གཉིས་པ། དེ་བཞིན་གཤེགས་པའི་ལེའུ།
དེ་ནས་བྱང་ཆུབ་སེམས་དཔའ་དེ་དག་དང་། འཇིག་རྟེན་གྱི་དབང་པོ་དེ་དག་འདི་སྙམ་དུ་སེམས་པར་གྱུར་ཏེ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡུལ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་བྱིན་གྱི་རླབས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱོད་ཡུལ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྟོབས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མྱི་བསྙེངས་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཏིང་ངེ་འཛིན་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་རྣམ་པར་འཕྲུལ་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མངའ་ཆེན་པོ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་མི་འཕྲོགས་པ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྤྱན་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྙན་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཤངས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ལྗགས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་སྐུ་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་
རྣམས་ལ་སངས་རྒྱས་ཀྱི་ཐུགས་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་འོད་ཟེར་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་གསུང་ནི་ཇི་ལྟ་བུ་ཞིག་མངའ། སངས་རྒྱས་བཅོམ་ལྡན་འདས་རྣམས་ལ་སངས་རྒྱས་ཀྱི་ཡེ་ཤེས་ནི་ཇི་ལྟ་བུ་ཞིག་མངའ། ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་དག་ཏུ་སངས་རྒྱས་བཅོམ་ལྡན་འདས་ཐམས་ཅད་བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་འཇུག་པ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཚོགས་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཐེག་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་རབ་ཏུ་གནས་པ་རྒྱ་མཚོ་ཐམས་ཅད་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་སྤྱོད་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་འབྱུང་བ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་མངོན་པར་ཤེས་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ཕ་རོལ་ཏུ་ཕྱིན་པ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་ས་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་ཐམས་ཅད་ལ་སྨོན་ལམ་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བྱང་ཆུབ་སེམས་དཔའ་རྣམས་ལ་ཡེ་ཤེས་རྒྱ་མཚོ་རྣམས་ནི་ཇི་ལྟ་བུ་ཞིག་ཏུ་ཡོངས་སུ་སྟོན། བཅོམ་ལྡན་འདས་ཀྱིས་བདག་ཅག་ལ་ཡང་ཐུགས་བརྩེ་བ་ཉེ་བར་བཟུང་སྟེ། བྱང་ཆུབ་སེམས་དཔའ་རྣམས་ཀྱི་བསམ་པ་ཇི་ལྟ་བ་བཞིན་དུ་
འཇིག་རྟེན་གྱི་ཁམས་རྒྱ་མཚོ་རྣམས་ཀྱང་བསྟན་པ་མཛད་གྲང་། སེམས་ཅན་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་ཕ་རོལ་ཏུ་ཕྱིན་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་རྣམ་པར་ཐར་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་རྣམ་པར་འཕྲུལ་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་སྤྲུལ་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་ཤིན་ཏུ་བསྟན་པ་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་མཚན་རྒྱ་མཚོ་རྣམས་ཀྱང་བསྟན་པ་མཛད་གྲང་། སངས་རྒྱས་ཀྱི་སྐུ་ཚེའི་ཚད་རྒྱ་མཚོ་རྣམས་ཀྱང་བསྟན་པ་མཛད་གྲང་། དེ་ནས་བྱང་ཆུབ་སེམས་དཔའ་དེ་དག་གི་བྱིན་རླབས་ཀྱིས། མཆོད་པའི་དཀྱིལ་འཁོར་གྱི་སྤྲིན་དེ་དག་ལས་ཚིགས་སུ་བཅད་པ་འདི་དག་བྱུང་ངོ་། །མཐའ་ཡས་རྒྱ་ཆེན་བསྐལ་པར་རབ་སྤྱད་དེ། །བྱང་ཆུབ་ཤིང་དྲུང་རང་བྱུང་ཡང་དག་སྐྱེས། །ཕྱི་མཐའི་བསྐལ་པར་འགྲོ་བའི་སྤྲིན་གྱུར་པ། །དེ་བཞིན་གཤེགས་པས་སྐུ་ནི་བྱིན་གྱིས་བརླབས། །འགྲོ་བ་མ་ལུས་ཀུན་གྱི་ཐེ་ཙོམ་གཅོད། །མོས་པའི་སྟོབས་ནི་ཡངས་པ་རབ་ཏུ་བསྐྱེད། །སེམས་ཅན་སྡུག་བསྔལ་མཐའ་ཡས་ཞི་བར་མཛད། །སངས་རྒྱས་བདེ་ལ་འགྲོ་བ་ཐམས་ཅད་འགོད། །བྱང་ཆུབ་སེམས་དཔའ་མཐའ་ཡས་ཞིང་རྡུལ་སྙེད། །དེ་བཞིན་གཤེགས་པ་བལྟ་ཞིང་ཀུན་ནས་གནས། །དེ་དག་བསམ་པ་སྤྱོད་ཡུལ་ཇི་བཞིན་དུ། །ཐེ་ཙོམ་བསལ་བར་ཆོས་རྣམས་རབ་བསྟན་གསོལ། །རྒྱལ་བ་ཀུན་གྱི་ས་ནི་ཇི་ལྟ་བུ། །དེ་བཞིན་གཤེགས་པའི་ཡུལ་གྱི་རྒྱུད་རྣམས་དང་། །སངས་རྒྱས་བྱིན་རླབས་མཐའ་དང་དབུས་མེད་པ། །དེ་དག་ཚུལ་ནི་རྣམ་དག་བསྟན་དུ་གསོལ། །དེ་བཞིན་གཤེགས་པའི་སྤྱོད་ཡུལ་ཅི་ཡིས་འཇུག །རྒྱལ་བའི་མཁྱེན་ལ་ཇི་ལྟར་འཇུག་པ་དང་། །ཡེ་ཤེས་རྒྱ་ཆེན་མཐུ་སྟོབས་རྣམ་པར་སྦྱངས། །རྒྱལ་སྲས་ཀུན་ལ་ཡང་དག་
བསྟན་དུ་གསོལ། །སངས་རྒྱས་ཏིང་འཛིན་ཇི་ལྟར་མཐའ་ཡས་དང་། །མི་སྙེམས་ཆོས་ཉིད་ཇི་ལྟར་ནམ་སྦྱངས་དང་། ། རྫུ་འཕྲུལ་མཐུ་ཡང་མཐའ་དང་དབུས་མེད་པ། །འགྲོ་བའི་བསམ་པ་རྣམས་ལ་བསྒྲག་ཏུ་གསོལ། །ཇི་ལྟར་ཆོས་རྒྱལ་ཕོ་བྲང་མངའ་མཛད་ཅིང་། །རྒྱལ་བའི་སྤྱོད་ཡུལ་ཇི་ལྟར་མི་འཕྲོགས་དང་། །སངས་རྒྱས་ཆོས་གཞན་རྒྱ་ཆེན་དེ་དག་ཀྱང་། །ཐུགས་བརྩེའི་སླད་དུ་ཡང་དག་བསྟན་དུ་གསོལ། །རྒྱལ་བའི་སྤྱན་ནི་ཇི་ལྟར་ཚད་མྱེད་ཅིང་། །སྙན་དང་ཤངས་དང་དེ་བཞིན་ལྗགས་དང་སྐུ། །སངས་རྒྱས་ཐུགས་ཀྱང་ཇི་ལྟར་མཐའ་ཡས་པ། །འདི་དག་ཚུལ་ལ་འཇུག་པ་བསྟན་དུ་གསོལ། །ཞིང་རྣམས་རྒྱ་མཚོ་ཇི་ལྟར་སེམས་ཅན་ཁམས། །ཆོས་དབྱིངས་ཚུལ་རྣམས་རྒྱ་མཚོ་དེ་དག་དང་། །སངས་རྒྱས་རྒྱ་མཚོ་མཐའ་དང་དབུས་མེད་པ། །འདི་དག་རྒྱལ་བའི་སྲས་ལ་བསྟན་དུ་གསོལ། །ཕ་རོལ་ཕྱིན་པ་རྒྱ་མཚོ་བསམ་ཡས་དང་། །རྣམ་པར་ཐར་ལ་འཇུག་ཚུལ་རྒྱ་མཚོ་དང་། །ཆོས་རྣམས་ཀུན་གྱི་ཚུལ་རྣམས་རྒྱ་མཚོ་དག །བྱང་ཆུབ་སྙིང་པོར་ཐམས་ཅད་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་དེའི་ཚེ་བྱང་ཆུབ་སེམས་དཔའ་དེ་དག་གི་སེམས་ཀྱི་ཡོངས་སུ་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས། ཞལ་གྱི་སྒོ་ཚེམས་ཀྱི་མཚམས་ཀྱི་གསེབ་ནས་འོད་ཟེར། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རབ་ཏུ་བཀྱེ་བ་འདི་ལྟ་སྟེ། རིན་པོ་ཆེའི་ཟེ་བ་རྣམ་པར་སྣང་བ་ཞེས་བྱ་བའི་འོད་ཟེར་དང་། འདི་ལྟ་སྟེ་ཆོས་ཀྱི་དབྱིངས་སུ་དབྱངས་སྣ་ཚོགས་ཀྱིས་རྒྱན་བྱེད་པ་ཞེས་བྱ་བའི་འོད་ཟེར་དང་། འདི་ལྟ་སྟེ་འོད་ཤིན་ཏུ་ཕྲ་བའི་སྤྲིན་ཀུན་ནས་ལྡིང་བ་ཞེས་བྱ་བའི་འོད་ཟེར་དང་། འདི་ལྟ་སྟེ་ཕྱོགས་བཅུའི་སངས་རྒྱས་ཀྱི་རྫུ་འཕྲུལ་དང་སྙིང་པོ་བྱང་ཆུབ་ཀྱི་འོད་ཅེས་བྱ་བའི་འོད་ཟེར་དང་། འདི་ལྟ་སྟེ་རིན་པོ་ཆེ་ཐམས་ཅད་འོད་འཕྲོ་བའི་གདུགས་ཀྱི་སྤྲིན་ཅེས་བྱ་བའི་འོད་ཟེར་དང་། འདི་ལྟ་སྟེ་རྣམ་པར་སྣང་བས་ཆོས་ཀྱི་དབྱིངས་རབ་ཏུ་སྣང་བའི་འོད་ཅེས་བྱ་བའི་འོད་ཟེར་དང་། འདི་ལྟ་སྟེ་སངས་རྒྱས་ཀྱི་ཞིང་ཐམས་
ཅད་དུ་འབྱུང་ཞིང་འཁྱིལ་བའི་རྒྱན་ཅེས་བྱ་བའི་འོད་ཟེར་དང་། འདི་ལྟ་སྟེ་རིན་པོ་ཆེ་རྡོ་རྗེ་དྲི་མ་མེད་པ་མང་པོའི་རྒྱལ་མཚན་ཞེས་བྱ་བའི་འོད་ཟེར་དང་། འདི་ལྟ་སྟེ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དུ་ཉེ་བར་འགྲོ་བའི་རྒྱན་ཅེས་བྱ་བའི་འོད་ཟེར་དང་། འདི་ལྟ་སྟེ་སངས་རྒྱས་ཐམས་ཅད་ཀྱི་མཚན་གྱི་འཁོར་ལོའི་སྒྲ་རབ་ཏུ་སྒྲོག་པ་ཞེས་བྱ་བའི་འོད་ཟེར་དང་། དེ་དག་ལ་སྩོགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་རབ་ཏུ་བཀྱེ་སྟེ། འོད་ཟེར་དེ་དག་རེ་རེ་ཞིང་འཁོར་གྱི་འོད་ཟེར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དོ། །འོད་ཟེར་དེ་དག་རེ་རེ་ཞིང་ཡང་རིན་པོ་ཆེ་ཐམས་ཅད་ཀྱི་ཁ་དོག་ཤིན་ཏུ་སྟོན་པ་དག་སྟེ། དེ་དག་རབ་ཏུ་འཕྲོས་ནས་ཕྱོགས་བཅུར་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་རབ་ཏུ་སྣང་བར་བྱས་ཏེ། བྱང་ཆུབ་སེམས་དཔའ་དེ་དག་གིས་ཀྱང་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་འཇིག་རྟེན་གྱི་ཁམས་རྒྱ་མཚོ་ནས། འོད་ཟེར་གྱི་སྒོ་དེ་དག་ཐམས་ཅད་ཀྱི་མཐུས་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཇིག་རྟེན་གྱི་ཁམས་རྒྱ་མཚོ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་མཐོང་བར་གྱུར་ཏོ། །འོད་ཟེར་དེ་དག་ཐམས་ཅད་ཀྱི་སྒོ་ནས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ཚིགས་སུ་བཅད་པ་འདི་དག་བྱུང་བར་གྱུར་ཏོ། །བསྐལ་པ་རྒྱ་མཚོ་མཐའ་ཡས་སྤྱོད་སྤྱད་དེ། །ཕྱོགས་རྣམས་རྒྱ་མཚོར་སངས་རྒྱས་ཀུན་ཀྱང་མཆོད། །སེམས་ཅན་རྒྱ་མཚོ་རྣམ་པར་དག་བྱས་ནས། །རྣམ་པར་སྣང་མཛད་བྱང་ཆུབ་མངོན་སངས་རྒྱས། །ཕྱོགས་རྣམས་ཀུན་ཏུ་སྣང་ཞིང་མངོན་པར་མཛེས། །སྤུ་རྣམས་ཀུན་ནས་སྤྲུལ་པའི་སྤྲིན་ཀྱང་འགྱེད། །དེས་ནི་སེམས་ཅན་སྣོད་བཞིན་བསྐུལ་བྱས་ནས། །བྱང་ཆུབ་སྦྱོར་བ་ཆགས་མེད་རྣམ་པར་དག །སྲིད་པའི་རྒྱུད་ན་སྔན་ཅད་འཁོར་བའི་ཚེ། །རྒྱལ་བས་སེམས་ཅན་ཡོངས་སུ་སྨིན་མཛད་པ། །དེ་དག་སྐད་ཅིག་གཅིག་གིས་རབ་ཏུ་བགྲོལ། །སངས་རྒྱས་རྣམ་འཕྲུལ་འདི་དག་མཐའ་ཡས་
