ཉི་ཤུ་རྩ་གཉིས་པ། བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོའི་དཔེ་ཡང་དག་པར་བསགས་པ་ཚིགས་སུ་བཅད་པའི་ལེའུ།
དེ་ནས་ལྷའི་དབང་པོ་བརྒྱ་བྱིན་གྱིས། བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བསོད་ནམས་ཀྱི་ཕུང་པོ་ཇི་ཙམ་ཞིག་དང་ལྡན་ན། སེམས་དང་པོ་བསྐྱེད་པའི་བྱང་ཆུབ་སེམས་དཔར་འགྱུར། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས། ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་གནས་འདི་ནི་ཡིད་ཆེས་པར་ཤིན་ཏུ་དཀའ་སྟེ། ཤེས་པར་དཀའ་བརྟག་པར་དཀའ། མངོན་པར་དད་པར་དཀའ་ཤིན་ཏུ་རྟོགས་པར་དཀའ། ཀུན་ནས་བསྒྲུབ་པར་དཀའ། ཡང་དག་པར་སྤྱད་པར་དཀའ། བརྗོད་པར་དཀའ། བསྐྱེད་པར་དཀའ། བརྒལ་བར་དཀའ། ཁོང་དུ་ཆུད་པར་དཀའ་འོན་ཀྱང་ཅི་ཚུལ་དུ་སངས་རྒྱས་ཀྱི་མཐུས་བཤད་པར་བྱའོ། །ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། གང་ཤར་ཕྱོགས་ཀྱི་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་དེ་དག་ལ་ལ་ཞིག་གིས་བསྐལ་པར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། བསླབ་པའི་ཚིག་ལྔ་པོ་དག་ཀྱང་འཛིན་དུ་བཙུད་པར་གྱུར་ལ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། དེ་བཞིན་དུ་བྱང་ཤར་ཀྱི་ཕྱོགས་མཚམས་དང་།
ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། དེ་བཞིན་དུ་ནུབ་བྱང་གི་ཕྱོགས་མཚམས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་གྲངས་མྱེད་པར་གཏོགས་པའི་སེམས་ཅན་རྣམས་ཀྱང་། བསྐལ་པར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། བསླབ་པའི་ཚིག་ལྔ་པོ་དག་ཀྱང་འཛིན་དུ་བཙུད་ན། རྒྱལ་བའི་སྲས་དེ་ལ་ཇི་སྙམ་དུ་སེམས། དེའི་རྒྱུས་བསོད་ནམས་མང་དུ་འཕེལ་ལམ། དེ་སྐད་ཅེས་སྨྲས་པ་དང་། ལྷའི་དབང་པོ་བརྒྱ་བྱིན་གྱིས། བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བསོད་ནམས་འདི་ནི་སངས་རྒྱས་བཅོམ་ལྡན་འདས་རྣམས་མ་གཏོགས་པར་གཞན་གྱིས་ཤེས་པར་མི་ནུས་སོ། །སྨྲས་པ་ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་ལ་ནི། དེ་དག་གི་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང་ཉེ་བར་མི་འགྲོ། བརྒྱ་སྟོང་གི་ཆ་དང་། བྱེ་བའི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། བྱེ་བ་ཁྲག་ཁྲིག་བརྒྱའི་ཆ་དང་། བྱེ་བ་ཁྲག་ཁྲིག་སྟོང་གི་ཆ་དང་། བྱེ་བ་ཁྲག་ཁྲིག་བརྒྱ་སྟོང་གི་ཆར་ཡང་ཉེ་བར་མི་འགྲོ། གྲངས་དང་ཆ་དང་བགྲང་བ་དང་། དཔེ་དང་རྒྱུར་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས་དཔེ་སྔ་མ་དེ་ལྟ་ཞོག་གི། ཀྱེ་རྒྱལ་བའི་སྲས་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་ཇི་སྙེད་པ་དེ་དག །བསྐལ་པ་བརྒྱར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། དགེ་བ་བཅུའི་ལས་ཀྱི་ལམ་རྣམས་ལ་ཡང་དག་པར་སྦྱར་བར་གྱུར་ལ། གཞུང་དེ་བཞིན་དུ་བསྐལ་པ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། བསམ་གཏན་བཞི་ལ་རབ་ཏུ་བཀོད་པ་དང་། བསྐལ་པ་བརྒྱ་ཕྲག་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། ཚངས་པའི་རྣམ་པར་སྤྱོད་པ་བཞི་ལ་རབ་ཏུ་བཀོད་པ་དང་།
བསྐལ་པ་བྱེ་བར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། གཟུགས་མེད་པའི་སྙོམས་པར་འཇུག་པ་བཞི་ལ་རབ་ཏུ་བཀོད་པར་གྱུར་པ་དང་། བསྐལ་པ་བྱེ་བར་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། རྒྱུན་ཏུ་ཞུགས་པའི་འབྲས་བུ་ལ་རབ་ཏུ་བཀོད་པ་དང་། བསྐལ་པ་བྱེ་བ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། ལན་ཅིག་ཕྱིར་འོང་བའི་འབྲས་བུ་ལ་རབ་ཏུ་བཀོད་པ་དང་། བསྐལ་པ་བྱེ་བ་བརྒྱ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། ཕྱིར་མི་འོང་བའི་འབྲས་བུ་ལ་རབ་ཏུ་བཀོད་པ་དང་། བསྐལ་པ་བྱེ་བ་ཁྲག་ཁྲིག་ཏུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། དགྲ་བཅོམ་པ་ལ་རབ་ཏུ་བཀོད་པ་དང་། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཏེ། རང་སངས་རྒྱས་ཀྱི་བྱང་ཆུབ་ལ་རབ་ཏུ་གཞག་པར་གྱུར་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། དེའི་རྒྱུས་བསོད་ནམས་མང་དུ་འཕེལ་ལམ། ལྷའི་དབང་པོ་བརྒྱ་བྱིན་གྱིས་སྨྲས་པ། ཀྱེ་རྒྱལ་བའི་སྲས་དེ་ནི་སངས་རྒྱས་བཅོམ་ལྡན་འདས་ཀྱིས་མཁྱེན་ཏོ། །བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་དེ་ལ་བསོད་ནམས་ཀྱི་ཕུང་པོ་སྔ་མ་དེས་བརྒྱའི་ཆར་ཡང་ཉེ་བར་མྱི་འགྲོའོ། །སྟོང་གི་ཆ་དང་བརྒྱ་སྟོང་གི་ཆ་དང་། བྱེ་བའི་ཆ་དང་། བྱེ་བ་བརྒྱའི་ཆ་དང་། བྱེ་བ་སྟོང་གི་ཆ་དང་། བྱེ་བ་བརྒྱ་སྟོང་གི་ཆ་དང་། གྲངས་དང་ཆ་དང་། བགྲང་བ་དང་། དཔེ་དང་རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་གང་འདི་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོར་བྱས་ཤིང་། བསླབ་པའི་ཚིག་ལྔ་ལ་གཞག་པ་དང་། དགེ་བ་བཅུའི་ལས་ཀྱི་ལམ་ལ་ཡང་དག་པར་སྦྱར་བ་དང་། བསམ་གཏན་བཞི་ལ་རབ་ཏུ་
དགོད་པ་དང་། ཚངས་པའི་རྣམ་པར་སྤྱོད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་རྒྱུན་ཏུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་སངས་རྒྱས་ཀྱི་བྱང་ཆུབ་ལ་རབ་ཏུ་དགོད་པ་དེ་ཙམ་གྱིས་ནི་སངས་རྒྱས་སུ་མི་འགྱུར་ཏེ། དེ་ནི་འདི་ལྟར་དེ་བཞིན་གཤེགས་པའི་རིགས་རྒྱུན་མི་གཅད་པའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་མ་ལུས་པར་ཁྱབ་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་ཐམས་ཅད་ཡང་དག་པར་བསྒྲལ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་འདུ་བ་དང་། འཇིག་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །འཇིག་རྟེན་གྱི་ཁམས་ཐམས་ཅད་ཀྱི་རང་བཞིན་ཡོངས་སུ་དག་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་བསམ་པ་དང་། བག་ལ་ཉལ་བ་དང་། བག་ཆགས་ཀྱི་མཚམས་སྦྱོར་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་དབང་པོ་དང་། སྦྱོར་བ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་སེམས་དང་སྤྱོད་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །སེམས་ཅན་ཐམས་ཅད་ཀྱི་དུས་གསུམ་གྱི་ཤེས་པ་ཡོངས་སུ་ཤེས་པར་བྱ་བའི་ཕྱིར་སེམས་སྐྱེའོ། །བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་དེ་ནི་འདི་ལྟར་སངས་རྒྱས་ཐམས་ཅད་དང་། ཡུལ་མཉམ་པ་ཉིད་དུ་བྱ་བའི་ཕྱིར་སེམས་སྐྱེའོ། །ཀྱེ་རྒྱལ་བའི་སྲས་དཔེ་སྔ་མ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་བྱུང་སྟེ། དེ་སེམས་བསྐྱེད་པ་གཅིག་གིས་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་
པ་འདའ་ལ་སེམས་བསྐྱེད་པ་དེ་དང་འདྲ་བས། ཤར་ཕྱོགས་སུ་བསྐལ་པ་གྲངས་མེད་པ་ཟད་ཟད་དུ་འདས་པར་བྱས་ཀྱང་། ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཟད་པར་མ་རུང་ནས། དེའི་འོག་ཏུ་སྐྱེས་བུ་གཉིས་པ་ཞིག་བྱུང་སྟེ། སྐྱེས་བུ་སྔ་མ་དེས་བསྐལ་པ་གྲངས་མེད་པ་འདས་པ་སྙེད་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་གསུམ་པ་ཞིག་བྱུང་སྟེ། སྐྱེས་བུ་དེ་གཉིས་ཀྱིས་བསྐལ་པ་གྲངས་མེད་པ་གཉིས་ཀྱིས་འདས་པ་དེ་དག་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བཞི་པ་ཞིག་བྱུང་ནས། སྔ་མ་གསུམ་གྱིས་འཇིག་རྟེན་གྱི་ཁམས་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ལ། དེའི་འོག་ཏུ་སྐྱེས་བུ་ལྔ་པ་ཞིག་བྱུང་སྟེ། སྐྱེས་བུ་སྔ་མ་བཞིས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ནས། དེའི་འོག་ཏུ་སྐྱེས་བུ་དྲུག་པ་ཞིག་བྱུང་སྟེ། སྐྱེས་བུ་སྔ་མ་རྣམས་ཀྱིས་བསྐལ་པ་གྲངས་མེད་པར་འདས་པ་དེ་དག་གི་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བདུན་པ་ཞིག་སྐྱེས་ལ། སྐྱེས་བུ་སྔ་མ་དྲུག་གིས་བསྐལ་པ་གྲངས་མེད་པར་འདས་པ་དེ་དག་གི་སེམས་བསྐྱེད་པ་གཅིག་གིས་འདས་ཏེ། དེའི་འོག་ཏུ་སྐྱེས་བུ་བརྒྱད་པ་ཞིག་སྐྱེས་ཏེ། སྐྱེས་བུ་སྔ་མ་བདུན་གྱིས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ལ། དེའི་འོག་ཏུ་སྐྱེས་བུ་དགུ་པ་ཞིག་བྱུང་སྟེ། སྐྱེས་བུ་སྔ་མ་བརྒྱད་ཀྱིས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་པར་བྱས་ཏེ། དེའི་འོག་ཏུ་སྐྱེས་བུ་བཅུ་པ་ཞིག་བྱུང་ནས། སྐྱེས་བུ་སྔ་མ་དགུས་བསྐལ་པ་གྲངས་མེད་པར་འདས་པ་དེ་དག་སེམས་བསྐྱེད་པ་གཅིག་གིས་འདས་ལ། སེམས་བསྐྱེད་པ་དེ་ལྟ་བུའི་འདའ་བས། ཤར་ཕྱོགས་ལོགས་སུ་བསྐལ་པ་གྲངས་མེད་པར་བགྲོད་ཀྱང་། ཤར་ཕྱོགས་ཀྱི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པའི་མཐའ་ནི་
ཤེས་པར་མི་རུང་ངོ་། །ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་རྣམས་བཅུ་པོ་ཐམས་ཅད་དུ་ཡང་དེ་བཞིན་དུ་རྒྱ་ཆེ་བས་ཏེ། སྐྱེས་བུ་དེ་དག་གིས་ཕྱོགས་བཅུར་ཇི་སྙེད་དུ་འདས་པ་དེ་དག་སྐྱེས་བུ་རེ་རེ་ཕྱོགས་བཅུར་རྣམ་པར་དགོད་པས་སེམས་བསྐྱེད་པ་གཅིག་གིས་བསྐལ་པ་གྲངས་མེད་པ་འདའ་བ་འདིའི་ཚུལ་དུ་བསྐལ་པ་གྲངས་མེད་པར་འདས་པ་དེ་དག །སྐྱེས་བུ་བརྒྱ་དག་གིས་འཇིག་རྟེན་གྱི་ཁམས་ཡོངས་སུ་དགོད་པའི་ཚུལ་དུ་ཕྱོགས་བཅུར་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ནི་མཐར་རྙེད་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐའ་མེད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སེམས་སྐྱེ་བ་ནི་འཇིག་རྟེན་གྱི་ཁམས་གཅིག་ཏུ་འགྲོ་བ་འམ། གྲངས་ཡོངས་སུ་ཤེས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱིས། འདི་ལྟར་ཕྱོགས་བཅུ་ཚད་མེད་པར་ཡོངས་སུ་ཤེས་ནས་བྱང་ཆུབ་སེམས་དཔའ་རྣམས་ཀྱི་སེམས་སྐྱེ་སྟེ། འདི་ལྟར་འཇིག་རྟེན་གྱི་ཁམས་ཕྲ་བ་ཡངས་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཡངས་པ་ཕྲ་བར་ཡོངས་སུ་ཤེས་པ་དང་། འཇིག་རྟེན་གྱི་ཁམས་སྣྲེལ་ཞི་འཇིག་རྟེན་གྱི་ཁམས་སྤྱི་བོ་ཚུགས་སུ་རྒྱུ་བར་ཡོངས་སུ་ཤེས་པ་དང་། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བ། འཇིག་རྟེན་གྱི་ཁམས་སྣྲེལ་ཞིར་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཆུང་ངུ་འཇིག་རྟེན་གྱི་ཁམས་ཆེན་པོར་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཆེན་པོ་འཇིག་རྟེན་གྱི་ཁམས་ཆུང་ངུར་ཡོངས་སུ་ཤེས་པ་དང་།
