བཞི་བཅུ་རྩ་གསུམ་པ། དེ་བཞིན་གཤེགས་པ་སྐྱེ་བ་འབྱུང་བ་བསྟན་པའི་ལེའུ།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བརྒྱད་པ། བཅོམ་ལྡན་འདས་ཡེ་ཤེས་ཆེན་པོས་རྣམ་པར་སངས་རྒྱས་པའི་དགོངས་པ་མངའ་བ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། སྐུ་གཅིག་པས་མཉམ་པ་ཉིད་བརྙེས་པ། སངས་རྒྱས་ཐམས་ཅད་ཀྱི་སྤྱོད་པ་མཉམ་པ་ཉིད་དང་ལྡན་པ། ཆགས་པ་མེད་པའི་སྤྱོད་ཡུལ་མངོན་པར་མཁྱེན་པ། ཡེ་ཤེས་ཀྱི་རང་བཞིན་གྱི་ཆོས་ཀྱི་སྐུ་མངའ་བ། མཚན་ཉིད་ཡོད་ནས་མེད་པའི་ཆོས་ལ་རྟེན་པ། ཆོས་ཀྱི་དབྱིངས་མི་གཉིས་པའི་སྤྱོད་ཡུལ་གྱི་ཡང་དག་པར་སྤྱོད་པ། མཐའ་དང་དབུས་མེད་ཅིང་མཚུངས་པའི་མངོན་པར་འཚང་རྒྱ་བ་བརྙེས་པ། རྣམ་པར་ཐར་པ་བསྒྲིབས་པ་མེད་པའི་སྤྱོད་ཡུལ་ལ་ཤིན་ཏུ་དགྱེས་པ། ཆོས་ཀྱི་སྐུ་ནམ་མཁའི་དབྱིངས་ཀྱི་མཐས་ཀླས་པ་མངའ་བ། དེ་བཞིན་གཤེགས་པའི་བྱིན་གྱི་རླབས་ཀྱི་ཕོ་བྲང་ཁང་པ་བརྩེགས་པའི་གཞལ་མེད་ཁང་དེ་བཞིན་གཤེགས་པ་བཞུགས་པ། ཆོས་ཀྱི་དབྱིངས་ཀྱི་སྙིང་པོ་ཅན། འོད་ཀུན་ནས་འབྱུང་བ་རྒྱན་ཆེན་
པོ་དང་ལྡན་པ། འོད་དང་ཞིང་གསལ་བ། རྣམ་པར་སྣང་བའི་སྙིང་པོ་ཅན་སངས་རྒྱས་སྐྱེ་བ་ཆོས་ཀྱི་དབྱིངས་མཐའ་དང་དབུས་མེད་པའི་གནས། བྱང་ཆུབ་སེམས་དཔའི་ལུས་ལས་བྱུང་བ། གཞི་འོད་ཟེར་གྱིས་རྣམ་པར་བརྒྱན་པ། བྱང་ཆུབ་སེམས་དཔའི་ལུས་རང་བཞིན་དུ་གནས་པས་རབ་ཏུ་བསྒྲུབས་པ། ཆོས་ཆེན་པོའི་གཞིར་གྱུར་པ། ཆོས་ཀྱི་དབྱིངས་ཀུན་ཏུ་རྒྱས་པ། དེ་བཞིན་གཤེགས་པའི་འོད་དང་ལྡན་པ། ནམ་མཁའི་དབྱིངས་ཀྱི་མཐས་གཏུགས་པ། ཡེ་ཤེས་ཀྱི་ཡུལ་ཡང་དག་པའི་མཐའ་སྤྱོད་ཡུལ་ཆགས་པ་མེད་པས་རྣམ་པར་གསལ་བ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་བཟང་པོའི་པད་མོ་ཆེན་པོ་རང་རང་གི་སྨོན་ལམ་གྱིས་བྱུང་བའི་དབུས་ཀྱི་སྙིང་པོ་ལ་འཁོད་པ་ཀུན་ཀྱང་ཚེ་གཅིག་གིས་ཐོགས་པ། འཇིག་རྟེན་གྱི་ཁམས་གཞན་དང་གཞན་ནས་ཕྱིན་པ། ཡེ་ཤེས་ཆེན་པོ་རྣམ་པར་ཕྱེ་བའི་སྤྱོད་ཡུལ་ལ་གཞོལ་བ། ཆོས་ཀྱི་དབྱིངས་ཐ་མི་དད་པའི་གཞི་མཉམ་པ་ཉིད་ལ་ཞུགས་པ། ནམ་མཁའི་དབྱིངས་གཞི་མེད་ཅིང་། མཐའ་དང་དབུས་མེད་པ་ལ་རྣམ་པར་སྤྱོད་པ། ཆོས་ཐམས་ཅད་འབྱུང་བ་མེད་ཅིང་། མངོན་པར་གྲུབ་པ་མེད་པ་མངོན་དུ་བྱས་པ། བྱང་ཆུབ་སེམས་དཔའི་ལུས་ལས་མ་གཡོས་པར་ཐམས་ཅད་མཁྱེན་པའི་ཡེ་ཤེས་རབ་ཏུ་ཐོབ་པ། འཇིག་རྟེན་གྱི་ཁམས་ཐམས་ཅད་དུ་ཀུན་གྱིས་བརྗོད་པ། དེ་བཞིན་གཤེགས་པའི་ཡེ་ཤེས་ལས་མངོན་དུ་བྱུང་བ། སངས་རྒྱས་ཐམས་ཅད་ཀྱི་བྱང་ཆུབ་མངོན་སུམ་དུ་གྱུར་པའི་ཡེ་ཤེས་སྣང་བ་ཐོབ་པ། དེ་བཞིན་གཤེགས་པའི་སྤྱོད་ཡུལ་རྒྱུན་མ་ཆད་པ། ཡེ་ཤེས་ཀྱི་རང་བཞིན་ཆོས་ཀྱི་ལུས་གཅིག་ཅིང་ཐ་མི་དད་པས། གཟུགས་ཀྱི་ལུས་མཐའ་ཡས་པའི་སྒོ་ཀུན་ཏུ་སྟོན་པ། ཆོས་ཀྱི་དབྱིངས་མཐའ་དང་དབུས་མེད་པ་ལ་འཇུག་པ་ཤིན་ཏུ་ཤེས་པ། སེམས་ཅན་གྱི་ཁམས་སུ་རྣམ་པར་སྤྱད་པ་ལས་ཕྱིར་མི་ལྡོག་པ། དེ་བཞིན་གཤེགས་པའི་ཆོས་ཀྱི་དབྱིངས་དང་། ཡང་དག་པའི་མཐའ་མཉམ་པ་
ཉིད་ཐོབ་པས་སྤྲུལ་པ་མངོན་པར་སྒྲུབ་པ། དེ་བཞིན་གཤེགས་པ་རྣམ་པར་སྣང་མཛད་དང་། སྔོན་ལྷན་ཅིག་ཏུ་སྐྱེས་ཤིང་དགེ་བའི་རྩ་བ་བསྩགས་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། ཀུན་ཏུ་གྲགས་པའི་དབང་ཕྱུག་རྒྱལ་པོ་དང་། དེ་བཞིན་གཤེགས་པའི་རིགས་སུ་བྱུང་བའི་དཔལ་དང་། རྡོ་རྗེ་དཔལ་གྱི་རྒྱལ་མཚན་དང་། རྣམ་པར་གྲོལ་བ་བསྒྲིབས་པ་མེད་པའི་ཟླ་བ་དང་། ཉི་མའི་འོད་ཟེར་དྲི་མ་མེད་པའི་སྙིང་པོ་དང་། མངོན་པར་ཤེས་པ་ཆེན་པོས་རྣམ་པར་འཕྲུལ་པའི་བློ་དང་། འོད་དྲི་མ་མེད་པའི་དཔལ་གྱི་གཟི་བརྗིད་འོད་ཟེར་གྱི་རྒྱལ་པོ་དང་། བློ་གྲོས་རྒྱ་མཚོའི་མཆོག་འཛིན་ཅིང་བློ་ལ་རྣམ་པར་རྩེ་བ་གསལ་བས་མངོན་པར་ཤེས་པའི་དཔལ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྟོབས་བཅུ་མི་འཇིགས་པའི་སེང་གེའི་ང་རོ་ཆེན་པོས་རྣམ་པར་རྩེ་བས་མངོན་པར་ཤེས་པ་དང་། དེ་དག་ལས་སྩོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང་ཐབས་གཅིག་ཏུ་བཞུགས་སོ། །དེ་ནས་དེའི་ཚེ་བཅོམ་ལྡན་འདས་ཀྱི་མཛོད་སྤུ་ནས་དེ་བཞིན་གཤེགས་པ་འབྱུང་བ་ཞེས་བྱ་བའི་འོད་ཟེར་འོད་ཟེར་གྱི་འཁོར་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་མང་པོའི་འོད་ཟེར་དང་ལྡན་པ་བྱུང་སྟེ། དེས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་མ་ལུས་པར་སྣང་བར་བྱས། འཇིག་རྟེན་གཡས་ཕྱོགས་སུ་ལན་བཅུར་བསྐོར་ཏེ། དེ་བཞིན་གཤེགས་པའི་རྣམ་པར་འཕྲུལ་པ་བསྟན་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་བསྐུལ་བ་བྱས་ཏེ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རབ་ཏུ་བསྐྱོད་ནས། ངན་སོང་གི་རྒྱུད་ཐམས་ཅད་ཀྱི་སྐྱེ་བ་དང་། ཤི་འཕོ་བ་རབ་ཏུ་ཞི་བར་བྱས་ཏེ། བདུད་ཀྱི་ཁྱིམ་ཐམས་ཅད་ཟིལ་གྱིས་མནན་ནས། དེ་བཞིན་གཤེགས་པ་ཐམས་ཅད་མངོན་པར་འཚང་རྒྱ་བས།
རྣམ་པར་སངས་རྒྱས་པའི་གདན་བསྟན་པ་བྱས་ཏེ། སངས་རྒྱས་ཀྱི་འཁོར་གྱི་དཀྱིལ་འཁོར་རྣམ་པར་བཀོད་པ། འབྱམ་ཀླས་པ་རབ་ཏུ་བསྟན་ནས། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་འབྱམ་ཀླས་པ་ཐམས་ཅད་མ་ལུས་པར་རྒྱས་པར་ཁྱབ་པར་བྱས་ནས་ཕྱིར་འོངས་ཏེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ལ་གཡས་ཕྱོགས་ནས་བསྐོར་ནས། བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱི་སྤྱི་བོར་ནུབ་བོ། །དེ་ནས་བྱང་ཆུབ་སེམས་དཔའི་འཁོར་དེ་དག་ཐམས་ཅད་ངོ་མཚར་ཆེར་འཛིན་ཅིང་། དགའ་བ་ཐོབ་པར་གྱུར་ཏེ། འོད་ཟེར་གྱི་དྲ་བ་སྣང་བ་འདི་ལྟ་བུ་བྱུང་བས་ན་ཆོས་ཆེན་པོ་བརྗོད་པར་ནི་འགྱུར་དུ་ངེས་སོ་སྙམ་ནས། རྟོག་པའི་བློ་ཡང་ཐོབ་པར་གྱུར་ཏོ། །འོད་ཟེར་དེ་དག་གིས་བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱི་ལུས་ལ་ཕོག་པར་གྱུར་མ་ཐག་ཏུ། དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་པད་མོའི་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པད་མོའི་སྙིང་པོ་དེ་ལ་པུས་མོ་གཡས་པའི་ལྷ་ང་བཙུགས་ནས། བཅོམ་ལྡན་འདས་གང་ན་བ་དེར་ཐལ་མོས་བཏུད་ཏེ། དེ་བཞིན་གཤེགས་པའི་འདུ་ཤེས་དང་ལྡན་པའི་ཡིད་ལ་བྱེད་པས། དེ་བཞིན་གཤེགས་པ་ལ་ཚིགས་སུ་བཅད་དེ་གསོལ་པ། །རྣམ་དག་བློ་མངའ་ཡོན་ཏན་མཁྱེན་པས་འཕགས་པ། །སྤྱོད་ཡུལ་ཆགས་པ་མེད་པའི་ཕ་རོལ་ཕྱིན་བརྙེས། །དུས་གསུམ་མཉམ་པའི་ཆོས་ཉིད་མཉམ་པ་སྟོན་པ། །ཁྱོད་ལ་བདག་ནི་བསྟི་སྟང་རིམ་གྲོ་བགྱིད་དོ། །མཚན་ཉིད་མེད་པའི་སྤྱོད་ཡུལ་ཕ་རོལ་ཕྱིན་བརྙེས། །མཚན་གྱིས་ཤིན་ཏུ་བརྒྱན་པའི་སྐུའང་སྟོན་མཛད། །དྲི་མེད་འོད་ཆེན་འོད་ཟེར་སྟོང་དང་ལྡན་འགྱེད། །བདུད་ཀྱི་སྡེ་རྣམས་མ་ལུས་རབ་ཏུ་འཇོམ་མཛད། །ཕྱོགས་
བཅུ་ཀུན་ན་གང་རྣམས་ཇི་སྙེད་མཆིས་པའི། །ཞིང་རྣམས་ཐམས་ཅད་མ་ལུས་རབ་ཏུ་བསྐྱོད་ཀྱང་། །ཐུགས་རྗེ་ལྡན་པས་སུ་ལའང་འཇིགས་པར་མི་མཛད། །ཁྱོད་ཀྱི་རྫུ་འཕྲུལ་མཐུ་ནི་དེ་འདྲ་དེ་ཚུལ། །ནམ་མཁའི་དབྱིངས་ལ་མཉམ་པ་ཉིད་དུ་རབ་ཞུགས། །དེ་བཞིན་ཆོས་དབྱིངས་མཉམ་པ་ཉིད་ཀྱང་བརྙེས་གྱུར། །སེམས་ཅན་སྟོང་ཕྲག་བྱེ་བ་གྲོལ་བར་མཛད་ཅིང་། །སེམས་ཅན་ཀུན་གྱི་སྡིག་ཆེན་རབ་ཏུ་ཞི་མཛད། །བསྐལ་པ་སྟོང་དུ་བརྟུལ་ཞུགས་དམ་པོ་སྤྱད་དེ། །བྱང་ཆུབ་མཆོག་གི་ལམ་ནི་ཡང་དག་བསྒྲུབས་ནས། །ཆགས་པ་མེད་པའི་ཡེ་ཤེས་སྤྱོད་ཡུལ་འདི་བརྙེས། །སངས་རྒྱས་ཀུན་དང་རང་བཞིན་གཅིག་ཏུ་རབ་གྱུར། །རྣམ་པར་འདྲེན་པ་ཁྱོད་ཀྱིས་འདི་ནས་འོང་བཀྱེ། །འཇིག་རྟེན་ཐམས་ཅད་མ་ལུས་ཀུན་ཏུ་བསྐྱོད་ནས། །ཆོ་འཕྲུལ་མཐའ་ཡས་ཡང་དག་བསྟན་པར་བགྱིས་ཏེ། །བདག་གི་ལུས་འདིར་དེ་དག་མ་ལུས་ཞུགས་གྱུར། །དེ་ལ་བདག་གི་བློ་གྲོས་འདི་ལྟར་སྐྱེས་ཏེ། །ཆོས་རྗེ་ཁྱོད་ལ་བདག་གིས་ཞུ་བའི་དུས་བབ། །ཤིན་ཏུ་ངེས་པའི་ཆོས་ལ་རབ་ཏུ་བསླབས་པའི། །བྱང་ཆུབ་སེམས་དཔའ་རྣམས་ཀྱང་འདུས་པར་གྱུར་སྙམ། །ཚོགས་འདི་དག་པ་འདུས་པས་རྣམ་པར་དག་པ། །འཇིག་རྟེན་སློབ་དཔོན་མགོན་པོས་རབ་ཏུ་བསྔགས་པ། །ཡེ་ཤེས་མཐའ་ཡས་ལྡན་པ་ཡུལ་ལ་ཆགས་མེད། །དེ་འདྲའི་མཐུ་ཆེན་དཔའ་བོ་འདི་དག་འདིར་ཕྱིན། །དེའི་དོན་འཇིག་རྟེན་སློབ་དཔོན་དྲང་སྲོང་ཆེན་པོ། །ཡེ་ཤེས་སྟོབས་དང་བརྩོན་འགྲུས་མཐའ་ཡས་བྱུང་གྱུར། །བྱང་ཆུབ་སེམས་དཔའ་འདི་དག་སྣང་བར་མཛད་གསོལ། །ཆོས་རབ་བདག་གིས་གང་ཞུས་དེ་ཡང་བཤད་གསོལ། །དྲང་སྲོང་ཆེན་པོའི་སྤྱོད་ཡུལ་འདི་དག་བསྟན་ཅིང་། །ཡང་དག་མ་ནོར་བརྗོད་པར་ནུས་པ་གང་ལགས། །སྐྱེས་བུ་ཁྱུ་མཆོག་རྣམས་ཀྱི་སྲས་ནི་གང་ལགས། །འཇིག་རྟེན་མགོན་གྱི་གཙོ་བོ་ཁྱོད་ཀྱིས་
བཤད་གསོལ། །ཚིགས་སུ་བཅད་པ་དེ་དག་གསོལ་མ་ཐག་ཏུ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་མི་བསྙེངས་པའི་མཐར་ཕྱིན་པ་ཞེས་བྱ་བའི་འོད་ཟེར་འཁོར་གྱི་འོད་ཟེར་ཁྲག་ཁྲིག་བརྒྱ་སྟོང་གྲངས་མེད་པ་དང་ལྡན་པ་བྱུང་སྟེ། དེས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་མ་ལུས་པར་སྣང་བར་བྱས་ནས། འཇིག་རྟེན་གཡས་ཕྱོགས་སུ་ལན་བཅུར་བསྐོར་ཏེ། དེ་བཞིན་གཤེགས་པའི་རྣམ་པར་འཕྲུལ་པ་བསྟན་ནས། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་བསྐུལ་བ་བྱས་ཏེ། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་རབ་ཏུ་བསྐྱོད་ནས། ངན་སོང་གི་རྒྱུད་ཐམས་ཅད་ཀྱི་སྐྱེ་བ་དང་། ཤི་འཕོ་བ་རབ་ཏུ་ཞི་བར་བྱས་ཏེ། བདུད་ཀྱི་ཁྱིམ་ཐམས་ཅད་ཟིལ་གྱིས་མནན་ནས། དེ་བཞིན་གཤེགས་པ་ཐམས་ཅད་མངོན་པར་འཚང་རྒྱ་བས། རྣམ་པར་སངས་རྒྱས་པའི་གདན་བསྟན་པ་བྱས་ཏེ། སངས་རྒྱས་ཀྱི་འཁོར་གྱི་དཀྱིལ་འཁོར་རྣམས་བཀོད་པ་འབྱམ་ཀླས་པ་རབ་ཏུ་བསྟན་ནས། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་འབྱམ་ཀླས་པ། ཐམས་ཅད་མ་ལུས་པར་རྒྱས་པར་ཁྱབ་པར་བྱས་ནས་ཕྱིར་འོངས་ཏེ། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ལ་གཡས་ཕྱོགས་ནས་བསྐོར་ནས། བྱང་ཆུབ་སེམས་དཔའ་ཀུན་ཏུ་བཟང་པོའི་ཁའི་སྒོར་ནུབ་བོ། །དེ་བཞིན་གཤེགས་པའི་འོད་ཟེར་ངེས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་རེག་པར་གྱུར་མ་ཐག་ཏུ་དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་ལུས་ཀྱི་སེང་གེའི་ཁྲི། སྔོན་ཅི་འདྲ་བ་དེ་ལས་བྱང་ཆུབ་སེམས་དཔའི་ལུས་ཀྱི་སེང་གེའི་ཁྲི་བརྒྱ་ཕྲག་སྟོང་གྱུར་དུ་བཟང་ཞིང་། ཁྱད་པར་དུ་འཕགས་པར་འདུག་སྟེ། དེ་བཞིན་གཤེགས་པའི་སེང་གེའི་གདན་མ་གཏོགས་པར་བྱང་ཆུབ་སེམས་
དཔའ་གཞན་གྱི་ལུས་ཀྱི་སེང་གེའི་ཁྲི་ལས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་སེང་གེའི་ཁྲི་བརྒྱ་ཕྲག་སྟོང་གྱུར་དུ་བཟང་ཞིང་ཁྱད་པར་དུ་འཕགས་པར་སྣང་ངོ་། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པས་ཆོ་འཕྲུལ་ཆེན་པོ་འཇིག་རྟེན་ཐམས་ཅད་ཀྱིས་ཁོང་དུ་ཆུད་པར་དཀའ་བ། བྱང་ཆུབ་སེམས་དཔའ་རྣམས་རབ་ཏུ་དགའ་བར་འགྱུར་བ་བསམ་གྱིས་མི་ཁྱབ་པ་འདི་ལྟ་བུ་བསྟན་ན། ཀྱེ་རྒྱལ་བའི་སྲས་དེ་གང་གི་སྔོན་གྱི་མཚན་མར་འགྱུར། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་ནི་བདག་འདི་སྙམ་དུ་སེམས་ཏེ། སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོ་འཕྲུལ་ཆེན་པོ་འདི་འདྲ་བདག་ཀྱང་མཐོང་སྟེ། དེ་བཞིན་གཤེགས་པ་རྣམས་ནི་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ཞེས་བྱ་བའི་ཆོས་ཀྱི་རྣམ་གྲངས་བསྟན་པར་དགོངས་པ་དང་། ཆོ་འཕྲུལ་ཆེན་པོའི་རྣམ་པ་འདི་ལྟ་བུ་དག་སྟོན་པ་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། དེ་བཞིན་གཤེགས་པ་སྐྱེ་བ་འབྱུང་བ་བསྟན་པའི་ཆོས་ཀྱི་རྣམ་གྲངས་ཀྱི་མིང་ཐོས་པར་གྱུར་མ་ཐག་ཏུ། དེའི་ཚེ་ས་ཆེན་པོ་གཡོས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ལེགས་པར་སྤོབས་པར་མཛོད་ཅིག །
ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་བསྟན་པ་ཁོང་དུ་ཆུད་པར་བྱ། ཀྱེ་རྒྱལ་བའི་སྲས་འཁོར་འདུས་པ་འདི་ནི་ཤིན་ཏུ་དག་པ་སྟེ། བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་ཀུན་ནས་འདུས་པའོ། །ཀྱེ་རྒྱལ་བའི་སྲས་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་སྤྱད་པ་ཤིན་ཏུ་སྤྱད་པ། ལས་ཀྱི་མཐའ་ཤིན་ཏུ་སྦྱངས་པ། དྲན་པ་དང་བློ་གྲོས་དང་། རིག་པས་ཤིན་ཏུ་འཕགས་པ། རྒྱ་ཆེན་པོའི་ཕ་རོལ་ཏུ་ཕྱིན་པ། མཆོག་ཐོབ་པ། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་དང་། སྤྱོད་པ་དང་ཚུལ་ལ་རབ་ཏུ་གནས་པ། སངས་རྒྱས་ཀྱི་རྗེས་སུ་སོང་བའི་འདུ་ཤེས་ཡིད་ལ་བྱེད་པ་མ་ཉམས་པ། སྙིང་རྗེ་ཆེན་པོས་འགྲོ་བ་ཐམས་ཅད་ལ་རྣམ་པར་ལྟ་བ། བྱང་ཆུབ་སེམས་དཔའི་མངོན་པར་ཤེས་པ་ཆེན་པོས་རྣམ་པར་རོལ་པའི་སྤྱོད་ཡུལ་ཅན། དེ་བཞིན་གཤེགས་པ་ཐམས་ཅད་ཀྱི་བྱིན་རང་གི་རྒྱུད་དུ་ལེན་པ། སངས་རྒྱས་ཐམས་ཅད་ཀྱི་ཆོས་ཀྱི་དཔལ་གྱི་བྱིན་གྱིས་བརླབས་པ་སྟེ། དེ་དག་ལས་སྩོགས་པ་ཡོན་ཏན་དང་ལེགས་པ་ཚད་མེད་པ་མང་པོ་དང་ལྡན་པ་ཤ་སྟག་འོངས་ཤིང་འདུས་པའོ། །ཀྱེ་རྒྱལ་བའི་སྲས་ཁྱོད་ཀྱང་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་བསྙེན་བཀུར་བ། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་མཆོག་ཏུ་ཕྱིན་པ། ཏིང་ངེ་འཛིན་དང་སྙོམས་པར་འཇུག་པའི་སྒོ་ཐམས་ཅད་ཀྱིས་རྣམ་པར་རོལ་པར་མངོན་པར་མཁས་པ། དེ་བཞིན་གཤེགས་པ་ཐམས་ཅད་ཀྱི་གསང་བའི་གནས་སུ་ཆུད་པ། སངས་རྒྱས་ཀྱི་ཆོས་ཐམས་ཅད་ལ་ཐེ་ཙོམ་ཡོངས་སུ་ཆད་པ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བྱིན་དུ་བརླབས་པ། སེམས་ཅན་ཐམས་ཅད་ཀྱི་དབང་པོ་ལ་མཁས་པ་དང་ལྡན་པ། སེམས་ཅན་ཐམས་ཅད་ཀྱི་མོས་པ་དང་རྣམ་པར་གྲོལ་བའི་ལམ་ཡང་དག་པར་སྟོན་པ། དེ་བཞིན་
གཤེགས་པ་ཐམས་ཅད་ཀྱི་རིགས་དང་། རྒྱུད་ཡང་དག་པར་འབྱུང་བའི་ཡེ་ཤེས་དང་ལྡན་པ། སངས་རྒྱས་ཀྱི་ཆོས་ཐམས་ཅད་བསྟན་པ་ལ་ཕ་རོལ་ཏུ་ཕྱིན་པའི་མཆོག་ཐོབ་པ་དེ་དག་ལ་སྩོགས་པ་ཡོན་ཏན་མང་པོ་ཚད་མེད་པའི་ཁྱད་པར་ཀྱི་མཐར་ཐུག་པ་ཡིན་གྱིས། ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་བསྟན་པ་དང་། སྐུ་ཡང་དག་པར་བསྟན་པ་དང་། དབྱངས་རབ་ཏུ་བརྗོད་པ་དང་ཐུགས་ཀྱི་མཐུ་དང་། ཡུལ་གྱི་གནས་དང་། སྤྱོད་ཡུལ་བསྟན་པ་དང་། མངོན་པར་བྱང་ཆུབ་པའི་གནས་དང་། ཆོས་ཀྱི་འཁོར་ལོ་བསྐོར་བ་མངོན་པར་བསྒྲུབ་པ་དང་། ཡོངས་སུ་མྱ་ངན་ལས་འདས་པ་ཆེན་པོ་བསྟན་པ་དང་། དེ་བཞིན་གཤེགས་པ་རྣམས་མཐོང་ཞིང་ཐོས་པ་དང་། དེ་བཞིན་གཤེགས་པ་དང་འགྲོགས་པས། དགེ་བའི་རྩ་བ་འབྱུང་བ་བསྟན་པ་ལ་ལེགས་པར་སྤོབས་པར་མཛོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། དོན་འདི་ཉིད་ཡང་བཟླས་བརྗོད་པའི་ཕྱིར། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཚིགས་སུ་བཅད་དེ་སྨྲས་པ། །ཆགས་མེད་བློ་གྲོས་ཤིན་ཏུ་རྣམ་པར་སངས་རྒྱས་བློ་ལྡན། །ཡེ་ཤེས་མཐའ་ཡས་ཡུལ་ལ་མཉམ་པ་ཉིད་དུ་གྱུར་པ། །རྒྱལ་བའི་སྤྱོད་ཡུལ་ཚད་མེད་ལེགས་པར་ཡང་དག་ཤོད་ཅིག །དེ་ཐོས་སངས་རྒྱས་སྲས་རྣམས་ཐམས་ཅད་རབ་ཏུ་དགའ་འགྱུར། །རྒྱལ་བ་མཆོག་རྣམས་འབྱུང་བ་ཇི་ལྟར་བྱང་ཆུབ་སེམས་དཔས། །ཁོང་དུ་ཆུད་བྱ་ཇི་ལྟར་དེ་དག་ཡང་དག་བལྟ་བྱ། །དེ་བཞིན་གཤེགས་ཐུགས་ཇི་འདྲ་སྐུ་དང་དབྱངས་ཀྱང་ཅི་འདྲ། །སྐྱེས་བུ་ཁྱུ་མཆོག་རྣམས་ཀྱི་ཡུལ་དང་སྤྱོད་ཡུལ་ཅི་འདྲ། །དེ་བཞིན་གཤེགས་པ་བྱང་ཆུབ་ཇི་ལྟར་རྣམ་པར་འཚང་རྒྱ། །ཆོས་ཀྱི་འཁོར་ལོ་དམ་པ་རྒྱལ་བ་ཇི་ལྟར་སྐོར་
མཛད། །བདེ་གཤེགས་མྱ་ངན་འདས་པའི་ཡང་དག་ཉིད་ཀྱང་གསུང་སྟེ། །སངས་རྒྱས་སྲས་པོ་མཐའ་ཡས་འདི་དག་དགའ་བར་མཛོད་ཅིག །གང་གིས་བདེ་གཤེགས་ཆོས་རྒྱལ་ཆེན་པོ་མཐོང་བར་གྱུར་ཅིང་། །གང་རྣམས་འགྲོགས་ཤིང་དགེ་བ་ཡང་དག་བསྐྱེད་པར་བྱེད་པ། །དེ་དག་བསོད་ནམས་འཕེལ་བ་ཡང་མ་ནོར་བརྗོད་པར་མཛོད་ཅིག །བདེ་གཤེགས་མཐོང་ན་ཇིར་འགྱུར་དེ་དང་འགྲོགས་ན་ཇིར་འགྱུར། །བདེ་གཤེགས་མྱ་ངན་འདས་དང་འོན་ཏམ་བཞུགས་ཀྱང་རུང་སྟེ། །དེ་བཞིན་གཤེགས་པའི་མཚན་རྣམས་གང་གིས་ཐོས་པར་གྱུར་ཅིང་། །ཡོན་ཏན་འབྱུང་གནས་རྣམས་ལ་གང་རྣམས་དད་པ་བསྐྱེད་པ། །དེ་དག་དོན་ཀྱང་ཅིར་འགྱུར་འཁོར་འདིར་བསྟན་པར་མཛོད་ཅིག །བྱང་ཆུབ་སེམས་དཔའ་འདི་དག་ཐམས་ཅད་ཐལ་མོ་སྦྱར་ཅིང་། །བདེ་བར་གཤེགས་དང་ཁྱོད་དང་བདག་ལ་ཀུན་ཀྱང་ལྟ་སྡོད། །དྲིས་པ་འདི་དག་སེམས་ཅན་དག་པ་ཁྱོད་ཀྱིས་ལུང་སྟོན། །ཡོན་ཏན་རྒྱ་མཚོ་ཆེ་མངའ་རྣམས་ཀྱི་སྤྱོད་ཡུལ་བསྟན་མཛོད། །དེ་དག་དོན་ཏུ་ཆོས་རབ་ལྡན་པའི་གསུང་མཆོག་རྗོད་ཅིང་། །མཁའ་འདྲ་ཁྱོད་ཀྱིས་སྐྱེ་བོ་རྣམས་ཀྱི་ཐེ་ཙོམ་གཅད་མཛོད། །དཔེ་དང་རྒྱུར་ལྡན་ཚིག་གིས་དེ་བཞིན་གཤེགས་པའི་རིགས་སྟོན། །ཐོས་ནས་སེམས་ཅན་ཁྲག་ཁྲིག་བྱང་ཆུབ་མཆོག་ཏུ་སེམས་བསྐྱེད། །ཇི་ལྟར་ཞིང་རྣམས་ཐམས་ཅད་མ་ལུས་རྒྱས་པར་བཀང་ཞིང་། །རྒྱལ་བའི་སྐུ་ཡི་ཡན་ལག་སྣ་ཚོགས་ཡང་དག་སྟོན་མཛད། །ཇི་ལྟར་ཁྲག་ཁྲིག་ཆོས་དང་ལྡན་པའི་གསུང་རབ་བརྗོད་པ། །སངས་རྒྱས་བྱང་ཆུབ་དཔེ་དང་རྒྱུ་ཡིས་བསྟན་པར་མཛོད་ཅིག །གང་ཞིག་ཕྱོགས་བཅུའི་ཞིང་རྣམས་ཁྲག་ཁྲིག་ཐམས་ཅད་ཀུན་ཏུ། །བསྟན་པ་མང་པོ་བྱེ་བ་མཐའ་ཡས་བགྲང་བར་སོང་ཡང་། །དེ་རིང་རྒྱལ་སྲས་འདིར་ཚོགས་འདི་འདྲའི་འཁོར་དང་འདྲ་བ། །བྱང་ཆུབ་སེམས་དཔའ་རྣམས་ཀྱིས་མཐོང་བར་ཤིན་ཏུ་དཀའ་བའོ། །དེ་བས་རྒྱལ་སྲས་རང་བཞིན་དག་པ་ཁྱོད་
ཀྱིས་བཤད་མཛོད། །དེ་བཞིན་གཤེགས་པ་རྣམས་ཀྱི་རིགས་ཡང་ཡོངས་སུ་སྟོན་ཅིག །བྱང་ཆུབ་སེམས་དཔའ་འདི་དག་ཐམས་ཅད་ཐལ་མོ་སྦྱར་ཏེ། །ཡངས་པའི་ཆོས་ཀྱིས་སྐོམ་ཞིང་ཆོས་ལ་དོན་གཉེར་གནས་སོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་དམྱིགས་ནས། བྱང་ཆུབ་སེམས་དཔའི་ཚོགས་ཐམས་ཅད་ལ་སྨྲས་པ། ཀྱེ་རྒྱལ་བའི་སྲས་དག་འདི་ལྟ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་བསྟན་པ། ཚད་མེད་པའི་ཆོས་ཀྱིས་འབྱུང་བ་འདི་ནི་བསམ་གྱིས་མི་ཁྱབ་པའི་གནས་ཏེ། ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ནི། རྒྱུ་གཅིག་མ་ཡིན་པ་དང་། རྐྱེན་གཅིག་མ་ཡིན་པས་ཡང་དག་པར་འགྲུབ་བོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དག །ཆོས་བཅུ་པོ་འདི་དག་ལ་སོགས་པ། ཆོས་རྣམ་པ་ཐ་དད་པ་བརྒྱ་སྟོང་ཚད་མེད་གྲངས་མེད་པ་ཡོངས་སུ་རྫོགས་པར་བྱ་བའི་ཚུལ་ཡང་དག་པར་བསྒྲུབས་པའི་རྒྱུས་དེ་བཞིན་གཤེགས་པ་རྣམས་འབྱུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། སྔོན་འགྲོ་བ་ཐམས་ཅད་ཡོངས་སུ་བསྐྱབ་པའི་སེམས་དང་། བྱང་ཆུབ་ཀྱི་སེམས་ཚད་མེད་པ་བསྐྱེད་པ་ཡང་དག་པར་བསྒྲུབས་པ་དང་། བསམ་པ་དང་ལྷག་པའི་བསམ་པ་སྔོན་ཤིན་ཏུ་སྦྱངས་ཤིང་ཡང་དག་པར་བསྒྲུབས་པ་དང་། བྱམས་པ་ཆེན་པོ་དང་། ཐུགས་རྗེ་ཆེན་པོ་ཚད་མེད་པས་སེམས་ཅན་ཡོངས་སུ་སྐྱབས་པ་ཡང་དག་པར་བསྒྲུབས་པ་དང་། སྤྱོད་པ་དང་སྨོན་ལམ་ཚད་མེད་པ་རྒྱུན་ཆད་པ་མེད་པར་ཡང་དག་པར་བསྒྲུབས་པ་དང་། བསོད་ནམས་དང་ཡེ་ཤེས་ཀྱི་ཚོགས་ཆེན་པོས་མི་ངོམས་པར་ཡང་དག་པར་བསྒྲུབས་པ་
དང་། སངས་རྒྱས་མཆོད་ཅིང་རིམ་གྲོ་བྱ་བ་དང་། སེམས་ཅན་ཡོངས་སུ་སྨིན་པར་བྱ་བའི་རྒྱུན་ཚད་མེད་པ་ཡང་དག་པར་བསྒྲུབས་པ་དང་། ཐབས་དང་ཤེས་རབ་ཀྱི་ལམ་རྣམ་པར་དག་ཅིང་། ཚད་མེད་པ་ཡང་དག་པར་བསྒྲུབས་པ་དང་། ཡོན་ཏན་རྣམ་པར་དག་པའི་རྣམ་པ་ཚད་མེད་པ་ཡང་དག་པར་བསྒྲུབས་པ་དང་། ལམ་གྱི་ཡན་ལག་རྣམ་པར་དགོད་པ་ཚད་མེད་པའི་ཡེ་ཤེས་ཡང་དག་པར་བསྒྲུབས་པ་དང་། དོན་དང་ལྡན་པའི་ཆོས་ཚད་མེད་པ་ཁོང་དུ་ཆུད་པས། མཐར་ཕྱིན་པར་བྱ་བ་ཡང་དག་པར་བསྒྲུབས་པ་སྟེ། ཀྱེ་རྒྱལ་བའི་སྲས་དག །ཆོས་བཅུ་པོ་འདི་དག་ལ་སྩོགས་པ། ཆོས་རྣམ་པ་ཐ་དད་པ་བརྒྱ་སྟོང་ཚད་མེད་གྲངས་མེད་པ་ཡོངས་སུ་རྫོགས་པར་བྱ་བའི་ཚུལ་ཡང་དག་པར་བསྒྲུབས་པའི་རྒྱུས་དེ་བཞིན་གཤེགས་པ་རྣམས་འབྱུང་བར་འགྱུར་རོ། །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འབྱུང་བ་ནི་རྒྱུ་གཅིག་གིས་འབྱུང་བ་མ་ཡིན། རྐྱེན་གཅིག་གིས་འབྱུང་བ་མ་ཡིན་ཏེ། ཀྱེ་རྒྱལ་བའི་སྲས་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་རྒྱུ་ཚད་མེད་པ་དང་། རྐྱེན་ཚད་མེད་པ་དང་། བསྒྲུབས་པ་ཚད་མེད་པས་ཡོངས་སུ་འགྲུབ་པར་འགྱུར་ཏེ། འདི་ལྟར་སྤྲིན་ཆེན་པོའི་ཆར་དུས་ལས་མྱི་འདའ་བར་རབ་ཏུ་འབབ་པས་ཀྱང་རྒྱུ་བྱས་ལ། རླུང་གི་དཀྱིལ་འཁོར་བཞི་རྒྱུན་མི་ཆད་པར་ལྡང་བས་ཀྱང་རྒྱུ་བྱས་ན་ཡོངས་སུ་འགྲུབ་པར་འགྱུར་རོ། །བཞི་པོ་དེ་དག་ཀྱང་གང་ཞེ་ན། འདི་ལྟ་སྟེ། རླུང་གི་དཀྱིལ་འཁོར་ཡོངས་སུ་འཛིན་པ་ཞེས་བྱ་བ་ནི་ཡོངས་སུ་གཟུང་བའི་ཕྱིར་ལྡང་ངོ་། །རླུང་གི་དཀྱིལ་འཁོར་ཡོངས་སུ་སྐེམ་པ་ཞེས་བྱ་བ་ནི། ཆུའི་ཕུང་པོ་ཡོངས་སུ་བསྐམ་པའི་ཕྱིར་ལྡང་ངོ་། །རླུང་གི་དཀྱིལ་འཁོར་ཡོངས་སུ་གཞོག་པ་ཞེས་བྱ་བ་ནི་གཞལ་མེད་ཁང་ཐམས་ཅད་ཡོངས་སུ་དགོད་པའི་ཕྱིར་ལྡང་ངོ་། །རླུང་གི་དཀྱིལ་འཁོར་རྣམ་པར་དགོད་པ་ཞེས་བྱ་བ་ནི། སེམས་ཅན་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་སུ་གཏོགས་པ་ཐམས་ཅད་ཀྱི་རྐྱེན་དུ་སྐྱེས་པའི་ལས་དང་། བྱང་ཆུབ་སེམས་དཔའི་དགེ་བའི་རྩ་བའི་སྟོབས་དང་ཤུགས་ཀྱིས། གནས་ཀྱི་རྣམ་པའི་རྒྱན་རྣམ་པར་ཕྱེ་བ་ཤིན་ཏུ་རྣམ་པར་དབྱེ་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པར་དབྱེ་བའི་ཕྱིར་ལྡང་སྟེ། ཀྱེ་རྒྱལ་བའི་སྲས་དག་དེ་དག་ལ་སྩོགས་པའི་རྣམ་པ་ཚད་མེད་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆོས་ཉིད་རབ་ཏུ་ཐོབ་པའི་ཕྱིར། ཡོངས་སུ་འབྱུང་བར་འགྱུར་བ་ཡང་འབྱུང་བ་དེ་ལ་འབྱུང་བར་བྱེད་པ་གང་ཡང་མེད་དེ། འབྱུང་བར་འགྱུར་བའང་མེད་པ་མ་ཡིན་ནོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་རྒྱུ་གཅིག་མ་ཡིན་པ་དང་། རྐྱེན་གཅིག་མ་ཡིན་པས་འབྱུང་བར་འགྱུར་ཏེ། ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་རྒྱུ་ཚད་མེད་པ་དང་། རྣམ་པ་ཚད་མེད་པ་དང་། ཡང་དག་པར་བསྒྲུབ་པ་ཚད་མེད་པས་འབྱུང་སྟེ། འདི་ལྟར་ཡང་དག་པར་རྫོགས་པའི་སངས་རྒྱས་རྣམས་ཀྱི་དྲུང་དུ་སྔོན་ཆོས་ཀྱི་སྤྲིན་གྱི་ཆར་ཆེན་པོ་བབ་པས་ཀྱང་རྒྱུར་བྱས་ལ། དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་བཞི་རྒྱུན་མི་ཆད་པར་ལྡང་བས་ཀྱང་རྒྱུ་བྱས་ནས་ཡང་དག་པར་འགྲུབ་པར་འགྱུར་རོ། །བཞི་གང་ཞེ་ན་འདི་ལྟ་སྟེ། དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་དྲན་པས་ཡང་དག་པར་བཟུང་ཞིང་གཟུངས་ཀྱིས་ཆུད་མི་ཟ་བ་ཞེས་བྱ་བ་ཡོད་དེ། དེ་ནི་དེ་བཞིན་གཤེགས་པ་དེ་དག་གི་ཆོས་ཀྱི་སྤྲིན་ཆེན་པོའི་ཆར་ཡང་དག་པར་གཟུང་བའི་ཕྱིར་ལྡང་ངོ་། །དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ལྷག་མཐོང་དང་། ཞི་གནས་ཀྱིས་བསྒྲུབས་པ་ཞེས་བྱ་བ་ཡོད་དེ། དེ་ནི་ཉོན་མོངས་པ་ཐམས་ཅད་ཡོངས་སུ་བསྐམ་པའི་ཕྱིར་ལྡང་ངོ་། །
དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ཡོངས་སུ་བསྔོ་བ་ལ་མཁས་པ་ཞེས་བྱ་བ་ཡོད་དེ། དེ་ནི་དགེ་བའི་རྩ་བ་ཐམས་ཅད་ཡོངས་སུ་བསྔོ་བའི་ཕྱིར་ལྡང་ངོ་། །དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་སྤྲུལ་པའི་རྒྱན་རྣམ་པར་བཀོད་པ་རྣམ་པར་འབྱེད་ཅིང་རྣམ་པར་འགོད་པ་ཞེས་བྱ་བ་ཡོད་དེ། དེ་ནི་སེམས་ཅན་སྔོན་ཡོངས་སུ་སྨིན་པར་བྱས་པ་རྣམས་ཀྱི་རྐྱེན་དུ་བྱུང་བའི་དགེ་བའི་རྩ་བ་ཡོངས་སུ་དག་པ་དང་། དེ་བཞིན་གཤེགས་པའི་དགེ་བའི་རྩ་བ་ཟག་པ་མེད་པའི་སྟོབས་དང་ཤུགས་ཀྱི་ཕྱིར་ལྡང་ངོ་། །ཀྱེ་རྒྱལ་བའི་སྲས་དག་དེ་དག་ལ་སྩོགས་པའི་རྣམ་པ་ཚད་མེད་པ་དང་། ཡང་དག་པར་བསྒྲུབས་པ་ཚད་མེད་པས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཆོས་ཉིད་རབ་ཏུ་ཐོབ་པའི་ཕྱིར་འབྱུང་བར་འགྱུར་ཏེ། དེ་ལ་འབྱུང་བར་བྱེད་པའམ་སྐྱེ་བར་བྱེད་པ་གང་ཡང་མེད་དེ། འབྱུང་ཡང་མེད་པའང་མ་ཡིན་ནོ། །དེ་ལྟར་རྒྱལ་བའི་སྲས་དག་དཔེའི་སྒོ་དང་པོས་ཁོང་དུ་ཆུད་པར་བྱ་བ་འདིས། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་འབྱུང་བར་འགྱུར་བའི་ཚེ། གཅིག་ཏུ་སྟུག་ཅིང་ཐ་མི་དད་པ་ཞེས་བྱ་བའི་སྤྲིན་ཆེན་པོའི་ཆར་འབབ་སྟེ། དེ་ནི་སྟོང་གསུམ་གྱི་སྟོང་ཆེན་པོའི་ཡོངས་སུ་གྲུབ་པའི་རླུང་གི་དཀྱིལ་འཁོར་མ་གཏོགས་པར་སའི་ཕྱོགས་གཞན་གྱིས་གཟུང་བའམ་བཟོད་པར་མི་ནུས་སོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འབྱུང་བའི་ཚེ། དེ་བཞིན་གཤེགས་པའི་རིགས་ཐ་མི་དད་པ་ཞེས་པའི་ཆོས་ཀྱི་སྤྲིན་ཆེན་པོའི་ཆར་འབབ་སྟེ། དེ་ནི་བྱང་ཆུབ་སེམས་དཔའ་
ཆེན་པོ་དེ་དག་ཉིད་ཀྱི་སྟོབས་དང་ཤུགས་ཀྱིས་བསྒྲུབས་པའི་སེམས་ཀྱི་རྒྱུད་མ་གཏོགས་པར་བྱང་ཆུབ་སེམས་དཔའ་བསམ་པ་དམའ་བ་ཅན་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་གཟུང་བའམ། བཟོད་པར་མི་ནུས་སོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་གཉིས་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། སྤྲིན་ཆེན་པོའི་ཆར་དེ་དག་འབབ་པའི་ཚེ། གང་ནས་ཀྱང་འོངས་པ་མྱེད་ལ་གང་དུ་ཡང་འགྲོ་བ་མེད་དོ། །སེམས་ཅན་རྣམས་ཀྱི་ལས་ཀྱི་ཚོགས་ཆེན་པོས་ཆར་རབ་ཏུ་འབབ་པ་ཡང་ཡོད་དོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་སྤྲིན་ཆེན་པོའི་ཆར་འབབ་པ་ཡང་གང་ནས་ཀྱང་འོངས་པ་མེད་ལ། གང་དུ་ཡང་འགྲོ་བ་མེད་དེ་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའི་སྟོབས་དང་ཤུགས་ཆེན་པོས། ཆར་མངོན་པར་འབབ་པ་ཡང་ཡོད་དོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་གསུམ་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། སྤྲིན་ཆེན་པོའི་ཆར་མངོན་པར་འབབ་པ་དེ་དག་ནི་སྟོང་གསུམ་གྱི་སྟོང་ཆེན་པོར་གཏོགས་པའི་སེམས་ཅན་ཐམས་ཅད་ཀྱིས་ཤེས་པའམ། བགྲང་བར་སླ་བ་མ་ཡིན་ཏེ། ཀྱེ་རྒྱལ་བའི་སྲས་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་རྣམས་ནི་སྤྲིན་ཆེན་པོའི་ཆར་དེ་ལ་སེམས་པས་མགོ་རྨོངས་པར་འགྱུར་རོ། །སྤྲིན་ཆེན་པོའི་
ཆར་དེ་ལ་བལྟས་པས་མིག་འཁྲུགས་པར་འགྱུར་རོ། །སྟོང་གསུམ་གྱི་སྟོང་ཆེན་པོའི་དབང་ཕྱུག་ཆེན་པོ་ནི་མ་གཏོགས་ཏེ། དེའི་སྔོན་གྱི་དགེ་བའི་རྩ་བ་ཡོངས་སུ་སྦྱངས་པའི་ཁྱད་པར་གྱིས། དེ་ལ་ཆུང་ངུ་ན་ཆར་པའི་ཐིགས་པ་གཅིག་ཀྱང་མ་རིག་པར་མི་འབབ་པོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་དེ་དག་ཡང་དག་པར་འབྱུང་བའི་ཚེ། དེ་བཞིན་གཤེགས་པའི་ཆོས་ཀྱི་སྤྲིན་གྱི་ཆར་མངོན་པར་འབབ་པ་ཡང་། སེམས་ཅན་ཐམས་ཅད་དང་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཤེས་པའམ་བསམ་པར་མི་ནུས་ཏེ། དེ་དག་ནི་དེ་བཞིན་གཤེགས་པའི་ཆོས་ཀྱི་སྤྲིན་གྱི་ཆར་ལ་སེམས་པས་མགོ་རྨོངས་པར་འགྱུར་རོ། །འགྲོ་བ་ཐམས་ཅད་ཀྱི་དབང་ཕྱུག །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་མ་གཏོགས་ཏེ། བློ་ཤིན་ཏུ་སྦྱངས་པའི་མཐུ་དང་ཤུགས་ཀྱིས་དེ་དག་ལ་ནི་ཆུང་ངུ་ན་ཚིག་དང་། ཡི་གེ་འགའ་ཙམ་ཡང་མ་རིག་པར་སེམས་ཅན་གཞན་གྱི་སེམས་ཀྱི་རྒྱུད་ལ་མི་འབབ་བོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བ་སྒོ་བཞི་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། སྤྲིན་ཆེན་པོའི་ཆར་དེ་དག་འབབ་པའི་ནང་ན། རབ་ཏུ་ཞི་བར་བྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་མེའི་ཕུང་པོ་དེ་རབ་ཏུ་ཞི་བར་བྱེད་དོ། །འབྱུང་བར་བྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ལས་ཆུའི་ཕུང་པོ་དེ་དག་འབྱུང་ངོ་། །ཡོངས་སུ་གཅོད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ཆུའི་ཕུང་པོ་དེ་དག་ཡོངས་སུ་གཅོད་དོ། །ཡོངས་སུ་སྒྲུབ་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ནོར་བུ་རིན་པོ་ཆེ་མང་པོ་ཡོངས་སུ་འགྲུབ་པར་བྱེད་དོ། །རྣམ་
པར་འབྱེད་པ་ཞེས་བྱ་བའི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་རྣམ་པར་འབྱེད་དོ། །ཀྱེ་རྒྱལ་བའི་སྲས་དག་དེ་བཞིན་གཤེགས་པ་ཡང་དག་པར་འབྱུང་བ་ལ་ཡང་རབ་ཏུ་ཞི་བར་བྱེད་པ་ཞེས་བྱ་བ་དེ་བཞིན་གཤེགས་པའི་རྒྱུ་མཐུན་པའི་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་ཉོན་མོངས་པ་འབར་བ་ཐམས་ཅད་རབ་ཏུ་ཞི་བར་བྱེད་དོ། །འབྱུང་བར་བྱེད་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་དགེ་བའི་རྩ་བའི་ཚོགས་ཐམས་ཅད་ཡང་དག་པར་འབྱུང་བར་བྱེད་དོ། །ཡོངས་སུ་གཅོད་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་ཉོན་མོངས་པ་དང་ལྟ་བའི་རྣམ་པ་ཐམས་ཅད་ཡོངས་སུ་གཅོད་དོ། །ཡོངས་སུ་གྲུབ་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་ཐམས་ཅད་མཁྱེན་པའི་ཆོས་རིན་པོ་ཆེ་ཡོངས་སུ་གྲུབ་པར་བྱེད་དོ། །རྣམ་པར་འབྱེད་པ་ཞེས་བྱ་བ་ཆོས་ཀྱི་སྤྲིན་ཆེན་པོའི་ཆར་འབབ་པ་ཡོད་དེ། དེ་ནི་སེམས་ཅན་ཐམས་ཅད་ཀྱི་སེམས་དང་བསམ་པ་རྣམ་པར་འབྱེད་དོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་འདི་ལྟ་སྟེ་དཔེར་ན། ཆར་སྤྲིན་ཆེན་པོ་ཡང་རོ་གཅིག་ལ་ཆུའི་ཕུང་པོ་ཡང་རྣམ་པར་མི་རྟོག་མོད་ཀྱི་དེ་ལྟར་རྣམ་པ་ཚད་མེད་པར་ཐ་དད་པའི་ཆར་རྣམ་པར་ཕྱེ་བ་འབབ་བོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་རོ་གཅིག་པ་ལས། དེ་ལྟར་ཚད་མེད་ཅིང་རྣམ་པ་ཐ་དད་པའི་ཆོས་ཀྱི་ཆར་སྣ་ཚོགས་འབབ་སྟེ། དེ་བཞིན་གཤེགས་པ་ཡང་ཡོངས་སུ་འབྱུང་ངོ་། །ཆོས་
རྣམ་པར་ཕྱེ་བ་ཚད་མེད་པ་ཡང་སྣང་ཞིང་ཡོད་དོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོ་ཡོངས་སུ་འགྲུབ་པར་འགྱུར་བའི་ཚེ། ཐོག་མ་ཉིད་དུ་གཟུགས་ལ་སྤྱོད་པའི་ལྷའི་བུ་རྣམས་ཀྱི་གཞལ་མེད་ཁང་ཡོངས་སུ་འགྲུབ་པར་འགྱུར་རོ་དེའི་འོག་ཏུ་འདོད་པ་ལ་སྤྱོད་པའི་ལྷའི་བུ་རྣམས་ཀྱི་གཞལ་མེད་ཁང་ཡོངས་སུ་འགྲུབ་པར་འགྱུར་རོ། །དེའི་འོག་ཏུ་མི་རྣམས་ཀྱི་གནས་ཡོངས་སུ་འགྲུབ་པར་འགྱུར་རོ། །དེའི་འོག་ཏུ་དེ་མ་ཡིན་པའི་སེམས་ཅན་ལྷག་མ་གཞན་རྣམས་ཀྱི་གནས་རྣམ་པར་ཕྱེ་བ་སྣ་ཚོགས་འགྲུབ་པར་འགྱུར་རོ། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་ཡང་དག་པར་འབྱུང་བའི་ཚེ། ཡང་ཐོག་མ་ཉིད་དུ་བྱང་ཆུབ་སེམས་དཔའི་ཡེ་ཤེས་ཀྱི་རྒྱུད་རྣམས་འབྱུང་བར་འགྱུར་རོ། །དེའི་འོག་ཏུ་རང་སངས་རྒྱས་ཀྱི་ཡེ་ཤེས་ཀྱི་རྒྱུད་རྣམས་འབྱུང་ངོ་། །དེའི་འོག་ཏུ་ཉན་ཐོས་ཀྱི་དགེ་བའི་རྩ་བའི་ཡེ་ཤེས་ཀྱི་རྒྱུད་རྣམས་འབྱུང་བར་འགྱུར་རོ། །དེའི་འོག་ཏུ་དེ་མ་ཡིན་པའི་སེམས་ཅན་གཞན་གྱི་འདུས་བྱས་ཀྱི་དགེ་བའི་རྩ་བ་དང་ཤེས་པའི་རྒྱུད་རྣམས་འབྱུང་བར་འགྱུར་རོ། །ཀྱེ་རྒྱལ་བའི་སྲས་དག་དེ་ལྟར་དཔེར་ན། ཆར་སྤྲིན་ཆེན་པོ་ཡང་རོ་གཅིག་ལ་ཆུའི་ཕུང་པོ་ཡང་རྣམ་པར་མི་རྟོག་པ་ལས། སེམས་ཅན་གྱི་དགེ་བའི་རྩ་བ་རྣམ་པ་ཐ་དད་པས་གཞལ་མེད་ཁང་རྣམ་པ་ཐ་དད་པ་ཡོད་ཅིང་སྣང་ངོ་། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་རོ་གཅིག་པ་ལས། སེམས་ཅན་གྱི་སྣོད་རྣམ་པ་ཐ་དད་པའི་ཕྱིར། དགེ་བའི་རྩ་བ་རྣམ་པ་ཐ་དད་པ་ཡོད་ཅིང་སྣང་བར་འགྱུར་རོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་། བྱང་
ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། ཆུས་འཇིག་པའི་བསྐལ་པ་ཆེན་པོ་བྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་ཆེན་མཚོ་གཅིག་ཏུ་གྱུར་པའི་ཚེ། ཆོས་ཉིད་ཐོབ་པས་དེ་བཞིན་གཤེགས་པ་འབྱུང་བའི་ཡོན་ཏན་རིན་པོ་ཆེས་རྣམ་པར་བརྒྱན་པ་ཞེས་བྱ་བའི་པད་མོ་མང་པོ་འབྱུང་སྟེ། དེ་དག་གིས་ནི་ཆུའི་བསྐལ་པ་ཐམས་ཅད་ཀུན་ནས་ཁེབས་སོ། །དེ་དག་ནི་འཇིག་རྟེན་ཐམས་ཅད་འོད་ཀྱིས་རྒྱས་པར་འགེངས་ཏེ། པད་མོ་དེ་དག་བྱུང་བ་དང་ལྷའི་བུ་དབང་ཕྱུག་ཆེན་པོ་དང་། གནས་གཙང་མའི་རིས་ཀྱི་ལྷའི་བུ་གཞན་རྣམས་ཀྱིས་ཀྱང་། བསྐལ་པ་འདི་ལ་ནི་ཡང་དག་པར་རྫོགས་པའི་སངས་རྒྱས་འདི་སྙེད་ཅིག་འབྱུང་བར་འགྱུར་རོ། །ཞེས་བྱ་བ་ཁོང་དུ་ཆུད་དོ། །ཀྱེ་རྒྱལ་བའི་སྲས་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་འགྲུབ་པའི་ཚེ། རླུང་གི་དཀྱིལ་འཁོར་དག་ཅིང་འོད་གསལ་བ་ཞེས་བྱ་བ་ལྡང་སྟེ། དེ་ནི་གཟུགས་ལ་སྤྱོད་པའི་ལྷ་རྣམས་ཀྱི་གཞལ་མེད་ཁང་ཡོངས་སུ་གནས་པར་བྱེད་དོ། །རླུང་གི་དཀྱིལ་འཁོར་དག་ཅིང་དང་ལ་འོད་གསལ་བས་རྒྱན་བཟང་པོ་ཞེས་བྱ་བ་ལྡང་སྟེ། དེ་ནི་འདོད་པ་ལ་སྤྱོད་པའི་ལྷའི་བུ་རྣམས་ཀྱི་ལྷའི་གཞལ་མེད་ཁང་ཡོངས་སུ་འགོད་དོ། །རླུང་གི་དཀྱིལ་འཁོར་གཅིག་ཏུ་སྟུག་ཅིང་ཐ་མི་དད་པ་ཞེས་བྱ་བ་ལྡང་སྟེ། དེ་ནི་ཁོར་ཡུག་དང་ཁོར་ཡུག་ཆེན་པོའི་རི་རྣམས་ཡོངས་སུ་གཞོག་པ་བྱེད་དོ། །རླུང་གི་དཀྱིལ་འཁོར་ཁྱད་པར་དུ་འཕགས་པ་ཞེས་བྱ་བ་ལྡང་སྟེ། དེ་ནི་རི་རབ་རིའི་རྒྱལ་པོ་ཡོངས་སུ་གཞོག་པ་བྱེད་དོ། །རླུང་གི་དཀྱིལ་འཁོར་བརྟན་པ་ཞེས་བྱ་བ་ལྡང་སྟེ། དེ་ནི་རིན་པོ་ཆེ་བཅུ་ཡོངས་སུ་གཞོག་པ་བྱེད་དོ། །བཅུ་གང་ཞེ་ན་འདི་ལྟ་སྟེ། སེང་ལྡེང་ཅན་དང་། དྲང་སྲོང་རི་དང་།
བདུད་ལས་རྒྱལ་དང་། བདུད་ལས་ཤིན་ཏུ་རྒྱལ་དང་། གཉའ་ཤིང་འཛིན་དང་། ས་འཛིན་དང་། བཏང་བཟུང་དང་། བཏང་བཟུང་ཆེན་པོ་དང་། སྤོས་ཀྱི་ངད་ཅན་དང་། ཁ་བ་ཅན་ནོ། །རླུང་གི་དཀྱིལ་འཁོར་རབ་ཏུ་གནས་པ་ཞེས་བྱ་བ་ལྡང་སྟེ། དེ་ནི་ས་ཆེན་པོ་ཀུན་ནས་གནས་པར་བྱེད་དོ། །རླུང་གི་དཀྱིལ་འཁོར་རྣམ་པར་བཀོད་པ་ཞེས་བྱ་བ་ལྡང་སྟེ། དེ་ནི་ས་བླའི་ལྷ་དང་། ཀླུ་དང་དྲི་ཟའི་ཁྱིམ་ཀུན་ནས་གནས་པར་བྱེད་དོ། །རླུང་གི་དཀྱིལ་འཁོར་མཛོད་མི་ཟད་པ་ཞེས་བྱ་བ་ལྡང་སྟེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཏོགས་པའི་རྒྱ་མཚོ་ཆེན་པོ་ཀུན་ནས་གནས་པར་བྱེད་དོ། །རླུང་གི་དཀྱིལ་འཁོར་རྣམ་པར་སྣང་བའི་དཀྱིལ་འཁོར་ཞེས་བྱ་བ་ལྡང་སྟེ། དེ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྱི་རིན་པོ་ཆེའི་རིགས་ཐམས་ཅད་ཀུན་ནས་གནས་པར་བྱེད་དོ། །རླུང་གི་དཀྱིལ་འཁོར་རྩ་བ་བརྟན་པ་ཞེས་བྱ་བ་ལྡང་སྟེ། དེ་ནི་ཡིད་བཞིན་གྱི་ཤིང་ཐམས་ཅད་ཀུན་ནས་གནས་པར་བྱེད་དོ། །ཀྱེ་རྒྱལ་བའི་སྲས་དེ་ལྟར་ཆར་སྤྲིན་ཆེན་པོའི་ཆར་རོ་གཅིག་ཏུ་འབབ་པ་དང་། ཆུའི་ཕུང་པོ་རྣམ་པར་མི་རྟོག་པ་ལས། ཆོས་ཉིད་ཐོབ་པ་དང་། སེམས་ཅན་རྣམས་ཀྱི་དགེ་བའི་རྩ་བ་ཐ་དད་པའི་ཁྱད་པར་གྱིས། རླུང་གི་དཀྱིལ་འཁོར་རྣམ་པ་ཐ་དད་པ་ཡོད་ཅིང་སྣང་ངོ་། །རླུང་གི་དཀྱིལ་འཁོར་རྣམ་པ་ཐ་དད་པར་གྱུར་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་ཡོད་ཅིང་སྣང་ངོ་། །ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བའི་རྩ་བའི་ཚོགས་ཐམས་ཅད་ཤིན་ཏུ་བསྩགས་པ། བླ་ན་མེད་པའི་ཡེ་ཤེས་ཆེན་པོ་སྣང་བ་ལ་མངོན་དུ་གྱུར་པ་རྣམས་འབྱུང་བའི་ཚེ། ཡེ་ཤེས་ཀྱི་འོད་ཟེར་ཆེན་པོ་བསམ་གྱིས་མི་ཁྱབ་པ། དེ་བཞིན་གཤེགས་པའི་རིགས་རྒྱུན་མི་གཅོད་པ་ཞེས་བྱ་བ་འཇིག་རྟེན་གྱི་ཁམས་མ་ལུས་པ་ཐམས་ཅད་རྒྱས་པར་འགེངས་པ་འབྱུང་སྟེ། འོད་ཟེར་
དེས་ནི་དེ་བཞིན་གཤེགས་པ་དང་། དབང་བསྐུར་བ་ཐོབ་པའི་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་། བྱང་ཆུབ་སེམས་དཔའ་འདི་སྙེད་ཅིག་དེ་བཞིན་གཤེགས་པའི་མཐུ་འདིས་ཡང་དག་པར་འགྲུབ་པར་འགྱུར་རོ། །ཞེས་བྱ་བར་ཐུགས་སུ་ཆུད་དོ། །ཀྱེ་རྒྱལ་བའི་སྲས་དག་དེ་ལྟར་དེ་བཞིན་གཤེགས་པ་འབྱུང་བར་འགྱུར་བའི་ཚེ། དེ་བཞིན་གཤེགས་པ་ཐམས་ཅད་ཀྱི་རིགས་འབྱུང་བའི་མཐུས། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འོད་བཟང་པོ་དྲི་མ་མེད་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཟག་པ་མེད་ཅིང་མི་ཟད་པ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་ཀུན་ཏུ་སྣང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་བསམ་གྱིས་མི་ཁྱབ་པ་ཆོས་ཀྱི་དབྱིངས་སུ་གཞོལ་བ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་དེ་བཞིན་གཤེགས་པའི་རིགས་ཡང་དག་པར་འབྱུང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་སྟོབས་མི་སྒུལ་བ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་ཟིལ་གྱིས་མི་ནོན་ཅིང་། ཡང་དག་པར་འཕགས་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་སྟོབས་དང་མི་བསྙེངས་པ་ཟིལ་གྱིས་མི་ནོན་པའི་ཡེ་ཤེས་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་ཐམས་ཅད་མངོན་པར་མཁྱེན་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་ཐམས་ཅད་དུ་བརྗོད་པ་ལས་འདས་ཤིང་ཐམས་ཅད་དུ་ཐོགས་པ་མེད་པ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་སྤྲུལ་པས་མངོན་པར་བསྒྲུབས་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་
པ་མཐོང་ཞིང་ཐོས་པ་དང་དེ་དང་འགྲོགས་པ་དོན་ཡོད་པས། དགེ་བའི་རྩ་བ་ཆུད་མི་ཟ་བའི་ཡེ་ཤེས་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་མཉམ་པ་ཉིད་ཀྱི་རྗེས་སུ་སོང་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་བསོད་ནམས་དང་། ཡེ་ཤེས་མི་ཟད་པའི་ཚོགས་འགྲོ་བ་ཐམས་ཅད་ཉེ་བར་འཚོ་བ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འཇུག་པར་དཀའ་བ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་དཀོན་མཆོག་གསུམ་གྱི་རིགས་རྒྱུན་མི་གཅོད་ཅིང་། ཡེ་ཤེས་ཟབ་མོ་ཐུགས་སུ་ཆུད་པ་ཡང་དག་པར་འགྲུབ་པར་འགྱུར་རོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་རྒྱན་སྣ་ཚོགས་ཅན་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་མཚན་དང་དཔེ་བྱད་བཟང་པོའི་རྒྱན་སྣ་ཚོགས་ཀྱིས་འགྲོ་བ་ཐམས་ཅད་རྣམ་པ་ཐམས་ཅད་དུ་དགའ་བར་འགྱུར་བ་ཡང་དག་པར་འགྲུབ་བོ། །དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་མི་འཕྲོགས་པ་ཞེས་བྱ་བ་འབྱུང་སྟེ། འོད་ཟེར་དེས་དེ་བཞིན་གཤེགས་པ་རྣམས་ཀྱི་ཡེ་ཤེས་སངས་རྒྱས་ཀྱི་ཡུལ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པར་སྐུ་ཚེའི་ཚད་རྒྱུན་མི་འཆད་པ་ཡང་དག་པར་འགྲུབ་པར་འགྱུར་ཏེ། ཀྱེ་རྒྱལ་བའི་སྲས་དག་དེ་ལྟར་དེ་བཞིན་གཤེགས་པའི་ཐུགས་རྗེ་ཆེན་པོའི་ཆར་སྤྲིན་ཆེན་པོ་རོ་གཅིག་པ་དང་། དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་གྱི་དཀྱིལ་འཁོར་ཆེན་པོ་རོ་གཅིག་པ་དང་། བྱང་ཆུབ་སེམས་དཔའ་ཡང་དག་པར་བསྒྲུབས་པའི་ཆོས་ཉིད་ཐོབ་པ་དང་། སེམས་ཅན་གྱི་བསམ་པ་དང་། དབང་པོ་དང་། བརྩོན་འགྲུས་རྣམ་པ་ཐ་དད་པའི་ཆོས་ཉིད་ཐོབ་པས། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་འོད་ཟེར་རང་བཞིན་གཅིག་པ་ལས་རྣམ་པ་
ཐ་དད་དུ་གྱུར་པ་ཡོད་ཅིང་སྣང་ངོ་། །ཡེ་ཤེས་ཀྱི་འོད་ཟེར་རྣམ་པ་ཐ་དད་པ་ལས་དེ་བཞིན་གཤེགས་པ་འབྱུང་བ་ཡང་དག་པར་འགྲུབ་པ་རྣམ་པ་ཐ་དད་པ་ཡང་ཡོད་ཅིང་སྣང་ངོ་། །ཀྱེ་རྒྱལ་བའི་སྲས་དག་དེ་བཞིན་གཤེགས་པ་ཡང་དག་པར་འགྲུབ་པ་རྣམ་པར་ཕྱེ་བའི་རོ་གཅིག་པ་ལས་ཡོན་ཏན་རྣམ་པ་ཐ་དད་པའི་རྒྱན་ཚད་མེད་བསམ་གྱིས་མི་ཁྱབ་པ་འབྱུང་ཞིང་དེ་བཞིན་གཤེགས་པའི་བྱིན་གྱི་རླབས་ཀྱིས་སེམས་ཅན་རྣམས་ཀྱིས་ཀྱང་། དེ་བཞིན་དུ་ཤེས་པར་འགྱུར་བ་ལ་ལྟོས། ཀྱེ་རྒྱལ་བའི་སྲས་དག་དེ་ནི་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བྱིན་གྱིས་མ་བརླབས་ན་སེམས་ཅན་སྔོན་ཅད་དེ་བཞིན་གཤེགས་པ་ལ་དགེ་བའི་རྩ་བ་མ་བསྐྱེད་པས། དེ་བཞིན་གཤེགས་པའི་ཡེ་ཤེས་ལ་ཆུང་ངུ་ན་ཆ་ཤས་གཅིག་ཙམ་བསྟན་པ་ཡང་ཤེས་པར་འགྱུར་བའམ། ཁོང་དུ་ཆུད་པར་འགྱུར་བའི་གནས་མེད་སྐབས་མེད་དེ། དེ་ནི་གནས་མ་ཡིན་ནོ། །ཀྱེ་རྒྱལ་བའི་སྲས་དག་དེ་ལྟར་དེ་བཞིན་གཤེགས་པའི་མཐུའི་ཁྱད་པར་གྱིས། སེམས་ཅན་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་མཐུ་ལ་འཇུག་ཅིང་རྟོག་པ་དང་། ཁོང་དུ་ཆུད་པར་བྱེད་ཀྱང་། དེ་བཞིན་གཤེགས་པ་ལ་རྟོག་པ་མི་མངའ། རྣམ་པར་རྟོག་པ་མི་མངའ་སྟེ། འབྱུང་བ་མེད་ཅིང་ཀུན་ནས་འབྱུང་བ་མེད་ལ་ཡང་དག་པར་འགྲུབ་པ་མེད་དེ། བྱ་བ་མེད་ཅིང་དེ་ལ་བྱེད་པ་སུའང་མེད་མོད་ཀྱི། ཡང་དག་པར་འབྱུང་བའི་གྲངས་སུ་བགྲང་བ་ཡང་ཡོད་དོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི། སྒོ་བརྒྱད་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ། དཔེར་ན། རླུང་གི་དཀྱིལ་འཁོར་ཆུའི་ཕུང་པོ་འཛིན་པ་བཞི་ནི། ནམ་མཁའ་ལ་གནས་ཤིང་ལྡིང་ངོ་། །བཞི་གང་ཞེ་ན་འདི་
ལྟ་སྟེ། རླུང་གི་དཀྱིལ་འཁོར་བརྟན་པ་དང་། རླུང་གི་དཀྱིལ་འཁོར་གནས་པ་དང་། རླུང་གི་དཀྱིལ་འཁོར་མི་ཉམས་པ་དང་། རླུང་གི་དཀྱིལ་འཁོར་སྙིང་པོ་དང་ལྡན་པ་ཞེས་བྱ་བ་དག་སྟེ། རླུང་གི་དཀྱིལ་འཁོར་ཆེན་པོ་དེ་བཞི་ནི་རབ་ཏུ་ལྡིང་ཞིང་ཆུའི་ཕུང་པོ་འཛིན་ཏེ། ཆུའི་ཕུང་པོ་ལ་གནས་པའི་ས་ཆེན་པོ་ནི་མི་འཇིག །རྣམ་པར་མི་འཇིག་པས་དེའི་ཕྱིར་ས་ནི་ཆུ་ལ་གནས་སོ། །ཆུ་ནི་རླུང་ལ་གནས་སོ། །རླུང་ནི་ནམ་མཁའ་ལ་གནས་སོ། །ནམ་མཁའ་ནི་མི་གནས་པ་ཞེས་བྱ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ནི་ཚུལ་དེ་ལྟ་བུར་གནས་སོ། །ཀྱེ་རྒྱལ་བའི་སྲས་དག །དེ་བཞིན་དུ་དེ་བཞིན་གཤེགས་པ་འབྱུང་བའི་ཚེ་དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ཤེས་རབ་ཀྱི་སྣང་བ་ཆགས་པ་མེད་པ་ལ་གནས་པ་བཞི་ལྡང་སྟེ། དེ་དག་ནི་འགྲོ་བ་ཐམས་ཅད་ཀྱི་དགེ་བའི་རྩ་བ་ཡོངས་སུ་འཛིན་ཏོ། །བཞི་གང་ཞེ་ན་འདི་ལྟ་སྟེ། དེ་བཞིན་གཤེགས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་བསྡུས་བ་སེམས་ཅན་ཡོངས་སུ་དགའ་བར་འགྱུར་བ་ཞེས་བྱ་བ་དང་། ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་ཆོས་རྣམ་པར་དགོད་པ་ལ་འགྲོ་བ་མོས་པར་བྱེད་པ་ཞེས་བྱ་བ་དང་། ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་དགེ་བའི་རྩ་བ་ཐམས་ཅད་ཡོངས་སུ་སྲུང་བ་ཞེས་བྱ་བ་དང་། ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་འཁོར་བ་ཐམས་ཅད་ཟག་པ་མེད་པའི་དབྱིངས་སུ་ཁོང་དུ་ཆུད་པ་ཞེས་བྱ་བ་དག་སྟེ། ཀྱེ་རྒྱལ་བའི་སྲས་དག་བཞི་པོ་དེ་དག་ནི་ཤེས་རབ་ཀྱི་སྣང་བ་ཆགས་པ་མེད་པ་ལ་གནས་པའི་ཡེ་ཤེས་ཀྱི་རླུང་གི་དཀྱིལ་འཁོར་ཆེན་པོ་རྣམས་ཏེ། དེ་དག་ནི་འགྲོ་བ་ཐམས་ཅད་བྱམས་པ་ཆེན་པོས་ཡོངས་སུ་བསྐྱབ་པ་དང་། ཐུགས་རྗེ་ཆེན་པོས་འགྲོ་བ་ཐམས་ཅད་ཡོངས་སུ་དགྲོལ་ཞིང་གཟུང་བའི་ཕྱིར་ལྡང་སྟེ། བྱམས་པ་ཆེན་པོ་དང་། སྙིང་རྗེ་ཆེན་པོ་ལ་གནས་པའི་བྱང་ཆུབ་སེམས་དཔའ་ནི། འགྲོ་བ་མང་པོ་རྣམ་པར་ཕྱེ་བ་འབྱམ་ཀླས་
པའི་ནང་ན་ཐབས་མཁས་པ་ལ་གནས་པའི་བྱམས་པ་ཆེན་པོས། སེམས་ཅན་ཐམས་ཅད་ཉེ་བར་འཚོ་བ་ཡིན་ཏེ། ཀྱེ་རྒྱལ་བའི་སྲས་དག་དེ་བཞིན་གཤེགས་པ་འབྱུང་བ་ནི་ཚུལ་དེ་ལྟ་བུར་འགྲུབ་ཅིང་། དེ་ལྟར་གནས་པ་ཡིན་ཏེ། ཤེས་རབ་ཀྱི་སྣང་བ་ཆགས་པ་མེད་པ་ནི་མི་གནས་པའོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་གཞན་ཡང་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲུབ་པ་ནི་ཚད་མེད་པའི་སེམས་ཅན་རྣམས་ཡོངས་སུ་སྤྱོད་པ་རྣམ་པ་ཐ་དད་པས་ཉེ་བར་འཚོ་བ་ཡིན་ཏེ། འདི་ལྟར་ཆུ་ལ་གནས་པའི་སེམས་ཅན་རྣམས་ཀྱང་གནས་ཀྱིས་ཉེ་བར་འཚོ་བ་ཡིན། སེམས་ཅན་སའི་སྟེང་ན་འཁོད་པ་རྣམས་ཀྱང་སའི་སྟེང་ན་ཡོད་པའི་རྣམ་པ་ཚད་མེད་པས་ཉེ་བར་འཚོ་བ་ཡིན། གཞལ་མེད་ཁང་ན་གནས་པ་རྣམས་ཀྱང་གཞལ་མེད་ཁང་གིས། ཉེ་བར་འཚོ་བ་ཡིན། ནམ་མཁའ་ལ་གནས་པ་རྣམས་ཀྱང་བར་སྣང་གི་གནས་ཀྱིས་ཉེ་བར་འཚོ་བ་ཡིན། ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པ་ཡང་དག་པར་འགྲུབ་པ་ཡང་རྣམ་པ་ཚད་མེད་པས་འགྲོ་བ་ཐམས་ཅད་ཉེ་བར་འཚོ་བ་ཡིན་ཏེ། འདི་ལྟར་མཐོང་བར་དགའ་བ་དང་། དད་ཅིང་མོས་པར་གྱུར་པའི་སེམས་ཅན་རྣམས་ཀྱང་སངས་རྒྱས་མཐོང་བས་ཉེ་བར་འཚོ་བ་ཡིན། ཚུལ་ཁྲིམས་ཀྱི་སྟོབས་ཀྱི་མཐུ་ལ་གནས་པ་རྣམས་ཀྱང་སངས་རྒྱས་ཀྱི་ཚུལ་ཁྲིམས་ཀྱིས་ཉེ་བར་འཚོ་བ་ཡིན། བསམ་གཏན་དང་ཚད་མེད་པ་ལ་གནས་པ་རྣམས་ཀྱང་འཕགས་པའི་འཇིག་རྟེན་ལས་འདས་པའི་མངོན་པར་ཤེས་པས་ཉེ་བར་འཚོ་བ་ཡིན། ཆོས་ཀྱི་སྒོ་སྣང་བ་ལ་གནས་པ་རྣམས་ཀྱང་རྒྱུ་ཆུད་མི་ཟ་བས་ཉེ་བར་འཚོ་བ་ཡིན། སྣང་བ་མེད་པ་ལ་གནས་པ་རྣམས་ཀྱང་
ཆོས་འབྱམ་ཀླས་པ་ཆུད་མི་ཟ་བས་ཉེ་བར་འཚོ་བ་ཡིན་པས། དེའི་ཕྱིར་དེ་བཞིན་གཤེགས་པ་ཡང་དག་པར་འགྲུབ་པ་ནི་འགྲོ་བ་ཐམས་ཅད་ཉེ་བར་འཚོ་བ་ཡིན་ཞེས་བྱའོ། །ཀྱེ་རྒྱལ་བའི་སྲས་དག་ཁོང་དུ་ཆུད་པར་བྱ་བའི་སྒོ་རྣམ་པ་བཅུ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐྱེ་བ་འབྱུང་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ནི་དེ་ལྟ་བུར་ཤེས་པར་བྱ་སྟེ། སྤྱོད་པ་ཡོངས་སུ་བསྒྲུབ་པ་ཚད་མེད་པས་ན། ཚད་མེད་པར་ཤེས་པར་བྱའོ། །ཕྱོགས་བཅུ་ཐམས་ཅད་རྒྱས་པར་འགེངས་པས་ན་ཤིན་ཏུ་ཡངས་པར་ཤེས་པར་བྱའོ། །སྐྱེ་བ་དང་འཇིག་པའི་གནས་དང་བྲལ་བས་ན་ལེན་པ་མེད་ཅིང་འདོར་བ་མྱེད་པར་ཤེས་པར་བྱའོ། །སེམས་དང་ཡིད་དང་རྣམ་པར་ཤེས་པ་དང་བྲལ་བས་ན་རྒྱུ་བ་མེད་ཅིང་རྒྱུ་བ་དང་བྲལ་བར་ཤེས་པར་བྱའོ། །ནམ་མཁའི་རང་བཞིན་ལྟ་བུ་ཡིན་པས་ན། ལུས་མེད་པར་ཤེས་པར་བྱའོ། །སེམས་ཅན་ཐམས་ཅད་ལ་བདག་མེད་པས་ན་མཉམ་པར་ཤེས་པར་བྱའོ། །སེམས་ཅན་ཐམས་ཅད་ལ་ཟད་མི་ཤེས་པའི་ཞིང་དུ་གྱུར་པས་ན་མི་ཟད་པར་ཤེས་པར་བྱའོ། །ཕྱི་མའི་མཐའི་མུར་ཐུག་པར་རྒྱུན་མི་འཆད་པས་ན། ཕྱིར་མི་ལྡོག་པར་ཤེས་པར་བྱའོ། །དེ་བཞིན་གཤེགས་པའི་ཡེ་ཤེས་ལ་གཉེན་པོ་མེད་པས་ན་མི་འཕྲོགས་པར་ཤེས་པར་བྱའོ། །འདུས་བྱས་དང་འདུས་མ་བྱས་མཉམ་པ་ཉིད་དུ་ཐུགས་སུ་ཆུད་པས་ན། མི་གཉིས་པར་ཤེས་པར་བྱའོ། །སྔོན་ཡོངས་སུ་སྨིན་པར་བྱས་པའི་སེམས་ཅན་གྱི་བསམ་པའི་ཁྱད་པར་ཡོངས་སུ་རྫོགས་པར་མཛད་པས་ན། འགྲོ་བ་ཐམས་ཅད་ཉེ་བར་འཚོ་བར་ཤེས་པར་བྱའོ། །ཀྱེ་རྒྱལ་བའི་སྲས་དག་དེ་དག་ལ་སྩོགས་པ་རྣམ་པར་བྱང་བ་རྣམ་པ་ཐ་དད་པ་ཚད་མེད་པ་ཤིན་ཏུ་བསྟན་པའི་སྒོས་བྱང་ཆུབ་སེམས་དཔའ་སེམས་དཔའ་ཆེན་པོས་
དེ་བཞིན་གཤེགས་པ་འབྱུང་ཞིང་ཡང་དག་པར་འགྲུབ་པ་བསྟན་པ་ཤེས་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་ཡང་བརྟག་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་ཀུན་ལས་འདས་ཤིང་སྟོབས་བཅུ་མངའ་གྱུར་ཏེ། །མི་མཉམ་མཉམ་དང་མཉམ་ཞིང་བར་སྣང་མཁའ་མཉམ་པའི། །མགོན་པོ་རྣམས་ཀྱི་སྤྱོད་ཡུལ་མཚུངས་མེད་མཐའ་ཡས་ཉོན། །དེ་དག་འཇིག་རྟེན་ཀུན་ན་ཡོན་ཏན་མཚུངས་པ་མེད། །སྟོབས་བཅུ་ཡོན་ཏན་ཚད་མེད་མངའ་བ་ཐམས་ཅད་ཀྱི། །མཐུ་ལ་སེམས་དང་ཡིད་ཀྱི་ཚུལ་གྱིས་མི་བསམ་སྟེ། །སྐྱེས་བུ་སེང་གེ་རྣམས་ནི་འཇིག་རྟེན་ཐམས་ཅད་ཀྱིས། །སྒོ་རྣམས་རེ་རེར་བསྐལ་པ་བྱེ་བར་མི་དཔོགས་སོ། །ཕྱོགས་བཅུ་ཀུན་ནས་ཞིང་རྣམས་ཇི་སྙེད་ཡོད་པ་རྣམས། །སྐྱེས་བུ་ལ་ལས་བཤིག་སྟེ་རྡུལ་ཕྲན་བགྲང་ནུས་ཀྱང་། །དེས་ནི་སྟོབས་བཅུ་མངའ་བའི་སྤུ་གཅིག་ཡོན་ཏན་ཡང་། །བསྐལ་པ་ཁྲག་ཁྲིག་བརྒྱས་ཀྱང་ཚད་གཟུང་མི་ནུས་སོ། །སྐྱེས་བུ་ལ་ལ་ནམ་མཁའི་དབྱིངས་ལ་འཇལ་བྱེད་ཅིང་། །དེ་ལྟར་ལ་ལས་རྩིས་འགོ་བཟུང་སྟེ་བགྲང་བྱས་ཀྱང་། །གཞལ་བར་མི་ནུས་མཐའ་ཡང་རྙེད་པར་མི་རུང་བ། །དེ་བཞིན་བདེ་གཤེགས་རྣམས་ཀྱི་སྤྱོད་ཡུལ་ཚད་ཀྱང་མེད། །དུས་གསུམ་སེམས་ཅན་རྣམས་ཀྱི་རིགས་རྒྱུད་ཇི་སྙེད་དང་། །དེ་དག་དུས་གསུམ་སྤྱོད་པ་སེམས་ཅན་འགའ་ཞིག་གིས། །སེམས་ཀྱི་སྐད་ཅིག་ཡུད་ཀྱིས་ཤེས་ཀྱང་འགྲོ་སྙེད་ཀྱི། །བསྐལ་པས་ཐམས་ཅད་ཟིལ་གནོན་རང་བཞིན་ཤེས་མི་ནུས། །ཇི་ལྟར་ཆོས་ཀྱི་དབྱིངས་ནི་ཀུན་ཏུ་མཐའ་ཡས་ཤིང་། །ཀུན་ཡིན་ཐམས་ཅད་མ་ཡིན་མི་སྣང་གཟུང་དུ་མེད། །དེ་བཞིན་སྟོབས་བཅུ་མངའ་བའི་སྤྱོད་ཡུལ་ཚད་མེད་དེ། །ཐམས་ཅད་ཡིན་ཡང་ཀུན་མིན་ཆོས་དབྱིངས་རང་བཞིན་ཡིན། །དེ་བཞིན་ཉིད་ནི་དེ་བཞིན་ཉིད་དུ་མི་རྟོག་
ཞིང་། ཀུན་ནས་འབྱུང་བ་མེད་ཅིང་ནམ་ཡང་ནུབ་པ་མེད། །དེ་བཞིན་འཇིག་རྟེན་ཀུན་འདས་དེ་དག་སྤྱོད་ཡུལ་ཏེ། །དེ་བཞིན་ཉིད་དང་ཚུལ་མཚུངས་འཕེལ་དང་འགྲིབ་པ་སྤངས། །ཡང་དག་མཐའ་ནི་མཐའ་མེད་མཐའ་ལ་གནས་པ་སྟེ། །དུས་གསུམ་ཀུན་དང་རྣམ་པ་ཀུན་ཏུ་རྣམ་པར་བྲལ། །དེ་བཞིན་མགོན་པོ་ཕན་མཛད་ཀུན་གྱི་སྤྱོད་ཡུལ་ཏེ། །དུས་གསུམ་རྒྱས་མཛད་རྣམ་པ་ཀུན་ཏུ་ཆགས་མི་མངའ། །རང་བཞིན་བྱས་པ་མེད་པས་རྣམ་པར་འགྱུར་བ་མེད། །རང་བཞིན་མཁའ་འདྲ་དྲི་མེད་ཉོན་མོངས་མེད་པ་སྟེ། །དེ་བཞིན་རྒྱལ་བ་རྣམས་ཀྱི་རང་བཞིན་ཀུན་ཏུ་དག །རང་བཞིན་འགྱུར་དང་བྲལ་ཞིང་ཡོད་དང་མེད་པ་མིན། །སྒྲ་དང་ཚིག་ལས་རྣམ་གྲོལ་དབྱངས་རྣམས་ཐམས་ཅད་མེད། །འགྲོ་དང་འོད་བྲལ་རྣམ་རྟོག་མེད་པས་མྱ་ངན་འདས། །དེ་བཞིན་སྟོབས་བཅུ་མངའ་བའི་སྤྱོད་ཡུལ་རང་བཞིན་མེད། །ཚིག་གི་རང་བཞིན་ཀུན་གྱིས་བརྗོད་པར་མི་ནུས་སོ། །དེ་ལྟར་ཆོས་ཀུན་རང་བཞིན་ཞི་བ་མཁྱེན་གྱུར་པས། །ཇི་ལྟར་ནམ་མཁའི་རླུང་དང་བྱ་རྗེས་འདྲ་བ་སྟེ། །སྔོན་ཆད་སྨོན་ལམ་མཛད་པ་གཟུགས་ཀྱི་སྐུར་ཡང་སྣང་། །སྟོབས་བཅུ་མངའ་བ་རྣམས་ཀྱི་ཆོ་འཕྲུལ་ཅི་འདྲ་ལྟོས། །རྒྱལ་བའི་སྤྱོད་ཡུལ་འདི་ལ་འཇུག་པར་སུ་འདོད་པ། །དེས་ནི་ནམ་མཁའ་འདྲ་བ་བསམ་པ་ཡོངས་སུ་སྤྱོངས། །རྟོག་དང་རྣམ་པར་རྟོག་དང་འདུ་ཤེས་འཛིན་སྤངས་ཏེ། །ནམ་མཁའ་ལྟ་བུའི་ཡིད་ཀྱིས་དེ་ལ་འཇུག་པར་གྱིས། །དེ་བས་བདེ་གཤེགས་སྲས་རྣམས་མགོན་པོའི་སྤྱོད་ཡུལ་རྣམས། །བདག་གིས་དཔེ་ཙམ་ཆུང་ཤས་བཤད་ཀྱིས་མཉན་པར་གྱིས། །སྟོབས་བཅུ་མངའ་བའི་ཡོན་ཏན་མཐར་ཕྱིན་མི་ནུས་ཀྱང་། །ཤས་ཙམ་ཤེས་པར་བྱ་བའི་དོན་དུ་ཆུང་ཟད་བརྗོད། །དེ་དག་སྐུ་ཡི་ཕྲིན་ལས་ཇི་ལྟར་འབྱུང་བ་དང་། །མགོན་པོ་རྣམས་ཀྱི་གསུང་དང་ཐུགས་ཀྱི་སྤྱོད་ཡུལ་དང་། །སྟོབས་བཅུ་རྣམས་ཀྱི་ཡུལ་དང་
འཁོར་ལོ་བསྐོར་བ་དང་། །མྱ་ངན་འདའ་དང་དགེ་རྩ་ཐམས་ཅད་བཤད་ཀྱིས་ཉོན། །འཇིག་རྟེན་འདི་དག་མ་ལུས་སྐྱེ་ཞིང་འབྱུང་བའི་ཚེ། །དེ་ལ་རྒྱུ་ཡི་རྣམ་གྲངས་གཅིག་ཅེས་བགྲང་མེད་ཀྱི། །རྒྱུ་དང་ཚུལ་གྱི་རྣམ་པ་ཁྲག་ཁྲིག་བརྒྱ་མང་གིས། །འཇིག་རྟེན་སྟོང་གསུམ་ཀུན་ནས་གནས་པའི་གྲངས་སུ་འགྲོ། །དེ་བཞིན་སྐྱེས་བུའི་མཆོག་རྣམས་སྐྱེ་བར་འགྱུར་བའི་ཚེ། །དེ་དག་ཡོན་ཏན་འདི་སྙེད་ཡིན་ཞེས་བགྲང་བ་མེད། །རྡུལ་དང་རྡུལ་ཕྲན་བགྲང་ནུས་སེམས་ཅན་ཀུན་བསམ་ནུས། །སྟོབས་བཅུ་མངའ་བ་རྣམས་ཀྱི་འབྱུང་བ་རྣམས་ལ་མིན། །ཇི་ལྟར་སྤྲིན་དང་དུས་ཀྱི་ཆར་ལ་བརྟེན་བྱས་ཤིང་། །ཆར་ཆེན་འབེབས་བྱེད་རླུང་རྣམས་བཞི་པོ་དེ་བཞིན་ཏེ། །དགེ་རྩ་ཀུན་དང་བྱང་ཆུབ་སེམས་དཔའི་མཐུས། །འཇིག་རྟེན་སྟོང་གསུམ་ཀུན་ནས་གནས་པའི་གྲངས་སུ་འགྲོ། །དེ་བཞིན་སྟོབས་བཅུ་རྣམས་ཀྱི་ཆོས་སྤྲིན་རྒྱུར་བྱས་ཤིང་། །བསམ་པ་རྣམ་དག་བྱེད་པའི་ཡེ་ཤེས་རླུང་ལྡང་སྟེ། །སྔོན་གྱི་དགེ་བ་རྐྱེན་སྐྱེས་རིགས་པར་ཡོངས་བསྔོས་པས། །སྟོབས་བཅུ་མགོན་པོ་རྣམས་ནི་འབྱུང་ཞིང་སྐྱེ་བར་འགྱུར། །སྟེང་གི་མཁའི་དབྱིངས་ལས་སྤྲིན་ཆེན་ཆར་བྲུགས་པ། །སྟོང་གསུམ་སྟོང་ཆེན་འཇིག་རྟེན་ཀུན་ནས་འཇིག་འགྱུར་ཚེ། །མཁའ་དབྱིངས་རྒྱ་ཆེན་དག་པའི་རླུང་ལངས་མ་གཏོགས་པར། །ས་ཕྱོགས་གཞན་གྱིས་བཟོད་ཅིང་གཟུང་བར་མི་ནུས་སོ། །དེ་བཞིན་སྟོབས་བཅུ་མངའ་བ་འབྱུང་བར་འགྱུར་བའི་ཚེ། །ཕྱོགས་བཅུ་ཀུན་གྱི་ཆོས་དབྱིངས་ཡོངས་སུ་རྒྱས་བཀང་ཞིང་། །ཆོས་ཚུལ་ཆར་ཆེན་འབབ་པར་གྱུར་ལ་ལྷག་པའི་སེམས། །རྣམ་པར་དག་པ་མ་གཏོགས་གཞན་གྱིས་འཛིན་མི་ནུས། །ནམ་མཁའི་དབྱིངས་ལས་སྤྲིན་ཆེན་ཆར་པ་འབབ་གྱུར་པ། །དེ་ལ་འགྲོ་དང་འོང་བ་ནམ་ཡང་ཡོད་པ་མིན། །དེ་ལ་བྱེད་པ་མེད་དེ་ཚོར་བ་པོ་ཡང་མེད། །དེ་དག་ཆོས་ཉིད་ཐོབ་འབྱུང་རྣམ་པ་གཞན་གྱིས་མིན། །དེ་བཞིན་
སྟོབས་བཅུ་མངའ་བའི་ཆོས་སྤྲིན་ཆར་འབབ་པ། །དེ་དག་འཕོ་དང་འོང་བ་ཡོད་པ་མ་ཡིན་ཡང་། །བྱང་ཆུབ་སེམས་དཔའི་མཐུ་དང་ལེགས་པར་སྤྱད་པའི་རྒྱུས། །བྱང་ཆུབ་སེམས་དཔའི་ཆོས་ཀྱི་རང་བཞིན་སྤྲིན་ཀྱང་འབྱུང་། །སྤྲིན་གྱི་ཆར་བཀྱེ་ཆར་ཐིགས་ཡོངས་སུ་བགྲང་ནུས་པའི། །སེམས་ཅན་དེ་འདྲ་ཁམས་གསུམ་འདི་ན་ཡོད་པ་མིན། །སྟོང་གསུམ་དབང་པོའི་དབང་ཕྱུག་དེ་ནི་མ་གཏོགས་ཏེ། །དབང་བསྒྱུར་དེ་ནི་སྔོན་གྱི་སྨོན་ལམ་འབྲས་བུས་བགྲང་། །དེ་བཞིན་བདེ་གཤེགས་ཆར་ཆེན་འབབ་པ་མ་ལུས་པར། །སེམས་ཅན་ཀུན་གྱིས་བགྲང་བས་གཞལ་བར་སླ་བ་མིན། །འཇིག་རྟེན་ཀུན་ན་འགྲོ་བའི་མཆོག་གྱུར་དབང་ཕྱུག་རྣམས། །དེ་དག་སྤྲིན་ཆེན་ཆར་ཆེན་རིན་ཆེན་ལག་བཀོད་ལྟ། །རབ་ཏུ་ཞི་བྱེད་ཞི་བྱེད་འབྱུང་བ་འབྱུང་བར་བྱེད། །གཞན་ཡང་ཡོངས་སུ་གཅོད་པ་དེ་ནི་ཡོངས་སུ་གཅོད། །སྒྲུབ་པ་དེ་བཞིན་གཞན་ཏེ་དེ་ནི་རིན་ཆེན་སྒྲུབ། །རྣམ་པར་འབྱེད་པ་སྟོང་གསུམ་ཐམས་ཅད་རྣམ་པར་འབྱེད། །སྟོབས་བཅུ་མངའ་བའི་ཞིང་སྤྲིན་ཉོན་མོངས་ཀུན་ཞིར་བྱེད། །འབྱུང་བ་དགེ་སྟོང་བརྒྱ་འགྲངས་ཀུན་ནས་འབྱུང་བར་བྱེད། །ཡོངས་སུ་གཅོད་པ་ལྟ་བའི་རྣམ་པ་ཡོངས་གཅོད་དེ། །རྒྱལ་བའི་རིན་ཆེན་སྒྲུབ་ཅིང་བསམ་པ་རྣམ་པར་འབྱེད། །བར་སྣང་མཁའ་ལས་ཆར་འབབ་ཇི་ལྟར་རོ་གཅིག་ཀྱང་། །གནས་ཀྱི་ཁྱད་ཀྱིས་ཡོངས་སུ་འགྱུར་བ་སྣ་ཚོགས་མང་། །འོན་ཀྱང་ཆུ་ལ་རྟོག་མེད་རྣམ་པར་རྟོག་པ་མེད། །ཐ་དད་རྣམ་པ་འགྲངས་པ་དེ་དག་ཆོས་ཉིད་ཚུལ། །དེ་བཞིན་ཆོས་ཀྱང་གཅིག་མིན་ཐ་དད་མ་ཡིན་ཏེ། །རོ་གཅིག་ཞི་ཞིང་རྟོག་མེད་རྣམ་པར་རྟོག་མེད་དེ། །འོན་ཀྱང་སངས་རྒྱས་ཆོས་འགྲངས་མུ་མེད་འབྱུང་བར་འགྱུར། །དེ་ནི་རྡུལ་བྲལ་རྣམས་ཀྱི་ཆོས་ཉིད་ཚུལ་ཡིན་ནོ། །ཇི་ལྟར་ཐོག་མར་གཟུགས་ཁམས་གཞལ་མེད་ཁང་པ་འབྱུང་། །དེ་ནས་འདོད་ཁམས་གཞལ་མེད་ཁང་རྣམས་རྣམ་པར་འགོད། །དེ་ནས་ས་སྟེང་
མི་ཡི་གནས་རྣམས་རྣམ་བཀོད་དེ། །དེ་ནས་ཀླུ་དང་དྲི་ཟ་འགྲོ་བ་ཀུན་གྱི་གནས། །དེ་བཞིན་སྟོབས་བཅུ་མངའ་བ་དེ་དག་འབྱུང་བའི་ཚེ། །ཐོག་མར་བྱང་ཆུབ་སེམས་དཔའི་སྤྱོད་པ་མུ་མེད་འབྱུང་། །དེ་ནས་ཞི་དགའ་རང་རྒྱལ་ཐེག་ལ་གནས་པ་རྣམས། །དེ་ནས་དབང་དུ་གྱུར་པའི་དེ་ནས་འགྲོ་ཀུན་གྱི། །ཇི་ལྟར་པད་མོ་སངས་རྒྱས་སྐྱེ་བའི་ལྟས་གྱུར་པས། །སྔོན་ཆད་སངས་རྒྱས་མཐོང་བའི་ལྷ་རྣམས་དགར་འགྱུར་ཞིང་། །ཆུ་ལས་བརྟེན་ཅིང་འོད་གསལ་གཞལ་མེད་ཁང་ཡང་འབྱུང་། །རླུང་ལས་འཇིག་རྟེན་རིས་རིས་ཆ་ཆར་འགོད་པ་བྱེད། །སངས་རྒྱས་སྔོན་གྱི་དགེ་བའི་འོད་གསལ་ལྟས་ཡིན་ཏེ། །དེས་ནི་སངས་རྒྱས་རྒྱལ་སྲས་ཀུན་གྱི་ཐུགས་ཆུད་འགྱུར། །ཡེ་ཤེས་ཡོངས་དག་དཀྱིལ་འཁོར་མཁའ་ལྟར་རྣམ་དག་པའི། །སྟོབས་བཅུ་ཐ་དད་ཇི་སྙེད་སངས་རྒྱས་ཆོས་འབྱུང་མཁྱེན། །རླུང་ནི་ཆུ་ཕུང་མ་ལུས་ཀུན་གྱི་གནས་ཡིན་ཏེ། །དེ་ཕྱིར་ས་སྟེང་གནས་རྣམས་འཇིག་པར་མི་འགྱུར་རོ། །ས་ཡང་ཤིང་དང་གེལ་པ་སྨན་གྱི་གནས་ཡིན་ཏེ། །མཁའ་ལ་གནས་སུ་བྱ་བ་གང་ཡང་མེད་པ་ཡིན། །མགོན་པོ་རྣམས་ཀྱང་ཤེས་རབ་ཡེ་ཤེས་གཞི་ལ་བཞུགས། །ཡེ་ཤེས་ཐུགས་རྗེ་བྱམས་པ་ཐབས་ཀྱིས་ཡོངས་སུ་བཟུང་། །རྒྱལ་བའི་ཆོས་རྣམས་ཇི་སྙེད་དེ་དག་ཐབས་སུ་འདུས། །རྡུལ་མེད་ཤེས་རབ་དེ་ནི་གནས་མེད་ལུས་ཀྱང་མེད། །འཇིག་རྟེན་བྱུང་ནས་ཚད་མེད་མང་པོ་ཀུན་ཀྱང་འཚོ། །ས་ལ་གནས་དང་ཆུ་ལ་གནས་པ་ཐམས་ཅད་དང་། །ནམ་མཁའི་ལྷ་རྫས་གཞལ་མེད་ཁང་ལ་གནས་པ་དང་། །རྐང་གཉིས་རྐང་བཞི་སེམས་ཅན་ཐམས་ཅད་ཉེ་བར་འཚོ། །དེ་བཞིན་སྐྱེས་མཆོག་དབང་པོ་ཆོས་ཀྱི་རྒྱལ་སྐྱེས་པ། །འགྲོ་བ་མ་ལུས་ཐམས་ཅད་ཉེ་བར་འཚོ་བ་ཡིན། །མཐོང་ཞིང་ཐོས་པར་གྱུར་དང་མཆོད་པས་དེ་བཞིན་ཏེ། ཉོན་མོངས་བསྩལ་བས་སེམས་ཅན་ཐམས་ཅད་ཉེ་བར་འཚོ། །འབྱུང་བ་
མཐར་ཐུག་མེད་པས་འཇིག་རྟེན་མགོ་རྨོངས་འགྱུར། །འོན་ཀྱང་འགྲོ་ལ་ཕན་དོན་སེམས་ཅན་ཤེས་བྱའི་ཕྱིར། །མི་མཁས་འགྲོ་བ་བསྟན་ཕྱིར་ཡེ་ཤེས་བསྟན་དོན་དུ། །རྒྱལ་བ་རྣམས་ཀྱི་དོན་རབ་དཔེ་མེད་དཔེས་བརྗོད་དོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་དགུ་པ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྐུ་བལྟར་ཡོད་པ་ཇི་ལྟ་བུར་ཁོང་དུ་ཆུད་པར་བྱ་དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་སྐུ་བལྟར་ཡོད་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོས་ཚད་མེད་པའི་རྗེས་སུ་འགྲོ་བས་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། ད་ནི་དེ་བཞིན་གཤེགས་པའི་སྐུ་བལྟར་ཡོད་པ་ནི་བྱང་ཆུབ་སེམས་དཔའ་ཆོས་གཅིག་གམ། རྣམ་པ་གཅིག་གམ། སྐུ་གཅིག་གམ། ཞིང་གཅིག་གམ། སེམས་ཅན་གཅིག་གིས་ཁོང་དུ་ཆུད་པར་བྱ་བ་མ་ཡིན་ཏེ། ཀྱེ་རྒྱལ་བའི་སྲས། དེ་བཞིན་གཤེགས་པའི་སྐུ་བལྟར་ཡོད་པ་ནི་ཐམས་ཅད་དུ་རྗེས་སུ་སོང་བར་བྱང་ཆུབ་སེམས་དཔས་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནམ་མཁའི་དབྱིངས་ནི་ཐམས་ཅད་ཀྱི་རྗེས་སུ་སོང་བ་སྟེ། འདོད་པ་དང་གཟུགས་ཡོད་པ་དང་། གཟུགས་མེད་པའི་གནས་ཐམས་ཅད་དུ་ཁྱབ་པ་ཡིན་
ཡང་། གང་དུའང་སོང་བ་མེད་ཅིང་རྗེས་སུ་སོང་བ་མེད་པར་ཤེས་པར་བྱའོ། །དེ་ཅིའི་ཕྱིར་ཞེ་ན། དེ་ནི་ནམ་མཁའ་ལ་གཟུགས་མེད་པའི་ཕྱིར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྐུ་ཡང་ཐམས་ཅད་ཀྱི་རྗེས་སུ་སོང་བ་སྟེ། སེམས་ཅན་ཐམས་ཅད་དང་། ཆོས་ཐམས་ཅད་དང་། ཞིང་ཐམས་ཅད་ཀུན་ཏུ་ཁྱབ་པར་ཤེས་པར་བྱའོ། །འོན་ཀྱང་གར་ཡང་གཤེགས་པ་མེད་ཅིང་རྗེས་སུ་བཞུད་པ་མེད་དེ། དེ་ཅིའི་ཕྱིར་ཞེ་ན། དེ་ནི་དེ་བཞིན་གཤེགས་པའི་སྐུ་ལ་ལུས་མེད་པའི་ཕྱིར་ཏེ། སེམས་ཅན་གྱི་རྣམ་པར་དམིགས་པ་ཡོད་པའི་ཕྱིར་སྐུར་བསྟན་པ་ཡང་ཡོད་དོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དང་པོ་འདིས་དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ནམ་མཁའ་ལ་གཟུགས་མེད་དེ། ཡངས་ཤིང་རྒྱ་ཆེ་བའི་ཕྱིར་སེམས་ཅན་ཐམས་ཅད་ཀྱི་བྱ་བ་སྣང་ཞིང་ཡོད་པར་འགྱུར་ཏེ། ནམ་མཁའ་ལ་རྟོག་པ་མེད་དོ། །སྤྲོས་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྐུ་ཡེ་ཤེས་ཀྱི་འོད་སྣང་བ་ལ་བརྟེན་ཅིང་། སེམས་ཅན་ཐམས་ཅད་ཀྱི་དགེ་བའི་རྩ་བ་ལས་འཇིག་རྟེན་པ་དང་། འཇིག་རྟེན་ལས་འདས་པ་རྣམས་ཡོད་ཅིང་སྣང་བར་གྱུར་ཀྱང་། དེ་བཞིན་གཤེགས་པའི་སྐུ་ལ་རྣམ་པར་རྟོག་པ་མི་མངའ་སྟེ། སྤྲོས་པ་མི་མངའ་འོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི་ཐོག་མ་ནས་སྤྲོས་པ་ཐམས་ཅད་ཡང་དག་པར་ཆད་པའི་ཕྱིར་རོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་གཉིས་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། ། ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། འཛམ་བུའི་གླིང་དུ་ཉི་མ་ཤར་བ་ནི་འོད་ཀྱིས་ཚད་མེད་པར་ཁྱབ་པས། སེམས་ཅན་རྣམས་
ཚད་མེད་པ་རྣམ་པས་ཉེ་བར་འཚོ་སྟེ། འདི་ལྟར་རི་ལ་བབ་ཅིང་རྩྭ་དང་ནགས་ཚལ་སྐྱེ་བར་བྱེད་པས་ཀྱང་ཉེ་བར་འཚོ་བ་ཡིན། མུན་པའི་མུན་ནག་ཡོངས་སུ་སེལ་ཅིང་སྣང་བར་བྱེད་པས་ཀྱང་ཉེ་བར་འཚོ་བ་ཡིན། ས་ལ་བབ་ཅིང་འདམ་རྫབ་ཡོངས་སུ་སྐེམ་པས་ཀྱང་ཉེ་བར་འཚོ་བ་ཡིན། ལོ་ཐོག་ལ་བབ་ཅིང་ཡོངས་སུ་སྨིན་པར་བྱེད་པས་ཀྱང་ཉེ་བར་འཚོ་བ་ཡིན། ནགས་ཚལ་དང་གེལ་པ་དང་སྨན་ལ་བབ་ཅིང་སྐྱེ་བ་དང་རྣམ་པར་འཕེལ་བར་བྱེད་པས་ཀྱང་ཉེ་བར་འཚོ་བ་ཡིན། ནམ་མཁའ་ལ་བབ་པས་ཀྱང་བར་སྣང་ལ་སྤྱོད་པའི་སེམས་ཅན་རྣམས་ཉེ་བར་འཚོ་བ་ཡིན། པད་མོའི་ནགས་ཚལ་ལ་བབ་ཀྱང་ཁ་འབྱེ་ཞིང་རྒྱས་པར་བྱེད་པས་ཉེ་བར་འཚོ་བ་ཡིན། གྲོང་དང་གྲོང་ཁྱེར་དང་། ལྗོངས་དང་ཕོ་བྲང་འཁོར་དང་། རྒྱལ་པོའི་གནས་ལ་བབ་ཀྱང་གཟུགས་སྣ་ཚོགས་གསལ་བར་སྟོན་པས་ཉེ་བར་འཚོ་བ་ཡིན། ཆུ་ལ་བབ་ཀྱང་ཆུ་ལ་གནས་པའི་སེམས་ཅན་ཡོངས་སུ་ལོངས་སྤྱོད་པས་ཉེ་བར་འཚོ་བ་ཡིན། ལས་ཀྱི་རྣམ་པ་སྣ་ཚོགས་ལ་བབ་ཀྱང་དགོས་པ་བརྩམས་པ་ཡོངས་སུ་གྲུབ་པར་བྱེད་པས་ཉེ་བར་འཚོ་བ་ཡིན། དེ་ཅིའི་ཕྱིར་ཞེ་ན། དེ་ནི་ཉི་མའི་དཀྱིལ་འཁོར་གྱིས་འོད་ཟེར་ཚད་མེད་པ་བཀྱེ་བའི་ཕྱིར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྐུ་བལྟར་ཡོད་པའི་ཉི་མ་ཡང་རྣམ་པ་ཚད་མེད་པས། སེམས་ཅན་ཐམས་ཅད་ཉེ་བར་འཚོ་བ་ཡིན་ཏེ། འདི་ལྟར་དགེ་བའི་ལས་ཡོངས་སུ་བསྐྱེད་ཅིང་སྡིག་པའི་ལས་རྣམ་པར་ཟློག་པས་ཀྱང་ཉེ་བར་འཚོ་བ་ཡིན། ཤེས་རབ་ཀྱི་འོད་སྣང་བར་མཛད་ཅིང་གཏི་མུག་གི་མུན་པ་རྣམ་པར་སེལ་བས་ཀྱང་ཉེ་བར་འཚོ་བ་ཡིན། འགྲོ་བ་ཐམས་ཅད་ཡོངས་སུ་སྐྱོབ་ཅིང་བྱམས་པ་ཆེན་པོ་དང་ལྡན་པས་ཀྱང་ཉེ་བར་འཚོ་བ་ཡིན། འགྲོ་བ་ཐམས་ཅད་ཡོངས་སུ་འགྲེལ་ཅིང་ཐུགས་རྗེ་ཆེན་པོ་དང་ལྡན་པས་ཀྱང་ཉེ་བར་འཚོ་བ་ཡིན། དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་འཕེལ་བར་མཛད་ཅིང་།
ཆོས་ཀྱི་ལོ་ཐོག་ལ་བབ་པས་ཀྱང་ཉེ་བར་འཚོ་བ་ཡིན། སེམས་ཅན་གྱི་རྙོག་པ་ཡོངས་སུ་སེལ་བས་དད་པ་བསྐྱེད་པས་ཀྱང་ཉེ་བར་འཚོ་བ་ཡིན། རྒྱུ་དང་འབྲས་བུ་རྣམ་པར་ཆུད་མི་ཟ་བས་མཐོང་བ་དོན་ཡོད་པས་ཀྱང་། ཉེ་བར་འཚོ་བ་ཡིན། སྐྱེ་བ་དང་འཕོ་བ་ཡང་དག་པར་སྟོན་ཅིང་། གཟུགས་སྣང་བར་མཛད་པས་ཀྱང་ཉེ་བར་འཚོ་བ་ཡིན། དགེ་བའི་རྩ་བ་རྣམ་པར་ཆུད་མི་གཟོན་ཅིང་ཁོང་ཁྲོ་བ་མི་མངའ་བས་ཀྱང་ཉེ་བར་འཚོ་བ་ཡིན། སློབ་མའི་ཡོན་ཏན་པད་མོའི་ཁ་ཕྱེ་ཞིང་རྒྱས་པར་མཛད་དེ། སེམས་ཅན་རྣམས་ལ་ཡེ་ཤེས་ཀྱི་འོད་ཟེར་ཚད་མེད་པ་རབ་ཏུ་གཏོང་བས་ཀྱང་ཉེ་བར་འཚོ་བ་ཡིན། སྤྱད་པ་བརྩམས་པ་ཡོངས་སུ་གྲུབ་པར་མཛད་ཅིང་། བྱང་ཆུབ་སེམས་དཔའི་སྤྲོ་བ་བསྐྱེད་པས་ཀྱང་ཉེ་བར་འཚོ་བ་ཡིན། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུའི་ཉི་མ་ནི་ཡེ་ཤེས་ཀྱི་འོད་ཟེར་དཀྱིལ་འཁོར་ཚད་མེད་པ་དང་ལྡན་པའི་ཕྱིར་རོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་གསུམ་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་དེ་ཉིད་འཛམ་བུའི་གླིང་དུ་འཆར་བའི་ཚེ། ཐོག་མ་ཉིད་དུ་རིའི་རྒྱལ་པོ་ཆེན་པོ་འདི་ལྟ་སྟེ། རི་རབ་རིའི་རྒྱལ་པོ་ལ་སྣང་བར་འགྱུར་རོ། །དེའི་འོག་ཏུ་དེ་མ་ཡིན་པའི་རི་ཆེན་པོ་གཞན་ལ་སྣང་བར་འགྱུར་རོ། །དེའི་འོག་ཏུ་རི་ནག་པོ་དག་ལའང་སྣང་བར་འགྱུར་རོ། ། དེའི་འོག་ཏུ་ས་ཕྱོགས་མཐོན་པོ་རྣམས་སུ་སྣང་བར་འགྱུར་རོ། །དེའི་འོག་ཏུ་འཛམ་བུའི་གླིང་འདིའི་ཕྱོགས་དམའ་བ་དག་ཀྱང་སྣང་བར་བྱེད་དེ། འོན་ཀྱང་ཉི་མའི་དཀྱིལ་འཁོར་ལ་འདིར་ནི་ཐོག་མ་ཉིད་དུ་འོད་ཟེར་དགྱེའོ་ཞེའམ། འདིར་ནི་ཐོག་མར་སྣང་བར་བྱའོ། །ཞེས་བྱ་བའི་རྣམ་པར་རྟོག་པ་མེད་དེ། སྤྲོས་པ་མེད་ཀྱང་