སོ། །རྒྱན་རྣམས་སྣ་ཚོགས་ཀུན་ཏུ་འོད་ཀྱང་སྣང་། །བྱང་ཆུབ་ཤིང་ནི་ཡལ་ག་རིན་ཆེན་འཕྱང་། །འོད་རྣམས་བཀྱེ་བ་ཀུན་ཏུ་རྣམ་པར་བརྒྱན། །བྱང་ཆུབ་བསམ་གྱིས་མྱི་ཁྱབ་དེ་སངས་རྒྱས། །ཕྱོགས་རྣམས་ཀུན་ཏུ་སྒྲ་ནི་རབ་ཏུ་སྒྲོག །སེམས་ཅན་ཀུན་གྱི་སེམས་བཞིན་ཚིམ་བྱས་ཏེ། །སྣ་ཚོགས་ཐབས་ཀྱི་སྒོ་ནས་རྣམ་པར་འདུལ། །དེ་ལས་ཆོས་ཉིད་ཞི་སྒྲ་རབ་ཏུ་འབྱུང་། །ཞིང་རྣམས་སྟོང་གི་རྡུལ་སྙེད་སྔན་ཅད་དུ། །སྤྱོད་ཚེ་ཕ་རོལ་ཕྱིན་ཀུན་རྒྱས་པར་མཛད། །སྟོབས་རྣམས་ཀུན་ལ་སངས་རྒྱས་རབ་བཞུགས་ཀྱང་། །རྒྱལ་བ་དེའི་ཞལ་ལྟར་ཀུན་ཀྱང་དེང་། །ཞིང་གི་རྡུལ་སྙེད་ཕྱོགས་རྣམས་ཐམས་ཅད་ནས། །རྒྱལ་སྲས་མང་པོ་རབ་ཏུ་དགའ་སྟེ་ལྷགས། །མཆོད་པ་སྣ་ཚོགས་ཆར་པ་རབ་འབེབས་ཤིང་། །ཐམས་ཅད་འཁོད་དེ་རྒྱལ་བ་མངོན་སུམ་ལྟ། །གསུང་དབྱངས་གཅིག་ལས་མཐའ་ཡས་མདོ་ཡི་རྣམས། །རྒྱ་མཚོ་དག་ཀྱང་སངས་རྒྱས་ཤིན་ཏུ་སྟོན། །འགྲོ་ཀུན་ཡིད་བཞིན་ཆོས་ཀྱི་ཆར་འབེབས་ཀྱིས། །རྐང་གཉིས་གཙོ་བོ་དེ་ལ་བལྟར་ཡང་འདོང་། །དུས་གསུམ་རྒྱལ་བའི་སྨོན་ལམ་གང་ཡོད་པ། །སྐད་ཅིག་ཐུགས་ལ་དེ་དག་མངོན་སུམ་སྟེ། །རྒྱལ་བ་བྱང་ཆུབ་ཤིང་དྲུང་སྟོན་མཛད་ཀྱིས། །རྒྱལ་བའི་དྲུང་དུ་མྱུར་དུ་འདོང་བར་གྱིས། །སངས་རྒྱས་རྣམ་པར་སྣང་མཛད་ཡེ་ཤེས་མཚོ། །འོད་ཟེར་ཀུན་གྱི་སྒོ་ནས་རབ་ཏུ་སྣང་། །ཆོས་ཉིད་ཇི་ལྟ་ཅི་འདྲ་དེ་དག་ལྟོས། །སངས་རྒྱས་འགྲོ་ཀུན་མངོན་སུམ་ཆོས་སྟོན་ཏོ། །དེའི་ཚེ་འཇིག་རྟེན་གྱི་ཁམས་རྒྱ་མཚོ་དེ་དག་ནས། དེ་བཞིན་གཤེགས་པའི་འོད་ཟེར་གྱིས་ཡང་དག་པར་བསྐུལ་བའི་རྣམས། བྱང་ཆུབ་སེམས་དཔའ་རང་རང་གི་འཁོར་གྱི་དཀྱིལ་འཁོར་རྒྱ་མཚོ་དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་གང་ན་བ་དེར་འོང་བར་གྱུར་ཏེ། འདི་ལྟར་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་དང་འདབ་ཆགས་སུ། ཤར་ཕྱོགས་ལོགས་
ན་འཇིག་རྟེན་གྱི་ཁམས་རྒྱ་མཚོ་པདྨོའི་དཔལ་དྲི་མ་མྱེད་པར་སྣང་བའི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་རིན་པོ་ཆེའི་ཕྲེང་བ་རྡོ་རྗེའི་སྙིང་པོ་ཞེས་བྱ་བ་ན། དེ་བཞིན་གཤེགས་པ་ཆོས་ཀྱི་ཆུ་བོ་རྣམ་པར་སངས་རྒྱས་པ། ནམ་མཁའ་མཐའ་ཡས་པའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་ཆོས་ཀྱི་དཔལ་པདྨོ་རྣམ་པར་བལྟ་བའི་རྒྱལ་མཚན་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་རྒྱ་མཚོ་དེ་ནས་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། བྱང་ཆུབ་སེམས་དཔའི་ལུས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་རིན་པོ་ཆེའི་ཆར་གྱི་འོད་ཟེར་པདྨོའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་རི་བོའི་ཟོམ་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཉི་མའི་འཁོར་ལོའི་ལུས་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་མེ་ཏོག་གི་ཕྲེང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སིལ་སྙན་སྒྲ་ཐམས་ཅད་འབྱིན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཕྱེ་མའི་ཤིང་གི་མཛོད་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་དང་བདུག་སྤོས་གཟུགས་ཐམས་ཅད་ཡོངས་སུ་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་ཐམས་ཅད་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་མཆོད་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ཤར་ཕྱོགས་སུ་བརྟེན་ཏེ།
མེ་ཏོག་སྣང་བ་སྣ་ཚོགས་ཀྱི་སྙིང་པོ་ཅན་གྱི་སེང་གེའི་ཁྲི་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ལྷོ་ཕྱོགས་ན། འཇིག་རྟེན་གྱི་ཁམས་རྒྱ་མཚོ་རིན་པོ་ཆེ་ཐམས་ཅད་སྣང་བས་རྣམ་པར་བརྒྱན་པའི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་འོད་མཐའ་ཡས་པའི་དཀྱིལ་འཁོར་གྱི་རྒྱན་ན། དེ་བཞིན་གཤེགས་པ་ཀུན་ནས་མཁྱེན་པའི་འོད་དཔལ་གྱི་རི་བོའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཆོས་རྣམ་པར་སྣང་བའི་བློ་གྲོས་ཤེས་བྱ་བ་བྱང་ཆུབ་སེམས་དཔའི་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཁོར་གྱི་དཀྱིལ་འཁོར་དེ་ནས་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། ནོར་བུའི་རྒྱལ་པོ་རྒྱན་གྱི་ཡུལ་ཐམས་ཅད་ཀྱིས་རྣམ་པར་གསལ་བར་བྱས་པའི་སྙིང་པོའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། ནོར་བུའི་རྒྱལ་པོ་ཀུན་ནས་སྣང་བ་རིན་པོ་ཆེའི་རྒྱན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་རིན་པོ་ཆེ་འོད་འཕྲོ་བ་རབ་ཏུ་འབར་ཞིང་སངས་རྒྱས་ཀྱི་མཚན་ཤིན་ཏུ་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་ཀུན་ནས་སྒྲ་འབྱིན་ཅིང་སངས་རྒྱས་ཀྱི་ཆོས་ཐམས་ཅད་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་ཤིང་གི་ཡལ་ག་སྣ་ཚོགས་ཀྱི་སྙིང་པོ་བྱང་ཆུབ་ཀྱི་རྒྱན་བྱེད་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་སྒོ་ཀུན་ནས་རིན་པོ་ཆེའི་འོད་ཟེར་དང་། སངས་རྒྱས་ཀྱི་སྤྲུལ་པས་སྣང་བར་བྱེད་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་རྒྱན་ཐམས་ཅད་དང་མ་འདྲེས་པར་འཁོར་གྱི་དཀྱིལ་འཁོར་དུ་གཟུགས་བརྙན་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་
བརླབ་པ་དང་། ནོར་བུའི་རྒྱལ་པོ་འོད་འཕྲོ་བ་ཤིན་ཏུ་སྡུག་པའི་སྒྲོན་མས་སངས་རྒྱས་ཐམས་ཅད་ཀྱི་ཡུལ་རྗེས་སུ་སྒྲོག་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་སངས་རྒྱས་ཀྱི་ཞིང་བསམ་གྱིས་མྱི་ཁྱབ་པ་དང་། དེ་བཞིན་གཤེགས་པའི་གཞལ་མེད་ཁང་གི་གཟུགས་བརྙན་ཡང་དག་པར་སྟོན་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་རིན་པོ་ཆེ་སྣ་ཚོགས་ཀྱི་ཚོན་གྱིས་དུས་གསུམ་གྱི་སངས་རྒྱས་ཀྱི་སྐུའི་གཟུགས་བརྙན་རྣམ་པར་སྣང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་ནོར་བུའི་རྒྱལ་པོའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་མོ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས། ལྷོ་ཕྱོགས་སུ་བརྟེན་ནས། ཨིན་དྲ་ནཱི་ལ་དང་། འཛམ་བུ་ནཱ་ད་དང་། པདྨ་རཱ་ག་སྣ་ཚོགས་ཀྱི་སྙིང་པོ་ཅན་གྱི་སེང་གེའི་ཁྲི་མངོན་པར་སྤྲུལ་ནས། སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ནུབ་ཕྱོགས་ན་འཇིག་རྟེན་གྱི་ཁམས་རྒྱ་མཚོ་རིན་པོ་ཆེའི་འོད་ཡིད་དུ་འོང་བར་རབ་ཏུ་སྣང་བ་ཞེས་བྱ་བ་ཡོད་དེ། འཇིག་རྟེན་གྱི་ཁམས་དེ་དག་ལས་འཇིག་རྟེན་གྱི་ཁམས་གོས་ཀྱི་སྟན་ཡོངས་སུ་འབྱུང་བ་ན། དེ་བཞིན་གཤེགས་པ་སྤོས་མངོན་དུ་སྣང་བའི་ཡོན་ཏན་རིན་པོ་ཆེས་བརྒྱན་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་སྤོས་འོད་འཕྲོ་བའི་རྒྱན་ཟླ་བའི་འོད་ཅེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་། ལྷན་ཅིག་ཏུ་བཅོམ་ལྡན་འདས་གང་ན་བ་དེར་འོང་བར་གྱུར་ཏེ། རིན་པོ་ཆེ་དང་སྤོས་དང་མེ་ཏོག་སྣ་ཚོགས་ཐམས་ཅད་ཀྱི་ཁང་པ་བརྩེགས་པའི་སྤྲིན་གྱི་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། ནོར་བུའི་རྒྱལ་པོ་ཁ་དོག་མཐའ་ཡས་པས་བརྒྱན་པའི་ཁང་པ་བརྩེགས་
པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་སྒྲོན་མ་དང་སྤོས་འོད་འཕྲོ་བའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མུ་ཏིག་ཐམས་ཅད་ཀྱི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་ཐམས་ཅད་ཀྱི་མེ་ཏོག་གི་ཟེ་བའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་ཕྲེང་བས་ཡོངས་སུ་བརྒྱན་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། འོད་ཟེར་གྱི་སྣང་བ་ཕྱོགས་ཀུན་ཏུ་འཕྲོ་བའི་སྙིང་པོ་དང་ལྡན་པའི་ཁང་པ་བརྩེགས་པ་རྒྱན་ཐམས་ཅད་འབྱུང་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་ཚོན་ཐམས་ཅད་ཀྱིས་རབ་ཏུ་བརྒྱན་ཅིང་རྒྱན་དུ་མ་ཡང་དག་པར་སྟོན་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཕྱོགས་ཐམས་ཅད་རྒྱན་གྱིས་རབ་ཏུ་བརྒྱན་པར་ཀུན་ནས་འགེངས་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྒོ་ཀུན་ཏུ་མེ་ཏོག་གི་རྟ་བབས་དང་དྲིལ་བུའི་དྲ་བ་བྲེས་པའི་ཁང་པ་བརྩེགས་པའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་ཁང་པ་བརྩེགས་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས། ནུབ་ཕྱོགས་སུ་བརྟེན་ཏེ། སེང་གེའི་ཁྲི་རིན་པོ་ཆེའི་པདྨོ་ཆེན་པོ་ལོ་མ་སྣ་ཚོགས་གསེར་ལས་བྱས་པའི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་བྱང་ཕྱོགས་ན་འཇིག་རྟེན་གྱི་ཁམས་རྒྱ་མཚོ་བཻ་ཌཱུརྱ་པདྨོའི་འོད་ཀྱི་དཀྱིལ་འཁོར་གྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་
ཁམས་ཀྱི་རྒྱུད་དེ་དག་ལས་འཇིག་རྟེན་གྱི་ཁམས་མེ་ཏོག་ཨུཏྤ་ལའི་རྒྱན་ན་དེ་བཞིན་གཤེགས་པ་ཡེ་ཤེས་ཀྱི་དཔལ་ཀུན་ཏུ་དབྱངས་ཀྱི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་སེང་གེའི་འོད་ཟེར་སྣང་བས་མཐུ་འབྱིན་པའི་བློ་གྲོས་ཤེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་། ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོང་བར་གྱུར་ཏེ། སྤོས་དང་ནོར་བུ་སྣ་ཚོགས་ཐམས་ཅད་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། སྒོ་ཐམས་ཅད་ནས་ལོ་མའི་དོག་པའི་སྤྲིན་འབྱུང་བའི་སྤོས་ཀྱི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཤིང་གི་གཟུགས་ཐམས་ཅད་ལས་རྒྱན་མཐའ་ཡས་པ་ཡོངས་སུ་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མེ་ཏོག་ཐམས་ཅད་ཀྱི་སྤྲིན་རབ་ཏུ་རིན་པོ་ཆེའི་མེ་ཏོག་གི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་འོད་འཕྲོ་བའི་དཀྱིལ་འཁོར་ཐམས་ཅད་ཀྱིས་རྣམ་པར་སྣང་བར་བྱས་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཙནྡན་གྱི་ཕྱེ་མ་ཐམས་ཅད་དང་། བྱང་ཆུབ་སེམས་དཔའི་ལུས་ཕྱེད་ཡང་དག་པར་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྔོན་གྱི་སྙིང་པོ་བྱང་ཆུབ་ཀྱི་རྒྱན་བསམ་གྱིས་མི་ཁྱབ་པར་རབ་ཏུ་སྟོན་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཁ་དོག་མཐའ་ཡས་པའི་གོས་ཀྱི་མཛོད་ཀྱི་ཉི་མས་རྣམ་པར་སྣང་བར་བྱས་པའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྒྲ་དབྱངས་ཐམས་ཅད་རབ་ཏུ་སྒྲོག་ཅིང་ཡིད་དུ་འོང་བའི་སྒྲ་ཀུན་ཏུ་གཏོང་བའི་ཤིང་གི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་ཤིང་གི་སྤྲིན་འཇིག་རྟེན་གྱི་ཁམས་
རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས། བྱང་ཕྱོགས་སུ་བརྟེན་ཏེ། སེང་གེའི་ཁྲི་ནོར་བུ་སྒྲོན་མའི་པདྨོའི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་བྱང་དང་ཤར་གྱི་ཕྱོགས་མཚམས་ན། འཇིག་རྟེན་གྱི་ཁམས་རྒྱ་མཚོ་འཛམ་བུ་ཆུ་ཀླུང་དང་། ཤེལ་གྱི་ཁ་དོག་ཚོན་གྱི་རྒྱལ་མཚན་ཅན་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་རིན་པོ་ཆེའི་རྒྱན་སྣ་ཚོགས་ཀྱི་སྙིང་པོ་ན། དེ་བཞིན་གཤེགས་པ་ཆོས་ཐམས་ཅད་ལ་མི་འཇིགས་པའི་སྒྲོན་མ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་ཆོས་ཀྱི་ཡོན་ཏན་གྱི་མཛོད་མི་ཟད་པའི་དཔལ་གྱི་གཟི་བརྗིད་མར་མེ་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་། ལྷན་ཅིག་ཏུ་འཕགས་ནས་བཅོམ་ལྡན་འདས་གང་ན་བ་དེར་འོང་བར་གྱུར་ཏེ། སེང་གེའི་ཁྲི་རིན་པོ་ཆེའི་ཁ་དོག་མཐའ་ཡས་པའི་པདྨོའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། སེང་གེའི་ཁྲི་ནོར་བུའི་རྒྱལ་པོ་ཀུན་ཏུ་མངོན་པས། རྣམ་པར་སྣང་བར་བྱས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་རྒྱན་མང་པོ་ཐམས་ཅད་ཀྱིས་རབ་ཏུ་བརྒྱན་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་རིན་པོ་ཆེ་འོད་འཕྲོ་བའི་སྒྲོན་མ་སྣ་ཚོགས་ཀྱི་ཕྲེང་བའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་ཕྱོགས་ཀུན་ནས་ཕྲེང་བ་རིན་པོ་ཆེའི་ཆར་འབེབས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་སྤོས་ཀྱི་མེ་ཏོག་པདྨོའི་ཕྲེང་བ་རིན་པོ་ཆེ་ཐམས་ཅད་ཀྱི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་སངས་
རྒྱས་ཀྱི་གདན་ཐམས་ཅད་ཀྱི་རྒྱན་ཡང་དག་པར་སྟོན་པའི་ནོར་བུའི་རྒྱལ་པོའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་རྒྱན་དང་ཕྲེང་བ་ཐམས་ཅད་འཕྱང་ཞིང་རྟ་བབས་དང་སྟེགས་བུས་རབ་ཏུ་བརྒྱན་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་ཤིང་ཐམས་ཅད་ཀྱི་ཡལ་ག་ལས་ནོར་བུ་རིན་པོ་ཆེ་དང་ཕྱེ་མ་འབྱུང་བའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེང་གེའི་ཁྲི་སྤོས་དང་། རིན་པོ་ཆེའི་ཚོགས་སྣ་ཚོགས་ཀྱིས་ཀུན་ནས་བརྒྱན་པའི་ཉི་མས་རྣམ་པར་སྣང་བར་བྱས་པའི་སྙིང་པོ་ཅན་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་སེང་གེའི་ཁྲིའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པར་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས། བྱང་དང་ཤར་གྱི་ཕྱོགས་མཚམས་སུ་བརྟེན་ཏེ། སེང་གེའི་ཁྲི་ནོར་བུ་རིན་པོ་ཆེ་སྣང་བའི་རྒྱལ་མཚན་གྱི་པདྨོ་སྣ་ཚོགས་ཀྱི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །དེ་ནས་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ཤར་དང་ལྷོའི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོ་བཻ་ཌཱུརྱའི་འོད་ཟེར་ཀུན་ཏུ་སྣང་བ་གསེར་གྱི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་ཀྱི་རྒྱུད་དེ་དག་ལས་འཇིག་རྟེན་གྱི་ཁམས་སྤོས་ཀྱི་དཔལ་དྲི་མ་མེད་པར་སྣང་བ་ན། དེ་བཞིན་གཤེགས་པ་ཀུན་ཏུ་དགའ་བའི་ཤུགས་དཔལ་གྱི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས་བྱང་ཆུབ་སེམས་དཔའ་ཡེ་ཤེས་ཀྱི་འོད་ཟེར་ཤེས་རབ་ཀུན་ནས་སྒྲོན་མའི་བློ་གྲོས་ཤེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། ནོར་བུ་ཡིད་བཞིན་གྱི་རྒྱལ་པོ་ཐམས་ཅད་ཀྱི་བླ་རེའི་སྤྲིན་བཅུས་ནམ་མཁའ་
ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་ཨིནྡྲ་ནཱི་ལའི་ཟེ་བ་ཅན་གྱི་མེ་ཏོག་ཐམས་ཅད་ཀྱི་རྒྱན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་རིན་པོ་ཆེའི་བླ་རེ་ཐམས་ཅད་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་འོད་འཕྲོ་བ་སྒྲོན་མའི་གཟུགས་ཀྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་སངས་རྒྱས་ཀྱི་རྫུ་འཕྲུལ་དང་འོད་དང་སྒྲ་དབྱངས་རབ་ཏུ་སྟོན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུ་དང་གོས་དང་རྒྱན་ཐམས་ཅད་ཀྱི་གཟུགས་བརྙན་ཡང་དག་པར་སྟོན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མེ་ཏོག་ཐམས་ཅད་ཀྱི་དོག་པ་ལྟ་བུ་རིན་པོ་ཆེའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དྲིལ་བུ་སྣ་ཚོགས་ཀུན་ཏུ་སྒྲས་ཁྱབ་པར་བྱེད་པའི་དྲ་བའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། པདྨོའི་དྲ་བ་མཐའ་ཡས་པ་སྣ་ཚོགས་རིན་པོ་ཆེའི་སྙིང་པོ་ཅན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། གསེར་གྱི་ཟེ་བ་འོད་འཕྲོ་ཞིང་སྣང་བའི་རྒྱལ་མཚན་གྱི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རྒྱན་བསམ་གྱིས་མི་ཁྱབ་པའི་གཟུགས་བརྙན་རབ་ཏུ་སྟོན་པའི་རྒྱན་ཐམས་ཅད་ཀྱིས་བརྒྱན་པའི་བླ་རེའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་བླ་རེའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ནས། བཅོམ་ལྡན་འདས་ལ་ཕྱག་འཚལ་ཏེ། ཤར་དང་ལྷོའི་ཕྱོགས་མཚམས་སུ་བརྟེན་ཏེ། སེང་གེའི་ཁྲི་པདྨོ་སྣ་ཚོགས་རིན་པོ་ཆེས་རབ་ཏུ་བརྒྱན་པའི་སྙིང་པོ་ཅན་མངོན་པར་སྤྲུལ་ནས། སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་
རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ལྷོ་དང་ནུབ་ཀྱི་ཕྱོགས་མཚམས་ན། འཇིག་རྟེན་གྱི་ཁམས་རྒྱ་མཚོ་ཉི་མའི་འོད་རབ་ཏུ་འབར་བས་ཀུན་ཏུ་སྣང་བའི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་ཉི་མ་དང་སེང་གེ་ལྟར་སྣང་བ་ན། དེ་བཞིན་གཤེགས་པ་སྒོ་ཀུན་ནས་ཡེ་ཤེས་རྣམ་པར་སྣང་བའི་དབྱངས་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་མེ་ཏོག་ཀུན་ནས་འོད་འཕྲོ་གཙུག་ཕུད་རབ་ཏུ་འཕྱང་བ་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། སྣ་ཚོགས་ཐམས་ཅད་ཀྱིས་བརྒྱན་པའི་རིན་པོ་ཆེའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། འོད་ཟེར་སྣང་བའི་རྒྱན་གྱིས་བརྒྱན་པའི་མེ་ཏོག་གི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མུ་ཏིག་མང་པོ་ཁ་དོག་མཐའ་ཡས་པ་ཐམས་ཅད་ཀྱི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེའི་སྒྲ་རབ་ཏུ་སྒྲོག་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་འོད་འཕྲོ་བ་སྣ་ཚོགས་ཀྱི་ཕྲེང་བའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་ཚོན་རྣམ་པ་སྣ་ཚོགས་ཀྱི་འོད་ཀྱིས་རབ་ཏུ་བརྒྱན་ཅིང་དྲིལ་བུའི་དྲ་བ་བྲེས་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་ཤིང་གི་ཡལ་ག་ཐམས་ཅད་ཀྱིས་བརྒྱན་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་ཉི་མ་རྣམ་པར་སྣང་བའི་ལྟེ་བའི་གདུགས་
ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་དང་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཙན་དན་གྱི་ཕྱེ་མ་མང་པོས་ཀུན་ཏུ་རྒྱས་པར་འགེངས་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཀྱི་ཡུལ་རྒྱ་ཆེན་པོ་རྣམ་པར་བསྟན་པས་ཀུན་ཏུ་རྒྱན་གྱིས་ཁྱབ་པར་བྱེད་པའི་གདུགས་ཀྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་གདུགས་ཀྱི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ལྷོ་དང་ནུབ་ཀྱི་ཕྱོགས་མཚམས་སུ་བརྟེན་ཏེ། སེང་གེའི་ཁྲི་ཨིནྡྲ་ནཱི་ལ་ཡིད་དུ་འོང་བར་འབར་བའི་འོད་ཟེར་གྱི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་ནུབ་དང་བྱང་གི་ཕྱོགས་མཚམས་ན་འཇིག་རྟེན་གྱི་ཁམས་རྒྱ་མཚོའི་རིན་པོ་ཆེའི་འོད་ཟེར་འབར་བའི་སྐར་མདའ་འོད་ཀྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་སྤོས་ཀྱི་རྒྱན་ཡིད་དུ་འོང་བའི་སྙིང་པོ་ན། དེ་བཞིན་གཤེགས་པ་ཡོན་ཏན་རྒྱ་མཚོ་ཚད་མེད་པའི་འོད་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་འོད་ཟེར་དང་གཟི་བརྗིད་མི་ཟད་པའི་རྒྱལ་པོའི་བློ་གྲོས་ཤེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ཏེ། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། རིན་པོ་ཆེ་ཐམས་ཅད་དུ་སྣང་བའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། རིན་པོ་ཆེ་འོད་འཕྲོ་བའི་
གཟུགས་ཀྱི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མེ་ཏོག་གི་སྤྲིན་གྱིས་རྣམ་པར་སྣང་བར་བྱས་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། འོད་ཟེར་གྱི་སྒོ་ནས་སངས་རྒྱས་སྤྲུལ་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཕྱོགས་བཅུའི་སངས་རྒྱས་ཀྱི་ཞིང་གཟུགས་བརྙན་གྱི་ཁོངས་སུ་ཆུད་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེའི་ཡལ་གའི་སྒོ་ཀུན་ནས་སངས་རྒྱས་ཀྱི་ཡུལ་རབ་ཏུ་སྒྲོག་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་རིན་པོ་ཆེ་བཻ་ཌཱུརྱའི་རིགས་ཀྱི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སེམས་སྐད་ཅིག་གཅིག་གིས་སེམས་ཅན་མཐའ་ཡས་པའི་གཟུགས་ཡོངས་སུ་སྟོན་པའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཐམས་ཅད་ཀྱི་སྨོན་ལམ་འབྱུང་བའི་སྒྲ་ཡིད་དུ་འོང་བ་རབ་ཏུ་གཏོང་བའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། འཁོར་གྱི་དཀྱིལ་འཁོར་ཐམས་ཅད་དུ་སེམས་ཅན་འདུལ་བའི་སྒྲ་སྒྲོག་པ་ནོར་བུའི་འོད་ཀྱི་དཀྱིལ་འཁོར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སོགས་པ་འོད་ཀྱི་དཀྱིལ་འཁོར་གྱི་སྤྲིན་བཅུས་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་ནུབ་དང་བྱང་གི་ཕྱོགས་མཚམས་སུ་བརྟེན་ཏེ། སེང་གེའི་ཁྲི་འོད་ཟེར་འབར་བ་མྱི་ཟད་པའི་གཟི་བརྗིད་ཀྱི་སྙིང་པོ་ཅན་མངོན་པར་སྤྲུལ་ནས་སྐྱིལ་མོ་ཀྲུང་
བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་འདི་དང་འདབ་ཆགས་སུ་འོག་གི་ཕྱོགས་ན་འཇིག་རྟེན་གྱི་ཁམས་རྒྱ་མཚོ་པདྨོ་དྲི་ཞིམ་དཔལ་གྱི་སྙིང་པོ་ཞེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་ལས་འཇིག་རྟེན་གྱི་ཁམས་རིན་པོ་ཆེའི་སེང་གེ་སྣང་ཞིང་འབར་བ་ན་དེ་བཞིན་གཤེགས་པ་ཆོས་ཀྱི་དབྱིངས་སྣང་བར་མཛད་པའི་འོད་ཟེར་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་ཆོས་ཀྱི་དབྱིངས་སུ་འོད་འཕྲོ་བ་རྣམ་པར་སྣང་བ་འབྱུང་བའི་བློ་གྲོས་ཤེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། རིན་པོ་ཆེ་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། སྤོས་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་འོད་འཕྲོ་བ་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཀྱི་ཆོས་ཐམས་ཅད་བརྗོད་པས་ཁྱབ་པར་བྱེད་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་ཐམས་ཅད་ཀྱི་རྒྱན་གྱིས་རྣམ་པར་སྣང་བར་བྱས་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མེ་ཏོག་གི་ཁང་པ་བརྩེགས་པ་ཐམས་ཅད་ཀྱི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། བསྐལ་པ་ཐམས་ཅད་གཅིག་ནས་གཅིག་ཏུ་བརྒྱུད་པར་སངས་རྒྱས་ཡང་དག་པར་འབྱུང་ཞིང་སེམས་ཅན་ཡོངས་སུ་སྨིན་པར་བྱ་བར་བརྗོད་པའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རིན་པོ་ཆེ་ཟད་མི་ཤེས་པ་ཐམས་ཅད་དང་མེ་ཏོག་ཐམས་ཅད་ཀྱི་ཟེ་བའི་འོད་ཟེར་གྱི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་འོད་ཟེར་གྱི་སྤྲིན་
འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ནས། བཅོམ་ལྡན་འདས་ལ་ཕྱག་འཚལ་ཏེ། འོག་གི་ཕྱོགས་སུ་བརྟེན་ནས་སེང་གེའི་ཁྲི་རིན་པོ་ཆེའི་སྒྲོན་མ་རབ་ཏུ་འབར་བ་འབྱུང་བའི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་ཡང་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པ་འདི་དང་འདབ་ཆགས་སུ་སྟེང་གི་ཕྱོགས་ན་འཇིག་རྟེན་གྱི་ཁམས་རྒྱ་མཚོ་ནོར་བུ་རིན་པོ་ཆེ་སྣ་ཚོགས་ཀྱི་འོད་རྒྱ་མཚོའི་རྒྱན་ཅེས་བྱ་བ་ཡོད་དེ། འཇིག་རྟེན་གྱི་ཁམས་བར་མའི་རྒྱུད་དེ་དག་ལས་འཇིག་རྟེན་གྱི་ཁམས་མཚན་ཡིད་དུ་འོང་བ་རྣམ་པར་སྣང་བ་ཞེས་བྱ་བ་ན། དེ་བཞིན་གཤེགས་པ་ཡོན་ཏན་དང་གྲགས་པ་ཐོགས་པ་མེད་པའི་རྣམ་པར་ཐར་པ་རབ་ཏུ་སྣང་བའི་རྒྱལ་པོ་བཞུགས་པའི་འཁོར་གྱི་དཀྱིལ་འཁོར་རྒྱ་མཚོ་ནས། བྱང་ཆུབ་སེམས་དཔའ་སྟོབས་དང་བརྩོན་འགྲུས་ཆགས་པ་མེད་པའི་བློ་གྲོས་ཤེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་འཕགས་ནས། བཅོམ་ལྡན་འདས་གང་ན་བ་དེར་འོང་བར་གྱུར་ཏེ། རིན་པོ་ཆེ་ཁ་དོག་མཐའ་ཡས་པར་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་། ནོར་བུ་རིན་པོ་ཆེ་ཀུན་ནས་འོད་ཀྱི་དྲ་བ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཀྱི་ཞིང་གི་རྒྱན་རྒྱ་ཆེན་པོས་རྣམ་པར་སྣང་བར་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སྤོས་ཐམས་ཅད་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རྒྱན་ཐམས་ཅད་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། སངས་རྒྱས་ཐམས་ཅད་ཀྱི་རྫུ་འཕྲུལ་འོད་འཕྲོ་བའི་སྤྲིན་བཅུས་
ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ཤིང་དང་ཟེ་བ་རྣམ་པ་སྣ་ཚོགས་སུ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། རྡོ་རྗེ་སྣ་ཚོགས་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། ནོར་བུའི་རྒྱལ་པོ་བྱང་ཆུབ་སེམས་དཔའི་སྤྱོད་པ་མཐའ་ཡས་པ་བརྗོད་ཅིང་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། མུ་ཏིག་གི་སྒྲོན་མ་འོད་འཕྲོ་བའི་སྤྲིན་བཅུས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་དང་། དེ་དག་ལ་སྩོགས་པ་འོད་འཕྲོ་བའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་བརླབ་པ་བྱེད་ཅིང་། བཅོམ་ལྡན་འདས་གང་ན་བ་དེར་ཕྱིན་ཏེ། བཅོམ་ལྡན་འདས་ལ་ཕྱག་འཚལ་ནས་སྟེང་གི་ཕྱོགས་སུ་བརྟེན་ཏེ། སེང་གེའི་ཁྲི་སངས་རྒྱས་ཀྱི་གསུང་སྒྲོག་པའི་འོད་ཟེར་འབྱུང་བའི་པདྨོའི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་དྲུག་པ། དེ་དག་ལ་སྩོགས་པ་འཇིག་རྟེན་གྱི་ཁམས་རྒྱ་མཚོ་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་རྙེད་ནས་ཀྱང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བྱེ་བ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་བྱང་ཆུབ་སེམས་དཔའ་རེ་རེ་ཞིང་ཡང་བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་ཅིང་མདུན་དུ་བྱས་ཏེ། བྱང་ཆུབ་སེམས་དཔའ་རེ་རེ་ཞིང་ཡང་རྒྱན་རྣམ་པ་སྣ་ཚོགས་ཀྱི་མཆོད་པའི་སྤྲིན་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་ནམ་མཁའ་ཀུན་ནས་ཡོག་པར་བྱིན་གྱིས་རློབ་ཅིང་འོངས་པར་གྱུར་ཏེ། གང་ནས་འོངས་པའི་ཕྱོགས་སུ་བརྟེན་ཏེ། སེང་གེའི་ཁྲི་རིན་པོ་ཆེ་སྣ་ཚོགས་ཀྱི་སྙིང་པོ་ཅན་དག་མངོན་པར་སྤྲུལ་ཅིང་སྐྱིལ་མོ་ཀྲུང་བཅས་ཏེ་འཁོད་པར་གྱུར་ཏོ། །འཁོད་
པའི་རྗེས་ལ་བྱང་ཆུབ་སེམས་དཔའ་དེ་དག་གི་བ་སྤུའི་ཁུང་ཐམས་ཅད་རེ་རེ་ནས་འོད་ཟེར་གྱི་སྤྲིན་རིན་པོ་ཆེ་ཐམས་ཅད་ལྟར་ཁ་དོག་སྣ་ཚོགས་པ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་བྱུང་བར་གྱུར་ཏོ། །རིན་པོ་ཆེ་རེ་རེའི་སྒོ་ནས་ཀྱང་བྱང་ཆུབ་སེམས་དཔའ་སེང་གེའི་ཁྲི་པདྨོའི་སྙིང་པོ་ཅན་ལ་འཁོད་པ་འཇིག་རྟེན་གྱི་ཁམས་རྒྱ་མཚོ་བཅུའི་རྡུལ་ཤིན་ཏུ་ཕྲ་བ་སྙེད་རབ་ཏུ་བྱུང་བར་གྱུར་ཏོ། །བྱང་ཆུབ་སེམས་དཔའ་རེ་རེས་ཀྱང་ཆོས་ཀྱི་དབྱིངས་ཀྱི་ཚུལ་རྒྱ་མཚོའི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱི་སྦུབས་གང་བར་བྱས་ནས། རྡུལ་ཤིན་ཏུ་ཕྲ་བ་རེ་རེ་ལ་ཡང་ཞིང་འབྱམ་ཀླས་པ་སངས་རྒྱས་ཀྱི་ཞིང་བཅུའི་རྡུལ་ཤིན་ཏུ་ཕྲ་བ་སྙེད་དུ་རབ་ཏུ་འཇུག་པར་གྱུར་ཏོ། །ཞིང་རེ་རེར་ཡང་དུས་གསུམ་དུ་གཤེགས་པའི་སངས་རྒྱས་བཅོམ་ལྡན་འདས་ཐམས་ཅད་ཤེས་ཤིང་མཐོང་བར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་ཡང་རྨི་ལམ་ལྟ་བུའི་རྣམ་པར་འཕྲུལ་པ་ཡང་དག་པར་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་ཡང་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་རེ་རེའི་ལྷའི་གནས་ཐམས་ཅད་དུ་སྐྱེ་བ་དང་ཤི་འཕོས་པ་ཡང་དག་པར་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཤིན་ཏུ་བསྟན་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཞིང་འབྱམ་ཀླས་པ་ཐམས་ཅད་རབ་ཏུ་བསྐྱོད་པ་དང་། སངས་རྒྱས་ཀྱི་ཡོན་ཏན་རབ་ཏུ་བརྗོད་ཅིང་རྣམ་པར་འཕྲུལ་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་ཞིང་ཐམས་ཅད་
ཡོངས་སུ་དག་པར་བྱ་བ་དང་། སྨོན་ལམ་རྒྱ་མཚོ་ཐམས་ཅད་རབ་ཏུ་བསྒྲག་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་འགྲོ་བ་ཐམས་ཅད་ཀྱི་ངེས་པའི་ཚིག་དང་། སངས་རྒྱས་ཀྱི་ཡན་ལག་རྣམ་པར་བསྟན་ཅིང་བརྗོད་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཆོས་ཀྱི་སྤྲིན་ཐམས་ཅད་ཀྱི་ཆར་བབ་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་ཕྱོགས་བཅུའི་འཇིག་རྟེན་གྱི་ཁམས་སུ་ཆོས་ཀྱི་དབྱིངས་སྣང་བས་རྒྱས་པར་རྣམ་པར་འཕྲུལ་པའི་མཐུའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་སངས་རྒྱས་ཀྱི་སྐུས་ཆོས་ཀྱི་དབྱིངས་གང་བར་བྱ་བ་དང་། སངས་རྒྱས་ཀྱི་རྣམ་པར་ཐར་པ་དང་། འོད་ཐམས་ཅད་ཀྱི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱི་དཀྱིལ་འཁོར་རྒྱ་མཚོ་ཐམས་ཅད་ན། བྱང་ཆུབ་སེམས་དཔའ་ཀུན་ཏུ་བཟང་པོ་རབ་ཏུ་གནས་པའི་སྒོ་དག་ནས་ཡང་དག་པར་བསྐུལ་བ་བྱེད་པར་གྱུར་ཏོ། །དེ་ལྟ་བུའི་ཆོས་ཀྱིས་ཆོས་ཀྱི་དབྱིངས་རྒྱས་པར་བཀང་སྟེ། སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་ཡང་དག་པར་བསྐུལ་བ་བྱེད་ཅིང་། འཇིག་རྟེན་གྱི་ཁམས་འབྱམ་ཀླས་པ་དག་ཏུ་རབ་ཏུ་བརྡལ་ཏེ་ཞིང་རེ་རེ་ཡང་སེམས་ཀྱི་སྐད་ཅིག་རེ་རེ་ལ་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ངན་སོང་གི་རྒྱུད་དུ་གཏོགས་པའི་སྡུག་བསྔལ་ཐམས་ཅད་ནི་རབ་ཏུ་ཞི་བར་བྱེད་དེ། སེམས་ཅན་ཕྱིན་ཅི་ལོག་ལ་ངེས་པ་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི་ཡང་དག་པར་ངེས་པའི་ཕུང་པོ་ལ་རབ་ཏུ་འགོད་དོ། །སེམས་ཅན་རི་རབ་ཀྱི་
རྡུལ་ཤིན་ཏུ་ཕྲ་བ་སྙེད་ནི་དགེ་བ་དང་། ཡིད་དུ་འོང་བ་དང་། མཐོ་རིས་སུ་སྐྱེ་བ་ལ་རབ་ཏུ་འགོད་དོ། །སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི་ཉན་ཐོས་དང་རང་སངས་རྒྱས་ཀྱི་ས་ལ་རབ་ཏུ་འགོད་དོ། །སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི་དགེ་བའི་བཤེས་གཉེན་བསྙེན་བཀུར་བའི་བསོད་ནམས་ཀྱི་ཚོགས་ལ་རབ་ཏུ་འགོད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི་སྔོན་ཆད་མ་བསྐྱེད་པའི་བྱང་ཆུབ་ཀྱི་སེམས་བསྐྱེད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ནི་བྱང་ཆུབ་སེམས་དཔའི་ས་ཕྱིར་མི་ལྡོག་པ་ཡང་དག་པར་ཐོབ་པ་ལ་ཡང་དག་པར་བསྐུལ་ལོ། །ཞིང་དེ་དག་རེ་རེ་དག་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་བཞིན་གཤེགས་པའི་ཡེ་ཤེས་ཀྱི་སྤྱན་ཆོས་ཐམས་ཅད་ཀུན་ནས་སྣང་ཞིང་གཟིགས་པ་ལ་ཡོངས་སུ་སྦྱངས་ཏེ་རབ་ཏུ་འགོད་དོ། །ཞིང་དེ་དག་རེ་རེ་ལ་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་སྟོབས་ཐམས་ཅད་ཀྱིས་རབ་ཏུ་གནས་པ་དང་། ཡེ་ཤེས་ཀྱི་ཚོགས་ཟད་མི་ཤེས་པ་དང་། སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་སྨོན་ལམ་རྒྱ་མཚོ་ལ་རབ་ཏུ་འགོད་དོ། །ཞིང་དེ་དག་རེ་རེར་ཡང་སེམས་ཅན་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་དེ་བཞིན་གཤེགས་པ་རྣམ་པར་སྣང་མཛད་ཀྱི་གདུང་དང་རྒྱུད་ཡང་དག་པར་འབྱུང་བའི་གནས་རྒྱ་མཚོ་རྣམ་པར་སྤྱོད་པ་ལ་རབ་ཏུ་འགོད་དོ། །བྱང་ཆུབ་སེམས་དཔའ་དེ་དག་གི་འོད་ཟེར་གྱི་སྒོ་ཐམས་ཅད་ནས་ཀྱང་ཚིགས་སུ་བཅད་པ་འདི་ལྟ་བུ་དག་བྱུང་བར་གྱུར་ཏོ། །འོད་ཟེར་ཐམས་ཅད་སྒོ་ནས་སྒྲ་འབྱུང་སྟེ། །ཇི་སྙེད་བྱང་ཆུབ་སྤྱོད་པར་འཇུག་པ་དང་། །རྒྱལ་སྲས་ཡོན་ཏན་ཕུན་སུམ་གང་ཡོད་པའི། །དབྱངས་ཀྱི་ཚོགས་རྣམས་ཀུན་ཏུ་བཀང་ཞིང་སྒྲོག །བསྐལ་པ་རྒྱ་མཚོར་སྐྱོ་མེད་སྤྱད་པ་སྤྱོད། །སྡུག་བསྔལ་ཀུན་ནས་འགྲོ་བ་ཀུན་འགྲོལ་ཀྱང་། །ཡིད་ལ་སྐྱོ་མྱེད་ཞུམ་པ་གང་ཡང་མེད། །འདི་ཡི་ཚུལ་ལ་རྒྱལ་སྲས་རབ་ཏུ་ཞུགས། །
ཆོས་ཀྱི་སྒོ་རྣམས་ཀུན་ལ་རབ་སྤྱོད་ཅིང་། །ཚུལ་འདིར་བསྐལ་པ་རྒྱ་མཚོ་ཟད་པར་བྱེད། །མཐའ་མེད་དབུས་མེད་ལྷག་མ་གང་ཡང་མེད། །དེ་དག་ཆོས་ཉིད་ཞི་བ་རབ་ཏུ་སྒྲོག །དུས་གསུམ་རྒྱལ་བའི་སྨོན་ལམ་གང་ཡོད་པ། །རྒྱལ་སྲས་དེ་དག་འགྲོ་ལ་ཕན་དོན་དུ། །དེ་དག་ཐམས་ཅད་མ་ལུས་ཡོངས་སུ་སྤྱོད། །དེ་དག་སྤྱོད་པའི་རྒྱན་ནི་འདི་འདྲའོ། །རྒྱལ་བ་ཀུན་གྱི་འཁོར་དུ་ཉེར་ཕྱིན་ཏེ། །ཕྱོགས་རྣམས་ཀུན་ན་གཟུགས་བརྙན་ལུས་འཆང་ཞིང་། །རྒྱལ་སྲས་ཡེ་ཤེས་རྒྱ་མཚོའི་བློ་གྲོས་ཅན། །དེ་དག་ཆོས་ཉིད་ཞིང་འཇུག་འདི་འདྲའོ། །འོད་ཟེར་སྒོ་རྣམས་རེ་རེ་མཐའ་ཡས་པའི། །བསམ་ཡས་ཞིང་རྣམས་དེ་དག་རབ་ཏུ་འཇུག །སྤྱོད་པས་མྱིག་ནི་ཀུན་ནས་ཡོངས་དག་སྟེ། །རྒྱལ་སྲས་དེ་དག་སྤྱོད་ཡུལ་འདི་ཡིན་ནོ། །སྐྲ་རྩེ་གཅིག་ཏུ་དེ་དག་རབ་གནས་ཤིང་། །ཞིང་རྣམས་དབྱིངས་ཀུན་ཀུན་ནས་བསྐྱོད་བྱས་ཀྱང་། །སེམས་ཅན་རྣམས་ལ་འཇིགས་པ་མྱི་བྱེད་དེ། །ས་འདི་རྣམ་དག་ཚུལ་འཆང་དག་གི་འོ། །ཚུལ་རྣམས་ཀུན་ལ་བསམ་གྱིས་མྱི་ཁྱབ་ལུས། །དེ་དག་ཀུན་ཏུ་ཞིང་རྣམས་སྣ་ཚོགས་སྤྲུལ། །སྐད་ཅིག་སེམས་ལ་འཆི་འཕོ་སྐྱེ་བ་སྣང་། །རྒྱན་འདི་སེམས་ལ་ཆགས་མེད་རྣམས་ཀྱི་འོ། །དུས་གསུམ་བསྐལ་པ་གང་ཡོད་མ་ལུས་པར། །སྐད་ཅིག་གཅིག་གིས་ཐམས་ཅད་རབ་ཏུ་སྟོན། །སྒྱུ་མ་ལྟ་བུ་ལུས་མེད་དངོས་ཀྱང་མེད། །དེ་འདྲའི་ཆོས་ཉིད་ཆགས་མེད་བློས་རྟོགས་སོ། ། བཟང་པོའི་སྤྱོད་པ་མཆོག་ལ་ཞུགས་པ་རྣམས། །འགྲོ་བ་ཀུན་ལ་ཡིད་དུ་འོང་བའི་ལུས། །རྒྱལ་སྲས་དེ་དག་ཆོས་ཉིད་འདི་ཡིན་ཏེ། །འོད་ཟེར་ཀུན་གྱི་སྒོ་ནས་དབྱངས་ཀྱང་སྒྲོག །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཐའ་དང་དབུས་མེད་པ་དེ་དག་དེ་བཞིན་གཤེགས་པའི་ཡུལ་ལ་རྣམ་པར་སྤྱོད་པས་རྣམ་པར་འཕྲུལ་པ་ཐོབ་པར་བྱ་བའི་ཕྱིར། སྨིན་མཚམས་ཀྱི་མཛོད་སྤུ་ནས་འོད་ཟེར་ཆེན་པོ་བྱང་ཆུབ་སེམས་དཔའ་ཐམས་ཅད་ཡེ་ཤེས་ཀྱི་