འཇིག་རྟེན་གྱི་ཁམས་ཡངས་པ་འཇིག་རྟེན་གྱི་ཁམས་དོག་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་དོག་པ་འཇིག་རྟེན་གྱི་ཁམས་ཡངས་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་བརྗོད་དུ་མེད་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་བརྗོད་དུ་མེད་པ་འཇིག་རྟེན་གྱི་ཁམས་གཅིག་ཏུ་ཡོངས་སུ་ཤེས་པ་དང་། འཇིག་རྟེན་གྱི་ཁམས་བརྗོད་དུ་མེད་པ་དང་། གཅིག་ཏུ་ཟད་པ་ཡོངས་སུ་ཤེས་པ་དང་། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་བརྗོད་དུ་མེད་པར་གཟུད་པ་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཀུན་ནས་ཉོན་མོངས་པ་འཇིག་རྟེན་གྱི་ཁམས་རྣམ་པར་དག་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་རྣམ་པར་དག་པ་འཇིག་རྟེན་གྱི་ཁམས་ཀུན་ནས་ཉོན་མོངས་པར་ཡོངས་སུ་ཤེས་པ་དང་། སྐྲའི་རྩེ་མོ་འཇིག་རྟེན་གྱི་ཁམས་ཚད་མེད་པར་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཚད་མེད་པ་སྐྲའི་རྩེ་མོར་ཡོངས་སུ་ཤེས་པ་དང་། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་ཐམས་ཅད་དུ་བསྒྲུབ་པ་ཡོངས་སུ་ཤེས་པ་དང་། འཇིག་རྟེན་གྱི་ཁམས་ཐམས་ཅད་ལུས་མེད་པའི་རང་བཞིན་དུ་ཡོངས་སུ་ཤེས་པ་དང་། འཇིག་རྟེན་གྱི་ཁམས་འབྱམ་ཀླས་པ་མ་ལུས་པ་ཐམས་ཅད་སེམས་བསྐྱེད་པ་གཅིག་གིས་ཐོགས་པ་མེད་པར་ཡོངས་སུ་ཤེས་པས། བྱང་ཆུབ་སེམས་དཔའ་རྣམས་ཀྱི་སེམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྐྱེའོ། །ཀྱེ་རྒྱལ་བའི་སྲས་འཇིག་རྟེན་གྱི་ཁམས་འདའ་བའི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་སེམས་བསྐྱེད་པ་གཅིག་གིས་ཤར་ཕྱོགས་སུ་འདུ་བ་དང་། འཇིག་པའི་བསྐལ་པ་གྲངས་མེད་པ་བགྲང་ལ། སེམས་བསྐྱེད་པས་བགྲང་བ་འདིའི་ཚུལ་དུ་ཤར་ཕྱོགས་སུ་བསྐལ་པ་གྲངས་མེད་པ་ཟད་ཟད་དུ་བགྲངས་ཀྱང་། ཤར་ཕྱོགས་ཀྱི་འཇིག་རྟེན་གྱི་ཁམས་ཀྱི་འདུ་བའི་བསྐལ་
པ་དང་། འཇིག་པའི་བསྐལ་པའི་མཐའ་ཤེས་པར་མ་རུང་ནས། དེའི་འོག་ཏུ་སྐྱེས་བུ་གཉིས་པ་ཞིག་སྐྱེས་ཏེ། སྐྱེས་བུ་སྔ་མ་དེས་བསྐལ་པ་གྲངས་མེད་པར་འདུ་བ་དང་། འཇིག་པའི་བསྐལ་པ་བགྲང་བ་དེ་དག་ཐམས་ཅད་སྐད་ཅིག་གཅིག་གིས་བགྲངས་ཏེ། དེའི་འོག་ཏུ་སྐྱེས་བུ་གསུམ་པ་ཞིག་བྱུང་ལ། སྐྱེས་བུ་སྔ་མ་གཉིས་ཀྱིས་བསྐལ་པ་གྲངས་མེད་པར་འདུ་བ་དང་། འཇིག་པའི་བགྲང་བ་དེ་དག་སེམས་བསྐྱེད་པ་གཅིག་གིས་བགྲངས་ཏེ། དེའི་འོག་དུ་སྐྱེས་བུ་བཞི་པ་ཞིག་བྱུང་ནས། སྐྱེས་བུ་སྔ་མ་གསུམ་གྱིས་བསྐལ་པ་གྲངས་མེད་པར་འདུ་བ་དང་། འཇིག་པ་བགྲང་བ་དེ་དག་སྐད་ཅིག་གཅིག་གིས་བགྲངས་ཏེ། དེའི་འོག་ཏུ་སྐྱེས་བུ་ལྔ་པ་ཞིག་བྱུང་ནས། སྐྱེས་བུ་སྔ་མ་བཞིས་བསྐལ་པ་གྲངས་མེད་པར་འདུ་བ་དང་། འཇིག་པ་བགྲང་བ་དེ་དག་སྐད་ཅིག་གཅིག་གིས་བགྲངས་པར་གྱུར་ལ། དེའི་འོག་ཏུ་སྐྱེས་བུ་དྲུག་པ་ཞིག་བྱུང་སྟེ། སྐྱེས་བུ་སྔ་མ་ལྔས་བསྐལ་པ་གྲངས་མེད་པར་འདུ་བ་དང་། འཇིག་པ་བགྲང་བ་དེ་དག་སྐད་ཅིག་གཅིག་གིས་བགྲངས་ཏེ། དེའི་འོག་དུ་སྐྱེས་བུ་བདུན་པ་ཞིག་བྱུང་ནས། སྐྱེས་བུ་སྔ་མ་དྲུག་གིས་བསྐལ་པ་གྲངས་མེད་པར་འདུ་བ་དང་། འཇིག་པ་བགྲང་བ་དེ་དག་སྐད་ཅིག་གཅིག་གིས་བགྲངས་པར་གྱུར་ལ། དེའི་འོག་ཏུ་སྐྱེས་བུ་བརྒྱད་པ་ཞིག་བྱུང་སྟེ། སྐྱེས་བུ་སྔ་མ་བདུན་གྱིས་བསྐལ་པ་གྲངས་མེད་པར་འདུ་བ་དང་། འཇིག་པའི་བསྐལ་པ་བགྲང་བ་དེ་དག་སྐད་ཅིག་གཅིག་གིས་བགྲངས་པར་གྱུར་ཏེ། དེའི་འོག་དུ་སྐྱེས་བུ་དགུ་པ་ཞིག་སྐྱེས་ལ། སྐྱེས་བུ་སྔ་མ་བརྒྱད་ཀྱིས་བསྐལ་པ་གྲངས་མེད་པར་འདུ་བ་དང་། འཇིག་པའི་བསྐལ་པ་བགྲང་བ་དེ་དག་སྐད་ཅིག་གཅིག་གིས་བགྲངས་ཏེ། དེའི་འོག་དུ་སྐྱེས་བུ་བཅུ་པ་ཞིག་བྱུང་ནས། སྐྱེས་བུ་དགུ་པོ་སྔ་མ་རྣམས་ཀྱིས་བསྐལ་པ་གྲངས་མེད་པར་འདུ་བ་དང་། འཇིག་པའི་བསྐལ་པ་བགྲང་བ་དེ་དག་སྐད་ཅིག་གཅིག་གིས་བགྲངས་པར་གྱུར་ན། ཀྱེ་རྒྱལ་བའི་སྲས་སྐྱེས་བུ་དེ་དག་གྲངས་
མེད་པའི་ཚུལ་དུ་ཕྱོགས་བཅུར་རྣམ་པར་བཀོད་པ་དང་། སྐད་ཅིག་གཅིག་གིས་འཇིག་རྟེན་གྱི་ཁམས་འདུ་བ་དང་། འཇིག་པ་གྲངས་མེད་པར་བགྲང་བའི་ཚུལ་དུ་བསྐལ་པ་གྲངས་མེད་པར་བགྲངས་ན། འཇིག་རྟེན་གྱི་ཁམས་དེ་དག་གི་འདུ་བ་དང་། འཇིག་པའི་བསྐལ་པ་གཅིག་ནས་གཅིག་ཏུ་བརྒྱུད་པ་ནི། ཕྱོགས་བཅུར་མཐའ་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་སེམས་དང་པོ་བསྐྱེད་པའི་བླ་ན་མེད་པ་ཡང་དག་པར་རྫོགས་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་འཇིག་རྟེན་འགའི་འདུ་བ་དང་། འཇིག་པ་བགྲང་བ་རབ་ཏུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱིས་སེམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་སྐྱེའི། འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་འདུ་བ་དང་། འཇིག་པའི་བསྐལ་པ་ཤེས་པར་བྱ་བ་ལ་འཇུག་པའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་སྟེ། འདི་ལྟར་བསྐལ་པ་རིང་པོ་ལ་བསྐལ་པ་ཐུང་ངུར་ཡང་དག་པར་འཇུག་པ་ཤེས་པར་བྱ་བ་དང་། བསྐལ་པ་ཐུང་ངུ་ལ་བསྐལ་པ་རིང་པོར་ཡང་དག་པར་འཇུག་པ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །བསྐལ་པ་གཅིག་ལ་བསྐལ་པ་གྲངས་མེད་པར་ཡང་དག་པར་འཇུག་པ་ཤེས་པར་བྱ་བ་དང་། བསྐལ་པ་གྲངས་མེད་པ་ལ་བསྐལ་པ་གཅིག་ཏུ་ཡང་དག་པར་འཇུག་པ་ཤེས་པར་བྱ་བ་དང་། འདི་ལྟ་སྟེ། སངས་རྒྱས་དང་བཅས་པའི་བསྐལ་པ། སངས་རྒྱས་མེད་པའི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང་། སངས་རྒྱས་མེད་པའི་བསྐལ་པ་སངས་རྒྱས་དང་བཅས་པའི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང་། སངས་རྒྱས་བརྗོད་
དུ་མེད་པའི་བསྐལ་པ་སངས་རྒྱས་གཅིག་གི་བསྐལ་པ་ཡང་དག་པར་འཇུག་པ་ཤེས་པར་བྱ་བ་དང་། སངས་རྒྱས་གཅིག་གི་བསྐལ་པ་སངས་རྒྱས་བརྗོད་དུ་མེད་པའི་བསྐལ་པར་ཡང་དག་པར་འཇུག་པ་ཤེས་པར་བྱ་བ་དང་། འདི་ལྟ་སྟེ་བསྐལ་པ་རྣམ་པ་ཐ་དད་པ་ལ་བསྐལ་པ་རྣམ་པ་ཐ་མི་དད་པར་ཡང་དག་པར་འཇུག་པ་ཤེས་པར་བྱ་བ་དང་། བསྐལ་པ་ཟད་པ་ལ་བསྐལ་པ་མ་ཟད་པར་ཡང་དག་པར་འཇུག་པ་ཤེས་པར་བྱ་བ་དང་། བསྐལ་པ་མ་ཟད་པ་ལ་བསྐལ་པ་ཟད་པར་ཁོང་དུ་ཆུད་པས་ཡང་དག་པར་འཇུག་པ་ཤེས་པར་བྱ་བ་དང་། འདི་ལྟ་སྟེ་བསྐལ་པ་བརྗོད་དུ་མེད་པ་སེམས་བསྐྱེད་པ་གཅིག་ཏུ་ཡང་དག་པར་འཇུག་པ་ཤེས་པར་བྱ་བ་དང་། སེམས་བསྐྱེད་པ་གཅིག་བསྐལ་པ་བརྗོད་དུ་མེད་པར་ཡང་དག་པར་འཇུག་པ་ཤེས་པར་བྱ་བ་དང་། འདི་ལྟ་སྟེ་བསྐལ་པ་ཐམས་ཅད་བསྐལ་པ་མེད་པར་རབ་ཏུ་འཇུག་པ་ཤེས་པར་བྱ་བ་དང་། བསྐལ་པ་མ་ཡིན་པ་བསྐལ་པར་འཇུག་པ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སྔོན་གྱི་མཐའི་མུར་ཐུག་པའི་བསྐལ་པ་དང་། ཕྱི་མའི་མཐའི་མུར་ཐུག་པའི་བསྐལ་པ་དང་། ད་ལྟར་བྱུང་བའི་བསྐལ་པ་དང་། འཇིག་རྟེན་གྱི་ཁམས་མ་ལུས་པ་ཐམས་ཅད་ཀྱི་འདུ་བ་དང་། འཇིག་པའི་བསྐལ་པ་སེམས་བསྐྱེད་པ་གཅིག་གིས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་སེམས་སྐྱེ་སྟེ། འདི་ལྟར་བསྐལ་པ་ཐམས་ཅད་ཀྱི་རྒྱུས་མངོན་པར་ཤེས་པར་བྱ་བའི་ཕྱིར། དེ་ཐོག་མར་གོ་ཆ་ཆེན་པོ་མངོན་པར་བསྒྲུབ་པོ། །ཀྱེ་རྒྱལ་བའི་སྲས་འཇིག་རྟེན་གྱི་ཁམས་འདུ་བ་དང་། འཇིག་པའི་བསྐལ་པ་བགྲང་བའི་དཔེ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེར་སེམས་བསྐྱེད་པ་
གཅིག་གིས། འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་དད་པ་སྣ་ཚོགས་ཐམས་ཅད་ཤེས་པ་ཚུལ་དེ་ལྟ་བུར་སེམས་བསྐྱེད་པ་རེ་རེ་ཞིང་ཤེས་པས་ཤར་ཕྱོགས་སུ་བསྐལ་པ་གྲངས་མེད་པ་ཟད་པ་བྱས་ཀྱང་སེམས་ཅན་རྣམས་ཀྱི་མོས་པ་ཐ་དད་པ་གཅིག་ནས་གཅིག་ཏུ་བརྒྱུད་པའི་མཐའ་ཟད་པར་མི་རུང་བ་ནས། གཞུང་དེ་བཞིན་དུ་བཅུའི་བར་དུ་སྟེ། ཤར་ཕྱོགས་སུ་ཇི་ལྟ་བ་དེ་བཞིན་དུ་སྟེང་གི་ཕྱོགས་ཀྱི་བར་གྱི་ཕྱོགས་བཅུ་ཐམས་ཅད་དུ་རྒྱ་ཆེར་བྱས་ན་དེ་དག་གི་མོས་པ་ཐ་དད་པ་གཅིག་ནས་གཅིག་ཏུ་བརྒྱུད་པ་ནི་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་གྱི་མོས་པ་ཐ་དད་པ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་དད་པ་སྣ་ཚོགས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་མོས་པ་མཐའ་དང་དབུས་མེད་པ་ལ་འཇུག་པ་དང་། སེམས་ཅན་གྱི་མོས་པ་ཐ་དད་པ་ལ་མཁས་པ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སེམས་ཅན་གཅིག་སེམས་ཅན་གྲངས་མེད་པར་ཡང་དག་པར་འཇུག་པར་བྱ་བའི་ཕྱིར། དད་པའི་ཚུལ་བརྗོད་དུ་མེད་པའི་སྣང་བའི་འོད་ཀྱིས་མོས་པ་གཅིག་ནས་གཅིག་དུ་བརྒྱུད་པ་མ་ལུས་པ་དང་། འགྲོ་བ་རྒྱ་མཚོ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་
དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་འདས་པ་དང་། མ་འོངས་པ་དང་། ད་ལྟར་བྱུང་བའི་དགེ་བ་དང་། མི་དགེ་བ་ལ་མོས་པ་ཚད་མེད་པ་ལ་འཇུག་པར་བྱ་བ་དང་། དུས་གསུམ་ཐམས་ཅད་ཀྱི་མོས་པ་སྣ་ཚོགས་དབང་གིས་ཡོངས་སུ་ཤེས་པར་བྱ་བ་དང་། མོས་པ་ཇི་ལྟ་བ་བཞིན་དུ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སྐལ་པ་མཉམ་པའི་མོས་པ་དང་། སྐལ་པ་མི་མཉམ་པའི་མོས་པ་ཤེས་པ་ལ་འཇུག་པར་བྱ་བ་དང་། མོས་པ་ཐམས་ཅད་མོས་པ་གཅིག་ཏུ་ཡང་དག་པར་འཇུག་པ་དང་། མོས་པ་གཅིག་མོས་པ་ཐམས་ཅད་དང་མཉམ་པ་ཉིད་དུ་མངོན་པར་འཚང་རྒྱ་བར་བྱ་བ་དང་། དེ་བཞིན་གཤེགས་པའི་སྟོབས་ལ་རབ་ཏུ་འཇུག་པའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་མོས་པ་བླ་མ་དང་བཅས་པ་དང་། མོས་པ་བླ་ན་མེད་པ་དང་། ལྷག་མ་དང་བཅས་པ་དང་། ལྷག་མ་མེད་པ་དང་། མཉམ་པ་དང་མི་མཉམ་པའི་མོས་པའི་བྱེ་བྲག་ཤེས་པ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་གནས་པའི་མོས་པ་དང་། མི་གནས་པའི་མོས་པ་དང་། ཐུན་མོང་གི་མོས་པ་དང་། ཐུན་མོང་མ་ཡིན་པའི་མོས་པ་དང་། འདྲེས་པ་དང་། མ་འདྲེས་པ་དང་། དགེ་བ་དང་མི་དགེ་བ་དང་། འཇིག་རྟེན་པ་དང་འཇིག་རྟེན་ལས་འདས་པའི་མོས་པ་དང་། མོས་པ་ཐམས་ཅད་ཀྱི་བྱེ་བྲག་ཤིན་ཏུ་ཤེས་པའི་དམ་པ་མངོན་པར་འཚང་རྒྱ་བའི་ཕྱིར་རོ། །བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། དགེ་བའི་མོས་པ་དང་། ཡངས་པའི་མོས་པ་
