བཞི་བཅུ་རྩ་བཞི་པ། འཇིག་རྟེན་ལས་འདས་པའི་ལེའུ།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་གསུམ་པ། བཅོམ་ལྡན་འདས་ཤིན་ཏུ་རྣམ་པར་སངས་རྒྱས་པའི་དགོངས་པ་མངའ་བ་མི་གཉིས་པ་ལ་ཡང་དག་པར་སྤྱོད་པ། མཚན་ཉིད་མེད་པའི་ཆོས་ལ་རབ་ཏུ་བརྟེན་པ།
སངས་རྒྱས་ཐམས་ཅད་དང་མཉམ་པ་ཉིད་བརྙེས་པ། བསྒྲིབས་པ་མེད་པ་ཐུགས་སུ་ཆུད་པ་རྟོགས་པ། ཕྱིར་མི་ལྡོག་པའི་ཆོས་དང་ལྡན་པ། སྤྱོད་ཡུལ་ལ་འཕྲོགས་པ་མེད་པ། དུས་གསུམ་རྣམ་པར་དགོད་པ་བསམ་གྱིས་མི་ཁྱབ་པ་ལ་མཉམ་པ་ཉིད་དུ་བྱུང་བ། འཇིག་རྟེན་གྱི་ཁམས་ཐམས་ཅད་དུ་ཤིན་ཏུ་ཁྱབ་པའི་སྐུ་མངའ་བ། ཆོས་ཐམས་ཅད་ལ་ཐེ་ཙོམ་མི་མངའ་བའི་ཡེ་ཤེས་ཅན་སྤྱོད་པ་ཐམས་ཅད་དང་ལྡན་པའི་དགོངས་པ་མངའ་བ། ཆོས་ཀྱི་ཡེ་ཤེས་ལ་ནེམ་ནུར་མི་མངའ་བ། རྣམ་པར་མ་བརྟགས་པའི་སྐུ་དང་ལྡན་པ་བྱང་ཆུབ་སེམས་དཔའ་ཐམས་ཅད་ཀྱིས་ཡང་དག་པར་མནོད་པའི་ཡེ་ཤེས་ཅན་སངས་རྒྱས་ཀྱི་སྤྱོད་པ་མི་གཉིས་པའི་ཕ་རོལ་ཏུ་ཕྱིན་པའི་མཆོག་བརྙེས་པ། དེ་བཞིན་གཤེགས་པའི་རྣམ་པར་ཐར་པ་ཐ་མི་དད་པའི་ཡེ་ཤེས་ཀྱི་མཐར་ཕྱིན་པ། སངས་རྒྱས་ཀྱིས་མཐའ་དང་དབུས་མེད་པའི་མཉམ་པ་ཉིད་ཐུགས་སུ་ཆུད་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་དབྱིངས་ཀྱི་མཐས་གཏུགས་པ་སངས་རྒྱས་ཀྱི་སྤྱོད་པས་རྣམ་པར་སྤྱོད་ཅིང་ཡུལ་མ་ག་དྷའི་ཆོས་ཀྱི་དགོན་པའི་སྙིང་པོའི་བྱང་ཆུབ་ལ་ཕོ་བྲང་འོད་ཀུན་ནས་འབྱུང་བ་ན་གདན་སེང་གེའི་ཁྲི་པད་མོའི་སྙིང་པོ་ཅན་ལ་བཞུགས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཚེ་གཅིག་གིས་ཐོགས་པ་འཇིག་རྟེན་གྱི་ཁམས་གཞན་དང་གཞན་ནས་འདུས་པ་ཀུན་ཀྱང་། བྱང་ཆུབ་སེམས་དཔའི་ཡེ་ཤེས་ཀྱི་ཚུལ་ཐམས་ཅད་རབ་ཏུ་ཐོབ་པ་ཤ་སྟག་སྟེ། འདི་ལྟར་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། རྣམ་པར་གདུལ་བ་དང་བྱང་ཆུབ་སེམས་དཔའི་ཆོས་ལ་རབ་ཏུ་དགོད་པར་མཁས་པ་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དཔྱད་པའི་ཚུལ་གྱི་ཡེ་ཤེས་འབྱམ་ཀླས་པ་ལ་ཞུགས་པ་དག་སྟེ།
འདི་ལྟར་མྱ་ངན་ལས་འདས་པའི་ས་དང་སྤྱོད་ཡུལ་དང་། ཡེ་ཤེས་ལ་སྤྱོད་ཅིང་རྟོག་པ་སྤྲོས་པ་ཐམས་ཅད་ཡོངས་སུ་ཆད་པ། སྤྱོད་པ་ཉེ་བར་གཟུང་བ་རྒྱུན་མི་འཆད་པས་སེམས་ཅན་ཐམས་ཅད་ཡང་དག་པར་གཟུང་བ་ལ་མཁས་པ། ཆོས་ཀྱི་ཚུལ་ལ་འཇུག་པར་བྱ་བ་མཐའ་དང་དབུས་མེད་པ་ལ་རབ་ཏུ་ཞུགས་པ། སེམས་ཅན་ཐམས་ཅད་ཀྱི་ལས་རྣམ་པར་སྨིན་པ་ཆུད་མི་ཟ་ཤིང་མི་དམིགས་པར་བརྟགས་ཤིང་དཔྱད་པ་ལ་ཤིན་ཏུ་མཁས་པ། སེམས་ཅན་ཐམས་ཅད་ཀྱི་བསམ་པ་དང་བག་ལ་ཉལ་བ་དང་། དབང་པོ་དང་། རྩོམ་པ་དང་སྦྱོར་བ་མཐོན་དམན་བརྟགས་ཅིང་དཔྱད་པ་ལ་རབ་ཏུ་མཁས་པ། འདས་པ་དང་མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱིས་གསུངས་པའི་དོན་དང་ཚིག་དང་ཡི་གེ་གཟུང་ཞིང་བཅང་བ་དང་ཤེས་པར་བྱ་བ་དང་། མཉམ་པར་གཟུང་བ་དང་བརྟག་པར་བྱ་བ་ལ་ཤིན་ཏུ་མཁས་པ། འཇིག་རྟེན་དང་འཇིག་རྟེན་ལས་འདས་པའི་ཆོས་ཀྱི་ཚུལ་ལ་འཇུག་པར་བྱ་བ་མཐའ་དང་དབུས་མེད་པ་ལ་ཤིན་ཏུ་ཞུགས་པ། འདུས་བྱས་དང་། འདུས་མ་བྱས་དང་། དུས་རྣམ་པ་ཐ་དད་པའི་ཚུལ་བརྟག་པ་ལ་རབ་ཏུ་མཁས་པ། འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་སྐད་ཅིག་གཅིག་གིས་དེ་མ་ཐག་ཏུ་རབ་ཏུ་ཐོབ་པ་ལ་རྣམ་པར་སྤྱོད་པ་སེམས་ཀྱི་སྐད་ཅིག་རེ་རེ་ལ་མངོན་པར་རྫོགས་པར་བྱང་ཆུབ་པ་ཡང་དག་པར་སྟོན་པ། སེམས་ཅན་ཐམས་ཅད་ཀྱི་སེམས་བསྐྱེད་པ་དང་མི་འབྲལ་བར་བྱང་ཆུབ་ཏུ་རྣམ་པར་འཚང་རྒྱ་བ་སེམས་ཅན་གཅིག་གི་སེམས་ཀྱི་དམིགས་པ་ལ་ཞུགས་པས་སེམས་ཅན་མ་ལུས་པ་ཐམས་ཅད་ཀྱི་སེམས་ཀྱི་དམིགས་པ་ལ་མཁས་པར་ཁོང་དུ་ཆུད་པ་རང་འབྱུང་གི་ཡེ་ཤེས་དང་ས་མངོན་དུ་གྱུར་པ་ལས་མི་ཉམས་པའི་བྱང་ཆུབ་སེམས་དཔའི་ལུས་དང་ལྡན་པ། ཐམས་ཅད་མཁྱེན་པའི་ས་ཐོབ་ཀྱང་རྒྱུན་མི་འཆད་པའི་
སྤྱོད་པ་ལས་ཕྱིར་མི་ལྡོག་པ། བྱང་ཆུབ་སེམས་དཔས་མངོན་པར་འདུ་བྱ་བའི་མཐུ་རྒྱུན་མི་ཆད་པ་མངོན་པར་འདུ་བྱ་བ་མྱེད་པའི་ཡེ་ཤེས་ཀྱི་ཚུལ་ལ་ཞུགས་པ། སེམས་ཅན་གཅིག་གི་དོན་དུ་བསྐལ་པ་མུ་མེད་པར་སྤྱོད་པ་ཡོངས་སུ་འཛིན་པའི་བྱིན་གྱི་རླབས་ལ་མཁས་པ། བསྐལ་པ་གྲངས་མེད་པར་འབྱུང་ཞིང་མཐོང་བར་དཀའ་བའི་བྱང་ཆུབ་སེམས་དཔའ་རིན་པོ་ཆེ་ཤིན་ཏུ་བཟང་པོ་ཆོས་ཀྱི་འཁོར་ལོ་ཐོགས་པ་མེད་པའི་བྱིན་གྱི་རླབས་ཀྱིས་འགྲོ་བ་ཐམས་ཅད་རྣམ་པར་གདུལ་བའི་དབྱིངས་ལ་འཇུག་པར་མཁས་པ། འདས་པ་དང་མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་རྣམ་པར་དག་པའི་གནས་ཡང་དག་པར་གཟུང་བའི་ཕྱིར་སྔོན་གྱི་སྤྱོད་པའི་མཐུའི་ཁྱད་པར་དང་སྨོན་ལམ་ཕུན་སུམ་ཚོགས་པ་དག་སྟེ། དེ་དག་དང་དེ་མ་ཡིན་པ་དེ་བཞིན་གཤེགས་པ་ཐམས་ཅད་ཀྱིས་ཡོན་ཏན་བསྔགས་ཤིང་ཡོངས་སུ་བརྗོད་ཀྱང་བསྐལ་པ་མུ་མེད་པར་མི་ཟད་མི་ཐུག་པ། ལེགས་པ་ཤིན་ཏུ་བརྗོད་པ་རབ་ཏུ་ཐོབ་པ་ཤ་སྟག་སྟེ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་མིག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་འཕྲུལ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཤེས་རབ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ལྟ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་གསལ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་དཔལ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བློ་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་ཤུགས་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཤུགས་ཆེན་པོ་འཛིན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པ་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་འཕྲུལ་པ་ཆེན་པོས་རབ་ཏུ་མཛེས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་ཀྱིས་རྣམ་པར་གནོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་བསྒྱིངས་པ་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་བསྒྱིངས་པ་ཆེན་པོའི་སྟོབས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གླང་པོ་ཆེན་པོའི་དམ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གླང་པོ་ཆེན་པོ་སྤོས་ཀྱི་གླང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་བཟང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ཀུན་ཏུ་སྣང་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དྲི་མ་མེད་པའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་གྲགས་པའི་ཟླ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འོད་ཟེར་རབ་ཏུ་འགྱེད་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བ་ཡོངས་སུ་རྒྱས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་དབང་པོ་འབྲུག་གི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་
ས་གྲུམ་པའི་སྒྲའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་དབྱིངས་རབ་ཏུ་སྒྲོག་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྔ་སྒྲའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་གོ་བར་བྱེད་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མི་རྟོག་རྣམ་པར་མི་རྟོག་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ས་གཞི་རབ་ཏུ་སྒྲོག་པའི་དབྱངས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡན་ལག་ཐམས་ཅད་ཀྱིས་དབྱངས་ཀྱི་ཟིལ་གྱིས་གནོན་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་དྲི་མ་མེད་པའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་གཙང་མའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པད་མོའི་སྙིང་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་པད་མོའི་དཔལ་གྱི་སྙིང་པོ་དང་། དེ་དག་ལ་སྩོགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་བརྗོད་དུ་མེད་པ་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་ཀུན་ཀྱང་ཀུན་ཏུ་བཟང་པོའི་སྤྱོད་
པ་དང་སྨོན་ལམ་དུ་ལྡན་པ། སྨོན་ལམ་དང་ལྷག་པའི་བསམ་པ་ཕུན་སུམ་ཚོགས་པ་དང་། སངས་རྒྱས་བྱུང་བ་ཐམས་ཅད་ཀྱི་དྲུང་དུ་འགྲོ་ཞིང་གསོལ་བ་གདབ་པ་ལ་མཁས་པ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡང་དག་པར་འཛིན་པ། སངས་རྒྱས་ཐམས་ཅད་ཀྱི་རིགས་རྒྱུན་མྱི་གཅོད་པ། སངས་རྒྱས་འབྱུང་བ་གཅིག་ནས་གཅིག་ཏུ་ལུང་བསྟན་པ་དང་། མངོན་པར་འཚང་རྒྱ་བ་དང་མྱིང་དང་ཞིང་དང་འཁོར་ལོའི་ཚུལ་ཡོངས་སུ་སྦྱོང་བ། སངས་རྒྱས་མྱི་བཞུགས་པའི་འཇིག་རྟེན་གྱི་ཁམས་སུ་སངས་རྒྱས་སྐྱེ་བ་ཡོངས་སུ་སྟོན་པ། ཀུན་ནས་ཉོན་མོངས་པའི་སེམས་ཅན་གྱི་ཁམས་ཐམས་ཅད་ཡོངས་སུ་དག་པར་བྱེད་པ། བྱང་ཆུབ་སེམས་དཔའི་ལས་ཀྱི་སྒྲིབ་པ་ཐམས་ཅད་རབ་ཏུ་སེལ་བ། ཆོས་ཀྱི་དབྱིངས་བསྒྲིབས་པ་མྱེད་པ་ལ་ཤིན་ཏུ་ཞུགས་པ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དེའི་ཚེ། སངས་རྒྱས་ཕལ་པོ་ཆེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཏིང་ངེ་འཛིན་ཆེན་པོ་སངས་རྒྱས་ཕལ་པོ་ཆེ་ཞེས་བྱ་བ་དེ་ལ་མཉམ་པར་བཞག་མ་ཐག་ཏུ་དེའི་ཚེ། ཕྱོགས་བཅུའི་འཇིག་རྟེན་གྱི་ཁམས་འབྱམ་ཀླས་པ་ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་མ་ལུས་པ་ཐམས་ཅད་རྣམ་པ་དྲུག་ཏུ་གཡོས་ཏེ་གཡོས་སོ། །རབ་ཏུ་གཡོས་སོ། །ཀུན་ཏུ་གཡོས་སོ། །འགུལ་ཏོ་རབ་ཏུ་འགུལ་ཏོ། །ཀུན་ཏུ་འགུལ་ཏོ། །ལྡེག་གོ་རབ་ཏུ་ལྡེག་གོ །ཀུན་ཏུ་ལྡེག་གོ །ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་ཆེམ་ཆེམ་མོ། །འུར་འུར་རབ་ཏུ་འུར་འུར། ཀུན་ཏུ་འུར་འུར་རོ། །ཤིག་ཤིག་རབ་ཏུ་ཤིག་ཤིག །ཀུན་ཏུ་ཤིག་ཤིག་གོ །དེ་ལྟར་འཇིག་རྟེན་གྱི་ཁམས་འབྱམ་ཀླས་པ་མ་ལུས་པ་ཐམས་ཅད་རབ་ཏུ་བསྐྱོད་དེ། དབྱངས་ཀྱིས་མངོན་པར་གོ་བར་
བྱས་ནས་ཏིང་ངེ་འཛིན་དེ་ལས་ལངས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཤེས་རབ་ཀྱིས་བྱང་ཆུབ་སེམས་དཔའི་ཚོགས་ཆེན་པོ་འདུས་པར་ཤེས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ལེགས་པར་བསྟན་པ་མཛོད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྒྱུ་མཐུན་པ་ནི་གང་། ངོ་མཚར་གྱི་འདུ་ཤེས་ནི་གང་། སྤྱོད་པ་ནི་གང་། དགེ་བའི་བཤེས་གཉེན་ནི་གང་བརྩོན་འགྲུས་རྩོམ་པ་ནི་གང་། དབུགས་ཕྱིན་པ་ཐོབ་པ་ནི་གང་། སེམས་ཅན་ཡོངས་སུ་སྨིན་པར་བྱ་བ་ནི་གང་། ཚུལ་ཁྲིམས་ནི་གང་། ལུང་བསྟན་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་ནི་གང་། དེ་བཞིན་གཤེགས་པ་ལ་འཇུག་པ་ནི་གང་། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་ནི་གང་། འཇིག་རྟེན་གྱི་ཁམས་ལ་འཇུག་པ་ནི་གང་། བསྐལ་པ་ལ་འཇུག་པ་ནི་གང་དུས་གསུམ་བསྟན་པ་ནི་གང་། དུས་གསུམ་ལ་འཇུག་པ་ནི་གང་། མྱི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་ནི་གང་། ཀུན་ཏུ་དབྱེ་བའི་ཡེ་ཤེས་ནི་གང་། གཟུངས་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔས་སངས་རྒྱས་བསྟན་པའི་རྗེས་སུ་རྟོགས་པར་བྱ་བ་ནི་གང་། ཀུན་ཏུ་བཟང་པོའི་སེམས་བསྐྱེད་པ་ནི་གང་། ཀུན་ཏུ་བཟང་པོའི་སྤྱོད་པའི་ཆོས་ནི་གང་། སྙིང་རྗེ་ཆེན་པོ་རབ་ཏུ་ཐོབ་པ་ནི་གང་། རྐྱེན་གང་གིས་བྱང་ཆུབ་ཏུ་སེམས་བསྐྱེད་པའི་བྱང་ཆུབ་ཀྱི་སེམས་ཀྱི་རྐྱེན་ནི་གང་། དགེ་བའི་བཤེས་གཉེན་ལ་གུས་པའི་སེམས་ནི་གང་། ཡོངས་སུ་དག་པ་ནི་གང་། ཕ་རོལ་ཏུ་ཕྱིན་པ་ནི་གང་། ཤེས་པ་ཁོང་དུ་ཆུད་པར་བྱ་བ་ནི་གང་རབ་ཏུ་རྟོགས་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཤུགས་ནི་གང་།
མཉམ་པ་ཉིད་ནི་གང་། སངས་རྒྱས་ཀྱི་ཆོས་ཀྱི་ཚུལ་གྱི་ལམ་ནི་གང་། ཆོས་བསྟན་པ་ནི་གང་། ཡོངས་སུ་གཟུང་བ་ནི་གང་། སྤོབས་པ་ནི་གང་། དབང་ནི་གང་། མྱི་གནས་པ་ནི་གང་། སེམས་མཉམ་པ་ཉིད་ནི་གང་། ཡེ་ཤེས་མངོན་པར་བསྒྲུབ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་གྱི་སྤྲུལ་པ་ནི་གང་། བྱིན་གྱི་རླབས་ནི་གང་། དབུགས་ཕྱིན་པ་ཆེན་པོ་རབ་ཏུ་ཐོབ་པ་ནི་གང་། སངས་རྒྱས་ཀྱི་ཆོས་ཟབ་མོ་ལ་འཇུག་པ་ནི་གང་། གནས་སུ་བྱ་བ་ནི་གང་། སེམས་བསྐྱེད་པ་བརྟན་པ་ནི་གང་། ནེམ་ནུར་ཐམས་ཅད་གཅོད་པའི་སེམས་བསྐྱེད་པ་ནི་གང་། བསམ་གྱིས་མི་ཁྱབ་པ་ནི་གང་། དགོངས་ཏེ་བཤད་པ་ལ་མཁས་པ་ནི་གང་། ཡེ་ཤེས་རྣམ་པར་དབྱེ་བ་ལ་མཁས་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྙོམས་པར་འཇུག་པ་ནི་གང་། རིལ་པོ་ནི་གང་། རྣམ་པར་ཐར་པ་ནི་གང་། མངོན་པར་ཤེས་པ་ནི་གང་། རིག་པ་ནི་གང་། རྣམ་པར་གྲོལ་བ་ནི་གང་། སྐྱེད་མོས་ཚལ་ནི་གང་། གཞལ་མེད་ཁང་ནི་གང་། དགའ་བ་ནི་གང་། རྒྱན་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མྱི་སྒུལ་བ་ནི་གང་། ལྷག་པའི་བསམ་པ་ཡོངས་སུ་མི་གཏོང་བ་ལ་གནས་པ་ནི་གང་། ཡེ་ཤེས་ཀྱི་རྣམ་པར་བལྟ་བ་ནི་གང་། ཆོས་ཤིན་ཏུ་བསྟན་པ་ནི་གང་། ཡོངས་སུ་དག་པ་ནི་གང་། ཕྱག་རྒྱ་ནི་གང་། ཡེ་ཤེས་སྣང་བ་ནི་གང་། བྱང་ཆུབ་སེམས་དཔའི་གནས་མཚུངས་པ་མེད་པ་ནི་གང་། སངས་རྒྱས་ཀྱི་བྱང་ཆུབ་ཏུ་ཞུམ་པ་མེད་པའི་སེམས་བསྐྱེད་པ་ནི་གང་། ལྷག་པའི་བསམ་པ་རི་བོ་ལྟ་བུ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་ནི་གང་། བྱང་ཆུབ་སེམས་དཔའི་རྣམ་པར་སྤྱོད་པ་རིན་པོ་ཆེ་ལྟ་བུ་ནི་གང་། ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་ནི་གང་།
རྩོམ་པ་ཆེན་པོ་ནི་གང་། བརྩམས་པ་ཆེན་པོ་མཐར་ཕྱིན་པར་བྱ་བ་ནི་གང་། དད་པ་མྱི་ཕྱེད་པ་ནི་གང་། ལུང་བསྟན་པ་ནི་གང་། དགེ་བའི་རྩ་བ་ཡོངས་སུ་བསྔོ་བ་ནི་གང་། ཡེ་ཤེས་ཁོང་དུ་ཆུད་པ་ནི་གང་། སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་གཏེར་ནི་གང་། སྡོམ་པ་ནི་གང་། དབང་ནི་གང་། རྣམ་པར་འཕྲུལ་པ་ནི་གང་། སེམས་ཅན་ལ་རྣམ་པར་འཕྲུལ་པ་ནི་གང་། ཞིང་ལ་རྣམ་པར་འཕྲུལ་པ་ནི་གང་། ཆོས་ལ་རྣམ་པར་འཕྲུལ་པ་ནི་གང་། ལུས་ལ་རྣམ་པར་འཕྲུལ་པ་ནི་གང་། སྨོན་ལམ་ལ་རྣམ་པར་འཕྲུལ་པ་ནི་གང་། སྤྱོད་ཡུལ་ལ་རྣམ་པར་འཕྲུལ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ལ་རྣམ་པར་འཕྲུལ་པ་ནི་གང་། མངོན་པར་ཤེས་པ་ལ་རྣམ་པར་འཕྲུལ་པ་ནི་གང་། རྫུ་འཕྲུལ་ལ་རྣམ་པར་འཕྲུལ་པ་ནི་གང་། སྟོབས་ལ་རྣམ་པར་འཕྲུལ་པ་ནི་གང་། རྣམ་པར་རྩེ་བ་ནི་གང་། ཁྱུ་མཆོག་གི་མཐུ་ཕྱུང་བ་ནི་གང་། སྟོབས་ནི་གང་། མི་འཇིགས་པ་ནི་གང་། བྱང་ཆུབ་སེམས་དཔའི་མ་འདྲེས་པའི་ཆོས་ནི་གང་། ལས་ནི་གང་ལུས་ནི་གང་། བྱང་ཆུབ་སེམས་དཔའ་རྣམས་ཀྱི་ལུས་ཀྱི་ལས་ནི་གང་། རང་བཞིན་ནི་གང་། ངག་ནི་གང་། ངག་ཡོངས་སུ་དག་པ་ནི་གང་། ཡོངས་སུ་འཛིན་པ་ནི་གང་། གང་གིས་ཤིན་ཏུ་བཟུང་ཞིང་བྱང་ཆུབ་སེམས་དཔའི་ངག་འབྱུང་བར་འགྱུར། བྱང་ཆུབ་སེམས་དཔའི་ངག་གིས་ནི་ངག་གི་ལས་གང་ཞིག་འགྲུབ་པར་འགྱུར། སེམས་ནི་གང་སེམས་བསྐྱེད་པ་ནི་གང་སེམས་ཀྱིས་རྒྱས་པར་དགང་བ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་དབང་པོ་ནི་གང་། བསམ་པ་ནི་གང་། ལྷག་པའི་བསམ་པ་ནི་གང་། སྦྱོར་བ་ནི་གང་། མོས་པ་ནི་གང་། འཇིག་རྟེན་གྱི་ཁམས་སུ་མོས་པ་ལ་འཇུག་
པ་ནི་གང་། སེམས་ཅན་གྱི་ཁམས་སུ་མོས་པ་ལ་འཇུག་པ་ནི་གང་། བག་ཆགས་ནི་གང་། ཉེ་བར་ལེན་པ་ནི་གང་། ནན་ཏན་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་འགྲུབ་པ་ནི་གང་། སངས་རྒྱས་ཀྱི་ཆོས་ལས་འགོལ་བའི་ལམ་ནི་གང་། སྐྱོན་མེད་པ་ནི་གང་། བྱང་ཆུབ་སེམས་དཔའི་ཆོས་ངེས་པ་འཐོབ་པ་ནི་གང་། སངས་རྒྱས་ཀྱི་ཆོས་ལ་འབྱུང་བའི་ལམ་ནི་གང་། སྐྱེས་བུ་དམ་པའི་མྱིང་ཐོབ་པ་ནི་གང་། ལམ་ནི་གང་། ལམ་ཚད་མེད་པ་ནི་གང་། ལམ་གྱི་ཚོགས་ནི་གང་། ལམ་བསྒོམ་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ལམ་གྱི་རྒྱན་ནི་གང་། རྐང་པ་ནི་གང་། ལག་པ་ནི་གང་། ལྟོ་ནི་གང་། སྙིང་པོ་ནི་གང་། སྙིང་ནི་གང་། གོ་ཆ་ནི་གང་། མཚོན་ཆ་ནི་གང་། མགོ་ནི་གང་། མྱིག་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་རྣ་བ་ནི་གང་། སྣ་ནི་གང་། ལྕེ་ནི་གང་། ལུས་ནི་གང་། ཡིད་རྣམ་པར་རྒྱུ་བ་ནི་གང་། འགྲོ་བ་ནི་གང་། གནས་པ་ནི་གང་། སྟན་ལ་འདུག་པ་ནི་གང་། མལ་ནི་གང་། རྣམ་པར་སྤྱོད་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ནི་གང་། ལྟ་བ་ནི་གང་། རྣམ་པར་ལྟ་བ་ནི་གང་། རྣམ་པར་བསྒྱིངས་པ་ནི་གང་། སེང་གེའི་ང་རོ་ནི་གང་། སྦྱིན་པ་ཡོངས་སུ་དག་པ་ནི་གང་། ཚུལ་ཁྲིམས་ཡོངས་སུ་དག་པ་ནི་གང་། བཟོད་པ་ཡོངས་སུ་དག་པ་ནི་གང་། བརྩོན་འགྲུས་ཡོངས་སུ་དག་པ་ནི་གང་། བསམ་གཏན་ཡོངས་སུ་དག་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ཤེས་རབ་ཡོངས་སུ་དག་པ་ནི་གང་། བྱམས་པ་ཡོངས་སུ་དག་པ་ནི་གང་། སྙིང་རྗེ་ཡོངས་སུ་དག་པ་ནི་གང་། དགའ་བ་ཡོངས་སུ་དག་པ་ནི་གང་། བཏང་སྙོམས་ཡོངས་སུ་དག་པ་ནི་གང་། དོན་ནི་གང་། ཆོས་ནི་གང་། བསོད་ནམས་ཀྱི་ཚོགས་ནི་གང་། ཡེ་ཤེས་ཀྱི་ཚོགས་ནི་གང་། རིག་པ་སྐྱེ་བ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ཆོས་
ཡོངས་སུ་ཚོལ་བ་ནི་གང་། ཆོས་རབ་ཏུ་བརྗོད་པ་ནི་གང་ཆོས་ཀྱི་ནན་ཏན་ནི་གང་། བདུད་ནི་གང་། བདུད་ཀྱི་ལས་ནི་གང་། བདུད་ཀྱི་ལས་བཟློག་པ་ནི་གང་། སངས་རྒྱས་མཐོང་བར་བྱ་བ་ནི་གང་། སངས་རྒྱས་ཀྱི་ཕྲིན་ལས་ནི་གང་། ང་རྒྱལ་གྱི་ལས་ནི་གང་། ཡེ་ཤེས་ཀྱི་ལས་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་བདུད་ཀྱི་བྱིན་གྱི་རླབས་ནི་གང་། སངས་རྒྱས་ཀྱི་བྱིན་གྱི་རླབས་ནི་གང་། ཆོས་ཀྱི་བྱིན་གྱི་རླབས་ནི་གང་། དགའ་ལྡན་ན་གནས་པའི་ལས་ནི་གང་། དགའ་ལྡན་གྱི་གནས་ནས་འཆི་འཕོ་སྟོན་པ་ནི་གང་། མངལ་ན་གནས་པར་སྟོན་པ་ནི་གང་། ཤིན་ཏུ་ཕྲ་བའི་རྒྱུད་སྟོན་པ་ནི་གང་། ཆེར་སྐྱེ་བ་ནི་གང་། གད་མོ་ཆེར་དགོད་པ་ནི་གང་། གོམ་པས་རྣམ་པར་གནོན་པ་ནི་གང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་གཞོན་ནུའི་ས་ཀུན་ཏུ་སྟོན་པ་ནི་གང་། བཙུན་མོའི་འཁོར་ཉེ་བར་སྟོན་པ་ནི་གང་། མངོན་པར་འབྱུང་བ་ནི་གང་། དཀའ་བ་སྤྱོད་པའི་སྦྱོར་བ་ནི་གང་། སྙིང་པོ་བྱང་ཆུབ་ཏུ་འགྲོ་བ་ནི་གང་། སྙིང་པོ་བྱང་ཆུབ་ལ་འདུག་པ་ནི་གང་། སྙིང་པོ་བྱང་ཆུབ་ལ་འདུག་པ་རྣམས་ཀྱི་ངོ་མཚར་རྨད་དུ་བྱུང་བའི་ཆོས་ནི་གང་། བདུད་འདུལ་བ་སྟོན་པ་ནི་གང་། དེ་བཞིན་གཤེགས་པའི་སྟོབས་མངོན་པར་རྫོགས་པར་བྱང་ཆུབ་པ་ནི་གང་། ཆོས་ཀྱི་འཁོར་ལོ་རབ་ཏུ་བསྐོར་བ་ནི་གང་། ཆོས་ཀྱི་འཁོར་ལོ་རབ་ཏུ་བསྐོར་བའི་ཆོས་དཀར་པོའི་རྣམ་པ་ནི་གང་། ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡོངས་སུ་མྱ་ངན་ལས་འདའ་བ་ཆེན་པོ་བསྟན་པ་ནི་གང་། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་ཤེས་རབ་ལ་དམྱིགས་ནས། བྱང་ཆུབ་སེམས་དཔའི་ཚོགས་དེ་དག་ཐམས་ཅད་ལ་སྨྲས་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་
ཆེན་པོ་རྣམས་ཀྱི་རྒྱུ་འཐུན་པ་སྟེ། བཅུ་གང་ཞེ་ན་འདི་ལྟར་ཆུད་མི་ཟ་བའི་ཕྱིར། བྱང་ཆུབ་ཀྱི་སེམས་ཀྱི་རྒྱུ་འཐུན་པ་དང་། རྒྱུད་ཀྱི་ཚུལ་གཅིག་ཏུ་བྱ་བའི་ཕྱིར་དགེ་བའི་བཤེས་གཉེན་གྱི་རྒྱུ་འཐུན་པ་དང་། ཤིན་ཏུ་བསྩགས་པའི་ཕྱིར་དགེ་བའི་རྩ་བའི་རྒྱུ་འཐུན་པ་དང་། ནན་ཏན་དུ་བྱ་བའི་ཕྱིར་ཕ་རོལ་ཏུ་ཕྱིན་པའི་རྒྱུ་འཐུན་པ་དང་། འབྱུང་བའི་ཕྱིར་ཆོས་ཐམས་ཅད་ཀྱི་རྒྱུ་འཐུན་པ་དང་། བྱང་ཆུབ་བརྟན་པའི་ཕྱིར་སྨོན་ལམ་གྱི་རྒྱུ་འཐུན་པ་དང་། རྒྱ་ཆེན་པོ་ཡང་དག་པར་བསྩགས་པའི་ཕྱིར་སྤྱོད་པའི་རྒྱུ་འཐུན་པ་དང་། ཚུལ་གཅིག་ཏུ་བྱ་བའི་ཕྱིར་བྱང་ཆུབ་སེམས་དཔའ་ཐམས་ཅད་དང་རྒྱུ་འཐུན་པ་དང་། སེམས་རབ་ཏུ་དང་བའི་ཕྱིར་སངས་རྒྱས་མཆོད་པ་རྒྱུ་འཐུན་པ་དང་། ཕ་ལྟ་བུར་བརྗོད་པའི་ཕྱིར་དེ་བཞིན་གཤེགས་པ་ཐམས་ཅད་དང་རྒྱུ་འཐུན་པའོ་ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྒྱུ་འཐུན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ངོ་མཚར་ཀྱི་འདུ་ཤེས་ཏེ། བཅུ་གང་ཞེ་ན། འདི་ལྟར་དགེ་བའི་རྩ་བ་ཐམས་ཅད་ལ་མི་དགེ་བར་འདུ་ཤེས་པ་དང་། དགེ་བ་ཐམས་ཅད་ལ་བྱང་ཆུབ་ཀྱི་ས་བོན་དུ་འདུ་ཤེས་པ་དང་། སེམས་ཅན་ཐམས་ཅད་ལ་བྱང་ཆུབ་ཀྱི་སྣོད་དུ་འདུ་ཤེས་པ་དང་། སྨོན་ལམ་ཐམས་ཅད་ལ་སྨོན་ལམ་མེད་པར་འདུ་ཤེས་པ་དང་། ཆོས་ཐམས་ཅད་ལ་འབྱུང་བར་འདུ་ཤེས་པ་དང་། སྤྱོད་པ་ཐམས་ཅད་ལ་སྤྱོད་པ་མེད་པར་འདུ་ཤེས་པ་དང་། ཆོས་ཐམས་ཅད་ལ་སངས་རྒྱས་ཀྱི་ཆོས་སུ་འདུ་ཤེས་པ་དང་། ཚིག་ཏུ་སྤྱོད་པ་ཐམས་ཅད་ལ་ངག་གི་ལམ་མྱེད་པར་འདུ་ཤེས་པ་དང་། སངས་རྒྱས་ཐམས་ཅད་ལ་ཕར་འདུ་ཤེས་པ་དང་། དེ་བཞིན་གཤེགས་པ་ཐམས་ཅད་ལ་གཉིས་སུ་མེད་པར་འདུ་ཤེས་པའོ། །ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ངོ་མཚར་གྱི་འདུ་ཤེས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་འདུ་ཤེས་རྣམ་པར་བཟློག་པ་ལ་མཁས་པ་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་སྟེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དོན་དུ་སྤྱོད་པ་དང་། ཆོས་ཐམས་ཅད་ཡོངས་སུ་བཙལ་བའི་དོན་དུ་སྤྱོད་པ་དང་། བསླབ་པ་ཐམས་ཅད་ནན་ཏན་ཏུ་བྱ་བའི་དོན་དུ་སྤྱོད་པ་དང་། དགེ་བའི་རྩ་བ་ཐམས་ཅད་བསྩགས་པའི་དོན་དུ་སྤྱོད་པ་དང་། ཏིང་ངེ་འཛིན་རྩེ་གཅིག་ཏུ་བྱ་བའི་དོན་དུ་སྤྱོད་པ་དང་། ཡེ་ཤེས་རབ་ཏུ་ཤེས་པར་བྱ་བའི་དོན་དུ་སྤྱོད་པ་དང་། བསྒོམ་པ་ཡོངས་སུ་བསྒོམ་པའི་དོན་དུ་སྤྱོད་པ་དང་། ཞིང་བརྒྱན་པའི་དོན་དུ་སྤྱོད་པ་དང་། དགེ་བའི་བཤེས་གཉེན་བསྙེན་བཀུར་བའི་དོན་དུ་སྤྱོད་པ་དང་། དེ་བཞིན་གཤེགས་པ་མཆོད་ཅིང་རིམ་གྲོར་བྱ་བའི་དོན་དུ་སྤྱོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱོད་པ་བླ་ན་མེད་པ་ཡོངས་སུ་རྫོགས་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་ཏེ། བཅུ་གང་ཞེ་ན། འདི་ལྟར་བྱང་ཆུབ་ཀྱི་སེམས་ལ་རབ་ཏུ་གཞོག་པའི་བཤེས་གཉེན་དང་། དགེ་བའི་རྩ་བ་ལ་སྦྱོར་བའི་བཤེས་གཉེན་དང་། ཕ་རོལ་ཏུ་ཕྱིན་པ་ལ་འཇུག་པར་བྱེད་པའི་བཤེས་གཉེན་དང་། ཆོས་ཐམས་ཅད་སྟོན་པའི་བཤེས་གཉེན་དང་། སེམས་ཅན་ཐམས་ཅད་ཡོངས་སུ་སྨྱིན་པར་བྱ་བ་ལ་གཞོག་པའི་བཤེས་གཉེན་དང་། སྤོབས་པ་ལ་རྣམ་པར་གདོན་མྱི་ཟ་བར་བྱེད་པའི་བཤེས་གཉེན་དང་། འགྲོ་བ་ཐམས་ཅད་གནས་གྱེན་དུ་བསྐྱོད་པའི་བཤེས་གཉེན་དང་། བསྐལ་
པ་ཐམས་ཅད་དུ་གནས་ཤིང་མི་སྐྱོ་བར་བྱེད་པའི་བཤེས་གཉེན་དང་། ཀུན་ཏུ་བཟང་པོའི་སྤྱོད་པ་ལ་རབ་ཏུ་གཞོག་པའི་བཤེས་གཉེན་དང་། སངས་རྒྱས་ཐམས་ཅད་ཀྱི་ཡེ་ཤེས་ལ་འཇུག་ཅིང་འབབ་པར་བྱེད་པའི་བཤེས་གཉེན་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་བཤེས་གཉེན་ནོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པ་སྟེ། བཅུ་གང་ཞེ་ན། འདི་ལྟར་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱའོ་སྙམ་སྟེ། བརྩོན་འགྲུས་རྩོམ་པ་དང་། ཆོས་ཐམས་ཅད་གཟུང་བར་བྱའོ་སྙམ་སྟེ། བརྩོན་འགྲུས་རྩོམ་པ་དང་། འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བར་བྱའོ་སྙམ་སྟེ། བརྩོན་འགྲུས་རྩོམ་པ་དང་། བྱང་ཆུབ་སེམས་དཔའི་བསླབ་པ་ཐམས་ཅད་ཤེས་པར་བྱའོ་སྙམ་སྟེ། བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ཀྱི་ཉེས་བྱས་ཟད་པར་བྱའོ་སྙམ་སྟེ་བརྩོན་འགྲུས་རྩོམ་པ་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ཐམས་ཅད་རྒྱུན་གཅད་དོ་སྙམ་སྟེ། བརྩོན་འགྲུས་རྩོམ་པ་དང་། བདུད་ཐམས་ཅད་ལས་རྒྱལ་བར་བྱའོ་སྙམ་སྟེ། བརྩོན་འགྲུས་རྩོམ་པ་དང་། སེམས་ཅན་ཐམས་ཅད་ལ་འཁྲུག་པ་མེད་པར་བྱའོ་སྙམ་སྟེ། བརྩོན་འགྲུས་རྩོམ་པ་དང་། སངས་རྒྱས་ཐམས་ཅད་ལ་མཆོད་པ་བྱའོ་སྙམ་སྟེ། བརྩོན་འགྲུས་རྩོམ་པ་དང་། དེ་བཞིན་གཤེགས་པ་ཐམས་ཅད་མཉེས་པར་བྱའོ་སྙམ་སྟེ། བརྩོན་འགྲུས་རྩོམ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་རྩོམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བླ་ན་མེད་པ་ཡང་དག་པར་རྫོགས་པ་འཐོབ་པར་འགྱུར་བ་དག་གོ །ཀྱེ་
རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་པ་ཐོབ་པ་སྟེ། བཅུ་གང་ཞེ་ན་འདི་ལྟར་བདག་ནི་བྱང་ཆུབ་ཀྱི་སེམས་ལ་གནས་པ་ཡིན་གྱིས་ད་དུང་གཞན་ཡང་བྱང་ཆུབ་ཀྱི་སེམས་ལ་དགོད་དོ་ཞེས་ཏེ་དབུགས་ཕྱིན་པ་རབ་ཏུ་འཐོབ་བོ། །བདག་ནི་འཇིག་རྟེན་གྱི་རྩོད་པ་ཐམས་ཅད་ཀྱིས་རྩོད་པ་མྱེད་པ་ལ་གཞོལ་བ་ཡིན་གྱིས་ད་དུང་གཞན་ཡང་རྩོད་པ་མེད་པར་དགའ་བ་ལ་དགོད་པར་བྱའོ། །ཞེས་དབུགས་ཕྱིན་པ་འཐོབ་བོ། །བདག་ནི་བྱིས་པའི་ཆོས་ལས་འཕགས་ཀྱི་ད་དུང་ཕ་རོལ་ཀྱང་བྱིས་པའི་ཆོས་ལས་གྱེན་དུ་བསྐྱོད་དེ་སངས་རྒྱས་ཀྱི་ཆོས་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དགེ་བའི་རྩ་བ་བཙལ་བ་ལ་བརྩོན་པ་ཡིན་གྱིས། ད་དུང་གཞན་ཡང་དགེ་བའི་རྩ་བ་ཚོལ་བར་བརྩོན་པ་ལ་རབ་ཏུ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་ཕ་རོལ་ཏུ་ཕྱིན་པའི་ལམ་དུ་ཞུགས་པ་ཡིན་གྱིས། ད་དུང་གཞན་བརྩོན་འགྲུས་ཡང་ཕ་རོལ་ཏུ་ཕྱིན་པའི་ལམ་དུ་འཇུག་པ་ལ་དགོད་པར་བྱའོ། །ཞེས་དབུགས་ཕྱིན་པ་འཐོབ་བོ། །བདག་ནི་སངས་རྒྱས་ཀྱི་རིགས་སུ་སྐྱེས་པ་ཡིན་གྱིས། ད་དུང་གཞན་ཡང་སངས་རྒྱས་ཀྱི་རིགས་སུ་སྐྱེ་བ་ལ་རབ་ཏུ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དངོས་པོ་མེད་པའི་ཆོས་ཀྱི་ཚུལ་ལ་ཞུགས་པ་ཡིན་གྱིས། ད་དུང་གཞན་ཡང་དངོས་པོ་མེད་པའི་ཆོས་ཀྱི་ཚུལ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་སངས་རྒྱས་ཀྱི་ཆོས་ཐམས་ཅད་མི་སྤོང་བ་ལ་བརྩོན་པ་ཡིན་གྱིས། ད་དུང་གཞན་ཡང་སངས་རྒྱས་ཀྱི་ཆོས་ཐམས་ཅད་མྱི་སྤོང་བར་བརྩོན་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ་བདག་གིས་ནི་ཐམས་ཅད་མཁྱེན་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་འགྱུར་གྱིས། ད་དུང་གཞན་ཡང་ཐམས་ཅད་མཁྱེན་པའི་བྱང་ཆུབ་ཏུ་སྨོན་ལམ་ཡོངས་སུ་རྫོགས་པར་བྱེད་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །བདག་ནི་དེ་
བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མཛོད་མི་ཟད་པར་ཞུགས་པ་ཡིན་གྱིས། ད་དུང་གཞན་ཡང་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་མཛོད་མྱི་ཟད་པར་འཇུག་པ་ལ་དགོད་པར་བྱའོ་ཞེས་དབུགས་ཕྱིན་པ་འཐོབ་བོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་པ་ཐོབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་དབུགས་ཕྱིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་ཡོངས་སུ་སྨིན་པར་བྱ་བ་དག་སྟེ། བཅུ་གང་ཞེ་ན་འདི་ལྟར་བྱང་ཆུབ་སེམས་དཔའ་རྣམས་ནི་སྦྱིན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །གཟུགས་ཀྱིས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །ཆོས་སྟོན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། ། སྐལ་བ་མཉམ་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །གནས་མེད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །བྱང་ཆུབ་སེམས་དཔའི་སྤྱོད་པ་བརྗོད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །འཇིག་རྟེན་གྱི་ཁམས་ཀུན་ཏུ་འབར་བ་ཡང་དག་པར་བསྟན་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །སངས་རྒྱས་ཀྱི་ཆོས་ཀྱི་ཆེ་བ་ཉིད་བརྗོད་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །རྫུ་འཕྲུལ་སྣ་ཚོགས་ཀྱི་རྣམ་པར་འཕྲུལ་པས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །ཐབས་མཁས་པའི་སྦྱོར་བ་དང་། ཚུལ་གྱིས་འཇིག་རྟེན་དུ་སྤྱད་པ་སྣ་ཚོགས་ཀྱིས་ཀྱང་སེམས་ཅན་གྱི་ཁམས་ཡོངས་སུ་སྨྱིན་པར་བྱེད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན། ཡོངས་སུ་སྨྱིན་པར་བྱ་བ་སྟེ། དེ་དག་གིས་བྱང་ཆུབ་སེམས་དཔའ་
རྣམས་ཀྱི་སེམས་ཅན་གྱི་ཁམས་ཡོངས་སུ་སྨིན་པར་བྱེད་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཏེ། བཅུ་གང་ཞེ་ན་འདི་ལྟར་བྱང་ཆུབ་ཀྱི་སེམས་མྱི་ཉམས་པའི་ཚུལ་ཁྲིམས་དང་། ཉན་ཐོས་དང་རང་སངས་རྒྱས་ཀྱི་ས་ཡོངས་སུ་སྤོང་བའི་ཚུལ་ཁྲིམས་དང་། སེམས་ཅན་ཐམས་ཅད་ལ་ཕན་པར་དགའ་བས་རྣམ་པར་ལྟ་བའི་ཚུལ་ཁྲིམས་དང་། སངས་རྒྱས་ཀྱི་ཆོས་ཐམས་ཅད་ལ་རབ་ཏུ་དགོད་པའི་ཚུལ་ཁྲིམས་དང་། བྱང་ཆུབ་སེམས་དཔའི་བསླབ་པ་ཐམས་ཅད་ལ་ནན་ཏན་ཏུ་བྱ་བའི་ཚུལ་ཁྲིམས་དང་། ཆོས་ཐམས་ཅད་མྱི་དམྱིགས་པའི་ཚུལ་ཁྲིམས་དང་། དགེ་བའི་རྩ་བ་ཐམས་ཅད་བྱང་ཆུབ་ཏུ་ཡོངས་སུ་བསྔོ་བའི་ཚུལ་ཁྲིམས་དང་། སངས་རྒྱས་ཀྱི་སྐུ་ཐམས་ཅད་ལས་ཕྱིར་ཕྱོགས་སུ་མི་ལྟ་བའི་ཚུལ་ཁྲིམས་དང་། ཆོས་ཐམས་ཅད་ངེས་པར་རྟོགས་པ་ལ་མངོན་པར་ཞེན་པ་མེད་པའི་ཚུལ་ཁྲིམས་དང་། དབང་པོ་སྡོམ་པའི་ཚུལ་ཁྲིམས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཚུལ་ཁྲིམས་རྒྱ་ཆེན་པོའི་ཕ་རོལ་ཏུ་ཕྱིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། ལུང་བསྟན་པ་དེ་དག་གིས་ལུང་བསྟན་པའི་བྱང་ཆུབ་སེམས་དཔའ་རྣམས་ནི་བདག་ཅག་ལུང་བསྟན་ཏོ། །ཞེས་བྱ་བར་ཤེས་སོ། །བཅུ་གང་ཞེ་ན། འདི་ལྟར་སྙིང་ཐག་པ་ནས་བྱང་ཆུབ་ཀྱི་སེམས་ཕུན་སུམ་ཚོགས་པ་ནི་བྱང་ཆུབ་སེམས་དཔའ་རྣམས་ཀྱི་རང་གི་རྒྱུད་ལས་ལུང་བསྟན་པའོ། །བྱང་ཆུབ་སེམས་དཔའི་སྤྱོད་པ་ལ་མི་སྐྱོ་བ་ནི་བྱང་ཆུབ་སེམས་དཔའི་ལུང་བསྟན་པའོ། །བསྐལ་པ་ཐམས་ཅད་དུ་ཞེ་ནོན་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སངས་རྒྱས་ཀྱི་ཆོས་ཐམས་ཅད་ལ་ནན་ཏན་དུ་བྱེད་པ་ནི་བྱང་ཆུབ་སེམས་
དཔའ་རྣམས་ཀྱི་ལུང་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ལ་གཅིག་ཏུ་ཆད་པར་མོས་ཤིང་ཡིད་ཆེས་ལ་མངོན་པར་དད་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་རྩ་བ་ཐམས་ཅད་ཡང་དག་པར་སོགས་ཤིང་སྒྲུབ་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སེམས་ཅན་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་དགོད་པར་བརྩོན་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་བཤེས་གཉེན་ཐམས་ཅད་དང་རྒྱུད་ཀྱི་ཚུལ་གཅིག་ཏུ་བྱེད་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །དགེ་བའི་བཤེས་གཉེན་ཐམས་ཅད་ལ་སྟོན་པར་འདུ་ཤེས་པ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །སྔོན་གྱི་བྱང་ཆུབ་གྱི་སྨོན་ལམ་རྗེས་སུ་བསྲུང་བ་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། ལུང་བསྟན་པ། དེ་དག་གིས་ལུང་བསྟན་པའི་བྱང་ཆུབ་སེམས་དཔའ་རྣམས་ནི་བདག་ཅག་ལུང་བསྟན་ཏོ་ཞེས་བྱ་བར་ཤེས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་སྟེ། བཅུ་གང་ཞེ་ན་འདི་ལྟར་སྔོན་གྱི་སྨོན་ལམ་ལ་འཇུག་པ་དང་། སྤྱོད་པ་ལ་འཇུག་པ་དང་། ཡང་དག་པར་བསྒྲུབ་པ་ལ་འཇུག་པ་དང་། ཕ་རོལ་ཏུ་ཕྱིན་པ་ལ་འཇུག་པ་དང་། བསྒྲུབ་པ་ལ་འཇུག་པ་དང་། སྨོན་ལམ་རྣམ་པ་ཐ་དད་པ་ལ་འཇུག་པ་དང་། མོས་པ་ཐ་དད་པ་ལ་འཇུག་པ་དང་། ཞིང་གི་རྒྱན་ལ་འཇུག་པ་དང་། རྫུ་འཕྲུལ་གྱིས་རྣམ་པར་འཕྲུལ་པ་ལ་འཇུག་པ་དང་། སྐྱེ་བ་བསྟན་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་ལ་འཇུག་པ་སྟེ། འཇུག་པ་དེ་དག་གིས་ནི་འདས་པ་དང་མ་འོངས་པ་དང་། ད་ལྟར་བྱུང་བའི་བྱང་ཆུབ་སེམས་དཔའ་ཐམས་ཅད་ལ་འཇུག་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་
དཔའ་རྣམས་ཀྱིས་དེ་བཞིན་གཤེགས་པ་ལ་འཇུག་པ་སྟེ། བཅུ་གང་ཞེ་ན་འདི་ལྟར་མུ་མེད་པའི་མངོན་པར་རྫོགས་པར་བྱང་ཆུབ་པ་ལ་འཇུག་པ་དང་། མུ་མེད་པའི་ཆོས་ཀྱི་འཁོར་ལོ་བསྐོར་བ་ལ་འཇུག་པ་དང་། མུ་མེད་པའི་ཆོས་ཀྱི་ཚུལ་ལ་འཇུག་པ་དང་། མུ་མེད་པའི་དབྱངས་ཀྱི་དཀྱིལ་འཁོར་ལ་འཇུག་པ་དང་། མུ་མེད་པའི་སེམས་ཅན་འདུལ་བ་ལ་འཇུག་པ་དང་། མུ་མེད་པའི་རྫུ་འཕྲུལ་གྱིས་རྣམ་པར་འཕྲུལ་པ་ལ་འཇུག་པ་དང་། མུ་མེད་པའི་སྐུ་སྣ་ཚོགས་ལ་འཇུག་པ་དང་། མུ་མེད་པའི་ཏིང་ངེ་འཛིན་ལ་འཇུག་པ་དང་། མུ་མེད་པའི་སྟོབས་དང་མི་འཇིགས་པ་ལ་འཇུག་པ་དང་། མུ་མེད་པའི་མྱ་ངན་ལས་འདས་པ་ཡོངས་སུ་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དེ་བཞིན་གཤེགས་པ་ལ་འཇུག་པ་སྟེ། འཇུག་པ་དེ་དག་གིས་ནི་འདས་པ་དང་། མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་བསམ་པ་དང་། སྤྱོད་པ་ལ་འཇུག་པ་སྟེ། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་དེ་དག་གིས་ནི། བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ཀྱི་བསམ་པ་དང་། སྤྱོད་པ་ལ་རབ་ཏུ་འཇུག་གོ །བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ཀྱི་སྔོན་གྱི་མཐའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་ཕྱི་མའི་མཐའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་ད་ལྟར་བྱུང་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་དགེ་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་མི་དགེ་བའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་དབང་པོའི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་མོས་པ་སྣ་ཚོགས་ཀྱི་སྤྱོད་པ་ལ་འཇུག་པ་དང་། སེམས་ཅན་ཐམས་ཅད་ཀྱི་ཉོན་མོངས་པའི་བག་ཆགས་དང་བག་ལ་ཉལ་བའི་སྤྱོད་
པ་ལ་འཇུག་པ་དང་། སེམས་ཅན་ཐམས་ཅད་ཀྱི་དུས་དང་དུས་མ་ཡིན་པར་ཡོངས་སུ་སྨྱིན་པར་བྱ་བ་དང་། རྣམ་པར་འདུལ་བའི་སྤྱོད་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་སེམས་ཅན་གྱི་བསམ་པ་དང་སྤྱོད་པ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་ལ་འཇུག་པ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་རྣམས་ལ་ཀུན་ནས་ཉོན་མོངས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་རྣམ་པར་དག་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཆུང་ངུར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཆེན་པོར་འཇུག་པ་དང་འཇིག་རྟེན་གྱི་ཁམས་རྣམས་ལ་རྡུལ་ཤིན་ཏུ་ཕྲ་མོར་ཆུད་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་རབ་ཏུ་ཕྲ་བར་འཇུག་པ་དང་། འཇིག་རྟེན་གྱི་ཁམས་རྣམས་ལ་ཡངས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་འབྱུང་བར་འཇུག་པ་དང་། འཇིག་རྟེན་གྱི་ཁམས་རྣམས་ལ་སངས་རྒྱས་དང་བཅས་པར་འཇུག་པ་དང་། འཇིག་རྟེན་གྱི་ཁམས་རྣམས་ལ་སངས་རྒྱས་མེད་པར་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་ལ་འཇུག་པ་སྟེ། དེ་དག་གིས་ནི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཁམས་ཐམས་ཅད་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསྐལ་པ་ལ་འཇུག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་བསྐལ་པ་ཐམས་ཅད་ལ་རབ་ཏུ་འཇུག་གོ །བཅུ་གང་ཞེ་ན་འདི་ལྟར་འདས་པའི་བསྐལ་པ་ལ་འཇུག་པ་དང་། མ་འོངས་པའི་བསྐལ་པ་ལ་འཇུག་པ་དང་། ད་ལྟར་བྱུང་བའི་བསྐལ་པ་ལ་འཇུག་
པ་དང་། གྲངས་ཡོད་པའི་བསྐལ་པ་ལ་འཇུག་པ་དང་། གྲངས་མེད་པའི་བསྐལ་པ་ལ་འཇུག་པ་དང་། གྲངས་ཡོད་པ་དང་གྲངས་མེད་པའི་བསྐལ་པ་ལ་འཇུག་པ་དང་། གྲངས་མེད་པ་གྲངས་ཡོད་པའི་བསྐལ་པ་ལ་འཇུག་པ་དང་། བསྐལ་པ་ཐམས་ཅད་ལ་བསྐལ་པ་གཅིག་ཏུ་འཇུག་པ་དང་། བསྐལ་པ་མ་ཡིན་པ་ལ་བསྐལ་པར་འཇུག་པ་དང་། བསྐལ་པ་ཐམས་ཅད་ལ་སྐད་ཅིག་གཅིག་གིས་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསྐལ་པ་ལ་འཇུག་པ་རྣམས་ཏེ། དེ་དག་གིས་བྱང་ཆུབ་སེམས་དཔའ་རྣམས་བསྐལ་པ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་བསྟན་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་ཤིན་ཏུ་སྟོན་ཏོ། །བཅུ་གང་ཞེ་ན་འདི་ལྟར་འདས་པའི་དུས་ལ་འདས་པར་བསྟན་པ་དང་། འདས་པའི་དུས་ལ་མ་འོངས་པར་བསྟན་པ་དང་། འདས་པའི་དུས་ལ་ད་ལྟར་བྱུང་བར་བསྟན་པ་དང་། མ་འོངས་པའི་དུས་ལ་འདས་པར་བསྟན་པ་དང་། མ་འོངས་པའི་དུས་ལས་ད་ལྟར་བྱུང་བར་བསྟན་པ་དང་། མ་འོངས་པའི་དུས་ལ་མི་ཟད་པར་བསྟན་པ་དང་། ད་ལྟར་བྱུང་བའི་དུས་ལ་འདས་པར་བསྟན་པ་དང་། ད་ལྟར་བྱུང་བའི་དུས་ལ་མ་འོངས་པར་བསྟན་པ་དང་། ད་ལྟར་བྱུང་བའི་དུས་ལ་མཉམ་པ་ཉིད་དུ་བསྟན་པ་དང་། ད་ལྟར་བྱུང་བའི་དུས་ལ་དུས་གསུམ་སྐད་ཅིག་ཏུ་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་བསྟན་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་སྟོན་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་ལ་འཇུག་པ་སྟེ། བཅུ་གང་ཞེ་ན་འདི་ལྟར་བརྡ་ལ་འཇུག་པ་དང་། ཚིག་གི་ལམ་ལ་འཇུག་པ་དང་། མངོན་པར་བརྗོད་པ་ལ་འཇུག་པ་དང་། གདགས་པ་ལ་འཇུག་པ་དང་། འདུ་ཤེས་
ལ་འཇུག་པ་དང་། ལེགས་པར་བསྔགས་པ་ལ་འཇུག་པ་དང་། སྤྱོད་པ་ལ་འཇུག་པ་དང་། མི་ཟད་པ་ལ་འཇུག་པ་དང་། ཞི་བ་ལ་འཇུག་པ་དང་། དབེན་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དུས་གསུམ་ལ་འཇུག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་དུས་གསུམ་ལ་འཇུག་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་སྐྱོ་ཞིང་སྒྱིད་ལུག་པ་མེད་པའི་སེམས་བསྐྱེད་པ་སྟེ། བཅུ་གང་ཞེ་ན། འདི་ལྟར་སངས་རྒྱས་ཐམས་ཅད་མཆོད་ཅིང་རིམ་གྲོར་བྱ་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། དགེ་བའི་བཤེས་གཉེན་ཐམས་ཅད་བསྙེན་བཀུར་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་བཙལ་བ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་མཉན་པ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། ཆོས་ཐམས་ཅད་བསྟན་པ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། སེམས་ཅན་ཐམས་ཅད་སངས་རྒྱས་ཀྱི་བྱང་ཆུབ་ལ་རབ་ཏུ་དགོད་པར་བྱ་བས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། བསྐལ་པ་བརྗོད་དུ་མྱེད་པའི་ཡང་བརྗོད་དུ་མེད་པར་འཇིག་རྟེན་གྱི་ཁམས་རེ་རེར་བྱང་ཆུབ་སེམས་དཔའི་སྤྱད་པ་སྤྱོད་པས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། འཇིག་རྟེན་གྱི་ཁམས་མ་ལུས་པ་ཐམས་ཅད་དུ་རྗེས་སུ་སྤྱོད་པས་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པ་དང་། སངས་རྒྱས་ཀྱི་ཆོས་ཐམས་ཅད་རྟོགས་པར་བྱ་བ་དང་། ཡང་དག་པར་བལྟ་བ་ལ་མི་སྐྱོ་ཞིང་ཡོངས་སུ་སྒྱིད་ལུག་པ་མེད་པའི་སེམས་བསྐྱེད་པའོ། །ཀྱེ་རྒྱལ་བའི་
སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མི་སྐྱོ་ཞིང་སྒྱིད་ལུག་པ་མེད་པའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཡོངས་སུ་སྐྱོ་བ་མེད་པ་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་དབྱེ་བའི་ཡེ་ཤེས་ཏེ། བཅུ་གང་ཞེ་ན་འདི་ལྟར་སེམས་ཅན་ཀུན་ཏུ་དབྱེ་བའི་ཡེ་ཤེས་དང་། དབང་པོ་ཀུན་ཏུ་དབྱེ་བའི་ཡེ་ཤེས་དང་། ལས་དང་རྣམ་པར་སྨིན་པ་ཀུན་ཏུ་དབྱེ་བའི་ཡེ་ཤེས་དང་། སྐྱེ་བ་ཀུན་ཏུ་དབྱེ་བའི་ཡེ་ཤེས་དང་། འཇིག་རྟེན་གྱི་ཁམས་ཀུན་ཏུ་དབྱེ་བའི་ཡེ་ཤེས་དང་། ཆོས་ཀྱི་དབྱིངས་ཀུན་ཏུ་དབྱེ་བའི་ཡེ་ཤེས་དང་། སངས་རྒྱས་ཀུན་ཏུ་དབྱེ་བའི་ཡེ་ཤེས་དང་། ཆོས་ཀུན་ཏུ་དབྱེ་བའི་ཡེ་ཤེས་དང་། དུས་གསུམ་ཀུན་ཏུ་དབྱེ་བའི་ཡེ་ཤེས་དང་། ཚིག་གི་རྒྱུད་ཐམས་ཅད་ལ་ངག་གི་ལམ་ཀུན་ཏུ་དབྱེ་བའི་ཡེ་ཤེས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་དབྱེ་བའི་ཡེ་ཤེས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཀུན་ཏུ་དབྱེ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་མི་བརྗེད་པར་འཛིན་པའི་ཕྱིར་ཐོས་པའི་གཟུངས་དང་། ཆོས་ཐམས་ཅད་ཇི་ལྟ་བ་བཞིན་ཏུ་རབ་ཏུ་འབྱེད་པའི་ཕྱིར་ཆོས་ཁོང་དུ་ཆུད་པའི་གཟུངས་དང་། ཆོས་གྱི་རང་བཞིན་རྗེས་སུ་རྟོགས་པའི་ཕྱིར་ཆོས་ཐམས་ཅད་ངེས་པར་རྟོགས་པའི་གཟུངས་དང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཐོབ་པའི་ཕྱིར་ཆོས་སྣང་བ་རབ་ཏུ་ཐོབ་པའི་གཟུངས་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལས་ཆོས་མངོན་དུ་ཐོས་པ་ཡོངས་སུ་མི་ཟད་པའི་ཕྱིར་ཏིང་ངེ་འཛིན་གྱི་གཟུངས་དང་། སྒྲ་སྐད་དང་ཐ་སྙད་བསམ་གྱིས་
མི་ཁྱབ་པ་ལ་འཇུག་པའི་ཕྱིར་དབྱངས་ཀྱི་དཀྱིལ་འཁོར་ལ་འཇུག་པའི་གཟུངས་དང་། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཀྱི་ཆོས་བསམ་གྱིས་མི་ཁྱབ་པ་ཤིན་ཏུ་སྟོན་པའི་ཕྱིར་དུས་གསུམ་གྱི་གཟུངས་དང་། སངས་རྒྱས་ཀྱི་ཆོས་མཐའ་དང་དབུས་མེད་པ་རྣམ་པ་ཐ་དད་པ་ཐམས་ཅད་ཤིན་ཏུ་སྟོན་པའི་ཕྱིར་རྣམ་པ་སྣ་ཚོགས་སུ་སྤོབས་པའི་གཟུངས་དང་། སངས་རྒྱས་བྱུང་བ་བརྗོད་དུ་མེད་པ་ཐམས་ཅད་དུ་རྣ་བའི་དབང་པོས་ཁྱབ་པར་བྱེད་པའི་ཕྱིར་ཐོགས་པ་མེད་པའི་རྣ་བ་མངོན་པར་བསྒྲུབ་པའི་གཟུངས་དང་། དེ་བཞིན་གཤེགས་པའི་སྟོབས་བཅུ་དང་། མི་བསྙེངས་པ་ལ་རབ་ཏུ་དགོད་པའི་ཕྱིར་སངས་རྒྱས་ཀྱི་ཆོས་ཐམས་ཅད་ཀྱི་གཟུངས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཏེ། དེ་དག་ཐོབ་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་བརྩོན་པར་བྱ་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་བསྟན་པ་རྗེས་སུ་རྟོགས་པར་བྱ་བ་སྟེ། བཅུ་གང་ཞེ་ན་འདི་ལྟར་མངོན་པར་བྱང་ཆུབ་པའི་སངས་རྒྱས་དང་། སྨོན་ལམ་གྱི་སངས་རྒྱས་དང་། ལས་རྣམ་པར་སྨྱིན་པའི་སངས་རྒྱས་དང་། བྱིན་གྱིས་བརླབས་པའི་སངས་རྒྱས་དང་། སྤྲུལ་པའི་སངས་རྒྱས་དང་། ཆོས་ཀྱི་དབྱིངས་ཀྱི་སངས་རྒྱས་དང་། སེམས་ཀྱི་སངས་རྒྱས་དང་། ཏིང་ངེ་འཛིན་གྱི་སངས་རྒྱས་དང་། རང་བཞིན་གྱི་སངས་རྒྱས་དང་། བསམ་པ་ཇི་ལྟ་བའི་སངས་རྒྱས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་བསྟན་པ་རྗེས་སུ་རྟོགས་པར་བྱ་བ་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སེམས་བསྐྱེད་པ་སྟེ། བཅུ་གང་ཞེ་ན་འདི་ལྟར་སེམས་བསྐྱེད་པ་དེ་ནི་འགྲོ་བ་ཐམས་ཅད་ཡོངས་སུ་སྐྱོབ་པའི་ཕྱིར་བྱམས་པ་ཆེན་པོ་དང་ལྡན་པའོ། །སེམས་བསྐྱེད་པ་དེ་ནི་འགྲོ་བ་ཐམས་ཅད་ཀྱི་སྡུག་བསྔལ་ཀྱི་ཕུང་པོ་རང་གི་ལུས་ཀྱིས་ལེན་པའི་ཕྱིར་སྙིང་རྗེ་ཆེན་པོ་དང་ལྡན་
པའོ། །སེམས་བསྐྱེད་པ་དེ་ནི་ཅི་བདོག་པ་ཡོངས་སུ་གཏོང་བའི་ཕྱིར་བཏང་བ་ཐམས་ཅད་ཡོངས་སུ་གཏང་བ་སྔོན་དུ་འགྲོ་བའོ། །སེམས་བསྐྱེད་པ་དེ་ནི་སངས་རྒྱས་ཀྱི་ཆོས་ཐམས་ཅད་ལ་མངོན་པར་མོས་པས་ཐམས་ཅད་མཁྱེན་པའི་ཡེ་ཤེས་ཡིད་ལ་བྱེད་པ་སྔོན་དུ་འགྲོ་བའོ། །སེམས་བསྐྱེད་པ་དེ་ནི་བྱང་ཆུབ་སེམས་དཔའི་བསླབ་པ་ཐམས་ཅད་ལ་ནན་ཏན་དུ་བྱེད་པས་ཡོན་ཏན་གྱིས་བརྒྱན་པའོ། །སེམས་བསྐྱེད་པ་དེ་ནི་སྐྱེ་བའི་སྐྱེ་མཆེད་ཐམས་ཅད་དུ་ཉམས་པར་མི་འགྱུར་བས་རྡོ་རྗེ་ལྟ་བུའོ། །སེམས་བསྐྱེད་པ་དེ་ནི་ཆོས་དཀར་པོ་ཐམས་ཅད་ལ་ཡང་དག་པར་གཞོལ་བས་རྒྱ་མཚོ་ལྟ་བུའོ། །སེམས་བསྐྱེད་པ་དེ་ནི་གཞན་གྱིས་ངན་དུ་བརྗོད་པ་དང་ངན་དུ་སྨྲ་བ་དག་བཟོད་པའི་ཕྱིར་རི་བོ་ཆེན་པོའི་དབང་པོ་དམ་པ་ལྟ་བུའོ། །སེམས་བསྐྱེད་པ་དེ་ནི་སེམས་ཅན་ཐམས་ཅད་ལ་དབུགས་ཕྱིན་པ་ཆེན་པོས་སྡུད་པའི་ཕྱིར་བདེ་བར་བྱེད་པའོ། །སེམས་བསྐྱེད་པ་དེ་ནི་ཆོས་ཐམས་ཅད་རབ་ཏུ་དབྱེ་བ་ལ་མཁས་པས་མི་དམྱིགས་པའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པས་རྟོགས་པར་ཁོང་དུ་ཆུད་པར་བྱ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་མྱུར་དུ་ཀུན་ཏུ་བཟང་པོའི་ཡེ་ཤེས་ཁོང་དུ་ཆུད་པ་ལ་མཁས་པས་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སྤྱོད་པའི་ཆོས་ཏེ། བཅུ་གང་ཞེ་ན་འདི་ལྟར་མ་འོངས་པའི་བསྐལ་པ་ཐམས་ཅད་དུ་གནས་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །མ་བྱོན་པའི་དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སེམས་ཅན་ཐམས་ཅད་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་དགོད་པ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །དགེ་བའི་
རྩ་བ་ཐམས་ཅད་ཡང་དག་པར་བསྩགས་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །ཕ་རོལ་ཏུ་ཕྱིན་པ་ཐམས་ཅད་ལ་འཇུག་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་ཡོངས་སུ་རྫོགས་པར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །འཇིག་རྟེན་གྱི་ཁམས་ཐམས་ཅད་བརྒྱན་པའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སངས་རྒྱས་གྱི་ཞིང་ཐམས་ཅད་དུ་སྐྱེ་བ་གཟུང་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །ཆོས་ཐམས་ཅད་ཡོངས་སུ་བཙལ་ཞིང་རབ་ཏུ་དབྱེ་བ་ལ་མཁས་པར་བྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །སངས་རྒྱས་ཀྱི་ཞིང་ཐམས་ཅད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བའི་སྨོན་ལམ་ནི་ཀུན་ཏུ་བཟང་པོའི་སྤྱོད་པའི་ཆོས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཀུན་ཏུ་བཟང་པོའི་སྤྱོད་པའི་ཆོས་ཏེ། དེ་དག་གིས་སྨོན་ཅིང་མངོན་པར་བརྩོན་པར་བྱས་ན། བྱང་ཆུབ་སེམས་དཔའ་རྣམས་མྱུར་ཏུ་ཀུན་ཏུ་བཟང་པོའི་སྨོན་ལམ་དང་། སྤྱོད་པ་ཡོངས་སུ་རྫོགས་པ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་བཞི་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་རབ་ཏུ་འཐོབ་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་རྟག་ཏུ་རྒྱུན་མི་འཆད་པར་སེམས་ཅན་གྱི་ཁམས་ལ་རྣམ་པར་ལྟའོ། །བཅུ་གང་ཞེ་ན་འདི་ལྟར་སེམས་ཅན་གྱི་ཁམས་མགོན་མེད་པ་རྣམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། སེམས་ཅན་གྱི་ཁམས་ཐེག་པ་མེད་པ་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བའི་རྩ་བས་དབུལ་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། ཡུན་རིང་
པོ་ནས་གཉིད་ཀྱིས་བརྒྱལ་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བ་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། འདོད་ཆགས་ཀྱི་བཅིང་བས་གླགས་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། སྲིད་པའི་གང་ཆེན་མཚོར་རབ་ཏུ་གཞོལ་བར་གྱུར་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། ཡུན་རིང་པོ་ནས་ན་བའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། དགེ་བའི་ཆོས་ལ་མོས་པ་མེད་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པ་དང་། སངས་རྒྱས་ཀྱི་ཆོས་ལས་ཤིན་ཏུ་འཁྱམས་པར་གྱུར་པའི་སེམས་ཅན་གྱི་ཁམས་ལ་རྣམ་པར་ལྟ་བའི་སྙིང་རྗེ་ཆེན་པོ་རབ་ཏུ་ཐོབ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་རབ་ཏུ་ཐོབ་པ་སྟེ་དེ་དག་གིས་བྱང་ཆུབ་སེམས་དཔའ་རྣམས་རྟག་ཏུ་རྒྱུན་མི་འཆད་པར་སེམས་ཅན་གྱི་ཁམས་ལ་རྣམ་པར་བལྟ་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་རྐྱེན་གང་གིས་བྱང་ཆུབ་ཏུ་སེམས་བསྐྱེད་པར་འགྱུར་བའི་བྱང་ཆུབ་ཀྱི་སེམས་ཀྱི་རྐྱེན་རྣམས་ཏེ། བཅུ་གང་ཞེ་ན་འདི་ལྟར་སེམས་ཅན་གྱི་ཁམས་ཡོངས་སུ་སྨྱིན་པར་བྱ་བ་དང་། རྣམ་པར་གདུལ་བར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རྣམ་པར་བཟློག་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ལ་བདེ་བའི་ཡོ་བྱད་ཀྱིས་སྡུད་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ཀྱི་མི་ཤེས་པ་བསྩལ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཉེ་བར་བསྒྲུབ་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་མཆོད་ཅིང་རིམ་
གྲོར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །དེ་བཞིན་གཤེགས་པ་ཐམས་ཅད་མཉེས་པར་བྱ་བའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་ཀྱི་སྐུ་གཟུགས་དང་མཚན་དང་དཔེ་བྱད་བཟང་པོ་ཡོངས་སུ་བསྟན་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །སངས་རྒྱས་ཐམས་ཅད་ཀྱི་ཡེ་ཤེས་ལ་འཇུག་ཅིང་ཁོང་དུ་ཆུད་པར་བྱེད་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། ། སངས་རྒྱས་ཀྱི་སྟོབས་དང་མི་བསྙེངས་པ་ཐམས་ཅད་ཡོངས་སུ་བསྟན་པའི་རྐྱེན་ནི་བྱང་ཆུབ་ཀྱི་སེམས་ཀྱི་རྐྱེན་ཏོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་སེམས་ཀྱི་རྐྱེན་ཏེ། རྐྱེན་དེ་དག་གིས་བྱང་ཆུབ་ཀྱི་སེམས་ཡང་དག་པར་སྐྱེ་བར་འགྱུར་བ་དག་གོ །ཀྱེ་རྒྱལ་བའི་སྲས་བྱང་ཆུབ་སེམས་དཔའ་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེས་ཀྱང་ཐམས་ཅད་མཁྱེན་པའི་ཡེ་ཤེས་མངོན་པར་འཚང་རྒྱ་བར་བྱ་བའི་ཕྱིར་དགེ་བའི་བཤེས་གཉེན་རྣམས་ལ་རིམ་གྲོ་དང་བཀུར་སྟི་དང་བསྙེན་བཀུར་བྱའོ། །དེ་དགེ་བའི་བཤེས་གཉེན་རྣམས་ལ་རིམ་གྲོ་དང་། བཀུར་སྟི་དང་། བསྙེན་བཀུར་བྱེད་པའི་ཚེ། དགེ་བའི་བཤེས་གཉེན་རྣམས་ལ་སེམས་བསྐྱེད་པ་བཅུ་པོ་འདི་དག་བསྐྱེད་པར་བྱ་སྟེ། བཅུ་གང་ཞེ་ན་འདི་ལྟར་རིམ་གྲོ་བྱ་བའི་སེམས་དང་། དགའ་བར་བྱ་བའི་སེམས་དང་ཇི་སྐད་བསྒོ་བ་བཞིན་དུ་ནན་ཏན་ཏུ་བྱ་བའི་སེམས་དང་ཡིད་མི་འབྱུང་བའི་སེམས་དང་། ཇི་སྙམ་ཡང་མི་བྱེད་པའི་སེམས་དང་། གཅིག་ཏུ་ངེས་པའི་སེམས་དང་། དགེ་བའི་རྩ་བ་ཐམས་ཅད་ལ་རྒྱུད་ཀྱི་ཚུལ་གཅིག་ཏུ་གྱུར་པའི་སེམས་དང་། སྨོན་ལམ་གཅིག་པའི་སེམས་དང་། སྟོན་པའི་སེམས་དང་། སྤྱོད་པ་མཚུངས་པར་ཡོངས་སུ་རྫོགས་པར་བྱ་བའི་སེམས་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་དགེ་བའི་བཤེས་གཉེན་རྣམས་ལ་སེམས་བསྐྱེད་པ་རྣམས་སོ། །དེ་སེམས་བསྐྱེད་པ་བཅུ་པོ་འདི་དག་བསྐྱེད་པའི་ཚེ་ཡོངས་སུ་དག་
པ་བཅུ་རབ་ཏུ་འཐོབ་པར་འགྱུར་ཏེ། བཅུ་གང་ཞེ་ན་འདི་ལྟར་ཆུད་མི་ཟ་བའི་ཕྱིར་ལྷག་པའི་བསམ་པ་ཡོངས་སུ་དག་པ་དང་། སེམས་ཅན་ཇི་ལྟ་བུར་འདུལ་བ་བཞིན་དུ་བསྟན་པའི་ཕྱིར་གཟུགས་ཡོངས་སུ་དག་པ་དང་། སྒྲ་སྐད་དང་ཐ་སྙད་བསམ་གྱིས་མི་ཁྱབ་པ་ལ་འཇུག་པར་བྱ་བའི་ཕྱིར་དབྱངས་ཀྱི་དཀྱིལ་འཁོར་ཡོངས་སུ་དག་པ་དང་། སངས་རྒྱས་ཀྱི་ཆོས་བསམ་གྱིས་མི་ཁྱབ་པ་བསྟན་པ་ལ་མཁས་པར་བྱ་བའི་ཕྱིར་སྤོབས་པ་ཡོངས་སུ་དག་པ་དང་། མི་ཤེས་པ་ཐམས་ཅད་དང་བྲལ་བར་བྱ་བའི་ཕྱིར་ཡེ་ཤེས་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དབང་རབ་ཏུ་ཐོབ་པར་བྱ་བའི་ཕྱིར་སྐྱེ་བ་ཡོངས་སུ་དག་པ་དང་། སྔོན་སྐལ་བ་མཉམ་པར་སྤྱད་པའི་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་ཕྱིར་འཁོར་ཡོངས་སུ་དག་པ་དང་། སྒྲིབ་པའི་ལས་ཐམས་ཅད་སྤངས་པས་རྣམ་པར་བཟློག་པའི་ཕྱིར་རྣམ་པར་སྨིན་པ་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་དང་ཚུལ་གཅིག་ཏུ་བྱ་བའི་ཕྱིར་སྨོན་ལམ་ཡོངས་སུ་དག་པ་དང་། ཀུན་ཏུ་བཟང་པོའི་ཐེག་པས་འབྱུང་བའི་ཕྱིར་སྤྱོད་པ་ཡོངས་སུ་དག་པ་སྟེ། ཡོངས་སུ་དག་པ་བཅུ་པོ་འདི་དག་འཐོབ་པར་འགྱུར་རོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་སྟེ། བཅུ་གང་ཞེ་ན་འདི་ལྟར་བདོག་པ་ཐམས་ཅད་ཡོངས་སུ་བཏང་བའི་ཕྱིར་སྦྱིན་པའི་ཕ་རོལ་ཏུ་ཕྱིན་པ་དང་། སངས་རྒྱས་ཀྱི་ཚུལ་ཁྲིམས་ཡོངས་སུ་སྦྱང་བའི་ཕྱིར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་སྟོབས་ཀྱིས་བསམ་པ་མི་འཁྲུགས་པས་སངས་རྒྱས་ཀྱི་སྟོབས་ལ་སྦྱར་བའི་ཕྱིར་བཟོད་པའི་ཕ་རོལ་ཏུ་ཕྱིན་པ་དང་། མོས་པ་ཐམས་ཅད་ལས་ཕྱིར་མི་ལྡོག་པར་བྱ་བའི་ཕྱིར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། དྲན་པ་རྩེ་གཅིག་ཏུ་བྱ་བའི་ཕྱིར་བསམ་གཏན་གྱི་ཕ་རོལ་ཏུ་ཕྱིན་པ་དང་།
ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་དང་། སངས་རྒྱས་ཀྱི་སྟོབས་ལ་འཇུག་པའི་ཕྱིར་ཡེ་ཤེས་ཀྱི་ཕ་རོལ་ཏུ་ཕྱིན་པ་དང་། ཀུན་ཏུ་བཟང་པོའི་སྨོན་ལམ་ཡོངས་སུ་རྫོགས་པར་བྱ་བའི་ཕྱིར་སྨོན་ལམ་གྱི་ཕ་རོལ་ཏུ་ཕྱིན་པ་དང་། རྫུ་འཕྲུལ་དང་རྣམ་པར་འཕྲུལ་པ་ཡོངས་སུ་བསྟན་པའི་ཕྱིར་རྫུ་འཕྲུལ་གྱི་ཕ་རོལ་ཏུ་ཕྱིན་པ་དང་། ཆོས་ཐམས་ཅད་ལ་ཡང་དག་པར་གཞོལ་བར་བྱ་བའི་ཕྱིར་ཆོས་ཀྱི་ཕ་རོལ་ཏུ་ཕྱིན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་ཕ་རོལ་ཏུ་ཕྱིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པ་ཁོང་དུ་ཆུད་པར་བྱ་བ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་ལ་རྣམ་པ་ཐ་དད་པ་ཤེས་པ་ཁོང་དུ་ཆུད་པར་བྱ་བ་དང་། སེམས་ཅན་གྱི་ཁམས་ཐམས་ཅད་ཀྱི་རིགས་བསམ་གྱིས་མི་ཁྱབ་པ་ལ་འཇུག་པའི་ཤེས་པ་ཁོང་དུ་ཆུད་པར་བྱ་བ་དང་། ཆོས་ཐམས་ཅད་ལ་གཅིག་པ་དང་ཐ་དད་པར་ཡང་དག་པར་གཞོལ་བར་བྱ་བའི་ཤེས་པ་ཁོང་དུ་ཆུད་པར་བྱ་བ་དང་། ཆོས་ཀྱི་དབྱིངས་འབྱམ་ཀླས་པ་ཐམས་ཅད་ཤིན་ཏུ་བསྟན་པའི་ཤེས་པ་ཁོང་དུ་ཆུད་པར་བྱ་བ་དང་། ནམ་མཁའི་དབྱིངས་མ་ལུས་པ་ཐམས་ཅད་ཀྱིས་ཀླས་པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་མ་འོངས་པའི་དུས་ཀྱི་འཇུག་པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་འདས་པའི་དུས་ཀྱི་འཇུག་པའི་ཤེས་པ་ཁོང་དུ་ཆུད་པར་བྱ་བ་དང་། འཇིག་རྟེན་གྱི་ཁམས་ཐམས་ཅད་ལ་ད་ལྟར་བྱུང་བའི་དུས་ཀྱི་འཇུག་པའི་ཤེས་པ་ཁོང་དུ་
ཆུད་པར་བྱ་བ་དང་། དེ་བཞིན་གཤེགས་པ་ཐམས་ཅད་ཀྱི་སྤྱོད་པ་དང་། སྨོན་ལམ་རྣམ་པ་ཐ་དད་པ་ཐམས་ཅད་ཡོངས་སུ་རྫོགས་པར་བྱ་བས་གཅིག་ཏུ་རྟོགས་པར་འགྱུར་བའི་ཤེས་པ་ཁོང་དུ་ཆུད་པར་བྱ་བ་དང་། འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་སྤྱོད་པ་གཅིག་གིས་བྱུང་བའི་ཤེས་པ་ཁོང་དུ་ཆུད་པར་བྱའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་པ་ཁོང་དུ་ཆུད་པར་བྱ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་སྣང་བ་ཐམས་ཅད་ལ་དབང་བསྒྱུར་བ་ཐོབ་པ་དང་། བསམ་པ་ཇི་ལྟ་བ་བཞིན་དུ་སྨོན་ལམ་ཡོངས་སུ་རྫོགས་པ་ཐོབ་པ་དང་། སངས་རྒྱས་ཀྱི་ཆོས་ཐམས་ཅད་མཚན་ཉིད་གཅིག་ཏུ་མོས་པས་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རབ་ཏུ་རྟོགས་པ་སྟེ། བཅུ་གང་ཞེ་ན་འདི་ལྟར་ཆོས་ཐམས་ཅད་ལ་ཚུལ་གཅིག་ཏུ་རྟོགས་པ་དང་། ཆོས་ཐམས་ཅད་ལ་ཚུལ་ཐ་དད་པར་རྟོགས་པ་དང་། ཆོས་ཐམས་ཅད་ལ་མཚན་ཉིད་གཅིག་ཏུ་རྟོགས་པ་དང་། སེམས་ཅན་གྱི་སེམས་དང་། བསམ་པ་ཐམས་ཅད་ལ་ཆགས་པ་མེད་པའི་ཡེ་ཤེས་སུ་རྟོགས་པ་དང་། སེམས་ཅན་ཐམས་ཅད་ཀྱི་དབང་པོ་མཉམ་པ་ཉིད་དུ་རྟོགས་པ་དང་། སེམས་ཅན་ཐམས་ཅད་ཀྱི་ཉོན་མོངས་པ་དང་། བག་ཆགས་ཀྱི་སྤྱོད་པ་རྟོགས་པ་དང་། སེམས་ཅན་ཐམས་ཅད་ཀྱི་བསམ་པ་དང་། བག་ལ་ཉལ་བའི་སྤྱོད་པ་རྟོགས་པ་དང་། སེམས་ཅན་ཐམས་ཅད་ཀྱི་དགེ་བ་དང་། མི་དགེ་བའི་སྤྱོད་པ་ཐམས་ཅད་རྟོགས་པ་དང་། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་དང་རྣམ་པར་རྩེ་བ་དང་། འཕྲུལ་པ་དང་། བྱིན་གྱི་རླབས་ཐམས་ཅད་རྟོགས་པ་དང་། དེ་བཞིན་གཤེགས་པའི་སྟོབས་བཅུ་མ་ལུས་པར་མངོན་པར་སངས་རྒྱས་པའི་བྱིན་གྱི་རླབས་རྟོགས་པའོ། །