སྣང་བས་ཕྱོགས་རྣམ་པར་སྟོན་པའི་སྙིང་པོ་ཞེས་བྱ་བ་རབ་ཏུ་བཀྱེའོ། །འོད་ཟེར་རིན་པོ་ཆེ་ཐམས་ཅད་ཁ་དོག་སྒྲོན་མའི་སྤྲིན་དུ་བརྡལ་བ། སངས་རྒྱས་ཀྱི་ཞིང་ཐམས་ཅད་དུ་རབ་ཏུ་སྣང་བ་དེ་བྱུང་ནས། ཚུལ་ཐམས་ཅད་ཀྱི་ཕྱོགས་འབྱམ་ཀླས་པ་རབ་ཏུ་སྣང་བར་བྱས་ཏེ། ཕྱོགས་ཐམས་ཅད་ཀྱི་དབྱིངས་རྒྱ་མཚོ་རྣམས་རབ་ཏུ་སྣང་བར་བྱས་ནས་སེམས་ཅན་རྒྱ་མཚོ་རྣམས་རབ་ཏུ་སྣང་བར་བྱས་ཏེ། འཇིག་རྟེན་གྱི་ཁམས་རྒྱ་མཚོ་ཐམས་ཅད་རབ་ཏུ་བསྟན་ནས། སངས་རྒྱས་ཀྱི་ཞིང་མང་པོ་ཐམས་ཅད་རབ་ཏུ་བསྐྱོད་པའི་རྒྱན་གྱི་ཚུལ་ཐམས་ཅད་ཀྱིས་རབ་ཏུ་བསྐྱོད་ནས། སངས་རྒྱས་ཀྱི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད། རྡུལ་ཤིན་ཏུ་ཕྲ་བ་ཐམས་ཅད་དང་མཉམ་པ་དག་ཏུ་རབ་ཏུ་སྤྲོས་ནས། སེམས་ཅན་ཐམས་ཅད་ཀྱི་བསམ་པ་དང་མོས་པ་ཅི་ལྟ་བ་རྒྱ་མཚོ་དག་ཏུ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་སྤྲིན་གྱི་ཆར་དུས་གསུམ་གྱི་རྡུལ་ཤིན་ཏུ་ཕྲ་བ་དང་མཉམ་པ་ཕབ་སྟེ། དུས་གསུམ་གྱི་སངས་རྒྱས་ཐམས་ཅད་ཀྱི་ཕ་རོལ་ཏུ་ཕྱིན་པ་རྒྱ་མཚོ་རབ་ཏུ་བསྟན་ནས། སེམས་ཅན་ཐམས་ཅད་མ་ལུས་པར་འཁོར་བ་ཐམས་ཅད་ལས་རབ་ཏུ་གདོན་པར་བྱ་བའི་ཕྱིར། མོས་པ་ཇི་བཞིན་དུ་བྱུང་བ་དང་མཐུན་པའི་སྤྲིན་གྱི་ཆར་རབ་ཏུ་དབབ་པ་དང་། དེ་བཞིན་གཤེགས་པ་ཐམས་ཅད་ཀྱི་སྨོན་ལམ་མ་ལུས་པའི་སྤྲིན་གྱི་ཆར་རབ་ཏུ་དབབ་པ་དང་། འཇིག་རྟེན་གྱི་ཁམས་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་འཁོར་དག་ཏུ་དགའ་བར་ཕྲད་པར་བྱས་ནས། བཅོམ་ལྡན་འདས་ལ་གཡས་ཕྱོགས་སུ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་པདྨོ་ཆེན་པོ་ཆུ་བ་རིན་པོ་ཆེ་ཐམས་ཅད་ལས་བསྒྲུབས་པ། ནང་རིམ་ནོར་བུའི་རྒྱལ་པོའི་མཛོད་སྣ་ཚོགས་ལས་བྱས་པ་ལོ་མ་རིན་པོ་ཆེ་ཐམས་ཅད་ཀྱི་རིགས་ཀྱི་ཆར་འབེབ་པ། ཟེ་བའི་ཕྲེང་བའི་རྒྱན་སྤོས་རིན་པོ་ཆེ་ཐམས་ཅད་ལས་བྱས་པ། སྙིང་པོ་འཛམ་བུ་ཆུ་ཀླུང་གི་གསེར་གྱི་
ཚོན་གྱིས་རབ་ཏུ་མཛེས་པར་བྲིས་པ། འོད་ཀྱི་འཁོར་རྣམ་པར་དག་ཅིང་འོད་ཟེར་གྱི་དྲ་བས་རྣམ་པར་སྣང་བར་བྱས་པའི་སྤྲིན་དང་ལྡན་པ། རྒྱན་ཐམས་ཅད་རབ་ཏུ་འབྱུང་བ་སེམས་ཀྱི་སྐད་ཅིག་ལ་སངས་རྒྱས་ཀྱི་རྣམ་པར་འཕྲུལ་པ་མཐའ་ཡས་སྟོན་པའི་སྒྲ་རབ་ཏུ་འབྱུང་བ། ནོར་བུའི་རྒྱལ་པོ་མཐའ་ཡས་པ་དང་། སངས་རྒྱས་ཀྱི་སྐུའི་གཟུགས་བརྙན་གྱི་སྤྲིན་གྱིས་ཐམས་ཅད་དུ་གང་བར་བྱེད་པ། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་ཐམས་ཅད་རབ་ཏུ་སྟོན་པའི་དབྱངས་འབྱིན་པར་གྱུར་ཏེ་བྱུང་ངོ་། །པདྨོ་ཆེན་པོ་དེ་བྱུང་བའི་རྗེས་སུ་བྱང་ཆུབ་སེམས་དཔའ་ཆོས་ཐམས་ཅད་ལ་ཕམ་པ་མེད་པའི་དབྱངས་ཞེས་བྱ་བ། བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་བཅོམ་ལྡན་འདས་ཀྱི་མཛོད་སྤུ་དེ་ཉིད་ནས་བྱུང་སྟེ། བཅོམ་ལྡན་འདས་ལ་ལན་དུ་མར་གཡས་ཕྱོགས་སུ་བསྐོར་བ་བྱས་ནས། བཅོམ་ལྡན་འདས་ལ་ཕྱག་འཚལ་ཏེ་པདྨོ་ཆེན་པོ་དེའི་སྙིང་པོ་ལ་འདུག་གོ །བྱང་ཆུབ་སེམས་དཔའ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ཀྱང་ཟེ་བའི་འཕྲེང་བ་དེ་དག་ལ་འཁོད་དོ། །དེ་ནས་བྱང་ཆུབ་སེམས་དཔའ་ཆོས་ཐམས་ཅད་ལ་ཕམ་པ་མེད་པའི་དབྱངས་ཆོས་ཀྱི་དབྱིངས་རྒྱ་ཆེ་ཞིང་ཚད་མེད་པས་རབ་ཏུ་དགའ་བའི་ཤུགས་ཤིན་ཏུ་སྐྱེས་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་གྱི་རྗེས་སུ་སོང་བའི་ཡེ་ཤེས་ཅན། སངས་རྒྱས་ཀྱི་ཆོས་ཀྱི་སྐུ་རྒྱ་མཚོ་བསམ་གྱིས་མྱི་ཁྱབ་པ་ལ་རབ་ཏུ་ཞུགས་པའི་མཐུ་དང་ལྡན་པ། ཞིང་འབྱམ་ཀླས་པ་ཐམས་ཅད་ཀྱི་དེ་བཞིན་གཤེགས་པ་རྣམས་ཀྱི་ཞབས་ཀྱི་དྲུང་དུ་ཕྱིན་པ་དང་། བ་སྤུ་ཐམས་ཅད་ལས་སྤྲུལ་པའི་སྤྲིན་ཟད་མི་ཤེས་པས་ཀུན་ཏུ་ཁེབས་པར་བྱེད་པ། སེམས་ཀྱི་སྐད་ཅིག་ཐམས་ཅད་ལ་དམིགས་པ་ཐམས་ཅད་ཆོས་ཀྱི་དབྱིངས་ཀུན་ཏུ་བསྒྱུར་བ། ཆོས་ཀྱི་དབྱིངས་ཐམས་ཅད་ལ་དུས་གསུམ་ཁྱབ་པར་བྱེད་པའི་སྤྱོད་ཡུལ་གྱིས་རྣམ་པར་སྤྱོད་པ། ཕྱོགས་ཐམས་ཅད་ཀྱི་དེ་བཞིན་གཤེགས་པའི་བྱིན་གྱི་རླབས་
འཆང་བ། ཏིང་ངེ་འཛིན་ཐམས་ཅད་ལ་རབ་ཏུ་འཇོག་ཅིང་ཕྱི་མའི་མཐའི་བསྐལ་པའི་མུར་ཐུག་པར་ཏིང་ངེ་འཛིན་དང་། རྣམ་པར་ཐར་པ་ལ་རྣམ་པར་སྤྱོད་པ། སངས་རྒྱས་ཀྱི་ཡོན་ཏན་རྒྱ་མཚོ་མཐའ་ཡས་པ་ཐམས་ཅད་དང་ཆོས་ཀྱི་དབྱིངས་ཀྱི་ལུས་དང་ལྡན་པས་དེ་བཞིན་གཤེགས་པའི་རྫུ་འཕྲུལ་དང་། རྣམ་པར་འཕྲུལ་པ་མཐའ་དང་དབུས་མེད་པ་ལ་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྐུ་ནི་ཆོས་ཀྱི་དབྱིངས་ཀྱིས་གསལ། །འགྲོ་བ་ཀུན་ལ་རྒྱལ་བ་མངོན་སུམ་སྟེ། །ཇི་ལྟར་མོས་པའི་སེམས་ཅན་རྒྱས་བཀང་ནས། །སྙིང་པོ་བྱང་ཆུབ་དེ་ལ་རྒྱལ་བ་བཞུགས། །ཞིང་རྣམས་ཀུན་གྱི་རྡུལ་ཕྲན་མཆོག་སྙེད་ཀྱི། །རྒྱལ་བ་སྤུ་རྩེ་ཀུན་ལ་རབ་བཞུགས་ཏེ། །བྱང་ཆུབ་སེམས་དཔའི་འཁོར་གྱིས་ཀུན་ནས་བསྐོར། །ཀུན་ཀྱང་བཟང་པོའི་སྤྱོད་པ་མཆོག་སྟོན་ཏོ། ། སྤུ་གཅིག་རྩེ་ལ་ཞིང་མང་རྒྱ་མཚོ་སྟེ། །བྱང་ཆུབ་སྙིང་པོ་པདྨོའི་གདན་ལ་བཞུགས། །ཆོས་དབྱིངས་རྒྱ་ཆེན་ཐམས་ཅད་ཀུན་བཀང་སྟེ། །སྤུ་རྣམས་ཀུན་ལ་རྣམ་པར་འཕྲུལ་པ་སྟོན། །ཞིང་རྣམས་རེ་རེ་དག་ན་རབ་བཞུགས་ཤིང་། །ཞིང་རྣམས་འབྱམ་ཀླས་ཀུན་ཏུ་རྒྱས་མཛད་པས། །ཕྱོགས་བཅུའི་བྱང་ཆུབ་སེམས་དཔའི་སྤྲིན་གྱི་རྣམས། །ཀུན་ཀྱང་སྙིང་པོ་བྱང་ཆུབ་དྲུང་དུ་འདོང་། །ཞིང་རྣམས་ཀུན་གྱི་རྡུལ་ཕྲན་མཆོག་སྙེད་ཀྱི། །བྱང་ཆུབ་སེམས་དཔའི་ཡོན་ཏན་རྒྱ་མཚོའི་འོད། །སངས་རྒྱས་ཀྱི་ནི་འཁོར་དུ་ཉེ་བར་འདོང་། །ཆོས་དབྱིངས་འབྱམ་ཀླས་རྟག་ཏུ་རྒྱས་པར་འགེངས། །ཞིང་རྣམས་ཐམས་ཅད་གཟུགས་བརྙན་རབ་ཏུ་སྟོན། །ཆོས་དབྱིངས་རྡུལ་རྣམས་ཡེ་ཤེས་སྤྱོད་ཡུལ་ཅན། །ཀུན་ཀྱང་བཟང་པོའི་སྤྱོད་ལ་རབ་ཏུ་གནས། །སངས་རྒྱས་ཀུན་གྱི་འཁོར་དུ་ཡང་དག་བྱུང་། །བྱང་ཆུབ་སེམས་དཔའ་ཡེ་ཤེས་མཆོག་ཡུལ་ཅན། །སངས་རྒྱས་ཆོས་སྤྲིན་ཉན་ཅིང་རབ་ཏུ་མཁས། །སངས་རྒྱས་ཀུན་གྱི་འཁོར་རྣམས་ཀུན་
ན་གནས། །ཞིང་རྣམས་ཀུན་ཏུ་བསྐལ་པ་རྒྱ་མཚོར་སྤྱོད། །རྒྱ་མཚོའི་ཆོས་ལ་རྣམ་པར་སྣང་བར་སྤྱོད། །དེ་དག་རྒྱལ་བའི་ས་རྣམས་རྒྱ་མཚོར་བཞུགས། །སངས་རྒྱས་ཆོས་རྣམས་གཞན་དང་གཞན་བྱུང་བ། །དེ་དག་སྨོན་ལམ་རྒྱ་མཚོར་རབ་ཏུ་འཇུག །སངས་རྒྱས་ཡོན་ཏན་ལེགས་པ་རྒྱ་མཚོ་དང་། །ཀུན་ཏུ་བཟང་པོའི་སྤྱོད་པ་དེ་དག་ཤེས། །སངས་རྒྱས་ཆོས་ཀྱི་དབྱིངས་རྣམས་ཀུན་བཀང་ཞིང་། །དེ་དག་རྣམ་འཕྲུལ་རྒྱ་ཆེན་ཀུན་ལ་ཞུགས། །ཞིང་རྣམས་ཀུན་གྱི་རྡུལ་ཕྲན་མང་སྙེད་ཀྱི། །ལུས་ཀྱི་སྤྲིན་ནི་རྟག་པར་རབ་ཏུ་སྟོན། །སེམས་ཅན་ཀུན་བཀང་འོད་ཀྱིས་ཀུན་ལ་སྐྱོབ། །བསམ་པ་ཡིད་བཞིན་ཆོས་ཀྱི་ཆར་ཡང་འབེབས། །དེ་ནས་བྱང་ཆུབ་སེམས་དཔའ་ཆོས་ཀྱི་དཔལ་པདྨོ་རྣམ་པར་ལྟ་བའི་རྒྱལ་མཚན་གྱིས། སངས་རྒྱས་ཀྱི་བྱིན་གྱིས་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་ཡེ་ཤེས་ཤིན་ཏུ་ཟབ། །དུས་རྣམས་ཀུན་ཏུ་དེ་འབྱུང་སྟེ། །ཆོས་དབྱིངས་ཐུགས་སུ་ཆུད་པས་ན། །འཇིག་རྟེན་མགོན་ཞེས་རབ་ཏུ་བརྗོད། །ཡང་དག་སངས་རྒྱས་ཆོས་ཀྱི་སྐུ། །འདྲེས་པ་མེད་ཅིང་གནས་པ་མེད། །སེམས་ཅན་ཐམས་ཅད་ཡིད་བཞིན་དུ། །གཟུགས་ཀྱི་སྐུར་ཡང་རབ་ཏུ་མཐོང་། །ཆོས་རྣམས་ཐམས་ཅད་མངོན་སངས་རྒྱས། །ཆོས་རྣམས་ཀུན་ལ་རབ་ཏུ་ཞུགས། །ཐམས་ཅད་མཁྱེན་པ་ཐམས་ཅད་གཟིགས། །ཞིང་རྣམས་ཀུན་ན་རྣམ་པར་མཛེས། །ཁ་དོག་བསམ་གྱིས་མི་ཁྱབ་པར། །སེམས་ཅན་ཐམས་ཅད་ཡིད་བཞིན་དུ། །སེམས་ཅན་མཆོག་གི་འོད་རྣམས་དང་། །དེ་བཞིན་སྐུ་ཡི་སྤྲིན་ཀྱང་མཐོང་། །དེ་བཞིན་གཤེགས་པའི་སྐུ་དག་ལས། །མི་ཟད་སངས་རྒྱས་སྤྲུལ་པ་རྣམས། །ཞིང་རྣམས་ཀུན་ཏུ་རབ་སྒྲོག་ཅིང་། །ཆོས་ཀྱི་རྒྱ་མཚོ་ཤིན་ཏུ་སྟོན། །སྤུ་རྣམས་རེ་རེ་ཀུན་ནས་ཀྱང་། །ཕྱོགས་བཅུར་འོད་ཟེར་དྲ་བ་དག །སངས་རྒྱས་གསུང་ནི་རབ་འབྱིན་ཅིང་། །