དང་། མོས་པ་བར་མ་དང་། ཐ་དད་པ་དང་། ངེས་པའི་མོས་པ་མ་ལུས་པ་ཐམས་ཅད་བསྒྲིབས་པ་མེད་པའི་ཡེ་ཤེས་དང་། ཆགས་པ་མེད་པའི་སངས་རྒྱས་ཀྱི་རྣམ་པར་ཐར་པས་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་རྣམ་པར་དག་པའི་མོས་པ་དང་། ཀུན་ནས་ཉོན་མོངས་པའི་མོས་པ་དང་། ཡངས་པའི་མོས་པ་དང་། དོག་པའི་མོས་པ་དང་། ཕྲ་བའི་མོས་པ་དང་། རྒྱ་ཆེ་བའི་མོས་པ་དང་། སེམས་ཅན་གྱི་ཁམས་མ་ལུས་པ་ཐམས་ཅད་ཀྱི་མོས་པའི་ཚུལ་རྣམ་པ་ཐ་དད་པ་ལ་རབ་ཏུ་འཇུག་པར་བྱ་བ་དང་། སེམས་ཅན་གཅིག་གི་མོས་པ་སྣ་ཚོགས་འབྱམ་ཀླས་པ་བཅུ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། རྒྱུད་སྟུག་པོའི་མོས་པ་དང་། སྦྱོར་བའི་མོས་པ་དང་། ཡོངས་སུ་བརྟགས་པའི་མོས་པ་དང་། ངང་གིས་རྗེས་སུ་འབྲང་བའི་མོས་པ་དང་། རྒྱུའི་ཚོགས་དང་ལྡན་པའི་མོས་པ་དང་། རྐྱེན་གྱི་ཚོགས་ལས་བྱུང་བའི་མོས་པ་དང་། མོས་པའི་དྲ་བ་མ་ལུས་པ་ཐམས་ཅད་མཉམ་པ་ཉིད་དུ་འཇུག་པའི་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་མོས་པ་སྣ་ཚོགས་ཀྱི་དཔེ་ཐ་དད་པ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་སེམས་གཅིག་བསྐྱེད་པས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་དབང་པོ་སྣ་ཚོགས་རབ་ཏུ་ཤེས་པར་གྱུར་ལ། དེ་ལྟ་བུའི་ཚུལ་དུ་སེམས་བསྐྱེད་པ་རེ་རེ་ལ་ཤེས་པས། ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་། ཤར་ཕྱོགས་
ཀྱི་སེམས་ཅན་རྣམས་ཀྱི་དབང་པོ་སྣ་ཚོགས་གཅིག་ནས་གཅིག་ཏུ་བརྒྱུད་པ་མཐར་ཐུག་པར་མ་རུང་ལ་ཚུལ་དེ་བཞིན་དུ་མོས་པ་ལ་ཇི་སྐད་བརྗོད་པ་བཞིན་དབང་པོ་ཐ་དད་པ་ལ་ཡང་ཤེས་པར་བྱས་ཏེ། དེ་དག་གི་དབང་པོ་སྣ་ཚོགས་གཅིག་ནས་གཅིག་ཏུ་བརྒྱུད་པ་ནི། ཕྱོགས་བཅུ་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐའ་མེད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག །སེམས་ཅན་དེ་ཙམ་དག་གི་དབང་པོ་སྣ་ཚོགས་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་དབང་པོ་ཡོངས་སུ་ཤེས་པར་བྱ་བའི་དོན་དུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་བཞིན་དུ་ཇི་ལྟར་མོས་པ་ལ་བརྗོད་པ་དེ་བཞིན་དུ་དབང་པོ་རྣམས་ལ་ཡང་ཤེས་པར་བྱ་སྟེ། ཐིབས་པོར་གྱུར་པའི་དབང་པོ་དང་། སྦྱོར་བ་དང་ལྡན་པའི་དབང་པོ་དང་། ཡོངས་སུ་བརྟགས་པའི་དབང་པོ་དང་། ངང་གིས་རྗེས་སུ་འབྲང་བའི་དབང་པོ་དང་། རྒྱུའི་ཚོགས་དང་ལྡན་པའི་དབང་པོ་དང་། རྐྱེན་གྱི་ཚོགས་ལས་བྱུང་བའི་དབང་པོ་དང་། དབང་པོའི་དྲ་བ་ཐམས་ཅད་མ་ལུས་པ་ལ་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་དབང་པོ་སྣ་ཚོགས་ཀྱི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་བསམ་པ་སྣ་ཚོགས་ཡོངས་སུ་ཤེས་པར་གྱུར་ལ། ཚུལ་དེ་ལྟ་བུར་སེམས་བསྐྱེད་པ་རེ་རེར་ཤེས་
པས། ཤར་ཕྱོགས་ལོགས་སུ་བསྐལ་པ་གྲངས་མེད་པ་ཟད་པར་བྱས་ཀྱང་སེམས་ཅན་གྱི་བསམ་པ་སྣ་ཚོགས་ཀྱི་མཐར་ཕྱིན་པར་མ་རུང་ལ། གཞུང་དེ་བཞིན་དུ་ཕྱོགས་བཅུའི་སེམས་ཅན་རྣམས་ཀྱི་བསམ་པ་སྣ་ཚོགས་ནི་ཤེས་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་དག་གི་བསམ་པ་སྣ་ཚོགས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་བསམ་པ་སྣ་ཚོགས་ཡོངས་སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་ལྟར་མོས་པ་ལ་ཇི་ལྟར་བརྗོད་པ་བཞིན་དུ་སྟེ། བསམ་པའི་ཐིབས་པོར་གྱུར་པ་དང་། སྦྱོར་བ་དང་ལྡན་པའི་བསམ་པ་དང་། ཡོངས་སུ་བརྟགས་པའི་བསམ་པ་དང་། ངང་གིས་རྗེས་སུ་འབྲང་བའི་བསམ་པ་དང་། རྒྱུའི་ཚོགས་དང་ལྡན་པའི་བསམ་པ་དང་། རྐྱེན་གྱི་ཚོགས་ལས་བྱུང་བའི་བསམ་པའི་བར་དུ། བསམ་པའི་དྲ་བ་མ་ལུས་པ་ཐམས་ཅད་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་བསམ་པ་སྣ་ཚོགས་ཀྱི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་སྦྱོར་བ་ཡོངས་སུ་ཤེས་ལ། གཞུང་དེ་ལྟར་མོས་པ་
ལ་ཇི་ལྟར་བརྗོད་པ་བཞིན་དུ་སྟེ། ཕྱོགས་བཅུའི་སྦྱོར་བ་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་དག་གི་སྦྱོར་བ་སྣ་ཚོགས་ཤེས་པའི་དོན་དུ་ནི། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའི། འདི་ལྟར་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་སྦྱོར་བ་སྣ་ཚོགས་ཡོངས་སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་ལྟར་མོས་པ་ལ་ཇི་སྐད་དུ་བརྗོད་པ་བཞིན་ཏེ། སྦྱོར་བའི་དྲ་བ་མ་ལུས་པ་ཐམས་ཅད་ཀྱི་བར་དུ་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་སྦྱོར་བ་སྣ་ཚོགས་ཀྱི་དཔེ་དེ་དག་ལྟའང་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་སེམས་བསྐྱེད་པ་སྣ་ཚོགས་རབ་ཏུ་ཤེས་ལ། ཚུལ་དེ་ལྟ་བུའི་སེམས་བསྐྱེད་པ་ཡོངས་སུ་ཤེས་པས། གཞུང་དེ་བཞིན་དུ་སྟེ། ཕྱོགས་བཅུའི་སེམས་བསྐྱེད་པ་སྣ་ཚོགས་གཅིག་ནས་གཅིག་ཏུ་བརྒྱུད་པ་ནི་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་དག་གི་སེམས་སྣ་ཚོགས་ཡོངས་སུ་ཤེས་
པར་བྱ་བའི་དོན་དུ། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟར་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། སེམས་ཅན་གྱི་ཁམས་ཀྱིས་གཏུགས་པ། ནམ་མཁའི་དབྱིངས་ཀྱིས་ཀླས་པའི་སེམས་ཅན་གྱི་ཁམས་མཐའ་དང་དབུས་མེད་པའི་སེམས་སྣ་ཚོགས་ཐམས་ཅད་ཡོངས་སུ་ཤེས་པས། མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །གཞུང་དེ་ལྟར་མོས་པ་ལ་ཇི་སྐད་དུ་བརྗོད་པ་དེ་བཞིན་དུ། སེམས་བསྐྱེད་པའི་དྲ་བ་མ་ལུས་པ་ཐམས་ཅད་མཉམ་པ་ཉིད་དུ་འཇུག་ཅིང་ཡོངས་སུ་རིག་པའི་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་སེམས་བསྐྱེད་པའི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ཏེ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་ལས་སྣ་ཚོགས་རབ་ཏུ་ཤེས་ལ། སེམས་བསྐྱེད་པ་ཤེས་པའི་ཚུལ་དེ་ལྟ་བུས་ཤར་ཕྱོགས་ལོགས་སུ་བསྐལ་པ་གྲངས་མེད་པར་ཟད་པར་བྱས་ཀྱང་། སེམས་ཅན་རྣམས་ཀྱི་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་མཐར་ཐུག་པར་མ་རུང་ལ། དེ་བཞིན་དུ་སྐྱེས་བུ་བཅུ་པའི་བར་དུ་སྐྱེས་པར་གྱུར་ཏེ། སྐྱེས་བུ་དགུ་པོ་དེ་དག་གིས་སེམས་ཅན་རྣམས་ཀྱི་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་ཡོངས་སུ་ཤེས་པར་བྱ་བའི་ཕྱིར། བསྐལ་པ་གྲངས་མེད་པ་ཟད་པར་བྱས་པ། དེ་དག་སེམས་བསྐྱེད་པ་གཅིག་གིས་ཤེས་པར་གྱུར་ཀྱང་། ཕྱོགས་བཅུར་ལས་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི་མཐར་ཐུག་པར་རུང་ཡང་སྲིད་ཀྱི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་དག་གི་ལས་སྣ་ཚོགས་ཡོངས་སུ་ཤེས་པར་བྱ་བའི་དོན་དུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟར་འཇིག་རྟེན་གྱི་ཁམས་དང་། དུས་གསུམ་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ལས་སྣ་ཚོགས་ཡོངས་སུ་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་ལས་སྣ་ཚོགས་མཐའ་དང་དབུས་མེད་པ་ལ་རབ་ཏུ་འཇུག་པ་དང་། ལས་ཀྱི་བྱེ་བྲག་ཐམས་ཅད་ལ་མཁས་པ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སེམས་ཅན་གཅིག་གྲངས་མེད་ཅིང་། རྣམ་པ་ཐ་དད་པར་ཡང་དག་པར་འཇུག་པ་དང་། ལས་ཀྱི་ཚུལ་བརྗོད་པའི་སྣང་བ་རབ་ཏུ་འཐོབ་པ་དང་། ལས་ཐམས་ཅད་མ་ལུས་པ་གཅིག་ནས་གཅིག་ཏུ་བརྒྱུད་པ་དང་། ལས་དང་ལྡན་པའི་འགྲོ་བ་རྒྱ་མཚོ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་དགེ་བ་དང་། མི་དགེ་བའི་རྣམ་པ་ཐ་དད་པ་ལ་རབ་ཏུ་འཇུག་ཅིང་དུས་གསུམ་ཐམས་ཅད་ཀྱི་ལས་སྣ་ཚོགས་དབང་གིས་ཡོངས་སུ་ཤེས་པར་བྱ་བ་དང་། ལས་ཇི་ལྟ་བ་བཞིན་དུ་མངོན་པར་འཚང་རྒྱ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། སྐལ་པ་མཉམ་པའི་ལས་དང་། སྐལ་པ་མི་མཉམ་པའི་ལས་ཤེས་པའི་མཆོག་ཐོབ་པར་བྱ་བ་དང་། ལས་ཐམས་ཅད་ལས་གཅིག་ཏུ་ཡང་
དག་པར་འཇུག་པ་དང་། ལས་གཅིག་ལས་ཐམས་ཅད་དང་མཉམ་པ་ཉིད་དུ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་བླ་མ་དང་། བཅས་པའི་ལས་དང་། བླ་ན་མེད་པའི་ལས་དང་། ལྷག་མ་དང་བཅས་པའི་ལས་དང་། མཉམ་པའི་ལས་དང་། མི་མཉམ་པའི་ལས་ཀྱི་བྱེ་བྲག་ཡེ་ཤེས་ཀྱི་རྒྱུད་ཆེན་པོས་མངོན་པར་འཚང་རྒྱ་ཞིང་། ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་གནས་པའི་ལས་དང་། མི་གནས་པའི་ལས་དང་། ཐུན་མོང་གི་ལས་དང་། ཐུན་མོང་མ་ཡིན་པའི་ལས་དང་། མཐའ་ཡས་པའི་ལས་དང་། མུ་མེད་པའི་ལས་དང་། མ་འདྲེས་པའི་ལས་དང་། དགེ་བའི་ལས་དང་། མི་དགེ་བའི་ལས་དང་། འཇིག་རྟེན་པའི་ལས་དང་། འཇིག་རྟེན་ལས་འདས་པའི་ལས་དང་། ལས་ཀྱི་བྱེ་བྲག་ཐམས་ཅད་ལ་ཡེ་ཤེས་ཀྱི་རྒྱུད་ཆེན་པོས་མངོན་པར་འཚང་རྒྱ་ཞིང་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་ཤེས་པའི་ལས་དང་། མི་ཤེས་པའི་ལས་དང་ཆེན་པོ་དང་། འབྲིང་དང་། ཚད་མེད་པའི་ལས་ཀྱི་སྒྲིབ་པ་ཐམས་ཅད་མ་ལུས་པར་ཆགས་པ་མེད་པས་ཤེས་པར་བྱ་བ་དང་། སངས་རྒྱས་ཀྱི་རྣམ་པར་ཐར་པ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་རྣམ་པར་དག་པའི་ལས་དང་། ཀུན་ནས་ཉོན་མོངས་པའི་ལས་དང་། རྒྱ་ཆེན་པོའི་ལས་དང་། རྒྱ་ཆུང་ངུའི་ལས་དང་། ཀུན་ཏུ་འབྲེལ་པའི་ལས་དང་། ཀུན་ཏུ་མ་འབྲེལ་པའི་ལས་དང་། ཕྲ་བའི་ལས་དང་། སྦོམ་པའི་ལས་དང་། ལས་མ་ལུས་པར་སེམས་ཅན་གྱི་ཁམས་ཀྱི་ལས་ཀྱི་ཚུལ་རྣམ་པ་ཐ་དད་
པ་ལ་རབ་ཏུ་འཇུག་པ་དང་། སེམས་ཅན་གཅིག་གིས་ལས་སྣ་ཚོགས་འབྱམ་ཀླས་པ་བཅུ་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་ཐིབས་པོར་གྱུར་པའི་ལས་དང་། སྦྱོར་བ་ཅན་གྱི་ལས་དང་། ཆུང་བའི་ལས་དང་། དྲན་པ་དང་ལྡན་པའི་ལས་དང་། རྒྱུའི་ཚོགས་དང་ལྡན་པའི་ལས་དང་། རྐྱེན་གྱི་ཚོགས་ལས་བྱུང་བའི་ལས་དང་། ལས་ཀྱི་དྲ་བ་ཐམས་ཅད་མ་ལུས་པ་མཉམ་པ་ཉིད་དུ་ཡོངས་སུ་རིག་ཅིང་ཤེས་པས་མངོན་པར་འཚང་རྒྱ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ།། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གཉིས་པ། ཀྱེ་རྒྱལ་བའི་སྲས་ལས་སྣ་ཚོགས་ཀྱི་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་ཏེ། དེའི་སེམས་བསྐྱེད་པ་གཅིག་གིས་ཤར་ཕྱོགས་ལོགས་སུ་འཇིག་རྟེན་གྱི་ཁམས་གྲངས་མེད་པར་གཏོགས་པའི་སེམས་ཅན་རྣམས་ཀྱི་སེམས་བསྐྱེད་པའི་ཤེས་པར་གྱུར་ལ། ཚུལ་དེ་ལྟར་སེམས་བསྐྱེད་པ་རེ་རེར་ཡོངས་སུ་ཤེས་པས། ཤར་ཕྱོགས་ལོགས་སུ་བསྐལ་པ་གྲངས་མེད་པར་ཟད་པར་བྱས་ཀྱང་། སེམས་ཅན་རྣམས་ཀྱི་ཉོན་མོངས་པ་སྣ་ཚོགས་མཐར་ཐུག་པར་མ་རུང་ལ། དེ་བཞིན་དུ་དེའི་འོག་ཏུ་སྐྱེས་བུ་གཉིས་པ་ཞིག་སྐྱེས་ཞེས་བྱ་བ་ནས། སྐྱེས་བུ་བཅུ་པ་སྐྱེས་པའི་བར་དུ་སྟེ། སྐྱེས་བུ་དགུ་པོ་དེ་དག་གིས་བསྐལ་པ་གྲངས་མེད་པར་ཉོན་མོངས་པ་སྣ་ཚོགས་རབ་ཏུ་ཤེས་པ་དེ་དག །སེམས་བསྐྱེད་པ་གཅིག་གིས་ཡོངས་སུ་ཤེས་པར་གྱུར་ལ། ཚུལ་དེ་འདྲ་བར་སེམས་བསྐྱེད་པ་རེ་རེར་ཡོངས་སུ་ཤེས་པས། གཞུང་དེ་བཞིན་དུ་སྟེ། ཕྱོགས་བཅུའི་ཉོན་མོངས་པ་སྣ་ཚོགས་གཅིག་ནས་གཅིག་ཏུ་བརྒྱུད་པ་དེ་དག་ནི་མཐར་ཐུག་པར་རུང་ཡང་སྲིད་ཀྱི། བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་དང་པོ་བསྐྱེད་པའི་དགེ་བའི་རྩ་བ་ནི་
