བཅུ་དགུ་པ། བྱང་ཆུབ་སེམས་དཔའི་ཚོགས་ཀྱི་ཚིགས་སུ་བཅད་པའི་ལེའུ།
དེ་ནས་སངས་རྒྱས་ཀྱི་མཐུས་ཕྱོགས་བཅུ་ནས་བྱང་ཆུབ་སེམས་དཔའ་བཅུ་བཅུ་འོངས་པར་གྱུར་ཏེ། བྱང་ཆུབ་སེམས་དཔའ་དེ་དག་སོ་སོ་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ནས་འོངས་པ་ཤ་སྟག་སྟེ། བྱང་ཆུབ་སེམས་དཔའ་རེ་རེ་ཞིང་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་དང་ལྷན་ཅིག་ཏུ་ཕྱིན་པར་གྱུར་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱང་མིང་འདི་ཞེས་བྱ་བ་དག་སྟེ། འདི་ལྟར་ཆོས་ཀྱི་བློ་གྲོས་དང་། ཐམས་ཅད་བློ་གྲོས་དང་། དཔལ་གྱི་བློ་གྲོས་དང་། ཡོན་ཏན་བློ་གྲོས་དང་། བརྩོན་འགྲུས་བློ་གྲོས་དང་། དགེ་བའི་བློ་གྲོས་དང་། ཡེ་ཤེས་བློ་གྲོས་དང་། བདེན་པའི་བློ་གྲོས་དང་། མཆོག་གི་བློ་གྲོས་དང་། དམ་པའི་བློ་གྲོས་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་འཇིག་རྟེན་གྱི་ཁམས་མིང་འདི་ཞེས་བྱ་བ་དག་ནས་འོངས་པ་དག་སྟེ། འདི་ལྟར་དབང་པོའི་མེ་ཏོག་དང་། པད་མོའི་མེ་ཏོག་དང་། རིན་པོ་ཆེའི་མེ་ཏོག་དང་། ཨུཏྤ་ལའི་མེ་ཏོག་དང་། རྡོ་རྗེའི་མེ་ཏོག་དང་། སྤོས་ཀྱི་མེ་ཏོག་དང་། ཡིད་དུ་འོང་བའི་མེ་ཏོག་དང་། འོད་ཟེར་གྱི་མེ་ཏོག་དང་། ལྡུམ་བུའི་མེ་ཏོག་དང་། ནམ་མཁའི་མེ་ཏོག་དག་གོ །བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པ་མཚན་འདི་ཞེས་བྱ་བ་དག་གི་ཞམ་རིང་ན་ཚངས་པར་སྤྱོད་པ་དག་སྟེ། འདི་ལྟར་ཟླ་བ་གཞན་མ་ཡིན་པ་དང་། ཟླ་བ་མ་ཉམས་པ་དང་། ཟླ་བ་མི་གཡོ་བ་དང་། ཟླ་བ་མི་སྒུལ་བ་དང་། ཟླ་བ་ཆུའི་ལྷ་དང་། ཟླ་བ་ཐོགས་པ་མེད་པ་དང་། ཟླ་བའི་འོད་ཟེར་དང་། ཟླ་བ་རྡུལ་མེད་པ་དང་། ཟླ་བ་རྣམ་པར་གྲུབ་པ་དག་གོ །དེ་ནས་བྱང་ཆུབ་སེམས་དཔའ་དེ་དག་ཐམས་ཅད་ཀྱིས་བཅོམ་ལྡན་འདས་ལ་ཕྱག་འཚལ་ཏེ། སངས་རྒྱས་ཀྱི་མཐུས་ཕྱོགས་བཅུར་རྒྱས་པར་བཀང་ནས་གང་ནས་འོངས་པའི་ཕྱོགས་སུ་བརྟེན་ཏེ། སེང་གེའི་ཁྲི་རྣམ་པར་སྣང་བའི་སྙིང་པོ་ཅན་དག་མངོན་པར་སྤྲུལ་ནས་སྐྱིལ་མོ་ཀྲུང་བཅས་ཏེ་འཁོད་དོ། །ཇི་ལྟར་འཇིག་རྟེན་གྱི་ཁམས་འདིའི་རི་རབ་ཀྱི་རྩེ་མོ་ལ་བྱང་ཆུབ་སེམས་དཔའ་རྣམས་
ལྷགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཐམས་ཅད་དང་ལྷའི་དབང་པོའི་ཁང་པ་ཀུན་ན་ཡང་དེ་བཞིན་ཏེ། བྱང་ཆུབ་སེམས་དཔའ་མིང་དེ་སྐད་ཅེས་བྱ་བ་ཤ་སྟག་གོ །འཇིག་རྟེན་གྱི་ཁམས་ཀྱང་དེ་སྐད་ཅེས་བྱ་བ་ནས་འོངས་པ་ཤ་སྟག་གོ །དེ་བཞིན་གཤེགས་པ་ཡང་མཚན་དེ་སྐད་ཅེས་བྱ་བའི་ཞམ་རིང་ན་ཚངས་པར་སྤྱོད་པ་ཤ་སྟག་གོ །དེ་ནས་བཅོམ་ལྡན་འདས་ཀྱིས་ཞབས་ཀྱི་མཐེ་བོ་གཉིས་ནས་འོད་ཟེར་བྱེ་བ་ཕྲག་སྟོང་བཀྱེ་སྟེ། ཕྱོགས་བཅུ་ཐམས་ཅད་སྣང་བར་བྱས་ནས་འཇིག་རྟེན་གྱི་ཁམས་ཐམས་ཅད་ཀྱང་བསྟན་ཏོ། །བྱང་ཆུབ་སེམས་དཔའ་དེ་དག་ཐམས་ཅད་ཀྱིས་ཀྱང་འཇིག་རྟེན་གྱི་ཁམས་དེ་དག་ཐམས་ཅད་ཀྱི་གླིང་བཞི་པ་ཐམས་ཅད་དང་། རི་རབ་ཀྱི་རྩེ་མོ་ཐམས་ཅད་ན་དེ་བཞིན་གཤེགས་པའི་རྣམ་པར་འཕྲུལ་པ་ཡོད་པ་ཐམས་ཅད་ཀྱང་མཐོང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྣང་བ་དྲི་མ་མེད་ལ་ལྟོས། །རི་རབ་རྩེ་མོ་ཐམས་ཅད་ལ། །མགོན་པོ་དག་ནི་རབ་ཏུ་སྣང་། །རྣམ་པར་རྒྱལ་བ་ཀུན་ན་བཞུགས། །ལྷའི་རྒྱལ་པོ་ཐམས་ཅད་ཀྱིས། །སྤྱན་དྲངས་ཤིང་ནི་གཤེགས་པར་གྱུར། །ཀུན་ཀྱང་སངས་རྒྱས་བཅུ་དག་གི །རབ་ཏུ་གཤེགས་པས་མངོན་པར་བསྟོད། །ཀུན་གྱི་འཁོར་ཀྱང་གཅིག་པ་སྟེ། །བྱང་ཆུབ་སེམས་དཔའ་མང་པོ་ལྷགས། །ཕྱོགས་བཅུ་དག་ནས་འོངས་གྱུར་ཅིང་། །ཡིད་དུ་འོང་བའི་སྟན་ལ་འཁོད། །ཀུན་གྱི་མིང་ཡང་འདི་ཉིད་དེ། །ཇི་ལྟར་དེད་ལ་བཏགས་པ་བཞིན། །འཇིག་རྟེན་ཁམས་ཀྱི་མིང་དག་ཀྱང་། །དེ་སྐད་དག་ནས་ཀུན་ཀྱང་འོངས། །འཇིག་རྟེན་ཁམས་རྣམས་ཐམས་ཅད་ན། །དྲང་སྲོང་ཆེན་པོའི་མཚན་ཀྱང་དེ། །དེ་ན་ཚངས་སྤྱོད་བླ་མེད་ལ། །ཐེ་ཙོམ་མེད་པར་དེ་དག་སྤྱོད། །ཀྱེ་མ་རྒྱལ་སྲས་ཁྱེད་ལྟོས་ཤིག །དྲང་སྲོང་ཆེན་པོའི་བྱིན་རླབས་ཀྱིས། །འཛམ་བུའི་གླིང་རྣམས་ཐམས་ཅད་ན། །རྒྱལ་བ་འདི་ན་བཞུགས་སྙམ་བྱེད། །བདག་
ཅག་རྣམས་ནི་འདི་སྙམ་དུ། །རི་རབ་རྩེ་ལ་བདེ་གཤེགས་སྙམ། །འཇིག་རྟེན་ཁམས་ནི་ཀུན་ན་ཡང་། །སངས་རྒྱས་ངོ་མཚར་རྨད་རེ་ཆེ། །འཇིག་རྟེན་ཁམས་རྣམས་ཐམས་ཅད་ན། །བྱང་ཆུབ་མཆོག་ཏུ་སེམས་བཏང་ཞིང་། །དེ་དག་སྨོན་ལམ་འདི་བཏབ་སྟེ། །བྱང་ཆུབ་སྤྱོད་པ་རབ་ཏུ་སྤྱོད། །ཁ་དོག་མདོག་ནི་ཚད་མེད་པས། །གང་ཟག་མཆོག་ནི་བསྐྱོད་བྱེད་ཀྱང་། །ཆོས་ཀྱི་དབྱིངས་ལ་མི་ཆགས་ཏེ། །དེ་དག་སུས་ཀྱང་མི་ཤེས་སོ། །གང་གིས་འཇིག་རྟེན་མུན་བསྩལ་ཞིང་། །ཐམས་ཅད་དུས་སུ་རྣམ་སྣང་བ། །དེ་ལ་འདྲ་བ་གང་ཡང་མེད། །དེ་ནི་ཤེས་པར་ཇི་ལྟར་རུང་། །དེ་ནས་བྱང་ཆུབ་སེམས་དཔའ་ཐམས་ཅད་བློ་གྲོས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འདྲེན་པ་རྣམས་ནི་མཐོང་ནས་ཀྱང་། །བསྐལ་པ་མང་པོ་འདས་གྱུར་ཏེ། །འཇིག་རྟེན་མགོན་སྐྱོབ་དེ་དག་གིས། །ཆོས་ཉིད་དེ་ནི་ཤེས་པ་མིན། །མཚན་མ་དག་ལ་སྤྱོད་པ་རྣམས། །གཏི་མུག་དྲ་བ་འཕེལ་བར་གྱུར། །སངས་རྒྱས་གང་གིས་མ་མཐོང་བ། །འཁོར་བའི་བཙོན་རར་མདོངས་པ་ཡིན། །ཆོས་རྣམས་འདི་དག་བརྟག་བྱས་ན། །རང་བཞིན་ཤེས་པར་མི་རུང་སྟེ། །སྐྱེ་དང་ཤི་འཕོས་གྱུར་པ་རྣམས། །མིང་ཙམ་དུ་ནི་བསྟན་པ་ཡིན། །ཆོས་རྣམས་གང་ཡང་འགྲོ་བ་མེད། །གང་ཡང་དེ་བཞིན་སྐྱེ་བ་མེད། །ཆོས་ཉིད་འདི་ནི་ཤེས་གྱུར་ན། །སངས་རྒྱས་ཀུན་ན་རབ་ཏུ་སྣང་། །གཟུང་དུ་མེད་ཅིང་བལྟར་མེད་ཅིང་། །ཆོས་ཀྱི་རྣམས་ནི་རང་བཞིན་མེད། །དངོས་མེད་པ་ཡི་མཐའ་ཤེས་ན། །སངས་རྒྱས་རྣམས་ལ་ཚད་ཀྱང་མེད། །ཚད་མེད་པ་ཡི་ཆོས་རྣམས་ཀྱི། །རང་བཞིན་གང་གིས་ཡོངས་ཤེས་པ། །དེ་ནི་ཅི་ཞིག་ཡོད་ཅེས་པར། །མཐོང་བར་གྱུར་པ་གང་ཡང་མེད། །གང་རྣམས་མཚན་མའི་རྗེས་འབྲང་བ། །དེ་དག་བྱིས་པའི་ཆོས་ཉིད་དེ། །དེ་ཕྱིར་མཚན་ཉིད་ཀུན་མེད་པའི། །སངས་རྒྱས་རྣམས་ཀྱང་མི་མཐོང་ངོ་། །དུས་གསུམ་འབྱུང་བའི་ཐུབ་པ་རྣམས། །མཚན་རབ་
ཀུན་དང་ལྡན་པ་སྟེ། །མི་གནས་ཚུལ་དུ་བཞུགས་པ་ཡིན། །ཆོས་ཀྱི་དབྱིངས་ལ་གཡོ་བ་མེད། །ལ་ལ་དག་གི་ཆོས་ཉིད་ཤེས། །ལ་ལ་དག་ནི་ཆོས་ཀྱང་བརྗོད། །གང་ལ་ཐེ་ཙོམ་མི་མངའ་བའི། །ཡང་དག་སངས་རྒྱས་དེ་རིང་མཐོང་། །སངས་རྒྱས་རྣམས་ཀྱི་ཆོས་ཉིད་འདི། ། ཆོས་ཀྱི་བློ་གྲོས་འདི་བརྗོད་དོ། །དེ་ཐོས་ནས་ཀྱང་བདག་ཅག་གིས། །སངས་རྒྱས་བྱང་ཆུབ་བསམ་ཡས་ཤེས། །དེ་ནས་བྱང་ཆུབ་སེམས་དཔའ་དཔལ་གྱི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་སངས་རྒྱས་དཔལ་མངའ་བའི། །ཡེ་ཤེས་ཤེས་རབ་ཤིན་ཏུ་ཆེ། །དེ་ལ་འཇིག་རྟེན་ཤིན་ཏུ་རྨོངས། །སངས་རྒྱས་ཆོས་ནི་བསམ་མི་ཁྱབ། །ཚུལ་བཞིན་མ་ཡིན་འདུ་ཤེས་ཀྱིས། །བྱིས་པ་རྣམས་ནི་སེམས་བྱེད་པས། །དེ་ཕྱིར་འདུ་ཤེས་ཀུན་སྦྱངས་པའི། །སངས་རྒྱས་རྣམས་ནི་མི་མཐོང་ངོ་། །ཤེས་རབ་ཆུང་བ་ཐམས་ཅད་ནི། །ཕུང་པོའི་འདུ་ཤེས་རྣམས་ལ་གནས། །ཕུང་པོ་རྣམ་པར་མ་བསྒོམས་པས། །དེ་བཞིན་གཤེགས་པ་མི་མཐོང་ངོ་། །དངོས་མེད་དངོས་སུ་བཤད་པ་ནི། །བདག་གི་དངོས་ཤེས་བྱ་བ་ཡིན། །ཆོས་རྣམས་ཐམས་ཅད་ཤེས་གྱིས་ཤིང་། །རྒྱལ་བ་རྣམ་པར་སྣང་མཛད་ལྟོས། །སྔོན་ཆད་ཕུང་པོའི་ཚུལ་བཞིན་དུ། །མ་འོངས་རྣམས་ཀྱང་སུས་མཐོང་བ། །མ་འོངས་པ་ཡི་ཚུལ་ཤེས་པས། །སངས་རྒྱས་བསམ་གྱིས་མི་ཁྱབ་ལྟོས། །ཇི་ལྟར་སྣང་བ་མེད་པ་ཡི། །མུན་པའི་ནང་ན་གཟུགས་མི་སྣང་། །དེ་བཞིན་ཆོས་རྣམས་བཤད་པ་ནི། །མཁས་ཀྱང་ཤེས་པར་མི་རུང་ངོ་། །ཇི་ལྟར་དྲི་མ་ལྡན་མིག་གིས། །གསལ་བའི་གཟུགས་ཀྱང་མི་མཐོང་བ། །དེ་བཞིན་སེམས་ནི་མ་སྦྱངས་པས། །སངས་རྒྱས་ཆོས་ནི་མི་མཐོང་ངོ་། །ཇི་ལྟར་ཉི་མ་བསྒྲིབས་མེད་པ། །རབ་རིབ་ཅན་གྱི་མི་མཐོང་བ། །དེ་བཞིན་ཕུག་ན་གནས་སེམས་ཀྱིས། །སངས་རྒྱས་དག་ནི་མི་མཐོང་ངོ་། །དེ་བས་མིག་ནི་རྣམ་པར་སྦྱོངས། །གཟུགས་ཀྱི་འདུ་ཤེས་རྣམ་པར་བསྒོམས། །ཆོས་རྣམས་མཐོང་བ་མེད་པ་ཡིས། །འོད་མཛད་