གདུལ་དཀའ་ཐམས་ཅད་རྣམ་པར་འདུལ། །སངས་རྒྱས་འོད་ཟེར་སྒོ་རྣམས་ནས། །སྒྲ་དབྱངས་ཟབ་མོ་རྟག་ཏུ་འབྱུང་། །སངས་རྒྱས་ཡོན་ཏན་རྒྱ་མཚོ་ནི། །བྱང་ཆུབ་སེམས་དཔའི་སྤྱོད་ཡུལ་ལོ། །སངས་རྒྱས་ཆོས་ཀྱི་འཁོར་ལོ་དག །མཐའ་དང་དབུས་མེད་རབ་ཏུ་བསྐོར། །ཡེ་ཤེས་ཟབ་མོ་ཤེས་བྱ་བ། །རྒྱ་ཆེ་ཕྱོགས་སུ་རབ་ཏུ་སྟོན། །འཇིག་རྟེན་ཁམས་རྣམས་ཐམས་ཅད་དུ། །རྣམ་པར་འཕྲུལ་པ་གཞན་དང་གཞན། །ཆོས་ཀྱི་དབྱིངས་རྣམས་ཀུན་བཀང་ཞིང་། །ཡང་དག་སངས་རྒྱས་སྟོན་པ་མཛད། །སྐུ་རྣམས་རེ་རེ་ཀུན་ནས་ཀྱང་། །ཞིང་རྣམས་ཀུན་གྱི་རྡུལ་མཉམ་པར། །སངས་རྒྱས་སེམས་ཅན་མཉམ་ཕྱུང་ཞིང་། །རྣམ་པར་འཕྲུལ་པ་རབ་ཏུ་སྟོན། །དེ་ནས་བྱང་ཆུབ་སེམས་དཔའ་ཆོས་ཀྱི་མཚོ་རྣམ་པར་སྣང་བའི་བློ་གྲོས་ཀྱིས། སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་ཀྱི་དབྱིངས་རྣམས་ཀུན་ཁྱབ་པར། །སངས་རྒྱས་སྐུ་ནི་རྣམ་པར་མཛེས། །རྒྱ་ཆེན་གསུང་ནི་རང་བྱུང་བ། །ཞིང་རྣམས་རྒྱ་མཚོར་ཤིན་ཏུ་སྒྲོག །འཇིག་རྟེན་ཐམས་ཅད་ཀུན་འཇུག་པར། །འཇིག་རྟེན་མགོན་པོ་ཤིན་ཏུ་མཛེས། །འགྲོ་བ་ཀུན་གྱི་བསམ་མཁྱེན་ཅིང་། །བྱིན་གྱི་རླབས་ནི་རབ་ཏུ་སྟོན། །སངས་རྒྱས་འཇིག་རྟེན་ཀུན་ལ་མངོན། །སེམས་ཅན་ཐམས་ཅད་བསམ་པ་བཞིན། །ཐམས་ཅད་གཟིགས་པ་སངས་རྒྱས་ཀྱི། །རྣམ་པར་འཕྲུལ་པ་ཐམས་ཅད་མཐོང་། །མཐའ་ཡས་འོད་མངའ་སངས་རྒྱས་སྤྲིན། །ཆོས་རྣམས་རྒྱ་མཚོའི་འབྲུག་ཀྱང་སྒྲོག །ཡེ་ཤེས་རྣམ་རྒྱུའི་ཚུལ་བཞིན་དུ། །རྒྱལ་བའི་སྲས་རྣམས་དེ་ལ་འཇུག །འཇུག་པ་རྣམས་ལ་འབྱུང་བ་མེད། །འབྱུང་བ་ཡོད་པ་རྣམ་པར་བསྟན། །གང་ལ་སངས་རྒྱས་བཞུགས་པ་ཡི། །ཆོས་རྣམས་འབྱུང་བ་ནམ་མཁའ་བཞིན། །འཕོ་དང་གནས་པ་མི་མངའ་སྟེ། །འོན་ཀྱང་རྒྱལ་བ་ཀུན་ན་སྣང་། །སངས་རྒྱས་ཆོས་ཀྱི་
དབྱིངས་ལས་བྱུང་། །དེ་ཕྱིར་སངས་རྒྱས་རབ་ཏུ་བརྗོད། །ཡུལ་ན་བཞུགས་མེད་རང་བཞིན་མེད། །དེ་ལ་འབྱུང་བ་མི་མངའ་སྟེ། །སྐུ་དང་མཚན་ཀྱང་དེ་བཞིན་མེད། །རྒྱལ་བ་གཟུགས་བརྙན་འདྲ་བ་འོ། །འགྲོ་བ་ཀུན་ཏུ་ཆོས་ཀྱི་སྤྲིན། །བསམ་པ་ཀུན་ལ་རབ་ཏུ་བྱུང་། །ཡང་དག་སངས་རྒྱས་རྣམས་ཀུན་ཏུ། །སེམས་ཅན་རྒྱ་མཚོ་འདུལ་བ་མཛད། །འཇིག་རྟེན་ཁམས་རྣམས་ཐམས་ཅད་ཀྱི། །སྙིང་པོ་བྱང་ཆུབ་ཀུན་ན་སྣང་། །འཁོད་པའི་རྒྱ་མཚོ་ཐམས་ཅད་ན། །ཞིང་རྣམས་ཀུན་གྱིས་རྣམ་པར་མཛེས། །སངས་རྒྱས་ཀུན་གྱི་སྐུ་དག་ལ། །ཡོན་ཏན་རྒྱ་མཚོ་ཟད་མི་ཤེས། །སངས་རྒྱས་ཡོན་ཏན་མཐའ་ཡས་ཏེ། །དེ་དག་ཡོན་ཏན་ཟད་པ་མེད། །དེ་ནས་བྱང་ཆུབ་སེམས་དཔའ་སྤོས་འོད་འཕྲོ་བའི་རྒྱན་ཟླ་བའི་འོད་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བསམ་གྱིས་མྱི་ཁྱབ་སངས་རྒྱས་སར། །བྱང་ཆུབ་སེམས་དཔའ་གང་བཞུགས་པ། །དེ་དང་དེ་དག་སངས་རྒྱས་ཀྱི། །སངས་རྒྱས་རྣམ་འཕྲུལ་ཐམས་ཅད་མཐོང་། །ཡེ་ཤེས་ལུས་ཀྱིས་ཞུགས་པ་རྣམས། །ཞིང་ཀུན་རྡུལ་གྱི་སྦུབས་སུ་ཡང་། །དེ་བཞིན་གཤེགས་པ་ཐམས་ཅད་དང་། །བདག་ཉིད་ལུས་ཀྱང་དེར་མཐོང་ངོ་། །གཟུགས་བརྙན་ཞིང་རྣམས་ཐམས་ཅད་དང་། །སངས་རྒྱས་ཀུན་གྱི་སྤྱན་སྔར་འབྱུང་། །ཀུན་ཏུ་བྱིན་གྱི་རླབས་རྣམས་དང་། །རྣམ་པར་འཕྲུལ་པ་རབ་ཏུ་སྟོན། །ཀུན་ཏུ་བཟང་པོའི་སྨོན་ལམ་དང་། །སྤྱོད་པ་གང་གིས་རྣམ་སྦྱངས་པ། །དེ་དག་ཞིང་རྣམས་ཐམས་ཅད་དུ། །སངས་རྒྱས་ཀུན་གྱི་རྣམ་འཕྲུལ་མཐོང་། །ཀུན་ཏུ་མཉམ་པ་ཉིད་གྱུར་ཅིང་། །ཀུན་ཏུ་ལུས་ཀྱིས་རབ་གནས་ཏེ། །ཡེ་ཤེས་ཀུན་གྱི་རྗེས་སོང་ན། །སངས་རྒྱས་སྤྱོད་ཡུལ་ཞུགས་པ་འོ། །སངས་རྒྱས་ཡེ་ཤེས་ཞུགས་པ་རྣམས། །ཆོས་ཀྱི་དབྱིངས་ལ་རྣམ་པར་མཛེས། །སངས་རྒྱས་ཀུན་གྱི་
སྐུ་དག་ཏུ། །རྒྱ་མཚོའི་ཞིང་ལ་རབ་ཏུ་འཇུག །སངས་རྒྱས་ཀུན་གྱི་ཞིང་དག་ཏུ། །བྱིན་གྱི་རླབས་རྣམས་རབ་བསྟན་པས། །གཞན་དང་གཞན་གྱི་ལུས་ངག་དང་། །མིང་གིས་ཀུན་ན་རབ་ཏུ་གནས། །བྱང་ཆུབ་སྙིང་པོར་རྣམ་འཕྲུལ་དང་། །བྱང་ཆུབ་མངོན་པར་འཚང་རྒྱ་ཞིང་། ། ཆོས་ཀྱི་འཁོར་ལོ་བསྐོར་བ་དག །སྐད་ཅིག་སེམས་ཀྱིས་སྟོན་པ་བྱེད། །ཞིང་རྣམས་འབྱམ་ཀླས་ཐམས་ཅད་དང་། །བསྐལ་པ་བྱེ་བ་བསམ་ཡས་དག །བྱང་ཆུབ་སེམས་དཔའ་མཉམ་གཞག་རྣམས། །སྐད་ཅིག་སེམས་ཀྱིས་རྣམ་པར་སྟོན། །སངས་རྒྱས་ཞིང་རྣམས་ཐམས་ཅད་ན། །བྱང་ཆུབ་སེམས་དཔའི་སྤྲུལ་པ་རྣམས། །སངས་རྒྱས་སྐུ་ལ་རྣམ་སྤྱོད་ཀྱང་། །མཐའ་མ་རྙེད་པར་མྱི་རུང་ངོ་། །དེ་ནས་བྱང་ཆུབ་སེམས་དཔའ་སེང་གེ་འོད་ཟེར་སྣང་བའི་མཐུས་འབྱིན་པའི་བློ་གྲོས་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམ་པར་སྣང་མཛད་ཀྱིས། །ཆོས་ཀྱི་འཁོར་ལོ་རབ་ཏུ་བསྐོར། །ཆོས་དབྱིངས་ཚུལ་རྣམས་ཐམས་ཅད་ཀྱང་། །སངས་རྒྱས་སྤྲིན་གྱིས་མངོན་དུ་ཡོག །འཇིག་རྟེན་ཁམས་རྣམས་རྒྱ་མཚོ་དག །ཕྱོགས་བཅུ་ཀུན་ན་གང་ཡོད་པ། །ཐམས་ཅད་ཀུན་ཏུ་འཁོར་ལོ་འཁོར། །དེ་ནི་སྨོན་ལམ་རྣམ་པར་འཕྲུལ་པའོ། །འཁོར་རྣམས་རྒྱ་མཚོ་རྒྱ་ཆེ་བ། །གཞན་དང་གཞན་གྱི་མིང་དག་གིས། །ཞིང་རྣམས་གནས་པ་ཀུན་ཏུ་ཡང་། །ཆོས་ཀྱི་འཁོར་ལོ་ཀུན་ཏུ་འཁོར། །རྣམ་པར་སྣང་མཛད་བྱིན་རླབས་ཀྱིས། །ཞིང་རྣམས་རྒྱ་མཚོ་ཀུན་ཏུ་ཡང་། །ཀུན་ཏུ་བཟང་པོའི་སྨོན་ལམ་དག །བརྗོད་ཅིང་ཞིང་རྣམས་ཀུན་ཏུ་འབྱུང་། །ཞིང་ཀུན་རྡུལ་ལ་སྐུ་ཡི་རྣམས། །ཐམས་ཅད་ཆོས་རབ་རབ་ཏུ་འབེབས། །འདྲེས་པ་མེད་ཅིང་འབྱུང་བ་མེད། །འཇིག་རྟེན་དག་ན་རྣམ་པར་མཛེས། །བསྐལ་པ་བྱེ་བ་གྲངས་མེད་པར། །ཞིང་ཀུན་རྡུལ་ཕྲན་སྦུབས་དག་ཏུ། །རྣམ་པར་སྣང་བ་མཛད་པའི་གསུང་། །
སྔོན་གྱི་སྤྱོད་པ་རབ་ཏུ་སྒྲོག །ཞིང་རྣམས་ཐམས་ཅད་རྡུལ་སྙེད་ཀྱི། །འོད་ཟེར་དྲ་བ་ཕྱོགས་བཅུ་ན། །སངས་རྒྱས་འོད་ཟེར་ཀུན་སྒོ་ནས། །བྱང་ཆུབ་མཆོག་ཕྱིར་སེམས་ཅན་འདུལ། །ཀུན་ཏུ་མ་འདྲེས་སྐུ་དག་གིས། །ཆོས་དབྱིངས་ཡོངས་སུ་རབ་གསལ་ཏེ། །འགྲོ་རྣམས་འདུལ་བ་ཇི་བཞིན་དུ། །གཟུགས་ཀྱི་སྐུ་ཡང་རབ་ཏུ་མཐོང་། །དུས་གསུམ་ཞིང་རྣམས་ཐམས་ཅད་ཀྱི། །མགོན་པོ་ཇི་སྙེད་བཞུགས་པ་རྣམས། །དེ་དག་ཀུན་གྱི་མཚན་ཀྱང་སྒྲོག །སངས་རྒྱས་རྣམ་པར་འཕྲུལ་ལ་ལྟོས། །ད་ལྟར་བྱུང་དང་འདས་པ་དང་། །སངས་རྒྱས་གང་རྣམས་མ་བྱོན་པ། །དེ་དག་ཀུན་གྱི་བསམ་ཡས་པ། །ཆོས་ཀྱི་འཁོར་ལོ་རབ་ཏུ་གྲག །དེ་ནས་བྱང་ཆུབ་སེམས་དཔའ་ཆོས་ཀྱི་ཡོན་ཏན་གྱི་མཛོད་མི་ཟད་པའི་དཔལ་གྱི་གཟི་བརྗིད་མར་མེས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་གིས་བྱང་ཆུབ་སེམས་དཔའ་ཡི། །ཡེ་ཤེས་ཚོགས་འདི་ཀུན་ནོན་ཅིང་། །ཡེ་ཤེས་རྟོགས་པ་རྙེད་པ་རྣམས། །དེ་དག་འདི་ཡི་ཚུལ་ལ་ཞུགས། །ཆོས་ཀྱི་དབྱིངས་དང་མཉམ་པའི་དབྱངས། །ཞིང་རྣམས་ཀུན་ཏུ་རབ་ཏུ་འབྱུང་། །སངས་རྒྱས་ཀུན་གྱི་སྤྱོད་ཡུལ་ཏེ། །བྱང་ཆུབ་སེམས་དཔའི་ཆེད་དུ་བརྗོད། །སྐད་ཅིག་རེ་རེའི་སེམས་ཀུན་ལ། །ཆོས་ཀྱི་དབྱིངས་སུ་རྣམ་པར་རྒྱུ། །དེ་བཞིན་ཉིད་ལ་གནས་ཤིང་རྟེན། །ཆོས་རྣམས་རྒྱ་མཚོ་ཀུན་ལ་ཞུགས། །རྒྱན་གྱི་ཕ་རོལ་ཕྱིན་པ་རྣམས། །བསྐལ་པ་བྱེ་བ་བསམ་ཡས་སུ། །སངས་རྒྱས་ཐམས་ཅད་སྐུ་དག་དང་། །ཞིང་རྣམས་ཀུན་ན་གནས་ཤིང་སྤྱོད། །རྡུལ་རྣམས་རེ་རེའི་སྟེང་ནས་ཀྱང་། །ཆོས་རྣམས་ཀུན་ནི་རབ་ཏུ་འབྱུང་། །ཞིང་རྣམས་ཀུན་ཀྱང་ཁྱབ་པར་བྱེད། །ཡེ་ཤེས་ཆགས་མེད་སྤྱོད་ཡུལ་ལོ། །སངས་རྒྱས་ཐམས་ཅད་སྤྱོད་ཡུལ་དུ། །ལས་པ་མེད་པར་ཀུན་བཀང་ཞིང་། །རྣམ་པར་འཕྲུལ་པའི་རྣམ་སྤྱོད་པས། །སངས་
རྒྱས་སྤྱོད་ཡུལ་རྣམས་ལ་ཞུགས། །སངས་རྒྱས་ཀུན་གྱི་རྗེས་སྙེགས་དབྱངས། །ཆོས་ཀྱི་དབྱིངས་ནི་རབ་སྒྲོག་པ། །ཆོས་དབྱིངས་རྗེས་སུ་ཤེས་པ་རྣམས། །དབྱངས་ཀྱི་རྒྱ་མཚོ་རྣམས་ལ་སྤྱོད། །བསྐལ་པ་རྒྱ་མཚོར་མ་འདྲེས་པར། །སྒྲ་དང་དབྱངས་རྣམས་ཤིན་ཏུ་སྒྲོག །དུས་རྣམས་ཐམས་ཅད་ཤེས་པས་གསལ། །དབྱངས་ཀྱི་དེ་དག་ས་ལ་ཞུགས། །སྒྲ་ཡི་ཤེས་ལ་རྨོངས་པ་མྱེད། །སེམས་ཅན་སྒྲ་ཡང་སྤྱོད་ཡུལ་ཏེ། །ཐམས་ཅད་མཁྱེན་པ་ཀུན་གྱི་ཡང་། །རྣམ་པར་འཕྲུལ་པའི་དབྱངས་ཤེས་སོ། །ས་ནས་སར་ཡང་ཕྱིན་གྱུར་ཅིང་། །སྟོབས་ཀྱི་ས་ལ་རབ་གནས་ཏེ། །བསྐལ་པ་བྱེ་བར་སྦྱངས་པས་ན། །ཆོས་ཉིད་འདི་ལ་རབ་ཏུ་འཇུག །དེ་ནས་བྱང་ཆུབ་སེམས་དཔའ་ཡེ་ཤེས་ཀྱི་འོད་ཟེར་ཤེས་རབ་ཀུན་ནས་སྒྲོན་མའི་བློ་གྲོས་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ལ་སངས་རྒྱས་བཞུགས་པ་ཡི། །ཆོས་རྣམས་དེ་དག་མཚན་ཉིད་མྱེད། །ཡེ་ཤེས་ས་ནི་ཐོབ་པ་རྣམས། །འཇིག་རྟེན་གཙོ་བོ་རབ་ཏུ་མཐོང་། །ཤེས་རབ་སྣང་བའི་ཀུན་འོད་ཅན། །བྱང་ཆུབ་སེམས་དཔའ་མཉམ་གཞག་རྣམས། །སངས་རྒྱས་ཐམས་ཅད་ཀུན་གྱི་ཡང་། །སྐུ་ཡི་རྣམ་པར་འཕྲུལ་ལ་ཞུགས། །ཆོས་ཀྱི་དབྱིངས་ལ་རྣམ་སྤྱད་ཅིང་། །ལུས་ཀྱི་དངོས་ལ་རབ་འཇུག་སྟེ། །ཟབ་མོའི་ཆོས་རྣམས་རྟོགས་གྱུར་ནས། །སྨོན་ལམ་དག་གིས་ཡང་དག་བྱུང་། །བསོད་ནམས་རྒྱ་མཚོས་བྱུང་གྱུར་ཅིང་། །ཡེ་ཤེས་ས་ལ་རྣམ་པར་གནས། །ཆོས་ལ་རྣམ་སྤྱོད་ཁོང་དུ་ཆུད། །སྤྱོད་པའི་མཆོག་ལ་རབ་ཏུ་སྤྱོད། །སངས་རྒྱས་ཞིང་རྣམས་ཐམས་ཅད་ཀྱི། །སངས་རྒྱས་ཀུན་གྱི་དྲུང་དག་ཏུ། །ཆོས་ཀྱི་དབྱིངས་ལ་སྤྱད་པས་ན། །རང་བཞིན་ལུས་ནི་རབ་ཏུ་མཐོང་། །ཞིང་རྣམས་འབྱམ་ཀླས་ཐམས་ཅད་དུ། ། བསྐལ་པ་བྱེ་བ་བསམ་ཡས་སུ། །ཐམས་ཅད་གཟིགས་པའི་ཆོས་ཀྱི་རྣམས། །རྒྱ་