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྟོགས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ཀྱི་ཚུལ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཤུགས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་ཀྱི་རང་བཞིན་ལ་འཇུག་པའི་སྟོབས་ཀྱི་ཤུགས་དང་། ཆོས་ཐམས་ཅད་སྤྲུལ་པ་ལྟ་བུའི་སྟོབས་ཀྱི་ཤུགས་དང་། ཆོས་ཐམས་ཅད་སྒྱུ་མ་ལྟ་བུའི་སྟོབས་ཀྱི་ཤུགས་དང་། ཆོས་ཐམས་ཅད་ལ་སངས་རྒྱས་ཀྱི་ཆོས་སུ་འཇུག་པའི་སྟོབས་ཀྱི་ཤུགས་དང་། ཆོས་ཐམས་ཅད་ལ་མངོན་པར་ཆགས་པ་མེད་པའི་སྟོབས་ཀྱི་ཤུགས་དང་། སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་མོས་པའི་སྟོབས་ཀྱི་ཤུགས་དང་། དགེ་བའི་བཤེས་གཉེན་ཐམས་ཅད་ལ་ཤིན་ཏུ་གུས་པའི་བསམ་པ་མི་གཏོང་བའི་སྟོབས་ཀྱི་ཤུགས་དང་། དགེ་བའི་རྩ་བ་ཐམས་ཅད་ཀྱིས་ཡེ་ཤེས་ཀྱི་རྒྱལ་པོ་ཆེན་པོ་མཉེས་པར་བྱེད་པའི་སྟོབས་ཀྱི་ཤུགས་དང་། སངས་རྒྱས་ཀྱི་ཆོས་ཐམས་ཅད་ལ་ཟབ་པར་ཡིད་ཆེས་པས་མི་སྤངས་པའི་སྟོབས་ཀྱི་ཤུགས་དང་། ཐམས་ཅད་མཁྱེན་པ་ཉིད་ཀྱི་སེམས་ལས་མྱི་ལྡོག་པར་མཁས་པའི་སྟོབས་ཀྱི་ཤུགས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཤུགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྟོབས་བཅུ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མཉམ་པ་ཉིད་དེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ལ་མཉམ་པ་ཉིད་དང་། ཆོས་ཐམས་ཅད་ལ་མཉམ་པ་ཉིད་དང་། སངས་རྒྱས་ཀྱི་ཞིང་ཐམས་ཅད་ལ་མཉམ་པ་ཉིད་དང་། ལྷག་པའི་བསམ་པ་ཐམས་ཅད་ལ་མཉམ་པ་ཉིད་དང་། དགེ་བའི་རྩ་བ་
ཐམས་ཅད་ལ་མཉམ་པ་ཉིད་དང་། བྱང་ཆུབ་སེམས་དཔའ་ཐམས་ཅད་ལ་མཉམ་པ་ཉིད་དང་། སྨོན་ལམ་ཐམས་ཅད་ལ་མཉམ་པ་ཉིད་དང་། ཕ་རོལ་ཏུ་ཕྱིན་པ་ཐམས་ཅད་ལ་མཉམ་པ་ཉིད་དང་། སྤྱོད་པ་ཐམས་ཅད་ལ་མཉམ་པ་ཉིད་དང་། སངས་རྒྱས་ཐམས་ཅད་ལ་མཉམ་པ་ཉིད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མཉམ་པ་ཉིད་དེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་མཉམ་པ་ཉིད་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཀྱི་ཚུལ་གྱི་ལམ་རྣམས་ཏེ། བཅུ་གང་ཞེ་ན་འདི་ལྟར་ཆོས་ཐམས་ཅད་ནི་མིང་ཙམ་མོ། །ཆོས་ཐམས་ཅད་ནི་སྒྱུ་མ་ལྟ་བུའོ། །ཆོས་ཐམས་ཅད་ནི་མིག་ཡོར་ལྟ་བུའོ། །ཆོས་ཐམས་ཅད་ནི་རྟེན་པ་ཙམ་མོ། །ཆོས་ཐམས་ཅད་ནི་ལས་དང་བྲལ་བའོ། །ཆོས་ཐམས་ཅད་ནི་མི་ཟད་པའི་སྦྱོར་བའོ། །ཆོས་ཐམས་ཅད་ནི་ཡང་དག་པའི་མཐའ་འོ། །ཆོས་ཐམས་ཅད་ནི་མཚན་མ་མེད་པའོ། །ཆོས་ཐམས་ཅད་ནི་དོན་དམ་པའོ། །ཆོས་ཐམས་ཅད་ནི་ཆོས་ཀྱི་དབྱིངས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཀྱི་ཚུལ་གྱི་ལམ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་གྱི་ཚུལ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་བསྟན་པ་སྟེ། བཅུ་གང་ཞེ་ན་འདི་ལྟར་ཟབ་མོའི་ཆོས་བསྟན་པ་དང་། ཡངས་པའི་ཆོས་བསྟན་པ་དང་། སྣ་ཚོགས་ཀྱི་ཆོས་བསྟན་པ་དང་། ཐམས་ཅད་མཁྱེན་པ་ཉིད་བརྗོད་པ་མང་པོའི་ཆོས་བསྟན་པ་དང་། ཕ་རོལ་ཏུ་ཕྱིན་པ་དང་ལྡན་པའི་ཆོས་བསྟན་པ་དང་། དེ་བཞིན་གཤེགས་པའི་སྟོབས་མངོན་པར་
བསྒྲུབ་པའི་ཆོས་བསྟན་པ་དང་། དུས་གསུམ་དང་ལྡན་པའི་ཆོས་བསྟན་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔས་བྱ་བའི་ཆོས་བསྟན་པ་དང་། སངས་རྒྱས་ཀྱི་ཡོན་ཏན་དང་། ལེགས་པ་རབ་ཏུ་བརྗོད་པའི་ཆོས་བསྟན་པ་དང་། བྱང་ཆུབ་སེམས་དཔའི་བསླབ་པ་ཐམས་ཅད་དང་། སངས་རྒྱས་ཐམས་ཅད་ཀྱི་མཉམ་པ་ཉིད་དང་། དེ་བཞིན་གཤེགས་པ་ཐམས་ཅད་ལ་དམིགས་པ་དང་ལྡན་པའི་ཆོས་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་བསྟན་པ་སྟེ་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་རྣམས་ཀྱི་ཆོས་བསྟན་པ་ཆེན་པོ་བླ་ན་མེད་པ་སྟོན་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡོངས་སུ་གཟུང་བ་སྟེ། བཅུ་གང་ཞེ་ན་འདི་ལྟར་དགེ་བའི་རྩ་བ་དང་། བསོད་ནམས་ཀྱི་ཚོགས་རྣམས་ཡོངས་སུ་གཟུང་བ་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པའི་ཆོས་བསྟན་པ་རྣམས་ཡོངས་སུ་གཟུང་བ་དང་། དཔེ་དང་མཐུན་པར་བསྟན་པ་ཐམས་ཅད་ཡོངས་སུ་གཟུང་བ་དང་། ཆོས་ཀྱི་ཚུལ་དང་། སྒོ་ཐམས་ཅད་ཡོངས་སུ་གཟུང་བ་དང་། གཟུངས་ཐམས་ཅད་མངོན་པར་བསྒྲུབ་པའི་སྒོ་རྣམས་ཡོངས་སུ་གཟུང་བ་དང་། ཐེ་ཙོམ་ཐམས་ཅད་ཡོངས་སུ་གཅོད་པ་རྣམས་ཡོངས་སུ་གཟུང་བ་དང་། བྱང་ཆུབ་སེམས་དཔའི་བསྒྲུབ་པ་ཐམས་ཅད་ཡོངས་སུ་གཟུང་བ་དང་། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཏིང་ངེ་འཛིན་ཤིན་ཏུ་བསྟན་པའི་སྒོ་རྣམས་ཡོངས་སུ་གཟུང་བ་དང་། ཆོས་སྣང་བའི་སྒོ་ཐམས་ཅད་ཡོངས་སུ་གཟུང་བ་དང་། སངས་རྒྱས་ཐམས་ཅད་ཀྱི་རྣམ་པར་སྤྲུལ་པ་དང་། རྣམ་པར་རོལ་པ་དང་། བྱིན་གྱི་རླབས་རྣམས་ཡོངས་སུ་གཟུང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་
སེམས་དཔའ་རྣམས་ཀྱི་ཡོངས་སུ་གཟུང་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཡོངས་སུ་གཟུང་བའོ། །བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་སྟེ། བཅུ་གང་ཞེ་ན་འདི་ལྟར་ཆོས་ཐམས་ཅད་ལ་རྣམ་པར་མ་བརྟགས་པའི་སྤོབས་པ་དང་། ཆོས་ཐམས་ཅད་ལ་མངོན་པར་འདུ་བྱེད་པ་མེད་པའི་སྤོབས་པ་དང་། ཆོས་ཐམས་ཅད་ལ་མི་གནས་པའི་སྤོབས་པ་དང་། ཆོས་ཐམས་ཅད་ལ་སྟོང་པ་ཉིད་དུ་སྣང་བའི་སྤོབས་པ་དང་། ཆོས་ཐམས་ཅད་ལ་མུན་པ་མེད་པའི་སྤོབས་པ་དང་། ཆོས་ཐམས་ཅད་ལ་སངས་རྒྱས་ཀྱི་བྱིན་གྱི་རླབས་ཀྱི་སྤོབས་པ་དང་། ཆོས་ཐམས་ཅད་ལ་གཞན་གྱི་དྲིང་མི་འཇོག་པའི་སྤོབས་པ་དང་། ཆོས་ཐམས་ཅད་ལ་ཚིག་གི་བྱེ་བྲག་མཁས་པའི་སྤོབས་པ་དང་། ཆོས་ཐམས་ཅད་ལ་དེ་ཁོ་ན་ཉིད་བསྟན་པའི་སྤོབས་པ་དང་། སེམས་ཅན་གྱི་སེམས་དང་། སྤྱོད་པ་ཐམས་ཅད་ལ་བསམ་པ་ཇི་ལྟ་བ་བཞིན་དུ་ཚིམ་པར་བྱེད་པའི་སྤོབས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤོབས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་སྤོབས་པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱེད་ཅིང་འདུལ་བའི་ཡེ་ཤེས་ཀྱི་དབང་དང་། ཆོས་ཐམས་ཅད་སྣང་བ་རབ་ཏུ་འཐོབ་པའི་དབང་དང་དགེ་བའི་རྩ་བ་ཐམས་ཅད་ལ་སྤྱོད་པའི་དབང་དང་ཡེ་ཤེས་ཆེན་པོའི་དབང་དང་མི་གནས་པའི་ཚུལ་ཁྲིམས་ཀྱི་དབང་དང་། དགེ་བའི་རྩ་བ་ཐམས་ཅད་བྱང་ཆུབ་ཏུ་ཡོངས་སུ་བསྔོ་བའི་དབང་དང་། བརྩོན་འགྲུས་བརྩམས་པ་ཐམས་
ཅད་ལས་ཕྱིར་མི་ལྡོག་པའི་ཡེ་ཤེས་ཀྱི་དབང་དང་། བདུད་ཐམས་ཅད་ཤིན་ཏུ་ཕམ་པར་བྱ་བའི་ཡེ་ཤེས་ཀྱི་དབང་དང་། གང་དུ་དགའ་བར་འགྲོ་བར་བྱང་ཆུབ་ཀྱི་སེམས་བསྐྱེད་པའི་ཡེ་ཤེས་ཀྱི་དབང་དང་། སངས་རྒྱས་ཐམས་ཅད་ཀྱི་བྱང་ཆུབ་ནམ་འདོད་པ་ན་མངོན་པར་རྫོགས་པར་འཚང་རྒྱ་བའི་ཡེ་ཤེས་ཀྱི་དབང་པོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་དབང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་གནས་པ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་ལ་མི་གནས་པ་དང་། སེམས་ཅན་ཐམས་ཅད་ལ་མི་གནས་པ་དང་། ཆོས་ཐམས་ཅད་ལ་མི་གནས་པ་དང་། བྱ་བ་ཐམས་ཅད་ལ་མི་གནས་པ་དང་། དགེ་བའི་རྩ་བ་ཐམས་ཅད་ལ་མི་གནས་པ་དང་། སྐྱེ་བའི་སྐྱེ་མཆེད་ཐམས་ཅད་ལ་མི་གནས་པ་དང་། སྨོན་ལམ་ཐམས་ཅད་ལ་མི་གནས་པ་དང་། སྤྱོད་པ་ཐམས་ཅད་ལ་མི་གནས་པ་དང་། བྱང་ཆུབ་སེམས་དཔའ་ཐམས་ཅད་ལ་མི་གནས་པ་དང་། སངས་རྒྱས་ཐམས་ཅད་ལ་མི་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མི་གནས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སེམས་ཡངས་པར་བསྒྱུར་བ་ཡོངས་སུ་ཤེས་པའི་ཡེ་ཤེས་ཡོངས་སུ་དག་ཅིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་མཉམ་པ་ཉིད་དེ། བཅུ་གང་ཞེ་ན་འདི་ལྟར་བསོད་ནམས་ཐམས་ཅད་བསྩགས་པ་ལ་སེམས་མཉམ་པ་ཉིད་དང་། སྨོན་ལམ་རྣམ་པ་ཐ་དད་པས་འབྱུང་བ་ཐམས་ཅད་ལ་སེམས་མཉམ་པ་ཉིད་དང་། སེམས་ཅན་གྱི་རིགས་ཐམས་ཅད་ལ་སེམས་མཉམ་པ་ཉིད་དང་། སེམས་
ཅན་གྱི་ལས་རྣམ་པར་སྨིན་པ་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། ཆོས་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། ཞིང་ཀུན་ནས་ཉོན་མོངས་པ་དང་། རྣམ་པར་དག་པ་ཐམས་ཅད་ལ་སེམས་མཉམ་པ་ཉིད་དང་། སེམས་ཅན་གྱི་མོས་པ་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། སྤྱོད་པའི་རྣམ་པར་རྟོག་པ་ཐམས་ཅད་ལ་སེམས་མཉམ་པ་ཉིད་དང་། སངས་རྒྱས་ཀྱི་སྟོབས་དང་མི་བསྙེངས་པ་ལ་འཇུག་པ་ཐམས་ཅད་ལ་སེམས་མཉམ་པ་ཉིད་དང་། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་འཇུག་པ་ཁོང་དུ་ཆུད་པར་བྱ་བ་ལ་སེམས་མཉམ་པ་ཉིད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་མཉམ་པ་ཉིད་དེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགོངས་པ་མཉམ་པ་ཉིད་རྒྱ་ཆེ་ཞིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་མངོན་པར་བསྒྲུབ་པ་སྟེ། བཅུ་གང་ཞེ་ན་འདི་ལྟར་སེམས་ཅན་གྱི་ཁམས་ཐམས་ཅད་ཀྱི་མོས་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། སངས་རྒྱས་ཀྱི་ཞིང་སྣ་ཚོགས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཕྱོགས་ཀྱི་དྲ་བ་རྣམ་པར་དབྱེ་བ་ཐམས་ཅད་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། འཇིག་རྟེན་གྱི་ཁམས་སྤྱིའུ་ཚུགས་སུ་རྒྱུ་བ་དང་སྣྲེལ་ཞིར་རྒྱུ་བ་ཐམས་ཅད་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཐམས་ཅད་གཅིག་པ་དང་། ཐ་དད་པའི་འབྱམ་ཀླས་པར་རྣམ་པར་དགོད་པ་ལ་མཁས་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ལུས་ཀྱི་རྒྱུད་ཐམས་ཅད་ཁོང་དུ་ཆུད་པར་བྱ་བ་ལ་འཇུག་པར་ཞུགས་པའི་ཡེ་ཤེས་མངོན་པར་བསྒྲུབ་པ་དང་།
འདུ་ཤེས་ཀྱིས་ཕྱིན་ཅི་ལོག་ཏུ་གྱུར་པའི་འཇིག་རྟེན་གྱི་རྣམ་པའི་འདུ་ཤེས་དང་། རློམ་སེམས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཀྱི་རྒྱུད་ཐམས་ཅད་ལ་འབྱུང་བ་གཅིག་གི་མཐར་ཐུག་པར་འཇུག་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། ཆོས་ཀྱི་དབྱིངས་ཐམས་ཅད་ཀྱི་དེ་བཞིན་གཤེགས་པའི་རྣམ་པར་འཕྲུལ་པ་དང་། བྱིན་གྱི་རླབས་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པ་དང་། འགྲོ་བ་ཐམས་ཅད་ཀྱི་དུས་གསུམ་དུ་འདུས་པའི་སངས་རྒྱས་ཀྱི་རིགས་ཐམས་ཅད་རྒྱུན་མི་གཅོད་པ་ཁོང་དུ་ཆུད་པར་བྱ་བ་ལ་ཞུགས་པའི་ཡེ་ཤེས་མངོན་པར་བསྒྲུབ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་མངོན་པར་བསྒྲུབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་གང་ལ་ཡང་མགོ་རྨོངས་པར་མི་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྲུལ་པ་སྟེ། བཅུ་གང་ཞེ་ན་འདི་ལྟར་སེམས་ཅན་སྤྲུལ་པ་དང་། ལུས་སྤྲུལ་པ་དང་། ཞིང་སྤྲུལ་པ་དང་། མཆོད་པ་སྤྲུལ་པ་དང་། དབྱངས་སྤྲུལ་པ་དང་། སྤྱོད་པ་དང་སྨོན་ལམ་སྤྲུལ་པ་དང་། སེམས་ཅན་ཡོངས་སུ་སྨིན་པར་བྱ་བ་དང་གདུལ་བ་སྤྲུལ་པ་དང་། མངོན་པར་རྫོགས་པར་བྱང་ཆུབ་པ་སྤྲུལ་པ་དང་། ཆོས་བསྟན་པ་སྤྲུལ་པ་དང་། བྱིན་གྱི་རླབས་སྤྲུལ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྲུལ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་སྤྲུལ་པ་ཡོངས་སུ་རྫོགས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱིན་གྱི་རླབས་ཏེ། བཅུ་གང་ཞེ་ན་འདི་ལྟར་སངས་རྒྱས་ཀྱི་བྱིན་གྱི་རླབས་དང་། ཆོས་ཀྱི་བྱིན་གྱི་
རླབས་དང་། སེམས་ཅན་གྱི་བྱིན་གྱི་རླབས་དང་། ལས་ཀྱི་བྱིན་གྱི་རླབས་དང་། སྤྱོད་པའི་བྱིན་གྱི་རླབས་དང་། སྨོན་ལམ་གྱི་བྱིན་གྱི་རླབས་དང་། སྤྱོད་ཡུལ་གྱི་བྱིན་གྱི་རླབས་དང་། དུས་ཀྱི་བྱིན་གྱི་རླབས་དང་། དགེ་བའི་བྱིན་གྱི་རླབས་དང་། ཡེ་ཤེས་ཀྱི་བྱིན་གྱི་རླབས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱིན་གྱི་རླབས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་དབང་བསྒྱུར་བའི་བྱིན་གྱི་རླབས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤིན་ཏུ་དབུགས་ཕྱིན་པ་རབ་ཏུ་རྙེད་པ་བཅུ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། མ་འོངས་པའི་དུས་ན་དེ་བཞིན་གཤེགས་པ་གང་ཇི་སྙེད་ཅིག་འབྱུང་བར་འགྱུར་བ་དེ་དག་ཐམས་ཅད་མཉེས་པར་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་སངས་རྒྱས་ཀྱི་ཚུལ་དང་འདྲ་བའི་རིམ་གྲོ་བླ་ན་མེད་པ་བྱའོ། །མཆོད་པ་དང་བསྙེན་བཀུར་བླ་ན་མེད་པ་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཆོད་ནས་ཀྱང་གདམས་ངག་གང་གིས་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སར་བྱུང་བར་གྱུར་པ་དང་། འབྱུང་བ་དང་འབྱུང་བར་འགྱུར་བ་དེ་ལྟ་བུའི་གདམས་ངག་དང་མན་ངག་བསྟན་པ་མཛད་ཀྱིས་གདམས་ངག་དང་མན་ངག་དེའང་བདག་གིས་བསམ་པ་ཐག་པས་རིམ་གྲོ་བྱས་ཏེ། མཉན་ལ་ཡང་དག་པར་ནན་ཏན་ཏུ་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་
བྱང་ཆུབ་སེམས་དཔའ་འདི་སྙམ་དུ་སེམས་ཏེ། བདག་བསྐལ་པ་བརྗོད་དུ་མེད་པར་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་རྣམས་དང་མི་འབྲལ་བར་འགྱུར་རོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། སྔོན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མ་ཞུགས་པའི་ཚེ། འདི་ལྟ་སྟེ། འཚོ་བ་མེད་པའི་འཇིགས་པའམ། གྲགས་པ་མེད་པའི་འཇིགས་པའམ། འཆི་བའི་འཇིགས་པའམ། ངན་སོང་གི་འཇིགས་པའམ། འཁོར་དུ་བག་ཚ་བའི་འཇིགས་པའང་རུང་སྟེ། ཇི་སྙེད་ཀྱི་འཇིགས་པར་གྱུར་པ་དེ་དག་ཐམས་ཅད་ནི་རྣམ་པར་བཟློག་པར་གྱུར། རིང་དུ་བྱས་པར་གྱུར་རྣམ་པར་བཅིལ་བར་གྱུར་ཏེ། བྱང་ཆུབ་ཀྱི་སེམས་བསྐྱེད་མ་ཐག་ཏུ་ཅིས་ཀྱང་མི་འཇིགས་པར་གྱུར་ཏོ། །མི་སྔངས་པར་གྱུར་ཏོ། །སྐྱི་གཡའ་བ་མེད་པར་གྱུར་ཏོ། །ཅིས་ཀྱང་འཇིགས་པར་མི་འགྱུར་རོ། །སྔངས་པར་མི་འགྱུར་རོ། །སྐྱི་གཡའ་བར་མི་འགྱུར་རོ། །དེ་བས་ན་བརྟན་ཞིང་རྣམ་པར་གནོན་ལ་ཟིལ་གྱིས་མི་ནོན་པས་བདུད་དང་མུ་སྟེགས་ཅན་དང་། ཕས་ཀྱི་རྒོལ་བ་ཐམས་ཅད་ཀྱིས་མི་ཐུབ་པར་གྱུར་ཏོ། །ཞེས་དབུགས་ཕྱིན་པ་ཆེན་པོ་རབ་ཏུ་ཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་བསྐྱེད་དེ། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་གྱི་ཁམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱའོ། །རབ་ཏུ་དགོད་པར་བྱའོ། །དེ་དག་བྱང་ཆུབ་ཐོབ་པར་གྱུར་ནས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་དད་པ་ཆེན་པོ་དང་ལྡན་པའི་སེམས་བསྐྱེད་པས་ཚེའི་ཚད་ཀྱི་མཐར་ཐུག་གི་བར་དུ་སངས་རྒྱས་ལ་འོས་པའི་རིམ་གྲོས་མཆོད་པ་དང་།
བཀུར་སྟི་བྱའོ། །དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང་སྐུ་གཟུགས་ལ་མཆོད་པའི་ལས་ཀྱི་ཕྱིར་མཆོད་རྟེན་ཚད་མེད་པ་མང་པོ་བྱའོ། །དེ་དག་གི་བསྟན་པ་ཡང་ཡོངས་སུ་བསྲུང་བར་བྱའོ། །དེ་དག་གི་དམ་པའི་ཆོས་ཀྱང་ཡོངས་སུ་བཟུང་བ་བླ་ན་མེད་པས་ཡོངས་སུ་གཟུང་བར་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། འཇིག་རྟེན་གྱི་ཁམས་ཐམས་ཅད་བླ་ན་མེད་པའི་མཛེས་པས་བརྒྱན་པར་བྱ། སྤུད་པར་བྱ། ཀླུབ་པར་བྱ། ཡོངས་སུ་སྦྱང་བར་བྱ། མཉམ་པར་བྱ། བསྒྱུར་བར་བྱ། བྱིན་གྱིས་བརླབ་པར་བྱ། བསྐྱོད་པར་བྱ། སྣང་བར་བྱ། རྫུ་འཕྲུལ་དང་རྣམ་པར་འཕྲུལ་པས་དགང་བར་བྱའོ་ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། སེམས་ཅན་ཐམས་ཅད་ཀྱི་ཐེ་ཙོམ་གཅད་པར་བྱའོ། །ནེམ་ནུར་གཅད་པར་བྱའོ། །བསམ་པ་ཡོངས་སུ་སྦྱང་བར་བྱའོ། །སེམས་ཁོང་དུ་ཆུད་པར་བྱའོ། །ཉོན་མོངས་པ་རྣམ་པར་བཟློག་པར་བྱའོ། །ངན་སོང་གི་སྒོ་གཅད་པར་བྱའོ། །བདེ་བའི་ལམ་གྱི་སྒོ་དབྱེ་བར་བྱའོ། །མུན་པ་རྣམ་པར་བསྩལ་བར་བྱའོ། །འོད་ཀྱིས་སྣང་བར་བྱའོ། །བདུད་ཐམས་ཅད་དང་བདུད་ཀྱི་ལས་རྣམས་རབ་ཏུ་གདུལ་བར་བྱའོ། །བླ་ན་མེད་པའི་བདེ་བ་ཆེན་པོ་འཐོབ་པ་འགྲོ་བ་ཐམས་ཅད་དུ་ཡང་དག་པར་བསྟན་པར་བྱའོ། །རབ་ཏུ་བསྐྱེད་པར་བྱའོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་གིས་སངས་རྒྱས་མཐོང་བ་ནི་དོན་ཡོད་པ་སྟེ། ཇི་ཙམ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བལྟ་བར་འདོད་པ་
དེ་ཙམ་ན་མཐོང་བར་འགྱུར་གྱིས། བདག་གིས་སངས་རྒྱས་མཐོང་བ་ནི་རྒྱུན་ཆད་པར་མི་འགྱུར་རོ། །དེ་བཞིན་གཤེགས་པ་མངོན་དུ་འགྱུར་བ་ནི་རྒྱུན་ཆད་པར་མི་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཨུ་དུམ་ཝ་རའི་མེ་ཏོག་ལྟ་བུར་བསྐལ་པ་ཐམས་ཅད་དུ་སྐྱེ་ཞིང་མཐོང་བར་དཀའ་བ་རྣམས་ལས་ཆོས་མཉན་པའང་རྒྱུན་མི་འཆད་པར་འགྱུར་ཏེ། དེ་ལྟར་བདག་གིས་བསམ་པ་ཡོངས་སུ་དག་པས་སེམས་བསྐྱེད་པ། གཡོ་ཐམས་ཅད་ཡོངས་སུ་སྤངས་པ་དྲང་བའི་ངང་ཚུལ་དང་ལྡན་པ་སྒྱུའི་རྣམ་པ་མེད་པས་སེམས་ཀྱི་སྐད་ཅིག་རེ་རེ་ལ་སངས་རྒྱས་མཐོང་བའི་བྱིན་གྱི་རླབས་དང་ལྡན་པར་འགྱུར་རོ། །ཞེས་དབུགས་ཕྱིན་པ་ཆེན་པོ་རབ་ཏུ་འཐོབ་བོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བ་དེའི་ཚེ། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་རྣམ་པར་འཕྲུལ་པས་རྒྱས་པར་དགང་ངོ་། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་ཀྱང་འགྲོ་བ་ཐམས་ཅད་རེ་རེར་སངས་རྒྱས་སྐྱེ་བ་ཡོངས་སུ་བསྟན་པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་ཆོས་ཀྱི་རྔ་ཆེན་པོ་བརྡུང་བར་བྱའོ། །ཆོས་ཀྱི་སྤྲིན་གྱི་ཆར་ཆེན་པོ་མངོན་པར་དབབ་པ་དང་། ཆོས་ཀྱི་སྦྱིན་པ་ཆེན་པོ་སྦྱིན་པ་དང་། མི་འཇིགས་པ་ཆེན་པོ་རྣམ་པར་དག་པར་བྱ་བའི་ཕྱིར། སེང་གེའི་ང་རོ་ཆེན་པོས་རྣམ་པར་སྤེལ་བའི་སྨོན་ལམ་ཆེན་པོས་ཆོས་ཀྱི་དབྱིངས་སུ་གནས་པའི་བསྐལ་པར་ཆོས་བསྟན་པར་བྱའོ། །འོན་ཀྱང་སྙིང་རྗེ་ཆེན་པོའི་བྱིན་གྱི་རླབས་ཀྱིས་བདག་གི་ལུས་ལ་དུབ་པ་མེད་པར་འགྱུར། ངག་དང་སེམས་ལ་དུབ་པ་མེད་པར་འགྱུར་རོ། །ཞེས་དབུགས་ཕྱིན་པ་ཆེན་པོ་རབ་ཏུ་
འཐོབ་བོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་ཕྱིན་པ་ཆེན་པོ་རབ་ཏུ་འཐོབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ལ་མངོན་པར་འཚང་རྒྱ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའི་སངས་རྒྱས་ཀྱི་ཆོས་ཟབ་མོ་ལ་འཇུག་པ་རྣམས་ཏེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་དུ་འདས་པའི་དུས་ལ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་དང་པོའོ། །འཇིག་རྟེན་གྱི་ཁམས་འགྲངས་པ་དེ་དང་དེ་དག་གི་འཇིག་རྟེན་གྱི་ཁམས་ཐམས་ཅད་དུ་མ་འོངས་པའི་དུས་ལ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་གཉིས་པའོ། །འཇིག་རྟེན་གྱི་ཁམས་འགྲངས་པ་དང་འཇིག་རྟེན་གྱི་ཁམས་ཡོད་པ་དང་། འཇིག་རྟེན་གྱི་ཁམས་སུ་བསྟན་པ་དང་། འཇིག་རྟེན་གྱི་ཁམས་ཡོངས་སུ་དག་པ་དང་། འཇིག་རྟེན་གྱི་ཁམས་སུ་ཤེས་པ་གང་ཇི་སྙེད་པའི་འཇིག་རྟེན་གྱི་ཁམས་ཐམས་ཅད་དུ་ད་ལྟར་བྱུང་བའི་དུས་ལ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་གསུམ་པའོ། །འཇིག་རྟེན་གྱི་ཁམས་ཐམས་ཅད་དུ་སྣ་ཚོགས་སུ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་བཞི་པའོ། །སེམས་ཅན་གྱི་ལས་དང་རྣམ་པར་སྨིན་པ་སྣ་ཚོགས་ཐམས་ཅད་ལ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་ལྔ་པའོ། །བྱང་ཆུབ་སེམས་དཔའི་སྤྱོད་པ་སྣ་ཚོགས་ལ་འཇུག་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེ་བཞིན་གཤེགས་པ་འདས་པ་རྣམས་ཀྱི་མཚམས་སྦྱོར་བ་ཤེས་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་
བཅོམ་ལྡན་འདས་མ་བྱོན་པ་རྣམས་ཀྱི་སངས་རྒྱས་གཅིག་ནས་གཅིག་ཏུ་བརྒྱུད་པ་ཤེས་པ་འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་ཀྱིས་ཀླས་ཤིང་ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་རབ་ཏུ་ཤེས་སོ། །འཁོར་གྱི་དཀྱིལ་འཁོར་རབ་ཏུ་ཤེས་སོ། །ཆོས་བསྟན་པ་རབ་ཏུ་ཤེས་སོ། །སེམས་ཅན་འདུལ་བ་རབ་ཏུ་ཤེས་སོ། །དེ་བཞིན་དུ་ཕྱོགས་བཅུ་ཀུན་གྱི་ཡང་རབ་ཏུ་ཤེས་ཏེ། འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འཇིག་རྟེན་གྱི་ཆོས་རབ་ཏུ་ཤེས་སོ། །ཉན་ཐོས་ཀྱི་ཆོས་རབ་ཏུ་ཤེས་སོ། །རང་སངས་རྒྱས་ཀྱི་ཆོས་རབ་ཏུ་ཤེས་སོ། །བྱང་ཆུབ་སེམས་དཔའི་ཆོས་རབ་ཏུ་ཤེས་སོ། །དེ་བཞིན་གཤེགས་པའི་ཆོས་རབ་ཏུ་ཤེས་སོ། །ཆོས་དེ་དག་ལའང་རྣམ་པར་མི་རྟོག་པས་རབ་ཏུ་ཞུགས་ནས་རྣམ་པ་ཐ་དད་པར་སྟོན་ཏེ། ཆོས་དེ་དག་ཀྱང་གཟུང་བ་མེད་པའི་ཚུལ་གྱིས་ཆོས་ཀྱི་དབྱིངས་སུ་འཛུད་དོ། །ཆོས་རྣམས་རྣམ་པར་བརྟག་ཏུ་མེད་པར་ཡང་ཤེས་ལ། ཆོས་དེ་དག་ཇི་ལྟ་བ་དེ་བཞིན་ཏུའང་རབ་ཏུ་སྟོན་ཏེ། འདི་ནི་སངས་རྒྱས་ཀྱི་ཆོས་ཟབ་མོ་ལ་འཇུག་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཟབ་མོ་ལ་འཇུག་པ་བཅུ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གནས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་བྱང་ཆུབ་ཀྱི་སྤྱད་པ་སྤྱོད་དོ། །བཅུ་གང་ཞེ་ན་འདི་ལྟར་སངས་རྒྱས་ཐམས་ཅད་མཆོད་པ་དང་། རིམ་གྲོར་བྱ་བ་ལ་གནས་ཤིང་
བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །དགེ་བའི་བཤེས་གཉེན་ཐམས་ཅད་དགའ་བར་བྱ་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །དགེ་བའི་རྩ་བ་རབ་ཏུ་བསྩགས་པ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །སངས་རྒྱས་ཀྱི་ཞིང་ཡོངས་སུ་དག་པར་བྱ་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །འགྲོ་བ་ཐམས་ཅད་ཡོངས་སུ་མི་གཏང་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །ཕ་རོལ་ཏུ་ཕྱིན་པ་ཐམས་ཅད་ལ་འཇུག་པ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །བྱང་ཆུབ་སེམས་དཔའི་སྨོན་ལམ་ཐམས་ཅད་ཡོངས་སུ་རྫོགས་པར་བྱ་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །བྱང་ཆུབ་ཀྱི་སེམས་ཚད་མེད་པ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །སངས་རྒྱས་ཐམས་ཅད་ཀྱི་མངོན་པར་རྫོགས་པར་འཚང་རྒྱ་བ་ལ་གནས་ཤིང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱིས་གནས་སུ་བྱ་བ་རྣམས་ཏེ། གནས་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྤྱད་པ་སྤྱོད་དོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་བསྟན་པ་སྟེ། བཅུ་གང་ཞེ་ན་འདི་ལྟར་སྒྲིབ་པའི་ལས་ཐམས་ཅད་རྣམ་པར་བཟློག་པའི་ཕྱིར་སེམས་བརྟན་པ་བསྐྱེད་པ་དང་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་
པ་རྣམས་ཀྱི་བསྟན་པ་ཡོངས་སུ་གཟུང་བའི་ཕྱིར་སེམས་བརྟན་པ་བསྐྱེད་པ་དང་། བདུད་ཐམས་ཅད་རབ་ཏུ་ཕམ་པར་བྱ་བའི་ཕྱིར། སེམས་བརྟན་པ་བསྐྱེད་པ་དང་། ལུས་དང་སྲོག་ཐམས་ཅད་ལ་མི་ལྟ་བའི་ཕྱིར་སེམས་བརྟན་པ་བསྐྱེད་པ་དང་། མུ་སྟེགས་ཅན་དང་ཕས་ཀྱི་རྒོལ་བ་ཐམས་ཅད་ཆོས་བཞིན་དུ་ཚར་གཅད་པའི་ཕྱིར་སེམས་བརྟན་པ་བསྐྱེད་པ་དང་། འགྲོ་བ་ཐམས་ཅད་ཡོངས་སུ་ཚིམ་པར་བྱ་བའི་ཕྱིར་སེམས་བརྟན་པ་བསྐྱེད་པ་དང་། འཁོར་གྱི་དཀྱིལ་འཁོར་ཐམས་ཅད་མངོན་པར་དགའ་བར་བྱ་བའི་ཕྱིར། སེམས་བརྟན་པ་བསྐྱེད་པ་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་ཡོངས་སུ་གདུལ་བའི་ཕྱིར་སེམས་བརྟན་པ་བསྐྱེད་པ་དང་། ཆོས་ཟབ་མོ་རྣམ་པར་བསྒོམ་པ་དང་། ཉན་ཐོས་དང་རང་སངས་རྒྱས་ཀྱིས་རྣམ་པར་བཟློག་པའི་ཕྱིར་སེམས་བརྟན་པ་བསྐྱེད་པ་དང་། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་བྱང་ཆུབ་སེམས་དཔའི་སྤྱོད་པ་སྤྱད་པས་མི་སྐྱོ་བའི་རྒྱུད་དུ་བྱ་བའི་ཕྱིར་སེམས་བརྟན་པ་བསྐྱེད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་བརྟན་པ་རྣམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་བརྟན་ཞིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ལ་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་ཐེ་ཙོམ་མེད་ཅིང་ཡིད་གཉིས་མེད་ལ་སོམ་ཉི་མེད་པ་རྣམས་ཏེ། བཅུ་གང་ཞེ་ན་ཀྱེ་རྒྱལ་བའི་སྲས་དེ་ལ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། སེམས་ཅན་ཐམས་ཅད་སྦྱིན་པས་ཡོངས་སུ་བསྡུ་བར་བྱའོ། །ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་།
ཤེས་རབ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱིས་ཡོངས་སུ་བསྡུ་བར་བྱའོ། །སྙམ་ཡང་དེ་ལ་དེ་ནི་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ། དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། མ་འོངས་པའི་དུས་ན་གང་ཇི་སྙེད་དུ་འབྱུང་བར་འགྱུར་བའི་སངས་རྒྱས་ཐམས་ཅད་བླ་ན་མེད་པའི་མཉེས་པར་བྱ་བ་དང་། སངས་རྒྱས་ཐམས་ཅད་མཆོད་ཅིང་བསྙེན་བཀུར་བའི་སེམས་བསྐྱེད་པས་མཉེས་པར་བྱའོ། །སྙམ་ཡང་དེ་ལ་དེ་ནི་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ། དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། འཇིག་རྟེན་གྱི་ཁམས་ཐམས་ཅད་འོད་ཟེར་སྣ་ཚོགས་ཀྱི་དྲ་བའི་རྒྱན་གྱིས་ཡོངས་སུ་རྒྱས་པར་དགང་ངོ་སྙམ་ཡང་དེ་ལ་དེ་ནི་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ་དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། མ་འོངས་པའི་བསྐལ་པའི་མུར་ཐུག་པར་མི་སྐྱོ་བའི་རྒྱུད་གྱི་སེམས་ཅན་ཚད་མེད་པ་ཡོངས་སུ་སྨིན་པར་བྱ་བའི་ཕྱིར། སེམས་ཅན་གྱི་ཁམས་གྲངས་མེད་པ་བསམ་གྱིས་མི་ཁྱབ་པ་མཚུངས་པ་མེད་པ་ཚད་མེད་པ་གཞལ་དུ་མེད་པ་ཀུན་ཏུ་མཐའ་ཡས་པ་མུ་མེད་པས་མཚམས་མེད་པ། བརྗོད་དུ་མེད་པའི་ཡང་བརྗོད་དུ་མེད་པ་གྲངས་དང་བགྲང་བ་ལས་འདས་པ། ཆོས་ཀྱི་དབྱིངས་ཀྱིས་ཀླས་པ་ནམ་མཁའི་དབྱིངས་ཀྱི་མཐས་གཏུགས་པ་ཐམས་ཅད་བླ་ན་མེད་པར་ཡོངས་སུ་སྨིན་པར་བྱ་བ་དང་། བླ་ན་མེད་པའི་རྣམ་པར་གདུལ་
བས་ཡོངས་སུ་སྨིན་པ་དང་། རྣམ་པར་གདུལ་བར་བྱའོ། །སྙམ་ཡང་དེ་ལ་དེ་ནི་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད། ཐེ་ཙོམ་མེད་དེ་དེ་ནི་གནས་མ་ཡིན་ནོ། །འདི་ནི་ཐེ་ཙོམ་ཐམས་ཅད་གཅོད་པའི་སེམས་བསྐྱེད་པ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སྨོན་ལམ་ཐམས་ཅད་ཡོངས་སུ་རྫོགས་པར་བྱའོ། །ཞེས་ནས་དེ་ལ་ནེམ་ནུར་མེད་ཅིང་ཡིད་གཉིས་མེད་པ་དང་། ཐེ་ཙོམ་མེད་པར་གནས་པ་ཡིན་ཏེ། འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་སྟེ། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སངས་རྒྱས་ཀྱི་ཆོས་ཐམས་ཅད་སྣང་བར་གྱུར་པས་ཆོས་ཐམས་ཅད་མངོན་དུ་གྱུར་པར་འགྱུར་རོ། །སྙམ་ཡང་དེ་ལ་དེ་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ། དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་སྟེ། འདི་ལྟར་སེམས་ཅན་ཐམས་ཅད་ཀྱི་སེམས་ཁོང་དུ་ཆུད་པར་བྱ་བའི་ཕྱིར། ཆོས་ཐམས་ཅད་སངས་རྒྱས་ཀྱི་ཆོས་སུ་མོས་པར་བྱའོ། །སྙམ་ཡང་དེ་ལ་དེ་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ། དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆགས་པ་མེད་པའི་ཆོས་ཀྱི་སྒོ་ཐམས་ཅད་ཆགས་པ་ཐམས་ཅད་མི་དམིགས་པས་རབ་ཏུ་ཤེས་ཤིང་། དེ་ལ་ནེམ་ནུར་མེད་ཡིད་གཉིས་མེད་ཐེ་ཙོམ་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཀྱི་བར་དུ་ཡང་དག་པ་ཉིད་ལ་གནས་པ། འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་བརྒྱད་པའོ། །ཀྱེ་རྒྱལ་བའི་སྲས་
གཞན་ཡང་བྱང་ཆུབ་སེམས་དཔས་ཆོས་ཐམས་ཅད་འདུ་ཤེས་ཀྱི་ཕྱིན་ཅི་ལོག་རབ་ཏུ་སྤངས་པ་དང་། བླང་བ་མེད་ཅིང་དོར་བ་མེད་པའི་ཚུལ་གྱིས་འཇིག་རྟེན་ལས་འདས་པའི་ཆོས་སུ་ཤེས་ཏེ། དེ་ལ་གཞན་གྱི་དྲིང་མི་འཇོག་ཅིང་ནེམ་ནུར་མེད་དེ་ཡིད་གཉིས་མེད་ལ་ཐེ་ཙོམ་མེད་པ་ཡིན་ཏེ། འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་ཏུ་སེམས་ཏེ། འདུ་ཤེས་ཕྱིན་ཅི་ལོག་ཐམས་ཅད་རབ་ཏུ་སྤངས་པའི་སེམས་སྐད་ཅིག་གཅིག་གི་ཡེ་ཤེས་གཅིག་དང་གཉིས་སུ་མི་དམིགས་པ་བགྲང་བ་ཐམས་ཅད་དང་བྲལ་བ། འདུས་མ་བྱས་ལ་ཤིན་ཏུ་གཞོལ་བ། བརྗོད་པ་ཐམས་ཅད་རབ་དུ་སྤངས་པ་སྤྱོད་ཡུལ་བརྗོད་ཏུ་མེད་པའི་མཐར་ཕྱིན་པས་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་བྱའོ། །སྙམ་ཡང་དེ་ལ་དེ་དེ་ལྟར་མི་འགྱུར་སྙམ་པའི་ནེམ་ནུར་མེད་ཡིད་གཉིས་མེད་ཐེ་ཙོམ་མེད་དེ་དེ་ནི་གནས་མ་ཡིན་ནོ། །འདི་ནི་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་བཅུ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ལ་ནེམ་ནུར་ཐམས་ཅད་གཅོད་པའི་སེམས་བསྐྱེད་པ་ཐེ་ཙོམ་མེད་ཅིང་ཡིད་གཉིས་མེད་ལ་སོམ་ཉི་མེད་པ་རྣམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་ནེམ་ནུར་མེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསམ་གྱིས་མི་ཁྱབ་པ་ཉིད་དེ། བཅུ་གང་ཞེ་ན། འདི་ལྟར་དགེ་བའི་རྩ་བ་ཐམས་ཅད་ལ་བསམ་གྱིས་མི་ཁྱབ་པ་ཡིན། སྨོན་ལམ་ཐམས་ཅད་ལ་བསམ་གྱིས་མི་ཁྱབ་པ་ཡིན། ཆོས་ཐམས་ཅད་སྒྱུ་མ་ལྟ་བུར་འཇུག་པ་ལ་བསམ་གྱིས་མི་ཁྱབ་པ་ཡིན། བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། བྱང་ཆུབ་ཏུ་སེམས་བསྐྱེད་པ་
ལ་གནས་པའི་དགེ་བའི་རྩ་བ་ཆུད་མི་ཟ་ཞིང་རྟོག་པ་མེད་པ་དང་། རྣམ་པར་རྟོག་པ་མེད་པ་ལ་བསམ་གྱིས་མི་ཁྱབ་པ་ཡིན། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཟབ་མོའི་ཆོས་ཐམས་ཅད་ལ་འང་རབ་ཏུ་འཇུག་ལ། སྨོན་ལམ་ཐམས་ཅད་ཡོངས་སུ་རྫོགས་ཀྱི་བར་དུ་ཡོངས་སུ་མྱ་ངན་ལས་ཀྱང་མི་འདའ་བ་འདི་ནི་བསམ་གྱིས་མི་ཁྱབ་པ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། མངལ་དུ་འགྲོ་བ་དང་སྐྱེ་བ་དང་གོམ་པ་བདུན་དུ་འགྲོ་བ་དང་། བཙུན་མོའི་འཁོར་གྱི་ནང་ན་གནས་པ་དང་། མངོན་པར་འབྱུང་བ་དང་། དཀའ་བ་སྤྱད་པའི་སྦྱོར་བ་དང་། སྙིང་པོ་བྱང་ཆུབ་ཏུ་འགྲོ་བ་དང་། བདུད་འདུལ་བ་དང་། རྣམ་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བ་དང་། སངས་རྒྱས་ཀྱི་རྣམ་པར་འཕྲུལ་པའི་བྱིན་གྱི་རླབས་ཐམས་ཅད་ཡོངས་སུ་སྟོན་ཅིང་སྙིང་རྗེ་ཆེན་པོ་དང་འགྲོ་བ་ཐམས་ཅད་ཡོངས་སུ་སྐྱོབ་པའི་སྨོན་ལམ་གྱི་བར་གྱིས་ཡོངས་སུ་རྒྱུན་མི་གཅོད་པ་འདི་ནི་བསམ་གྱིས་མི་ཁྱབ་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཀྱི་དབྱིངས་ཀྱིས་ཀླས་པར་སེམས་བསྐྱེད་པས་དེ་བཞིན་གཤེགས་པའི་སྟོབས་བཅུ་དང་། བྱིན་གྱི་རླབས་རྣམས་ཀྱང་ཡང་དག་པར་སྟོན་ལ་སེམས་ཅན་ཡོངས་སུ་སྨིན་པར་བྱ་བ་ཡང་རྒྱུན་མི་གཅོད་པ་འདི་ནི་བསམ་གྱིས་མི་ཁྱབ་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་མཚན་མ་མེད་པ་ལ་མཚན་མ་ཡོད་པར་འཇུག །མཚན་མ་ཡོད་པ་ལ་མཚན་མ་མེད་པར་འཇུག་རྟོག་པ་མེད་པ་ལ་རྟོག་པ་ཡོད་པར་སྟོན། རྟོག་པ་ཡོད་པ་ལ་རྟོག་པ་མེད་པར་སྟོན། དངོས་པོ་མེད་པ་ལ་དངོས་པོ་ཡོད་པར་འཇུག །དངོས་པོ་ཡོད་པ་ལ་དངོས་པོ་མེད་པར་འཇུག །མངོན་པར་འདུ་བྱེད་པ་ལ་མངོན་པར་འདུ་བྱ་བ་མེད་པར་སྟོན། མངོན་པར་འདུ་བྱ་བ་མེད་
པ་ལ་མངོན་པར་འདུ་བྱ་བ་ཡོད་པར་སྟོན། ཆོས་ཐམས་ཅད་བརྗོད་དུ་མེད་པ་ལ་བརྗོད་དུ་ཡོད་པར་ཤེས། ཆོས་ཐམས་ཅད་བརྗོད་དུ་ཡོད་པ་ལ་བརྗོད་དུ་མེད་པར་ཤེས་ཏེ། འདི་ནི་བསམ་གྱིས་མི་ཁྱབ་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བྱང་ཆུབ་ཀྱང་སེམས་དང་མཉམ་པར་ཤེས་ལ་སེམས་ཀྱང་བྱང་ཆུབ་དང་མཉམ་པར་ཤེས་ཏེ། འགྲོ་བ་ཐམས་ཅད་ཀྱང་སེམས་དང་བྱང་ཆུབ་ཏུ་ཤེས་མོད་ཀྱི་དེའི་སེམས་ཕྱིན་ཅི་ལོག་ཏུ་འགྱུར་བ་མེད། འདུ་ཤེས་ཕྱིན་ཅི་ལོག་ཏུ་འགྱུར་བ་མེད། ལྟ་བ་ཕྱིན་ཅི་ལོག་ཏུ་འགྱུར་བ་མེད་དེ། འདི་ནི་བསམ་གྱིས་མི་ཁྱབ་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཀྱི་སྐད་ཅིག་རེ་རེ་ཞིང་འགོག་པ་ལ་སྙོམས་པར་འཇུག་ཀྱང་ཡང་དག་པའི་མཐའ་མངོན་དུ་མི་བྱེད་ཟག་པ་ཟད་པ་ཡིན་ཡང་དགེ་བའི་རྩ་བ་ཟག་པ་ཟད་པར་མི་བྱེད། ཆོས་ཐམས་ཅད་ཟག་པ་མེད་པར་ཡང་ཤེས། ཟག་པ་ཟད་པར་ཡང་ཤེས། ཟག་པ་འགག་པར་ཡང་ཤེས་ཤིང་སངས་རྒྱས་ཀྱི་ཆོས་ལ་འཇིག་རྟེན་གྱི་ཆོས་སུ་འཇུག་སྟེ། འཇིག་རྟེན་གྱི་ཆོས་ལ་སངས་རྒྱས་ཀྱི་ཆོས་སུ་འཇུག་ཀྱང་། སངས་རྒྱས་ཀྱི་ཆོས་ཀྱིས་འཇིག་རྟེན་གྱི་ཆོས་ལ་རྣམ་པར་མི་རྟོག །འཇིག་རྟེན་གྱི་ཆོས་ཀྱིས་སངས་རྒྱས་ཀྱི་ཆོས་ལ་རྣམ་པར་མི་རྟོག །ཆོས་ཐམས་ཅད་གཟུང་བ་མེད་པའི་ཚུལ་དུ་ཆོས་ཀྱི་དབྱིངས་སུ་ཡང་འཛུད་ལ། ཆོས་ཐམས་ཅད་འགྱུར་བ་མེད་པའི་ཚུལ་གྱིས། གཉིས་སུ་མེད་པར་ཡང་ཤེས་པ་འདི་ནི་བསམ་གྱིས་མི་ཁྱབ་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསམ་གྱིས་མི་ཁྱབ་པ་རྣམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་བསམ་གྱིས་མི་ཁྱབ་པ་བླ་ན་མེད་པ་འཐོབ་པར་འགྱུར་བ་དག་གོ།། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅོ་ལྔ་པ།
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱིས་དགོངས་ཏེ་བཤད་པ་ལ་མཁས་པ་སྟེ། བཅུ་གང་ཞེ་ན་འདི་ལྟར་སངས་རྒྱས་ཀྱི་ཆོས་ཀྱི་རྣམ་གྲངས་ཐམས་ཅད་ལ་དགོངས་ཏེ་བཤད་པ་ལ་མཁས་པ་དང་། སྐྱེ་བའི་སྐྱེ་མཆེད་ཐམས་ཅད་ལ་དགོངས་ཏེ་བཤད་པ་ལ་མཁས་པ་དང་། བྱང་ཆུབ་སེམས་དཔའི་རྫུ་འཕྲུལ་དང་། རྣམ་པར་འཕྲུལ་པ་དང་། མངོན་པར་རྫོགས་པར་འཚང་རྒྱ་བ་ཐམས་ཅད་ལ་དགོངས་ཏེ་བཤད་པ་ལ་མཁས་པ་དང་། སེམས་ཅན་ཐམས་ཅད་ཀྱི་ལས་ཀྱི་རྣམ་པར་སྨིན་པར་འཇུག་པ་ཐམས་ཅད་ལ་དགོངས་ཏེ་བཤད་པ་ལ་མཁས་པ་དང་། སེམས་ཅན་ཐམས་ཅད་ཀྱི་ཀུན་ནས་ཉོན་མོངས་པ་དང་། རྣམ་པར་བྱང་བ་དང་། རྣམ་པར་ལྡང་བ་ལ་དགོངས་ཏེ་བཤད་པ་ལ་མཁས་པ་དང་། ཆོས་ཐམས་ཅད་ཆགས་པ་མེད་པའི་སྒོའི་མཐར་ཕྱིན་པ་ལ་བསྒྲིབས་པ་མེད་པའི་ཚུལ་གྱིས་དགོངས་ཏེ་བཤད་པ་ལ་མཁས་པ་སྟེ། འདི་ནི་དགོངས་ཏེ་བཤད་པ་ལ་མཁས་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནམ་མཁའི་དབྱིངས་ཀྱི་ཕྱོགས་རེ་རེ་དང་། འཇིག་རྟེན་གྱི་ཁམས་ཀྱི་རྒྱུད་རེ་རེ་ན་ཡང་། འཇིག་རྟེན་གྱི་ཁམས་འགྲུབ་པ་དང་། འཇིག་རྟེན་གྱི་ཁམས་འཇིག་པ་རྒྱུན་མི་འཆད་ཅིང་མཚམས་མེད་པ་ཤེས་པ་འདི་ནི་དགོངས་ཏེ། བཤད་པ་ལ་མཁས་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཀྱི་དབྱིངས་ཐམས་ཅད་དུ་ཕྲ་བ་དང་ཡངས་པའི་འཇུག་པས་ཡོངས་སུ་འཇུག་པ་ཐམས་ཅད་གཟུང་བ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་སྐྱེ་བ་ནས་བཟུང་སྟེ། ཡོངས་སུ་མྱ་ངན་ལས་འདའ་བ་ཆེན་པོའི་བར་དུ་བཟུང་བ་རྒྱུན་འཆད་པ་མེད་པས་ཆོས་ཀྱི་དབྱིངས་ཐམས་ཅད་སངས་རྒྱས་ཀྱིས་ཡོངས་སུ་གང་བར་འཇུག་ཅིང་སངས་རྒྱས་སྐྱེ་བ་ཐམས་ཅད་ཀྱང་ཤིན་ཏུ་རྣམ་པར་ཕྱེ་བར་མཐོང་བ་འདི་ནི་དགོངས་ཏེ་བཤད་པ་ལ་མཁས་པ་བརྒྱད་པའོ། །
ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་མི་འགྱུར་བའི་ཚུལ་གྱིས་མྱ་ངན་ལས་འདས་པར་ཤེས་ཀྱང་ཐམས་ཅད་མཁྱེན་པའི་སྨོན་ལམ་ཡོངས་སུ་རྫོགས་པར་བྱ་བ་ཡོངས་སུ་མ་རྫོགས་ཀྱི་བར་དུ་སྨོན་ལམ་ཕྱིར་ཟློག་པར་མི་བྱེད་པ་འདི་ནི་དགོངས་ཏེ་བཤད་པ་ལ་མཁས་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་གཞན་གྱི་དྲིང་མི་འཇོག་པར་ཡང་ཤེས་ལ་དགེ་བའི་བཤེས་གཉེན་ལ་རྟེན་པ་ཡང་རིང་དུ་མི་སྤོང་། དེ་བཞིན་གཤེགས་པ་ལ་རིམ་གྲོ་བྱ་བ་ཡང་རྒྱུན་མི་གཅོད་དགེ་བའི་བཤེས་གཉེན་དང་རྒྱུད་ཀྱི་ཚུལ་གཅིག་ཏུ་གྱུར་པའི་དགེ་བའི་རྩ་བ་ཡང་ཡང་དག་པར་སྡུད་ཅིང་སྐྱེད་པ་དང་། སྤྱོད་པ་དང་བརྟན་པར་བྱེད་པ་དང་རྣམ་པ་གཅིག་ཏུ་བྱེད་པ་དང་། རྒྱུད་ཀྱི་ཚུལ་གཅིག་ཏུ་བྱེད་པ་དང་གཅིག་ཏུ་འབྱུང་བར་བྱེད་པ་དང་། ཡོངས་སུ་གྲུབ་པ་གཅིག་ཏུ་བྱེད་པ་འདི་ནི་དགོངས་ཏེ་བཤད་པ་ལ་མཁས་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགོངས་ཏེ་བཤད་པ་ལ་མཁས་པ་རྣམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་ཐམས་ཅད་ཀྱི་དགོངས་ཏེ་བཤད་པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་ཡེ་ཤེས་རྣམ་པར་དབྱེ་བ་ལ་མཁས་པ་སྟེ། བཅུ་གང་ཞེ་ན། འདི་ལྟར་ཞིང་ཐམས་ཅད་དུ་ཡེ་ཤེས་རྣམ་པར་དབྱེ་བ་ལ་མཁས་པ་དང་། སེམས་ཅན་གྱི་སྐྱེ་མཆེད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། སེམས་ཅན་ཐམས་ཅད་ཀྱི་སེམས་དང་། སྤྱོད་པ་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། སེམས་ཅན་ཐམས་ཅད་ཀྱི་དབང་པོ་ཡོངས་སུ་ཤེས་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། སེམས་ཅན་ཐམས་ཅད་ཀྱི་ལས་དང་རྣམ་པར་སྨིན་པ་མངོན་པར་འདུ་བྱེད་པ་ལ་འཇུག་
པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། ཉན་ཐོས་ཀྱི་སྤྱོད་པ་ཐམས་ཅད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། རང་སངས་རྒྱས་ཀྱི་སྤྱོད་པ་ཐམས་ཅད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། འཇིག་རྟེན་གྱི་ཆོས་ཐམས་ཅད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པ་དང་། སངས་རྒྱས་ཀྱི་ཆོས་ཐམས་ཅད་ལ་འཇུག་པར་ཡེ་ཤེས་རྣམ་པར་དབྱེ་བ་ལ་མཁས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་རྣམ་པར་དབྱེ་བ་ལ་མཁས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་དུ་ཡེ་ཤེས་རྣམ་པར་དབྱེ་བ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙོམས་པར་འཇུག་པ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་ཀྱི་ཤེས་པ་ལ་སྙོམས་པར་འཇུག་པ་དང་། སེམས་ཅན་ཐམས་ཅད་ཀྱི་ལུས་ལ་སྙོམས་པར་འཇུག་པ་དང་། ཆོས་ཐམས་ཅད་ལ་སྙོམས་པར་འཇུག་པ་དང་། སངས་རྒྱས་མཐོང་བ་ཐམས་ཅད་ལ་སྙོམས་པར་འཇུག་པ་དང་། བསྐལ་པར་གནས་པར་མཁས་པ་ཐམས་ཅད་ལ་སྙོམས་པར་འཇུག་པ་དང་། བསམ་གྱིས་མི་ཁྱབ་པའི་ལུས་ཀྱི་རྒྱུད་ཀྱི་ཏིང་ངེ་འཛིན་དང་། རྣམ་པར་ལྡང་བ་མཁས་པ་ལ་སྙོམས་པར་འཇུག་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་ལ་སྙོམས་པར་འཇུག་པ་དང་། འགྲོ་བ་ཐམས་ཅད་ཁོང་དུ་ཆུད་པར་བྱ་བས་སྙོམས་པའི་ཡེ་ཤེས་གྱིས་མཁས་པ་ལ་སྙོམས་པར་འཇུག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཏིང་ངེ་འཛིན་ལ་སེམས་ཀྱི་སྐད་ཅིག་གཅིག་གིས་ཡེ་ཤེས་ཀྱི་འཇུག་པ་ལ་སྙོམས་པར་འཇུག་པ་དང་། ཆགས་པ་མེད་པའི་སེམས་སྐད་ཅིག་གཅིག་གི་ཡེ་ཤེས་ཀྱིས་བྱང་ཆུབ་སེམས་དཔའི་
སྤྱོད་པ་ཐམས་ཅད་ཡང་དག་པར་བླང་བ་ལ་རབ་ཏུ་གནས་ཤིང་རྒྱུན་མི་གཅོད་པའི་སྨོན་ལམ་ཆེན་པོའི་ཡེ་ཤེས་མཁས་པ་ལ་སྙོམས་པར་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙོམས་པར་འཇུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས། སངས་རྒྱས་ཀྱི་ཆོས་ཐམས་ཅད་དུ་སྙོམས་པར་འཇུག་པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རིལ་པོ་རྣམས་ཏེ། བཅུ་གང་ཞེ་ན། འདི་ལྟར་རིལ་གྱིས་སེམས་ཅན་དང་། རིལ་གྱིས་ཞིང་དང་། རིལ་གྱིས་མཚན་ཉིད་མི་མཐུན་པའི་འགྲོ་བ་དང་། རིལ་གྱིས་བསྐལ་པའི་མེ་དང་། རིལ་གྱིས་ཆུས་འཇིག་པ་དང་། རིལ་གྱིས་སངས་རྒྱས་དང་། རིལ་གྱིས་སྣ་ཚོགས་མངོན་པར་བསྒྲུབ་པ་དང་། རིལ་གྱིས་དེ་བཞིན་གཤེགས་པའི་སྐུ་ཁ་དོག་མཐའ་ཡས་པ་དང་། རིལ་གྱིས་ཆོས་ཐམས་ཅད་རྣམ་པ་སྣ་ཚོགས་སུ་བསྟན་པ་དང་། རིལ་གྱིས་དེ་བཞིན་གཤེགས་པ་ཐམས་ཅད་མཆོད་པ་རྣམ་པ་ཐ་དད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རིལ་པོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་རིལ་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་ཐར་པ་རྣམས་ཏེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་དུ་ལུས་ཀྱིས་རྒྱས་པར་དགང་བའི་རྣམ་པར་ཐར་པ་དང་། འཇིག་རྟེན་གྱི་ཁམས་ཐམས་ཅད་དུ་ཁ་དོག་དུ་མ་དང་། ཁ་དོག་སྣ་ཚོགས་ཡོངས་སུ་བསྟན་པའི་རྣམ་པར་ཐར་པ་དང་། ཆོས་ཀྱི་དབྱིངས་ཐམས་ཅད་ལ་སངས་རྒྱས་ཀྱི་ཞིང་གཅིག་ཏུ་འཇུག་པའི་རྣམ་པར་ཐར་པ་དང་། སེམས་ཅན་གྱི་ཁམས་ཐམས་ཅད་བྱིན་གྱིས་བརླབས་
པའི་རྣམ་པར་ཐར་པ་དང་། སངས་རྒྱས་ཀྱིས་བརྒྱན་པའི་འཇིག་རྟེན་གྱི་ཁམས་ཐམས་ཅད་དུ་ལུས་ཀྱིས་རྒྱས་པར་དགང་བའི་རྣམ་པར་ཐར་པ་དང་། བདག་འཇིག་རྟེན་གྱི་ཁམས་ཐམས་ཅད་དུ་ཕྱིན་པར་ཤེས་པར་བྱ་བའི་རྣམ་པར་ཐར་པ་དང་། འཇིག་རྟེན་གྱི་ཁམས་ཐམས་ཅད་དུ་སེམས་ཀྱི་སྐད་གཅིག་གཅིག་གིས་འགྲོ་བའི་རྣམ་པར་ཐར་པ་དང་། འཇིག་རྟེན་གྱི་ཁམས་གཅིག་ཏུ་སངས་རྒྱས་ཐམས་ཅད་སྐྱེ་བ་ཡོངས་སུ་བསྟན་པའི་རྣམ་པར་ཐར་པ་དང་། འཇིག་རྟེན་གྱི་ཁམས་ཐམས་ཅད་དུ་ལུས་གཅིག་དུ་ཤེས་པར་བྱ་བའི་རྣམ་པར་ཐར་པ་དང་། སེམས་ཀྱི་སྐད་ཅིག་གཅིག་ལ་སངས་རྒྱས་ཐམས་ཅད་ཀྱི་རྣམ་པར་སྤྲུལ་པ་དང་། རྣམ་པར་རོལ་བ་དང་མི་འབྲལ་བ་ཡོངས་སུ་བསྟན་པའི་རྣམ་པར་ཐར་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་ཐར་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་ཐམས་ཅད་ཀྱི་རྣམ་པར་ཐར་པས་རྣམ་པར་རོལ་བ་བླ་ན་མེད་པ་འཐོབ་པར་འགྱུར་བ་དག་གོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པ་རྣམས་ཏེ། བཅུ་གང་ཞེ་ན། འདི་ལྟར་སྔོན་གྱི་གནས་རྗེས་སུ་དྲན་པས་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། ལྷའི་རྣ་བ་བསྒྲིབས་པ་མེད་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། སེམས་ཅན་ཕ་རོལ་དང་གང་ཟག་ཕ་རོལ་གྱི་སེམས་དང་། སྤྱོད་པ་བསམ་གྱིས་མི་ཁྱབ་པ་ཡོངས་སུ་ཤེས་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། ལྷའི་མིག་ཐོགས་པ་མེད་པས་རྣམ་པར་བལྟ་བ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། རྫུ་འཕྲུལ་དང་རྣམ་པར་འཕྲུལ་བ་ཆེན་པོའི་བྱིན་གྱི་རླབས་ཀྱིས་སེམས་ཅན་རྣམས་ཀྱི་བསམ་པ་བསམ་གྱིས་མི་ཁྱབ་པ་ཇི་
ལྟ་བ་བཞིན་དུ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། འཇིག་རྟེན་གྱི་ཁམས་བསམ་གྱིས་མི་ཁྱབ་པར་ལུས་ཡོངས་སུ་བསྟན་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། འཇིག་རྟེན་གྱི་ཁམས་བརྗོད་དུ་མེད་པར་སེམས་སྐད་ཅིག་གིས་འགྲོ་བ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། འཇིག་རྟེན་གྱི་ཁམས་བསམ་གྱིས་མི་ཁྱབ་པ་བརྒྱན་པར་བྱིན་གྱིས་བརླབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། ལུས་ཀྱི་རྒྱུད་བརྗོད་དུ་མེད་པར་སྤྲུལ་པ་ཡོངས་སུ་བསྟན་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་མངོན་པར་ཤེས་པ་དང་། འཇིག་རྟེན་གྱི་ཁམས་བརྗོད་དུ་མེད་པར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །ཞེས་བྱ་བར་སེམས་ཅན་གྱི་བསམ་པ་བསམ་གྱིས་མི་ཁྱབ་པ་ཇི་ལྟ་བ་བཞིན་དུ་ཡོངས་སུ་བསྟན་པ་ལ་མཁས་ཤིང་ཤེས་པའི་མངོན་པར་ཤེས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་མངོན་པར་ཤེས་པ་ཆེན་པོ་བསྒྲུབ་པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་འཐོབ་པར་འགྱུར་བ་དག་གོ །སེམས་ཅན་ཐམས་ཅད་ལ་ཡོངས་སུ་སྟོན་པའི་ནན་ཏན་བྱེད་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རིག་པ་སྟེ། བཅུ་གང་ཞེ་ན། འདི་ལྟར་སེམས་ཅན་གྱི་ལས་དང་རྣམ་པར་སྨིན་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ་དང་། འགྲོ་བ་ཐམས་ཅད་ཀྱི་དམིགས་པས་དབེན་ཞིང་བྱེད་པ་མེད་པ་ལ་སྤྲོས་པ་མེད་པའི་སེམས་རབ་ཏུ་ཞི་བ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ་དང་དམིགས་པ་ཐམས་ཅད་ལ་ཞུགས་པས་སེམས་གཅིག་ལ་
འང་ཐ་དད་དུ་དམིགས་ཤིང་ཆོས་ཐམས་ཅད་རབ་ཏུ་རྟོགས་པས་རྡོ་རྗེ་ལྟ་བུའི་ཡེ་ཤེས་ཀྱི་རིག་པ་དང་། དབྱངས་བསམ་གྱིས་མི་ཁྱབ་པ་བྱིན་གྱིས་བརླབས་པས་འཇིག་རྟེན་གྱི་ཁམས་མུ་མེད་པར་གོ་བར་བྱ་བ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ་དང་། གནས་ཐམས་ཅད་ཡང་དག་པར་གཞོམ་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ་དང་། སྐྱེ་བ་ལ་མཁས་པ་དང་། མི་སྐྱེ་བ་ལ་མཁས་པ་མངོན་པར་བསྒྲུབ་པ་ཤེས་པའི་རིག་པ་དང་། འདུ་ཤེས་དང་། ཚོར་བའི་ཡུལ་ཐམས་ཅད་རྣམ་པར་བཟློག་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་མཚན་ཉིད་མེད་པ་དང་། མཚན་ཉིད་དང་བྲལ་བ་མེད་ཅིང་རྣམ་པར་དགོད་པ་གཅིག་ཏུ་གྱུར་པ་དང་། རྣམ་པར་དགོད་པ་མེད་པའི་ཚུལ་གྱིས་རིག་པར་བྱ་བ་སྣ་ཚོགས་ཐ་དད་པ་རབ་ཏུ་ཤེས་ཏེ། ཚད་མེད་པའི་བསྐལ་པར་ཆོས་སྟོན་ཅིང་ཆོས་ཀྱི་དབྱིངས་སུ་གནས་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འབྱུང་བ་འདི་ནི་ཡེ་ཤེས་ཀྱི་རིག་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་མངོན་པར་གྲུབ་པར་འགྱུར་བ་མེད་པའི་ཚུལ་དང་། སྐྱེ་བ་མྱི་དམིགས་པའི་ཚུལ་གྱིས་རབ་ཏུ་ཤེས། རྒྱུ་རབ་ཏུ་ཤེས། རྐྱེན་རབ་ཏུ་ཤེས། དངོས་པོ་རབ་ཏུ་ཤེས། དམིགས་པ་རབ་ཏུ་ཤེས། འདུ་བྱེད་རབ་ཏུ་ཤེས། སྐྱེ་བ་རབ་ཏུ་ཤེས། འགོག་པ་རབ་ཏུ་ཤེས་དེ་ཁོ་ན་བསྟན་པ་རབ་ཏུ་ཤེས། གཏི་མུག་དང་ལྡན་པར་འགྱུར་བ་རབ་ཏུ་ཤེས་གཏི་མུག་དང་བྲལ་བ་རབ་ཏུ་ཤེས་ཕྱིན་ཅི་ལོག་རབ་ཏུ་ཤེས་ཕྱིན་ཅི་ལོག་མེད་པ་རབ་ཏུ་ཤེས་ཀུན་ནས་ཉོན་མོངས་པ་རབ་ཏུ་ཤེས་རྣམ་པར་བྱང་བ་རབ་ཏུ་ཤེས། འཁོར་བ་རབ་ཏུ་ཤེས། མྱ་ངན་ལས་འདས་པ་རབ་ཏུ་ཤེས། དམིགས་པ་རབ་ཏུ་ཤེས་དམིགས་པ་མེད་པ་རབ་ཏུ་ཤེས། མངོན་པར་ཆགས་པ་རབ་ཏུ་ཤེས་མངོན་པར་ཆགས་པ་མེད་པ་རབ་ཏུ་ཤེས། གནས་རབ་ཏུ་ཤེས་གྱེན་
དུ་བསྐྱོད་པ་རབ་ཏུ་ཤེས། ཞུགས་པ་རབ་ཏུ་ཤེས་ལོག་པ་རབ་ཏུ་ཤེས། འཇུག་པ་རབ་ཏུ་ཤེས་ལྡོག་པ་རབ་ཏུ་ཤེས། འཇིག་པ་རབ་ཏུ་ཤེས་འབྱུང་བ་རབ་ཏུ་ཤེས། ཡོངས་སུ་སྨིན་པ་རབ་ཏུ་ཤེས་དབང་པོ་རབ་ཏུ་ཤེས། སྣོད་ཐ་དད་པའི་ཚུལ་གྱིས་སེམས་ཅན་དེ་དག་གི་འདུལ་བ་ཡང་རབ་ཏུ་ཤེས། སེམས་ཅན་འདུལ་ཞིང་བྱང་ཆུབ་སེམས་དཔའི་སྤྱོད་པ་ལ་མགོ་རྨོངས་པའང་མེད་དེ། ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། བྱང་ཆུབ་སེམས་དཔས་ནི་སེམས་ཅན་ཡོངས་སུ་སྨིན་པར་བྱ་བའི་དོན་མ་གཏོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་དེ། དེ་གང་གི་ཕྱིར་སེམས་བསྐྱེད་པའི་སེམས་ཅན་དེ་དག་ཡོངས་སུ་སྨིན་པར་བྱེད་ཅིང་རྣམ་པར་གདུལ་བས་ལུས་ལ་ཉོན་མོངས་པར་མི་རྩིའོ། །ཀྱེ་རྒྱལ་བའི་སྲས་འདི་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་ཐམས་ཅད་ཀྱི་བྱ་བ་དང་། མི་འགལ་བ་ཞེས་བྱ་བ་རྟེན་ཅིང་འབྲེལ་བར་འབྱུང་བ་རིག་པ་སྟེ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་གང་ལ་ཡང་མངོན་པར་ཆགས་པ་མེད་དེ། སངས་རྒྱས་ལ་མངོན་པར་ཆགས་པ་མི་སྐྱེད། ཆོས་གང་ལ་ཡང་མངོན་པར་ཆགས་པ་མེད་དེ། ཆོས་ལ་མངོན་པར་ཆགས་པ་མི་སྐྱེད། ཞིང་གང་ལ་ཡང་མངོན་པར་ཆགས་པ་མེད་དེ། ཞིང་ལ་མངོན་པར་ཆགས་པ་མི་སྐྱེད། སེམས་ཅན་གང་ལ་ཡང་མངོན་པར་ཆགས་པ་མེད་དེ། སེམས་ཅན་ལ་མངོན་པར་ཆགས་པ་མི་སྐྱེད། སེམས་ཅན་གང་ལ་ཡང་མཐོང་བ་མེད་དེ། སེམས་ཅན་ཡང་ཡོངས་སུ་སྨིན་པར་བྱེད་ཅིང་། སེམས་ཅན་ཡང་ཡོངས་སུ་འདུལ་བར་བྱེད། ཆོས་གང་ཡང་སྟོན་པ་མེད་དེ། སྤྱོད་པ་ཡང་ཡོངས་སུ་སྦྱོང་ཞིང་སྨོན་ལམ་ཡང་ཡོངས་སུ་རྫོགས་པར་བྱེད། སྙིང་རྗེ་ཆེན་པོ་ཡང་རྣམ་པར་འཕེལ་བར་བྱེད། སངས་རྒྱས་ཀྱང་མཐོང་བར་བྱེད། དེ་བཞིན་གཤེགས་པས་ཆོས་བསྟན་པ་ལའང་རྗེས་སུ་
འབྲང་བར་བྱེད། དེ་བཞིན་གཤེགས་པ་དང་རྒྱུ་མཐུན་པ་ཡང་འཐོབ་པར་བྱེད། དགེ་བའི་རྩ་བ་བསྐྱེད་པ་ཡང་སྐྱེད་པར་བྱེད། དེ་བཞིན་གཤེགས་པའི་སྤྱོད་ཡུལ་ཡང་རྒྱུན་མི་འཆད་པར་བྱེད། དེ་བཞིན་གཤེགས་པ་མཆོད་པ་ཡང་རྣམ་པར་འཕེལ་བར་བྱེད། འཇིག་རྟེན་གྱི་ཁམས་བསམ་གྱིས་མི་ཁྱབ་པ་ཡང་ཆོས་ཀྱི་དབྱིངས་ཀྱིས་ཀླས་པའི་སེམས་ཀྱིས་ཡོངས་སུ་སྐྱོད་པར་བྱེད། ཆོས་བསྟན་པ་རྣམ་པ་སྣ་ཚོགས་ཀྱང་རབ་ཏུ་ཤེས་པར་བྱེད། སེམས་ཅན་གྱི་གྲངས་ཀྱང་རབ་ཏུ་ཤེས་པར་བྱེད་སེམས་ཅན་རྣམ་པ་ཐ་དད་པ་ཡང་རབ་ཏུ་ཤེས་པར་བྱེད། སྡུག་བསྔལ་སྐྱེ་བ་ཡང་རབ་ཏུ་ཤེས་པར་བྱེད། སྡུག་བསྔལ་འགོག་པ་ཡང་རབ་ཏུ་ཤེས་པར་བྱེད། འདུ་བྱེད་ཀྱི་རྣམ་པ་ཐམས་ཅད་སྡུག་བསྔལ་བར་ཤེས་ནས། མིག་ཡོར་ལྟ་བུའི་ཚུལ་གྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིང་སྐྱེ་བའི་སྐྱེ་མཆེད་ཐམས་ཅད་རྩ་བ་ནས་རྒྱུན་མི་གཅད་པའི་སེམས་བསྐྱེད་པས་འགྲོ་བ་ཐམས་ཅད་ཡོངས་སུ་བསྐྱབ་པའི་ཕྱིར་མི་སྤྱོད་པའི་ཚུལ་གྱིས་བྱང་ཆུབ་སེམས་དཔའི་སྤྱད་པ་ལ་སྤྱོད་ཅིང་། སངས་རྒྱས་ཐམས་ཅད་ཀྱི་རིགས་ཀྱི་རྗེས་སུ་བསླབ་པ་དང་། རྟོག་པའི་ཕྱིན་ཅི་ལོག་ཐམས་ཅད་ཁོང་དུ་ཆུད་པའི་རི་བོའི་རྒྱལ་པོ་ཆེན་པོ་དམ་པ་ལྟ་བུ་ཐམས་ཅད་མཁྱེན་པ་ཉིད་ཀྱི་སྒོ་ལ་གཞོལ་བས་སེམས་ཅན་ཐམས་ཅད་སྲིད་པའི་གང་ཆེན་མཚོ་ལས་ཕྱིར་བཟློག་པའི་ཕྱིར་ཡེ་ཤེས་འབྱམ་ཀླས་པ་ཆེ་ཞིང་མི་གཡོ་བའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ། །ཞེས་བྱ་བ་འདི་ནི་ཤེས་པའི་རིག་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རིག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པས་མཁྱེན་པའི་རིག་པ་ཆེན་པོ་མངོན་པར་བསྒྲུབ་པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་
རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་གྲོལ་བ་སྟེ། བཅུ་གང་ཞེ་ན། འདི་ལྟར་ཉོན་མོངས་པ་ལས་རྣམ་པར་གྲོལ་བ་དང་། ལྟ་བ་ལས་རྣམ་པར་གྲོལ་བ་དང་། ཉེ་བར་ལེན་པ་ལས་རྣམ་པར་གྲོལ་བ་དང་། ཕུང་པོ་དང་ཁམས་དང་། སྐྱེ་མཆེད་ལས་རྣམ་པར་གྲོལ་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་ལས་འདའ་བའི་རྣམ་པར་གྲོལ་བ་དང་། མི་སྐྱེ་བའི་ཆོས་ལ་བཟོད་པ་ཐོབ་པའི་རྣམ་པར་གྲོལ་བ་དང་། འགྲོ་བའི་ཞིང་ཐམས་ཅད་ནས་སེམས་ཅན་གྱི་ཆོས་ལས་གྱེན་དུ་བསྐྱོད་པའི་རྣམ་པར་གྲོལ་བ་དང་། བྱང་ཆུབ་སེམས་དཔའི་རྣམ་པར་བསྒྲུབ་པ་མཐའ་དང་དབུས་མེད་པའི་རྣམ་པར་གྲོལ་བ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ལས་གྱེན་དུ་བསྐྱོད་དེ། དེ་བཞིན་གཤེགས་པའི་ས་འཐོབ་པའི་རྣམ་པར་གྲོལ་བ་དང་། དུས་གསུམ་ཐམས་ཅད་སྐད་ཅིག་གཅིག་གིས་ཤེས་པའི་རྣམ་པར་གྲོལ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་གྲོལ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཕྲིན་ལས་བླ་ན་མེད་པ་སེམས་ཅན་རྣམས་ཀྱིས་འཐོབ་པར་བྱེད་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེད་མོས་ཚལ་ཏེ། བཅུ་གང་ཞེ་ན། འདི་ལྟར་ཡོངས་སུ་སྐྱོ་བ་མེད་པས་འཁོར་བའི་སྐྱེད་མོས་ཚལ་དང་། མི་དགའ་བ་མེད་པས་སེམས་ཅན་ཡོངས་སུ་སྨིན་པར་བྱ་བའི་སྐྱེད་མོས་ཚལ་དང་། སྤྱོད་པ་ཆེན་པོ་བསྐྱེད་ཅིང་རབ་ཏུ་འཛིན་པས་བསྐལ་པ་ཐམས་ཅད་དུ་ཞེ་ནོན་པའི་སྐྱེད་མོས་ཚལ་དང་། རང་གི་ཁྱིམ་ལྟར་དགའ་བས་འཇིག་རྟེན་གྱི་ཁམས་ཡོངས་སུ་དག་པའི་སྐྱེད་མོས་ཚལ་དང་། བདུད་ཀྱི་ཡུལ་མངོན་པར་འདུལ་བས་བདུད་ཀྱི་ཁྱིམ་ཐམས་ཅད་ཀྱི་སྐྱེད་མོས་ཚལ་དང་། ཚུལ་བཞིན་དུ་རབ་ཏུ་རྟོགས་པས་ཇི་སྐད་དུ་ཐོས་པའི་ཆོས་རྟོགས་པར་གཞོག་པའི་སྐྱེད་མོས་ཚལ་དང་། བདག་གི་ཕའི་
ཡུལ་ལ་སྤྱོད་པས་ཕ་རོལ་ཏུ་ཕྱིན་པ་དྲུག་དང་། བསྡུ་བའི་དངོས་པོ་བཞི་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་སྐྱེད་མོས་ཚལ་དང་། ཆོས་གཞན་ཡིད་ལ་མི་བྱེད་པས་དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། མདོར་ན་སངས་རྒྱས་ཀྱི་ཆོས་ཐམས་ཅད་ཀྱི་སྐྱེད་མོས་ཚལ་དང་། མྱ་ངན་ལས་འདས་པ་ཆེན་པོའི་རྒྱན་གྱིས་རྣམ་པར་གདུལ་བ་དང་། ཆོས་ཀྱི་འཁོར་ལོ་བསྐོར་བ་མི་གཏང་བས་བྱང་ཆུབ་སེམས་དཔའ་ཐམས་ཅད་ཀྱིས་རྣམ་པར་འཕྲུལ་པ་དང་རྣམ་པར་རྩེ་བ་དང་། བྱིན་གྱི་རླབས་ཡོངས་སུ་བསྟན་པའི་སྐྱེད་མོས་ཚལ་དང་། འཇིག་རྟེན་གྱི་ཁམས་ཐམས་ཅད་དུ་ཆོས་ཀྱི་ལུས་ཀྱིས་རྒྱས་པར་འགེངས་ཤིང་ནམ་མཁའི་དབྱིངས་དང་། མཉམ་པ་ཉིད་དུ་རྟོགས་པས་སེམས་ཀྱི་སྐད་ཅིག་ཐམས་ཅད་ལ་མངོན་པར་རྫོགས་པར་འཚང་རྒྱ་བ་དང་། མི་འབྲལ་བར་འགྲོ་བ་ཐམས་ཅད་དུ་བསྟན་པའི་སྐྱེད་མོས་ཚལ་ལོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེད་མོས་ཚལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡོངས་སུ་སྐྱོ་བ་མེད་པའི་སྤྱོད་པ་ཆེན་པོ་བླ་ན་མེད་པས་དགའ་བ་རབ་ཏུ་འཐོབ་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཞལ་མེད་ཁང་སྟེ། བཅུ་གང་ཞེ་ན། འདི་ལྟར་ཉམས་པ་མེད་པས་བྱང་ཆུབ་ཀྱི་སེམས་ཀྱི་གཞལ་མེད་ཁང་དང་། འདོད་པའི་ཁམས་ཀྱི་སེམས་ཅན་གྱི་ཁམས་ཡོངས་སུ་སྨིན་པར་བྱེད་པས་དགེ་བ་བཅུའི་ལས་ཀྱི་ལམ་དང་། བསོད་ནམས་དང་། ཡེ་ཤེས་ཀྱི་ཚོགས་ཀྱི་གཞལ་མེད་ཁང་དང་། གཟུགས་ཀྱི་ཁམས་ཀྱི་སེམས་ཅན་གྱི་ཁམས་ཡོངས་སུ་སྨིན་པར་བྱེད་པས་ཚངས་པའི་གནས་བཞི་ལ་བསམ་གཏན་འཆའ་བའི་གཞལ་མེད་ཁང་དང་ཉོན་མོངས་པའི་དངོས་པོ་ཐམས་ཅད་ཀྱིས་མི་གོས་པས་གནས་གཙང་མའི་ལྷའི་གནས་སུ་སྐྱེ་བའི་གཞལ་མེད་ཁང་དང་། སེམས་
ཅན་མི་ཁོམ་པ་ཐོབ་པ་ལས་རྣམ་པར་བཟློག་པས་གཟུགས་མེད་པའི་ལྷའི་རྒྱུད་ཀྱི་གཞལ་མེད་ཁང་དང་། ཉོན་མོངས་པ་ཐམས་ཅད་ལས་སེམས་ཅན་གྱེན་དུ་བསྐྱོད་པས། ཀུན་ནས་ཉོན་མོངས་པའི་འཇིག་རྟེན་གྱི་ཁམས་སུ་ཆེད་དུ་བསམས་ཏེ། སྐྱེ་བ་འཛིན་པའི་གཞལ་མེད་ཁང་དང་། སྔོན་ལྷན་ཅིག་སྤྱོད་སྤྱོད་པའི་སེམས་ཅན་ཡོངས་སུ་སྨིན་པར་བྱ་བས། སླས་དང་བུ་དང་། བུ་མོ་དང་ཆུང་མ་ཀུན་ཏུ་སྟོན་པའི་གཞལ་མེད་ཁང་དང་སེམས་ཅན་དབང་ཕྱུག་ལ་ཆགས་པ་རྣམ་པར་བཟློག་པས་གླིང་བཞི་དང་། འཛམ་བུ་གླིང་དང་བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོའི་དབང་ཕྱུག་ལ་དབང་བར་བྱེད་པའི་གཞལ་མེད་ཁང་དང་། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པས་ཤིན་ཏུ་རྣམ་པར་རྩེ་བ་ཤེས་པའི་ཕྱིར་བྱང་ཆུབ་སེམས་དཔའི་སྤྱོད་པ་ཐམས་ཅད་ལ་གནས་པའི་དབང་ཕྱུག་ལ་དབང་བསྒྱུར་བས་རྣམ་པར་རྩེ་བའི་མངོན་པར་ཤེས་པའི་གཞལ་མེད་ཁང་དང་། དེ་བཞིན་གཤེགས་པའི་སྟོབས་བཅུའི་རྒྱན་ལ་གནས་པས་ཐམས་ཅད་མཁྱེན་པ་ཉིད་ཀྱི་རྒྱལ་སྲིད་དང་དབང་ཕྱུག་བླ་ན་མེད་པ་ལ་སངས་རྒྱས་ཐམས་ཅད་ཀྱི་རྫུ་འཕྲུལ་གྱི་དབང་བསྒྱུར་བ་ཡང་དག་པར་བླང་ཞིང་ཆོས་ཐམས་ཅད་ལ་དབང་སྒྱུར་བའི་རྒྱལ་སྲིད་གཟུང་བའི་གཞལ་མེད་ཁང་ངོ་། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་གྱི་གཞལ་མེད་ཁང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་འགྲོ་བ་ཐམས་ཅད་དུ་ཆོས་ཀྱི་དབང་བསྐུར་བས། རྣམ་པར་འཕྲུལ་བའི་བྱིན་གྱི་རླབས་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགའ་བ་སྟེ། བཅུ་གང་ཞེ་ན། འདི་ལྟར་འཁྲུག་པ་མེད་པས་དྲན་པའི་དགའ་བ་དང་། རབ་ཏུ་རྣམ་པར་འབྱེད་པ་ལ་མཁས་པས་བློ་གྲོས་ཀྱི་དགའ་བ་དང་། སངས་རྒྱས་ཐམས་ཅད་ཀྱི་ཞབས་ཀྱི་དྲུང་ནས་མངོན་སུམ་དུ་ཆོས་ཐོས་པ་
ཡོངས་སུ་ཟད་པར་མི་འགྱུར་བས་རྟོགས་པའི་དགའ་བ་དང་། ཕྱོགས་བཅུའི་ཚད་མེད་པར་ཁྱབ་པས་བློའི་དགའ་བ་དང་། སེམས་ཅན་གྱི་ལུས་སྒོ་མཐའ་ཡས་པ་ཡོངས་སུ་སྟོན་པས་བྱང་ཆུབ་སེམས་དཔའི་རྣམ་པར་འཕྲུལ་པའི་དགའ་བ་དང་། ཏིང་ངེ་འཛིན་གྱི་སྒོ་གཅིག་གིས་ཏིང་ངེ་འཛིན་གྱི་སྒོ་ཐམས་ཅད་ལ་འཇུག་པས་ཏིང་ངེ་འཛིན་གྱི་དགའ་བ་དང་། ཐོས་པ་ཐམས་ཅད་འཛིན་པ་ཉམས་པ་མེད་པར་ཀུན་ཏུ་འཛིན་ཅིང་སེམས་ཅན་གཞན་གྱི་རྒྱུད་ཀྱིས་འཐོབ་པར་བྱེད་པས་གཟུངས་ཀྱི་དགའ་བ་དང་། ཚིག་གཅིག་དང་ཡི་གེ་གཅིག་གིས་བསྐལ་པ་བརྗོད་དུ་མེད་པར་གཞན་དང་གཞན་དུ་སྨྲ་ཞིང་ངེས་པའི་ཚིག་རྒྱུད་མི་འཆད་པར་རབ་ཏུ་སྟོན་པས་སྤོབས་པའི་དགའ་བ་དང་། སེམས་ཅན་ཐམས་ཅད་ཀྱི་ལུས་ལ་མཐའ་ཡས་པའི་སྒོའི་རྒྱུད་དུ་མངོན་པར་བྱང་ཆུབ་པ་སྟོན་པས་མངོན་པར་རྫོགས་པར་བྱང་ཆུབ་པའི་དགའ་བ་དང་། བདུད་དང་ཕྱིར་རྒོལ་བ་ཐམས་ཅད་ཆོས་དང་འཐུན་པར་ཚར་གཅོད་པས་ཆོས་ཀྱི་འཁོར་ལོ་བསྐོར་བའི་དགའ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགའ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་ཆོས་ཀྱི་དགྱེས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྒྱན་ཏེ། བཅུ་གང་ཞེ་ན། འདི་ལྟར་ཐུབ་པ་མེད་པས་སྟོབས་ཀྱི་རྒྱན་དང་། ཟིལ་གྱིས་མི་ནོན་པས་མི་འཇིགས་པའི་རྒྱན་དང་། དོན་བརྗོད་དུ་མེད་ཅིང་ཡངས་པ་བརྗོད་པའི་སྒོ་རྒྱུན་མི་འཆད་པས་དོན་གྱི་རྒྱན་དང་། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞི་ཤིན་ཏུ་བརྟགས་པའི་ཆོས་རབ་ཏུ་སྟོན་པ་ལ་མགོ་རྨོངས་པ་མེད་པས་ཆོས་ཀྱི་རྒྱན་དང་། བྱང་ཆུབ་སེམས་དཔའ་ཐམས་ཅད་ཀྱིས་བྱ་བའི་སྨོན་ལམ་ལས་ཕྱིར་མི་ལྡོག་པས་སྨོན་ལམ་གྱི་རྒྱན་དང་། ཀུན་ཏུ་བཟང་པོའི་ཐེག་པས་འབྱུང་བས་སྤྱོད་པའི་རྒྱན་དང་།
ཞིང་ཐམས་ཅད་ཞིང་གཅིག་དུ་བྱིན་གྱིས་རློབ་པས་ཞིང་གི་རྒྱན་དང་། ཞིང་ཐམས་ཅད་དུ་ཆོས་ཀྱི་སྤྲིན་ཆེན་པོའི་ཆར་རྒྱས་པར་རབ་ཏུ་འབེབས་པས། དབྱངས་ཀྱི་དཀྱིལ་འཁོར་གྱི་རྒྱན་དང་བསྐལ་པ་གྲངས་མེད་པ་ཐམས་ཅད་དུ་སྤྱོད་པའི་རྒྱུན་མི་གཅོད་པས་བྱིན་གྱི་རླབས་ཀྱི་བརྒྱན་དང་སེམས་ཅན་གཅིག་གི་ལུས་སེམས་ཅན་སྙེད་ཀྱི་ལུས་སུ་སྟོན་ཅིང་སེམས་ཅན་ཀྱི་ཁོང་དུ་ཆུད་པར་བྱེད་པའི་ཐམས་ཅད་མཁྱེན་པའི་སྟོབས་བཅུ་དང་། མི་འཇིགས་པའི་མཐུ་ལས་ཕྱིར་མི་ལྡོག་པས་འཕྲུལ་པའི་རྒྱན་ཏོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྒྱན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ཀྱི་རྒྱན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མི་སྒུལ་བ་སྟེ། བཅུ་གང་ཞེ་ན། འདི་ལྟར་གཏོང་བ་ཐམས་ཅད་ཡོངས་སུ་གཏོང་ཞིང་། སྦྱིན་པ་ཐམས་ཅད་སྦྱིན་པར་བྱེད་པས་སེམས་བསྐྱེད་པ་མི་སྒུལ་བ་དང་། སངས་རྒྱས་ཀྱི་ཆོས་ཐམས་ཅད་ངེས་པར་རྟོགས་པར་གཞག་པ་ལ་སེམས་བསྐྱེད་པ་མི་སྒུལ་བ་དང་། སངས་རྒྱས་ཐམས་ཅད་ལ་མཆོད་ཅིང་རིམ་གྲོ་བྱ་བའི་ཡིད་ལ་བྱ་བ་མང་བས་སེམས་བསྐྱེད་པ་མི་སྒུལ་བ་དང་། སེམས་ཅན་ཐམས་ཅད་ཀྱིས་མི་འཁྲུག་པས་སེམས་བསྐྱེད་པ་མི་སྒུལ་བ་དང་། འགྲོ་བ་ཐམས་ཅད་ཡོངས་སུ་མི་གཏོང་བས་སེམས་བསྐྱེད་པ་མི་སྒུལ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བ་རྒྱུན་མི་གཅོད་པས་སེམས་བསྐྱེད་པ་མི་སྒུལ་བ་དང་། བསྐལ་པ་འགྲོ་བ་ཐམས་ཅད་དང་མཉམ་པ་བརྗོད་དུ་མེད་པའི་ཡང་བརྗོད་དུ་མེད་པར་བྱང་ཆུབ་སེམས་དཔའི་སྤྱད་པ་སྤྱོད་པས་ཞུམ་པར་མི་འགྱུར། སྒྱིད་ལུག་པར་མི་འགྱུར་ཞིང་། བྱང་ཆུབ་སེམས་དཔའི་སྤྱོད་པ་ལས་ཕྱིར་མི་ལྡོག་པས་སེམས་བསྐྱེད་པ་མི་སྒུལ་བ་དང་།
ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དད་པ་གཏིང་ཚུགས་པ་དང་། རྙོག་པ་མེད་ཅིང་དག་པ་དང་། རྣམ་པར་དག་པ་དྲི་མ་མེད་པ་འོད་དང་བ་སངས་རྒྱས་ཐམས་ཅད་བསྙེན་བཀུར་བྱ་བ་ལ་བརྩོན་པ། ཕྱིར་མི་ལྡོག་པ་མི་ཟད་པ་མི་འཕྲོགས་པ་དགའ་བ་དང་སྤྲོ་བ་དང་། མོས་པ་ཆེན་པོས་བྱུང་བ་དང་ལྡན་པས་སེམས་བསྐྱེད་པ་མི་སྒུལ་བ་དང་། ཐམས་ཅད་མཁྱེན་པར་སྦྱོར་ཞིང་འབྱུང་བའི་ལམ་ལ་ཤིན་ཏུ་གྲུབ་པས་སེམས་བསྐྱེད་པ་མི་སྒུལ་བ་དང་། བྱང་ཆུབ་སེམས་དཔའི་སྤྱོད་པ་དང་གདམས་ངག་དང་མན་ངག་དང་བསླབ་པ་ཐམས་ཅད་གཟུང་ཞིང་མཉན་པ་ཡོངས་སུ་མི་སྤོང་ཞིང་མོས་པར་བྱ་བ་ལ་སེམས་བསྐྱེད་པ་མི་སྒུལ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མི་སྒུལ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་མི་སྒུལ་ཅིང་། བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་ཡོངས་སུ་མི་གཏོང་བ་ལ་གནས་པ་སྟེ། བཅུ་གང་ཞེ་ན་འདི་ལྟར་སངས་རྒྱས་ཐམས་ཅད་ཀྱི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡོངས་སུ་མི་གཏོང་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། རྣམ་པར་གདུལ་བ་ཡོངས་སུ་མི་གཏོང་བ་དང་། སངས་རྒྱས་ཐམས་ཅད་ཀྱི་གདུང་བསབ་པ་ཡོངས་སུ་མི་གཏོང་བ་དང་། དགེ་བའི་བཤེས་གཉེན་ཐམས་ཅད་ལ་བསྙེན་པ་ཡོངས་སུ་མི་གཏོང་བ་དང་། སངས་རྒྱས་ཀྱི་ཞིང་ཐམས་ཅད་དུ་དེ་བཞིན་གཤེགས་པ་བསྙེན་བཀུར་བྱ་བ་ཡོངས་སུ་མི་གཏོང་བ་དང་། ཡོན་ཏན་ཐམས་ཅད་ཡོངས་སུ་བཙལ་བའི་ཕྱིར་ཐེག་པ་ཆེན་པོ་ཡོངས་སུ་མི་གཏོང་བ་དང་། སངས་རྒྱས་བྱུང་བ་ཐམས་ཅད་དུ་ཚངས་པར་སྤྱད་པ་སྤྱོད་ཅིང་། ཚུལ་ཁྲིམས་སྲུང་བ་ཡོངས་སུ་མི་གཏོང་བ་དང་། བྱང་ཆུབ་སེམས་དཔའ་ཐམས་ཅད་ཡོངས་སུ་མི་གཏོང་
བ་དང་། དེ་བཞིན་གཤེགས་པ་ཐམས་ཅད་ཀྱི་གསུང་ཡོངས་སུ་བཙལ་ཞིང་ཡང་དག་པར་གཟུང་བ་ལ་མཁས་པ་ཡོངས་སུ་མི་གཏོང་བ་དང་། བྱང་ཆུབ་སེམས་དཔའི་སྤྱོད་པ་དང་། སྨོན་ལམ་ཐམས་ཅད་ཡང་དག་པར་བསྒྲུབ་པས་སངས་རྒྱས་ཀྱི་ཆོས་ཐམས་ཅད་ཡང་དག་པར་བསྒྲུབ་པ་ཡོངས་སུ་མི་གཏོང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་ཡོངས་སུ་མི་གཏོང་བ་ལ་གནས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ཡོངས་སུ་མི་གཏོང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱིས་རྣམ་པར་ལྟ་བ་སྟེ། བཅུ་གང་ཞེ་ན། འདི་ལྟར་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་བསྟན་པར་མཁས་པ་ལ་ཡེ་ཤེས་ཀྱིས་རྣམ་པར་ལྟ་བ་དང་། དུས་གསུམ་གྱི་དགེ་བའི་རྩ་བ་ཐམས་ཅད་ལ་ཡེ་ཤེས་ཀྱིས་རྣམ་པར་ལྟ་བ་དང་། བྱང་ཆུབ་སེམས་དཔའི་སྤྱོད་པ་དང་རྣམ་པར་འཕྲུལ་པ་ཐམས་ཅད་ལ་ཡེ་ཤེས་ཀྱིས་རྣམ་པར་ལྟ་བ་དང་། ཆོས་ཐམས་ཅད་ཀྱི་ཚུལ་གྱི་སྒོ་ལ་ཡེ་ཤེས་ཀྱིས་རྣམ་པར་ལྟ་བ་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་ལ་ཡེ་ཤེས་ཀྱིས་རྣམ་པར་ལྟ་བ་དང་། གཟུངས་ཀྱི་སྒོ་ཐམས་ཅད་ལ་ཡེ་ཤེས་ཀྱིས་རྣམ་པར་ལྟ་བ་དང་། འཇིག་རྟེན་གྱི་ཁམས་ཐམས་ཅད་དུ་ཆོས་བསྟན་པ་ལ་ཡེ་ཤེས་ཀྱིས་རྣམ་པར་ལྟ་བ་དང་། ཆོས་ཀྱི་དབྱིངས་ཐམས་ཅད་དུ་འཇུག་པ་ལ་ཡེ་ཤེས་ཀྱིས་རྣམ་པར་ལྟ་བ་དང་། ཕྱོགས་བཅུ་ཐམས་ཅད་དུ་བསམ་གྱིས་མི་ཁྱབ་པ་ལ་ཡེ་ཤེས་ཀྱིས་རྣམ་པར་ལྟ་བ་དང་། སངས་རྒྱས་ཀྱི་ཆོས་ཐམས་ཅད་ཀྱི་ཡེ་ཤེས་སྣང་བ་ཆགས་པ་མེད་པ་ལ་ཡེ་ཤེས་ཀྱིས་རྣམ་པར་ལྟ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱིས་རྣམ་པར་ལྟ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་
དེ་བཞིན་གཤེགས་པའི་ཡེ་ཤེས་ཆེན་པོས་རྣམ་པར་གཟིགས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཤིན་ཏུ་བསྟན་པ་སྟེ། བཅུ་གང་ཞེ་ན། འདི་ལྟར་ཆོས་ཐམས་ཅད་རྟེན་ཅིང་འབྲེལ་བར་འབྱུང་བར་བསྟན་པ་དང་། ཆོས་ཐམས་ཅད་སྒྱུ་མ་ལྟ་བུར་བསྟན་པ་དང་། ཆོས་ཐམས་ཅད་ཉོན་མོངས་པ་མེད་པར་བསྟན་པ་དང་། ཆོས་ཐམས་ཅད་མཐའ་དང་དབུས་མེད་པར་བསྟན་པ་དང་། ཆོས་ཐམས་ཅད་གནས་མེད་པར་བསྟན་པ་དང་། ཆོས་ཐམས་ཅད་རྡོ་རྗེ་ལྟ་བུར་བསྟན་པ་དང་། ཆོས་ཐམས་ཅད་དེ་བཞིན་གཤེགས་པར་བསྟན་པ་དང་། ཆོས་ཐམས་ཅད་རབ་ཏུ་ཞི་བར་བསྟན་པ་དང་། ཆོས་ཐམས་ཅད་འབྱུང་བའི་ལམ་དུ་བསྟན་པ་དང་། ཆོས་ཐམས་ཅད་དོན་གཅིག་པའི་རང་བཞིན་ཡོངས་སུ་མ་གྲུབ་པར་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཤིན་ཏུ་བསྟན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ཤིན་ཏུ་བསྟན་པ་ལ་མཁས་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡོངས་སུ་དག་པ་སྟེ། བཅུ་གང་ཞེ་ན། འདི་ལྟར་ལྷག་པའི་བསམ་པ་ཡོངས་སུ་དག་པ་དང་། ཐེ་ཙོམ་དང་ཡིད་གཉིས་རྣམ་པར་འཐོར་བ་ཡོངས་སུ་དག་པ་དང་། ལྟ་བ་ཡོངས་སུ་དག་པ་དང་། སྤྱོད་ཡུལ་ཡོངས་སུ་དག་པ་དང་། ཐམས་ཅད་མཁྱེན་པ་ཉིད་ལ་མོས་པ་ཡོངས་སུ་དག་པ་དང་། སོ་སོ་ཡང་དག་པར་རིག་པ་ཡོངས་སུ་དག་པ་དང་། མི་འཇིགས་པ་ཡོངས་སུ་དག་པ་དང་། བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱིས་རྣམ་པར་སྤྱོད་པ་ཡོངས་སུ་དག་པ་དང་། བྱང་ཆུབ་སེམས་དཔའི་ཡང་དག་པར་དམ་བཅས་པ་ཐམས་ཅད་ཡང་དག་པར་བསྒྲུབ་པ་ཡོངས་སུ་དག་པ་དང་། བསོད་ནམས་བརྒྱ་པའི་མཚན་གྱི་མི་ཆེན་པོའི་མཚན་སུམ་ཅུ་རྩ་གཉིས་དང་ལྡན་ཞིང་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་མཐར་ཐུག་པའི་དགེ་བའི་ཆོས་དང་ལྡན་པའི་དགེ་བའི་རྩ་བ་ཐམས་ཅད་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་ཤེས་ཀྱང་སངས་རྒྱས་ཀྱི་ཆོས་ཡོངས་སུ་བཙལ་བས་སྒྱིད་ལུག་པར་བྱེད་པར་འགྱུར་བ་མེད་ཅིང་། བྱང་ཆུབ་སེམས་དཔའི་སྤྱོད་པ་ལ་ཞུམ་པར་འགྱུར་བ་མེད་ལ་མི་འཇིགས་མི་སྐྲག་སྐྲག་པར་མི་བྱེད་དེ། སྨོན་ལམ་ལས་ཕྱིར་མི་ལྡོག་ཅིང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྒྱུན་མི་གཅོད་ཅིང་། སངས་རྒྱས་ཀྱི་ཆོས་ཡོངས་སུ་བཙལ་བ་ལ་མཐར་ཐུག་པ་མེད་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱིས་པ་སོ་སོའི་སྐྱེ་བོ་རང་གི་ཀུན་ནས་ཉོན་མོངས་པས་ཤིན་ཏུ་འཁྲུགས་པར་གྱུར་པ་དེ་དག་བྱང་ཆུབ་སེམས་དཔའ་ལ་མི་སྙན་པར་རྗོད་ཅིང་ངན་དུ་ཟེར་ལ་མི་ཚུལ་བ་དང་། རྩུབ་པའི་ངག་འབྱིན་ཅིང་སྡིགས་རུ་བྱེད་པ་དང་། རྡོ་དང་དབྱིག་པ་དང་། མཚོན་ཆས་རྡེག་ཅིང་འདེབས་ཀྱང་དེའི་རྒྱུས་བྱང་ཆུབ་སེམས་དཔའི་སྤྱོད་པ་དང་། སངས་རྒྱས་ཀྱི་ཆོས་ཡོངས་སུ་བཙལ་བ་ལས་སྐྱོ་བར་མི་འགྱུར་ཏེ། བཟོད་པ་དང་མོས་པ་མང་བར་སྤྱོད་ཅིང་ཆོས་སྐྱོན་མེད་པ་ཡང་དག་པ་ཇི་ལྟ་བ་བཞིན་དུ་རྟོགས་པའི་བཟོད་པ་དང་། ལྡན་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་འགྱུར་བའི་ཕྱག་རྒྱ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཟབ་མོ་ཐམས་ཅད་མཁྱེན་པ་ཉིད་དང་ལྡན་པ་བསྟན་པའི་ཚེ། ཁོང་ནས་ཤེས་པས་འཇུག་ཅིང་མོས་པ་དང་། ཡིད་ཆེས་པ་དང་། དགའ་བ་དང་མངོན་པར་དད་པར་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རང་གི་ཤེས་པས་བདག་ཤེས་པར་བྱེད་ཅིང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལྷག་པའི་བསམ་པས། སངས་རྒྱས་སུ་འགྱུར་བར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ། མངོན་པར་འཚང་རྒྱ་བར་བྱའོ། །དགའ་བ་དང་མོས་པ་དང་སྤྲོ་བ་ཆེན་པོས་བྱུང་བའི་སེམས་བསྐྱེད་པ་དང་། མོས་པ་ཆེན་པོའི་རྒྱུས། རྣམ་པར་འཕེལ་བའི་བརྩོན་འགྲུས་ཆེན་པོས་འགྲོ་བ་ལྔའི་རྒྱུད་དུ་འཁོར་ཞིང་ཉོན་མོངས་པའི་སེམས་ཅན་རྣམས་རབ་ཏུ་དགྲོལ་བར་བྱའོ། །སྙམ་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེ་བཞིན་གཤེགས་པའི་ཡེ་ཤེས་མུ་མེད་པ་ལ་འཇུག་ཀྱང་དེ་བཞིན་གཤེགས་པའི་ཡེ་ཤེས་ལས་མཚམས་ཀྱིས་དཔོག་པ་མི་བྱེད་ཅིང་སངས་རྒྱས་བཅོམ་ལྡན་འདས་ཚད་མེད་པ་རྣམས་ལས་དེ་བཞིན་གཤེགས་པའི་ཡེ་ཤེས་ཀུན་ཏུ་མཐའ་ཡས་པ་ཐོས་ཤིང་ཚད་འཛིན་པར་མི་བྱེད་ཅིང་། ཡི་གེ་རྣམ་པར་དགོད་པ་ཐམས་ཅད་ཀྱིས་དེ་བཞིན་གཤེགས་པའི་ཡེ་ཤེས་ལས་མཚམས་སུ་དཔོག་པར་མི་བྱེད་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཤིན་ཏུ་མོས་པ་ཡིན་ཏེ། མོས་པ་གཞན་གྱིས་མི་ཐུབ་པ་དང་མོས་པ་ཟབ་པ་དང་། མོས་པ་ཡངས་པ་དང་། མོས་པ་ཆེ་བ་དང་། མོས་པ་
སྣ་ཚོགས་དང་། མོས་པ་ཟིལ་གྱིས་མི་ནོན་པ་དང་། མོས་པ་བླ་ན་མེད་པ་དང་། མོས་པ་བརྟན་པ་དང་མོས་པ་ལས་མི་མཚུངས་པའི་མོས་པ་དང་ལྡན་ཞིང་དེ་ལ་བདུད་ཐམས་ཅད་དང་། བདུད་ཀྱི་རིས་ཀྱི་ལྷ་ཐམས་ཅད་དང་། མུ་སྟེགས་ཅན་གཞན་དང་ཕས་ཀྱི་རྒོལ་བ་ཐམས་ཅད་ཀྱིས་མོས་པ་དེ་ལས་བཟློག་པར་མི་ནུས་ཤིང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལས་ཕྱིར་བཟློག་པར་མི་ནུས་ཏེ། དེ་ལྟ་བུའི་མོས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་མོས་པ་དང་ལྡན་པ་ཡིན་ཏེ་འདི་ནི་ཕྱག་རྒྱ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་མི་ཟློགས་ཤིང་ལུས་དང་སྲོག་ལ་མི་ལྟ་བར་ཐམས་ཅད་མཁྱེན་པ་ཉིད་ལ་མངོན་པར་ཕྱོགས་ཤིང་ཐམས་ཅད་མཁྱེན་པ་ཉིད་དུ་སེམས་བསྐྱེད་པ་སངས་རྒྱས་ཐམས་ཅད་ཀྱི་བྱང་ཆུབ་སྣང་བར་བྱུང་བས་བྱང་ཆུབ་སེམས་དཔའི་སྤྱད་པ་ལ་སྤྱོད་ཅིང་སངས་རྒྱས་ཀྱི་བྱང་ཆུབ་ཡོངས་སུ་མི་གཏོང་ལ་དགེ་བའི་བཤེས་གཉེན་བསྙེན་པ་ལས་ཕྱིར་མི་ལྡོག་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་ཐེག་པ་ཆེན་པོ་ལ་གནས་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ལ་སངས་རྒྱས་ཀྱི་ཆོས་ཡོངས་སུ་བཙལ་བས་ཉེ་བར་རྟོན་པར་བྱེད་དེ་དགེ་བའི་རྩ་བ་ལའང་རབ་ཏུ་གཞོག་གོ །ཇི་ལྟར་ན་བྱང་ཆུབ་ལས་ཕྱིར་མི་ལྡོག་པར་འགྱུར་ཞེས་ཏེ། ཐམས་ཅད་མཁྱེན་པ་ཉིད་ཀྱི་སེམས་ཀྱིས་ཀྱང་རབ་ཏུ་འཛིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་ལ་སྙོམས་པའི་སེམས་ལ་གནས་ཤིང་ཐམས་ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པ་ལ་བརྩོན་པ་ཡིན་ཏེ། སེམས་ཅན་ཐམས་ཅད་ལ་
ཡང་སྙིང་རྗེ་ཆེན་པོ་བསྐྱེད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཆོས་སྟོན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་། དགེ་བའི་རྩ་བ་ཐམས་ཅད་ཀྱིས་རྒྱུད་ཀྱི་ཚུལ་གཅིག་ཏུ་གྱུར་ཅིང་། སངས་རྒྱས་ཐམས་ཅད་ཀྱི་རིགས་རྒྱུན་མི་གཅོད་པ་ལ་ཤིན་ཏུ་བརྩོན་པ་དང་། ཐམས་ཅད་མཁྱེན་པའི་ཡེ་ཤེས་གྱི་ལམ་གྱིས་འབྱུང་བ་ལ་གནས་པ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་སྟེ། ཕྱག་རྒྱ་དེ་དག་དང་ལྡན་ན་བྱང་ཆུབ་སེམས་དཔའ་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་ཞིང་ཆོས་ཀྱི་ཡེ་ཤེས་ཀྱི་ཕྱག་རྒྱ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་སྣང་བ་སྟེ། བཅུ་གང་ཞེ་ན། འདི་ལྟར་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་ཏེ། སངས་རྒྱས་ཀྱི་བྱང་ཆུབ་ཀྱིས་སྣང་བར་གྱུར་པའི་ཡེ་ཤེས་སྣང་བ་དང་། སངས་རྒྱས་ཐམས་ཅད་ལྟ་བ་ལ་ཡེ་ཤེས་སྣང་བ་དང་། སེམས་ཅན་ཐམས་ཅད་ཀྱི་འཆི་འཕོ་བ་དང་སྐྱེ་བའི་སྐྱེ་མཆེད་ལ་ཡེ་ཤེས་སྣང་བ་དང་། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་ཡེ་ཤེས་སྣང་བ་དང་། དགེ་བའི་བཤེས་གཉེན་ཐམས་ཅད་ཀྱི་རྒྱུ་མཐུན་པས་བྱང་ཆུབ་ཏུ་སེམས་བསྐྱེད་ཅིང་དགེ་བའི་རྩ་བ་ཐམས་ཅད་བསྩགས་པ་ལ་ཡེ་ཤེས་སྣང་བ་དང་། སེམས་ཅན་རྣམ་པར་གདུལ་བ་ལ་ཡེ་ཤེས་སྣང་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བས་དེ་བཞིན་གཤེགས་
པའི་ས་ལ་དགོད་པ་ལ་ཡེ་ཤེས་སྣང་བ་དང་། ཆོས་ཀྱི་ཚུལ་འབྱམ་ཀླས་ཤིང་བསམ་གྱིས་མི་ཁྱབ་པ་བསྟན་པ་ལ་ཡེ་ཤེས་སྣང་བ་དང་། སངས་རྒྱས་ཐམས་ཅད་ཀྱི་བྱིན་གྱི་རླབས་ལ་མཁས་པ་ལ་ཡེ་ཤེས་སྣང་བ་དང་། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱ་བ་ལ་ཡེ་ཤེས་སྣང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་ཡེ་ཤེས་སྣང་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་བླ་ན་མེད་པའི་ཡེ་ཤེས་སྣང་བ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་གནས་སེམས་ཅན་ཐམས་ཅད་དང་། ཉན་ཐོས་ཐམས་ཅད་དང་། རང་སངས་རྒྱས་ཐམས་ཅད་དང་། མཚུངས་པ་མེད་པ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་ཡང་དག་པའི་མཐའི་གནས་ཀྱིས་གནས་ཀྱང་སྨོན་ལམ་ཐམས་ཅད་ཡོངས་སུ་མ་རྫོགས་ཀྱི་བར་དུ་མངོན་ཏུ་མི་བྱེད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་བསྐྱེད་པར་བྱ་བ་ཡང་ཆོས་ཀྱི་དབྱིངས་ཐམས་ཅད་ཀྱིས་ཀླས་པར་སེམས་བསྐྱེད་པས་སྐྱེད་པར་བྱེད་ལ་ཆོས་གང་ལ་ཡང་མངོན་པར་ཆགས་པ་མེད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་གཉིས་པའོ། །ཀྱེ་རྒྱལ་བའི་སྲས་གཞན་ཡང་། བྱང་ཆུབ་སེམས་དཔའ་སྤྲུལ་པ་ལྟ་བུའི། བྱང་ཆུབ་སེམས་དཔའི་སྤྱོད་པ་ལ་ཆོས་ཐམས་ཅད་རབ་ཏུ་ཞི་བས་སྤྱོད་ཀྱང་སངས་རྒྱས་ཀྱི་ཆོས་ཐམས་ཅད་ལ་མགོ་རྨོངས་པའང་མེད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་ལས་གྱེན་དུ་འཕགས་པའི་ཡིད་ལ་བྱ་བས་བསྐལ་པ་བརྗོད་དུ་མེད་པར་སྨོན་ལམ་ཆེན་པོ་ཡོངས་སུ་རྫོགས་པར་བྱ་བའི་ཕྱིར་
བྱང་ཆུབ་སེམས་དཔའི་སྤྱད་པ་སྤྱོད་ཀྱང་ཡོངས་སུ་སྐྱོ་བ་མི་བསྐྱེད་དེ། འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་རང་བཞིན་གྱིས་དབེན་པས་ཆོས་ཐམས་ཅད་ལ་མི་གནས་པར་སྤྱོད་ཀྱང་ཐམས་ཅད་མཁྱེན་པར་འབྱུང་བའི་ཆོས་ཡོངས་སུ་མ་རྫོགས་ཀྱི་བར་དུ་ཡོངས་སུ་མྱ་ངན་ལས་འདའ་བར་མི་བྱེད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བསྐལ་པ་ཐམས་ཅད་བསྐལ་པ་མ་ཡིན་པར་ཡང་ཤེས་ལ་བསྐལ་པའི་གྲངས་ཀྱང་རབ་ཏུ་སྟོན་ཏེ། དེ་ཡང་ཡང་དག་པ་དེ་ཁོ་ན་བཞིན་དུ་འགྱུར་བ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་མངོན་པར་འདུ་བྱ་བ་མེད་པར་ཡང་ཤེས་ལ་སངས་རྒྱས་ཀྱི་ཆོས་ཐམས་ཅད་ཡོངས་སུ་བཙལ་བའི་ཕྱིར་མངོན་པར་འདུ་བྱ་བའི་སྤྲོས་པ་ཡང་རྒྱུན་མི་གཅོད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཁམས་གསུམ་ཐམས་ཅད་སེམས་ཙམ་དུ་འཇུག་སྟེ། དུས་གསུམ་ཡང་སེམས་ཙམ་དུ་ཤེས་ལ་སེམས་དེ་ཡང་མཐའ་དང་དབུས་མེད་པར་ཁོང་དུ་ཆུད་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཅན་གཅིག་གི་དོན་ཏུ་ཡང་ཐམས་ཅད་མཁྱེན་པའི་ས་ལ་རབ་ཏུ་གཞག་པའི་ཕྱིར་བསྐལ་པ་བརྗོད་དུ་མྱེད་པར་བྱང་ཆུབ་སེམས་དཔའི་སྤྱད་པ་སྤྱོད་ལ་སེམས་ཅན་གཅིག་གི་དོན་དུ་ཇི་ལྟ་བ་དེ་བཞིན་དུ་སེམས་ཅན་ཐམས་ཅད་ཀྱི་དོན་དུ་ཡང་ཐམས་ཅད་མཁྱེན་པའི་ས་ལ་དགོད་པའི་ཕྱིར་བྱང་ཆུབ་སེམས་དཔའི་སྤྱད་པ་སྤྱོད་ཀྱང་། དུས་སུ་སྤྱོད་པས་ཡོངས་སུ་མི་སྐྱོ་བ་ཡིན་ཏེ། འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་དགུ་པའོ། །ཀྱེ་རྒྱལ་བའི་སྲས་
གཞན་ཡང་བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ཡང་ཡོངས་སུ་རྫོགས་ལ་སེམས་ཅན་ཐམས་ཅད་ཀྱི་དོན་དུ་འགྱུར་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་མི་རྒྱ་ཞིང་ཇི་སྲིད་ཇི་སྲིད་དུ་འཁོར་བ་དེ་སྲིད་དེ་སྲིད་དུ་སེམས་ཅན་གྱི་དོན་གྱི་ཕྱི་ཕྱིར་ཞིང་ཚད་མེད་པ་བྱ་བར་འགྱུར་རོ། །སངས་རྒྱས་ཀྱི་བྱང་ཆུབ་ཏུ་དགོད་པར་འགྱུར་རོ། །སྙམ་པ་འདི་ནི་བྱང་ཆུབ་སེམས་དཔའི་གནས་མཚུངས་པ་མེད་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའི་གནས་མཚུངས་པ་མེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་ཡེ་ཤེས་ཆེན་པོ་མཚུངས་པ་མེད་པས་གནས་པ་བླ་ན་མེད་པ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་དྲུག་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་བྱང་ཆུབ་ཏུ་ཞུམ་པ་མེད་པའི་སེམས་བསྐྱེད་པ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔས་འདི་ལྟར་བདུད་དང་བདུད་ཀྱི་རིས་ཀྱི་ལྷ་ཐམས་ཅད་རབ་ཏུ་འཕམ་པར་བྱའོ། །སྙམ་སྟེ་ཞུམ་པ་མེད་པའི་སེམས་བསྐྱེད་པ་དང་། མུ་སྟེགས་ཅན་གཞན་དང་། ཕས་ཀྱི་རྒོལ་བ་ཐམས་ཅད་ཆོས་དང་མཐུན་པར་ཚར་གཅད་དོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། ལེགས་པར་བཤད་པས་སེམས་ཅན་གྱི་ཁམས་ཐམས་ཅད་ཚིམ་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། ཆོས་ཀྱི་དབྱིངས་ཡོངས་སུ་རྫོགས་པར་བྱ་བས་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བ་ཐམས་ཅད་ཡོངས་སུ་རྫོགས་པར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། འགྲོ་བ་ཐམས་ཅད་ཀྱི་བསོད་ནམས་ཀྱི་ཕུང་པོ་ཡོངས་སུ་རྫོགས་པར་བྱ་བ་ཡོངས་སུ་རྫོགས་པར་བྱའོ། །ཡང་དག་པར་བསྡུ་བར་བྱའོ། །སྙམ་སྟེ་ཞུམ་པ་མེད་པའི་
སེམས་བསྐྱེད་པ་དང་། གཏེར་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩམ་པ་ཆེན་པོ་དང་། བྱང་ཆུབ་སེམས་དཔའི་སྤྱོད་པ་རྫོགས་པར་དཀའ་བ་ཡོངས་སུ་རྫོགས་པར་བྱའོ། །སྙམ་སྟེ་ཞུམ་པ་མེད་པའི་སེམས་བསྐྱེད་པ་དང་། སེམས་ཅན་གྱི་ཁམས་ཐམས་ཅད་བླ་ན་མེད་པའི་ཡོངས་སུ་སྨིན་པར་བྱ་བ་དང་། བླ་ན་མེད་པའི་གདུལ་བས་ཡོངས་སུ་སྨིན་པར་བྱའོ། །གདུལ་བར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། འཇིག་རྟེན་གྱི་ཁམས་ཐམས་ཅད་ཁ་དོག་དུ་མ་དང་ཁ་དོག་སྣ་ཚོགས་དང་། བརྒྱ་སྟོང་དུ་མ་ལས་འདས་པའི་ཁ་དོག་དུ་མོས་པར་བསྒྱུར་ལ་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱའོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། བདག་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། གང་ལ་ལ་ཞིག་གིས་བདག་གི་ལུས་ལ་དམིགས་ཏེ། ལག་པ་དང་རྐང་པ་དང་རྣ་བ་དང་སྣ་དང་། ཤ་དང་ཁྲག་དང་རུས་པ་དང་རྐང་དང་། བུ་དང་བུ་མོ་དང་ཆུང་མ་དང་གླང་པོ་དང་། རྟ་དང་རྒྱལ་སྲིད་དང་གཡོག་འཁོར་ཐམས་ཅད་སློང་བ་ཞིག་བྱུང་ན་དེ་ལ་བདག་གིས་ཐམས་ཅད་ཡོངས་སུ་གཏང་བར་བྱས་ཏེ། སེམས་ཅན་ཐམས་ཅད་ལ་ཡོངས་སུ་སྐྱོ་བ་དང་ལྡན་པའི་སེམས་གཅིག་ཀྱང་མི་བསྐྱེད་དོ། །སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར་རྣམ་པར་སྨིན་པ་ལ་རེ་བ་མེད་ཅིང་སྙིང་རྗེ་ཆེན་པོ་སྔོན་དུ་འགྲོ་བ་དང་། བྱམས་པ་ཆེན་པོའི་མཐར་གཏུགས་པའི་སེམས་བསྐྱེད་པས། ལུས་ཐམས་ཅད་ཀྱང་ཡོངས་སུ་གཏང་ངོ་སྙམ་སྟེ། ཞུམ་པ་མེད་པའི་སེམས་བསྐྱེད་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། དུས་གསུམ་གྱི་སངས་རྒྱས་ཐམས་ཅད་དང་། སངས་རྒྱས་ཀྱི་ཆོས་ཐམས་ཅད་དང་། སེམས་ཅན་ཐམས་ཅད་དང་།
ཞིང་ཐམས་ཅད་དང་། འགྲོ་བ་ཐམས་ཅད་དང་། དུས་ཐམས་ཅད་དང་། ནམ་མཁའི་ཁམས་ཐམས་ཅད་དང་སྤྱོད་པར་གཏོགས་པའི་ཁམས་ཐམས་ཅད་དང་། མྱ་ངན་ལས་འདས་པའི་ཁམས་ཞི་བ་གང་ཇི་སྙེད་པ་ཐམས་ཅད་དང་། ཆོས་ཐ་དད་པ་དེ་དག་ཐམས་ཅད་སེམས་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཤེས་པར་བྱ། རྟོགས་པར་བྱ། མངོན་པར་རྫོགས་པར་འཚང་རྒྱ་བར་བྱ། བལྟ་བར་བྱ། ཁོང་དུ་ཆུད་པར་བྱ། བསྒོམ་པར་བྱ། རྣམ་པར་བསྒོམ་པར་བྱ། མངོན་པར་ཤེས་པར་བྱ། ཡོངས་སུ་ཤེས་པར་བྱ། རབ་ཏུ་སྤང་བར་བྱ། མངོན་ཏུ་བྱ་སྟེ། དེ་དག་ཐམས་ཅད་ལ་མ་བརྟགས་རྣམ་པར་མ་བརྟགས་སྣ་ཚོགས་སུ་མ་བྱས། རྣམ་པ་ཐ་དད་དུ་མ་བྱས། ཆེད་དུ་བསྐྱོད་པར་མ་བྱས། དམིགས་པར་མ་བྱས་བསྒོམ་པར་མ་བྱས་རྣམ་པར་བསྒོམ་པར་མ་བྱས། གཅིག་ཏུ་མ་བྱས་གཉིས་སུ་མ་བྱས་པའི་ཡེ་ཤེས་མི་གཉིས་པ་གཉིས་པོ་ཐམས་ཅད་རབ་ཏུ་ཤེས་པ་དང་། མཚན་ཉིད་མེད་པའི་ཡེ་ཤེས་དང་། མཚན་ཉིད་ཐམས་ཅད་རབ་ཏུ་ཤེས་པ་དང་། རྟོག་པ་མེད་པའི་ཡེ་ཤེས། རྟོག་པ་ཐམས་ཅད་རབ་ཏུ་ཤེས་པ་དང་། སྣ་ཚོགས་སུ་གྱུར་པ་མེད་པའི་ཡེ་ཤེས། སྣ་ཚོགས་ཐམས་ཅད་རབ་ཏུ་ཤེས་པ་དང་། རྣམ་པར་ཐ་དད་པར་གྱུར་པ་མེད་པའི་ཡེ་ཤེས་རྣམ་པ་ཐ་དད་པ་ཐམས་ཅད་རབ་ཏུ་ཤེས་པ་དང་། འཇིག་རྟེན་དུ་གྱུར་པ་མེད་པའི་ཡེ་ཤེས་འཇིག་རྟེན་ཐམས་ཅད་རབ་ཏུ་ཤེས་པ་དང་། འཇིག་རྟེན་གྱི་ཁམས་སུ་ཕྱིན་པ་མེད་པའི་ཡེ་ཤེས་འཇིག་རྟེན་གྱི་ཁམས་ཐམས་ཅད་དུ་རབ་ཏུ་ཤེས་པ་དང་། དུས་སུ་གྱུར་པ་མེད་པའི་ཡེ་ཤེས་དུས་ཐམས་ཅད་རབ་ཏུ་ཤེས་པ་དང་། སེམས་ཅན་གྱི་སར་གྱུར་པ་མེད་པའི་ཡེ་ཤེས་སེམས་ཅན་གྱི་ཁམས་ཐམས་ཅད་རབ་ཏུ་ཤེས་པ་དང་། མངོན་པར་ཤེས་པ་ཐམས་ཅད་ལས་གྱེན་དུ་འཕགས་པའི་ཡེ་ཤེས་མངོན་པར་ཆགས་པའི་སྤྱོད་ཡུལ་གྱི་མཐར་ཐུག་པ་དང་། གནས་མེད་པ་ལ་གཞོལ་པའི་ཡེ་ཤེས་
གནས་ཐམས་ཅད་རབ་ཏུ་ཤེས་པ་དང་། ཀུན་ནས་ཉོན་མོངས་པ་མེད་པའི་ཡེ་ཤེས་ཀུན་ནས་ཉོན་མོངས་པ་ཐམས་ཅད་རབ་ཏུ་ཤེས་པ་དང་། མི་ཟད་པའི་མཐར་ཕྱིན་པའི་ཡེ་ཤེས་ཟད་པ་ཐམས་ཅད་རབ་ཏུ་ཤེས་པ་དང་། ཆོས་ཀྱི་དབྱིངས་ལ་གཞོལ་བའི་ཡེ་ཤེས་འཇིག་རྟེན་གྱི་ཁམས་ཐམས་ཅད་དུ་ལུས་ཡོངས་སུ་སྟོན་པ་དང་། བརྗོད་པ་དང་ཚིག་དང་། སྒྲ་དང་དབྱངས་དང་བྲལ་བའི་ཡེ་ཤེས་སྒྲ་དབྱངས་བརྗོད་དུ་མེད་པ་རབ་ཏུ་བརྗོད་པ་དང་། རང་བཞིན་གཅིག་པའི་ཡེ་ཤེས་རང་བཞིན་མེད་པ་རབ་ཏུ་རྟོགས་པ་དང་། སྤྱོད་ཡུལ་གཅིག་ལ་ཞུགས་པའི་ཡེ་ཤེས་སྤྱོད་ཡུལ་ཐ་དད་པ་ཡོངས་སུ་སྟོན་པས། བརྗོད་པ་ཆེན་པོའི་བྱིན་གྱི་རླབས་ཡང་དག་པར་བསྟེན་པའི་ཕྱིར་བརྗོད་དུ་མེད་པའི་ཆོས་ཐམས་ཅད་མངོན་པར་རྫོགས་པར་འཚང་རྒྱ་བར་བྱའོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་ཐམས་ཅད་མཁྱེན་པ་ཉིད་ཀྱི་ས་ཆེན་པོ་མངོན་པར་རྫོགས་པར་འཚང་རྒྱ་བར་བྱའོ། །ཆོ་འཕྲུལ་ཆེན་པོ་དང་རྣམ་པར་འཕྲུལ་པའི་ཆོ་འཕྲུལ་ཡང་འགྲོ་བ་ཐམས་ཅད་དུ་བསྟན་པར་བྱའོ། །སྙམ་པ་འདི་ནི་ཞུམ་པ་མེད་པའི་སེམས་བསྐྱེད་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཞུམ་པ་མེད་པའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་ཞུམ་པ་མྱེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་རི་བོ་ལྟ་བུ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་ཐམས་ཅད་མཁྱེན་པའི་ཆོས་ཡིད་ལ་བྱ་བས་རྟག་ཏུ་རྒྱུན་མི་འཆད་པར་བརྩོན་པ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་མི་དམིགས་པས་ཆོས་
ཐམས་ཅད་ལ་རང་བཞིན་གྱིས་སྟོང་པར་རྣམ་པར་བལྟ་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བསྐལ་པ་མཐའ་དང་དབུས་མེད་པར་ཆོས་དཀར་པོ་ཐམས་ཅད་ཀྱི་སྤྱོད་པ་དང་ལྡན་པའི་སེམས་བསྐྱེད་པས་བྱང་ཆུབ་སེམས་དཔའི་སྤྱད་པ་སྤྱོད་ཅིང་ཆོས་དཀར་པོ་ཡང་དག་པར་བླངས་པ་ཐམས་ཅད་ལ་ནན་ཏན་དུ་བྱེད་པས་དེ་བཞིན་གཤེགས་པའི་ཡེ་ཤེས་ཚད་མེད་པ་ཡང་ཁོང་དུ་ཆུད་པར་བྱེད་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ཀྱིས་དགེ་བའི་བཤེས་གཉེན་ལ་ཚུལ་དང་འདྲ་བའི་རིམ་གྲོ་བྱེད་ཅིང་རེ་བ་མེད་པའི་སེམས་བསྐྱེད་པ་ཆོས་རྐུ་བ་དང་བྲལ་བས་ནན་ཏན་དུ་བྱེད་དེ། གཞན་དུ་ན་འདི་ལ་བདག་གིས་དེ་བས་ཀྱང་རིམ་གྲོ་དང་བཀུར་སྟི་རྒྱ་ཆེན་པོ་བསྐྱེད་པར་བྱའོ། །འདི་ལ་ཡོངས་སུ་གཏོང་བ་ཐམས་ཅད་ཀྱང་དབུལ་བར་བྱའོ། །སྙམ་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་ལས་སྡུག་བསྔལ་གྱི་རྣམ་པ་བཟོད་པར་བྱེད་དེ། ལུས་ལ་གནོད་པ་དང་། སྲོག་ལ་འབབ་པ་ཡང་ཉམས་སུ་ལེན་ཅིང་གཤེ་བ་དང་། མི་སྙན་དུ་ཟེར་བ་དང་སྡིག་པ་དང་། སྨོད་པ་དང་ཁྱད་དུ་གསོད་པ་ཐམས་ཅད་ཀྱང་བཟོད་པར་བྱེད་དེ། དེའི་རྒྱུས་ཉམས་པར་མི་འགྱུར་འཁྲུག་པར་མི་འགྱུར། འཁྲུག་པ་དང་རྣམ་པར་འཁྲུག་པར་མི་བྱེད་དེ། དེའི་རྒྱུས་སེམས་ཅན་རྣམས་ལ་སྙིང་རྗེ་ཆེན་པོའི་གོ་བགོས་པ་ཡང་ཡོངས་སུ་མི་འདོར་རྒྱུན་མི་གཅོད་ཅིང་དེ་བས་ཀྱང་ཤས་ཆེར་སྙིང་རྗེ་ཆེན་པོ་རྣམ་པར་འཕེལ་བར་བྱེད་དོ། །རྒྱུན་མི་གཅོད་དོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ནི་
བྱང་ཆུབ་སེམས་དཔའ་དེ་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་འབྱུང་བའི་བཏང་སྙོམས་དང་། དེ་བཞིན་གཤེགས་པའི་ཆོས་ཐམས་ཅད་རབ་ཏུ་རྟོགས་པའི་བཟོད་པ་དང་དེས་པའི་དབང་དང་ལྡན་པའི་ཕྱིར་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བསོད་ནམས་ཀྱིས་དབང་བསྒྱུར་བ་ཆེན་པོ་དང་ལྡན་པ་ཡིན་ཏེ། ལྷ་ལ་དབང་བསྒྱུར་བ་དང་། མི་ལ་དབང་བསྒྱུར་བ་དང་། གཟུགས་ལ་དབང་བསྒྱུར་བ་དང་། སྟོབས་ལ་དབང་བསྒྱུར་བ་དང་། འཁོར་ལ་དབང་བསྒྱུར་བ་དང་འདོད་པ་ལ་དབང་བསྒྱུར་བ་དང་། རྒྱལ་སྲིད་ལ་དབང་བསྒྱུར་བ་དང་། དབང་ཕྱུག་ལ་དབང་བསྒྱུར་བ་དང་། ཡོན་ཏན་ལ་དབང་བསྒྱུར་བ་དང་། ཤེས་རབ་ལ་དབང་བསྒྱུར་བ་ཆེན་པོ་དང་ལྡན་པ་ཡིན་ཏེ། དེ་རྒྱལ་སྲིད་ཀྱི་བདེ་བའི་དབང་དུ་མི་འགྱུར། འདོད་པའི་བདེ་བའི་དབང་དུ་མི་འགྱུར། ལོངས་སྤྱོད་ཀྱི་བདེ་བའི་དབང་དུ་མི་འགྱུར། འཁོར་གྱི་བདེ་བའི་དབང་དུ་མི་འགྱུར་ཏེ། གཞན་དུ་ན་ཆོས་འདོད་པ་ཆོས་ལ་གཞོལ་བ་ཆོས་ལ་འབབ་པ། ཆོས་ཀྱི་མཐར་ཐུག་པ། ཆོས་ལ་བརྟེན་པ་ཆོས་ལ་སྐྱབས་ཚོལ་བ། ཆོས་ལ་དཔུང་གཉེན་ཚོལ་བ་ཆོས་ལ་གནས་པ། ཆོས་ལ་དོན་དུ་གཉེར་བ་ཆོས་ལ་མངོན་པར་དགའ་བ། ཆོས་ལ་ཚོལ་བ་ཡིན་ཏེ། ཆོས་ཉིད་ལ་བསམ་གཏན་འཆའ་ཞིང་གནས་པ་ཡིན་ཏེ། རྣམ་པ་དེ་ལྟ་བུའི་བདེ་བའི་བྱེ་བྲག་དང་འགྲོགས་པས་བདུད་ཀྱི་ཡུལ་ལ་གནས་པ་མ་ཡིན། ཀྱེ་རྒྱལ་བའི་སྲས་དེ་ཡང་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔས་སྔོན་སེམས་ཅན་ཐམས་ཅད་བདག་གིས་བདུད་ཀྱི་ཡུལ་ལས་རྣམ་པར་བཟློག་པར་བྱའོ། །སངས་རྒྱས་ཀྱི་ཡུལ་ལ་དགོད་པར་བྱའོ། །ཞེས་སེམས་བསྐྱེད་པའི་ཕྱིར་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་དྲུག་པའོ། །ཀྱེ་རྒྱལ་བའི་སྲས་གཞན་ཡང་
བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བརྩོན་འགྲུས་འདི་ལྟ་བུ་བརྩམས་ཏེ་བསྐལ་པ་གྲངས་མེད་པར་བྱང་ཆུབ་སེམས་དཔའི་སྤྱད་པ་སྤྱོད་ཀྱང་དེ་རིང་ཁོ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གཟོད་ཞུགས་པ་ཙམ་དུ་འཛིན་ཏེ། བྱང་ཆུབ་སེམས་དཔའི་སྤྱོད་པས་མི་འཇིགས་མི་སྐྲག་སྐྲག་པར་མི་འགྱུར་ཞིང་མི་འཇིགས་པ་འདི་ལྟ་བུ་དང་ལྡན་པ་ཡིན་ཏེ། དེ་རིང་ཁོ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བ་སྙམ་དུ་འཛིན་པས་དེ་ཕྱིན་ཅད་ཀྱང་འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་བསྐལ་པ་ཚད་མེད་པར་བྱང་ཆུབ་སེམས་དཔའི་སྤྱད་པ་སྤྱོད་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཅན་ཕ་རོལ་དང་གང་ཟག་ཕ་རོལ་ཅང་ཤེས་པ་མ་ཡིན་པ། གདུལ་དཀའ་བ། གསོ་དཀའ་བ། བྱས་པ་མི་གཟོ་བ། བྱས་པ་མི་དྲན་པ་ཤེས་ནས་དེ་དག་རྣམ་པར་བཟློག་པའི་ཕྱིར་གོ་ཆ་ཆེན་པོ་བགོས་ཏེ། སེམས་ཅན་ཐམས་ཅད་ཀྱི་སེམས་ལ་དབང་བསྒྱུར་བ་ལའང་བསམ་པའི་སྤྱོད་ཡུལ་ཇི་ལྟ་བ་བཞིན་དུ་གནས་པ་ཡིན་ཏེ། སེམས་ཅན་འཁུ་བས་སྐྱོ་བར་མི་འགྱུར་ཞིང་། སེམས་ཅན་ཕ་རོལ་ཀྱི་ཉོན་མོངས་པས་ཕྱིར་ལྡོག་པར་མི་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་འདི་ལྟ་བུ་ཞིག་བདག་གི་བྱང་ཆུབ་སེམས་དཔའི་སྤྱོད་པ་ཡང་དག་པར་བསྒྲུབ་པར་འགྱུར་རོ། །ཞེས་བྱ་བར་སུ་ལ་སྐབས་འབྱེད་པ་མེད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་གཞན་དུ་ན་བདག་གཅིག་པུས་ཕྱི་མའི་མཐའི་མུར་ཐུག་པའི་བསྐལ་པར་བྱང་ཆུབ་སེམས་དཔའི་སྤྱོད་པ་སྤྱད་པར་བྱའོ། །རང་གི་རྒྱུད་འདི་ཉིད་ལས་སངས་རྒྱས་ཀྱི་ཆོས་ཐམས་
ཅད་ཡང་དག་པར་བསྒྲུབ་པར་བྱའོ། །སེམས་བསྐྱེད་པ་ལ་རག་ལས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་བྱ་སྟེ། བྱང་ཆུབ་ཏུ་སེམས་བསྐྱེད་པར་བྱའོ། །རང་གི་རྒྱུད་རྣམ་པར་སྦྱང་བར་བྱའོ། །གཞན་གྱི་རྒྱུད་རྣམ་པར་སྦྱང་བར་བྱའོ། །རང་གི་ཡུལ་ཁོང་དུ་ཆུད་པར་བྱའོ། །གཞན་གྱི་ཡུལ་ཁོང་དུ་ཆུད་པར་བྱའོ། །འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་ཡུལ་གཅིག་ཏུ་འགྱུར་བར་བྱའོ། །སྙམ་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་ཆོས་གང་བྱང་ཆུབ་སེམས་དཔའི་སྤྱད་པ་སྤྱོད་པ་དེ་ལྟ་བུའི་ཆོས་ཀྱང་རྗེས་སུ་མི་མཐོང་ངོ་། །ཆོས་གང་བྱང་ཆུབ་སེམས་དཔའི་སྤྱོད་པ་ཡོངས་སུ་རྫོགས་པར་བྱེད་པ་དེ་ལྟ་བུའི་ཆོས་ཀྱང་རྗེས་སུ་མི་མཐོང་ངོ་། །ཆོས་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པའམ། འཚང་རྒྱ་བའམ། འཚང་རྒྱ་བར་འགྱུར་བ་དེ་ལྟ་བུའི་ཆོས་ཀྱང་རྗེས་སུ་མི་མཐོང་ངོ་། ། གང་གིས་ཆོས་བསྟན་པ་དང་སྟོན་པ་དང་སྟོན་པར་འགྱུར་བ་དེ་ལྟ་བུའི་ཆོས་ཀྱང་རྗེས་སུ་མི་མཐོང་ངོ་། །དེ་ལ་སྟོན་པར་བྱེད་པ་དེ་ཡང་མི་དམིགས་ལ་ཆོས་སྟོན་པ་ཉིད་ཀྱང་མི་དམིགས་ཏེ། འོན་ཀྱང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སྨོན་ལམ་ཕྱིར་བཟློག་པར་མི་བྱེད་དོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། འདི་ལྟ་སྟེ་ཆོས་ཐམས་ཅད་མི་དམིགས་པའི་སྤྱོད་པས་ཆོས་ཐམས་ཅད་ཡོངས་སུ་བཙལ་བ་དེ་ལྟ་བུས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འབྱུང་བར་འགྱུར་ཏེ། དེ་ནི་གཉེན་པོ་ཡོངས་སུ་སྦྱང་བ་དང་། ཤེས་རབ་ཡོངས་སུ་རྫོགས་པར་བྱ་བའི་ཕྱིར་ལས་དང་དགེ་བའི་རྩ་བ་དེ་བས་ཀྱང་ཤས་ཆེར་ཡང་དག་པར་སྡུད་དོ། །དགེ་བའི་ལས་ཐམས་ཅད་ཡང་དག་པར་བསྡུས་པས་སེམས་ཀྱི་སྐད་
ཅིག་རེ་རེ་ཞིང་ཤིན་ཏུ་ཤས་ཆེ་བར་རྣམ་པར་འཕེལ་ཏེ། དེ་ལ་གལ་ཏེ་ཆོས་འདི་དག་ཐམས་ཅད་དེ་ལྟ་བུར་དབེན་ན། བདག་ཀྱང་སུ་ཞིག་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་སྙམ་པའི་འཇིགས་པ་མེད་སྡང་བ་མེད་དེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྷག་པའི་བསམ་པ་རི་བོ་ལྟ་བུ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་རི་བོ་ལྟ་བུ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་ཐུགས་རི་བོའི་རྒྱལ་པོ་ལྟ་བུ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱི་འཇུག་པ་རྒྱ་མཚོ་ལྟ་བུ་སྟེ། བཅུ་གང་ཞེ་ན། འདི་ལྟར་སེམས་ཅན་གྱི་ཁམས་ཐམས་ཅད་ཚད་མེད་པར་འཇུག་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་འཇིག་རྟེན་གྱི་ཁམས་འབྱམ་ཀླས་པ་ལ་རྟོག་པ་མེད་པ་དང་། རྣམ་པར་རྟོག་པ་མེད་པ་ལ་གནས་པས་འཇུག་པ་མེད་པར་ཞུགས་པ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔས་ནམ་མཁའི་དབྱིངས་ཚད་མེད་པ་ཐམས་ཅད་ཡོངས་སུ་སྦྱངས་ཤིང་ནམ་མཁའ་ལ་སྒྲིབ་པ་མེད་པའི་ཚུལ་གྱིས་ཕྱོགས་ཀྱི་དྲ་བ་རྣམ་པར་ཕྱེ་བ་ཐམས་ཅད་མཉམ་པ་ཉིད་དུ་རྟོགས་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་ཆོས་ཀྱི་དབྱིངས་ཁོང་དུ་ཆུད་པར་
བྱ་བ་ལ་ཆགས་པ་མེད་པར་འཇུག་པའི་ཚུལ་དང་། ཆད་པ་མེད་པར་འཇུག་པའི་ཚུལ་དང་། རྟག་པ་མེད་པར་འཇུག་པའི་ཚུལ་དང་། ཚད་མེད་པར་འཇུག་པའི་ཚུལ་དང་། འཇུག་པ་མེད་པར་འཇུག་པའི་ཚུལ་དང་། ལྡོག་པ་མེད་པར་འཇུག་པའི་ཚུལ་དང་། འཇུག་པ་ཐམས་ཅད་ཡོངས་སུ་ཤེས་པའི་ཚུལ་གྱིས་ཤིན་ཏུ་ཞུགས་པ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་དགེ་བའི་རྩ་བ་ཐམས་ཅད་ཡང་དག་པར་སྡུད་ཅིང་ཡོངས་སུ་སྩོགས་ཏེ། འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་ཐམས་ཅད་དང་། བྱང་ཆུབ་སེམས་དཔའ་དང་ཆོས་སྨྲ་བ་དང་། ཉན་ཐོས་དང་། རང་སངས་རྒྱས་རྣམས་དང་། སོ་སོའི་སྐྱེ་བོ་ཐམས་ཅད་ལ་དགེ་བའི་རྩ་བ་ཇི་སྙེད་ཅིག་བྱས་པ་དང་། བྱེད་པ་དང་བྱེད་པར་འགྱུར་བ་དང་། དགེ་བའི་རྩ་བ་གང་གིས་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པ་དང་། འཚང་རྒྱ་བ་དང་། འཚང་རྒྱ་བར་འགྱུར་བ་དང་། ཆོས་གང་འདས་པ་དང་མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་བསྟན་པ་དང་། སྟོན་པ་དང་། སྟོན་པར་འགྱུར་བ་དང་། སེམས་ཅན་ཇི་སྙེད་ཅིག་ཆོས་བསྟན་པ་དེ་དག་ལ་གྲུབ་པ་དང་། འགྲུབ་པ་དང་འགྲུབ་པར་འགྱུར་བ་དང་། སེམས་ཅན་ཇི་སྙེད་ཅིག་དུལ་བ་དང་། འདུལ་བ་དང་འདུལ་བར་འགྱུར་བ་དེ་ལྟ་བུའི་དགེ་བའི་རྩ་བ་ཐམས་ཅད་རབ་ཏུ་ཤེས་སོ། །མོས་པར་བྱེད་དོ། །རྗེས་སུ་ཡི་རང་བར་བྱེད་དོ། །དགེ་བའི་རྩ་བ་ཡོངས་སུ་བཙལ་བས་ཀྱང་སྐྱོ་བར་མི་བྱེད་སྐྱོ་བར་མི་སྐྱེད་དེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་
རྒྱ་མཚོ་ལྟ་བུ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་འདས་པའི་བསྐལ་པ་ལ་འཇུག་སྟེ། སེམས་བསྐྱེད་པ་རེ་རེས་ཀྱང་བསྐལ་པ་བརྗོད་དུ་མེད་པ་ལ་འཇུག་གོ །བསྐལ་པ་རེ་རེ་ལ་ཡང་སངས་རྒྱས་སྐྱེ་བ་ཁྲག་ཁྲིག་ཕྲག་བརྒྱའམ། ཁྲག་ཁྲིག་ཕྲག་སྟོང་ངམ། ཁྲག་ཁྲིག་བརྒྱ་ཕྲག་སྟོང་ངམ། སངས་རྒྱས་སྐྱེ་བ་ཚད་མེད་པ་དང་། གྲངས་མེད་པ་དང་། བསམ་གྱིས་མི་ཁྱབ་པ་དང་། མཚུངས་པ་མེད་པ་དང་། གཞལ་དུ་མེད་པ་དང་། དཔག་ཏུ་མེད་པ་དང་། མཐའ་ཡས་པ་དང་། མུ་མེད་པ་དང་། ས་མཚམས་མེད་པ་དང་། བརྗོད་དུ་མེད་པ་ལ་འཇུག་གོ །སངས་རྒྱས་སྐྱེ་བ་གྲངས་དང་བགྲང་བ་ལས་འདས་པ་ལ་འཇུག་ཅིང་ཤེས་པར་བྱེད་དོ། །སངས་རྒྱས་བཅོམ་ལྡན་འདས་དེ་དག་གི་འཁོར་གྱི་དཀྱིལ་འཁོར་ཡང་ཁོང་དུ་ཆུད་པར་བྱེད་དེ། བྱང་ཆུབ་སེམས་དཔའི་ཚོགས་དང་། ཉན་ཐོས་ཀྱི་དགེ་འདུན་དང་། ཆོས་བསྟན་པ་དང་། སེམས་ཅན་གདུལ་བ་དང་། སྐུ་ཚེའི་ཚད་དང་། བྱིན་གྱི་རླབས་དང་། བསྟན་པ་གནས་པའི་རིམ་པ་ལའང་འཇུག་གོ །བསྐལ་པ་གཅིག་ལ་ཇི་ལྟར་ཞུགས་པ་དེ་བཞིན་དུ་བསྐལ་པ་ཐམས་ཅད་ལ་འཇུག་ན་སངས་རྒྱས་མི་བཞུགས་པ་དང་། སངས་རྒྱས་མ་བྱུང་བའི་བསྐལ་པ་ལྟ་ཅི་སྨོས་ཏེ། བསྐལ་པ་གང་ལ་སེམས་ཅན་གང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་བསྐྱེད་པ་དང་། སེམས་ཅན་གང་གིས་དགེ་བའི་རྩ་བ་ཡོངས་སུ་སྨིན་པར་བྱས་པ་དང་། སེམས་ཅན་གང་གིས་མ་བྱོན་པའི་སངས་རྒྱས་མཐོང་བར་དགེ་བའི་རྩ་བ་ཡོངས་སུ་སྨིན་པར་བྱས་པ་དེ་དག་ཀྱང་བྱང་ཆུབ་སེམས་དཔས་རབ་ཏུ་ཤེས་ཏེ། དེ་ལྟར་འཇུག་པས་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པ་ལ་འཇུག་ཅིང་རྟོག་ཀྱང་སྔོན་གྱི་བསྐལ་པའི་དུས་ལ་འཇུག་པས་ངོམས་པར་མི་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་
ལྟ་བུ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་མ་འོངས་པའི་བསྐལ་པ་ལ་འཇུག་ཅིང་། རྣམ་པར་དཔྱོད་ལ་སེམས་ཤིང་རྟོག་སྟེ། མ་འོངས་པའི་དུས་ཀྱི་བསྐལ་པ་གང་དང་གང་ནི་སངས་རྒྱས་དང་བཅས་པར་འགྱུར། བསྐལ་པ་གང་དང་གང་ནི་སངས་རྒྱས་མི་བཞུགས་པར་འགྱུར། བསྐལ་པ་དེ་དག་ལའང་སངས་རྒྱས་བཅོམ་ལྡན་འདས་ནི་ཇི་སྙེད་ཅིག་འབྱུང་། དེ་བཞིན་གཤེགས་པ་དེ་དག་གི་མཚན་ནི་ཅི་ཞེས་བྱ་བར་འགྱུར། འཇིག་རྟེན་གྱི་ཁམས་ནི་གང་དུ་མིང་ནི་ཅི་ཞེས་བྱ་བ་ཞིག་ཏུ་སེམས་ཅན་ནི་ཇི་སྙེད་ཅིག་ཡོངས་སུ་སྨིན་པར་མཛད་པར་འགྱུར། དེ་བཞིན་གཤེགས་པ་དེ་དག་ནི་སྐུ་ཚེའི་ཚད་ཇི་ཙམ་དང་ལྡན་པ་ཞིག་ཏུ་འགྱུར་ཞེས་བསྐལ་པ་གཅིག་ནས་གཅིག་ཏུ་བརྒྱུད་པ་དང་། གཅིག་ནས་གཅིག་ཏུ་འབྲེལ་པ་ཐམས་ཅད་ལ་རྟོག་སྟེ། དེ་ལྟར་འཇུག་ཅིང་རྟོག་པས་བསྐལ་པ་བརྗོད་དུ་མེད་པ་ཟད་པར་བྱེད་ཀྱང་ཕྱི་མའི་མཐའི་མུར་ཐུག་པའི་དུས་ལ་འཇུག་པས་ངོམས་པར་མི་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་གྱིས་འཇུག་པ་རྒྱ་མཚོ་ལྟ་བུ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ད་ལྟར་བྱུང་བའི་དུས་ལ་འཇུག་ཅིང་རྟོག་སྟེ། ཕྱོགས་སྣ་ཚོགས་ལ་འཇུག་པར་བྱ་བ་དང་། ཕྱོགས་བཅུ་རྣམ་པར་གནས་པ་དང་། ཕྱོགས་ཀྱི་རྒྱུད་བསྟན་པ་མཐའ་ཡས་པ་དང་། ཕྱོགས་ཀྱི་དྲ་བ་དང་། ཕྱོགས་ཀྱི་དྲ་བའི་རྒྱུད་རྣམ་པར་ཐ་དད་པ་ཐམས་ཅད་བསྟན་པ་དག་ཏུ་སངས་རྒྱས་བཅོམ་ལྡན་འདས་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པ་དང་། མངོན་པར་འཚང་རྒྱ་བ་དང་། མངོན་པར་རྒྱ་བར་འགྱུར་བ་དང་། སྙིང་པོ་བྱང་ཆུབ་ཀྱི་ཤིང་དྲུང་དུ་གཤེགས་པ་དང་། བྱང་ཆུབ་ཀྱི་གཞིལ་ཉུག་པ་དང་། བཞུགས་པ་དང་། བདུད་ཀྱི་དཀྲུགས་མ་རབ་ཏུ་ཕམ་པར་མཛད་པ་དང་། རྣམ་པར་འཚང་རྒྱ་བ་དང་། བཞེངས་པ་དང་། གྲོང་རྡལ་ཏུ་གཤེགས་པ་དང་། ལྷའི་གནས་སུ་ཆོས་སྟོན་པ་དང་། ཆོས་ཀྱི་
འཁོར་ལོ་བསྐོར་བ་དང་། སེམས་ཅན་གྱི་ཁམས་རྣམ་པར་འདུལ་བ་དང་། དེ་བཞིན་གཤེགས་པའི་རྣམ་པར་འཕྲུལ་པ་ཡོངས་སུ་སྟོན་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཏོང་བ་དང་། སྐུ་ཚེའི་འདུ་བྱེད་སྤོང་པ་དང་། ཕུང་པོ་མ་ལུས་པའི་མྱ་ངན་ལས་འདས་པར་ཡོངས་སུ་མྱ་ངན་ལས་འདའ་བ་དང་། ཆོས་ཀྱི་ཚུལ་ཡང་དག་པར་བགྲོ་བ་དང་། བསྟན་པ་ཡང་དག་པར་འཛིན་པ་དང་། དམ་པའི་ཆོས་གསལ་བར་བྱེད་པ་དང་། དེ་བཞིན་གཤེགས་པའི་མཆོད་རྟེན་རྒྱན་གྱིས་བརྒྱན་པར་བྱེད་པ་དང་། དེ་བཞིན་གཤེགས་པའི་མཆོད་རྟེན་ལ་མཆོད་པ་བྱེད་པ་དང་། འཇིག་རྟེན་གྱི་ཁམས་ཐམས་ཅད་དུ་མཆོད་རྟེན་གྱི་རྒྱན་ཡིད་ལ་བྱེད་པ་དག་ལ་སེམས་ཤིང་རྣམ་པར་སེམས་ལ་ཡིད་ལ་བྱེད་དེ། དེ་ལྟ་བུར་འཇུག་པས་སེམས་བསྐྱེད་པ་རེ་རེ་ལ་ཡང་འཇིག་རྟེན་གྱི་ཁམས་བརྗོད་དུ་མེད་པ་ལ་འཇུག་ཅིང་སེམས་ཅན་ཐམས་ཅད་ཀྱང་རྟོགས་པར་བྱེད། སངས་རྒྱས་བཅོམ་ལྡན་འདས་ཀྱང་མཐོང་བར་བྱེད། དམ་པའི་ཆོས་ཀྱང་ཐོས་པར་བྱེད། ཐོས་ནས་ཀྱང་ཀུན་ཆུབ་པར་བྱེད། དྲན་པས་ཡོངས་སུ་འཛིན། བློ་གྲོས་ཀྱིས་རྣམ་པར་འབྱེད། རྟོགས་པས་རྣམ་པར་འཕེལ་བར་བྱེད། བློས་ཕྱོགས་བཅུར་ཚད་མེད་པར་རྒྱས་པར་བྱེད་ཀྱང་སངས་རྒྱས་ཀྱི་ཆོས་ལ་མགོ་རྨོངས་པར་མི་འགྱུར་རོ། །དེ་ཅིའི་ཕྱིར་ཞེ་ན། རྨི་ལམ་ལྟ་བུར་རྣམ་པར་བསྒོམས་པའི་ཕྱིར་ཏེ། དེ་བཞིན་གཤེགས་པ་དེ་དག་ལའང་མཆོད་ཅིང་རིམ་གྲོར་བྱ་བ་ཐམས་ཅད་བྱེད་པས་དེ་བཞིན་གཤེགས་པ་དེ་དང་དེ་དག་གི་ཞབས་ཀྱི་དྲུང་དུ་བདག་ཉིད་དེ་བཞིན་གཤེགས་པ་ལ་མཆོད་ཅིང་རིམ་གྲོ་བྱེད་པས་བརྩོན་པར་སྟོན་ཀྱང་བདག་གི་ལུས་ལ་ཡང་མངོན་པར་ཆགས་པ་མེད། དེ་བཞིན་གཤེགས་པའི་སྐུ་ལ་ཡང་མ་ཡིན། འཇིག་རྟེན་གྱི་ཁམས་ལ་ཡང་མ་ཡིན། ཆོས་ཉན་པ་ལ་ཡང་མ་ཡིན། བསྐལ་པའི་གྲངས་ལ་འཇུག་པ་ལ་ཡང་མ་ཡིན། ད་ལྟར་
བྱུང་བའི་སངས་རྒྱས་མཐོང་བས་ངོམས་པར་ཡང་མི་འགྱུར་ལ། ཆོས་མཉན་པས་ཀྱང་མ་ཡིན། འཇིག་རྟེན་གྱི་ཁམས་རྣམ་པར་བརྟགས་པས་ཀྱང་མ་ཡིན། བསྐལ་པའི་གྲངས་ལ་འདུག་པས་ཀྱང་མ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་སངས་རྒྱས་བཅོམ་ལྡན་འདས་རྣམས་ལ་རིམ་གྲོ་བྱེད། བཀུར་སྟི་བྱེད། མཆོད་པ་བྱེད་དེ། བསྐལ་པ་རེ་རེ་ལ་ཡང་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་བཅོམ་ལྡན་འདས་ལ་རིམ་གྲོ་བྱེད། བཀུར་སྟི་བྱེད། མཆོད་པ་བྱེད་ཅིང་། བདག་གི་ལུས་ཀྱི་སྐྱེ་བ་དང་། ཤི་འཕོ་ཡོངས་སུ་བསྟན་པས་ཁམས་གསུམ་ཐམས་ཅད་ལས་འདས་པའི་མཆོད་པས། དེ་བཞིན་གཤེགས་པ་ཉན་ཐོས་ཀྱི་དགེ་འདུན་དང་བཅས་པ་དང་། བྱང་ཆུབ་སེམས་དཔའི་ཚོགས་ཀྱིས་བསྐོར་བ་ལ་མཆོད་པ་བྱེད་པ་དང་། དེ་བཞིན་གཤེགས་པ་མྱ་ངན་ལས་འདས་པ་རྣམས་ཀྱི་སྐུ་གདུང་ལ་ཡང་བླ་ན་མེད་པའི་མཆོད་པས་མཆོད་པ་བྱེད་ཅིང་ཡོངས་སུ་གཏོང་བའི་སེམས་བསམ་གྱིས་མི་ཁྱབ་པས་སེམས་ཅན་གྱི་ཁམས་ཐམས་ཅད་ཤིན་ཏུ་ཚིམ་པར་བྱ་བའི་ཕྱིར་རྣམ་པར་སྨིན་པ་ལ་རེ་བ་མེད་ཅིང་ཕན་གདགས་པ་ལྷུར་བྱ་བ་དང་། ཕན་པར་འདོད་པས་ཡོངས་སུ་བཟུང་བར་སྦྱིན་པ་བྱེད་ཀྱང་སངས་རྒྱས་མཆོད་ཅིང་། རིམ་གྲོར་བྱ་བ་དང་། སེམས་ཅན་ཐམས་ཅད་ལ་ཡོངས་སུ་གཏང་བ་ཤིན་ཏུ་བཏང་བས་ངོམས་པར་མི་འགྱུར་ཏེ། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་བཅོམ་ལྡན་འདས་རྣམས་ལ་རིམ་གྲོ་བྱ་བ་དང་། སེམས་ཅན་ཉེ་བར་བསྩལ་བ་དང་། བསྟན་པ་ཡོངས་སུ་གཟུང་བ་དང་། དམ་པའི་ཆོས་བརྗོད་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་གདུལ་བས་
ཀྱང་ངོམས་པར་མི་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་གདམས་ངག་དང་། བྱང་ཆུབ་སེམས་དཔའི་བསླབ་པ་དང་། བྱང་ཆུབ་སེམས་དཔའི་མན་ངག་དང་། བྱང་ཆུབ་སེམས་དཔའི་ནན་ཏན་དང་། བྱང་ཆུབ་སེམས་དཔའི་ཡོངས་སུ་དག་པ་དང་། བྱང་ཆུབ་སེམས་དཔའི་ཡོངས་སུ་སྨིན་པར་བྱ་བ་དང་། བྱང་ཆུབ་སེམས་དཔའི་གདུལ་བ་དང་། བྱང་ཆུབ་སེམས་དཔའི་མཉམ་པ་ཉིད་དང་། བྱང་ཆུབ་སེམས་དཔའི་འབྱུང་བ་དང་། བྱང་ཆུབ་སེམས་དཔའི་གཟུངས་ཀྱི་སྒོའི་ལམ་སངས་རྒྱས་བཅོམ་ལྡན་འདས་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་དང་། ཆོས་སྨྲ་བ་ཐམས་ཅད་ལས་ཚོལ་བ་དང་། ཡོངས་སུ་ཚོལ་བ་དང་། འཛིན་པ་དང་། ཀུན་ཆུབ་པར་བྱེད་ཅིང་སེམས་ཅན་ཐམས་ཅད་ཡོངས་སུ་བསྡུ་བ་དང་བསླབ་པ་དང་། གྲུབ་པར་བྱ་བ་དང་། སེམས་ཅན་དེ་དག་ལ་ཆོས་བསྟན་པས་ངོམས་པར་མི་འགྱུར་ཏེ། ཐམས་ཅད་མཁྱེན་པ་ཉིད་དང་ལྡན་པའི་སེམས་བསྐྱེད་པ་སངས་རྒྱས་ཐམས་ཅད་ཀྱི་ཆོས་ཀྱི་ཚུལ་གྱི་རྗེས་སུ་སོང་བས། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པར་སེམས་ཅན་བརྗོད་དུ་མེད་པའི་ཡང་བརྗོད་དུ་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་རབ་ཏུ་གཞོག་པ་དང་། སངས་རྒྱས་ཀྱི་ཆོས་ཐམས་ཅད་ལ་སྦྱོར་ཡང་ངོམས་པར་མི་འགྱུར་བ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡེ་ཤེས་ཀྱིས་འཇུག་པ་རྒྱ་མཚོ་ལྟ་བུ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་
ཐམས་ཅད་ཀྱི་ཆོས་ཀྱི་ཡེ་ཤེས་ཆེན་པོ་རྒྱ་མཚོ་ལྟ་བུ་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་སྤྱོད་པ་རིན་པོ་ཆེ་ལྟ་བུ་སྟེ། བཅུ་གང་ཞེ་ན། འདི་ལྟར་སངས་རྒྱས་བཞུགས་པའི་འཇིག་རྟེན་གྱི་ཁམས་གྲངས་མེད་པར་འགྲོ་ཞིང་དེ་བཞིན་གཤེགས་པ་རྣམས་བལྟ་བ་དང་། དེ་དག་ལ་ཕྱག་བྱ་བ་དང་། བསྙེན་བཀུར་བྱེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་བསམ་གྱིས་མི་ཁྱབ་པའི་སངས་རྒྱས་བཅོམ་ལྡན་འདས་རྣམས་ལས་ཆོས་ཉན་ཅིང་ཐོས་ནས་ཀྱང་འཛིན་ཅིང་ཁོང་དུ་ཆུད་པར་བྱེད་དེ། དྲན་པས་ཡང་དག་པར་འཛིན་པ་དང་། བློ་གྲོས་ཀྱིས་རྣམ་པར་འབྱེད་པ་དང་། རྟོགས་པས་རྣམ་པར་འཕེལ་བར་བྱེད་པ་དང་། བློས་ཕྱོགས་བཅུར་ཚད་མེད་པར་འགེངས་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་འདི་ནས་ཀྱང་འཕོས་པར་མ་གྱུར་ལ་གཞན་དུ་ཡང་ལུས་སྟོན་ལ། སངས་རྒྱས་ཀྱི་ཆོས་ལའང་མགོ་རྨོངས་པ་མེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་གཅིག་ལ་རྣམ་པར་སྤྱད་པས་ཆོས་ཐམས་ཅད་ཤེས་ཤིང་ཆོས་ཐམས་ཅད་དོན་གཅིག་པ་དང་། དོན་ཐ་དད་པ་མ་ཡིན་པའི་མཐར་ཐུག་པའི་ཚུལ་གྱིས་ཆོས་ཐ་དད་པ་ཡང་དག་པར་བསྟན་པ་ཡང་རབ་ཏུ་ཤེས་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་བཞི་པའོ། །ཀྱེ་རྒྱལ་བའི་སྲས་
གཞན་ཡང་བྱང་ཆུབ་སེམས་དཔའ་ཉོན་མོངས་པ་རྣམ་པར་བཟློག་པ་ཡང་རབ་ཏུ་ཤེས། ཉོན་མོངས་པའི་རྒྱུན་གཅད་པ་ཡང་རབ་ཏུ་ཤེས། ཉོན་མོངས་པ་རྣམ་པར་གཞིལ་བ་ཡང་རབ་ཏུ་ཤེས་ཏེ། ཉོན་མོངས་པ་སྤོང་བ་ལ་ཤིན་ཏུ་གནས་ཀྱང་བྱང་ཆུབ་སེམས་དཔའི་སྤྱོད་པ་ལས་ཡང་དག་པའི་མཐའ་མངོན་ཏུ་མི་བྱེད་ཅིང་ཡང་དག་པའི་མཐའ་ལའང་ཕ་རོལ་ཏུ་ཕྱིན་པའི་མཆོག་ཀྱང་ཐོབ་ལ་ཐབས་མཁས་པའི་བསླབ་པ་ལ་ཤིན་ཏུ་བྱང་བས། སྔོན་གྱི་སྨོན་ལམ་ཡོངས་སུ་བསྐང་བའི་སྤྱོད་པ་དེ། ཡོངས་སུ་རྫོགས་པར་བྱེད་ཀྱང་ལུས་དུབ་པར་མི་འགྱུར་བ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་འགྲོ་བ་ཐམས་ཅད་སེམས་ཀྱིས་བརྟགས་པ་ཡུལ་ན་མི་གནས་པ་ཕྱོགས་ན་མི་གནས་པར་ཤེས་ཤིང་འཇུག་ལ་ཡུལ་དང་གནས་ཀྱང་སྟོན་ཏེ། རྟོག་པ་དང་མངོན་པར་འདུ་བྱེད་པའང་མེད་ལ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཕྱིར་མངོན་པར་འདུ་བྱ་བའི་ས་ལ་ཡང་སྤྱོད་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་རང་བཞིན་མེད་པ་དང་། སྣ་ཚོགས་མ་ཡིན་པ་དང་། རྣམ་པ་ཐ་དད་པ་མེད་པ་དང་། བགྲང་བ་མེད་པ་དང་། མཚུངས་པ་མེད་པ་དང་། ཁ་དོག་མེད་པ་དང་། མཚན་ཉིད་མེད་པས་རང་བཞིན་གཅིག་པ་རབ་ཏུ་ཤེས་ཏེ། གཅིག་ཏུ་ཡང་མི་དམིགས་ལ་མང་པོའི་རང་བཞིན་དུ་ཡང་ཡོད་པ་མ་ཡིན་པར་རབ་ཏུ་ཤེས་ཏེ། བྱང་ཆུབ་སེམས་དཔས་ཆོས་འདི་དག་ནི་སངས་རྒྱས་ཀྱི་ཆོས་སོ། །འདི་དག་ནི་བྱང་ཆུབ་སེམས་དཔའི་ཆོས་སོ། །འདི་དག་ནི་རང་སངས་རྒྱས་ཀྱི་ཆོས་སོ། །
འདི་དག་ནི་ཉན་ཐོས་ཀྱི་ཆོས་སོ། །འདི་དག་ནི་སོ་སོའི་སྐྱེ་བོའི་ཆོས་སོ། །འདི་དག་ནི་དགེ་བ་དང་མི་དགེ་བའི་ཆོས་སོ། །འདི་དག་ནི་འཇིག་རྟེན་གྱི་ཆོས་སོ། །འདི་དག་ནི་འཇིག་རྟེན་ལས་འདས་པའི་ཆོས་སོ། །འདི་དག་ནི་ཁ་ན་མ་ཐོ་བ་དང་བཅས་པའི་ཆོས་སོ། །འདི་དག་ནི་ཁ་ན་མ་ཐོ་བ་མེད་པའི་ཆོས་སོ། །འདི་དག་ནི་ཟག་པ་དང་བཅས་པའི་ཆོས་སོ། །འདི་དག་ནི་ཟག་པ་མེད་པའི་ཆོས་སོ། །འདི་དག་ནི་འདུས་བྱས་ཀྱི་ཆོས་སོ། །འདི་དག་ནི་འདུས་མ་བྱས་ཀྱི་ཆོས་སོ། །ཞེས་བྱ་བར་རབ་ཏུ་ཤེས་པ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས་ཆོས་ཀྱང་མི་དམིགས་སེམས་ཅན་ཡང་མི་དམིགས་ཏེ། འདི་ལྟར་སེམས་ཅན་ཐམས་ཅད་གདུལ་བ་དང་། ཆོས་ཐམས་ཅད་རྟོགས་པར་བྱ་བའི་ཕྱིར་སྨོན་ལམ་གྱི་རྒྱུན་ཀྱང་མི་གཅོད་དོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་ནི་བྱང་ཆུབ་སེམས་དཔའ་སེམས་ལ་མཁས་པས་སེམས་ཅན་གཞན་གྱི་རབ་ཏུ་རྟོག་པ་ལ་མཁས་པ་དང་། སེམས་ཅན་ཐམས་ཅད་ཀྱི་དམིགས་པ་ལ་མཁས་པས། སེམས་ཅན་ཐམས་ཅད་ལ་གདམས་ངག་རྗེས་སུ་སྟོན་པ་ལ་མཁས་པ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་འདའ་བར་བྱ་བ་ལ་མཁས་པའི་ཕྱིར་ཏེ། བྱང་ཆུབ་སེམས་དཔའི་སྤྱོད་པ་དེ་ཡང་སྨོན་ལམ་ཡོངས་སུ་རྫོགས་པར་བྱ་བའི་ཕྱིར་སྤྱོད་པ་འདི་ནི་བྱང་ཆུབ་སེམས་དཔའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་འདུ་ཤེས་ཀྱི་བྱིན་གྱི་རླབས་ཐམས་ཅད་ལ་མཁས་པས། ཆོས་རབ་ཏུ་སྟོན་ཅིང་
རྣམ་པར་འབྱེད་དེ་ཤེས་པར་ཡང་བྱེད་ལ་ཐབས་མཁས་པས་མྱ་ངན་ལས་འདས་པ་ཡང་ཡོངས་སུ་སྟོན་ཏེ། དེ་ཡང་ཕྱིན་ཅི་ལོག་མེད་པ་དང་ནོར་བ་མེད་པར་རབ་ཏུ་ཤེས་ཏེ། བྱང་ཆུབ་སེམས་དཔའ་དེས་དེ་བཞིན་ཉིད་མི་གཡོ་བའི་ཕྱིར་ཆོས་ཐམས་ཅད་དུས་གསུམ་མཉམ་པ་ཉིད་ལ་གནས་ཤིང་ཡང་དག་པའི་མཐའ་ལ་རབ་ཏུ་རྟེན་པར་ཡང་ཡང་དག་པར་ཤེས་ཏེ། སེམས་ཅན་གང་དུལ་བའམ་གདུལ་བའམ་འདུལ་བར་འགྱུར་བ་དེ་ལྟ་བུའི་སེམས་ཅན་གང་ཡང་རྗེས་སུ་མི་མཐོང་ལ། བྱུང་རྒྱལ་དུ་བདག་གིས་བསྐྱེད་དོ་སྙམ་དུའང་མི་སེམས་ཏེ། ཆོས་གང་སྐྱེ་བའམ་འགག་པར་འགྱུར་བ་དེ་ལྟ་བུའང་མི་དམིགས་ཏེ། ཆོས་ཐམས་ཅད་ལ་མི་གནས་པས་དོན་ཡོད་པར་འགྱུར་བ་འདི་ནི་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་བསམ་གྱིས་མི་ཁྱབ་པའི་དེ་བཞིན་གཤེགས་པ་རེ་རེ་ལས་ཀྱང་རྣམ་པ་ཐ་དད་དུ་བགྲང་བའི་ཚུལ་གྱིས་བསྐལ་པ་བགྲང་བ་སྣ་ཚོགས་མིང་ཐ་དད་པ་གཞན་དང་གཞན་བསྐལ་པ་དེ་དང་དེ་དག་ཏུ་གདགས་པའི་བསྐལ་པ་གཅིག་བཟུང་བ་ནས་བརྗོད་དུ་མེད་པ་ཤིན་ཏུ་བསྟན་པའི་བར་དུ་ལུང་བསྟན་པ་ཉན་ཅིང་། ལུང་བསྟན་པ་དེ་དག་ཐོས་ནས་ཀྱང་བྱང་ཆུབ་སེམས་དཔའི་སྤྱོད་པ་དང་དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པ་ལ་འཁོར་བ་མེད་ཅིང་མགོ་རྨོངས་པ་མེད་ལ་ལུང་བསྟན་པ་དེ་དག་རྣམ་པ་དེ་ལྟ་བུར་ཐོས་ནས་ཀྱང་དེ་བཞིན་གཤེགས་པ་གཉིས་སུ་མི་གསུང་བ་དང་བདག་ཉིད་ཀྱི་སྤྱོད་པའི་མཐུ་དང་སྨོན་ལམ་གྱི་ཁྱད་པར་གྱིས་སེམས་ཅན་ཇི་ལྟར་སྨིན་པར་བྱས་པ་རྣམས་ཀྱི་སྨོན་ལམ་དེ་དག་ཐམས་ཅད་ཆོས་ཀྱི་དབྱིངས་ཁོང་དུ་ཆུད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་རྫོགས་པར་བྱེད་པ་འདི་ནི་བྱང་ཆུབ་སེམས་
དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རྣམ་པར་སྤྱོད་པ་རིན་པོ་ཆེ་ལྟ་བུ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་རྣམ་པར་སྤྱོད་པ་རིན་པོ་ཆེ་ལྟ་བུ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་རིན་པོ་ཆེ་ཆེན་པོ་བླ་ན་མེད་པར་འཚང་རྒྱ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་ཆོས་ཐམས་ཅད་མཐའ་ཡས་པ་ཡིན་ཡང་བྱང་ཆུབ་སེམས་དཔའ་ནི་འདི་ལྟར་ཆོས་ཐམས་ཅད་དུས་གསུམ་མ་ལུས་པར་ཤེས་པས་མངོན་པར་རྫོགས་པར་འཚང་རྒྱ་བར་བྱའོ། །སྙམ་དུ་སེམས་བསྐྱེད་པ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་དང་པོའོ། །ཀྱེ་རྒྱལ་བའི་སྲས་གཞན་ཡང་སྐྲའི་རྩེ་མོའི་གོ་དང་། སྒོ་རེ་རེ་ལ་ཡང་སེམས་ཅན་མཐའ་ཡས་ཏེ་མུ་མེད་པས། ཆོས་ཀྱི་དབྱིངས་ཐམས་ཅད་ཀྱི་སེམས་ཅན་ལྟ་སྨོས་ཀྱང་ཅི་དགོས་ན་བྱང་ཆུབ་སེམས་དཔའ་ནི་གོ་ཅ་ཆེན་པོ་བགོས་ཤིང་འདི་སྐད་དུ་སེམས་ཅན་ཐམས་ཅད་མྱ་ངན་ལས་འདས་པ་ཆེན་པོ་བླ་ན་མེད་པས། ཡོངས་སུ་མྱ་ངན་ལས་བཟླ་བར་བྱའོ། །ཞེས་བྱ་བའི་ཚིག་བརྗོད་པ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་གཉིས་པའོ། །ཀྱེ་རྒྱལ་བའི་སྲས་གཞན་ཡང་འཇིག་རྟེན་གྱི་ཁམས་རྣམས་ནི་མཐའ་ཡས་མུ་མེད་པ་སྟེ། རིས་མེད་ལས་མཚམས་མེད་པ་ན་བྱང་ཆུབ་སེམས་དཔའ་ནི་འདི་ལྟར་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་བླ་ན་མེད་པས་འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བར་བྱའོ། །ཞེས་སྨོན་ལམ་མངོན་པར་སྒྲུབ་ཅིང་དེ་ཡང་ཡང་དག་པ་དང་། དབེན་པར་ཡོངས་སུ་སྦྱོར་བ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་གསུམ་པའོ། །ཀྱེ་
རྒྱལ་བའི་སྲས་གཞན་ཡང་འགྲོ་བ་ཐམས་ཅད་ནི་མཐའ་ཡས་མུ་མེད་པ་སྟེ། རིས་མེད་ལས་མཚམས་མེད་པ་ལ་བྱང་ཆུབ་སེམས་དཔའ་ནི་འདི་ལྟར་འགྲོ་བ་ཐམས་ཅད་བླ་ན་མེད་པའི་ཡེ་ཤེས་ཀྱི་སྣང་བ་ཆེན་པོས་སྣང་བར་བྱའོ་ཞེས་ཏེ། དགེ་བའི་རྩ་བ་ཡོངས་སུ་བསྔོ་བ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་བཞི་པའོ། །ཀྱེ་རྒྱལ་བའི་སྲས་གཞན་ཡང་སངས་རྒྱས་བཅོམ་ལྡན་འདས་རྣམས་ནི་མཐའ་ཡས་མུ་མེད་པ་སྟེ། རིས་མེད་ལ་ས་མཚམས་མེད་པ་ན། བྱང་ཆུབ་སེམས་དཔའ་ནི་དགེ་བའི་རྩ་བ་བསྐྱེད་ཅིང་། འདི་ལྟར་སངས་རྒྱས་བཅོམ་ལྡན་འདས་རྣམས་མཉེས་པར་བྱས་པའི་འོག་ཏུ་བདག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ། །ཞེས་ཡོངས་སུ་བསྔོ་བ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔས་སངས་རྒྱས་བཅོམ་ལྡན་འདས་རྣམས་ཀྱང་མཐོང་སྟེ། ཆོས་ཀྱང་ཉན་ལ་དགའ་བ་དང་སྤྲོ་བ་བསྐྱེད་ཀྱང་རང་གི་ལུས་ལ་ཡང་མངོན་པར་ཆགས་པར་མི་བྱེད་དེ་དེ་བཞིན་གཤེགས་པའི་སྐུ་ལ་ཡང་མངོན་པར་ཆགས་པར་མི་བྱེད་ཅིང་། དེ་བཞིན་གཤེགས་པའི་སྐུ་དེ་དག་ཀྱང་ཡོད་པར་ཡང་མི་བྱེད། མེད་པར་ཡང་མི་བྱེད་མེད་པ་མ་ཡིན་པར་ཡང་མི་བྱེད། ཡོད་པ་མ་ཡིན་པར་ཡང་མི་བྱེད། དངོས་པོར་ཡང་མི་བྱེད། དངོས་པོ་མེད་པར་ཡང་མི་བྱེད། གཟུགས་སུ་ཡང་མི་བྱེད། མཚན་དུ་ཡང་མི་བྱེད། འབྱུང་བར་འང་མི་བྱེད། འཇིག་པར་འང་མི་བྱེད། དེ་བཞིན་གཤེགས་པའི་སྐུ་དེ་དག་སྐྱེ་བར་ཡང་མི་བྱེད། འཇིག་པར་ཡང་མི་བྱེད། དེ་བཞིན་གཤེགས་པའི་སྐུ་ལ་དངོས་པོར་ཡང་མི་འཇུག་སྟེ། དངོས་པོ་ཆུད་ཟ་བར་ཡང་མི་བྱེད་དོ། །དེ་ཅིའི་ཕྱིར་ཞེ་ན། དེ་ནི་དངོས་པོ་ཐམས་ཅད་མ་བཟུང་བའི་ཕྱིར་ཏེ། འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་
