དྲུག་པ། འཇིག་རྟེན་གྱི་ཁམས་རྒྱ་མཚོའི་འཁོར་ཡུག་གི་རྒྱན་རྒྱ་མཚོ་ཤིན་ཏུ་བསྟན་པ་ཞེས་བྱ་བའི་ལེའུ།
ཀྱེ་རྒྱལ་བའི་སྲས་དག་དེ་ལ་འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་པའི་འཁོར་ཡུག་ཆེན་པོ་ནི་ནོར་བུའི་རྒྱལ་པོ་པདྨོ་ཉི་མའི་གཞི་ལ་བརྟེན་པ་སྟེ། ནོར་བུའི་རིགས་རྒྱ་མཚོ་སྤོས་ཀྱི་ཙནྡན་ཐམས་ཅད་ལས་གྲུབ་པ། ནོར་བུའི་རྒྱལ་པོ་རྒྱན་གྱི་ཡུལ་ཐམས་ཅད་ཀྱིས་ལྷུན་ཤིན་ཏུ་འཕགས་ཤིང་ཟིལ་གྱིས་གནོན་པ་ནོར་བུ་སྤོས་ཞིམ་པོ་གཟི་བརྗིད་ཀྱི་འཁོར་ལོ་རྣམ་པར་སྣང་བའི་སྙིང་པོ་ཅན། ནོར་བུའི་རྒྱལ་པོ་རྡོ་རྗེ་སྲ་ཞིང་མི་ཤིགས་པ་ལྟར་ཤིན་ཏུ་མཁྲེགས་ཤིང་སྲ་བ་རིན་པོ་ཆེའི་ཆུ་ཐམས་ཅད་ཀུན་ནས་འབྱུང་བ་རིན་པོ་ཆེའི་ཤིང་གི་ནགས་ཚལ་གྱི་རྒྱན་ཐམས་ཅད་མེ་ཏོག་ཤིན་ཏུ་རྒྱས་པ། སྤོས་ཀྱི་རྩི་མཆོག་བཟང་པོ་ཐམས་ཅད་ཀྱི་རྒྱན་གྱིས་བརྒྱན་པ། སྤོས་ཀྱི་མེ་ཏོག་དཔལ་ཅན་ཤིན་ཏུ་བཟང་བས་རྣམ་པར་བརྒྱན་པ། ནོར་བུའི་རྒྱལ་པོ་འཇིག་རྟེན་གྱི་ཁམས་ཐམས་ཅད་ཀྱི་དབྱིབས་ལྟ་བུའི་དྲ་བས་ཀུན་ནས་བྲེས་པ་སྟེ། དེ་དག་ལ་སྩོགས་པ་རྒྱན་བཟང་པོའི་རྣམ་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཤིན་ཏུ་ཕྲ་བ་སྙེད་ཀྱིས་རབ་ཏུ་བརྒྱན་པའོ། །དེ་ནས་བྱང་ཆུབ་སེམས་དཔའ་ཀུན་ཏུ་བཟང་པོས་ཡང་ཁོར་ཡུག་གི་རྒྱན་དང་ཡོན་ཏན་ཡོངས་སུ་དག་པ་འདི་ཉིད་བསྟན་པའི་ཕྱིར། སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་གྱི་ཁམས་རྒྱ་མཚོ་གང་ཡོད་པ། །མཐའ་དང་དབུས་མེད་སྣ་ཚོགས་རྣམ་པ་ཅན། །ནོར་བུ་མང་པོས་རྣམ་དག་མཐའ་ཡས་མཆོག །དེ་དག་སངས་རྒྱས་རྣམ་པར་འཕྲུལ་པས་བྱུང་། །དྲི་མེད་ཁོར་ཡུག་རྒྱན་གྱིས་བརྒྱན་པ་ནི། །ནོར་བུ་མང་པོ་དེ་བཞིན་སྤོས་མང་དང་། །མུ་ཏིག་གསལ་བའི་ཚོགས་ལ་རབ་ཏུ་གནས། །ཁ་དོག་མཐའ་ཡས་རིན་ཆེན་རྣམས་ཀྱིས་བརྟེན། །སྙིང་པོ་ནོར་བུའི་སྤྲིན་ཅན་སྣ་ཚོགས་སྲ། །འཛམ་བུ་ཆུ་ཀླུང་འོད་འཕྲོ་སྙིང་པོའི་ཚོགས། །འོད་འཕྲོ་དམ་པ་ཕྱོགས་སུ་སྣང་ཞིང་འཚེར། །ཁོར་ཡུག་དྲི་མ་མེད་པ་རྣམ་པར་མཛེས། །ནོར་བུའི་རྡོ་རྗེས་བྱས་ཤིང་སྲ་ཞིང་བརྟན། །མཚམས་རྣམས་མི་ཕྱེད་ནོར་བུ་སྣ་ཚོགས་འབྲུལ། །མཚན་
ལྡན་ནོར་བུའི་རིན་ཆེན་རྣམ་བཀོད་པ། །རྒྱན་རྣམས་ཀུན་གྱིས་ཡོངས་སུ་དག་པར་སྣང་། །སྤོས་ཆུའི་སྤྲིན་གྱི་ཁ་དོག་མཐའ་ཡས་ཏེ། །རིན་ཆེན་ཙནྡན་མེ་ཏོག་ཀུན་ཏུ་གྲམ། །པདྨོ་སྣ་ཚོགས་གོས་ཀྱིས་ཀུན་ནས་ཡོག །རིན་ཆེན་རྩི་མཆོག་དྲི་ཞིམ་རྣམས་དང་ལྡན། །སྣ་ཚོགས་ཤིང་གི་སྤྲིན་གྱིས་ཀུན་ནས་བརྒྱན། །ནོར་བཟང་ཀུན་གྱིས་ཀུན་ནས་གཟི་བརྗིད་འབར། །འོད་ཟེར་སྤྲིན་གྱི་འོད་ཀྱི་དཀྱིལ་འཁོར་ཅན། །གོས་ཀྱི་མཛོད་ཀྱིས་ཤིན་ཏུ་འབར་བར་གནས། །སྤོས་ཀྱི་འོད་འཕྲོ་བདུག་པ་གདུགས་འཆང་བའི། །བྱང་ཆུབ་སེམས་དཔའ་མང་པོས་ཆོས་དབྱིངས་གང་། །སྒྲ་དབྱངས་མང་པོ་རྒྱ་མཚོ་ཐམས་ཅད་འབྱིན། །འདི་ནི་རྣམ་པར་སྣང་མཛད་ཆོས་འཁོར་ལོ། །རིན་ཆེན་མཛེས་པ་དེ་དག་ཐམས་ཅད་དང་། །ནོར་བུ་དག་དང་ཀུན་ནས་འོད་འཕྲོའི་ཤིང་། །ཀུན་ལ་རྣམ་པར་སྣང་མཛད་སྐུ་གསལ་བ། །གཟུགས་བརྙན་ཚུལ་དུ་ནང་ན་ཡོད་པ་སྣང་། །ཐམས་ཅད་གཟུགས་སུ་སྐུ་རྣམས་མཐའ་ཡས་ཏེ། །སངས་རྒྱས་སྤྲུལ་མང་ཁ་དོག་མུ་མེད་པས། །ཐམས་ཅད་ཕྱོགས་དང་ཆོས་དབྱིངས་ཀུན་བཀང་ཞིང་། །སེམས་ཅན་མང་པོ་ཚད་མེད་རྣམ་པར་འདུལ། །ཐམས་ཅད་རྒྱན་ལས་སྒྲ་དབྱངས་ཀུན་འབྱུང་སྟེ། །རྣམ་པར་སྣང་མཛད་སྨོན་ལམ་འཁོར་ལོ་ཡིས། །ཞིང་རྣམས་རྒྱ་མཚོ་ཡོངས་སུ་དག་བྱས་པ། །དེ་ཀུན་དེ་ལས་རྣམ་པར་འཕྲུལ་ཞིང་གྲགས། །འཇིག་རྟེན་གྱི་ཁམས་རྒྱ་མཚོའི་འཁོར་ཡུག་གི་རྒྱན་རྒྱ་མཚོ་ཤིན་ཏུ་བསྟན་པ་ཞེས་བྱ་བ་སྟེ། ལེའུ་དྲུག་པའོ།། །།