིང་རྣམས་ཀུན་ལ་མངོན་སུམ་ནམ་མཁའ་འདྲ། །དེ་འབྱུང་བྱང་ཆུབ་ཤིང་ཆེན་འདི་ལས་གྲག །ཆོས་དབྱིངས་
མཐའ་དང་མཉམ་པའི་ལུས་ཅན་ཏེ། །འགྲོ་བ་ཀུན་འགེངས་འགྲོ་བ་ཀུན་སྣང་བྱེད། །འབྱམ་ཀླས་ཐབས་ཀྱི་སྒོ་ནས་རྣམ་པར་དག །རིང་དུ་སོང་མཆོག་དེ་ནི་རྒྱལ་བས་བསྟན། །ཐམས་ཅད་ཆོས་དང་སྨོན་ལམ་སྤྱོད་མང་དང་། །ཞིང་རྣམས་རྒྱ་མཚོའི་དབྱིངས་ཀྱང་མཉམ་རྟོགས་པས། །བསྐལ་པ་ཀུན་ཏུ་འགྲོ་མཆོག་མི་གཡོ་སྟེ། །གཞལ་མེད་ས་དེའི་སྤྲིན་ཀྱང་རབ་ཏུ་སྒྲོག །ཚད་མེད་ཡུལ་ཅན་སྟོབས་ཀྱིས་རབ་ཏུ་སྣང་། །རྫུ་འཕྲུལ་ཆོས་ཀྱིས་འགྲོ་ཞིང་སྟོབས་ལ་འཇུག །འདི་ནི་རྡུལ་མེད་དགེ་བའི་བློ་གྲོས་ས། །བསྐལ་པ་རྒྱ་མཚོར་བྱང་ཆུབ་ཤིང་ལས་བརྗོད། །ཆོས་ཀྱི་སྤྲིན་ནི་རྒྱ་ཆེན་ས་བཅུ་སྟེ། །དུས་རྣམས་ཀུན་འགེངས་ནམ་མཁའི་རང་བཞིན་འདྲ། །སངས་རྒྱས་ཡུལ་གྱི་སྒྲ་དང་དབྱངས་ཀུན་ཏུ། །རྒྱལ་བའི་བྱིན་གྱིས་འདི་ལས་རབ་ཏུ་གྲག །དེ་ནས་བྱང་ཆུབ་སེམས་དཔའ་རྣམ་པར་གནོན་པ་གཏི་མུག་མེད་པའི་འོད་ཟེར་གྱི་རྒྱལ་མཚན་གྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ནས། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྣམ་པ་དུ་མར་འཁོར་རྣམས་གནས་པ་ནི། །དད་པ་སྣ་ཚོགས་ཡོངས་སུ་དག་པའི་སེམས། །རྒྱན་དང་ཡུལ་རྣམས་ཀུན་ལ་རབ་ཏུ་ཞུགས། །དེ་དག་སངས་རྒྱས་ཡེ་ཤེས་འཇུག་པར་འགྱུར། །ཕན་ཚུན་སྨོན་ལམ་རྣམ་དག་སྤྱོད་ཡུལ་ཏེ། །དག་པ་མཐའ་ཡས་བྱ་བ་རབ་ཏུ་བྱས། །དེ་བཞིན་གཤེགས་པའི་རྣམ་འཕྲུལ་ཐམས་ཅད་ཀྱང་། །གཞན་དང་གཞན་གྱི་སྒོ་ནས་རབ་ཏུ་མཐོང་། །བདེ་གཤེགས་ཆོས་ཀྱི་སྐུ་ལ་ཞུགས་པ་དག །ལ་ལས་རྒྱལ་བའི་ཆོས་སྐུ་དེ་ཉིད་ལ། །ཀུན་ཏུ་སྤྲིན་འདྲ་གཞལ་དུ་མེད་པ་ཡི། །མཐའ་ཡས་ཆོས་ཀྱི་རང་བཞིན་ཆོས་ཉིད་མཐོང་། །ལ་ལས་རྒྱལ་བའི་གཟུགས་སྐུ་དེ་ཉིད་ལ། །ཕྱོགས་བཅུ་ཀུན་ཏུ་རྣམ་པར་འཕྲུལ་མཛད་ཅིང་། །ཡོན་ཏན་མཐའ་ཡས་འོད་སྤྲིན་རབ་འབར་བ། །འགྲོ་བ་ངང་ཚུལ་སྤྲིན་དུ་གྱུར་པར་མཐོང་། །ལ་ལ་རྒྱལ་བའི་ཡེ་ཤེས་ཆགས་མེད་འཇུག །དུས་གསུམ་མཉམ་ཉིད་མཁའ་དང་འདྲ་བའི་སྐུ། །འགྲོ་བ་ཀུན་