སེམས་བསྐྱེད་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སེམས་ཅན་གཞན་དང་གང་ཟག་གཞན་དག་གི་མགོ་བཅད་པར་གྱུར་ཏམ། ལག་པ་བཅད་དམ། རྐང་པ་བཅད་དམ། རྣ་བ་དང་སྣ་བཅད་དམ། མིག་ཕྱུང་བར་གྱུར་ཏམ། གཤེའམ་མི་སྙན་པར་ཟེར་རམ། རྡེག་གམ་སྡིགས་སམ། སྨོད་དམ་འཆིང་ངམ། ཅོ་འདྲིའམ་ཐོ་འཚམ་ཡང་བཟོད་ཅིང་། དེའི་རྒྱུས་སེམས་ཁྲོ་བར་མི་འགྱུར། འཁྲུག་པ་དང་རྣམ་པར་འཁྲུག་པར་མི་འགྱུར། གནོད་པར་སེམས་པ་དང་ཁོང་ཁྲོ་བར་མི་འགྱུར་ཏེ། བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པར་བྱང་ཆུབ་སེམས་དཔའི་སྤྱད་པ་སྤྱོད་ཀྱང་སེམས་ཅན་ཐམས་ཅད་ཡོངས་སུ་གཏོང་བའི་སེམས་མི་བསྐྱེད་དོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་ཆོས་ཐམས་ཅད་མི་གཉིས་པར་རྣམ་པར་སྤྱད་པའི་བསླབ་པ་ལ་སློབ་ཅིང་མི་འཁྲུག་པའི་བསམ་པས་སེམས་ཅན་ཐམས་ཅད་ཀྱིས་སྡུག་བསྔལ་དུ་བྱས་པའི་སྡུག་བསྔལ་ཐམས་ཅད་རང་གི་ལུས་ཀྱིས་ཉམས་སུ་བླང་བར་བཟོད་པར་བྱེད་ཅིང་བཏང་སྙོམས་སུ་གནས་པ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་མ་འོངས་པའི་དུས་ལ་ནི་མཐའ་མེད་དེ། ཐུག་པ་མེད་ཅིང་རྒྱུན་ཆད་པ་མེད་པ་ཡིན་ན། བྱང་ཆུབ་སེམས་དཔའ་ནི་འདི་ལྟར་མ་འོངས་པའི་བསྐལ་པ་འགྲངས་བར་ཆོས་ཀྱི་དབྱིངས་ཀྱིས་གཏུགས་པ་ནམ་མཁའི་དབྱིངས་ལྟར་གནས་པ། གང་ཇི་སྙེད་པ་ཡོད་པ་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཡོངས་སུ་སྨྱིན་པར་བྱ་བས་བྱང་ཆུབ་སེམས་དཔའི་སྤྱོད་པ་སྤྱད་པར་བྱའོ། །འཇིག་རྟེན་གྱི་ཁམས་གཅིག་ཏུ་ཇི་ལྟར་སྤྱད་པ་དེ་བཞིན་དུ་འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་དབྱིངས་ཀྱི་མཐས་གཏུགས་པ་ཐམས་ཅད་དུའང་སྤྱོད་པར་བྱའོ། །ཞེས་སེམས་བསྐྱེད་ཀྱང་དེ་ལྟ་བུའི་དུས་སུ་སྤྱོད་པས་སྡང་བ་མེད་
ཅིང་མི་འཇིགས་མི་སྐྲག་གོ །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ལྟར་སེམས་ཅན་ཐམས་ཅད་ཀྱི་དོན་དུ་བྱང་ཆུབ་སེམས་དཔའི་སྤྱོད་པ་ཉམས་སུ་ལེན་པ་ནི། བྱང་ཆུབ་སེམས་དཔའི་ཡི་དམ་བརྟན་པ་སྟེ། འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ལ་རག་ལུས་པར་ཡིད་ཆེས་པར་བྱས་ཏེ། བསམ་པ་ཡོངས་སུ་དག་པས། དགེ་བའི་རྩ་བ་ཐམས་ཅད་ཡང་དག་པར་སྡུད་ཅིང་ཡོངས་སུ་རྫོགས་པར་བྱེད་དེ། ནམ་འདོད་པར་གྱུར་པ་དེའི་ཚེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱའོ། །ཞེས་བྱང་ཆུབ་ལ་དབང་བསྒྱུར་བར་གནས་ཤིང་། བགེགས་མེད་པའི་ལམ་དུ་ཞུགས་པ་དང་། ཉེ་བར་ལེན་པའི་རྐྱེན་ཐམས་ཅད་ཡོངས་སུ་བྱང་བས། སངས་རྒྱས་ཀྱི་བྱང་ཆུབ་ཏུ་བརྟེན་པ་ཐོགས་པ་མེད་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་མངོན་པར་འཚང་མི་རྒྱ་སྟེ། དེ་ཡང་ཅིའི་ཕྱིར་ཞེ་ན། འདི་ལྟར་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། སྨོན་ལམ་ཡོངས་སུ་རྫོགས་པར་བྱ་བའི་ཕྱིར་ཏེ། བྱང་ཆུབ་སེམས་དཔའི་སྤྱོད་པ་འཇིག་རྟེན་གྱི་ཁམས་ཐམས་ཅད་ཀྱིས་ཀླས་ཏེ། སྤྱོད་པ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་རྣམས་ཀྱང་མི་དམིགས། བྱང་ཆུབ་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས་ཆོས་ཐམས་ཅད་ཀྱང་མི་དམིགས། སེམས་ཅན་ཐམས་ཅད་ཀྱང་མི་དམིགས། སེམས་ཀྱང་མི་དམིགས། སྤྱོད་པ་ཡང་མི་དམིགས་སྔོན་གྱི་མཐའ་ཡང་མི་དམིགས། ཕྱི་མའི་མཐའ་ཡང་མི་དམིགས། ད་ལྟར་བྱུང་བ་ཡང་མི་དམིགས། འགྲོ་
བ་ཐམས་ཅད་ཀྱང་མི་དམིགས། འདུས་བྱས་དང་འདུས་མ་བྱས་ཀྱང་མི་དམིགས་ཏེ། དེ་དེ་ལྟར་དབེན་པར་གནས་པ་ཡིན། དེ་ལྟར་ཟབ་མོ་ལ་གནས་པ་དང་དེ་ལྟར་ཞི་བ་ལ་གནས་པ་དང་། དེ་ལྟར་ཉོན་མོངས་པ་མེད་པ་ལ་གནས་པ་དང་། དེ་ལྟར་བརྗོད་དུ་མེད་པ་ལ་གནས་པ་དང་། དེ་ལྟར་གཉིས་སུ་མེད་པ་ལ་གནས་པ་དང་། དེ་ལྟར་རྟོག་པ་མེད་པ་ལ་གནས་པ་དང་། དེ་ལྟར་ཆོས་ཐམས་ཅད་ཀྱི་རང་བཞིན་ལ་གནས་པ་དང་། དེ་ལྟར་རིག་པ་ལ་གནས་པ་དང་། དེ་ལྟར་གྲོལ་བ་ལ་གནས་པ་དང་། དེ་ལྟར་མྱ་ངན་ལས་འདས་པ་ལ་གནས་པ་དང་། དེ་ལྟར་ཡང་དག་པའི་མཐའ་ལ་གནས་པ་ཡིན་ཡང་སྨོན་ལམ་གྱི་རྒྱུན་ཀྱང་མི་གཅོད། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་དང་། བྱང་ཆུབ་སེམས་དཔའི་སྤྱོད་པ་དང་། སེམས་ཅན་ཡོངས་སུ་སྨྱིན་པར་བྱ་བ་དང་། ཕ་རོལ་ཏུ་ཕྱིན་པ་རྣམས་དང་། སེམས་ཅན་གདུལ་བ་དང་། སངས་རྒྱས་མཆོད་ཅིང་རིམ་གྲོར་བྱ་བ་དང་། ཆོས་བསྟན་པ་དང་། འཇིག་རྟེན་གྱི་ཁམས་བརྒྱན་པའི་རྒྱུན་ཀྱང་མི་གཅོད་དོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་རྣམས་ནི་སྨོན་ལམ་ཆེན་པོས་ཤིན་ཏུ་བྱུང་བའི་ཕྱིར་ཏེ། གང་གིས་ཆོས་ཐམས་ཅད་ཀྱི་མཚན་ཉིད་འདི་ལྟ་བུར་རབ་ཏུ་ཤེས་པ་ནི་སྙིང་རྗེ་ཆེན་པོ་དེ་བས་ཀྱང་རྣམ་པར་འཕེལ་བར་བྱེད། ཡོན་ཏན་བརྗོད་དུ་མེད་པས་ཀྱང་སེམས་ཅན་ཐམས་ཅད་ཡོངས་སུ་མི་གཏོང་བའི་སེམས་ཆེར་བསྐྱེད་དེ། དེ་ལྟར་དངོས་པོ་མེད་པའི་ཆོས་ཐམས་ཅད་ལ་ཡང་བྱིས་པ་སོ་སོའི་སྐྱེ་བོ་ཀུན་ཏུ་གཏི་མུག་པ་འདི་དག་གིས་ཆོས་ཐམས་ཅད་ཀྱི་རང་བཞིན་ཁོང་དུ་མི་ཆུད་མི་ཤེས་ཀྱིས་དེ་ཁོང་དུ་ཆུད་པར་བྱའོ། །དེ་ཅིའི་ཕྱིར་ཞེ་ན། འགྲོ་བ་ཐམས་ཅད་སངས་རྒྱས་བཅོམ་ལྡན་འདས་རྣམས་ལས་ལྷག་པར་ཞི་བའི་གནས་ཀྱང་མེད་ན། དེ་དག་གིས་ཀྱང་ཆོས་དེ་ལྟ་བུར་བསྟེན་ཏེ། སེམས་ཅན་ཡོངས་སུ་སྨིན་པར་མཛད་
ཅིང་ཐུགས་རྗེ་ཆེན་པོ་ཡང་མ་གློད་ན། བདག་ཅག་གིས་ལྟ་སེམས་བསྐྱེད་པ་བདེན་པའི་ཚིག་ལ་གནས་པ་མི་བསླུ་བ་སངས་རྒྱས་དང་། ཆོས་ཀྱི་རིགས་ཐམས་ཅད་མི་གཅོད་པ། སྨོན་ལམ་ཆེན་པོས་མངོན་དུ་བྱས་པ་དང་། སེམས་ཅན་ཐམས་ཅད་ཀྱི་དོན་ལ་གདོན་མི་ཟ་བར་སེམས་བསྐྱེད་པ་དང་། དགེ་བའི་རྩ་བ་ཐམས་ཅད་ཤིན་ཏུ་བསྩགས་པས། ཡོངས་སུ་བསྔོ་བ་ལ་མཁས་པའི་གནས་ལ་རབ་ཏུ་གནས་པ། ཡེ་ཤེས་ཟབ་མོས་མངོན་པར་བསྒྲུབས་པ་འགྲོ་བའི་ཚོགས་ཐམས་ཅད་ཁོང་དུ་ཆུད་པ་དང་སེམས་ཅན་ཐམས་ཅད་ལ་མཉམ་པ་ཉིད་དུ་གྱུར་པའི་སེམས་ཀྱིས་སེམས་ཅན་ཐམས་ཅད་བླ་ན་མེད་པའི་ཆོས་ཀྱི་སྦྱིན་པ་ཆེན་པོ་ལ་བོད་བོད་ལ་སེམས་ཅན་ཐམས་ཅད་གྲོལ་བར་མ་བྱས། སེམས་ཅན་ཐམས་ཅད་སངས་རྒྱས་སུ་ཕྱིན་པར་མ་བྱས། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་མ་བྱས་ཏེ། སྨོན་ལམ་ཆེན་པོ་ཡོངས་སུ་མ་རྫོགས་པར་སྙིང་རྗེ་ཆེན་པོ་ཡང་ཇི་ལྟར་གློད་པར་བྱ། སྨོན་ལམ་ཆེན་པོ་ཡོངས་སུ་རྫོགས་པར་བྱའོ། །སྙམ་པ་འདི་ནི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་གོ་ཅ་རྡོ་རྗེ་ལྟ་བུའི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་མངོན་པར་མཁྱེན་པ་ཆེན་པོའི་ཡེ་ཤེས་རྡོ་རྗེ་ལྟ་བུ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་བདུན་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བརྩམ་པ་ཆེན་པོ་སྟེ། བཅུ་གང་ཞེ་ན། འདི་ལྟར་སངས་རྒྱས་ཐམས་ཅད་མཆོད་དོ། །བསྙེན་བཀུར་རོ་ཞེས་བརྩམ་པ་ཆེན་པོ་རྩོམ་པ་དང་། བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་རྩ་བ་བརྟན་པར་བྱའོ། །ཞེས་བརྩམ་པ་ཆེན་པོ་རྩོམ་པ་དང་། དེ་བཞིན་
གཤེགས་པ་མྱ་ངན་ལས་འདས་པ་ཐམས་ཅད་ཀྱི་མཆོད་རྟེན་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་ཕྱེ་མ་དང་། ན་བཟའ་དང་། གདུགས་དང་རྒྱལ་མཚན་དང་། བ་དན་གྱིས་བརྒྱན་པར་བྱའོ། །མཆོད་པར་བྱའོ། །དམ་པའི་ཆོས་ཀྱང་ཡང་དག་པར་གཟུང་བར་བྱའོ། །བསྟན་པ་ཡང་ཡོངས་སུ་བསྲུང་བར་བྱའོ། །ཞེས་བརྩམ་པ་ཆེན་པོ་རྩོམ་པ་དང་། སེམས་ཅན་གྱི་ཁམས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱའོ། །ཞེས་བརྩམ་པ་ཆེན་པོ་རྩོམ་པ་དང་། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་ཞིང་ཡོངས་སུ་དག་པ་བླ་ན་མེད་པས་ཡོངས་སུ་དག་པར་བྱའོ། །ཞེས་བརྩམ་པ་ཆེན་པོ་རྩོམ་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འདི་སྙམ་དུ་སེམས་ཏེ། མ་འོངས་པའི་བསྐལ་པ་འགྲངས་པ་ཇི་སྙེད་པ་དེ་དག་ཐམས་ཅད་ཀྱིས་འཇིག་རྟེན་གྱི་ཁམས་རེ་རེར་ཡང་སེམས་ཅན་རེ་རེའི་དོན་དུ་ཡང་བྱང་ཆུབ་སེམས་དཔའི་སྤྱོད་པ་སྤྱད་པར་བྱའོ། །སེམས་ཅན་གཅིག་གི་དོན་དུ་ཇི་ལྟ་བ་དེ་བཞིན་དུ། སེམས་ཅན་ཐམས་ཅད་མ་ལུས་པའི་དོན་དུ་ཡང་སྙིང་རྗེ་ཆེན་པོ་བསྐྱེད་དེ། སེམས་ཅན་ཐམས་ཅད་སངས་རྒྱས་ཀྱི་བྱང་ཆུབ་ལ་དགོད་པའི་ཕྱིར་བྱང་ཆུབ་སེམས་དཔའི་སྤྱོད་པ་སྤྱད་པར་བྱའོ། །ཞེས་སངས་རྒྱས་ཀྱི་ཆོས་ཀྱི་དོན་དུ་ཡོངས་སུ་སྐྱོ་བ་དང་ལྡན་པའི་སེམས་བསྐྱེད་པ་གཅིག་ཀྱང་མི་བསྐྱེད་པའི་བརྩམ་པ་ཆེན་པོ་རྩོམ་མོ། །སངས་རྒྱས་བཅོམ་ལྡན་འདས་དེ་དག་ལས་ཀྱང་དེ་བཞིན་གཤེགས་པ་གཅིག་ལ་ཡང་བསམ་གྱིས་མི་ཁྱབ་པའི་བསྐལ་པར་མཆོད་པ་དང་། རིམ་གྲོ་བྱས་ཏེ་དེ་བཞིན་གཤེགས་པ་གཅིག་ལ་ཇི་ལྟ་བ་དེ་བཞིན་དུ་དེ་བཞིན་གཤེགས་པ་ཐམས་ཅད་ལའང་མཆོད་པ་དང་། རིམ་གྲོ་བྱའོ་ཞེས་བརྩམ་པ་ཆེན་པོ་རྩོམ་པ་དང་། དེ་བཞིན་གཤེགས་པ་དེ་དག་ཡོངས་སུ་མྱ་ངན་ལས་འདས་ནས་ཀྱང་ཐམས་ཅད་ཀྱི་སྐུ་གདུང་ལ་བསྐལ་
པ་བསམ་གྱིས་མི་ཁྱབ་པར་རིན་པོ་ཆེ་ཐམས་ཅད་ཀྱི་གདུགས་དང་དྲིལ་བུ་དང་། རྒྱལ་མཚན་དང་བ་དན་དང་། བདུག་སྤོས་དང་ན་བཟའ་ཐམས་ཅད་ཀྱིས་མཆོད་པ་བྱས་ཏེ། དེ་བཞིན་གཤེགས་པ་རེ་རེ་ཞིང་ཡང་མཆོད་རྟེན་འཇིག་རྟེན་གྱི་ཁམས་ཡངས་པ་བརྗོད་དུ་མེད་པར་ཁྱབ་པ། དེ་བཞིན་གཤེགས་པའི་སྐུ་གཟུགས་ཀྱིས་བརྒྱན་པ་མང་པོ་བྱས་ཏེ། དེ་བཞིན་གཤེགས་པའི་སྐུ་གཟུགས་དེ་དག་ཀྱང་འདི་ལྟ་སྟེ། འཇིག་རྟེན་གྱི་ཁམས་ཡངས་པ་བསམ་གྱིས་མི་ཁྱབ་པར་ཁྱབ་པ་དེ་ལྟ་བུའི་རྣམ་པ་དང་ལྡན་པར་བྱའོ། །སངས་རྒྱས་ཀྱི་ཆོས་ཀྱི་དོན་དུ་སངས་རྒྱས་བཅོམ་ལྡན་འདས་བསྙེན་བཀུར་བ་དང་། སེམས་ཅན་ཡོངས་སུ་སྨིན་པར་བྱ་བ་དང་། བསྟན་པ་ཡོངས་སུ་གཟུང་བ་དང་། དམ་པའི་ཆོས་བརྗོད་པ་ལ་རྒྱུན་གཅོད་ཅིང་བཏང་བའི་སེམས་བསྐྱེད་པ་གཅིག་ཀྱང་བསྐྱེད་པར་མི་བྱའོ། །ཞེས་བརྩམ་པ་ཆེན་པོ་རྩོམ་པ་དང་དགེ་བའི་རྩ་བ་དེས་ཀྱང་དེ་བཞིན་གཤེགས་པ་ཐམས་ཅད་དང་གཅིག་ཅིང་མཚུངས་པའི་སངས་རྒྱས་ཀྱིས་ཐོབ་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ། །ཞེས་བརྩམ་པ་ཆེན་པོ་རྩོམ་པ་དང་། མངོན་པར་སངས་རྒྱས་ནས་ཀྱང་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་སངས་རྒྱས་ཀྱི་རྣམ་པར་འཕྲུལ་པ་དང་། ཆོ་འཕྲུལ་བསམ་གྱིས་མི་ཁྱབ་པ་ཡང་དག་པར་བསྟན་ཅིང་། བསྐལ་པ་བརྗོད་དུ་མེད་པར་ཆོས་བསྟན་ཀྱང་བདག་གི་ལུས་ལ་དུབ་པར་མི་འགྱུར་ཞིང་། ངག་དང་སེམས་ལ་དུབ་པར་མི་འགྱུར་བར་བྱའོ། །འགྲོ་བ་ཐམས་ཅད་ཡོངས་སུ་བསྐྱང་བའི་ཕྱིར་སེམས་བསྐྱེད་པ་ཆོས་དང་ལྡན་པ་དེ་བཞིན་གཤེགས་པའི་ཆོས་ཀྱི་བསྟན་པ་སེམས་ཅན་ཐམས་ཅད་ཀྱི་དོན་དུ་སྨོན་ལམ་ཆེན་པོ་བཏབ་པ་དང་ལྡན་པ། བྱམས་པ་ཆེན་པོ་སྔོན་དུ་འགྲོ་བ་སྙིང་རྗེ་ཆེན་པོའི་མཐར་ཐུག་པ་མཚན་
ཉིད་མེད་པའི་ཆོས་ཀྱི་གཞིས་གཏུགས་པ་བདེན་པའི་ཚིག་ལ་གནས་པ། ཆོས་ཐམས་ཅད་ཀྱིས་དབེན་པ་མངོན་དུ་བྱས་པ། སེམས་ཅན་ཐམས་ཅད་མི་དམིགས་པ། ལས་དང་བྱ་བར་མི་འགལ་བ། འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་ཐམས་ཅད་དང་། རྒྱུད་ཀྱི་ཚུལ་གཅིག་ཏུ་གྱུར་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ་མཚན་ཉིད་མེད་པའི་ཆོས་ལ་གཞོལ་བ། འཇུག་པ་དང་ལྡོག་པ་མེད་པར་ཡོངས་སུ་རྫོགས་པས། སངས་རྒྱས་ཀྱི་ཆོས་ཐམས་ཅད་རྒྱུན་མི་གཅོད་པ་དང་། སྨོན་ལམ་ཆེན་པོ་དང་ལྡན་པས་སངས་རྒྱས་ཀྱི་ཕྲིན་ལས་ཆེན་པོ་བསྒྲུབ་བོ་ཞེས་བརྩམ་པ་ཆེན་པོ་རྩོམ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བརྩམས་པ་ཆེན་པོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་ཕུན་སུམ་ཚོགས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བརྩམས་པ་ཆེན་པོ་མཐར་ཕྱིན་པར་བྱ་བ་སྟེ། བཅུ་གང་ཞེ་ན། འདི་ལྟར་དེ་བཞིན་གཤེགས་པ་ཐམས་ཅད་མཆོད་པ་དང་རིམ་གྲོ་བྱ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། སེམས་ཅན་ཐམས་ཅད་མོས་པ་ཇི་ལྟ་བ་བཞིན་དུ་རྗེས་སུ་བསྲུང་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། སངས་རྒྱས་ཀྱི་ཆོས་ཐམས་ཅད་བཙལ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། དགེ་བའི་རྩ་བ་ཐམས་ཅད་བསགས་པ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། སངས་རྒྱས་ཀྱི་ཆོས་ཐམས་ཅད་ངེས་པར་རྟོགས་པར་བྱ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། སྨོན་ལམ་ཐམས་ཅད་ཡོངས་སུ་རྫོགས་པར་བྱ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། བྱང་ཆུབ་ཀྱི་སྤྱོད་པ་ཐམས་ཅད་ཁོང་དུ་ཆུད་པར་བྱ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། དགེ་བའི་བཤེས་གཉེན་ཐམས་ཅད་མཉེས་པར་བྱ་
བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། འཇིག་རྟེན་གྱི་ཁམས་ཐམས་ཅད་དུ་འགྲོ་བ་དང་། དེ་བཞིན་གཤེགས་པའི་དྲུང་དུ་ཉེ་བར་འགྲོ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པ་དང་། ཆོས་ཐམས་ཅད་མཉན་པར་བྱ་བའི་ཕྱིར་སངས་རྒྱས་ཀྱི་འཁོར་ཀྱི་དཀྱིལ་འཁོར་དུ་འགྲོ་བ་ལ་བརྩམས་པ་ཆེན་པོ་མཐར་ཕྱིན་པར་བྱེད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བརྩམས་པ་ཆེན་པོ་མཐར་ཕྱིན་པར་བྱ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡང་དག་པར་རྫོགས་པའི་བྱང་ཆུབ་ཀྱི་ཡེ་ཤེས་ཆེན་པོ་བརྩམས་པའི་མཐར་དབྱུང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དད་པ་མི་ཕྱེད་པ་སྟེ། བཅུ་གང་ཞེ་ན། འདི་ལྟར་སངས་རྒྱས་ཐམས་ཅད་ལ་དད་པ་མི་ཕྱེད་པ་དང་། སངས་རྒྱས་ཀྱི་ཆོས་ཐམས་ཅད་ལ་དད་པ་མི་ཕྱེད་པ་དང་། འཕགས་པའི་དགེ་འདུན་ཐམས་ཅད་ལ་དད་པ་མི་ཕྱེད་པ་དང་། བྱང་ཆུབ་སེམས་དཔའ་ཐམས་ཅད་ལ་དད་པ་མི་ཕྱེད་པ་དང་། དགེ་བའི་བཤེས་གཉེན་ཐམས་ཅད་ལ་དད་པ་མི་ཕྱེད་པ་དང་། སེམས་ཅན་ཐམས་ཅད་ལ་དད་པ་མི་ཕྱེད་པ་དང་། བྱང་ཆུབ་སེམས་དཔའི་སྨོན་ལམ་ཐམས་ཅད་ལ་དད་པ་མི་ཕྱེད་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཁོང་དུ་ཆུད་པར་བྱ་བ་ལ་དད་པ་མི་ཕྱེད་པ་དང་། སངས་རྒྱས་ཐམས་ཅད་ལ་མཆོད་ཅིང་བསྙེན་བཀུར་བྱ་བ་ལ་དད་པ་མི་ཕྱེད་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བར་བྱང་ཆུབ་སེམས་དཔའི་ཐབས་མཁས་པ་མཚམས་སྦྱོར་བའི་ཚུལ་ལ་དད་པ་མི་ཕྱེད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དད་པ་མི་ཕྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡེ་ཤེས་ཆེན་པོའི་དད་པ་མི་ཕྱེད་པ་བླ་ན་མེད་པ་
འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། བཅུ་གང་ཞེ་ན། འདི་ལྟར་མོས་པ་དྲག་པོས་རང་གི་རྒྱུད་ལས་ལུང་བསྟན་པ་དང་། བྱང་ཆུབ་སེམས་དཔའི་དགེ་བའི་རྩ་བ་ལ་གཞོལ་བའི་སྐབས་ཀྱིས་ལུང་བསྟན་པ་དང་། སྤྱོད་པ་རྒྱ་ཆེན་པོས་ལུང་བསྟན་པ་དང་། མངོན་ཏུ་ལུང་བསྟན་པ་དང་། གསང་སྟེ་ལུང་བསྟན་པ་དང་། རང་གི་སེམས་ལ་རག་ལས་པར་ཁོང་དུ་ཆུད་པར་ལུང་བསྟན་པ་དང་། བཟོད་པ་ཐོབ་པས་ལུང་བསྟན་པ་དང་། སེམས་ཅན་ཡོངས་སུ་སྨིན་པར་བྱ་བའི་དོན་ཀྱིས་ལུང་བསྟན་པ་དང་། བསྐལ་པ་འགྲངས་པ་ཐམས་ཅད་མི་ཟད་པས་ལུང་བསྟན་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ཀྱིས་རྣམ་པར་འཕྲུལ་པས་ལུང་བསྟན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུང་བསྟན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་ལུང་བསྟན་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་བསྔོ་བ་སྟེ། བཅུ་གང་ཞེ་ན། འདི་ལྟར་བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། སྨོན་ལམ་གཅིག་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་བསམ་པ་གཅིག་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན།
རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། སྤྱོད་པ་གཅིག་ཏུ་ཡོངས་སུ་རྫོགས་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན་རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། རྒྱུད་ཀྱི་ཚུལ་གཅིག་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། གཅིག་ཅིང་མཉམ་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། ཡིད་ལ་བྱ་བ་གཅིག་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། ཡོངས་སུ་དག་པ་གཅིག་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་དང་། གཅིག་ཏུ་རྣམ་པར་སྤྱོད་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས་དགེ་བའི་བཤེས་གཉེན་རྣམས་
དང་། གཅིག་ཅིང་མཉམ་པར་འཇུག་པ་ཡོངས་སུ་རྫོགས་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར་འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག །བདག་གི་དགེ་བའི་རྩ་བ་འདིས། དགེ་བའི་བཤེས་གཉེན་རྣམས་དང་། ཐ་མི་དད་པ་ཕུན་སུམ་ཚོགས་པར་གྱུར་ཅིག །ཕུན་སུམ་ཚོགས་པར། འགྱུར་རམ་འགྱུར་ཞེ་ན། རྣམ་པ་གཞན་དུ་མ་འགྱུར་བར་དེ་ལྟར་ཕུན་སུམ་ཚོགས་པར་གྱུར་ཅིག་ཅེས་བྱའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་བསྔོ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དགེ་བའི་རྩ་བ་ཡོངས་སུ་བསྔོ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཁོང་དུ་ཆུད་པ་སྟེ། བཅུ་གང་ཞེ་ན། འདི་ལྟར་གཏོང་བའི་སེམས་ཀྱིས་རྣམ་པར་འཕྲུལ་པའི་ཡེ་ཤེས་ཁོང་དུ་ཆུད་པ་དང་། སངས་རྒྱས་ཀྱི་ཆོས་ཐམས་ཅད་ལ་མོས་པའི་ཡེ་ཤེས་ཁོང་དུ་ཆུད་པ་དང་། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་མཐའ་དང་དབུས་མེད་པ་ལ་འཇུག་པའི་ཡེ་ཤེས་ཁོང་དུ་ཆུད་པ་དང་། དྲིས་པ་ཐམས་ཅད་ཀྱི་ཐེ་ཙོམ་གཅོད་པའི་ཡེ་ཤེས་ཁོང་དུ་ཆུད་པ་དང་། དོན་ཤེས་པ་ལ་འཇུག་པའི་ཡེ་ཤེས་ཁོང་དུ་ཆུད་པ་དང་། དེ་བཞིན་གཤེགས་པ་ཐམས་ཅད་ཀྱི་གསུང་ལ་མཁས་པས། སངས་རྒྱས་ཀྱི་ཆོས་ཐམས་ཅད་ལ་ཡིད་ཆེས་པར་འཇུག་པའི་ཡེ་ཤེས་ཁོང་དུ་ཆུད་པ་དང་། སངས་རྒྱས་
ལ་བསྐྱེད་པའི་དགེ་བའི་རྩ་བ་ཆུང་ཡང་རུང་སྟེ། ཐམས་ཅད་དེ་བཞིན་གཤེགས་པའི་ཡེ་ཤེས་ཚད་མེད་པར་འགྱུར་བར་ཡིད་ཆེས་པར་བྱས་ཤིང་། ཆོས་དཀར་པོ་ཐམས་ཅད་ཡོངས་སུ་རྫོགས་པར་བྱེད་པའི་ཡེ་ཤེས་ཁོང་དུ་ཆུད་པ་དང་། བྱང་ཆུབ་སེམས་དཔའི་རྣམ་པར་སྤྱོད་པ་བསམ་གྱིས་མི་ཁྱབ་པ་ཡོངས་སུ་རྫོགས་པར་བྱ་བའི་ཡེ་ཤེས་ཁོང་དུ་ཆུད་པ་དང་། སེམས་ཀྱི་སྐད་ཅིག་གཅིག་གིས་སངས་རྒྱས་ཀྱི་ཞིང་བརྗོད་དུ་མེད་པར་འགྲོ་ཞིང་གནས་པར་བྱ་བའི་ཕྱིར། སེམས་ཀྱི་སྐད་ཅིག་གི་ཡེ་ཤེས་ཁོང་དུ་ཆུད་པ་དང་། སངས་རྒྱས་ཐམས་ཅད་ཀྱི་བྱང་ཆུབ་མངོན་པར་འཚང་རྒྱ་བ་དང་། ཆོས་ཀྱི་དབྱིངས་ཐམས་ཅད་ལ་འཇུག་པ་དང་། སངས་རྒྱས་ཀྱི་ཆོས་ཐམས་ཅད་བསྟན་པ་དང་། གཟུང་བ་དང་། དེ་བཞིན་གཤེགས་པ་ཐམས་ཅད་ཀྱི་གསུང་སྣ་ཚོགས་ལ་འཇུག་པའི་རྒྱན་གྱི་ཡེ་ཤེས་ཁོང་དུ་ཆུད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཁོང་དུ་ཆུད་པ་རྣམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་ཡེ་ཤེས་ཁོང་དུ་ཆུད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་མཐའ་དང་དབུས་མེད་པ་རྣམས་ཏེ། བཅུ་གང་ཞེ་ན། འདི་ལྟར་སངས་རྒྱས་ཐམས་ཅད་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། ཆོས་ཀྱི་དབྱིངས་ཐམས་ཅད་དུ་འཇུག་པ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། འགྲོ་བ་ཐམས་ཅད་ཀྱི་ཞིང་དང་དུས་དང་། ཆོས་ཀྱི་དབྱིངས་སུ་འཇུག་པ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། ཆོས་ཐམས་ཅད་ནམ་མཁའ་དང་མཉམ་པར་བལྟ་བ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་ལ་རྒྱ་ཆེར་བརྟགས་པ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། དུས་གསུམ་གྱི་སངས་རྒྱས་ཐམས་ཅད་ཡིད་ལ་བྱ་བ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། ལས་དང་རྣམ་པར་སྨིན་པ་བསམ་གྱིས་མི་ཁྱབ་པར་འཇུག་པ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱ་བ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། འཁོར་ཀྱི་དཀྱིལ་
འཁོར་ཐམས་ཅད་དུ་འཇུག་པ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་དང་། དེ་བཞིན་གཤེགས་པ་ཐམས་ཅད་ཀྱི་དབྱིངས་རྣམ་པར་བལྟ་བ་ལ་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་རྒྱ་ཆེན་པོ་མཐའ་དང་དབུས་མེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་མཐའ་དང་དབུས་མེད་པ་ཐམས་ཅད་ཀྱི་ཡེ་ཤེས་ཆེན་པོ་རྒྱ་མཚོ་ལྟ་བུར་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཏེར་ཏེ། བཅུ་གང་ཞེ་ན། འདི་ལྟར་ཆོས་ཐམས་ཅད་ལ་བགྲང་པས་སྦྱར་བའི་གཏེར་དང་། ཆོས་ཐམས་ཅད་ལ་ངེས་པར་རྟོགས་པའི་གཏེར་དང་། ཆོས་ཐམས་ཅད་ལ་གཟུངས་སྣང་བའི་གཏེར་དང་། ཆོས་ཐམས་ཅད་ལ་སོ་སོ་ཡང་དག་པར་རིག་པས་རབ་ཏུ་སྣང་བའི་གཏེར་དང་། ཆོས་ཐམས་ཅད་ལ་བརྗོད་དུ་མེད་པའི་ཚུལ་མཁས་པར་ཁོང་དུ་ཆུད་པའི་གཏེར་དང་། སངས་རྒྱས་ཀྱི་རྣམ་པར་འཕྲུལ་པ་དང་། ཆོ་འཕྲུལ་ཐམས་ཅད་ལ་སོ་སོར་རྟོག་ཅིང་བལྟ་བའི་གཏེར་དང་། ཆོས་ཐམས་ཅད་ལ་མཉམ་པ་ཉིད་དུ་མངོན་པར་བསྒྲུབ་པར་མཁས་པའི་གཏེར་དང་། སངས་རྒྱས་ཐམས་ཅད་མཐོང་བ་དང་། མི་འབྲལ་བའི་གཏེར་དང་། སྒྱུ་མ་ལྟ་བུའི་བསྐལ་པ་བསམ་གྱིས་མི་ཁྱབ་པ་ཡོངས་སུ་གྲུབ་པར་འཇུག་པ་ལ་མཁས་པའི་གཏེར་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དགའ་བ་དང་རབ་ཏུ་དགའ་བ་དང་། མོས་པ་ཆེན་པོ་རབ་ཏུ་རྙེད་པའི་གཏེར་རོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཏེར་ཏེ། དེ་དག་ལ་གནས་ཤིང་བྱང་ཆུབ་སེམས་
དཔའ་རྣམས་སངས་རྒྱས་ཐམས་ཅད་ཀྱི་ཆོས་ཀྱི་ཡེ་ཤེས་ཀྱི་གཏེར་བླ་ན་མེད་པ་ཐོབ་པས་སེམས་ཅན་ཐམས་ཅད་འདུལ་བ་ལ་བརྩོན་པར་བྱེད་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྡོམ་པ་སྟེ། བཅུ་གང་ཞེ་ན། འདི་ལྟར་སངས་རྒྱས་ཀྱི་ཆོས་ཐམས་ཅད་ལ་མི་འཁྲུག་མི་འཁྲུལ་བའི་སྡོམ་པ་དང་། སངས་རྒྱས་ཐམས་ཅད་ལ་བསམ་པ་མི་ཕྱེད་པའི་སྡོམ་པ་དང་། བྱང་ཆུབ་སེམས་དཔའ་ཐམས་ཅད་ལ་བསམ་པ་རླབས་པོ་ཆེའི་སྡོམ་པ་དང་། དགེ་བའི་བཤེས་གཉེན་ཐམས་ཅད་ལ་བསམ་པ་མི་འདོར་བའི་སྡོམ་པ་དང་། ཉན་ཐོས་དང་རང་སངས་རྒྱས་ཡིད་ལ་བྱ་བ་ཐམས་ཅད་ལ་ཡོངས་སུ་མི་རྒྱུ་བའི་སྡོམ་པ་དང་། བྱང་ཆུབ་སེམས་དཔའ་ཆུད་ཟ་བའི་ལས་ཐམས་ཅད་རྣམ་པར་བཟློག་པའི་སྡོམ་པ་དང་། སེམས་ཅན་ཐམས་ཅད་ལ་ཁོང་ཁྲོ་བ་མེད་པའི་སྡོམ་པ་དང་། དགེ་བའི་རྩ་བ་བརྩམས་པ་ཐམས་ཅད་མཐར་ཕྱིན་པར་བྱ་བའི་སྡོམ་པ་དང་། བདུད་ཐམས་ཅད་རབ་ཏུ་ཕམ་པར་བྱ་བའི་སྡོམ་པ་དང་། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་རྫོགས་པར་བྱ་བའི་སྡོམ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྡོམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡེ་ཤེས་ཆེན་པོའི་སྡོམ་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། བཅུ་གང་ཞེ་ན། འདི་ལྟར་བསྐལ་པ་བརྗོད་དུ་མེད་པར་ཚེའི་ཚད་བྱིན་ཀྱིས་རློབ་པས་ཚེ་ལ་དབང་བ་དང་། ཏིང་ངེ་འཛིན་གྲངས་མེད་པར་ངེས་པར་རྟོགས་པར་གཞོག་ཅིང་། ཡེ་ཤེས་ཀྱིས་འཇུག་པའི་ཚུལ་གྱིས་སེམས་ལ་དབང་བ་དང་། འཇིག་རྟེན་གྱི་ཁམས་ཐམས་ཅད་རྒྱན་རྣམ་པར་དབྱེ་བ་དུ་མས་རབ་
ཏུ་བརྒྱན་པར་བྱིན་གྱིས་བརླབ་པ་སྟོན་པའི་ཚུལ་གྱིས་ཡོ་བྱད་ལ་དབང་བ་དང་། དུས་ཇི་ལྟ་བ་བཞིན་དུ་ལས་ཀྱི་རྣམ་པར་སྨིན་པ་བྱིན་གྱིས་རློབ་པས་ལས་ལ་དབང་བ་དང་། འཇིག་རྟེན་གྱི་ཁམས་ཐམས་ཅད་དུ་སྐྱེ་བ་སྟོན་པས་སྐྱེ་བ་ལ་དབང་བ་དང་། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱིས་ཡོངས་སུ་གང་བར་བལྟ་བས་མོས་པ་ལ་དབང་བ་དང་། དུས་དང་ཞིང་གང་དུ་འདོད་པར་མངོན་པར་འཚང་རྒྱ་བས་སྨོན་ལམ་ལ་དབང་བ་དང་། རྫུ་འཕྲུལ་གྱི་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པས། རྫུ་འཕྲུལ་ལ་དབང་བ་དང་། ཆོས་ཀྱི་སྒོ་དང་སྣང་བ་མཐའ་དང་དབུས་མེད་པ་ཡང་དག་པར་སྟོན་པས་ཆོས་ལ་དབང་བ་དང་། དེ་བཞིན་གཤེགས་པའི་སྟོབས་བཅུ་དང་། མི་བསྙེངས་པ་སྐད་ཅིག་སྐད་ཅིག་ཏུ་གོ་བར་ཡོངས་སུ་སྟོན་པས་ཡེ་ཤེས་ལ་དབང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་མངའི་ཕ་རོལ་ཏུ་ཕྱིན་པ། ཡེ་ཤེས་ཀྱིས་རྣམ་པར་འཕྲུལ་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་འཕྲུལ་པ་རྣམས་ཏེ། བཅུ་གང་ཞེ་ན། འདི་ལྟར་སེམས་ཅན་ལ་རྣམ་པར་འཕྲུལ་པ་དང་། ཞིང་ལ་རྣམ་པར་འཕྲུལ་པ་དང་། ཆོས་ལ་རྣམ་པར་འཕྲུལ་པ་དང་། ལུས་ལ་རྣམ་པར་འཕྲུལ་པ་དང་། སྨོན་ལམ་ལ་རྣམ་པར་འཕྲུལ་པ་དང་། སྤྱོད་ཡུལ་ལ་རྣམ་པར་འཕྲུལ་པ་དང་། ཡེ་ཤེས་ལ་རྣམ་པར་འཕྲུལ་པ་དང་། མངོན་པར་ཤེས་པ་ལ་རྣམ་པར་འཕྲུལ་པ་དང་། རྫུ་འཕྲུལ་ལ་རྣམ་པར་འཕྲུལ་པ་དང་། སྟོབས་ལ་རྣམ་པར་འཕྲུལ་པ་དག་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་
ཀྱི་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་དེ་ལ་བྱང་ཆུབ་སེམས་དཔའ་རྣམས་ཀྱི་སེམས་ཅན་ལ་རྣམ་པར་འཕྲུལ་པ་གང་ཞེ་ན། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་སེམས་ཅན་མེད་པས་སྒྲོལ་བའི་རྣམ་པར་འཕྲུལ་པ་དང་། སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པར་བྱིན་གྱིས་བརླབ་པའི་རྣམ་པར་འཕྲུལ་པ་དང་། སེམས་ཅན་ཐམས་ཅད་ལ་དུས་ལ་བབ་ན་ཆོས་བསྟན་པ་རྒྱུན་མི་གཅོད་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་དུ་སྤྲུལ་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་སྐྲའི་སྦུབས་གཅིག་ཏུ་བཙུད་ཀྱང་གནོད་པར་མི་འགྱུར་བའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་འཇིག་རྟེན་གྱི་ཁམས་སུ་བྱིན་གྱིས་བརླབས་ཏེ། ཕ་རོལ་ཤེས་པར་བྱེད་པ་དང་། ཡོངས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་དུ་བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོའི་དབང་ཡོངས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་དུ་ཉན་ཐོས་དང་། རང་སངས་རྒྱས་ཀྱི་གཟུགས་དང་ཁ་དོག་དང་མཚན་དང་། ཆོ་ག་དང་སྤྱོད་ལམ་ཡོངས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ཐོབ་པ་ཡོངས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་གྱི་ཁམས་མ་ལུས་པ་ཐམས་ཅད་དུ་ཐམས་ཅད་མཁྱེན་པའི་སྟོབས་མངོན་པར་རྫོགས་པར་སངས་རྒྱས་པའི་གཟུགས་ཀྱི་སྐུ་དང་། མཚན་དང་དཔེ་བྱད་བཟང་པོ་སྣ་ཚོགས་ཀྱི་རྒྱན་ཡོངས་སུ་སྟོན་པའི་རྣམ་པར་འཕྲུལ་པ་སྟེ།
ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཞིང་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་ཞིང་ཐམས་ཅད་ཞིང་གཅིག་ཏུ་བྱིན་གྱིས་རློབ་པའི་རྣམ་པར་འཕྲུལ་པ་དང་། ཞིང་ཐམས་ཅད་སྐྲའི་སྦུབས་གཅིག་ཏུ་འཛུད་པའི་རྣམ་པར་འཕྲུལ་པ་དང་། ཞིང་ཐམས་ཅད་མི་ཟད་པ་ལ་འཇུག་པའི་རྣམ་པར་འཕྲུལ་པ་དང་། ཞིང་ཐམས་ཅད་སྐྱིལ་མོ་ཀྲུང་གཅིག་གིས་རྒྱས་པར་འགེངས་པའི་ལུས་གཅིག་ཡོངས་སུ་སྟོན་པའི་རྣམ་པར་འཕྲུལ་པ་དང་། ཞིང་ཐམས་ཅད་རང་གི་ལུས་སུ་ཆུད་པར་ཡོངས་སུ་སྟོན་པའི་རྣམ་པར་འཕྲུལ་པ་དང་། ཞིང་ཐམས་ཅད་རབ་ཏུ་བསྐྱོད་ཀྱང་སེམས་ཅན་འཇིག་པར་མི་འགྱུར་བའི་རྣམ་པར་འཕྲུལ་པ་དང་། ཞིང་ཐམས་ཅད་ཀྱི་རྒྱན་རྣམ་པར་ཕྱེ་བ་ཞིང་གཅིག་ཏུ་ཡོངས་སུ་སྟོན་པའི་རྣམ་པར་འཕྲུལ་པ་དང་། ཞིང་གཅིག་གི་རྣམ་པར་ཕྱེ་བ་ཞིང་ཐམས་ཅད་ཀྱི་རྒྱན་རྣམ་པར་ཕྱེ་བར་ཡོངས་སུ་སྟོན་པའི་རྣམ་པར་འཕྲུལ་པ་དང་། ཞིང་ཐམས་ཅད་ཀྱི་དེ་བཞིན་གཤེགས་པའི་འཁོར་ཀྱི་དཀྱིལ་འཁོར་དུ་དེ་བཞིན་གཤེགས་པའི་སྐུ་གཅིག་གིས་ཡོངས་སུ་ཁྱབ་པར་སེམས་ཅན་ཐམས་ཅད་ལ་སྟོན་པའི་རྣམ་པར་འཕྲུལ་པ་དང་། ཞིང་ཕྲ་བ་དང་ཆེ་བ་དང་ཡངས་པ་དང་རྒྱ་ཆེ་བ་དང་། ཟབ་པ་དང་སྣྲེལ་ཞི་དང་སྤྱིའུ་ཚུགས་སུ་རྒྱུ་བ་དང་། གཞི་མཉམ་པ་ལ་འཇུག་པར་ཡོངས་སུ་གཞོལ་བས་ཕྱོགས་ཀྱི་དྲ་བ་རྣམ་པར་ཕྱེ་བ་ལ་འཇུག་པར་སེམས་ཅན་མ་ལུས་པ་ཐམས་ཅད་ལ་ཡོངས་སུ་སྟོན་པའི་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཞིང་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་
དཔའ་རྣམས་ཀྱི་ཆོས་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་ཆོས་ཐམས་ཅད་ཆོས་གཅིག་ཏུ་ཡང་དག་པར་གཞོལ་བར་བྱ་བ་དང་། ཆོས་གཅིག་པོ་ཆོས་ཐམས་ཅད་དུ་ཡང་དག་པར་གཞོལ་བར་བྱེད་ཀྱང་སེམས་ཅན་གྱི་བསམ་པ་དང་། མི་འགལ་བར་རྣམ་པར་དམིགས་པའི་རྣམ་པར་འཕྲུལ་པ་དང་། ཆོས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པས་བསྒྲུབ་པར་ཁོང་དུ་ཆུད་པར་བྱ་བ་ཕ་རོལ་གྱིས་གོ་བར་བྱ་བའི་རྣམ་པར་འཕྲུལ་པ་དང་། ཆོས་ཐམས་ཅད་འདུ་ཤེས་དང་བྲལ་བར་སེམས་ཅན་མང་པོས་ཁོང་དུ་ཆུད་པར་བྱ་བའི་རྣམ་པར་འཕྲུལ་པ་དང་། ཆོས་ཐམས་ཅད་ལ་ཚུལ་གཅིག་ཏུ་འཇུག་ཅིང་ཚུལ་མཐའ་ཡས་པར་སྟོན་པའི་རྣམ་པར་འཕྲུལ་པ་དང་། ཆོས་ཐམས་ཅད་ལ་བརྗོད་དུ་མེད་པར་འཇུག་ཅིང་། སྒོ་བརྒྱ་སྟོང་གིས་ཕ་རོལ་ཀྱི་རྒྱུད་དུ་བསྟན་པའི་རྣམ་པར་འཕྲུལ་པ་དང་། ཆོས་ཐམས་ཅད་སྒོ་ཀུན་ནས་རྒྱུ་བའི་ཡི་གེའི་ཚུལ་ལ་མཁས་པར་རྣམ་པར་འཕྲུལ་པ་དང་། ཆོས་ཐམས་ཅད་ཆོས་ཀྱི་སྒོ་གཅིག་དང་མི་འགལ་བ་ལ་འཇུག་པའི་ཚུལ་ཁོང་དུ་ཆུད་པར་སྟོན་པས་བསྐལ་པ་བརྗོད་དུ་མེད་ཅིང་མི་ཟད་པར་རྣམ་པར་འཕྲུལ་པ་དང་། ཆོས་ཐམས་ཅད་སངས་རྒྱས་ཀྱི་ཆོས་སུ་འཇུག་པ་ལ་སེམས་ཅན་མང་པོ་གཟུད་པའི་རྣམ་པར་འཕྲུལ་པ་དང་། ཆོས་ཐམས་ཅད་མཐའ་དང་དབུས་མེད་པར་ཡོངས་སུ་སྟོན་པའི་རྣམ་པར་འཕྲུལ་པ་དང་། ཆོས་ཐམས་ཅད་ལ་ཆགས་པ་མེད་པའི་མཐར་ཕྱིན་ཅིང་མཐའ་དང་དབུས་མེད་པའི་སྒྱུ་མའི་དྲ་བ་རྣམ་པ་ཐ་དད་པ་ལ་འཇུག་པས་བསྐལ་པ་མུ་མེད་པར་མི་ཟད་པར་སེམས་ཅན་ལ་སྟོན་པའི་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ལ་རྣམ་པར་འཕྲུལ་པ་སྟེ། བཅུ་
གང་ཞེ་ན། འདི་ལྟར་སེམས་ཅན་ཐམས་ཅད་ཀྱི་ལུས་རང་གི་ལུས་སུ་བྱིན་གྱིས་རློབ་ཅིང་། མོས་པར་བྱེད་པ་ལ་འཇུག་པའི་རྣམ་པར་འཕྲུལ་པ་དང་། རང་གི་ལུས་སེམས་ཅན་ཐམས་ཅད་ཀྱི་ལུས་ཀྱི་འདུ་ཤེས་སུ་བྱིན་གྱིས་རློབ་པའི་རྣམ་པར་འཕྲུལ་པ་དང་། སངས་རྒྱས་ཐམས་ཅད་ཀྱི་སྐུ་སངས་རྒྱས་གཅིག་གི་སྐུར་མོས་ཤིང་འཇུག་པའི་རྣམ་པར་འཕྲུལ་པ་དང་། སངས་རྒྱས་གཅིག་གི་སྐུ་སངས་རྒྱས་མ་ལུས་པ་ཐམས་ཅད་ཀྱི་སྐུར་འཇུག་ཅིང་གཞན་ལ་ཡོངས་སུ་སྟོན་པའི་རྣམ་པར་འཕྲུལ་པ་དང་། ཞིང་ཐམས་ཅད་དུ་ནམ་མཁའ་བྱིན་གྱིས་རློབ་པའི་རྣམ་པར་འཕྲུལ་པ་དང་། དུས་གསུམ་ཐམས་ཅད་ཆོས་ཀྱི་སྐུ་གཅིག་གིས་ཡོངས་སུ་རྒྱས་པར་སེམས་ཅན་ལ་སྟོན་པའི་རྣམ་པར་འཕྲུལ་པ་དང་། ལུས་གཅིག་ཏུ་ཏིང་ངེ་འཛིན་ལ་མཉམ་པར་བཞག་ཅིང་ལུས་མཐའ་ཡས་པ་ལས་རྣམ་པར་ལྡང་བའི་རྣམ་པར་འཕྲུལ་པ་དང་། ལུས་གཅིག་གིས་མངོན་པར་སངས་རྒྱས་ཤིང་སེམས་ཅན་སྙེད་ཀྱི་ལུས་སུ་ཡོངས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་ཐམས་ཅད་ཀྱི་ལུས་སེམས་ཅན་གཅིག་གི་ལུས་སུ་སྟོན་པའི་རྣམ་པར་འཕྲུལ་པ་དང་། སེམས་ཅན་ཐམས་ཅད་ཀྱི་ལུས་ཆོས་ཀྱི་སྐུར་སྟོན་ཅིང་། ཆོས་ཀྱི་སྐུ་སེམས་ཅན་གྱི་ལུས་སུ་སྟོན་པའི་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྨོན་ལམ་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་རང་གི་སྨོན་ལམ་དུ་བྱིན་གྱིས་རློབ་པའི་རྣམ་པར་འཕྲུལ་པ་དང་། སངས་རྒྱས་ཐམས་ཅད་ཀྱི་རྫོགས་པའི་བྱང་ཆུབ་ཀྱི་སྨོན་ལམ་གྱི་སྟོབས་དང་། མཐུ་མངོན་པར་རྫོགས་པར་བྱང་ཆུབ་པར་ཡོངས་སུ་
སྟོན་པའི་རྣམ་པར་འཕྲུལ་པ་དང་སེམས་ཅན་ཇི་ལྟར་སྨིན་པ་རང་རང་གི་བསམ་པ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་བྱ་བའི་རྣམ་པར་འཕྲུལ་པ་དང་། བསྐལ་པ་འགྲངས་པ་མུ་མེད་པ་ཐམས་ཅད་དུ་སྨོན་ལམ་རྒྱུན་མི་གཅོད་པའི་རྣམ་པར་འཕྲུལ་པ་དང་། རྣམ་པར་ཤེས་པའི་ལུས་ལས་གྱེན་དུ་བསྐྱོད་དེ། ཡེ་ཤེས་ཀྱི་ལུས་ལ་ཡང་མི་གནས་པའི་སྨོན་ལམ་ལ་དབང་བསྒྱུར་བས་ལུས་ཐམས་ཅད་ཡོངས་སུ་སྟོན་པའི་རྣམ་པར་འཕྲུལ་པ་དང་། རང་གི་ལུས་ཚད་དུ་གྱུར་པས་ཕ་རོལ་གྱི་ཚོགས་ཀྱི་སྨོན་ལམ་ཐམས་ཅད་ཡོངས་སུ་རྫོགས་པར་བྱ་བའི་རྣམ་པར་འཕྲུལ་པ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་སྨོན་ལམ་ལས་ཕྱིར་མི་ལྡོག་པའི་རྣམ་པར་འཕྲུལ་པ་དང་། བསྐལ་པ་འགྲངས་པ་ཐམས་ཅད་བྱང་ཆུབ་ཀྱི་སྤྱོད་པས་རྒྱས་པར་དགང་བའི་སྨོན་ལམ་རྒྱུན་མི་འཆད་པའི་རྣམ་པར་འཕྲུལ་པ་དང་། སྐྲའི་སྦུབས་གཅིག་ཏུ་མངོན་པར་འཚང་རྒྱ་བའི་སྨོན་ལམ་གྱི་སྟོབས་ཀྱིས་སངས་རྒྱས་ཀྱི་ཞིང་ཐམས་ཅད་དུ་རྒྱས་པར་དགང་ཞིང་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་སེམས་ཅན་གཅིག་ཏུ་སྟོན་པའི་སྨོན་ལམ་ལ་རྣམ་པར་འཕྲུལ་པ་དང་། ཆོས་ཀྱི་ཚིག་གཅིག་བརྗོད་པས་ཆོས་ཀྱི་དབྱིངས་མ་ལུས་པ་ཐམས་ཅད་རྒྱས་པར་བཀང་སྟེ། ཆོས་ཀྱི་སྤྲིན་ཆེན་པོ་འབྱུང་བ་ལས། ཆོས་བདུད་རྩིའི་ཆར་རབ་ཏུ་འབབ་ཅིང་རིག་པ་དང་། རྣམ་པར་གྲོལ་བའི་གློག་སྣང་བ་དང་ཡང་དག་པ་དེ་ཁོ་ན་ཉིད་ཀྱི་ཆོས་ཀྱི་འབྲུག་སྒྲ་མངོན་པར་འབྱུང་བས་སེམས་ཅན་གྱི་ཁམས་ཐམས་ཅད་ཡོངས་སུ་ངོམས་པར་བྱ་བའི་སྨོན་ལམ་ཆེན་པོ་ཡོངས་སུ་རྫོགས་པར་བྱ་བས། རྣམ་པར་རྩེ་བའི་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྨོན་ལམ་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཆོས་ཀྱི་
དབྱིངས་ཀྱི་སྤྱོད་ཡུལ་དང་ཡང་ལྡན་ལ་སེམས་ཅན་གྱི་ཁམས་ཀྱི་སྤྱོད་ཡུལ་དུ་ཡང་སྣང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་སྤྱོད་ཡུལ་ལ་མངོན་པར་དགའ་བ་འང་ཡིན་ལ་བདུད་ཀྱི་སྤྱོད་ཡུལ་ལ་གནས་པར་ཡང་སྣང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་མྱ་ངན་ལས་འདས་པའི་སྤྱོད་ཡུལ་དང་ཡང་ལྡན་ལ་འཁོར་བའི་སྤྱོད་ཡུལ་ལས་ཀྱང་མི་གཡོའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཐམས་ཅད་མཁྱེན་པ་ཉིད་ཀྱི་སྤྱོད་ཡུལ་དང་ཡང་ལྡན་ལ་བྱང་ཆུབ་སེམས་དཔའི་སྤྱོད་ཡུལ་གྱི་རྒྱུད་ཀྱང་རྒྱུན་མི་གཅོད་དོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཞི་བ་དང་རབ་ཏུ་ཞི་བ་དང་ཉེ་བར་ཞི་བའི་སྤྱོད་ཡུལ་དང་ཡང་ལྡན་ལ་སེམས་ཅན་མ་ཞི་བ་རབ་ཏུ་མ་ཞི་བ་ཉེ་བར་མ་ཞི་བའི་སྤྱོད་ཡུལ་ཅན་རྣམས་ཀྱང་རྣམ་པར་མི་སྤོང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་བླང་བ་མེད་པ་དང་། དོར་བ་མེད་པ་དང་། སྤྲོས་པ་མེད་པ་དང་མི་འཕྲོ་བ་དང་། མཚན་མ་མེད་པ་དང་དངོས་པོ་མེད་པ་དང་རྣམ་པར་མི་དམིགས་པ་དང་བར་སྣང་དང་མཉམ་པའི་སྤྱོད་ཡུལ་དང་ཡང་ལྡན་ལ་སེམས་ཅན་སྤྲོས་པ་དང་། མཚན་མ་ཐམས་ཅད་དུ་དམིགས་པའི་སྤྱོད་ཡུལ་ཅན་རྣམས་ཀྱི་གནས་ནའང་སྣང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སྟོབས་དང་། རྣམ་པར་ཐར་པའི་སྤྱོད་ཡུལ་དང་ཡང་ལྡན་ལ་ཕྱོགས་གཅིག་པའི་སྤྱོད་ཡུལ་ཐམས་ཅད་དུའང་སྣང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སེམས་ཅན་མེད་པའི་མཐའི་སྤྱོད་ཡུལ་དང་ཡང་ལྡན་ལ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ཡང་རྣམ་པར་མི་སྤོང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་བསམ་གཏན་དང་། རྣམ་པར་ཐར་པ་དང་། རྟོགས་པ་དང་ཡེ་ཤེས་དབེན་པའི་སྤྱོད་ཡུལ་དང་ཡང་ལྡན་ལ། འཇིག་རྟེན་གྱི་ཁམས་ཐམས་ཅད་དུ་སྐྱེ་བར་ཡང་སྣང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་
དཔའ་རྣམས་ནི་དེ་བཞིན་གཤེགས་པའི་སྤྱོད་པ་དང་། མངོན་པར་འཚང་རྒྱ་བ་དང་སངས་རྒྱས་ཀྱི་རྒྱན་དང་སྤྱོད་ཡུལ་ཐམས་ཅད་ཀྱང་ཐོབ་ལ་ཉན་ཐོས་དང་རང་སངས་རྒྱས་ཐམས་ཅད་ཀྱི་སྤྱོད་ལམ་དང་ཆོ་ག་ཡང་ཡོངས་སུ་སྟོན་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ལ་རྣམ་པར་འཕྲུལ་པ་སྟེ། བཅུ་གང་ཞེ་ན་འདི་ལྟར་སོ་སོ་ཡང་དག་པར་རིག་པའི་ཡེ་ཤེས་མི་ཟད་པ་ལ་རྣམ་པར་འཕྲུལ་པ་དང་། རྨོངས་པ་མེད་པའི་གཟུངས་ཐམས་ཅད་ཐོབ་པའི་ཡེ་ཤེས་ལ་རྣམ་པར་འཕྲུལ་པ་དང་། སྨོན་ལམ་ཤིན་ཏུ་རྣམ་པར་གདོན་མི་ཟ་བ་བསྟན་པ་དང་། སེམས་ཅན་གྱི་ཁམས་ཐམས་ཅད་ཀྱི་དབང་པོ་ཡོངས་སུ་འཛིན་པ་དང་། ཁོང་དུ་ཆུད་པའི་ཡེ་ཤེས་ལ་རྣམ་པར་འཕྲུལ་པ་དང་། རང་གི་སེམས་ཀྱི་ཡེ་ཤེས་ཕ་རོལ་གྱི་སེམས་ཀྱི་ཡེ་ཤེས་དང་། སེམས་གཅིག་ལས་སེམས་ཅན་ཐམས་ཅད་ཀྱི་སྤྱོད་པ་དང་། རྣམ་པར་གཡོ་བར་བྱེད་པའི་ཡེ་ཤེས་ལ་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་ཀྱི་བསམ་པ་དང་། བག་ལ་ཉལ་བ་དང་བག་ཆགས་དང་ཉོན་མོངས་པའི་ནད་ལ་གང་དང་འབྱོར་བའི་སྨན་ཡང་དག་པར་གཏོང་བའི་ཡེ་ཤེས་ལ་རྣམ་པར་འཕྲུལ་པ་དང་། དེ་བཞིན་གཤེགས་པའི་སྟོབས་བཅུ་ལ་སྐད་ཅིག་གཅིག་གིས་འཇུག་པའི་ཡེ་ཤེས་ལ་རྣམ་པར་འཕྲུལ་པ་དང་། དུས་གསུམ་གྱི་བསྐལ་པའི་གྲངས་ཐམས་ཅད་ལ་ཆགས་པ་མེད་པའི་ཡེ་ཤེས་ཡངས་པ་སེམས་ཅན་གཞན་གྱིས་ཐོབ་པར་བྱེད་པའི་ཡེ་ཤེས་ལ་རྣམ་པར་འཕྲུལ་པ་དང་། ཐོགས་པ་མེད་པའི་སེམས་ཀྱི་སྐད་ཅིག་ཏུ། མངོན་པར་འཚང་རྒྱ་བར་འགྲོ་བ་ཐམས་ཅད་དུ་ཡོངས་སུ་སྟོན་པའི་ཡེ་ཤེས་ལ་རྣམ་པར་འཕྲུལ་པ་དང་། སེམས་ཅན་གཅིག་གི་འདུ་ཤེས་ཀྱིས་སེམས་ཅན་མ་ལུས་པ་ཐམས་ཅད་ཀྱི་ལས་དང་བྱ་བ་ལ་མངོན་སུམ་དུ་
འཇུག་པའི་ཡེ་ཤེས་ལ་རྣམ་པར་འཕྲུལ་པ་དང་། སེམས་ཅན་གཅིག་གི་སྒྲ་དབྱངས་ཀྱིས་སྒྲ་ཐམས་ཅད་ལ་འཇུག་པ་ཡོངས་སུ་སྟོན་པའི་ཡེ་ཤེས་ལ་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པ་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་དུ་ལུས་ཡོངས་སུ་སྟོན་ཀྱང་ལུས་གཅིག་ཏུ་དམིགས་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་དུ་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དང་། ཆོས་བསྟན་པ་དང་ཡོངས་སུ་འཛིན་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། སེམས་ཅན་གཅིག་གི་སེམས་ལ་དམིགས་པས་བྱང་ཆུབ་ཀྱི་རྒྱུད་བརྗོད་དུ་མེད་པ་རྣམ་པར་འཚང་རྒྱ་ཞིང་སེམས་ཅན་ཐམས་ཅད་ཀྱི་སེམས་ཀྱིས་གོ་བར་བྱེད་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། དབྱངས་གཅིག་གིས་འཇིག་རྟེན་གྱི་ཁམས་ཐམས་ཅད་དུ་གོ་བར་བྱེད་ཅིང་སྒྲ་རྣམ་པ་ཐ་དད་པ་ཐམས་ཅད་དུ་ཤེས་པར་བྱེད་པས། སེམས་ཅན་གཞན་གྱི་སེམས་ཀྱི་རྒྱུད་དུ་ཕྱིན་པར་བྱེད་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། འགྲོ་བ་ཐམས་ཅད་ཀྱི་སྔོན་གྱི་མཐའི་མུར་ཐུག་པའི་བསྐལ་པ་སེམས་ཀྱི་སྐད་ཅིག་གཅིག་གིས་རྗེས་སུ་དྲན་ཞིང་ཤེས་པས་ལས་ཀྱི་འབྲས་བུ་རྣམ་པར་སྨིན་པ་ཅི་ལྟ་བ་བཞིན་དུ་མངོན་སུམ་དུ་སྟོན་ཅིང་སེམས་ཅན་གྱིས་གོ་བར་བྱེད་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། འཇིག་རྟེན་གྱི་ཁམས་ཐམས་ཅད་བརྒྱན་པར་བྱ་བ་འདི་མངོན་པར་ཤེས་པ་ལ་རྣམ་པར་འཕྲུལ་པ་དང་། དུས་ཐམས་ཅད་མཉམ་པ་ཉིད་དུ་འཇུག་པའི་མངོན་པར་ཤེས་པ་ལ་
རྣམ་པར་འཕྲུལ་པ་དང་། སངས་རྒྱས་ཐམས་ཅད་ཀྱི་བྱང་ཆུབ་ཏུ་སྤྱོད་པའི་སྨོན་ལམ་ཡང་དག་པར་བསྐྱེད་པ་དང་། ཆོས་ཀྱི་སྣང་བ་རབ་ཏུ་དགྱེ་བའི་མངོན་པར་ཤེས་པ་ལ་རྣམ་པར་འཕྲུལ་པ་དང་། ལྷ་དང་ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱིས་མངོན་པར་ཤེས་པ་ལ་རྣམ་པར་འཕྲུལ་པ་དང་། ཉན་ཐོས་དང་། རང་སངས་རྒྱས་དང་བྱང་ཆུབ་སེམས་དཔའ་དང་། དེ་བཞིན་གཤེགས་པའི་སྟོབས་བཅུ་དང་། བྱང་ཆུབ་སེམས་དཔའི་དགེ་བའི་རྩ་བ་ཐམས་ཅད་ཀྱིས་ཡོངས་སུ་བསྲུངས་པའི་མངོན་པར་ཤེས་པ་ལ་རྣམ་པར་འཕྲུལ་པ་དང་། ཀྱེ་རྒྱལ་བའི་སྲས་མདོར་ན་བྱང་ཆུབ་སེམས་དཔའ་ནི་མངོན་པར་ཤེས་པས་ཆོས་ཐམས་ཅད་ལ་ཡང་དག་པར་གཞོལ་བ་ཡིན་ཏེ། བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མངོན་པར་ཤེས་པ་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་རྡུལ་ཤིན་ཏུ་ཕྲ་བ་གཅིག་ཏུ་འཛུད་པའི་རྫུ་འཕྲུལ་ལ་རྣམ་པར་འཕྲུལ་པ་དང་། རྡུལ་ཤིན་ཏུ་ཕྲ་བ་གཅིག་ལ་ཆོས་ཀྱི་དབྱིངས་ཐམས་ཅད་དང་མཉམ་པའི་སངས་རྒྱས་ཀྱི་ཞིང་གཅིག་ཡོངས་སུ་སྟོན་པའི་རྫུ་འཕྲུལ་ལ་རྣམ་པར་འཕྲུལ་པ་དང་། རྒྱ་མཚོ་ཐམས་ཅད་ཀྱི་ཆུའི་ཕུང་པོ་ཆེན་པོ་བ་སྤུའི་ཁུང་བུ་གཅིག་ཏུ་བླུགས་ཏེ། ཆོས་ཀྱི་དབྱིངས་དང་མཉམ་པའི་འཇིག་རྟེན་གྱི་ཁམས་སུ་འགྲོ་ཡང་སེམས་ཅན་ལ་གནོད་པར་མི་འགྱུར་བའི་རྫུ་འཕྲུལ་ལ་རྣམ་པར་འཕྲུལ་པ་དང་། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པ་རང་གི་ལུས་སུ་བཙུད་དེ། བྱ་བ་ཐམས་ཅད་ཡོངས་སུ་སྟོན་པ་ལ་མཁས་པའི་རྫུ་འཕྲུལ་ལ་རྣམ་པར་འཕྲུལ་པ་དང་། ཁོར་ཡུག་དང་རྡོ་རྗེའི་རི་
བསམ་གྱིས་མི་ཁྱབ་པ་ཐམས་ཅད་བ་སྤུའི་ཁུང་བུ་གཅིག་ཏུ་བྲེས་ཏེ། འཇིག་རྟེན་གྱི་ཁམས་ཐམས་ཅད་དུ་འགྲོ་ཡང་སེམས་ཅན་རྣམས་སྡང་བར་མི་འགྱུར་བའི་རྫུ་འཕྲུལ་ལ་རྣམ་པར་འཕྲུལ་པ་དང་། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པ་བསྐལ་པ་གཅིག་ཏུ་བྱིན་གྱིས་བརླབས་ཏེ། བསྐལ་པ་གཅིག་ལ་བརྗོད་དུ་མེད་པའི་ཡང་བརྗོད་དུ་མེད་པའི་བསྐལ་པ་འདུ་བ་དང་། འཇིག་པ་སྟོན་ཀྱང་སེམས་ཅན་ལ་གནོད་པར་མི་འགྱུར་བའི་རྫུ་འཕྲུལ་ལ་རྣམ་པར་འཕྲུལ་པ་དང་། འཇིག་རྟེན་གྱི་ཁམས་ཐམས་ཅད་དུ་ཆུས་འཇིག་པ་ཡོངས་སུ་བསྟན་པ་དང་། མེ་དང་རླུང་གིས་འཇིག་པ་ཡོངས་སུ་བསྟན་ཀྱང་སེམས་ཅན་ལ་གནོད་པར་མི་འགྱུར་བའི་རྫུ་འཕྲུལ་ལ་རྣམ་པར་འཕྲུལ་པ་དང་། འཇིག་རྟེན་གྱི་ཁམས་ཐམས་ཅད་འཚིག་ཅིང་ཆུ་དང་། མེ་དང་རླུང་གིས་འཇིག་ཀྱང་ལོངས་སྤྱོད་དང་། ཉེ་བར་སྤྱོད་པ་ཐམས་ཅད་ཀྱིས་ཡོངས་སུ་གང་བར་བྱས་ཤིང་སེམས་ཅན་ལ་ཀུན་ཏུ་སྟོན་པའི་རྫུ་འཕྲུལ་ལ་རྣམ་པར་འཕྲུལ་པ་དང་། འཇིག་རྟེན་གྱི་ཁམས་བསམ་གྱིས་མི་ཁྱབ་པ་ལག་པའི་མཐིལ་ཀྱིས་བླངས་ཏེ། འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པར་བཀོད་ཀྱང་སེམས་ཅན་ལ་གནོད་པར་མི་འགྱུར་བའི་རྫུ་འཕྲུལ་ལ་རྣམ་པར་འཕྲུལ་པ་དང་། ཞིང་ཐམས་ཅད་ནམ་མཁའི་རང་བཞིན་དུ་ཡོངས་སུ་བསྟན་པས་སེམས་ཅན་གྱིས་གོ་བར་བྱེད་པའི་རྫུ་འཕྲུལ་ལ་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ལ་རྣམ་པར་འཕྲུལ་པ་སྟེ། བཅུ་གང་ཞེ་ན། འདི་ལྟར་ཡོངས་སུ་སྨྱིན་པར་བྱ་བ་དང་། འདུལ་བ་མྱི་གཏོང་བས་སེམས་ཅན་གྱི་སྟོབས་ལ་རྣམ་པར་འཕྲུལ་པ་དང་། ནམ་མཁའ་བརྗོད་དུ་མེད་པའི་
ཡང་བརྗོད་དུ་མེད་པ་ཐམས་ཅད་རྒྱན་རྣམ་པར་ཕྱེ་བས་བརྒྱན་པར་ཡོངས་སུ་སྟོན་པས་ཞིང་གི་སྟོབས་ལ་རྣམ་པར་འཕྲུལ་པ་དང་། ལུས་ཐམས་ཅད་ལུས་མེད་པར་འཇུག་པས་ཆོས་ཀྱི་སྟོབས་ལ་རྣམ་པར་འཕྲུལ་པ་དང་། སྤྱོད་པ་རྒྱུན་མི་གཅོད་པས། བསྐལ་པའི་སྟོབས་ལ་རྣམ་པར་འཕྲུལ་པ་དང་། གཉིད་ཀྱིས་ལོགས་པ་སངས་པར་བྱེད་པས། སངས་རྒྱས་ཀྱི་སྟོབས་ལ་རྣམ་པར་འཕྲུལ་པ་དང་། བྱང་ཆུབ་སེམས་དཔའི་སྤྱོད་པ་ཐམས་ཅད་སྐྱེད་ཅིང་རབ་ཏུ་འཛིན་པའི་ཕྱིར་སྤྱོད་པའི་སྟོབས་ལ་རྣམ་པར་འཕྲུལ་པ་དང་། སེམས་ཅན་གྱི་ཁམས་ཐམས་ཅད་ཡང་དག་པར་སྒྲོལ་བས། སངས་རྒྱས་ཀྱི་སྟོབས་ལ་རྣམ་པར་འཕྲུལ་པ་དང་། ཆོས་ཐམས་ཅད་བདག་པོ་མེད་པར་མངོན་པར་འཚང་རྒྱ་བའི་ཕྱིར་རང་བྱུང་གི་སྟོབས་ལ་རྣམ་པར་འཕྲུལ་པ་དང་། ཐམས་ཅད་མཁྱེན་པའི་ཡེ་ཤེས་མ་ལུས་པར་མངོན་པར་འཚང་རྒྱ་བའི་ཕྱིར་ཐམས་ཅད་མཁྱེན་པའི་སྟོབས་ལ་རྣམ་པར་འཕྲུལ་པ་དང་། སེམས་ཅན་ཐམས་ཅད་ཡོངས་སུ་མི་གཏོང་བས་སྙིང་རྗེ་ཆེན་པོའི་སྟོབས་ལ་རྣམ་པར་འཕྲུལ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ལ་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་སེམས་ཅན་ལ་རྣམ་པར་འཕྲུལ་པ་བཟུང་བ་མན་ཅད་སྟོབས་ལ་རྣམ་པར་འཕྲུལ་པ་ཡན་ཅད་ཀྱི་བར་ཏུ་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་འཕྲུལ་པ་སྟེ། ཀྱེ་རྒྱལ་བའི་སྲས་བྱང་ཆུབ་སེམས་དཔའ་གང་གིས་རྣམ་པར་འཕྲུལ་པ་བཅུ་པོ་དེ་དག་འཐོབ་པར་འགྱུར་བ་དེ་ནི་འདོད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །འདོད་ན་མངོན་པར་འཚང་མི་རྒྱའོ། །འདོད་ན་མངོན་པར་ཡང་འཚང་རྒྱ་ལ་སྤྱོད་པ་ཡང་རྒྱུན་མི་གཅོད་དོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན།
བྱང་ཆུབ་སེམས་དཔའ་རྣམས་ནི་སྨོན་ལམ་ཆེན་པོས་བྱུང་བ་སྟེ། སྒོ་མཐའ་ཡས་པའི་རྣམ་པར་འཕྲུལ་པ་ཡོངས་སུ་བསྟན་པ་ལ་མཁས་པའི་ཕྱིར་རོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་རྩེ་བ་སྟེ། བཅུ་གང་ཞེ་ན། འདི་ལྟར་བྱང་ཆུབ་སེམས་དཔའ་སེམས་ཅན་གྱི་ལུས་ལ། ཞིང་གི་ལུས་བྱིན་ཀྱིས་རློབ་པ་བྱེད་ཀྱང་། སེམས་ཅན་གྱི་ལུས་འབྱེད་པར་མི་བྱེད་པ་དེ་ནི་རྣམ་པར་རྩེ་བ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཞིང་གི་ལུས་ལ་སེམས་ཅན་གྱི་ལུས་བྱིན་གྱིས་རློབ་ཀྱང་། ཞིང་གི་ལུས་འདྲེས་པར་ཡང་མི་བྱེད་པ་དེ་ནི་རྣམ་པར་རྩེ་བ་གཉིས་པའོ། །ཀྱེ་རྒྱལ་བའི་སྲས་གཞན་ཡང་། བྱང་ཆུབ་སེམས་དཔའ་སངས་རྒྱས་ཀྱི་སྐུ་ལ་སེམས་ཅན་གྱི་ལུས་བྱིན་གྱིས་རློབ་ཀྱང་། སངས་རྒྱས་ཀྱི་སྐུ་དམའ་བར་མི་བྱེད་པ་དེ་ནི་རྣམ་པར་རྩེ་བ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཉན་ཐོས་དང་། རང་སངས་རྒྱས་ཀྱི་ལུས་ལ་དེ་བཞིན་གཤེགས་པའི་སྐུ་ཡོངས་སུ་སྟོན་ཀྱང་ཉན་ཐོས་དང་། རང་སངས་རྒྱས་ཀྱི་ལུས་རྒྱ་ཆེན་པོར་ཡང་མྱི་བྱེད་པ་འདི་ནི་རྣམ་པར་རྩེ་བ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སྤྱོད་པའི་ལུས་ལ་མངོན་པར་འཚང་རྒྱ་བའི་ལུས་ཡོངས་སུ་སྟོན་ཀྱང་སྤྱོད་པའི་རྒྱུན་མི་གཅོད་པ་དེ་ནི་རྣམ་པར་རྩེ་བ་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་མངོན་པར་རྫོགས་པར་བྱང་ཆུབ་པའི་ལུས་ལ་སྤྱོད་པ་ཡོངས་སུ་སྟོན་ཀྱང་མངོན་པར་རྫོགས་པར་བྱང་ཆུབ་པ་ཉེ་བར་ལེན་པ་ཡང་མི་བྱེད་པ་དེ་ནི་རྣམ་པར་རྩེ་བ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་མྱ་ངན་ལས་འདས་པའི་དབྱིངས་སུ་འཁོར་བའི་རྒྱུན་ཡོངས་སུ་སྟོན་ཀྱང་མྱ་ངན་ལས་འདས་པ་ལ་མངོན་པར་ཆགས་པ་མི་སྐྱེད་པ་དེ་ནི་རྣམ་པར་རྩེ་བ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འཁོར་བ་མྱ་ངན་ལས་འདས་པ་ལ་ཡོངས་སུ་སྟོན་ཀྱང་ཡོངས་སུ་མྱ་ངན་ལས་འདའ་བས་ཤིན་ཏུ་མྱ་ངན་ལས་འདའ་བར་མི་བྱེད་པ་འདི་ནི་རྣམ་པར་རྩེ་བ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་
སེམས་དཔའ་མཉམ་པར་བཞག་བཞིན་དུ་འདི་ལྟ་སྟེ། འོང་བ་དང་འགྲོ་བ་དང་། འགྲེང་བ་དང་འདུག་པའི་བྱ་བ་ཐམས་ཅད་ཡོངས་སུ་སྟོན་ཀྱང་། ཏིང་ངེ་འཛིན་ཀྱི་མཉམ་པ་ཉིད་འཁྲུག་པར་མི་བྱེད་པ་དེ་ནི་རྣམ་པར་རྩེ་བ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེ་བཞིན་གཤེགས་པ་གཅིག་གི་ཞབས་ཀྱི་དྲུང་ནས་ཆོས་ཐོས་ནས་ལུས་ཀྱང་མི་སྣང་བར་མི་བྱེད་ལ། ཏིང་ངེ་འཛིན་ཀྱི་སྟོབས་ཀྱིས་དེ་བཞིན་གཤེགས་པའི་འཁོར་ཀྱི་དཀྱིལ་འཁོར་བརྗོད་དུ་མེད་པའི་ཡང་བརྗོད་དུ་མེད་པ་གཞན་དང་གཞན་དུ་ལུས་རྣམ་པར་དགོད་པས། ལྡང་ཡང་ལུས་ཐ་དད་པར་ཡང་མི་བྱེད། ཏིང་ངེ་འཛིན་ཐ་དད་པར་ཡང་མི་བྱེད་ལ་དེ་བཞིན་གཤེགས་པ་དེ་དག་ལས་ཀྱང་ཆོས་ཉན་ཅིང་ཐོས་ནས་ཀྱང་འཛིན་ཅིང་ཀུན་ཆུབ་པར་བྱེད་ལ་ཏིང་ངེ་འཛིན་ལའང་སྙོམས་པར་འཇུག་ཅིང་ཆོས་དྲི་བ་གཟུང་བའི་རྒྱུན་ཀྱང་མི་གཅོད་དེ། དེ་དེ་ལྟར་མཉམ་པར་བཞག་བཞིན་དུ་ལུས་མི་སྣང་བར་ཡང་མི་བྱེད་ལ་ཏིང་ངེ་འཛིན་གྱི་ལུས་དང་། སྒོ་མངོན་པར་བསྒྲུབ་པ་རེ་རེས་ལས་ཀྱང་བརྗོད་དུ་མེད་པའི་ཡང་བརྗོད་དུ་མེད་པའི་ཏིང་ངེ་འཛིན་གྱི་ལུས་དང་། སྒོ་མངོན་པར་བསྒྲུབ་ཅིང་དེ་ལྟ་བུའི་ཚུལ་གྱིས་བསྐལ་པ་ཐམས་ཅད་ཟད་པར་གྱུར་ཀྱང་། བྱང་ཆུབ་སེམས་དཔའི་ཏིང་ངེ་འཛིན་ཀྱི་སྒོ་མངོན་པར་བསྒྲུབ་པའི་མཐའ་གང་ཡང་མེད་པ་དེ་ནི་རྣམ་པར་རྩེ་བ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་རྩེ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོས་རྣམ་པར་རོལ་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡུལ་ཏེ། བཅུ་གང་ཞེ་ན་འདི་ལྟར་ཆོས་ཀྱི་དབྱིངས་མཐའ་ཡས་པའི་སྒོ་ལ་འཇུག་པར་སེམས་ཅན་ལ་ཡོངས་སུ་སྟོན་པའི་ཡུལ་དང་། འཇིག་རྟེན་གྱི་ཁམས་ཐམས་
ཅད་དུ་རྒྱན་རྣམ་པ་སྣ་ཚོགས་དུ་མ་མངོན་པར་བསྒྲུབ་པ་འགྲོ་བ་ཐམས་ཅད་ཀྱིས་རྣམ་པར་དམིགས་པར་བྱ་བའི་ཡུལ་དང་། སེམས་ཅན་གྱི་ཁམས་ཐམས་ཅད་དུ་སྤྲུལ་པ་མངོན་པར་བསྒྲུབ་པ་རྣམ་པར་དམིགས་པར་བྱ་བའི་ཡུལ་དང་། དེ་བཞིན་གཤེགས་པའི་སྐུ་བྱང་ཆུབ་སེམས་དཔའི་ལུས་སུ་མངོན་པར་བསྒྲུབ་པ་དང་། བྱང་ཆུབ་སེམས་དཔའི་ལུས་དེ་བཞིན་གཤེགས་པའི་སྐུར་མངོན་པར་བསྒྲུབ་པའི་ཡུལ་དང་། ནམ་མཁའི་ཁམས་འཇིག་རྟེན་གྱི་ཁམས་སུ་མངོན་པར་བསྒྲུབ་པ་དང་། འཇིག་རྟེན་གྱི་ཁམས་ནམ་མཁའི་ཁམས་སུ་མངོན་པར་བསྒྲུབ་པའི་ཡུལ་དང་། མྱ་ངན་ལས་འདས་པ་འཁོར་བར་མངོན་པར་བསྒྲུབ་པ་དང་། འཁོར་བ་མྱ་ངན་ལས་འདས་པར་མངོན་པར་བསྒྲུབ་པའི་ཡུལ་དང་། སེམས་ཅན་གཅིག་གི་སྐད་དུ་བརྗོད་པས་སངས་རྒྱས་ཀྱི་ཆོས་ཐམས་ཅད་བསྟན་པར་མངོན་པར་བསྒྲུབ་པའི་ཡུལ་དང་། མཐའ་ཡས་པའི་སྒོ་ནས་ལུས་ཀུན་ཏུ་སྟོན་ཅིང་ལུས་གཅིག་ཏུ་བྱིན་གྱིས་བརླབ་པ་དང་། ལུས་རྣམ་པ་ཐ་དད་པ་ཐམས་ཅད་མངོན་པར་བསྒྲུབ་པའི་ཡུལ་དང་། ལུས་གཅིག་གིས་ཆོས་ཀྱི་དབྱིངས་ཐམས་ཅད་དུ་རྒྱས་པར་དགང་བའི་ཡུལ་དང་། སེམས་ཅན་ཐམས་ཅད་ཀྱི་སེམས་བསྐྱེད་པའི་སྐད་ཅིག་རེ་རེ་ལ་མཐའ་ཡས་པའི་སྒོ་མངོན་པར་བསྒྲུབ་ཅིང་རྣམ་པར་འཚང་རྒྱ་བའི་ཡུལ་ལོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡུལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་ཡུལ་བླ་ན་མེད་པ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅྭ་བརྒྱད་པ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ཏེ། བཅུ་གང་ཞེ་ན་འདི་ལྟར་འཇིག་རྟེན་ཐམས་ཅད་དང་འདུ་འཛི་མེད་པའི་ཕྱིར་བསམ་པའི་སྟོབས་དང་། སངས་རྒྱས་ཀྱི་ཆོས་ཐམས་ཅད་ལ་སྒྱིད་ལུག་པ་མེད་པར་བྱ་བའི་ཕྱིར་ལྷག་པའི་བསམ་པའི་སྟོབས་དང་། བྱང་ཆུབ་སེམས་དཔའི་བརྩམས་པ་ཐམས་ཅད་མཐར་ཕྱིན་པར་བྱ་བ་ཡོངས་སུ་བསྟན་པའི་ཕྱིར་སྦྱོར་བའི་སྟོབས་དང་། འགྲོ་བ་ཐམས་ཅད་ཀྱི་
སེམས་དང་། སྤྱོད་པ་རབ་ཏུ་ཤེས་པར་བྱ་བའི་ཕྱིར་ཡེ་ཤེས་ཀྱི་སྟོབས་དང་། བསམ་པ་ཐམས་ཅད་ཡོངས་སུ་རྫོགས་པར་བྱ་བའི་སྨོན་ལམ་གྱི་སྟོབས་དང་། ཕྱི་མའི་མཐའི་མུར་ཐུག་པར་རྒྱུན་ཆད་པ་མེད་པར་བྱ་བའི་ཕྱིར་སྤྱོད་པའི་སྟོབས་དང་། ཐེག་པ་ཐམས་ཅད་ཀྱིས་འབྱུང་བར་ཀུན་ཏུ་བསྟན་པ་དང་། ཐེག་པ་ཆེན་པོ་ལས་ཕྱིར་མི་ལྡོག་པར་བྱ་བའི་ཕྱིར་ཐེག་པའི་སྟོབས་དང་། སྐྲའི་སྦུབས་གཅིག་ཏུ་སངས་རྒྱས་འབྱུང་བ་ཐམས་ཅད་དང་། འཇིག་རྟེན་གྱི་ཁམས་ཡོངས་སུ་དག་པ་ཐམས་ཅད་ཀུན་ཏུ་བསྟན་པའི་ཕྱིར་རྣམ་པར་འཕྲུལ་པའི་སྟོབས་དང་། སེམས་བསྐྱེད་པ་ཐམས་ཅད་ལ་བྱང་ཆུབ་ཏུ་རྣམ་པར་འཚང་རྒྱ་བ་དང་། མི་འབྲལ་བའི་ཕྱིར་བྱང་ཆུབ་ཀྱི་སྟོབས་དང་། ཆོས་ཀྱི་ཚིག་གཅིག་བརྗོད་པས་སེམས་ཅན་ཐམས་ཅད་ཀྱི་བསམ་པ་དང་། དབང་པོ་མ་ལུས་པ་ལྷག་མ་མེད་པ་མཐའ་དག་རྟོགས་པར་བྱ་བའི་ཕྱིར་ཆོས་ཀྱི་འཁོར་ལོ་བསྐོར་བའི་སྟོབས་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྟོབས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་དང་། སྟོབས་བཅུ་དང་ལྡན་པའི་མཆོག་ཏུ་འགྱུར་བ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མི་འཇིགས་པ་སྟེ། བཅུ་གང་ཞེ་ན། འདི་ལྟར་ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སྒྲ་ཐམས་ཅད་འཛིན་པའི་གཟུངས་རབ་ཏུ་ཐོབ་པ་ཡིན་ཏེ། དེ་འདི་སྙམ་དུ་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་ནས་སྟོན་པ་ལ་ལ་ཞིག་བདག་གི་གན་དུ་བྱོན་ཏེ། འགྲོ་བ་ཆེན་པོ་བརྒྱ་སྟོང་རབ་ཏུ་བཤད་པར་གྱུར་ན། བདག་གིས་དེ་གཟུང་བར་མི་ནུས་སྙམ་དུ་མི་སེམས་ཏེ། བྱང་ཆུབ་སེམས་དཔས་རྒྱུ་འདི་རྗེས་སུ་མི་མཐོང་ངོ་། །རྒྱུའང་རྗེས་སུ་མི་མཐོང་བས་མི་འཇིགས་པ་ཆེན་པོའི་དམ་པ་ཐོབ་ཅིང་བརྟན་ལ་ཞུམ་པ་མེད་པའི་ཡིད་ཀྱིས་འགྲོ་བ་ཐམས་ཅད་ལ་ཅི་འདོད་པ་དེ་དྲིས་ཤིག་ཅེས་སྐབས་འབྱེད་པ་འདི་ནི་མི་འཇིགས་པ་དང་པོའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཡི་གེ་དང་།
དོན་བརྗོད་པ་དང་། སྒྲ་དང་སྐད་ཐམས་ཅད་ཀྱི་མཚམས་སྦྱར་བ་རབ་ཏུ་རྟོགས་པར་བྱ་བ་དང་། དེ་བཞིན་གཤེགས་པས་དབང་བསྐུར་བའི་སྤོབས་པ་ཐོགས་པ་མེད་པ་དམ་པའི་ཕ་རོལ་དུ་ཕྱིན་པ་ཐོབ་པ་ཡིན་ཏེ། དེ་དག་འདི་སྙམ་དུ་ཤར་ཕྱོགས་དང་། ལྷོ་ཕྱོགས་དང་ནུབ་ཕྱོགས་དང་བྱང་ཕྱོགས་ནས་ལ་ལ་ཞིག་འོངས་ཏེ། བདག་ལ་ཆོས་ཀྱི་ཐེ་ཙོམ་ཆེན་པོ་ཞིག་དྲིས་པར་གྱུར་ན། བདག་གིས་ལན་མི་ལོན་སྙམ་དུ་མི་སེམས་ཏེ། བྱང་ཆུབ་སེམས་དཔས་རྒྱུ་ཡང་རྗེས་སུ་མི་མཐོང་ངོ་། །རྒྱུ་འདི་རྗེས་སུ་མི་མཐོང་བས་མི་འཇིགས་པ་ཆེན་པོའི་དམ་པ་ཐོབ་ཅིང་འགྲོ་བ་ཐམས་ཅད་ཀྱི་དྲི་བ་ཡོངས་སུ་དྲི་བ་ཅི་ཡོད་པ་བརྟན་པ་དང་། འཇིགས་ཤིང་སྤུ་ལྡང་བ་མེད་པར་བྱོས་ལ། གང་འདོད་པ་དེ་དག་དྲིས་ཤིག་ཅེས་སྐབས་འབྱེད་པ་འདི་ནི་མི་འཇིགས་པ་གཉིས་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སྟོང་པའི་ཆོས་ཁོང་དུ་ཆུད་པར་རྟོགས་པ་ཡིན་ཏེ། བདག་དང་བདག་གི་དང་། བྱེད་པ་པོ་དང་བྱེད་དུ་འཇུག་པ་དང་། ཚོར་བ་པོ་དང་སྲོག་དང་གསོ་བ་དང་། གང་ཟག་དང་ཕུང་པོ་དང་ཁམས་དང་། སྐྱེ་མཆེད་དུ་ལྟ་བ་དང་བྲལ་ཏེ། སེམས་ནམ་མཁའ་དང་མཚུངས་པའི་རྗེས་སུ་སོང་བ། དེ་དག་འདི་སྙམ་དུ་བདག་ལ་ལ་ཞིག་གིས་ལུས་དང་། ངག་དང་ཡིད་ཀྱིས་གནོད་པར་བྱ་བའམ། གཅིག་ཏུ་མི་འགྱུར་རམ་སྙམ་དུ་སེམས་པ་མེད་དེ། བྱང་ཆུབ་སེམས་དཔས་མཚན་མའང་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་ནི་བདག་ཏུ་འཛིན་པ་དང་། བདག་གིར་འཛིན་པ་དང་། བྲལ་བའི་ཕྱིར་ཏེ། མཚན་མའང་རྗེས་སུ་མི་མཐོང་བས། མི་འཇིགས་པ་ཆེན་པོའི་དམ་པ་ཐོབ་ཅིང་། བྱང་ཆུབ་སེམས་དཔའ་ཐམས་ཅད་ཀྱི་སྔོན་དུ་འདོར་བ་ལ་རབ་ཏུ་བརྟན་པ་འདི་ནི་མི་འཇིགས་པ་གསུམ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱི་བྱིན་གྱི་རླབས་ཀྱིས་བྱིན་དུ་བརླབས་ཏེ། སངས་རྒྱས་ཀྱི་སྣང་བས་ཉེ་བར་བརྟན་ཅིང་དེ་བཞིན་གཤེགས་པའི་སྤྱོད་ལམ་དང་། སྤྱོད་པ་དང་ཚུལ་ལ་རབ་ཏུ་གནས་ལ་སྤྱོད་ལམ་རྣམ་པར་མི་བརྟགས་ཤིང་ཅི་ལྟ་བ་བཞིན་དུ་གནས་པས་དེ་དག་འདི་