མཐར་ཐུག་པར་མི་རུང་ངོ་། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་དེ་ཙམ་དག་གི་ཉོན་མོངས་པ་སྣ་ཚོགས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བ་མ་ཡིན་གྱི། འདི་ལྟ་སྟེ་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ཉོན་མོངས་པ་ཚད་མེད་པ་ཐམས་ཅད་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་ཉོན་མོངས་པ་ཡང་བ་དང་། ཉོན་མོངས་པ་ལྕི་བ་མངོན་པར་འཚང་རྒྱ་བའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་བག་ལ་ཉལ་བའི་ཉོན་མོངས་པ་དང་། སེམས་ཀུན་ནས་འཁོར་བའི་ཉོན་མོངས་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་དང་། རྣམ་པར་བྱང་བ་རྣམ་པར་དགོད་པ་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སེམས་ཅན་གཅིག་གི་ཉོན་མོངས་པ་ཚད་མེད་པ་སྣ་ཚོགས་རང་དབང་མེད་པར་བྱེད་པའི་ཉོན་མོངས་པ་རྣམ་པར་གཅད་པའི་ཡེ་ཤེས་ཡོངས་སུ། ཤེས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་སེམས་ཅན་ཐམས་ཅད་ཀྱི་ཉོན་མོངས་པ་དང་། རྣམ་པར་དཔྱོད་པ་རྣམ་པ་སྣ་ཚོགས་ཤེས་པ་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་མ་རིག་པ་ལ་གནས་པའི་ཉོན་མོངས་པ་དང་། སྲིད་པ་དང་ལྡན་པའི་ཉོན་མོངས་པ་དང་། སྲིད་པའི་རྒྱུད་ཐམས་ཅད་ཀྱི་ཉོན་མོངས་པ་ཀུན་ཏུ་སྦྱོར་བ་རྣམ་པར་གཅད་
པའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་འདོད་ཆགས་ཀྱིས་ཡེ་རྔམ་པའི་ཉོན་མོངས་པ་དང་། ཞེ་སྡང་གིས་ཁོང་ཁྲོ་བ་དང་། གཏི་མུག་གིས་མངོན་པར་ཁེབས་པ་དང་། ཆ་མཉམ་པའི་ཉོན་མོངས་པ་དང་། ཉོན་མོངས་པ་ཐམས་ཅད་རྩ་བ་དང་བཅས་ཏེ། རྣམ་པར་གཅད་པའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་བདག་ཏུ་བྱ་བ་ཤིན་ཏུ་བསྒོམས་པའི་ཉོན་མོངས་པ་དང་། བདག་གི་བྱ་བ་ལ་མངོན་པར་ཞེན་པ་དང་། ང་རྒྱལ་གྱིས་བསླང་བ་དང་། ང་རྒྱལ་གྱིས་མངོན་པར་སྦྲེལ་བའི་ཉོན་མོངས་པ་དང་། ཉོན་མོངས་པ་ཐམས་ཅད་མ་ལུས་པར་ཁོང་དུ་ཆུད་ཅིང་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ་ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བའི་ཡོངས་སུ་རྟོག་པ་རྩ་བར་གྱུར་པའི་ཉོན་མོངས་པ་དང་། ཡོངས་སུ་རྟོག་པའི་ཤུགས་ཀྱི་རྗེས་སུ་འབྲང་བའི་ཉོན་མོངས་པའི་རྣམ་པར་རྟོག་པ་དང་། འཇིག་ཚོགས་ལ་མངོན་པར་ཞེན་པ་དང་། ལྟ་བའི་རྣམ་པ་དྲུག་ཅུ་རྩ་གཉིས་ཀྱི་ཚུལ་སྣ་ཚོགས་དང་ལྡན་པའི་ཉོན་མོངས་པ་མངོན་པར་འཚང་རྒྱ་བའི་ཡེ་ཤེས་ཡོངས་སུ་ཤེས་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །འདི་ལྟ་སྟེ། བསྒྲིབས་པའི་ཉོན་མོངས་པ་དང་། ཀུན་ནས་བསྒྲིབས་པའི་ཉོན་མོངས་པ་ཐམས་ཅད་ཤེས་པས་རྣམ་པར་དག་པར་བྱ་བ་དང་། སྙིང་རྗེ་ཆེན་པོས་ཡོངས་སུ་བསྐྱབས་པའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་
སྐྱེའོ། །བསམ་པ་དང་བག་ལ་ཉལ་བ་དང་། ཀུན་ནས་འཁོར་བའི་ཉོན་མོངས་པའི་དྲ་བ་ཐམས་ཅད་རྣམ་པར་གཅོད་པའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེའོ། །ཀྱེ་རྒྱལ་བའི་སྲས་ཉོན་མོངས་པ་སྣ་ཚོགས་ཀྱི་དཔེ་དེ་དག་ལྟ་ཡང་ཞོག་གི ། ཀྱེ་རྒྱལ་བའི་སྲས་འདི་ལ་སྐྱེས་བུ་ལ་ལ་ཞིག་སྐྱེས་པར་གྱུར་ལ། དེའི་སེམས་བསྐྱེད་པ་གཅིག་གིས་འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་རྣམས་དང་ལྷན་ཅིག་པས། ཤར་ཕྱོགས་ལོགས་སུ་སངས་རྒྱས་བཅོམ་ལྡན་འདས་ཚད་མེད་པ་དག །མནབས་སྩལ་བྲོ་བའི་མཆོག་ཚད་མེད་པ་དང་། བདུག་སྤོས་ཚད་མེད་པ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་ཚད་མེད་པ་དང་། ཕོ་བྲང་ཚད་མེད་པ་དང་། བླ་རེ་ཚད་མེད་པ་དང་། གཞལ་མེད་ཁང་ཚད་མེད་པ་དང་། རིན་པོ་ཆེའི་དྲ་བ་དཔག་ཏུ་མེད་པ་དང་། སེང་གེའི་གདན་དཔག་ཏུ་མེད་པ་དང་། རིན་པོ་ཆེའི་རྒྱན་དང་། ལྷབ་ལྷུབ་ཚད་མེད་པ་དང་། མཆོད་པའི་རྣམ་པ་ཚད་མེད་པས་མཉེས་པར་བྱ་སྟེ། བསྐལ་པ་ཚད་མེད་པར་བསྙེན་བཀུར་ལ། རིམ་གྲོ་དང་བཀུར་སྟིར་བྱས་ཏེ། རྗེ་ས་དང་མཆོད་པས་བཏུད་ཅིང་ཕྱག་འཚལ་ཏེ། སྤྱི་བོས་གཏུགས་ནས་སྙན་པར་བརྗོད་དེ་འཁོར་ཞིང་ཞལ་དུ་ལྟ་ལ། དེ་བཞིན་གཤེགས་པ་རེ་རེ་ལ་ཡང་མི་དེ་དང་འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་དེ་དག་གིས་ཤིན་ཏུ་དད་པར་མར་མེ་གྲངས་མེད་པ་དག་ཀྱང་བུས་ཏེ། སྐྱེས་བུ་དེས་ཇི་ལྟ་བ་བཞིན་དུ་སེམས་ཅན་དེ་དག་གིས་ཀྱང་འཇིག་རྟེན་གྱི་ཁམས་དེ་སྙེད་པོ་དེ་དག་ནོར་བུ་རིན་པོ་ཆེ་རྣམ་པར་སྣང་བ་དང་ཡིད་བཞིན་གྱི་རྒྱལ་པོ་དང་། ཕྱོགས་ཐམས་ཅད་སྣང་བར་བྱེད་པ་དང་། མེའི་འོད་དང་། བརྒལ་དཀའ་བ་དང་། ཆུའི་ཟླ་བའི་འོད་དང་། རིན་པོ་ཆེའི་རྒྱན་དང་། བསོད་ནམས་ཀྱི་རྒྱལ་མཚན་དང་། ནོར་བུ་ཡིད་དུ་འོང་བ་དང་། དེ་དག་ལ་སྩོགས་
པ་རིན་པོ་ཆེ་ཚད་མེད་པས་ཡོངས་སུ་བཀང་སྟེ། ཡོན་དུ་གསོལ་ལ་དེ་བཞིན་དུ་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་རྒྱལ་མཚན་དང་། བ་དན་དང་། ཕོ་བྲང་དང་། གནམ་ཡོལ་དང་། སིལ་སྙན་དང་རོལ་མོ་བརྡུང་བ་དང་། གླུ་དང་རིན་པོ་ཆེའི་དྲ་བ་དང་། གསེར་གྱི་དྲ་བ་དང་། ནོར་བུའི་དྲ་བ་དང་། དྲིལ་བུའི་དྲ་བ་དང་། སེང་གེའི་ཁྲི་དང་། དེ་བཞིན་དུ་སངས་རྒྱས་ཀྱི་མཆོད་པ་བརྩམས་པ་རྒྱ་ཆེར་ཏེ། དེ་བཞིན་གཤེགས་པ་དེ་དག་བཞུགས་ཤིང་འཚོ་སྐྱོང་བའི་ཚེ། མཆོད་པའི་རྣམ་པ་དེ་ལྟ་བུས་མཆོད་ནས་མྱ་ངན་ལས་འདས་ནས་ཀྱང་མི་དེ་དང་། འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་དེ་སྙེད་ཀྱིས། དེ་བཞིན་གཤེགས་པ་རེ་རེ་ཞིང་ཡང་མཆོད་རྟེན་འཇིག་རྟེན་གྱི་ཁམས་ཚད་མེད་པ་དང་མཉམ་པར་ཡངས་ཤིང་རྒྱ་ཆེ་བ་རིན་པོ་ཆེ་ཚད་མེད་པ་ལས་བརྩིགས་ཏེ། རྒྱན་དང་རིན་པོ་ཆེ་ཚད་མེད་པས་བརྒྱན་པ་ལ་མཆོད་རྟེན་གཅིག་ཇི་ལྟ་བ་བཞིན་དུ། མཆོད་རྟེན་དཔག་ཏུ་མེད་པ་མང་པོ་ལ་ཡང་དེ་བཞིན་དུ་བྱས་ཏེ། ཐམས་ཅད་ཀྱི་ཚད་ཀྱང་དེ་ཙམ་ལ། མཆོད་རྟེན་རེ་རེ་ལ་ཡང་དེ་བཞིན་གཤེགས་པའི་སྐུ་གཟུགས་མང་པོ་ཚད་མེད་པར་བྱས་ཏེ། འཇིག་རྟེན་གྱི་ཁམས་མང་པོ་ཡང་སྣང་བས་རྒྱས་པར་གྱུར་ལ། རྣམ་གྲངས་དེ་ལྟ་བུར་དེ་བཞིན་གཤེགས་པ་ལ་མཆོད་པ་དང་། རིམ་གྲོའི་ཡོན་ཏན་ཡོངས་སུ་བརྗོད་པ་དེ་དག་བྱེད་ཅིང་། ཡོངས་སུ་མྱ་ངན་ལས་འདས་པ་དེ་དག་ལ་ཡང་མཆོད་པ་བྱ་བས། བསྐལ་པ་ཚད་མེད་པ་ཟད་པར་གྱུར་ཏེ། ཤར་ཕྱོགས་སུ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་དང་། ཕྱོགས་བཅུ་ཐམས་ཅད་དུ་ཡང་རྒྱ་
ཆེར་ཏེ། སྐྱེས་བུ་བཅུ་སྔོན་དུ་འགྲོ་བས་ཕྱོགས་བཅུ་རེ་རེ་ལ་སྐྱེས་བུ་རེ་རེ་ཞིང་ཡང་ཕྱོགས་བཅུར་བྱས་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། སྐྱེས་བུ་དེ་ལ་སྩོགས་པའི་མིའི་འཇིག་རྟེན་གྱི་ཁམས་ཚད་མེད་པ། བཅུར་གཏོགས་པ་དེ་དག་ལ་དེའི་རྒྱུས་བསོད་ནམས་ཀྱི་ཕུང་པོ་ཆེར་འཕེལ་ལམ། སྨྲས་པ། ཀྱེ་རྒྱལ་བའི་སྲས་དེ་ནི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཡེ་ཤེས་ཀྱིས་ཐུགས་སུ་ཆུད་པར་ཟད་དོ། །སྨྲས་པ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་ཇི་ཙམ་ཡོད་པའི་བསོད་ནམས་ཀྱི་ཕུང་པོ་དེ་ལ་བསྐལ་པ་ཚད་མེད་པར་མཉེས་པར་བྱས་པའི་སངས་རྒྱས་མཆོད་པ་དང་། རིམ་གྲོ་ལས་བྱུང་བའི་བསོད་ནམས་ཀྱི་ཕུང་པོ་སྔ་མ་དེས་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བ་བརྒྱ་སྟོང་གི་ཆར་ཡང་ཉེ་བར་མི་འགྲོའོ། ། གྲངས་དང་། ཆ་དང་། བགྲང་བ་དང་། དཔེ་དང་། རྒྱུར་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས་དཔེ་སྔ་མ་དེ་དག་ལྟ་ཡང་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་གཉིས་པ་ཞིག་བྱུང་སྟེ། དེའི་སེམས་བསྐྱེད་པ་གཅིག་གིས། སྐྱེས་བུ་སྔ་མ་དེ་དང་འགྲོ་བ་ཕལ་འཇིག་རྟེན་གྱི་ཁམས་ཚད་མེད་པར་གཏོགས་པ་སྔ་མ་རྣམས་ཀྱིས། བསྐལ་པ་ཚད་མེད་པར་སངས་རྒྱས་མཆོད་པ་དང་། རིམ་གྲོར་མངོན་པར་འདུ་བྱས་པ་དེ་དེ་དག་སེམས་བསྐྱེད་པ་གཅིག་གིས་མངོན་པར་འདུ་བྱེད་ལ། ཚུལ་དེ་ལྟ་བུར་སེམས་བསྐྱེད་པ་རེ་རེར་མཉེས་པར་བྱེད་པས། ཤར་ཕྱོགས་ལོགས་སུ་འཇིག་རྟེན་གྱི་ཁམས་ཚད་མེད་པར་གཏོགས་པའི་སེམས་ཅན་རྣམས་དང་ལྷན་ཅིག་པས། སངས་རྒྱས་བཅོམ་ལྡན་འདས་ཚད་མེད་པ་མཉེས་པར་བྱས་ཏེ། གཞུང་དེ་བཞིན་དུ། ཐོག་མ་ལ་ཇི་སྐད་དུ་བརྗོད་པ་དེ་བཞིན་དུ་གཉིས་པ་ལ་དཔག་ཏུ་མེད་པ།
གསུམ་པ་ལ་གྲངས་མེད་པ། བཞི་པ་ལ་བསམ་གྱིས་མི་ཁྱབ་པ། ལྔ་པ་ལ་མཚུངས་པ་མེད་པ། དྲུག་པ་ལ་ཀུན་ཏུ་མཐའ་ཡས་པ། བདུན་པ་ལ་མུ་མེད་པ། བརྒྱད་པ་ལ་ས་མཚམས་མེད་པ། དགུ་པ་ལ་གཞལ་དུ་མེད་པའི་བར་དུ་སྟེ། ཀྱེ་རྒྱལ་བའི་སྲས་དཔེ་སྔ་མ་དེ་དག་ལྟ་ཞོག་གི། ཀྱེ་རྒྱལ་བའི་སྲས་འདི་ལ་སྐྱེས་བུ་བཅུ་པ་ཞིག་སྐྱེས་ཏེ། སྐྱེས་བུ་སྔ་མ་དགུ་པོ་དེ་དག་དང་། འཇིག་རྟེན་གྱི་ཁམས་གཞལ་དུ་མེད་པ་བཅུར་གཏོགས་པའི་སེམས་ཅན་ཕལ་དེ་དག་གིས། བསྐལ་པ་དཔག་ཏུ་མེད་པར་སངས་རྒྱས་མཆོད་པ་དང་། རིམ་གྲོས་མཉེས་པར་བྱས་པ་དེ་ཙམ་དུ་སེམས་བསྐྱེད་པ་གཅིག་གིས་མཉེས་པར་བྱེད་ཅིང་། ཚུལ་དེ་ལྟར་སེམས་བསྐྱེད་པ་རེ་རེར་མཉེས་པར་བྱེད་པས། ཤར་ཕྱོགས་ལོགས་སུ་འཇིག་རྟེན་གྱི་ཁམས་བརྗོད་དུ་མེད་པར་གཏོགས་པའི་སེམས་ཅན་རྣམས་དང་ལྷན་ཅིག་པས། ཞལ་ཟས་རོ་བྲོ་བའི་མཆོག་བརྗོད་དུ་མེད་པ་ཞེས་བྱ་བ་ནས། གཞན་ཡང་རྒྱ་ཆེར་ཏེ་དེ་ལྟ་བུས་སངས་རྒྱས་བཅོམ་ལྡན་འདས་བརྗོད་དུ་མེད་པ་མཉེས་པར་བྱས་པ་ནས། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོ་ལ་བསྐལ་པ་བརྗོད་དུ་མེད་པར་གཏོགས་པའི་སངས་རྒྱས་མཆོད་པ་དང་། བསྙེན་བཀུར་བ་ལས་བྱུང་བའི་བསོད་ནམས་ཀྱི་ཕུང་པོ་སྔ་མས་བརྒྱའི་ཆར་ཡང་ཉེ་བར་མི་འགྲོ་ཞེས་བྱ་བ་ནས། རྒྱུའི་བར་དུ་ཡང་ཉེ་བར་མི་འགྲོ་ཞེས་བྱ་བའི་བར་དུ་སྟེ། དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་ནི་འདི་ལྟར་སངས་རྒྱས་སྐྱེས་པ་དེ་ཙམ་ཉི་ཙེ་ཞིག་མཆོད་ཅིང་བསྙེན་བཀུར་བ་འམ། སངས་རྒྱས་ཀྱི་མཆོད་པའི་ཡོ་བྱད་དེ་ཙམ་དག་གི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེའི། དེ་ནི་འདི་ལྟར་འཇིག་རྟེན་གྱི་ཁམས་འབྱམ་ཀླས་པ་མ་ལུས་པ་ཐམས་ཅད་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་མཐས་གཏུགས་