རབ་ཏུ་མཐོང་མ་ཡིན། །ཇི་ལྟར་སྔོན་བློས་ཀུན་བཤད་ཅིང་། །བདག་གིས་ཇི་ལྟར་ཐོས་པ་བཞིན། །སངས་རྒྱས་བྱང་ཆུབ་མི་བསྙེངས་པ། །རྣམ་པར་སྣང་མཛད་རབ་ཏུ་མཐོང་། །དེ་ནས་བྱང་ཆུབ་སེམས་དཔའ་ཡོན་ཏན་བློ་གྲོས་ཀྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གནས་མེད་པ་ཡི་ཆོས་རྣམས་ལ། །གནས་ནི་ཡོངས་སུ་བརྟགས་པས་ན། །དེ་ཕྱིར་སྲིད་པའི་བཙོན་ར་ན། །བྱིས་པ་རྣམས་ནི་རབ་ཏུ་འཁོར། །བརྗོད་པས་བརྗོད་དུ་མི་རུང་ཆོས། །བློ་ཞན་རྣམས་ཀྱིས་རྣམ་པར་བརྟགས། །དེས་ནི་ཡོངས་སུ་བསྒྲིབས་བྱས་པས། །བདག་གི་སེམས་ཀྱང་རབ་རྨོངས་བྱས། །ཤེས་རབ་ཆུང་ལ་ལམ་ནོར་ཅིང་། །བདག་གི་སེམས་ལ་མི་མཁས་པ། །ཕྱིན་ཅི་ལོག་གི་བློ་དག་གིས། །མི་བཟད་ལུས་ནི་འཕེལ་བར་བྱེད། །གང་གིས་སྟོང་པ་མ་མཐོང་བ། །དེ་དག་འཁོར་ཞིང་ཉམ་ཡང་ང་། །ཆོས་མིག་བསམ་གྱིས་མི་ཁྱབ་པའི། །མིག་ཀྱང་དེ་ལ་ཡོད་པ་མིན། །དེ་བས་མིག་ནི་སྦྱང་བར་གྱིས། །བསམ་པ་རྣམས་ཀྱང་རྣམ་པར་སེམས། །གང་ཕྱིར་བདག་ཅག་སྔོན་ཅད་དུ། །བདེ་གཤེགས་མ་མཐོང་ཆུད་ཀྱང་ཟོས། །ཡང་དག་སངས་རྒྱས་མཐོང་དེ་འང་། །གང་གི་སེམས་ལ་ཆགས་མེད་པ། །དེས་ནི་སངས་རྒྱས་ཅིས་བྱུང་བའི། །ཆོས་རྣམས་དེ་དག་རབ་ཏུ་མཐོང་། །གང་གིས་ཤེས་རབ་ཆེ་མངའ་བ། །ཆོས་སུ་བདེ་གཤེགས་མཐོང་བ་རྣམས། །དེ་དག་འཇིག་རྟེན་མིག་ཅན་ཏེ། །གང་གིས་མཐོང་བ་མཐོང་ཞེས་བྱ། །ལྷག་མཐོང་མེད་པར་མཐོང་བ་ནི། །ཆོས་རྣམས་ངན་པར་མཐོང་བ་སྟེ། །ལྷག་མཐོང་གིས་ནི་མཐོང་གྱུར་ན། །ཐམས་ཅད་མཐོང་བ་མེད་པ་ཡིན། །ཀྱེ་མ་ཆོས་ཀྱི་ཆོས་ཉིད་ནི། །ཡང་དག་སངས་རྒྱས་རྣམས་ཀྱིས་བཤད། །དེ་ནི་རང་བཞིན་ཐམས་ཅད་དུ། །ཤི་བ་མེད་ཅིང་འཚོ་བ་མེད། །སངས་རྒྱས་བྱང་ཆུབ་ཅི་འདྲ་བ། །དཔལ་གྱི་བློས་ནི་སྔོན་བསྟན་ཏེ། །དེ་ལས་བདག་གིས་ཐོས་ནས་ཀྱང་། །སངས་རྒྱས་ཆོས་ཉིད་ཤེས་མ་གྱུར། །
