ཉི་ཤུ་རྩ་བཞི་པ། རབ་མཚེ་མའི་གནས་ན་རྣམ་པར་འཕྲུལ་པའི་ལེའུ།
སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་བཞི་པ། དེ་ནས་སངས་རྒྱས་ཀྱི་མཐུས། ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང་། ལྷོ་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་དང་། གཞུང་དེ་བཞིན་དུ་སྟེང་གི་ཕྱོགས་ཀྱི་འཇིག་རྟེན་གྱི་ཁམས་ཀྱི་བར་ཐམས་ཅད་ན། གླིང་བཞི་པ་འདི་ལ་སྩོགས་པ་གླིང་བཞི་པ་རེ་རེ་ན། དེ་བཞིན་གཤེགས་པ་མང་པོ་བཞུགས་པར་སྣང་ངོ་། །བྱང་ཆུབ་སེམས་དཔའ་དེ་དག་ཀྱང་། དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །བདག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་ཆོས་སྟོན་ཏོ། །བདག་ཀྱང་དེ་བཞིན་གཤེགས་པའི་ཞབས་ཀྱི་དྲུང་ན་འཁོད་པར་ཤེས་སོ། །བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་མ་བཤིག་མ་བཏང་བར་བྱང་ཆུབ་ཀྱི་ཤིང་དྲུང་ཡང་མ་སྤངས་པར་རི་རབ་ཀྱི་རྩེ་མོ་ནས། མཚེ་མའི་གནས་ཀྱི་ལྷའི་བུ་རབ་མཚེ་མའི་ཁང་པ་ནོར་བུ་སྣ་ཚོགས་གང་ན་བ་དེར་གཤེགས་པར་སྣང་ངོ་། །ཇི་ལྟར་གླིང་བཞི་པ་འདི་ན་བཅོམ་ལྡན་འདས་རབ་མཚེ་མའི་གནས་སུ་གཤེགས་པར་སྣང་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ཡང་། རབ་མཚེ་མའི་གནས་སུ་གཤེགས་པར་སྣང་སྟེ། བྱིན་གྱིས་བརླབས་སྔ་མ་རྣམས་ཀྱང་དེ་བཞིན་མ་འཁྲུགས་པར་སྣང་ངོ་། །
དེ་ནས་ལྷའི་རྒྱལ་པོ་རབ་མཚེ་མས། བཅོམ་ལྡན་འདས་རྒྱང་རིང་པོ་ནས་ཁང་པ་ནོར་བུ་སྣ་ཚོགས་ལོགས་སུ་མངོན་པར་གཤེགས་པ་མཐོང་ནས། རིངས་པའི་གཟུགས་སུ་ཁང་པ་ནོར་བུ་སྣ་ཚོགས་ཀྱི་ནང་དུ། དེ་བཞིན་གཤེགས་པའི་གདན་རྫུ་འཕྲུལ་གྱིས་བསྒྲུབས་པའི་སེང་གེའི་ཁྲི་པད་མོའི་སྙིང་པོ་ཅན། ལྷ་རྫས་ཀྱི་རིན་པོ་ཆེ་ལས་བྱས་པ་པོག་རེ་བརྒྱ་སྟོང་ཕྲག་བཅུས་ཀུན་ནས་བརྒྱན་པ། གསེར་གྱི་དྲ་བ་བརྒྱ་སྟོང་ཕྲག་བཅུས་ཀུན་ནས་མངོན་པར་བྲེས་པ། མེ་ཏོག་གི་བླ་རེ་བརྒྱ་སྟོང་ཕྲག་བཅུས་ཀུན་ཏུ་ཁྱབ་པར་བྱས་པ། ཕྲེང་བའི་བླ་རེ་བརྒྱ་སྟོང་ཕྲག་བཅུས་ཀུན་ཏུ་བརྒྱུས་པ། སྤོས་ཀྱི་བླ་རེ་བརྒྱ་སྟོང་ཕྲག་བཅུས་སྤོས་ཐམས་ཅད་ཀུན་ཏུ་འཐུལ་བར་བདུགས་པ། རིན་པོ་ཆེའི་བླ་རེ་བརྒྱ་སྟོང་ཕྲག་བཅུས་ཀུན་ཏུ་བྲེས་པ། མེ་ཏོག་གི་གདུགས་བརྒྱ་སྟོང་ཕྲག་བཅུས་ཀུན་ནས་བཟུང་བ། ཕྲེང་བའི་གདུགས་བརྒྱ་སྟོང་ཕྲག་བཅུས་ཀུན་ནས་བཟུང་བ། རིན་པོ་ཆེའི་གདུགས་བརྒྱ་སྟོང་ཕྲག་བཅུས་ཀུན་ནས་བཟུང་བ། འོད་ཟེར་བརྒྱ་སྟོང་ཕྲག་བཅུས་ཀུན་ནས་སྣང་བར་བྱས་པ། རབ་མཚེ་མའི་ལྷའི་རྒྱལ་པོ་བརྒྱ་སྟོང་ཕྲག་བཅུས་རབ་ཏུ་གདུད་པ། ཚངས་པ་བརྒྱ་སྟོང་ཕྲག་བཅུས་མངོན་པར་ཕྱག་བྱ་བ། བྱང་ཆུབ་སེམས་དཔའ་བརྒྱ་སྟོང་ཕྲག་བཅུས་མངོན་པར་བསྟོད་པ། རོལ་མོ་བརྡུང་བ་བརྒྱ་སྟོང་ཕྲག་བཅུའི་སྒྲ་ཕྱུང་བ། ཆོས་ཀྱི