ཉི་མའི་དཀྱིལ་འཁོར་འོད་མཉམ་དུ་གཏོང་ཞིང་འཆར་བ་ནི་མེད་པ་མ་ཡིན་ཏེ། ས་མཐོན་དམན་གྱི་ཁྱད་པར་གྱིས་མཐོ་མཐོ་ལ་སྔར་འཆར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང་ཆོས་ཀྱི་དབྱིངས་མཐའ་དང་དབུས་མྱེད་པའི་རིགས་སུ་འཆར་བར་གྱུར་པའི་ཚེ། རྟག་ཏུ་རྒྱུན་མི་འཆད་པར་ཐོགས་པ་མེད་པའི་ཡེ་ཤེས་ཀྱི་འོད་ཟེར་སྣང་བ་འགྱེད་དེ། །དེ་ཡོངས་སུ་བཀྱེ་བའི་ཚེ་ཡང་ཐོག་མ་ཉིད་དུ་ལྷག་པའི་བསམ་པ་རིའི་རྒྱལ་པོ་ཆེན་པོ་ལྟ་བུ་དང་ལྡན་པའི་སྐྱེས་བུ་དམ་པ་རྣམས་ལ། ཆོས་ཀྱི་སྣང་བ་ཆེན་པོ་ཡང་དག་པར་སྟོན་པའི་ཚུལ་དུ་འཆར་བར་འགྱུར་རོ། །དེའི་འོག་ཏུ་ཉན་ཐོས་དང་། རང་སངས་རྒྱས་ཀྱི་ཐེག་པར་ཞུགས་པ་རྣམས་ལ་འཆར་བར་འགྱུར་རོ། །དེའི་འོག་ཏུ་དགེ་བའི་རྩ་བ་ངེས་པ་དང་ལྡན་པའི་སེམས་ཅན་རྣམས་ལ་བསམ་པའི་སྣོད་ཇི་ལྟ་བ་བཞིན་དུ་ཡེ་ཤེས་ཀྱི་སྣང་བ་ཆེན་པོ་ཡང་དག་པར་བསྟན་པའི་ཚུལ་གྱིས་འཆར་བར་འགྱུར་རོ། །དེའི་འོག་ཏུ་ཆུང་ངུ་ན་ལོག་པར་ངེས་པའི་སེམས་ཅན་ཡན་ཆད། སེམས་ཅན་ཐམས་ཅད་ལའང་དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འཆར་བར་འགྱུར་རོ། །དེ་ལྟར་ཤར་ནས་ཀྱང་སེམས་ཅན་རྣམས་ལ་ཤིན་ཏུ་ཕན་པར་འགྱུར་ཏེ། མ་འོངས་པའི་རྒྱུ་ཡང་ཡོངས་སུ་སྨིན་པར་མཛད་ཅིང་། དགེ་བའི་ཆོས་ཀྱིས་རྣམ་པར་འཕེལ་བར་མཛད་ཀྱང་། དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་འོད་ཟེར་དེ་དག་ནི་སེམས་ཅན་འདི་རྣམས་ལ། བདག་ཅག་གིས་ཐོག་མ་ཉིད་དུ་ཐེག་པ་ཆེན་པོས་སྣང་བར་བྱས་ཏེ། དེའི་འོག་ཏུ་བསམ་པ་འབྲིང་དང་ལྡན་པ་རྣམས་ལ། ཉན་ཐོས་དང་། རང་སངས་རྒྱས་ཀྱི་ཐེག་པས་རྣམ་པར་དག་པར་བྱ་བའི་ཕྱིར་སྣང་བར་བྱའོ། །དེའི་འོག་ཏུ་སེམས་ཅན་དགེ་བའི་བསམ་པ་ཅན་མོས་པའི་ཐེག་པ་དང་ལྡན་པ་རྣམས་ལ་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་
བྱ་བའི་ཚུལ་གྱིས་སྣང་བར་བྱའོ། །དེའི་འོག་ཏུ་ཆུང་ངུ་ན་སེམས་ཅན་ལོག་པར་ངེས་པ་ཡན་ཆད། སེམས་ཅན་ཐམས་ཅད་ཀྱི་བསམ་པ་ཡོངས་སུ་སྦྱང་བར་བྱའོ། །ལྟ་བ་བསྲང་བར་བྱའོ་ཞེས་རྣམ་པར་རྟོག་པ་མི་མངའ། སྤྲོས་པ་མི་མངའ་སྟེ། འོན་ཀྱང་འོད་ཟེར་མཉམ་པར་འགྱེད་པས། འོད་ཟེར་གྱི་མཉམ་པ་ཉིད་ཀུན་ཏུ་བསྒྲིབས་པ་མེད་པར་སེམས་ཅན་ཐམས་ཅད་ལ་རབ་ཏུ་སྣང་བར་འགྱུར་ཏེ། དེ་ནི་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ལ་རྣམ་པར་རྟོག་པ་མི་མངའ་བའི་ཕྱིར་རོ། །དེ་ཡང་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་རྣམ་པར་རྟོག་པ་མེད་ཅིང་། འོད་ཟེར་མཉམ་པ་ཉིད་དུ་འཆར་ཡང་རི་ཆེན་པོ་རྣམས་ལ་རྣམ་པ་ཐ་དད་དུ་སྣང་བར་འགྱུར་རོ། །དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་རྣམ་པར་རྟོག་པ་མི་མངའ་ཞིང་། འོད་ཟེར་མཉམ་པ་ཉིད་དུ་འཆར་ཡང་སེམས་ཅན་རྣམས་ཀྱི་དགེ་བའི་རྩ་བ་རྣམ་པ་ཐ་དད་པ་དང་། བསམ་པའི་རྣམ་པ་ཐ་དད་པས། དེ་བཞིན་གཤེགས་པའི་འོད་ཟེར་རྣམ་པ་ཐ་དད་པ་ཡང་སྣང་ཞིང་ཡོད་དོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བཞི་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་དེ་ཉིད་ཤར་ཀྱང་སེམས་ཅན་དམུས་ལོང་རྣམས་ཀྱི་མིག་ལམ་དུ་སྣང་བར་མི་འགྱུར་ཏེ། དེ་ནི་མིག་དང་མི་ལྡན་པའི་ཕྱིར་རོ། །ཀྱེ་རྒྱལ་བའི་སྲས་དེ་ལྟར་ཉི་མའི་དཀྱིལ་འཁོར་དེ་སེམས་ཅན་དམུས་ལོང་རྣམས་མིག་དང་མི་ལྡན་པའི་ཕྱིར་མིག་ལམ་དུ་མི་སྣང་དུ་ཟིན་གྱིས་ཀྱང་། སེམས་ཅན་དམུས་ལོང་རྣམས་ལ་ཡང་ཉི་མར་གདགས་པ་དང་། ཁ་ཟས་འཇུ་བ་དང་། བདེ་བར་སྤྱོད་པ་དང་། ལུས་ཀྱི་གྲང་བ་བསྩལ་པ་དང་། ལུས་ཡང་བ་དང་། མྱིག་ནད་དང་། ལུས་ལ་གནས་པའི་ནད་རླུང་ངམ། མཁྲིས་པའམ། བད་ཀན་ལས་
བྱུང་བ་དེ་དག་ཐམས་ཅད་སེལ་བར་བྱེད་པའི་སྒོར་མི་ཕན་པ་མ་ཡིན་ཏེ་ཕན་འདོགས་སོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང་སེམས་ཅན་ལྷག་པའི་བསམ་པའི་མིག་མདོངས་པར་གྱུར་པ་མོས་པ་ལོག་པ། ལྟ་བ་ལོག་པ། སྦྱོར་བ་ལོག་པ། འཚོ་བ་ལོག་པ། དམུས་ལོང་ལྟ་བུར་གྱུར་པའི་མིག་ལམ་དུ་སྣང་བར་མི་འགྱུར་ཏེ། དེ་ནི་དད་པའི་མིག་དང་མི་ལྡན་པའི་ཕྱིར་རོ། །ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་སེམས་ཅན་དམུས་ལོང་ལྟ་བུར་གྱུར་པ། དད་པའི་མིག་དང་མི་ལྡན་པ་དེ་དག་གི་མིག་ལམ་དུ་སྣང་བར་མ་གྱུར་ཏུ་ཟིན་ཀྱང་། སེམས་ཅན་རྣམ་པ་དེ་ལྟ་བུ་དག་ལ་དེ་བཞིན་གཤེགས་པའི་མཐུས། སེམས་ཅན་དེ་དག་གི་ལུས་ལ། མི་བདེ་བ་རྩེ་ཟིལ་བར་འགྱུར་བ་དང་། མ་འོངས་པའི་ཉོན་མོངས་པའི་རྒྱུའི་ལྷག་པ་སེལ་པའི་སྒོར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཕན་པར་མི་འགྱུར་བ་མ་ཡིན་ཏེ། ཕན་འདོགས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པ་ལ་ཡོན་ཏན་རིན་པོ་ཆེ་ཐམས་ཅད་ཡང་དག་པར་བསགས་པ་ཞེས་བྱ་བའི་འོད་ཟེར་དང་ཐམས་ཅད་མཁྱེན་པའི་ཡེ་ཤེས་ཀྱི་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། རྣམ་པར་དག་པས་རྣམ་པར་རོལ་པའི་ཡེ་ཤེས་ཀྱི་སྣང་བ་དང་ལྡན་པ་ཞེས་བྱ་བའི་འོད་ཟེར་དང་དབྱངས་ཆེན་པོས་ཡེ་ཤེས་རྣམ་པར་དགོད་པའི་དོན་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། སྤྱོད་པ་ཐམས་ཅད་ཀྱིས་ཤིན་ཏུ་ཚིམ་པར་བྱེད་པའི་ཡེ་ཤེས་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། སེམས་ཅན་ཐམས་ཅད་ཀྱི་ཐེ་ཙོམ་ཐམས་ཅད་ཡོངས་སུ་གཅོད་པའི་ཡུལ་ལ་རྣམ་པར་རོལ་པ་ཞེས་བྱ་བའི་འོད་ཟེར་དང་། མི་གནས་པའི་ཡེ་ཤེས་རྣམ་པར་འཕྲུལ་པའི་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། སྤྲོས་པ་ཐམས་ཅད་ཡང་དག་པར་གཅོད་པའི་ཡུལ་ལ་ཡེ་ཤེས་ཀྱི་རྣམ་པར་རོལ་པ་ཞེས་བྱ་བའི་འོད་ཟེར་དང་། ཐེག་པ་ཐ་དད་
པའི་སྣོད་ལ་དབྱངས་རབ་ཏུ་བསྒྲགས་པ་ཞེས་བྱ་བའི་འོད་ཟེར་དང་། ཞིང་གི་རྒྱུན་དུ་སེམས་ཅན་ཡོངས་སུ་སྨིན་པར་མཛད་ཅིང་། སྐྱེ་བ་རྣམ་པར་སྦྱོང་བས་རྣམ་པར་རོལ་པའི་དཀྱིལ་འཁོར་གྱི་དབྱངས་ཤེས་བྱ་བའི་འོད་ཟེར་མངའ་སྟེ། ཀྱེ་རྒྱལ་བའི་སྲས་འོད་ཟེར་དེ་དག་ལ་སྩོགས་པ། དེ་བཞིན་གཤེགས་པའི་མཛོད་སྤུའི་གསེབ་ཀྱི་སྒོ་གཅིག་ནས་ཀྱང་འོད་ཟེར་སྟོང་ཚང་བར་འབྱུང་སྟེ། ལྔ་བརྒྱ་ནི་འོག་གི་ཕྱོགས་སུ་གཏོགས་སོ། །ལྔ་བརྒྱ་ནི་སྟེང་གི་ཕྱོགས་སུ་གཏོགས་སོ། །འོད་ཟེར་དེ་དག་མཐོང་བར་གྱུར་ན། བྱང་ཆུབ་སེམས་དཔའི་སངས་རྒྱས་ཀྱི་ཞིང་གཞན་དང་གཞན་ན་འཁོད་པ་རྣམས་ཀྱི་དེ་བཞིན་གཤེགས་པ་མཚན་ཐ་དད་པ་རྣམས་རབ་ཏུ་ཤེས་པར་འགྱུར་ཏེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་དེ་བཞིན་གཤེགས་པའི་ཡུལ་ལ་མགོ་ཡོངས་སུ་དག་པ་བཅུ་རབ་ཏུ་འཐོབ་པར་འགྱུར་རོ། །དེ་བཞིན་གཤེགས་པའི་ཡུལ་ལ་མིག་ཡོངས་སུ་དག་པ་བཅུ་དང་། རྣ་བ་ཡོངས་སུ་དག་པ་བཅུ་དང་། སྣ་ཡོངས་སུ་དག་པ་བཅུ་དང་། ལྕེ་ཡོངས་སུ་དག་པ་བཅུ་དང་། ལུས་ཡོངས་སུ་དག་པ་བཅུ་དང་། ལག་པ་ཡོངས་སུ་དག་པ་བཅུ་དང་། རྐང་པ་ཡོངས་སུ་དག་པ་བཅུ་དང་། ས་ཡོངས་སུ་དག་པ་བཅུ་དང་། ཡེ་ཤེས་འབྱམ་ཀླས་པ་ཡོངས་སུ་དག་པ་བཅུ་རབ་ཏུ་འཐོབ་པར་གྱུར་ཏེ། དེ་དག་གི་སྐྱེ་མཆེད་བྱང་ཆུབ་སེམས་དཔའི་སར་གྲུབ་པ་དེ་དག་གིས་འོད་ཟེར་དེ་དག་མཐོང་ཞིང་ཤེས་པར་གྱུར་ནས་ཀྱང་དེ་དག་གི་སྐྱེ་མཆེད་དེ་དག་དེ་བས་ཀྱང་རྣམ་པར་དག་པར་འགྱུར་ཏེ། དེ་དག་གི་དགེ་བའི་རྩ་བ་ཐམས་ཅད་ཀྱང་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་འགྱུར་རོ། །ཉན་ཐོས་ཀྱི་ཐེག་པ་པ་དང་། རང་སངས་རྒྱས་ཀྱི་ཐེག་པ་པ་རྣམས་ལ་ཡང་། ཕྱོགས་གཅིག་གི་སར་དྲི་མ་ཐམས་ཅད་ཡོངས་སུ་བྱང་བའི་རྒྱུར་འགྱུར་རོ། །སེམས་ཅན་དམུས་ལོང་ལྟ་བུ་རྣམས་ཀྱིས་ཀྱང་ལུས་ཀྱི་བདེ་བ་རབ་ཏུ་འཐོབ་ཅིང་ཡོངས་སུ་རྫོགས་པ་དང་། སྐྱོན་མེད་པ་དང་། རྣམ་པར་དག་
པ་དང་། ཤིན་ཏུ་དུལ་བ་རབ་ཏུ་འགྲུབ་པར་འགྱུར་ཏེ། དེ་ནས་གོང་དུ་ཡང་རྣམ་པར་བསྒོམ་པའི་ཡེ་ཤེས་རབ་ཏུ་འགྲུབ་པའི་རྒྱུར་འགྱུར་རོ། །སེམས་ཅན་དམྱལ་བ་པ་དང་། བྱོལ་སོང་གི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་རྣམས་དང་། ལོག་པར་ལྟུང་བའི་སེམས་ཅན་རྣམས་ལའང་ལུས་ཀྱི་བདེ་བ་ཉེ་བར་འགྲུབ་པའི་རྒྱུར་འགྱུར་ཏེ། ལུས་ཀྱི་བདེ་བ་དེ་དང་ལྡན་པར་གྱུར་ནས་ཀྱང་། ལོག་པར་ལྟུང་བ་དེ་དག་ནས་ཤི་འཕོ་ཞིང་འགྲོལ་བར་འགྱུར་རོ། །ལོག་པར་ལྟུང་བའི་ངན་སོང་དེ་དག་ནས་ཤི་འཕོས་ནས་ཀྱང་ལྷ་དང་མིར་སྐྱེ་སྟེ། ཀྱེ་རྒྱལ་བའི་སྲས་སེམས་ཅན་དེ་དག་གིས་ནི་ཁོང་ཏ་བདག་ཅག་རྒྱུ་གང་དང་རྐྱེན་གང་དང་སུའི་མཐུས་དེར་སྐྱེས་པར་གྱུར་པ་ཡང་མི་ཤེས་ཁོང་དུ་མི་ཆུད་དོ། །འདི་ལྟ་སྟེ་དཔེར་ན་སེམས་ཅན་དམུས་ལོང་དུ་གྱུར་པ་དེ་དག་འདི་སྙམ་དུ་སེམས་ཏེ། བདག་ཅག་ནི་ཚངས་པས་བྱས་པ་སྟེ། ཚངས་པས་སྤྲུལ་པའོ་ཞེས་བྱ་བའི་ལྟ་བའི་རྣམ་པ་དང་ལྡན་ཡང་། དེ་བཞིན་གཤེགས་པའི་ཏིང་ངེ་འཛིན་གྱི་དཀྱིལ་འཁོར་ཀུན་ཏུ་རྣམ་པར་འཕྲུལ་པ་ལ་བཞུགས་ཤིང་སངས་རྒྱས་ཀྱི་གསུང་སྟོང་ཕྲག་དྲུག་ཅུ་དང་ལྡན་པས་སེམས་ཅན་དེ་དག་ལ་བཀའ་སྩལ་ཏེ། གྲོགས་པོ་དག་འདི་ནི་ཚངས་པའི་ཞིང་མ་ཡིན། འཇིག་རྟེན་གྱི་མགོན་པོའི་ཞིང་མ་ཡིན་ཏེ། འདི་ནི་སངས་རྒྱས་ཀྱི་ཞིང་ངོ་། །ཁྱོད་ནི་དེ་བཞིན་གཤེགས་པས་ཡོངས་སུ་སྨིན་པར་བྱས་པའོ། །ཞེས་བཀའ་སྩལ་ན། སེམས་ཅན་དེ་དག་ཀྱང་དེ་བཞིན་གཤེགས་པའི་བྱིན་གྱི་རླབས་ཀྱིས་དྲན་པར་གྱུར་ནས། དེ་དག་དེ་མ་ཐག་ཏུ་དགའ་རངས་ཤིང་ཡིད་བདེ་བས་རབ་ཏུ་དགའ་བ་དང་། བདེ་བའི་ཉམས་ཀྱི་ཡིད་སྤྲོ་བ་དང་། ལྡན་པར་གྱུར་ནས་མེ་ཏོག་གི་སྤྲིན་དང་། སྤོས་ཀྱི་སྤྲིན་དང་། རོལ་མོའི་སྤྲིན་དང་། ནབ་བཟའི་སྤྲིན་དང་། གདུགས་ཀྱི་སྤྲིན་དང་། རྒྱལ་མཚན་གྱི་སྤྲིན་དང་། བ་དན་གྱི་སྤྲིན་དང་། རིན་པོ་ཆེའི་སྤྲིན་དང་། སེང་གེའི་རྒྱལ་མཚན་དང་། ཟླ་བ་ཁམ་པའི་ཁང་པ་བརྩེགས་པའི་སྤྲིན་
དང་། བསྟོད་པའི་སྤྲིན་དང་། རྒྱན་སྣ་ཚོགས་ཤིན་ཏུ་བསྒྲུབས་པའི་སྤྲིན་རྒྱ་ཆེན་པོས་དེ་བཞིན་གཤེགས་པ་ལ་རིམ་གྲོ་བྱེད་དོ། །བཀུར་སྟི་བྱེད་དོ། །བསྟི་སྟང་བྱེད་དོ། །མཆོད་པ་བྱེད་དོ། ། དེ་ཅིའི་ཕྱིར་ཞེ་ན། དེ་ནི་དེ་དག་གིས་ལྷའི་མིག་རྣམ་པར་དག་པར་བྱས་པའི་ཕྱིར་ཏེ། སེམས་ཅན་དེ་དག་ལའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དེ་བཞིན་གཤེགས་པ་ལུང་སྟོན་ཏོ། །ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ནི། སེམས་ཅན་དམུས་ལོང་དུ་གྱུར་པ་རྣམས་ལ་ཡང་དགེ་བའི་རྩ་བ་ཡོངས་སུ་སྨིན་པར་མཛད་པས་ཕན་འདོགས་པ་ཡིན་ནོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཟླ་བའི་དཀྱིལ་འཁོར་འཆར་བར་འགྱུར་བའི་ཚེ། རྨད་དུ་བྱུང་བའི་ཆོས་བཞི་སྔ་ཕྱི་མེད་པར་བྱེད་དེ། བཞི་གང་ཞེ་ན་འདི་ལྟ་སྟེ། སྐར་མ་ཐམས་ཅད་ཟིལ་གྱིས་གནོན་ཏོ། །འཕེལ་བ་དང་འགྲིབ་པ་ཡང་ཡོངས་སུ་སྟོན་ཏོ། །འཛམ་བུའི་གླིང་ཐམས་ཅད་ཀྱི་ཆུ་དང་བའི་སྣོད་ཀུན་ཏུ་ཡང་གཟུགས་བརྙན་རབ་ཏུ་སྣང་ངོ་། །སེམས་ཅན་ཀུན་གྱིས་བལྟས་ན་ཡང་མངོན་སུམ་དུ་གནས་པར་སྣང་སྟེ། དེ་ལ་རྣམ་པར་རྟོག་པ་མེད་དོ། །སྤྲོས་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྐུ་ཟླ་བའི་དཀྱིལ་འཁོར་ཀྱང་རྨད་དུ་བྱུང་བའི་ཆོས་བཞི་སྔ་ཕྱི་མེད་པར་སྟོན་ཏོ། །བཞི་གང་ཞེ་ན་འདི་ལྟ་སྟེ། སློབ་པ་དང་མི་སློབ་པ་ཐམས་ཅད་དང་། རང་སངས་རྒྱས་ཐམས་ཅད་ཀྱི་ཡོན་ཏན་རྣམ་པ་ཐམས་ཅད་དུ་ཟིལ་གྱིས་གནོན་ཏོ། །ཇི་ལྟ་བུར་མོས་པའི་སེམས་ཅན་རྣམས་ཀྱི་ལྟ་བ་རྣམ་པ་ཐ་དད་པའི་ཚུལ་དུ་སྐུ་ཚེའི་ཚད་རྣམ་པ་ཐ་དད་པ་ཡང་ཡང་དག་པར་སྟོན་ཏེ། དེ་བཞིན་གཤེགས་པའི་སྐུ་ཟླ་བའི་
དཀྱིལ་འཁོར་ལ་འཕེལ་བ་དང་། འགྲིབ་པ་མི་མངའ་འོ། །འཇིག་རྟེན་གྱི་ཁམས་ཐམས་ཅད་དུ་ལྷག་པའི་བསམ་པ་དང་། སེམས་ཡོངས་སུ་དག་ཅིང་མོས་པ་ཡོངས་སུ་བསྒོམས་པའི་སྟོབས་དང་ཤུགས་སུ་ལྡན་པའི་སེམས་ཅན་བྱང་ཆུབ་ཀྱི་སྣོད་རྣམས་ལ་ཡང་གཟུགས་བརྙན་རབ་ཏུ་འབྱུང་ངོ་། །སེམས་ཅན་ཀུན་གྱིས་བལྟས་ཀྱང་བདག་བདག་ལ་མངོན་དུ་གཟིགས་པར་འཛིན་ཏེ། བསམ་པ་ཇི་ལྟ་བ་བཞིན་དུ་ཆོས་ཉན། ཐེག་པ་གང་གིས་འདུལ་བའི་ས་ཇི་བཞིན་དུ་རྣམ་པར་གྲོལ་བར་འགྱུར་ཏེ། སེམས་ཅན་ཇི་ལྟ་བུར་འདུལ་བ་བཞིན་དུ་སྣང་བའི་ཚུལ་གྱིས། དེ་བཞིན་གཤེགས་པའི་སྐུ་ཡང་རབ་ཏུ་སྟོན་ཏེ། དེ་བཞིན་གཤེགས་པའི་སྐུ་ཟླ་བའི་དཀྱིལ་འཁོར་དེ་ལ་རྣམ་པར་རྟོག་པ་མི་མངའ་སྤྲོས་པ་མི་མངའ་འོ། །རྣམ་པར་རྟོག་པ་མི་མངའ་ཞིང་སྤྲོས་པ་མི་མངའ་ས་ཀྱང་། ཕྲིན་ལས་དེ་དག་ལ་རབ་ཏུ་སྤྱོད་དོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། སྟོང་གསུམ་གྱི་སྟོང་ཆེན་པོའི་བདག་པོ་ཚངས་པ་ཆེན་པོ་ནི་ལས་གྲོན་ཆུང་ངུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་ལུས་ཡོངས་སུ་སྟོན་ཏོ། །འོན་ཀྱང་ལུས་ཡོངས་སུ་འབྱེད་པ་མེད་དོ། །ལུས་ཐ་དད་པར་བྱེད་པ་མེད་དོ། །སྟོང་གསུམ་གྱི་སྟོང་ཆེན་པོར་གཏོགས་པའི་སེམས་ཅན་རྣམས་ཀྱིས་ཀྱང་བསམ་པ་མཉམ་པ་ཉིད་ཇི་ལྟ་བུ་དང་ལྡན་པའི་ཚུལ་བཞིན་དུ་ལུས་མཉམ་པ་ཉིད་དུ་མཐོང་ངོ་། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ཡང་སྐུ་ཡོངས་སུ་འབྱེད་པ་མི་མཛད། སྐུ་ཐ་དད་པར་མཛད་པ་ཡང་མི་མངའ་བར་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ལ་ཡང་བསམ་པ་དང་མོས་པ་ཇི་ལྟ་བ་བཞིན་དུ་སྐུ་ཡོངས་སུ་སྟོན་ཏེ། དེ་བཞིན་གཤེགས་པའི་སྐུ་ལ་རྣམ་པར་རྟོག་པ་མི་མངའ།
སྤྲོས་པ་མི་མངའ་འོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། སྨན་པའི་རྒྱལ་པོ་ཆེན་པོ་སྨན་གྱི་ཡོ་བྱད་དང་། ཆོ་ག་ལ་ཤིན་ཏུ་མཁས་པ་གཙུག་ལག་དང་། སྔགས་ཐམས་ཅད་ཀྱི་ཚུལ་ཤེས་པ་ཞིག་ཡོད་ལ། འཛམ་བུའི་གླིང་གི་སྨན་ཐམས་ཅད་དེའི་དབང་དུ་གྱུར་ཏེ། སྨན་པའི་རྒྱལ་པོ་ཆེན་པོ་དེའི་སྔོན་གྱི་དགེ་བའི་རྩ་བའི་སྟོབས་ཀྱི་ཤུགས་དང་། སྔགས་དང་རིག་སྔགས་ཀྱི་མཐུ་དང་། ཐབས་ཀྱིས་མཐོང་མ་ཐག་ཏུ་སེམས་ཅན་རྣམས་ཀྱི་ནད་ཡོངས་སུ་འཚོ་བར་འགྱུར་ཞིང་ནད་མེད་པར་འགྱུར་བ་ཞིག་ཡོད་དེ། དེ་ནས་སྨན་པའི་རྒྱལ་པོ་དེ་འཆི་བའི་དུས་ལ་བབ་པར་གྱུར་ནས། དེ་འདི་སྙམ་དུ་སེམས་པར་གྱུར་ཏེ། ཀྱེ་ཧུད་སེམས་ཅན་འདི་དག་བདག་ཤི་བ་དང་། མགོན་མེད་པར་འགྱུར་གྱིས། བདག་གི་ཐབས་མཁས་པའི་སྟོབས་ཀྱིས། སྨན་ཐམས་ཅད་ཡོངས་སུ་བསྡུས་ཏེ། བདག་གི་ལུས་ལ་བསྐུའོ། །སྔགས་དང་རིག་སྔགས་ཀྱི་སྟོབས་དང་བྱིན་གྱི་རླབས་ཀྱིས་ཀྱང་བདག་གི་ལུས་བྱིན་གྱིས་བརླབས་ཏེ། ཅི་ནས་ཀྱང་བདག་ཤི་ནས་ལུས་མི་འཇིག་པ་དང་། མི་སྐམ་པ་དང་། མི་ཉམས་ཤིང་འགྲོ་བ་དང་འོང་བ་དང་། འདུག་པས་ཀྱང་སྤྱོད་པ་དང་། ནད་ཐམས་ཅད་སོས་པར་བྱ་བའི་ཕྱིར་སྨན་པའི་ལས་སུ་བྱ་བ་ཐམས་ཅད་ཀྱང་སྤྱོད་ཅིང་། བལྟ་བ་དང་མཉན་པའི་དོན་སྤྱོད་པས་ཀྱང་སྔོན་ཇི་ལྟ་བ་བཞིན་དུ། ཕྱི་ནས་ཀྱང་གནས་པར་བྱའོ། །སྙམ་དུ་སེམས་པ་ཞིག་ཡོད་ན། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་པའི་རྒྱལ་པོ་ཆེན་པོ་བླ་ན་མེད་པ་ཉོན་མོངས་པའི་ནད་ཐམས་ཅད་རབ་ཏུ་ཞི་བར་མཛད་པ་ལ་མཁས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཀུན་
མཁྱེན་པའི་རྩི་ལ་བརྩོན་འགྲུས་ཤིན་ཏུ་མཛད་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་མཁས་པ་དང་། སྔགས་དང་རིག་སྔགས་ལ་ཤིན་ཏུ་བསླབས་པ། སྟོབས་དང་མི་བསྙེངས་པ་དང་། སངས་རྒྱས་ཀྱི་ཆོས་མ་འདྲེས་པ་ལ་རབ་ཏུ་མཁས་པ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཚུལ་མཁྱེན་པ། དེ་བཞིན་གཤེགས་པ་ཐམས་ཅད་ཀྱི་མངའ་ཆེན་པོ་བརྙེས་པ་དེས་ཀྱང་། སྔོན་བྱང་ཆུབ་སེམས་དཔའི་སྤྱོད་པ་ལ་ཞུགས་ཤིང་། བསོད་ནམས་དང་ཡེ་ཤེས་ཀྱི་ཚོགས་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་མཁས་པའི་སྔགས་དང་། རིག་སྔགས་དང་སྨན་གྱི་མཐུས་ཕྱི་མའི་མཐའི་མུར་ཐུག་པའི་བསྐལ་པར་འགྲོ་བ་ཐམས་ཅད་ཀྱི་ཉོན་མོངས་པའི་ནད་གསོ་བའི་ཕྱིར་སྐུ་ཚེའི་ཚད་བྱིན་གྱིས་བརླབས་པས། དེའི་སྐུ་ཡོངས་སུ་དག་པའི་ཕྱིར་མཐོང་མ་ཐག་ཏུ་ཆེད་དུ་མི་མཛད་ཅིང་། ལྷུན་གྱིས་གྲུབ་པར་སེམས་ཅན་རྣམས་ཀྱི་ཉོན་མོངས་པའི་ནད་ཐམས་ཅད་རབ་ཏུ་ཞི་བར་འགྱུར་ཏེ། སངས་རྒྱས་ཀྱི་ཕྲིན་ལས་ཐམས་ཅད་ཀྱང་རྒྱུན་མི་འཆད་པར་འབྱུང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བརྒྱད་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་ཆེན་པོ་འོད་ཐམས་ཅད་འདུས་པས་རྣམ་པར་སྣང་བའི་སྙིང་པོ་ཞེས་བྱ་བ་ཡོད་དེ། ཀྱེ་རྒྱལ་བའི་སྲས་ནོར་བུ་རིན་པོ་ཆེ་ཆེན་པོ་དེའི་འོད་ཀྱིས་སེམས་ཅན་གང་ལ་བབ་པ་དེ་དག་ཐམས་ཅད་ཀྱང་འདི་ལྟ་སྟེ། ནོར་བུ་རིན་པོ་ཆེའི་འོད་ཐམས་ཅད་འདུས་པས་རྣམ་པར་སྣང་བའི་སྙིང་པོའི་ཁ་དོག་ཏུ་ཁ་དོག་གཅིག་པར་འགྱུར་རོ། །གང་གིས་ནོར་བུ་རིན་པོ་ཆེ་དེ་མཐོང་བར་གྱུར་པ་དེ་དག་གི་མིག་ཀྱང་ཡོངས་སུ་དག་པར་འགྱུར་རོ། །ནོར་བུ་རིན་པོ་ཆེ་དེའི་འོད་ཀྱི་དཀྱིལ་འཁོར་གྱིས་ཇི་ཙམ་དུ་ཁྱབ་པར་གྱུར་པ་དེ་ཙམ་དུ་འོད་ཀྱི་དཀྱིལ་
འཁོར་དེ་ལས་སེམས་ཅན་བདེ་བར་བྱེད་པ་ཞེས་པའི་ནོར་བུ་རིན་པོ་ཆེའི་ཆར་འབབ་པར་འགྱུར་ཏེ། དེས་སེམས་ཅན་དེ་དག་ཀྱང་རབ་ཏུ་བདེ་བར་འགྱུར་ལ་སྡུག་བསྔལ་ཡང་རྒྱུན་ཆད་པར་འགྱུར་རོ། །ཀྱེ་རྒྱལ་བའི་སྲས་ལྟོས་དང་། ནོར་བུ་རིན་པོ་ཆེ་དེ་ཆོས་ཅི་ལ་ཡང་མི་རྟོག་ན་འོན་ཀྱང་དོན་ཆེན་པོ་རབ་ཏུ་སྒྲུབ་པོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ལ་ཡང་སྐུ་རིན་པོ་ཆེ་ཆེན་པོ་བསོད་ནམས་ཐམས་ཅད་ཡོངས་སུ་བསྡུས་པས། ཡེ་ཤེས་ཆེན་པོའི་སྙིང་པོ་དང་ལྡན་པ་མངའ་སྟེ། དེ་བཞིན་གཤེགས་པའི་སྐུ་རིན་པོ་ཆེའི་ཡེ་ཤེས་ཀྱི་འོད་ཟེར་དེ་དག་གིས་སེམས་ཅན་ཇི་སྙེད་ལ་རེག་པར་གྱུར་པ་དེ་དག་ཐམས་ཅད་ཀྱང་འདི་ལྟ་སྟེ། དེ་བཞིན་གཤེགས་པའི་སྐུའི་ཁ་དོག་ཏུ་ཁ་དོག་གཅིག་པར་འགྱུར་རོ། །སེམས་ཅན་གང་གིས་དེ་བཞིན་གཤེགས་པའི་སྐུ་མཐོང་བར་གྱུར་པ་དེ་དག་གི་ཆོས་ཀྱི་མིག་ཀྱང་རྣམ་པར་དག་པར་འགྱུར་རོ། །དེ་བཞིན་གཤེགས་པའི་སྐུ་རིན་པོ་ཆེའི་འོད་ཟེར་གྱི་དྲ་བའི་དཀྱིལ་འཁོར་གྱིས། སེམས་ཅན་ཇི་སྙེད་ལ་རེག་པ་དེ་དག་ཐམས་ཅད་ཀྱང་དབུལ་བ་དང་ཡོངས་སུ་བྲལ་བར་འགྱུར་ཏེ། བྱང་ཆུབ་ཀྱི་སྒོའི་བར་གྱི་དེ་བཞིན་གཤེགས་པའི་བདེ་བའང་རབ་ཏུ་འཐོབ་པར་འགྱུར་རོ། །ཀྱེ་རྒྱལ་བའི་སྲས་ལྟོས་དང་། དེ་བཞིན་གཤེགས་པའི་སྐུ་ཆོས་གང་ལ་ཡང་རྟོག་པ་མི་མངའ་སྟེ། སྤྲོས་པ་མི་མངའ་ཡང་འགྲོ་བ་ཐམས་ཅད་ཀྱི་དོན་ཡོངས་སུ་འཐོབ་པར་མཛད་དོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་ནང་ན་རིན་པོ་ཆེའི་རྒྱལ་པོ་ཆེན་པོ་ཡིད་བཞིན་གྱི་ནོར་བུ་འགྲོ་བ་ཐམས་ཅད་ཀྱི་རྒྱན་གྱི་སྙིང་པོ་ཞེས་བྱ་བ་ཡོད་དེ། རིན་པོ་ཆེའི་རྒྱལ་པོ་དེ་ནི་ཡོན་ཏན་བརྒྱ་སྟོང་ཕྲག་བཅུ་དང་ལྡན་པ་སྟེ། ནོར་བུ་རིན་པོ་ཆེའི་རྒྱལ་པོ་དེ་གང་ན་འདུག་པ་དེ་འཁོར་གྱི་སེམས་ཅན་ཀུན་
གྱི་ནད་དང་སྡུག་བསྔལ་གྱི་གཙེ་བ་ཐམས་ཅད་མེད་པར་འགྱུར་རོ། །སེམས་ཅན་ཇི་སྙེད་ཅིག་ནོར་བུ་རིན་པོ་ཆེའི་རྒྱལ་པོ་དེ་ལ་འདོད་པས་སེམས་པ་དེ་དག་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་དེ། རིན་པོ་ཆེའི་རྒྱལ་པོ་ཆེན་པོ་དེ་ནི་བསོད་ནམས་མ་བྱས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་འགྱུར་བ་མ་ཡིན་ནོ། །ཀྱེ་རྒྱལ་བའི་སྲས་དེ་ལ་ནོར་བུ་རིན་པོ་ཆེའི་རྒྱལ་པོ་ཆེན་པོ་ཞེས་བྱ་བ་དེ་ནི་དེ་བཞིན་གཤེགས་པའི་སྐུ་སེམས་ཅན་ཐམས་ཅད་ཤིན་ཏུ་ཚིམ་པར་མཛད་པའི་ཚིག་བླ་དགས་ཏེ། གང་ན་དེ་བཞིན་གཤེགས་པའི་སྐུ་བལྟར་ཡོད་ཅིང་མཚན་མཉན་དུ་ཡོད་ལ་ཡོན་ཏན་དང་ལེགས་པ་ཡོངས་སུ་བརྗོད་དུ་ཡོད་པ། དེ་ཕྱོགས་ཀྱི་སེམས་ཅན་ཀུན་གྱི་འཁོར་བ་ལ་གནས་པའི་སྡུག་བསྔལ་དང་། མི་བདེ་བ་ཐམས་ཅད་མེད་པར་འགྱུར་རོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་སྐུ་རིན་པོ་ཆེ་དེ་ནི་ཇི་སྟེ། སེམས་ཅན་འཇིག་རྟེན་གྱི་ཁམས་ཐམས་ཅད་དུ་གཏོགས་པ་ཀུན་གྱིས་སྔ་ཕྱི་མེད་པར་སེམས་རྩེ་གཅིག་ཏུ་ཡིད་ལ་བྱ་བ་མ་འཁྲུགས་པས། དེ་བཞིན་གཤེགས་པའི་སྐུ་བལྟ་བའི་ཕྱིར་དམིགས་པ་བྱས་ན་དེ་དག་ཐམས་ཅད་ཀྱིས་སོ་སོ་ནས་དེ་བཞིན་གཤེགས་པའི་སྐུའང་མཐོང་བར་འགྱུར་ལ། ཐམས་ཅད་ཀྱི་ཆོས་ཀྱི་བསམ་པ་ཡང་ཡོངས་སུ་རྫོགས་པར་འགྱུར་རོ། །དེ་བཞིན་གཤེགས་པའི་སྐུ་དེ་ཡང་སེམས་ཅན་འདུལ་བའི་དབང་དུ་དེ་བཞིན་གཤེགས་པའི་བྱིན་གྱི་རླབས་ཀྱིས་བསྟན་པ་མ་གཏོགས་པར་སེམས་ཅན་བསོད་ནམས་མ་བྱས་པ་རྣམས་ཀྱི་མིག་ལམ་དུ་སྣང་བར་མི་འགྱུར་ཏེ། སེམས་ཅན་སུ་ལ་ཡང་རུང་སྟེ། དགེ་བའི་རྩ་བ་དེ་བཞིན་གཤེགས་པའི་སྐུ་བསྟན་པས་ཡོངས་སུ་སྨིན་པར་བྱ་བ་ཞིག་ཡོད་ན། དེ་དག་ཡོངས་སུ་སྨིན་པར་བྱ་བའི་དོན་དུ་དེ་བཞིན་གཤེགས་པའི་སྐུ་རིན་པོ་ཆེ་སྟོན་ཏོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཚད་མེད་པའི་རྗེས་སུ་སོང་ཞིང་ཕྱོགས་ཀྱི་དྲ་བ་ཐམས་ཅད་རྒྱས་པར་འགེངས་པ། ནམ་མཁའ་ལྟ་བུར་ཆགས་
པ་མེད་པའི་སྤྱོད་ཡུལ་དང་ལྡན་པ། ཆོས་ཀྱི་དབྱིངས་མཉམ་པ་ཉིད་ཁོང་དུ་ཆུད་པ་ཡང་དག་པའི་མཐའ་མཉམ་པ་ཉིད་ལ་གནས་པ་དེ་བཞིན་ཉིད་ལ་གནས་པ། དེ་བཞིན་ཉིད་མ་སྐྱེས་མ་འགགས་པ་དང་དུས་གསུམ་མཉམ་པ་ཉིད་ཀྱི་རྗེས་སུ་སོང་བ་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་ཐམས་ཅད་དང་བྲལ་བ། ཕྱི་མའི་མཐའི་མུར་ཐུག་པའི་ལྷག་པའི་བསམ་པ་ལ་ཞུགས་པ། འཇིག་རྟེན་གྱི་ཁམས་དང་། ཆོས་ཀྱི་དབྱིངས་མ་ལུས་པ་ཐམས་ཅད་དུ་ཁྱབ་པ། དེ་བཞིན་གཤེགས་པ་ཐམས་ཅད་དང་། སྐུའི་རྒྱན་གཅིག་ཏུ་གྱུར་པས་ཁོང་དུ་ཆུད་པར་བྱ་བའི་སྒོ་འདིས་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐུ་བལྟར་ཡོད་པར་ཤེས་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། དོན་འདི་ཉིད་ཡང་བརྟག་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཇི་ལྟར་མཁའ་དབྱིངས་ཀུན་ཏུ་མུ་མེད་དབྱིངས་ཡིན་ཏེ། །གཟུགས་དང་གཟུགས་མེད་དེ་བཞིན་དངོས་དང་དངོས་མེད་ཀུན། །ཕྱོགས་དང་ཕྱོགས་མཚམས་ཀུན་དང་སེམས་ཅན་ལུས་དང་ཞིང་། །དུས་གསུམ་མ་ལུས་མཁའ་དབྱིངས་ངེས་ཁྱབ་པོ། །དེ་བཞིན་གཤེགས་སྐུ་ཀུན་ནས་བལྟར་ཡོད་དེ་བཞིན་ཏེ། །འཇིག་རྟེན་ཁམས་དང་ཆོས་དབྱིངས་མ་ཁྱབ་གང་ཡང་མེད། །རྣམ་པ་ཀུན་ཏུ་བལྟར་མེད་གཟུང་མེད་རྒྱལ་བའི་སྐུ། །འདུལ་བའི་དོན་ཡོད་མགོན་པོའི་སྐུ་ནི་བལྟར་མེད་མིན། །ཇི་ལྟར་མཁའ་དབྱིངས་འདི་ནི་གཟུང་མེད་དབྱིངས་ཡིན་པས། །འགྲོ་བ་ཀུན་གྱི་ལས་ཀྱི་རྣམ་པ་མ་ལུས་གནས། །འོན་ཀྱང་བདག་གིས་གང་དུ་ཇི་ལྟར་སུ་ཡི་དོན། །ཅི་དང་ཅི་ཞིག་བྱ་ཞེས་མཁའ་དབྱིངས་རྟོག་པ་མེད། །དེ་བཞིན་སྐྱེས་མཆོག་སྐུ་ཡི་ཕྲིན་ལས་བརྟེན་བྱས་ཏེ། །ཕྱོགས་བཅུ་ཀུན་ན་དཀར་པོའི་ཆོས་རྣམས་ཅི་ཡོད་པ། །སྣ་ཚོགས་མི་རྣམས་བྱེད་ཀྱང་སངས་རྒྱས་སྐུ་ལ་ནི།
འདི་ཡི་དོན་ཞིག་བྱ་ཞེས་ཡོངས་སུ་རྟོག་མི་མངའ། །ཇི་ལྟར་འཛམ་བུའི་གླིང་དུ་ཉི་མ་འཆར་འགྱུར་ཚེ། །མུན་པ་མ་ལུས་སེལ་ཅིང་རབ་ཏུ་སྣང་བ་བྱེད། །ཤིང་དང་པད་མོའི་ནགས་ཚལ་ས་རྣམས་གར་བབ་པའི། །སྣ་ཚོགས་གནས་ཀྱིས་སེམས་ཅན་ཐམས་ཅད་ཉེ་བར་འཚོ། །དེ་བཞིན་རྒྱལ་བའི་ཉི་མ་སེམས་ཅན་ཀུན་འཚོ་སྟེ། །ལྷ་མི་འཇིག་རྟེན་རྣམས་ཀྱི་འདུས་བྱས་དགེ་རྩ་ལ། །མུན་པའི་ཐིབས་པོ་བསྩལ་ཅིང་ཤེས་རབ་སྣང་འགྱུར་བས། །མི་ཡི་དབང་པོ་མཆོག་མཐོང་བདེ་བ་ཐམས་ཅད་འཐོབ། །ཉི་མའི་འོད་ཟེར་ཐོག་མ་རི་རབ་ཁོར་ཡུག་ལ། །ཤར་ནས་དེ་ཡི་འོག་ཏུ་རི་བོ་མང་ལ་འཆར། །དེ་ནས་ས་སྟེངས་འདི་ཡི་ཕྱོགས་རྣམས་མཐོ་མཐོ་ལ། །དེ་ནས་ས་སྟེངས་དམའ་བའི་ཕྱོགས་རྣམས་སྣང་བར་བྱེད། །བདེ་གཤེགས་འོད་ཟེར་ཐོག་མར་རྒྱལ་སྲས་ལུས་ལ་འཆར། །དེ་ཡི་འོག་ཏུ་རང་རྒྱལ་ཐེག་ལ་གནས་པར་འཆར། །དེ་ནས་དབང་བསྒྱུར་དེ་ནས་སློབ་པ་རྣམས་ལ་འཆར། །དེ་ནས་མ་ལུས་འགྲོར་འཆར་སངས་རྒྱས་རྟོག་མི་མངའ། །མིག་དང་མི་ལྡན་ཉི་མ་ཀུན་ཏུ་སྣང་མི་མཐོང་། །འོན་ཀྱང་ཉི་མའི་གྲངས་ཀྱིས་དེ་དག་ཉེ་བར་འཚོ། །བཀྲེས་པ་སྤོང་ཞིང་ལུས་ལ་ཤིན་ཏུ་ལྷམ་པར་བྱེད། །དེ་ལྟར་སེམས་ཅན་ཐམས་ཅད་ཉི་མས་ཉེ་བར་འཚོ། །དད་དང་མི་ལྡན་སངས་རྒྱས་ཉི་མ་མི་མཐོང་སྟེ། །འོན་ཀྱང་རྒྱལ་བའི་བྱིན་གྱིས་དེའང་ཉེ་བར་འཚོ། །རྒྱལ་བའི་མཚན་ཐོས་བདེ་གཤེགས་འོད་ལ་རེག་གྱུར་ཀྱང་། །དེ་ལ་བྱང་ཆུབ་གོ་འཕང་བར་གྱི་རྒྱུར་འགྱུར་རོ། །ཟླ་བ་ཤར་བ་སྐར་མ་ཐམས་ཅད་ཟིལ་གྱིས་གནོན། །འགྲོ་བ་རྣམས་ལ་འཕེལ་དང་འགྲིབ་པ་ཡང་དུ་སྟོན། །ཆུ་མཚོ་ཀུན་ལ་གཟུགས་བརྙན་རབ་ཏུ་སྣང་བར་བྱེད། །གང་རྣམས་ཆུ་ལ་ལྟ་བ་དེ་ལ་མངོན་པར་སྣང་། །རྒྱལ་བའི་ཟླ་བ་ཤར་བ་ཉན་ཐོས་ཟིལ་གྱིས་གནོན། །འདུལ་བ་ཇི་བཞིན་རང་སྐུ་འཕེལ་དང་འགྲིབ་པ་སྟོན། །ལྷ་དང་མི་ཡི་སེམས་ལ་གཟུགས་བརྙན་རབ་ཏུ་སྣང་། །འགྲོ་བ་ཀུན་གྱིས་བདག་
བདག་མདུན་ན་བཞུགས་པར་ཤེས། །ཚངས་པ་ཇི་ལྟར་ཚངས་པའི་གནས་ནས་མ་གཡོས་ཀྱང་། །སྟོང་གསུམ་ཚངས་གནས་ཀུན་ཏུ་རང་གི་ལུས་ཀྱང་སྟོན། །ལྷ་དང་མི་རྣམས་རང་གི་ལུས་ཀྱི་དབང་དུ་བྱེད། །ཚངས་པ་རང་གིས་ལུས་ཀྱང་ཐ་དད་བྱེད་པ་མིན། །དེ་བཞིན་ཆོས་རྣམས་ཀུན་ལ་མངའ་འགྱུར་སྟོན་པ་ཡང་། །ཕྱོགས་བཅུ་ཀུན་ཏུ་སྐུ་གཟུགས་སྟོན་མཛད་དེ། །དཔེ་ཟླ་མེད་པ་རྣམས་ཀྱི་སྐུ་ལ་དབྱེ་བ་མེད། །མི་རྣམས་ཀུན་ཀྱང་སོ་སོ་སྟོན་པ་མངོན་གྱུར་ཤེས། །ཇི་ལྟར་གཙུག་ལག་ཀུན་ལ་མཁས་པའི་སྨན་པ་ཞིག །གང་གིས་མཐོང་བར་གྱུར་པ་དེ་དག་ནད་འཇི་བ། །གང་ཚེ་ཚེ་ཟད་འཆི་འགྱུར་དེ་ཚེ་སྨན་བསྡུས་ཤིང་། །རང་གི་ལུས་ལ་བསྐུས་ཏེ་སྤྱོད་པ་ཐམས་ཅད་སྟོན། །དེ་ལྟར་མི་མཆོག་དབང་པོ་མཚུངས་མེད་སྨན་པའི་རྒྱལ། །ཐབས་དང་ཤེས་རབ་ཡེ་ཤེས་ཀུན་ལ་རབ་མཁས་པ། །སྔོན་གྱི་སྤྱོད་པའི་ཁྱད་ཀྱིས་སྟོན་པའི་སྐུ་སྟོན་ཏེ། །མཐོང་ཞིང་འགྲོ་བའི་ཉོན་མོངས་མ་ལུས་ནད་ཀྱང་འཇི། །ཇི་ལྟར་གང་ཆེན་མཚོ་ལ་རིན་ཆེན་འབྱུང་ཡོད་པ། །འོད་ཀྱི་རྣམ་པ་ཐམས་ཅད་ཀུན་ཏུ་འགྱེད་བྱེད་དེ། །སེམས་ཅན་གང་ལ་རེག་པ་དེ་དག་དེ་ཚུལ་འགྱུར། །གང་གིས་མཐོང་གྱུར་དེ་དག་མིག་ཀྱང་རྣམ་པར་འདག །རྒྱལ་བ་རིན་ཆེན་དེ་བཞིན་ཤེས་རབ་འོད་འགྱེད་དེ། །སེམས་ཅན་སུས་རེག་དེ་དག་སངས་རྒྱས་ཁ་དོག་འགྱུར། །གང་གིས་རྒྱལ་བ་མཐོང་བ་དེ་དག་མིག་ལྔ་འཐོབ་པར་འགྱུར། །མུན་པ་རྡུལ་བསྩལ་རྒྱལ་བའི་ས་ལ་གནས་པར་འགྱུར། །ཇི་ལྟར་ནོར་བུ་རིན་ཆེན་བསམ་པ་ཀུན་སྟེར་བ། །གང་རྣམས་ཅི་འདོད་དེ་ལ་དེ་དག་ཐམས་ཅད་འབྱིན། །དེ་ནི་བསོད་ནམས་གང་གིས་བྱས་པ་དེས་མཐོང་སྟེ། །རིན་ཆེན་དམ་པ་དེ་ལ་རྣམ་རྟོག་གང་ཡང་མེད། །དེ་བཞིན་བདེ་གཤེགས་སྐུ་མཆོག་བསམ་པ་ཀུན་སྐོང་བ། །མཐོང་ནས་སྨོན་ལམ་སུ་འདེབས་དེ་དག་བསམ་པ་འགྲུབ། །སྙིང་རིང་དམའ་བའི་
སེམས་ལྡན་འགྲོ་བས་ཐུབ་མི་མཐོང་། །བདེ་གཤེགས་རྣམ་རྟོག་མི་མངའ་སེར་སྣ་མི་མངའ་འོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་པ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསུང་བརྗོད་པ་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསུང་བརྗོད་པ་ནི། དབྱངས་ཀྱི་དཀྱིལ་འཁོར་ཚད་མེད་པས་རྒྱས་ཤིང་ཁྱབ་པར་མཛད་པའི་ཕྱིར་ཀུན་ཏུ་ཁྱབ་པར་ཤེས་པར་བྱའོ། །ཆོས་སྟོན་པ་མངོན་པར་བསྒྲུབ་པའི་ཕྱིར་སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཚིམ་པར་མཛད་པར་ཤེས་པར་བྱའོ། །སེམས་རབ་ཏུ་ཚིམ་པར་མཛད་པའི་ཕྱིར་འཁོར་གྱི་དཀྱིལ་འཁོར་ཐམས་ཅད་མོས་པ་ཇི་ལྟ་བ་བཞིན་དུ་དགའ་བར་མཛད་པར་ཤེས་པར་བྱའོ། ། དུས་ལས་མི་འདའ་བའི་ཕྱིར་དུས་ལ་ཇི་ལྟར་བབ་པ་བཞིན་དུ་འབྲལ་བ་མེད་པར་ཤེས་པར་བྱའོ། །སྒྲ་བརྙན་དང་འདྲ་བའི་ཕྱིར་ཤིན་ཏུ་མི་སྐྱེ་མི་འགག་པར་ཤེས་པར་བྱའོ། །ལས་བསྩགས་པ་ཐམས་ཅད་ཡོངས་སུ་རྫོགས་པའི་ཕྱིར་བདག་པོ་མེད་པར་ཤེས་པར་བྱའོ། །གཏིང་དཔག་དཀའ་
བའི་ཕྱིར་ཤིན་ཏུ་ཟབ་པར་ཤེས་པར་བྱའོ། །ཆོས་ཀྱི་དབྱིངས་ལ་ཞེན་པས་ཅིས་ཀྱང་མི་ཚུགས་པར་ཤེས་པར་བྱའོ། །ཆོས་ཉིད་ལ་ཡང་དག་པར་གཞོལ་བས་རྒྱུན་མི་འཆད་པར་ཤེས་པར་བྱའོ། །ཤིན་ཏུ་གཏན་ལ་ཕེབས་པའི་མཐར་ཐུག་པས་སྐྱོར་མེད་པར་ཤེས་པར་བྱ་སྟེ། དེ་བཞིན་གཤེགས་པའི་གསུང་བརྗོད་པ་ནི། བདག་པོ་ཡོད་པ་ཡང་མ་ཡིན། བདག་པོ་མེད་པ་ཡང་མ་ཡིན་པ་དང་། རྣམ་པར་དམིགས་པ་ཡང་མ་ཡིན། རྣམ་པར་མི་དམིགས་པ་ཡང་མ་ཡིན་པར་ཤེས་པར་བྱའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། འཇིག་རྟེན་གྱི་ཁམས་འཇིག་པར་འགྱུར་བའི་ཚེ། ཆོས་ཉིད་ཐོབ་པས་སྒྲ་ཆེན་པོའི་དབྱངས་ཆེན་པོ་བཞི་འབྱུང་བར་འགྱུར་ཏེ། དེ་དག་ལ་བདག་པོ་མེད་ཅིང་ཡོངས་སུ་འཛིན་པ་མེད་དོ། །བཞི་གང་ཞེ་ན། ཀྱེ་རྒྱལ་བའི་སྲས་འཇིག་རྟེན་གྱི་ཁམས་འཇིག་པར་འགྱུར་བའི་ཚེ། སྒྲ་ཆེན་པོའི་དབྱངས་ཆེན་པོ་ཐོག་མ་རྣམ་པ་འདི་ལྟ་བུ་འབྱུང་སྟེ། ཀྱེ་མ་གྲོགས་པོ་དག་བསམ་གཏན་དང་པོ་ནི་འདོད་པ་དང་། གནོད་སེམས་མེད་པས་ཤིན་ཏུ་བདེ་བ་སྟེ། འདོད་པའི་ཁམས་ལས་ཡང་དག་པར་འདའ་བའི་རྒྱུར་འགྱུར་རོ། །སྒྲ་དེ་ཐོས་ནས་སེམས་ཅན་རྣམས་བསམ་གཏན་དང་པོ་བསྒྲུབས་ཏེ། འདོད་པའི་ཁམས་ལས་འདས་ནས་ཚངས་པའི་འཇིག་རྟེན་དུ་སྐྱེའོ། །དེ་ནས་ཆོས་ཉིད་ཐོབ་པས་སྒྲ་ཆེན་པོའི་དབྱངས་ཆེན་པོ་གཉིས་པ་འབྱུང་སྟེ། ཀྱེ་མ་གྲོགས་པོ་དག་བསམ་གཏན་གཉིས་པ་འདི་ནི་རྣམ་པར་རྟོག་པ་མེད་ཅིང་། རྣམ་པར་དཔྱོད་པ་མེད་པས་ཤིན་ཏུ་བདེ་བ་སྟེ་ཚངས་རིས་ཀྱི་ལྷ་ལས་ཡང་དག་པར་འདའ་བའི་རྒྱུར་འགྱུར་རོ། །སྒྲ་དེ་ཐོས་ནས་ཀྱང་སེམས་ཅན་རྣམས་བསམ་གཏན་གཉིས་པ་བསྒྲུབས་ཏེ། ཚངས་པའི་འཇིག་རྟེན་ལས་འདས་ནས། གྱ་ནོམ་སྣང་བའི་ལྷ་དང་སྐལ་བ་མཉམ་པར་སྐྱེའོ། །དེ་ནས་ཆོས་ཉིད་རབ་ཏུ་ཐོབ་པས། སྒྲ་ཆེན་པོའི་དབྱངས་ཆེན་པོ་གསུམ་པ་