པ་བརྗོད་དུ་མེད་པའི་ཡང་བརྗོད་དུ་མེད་པ། ཕྱོགས་བཅུ་ཚད་ལས་འདས་པ་འབྱམ་ཀླས་པ། ཕྱོགས་བཅུའི་རྣམ་གྲངས་མཐའ་ཡས་པའི་དྲ་བས་ཁྱབ་པ། མིག་འཕྲུལ་གྱི་རྣམ་པས་མཐའ་ཡས་པ། འཇིག་རྟེན་གྱི་ཁམས་ཐམས་ཅད་གཞི་མཉམ་པར་ཆུད་པ། འཇིག་རྟེན་གྱི་ཁམས་མ་ལུས་པར་འདུས་པའི་ཚུལ་ཤིན་ཏུ་བསྟན་པ། འདུ་ཤེས་ཀྱི་རྣམ་པ་ལ་གནས་པའི་ཕྱོགས་ཀྱི་དྲ་བ་རྣམ་པར་ཕྱེ་བ་ལ་གནས་པ་ཐམས་ཅད་དུ་གཏོགས་པ། ལྷག་མ་མེད་པ་མ་ལུས་པའི་འཇིག་རྟེན་གྱི་ཁམས་གྲངས་དང་ཚུལ་ཤིན་ཏུ་བསྟན་པ་དག་ཏུ་སྔོན་གྱི་མཐའི་མུར་ཐུག་པའི་བསྐལ་པ་གྲངས་མེད་པའི་ཚུལ་ཤིན་ཏུ་བསྟན་པར་གཏོགས་པ་ཐམས་ཅད་མཁྱེན་པའི་ཡེ་ཤེས་ཀྱི་ཚུལ་གྱིས་མངོན་པར་ཐུགས་སུ་ཆུད་པ་དག་ཏུ། སངས་རྒྱས་བཅོམ་ལྡན་འདས་གང་ཇི་སྙེད་ནུབ་པར་གྱུར་ཏེ། ཡོངས་སུ་མྱ་ངན་ལས་འདས་པ་དང་། གང་ཡང་མ་འོངས་པའི་དུས་ན་འཇིག་རྟེན་གྱི་ཁམས་ཐམས་ཅད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འབྱུང་བར་འགྱུར་བ་དང་། གང་ཡང་ད་ལྟར་བྱུང་བའི་དུས་ན་ད་ལྟར་ཕྱོགས་བཅུ་ན་སངས་རྒྱས་བཅོམ་ལྡན་འདས་རྣམས་བཞུགས་ཤིང་འཚོ་སྐྱོང་བ་དང་། ཆོས་སྟོན་པ་དེ་དག་ཐམས་ཅད་མཆོད་ཅིང་རིམ་གྲོར་བྱ་བའི་ཕྱིར། བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་སྟེ། སེམས་བསྐྱེད་པ་དེ་སྐྱེས་མ་ཐག་ནས། དེ་དང་དེར་འདས་པའི་གྲངས་སུ་གཏོགས་པ་དང་། སྔོན་གྱི་མུར་གྱུར་པ་ཇི་སྙེད་པ་དེ་བཞིན་གཤེགས་པ་དེ་དག་གིས། མངོན་པར་ཐུགས་སུ་ཆུད་པ། དེ་དག་ཏུ་སངས་རྒྱས་བཅོམ་ལྡན་འདས་གང་ཇི་སྙེད་མྱ་ངན་ལས་འདས་པ་དེ་དག་གི་དགེ་བའི་རྩ་བ་ཇི་ལྟ་བ་བཞིན་དུ་བྱང་ཆུབ་སེམས་དཔའ་ཡིད་ཆེས་སོ། །དེ་བཞིན་གཤེགས་པ་མ་བྱོན་པ་དེ་དང་དེའི་དུས་སུ་གཏོགས་པ་ཕྱི་མའི་མཐའི་མུར་བསྟན་པ་དཔག་ཏུ་མེད་པའི་མཐའ་དང་།
དབུས་མེད་པར་ཤིན་ཏུ་བསྟན་པ་དཔག་ཏུ་མེད་པ་དག་ཏུ་སངས་རྒྱས་བཅོམ་ལྡན་འདས་གང་ཇི་སྙེད་འབྱུང་བར་འགྱུར་བ་དེ་དག་གི་དགེ་བའི་རྩ་བ་ལ་ཡང་བྱང་ཆུབ་སེམས་དཔའ་དེ་ཡིད་ཆེས་སོ། །ད་ལྟར་བྱུང་བའི་དེ་བཞིན་གཤེགས་པའི་སངས་རྒྱས་ཀྱི་ཡེ་ཤེས་མཐའ་དང་དབུས་མེད་པར་བསྟན་པ། མ་ལུས་པར་མངོན་པར་སངས་རྒྱས་པའི་སངས་རྒྱས་བཅོམ་ལྡན་འདས་དེ་དག་གི་དགེ་བའི་རྩ་བ་ལ་ཡང་བྱང་ཆུབ་སེམས་དཔའ་དེ་ཡིད་ཆེས་ཤིང་ཡོངས་སུ་འཛིན་པར་བྱེད་ཡོངས་སུ་རྒྱས་པར་བྱེད། རབ་ཏུ་འཐོབ་པར་བྱེད། ཁོང་དུ་ཆུད་པར་བྱེད། རབ་ཏུ་རེག་པར་བྱེད། ཤིན་ཏུ་བསྒྲུབ་པར་བྱེད། རྒྱུད་གཅིག་ཏུ་གྱུར་པར་བྱེད། སངས་རྒྱས་ཐམས་ཅད་ཀྱང་མཉམ་པ་ཉིད་དུ་ཁོང་དུ་ཆུད་པར་བྱེད་དོ། །དེ་ཅིའི་ཕྱིར་ཞེ་ན། འདི་ལྟར་སེམས་བསྐྱེད་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་གདུང་རྒྱུན་མི་འཆད་པའི་ཕྱིར་སྐྱེའོ། །འཇིག་རྟེན་གྱི་ཁམས་མ་ལུས་པ་ཐམས་ཅད་རྒྱས་པར་དགང་པའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་ཡོངས་སུ་བསྒྲལ་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་འདུ་བ་དང་། འཇིག་པ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །འཇིག་རྟེན་གྱི་ཁམས་ཐམས་ཅད་ཀྱི་སྲིད་པ་གསུམ་ཡོངས་སུ་དག་པ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་བསམ་པ་དང་བག་ལ་ཉལ་བ་དང་། བག་ཆགས་ཐམས་ཅད་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་ཤི་འཕོ་དང་། སྐྱེ་བ་ཡོངས་སུ་ཤེས་པར་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་དབང་པོ་དང་། སྦྱོར་བ་ཡོངས་སུ་ཤེས་པ་བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་སེམས་དང་སྤྱོད་པ་ཡོངས་སུ་ཤེས་པར་
བྱ་བའི་ཕྱིར་སྐྱེའོ། །སེམས་ཅན་ཐམས་ཅད་ཀྱི་དུས་གསུམ་གྱི་ཤེས་པ་ཡོངས་སུ་ཤེས་པར་བྱ་བའི་ཕྱིར་སྐྱེ་སྟེ། སེམས་བསྐྱེད་པ་དེས་སངས་རྒྱས་བཅོམ་ལྡན་འདས་འདས་པ་དག་དང་ཉེ་བར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་པ་དང་། ད་ལྟར་བྱུང་བ་རྣམས་དང་ཉེ་བར་འགྱུར་རོ། །འདས་པའི་སངས་རྒྱས་ཀྱི་བྱང་ཆུབ་ཏུ་ཉེ་བར་འགྲོའོ། །མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་བྱང་ཆུབ་ཏུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་ཆོས་ཀྱང་འཐོབ་པར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་པ་རྣམས་ཀྱི་ཆོས་ཀྱང་འཐོབ་པར་འགྱུར་རོ། །སངས་རྒྱས་བཅོམ་ལྡན་འདས་ད་ལྟར་བྱུང་བ་རྣམས་ཀྱི་ཆོས་ཀྱང་འཐོབ་པར་འགྱུར་རོ། །སངས་རྒྱས་བཅོམ་ལྡན་འདས་འདས་པ་རྣམས་དང་མཉམ་པ་ཉིད་དུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་མ་བྱོན་པ་དང་། ད་ལྟར་བྱུང་བ་རྣམས་དང་མཉམ་པ་ཉིད་དུ་ཉེ་བར་འགྲོའོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་ཡེ་ཤེས་ཀྱི་ཚོགས་རྣམ་པར་དག་པར་འགྱུར་རོ། །སངས་རྒྱས་བཅོམ་ལྡན་འདས་མ་བྱོན་པ་དང་། ད་ལྟར་བྱུང་བ་རྣམས་ཀྱི་ཡེ་ཤེས་ཀྱི་ཚོགས་ཀྱང་རྣམ་པར་དག་པར་འགྱུར་རོ། །སངས་རྒྱས་བཅོམ་ལྡན་འདས་འདས་པ་དང་། མ་བྱོན་པ་དང་། ད་ལྟར་བྱུང་བའི་སྟོབས་ལ་ཐུབ་པ་མེད་པར་ཡང་ཤིན་ཏུ་བསྟན་པར་འགྱུར་རོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་དག་གི་མི་བསྙེངས་པ་ཡོངས་སུ་དག་པ་ཡོངས་སུ་རྫོགས་པར་བྱེད་དོ། །སངས་རྒྱས་བཅོམ་ལྡན་འདས་འདས་པ་རྣམས་ཀྱི་བསྟན་པར་བྱ་བའི་སངས་རྒྱས་ཀྱི་ཆོས་ཀྱི་རྒྱན་མཉམ་པ་ཉིད་ཀྱང་རྗེས་སུ་ཐོབ་བོ། །སངས་རྒྱས་བཅོམ་ལྡན་འདས་འདས་པ་དང་མ་བྱོན་པ་དང་ད་ལྟར་བྱུང་བ་རྣམས་ཀྱི་བསྟན་པར་བྱ་བའི་སངས་རྒྱས་ཀྱི་ཆོས་ཀྱི་རྒྱན་མཉམ་པ་ཉིད་ཀྱང་ཡོངས་སུ་རྫོགས་པར་བྱེད་དོ། །
ནམ་མཁའི་དབྱིངས་ཀྱི་མཐར་ཐུག་པ། ཆོས་ཀྱི་དབྱིངས་མཐའ་དང་དབུས་མེད་པར་ཤིན་ཏུ་བསྟན་པའི་དུས་གསུམ་མཉམ་པ་ཉིད་ཐུགས་སུ་ཆུད་པའི་སངས་རྒྱས་ཀྱི་ཡེ་ཤེས་ཀྱང་རྗེས་སུ་འཐོབ་བོ། །དེ་ཅིའི་ཕྱིར་ཞེ་ན། དེ་ལྟར་དེ་ནི་སངས་རྒྱས་སུ་ཤོག་ཤིག་ཅེས་བྱ་བའི་སེམས་བསྐྱེད་པ་དེས། འདས་པའི་སངས་རྒྱས་བཅོམ་ལྡན་འདས་རྣམས་དང་ཉེ་བ་ཡིན། མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་ཉེ་བ་ཡིན། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་ཡུལ་རྣམས་དང་མཉམ་པ་ཡིན། འདས་པའི་སངས་རྒྱས་ཀྱི་ཆོས་རྣམས་དང་མཉམ་པ་ཡིན་ནོ། །མ་འོངས་པ་དང་ད་ལྟར་བྱུང་བའི་སངས་རྒྱས་ཀྱི་ཆོས་རྣམས་དང་མཉམ་པ་ཡིན། སངས་རྒྱས་ཀྱི་ཆོས་ཀྱི་ཡུལ་ཐམས་ཅད་དང་མཉམ་པ་ཡིན། གཅིག་ཏུ་ངེས་པའི་ལུས་གཅིག་ཏུ་གྱུར་པས་ཀྱང་དུས་གསུམ་དུ་མཉམ་པའི་སངས་རྒྱས་ཐམས་ཅད་ཀྱི་ཡེ་ཤེས་དང་། འགྲོགས་པ་ཡང་ཐོབ་པ་སྟེ། ཡེ་ཤེས་དེ་དང་འགྲོགས་པར་འགྱུར་བའི་སེམས་བསྐྱེད་པའི་འབྱུང་བ་དེ་སྐྱེས་མ་ཐག་ཏུ་ཕྱོགས་བཅུ་ན། སངས་རྒྱས་བཅོམ་ལྡན་འདས་རྣམས་ཀྱང་ཆེད་དུ་བརྗོད་པ་མཛད་དོ། །སེམས་བསྐྱེད་པ་དེ་ཉིད་རྟེན་དུ་མཛད་དེ། འདུལ་བ་ཇི་བཞིན་དུ་ཆོས་ཀྱང་ཡང་དག་པར་སྟོན། འཇིག་རྟེན་གྱི་ཁམས་ཐམས་ཅད་དུ་ཡང་འདུལ་བ་ཚད་མེད་པ་རྣམས་འབྱུང་བར་འགྱུར་འཇིག་རྟེན་གྱི་ཁམས་ཐམས་ཅད་དུ་ཡང་རབ་ཏུ་གཡོ་བར་འགྱུར། འཇིག་རྟེན་གྱི་ཁམས་ཐམས་ཅད་ཀྱང་སྣང་བས་རྒྱས་པར་འགྱུར། འཇིག་རྟེན་གྱི་ཁམས་ཐམས་ཅད་ཀྱི་ངན་སོང་ཡང་རྒྱུན་ཆད་པར་འགྱུར། འཇིག་རྟེན་གྱི་ཁམས་ཐམས་ཅད་ཀྱང་ཡོངས་སུ་དག་པར་འགྱུར། འཇིག་རྟེན་གྱི་ཁམས་ཐམས་ཅད་དུ་ཡང་སངས་རྒྱས་འབྱུང་བ་ཡང་དག་པར་སྟོན་པར་འགྱུར། སེམས་ཅན་ཐམས་ཅད་ཀྱང་རབ་ཏུ་དགའ་བར་འགྱུར། ཆོས་ཀྱི་དབྱིངས་ཐམས་ཅད་ལ་ཡང་རབ་ཏུ་འཇུག་པར་འགྱུར།
སངས་རྒྱས་ཀྱི་རིགས་ཐམས་ཅད་ཀྱང་ཡོངས་སུ་འཛིན་པར་འགྱུར། སངས་རྒྱས་ཀྱི་རིགས་ཀྱི་སྣང་བ་ཐམས་ཅད་ཀྱང་རབ་ཏུ་ཐོབ་པར་འགྱུར་ཏེ། དུས་གསུམ་དུ་གཏོགས་པ་ལས་སེམས་བསྐྱེད་པ་དེར་སངས་རྒྱས་སམ། སངས་རྒྱས་ཀྱི་ཆོས་སམ། བྱང་ཆུབ་སེམས་དཔའ་འམ། བྱང་ཆུབ་སེམས་དཔའི་ཆོས་སམ། རང་སངས་རྒྱས་སམ། རང་སངས་རྒྱས་ཀྱི་ཆོས་སམ། ཉན་ཐོས་སམ་ཉན་ཐོས་ཀྱི་ཆོས་སམ། འཇིག་རྟེན་པ་འམ་འཇིག་རྟེན་པའི་ཆོས་སམ། འཇིག་རྟེན་ལས་འདས་པ་འམ། འཇིག་རྟེན་ལས་འདས་པའི་ཆོས་སམ། སེམས་ཅན་ནམ་སེམས་ཅན་གྱི་ཆོས་ཀྱང་རུང་སྟེ། མ་འདུས་པ་གང་ཡང་མེད་དེ། ཐམས་ཅད་མཁྱེན་པ་ཉིད་ནི་མ་གཏོགས་སོ། །དེ་ལྟར་ན་སེམས་བསྐྱེད་པ་དེར་ནི་ཆོས་ཀྱི་དབྱིངས་ཐམས་ཅད་འདུས་སོ། །དེ་ནས་སངས་རྒྱས་ཀྱི་མཐུས། དེའི་ཚེ་ཕྱོགས་བཅུར་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་རྣམ་པ་དྲུག་དུ་གཡོས་པར་གྱུར་ཏེ། གཡོས་སོ་རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག་ཀུན་ཏུ་ཤིག་ཤིག་གོ །དེ་ནས་སངས་རྒྱས་ཀྱི་མཐུ་དང་། སེམས་བསྐྱེད་པ་དེའི་ཡོན་ཏན་ཡང་དག་པར་བརྗོད་པའི་ཆོས་ཉིད་རབ་ཏུ་ཐོབ་པའི་ཕྱིར། ལྷ་རྫས་ཀྱི་མེ་ཏོག་གི་ཆར་ཡང་མངོན་པར་བབ་བོ། །ལྷ་རྫས་ཀྱི་སྤོས་ཀྱི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྱེ་མའི་ཆར་ཡང་མངོན་པར་བབ་བོ། །ལྷ་རྫས་ཀྱི་ཕྲེང་བའི་ཆར་ཡང་མངོན་པར་བབ་བོ། །ལྷ་རྫས་ཀྱི་གོས་ཀྱི་ཆར་ཡང་མངོན་པར་བབ་བོ། །ལྷ་རྫས་ཀྱི་རིན་པོ་ཆེའི་ཆར་ཡང་མངོན་པར་བབ་བོ། །ལྷ་རྫས་ཀྱི་རྒྱན་གྱི་ཆར་ཡང་མངོན་པར་བབ་བོ། །
ལྷ་རྫས་ཀྱི་རོལ་མོ་རྣམས་ཀྱང་མངོན་པར་སྒྲ་འབྱིན་པར་གྱུར་ཏོ། །ལྷ་རྫས་ཀྱི་སྣང་བ་ཡང་རབ་ཏུ་བྱུང་ངོ་། །ལྷ་རྫས་ཀྱི་འོད་ཀྱང་རབ་ཏུ་བྱུང་ངོ་། །ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་འདས་པའི་ཕ་རོལ་ནས། དེ་བཞིན་གཤེགས་པ་ཆོས་ཀྱི་བློ་གྲོས་སུ་མཚན་བཏགས་པ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཞལ་མངོན་པར་བསྟན་ཏེ། གསུང་བརྗོད་པ་ཆོས་ཀྱི་བློ་གྲོས་ལེགས་སོ་ལེགས་སོ། །ཕྱོགས་བཅུ་ན་དེ་བཞིན་གཤེགས་པ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་ཆོས་བསྟན་པ་དེ་ལ་ཆེད་དུ་བརྗོད་པ་མཛད་དོ། །ངེད་ཀྱིས་ཀྱང་ཆོས་བསྟན་པ་འདི་ཉིད་ཤིན་ཏུ་རྣམ་པར་ཕྱེ་སྟེ། ངེད་ཀྱིས་ཇི་ལྟར་ཤིན་ཏུ་རྣམ་པར་ཕྱེ་བ་དེ་བཞིན་དུ་སངས་རྒྱས་ཐམས་ཅད་ཀྱིས་ཀྱང་ཤིན་ཏུ་རྣམ་པར་ཕྱེའོ། །འདི་ཉིད་དུ་ཡང་ཁྱོད་ཀྱིས་ཆོས་བསྟན་པ་དེས་བྱང་ཆུབ་སེམས་དཔའ་སངས་རྒྱས་ཀྱི་ཞིང་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱིས་བྱང་ཆུབ་ཏུ་སེམས་བསྐྱེད་དོ། །དེ་དག་ཀྱང་ངེད་ཀྱིས་ལུང་བསྟན་ཏེ། དེ་དག་ནི་མ་འོངས་པའི་དུས་བསྐལ་པ་སྟོང་ཕྲག་བརྗོད་དུ་མེད་པའི་མཐར་ཐམས་ཅད་ཀྱང་དུས་གཅིག་ཏུ་འཇིག་རྟེན་གྱི་ཁམས་མིང་ཐ་དད་པ་དག་ཏུ་དེ་བཞིན་གཤེགས་པ་མཚན་གཅིག་པ་ཤ་སྟག་འབྱུང་བར་འགྱུར་ཏེ། འདི་ལྟར་སེམས་རྣམ་པར་དག་པ་ཞེས་བྱ་བ་ཤ་སྟག་ཏུ་འགྱུར་རོ། །ངེད་ཀྱིས་ཆོས་བསྟན་པ་འདི་ཡང་ཇི་ལྟར་མ་འོངས་པའི་དུས་ན། མ་འོངས་པའི་བྱང་ཆུབ་སེམས་དཔའ་མ་ཐོས་པ་རྣམས་ཀྱིས་ཐོས་པར་བྱ་བ་དང་། ཇི་ལྟར་འཇིག་རྟེན་གྱི་ཁམས་མི་མཇེད་འདིར་སེམས་ཅན་རྣམས་ཀྱིས་ཤེས་ཤིང་གླིང་བཞི་པ་འདིའི་རི་རབ་ཀྱི་རྩེ་མོ་ལ་ཇི་ལྟར་སེམས་ཅན་རྣམས་འདུལ་བར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་གྲངས་མེད་པ། བསམ་གྱིས་མི་ཁྱབ་པ་མཚུངས་པ་མེད་པ། ཀུན་ཏུ་མཐའ་ཡས་པ། དཔག་ཏུ་མེད་པ། ས་མཚམས་མེད་པ། བརྗོད་དུ་མེད་པ། ཆོས་
ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་དག་ཏུ་ཡང་། སེམས་ཅན་རྣམས་འདུལ་བར་འགྱུར་བར་བྱ་བའི་ཕྱིར་བྱིན་གྱིས་བརླབ་བོ། །ཐམས་ཅད་ན་ཡང་ཆོས་བསྟན་པ་འདི་ཉིད་བྱང་ཆུབ་སེམས་དཔའ་ཆོས་ཀྱི་བློ་གྲོས་ཤེས་བྱ་བ་ཤ་སྟག །སངས་རྒྱས་ཀྱི་མཐུ་དང་། བཅོམ་ལྡན་འདས་ཀྱི་སྔོན་གྱི་སྨོན་ལམ་གྱིས་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྟན་པ་དང་། ཡེ་ཤེས་ཀྱི་སྣང་བ་ཤིན་ཏུ་གསལ་བར་བྱ་བ་དང་། དོན་གྱིས་འདུལ་བའི་སྣང་བ་ཐོབ་པ་དང་། ཆོས་ཉིད་རབ་ཏུ་ཐོབ་པར་བྱ་བ་དང་། བྱང་ཆུབ་སེམས་དཔའ་རྣམས་ཤིན་ཏུ་དགའ་བར་བྱ་བ་དང་། སངས་རྒྱས་ཀྱི་ཆོས་ཀྱི་རྒྱུད་ཡང་དག་པར་བསྟན་པར་བྱ་བ་དང་། སངས་རྒྱས་ཀྱི་ཆོས་མཉམ་པ་ཉིད་དུ་བྱ་བ་དང་། ཆོས་ཀྱི་དབྱིངས་གཉིས་སུ་མེད་པ་ལ་འཇུག་པར་བྱ་བའི་ཕྱིར་རབ་ཏུ་སྟོན་ཏོ། །དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ཕྱོགས་བཅུར་བལྟས་ཏེ། འཁོར་ཐམས་ཅད་ལ་རྣམ་པར་བལྟས་ནས། ནམ་མཁའི་ཁམས་རྣམས་ལ་ནི་རྣམ་པར་དཔྱོད། སེམས་ཅན་གྱི་ཁམས་ནི་ཡོངས་སུ་སྨིན་པར་བྱེད། ལས་དང་རྣམ་པར་སྨིན་པའི་ཁམས་ནི་འགལ་བར་མི་བྱེད། ནམ་མཁའི་ཁམས་ནི་ཡོངས་སུ་དག་པར་བྱེད། ཀུན་ནས་ཉོན་མོངས་པ་ལས་བྱུང་བ་ནི་རབ་ཏུ་སེལ། མོས་པ་ཡངས་པ་ལས་བྱུང་བ་ནི་ཤིན་ཏུ་འཕེལ་བར་བྱེད། སེམས་ཅན་གྱི་དབང་པོ་ཐ་དད་པ་ལ་ནི་རབ་ཏུ་འཇུག་དུས་གསུམ་ནི་མཉམ་པར་བྱེད། མྱ་ངན་ལས་འདས་པའི་དབྱིངས་ལ་ནི་ཡང་དག་པར་རྟོག་ཅིང་། རང་གི་དགེ་བའི་རྩ་བའི་སྟོབས་ཡོངས་སུ་དག་པར་བྱ་བ་ལ་གཞོལ་བའི་ཕྱིར། དེའི་ཚེ་སངས་རྒྱས་ཀྱི་མཐུས་ཚིགས་སུ་བཅད་པ་འདི་དག་སྨྲས་སོ། །གང་ཞིག་ཕྱོགས་རྣམས་བཅུ་པོ་མ་ལུས་རྒྱས་བྱས་ཤིང་། །སེམས་ཅན་ཞིང་དང་ཆོས་གསུམ་དག་ཀྱང་རྟོགས་གྱུར་པ། །སངས་རྒྱས་མཚོ་མཆོག་བྱང་ཆུབ་སེམས་དཔའ་དེ་བཞིན་ཏེ། །དེ་དག་འཇིག་རྟེན་ཕན་ཕྱིར་སེམས་ཀྱི་དམ་པ་བསྐྱེད། །
ནམ་མཁའི་དབྱིངས་ཀྱིས་ཀླས་པའི་ཆོས་དབྱིངས་ཇི་བཞིན་དང་། ། ཇི་ལྟར་སངས་རྒྱས་ཆོས་རྣམས་འགྲོ་ཀུན་རྗེས་སོང་དང་། །སངས་རྒྱས་ཐམས་ཅད་ཀུན་ཏུ་ཁྱབ་བརྙེས་ཇི་བཞིན་གྱིས། །འགྲོ་བ་མྱི་ལྡོག་དོན་དུ་ཕན་པར་རབ་ཏུ་ཞུགས། །འཇིག་རྟེན་རྣམས་ལ་བྱམས་པས་རྟག་པར་རབ་གནས་ཤིང་། །འཚེ་བ་མེད་པར་འགྲོ་ལ་ཕན་ཕྱིར་སུ་ཞུགས་ཏེ། །སྣང་བ་མི་ཟད་འོད་བྱེད་གནས་སུ་གྱུར་པ་རྣམས། །བསམ་གྱིས་མི་ཁྱབ་སྟོབས་བཅུ་མངའ་བས་བྱིན་གྱིས་བརླབས། །དེ་ནི་ཞིང་རྣམས་ཐ་དད་མ་ཡིན་ཚུལ་ཡང་རྙེད། །དེ་ནི་ལུས་ཀྱི་རྣམ་པ་ཀུན་ལ་རབ་ཏུ་ཞུགས། །བསོད་ནམས་ཡེ་ཤེས་དེ་ཡང་སངས་རྒྱས་བྱང་ཆུབ་བཞིན། །འདི་ནི་ཆགས་མེད་གཞོལ་བ་ཡེ་ཤེས་རྒྱུར་སྐྱེས་སོ། །སྤྱིའུ་ཚུགས་རྒྱུ་བའི་འགྲོ་བ་སྣ་ཚོགས་མ་ལུས་པར། །གཞན་ཡང་ཞིང་རྣམས་འབྱམ་ཀླས་ཆགས་མྱེད་མཐར་ཐུག་པ། །དེ་དག་ཕྲ་སྦོམ་རྒྱ་ཆེ་ཡངས་པ་ཐམས་ཅད་དུ། །བྱང་ཆུབ་སེམས་མཆོག་དེ་ནི་གཅིག་པུ་ཀུན་ཏུ་འགྲོ། །བརྗོད་དུ་མེད་པ་ཤིན་ཏུ་ཕྲ་ཞིང་མྱི་གནས་པའི། །བྱང་ཆུབ་སེམས་དཔའི་སྤྱད་པ་མཆོག་ལ་རྟག་ཞུགས་ཤིང་། །མཁས་པ་གང་གིས་སངས་རྒྱས་ཆོས་མཐོང་མྱི་ངོམས་པ། །དེ་དག་ཆོས་རྣམས་རྒྱ་མཚོའི་རྣམ་པར་ཆུད་པ་ཡིན། །འཇིག་རྟེན་ལམ་རྒྱུད་ཀུན་ལ་སུ་ཞིག་སྙིང་བརྩེ་ཞིང་། །འཇིག་རྟེན་གསུམ་པོ་སྦྱང་བར་རྟག་ཏུ་ཞུགས་པ་རྣམས། །ཕྱི་མའི་མཐར་ཐུག་སངས་རྒྱས་གདུང་གི་རྒྱུན་མི་གཅོད། །དེ་ནི་བདུད་ཀྱི་ཁྱིམ་ཡང་རབ་ཏུ་བཅོམ་པ་ཡིན། །དུས་གསུམ་རྒྱལ་བ་རྣམས་དང་རྒྱུད་གཅིག་དངོས་གྱུར་ཅིང་། །ཤིན་ཏུ་ཕྲ་བའི་ཚུལ་གྱིས་ལམ་ལ་རྟག་བརྩོན་ཏེ། །སུ་ཞིག་སངས་རྒྱས་ཡུལ་ལ་དད་སེམས་པ། །དེ་ནི་ཆགས་མེད་ཐུབ་པ་ཀུན་གྱིས་དབང་ཡང་བསྐུར། །རྡོ་རྗེ་ལྟ་བུར་སྲ་ཞིང་བརྟན་ལ་མི་ཤིགས་པ། །རྐང་གཉིས་གཙོ་བོའི་མཛད་པ་རྟག་ཏུ་དྲན་ཤེས་ཤིང་། །འདྲེན་པའི་སྤྱོད་ཡུལ་སྣང་རབ་ཤིན་ཏུ་རྙེད་པ་རྣམས། །
གཞན་གྱི་དྲིང་ལ་མྱི་རྒྱུག་བྱང་ཆུབ་སེམས་ཀྱང་སྐྱེ། །འགྲོ་བ་རྣམས་ཀྱི་འདུ་ཤེས་རྣམ་པར་མང་ཤེས་ཤིང་། །དེ་བཞིན་ལས་དང་འབྲས་བུ་སེམས་ཀྱི་རྣམས་ཀྱང་སྟེ། །གཞན་ཡང་དབང་པོའི་མཐུ་དང་ཁམས་རྣམས་དུ་མ་དག །ཀུན་ཀྱང་བྱང་ཆུབ་སེམས་དཔའ་སྤྱོད་ཡུལ་གཅིག་ཡིན་ནོ། །གང་ཞིག་ཆོས་ཀྱི་དབྱིངས་བཞིན་བྱང་ཆུབ་སེམས་ཡངས་ཤིང་། །རྟག་ཏུ་ཆོས་ལ་མི་གནས་ནམ་མཁའ་ཇི་བཞིན་པ། །ཆགས་མེད་སེམས་ལྡན་དེ་དག་སངས་རྒྱས་ཡེ་ཤེས་ཞུགས། །དེ་དག་རྟོག་མེད་ཆོས་ཅན་ཡང་དག་མཐའ་ལ་གནས། །སེམས་ཅན་བསམ་པ་རྣམས་འབྱེད་སེམས་ཅན་འདུ་ཤེས་མེད། །ཆོས་ཀྱི་རྣམ་རྟོག་ཁྲག་ཁྲིག་ཕ་མཐར་རབ་ཏུ་ཕྱིན། །དེ་དག་རྟོག་ལ་མོས་ཤིང་རྣམ་པར་མྱི་རྟོག་སྟེ། །དེ་དག་ཞིང་རྣམས་བྱེ་བ་ཁྲག་ཁྲིག་རྗེས་སུ་ཞུགས། །གང་ཞིག་སངས་རྒྱས་བྱེ་བ་ཁྲག་ཁྲིག་རྗེས་སེམས་ཤིང་། །གང་ཞིག་ཆོས་དབྱིངས་ཚུལ་གྱི་མཛོད་དུ་ཞུགས་གྱུར་ལ། །གང་ཞིག་སེམས་ཅན་དབང་པོའི་རྣམ་པར་མཐར་ཕྱིན་པ། །དེ་དག་སེམས་ཅན་གཙོ་བཞིན་ཆོས་ཉིད་ཤེས་པ་ཡིན། །ལྷག་པའི་བསམ་པ་དགེ་དང་རྟག་པར་མངོན་ལྡན་ཞིང་། །སྐྱེས་བུ་སེང་གེའི་བསྙེན་བཀུར་ཕྱིར་ལྡོག་མྱི་འགྱུར་ལ། །འཇིག་རྟེན་གཙོ་བོ་མཁས་པ་མཐོང་བས་མི་ངོམས་པ། །དེ་དག་སངས་རྒྱས་ཁྲག་ཁྲིག་བྱེ་བས་བྱིན་གྱིས་བརླབས། །ཟབ་མོའི་ཆོས་རྣམས་རྣམ་པར་འབྱེད་ཀྱང་ཆགས་པ་མེད། །གནས་པ་མེད་པས་སེམས་ཀྱི་དམ་པ་རྟག་ཏུ་དག །དེ་དག་བསྐལ་པ་མཐའ་ཡས་སྐྱེས་བུའི་སེང་གེ་རྣམས། །དུས་གསུམ་ཆགས་པ་མེད་པར་གཏོགས་པའི་ཡིད་དང་ལྡན། །མྱི་འཕྲོགས་ཐུབ་པར་མི་ནུས་ཡིད་ཀྱི་དབང་པོ་དང་། །གསུམ་པ་རྗེས་སུ་སོང་དང་རྟག་ཏུ་ལྡན་གྱུར་ཅིང་། །ཆོས་རྣམས་འབྱམ་ཀླས་ཤིན་ཏུ་བསླབས་པས་རྨོངས་མེད་པ། །དེ་དག་ཆོས་དབྱིངས་འགེངས་ཀྱང་ནམ་ཡང་མི་ངོམས་སོ། །ཚིག་གི་ལམ་འདས་ཇི་བཞིན་མཁས་པ་ཞི་བ་ཤེས། །དེ་བཞིན་ཉིད་ལ་ནམ་ཡང་
རྣམ་པར་མྱི་འབྱེད་པ། །དེ་དག་སངས་རྒྱས་ཐམས་ཅད་ཡུལ་ལ་རྗེས་སེམས་ཤིང་། །དུས་གསུམ་ཆགས་པ་མེད་པར་རྟོགས་པའི་ཡིད་ལྡན་འགྱུར། །མཁས་པ་གང་ཞིག་སེམས་བསྐྱེད་འབྱམ་ཀླས་ཆོས་ཀྱི་དབྱིངས། །འགེངས་ཤིང་ཕྱོགས་བཅུའི་སངས་རྒྱས་ཞིང་དུ་འགྲོ་བ་ནི། །དེ་དག་ཁྲག་ཁྲིག་ཚུལ་རྣམས་བརྗོད་དུ་མེད་པ་ཡི། །སྣང་བ་རྙེད་པར་གནས་པའི་རྒྱལ་བའི་སྲས་ཡིན་ནོ། །ཆོས་རབ་མུ་སྟེགས་སྙིང་རྗེའི་ཚུལ་གྱི་རྗེས་སོང་ཞིང་། །བྱམས་པའི་ཕ་རོལ་ཕྱིན་པ་བར་སྣང་ཇི་བཞིན་ཏེ། །སེམས་ཅན་ཁམས་ལ་ནམ་ཡང་ཡོངས་སུ་རྟོག་མེད་པ། །དེ་དག་རྣམ་རྟོག་མེད་ལ་བརྩོན་ཞིང་འཇིག་རྟེན་སྤྱོད། །ཕྱོགས་བཅུ་དག་ཏུ་བདེན་པས་འགྲོ་བ་ཡིད་འབེབས་པར། །དོང་པས་སེམས་ཅན་གཙོ་བོ་དེ་དག་ཀུན་ཏུ་རྒྱུ། །བདེན་པའི་ཚིག་བརྩོན་རྟག་ཏུ་ངེས་པའི་སེམས་ལྡན་པ། །དེ་དག་ཕྱོགས་བཅུའི་མྱི་ཡི་མཆོག་གིས་བྱིན་གྱིས་བརླབས། །འདས་པར་གྱུར་པའི་དུས་ཀྱང་དེ་དག་རྗེས་སུ་དྲན། །དེ་བཞིན་མ་འོངས་དུས་ལ་འཇུག་པ་རྣམ་པར་སྒོམ། །དེ་དག་ཕྱོགས་བཅུའི་འཇིག་རྟེན་ཀུན་ན་མྱི་གནས་ཏེ། །སེམས་ཅན་ཕན་དང་སྒྲོལ་ཕྱིར་ཀུན་ཏུ་རྣམ་པར་རྒྱུ། །ཡེ་ཤེས་འོད་མཆོག་དམ་པས་ཆགས་པ་མེད་གྱུར་ལ། །རྒྱུ་ཡི་རྣམ་པ་ཆོས་རབ་ནེམ་ནུར་མེད་བརྟན་རྣམས། །དེ་དག་ཐེ་ཙོམ་ཐམས་ཅད་རྣམ་པར་ལྡོག་པ་བྱེད། །ཆོས་ཀྱི་དབྱིངས་འདིར་ནེམ་ནུར་མེད་པར་རབ་ཏུ་འཇུག །གང་ཞིག་བདུད་རྣམས་ཀུན་གྱི་གནས་རྣམས་འཇོམས་བྱེད་དང་། །གང་ཡང་སེམས་ཅན་རབ་རིབ་ཤིན་ཏུ་སེལ་བྱེད་དང་། །གང་རྣམས་རྟོག་པ་འཇིག་ཅིང་རྣམ་རྟོག་མི་འགྲོགས་པ། ། སེམས་ཅན་གཙོ་བོ་དེ་དག་ཡུལ་ལ་ཐེ་ཙོམ་མེད། །དུས་གསུམ་མ་ལུས་ཐེ་ཙོམ་རྣམ་པར་ལྡོག་བྱས་ཤིང་། །བསམ་པའི་མཆོག་གིས་དེ་བཞིན་གཤེགས་པའི་དྲུང་འགྲོ་སྟེ། །དད་པའི་སྟོབས་དང་ལྡན་ཞིང་བློ་བརྟན་རྙེད་པ་རྣམས། །དེ་དག་དོན་རྟོགས་ཁོང་དུ་ཆུད་ཅིང་བློ་ཡང་དག །མཁས་པ་འགྲོ་བའི་དོན་དུ་ཕྱི་མའི་མཐར་སྤྲོ་
སྟེ། །སེམས་ཅན་དོན་དུ་རྣམ་ཐར་འབྱམ་ཀླས་ཡོངས་སུ་ཚོལ། །ཡུན་རིང་དུས་སུ་སྐྱོ་བ་མེད་ཅིང་ཞུམ་པ་མེད། །སེམས་ཅན་དམྱལ་བ་སྡུག་བསྔལ་མང་པོ་བཟློག་པར་བྱེད། །དེ་དག་བསོད་ནམས་མི་ཟད་ཡེ་ཤེས་ལྡན། །འགྲོ་བའི་དབང་པོ་སྣ་ཚོགས་བསམ་ལ་རབ་ཏུ་འཇུག །སྐྱེ་དགུའི་ལས་ཀྱི་རྒྱུད་ཀྱང་ཤིན་ཏུ་ཤེས་བྱས་ཤིང་། །བསམ་པ་ཇི་བཞིན་ཚུལ་འདིའི་ཆོས་རྣམས་མཐའ་ཡས་བརྗོད། །འགྲོ་ལ་བྱམས་པའི་སེམས་རྣམས་ཀུན་དང་རྗེས་སུ་ལྡན། །བདག་མེད་ཉིད་རྟོགས་འོན་ཀྱང་བཏང་སྙོམས་བྱེད་པ་མིན། །དེ་དག་སྙིང་བརྩེ་གཅིག་ཏུ་གསལ་བར་ཆོས་ཀྱང་བརྗོད། །འོན་ཀྱང་དམྱིགས་པར་མི་གནས་དེ་དག་འཇིག་རྟེན་རྒྱུ། །དེ་དག་འོད་ཟེར་དྲ་བ་སྣ་ཚོགས་མདོག་བཀྱེ་ཞིང་། །འགྲོ་བའི་མུན་པ་བསལ་ཏེ་ཀུན་ཏུ་སྣང་བྱས་ནས། །འོད་ཟེར་སྒོ་ཡི་པད་མོ་དག་ལ་རྒྱལ་སྲས་རྣམས། །ཀུན་ཏུ་བསྟན་ཏེ་རྡུལ་དང་བྲལ་བའི་ཆོས་ཀྱང་སྟོན། །སྤུ་གཅིག་རྩེ་ལ་ཞིང་རྣམས་རྒྱལ་བས་བརྒྱན་པ་དང་། །དེ་བཞིན་རྒྱལ་བའི་སྲས་ཀྱིས་བརྒྱན་པ་མངོན་པར་མཐོང་། །འཁོར་རྣམས་བློ་སེམས་གཞན་དང་གཞན་ཅན་དཔེ་མེད་པ། །འགྲོ་བ་དེ་དག་སེམས་ཤེས་རྨོངས་མེད་སྟོན་པ་བྱེད། །སེམས་འཇུག་གཅིག་གིས་ཕྱོགས་རྣམས་བཅུ་པོ་ཐམས་ཅད་ཀྱི། །བརྗོད་དུ་མེད་པ་ཁྲག་ཁྲིག་ཞིང་རྣམས་ཀུན་བགྲོད་ཅིང་། །སོང་སྟེ་སངས་རྒྱས་འགྲོ་བའི་དོན་དུ་མཆོད་བྱས་ནས། །དྲི་བ་ཁྲག་ཁྲིག་དོན་དང་ལྡན་པ་སྣ་ཚོགས་འདྲི། །བདེར་གཤེགས་རྣམས་ལ་ཕ་ཡི་འདུ་ཤེས་ཉེར་བཞག་ཅིང་། །ཆོས་ཀྱི་གཏེར་མཁས་རྟག་ཏུ་ཤེས་རབ་རྣོན་པོ་ཅན། །ཡེ་ཤེས་འབྱུང་གནས་མཁས་པས་སངས་རྒྱས་ཆགས་མེད་ཕྱིར། །འགྲོ་བའི་དོན་འདོད་བྱང་ཆུབ་མཆོག་གི་སྤྱོད་པ་སྒྲུབ། །གང་རྣམས་ཆོས་དབྱིངས་རྣམ་པར་ཕྱེ་ཞིང་བསམ་བྱས་ཀྱང་། །བསྐལ་པ་མང་པོ་འདས་བྱས་ཟད་པར་མ་གྱུར་ཏེ། །ཆོས་ཉིད་གནས་མེད་གང་ལའང་