གྱི་བསམ་པའི་ཚུལ་འབྱུང་བའི། །སངས་རྒྱས་སྟོབས་ལ་རབ་ཏུ་འཇུག་པ་མཐོང་། །སངས་རྒྱས་གསུང་ནི་ཐོགས་པ་མེད་འབྱུང་སྟེ། །ཕྱོགས་ཀུན་ཞིང་རྣམས་མ་ལུས་རྒྱས་འགྱུར་ཞིང་། །འགྲོ་བ་སྣོད་བཞིན་བསྐུལ་བར་བྱེད་པ་ཡི། །དེ་བཞིན་གཤེགས་པའི་གསུང་ལ་ལ་ལ་འཇུག །ལ་ལ་སངས་རྒྱས་སྣང་བ་སྣ་ཚོགས་འཇུག །སྣ་ཚོགས་སྣང་བས་འགྲོ་བ་ཀུན་བཀང་ཞིང་། །རྒྱལ་བའི་རྫུ་འཕྲུལ་ཀུན་ཏུ་སྣང་མཛད་པའི། །སངས་རྒྱས་འོད་ནི་ལ་ལས་དེར་ཡང་མཐོང་། །བ་སྤུའི་སྒོ་ནས་འོད་ཟེར་རབ་བཀྱེ་བའི། །འོད་ཟེར་རྒྱ་མཚོའི་སྤྲིན་ལ་ལ་ལ་འཇུག །སྔན་ཅད་རྒྱལ་བའི་སྤྱོད་པ་བསྟན་པ་ལ། །ལ་ལ་དགའ་ཞིང་རྒྱལ་བ་ཤེས་པར་བྱེད། །ལ་ལས་བསོད་ནམས་སྣ་ཚོགས་མཚན་གྱི་རྣམས། །བདེ་གཤེགས་བསོད་ནམས་འབྱུང་བ་ཇི་བཞིན་མཐོང་། །ཕ་རོལ་ཕྱིན་པ་རྒྱ་མཚོ་སྦྱོང་བའི་ཚེ། །ཇི་ལྟར་དག་གྱུར་མཚན་ཀྱང་ལ་ལས་མཐོང་། །སྒོ་རྣམས་ཀུན་ནས་རྒྱལ་བ་ཚད་མྱེད་དེ། ། མཐའ་དང་དབུས་མེད་ཆོས་ཀྱི་དབྱིངས་བཀང་ཞིང་། །སངས་རྒྱས་བྱིན་རླབས་ཀུན་རབ་བརྗོད་པ་ཀུན། །རྣམ་འཕྲུལ་སངས་རྒྱས་ཡུལ་ནི་ལ་ལས་མཐོང་། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས། འཇིག་རྟེན་གྱི་ཁམས་མེ་ཏོག་གི་རྒྱན་གྱིས་བརྒྱན་པའི་གཞི་དང་སྙིང་པོ་རྒྱ་མཚོ་ཐམས་ཅད་རྣམ་པ་དྲུག་ཏུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །འཇིག་རྟེན་གྱི་དབང་པོ་དེ་དག་ཐམས་ཅད་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་དུ་མངོན་པར་རབ་ཏུ་ཕབ་པོ། །འདི་ལྟར་སྤོས་ཀྱི་མེ་ཏོག་སྣ་ཚོགས་ཀྱི་སྤྲིན་གྱི་ཆར་ཐམས་ཅད་རབ་ཏུ་ཕབ་པོ། །རིན་པོ་ཆེ་སྣ་ཚོགས་
ཐམས་ཅད་ཀྱི་སྤྲིན་དང་། རིན་པོ་ཆེའི་འོད་འཕྲོ་བའི་པདྨོའི་དྲ་བ་ཐམས་ཅད་ཀྱི་སྤྲིན་དང་། ནོར་བུ་རིན་པོ་ཆེའི་འོད་ཀྱི་དཀྱིལ་འཁོར་ཁ་དོག་མཐའ་ཡས་པའི་སྤྲིན་དང་། རིན་པོ་ཆེ་ཁ་དོག་སྣ་ཚོགས་དང་། མུ་ཏིག་ཐམས་ཅད་ཀྱི་སྤྲིན་དང་། སྤོས་དང་ཙནྡན་དང་། རིན་པོ་ཆེ་ཐམས་ཅད་ཀྱི་སྤྲིན་དང་། རིན་པོ་ཆེའི་གདུགས་