སྙམ་དུ་བདག་གི་སྤྱོད་ལམ་ལ་ལ་ལ་ཞིག་གིས་བརྒལ་བར་མི་འགྱུར་རམ་སྙམ་དུ་མི་སེམས་ཏེ། བྱང་ཆུབ་སེམས་དཔས་མཚན་མའང་རྗེས་སུ་མི་མཐོང་ངོ་། །མཚན་མའང་རྗེས་སུ་མི་མཐོང་བས་མི་འཇིགས་པ་ཆེན་པོའི་དམ་པ་ཐོབ་ཅིང་འཁོར་ཀྱི་ནང་དུ་ཕྱིན་ནས། ཆོས་སྟོན་པ་འདི་ནི་མི་འཇིགས་པ་བཞི་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ལུས་དང་ངག་དང་། ཡིད་ཤིན་ཏུ་དག་ཅིང་ཡོངས་སུ་དག་པ་དང་། གཙང་བ་དང་གཙང་སྦྲ་དང་། དེས་པ་དང་ལྡན་ཞིང་ངན་པར་སྤྱོད་པ་དང་ངན་ཏུ་བྱེད་པ་དང་། ངན་དུ་སྨྲ་བ་དང་བྲལ་བ་ཡིན་ཏེ། དེ་དག་ནི་འདི་སྙམ་དུ་བདག་གི་ལུས་དང་། ངག་དང་ཡིད་ཀྱི་ལས་ལ་ལ་ལ་ཞིག་གིས་བརྒལ་བར་མི་འགྱུར་རམ་སྙམ་དུ་མི་སེམས་ཏེ། བྱང་ཆུབ་སེམས་དཔས་མཚན་མའང་རྗེས་སུ་མི་མཐོང་ངོ་། །མཚན་མའང་རྗེས་སུ་མི་མཐོང་བས་འཇིགས་པ་དང་བྲལ་ཞིང་མི་འཇིགས་པ་ཆེན་པོའི་དམ་པ་ཐོབ་པས་སེམས་ཅན་གཞན་ཆོས་ལ་སྦྱོར་བ་བྱེད་པ་འདི་ནི་མི་འཇིགས་པ་ལྔ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ལག་ན་རྡོ་རྗེ་རྟག་ཏུ་ཕྱི་བཞིན་འབྲང་བས། ཡོངས་སུ་བསྲུང་བ་ཆེན་པོ་ཐོབ་ཅིང་། ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་གྱིས་རྟག་ཏུ་རིམ་གྲོར་བྱ་བ་ཡིན། བརྒྱ་བྱིན་དང་ཚངས་པ་དང་འཇིག་རྟེན་གྱི་མགོན་པོ་རྣམས་ཀྱིས་རྟག་ཏུ་ཕྱག་བྱ་བ་ཡིན། དེ་བཞིན་གཤེགས་པ་ཐམས་ཅད་ཀྱིས་རྟག་ཏུ་དགོངས་པ་ཡིན་ཏེ། དེ་དག་འདི་སྙམ་དུ་བདག་ཅག་ལ་བདུད་དམ་བདུད་ཀྱི་རིས་སུ་གཏོགས་པའི་ལྷའམ་མུ་སྟེགས་ཅན་དང་། མུ་སྟེགས་སྤྱོད་པ་པ་དང་། ཀུན་ཏུ་རྒྱུ་བ་དག་གམ། སེམས་ཅན་དམིགས་པ་ལ་མངོན་པར་ཞེན་པ་ལ་ལ་ཞིག་འོངས་ཤིང་བར་ཆད་བྱེད་པར་མི་འགྱུར་རམ་ཞེས་བྱ་བར་སེམས་པ་མེད་དེ། བྱང་ཆུབ་སེམས་དཔས་མཚན་མའང་རྗེས་སུ་མི་མཐོང་ངོ་། ། མཚན་མ་རྗེས་སུ་མི་མཐོང་བས་འཇིགས་པ་དང་བྲལ་ཞིང་མི་འཇིགས་པའི་དམ་པ་ཆེན་པོ་ཐོབ་པས་དགའ་ཞིང་ཡིད་བདེ་བ་དང་ལྡན་པར་བྱང་ཆུབ་སེམས་དཔའི་ལས་ཐམས་ཅད་ལ་ནན་ཏན་དུ་བྱེད་པ་འདི་ནི་མི་འཇིགས་པ་དྲུག་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སངས་རྒྱས་ཀྱིས་བསྔགས་པའི་དྲན་པ་རབ་ཏུ་ཐོབ་ཅིང་དྲན་པའི་དབང་པོ་
མཆོག་དང་ལྡན་པས་ཡོངས་སུ་རྨོངས་པ་མེད་པ་ཡིན་ཏེ། དེ་དག་འདི་སྙམ་དུ་བདག་ཅག་གིས་ཆོས་ཀྱི་ཚིག་དང་ཡི་གེ་བྱང་ཆུབ་སེམས་དཔའི་ལམ་དང་ལྡན་པ། དེ་བཞིན་གཤེགས་པའི་ཞལ་ནས་བྱུང་བ་ལ་ལ་ཞིག་ཡོངས་སུ་མ་ཟིན་པའམ། ཆུད་ཟ་བར་འགྱུར་ཞིང་ནུབ་པར་འགྱུར་བ་མེད་དམ་ཞེས་བྱ་བར་སེམས་པ་མེད་དེ། བྱང་ཆུབ་སེམས་དཔས་མཚན་མའང་རྗེས་སུ་མི་མཐོང་ངོ་། །མཚན་མའང་རྗེས་སུ་མི་མཐོང་བས་འཇིགས་པ་དང་བྲལ་ཞིང་འཇིགས་པ་མེད་པ་ཆེན་པོའི་དམ་པ་ཐོབ་པས། དེ་བཞིན་གཤེགས་པ་ཐམས་ཅད་ཀྱི་བསྟན་པ་ཡང་དག་པར་གཟུང་བའི་ཕྱིར་ནན་ཏན་དུ་བྱེད་པ་འདི་ནི་མི་འཇིགས་པ་བདུན་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཐབས་དང་ཤེས་རབ་དང་། ཡེ་ཤེས་ཁོང་དུ་ཆུད་པར་རྟོགས་ཤིང་བྱང་ཆུབ་སེམས་དཔའི་སྟོབས་ཀྱི་ཕ་རོལ་ཏུ་ཕྱིན་པའི་མཆོག་ཐོབ་པས། རྒྱུན་མི་ཆད་པར་སེམས་ཅན་གྱི་ཁམས་ཡོངས་སུ་སྨིན་པར་བྱེད་ཅིང་དེ་དག་སངས་རྒྱས་ཀྱི་བྱང་ཆུབ་ཏུ་སྨོན་ལམ་དང་བསམ་པ་ཆེན་པོ་རབ་ཏུ་བཏང་སྟེ། སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་ནས་ཆེད་དུ་བསམས་ཏེ། འཇིག་རྟེན་གྱི་གནས་འདོད་པ་དང་འཁྲུག་པ་དང་། ཉོན་མོངས་པའི་རྙོག་པ་ཅན་དུ་སྐྱེ་བ་བཟུང་ཞིང་འདོད་པའི་དགའ་བ་ལ་རྩེ་བ་དང་། འཁོར་གྱི་ལོངས་སྤྱོད་ཆེན་པོ་སེམས་ཅན་ཡོངས་སུ་སྨིན་པར་བྱ་བའི་དོན་དུ་བདག་གིས་ཡོངས་སུ་གཟུང་བ་བྱེད་ཀྱང་། དེ་དག་འདི་སྙམ་དུ་བདག་ཅག་སེམས་ཅན་གྱི་འདུ་འཛིས་གོས་པས་ཡོངས་སུ་གོས་པར་གྱུར་ཏེ། བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། གཟུངས་ཀྱི་སྒོ་དང་། སྤོབས་པའི་བར་ཆད་དམ་གཅིག་ཏུ་མི་འགྱུར་རམ་ཞེས་སེམས་པ་མེད་དེ། བྱང་ཆུབ་སེམས་དཔའ་དེ་དག་གིས་རྒྱུ་ཡང་རྗེས་སུ་མི་མཐོང་ངོ་། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་བྱང་ཆུབ་སེམས་དཔའི་ལམ་ལ་རྒྱུན་མི་འཆད་པར་སྤྱོད་པའི་ཕྱིར། ཆོས་ཐམས་ཅད་ལ་དབང་གི་ཕ་རོལ་ཏུ་ཕྱིན་པ་དམ་པ་ཐོབ་པ་དག་སྟེ། དེ་དག་གི་འཇིག་རྟེན་གྱི་རྣམ་པར་
འཁྲུག་པ་ཐམས་ཅད་ཀྱིས་བྱང་ཆུབ་སེམས་དཔའི་ལམ་ལ་རྣམ་པར་འཁྲུག་པར་འགྱུར་བ་རྗེས་སུ་མི་མཐོང་ངོ་། །རྗེས་སུ་མི་མཐོང་བས་འཇིགས་པ་དང་བྲལ་ཞིང་མི་འཇིགས་པ་ཆེན་པོའི་ཕ་རོལ་ཏུ་ཕྱིན་པ་དམ་པ་ཐོབ་པས་འཇིག་རྟེན་གྱི་ཁམས་ཀྱི་གནས་ཐམས་ཅད་ཀྱི་སྐྱེ་བའི་སྐྱེ་མཆེད་ཐམས་ཅད་དུ་སྐྱེ་བ་གཟུང་བར་སྨོན་ལམ་རབ་ཏུ་འདེབས་ཏེ། འདི་ནི་མི་འཇིགས་པ་བརྒྱད་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཐམས་ཅད་མཁྱེན་པའི་སེམས་མ་ཉམས་ཤིང་བྱང་ཆུབ་སེམས་དཔའི་ལམ་ལ་གནས་པས་ཐེག་པ་ཆེན་པོ་ལ་ཡང་དག་པར་གནས་པ་སྟེ། དེ་དག་ནི་ཐམས་ཅད་མཁྱེན་པ་ཉིད་ཀྱི་སེམས་ཀྱི་སྟོབས་དང་ཤུགས་ལ་གནས་ཤིང་། ཉན་ཐོས་དང་རང་སངས་རྒྱས་ཐམས་ཅད་ཀྱི་ཆོ་ག་དང་སྤྱོད་ལམ་ཡོངས་སུ་སྟོན་ཀྱང་། དེ་དག་འདི་སྙམ་དུ་བདག་ཅག་ཉན་ཐོས་དང་། རང་སངས་རྒྱས་ཀྱི་ཐེག་པའམ། གཅིག་གིས་འབྱུང་བར་མི་འགྱུར་རམ་སྙམ་དུ་སེམས་པ་མེད་དེ། བྱང་ཆུབ་སེམས་དཔས་རྒྱུ་ཡང་རྗེས་སུ་མི་མཐོང་ངོ་། །རྒྱུའང་རྗེས་སུ་མི་མཐོང་བས་འཇིགས་པ་དང་བྲལ་ཞིང་མི་འཇིགས་པ་ཆེན་པོའི་ཕ་རོལ་དུ་ཕྱིན་པ་དམ་པ་ཐོབ་པས་ཐེག་པ་ཐམས་ཅད་མཉམ་པ་ཉིད་དུ་སྟོན་ཅིང་། ཐེག་པ་ཆེན་པོའི་མཉམ་པ་ཉིད་ཡོངས་སུ་རྫོགས་པར་བྱེད་པ་འདི་ནི་མི་འཇིགས་པ་དགུ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་དགེ་བའི་རྩ་བ་ཡང་དག་པར་བསྡུས་པས་དཀར་པོའི་ཆོས་ཡོངས་སུ་འདུས་པ་ཡིན། མངོན་པར་ཤེས་པ་དང་བསམ་པ་ཐམས་ཅད་ཡོངས་སུ་རྫོགས་པ་ཡིན། རྒྱུན་ཆད་པ་མེད་པར་སངས་རྒྱས་ཀྱི་བྱང་ཆུབ་ལ་རབ་ཏུ་རྟེན་པ་ཡིན། བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པ་ཡིན། སངས་རྒྱས་ཐམས་ཅད་མཁྱེན་པའི་ཡེ་ཤེས་དང་རྫུ་འཕྲུལ་ལ་མངོན་པར་དབང་བསྐུར་ཡང་སེམས་ཅན་ཡོངས་སུ་སྨིན་པར་བྱ་བའི་ཕྱིར། སྤྱོད་པ་ཉེ་བར་བླང་བ་དེ་ཡང་རྒྱུན་མི་གཅོད་དེ། དེ་དག་འདི་སྙམ་དུ་བདག་ཅག་གིས་སེམས་ཅན་ཡོངས་སུ་སྨིན་པར་མ་གྱུར་ལ། བདག་ཅག་ཀྱང་སངས་རྒྱས་ཀྱི་ཁྱུ་མཆོག་གི་མཐུ་ཕྱུང་བ་སྟོན་པར་མི་ནུས་པའམ། གཅིག་ཏུ་མི་འགྱུར་རམ་ཞེས་
སེམས་པ་མེད་དེ། བྱང་ཆུབ་སེམས་དཔས་རྒྱུའང་རྗེས་སུ་མི་མཐོང་ངོ་། །རྒྱུའང་རྗེས་སུ་མི་མཐོང་བས་འཇིགས་པ་དང་བྲལ་ཞིང་མི་འཇིགས་པ་ཆེན་པོའི་ཕ་རོལ་ཏུ་ཕྱིན་པ་དམ་པ་ཐོབ་པས། སེམས་ཅན་ཡོངས་སུ་སྨིན་པའི་ཚུལ་ཇི་ལྟ་བ་བཞིན་དུ་སངས་རྒྱས་ཀྱི་ཡུལ་ཡོངས་སུ་སྟོན་ཏེ། བྱང་ཆུབ་སེམས་དཔའི་སྤྱོད་པ་ཡང་རྒྱུན་མི་གཅོད་ལ་བྱང་ཆུབ་སེམས་དཔའི་སྨོན་ལམ་ཆེན་པོས་སྐྱེ་བ་ཡང་རྒྱུན་མི་གཅོད་ཅིང་བྱང་ཆུབ་སེམས་དཔས་ཡོངས་སུ་སྨིན་པར་བྱ་བའང་རྒྱུན་མི་གཅོད་དེ། འདི་ནི་མི་འཇིགས་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མི་འཇིགས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་མི་འཇིགས་པ་ཆེན་པོ་བླ་ན་མེད་པ་འཐོབ་པར་འགྱུར་བ་དང་། བྱང་ཆུབ་སེམས་དཔའི་མི་འཇིགས་པ་ལས་ཀྱང་ཕྱིར་ལྡོག་པར་མི་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་མ་འདྲེས་པ་རྣམས་ཏེ། བཅུ་གང་ཞེ་ན་ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་རྣམས་མ་བསྟན་པར་ཕ་རོལ་ཏུ་ཕྱིན་པ་རྣམས་ལ་བརྩོན་ཞིང་གཏོང་བ་ཡོངས་སུ་གཏོང་ལ་འཇུངས་པ་དང་བྲལ་བ་ཡིན། ཚུལ་ཁྲིམས་ཡོངས་སུ་དག་ལ། ཚུལ་ཁྲིམས་ངན་པ་ཐམས་ཅད་རབ་ཏུ་བསྩལ་བ་ཡིན། བཟོད་པ་ཕུན་སུམ་ཚོགས་ལ་བསམ་པ་མི་སྒུལ་བ་ཡིན། བརྩོན་འགྲུས་ཆེན་པོ་དང་ལྡན་ལ་དུས་ཐམས་ཅད་དུ་ཕྱིར་མི་ལྡོག་པ་ཡིན། ཤིན་ཏུ་མཉམ་པར་གཞག་པའི་ཡེ་ཤེས་དང་ལྡན་ལ་འཁྲུག་པ་ཐམས་ཅད་ཡོངས་སུ་སྤངས་པ་ཡིན། ཤེས་རབ་ཀྱིས་ཤིན་ཏུ་བྱུང་ཞིང་སྡིག་པའི་ལྟ་བ་དང་བྲལ་བ་ཡིན་ཏེ། ཀྱེ་རྒྱལ་བའི་སྲས་དེ་ལྟར་མ་བསྟན་པར་ཕ་རོལ་ཏུ་ཕྱིན་པ་ལ་བརྩོན་པ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པའི་ཆོས་ཏེ། དེ་ལྟར་ཕ་རོལ་ཏུ་ཕྱིན་པའི་ལམ་དང་མཐུན་པ་དེ་ནི་བྱང་ཆུབ་སེམས་དཔའི་མ་འདྲེས་པའི་ཆོས་དང་པོའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སེམས་ཅན་གྱི་ཁམས་ཡོངས་སུ་སྡུད་ཅིང་། འཇིག་རྟེན་གྱི་ཟང་ཟིང་དང་། ཆོས་
ཀྱི་སྦྱིན་པ་ཡོངས་སུ་གཏོང་བའི་ངང་ཚུལ་ཅན། བཞིན་འཛུམ་པ་སྙན་པར་སྨྲ་བ་ཚིག་འཇམ་པ། སེམས་ཅན་ཐམས་ཅད་ཀྱི་སེམས་མངོན་པར་དགའ་བ། དོན་ཡང་དག་པ་ཇི་ལྟ་བ་བཞིན་ལ་རབ་ཏུ་སྦྱོར་བ། སངས་རྒྱས་ཀྱི་བྱང་ཆུབ་ཀྱི་དོན་ཁོང་དུ་ཆུད་པར་བྱེད་པ། མི་མཉམ་པའི་སེམས་མེད་པ། སེམས་ཅན་ཐམས་ཅད་ལ་སྙོམས་པར་དོན་དུ་སེམས་པ་དག་སྟེ། ཀྱེ་རྒྱལ་བའི་སྲས་དེ་ལྟར་མ་བསྟན་པར་སེམས་ཅན་གྱི་ཁམས་ཡོངས་སུ་བསྡུ་བའི་ཕྱིར་ནན་ཏན་དུ་བྱེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པ་སྟེ། དེ་ལྟར་བསྡུ་བའི་དངོས་པོའི་ལམ་དང་མཐུན་པ་དེ་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པ་གཉིས་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཡོངས་སུ་བསྔོ་བའི་ཚུལ་ལ་མཁས་ཤིང་རྣམ་པར། སྨིན་པ་ལ་རེ་བ་མེད་པར། སངས་རྒྱས་ཀྱི་བྱང་ཆུབ་ཀྱི་རྗེས་སུ་སོང་བར་ཡོངས་སུ་བསྔོ་ཞིང་འཇིག་རྟེན་གྱི་སྙོམས་པར་འཇུག་པ་ཐམས་ཅད་ལ་ཡེ་བརྔམ་པ་མེད་པས། དེ་བཞིན་གཤེགས་པའི་ཡེ་ཤེས་ལ་རབ་ཏུ་གནས་ཤིང་སེམས་ཅན་གྱི་དོན་དུ་ཡོངས་སུ་བསྔོ་སྟེ། ཀྱེ་རྒྱལ་བའི་སྲས་དེ་ལྟར་མ་བསྟན་པར་དགེ་བའི་རྩ་བ་ཐམས་ཅད་བརྩམ་པ་དང་། སངས་རྒྱས་ཀྱི་ཡེ་ཤེས་དེ་ལྟར་ཚོལ་ཞིང་སེམས་ཅན་གྱི་དོན་ཡོངས་སུ་ཚོལ་བ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པ་སྟེ། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་གསུམ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཐབས་མཁས་པའི་ཕ་རོལ་ཏུ་ཕྱིན་པ་དམ་པ་ཐོབ་པས་སེམས་ཅན་ཐམས་ཅད་ཀྱི་རྗེས་སུ་འབྲང་ཞིང་འཇིག་རྟེན་པ་ཐམས་ཅད་ཀྱི་ལམ་ལ་ཡོངས་སུ་སྐྱོ་བ་མེད་པའི་ཡིད་དང་ལྡན་ཏེ། འཕགས་པའི་སྤྱོད་ཡུལ་ལ་མངོན་དུ་བལྟས་ལ། ཉན་ཐོས་དང་རང་སངས་རྒྱས་ཐམས་ཅད་ཀྱི་འབྱུང་བ་ལས་ཕྱིར་ཕྱོགས་ཏེ། སེམས་ཅན་ཐམས་ཅད་ཡོངས་སུ་སྨིན་པ་ལ་མངོན་པར་བརྩོན་ཞིང་། བདག་གི་བདེ་བ་ལ་ཆགས་པ་མེད་དེ། བསམ་གཏན་
དང་རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་འཇུག་པ་དང་། རྣམ་པར་ལྡང་བ་ལ་མཁས་པས་རང་གི་དབང་དུ་གྱུར་པའི་ཏིང་ངེ་འཛིན་ཐོབ་ཅིང་འཁོར་བས་ཡོངས་སུ་སྐྱོ་བ་མེད་པའི་སེམས་དང་ལྡན་ཏེ། འཁོར་བ་ལ་བཟའ་ཤིང་གི་ར་བ་ལྟ་བུའི་འདུ་ཤེས་ཆེན་པོ་ཐོབ་པ་དང་། བདུད་ཀྱི་ཁྱིམ་ཐམས་ཅད་ན་གནས་པ་དང་། བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱི་དབང་ཆེན་པོ་ཡོངས་སུ་སྟོན་ཅིང་སྐྱེ་བའི་སྐྱེ་མཆེད་ཐམས་ཅད་དུ་གཟུགས་བརྙན་བྱུང་བར་གྱུར་ལ། ཞགས་པ་འཐུབ་པའི་རབ་ཏུ་བྱུང་བ་ཐམས་ཅད་ཀྱི་ལྟ་བ་དང་བྲལ་ཏེ། འཇིག་རྟེན་པའི་རང་བཟོ་དང་། སྔགས་དང་གཙུག་ལག་དང་། ཡི་གེ་དང་ཤོད་ཐབས་དང་གྲངས་དང་རྩིས་དང་། རང་གི་རྩེད་མོ་དང་། འཇིག་རྟེན་པའི་དགའ་བ་ཐམས་ཅད་ཡོངས་སུ་སྟོན་ཅིང་། བུད་མེད་ཀྱི་ཆོ་ག་དང་། མཚན་མ་དང་ཆ་ལུགས་དང་། སྒྱུ་རྩལ་ཐམས་ཅད་ཀྱི་ཚུལ་ལ་མཁས་པ། འཇིག་རྟེན་པ་དང་། འཇིག་རྟེན་ལས་འདས་པའི་ཆོས་མཉན་པ་དང་། དཔྱད་པ་དང་དྲི་བ་དང་། བརྟག་པ་ཤིན་ཏུ་བསྟན་པའི་ཕ་རོལ་ཏུ་ཕྱིན་པའི་མཆོག་ཐོབ་པ། འཇིག་རྟེན་པ་དང་། འཇིག་རྟེན་ལས་འདས་པའི་དགོས་པའི་ཕ་རོལ་ཏུ་ཕྱིན་པའི་མཆོག་ཐོབ་པ། སེམས་ཅན་ཐམས་ཅད་ཀྱིས་ངོར་བལྟ་བ་དབང་དང་ལྡན་པ་དང་། རང་རྒྱལ་བ་ཐམས་ཅད་ཀྱི་ཆོ་ག་དང་། སྤྱོད་ལམ་ཡོངས་སུ་སྟོན་པ། ཐེག་པ་ཆེན་པོ་ལ་ཡང་དག་པར་ཞུགས་པ། དེ་བཞིན་གཤེགས་པའི་རྣམ་པར་འཚང་རྒྱ་བ་སྐད་ཅིག་སྐད་ཅིག་ཏུ་སྟོན་པ། སྤྱོད་པའི་རྒྱུན་ཡོངས་སུ་མི་གཅོད་པ་སྟེ། ཀྱེ་རྒྱལ་བའི་སྲས་དེ་ལྟར་ཐབས་མཁས་པའི་ཕ་རོལ་ཏུ་ཕྱིན་པའི་མཆོག་ཐོབ་ཀྱང་བསྟན་པ་མེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་མ་འདྲེས་པའི་ཆོས་ཏེ། འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཟུང་དང་སྣྲེལ་ཞི་ལ་མཁས་ཤིང་ཡེ་ཤེས་ཀྱིས་རྣམ་པར་རྩེ་བ་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་མཆོག་ཐོབ་པས། འདི་ལྟར་མྱ་ངན་ལས་
འདས་པ་ལ་གནས་ཀྱང་། འཁོར་བའི་སྒོ་ཡོངས་སུ་སྟོན་པ། སེམས་ཅན་མེད་པའི་མཐའི་སྤྱོད་ཡུལ་དང་ལྡན་ཡང་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་མ་བཏང་བ་ཤིན་ཏུ་དུལ་བ་དང་། ཞི་བའི་ཕ་རོལ་དུ་ཕྱིན་པའི་མཆོག་ཐོབ་ཀྱང་། ཉོན་མོངས་པའི་འབར་བ་སེམས་ཅན་ལ་ཡོངས་སུ་སྟོན་པ། ཆོས་ཀྱི་ཡེ་ཤེས་གཅིག་ཏུ་སྟུག་པའི་ལུས་དང་ལྡན་ཡང་སེམས་ཀྱི་སྒོ་མཐའ་ཡས་པ་ཡོངས་སུ་སྟོན་པ། བསམ་གཏན་ཆེན་པོ་ལ་བསམ་གཏན་འཆའ་ཡང་འདོད་པའི་དགའ་བ་ཐམས་ཅད་ཀྱིས་རྩེ་ཞིང་ལོངས་སྤྱོད་པར་སེམས་ཅན་ལ་རྣམ་པར་སྟོན་པས་གཅིག་ཏུ་དགའ་བར་དགའ་ཞིང་མོས་པ། ཁམས་གསུམ་པ་ཐམས་ཅད་ལས་ཕྱིར་ལྟས་ཀྱང་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་བསམ་པ་མ་བཏང་བ། རྟག་ཏུ་ཆོས་ཀྱི་དགའ་བས་དགའ་ཞིང་མོས་ཀྱང་ལྷའི་བུ་མོ་བརྒྱ་ཕྲག་སྟོང་གི་སྒྲ་རབ་ཏུ་ཕྱུང་བ་དང་རྩེ་བ། མཚན་དང་དཔེ་བྱད་བཟང་པོ་དང་། དགེ་བའི་མཆོག་བརྒྱ་ཕྲག་སྟོང་གིས་བརྒྱན་པའི་ལུས་དང་ལྡན་ཡང་དབུལ་བ་ཐམས་ཅད་ཀྱི་ཚུལ་ཡོངས་སུ་སྟོན་པ། རྟག་ཏུ་ཁ་ན་མ་ཐོ་བ་མེད་པའི་ལས་དགེ་བ་སྤྱད་ཀྱང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དུ་སྐྱེ་བ་ཡང་ཡོངས་སུ་སྟོན་པ། སངས་རྒྱས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པའི་མཆོག་ཐོབ་ཀྱང་། བྱང་ཆུབ་སེམས་དཔའི་ཡེ་ཤེས་ཀྱི་ལུས་ལས་གྱེན་དུ་མ་གཡོས་པ་དག་སྟེ། ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའ་རྣམས་ནི་ཡེ་ཤེས་མུ་མེད་པ་དང་ལྡན་པས། དེའི་ཕྱིར་དེ་དག་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་ཁོང་དུ་ཆུད་པར་དཀའ་ན་སེམས་ཅན་བྱིས་པ་གཞན་གྱིས་ལྟ་སྨོས་ཀྱང་ཅི་དགོས་ཏེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་ལྔ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ལུས་དང་ངག་དང་ཡིད་ཡེ་ཤེས་སྔོན་དུ་འགྲོ་བ་དང་ལྡན་པ་སྟེ། ལས་ཤིན་ཏུ་དག་པར་སྤྱོད་ཅིང་། སྲོག་གཅོད་པ་དང་བྲལ་བ་ནས་སྡིག་པའི་ལྟ་བའི་བར་དང་བྲལ་བས་བྱམས་
པ་ཕུན་སུམ་ཚོགས་ཤིང་ཡང་དག་པའི་ལྟ་བ་ལ་ཞུགས་པ་ཡིན་ཏེ། ཀྱེ་རྒྱལ་བའི་སྲས་དེ་ལྟར་ལུས་དང་ངག་དང་ཡིད་ཀྱི་ལས་ཡེ་ཤེས་སྔོན་དུ་འགྲོ་བ་དང་ལྡན་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་དྲུག་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་སྙིང་རྗེ་ཆེན་པོ་དང་ལྡན་པས་སེམས་ཅན་ཐམས་ཅད་ཡོངས་སུ་མི་གཏོང་ཞིང་སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རང་གི་ལུས་ཀྱིས་ལེན་པར་མཁས་པས། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་སྡུག་བསྔལ་གྱིས་སེམས་ཅན་གྱི་དོན་དུ་ཡོངས་སུ་སྐྱོ་བ་མེད་པའི་སེམས་དང་ལྡན་ཞིང་སེམས་ཅན་གྱི་ཁམས་ཐམས་ཅད་དགྲོལ་བ་ལ་ཞུགས་པ། འདོད་པའི་དགའ་བ་ཐམས་ཅད་ཀྱིས་རྩེ་ཞིང་ཡོངས་སུ་ལོངས་སྤྱོད་པ་ལ་ཆགས་པ་མེད་པའི་ཡིད་དང་ལྡན་པས་རྟག་ཏུ་སེམས་ཅན་རྣམས་སྡུག་བསྔལ་གྱི་ཕུང་པོ་ལས་དགྲོལ་བ་ལ་མངོན་པར་བརྩོན་པ་སྟེ། ཀྱེ་རྒྱལ་བའི་སྲས་དེ་ལྟར་སྙིང་རྗེ་ཆེན་པོའི་སྟོབས་ཡོངས་སུ་མི་གཏོང་བ་འདི་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་བདུན་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་འགྲོ་བ་ཐམས་ཅད་ཀྱི་ཡིད་དུ་འོང་ཞིང་མཐོང་ན་དགའ་བ་སྟེ། བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱིས་ཕྱག་བྱ་བ། འགྲོ་བ་ཐམས་ཅད་མཐོང་བར་སྨོན་པ། སེམས་ཅན་ཐམས་ཅད་མངོན་པར་དགའ་བའི་སེམས་དང་ལྡན་པ་སྟེ། ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ནི་བྱང་ཆུབ་སེམས་དཔའ་རྣམས་སྔོན་ནས་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཞིང་ཡོངས་སུ་དག་པའི་ལས་ཀྱི་ཚུལ་གྱིས་སྤྱོད་པས། དེའི་ཕྱིར་དེ་དག་མཐོང་བས། འགྲོ་བ་ཐམས་ཅད་མི་ངོམས་པ་ཡིན། ཀྱེ་རྒྱལ་བའི་སྲས་དེ་ལྟར་འགྲོ་བ་ཐམས་ཅད་མཐོང་བར་མངོན་པར་དགའ་བ་དེ་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། འདི་ནི་བྱང་ཆུབ་
སེམས་དཔའ་རྣམས་ཀྱི་ཆོས་མ་འདྲེས་པ་བརྒྱད་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་ཐམས་ཅད་མཁྱེན་པ་ཉིད་ཀྱི་སེམས་བརྟན་པ་དང་ལྡན་པའི་ལྷག་པའི་བསམ་པའི་གོ་ཅ་ཤིན་ཏུ་བགོས་པས། དེ་དག་ཇི་ལྟར་ཉོན་མོངས་ཤིང་བྱིས་པའི་སྐྱེ་བོའི་འདུ་འཛི་དང་། ཇི་ལྟར་བསྟེན་ཏམ། ཉན་ཐོས་དང་རང་སངས་རྒྱས་ཀྱི་ཚོགས་ཀྱི་ནང་དུ་ཇི་ལྟར་ཕྱིན་ཀྱང་རུང་སྟེ། ཐམས་ཅད་མཁྱེན་པའི་སེམས་རིན་པོ་ཆེ་བཟང་པོ་འོད་དང་ལྡན་པ་དེ་འཇིག་པར་མི་བྱེད་དོ། །ཀྱེ་རྒྱལ་བའི་སྲས་དེ་ནི་འདི་ལྟ་སྟེ་དཔེར་ན་ནོར་བུ་རིན་པོ་ཆེ་ཆེན་པོ་རྒྱན་བཟང་པོ་ཞེས་བྱ་བ་དེ་ཆུ་དང་བར་བྱེད་པ་ནི་པད་མོའི་རྫིང་བུ་ཇི་ལྟར་རྙོག་ཀྱང་རུང་སྟེ། ནང་དུ་བཅུག་ན་ནོར་བུ་རིན་པོ་ཆེའི་འོད་གསལ་ཞིང་བཟང་པོ་དེ་ཉིད་རྣམ་པར་མི་སྤོང་སྟེ། ཆུ་དེ་ཐམས་ཅད་ཀྱང་རྙོག་པ་མེད་པར་རབ་ཏུ་དང་བར་བྱེད་དོ། །ཀྱེ་རྒྱལ་བའི་སྲས་དེ་བཞིན་དུ་བྱང་ཆུབ་སེམས་དཔའ་ཡང་བྱིས་པའི་སྐྱེ་བོའི་འདུ་འཛིན་ཇི་ལྟར་བསྟེན་ཀྱང་ཐམས་ཅད་མཁྱེན་པའི་སེམས་རིན་པོ་ཆེའི་འོད་གསལ་ཞིང་སྣང་བ་བཟང་པོ་དེ་ཆུད་ཟོས་པར་མི་བྱེད་དེ་སེམས་ཅན་དེ་དག་ཀྱང་ཉོན་མོངས་པའི་རྙོག་པ་དེ་ལས་ཟློག་ཅིང་ཐམས་ཅད་མཁྱེན་པའི་སེམས་རིན་པོ་ཆེའི་འོད་གསལ་ཞིང་སྣང་བ་དེ་ཉིད་ལ་རབ་ཏུ་འགོད་དོ། །ཀྱེ་རྒྱལ་བའི་སྲས་དེ་ལྟར་ཅི་ལྟར་ཉོན་མོངས་པར་གྱུར་ཀྱང་རུང་། བྱིས་པའི་སྐྱེ་བོའི་འདུ་འཛི་དང་། ཇི་ལྟར་བསྟེན་ཏམ། ཉན་ཐོས་དང་རང་སངས་རྒྱས་ཀྱི་ཚོགས་ཀྱི་ནང་དུ་ཇི་ལྟར་ཕྱིན་ཀྱང་རུང་སྟེ། ཐམས་ཅད་མཁྱེན་པའི་སེམས་རིན་པོ་ཆེ་དེ་ཉིད་འཇིག་པར་མི་བྱེད་པ་དེ་ནི་བྱང་ཆུབ་སེམས་དཔའི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་དགུ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ནི་རང་གི་ཡུལ་གྱི་ཡེ་ཤེས་ཀྱི་ཆོས་ལ་དབང་བསྒྱུར་བའི་ཕ་རོལ་ཏུ་ཕྱིན་པ་དམ་པ་ཐོབ་པ་སྟེ། རང་བྱུང་གི་ཡེ་ཤེས་ཀྱི་དབང་བསྐུར་བས་དབང་བསྐུར་ཞིང་གོ་འཕང་སྐྱོན་མེད་པ་ལ་གནས་ཀྱང་དགེ་བའི་བཤེས་གཉེན་ལ་གནས་པ་རིང་དུ་མི་སྤོང་ཞིང་དེ་བཞིན་གཤེགས་པ་ལ་རིམ་གྲོ་བྱ་བའི་
རྒྱུན་མི་གཅོད་དེ། དེ་ལྟར་ཚུལ་ཕུན་སུམ་ཚོགས་པ་དང་། འགྲོ་བ་ཐམས་ཅད་དུ་དགེ་བའི་བཤེས་གཉེན་བསྟེན་པ་ལས་ཕྱིར་མི་ལྡོག་ཅིང་དེ་བཞིན་གཤེགས་པ་ལ་རིམ་གྲོ་བྱ་བ་རྒྱུན་མི་གཅོད་པ་དེ་ནི་བྱང་ཆུབ་སེམས་དཔའི་ཆོས་མ་འདྲེས་པ་སྟེ། འདི་ནི་བྱང་ཆུབ་སེམས་དཔའི་ཆོས་མ་འདྲེས་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་མ་འདྲེས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཆོས་མ་འདྲེས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལས་ཏེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་ཡོངས་སུ་སྦྱང་བའི་ལས་དང་། སངས་རྒྱས་ཐམས་ཅད་བསྙེན་བཀུར་བའི་ལས་དང་། བྱང་ཆུབ་སེམས་དཔའི་གྲོགས་ཐམས་ཅད་དང་དགེ་བའི་རྩ་བ་གཅིག་ཏུ་བྱ་བའི་ལས་དང་། སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བའི་ལས་དང་། མ་འོངས་པའི་དུས་ཐམས་ཅད་ཀྱི་ཕྱི་མའི་མཐའི་མུར་ཐུག་པར་ཡོངས་སུ་གཟུང་བའི་ལས་དང་། འཇིག་རྟེན་གྱི་ཁམས་ཐམས་ཅད་དུ་འགྲོ་ཡང་འཇིག་རྟེན་གྱི་ཁམས་གཅིག་ནས་མི་གཡོ་བའི་རྫུ་འཕྲུལ་གྱི་ལས་དང་། ཁ་དོག་མཐའ་ཡས་པའི་འོད་གཟེར་དགྱེ་བའི་འོད་ཀྱི་ལས་དང་། པད་མོའི་སྙིང་པོ་ལ་བྱང་ཆུབ་སེམས་དཔའི་གཟུགས་འཁོད་པ་ཡོངས་སུ་བསྟན་པའི་འོད་གཟེར་གྱི་ལས་དང་། མྱ་ངན་ལས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་གཟུང་བས་དཀོན་མཆོག་གསུམ་གྱི་རིགས་རྒྱུན་མི་གཅད་པའི་ལས་དང་། འཇིག་རྟེན་ཐམས་ཅད་དུ་རྒྱུ་ཞིང་ཆོས་བསྟན་པ་དང་། སེམས་ཅན་གདུལ་བ་ཡང་དག་པར་བསྒྲུབ་པའི་སྤྲུལ་པའི་ལས་དང་། ནམ་འདོད་པ་དང་ནམ་སེམས་བསྐྱེད་པ་ན་སྨོན་ལམ་ཡོངས་སུ་རྫོགས་པར་སེམས་ཅན་ལ་ཡང་དག་པར་སྟོན་པའི་བྱིན་གྱི་རླབས་ཀྱི་ལས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལས་ཏེ། དེ་དག་ལ་
གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་འཕྲིན་ལས་རྒྱ་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། བཅུ་གང་ཞེ་ན་འདི་ལྟར་འགྲོ་བ་ཐམས་ཅད་དུ་བྱུང་བ་མེད་པས། བྱང་ཆུབ་སེམས་དཔའི་ལུས་ནི་འོངས་པ་མེད་པའོ། །འགྲོ་བ་ཐམས་ཅད་དུ་མི་དམིགས་པ་མེད་པས་བྱང་ཆུབ་སེམས་དཔའི་ལུས་ནི་འོངས་པའོ། །འཇིག་རྟེན་ཐམས་ཅད་ཀྱིས་དམིགས་པ་ཇི་ལྟ་བ་བཞིན་དུ་བྱང་ཆུབ་སེམས་དཔའི་ལུས་ནི་བདེན་པ་མ་ཡིན་པའོ། །འཇིག་རྟེན་གྱི་བདེན་པ་རྣམ་པར་དམིགས་པ་ཇི་ལྟ་བ་བཞིན་དུ་བྱང་ཆུབ་སེམས་དཔའི་ལུས་ནི་བརྫུན་པ་མ་ཡིན་ནོ། །ཕྱི་མའི་མཐའི་མུར་རྒྱུན་མི་འཆད་པས་བྱང་ཆུབ་སེམས་དཔའི་ལུས་ནི་རྒྱུན་མི་ཟད་པའོ། །བདུད་ཐམས་ཅད་ཀྱིས་མི་ཤིགས་པས་བྱང་ཆུབ་སེམས་དཔའ་རྣམས་ཀྱི་ལུས་ནི་བརྟེན་པའོ། །བདུད་ཀྱི་རྒོལ་བ་ཐམས་ཅད་ཀྱིས་མི་སྒུལ་བས་བྱང་ཆུབ་སེམས་དཔའི་ལུས་ནི་སྲ་བའོ། །བསོད་ནམས་བརྒྱ་པའི་མཚན་གྱིས་ཤིན་ཏུ་རྣམ་པར་དག་པར་སྣང་བས་བྱང་ཆུབ་སེམས་དཔའི་ལུས་ནི་མཚན་བཟང་པོ་དང་ལྡན་པའོ། །ཆོས་ཀྱི་མཚན་ཉིད་མེད་པའི་མཐར་ཐུག་པས་བྱང་ཆུབ་སེམས་དཔའི་ལུས་ནི་མཚན་ཉིད་མེད་པའོ། །འདས་པ་དང་། མ་བྱོན་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་མཉམ་པ་ཉིད་ཐོབ་པས་བྱང་ཆུབ་སེམས་དཔའི་ལུས་ནི་ཀུན་ཏུ་སོང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྐུ་མི་ཟད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཀྱི་ལས་ཏེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་ལུས་གཅིག་གིས་རྒྱས་པར་འགེངས་པའི་ལུས་ཀྱི་ལས་དང་། སེམས་
ཅན་གྱི་ཁམས་ཐམས་ཅད་དུ་སྒོ་ཡོངས་སུ་སྟོན་པའི་ལུས་ཀྱི་ལས་དང་། སྐྱེ་བ་ཐམས་ཅད་དུ་གནས་པའི་ལུས་ཀྱི་ལས་དང་། འཇིག་རྟེན་གྱི་ཁམས་ཐམས་ཅད་དུ་འགྲོ་བའི་ལུས་ཀྱི་ལས་དང་། སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་འགྲོ་བའི་ལུས་ཀྱི་ལས་དང་། འཇིག་རྟེན་གྱི་ཁམས་ཐམས་ཅད་ལག་པ་གཅིག་གིས་ཀུན་ཏུ་ཁེབས་པར་བྱེད་པའི་ལུས་ཀྱི་ལས་དང་། ཁོར་ཡུག་དང་། རྡོ་རྗེའི་རི་ཐམས་ཅད་ལག་པ་གཅིག་གིས་ཉུག་པའི་ལུས་ཀྱི་ལས་དང་། སངས་རྒྱས་ཀྱི་ཞིང་ཐམས་ཅད་དུ་རང་གི་ལུས་འཇིག་པ་དང་། འབྱུང་བ་ཡོངས་སུ་སྟོན་པའི་ལུས་ཀྱི་ལས་དང་སེམས་ཅན་གྱི་ཁམས་ཐམས་ཅད་ལུས་གཅིག་གིས་ཡོངས་སུ་འཛིན་པའི་ལུས་ཀྱི་ལས་དང་། སེམས་ཅན་གྱི་ཁམས་ཐམས་ཅད་ལུས་མེད་པར་ཁོང་དུ་ཆུད་པས་ཞིང་ཡོངས་སུ་དག་པ་དང་། ཡོངས་སུ་རྫོགས་པ་ཀུན་ཏུ་སྟོན་པའི་ལུས་ཀྱི་ལས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཀྱི་ལས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་འགྲོ་བ་ཀུན་གྱིས་རྣམ་པར་རིག་པར་བྱ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རང་བཞིན་ཏེ། བཅུ་གང་ཞེ་ན་འདི་ལྟར་ནན་ཏན་དང་ལྡན་པས་ཕ་རོལ་ཏུ་ཕྱིན་པའི་རང་བཞིན་དང་། འགྲོ་བ་ཐམས་ཅད་ཡོངས་སུ་མི་གཏོང་བས། བསྡུ་བའི་དངོས་པོའི་རང་བཞིན་དང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རང་གི་ལུས་ཀྱིས་ལེན་ཀྱང་། ཡོངས་སུ་མི་སྐྱོ་བས་སྙིང་རྗེ་ཆེན་པོའི་རང་བཞིན་དང་། འགྲོ་བ་ཐམས་ཅད་ཡོངས་སུ་སྐྱོབ་པས་བྱམས་པ་ཆེན་པོའི་རང་བཞིན་དང་། འགྲོ་བ་ཐམས་ཅད་ཉེ་བར་འཚོ་བས་བསོད་ནམས་ཀྱི་རང་བཞིན་དང་། སངས་རྒྱས་ཐམས་ཅད་ཀྱི་སྐུ་དང་། གཅིག་ཏུ་འདྲེས་པས་ཡེ་ཤེས་ཀྱི་རང་བཞིན་དང་། སྐྱེ་བའི་སྐྱེ་མཆེད་ཐམས་ཅད་ལས་འདས་པས་ཆོས་ཀྱི་རང་བཞིན་དང་། ཐམས་ཅད་དུ་སྒོ་ཡོངས་སུ་སྟོན་པས་ཐམས་ཅད་ཀྱི་རང་བཞིན་དང་། རྫུ་འཕྲུལ་
དང་རྣམ་པར་འཕྲུལ་པ་ཐམས་ཅད་ཡོངས་སུ་སྟོན་པས། རྫུ་འཕྲུལ་གྱི་རང་བཞིན་དང་། ནམ་འདོད་པའི་དུས་སུ་མངོན་པར་རྫོགས་པར་འཚང་རྒྱ་བས། བྱང་ཆུབ་ཀྱི་རང་བཞིན་ནོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རང་བཞིན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་རང་བཞིན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི། བྱང་ཆུབ་སེམས་དཔའ་རྣམས་ཀྱི་ངག་སྟེ། བཅུ་གང་ཞེ་ན། འདི་ལྟར་སེམས་ཅན་ཐམས་ཅད་བདེ་བར་བྱེད་པས་བྱང་ཆུབ་སེམས་དཔའ་རྣམས་ཀྱི་ངག་ནི་འཇམ་པའོ། །སེམས་ཅན་ཐམས་ཅད་ཀྱི་སེམས་སིམ་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་སྙན་པའོ། །ཡང་དག་པ་ཇི་ལྟ་བ་བཞིན་དུ་གོ་བར་བྱེད་པས་བྱང་ཆུབ་སེམས་དཔའ་རྣམས་ཀྱི་ངག་ནི་མི་བརྫུན་པའོ། །རྨི་ལམ་ན་ཡང་ལོག་པར་མི་སྨྲ་བས་བྱང་ཆུབ་སེམས་དཔའི་ངག་ནི་བདེན་པའི་རྗེས་སུ་འབྲང་བའོ། །བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཟིལ་གྱིས་གནོན་པས་བྱང་ཆུབ་སེམས་དཔའ་རྣམས་ཀྱི་ངག་ནི་རྒྱ་ཆེ་བའོ། །ཆོས་ཀྱི་རང་བཞིན་སྟོན་པས། བྱང་ཆུབ་སེམས་དཔའ་རྣམས་ཀྱི་ངག་ནི་ཟབ་མོའི་དབྱངས་སུ་སྒྲོག་པའོ། །ཆོས་བསྟན་པ་ཐམས་ཅད་མི་ཟད་པས་བྱང་ཆུབ་སེམས་དཔའ་རྣམས་ཀྱི་ངག་ནི་སྙིང་པོ་དང་ལྡན་པའོ། །སྒྲ་ཇི་ལྟ་བ་བཞིན་དུ་ཁོང་དུ་ཆུད་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ངག་ནི་ཤིན་ཏུ་གསལ་བའོ། །དུས་དང་ལས་དང་རྣམ་པར་སྨིན་པ་ཇི་ལྟ་བ་བཞིན་དུ་ཡོངས་སུ་སྟོན་པས། བྱང་ཆུབ་སེམས་དཔའ་རྣམས་ཀྱི་ངག་ནི་རྣམ་པ་ཐ་དད་པའོ། །བསམ་པ་ཇི་ལྟ་བ་བཞིན་དུ་རྣམ་པར་སྤྱོད་པ་ལ་འཇུག་པར་བྱེད་པས་བྱང་ཆུབ་སེམས་དཔའ་རྣམས་ཀྱི་ངག་ནི་འགྲོ་བ་ཐམས་ཅད་ལ་འགྲོ་བའོ། །ཀྱེ་རྒྱལ་བའི་སྲས་
བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ངག་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་དེ་བཞིན་གཤེགས་པའི་གསུང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ངག་དེ་ཡང་ལས་རྣམ་པར་དག་པ་བཅུས་ཡོངས་སུ་སྦྱངས་པ་ཡིན་ཏེ། བཅུ་གང་ཞེ་ན། འདི་ལྟར་དེ་བཞིན་གཤེགས་པའི་གསུང་ལ་མོས་པ་ཡོངས་སུ་དག་པ་དང་། བྱང་ཆུབ་སེམས་དཔའི་ཚིག་སྔོན་མ་ཐོས་པ་ལ་མངོན་པར་མོས་པ་ཡོངས་སུ་དག་པ་དང་། འགྲོ་བ་ཐམས་ཅད་ཀྱི་ཡིད་དུ་མི་འོང་བའི་ཚིག་ཡོངས་སུ་སྤངས་པས་ཡོངས་སུ་དག་པ་དང་། སྔོན་གྱི་མཐར་ངག་གི་ཉེས་པ་བཞི་དང་བྲལ་བས་ཡོངས་སུ་དག་པ་དང་། དགའ་བ་དང་། མོས་པ་ཆེན་པོས་དེ་བཞིན་གཤེགས་པ་མངོན་པར་བསྟོད་པས་ཡོངས་སུ་དག་པ་དང་། སྒྲ་ཆེན་པོས་དེ་བཞིན་གཤེགས་པ་མཆོད་པར་འོས་པ་ཡང་དག་པ་ཇི་ལྟ་བ་བཞིན་དུ་སངས་རྒྱས་ཀྱི་ཡོན་ཏན་དང་། ལེགས་པ་བརྗོད་པས་ཡོངས་སུ་དག་པ་དང་། བསམ་པ་ཐག་པས་སེམས་ཅན་གཞན་ལ་ཆོས་ཀྱི་སྦྱིན་པས། སྡུད་པ་ཡོངས་སུ་དག་པ་དང་། གླུའི་དབྱངས་དང་། རོལ་མོ་བརྡུང་བ་དང་། དཀྲོལ་བའི་དབྱངས་ཀྱིས་དེ་བཞིན་གཤེགས་པ་ལ་མངོན་པར་བསྟོད་པས་ཡོངས་སུ་དག་པ་དང་། སངས་རྒྱས་བཅོམ་ལྡན་འདས་རྣམས་ལས་མངོན་སུམ་དུ་ཆོས་ཐོས་ནས། རང་གི་ལུས་འབུལ་བས་ཡོངས་སུ་དག་པ་དང་། བྱང་ཆུབ་སེམས་དཔའི་ཆོས་སྨྲ་བ་ཐམས་ཅད་ལས་ཆོས་ཐོས་ནས། རིམ་གྲོ་བྱ་བའི་ཕྱིར་བདག་འབུལ་ཞིང་སྙིང་ཐག་པ་ནས་ཡོངས་སུ་བཏང་བས་ཡོངས་སུ་དག་པ་སྟེ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ངག་ནི་ལས་རྣམ་པར་དག་པ་བཅུ་པོ་དེ་དག་གིས་ཤིན་ཏུ་སྦྱངས་པར་འབྱུང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་ཀྱི་ངག་དེ་ལྟར་ཡོངས་སུ་སྦྱངས་པ་དེ་ཡང་ཡོངས་སུ་འཛིན་པ་བཅུས། ཡོངས་སུ་གཟུང་བར་འབྱུང་སྟེ།
བཅུ་གང་ཞེ་ན། འདི་ལྟར་ལྷའི་དབང་པོ་ལ་སྩོགས་པ་ལྷ་ཐམས་ཅད་ཀྱིས་ཡོངས་སུ་གཟུང་བར་འབྱུང་བ་ཡིན། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། དྲི་ཟའི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མིའམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་དང་། ཚངས་པའི་དབང་པོ་ལ་སྩོགས་པ་ཚངས་པའི་རིས་སུ་གཏོགས་པའི་ལྷ་ཐམས་ཅད་ཀྱིས་ཡོངས་སུ་གཟུང་བར་འབྱུང་བ་ཡིན། དེ་བཞིན་གཤེགས་པ་ཆོས་ཀྱི་དབང་པོ་ལ་སྩོགས་པ་ཆོས་སྨྲ་བ་ཐམས་ཅད་ཀྱིས་ཡོངས་སུ་གཟུང་བར་འབྱུང་བ་ཡིན་ཏེ། ཀྱེ་རྒྱལ་བའི་སྲས་བྱང་ཆུབ་སེམས་དཔའི་ངག་ནི་ཡོངས་སུ་འཛིན་པ། བཅུ་པོ་དེ་དག་གིས་ཤིན་ཏུ་གཟུང་བར་འབྱུང་ངོ་། །ཀྱེ་རྒྱལ་བའི་སྲས་བྱང་ཆུབ་སེམས་དཔའི་ངག་དེ་ལྟར་ཤིན་ཏུ་གཟུང་བར་འབྱུང་བ་དེ་ཡང་དགོས་པ་བཅུ་ཡོངས་སུ་གྲུབ་པར་བྱེད་དེ། བཅུ་གང་ཞེ་ན། འདི་ལྟར་སེམས་ཅན་གྱི་ཁམས་མངོན་པར་དགའ་བར་བྱེད་དོ། །འཇིག་རྟེན་གྱི་ཁམས་སུ་གོ་བར་བྱེད་དོ། །དབང་པོའི་ཁམས་ལ་འཇུག་པར་བྱེད་དོ། །མོས་པའི་ཁམས་རྣམ་པར་དག་པར་བྱེད་དོ། །ཉོན་མོངས་པའི་ཁམས་སེལ་བར་བྱེད་དོ། །བག་ཆགས་ཀྱི་ཁམས་སྤོང་བར་བྱེད་དོ། །བསམ་པའི་ཁམས་སྦྱོང་བར་བྱེད་དོ། །ལྷག་པའི་བསམ་པའི་ཁམས་རྣམ་པར་འཕེལ་བར་བྱེད་དོ། །ཆོས་ཀྱི་ཁམས་རྒྱས་པར་བྱེད་དོ། །མྱ་ངན་ལས་འདས་པའི་ཁམས་ཡང་དག་པར་རྟོགས་པར་བྱེད་དོ། །དགོས་པ་བཅུ་པོ་དེ་དག་ཡོངས་སུ་སྒྲུབ་བོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཏེ། བཅུ་གང་ཞེ་ན། འགྲོ་བ་ཐམས་ཅད་ཀྱི་དགེ་བའི་རྩ་བ་ཡང་དག་པར་འཛིན་ཅིང་རྟོན་པས་བྱང་ཆུབ་སེམས་དཔའ་རྣམས་ཀྱི་སེམས་ནི་ས་ལྟ་བུའོ། །སངས་རྒྱས་ཐམས་ཅད་ཀྱི་ཡེ་ཤེས་རྒྱ་ཆེན་པོའི་རྒྱ་མཚོ་མཐའ་དང་དབུས་མེད་པ་ལ་ཞུགས་པས། བྱང་ཆུབ་སེམས་དཔའ་
རྣམས་ཀྱི་སེམས་ནི་རྒྱ་མཚོ་ལྟ་བུའོ། །འཇིག་རྟེན་ལས་འདས་པའི་དགེ་བའི་རྩ་བ་ཤིན་ཏུ་མཐོ་བ་ལ་འགྲོ་བ་ཐམས་ཅད་རབ་ཏུ་དགོད་པའི་ཕྱིར། བྱང་ཆུབ་སེམས་དཔའི་སེམས་ནི་རི་བོ་ཆེན་པོ་ལྟ་བུའོ། །ཀུན་ནས་ཉོན་མོངས་པ་མེད་ཅིང་བསམ་པ་དག་པ་དང་ལྡན་པས་བྱང་ཆུབ་སེམས་དཔའ་རྣམས་ཀྱི་སེམས་ནི་ནོར་བུ་རིན་པོ་ཆེ་ལྟ་བུའོ། །ཆོས་ཐམས་ཅད་ལ་རབ་ཏུ་རྣོ་བས། བྱང་ཆུབ་སེམས་དཔའ་རྣམས་ཀྱི་སེམས་ནི་རྡོ་རྗེ་ལྟ་བུའོ། །བདུད་དང་མུ་སྟེགས་ཅན་གཞན་དང་ཕས་ཀྱི་རྒོལ་བ་ཐམས་ཅད་ཀྱིས་མི་སྐུལ་བས། བྱང་ཆུབ་སེམས་དཔའ་རྣམས་ཀྱི་སེམས་ནི་རིའི་རྒྱལ་པོ་རྡོ་རྗེའི་ཁོར་ཡུག་ཤིན་ཏུ་བརྟན་ཞིང་མི་ཤིགས་པ་ལྟ་བུའོ། །འཇིག་རྟེན་གྱི་ཆོས་ཐམས་ཅད་ཀྱིས་མི་གོས་པས། བྱང་ཆུབ་སེམས་དཔའ་རྣམས་ཀྱི་སེམས་ནི་པད་མོ་ལྟ་བུའོ། །བསྐལ་པ་ཐམས་ཅད་དུ་འབྱུང་བ་དང་། མཐོང་བར་དཀའ་བས་བྱང་ཆུབ་སེམས་དཔའ་རྣམས་ཀྱི་སེམས་ནི་མེ་ཏོག་ཨུ་དུམ་བ་ར་ལྟ་བུའོ། །འགྲོ་བ་ཐམས་ཅད་ཀྱི་མ་རིག་པའི་མུན་པ་མུན་ནག་དང་། རབ་རིབ་ཀྱི་རྨུགས་པ་སེལ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་ནི་ཉི་མ་ལྟ་བུའོ། །འགྲོ་བ་ཐམས་ཅད་ཀྱིས་བརྗོད་དུ་མེད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་ནི་བར་སྣང་ལྟ་བུའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགོངས་པ་རྒྱ་ཆེན་པོ་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་སྟེ། བཅུ་གང་ཞེ་ན་འདི་ལྟར་འགྲོ་བ་ཐམས་ཅད་རབ་ཏུ་དགྲོལ་བར་བྱའོ་ཞེས་བྱང་ཆུབ་སེམས་དཔའ་སེམས་བསྐྱེད་དོ། །སེམས་ཅན་ཐམས་ཅད་ཀྱི་ཉོན་མོངས་པ་བསྩལ་བར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །བག་ཆགས་ཀྱི་མཚམས་འབྲེལ་པ་ཐམས་ཅད་སྤང་བར་བྱའོ། །
ཞེས་བྱང་ཆུབ་སེམས་དཔའ་སེམས་བསྐྱེད་དོ། །ཆོས་ཐམས་ཅད་ལ་ཐེ་ཙོམ་མེད་པར་ཐོབ་པར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་རབ་ཏུ་ཞི་བར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །ངན་སོང་དང་མི་ཁོམ་པ་ཐམས་ཅད་གཅད་པར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །དེ་བཞིན་གཤེགས་པ་ཐམས་ཅད་མཉེས་པར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །བྱང་ཆུབ་སེམས་དཔའི་བསླབ་པ་ཐམས་ཅད་ལ་ནན་ཏན་ཏུ་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །སྐྲའི་སྦུབས་སུ་འཇུག་པ་ཐམས་ཅད་ཀྱང་མ་ལུས་པར་འགྲོ་བ་ཐམས་ཅད་དུ་སངས་རྒྱས་ཐམས་ཅད་བྱང་ཆུབ་ཏུ་འཚང་རྒྱ་བ་བསྟན་པར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །འགྲོ་བ་མ་ལུས་པ་ཐམས་ཅད་ཀྱི་བསམ་པ་དང་། དབང་པོ་རབ་ཏུ་རྟོགས་པས། འཇིག་རྟེན་གྱི་ཁམས་ཐམས་ཅད་དུ་གྲགས་པར་བྱ་བར་ཆོས་ཀྱི་རྔ་བླ་ན་མེད་པ་བརྡུང་བར་བྱའོ། །ཞེས་བྱང་ཆུབ་སེམས་དཔའ་སེམས་བསྐྱེད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགོངས་པ་རྒྱ་ཆེན་པོའི་ཕྲིན་ལས་བླ་ན་མེད་པ་རྩོམ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཀྱིས་རྒྱས་པར་དགང་བ་སྟེ། བཅུ་གང་ཞེ་ན་འདི་ལྟར་སེམས་ཤིན་ཏུ་ཡངས་པ་དང་ལྡན་པས་ནམ་མཁའི་དབྱིངས་ཐམས་ཅད་རྒྱས་པར་དགང་བ་དང་། མཐའ་དང་དབུས་མེད་པར་ཁོང་དུ་ཆུད་པས་ཆོས་ཀྱི་དབྱིངས། ཐམས་ཅད་རྒྱས་པར་དགང་བ་དང་། སྐད་ཅིག་གཅིག་ཏུ་འཛུད་པས་དུས་གསུམ་ཐམས་ཅད་རྒྱས་པར་དགང་བ་དང་། གཤེགས་པ་དང་སྐྱེ་བ་དང་འབྱུང་བ་དང་རྣམ་པར་འཚང་རྒྱ་བ་དང་།
ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་འདས་པ་ཆེན་པོ་མངོན་སུམ་དུ་ཤེས་པས་སངས་རྒྱས་སྐྱེ་བ་ཐམས་ཅད་དུ་རྒྱས་པར་དགང་བ་དང་། བག་ཆགས་དང་དབང་པོ་ནམ་མཁའ་ལྟ་བུར་ཁོང་དུ་ཆུད་པས། སེམས་ཅན་གྱི་ཁམས་ཐམས་ཅད་དུ་རྒྱས་པར་དགང་བ་དང་། ཆོས་ཀྱི་དབྱིངས་ཐམས་ཅད་ཁོང་དུ་ཆུད་པའི་ཡེ་ཤེས་དང་ལྡན་པས་མིག་ཡོར་ལྟ་བུའི་ཡེ་ཤེས་ཀྱིས་རྒྱས་པར་དགང་བ་དང་། སྒྱུ་མའི་དྲ་བ་རྣམ་པ་ཐ་དད་པ་ལྟ་བུར་ཁོང་དུ་ཆུད་པས་མཐའ་དང་དབུས་མེད་པར་རྒྱས་པར་དགང་བ་དང་རང་བཞིན་མི་དམིགས་པས་མི་སྐྱེ་བར་རྒྱས་པར་དགང་བ་དང་། རང་གི་སེམས་དང་གཞན་གྱི་སེམས་ལ་ཐོགས་པ་མེད་པས་ཆགས་པ་མེད་པར་རྒྱས་པར་དགང་བ་དང་། སེམས་བསྐྱེད་པ་ཐམས་ཅད་ལ་མངོན་པར་རྫོགས་པར་བྱང་ཆུབ་པ་ཡོངས་སུ་སྟོན་པས་དབང་གིས་རྒྱས་པར་དགང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཀྱིས་རྒྱས་པར་དགང་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ཀྱིས་རྒྱས་པར་དགང་བ་མཐའ་དང་དབུས་མེད་པའི་རྒྱན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབང་པོ་སྟེ། བཅུ་གང་ཞེ་ན་འདི་ལྟར་སངས་རྒྱས་ཐམས་ཅད་མཐོང་བར་དད་པ་ཕྱིར་ལྡོག་པ་མེད་པས། བྱང་ཆུབ་སེམས་དཔའ་རྣམས་ཀྱི་དབང་པོ་ནི་དགའ་བར་བྱེད་པའོ། །སངས་རྒྱས་ཀྱི་ཆོས་ཐམས་ཅད་མངོན་པར་འཚང་རྒྱ་བར་བྱེད་པས་བྱང་ཆུབ་སེམས་དཔའ་རྣམས་ཀྱི་དབང་པོ་ནི་མངོན་པར་མོས་པའོ། །བྱ་བ་ཐམས་ཅད་ཐོགས་པ་མེད་པས་བྱང་ཆུབ་སེམས་དཔའ་རྣམས་ཀྱི་དབང་པོ་ནི་ཕྱིར་མི་ལྡོག་པའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་གཅོད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་དབང་པོ་ནི་གནས་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཁོང་དུ་ཆུད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་དབང་པོ་ནི་ཤིན་ཏུ་ཕྲ་བའོ། །སེམས་ཅན་ཐམས་ཅད་ཀྱི་དགོས་པ་ཡོངས་སུ་
གྲུབ་པར་བྱེད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་དབང་པོ་ནི་རྒྱུན་མི་འཆད་པའོ། །ཆོས་ཐམས་ཅད་ལ་རབ་ཏུ་རྣོ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་དབང་པོ་ནི་རྡོ་རྗེ་ལྟ་བུའོ། །དེ་བཞིན་གཤེགས་པ་ཐམས་ཅད་ཀྱི་ཡུལ་ལ་སྣང་བ་ཐོབ་པའི་ཕྱིར་བྱང་ཆུབ་སེམས་དཔའ་རྣམས་ཀྱི་དབང་པོ་ནི་རྡོ་རྗེའི་འོད་འཕྲོ་བ་ལྟར་སྣང་བར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་ལུས་གཅིག་ཏུ་གྱུར་པས་བྱང་ཆུབ་སེམས་དཔའ་རྣམས་ཀྱི་དབང་པོ་ནི་ཐ་མི་དད་པའོ། །དེ་བཞིན་གཤེགས་པའི་སྟོབས་ཀྱི་རྗེས་སུ་ཞུགས་པའི་ཕྱིར། བྱང་ཆུབ་སེམས་དཔའ་རྣམས་ཀྱི་དབང་པོ་ནི་ཆགས་པ་མེད་པའི་མཐར་ཕྱིན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབང་པོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དབང་པོ་རྒྱ་ཆེན་པོ་ཡོངས་སུ་རྫོགས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསམ་པ་སྟེ། བཅུ་གང་ཞེ་ན་འདི་ལྟར་བྱང་ཆུབ་སེམས་དཔའ་རྣམས་ཀྱི་བསམ་པ་འཇིག་རྟེན་གྱི་ཆོས་ཐམས་ཅད་ཀྱིས་མ་གོས་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་ཉན་ཐོས་དང་། རང་སངས་རྒྱས་ཐམས་ཅད་ཀྱི་ཡིད་ལ་བྱ་བ་དང་མ་འདྲེས་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་སངས་རྒྱས་ཀྱི་བྱང་ཆུབ་ཀྱི་རྗེས་སུ་སོང་བ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་ཐམས་ཅད་མཁྱེན་པའི་ཡེ་ཤེས་སུ་འབྱུང་བའི་ལམ་དང་མཐུན་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་བདུད་དང་མུ་སྟེགས་ཅན་གཞན་དང་། མུ་སྟེགས་སྤྱོད་པའི་རྒོལ་བ་ཐམས་ཅད་ཀྱིས་མི་འཕྲོགས་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་དཀྱིལ་འཁོར་གྱིས་རྣམ་པར་དག་པས་ཀུན་ནས་ཉོན་མོངས་པ་མེད་པ་དང་། བྱང་ཆུབ་སེམས་
དཔའ་རྣམས་ཀྱི་བསམ་པ་ཆོས་ཇི་སྐད་དུ་ཐོས་པ་ཡོངས་སུ་མི་གཏོང་བས། ཤིན་ཏུ་ཟིན་པར་ཡང་དག་པར་འཛིན་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་སྐྱེ་བའི་སྐྱེ་མཆེད་ཐམས་ཅད་ཀྱིས་མ་གོས་པས་ཡོངས་སུ་ཉམས་པ་མེད་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་ཡེ་ཤེས་ཕྲ་བ་ལ་ཞུགས་པའི་ཕྱིར་ཟབ་པ་དང་། བྱང་ཆུབ་སེམས་དཔའ་རྣམས་ཀྱི་བསམ་པ་སངས་རྒྱས་ཀྱི་ཆོས་ཐམས་ཅད་ལ་ཤིན་ཏུ་བརྩོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་དགོངས་པ་བླ་ན་མེད་པ་ཡོངས་སུ་རྫོགས་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སྟེ། བཅུ་གང་ཞེ་ན་འདི་ལྟར་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་དགེ་བའི་རྩ་བ་ཐམས་ཅད་བསྩགས་པ་ལ་ཕྱིར་མི་ལྡོག་པར་དབང་བསྒྱུར་བ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་དེ་བཞིན་གཤེགས་པ་ཐམས་ཅད་ཀྱི་དགོངས་པའི་ཚུལ་བསྟན་པ་ལ་ནེམ་ནུར་མེད་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སྨོན་ལམ་དང་སྤྱོད་པ་ཆེན་པོའི་རྒྱུན་ཡོངས་སུ་འཛིན་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སངས་རྒྱས་ཀྱི་ཆོས་ཐམས་ཅད་ལ་འཇུག་པར་བྱ་བ་ལ་ཕུལ་དུ་ཕྱིན་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སངས་རྒྱས་ཀྱི་ཆོས་ཐམས་ཅད་ལ་དབང་བསྒྱུར་བས་མངོན་སུམ་དུ་གྱུར་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་ཆོས་སྣ་ཚོགས་ཀྱི་ཚུལ་ལ་རབ་ཏུ་ཞུགས་པས། རྒྱ་ཆེ་བ་དང་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་བརྩམས་པ་ཐམས་ཅད་མཐར་ཕྱིན་པར་བྱེད་པས་གཙོ་བོར་གྱུར་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་ཏིང་ངེ་འཛིན་དང་།
སྙོམས་པར་འཇུག་པ་དང་། རྣམ་པར་འཕྲུལ་བའི་རྒྱན་ཐམས་ཅད་ལ་དབང་བསྒྱུར་བ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སྔོན་གྱི་སྨོན་ལམ་གྱིས་ཡོངས་སུ་བཟུང་བས་ཤིན་ཏུ་བརྟན་པ་དང་། བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་ལ་རྒྱུན་མི་གཅོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྷག་པའི་བསམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་ལྷག་པའི་དགོངས་པ་བླ་ན་མེད་པ་ཡོངས་སུ་དག་པ་འཐོབ་པར་འགྱུར་བ་དག་གོ། །། སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་བཅུ་དགུ་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྦྱོར་བ་སྟེ། བཅུ་གང་ཞེ་ན་འདི་ལྟར་རྣམ་པར་སྨིན་པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏོང་བས་བྱང་ཆུབ་སེམས་དཔའ་རྣམས་ཀྱི་སྦྱིན་པའི་སྦྱོར་བ་དང་། གཞན་ལ་བརྙས་པ་མེད་པས་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་དང་། བསླབ་པ་དང་། སྦྱངས་པའི་ཡོན་ཏན་དང་། སྡོམ་པ་དང་། བརྟུལ་ཞུགས་དང་དཀའ་ཐུབ་ཐམས་ཅད་དུ་ཡི་དམ་བཅས་པ་ལ་ནན་ཏན་བྱེད་པའི་སྦྱོར་བ་དང་། བདག་དང་ཕ་རོལ་གྱི་འདུ་ཤེས་མེད་པས་བྱང་ཆུབ་སེམས་དཔའ་རྣམས་ཀྱི་གནོད་སེམས་ཀྱི་ཐ་བ་དང་། གཤེ་བ་ཐམས་ཅད་རྣ་ལ་གཟོན་ཅིང་སེམས་ཅན་གྱི་ངན་དུ་བྱས་པ་ཐམས་ཅད་བཟོད་པའི་སྦྱོར་བ་དང་། ལུས་དང་ངག་དང་སེམས་ཡང་དག་པར་བསྐུལ་བས་བརྩམས་པ་ཐམས་ཅད་མཐར་ཕྱིན་པར་བྱེད་པའི་ཕྱིར། བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་བརྩམས་པ་ཐམས་ཅད་ལས་ཕྱིར་མི་ལྡོག་པའི་སྦྱོར་བ་དང་། འདོད་པའི་འཁྲུག་པ་དང་ཉོན་མོངས་པའི་གཡོག་འཁོར་ཡོངས་སུ་མི་སྤོང་བས། བྱང་ཆུབ་སེམས་དཔའ་རྣམས་ཀྱི་བསམ་
གཏན་དང་། རྣམ་པར་ཐར་པ་དང་ཏིང་ངེ་འཛིན་དང་། སྙོམས་པར་འཇུག་པ་དང་། མངོན་པར་ཤེས་པ་ཐམས་ཅད་མངོན་པར་བསྒྲུབ་པའི་སྦྱོར་བ་དང་བསོད་ནམས་བསྩགས་པ་ཐམས་ཅད་ལ་སྐྱོ་བ་མེད་པས། བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ནན་ཏན་གྱི་སྦྱོར་བ་དང་། སེམས་ཅན་མེད་པ་ལ་ཞུགས་པས་བྱང་ཆུབ་སེམས་དཔའ་རྣམས་ཀྱི་བྱམས་པ་ཆེན་པོའི་སྦྱོར་བ་དང་། ཆོས་ཐམས་ཅད་རང་བཞིན་གྱིས་དབེན་པའི་ཕྱིར། བྱང་ཆུབ་སེམས་དཔའ་རྣམས་ཀྱི་འགྲོ་བ་ཐམས་ཅད་ཀྱི་སྡུག་བསྔལ་རང་གི་ལུས་ཀྱིས་ལེན་པའི་སྙིང་རྗེ་ཆེན་པོ་ལས་ཕྱིར་མི་ལྡོག་པའི་སྦྱོར་བ་དང་། ཆགས་པ་མེད་པར་ཁོང་དུ་ཆུད་པས་འགྲོ་བ་ཐམས་ཅད་ཡང་དག་པར་སྟོན་པའི་ཕྱིར། བྱང་ཆུབ་སེམས་དཔའ་རྣམས་ཀྱི་དེ་བཞིན་གཤེགས་པའི་སྟོབས་བཅུ་རྣམ་པར་འཚང་རྒྱ་བའི་སྦྱོར་བ་དང་། སེམས་ཅན་གཞན་གྱི་རྒྱུད་དུ་ཕྱིན་པར་བྱེད་པས། བྱང་ཆུབ་སེམས་དཔའ་རྣམས་ཀྱི་ཆོས་ཀྱི་འཁོར་ལོ་བསྐོར་བ་ལས་ཕྱིར་མི་ལྡོག་པའི་སྦྱོར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྦྱོར་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྦྱོར་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མོས་པ་སྟེ། བཅུ་གང་ཞེ་ན་འདི་ལྟར་བསྒྲུབ་བར་དཀའ་བའི་རྩ་བ་སྦྱོར་བས་རླབས་པོ་ཆེའི་མོས་པ་དང་། རྒྱན་སྣ་ཚོགས་མངོན་པར་བསྒྲུབ་པས་སྣ་ཚོགས་ཀྱི་མོས་པ་དང་། ཡིད་ཞུམ་པ་མེད་པས་རྒྱ་ཆེན་པོའི་མོས་པ་དང་། ཆོས་ཟབ་མོའི་ཚུལ་ལ་ཞུགས་པས་ཞི་བར་བྱེད་པའི་མོས་པ་དང་། སེམས་རྒྱ་ཆེན་པོ་བསྐྱེད་པས་ཡངས་པའི་མོས་པ་དང་། སངས་རྒྱས་ཀྱི་བྱིན་གྱི་རླབས་ཀྱི་མཐུ་དང་། ཤུགས་སུ་ལྡན་པས་རང་གི་སྐབས་ཕྱེ་བའི་མོས་པ་དང་། བདུད་ཀྱི་ལས་ཐམས་ཅད་རབ་ཏུ་འཇོམས་པས་མི་འཕྲོགས་པའི་མོས་པ་དང་།
ལས་ཀྱི་རྣམ་པར་སྨིན་པ་ལ་གཅིག་ཏུ་ངེས་པས་ཤིན་ཏུ་གདོན་མི་ཟ་བའི་མོས་པ་དང་། ཅི་འདོད་པའི་ཆོ་འཕྲུལ་ཡོངས་སུ་སྟོན་པས་མངོན་དུ་གྱུར་པའི་མོས་པ་དང་སྟོབས་དང་མི་ལྡན་པ་མེད་པའི་ཕྱིར་དུས་གང་དུ་འདོད་པར་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བས་སངས་རྒྱས་ཐམས་ཅད་ཀྱིས་ལུང་བསྟན་པ་ཡང་དག་པར་ནོད་པའི་མོས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མོས་པ་སྟེ་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་མོས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་སུ་མོས་པ་ལ་འཇུག་པ་སྟེ། བཅུ་གང་ཞེ་ན་འདི་ལྟར་འཇིག་རྟེན་གྱི་ཁམས་ཐམས་ཅད་འཇིག་རྟེན་གྱི་ཁམས་གཅིག་ཏུ་མོས་པ་ལ་འཇུག་པ་དང་། འཇིག་རྟེན་གྱི་ཁམས་གཅིག་འཇིག་རྟེན་གྱི་ཁམས་ཐམས་ཅད་དུ་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་པད་མོའི་གདན་གཅིག་ལ་བཞུགས་པའི་དེ་བཞིན་གཤེགས་པའི་སྐུས་ཡོངས་སུ་ཁྱབ་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་ནམ་མཁའི་རང་བཞིན་དུ་ཡང་དག་པར་བསྟན་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་སངས་རྒྱས་ཀྱི་རྒྱན་གྱིས་བརྒྱན་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་བྱང་ཆུབ་སེམས་དཔའི་ལུས་ཀྱིས་རྒྱས་པར་དགང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་སྐྲའི་སྦུབས་གཅིག་ཏུ་དགོད་པར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་སེམས་ཅན་གཅིག་གི་ལུས་ཀྱི་རྒྱུད་ཀྱི་རྗེས་སུ་འབྲང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་དེ་བཞིན་གཤེགས་པ་གཅིག་གི་བྱང་ཆུབ་ཀྱི་ཤིང་དང་། དེ་བཞིན་གཤེགས་པ་གཅིག་གི་
སྙིང་པོ་བྱང་ཆུབ་ཀྱིས་ཡོངས་སུ་རྒྱས་པར་གང་བར་མོས་པ་ལ་འཇུག་པ་དང་། འཇིག་རྟེན་གྱི་ཁམས་ཐམས་ཅད་དུ་སྒྲའི་དབྱངས་གཅིག་གིས་གོ་བར་བྱ་བ་དང་། སེམས་ཅན་གྱི་ཁམས་ཐམས་ཅད་ཀྱི་སྒྲ་སྐད་རྣམ་པ་ཐ་དད་པ་ལ་འཇུག་པས་ཚིམ་པར་བྱ་བར་མོས་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འཇིག་རྟེན་གྱི་ཁམས་སུ་མོས་པ་ལ་འཇུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སངས་རྒྱས་ཀྱི་ཞིང་ལ་མོས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་ཁམས་སུ་མོས་པ་ལ་འཇུག་པ་སྟེ། བཅུ་གང་ཞེ་ན་འདི་ལྟར་སེམས་ཅན་གྱི་ཁམས་ཐམས་ཅད་རང་བཞིན་གྱིས་ལུས་མེད་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་སེམས་ཅན་གཅིག་གི་ལུས་ཀྱི་རྒྱུད་དུ་འདུས་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བྱང་ཆུབ་སེམས་དཔའི་ཁོང་དུ་འདུས་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་སྐུར་འདུས་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་དུ་སེམས་ཅན་གཅིག་གི་ལུས་ཡོངས་སུ་ཞུགས་པར་འགྱུར་བར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་སངས་རྒྱས་ཀྱི་ཆོས་ཀྱི་སྣོད་དུ་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་དང་། ཅི་འདོད་པ་དང་། གར་མོས་པའི་གཟུགས་དང་། ཁ་དོག་དང་ཆ་བྱད་དུ་མངོན་པར་བལྟ་བར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་ཉན་ཐོས་དང་། རང་སངས་རྒྱས་ཀྱི་གཟུགས་དང་ཁ་དོག་དང་ཆ་བྱད་དུ་ཡོངས་སུ་བསྟན་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་བྱང་
ཆུབ་སེམས་དཔའི་ཡོན་ཏན་གྱིས་ཡོངས་སུ་བརྒྱན་པར་བྱིན་གྱིས་བརླབ་ཅིང་ཡོངས་སུ་བསྟན་པར་མོས་པ་ལ་འཇུག་པ་དང་། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་སྐུ་གཟུགས་དང་། མཚན་དང་དཔེ་བྱད་བཟང་པོ་དང་། གཟུགས་ཀྱི་སྐུ་སྣ་ཚོགས་ཀྱི་སྤྱོད་ལམ་དང་། ཚུལ་དང་སྤྱོད་པ་ཡོངས་སུ་བསྟན་ཅིང་གཞན་གྱིས་རིག་པར་བྱ་བར་མོས་པ་ལ་འཇུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེམས་ཅན་གྱི་ཁམས་སུ་མོས་པ་ལ་འཇུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགྱེས་པ་དང་། ཁྱུ་མཆོག་གི་མཐུ་ཕྱུང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བག་ཆགས་ཏེ། བཅུ་གང་ཞེ་ན་འདི་ལྟར་བྱང་ཆུབ་ཀྱི་སེམས་ཀྱི་བག་ཆགས་དང་། དགེ་བའི་རྩ་བའི་བག་ཆགས་དང་། སེམས་ཅན་ཡོངས་སུ་སྨིན་པར་བྱ་བའི་བག་ཆགས་དང་། སངས་རྒྱས་བལྟ་བའི་བག་ཆགས་དང་། འཇིག་རྟེན་གྱི་ཁམས་ཡོངས་སུ་དག་པར་སྐྱེ་བའི་བག་ཆགས་དང་། སྤྱོད་པའི་བག་ཆགས་དང་། སྨོན་ལམ་གྱི་བག་ཆགས་དང་། ཕ་རོལ་ཏུ་ཕྱིན་པའི་བག་ཆགས་དང་། ཆོས་མཉམ་པ་ཉིད་ངེས་པར་རྟོགས་པའི་བག་ཆགས་དང་། སྤྱོད་པ་རྣམ་པ་ཐ་དད་པའི་བག་ཆགས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བག་ཆགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཉོན་མོངས་པའི་བག་ཆགས་མ་ལུས་པ་སྤངས་ནས། དེ་བཞིན་གཤེགས་པའི་ཡེ་ཤེས་ཆེན་པོའི་བག་ཆགས་ཐུགས་སུ་ཆུད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཉེ་བར་ལེན་པ་སྟེ། ཉེ་བར་ལེན་པ་དེ་དག་གིས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པའོ། །བཅུ་གང་ཞེ་ན་འདི་ལྟར་ཡོངས་སུ་སྨིན་པའི་མཐར་ཕྱིན་
པར་བྱ་བའི་ཕྱིར་སེམས་ཅན་གྱི་ཁམས་ཉེ་བར་ལེན་པ་དང་། ལྷག་མ་མེད་པར་ཡོངས་སུ་དག་པར་བྱ་བའི་ཕྱིར་འཇིག་རྟེན་གྱི་ཁམས་ཉེ་བར་ལེན་པ་དང་། བྱང་ཆུབ་སེམས་དཔའི་སྤྱོད་པས་མཉེས་པར་བྱ་བའི་ཕྱིར་དེ་བཞིན་གཤེགས་པ་ཉེ་བར་ལེན་པ་དང་། མཚན་དང་དཔེ་བྱད་བཟང་པོ་དང་། སངས་རྒྱས་ཀྱི་ཡོན་ཏན་ཡང་དག་པར་བསྡུ་བའི་ཕྱིར་དགེ་བའི་རྩ་བ་ཉེ་བར་ལེན་པ་དང་། སེམས་ཅན་ཐམས་ཅད་ཀྱི་སྡུག་བསྔལ་གྱི་ཕུང་པོ་ཉེ་བར་བླངས་ཏེ། རབ་ཏུ་ཞི་བར་བྱ་བའི་ཕྱིར་སྙིང་རྗེ་ཆེན་པོ་ཉེ་བར་ལེན་པ་དང་། སེམས་ཅན་ཐམས་ཅད་ཐམས་ཅད་མཁྱེན་པའི་བདེ་བ་ལ་རབ་ཏུ་དགོད་པའི་ཕྱིར་བྱམས་པ་ཆེན་པོ་ཉེ་བར་ལེན་པ་དང་། བྱང་ཆུབ་སེམས་དཔའི་རྒྱན་ཡང་དག་པར་བསྡུ་བའི་ཕྱིར་ཕ་རོལ་ཏུ་ཕྱིན་པ་ཉེ་བར་ལེན་པ་དང་། སྒོ་ཐམས་ཅད་ཡོངས་སུ་བསྟན་པའི་ཕྱིར་ཐབས་མཁས་པ་ཉེ་བར་ལེན་པ་དང་། ཆགས་པ་མེད་པའི་ཡེ་ཤེས་ཀྱི་ཕྱིར་བྱང་ཆུབ་ཉེ་བར་ལེན་པ་དང་། མདོར་ན་ཐམས་ཅད་མངོན་སུམ་དུ་ཤེས་པས་མངོན་པར་ཤེས་པར་བྱ་བའི་ཕྱིར། བྱང་ཆུབ་སེམས་དཔའི་ཆོས་ཐམས་ཅད་ཉེ་བར་ལེན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཉེ་བར་ལེན་པ་སྟེ། ཉེ་བར་ལེན་པ་དེ་དག་གིས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་ཅིང་། དེ་བཞིན་གཤེགས་པ་ཐམས་ཅད་ཀྱི་ཉེ་བར་ལེན་པ་མེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ནན་ཏན་ཏེ། བཅུ་གང་ཞེ་ན་འདི་ལྟར་ཕ་རོལ་ཏུ་ཕྱིན་པའི་ནན་ཏན་དང་། བསླབ་པའི་ནན་ཏན་དང་། ཡེ་ཤེས་ཀྱི་ནན་ཏན་དང་། དོན་གྱི་ནན་ཏན་དང་། ཆོས་ཀྱི་ནན་ཏན་དང་། མངོན་པར་བསྒྲུབ་པའི་ནན་ཏན་དང་། ཡང་དག་པར་བསྟན་པའི་ནན་ཏན་དང་། སྤྱོད་པས་མི་སྐྱོ་བའི་ནན་ཏན་དང་། མངོན་པར་རྫོགས་པར་བྱང་ཆུབ་པར་བྱ་བའི་ནན་ཏན་དང་། ཆོས་ཀྱི་འཁོར་ལོ་བསྐོར་བའི་ནན་ཏན་ནོ། །ཀྱེ་རྒྱལ་བའི་
སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ནན་ཏན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ཀྱི་ནན་ཏན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འགྲུབ་པ་སྟེ། བཅུ་གང་ཞེ་ན་འདི་ལྟར་དགེ་བའི་བཤེས་གཉེན་ལ་སེམས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་བཀའ་ལ་མངོན་པར་ཡིད་ཆེས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དམ་པའི་ཆོས་ལ་མི་སྤོང་བ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཚད་མེད་པའི་སེམས་ཀྱིས་སངས་རྒྱས་སུ་དགེ་བའི་རྩ་བ་ཡོངས་སུ་བསྔོ་བ་མི་ཟད་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་ཡུལ་ས་མཚམས་མེད་པར་ཡིད་ཆེས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །འཇིག་རྟེན་གྱི་ཁམས་ཀྱི་ཡུལ་ལ་འཇུག་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཆོས་ཀྱི་དབྱིངས་ཀྱི་ཡུལ་ལས་མི་གཡོ་བ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །བདུད་ཀྱི་ཡུལ་ལས་གྱེན་དུ་སྤགས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །སངས་རྒྱས་ཐམས་ཅད་ཀྱི་རྗེས་སུ་དྲན་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །དེ་བཞིན་གཤེགས་པའི་སྟོབས་བཅུའི་ཡུལ་ལ་མངོན་པར་མོས་པ་ནི་སངས་རྒྱས་ཀྱི་ཆོས་རྣམས་འགྲུབ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འགྲུབ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་འགྲུབ་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལས་གོལ་བའི་ལམ་སྟེ། དེ་དག་ནི་བྱང་ཆུབ་སེམས་དཔས་ཡོངས་སུ་སྤང་བར་བྱ་བ་དག་གོ །བཅུ་གང་ཞེ་ན་འདི་ལྟར་དགེ་བའི་བཤེས་གཉེན་ལ་བརྙས་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །འཁོར་
བའི་སྡུག་བསྔལ་གྱིས་འཇིགས་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །བྱང་ཆུབ་སེམས་དཔའི་སྤྱོད་པས་སྐྱོ་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །འཇིག་རྟེན་གྱི་ཁམས་ན་གནས་པས་ཡོངས་སུ་སྐྱོ་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །མཉམ་པར་གཞག་པ་ལ་གནས་སུ་བྱེད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །དགེ་བའི་རྩ་བ་ལ་ཆགས་ཤིང་ཞེན་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །དམ་པའི་ཆོས་སྤོང་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །བྱང་ཆུབ་སེམས་དཔའི་སྤྱོད་པ་ལས་དཔར་བས་འབྱེད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །ཉན་ཐོས་དང་རང་སངས་རྒྱས་སུ་འདོད་པ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །བྱང་ཆུབ་སེམས་དཔའ་ལ་ཞེ་སྡང་ཞིང་ཁོང་ཁྲོ་བ་ནི་སངས་རྒྱས་ཀྱི་ཆོས་ལས་གོལ་བའི་ལམ་མོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལས་གོལ་བའི་ལམ་རྣམས་ཏེ། དེ་དག་ནི་བྱང་ཆུབ་སེམས་དཔས་ཡོངས་སུ་སྤང་བར་བྱའོ། །དེ་དག་ཡོངས་སུ་སྤངས་ནས་དེའི་འོག་ཏུ་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་སྐྱོན་མེད་པ་ཉིད་དུ་འདའ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱོན་མེད་པ་སྟེ། བཅུ་གང་ཞེ་ན་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའང་མངོན་པར་བསྒྲུབ་ལ་སེམས་ཅན་ཐམས་ཅད་ལའང་རྣམ་པར་ལྟ་བ་དང་། ལྟ་བའི་རྣམ་པ་ཐམས་ཅད་དང་ཡང་བྲལ་ལ། ལྟ་བའི་བཅིང་བས་གླགས་པ་ཐམས་ཅད་ཀྱང་རབ་ཏུ་འབྲལ་བ་དང་། མཚན་མ་ཐམས་ཅད་ཀྱི་ཡིད་ལ་མི་བྱེད་ལ་མཚན་མ་ལ་མངོན་པར་དགའ་བའི་སེམས་ཅན་ཐམས་ཅད་ཀྱང་མི་འདོར་བ་དང་། ཁམས་གསུམ་པ་ཐམས་ཅད་ལས་ཡང་དག་པར་འདས་ཏེ་འཇིག་རྟེན་གྱི་ཁམས་ཀྱི་གནས་ཐམས་ཅད་ན་གནས་པ་དང་། ཉོན་མོངས་པ་རྣམས་ཀྱང་རྣམ་པར་བཟློག་ལ།
སེམས་ཅན་རྣམས་དང་ཡང་ཕྲད་ཅིང་འགྲོགས་པ་དང་། ཆོས་རྣམས་ལ་ཡང་འདོད་ཆགས་དང་བྲལ་ལ། སེམས་ཅན་ཐམས་ཅད་ལ་ཡང་སྙིང་རྗེ་ཆེན་པོས་བྱམས་པ་དང་། དངོས་པོ་ཐམས་ཅད་ཀྱིས་ཀྱང་དབེན་ལ་འཁོར་ཐམས་ཅད་ཀྱང་ཡོངས་སུ་སྟོན་པ་དང་། འཇིག་རྟེན་གྱི་ཁམས་ལས་ཀྱང་གྱེན་དུ་འཕགས་ལ་སྐྱེ་ཞིང་ཤི་འཕོ་པའི་སྤྱོད་པ་ཡང་མངོན་པར་བསྒྲུབ་པ་དང་། འཇིག་རྟེན་གྱི་ཆོས་ཐམས་ཅད་ཀྱིས་ཀྱང་མ་གོས་ལ། འཇིག་རྟེན་གྱི་བྱ་བ་ཐམས་ཅད་ལའང་ཐོགས་པ་མེད་པ་དང་། སངས་རྒྱས་ཀྱི་བྱང་ཆུབ་ཀྱང་མངོན་དུ་གྱུར་ལ་སྤྱོད་པ་དང་སྨོན་ལམ་ཆེན་པོའི་ཉི་མ་ཡང་རྒྱུན་མི་གཅོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྐྱོན་མེད་པ། འཕགས་པ་འཇིག་རྟེན་ལས་འདས་པ། འགྲོ་བ་ཐམས་ཅད་དང་། ཐུན་མོང་མ་ཡིན་པ་ཉན་ཐོས་དང་། རང་སངས་རྒྱས་ཐམས་ཅད་དང་མ་འདྲེས་པ་སྟེ། སྐྱོན་མེད་པ་དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་ཆོས་ངེས་པ་རྣམ་པར་འཐོབ་པར་འགྱུར་བ་དག་གོ ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་ངེས་པ་འཐོབ་པ་སྟེ། བཅུ་གང་ཞེ་ན་འདི་ལྟར་དེ་བཞིན་གཤེགས་པའི་རིགས་སུ་སྐྱེས་པ་ཡིན། སངས་རྒྱས་ཀྱི་ཡུལ་ལ་གནས་པ་ཡིན། བྱང་ཆུབ་སེམས་དཔའི་ལས་ལ་ཞུགས་པ་ཡིན། ཕ་རོལ་ཏུ་ཕྱིན་པ་ལ་ནན་ཏན་དུ་བྱེད་པ་ཡིན། སངས་རྒྱས་ཀྱི་རྒྱུད་ནས་བྱུང་བ་ཡིན། དེ་བཞིན་གཤེགས་པའི་གདུང་ལས་སྐྱེས་པ་ཡིན། སངས་རྒྱས་ཀྱི་སྟོབས་ལ་གནས་པ་ཡིན། དེ་བཞིན་གཤེགས་པའི་བྱང་ཆུབ་ཏུ་རྗེས་སུ་སོང་བ་ཡིན། སངས་རྒྱས་ཐམས་ཅད་དང་སྐུ་དང་རང་བཞིན་གཅིག་པ་ཡིན། དེ་བཞིན་གཤེགས་པ་ཐམས་ཅད་ཀྱི་རྣམ་པར་སྤྱོད་པ་དང་མི་གཉིས་པ་ཡིན། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ཆོས་ངེས་པར་འཐོབ་པ་
སྟེ། དེ་དག་ནི་སྐྱོན་མེད་པ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་འཐོབ་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལ་འབྱུང་བའི་ལམ་སྟེ། བཅུ་གང་ཞེ་ན་འདི་ལྟར་དགེ་བའི་བཤེས་གཉེན་རྣམས་དང་རྒྱུད་ཀྱི་ཚུལ་གཅིག་ཏུ་འགྱུར་བ་དང་། དགེ་བའི་རྩ་བ་ཐུན་མོང་དུ་མོས་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །དེ་བཞིན་གཤེགས་པ་ཐམས་ཅད་ཀྱི་རྣམ་པར་འཕྲུལ་པ་དང་། ཚུལ་མཐུན་ཞིང་སྨོན་ལམ་ཆེན་པོ་ལ་དབུགས་ཕྱིན་པ་ཐོབ་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སེམས་རྒྱ་ཆེན་པོས་རང་གི་དགེ་བའི་རྩ་བའི་གོ་འབྱེད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ལས་ཇི་ལྟར་བྱས་པ་ཆུད་མི་ཟ་བས་བསྐལ་པ་འགྲངས་པ་ཐམས་ཅད་དུ་མི་སྐྱོ་བ་ནི། སངས་རྒྱས་ཀྱི་ཆོས་ལས་འབྱུང་བའི་ལམ་མོ། །ཕྱི་མའི་མཐའི་མུར་ཐུག་པ་ཐམས་ཅད་དུ་ཡོངས་སུ་འཛིན་པས། འཇིག་རྟེན་གྱི་ཁམས་གྲངས་མེད་པར་གནས་པར་བྱ་བ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་ལ་མཁས་པས་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སྙིང་རྗེ་ཆེན་པོ་བསྐྱེད་དེ་སེམས་ཚད་མེད་པར་བྱེད་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ནམ་མཁའི་དབྱིངས་ཐམས་ཅད་སེམས་བསྐྱེད་པ་གཅིག་གིས་རྒྱས་པར་དགང་བས་སྤྱོད་པ་དང་སྨོན་ལམ་ཆེན་པོའི་ཁྱད་པར་ལ་འཇུག་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །སྔོན་མངོན་པར་བསྒྲུབས་པ་ཆུད་མི་ཟ་བར་དེ་བཞིན་གཤེགས་པའི་རིགས་ཡང་དག་པར་འཛིན་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །འགྲོ་བ་ཐམས་ཅད་ལ་བྱང་ཆུབ་ཀྱི་སེམས་ཡོངས་སུ་སྟོན་ཅིང་། བྱང་ཆུབ་ཏུ་སེམས་བསྐྱེད་པ་རྣམས་ཀྱི་དགེ་བའི་རྩ་བ་ཐམས་ཅད་ཉེ་བར་སྟོན་པ་ནི་སངས་རྒྱས་ཀྱི་ཆོས་ལ་འབྱུང་བའི་ལམ་མོ། །ཀྱེ་རྒྱལ་བའི་
སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་ཆོས་ལ་འབྱུང་བའི་ལམ་སྟེ། དེ་དག་གིས་བྱུང་བའི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་བཅུ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་འཐོབ་པ་སྟེ། བཅུ་གང་ཞེ་ན། འདི་ལྟར་བྱང་ཆུབ་ཀྱི་ཡེ་ཤེས་ཀྱི་ལུས་དང་ལྡན་པས་བྱང་ཆུབ་སེམས་དཔའ་ཞེས་བྱ་བ་ཡིན། ཐེག་པ་ཆེན་པོ་ལ་རབ་ཏུ་གནས་པའི་ཕྱིར་སེམས་དཔའ་ཆེན་པོ་ཞེས་བྱ་བ་ཡིན། ཆོས་ཀྱི་དམ་པ་མངོན་པར་རྟོགས་པས་དམ་པའི་སེམས་དཔའ་ཞེས་བྱ་བ་ཡིན། མཆོག་གི་ཆོས་མངོན་པར་འཚང་རྒྱ་བས་མཆོག་གི་སེམས་དཔའ་ཞེས་བྱ་བ་ཡིན། ཡེ་ཤེས་ཀྱི་ཁྱད་པར་རབ་དང་ལྡན་པས་རབ་ཀྱི་སེམས་དཔའ་ཞེས་བྱ་བ་ཡིན། ཕུལ་དུ་བརྩོན་འགྲུས་རྩོམ་པས་ཕུལ་གྱི་སེམས་དཔའ་ཞེས་བྱ་བ་ཡིན། གོང་ན་མེད་པའི་ཆོས་ཡང་དག་པར་སྟོན་པས་བླ་ན་མེད་པའི་སེམས་དཔའ་ཞེས་བྱ་བ་ཡིན། སྟོབས་བཅུའི་ཡེ་ཤེས་ཡངས་པ་དང་ལྡན་པས་སྟོབས་ཀྱི་སེམས་དཔའ་ཞེས་བྱ་བ་ཡིན། འགྲོ་བ་ཐམས་ཅད་ན་དཔེ་མེད་པས་མི་མཉམ་མི་འདྲ་བའི་སེམས་དཔའ་ཞེས་བྱ་བ་ཡིན། ནམ་འདོད་པའི་སེམས་ཀྱི་སྐད་ཅིག་ལ་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བས་བསམ་གྱིས་མི་ཁྱབ་པའི་སེམས་དཔའ་ཞེས་བྱ་བ་ཡིན། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྐྱེས་བུ་དམ་པའི་མིང་འཐོབ་པ་རྣམས་སོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་སྟེ། བཅུ་གང་ཞེ་ན་འདི་ལྟར་གཅིག་པུ་གྲོགས་མེད་པར་བྱང་ཆུབ་ཀྱི་སེམས་མི་གཏོང་བས་བྱང་ཆུབ་སེམས་དཔའ་རྣམས་ཀྱི་ལམ་གཅིག་ལ་རྟེན་པ་དང་། ཐབས་དང་ཤེས་རབ་ཀྱིས་མངོན་པར་བསྒྲུབ་པས། བྱང་ཆུབ་སེམས་དཔའ་རྣམས་ཀྱི་ལམ་ཡན་ལག་གཉིས་པ་དང་། སྟོང་པ་ཉིད་ཀྱི་སྦྱོར་བ་དང་། མཚན་མ་མེད་པའི་མཐའི་རྩེ་
མོར་ཕྱིན་པ་དང་། སྨོན་པ་མེད་པའི་ཕྱིར་ཁམས་གསུམ་དང་མི་འདྲེ་བས་བྱང་ཆུབ་སེམས་དཔའི་ལམ་རྣམ་པ་གསུམ་པ་དང་། ཉེས་པ་བཤགས་པའི་ཚུལ་དང་། བསོད་ནམས་ཐམས་ཅད་ལ་རྗེས་སུ་ཡི་རང་བ་དང་། དེ་བཞིན་གཤེགས་པ་ལ་གསོལ་བ་གདབ་པའི་རིམ་གྲོ་རྒྱུན་མི་གཅོད་པ་དང་། ཡོངས་སུ་བསྔོ་བ་ལ་མཁས་པས་ཤིན་ཏུ་བསྔོ་བའི་ཕྱིར་བྱང་ཆུབ་སེམས་དཔའི་ལམ་སྤྱོད་པ་བཞིས་སྨོས་པ་དང་དད་པའི་རྩ་བ་ཚུགས་ཏེ། ཤིན་ཏུ་བརྟན་པ་དང་། བརྩོན་འགྲུས་ཆེན་པོ་ལས་ཕྱིར་མི་ལྡོག་པ་དང་། དྲན་པ་རྩེ་གཅིག་པ་དང་ཏིང་ངེ་འཛིན་གྱི་ཚུལ་མ་འཁྲུགས་པ་དང་། རབ་ཏུ་རྟོགས་པའི་ཤེས་རབ་ཀྱི་སྤྱོད་ཡུལ་ལ་མཁས་པས། བྱང་ཆུབ་སེམས་དཔའ་རྣམས་ཀྱི་ལམ་དབང་པོ་ལྔས་རྣམ་པར་སྤེལ་བ་དང་། འདི་ལྟ་སྟེ་ལྷའི་མིག་གིས་འཇིག་རྟེན་གྱི་ཁམས་ཐམས་ཅད་ཀྱི་གཟུགས་ཀྱི་རྣམ་པ་ཐམས་ཅད་དང་། སེམས་ཅན་གྱི་ཤི་འཕོ་དང་། སྐྱེ་བ་ཐམས་ཅད་ཡོངས་སུ་མཐོང་བའི་རང་བཞིན་དང་ལྡན་པ་དང་། ལྷའི་རྣ་བས་དེ་བཞིན་གཤེགས་པ་ཐམས་ཅད་ཀྱི་ཆོས་བསྟན་པ་མཉན་ཅིང་དྲན་པར་བྱ་བ་དང་། ཡོངས་སུ་གཟུང་བར་བྱ་བས་སེམས་ཅན་ཕ་རོལ་གྱི་དབང་པོ་ལ་ཡང་དག་པར་ཕྱིན་པར་བྱེད་པ་དང་བདག་གི་སེམས་ཆགས་པ་མེད་པས། ཕ་རོལ་གྱི་སེམས་ཤེས་པས་མཐོང་བ་ལ་དབང་བསྒྱུར་བ་མངོན་པར་བསྒྲུབ་པ་དང་། སྔོན་གྱི་གནས་རྗེས་སུ་དྲན་པས་བསྐལ་པ་འགྲངས་པ་ཐམས་ཅད་རྗེས་སུ་དྲན་ཞིང་དགེ་བའི་རྩ་བ་རྣམ་པར་འཕེལ་བར་བྱེད་པ་དང་། རྫུ་འཕྲུལ་དང་རྣམ་པར་འཕྲུལ་པ་ཆེན་པོ་བསྒྲུབས་པས་སེམས་ཅན་ཇི་ལྟར་འདུལ་བ་བཞིན་དུ་ཆོ་འཕྲུལ་སྣ་ཚོགས་ཡོངས་སུ་སྟོན་ཅིང་། སེམས་ཅན་ཐམས་ཅད་ལ་ཆོས་བརྗོད་པ་དང་། ཟག་པ་ཟད་པའི་ཡེ་ཤེས་དང་ལྡན་པས་ཡང་དག་པའི་མཐའ་མངོན་སུམ་དུ་མཐོང་ཞིང་བྱང་ཆུབ་སེམས་དཔའི་སྤྱོད་པ་བསྒྲུབ་པ་རྒྱུན་མི་གཅོད་པས། བྱང་ཆུབ་སེམས་དཔའ་རྣམས་ཀྱི་ལམ་མངོན་པར་ཤེས་པ་དྲུག་གིས་རྣམ་པར་འཕྲུལ་བ་དང་།
འདི་ལྟ་སྟེ། སེམས་ཅན་གྱི་གཙོ་བོ་མཐའ་ཡས་པ་ཐམས་ཅད་སྐྲའི་རྩེ་མོ་གཅིག་ལ་བཞུགས་པར་མཐོང་སྟེ། ཡང་དག་པར་ཡོངས་སུ་གཟུང་ཞིང་སེམས་ཅན་གྱི་བསམ་པས་རྣམ་པར་རིག་པར་བྱ་བ་ལ་འཇུག་པས་སངས་རྒྱས་རྗེས་སུ་དྲན་པ་དང་། དེ་བཞིན་གཤེགས་པ་གཅིག་གི་འཁོར་གྱི་དཀྱིལ་འཁོར་ནས་མ་གཡོས་པར་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དུ་མངོན་དུ་ཞལ་ནས་ཆོས་བསྟན་པ་བསྒྲགས་པ་མི་ཟད་པས་འགྲོ་བ་ཐམས་ཅད་ཀྱི་བསམ་པ་དང་། དབང་པོ་ཇི་ལྟ་བ་བཞིན་དུ་རྣམ་པར་རིག་པར་བྱ་བ་ལ་འཇུག་པས་ཆོས་རྗེས་སུ་དྲན་པ་དང་། ཕྱིར་མི་ལྡོག་པའི་བྱང་ཆུབ་སེམས་དཔའི་ཚོགས་མཐོང་བ་དང་མི་འབྲལ་ཞིང་འགྲོ་བ་ཐམས་ཅད་ལ་བྱང་ཆུབ་སེམས་དཔའི་ལུས་ཡོངས་སུ་སྟོན་པས་དགེ་འདུན་རྗེས་སུ་དྲན་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྦྱིན་པ་ཡོངས་སུ་གཏོང་བ་ལ་ཡང་དག་པར་གཞོལ་ཞིང་གཏོང་བ་ཆེན་པོས་རྣམ་པར་སྤེལ་བ་ཡིད་ལ་བྱེད་པས་གཏོང་བ་རྗེས་སུ་དྲན་པ་དང་། བྱང་ཆུབ་ཀྱི་སེམས་དང་མི་འབྲལ་བས་དགེ་བའི་རྩ་བ་ཐམས་ཅད་འགྲོ་བ་ཐམས་ཅད་ལ་སྟོབས་པས། ཚུལ་ཁྲིམས་རྗེས་སུ་དྲན་པ་དང་། དགའ་ལྡན་གྱི་ཕོ་བྲང་གི་མཆོག་ན་བྱང་ཆུབ་སེམས་དཔའ་ཚེ་གཅིག་གིས་ཐོགས་པ་བཞུགས་པ་རྗེས་སུ་དྲན་པས་ལྷ་རྗེས་སུ་དྲན་པ་དང་། ཐབས་ཀྱི་ཡེ་ཤེས་ཆེན་པོས་འགྲོ་བ་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་རྒྱུན་མི་འཆད་པ་ལ་ཞུགས་ཏེ། སེམས་ཅན་རྗེས་སུ་དྲན་པའི་ཕྱིར་དགེ་འདུན་རྗེས་སུ་དྲན་པས་བྱང་ཆུབ་སེམས་དཔའི་ལམ་རྗེས་སུ་དྲན་པ་བདུན་གྱིས་མངོན་པར་བསྒྲུབས་པ་དང་། འདི་ལྟ་སྟེ་ལོག་པར་ལྟ་བ་ཐམས་ཅད་ཡོངས་སུ་སྤངས་པས་ཡང་དག་པའི་ལྟ་བའི་ལམ་དུ་འབྱུང་བ་དང་། རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོགས་པ་དང་བྲལ་བས་ཐམས་ཅད་མཁྱེན་པ་ཉིད་དང་མཐུན་ཞིང་དོན་ཡོད་ལ་ཡིད་ལ་བྱ་བ་མེད་པས་བྱུང་བ་དང་། ངག་གི་ཉེས་པ་བཞི་དང་བྲལ་བས་འཕགས་པ་དང་མཐུན་
ཞིང་ཡང་དག་པའི་ངག་རབ་ཏུ་བརྗོད་པ་དང་། ལུས་ཀྱི་ལས་ཐམས་ཅད་སེམས་ཅན་ཉེ་བར་འཚོ་བས་འགྲོ་བ་ཐམས་ཅད་ཐོགས་པ་མེད་པར་ཡོངས་སུ་སྨིན་པར་བྱེད་ཅིང་འདུལ་བས་མངོན་པར་བསྒྲུབས་པ་དང་། འཕགས་པའི་རིགས་ལ་རབ་ཏུ་གནས་ཤིང་སྦྱངས་པའི་ཡོན་ཏན་གྱིས་སྡོམ་པ་བྱང་ཆུབ་ཀྱི་ལམ་དང་ལྡན་པའི་སྤྱོད་ལམ་དང་། སྤྱོད་པ་དང་ཚུལ་ལ་རབ་ཏུ་གནས་ཤིང་ཐམས་ཅད་དུ་ཁ་ན་མ་ཐོ་བ་མེད་པས་ཡང་དག་པའི་འཚོ་བ་དང་། བྱང་ཆུབ་སེམས་དཔའ་ཐམས་ཅད་ཀྱི་བརྟུལ་ཞུགས་དང་། དཀའ་ཐུབ་ཀྱིས་ཀུན་ནས་གདུངས་པ་དང་། ཡོངས་སུ་གདུངས་པ་ཡང་དག་པར་སྟོན་ཅིང་། དེ་བཞིན་གཤེགས་པའི་སྟོབས་བཅུའི་རང་བཞིན་ཐོགས་པ་མེད་པ་དང་ལྡན་པའི་ཕྱིར་ཡང་དག་པའི་རྩོལ་བ་དང་། སྒྲ་ཐམས་ཅད་འཛིན་ཅིང་དྲན་པ་འཇིག་རྟེན་གྱི་རྣམ་པར་འཁྲུག་པ་ཐམས་ཅད་ཀྱིས་བར་དུ་མི་ཆོད་པའི་ཕྱིར་ཡང་དག་པའི་དྲན་པ་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་ཏིང་ངེ་འཛིན་གཅིག་གིས་ཏིང་ངེ་འཛིན་ཐམས་ཅད་མངོན་པར་བསྒྲུབ་པ་ལ་མཁས་པའི་ཕྱིར་ཡང་དག་པའི་ཏིང་ངེ་འཛིན་དང་ལྡན་པས་བྱང་ཆུབ་སེམས་དཔའ་རྣམས་ཀྱི་ལམ་ནི་འཕགས་པའི་ལམ་གྱི་ཡན་ལག་བརྒྱད་དང་ལྡན་ཞིང་བྱང་ཆུབ་དང་མཐུན་པར་གྱུར་པ་དང་། འདི་ལྟ་སྟེ་འདོད་པ་དང་གནོད་སེམས་དང་། འཚོ་བ་མེད་པ་དང་ངག་གི་ལས་ཐམས་ཅད་ཀྱིས་མ་བསྒྲིབས་པར་ཆོས་སྟོན་པའི་ཚུལ་དང་ལྡན་པས་རྣམ་པར་རྟོག་པ་དང་། རྣམ་པར་དཔྱོད་པ་གསལ་བ་དང་། ཐམས་ཅད་མཁྱེན་པའི་ཡེ་ཤེས་ལ་སེམས་ཅན་ཡོངས་སུ་སྨིན་པར་བྱ་བའི་བསམ་པ་ཡོངས་སུ་མི་གཏོང་ཞིང་དགའ་བ་ཟིང་ཟིང་པོ་དང་བྲལ་བ་དང་། དེ་བཞིན་གཤེགས་པ་ཐམས་ཅད་མཐོང་བས་དགའ་བའི་ཡིད་བདེ་བ་ཡང་རྒྱུན་མི་འཆད་ཅིང་འཇིག་རྟེན་པའི་བདེ་བ་དང་། སྡུག་བསྔལ་དང་བྲལ་བས་འཕགས་པ་འཇིག་རྟེན་ལས་འདས་པའི་བྱང་ཆུབ་སེམས་དཔའི་ལམ་དང་མཐུན་པ་དང་། མི་གཡོ་བའི་གཟུགས་
མེད་པའི་སྙོམས་པར་ཞུགས་པས་མངོན་པར་བསྒྲུབས་པ་དང་། འདོད་པའི་ཁམས་དང་གཟུགས་ཀྱི་ཁམས་སུ་སྐྱེས་པ་ལས་མ་གཡོས་པར་འདུ་ཤེས་པ་དང་། ཚོར་བ་ཐམས་ཅད་འགོག་པའི་སྙོམས་པར་འཇུག་པས་མངོན་པར་བསྒྲུབས་ཤིང་། བྱང་ཆུབ་སེམས་དཔའི་སྤྱོད་པ་བསྒྲུབ་པ་རྒྱུན་མི་གཅོད་པས། བྱང་ཆུབ་སེམས་དཔའ་རྣམས་ཀྱི་ལམ་མཐར་གྱིས་སྤྱོད་ཅིང་སྙོམས་པར་འཇུག་པ་དགུས་མངོན་པར་བསྒྲུབས་པ་དང་། འདི་ལྟ་སྟེ་གནས་དང་གནས་མ་ཡིན་པ་ལ་མཁས་པའི་ཡེ་ཤེས་དང་། ལྡན་པ་དང་། འགྲོ་བ་ཐམས་ཅད་ཀྱི་འདས་པ་དང་། མ་འོངས་པ་དང་། ད་ལྟར་བྱུང་བའི་ལས་དང་། རྒྱུ་དང་རྣམ་པར་སྨིན་པ་ཡོངས་སུ་ལེན་པ་ཤིན་ཏུ་རྟོགས་པ་དང་། དབང་པོ་ཇི་ལྟ་བ་བཞིན་དུ་ཆོས་སྟོན་ཅིང་གོ་བར་བྱེད་པས་སེམས་ཅན་གྱི་ཁམས་ཐམས་ཅད་ཀྱི་དབང་པོ་རབ་དང་ཐ་མ་ཤེས་པའི་ཡེ་ཤེས་ཀྱིས་ཤིན་ཏུ་བརྟགས་པ་དང་ཁམས་ཐ་དད་པ་དང་ཁམས་དུ་མ་ལ་མཁས་པ་དང་ལྡན་པ་དང་། རབ་དང་ཐ་མ་དང་། འབྲིང་ལ་མོས་པ་རབ་ཏུ་རྟོགས་པའི་ཆོས་ཀྱི་ཚུལ་ལ་ཞུགས་པ་དང་། འགྲོ་བ་ཐམས་ཅད་དང་ཞིང་དང་དུས་དང་། བསྐལ་པ་ཐམས་ཅད་བྱང་ཆུབ་སེམས་དཔའི་ལུས་དང་། གཟུགས་ཀྱིས་རྒྱས་པར་དགང་ཞིང་དེ་བཞིན་གཤེགས་པའི་ཚུལ་ཡོངས་སུ་བསྟན་པས། བྱང་ཆུབ་སེམས་དཔའི་སྤྱོད་པ་བསྒྲུབ་པ་ཡོངས་སུ་མི་གཏོང་བ་དང་། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་དང་། ཀུན་ནས་ཉོན་མོངས་པ་དང་། རྣམ་པར་བྱང་བ་ཐམས་ཅད་ལས་རྣམ་པར་ལྡང་བ་དུས་ལ་བབ་པ་དང་། དུས་ལ་མ་བབ་པ་རྟོགས་པའི་ཡེ་ཤེས་ཀྱི་ཚུལ་གྱིས་མངོན་པར་བསྒྲུབས་པའི་བྱང་ཆུབ་སེམས་དཔའི་རྣམ་པར་ཐར་པ་ལ་རབ་ཏུ་གནས་པ་དང་། སེམས་ཅན་ཐམས་ཅད་ཀྱི་སྐྱེ་བ་དང་། ཤི་འཕོ་བ་དང་ལམ་གྱི་རྒྱུད་དང་། འཕོ་བ་ཐ་དད་པའི་གནས་ལ་མཁས་པ་དང་ལྡན་པ་དང་། དུས་གསུམ་གྱི་བསྐལ་པ་འགྲངས་
པ་ཐམས་ཅད་སྐད་ཅིག་གཅིག་ཏུ་གཟུང་བ་རྟོགས་པའི་ཡེ་ཤེས་སྣང་བས་མངོན་པར་བསྒྲུབས་པ་དང་། འགྲོ་བ་ཐམས་ཅད་ཀྱི་ཉོན་མོངས་པ་དང་བག་ཆགས་དང་བསམ་པ་དང་། བག་ལ་ཉལ་བ་བྱང་བར་ཐོབ་པའི་ཡེ་ཤེས་ཀྱི་ཚུལ་གྱིས་མངོན་པར་བསྒྲུབས་པའི་བྱང་ཆུབ་སེམས་དཔའི་སྤྱོད་པ་བསྒྲུབ་པ་མི་གཏོང་བས་བྱང་ཆུབ་སེམས་དཔའ་རྣམས་ཀྱི་ལམ་ནི་དེ་བཞིན་གཤེགས་པའི་སྟོབས་བཅུ་རབ་ཏུ་རྟོགས་པ་ལ་ཡང་དག་པར་བཏང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་ཐམས་ཅད་ཀྱི་ལམ་ལ་མཁས་པ་བླ་ན་མེད་པ་འཐོབ་བར་འགྱུར་བ་དག་གོ །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྣམས་ཀྱི་ལམ་ནི་ཚད་མེད་པའོ། །ལམ་གྱི་ཚོགས་ནི་ཚད་མེད་པའོ། །ལམ་བསྒོམ་པ་ནི་ཚད་མེད་པའོ། །ལམ་གྱི་རྒྱན་ནི་ཚད་མེད་པའོ། །དེ་ཅིའི་ཕྱིར་ཞེ་ན། ཀྱེ་རྒྱལ་བའི་སྲས་དེ་ལ་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་ཚད་མེད་པ་སྟེ། བཅུ་གང་ཞེ་ན་འདི་ལྟར་ནམ་མཁའི་དབྱིངས་ཚད་མེད་པ་དང་། མཐའ་དང་དབུས་མེད་པའི་ཆོས་ཀྱི་དབྱིངས་ཚད་མེད་པ་དང་། མི་ཟད་པའི་སེམས་ཅན་གྱི་ཁམས་ཚད་མེད་པ་དང་། མུ་མེད་པའི་འཇིག་རྟེན་གྱི་ཁམས་ཚད་མེད་པ་དང་། མི་ཟད་པའི་བསྐལ་པ་འགྲངས་པ་ཚད་མེད་པ་དང་། འགྲོ་བ་ཐམས་ཅད་ཀྱི་ཐ་སྙད་མཐའ་ཡས་ཤིང་ཚད་མེད་པ་དང་། དེ་བཞིན་གཤེགས་པའི་སྐུ་ཚད་མེད་པ་དང་། དེ་བཞིན་གཤེགས་པའི་གསུང་གི་དབྱངས་ཚད་མེད་པ་དང་། དེ་བཞིན་གཤེགས་པའི་སྟོབས་ཚད་མེད་པ་དང་། ཐམས་ཅད་མཁྱེན་པའི་ཡེ་ཤེས་ཚད་མེད་པ་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་ཚད་མེད་པ་རྣམས་སོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། ནམ་མཁའི་དབྱིངས་ཅི་ཙམ་དུ་ཚད་མེད་པ་དེ་ཙམ་དུ་ཚད་མེད་པའི་བྱང་ཆུབ་
སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་ཆོས་ཀྱི་དབྱིངས་མཐའ་དང་དབུས་མེད་པ་དེ་ལྟར་མཐའ་དང་དབུས་མེད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་སེམས་ཅན་གྱི་ཁམས་མི་ཟད་པ་དེ་ལྟར་མི་ཟད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་འཇིག་རྟེན་གྱི་ཁམས་མུ་མེད་པ་དེ་ལྟར་མུ་མེད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་བསྐལ་པ་གྲངས་སུ་བགྲང་ཞིང་བསྟན་པ་མི་ཟད་པ་དེ་ལྟར་འགྲོ་བ་ཐམས་ཅད་མི་ཟད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་འགྲོ་བ་ཐམས་ཅད་ཀྱི་ཐ་སྙད་མཐའ་ཡས་པ་དེ་ལྟར་འགྲོ་བ་ཐམས་ཅད་ཀྱི་སྒྲ་དང་ཐ་སྙད་ལ་འཇུག་པའི་ཡེ་ཤེས་ཀྱིས་མངོན་པར་བསྒྲུབས་པ་མཐའ་ཡས་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་དེ་བཞིན་གཤེགས་པའི་སྐུ་ཚད་མེད་པ་དེ་ལྟར་འགྲོ་བ་དང་ཞིང་དང་དུས་དང་། སེམས་ཅན་དང་བསྐལ་པ་ཐམས་ཅད་དུ་རྒྱས་པར་འགེངས་ཞིང་ཚད་མེད་པར་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་སངས་རྒྱས་ཀྱི་གསུང་གི་དབྱངས་ཚད་མེད་པ་དེ་ལྟར་བྱང་ཆུབ་སེམས་དཔས་ཚིག་གི་ལས་གཅིག་བརྗོད་པས་ཆོས་ཀྱི་དབྱིངས་མ་ལུས་པ་ཐམས་ཅད་དུ་རྒྱས་པར་ཁྱབ་ཅིང་སེམས་ཅན་གྱི་ཁམས་ཐམས་ཅད་གོ་བར་བྱེད་པའི་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་དེ་བཞིན་གཤེགས་པའི་སྟོབས་ཚད་མེད་པ་དེ་ལྟར་དེ་བཞིན་གཤེགས་པའི་སྟོབས་ཀྱིས་བསྟན་པའི་བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཇི་ལྟར་ཐམས་ཅད་མཁྱེན་པའི་ཡེ་ཤེས་ཚད་མེད་པ་དེ་ལྟར་ཚད་མེད་པར་བྱས་ཏེ། བྱང་ཆུབ་སེམས་དཔས་ལམ་གྱི་ཚོགས་ཡོངས་སུ་བསྡུ་བར་བྱའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་གྱི་ཚོགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་
གཤེགས་པའི་ཡེ་ཤེས་མཐའ་དང་དབུས་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་བསྒོམ་པ་སྟེ། བཅུ་གང་ཞེ་ན་འདི་ལྟར་ལུས་དང་ངག་དང་སེམས་ཀྱིས་མི་ལོངས་པ་མེད་པས་བླང་བ་མེད་པ་དང་། དོར་བ་མེད་པ་བསྒོམ་པ་དང་། ཡང་དག་པ་ཇི་ལྟ་བ་བཞིན་དུ་འཇུག་པའི་ཡེ་ཤེས་དང་ལྡན་པས་བསྣན་པ་མེད་པ་དང་། དབྲི་བ་མེད་པར་བསྒོམ་པ་དང་། རང་བཞིན་གྱིས་འཇུག་པ་མེད་པས་བསྒོམ་པ་མེད་པ་དང་། རྣམ་པར་བསྒོམ་པ་མེད་པ་བསྒོམ་པ་དང་། མངོན་པར་ཞེན་པ་ཐམས་ཅད་དང་བྲལ་བས་སྒྱུ་མ་དང་རྨི་ལམ་དང་མིག་ཡོར་དང་། སྒྲ་བརྙན་དང་གཟུགས་བརྙན་དང་སྨིག་རྒྱུ་དང་ཆུའི་ཟླ་བ་ལྟ་བུར་བསྒོམ་པ་དང་། ཁམས་གསུམ་པའི་བསོད་ནམས་བལྟ་བས་བསྩགས་པ་བསྩལ་བའི་ཕྱིར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱ་བ་མེད་པ་བསྒོམ་པ་དང་། ཆོས་སུ་གདགས་པ་རྣམ་པར་དགོད་པ་དང་བྲལ་བས་བརྗོད་དུ་མེད་པ་དང་། བསྟན་དུ་མེད་པ་དང་སྨོས་སུ་མེད་པ་དང་། བཤད་དུ་མེད་པ་བསྒོམ་པ་དང་། ཆོས་ཐམས་ཅད་ལ་ཞུགས་པའི་ཡེ་ཤེས་མངོན་སུམ་དང་ལྡན་པས། ཆོས་ཀྱི་དབྱིངས་ཐ་མི་དད་པ་བསྒོམ་པ་དང་། དེ་ཁོ་ན་ཉིད་དང་། དེ་བཞིན་ཉིད་ནམ་མཁའི་མཐའ་དང་མཉམ་པ་ཁོང་དུ་ཆུད་པས་དེ་བཞིན་ཉིད་དང་། ཡང་དག་པའི་མཐའ་མ་ཉམས་པར་བསྒོམ་པ་དང་། མངོན་པར་འདུ་བྱེད་པའི་སྟོབས་རྒྱུན་མི་འཆད་པའི་ཕྱིར་བྱང་ཆུབ་སེམས་དཔའི་ཡེ་ཤེས་ཡངས་པ་བསྒོམ་པ་དང་། ཆོས་ཐམས་ཅད་མངོན་སུམ་དུ་གྱུར་ཏེ། ཐེ་ཙོམ་མེད་པས་དེ་བཞིན་གཤེགས་པའི་སྟོབས་བཅུ་དང་། མི་བསྙེངས་པ་བཞི་དང་སོ་སོ་ཡང་དག་པར་རིག་པ་དང་། ཐམས་ཅད་མཁྱེན་པའི་ཡེ་ཤེས་དང་མཚུངས་པ་མེད་པ་བསྒོམ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་བསྒོམ་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་བསྒོམ་
པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལམ་གྱི་རྒྱན་ཏེ་བཅུ་གང་ཞེ་ན། ཀྱེ་རྒྱལ་བའི་སྲས། འདི་ལ་བྱང་ཆུབ་སེམས་དཔའ་འདོད་པའི་ཁམས་ནས་ཀྱང་མི་གཡོ་ལ། གཟུགས་དང་གཟུགས་མེད་པ་ལ་སྤྱོད་པའི་བསམ་གཏན་དང་། རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ་ལ་སྙོམས་པར་འཇུག་ཀྱང་། དེ་དག་གི་དབང་གིས་མི་སྐྱེ་བ་འདི་ནི་ལམ་གྱི་རྒྱན་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཉན་ཐོས་ཀྱི་ལམ་མངོན་སུམ་དུ་གྱུར་པའི་ཡེ་ཤེས་ལ་ཞུགས་ཀྱང་ལམ་དེས་འབྱུང་བའང་མ་ཡིན་པ་འདི་ནི་ལམ་གྱི་རྒྱན་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རང་སངས་རྒྱས་ཀྱི་ལམ་ལ་མངོན་སུམ་དུ་གྱུར་པའི་ཡེ་ཤེས་སྣང་བ་ལ་མཁས་ཀྱང་སྙིང་རྗེ་ཆེན་པོའི་སྟོབས་རྒྱུན་མི་གཅོད་པ་འདི་ནི་ལམ་གྱི་རྒྱན་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་གཡོག་འཁོར་མང་པོ་དང་ལྡན་ཞིང་། གཡོག་འཁོར་ལྷ་དང་མིའི་རྣམ་པར་དག་པ་དང་ལྡན་ཞིང་། ལྷའི་བུ་མོ་བརྒྱ་སྟོང་གིས་རོལ་མོ་བརྡུང་བ་དང་དཀྲོལ་བའི་སྒྲ་ཕྱུང་སྟེ་བརྗོད་པ་ལ་སྤྱོད་ཀྱང་བྱང་ཆུབ་སེམས་དཔའི་ལམ་དང་ལྡན་པའི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་མི་འདོར་བ་འདི་ནི་ལམ་གྱི་རྒྱན་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་ཀྱི་རྩེ་དགའ་དགོད་པ་དང་། སེམས་ཅན་དང་འདྲེས་ཤིང་འབུར་ལྡོག་པ་བྱེད་ཀྱང་སེམས་ཀྱི་སྐད་ཅིག་གཅིག་ལ་ཡང་བྱང་ཆུབ་སེམས་དཔའི་ཏིང་ངེ་འཛིན་མཉམ་པ་ཉིད་མི་འདོར་བ་འདི་ནི་ལམ་གྱི་རྒྱན་ལྔ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་འཇིག་རྟེན་གྱི་ཆོས་ཐམས་ཅད་དང་མ་འདྲེས་ཤིང་འཇིག་རྟེན་གྱི་ཕ་རོལ་དུ་ཕྱིན་པ་ཡིན་ཡང་། སེམས་ཅན་བསྒྲལ་བའི་ཕྱིར་ཕ་རོལ་ཏུ་མི་འགྲོ་བའི་ལམ་ཡང་མི་གཏོང་བ་འདི་ནི་ལམ་གྱི་རྒྱན་དྲུག་
པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཡང་དག་པ་ཇི་ལྟ་བ་བཞིན་གྱི་ཡེ་ཤེས་སྣང་བ་ལ་ཞུགས་པའི་ལམ་ལ་གནས་ཀྱང་ལམ་ངན་པར་ཞུགས་པའི་སེམས་ཅན་ཕྱིར་བཟློག་པའི་ཕྱིར་ལམ་མ་ཡིན་པ་དང་། ལམ་ངན་པ་ཡང་གནོན་ལ། ལམ་དེས་འཁོར་བ་འཛིན་པའང་མ་ཡིན་ཏེ། དེས་དག་པར་ཡང་མི་སེམས་པ་འདི་ནི་ལམ་གྱི་རྒྱན་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྟག་ཏུ་ཚུལ་ཁྲིམས་ལེགས་པར་བསྲུངས་པ་དང་ལྡན་ཞིང་དེ་བཞིན་གཤེགས་པའི་ཚུལ་ཁྲིམས་རྣམ་པར་དག་པ་ལ་རྟེན་པས། ལུས་དང་ངག་དང་ཡིད་ཀྱི་ལས་ཀྱི་མཐའ་ཁ་ན་མ་ཐོ་བ་མེད་པ་དང་ལྡན་ཡང་ཚུལ་ཁྲིམས་ངན་པ་དང་ལྡན་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སོ་སོའི་སྐྱེ་བོ་ཐ་མལ་པའི་སྤྱོད་པ་ཐམས་ཅད་སྟོན་ཅིང་། བྱང་ཆུབ་སེམས་དཔའི་ལམ་ལ་རྟེན་པས། བསོད་ནམས་ཀྱི་ཚོགས་རྣམ་པར་དག་པ་ཐམས་ཅད་ཡོངས་སུ་རྫོགས་པ་ཡིན་ཡང་སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། མི་ཁོམ་པ་དང་དབུལ་བར་སྐྱེས་པའི་ལམ་དུ་ཞུགས་པའི་སེམས་ཅན་ཐམས་ཅད་རྣམ་པར་བཟློག་པའི་ཕྱིར། དེ་དག་གི་ལམ་དུ་སྐྱེས་པ་ཡང་སྟོན་ལ། ལམ་དེ་དག་ལ་ཡང་དག་པར་གཞོལ་བ་ཡང་མ་ཡིན་པ་འདི་ནི་ལམ་གྱི་རྒྱན་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མི་འཇོག་ཅིང་ཐོགས་པ་མེད་པའི་སྤོབས་པ་ཐོབ་པ་སངས་རྒྱས་ཀྱི་ཆོས་ཐམས་ཅད་ལ་ཡེ་ཤེས་སྣང་བས་རྣམ་པར་ལྟ་བ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ། སངས་རྒྱས་ཐམས་ཅད་ཀྱི་ཆོས་ཀྱི་སྐུ་དང་། ལུས་གཅིག་ཏུ་གྱུར་པ་སེམས་ཅན་ཐམས་ཅད་ཀྱི་ཆོས་ཀྱི་སྙིང་པོའི་ཚུལ་ཅན་དགོངས་པའི་སྣང་བ་ཁོང་དུ་ཆུད་པ། ཐེག་པ་ཐམས་ཅད་ཀྱི་མཉམ་པ་ཉིད་ལ་རབ་ཏུ་གནས་པ་སངས་རྒྱས་ཐམས་ཅད་ཀྱི་སྤྱོད་ཡུལ་ལ་མངོན་པར་མོས་པ་འགྲོ་བ་ཐམས་ཅད་ཀྱི་ཡིད་དུ་འོང་བ། སེམས་
ཅན་གྱི་ཁམས་ཐམས་ཅད་ཀྱིས་ངོར་ལྟ་བ། འགྲོ་བ་ཐམས་ཅད་ཀྱི་སློབ་དཔོན་དུ་བྱ་བ་ཡིན་ཡང་། ཆོས་ཡོངས་སུ་བཙལ་བར་བྱ་བ་རྒྱུན་མི་གཅོད་ཅིང་ངོ་མཚར་གྱིས་ཡོངས་སུ་ཟིན་པར་སྣང་བས་སྲི་ཞུའི་ལས་ཐམས་ཅད་ལ་གནས་ཏེ། མཁན་པོ་དང་སློབ་དཔོན་དུ་སྟོན་ཀྱང་དེ་ཉིད་འགྲོ་བ་ཐམས་ཅད་ཀྱི་སློབ་དཔོན་དུ་འགྱུར་བ་ཡིན་ཏེ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་རྣམས་ནི་ཐབས་མཁས་པ་དང་ལྡན་པར་བྱང་ཆུབ་སེམས་དཔའི་ལམ་ལ་ཤིན་ཏུ་གནས་པ་ཡིན་པས། དེ་དག་ནི་ཐབས་གང་དང་གང་གིས་སེམས་ཅན་རྣམས་འདུལ་བར་འགྱུར་བ་དེ་དང་དེ་ཐབས་སེམས་ཅན་རྣམས་ལ་ཡོངས་སུ་སྟོན་ཏེ། འདི་ནི་ལམ་གྱི་རྒྱན་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དགེ་བའི་རྩ་བ་ཐམས་ཅད་ཡོངས་སུ་འདུས་ཤིང་བྱང་ཆུབ་སེམས་དཔའི་སྤྱོད་པ་དང་རྫུ་འཕྲུལ་ཐམས་ཅད་ཐོབ་པ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བས་མངོན་པར་དབང་བསྐུར་བ། ཆོས་ཐམས་ཅད་ལ་དབང་བའི་དབང་ཕྱུག་གི་ཕ་རོལ་ཏུ་ཕྱིན་པའི་མཆོག་ཐོབ་པ། ཆགས་པ་མེད་ཅིང་དྲི་མ་མེད་པའི་ཐབས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་ཐོགས་པ་མེད་པར་དེ་བཞིན་གཤེགས་པའི་སྐུ་ཡང་དག་པར་སྟོན་པ། ཆོས་ཀྱི་འཁོར་ལོ་ཐོགས་པ་མེད་པར་བསྐོར་བའི་བྱིན་གྱི་རླབས་དང་ལྡན་པ། འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་ལུས་དང་གཟུགས་བདོག་པ། ཆོས་ཐམས་ཅད་ཀྱི་དབང་ཕྱུག་གི་ཕ་རོལ་ཏུ་ཕྱིན་པ་དམ་པ་དང་ལྡན་པ། བྱང་ཆུབ་སེམས་དཔའི་དབང་ཐམས་ཅད་རབ་ཏུ་ཐོབ་པ། འགྲོ་བ་ཐམས་ཅད་ཀྱི་ཞིང་དུ་སྐྱེ་བ་ཡོངས་སུ་སྟོན་པ་ལ་མཁས་པ་འདས་པ་དང་མ་འོངས་པ་དང་། ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་དང་ཡུལ་གཅིག་ཏུ་གྱུར་པའང་ཡིན་ལ། བྱང་ཆུབ་སེམས་དཔའི་སྤྱོད་པའང་རྒྱུན་མི་གཅོད་ཅིང་། བྱང་ཆུབ་སེམས་དཔའི་ཆོས་ཉིད་ཀྱང་རྣམ་པར་མི་སྤོང་། བྱང་ཆུབ་སེམས་དཔའི་ལས་ལས་ཀྱང་རྣམ་པར་མི་ལྡོག །བྱང་ཆུབ་སེམས་དཔའི་
ལམ་ལས་ཀྱང་ཕྱིར་མི་ལྡོག །བྱང་ཆུབ་སེམས་དཔའི་སྤྱོད་པའང་རྒྱུན་མི་གཅོད། བྱང་ཆུབ་སེམས་དཔའི་ཉེ་བར་ལེན་པའང་འཆད་པར་མི་བྱེད། བྱང་ཆུབ་སེམས་དཔའི་ཐབས་མཁས་པ་ལས་ཀྱང་ཕྱིར་མི་ལྡོག །བྱང་ཆུབ་སེམས་དཔའི་བྱ་བ་ཡང་ཐོགས་པར་མི་བྱེད། བྱང་ཆུབ་སེམས་དཔའི་མངོན་པར་འདུ་བྱེད་པའི་སྟོབས་ཀྱིས་ཀྱང་ཡོངས་སུ་སྐྱོ་བ་མེད་ཅིང་བྱང་ཆུབ་སེམས་དཔའི་སྤྱོད་པའི་བྱིན་གྱི་རླབས་ལས་ཀྱང་རིང་དུ་འཕང་བ་མ་ཡིན་ཏེ། ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། དེ་ལྟར་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པ་དང་། ཐམས་ཅད་མཁྱེན་པ་ཉིད་ཀྱི་སྒོ་ལ་རྣམ་པར་ལྟ་བ་དེ་ལྟ་བུས་ནི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མྱུར་དུ་འབྱུང་བའི་ཕྱིར་ཏེ། འདི་ནི་ལམ་གྱི་རྒྱན་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལམ་གྱི་རྒྱན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ལམ་རིན་པོ་ཆེའི་རྒྱན་བླ་ན་མེད་པ་ཐོབ་པར་གྱུར་ཀྱང་། བྱང་ཆུབ་སེམས་དཔའི་ལམ་གྱི་རྒྱུན་མི་གཅོད་པའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྐང་པ་སྟེ། བཅུ་གང་ཞེ་ན། འདི་ལྟར་སྨོན་ལམ་ཆེན་པོའི་ཁྱད་པར་ཡོངས་སུ་བསྡུ་བ་ཤིན་ཏུ་རྫོགས་པར་བྱ་བའི་ཕྱིར་ཚུལ་ཁྲིམས་ཀྱི་རྐང་པ་དང་། བྱང་ཆུབ་ཀྱི་ཡན་ལག་ཐམས་ཅད་ཡང་དག་པར་བསྡུ་བ་ལས་ཕྱིར་མི་ལྡོག་པའི་ཕྱིར་བརྩོན་འགྲུས་ཀྱི་རྐང་པ་དང་། སེམས་ཅན་རྣམས་བསམ་པ་ཇི་ལྟ་བ་བཞིན་དུ་ཡོངས་སུ་ཚིམ་པར་བྱ་བའི་ཕྱིར་མངོན་པར་ཤེས་པའི་རྐང་པ་དང་། སངས་རྒྱས་ཀྱི་ཞིང་ཐམས་ཅད་དུ་འགྲོ་ཡང་ཞིང་གཅིག་ནས་མི་གཡོ་བའི་ཕྱིར་རྫུ་འཕྲུལ་གྱི་རྐང་པ་དང་། ཁྱད་པར་དུ་འགྲོ་བའི་ཕྱིར་ལྷག་པའི་བསམ་པའི་རྐང་པ་དང་། བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་དམ་བཅས་པ་བརྟན་པའི་རྐང་པ་དང་། བླ་མ་ཐམས་ཅད་ཀྱི་བསྒོ་བ་ལས་འགལ་བར་མི་བྱེད་པའི་ཕྱིར་མཐུན་པར་འཛིན་པའི་རྐང་པ་དང་། དེ་བཞིན་གཤེགས་པ་ཐམས་
ཅད་ཀྱིས་གསུངས་པ་ཡང་དག་པར་གཟུང་བས་མི་སྐྱོ་བའི་ཕྱིར་ཆོས་མཉན་པ་མི་ངོམས་པར་ཚོལ་བའི་རྐང་པ་དང་། ཚངས་པའི་གནས་ནས་འཁོར་གྱི་དཀྱིལ་འཁོར་ཐམས་ཅད་དུ་འགྲོ་བར་སྒྱིད་ལུག་པ་མེད་པའི་ཕྱིར་ཆོས་ཀྱི་ཆར་འབེབས་པའི་རྐང་པ་དང་། ཐམས་ཅད་དུ་ཁ་ན་མ་ཐོ་བ་མེད་པའི་ཕྱིར་བྱང་ཆུབ་སེམས་དཔའི་སྤྱོད་པ་ཆེན་པོ་ལ་ནན་ཏན་དུ་བྱེད་པའི་རྐང་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྐང་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཞབས་ཀྱི་མཆོག་གིས། འཇིག་རྟེན་གྱི་ཁམས་ཐམས་ཅད་དུ་འགྲོ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལག་པ་སྟེ། བཅུ་གང་ཞེ་ན་འདི་ལྟར་དེ་བཞིན་གཤེགས་པ་ཐམས་ཅད་ཀྱིས་གསུངས་པ་ལ་གཅིག་ཏུ་མོས་ཤིང་ཡིད་ཆེས་པས་མཐར་ཕྱིན་པར་བྱ་བའི་ཕྱིར་དད་པའི་ལག་པ་དང་། སློང་བ་ཐམས་ཅད་ཡིད་བཞིན་དུ་ཚིམ་པར་བྱ་བའི་ཕྱིར་གཏོང་བ་རབ་ཏུ་གཏོང་བའི་ལག་པ་དང་། ལག་པ་གཡས་པ་བརྐྱང་བའི་ཕྱིར་ཚུར་ཤོག་བདེ་བར་འོངས་སམ་ཞེས་འདོར་ཏེ། གསོང་པོར་སྨྲ་བའི་ལག་པ་དང་། བསོད་ནམས་བསགས་པ་རྣམ་པར་སྤེལ་བ་ལས་མི་གཡོ་བའི་ཕྱིར་དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱེད་པའི་ལག་པ་དང་། སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་ཕྱིར་ཐོས་པ་ཐམས་ཅད་ལ་མཁས་པའི་ལག་པ་དང་། འདོད་པའི་འདམ་དུ་ཐོགས་པའི་སེམས་ཅན་གྱི་ཁམས་ལ་ལག་པ་རིང་དུ་བརྐྱང་སྟེ། འཇུ་བར་རྙེབ་པའི་ཕྱིར་ཁམས་གསུམ་དང་བྲལ་ཞིང་ཤིན་ཏུ་འབྱུང་བར་བྱེད་པའི་ལག་པ་དང་། ཆུ་བོ་ཆེན་པོ་བཞིས་ཁྱེར་བ་ལས་ལག་པ་རིང་དུ་བརྐྱང་ཞིང་གདོན་བའི་ཕྱིར་བདེ་བའི་ཐང་ལ་གཞོག་པའི་ལག་པ་དང་། འགྲོ་བ་ཐམས་ཅད་ལ་གནོད་པ་མེད་པར་བསྟན་པའི་ཆོས་རབ་ཏུ་བསྟན་པའི་ཕྱིར་ཡང་དག་པར་སྦྱོར་བའི་ཆོས་ལ་སློབ་
དཔོན་གྱིས་མི་འཆབ་པའི་ལག་པ་དང་། ལུས་དང་སེམས་ཀྱི་ནད་རབ་ཏུ་བསལ་བའི་ཕྱིར་འཇིག་རྟེན་པ་དང་། འཇིག་རྟེན་ལས་འདས་པའི་གཙུག་ལག་ཐམས་ཅད་ཤེས་པའི་ལག་པ་དང་། ཉོན་མོངས་པའི་མུན་པ་ཐམས་ཅད་དང་བྲལ་བའི་ཆོས་ཀྱི་སྣང་བ་མཚུངས་པ་མེད་པ་ཡོངས་སུ་བསྟན་པའི་ཕྱིར་ཤེས་རབ་དང་ཡེ་ཤེས་རིན་པོ་ཆེའི་ལག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཕྱག་འཇིག་རྟེན་གྱི་ཁམས་ཐམས་ཅད་ཀུན་ནས་ཡོག་པར་སྐྱོབ་པ་བླ་ན་མེད་པ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྟོ་སྟེ། བཅུ་གང་ཞེ་ན་འདི་ལྟར་བསམ་པ་དག་པས་གཡོ་བ་མེད་པའི་ལྟོ་དང་དྲང་བས་སྒྱུ་མེད་པའི་ལྟོ་དང་། ཐིབས་པོ་མེད་པས་འཆོས་པ་མེད་པའི་ལྟོ་དང་། དངོས་པོ་ཐམས་ཅད་ལ་མངོན་པར་ཆགས་པ་མེད་པས་ཡུལ་ལ་མི་འཛིན་པའི་ལྟོ་དང་། ཤེས་པའི་ཕྱིར་ཉོན་མོངས་པ་ཐམས་ཅད་སེལ་བའི་ལྟོ་དང་། སྐྱོན་མེད་པའི་ཕྱིར་སེམས་དག་པའི་ལྟོ་དང་། ཆོས་ཇི་ལྟ་བ་བཞིན་དུ་ཡིད་ལ་བྱ་བའི་ཕྱིར་ཁ་ཟས་ཐམས་ཅད་ཡོངས་སུ་ཤེས་པར་བྱ་བ་སོ་སོར་རྟོག་པའི་ལྟོ་དང་། རྟེན་ཅིང་འབྲེལ་བར་འབྱུང་བ་རྗེས་སུ་རྟོགས་པར་བྱ་བའི་ཕྱིར་མངོན་པར་འདུ་མི་བྱེད་པ་སོ་སོར་རྟོག་པའི་ལྟོ་དང་། བསམ་པ་ཤིན་ཏུ་སྨིན་པས་འབྱུང་བ་ཐམས་ཅད་ཤེས་པའི་ལྟོ་དང་། སེམས་ཅན་ཐམས་ཅད་སངས་རྒྱས་ཀྱི་སྐུའི་ནང་དུ་ཆུད་པ་ཁོང་དུ་ཆུད་པའི་ཕྱིར་དྲི་མ་མཐའ་ཡས་པའི་ལྟ་བ་ཐམས་ཅད་དང་བྲལ་བའི་ལྟོའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྟོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་
གཤེགས་པའི་སྐུ། འགྲོ་བ་ཐམས་ཅད་ཡོངས་སུ་འཛིན་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་སྟེ། བཅུ་གང་ཞེ་ན་འདི་ལྟར་དེ་བཞིན་གཤེགས་པ་ཐམས་ཅད་ཀྱི་ཚུལ་གྱི་མཐུ་ཚད་མེད་པ་ཡོངས་སུ་བསྐྱེད་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ། སངས་རྒྱས་ཀྱི་རིགས་རྒྱུན་མི་གཅོད་པར་ཀུན་ནས་གནས་པ་དང་། ཡེ་ཤེས་སྣང་བ་ཆེན་པོ་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའི་སྙིང་པོ་ཆོས་ཀྱི་རིགས་རབ་ཏུ་གསལ་བར་བྱེད་པར་ཀུན་ནས་གནས་པ་དང་། ཕྱིར་མི་ལྡོག་པའི་འཁོར་ལོ་ཡང་དག་པར་གཞོལ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་དགེ་འདུན་གྱི་རིགས་ཡོངས་སུ་སྡུད་པར་ཀུན་ནས་གནས་པ་དང་། དུས་ཇི་ལྟ་བ་བཞིན་ལས་མི་འདའ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་ཆོས་ཐམས་ཅད་ངེས་པར་གླེང་བར་བྱེད་པ་དང་། རྒྱུ་གཅིག་ནས་གཅིག་ཏུ་བརྒྱུད་པའི་རྒྱུན་མི་འཆད་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་ངེས་པ་མེད་པར་ཡོངས་སུ་སྨིན་པར་བྱེད་པར་གནས་པ་དང་། མ་འོངས་པའི་རྒྱུ་སྐྱོན་མེད་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་ཀྱི་སྙིང་པོ་སེམས་ཅན་ལོག་པར་ངེས་པ་རྣམས་ལ་སྙིང་རྗེ་ཆེན་པོ་སྐྱེ་བར་ཀུན་ནས་གནས་པ་དང་བདུད་ཀྱི་སྡེ་ཐམས་ཅད་བཏུལ་ཏེ། དགེ་བའི་རྩ་བ་མི་འཕྲོགས་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་དེ་བཞིན་གཤེགས་པའི་སྟོབས་བཅུ་ཐུབ་པ་མེད་པའི་རྒྱུ་ཡོངས་སུ་རྫོགས་པར་བྱེད་པར་ཀུན་ནས་གནས་པ་དང་། འགྲོ་བ་མ་ལུས་པ་ཐམས་ཅད་ཡོངས་སུ་ཚིམ་པར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་མི་འཇིགས་པ་ཆེན་པོའི་སེང་གེ་དང་། ཁྱུ་མཆོག་གི་ང་རོ་འབྱིན་པར་ཀུན་ནས་གནས་པ་དང་། ཐམས་ཅད་དུ་ཡེ་ཤེས་ཡང་དག་པར་གཞོལ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་ཀྱི་སྙིང་པོ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པའི་ཕྱིར་ཀུན་ནས་གནས་པ་དང་། སྐད་ཅིག་གཅིག་ཏུ་མི་མཉམ་པར་
མེད་པར་ཞུགས་པས། བྱང་ཆུབ་སེམས་དཔའ་རྣམས་ཀྱི་སྙིང་པོ་ཞིང་ཐམས་ཅད་དང་། ཆོས་ཐམས་ཅད་དང་སངས་རྒྱས་ཐམས་ཅད་མཉམ་པ་ཉིད་དུ་ཁོང་དུ་ཆུད་པར་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དགེ་བའི་རྩ་བ་ཐམས་ཅད་མ་ལོག་པས་དེ་བཞིན་གཤེགས་པའི་ཡེ་ཤེས་ཆེན་པོའི་སྙིང་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་སྟེ། བཅུ་གང་ཞེ་ན་བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་ཞེ་ནོན་པའི་སྙིང་དང་། མཚན་དང་དཔེ་བྱད་བཟང་པོའི་བསོད་ནམས་ཀྱི་ཚོགས་ཡོངས་སུ་བསྡུ་བའི་ཕྱིར་སེམས་ཞུམ་པ་མེད་པའི་སྙིང་དང་། བདུད་ཀྱི་སྡེ་ཐམས་ཅད་རབ་ཏུ་གཞོམ་པའི་ཕྱིར་རྣམ་པར་གནོན་པ་ཆེན་པོའི་སྙིང་དང་། ཉོན་མོངས་པ་ཐམས་ཅད་ཀྱིས་མི་ཚུགས་པའི་ཕྱིར་ཚུལ་བཞིན་དུ་སྦྱོར་བའི་སྙིང་དང་། སྙིང་པོ་བྱང་ཆུབ་ཀྱི་བར་དུ་ཕྱིན་པར་བྱ་བའི་ཕྱིར་ཕྱིར་མི་འགྱུར་ཞིང་། ཕྱིར་མི་ལྡོག་པའི་སྙིང་དང་། སེམས་འཕོ་བ་མེད་པར་ཁོང་དུ་ཆུད་པས་མངོན་པར་ཆགས་པ་མེད་པའི་ཕྱིར་རང་བཞིན་གྱི་འོད་གསལ་བའི་སྙིང་དང་། ཇི་ལྟར་མོས་པའི་ཚུལ་བཞིན་དུ་རྣམ་པར་ཐར་པ་འཐོབ་པ་བྱ་བའི་ཕྱིར། སེམས་ཅན་གྱི་ཚུལ་ཤེས་པའི་སྙིང་དང་། ཐེག་པ་གཞན་ལ་མོས་པ་མེད་པར་སེམས་ཅན་གྱི་ཁམས་ཡོངས་སུ་བསྐྱབ་པའི་ཕྱིར། ཚངས་པའི་རྣམ་པར་སྤྱོད་པ་རྒྱ་ཆེན་པོས་སངས་རྒྱས་ཀྱི་ཆོས་ལ་འཇུག་པའི་སྙིང་དང་། ལྟ་བའི་མཚན་མས་ཁམས་གསུམ་ལ་མངོན་པར་ཆགས་པ་མེད་པར་བྱ་བའི་ཕྱིར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུ་བྱ་བ་མེད་པའི་སྙིང་དང་། སེམས་ཅན་ཐམས་ཅད་བདུད་དུ་གྱུར་པའི་སྒོས་བདུད་ཐམས་ཅད་འོངས་པར་གྱུར་ཀྱང་། སྤུ་གཅིག་ཀྱང་མི་གཡོ་བས་དཔལ་གྱི་བེའུས་བརྒྱན་ཅིང་རྡོ་རྗེའི་ཁམས་ལྟར་སྲ་ཞིང་བརྟན་པའི་སྙིང་པོ་དམ་པ་དང་ལྡན་པའི་སྙིང་ངོ་། །ཀྱེ་
རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་སྣང་བ་ཆེན་པོའི་སྙིང་པོ་དང་ལྡན་པའི་སྙིང་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གོ་ཅ་སྟེ། བཅུ་གང་ཞེ་ན་འདི་ལྟར་འགྲོ་བ་ཐམས་ཅད་ཡོངས་སུ་བསྐྱབ་པའི་ཕྱིར་བྱམས་པ་ཆེན་པོའི་གོ་ཅ་དང་། མི་དགའ་བ་ཐམས་ཅད་བཟོད་པར་བྱ་བའི་ཕྱིར་སྙིང་རྗེ་ཆེན་པོའི་གོ་ཅ་དང་། བརྩམས་པ་ཐམས་ཅད་མཐར་ཕྱིན་པར་བྱ་བའི་ཕྱིར་སྨོན་ལམ་གྱི་གོ་ཅ་དང་། སངས་རྒྱས་ཐམས་ཅད་ཀྱི་རྒྱན་འབྱུང་བར་བྱ་བའི་ཕྱིར་ཡོངས་སུ་བསྔོ་བའི་གོ་ཅ་དང་། འགྲོ་བ་ཐམས་ཅད་ཉེ་བར་འཚོ་བར་བྱ་བའི་ཕྱིར་བསོད་ནམས་ཀྱི་གོ་ཅ་དང་། འགྲོ་བ་ཐམས་ཅད་བསྒྲལ་བའི་ཕྱིར་ཕ་རོལ་ཏུ་ཕྱིན་པའི་གོ་ཅ་དང་། འགྲོ་བ་ཐམས་ཅད་ཀྱི་ཉོན་མོངས་པའི་མུན་པ་རབ་ཏུ་ཞི་བར་བྱ་བའི་ཕྱིར་ཡེ་ཤེས་ཀྱི་གོ་ཅ་དང་། སྒོ་ཀུན་དང་ལྡན་པའི་དགེ་བའི་རྩ་བ་མངོན་པར་བསྒྲུབ་པའི་ཕྱིར་ཐབས་མཁས་པའི་གོ་ཅ་དང་། ཐེག་པ་གཞན་ལ་མོས་པ་མེད་པའི་ཕྱིར་ཐམས་ཅད་མཁྱེན་པ་ཉིད་ཀྱི་སེམས་བརྟན་ཞིང་འཁྲུག་པ་མེད་པའི་གོ་ཅ་དང་། ཆོས་ཀྱི་རློམ་སེམས་མེད་པས་གཅིག་ཏུ་ངེས་པའི་གོ་ཅའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གོ་ཅ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་བདུད་ཀྱི་སྡེ་ཐམས་ཅད་སྤ་འགོང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མཚོན་ཅ་སྟེ། བཅུ་གང་ཞེ་ན། འདི་ལྟར་སེར་སྣའི་སྐྱོན་རབ་ཏུ་གཞོམ་པའི་ཕྱིར་གཏོང་བའི་མཚོན་ཅ་དང་། ཚུལ་ཁྲིམས་ངན་པ་ཐམས་ཅད་བསལ་བའི་ཕྱིར་ཚུལ་ཁྲིམས་གྱི་མཚོན་ཅ་དང་། རྣམ་པར་རྟོག་པ་ཐམས་ཅད་བསྩལ་བའི་ཕྱིར་ཆོས་མཉམ་པ་ཉིད་ཀྱི་མཚོན་ཅ་དང་། འགྲོ་བ་ཐམས་ཅད་ཀྱི་ཉོན་མོངས་པ་ཡོངས་སུ་གཅད་པའི་ཕྱིར་
ཤེས་རབ་དང་ཡེ་ཤེས་ཀྱི་མཚོན་ཅ་དང་། འཚོ་བ་ཐམས་ཅད་ལ་ཁ་ན་མ་ཐོ་བ་མེད་པར་བྱ་བའི་ཕྱིར། ཡང་དག་པར་འཚོ་བའི་མཚོན་ཅ་དང་། སྒོ་ཐམས་ཅད་ཡོངས་སུ་བསྟན་པའི་ཕྱིར་ཐབས་མཁས་པའི་མཚོན་ཅ་དང་། ཉོན་མོངས་པའི་སྒོ་ནས་སེམས་ཅན་བཟློག་པའི་ཕྱིར། འདོད་ཆགས་དང་། ཞེ་སྡང་དང་། གཏི་མུག་དང་། མདོར་བསྡུ་ན་ཉོན་མོངས་པ་ཐམས་ཅད་ཀྱི་མཚོན་ཅ་དང་། སྤྱོད་པ་རྒྱུན་མི་འཆད་པས་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་ཕྱིར་འཁོར་བའི་མཚོན་ཅ་དང་། མངོན་པར་ཞེན་པ་ཐམས་ཅད་རབ་ཏུ་བསྩལ་བའི་ཕྱིར། ཆོས་ཚུལ་གཅིག་པ་བསྟན་པའི་མཚོན་ཅ་དང་། སྤྱོད་པའི་སྒོ་ལས་ཕྱིར་ཕྱོགས་སུ་མི་བལྟ་བའི་ཕྱིར་ཐམས་ཅད་མཁྱེན་པ་ཉིད་ཀྱི་མཚོན་ཅའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མཚོན་ཅ་སྟེ། མཚོན་ཅ་དེ་དག་གིས་བྱང་ཆུབ་སེམས་དཔའ་རྣམས་སེམས་ཅན་ཐམས་ཅད་ཀྱི་སེམས་དང་བསམ་པ་ལ་ཡུན་རིང་པོའི་ཉེ་བར་ཉོན་མོངས་པ་དང་། བག་ལ་ཉལ་བ་ཡོད་པ་ཐམས་ཅད་རབ་ཏུ་འཇོམས་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མགོ་སྟེ། བཅུ་གང་ཞེ་ན། འདི་ལྟར་སྤྱི་གཙུག་ལྟར་མི་སྣང་བའི་ཕྱིར་མྱ་ངན་ལས་འདས་པའི་མགོ་དང་། ལྷ་དང་བཅས་པའི་འཇིག་རྟེན་ཐམས་ཅད་འདུད་པར་བྱ་བའི་ཕྱིར་བླ་མ་ལ་འདུད་པའི་མགོ་དང་། སྟོང་གསུམ་ཐམས་ཅད་ཀྱི་བདག་པོར་འགྱུར་བར་བྱ་བའི་ཕྱིར་མོས་པ་ཡངས་པའི་མགོ་དང་། ཁམས་གསུམ་གྱིས་མཆོད་པར་བྱ་བའི་ཕྱིར་དགེ་བའི་རྩ་བ་ཐམས་ཅད་སྔོན་དུ་འགྲོ་བའི་མགོ་དང་། གཙུག་ཏོར་དང་ལྡན་པའི་སྤྱི་བོ་འཐོབ་པར་བྱ་བའི་ཕྱིར། སེམས་ཅན་ཐམས་ཅད་ཀྱི་ཁུར་ཁྱེར་བའི་མགོ་དང་། ཐམས་ཅད་དུ་ཁྱད་པར་དུ་འགྲོ་བར་བྱ་བའི་ཕྱིར་གཞན་གྱི་ལྟུང་བ་ལ་བརྙས་པ་མེད་པའི་མགོ་དང་། སྤྱི་བོ་ལ་གནས་པའི་ཆོས་ཐོབ་པར་བྱ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་མགོ་དང་། སེམས་ཅན་ཐམས་ཅད་ཀྱི་མགོ་མཉམ་
པ་ཡོངས་སུ་བསྟན་པའི་ཕྱིར་ཡེ་ཤེས་དང་ཐབས་སུ་ལྡན་པའི་མགོ་དང་། འགྲོ་བ་ཐམས་ཅད་སློབ་པར་བྱ་བའི་ཕྱིར་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་མགོ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་ཡོངས་སུ་སྡུད་པའི་མགོའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མགོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་སྤྱི་བོར་གྱུར་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མིག་སྟེ། བཅུ་གང་ཞེ་ན། འདི་ལྟར་གཟུགས་ཐམས་ཅད་བལྟ་བའི་ཕྱིར་ཤའི་མིག་དང་། སེམས་ཅན་ཐམས་ཅད་བལྟ་བའི་ཕྱིར་ལྷའི་མིག་དང་། སེམས་ཅན་ཐམས་ཅད་ཀྱི་དབང་པོ་དང་ཡུལ་བལྟ་བའི་ཕྱིར་ཤེས་རབ་ཀྱི་མིག་དང་། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་བལྟ་བའི་ཕྱིར་ཆོས་ཀྱི་མིག་དང་། དེ་བཞིན་གཤེགས་པའི་སྟོབས་བཅུ་བལྟ་བའི་ཕྱིར་སངས་རྒྱས་ཀྱི་མིག་དང་། ཆོས་ཡོངས་སུ་ཤེས་པ་བལྟ་བའི་ཕྱིར་ཡེ་ཤེས་ཀྱི་མིག་དང་། སངས་རྒྱས་ཀྱི་མཐུའི་འོད་སྣང་བ་བལྟ་བའི་ཕྱིར། སྣང་བའི་མིག་དང་། མྱ་ངན་ལས་འདའ་བར་བྱ་བའི་ཕྱིར་མངོན་པར་བསྒྲུབ་པའི་མིག་དང་། བསྒྲིབས་པ་མེད་པར་བྱ་བའི་ཕྱིར་ཆགས་པ་མེད་པའི་མིག་དང་། ཆོས་ཀྱི་དབྱིངས་སྒོ་ཐམས་ཅད་ནས་བལྟ་བའི་ཕྱིར་ཐམས་ཅད་མཁྱེན་པའི་མིག་གོ །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མིག་སྟེ། མིག་དེ་དག་དང་ལྡན་པས་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣ་བ་སྟེ། བཅུ་གང་ཞེ་ན། འདི་ལྟར་བསྔགས་པ་ཐོས་ནས་དགའ་བ་སྤོང་བ་དང་།
མི་སྙན་པ་ཐོས་ན་ཁོང་ཁྲོ་བ་སྤོང་བ་དང་། ཉན་ཐོས་དང་རང་སངས་རྒྱས་ཀྱི་གཏམ་ཐོས་ན་འདོད་པ་མེད་ཅིང་མི་སྨོད་པ་དང་། བྱང་ཆུབ་སེམས་དཔའ་འབྱུང་བའི་གཏམ་ཐོས་ན་དགའ་བ་དང་མོས་པ་དང་སྤྲོ་བ་ཆེན་པོ་སྐྱེ་བ་དང་། སེམས་ཅན་དམྱལ་བ་དང་། །བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་དང་། ཡི་དགས་དང་། ལྷ་མ་ཡིན་དང་། མི་ཁོམ་པ་དང་། དབུལ་པོར་སྐྱེས་པ་ཐོས་ན་སྙིང་རྗེ་ཆེན་པོའི་གོ་གྱོན་པ་དང་། ལྷ་དང་མིའི་རྒྱུད་ཀྱི་བྱེ་བྲག་ཐོས་ན། རྟག་ཏུ་ཆོས་ལ་གཟུང་བའི་བློར་འགྱུར་བ་དང་། སངས་རྒྱས་ཀྱི་ཡོན་ཏན་དང་། བསྔགས་པ་ཐོས་ན་དེའི་ཡོན་ཏན་དང་། བསྔགས་པ་ཡོངས་སུ་རྫོགས་པར་བྱ་བའི་བརྩོན་འགྲུས་དང་། ཕ་རོལ་ཏུ་ཕྱིན་པ་དང་། བསྡུ་བའི་དངོས་པོ་དང་། བྱང་ཆུབ་སེམས་དཔའི་སྡེ་སྣོད་ཀྱི་གཏམ་ཐོས་ན་ཐམས་ཅད་ཀྱི་ཕ་རོལ་ཏུ་འགྲོ་བ་དང་། ཀྱེ་རྒྱལ་བའི་སྲས་བྱང་ཆུབ་སེམས་དཔའི་རྣ་བའི་དབང་པོ་ལ་ནི་ཕྱོགས་བཅུའི་འཇིག་རྟེན་གྱི་ཁམས་ནས་བསྒྲགས་པའི་སྒྲ་ཐམས་ཅད་ཀྱང་གྲག་ཅིང་ཐོས་པར་འགྱུར་ཏེ། སྒྲ་ཐམས་ཅད་སྒྲ་བརྙན་ལྟ་བུར་བརྗོད་དུ་མེད་པའི་དོན་དུ་ཁོང་དུ་ཆུད་ཅིང་ཤེས་པ་དང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་ཆོས་ཀྱི་རྣ་བ་མཉམ་པར་གཞག་པ་དང་། ལྡན་ཏེ་ཐོག་མ་སེམས་བསྐྱེད་པ་ནས། སྙིང་པོ་བྱང་ཆུབ་ཀྱི་བར་དུ་བྱང་ཆུབ་སེམས་དཔའི་ལམ་དང་མི་གནས་ཀྱང་སེམས་ཅན་ཡོངས་སུ་སྨིན་པར་བྱ་བ་མི་འདོར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྙན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྣ་སྟེ། བཅུ་གང་ཞེ་ན། འདི་ལྟར་འཐུན་པའི་དྲི་ལ་མི་མཐུན་པར་གནས་པ་དང་། མི་མཐུན་པའི་དྲི་ལ་འཐུན་པར་
གནས་པ་དང་། དྲི་འཐུན་པ་དང་། མི་འཐུན་པ་ལ་མཉམ་པ་ཉིད་དུ་གནས་པ་དང་། དྲི་འཐུན་པ་དང་། མི་འཐུན་པ་མ་ཡིན་པ་ལ་བཏང་སྙོམས་སུ་གནས་པ་དང་། གོས་དང་། མལ་ཅ་དང་། ཡན་ལག་དང་། ཉིང་ལག་གི་དྲི་ལ་འདོད་ཆགས་དང་། ཞེ་སྡང་དང་། གཏི་མུག་དང་། ཆ་མཉམ་པ་སྤྱོད་པའི་སེམས་ཅན་གྱི་ཤེས་པར་གནས་པ་དང་། གཏེར་ཆེན་པོ་དེ་དག་དང་། རྩྭ་དང་། གེལ་བ་དང་། སྨན་དང་། ནགས་ཚལ་ཇི་སྙེད་པ་དེ་དག་གི་དྲིས་གཏེར་ཐམས་ཅད་མངོན་སུམ་དུ་ཤེས་པར་གནས་པ་དང་། འོག་གི་སེམས་ཅན་དམྱལ་བ་ཆེན་པོ་མནར་མེད་པ་ཡན་ཅད་སྲིད་པའི་རྩེ་མོ་མན་ཅད་ན་གནས་པའི་སེམས་ཅན་རྣམས་ཀྱིས་དྲི་ཚོར་བ་ཙམ་གྱིས་སྔོན་གྱི་སྤྱོད་པ་སྟོན་པར་གནས་པ་དང་། ཉན་ཐོས་ཀྱི་ཚུལ་ཁྲིམས་དང་། ཐོས་པ་དང་། གཏོང་བ་དང་། ཤེས་རབ་ཀྱི་དྲི་ཚོར་བས་ཐམས་ཅད་མཁྱེན་པ་ཉིད་ཀྱི་སེམས་མི་འཁྲུགས་པར་གནས་པ་དང་། བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པའི་དྲི་ཚོར་ཞིང་དེ་བཞིན་གཤེགས་པའི་ས་ལ་ཡང་དག་པར་གཞོལ་བའི་ཡེ་ཤེས་ལ་གནས་པ་དང་། དེ་བཞིན་གཤེགས་པ་ཐམས་ཅད་ཀྱི་ཡུལ་དང་ཡེ་ཤེས་ཀྱི་དྲི་ཚོར་ཞིང་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པར་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྣ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཤངས་མཐའ་དང་དབུས་མེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྕེ་སྟེ། བཅུ་གང་ཞེ་ན་འདི་ལྟར་སེམས་ཀྱི་སྤྱོད་པ་མི་ཟད་པ་རབ་ཏུ་སྟོན་པའི་ལྕེ་དང་། ཆོས་ཀྱི་ཚུལ་མི་ཟད་པ་རབ་ཏུ་སྟོན་པའི་ལྕེ་དང་། སངས་རྒྱས་ཀྱི་ཡོན་ཏན་དང་བསྔགས་
པ་མི་ཟད་པ་རབ་ཏུ་སྟོན་པའི་ལྕེ་དང་། ངེས་པའི་ཚིག་དང་སྤོབས་པ་མི་ཟད་པ་སྟོན་པའི་ལྕེ་དང་། ཐེག་པ་ཆེན་པོའི་ཚོགས་མི་ཟད་པ་སྟོན་པའི་ལྕེ་དང་། དེའི་ལྕེ་དེ་ཕྱོགས་བཅུའི་ནམ་མཁའ་རྒྱས་པར་འགེངས་པ་དང་། དེའི་ལྕེ་དེ་སེམས་ཅན་ཐམས་ཅད་ལ་ཡང་དག་པར་གཞོལ་བ་དང་། དེའི་ལྕེ་དེ་སངས་རྒྱས་ཀྱི་ཞིང་ཐམས་ཅད་དུ་འོད་ཀྱིས་སྣང་བར་བྱེད་པ་དང་། དེའི་ལྕེ་དེ་སངས་རྒྱས་ཐམས་ཅད་མཉེས་པར་བྱེད་ཅིང་ཕྱག་འཚལ་བ་དང་། དེའི་ལྕེ་དེ་བདུད་དང་། རྒོལ་བ་དང་། ཉོན་མོངས་པ་དང་། འཁོར་བ་ཐམས་ཅད་འཇིག་ཅིང་མྱ་ངན་ལས་འདའ་བའི་ལམ་སྟོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྕེ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ལྗགས་སངས་རྒྱས་ཀྱི་ཞིང་ཐམས་ཅད་རྒྱས་པར་ཁྱབ་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། བཅུ་གང་ཞེ་ན། འདི་ལྟར་མི་ཡོངས་སུ་སྨིན་པར་བྱ་བའི་ཕྱིར། མིའི་ལུས་དང་། སེམས་ཅན་དམྱལ་བ་དང་། བྱོལ་སོང་གི་སྐྱེ་གནས་དང་། གཤིན་རྗེའི་འཇིག་རྟེན་གྱི་སེམས་ཅན་གདུལ་བའི་ཕྱིར་མི་མ་ཡིན་པའི་ལུས་དང་། འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པ་ན་སྤྱོད་པའི་སེམས་ཅན་གདུལ་བའི་ཕྱིར་ལྷའི་ལུས་དང་། སློབ་པའི་ས་བསྟན་པའི་ཕྱིར་སློབ་པའི་ལུས་དང་། མི་སློབ་པའི་ས་བསྟན་པའི་ཕྱིར་མི་སློབ་པའི་ལུས་དང་། རང་སངས་རྒྱས་ཀྱི་སར་གདུལ་བའི་ཕྱིར་རང་སངས་རྒྱས་ཀྱི་ལུས་དང་། ཐེག་པ་ཆེན་པོ་ལ་ཡང་དག་པར་འབྱུང་བར་བྱ་བའི་ཕྱིར་བྱང་ཆུབ་སེམས་དཔའི་ལུས་དང་། དབང་བསྐུར་བའི་ཡེ་ཤེས་འཐོབ་པར་བྱ་བའི་ཕྱིར་དེ་བཞིན་གཤེགས་པའི་སྐུ་དང་། མངོན་པར་བསྒྲུབ་པ་ལ་མཁས་པར་བྱ་བའི་ཕྱིར་ཡིད་ཀྱི་རང་བཞིན་གྱི་ལུས་དང་། ཟག་པ་མེད་ཅིང་ལྷུན་གྱིས་གྲུབ་པའི་བྱ་བས་ལུས་ཐམས་ཅད་ཡོངས་སུ་བསྟན་པའི་ཕྱིར་ཆོས་ཀྱི་ལུས་སོ། །ཀྱེ་རྒྱལ་བའི་སྲས་བཅུ་
པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལུས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྐུ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡིད་རྣམ་པར་རྒྱུ་བ་སྟེ། བཅུ་གང་ཞེ་ན་འདི་ལྟར་དགེ་བའི་རྩ་བ་ཐམས་ཅད་བརྩམས་པ་ལ་ཡིད་ནི་སྔོན་དུ་འགྲོ་བའོ། །ནན་ཏན་ལྷུར་བླང་བ་ལ་ཡིད་ནི་གནས་སོ། །སངས་རྒྱས་ཀྱི་ཆོས་རྣམས་ལ་ཡིད་ནི་རྗེས་སུ་ཞུགས་པའོ། །སེམས་ཅན་རྣམས་ཀྱི་བསམ་པར་ཡིད་ནི་ཁོང་དུ་ཆུད་པའོ། །ཉོན་མོངས་པ་ཐམས་ཅད་དང་མ་འདྲེས་པས་ཡིད་ནི་རྒྱུ་བ་མེད་པའོ། །གློ་བུར་གྱི་དྲི་མས་ཀུན་ནས་ཉོན་མོངས་པ་མེད་པའི་ཕྱིར་ཡིད་ནི་འོད་གསལ་བའོ། །དུས་ཇི་ལྟ་བའི་སྐད་ཅིག་ལས་ཀྱང་མི་འདའ་བའི་ཕྱིར་ཡིད་ནི་དཔྱད་པ་ཤིན་ཏུ་བརྟགས་པའོ། །ཐམས་ཅད་དུ་ཁ་ན་མ་ཐོ་བ་མེད་པའི་ཕྱིར་ཡིད་ནི་ལས་ཀྱི་མཐའ་ཤིན་ཏུ་སྤྱད་པའོ། །དབང་པོ་ཤིན་ཏུ་དུལ་བས་ཡུལ་ལ་མི་རྒྱུག་པའི་ཕྱིར་ཡིད་ནི་དབང་པོ་རུབ་པའོ། །སངས་རྒྱས་ཀྱི་ཏིང་ངེ་འཛིན་ལ་བདག་གིར་མི་བྱེད་པའི་ཕྱིར་ཡིད་ནི་ཤིན་ཏུ་མཉམ་པར་གཞག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡིད་རྣམ་པར་རྒྱུ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཐུགས་རྣམ་པར་རྒྱུ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་སྟེ། བཅུ་གང་ཞེ་ན་འདི་ལྟར་ཆོས་འདོད་པས་ཆོས་ཉན་དུ་འགྲོ་བ་དང་། སེམས་ཅན་གྱི་དོན་དུ་ཆོས་སྟོན་དུ་འགྲོ་བ་དང་། རང་གི་སེམས་ངེས་པར་རྟོགས་པས་འདོད་པ་མེད་པ་དང་། སྡང་བ་མེད་པ་དང་། གཏི་མུག་མེད་པ་དང་། འཇིགས་པ་མེད་པར་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་འདོད་པའི་ཁམས་སུ་འགྲོ་བ་དང་། མྱུར་དུ་ཕྱིར་ལྡོག་པར་བྱ་བས་གཟུགས་དང་གཟུགས་མེད་པའི་སྙོམས་པར་འཇུག་པར་འགྲོ་བ་དང་། ཤེས་རབ་མྱུར་བ་
འཐོབ་པར་བྱ་བའི་ཕྱིར་དོན་དང་། ཆོས་ཀྱི་རྒྱུད་དུ་འགྲོ་བ་དང་། འདུལ་བའི་དབང་གིས་སྐྱེ་བ་ཐམས་ཅད་དུ་འགྲོ་བ་དང་། དེ་བཞིན་གཤེགས་པ་བལྟ་བ་དང་། ཕྱག་བྱ་བ་དང་། བསྙེན་བཀུར་བའི་ཕྱིར་སངས་རྒྱས་ཀྱི་ཞིང་ཐམས་ཅད་དུ་མངོན་པར་ཤེས་པས་འགྲོ་བ་དང་། འཁོར་བའི་རྒྱུད་ཀྱི་རྒྱུན་མི་གཅད་པའི་ཕྱིར་མྱ་ངན་ལས་འདས་པའི་རྒྱུད་དུ་འགྲོ་བ་དང་། བྱང་ཆུབ་སེམས་དཔའི་སྤྱོད་པ་རྒྱུན་མི་གཅད་པའི་ཕྱིར་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བར་འགྲོ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་བཞུད་པ་དང་གཤེགས་པ་དང་། བྱོན་པ་མེད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གནས་ཏེ། བཅུ་གང་ཞེ་ན་འདི་ལྟར་ཉམས་པ་མེད་པའི་ཕྱིར་བྱང་ཆུབ་ཀྱི་སེམས་ལ་གནས་པ་དང་། ཚོགས་ཀྱིས་མི་ངོམས་པའི་ཕྱིར་ཕ་རོལ་ཏུ་ཕྱིན་པ་ལ་གནས་པ་དང་། ཤེས་རབ་ཤིན་ཏུ་སྦྱངས་པའི་ཕྱིར་ཆོས་ཀྱི་གཏམ་ལ་གནས་པ་དང་། བསམ་གཏན་ཆེན་པོ་ཁོང་དུ་ཆུད་པར་བྱ་བའི་ཕྱིར་བས་མཐའི་དགོན་པ་ལ་གནས་པ་དང་། བྱ་བ་ཉུང་བའི་ཕྱིར་ཐམས་ཅད་མཁྱེན་པ་ཉིད་དང་། མཐུན་པའི་སྦྱངས་པའི་ཡོན་ཏན་དང་ཆོག་ཤེས་པ་དང་འཕགས་པའི་རྒྱུད་ལ་གནས་པ་དང་། ཆོས་ཀྱི་བརྩོན་འགྲུས་རྗེས་སུ་འབྲང་བར་བྱ་བའི་ཕྱིར་ནན་ཏན་ལ་གནས་པ་དང་། སངས་རྒྱས་ཀྱི་སྤྱོད་ལམ་ཡོངས་སུ་རྫོགས་པར་བྱ་བའི་ཕྱིར། དེ་བཞིན་གཤེགས་པ་བསྙེན་བཀུར་བ་ལ་གནས་པ་དང་། ཡེ་ཤེས་ཆེན་པོ་ཡོངས་སུ་རྫོགས་པར་བྱ་བའི་ཕྱིར་མངོན་པར་ཤེས་པས་འབྱུང་བ་ལ་གནས་པ་དང་། ལུང་བསྟན་པ་ཡོངས་སུ་རྫོགས་པར་བྱ་བའི་ཕྱིར་བཟོད་པ་ཐོབ་པ་ལ་གནས་པ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་སྙིང་པོ་བྱང་ཆུབ་ལ་གནས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་
རྣམས་ཀྱི་གནས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་གནས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྟན་ལ་འདུག་པ་སྟེ། བཅུ་གང་ཞེ་ན་འདི་ལྟར་དགེ་བ་བཅུའི་ལས་ཀྱི་ལམ་བསྒྲུབ་པའི་ཕྱིར་འཁོར་ལོས་སྒྱུར་བའི་སྟན་ལ་འདུག་པ་དང་། འཇིག་རྟེན་ཐམས་ཅད་སངས་རྒྱས་ཀྱི་ཆོས་ཀྱི་དབང་ཕྱུག་ལ་དགོད་པའི་ཕྱིར་འཇིག་རྟེན་གྱི་མགོན་པོའི་སྟན་ལ་འདུག་པ་དང་། འགྲོ་བ་ཐམས་ཅད་ཀྱི་དབང་པོར་འགྱུར་བའི་ཕྱིར་བརྒྱ་བྱིན་གྱི་སྟན་ལ་འདུག་པ་དང་། རང་གི་སེམས་དང་། གཞན་གྱི་སེམས་ལ་དབང་བསྒྱུར་བའི་ཕྱིར་ཚངས་པའི་སྟན་ལ་འདུག་པ་དང་། ཆོས་ཀྱི་གཏམ་མ་ནོར་བར་བྱ་བའི་ཕྱིར་སེང་གེའི་སྟན་ལ་འདུག་པ་དང་། གཟུངས་དང་སྤོབས་པའི་སྟོབས་ཀྱིས་བརྗོད་པའི་ཕྱིར་ཆོས་ཀྱི་སྟན་ལ་འདུག་པ་དང་། དམ་བཅས་པ་མཐར་ཕྱིན་པའི་ཕྱིར་ཡི་དམ་ལ་བརྟན་པའི་སྟན་ལ་འདུག་པ་དང་། གཤེ་བ་དང་། སྡང་བ་བྱམས་པར་བྱ་བའི་ཕྱིར་བྱམས་པ་ཆེན་པོའི་སྟན་ལ་འདུག་པ་དང་། མི་དགའ་བ་ཐམས་ཅད་བཟོད་པར་བྱ་བས་མི་སྐྱོ་བར་བྱ་བའི་ཕྱིར་སྙིང་རྗེ་ཆེན་པོའི་སྟན་ལ་འདུག་པ་དང་། ཕས་ཀྱི་རྒོལ་བ་དང་བདུད་ཀྱི་སྡེ་ཐམས་ཅད་བཟློག་པའི་ཕྱིར་རྡོ་རྗེའི་སྟན་ལ་འདུག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྟན་ལ་འདུག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སངས་རྒྱས་ཀྱི་གདན་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མལ་ཏེ། བཅུ་གང་ཞེ་ན་འདི་ལྟར་ལུས་དང་སེམས་དབེན་པར་བྱ་བའི་ཕྱིར་དབེན་པའི་མལ་དང་། ཚུལ་བཞིན་གྱི་སྦྱོར་བ་བསྒྲུབ་པའི་ཕྱིར་ནང་དུ་ཡང་དག་པར་གཞོག་པའི་མལ་དང་། ལུས་དང་སེམས་ལས་སུ་རུང་བར་བྱ་བའི་ཕྱིར་སྙོམས་པར་འཇུག་པའི་མལ་དང་། གཞན་དང་བདག་
ལ་གདུང་བ་མེད་པར་བྱ་བའི་ཕྱིར་ཚངས་པའི་མལ་དང་། ཕྱིས་འགྱོད་པ་མེད་པར་བྱ་བའི་ཕྱིར་ལེགས་པའི་ལས་ཀྱི་མལ་དང་། ཕྱིས་ཁྲོ་བ་མེད་པར་བྱ་བའི་ཕྱིར་ཡང་དག་པའི་ནན་ཏན་གྱི་མལ་དང་། དགེ་བའི་བཤེས་གཉེན་གྱིས་བསྐུལ་བར་བྱ་བའི་ཕྱིར་ལམ་གྱི་མལ་དང་། ཡོངས་སུ་བསྔོ་བ་ལ་མཁས་པའི་ཕྱིར་ཤིན་ཏུ་མཉམ་པར་གཞག་པའི་མལ་དང་། བརྩམས་པ་མཐར་ཕྱིན་པར་བྱ་བའི་ཕྱིར་དགོས་པ་ཐམས་ཅད་ཡོངས་སུ་གྲུབ་པའི་མལ་དང་། སྔོན་ལས་ལེགས་པར་སྤྱད་པའི་ཕྱིར་ལྷུན་གྱིས་གྲུབ་པར་སྤྱོད་པའི་མལ་ལོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་མལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཆོས་ཀྱི་གཟིམས་མལ་ཆེན་པོར་རྣམ་པར་འཚང་རྒྱ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་སྤྱོད་པ་སྟེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ལ་སེམས་མཉམ་པས་བྱམས་པ་ཆེན་པོ་ལ་རྣམ་པར་སྤྱོད་པ་དང་། མ་བསླབས་པ་ལ་བརྙས་པ་མེད་པའི་ཕྱིར་སྙིང་རྗེ་ཆེན་པོ་ལ་རྣམ་པར་སྤྱོད་པ་དང་། མི་དགའ་བ་ཐམས་ཅད་བསྩལ་བའི་ཕྱིར་དགའ་བ་ཆེན་པོ་ལ་རྣམ་པར་སྤྱོད་པ་དང་། འདུས་བྱས་དང་འདུས་མ་བྱས་སུ་མཉམ་ཞིང་མཚུངས་པའི་ཕྱིར་བཏང་སྙོམས་ཆེན་པོ་ལ་རྣམ་པར་སྤྱོད་པ་དང་། བྱང་ཆུབ་ཀྱི་སེམས་སྔོན་དུ་འགྲོ་བས་ཕ་རོལ་ཏུ་ཕྱིན་པ་ཐམས་ཅད་ལ་རྣམ་པར་སྤྱོད་པ་དང་། རབ་ཏུ་རྣམ་པར་དབྱེ་བ་ལ་མཁས་པས་རྣམ་པའི་མཆོག་ཐམས་ཅད་དང་ལྡན་པའི་སྟོང་པ་ཉིད་ལ་རྣམ་པར་སྤྱོད་པ་དང་། སྐྱོན་མེད་པ་ལ་ཐོགས་པ་མེད་པས་མཚན་མ་མེད་པ་ལ་རྣམ་པར་སྤྱོད་པ་དང་། ཆེད་དུ་བསམས་ཏེ་སྐྱེ་བ་འཛིན་པའི་ཕྱིར་སྨོན་པ་མེད་པ་ལ་རྣམ་པར་སྤྱོད་པ་དང་། བཟོད་པ་ཡོངས་སུ་རྫོགས་པར་བྱ་བའི་ཕྱིར་དྲན་པ་དང་། ཤེས་བཞིན་ལ་རྣམ་པར་སྤྱོད་པ་དང་། ལུང་བསྟན་པ་ཐོབ་པར་བྱ་བའི་ཕྱིར་ཆོས་ཐམས་ཅད་མཉམ་པ་ཉིད་ལ་རྣམ་པར་སྤྱོད་པའོ། །ཀྱེ་རྒྱལ་བའི་སྲས་བཅུ་པོ་དེ་
དག་ནི་བྱང་ཆུབ་སེམས་དཔའི་རྣམ་པར་སྤྱོད་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་རྣམ་པར་སྤྱོད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ཏེ། བཅུ་གང་ཞེ་ན་འདི་ལྟར་དྲན་པ་ཉེ་བར་གཞག་པ་ཡོངས་སུ་རྫོགས་པར་བྱ་བའི་ཕྱིར་དྲན་པའི་སྤྱོད་ཡུལ་དང་། ཆོས་ཀྱི་ཚུལ་རྟོགས་པར་བྱ་བའི་ཕྱིར་རྟོགས་པའི་སྤྱོད་ཡུལ་དང་། སངས་རྒྱས་ཐམས་ཅད་མཉེས་པར་བྱ་བའི་ཕྱིར་བློ་གྲོས་ཀྱི་སྤྱོད་ཡུལ་དང་། ཐམས་ཅད་མཁྱེན་པ་ཉིད་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་ཕ་རོལ་ཏུ་ཕྱིན་པའི་སྤྱོད་ཡུལ་དང་། སེམས་ཅན་ཡོངས་སུ་སྨྱིན་པར་བྱ་བའི་ཕྱིར་བསྡུ་བའི་དངོས་པོའི་སྤྱོད་ཡུལ་དང་། དགེ་བའི་རྩ་བ་ཐམས་ཅད་དྲན་པའི་ཕྱིར་འཁོར་བའི་སྤྱོད་ཡུལ་དང་། འདུ་འཛི་བསལ་ཞིང་སེམས་ཅན་མོས་པ་ཇི་ལྟ་བ་བཞིན་དུ་གདུལ་བའི་ཕྱིར། སེམས་ཅན་ཐམས་ཅད་དང་འགྲོགས་པའི་སྤྱོད་ཡུལ་དང་། སེམས་ཅན་ཐམས་ཅད་ཀྱི་དབང་པོ་དང་། ཡུལ་ཁོང་དུ་ཆུད་པར་བྱ་བའི་ཕྱིར་མངོན་པར་ཤེས་པ་བསྐྱེད་པའི་སྤྱོད་ཡུལ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་མཚོན་ཆ་གདགས་པའི་ཕྱིར་ཐབས་མཁས་པའི་སྤྱོད་ཡུལ་དང་། ཐམས་ཅད་མཁྱེན་པའི་ཡེ་ཤེས་མངོན་པར་སངས་རྒྱས་ཀྱང་བྱང་ཆུབ་སེམས་དཔའི་སྤྱོད་པ་རྒྱུན་མི་གཅོད་པའི་ཕྱིར་སྙིང་པོ་བྱང་ཆུབ་ཀྱི་སྤྱོད་ཡུལ་ལོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོའི་སྤྱོད་ཡུལ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ལྟ་བ་སྟེ། བཅུ་གང་ཞེ་ན་འདི་ལྟར་གཟུགས་ཤིན་ཏུ་ཕྲ་བ་བལྟ་བའི་ཕྱིར་ལས་ལེགས་པར་བྱས་པས་ལྟ་བ་དང་། སེམས་ཅན་གྱི་གྲངས་ལ་མངོན་པར་ཆགས་པ་མེད་པར་བྱ་བའི་ཕྱིར་ཤི་འཕོའི་རྒྱུད་ཤེས་པས་ལྟ་བ་དང་། སེམས་ཅན་གྱི་