མཚོ་ཀུན་ལ་རབ་ཏུ་སྤྱོད། །བདག་མཐོང་བས་ནི་ལུས་དང་རྡུལ། །གཅིག་ཏུ་འདྲེས་པ་མངོན་པར་བྱས། །མ་སྐྱེས་མཚན་ཉིད་མེད་པ་སྟེ། །ཞིང་རྣམས་ཀུན་ཏུའང་རྣམ་པར་མཛེས། །འཇིག་རྟེན་ཀུན་གྱི་བསམ་མཐུན་པར། །སེམས་ཅན་ཀུན་ལ་མངོན་སུམ་དུ། །ལུས་ཀྱི་སྤྲིན་ནི་བསྟན་བྱས་ཤིང་། །བྱང་ཆུབ་དོན་དུ་སེམས་ཅན་འདུལ། །སངས་རྒྱས་ཐམས་ཅད་མཐུ་ཡིས་ནི། །བྱང་ཆུབ་སེམས་དཔའ་བརྗོད་པ་སྟེ། །གང་གིས་མགོན་པོ་མཐོང་བ་ཡི། །རྒྱལ་བའི་བྱིན་རླབས་ཤིན་ཏུ་ཟབ། །མགོན་པོ་ཇི་སྙེད་གང་བཞུགས་པའི། །བྱིན་རླབས་མཐའ་དང་དབུས་མེད་དེ། །ཆོས་དབྱིངས་རབ་ཏུ་གང་བྱས་ནས། །བྱང་ཆུབ་སེམས་དཔའ་རྣམ་འཚང་རྒྱ། །དེ་ནས་བྱང་ཆུབ་སེམས་དཔའ་མེ་ཏོག་ཀུན་ནས་འོད་འཕྲོ་གཙུག་ཕུད་རབ་ཏུ་འཕྱང་བས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་ཀུན་ཏུ་སངས་རྒྱས་ཀྱི། །གསུང་གི་དཀྱིལ་འཁོར་སྒྲ་འབྱིན་ཏེ། །ཆོས་ཀྱི་དབྱིངས་རྣམས་གང་བྱས་ནས། །ཡོན་ཏན་སྤྲིན་ནི་རབ་ཏུ་བརྗོད། །ཡང་དག་སངས་རྒྱས་ཆོས་ཀྱི་སྐུ། །རྣམ་དག་ནམ་མཁའ་འདྲ་བ་སྟེ། །གཟུགས་ཀྱི་སྐུ་ཡང་རབ་སྟོན་ཅིང་། །ཆོས་ཉིད་འདི་ལ་ཤིན་ཏུ་འཇུག །དགའ་དང་མོས་པའི་ཤུགས་རྣམས་དང་། །སངས་རྒྱས་སྟོབས་རྣམས་ཐམས་ཅད་ལ། །རབ་ཏུ་གནས་ཤིང་དེ་དག་ནི། །དེ་བཞིན་གཤེགས་པའི་ཡེ་ཤེས་འཇུག །ཤེས་རབ་ཆུང་ངུས་ཆོས་འདི་དག །ཀུན་ནས་ཤེས་པར་མི་ནུས་ཏེ། །ཡེ་ཤེས་མིག་ནི་རྣམ་སྦྱངས་ཤིང་། །འདི་ཡི་ཚུལ་ལ་འཇུག་པར་འགྱུར། །རབ་ཏུ་གནས་དང་བྱིན་རླབས་དང་། །ཆོས་ཀུན་རྣམ་པར་སྤྱད་པ་དང་། ། རབ་ཏུ་འཇུག་དང་ལྡང་བ་ཡི། །མཉམ་པ་ཉིད་ལ་རབ་ཏུ་ཞུགས། །ཆོས་རྣམས་མཐའ་ཡས་ཀློང་གི་རྣམས། །ཆོས་ཀུན་མཚན་ཉིད་རྣམས་ལ་སྟེ། །ཀུན་མཁྱེན་ཉིད་ལ་རབ་ཞུགས་
ཤིང་། །ཆོས་ཀྱི་རྒྱ་མཚོ་ཀུན་ལ་སྤྱོད། །སངས་རྒྱས་ཞིང་ན་ཀུན་འཁོད་ཅིང་། །ཐམས་ཅད་ཀུན་ན་རྣམ་པར་མཛེས། །འོངས་པ་མེད་ཅིང་འཕོས་པ་མེད། །སངས་རྒྱས་ཆོས་ཉིད་དེ་འདྲ་འོ། །གཟུགས་བརྙན་འདྲ་བའི་སྐུ་རྣམས་ནི། །སེམས་ཅན་རྒྱ་མཚོའི་ནང་ན་སྣང་། །མོས་པ་ཅི་འདྲ་ཡོད་པ་རྣམས། །དེ་བཞིན་མགོན་པོ་ཀུན་གྱིས་མཐོང་། །ཀུན་ཏུ་བཟང་པོའི་སྨོན་ལམ་དང་། །སྤྱོད་པ་མང་པོ་སུས་སྦྱངས་པ། །དེ་དག་ཐམས་ཅད་བ་སྤུ་ལའང་། །རྣམ་འཕྲུལ་གཞན་དང་གཞན་དག་མཐོང་། །ལུས་ཀྱི་རྣམས་ནི་རེ་རེས་ཀྱང་། །ཆོས་ཀྱི་དབྱིངས་རྣམས་ཀུན་ཏུ་ཁྱབ། །འཁོར་ལོ་ཀུན་ན་འཁོར་བ་སྟེ། །ཆོས་ཀྱི་འཁོར་ལོ་བསམ་མི་ཁྱབ། །དེ་ནས་བྱང་ཆུབ་སེམས་དཔའ་འོད་ཟེར་དང་གཟི་བརྗིད་མི་ཟད་པའི་རྒྱལ་པོའི་བློ་གྲོས་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་སྐུ་ནི་ཐམས་ཅད་ནས། །འོད་ཟེར་སྤྲིན་མང་ཕྱོགས་རྣམས་བཅུར། །ཁ་དོག་མཐའ་ཡས་འབར་བའི་འོད། །སེམས་ཅན་བསམ་པ་ཀུན་ལ་འཕྲོ། །སངས་རྒྱས་ཞིང་རྣམས་ཐམས་ཅད་ཀྱི། །སྙིང་པོ་བྱང་ཆུབ་ཀུན་ན་བཞུགས། །བདུད་རྣམས་ཐམས་ཅད་རབ་བཏུལ་ཏེ། །འཁོར་གྱི་ནང་ན་རྣམ་པར་མཛེས། །ཐམས་ཅད་རྡུལ་ནའང་མ་འདྲེས་པར། །འོད་ཟེར་དཀྱིལ་འཁོར་རྒྱས་པར་འགེངས། །ཕྱོགས་རྣམས་གཞན་དང་གཞན་ལམ་དུ། །ཞིང་གི་རྒྱུད་རྣམས་རབ་ཏུ་སྟོན། །ཞིང་གི་རྣམས་ནི་རྒྱ་མཚོའི་ཀློང་། །ཕྱོགས་ཀྱི་རྣམས་ཀྱང་ཀུན་ཏུ་གནོན། །ཞིང་རྣམས་ཐང་ཆེན་མཉམ་ཞིང་དག །ཨིནྡྲ་ནཱི་ལར་ཀུན་ནས་གནས། །སྤྱིའུ་ཚུགས་དག་དང་སྣྲེལ་ཞི་དང་། །པདྨོའི་དབྱིབས་དང་ཁྱད་ཁྱུད་དང་། །དཀྱིལ་འཁོར་འཁོར་ལོའི་ཁྱད་པར་དུ། །གཟུགས་རྣམས་ཀུན་གྱིས་རབ་ཏུ་གནས། །ཆོས་ཀྱི་དབྱིངས་རྣམས་གར་ཕྱིན་པར། །ཐུབ་པ་མྱེད་པར་གྲམ་བདལ་བ། །
དེ་དག་ཀུན་གྱི་འཁོར་རྣམས་སུ། །ཤིན་ཏུ་བསྟན་པའི་ཆོས་འབྱུང་ངོ་། །དེ་བཞིན་གཤེགས་པའི་སྐུ་དབྱིངས་ན། །འཁོད་པའི་ཞིང་རྣམས་བསམ་མྱི་ཁྱབ། །དེ་དག་ཀུན་ཏུ་ཆོས་ཉིད་འདི། །འཇིག་རྟེན་མགོན་པོ་རྣམས་ཀྱང་སྟོན། །ཐ་དད་མེད་པའི་ཆོས་ཀྱི་དབྱིངས། །ཆོས་ཀྱི་འཁོར་ལོ་རབ་ཏུ་འཁོར། །ཚིག་གི་ཚུལ་གྱི་རྣམ་པ་ཡིས། །ཆོས་བསྟན་པ་ནི་ཀུན་ཏུ་འབྱུང་། །སངས་རྒྱས་གསུང་གི་དཀྱིལ་འཁོར་ནི། །ཚུལ་རྣམས་བསམ་ཅིང་རབ་ཏུ་བརྗོད། །དད་པ་རྒྱ་མཚོའི་ཚུལ་དག་གིས། །མི་ཟད་ཚུལ་རྣམས་རབ་ཏུ་བསྟན། །སངས་རྒྱས་ཞིང་རྣམས་ཀུན་ན་ཡང་། །རྒྱལ་བ་རྣམས་ནི་མྱིག་ཡོར་འདྲ། །སྙིང་པོ་བྱང་ཆུབ་རྣམས་ན་སྣང་། །འབྱུང་བ་དག་ཀྱང་ཡོད་པ་མྱིན། །དེ་ནས་བྱང་ཆུབ་སེམས་དཔའ་ཆོས་ཀྱི་དབྱིངས་སུ་འོད་འཕྲོ་བའི་རྣམ་པར་སྣང་བའི་འབྱུང་བ་བློ་གྲོས་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བལྟ་ཞིང་བལྟ་ཞིང་སངས་རྒྱས་རྣམས། །སྐུ་གཟུགས་བསམ་གྱིས་མྱི་ཁྱབ་སྟེ། །དགའ་བ་རྒྱ་མཚོ་ཀུན་ཀྱང་འབྱུང་། །ཆོས་ཀྱི་ཤུགས་ནི་རབ་ཏུ་འཕེལ། །མཚན་རབ་ཀུན་ནས་སངས་རྒྱས་རྣམས། །ཕྱོགས་བཅུ་ཀུན་ཏུ་རབ་ཏུ་འབྱུང་། །རྡུལ་རྣམས་ཀུན་ཏུ་འཇུག་པ་ཡི། །སངས་རྒྱས་སྤྲིན་ཀྱང་དེ་བཞིན་བསྟན། །སྐད་ཅིག་སྐད་ཅིག་སེམས་ཀུན་ལ། །སངས་རྒྱས་འོད་ནི་དཔལ་གྱིས་འབར། །རྣམ་འཕྲུལ་གཞན་དང་གཞན་དག་གིས། །ཞིང་རྣམས་རྒྱ་མཚོ་ཀུན་ན་སྣང་། །བྱང་ཆུབ་སེམས་དཔའ་ཤེས་རབ་ཆེ། །རྒྱ་མཚོའི་ཆོས་ལ་བྱུང་བ་རྣམས། །སངས་རྒྱས་ཀུན་གྱིས་བྱིན་བརླབས་པ། །འདི་ཡི་ཡུལ་ལ་རྣམ་པར་སྤྱོད། །ཀུན་ཏུ་བཟང་པོའི་སྨོན་ལམ་ལ། །གང་རྣམས་ཤིན་ཏུ་གནས་གྱུར་པ། །དེ་དང་དེ་རྣམས་ཞིང་དག་ཏུ། །སངས་རྒྱས་རྣམ་འཕྲུལ་ཀུན་ལ་བལྟ། །ཡེ་ཤེས་ཟབ་མོ་རྣམ་གནོན་ཅིང་། །ཆོས་ཀྱི་དབྱིངས་ལ་གཞོལ་བ་ནི། །མོས་པ་རྒྱ་
མཚོ་ཤེས་པ་སྟེ། །སྨོན་ལམ་ཀུན་གྱིས་བྱུང་བའོ། །སངས་རྒྱས་ཀུན་གྱི་སྐུ་དང་གསུང་། །ཆགས་པ་མེད་ལ་རབ་ཏུ་ཞུགས། །སྤྱོད་པ་གཞན་དང་གཞན་དག་གིས། །སྤྱོད་ཡུལ་ཀུན་ཀྱང་ཁོང་དུ་ཆུད། །སངས་རྒྱས་ཀུན་གྱི་སྐུ་གནས་ཤིང་། །ཡེ་ཤེས་སྤྱོད་ཡུལ་གྱུར་པ་རྣམས། །ཆོས་ཀྱི་དབྱིངས་ལ་རབ་བརྩོན་པ། །རྒྱལ་བ་རྣམས་ཀྱི་ས་གནོན་ཏོ། །སྐད་ཅིག་སེམས་ཀྱིས་ཞིང་གི་རྣམས། །སངས་རྒྱས་ཞིང་གི་རྡུལ་མཉམ་པ། །དེ་དག་ཆོས་ཉིད་ཇི་བཞིན་དུ། །རྡུལ་གཅིག་སྟེང་དུ་རྣམ་པར་སྤྱོད། །ཞིང་རྣམས་ཇི་སྙེད་ཐམས་ཅད་ནི། །ཞིང་གི་རྣམ་འཕྲུལ་གང་ཡོད་པ། །ཆོས་ཉིད་འདི་ལ་ཞུགས་པ་རྣམས། །ཞིང་གཅིག་ཏུ་ནི་སྡུད་པ་བྱེད། །དེ་ནས་བྱང་ཆུབ་སེམས་དཔའ་སྟོབས་དང་བརྩོན་འགྲུས་ཆགས་པ་མྱེད་པའི་བློ་གྲོས་ཀྱིས། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཞིང་རྣམས་རྒྱ་མཚོ་ཐམས་ཅད་དུ། །དེ་དག་གསུང་ནི་ཟབ་མོ་འབྱུང་། །དབྱངས་ཀྱི་ཡན་ལག་ཀུན་རྒྱས་པ། །ཆོས་ཀྱི་སྤྲིན་གྱི་ཆར་འབེབས་སོ། །བརྗོད་པ་རྒྱ་མཚོ་ཐམས་ཅད་ཀྱིས། །སེམས་ཅན་ཀུན་གྱི་སྐད་དག་ཏུ། །སངས་རྒྱས་ཞིང་རྣམས་ཀུན་ཏུ་ཡང་། །ཆོས་རྣམས་བསྟན་པ་རབ་ཏུ་འབྱུང་། །ཞིང་རྣམས་ཀུན་ཏུ་མ་ལུས་པར། །སངས་རྒྱས་རྣམ་པར་འཕྲུལ་མཐོང་ཞིང་། །སངས་རྒྱས་གསུང་རྣམས་ཐོས་པ་དང་། །བྱང་ཆུབ་མཆོག་ཕྱིར་ཀུན་ཀྱང་འཇུག །རྡུལ་རྣམས་རེ་རེའི་སྟེང་ནས་ཀྱང་། །ཆོས་ཀྱི་དབྱིངས་ཀྱི་ཕྱོགས་ཚུལ་གྱིས། །སངས་རྒྱས་ཞིང་རྣམས་ཀུན་བཀང་ཞིང་། །སངས་རྒྱས་རྣམ་འཕྲུལ་སྟོན་པ་བྱེད། །ཆོས་ཀྱི་སྐུ་ནི་ཐ་དད་མིན། །ནམ་མཁའ་བཞིན་ཏེ་ཆགས་པ་མེད། །གཟུགས་ཀྱི་སྐུར་ནི་རྣམ་དམྱིགས་པ། །མིག་ཡོར་སྣང་བའི་མཚན་ཉིད་དོ། །མྱིག་ཡོར་ཡུལ་ལ་མི་གནས་ཏེ། །
ནམ་མཁའ་བཞིན་དུ་དངོས་པོ་མྱེད། །མཉམ་པ་ཉིད་འདི་རྟོགས་གྱུར་ནས། །ཡེ་ཤེས་རྒྱ་མཚོ་མཐོང་བར་འགྱུར། །སངས་རྒྱས་སྐུ་ནི་མ་སྐྱེས་ཏེ། །གཟུང་བ་མེད་ཅིང་འབྱུང་བ་མེད། །ནམ་མཁའ་མཉམ་པ་ཉིད་དང་མཚུངས། །གཟུང་དུ་མྱེད་ལས་འདི་བསྟན་ཏོ། །ཞིང་རྣམས་ཀུན་གྱི་སངས་རྒྱས་རྣམས། །དེ་དག་སྤུ་གཅིག་རྩེ་ལ་ཚོགས། །ཡེ་ཤེས་མྱིག་དང་ལྡན་པ་ཡིས། །སྤུ་རྣམས་ཀུན་ཏུ་རྣམ་འཕྲུལ་མཐོང་། །རྣམ་པར་སྣང་བའི་སྨོན་ལམ་སྟེ། །ཆོས་ཀྱི་དབྱིངས་ནི་ཀུན་བཀང་ཞིང་། །བླ་མེད་ཆོས་ཀྱི་འཁོར་ལོ་དག །ཞིང་རྣམས་ཀུན་ན་རྟག་ཏུ་འཁོར། །ཇི་སྙེད་བསྐལ་པ་བསམ་ཡས་པར། །སྤུ་རྩེ་གཅིག་ཏུ་རྣམ་སྤྲུལ་པ། །སངས་རྒྱས་ཀུན་གྱིས་བཤད་མཛད་ཀྱང་། །དེ་ཡི་མཐའ་ནི་རྙེད་པར་དཀའ། །ཇི་ལྟར་གླིང་བཞི་པ་འདིར་དེ་བཞིན་གཤེགས་པས་རྣམ་པར་སྤྲུལ་པའི་སྙིང་པོ་བྱང་ཆུབ་ཏུ་ཕྱོགས་བཅུ་ནས་བྱང་ཆུབ་སེམས་དཔའ་རྣམས་འདུས་པར་གྱུར་པ་དེ་བཞིན་དུ། འཇིག་རྟེན་གྱི་ཁམས་རྒྱ་མཚོའི་གླིང་བཞི་པ་ཐམས་ཅད་ཀྱི་གླིང་བཞི་པ་རེ་རེར་ཡང་། དེ་བཞིན་གཤེགས་པས་རྣམ་པར་སྤྲུལ་པའི་སྙིང་པོ་བྱང་ཆུབ་དག་ཏུ་བྱང་ཆུབ་སེམས་དཔའ་ཕྱོགས་བཅུའི་འཇིག་རྟེན་གྱི་ཁམས་རྒྱ་མཚོ་བྱེ་བའི་རྡུལ་ཤིན་ཏུ་ཕྲ་བ་སྙེད་ཀུན་ནས་འདུས་པར་གྱུར་ཏོ། །འདི་ན་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་སྙིང་པོ་བྱང་ཆུབ་དེ་བཞིན་གཤེགས་པས་རྣམ་པར་སྤྲུལ་པ་དག་ཏུ། ཀུན་ནས་འདུས་པའི་བྱང་ཆུབ་སེམས་དཔའ་དེ་དག་ཀྱང་། ཆོས་ཉིད་འདི་ཁོ་ན་རབ་ཏུ་སྟོན་ཏོ། །དེ་བཞིན་གཤེགས་པའི་ལེའུ་སྟེ་གཉིས་པའོ།། །།