ཐམས་ཅད་ཀྱི་སྤྲིན་དང་། ནོར་བུའི་རྒྱལ་པོའི་སྒྲ་དབྱངས་བཟང་པོ་ཡིད་དུ་འོང་བའི་སྤྲིན་དང་། ནོར་བུའི་ཉི་མའི་འོད་ཟེར་གྱི་ཕྲེང་བ་མང་པོའི་སྤྲིན་དང་། རིན་པོ་ཆེའི་འོད་ཟེར་གྱི་མཛོད་ཐམས་ཅད་ཀྱི་སྤྲིན་དང་། རང་རང་གི་ལུས་ལས་རྒྱན་ཐམས་ཅད་འཕྱང་བའི་སྤྲིན་དང་། དེ་ལྟ་བུ་དག་ལ་སྩོགས་པ་འཇིག་རྟེན་གྱི་དབང་པོ་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་བསམ་གྱིས་མི་ཁྱབ་པའི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་ཐམས་ཅད་དུ་མངོན་པར་ཕབ་པོ། །ཇི་ལྟར་འཇིག་རྟེན་གྱི་ཁམས་འདིར་འཇིག་རྟེན་གྱི་དབང་པོ་རྣམས་རབ་ཏུ་དགའ་བར་གྱུར་པ་དེ་བཞིན་དུ། གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོའི་འཇིག་རྟེན་གྱི་དབང་པོ་རྣམས་རེ་རེས་ཀྱང་མཆོད་པ་མངོན་པར་བསྒྲུབ་པའི་སྤྲིན་གྱི་ཆར་དེ་བཞིན་གཤེགས་པའི་འཁོར་གྱི་དཀྱིལ་འཁོར་རྒྱ་མཚོ་དག་ཏུ་རབ་ཏུ་ཕབ་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ན་ཡང་འཇིག་རྟེན་གྱི་དབང་པོ་རྣམས་མོས་པ་གཞན་དང་གཞན་དང་། དམིགས་པ་གཞན་དང་གཞན་དང་། །ཏིང་ངེ་འཛིན་གྱི་ཚུལ་གྱི་སྒོ་རྒྱ་མཚོ་གཞན་དང་གཞན་དང་། ཚོགས་གཞན་དང་གཞན་དང་། ཡང་དག་པར་སྒྲུབ་པ་གཞན་དང་གཞན་དང་། དགའ་བའི་ཤུགས་ཀྱིས་སྤྱོད་པ་གཞན་དང་གཞན་དང་། ཕྱོགས་ཀྱི་ཚུལ་གཞན་དང་གཞན་དང་། ཆོས་ཀྱི་ཚུལ་ལ་འཇུག་པ་གཞན་དང་གཞན་དང་། དེ་བཞིན་གཤེགས་པའི་ཡུལ་དང་། བྱིན་གྱི་རླབས་ལ་འཇུག་པ་གཞན་དང་གཞན་དང་། ཡུལ་དང་སྟོབས་ལ་འཇུག་པ་གཞན་དང་གཞན་དང་། རྣམ་པར་ཐར་པའི་ཚུལ་རྒྱ་མཚོའི་སྒོ་གཞན་དང་གཞན་གྱིས། དེ་བཞིན་གཤེགས་པའི་སྙིང་པོ་བྱང་ཆུབ་ལ་བཞུགས་པ་ལ་ཁོང་
དུ་ཆུད་པར་བྱེད་དོ། །འདི་ན་ཇི་ལྟ་བ་བཞིན་ཕྱོགས་བཅུའི་ཆོས་ཀྱི་དབྱིངས་རྒྱ་མཚོའི་ནམ་མཁའི་དབྱིངས་ཀྱི་མཐའ་ཀླས་པའི་འཇིག་རྟེན་གྱི་ཁམས་རྒྱ་མཚོ་ཐམས་ཅད་ན་ཡང་དེ་བཞིན་ནོ། །འཇིག་རྟེན་གྱི་དབང་པོ་ཐམས་ཅད་ཀྱི་རྒྱན་གྱི་ཚུལ་རབ་ཏུ་བྱུང་བ་ཞེས་བྱ་བའི་སྟེ་ལེའུ་དང་པོའོ།། །།