ཆུད་པར་མ་གྱུར་ཀྱང་། །ཆགས་མེད་ཡེ་ཤེས་ཅན་རྣམས་སྐྱོ་སེམས་མེད་པར་སྤྱོད། །དུས་གསུམ་རྒྱལ་བའི་རིགས་སུ་རིགས་དང་ལྡན་འགྱུར་ཞིང་། །བདེར་གཤེགས་ཀུན་གྱི་སྐུ་ལས་ཡང་དག་བྱུང་གྱུར་པས། །ཆོས་ཀྱི་ལུས་ཅན་དེ་དག་འགྲོ་ལ་གཟུགས་ལུས་སྟོན། །སྒྱུ་མཁན་མཁས་པ་ཡིད་འོང་སྒྱུ་མ་སྟོན་པ་བཞིན། །མཁས་པ་དེ་དག་ལ་ལར་སྤྱོད་པ་མཆོག་བརྙེས་སྣང་། །ལ་ལར་མཁས་པ་སྐྱེ་ཞིང་མྱ་ངན་འདས་པར་སྣང་། །བྱང་ཆུབ་དམ་པའི་མཆོག་ཀྱང་རྣམ་པར་འཚང་རྒྱ་སྣང་། །མྱ་ངན་འདའ་བ་སྟོན་པའང་དེ་བཞིན་ལ་ལར་སྣང་། །རང་རྒྱལ་རྣམས་དང་ཉན་ཐོས་རྒྱལ་བའི་ས་མིན་པའི། །ཆོས་ཉིད་དེ་ལ་ཇི་ལྟར་རབ་ཏུ་གནས་པ་ལྟོས། །ལུས་དང་སྒྲ་མེད་བསམ་མེད་འདུ་ཤེས་ལྡན་པ་མིན། །འོན་ཀྱང་བྱ་བ་སྣ་ཚོགས་དུ་མ་ཉེ་བར་སྟོན། །འགྲོ་བར་ཆོས་རྣམས་རྣམ་པར་འབྱེད་ཅིང་སྐྱེར་འགྱུར་ཏེ། །འཇིག་རྟེན་གཙོ་བོ་མི་བཞུགས་ཕྱི་ན་རྒྱལ་སྲས་རྣམས། །ཆགས་མེད་མཐར་ཕྱིན་པ་ཡི་ཡེ་ཤེས་མི་གནས་ཏེ། །སངས་རྒྱས་བྱིན་རླབས་རྣམ་པར་འཕྲུལ་པ་དག་ཀྱང་སྟོན། །འཇིག་རྟེན་འདི་ན་དེ་དག་འདྲ་བ་གང་ཡང་མེད། །དེ་དག་བས་ཀྱང་འཕགས་པས་ལྟ་གོ་ཅི་ཞིག་སྨོས། །ཐམས་ཅད་མཁྱེན་པའི་ཡེ་ཤེས་ཡངས་པ་མ་ཐོབ་པར། །ཐམས་ཅད་མཁྱེན་པའི་ཐབས་སུ་རྣམ་འཕྲུལ་མཆོག་ཀྱང་ཐོབ། །གང་རྣམས་ཆོས་རབ་འཕགས་པར་རྟག་ཏུ་འཇུག་བྱེད་པ། །དེ་དག་ཆོས་རབ་དམ་པ་མཆོག་གི་ཐེག་པ་ཡིན། །འཇིག་རྟེན་དུས་དང་དུས་མིན་ཚོད་ཀྱང་ཤེས་བྱས་ཤིང་། །དེ་དག་འགྲོ་ལ་ཕན་ཕྱིར་རྣམ་པར་འཕྲུལ་པ་སྟོན། །དཔའ་བོ་གང་རྣམས་ཞིང་ཀུན་དག་གི་ལུས་འགེངས་ཤིང་། །གང་རྣམས་འཇིག་རྟེན་འོད་ཟེར་དྲ་བ་མཆོག་གཏོང་བ། །མུན་པ་བསྩལ་ཅིང་སྣང་བས་འཇིག་རྟེན་རྒྱས་པར་བྱེད། །ཀླུ་ཡི་དབང་པོ་བཞིན་དུ་ཆོས་ཀྱི་ཆར་པ་འབེབས། །རྨི་ལམ་ལྟ་བུ་ལོག་པའི་སྒྱུ་མ་འདྲ་བ་ཡི། །འདུ་བྱེད་རབ་ཏུ་ཤེས་ནས་ལམ་
རྣམས་སྦྱོར་འཇུག་ཅིང་། །འགྲོ་བ་ཐམས་ཅད་སྙིང་རྗེ་ཆེན་པོས་ཁྱབ་བྱས་ནས། །རང་བཞིན་དག་པས་ཐར་ལམ་བྱ་བ་མེད་པར་སྟོན། །གང་རྣམས་རྒྱལ་བའི་སྟོབས་རྣམས་ཇི་བཞིན་ཚད་མེད་དང་། །གང་རྣམས་མཁའ་ལྟར་འགྲོ་བ་ཀུན་ཏུ་མཐའ་ཡས་ཤིང་། །གང་རྣམས་སེམས་ཅན་ཁམས་ཀུན་ཡོངས་སུ་དགྲོལ་བརྩོན་པ། །དེ་དག་བསྐལ་པ་བྱེ་བར་གྲངས་མེད་སྤྱད་པ་སྤྱོད། །ལས་མཆོག་བླ་ན་མེད་པ་ཤིན་ཏུ་སྦྱངས་པ་ཡིས། །ཡོན་ཏན་དམ་པ་སྣ་ཚོགས་རྣམས་ཀྱང་ཀུན་སེམས་ཤིང་། །བྱང་ཆུབ་སེམས་དཔའ་དེ་དག་སྤྱོད་པ་མཆོག་མྱི་གཏོང་། །ཐམས་ཅད་མཁྱེན་པའི་ཡེ་ཤེས་འབྱུང་བ་རྣམ་པར་ལྟ། །སེམས་འབྱུང་གཅིག་གིས་འཇིག་རྟེན་བསམ་གྱིས་མི་ཁྱབ་པ། །འབྱམ་ཀླས་ཀུན་ཏུ་རྒྱུ་ཞིང་འགྲོ་བ་རབ་ཏུ་སྣང་། །རྟོག་དང་རྣམ་རྟོག་མྱི་བྱེད་དག་པའི་སེམས་དང་ལྡན། །དེ་དག་གཅིག་མིན་ལུས་ལ་ལུས་གཅིག་སྟོན་པ་བྱེད། །དེ་དག་འཇིག་རྟེན་ཀུན་ལ་རྟོག་པར་མི་བྱེད་དེ། །མགོན་པོ་ཀུན་གྱི་ཆོས་ཉིད་ཡོངས་སུ་མི་རྟོག་གོ །དེ་དག་ཆོས་ཀུན་རྣམ་འབྱེད་འདོད་ཆགས་བྲལ་གྱུར་པ། །འགྲོ་བ་ཐར་པར་བྱ་བ་ཡོངས་སུ་མི་གཏོང་ངོ་། །འཇིག་རྟེན་ཀུན་གྱི་འདུ་ཤེས་རྣམ་པ་གང་ཡོད་པ། །བཟང་ངན་འབྲིང་དང་དེ་བཞིན་ཆུང་དང་སྣ་ཚོགས་ཀྱི། །འདུ་ཤེས་ཐིབས་པོ་དག་དང་རབ་རྒལ་རྣམ་ཕྱེ་སྟེ། །དེ་དག་བྱིན་རླབས་རྣམ་པར་འཕྲུལ་པ་ཤིན་ཏུ་སྟོན། །ཇི་ལྟར་སྒྱུ་མ་རྣམ་པ་སྣ་ཚོགས་ཚད་མེད་པ། །དེ་འདྲའི་རྣམ་པར་འཕྲུལ་པས་ཆོས་དབྱིངས་འདི་དག་འགེངས། །ནམ་མཁའི་དབྱིངས་ཀྱི་མཐའ་ཀླས་ལུས་ཀྱི་བྱེ་བྲག་གིས། །འགྲོ་བ་རྣམས་ཀྱི་མོས་པ་ཇི་བཞིན་སྟོན་པ་བྱེད། །དེ་དག་གང་ལའང་མ་ཆགས་རྟོག་དང་རྣམ་རྟོག་མེད། །དོག་པ་མེད་ཅིང་ཉོན་མོངས་དེ་བཞིན་རློམ་སེམས་མེད། །དེ་དག་སངས་རྒྱས་ཆགས་པའི་བློ་མེད་ཐར་ལ་མིན། །འགྲོ་བ་ཀུན་ལའང་བདེ་བའི་འདུ་ཤེས་རབ་ཏུ་སྐྱེད། །འཇིག་རྟེན་ཀུན་ན་ཤེས་ལ་མཁས་རབ་མི་འཇིགས་པ། །འཇིག་རྟེན་འདུ་ཤེས་གནས་ལ་འཇུག་པར་མྱི་བྱེད་དེ། །དེ་དག་
ཆོས་ཀུན་འདི་ལ་འདུ་ཤེས་གང་ཞེས་རྟོག །དེ་ལྟར་གཞིག་ན་དུས་གསུམ་གང་ཡང་དམྱིགས་པ་མྱེད། །སྔོན་གྱི་མཐར་ཐུག་པ་ཡི་དུས་ལ་རབ་ཞུགས་སྟེ། །ཕྱི་མའི་མཐར་ཐུག་མ་འོངས་པ་ལ་རབ་ཞུགས་ནས། །ཞིང་རྣམས་ཀུན་ན་ཅི་ཡོད་ཀུན་ཀྱང་དེ་བཞིན་དུ། །ཤིན་ཏུ་ཤེས་ཀྱང་རྟག་པར་གང་ཡང་མྱི་དམྱིགས་སོ། །མྱ་ངན་འདས་པའི་དབྱིངས་ལ་འང་བརྩོན་པར་དེ་བཞིན་གནས། །ཉོན་མོངས་མེད་པའི་ཚུལ་གྱིས་རྗེས་སོང་མི་གནས་ཏེ། །དེ་དག་ཡང་དག་མཐའ་འདྲ་དེ་ལ་འདྲ་བ་མེད། །བྱང་ཆུབ་སྤྱོད་པ་ལས་ཀྱང་དཔའ་བོ་མྱི་ལྡོག་གོ །གང་རྣམས་བྱང་ཆུབ་བརྟན་པ་རི་རབ་བཞིན་གནས་ཤིང་། །སངས་རྒྱས་རྒྱལ་སྲས་མཁས་པས་ཆོས་དབྱིངས་ཐམས་ཅད་དང་། །འགྲོ་བ་ཀུན་ཏུ་ཤིན་ཏུ་གང་བྱས་པ། །འདི་ནི་དཔའ་བོ་རྣམས་ཀྱི་སྤྱོད་པའི་མཆོག་ཡིན་ནོ། །བློ་མཆོག་དམ་པ་གང་ཞིག་ཐམས་ཅད་མཁྱེན་པ་ཡི། །རྣམ་གྲོལ་མཛེས་པའི་ཚུལ་མཆོག་ཡངས་པ་འདོད་པ་ནི། །དེས་ནི་གང་ལས་ཟག་ཟད་སྲིད་གསུམ་བདེ་འབྱུང་བའི། །བྱང་ཆུབ་སེམས་ལ་རིམ་པ་མེད་པར་འཇུག་པར་གྱིས། །གང་གིས་བསམ་པ་རྡུལ་བྲལ་བྱང་ཆུབ་སེམས་གནས་པ། །དེ་དག་ཡོན་ཏན་ལེགས་པ་ཟད་པར་བརྗོད་མི་ནུས། །འོན་ཀྱང་འགྲོ་བའི་དོན་དུ་བདེ་གཤེགས་ལེགས་བརྗོད་ཕྱིར། །ཡོན་ཏན་ལྡན་པ་དེ་ཡི་སྤྱོད་པ་མཆོག་ཀྱང་ཉོན། །གང་གིས་ཞིང་རྣམས་བྱེ་བ་ཁྲག་ཁྲིག་རྡུལ་བྱས་ཏེ། །ཕྱོགས་རྣམས་རེ་རེ་ཀུན་ཏུ་བཀང་སྟེ་བགྲང་བྱས་ཤིང་། །དེ་ཡི་རྗེས་སུ་དཔག་པས་རྣམ་འདྲེན་ཟད་བྱེད་ན། །འདུ་ཤེས་རྣམས་ནི་མཐར་ཐུག་ཟད་པར་མི་འགྱུར་རོ། །གང་ཞིག་སེམས་ཅན་གྲངས་མཁས་སེམས་ཅན་འདུ་ཤེས་མེད། །སྤྱོད་པ་ཙམ་དུ་གཞོལ་ཞིང་སྒྲ་ལ་མ་ཆགས་དང་། །གང་ཞིག་འཇིག་རྟེན་ཁམས་འབྱེད་ཆགས་པ་མེད་པའི་སེམས། །དེ་དག་ལྡང་དང་གྲངས་མཁས་གྲངས་དམིགས་མེད་པ་ཡིན། །ཡིད་ཀྱིས་ནམ་མཁའི་དབྱིངས་ནི་མཐའ་ཡས་རྒྱ་ཆེ་དང་། །དུས་རྣམས་འཇིག་རྟེན་ཀུན་ཏུ་རྟོགས་པའི་མཁས་པ་གང་། །སྤར་མོས་ཐལ་གཏོར་བཞིན་དུ་ཐེ་
ཚོམ་རྣམ་གཏོར་བ། །དེ་དག་སངས་རྒྱས་ཆོས་རྟོགས་ཡིད་ཅན་ཆགས་པ་མེད། །གང་དག་ཕྱོགས་རྣམས་མཐའ་ཡས་ཞིང་ལ་རབ་འཇུག་ཅིང་། །སེམས་བསྐྱེད་གཅིག་གིས་བློ་ཉམས་མེད་པར་འདོད་བྱེད་པ། །དེ་དག་ཐ་དད་གྲངས་ལ་རྟོགས་པས་དེར་ཞུགས་ཏེ། །སྐྱོ་བ་མེད་པའི་ཆོས་ལ་ཡང་དག་མཐའ་ལྟར་མཁས། །གང་ཞིག་སངས་རྒྱས་བྱེ་བ་ཁྲག་ཁྲིག་བསམ་ཡས་པའི། །འཁོར་དུ་ཉེ་བར་ཕྱིན་ཏེ་ཞམ་རིང་འཁོར་གནས་ཤིང་། །གཙོ་བོ་དག་ལ་འདྲི་བའི་ཐོག་མར་གང་འགྲོ་བ། །སྤྱོད་ཡུལ་མཆོག་ཅན་དེ་ཡི་སྨོན་ལམ་མཆོག་འདི་ཡིན། །གང་ཞིག་ཕྱོགས་རྣམས་ཀུན་གྱི་མགོན་པོ་ཀུན་དྲན་ཞིང་། །ཆོས་ཉིད་དེ་ལ་ནམ་ཡང་གནས་པར་མ་གྱུར་པ། །ཁམས་གསུམ་དགེ་བ་གང་ཡོད་ཀུན་གྱི་རྒྱུ་ཡིན་ཏེ། །དེ་དག་ཞིང་རྣམས་ཐམས་ཅད་ཡོངས་སུ་དག་པར་སྤྱོད། །གང་རྣམས་སྐྱེ་བའི་རྒྱུད་དུ་སྲིད་གསུམ་སྣ་ཚོགས་རྣམས། །འཇིག་རྟེན་ཀུན་ན་ཡོད་ལ་མ་ཆགས་མིག་གྱུར་པ། །དེ་དག་བག་ཆགས་མཁས་ཤིང་དེ་བཞིན་དབང་པོ་མཁས། །མོས་པ་བྱེ་བ་ཁྲག་ཁྲིག་བསམ་ཡས་དེ་བཞིན་མཁས། །འགྲོ་བའི་བསམ་པ་ཇི་བཞིན་གང་གིས་ཤེས་གྱུར་ཅིང་། །ཤེས་རབ་ཆེན་པོ་དེ་དག་དེ་བཞིན་ཆོས་སྟོན་པ། །དེ་དག་ཀུན་ནས་ཉོན་མོངས་རྣམ་དག་ཚུལ་ལ་མཁས། །སེམས་མང་རྣམ་པར་སྦྱོང་བའི་ལམ་ལྡན་སྟོན། །གང་ཞིག་ཏིང་འཛིན་བྱེ་བ་ཁྲག་ཁྲིག་བརྗོད་ཡས་རྣམས། །སེམས་ཀྱི་རྒྱུ་བ་གཅིག་གི་རྗེས་སུ་ཞུགས་གྱུར་པ། །དེ་དག་མཚན་མ་སྣ་ཚོགས་གནས་པ་རབ་ཏུ་ཤེས། །ལྡང་བའི་རྒྱུ་ལ་མཁས་ཤིང་བློ་གྲོས་སྤྱོད་ཡུལ་ཤེས། །ཆགས་མྱེད་བྱང་ཆུབ་དེ་ལ་མངོན་དུ་གང་ཞུགས་ཤིང་། །འགྲོ་ལ་ཕན་པའི་དོན་དུ་བློ་ཡངས་སུ་ཞུགས་པ། །ཡེ་ཤེས་འབྱམ་ཀླས་འདི་དང་དེ་དག་ལྡན་པ་ཡིན། །དེ་ཕྱིར་དེ་དག་སྐྱེས་བུ་མཆོག་གི་གསུང་ཡང་སྒྲོག །གང་ཞིག་བསྐལ་པ་རིང་དང་བསྐལ་པ་ཐུང་མཁས་ཤིང་། །ཉིན་ཞག་མཁས་ཤིང་དེ་བཞིན་ཟླ་བ་ཟླ་ཕྱེད་མཁས། །གང་ཡང་འཇིག་རྟེན་རྟག་ཏུ་སྐྱེ་བ་
མཁས་གྱུར་པ། །ཞིང་གི་རྣམ་པ་མཁས་ཤིང་རྣམ་ཕྱེའི་ཆོས་མེད་པའོ། །གང་རྣམས་ཕྱོགས་ལ་ཞུགས་ཏེ་ཕྱོགས་ཀྱི་རྗེས་འབྲང་ཞིང་། །ཕྱོགས་ཀུན་ཚད་ནི་རྗེས་སུ་ཤེས་པར་མ་གྱུར་པ། །དེ་དག་དབུས་མས་ཕྱོགས་ཀྱི་རྗེས་སུ་འགྲོ་བྱེད་ཅིང་། །ཞིང་རྣམས་སྦྱོང་ཡང་ཡོངས་སུ་དག་རྟོགས་ཆགས་པ་མེད། །སྟོབས་ལ་འཇུག་པས་རྒྱལ་བ་རྣམས་ཀྱི་སྟོབས་ཤེས་པ། །འགྲོ་བ་རྣམས་ཀྱི་གནས་དང་གནས་མིན་བསམ་བྱས་ནས། །འདས་དང་མ་འོངས་ད་ལྟར་བྱུང་བའི་ལས་ཀྱི་ས། །ཡང་དག་རྟོགས་བྱས་ལས་ཀྱི་རྣམ་པར་སྨིན་ལ་གནས། །འཇིག་རྟེན་ཀུན་མཁས་སྣ་ཚོགས་ཐ་དད་ཇི་བཞིན་དུ། །སྲིད་གསུམ་རྣམ་པར་རྒྱུ་བའི་ཚུལ་ཡང་ཅི་བཞིན་དང་། །དབང་པོ་རྣོན་པོ་འབྲིང་དང་དབང་པོ་ཐ་མར་ཡང་། །འགྲོ་བ་མ་ལུས་ཀུན་གྱི་དབང་པོ་རྣམ་པར་འབྱེད། །མོས་པ་རྣམ་པ་སྣ་ཚོགས་དགེ་དང་མི་དགེ་དང་། །བཟང་ངན་དེ་བཞིན་འབྲིང་ལ་རྣམ་པར་སེམས་བྱེད་ཅིང་། །འགྲོ་བ་ཀུན་ན་འགྲོ་བ་བརྟན་པ་རྣམ་པར་འབྱེད། །སྲིད་གསུམ་རྒྱུ་ཡི་རྒྱུད་ཀྱང་རབ་ཏུ་ཤེས། །བསམ་གཏན་རྣམ་ཐར་ཉོན་མོངས་ཇི་བཞིན་མཚན་མཐོང་ཞིང་། །ཉོན་མོངས་མཚམས་སྦྱོར་རྣམ་བྱང་ཅི་འགྱུར་དང་། །སྔོན་ཆད་གནས་ཀྱི་བདེ་དང་སྡུག་བསྔལ་རྒྱུད་རྣམས་ཀྱང་། །བརྟན་པ་རྣམས་ནི་སངས་རྒྱས་སྟོབས་རྣམས་སྦྱོང་བར་བྱེད། །ཇི་ལྟར་འགྲོ་བའི་ལམ་རྒྱུད་ཉོན་མོངས་ལས་འཇུག་དང་། །འགྲོ་རྒྱུད་ཐམས་ཅད་འཇིག་ཅིང་ཞིག་འགྱུར་ཐམས་ཅད་དང་། །ཟག་པ་སྣ་ཚོགས་རྣམས་ཀྱང་ཇི་ལྟར་སྐྱེས་འགྱུར་བ། །བག་ཆགས་མཚམས་སྦྱོར་ཅི་བཞིན་དེ་བཞིན་རབ་ཏུ་འཇུག །ཇི་ལྟར་འཇིག་རྟེན་ཉོན་མོངས་ཟད་ཅིང་དག་གྱུར་པ། །དེ་ལ་སྐྱེས་བུ་ཁྱུ་མཆོག་སྤྱོད་པའི་བློ་དང་ལྡན། །སྟོབས་འཆང་དག་ནི་སྟོབས་བཅུ་རྣམས་ཀྱི་འོད་སྣང་སྟེ། །རྒྱལ་བའི་སྟོབས་ཀྱང་ཐོབ་མིན་ཐེ་ཙོམ་ཡོད་པ་མིན། །སྤུ་རྩེ་གཅིག་ལ་གང་རྣམས་རྣམ་པར་སེམས་བྱེད་ཅིང་། །ལ་ལ་ཉོན་མོངས་ལ་ལ་དོག་དང་ཡངས་པ་ཡི། །སྣ་ཚོགས་ཞིང་རྣམས་ཚད་ལས་འདས་པ་ཀུན་
མཐོང་ནས། ། ལས་དང་བྱ་བ་སྣ་ཚོགས་རྒྱུད་དུ་རབ་ཏུ་ཤེས། །གང་རྣམས་རྡུལ་གཅིག་རྩེ་ལ་རྣམ་སེམས་བརྗོད་མེད་པའི། །ཞིང་དང་བདེ་གཤེགས་སྲས་རྣམས་སེམས་ཅན་གཙོ་མཐོང་ཡང་། །ཞིང་རྣམས་འཁྲུགས་ཤིང་འདྲེས་པའི་ཉེས་པ་གང་མེད་པ། །གཅིག་ནས་འཇུག་པས་རྣལ་འབྱོར་ལྡན་པ་ཀུན་འཇུག་ལ། །སྤུ་གཅིག་རྩེ་ལ་ཕྱོགས་བཅུ་ཐམས་ཅད་རྣམ་ཕྱེ་སྟེ། །ནམ་མཁའི་དབྱིངས་ཐུག་འཇིག་རྟེན་ཁམས་རྣམས་ཀུན་ཞུགས་ཤིང་། །ཕྱོགས་འགའ་ཙམ་ཡང་རྒྱལ་བས་སྟོང་པར་མཐོང་བ་མེད། །དེ་བཞིན་ཞིང་དང་འཇིག་རྟེན་འབྱམ་ཀླས་དེ་དག་སྦྱོང་། །དེ་ལྟར་བརྟན་པས་རྒྱལ་བས་སྟོང་མིན་ཞིང་ཤེས་ནས། །འཇིག་རྟེན་ཀུན་ཀྱང་སྤུ་རྩེ་གཅིག་ལ་ཡོད་པར་འཇུག །དུས་གསུམ་རྒྱུད་རྣམས་མཚན་ཉིད་ཐ་དད་ཁམས་ཀུན་དང་། །ཉིན་ཞག་དུས་དང་ཟླ་ཕྱེད་རྒྱུད་ཀྱི་རྣམ་ཐར་འཇུག །དེ་ལྟར་རྒྱལ་སྲས་འཇིགས་མེད་བྱང་ཆུབ་སེམས་དཔའ་རྣམས། །སྐྱེས་བུ་ཁྱུ་མཆོག་ཡེ་ཤེས་རྒྱལ་སྲིད་ཐོབ་ཞུགས་པ། །དེ་དག་འདི་འདྲ་ཤེས་ནས་རྗེས་སུ་སེམས་བྱེད་ཅིང་། །བདེ་གཤེགས་རྣམས་ལ་དགའ་བ་མཐའ་ཡས་ཡངས་པ་འཐོབ། །གང་རྣམས་བྱེ་བ་ཁྲག་ཁྲིག་སྣ་ཚོགས་ལུས་སྒྱུར་ཅིང་། །ཕྱོགས་བཅུའི་རྒྱལ་བ་ཐམས་ཅད་མངོན་པར་མཆོད་པའི་ཕྱིར། །རྣམ་འཕྲུལ་དམ་པ་བཟང་པོ་ཀུན་ཏུ་སྟོན་བྱེད་པ། །དེ་དག་མགོན་པོ་རྣམས་ཀྱི་སྤྱོད་ཡུལ་རབ་ལ་ཞུགས། །གང་རྣམས་སངས་རྒྱས་བྱེ་བ་ཁྲག་ཁྲིག་དྲུང་བསླབས་ཤིང་། །གང་རྣམས་ཆོས་ཀྱི་མཛོད་རྟོགས་ཡིད་ལ་ངོམས་མེད་དེ། །གང་དག་མགོན་པོ་ཁྱུ་མཆོག་རྣམས་ལ་དགའ་སེམས་པ། །དེ་དག་ཆོས་ཀྱི་སྤྲིན་ཡིན་སྤྱོད་པ་མང་ལ་སྤྱོད། །ཡེ་ཤེས་འཕེལ་བར་འགྱུར་བའི་ཆོས་ཀྱི་གནས་མཁས་པ། །དེ་དག་སངས་རྒྱས་འབྱུང་གནས་ཏིང་འཛིན་ཐོབ་པ་ཡིན། །རི་རྒྱལ་ལྟ་བུ་དེ་དག་དད་པའི་འབྱུང་གནས་རྟེན། །ཡེ་ཤེས་འབྱུང་གནས་འགྲོ་བའི་ཡོན་ཏན་འབྱུང་གནས་སོ། །གནས་པ་མེད་པ་དམ་པ་ཤིན་ཏུ་ཡངས་པ་དང་། །