དེ་ནས་བྱང་ཆུབ་སེམས་དཔའ་བརྩོན་འགྲུས་བློ་གྲོས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྣམ་པར་རྟོག་པ་སྤྱོད་པ་ཡི། །མིག་ནི་ཤིན་ཏུ་འཁྲུལ་བ་ཡིན། །འཁྲུལ་པར་མཐོང་བ་ལོག་པ་སྟེ། །སངས་རྒྱས་ལ་ནི་ལོག་མི་མངའ། །གང་གིས་ལོག་པར་ཤེས་གྱུར་ཏེ། །ཡང་དག་ཇི་བཞིན་མ་ནོར་ལ། །ཡང་དག་མ་ཡིན་བདེན་ཤེས་ན། །སངས་རྒྱས་དྲི་མེད་མཐོང་བ་ཡིན། །མཐོང་བ་དག་གིས་དྲི་མར་འགྱུར། །རྣམ་པར་མཐོང་ན་དེ་མེད་དེ། །སངས་རྒྱས་རྣམས་ནི་མཐོང་དང་བྲལ། །དེ་བས་རྣམ་པར་གཟིགས་ཤེས་བྱ། །དེ་ནི་འཇིག་རྟེན་སྤྱོད་པ་སྟེ། །འཇིག་རྟེན་དེ་ཡང་རྣམ་པར་བརྟགས། །འཇིག་རྟེན་འཇིག་པ་ཤེས་གྱུར་ན། །སྣང་བ་དག་ནི་སྐྱེ་བར་འགྱུར། །འཇིག་རྟེན་རྣམས་ཀྱི་སྣང་བ་ནི། །འཇིག་རྟེན་མཚན་ཉིད་སྣང་བ་སྟེ། །ཡང་དག་ཇི་བཞིན་བསམ་བྱས་ཤིང་། །དེ་ལྟར་མཐོང་བ་མཐོང་བའོ། །དེ་ལྟར་མཐོང་བ་ཉོན་མོངས་མེད། །དབང་དུ་གྱུར་ཅིང་ཟག་པ་མེད། །གང་གིས་ཐ་དད་མེད་མཐོང་བ། །དངོས་པོར་བརྟགས་པ་མ་ཡིན་ནོ། །རྟོག་དང་རྣམ་པར་རྟོག་པ་ནི། །སངས་རྒྱས་ཆོས་རྣམས་བརྗོད་པ་སྟེ། །དེ་དག་ཡོད་པ་མ་ཡིན་པས། །རང་བཞིན་དེ་ཕྱིར་སྦྱངས་པ་ཡིན། །དེ་དག་རང་བཞིན་རྣམ་པར་དག །ནམ་མཁའ་བཞིན་དུ་མཚན་ཉིད་མེད། །དེ་དག་ལ་ནི་སྟོན་པ་མེད། །མཁས་པ་རྣམས་ཀྱིས་དེ་ལྟར་ལྟོས། །ཆོས་རྣམས་ལ་ནི་མོས་མྱེད་དེ། །ཆོས་ཀྱི་འདུ་ཤེས་རྣམ་བསྒོམས་ཤིང་། །ཤེས་པ་དེ་ཡང་མ་བསྒོམས་པ། །དེས་ནི་ཐུབ་ཆེན་མཐོང་བ་ཡིན། །ཇི་ལྟར་ཡོན་ཏན་བློས་བརྗོད་པ། །དེ་ལྟར་ཡང་དག་སངས་རྒྱས་མཐོང་། །དེ་མཐོང་བས་ན་འདུ་བྱེད་ཀུན། །རང་བཞིན་གྱིས་ནི་རྣམ་པར་ཞི། །དེ་ནས་བྱང་ཆུབ་སེམས་དཔའ་དགེ་བའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཀྱེ་མ་སངས་རྒྱས་དཔལ་ཆེན་རྣམས། །དེ་བཞིན་གཤེགས་པ་ཚད་མེད་དོ། །རྣམ་གྲོལ་ཐུགས་ནི་སྡིག་མི་མངའ། ། འཇིག་རྟེན་མཐར་ཕྱིན་བརྒལ་བའོ། །
ཡང་དག་ཇི་བཞིན་མ་ནོར་བར། །བསྐལ་པ་རྣམས་ནི་ཚད་མེད་པས། །ཇི་ལྟར་མཁས་པས་མཐོང་བ་བཞིན། །འཇིག་རྟེན་སྒྲོན་མས་རབ་ཏུ་གཟིགས། །འདུ་བྱེད་ཐམས་ཅད་སྐད་ཅིག་མ། །སོ་སོའི་སྐྱེ་བོ་དེ་དག་འགེངས། །ནམ་མཁའི་ཁམས་ནི་གཟུང་བྱས་ཤིང་། །དེ་དག་དེ་ཕྱིར་ཁོམ་པ་མེད། །ཁོམ་པ་མེད་ཅེས་བྱ་བ་ནི། །ཅི་ཡང་བརྗོད་པ་མེད་པ་སྟེ། །ཁོམ་པ་མེད་པའི་རང་བཞིན་གྱིས། །ཁོམ་པ་བསམ་གྱིས་མྱི་ཁྱབ་ཐོབ། །གང་ལ་དངོས་པོ་མེད་པ་ཡི། །མི་ཟད་ཁོམ་པ་མེད་པར་བཤད། །ཡོད་པའི་རང་བཞིན་ཤེས་གྱུར་ན། །དེས་ནི་གྲགས་ཆེན་མཐོང་བ་ཡིན། །མཐོང་བ་མེད་པ་མཐོང་ཞེས་བྱ། །ཡོད་པ་མེད་པའང་ཡོད་ཅེས་བྱ། །མཐོང་བ་དག་གམ་ཡོད་པ་ནི། །མ་བསྒོམས་ན་ནི་རྣམ་པར་བསྒོམས། །ཇི་ལྟར་ལྟ་བ་སུས་མཐོང་བ། །དེ་དག་གིས་ནི་ལྟ་བ་བཤིག །གང་ལས་སངས་རྒྱས་སྨོས་པ་ཡི། །དེ་དག་ཆོས་རྣམས་ཞིག་པ་མེད། །ཇི་ལྟར་ཐུབ་པས་བསྟན་པ་བཞིན། །སངས་རྒྱས་ཡོངས་སུ་སུས་མཐོང་བ། །དེ་ནི་འཇིག་རྟེན་སྣང་བར་བྱེད། །རྒྱལ་བ་རྣམ་པར་སྣང་མཛད་བཞིན། །ཆོས་རྣམས་ཀྱི་ནི་སྣང་བ་གཅིག །དེ་བཞིན་གཤེགས་པས་རབ་ཏུ་བསྟན། །དེས་ནི་བརྩོན་བློ་བརྟན་པ་དེ། །ཆོས་མང་བྱེ་བ་རབ་ཏུ་སྟོན། །ཡོད་དང་མེད་པ་ཤེས་བྱ་སྟེ། །གང་གིས་འདུ་ཤེས་རྣམ་བསྒོམས་པ། །དེས་ནི་སངས་རྒྱས་མཐོང་བ་སྟེ། །ཡང་དག་མཐའ་ལ་རབ་ཏུ་གནས། །དེ་ནས་བྱང་ཆུབ་སེམས་དཔའ་ཡེ་ཤེས་བློ་གྲོས་ཀྱིས་སངས་རྒྱས་ཀྱི་མཐུས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བའི་བསྟན་པ་འདི་ཐོས་པས། །སྣང་བ་བདག་ཅག་ཤེས་པར་གྱུར། །ཕྱོགས་བཅུ་ཀུན་ཏུ་སྣང་བ་ཡི། །ཡང་དག་སངས་རྒྱས་དེས་ཀྱང་མཐོང་། །སེམས་ཅན་རང་བཞིན་ཡོད་གྱུར་པ། །དེ་ནི་སེམས་ཅན་གཡང་ས་སྟེ། །འདི་ལ་ཅི་ཡང་ཡོད་པ་མིན། །ཚིག་གི་ལམ་རྣམས་བསྡུས་པའོ། །བྱིས་པ་འཛིན་དང་བཅས་པ་རྣམས། །བདག་ལུས་ཡང་དག་འཛིན་པ་ལ། །སངས་རྒྱས་སྣང་བར་མི་འགྱུར་ཏེ། །དེ་བཞིན་གཤེགས་པ་གཟུང་བ་མེད། །ཡང་དག་སངས་རྒྱས་མ་མཐོང་ཞིང་། །གང་རྣམས་མིག་
ཡོད་མ་ཡིན་པ། །དེ་དག་བསྐལ་པ་གྲངས་མེད་དུ། །སྲིད་པའི་གང་ཆེན་མཚོ་ན་འཁོར། །ཉོན་མོངས་ཅན་ནི་འཁོར་བར་བཤད། །ཉོན་མོངས་མེད་པ་མྱ་ངན་འདས། །མྱ་ངན་འདས་དང་འཁོར་བ་ཡང་། །རང་བཞིན་རྙེད་པར་མི་རུང་ངོ་། །འཁོར་ཞེས་བྱ་བ་བརྡ་ཡིན་ཏེ། །མྱ་ངན་འདས་པ་བརྗོད་པ་ཡིན། །འཕགས་པའི་ཆོས་རྣམས་མ་སྐྱེས་པ། །བླ་མ་དག་ནི་མི་ཤེས་སོ། །འདི་ནི་སངས་རྒྱས་རྒྱལ་བ་འདི། །འདི་ཡིན་འདི་འདྲའི་འདུ་ཤེས་ཅན། །དེ་དག་སངས་རྒྱས་མི་མཐོང་སྟེ། །ཚུལ་བཞིན་མ་ཡིན་ཕྱིན་ཅི་ལོག །ཞི་བའི་རང་བཞིན་ཇི་ལྟ་བར། །གང་གིས་ཞི་བ་ཤེས་གྱུར་པ། །དེས་ནི་ཚིག་གི་ལམ་འདས་པའི། །ཡང་དག་སངས་རྒྱས་རབ་ཏུ་མཐོང་། །ཆོས་རྣམས་ཀུན་གྱི་སྤྱོད་པ་ཡིན། །རབ་ཏུ་བརྗོད་པ་བསྟན་པ་མེད། །འོན་ཀྱང་མཉམ་པ་ཉིད་དུ་ལྟ། །རྒྱལ་བ་ཆོས་རྣམས་ཀུན་དང་མཉམ། །ཡང་དག་སངས་རྒྱས་མཐའ་དབུས་མེད། །ཐོག་མ་དག་དང་ཐ་མར་ཡང་། །འགལ་མེད་རྩ་བ་མེད་པས་ན། །དེ་ནི་སངས་རྒྱས་དེ་ཕྱིར་བརྗོད། །དེ་ནས་བྱང་ཆུབ་སེམས་དཔའ་བདེན་པའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་བརླབས་ཀྱིས་ཕྱོགས་བཅུར་རྣམ་པར་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་རྣམས་ནི་མཉམ་པའི་ཕྱིར། །བསྐལ་པ་བསམ་གྱིས་མྱི་ཁྱབ་པར། །སེམས་ཅན་དམྱལ་བར་གནས་ཀྱང་བླ། །དེ་ནི་བདེ་བ་བསམ་མི་ཁྱབ། །ཅི་ཕྱིར་ཞེ་ན་བསྐལ་པ་རྣམས། །གྲངས་མེད་སྡུག་བསྔལ་སྔན་ཅད་བྱུང་། །འོན་ཀྱང་བདེ་གཤེགས་མ་ཐོས་པས། །བདག་ཅག་འཁོར་ལས་མ་གྲོལ་ལོ། །དེ་བཞིན་མ་ནོར་ཆོས་ཀྱི་རྣམས། །ཡང་དག་ཉིད་དུ་རྟོགས་གྱུར་ཏེ། །གང་ལ་འགྲོགས་པ་མེད་པ་རྣམས། །དེ་དག་བྱང་ཆུབ་བླ་ན་མེད། །སངས་རྒྱས་རྣམས་དང་མངོན་སུམ་པ། །སྔོན་ཅད་མ་བྱུང་འབྱུང་མི་འགྱུར། །གང་ཕྱིར་སངས་རྒྱས་བརྗོད་པའི་ཆོས། །དེ་དག་མཚན་ཉིད་མེད་པ་འོ། །ཆོས་རྣམས་བལྟ་དཀའ་ཇི་བཞིན་དུ། །གང་ཞིག་དེ་ལྟར་རྟོགས་པ་ནི། །དེ་དག་སངས་རྒྱས་ཀུན་གཟིགས་པ། །ཡང་དག་བལྟ་བས་ཤིན་ཏུ་མཐོང་། །ཡང་དག་ལ་ནི་ཡང་དག་གཟིགས། །ཡང་དག་མིན་པར་ཡང་དག་མིན། །
འདི་ཡི་མཐའ་ནི་སྟོན་པས་ན། །སངས་རྒྱས་སངས་རྒྱས་ཞེས་ཀྱང་བྱ། །ཁོང་དུ་མ་ཆུད་ཆོས་བསྟན་ཏེ། །སངས་རྒྱས་ཆོས་རྣམས་རབ་ཏུ་བརྗོད། །འདི་ནི་སངས་རྒྱས་བསྒོམ་པ་སྟེ། །གཅིག་ཏུ་དམིགས་པ་མ་ཡིན་ནོ། །དེ་ལྟར་མང་དང་གཅིག་གནས་པ། །མང་པོ་དག་ཏུ་རྣམ་པར་ཤེས། །གནས་པ་མེད་པའི་ཆོས་རྣམས་ཀྱིས། །བསྩགས་པ་དག་ཀྱང་རབ་ཏུ་བྱས། །བྱས་པ་མེད་ཅིང་བྱེད་པ་མེད། །ལས་ཀྱི་འདུ་ཤེས་རྣམ་བསྒོམས་ཤིང་། །ལས་འདི་ཅི་བཞིན་ཤེས་བྱས་ན། །རྣམ་པར་དག་ཀྱང་མི་དམིགས་སོ། །གང་ལ་སངས་རྒྱས་བཞུགས་པ་ཡི། །ངེས་པའི་གནས་ནི་དམིགས་མེད་པས། །གནས་པ་མེད་པའི་ཆོས་རྣམས་ཀྱིས། །སངས་རྒྱས་གཡོ་བ་གང་ཡང་མེད། །དེ་ནས་བྱང་ཆུབ་སེམས་དཔའ་མཆོག་གི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སེམས་ཅན་ཆེན་པོ་བླ་ན་མེད། །སེམས་ཅན་འདུ་ཤེས་རྣམ་པར་བསྒོམས། །འཇུག་པར་བྱ་བ་གང་ཡང་མེད། །དེ་བས་བླ་ན་མེད་ཅེས་བྱ། །གང་ལ་ཕྲ་བ་ཡོད་མིན་པ། །དེ་ལ་སྦོམ་པའང་ཡོད་པ་མིན། །དེ་ནི་སངས་རྒྱས་རྣམས་ཀྱིས་བརྙེས། །རྣམ་པར་མི་རྟོག་འདུས་མ་བྱས། །གང་ཞིག་སངས་རྒྱས་སྤྱོད་ཡུལ་བ། །དེ་ལ་བགྲང་བ་ཡོད་པ་མིན། །ཡང་དག་སངས་རྒྱས་བགྲང་དང་བྲལ། །དེ་ནི་སངས་རྒྱས་ཆོས་ཉིད་དོ། །མུན་པ་རྣམས་ནི་རྣམ་བསལ་ཅིང་། །དེ་བཞིན་གཤེགས་པ་རྣམ་པར་སྣང་། །དེ་ལ་སྣང་བ་གང་ཡང་མེད། །མི་སྣང་བ་ཡང་ཅི་ཡང་མེད། །ཐམས་ཅད་ཆོས་ལ་ཀུན་ནས་དགའ། །སྐྱེས་པ་མེད་ཅིང་གནས་པ་མེད། །འདོད་ཆགས་མེད་ཅིང་རྟེན་པ་མེད། །ཆོས་ཉིད་དེ་ཡང་སྦེད་པ་མེད། །གང་ལ་གཉིས་སུ་བགྲང་མེད་ཅིང་། །གཅིག་ཀྱང་ཡོད་པ་མ་ཡིན་པས། །ཇི་བཞིན་རབ་ཏུ་གནས་པ་ཡི། །ཤེས་རབ་ཆེན་པོས་ལེགས་པར་མཐོང་། །མི་གཉིས་པ་ལ་གཉིས་པ་མེད། །གཉིས་པ་མེད་པ་སྟོང་པ་སྟེ། །སྟོང་པ་དེ་ཡང་ཁམས་གསུམ་ཀུན། །དེ་ནི་སངས་རྒྱས་མཐོང་བའོ། །བྱིས་པས་བྱང་ཆུབ་མི་ཤེས་ཀྱང་། །དེ་དག་དེ་ལ་རབ་ཏུ་གནས། །གནས་པ་མེད་པའི་ཆོས་རྣམས་ཀྱིས། །རང་གི་ལུས་ནི་རྗེས་སུ་བལྟ། །ལུས་མེད་པ་ནི་ལུས་སུ་བཤད། །འབྱུང་བ་མེད་ཅིང་བསྟན་དུ་མེད། །འཇིག་ཚོགས་མང་པོ་བལྟར་མེད་པ། །སངས་རྒྱས་སྐུ་ནི་བླ་ན་མེད། །སངས་