འབྱུང་སྟེ། ཀྱེ་མ་གྲོགས་པོ་དག་བསམ་གཏན་གསུམ་པ་འདི་ནི་དགའ་བ་མེད་པས་ཤིན་ཏུ་བདེ་བ་སྟེ། གྱ་ནོམ་སྣང་བའི་ལྷ་ལས་ཡང་དག་པར་འདའ་བའི་རྒྱུར་འགྱུར་རོ། །སྒྲ་དེ་ཐོས་ནས་ཀྱང་སེམས་ཅན་རྣམས་བསམ་གཏན་གསུམ་པ་བསྒྲུབས་ཏེ། གྱ་ནོམ་སྣང་བའི་ལྷ་ལས་འདས་ནས་དགེ་རྒྱས་ཀྱི་ལྷ་དང་སྐལ་བ་མཉམ་པར་སྐྱེའོ། །དེ་ནས་ཆོས་ཉིད་རབ་ཏུ་ཐོབ་པས་སྒྲ་ཆེན་པོའི་དབྱངས་ཆེན་པོ་བཞི་པ་འབྱུང་སྟེ། ཀྱེ་མ་གྲོགས་པོ་དག་བསམ་གཏན་བཞི་པ་འདི་ནི་ཤིན་ཏུ་ཞི་བ་སྟེ། དགེ་རྒྱས་ཀྱི་ལྷ་ལས་ཡང་དག་པར་འདའ་བའི་རྒྱུར་འགྱུར་རོ། །སྒྲ་དེ་ཐོས་ནས་ཀྱང་སེམས་ཅན་རྣམས་བསམ་གཏན་བཞི་པ་བསྒྲུབས་ཏེ། དགེ་རྒྱས་ཀྱི་ལྷ་ལས་འདས་ནས་འབྲས་བུ་ཆེ་བའི་ལྷ་དང་སྐལ་བ་མཉམ་པར་སྐྱེའོ། །ཀྱེ་རྒྱལ་བའི་སྲས་དེ་ལྟར་འཇིག་རྟེན་གྱི་ཁམས་འཇིག་པར་འགྱུར་བའི་ཚེ། ཆོས་ཉིད་རབ་ཏུ་ཐོབ་པས། སྒྲ་ཆེན་པོའི་དབྱངས་ཆེན་པོ་དེ་བཞི་འབྱུང་བར་འགྱུར་ཏེ། དེ་ལ་བདག་པོའམ། རྗོད་པར་བྱེད་པ་གང་ཡང་མེད་མོད་ཀྱི། དེ་ལྟར་ཚད་མེད་པའི་ཡོན་ཏན་དང་ལྡན་པའི་སྒྲ་རྣམས་འབྱུང་བར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་གསུང་ལའང་བདག་པོ་གང་ཡང་མེད་དེ། རྗོད་པར་བྱེད་པ་མེད་དོ། །འཕྲོ་བར་བྱེད་པ་མེད་དོ། །ལེན་པ་མེད་དོ། །གཏོང་བ་མེད་དོ། །འོན་ཀྱང་དེ་བཞིན་གཤེགས་པའི་ཆོས་ཉིད་ཐོབ་པས་སྒྲ་ཆེན་པོའི་དབྱངས་ཆེན་པོ་བཞི་འབྱུང་བར་འགྱུར་ཏེ། བཞི་གང་ཞེ་ན་འདི་ལྟ་སྟེ། དེ་བཞིན་གཤེགས་པའི་ཆོས་ཉིད་ཐོབ་པས་སྒྲ་ཆེན་པོ་གཅིག་འབྱུང་བ་ནི། ཀྱེ་མ་འདུས་བྱས་འདི་དག་སྡུག་བསྔལ་བ་སྟེ། སེམས་ཅན་དམྱལ་བ་ནི་སྡུག་བསྔལ་ལོ། །བྱོལ་སོང་གི་སྐྱེ་གནས་ནི་སྡུག་བསྔལ་ལོ། །གཤིན་རྗེའི་འཇིག་རྟེན་ནི་སྡུག་བསྔལ་ལོ། །བསོད་ནམས་མ་བྱས་པ་ནི་སྡུག་བསྔལ་ལོ། །བདག་གིར་འཛིན་པ་ནི་སྡུག་བསྔལ་སྟེ། སྡིག་པའི་ལས་སྤྱོད་པ་ནི་སྡུག་བསྔལ་
གྱིས་ལྷ་དང་མིར་སྐྱེ་བའི་ཕྱིར་དགེ་བའི་རྩ་བ་སྐྱེད་ཅིག །འཕགས་པའི་སྐྱེ་མཆེད་ཡོངས་སུ་ཟུངས་ཤིག །མི་ཁོམ་པར་སྐྱེ་བ་ཡོངས་སུ་སྤོངས་ཤིག །སྒྲ་དེ་ཐོས་ནས་ཀྱང་སེམས་ཅན་རྣམས་མ་ནོར་བར་ནན་ཏན་རབ་ཏུ་བྱེད་དེ་དེ་དག་མ་ནོར་བར་ནན་ཏན་བྱེད་ཅིང་། དགེ་བ་ཡོངས་སུ་སྤྱོད་དོ། །དེ་དག་དགེ་བ་སྤྱོད་པའི་ནན་ཏན་ལ་ཞུགས་པས་མི་ཁོམ་པར་སྐྱེ་བ་ཡོངས་སུ་སྤོང་སྟེ། ལྷ་དང་མིར་སྐྱེ་བའི་སྐྱེ་མཆེད་ཀྱང་རབ་ཏུ་འཛིན་ཏོ། །དེ་ནས་དེ་བཞིན་གཤེགས་པའི་ཆོས་ཉིད་རབ་ཏུ་ཐོབ་པས། སྒྲ་ཆེན་པོའི་དབྱངས་ཆེན་པོ་གཉིས་པ་འབྱུང་སྟེ། ཀྱེ་མ་འདུས་བྱས་འདི་དག་ནི་ཤིན་ཏུ་སྡུག་བསྔལ་བ་སྟེ། འབར་བ་ཀུན་ནས་འབར་བ་རབ་ཏུ་འབར་བ། ལྕགས་ཀྱི་གོང་བུ་དང་འདྲ་བ་མི་རྟག་ཅིང་འགྱུར་བའི་ཆོས་ཅན་དག་གོ །འདུས་མ་བྱས་ནི་ཞི་བ་གདུང་བ་མེད་པ། བསིལ་པ་ཡོངས་སུ་གདུང་བ་དང་བྲལ་བའོ། །སྒྲ་དེ་ཐོས་ནས་ཀྱང་སེམས་ཅན་རྣམས། དགེ་བའི་ཆོས་ལ་མངོན་པར་བརྩོན་པར་བྱེད་དེ། དེ་ལྟར་མངོན་པར་བརྩོན་པས་ཉན་ཐོས་ཀྱི་ཐེག་པ་ལ། སྒྲའི་རྗེས་སུ་འགྲོ་བའི་བཟོད་པ་འཐོབ་པར་འགྱུར་རོ། །དེ་ནས་དེ་བཞིན་གཤེགས་པའི་ཆོས་ཉིད་ཐོབ་པས་སྒྲ་ཆེན་པོའི་དབྱངས་ཆེན་པོ་གསུམ་པ་འབྱུང་སྟེ། ཀྱེ་མ་ཉན་ཐོས་ཀྱི་ཐེག་པ་འདི་ནི་གཞན་གྱི་སྒྲའི་རྗེས་སུ་འབྲང་བས་ཤིན་ཏུ་ཆུང་བ་སྟེ། འདི་བས་མཐོ་བའི་ཐེག་པ་འདི་ལྟ་སྟེ། རང་གིས་མངོན་པར་འཚང་རྒྱ་བར་བྱ་བ། སློབ་དཔོན་མེད་པ། རང་སངས་རྒྱས་ཀྱི་ཐེག་པ་ཡོད་དོ། །སྒྲ་དེ་ཐོས་ནས་ཀྱང་སེམས་ཅན་མོས་པ་ཆེ་བ་རྣམས་རང་སངས་རྒྱས་ཀྱི་ཐེག་པ་ལ་ནན་ཏན་བྱེད་ཅིང་ཉན་ཐོས་ཀྱི་ཐེག་པ་སྤངས་ནས། རང་སངས་རྒྱས་ཀྱི་བྱང་ཆུབ་ཏུ་འཇུག་གོ །དེ་ནས་དེ་བཞིན་གཤེགས་པའི་ཆོས་ཉིད་རབ་ཏུ་ཐོབ་པས་སྒྲ་ཆེན་པོའི་དབྱངས་ཆེན་པོ་བཞི་པ་འབྱུང་སྟེ། ཀྱེ་མ་ཉན་ཐོས་དང་རང་སངས་རྒྱས་ཀྱི་ཐེག་པ་ལས་འདས་པའི་ཐེག་པ་ཆེན་པོ་བྱང་ཆུབ་སེམས་དཔའི་སྤྱོད་པ་དང་། མཐུན་པ་ཕ་རོལ་
ཏུ་ཕྱིན་པ་དྲུག་དང་། བྱང་ཆུབ་ཀྱི་སྤྱོད་པ་རྒྱུན་མི་འཆད་པ། བྱང་ཆུབ་ཀྱི་སེམས་ཡོངས་སུ་མི་གཏོང་བ། བསོད་ནམས་དང་ཡེ་ཤེས་ཀྱི་ཚོགས་ཚད་མེད་པས་ཡོངས་སུ་བཟུང་བ་ཡོད་དེ། ཉན་ཐོས་ཀྱི་ཐེག་པ་ནི་གཞན་གྱི་སྒྲའི་རྗེས་སུ་འབྲང་བའོ། །རང་སངས་རྒྱས་ཀྱི་ཐེག་པ་ནི་ཤིན་ཏུ་ཆུང་བའོ། །ཐེག་པ་ཆེན་པོ་ནི་ཐེག་པའི་དམ་པ། ཐེག་པའི་གཙོ་བོ། ཐེག་པའི་མཆོག་སྟེ། བླ་ན་མེད་པའི་ཐེག་པ་སེམས་ཅན་ཐམས་ཅད་ཉེ་བར་འཚོ་བའི་ཐེག་པའོ། །སྒྲ་དེ་ཐོས་ནས་ཀྱང་སེམས་ཅན་དེ་བས་ཀྱང་ཡངས་པ་ལ་མོས་པ། དབང་པོ་རྣོ་བ། སྔོན་དགེ་བའི་རྩ་བ་བསྐྱེད་པ། དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་དུ་བརླབས་པ། དེ་དག་སྙིང་ཐག་པ་ནས་དེ་བཞིན་གཤེགས་པའི་རང་བྱུང་གི་བྱང་ཆུབ་ཏུ་སེམས་བསྐྱེད་དེ། དེ་བཞིན་གཤེགས་པའི་གསུང་དེ་ཡང་སྐུ་ལས་འབྱུང་བ་མ་ཡིན། ཐུགས་ལས་འབྱུང་བ་མ་ཡིན་ཏེ། སེམས་ཅན་རྣམས་ཀྱི་དགེ་བའི་ལས་ཤིན་ཏུ་བསྩགས་པས་ཁོང་དུ་ཆུད་པར་འགྱུར་བ་མེད་པའང་མ་ཡིན་ནོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དང་པོ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རི་དང་གཅོང་རོང་དང་། བྲག་གི་སུལ་དང་མཚམས་ནས། སྒྲ་བརྙན་གྲགས་པ་ནི་འཇིག་རྟེན་ཀུན་ལ་འང་མཚུངས་པར་གྲག་སྟེ། ལུས་མེད་ཅིང་བལྟར་མི་སྣང་ལ། གཞན་གྱི་སྒྲའི་རྐྱེན་ལ་རྟེན་ཏེ། སྒྲ་ཐམས་ཅད་ཀྱི་ཚུལ་དང་སྒྲ་བརྙན་དེ་དག་འབྱུང་ཡང་དེ་ལ་རྣམ་པར་རྟོག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་གསུང་ཡུལ་ན་མི་གནས་ཕྱོགས་ན་མི་གནས་པ་སྟེ། འོན་ཀྱང་སེམས་ཅན་གྱི་བསམ་པ་དང་མོས་པ་ལ་རྟེན་ཅིང་འབྱུང་བ་མེད་པ་ཡང་མ་ཡིན་ཏེ། དེ་ནི་སྒྲས་རྣམ་པར་དམྱིགས་པ་མྱེད་ཅིང་བརྗོད་དུ་མེད་པའོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་གཉིས་པ་འདིས་ཀྱང་། བྱང་ཆུབ་
སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ལྷ་རྣམས་ཀྱི་ཆོས་ཀྱི་རྔ་ཆེན་པོ་ཆོས་ལ་ཡང་དག་པར་སྐུལ་བ་ཞེས་བྱ་བ་སྟེང་གི་བར་སྣང་ལས་ཡང་དག་པར་སྒྲོག་སྟེ། ནམ་ལྷ་རྣམས་བག་མེད་པར་སྤྱོད་པར་གྱུར་པ་དེའི་ཚེ། ཆོས་ཀྱི་རྔ་ཆེན་པོ་དེ་འདི་སྐད་དུ་ཀྱེ་གྲོགས་པོ་དག་འདོད་པའི་བདེ་བ་འདི་དག་ནི་ཤིན་ཏུ་མི་རྟག་ཅིང་། བསླུ་ལ་མྱུར་དུ་འཇིག་ཅིང་བྱིས་པ་འདྲིད་པ་སྟེ། བྱིས་པས་བསྙེན་པའོ། །བྱིས་པས་བསྔགས་པའོ། །དེ་བས་ན་བག་ཡོད་པར་གྱིས་ལ་བག་མེད་པར་མ་བྱེད་ཅིག །ངན་སོང་དག་ཏུ་ལྟུང་བར་གྱུར་ཏ་རེ་ཞེས་བྱ་བའི་སྒྲ་སྒྲོག་གོ །ཀྱེ་རྒྱལ་བའི་སྲས་དེ་ལྟར་སྒྲ་དེ་ཐོས་ནས། བག་མེད་པར་སྤྱོད་པའི་ལྷའི་བུ་རྣམས་ཀྱང་སོ་སོ་ནས་སྐྱོ་བར་གྱུར་ཏེ། རང་རང་གི་གནས་ཀྱི་འདོད་པའི་དགའ་བ་སྤངས་ནས། ལྷའི་རྒྱལ་པོའི་གནས་སུ་འདོང་ངོ་། །དེ་དག་དེར་ཕྱིན་ནས་ཀྱང་ཆོས་ལ་དགའ་བས་ཉི་མ་སྟུང་ཞིང་ཆོས་ལ་སྤྱོད་པར་འགྱུར་རོ། །ཀྱེ་རྒྱལ་བའི་སྲས་ལྟོས་དང་ལྷའི་རྔ་དེ་ལ་འབྱུང་བའམ། འཇིག་པ་གང་ཡང་མེད་ལ་ལྷ་རྣམས་ལའང་དོན་ཆེན་པོ་དེ་ལྟ་བུས་ཤིན་ཏུ་ཕན་འདོགས་སོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་གསུང་ཡང་། སེམས་ཅན་གྱི་ཁམས་མ་ལུས་པར་རྒྱས་པར་མཛད་དེ། སེམས་ཅན་བག་མེད་པར་སྤྱོད་པ་རྣམས་ལ་ཡང་དག་པར་བསྐུལ་བའི་ཕྱིར་ཆོས་ཆེན་པོའི་སྒྲ་སྒྲོག་ཅིང་འབྱུང་ངོ་། །འདི་ལྟ་སྟེ་ཡོངས་སུ་གཟུང་བ་མེད་པའི་སྒྲ་འབྱུང་ངོ་། །བག་ཡོད་པའི་སྒྲ་འབྱུང་ངོ་། །མི་རྟག་པ་དང་སྡུག་བསྔལ་བ་དང་། བདག་མེད་པའི་སྒྲ་འབྱུང་ངོ་། །ཞི་བ་མྱ་ངན་ལས་འདས་པའི་སྒྲ་འབྱུང་ངོ་། །འཇིག་རྟེན་གྱི་ཁམས་མ་ལུས་པར་རྒྱས་པར་བཀང་སྟེ། སེམས་ཅན་བག་མེད་པར་སྤྱོད་པ་རྣམས་མོས་པར་ཇི་ལྟ་བ་བཞིན་དུ་རབ་ཏུ་དགའ་བར་བྱ་བ་དང་། ཐེག་པ་ཇི་ལྟ་བ་བཞིན་དུ་འབྱུང་བར་བྱ་བའི་ཕྱིར་ཡང་དག་པར་བསྐུལ་བ་མཛད་
ཅིང་། རང་བྱུང་གི་ཡེ་ཤེས་ཚད་མེད་པ་དང་། བྱང་ཆུབ་སེམས་དཔའི་སྤྱོད་པ་མི་འཕྲོགས་པ་དང་། དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱིས་ཐམས་ཅད་དུ་ཁྱབ་ཅིང་ལྷུན་གྱིས་གྲུབ་པ་ཡང་རབ་ཏུ་རྗོད་དོ། །སྒྲ་དེ་ཐོས་ནས་ཀྱང་སེམས་ཅན་ཚད་མེད་གྲངས་མེད་པ་དགེ་བའི་ཆོས་ལ་ཤིན་ཏུ་བརྩོན་པར་འགྱུར་ཏེ། ལ་ལ་ནི་ཉན་ཐོས་ཀྱི་ཐེག་པ་ལ། ལ་ལ་ནི་རང་སངས་རྒྱས་ཀྱི་ཐེག་པ་ལ། ལ་ལ་ནི་བླ་ན་མེད་པའི་ཐེག་པ་ཆེན་པོ་ལ། མངོན་པར་འཇུག་ཀྱང་། དེ་བཞིན་གཤེགས་པའི་གསུང་དེ་ནི་གང་ལའང་ཞུགས་པ་མེད་དེ། གང་གིས་ཀྱང་ཚིག་ཏུ་མི་བརྗོད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་གསུམ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ། དཔེར་ན། ལྷའི་རྒྱལ་པོ་དབང་བསྒྱུར་གྱི་ལྷའི་བུ་མོ་བཟང་མོ་ཞེས་བྱ་བའི་ཁའི་དབུགས་གཅིག་གིས་ལྷ་རྫས་ཀྱི་རོལ་མོའི་སྒྲ་ཡན་ལག་བརྒྱ་ཕྲག་སྟོང་དང་ལྡན་པའི་ང་རོ་འབྱུང་སྟེ། སྒྲ་དེ་འབྱུང་བ་ན་སྒྲ་རྣམ་པ་ཐ་དད་པ་བརྒྱ་ཕྲག་སྟོང་གི་དབྱངས་སུ་གྲག་གོ །ཀྱེ་རྒྱལ་བའི་སྲས་ལྟོས་དང་། དེ་ལྟར་ཁའི་དབུགས་གཅིག་པུ་ལས་ཀྱང་། སྒྲའི་དབྱངས་ཚད་མེད་པ་འབྱུང་བར་རུང་ངོ་། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་གསུང་གཅིག་འབྱུང་ཡང་ཚད་མེད་པར་ཁྱབ་སྟེ། སེམས་ཅན་གྱི་བསམ་པ་ཇི་ལྟ་བ་བཞིན་དུ་སེམས་ཀྱི་རྒྱུད་ལ་མོས་པའི་ཚུལ་དང་འདྲ་བར་ཚད་མེད་པའི་སྒྲའི་རྣམ་པར་དེ་བཞིན་གཤེགས་པའི་གསུང་གྲག་གོ །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བཞི་པ་འདིས་ཀྱང་། དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཚངས་པ་ཆེན་པོ་ནི་ཚངས་པའི་འཇིག་རྟེན་ན་འདུག་ཀྱང་འདོད་ན། ཚངས་པའི་འཁོར་ཐམས་ཅད་དུ་ཚངས་པའི་དབྱངས་ཀྱིས་གོ་བར་བྱེད་དོ། །དབྱངས་དེ་ཡང་ཚངས་པའི་འཁོར་ལས་
གཞན་དུ་མི་འགྲོ་སྟེ། ཚངས་པའི་རིས་ཀྱི་ལྷའི་བུ་ཐམས་ཅད་ཀྱང་སོ་སོ་ནས་ཚངས་པ་ཆེན་པོ་ནི། བདག་ཁོ་ནའི་དོན་དུ་ཚངས་པའི་སྒྲ་སྒྲོག་གོ་སྙམ་མོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། སངས་རྒྱས་ཀྱི་གསུང་བླ་ན་མེད་པ་སྒྲོག་པའི་ཚེ། འཁོར་གྱི་དཀྱིལ་འཁོར་ཐམས་ཅད་དབྱངས་ཀྱིས་མངོན་པར་གོ་བར་མཛད་དེ། དབྱངས་དེ་ཡང་འཁོར་གྱི་དཀྱིལ་འཁོར་ལས་གུད་དུ་མི་འགྲོའོ། །དེ་ཅིའི་ཕྱིར་ཞེ་ན། དེ་ལ་དེ་བཞིན་གཤེགས་པ་ནི་དབྱངས་ཀྱི་སེར་སྣ་མི་མངའ་སྟེ། སེམས་ཅན་དབང་པོ་ཡོངས་སུ་མ་སྨིན་པ་རྣམས་ལ། དེ་བཞིན་གཤེགས་པའི་དབྱངས་གྲག་པར་མི་འགྱུར་རོ། །འཁོར་གྱི་དཀྱིལ་འཁོར་དུ་ཚོགས་པའི་སེམས་ཅན་ཐམས་ཅད་ཀྱང་འདི་སྙམ་དུ་སེམས་ཏེ། བདག་ཁོ་ནའི་དོན་དུ་དེ་བཞིན་གཤེགས་པ་ཆོས་སྟོན་ཏོ་སྙམ་མོ། །དེ་བཞིན་གཤེགས་པ་ནི་གསུང་སྒྲོག་པ་ཡང་མེད། ཕྱིར་སྡུད་པ་ཡང་མེད་དེ། ཕྲིན་ལས་དེ་དག་ཀྱང་ཡོད་ཅིང་སྣང་ངོ་། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་། དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ནམ་མཁའི་དབྱིངས་ལས་ཆར་གྱི་རོ་གཅིག་པ་འབབ་ཀྱང་སྣོད་ཀྱི་རྣམ་པ་ཐ་དད་པས་ཆུ་རྣམ་པ་ཐ་དད་པར་སྣང་གི་ཆུ་ལ་རྣམ་པར་རྟོག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་གསུང་ཡང་འདི་ལྟ་སྟེ། དེ་བཞིན་གཤེགས་པའི་རྣམ་པར་གྲོལ་བར། རོ་གཅིག་ཀྱང་སེམས་ཅན་གྱི་བསམ་པའི་སྣོད་རྣམ་པ་ཐ་དད་པས། དེ་བཞིན་གཤེགས་པའི་གསུང་རྣམ་པ་ཐ་དད་དུ་སྣང་སྟེ། དེ་བཞིན་གཤེགས་པའི་གསུང་ལ་རྣམ་པར་རྟོག་པ་མེད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་
གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཀླུའི་རྒྱལ་པོ་མ་དྲོས་པ་ནི་འཛམ་བུའི་གླིང་ཐམས་ཅད་སྤྲིན་ཆེན་པོས་རྒྱས་ཤིང་ཁྱབ་པར་བྱས་ཏེ། འདི་ལྟར་ལོ་ཐོག་སྐྱེད་པ་དང་། རྩྭ་དང་གེལ་པ་དང་། རྩི་དང་ནགས་ཚལ་སྣ་ཚོགས་རྣམ་པར་སྤེལ་བ་དང་། རྣང་དང་ལུ་མ་དང་མཚོ་དང་མཚེའུ་དང་རྫིང་བུ་ཡོངས་སུ་དགང་བའི་ཕྱིར་ཆར་ཆེན་པོ་འབེབས་ཀྱང་། ཆར་དེ་ནི་ཀླུའི་རྒྱལ་པོ་མ་དྲོས་པའི་ལུས་ལས་བྱུང་བ་མ་ཡིན། སེམས་ལས་བྱུང་བ་མ་ཡིན་ཏེ། སེམས་ཅན་རྣམས་ལ་ཡང་རྣམ་པ་ཚད་མེད་པས་ཉེ་བར་འཚོ་བའི་རྒྱུར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འཇིག་རྟེན་གྱི་ཁམས་མ་ལུས་པ་ཐམས་ཅད་ཐུགས་རྗེ་ཆེན་པོའི་སྤྲིན་གྱིས་རྒྱས་པར་བཀང་སྟེ། སེམས་ཅན་ཐམས་ཅད་ཀྱི་བསམ་པ་ཡོངས་སུ་ཚིམ་པར་བྱ་བ་དང་། དགེ་བའི་རྩ་བ་ཐམས་ཅད་ཤིན་ཏུ་བསྐྱེད་པ་དང་། ཐེག་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཆོས་ཀྱི་སྤྲིན་ཆེན་པོའི་ཆར་བདུད་རྩིའི་རོ་དང་ལྡན་པ་འབེབས་ཏེ། དེ་བཞིན་གཤེགས་པའི་གསུང་དེ་ཡང་ནང་ནས་བྱུང་བ་མ་ཡིན། ཕྱི་རོལ་ནས་བྱུང་བ་ཡང་མ་ཡིན་མོད་ཀྱི། དེ་ལྟར་ཚད་མེད་པའི་སེམས་ཅན་རྣམས་ཀྱང་ཉེ་བར་འཚོ་བའི་རྒྱུར་འགྱུར་རོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་། དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཀླུའི་རྒྱལ་པོ་ཡིད་དུ་འོང་བ་ནི་ནམ་ཆར་ཆེན་པོ་དབབ་པར་འདོད་པ་དེའི་ཚེ་ནམ་མཁའ་ཐམས་ཅད་སྤྲིན་གྱི་དྲ་བས་ཡོག་པར་བྱེད་དེ། ཞག་བདུན་དུ་སྤྲིན་ཆེན་པོ་ཀུན་ནས་སྡུད་དོ། །སེམས་ཅན་གྱི་ལས་ཀྱི་མཐའ་རྣམས་ཡོངས་སུ་མ་ཟིན་གྱི་བར་དུ་ཆར་གྱི་རྒྱུན་ཀྱང་ཀུན་ཏུ་གཏོང་བར་མི་བྱེད། དེ་ཅིའི་ཕྱིར་
ཞེ་ན། ཀྱེ་རྒྱལ་བའི་སྲས་ཀླུའི་རྒྱལ་པོ་ཆེན་པོ་ཡིད་དུ་འོང་བ་ནི་མི་འཚེ་བའི་ངང་ཚུལ་དང་ལྡན་པ་སྟེ། ཞག་བདུན་འདས་ནས་ཆར་གྱི་རྒྱུན་ཤིན་ཏུ་ཕྲ་བས་ས་ཐམས་ཅད་ཡོངས་སུ་ངོམས་པར་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་པོ་ཆེན་པོ་ཡང་། ཐུགས་རྗེ་ཆེན་པོའི་སྤྲིན་བསྡུས་ཏེ། ནམ་ཆོས་ཀྱི་ཆར་ཆེན་པོ་དབབ་པར་དགྱེས་པ་དེའི་ཚེ། ཤེས་རབ་དང་ཐབས་མཁས་པས་སེམས་ཅན་ཡོངས་སུ་སྨིན་པར་མཛད་དོ། །སེམས་ཅན་རྣམས་ཀྱི་དབང་པོ་ཡོངས་སུ་མ་སྨིན་གྱི་བར་དུ་ནི། བདུད་རྩིའི་ཆར་སྔར་འབེབས་པར་མི་མཛད་དེ་ནམ་སེམས་ཅན་རྣམས་ཡོངས་སུ་སྨིན་པར་གྱུར་པ་དེའི་ཚེ། གཟོད་ཆོས་ཀྱི་ཆར་ཆེན་པོ་བདུད་རྩིའི་རོ་དང་ལྡན་པ་འབེབས་སོ། །ཕྲ་ཞིང་ཟབ་ལ་མཁས་པས་ཤེས་པར་བྱ་བའི་ཆོས་རྗོད་ཅིང་སེམས་ཅན་རྣམས་འཇིག་པར་མ་གྱུར་པར་རིམ་གྱིས་ཐམས་ཅད་མཁྱེན་པ་ཉིད་ཀྱི་ཆོས་ཀྱི་རོ་བླ་ན་མེད་པས་ཡོངས་སུ་ངོམས་པར་མཛད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བརྒྱད་པ་འདིས་ཀྱང་། དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རྒྱ་མཚོ་ཆེན་པོའི་ནང་ན་ལག་གིས་འགྲོ་བའི་བདག་པོ་རྒྱན་ཆེན་པོ་ཞེས་བྱ་བ་ཡོད་དེ། དེ་འདོད་ན་རྒྱ་མཚོ་ཆེན་པོའི་ནང་དུ་རྒྱན་གཅིག་དང་ལྡན་པའི་ཆར་རབ་ཏུ་འབེབས་སོ། །དེ་འདོད་ན་རྒྱན་བཅུ་དང་ལྡན་པའི་ཆར་རབ་ཏུ་འབེབས་སོ། །དེ་འདོད་ན་རྒྱན་བརྒྱ་དང་ལྡན་པའི་ཆར་རབ་ཏུ་འབེབས་སོ། །དེ་འདོད་ན་རྒྱན་སྟོང་དང་ལྡན་པའི་ཆར་རབ་ཏུ་འབེབས་སོ། །དེ་འདོད་ན་རྒྱན་བརྒྱ་ཕྲག་སྟོང་དང་ལྡན་པའི་ཆར་རབ་ཏུ་འབེབས་ཀྱང་། ཀྱེ་རྒྱལ་བའི་སྲས་ཆར་པ་དེ་དག་ལ་རྣམ་པར་རྟོག་པ་གང་ཡང་མེད་དེ། འོན་ཀྱང་ཀླུའི་རྒྱལ་པོ་དེའི་ཁྱུ་མཆོག་གི་མཐུ་ཕྱུང་བ། བསམ་གྱིས་མི་ཁྱབ་པ་རྣམ་པར་ཕྱེ་བའི་བྱིན་གྱིས་རྣམ་པར་དགོད་
པའི་རྒྱན་བརྒྱ་ཕྲག་སྟོང་དང་ལྡན་པའི་ཆར་འབབ་པ་ཡོད་ཅིང་སྣང་ངོ་། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། ནམ་ཆོས་ཀྱི་ཆར་ཆེན་པོ་དབབ་པར་དགྱེས་པ་དེའི་ཚེ་བཞེད་ན། ཆོས་གཅིག་རྣམ་པར་དགོད་པའི་རྒྱན་གྱིས་ཀྱང་ཆོས་སྟོན་ཏོ། །བཞེད་ན་ཆོས་བཅུ་རྣམ་པར་དགོད་པའི་རྒྱན་དང་། བཞེད་ན་ཆོས་ཉི་ཤུ་རྣམ་པར་དགོད་པའི་རྒྱན་དང་། བཞེད་ན་ཆོས་བརྒྱ་རྣམ་པར་དགོད་པའི་རྒྱན་དང་། བཞེད་ན་ཆོས་སྟོང་རྣམ་པར་དགོད་པའི་རྒྱན་དང་། བཞེད་ན་ཆོས་བརྒྱ་ཕྲག་སྟོང་རྣམ་པར་དགོད་པའི་རྒྱན་དང་། བཞེད་ན་སེམས་ཅན་གྱི་སྤྱོད་པ་སྟོང་ཕྲག་བརྒྱད་ཅུ་རྩ་བཞི་ལ། གསུང་རྣམ་པ་ཐ་དད་པ་སྟོང་ཕྲག་བརྒྱད་ཅུ་རྩ་བཞི་རྣམ་པར་དགོད་པའི་རྒྱན་གྱིས་ཆོས་སྟོན་པ་ནས། གསུང་གི་རྣམ་པ་བྱེ་བ་ཁྲག་ཁྲིག་བརྒྱ་སྟོང་ཚད་མེད་པའི་བར་དུ་རྣམ་པར་དགོད་པའི་རྒྱན་གྱིས་ཆོས་སྟོན་ཏེ། སེམས་ཅན་ཚད་མེད་པ་ཡང་ཡོངས་སུ་ཚིམ་པར་མཛད་ཀྱང་། དེ་བཞིན་གཤེགས་པའི་ཆོས་ཀྱི་སྤྲིན་ཆེན་པོའི་གསུང་ལ་རྣམ་པར་རྟོག་པ་གང་ཡང་མི་མངའ་འོ། །འོན་ཀྱང་སོ་སོར་ཅི་རིགས་སུ་སེམས་ཅན་རྣམས་ཀྱི་དབང་པོ་ཡོངས་སུ་ཚིམ་པར་བྱ་བའི་ཕྱིར། འདི་ལྟ་སྟེ་དེ་བཞིན་གཤེགས་པའི་ཆོས་ཀྱི་དབྱིངས་ཀྱི་དཀྱིལ་འཁོར་ཤིན་ཏུ་དག་པའི་ཕྱིར། དེ་ལྟར་གསུང་གི་རྣམ་པ་ཚད་མེད་པ་འབྱུང་བར་འགྱུར་རོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་དེ་བཞིན་གཤེགས་པའི་གསུང་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཀླུའི་རྒྱལ་པོ་གང་ཆེན་མཚོ་ནི། ནམ་ཀླུའི་རྒྱལ་པོ་ཆེན་པོའི་རྣམ་པར་རྩེ་བས། རྣམ་པར་རྩེ་བར་འདོད་ཅིང་སེམས་ཅན་རྣམས་ཀྱང་བདེ་བ་དང་། ཡོངས་སུ་ཚིམ་པར་བྱ་བར་འདོད་པར་གྱུར་པ་དེའི་ཚེ། གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་སའི་སྟེང་ཉེ་བར་བཟུང་བ་ཡན་ཅད། ལྷའི་རྒྱལ་པོ་དབང་བསྒྱུར་གྱི་གནས་ཀྱི་བར་དུ་སྤྲིན་གྱི་དྲ་བ་ཁ་དོག་སྣ་ཚོགས་ཅན་ཁ་དོག་དུ་མ་དང་ལྡན་པས་
ཡོངས་སུ་ཁེབས་པར་བྱེད་དོ། །སྤྲིན་གྱི་དྲ་བའི་རྒྱན་དེ་དག་ལ་ཡང་ཁ་དོག་རྣམ་པ་ཐ་དད་པའི་གཟུགས་རྣམ་པར་ཕྱེ་བ་འདི་ལྟ་བུ་དག་སྣང་ཞིང་ཡོད་དེ། འདི་ལྟར་ལ་ལ་ནི་འཛམ་བུ་ཆུ་ཀླུང་གི་གསེར་གྱི་ཁ་དོག་ཏུ་སྣང་ངོ་། །ལ་ལ་ནི་བཻ་ཌཱུརྱ་བཟང་པོའི་ཁ་དོག་ཏུ་སྣང་ངོ་། །ལ་ལ་ནི་དངུལ་གྱི་ཁ་དོག་ཏུ་སྣང་ངོ་། །ལ་ལ་ནི་ཤེལ་གྱི་ཁ་དོག་ཏུ་སྣང་ངོ་། །ལ་ལ་ནི་མུ་ས་ར་གལྤའི་ཁ་དོག་ཏུ་སྣང་ངོ་། །ལ་ལ་ནི་ཨ་སྨ་གར་བྷའི་ཁ་དོག་ཏུ་སྣང་ངོ་། །ལ་ལ་ནི་དཔལ་གྱི་སྙིང་པོའི་ཁ་དོག་ཏུ་སྣང་ངོ་། །ལ་ལ་ནི་མུ་ཏིག་དམར་པོའི་ཁ་དོག་ཏུ་སྣང་ངོ་། །ལ་ལ་ནི་སྤོས་སྣ་ཚོགས་ཀྱི་ཁ་དོག་ཏུ་སྣང་ངོ་། །ལ་ལ་ནི་གོས་དཀར་པོ་དྲི་མ་མེད་པའི་ཁ་དོག་ཏུ་སྣང་ངོ་། །ལ་ལ་ནི་ཁ་དོག་གཅིག་ཏུ་སྣང་ངོ་། །ལ་ལ་ནི་ཁ་དོག་རྣམ་པ་ཐ་དད་པ་སྣ་ཚོགས་སུ་སྣང་ངོ་། །རྣམ་པ་དེ་ལྟ་བུའི་སྤྲིན་གྱི་དྲ་བས་གླིང་བཞི་པ་ཀུན་ནས་ཁེབས་པར་བྱས་ནས། རྣམ་པ་སྣ་ཚོགས་ཀྱི་གློག་འགྱེད་དེ། འདི་ལྟར་སྤྲིན་གསེར་གྱི་ཁ་དོག་ཏུ་འདུག་པ་ལས། གློག་གི་ཕྲེང་བ་བཻ་ཌཱུརྱའི་ཁ་དོག་ལྟ་བུ་འགྱེད་དོ། །སྤྲིན་བཻ་ཌཱུརྱ་བཟང་པོའི་ཁ་དོག་ཏུ་འདུག་པ་ལས་གློག་གི་ཕྲེང་བ་གསེར་གྱི་ཁ་དོག་ལྟ་བུ་འགྱེད་དོ། །སྤྲིན་དངུལ་གྱི་ཁ་དོག་ཏུ་འདུག་པ་ལས། གློག་གི་ཕྲེང་བ་མུ་ས་ར་གལ་པའི་ཁ་དོག་ལྟ་བུ་འགྱེད་དོ། །སྤྲིན་མུ་ས་ར་གལ་པའི་ཁ་དོག་ཏུ་འདུག་པ་ལས། གློག་གི་ཕྲེང་བ་དངུལ་གྱི་ཁ་དོག་ལྟ་བུ་འགྱེད་དོ། །སྤྲིན་ཨ་སྨ་གར་བྷའི་ཁ་དོག་ཏུ་འདུག་པ་ལས། གློག་གི་ཕྲེང་བ་མུ་ཏིག་དམར་པོའི་ཁ་དོག་ལྟ་བུ་འགྱེད་དོ། །སྤྲིན་མུ་ཏིག་དམར་པོའི་ཁ་དོག་ཏུ་འདུག་པ་ལས། གློག་གི་ཕྲེང་བ་ཨ་སྨ་གར་བྷའི་ཁ་དོག་ལྟ་བུ་འགྱེད་དོ། །སྤྲིན་ཨ་སྨ་གར་བྷའི་ཁ་དོག་ཏུ་འདུག་པ་ལས། གློག་གི་ཕྲེང་བ་དཔལ་གྱི་སྙིང་པོའི་ཁ་དོག་ལྟ་བུ་འགྱེད་དོ། །སྤྲིན་དཔལ་གྱི་སྙིང་པོའི་ཁ་དོག་ཏུ་འདུག་པ་ལས། གློག་གི་ཕྲེང་བ་སྤོས་རྣམ་པ་ཐ་དད་པའི་ཁ་དོག་ལྟ་བུ་འགྱེད་དོ། །སྤྲིན་སྤོས་རྣམ་པ་ཐ་དད་པའི་ཁ་དོག་ལྟ་བུར་འདུག་པ་ལས། གློག་གི་ཕྲེང་བ་ཤེལ་གྱི་ཁ་དོག་
ལྟ་བུ་འགྱེད་དོ། །སྤྲིན་ཤེལ་གྱི་ཁ་དོག་ལྟ་བུར་འདུག་པ་ལས། གློག་གི་ཕྲེང་བ་རིན་པོ་ཆེ་སྣ་ཚོགས་ཆོ་མ་ཆོ་དགུའི་ཁ་དོག་ལྟ་བུ་འགྱེད་དོ། །སྤྲིན་རྣམ་པ་སྣ་ཚོགས་རྣམ་པ་ཐ་དད་པའི་ཁ་དོག་ཏུ་འདུག་པ་ལས། གློག་གི་ཕྲེང་བ་ཁ་དོག་གཅིག་ཏུ་སྣང་བ་འགྱེད་དོ། །སྤྲིན་ཁ་དོག་གཅིག་ཏུ་འདུག་པ་ལས། གློག་གི་ཕྲེང་བ་སྣ་ཚོགས་རྣམ་པ་ཐ་དད་པའི་ཁ་དོག་དང་ལྡན་པ་འགྱེད་དོ། ། རྣམ་པ་ཇི་ལྟ་བུར་མོས་པའི་ཚུལ་བཞིན་དུ་སེམས་ཅན་དགའ་བར་བྱ་བའི་ཕྱིར་འབྲུག་གི་སྒྲ་དབྱངས་རྣམ་པ་དུ་མའི་ང་རོ་འབྱིན་ཏོ། །ལ་ལར་ནི་ལྷའི་རྔའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་ལྷའི་བུ་མོའི་གླུ་དང་རོལ་མོའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་རོལ་མོ་བརྡུང་བ་དང་དཀྲོལ་བའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་ཀླུའི་བུ་མོའི་གླུའི་སྒྲ་དབྱངས་སྣ་ཚོགས་ཀྱི་ང་རོ་འབྱིན་ཏོ། །ལ་ལར་ནི་དྲི་ཟའི་བུ་མོའི་གླུའི་སྒྲ་དབྱངས་དང་ང་རོ་འབྱིན་ཏོ། །ལ་ལར་ནི་མིའམ་ཅིའི་བུ་མོའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་ས་གྲུམ་པའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་རྒྱ་མཚོ་འབྲུག་གི་སྒྲ་ཟབ་མོའི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་སེང་གེའི་རྒྱལ་པོའི་སྒྲའི་གདངས་ཀྱི་སྒྲ་དབྱངས་དང་ང་རོ་འབྱིན་ཏོ། །ལ་ལར་ནི་བྱ་བཙུན་པའི་སྐད་ཀྱི་སྒྲ་དབྱངས་ཀྱི་ང་རོ་འབྱིན་ཏོ། །ལ་ལར་ནི་རྣམ་པ་སྣ་ཚོགས་ཐ་དད་པའི་གླུའི་སྒྲ་དབྱངས་ཀྱི་ང་རོ་འབྱིན་ཏོ། །དེ་ལྟ་བུའི་སྤྲིན་གྱི་དྲ་བ་ཆེན་པོ་བསྡུས་ཏེ། གློག་གི་ཕྲེང་བ་བཀྱེ་ནས་འབྲུག་གི་སྒྲ་དབྱངས་དང་ང་རོ་རྣམ་པ་དེ་ལྟ་བུ་དག་ཀྱང་ཕྱུང་སྟེ། དགའ་བ་དང་སྤྲོ་བ་ཆེན་པོ་བསྐྱེད་པ་ཞེས་བྱ་བའི་ཀླུའི་རླུང་ཆེན་པོ་འགྱེད་དོ། །རླུང་ཆེན་པོ་དེ་དག་ལངས་པས་ཀྱང་སེམས་ཅན་རྣམས་ཀྱི་ལུས་སིམ་པར་འགྱུར་ཏེ། དགའ་བ་དང་སྤྲོ་བ་ཡང་རབ་ཏུ་སྐྱེའོ། །དེ་ནས་སེམས་ཅན་རྣམས་ཀྱི་བསོད་ནམས་དང་། མོས་པའི་ཁྱད་པར་གྱི་ཚུལ་ཇི་ལྟ་བ་བཞིན་དུ་ལས་ཀྱི་རྣམ་པ་སྣ་ཚོགས་སུ་ཐ་དད་དུ་གྱུར་པའི་ཆར་ཆེན་པོ་འབེབས་ཏེ། ལྷའི་རྒྱལ་པོ་དབང་
བསྒྱུར་གྱི་གནས་ཉེ་བར་བཟུང་བ་མན་ཅད་སའི་སྟེང་ན་ཡོད་པའི་གནས་ཀྱི་བར་དུ་ཆར་པ་རྣམ་པ་ཐ་དད་པ་འབེབས་ཏེ། འདི་ལྟར་རྒྱ་མཚོ་ཆེན་པོར་ནི་ཐ་མི་དད་པ་ཞེས་བྱ་བའི་ཆར་སྤྲིན་ཆེན་པོའི་ཆར་འབེབས་སོ། །དབང་བསྒྱུར་གྱི་ལྷ་རྣམས་ལ་ནི་ཤིན་ཏུ་སྙན་ཅིང་མཉན་པར་འོས་པ་ཞེས་བྱ་བའི་སྒྲ་སྙན་པའི་གླུ་དང་རོལ་མོའི་ཆར་ཆེན་པོ་འབེབས་སོ། །འཕྲུལ་དགའི་ལྷ་རྣམས་ལ་ནི་སྣང་བ་རབ་ཏུ་གཏོང་བ་ཞེས་བྱ་བའི་ནོར་བུ་རིན་པོ་ཆེའི་ཆར་ཆེན་པོ་འབེབས་སོ། །དགའ་ལྡན་གྱི་ལྷ་རྣམས་ལ་ནི། གཙུག་ཕུད་འཕྱང་བ་ཞེས་བྱ་བའི་རྒྱན་གྱི་ཆར་ཆེན་པོ་འབེབས་སོ། །མཚེ་མའི་ལྷ་རྣམས་ལ་ནི་རྒྱན་སྣ་ཚོགས་ཤེས་བྱ་བ་མེ་ཏོག་གི་ཆར་ཆེན་པོ་འབེབས་སོ། །སུམ་ཅུ་རྩ་གསུམ་གྱི་ལྷ་རྣམས་ལ་ནི་སྤོས་ཡིད་དུ་འོང་བ་ཞེས་བྱ་བའི་ལྷ་རྫས་ཀྱི་སྤོས་ཀྱི་ཆར་ཆེན་པོ་འབེབས་སོ། །རྒྱལ་པོ་ཆེན་པོ་བཞིའི་རིས་ཀྱི་ལྷ་རྣམས་ལ་ནི་དགའ་བར་བྱེད་པ་ཞེས་བྱ་བ་ལྷ་རྫས་ཀྱི་གོས་ཀྱི་ཆར་ཆེན་པོ་འབེབས་སོ། །ཀླུའི་རྒྱལ་པོ་ཆེན་པོའི་གནས་སུ་ནི་འོད་ཤིན་ཏུ་འཕགས་པ་ཞེས་བྱ་བ་མུ་ཏིག་དམར་པོའི་ཆར་ཆེན་པོ་འབེབས་སོ། །ལྷ་མ་ཡིན་གྱི་གནས་སུ་ནི་དགྲ་ཕ་རོལ་ཤིན་ཏུ་འཇོམ་པ་ཞེས་བྱ་བ་གཞུ་དང་མཚོན་ཆའི་ཆར་ཆེན་པོ་འབེབས་སོ། །བྱང་གི་སྒྲ་མི་སྙན་དུ་ནི་མེ་ཏོག་ཤིན་ཏུ་རྒྱས་པ་ཞེས་བྱ་བའི་མེ་ཏོག་སྣ་ཚོགས་ཀྱི་ཆར་ཆེན་པོ་འབེབས་སོ། །གཞུང་དེ་བཞིན་དུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་ཀྱི་གནས་སྣ་ཚོགས་སུ་རྣམ་པ་ཐ་དད་པའི་ཆར་སྣ་ཚོགས་རབ་ཏུ་འབེབས་སོ། །ཀྱེ་རྒྱལ་བའི་སྲས་ཀླུའི་རྒྱལ་པོ་གང་ཆེན་མཚོ་ལ་སེར་སྣ་ཅུང་ཟད་ཀྱང་མེད་དེ། འོན་ཀྱང་སེམས་ཅན་རྣམས་ཀྱི་དགེ་བའི་རྩ་བ་དང་། བསོད་ནམས་ཀྱི་ཚོགས་རྣམ་པ་སྣ་ཚོགས་ཐ་དད་པའི་ཁྱད་པར་གྱིས་ཆར་རྣམ་པ་ཐ་དད་པའང་སྣང་ཞིང་ཡོད་པར་གྱུར་ཏོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བླ་ན་མེད་པའི་ཆོས་ཀྱི་རྒྱལ་པོ་ཆེན་པོ་ཡང་རྟག་ཏུ་
རྒྱུན་མི་འཆད་པར་ཆོས་ཀྱི་རྣམ་པར་རོལ་པས་རྣམ་པར་རོལ་པའི་ཚེ། ཆོས་ཀྱི་དབྱིངས་མ་ལུས་པ་ཐམས་ཅད་ཆོས་ཀྱི་སྐུའི་སྤྲིན་གྱིས་རྒྱས་པར་བཀང་ཞིང་། སེམས་ཅན་ཇི་ལྟར་མོས་པའི་ཚུལ་བཞིན་དུ་སྐུའི་སྤྲིན་ཡང་དག་པར་སྟོན་ཏེ། འདི་ལྟར་སེམས་ཅན་ལ་ལ་ལ་ནི་སྐྱེ་བ་འབྱུང་བའི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་སྤྲུལ་པའི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་བྱིན་གྱི་རླབས་ཀྱི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་གཟུགས་ཀྱི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་སྐུ་སྣ་ཚོགས་མངོན་པར་བསྒྲུབས་པའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་བསོད་ནམས་ཀྱི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་ཡེ་ཤེས་ཀྱི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་སྟོབས་ལ་ཐུབ་པ་མེད་པའི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་མི་བསྙེངས་པ་ཟིལ་གྱིས་མི་ནོན་པའི་སྐུའི་སྤྲིན་ཡོངས་སུ་སྟོན་ཏོ། །སེམས་ཅན་ལ་ལ་ལ་ནི་ཆོས་ཀྱི་དབྱིངས་ལུས་པ་མེད་པའི་སྐུའི་སྤྲིན་ཡོངས་སུ་སྟོན་ཏེ། ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འཇིག་རྟེན་གྱི་ཁམས་མ་ལུས་པ་ཐམས་ཅད་ཆོས་ཀྱི་སྐུའི་སྤྲིན་གྱིས་བཀང་ཞིང་། སེམས་ཅན་རྣམས་ཀྱི་སེམས་དང་། བསམ་པ་དང་མོས་པ་ཇི་ལྟ་བའི་ཚུལ་བཞིན་དུ་དེ་དག་ལ་འོད་ཟེར་གྱི་གློག་གི་འཕྲེང་བ་འགྱེད་དེ། འདི་ལྟར་སེམས་ཅན་ལ་ལ་ལ་ནི་འོད་ཟེར་གྱི་གློག་གི་འཕྲེང་བ་ཀུན་ཏུ་ཁྱབ་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་སངས་རྒྱས་ཀྱི་གསང་བ་ལ་འཇུག་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་སྤོགས་པ་སྣང་བ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་སྣང་བར་བྱེད་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་གཟུངས་ཀྱི་སྒོ་མི་ཟད་པ་ལ་འཇུག་
པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་དྲན་པ་མི་འཁྲུགས་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་བློ་གྲོས་མི་འཕྲོགས་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་རིག་པའི་རྗེས་སུ་འཇུག་པ་ཞེས་བྱ་བ་འགྱེད་དོ། །སེམས་ཅན་ལ་ལ་ལ་ནི་འོད་ཟེར་གྱི་གློག་གི་ཕྲེང་བ་བསམ་པ་ཐམས་ཅད་ཤིན་ཏུ་ཚིམ་པར་བྱེད་པ་ཞེས་བྱ་བ་འགྱེད་དེ། ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་རྣམ་པ་དེ་ལྟ་བུའི་འོད་ཟེར་གྱི་དྲ་བའི་གློག་ཚད་མེད་པ་དེ་དག་རབ་ཏུ་བཀྱེ་ནས། ཏིང་ངེ་འཛིན་ཆེན་པོའི་འབྲུག་གི་སྒྲ་དབྱངས་རྣམ་པ་འདི་ལྟ་བུ་དག་རབ་ཏུ་སྒྲོག་སྟེ། འདི་ལྟར་སེམས་ཅན་ལ་ལ་ལ་ནི་བློ་ཤིན་ཏུ་རྣམ་པར་སངས་རྒྱས་པ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་ཤིན་ཏུ་སྦྱངས་པས་དྲི་མ་མེད་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་ཆོས་ཐམས་ཅད་ལ་དབང་བསྒྱུར་བ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་རྡོ་རྗེའི་དཀྱིལ་འཁོར་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་རི་རབ་རྒྱལ་མཚན་ཞེས་བྱ་བའི་ཏིང་ངེ་འཛིན་ཀྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་གང་ཆེན་རྒྱ་མཚོ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་ཉི་མ་སྒྲོན་མ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་འགྲོ་བ་ཐམས་ཅད་ཡོངས་སུ་ཚིམ་པར་བྱེད་པ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་མཛོད་མི་ཟད་པ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་གོ །སེམས་ཅན་ལ་ལ་ལ་ནི་མི་འཁྲུགས་
པའི་མོས་པ་ཡོངས་སུ་འཛིན་པ་ཞེས་བྱ་བའི་ཏིང་ངེ་འཛིན་གྱི་འབྲུག་གི་སྒྲ་དབྱངས་སྒྲོག་སྟེ། ཀྱེ་རྒྱལ་བའི་སྲས་དེ་ལྟར་དེ་དག་ལ་སྩོགས་པ་དེ་བཞིན་གཤེགས་པའི་ཆོས་ཀྱི་སྐུའི་སྤྲིན་ལས་དེ་དག་ལ་སྩོགས་པ་ཏིང་ངེ་འཛིན་རྣམ་པ་ཐ་དད་པའི་སྒོའི་འབྲུག་ཆེན་པོའི་སྒྲ་དབྱངས་ཆོས་མཉན་པའི་སྔོན་གྱི་ལྟས་འགྲོ་བ་ཐམས་ཅད་ཤིན་ཏུ་ཚིམ་པར་བྱེད་པ་རབ་ཏུ་སྒྲོག་གོ །ཀྱེ་རྒྱལ་བའི་སྲས་དེ་བཞིན་གཤེགས་པའི་ཆོས་ཀྱི་སྐུའི་སྤྲིན་རྣམ་པ་དེ་ལྟ་བུ་བྱུང་བ་དང་། འོད་ཟེར་གྱི་གློག་གི་ཕྲེང་བ་བཀྱེ་སྟེ། ཏིང་ངེ་འཛིན་གྱི་འབྲུག་སྒྲ་འགྲོ་བ་ཐམས་ཅད་ཚིམ་པར་བྱེད་པ་ཤིན་ཏུ་བསྒྲགས་པའི་ཚེ། དེ་བཞིན་གཤེགས་པའི་ཆོས་ཀྱི་སྐུའི་སྤྲིན་སྔོན་བྱམས་པ་ཆེན་པོ་དང་། ཐུགས་རྗེ་ཆེན་པོ་བསྒྲིབས་པ་མེད་པས། མངོན་པར་བསྒྲུབས་པ་ལས་ཡེ་ཤེས་ཆེན་པོའི་དཀྱིལ་འཁོར་གྱི་རླུང་འབྱུང་བ་ཡོད་དེ། དེ་ནི་ཐོག་མར་སེམས་ཅན་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་སེམས་དང་ལུས་སིམ་པར་བྱེད་དོ། །དེའི་འོག་ཏུ་ཆོས་ཀྱི་སྤྲིན་གྱི་ཆར་ཆེན་པོ་འབེབས་སོ། །ཀྱེ་རྒྱལ་བའི་སྲས་ཆོས་ཀྱི་སྐུའི་སྤྲིན་ཆེན་པོ་བསམ་གྱིས་མི་ཁྱབ་པ་ཐུགས་རྗེ་ཆེན་པོ་ལས་བྱུང་བ་བསྡུས་ཤིང་། སེམས་ཅན་ལུས་དང་སེམས་སིམ་པར་གྱུར་པ་རྣམས་ལ་དེ་བཞིན་གཤེགས་པ་ཆོས་ཀྱི་ཆར་ཆེན་པོ་བསམ་གྱིས་མི་ཁྱབ་པ་འབེབས་ཏེ། འདི་ལྟར་བྱང་ཆུབ་སེམས་དཔའ་སྙིང་པོ་བྱང་ཆུབ་ཀྱི་མཆོག་ཏུ་ཕྱིན་པ་རྣམས་ལ་ཆོས་ཀྱི་དབྱིངས་ཐ་མི་དད་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་དཔའ་སྲིད་པ་ཐ་མ་པ་རྣམས་ལ་དེ་བཞིན་གཤེགས་པའི་གསང་བ། བྱང་ཆུབ་སེམས་དཔའི་ཐབས་ཀྱི་རྣམ་པར་རོལ་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་དཔའ་དབང་བསྐུར་བ་ཐོབ་པ་རྣམས་ལ་དེ་བཞིན་གཤེགས་པའི་རྒྱན་གྱིས་རྣམ་པར་ཀླུབས་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་
དཔའ་ཚེ་གཅིག་གིས་ཐོགས་པ་རྣམས་ལ་ཀུན་ནས་སྣང་བ་ཡོངས་སུ་སྦྱོང་བ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་དཔའ་བཟོད་པ་ཐོབ་པ་རྣམས་ལ་ཡོན་ཏན་རིན་པོ་ཆེ་ཡེ་ཤེས་ཀྱི་མེ་ཏོག་ཤིན་ཏུ་རྒྱས་པས་བྱང་ཆུབ་སེམས་དཔའི་སྤྱོད་པ་རྒྱུན་མི་འཆད་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་དཔའི་སྤྱོད་པ་ལ་ཞུགས་པ་རྣམས་ལ་སྤྲུལ་པས་མངོན་པར་འཇུག་པའི་སྤྱོད་པ་རྒྱུན་མི་འཆད་ཅིང་ཡོངས་སུ་སྐྱོ་བ་མེད་པ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །བྱང་ཆུབ་སེམས་དཔའ་སེམས་དང་པོ་བསྐྱེད་པ་རྣམས་ལ་དེ་བཞིན་གཤེགས་པའི་སྤྱོད་པའི་རྗེས་སུ་སྙེག་ཅིང་། བྱམས་པ་ཆེན་པོ་དང་། སྙིང་རྗེ་ཆེན་པོས་འགྲོ་བ་ཐམས་ཅད་ཡོངས་སུ་སྐྱོབ་པ་ཞེས་བྱ་བའི་སྤྲིན་ཆེན་པོའི་ཆར་རབ་ཏུ་འབེབས་སོ། །སེམས་ཅན་རང་སངས་རྒྱས་ཀྱི་ཐེག་པ་ལ་མོས་པ་རྣམས་ལ་རྟེན་ཅིང་འབྲེལ་པར་འབྱུང་བའི་ཚུལ་ཁོང་དུ་ཆུད་པས་མཐའ་གཉིས་ཀྱི་ལྟ་བ་དང་བྲལ་ཞིང་རྣམ་པར་གྲོལ་བའི་འབྲས་བུ་ཆུད་མི་ཟ་བ་ཞེས་བྱ་བའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །སེམས་ཅན་ཉན་ཐོས་ཀྱི་ཐེག་པ་ལ་མོས་པ་རྣམས་ལ་ཉོན་མོངས་པའི་དགྲ་ཐམས་ཅད་འཇོམས་པ་ཞེས་བྱ་བའི་ཤེས་རབ་ཀྱི་རལ་གྲིའི་ཆོས་ཀྱི་སྤྲིན་ཆེན་པོའི་ཆར་རབ་ཏུ་འབེབས་སོ། །སེམས་ཅན་དགེ་བའི་རྩ་བ་ཤིན་ཏུ་བསྩགས་ཤིང་ཐེག་པ་ལ་ངེས་པར་གྱུར་པ་རྣམས་ལ་དགའ་བ་དང་། སྤྲོ་བ་རབ་ཏུ་བསྐྱེད་པ་ཞེས་བྱ་བ་ཆོས་ཀྱི་སྒོ་སྣ་ཚོགས་མངོན་པར་བསྒྲུབ་པའི་ཆར་རབ་ཏུ་འབེབས་ཏེ། ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པ་ནི་ཆོས་ཀྱི་སྒོ་བཅུ་པོ་འདི་དག་ལ་སྩོགས་པ་ཚད་མེད་པའི་ཆོས་ཀྱི་སྤྲིན་ཆེན་པོའི་ཆར་སེམས་ཅན་མ་ལུས་པ་ཐམས་ཅད་ཀྱི་མོས་པ་ཇི་ལྟ་བ་བཞིན་དུ། ཆོས་ཀྱི་དབྱིངས་ཐམས་ཅད་རྒྱས་པར་བཀང་སྟེ། རབ་ཏུ་འབེབས་པ་མཛད་དོ། །
ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ། ཆོས་ཀྱི་སེར་སྣ་གང་ཡང་མི་མངའ་ཡང་སེམས་ཅན་རྣམ་པ་ཇི་ལྟ་བུར་སྨིན་པའི་ཚུལ་དང་། བསམ་པ་དང་དབང་པོ་དང་མོས་པ་དང་། བརྩོན་འགྲུས་རྣམ་པ་ཐ་དད་པས་དེ་བཞིན་གཤེགས་པའི་ཆོས་ཀྱི་ཆར་ཆེན་པོ་རྣམ་པ་ཐ་དད་པར་སྣང་བར་གྱུར་ཏོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བཅུ་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསུང་བརྗོད་པ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་གསུང་དེ་ནི་ཚད་མེད་པ་ཤིན་ཏུ་བསྟན་པ་བཅུས་ཁོང་དུ་ཆུད་པར་བྱ་སྟེ། བཅུ་གང་ཞེ་ན། འདི་ལྟར་ཐམས་ཅད་རྗེས་སུ་སོང་བའི་ཕྱིར་ནམ་མཁའི་དབྱིངས་ལྟར་ཚད་མེད་པར་ཁོང་དུ་ཆུད་པར་བྱའོ། །མ་ལུས་པའི་མཐར་ཐུག་པས་ཆོས་ཀྱི་དབྱིངས་ལྟར་ཚད་མེད་པར་ཁོང་དུ་ཆུད་པར་བྱའོ། །སེམས་ཅན་ཐམས་ཅད་ཀྱི་སེམས་རབ་ཏུ་ཚིམ་པར་བྱེད་པས། སེམས་ཅན་གྱི་ཁམས་ལྟར་ཚད་མེད་པར་ཁོང་དུ་ཆུད་པར་བྱའོ། །རྣམ་པར་སྟོན་པས་ལས་ལྟར་ཚད་མེད་པར་ཁོང་དུ་ཆུད་པར་བྱའོ། ། ཤིན་ཏུ་ཞི་བར་བྱེད་པས་ཉོན་མོངས་པ་ལྟར་ཚད་མེད་པར་ཁོང་དུ་ཆུད་པར་བྱའོ། །སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་དུ་ཁོང་དུ་ཆུད་པར་བྱེད་པས། སྒྲ་དབྱངས་རྣམ་པ་ཐ་དད་པ་ལྟར་ཚད་མེད་པར་ཁོང་དུ་ཆུད་པར་བྱའོ། །རྣམ་པར་གྲོལ་བ་ཤིན་ཏུ་རྟོགས་པས་མོས་པ་ཚད་མེད་པ་ལྟར་ཁོང་དུ་ཆུད་པར་བྱའོ། །མཐའ་དང་དབུས་མེད་ཅིང་ས་མཚམས་མེད་པས་དུས་གསུམ་ལྟར་ཚད་མེད་པར་ཁོང་དུ་ཆུད་པར་བྱའོ། །ཆོས་ཐམས་ཅད་རྣམ་པར་འབྱེད་པས་ཡེ་ཤེས་ལྟར་ཚད་མེད་པར་ཁོང་དུ་ཆུད་པར་བྱའོ། །དེ་བཞིན་གཤེགས་པའི་ཆོས་ཀྱི་དབྱིངས་ཀྱི་རྗེས་སུ་སོང་བས་སངས་རྒྱས་ཀྱི་ཡུལ་ཕྱིར་མི་ལྡོག་པ་ལྟར་ཚད་མེད་པར་
ཁོང་དུ་ཆུད་པར་བྱ་སྟེ། ཀྱེ་རྒྱལ་བའི་སྲས་དེ་ལྟར་དེ་དག་ལ་སྩོགས་པ་མངོན་པར་བསྒྲུབས་པ་ཐ་དད་པ་ཤིན་ཏུ་བསྟན་པ་བརྒྱ་སྟོང་མང་པོས། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གསུང་བརྗོད་པ་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་ཡང་བརྟག་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །འཇིག་རྟེན་འཇིག་པར་འགྱུར་ཚེ་གཞལ་མེད་སྒྲ་དབྱངས་བཞི། །སེམས་ཅན་དགེ་བའི་འབྲས་བུས་བར་སྣང་མཁའ་ལས་འབྱུང་། །བསམ་གཏན་བཞི་ནི་ཞི་བ་སྡུག་བསྔལ་མེད་པ་ཡོད། །དེ་སྐད་སྒྲ་ཐོས་འདོད་པའི་ཁམས་རྣམས་རྣམ་པར་སྤོང་། །དེ་བཞིན་སྟོབས་བཅུ་མངའ་གསུང་དམ་པ་ཚད་མེད་པ། །སེམས་ཅན་དོན་དུ་ཆོས་དབྱིངས་རྣམ་པར་བཀང་ཞིང་འབྱུང་། དེས་ནི་སྲིད་པའི་མཚོ་ལས་འདའ་ཞིང་རྒལ་བར་འགྱུར། །བདེ་གཤེགས་གསུང་དེ་སྐུ་ལ་མེད་དེ་ཐུགས་ལ་མིན། །རི་དང་བྲག་དང་ལུང་སུལ་གནས་པའི་སྒྲ་བརྙན་ནི། །མི་ཡི་སྒྲ་བཞིན་སྒྲ་བརྙན་ཐམས་ཅད་རབ་ཏུ་བརྗོད། །གཞན་གྱི་སྒྲ་ཕྱུང་རྣམ་པར་དམིགས་པས་སྒྲ་དེ་འབྱུང་། །དེ་ལ་སྒྲ་རྟོག་རྣམ་པ་ཀུན་ཏུ་ཡོད་མ་ཡིན། །སྟོབས་བཅུ་མངའ་བའི་གསུང་དབྱངས་ཆོས་ཉིད་རྣམ་མི་རྟོག །གཞན་གྱི་སྤྱོད་དང་དབང་པོ་ཡོངས་སུ་སྨིན་པས་འབྱུང་། །སེམས་ཅན་མང་པོ་འདུལ་ཞིང་བསམ་པ་དགའ་བར་མཛད། །སྟོབས་བཅུ་མངའ་བ་རྣམས་ལ་རློམ་སེམས་བསྐྱོད་མི་མངའ། །ཇི་ལྟར་རྔ་ཆེན་ཆོས་ལ་བསྐུལ་བའི་སྒྲ་ལྡན་པ། །གང་ཚེ་ལྷ་རྣམས་འདོད་ལ་ཞེན་ཅིང་བག་མེད་པ། །དེ་ཚེ་མཁའ་ཡི་དབྱིངས་ལས་ཆོས་ཀྱི་སྒྲ་སྟོན་ཏེ། །སྒྲ་དེ་ཐོས་ཤིང་ལྷ་རྣམས་བག་ཡོད་སྤྱོད་པར་འགྱུར། །དེ་བཞིན་སྟོབས་བཅུ་མངའ་བའི་ཆོས་སྒྲ་ལྡན་པའི་རྔ། །ཕྱོགས་བཅུ་ཀུན་ཏུ་སེམས་ཅན་ཡང་དག་རབ་ཏུ་བསྐུལ། །
རྒྱལ་བའི་གསུང་ནི་སྐྱེ་མཆེད་འགག་པ་མི་དམིགས་སོ། །དེ་ཡི་སྒྲ་ཐོས་སེམས་ཅན་བྱང་ཆུབ་འཐོབ་པར་འགྱུར། །ལྷ་ཡི་དབང་པོ་དབང་བསྒྱུར་ལྷ་རྫས་རྩེ་བའི་ཚེ། །ལྷ་མོའི་ཁ་དབུགས་གཅིག་ཀྱང་ཡན་ལག་མང་ལྡན་པས། །ཁ་དབུགས་སྒྲ་དབྱངས་གཅིག་ལས་སྣ་ཚོགས་སྒྲ་མང་འབྱུང་། །སྒྲ་དབྱངས་བརྒྱ་སྟོང་མང་པོ་འབྱུང་ཡང་དེ་ལ་རྣམ་རྟོག་མེད། །དེ་བཞིན་སྟོབས་བཅུ་མངའ་བའི་གསུང་གཅིག་བསྒྲག་པ་ལས། །སེམས་ཅན་སྙེད་ཀྱི་གསུང་གི་ཡན་ལག་དུས་གཅིག་འབྱུང་། །སེམས་ཅན་ཇི་བཞིན་ཇི་ལྟར་མོས་པར་གསུང་ཉན་ཅིང་། །ཐོས་ནས་ཉོན་མོངས་སྤོང་བྱེད་སྒྲ་ལ་རྟོག་པ་མེད། །ཇི་ལྟར་ཚངས་པ་ཚངས་པའི་སྟན་ལས་མ་གཡོས་པར། །སྒྲ་དབྱངས་གཅིག་བརྗོད་ཚངས་པ་བསམ་ཡས་དགའ་བར་བྱེད། །འོན་ཀྱང་ཚངས་པའི་དབྱངས་དེ་འཁོར་གྱི་ཕྱིར་མི་འབྱུང་། །འཁོར་རྣམས་ཇི་སྙེད་ཐམས་ཅད་ཁོང་དུ་ཆུད་པར་བྱེད། ། སྟོབས་བཅུའི་ལེགས་མངའ་ཚངས་པ་སངས་རྒྱས་གདན་བཞུགས་ཤིང་། །གསུང་གཅིག་ཆོས་དབྱིངས་མ་ལུས་བཀང་ཏེ་རབ་ཏུ་སྒྲོག །འཁོར་ལས་མི་འདའ་སངས་རྒྱས་སེར་སྣ་མངའ་བ་མིན། །སེམས་ཅན་དད་དང་བྲལ་བས་རྒྱལ་བའི་གསུང་མི་ཐོས། །ཇི་ལྟར་ཆུ་རྒྱུན་ཐམས་ཅད་རང་བཞིན་གཅིག་པ་སྟེ། །རོ་འཐུན་མི་རྟོག་དག་ཅིང་ཡན་ལག་བརྒྱད་དང་ལྡན། །ས་སྟེངས་སྣོད་ཀྱི་ཁྱད་པར་གཞན་དང་གཞན་གྱུར་པས། །རྐྱེན་དང་ཕྲད་གྱུར་ཆུ་ཡི་རྣམ་པ་ཐ་དད་འགྱུར། །དེ་བཞིན་རྒྱལ་སྲས་ཐམས་ཅད་མཁྱེན་གསུང་ཐམས་ཅད་ཀྱང་། །རོ་མཐུན་མི་རྟོག་སངས་རྒྱས་བྱང་ཆུབ་རང་བཞིན་ཡིན། །སེམས་ཅན་སྤྱོད་པའི་ཁྱད་ཀྱིས་རྣམ་པ་ཐ་དད་འགྱུར། །སེམས་ཅན་བདེ་གཤེགས་གསུང་ལ་གཞན་དང་གཞན་དུ་ཉན། །མ་དྲོས་ཀླུ་ནི་འཛམ་བུའི་གླིང་ཆེན་ཀུན་བཀང་ཞིང་། །ས་གཞི་ངོམས་པར་བྱ་ཕྱིར་ཆར་པའི་རྒྱུན་ཀྱང་གཏོང་། །ལོ་ཐོག་ནགས་ཚལ་ཆུ་ཀླུང་རིམ་གྱིས་སྐྱེ་བར་བྱེད། །འོན་ཀྱང་ཆུ་རྒྱུན་ལུས་ལས་མ་བྱུང་
སེམས་ལས་མིན། །བཅོམ་ལྡན་འདས་ཀྱང་དེ་བཞིན་ཆོས་ཀྱི་དབྱིངས་བཀང་ཞིང་། །སེམས་ཅན་ངོམས་པར་བྱ་ཕྱིར་ཆོས་ཀྱི་ཆར་ཆེན་འབེབས། །དགེ་བ་བརྒྱ་འཕེལ་སེམས་ཅན་ཉོན་མོངས་ཞི་བར་མཛད། །རྒྱལ་བའི་གསུང་ནི་ཕྱི་ནང་གང་ནའང་ཡོད་པ་མིན། །ལག་གིས་འགྲོ་བའི་བདག་པོ་ཡིད་དུ་འོང་བ་ནི། །ཉིན་ཞག་བདུན་དུ་མཁའ་དབྱིངས་འདི་ལ་སྤྲིན་སྡུད་དེ། །དགོས་པ་མ་གྲུབ་བར་དུ་ཆར་གྱི་རྒྱུན་མི་འབེབས། །ཕན་པའི་དོན་དུ་ཆར་རྒྱུན་ཕྲ་མོ་ཕྱིས་འབེབས་སོ། །སྟོབས་བཅུ་འགྲོ་བའི་དོན་དུ་ཆོས་དབྱིངས་རྒྱས་མཛད་ཅིང་། །སེམས་ཅན་ཡོངས་སུ་སྨིན་ཕྱིར་དོན་དམ་མི་གསུང་སྟེ། །ནམ་ཞིག་སྣོད་དུ་གྱུར་ཚེ་ཟབ་མོའི་ཆོས་ཀྱང་གསུང་། །ཐོས་ནས་མི་སྔང་སངས་རྒྱས་ཡེ་ཤེས་འཇུག་པར་འགྱུར། །ཇི་ལྟར་རྒྱ་མཚོའི་ཀླུ་ཡི་རྒྱལ་པོ་རྒྱན་ཅན་ནི། །སྤྲིན་གྱི་རྒྱན་བཅུ་བསྡུས་ཤིང་ཆར་པ་རབ་ཏུ་འབེབས། །འོན་ཏམ་སྤྲིན་རྒྱན་བརྒྱ་བསྡུས་བརྒྱ་སྟོང་རྒྱན་བསྡུས་ཤིང་། །རོ་གཅིག་ཆར་ལས་རྣམ་པ་སྣ་ཚོགས་མང་པོ་འབེབས། །སངས་རྒྱས་ཐ་དད་ཡང་དག་མཁྱེན་གྱི་མཐར་ཕྱིན་པའི། །རང་བྱུང་སྒོ་བཅུ་འོན་ཏམ་ཉི་ཤུ་བརྒྱ་གསུང་སྟེ། །གལ་ཏེ་ཡང་ན་བརྒྱ་སྟོང་ཚད་མེད་མང་པོ་གསུང་། །འོན་ཀྱང་ཆོས་དབྱིངས་རྣམ་པར་འབྱེད་པར་མཛད་པ་མེད། །ལག་འགྲོ་ཀུན་གྱི་གཙོ་བོ་ཀླུ་དབང་གང་ཆེན་མཚོ། །གླིང་བཞི་འདི་དག་སྤྲིན་གྱི་དྲ་བས་ཀུན་ཏུ་འགེངས། །གནས་རྣམས་ཀུན་ཏུ་ཆར་པ་རྣམ་པ་སྣ་ཚོགས་འབེབས། །གང་ཆེན་མཚོ་བདག་དེ་ལ་གཉིས་སུ་བྱ་བ་མེད། །སངས་རྒྱས་འགྲོ་བ་ཀུན་གཙོ་ཆོས་རྒྱལ་དམ་པ་ཡང་། །ཐུགས་རྗེ་ཆེན་པོའི་སྟོབས་ཀྱིས་སྐུ་སྤྲིན་རྒྱས་བདལ་ཅིང་། བྱང་ཆུབ་ལམ་དུ་ཞུགས་ལ་ཆོས་རབ་ཆར་འབེབས་ཏེ། །མི་རྟོག་འཇིག་རྟེན་ཀུན་ལ་གཞན་དང་གཞན་ཡང་གསུང་།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་བཅུ་གཅིག་པ།
དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས། ཇི་ལྟ་བུར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ནི་སེམས་ཀྱིས་རྣམ་པར་དགོད་པ་མ་ཡིན། ཡིད་ཀྱིས་རྣམ་པར་དགོད་པ་མ་ཡིན། རྣམ་པར་ཤེས་པས་རྣམ་པར་དགོད་པ་མ་ཡིན་ཏེ། ཀྱེ་རྒྱལ་བའི་སྲས་དེ་བཞིན་གཤེགས་པའི་ཐུགས་སྐྱེ་བ་ནི། དེ་བཞིན་གཤེགས་པའི་ཡེ་ཤེས་ཚད་མེད་པས་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནམ་མཁའ་ལ་བརྟེན་ཅིང་བྱ་བ་ཐམས་ཅད་རྣམ་པར་དགོད་པར་འགྱུར་ཏེ། ནམ་མཁའ་ནི་མི་གནས་པའོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་ལ་བརྟེན་ཅིང་། འཇིག་རྟེན་པ་དང་འཇིག་རྟེན་ལས་འདས་པའི་ཤེས་པ་ཐམས་ཅད་རྣམ་པར་དགོད་པ་ཡིན་ཏེ། དེ་བཞིན་གཤེགས་པའི་ཡེ་ཤེས་ནི་མི་གནས་པའོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དང་པོ་འདིས། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། ཆོས་ཀྱི་དབྱིངས་སུ་ནི་ཉན་ཐོས་ཐམས་ཅད་ཀྱང་རྣམ་པར་གྲོལ་བར་འགྱུར་རོ། །རང་སངས་རྒྱས་ཐམས་ཅད་ཀྱང་རྣམ་པར་འགྲོལ་ཏེ། བྱང་ཆུབ་སེམས་དཔའ་ཐམས་ཅད་ཀྱང་ཡང་དག་པར་འབྱུང་མོད་
ཀྱི། ཆོས་ཀྱི་དབྱིངས་ལ་འཕེལ་ཞིང་འགྲིབ་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་ལ་བརྟེན་ཅིང་། འཇིག་རྟེན་དང་འཇིག་རྟེན་ལས་འདས་པའི་ཤེས་པ་བགྲངས་པ་ཐམས་ཅད་ཀྱང་། རྣམ་པར་དགོད་ཅིང་ལས་དང་བཟོའི་གནས་ཐམས་ཅད་རྣམ་པར་དགོད་ཀྱང་དེ་བཞིན་གཤེགས་པའི་ཡེ་ཤེས་ལ་འཕེལ་ཞིང་འགྲིབ་པ་མེད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་གཉིས་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། གླིང་ཆེན་པོ་བཞི་དང་། གླིང་ཕྲན་བྱེ་བ་བརྒྱ་ཕྲག་བརྒྱད་ཅུ་དག་ནི་རྒྱ་མཚོ་ཆེན་པོས་མངོན་པར་སྤངས་པའི་ཕྱིར་གང་དང་གང་དུ་སའི་ཁམས་བཤོང་བ་དེ་དང་དེ་ནས་ཆུ་འབྱུང་སྟེ། རྒྱ་མཚོ་ཆེན་པོ་ལ་རྣམ་པར་རྟོག་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་སེམས་ཅན་ཐམས་ཅད་ཀྱི་སེམས་དང་བསམ་པ་ཡང་དེ་བཞིན་གཤེགས་པའི་ཡེ་ཤེས་ཀྱིས་མངོན་པར་བརླན་པས། དེ་དག་དམིགས་པ་གང་དང་། གང་ལ་རྣམ་པར་དཔྱོད་ཅིང་ཆོས་ཀྱི་སྒོ་གང་དང་གང་ལ་བརྩོན་པར་བྱེད་པ། དེ་དང་དེ་ནས་ཡེ་ཤེས་ཀྱི་སྣང་བ་འབྱུང་སྟེ། དེ་བཞིན་གཤེགས་པའི་ཡེ་ཤེས་རྒྱ་མཚོ་ཆེན་པོ་དེ་ནི་སྙོམས་ཤིང་རྣམ་པར་མི་རྟོག་ལ་རིམ་པར་འབྱེད་པ་མི་མཛད་ཀྱང་། བསམ་པ་དང་སྦྱོར་བའི་ཁྱད་པར་གྱིས་དེ་བཞིན་གཤེགས་པའི་ཡེ་ཤེས་སྣང་བའི་ཁྱད་པར་དུ་འགྱུར་བ་ཡང་ཡོད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་གསུམ་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྒྱ་
མཚོ་ཆེན་པོའི་ནང་ན་ནོར་བུ་རིན་པོ་ཆེ་ཆེན་པོ་ཡོན་ཏན་ཚད་མེད་པ་ཕུན་སུམ་ཚོགས་པ་བཞི་ཡོད་དེ། ནོར་བུ་རིན་པོ་ཆེ་དེ་དག་གི་གཟི་བརྗིད་དང་མཐུས། རྒྱ་མཚོ་ཆེན་པོར་རིན་པོ་ཆེ་ཐམས་ཅད་འབྱུང་སྟེ། ཀྱེ་རྒྱལ་བའི་སྲས་གལ་ཏེ་རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་དེ་བཞི་མེད་དུ་ཟིན་ན་ནི། རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་གཅིག་ཀྱང་ཡོད་པར་མི་འགྱུར་རོ། །བཞི་པོ་དེ་དག་ཀྱང་གང་ཞེ་ན། འདི་ལྟ་སྟེ། རིན་པོ་ཆེ་ཐམས་ཅད་ཡང་དག་པར་སྡུད་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་དང་། མི་ཟད་པའི་མཛོད་ཅེས་བྱ་བའི་ནོར་བུ་རིན་པོ་ཆེ་ཆེན་པོ་དང་། སྙིང་བླས་མེད་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་དང་། རྒྱན་ཐམས་ཅད་ཡང་དག་པར་སྡུད་པ་ཞེས་བྱ་བའི་ནོར་བུ་རིན་པོ་ཆེ་ཆེན་པོ་སྟེ། ནོར་བུ་རིན་པོ་ཆེ་ཚད་མེད་པའི་ཡོན་ཏན་ཕུན་སུམ་ཚོགས་པ་དང་ལྡན་པ་དེ་བཞི་ཡོད་དོ། །ཀྱེ་རྒྱལ་བའི་སྲས་ནོར་བུ་རིན་པོ་ཆེ་ཆེན་པོ་བཞི་པོ་དེ་དག་ནི་བསོད་ནམས་ངན་ངོན་དང་ལྡན་པའི་ལྷ་མ་ཡིན་ནམ། ནམ་མཁའ་ལྡིང་ངམ། ཀླུའམ་དེ་མ་ཡིན་པའི་སེམས་ཅན་ཆུ་ལ་གནས་པའི་མིག་གིས་མཐོང་བར་མི་འགྱུར་རོ། །དེ་ཅིའི་ཕྱིར་ཞེ་ན། ནོར་བུ་རིན་པོ་ཆེ་ཆེན་པོ་དེ་བཞི་ནི་ཀླུའི་རྒྱལ་པོ་གང་ཆེན་མཚོའི་མཛོད་ན་འཁོད་པའི་ཕྱིར་རོ། །ཀྱེ་རྒྱལ་བའི་སྲས་ནོར་བུ་རིན་པོ་ཆེ་ཆེན་པོ་བཞི་པོ་དེ་དག་ནི་གྲུ་བཞིར་འདུག་པ་སྟེ། ཀླུའི་རྒྱལ་པོ་གང་ཆེན་མཚོའི་གནས་ཀྱི་ཕྱོགས་བཞིར་བཀོད་པ་དག་གོ །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་རྒྱ་མཚོ་ཆེན་པོའི་ནང་ན་ཡེ་ཤེས་ཀྱི་རིན་པོ་ཆེ་ཆེན་པོ་བསོད་ནམས་དང་། ཡེ་ཤེས་དང་ཡོན་ཏན་ཕུན་སུམ་ཚོགས་པ་བཞི་ཡོད་དེ། ཡེ་ཤེས་རིན་པོ་ཆེ་ཆེན་པོ་དེ་དག་གི་གཟི་བརྗིད་དང་། མཐུས་དེ་བཞིན་གཤེགས་པའི་ཡེ་ཤེས་རྒྱ་མཚོ་ཆེན་པོའི་ནང་ནས་སློབ་པ་དང་། མི་སློབ་པ་ཐམས་ཅད་དང་། རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་
རིན་པོ་ཆེ་འབྱུང་སྟེ། ཀྱེ་རྒྱལ་བའི་སྲས་གལ་ཏེ་དེ་བཞིན་གཤེགས་པའི་ཡེ་ཤེས་རྒྱ་མཚོ་ཆེན་པོའི་ནང་ན། ཡེ་ཤེས་རིན་པོ་ཆེ་ཆེན་པོ་དེ་བཞི་མེད་དུ་ཟིན་ན་ནི། དེ་བཞིན་གཤེགས་པའི་ཡེ་ཤེས་རྒྱ་མཚོ་ཆེན་པོའི་ནང་ནས་ཆུང་ངུ་ན། བྱང་ཆུབ་སེམས་དཔའ་གཅིག་གི་ཡེ་ཤེས་རིན་པོ་ཆེ་ཡང་འབྱུང་བར་མི་འགྱུར་རོ། །བཞི་པོ་དེ་དག་ཀྱང་གང་ཞེ་ན། འདི་ལྟ་སྟེ། ཐབས་མཁས་པ་ཆགས་པ་མེད་པའི་ཡེ་ཤེས་རིན་པོ་ཆེ་ཆེན་པོ་དང་། འདུས་བྱས་དང་འདུས་མ་བྱས་སུ་མཉམ་པའི་ཆོས་རབ་ཏུ་རྟོགས་པའི་ཡེ་ཤེས་རིན་པོ་ཆེ་ཆེན་པོ་དང་། ཆོས་ཀྱི་དབྱིངས་ཐ་མི་དད་ཀྱང་རྣམ་པ་ཐ་དད་དུ་ཤིན་ཏུ་སྟོན་པའི་ཡེ་ཤེས་རིན་པོ་ཆེ་ཆེན་པོ་དང་། དུས་དང་དུས་མ་ཡིན་པ་ལས་མི་འདའ་ཞིང་དུས་ལ་ཕེབས་པར་བྱེད་པའི་ཡེ་ཤེས་རིན་པོ་ཆེ་ཆེན་པོ་སྟེ། དེ་བཞིན་གཤེགས་པའི་ཡེ་ཤེས་རིན་པོ་ཆེ་ཆེན་པོ་དེ་བཞི་ཡོད་དོ། །ཀྱེ་རྒྱལ་བའི་སྲས་ཡེ་ཤེས་རིན་པོ་ཆེ་ཆེན་པོ་བཞི་པོ་དེ་དག་ནི། སེམས་ཅན་བསོད་ནམས་ངན་ངོན་དང་ལྡན་པ་རྣམས་ཀྱི་མིག་གིས་མཐོང་བར་མྱི་འགྱུར་ཏེ། དེ་ཅིའི་ཕྱིར་ཞེ་ན། ཡེ་ཤེས་རིན་པོ་ཆེ་ཆེན་པོ་དེ་བཞི་ནི་དེ་བཞིན་གཤེགས་པའི་ཆོས་ཀྱི་མཛོད་ན་འཁོད་པའི་ཕྱིར་ཏེ། ཀྱེ་རྒྱལ་བའི་སྲས་ཡེ་ཤེས་རིན་པོ་ཆེ་ཆེན་པོ་བཞི་པོ་དེ་དག་ནི་རྣམ་པ་ཀུན་ཏུ་བཟང་བ་སྟེ། ཕྱོགས་བཞིར་རྣམ་པར་བཀོད་ཅིང་བྱང་ཆུབ་སེམས་དཔའ་ཉེ་བར་འཚོ་བ་དང་། བྱང་ཆུབ་སེམས་དཔའི་ཡེ་ཤེས་སྣང་བས་འཐོབ་པ་དག་སྟེ། ཕྱོགས་བཞིར་བྱང་ཆུབ་སེམས་དཔའ་ཡང་དག་པར་བསྒྲུབས་པའི་ཕྱིར་རྣམ་པར་བཀོད་པ་དག་གོ། ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བཞི་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྒྱ་མཚོ་ཆེན་པོ་དེ་ཉིད་ཀྱི་འོག་ན་ནོར་བུ་རིན་པོ་ཆེ་ཆེན་པོ་དྲག་ཤུལ་གྱི་གཟི་བརྗིད་དང་
ལྡན་པ་མཐུ་ཤིན་ཏུ་ཆེ་བ་བཞི་ཡོད་དེ། ནོར་བུ་རིན་པོ་ཆེ་ཆེན་པོ་དེ་དག་གི་གཟི་བརྗིད་དང་མཐུས། རྒྱ་མཚོ་ཆེན་པོར་རླུགས་པའི་ཆུའི་ཕུང་པོ་ཐམས་ཅད་ཡོངས་སུ་འགྲིབ་པར་འགྱུར་ཏེ། དེ་ཡོད་པས་རྒྱ་མཚོ་ཆེན་པོ་ཡང་འཕེལ་བ་དང་འགྲིབ་པར་མི་འགྱུར་རོ། །ནོར་བུ་རིན་པོ་ཆེ་ཆེན་པོ་དེ་བཞི་ནི་རྒྱ་མཚོ་ཆེན་པོའི་འོག་གི་མཚམས་ན་གནས་ཏེ། བཞི་གང་ཞེ་ན་འདི་ལྟ་སྟེ། ཉི་མའི་སྙིང་པོ་ཞེས་བྱ་བའི་ནོར་བུ་རིན་པོ་ཆེ་དང་། རླན་མེད་པ་ཞེས་བྱ་བའི་ནོར་བུ་རིན་པོ་ཆེ་དང་། མེའི་འོད་ཅེས་བྱ་བའི་ནོར་བུ་རིན་པོ་ཆེ་དང་། མ་ལུས་པའི་མཐར་ཐུག་པ་ཞེས་བྱ་བའི་ནོར་བུ་རིན་པོ་ཆེ་དག་སྟེ། ནོར་བུ་རིན་པོ་ཆེ་ཆེན་པོ་དེ་བཞི་ཡོད་དོ། །ཀྱེ་རྒྱལ་བའི་སྲས་གལ་ཏེ་རྒྱ་མཚོ་ཆེན་པོ་ལ་ནོར་བུ་རིན་པོ་ཆེ་ཆེན་པོ་དེ་བཞི་མེད་དུ་ཟིན་ན་ནི། གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་ཀྱང་གཅིག་ཏུ་ཆུས་ཡོངས་སུ་རྒྱས་པར་འགྱུར་ཏེ། ཁོར་ཡུག་དང་ཁོར་ཡུག་ཆེན་པོའི་རི་ལས་ཀྱང་འདས་ཤིང་། ཆུའི་ཕུང་པོས་སྲིད་པའི་རྩེ་མོ་མན་ཆད་དུའང་གང་བར་འགྱུར་རོ། །ཀྱེ་རྒྱལ་བའི་སྲས་རྒྱ་མཚོ་ཆེན་པོར་འདུས་པའི་ཆུའི་ཕུང་པོ་དེ་དག་ཀྱང་ནོར་བུ་རིན་པོ་ཆེ་ཉི་མའི་སྙིང་པོའི་འོད་ཀྱིས་ཕོག་ན་ཆུའི་རང་བཞིན་སྤངས་ནས། འོ་མ་དང་ཞོར་གྱུར་ཏེ་འདུག་གོ །ནོར་བུ་རིན་པོ་ཆེ་ཆེན་པོ་རླན་མེད་པའི་འོད་ཀྱིས་ཕོག་ན་འོ་མ་དང་ཞོའི་རང་བཞིན་སྤངས་ནས་མར་གྱི་ཉིང་ཁུ་ལྟ་བུར་འགྱུར་རོ། །མེའི་འོད་ཀྱི་ནོར་བུ་རིན་པོ་ཆེ་ཆེན་པོའི་འོད་ཀྱིས་ཕོག་ན་མར་གྱི་སྙིང་ཁུ་ལྟ་བུའི་རང་བཞིན་སྤངས་ཏེ་མེ་ལྟ་བུར་འབར་བར་འགྱུར་རོ། །ནོར་བུ་རིན་པོ་ཆེ་ཆེན་པོ་མ་ལུས་པའི་མཐར་ཐུག་པའི་འོད་ཀྱིས་ཕོག་ན། ཐམས་ཅད་ལྷག་མ་མེད་ཅིང་མ་ལུས་པར་མི་སྣང་བར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་རྒྱ་མཚོ་ཆེན་པོ་ལ་ཡེ་ཤེས་རིན་པོ་ཆེ་ཆེན་པོ་མཐུ་དང་འོད་ཤིན་ཏུ་ཆེ་བ་བཞི་ཡོད་དེ། ཡེ་ཤེས་རིན་པོ་ཆེ་ཆེན་པོ་དེ་བཞིའི་མཐུ་དང་འོད་
ཀྱིས་ཕོག་ན། བྱང་ཆུབ་སེམས་དཔའི་སྨོན་ལམ་གྱི་བསམ་པས་བྱུང་བའི་བསོད་ནམས་ཀྱི་ཆུའི་ཕུང་པོ་ཡོངས་སུ་འགྲིབ་པར་འགྱུར་ཏེ། དེ་དག་ཡོད་པས་དེ་བཞིན་གཤེགས་པའི་ཡེ་ཤེས་ཀྱི་རྒྱ་མཚོ་ཆེན་པོ་གང་བ་དང་འགྲིབ་པར་མི་མངོན་ནོ། །བཞི་པོ་དེ་དག་ཀྱང་གང་ཞེ་ན་འདི་ལྟ་སྟེ། དབའ་རླབས་ཐམས་ཅད་ཞི་བར་བྱེད་པའི་ཡེ་ཤེས་རིན་པོ་ཆེ་ཆེན་པོ་དང་། ཆོས་ཀྱི་རྗེས་སུ་འབྲང་ཞིང་སྲེད་པ་ཡོངས་སུ་ཟད་པར་བྱེད་པའི་ཡེ་ཤེས་རིན་པོ་ཆེ་ཆེན་པོ་དང་། ཤེས་རབ་ཀྱི་འོད་ཆེན་པོས་ཤིན་ཏུ་སྣང་བའི་ཡེ་ཤེས་རིན་པོ་ཆེ་ཆེན་པོ་དང་། མུན་པ་མེད་ཅིང་སྣང་བ་མྱེད་པ་དེ་བཞིན་གཤེགས་པའི་མཉམ་པ་ཉིད་ཀྱི་ཡེ་ཤེས་རིན་པོ་ཆེ་ཆེན་པོ་སྟེ། དེ་བཞིན་གཤེགས་པའི་ཡེ་ཤེས་རིན་པོ་ཆེ་མཐུ་དང་། གཟི་བརྗིད་ཤིན་ཏུ་ཆེ་བ་འདི་བཞི་ཡོད་དོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་རིན་པོ་ཆེ་ཆེན་པོ་འདི་བཞིའི་གཟི་བརྗིད་དང་མཐུས་བྱང་ཆུབ་སེམས་དཔའ་ཐམས་ཅད་ཀྱང་དེ་བཞིན་གཤེགས་པའི་ཡེ་ཤེས་མཉམ་པ་ཉིད་འཐོབ་པར་འགྱུར་རོ། །ཀྱེ་རྒྱལ་བའི་སྲས་དེ་ལྟར་དེ་བཞིན་གཤེགས་པའི་ཡེ་ཤེས་ཀྱི་རྒྱ་མཚོ་ཆེན་པོ་དེ་ལ་བྱང་ཆུབ་སེམས་དཔའ་བསོད་ནམས་དང་། བྱང་ཆུབ་ཀྱི་ཚོགས་ཆེན་པོ་བསྩགས་པ་རྣམས་ཀྱི་དགེ་བའི་རྩ་བའི་དབའ་རླབས་ཀྱི་ཤུགས་དྲག་པོ། །ལྷ་དང་མི་དང་ལྷ་མ་ཡིན་གྱི་འཇིག་རྟེན་དུ་བཅས་པས། མི་ཟློགས་ཤིང་བསམ་གྱིས་མི་ཁྱབ་པ་ལྡང་སྟེ། བྱང་ཆུབ་སེམས་དཔའ་དགེ་བའི་རྩ་བའི་དབའ་རླབས་ཀྱི་ཤུགས་བསམ་གྱིས་མི་ཁྱབ་པ་དེ་དག་ལ་དེ་བཞིན་གཤེགས་པའི་ཡེ་ཤེས་རིན་པོ་ཆེ་ཆེན་པོའི་དབའ་རླབས་ཐམས་ཅད་ཞི་བར་བྱེད་པའི་འོད་ཀྱིས་ཕོག་ན། དགེ་བའི་རྩ་བའི་དབའ་རླབས་ཀྱི་ཤུགས་དྲག་པོ་སྤངས་ནས། ཏིང་ངེ་འཛིན་ལ་རྩེ་གཅིག་ཏུ་གནས་པར་འགྱུར་རོ། །ཆོས་ཀྱི་རྗེས་སུ་འབྲང་ཞིང་སྲེད་པ་ཟད་པར་བྱེད་པའི་ཡེ་ཤེས་རིན་པོ་ཆེ་ཆེན་པོའི་འོད་ཀྱིས་ཕོག་ན། ཏིང་ངེ་འཛིན་གྱི་རོ་དང་གནས་རྣམ་པར་སྤངས་ཏེ།
མངོན་པར་ཤེས་པ་རྒྱ་ཆེན་པོ་མངོན་པར་བསྒྲུབ་པའི་ཚུལ་ལ་གནས་པར་འགྱུར་རོ། །ཤེས་རབ་ཀྱི་འོད་ཆེན་པོས་ཤིན་ཏུ་སྣང་བའི་ཡེ་ཤེས་རིན་པོ་ཆེ་ཆེན་པོའི་འོད་ཀྱིས་ཕོག་ན་མངོན་པར་ཤེས་པ་རྒྱ་ཆེན་པོ་མངོན་པར་བསྒྲུབ་པའི་ཚུལ་རྣམ་པར་སྤངས་ཏེ། རིགས་པའི་སྣང་བ་ཆེན་པོ་མངོན་པར་བསྒྲུབ་པའི་ཚུལ་ལ་གནས་པར་འགྱུར་རོ། །མུན་པ་མེད་ཅིང་སྣང་བ་མེད་པ་དེ་བཞིན་གཤེགས་པའི་མཉམ་པ་ཉིད་ཀྱི་ཡེ་ཤེས་རིན་པོ་ཆེ་ཆེན་པོའི་འོད་ཀྱིས་ཕོག་ན། རིགས་པའི་སྣང་བ་ཆེན་པོ་མངོན་པར་བསྒྲུབ་པའི་ཚུལ་རྣམ་པར་སྤངས་ཏེ། དེ་བཞིན་གཤེགས་པའི་ས་མཉམ་པ་ཉིད་ཆེད་དུ་བྱ་བ་ཡོངས་སུ་ཞི་བ་ཕྲིན་ལས་ལྷུན་གྱིས་གྲུབ་པར་འབྱུང་བ་རབ་ཏུ་འཐོབ་བོ། །ཀྱེ་རྒྱལ་བའི་སྲས་ཡེ་ཤེས་རིན་པོ་ཆེ་ཆེན་པོ་འདི་བཞིའི་འོད་སྣང་བས་ཕོག་པའི་བྱང་ཆུབ་སེམས་དཔའ་རྣམས་ནི་དེ་བཞིན་གཤེགས་པའི་མཉམ་པ་ཉིད་བཞི་པོ་དེ་དག་འཐོབ་པར་འགྱུར་རོ། །ཀྱེ་རྒྱལ་བའི་སྲས་གལ་ཏེ་དེ་བཞིན་གཤེགས་པའི་ཡེ་ཤེས་ཀྱི་རྒྱ་མཚོ་ཆེན་པོའི་ནང་ན་ཡེ་ཤེས་རིན་པོ་ཆེ་ཆེན་པོ་འདི་བཞི་མེད་དུ་ཟིན་ན་ནི། ཆུང་ངུ་ན་བྱང་ཆུབ་སེམས་དཔའ་གཅིག་གིས་ཀྱང་དེ་བཞིན་གཤེགས་པའི་ས་མཉམ་པ་ཉིད་འཐོབ་པར་འགྱུར་བའི་གནས་མེད་སྐབས་མེད་དེ། དེ་ནི་གནས་མ་ཡིན་ནོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། འོག་གི་ཆུའི་ཕུང་པོ་ཉེ་བར་བཟུང་བ་ཡན་ཅད། འདུ་ཤེས་མེད། འདུ་ཤེས་མེད་མིན་གྱི་སྐྱེ་མཆེད་ཀྱི་སྲིད་པའི་རྩེ་མོའི་བར་གྱི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ནམ་མཁའ་ལ་གནས་པ་སྟེ། གཟུགས་མེད་པ་ལ་སྤྱོད་པའི་སེམས་ཅན་གྱི་གནས་དང་། གཟུགས་ལ་སྤྱོད་པའི་སེམས་ཅན་གྱི་གནས་དང་། འདོད་པ་ལ་སྤྱོད་པའི་སེམས་ཅན་གྱི་གནས་ཇི་སྙེད་པ་དེ་
དག་ཐམས་ཅད་ནམ་མཁའ་ལ་གནས་ཤིང་ནམ་མཁའི་དབྱིངས་ལས་བྱུང་བའོ། །དེ་ཅིའི་ཕྱིར་ཞེ་ན། ནམ་མཁའི་དབྱིངས་ཀྱིས་ཐམས་ཅད་དུ་ཁྱབ་པའི་ཕྱིར་ཏེ། ནམ་མཁའ་ལ་གནོད་པའམ། མི་བདེ་བར་འགྱུར་བ་མེད་ཀྱང་ཁམས་གསུམ་དུ་འགྲུབ་པའི་གྲངས་སུ་ཡང་འགྲོའོ། །ཀྱེ་རྒྱལ་བའི་སྲས་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་པ་མ་ལུས་པ་དག་ན། ཉན་ཐོས་ཀྱི་ཡེ་ཤེས་སམ། རང་སངས་རྒྱས་ཀྱི་ཡེ་ཤེས་སམ། བྱང་ཆུབ་སེམས་དཔའི་ཡེ་ཤེས་སམ། འདུས་བྱས་ལ་སྤྱོད་པའི་ཡེ་ཤེས་སམ། འདུས་མ་བྱས་ལ་སྤྱོད་པའི་ཡེ་ཤེས་གང་ཇི་སྙེད་ཡོད་པ། དེ་དག་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་ནམ་མཁའ་ལ་གནས་ཤིང་། དེ་བཞིན་གཤེགས་པའི་ཡེ་ཤེས་ཀྱི་ནམ་མཁའ་ལས་བྱུང་བའོ། ། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་ཡེ་ཤེས་ཀྱི་ནམ་མཁའི་དབྱིངས་ཀྱིས་ཀུན་ཏུ་ཁྱབ་པའི་ཕྱིར་ཏེ། དེ་བཞིན་གཤེགས་པའི་ཡེ་ཤེས་ལ་གནོད་པའམ་མི་བདེ་བར་འགྱུར་བ་མེད་ཀྱང་ཡེ་ཤེས་ཡང་དག་པར་འགྲུབ་པ་རྣམ་པ་ཐ་དད་པར་འགྱུར་བ་ཡང་ཡོད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རིའི་རྒྱལ་པོ་ཁ་བ་དང་ལྡན་པའི་རྩེ་མོ་ལ། སྨན་གྱི་རྒྱལ་པོ་རྩ་བ་མ་གྲུབ་པ་ཞེས་བྱ་བ་ཡོད་དེ། དེ་ནི་ས་ཆེན་པོའི་འོག་རྡོ་རྗེའི་དབྱིངས་ཀྱི་ཆུའི་ཕུང་པོའི་གཞིའི་གཏིང་ནས་དཔག་ཚད་བརྒྱ་སྟོང་ཕྲག་དྲུག་ཅུ་རྩ་བརྒྱད་མངོན་པར་བརྟོལ་ཏེ། གྱེན་དུ་བྱུང་བས་རྩ་བ་ཤིན་ཏུ་བརྟན་པའོ། །སྨན་གྱི་རྒྱལ་པོ་དེའི་རྩ་བའི་འོད་ལས། འཛམ་བུའི་གླིང་ན་ཡོད་པའི་ཤིང་ཐམས་ཅད་ཀྱི་རྩ་བ་ཆགས་པར་འགྱུར་ཏེ། སྡོང་པོའི་འོད་ཀྱིས་སྡོང་པོ་ཆགས་
པར་འགྱུར་རོ། །ཡལ་གའི་འོད་ཀྱིས་ཡལ་ག་ཆགས་པར་འགྱུར་རོ། །ལོ་མའི་འོད་ཀྱིས་ལོ་མ་ཆགས་པར་འགྱུར་རོ། །མེ་ཏོག་གི་འོད་ཀྱིས་མེ་ཏོག་ཆགས་པར་འགྱུར་རོ། །འབྲས་བུའི་འོད་ཀྱིས་འབྲས་བུ་ཆགས་པར་འགྱུར་རོ། །སྨན་ཀྱི་རྒྱལ་པོ་ཆེན་པོ་དེའི་རྩ་བ་ལས་སྙིང་པོ་འགྲུབ་བོ། །སྙིང་པོ་ལས་རྩ་བ་འགྲུབ་བོ། །དེ་ཅིའི་ཕྱིར་ཞེ་ན། རྩ་བ་མ་གྲུབ་པ་ཞེས་བྱ་སྟེ། སྨན་གྱི་རྒྱལ་པོ་ཆེན་པོ་དེ་ནི་གནས་རྣམ་པ་གཉིས་སུ་མྱི་སྐྱེ་སྟེ། གཉིས་གང་ཞེ་ན། འདི་ལྟ་སྟེ། སེམས་ཅན་དམྱལ་བའི་ནང་དང་ཆུའི་ཕུང་པོ་ལས་མི་སྐྱེའོ། །དེ་གཉིས་ལས་མི་སྐྱེ་ཞེས་ཡོངས་སུ་མི་སྐྱེ་བའི་ཆོས་ཅན་ཡང་མ་ཡིན་ཏེ། འདི་ལྟར་སའི་དཀྱིལ་འཁོར་ཇི་ཙམ་དུ་མཉམ་ཞིང་སྐབས་ཡོད་པ་དེ་ཙམ་དུ་སྨན་གྱི་རྒྱལ་པོ་ཆེན་པོ་སྐྱེ་བའི་ཆོས་ཡོད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་རྩ་བ་མ་གྲུབ་པ་ཡང་སྔོན་གྱི་ལྷག་པའི་དགོངས་པ་དང་། ཐུགས་རྗེ་ཆེན་པོས་རྩ་བ་བརྟན་པར་བྱུང་ཞིང་། རྩ་བ་གནས་པ་མེད་པ། དེ་བཞིན་གཤེགས་པ་ཐམས་ཅད་ཀྱི་རིགས་སུ་བྱུང་བ། དུས་གསུམ་གྱི་དགེ་བའི་རྩ་བ་ཐམས་ཅད་ཀྱིས་ཡེ་ཤེས་ཀྱི་ཤིང་ཡང་དག་པར་གྲུབ་པ། འཇིག་རྟེན་གྱི་ཁམས་མ་ལུས་པ་ཐམས་ཅད་དུ་དགེ་བའི་རྩ་བས་ཀུན་ཏུ་ཁྱབ་པ། ངན་སོང་ཐམས་ཅད་རྣམ་པར་ཟློག་པ་དགེ་བའི་རྣམ་པས་བྱུང་བ། ཐབས་མཁས་པ་བརྟན་ཞིང་སྲ་ལ་མི་གཡོ་བའི་སྡོང་པོ་ཅན། ཕ་རོལ་ཏུ་ཕྱིན་པས་ཆོས་ཀྱི་དབྱིངས་རྒྱས་པར་འགེངས་པའི་ཡལ་ག་ཅན་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་ལོ་མ་ཀུན་ཏུ་འགེབས་པ་ཅན། གཟུངས་དང་། སྤོབས་པ་དང་། བྱང་ཆུབ་ཀྱི་ཡན་ལག་གི་མེ་ཏོག་ཤིན་ཏུ་རྒྱས་པ་ཅན། ཐམས་ཅད་མཁྱེན་པའི་རྣམ་པར་གྲོལ་བ་རྟོག་པ་དང་བྲལ་བའི་འབྲས་བུ་ཅན་ཏེ། ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་རྩ་བ་མ་གྲུབ་པ་ཞེས་བྱ་བ་དེ་ལ། ཅིའི་ཕྱིར་རྩ་བ་མ་གྲུབ་
པ་ཞེས་བྱ་ཞེ་ན། ཤིན་ཏུ་རྒྱུན་ཆད་པ་མེད་པ་དང་། བྱང་ཆུབ་སེམས་དཔའི་སྤྱོད་པའི་དཀྱིལ་འཁོར་རྒྱུན་མི་འཆད་ཅིང་། བྱང་ཆུབ་སེམས་དཔའི་སྤྱོད་པ་ལས་ཀྱང་། དེ་བཞིན་གཤེགས་པ་ཉིད་དུ་འགྱུར་ལ། དེ་བཞིན་གཤེགས་པ་ཉིད་ལས་ཀྱང་། བྱང་ཆུབ་སེམས་དཔའི་སྤྱོད་པ་འབྱུང་བས་དེའི་ཕྱིར་རྩ་བ་མ་གྲུབ་པ་ཞེས་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་རྩ་བ་མ་གྲུབ་པ་དེའི་རྩ་བའི་འོད་ལས། བྱང་ཆུབ་སེམས་དཔའ་ཐམས་ཅད་འགྲོ་བ་ཐམས་ཅད་ཡོངས་སུ་མི་གཏོང་བའི་སྙིང་རྗེ་ཆེན་པོའི་རྩ་བ་འཛིན་ཏོ། །སྡོང་པོའི་འོད་ལས་བརྩོན་འགྲུས་དང་། ལྷག་པའི་བསམ་པ་དང་ཐབས་མཁས་པའི་སྡོང་པོ་འཛིན་ཏོ། །ཡལ་གའི་འོད་ལས་ཕ་རོལ་ཏུ་ཕྱིན་པའི་ཡལ་ག་འཛིན་ཏོ། །ལོ་མའི་འོད་ལས་ཚུལ་ཁྲིམས་དང་། བསླབ་པ་དང་སྦྱངས་པའི་ཡོན་ཏན་དང་། སྡོམ་པ་ཐམས་ཅད་ཀྱི་ལོ་མ་འཛིན་ཏོ། །མེ་ཏོག་གི་འོད་ལས་མཚན་དང་དཔེ་བྱད་བཟང་པོ། དགེ་བའི་རྩ་བ་སྣ་ཚོགས་ཀྱིས་གྲུབ་པའི་མེ་ཏོག་འཛིན་ཏོ། །འབྲས་བུའི་འོད་ལས་མ་སྐྱེས་མ་བྱུང་བའི་བཟོད་པ་ནས། སངས་རྒྱས་སུ་དབང་བསྐུར་བའི་སའི་བར་གྱི་འབྲས་བུ་འཛིན་ཏོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་རྩ་བ་མ་གྲུབ་པ་དེ་ནི་གནས་གཉིས་ནས་མི་སྐྱེ་སྟེ། གཉིས་གང་ཞེ་ན། འདི་ལྟ་སྟེ། འདུས་མ་བྱས་ཀྱི་གཡང་དུ་ལྟུང་བ་ཉན་ཐོས་དང་། རང་སངས་རྒྱས་རྣམས་དང་། དབང་པོ་དང་བསམ་པ་ཉམས་པའི་སྣོད་ལྟ་བ་དང་སྲེད་པའི་ཆུས་གང་བ་ལས་མི་སྐྱེ་སྟེ། ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་དེ་མི་སྐྱེ་བའི་ཆོས་ཅན་ལ་མི་སྐྱེ་ཞེས་ཡོངས་སུ་མི་སྐྱེ་བའི་ཆོས་ཅན་ཡང་མ་ཡིན་ཏེ། བྱང་ཆུབ་སེམས་དཔའ་ལྷག་པའི་བསམ་པ་ཆེན་པོ་ཅན། མཉམ་པའི་སེམས་དང་ལྡན་པ་རྣམས་ལ་སྐྱེ་སྟེ། ཇི་ཙམ་དུ་སེམས་ཅན་རྣམས་ཀྱི་མོས་པ་དང་། ལྷག་
པའི་བསམ་པ་ཡོད་པ་དེ་ཙམ་དུ་དེ་བཞིན་གཤེགས་པའི་ཡེ་ཤེས་སྨན་གྱི་རྒྱལ་པོ་ཆེན་པོ་དེ་རྣམ་པར་སྐྱེ་བའི་ཆོས་ཅན་དུ་འགྱུར་རོ། །ཀྱེ་རྒྱལ་བའི་སྲས་ལྟོས་དང་། དེ་བཞིན་གཤེགས་པའི་ཡེ་ཤེས་ལ་འཕེལ་ཞིང་འགྲིབ་པ་མེད་ལ་རྩ་བ་གྲུབ་པ་མེད་ཀྱང་གཏན་ཏུ་རྒྱུན་མི་ཆད་པར་སྣང་བ་ཡིན་ཏེ། ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མེས་འཇིག་པའི་བསྐལ་པ་བྱུང་བའི་ཚེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཉི་མ་བདུན་ཤར་ཅིང་འཚིག་པ་དང་འབར་བ་དང་། རབ་ཏུ་འབར་བ་དང་མེའི་ཕུང་པོ་ཆེན་པོར་གྱུར་ཏེ། གཅིག་ཏུ་འབར་བར་གྱུར་ནས། རྩྭ་དང་གེལ་པ་དང་། སྨན་དང་ནགས་ཚལ་ཡན་ཅད་ཁོར་ཡུག་དང་ཁོར་ཡུག་ཆེན་པོའི་བར་དུ་ཚིག་ཅིང་ཐལ་བའང་མི་མངོན་པར་འགྱུར་བ་དེའི་ཚེ། མི་ལ་ལ་ཞིག་གིས་རྩྭ་སྐམ་པོ་དུད་པ་རླན་གྱིས་བག་མེད་པ། ཁུར་ཆེན་པོ་གཅིག་ཅིག་བཀུར་བཀུར་ཏེ་བཅུག་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། རྩྭ་ཁུར་གཅིག་པོ་དེ་ལས་ཆུང་ངུ་ན་རྩྭའི་ཟེགས་མ་གཅིག་ཀྱང་མ་ཚིག་པ་ཡོད་དམ། སྨྲས་པ། ཀྱེ་རྒྱལ་བའི་སྲས་མ་ཡིན་ཏེ། མ་ཚིག་པ་ཡོད་པར་འགྱུར་བ་ནི་གནས་མེད་སྐབས་མེད་དོ། སྨྲས་པ། ཀྱེ་རྒྱལ་བའི་སྲས་མེའི་ཕུང་པོ་ཆེན་པོ་དེའི་ནང་གི་རྩྭའི་ཟེགས་མ་འགའ་ཞིག་མ་ཚིག་པ་ནི་ཡོད་ཀྱང་སྲིད་ཀྱི། དེ་བཞིན་གཤེགས་པའི་ཡེ་ཤེས་ཀྱིས་ནི་དུས་གསུམ་ན་ཡོད་པའི་སེམས་ཅན་འགྲངས་པ་དང་། ཞིང་འགྲངས་པ་དང་། བསྐལ་པ་འགྲངས་པ་དང་། ཆོས་འགྲངས་པ་གང་ཡང་ཐུགས་སུ་མ་ཆུད་པ་རྙེད་པར་མི་རུང་སྟེ། དེ་ནི་གནས་མ་ཡིན་ནོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐ་མི་དད་པའི་ཡེ་ཤེས་ཐུགས་སུ་ཆུད་པའི་ཕྱིར་རོ། །ཀྱེ་རྒྱལ་བའི་སྲས་
ཁོང་དུ་ཆུད་པར་བྱ་བའི་སྒོ་བརྒྱད་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རླུང་གིས་འཇིག་པའི་བསྐལ་པ་བྱུང་བའི་ཚེ། རྣམ་པར་འཐོར་བ་ཞེས་བྱ་བའི་རླུང་མར་ཆེན་པོ་འབྱུང་སྟེ། དེ་དག་ནི་ཁོར་ཡུག་དང་ཁོར་ཡུག་ཆེན་པོའི་རྡོ་རྗེའི་རི་ཡན་ཅད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བཤིག་བཅོམ་རྣམ་པར་གཏོར་ཏེ་ཆ་ཤས་ཀྱང་མེད་པར་བྱེད་དེ། དེ་ལ་ཕྱིར་ཟློག་པ་ཞེས་བྱ་བའི་རླུང་མར་ཆེན་པོ་གཞན་ལྡང་བ་འང་ཡོད་དེ། དེ་དག་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་འཁོར་ཀུན་ནས་ལྡང་སྟེ། རྣམ་པར་འཐོར་བའི་རླུང་མར་ཆེན་པོ་འཇིག་རྟེན་གྱི་ཁམས་གཞན་དུ་མི་འགྲོ་བར་ཕྱིར་ཟློག་གོ །ཀྱེ་རྒྱལ་བའི་སྲས་ཅི་སྟེ་ཕྱིར་ཟློག་པའི་རླུང་མར་ཆེན་པོ་དེ་དག་གིས་རྣམ་པར་འཐོར་བའི་རླུང་མར་ཆེན་པོ་དེ་ཕྱིར་མ་བཅིལ་དུ་ཟིན་ན། ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ཀྱང་བཤིག་པར་འགྱུར་རོ། །བཅོམ་པར་འགྱུར་རོ། །གཏོར་བར་འགྱུར་རོ། །ཆ་ཤས་ཀྱང་མི་བཞག་པར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་རླུང་མར་ཆེན་པོ་ཉོན་མོངས་པ་ཐམས་ཅད་རྣམ་པར་འཐོར་བ་ཡོད་དེ། ཡེ་ཤེས་ཀྱི་རླུང་མར་ཆེན་པོ་དེས་དེ་བཞིན་གཤེགས་པ་བྱང་ཆུབ་སེམས་དཔའ་ཐམས་ཅད་ཀྱི་ཉོན་མོངས་པའི་བག་ཆགས་རྣམ་པར་འཐོར་ཞིང་རྣམ་པར་འཇོམས་པར་མཛད་དེ། དེ་ལའང་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་རླུང་མར་ཆེན་པོ་ཐབས་མཁས་པས་ཡང་དག་པར་འཛིན་པ་ཞེས་བྱ་བ་རབ་ཏུ་ལྡང་བ་ཡོད་དེ། ཉོན་མོངས་པའི་བག་ཆགས་རྣམ་པར་འཐོར་བའི་ཡེ་ཤེས་ཀྱི་རླུང་མར་ཆེན་པོ་དེ་དག་གིས་བྱང་ཆུབ་སེམས་དཔའ་དབང་པོ་ཡོངས་སུ་མ་སྨིན་པ་རྣམས་ལས་ཕྱིར་ཟློག་གོ། །
ཀྱེ་རྒྱལ་བའི་སྲས་དེ་ལ་ཅི་སྟེ་དེ་བཞིན་གཤེགས་པའི་ཡེ་ཤེས་ཀྱི་རླུང་མར་ཆེན་པོའི་དཀྱིལ་འཁོར་དེ་མེད་དུ་ཟིན་ན། དེའི་བྱང་ཆུབ་སེམས་དཔའ་ཚད་མེད་གྲངས་མེད་པ་ཞིག །ཉན་ཐོས་དང་རང་སངས་རྒྱས་ཀྱི་སར་ལྟུང་བར་འགྱུར་རོ། །ཡེ་ཤེས་ཀྱི་རླུང་མར་ཆེན་པོ་ཐབས་མཁས་པས་ཡང་དག་པར་འཛིན་པ་དེའི་མཐུས། བྱང་ཆུབ་སེམས་དཔའ་རྣམས་ཉན་ཐོས་དང་། རང་སངས་རྒྱས་ཀྱི་ས་ལས་འདས་ཏེ། རང་འབྱུང་དེ་བཞིན་གཤེགས་པ་ཉིད་ལ་རབ་ཏུ་འཁོད་དོ། །ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་དེ་བཞིན་གཤེགས་པའི་ཡེ་ཤེས་ནི་ཐམས་ཅད་དུ་ཁྱབ་པ་སྟེ། དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་སེམས་ཅན་གྱི་རིས་ན། དེ་བཞིན་གཤེགས་པའི་ཡེ་ཤེས་ཀྱིས་ཐམས་ཅད་དུ་མ་ཁྱབ་པ་དེ་ལྟ་བུ་གང་ཡང་མེད་དེ། དེ་ཡང་ཅིའི་ཕྱིར་ཞེ་ན། དེ་བཞིན་གཤེགས་པའི་ཡེ་ཤེས་ནི་འདུ་ཤེས་སུ་འཛིན་པས་རྣམ་པར་དགོད་པ་མ་ཡིན་ཏེ། ཐམས་ཅད་མཁྱེན་པའི་ཡེ་ཤེས་རང་འབྱུང་གི་ཡེ་ཤེས་ཆགས་པ་མེད་པའི་ཡེ་ཤེས་ནི་འདུ་ཤེས་དང་། རྣམ་པར་བྲལ་བས་རབ་ཏུ་འབྱུང་ངོ་། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན་རི་མོའི་གཞི་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་ཞིག་ཡོད་པར་གྱུར་ལ། རི་མོའི་གཞི་ཆེན་པོ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིལ་གྱིས་རྫོགས་པར་བྲིས་ཏེ། འདི་ལྟར་ཁོར་ཡུག་ཆེན་པོའི་ཚད་དུ་ནི་ཁོར་ཡུག་ཆེན་པོ་བྲིས། ས་ཆེན་པོའི་ཚད་དུ་ནི་ས་ཆེན་པོ་བྲིས། སྟོང་གཉིས་པའི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གཉིས་པའི་འཇིག་རྟེན་གྱི་ཁམས་བྲིས། སྟོང་གི་འཇིག་རྟེན་གྱི་ཁམས་ཀྱི་ཚད་དུ་ནི་སྟོང་གི་འཇིག་རྟེན་གྱི་ཁམས་བྲིས། གླིང་བཞི་པའི་འཇིག་རྟེན་གྱི་ཁམས་ཀྱི་ཚད་དུ་ནི་གླིང་བཞི་པའི་