དབང་པོ་ཁོང་དུ་ཆུད་པར་བྱ་བའི་ཕྱིར་སེམས་ཅན་གྱི་དབང་པོ་ཤེས་པས་ལྟ་བ་དང་། ཆོས་ཀྱི་དབྱིངས་ཐ་དད་དུ་མི་དབྱེ་བའི་ཕྱིར་ཆོས་རབ་ཏུ་རྣམ་པར་འབྱེད་པའི་ལྟ་བ་དང་། སངས་རྒྱས་ཀྱི་སྤྱན་གསལ་བ་ཐོབ་པར་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་ལ་མངོན་དུ་ལྟ་བ་དང་། ཇི་ལྟར་གནས་པའི་ཆོས་བསྟན་པའི་ཕྱིར་ཤེས་རབ་དང་། ཡེ་ཤེས་ཐོབ་པས་ལྟ་བ་དང་། སངས་རྒྱས་ཀྱི་ཆོས་ངེས་པར་རབ་ཏུ་ཐོབ་པར་བྱ་བའི་ཕྱིར་མི་སྐྱེ་བའི་བཟོད་པ་ཐོབ་པས་ལྟ་བ་དང་། འདུ་ཤེས་དང་ཉོན་མོངས་པ་ཐམས་ཅད་ཀྱི་ཁམས་གསུམ་པ་དང་། ཉན་ཐོས་དང་རང་སངས་རྒྱས་ཀྱིས་རྣམ་པར་བཟློག་པའི་ཕྱིར་མི་ལྡོག་པའི་ས་ལ་ལྟ་བ་དང་། སངས་རྒྱས་ཀྱི་ཆོས་ཐམས་ཅད་ལ་དབང་བསྒྱུར་བས་ཡེ་ཤེས་མི་ཉམས་པ་ཡོངས་སུ་བསྟན་པའི་ཕྱིར་དབང་བསྐུར་བའི་ས་ལ་ལྟ་བ་དང་། ཕྱོགས་བཅུར་བྱ་བ་ཐམས་ཅད་སྟོན་པའི་ཕྱིར་བློ་ཤིན་ཏུ་རྣམ་པར་སངས་རྒྱས་པའི་ཏིང་ངེ་འཛིན་ལ་སྙོམས་པར་ཞུགས་པས་ལྟ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ལྟ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོས་ལྟ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་ལྟ་བ་སྟེ། བཅུ་གང་ཞེ་ན་འདི་ལྟར་མི་དགའ་བའི་སེམས་མེད་པས་བསམ་པ་ཇི་ལྟ་བ་བཞིན་དུ་ཚིམ་པར་བྱ་བའི་ཕྱིར་སློང་བ་ལ་རྣམ་པར་ལྟ་བ་དང་། ཐམས་ཅད་མཁྱེན་པ་ཉིད་ཀྱི་ཚུལ་ཁྲིམས་ལ་རབ་ཏུ་དགོད་པའི་ཕྱིར་སེམས་ཅན་ཚུལ་ཁྲིམས་ངན་པ་ཅན་ལ་རྣམ་པར་ལྟ་བ་དང་། བཟོད་པའི་སྟོབས་ཀྱིས་སངས་རྒྱས་ཀྱི་བཟོད་པ་ལ་རབ་ཏུ་དགོད་པའི་ཕྱིར་སེམས་ཅན་གནོད་སེམས་ཅན་ལ་རྣམ་པར་ལྟ་བ་དང་། མི་གཏོང་བ་ལ་བརྩོན་པས་ཐེག་པ་ཆེན་པོ་ལ་སེམས་ཅན་ཡང་དག་པར་དགོད་པའི་ཕྱིར་སེམས་ཅན་ལེ་ལོ་ཅན་ལ་རྣམ་པར་ལྟ་བ་དང་། ཐམས་ཅད་མཁྱེན་པའི་ས་རྣམ་པར་འཁྲུག་པ་མེད་པ་ལ་རབ་
ཏུ་དགོད་པའི་ཕྱིར་སེམས་ཅན་སེམས་རྣམ་པར་འཁྲུག་པ་ཅན་ལ་རྣམ་པར་ལྟ་བ་དང་། ཐེ་ཙོམ་མེད་པས་བལྟ་བ་དང་། དམིགས་པ་ཐམས་ཅད་རབ་ཏུ་བསྩལ་བའི་ཕྱིར་སེམས་ཅན་ཤེས་རབ་འཆལ་བ་ཅན་ལ་རྣམ་པར་ལྟ་བ་དང་། ཇི་ལྟར་བསྟན་པའི་སངས་རྒྱས་ཀྱི་ཆོས་ལ་རབ་ཏུ་དགོད་པའི་ཕྱིར་དགེ་བའི་བཤེས་གཉེན་ལ་དགེ་བར་རྣམ་པར་ལྟ་བ་དང་། དོན་གྱི་མཆོག་ཉམས་སུ་མྱོང་བར་བྱ་བའི་ཕྱིར་ཇི་སྐད་དུ་ཐོས་པའི་ཆོས་ལ་ལྷག་མཐོང་གིས་རྣམ་པར་ལྟ་བ་དང་། སྙིང་རྗེ་ཆེན་པོའི་སྟོབས་མི་གཏོང་བའི་ཕྱིར་སེམས་ཅན་ཐམས་ཅད་ཡོངས་ལ་རྣམ་པར་ལྟ་བ་དང་། ཐམས་ཅད་མཁྱེན་པའི་ཡེ་ཤེས་རྫོགས་པར་འཚང་རྒྱ་བར་བྱ་བའི་ཕྱིར་སངས་རྒྱས་ཀྱི་ཆོས་ཐམས་ཅད་ལ་རྣམ་པར་ལྟ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་ལྟ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོས་རྣམ་པར་ལྟ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་བསྒྱིངས་པ་སྟེ། བཅུ་གང་ཞེ་ན་འདི་ལྟར་ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོའི་འཁོར་ཐམས་ཅད་ཟིལ་གྱིས་གནོན་པའི་ཕྱིར་ཁྱུ་མཆོག་གི་རྣམ་པར་བསྒྱིངས་པ་དང་། ཤིན་དུ་དུལ་ཞིང་ཅང་ཤེས་པའི་སེམས་ཀྱིས་སེམས་ཅན་ཐམས་ཅད་ཀྱི་ཁུར་བ་ཀུར་བའི་ཕྱིར་གླང་པོའི་བསྒྱིངས་པ་དང་། ཆོས་ཀྱི་སྤྲིན་ཆེན་པོ་ཤིན་ཏུ་འདུས་པ་ལས་རིག་པ་དང་། རྣམ་པར་གྲོལ་བའི་གློག་འགྱུ་ཞིང་ཡང་དག་པ་མ་ནོར་བར་འབྲུག་སྒྲ་ཆེན་པོ་བསྒྲགས་ཏེ། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་བདུད་རྩིའི་ཆུའི་ཆོས་ཀྱི་ཆར་མངོན་པར་དབབ་པའི་ཕྱིར་ཀླུའི་རྣམ་པར་བསྒྱིངས་པ་དང་། མ་རིག་པའི་སྒོ་ངའི་སྦུབས་དང་། ལྕག་ལྕིག་གི་སྤྲི་བརྟོལ་ཏེ། སྲེད་པའི་ཆུ་ལྷག་མཐོང་གི་གཤོག་
པས་ཕྱེ་སྟེ། སེམས་ཀྱི་སྦྲུལ་འདོད་པ་དང་། འཁྲུག་པ་དང་། ཉོན་མོངས་པའི་རྙོག་པ་ཅན་མངོན་པར་བླང་ཞིང་འབྱུང་བའི་ཕྱིར། ནམ་མཁའ་ལྡིང་གི་དབང་པོ་ཆེན་པོའི་རྣམ་པར་བསྒྱིངས་པ་དང་། འཇིགས་པ་དང་བག་ཚ་བ་ཐམས་ཅད་མེད་ཅིང་ཡེ་ཤེས་ཆེན་པོ་མཉམ་པ་ཉིད་ཀྱི་སྡེར་མོས་ངན་པར་ཚོགས་པའི་ཕས་ཀྱི་རྒོལ་བ་ཐམས་ཅད་རབ་ཏུ་གཞོམ་པའི་ཕྱིར་སེང་གེ་ཆེན་པོའི་རྣམ་པར་བསྒྱིངས་པ་དང་། འདོད་པ་དང་། འཁྲུག་པ་དང་ཉོན་མོངས་པའི་རྙོག་པའི་དགྲ་གནོད་པར་སེམས་པ་གདུལ་དཀའ་བ་ཐམས་ཅད་དབུས་ནས་གཞོམ་པའི་ཕྱིར་དཔའ་བོའི་རྣམ་པར་བསྒྱིངས་པ་དང་། ཕུང་པོ་དང་ཁམས་དང་སྐྱེ་མཆེད་དང་རྟེན་ཅིང་འབྲེལ་བར་འབྱུང་བ་ཐམས་ཅད་རབ་ཏུ་རྟོགས་པར་བྱེད་པའི་ཡེ་ཤེས་ཀྱིས་ཆོས་ཐམས་ཅད་ཀྱི་དབང་ཕྱུག་ཡང་དག་པར་བསྟན་པའི་ཕྱིར་ཡེ་ཤེས་ཀྱི་རྣམ་པར་བསྒྱིངས་པ་དང་། དྲན་པ་དང་བློ་གྲོས་དང་རྟོགས་པས་ཐོས་པ་ཐམས་ཅད་ཡོངས་སུ་བཟུང་སྟེ། མི་བརྗེད་པར་བཞག་པས་སེམས་ཅན་གཞན་གྱི་དབང་པོའི་རྒྱུད་དུ་ཕྱིན་པར་བྱ་བའི་ཕྱིར་གཟུངས་ཀྱི་རྣམ་པར་བསྒྱིངས་པ་དང་། མྱུར་ཞིང་མགྱོགས་ལ་དྲག་ཅིང་ཐོགས་པ་མེད་པ་དང་། ཆགས་པ་མེད་པར་ཚིག་ཐམས་ཅད་རབ་ཏུ་ཕྱེ་སྟེ་བསྟན་པས་སེམས་ཅན་ཐམས་ཅད་ཚིམ་པར་བྱེད་ཅིང་། དོན་ཡོད་ལ་རྨོངས་པ་མེད་པའི་སྤོབས་པ་དང་ལྡན་པས་སྤོབས་པའི་རྣམ་པར་བསྒྱིངས་པ་དང་། སེང་གེའི་ཁྲི་དམ་པའི་སྟེང་དུ་ཕྱིན་ཏེ། བདུད་ཀྱི་རྒོལ་བ་ཐམས་ཅད་བཅོམ་ནས་ཐམས་ཅད་མཁྱེན་པའི་ཡེ་ཤེས་ཀྱི་ཚོགས་ཡོངས་སུ་རྒྱས་པའི་ཕྱིར་སེམས་ཀྱི་སྐད་ཅིག་གཅིག་དང་ལྡན་པའི་ཤེས་རབ་ཀྱིས་གང་འཐོབ་པར་བྱ་བ་དེ་ཐམས་ཅད་དུ་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བས་སངས་རྒྱས་ཀྱི་རྣམ་པར་བསྒྱིངས་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་བསྒྱིངས་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་དབང་བསྒྱུར་བའི་རྣམ་པར་
བསྒྱིངས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སེང་གེའི་ང་རོ་སྟེ། བཅུ་གང་ཞེ་ན་འདི་ལྟར་སངས་རྒྱས་སུ་འགྱུར་བར་བྱའོ། །ཞེས་བྱང་ཆུབ་ཀྱི་སེམས་ཀྱི་སེང་གེའི་ང་རོ་ཆེན་པོ་དང་མ་རྒལ་བ་བརྒལ་བར་བྱའོ། །མ་གྲོལ་བ་དགྲོལ་བར་བྱའོ། །དབུགས་མ་ཕྱིན་པ་དབུགས་དབྱུང་བར་བྱའོ། །ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བར་བྱའོ། །ཞེས་སེམས་ཅན་ལ་སྙིང་རྗེ་བའི་སེང་གེའི་ང་རོ་ཆེན་པོ་དང་། སངས་རྒྱས་ཀྱི་གདུང་དང་། ཆོས་ཀྱི་གདུང་དང་། དགེ་འདུན་གྱི་གདུང་མི་གཅད་དོ་ཞེས་དེ་བཞིན་གཤེགས་པས་མཛད་པ་བཟོ་བའི་སེང་གེའི་ང་རོ་ཆེན་པོ་དང་། ཞིང་ཐམས་ཅད་ཡོངས་སུ་དག་པར་བྱའོ། །ཞེས་དམ་བཅས་པ་ལ་བརྟན་ཞིང་ཁ་འོག་ཏུ་ལུས་འཁྲུས་པའི་སེང་གེའི་ང་རོ་ཆེན་པོ་དང་། ངན་སོང་དང་མི་ཁོམ་པ་ཐམས་ཅད་བསྐམ་པར་བྱའོ། །ཞེས་རང་གི་ལུས་ཡོངས་སུ་དག་པའི་སེང་གེའི་ང་རོ་ཆེན་པོ་དང་། སངས་རྒྱས་ཀྱི་སྐུ་དང་གསུང་དང་ཐུགས་ཀྱི་རྒྱན་དང་མཚན་དང་། དཔེ་བྱད་བཟང་པོ་ཡོངས་སུ་རྫོགས་པར་བྱའོ། །ཞེས་བསོད་ནམས་ཀྱི་ཚོགས་ཡོངས་སུ་བཙལ་བས་མི་ངོམས་པའི་སེང་གེའི་ང་རོ་ཆེན་པོ་དང་། སངས་རྒྱས་ཐམས་ཅད་ཀྱི་ཡེ་ཤེས་ཡོངས་སུ་རྫོགས་པར་བྱའོ་ཞེས་ཡེ་ཤེས་ཀྱི་ཚོགས་ཡོངས་སུ་བཙལ་བས་མི་ངོམས་པའི་སེང་གེའི་ང་རོ་ཆེན་པོ་དང་། བདུད་དང་བདུད་ཀྱི་ལས་ཐམས་ཅད་རབ་ཏུ་གཞོམ་པར་བྱའོ་ཞེས་ཡང་དག་པའི་ནན་ཏན་དང་ཉོན་མོངས་པ་མེད་པའི་སེང་གེའི་ང་རོ་ཆེན་པོ་དང་། བདག་མེད་པ་དང་སེམས་ཅན་མེད་པ་དང་། སྲོག་མེད་པ་དང་གང་ཟག་མེད་པ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པས་ནམ་མཁའི་དབྱིངས་དྲི་མ་མེད་པ་ལྟ་བུར་ཆོས་ཐམས་ཅད་ཤེས་པར་བྱའོ། །ཞེས་མི་སྐྱེ་བའི་ཆོས་ཀྱི་བཟོད་པ་ཐོས་པར་བྱ་བའི་སེང་གེའི་ང་རོ་ཆེན་པོ་དང་།
ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་སྲིད་པའི་ཐ་མར་གྱུར་པའི་ཚེ། སངས་རྒྱས་ཀྱི་ཞིང་གཙང་ཞིང་དྲི་མ་མེད་ལ་འོད་གསལ་བའི་རྒྱན་དང་ལྡན་པ་ཐམས་ཅད་བསྐྱོད་དེ། བརྒྱ་བྱིན་དང་ཚངས་པ་དང་འཇིག་རྟེན་ཀྱི་མགོན་པོ་ཐམས་ཅད་ཀྱིས་རབ་ཏུ་བསྔགས་པའི་རིགས་སུ་བྱུང་སྟེ། ཡེ་ཤེས་ཆེན་པོ་ཆགས་པ་མེད་པས་རྣམ་པར་ལྟ་བའི་བློའི་མིག་དང་ལྡན་པ། སེམས་ཅན་ཐམས་ཅད་ཀྱི་ནང་ནས་བདག་བླ་ན་མེད་པར་མཐོང་སྟེ། ས་ཆེན་པོས་ཡོངས་སུ་མ་བཟུང་བར་གོམ་པ་བདུན་དུ་འགྲོ་ཞིང་སེང་གེའི་ང་རོ་ཆེན་པོ་སྒྲོག་སྟེ། བདག་ནི་འཇིག་རྟེན་ན་མཆོག་ཏུ་གྱུར་པ། བདག་ནི་འཇིག་རྟེན་ན་གཙོ་བོར་གྱུར་པ་ཡིན་གྱི་སྐྱེ་ཞིང་འཆི་བ་མཐར་དབྱུང་བར་བྱའོ་ཞེས་ཇི་སྐད་དུ་སྨྲས་པ་དེ་ལྟར་བྱེད་པའི་སེང་གེའི་ང་རོ་ཆེན་པོའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སེང་གེའི་ང་རོ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སེང་གེའི་ང་རོ་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སེམས་ཅན་ལ་མི་མཉམ་པ་མེད་པའི་ཕྱིར་སེམས་སྙོམས་པའི་སྦྱིན་པ་དང་། བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་བསམ་པ་ཇི་ལྟ་བ་བཞིན་དུ་ཚིམ་པར་བྱེད་པའི་སྦྱིན་པ་དང་། ཕན་པའི་དངོས་པོ་ཡོངས་སུ་མ་ཉམས་པའི་ཕྱིར་འཁྲུག་པ་མེད་པའི་སྦྱིན་པ་དང་། གང་ཟག་རབ་དང་། ཐ་མ་ཤེས་པའི་ཕྱིར་ཅི་རིགས་སུ་སྦྱིན་པ་དང་། རྣམ་པར་སྨིན་པ་ལ་རེ་བ་མེད་པའི་ཕྱིར་ཡེ་བརྔམ་པ་མེད་པའི་སྦྱིན་པ་དང་། སེམས་ཀྱི་འཛིན་པ་ཐམས་ཅད་སྤོང་བའི་ཕྱིར་ཡོངས་སུ་བཏང་བ་ཤིན་ཏུ་གཏོང་བའི་སྦྱིན་པ་དང། མ་བཏང་བ་གཏོང་བས་དག་པར་བྱ་བའི་ཕྱིར་ཕྱི་ནང་གི་དངོས་པོ་ལ་ཕངས་པ་མེད་པར་ཡོངས་སུ་གཏོང་བའི་སྦྱིན་པ་དང་། འདུས་བྱས་དང་འདུས་མ་བྱས་ཡོངས་སུ་སྤང་
བའི་ཕྱིར་བྱང་ཆུབ་ཏུ་ཡོངས་སུ་བསྔོས་པའི་སྦྱིན་པ་དང་། སྙིང་པོ་བྱང་ཆུབ་ཀྱི་བར་དུ་རྗེས་སུ་གཞོལ་བར་བྱ་བའི་ཕྱིར། སེམས་ཅན་དེ་དག་ཡོངས་སུ་སྨིན་པར་བྱ་བའི་སྦྱིན་པ་དང་། སྦྱིན་པ་དག་དང་ལེན་པ་དང་། སྦྱིན་པ་ནམ་མཁའ་དང་མཚུངས་པར་ཡིད་ལ་བྱེད་པའི་ཕྱིར་འཁོར་གསུམ་ཡོངས་སུ་དག་པའི་སྦྱིན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྦྱིན་པ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་གཏོང་བ་ཆེན་པོ་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སྡོམ་པ་གསུམ་ཡོངས་སུ་བསྲུང་བའི་ཕྱིར་ལུས་ཡོངས་སུ་དག་པའི་ཚུལ་ཁྲིམས་དང་། ངག་གི་ཉེས་པ་བཞི་ཡོངས་སུ་སྤང་བའི་ཕྱིར་ངག་ཡོངས་སུ་དག་པའི་ཚུལ་ཁྲིམས་དང་ཆགས་སེམས་དང་གནོད་སེམས་དང་ལོག་པར་ལྟ་བ་ཡོངས་སུ་སྤང་བའི་ཕྱིར་སེམས་ཡོངས་སུ་དག་པའི་ཚུལ་ཁྲིམས་དང་། ལྷ་དང་མི་ཐམས་ཅད་ཀྱི་བདག་པོ་བྱེད་དུ་གཞུག་པའི་ཕྱིར་བསླབ་པ་ཐམས་ཅད་གོད་པ་མེད་པའི་ཚུལ་ཁྲིམས་དང་། ཉི་ཙེ་བའི་ཐེག་པ་ལ་འདོད་པ་མེད་པའི་ཕྱིར་བྱང་ཆུབ་ཀྱི་སེམས་ཡོངས་སུ་བསྲུང་བས་དག་པའི་ཚུལ་ཁྲིམས་དང་། ཁ་ན་མ་ཐོ་བ་རྡུལ་ཙམ་ལ་ཡང་འཇིགས་པར་བལྟ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་བསྟན་པའི་ཆོ་ག་དང་། བསླབ་པའི་གནས་མ་གོད་ཅིང་དག་པའི་ཚུལ་ཁྲིམས་དང་། སེམས་ཅན་ཐམས་ཅད་ལྟུང་བ་ལས་བསླང་བའི་ཕྱིར་འདུལ་བས་དབེན་པའི་ཚུལ་ཁྲིམས་དང་། དགེ་བའི་ཆོས་ཐམས་ཅད་ཀྱི་ཡི་དམ་བརྣན་པའི་ཕྱིར་སྡིག་པ་ཐམས་ཅད་མི་བྱེད་པས་དག་པའི་ཚུལ་ཁྲིམས་དང་། རློམ་སེམས་མེད་པར་བྱ་བའི་ཕྱིར་དམིགས་པའི་ལྟ་བ་ཐམས་ཅད་ཡོངས་སུ་སྤོང་བའི་ཚུལ་ཁྲིམས་དང་། སྙིང་རྗེ་ཆེན་པོའི་སྟོབས་མངོན་པར་བསྒྲུབ་པའི་ཕྱིར་འགྲོ་བ་ཐམས་ཅད་རྗེས་
སུ་བསྲུང་བས་དག་པའི་ཚུལ་ཁྲིམས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཚུལ་ཁྲིམས་ཁ་ན་མ་ཐོ་བ་མེད་ཅིང་ཡོངས་སུ་དག་པ་བླ་ན་མེད་པ་ཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཟོད་པ་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སེམས་ཅན་གཞན་གྱི་ཡིད་དང་མི་འགལ་བར་བྱ་བའི་ཕྱིར་གཞན་གྱིས་མི་སྙན་པར་བརྗོད་པ་དང་། ངན་པར་འོངས་པའི་ཚིག་གི་ལམ་རྣ་ལ་གཟོན་པའི་བཟོད་པ་ཡོངས་སུ་དག་པ་དང་། བདག་དང་གཞན་བསྲུང་བའི་ཕྱིར་རྡོ་དང་དབྱུག་པ་དང་། མཚོན་ཆ་དང་ལག་ཆ་ཐམས་ཅད་བག་ལ་ཞ་བར་བྱ་བའི་བཟོད་པ་ཡོངས་སུ་དག་པ་དང་། རང་བཞིན་གྱིས་མི་འཁྲུག་པའི་ཕྱིར་ཐ་བ་དང་། ཁྲོ་བ་དང་། གནོད་སེམས་ཐམས་ཅད་ཀྱིས་མི་གོས་པའི་བཟོད་པ་ཡོངས་སུ་དག་པ་དང་། དཔོན་དུ་གྱུར་པས་བག་ལ་ཞ་བར་བྱ་བའི་ཕྱིར་སེམས་ཅན་དམའ་བ་ལ་མི་འཁྲུག་པའི་བཟོད་པ་ཡོངས་སུ་དག་པ་དང་། བདག་གི་ལུས་དང་སྲོག་ཡོངས་སུ་གཏོང་བའི་ཕྱིར་སྐྱབས་ཚོལ་བ་བསྐྱབ་པའི་བཟོད་པ་ཡོངས་སུ་དག་པ་དང་། མ་བསླབས་པ་ཐམས་ཅད་ལ་མི་བརྙས་པའི་ཕྱིར་བདག་གི་ང་རྒྱལ་ཡོངས་སུ་སྤང་བའི་བཟོད་པ་དང་། སྒྱུ་མའི་རྣམ་པ་ལྟ་བུར་རབ་ཏུ་རྟོགས་པའི་ཕྱིར་ལུས་ཡན་ལག་སོ་སོར་ཕྲལ་ཏེ། གཏུབས་ཀྱང་མི་འཁྲུག་པའི་བཟོད་པ་ཡོངས་སུ་དག་པ་དང་། བདག་དང་གཞན་གྱི་འདུ་ཤེས་དང་བྲལ་བའི་ཕྱིར་གནོད་པར་བྱས་པ་ཐམས་ཅད་ལ་ཞེ་མི་སྡང་བའི་སེམས་ཀྱི་བཟོད་པ་ཡོངས་སུ་དག་པ་དང་། ཡུལ་ཐམས་ཅད་རྣམ་པར་བཟློག་པའི་ཕྱིར་ཉོན་མོངས་པ་དང་། མི་མཐུན་པའི་བཟོད་པ་ཡོངས་སུ་དག་པ་དང་། ཆོས་ཐམས་ཅད་ཟད་ཅིང་མི་སྐྱེ་བ་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལ་གཞན་གྱི་དྲིང་མི་འཇོག་པར་འཇུག་པའི་ཕྱིར། བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱི་ཚུལ་དང་། མཐུན་པའི་བཟོད་
པ་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བཟོད་པ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་བཟོད་པ་ལ་གཞན་གྱི་དྲིང་མི་འཇོག་པར་འཇུག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སངས་རྒྱས་དང་བྱང་ཆུབ་སེམས་དཔའ་དང་སློབ་དཔོན་དང་། བླ་མ་དང་སྦྱིན་པའི་གནས་ཐམས་ཅད་ལ་ལྡང་ཞིང་བསྙེན་བཀུར་དང་། རིམ་གྲོ་བྱ་བ་ལས་མི་ལྡོག་པའི་ཕྱིར་ལུས་ཀྱིས་བརྩམས་པ་ཡོངས་སུ་དག་པའི་བརྩོན་འགྲུས་དང་། དེ་བཞིན་གཤེགས་པ་ཐམས་ཅད་ཀྱིས་གསུངས་པ་མཉན་པ་དང་། དྲན་པར་བྱ་བ་དང་། གཟུང་བ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་དང་བསྔགས་པ་རབ་ཏུ་བརྗོད་པ་དང་། ཇི་སྐད་དུ་ཐོས་པའི་ཆོས་རྣམས་སེམས་ཅན་ཐམས་ཅད་ལ་སྟོན་པས་མི་སྐྱོ་བའི་ཕྱིར་ངག་གིས་བརྩམས་པ་ཡོངས་སུ་དག་པའི་བརྩོན་འགྲུས་དང་། བྱམས་པ་དང་སྙིང་རྗེ་དང་དགའ་བ་དང་། བཏང་སྙོམས་དང་བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་སྙོམས་པར་འཇུག་ཅིང་ལྡང་བ་ལ་མཁས་པ་ལས་མི་ལྡོག་པའི་ཕྱིར་སེམས་ཀྱིས་བརྩམས་པ་ཡོངས་སུ་དག་པའི་བརྩོན་འགྲུས་དང་། གཡོ་དང་། སྒྱུ་མེད་པ་རང་བཞིན་གྱིས་དྲང་ཞིང་འཆོས་པ་མེད་དེ། སྦྱོར་བའི་བརྩམ་པ་ཐམས་ཅད་ལས་མི་ལྡོག་པའི་ཕྱིར་བསམ་པ་ཞུམ་པ་མེད་པས་ཡོངས་སུ་དག་པའི་བརྩོན་འགྲུས་དང་རྟག་ཏུ་རྒྱུན་མི་འཆད་པར་གོང་ནས་གོང་དུ་ཁྱད་པར་དུ་འགྲོ་ཞིང་མངོན་སུམ་གྱི་ཡེ་ཤེས་ཀྱི་སྣང་བས་དགེ་བའི་ཆོས་ཐམས་ཅད་ལ་ལྷག་པར་དམིགས་པའི་ཕྱིར་ལྷག་པའི་བསམ་པས་ཡོངས་སུ་དག་པའི་བརྩོན་འགྲུས་དང་། སྦྱིན་པ་དང་དུལ་བ་དང་སྡོམ་པ་དང་དེས་པ་དང་། ཚུལ་ཁྲིམས་དང་ཐོས་པ་དང་གཏོང་བ་དང་། བག་ཡོད་པས་ཤིན་ཏུ་བཟུང་ཞིང་ཐོགས་པ་མེད་པར་སྙིང་པོ་བྱང་ཆུབ་ཏུ་འགྲོ་བའི་ཕྱིར་
ཐོགས་པ་མེད་ཅིང་དོན་ཡོད་པས་ཡོངས་སུ་དག་པའི་བརྩོན་འགྲུས་དང་། འདོད་ཆགས་དང་ཞེ་སྡང་དང་གཏི་མུག་དང་འདོད་པའི་འཁྲུག་པ་དང་། ཉོན་མོངས་པ་དང་ལྟ་བ་དང་། ཀུན་ནས་བསྐོར་བ་དང་། སྒྲིབ་པ་དང་བར་དུ་གཅོད་པ་ཡོངས་སུ་ཆད་པའི་ཕྱིར། བདུད་ཀྱི་སྒྲ་ཐམས་ཅད་དང་བྲལ་བ་ཡོངས་སུ་དག་པའི་བརྩོན་འགྲུས་དང་། ཤེས་པ་དང་རབ་ཏུ་ཤེས་པ་དང་། ཤིན་ཏུ་ཁོང་དུ་ཆུད་པ་དང་། ལེགས་པར་བྱས་པས་འགྱོད་པ་མེད་པར་བརྩམས་པ་ཐམས་ཅད་མཐར་ཕྱིན་པར་བྱ་བ་དང་། སངས་རྒྱས་ཀྱི་ཆོས་མ་འདྲེས་པ་རབ་ཏུ་འཐོབ་པར་བྱ་བའི་ཕྱིར། ཡེ་ཤེས་སྣང་བ་ཡོངས་སུ་བསྒྲུབས་པས་ཡོངས་སུ་དག་པའི་བརྩོན་འགྲུས་དང་སེམས་ཀྱི་འཛིན་པ་དང་། ཡོངས་སུ་འཛིན་པ་ཐམས་ཅད་སྤངས་པས་ལུས་དང་ངག་དང་སེམས་ཀྱིས་བརྩམས་པ་མཚན་དང་མཚན་མ་མེད་པ་མཉམ་པས། སྒོ་ཀུན་དང་ལྡན་པའི་ཆོས་ཀྱི་དབྱིངས་ཤིན་ཏུ་རྟོགས་ཤིང་ཇི་ལྟ་བ་བཞིན་དུ་ཤེས་པས་ཁོང་དུ་ཆུད་པའི་ཕྱིར་བླང་བ་མེད་པ་དང་། དོར་བ་མེད་པས་ཡོངས་སུ་དག་པའི་བརྩོན་འགྲུས་དང་། ས་དང་ས་མ་ཡིན་པ་ལས་ཡང་དག་པར་འདས་ཏེ། སངས་རྒྱས་ཐམས་ཅད་ཀྱིས་དབང་བསྐུར་བ་ཡང་དག་པར་མནོད་པ་དང་། སངས་རྒྱས་ཐམས་ཅད་ཀྱི་སྐུ་ཟག་པ་མེད་པ་དང་། འཆི་འཕོ་དང་སྐྱེ་བ་དང་འབྱུང་བ་དང་། རྣམ་པར་འཚང་རྒྱ་བ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བ་ཆེན་པོ་ཡོངས་སུ་བསྟན་པ་དང་། ཀུན་ཏུ་བཟང་པོའི་རྣམ་པ་ཡོངས་སུ་རྫོགས་པའི་ཕྱིར་ཆོས་ཀྱི་སྣང་བ་ཡོངས་སུ་རྫོགས་པས་ཡོངས་སུ་དག་པའི་བརྩོན་འགྲུས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བརྩོན་འགྲུས་ཆེན་པོ་བླ་ན་མེད་པ་ཡོངས་སུ་དག་པ་འཐོབ་པར་འགྱུར་བ་དག་གོ། །།སངས་རྒྱས་རྨད་གཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གཅིག་པ།
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསམ་གཏན་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་ཡོངས་སུ་བཟུང་བ་ཐམས་ཅད་ལས་འབྱུང་བའི་ཕྱིར་རྟག་ཏུ་རྒྱུན་མྱི་འཆད་པར་རབ་ཏུ་འབྱུང་བས་མངོན་པར་འབྱུང་བའི་སེམས་ཀྱི་བསམ་གཏན་ཡོངས་སུ་དག་པ་དང་། ལམ་བསྟན་པའི་ཕྱིར་དགེ་བའི་བཤེས་གཉེན་ཚུལ་དང་འདྲ་བ་རྙེད་པའི་བསམ་གཏན་ཡོངས་སུ་དག་པ་དང་། བདག་གི་མྱེད་ཅིང་ཡོངས་སུ་འཛིན་པ་མྱེད་པའི་ཕྱིར་བས་མཐའ་དགོན་པའི་གནས་དང་། ནགས་ཚལ་ན་གནས་པའི་བསམ་གཏན་ཡོངས་སུ་དག་པ་དང་། དབེན་པ་ལ་མོས་པས་དགའ་བའི་ཕྱིར་འདུ་འཛི་སྤོང་ཞིང་སེམས་ཅན་མི་གཏོང་བའི་བསམ་གཏན་ཡོངས་སུ་དག་པ་དང་། དབང་པོའི་སྒོ་བསྡམ་པའི་ཕྱིར་སེམས་དུལ་ཞིང་ལས་སུ་རུང་བའི་བསམ་གཏན་ཡོངས་སུ་དག་པ་དང་། སྒྲའི་ཚེར་མ་ཐམས་ཅད་ཀྱིས་བསམ་གཏན་ལ་བསྒྲིབས་པ་མེད་པའི་ཕྱིར་རང་གི་ཡེ་ཤེས་ཉེ་བར་ཞི་བའི་བསམ་གཏན་ཡོངས་སུ་དག་པ་དང་། རབ་ཏུ་དབྱེ་བ་ཐམས་ཅད་མངོན་སུམ་དུ་ཤེས་པས་ལམ་དང་། བྱང་ཆུབ་ཀྱི་ཡན་ལག་ལ་སྦྱོར་བའི་བསམ་གཏན་ཡོངས་སུ་དག་པ་དང་། ད་དུང་འདོད་པའི་ཁམས་སུ་དམྱིགས་པའི་ཕྱིར་བསམ་གཏན་གྱི་རོ་མི་མྱོང་བའི་ཐབས་ལས་རྣམ་པར་མི་ལྡོག་པའི་བསམ་གཏན་ཡོངས་སུ་དག་པ་དང་། སེམས་ཅན་ཐམས་ཅད་ཀྱི་དབང་པོ་རྗེས་སུ་རྟོགས་པར་བྱ་བའི་ཕྱིར་མངོན་པར་ཤེས་པ་དང་། རིག་པ་བསྐྱེད་པའི་བསམ་གཏན་ཡོངས་སུ་དག་པ་དང་། སངས་རྒྱས་ཀྱི་ཏིང་ངེ་འཛིན་བདག་གིར་བྱ་བ་མེད་པ་དང་ལྡན་པའི་ཕྱིར་མངོན་པར་འདུ་མི་བྱེད་པ་ལ་མངོན་པར་ཕྱོགས་ཤིང་རྣམ་པར་རྩེ་བའི་བསམ་གཏན་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསམ་གཏན་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བསམ་གཏན་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་རབ་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་འབྲས་བུ་ཆུད་མི་ཟ་བའི་ཚུལ་གྱིས་རྒྱུ་རབ་ཏུ་ཤེས་པའི་ཤེས་རབ་ཡོངས་སུ་དག་པ་དང་། ཚོགས་པ་དང་མི་འགལ་བའི་ཕྱིར་རྐྱེན་ཐམས་ཅད་ལ་འཇུག་པའི་ཤེས་རབ་ཡོངས་སུ་དག་པ་དང་། རྟེན་ཅིང་འབྲེལ་པ་ལ་འཇུག་པ་ཇི་ལྟ་བ་བཞིན་དུ་ཤེས་པའི་ཕྱིར་རྟག་པ་དང་། ཆད་པ་མེད་པའི་ཤེས་རབ་ཡོངས་སུ་དག་པ་དང་། སེམས་ཅན་དུ་འཛིན་པ་སྤང་བའི་ཕྱིར་ལྟ་བ་ཐམས་ཅད་སེལ་བའི་ཤེས་རབ་ཡོངས་སུ་དག་པ་དང་། སྒྱུ་མའི་རང་བཞིན་དུ་ཡོངས་སུ་བརྟག་པའི་ཕྱིར་སེམས་ཅན་ཐམས་ཅད་ཀྱི་སེམས་དང་སྤྱོད་པ་ལ་རྣམ་པར་ལྟ་བའི་ཤེས་རབ་ཡོངས་སུ་དག་པ་དང་། ཚིག་གི་བྱེ་བྲག་ཐམས་ཅད་བསྟན་པ་ཐོགས་པ་མེད་པར་ལུང་བསྟན་པའི་ཕྱིར་སོ་སོ་ཡང་དག་པར་རིག་པ་ཆེན་པོ་ལ་འཇུག་པའི་ཤེས་རབ་ཡོངས་སུ་དག་པ་དང་། དེ་བཞིན་གཤེགས་པ་ཐམས་ཅད་ཀྱི་མཁྱེན་པ་དང་། མཁས་པའི་རྗེས་སུ་ཞུགས་པའི་ཕྱིར་བདུད་དང་ཕས་ཀྱི་རྒོལ་བ་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱི་གཏིང་དཔག་དཀའ་བའི་ཤེས་རབ་ཡོངས་སུ་དག་པ་དང་། ཐམས་ཅད་དུ་ཆགས་པ་མེད་པའི་མཚན་ཉིད་ཀྱི་རྗེས་སུ་སོང་བའི་ཕྱིར། སངས་རྒྱས་ཐམས་ཅད་ཀྱི་སྐུ་མཐོང་བ་དང་། སེམས་ཅན་ཐམས་ཅད་ཐོག་མ་ནས་རྣམ་པར་དག་པར་མཐོང་བ་དང་། ཆོས་ཐམས་ཅད་དབེན་པར་མཐོང་བ་དང་། ཞིང་ཐམས་ཅད་ནམ་མཁའི་རང་བཞིན་དུ་མཐོང་བའི་ཤེས་རབ་ཡོངས་སུ་དག་པ་དང་། ཐམས་ཅད་ལ་ཁྱད་པར་ཅན་གྱི་ཡེ་ཤེས་རྗེས་སུ་ཐོབ་པའི་ཕྱིར་གཟུངས་དང་སྤོབས་པ་ལ་བརྟེན་པའི་ཕ་རོལ་ཏུ་ཕྱིན་པ་ཐམས་ཅད་དང་། ཐབས་ཀྱི་ལག་པ་རྐྱོང་བའི་ཤེས་རབ་ཡོངས་སུ་དག་པ་དང་། ཆོས་ཐམས་ཅད་ཀྱི་སྤྱི་བོར་གྱུར་པའི་ཡེ་ཤེས་རབ་ཏུ་ཐོབ་པའི་ཕྱིར་སེམས་ཀྱི་སྐད་ཅིག་གཅིག་དང་ལྡན་པས་ཆོས་ཐམས་ཅད་མཉམ་པ་ཉིད་དུ་རྟོགས་
པའི་ཡེ་ཤེས་རྡོ་རྗེ་ལྟ་བུ་མི་འཁྲུགས་ཤིང་དབྱེར་མེད་པའི་མཚན་ཉིད་ཀྱི་ཤེས་རབ་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཤེས་རབ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་སྣང་བ་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བྱམས་པ་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སེམས་ཅན་ལ་བྱེ་བྲག་དབྱེ་བ་མེད་པའི་ཕྱིར་སེམས་མཉམ་པའི་བྱམས་པ་ཡོངས་སུ་དག་པ་དང་། སེམས་ཅན་ཐམས་ཅད་ཀྱི་བྱ་བ་ཅི་ཡོད་པ་ལ་བརྩོན་པར་བྱ་བའི་ཕྱིར་ཕན་པའི་དངོས་པོའི་བྱམས་པ་ཡོངས་སུ་དག་པ་དང་། སེམས་ཅན་ཐམས་ཅད་རྒ་ཤིའི་ཉམ་ང་བ་ལས་བསྒྲལ་བའི་ཕྱིར་རང་གིས་བསྐྱབ་པའི་བྱམས་པ་ཡོངས་སུ་དག་པ་དང་། འདུས་བྱས་ཀྱི་དགེ་བའི་རྩ་བ་ལ་ལྷག་པར་དམྱིགས་པའི་ཕྱིར་འགྲོ་བ་ཐམས་ཅད་ཡོངས་སུ་མི་གཏོང་ཞིང་ཕོངས་པར་སེམས་པ་དང་ལྡན་པའི་བྱམས་པ་ཡོངས་སུ་དག་པ་དང་། འགྲོ་བ་ཐམས་ཅད་ཀྱི་ཉོན་མོངས་པ་ཡང་དག་པར་གཅད་པའི་ཕྱིར་རྣམ་པར་དབྲལ་བའི་བྱམས་པ་ཡོངས་སུ་དག་པ་དང་། འགྲོ་བ་ཐམས་ཅད་ཐམས་ཅད་མཁྱེན་པ་ཉིད་ཀྱི་སེམས་ལ་མོས་པར་བྱ་བའི་ཕྱིར། བྱང་ཆུབ་ཀྱི་རྣམ་པ་མངོན་པར་བསྒྲུབ་པའི་བྱམས་པ་ཡོངས་སུ་དག་པ་དང་། ཐམས་ཅད་དུ་འོད་ཟེར་མཉམ་པར་རབ་ཏུ་དགྱེ་བའི་ཕྱིར་འགྲོ་བ་ཐམས་ཅད་ལ་ཁོང་ཁྲོ་བ་མེད་པའི་བྱམས་པ་ཡོངས་སུ་དག་པ་དང་། སེམས་ཅན་ཐམས་ཅད་ཡོངས་སུ་བསྐྱབ་པའི་ཕྱིར་ནམ་མཁའ་རྒྱས་པར་འགེངས་པའི་བྱམས་པ་ཡོངས་སུ་དག་པ་དང་། ཡང་དག་པ་ཇི་ལྟ་བ་བཞིན་དུ་མངོན་པར་འཚང་རྒྱ་བའི་ཕྱིར་ཆོས་ལ་དམིགས་པའི་བྱམས་པ་ཡོངས་སུ་དག་པ་དང་། སེམས་ཅན་སྐྱོན་མེད་པར་གཟུད་པའི་ཕྱིར་སྒྲིབ་པ་མེད་པའི་བྱམས་པ་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་
བྱམས་པ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བྱམས་པ་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་ཁོང་ནས་སྙིང་རྗེ་བའི་ཕྱིར་གྲོགས་མེད་པའི་སྙིང་རྗེ་ཆེན་པོ་ཡོངས་སུ་དག་པ་དང་། སྡུག་བསྔལ་གྱི་ཕུང་པོ་ཐམས་ཅད་ལེན་པ་ལ་ཞུམ་པ་མེད་པའི་ཕྱིར་ཡོངས་སུ་སྐྱོ་བ་མེད་པའི་སྙིང་རྗེ་ཆེན་པོ་ཡོངས་སུ་དག་པ་དང་། ཆེད་དུ་བསམས་ཏེ། སྐྱེ་བ་ལེན་ཅིང་མངོན་པར་འདྲེན་པའི་ཕྱིར་ངན་སོང་དང་མི་ཁོམ་པར་སྐྱེས་པ་ཐམས་ཅད་ལ་སྙིང་རྗེ་ཆེན་པོ་ཡོངས་སུ་དག་པ་དང་། མི་རྟག་པའི་དོན་ཡོངས་སུ་བསྟན་པའི་ཕྱིར་ལྷ་དང་མིར་སྐྱེས་པ་ཐམས་ཅད་ལ་སྙིང་རྗེ་ཆེན་པོ་ཡོངས་སུ་དག་པ་དང་། བསྐལ་པ་དཔག་ཏུ་མེད་པར་གོ་ཅ་མི་འདོར་བའི་ཕྱིར་ལོག་པར་ངེས་པ་ཐམས་ཅད་ལ་སྙིང་རྗེ་ཆེན་པོ་ཡོངས་སུ་དག་པ་དང་། སེམས་ཅན་ཐམས་ཅད་ལ་བདེ་བ་བསྟབས་པའི་ཕྱིར་བདག་གི་བདེ་བ་ལ་ཆགས་པ་མེད་པའི་སྙིང་རྗེ་ཆེན་པོ་ཡོངས་སུ་དག་པ་དང་། རང་གི་སེམས་ཡོངས་སུ་སྦྱང་བའི་ཕྱིར་ལེགས་པར་བྱས་པ་ཐམས་ཅད་ལ་ལན་མི་རེ་བའི་སྙིང་རྗེ་ཆེན་པོ་ཡོངས་སུ་དག་པ་དང་། ཡང་དག་པ་ཇི་ལྟ་བ་བཞིན་དུ་ཆོས་བསྟན་པའི་ཕྱིར་ཕྱིན་ཅི་ལོག་དང་མི་ཤེས་པ་ལ་གནས་པའི་འཇིག་རྟེན་གྱི་རྒྱུད་རྣམ་པར་ཟློག་པའི་སྙིང་རྗེ་ཆེན་པོ་ཡོངས་སུ་དག་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔས་ཆོས་ཐམས་ཅད་རང་བཞིན་གྱིས་འོད་དང་ཞིང་གསལ་བ་དང་། ཡོངས་སུ་གདུང་བ་མེད་པ་དང་། ཀུན་ནས་འཁྲུགས་པ་མེད་པ་སྟེ། གློ་བུར་གྱི་དྲི་མ་དང་། ཀུན་ནས་ཉོན་མོངས་པས། ཀུན་ནས་ཉོན་མོངས་པར་གྱུར་ཏོ། །ཞེས་བྱ་བར་ཤེས་ནས། སེམས་ཅན་ཐམས་ཅད་ལ་ཐོག་མ་ནས་དག་ཅིང་རྣམ་པར་དག་པ་དང་། དྲི་མ་མེད་ཅིང་ཡོངས་སུ་དག་པ་དང་། རང་བཞིན་གྱིས་འོད་དང་ཞིང་གསལ་བའི་ཆོས་བསྟན་པའི་ཕྱིར་སྙིང་རྗེ་ཆེན་པོ་སྐྱེ་བ་དང་། ཀྱེ་
རྒྱལ་བའི་སྲས་གཞན་ཡང་བྱང་ཆུབ་སེམས་དཔས་ཆོས་ཐམས་ཅད་ནམ་མཁའི་བྱ་ལམ་ལྟ་བུ་ཡིན་ཡང་རང་གི་སྒྲིབ་པས་བསྒྲིབས་པས་ཤེས་པར་མ་གྱུར་ཏོ། །ཞེས་བྱ་བར་ཤེས་ནས། སེམས་ཅན་ཐམས་ཅད་ལ་ཡང་དག་པའི་ལམ་ཐེག་པ་ཆེན་པོའི་འབྱུང་བ་ཡོངས་སུ་བསྟན་པའི་ཕྱིར་སྙིང་རྗེ་ཆེན་པོ་འབྱུང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་རྗེ་ཆེན་པོ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཐུགས་རྗེ་ཆེན་པོ་བླ་ན་མེད་པ་ཡོངས་སུ་དག་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགའ་བ་ཡོངས་སུ་དག་པ་སྟེ། བཅུ་གང་ཞེ་ན། འདི་ལྟར་རབ་ཏུ་དགའ་བས་བྱང་ཆུབ་ཏུ་སེམས་བསྐྱེད་པ་ནི། དགའ་བ་ཡོངས་སུ་དག་པའོ། །གནོད་པ་མེད་པར་བདོག་པ་ཐམས་ཅད་ཡོངས་སུ་གཏོང་བ་ནི་དགའ་བ་ཡོངས་སུ་དག་པའོ། །སེམས་ཞུམ་པ་མེད་པས་སེམས་ཅན་ཚུལ་ཁྲིམས་ངན་པ་ཅན་ཡོངས་སུ་སྨིན་པར་བྱེད་པ་ནི་དགའ་བ་ཡོངས་སུ་དག་པའོ། །སེམས་ཅན་ཐམས་ཅད་ཀྱི་ཉེས་བྱས་བཟོད་པར་བྱ་བའི་ཕྱིར་དམ་བཅས་པ་མཐར་ཕྱིན་པར་བྱེད་པ་ནི། དགའ་བ་ཡོངས་སུ་དག་པའོ། །ཆོས་དོན་དུ་གཉེར་བའི་ཕྱིར་ལུས་དང་སྲོག་གཏང་བ་ལ་འགྱོད་པ་མེད་པ་ནི། དགའ་བ་ཡོངས་སུ་དག་པའོ། །ཆོས་ལ་མོས་ཤིང་དགའ་བ་ནི་དགའ་བ་ཡོངས་སུ་དག་པའོ། །འདོད་པའི་དགའ་བ་ཐམས་ཅད་སྤྱོད་པ་ནི། དགའ་བ་ཡོངས་སུ་དག་པའོ། །སངས་རྒྱས་བལྟ་བ་དང་། བསྙེན་བཀུར་བས་མི་ངོམས་ཤིང་ཆོས་ཀྱི་དབྱིངས་ཐ་དད་དུ་མི་འབྱེད་པ་ནི་དགའ་བ་ཡོངས་སུ་དག་པའོ། །བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པས་འབྱུང་བ་ཐམས་ཅད་ལ་སེམས་ཅན་གཞན་མོས་པར་བྱེད་པ་ནི་དགའ་བ་ཡོངས་སུ་དག་པའོ། །ཞི་བ་དང་ཐུབ་ཅིང་མི་འཁྲུག་པ་ལ་བསམ་གཏན་འཆའ་བ་ཤེས་རབ་ཀྱི་ཤས་ཆེ་བས་ལྟ་བ་གསལ་བ་དང་། བརྟུལ་
ཞུགས་དང་དཀའ་ཐུབ་ཡོངས་སུ་རྫོགས་པར་བྱ་བའི་བསམ་པས་བྱང་ཆུབ་སེམས་དཔའི་སྤྱོད་པ་རྒྱུན་མི་འཆད་པར་བྱེད་པ་ནི་དགའ་བ་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགའ་བ་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་དགྱེས་པ་ཆེན་པོ་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཡོངས་སུ་དག་པ་སྟེ། བཅུ་གང་ཞེ་ན་འདི་ལྟར་སེམས་ཅན་ཐམས་ཅད་ཀྱིས་རིམ་གྲོ་བྱས་ཀྱང་དགའ་བ་མེད་ལ་སེམས་ཅན་ཐམས་ཅད་ཀྱིས་རིམ་གྲོ་མ་བྱས་ཀྱང་ཁོང་ཁྲོ་བར་མི་འགྱུར་བའི་བཏང་སྙོམས་ཡོངས་སུ་དག་པ་དང་། འཇིག་རྟེན་གྱི་ཆོས་བརྒྱད་ལས་རྣམ་པར་འདས་པར་སྤྱོད་པས་བཏང་སྙོམས་ཡོངས་སུ་དག་པ་དང་། སྣོད་མ་ཡིན་པ་རྣམས་ཀྱང་བཀོལ་ཏེ་མི་འདོར་ལ། སྣོད་དུ་གྱུར་པ་རྣམས་ཀྱི་དུས་དང་ཡང་སྦྱོར་བའི་བཏང་སྙོམས་ཡོངས་སུ་དག་པ་དང་། ཉན་ཐོས་དང་། རང་སངས་རྒྱས་དང་སློབ་པ་དང་མི་སློབ་པ་རྣམ་པར་དག་པའི་ཆོས་ཐོབ་པར་གྱུར་པ་རྣམས་ལ་རྩོལ་བ་གཏོང་བའི་བཏང་སྙོམས་ཡོངས་སུ་དག་པ་དང་། འདོད་པའི་དགའ་བ་དང་རྩེད་མོ་དང་ལོངས་སྤྱོད་དང་། ཀུན་ནས་ཉོན་མོངས་པའི་བག་ཏུ་འགྱུར་བའི་ཆོས་ཐམས་ཅད་ལ་སེམས་འབྲེལ་བར་མི་གཏོང་བའི་བཏང་སྙོམས་ཡོངས་སུ་དག་པ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་པ་འཁོར་བ་ལས་སྐྱོ་བའི་རྣལ་འབྱོར་ལ་སྤྱོད་པ་རྣམས་དང་སྙེན་པར་མི་བྱེད་པའི་བཏང་སྙོམས་ཡོངས་སུ་དག་པ་དང་། འཇིག་རྟེན་རྒྱང་ཕེན་པའི་གཏམ་ཐམས་ཅད་དང་། མྱ་ངན་ལས་མི་འདའ་བ་དང་། འདོད་ཆགས་དང་མི་དབྲལ་བའི་གཏམ་དང་། མི་རིགས་ཤིང་འདུ་འཛིར་གྱུར་པའི་གཏམ་དང་། གཞན་ལ་ཐོ་འཚམ་པའི་གཏམ་དང་། ཉན་ཐོས་དང་། རང་སངས་རྒྱས་ཀྱི་གཏམ་དང་མདོར་ན་བྱང་ཆུབ་སེམས་དཔའི་ལམ་ལས་གོལ་བའི་གཏམ་ཐམས་ཅད་དང་འདུ་བ་
མེད་པའི་བཏང་སྙོམས་ཡོངས་སུ་དག་པ་དང་། དྲན་པ་དང་། བློའི་སྟོབས་དང་། ཤུགས་ཇི་ལྟ་བ་བཞིན་དུ་གང་ལ་ཡོངས་སུ་སྨིན་པར་བྱས་པའི་སེམས་ཅན་དེ་དག་གིས་དེ་ལ་གོང་མའི་ཆོས་ཤེས་པར་མི་ནུས་ནའང་དེ་དག་གི་དུས་བསྡད་པས་བཏང་སྙོམས་ཡོངས་སུ་དག་པ་དང་། བྱང་ཆུབ་སེམས་དཔའ་སྔོན་ཡོངས་སུ་སྨིན་པར་བྱས་པ་གང་། དེ་བཞིན་གཤེགས་པའི་སས་འདུལ་བར་གྱུར་པ་དེ་དག་ལ་བསྡད་པའི་ཕྱིར་བཏང་སྙོམས་ཡོངས་སུ་དག་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྣམས་ཀྱི་བཏང་སྙོམས་གཉིས་དང་བྲལ་ཞིང་མཐོན་དམན་མེད་ལ་བླང་དོར་མེད་ཅིང་རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། བྲལ་བས་རྟག་ཏུ་མཉམ་པར་གཞག་ཅིང་ཆོས་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་གནས་པའི་བཟོད་པ་ཐོབ་པའི་བཏང་སྙོམས་ཡོངས་སུ་དག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཡོངས་སུ་དག་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བཏང་སྙོམས་ཆེན་པོ་ཡོངས་སུ་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དོན་ཏེ། བཅུ་གང་ཞེ་ན། འདི་ལྟར་ནན་ཏན་ལྷུར་ལེན་པའི་ཕྱིར་ཐོས་པའི་དོན་དང་། རབ་ཏུ་དབྱེ་བ་ལ་མཁས་པའི་ཕྱིར་ཆོས་ཀྱི་དོན་དང་། དོན་དམ་པ་སྟོང་པ་ཉིད་ཀྱི་ཕྱིར་སྟོང་པ་ཉིད་ཀྱི་དོན་དང་། སེམས་ཅན་གྱི་འདུ་འཛིས་དབེན་པའི་ཕྱིར་དབེན་པའི་དོན་དང་། སེམས་ཅན་གྱི་སྒྲ་ལ་མངོན་པར་ཆགས་པ་མེད་པའི་ཕྱིར་བརྗོད་དུ་མེད་པའི་དོན་དང་། དུས་གསུམ་མཉམ་པ་ཉིད་ཀྱི་ཕྱིར་ཡང་དག་པ་ཇི་ལྟ་བ་བཞིན་གྱི་དོན་དང་། རོ་མཉམ་པ་ཉིད་ཀྱི་ཕྱིར་ཆོས་ཀྱི་དབྱིངས་ལ་འཇུག་པའི་དོན་དང་། དེ་བཞིན་ཉིད་ཀྱི་རྗེས་སུ་འབྲང་བའི་ཕྱིར་དེ་བཞིན་ཉིད་ཀྱི་དོན་དང་། ཡང་དག་པའི་མཐའ་རྟོགས་པའི་ཕྱིར་ཡང་དག་པའི་མཐའི་དོན་དང་།
སྡུག་བསྔལ་གྱི་ཕུང་པོ་ཡང་དག་པར་གཅད་ཅིང་བྱང་ཆུབ་སེམས་དཔའི་སྤྱོད་པ་བསྒྲུབ་པ་བསྐྱེད་པའི་ཕྱིར་མྱ་ངན་ལས་འདས་པ་ཆེན་པོའི་དོན་ཏོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དོན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཐམས་ཅད་མཁྱེན་པའི་ཡེ་ཤེས་ཀྱི་དོན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཏེ། བཅུ་གང་ཞེ་ན་འདི་ལྟར་ཇི་སྐད་དུ་སྨྲས་པ་དེ་བཞིན་དུ་བྱ་བའི་ཕྱིར་བདེན་པའི་ཆོས་དང་། ལེན་ཅིང་འཛིན་པ་ཐམས་ཅད་ཡོངས་སུ་གཅད་པའི་ཕྱིར་ཡོངས་སུ་འཛིན་པ་མེད་པའི་ཆོས་དང་། ཉོན་མོངས་པའི་འབར་བ་ཐམས་ཅད་རབ་ཏུ་ཞི་བར་བྱ་བའི་ཕྱིར་རྩོད་པ་མེད་པའི་ཆོས་དང་། ཡོངས་སུ་གདུང་བ་དང་བྲལ་བའི་ཕྱིར་ཞི་བའི་ཆོས་དང་། འདོད་ཆགས་ཀྱི་དྲི་མ་དང་། ཉོན་མོངས་པ་ཐམས་ཅད་དང་བྲལ་བའི་ཕྱིར་འདོད་ཆགས་དང་བྲལ་བའི་ཆོས་དང་། དམིགས་པ་ཐམས་ཅད་རྒྱུན་ཆད་པའི་ཕྱིར་ཡོངས་སུ་རྟོག་པ་མེད་པའི་ཆོས་དང་། ནམ་མཁའ་དང་འདྲ་ཞིང་མཚུངས་པའི་ཕྱིར་མི་སྐྱེ་བའི་ཆོས་དང་། སྐྱེ་བ་དང་འཇིག་པ་དང་གནས་མེད་པའི་ཕྱིར་འདུས་མ་བྱས་ཀྱི་ཆོས་དང་། རང་བཞིན་གྱིས་ཀུན་ནས་ཉོན་མོངས་པ་མེད་པའི་ཕྱིར་རང་བཞིན་གྱི་ཆོས་དང་། བྱང་ཆུབ་སེམས་དཔའི་སྤྱོད་པ་སྒྲུབ་ཅིང་ཡོངས་སུ་གཟུང་བའི་ཕྱིར་ཕུང་པོ་ཐམས་ཅད་སྤངས་ཏེ། མྱ་ངན་ལས་འདས་པར་འགྲོ་བའི་ཆོས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཆོས་ཉིད་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ཏེ། བཅུ་གང་ཞེ་ན་འདི་ལྟར་དཀོན་མཆོག་གསུམ་གྱི་གདུང་རྒྱུན་མི་གཅད་པའི་ཕྱིར། ཕ་རོལ་བྱང་ཆུབ་ཀྱི་སེམས་ལ་ཡིད་དམ་འཆར་གཞུག་པའི་བསོད་ནམས་ཀྱི་ཚོགས་དང་། མི་དགེ་བའི་
ཆོས་ཐམས་ཅད་སྤང་ཞིང་དགེ་བའི་ཆོས་ཐམས་ཅད་ཡང་དག་པར་བསྡུ་བར་བྱ་བའི་ཕྱིར་ཡོངས་སུ་བསྔོ་བའི་རྣམ་པ་བཅུའི་རྗེས་སུ་འབྲང་བའི་བསོད་ནམས་ཀྱི་ཚོགས་དང་། འཇིག་རྟེན་གསུམ་གྱི་བསོད་ནམས་ཟིལ་གྱིས་གནན་པའི་ཕྱིར་ཤེས་རབ་དང་ཡེ་ཤེས་བསྟན་པའི་བསོད་ནམས་ཀྱི་ཚོགས་དང་། སེམས་ཅན་གྱི་ཁམས་ཐམས་ཅད་ཕ་རོལ་གྱི་མཐར་བསྒྲལ་བའི་ཕྱིར་ཡོངས་སུ་སྐྱོ་བ་མེད་པའི་བསོད་ནམས་ཀྱི་ཚོགས་དང་། ཡོངས་སུ་གཟུང་བ་ཐམས་ཅད་གཏང་བའི་ཕྱིར་ནང་དང་ཕྱིའི་དངོས་པོ་ཐམས་ཅད་ཡོངས་སུ་གཏོང་བའི་བསོད་ནམས་ཀྱི་ཚོགས་དང་། བརྩོན་འགྲུས་ཆེན་པོ་བརྩམ་པས་སེམས་ཀྱི་སྒོ་གཏན་འབྱེད་ཅིང་མཆོད་སྦྱིན་རབ་ཏུ་བྱ་བའི་ཕྱིར་མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱ་བའི་བསོད་ནམས་ཀྱི་ཚོགས་དང་། ཐབས་དང་ཚུལ་དང་འཐད་པས་ཡོངས་སུ་གཟུང་བའི་ཕྱིར་དགེ་བའི་རྩ་བ་རབ་འབྲིང་དང་ཐ་མས་རློམ་སེམས་མེད་པར་ཡོངས་སུ་བསྔོ་བའི་བསོད་ནམས་ཀྱི་ཚོགས་དང་། སྐྱེས་བུ་དམ་པའི་རྣམ་པར་གནོན་པ་ཡོངས་སུ་བསྟན་པའི་ཕྱིར་ཡང་དག་པ་དང་། ལོག་པར་ངེས་པ་དང་ཉམས་དམའ་ཞིང་དགེ་བའི་རྩ་བ་མ་བསགས་པ་རྣམས་ལ་བརྙས་པ་མེད་ཅིང་སྙིང་རྗེ་ཆེན་པོ་དང་ལྡན་པའི་བསོད་ནམས་ཀྱི་ཚོགས་དང་། ལྷག་པའི་བསམ་པ་བརྟན་པས་ཡོངས་སུ་སྐྱོང་བའི་ཕྱིར་དེ་བཞིན་གཤེགས་པ་ཐམས་ཅད་ལ་མཆོད་ཅིང་རིམ་གྲོ་བྱ་བ་དང་། བྱང་ཆུབ་སེམས་དཔའ་ཐམས་ཅད་ལ་སྟོན་པ་ལྟར་དབེན་པར་སེམས་པ་དང་། སེམས་ཅན་ཐམས་ཅད་ཀྱི་བྱ་བ་ཅི་ཡོད་པ་བྱེད་པ་ལ་བརྩོན་པའི་བསོད་ནམས་ཀྱི་ཚོགས་དང་། ཀྱེ་རྒྱལ་བའི་སྲས་དགེ་བའི་རྩ་བ་བསྐལ་པ་གྲངས་མེད་པར་བསགས་ཤིང་ཡོངས་སུ་བསྡུས་ཏེ། ལག་པའི་མཐིལ་དུ་ཕྱིན་ཅིང་བདག་ལ་དབང་ཡོད་པར་གྱུར་པའི་བྱང་ཆུབ་ཀྱང་། སེམས་ཅན་ལ་ལ་ཞིག་ལ་ཡོངས་སུ་བཏང་སྟེ། བྱིན་ན་མི་དགའ་བ་མེད་ལ་འགྱོད་པ་མེད་ཅིང་དེ་བཞིན་དུ་སེམས་ཅན་མ་ལུས་པ་ཐམས་ཅད་ལ་ཡང་རང་ལ་དབང་ཡོད་པར་ཡོངས་སུ་
བསྡུས་ཏེ། ལག་པའི་མཐིལ་དུ་ཕྱིན་པའི་བྱང་ཆུབ་ཡོངས་སུ་བཏང་སྟེ། བྱིན་ཡང་མི་དགའ་བ་མེད་ལ། ཕྱིས་འགྱོད་པ་མེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ནམ་མཁའི་དབྱིངས་རྒྱ་ཆེན་པོའི་རྗེས་སུ་སོང་བ་ཞེས་བྱ་བ་སྟེ། ཡེ་ཤེས་ཆེན་པོ་ཡངས་པ་ཁོང་དུ་ཆུད་པའི་རྒྱུར་འགྱུར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་ཚོགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་བསོད་ནམས་ཀྱི་ཚོགས་ཆེན་པོ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ཏེ། བཅུ་གང་ཞེ་ན། འདི་ལྟར་བསམ་པ་སྒྱུ་མེད་པར་བྱ་བའི་ཕྱིར། ཡང་དག་པའི་དགེ་བའི་བཤེས་གཉེན་མང་དུ་ཐོས་པ་རྣམས་ལ་བསྟེན་པ་དང་། བཀུར་བ་དང་། བསྙེན་བཀུར་བྱ་བ་དང་། རིམ་གྲོ་བྱ་བ་དང་། བསྟི་སྟང་དུ་བྱ་བ་དང་། བླ་མར་བྱ་བ་དང་། གུས་པར་བྱ་བ་དང་། བཀའ་བློ་བདེ་ཞིང་འཐུན་པར་ལེན་པའི་ཡེ་ཤེས་ཀྱི་ཚོགས་དང་། བདག་སྣོད་དུ་བྱ་བའི་ཕྱིར་ང་རྒྱལ་མེད་ཅིང་འདུད་པ་དང་། ཕྱག་འཚལ་བ་དང་། རབ་ཏུ་གུས་པ་དང་། ལུས་དང་སེམས་ལས་སུ་རུང་བ་དང་། ཁོང་བདེ་བ་དང་། མི་སླུ་བ་དང་། མི་རྩུབ་པ་དང་། དེས་ཤིང་འཇམ་ལ་མཉེན་པ་དང་། བཞིན་འཛུམ་ཞིང་ཁྲོ་གཉེར་མེད་པ་དང་། འདོར་ཏེ་གསོང་པོར་སྨྲ་བ་དང་། རབ་ཏུ་དགའ་བ་དང་། མི་འཆོས་པ་དང་། གཡོ་མེད་པ་དང་། སྒྱུ་མེད་པའི་ཡེ་ཤེས་ཀྱི་ཚོགས་དང་། ཡེ་ཤེས་རྣམ་པ་བཅུ་ལ་རབ་ཏུ་སྦྱར་བའི་ཕྱིར་དྲན་པ་ཤེས་བཞིན་དང་། རྟོགས་པ་ཁོང་དུ་ཆུད་པ་དང་། བློ་གྲོས་མི་གཡེང་བ་དང་། ངོ་ཚ་ཤེས་པ་དང་། མོས་པ་ལ་རབ་ཏུ་གནས་པ་དང་། རྗེས་སུ་དྲན་པར་བྱ་བ་དྲུག་དྲན་པ་དང་། གུས་པ་དྲུག་ཡོངས་སུ་བསྟེན་པ་དང་། སྙིང་པོར་བྱ་བའི་ཆོས་དྲུག་གི་རྗེས་སུ་འབྲང་བའི་ཡེ་ཤེས་ཀྱི་ཚོགས་སོ། །བསམ་པ་དང་ཡིད་ལ་བྱ་བ་གཞན་མེད་པར་བྱ་བའི་
ཕྱིར་ཆོས་དོན་དུ་གཉེར་བ་དང་། ཆོས་འདོད་པ་དང་། ཆོས་ལ་མོས་ཤིང་དགའ་བ་དང་། ཆོས་བཙལ་བ་དང་། ཐོས་པས་མི་ངོམས་པ་དང་། འཇིག་རྟེན་རྒྱང་ཕེན་པ་དང་། མ་འདྲེས་པ་དང་། འཇིག་རྟེན་པའི་གཏམ་ཐམས་ཅད་སྤོང་བ་དང་། འཇིག་རྟེན་ལས་འདས་པའི་གཏམ་ལྷུར་ལེན་པ་དང་། ཐེག་པ་དམའ་བ་སྤོང་ཞིང་བློ་གྲོས་ཡངས་པའི་ཐེག་པ་ཆེན་པོ་ལ་ཡང་དག་པར་གཞོལ་བའི་ཡེ་ཤེས་ཀྱི་ཚོགས་དང་། ནན་ཏན་ལྷུར་བླང་བའི་ཕྱིར་ཕ་རོལ་ཏུ་ཕྱིན་པ་དྲུག་ཡོངས་སུ་བཙལ་བ་ལ་འཐུན་པར་བརྩོན་པ་དང་། ཚངས་པའི་གནས་བཞི་རབ་ཏུ་བསྒྲུབ་པ་དང་། རིག་པ་དང་མཐུན་པའི་ཆོས་དང་སྟེན་པ་དང་། མཁས་པའི་སྐྱེ་བོ་ལ་ཡོངས་སུ་འདྲི་བ་དང་། ལམ་ཉམ་ང་བ་དང་བྲལ་ཞིང་ཡང་དག་པའི་ལམ་ལ་མ་ནོར་བར་གཞོལ་བ་དང་། བསྐུལ་བ་དང་དྲན་པར་བྱ་བ་དང་། མོས་པར་བྱ་བས་རང་གི་སེམས་འདུལ་བ་དང་། ཕ་རོལ་གྱི་སེམས་རྗེས་སུ་སྲུང་བའི་ཡེ་ཤེས་ཀྱི་ཚོགས་དང་། བདག་དང་གཞན་གྱི་སེམས་རྣམ་པར་སྦྱང་བའི་ཕྱིར་རྟག་ཏུ་རྒྱུན་མི་ཆད་པར་འབྱུང་བའི་སེམས་དང་། ཁམས་གསུམ་ལས་དབེན་པར་དགའ་ཞིང་། རང་གི་སེམས་རྟོགས་པར་བྱེད་པ་དང་། མི་དགེ་བའི་སེམས་ཀྱི་སྐབས་མི་འབྱེད་ཅིང་རྣམ་པར་རྟོག་པ་གསུམ་བསྩལ་བས། ལུས་དང་ངག་དང་སེམས་ལས་སུ་རུང་བ་དང་། སེམས་ཀྱི་རང་བཞིན་གཅིག་ཏུ་ངེས་པ་རབ་ཏུ་རྟོགས་པར་བྱེད་པའི་ཡེ་ཤེས་ཀྱི་ཚོགས་དང་། ཀྱེ་རྒྱལ་བའི་སྲས་གཞན་ཡང་ཕུང་པོ་རྣམས་ལ་སྒྱུ་མ་ལྟ་བུར་རྟོག་པ་དང་། ཁམས་རྣམས་ལ་སྦྲུལ་གདུག་པ་ལྟ་བུའི་འདུ་ཤེས་སུ་རྟོག་པ་དང་། ཆོས་ཐམས་ཅད་སྒྱུ་མ་དང་། སྨྱིག་རྒྱུ་དང་། ཆུའི་ཟླ་བ་དང་། རྨི་ལམ་དང་། མིག་ཡོར་དང་། སྒྲ་བརྙན་དང་། གཟུགས་བརྙན་དང་། མིག་ཡོར་དང་འདྲ་ཞིང་ནམ་མཁའ་རི་མོ་དང་མཉམ་པ་དང་། མགལ་མེ་བསྐོར་བ་ལྟ་བུ་སྟེ། འཇའི་ཚོན་དང་འདྲ་བ་ཉི་མ་དང་ཟླ་བའི་འོད་ལྟ་བུ་སྟེ། ཆོས་ཐམས་ཅད་ནི་གཟུང་དུ་མེད་པ་མཚན་མ་མེད་པ། རྟག་པ་མེད་པ་ཆད་པ་མེད་པ་སོང་བ་མེད་པ། འོང་བ་མེད་པ་སྟེ། ཆོས་
ཐམས་ཅད་མི་གནས་པར་རབ་ཏུ་རྟོག་ཅིང་འཇུག་པ་དང་། མོས་པ་དང་ཡིད་ཆེས་པ་འདི་ནི་སྐྱེ་བ་དང་། འཇིག་པ་ལ་མི་གནས་པ་ཞེས་བྱ་བ་ཡེ་ཤེས་ཀྱི་ཚོགས་བདུན་པ་སྟེ། ཆོས་ཐམས་ཅད་ཁོང་དུ་ཆུད་པ་དག་པའི་རྒྱུར་འགྱུར་བའོ། །ཆོས་ཐམས་ཅད་བདག་མེད་པ་དང་། སེམས་ཅན་མེད་པ་དང་། སྲོག་མེད་པ་དང་། གང་ཟག་མེད་པ་དང་། སེམས་མེད་པ་དང་། དོན་མེད་པ་དང་། འདོད་ཆགས་མེད་པ་དང་། ཞེ་སྡང་མེད་པ་དང་། གཏི་མུག་མེད་པ་དང་། ཉོན་མོངས་པ་མེད་པ་དང་། ལུས་མེད་པ་དང་། རྫས་མེད་པ་དང་། ལྟ་བ་མེད་པ་དང་། དྲི་མ་མེད་པ་དང་། རྗེ་བ་མེད་པ་དང་། གོས་པ་མེད་པ་དང་། རྒྱུ་བ་མེད་པ་དང་། ཟང་ཟིང་མེད་པ་དང་། མྱ་ངན་ལས་འདས་པའི་རྒྱུད་དུ་ཡང་དག་པར་གཞོལ་བ་ཐོས་ན་མོས་ཤིང་ཡིད་ཆེས་ལ་ཡིད་གཉིས་མེད་ཅིང་ཐེ་ཙོམ་མི་ཟ་བ་འདི་ནི་ཡེ་ཤེས་ཀྱི་ཚོགས་བརྒྱད་པ་སྟེ། མོས་པ་ཡོངས་སུ་རྫོགས་པར་འགྱུར་བའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་ཚུལ་གཞན་གྱི་སྦྱོར་བས་ཡང་དག་པར་བྲལ་བར་བྱས་པས་དབང་པོ་བསྡམས་པ་ལྷག་མཐོང་དང་ཞི་གནས་ཀྱིས་ཞི་བ་དང་། ཉེ་བར་ཞི་བ་དང་། རབ་ཏུ་ཞི་བར་གྱུར་པ། ཡིད་ལ་བྱ་བ་ཐམས་ཅད་ཀྱིས་མ་བྱས་མ་བསྐྱེད། མངོན་པར་མ་བྱས་པའི་ངང་ཚུལ་ཅན་བདག་མེད་པ་དང་། སེམས་ཅན་མེད་པ་དང་། བདག་གི་འདུ་ཤེས་རྣམ་པར་རྒྱུ་བས་ནན་ཏན་དུ་བྱེད་པ་མེད་པའི་བློ་དང་ལྡན་པ། ཟད་པ་མེད་ཅིང་ཚད་མེད་ལ་མི་དམིགས་པའི་བཟོད་པ་ཅན། ལུས་དང་ངག་དང་སེམས་བླང་བ་མེད་པ་དང་དོར་བ་མེད་པས། སྔོན་དུ་འདོར་བའི་བརྩོན་འགྲུས་དང་ལྡན་པ། སེམས་ཅན་ཐམས་ཅད་དང་ཆོས་ཐམས་ཅད་ལ་མི་གནས་པར་བསམ་གཏན་འཆའ་བ། ཚུ་རོལ་མེད་པ་ཕ་རོལ་མེད་པ། ཚུ་རོལ་དང་ཕ་རོལ་དང་བྲལ་བ་རྒྱུ་བ་མེད་པ་རྒྱུ་བ་དང་བྲལ་བའི་ཤེས་རབ་ཀྱིས་དེ་ལྟར་ངེས་པར་རྟོག་པ་འདི་ནི་ཡེ་ཤེས་ཀྱི་ཚོགས་དགུ་པ་སྟེ། མཚན་མ་དང་ཡོངས་སུ་རྟོག་པ་
ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་བའོ། །ཀྱེ་རྒྱལ་བའི་སྲས་རྟེན་ཅིང་འབྲེལ་བར་འབྱུང་བ་མཐོང་བས་ནི་ཆོས་མཐོང་བ་ཤིན་ཏུ་རྣམ་པར་དག་པར་འགྱུར། ཆོས་མཐོང་བས་ནི་ཞིང་མཐོང་བ་ཤིན་ཏུ་རྣམ་པར་དག་པར་འགྱུར། ཞིང་མཐོང་བས་ནི་ནམ་མཁའ་མཐོང་བ་ཤིན་ཏུ་རྣམ་པར་དག་པར་འགྱུར། ནམ་མཁའ་མཐོང་བས་ནི་ཆོས་ཀྱི་དབྱིངས་མཐོང་བ་ཤིན་ཏུ་རྣམ་པར་དག་པར་འགྱུར། ཆོས་ཀྱི་དབྱིངས་མཐོང་བས་ནི་ཡེ་ཤེས་མཐོང་བ་ཤིན་ཏུ་རྣམ་པར་དག་པར་འགྱུར་བ་འདི་ནི་ཡེ་ཤེས་ཀྱི་ཚོགས་བཅུ་པ་སྟེ། ཐམས་ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པའི་རྒྱུར་འགྱུར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཚོགས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་མ་ཆགས་མ་བསྒྲུབས་པའི་ཡེ་ཤེས་ཤིན་ཏུ་རྣམ་པར་དག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་རིག་པ་སྐྱེ་བ་སྟེ། བཅུ་གང་ཞེ་ན་འདི་ལྟར་ཆོས་ཤིན་ཏུ་རྣམ་པར་ཕྱེ་བའི་བློ་ནི་རིག་པ་སྐྱེ་བའོ། །ཆོས་རྣམས་ལ་ཆགས་པ་མེད་པའི་རྣལ་འབྱོར་ནི་རིག་པ་སྐྱེ་བའོ། །ལྟ་བ་མ་ལོག་པ་ནི་རིག་པ་སྐྱེ་བའོ། ། དབང་པོ་རྣམས་ལ་ཤེས་རབ་སྣང་བ་ནི་རིག་པ་སྐྱེ་བའོ། །རིག་པ་བརྩམ་པ་ལ་ཡང་དག་པར་སྦྱོར་བ་ནི་རིག་པ་སྐྱེ་བའོ། །ཡེ་ཤེས་མངོན་པར་རྟོགས་པར་བྱ་བའི་ཕྱིར་བདེན་པ་ལ་འཇུག་པ་ནི་རིག་པ་སྐྱེ་བའོ། །ལས་དང་ཉོན་མོངས་པ་ཟད་ཅིང་མི་སྐྱེ་བར་ཤེས་པ་ནི་རིག་པ་སྐྱེ་བའོ། །ཤེས་རབ་དང་ཡེ་ཤེས་ཀྱིས་རྣམ་པར་འབྱེད་པའི་ལྷའི་མིག་ནི་རིག་པ་སྐྱེ་བའོ། །སྔོན་གྱི་མཐའ་ནས་རྣམ་པར་སྦྱངས་པའི་སྔོན་གྱི་གནས་རྗེས་སུ་དྲན་པ་ནི་རིག་པ་སྐྱེ་བའོ། །མངོན་པར་ཤེས་པ་ཡོངས་སུ་སྦྱངས་པས་སེམས་ཅན་ལ་ལྟ་བའི་ཟག་པ་ཟད་པའི་ཡེ་ཤེས་ནི་རིག་པ་སྐྱེ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་རིག་པ་སྐྱེ་བ་སྟེ། དེ་
དག་ལ་གནས་ཤིང་། བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཆོས་ཀྱི་རིག་པ་སྣང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཡོངས་སུ་ཚོལ་བ་སྟེ། བཅུ་གང་ཞེ་ན་འདི་ལྟར་གཡོ་དང་སྒྱུ་མེད་པས་བསམ་པ་ཐག་པར་ཆོས་ཡོངས་སུ་ཚོལ་བ་དང་། བརྩོན་འགྲུས་ལྷོད་པ་མེད་པར་སྲན་འཛུགས་པས་བརྩོན་འགྲུས་ཀྱིས་ཆོས་ཡོངས་སུ་ཚོལ་བ་དང་། ལུས་དང་སྲོག་ལ་མི་ལྟ་བར་ཆོས་ཡོངས་སུ་ཚོལ་བ་དང་། རྙེད་སྟོབས་དང་བཀུར་སྟི་དང་། གྲགས་པའི་ཕྱིར་མ་ཡིན་གྱི་འགྲོ་བ་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་ཆོས་ཡོངས་སུ་ཚོལ་བ་དང་། བདག་འབའ་ཤིག་ལ་ཕན་པའི་ཕྱིར་མ་ཡིན་གྱི་བདག་དང་གཞན་དང་འགྲོ་བ་ཐམས་ཅད་ལ་ཕན་པའི་ཕྱིར་ཆོས་ཡོངས་སུ་ཚོལ་བ་དང་། ཆོས་ཀྱི་མདངས་ཀྱིས་ར་ཆོད་བྱ་བའི་ཕྱིར་མ་ཡིན་གྱི་ཤེས་རབ་ལ་འཇུག་པའི་ཕྱིར་ཆོས་ཡོངས་སུ་ཚོལ་བ་དང་། གོ་བ་ལོབ་ལ་དགའ་བའི་ཕྱིར་མ་ཡིན་གྱི་རབ་ཏུ་རྟེན་པར་བྱ་བའི་ཕྱིར་ཆོས་ཡོངས་སུ་ཚོལ་བ་དང་། བྱང་ཆུབ་ཀྱི་སེམས་མ་བཏང་བས། སེམས་ཅན་ལ་སྙིང་རྗེ་བའི་ཕྱིར་ཆོས་ཡོངས་སུ་ཚོལ་བ་དང་། ཡིད་གཉིས་དང་བྲལ་བའི་ཕྱིར་སེམས་ཅན་ཐམས་ཅད་ཀྱི་ཐེ་ཙོམ་གཅད་པའི་ཕྱིར་ཆོས་ཡོངས་སུ་ཚོལ་བ་དང་། རློམ་སེམས་མེད་ཅིང་འདོད་པ་མེད་པའི་ཕྱིར་སངས་རྒྱས་ཀྱི་ཆོས་ཡོངས་སུ་རྫོགས་པར་བྱ་བར་ཆོས་ཡོངས་སུ་ཚོལ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཡོངས་སུ་ཚོལ་བ་སྟེ། ཆོས་ཡོངས་སུ་ཚོལ་བ་དེ་དག་གིས་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་མི་འཇོག་པའི་ཡེ་ཤེས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་རབ་ཏུ་བརྗོད་པ་སྟེ། བཅུ་གང་ཞེ་ན་འདི་ལྟར་བྱིས་པ་སོ་སོའི་སྐྱེ་བོ་རྣམས་ལ་ཀུན་རྫོབ་ལ་འཇུག་པའི་དགེ་བའི་རྩ་བ་
བསྐྱེད་པ་དང་། དད་པའི་རྗེས་སུ་འབྲང་བ་རྣམས་ལ་དད་པ་མི་ཕྱེད་པ་དང་། ཆགས་པའི་གནས་ལས་བཟླ་ཞིང་ཆོས་ཀྱི་རང་བཞིན་ཁོང་དུ་ཆུད་པར་བྱ་བ་དང་། ཆོས་ཀྱི་རྗེས་སུ་འབྲང་བ་རྣམས་ལ་ཆོས་ལ་གནས་པ་དང་། ཆོས་ཀྱི་རྗེས་སུ་བརྩོན་པ་དང་། ཆོས་དང་གཉེར་བའི་ཆོས་ལ་ནན་ཏན་དུ་བྱེད་པ་དང་། བརྒྱད་པ་རྣམས་ལ་ལོག་པ་བརྒྱད་ལས་བཟླ་ཞིང་ཡང་དག་པ་བརྒྱད་ལ་འཇུག་པ་དང་། རྒྱུན་ཏུ་ཞུགས་པ་རྣམས་ལ་ཀུན་ཏུ་སྦྱོར་བ་ཡོངས་སུ་སྤང་བ་དང་། འཁོར་བའི་རྒྱུན་གཅད་པ་དང་། དོན་དམ་པའི་བདེན་པ་མཐོང་བ་དང་། ལན་ཅིག་ཕྱིར་འོང་བ་རྣམས་ལ་རོ་མྱོང་བའི་ཁ་ན་མ་ཐོ་བ་ཡོངས་སུ་བརྟག་པ་དང་། གང་དུ་ཡང་མ་འོང་ལ་མི་འགྲོ་བའི་ཆོས་རབ་ཏུ་བརྗོད་པ་དང་། ཕྱིར་མི་འོང་བ་རྣམས་ལ་ཁམས་གསུམ་དུ་མངོན་པར་དགའ་བ་མེད་པས་སྐད་ཅིག་འགའ་ཙམ་དུ་ཡང་སྐྱེ་བར་མི་སྨོན་པའི་ཕྱིར་ཟག་པ་ཟད་པ་རབ་ཏུ་བརྗོད་པ་དང་། དགྲ་བཅོམ་པ་རྣམས་ལ་མངོན་པར་ཤེས་པ་དྲུག་གིས་རྣམ་པར་འཕྲུལ་པ་དང་། རྣམ་པར་ཐར་པ་བརྒྱད་ཀྱིས་རྣམ་པར་རྩེ་བ་དང་། མཐར་གྱིས་སྤྱོད་ཅིང་སྙོམས་པར་འཇུག་པ་དགུའི་ཏིང་ངེ་འཛིན་ལ་སྙོམས་པར་འཇུག་པ་དང་། སོ་སོ་ཡང་དག་པར་རིག་པ་བཞི་རབ་ཏུ་བརྗོད་པ་དང་། རང་སངས་རྒྱས་རྣམས་ལ་རྟེན་ཅིང་འབྲེལ་བར་འབྱུང་བ་ལ་འཇུག་པའི་རོ་གཅིག་པ་དང་། གཅིག་ཏུ་དགའ་བ་དང་། དབེན་པ་ལ་དགའ་བ་དང་། སྨྲ་བ་ཉུང་བ་དང་། བྱ་བ་ཉུང་བ་དང་། རང་འབྱུང་གིས་ཡོངས་སུ་གནན་པ་དང་། མ་ཐོས་པར་རང་གི་ཡེ་ཤེས་ཀྱིས་མངོན་པར་རྟོགས་པར་བྱ་བ་རབ་ཏུ་བརྗོད་པ་དང་། བྱང་ཆུབ་སེམས་དཔའ་རྣམས་ལ་བློ་གྲོས་རྒྱ་ཆེན་པོ་དང་དབང་པོ་རྣོ་བ་དང་། རྟག་ཏུ་རྒྱུན་མི་ཆད་པར་སེམས་ཅན་རབ་ཏུ་ཐར་བར་བྱེད་པའི་སེམས་དང་། བསོད་ནམས་ཀྱི་ཚོགས་བསགས་པ་དང་། སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བ་རབ་ཏུ་བརྗོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་
བྱང་ཆུབ་སེམས་དཔའ་རྣམས་ཀྱི་ཆོས་རབ་ཏུ་བསྟན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཤེས་རབ་དང་ཡེ་ཤེས་ཆེན་པོ་རབ་ཏུ་བརྗོད་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ནན་ཏན་ཏེ། བཅུ་གང་ཞེ་ན་འདི་ལྟར་དགེ་བའི་བཤེས་གཉེན་ལ་གུས་པར་བྱེད་པས་ཆོས་ལ་ནན་ཏན་བྱེད་པ་དང་། ལྷས་ཡང་དག་པར་བསྐུལ་ཞིང་ཆོས་ལ་ནན་ཏན་བྱེད་པ་དང་། སངས་རྒྱས་བཅོམ་ལྡན་འདས་རྣམས་ལ་ངོ་ཚ་དང་ཁྲེལ་གྱིས་འཛེམ་ཞིང་ཆོས་ལ་ནན་ཏན་བྱེད་པ་དང་། སེམས་ཅན་ལ་སྙིང་རྗེ་བའི་ཕྱིར་འཁོར་བའི་རྒྱུན་མི་གཅོད་པས་ཆོས་ལ་ནན་ཏན་བྱེད་པ་དང་། ཤིན་ཏུ་མཐར་ཕྱིན་པར་ལེགས་པར་བྱས་པས་ཕྱིར་འཁྲུག་པ་མེད་པར་ཆོས་ལ་ནན་ཏན་བྱེད་པ་དང་། བྱང་ཆུབ་སེམས་དཔའ་བརྩོན་འགྲུས་ཆེན་པོ་ཐེག་པ་ཆེན་པོ་ལ་ཞུགས་པ་གཞན་གྱི་རྗེས་སུ་བསླབ་པར་བྱའོ། །ཞེས་ཆོས་ལ་ནན་ཏན་བྱེད་པ་དང་། ཚུལ་བཞིན་གྱི་སྦྱོར་བས་ལོག་པ་སྤང་བའི་ཕྱིར་ཆོས་ལ་ནན་ཏན་བྱེད་པ་དང་། བདུད་ཀྱི་ལས་དང་ཉོན་མོངས་པ་ཐམས་ཅད་གཞོམ་པའི་ཕྱིར་ཆོས་ལ་ནན་ཏན་བྱེད་པ་དང་། སངས་རྒྱས་སུ་གྱུར་ནས་སེམས་ཅན་ཐམས་ཅད་ཀྱི་དབང་པོ་མཆོག་དང་། འབྲིང་དང་ཐ་མ་ཤེས་པས་ཆོས་བསྟན་པར་བྱའོ། །ཞེས་ཆོས་ལ་ནན་ཏན་བྱེད་པ་དང་། སེམས་ཆོས་ཀྱི་དབྱིངས་མཐའ་དང་དབུས་མེད་ལ་ཡངས་ཤིང་རྒྱ་ཆེ་བས་ཡོངས་སུ་སྦྱང་བའི་ཕྱིར་ཆོས་ལ་ནན་ཏན་བྱེད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་ནན་ཏན་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ནན་ཏན་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་དེ། བཅུ་གང་ཞེ་ན། འདི་ལྟར་མངོན་པར་ཆགས་པའི་ཕྱིར་ཕུང་པོའི་བདུད་དང་། གླགས་སུ་འགྱུར་བའི་ཕྱིར་ཉོན་མོངས་པའི་བདུད་དང་། སྒྲིབ་པའི་ཕྱིར་ལས་ཀྱི་བདུད་དང་། སློང་བའི་ཕྱིར་སེམས་ཀྱི་བདུད་དང་།
སྐྱེས་པ་དང་བྲལ་བར་བྱེད་པས་ཚམ་གྱི་བདུད་དང་། གཡོ་བ་དང་རློམ་པ་དང་འགྱུར་བ་དང་། བག་མེད་པར་སྤྱོད་པས་ལྷའི་བུའི་བདུད་དང་། དེ་ལ་ཞེན་པའི་ཕྱིར་དགེ་བའི་རྩ་བའི་བདུད་དང་། རོ་མྱོང་བར་བྱེད་པའི་ཕྱིར་ཏིང་ངེ་འཛིན་གྱི་བདུད་དང་། གཟུགས་བརྙན་གྱི་ཕྱིར་དགེ་བའི་བཤེས་གཉེན་གྱི་བདུད་དང་། སྨོན་ལམ་མངོན་པར་མི་བསྒྲུབ་པས་ཆོས་ཀྱི་ཡེ་ཤེས་ཁོང་དུ་ཆུད་པའི་བདུད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བདུད་དེ། དེ་དག་ཡོངས་སུ་སྤང་བའི་ཕྱིར་བྱང་ཆུབ་སེམས་དཔས་བརྩོན་པར་བྱ་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཏེ། བཅུ་གང་ཞེ་ན། འདི་ལྟར་བྱང་ཆུབ་ཀྱི་སེམས་ཉམས་པའི་དགེ་བའི་རྩ་བ་ཐམས་ཅད་ནི་བདུད་ཀྱི་ལས་སོ། །སེམས་མི་ཉམས་པའི་སྦྱིན་པ་ཡོངས་སུ་གཏོང་བ་དང་། ཚུལ་ཁྲིམས་ལ་འཁྲུག་པ་དང་། ངན་སེམས་དང་ལྡན་པ་ཡོངས་སུ་སྤོང་བ་དང་། ལེ་ལོ་ཅན་ཡོངས་སུ་གཏོང་བ་དང་། སེམས་འཁྲུགས་པ་ལ་བརྙས་པ་དང་། ཤེས་རབ་འཆལ་བ་ཅན་ལ་སྨོད་པ་ནི་བདུད་ཀྱི་ལས་སོ། །ཆོས་ལ་སློབ་དཔོན་གྱིས་བཅབས་པ་དང་། ཆོས་ཀྱི་སྣོད་ལ་ཁྱད་དུ་གསོད་པ་དང་། ཟང་ཟིང་ལ་འབྲེལ་པར་ཆོས་སྟོན་པ་ནི་བདུད་ཀྱི་ལས་སོ། །སྣོད་མ་ཡིན་པ་ལ་ཆོས་རྒྱ་ཆེན་པོ་སྟོན་པ་ནི་བདུད་ཀྱི་ལས་སོ། །ཕ་རོལ་ཏུ་ཕྱིན་པ་རྣམས་མི་ཐོས་པ་དང་། ཐོས་ན་ལོག་པར་འཇུག་པ་དང་། ལོག་པར་ཞུགས་ནས་ལེ་ལོ་བྱེད་པ་དང་། ལེ་ལོ་བྱས་ནས་སེམས་ཞུམ་པར་བྱེད་པ་དང་། སེམས་ཞུམ་པར་གྱུར་ནས་བྱང་ཆུབ་ཀྱི་ལམ་ཡངས་པ་དང་ལྡན་པའི་སེམས་དང་སེམས་ལས་བྱུང་བའི་ཆོས་མི་འབྱུང་བ་ནི་བདུད་ཀྱི་ལས་སོ། །སྡིག་པའི་གྲོགས་པོ་ལ་བསྟེན་པ་དང་། དགེ་བའི་བཤེས་གཉེན་ཡོངས་སུ་སྤོང་བ་དང་། ཉན་ཐོས་དང་། རང་སངས་རྒྱས་ཀྱི་ཐེག་པ་འདོད་པ་དང་། སྐྱེ་བའི་སྐྱེ་མཆེད་ལ་མངོན་པར་མི་དགའ་བ་དང་། མྱ་ངན་ལས་འདའ་བ་དང་། འདོད་ཆགས་
དང་བྲལ་བ་དང་། སེམས་ཉེ་བར་ཞི་བ་ནི་བདུད་ཀྱི་ལས་སོ། བྱང་ཆུབ་སེམས་དཔའ་ལ་ཞེ་སྡང་བའི་བསམ་པ་དང་། མི་སྙན་པར་བརྗོད་པ་དང་། འཐོབ་པའི་བགེགས་བྱེད་པ་དང་། འཁྲུལ་པའི་སྐྱོན་ཚོལ་བ་དང་། མི་བདེ་བའི་མིག་གིས་ལྟ་བ་ནི་བདུད་ཀྱི་ལས་སོ། །དམ་པའི་ཆོས་ལ་སྤོང་བ་དང་། མ་ཐོས་པའི་མདོ་སྡེ་ཐོས་ན་སྨོད་པ་དང་། ཆོས་སྨྲ་བ་གཞན་གྱིས་བཤད་པ་ཉན་པར་མི་དགའ་ཞིང་བརྙས་ཏེ། ཁྱད་དུ་གསོད་པ་དང་། བདག་སྟོད་པ་དང་། གཞན་སྨོད་པ་ནི་བདུད་ཀྱི་ལས་སོ། །འཇིག་རྟེན་རྒྱང་ཕེན་པ་ཚོལ་ཞིང་ཡི་གེ་སྣ་ཚོགས་དང་། འབྲུ་སྣ་ཚོགས་སུ་རང་བཟོར་བྱས་པའི་རང་བཟོ་ལ་དགའ་བ་དང་། ཉན་ཐོས་དང་། རང་སངས་རྒྱས་ཀྱི་གཏམ་རྗེས་སུ་དྲན་པ་དང་། ཟབ་མོའི་གཏམ་འཆད་ཅིང་སྦེད་པ་དང་། གཏམ་སྣ་ཚོགས་རྣམ་པར་བརྗོད་པ་དང་། སྣོད་མ་ཡིན་པ་ལ་ཟབ་མོའི་ཆོས་སྟོན་པ་དང་། བྱང་ཆུབ་ཀྱི་ལམ་མི་ཚོལ་བ་དང་། ལམ་ངན་པའི་རྒྱུད་ལ་གནས་པ་ནི་བདུད་ཀྱི་ལས་སོ། །གྲོལ་བ་དང་རྒལ་བ་དང་། དབུགས་ཕྱིན་པ་ལ་ནི་བསྟེན་ཅིང་བསྙེན་པ་དང་། བཀུར་བ་དང་རིམ་གྲོ་བྱེད་ཀྱི་མ་གྲོལ་བ་དང་། མ་རྒལ་བ་དང་། དབུགས་མ་ཕྱིན་པ་ལ་མི་སྟེན་མི་བསྙེན་བཀུར་བ་མི་བྱེད། རིམ་གྲོ་མི་བྱེད་ཡོངས་སུ་སྨིན་པར་མི་བྱེད་པ་དང་། མངོན་པའི་ང་རྒྱལ་དུ་ལྷུང་སྟེ། སུ་ལའང་མི་འདུད་ཅིང་ང་རྒྱལ་ཡོངས་སུ་འཕེལ་བར་བྱེད་པ་དང་། སེམས་ཅན་ལ་ཁོང་ཁྲོ་བ་དང་། ཆོས་ཀྱི་ཡེ་ཤེས་མི་ཚོལ་བ་དང་། ཡེ་ཤེས་ཀྱི་གཏེར་མི་བསྲུང་བ་དང་། སེམས་རྟག་ཏུ་བརླང་བ་དང་། མགུ་དཀའ་ཞིང་གསོལ་བ་གདབ་པར་དཀའ་བ་ནི་བདུད་ཀྱི་ལས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཏེ། དེ་དག་ཡོངས་སུ་སྤངས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་ཆོས་ཚོལ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་བཟློག་པ་སྟེ། བཅུ་གང་ཞེ་ན། འདི་ལྟར་དགེ་བའི་
བཤེས་གཉེན་བཀུར་བའི་ཕྱིར་ང་རྒྱལ་ཐམས་ཅད་ཡོངས་སུ་སྤོང་བ་ནི་བདུད་ཀྱི་ལས་བཟློག་པའོ། །བདག་ལ་མི་བསྟོད་མི་བསྔགས་པ་ནི་བདུད་ཀྱི་ལས་བཟློག་པའོ། །སངས་རྒྱས་ཀྱི་ཆོས་ཟབ་མོ་ལ་མོས་ཤིང་མི་སྤོང་བ་ནི་བདུད་ཀྱི་ལས་བཟློག་པའོ། །ཐམས་ཅད་མཁྱེན་པའི་སེམས་ཡོངས་སུ་ཉམས་པར་མི་བྱེད་པ་ནི་བདུད་ཀྱི་ལས་བཟློག་པའོ། །ཆོས་ཟབ་མོའི་ཚུལ་ལ་བརྩོན་ཞིང་བག་ཡོད་པར་གནས་པ་ནི་བདུད་ཀྱི་ལས་བཟློག་པའོ། །བྱང་ཆུབ་སེམས་དཔའི་སྡེ་སྣོད་ལ་གནས་ཤིང་ཆོས་ཐམས་ཅད་ཡོངས་སུ་ཚོལ་བ་ནི་བདུད་ཀྱི་ལས་བཟློག་པའོ། །ཡང་དང་ཡང་མཉན་ཅིང་ཡང་དག་པའི་གཏམ་གྱིས་ཡོངས་སུ་མི་སྐྱོ་བ་ནི་བདུད་ཀྱི་ལས་བཟློག་པའོ། །འཇིག་རྟེན་གྱི་ཁམས་ཐམས་ཅད་ན་བཞུགས་པའི་དེ་བཞིན་གཤེགས་པ་ཐམས་ཅད་ལ་སྐྱབས་དང་དཔུང་གཉེན་ཚོལ་བའི་འདུ་ཤེས་ནི་བདུད་ཀྱི་ལས་བཟློག་པའོ། །བསྒྲུབ་པ་ལ་སངས་རྒྱས་ཐམས་ཅད་ཀྱི་བྱིན་གྱི་རླབས་རྗེས་སུ་དྲན་ཞིང་མོས་པས་ཡང་དག་པར་ལེན་པ་ནི་བདུད་ཀྱི་ལས་བཟློག་པའོ། །བྱང་ཆུབ་སེམས་དཔའི་གྲོགས་ཐམས་ཅད་ཀྱི་དགེ་བའི་རྩ་བ་དང་། མི་གཉིས་པར་མངོན་པར་བསྒྲུབ་པ་ནི་བདུད་ཀྱི་ལས་བཟློག་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་བཟློག་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་བདུད་ཀྱི་ལས་ཐམས་ཅད་ལས་འདའ་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་མཐོང་བར་བྱ་བ་སྟེ། བཅུ་གང་ཞེ་ན་འདི་ལྟར་མངོན་པར་རྫོགས་པར་བྱང་ཆུབ་པའི་སངས་རྒྱས་འཇིག་རྟེན་ན་བཞུགས་པར་མངོན་པར་ཆགས་པ་མེད་པར་མཐོང་བར་བྱ་བ་དང་། སྨོན་ལམ་གྱི་སངས་རྒྱས་མངོན་པར་བསྒྲུབ་པ་དང་། ལས་རྣམ་པར་སྨིན་པའི་སངས་རྒྱས་ལ་ཡིད་ཆེས་པར་བྱ་བ་དང་། བྱིན་གྱི་རླབས་ཀྱི་སངས་རྒྱས་ཀྱི་རྗེས་སུ་འབྲང་བར་བྱ་བ་དང་། མྱ་ངན་ལས་འདས་པའི་སངས་རྒྱས་ཁོང་དུ་ཆུད་པར་བྱ་བ་
དང་། ཆོས་ཀྱི་དབྱིངས་ཀྱི་སངས་རྒྱས་ལ་ཐམས་ཅད་དུ་གཞོལ་བར་བྱ་བ་དང་། སེམས་ཀྱི་སངས་རྒྱས་གནས་པར་བྱ་བ་དང་། ཏིང་ངེ་འཛིན་གྱི་སངས་རྒྱས་ལ་ཚད་དུ་གནས་པར་མི་བྱ་བ་དང་། རང་བཞིན་འོད་གསལ་བའི་སངས་རྒྱས་རབ་ཏུ་རྟོགས་པར་བྱ་བ་དང་། བསམ་པ་ཇི་བཞིན་གྱི་སངས་རྒྱས་རྒྱ་ཆེན་པོས་བླང་བར་བྱ་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་མཐོང་བར་བྱ་བ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པ་མཐོང་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་འཕྲིན་ལས་ཏེ། བཅུ་གང་ཞེ་ན། འདི་ལྟར་ཡང་དག་པའི་ནན་ཏན་ལ་མོས་པར་བྱ་བའི་ཕྱིར་དུས་སུ་བསྐུལ་བ་ནི་སངས་རྒྱས་ཀྱི་འཕྲིན་ལས་སོ། །སྔོན་གྱི་དགེ་བའི་རྩ་བ་ཡང་དག་པར་བསྐུལ་པའི་ཕྱིར་རྨི་ལམ་དུ་སངས་རྒྱས་སྟོན་པ་ནི་སངས་རྒྱས་ཀྱི་འཕྲིན་ལས་སོ། །ཐེ་ཙོམ་མེད་པའི་ཡེ་ཤེས་ཀྱི་ཕྱིར་མ་ཐོས་པའི་མདོ་སྡེ་སྟོན་པ་ནི་སངས་རྒྱས་ཀྱི་འཕྲིན་ལས་སོ། །ཐེ་ཙོམ་མེད་པའི་སེམས་ཀྱི་ཕྱིར་འགྱོད་པ་ཀུན་ནས་འཁོར་བས་ཡོངས་སུ་གནོན་པ་ལ་འབྱུང་བའི་ལས་ཉེ་བར་བསྒྲུབ་པ་ནི་སངས་རྒྱས་ཀྱི་འཕྲིན་ལས་སོ། །འཇུངས་པའི་སེམས་དང་ཤེས་རབ་འཆལ་པའི་བར་གྱི་སེམས་དང་ཉན་ཐོས་དང་། རང་སངས་རྒྱས་ཀྱི་སེམས་དང་། ཐེ་ཙོམ་དང་ནེམ་ནུར་གྱི་སེམས་དང་། དེ་ལ་ཞེན་པའི་སེམས་དང་། ང་རྒྱལ་གྱི་སེམས་ཤིག་བྱུང་ན་སྔོན་དགེ་བའི་རྩ་བ་མངོན་པར་བསྒྲུབ་པའི་ཕྱིར་མཚན་གྱིས་བརྒྱན་པའི་དེ་བཞིན་གཤེགས་པའི་སྐུ་མདུན་དུ་གནས་ཏེ་བཟློག་པ་ནི་སངས་རྒྱས་ཀྱི་འཕྲིན་ལས་སོ། །ཆོས་མཉན་པའི་མུ་གེ་བྱུང་བའི་ཚེ། ཆོས་མཉན་པ་གང་ཐོས་པས་གཟུངས་ཀྱི་ཡེ་ཤེས་འཐོབ་པར་འགྱུར་བ་དེ་ལྟ་བུའི་ཆོས་མཉན་པ་ཐོས་པར་བྱེད་ཅིང་མངོན་པར་ཤེས་པའི་ཡེ་ཤེས་ཉེ་བར་བསྟན་ཏེ། མོས་པ་ཤིན་ཏུ་རྣམ་པར་དག་པའི་ཕྱིར་སེམས་ཅན་གྱི་དོན་