་གླུའི་དབྱང་བརྒྱ་སྟོང་ཕྲག་བཅུའི་གླུའི་དབྱངས་དང་ལྡན་པ། མེ་ཏོག་གི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། ཕྲེང་བའི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། རྒྱན་གྱི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པ། གོས་ཀྱི་སྤྲིན་གྱི་ཆར་བརྒྱ་སྟོང་ཕྲག་བཅུ་རབ་ཏུ་ཕབ་པས་ཀུན་ནས་གཡོགས་པ། ནོར་བུ་རིན་པོ་ཆེའི་སྤྲིན་བརྒྱ་སྟོང་ཕྲག་བཅུའི་ཆར་རབ་ཏུ་ཕབ་པས་ཀུན་ཏུ་སྣང་བར་བྱས་པ། དགེ་བའི་རྩ་བ་བརྒྱ་སྟོང་ཕྲག་བཅུས་ཀུན་ནས་བྱུང་བ། སངས་རྒྱས་བརྒྱ་སྟོང་ཕྲག་བཅུས་བྱིན་གྱིས་བརླབས་པ། བསོད་ནམས་བརྒྱ་སྟོང་ཕྲག་བཅུས་བསྩགས་ཤིང་བསྒྲུབས་པ། ལྷག་པའི་
བསམ་པ་བརྒྱ་སྟོང་ཕྲག་བཅུས་ཤིན་ཏུ་སྦྱངས་པ། སྨོན་ལམ་བརྒྱ་སྟོང་ཕྲག་བཅུས་རྣམ་པར་དག་པར་བྱས་པ། སྤྱོད་པ་བརྒྱ་སྟོང་ཕྲག་བཅུས་ཀུན་ནས་བསླང་བ། ཆོས་བརྒྱ་སྟོང་ཕྲག་བཅུས་རབ་ཏུ་བརྟན་པ། རྣམ་པར་འཕྲུལ་པ་བརྒྱ་སྟོང་ཕྲག་བཅུ་དང་ལྡན་པ། ཡོན་ཏན་བརྒྱ་སྟོང་ཕྲག་བཅུས་ཤིན་ཏུ་འཕགས་པ། བརྗོད་པ་བརྒྱ་སྟོང་ཕྲག་བཅུས་ཤིན་ཏུ་བརྗོད་པ་བཤམས་སོ། །ཇི་ལྟར་གླིང་བཞི་པ་འདིར་རབ་མཚེ་མའི་གནས་ཀྱི་ལྷའི་རྒྱལ་པོ་རབ་མཚེ་མའི་ཁང་པ་ནོར་བུ་སྣ་ཚོགས་སུ་དེ་བཞིན་གཤེགས་པའི་གདན་བཏིང་བ། དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་དག་གི། རབ་མཚེ་མའི་གནས་སུ་ཡང་། ཁང་པ་ནོར་བུ་སྣ་ཚོགས་སུ་ལྷའི་རྒྱལ་པོ་རབ་མཚེ་མ་རྣམས་ཀྱིས་དེ་བཞིན་གཤེགས་པའི་གདན་རྒྱན་འདི་འདྲ་བ་དང་། བཤམ་པའི་ཚུལ་འདི་འདྲ་བ་དག་ཀྱང་བཏིང་བར་གྱུར་ཏོ། །དེ་ནས་ལྷའི་རྒྱལ་པོ་རབ་མཚེ་མས་བཅོམ་ལྡན་འདས་ཀྱི་གདན་བཏིང་ནས། ཞེ་ས་དང་རིམ་གྲོར་བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་ཏེ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གཤེགས་སུ་གསོལ། བདེ་བར་གཤེགས་པ་གཤེགས་སུ་གསོལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བར་གཤེགས་སམ། དེ་ནས་བཅོམ་ལྡན་འདས་ལྷའི་རྒྱལ་པོ་རབ་མཚེ་མས་སྤྱན་དྲངས་པ་བཞིན་དུ་ཁང་པ་ནོར་བུ་སྣ་ཚོགས་སུ་གཤེགས་སོ། །ཇི་ལྟར་གླིང་བཞི་པ་འདི་རབ་མཚེ་མའི་གནས་སུ་ལྷའི་རྒྱལ་པོ་རབ་མཚེ་མའི་ཁང་པ་ནོར་བུ་སྣ་ཚོགས་སུ་གཤེགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་རབ་མཚེ་མའི་གནས་སུ་ཁང་པ་ནོར་བུ་སྣ་ཚོགས་སུ་གཤེགས་པར་སྣང་ངོ་། །དེ་ནས་ལྷའི་རྒྱལ་པོ་རབ་མཚེ་མའི་ལྷའི་དབང་པོའི་གནས་ཐམས་ཅད་དུ་སྒྲ་བསྒྲགས་ཏེ། ལྷའི་རྒྱལ་པོ་རབ་མཚེ་མས་བཅོམ་ལྡན་འདས་ལ་གསོལ་བ་བཏབ་པོ། །དེ་ནས་ལྷའི་རྒྱལ་པོ་རབ་མཚེ་མས་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རྣམས་ལ། དགེ་བའི་རྩ་བ་ཇི་ལྟར་བསྐྱེད་པ་དེ་རྗེས་སུ་དྲན་ནས། སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །བཀྲ་ཤིས་དམ་པ་གང་ཞིག་གིས། །སངས་རྒྱས་གྲགས་པའི་དམ་པར་མཚན་བཏགས་མཚན་གསོལ་པ། །ནོར་བུའི་གཙུག་ཏུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་སྒྲོན་མ་བློ་ཞེས་མཚན་བཏགས་པ། །སྦྱངས་པའི་ལམ་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །བསྒྲིབས་མེད་གཟིགས་པ་འཛུམ་པའི་སྤྱན་དུ་མཚན་བཏགས་པ། །རྒྱན་གཅིག་ལྡན་པར་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་སྒྲོན་མ་མར་མེ་མཛད་ཅེས་མཚན་བཏགས་པ། །རྣམ་པར་རྒྱལ་བར་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །བདེ་གཤེགས་ཡང་དག་དོན་གཟིགས་པ་ཞེས་མཚན་བཏགས་པ། །དྲི་མེད་རྩེ་མོར་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །དེ་བཞིན་གཤེགས་པ་རང་འབྱུང་མཆོག་ཅེས་མཚན་བཏགས་པ། །རིན་ཆེན་སྤོས་སུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་སྒྲོན་མ་དབྱིག་གི་ལྷ་ཞེས་མཚན་བཏགས་པ། །དྲི་མྱེད་སྣ་ཚོགས་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འགྲོ་བ་མེད་པ་སྨྲ་བའི་སྟག་ཅེས་མཚན་བཏགས་པ། །ཐམས་ཅད་ཚུལ་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག ། བཀྲ་ཤིས་དམ་པ་གང་
ཞིག་གིས། །ཡོན་ཏན་ཀུན་མངའ་དཔལ་གྱིས་རྒྱལ་བར་མཚན་བཏགས་པ། །དགའ་བའི་རྒྱན་དུ་གཤེགས་པ་ལྟར། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །བཀྲ་ཤིས་དམ་པ་གང་ཞིག་གིས། །འཇིག་རྟེན་ཕན་བརྩོན་དཀའ་ཐུབ་དྲག་པོ་མཚན་བཏགས་པ། །ཀུན་ནས་མདོག་དུ་གཤེགས་གྱུར་པ། །དེས་ནི་འདིར་ཡང་བཀྲ་ཤིས་མཆོག་གྱུར་ཅིག །ཇི་ལྟར་ལྷའི་རྒྱལ་པོ་རབ་མཚེ་མས་སངས་རྒྱས་ཀྱི་བྱིན་གྱི་རླབས་ཀྱིས། སྔོན་གྱི་རྒྱལ་བ་གཤེགས་པ་བརྗོད་དེ་མངོན་པར་བསྟོད་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་རྒྱལ་པོ་རབ་མཚེ་མ་རྣམས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་སྔོན་གྱི་ཡང་དག་པར་རྫོགས་པའི་སངས་རྒྱས་གཤེགས་པ་བརྗོད་ཅིང་། གླུའི་དབྱངས་ཀྱིས་ཚིགས་སུ་བཅད་དེ་མངོན་པར་བསྟོད་དོ། །དེ་ནས་བཅོམ་ལྡན་འདས་ཁང་པ་ནོར་བུ་སྣ་ཚོགས་སུ་གཤེགས་ནས་གདན་བཏིང་བ་ལ་སྐྱིལ་མོ་ཀྲུང་བཅས་ཏེ་བཞུགས་སོ། །ཇི་ལྟར་བཅོམ་ལྡན་འདས་བཞུགས་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་ཡང་གདན་གཏིང་བ་དེ་དག་ལ་བཞུགས་པར་སྣང་ངོ་། །བཅོམ་ལྡན་འདས་བཞུགས་མ་ཐག་ཏུ་ཁང་པ་ནོར་བུ་སྣ་ཚོགས་དེ་འདི་ལྟ་སྟེ། དཔེར་ན་རབ་མཚེ་མའི་ལྷའི་རིས་ཐམས་ཅད་ཙམ་དུ་ཆེ་བར་གྱུར་པ་སྣང་སྟེ། འདི་ན་ཇི་ལྟ་བ་བཞིན་དུ་འཇིག་རྟེན་གྱི་ཁམས་ཐམས་ཅད་ན་ཡང་དེ་བཞིན་ནོ། །རབ་མཚེ་མའི་གནས་ན་རྣམ་པར་འཕྲུལ་པའི་ལེའུ་ཞེས་བྱ་བ་སྟེ། ཉི་ཤུ་བཞི་པ།། །།