རྒྱས་ཆོས་ཀྱི་རང་བཞིན་ཉིད། །དེ་སྐད་བདེན་པའི་བློས་སྨྲས་ཏེ། །དེ་ཐོས་པས་ནི་མིག་ཀྱང་སྦྱངས། །ཤིན་ཏུ་འོད་ཀྱང་དང་ཞིང་སྣང་། །དེ་ནས་བྱང་ཆུབ་སེམས་དཔའ་དམ་པའི་བློ་གྲོས་ཀྱིས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་རྣམ་པར་བལྟས་ཏེ་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དྲིན་གཟོ་མེད་པའི་སེམས་ཅན་ཕྱིར། །སྐྱེས་བུ་དྲང་སྲོང་མཆོག་གི་རྣམས། །དཔའ་ཆེན་སེམས་ཅན་གཙོ་བོ་དང་། །འོད་མཛད་པ་ནི་རབ་ཏུ་བྱུང་། །ཐུགས་རྗེ་ཆེན་པོ་བསྐྱེད་མཛད་དེ། །སེམས་ཅན་ཁམས་ལ་རྣམ་གཟིགས་ཀྱང་། །སྲིད་པས་བཅིངས་པའི་སྡུག་བསྔལ་བའི། །སེམས་ཅན་རྣམས་ནི་དེ་ནས་གཟིགས། །འཇིག་རྟེན་ལྷ་དང་བཅས་པ་ན། །ཡང་དག་སངས་རྒྱས་དཔལ་མངའ་བ། །སེམས་ཅན་གཙོ་བོ་མ་གཏོགས་པར། །སྐྱོབ་པ་གཞན་ནི་གང་ཡང་མེད། །གལ་ཏེ་སངས་རྒྱས་མ་སྐྱེས་ལ། ། བྱང་ཆུབ་སེམས་དཔའ་འདི་འདྲ་དག །མེད་ན་འཇིག་རྟེན་ཁམས་ཀུན་ན། །སེམས་ཅན་བདེ་བ་གཅིག་མི་འབྱུང་། །སེམས་ཅན་གཙོ་བོ་འདྲེན་མཛད་པ། །དེ་བཞིན་གཤེགས་པ་སྐྱེས་པ་དང་། །བྱང་ཆུབ་སེམས་དཔའ་འདི་འདྲ་དག །འབྱུང་བ་འཇིག་རྟེན་བདེ་བའི་རྒྱུ། །གང་གིས་དེ་བཞིན་གཤེགས་མཐོང་བ། །དེ་དག་འཐོབ་པ་ལེགས་པར་འཐོབ། །གང་གིས་ཐོས་ཤིང་དད་འགྱུར་བ། །དེ་ཡང་འཇིག་རྟེན་མཆོད་རྟེན་ནོ། །གང་གིས་སངས་རྒྱས་མཐོང་གྱུར་པ། །བདག་ཅག་རྣམས་ཀྱིས་འཐོབ་ལེགས་ཐོབ། །འདི་འདྲ་བ་ཡི་ཚུལ་ཐོས་པས། །ཀུན་ཀྱང་ཡང་དག་སངས་རྒྱས་འགྱུར། །འདས་པའི་དུས་ནའང་དཔལ་འདི་ཡོད། །བྱང་ཆུབ་སེམས་དཔའ་ཐམས་ཅད་ཀྱིས། །ཤེས་རབ་མིག་ནི་རྣམ་སྦྱངས་པས། །སྤྱོད་ཡུལ་འདི་དག་མཐོང་བར་འགྱུར། །རྣམ་པར་སྣང་མཛད་ཐུབ་མཐོང་ནས། །ད་དུང་ཕྱིར་ཞིང་དད་པ་སྐྱེ། །དེ་ཡི་ཡེ་ཤེས་མཐའ་ཡས་པས། །ད་དུང་བརྗོད་དུ་ཡོད་པ་མིན། །གང་ཞིག་མཆོག་གི་བློས་སྨྲས་པ། །རྒྱལ་སྲས་གཞན་གྱིས་བཤད་པ་རྣམས། །དེ་དག་ད་རུང་བདག་གིས་ཀྱང་། །བསྐལ་པ་བསམ་ཡས་བཤད་པར་བྱ། །རི་རབ་ཀྱི་རྩེ་མོར་དེ་བཞིན་གཤེགས་པའི་རྣམ་པར་འཕྲུལ་པ་དང་། བྱང་ཆུབ་སེམས་དཔའི་ཚོགས་ཀྱི་ཚིགས་སུ་བཅད་པའི་ལེའུ་སྟེ། བཅུ་དགུ་པའོ།། །།