འཇིག་རྟེན་གྱི་ཁམས་བྲིས། རྒྱ་མཚོ་ཆེན་པོའི་ཚད་དུ་ནི་རྒྱ་མཚོ་ཆེན་པོ་བྲིས། འཛམ་བུའི་གླིང་གི་ཚད་དུ་ནི་འཛམ་བུའི་གླིང་བྲིས། ཤར་གྱི་ལུས་འཕགས་ཀྱི་གླིང་གི་ཚད་དུ་ནི་ཤར་གྱི་ལུས་འཕགས་ཀྱི་གླིང་བྲིས། ནུབ་ཀྱི་བན་ལང་སྤྱོད་ཀྱི་གླིང་གི་ཚད་དུ་ནི་ནུབ་ཀྱི་བན་ལང་སྤྱོད་ཀྱི་གླིང་བྲིས། བྱང་གི་སྒྲ་མི་སྙན་གྱི་གླིང་གི་ཚད་དུ་ནི་བྱང་གི་སྒྲ་མི་སྙན་གྱི་གླིང་བྲིས། རི་རབ་ཀྱི་ཚད་དུ་ནི་རི་རབ་བྲིས། ས་བླ་ན་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་ས་བླ་ན་སྤྱོད་པའི་ལྷའི་གཞལ་མེད་ཁང་རྣམས་བྲིས། འདོད་པ་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་འདོད་པ་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས། གཟུགས་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་གཟུགས་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས། གཟུགས་མེད་པ་ལ་སྤྱོད་པའི་ལྷའི་གཞལ་མེད་ཁང་གི་ཚད་དུ་ནི་གཟུགས་མེད་པ་ལ་སྤྱོད་པའི་ལྷའི་གཞལ་མེད་ཁང་རྣམས་བྲིས་པར་གྱུར་ལ་རི་མོའི་གཞི་ཆུ་ཞེང་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཙམ་ཡོད་པ་དེ། རྡུལ་ཤིན་ཏུ་ཕྲ་བ་གཅིག་གི་ནང་དུ་བཅུག་པར་གྱུར་ལ་རྡུལ་གཅིག་ལ་ཇི་ལྟ་བ་དེ་བཞིན་དུ་རྡུལ་ཤིན་ཏུ་ཕྲ་བ་མ་ལུས་པ་ཐམས་ཅད་རེ་རེ་ལ་ཡང་དེ་ཙམ་གྱི་རི་མོའི་གཞི་ཆེན་པོ་རེ་རེ་ཡོད་པར་གྱུར་ཏེ། དེ་ནས་སྐྱེས་བུ་མཁས་པ་ཡིད་གཞུངས་པ། ཁོང་བཟོ་བ་གསལ་བ་དེ་བཞིན་ཉིད་ཁོང་དུ་ཆུད་པའི་རྟོགས་པ་དང་། ལྡན་པ་ཞིག་སྐྱེས་པར་གྱུར་ཏེ། དེ་ལ་འཕྲུལ་གྱི་མིག་ཀུན་ཏུ་དག་པ་ཤིན་ཏུ་འོད་གསལ་བ་ཡང་བདོག་པར་གྱུར་ལ། དེས་འཕྲུལ་གྱི་མིག་གིས་བལྟས་ན་མཐོང་བར་གྱུར་ནས་རི་མོའི་གཞི་ཆེན་པོ་དེ་ལྟ་བུ་དེ་ལྟར་ཤིན་ཏུ་ཕྲ་མོའི་རྡུལ་དེ་དག་ལ་འཁོད་ཀྱང་སེམས་ཅན་སུ་ལ་ཡང་ཕན་པར་མ་གྱུར་པས་དེ་འདི་སྙམ་དུ་སེམས་ཏེ། ཀྱེ་མ་བདག་གིས་བརྩོན་འགྲུས་ཀྱི་མཐུ་དང་། སྟོབས་ཞིག་གིས་རྡུལ་ཕྲ་མོ་འདི་ཁ་ཕྱེ་སྟེ། རི་མོའི་གཞི་ཆེན་པོ་འདི་དག་འགྲོ་བ་ཐམས་ཅད་ཉེ་བར་འཚོ་བར་བྱའོ། །སྙམ་ནས་དེས་བརྩོན་
འགྲུས་ཀྱི་སྟོབས་དང་མཐུ་ཆེན་པོ་བསྐྱེད་དེ། རི་མོའི་གཞི་ཆེན་པོ་དེ་དག་འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་ཉེ་བར་འཚོ་བར་བྱེད་པ་ཞིག་ཡོད་ན། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཚད་མེད་པའི་ཡེ་ཤེས་ཆགས་པ་མེད་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བའི་ཡེ་ཤེས་ཀྱང་སེམས་ཅན་ཐམས་ཅད་ཀྱི་སེམས་ལ་རིལ་གྱིས་ཆུད་པར་གནས་ཏེ། སེམས་ཅན་གྱི་སེམས་དེ་དག་ཐམས་ཅད་དེ་བཞིན་གཤེགས་པའི་ཡེ་ཤེས་ཀྱི་ཚད་དང་མཉམ་ཡང་དེ་བཞིན་གཤེགས་པའི་ཡེ་ཤེས་དེ་ནི་བྱིས་པ་འདུ་ཤེས་སུ་འཛིན་པས། རྣམ་པར་གླགས་པ་རྣམས་མི་ཤེས་ཤིང་ཁོང་དུ་མི་ཆུད་ལ་མངོན་ཏུ་མི་བྱེད་ཉམས་སུ་མྱོང་བར་མི་བྱེད་དེ། དེ་ནས་དེ་བཞིན་གཤེགས་པའི་ཡེ་ཤེས་ཆགས་པ་མེད་པས་སེམས་ཅན་གྱི་ཁམས་ཐམས་ཅད་ལ་རྣམ་པར་གཟིགས་ནས། ངོ་མཚར་གྱི་དགོངས་པ་སྐྱེ་བར་འགྱུར་ཏེ། ཀྱེ་མ་སེམས་ཅན་འདི་དག་དེ་ལྟར་དེ་བཞིན་གཤེགས་པའི་ཡེ་ཤེས་ཡང་དག་པ་ཇི་ལྟ་བ་བཞིན་དུ་ཡང་མི་ཤེས་ལ། དེ་བཞིན་གཤེགས་པའི་ཡེ་ཤེས་ཀྱང་ཁོང་ན་ཡོད་པ་ངོ་མཚར་ཆེས། བདག་གི་སེམས་ཅན་འདི་དག་ཅི་ནས་ཀྱང་རང་རང་གི་འདུ་ཤེས་ཀྱི་མདུད་པ་ཆེན་པོ་འཕགས་པའི་ལམ་གྱི་སྟོབས་དང་ཤུགས་ཀྱིས་བཀྲོལ་ཏེ། དེ་བཞིན་གཤེགས་པའི་ཡེ་ཤེས་ཁོང་དུ་ཆུད་ཅིང་། དེ་བཞིན་གཤེགས་པའི་མཉམ་པ་ཉིད་ཀྱང་ཐོབ་པར་འགྱུར་བར་འཕགས་པའི་ལམ་བསྟན་ཏེ། འདུ་ཤེས་ཀྱི་རྣམ་པས་རྣམ་པར་གླགས་པ་ཐམས་ཅད་བསལ་བར་བྱའོ། །ཞེས་ནས་དེ་བཞིན་གཤེགས་པའི་ལམ་བསྟན་པས་དེ་དག་གི་འདུ་ཤེས་ཀྱི་རྣམ་པ་ཐམས་ཅད་ཡོངས་སུ་བསལ་བར་མཛད་དོ། །དེ་ལྟར་འདུ་ཤེས་ཀྱི་རྣམ་པ་ཐམས་ཅད་ཡོངས་སུ་སེལ་བའི་ཕྱིར། དེ་བཞིན་གཤེགས་པའི་ཡེ་ཤེས་ཚད་མེད་པས་འགྲོ་བ་ཐམས་ཅད་ཡོངས་སུ་འཚོའོ། ། ཀྱེ་རྒྱལ་བའི་སྲས་ཁོང་དུ་ཆུད་པར་བྱ་བའི་སྒོ་བཅུ་པ་འདིས་ཀྱང་། བྱང་ཆུབ་སེམས་དཔའ་སེམས་དཔའ་
ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཐུགས་སྐྱེ་བ་ཁོང་དུ་ཆུད་པར་བྱ་སྟེ། ཀྱེ་རྒྱལ་བའི་སྲས་དེ་དག་ལ་སོགས་པ་མངོན་པར་བསྒྲུབ་པ་བརྒྱ་སྟོང་ཚད་མེད་པའི་སྒོས། བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་ཐུགས་སྐྱེ་བ་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་ཡང་བརྟག་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །སྟོབས་བཅུ་མངའ་བའི་ཐུགས་ནི་ཡེ་ཤེས་མཆོག་ལས་བྱུང་། །རྒྱལ་བའི་ཡེ་ཤེས་དེ་ཡང་ཇི་ལྟར་བརྟག་ཅེ་ན། །ཕྱོགས་བཅུ་ཀུན་གྱི་སེམས་ཅན་ཁམས་རྣམས་ཇི་སྙེད་པ། །ཐམས་ཅད་ལུས་མེད་རང་བཞིན་མེད་པའི་མཁའ་ལས་འབྱུང་། ཆོས་དབྱིངས་ཀུན་གྱི་སེམས་ཅན་ཁམས་རྣམས་ཇི་སྙེད་པ། །བཟོ་དང་མཁས་པའི་ཤེས་པ་སྣ་ཚོགས་བདེ་མྱོང་བ། །དེ་དག་ཐམས་ཅད་བདེ་གཤེགས་མཁྱེན་ལས་ཐབས་ཀྱིས་འབྱུང་། །བདེ་གཤེགས་ཡེ་ཤེས་དེ་ནི་སྔོན་ནས་རང་བཞིན་མེད། །ཆོས་ཀྱི་དབྱིངས་ལ་གནས་ཏེ་དབང་ཆེན་ཚོགས་རྣམས་གྲོལ། །ཕྱོགས་བཅུའི་རང་རྒྱལ་ཐེག་ལ་གནས་པ་ཀུན་ཀྱང་སྟེ། །སངས་རྒྱས་མ་ལུས་པ་ཡང་ཆོས་ཀྱི་དབྱིངས་སུ་འབྱུང་། །ཆོས་དབྱིངས་དེ་ལ་རྣམ་པར་འཕེལ་ཞིང་འགྲིབ་པ་མེད། །དེ་བཞིན་སངས་རྒྱས་མཁྱེན་ལ་ཤེས་པ་ཀུན་འབྱུང་སྟེ། །སློབ་དང་མི་སློབ་འདུས་བྱས་འདུས་མ་བྱས་པ་འབྱུང་། །བདེ་གཤེགས་དམ་པའི་ཡེ་ཤེས་འཕེལ་ཞིང་འགྲིབ་མྱེད་དེ། །སངས་རྒྱས་ཡེ་ཤེས་དེ་ལ་སྐྱེ་ཞིང་འཇིག་པའང་མེད། །ཇི་ལྟར་གླིང་རྣམས་ཆུ་ཡི་རྒྱལ་པོས་མངོན་བརླན་པས། །ས་སྟེང་གང་འདོད་བརྐོས་པར་ངེས་པར་ཆུ་འབྱུང་འཐོབ། །ས་ལ་རྣམ་རྟོག་མེད་དེ་ཆུ་ལ་མུ་མེད་པས། །བརྩོན་འགྲུས་སྟོབས་དང་ལྡན་ན་ཕྱོགས་ཀུན་ཆུ་ཡང་འབྱུང་། །ཕྱོགས་བཅུ་མ་ལུས་སེམས་ཅན་ཁམས་རྣམས་ཇི་སྙེད་
པ། །དེ་དག་སེམས་ནི་བདེ་གཤེགས་མཁྱེན་པས་མངོན་བརླན་པས། །གང་དང་གང་དུ་ལས་བྱས་བརྩོན་འགྲུས་མཐུ་བསྐྱེད་པ། །དེ་དང་དེ་ནས་ཡེ་ཤེས་ཆུ་འབྱུང་འཐོབ་པར་འགྱུར། །རིན་ཆེན་མཆོག་བཞི་གང་ཆེན་མཚོ་ཡི་མཛོད་གནས་པ། །དེ་དག་མཐུས་ནི་ཆུ་འཛིན་ཆེན་པོར་རིན་ཆེན་འབྱུང་། །ནོར་བུ་རིན་ཆེན་དེ་དག་ཕལ་གྱིས་མི་མཐོང་སྟེ། །དེ་དག་ཕྱོགས་བཞིར་རྣམ་ཕྱེ་གང་ཆེན་མཚོ་ན་གནས། །བདེ་གཤེགས་ཡེ་ཤེས་བཞི་པོ་ཚད་མེད་དེ་བཞིན་ཏེ། །འགྲོ་བའི་ཡེ་ཤེས་དེས་འབྱུང་འཇིག་པར་མི་འགྱུར་རོ། །ཡེ་ཤེས་ཆེན་པོ་དེ་དག་གཞན་རྣམས་སུས་མི་མཐོང་། །སྟོབས་བཅུ་རྣམས་དང་དབང་བསྐུར་ཐོབ་པ་མ་གཏོགས་སོ། །ཆུ་འཛིན་ཆེན་པོའི་མཐའ་ན་རིན་ཆེན་བཞི་ཡོད་དེ། །སྟོབས་ཆེ་གཟི་བརྗིད་ཆེ་བས་དེ་དག་ཆུ་འགྲིབ་བྱེད། །དེ་དག་མེད་དུ་ཟིན་ན་གླིང་བཞི་རྒྱས་པར་འགྱུར། །དེ་དག་ཡོད་པས་རྒྱ་མཚོ་འཕེལ་ཞིང་འགྲིབ་པ་མེད། །དེ་བཞིན་བདེ་གཤེགས་ཡེ་ཤེས་རྒྱལ་སྲས་དོན་བརྩོན་པ། །ཆོས་ཀྱི་ཤུགས་གཅོད་དབའ་རླབས་ཤིན་ཏུ་རྣམ་པར་སེལ། །ཤེས་རབ་ཡངས་པའི་ཡེ་ཤེས་མཐའ་དང་དབུས་མེད་སྣང་། །དེ་མེད་གྱུར་ན་རྒྱལ་སྲས་གང་ཡང་འཚང་མི་རྒྱ། །འོག་གི་གཞི་ནས་བཟུང་སྟེ་སྲིད་པའི་རྩེ་མོའི་བར། །འདོད་དང་གཟུགས་དང་གཟུགས་མེད་ཁམས་གསུམ་ཐམས་ཅད་ཀྱང་། །བདག་མེད་དབྱིངས་ལ་ལེགས་པར་གནས་པས་གནས་པ་སྟེ། །ནམ་མཁའ་མཐོ་ཞིང་དམའ་བར་འགྱུར་བ་གང་ཡང་མེད། །དེ་བཞིན་བདེ་གཤེགས་ཡེ་ཤེས་ཤེས་པ་ཀུན་གྱི་རྒྱུ། །སློབ་དང་མི་སློབ་རྣམས་དང་དེ་བཞིན་རང་རྒྱལ་དང་། །བྱང་ཆུབ་སེམས་དཔའ་བདེ་བར་བྱེད་པའི་ཡེ་ཤེས་ཀྱང་། །སངས་རྒྱས་ཡེ་ཤེས་མཆོག་ལ་བདེ་བར་རབ་ཏུ་གནས། །གངས་རི་སྤོ་ལ་གཟི་བརྗིད་ཆེ་བའི་སྨན་གྱི་མཆོག །རྩ་བ་གྲུབ་མེད་ཡོད་དེ་དེ་ཡི་གཟི་བརྗིད་མཐུས། །འཛམ་བུའི་གླིང་གི་ཤིང་མཆོག་ཐམས་ཅད་རྣམ་པར་སྐྱེ། །
སྙིང་པོས་རྩ་བ་སྐྱེད་བྱེད་རྩ་བས་སྙིང་པོ་སྐྱེད། །དེ་བཞིན་བདེ་གཤེགས་རིགས་ལས་སངས་རྒྱས་ཡེ་ཤེས་འབྱུང་། །དེ་ཡི་ཡོན་ཏན་མཐུས་ནི་རྣལ་འབྱོར་ཡེ་ཤེས་འབྱུང་། །སྤྱོད་པས་བྱང་ཆུབ་འབྱུང་སྟེ་བྱང་ཆུབ་སྤྱོད་པ་འབྱིན། །སེམས་ཡིད་མཉམ་དང་ལྡན་ལ་སངས་རྒྱས་ཡེ་ཤེས་སྐྱེ། །བསྐལ་པ་འཇིག་དུས་མི་བཟད་བསྐལ་པའི་མེ་འབྱུང་བར། །ལ་ལས་སྦུར་རྩིའི་ཁུར་བོར་མི་ཚིག་གནས་མེད་དེ། །རྒྱལ་བའི་སྲས་རྣམས་དེ་ནི་མི་ཚིག་སྐབས་མེད་དོ། །རྡོ་རྗེ་འཚིག་པར་བྱེད་ན་རྩྭ་སྐམ་ཅི་ཞིག་སྨོས། རྩྭ་ལ་མི་འཚིག་ཅི་སྟེ་གནས་ཡོད་སྲིད་འགྱུར་གྱི། །བདེ་གཤེགས་ཡེ་ཤེས་ཀྱིས་ནི་མ་མཁྱེན་གང་ཡང་མེད། །སེམས་ཅན་དུས་དང་བསྐལ་པ་ཞིང་རྣམས་རབ་ཏུ་མཁྱེན། །དེ་ལྟར་སངས་རྒྱས་ཡེ་ཤེས་ཚད་མེད་མཐའ་ཡང་ཡས། །བསྐལ་པ་འཇིག་པའི་ཚེ་ན་རྣམ་འཐོར་རླུང་ལྡང་སྟེ། །དེ་ནི་ཁོར་ཡུག་རི་རབ་ཀུན་ཀྱང་རྣམ་པར་འཐོར་བར་བྱེད། །རྣམ་འཐོར་ཕྱིར་ལྡོག་བྱེད་པའི་རླུང་མར་གཞན་མེད་ན། །ཚད་མེད་ཞིང་རྣམས་ཀུན་ཀྱང་རྣམ་པར་འཇིག་པར་འགྱུར། །དེ་བཞིན་སྟོབས་བཅུ་མངའ་བའི་ཡེ་ཤེས་རླུང་ལྡང་བ། །དེ་དག་བྱང་ཆུབ་སེམས་དཔའི་ཉོན་མོངས་རྣམ་པར་འཐོར། །དེ་ལ་ཐབས་དང་ལྡན་པའི་རླུང་མར་གཞན་ཡོད་དེ། །དེས་ནི་ཡོངས་སུ་བཟུང་བས་ཉན་ཐོས་མི་འགྱུར་རོ། །སྟོང་གསུམ་ཚད་ཀྱི་རི་མོའི་གཞི་ཞིག་ཡོད་གྱུར་ལ། །རྡུལ་ཕྲན་མ་ལུས་ཀུན་གྱི་སྦུབས་ནའང་དེ་འདྲ་སྟེ། །སྐྱེས་བུ་མཁས་པ་མིག་ལྡན་ལ་ལས་རྣམ་ཕྱེ་ནས། །རི་མོའི་གཞི་དེ་འགྲོ་ཀུན་ཉེ་བར་འཚོ་བྱས་ན། །བཅོམ་ལྡན་དེ་ཡང་དེ་བཞིན་སེམས་ཅན་ཀུན་གྱི་སེམས། །རིལ་གྱིས་བདེ་གཤེགས་མཁྱེན་ཡིན་འདུ་ཤེས་བསྒྲིབས་གྱུར་ཅེས། རྒྱལ་བའི་ཐུགས་རྗེ་བསྐྱེད་ཅིང་འདུ་ཤེས་སྤོང་བར་སྟོན། །འདུ་ཤེས་ཡོངས་སུ་ཤེས་ནས་རྒྱལ་སྲས་ཉེ་བར་འཚོ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་བྱང་ཆུབ་སེམས་
དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སངས་རྒྱས་ཀྱི་ཡུལ་ཇི་ལྟ་བུར་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་ཡུལ་ནི་ཤེས་རབ་དང་། ཡེ་ཤེས་ཆགས་པ་མེད་ཅིང་བསྒྲིབས་པ་མེད་པས་འཇུག་ཅིང་། འགྲོ་བ་ཐམས་ཅད་ཡུལ་དུ་གྱུར་པའི་སྒོས་ཁོང་དུ་ཆུད་པར་བྱ་སྟེ། དེ་བཞིན་གཤེགས་པའི་ཡུལ་ནི་འཇིག་རྟེན་ཐམས་ཅད་ཡུལ་དུ་གྱུར་པ་དང་། ཞིང་ཐམས་ཅད་ཡུལ་དུ་གྱུར་པ་དང་། ཆོས་ཐམས་ཅད་ཡུལ་དུ་གྱུར་པ་དང་། སེམས་ཅན་ཐམས་ཅད་ཡུལ་དུ་གྱུར་པ་དང་། དེ་བཞིན་ཉིད་ཐ་མི་དད་པ་ཡུལ་དུ་གྱུར་པ་དང་། ཆོས་ཀྱི་དབྱིངས་བསྒྲིབས་པ་མེད་པ་ཡུལ་དུ་གྱུར་པ་དང་། ཡང་དག་པའི་མཐའ་ལ་མཐའ་མེད་པར་ཡུལ་དུ་གྱུར་པ་དང་། ནམ་མཁའི་དབྱིངས་ཚད་མེད་པ་ཡུལ་དུ་གྱུར་པ་དང་། མྱ་ངན་ལས་འདས་པའི་དབྱིངས་ལ་ཡུལ་མེད་པ་ཡུལ་དུ་གྱུར་པའི་སྒོས་ཁོང་དུ་ཆུད་པར་བྱ་སྟེ། འགྲོ་བ་ཐམས་ཅད་ཀྱི་ཡུལ་ཇི་ལྟར་ཚད་མེད་པ་དེ་བཞིན་དུ་དེ་བཞིན་གཤེགས་པའི་ཡུལ་ཡང་ཚད་མེད་དེ། མྱ་ངན་ལས་འདས་པའི་ཡུལ་གྱི་བར་དུ་ཇི་ལྟར་ཚད་མེད་ཅིང་ཡུལ་མེད་ལ་ཡུལ་མ་ཡིན་ཏེ། ཐམས་ཅད་གང་ན་ཡང་མེད་པ་དེ་བཞིན་དུ་དེ་བཞིན་གཤེགས་པའི་ཡུལ་ཡང་ཚད་མེད་ཅིང་། ཡུལ་མེད་ལ་ཡུལ་མ་ཡིན་ཏེ། ཐམས་ཅད་གང་ན་ཡང་མེད་དོ། །ཀྱེ་རྒྱལ་བའི་སྲས་འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཀྱི་ཡུལ་གྱིས་སངས་རྒྱས་ཀྱི་ཡུལ་ཁོང་དུ་ཆུད་པར་བྱ་སྟེ། ཇི་ལྟར་སེམས་ཀྱི་ཡུལ་ཚད་མེད་ཅིང་མུ་མེད་དེ་མ་
བཅིངས་མ་གྲོལ་བ་དེ་བཞིན་དུ་དེ་བཞིན་གཤེགས་པའི་ཡུལ་ཡང་ཚད་མེད་ཅིང་། མུ་མེད་དེ་མ་བཅིངས་མ་གྲོལ་བའོ། །དེ་ཅིའི་ཕྱིར་ཞེ་ན། འདི་ལྟར་སེམས་དེ་ནི་ཇི་ལྟ་ཇི་ལྟར་བསམས་ཤིང་རྣམ་པར་བརྟགས་པ་དེ་ལྟ་དེ་ལྟར་ཚད་མེད་པར་རྣམ་པར་དགོད་པ་ཡིན་ཏེ། ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ཀླུ་རྣམས་ནི་སེམས་ཀྱི་ཁྱད་པར་གྱིས་ཆར་པའི་རྒྱུན་ཆེན་པོ་འབེབས་ཏེ། ཆར་པའི་རྒྱུན་དེ་ཡང་ཀླུ་རྣམས་ཀྱི་ནང་ནས་བྱུང་བའང་མ་ཡིན། ཕྱི་རོལ་ནས་བྱུང་བའང་མ་ཡིན་ནོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཡུལ་ཡང་རྣམ་པ་ཇི་ལྟ་ཇི་ལྟ་བུར་བསམས་ཏེ། རྣམ་པར་བརྟགས་པ་དེ་ལྟ་དེ་ལྟ་བུར་བསམ་གྱིས་མི་ཁྱབ་པར་རྣམ་པར་དགོད་པར་འགྱུར་ཏེ། དེ་ནི་ཕྱོགས་ན་གནས་པའང་མ་ཡིན། ཡུལ་ན་གནས་པའང་མ་ཡིན་ནོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ལ་ཆུའི་ཕུང་པོ་ཚད་མེད་པ་གང་ཇི་སྙེད་ཡོད་པ་དེ་དག་ཐམས་ཅད་ཀླུ་རྣམས་ཀྱི་སེམས་ཀྱི་ཁྱད་པར་ལས་བྱུང་བའོ། །ཀྱེ་རྒྱལ་བའི་སྲས་དེ་བཞིན་དུ་ཐམས་ཅད་མཁྱེན་པ་ཉིད་ཀྱི་རྒྱ་མཚོ་ལ་ཆོས་ཀྱི་རྒྱུད་ཚད་མེད་པ་གང་ཇི་སྙེད་ཡོད་པ་དེ་དག་ཐམས་ཅད་སྔོན་གྱི་དགོངས་པའི་སྨོན་ལམ་མངོན་པར་བསྒྲུབས་པའི་ཁྱད་པར་གྱིས་བྱུང་བའོ། །བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་རྒྱ་མཚོ་ཆེན་པོ་ནི་ཇི་ཙམ་ཞིག་ཏུ་ཚད་མེད་ཐམས་ཅད་མཁྱེན་པའི་ཡེ་ཤེས་ཀྱི་རྒྱ་མཚོ་ནི་ཇི་ཙམ་ཞིག་ཏུ་ཚད་མེད། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་གནས་འདི་བསྟན་པ་ནི་བསམ་གྱིས་མི་ཁྱབ་པ་སྟེ། འོན་ཀྱང་དཔེ་ཙམ་ཞིག་བསྟན་གྱིས་དེ་ཉོན་ཅིག །ཀྱེ་རྒྱལ་བའི་སྲས་རྒྱ་མཚོ་ཆེན་པོར་ནི་འཛམ་བུའི་གླིང་འདི་ནས། ཆུ་ཀླུང་སྟོང་ཕྲག་ཕྱེད་དང་གསུམ་འབབ་བོ། །ནུབ་ཀྱི་བན་ལང་སྤྱོད་ཀྱི་གླིང་ནས་ཆུ་ཀླུང་སྟོང་ཕྲག་ལྔ་འབབ་བོ། །ཤར་གྱི་ལུས་འཕགས་པོའི་གླིང་ནས་ཆུ་ཀླུང་སྟོང་ཕྲག་ཕྱེད་དང་བརྒྱད་འབབ་བོ། །བྱང་གི་
སྒྲ་མི་སྙན་གྱི་གླིང་ནས་ཆུ་ཀླུང་སྟོང་ཕྲག་བཅུ་ཚང་བར་འབབ་སྟེ། ཀྱེ་རྒྱལ་བའི་སྲས་དེ་ལྟར་ན་རྒྱ་མཚོ་ཆེན་པོ་དེར་གླིང་བཞི་པའི་འཇིག་རྟེན་གྱི་ཁམས་འདི་ནས་ཆུ་ཀླུང་སྟོང་ཕྲག་ཉི་ཤུ་རྩ་ལྔ་ཚང་བར་རྒྱུན་མི་འཆད་པར་འབབ་བོ། །ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། གླིང་ཆེན་པོ་བཞི་ནས་རྒྱ་མཚོ་ཆེན་པོར་འབབ་པའི་ཆུའི་ཕུང་པོ་དེ་ཚད་མེད་པ་ཡིན་མོད། བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་དེ་ནི་ཚད་མེད་གྲངས་མེད་དོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་གླིང་བཞི་པའི་འཇིག་རྟེན་གྱི་ཁམས་འདི་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་ཀྱང་ཀླུའི་རྒྱལ་པོ་འོད་ཟེར་བཅུ་པའི་སྤྲིན་ལས། ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བཅུ་པའི་སྤྲིན་ལས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་འོད་ཟེར་བརྒྱ་པའི་སྤྲིན་ལས་ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བཅུ་པའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བརྒྱ་པའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་རྒྱན་ཆེན་པོའི་སྤྲིན་ལས་ཆུའི་ཕུང་པོ་ཆེས་མང་བ་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བཅུ་པའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བརྒྱ་པའི་སྤྲིན་ལས་ཆུའི་ཕུང་པོ་ཇི་སྙེད་ཅིག་
རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་རྒྱན་ཆེན་པོའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་ཡིད་དུ་འོང་བའི་སྤྲིན་ལས་ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །གཞུང་དེ་བཞིན་དུ་དེ་བས་ཀྱང་ཀླུའི་རྒྱལ་པོ་འགྲོ་བར་ཆར་འབེབས་པའི་སྤྲིན་ལས་ཆེས་མང་བར་འབབ་བོ། །དེ་བས་ཀྱང་ཀླུའི་རྒྱལ་པོ་དགའ་བོ་དང་། ཉེ་དགའ་བོའི་སྤྲིན་ལས་ཆེས་མང་བར་འབབ་བོ། །དེ་བས་ཀྱང་ཀླུའི་རྒྱལ་པོ་འོད་མཐའ་ཡས་པའི་སྤྲིན་ལས་ཆེས་མང་བར་འབབ་བོ། །དེ་བས་ཀྱང་ཀླུའི་རྒྱལ་པོ་ཤུགས་ཆེན་པོར་འཛིན་པའི་སྤྲིན་ལས་ཆེས་མང་བར་འབབ་བོ། །དེ་བས་ཀྱང་ཀླུའི་རྒྱལ་པོ་ཤིན་ཏུ་རྣམ་པར་རྒྱལ་བའི་སྤྲིན་ལས་ཆེས་མང་བར་འབབ་སྟེ། ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་འོད་ཟེར་བཅུ་པའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་འོད་ཟེར་བརྒྱ་པའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་རྒྱན་ཆེན་པོའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་ཡིད་དུ་འོང་བའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་འགྲོ་བར་ཆར་འབེབས་པའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་དགའ་བོ་དང་། ཉེ་དགའ་བོའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་འོད་མཐའ་ཡས་པའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་ཤུགས་ཆེན་པོ་འཛིན་པའི་སྤྲིན་ལས་ཇི་སྙེད་ཅིག་བབ་པ་དང་། ཀླུའི་རྒྱལ་པོ་རྣམ་པར་རྒྱལ་བའི་སྤྲིན་ལས་ཇི་སྙེད་ཅིག་བབ་པ་དེ་དག་བས་ཀྱང་ཀླུའི་རྒྱལ་པོ་རྣམ་པར་བསྒྱིངས་པའི་སྤྲིན་ལས་ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་སྟེ། ཀྱེ་རྒྱལ་བའི་སྲས་ཀླུའི་རྒྱལ་པོ་ཆེན་པོ་བཅུ་པོ་འདི་དག་ལ་སྩོགས་པ། ཀླུའི་རྒྱལ་པོའི་རིགས་ཁྲག་ཁྲིག་བརྒྱད་ཅུ་སོ་སོའི་སྤྲིན་ལས་ཆུའི་ཕུང་པོ་ཆེན་པོ་མང་པོ་རྒྱ་མཚོ་ཆེན་པོར་འབབ་བོ། །
ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་བཅུའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོའི་རིགས་ཁྲག་ཁྲིག་བརྒྱད་ཅུ་སོ་སོའི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་ཆེན་པོ་གང་ཆེན་མཚོའི་བུ་ཐུ་བོ་འཛམ་བུའི་རྒྱལ་མཚན་གྱི་སྤྲིན་ལས། ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་དེ་བཞིན་དུ་ཆུ་ཀླུང་ཆེན་པོ་དེ་དག་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། སྤྲིན་ཆེན་པོ་དེ་དག་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་འོད་ཟེར་བཅུ་པའི་གནས་ནས་ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་ཆུ་ཀླུང་ཆེན་པོ་དག་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་སྔ་མ་དེ་དག་གི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་གང་ཆེན་མཚོའི་བུ་ཐུ་བོ་འཛམ་བུའི་རྒྱལ་མཚན་གྱི་སྤྲིན་ལས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་འོད་ཟེར་བཅུ་པའི་གནས་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་བས་ཀྱང་། ཀླུའི་རྒྱལ་པོ་ཆེན་པོ་འོད་ཟེར་བརྒྱ་པའི་གནས་ནས། ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་ཆུ་ཀླུང་ཆེན་པོ་དག་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་དེ་དག་དང་། ཀླུའི་རྒྱལ་པོ་ཆེན་པོའི་རིགས་ཁྲག་ཁྲིག་བརྒྱད་ཅུ་སོ་སོའི་སྤྲིན་ལས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་
བབ་པ་དང་། ཀླུའི་རྒྱལ་པོ་གང་ཆེན་མཚོའི་བུ་ཐུ་བོ་འཛམ་བུའི་རྒྱལ་མཚན་གྱི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་འོད་ཟེར་བཅུ་པའི་གནས་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་འོད་ཟེར་བརྒྱ་པའི་གནས་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་ཆེན་པོ་རྒྱན་ཆེན་པོའི་གནས་ནས། ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གཞུང་དེ་བཞིན་དུ། དེ་དག་བས་ཀྱང་ཡིད་དུ་འོང་བའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་འགྲོ་བར་ཆར་འབེབས་པའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་དགའ་བོ་དང་ཉེ་དགའ་བོའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་འོད་མཐའ་ཡས་པའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་ཤུགས་ཆེན་པོ་འཛིན་པའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་ཤིན་ཏུ་རྣམ་པར་རྒྱལ་བའི་གནས་ནས་ཆེས་མང་བར་འབབ་བོ། །དེ་དག་བས་ཀྱང་ཀླུའི་རྒྱལ་པོ་ཆེན་པོ་རྣམ་པར་བསྒྱིངས་པའི་གནས་ནས། ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་ཆུ་ཀླུང་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་བཅུ་པོ་དེ་དག་གི་སྤྲིན་དང་གནས་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོའི་རིགས་ཁྲག་ཁྲིག་བརྒྱད་ཅུའི་སྤྲིན་དང་གནས་ནས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། འཛམ་བུའི་རྒྱལ་མཚན་གྱི་སྤྲིན་ལས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་དག་བས་ཀྱང་། ཀླུའི་རྒྱལ་པོ་ཆེན་པོ་གང་ཆེན་མཚོའི་སྤྲིན་ཐ་མི་དད་པ་ཞེས་
བྱ་བ་ལས་ཆུའི་ཕུང་པོ་ཆེས་མང་བར་རྒྱ་མཚོ་ཆེན་པོར་འབབ་བོ། །ཀྱེ་རྒྱལ་བའི་སྲས་དེ་བཞིན་དུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཀྱི་ཆུ་ཀླུང་གི་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་སྔ་མ་དེ་དག་གི་སྤྲིན་དང་། གནས་ནས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་གང་ཆེན་མཚོའི་བུ་ཐུ་བོ་འཛམ་བུའི་རྒྱལ་མཚན་གྱི་སྤྲིན་ལས་ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དང་། ཀླུའི་རྒྱལ་པོ་ཆེན་པོ་གང་ཆེན་མཚོའི་སྤྲིན་ཐ་མི་དད་པ་ཞེས་བྱ་བ་ལས། ཆུའི་ཕུང་པོ་ཇི་སྙེད་ཅིག་རྒྱ་མཚོ་ཆེན་པོར་བབ་པ་དེ་བས་ཀྱང་། ཀླུའི་རྒྱལ་པོ་གང་ཆེན་མཚོའི་གནས་ནས། ཆུའི་དབའ་རྒལ་ཆེན་པོ་བཻ་ཌཱུརྱ་སྔོན་པོའི་ཁ་དོག་ལྟ་བུར་འདུག་པ་ཆེས་མང་བར་འབྱུང་སྟེ། དེ་ནི་རྒྱ་མཚོ་ཆེན་པོ་ཐམས་ཅད་ཀྱང་ཆུའི་ཤུགས་ཆེན་པོས་རྒྱས་པར་བྱེད་མོད་ཀྱི། འོན་ཀྱང་རྒྱ་མཚོ་ཆེན་པོ་ནི་དབྲེས་ལས་འདའ་བ་མེད་དེ། ཀྱེ་རྒྱལ་བའི་སྲས་རྒྱ་མཚོ་ཆེན་པོ་དེ་ནི་ཆུའི་ཕུང་པོས་དེ་ལྟར་ཚད་མེད་པ་སྟེ། ཇི་ལྟར་ཆུའི་ཕུང་པོས་ཚད་མེད་པ་དེ་ལྟར་རིན་པོ་ཆེའི་ཕུང་པོས་ཀྱང་ཚད་མེད་དེ། སེམས་ཅན་གྱི་གནས་ཀྱིས་ཀྱང་ཚད་མེད་ལ། སེམས་ཅན་ཆེན་པོའི་ལུས་ཀྱི་རྣམ་པས་ཀྱང་ཚད་མེད་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། རྒྱ་མཚོ་ཆེན་པོ་དེ་ཚད་མེད་མོད། བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་རྒྱ་མཚོ་ཆེན་པོ་དེ་ནི་དཔེས་བརྗོད་པར་ཡང་དཀའ་བ་ཙམ་དུ་རྒྱ་ཆེའོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་དེ་ལྟར་རྒྱ་མཚོ་ཆེན་པོ་ཚད་མེད་པ་དེས། དེ་བཞིན་གཤེགས་པའི་ཡེ་ཤེས་རྒྱ་མཚོ་ཡུལ་ཚད་མེད་པའི་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆར་ཡང་ཉེ་བར་མི་འགྲོ་བ་ནས་རྒྱུར་བྱ་བའི་བར་དུ་ཡང་ཉེ་བར་མི་འགྲོའོ། །ཀྱེ་རྒྱལ་བའི་སྲས་འོན་ཀྱང་བསམ་པ་ཇི་ལྟ་བ་བཞིན་དུ་སེམས་ཅན་གྱིས། རྣམ་པར་རིག་པར་བྱ་བ་ཉེ་བར་བཟུང་སྟེ། རྒྱ་མཚོ་ཆེན་
པོ་ལས་དེ་བཞིན་གཤེགས་པའི་ཡུལ་དཔེར་བླང་གི། དེ་བཞིན་གཤེགས་པའི་ཡེ་ཤེས་རྒྱ་མཚོའི་ཡུལ་ལ་དཔེ་ཡོད་པ་མ་ཡིན་ཏེ། ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་རྒྱ་མཚོའི་ཡུལ་ནི་དཔེ་ལས་འདས་པའོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཡེ་ཤེས་རྒྱ་མཚོའི་ཡུལ་དེ་ལྟ་བུ་ནི་འདི་ལྟ་སྟེ། ཐུགས་དང་པོ་བསྐྱེད་པ་ནས། བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མ་ཆད་པའི་ཕྱིར་ཡང་དག་པར་བསྒྲུབས་པས་ཀྱང་ཚད་མེད་པར་ཁོང་དུ་ཆུད་པར་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་དང་རིན་པོ་ཆེ་གསུམ་གྱི་རྒྱུན་མི་གཅོད་པས་རིན་པོ་ཆེའི་ཕུང་པོས་ཀྱང་ཚད་མེད་པར་ཁོང་དུ་ཆུད་པར་བྱའོ། །སློབ་པ་དང་མི་སློབ་པ་དང་། རང་སངས་རྒྱས་ཐམས་ཅད་ཉེ་བར་འཚོ་བས། འབྱུང་པོ་གནས་པས་ཀྱང་། ཚད་མེད་པར་ཁོང་དུ་ཆུད་པར་བྱའོ། །ས་དང་པོ་ལ་གནས་པའི་བྱང་ཆུབ་སེམས་དཔའ་ཡན་ཅད་ཆགས་པ་མེད་པའི་མཐར་ཐུག་པའི་ས་ལ་གནས་པའི་བར་གྱི་བྱང་ཆུབ་སེམས་དཔའ་ཐམས་ཅད་གནས་པས། འབྱུང་པོ་ཆེན་པོའི་ལུས་རྣམ་པ་ཐ་དད་པས་ཀྱང་ཚད་མེད་པར་ཁོང་དུ་ཆུད་པར་བྱ་སྟེ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་དེ་བཞིན་གཤེགས་པའི་ཡེ་ཤེས་རྒྱ་མཚོའི་ཡུལ་འགྲོ་བ་ཐམས་ཅད་ཉེ་བར་འཚོ་བ་ནི་ཚད་མེད་པའི་ཡེ་ཤེས་དང་ལྡན་པའི་ཚུལ་གྱིས་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། དོན་དེ་ཉིད་ཡང་བརྟག་པར་བྱ་བའི་ཕྱིར་ཚིགས་སུ་བཅད་པ་འདི་དག་སྨྲས་སོ། །རྡུལ་མེད་རྣམས་ཀྱི་ཡུལ་ནི་ཚད་མེད་གཞལ་དུ་མེད། །སེམས་ཀྱི་ཡུལ་བཞིན་རྣམ་པ་ཀུན་ཏུ་ཚད་མེད་དེ། །སེམས་ཀྱིས་མངོན་བསྒྲུབས་ཡིད་ཀྱི་ཡུལ་ནི་ཇི་ལྟ་བ། །དེ་བཞིན་སྟོབས་བཅུ་རྣམས་ཀྱི་ཡུལ་ཡང་ཤེས་པར་བྱ། །ཀླུའི་དབང་པོའི་གནས་ནས་ནམ་ཡང་མི་གཡོ་བར། །སེམས་ཀྱི་མཐུས་ནི་ཆར་ཆེན་རྒྱུན་
ཀྱང་རབ་ཏུ་འབེབས། །དེ་ལའང་འོང་དང་འགྲོ་བར་དམིགས་པ་མེད་པ་སྟེ། །ཀླུ་ཡི་དབང་པོའི་བསམ་པ་ཙམ་གྱིས་ཆར་ཡང་འབབ། །དེ་བཞིན་སྟོབས་བཅུ་གང་དག་ནས་ཀྱང་བྱོན་པ་མེད། །དེ་བཞིན་ཐུབ་པ་གང་དུ་ཡང་བཞུད་པ་མི་དམིགས་ཏེ། །ཐུགས་ཀྱིས་དགོངས་པས་སྐྲ་རྩེ་གཅིག་ལ་འཇུག་པར་ཡང་། །ཆོས་ཀྱི་དབྱིངས་ཀྱི་ཚད་དུ་དེ་དག་ཤིན་ཏུ་འབྱུང་། །རྒྱ་མཚོ་ཆུ་དང་རིན་ཆེན་ཚོགས་ཀྱིས་ཚད་མེད་དེ། །སེམས་ཅན་དག་དང་འབྱུང་པོ་གནས་པས་ཚད་ཀྱང་མེད། །རོ་གཅིག་རྙོག་པར་མི་ནུས་སེམས་ཅན་དེར་སྐྱེས་པ། །དེ་དག་ཀུན་ཀྱང་ཆུ་བོ་གཞན་ལ་སྤྱོད་མི་བྱེད། །དེ་བཞིན་རྒྱལ་བའི་ཡུལ་ཡང་མཁྱེན་པས་ཚད་མེད་དེ། །རིན་ཆེན་གསུམ་གནས་རིན་ཆེན་ཚོགས་ཀྱིས་ཚད་ཀྱང་མེད། །སློབ་དང་མི་སློབ་སེམས་ཅན་རྣམས་ཀྱིས་ཚད་མེད་དེ། །ཡེ་ཤེས་མཆོག་དོན་སྤྱོད་པའི་འབྱུང་པོས་ཚད་ཀྱང་མེད།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གཉིས་པ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྤྱོད་ཡུལ་ཇི་ལྟ་བུར་ཤེས་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་སྤྱོད་ཡུལ་ནི་ཆགས་པ་མེད་པའི་སྤྱོད་ཡུལ་དུ་ཤེས་པར་བྱ་སྟེ། ཇི་ལྟར་དེ་བཞིན་ཉིད་ནི་སྔོན་གྱི་
མཐའ་ནས་བྱུང་བ་མ་ཡིན། ཕྱི་མའི་མཐའ་ནས་འཕོས་པ་མ་ཡིན། ད་ལྟར་བྱུང་བས་མངོན་པར་བསྒྲུབས་པ་མ་ཡིན་པ་དེ་བཞིན་དུ་དེ་བཞིན་གཤེགས་པའི་སྤྱོད་ཡུལ་ཡང་མ་སྐྱེས་མ་འཕོས་མངོན་པར་གྲུབ་པ་མེད་པར་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་ཆོས་ཀྱི་དབྱིངས་ལ་ལུས་མེད་པས་ཆོས་ཀྱི་དབྱིངས་དེ་ནི་ཚད་ཡོད་པའང་མ་ཡིན། ཚད་མེད་པའང་མ་ཡིན་ནོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྤྱོད་ཡུལ་ལ་ལུས་མེད་པས་དེ་བཞིན་གཤེགས་པའི་སྤྱོད་ཡུལ་དེ་ཡང་ཚད་ཡོད་པ་ཡང་མ་ཡིན། ཚད་མེད་པ་ཡང་མ་ཡིན་ནོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། འདབ་ཆགས་བྱ་ནི་ནམ་མཁའ་ལས་ལྡིང་སྟེ། འགྲོ་ན་ལོ་བརྒྱར་སོང་ཡང་ཇི་སྲིད་དུ་ཕྱིན་པ། དེ་སྲིད་ནི་མ་ཕྱིན་པའང་ཡོད་དེ། ནམ་མཁའ་ལ་མཐའ་མེད་པས་སྔ་ཕྱི་ཁྱད་པར་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་སྤྱོད་ཡུལ་ཡང་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་བསྟན་ཀྱང་དེ་སྙེད་ནི་མ་བསྟན་པའང་ཡོད་དེ། དེ་ནི་དེ་བཞིན་གཤེགས་པའི་སྤྱོད་ཡུལ་ལ་མུ་མེད་པའི་ཕྱིར་རོ། །ཀྱེ་རྒྱལ་བའི་སྲས་དེ་ལྟ་བུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱང་ཆགས་པ་མེད་པའི་སྤྱོད་ཡུལ་ལ་མི་གནས་པའི་ཚུལ་གྱིས་བཞུགས་ཤིང་སེམས་ཅན་ཐམས་ཅད་ལ་སྤྱོད་ཡུལ་དེའང་སྟོན་པ་མཛད་དོ། །སེམས་ཅན་ཆགས་པ་སྣ་ཚོགས་ལ་མངོན་པར་ཞེན་པ་རྣམས་ཀྱང་ཆགས་པའི་ལམ་དེ་དང་དེ་ནས་ཡོངས་སུ་ཟློ་བ་མཛད་དོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ནམ་མཁའ་ལྡིང་གི་རྒྱལ་པོ་ཆེན་པོའི་སྤྱོད་ཡུལ་ནི་ནམ་མཁའ་སྟེ། ནམ་མཁའ་ལ་གནས་ཤིང་རང་གི་མིག་ཡོངས་སུ་དག་པས་ཀླུའི་གནས་སུ་བལྟས་ཏེ། རྒྱ་མཚོ་ཆེན་པོའི་ཆུའི་ཕུང་པོ་ཆེན་པོ་ནམ་མཁའ་ལྡིང་གི་ཤུགས་དྲག་པོ་དང་། གཤོག་པའི་རླུང་ཆེན་པོའི་མཐུས་
གཡས་གཡོན་དུ་ཕྱེ་སྟེ། བསལ་ནས་ཀླུའམ་ཀླུའི་བུད་མེད་དུས་ཡོངས་སུ་སྨིན་ཏེ་ཚེའི་མཐའ་ཕྱིན་པ་འཛིན་ཅིང་འབྱིན་ཏོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ནམ་མཁའ་ལྡིང་གི་རྒྱལ་པོ་ཆེན་པོ་ཆགས་པ་མེད་པའི་སྤྱོད་ཡུལ་མངའ་བ་ཡང་བསྒྲིབས་པ་མེད་པའི་སྤྱོད་ཡུལ་ལ་ཞུགས་ཤིང་། དེ་བཞིན་གཤེགས་པའི་སྤྱན་བླ་ན་མེད་པ་རྣམ་པར་དག་པས་ཆོས་ཀྱི་དབྱིངས་ཐམས་ཅད་དུ་སེམས་ཅན་ཐམས་ཅད་ཀྱི་གནས་ལ་གཟིགས་ནས། དེ་བཞིན་གཤེགས་པའི་སྟོབས་ཀྱི་ཤུགས་དང་ལྡན་པའི་ཤེས་རབ་དང་། ཡེ་ཤེས་ཀྱི་གཤོག་པས་འཁོར་བའི་རྒྱ་མཚོ་ཆེན་པོ་སྲེད་པའི་ཆུས་གང་བ་ཕྱེ་སྟེ་བསྩལ་ནས། སེམས་ཅན་དབང་པོ་ཡོངས་སུ་དག་ཅིང་སྔོན་དགེ་བའི་རྩ་བའི་ཚོགས་བསྩགས་པར་གྱུར་པ། སངས་རྒྱས་ཀྱི་ཆོས་ཀྱི་སྣོད་དུ་གྱུར་པ་རྣམས་འཁོར་བའི་རྒྱ་མཚོ་ནས་བཏོན་ཏེ། དེ་བཞིན་གཤེགས་པའི་ཆོས་ཀྱི་སྤྱོད་ཡུལ་ལ་རབ་ཏུ་དགོད་པ་མཛད་ཀྱང་། དེ་བཞིན་གཤེགས་པ་ནི་ཆགས་པ་མེད་པའི་སྤྱོད་ཡུལ་ལ་བཞུགས་པས་སྤྲོས་པ་ཐམས་ཅད་ཡོངས་སུ་ཆད་དེ། རྟོག་པ་མི་མངའ་རྣམ་པར་རྟོག་པ་མི་མངའ་འོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ཉི་མ་དང་ཟླ་བའི་དཀྱིལ་འཁོར་དག་ནི་འགྲོ་བ་ཐམས་ཅད་ཉེ་བར་འཚོ་བ་སྟེ། གཅིག་པུ་སྤྱོད་ཅིང་གྲོགས་མེད་ཀྱང་གཞན་གྱིས་མི་ཐུབ་ཅིང་གནས་པ་མེད་ལ་ནམ་མཁའི་དབྱིངས་ལས་རྒྱུ་ཞིང་འགྲོ་བ་དང་། འོང་བར་མངོན་ཡང་དེ་དག་ནི་བདག་ཅག་གང་དུ་འདོང་། གང་ནས་འགྲོ་སྙམ་དུ་སེམས་པ་མེད་དོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཉི་ཟླ་རྣམས་ཀྱང་སྤྱོད་ཡུལ་མྱ་ངན་ལས་འདས་པ་མངའ་བདག་སྟེ། རང་བཞིན་ཉིད་ཀྱིས་ཆོས་དང་ལྡན་ཡང་དེ་དག་ཆོས་ཀྱི་དབྱིངས་ཐམས་ཅད་དུ་རྗེས་སུ་སྤྱོད་ཅིང་གཤེགས་པ་ཡང་དག་པར་སྟོན་པ་མཛད་དོ། །སངས་རྒྱས་ཀྱི་ཕྲིན་ལས་ཐམས་ཅད་རྒྱུན་མི་འཆད་པས། འགྲོ་བ་ཐམས་ཅད་ཉེ་བར་འཚོ་ཡང་གཤེགས་པ་དང་། བཞུད་པར་རྣམ་པར་