ཐམས་ཅད་མཁྱེན་ལ་མངོན་གྱུར་མྱ་ངན་མེད་པ་དང་། །སེམས་ཅན་སྐྱོབ་ཅིང་ཉོན་མོངས་རྙོག་པ་མེད་ཞུགས་པའི། །བྱམས་པའི་བསམ་པས་འགྲོ་བ་ཀུན་ཀྱང་འགེངས། །དེ་དག་སྙིང་རྗེའི་བློ་ཡང་ཤིན་ཏུ་ཡངས་པ་ཡིན། །བདག་ལ་ཅིར་སེམས་དེ་བཞིན་སངས་རྒྱས་སེམས་ཅན་ལ། །གཞན་དུ་ནམ་མཁའ་ལྟ་བུར་མཚན་ཉིད་མེད་པར་འཇུག །ཉམས་པར་འགྱུར་བའི་སེམས་ཅན་རྣམས་མཐོང་ཕྱིར་ཞིང་རྩོམ། །བྱང་ཆུབ་སེམས་ལ་མཁས་པ་དག་གི་ཚད་དག་ནི། །བསྐལ་པ་བྱེ་བའི་མཐས་ཀྱང་བརྗོད་པར་མི་ནུས་ཏེ། །ཅི་ཕྱིར་ཞེ་ན་དེ་ལས་སངས་རྒྱས་ཐམས་ཅད་བྱུང་། །དབང་བདེས་རིམ་གྲོར་བྱས་དང་རང་རྒྱལ་ཀུན་ཀྱང་འབྱུང་། །ཕྱོགས་བཅུའི་ཞིང་རྣམས་གྲངས་མེད་བཅུར་ནི་བགྲང་གྱུར་པའི། །སེམས་ཅན་ཐམས་ཅད་བསྐལ་པ་གཅིག་ཏུ་བདར་བཀོད་ཅིང་། །བསླབ་པ་བཅུ་དང་དགེ་བཅུ་བསམ་གཏན་འཐོབ་པ་དང་། །ཚངས་པ་དག་དང་རྣམ་གྲོལ་ཞི་བའི་གནས་བཀོད་ཅིང་། །དེ་དག་བསྐལ་པ་བྱེ་བར་བདེ་བར་རབ་བཀོད་དེ། །དགྲ་བཅོམ་ཉོན་མོངས་ཞི་ལ་རབ་ཏུ་དགོད་བྱས་ཀྱང་། །བྱང་ཆུབ་སེམས་དཔའི་དགེ་བའི་ཚོགས་ཀྱི་ཆར་མྱི་རུང་། །བྱང་ཆུབ་སེམས་དཔའ་ཞུགས་མ་ཐག་ཏུ་ཚོགས་ཆེན་སྩོགས། །ཉོན་མོངས་མེད་ཅིང་ཤིན་ཏུ་ཕྲ་ལམ་རྟོགས་པ་ཡིན། །རང་རྒྱལ་སེམས་ཅན་བྱེ་བ་ཁྲག་ཁྲིག་བཀོད་གྱུར་ཀྱང་། །བསོད་ནམས་བསགས་པ་དེས་ནི་བྱང་ཆུབ་སེམས་རབ་ལ། །གྲངས་དང་ཆ་དང་བགྲང་བའི་རྣམ་པར་ཉེར་མྱི་འགྲོ། །ཞིང་གི་རྡུལ་ནི་ཚད་ཀྱིས་ཤེས་པར་རུང་ཡང་སྲིད། །སྐད་ཅིག་སེམས་ཀྱིས་ཞིང་མང་ཡོངས་སུ་འདས་བྱས་ཤིང་། །དེ་ལྟར་བསྐལ་པ་བརྗོད་ཡས་ཟད་པར་འགྲོ་བྱས་ན། །ཞིང་མཐའ་ཐུག་པར་རུང་སྲིད་བྱང་ཆུབ་སེམས་མཆོག་མིན། །མཐའ་རྣམས་ཀུན་ཏུ་བསྐལ་པ་མང་པོའི་མཐའ་མེད་དེ། །སྔོན་གྱི་མཐའ་གྱུར་བསྐལ་པ་དེ་བཞིན་མ་འོངས་དང་། །ད་ལྟར་བྱུང་བའི་བསྐལ་པ་ཟད་དང་ཐུབ་མེད་པའི། །བསྐལ་པ་དེ་དག་ཟད་སྲིད་བྱང་ཆུབ་སེམས་མ་ཡིན། །ཅི་ཕྱིར་ཞེ་
ན་འདི་ལྟར་ཕྱོགས་རྣམས་ཀུན་བཀང་ཤིང་། །རྟོག་དང་རྣམ་རྟོག་ཡོངས་སུ་ཤེས་པར་བྱ་བའི་ཕྱིར། །སྐད་ཅིག་གཅིག་གིས་དུས་གསུམ་རྟོགས་པར་བྱ་དོན་ཏུ། །འགྲོ་བའི་དོན་དུ་འདོད་ཅིང་སེམས་མཆོག་རིན་ཆེན་སྐྱེ། །ཕྱོགས་བཅུའི་ཞིང་རྣམས་སྟོང་མང་ཀུན་ཏུ་མཐའ་ཡས་པའི། །འགྲོ་བ་རྣམས་ཀྱི་མོས་པ་བསམ་པ་ཅི་འདྲ་དང་། །སྦྱོར་བ་གང་དང་སེམས་དང་སྤྱོད་པ་དེ་བཞིན་ཏེ། །མཐར་ཐུག་རུང་སྲིད་མཁའ་འདྲའི་བྱང་ཆུབ་སེམས་མཐའ་མིན། །དེ་ནི་འདི་ལྟར་ཕྱོགས་བཅུ་བྱམས་དང་སྙིང་རྗེ་དང་། །བསམ་པ་ཆེན་པོས་འགྲོ་བ་ཐམས་ཅད་རྒྱས་བྱས་ཤིང་། །ཐར་པའི་དོན་དུ་སངས་རྒྱས་ཡོན་ཏན་ཀུན་སྤྱོད་ཕྱིར། །རིན་ཆེན་སེམས་ཀྱི་སྟོབས་ནི་ཚད་མེད་རབ་ཏུ་སྐྱེས། །མོས་དང་བསམ་པ་ཡིད་བཞིན་ཡང་དག་སྦྱོར་བ་དང་། །འགྲོ་བའི་དབང་པོ་སྦྱོར་བར་སེམས་དང་སྤྱོད་པ་རྣམས། །སྐད་ཅིག་གཅིག་གིས་ཇི་བཞིན་རྟོགས་པར་བྱ་བའི་ཕྱིར། །ཐམས་ཅད་མཁྱེན་པའི་ཡེ་ཤེས་ལྟ་བུའི་སེམས་སྐྱེས་སོ། །འགྲོ་བའི་ལས་དང་ཉོན་མོངས་སྣ་ཚོགས་འབྱམ་ཀླས་པ། །གང་གིས་ཁམས་གསུམ་འདི་དག་ཏུ་ནི་སྐྱེ་འགྱུར་བ། །དེ་དག་མཐའ་ནི་ཕྱོགས་བཅུར་རྙེད་པར་རུང་སྲིད་ཀྱི། །བྱང་ཆུབ་སེམས་ཀྱི་མཆོག་ལ་ཀུན་ཏུ་མཐའ་མེད་དོ། །ཅི་ཕྱིར་ཞེ་ན་འདི་ལྟར་ཉོན་མོངས་ལས་གྲོལ་བའི། །སེམས་ནི་དེ་བཞིན་གཤེགས་པ་མཆོད་པའི་དོན་དུ་སྐྱེ། །ཉོན་མོངས་གྲོལ་བྱེད་དེ་བཞིན་ལས་ཀྱི་རྒྱུད་ཀྱང་གཅོད། །དུས་གསུམ་མུན་པ་སེལ་ཅིང་མི་ཟད་སྙིང་རྗེས་བྱུང་། །ཕྱོགས་བཅུའི་སངས་རྒྱས་མ་ལུས་ཐམས་ཅད་དང་། །སེམས་ཅན་མང་པོ་ཐམས་ཅད་སེམས་གཅིག་བསྐྱེད་པ་ཡིས། །སྤོས་དང་མེ་ཏོག་ཕྲེང་བ་བྱུག་པ་དམ་པ་དང་། །གདུགས་དང་རྒྱལ་མཚན་བཟའ་བཏུང་ན་བཟས་མཆོད་པར་བྱེད། །གཞན་ཡང་གདན་གྱི་རྣམ་པ་འཆག་ས་དམ་པ་དང་། །ཕོ་བྲང་མང་པོ་སྣ་ཚོགས་ཙན་དན་མཆོག་བསངས་པ། །ནོར་བུ་རིན་ཆེན་རྣམ་པར་སྣང་བས་བརྒྱན་པ་དང་། །ཡིད་བཞིན་ནོར་བུ་ཡིད་འོང་བརྒྱན་པས་མཆོད་བྱས་ཏེ། །དེ་ལྟར་
བདེ་གཤེགས་སེམས་ཅན་མངོན་པར་མཆོད་བྱེད་པས། །བསྐལ་པ་ཁྲག་ཁྲིག་བརྗོད་དུ་མེད་པར་ཟད་བྱས་ཀྱང་། །བྱང་ཆུབ་སེམས་དཔའི་བདེ་བསྩགས་མཐར་ཕྱིན་བདེ་བ་ཉིད། །གང་བསྒྲུབས་བྱང་ཆུབ་སེམས་ལ་མཉམ་པར་ཉེར་མི་འགྲོ། །ཇི་སྙེད་དཔེར་བརྗོད་བྱས་པ་འདི་དག་ཐམས་ཅད་ཀྱང་། །ཡང་དག་སྐྱེས་པའི་བྱང་ཆུབ་སེམས་ཀྱི་ཆར་མི་རུང་། །དེ་ཡང་འདི་ལྟར་དུས་གསུམ་བཞུགས་པའི་སྐྱེས་བུ་མཆོག །ཐམས་ཅད་བྱང་ཆུབ་སེམས་མཆོག་དེ་ལས་བྱུང་བ་ཡིན། །བྱང་ཆུབ་སེམས་ནི་ཆགས་པ་མེད་པའི་མཐར་ཕྱིན་ཏེ། །ཐམས་ཅད་ཚད་ལ་གནས་ཀྱང་དེ་ལ་ཚད་ཡོད་མིན། །ཐམས་ཅད་མཁྱེན་པའི་ཡེ་ཤེས་གཞོལ་ཞིང་ཚད་མེད་སྟོབས། །སེམས་ཅན་རང་བཞིན་དེ་བཞིན་བྱང་ཆུབ་མཐར་ཡང་ཕྱིན། །བྱང་ཆུབ་སེམས་ནི་ནམ་མཁའི་མཐའ་དང་མཉམ་པ་སྟེ། །ཆོས་རྣམས་ཀུན་ལ་ཁྱབ་པ་ཆོས་དབྱིངས་ཅི་བཞིན་ནོ། །ཚད་མེད་དེ་བཞིན་ཉིད་ཀུན་དེའི་སྤྱོད་ཡུལ་གྱུར། །དེས་ནི་ཀུན་ཏུ་ཁྱབ་པའི་སེམས་ཅན་གཙོ་བཞིན་ནོ། །དེ་ནི་འབྱམ་ཀླས་ཆོས་རྣམས་ཀུན་ལ་རྗེས་སུ་ཞུགས། །དེས་ནི་ཞིང་རྣམས་མ་ལུས་འབྱམ་ཀླས་ཀུན་ཏུ་ཁྱབ། །དེས་ནི་ཤེས་པ་འབྱམ་ཀླས་ཐམས་ཅད་རྟོགས་པར་ཆུད། །དེས་ནི་སངས་རྒྱས་འབྱམ་ཀླས་ཀུན་དང་འགལ་མེད་ཐོབ། །རྟག་ཏུ་བསོད་ནམས་བླ་ན་མེད་པ་དག་དང་ལྡན། །དེ་བཞིན་རྟག་ཏུ་ཚུལ་ཁྲིམས་རྣམ་དག་མི་གནས་ལྡན། །རྟག་ཏུ་ཀུན་གཏོང་རྟག་པར་རབ་ཏུ་དགེ་བ་སྟེ། །ལྡོག་པ་མེད་པའི་བརྩོན་འགྲུས་མཆོག་དང་རབ་ཏུ་ལྡན། །བསམ་གཏན་མཛོད་ལ་རྟག་པར་བསམ་གཏན་འཇུག་པར་བྱེད། །ཤེས་རབ་ཤིན་ཏུ་ཡངས་པ་དང་ཡང་རྟག་ཏུ་ལྡན། །རྒྱལ་སྲས་རྣམས་ཀྱི་ས་རབ་དམ་པ་གང་ཡོད་པ། །དེ་དག་དོན་དུ་ཡེ་ཤེས་ཀུན་ཏུ་བཟང་པོ་བྱུང་། །འགྲོ་བ་ཀུན་ན་སྐྱེས་བུ་ཡེ་ཤེས་གང་བཞུགས་པ། །དེ་དག་གིས་ནི་བྱང་ཆུབ་སེམས་རབ་བྱིན་གྱིས་བརླབས། །ཏིང་ངེ་འཛིན་དང་གཟུངས་ཀྱི་དམ་པས་རབ་ཏུ་བརྒྱན། །དེ་བཞིན་གཤེགས་པའི་རྣམ་འཕྲུལ་
རྣམ་པས་རབ་ཏུ་བརྒྱན། །འཇིག་རྟེན་ཀུན་དང་འགྲོ་བ་རྣམས་ཀྱི་ཇི་ཙམ་ཚད། །ནམ་མཁའི་ཚད་ཀྱང་ཕྱོགས་བཅུ་དག་ཏུ་ཇི་ཙམ་པ། །དེ་དག་བས་ཀྱང་བྱང་ཆུབ་སེམས་འདི་ཚད་མེད་དེ། །དེ་ལས་སྐྱེས་བུའི་སེང་གེ་ཀུན་ཀྱང་སྐྱེས་ཤིང་བྱུང་། །བྱང་ཆུབ་སེམས་འདི་སྟོབས་བཅུ་རྣམས་ཀྱི་རྩ་བ་སྟེ། །བརྟེན་པ་བཞི་ཡི་གནས་ཡིན་སོ་སོར་ཤེས་པའི་རྩ། །རྒྱལ་བའི་ཆོས་རྣམས་བཅྭོ་བརྒྱད་ཡང་དག་འབྱིན་པ་སྟེ། །སྐྱེས་བུའི་གཙོ་བོས་མཁྱེན་པར་བྱ་བའི་ཆོས་ཀུན་འབྱིན། །གཟུགས་ཀྱི་སྐུ་ནི་མཚན་རབ་རྣམས་ཀྱིས་བསྩགས་པ་དང་། །ཆོས་སྐུ་མཉམ་ཉིད་རྟོག་པ་མྱི་མངའ་བརྙེས་པ་དང་། །འགྲོ་བས་མཆོད་པའི་ཡེ་ཤེས་ཆགས་མེད་གང་བྱུང་བ། །ཀུན་གྱི་རྩ་བ་འབྱུང་གནས་བྱང་ཆུབ་སེམས་འདི་ཡིན། །རང་རྒྱལ་ཐེག་པ་འབྱུང་ཞིང་ཉན་ཐོས་ཐེག་པའང་འབྱུང་། །བསམ་གཏན་ཏིང་འཛིན་བདེ་བ་གཟུགས་ཀྱི་ཁམས་རྣམས་དང་། །གཟུགས་མེད་ཁམས་རྣམས་ཏིང་ངེ་འཛིན་གྱི་བདེ་བ་དག །ཀུན་གྱི་རྩ་བ་བྱང་ཆུབ་སེམས་མཆོག་འདི་ཡིན་ནོ། །མི་དང་དེ་བཞིན་ལྷ་ཡི་དབང་པོའི་བདེ་བ་དང་། །ལམ་རྒྱུད་སྣ་ཚོགས་ཀུན་ཀྱང་འདི་ལ་ཤིན་ཏུ་སྦྱངས། །བརྩོན་འགྲུས་སྟོབས་དང་དབང་པོའི་བདེ་བ་གང་ཡོད་པ། །ཀུན་གྱི་རྩ་བ་དང་པོ་བྱང་ཆུབ་སེམས་འདི་ཡིན། །ཅི་ཕྱིར་ཞེ་ན་འདི་ལྟར་བྱང་ཆུབ་སེམས་བསྐྱེད་ཅིང་། །ཕ་རོལ་ཕྱིན་དྲུག་བརྩོན་པར་སྤྱད་པ་རབ་ཏུ་སྤྱོད། །སེམས་ཅན་རྣམས་ལའང་སྤྱོད་པ་ཡང་དག་རབ་ཏུ་སྟོན། །དེས་ནི་ཁམས་གསུམ་འགྲོ་བའི་བདེ་བ་ཀུན་ཀྱང་འབྱུང་། །སངས་རྒྱས་ཆགས་མེད་ཐུགས་ཆུད་དོན་དམ་མཁྱེན་པ་རྣམས། །ཆོས་ཀྱི་དམ་པའི་མཆོག་རྣམས་ཡང་དག་ཀུན་སྟོན་ཅིང་། །རྒྱ་ཆེན་ཉོན་མོངས་ལས་ལས་སེམས་ཅན་གྲོལ་མཛད་དེ། །མྱ་ངན་འདས་པ་དམ་པ་མཆོག་ལ་དགོད་མཛད་པ། །ཡེ་ཤེས་འོད་ཟེར་འོད་ཡངས་ཉི་མ་ལྟ་བུ་སྟེ། །འགྲོ་བར་སྤྱོད་པ་དཀར་པོས་ཡོངས་རྒྱས་ཟླ་བ་བཞིན། །
ཡོན་ཏན་ཤིན་ཏུ་བསགས་པ་ཚད་མེད་ཆུ་ལྟ་བུ། །དྲི་མེད་ཆགས་པ་མི་མངའ་ཚད་མེད་མཁའ་དབྱིངས་འདྲ། །གང་ཞིག་ཡོན་ཏན་མཐའ་ཡས་བྱང་ཆུབ་སེམས་ཡངས་པ། །ཤིན་ཏུ་ཆེ་ཞིང་བདེ་སྐྱིད་ཚད་མེད་སྨོན་བྱེད་ཅིང་། །ཕྱི་མའི་མཐར་ཐུག་སྤྱོད་པར་སྨོན་པས་སུ་བརྩོན་པ། །དེ་དག་སེམས་ཅན་གདུལ་བའི་དོན་ཕྱིར་རྟག་ཏུ་བརྩོན། །འཇིག་རྟེན་འབྱམ་ཀླས་ཐམས་ཅད་རྣམ་པར་སྦྱང་བའི་ཕྱིར། །སྨོན་ལམ་བྱེ་བ་ཁྲག་ཁྲིག་བསམ་གྱིས་མི་ཁྱབ་དང་། །སྟོང་པ་མཚན་མ་མེད་པ་སྨོན་མེད་མི་གནས་པའི། །སྨོན་ལམ་བྱེ་བ་བརྒྱས་ནི་སེམས་དེ་དག་པར་འགྱུར། །ཆོས་ཀྱི་རང་བཞིན་ནམ་མཁའ་ལྟ་བུ་སུས་རྟོགས་ཤིང་། །ཞི་དང་རབ་ཞི་ཉེར་ཞིར་ཐམས་ཅད་མཉམ་གཞོག་པ། །དེ་དག་ཆོས་གྲངས་ཁྲག་ཁྲིག་བསམ་གྱིས་མྱི་ཁྱབ་པའི། །གྲངས་སུ་འགྲོ་ལ་སྟོན་ཀྱང་དེ་ནི་གནས་པ་མེད། །ཕྱོགས་བཅུ་ཀུན་གྱི་འཇིག་རྟེན་གཙོ་བོ་ཇི་སྙེད་པ། །དེ་དག་ཀུན་གྱི་བྱང་ཆུབ་སེམས་མཆོག་འདི་བསྔགས་ཏེ། །ཡོན་ཏན་བརྒྱ་ཕྲག་བསམ་གྱིས་མི་ཁྱབ་པས་ཀྱང་བརྒྱན། །སེམས་ཅན་གཙོ་བཞིན་ཡང་དག་ཕ་རོལ་ཕྱིན་པ་ཡིན། །བསྐལ་པ་སེམས་ཅན་སྙེད་དུ་གལ་ཏེ་ལེགས་བརྗོད་ཀྱང་། །བྱང་ཆུབ་སེམས་རབ་དེ་ལ་མཐར་ཐུག་གང་ཡང་མེད། །རྒྱལ་བ་འབྱུང་བའི་རིན་ཆེན་དེར་ནི་གང་སྐྱེས་པ། །དེ་ཡི་དཔེ་ནི་ཁམས་གསུམ་གློངས་ཀྱང་གང་ཡང་མེད། །དུས་གསུམ་རྒྱལ་བ་ཀུན་གྱིས་གང་ཞིག་རྣམ་བསྩགས་པའི། །བྱང་ཆུབ་སེམས་རབ་དེ་ལ་སྨོན་ལམ་ཀུན་གྱིས་གྱིས། །བྱང་ཆུབ་སེམས་རབ་དམ་པ་དེ་ནི་བསོད་ནམས་གཏེར། །དེས་ནི་རྒྱལ་སྲས་ཆགས་པ་མེད་པ་རབ་ཏུ་འཐོབ། །འགྲོ་བའི་སེམས་དང་སྤྱོད་པ་ཤེས་ཤིང་མཐོང་རུང་སྲིད། །ཞིང་རྣམས་རྡུལ་དུ་བླགས་ཏེ་བགྲང་བར་ནུས་ཀྱང་སྲིད། །བར་སྣང་སྐྲ་ཡིས་མཉམ་པར་གཞལ་བར་ནུས་སྲིད་ཀྱི། །བྱང་ཆུབ་སེམས་མཆོག་ཡོན་ཏན་མཐར་ཕྱིན་མྱི་ནུས་སོ། །འདི་ལས་དུས་གསུམ་སངས་རྒྱས་ཐམས་ཅད་རབ་ཏུ་
བྱུང་། །འདི་ལས་འཇིག་རྟེན་འགྲོ་བ་ཀུན་གྱི་བདེ་བ་འབྱུང་། །འདི་ལས་རྒྱལ་བས་བསྔགས་པའི་ལེགས་པ་ཐམས་ཅད་འབྱུང་། །འདིས་ནི་སེམས་ཅན་གཙོ་ལ་ཐེ་ཙོམ་མེད་པར་འགྱུར། །འདིས་ནི་འཇིག་རྟེན་ཀུན་གྱི་སྒྲིབ་པ་ཟད་པར་འགྱུར། །འདིས་ནི་ཞིང་རྣམས་ཡོངས་སུ་དག་པའི་མཆོག་དུ་འགྱུར། །འདི་ལས་འཇིག་རྟེན་དམ་པ་ཤེས་དང་ལྡན་པ་འབྱུང་། །གང་ཞིག་ཕྱོགས་བཅུའི་རྒྱལ་བ་བལྟ་བར་འདོད་པ་དང་། །གང་ཞིག་བྱིན་དང་བསོད་ནམས་མྱི་ཟད་མཛོད་འདོད་དང་། །གང་ཞིག་འགྲོ་བ་ཀུན་གྱི་སྡུག་བསྔལ་ཟློག་འདོད་པ། །དེས་ནི་ཡོན་ཏན་མཐའ་ཡས་བྱང་ཆུབ་སེམས་བསྐྱེད་བྱ། །བྱང་ཆུབ་སེམས་དཔའ་སེམས་དང་པོ་བསྐྱེད་པའི་བསོད་ནམས་ཀྱི་ཕུང་པོའི་དཔེ་ཡང་དག་པར་བསགས་པ་ཚིགས་སུ་བཅད་པའི་ལེའུ་ཞེས་བྱ་བ་སྟེ་ཉི་ཤུ་གཉིས་སོ།། །།