རྟོག་པའམ་སྤྲོས་པ་མི་མངའ་སྟེ། གཅིག་ཏུ་སྤྱོད་ཅིང་འདྲ་བ་མེད་པས་ཐུབ་པ་མེད་ལ་མི་གནས་ཤིང་ཆགས་པ་མེད་པར་སྤྱོད་ཀྱང་དེ་དག་འཕོ་བ་དང་སྐྱེ་བ་དང་། ཡུམ་གྱི་སྐུ་ན་བཞུགས་པ་དང་། བལྟམས་པ་དང་མངོན་པར་འབྱུང་བ་དང་། དཀའ་བ་སྤྱོད་པ་མཛད་པ་དང་། སྙིང་པོ་བྱང་ཆུབ་ཏུ་གཤེགས་པ་དང་། བདུད་འདུལ་བ་དང་། བྱང་ཆུབ་ཏུ་རྣམ་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདས་པ་ཆེན་པོ་སྟོན་པ་ཡང་སྣང་ཞིང་ཡོད་དོ། །འོན་ཀྱང་དེ་དག་ལ་བདག་ཅག་གིས་གང་དུ་སྐྱེ་བར་བྱ། གང་དུ་མྱ་ངན་ལས་འདའ་བར་བྱ་སྙམ་དུ་དགོངས་པར་མི་མངའོ། །ཀྱེ་རྒྱལ་བའི་སྲས་དེ་ལྟར་ཚུལ་ཚད་མེད་པ་དང་། རྣམ་པ་ཚད་མེད་པར་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་སྤྱོད་ཡུལ་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། དོན་འདི་ཉིད་ཡང་བརྟག་པར་བྱ་བའི་ཕྱིར་ཚིགས་སུ་བཅད་པ་འདི་དག་སྨྲས་སོ། །དེ་བཞིན་ཉིད་ནི་ནམ་ཡང་མ་སྐྱེས་འཇིག་པ་མེད། །ནམ་ཡང་ཕྱོགས་ན་མི་གནས་མི་སྣང་དེ་བཞིན་ཉིད། །དེ་བཞིན་ཕན་མཛད་རྣམས་ཀྱི་སྤྱོད་ཡུལ་ཚད་མེད་དེ། །དངོས་ཉིད་དེ་བཞིན་ཉིད་མཚུངས་དུས་ལས་རྣམ་པར་འདས། །ཇི་ལྟར་ཆོས་དབྱིངས་དབྱིངས་དེ་དབྱིངས་ཉིད་མ་ཡིན་ལ། །ཚད་ཡོད་མ་ཡིན་དེ་ལྟར་ཚད་མེད་མ་ཡིན་པ། །དེ་བཞིན་ཡོན་ཏན་མངའ་བའི་སྤྱོད་ཡུལ་ཚད་མེད་དེ། །སྔོན་ནས་ལུས་མེད་པས་ན་ཚད་ཡོད་མ་ཡིན་ནོ། །བར་སྣང་མཁའ་ལ་ཁྲག་ཁྲིག་ལོ་གྲངས་བྱ་ལྡིང་བ། །མཁའ་ཡི་དབྱིངས་ལ་དང་པོ་དེ་དང་ཐ་མར་འདྲ། །རྒྱལ་བའི་སྤྱོད་ཡུལ་བསྐལ་པ་བརྒྱ་འགྲངས་བཤད་བྱས་ཀྱང་། །ཇི་སྙེད་བརྗོད་པ་དེ་སྙེད་ཡོན་ཏན་མ་བརྗོད་ཡོད། །ནམ་མཁའ་
ལྡིང་ནི་མཁའ་གནས་ཀླུ་ལ་རྣམ་པར་ལྟ། །ཆུ་ཆེན་ཡོངས་ཕྱེ་ཀླུ་དང་ཀླུ་ཡི་བུ་མོ་འདྲེན། །སྟོབས་བཅུ་རང་གི་མཐུ་ཡིས་ཉོན་མོངས་རྣམ་ཕྱེ་ཞིང་། །དགེ་རྩ་ལེགས་པར་བྱས་པ་འདུས་བྱས་ཁམས་ནས་འབྱིན། །ཉི་མ་ཟླ་བ་མཁའ་ཡི་དབྱིངས་ལས་ཤུགས་ཀྱིས་རྒྱུ་བ། ། སེམས་ཅན་བདེ་བ་སྐྱེད་ཀྱང་རྟོག་པ་ཡོད་པ་མིན། །བཅོམ་ལྡན་འདས་ཀྱང་དེ་བཞིན་ཆོས་ཀྱི་དབྱིངས་གཤེགས་ཤིང་། །སེམས་ཅན་མང་པོ་འདུལ་ཡང་རྣམ་པར་རྟོག་མི་མངའ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟ་བུར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མངོན་པར་རྫོགས་པར་བྱང་ཆུབ་པ་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས། དོན་ཐམས་ཅད་རྣམ་པར་དཔྱད་པ་མཉམ་པ་ཉིད་དང་། ཆོས་ཐམས་ཅད་ལ་ནེམ་ནུར་མེད་ཅིང་། གཉིས་སུ་མེད་པ་རྗེས་སུ་རྟོགས་པས། དེ་བཞིན་གཤེགས་པ་རྣམས་ཀྱི་མངོན་པར་རྫོགས་པར་བྱང་ཆུབ་པ་ཁོང་དུ་ཆུད་པར་བྱའོ། །མཚན་མ་མེད་པ་རྗེས་སུ་རྟོགས་པ་དང་། རྒྱུ་བ་མེད་པ་རྗེས་སུ་རྟོགས་པ་དང་། ཐོགས་པ་མེད་པ་རྗེས་སུ་རྟོགས་པ་དང་། མཐའ་དང་དབུས་མེད་པ་རྗེས་སུ་རྟོགས་པ་དང་། མུ་མེད་པར་ཁྱབ་པ་རྗེས་སུ་རྟོགས་པ་དང་། མཐའ་དང་མཐའ་མེད་པ་ཡོངས་སུ་སྤངས་པའི་དབུས་ཀྱི་གནས་ཁོང་དུ་ཆུད་པ་དང་། ཡི་གེ་དང་སྒྲ་དང་བརྗོད་
པ་འབྱུང་བ་ཐམས་ཅད་རྗེས་སུ་རྟོགས་པ་དང་། སེམས་ཅན་ཐམས་ཅད་ཀྱི་སེམས་དང་སྤྱོད་པའི་རྣམ་པར་རྟོག་པ་ཐམས་ཅད་དང་། བསམ་པ་དང་། དབང་པོ་དང་། ཉོན་མོངས་པ་དང་། བག་ཆགས་དང་། བག་ལ་ཉལ་བ་དང་། རང་བཞིན་མངོན་སུམ་དུ་རྗེས་སུ་རྟོགས་པ་དང་། དུས་གསུམ་ཐམས་ཅད་སེམས་ཀྱི་སྐད་ཅིག་གཅིག་གི། ཡེ་ཤེས་ཀྱིས་རྗེས་སུ་རྟོགས་པས། དེ་བཞིན་གཤེགས་པ་རྣམས་ཀྱི་མངོན་པར་རྫོགས་པར་བྱང་ཆུབ་པ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། རྒྱ་མཚོ་ཆེན་པོ་ལ་གླིང་བཞི་པའི་སེམས་ཅན་ཐམས་ཅད་ཀྱི་ལུས་ཀྱི་གཟུགས་བརྙན་རྒྱ་ལྟ་བུར་སྣང་སྟེ། དེའི་ཕྱིར་རྒྱ་མཚོ་ཆེན་པོ་བཞི་ཞེས་བྱའོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་མངོན་པར་རྫོགས་པར་བྱང་ཆུབ་པ་ལ། སེམས་ཅན་ཐམས་ཅད་ཀྱི་སེམས་དང་། དབང་པོ་དང་། བསམ་པ་རྣམ་པ་ཐ་དད་པ་རྣམས་སྣང་བ་མེད་པའི་རང་བཞིན་གྱིས་ཡོངས་སུ་སྣང་བར་འགྱུར་ཏེ། དེའི་ཕྱིར་དེ་བཞིན་གཤེགས་པ་མངོན་པར་རྫོགས་པར་བྱང་ཆུབ་པ་ཞེས་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་མངོན་པར་རྫོགས་པར་བྱང་ཆུབ་པ་དེ་ནི་ཡི་གེ་ཐམས་ཅད་ཀྱིས་བསྟན་པ་མ་ཡིན་ནོ། །དབྱངས་ཐམས་ཅད་ཀྱིས་བརྗོད་པ་མ་ཡིན་ནོ། །ཐ་སྙད་ཐམས་ཅད་ཀྱིས་སྨོས་པ་མ་ཡིན་མོད་ཀྱི། འོན་ཀྱང་གཞན་གྱི་རྣམ་པར་རིག་པ་ཉེ་བར་བཟུང་སྟེ། དེ་བཞིན་གཤེགས་པའི་མངོན་པར་རྫོགས་པར་བྱང་ཆུབ་པ་བསྟན་པར་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མངོན་པར་བྱང་ཆུབ་པའི་ཚེ། སེམས་ཅན་ཐམས་ཅད་ཀྱི་ཚད་ཇི་སྙེད་པ་དེ་སྙེད་ཀྱི་ཚད་ཀྱི་སྐུ་ཀུན་ནས་གནས་པར་འགྱུར་རོ། །ཆོས་ཐམས་ཅད་ཀྱི་ཚད་ཇི་སྙེད་པ་དང་། ཞིང་ཐམས་ཅད་ཀྱི་ཚད་ཇི་སྙེད་པ་དང་།
དུས་ཐམས་ཅད་ཀྱི་ཚད་ཇི་སྙེད་པ་དང་། དེ་བཞིན་གཤེགས་པ་ཐམས་ཅད་ཀྱི་ཚད་ཇི་སྙེད་པ་དང་། སངས་རྒྱས་ཐམས་ཅད་ཀྱི་ཚད་ཇི་སྙེད་པ་དང་། ཐ་སྙད་ཐམས་ཅད་ཀྱི་ཚད་ཇི་སྙེད་པ་དང་། དེ་བཞིན་ཉིད་དང་ཆོས་ཀྱི་དབྱིངས་ཀྱི་ཚད་ཇི་སྙེད་པ་དང་། ནམ་མཁའི་དབྱིངས་དང་ཆགས་པ་མེད་པའི་དབྱིངས་ཀྱི་ཚད་ཇི་སྙེད་པ་དང་། མངོན་པར་བསྒྲུབ་པའི་དབྱིངས་དང་། རྣམ་པར་སྤྱོད་པའི་དབྱིངས་ཀྱི་ཚད་ཇི་སྙེད་པ་དང་། མྱ་ངན་ལས་འདས་པའི་དབྱིངས་ཀྱི་ཚད་ཇི་སྙེད་པ་དེ་སྙེད་ཀྱི་སྐུ་ཀུན་ནས་གནས་པར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་སྐུའི་ཚད་ཇི་སྙེད་པ་དེ་སྙེད་ཀྱི་ཚད་ཀྱི་གསུང་ཡང་ཀུན་ནས་གནས་པར་འགྱུར་རོ། །སྐུ་དང་གསུང་གི་ཚད་ཇི་སྙེད་པ་དེ་སྙེད་དུ་ཆགས་པ་མེད་པའི་དགོངས་པ་ཀུན་ནས་གནས་པར་འགྱུར་ཏེ། དེ་དེ་ལྟ་བུར་ཚད་མེད་པའི་སྐུ་དང་། གསུང་དང་དགོངས་པའི་ཕྲིན་ལས་འཁོར་གསུམ་ཡོངས་སུ་དག་པ་བརྙེས་པས་རང་གི་སྐུ་དེ་ཉིད་ལས་སེམས་ཅན་ཐམས་ཅད་མངོན་པར་འཚང་རྒྱ་བའི་དམིགས་པ་སྟོན་ཏོ། །དེ་བཞིན་དུ་སེམས་ཅན་ཐམས་ཅད་ཀྱང་མྱ་ངན་ལས་འདས་པ་ཞི་བའི་དབྱིངས་སུ་ཡང་དག་པར་གཞོལ་བའི་བར་དུ་རབ་ཏུ་སྟོན་ཏེ། དེས་ནི་འདི་ལྟར་ཐམས་ཅད་དངོས་པོ་མེད་པའི་རང་བཞིན་དང་། མཚན་ཉིད་མེད་པའི་རང་བཞིན་དང་། མི་སྐྱེ་མི་འགག་པའི་རང་བཞིན་དང་། བདག་ལ་བདག་མེད་པའི་རང་བཞིན་དང་། སེམས་ཅན་ལ་སེམས་ཅན་མེད་པའི་རང་བཞིན་དང་། སངས་རྒྱས་རྣམ་པར་མི་རྟོག་པའི་རང་བཞིན་དང་། ཆོས་ཀྱི་དབྱིངས་ཀྱི་རང་བཞིན་དང་། ནམ་མཁའི་དབྱིངས་ཀྱི་རང་བཞིན་ཐུགས་སུ་ཆུད་དེ། དེ་ལྟ་བུའི་རང་བཞིན་མངོན་པར་རྫོགས་པར་སངས་རྒྱས་ནས་མ་ལུས་པར་ཐུགས་སུ་ཆུད་པ་དང་། ཆོས་ཀྱི་དབྱིངས་རབ་ཏུ་བརྙེས་པ་དང་། དེ་བཞིན་གཤེགས་པའི་ཐུགས་རྗེ་ཆེན་པོ་རྒྱུན་མི་འཆད་པས་སེམས་ཅན་གྱི་དོན་ཡོངས་སུ་བསྒྲུབ་པ་མཛད་དོ། །ཀྱེ་རྒྱལ་
བའི་སྲས་འདི་ལྟ་སྟེ། ནམ་མཁའ་ནི་སྐྱེ་བ་མེད་པས་འཇིག་རྟེན་གྱི་ཁམས་འདུའང་རུང་འཇིག་ཀྱང་རུང་སྟེ། དེ་བཞིན་དུ་མི་ཟད་མི་འཕེལ་བར་གནས་སོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱང་འདི་ལྟ་སྟེ། གཅིག་པའང་མ་ཡིན། ཐ་དད་པའང་མ་ཡིན་པས། མཚན་ཉིད་མེད་པར་མཚན་ཉིད་གཅིག་པའི་ཕྱིར་མངོན་པར་རྫོགས་པར་སངས་རྒྱས་ཀྱང་རུང་། མངོན་པར་རྫོགས་པར་སངས་མ་རྒྱས་ཀྱང་རུང་སྟེ། མཚན་ཉིད་དེ་ཁོ་ན་བཞིན་དུ་གནས་སོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མི་ལ་ལ་ཞིག་སྐྱེས་ཏེ། དེས་ཆུ་ཀླུང་གང་གཱའི་བྱེ་མ་སྙེད་ཀྱི་སེམས་བསྐྱེད་པ་མངོན་པར་སྤྲུལ་ལ་སེམས་བསྐྱེད་པ་དེ་དག་རེ་རེས་ཀྱང་དེ་བཞིན་གཤེགས་པ་ཁ་དོག་མེད་པ་མཚན་མ་མེད་པ། དབྱིབས་དང་བྲལ་བ། སྐུ་དང་བྲལ་བ། ཆུ་ཀླུང་གང་གཱའི་བྱེ་མ་སྙེད་ཅིག་སྤྲུལ་ཏེ། དེ་མངོན་པར་སྤྲུལ་པ་བྱེད་པ་ལ་ཡང་བསྐལ་པ་ཆུ་ཀླུང་གང་གཱའི་བྱེ་མ་སྙེད་ཅིག་འདས་པར་གྱུར་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། མི་དེས་སྤྲུལ་པའི་སེམས་བསྐྱེད་པ་དེ་དག་གིས་དེ་བཞིན་གཤེགས་པ་ཇི་སྙེད་ཅིག་སྤྲུལ་པར་འགྱུར། བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། སྨྲས་པ། ཀྱེ་རྒྱལ་བའི་སྲས་ཁྱོད་ཀྱིས་ཇི་སྐད་དུ་སྨྲས་པའི་དོན་བདག་གིས་ཤེས་ཏེ། ཇི་སྙེད་དུ་སྤྲུལ་པ་བྱས་པ་དེ་སྙེད་ཅིག་ནི་མ་སྤྲུལ་པའང་ཡོད་དོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་ཇི་སྐད་དུ་སྨྲས་པ་དེ་དེ་བཞིན་གྱིས་ལེགས་སོ་ལེགས་སོ། །ཀྱེ་རྒྱལ་བའི་སྲས་དེ་བཞིན་དུ་སྐད་ཅིག་ཐང་ཅིག་ཡུད་ཙམ་གྱིས་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཀྱང་། དེ་སྙེད་ཅིག་ནི་མངོན་པར་སངས་རྒྱས་སོ། །དེ་སྙེད་ཅིག་ནི་མངོན་པར་སངས་མ་རྒྱས་པའང་ཡོད་པར་འགྱུར་རོ། །
དེ་ཅིའི་ཕྱིར་ཞེ་ན། དེ་ནི་འདི་ལྟར་བྱང་ཆུབ་ལ་མཚན་ཉིད་མེད་པས། གང་ལ་མཚན་ཉིད་མེད་པ་དེ་ནི་མངོན་པར་རྫོགས་པའི་བྱང་ཆུབ་ལ་འགྲིབ་པ་མེད་དོ། །དེའི་མངོན་པར་རྫོགས་པའི་བྱང་ཆུབ་ལ་འཕེལ་བ་མེད་དོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མངོན་པར་རྫོགས་པའི་བྱང་ཆུབ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་མངོན་པར་སངས་རྒྱས་ནས་ཀྱང་། སྐད་ཅིག་ཡུད་ཙམ་ཐང་ཅིག་གིས་བློ་ཤིན་ཏུ་རྣམ་པར་སངས་རྒྱས་པའི་ཏིང་ངེ་འཛིན་ལ་སྙོམས་པར་འཇུག་སྟེ། དེ་དག་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་མངོན་པར་རྫོགས་པར་བྱང་ཆུབ་པའི་སྐུ་འབྱམ་ཀླས་པ་གཅིག་ལས། སྐུ་སེམས་ཅན་མ་ལུས་པ་ཐམས་ཅད་དང་མཉམ་པ་ཀུན་ནས་གནས་པར་འགྱུར་ཏེ། མངོན་པར་རྫོགས་པར་བྱང་ཆུབ་པའི་སྐུ་འབྱམ་ཀླས་པ་གཅིག་ལས་ཇི་ལྟ་བ་དེ་བཞིན་དུ་མངོན་པར་རྫོགས་པར་བྱང་ཆུབ་པའི་སྐུ་མ་ལུས་པ་ཐམས་ཅད་ཀྱི་སྒོ་ནས་ཀྱང་། སྐུ་སེམས་ཅན་མ་ལུས་པ་ཐམས་ཅད་དང་། མཉམ་པ་རེ་རེ་ཀུན་ནས་གནས་པར་འགྱུར་རོ། །ཀྱེ་རྒྱལ་བའི་སྲས་དེ་ལྟར་ན་མངོན་པར་རྫོགས་པའི་བྱང་ཆུབ་ཀྱི་སྒོ་ཡང་ཚད་མེད་པས། དེ་བཞིན་གཤེགས་པའི་སྐུའི་དབྱིབས་ཀྱང་ཚད་མེད་པ་ཉིད་དུ་ཤེས་པར་བྱ་སྟེ། དེའི་ཕྱིར་ན་དེ་བཞིན་གཤེགས་པའི་དབྱིངས་ཚད་མེད་ཅེས་བྱ། སེམས་ཅན་གྱི་ཁམས་ཚད་དུ་མ་བྱས་པ་ཞེས་བྱའོ། །ཀྱེ་རྒྱལ་བའི་སྲས་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི། མངོན་པར་རྫོགས་པར་བྱང་ཆུབ་ཁོང་དུ་ཆུད་པར་བྱ་སྟེ། སྐྲའི་རྩེ་མོ་གཅིག་ལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་
དེ་བཞིན་གཤེགས་པའི་སྐུ་སེམས་ཅན་ཐམས་ཅད་སྙེད་དུ་འཇུག་པར་བྱའོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་དེ་བཞིན་གཤེགས་པ་རྣམས་ཀྱི་མངོན་པར་རྫོགས་པར་བྱང་ཆུབ་པའི་སྐུ་དེ་དག་ནི་མི་འཇིག་པའི་ཚུལ་གྱིས། ཡོང་ནས་མ་སྐྱེས་པའི་ཕྱིར་རོ། །སྐྲའི་རྩེ་མོ་གཅིག་ལ་ཇི་ལྟར་ཁོང་དུ་ཆུད་པར་བྱ་བ་དེ་བཞིན་དུ། ཆོས་ཀྱི་དབྱིངས་མ་ལུས་པ་ཐམས་ཅད་དུའང་ཁོང་དུ་ཆུད་པར་བྱ་སྟེ། གནས་གང་ན་དེ་བཞིན་གཤེགས་པ་མི་བཞུགས་པ་དེ་ལྟ་བུ་ནི་གང་ཡང་མེད་པར་མོས་པར་བྱའོ། །དེ་ཅིའི་ཕྱིར་ཞེ་ན། དེ་ནི་དེ་བཞིན་གཤེགས་པ་རྣམས་ཀྱི་མངོན་པར་རྫོགས་པའི་བྱང་ཆུབ་ཀྱིས་ཐམས་ཅད་དུ་ཁྱབ་པའི་ཕྱིར་ཏེ། དེ་བས་ན་སྟོབས་དང་མཐུ་དང་ཉམས་ཀྱི་ཚུལ་ཇི་ལྟ་བ། དེ་བཞིན་དུ་དེ་བཞིན་གཤེགས་པ་རྣམས་ཀྱི་སྙིང་པོ་བྱང་ཆུབ་དང་། བྱང་ཆུབ་ཀྱི་ཤིང་དང་། གདན་སེང་གེའི་ཁྲི་དང་། མངོན་པར་རྫོགས་པའི་བྱང་ཆུབ་རྣམ་པ་ཐ་དད་པའང་དེ་བཞིན་གཤེགས་པའི་སྟོབས་ལ་འཇུག་པའི་ཚུལ་གྱིས་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་། བྱང་ཆུབ་སེམས་དཔའ་སེམས་དཔའ་ཆེན་པོས་རང་གི་སེམས་ཀྱི་ཚུལ་གྱིས། དེ་བཞིན་གཤེགས་པ་ཐམས་ཅད་ཀྱི་མངོན་པར་རྫོགས་པའི་བྱང་ཆུབ་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་མངོན་པར་རྫོགས་པའི་བྱང་ཆུབ་དང་། བྲལ་བའི་སེམས་དེ་ལྟ་བུ་གང་ཡང་མེད་དེ། རང་གི་སེམས་ཀྱིས་ཇི་ལྟ་བ་བཞིན་དུ་སེམས་ཅན་མ་ལུས་པ་ཐམས་ཅད་ཀྱི་སེམས་མང་པོ་འབྱམ་ཀླས་པ་རྣམས་ལས་ཀྱང་། དེ་བཞིན་གཤེགས་པ་རྣམས་ཀྱི་མངོན་པར་རྫོགས་པའི་བྱང་ཆུབ་ཁོང་དུ་ཆུད་པར་བྱ་སྟེ། ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མངོན་པར་རྫོགས་པའི་བྱང་ཆུབ་རྒྱ་ཆེ་ཞིང་ཡངས་ལ་ཀུན་ཏུ་ཁྱབ་སྟེ། མི་འབྲལ་བ་དང་རྣམ་པར་འཆད་པ་མེད་པ་དང་། རྒྱུན་མི་འཆད་པར་ཚུལ་གྱི་སྒོ་བསམ་གྱིས་མི་ཁྱབ་པ་ལ་འཇུག་པས་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། དོན་འདི་ཉིད་ཡང་བརྟག་པར་བྱ་བའི་ཕྱིར་ཚིགས་སུ་བཅད་པ་འདི་དག་སྨྲས་སོ། །ཆོས་རྣམས་ཐམས་ཅད་རྟོགས་པ་གཉིས་དང་གཉིས་མེད་བྲལ། ཆོས་རྣམས་ཐམས་ཅད་རྟོགས་པ་ཡང་དག་ཡུལ་མེད་ཡིན། །ཆོས་རྣམས་ཐམས་ཅད་རྟོགས་པ་ནམ་མཁའི་རང་བཞིན་མཉམ། །ཆོས་རྣམས་ཐམས་ཅད་རྟོགས་པ་བདག་དང་བདག་མེད་སྙོམས། །གླིང་བཞི་ཀུན་གྱི་གཟུགས་མང་ཇི་སྙེད་ཇི་བཞིན་དུ། །གཟུགས་བརྙན་རྒྱ་མཚོར་རྒྱ་འདྲ་དེ་ཕྱིར་རྒྱ་མཚོ་སྟེ། །དེ་བཞིན་ཕྱོགས་བཅུ་སེམས་ཅན་ཐམས་ཅད་རྒྱ་བཞིན་དུ། །བསམ་པ་ཐུགས་སུ་ཆུད་པས་དེ་ཕྱིར་བྱང་ཆུབ་ཡིན། །ཇི་ལྟར་ནམ་མཁའ་འཇིག་རྟེན་ཡོངས་སུ་འགྲུབ་གྱུར་ཀྱང་། །རྣམ་པར་འཕེལ་བར་མི་འགྱུར་འཇིག་ཀྱང་འགྲིབ་པ་མེད། །རྒྱལ་བ་འཇིག་རྟེན་འདས་པའི་བྱང་ཆུབ་དེ་བཞིན་ཏེ། །བྱང་ཆུབ་བྱང་མ་ཆུབ་ཏུ་མཚན་ཉིད་མེད་པར་གཅིག །མཁས་པའི་སེམས་ཀྱིས་སྤྲུལ་པ་མངོན་པར་སྤྲུལ་བྱས་པ། །མངོན་སྤྲུལ་མངོན་མ་སྤྲུལ་ཀྱང་སྔོན་དང་རང་བཞིན་མཉམ། །དེ་བཞིན་འགྲོ་བ་ཐམས་ཅད་བྱང་ཆུབ་སངས་རྒྱས་ཀྱང་། །སྔོན་དང་རང་བཞིན་གཅིག་སྟེ་འཕེལ་ཞིང་འགྲིབ་པ་མེད། །རྣམ་སངས་རྒྱས་ཤེས་བྱ་བའི་རྒྱལ་བའི་ཏིང་འཛིན་ཡོད། །བྱང་ཆུབ་སྙིང་པོར་བཞུགས་ནས་ཏིང་འཛིན་དེ་བསྒྲུབས་ཏེ། །སེམས་ཅན་སྙེད་ཀྱི་འོད་ཟེར་མཉམ་པར་རབ་བཀྱེ་ཞིང་། །པད་མ་ཇི་བཞིན་རྣམ་པར་སངས་རྒྱས་སེམས་ཅན་འདུལ། །བསྐལ་པ་དུས་གསུམ་
སེམས་ཅན་ཞིང་གི་རང་བཞིན་དང་། །ཆོས་དང་དེ་བཞིན་སེམས་ཅན་དབང་པོ་བསམ་པ་དག ། ཐམས་ཅད་རང་བཞིན་སྐུ་ལ་མཉམ་པ་ཉིད་དུ་གཟིགས། །དེ་བས་བྱང་ཆུབ་གནས་ནི་ཚད་མེད་ཤེས་པར་གྱིས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་བསྐོར་བ་ཇི་ལྟ་བུར་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་དགོངས་པས་ཤིན་ཏུ་བྱིན་གྱིས་བརླབས་པས། ཆོས་ཀྱི་འཁོར་ལོ་རབ་ཏུ་བསྐོར་བ་ནི། ཡོང་གིས་ལྡང་བ་མེད་པའི་ཚུལ་གྱིས་འཁོར་བ་མེད་ཅིང་མངོན་པར་གྲུབ་པ་མེད་པར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་མཐར་ལྟ་བ་ཐམས་ཅད་དང་བྲལ་བའི་ཚུལ་གྱིས་འཁོར་གསུམ་ཡོངས་སུ་གཅོད་པ་ཤིན་ཏུ་ཆད་པར་ཤེས་པར་བྱའོ། །ནམ་མཁའི་མཐའ་ཁོང་དུ་ཆུད་པའི་ཚུལ་གྱིས་འདོད་ཆགས་དང་བྲལ་བའི་མཐའི་མཐའ་མེད་པར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་བརྗོད་དུ་མེད་པའི་ཚུལ་གྱིས་སྨོས་སུ་མེད་པར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་མྱ་ངན་ལས་འདས་པའི་རང་བཞིན་གྱིས་ཤིན་ཏུ་ཞི་བར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་དེ་བཞིན་གཤེགས་པའི་གསུང་གིས་ཐམས་ཅད་དུ་ཁྱབ་པའི་ཕྱིར་ཡི་གེ་དང་སྒྲ་དང་དབྱངས་དང་སྐད་སྣ་ཚོགས་སུ་འཁོར་
བར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་ཆོས་ཀྱི་ཚུལ་གྱི་རང་བཞིན་གྱིས་སྒྲ་བརྙན་གྱི་སྒྲ་དང་། དབྱངས་ཀྱི་རང་བཞིན་དུ་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་བདག་པོ་ཡོད་ནས་མེད་པའི་ཕྱིར་སྒྲ་ཐམས་ཅད་སྒྲ་གཅིག་ཏུ་ཁོང་དུ་ཆུད་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་ཕྱི་དང་ནང་འབྲེལ་བ་མེད་པས་ཡི་གེ་ཟད་མི་ཤེས་པར་ཤེས་པར་བྱའོ། །ཆོས་ཀྱི་འཁོར་ལོ་བསྐོར་བ་ནི་ཆོས་ཉིད་ཁོང་དུ་ཆུད་པའི་ཚུལ་གྱིས་ཡོང་གིས་མ་སྐྱེས་མ་འགགས་པར་ཤེས་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ། དཔེར་ན། ཡི་གེ་འགྲངས་པ་ཐམས་ཅད་ནི་བསྟན་པ་ཐམས་ཅད་ཀྱིས་ཤིན་ཏུ་བསྟན་ཀྱང་མི་འཕེལ་མི་འགྲིབ་སྟེ། སྔོན་གྱི་མཐའི་བསྐལ་པའི་མུར་ཐུག་པ་ནས། ཡི་གེ་ཐམས་ཅད་བརྗོད་ཀྱང་མ་འཕེལ་མ་འགྲིབ་པ་ཡིན་ནོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་ཡང་ཡི་གེ་རྣམ་པར་དམིགས་པར་བསྟན་པ་ཐམས་ཅད་ཀྱིས་ཤིན་ཏུ་བསྟན་ཀྱང་མི་འཕེལ་མི་འགྲིབ་སྟེ། སྔོན་གྱི་མཐའི་མུར་བྱུང་བའི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་བསྐོར་ཀྱང་ཆོས་ཀྱི་འཁོར་ལོ་མ་ཟད་པ་ཡིན་ཏེ། དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་དེ་ནི་དགོས་པ་ཐམས་ཅད་དང་། སྤྱོད་པ་འགྲངས་པ་ཐམས་ཅད་དང་། འཇིག་རྟེན་པ་དང་། འཇིག་རྟེན་ལས་འདས་པའི་དགོས་པ་ཐམས་ཅད་ཀྱི་ནང་དུ་འདུས་ཀྱང་གང་ལ་ཡང་མི་གནས་པར་ཤེས་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ། དཔེར་ན་ཡི་གེའི་འབྲུ་འགྲངས་པ་དགོས་པ་ཐམས་ཅད་དང་། སྤྱོད་པ་འགྲངས་པ་ཐམས་ཅད་དང་། བགྲང་བ་འགྲངས་པ་ཐམས་ཅད་དང་། འཇིག་རྟེན་པ་དང་འཇིག་རྟེན་ལས་འདས་པའི་གནས་ཐམས་ཅད་དུ་ཁྱབ་པར་འདུག་ཀྱང་ཅི་ལའང་མི་གནས་པར་ཤེས་པར་བྱའོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་ཡང་སེམས་ཅན་དང་། ཆོས་དང་ལས་དང་རྣམ་པར་སྨིན་པ་ཐམས་ཅད་དུ་ཁྱབ་ཀྱང་
ཅི་ལའང་མི་གནས་ཏེ། སེམས་ཅན་གང་ཡང་རུང་སྒྲ་སྣ་ཚོགས་ཇི་སྙེད་དུ་བརྗོད་པ་དེ་དག་ཐམས་ཅད་ཀྱང་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བའི་སྒྲ་ཉིད་དུ་བརྗོད་དོ། །དེ་ཅིའི་ཕྱིར་ཞེ་ན། སྒྲ་ཐམས་ཅད་ནི་ཆོས་ཀྱི་འཁོར་ལོ་བསྐོར་བའི་ཚུལ་ལས་རྣམ་པར་མི་འདའོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས། ཆོས་ཀྱི་འཁོར་ལོ་བསྐོར་བ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་ཁོང་དུ་ཆུད་པར་འདོད་པས། དེ་བཞིན་གཤེགས་པའི་མངོན་པར་བསྒྲུབ་པ་ལ་འཇུག་པ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་དེ་བཞིན་གཤེགས་པས་མངོན་པར་བསྒྲུབ་པ་དེ་ཡང་གང་ཞེ་ན། ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བའི་ཚེ། སེམས་ཅན་ཐམས་ཅད་ཀྱི་སེམས་དང་། སྤྱོད་པ་དང་། བསམ་པ་དང་། དབང་པོ་དང་། བརྩོན་འགྲུས་རྣམ་པ་ཐ་དད་པ་ཇི་སྙེད་པ་དེ་སྙེད་དུ། དེ་བཞིན་གཤེགས་པའི་གསུང་ལས་དབྱངས་ཀྱི་ཡན་ལག་འབྱུང་བར་འགྱུར་རོ། །ཀྱེ་རྒྱལ་བའི་སྲས། དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཏིང་ངེ་འཛིན་མི་བསྙེངས་པ། ཆགས་པ་མེད་པའི་མཐར་ཐུག་པ་ཞེས་བྱ་བ་མངའ་སྟེ། དེ་ལ་སྙོམས་པར་ཞུགས་ཞིང་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་མཛད་དེ། ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་སེམས་ཅན་ཐམས་ཅད་ཇི་སྙེད་ཡོད་པ་དེ་སྙེད་ཀྱི་ཆོས་ཀྱི་འཁོར་ལོ་བསྐོར་བའི་སྒྲ་མངོན་པར་རྫོགས་པའི་བྱང་ཆུབ་ཀྱི་སྐུ་རེ་རེའི་ཞལ་ནས་འབྱུང་ངོ་། །
སྒྲའི་དབྱངས་དེ་དག་རེ་རེ་ཞིང་ཡང་དབྱངས་ཀྱི་ཡན་ལག་དང་སྒྲ་རྣམ་པ་ཐ་དད་པ་སེམས་ཅན་སྙེད་དང་ལྡན་པར་འབྱུང་ངོ་། །ཀྱེ་རྒྱལ་བའི་སྲས་དེ་ནི་དེ་བཞིན་གཤེགས་པ་རྣམས་ཆོས་ཀྱི་འཁོར་ལོ་བསྐོར་བ་མཛད་པ་སྟེ། འདི་ལྟར་ཏིང་ངེ་འཛིན་དེ་ཉིད་ལ་སྙོམས་པར་ཞུགས་པའོ། །སེམས་ཅན་ཐམས་ཅད་མཉམ་པར་དགའ་བར་འགྱུར་བ་སྟེ། གང་གིས་དེ་ལྟ་བུར་དེ་བཞིན་གཤེགས་པ་ཆོས་ཀྱི་འཁོར་ལོ་བསྐོར་བ་ཁོང་དུ་ཆུད་པ་དེ་དག་ནི་དེ་བཞིན་གཤེགས་པའི་རིགས་དང་མཐུན་པར་སྤྱོད་པ་ཡིན། །གང་གིས་དེ་ལྟར་ཁོང་དུ་མ་ཆུད་པ་དེ་དག་ནི་དེ་བཞིན་གཤེགས་པའི་རིགས་ལས་ལོགས་ཤིག་པའི་ཆོས་ལ་སྤྱོད་པ་དག་གོ །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཚད་མེད་པ་ཁོང་དུ་ཆུད་པར་བྱ་བའི་ཚུལ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས། ཆོས་ཀྱི་འཁོར་ལོ་བསྐོར་བ་མངོན་པར་བསྒྲུབ་པ་མཛད་པ་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་ཡང་བརྟག་པར་བྱ་བའི་ཕྱིར་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མཚུངས་མེད་ཆོས་ཀྱི་འཁོར་ལོ་འཁོར་བ་མི་དམྱིགས་ཏེ། །ཕྱིར་ཡང་ལོག་མེད་དུས་རྣམས་ཀུན་ལས་རྣམ་པར་གྲོལ། །ཡི་གེ་ཐམས་ཅད་སྨྲ་བར་བྱ་བས་ཟད་མི་འགྱུར་དེ་བཞིན་སྟོབས་བཅུའི་ཆོས་ཀྱི་འཁོར་ལོ་མཐའ་ཡང་ཡས། །ཡི་གེའི་འབྲུ་རྣམས་ཐམས་ཅད་དགོས་པ་ཀུན་ཏུ་ཁྱབ། །གང་ནའང་མི་གནས་དེ་བཞིན་སངས་རྒྱས་འཁོར་ལོ་སྟེ། །སྒྲ་རྣམས་ཀུན་ལ་ཞུགས་ཀྱང་རང་བཞིན་ཞུགས་པ་མེད། །མ་ལུས་སེམས་ཅན་སྤྱོད་པས་སེམས་ཅན་དགའ་བར་མཛད། །གྲངས་ལས་ཡོངས་སུ་འདས་པའི་ཆོས་རྣམས་བརྗོད་པའི་ཕྱིར། །མ་ལུས་མཐར་ཐུག་ཏིང་འཛིན་སྟོན་པ་སྙོམས་པར་འཇུག །དེ་མཐུས་སྐད་ཅིག་དེ་ལ་
སེམས་ཅན་ཇི་སྙེད་པ། །དེ་སྙེད་རྒྱལ་བའི་གསུང་དབྱངས་ཡིད་དུ་འོང་བ་འབྱུང་། །སྒྲ་གཅིག་དབྱངས་ལས་སེམས་ཅན་མ་ལུས་ཇི་སྙེད་པའི། །སྒྲ་དབྱངས་རྣམ་པ་ཐ་དད་དུས་གཅིག་འབྱུང་བར་འགྱུར། །འཇིག་རྟེན་དབང་ཕྱུག་ཀུན་ལ་རྣམ་པར་རྟོག་མི་མངའ། །གང་རྣམས་ཇི་ལྟར་མོས་པ་དེ་བཞིན་གསུང་ཡང་ཉན། །ཡི་གེ་རྣམས་ནི་ནང་ན་ཡོད་མིན་ཕྱི་ནས་འབྱུང་བ་མིན། །དེ་དག་ཟད་པར་མི་འགྱུར་བསགས་པའང་གང་ཡང་མེད། །འོན་ཀྱང་འཁོར་ལོ་བསྐོར་ན་འགྲོ་བའི་དོན་དུ་འགྱུར། །སྟོབས་བཅུ་མངའ་བ་རྣམས་ཀྱི་ཆོ་འཕྲུལ་ཅི་འདྲ་ལྟོས། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མྱ་ངན་ལས་འདས་པ་ཆེན་པོ་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདས་པ་ཆེན་པོ་ཁོང་དུ་ཆུད་པར་འདོད་པས་རང་བཞིན་གྱི་ངོ་བོ་ཉིད་ལ་བློ་ཡོངས་སུ་བཏང་སྟེ། དེས་དེ་བཞིན་ཉིད་ཀྱི་ཡོངས་སུ་མྱ་ངན་ལས་འདས་པ་ཇི་ལྟ་བ་དེ་བཞིན་དུ། དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པ་ཁོང་དུ་ཆུད་པར་བྱའོ། །ཡང་དག་པའི་མཐའ་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། ཆོས་ཀྱི་དབྱིངས་
ཀྱི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། ནམ་མཁའི་དབྱིངས་ཀྱི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། རང་བཞིན་གྱིས་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། འདོད་ཆགས་དང་བྲལ་བའི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། རྨི་ལམ་གྱི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། མཚན་ཉིད་མེད་པའི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། ཆགས་པ་མེད་པའི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། བདག་གི་རང་བཞིན་གྱི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དང་། ཆོས་ཐམས་ཅད་ཀྱི་རང་བཞིན་གྱི་མཐའི་ཡོངས་སུ་མྱ་ངན་ལས་འདས་པ་ཇི་ལྟ་བ་དེ་བཞིན་དུ་དེ་བཞིན་གཤེགས་པའི་ཡོངས་སུ་མྱ་ངན་ལས་འདས་པ་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། དེ་ནི་དེ་དག་ཐོག་མ་ནས་མ་སྐྱེས་མ་བྱུང་བའི་ཕྱིར་ཏེ། ཆོས་གང་མ་སྐྱེས་མ་བྱུང་བ་དེ་ལ་འབྲལ་བར་འགྱུར་བ་གང་ཡང་མེད་དོ། །ཀྱེ་རྒྱལ་བའི་སྲས་གཞན་ཡང་དེ་བཞིན་གཤེགས་པ་རྣམས་ནི། བྱང་ཆུབ་སེམས་དཔའ་རྣམས་ལ་ཡོངས་སུ་མྱ་ངན་ལས་འདའ་བ་ཤིན་ཏུ་མཐར་ཐུག་པ། མི་རྗོད་མི་སྟོན་ཏེ། དེ་ཅིའི་ཕྱིར་ཞེ་ན། དེ་དག་གིས་ནི་དེ་བཞིན་གཤེགས་པ་ཐམས་ཅད་ད་ལྟར་བྱུང་བ་ཇི་ལྟ་བ་དེ་བཞིན་དུ་འདས་པ་དང་། མ་བྱོན་པ་རྣམས་ཀྱང་། སྐད་ཅིག་གཅིག་ལ་མངོན་དུ་བྱ་ཞིང་སྐད་ཅིག་ཀྱང་ཡེ་ཤེས་ཀྱི་སྐད་ཅིག་གིས་རྗེས་སུ་འབྲང་བར་བྱ། སྐད་ཅིག་དེ་ལ་ཡང་དེ་བཞིན་གཤེགས་པ་ཐམས་ཅད་མངོན་ཏུ་བལྟ་བར་བྱ། དེ་བཞིན་གཤེགས་པའི་མངོན་པར་བསྒྲུབ་པ་ཐམས་ཅད་ཀྱང་དེས་མངོན་པར་བསྒྲུབ་པར་བྱ་སྟེ། དེས་ནི་གཉིས་ཀྱི་འདུ་ཤེས་ཀྱང་བསྐྱེད་པར་མི་བྱ། མི་གཉིས་པའི་འདུ་ཤེས་ཀྱང་མ་ཡིན། སེམས་ཅན་གྱི་འདུ་ཤེས་ཀྱང་མ་ཡིན། བདག་གི་འདུ་ཤེས་ཀྱང་མ་ཡིན་པའི་ཕྱིར་རོ། །ཀྱེ་རྒྱལ་བའི་
སྲས་དེ་ཅིའི་ཕྱིར་ཞེ་ན། བྱང་ཆུབ་སེམས་དཔས་ནི་མངོན་པར་ཞེན་པའི་ལམ་ཐམས་ཅད་དང་བྲལ་ཞིང་འདུ་ཤེས་ཐམས་ཅད་ཡོངས་སུ་སྤང་བར་བྱ་དགོས་པའི་ཕྱིར་རོ། །ཀྱེ་རྒྱལ་བའི་སྲས་གཞན་ཡང་དེ་བཞིན་གཤེགས་པ་འབྱུང་བ་ཞེས་བྱ་བ་འདི་ནི་སེམས་ཅན་ཕ་རོལ་ཡོངས་སུ་ཚིམ་པར་འགྱུར་བའི་ཚིག་གོ །དེ་བཞིན་གཤེགས་པ་ཡོངས་སུ་མྱ་ངན་ལས་འདའ་ཞེས་བྱ་བ་འདི་ནི་སེམས་ཅན་ཕ་རོལ་གྱི་སྐྱོ་བ་བསྐྱེད་པའི་ཚིག་སྟེ། ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ནི་སྐྱེ་བ་མེད་དེ། ཡོངས་སུ་མྱ་ངན་ལས་མི་འདའ་འོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་ཆོས་ཀྱི་དབྱིངས་ལ་བཞུགས་པའི་ཕྱིར་ཏེ། སེམས་ཅན་ཕ་རོལ་གྱི་སེམས་དང་། བསམ་པ་ཡོངས་སུ་སྐོམ་པར་བྱ་བའི་ཕྱིར། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་སྣང་ངོ་། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་ཆོས་ཀྱི་དབྱིངས་ཀྱི་ཚད་དང་། མཉམ་པ་ཞིག་ཤར་ལ་དེ་ཤར་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་ཆུ་ཡོངས་སུ་དང་བའི་སྣོད་ཐམས་ཅད་དུ་གཟུགས་བརྙན་ཕྱིན་པར་སྣང་ཞིང་མངོན་ལ། ཉི་མའི་དཀྱིལ་འཁོར་ལ་འཕོས་པ་མེད་ཅིང་ཉི་མའི་དཀྱིལ་འཁོར་ཀུན་ཏུ་ཕྱིན་པར་སྣང་བར་གྱུར་ཀྱང་དེའི་ནང་ནས་ཆུའི་སྣོད་གཅིག་ཅིག་ཆག་གམ། དེ་ནས་ལོགས་ཤིག་ཏུ་ཕྱུང་ངམ་སྟོང་པར་བཞག་པར་གྱུར་ན་ཉི་མའི་གཟུགས་བརྙན་ཡང་སྣང་བར་མི་འགྱུར་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། ཉི་མའི་དཀྱིལ་འཁོར་རམ་གཅིག་གིས་ཉེས་ཏེ་སྣོད་དེར་ཉི་མའི་གཟུགས་བརྙན་མི་སྣང་བར་མ་གྱུར་གྲང་ངོ་། །བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་དེ་ལྟ་མ་ཡིན་ཏེ་སྣོད་དང་མི་ལྡན་པའི་ཕྱིར་ཉི་མའི་གཟུགས་བརྙན་མི་སྣང་གི་ཉི་མའི་དཀྱིལ་འཁོར་གྱི་ཉེས་པ་ནི་མ་ཡིན་ནོ། །བྱང་ཆུབ་སེམས་དཔའ་ཀུན་ཏུ་
བཟང་པོས་སྨྲས་པ། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པའི་ཉི་མའི་དཀྱིལ་འཁོར་འཆར་བར་འགྱུར་བའི་ཚེའང་། འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་ཀྱི་ཆོས་ཀྱི་དབྱིངས་ཀུན་ཏུ་སྔ་ཕྱི་མེད་པར་འཆར་ཏེ། དེ་ནི་འཇིག་རྟེན་གྱི་ཁམས་འབྱམ་ཀླས་པ་ཀུན་གྱི་སེམས་ཅན་སེམས་རྙོག་པ་མེད་པ་དང་ལྡན་པའི་ཆུའི་སྣོད་ཐམས་ཅད་ལ་གཟུགས་བརྙན་སྣང་བར་འགྱུར་རོ། །སེམས་ཀྱི་རྒྱུད་རྙོག་པ་མེད་པའི་ཕྱིར་རྟག་ཏུ་རྒྱུན་མི་འཆད་པར། དེ་བཞིན་གཤེགས་པའི་སྐུ་ཉི་མའི་དཀྱིལ་འཁོར་སྣང་ཡང་སེམས་ཅན་སེམས་རྙོག་པ་དང་ལྡན་ཞིང་སྣོད་ཆག་པར་གྱུར་པ་རྣམས་ཀྱིས་ནི་དེ་བཞིན་གཤེགས་པའི་སྐུ་ཉི་མའི་དཀྱིལ་འཁོར་མཐོང་བར་མི་འགྱུར་ཏེ། དེ་བཞིན་གཤེགས་པ་ལ་འཕོ་བ་མི་མངའ་ཡང་ཐམས་ཅད་དུ་སྐྱེ་བར་སྣང་སྟེ། འཇིག་རྟེན་གྱི་ཁམས་འབྱམ་ཀླས་པ་ལ་ལ་ཞིག་གི་སེམས་ཅན་སྣོད་ཆག་པ་ལྟ་བུར་གྱུར་པའམ། སེམས་རྙོག་པ་དང་ལྡན་ཞིང་། ལས་དང་ཉོན་མོངས་པས་བསྒྲིབས་པ་ཞིག་ཡོད་པར་གྱུར་ན་ཡང་། དེར་ནི་དེ་བཞིན་གཤེགས་པ་རྣམས་མྱ་ངན་ལས་འདའ་བར་སྣང་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། དེ་བཞིན་གཤེགས་པས་ཉེས་ཏེ་དེ་བཞིན་གཤེགས་པ་རྣམས། མྱ་ངན་ལས་འདའ་བའམ། ཚིག་ཏུ་མ་གྱུར་གྲང་ངོ་། །སྨྲས་པ་ཀྱེ་རྒྱལ་བའི་སྲས་དེ་ལྟ་མ་ཡིན་ཏེ། དེ་བཞིན་གཤེགས་པ་རྣམས་ནི་སེམས་ཅན་གྱི་རྒྱུད་དགེ་བའི་རྩ་བ་དང་། མི་ལྡན་པས་ཡོངས་སུ་མྱ་ངན་ལས་འདའི། དེ་བཞིན་གཤེགས་པ་རྣམས་ཀྱིས་ཉེས་པའི་ཕྱིར་ཞེས་ནི་མི་བརྗོད་དོ། །སྨྲས་པ་ཀྱེ་རྒྱལ་བའི་སྲས་འོ་ན་བྱང་ཆུབ་སེམས་དཔའ་སེམས་དཔའ་ཆེན་པོས། དེ་བཞིན་གཤེགས་པ་རྣམས་མྱ་ངན་ལས་འདའ་བ་ཡང་། དེ་ལྟ་བུར་ཤེས་པར་བྱའོ། །ཀྱེ་རྒྱལ་བའི་སྲས་གཞན་ཡང་ཡོངས་སུ་མྱ་ངན་ལས་འདའ་བས། འདུལ་བའི་སེམས་ཅན་རྣམས་ལ་དེ་བཞིན་གཤེགས་
པ་རྣམས་ཡོངས་སུ་མྱ་ངན་ལས་འདའ་བ་སྟོན་ཏེ། དེ་བཞིན་གཤེགས་པ་རྣམས་ནི་འབྱུང་བའང་མེད། ཡོངས་སུ་མྱ་ངན་ལས་འདའ་བའང་མེད་དོ། །ཀྱེ་རྒྱལ་བའི་སྲས་དེ་ཡང་འདི་ལྟ་སྟེ། དཔེར་ན། མེ་ནི་འཇིག་རྟེན་ཐམས་ཅད་ན་ཡང་མེའི་དགོས་པ་སྒྲུབ་བོ། །དེ་ལས་གྲོང་ངམ། གྲོང་ཁྱེར་རམ། གྲོང་རྡལ་ལམ། ཡུལ་ལམ། ཕོ་བྲང་འཁོར་ཏམ། རྒྱལ་པོའི་གནས་ཤིག་ཏུ་མེ་ཤི་བར་གྱུར་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། དེས་འཇིག་རྟེན་ཐམས་ཅད་དུ་མེ་ཐམས་ཅད་ལྷག་མ་མེད་པའམ། གཅིག་ཏུ་ཤི་སྟེ་ཞི་བར་མ་གྱུར་གྲང་ངོ་། །བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་དེ་ལྟ་མ་ཡིན་ནོ། །སྨྲས་པ། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འཇིག་རྟེན་གྱི་ཁམས་འབྱམ་ཀླས་པ། མ་ལུས་པ་ཐམས་ཅད་ན་དེ་བཞིན་གཤེགས་པའི་ཕྲིན་ལས་མཛད་པ་ལས་དུས་གཞན་ཞིག་ན། དེ་བཞིན་གཤེགས་པའི་ཕྲིན་ལས་ཡོངས་སུ་རྫོགས་པར་གྲུབ་ནས། ཞིང་གི་གྲངས་སུ་བྱ་བ་ལ་ལ་ཞིག་ནས་ཡོངས་སུ་མྱ་ངན་ལས་འདའ་བ་བསྟན་པར་གྱུར་ན། ཀྱེ་རྒྱལ་བའི་སྲས་དེ་ལ་ཇི་སྙམ་དུ་སེམས། འཇིག་རྟེན་ཐམས་ཅད་ནས་ཀྱང་དེ་བཞིན་གཤེགས་པའམ་གཅིག་ཡོངས་སུ་མྱ་ངན་ལས་འདས་པར་མ་གྱུར་གྲང་ངོ་། །སྨྲས་པ། ཀྱེ་རྒྱལ་བའི་སྲས་དེ་ལྟ་མ་ཡིན་ནོ། །སྨྲས་པ། ཀྱེ་རྒྱལ་བའི་སྲས་འོ་ན་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདས་པ་ཆེན་པོ་ཡང་དེ་ལྟ་བུར་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། སྒྱུ་མའི་མཁན་པོ་མཁས་པ་ལོབས་པ་ཤིན་ཏུ་བྱང་བ་ཞིག་གིས་
སྔགས་དང་རིག་སྔགས་ཀྱི་སྟོབས་དང་ཤུགས་ལ་བརྟེན་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་སྒྱུ་མའི་རྣམ་པ་མང་པོ་བསྟན་ཏེ། གྲོང་དང་གྲོང་ཁྱེར་དང་ལྗོངས་དང་། ཕོ་བྲང་འཁོར་དང་རྒྱལ་པོའི་གནས་ཐམས་ཅད་དུ་རང་གི་ལུས་བསྟན་ཏེ། སྒྱུ་མ་དེ་དག་ཀྱང་བསྐལ་པར་གནས་པར་བྱིན་གྱིས་བརླབས་པ་ལས། གྲོང་ངམ་གྲོང་ཁྱེར་རམ། ལྗོངས་སམ། ཡུལ་ལམ། ཕོ་བྲང་འཁོར་ཏམ། རྒྱལ་པོའི་གནས་གཅིག་ཅིག་ཏུ་དགོས་པ་རྫོགས་པར་ཟིན་ནས། སྒྱུ་མའི་མཁན་པོ་དེས་རང་གི་ལུས་མི་སྣང་བར་བྱས་ན། ཀྱེ་རྒྱལ་བའི་སྲས་དེ་ཇི་སྙམ་དུ་སེམས། འཇིག་རྟེན་ཐམས་ཅད་ནས་ཀྱང་སྒྱུ་མའི་རྣམ་པ་མང་པོ་ཡོངས་སུ་ནུབ་པའམ། གཅིག་ཏུ་མ་གྱུར་གྲང་ངོ་། །བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་སྨྲས་པ། ཀྱེ་རྒྱལ་བའི་སྲས་དེ་ལྟ་མ་ཡིན་ནོ། །སྨྲས་པ། ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་ཀྱི་སྒྱུ་མ་ཚད་མེད་པ་ལ་ཤིན་ཏུ་བྱང་བ། ཐབས་དང་ཤེས་རབ་དང་ཡེ་ཤེས་ཀྱི་རིག་སྔགས་ཀྱིས་ཤིན་ཏུ་བྱུང་བ་ཡང་ཆོས་ཀྱི་དབྱིངས་ཐམས་ཅད་དུ་དེ་བཞིན་གཤེགས་པའི་སྐུ་སྒྱུ་མའི་རྣམ་པ་ལྟ་བུ་ཆོས་ཀྱི་དབྱིངས་ཀྱི་ཀླས་པར་གནས་པ། ནམ་མཁའི་དབྱིངས་ཀྱི་མཐར་ཐུག་པར་མི་འཇིག་པ་བསྟན་ལ་སེམས་ཅན་གྱི་མོས་པ་བཞིན་དུ་ཕྲིན་ལས་རྫོགས་པར་ཟིན་ནས། ཞིང་འབྱམ་ཀླས་པ་ལ་ལ་ཞིག་ནས་ཡོངས་སུ་མྱ་ངན་ལས་འདས་པ་སྟོན་ཀྱང་ཞིང་གཅིག་ནས་ཡོངས་སུ་མྱ་ངན་ལས་འདས་པས་འཇིག་རྟེན་གྱི་ཁམས་ཐམས་ཅད་ནས་ཡོངས་སུ་མྱ་ངན་ལས་འདའ་བ་མ་ཡིན་ཏེ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདའ་བ་ནི་དེ་ལྟ་བུར་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་
རྒྱས་རྣམས་ཀྱི་ཏིང་ངེ་འཛིན་མི་གཡོ་བ་ཞེས་བྱ་བ་ཡོད་དེ། ཏིང་ངེ་འཛིན་དེ་ལ་ནི་དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདའ་བ་སྟོན་པའི་ཚེ་སྙོམས་པར་འཇུག་གོ །ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་བཞིན་གཤེགས་པའི་སྐུ་འབྱམ་ཀླས་པ་རེ་རེ་ལས་ཀྱང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་འབྱུང་བར་འགྱུར་ཏེ། འོད་ཟེར་དེ་དག་རེ་རེའི་སྒོ་ནས་ཀྱང་པད་མོ་གྲངས་མེད་པ་འབྱུང་བར་འགྱུར་རོ། །པད་མོ་དེ་དག་རེ་རེ་ལས་ཀྱང་ཟེ་བ་བརྗོད་དུ་མེད་པ་འབྱུང་བར་འགྱུར་རོ། །ཟེ་བ་དེ་དག་ཐམས་ཅད་ལ་ཡང་སེང་གེའི་ཁྲི་མང་པོ་འབྱུང་བར་འགྱུར་ཏེ། སེང་གེའི་ཁྲི་མང་པོ་དེ་དག་ལ་ཡང་དེ་བཞིན་གཤེགས་པའི་སྐུ་མང་པོ་བཞུགས་པ་ཡོངས་སུ་སྣང་ངོ་། །ཀྱེ་རྒྱལ་བའི་སྲས་དེ་ལ་སེམས་ཅན་ཐམས་ཅད་ཀྱི་གྲངས་ཇི་སྙེད་ཡོད་པ་དེ་སྙེད་ཀྱི་དེ་བཞིན་གཤེགས་པའི་སྐུ་རྣམ་པའི་མཆོག་ཐམས་ཅད་དང་ལྡན་པ། སངས་རྒྱས་ཀྱི་ཡོན་ཏན་གྱི་རྒྱན་ཐམས་ཅད་ཀྱིས་ཤིན་ཏུ་བརྒྱན་པ་ཀུན་ནས་བཞུགས་ཏེ། དེ་དག་ནི་སྔོན་གྱི་དམ་བཅས་པ་ཆེན་པོ་མཐར་དབྱུང་བའི་ཕྱིར་རོ། །དེ་ལ་སེམས་ཅན་དབང་པོ་ཡོངས་སུ་སྨིན་པ་རྣམས་ཀྱིས་དེ་བཞིན་གཤེགས་པའི་སྐུ་དེ་དག་མཐོང་ནས་རྣམ་པར་འདུལ་བར་འགྱུར་ཏེ། དེ་བཞིན་གཤེགས་པའི་སྐུ་དེ་དག་ཀྱང་འདི་ལྟ་སྟེ། སེམས་ཅན་ཐམས་ཅད་དུས་གང་དུ་ཡོངས་སུ་སྨིན་པར་གྱུར་པའི་ཚུལ་བཞིན་དུ་གདུལ་བའི་དུས་ལས་མི་འདའ་བར་བྱ་བའི་ཕྱིར། ཕྱི་མའི་མཐའི་མུར་ཐུག་པར་བྱིན་གྱིས་བརླབས་པ་དག་སྟེ། དེ་བཞིན་གཤེགས་པའི་སྐུ་དེ་དག་ནི་ཡུལ་ན་གནས་པའང་མ་ཡིན། ཕྱོགས་ན་གནས་པའང་མ་ཡིན་ནོ། །ཡོད་པ་ཡང་མ་ཡིན་མེད་པའང་མ་ཡིན་ནོ། །འོན་ཀྱང་དེ་བཞིན་གཤེགས་པའི་སྔོན་གྱི་སྨོན་ལམ་ཆེན་པོའི་བྱིན་གྱི་རླབས་དང་། སེམས་ཅན་རྣམས་ཀྱི་དབང་པོ་ཡོངས་སུ་སྨིན་པ་རྒྱུར་བྱས་ན། དེ་བཞིན་གཤེགས་པའི་སྐུ་དེ་དག་ཀྱང་བརྗོད་པར་འགྱུར་རོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་སེམས་
དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི། ཡོངས་སུ་མྱ་ངན་ལས་འདའ་བ་ཚད་མེད་པའི་རྗེས་སུ་སོང་བ་ཆགས་པ་མེད་པའི་མཐར་ཐུག་པ། ཆོས་ཀྱི་དབྱིངས་ལྟར་མཐའ་དང་དབུས་མེད་པ་ནམ་མཁའི་དབྱིངས་ཀྱི་རང་བཞིན་ཅན། དེ་བཞིན་ཉིད་ཀྱིས་མི་སྐྱེ་མི་འགག་པ་ཡང་དག་པའི་མཐའ་ལ་གནས་པ། དུས་བཞིན་དུ་རབ་ཏུ་སྟོན་པ། འགྲོ་བ་ཐམས་ཅད་དུ་རྒྱུན་མི་འཆད་པ། སྔོན་གྱི་བྱིན་གྱི་རླབས་ཀྱིས་ཤིན་ཏུ་བྱིན་གྱིས་བརླབས་པ། འགྲོ་བའི་ཞིང་ཐམས་ཅད་དང་། ཆོས་ཀྱི་དབྱིངས་འབྱམ་ཀླས་པ་ཐམས་ཅད་ལས་མི་འདའ་བ་ཁོང་དུ་ཆུད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་འདི་ཉིད་ཡང་བརྟག་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཉི་མའི་དཀྱིལ་འཁོར་ཆོས་དབྱིངས་ཚད་དང་མཉམ་པ་ནི། །སྣོད་དུ་གཟུགས་བརྙན་སྣང་སྟེ་ཆག་ལ་སྣང་བ་མིན། །དེ་ལྟར་མི་མཆོག་དབང་པོ་འཇིག་རྟེན་ཀུན་ཏུ་སྣང་། །སེམས་ཅན་དད་མེད་རྣམས་ཀྱིས་མྱ་ངན་འདས་པར་ཤེས། །མེ་ནི་འཇིག་རྟེན་ཀུན་ན་དགོས་པའི་དོན་བསྒྲུབ་སྟེ། །ཤིང་དང་མི་ལྡན་དེ་དང་དེ་ནས་ཞི་བར་འགྱུར། །དེ་བཞིན་རྒྱལ་བའི་མེ་འབར་གཟི་བརྗིད་ཆེ་མངའ་བ། །འདུལ་བ་མེད་པས་ཡོངས་སུ་མྱ་ངན་འདའ་བ་སྟོན། །སྒྱུ་མའི་མཁན་པོ་སྟོང་གསུམ་ཁམས་སུ་ལུས་སྟོན་པ། །དགོས་པའི་མཐར་ཕྱིན་བདག་གི་ལུས་ཀྱང་མི་སྣང་བྱེད། །ཞིང་རྣམས་གང་དུ་སངས་རྒྱས་ཕྲིན་ལས་རྫོགས་གྱུར་པ། །དེ་ནི་རྒྱལ་བ་མི་སྣང་འོན་ཀྱང་གུད་ན་སྣང་། །རྒྱལ་བའི་ཏིང་འཛིན་མི་གཡོ་ཐོབ་ཅེས་བྱ་བ་ཡོད། །རྒྱལ་བའི་ཕྲིན་ལས་རྫོགས་ནས་དེ་ལ་སྙོམས་པར་འཇུག །འབྱམ་ཀླས་སྐུ་རྣམས་གཅིག་ལས་ཚད་མེད་མཐའ་ཡས་པའི། །འོད་ཟེར་པད་མོ་སངས་རྒྱས་སྐད་ཅིག་གཅིག་གིས་འབྱུང་། །རྒྱལ་བ་དེ་དག་ཆོས་དབྱིངས་ཀུན་ཏུ་རྒྱས་
འགེངས་པ། །སེམས་ཅན་བསོད་ནམས་བྱས་པས་སངས་རྒྱས་དེ་མཐོང་སྟེ། །རྒྱལ་བའི་སྐུ་མཆོག་དེ་དག་ཆོས་ཀྱི་དབྱིངས་མཉམ་པར། །སྐུ་ཚེ་བྱིན་གྱིས་བརླབས་པས་ཡན་ལག་ཀུན་དང་ལྡན། །ཇི་ལྟར་སངས་རྒྱས་མ་སྐྱེས་སྐྱེས་པར་བརྗོད་གྱུར་པ། །དེ་བཞིན་ཞིག་པ་མེད་ཀྱང་མྱ་ངན་འདས་ཤེས་བརྗོད། །དཔེ་དང་དབྱངས་དང་ཚིག་གི་ལམ་རྣམས་ཀུན་གྱིས་དབེན། །དོན་གྲུབ་སངས་རྒྱས་ལྷ་ཡི་དམ་པ་མཚུངས་པ་མྱེད། །དེ་སྐད་ཅེས་སྨྲས་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཐོང་བ་དང་ཐོས་པ་དང་དེ་དག་དང་འགྲོགས་པས་དགེ་བའི་རྩ་བ་སྐྱེ་བར་འགྱུར་བ། བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟ་བུར་ཁོང་དུ་ཆུད་པར་བྱ། དེ་སྐད་ཅེས་སྨྲས་པ་དང་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་བཞིན་གཤེགས་པའི་རིགས་སུ་བྱུང་བའི་དཔལ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དེ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མཐོང་བ་དང་ཐོས་པ་དང་དེ་དག་དང་འགྲོགས་པའི་དགེ་བའི་རྩ་བ་སྐྱེ་བར་འགྱུར་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོས་མི་ཟད་པ་མངོན་པར་བསྒྲུབ་པའི་བློས་དོན་ཡོད་པ་དང་། བགེགས་མེད་པ་དང་། ཤིན་ཏུ་མཐར་ཐུག་པར་འགྲུབ་པ་དང་མི་བསླུ་བ་དང་། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དང་། འདུས་བྱས་ཐམས་ཅད་ལ་སྤྱོད་པའི་རྒྱུན་མི་ཟད་པ་དང་། འདུས་མ་བྱས་ཀྱི་ཡེ་ཤེས་འཐོབ་པར་འགྱུར་
བ་དང་། དེ་བཞིན་གཤེགས་པའི་ཡེ་ཤེས་སྐྱེ་བར་འགྱུར་བ་དང་། ཕྱི་མའི་མཐའི་མུ་མཐའ་ཡས་པའི་མཐར་ཐུག་པར་འགྱུར་བ་དང་། རང་བྱུང་གི་རྣམ་པའི་མཆོག་ཐམས་ཅད་དང་ལྡན་པ་འཐོབ་པར་འགྱུར་བར་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། མི་ལ་ལ་ཞིག་གིས་རྡོ་རྗེའི་ཁམས་ཤིག་ཟོས་པར་གྱུར་ན། དེ་ནི་ཇི་ཙམ་དུ་ཆུང་དུ་ཟིན་ཀྱང་རྡོ་རྗེའི་ཁམས་དེ་ཞུ་བར་མི་ནུས་ཏེ། དེ་ནི་གདོན་མི་ཟ་བར་གནས་ཐམས་ཅད་ལས་འདས་ནས། འོག་གི་ཕྱོགས་སུ་འབྱུང་བར་འགྱུར་རོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ནི་རྡོ་རྗེའི་ཆོས་མ་འདྲེས་པ་ཡིན་པའི་ཕྱིར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བ་ནི་ཇི་ཙམ་དུ་ཆུང་དུ་ཟིན་ཀྱང་། འདུས་བྱས་ལ་སྤྱོད་པའི་ཉོན་མོངས་པའི་གནས་ཐམས་ཅད་ལས་མངོན་པར་འདས་ཏེ། དེ་བཞིན་གཤེགས་པའི་ཡེ་ཤེས་འདུས་མ་བྱས་པའི་མཐར་ཐུག་པར་འགྱུར་རོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བའི་ཆོས་མ་འདྲེས་པ་ཡིན་པའི་ཕྱིར་རོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རྩྭ་དང་ལོ་མའི་ཕུང་པོ་ནི་རི་རབ་ཙམ་ཞིག་ཡོད་དུ་ཟིན་ཀྱང་དེར་མེ་མདག་ཡུངས་ཀར་ཀྱི་འབྲུ་ཙམ་ཞིག་བཅུག་ན། རྩྭ་དང་ལོ་མའི་ཕུང་པོ་དེ་ནི་གདོན་མི་ཟ་བར་འཚིག་པར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་མེའི་མཚན་ཉིད་བསྲེག་པ་ལ་སྟ་གོན་དུ་གནས་པའི་ཕྱིར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བའི་མེ་མདག་ཀྱང་ཇི་ཙམ་དུ་ཆུང་དུ་ཟིན་ཀྱང་། ཉོན་མོངས་པ་ཐམས་ཅད་ཀྱི་རྩྭ་དང་ལོ་མའི་ཕུང་པོ་མ་ལུས་པར་བསྲེགས་ནས། སངས་རྒྱས་ཀྱི་མཐར་ཕྱིན་ཀྱི་བར་དུ་འགྲུབ་པར་བྱེད་དོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་བསྐྱེད་པའི་དགེ་བའི་རྩ་བ་ནི་ཤིན་ཏུ་ཐུག་པའི་མཐར་ཕྱིན་པའི་ཕྱིར་རོ། །ཀྱེ་རྒྱལ་བའི་སྲས་གཞན་ཡང་འདི་ལྟ་སྟེ་དཔེར་ན། རིའི་རྒྱལ་པོ་ཁ་བ་ཅན་ལ། སྨན་གྱི་རྒྱལ་པོ་ཆེན་པོ་བལྟ་ན་ལེགས་པ་ཞེས་བྱ་བ་ཡོད་དེ། སྨན་གྱི་རྒྱལ་པོ་དེ་སེམས་ཅན་གང་གིས་མཐོང་བར་གྱུར་པ་དེ་དག་གི་མིག་རྣམ་པར་དག་པར་འགྱུར་རོ། །སྨན་གྱི་རྒྱལ་པོ་དེ་ལ་རླུང་གིས་བཏབ་པའི་སྒྲ་གང་གིས་ཐོས་པ་དེ་དག་གི་རྣ་བ་རྣམ་པར་དག་པར་འགྱུར་རོ། །
གང་གིས་དྲི་ཚོར་བ་དེ་དག་གི་སྣ་རྣམ་པར་དག་པར་འགྱུར་རོ། །གང་གིས་མྱོངས་པ་དེ་དག་གི་ལྕེ་རྣམ་པར་དག་པར་འགྱུར་རོ། །གང་གིས་རེག་པ་དེ་དག་གི་ལུས་རྣམ་པར་དག་པར་འགྱུར་རོ། །གང་གིས་དེ་འཁོར་གྱིས་ཕྱོགས་སུ་ཕྱིན་པ་དེ་དག་གི་ནད་ཀྱང་ཡོངས་སུ་ཞི་བར་འགྱུར་རོ། །ཀྱེ་རྒྱལ་བའི་སྲས་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་རྒྱལ་པོ་ཆེན་པོ་བླ་ན་མེད་པ་ཡང་སེམས་ཅན་ཐམས་ཅད་རྣམ་པ་ཐམས་ཅད་དུ་ཉེ་བར་འཚོ་བ་ཡིན་ཏེ། སེམས་ཅན་གང་གིས་དེ་བཞིན་གཤེགས་པའི་གཟུགས་ཀྱི་སྐུ་མཐོང་བར་གྱུར་པ་དེ་དག་ལ་མཐོང་བའི་དགེ་བའི་རྩ་བ་དེ་ནི་ལྷའི་མིག་ཡོངས་སུ་དག་པར་འགྱུར་བའི་རྒྱུར་འགྱུར་རོ། །སེམས་ཅན་གང་གིས་དེ་བཞིན་གཤེགས་པའི་མཚན་ཐོས་པ་དེ་དག་ལ་རྣ་བ་ཡོངས་སུ་དག་པའི་རྒྱུར་འགྱུར་རོ། །སེམས་ཅན་གང་གིས་དེ་བཞིན་གཤེགས་པའི་ཚུལ་ཁྲིམས་ཀྱི་དྲི་ཚོར་བ་དེ་དག་ལ་ལྷའི་སྣ་ཡོངས་སུ་དག་པའི་རྒྱུར་འགྱུར་རོ། །སེམས་ཅན་གང་གིས་དེ་བཞིན་གཤེགས་པའི་ཆོས་ཀྱི་རོ་མྱོང་བ་དེ་དག་ལ་ཚིག་གི་ཚུལ་ཐམས་ཅད་ཤེས་པའི་ལྕེའི་དབང་པོ་ཡངས་པ་རྣམ་པར་དག་པའི་རྒྱུར་འགྱུར་རོ། །སེམས་ཅན་གང་ལ་དེ་བཞིན་གཤེགས་པའི་འོད་ཀྱིས་ཕོག་པར་གྱུར་པ་དེ་དག་ལ་ཆོས་ཀྱི་སྐུ་ཤིན་ཏུ་ཆེ་བ་ཡོངས་སུ་དག་པའི་རྒྱུར་འགྱུར་རོ། །སེམས་ཅན་གང་གིས་དེ་བཞིན་གཤེགས་པ་རྗེས་སུ་དྲན་པ་དེ་དག་ལ་དེ་བཞིན་གཤེགས་པ་དྲན་པ་རྩེ་གཅིག་ཡོངས་སུ་དག་པས་ཡང་དག་པར་རྫོགས་པའི་སངས་རྒྱས་མཐོང་བའི་རྒྱུར་འགྱུར་རོ། །སེམས་ཅན་གང་གིས་དེ་བཞིན་གཤེགས་པ་བཞུགས་བཞུགས་པའི་ས་ཕྱོགས་སམ། དེ་བཞིན་གཤེགས་པའི་མཆོད་རྟེན་ལ་མཆོད་པ་བྱས་ན་དེ་དག་གི་དགེ་བའི་རྩ་བ་དེ་ཡང་ཉོན་མོངས་པའི་ནད་ཐམས་ཅད་ཞི་ཞིང་འཕགས་པའི་བདེ་བ་ཐོབ་པའི་རྒྱུར་འགྱུར་རོ། །ཀྱེ་རྒྱལ་བའི་སྲས་ཁྱོད་ཀྱིས་ཡིད་ཆེས་པ་དང་ཁོང་དུ་ཆུད་པར་བྱ་ན། སེམས་ཅན་ལ་ལ་ཞིག་གིས་དེ་བཞིན་གཤེགས་པ་མཐོང་ངམ་ཐོས་ཀྱང་ལས་ཀྱི་སྒྲིབ་པས་ཀུན་ནས་འཁོར་བའི་ཕྱིར། དེ་བཞིན་གཤེགས་
པ་ལ་མ་དད་པ་ཞིག་བྱས་ན་ཡང་དེ་དག་གི་མཐོང་བའི་དགེ་བའི་རྩ་བ་དེ་ནི་ཡོངས་སུ་མྱ་ངན་ལས་འདའ་བའི་བར་དུ་དོན་ཡོད་དོ་ཞེས་བདག་སྨྲའོ། །ཀྱེ་རྒྱལ་བའི་སྲས་དེ་བཞིན་གཤེགས་པ་མཐོང་བ་དང་ཐོས་པ་དང་དེ་དག་དང་འགྲོགས་པའི་དགེ་བའི་རྩ་བ་སྐྱེ་བ་ནི། བྱང་ཆུབ་སེམས་དཔའ་སེམས་དཔའ་ཆེན་པོས་མི་དགེ་བའི་ཆོས་ཐམས་ཅད་སྤང་བ་དང་། དགེ་བའི་ཆོས་ཐམས་ཅད་མངོན་ཏུ་བྱ་ཞིང་ཡོངས་སུ་རྫོགས་པར་འགྱུར་བའི་རྒྱུར་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་གཞན་ཡང་དཔེ་རྣམ་པར་དགོད་པ་ཐམས་ཅད་ཀྱིས་དེ་བཞིན་གཤེགས་པ་རྣམ་པ་ཐམས་ཅད་དུ་ཤེས་པར་མི་རུང་སྟེ། ཅིས་ཀྱང་དཔེར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་བཞིན་གཤེགས་པ་རྣམས་ནི་སེམས་ཀྱི་ལས་ཐམས་ཅད་ལས་ཤིན་ཏུ་འདས་པས་བསམ་གྱིས་མི་ཁྱབ་པ་སྟེ། འོན་ཀྱང་སེམས་ཅན་རྣམས་ཀྱི་བསམ་པ་ཡོངས་སུ་ཚིམ་པར་བྱ་བའི་ཕྱིར་དེ་བཞིན་གཤེགས་པ་རྣམས་ནི་བྱང་ཆུབ་སེམས་དཔའ་རྣམས་ལ་དཔེས་སྟོན་པ་མངོན་པར་གནང་བ་མཛད་ཀྱི་དེ་ལྷུར་བླང་བའི་ཕྱིར་ནི་མ་ཡིན་ནོ། །ཀྱེ་རྒྱལ་བའི་སྲས་ཆོས་ཀྱི་རྣམ་གྲངས་རྣམ་པ་འདི་ལྟ་བུ་དག་ནི་དེ་བཞིན་གཤེགས་པའི་གསང་བའི་གནས་ཤེས་བྱའོ། །འཇིག་རྟེན་ཐམས་ཅད་ཀྱིས་ཤེས་པར་དཀའ་བ་ཞེས་བྱའོ། །དེ་བཞིན་གཤེགས་པའི་ཕྱག་རྒྱ་དང་ལྡན་པ་ཞེས་བྱའོ། །ཡེ་ཤེས་ཀྱི་མཐུ་ཆེན་པོ་བརྗོད་པ་ཞེས་བྱའོ། །དེ་བཞིན་གཤེགས་པའི་རིགས་སྟོན་པ་ཞེས་བྱའོ། །བྱང་ཆུབ་སེམས་དཔའ་ཐམས་ཅད་ཡང་དག་པར་སྒྲུབ་པ་ཞེས་བྱའོ། །འགྲོ་བ་ཐམས་ཅད་ཀྱིས་མི་འཕྲོགས་པ་ཞེས་བྱའོ། །ཤིན་ཏུ་ངེས་པར་དེ་བཞིན་གཤེགས་པའི་སྤྱོད་ཡུལ་གྱིས་རྗེས་སུ་སོང་བ་ཞེས་བྱའོ། །སེམས་ཅན་གྱི་ཁམས་མ་ལུས་པ་ཐམས་ཅད་རྣམ་པར་སྦྱོང་བ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱིས་བསྟན་པའི་རྩ་བ་ཞེས་བྱའོ། །ཤིན་ཏུ་མཐར་ཐུག་པའི་མུར་ཕྱིན་པ་ཞེས་བྱ་བའི་བར་དུ་སྟེ། ཀྱེ་རྒྱལ་བའི་སྲས་ཆོས་ཀྱི་རྣམ་གྲངས་རྣམ་པ་འདི་ལྟ་བུ་དག་
ནི་ཐེག་པ་ཆེན་པོ་ལ་ཡང་དག་པར་ཞུགས་པ་བསམ་གྱིས་མི་ཁྱབ་པའི་ཐེག་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་གཞན་གྱི་དོན་དུ་དེ་བཞིན་གཤེགས་པ་སྟོན་པ་མི་མཛད་དོ། །ཆོས་ཀྱི་རྣམ་གྲངས་རྣམ་པ་འདི་ལྟ་བུ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་མ་གཏོགས་པར་སེམས་ཅན་གཞན་གྱི་ལག་ཏུ་ཕྱིན་པར་མི་འགྱུར་རོ། །ཀྱེ་རྒྱལ་བའི་སྲས་འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་གང་གིས་འཁོར་ལོས་སྒྱུར་བའི་རྒྱལ་པོར་བརྗོད་པའི་རིན་པོ་ཆེ་གང་ཡང་རུང་སྟེ། རིན་པོ་ཆེ་དེ་དག་ནི་འཁོར་ལོས་སྒྱུར་བའི་རྒྱལ་པོ་དེའི་བུ་ཐུ་བོ་གཞོན་ནུ་བཙུན་མོ་དམ་པ་ལས་བྱུང་བ་འཁོར་ལོས་སྒྱུར་བའི་མཚན་དང་ལྡན་པ་མ་གཏོགས་པར་སེམས་ཅན་གཞན་གྱི་ལག་ཏུ་ཕྱིན་པར་མི་འགྱུར་རོ། །ཀྱེ་རྒྱལ་བའི་སྲས་འཁོར་ལོས་སྒྱུར་བའི་རྒྱལ་པོའི་བུ་འཁོར་ལོས་སྒྱུར་བའི་མཚན་དང་ལྡན་པ་དེ་ལྟ་བུ་མེད་ན་ནི་འཁོར་ལོས་སྒྱུར་བའི་རྒྱལ་པོ་དུས་བྱས་ནས་ཞག་བདུན་ལོན་པ་དང་ནོར་བུ་རིན་པོ་ཆེ་དེ་དག་མ་ལུས་པར་ནུབ་པར་འགྱུར་ཏེ་མི་འཁོད་དོ། །ཀྱེ་རྒྱལ་བའི་སྲས་དེ་བཞིན་དུ་མདོ་སྡེ་རིན་པོ་ཆེ་རྣམ་པ་འདི་ལྟ་བུ་འདི་དག་ཀྱང་དེ་བཞིན་གཤེགས་པ་རྣམས་ཀྱི་སྲས་ཀྱི་ཐུ་བོ་དེ་བཞིན་གཤེགས་པའི་རིགས་སུ་བྱུང་བ་དེ་བཞིན་གཤེགས་པ་རྣམས་ལ་དགེ་བའི་རྩ་བ་བསྐྱེད་པ་རྣམས་མ་གཏོགས་པར་སེམས་ཅན་གཞན་གྱི་ལག་ཏུ་ཕྱིན་པར་མི་འགྱུར་རོ། །ཀྱེ་རྒྱལ་བའི་སྲས་སྐྱེས་བུ་དམ་པ་དེ་ལྟ་བུ་དག་མེད་དུ་ཟིན་ན་ནི་རིང་པོར་མི་ཐོགས་པར་མདོ་སྡེ་རྣམ་པ་འདི་ལྟ་བུ་དེ་བཞིན་གཤེགས་པའི་གསང་བ་ཆེན་པོ་ཆོས་ཀྱི་རྣམ་གྲངས་དེ་བཞིན་གཤེགས་པའི་ཚུལ་རྒྱུན་མི་འཆད་པར་བྱེད་པ་རྣམས་ཀྱང་། ཐམས་ཅད་ཀྱི་ཐམས་ཅད་དུ་ནུབ་པར་འགྱུར་ཏེ་མི་འཁོད་དོ། །དེ་ཅིའི་ཕྱིར་ཞེ་ན། ཉན་ཐོས་དང་རང་སངས་རྒྱས་ཐམས་ཅད་ལ་ནི་ཆོས་ཀྱི་རྣམ་གྲངས་རྣམ་པ་འདི་ལྟ་བུ་དག་མཉན་པའི་མཐུའང་མེད་ན། གཟུང་བའམ་བཅང་བ་
འམ་ཀླག་པའམ་བསྟན་པའམ། བྲི་བ་ལྟ་ཅི་སྨོས་ཏེ་དེ་ནི་གནས་མ་ཡིན་ནོ། །གཞན་དུ་ན་ཆོས་ཀྱི་རྣམ་གྲངས་རྣམ་པ་འདི་ལྟ་བུ་དག་ནི་སྐྱེས་བུ་དམ་པ་དེ་དག་ཉིད་ཀྱི་ལག་ཏུ་ཕྱིན་པའམ། གླེགས་བམ་དུ་བྱས་པའམ། ཡིད་ལས་ཡོད་པར་འགྱུར་རོ། །ཀྱེ་རྒྱལ་བའི་སྲས་དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཀྱི་རྣམ་གྲངས་འདི་ལྟ་བུ་དག་ཐོས་ན་བསམ་པ་ཐག་པས་རིམ་གྲོ་དང་། བཀུར་སྟི་དང་། རྗེ་སར་བྱས་ཏེ། སྤྱི་བོ་ལ་བླང་བར་བྱའོ། །རབ་ཏུ་དགའ་བར་བྱའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་གནས་འདི་ལ་མོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཀོན་པ་མ་ཡིན་ནོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་སེམས་དཔའ་ཆེན་པོ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོར་ཕ་རོལ་ཏུ་ཕྱིན་པ་དྲུག་ཡང་དག་པར་བསྒྲུབ་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་བསྒྲུབ་པ་ལ་མངོན་པར་བརྩོན་པར་བྱས་ཀྱང་དེ་བཞིན་གཤེགས་པའི་ཆེ་བ་ཉིད་བསམ་གྱིས་མི་ཁྱབ་པ་འདི་མ་ཐོས་སམ། ཐོས་ནས་ཀྱང་ཡིད་མི་ཆེས་ཤིང་དད་པ་མེད་དེ་མི་འཇུག་ཁོང་དུ་ཆུད་པར་མི་བྱེད་ན། བྱང་ཆུབ་སེམས་དཔའ་དེ་ནི། བྱང་ཆུབ་སེམས་དཔའི་ཆོས་ཉིད་ལ་ཡང་དག་པར་བྱུང་བ་མ་ཡིན་ནོ། །དེ་ལ་དེ་བཞིན་གཤེགས་པ་རྣམས་ཀྱིས་ཀྱང་དེ་བཞིན་གཤེགས་པའི་རིགས་སུ་བྱུང་བར་བཤད་པར་མི་འགྱུར་རོ། །ཀྱེ་རྒྱལ་བའི་སྲས་ནམ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་ཡེ་ཤེས་ཆེ་བ་ཉིད་བསམ་གྱིས་མི་ཁྱབ་པ་ཚད་མེད་པ་ཆགས་པ་མེད་པ་བསྒྲིབས་པ་མེད་པ་འདི་ཐོས་ནས་ཡིད་ཆེས་ཤིང་དད་དེ་འཇུག་པ་དང་ཁོང་དུ་ཆུད་པར་བྱེད་པ་དེའི་ཚེ་བྱང་ཆུབ་སེམས་དཔའ་དེ། དེ་བཞིན་གཤེགས་པའི་རིགས་སུ་བྱུང་བ་ཡིན། དེ་བཞིན་གཤེགས་པའི་ཡུལ་གྱི་རྗེས་སུ་སོང་བ་ཡིན། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཉམ་པ་ཉིད་དུ་
ཤིན་ཏུ་གྲུབ་པ་ཡིན། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་རབ་ཏུ་གནས་པ་ཡིན། འཇིག་རྟེན་གྱི་ཆོས་ཐམས་ཅད་དང་ཤིན་ཏུ་བྲལ་བ་ཡིན། དེ་བཞིན་གཤེགས་པའི་སྤྱོད་ཡུལ་ལ་ཤིན་ཏུ་བྱུང་བ་ཡིན། བྱང་ཆུབ་སེམས་དཔའ་ཐམས་ཅད་ཀྱི་ཆོས་ཉིད་རྟོགས་པར་ཁོང་དུ་ཆུད་པ་ཡིན། དེ་བཞིན་གཤེགས་པ་ཐམས་ཅད་ཀྱི་ཁྱུ་མཆོག་གི་མཐུ་ཕྱུང་བ་དང་། རྣམ་པར་རོལ་པ་ལ་ཐེ་ཙོམ་མེད་པ་ཡིན་ཏེ། བྱང་ཆུབ་སེམས་དཔའི་དབང་རང་འབྱུང་གི་ཆོས་ཉིད་ལ་གནས་པས་ཀྱང་། དེ་བཞིན་གཤེགས་པའི་ཡུལ་ཆགས་པ་མེད་པ་ལ་འཇུག་པ་ཡིན་ནོ། །ཀྱེ་རྒྱལ་བའི་སྲས་བྱང་ཆུབ་སེམས་དཔས་ཆོས་འདི་དག་ཐོས་ནས་བློ་ཐམས་ཅད་ཀྱི་རྗེས་སུ་སོང་བ་དང་། སེམས་ཀྱི་བསམ་པའི་སྟོབས་དང་ཤུགས་ཚད་མེད་པའི་རྗེས་སུ་སོང་བ་དང་། ལྷག་པའི་བསམ་པས་འཇུག་པར་རྟོག་པ་དང་། རྣམ་པར་རྟོག་པ་ཡོངས་སུ་སྤངས་པ་དང་། ཡིད་ལ་བྱེད་པ་དེ་བཞིན་གཤེགས་པ་ཐམས་ཅད་མངོན་དུ་གྱུར་པ་དང་། དྲན་པའི་དབང་ནམ་མཁའི་དབྱིངས་མཉམ་པ་ཉིད་ཀྱིས་རྣམ་པར་བསྒོམས་པ་དང་། བྱང་ཆུབ་སེམས་དཔའི་བློ་གྲོས་གྱི་ལས་ཆོས་ཀྱི་དབྱིངས་མཐའ་དང་དབུས་མེད་པས་རྣམ་པར་དཔྱད་པ་དང་། རང་བྱུང་གི་ཡེ་ཤེས་འབྱམ་ཀླས་པ་ཡོན་ཏན་ཐམས་ཅད་ཡོངས་སུ་རྫོགས་པས་མངོན་པར་ཤེས་པར་བྱ་བ་དང་། སེམས་བསྐྱེད་པ་འཇིག་རྟེན་ཐམས་ཅད་ཀྱི་དྲི་མ་དང་བྲལ་བ་དང་། བྱང་ཆུབ་སེམས་དཔའི་དཔྱོད་པ་དང་། བསམ་པ་ལ་འཇུག་པ་འབྱམ་ཀླས་པ་ཕྱོགས་ཀྱི་དྲ་བ་ཐམས་ཅད་དུ་རྒྱས་པར་འགེངས་པ་དང་། དགེ་བའི་རྩ་བ་ཡོངས་སུ་བསྔོ་བའི་ཡེ་ཤེས་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། རྒྱུད་ཀྱི་ཚུལ་གཅིག་ཏུ་གྱུར་པས་ཆོས་འདི་རྣམས་ལ་འཇུག་པ་མྱེད་པར་ཁོང་དུ་ཆུད་པའི་ཚུལ་གྱིས་འཇུག་པར་བྱ་སྟེ། དེས་ནི་ཆོས་གང་ལ་ཡང་གཅིག་ཏུ་དམྱིགས་པས་ཡིད་ལ་བྱ་བར་མི་བྱའི། ཀྱེ་
རྒྱལ་བའི་སྲས་ཆོས་གཅིག་ལ་ཆོས་ཐམས་ཅད་ཚད་མེད་པའི་ཚུལ་དུ་ཡིད་ལ་བྱའོ། །ཀྱེ་རྒྱལ་བའི་སྲས་ཡོན་ཏན་དེ་ལྟ་བུ་དང་ལྡན་པའི་བྱང་ཆུབ་སེམས་དཔས་ནི་ལས་གྲོན་ཆུང་ངུར་རང་འབྱུང་གི་ཡེ་ཤེས་དང་མངའ་བསྒྱུར་བ་འཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དོན་དེ་ཉིད་ཡང་བརྟག་པར་བྱ་བའི་ཕྱིར། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་བ་དེ་དག་ཐོས་མཐོང་མཆོད་པ་བྱས་པས་ཀྱང་། །ཚད་མེད་པ་ཡི་བསོད་ནམས་ཕུང་པོ་འཕེལ་བར་འགྱུར། །ཉོན་མོངས་འཁོར་བའི་སྡུག་བསྔལ་ཐམས་ཅད་སྤངས་གྱུར་དུ། །འདུས་བྱས་འདི་ནང་བར་མ་དོར་ནི་ཟད་མྱི་འགྱུར། །སྐྱེས་བུ་ལ་ལས་རྡོ་རྗེ་ཟོས་གྱུར་དེ་ལ་ནི། །ཞུ་བར་མི་འགྱུར་གདོན་མི་ཟ་བར་ཕྱིར་འབྱུང་འགྱུར། །དེ་བཞིན་སྟོབས་བཅུ་རྣམས་ལ་མཆོད་བྱས་བསོད་ནམས་ཀྱི། །ཡེ་ཤེས་རྡོ་རྗེས་ཉོན་མོངས་མ་ལུས་བཅོམ་པར་འགྱུར། །རྩྭ་སྐམ་སྤུངས་པ་རི་བོའི་མཆོག་ཙམ་ཡོད་གྱུར་ཀྱང་། །མྱེ་མདག་ཡུངས་འབྲུ་ཙམ་གྱིས་དེ་ནི་འཚིག་འགྱུར་ཏེ། །དེ་བཞིན་བདེ་གཤེགས་མཆོད་པ་ཆུང་ཟད་ཅིག་བྱས་ཀྱང་། །ཉོན་མོངས་ཐམས་ཅད་ཚིག་བྱེད་མྱ་ངན་འདས་རྒྱུར་འགྱུར། །རི་བོ་ཁ་བ་ཅན་ལ་མཐོང་ལེགས་སྨན་ཡོད་དེ། །མཐོང་ཞིང་རེག་པས་ནད་རྣམས་ཐམས་ཅད་ཞི་བར་བྱེད། །དེ་བཞིན་སྟོབས་བཅུ་རྣམས་ནི་མཐོང་ངམ་ཐོས་ཀྱང་རུང་། །ཡོན་ཏན་ཀུན་ལྡན་སངས་རྒྱས་ཡེ་ཤེས་འཐོབ་པར་འགྱུར། །དེ་ནས་དེའི་ཚེ་སངས་རྒྱས་ཀྱི་མཐུས། ཕྱོགས་བཅུར་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་གྱི་འཇིག་རྟེན་གྱི་ཁམས་རྣམས་རྣམ་པ་དྲུག་དང་ལྟས་ཆེན་པོ་བཅྭ་བརྒྱད་དུ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ། །རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ། །ཆེམ་
ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག་ཀུན་ཏུ་ཤིག་ཤིག་གོ །འདི་ལྟ་སྟེ་ཤར་ཕྱོགས་དམའ་བར་གྱུར་ན། ནུབ་ཕྱོགས་མཐོ་བར་གྱུར་ཏོ། །ནུབ་ཕྱོགས་དམའ་བར་གྱུར་ན་ཤར་ཕྱོགས་མཐོ་བར་གྱུར་ཏོ། །ལྷོ་ཕྱོགས་དམའ་བར་གྱུར་ན་བྱང་ཕྱོགས་མཐོ་བར་གྱུར་ཏོ། །བྱང་ཕྱོགས་དམའ་བར་གྱུར་ན་ལྷོ་ཕྱོགས་མཐོ་བར་གྱུར་ཏོ། །དབུས་དམའ་བར་གྱུར་ན་མཐའ་མཐོ་བར་གྱུར་ཏོ། །མཐའ་དམའ་བར་གྱུར་ན་དབུས་མཐོ་བར་གྱུར་ཏོ། །དེ་བཞིན་གཤེགས་པའི་མཐུས་ལྷ་རྫས་ལས་འདས་པའི་མེ་ཏོག་གི་སྤྲིན་དང་ན་བཟའི་སྤྲིན་དང་། གདུགས་ཀྱི་སྤྲིན་དང་རྒྱལ་མཚན་གྱི་སྤྲིན་དང་། བ་དན་གྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་སྤོས་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་ཕྲེང་བ་དང་། བྱུག་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་རྒྱན་དང་ལྷབ་ལྷུབ་ཀྱི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་ནོར་བུ་རིན་པོ་ཆེ་འོད་ཆེན་པོ་དང་ལྡན་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་བྱང་ཆུབ་སེམས་དཔའི་ལེགས་སོ། །ཞེས་བརྗོད་པའི་སྤྲིན་གྱི་ཆར་མངོན་པར་བབ་བོ། །ལྷ་རྫས་ལས་འདས་པའི་བྱང་ཆུབ་སེམས་དཔའི་ལུས་བརྗོད་དུ་མེད་པའི་སྤྲིན་གྱི་ཆར་མངོན་པར་བབ་བོ། །འཇིག་རྟེན་གྱི་ཁམས་བསམ་གྱིས་མི་ཁྱབ་པར་ཡོངས་སུ་དག་པས་མངོན་པར་འཚང་རྒྱ་བའི་སྤྲིན་གྱི་ཆར་མངོན་པར་བབ་བོ། །དེ་བཞིན་གཤེགས་པའི་གསུང་ཆོས་ཀྱི་དབྱིངས་མཐའ་དང་དབུས་མྱེད་པ་རྒྱས་པར་འགེངས་པའི་སྤྲིན་གྱི་ཆར་མངོན་པར་བབ་བོ། །གླིང་བཞི་པའི་འཇིག་རྟེན་གྱི་ཁམས་འདིར་དེ་བཞིན་གཤེགས་པའི་བྱང་ཆུབ་ཐུགས་སུ་ཆུད་པའི་ཆོས་ཀྱི་བྱིན་གྱི་རླབས་ཀྱིས། བྱང་ཆུབ་སེམས་དཔའ་དགའ་བར་གྱུར་པ་དེ་བཞིན་དུ་འཇིག་རྟེན་གྱི་ཁམས་མ་ལུས་པ་ཐམས་ཅད་དུའང་ཕྱོགས་བཅུ་རྒྱས་པ་ཐམས་ཅད་རབ་ཏུ་
དགའ་བར་གྱུར་ཏོ། །ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་བརྒྱད་ཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་དག་ནས་ཀྱང་། དེ་བཞིན་གཤེགས་པ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་བརྒྱད་ཅུའི་རྡུལ་ཤིན་ཏུ་ཕྲ་བ་སྙེད་མཚན་ཀུན་ཏུ་བཟང་པོར་མཐུན་པ་ཤ་སྟག་གིས། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཞལ་མངོན་པར་བསྟན་ཏེ། འདི་སྐད་ཅེས་གསུངས་སོ། །རིགས་ཀྱི་བུ་ཁྱོད་ཀྱིས་དེ་བཞིན་གཤེགས་པའི་མཐུ་བསམ་གྱིས་མི་ཁྱབ་པའི་ཚུལ་མང་པོ་སངས་རྒྱས་ཀྱི་བྱིན་གྱི་རླབས་དང་། ཆོས་ཉིད་རྗེས་སུ་བསྙེགས་པས་བསྟན་པ་ལེགས་སོ་ལེགས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་བརྒྱད་ཅུའི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱང་མཚན་མཐུན་པ་ཤ་སྟག་ཆོས་བསྟན་པ་འདི་ལ་ལེགས་པ་བརྗོད་པ་མཛད་དོ། །ངེད་ཀྱིས་ཀྱང་དེ་སྐད་དུ་བརྗོད་པ་ཡིན་ནོ། །ངེད་ཀྱིས་ཇི་སྐད་དུ་བརྗོད་པ་དེ་བཞིན་དུ་སངས་རྒྱས་ཐམས་ཅད་ཀྱིས་ཀྱང་བརྗོད་དོ། །ཆོས་བསྟན་པ་འདི་ཤིན་ཏུ་བསྟན་པའི་ཚེ། བྱང་ཆུབ་སེམས་དཔའ་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱིས་བྱང་ཆུབ་སེམས་དཔའི་ཏིང་ངེ་འཛིན་ཐམས་ཅད་མངོན་པར་ཤེས་པ་རབ་ཏུ་ཐོབ་པར་གྱུར་ཏེ། དེ་དག་ཀྱང་ངེད་ཀྱིས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཚེ་གཅིག་གིས་ཐོགས་པར་ལུང་བསྟན་ཏོ། །སེམས་ཅན་སངས་རྒྱས་ཀྱི་ཞིང་བརྒྱ་ཕྲག་སྟོང་གི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཀྱང་མ་འོངས་པའི་དུས་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་སངས་རྒྱས་ཀྱི་ཡུལ། ཕུན་སུམ་ཚོགས་པ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་ཏུ་
འགྱུར་བར་ངེད་ཀྱིས་ལུང་བསྟན་ཏོ། །ཆོས་བསྟན་པ་འདི་ཡང་མ་འོངས་པའི་བྱང་ཆུབ་སེམས་དཔའ་རྣམས་ཀྱིས་མ་ཐོས་པའི་ཆོས་ཐོས་པར་བྱ་བའི་ཕྱིར་ངེད་ཀྱིས་བྱིན་གྱིས་བརླབས་སོ། །གླིང་བཞི་པའི་འཇིག་རྟེན་གྱི་ཁམས་འདིར་སེམས་ཅན་རྣམས་ཀྱིས་ཇི་ལྟར་ཤེས་པར་གྱུར་ཅིང་དུལ་བར་གྱུར་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་གྲངས་མེད་པ་བསམ་གྱིས་མི་ཁྱབ་པ་མཚུངས་པ་མེད་པ་མཐའ་ཡས་པ་མུ་མེད་པས་མཚམས་མེད་པ་དཔག་ཏུ་མེད་པ་བརྗོད་དུ་མྱེད་པ་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་དབྱིངས་ཀྱི་མཐས་གཏུགས་པ་ཐམས་ཅད་མ་ལུས་པ་དག་ཏུ་ཡང་སེམས་ཅན་རྣམས་རྣམ་པར་དུལ་བར་གྱུར་ཏོ། །སངས་རྒྱས་ཀྱི་མཐུ་དང་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྔོན་གྱི་སྨོན་ལམ་གྱི་བྱིན་གྱི་རླབས་དང་། ཆོས་ཉིད་རབ་ཏུ་ཐོབ་པ་དང་། དགེ་བའི་རྩ་བའི་མཐུ་དང་། དེ་བཞིན་གཤེགས་པའི་ཡེ་ཤེས་ཉམས་པ་མྱེད་པ་ལས་མྱི་འགྱུར་བ་དང་། སངས་རྒྱས་ཀྱི་སྐུ་འཐོབ་པ་ལས་གཞན་དུ་མི་འགྱུར་བ་དང་། དུས་ལ་ཇི་ལྟར་བབ་པ་བཞིན་དུ་བྱང་ཆུབ་སེམས་དཔའ་ཡང་དག་པར་བསྐུལ་བ་དང་། སྔོན་མངོན་པར་བསྒྲུབ་པ་ཆུད་མ་ཟོས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་མཐུ། ཤིན་ཏུ་ཡངས་པ་དང་། ཐམས་ཅད་མཁྱེན་པའི་ཡེ་ཤེས་གྱི་མངའ་བསྒྱུར་བ་ཡང་དག་པར་བསྟན་པའི་མཐུས་ཕྱོགས་བཅུའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མྱེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀྱི་ཕ་རོལ་ནས། བྱང་ཆུབ་སེམས་དཔའ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཕྱོགས་བཅུའི་ཆོས་ཀྱི་དབྱིངས་རྒྱས་པར་འགེངས་ཤིང་བྱང་ཆུབ་སེམས་དཔའི་རྒྱན་ཆེན་པོ་རབ་ཏུ་བསྟན་པ་དང་། འོད་གཟེར་གྱི་དྲ་བ་ཆེན་པོ་རབ་
ཏུ་བཀྱེ་བ་དང་། འཇིག་རྟེན་གྱི་ཁམས་ཐམས་ཅད་བསྐྱོད་པ་དང་། བདུད་ཀྱི་ཁྱིམ་ཐམས་ཅད་རབ་ཏུ་གཞིག་པ་དང་། ངན་སོང་གི་ཡུལ་ཐམས་ཅད་རབ་ཏུ་ཞི་བར་བྱ་བ་དང་། དེ་བཞིན་གཤེགས་པའི་ཆེ་བ་ཉིད་རབ་ཏུ་བརྗོད་པ་དང་། ཆོས་ཡང་དག་པར་འགྲོ་བ་རྣམ་པ་ཐ་དད་པ་ཚད་མེད་པས་དེ་བཞིན་གཤེགས་པའི་ལེགས་པ་བརྗོད་པ་དང་། རྣམ་པ་ཐམས་ཅད་དུ་ཆོས་ཀྱི་ཆར་ཚད་མྱེད་པ་དབབ་པའི་སྤྲིན་གྱི་ཆར་མངོན་པར་དབབ་པ་དང་། ལུས་རྣམ་པ་ཐ་དད་པ་ཚད་མེད་པ་རབ་ཏུ་བསྟན་པ་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཆེན་པོ་རང་རང་གི་རྒྱུད་ཀྱི་སྣོད་ཚད་མེད་པས་ཡང་དག་པར་གཟུང་བ་བྱེད་ཅིང་འོངས་པར་གྱུར་ཏོ། །དེ་དག་ཀྱང་སངས་རྒྱས་ཀྱི་བྱིན་གྱིས་འདི་སྐད་དུ་བརྗོད་དེ། ཀྱེ་རྒྱལ་བའི་སྲས་དེ་ལྟར་ཁྱོད་ཀྱིས་དེ་བཞིན་གཤེགས་པའི་ཆོས་ཉིད་མྱི་འཕྲོགས་ཤིང་བསམ་གྱིས་མི་ཁྱབ་པ་འདི་བརྗོད་པ་ལེགས་སོ། །ལེགས་སོ། །ཀྱེ་རྒྱལ་བའི་སྲས་བདག་ཅག་ཀྱང་ཐམས་ཅད་ཀུན་ཏུ་བཟང་པོ་ཞེས་བྱ་བར་མིང་མཐུན་པ་ཤ་སྟག་སྟེ། དེ་བཞིན་གཤེགས་པའི་མཚན་ཀུན་ཏུ་གྲགས་པའི་དབང་ཕྱུག་རྒྱལ་པོ་ཞེས་བྱ་བ་དག་གི་དྲུང་ནས་འཇིག་རྟེན་གྱི་ཁམས་གྱི་མྱིང་ཀུན་ཏུ་སྣང་བའི་འོད་ཅེས་བྱ་བ་དག་ནས་འདིར་ཕྱིན་ཏེ། ཐམས་ཅད་དུའང་སངས་རྒྱས་ཀྱི་མཐུ་དང་དེ་བཞིན་གཤེགས་པའི་ཆོས་ཉིད་རབ་ཏུ་ཐོབ་པས་ཆོས་བསྟན་པ་འདི་ཉིད་བྱུང་བར་གྱུར་ཏོ། །ཀྱེ་རྒྱལ་བའི་སྲས་དེ་ལྟར་བདག་ཅག་ཀྱང་དབང་དུ་གྱུར་པ་ཤ་སྟག །སངས་རྒྱས་ཀྱི་བྱིན་གྱི་རླབས་ཀྱིས་འཁོར་འདིར་ཕྱིན་ཏེ། ཇི་ལྟར་བདག་ཅག་འཁོར་འདིར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་མཐས་གཏུགས་པ་ཐམས་ཅད་ཀྱི་གླིང་བཞི་པ་ཐམས་ཅད་དུ་ཡང་དེ་བཞིན་གཤེགས་པའི་བྱིན་གྱི་རླབས་དང་མཐུས་བྱང་ཆུབ་སེམས་དཔའ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་
ཤིན་ཏུ་ཕྲ་བ་སྙེད་ཕྱིན་པར་གྱུར་ཏེ། ཐམས་ཅད་ནའང་དེ་བཞིན་གཤེགས་པའི་མངའ་མི་འཕྲོགས་པའི་ཆོས་འདི་ཉིད་ཚིག་འདི་དག་ཉིད་དང་། ཡི་གེ་འདི་དག་ཉིད་དང་། ངེས་པའི་ཚིག་མངོན་པར་བསྒྲུབ་པ་འདི་དག་ཉིད་ཀྱིས་དོན་འདི་ཉིད་བརྗོད་དེ་ལྷག་ཆད་མྱེད་པར་བརྗོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བྱང་ཆུབ་སེམས་དཔའི་ཚོགས་ཐམས་ཅད་ལ་རྣམ་པར་བལྟས་ནས་དེ་བཞིན་གཤེགས་པའི་རིགས་བརྗོད་ཅིང་སངས་རྒྱས་ཀྱི་ཆེ་བ་ཉིད་སྨོས་པ་དང་། དེ་བཞིན་གཤེགས་པའི་ཆོས་ཉིད་མི་འཕྲོགས་པ་ཡོངས་སུ་བརྗོད་པ་དང་། སྔོན་གྱི་དགེ་བའི་རྩ་བ་ཚད་མེད་ཅིང་ཡངས་པ་དོན་ཡོད་པར་བརྗོད་པ་དང་། རྣམ་པའི་མཆོག་ཐམས་ཅད་དང་ལྡན་པའི་སངས་རྒྱས་སྐྱེ་བ་སྨོས་པ་དང་། སེམས་ཅན་མ་ལུས་པ་ཐམས་ཅད་ཀྱི་སེམས་ཀྱི་བསམ་པ་རབ་ཏུ་བརྟག་པ་དང་། འགྲོ་བ་ཐམས་ཅད་ལ་དུས་ལ་ཇི་ལྟར་འབབ་པ་བཞིན་དུ་ཆོས་བསྟན་པ་རྣམ་པར་དགོད་པ་ཡོངས་སུ་མི་གཏོང་བ་དང་། བྱང་ཆུབ་སེམས་དཔའ་ཐམས་ཅད་ཀྱི་ཆོས་སྣང་བ་མཐའ་དང་དབུས་མེད་པ་ཡང་དག་པར་བསྐྱེད་པ་དང་། དེ་བཞིན་གཤེགས་པའི་སྤྲུལ་པ་དང་། བྱིན་གྱི་རླབས་རྣམ་པར་དགོད་པ་ཆེན་པོ་རབ་ཏུ་བསྟན་པ་དང་། དེ་བཞིན་གཤེགས་པ་ཐམས་ཅད་དང་རང་བཞིན་གཅིག་པའི་ལུས་མི་འཁྲུགས་པར་བྱ་བ་བྱེད་ཅིང་སྔོན་གྱི་སྤྱོད་པའི་སྟོབས་དང་ཤུགས་ཀྱིས་མངོན་པར་བསྒྲུབས་ཏེ་རང་གི་རྒྱུད་ཀྱི་མཐུས་ཡང་དག་པར་བླངས་པའི་སངས་རྒྱས་ཀྱི་བྱིན་གྱི་རླབས་ཀྱིས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དཔེ་རྣམས་ཇི་སྙེད་འཇིག་རྟེན་ཀུན་ན་གང་ཡོད་པ། །དེ་དག་ཐམས་ཅད་སངས་རྒྱས་སྤྱོད་ལམ་འདི་དང་བྲལ། །འོན་ཀྱང་འགྲོ་ལ་ཕན་ཕྱིར་སེམས་ཅན་བསྟན་པའི་ཕྱིར། །དཔེ་མེད་རྣམས་ལ་དོན་གྱི་ཚུལ་གྱིས་དཔེ་ཡང་བླངས། །བདེ་གཤེགས་གསང་བ་འདི་དག་ཐ་མལ་དམས་མི་ཐོས། །བསྐལ་པ་
བརྒྱ་ཕྲག་སྟོང་དུ་དེ་ཡི་སྒྲ་དཀོན་ནོ། །གང་རྣམས་བརྩོན་འགྲུས་བློ་ལྡན་ཤིན་ཏུ་དུལ་གྱུར་པ། །དེ་འདྲའི་སྐྱེ་བུས་སངས་རྒྱས་གསང་བ་འདི་འདྲ་ཐོས། །གང་གིས་འདི་ཐོས་གྱུར་ནས་རབ་ཏུ་དགའ་འགྱུར་བ། །དེ་ནི་སྔོན་ཅད་སངས་རྒྱས་བརྒྱ་སྟོང་བཀུར་ཅིང་མཆོད། །བདེ་གཤེགས་རྣམས་ཀྱིས་བྱིན་བརླབས་རྒྱལ་བས་ཡོངས་སུ་བཟུང་། །ལྷ་དང་མིས་བསྟོད་མཁས་པས་རིམ་གྲོ་བྱ་བ་ཡིན། །འདི་ནི་བདེ་གཤེགས་འཇིག་རྟེན་འདས་པ་ཀུན་གྱིས་དཀོར། །རྒྱལ་བ་སེམས་ཅན་སྒྲོལ་བ་ཀུན་ཀྱང་འདི་ལས་འབྱུང་། །འདི་ནི་དཀར་པོའི་ལམ་མངའ་ཀུན་ཀྱི་མཐའ་ཡས་རིགས། །དེ་ཕྱིར་བག་ཡོད་གྱིས་ཏེ་འདི་ནི་གཟུང་བར་གྱིས། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་མངོན་པར་གནང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་དེ་བཞིན་གཤེགས་པའི་རིགས་སུ་བྱུང་བའི་དཔལ་ཡིད་དགའ་སྟེ། བྱང་ཆུབ་སེམས་དཔའི་འཁོར་དེ་དག་ཐམས་ཅད་དང་ལྷ་དང་མི་དང་། ལྷ་མ་ཡིན་དང་། ཀླུ་དང་། གནོད་སྦྱིན་དང་། དྲི་ཟ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། དབང་ཕྱུག་ཆེན་པོ་དང་གཙང་མའི་གནས་ཀྱི་འཁོར་དུ་བཅས་པ་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བཤད་པ་ལ་མངོན་པར་དགའ་འོ། །ཤིན་ཏུ་རྒྱས་པ་ཆེན་པོའི་མདོ་སངས་རྒྱས་ཕལ་པོ་ཆེ་ཞེས་བྱ་བ་ལས་དེ་བཞིན་གཤེགས་པ་སྐྱེ་བ་འབྱུང་བ་བསྟན་པའི་ལེའུ་སྟེ་བཞི་བཅུ་རྩ་གསུམ་པའོ།། །།