ཚད་མེད་པ་ལ་བརྩོན་པར་སྦྱར་བ་འདི་ནི་སངས་རྒྱས་ཀྱི་འཕྲིན་ལས་དྲུག་པའོ། །བདུད་ཀྱི་ལས་ཤིག་བྱུང་བར་གྱུར་ན་ནམ་མཁའི་དབྱིངས་ལས་སྒྲ་བསྒྲགས་པའི་ཚུལ་ལམ། འོན་ཏམ་ཡན་ལག་ནས་བརྒྱུད་པའི་ཚུལ་ལམ། ཐབས་སྣ་ཚོགས་ཀྱིས་བདུད་ཀྱི་ལས་དེ་དག་ཤེས་པར་བྱེད་པ་དང་། ཁོང་དུ་ཆུད་པར་བྱེད་པ་དང་། གསལ་བར་འདོད་པར་བྱེད་ཅིང་དེ་ཐོས་ནས་ལྷག་པའི་བསམ་པ་ཆེ་བ་ཉིད་ཀྱིས་ཟིལ་གྱིས་མནན་ཏེ། སྤྱོད་པར་འགྱུར་བ་འདི་ནི་སངས་རྒྱས་ཀྱི་འཕྲིན་ལས་བདུན་པའོ། །སྔོན་སྨོན་ལམ་ཤིན་ཏུ་བསྒྲུབས་པས་མཚམས་མེད་པའི་སེམས་ལས་ཡོངས་སུ་བསྲུང་བ་དང་། ཉན་ཐོས་དང་། རང་སངས་རྒྱས་ཀྱི་སྐྱོན་མེད་པར་འཇུག་པ་ལས་བསྲུང་བ་དང་། དབང་པོ་མ་སྨིན་པར་རྣམ་པར་གྲོལ་བར་དམིགས་པ་ལས་བཟློག་པ་ནི་སངས་རྒྱས་ཀྱི་འཕྲིན་ལས་སོ། །འཁོར་རྒྱུད་དུ་འབྲེལ་བར་བྱེད་པའི་ཟག་པ་རྣམས་ཡོངས་སུ་གཅོད་པ་དང་། གཅོད་པ་ཡོངས་སུ་འབྲེལ་བར་བྱེད་པའི་ཀུན་ཏུ་སྦྱོར་བ་རྣམས་ཡང་དག་པར་བསྒྲུབ་པ་དང་། སེམས་ཅན་རྣམས་ལ་སྙིང་རྗེ་ཆེན་པོ་མངོན་པར་བསྒྲུབ་པ་དང་། སྤྱོད་པ་ཡོངས་སུ་བསྒྲུབ་པར་མོས་ཀྱང་སྦྱོར་བ་མྱ་ངན་ལས་འདས་པ་དེ་ནི་སངས་རྒྱས་ཀྱི་འཕྲིན་ལས་དགུ་པ་སྟེ། སྤྱོད་པ་རྒྱུན་མི་འཆད་པའི་རྒྱུར་འགྱུར་བའོ། །ཀྱེ་རྒྱལ་བའི་སྲས་ཁྱོད་ཚུར་ཤོག་བདག་དང་སེམས་ཅན་ཀུན་ཀྱང་ཡོངས་སུ་མྱ་ངན་ལས་འདས་པར་ཤེས་པར་གྱིས་ལ། སེམས་ཅན་མ་རྒལ་བས་མ་འཇིགས་པར་བསོད་ནམས་དང་ཡེ་ཤེས་ཀྱི་ཚོགས་བཙལ་བས་མི་ངོམས་པ་ལ་སེམས་ཞོག་ཤིག །མངོན་པར་འདུ་བྱེད་པའི་རང་བཞིན་གྱི་མཚན་ཉིད་ཀྱང་མ་བཏང་ཤིག །སངས་རྒྱས་ཀྱི་གཟུགས་ཀྱི་སྐུ་ཡང་མདོར་ཅིག །འདོད་ཆགས་དང་བྲལ་བ་ཡང་ཐོབ་པར་གྱིས་ཤིག །ཆོས་ཐམས་ཅད་ལ་ཆགས་པ་མེད་པའི་ཐམས་ཅད་མཁྱེན་པའི་ཡེ་ཤེས་ཀྱང་བཙལ་བར་གྱིས་ཤིག །ཆོས་ཐམས་ཅད་ལ་གཞན་གྱི་དྲིང་འཇོག་པ་མེད་པར་སངས་རྒྱས་ཀྱི་ཞིང་ཡང་ཡོངས་སུ་སྦྱང་བར་གྱིས་ཤིག །ཞིང་གི་
མཚན་ཉིད་ནམ་མཁའ་ལྟ་བུར་ཡང་ཤེས་པར་གྱིས་ཤིག །སེམས་ཅན་ཡོངས་སུ་སྨིན་པར་བྱ་བས་ཀྱང་མ་སྐྱོ་ཤིག །བདག་མེད་པའི་མཚན་ཉིད་ཀྱང་མ་སྤོང་ཤིག །མངོན་པར་ཤེས་པའི་ཡེ་ཤེས་ལའང་རྣམ་པར་འཕྲུལ་བར་གྱིས་ཤིག །ཆོས་ཀྱི་དབྱིངས་ལས་ཀྱང་མ་གཡོ་ཤིག །བྱང་ཆུབ་ཀྱི་སེམས་བསྐྱེད་པ་ཡང་མ་བཏང་ཤིག །ཐམས་ཅད་མཁྱེན་པའི་ཡེ་ཤེས་ལའང་འབྱུང་བར་གྱིས་ཤིག །ཆོས་ཀྱི་འཁོར་ལོ་བསྐོར་བས་ཀྱང་སེམས་ཅན་ཐམས་ཅད་ཚིམ་པར་གྱིས་ཤིག །ཆོས་ཉིད་བརྗོད་དུ་མེད་པ་ལས་ཀྱང་འདའ་བར་མ་བྱེད་ཅིག །དེ་བཞིན་གཤེགས་པའི་རྣམ་པར་འཕྲུལ་པ་དང་། བྱིན་གྱི་རླབས་ཀྱང་ཡོངས་སུ་སྟོན་ཅིག །བྱང་ཆུབ་སེམས་དཔའི་ལུས་ཀྱང་མ་དོར་ཅིག །ཡོངས་སུ་མྱ་ངན་ལས་འདས་པ་ཆེན་པོ་ཡང་ཡོངས་སུ་སྟོན་ཅིག །སྐྱེ་བའི་སྐྱེ་མཆེད་ཐམས་ཅད་དུ་ཡང་སྣང་བར་གྱིས་ཤིག་ཅེས། ཀྱེ་རྒྱལ་བའི་སྲས་རྣམ་པ་དེ་ལྟ་བུའི་ཆོས་ཟུང་དང་སྣྲེལ་ཞིར་བསྒྲུབ་པ་མངོན་པར་བསྒྲུབ་པ་རྣམས་ཉེ་བར་བསྒྲུབ་པ་འདི་ནི་སངས་རྒྱས་ཀྱི་འཕྲིན་ལས་ཡང་དག་ཕུལ་གྱི་ཆོས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་འཕྲིན་ལས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་རང་འབྱུང་གི་འཕྲིན་ལས་གཞན་གྱི་དྲིང་མི་འཇོག་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ང་རྒྱལ་གྱི་ལས་ཏེ། བཅུ་གང་ཞེ་ན་འདི་ལྟར་བླ་མ་དང་། སྦྱིན་པའི་གནས་དང་། ཕ་དང་མ་དང་དགེ་སྦྱོང་དང་། བྲམ་ཟེ་དང་། ཡང་དག་པར་སོང་བ་དང་། ཡང་དག་པར་ཞུགས་པ་ལ་རིམ་གྲོ་མེད་པ་ནི་ང་རྒྱལ་གྱི་ལས་སོ། །ཆོས་སྨྲ་བ་དང་ཁྱད་པར་གྱི་ཆོས་ཁོང་དུ་ཆུད་པ་དང་། ཆོས་རྒྱ་ཆེན་པོ་སྟོན་པ་དང་། ཐེག་པ་ཆེན་པོ་ལ་ཡང་དག་པར་གནས་པ་དང་། འབྱུང་བའི་ལམ་གྱི་ཚུལ་ཤེས་པ་དང་། གཟུངས་དང་མདོ་སྡེ་ལ་ཤིན་ཏུ་བྱང་བ་རྣམས་ལ་མི་འདུད་དེ། ཁེངས་ཤིང་འགྱིངས་
ལ་ཆོས་དང་ཆོས་སྨྲ་བ་ལ་གུས་པ་མི་སྐྱེད་པ་དང་། གུས་པར་མི་ཉན་པ་དང་། ཞེ་ས་མི་བྱེད་པ་ནི་ང་རྒྱལ་གྱི་ལས་སོ། །ཆོས་མ་ཉན་པ་དང་ཡང་དག་པའི་གཏམ་བྱ་བར་འདུག་པ་ལས་ཆོས་ཀྱི་ཤུགས་ཆེན་པོ་སྐྱེས་ཀྱང་ཆོས་སྨྲ་བ་ལ་ལེགས་སོ་ཞེས་བྱ་བ་མི་སྟེར་ཅིང་ལ་ལ་ཞིག་འདི་ལ་དད་པར་གྱུར་དུ་འོང་ངོ་། །སྙམ་པ་ནི་ང་རྒྱལ་གྱི་ལས་སོ། །ལྷག་པའི་ང་རྒྱལ་བསྐྱེད་དེ་བདག་གི་གཟེངས་བསྟོད་ཅིང་གཞན་གྱི་ཉམས་སྨོད་པ་དང་། རང་གི་དྲོད་མི་འཛིན་ཅིང་སེམས་ངེས་པར་རྟོགས་པ་མི་བསྐྱེད་པ་ནི་ང་རྒྱལ་གྱི་ལས་སོ། །མཐོ་བའི་ང་རྒྱལ་བསྐྱེད་དེ་ཤེས་བཞིན་ཁོང་དུ་ཆུད་བཞིན་དུ་བསྔགས་པར་འོས་པའི་གང་ཟག་རྣམས་ཀྱི་ལེགས་པ་འཆབ་པ་དང་། མི་སྙན་པར་རྗོད་ཅིང་གཞན་གྱི་ཡོན་ཏན་བསྔགས་པས་དགའ་བར་མི་འགྱུར་བ་འདི་ནི་ང་རྒྱལ་གྱི་ལས་སོ། །འདི་ནི་ཆོས་སོ། །འདི་ནི་འདུལ་བའོ། །འདི་ནི་ཡང་དག་པར་སངས་རྒྱས་ཀྱི་བཀའ་ཡིན་ནོ་ཞེས་བྱ་བར་ཤེས་པ་གང་ཟག་ལ་ཞེ་སྡང་ཞིང་ཆོས་ལ་ཞེ་སྡང་བ་དང་། ཆོས་སྤོང་བ་དང་། གཞན་ཡང་དཔར་བས་ལྡོག་པར་བྱེད་པ་ནི་ང་རྒྱལ་གྱི་ལས་སོ། །སྟན་མཐོན་པོ་འདོད་ཅིང་གཅེས་པར་བྱ་བའི་ཆོས་ཚོལ་བ་དང་། གཞན་གྱི་རིམ་གྲོ་བྱ་བར་སྡོད་ཅིང་མངོན་པར་དགའ་བ་དང་། གནས་བརྟན་རྒན་པ་ཚངས་པའི་སྤྱོད་པ་ཡུན་རིང་དུ་སྤྱོད་སྤྱོད་པ་རྣམས་ལ་མི་ལྡང་ཞིང་མི་བསྩུ་བ་དང་། བསྙེན་བཀུར་མི་བྱེད་པ་ནི་ང་རྒྱལ་གྱི་ལས་སོ། །བཞིན་ཁྲོ་གཉེར་ཅན་དུ་བྱས་ཤིང་མི་འཛུམ་པ་དང་། ཚིག་འཇམ་ཞིང་མཉེན་པ་མེད་ལ་རྟག་ཏུ་ཁེངས་པའི་སེམས་ཀྱིས་ཀླན་ཀ་ཚོལ་ཞིང་གླགས་ལྟ་བ་ནི་ང་རྒྱལ་གྱི་ལས་སོ། །ལྷག་པའི་ང་རྒྱལ་དུ་ལྷུང་ཞིང་མཁས་པའི་དྲུང་དུ་མི་འགྲོ་མི་སྟེན་མི་སྙེན་རིམ་གྲོ་མི་བྱེད་ཅིང་དགེ་བ་ནི་གང་། མི་དགེ་བ་ནི་གང་། བྱ་བ་ནི་ཅི་མི་བྱ་བ་ནི་ཅི་ཞིག་བྱས་ན་ཡུན་རིང་པོར་དོན་དང་བདེ་བ་དང་ཕན་པར་འགྱུར་ཞེས་མི་འདྲི་མི་དཔྱོད་དེ། དེ་རྨོངས་པ་ལས་ཀྱང་ཆེས་རྨོངས་པར་གྱུར་ནས་གཏི་མུག་གིས་བློང་ཞིང་ང་རྒྱལ་གྱིས་རྒྱལ་ཏེ། འབྱུང་བ་མི་མཐོང་བ་ནི་ང་རྒྱལ་གྱི་ལས་སོ། །དེ་མངོན་པའི་ང་རྒྱལ་གྱིས་
ཟིལ་གྱིས་ནོན་པས་སངས་རྒྱས་སྐྱེ་བ་མཉེས་པར་མི་བྱེད་པ་དང་། སྔོན་གྱི་དགེ་བའི་རྩ་བ་ཟད་པར་བྱེད་ཅིང་གསར་དུ་མི་བསྒྲུབ་ལ་མི་བཤད་པ་འཆད་པ་དང་། འཐབ་མོ་བྱེད་ཅིང་རྩོད་པ་མང་བར་གྱུར་ཏེ། དེ་དེ་ལྟ་བུའི་ཆོས་ལ་མང་དུ་སྤྱོད་པས་འདོད་རྒྱལ་ཆེན་པོར་ལྷུང་བའི་གནས་སུ་གྱུར་ཀྱང་བྱང་ཆུབ་སེམས་དཔའི་སྟོབས་དང་ཤུགས་ཀྱིས་དེ་ད་དུང་དབང་ཕྱུག་ཐོབ་པར་འགྱུར་ཡང་བསྐལ་པ་བརྒྱ་སྟོང་དུ་མར་ཡང་སངས་རྒྱས་སྐྱེ་བ་མཐོང་བར་ཡང་མི་འགྱུར་ན་ཆོས་མཉན་པ་ལྟ་སྨོས་ཀྱང་ཅི་དགོས་ཏེ། འདི་ནི་ང་རྒྱལ་གྱི་ལས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ང་རྒྱལ་གྱི་ལས་ཏེ། དེ་དག་ཡོངས་སུ་སྤངས་ཤིང་བྱང་ཆུབ་སེམས་དཔའ་རྣམས་ཡེ་ཤེས་ཀྱི་ལས་བཅུ་འཐོབ་པར་འགྱུར་བ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། །བམ་པོ་ཉི་ཤུ་གཉིས་པ། ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ལས་ཏེ། བཅུ་གང་ཞེ་ན། འདི་ལྟར་ལས་ཀྱི་རྣམ་པར་སྨིན་པ་ལ་ཡིད་ཆེས་པས་རྒྱུ་དང་འབྲས་བུ་ཆུད་མི་ཟ་བ་ནི་ཡེ་ཤེས་ཀྱི་ལས་སོ། །བྱང་ཆུབ་ཀྱི་སེམས་མི་གཏོང་བས་རྟག་ཏུ་རྒྱུན་མི་འཆད་པར་སངས་རྒྱས་ཡིད་ལ་བྱེད་པ་ནི་ཡེ་ཤེས་ཀྱི་ལས་སོ། །དགེ་བའི་བཤེས་གཉེན་ལ་བསྙེན་ཅིང་བསྟེན་པ་དང་། རིམ་གྲོ་བྱེད་ཅིང་དེ་ལ་ལྡང་བ་དང་། བསྙེན་བཀུར་བ་དང་། བླ་མར་བྱ་བ་དང་། ཉན་པར་དགའ་བ་ནི་ཡེ་ཤེས་ཀྱི་ལས་སོ། །ཆོས་ལ་དོན་དུ་གཉེར་ཅིང་ཆོས་འདོད་པ་དང་། ཆོས་ཚོལ་བ་དང་། ཐོས་པ་བཙལ་བས་མི་ངོམས་པ་དང་། ཚུལ་བཞིན་ཡིད་ལ་བྱ་བས་སྦྱོར་བ་དང་། ཚུལ་བཞིན་མ་ཡིན་པའི་ཡིད་ལ་བྱེད་པ་ཡོངས་སུ་སྤོང་བ་ནི་ཡེ་ཤེས་ཀྱི་ལས་སོ། །སེམས་ཅན་རྣམས་ལ་ང་རྒྱལ་མེད་པ་དང་། བྱང་ཆུབ་སེམས་དཔའ་རྣམས་ལ་སྟོན་པ་ཙམ་དུ་གཅེས་པར་སེམས་པ་དང་། ཆོས་རྣམས་ལ་བདག་ཙམ་དུ་གཅེས་པར་སེམས་པ་དང་། དེ་བཞིན་གཤེགས་པ་རྣམས་ལ་སྲོག་ཙམ་དུ་གཅེས་པར་སེམས་པ་དང་། ནན་ཏན་
ཉམས་སུ་བླང་བ་ལ་སངས་རྒྱས་ཙམ་དུ་གཅེས་པར་སེམས་པ་ནི་ཡེ་ཤེས་ཀྱི་ལས་སོ། །ལུས་དང་ངག་དང་ཡིད་ཀྱི་ལས་ཁ་ན་མ་ཐོ་བ་མེད་པ་དང་། འཚོ་བའི་དབང་པོ་སྨད་དུ་མི་རུང་བ་དང་། འཚོ་བ་མཁས་པས་བསྔགས་པ་དང་། བྱང་ཆུབ་ཀྱི་ལས་ཀྱི་རྗེས་སུ་རྩོམ་པའི་རྩོལ་བ་ནི་ཡེ་ཤེས་ཀྱི་ལས་སོ། །རྟེན་ཅིང་འབྲེལ་བར་འབྱུང་བ་དང་། མི་འགལ་བ་དང་ལྟ་བའི་ཐིབས་པོ་དང་བྲལ་བ་དང་། གཏི་མུག་གི་མུན་པ་དང་། རབ་རིབ་སེལ་བ་དང་། མ་རིག་པའི་མུན་ནག་མེད་པར་བྱེད་པ་དང་། ཆོས་ཐམས་ཅད་ལ་ཤེས་རབ་ཀྱི་སྣང་བ་རབ་ཏུ་འཐོབ་པར་བྱེད་པ་ནི་ཡེ་ཤེས་ཀྱི་ལས་སོ། །ཡོངས་སུ་བསྔོ་བ་བཅུའི་རྗེས་སུ་འབྲང་བ་དང་། ཕ་རོལ་ཏུ་ཕྱིན་པ་རྣམས་ལ་མར་འདུ་ཤེས་པ་དང་། ཐབས་མཁས་པ་ལ་ཕར་འདུ་ཤེས་པ་དང་། བསམ་པ་བྱང་ཆུབ་ཀྱི་རྣམ་པ་ལ་ཞུགས་པ་ནི་ཡེ་ཤེས་ཀྱི་ལས་སོ། །སྦྱིན་པ་དང་། ཚུལ་ཁྲིམས་དང་། ཐོས་པ་དང་། ལྷག་མཐོང་དང་ཞི་གནས་ཡོངས་སུ་ཚོལ་བ་དང་། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་ཚོལ་བས་མི་སྐྱོ་བ་ནི་ཡེ་ཤེས་ཀྱི་ལས་སོ། །ལས་གང་སངས་རྒྱས་ཀྱིས་བསྔགས་པ་བདུད་ཀྱི་དཀྲུགས་མ་དང་། ཉོན་མོངས་པ་ཐམས་ཅད་དང་བྲལ་བ་བསྒྲིབས་པ་དང་། གཅོད་པ་དང་། ཀུན་ནས་འཁོར་བ་ཐམས་ཅད་ཡོངས་སུ་ཆད་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། རྣམ་པར་གདུལ་བའི་ཡེ་ཤེས་དང་མཐུན་པ་དམ་པའི་ཆོས་ཡོངས་སུ་གཟུང་བ་ལ་བརྩོན་པ། སངས་རྒྱས་ཀྱི་ཞིང་ཡོངས་སུ་དག་པར་བྱེད་པའི་མངོན་པར་ཤེས་པ་དང་། རིག་པའི་ཡེ་ཤེས་མངོན་སུམ་དུ་གྱུར་ཅིང་དེ་ལྟ་བུའི་ལས་བྱེད་པ་འདི་ནི་ཡེ་ཤེས་ཀྱི་ལས་ཡང་དག་ཕུལ་གྱི་ཆོས་དང་ལྡན་པ་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ལས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་ཡེ་ཤེས་ཆེན་པོ་སྔོན་དུ་འགྲོ་བས་མངོན་པར་བསྒྲུབ་
པ་ལ་མཁས་པ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་བྱིན་གྱི་རླབས་ཏེ། བཅུ་གང་ཞེ་ན་འདི་ལྟར་སེམས་ཞུམ་པར་གྱུར་པ་ནི་བདུད་ཀྱི་བྱིན་གྱི་རླབས་སོ། །བསམ་པ་འཁྲུགས་པ་ནི་བདུད་ཀྱི་བྱིན་གྱི་རླབས་སོ། །རྒྱ་ཆུང་ངུས་མགུ་བ་ནི་བདུད་ཀྱི་བྱིན་གྱི་རླབས་སོ། །གཅིག་ལས་མི་བཟོད་པ་ནི་བདུད་ཀྱི་བྱིན་གྱི་རླབས་སོ། །སྨོན་ལམ་ལ་ལྷག་པར་མི་དམིགས་པ་ནི་བདུད་ཀྱི་བྱིན་གྱི་རླབས་སོ། །ཉོན་མོངས་པ་རྣམ་པར་བཟློག་པ་དང་། ཞི་བ་འདོད་པ་ནི་བདུད་ཀྱི་བྱིན་གྱི་རླབས་སོ། །འཁོར་བའི་རྒྱུན་མི་གཅོད་པ་ནི་བདུད་ཀྱི་བྱིན་གྱི་རླབས་སོ། །སྤྱོད་པ་ལས་ཕྱིར་མི་ལྡོག་པ་ནི་བདུད་ཀྱི་བྱིན་གྱི་རླབས་སོ། །སེམས་ཅན་ཡོངས་སུ་སྨིན་པར་མི་བྱེད་པ་ནི་བདུད་ཀྱི་བྱིན་གྱི་རླབས་སོ། །ཆོས་ལ་ཐེ་ཙོམ་ཟ་ཞིང་དམ་པའི་ཆོས་སྤོང་བ་ནི་བདུད་ཀྱི་བྱིན་གྱི་རླབས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བདུད་ཀྱི་བྱིན་གྱི་རླབས་ཏེ། དེ་དག་ཡོངས་སུ་སྤངས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཀྱི་བྱིན་གྱི་རླབས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སངས་རྒྱས་ཀྱི་བྱིན་གྱི་རླབས་ཏེ། བཅུ་གང་ཞེ་ན་འདི་ལྟར་ཐོག་མར་བྱང་ཆུབ་ཏུ་སེམས་སྐྱེ་བ་ནི་སངས་རྒྱས་ཀྱི་བྱིན་གྱི་རླབས་སོ། །ཚེ་ཚེ་རབས་སུ་བྱང་ཆུབ་ཀྱི་སེམས་མི་སྟོར་བ་ནི་སངས་རྒྱས་ཀྱི་བྱིན་གྱི་རླབས་སོ། །བདུད་ཀྱི་ལས་ཁོང་དུ་ཆུད་ཅིང་དེ་རྣམ་པར་བཟློག་པ་ནི་སངས་རྒྱས་ཀྱི་བྱིན་གྱི་རླབས་སོ། །ཕ་རོལ་ཏུ་ཕྱིན་པ་གྲག་ཅིང་ཐོས་པར་འགྱུར་བ་དང་། ཐོས་ནས་ཀྱང་ནན་ཏན་བྱེད་པ་ནི་སངས་རྒྱས་ཀྱི་བྱིན་གྱི་རླབས་སོ། །འཁོར་བའི་སྡུག་བསྔལ་རབ་ཏུ་ཤེས་ཤིང་ཡོངས་སུ་སྐྱོ་བར་མི་བྱེད་པ་ནི་སངས་རྒྱས་ཀྱི་བྱིན་གྱི་རླབས་སོ། །ཆོས་ཟབ་མོ་རྟོགས་པར་བྱ་བས་འབྲས་བུ་ཐོབ་པར་བྱེད་པ་ནི་སངས་རྒྱས་ཀྱི་བྱིན་གྱི་རླབས་སོ། །སེམས་ཅན་རྣམས་ལ་ཉན་ཐོས་དང་རང་སངས་རྒྱས་ཀྱི་རྣམ་
པར་གྲོལ་བས་ཆོས་སྟོན་ཀྱང་དེའི་རྣམ་པར་གྲོལ་བ་ལ་མོས་པ་མེད་པ་ནི་སངས་རྒྱས་ཀྱི་བྱིན་གྱི་རླབས་སོ། །འདུས་བྱས་ཀྱི་རང་བཞིན་ལ་རྟོག་ཅིང་འདུས་མ་བྱས་ལ་མི་གནས་ལ། འདུས་བྱས་དང་འདུས་མ་བྱས་ལ་མི་གཉིས་པར་འདུ་ཤེས་པ་ནི་སངས་རྒྱས་ཀྱི་བྱིན་གྱི་རླབས་སོ། །ཉིང་གི་མཚམས་སྦྱོར་བ་ལ་གནས་ཀྱང་ཉིང་གི་མཚམས་སྦྱོར་བ་སེལ་བ་ནི་སངས་རྒྱས་ཀྱི་བྱིན་གྱི་རླབས་སོ། །ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་ཀྱང་བྱང་ཆུབ་སེམས་དཔའི་སྤྱོད་པ་བསྒྲུབས་པའི་རིགས་རྒྱུན་མི་གཅད་པ་ནི་སངས་རྒྱས་ཀྱི་བྱིན་གྱི་རླབས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་སངས་རྒྱས་ཀྱི་བྱིན་གྱི་རླབས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་དེ་བཞིན་གཤེགས་པའི་སྟོབས་བཅུའི་བྱིན་གྱི་རླབས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་བྱིན་གྱི་རླབས་ཏེ། བཅུ་གང་ཞེ་ན་འདི་ལྟར་འདུས་བྱས་ཐམས་ཅད་མི་རྟག་གོ་ཞེས་བྱ་བ་ནི་ཆོས་ཀྱི་བྱིན་གྱི་རླབས་སོ། །འདུས་བྱས་ཐམས་ཅད་སྡུག་བསྔལ་ལོ་ཞེས་བྱ་བ་ནི་ཆོས་ཀྱི་བྱིན་གྱི་རླབས་སོ། །འདུ་བྱེད་ཐམས་ཅད་བདག་མེད་དོ་ཞེས་བྱ་བ་ནི་ཆོས་ཀྱི་བྱིན་གྱི་རླབས་སོ། །མྱ་ངན་ལས་འདས་པ་ཞི་བའོ་ཞེས་བྱ་བ་ནི་ཆོས་ཀྱི་བྱིན་གྱི་རླབས་སོ། །ཆོས་རྣམས་ནི་རྟེན་ཅིང་འབྲེལ་བར་འབྱུང་བ་སྟེ། རྐྱེན་རྣམས་མེད་པར་མི་འབྱུང་བ་ནི་ཆོས་ཀྱི་བྱིན་གྱི་རླབས་སོ། །ཚུལ་བཞིན་མ་ཡིན་པ་ཀུན་ནས་བྱུང་བས་མ་རིག་པ་ཀུན་ནས་འབྱུང་ངོ་། །མ་རིག་པ་ཀུན་ནས་བྱུང་བས་རྒ་ཤིའི་བར་དུ་ཀུན་ནས་འབྱུང་ངོ་། །ཚུལ་བཞིན་མ་ཡིན་པ་འགགས་པས་མ་རིག་པ་འགག་གོ །མ་རིག་པ་འགགས་པས་རྒ་ཤིའི་བར་དུ་འགག་པར་འགྱུར་བ་ནི་ཆོས་ཀྱི་བྱིན་གྱི་རླབས་སོ། །ཉན་ཐོས་ཀྱི་ཐེག་པ་རྣམ་པར་ཐར་པའི་སྒོ་གསུམ་གྱིས་བྱུང་བ་དང་། རང་སངས་རྒྱས་ཀྱི་ཐེག་པ་ཉོན་མོངས་པ་མེད་པའི་ཆོས་ཁོང་དུ་ཆུད་པས་བྱུང་བ་ནི་ཆོས་ཀྱི་བྱིན་གྱི་རླབས་སོ། །ཐེག་པ་ཆེན་པོ་ཕ་རོལ་ཏུ་ཕྱིན་པ་དྲུག་དང་། བསྡུ་བའི་དངོས་པོ་བཞིས་བྱུང་བ་ནི་ཆོས་ཀྱི་
བྱིན་གྱི་རླབས་སོ། །སངས་རྒྱས་ཀྱི་ཡུལ་ཞིང་ཐམས་ཅད་དང་། ཆོས་ཐམས་ཅད་དང་། སེམས་ཅན་ཐམས་ཅད་དང་དུས་ཐམས་ཅད་རབ་ཏུ་མཁྱེན་པའི་ཡེ་ཤེས་མངའ་བ་ནི་ཆོས་ཀྱི་བྱིན་གྱི་རླབས་སོ། །མྱ་ངན་ལས་འདས་པ་ཡིད་ལ་བྱ་བ་ཐམས་ཅད་ཡོངས་སུ་ཆད་པ་དང་། འཛིན་པ་ཐམས་ཅད་རྣམ་པར་སྤངས་པ་དང་། སྔོན་གྱི་མཐའ་དང་ཕྱི་མའི་མཐའི་རང་བཞིན་གྱི་རྗེས་སུ་སོང་བར་ཤེས་པ་ནི་ཆོས་ཀྱི་བྱིན་གྱི་རླབས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་བྱིན་གྱི་རླབས་ཏེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་སངས་རྒྱས་ཐམས་ཅད་ཀྱི་བྱིན་གྱི་རླབས་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགའ་ལྡན་ན་གནས་པའི་ལས་ཏེ། བཅུ་གང་ཞེ་ན་འདི་ལྟར་འདོད་པའི་ཁམས་ཀྱི་ལྷའི་བུ་རྣམས་ལ་འདོད་པའི་དབེན་པ་བསྟན་པ་དང་། དབང་ཕྱུག་མི་རྟག་པ་བསྟན་པ་དང་། ཕུན་སུམ་ཚོགས་པ་ཐམས་ཅད་རྒུད་པར་འགྱུར་བ་བསྟན་པ་དང་དེ་དག་བྱང་ཆུབ་ཀྱི་སེམས་ལ་ཡང་དག་པར་དགོད་པ་འདི་ནི་དགའ་ལྡན་ན་གནས་པའི་ལས་དང་པོའོ། །གཟུགས་ཀྱི་ཁམས་ཀྱི་ལྷའི་བུ་རྣམས་ལ་བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་ལ་སྙོམས་པར་འཇུག་པ་དང་། རྣམ་པར་ལྡང་བ་སྟོན་ཅིང་བསམ་གཏན་དང་། བསམ་གཏན་གྱི་ཡན་ལག་དེ་དག་ལ་མངོན་པར་ཞེན་པ་དང་། སྲེད་པས་བྱུང་བའི་འཇིག་ཚོགས་སུ་ལྟ་བ་དང་། གཏི་མུག་གི་ཤས་ཆེ་བའི་ཉོན་མོངས་པ་རྣམས་ཡང་དག་པ་ཇི་ལྟ་བ་བཞིན་དུ་བསྟན་པ་དང་། གཟུགས་དང་གཟུགས་མེད་པའི་ཕྱིན་ཅི་ལོག་ལ་ཞུགས་པ་ཐམས་ཅད་ལ་སྡུག་པར་ཡིད་ལ་བྱེད་པ་ཐམས་ཅད་མི་སྡུག་ཅིང་མི་རྟག་པར་ཡོངས་སུ་བསྟན་ཏེ། བྱང་ཆུབ་ཀྱི་སེམས་ལ་དགོད་པ་འདི་ནི་དགའ་ལྡན་ན་གནས་པའི་ལས་གཉིས་པའོ། །ཀྱེ་རྒྱལ་བའི་སྲས་དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་རྣམས་ནི་རྒྱན་བཟང་པོའི་ཏིང་ངེ་འཛིན་ལ་གནས་ཏེ། ལུས་ལས་འོད་བཀྱེ་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་
རྒྱས་པར་བཀང་ནས་སེམས་ཅན་རྣམས་ལ་དད་པ་ཇི་བཞིན་དུ་ཆོས་སྣ་ཚོགས་ཀྱི་སྒྲ་སྐད་རབ་ཏུ་བརྗོད་དེ་ཆོས་ཀྱི་སྒྲ་སྐད་དེ་དག་ཐོས་ནས་སེམས་དང་བར་གྱུར་ཏེ། དགའ་ལྡན་གྱི་ལྷ་དང་བརྟུལ་ཞུགས་མཐུན་པར་སྐྱེ་བར་འགྱུར་ཞིང་། དེ་ལྟར་སྐྱེས་ནས་ཀྱང་བྱང་ཆུབ་ཀྱི་སེམས་ལ་དགོད་པ་འདི་ནི་དགའ་ལྡན་ན་གནས་པའི་ལས་གསུམ་པའོ། །ཀྱེ་རྒྱལ་བའི་སྲས་དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་མིག་བསྒྲིབས་པ་མེད་པས། ཕྱོགས་བཅུའི་དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་རྣམས་ལ་ལྟ་སྟེ། བྱང་ཆུབ་སེམས་དཔའ་དེ་དག་གིས་ཀྱང་བྱང་ཆུབ་སེམས་དཔའ་དེ་མཐོང་ངོ་། །མཐོང་ནས་ཀྱང་ཆོས་ཡང་དག་པར་བགྲོ་བ་ཆེན་པོ་དང་། ཡང་དག་པའི་ཆོས་ཀྱི་གཏམ་ཆེན་པོ་བྱེད་དོ། །ཡུམ་གྱི་སྐུར་གཤེགས་པ་དང་། སྐྱེ་བ་དང་འབྱུང་བ་དང་། སྙིང་པོ་བྱང་ཆུབ་ཀྱི་རྒྱན་རྣམ་པར་དགོད་པ་དང་། ཡང་དག་པར་བགྲོ་བའོ། །སྔོན་གྱི་སྤྱོད་པ་གང་གིས་ཡེ་ཤེས་ཆེ་བ་ཉིད་དེ་ཐོབ་པར་གྱུར་པའི་སྔོན་གྱི་སྤྱོད་པ་དག་ཀྱང་རབ་ཏུ་བརྗོད་དོ། །གནས་ནས་མི་གཡོ་ཡང་བྱ་བ་འདི་ལྟ་བུ་དག་སྟོན་པ་འདི་ནི་དགའ་ལྡན་ན་གནས་པའི་ལས་བཞི་པའོ། །ཀྱེ་རྒྱལ་བའི་སྲས་དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའི་དྲུང་དུ་བྱང་ཆུབ་སེམས་དཔའ་དེ་ལ་བལྟ་བ་དང་ཕྱག་བྱ་བ་དང་། བསྙེན་བཀུར་བའི་ཕྱིར་ཕྱོགས་བཅུ་ནས་དགའ་ལྡན་གྱི་གནས་རབ་ན་འཁོད་པའི་བྱང་ཆུབ་སེམས་དཔའ་རྣམས་འོངས་ཏེ། བྱང་ཆུབ་སེམས་དཔའ་དེ་དག་གི་སེམས་དང་བསམ་པ་ཡོངས་སུ་ཚིམ་པར་བྱ་བ་དང་། སྨོན་པ་ཡོངས་སུ་རྫོགས་པར་བྱ་བའི་ཕྱིར་ཆོས་ཡང་དག་པར་བགྲོ་བའི་སྒོ་ཆེན་པོ་ཡང་དག་པར་སྟོན་ཏེ། སོ་སོའི་ས་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་གང་བྱ་བ་དང་། གང་སྤང་བ་དང་གང་བསྒོམ་པ་དང་གང་མངོན་དུ་བྱ་བ་དེ་དག་ཀྱང་ཡང་དག་པར་སྟོན་ཏོ། །ཡང་དག་པར་བགྲོ་བའི་ཆོས་དེ་དག་ཐོས་ནས་ཀྱང་རབ་ཏུ་དགའ་ཞིང་མགུ་བ་དང་། རངས་པས་ལེགས་པར་རྗོད་ཅིང་།
རང་རང་གི་ཞིང་དང་། རང་རང་གི་གནས་སུ་འདོང་བར་འགྱུར་བ་འདི་ནི་དགའ་ལྡན་ན་གནས་པའི་ལས་ལྔ་པའོ། །ཀྱེ་རྒྱལ་བའི་སྲས་དགའ་ལྡན་གྱི་གནས་རབ་ན་གནས་པའི་གན་དུ་ནམ་བདུད་སྡིག་ཅན་འདོད་པའི་ཁམས་ཀྱི་དབང་པོ་འཁོར་མང་པོས་ཡོངས་སུ་བསྐོར་བ་ཞིག་གླགས་བཙལ་བའི་ཕྱིར་འོངས་པར་གྱུར་ནའང་དེའི་ཚེ་བྱང་ཆུབ་སེམས་དཔའ་བདུད་ཐམས་ཅད་ཚར་གཅོད་པ་ཞེས་བྱ་བའི་རྡོ་རྗེའི་ཚིག་ལ་གནས་ཤིང་ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་མཁས་པས་ཡང་དག་པར་གཟུང་བའི་ཡེ་ཤེས་ཀྱི་སྒོས་མཉམ་ཞིང་མཉན་པའི་མཐའ་གཉིས་བཟུང་ནས་ཅི་ནས་ཀྱང་བདུད་སྡིག་ཅན་གྱིས་གླགས་རྙེད་པར་མི་འགྱུར་བ་དེ་ལྟ་དེ་ལྟར་བྱིན་གྱིས་རློབ་བོ། །དེ་ལྟ་དེ་ལྟར་ཆོས་ཀྱང་སྟོན་ཏེ་བདུད་ཀྱི་འཁོར་ཆེན་པོ་དེས་བྱང་ཆུབ་སེམས་དཔའི་རྣམ་པར་འཕྲུལ་པ་དེ་ལྟ་བུ་མཐོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་འདི་ནི་དགའ་ལྡན་ན་གནས་པའི་ལས་དྲུག་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པ་ནི་གང་གི་ཚེ་འདི་ལྟར་འདོད་པའི་ཁམས་ཀྱི་ལྷའི་བུ་འདི་རྣམས་ཆོས་མཉན་པ་དང་། ཡང་དག་པར་བགྲོ་བས་སྐྱོ་བར་གྱུར་ཏོ། །ཞེས་བྱ་བར་ཤེས་པར་གྱུར་པ་དེའི་ཚེ། འདོད་པའི་ཁམས་ཀྱི་གནས་ཐམས་ཅད་དུ་སྒྲ་སྒྲོག་ཅིང་དབྱངས་འབྱིན་ཏེ། གྲོགས་པོ་དག་དེ་རིང་བྱང་ཆུབ་སེམས་དཔའ་བཙུན་མོའི་འཁོར་ཆེན་པོ་སྟོན་པ་མཛད་ཀྱིས་བལྟ་བར་སུ་འདོད་པ་དེ་དག་མྱུར་དུ་ཤིག་ཤིག་ཅེས་ནས། དེར་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་ཀུན་ནས་འདུ་བར་འགྱུར་ཏེ། དེ་དག་དང་བྱང་ཆུབ་སེམས་དཔའ་རྣམས་ཀུན་ནས་འདུས་པར་གྱུར་ནས་ཀྱང་། ལྷའི་བུ་དེ་དག་གིས་སྔོན་ཅད་མ་མཐོང་མ་ཐོས་པའི་བཙུན་མོའི་འཁོར་དེ་ལྟ་བུ་བསྟན་ནས། དེ་དག་ནམ་དགའ་བས་མོས་པར་གྱུར་པ་དེའི་ཚེ། དེ་དག་གིས་རོལ་མོ་བརྡུང་བ་དང་། དཀྲོལ་བ་དེ་དག་ལས་ཀྱེ་གྲོགས་པོ་རྣམས་འདུ་བྱེད་ཐམས་ཅད་ནི་མི་རྟག་གོ །འདུ་བྱེད་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་བདག་
མེད་པའོ། །མྱ་ངན་ལས་འདས་པ་ནི་ཞི་བའོ། །ཞེས་སྒྲ་འབྱུང་བ་དང་། བྱང་ཆུབ་སེམས་དཔའི་སྤྱོད་པས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ་ཞེས་བྱ་བའི་སྒྲ་འབྱུང་བ་ཐོས་པར་འགྱུར་ཏེ། དེ་དག་གིས་ཆོས་ཀྱི་སྒྲ་དེ་ཐོས་པ་དང་། སྐྱོ་བ་སྐྱེ་བར་འགྱུར་ཏེ། བྱང་ཆུབ་ཀྱི་སེམས་ལ་ཡང་དག་པར་གཞོལ་བར་འགྱུར་བ་འདི་ནི་དགའ་ལྡན་ན་གནས་པའི་ལས་བདུན་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་འདུག་པ་ནི་དགའ་ལྡན་གྱི་གནས་ནས་ཀྱང་ལུས་མི་སྣང་བར་མ་གྱུར་ལ། ཕྱོགས་བཅུར་ཡང་དེ་བཞིན་གཤེགས་པ་རྣམས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་འགྲོ་སྟེ། དེ་ལ་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའི་ས་མངོན་པར་དབང་བསྐུར་བ་ཐོབ་པའི་མཆོག་ཏུ་ཕྱིན་པས་ཐམས་ཅད་མངོན་པར་ཤེས་པ་ཞེས་བྱ་བ་ཡང་ཡང་དག་པར་བསྟན་པར་འགྱུར་བ་དང་། ཐམས་ཅད་མཁྱེན་པའི་ཡེ་ཤེས་ཡན་ལག་དང་ཉེ་བའི་ཡན་ལག་ཐམས་ཅད་དང་ལྡན་ཞིང་། རྣམ་པའི་མཆོག་ཐམས་ཅད་དང་ལྡན་པ་ལ་འཇུག་པ་སེམས་ཀྱི་སྐད་ཅིག་གཅིག་གིས་སྦྱོར་བ་ཡང་དག་པར་བསྟན་པར་འགྱུར་བ་འདི་ནི་དགའ་ལྡན་ན་གནས་པའི་ལས་བརྒྱད་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པའི་མཐུས་ཁྱད་པར་འདོད་པ་ཞེས་བྱ་བའི་དེ་བཞིན་གཤེགས་པའི་མཆོད་པ་དང་། རིམ་གྲོ་རྣམ་པ་ཚད་མེད་པས་རྣམ་པར་དག་པ་མཐའ་ཡས་པའི་རྣམ་པ་ཡོངས་སུ་སྟོན་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ། འཇིག་རྟེན་གྱི་ཁམས་འབྱམ་ཀླས་པའི་དེ་བཞིན་གཤེགས་པའི་མཆོད་པའི་ལས་ཀྱི་དོན་དུ་འབྱུང་སྟེ། མཆོད་པ་དེ་མཐོང་ནས་སེམས་ཅན་གྲངས་མེད་ཚད་མེད་པའི་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་ནི་དགའ་ལྡན་ན་གནས་པའི་ལས་དགུ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པ་མཐའ་
དང་དབུས་མེད་པའི་ཆོས་སྒྱུ་མ་ལ་ཞུགས་པ་ནི་མིག་ཡོར་ལྟ་བུས་ཤིན་ཏུ་བསྒྲུབས་པའི་ཡེ་ཤེས་ཀྱིས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་གཟུགས་སྣ་ཚོགས་དང་། ཁ་དོག་སྣ་ཚོགས་དང་དབྱིབས་སྣ་ཚོགས་དང་། སྤྱོད་ལམ་སྣ་ཚོགས་དང་བྱ་བ་སྣ་ཚོགས་དང་། སྦྱོར་བ་སྣ་ཚོགས་དང་། བསྟན་པ་མངོན་པར་བསྒྲུབ་པ་སྣ་ཚོགས་དང་། དགོངས་པ་རྣམ་པ་སྣ་ཚོགས་ཀྱིས་སེམས་ཅན་རྣམས་མོས་པ་ཇི་ལྟ་བ་བཞིན་དུ་སེམས་དང་བསམ་པ་མགུ་བར་བྱ་བའི་ཕྱིར་ཆོས་སྟོན་ཅིང་གཟུགས་ཡོངས་སུ་སྟོན་ཏེ། འདི་ནི་དགའ་ལྡན་ན་གནས་པའི་ལས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དགའ་ལྡན་ན་གནས་པའི་ལས་ཏེ། དེ་དག་བྱས་ནས་བྱང་ཆུབ་སེམས་དཔའ་རྣམས་ཕྱིས་མིའི་འཇིག་རྟེན་དུ་འོང་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དགའ་ལྡན་གྱི་གནས་ནས་ཤི་འཕོ་སྟོན་པ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་རྣམས་ལྷའི་རིས་དགའ་ལྡན་ནས་ཤི་འཕོ་བའི་ཚེ། རྐང་པའི་མཐིལ་གྱི་འོག་ནས་བདེ་བའི་རྒྱན་ཅེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་རྒྱས་པར་བཀང་ཞིང་ངན་སོང་དང་མི་ཁོམ་པའི་རྒྱུད་དུ་སྐྱེས་པའི་སེམས་ཅན་རྣམས་ཀྱི་ལུས་ལ་འབབ་བོ། །དེ་ལྟར་འོད་དེས་ལུས་ལ་བབ་མ་ཐག་ཏུ་དེ་ཉིད་ཀྱི་ཚེ། སེམས་ཅན་དེ་དག་བདེ་བ་ཐམས་ཅད་ཀྱིས་ཚིམ་ཞིང་སྡུག་བསྔལ་གྱི་ཚོར་བ་རྩེ་ཟིལ་བར་འགྱུར་རོ། །བདེ་བའི་ཉམས་ནི་ཉམས་སུ་ཚོར་མ་ཐག་ཏུ་དེ་དག་གིས་འདི་ལྟར་གྲོགས་པོ་དག་སེམས་ཅན་གཞན་ཞིག་ནི་འཇིག་རྟེན་གྱི་ཁམས་འདིར་སྐྱེས་སོ་ཞེས་བྱ་བར་ཤེས་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དང་པོའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེའི་སྨིན་མཚམས་ཀྱི་མཛོད་སྤུ་ནས་ཡང་དག་པར་བསྐུལ་བ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་བཀང་ཞིང་སྔོན་ལྷན་ཅིག་ཏུ་སྤྱོད་སྤྱོད་པའི་བྱང་ཆུབ་སེམས་དཔའ་རྣམས་ཀྱི་
ལུས་ལ་འབབ་བོ། །འོད་ཟེར་དེས་དེ་ལྟར་ལུས་ལ་བབ་མ་ཐག་ཏུ། དེ་ཉིད་ཀྱི་ཚེ་བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་དགའ་ལྡན་གྱི་གནས་ནས་ཤི་འཕོ་བར་ཁོང་དུ་ཆུད་དེ་དེ་དག་ཐམས་ཅད་འདུས་ནས་བྱང་ཆུབ་སེམས་དཔའ་ལ་མཆོད་པའི་ལས་མངོན་པར་བསྒྲུབ་པ་འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་གཉིས་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་ལག་པ་གཡས་པའི་མཐིལ་ནས་ཡོངས་སུ་དག་པའི་ཡུལ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་སྦྱོང་ཞིང་དེ་ན་ཟག་པ་མེད་པའི་རང་སངས་རྒྱས་འཁོད་པ་དེ་དག་འཇིག་རྟེན་གྱི་ཁམས་གཞན་དུ་སེལ་ཏོ། །མ་ཡིན་ན་ཡང་གང་གིས་ཤེས་པར་གྱུར་པ་དེ་དག་ཚེའི་འདུ་བྱེད་འདོར་རོ། །གཞན་ཡང་འདུལ་བའི་དབང་དུ་དེ་བཞིན་གཤེགས་པའི་བྱིན་གྱིས་བྱིན་དུ་བརླབས་པའི་སེམས་ཅན་མ་གཏོགས་པར་བདུད་དང་མུ་སྟེགས་ཅན་གཞན་དང་ཕས་ཀྱི་རྒོལ་བ་དང་ཀུན་ཏུ་རྒྱུ་བ་དང་། དམིགས་པ་ལ་མངོན་པར་ཞེན་པའི་སེམས་ཅན་རྣམས་འཇིག་རྟེན་གྱི་ཁམས་གཞན་དུ་སེལ་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་གསུམ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེའི་པུས་མོ་གཉིས་ཀྱི་ལྷ་ང་གཉིས་ནས་དྲི་མ་མེད་ཅིང་བཟང་ལ་འོད་གསལ་བའི་རྒྱན་ཅེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་ལྷའི་གནས་ཐ་མ་ཉེ་བར་བཟུང་བ་ཡན་ཅད་འོག་མིན་གྱི་ལྷའི་གནས་མན་ཆད་དུ་སྣང་བར་བྱེད་དེ། དེས་ལྷའི་བུ་དེ་དག་གིས་ཀྱང་བྱང་ཆུབ་སེམས་དཔའ་དགའ་ལྡན་གྱི་གནས་ཀྱི་གནས་ནས་ཤི་འཕོ་བར་ཤེས་ནས། དེ་དག་ཀུན་ཀྱང་སྐྱོ་བ་སྐྱོ་བའི་ཡིད་ཀྱིས་མེ་ཏོག་དང་། ཕྲེང་བ་དང་། སྤོས་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་ཐོགས་ཏེ། རོལ་མོ་བརྡུང་བ་དང་། དཀྲོལ་བའི་སྒྲ་རབ་ཏུ་བྱུང་ནས་བྱང་ཆུབ་སེམས་དཔའི་དྲུང་དུ་མཆོད་པའི་ལས་ཀྱི་ཕྱིར་འདོང་སྟེ། ཤི་འཕོ་ཉེ་བར་བཟུང་བ་ནས་ཡོངས་སུ་མྱ་ངན་ལས་འདས་པ་ཆེན་པོ་བསྟན་གྱི་བར་དུ་བསྙེན་
བཀུར་བྱེད་དོ། །ཕྱི་བཞིན་འབྲང་ངོ་། །འདི་ནི་དགའ་ལྡན་གྱི་གནས་ནས་ཤི་འཕོ་བ་སྟོན་པ་བཞི་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེ་དཔལ་གྱི་བེའུའི་རྒྱན་དང་ལྡན་པ། རྡོ་རྗེའི་ཁམས་ལྟར་སྲ་ཞིང་བརྟན་པའི་སྙིང་པོ་ཅན་གྱི་སྙིང་ཀ་ནས་གཞན་གྱིས་མི་ཐུབ་པའི་རྒྱལ་མཚན་ཞེས་བྱ་བའི་འོད་ཟེར་གཏོང་སྟེ། དེ་བཏང་ནས་ཀྱང་ལག་ན་རྡོ་རྗེའི་འཇིག་རྟེན་ཐམས་ཅད་ཡོངས་སུ་སྣང་བར་བྱེད་དོ། །དེ་ནས་ལག་ན་རྡོ་རྗེ་ཁྲག་ཁྲིག་ཕྲག་བརྒྱ་འོངས་ཏེ། ཤི་འཕོ་སྟོན་པ་ཉེ་བར་བཟུང་བ་ནས། ཡོངས་སུ་མྱ་ངན་ལས་འདས་པ་ཆེན་པོ་བསྟན་གྱི་བར་དུ་བྱང་ཆུབ་སེམས་དཔའི་ཕྱི་བཞིན་འབྲང་སྟེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་ལྔ་པའོ། ། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེའི་བ་སྤུའི་བུ་ག་ཐམས་ཅད་ནས་འགྲོ་བ་ཐམས་ཅད་དུ་རྣམ་པར་ཕྱེ་བ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་ནས་བྱང་ཆུབ་སེམས་དཔའི་ལུས་ལ་འབབ་བོ། །བྱང་ཆུབ་སེམས་དཔའི་ལུས་ལ་བབ་ནས་ལྷ་དང་མིའི་གནས་སུ་འཆར་རོ། །དེས་བྱང་ཆུབ་སེམས་དཔའ་དེ་དག་ཀྱང་བདག་ཅག་གིས་འདིར་གནས་ཏེ། སེམས་ཅན་ཡོངས་སུ་སྨིན་པར་བྱ་བ་དང་། དེ་བཞིན་གཤེགས་པ་ལ་མཆོད་པར་བྱ་བར་འགྱུར་རོ། །སྙམ་དུ་ཁོང་དུ་ཆུད་པ་འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དྲུག་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེའི་ཁང་པ་ནོར་བུ་རིན་པོ་ཆེ་ཆེན་པོའི་སྙིང་པོ་ཅན་ནས། རྣམ་པར་བསྩགས་པ་ཤིན་ཏུ་གནས་པ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་ཁྱིམ་གང་དུ་བྱང་ཆུབ་སེམས་དཔའ་སྐྱེ་བར་འགྱུར་བའི་ཁྱིམ་དེར་འཆར་རོ། །འོད་ཟེར་དེ་དེ་ལྟར་ཤར་མ་ཐག་ཏུ་དེ་ཉིད་ཀྱི་ཚེ། བྱང་ཆུབ་སེམས་དཔའ་དེ་དག་ཁྱིམ་མམ་གྲོང་ཁྱེར་རམ་གྲོང་རྡལ་ལམ། འཛམ་བུའི་གླིང་དུ་སེམས་ཅན་འདུལ་བ་ཉེ་བར་བཟུང་ཞིང་སྐྱེ་བ་རབ་ཏུ་འཛིན་ཏེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བདུན་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་དེའི་ཁང་པ་བརྩེགས་པ་ལྷ་ཐམས་ཅད་ཀྱི་གནས་ཀྱི་རྒྱན་ཅེས་བྱ་བ་ལས་གནས་ཐམས་ཅད་རྣམ་པར་དག་པའི་རྒྱན་ཅེས་བྱ་བའི་འོད་ཟེར་འབྱུང་སྟེ། དེ་དག་བྱུང་མ་ཐག་ཏུ་ཡུམ་གང་གི་དགུ་
གཡས་པར་སྐྱེ་བར་འགྱུར་བ་དེའི་ལུས་ལ་འབབ་པོ། །དེ་ལྟར་བབ་མ་ཐག་ཏུ་དེ་ཉིད་ཀྱི་ཚེ་བྱང་ཆུབ་སེམས་དཔའི་ཡུམ་བདེ་བ་ཐམས་ཅད་འཐོབ་པར་འགྱུར་ཏེ། ཡོན་ཏན་དང་སྡོམ་པ་ཐམས་ཅད་ལའང་གནས་པར་འགྱུར་རོ། །ཡུམ་གྱི་སྐུ་དེར་ཡང་ཕོ་བྲང་བརྩེགས་པ་ཆེན་པོ་རིན་པོ་ཆེའི་དམ་པས་བརྒྱན་པ་བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་འབྱུང་སྟེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བརྒྱད་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་རྐང་པའི་མཐིལ་གྱི་འོག་ནས་གནས་པ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་མ་ཐག་ཏུ་ལྷའི་བུའམ། ཚངས་པ་གང་ལ་ལ་བྱང་ཆུབ་སེམས་དཔའི་མཆོད་པའི་ལས་ཀྱི་དོན་དུ་ཤི་འཕོ་བར་འདོད་པར་གྱུར་ལ་བྱང་ཆུབ་སེམས་དཔས་ཀྱང་ལྷའི་བུ་དེ་དག་ན་འཁོད་པ་བཞིན་དུ་དེ་བཞིན་གཤེགས་པ་ལ་མཆོད་པའི་ལས། མངོན་པར་སྒྲུབ་པར་ནུས་པར་ཤེས་པ་དེ་དག་གི་ལུས་ལ་འབབ་པོ། །དེ་ལྟར་འོད་ཟེར་དེས་བབ་པར་གྱུར་མ་ཐག་ཏུ་དེ་ཉིད་ཀྱི་ཚེ་ལྷའི་བུ་དེ་དག་ཤི་འཕོའི་ལས་དེ་ལས་རྣམ་པར་ལྡང་སྟེ། དེ་དག་དེ་ན་འཁོད་བཞིན་དུ་བྱང་ཆུབ་སེམས་དཔའ་ལ་ཤི་འཕོ་ཉེ་བར་བཟུང་བ་ནས་ཡོངས་སུ་མྱ་ངན་ལས་འདས་པ་བསྟན་གྱི་བར་དུ་མཆོད་པའི་ལས་བྱེད་དེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའི་དཔེ་བྱད་བཟང་པོ་རྣམས་ལས་ཉི་མ་སྣ་ཚོགས་ཀྱི་ཚུལ་ཞེས་བྱ་བའི་འོད་ཟེར་འབྱུང་སྟེ། དེ་བྱུང་ནས་ཀྱང་བྱང་ཆུབ་སེམས་དཔའི་ལས་སྣ་ཚོགས་སྟོན་ཏོ། །ཀྱེ་རྒྱལ་བའི་སྲས་དེ་ལ་ལྷ་དང་མི་ལ་ལས་ནི་བྱང་ཆུབ་སེམས་དཔའ་དགའ་ལྡན་གྱི་གནས་རབ་ཉིད་ན་འདུག་པ་མཐོང་ངོ་། །ལ་ལས་ནི་ཡུམ་གྱི་སྐུར་བཞུད་པ་མཐོང་ངོ་། །ལ་ལས་ནི་སྐྱེ་བར་མཐོང་ངོ་། །ལ་ལས་ནི་འབྱུང་བར་མཐོང་ངོ་། །ལ་ལས་ནི་རྣམ་པར་འཚང་རྒྱ་བར་མཐོང་ངོ་། །ལ་ལས་ནི་ཆོས་གྱི་འཁོར་ལོ་བསྐོར་བར་མཐོང་ངོ་། །ལ་ལས་ནི་དེ་བཞིན་གཤེགས་པ་མྱ་ངན་ལས་འདའ་བར་མཐོང་སྟེ། འདི་ནི་དགའ་ལྡན་གྱི་གནས་ནས་ཤི་འཕོ་སྟོན་པ་བཅུ་པའོ། །ཀྱེ་རྒྱལ་བའི་སྲས་དེ་ལྟར་བྱང་ཆུབ་སེམས་དཔའི་འོད་ཟེར་བཅུ་པོ་དེ་དག་ལས་སོགས་པ། འོད་ཟེར་གྲངས་མེད་པ་བརྒྱ་སྟོང་ཕྲག་བཅུ་བྱང་ཆུབ་སེམས་དཔའི་ལུས་ལས་འབྱུང་
སྟེ། དེ་བཞིན་དུ་སྟན་དང་། གཞལ་མེད་ཁང་དང་། ཁང་པ་བརྩེགས་པ་དག་ནས་ཀྱང་འབྱུང་སྟེ། དེ་དག་བྱུང་ནས་ཀྱང་བྱང་ཆུབ་སེམས་དཔའི་ལས་སྣ་ཚོགས་ཡོངས་སུ་སྟོན་ཏོ། །ཀྱེ་རྒྱལ་བའི་སྲས་དེ་ལྟར་ལས་ཡོངས་སུ་གྲུབ་པའི་བྱང་ཆུབ་སེམས་དཔའ་རྣམས་ཆོས་ཐམས་ཅད་རབ་ཏུ་གྲུབ་པའི་ཕྱིར་ལྷའི་གནས་དགའ་ལྡན་ནས་ཤི་འཕོ་སྟོན་ཏོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མངལ་ན་གནས་པར་སྟོན་པ་སྟེ། བཅུ་གང་ཞེ་ན་འདི་ལྟར་སེམས་རྒྱ་ཆུང་བ་དང་། དམའ་བ་ལ་མོས་པ་རྣམས་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའི་དངོས་པོའི་བསོད་ནམས་ཀྱི་རྩ་བ་ལ་ཡིད་མི་ཆེས་པར་གྱུར་དུ་འོང་ཞེས་བྱང་ཆུབ་སེམས་དཔའ་མངལ་ན་གནས་པར་སྟོན་པ་འདི་ནི་མངལ་ན་གནས་པར་སྟོན་པ་དང་པོའོ། །ཕ་དང་མ་དང་གཉེན་བཤེས་ཀྱི་ཚོགས་དང་། སྔོན་ལྷན་ཅིག་ཏུ་སྤྱོད་སྤྱོད་པའི་བྱང་ཆུབ་སེམས་དཔའ་རྣམས་དང་། སེམས་ཅན་གང་གི་དགེ་བའི་རྩ་བ་མངལ་ན་གནས་པས་ཡོངས་སུ་སྨིན་པར་བྱ་བ་དེ་དག་གི་དོན་དུ་བྱང་ཆུབ་སེམས་དཔའ་མངལ་ན་གནས་པར་སྟོན་ཏེ་འདི་ནི་མངལ་ན་གནས་པར་སྟོན་པ་གཉིས་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་ནི་རྨོངས་པ་མེད་ཅིང་དྲན་ལ་ཤེས་བཞིན་དུ་མའི་ལྟོར་འགྲོ་སྟེ། མའི་ལྟོ་ན་འདུག་པའི་ཚེའང་དྲན་པ་ཉམས་པ་མེད་དོ། །འདི་ནི་མངལ་ན་གནས་པར་སྟོན་པ་གསུམ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་ནི་མའི་མངལ་ན་འདུག་ཀྱང་འདི་ལྟ་སྟེ་ཕྱོགས་དང་། འཇིག་རྟེན་གྱི་ཁམས་ནས་འདུས་པའི་བྱང་ཆུབ་སེམས་དཔའ་དང་བརྒྱ་བྱིན་དང་ཚངས་པ་དང་། འཇིག་རྟེན་གྱི་མགོན་པོ་རྣམས་དང་ལྷན་ཅིག་འགྲོགས་ཤིང་ཆོས་བསྒྲག་པ་དང་། ཡང་དག་པའི་གཏམ་བྱ་བ་རྒྱུན་མི་གཅོད་ཅིང་བྱང་ཆུབ་སེམས་དཔའི་སྟོབས་ཚད་མེད་པ་ཡང་ཡོངས་སུ་སྟོན་ཏེ། ཀྱེ་རྒྱལ་བའི་སྲས་དེ་དག་མངལ་ན་གནས་ཀྱང་དེ་ལྟ་བུའི་སྨོན་ལམ་གྱི་ཁྱད་པར་བདོག་པས་བྱང་ཆུབ་སེམས་དཔའ་དེ་དག་ནི་ཡེ་ཤེས་མུ་མེད་པ་དང་ལྡན་པ་སྟེ། འདི་ནི་མངལ་ན་གནས་པར་སྟོན་པ་བཞི་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་མའི་མངལ་ན་གནས་པའི་ཚེ། དེ་ནི་འཁོར་གྱི་དཀྱིལ་འཁོར་ཀུན་ནས་གནས་པར་འགྱུར་བ་ཡོད་དེ། བྱང་ཆུབ་སེམས་དཔའ་དེ་དག་གི་སྔོན་གྱི་སྨོན་ལམ་གྱིས་དེ་
དག་ཡོངས་སུ་སྨིན་པར་བྱ་བའི་ཕྱིར། བྱང་ཆུབ་སེམས་དཔའ་མངལ་ན་གནས་པར་སྟོན་ཏེ། འདི་ནི་མངལ་ན་གནས་པར་སྟོན་པ་ལྔ་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་ནི་མིའི་འཇིག་རྟེན་དུ་བྱུང་ནས་ཀྱང་མིར་སྐྱེས་པ་རྣམ་པའི་མཆོག་ཐམས་ཅད་དང་ལྡན་པ་སྟོན་ཏེ། འདི་ནི་མངལ་ན་གནས་པར་སྟོན་པ་དྲུག་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་ནི་མའི་ལུས་ན་འདུག་བཞིན་དུ་འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཡོངས་སུ་དག་པ་བཞིན་གྱི་དཀྱིལ་འཁོར་ལྟ་བུར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སྣང་སྟེ། དེ་ལ་མོས་པ་ཆེན་པོ་དང་ལྡན་པའི་ལྷ་དང་ཀླུ་དང་གནོད་སྦྱིན་དང་། དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་གིས་ཤེས་པར་གྱུར་ནས་དེ་དག་ཉེ་བར་འོངས་ཤིང་མཆོད་པ་དང་། རིམ་གྲོ་བྱེད་དེ་འདི་ནི་མངལ་ན་གནས་པར་སྟོན་པ་བདུན་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་མངལ་ན་གནས་པས་འཇིག་རྟེན་གྱི་ཁམས་གཞན་ན་འཁོད་པའི་བྱང་ཆུབ་སེམས་དཔའ་སྲིད་པ་ཐ་མ་པར་གྱུར་པ་རྣམས་དང་ཚོགས་ཏེ། ཆོས་ཀྱི་བརྡའི་སྒོ་ཆེན་པོ་ཡེ་ཤེས་ཆེན་པོའི་སྙིང་པོ་ཞེས་བྱ་བ་ཡང་དག་པར་འགྲོ་བར་བྱ་བ་ཡོད་དོ། །དེ་དག་དང་འདུ་བའི་ཕྱིར་བྱང་ཆུབ་སེམས་དཔའ་མངལ་ན་གནས་པར་སྟོན་ཏེ། འདི་ནི་མངལ་ན་གནས་པ་སྟོན་པ་བརྒྱད་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་ནི་དྲི་མ་མེད་པའི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཤིང་མའི་མངལ་དུ་འགྲོ་སྟེ། ཏིང་ངེ་འཛིན་དེའི་མཐུས་མ་ལ་ཡང་གནོད་པར་མི་འགྱུར་བར་དགའ་ལྡན་གྱི་གནས་རབ་བས་ཀྱང་ལྷག་པའི་རྒྱན་མའི་ཁོང་དུ་ཀུན་ནས་གནས་པར་འགྱུར་ཏེ། འདི་ནི་མངལ་ན་གནས་པར་སྟོན་པ་དགུ་པའོ། །ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་མའི་མངལ་ན་འདུག་པའི་མཐུས་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་དེ་བཞིན་གཤེགས་པའི་མཆོད་པའི་ལས་ཀྱི་ཕྱིར་བསོད་ནམས་ཆེན་པོའི་མེ་ཏོག་ཀུན་ནས་རྒྱས་པ་ཞེས་བྱ་བའི་དེ་བཞིན་གཤེགས་པའི་མཆོད་པའི་རིམ་གྲོ་འབྱུང་སྟེ། སངས་རྒྱས་བཅོམ་ལྡན་
འདས་དེ་དག་ཀྱང་དེ་ལ་བྱང་ཆུབ་སེམས་དཔའི་རྣམ་པར་སྤྱོད་པ་ཆོས་ཀྱི་དབྱིངས་ཀྱི་སྙིང་པོ་མཐའ་དང་དབུས་མེད་པ་ཡང་དག་པར་སྟོན་ཏེ། ཤེས་པར་བྱ་བ་དེ་ཤེས་པས་བྱང་ཆུབ་སེམས་དཔའ་རྣམས་ཤིན་ཏུ་ཕྲ་བའི་འགྲོ་བ་བཅུ་སྟོན་ཏོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཤིན་ཏུ་ཕྲ་བའི་རྒྱུད་སྟོན་པ་སྟེ། བཅུ་གང་ཞེ་ན་ཀྱེ་རྒྱལ་བའི་སྲས་འདི་ལ་བྱང་ཆུབ་སེམས་དཔའ་མའི་མངལ་ན་ཡང་གནས་ལ་ཐོག་མ་སེམས་བསྐྱེད་པ་ཉེ་བར་བཟུང་བ་ནས་དབང་བསྐུར་བའི་བར་དུ་ཡང་ཡོངས་སུ་སྟོན་པ་དང་། མའི་མངལ་ན་ཡང་གནས་ལ་དགའ་ལྡན་ན་གནས་པ་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་སྐྱེ་བ་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་གཞོན་ནུའི་ས་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་བཙུན་མོའི་འཁོར་གྱི་ནང་དུ་འདུག་པར་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་མངོན་པར་འབྱུང་བ་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་དཀའ་བ་སྤྱོད་པའི་སྦྱོར་བ་དང་། སྙིང་པོ་བྱང་ཆུབ་ཏུ་འགྲོ་བ་ནས་རྣམ་པར་འཚང་རྒྱ་བའི་བར་དུ་ཡང་ཡོངས་སུ་སྟོན་པ་དང་། མའི་མངལ་ན་ཡང་གནས་ལ་ཆོས་ཀྱི་འཁོར་ལོ་བསྐོར་བ་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་ཡོངས་སུ་མྱ་ངན་ལས་འདའ་བ་ཡང་ཡོངས་སུ་སྟོན་པ་དང་། མའི་མངལ་ནའང་གནས་ལ་ཤིན་ཏུ་ཕྲ་ལ་རྒྱ་ཆེ་བར་འཇུག་པའི་ཚུལ་གྱིས་མངལ་གྱི་གནས་དེ་ཉིད་དུ་བྱང་ཆུབ་སེམས་དཔའི་སྤྱོད་པ་ཐམས་ཅད་དང་། དེ་བཞིན་གཤེགས་པའི་རྣམ་པར་འཕྲུལ་པའི་བྱིན་གྱི་རླབས་ཀྱི་རྣམ་པ་དང་། སྒོ་ཡང་ཡོངས་སུ་སྟོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཤིན་ཏུ་ཕྲ་བའི་རྒྱུད་སྟོན་པ་སྟེ། དེ་དག་ལ་གནས་ཤིང་བྱང་ཆུབ་སེམས་དཔའ་རྣམས་ཡེ་ཤེས་ཆེན་པོ་ཤིན་ཏུ་ཕྲ་བ་བླ་ན་མེད་པ་འཐོབ་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཚེར་སྐྱེ་བ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་དེ་ལ་བྱང་ཆུབ་སེམས་དཔའ་དྲན་ཞིང་ཤེས་བཞིན་དུ་སྐྱེ་བ་དང་། འོད་ཟེར་གྱི་དྲ་
བ་སྣང་བ་ཆེན་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་བཀང་སྟེ། ལུས་སྣང་བ་དང་ལྡན་པར་སྐྱེ་བ་དང་ཕྱིར་མི་ལྡོག་ཅིང་སྲིད་པའི་ཐ་མ་པར་གྱུར་པར་སྐྱེ་བ་དང་མ་སྐྱེས་ཤིང་འབྱུང་བ་མེད་པར་སྐྱེ་བ་དང་ཁམས་གསུམ་པ་སྒྱུ་མའི་རྣམ་པ་ལྟ་བུར་ཁོང་དུ་ཆུད་དེ་སྐྱེ་བ་དང་། ཕྱོགས་བཅུའི་འཇིག་རྟེན་གྱི་ཁམས་སུ་ལུས་ཡོངས་སུ་སྟོན་ཅིང་སྐྱེ་བ་དང་། ལུས་དེ་ཉིད་ཀྱིས་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པར་བྱ་བར་སྐྱེ་བ་དང་། དེ་བཞིན་གཤེགས་པ་མ་ལུས་པ་ཐམས་ཅད་ཀྱི་འོད་ཟེར་བཀྱེ་བས་ཡང་དག་པར་བསྐུལ་བའི་ལུས་སུ་སྐྱེ་བ་དང་། ཡེ་ཤེས་ཆེན་པོས་རྣམ་པར་འབྱེད་པའི་ཏིང་ངེ་འཛིན་ལ་སྙོམས་པར་འཇུག་པའི་ལུས་སུ་སྐྱེ་བ་དང་། ཀྱེ་རྒྱལ་བའི་སྲས་བྱང་ཆུབ་སེམས་དཔའ་སྐྱེས་ནས་ཀྱང་སངས་རྒྱས་ཀྱི་ཞིང་ཐམས་ཅད་ཀྱང་རབ་ཏུ་གཡོ་བར་འགྱུར། སེམས་ཅན་ཐམས་ཅད་ཀྱང་རབ་ཏུ་འགྲོལ་བར་འགྱུར། ངན་སོང་ཐམས་ཅད་ཀྱང་རབ་ཏུ་ཞི་བར་འགྱུར། བདུད་ཐམས་ཅད་ཀྱང་རབ་ཏུ་སྤ་འགོང་བར་འགྱུར། བྱང་ཆུབ་སེམས་དཔའ་དཔག་ཏུ་མེད་པ་ཡང་འོང་བར་འགྱུར་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ཚེར་སྐྱེ་བ་སྟེ། དེ་དག་ནི་བྱང་ཆུབ་སེམས་དཔའ་རྣམས་སེམས་ཅན་འདུལ་བའི་དོན་དུ་ཡོངས་སུ་སྟོན་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གད་མོ་ཆེར་དགོད་པ་སྟེ། བཅུ་གང་ཞེ་ན་འདི་ལྟར་ཀྱེ་མའོ། །འཇིག་རྟེན་གནས་པ་འདི་ནི་འདོད་པའི་འདམ་དུ་བྱིང་བ་སྟེ། འདི་ལ་ངེད་མ་གཏོགས་པར་གཞན་འབྱིན་པར་བྱེད་པ་སུའང་མེད་དོ་སྙམ་ནས། བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། ཀྱེ་མའོ་འཇིག་རྟེན་གནས་པ་འདི་ནི་ཉོན་མོངས་པས་མདོངས་པར་བྱས་པའོ། །བདག་ནི་ཤེས་རབ་དང་ཡེ་ཤེས་ཀྱིས་ཤིན་ཏུ་བརྒྱན་པའོ། །ཞེས་ནས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། ལུས་ཀྱི་གཞི་འདི་ཉིད་ཀྱིས་དེ་བཞིན་གཤེགས་པའི་ཆོས་ཀྱི་སྐུ་བླ་ན་མེད་པ་ཆེན་པོ་དུས་གསུམ་རྒྱས་པར་འགེངས་པ་འཐོབ་པར་འགྱུར་རོ་ཞེས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། ཀྱེ་རྒྱལ་བའི་སྲས་གཞན་ཡང་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་མིག་བསྒྲིབས་པ་མེད་པས་ཕྱོགས་བཅུར་ཚངས་པའི་ལྷའི་གནས་ཉེ་བར་བཟུང་བ་ནས་དབང་ཕྱུག་
ཆེན་པོའི་གནས་ཀྱི་བར་དུ་རྣམ་པར་ལྟ་ཞིང་འདི་སྙམ་དུ་སེམས་ཏེ། སེམས་ཅན་འདི་དག་ནི་ལུས་སུ་འཕེལ་བའོ། །བདག་ནི་ཡེ་ཤེས་ཀྱི་སྟོབས་དང་ལྡན་པའོ་ཞེས་བྱ་བར་མཐོང་ནས། བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། སྔོན་དགེ་བའི་རྩ་བ་བསྐྱེད་པའི་སེམས་ཅན་རྣམས་ད་དུང་ཕྱིར་མི་ལྡོག་པར་མཐོང་ནས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་ས་བོན་ཆུང་ངུ་ལས་འབྲས་བུ་ཆེར་འགྱུར་བ་མཐོང་ནས། བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། ཡང་དག་པར་རྫོགས་པའི་སངས་རྒྱས་ཀྱིས་བསྟན་པ་དོན་ཡོད་པར་མཐོང་ནས། བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། སྔོན་ཐེག་པ་ལ་ལྷན་ཅིག་ཏུ་ཞུགས་པའི་བྱང་ཆུབ་སེམས་དཔའ་རྣམས་ཆགས་པའི་གནས་གཞན་དང་གཞན་ལ་ཆགས་པས་སངས་རྒྱས་ཀྱི་ཆོས་ཀྱི་ཆེ་བ་ཉིད་མ་ཐོབ་པ་མཐོང་ནས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། རྒྱལ་བའི་སྲས་གཞན་ཡང་སྔོན་འགྲོགས་པར་གྱུར་པའི་ལྷ་དང་མི་རྣམས་ཆུང་ངུ་ན་བྱིས་པའི་ས་ལས་ཀྱང་མ་འདས་ཤིང་ཡོངས་སུ་སྐྱོ་བའི་དབང་པོ་དང་ལྡན་པར་འགྱུར་བ་མཐོང་ནས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པ་དང་། དེ་བཞིན་གཤེགས་པ་མ་ལུས་པ་ཐམས་ཅད་ཀྱི་འོད་ཟེར་དབུགས་ཕྱིན་པ་ཆེན་པོ་རྣམ་པར་འཕེལ་བར་བྱེད་པས་རེག་པར་གྱུར་ནས་བྱང་ཆུབ་སེམས་དཔའ་རྣམས་གད་མོ་ཆེར་དགོད་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གད་མོ་ཆེར་དགོད་པ་སྟེ། དེ་དག་གིས་བྱང་ཆུབ་སེམས་དཔའ་རྣམས་སེམས་ཅན་འདུལ་བའི་དབང་གི་ཕྱིར་དགོད་པར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའི་གོམ་པས་རྣམ་པར་གནོན་པ་སྟེ། བཅུ་གང་ཞེ་ན་འདི་ལྟར་བྱང་ཆུབ་སེམས་དཔའི་མཐུ་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པ་དང་། ནོར་བདུན་ཡོངས་སུ་གཏོང་བར་བསྟན་པའི་ཕྱིར་གོམ་པས་རྣམ་པར་གནོན་པ་དང་། སའི་ལྷའི་བསམ་པ་ཡོངས་སུ་རྫོགས་པར་བྱ་བའི་ཕྱིར་གོམ་པས་རྣམ་པར་
གནོན་པ་དང་། ཁམས་གསུམ་ལས་འདས་པའི་རྣམ་པར་གནོན་པ་དང་། འགྲོས་ཡོངས་སུ་བསྟན་པའི་ཕྱིར་གོམ་པས་རྣམ་པར་གནོན་པ་དང་། གླང་པོའི་འགྲོས་དང་། ཁྱུ་མཆོག་གི་འགྲོས་དང་། སེང་གེའི་འགྲོས་དང་། འགྲོས་ཐམས་ཅད་ལས་འདས་ཤིང་བྱང་ཆུབ་སེམས་དཔའི་འགྲོས་ཁྱད་པར་དུ་འཕགས་པ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་ཀྱི་འགྲོས་ཀྱིས་རྣམ་པར་གནོན་པ་དང་། ཀྱེ་རྒྱལ་བའི་སྲས་ས་ཆེན་པོ་ཡང་རྡོ་རྗེའི་དབྱིངས་ཀྱིས་ཀུན་ནས་བཟུང་བར་འགྱུར་ཏེ། སའི་ཕྱོགས་གཞན་གྱིས་བྱང་ཆུབ་སེམས་དཔའི་ལུས་བཟུང་བར་མི་ནུས་པ་བསྟན་པའི་ཕྱིར་བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པ་དང་། སེམས་ཅན་གཞན་སྤྲོ་བར་བྱ་བའི་ཕྱིར་བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པ་དང་། བྱང་ཆུབ་ཀྱི་ཡན་ལག་རིན་པོ་ཆེ་བདུན་གྱི་ནན་ཏན་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པ་དང་། ཆོས་ཉིད་རབ་ཏུ་ཐོབ་པས་གཞན་གྱི་དྲིང་མི་འཇོག་པ་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པ་དང་། བདག་ནི་འཇིག་རྟེན་ན་གཙོ་བོ་ཡིན། བདག་ནི་འཇིག་རྟེན་ན་ཕུལ་དུ་ཕྱིན་པ་ཡིན་ནོ། །ཞེས་ཚིག་བརྗོད་པའི་ཕྱིར། བྱང་ཆུབ་སེམས་དཔའ་རྣམས་གོམ་པས་རྣམ་པར་གནོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གོམ་པས་རྣམ་པར་གནོན་པ་སྟེ། དེ་དག་ནི་བྱང་ཆུབ་སེམས་དཔའ་རྣམས་སེམས་ཅན་འདུལ་བའི་དོན་དུ་སྟོན་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་གཞོན་ནུའི་ས་ཀུན་ཏུ་སྟོན་པའི་ལས་ཏེ། བཅུ་གང་ཞེ་ན་འདི་ལྟར་ཡི་གེ་དང་གྲངས་དང་བརྡ་དང་རྩིས་ཀྱི་སྦྱོར་བ་ཐམས་ཅད་ལས་རབ་ཏུ་འདས་པའི་བྱ་བ་ཀུན་ཏུ་སྟོན་པའི་ལས་དང་། རྟ་དང་གླང་པོ་དང་། ཤིང་རྟ་རྒྱུག་པ་ཐམས་ཅད་འཕོང་ཀུན་ལས་འཕགས་པ་ཀུན་ཏུ་སྟོན་པའི་ལས་དང་། ཆོ་ལོ་དང་བརྡ་ཐབས་དང་། གར་དང་། རྒྱན་པོ་དང་རྩེད་མོ་དང་། འཇིག་རྟེན་གྱི་དགའ་བ་ལ་ཕལ་ལས་འཕགས་པའི་བྱ་བ་ཀུན་ཏུ་སྟོན་པའི་ལས་དང་ལུས་དང་ངག་དང་ཡིད་ཀྱི་ལས་ཁ་ན་མ་ཐོ་བ་མེད་པ་ཀུན་ཏུ་སྟོན་པའི་ལས་དང་། མྱ་ངན་ལས་འདས་པའི་སྒོའི་ཏིང་ངེ་འཛིན་ལ་སྙོམས་པར་འཇུག་པས། འཇིག་
རྟེན་གྱི་ཁམས་ཚད་མེད་པ་རྒྱས་པར་དགང་བ་ཀུན་ཏུ་སྟོན་པའི་ལས་དང་། མི་ཐམས་ཅད་དང་། ལྷ་ཐམས་ཅད་དང་། ཀླུ་དང་གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ལས་ཤིན་དུ་འདས་པར་བྱང་ཆུབ་སེམས་དཔའི་མཐུ་ཀུན་ཏུ་སྟོན་པའི་ལས་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོའི་གཟུགས་དང་ཁ་དོག་དང་གཟི་བརྗིད་ལས་ཤིན་ཏུ་འདས་པར་བྱང་ཆུབ་སེམས་དཔའི་གཟུགས་དང་། ཁ་དོག་དང་། གཟི་བརྗིད་ཀུན་ཏུ་སྟོན་པའི་ལས་དང་། འདོད་པ་དང་། དགའ་བ་དང་། རྩེ་བས་མྱོས་པའི་སེམས་ཅན་རྣམས་ལ་ཆོས་ཀྱི་དགའ་བས་རབ་ཏུ་དགའ་བ་ཡང་དག་པར་བསྐྱེད་པ་ཀུན་ཏུ་སྟོན་པའི་ལས་དང་། ཆོས་ཀྱི་རིམ་གྲོ་བསྐྱེད་པ་དང་། དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བས་འདོད་པའི་ཁམས་ཐམས་ཅད་རྒྱས་པར་འགེངས་པ་ཀུན་ཏུ་སྟོན་པའི་ལས་དང་། ཆོས་ལ་དགའ་བའི་སྣང་བས་དེ་བཞིན་གཤེགས་པའི་བྱིན་གྱི་རླབས་ཡང་དག་པར་བླང་བ་ཀུན་ཏུ་སྟོན་པའི་ལས་སོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་གཞོན་ནུའི་ས་ཀུན་ཏུ་སྟོན་པའི་ལས་ཏེ་དེ་དག་ཡོངས་སུ་བསྟན་ནས་དེའི་འོག་ཏུ་བྱང་ཆུབ་སེམས་དཔའ་རྣམས་བཙུན་མོའི་འཁོར་གྱི་ནང་དུ་འདོང་བར་འགྱུར་བའོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཙུན་མོའི་འཁོར་ཉེ་བར་སྟོན་པ་སྟེ། བཅུ་གང་ཞེ་ན། འདི་ལྟར་སྔོན་ལྷན་ཅིག་ཏུ་སྤྱོད་སྤྱོད་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་དོན་ཏུ་བྱང་ཆུབ་སེམས་དཔའ་རྣམས་བཙུན་མོའི་འཁོར་ཉེ་བར་སྟོན་པ་དང་། བྱང་ཆུབ་སེམས་དཔའི་དགེ་བའི་རྩ་བ་བརྗོད་པའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། ལོངས་སྤྱོད་དང་སྐྱིད་པ་ལ་ཆགས་པའི་ལྷ་དང་མི་རྣམས་ལ་ལོངས་སྤྱོད་དང་སྐྱིད་པའི་ཆེ་བ་ཉིད་ཡོངས་སུ་བསྟན་པའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། རྙོག་པ་ལྔའི་ཞིང་དུ་སེམས་ཅན་རྣམས་ཀྱི་བསམ་པའི་རྗེས་སུ་འབྲང་བའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། བཙུན་མོའི་འཁོར་གྱི་ནང་ན་ཏིང་ངེ་
འཛིན་ལ་གནས་ཤིང་བྱང་ཆུབ་སེམས་དཔའི་མཐུ་དང་ཆེ་བ་ཉིད་ཡོངས་སུ་བསྟན་པའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། སྔོན་གྱི་སྨོན་ལམ་དང་ལྡན་པའི་སེམས་ཅན་རྣམས་ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། ཕ་དང་མ་དང་གཉེན་པའི་ཚོགས་ཀྱི་བསམ་པ་ཡོངས་སུ་རྫོགས་པར་བྱ་བའི་ཕྱིར་བཙུན་མོའི་འཁོར་ཉེ་བར་སྟོན་པ་དང་། ཆོས་ཀྱི་དབྱིངས་ཆེན་པོ་དང་ལྡན་པའི་རོལ་མོ་བརྡུང་བ་དང་། དཀྲོལ་བའི་སྒྲས་དེ་བཞིན་གཤེགས་པ་ཐམས་ཅད་མཆོད་ཅིང་བསྙེན་བཀུར་བ་ཡོངས་སུ་གྲུབ་པར་བྱ་བའི་ཕྱིར། བཙུན་མོའི་འཁོར་ཉེ་བར་སྟོན་པ་དང་། བཙུན་མོའི་འཁོར་གྱི་ནང་ནས་བྱང་ཆུབ་སེམས་དཔའི་ཏིང་ངེ་འཛིན་ལ་གནས་ཤིང་ཤིན་ཏུ་ཕྲ་བའི་མངོན་པར་རྫོགས་པར་འཚང་རྒྱ་བ་ནས་ཡོངས་སུ་མྱ་ངན་ལས་འདས་པ་ཆེན་པོའི་བར་དུ་བསྟན་པའི་ཕྱིར། བཙུན་མོའི་འཁོར་ཉེ་བར་སྟོན་པ་དང་། ཆོས་ཀྱི་སྐྱབས་དང་ལྡན་པ་ཡང་དག་པར་བསྟན་པའི་ཕྱིར། བཙུན་མོའི་འཁོར་ཉེ་བར་སྟོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བཙུན་མོའི་འཁོར་ཉེ་བར་སྟོན་པ་སྟེ། དེ་དག་ནི་སྲིད་པ་ཐ་མ་པའི་བྱང་ཆུབ་སེམས་དཔས་ཡོངས་སུ་བསྟན་ནས་དེའི་འོག་ཏུ་མངོན་པར་འབྱུང་བར་འགྱུར་བ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མངོན་པར་འབྱུང་བ་སྟེ། བཅུ་གང་ཞེ་ན། འདི་ལྟར་ཁྱིམ་གྱི་གནས་སྨད་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། གནས་ལ་དགའ་བའི་སེམས་ཅན་གྱེན་དུ་བསྐྱོད་པའི་ཕྱིར་བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། འཕགས་པ་དང་མཐུན་པའི་ལམ་གྱི་ལེགས་པ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། རབ་ཏུ་བྱུང་བའི་ཡོན་ཏན་དང་། ལེགས་པ་ཡང་དག་པར་བསྔགས་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་།
མཐའ་གཉིས་ཀྱི་ལྟ་བ་དང་བྲལ་བ་ཡང་དག་པར་བསྟན་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། འདོད་པའི་བདེ་བ་དང་ཕྲད་པར་བརྩོན་ཞིང་བདག་གི་བདེ་བ་ལྷུར་ལེན་པའི་སེམས་ཅན་སྐྱོ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། ཁམས་གསུམ་པ་ཐམས་ཅད་ལས་འབྱུང་བའི་སྔོན་གྱི་ལྟས་ཡང་དག་པར་བསྟན་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། རང་ལ་རག་ལས་པར་སྤྱོད་ཅིང་གཞན་གྱི་དྲིང་མི་འཇོག་པ་ལ་བསྟེན་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། དེ་བཞིན་གཤེགས་པའི་སྟོབས་བཅུ་དང་མི་བསྙེངས་པ་ཐོབ་པ་དང་། མཐུན་པར་ཡང་དག་པར་བསྟན་པའི་ཕྱིར། བྱང་ཆུབ་སེམས་དཔའ་རྣམས་མངོན་པར་འབྱུང་བ་དང་། ཀྱེ་རྒྱལ་བའི་སྲས་ཆོས་ཉིད་ཀྱིས་ཀྱང་། བྱང་ཆུབ་སེམས་དཔའ་སྲིད་པའི་ཐ་མ་པ་ནི་གདོན་མི་ཟ་བར་མངོན་པར་འབྱུང་སྟེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་སེམས་ཅན་འདུལ་བའི་དབང་གི་ཕྱིར་མངོན་པར་འབྱུང་བ་ཡོངས་སུ་སྟོན་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དཀའ་བ་སྤྱོད་པའི་སྦྱོར་བ་སྟེ། བཅུ་གང་ཞེ་ན། འདི་ལྟར་དམའ་བ་ལ་མོས་པའི་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། ལྟ་བའི་རྣམ་པ་ལ་གནས་པའི་སེམས་ཅན་རྣམས་གྱེན་དུ་བསྐྱོད་པའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། ལས་དང་བྱ་བས་འཁྱམས་པར་གྱུར་པའི་སེམས་ཅན་རྣམས་ལ་ལས་ཀྱི་རྣམ་པར་སྨིན་པ་མངོན་སུམ་དུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། ཀུན་ནས་ཉོན་མོངས་པའི་འཇིག་རྟེན་གྱི་ཁམས་འབྱམ་ཀླས་པར་ཆོས་ཉིད་རྗེས་སུ་འབྲང་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་
དཀའ་བ་སྤྱོད་པ་སྟོན་པ་དང་། བདག་གི་དུབ་པ་ཉེ་བར་ཞི་ཞིང་མཐུ་དང་ལྡན་པ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། མ་ཡིན་ན་ཆོས་ལ་ཆགས་པ་རྣམས་ཀྱི་དོན་དུ་བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། འདོད་པའི་བདེ་བ་དང་ཕྲད་པར་བརྩོན་ཞིང་རང་གི་བདེ་བ་ལྷུར་ལེན་པའི་སེམས་ཅན་རྣམས་སྐྱོ་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། བྱང་ཆུབ་སེམས་དཔའི་སྤྱོད་པ་བརྩམས་པའི་ཁྱད་པར་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། སྐྱེ་བོ་ཕྱི་མ་རྣམས་བརྩོན་འགྲུས་རྩོམ་པ་ལ་ཡང་དག་པར་སྦྱར་བའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པ་དང་། མ་ཡིན་ན་དབང་པོ་ཡོངས་སུ་མ་སྨིན་པའི་ལྷ་དང་། མི་རྣམས་ཡོངས་སུ་སྨིན་པར་བྱ་བའི་དུས་བསྡད་པའི་ཕྱིར། བྱང་ཆུབ་སེམས་དཔའ་རྣམས་དཀའ་བ་སྤྱོད་པ་སྟོན་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་སེམས་ཅན་འདུལ་བའི་དབང་གི་ཕྱིར་དཀའ་བ་སྤྱོད་པའི་སྦྱོར་བ་ཡོངས་སུ་སྟོན་པ་དག་གོ །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་བྱང་ཆུབ་ཏུ་འགྲོ་བ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་སྣང་བར་བྱ་བའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། འཇིག་རྟེན་གྱི་ཁམས་ཐམས་ཅད་རབ་ཏུ་བསྐྱོད་པའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། འཇིག་རྟེན་གྱི་ཁམས་ཐམས་ཅད་དུ་བདག་གི་ལུས་རྣམ་པར་ཕྱེ་བ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། སྔོན་ལྷན་ཅིག་ཏུ་སྤྱོད་པ་སྤྱོད་པའི་གྲོགས་ཀྱི་བྱང་ཆུབ་སེམས་དཔའ་རྣམས་བསྐུལ་བའི་ཕྱིར།
བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། སྙིང་པོ་བྱང་ཆུབ་ཀྱི་རྒྱན་རྣམ་པར་ཕྱེ་བ་ཡོངས་སུ་བསྟན་པའི་ཕྱིར་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། སེམས་ཅན་ཇི་ལྟར་མོས་པ་རྣམས་ལ་ལུས་དང་སྤྱོད་ལམ་དང་། བྱང་ཆུབ་ཀྱི་ཤིང་གི་རྒྱན་རྣམ་པར་ཕྱེ་བ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། འཇིག་རྟེན་གྱི་ཁམས་ཐམས་ཅད་ན་བཞུགས་པའི་དེ་བཞིན་གཤེགས་པ་ཐམས་ཅད་མངོན་དུ་བལྟ་བའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། གོམ་པ་དོར་བ་དང་། འདེག་པ་ཐམས་ཅད་དུ་ཏིང་ངེ་འཛིན་གྱི་སྒོ་ལ་སྙོམས་པར་འཇུག་ཅིང་། སྐད་ཅིག་སྐད་ཅིག་དུ་རྣམ་པར་འཚང་རྒྱ་བ་ལས་མི་འདའ་བའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། ལྷ་དང་ཀླུ་དང་། གནོད་སྦྱིན་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་གྱི་མགོན་པོ་ཐམས་ཅད་ཀྱི་མཆོད་པ་བླང་བའི་ཕྱིར་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བ་དང་། ཆགས་པ་མེད་པའི་ཡེ་ཤེས་ཆེན་པོས་རྣམ་པར་ཕྱེ་བའི་བྱང་ཆུབ་སེམས་དཔའི་སྤྱོད་པ་སྤྱད་པས་འཇིག་རྟེན་གྱི་ཁམས་ཐམས་ཅད་རྣམ་པར་བལྟ་བའི་ཕྱིར་དེ་བཞིན་གཤེགས་པ་ཐམས་ཅད་ཡིད་ལ་བྱེད་ཅིང་། ཕྱོགས་ཐམས་ཅད་དུ་རྣམ་པར་ཕྱེ་བའི་མངོན་པར་རྫོགས་པའི་བྱང་ཆུབ་ཡོངས་སུ་བསྟན་པའི་ཕྱིར། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཏུ་འདོང་བའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་བྱང་ཆུབ་ཏུ་འགྲོ་བ་སེམས་ཅན་འདུལ་བའི་དབང་གི་ཕྱིར་ཡོངས་སུ་བསྟན་པ་དག་གོ། །།སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གསུམ་པ། །
ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་སྙིང་པོ་བྱང་ཆུབ་ལ་འདུག་པ་སྟེ། བཅུ་གང་ཞེ་ན། འདི་ལྟར་འཇིག་རྟེན་གྱི་ཁམས་ཐམས་ཅད་རབ་ཏུ་བསྐྱོད་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །འཇིག་རྟེན་གྱི་ཁམས་ཐམས་ཅད་སྣང་བར་བྱེད་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །ངན་སོང་ཐམས་ཅད་རབ་ཏུ་ཞི་བར་བྱེད་ཅིང་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །འཇིག་རྟེན་གྱི་ཁམས་ཐམས་ཅད་རྡོ་རྗེའི་རང་བཞིན་དུ་བྱིན་གྱིས་རློབ་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །དེ་བཞིན་གཤེགས་པའི་གདན་སེང་གེའི་ཁྲི་ལ་རྣམ་པར་ལྟ་ཞིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །ཡིད་ནམ་མཁའ་དང་མཉམ་པ་ལ་རྣམ་པར་མི་རྟོག་ཅིང་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །ཇི་ལྟར་མཐུན་པའི་ལུས་དང་སྤྱོད་ལམ་ཡོངས་སུ་སྟོན་ཅིང་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །རྡོ་རྗེའི་སྙིང་པོའི་ཏིང་ངེ་འཛིན་རྗེས་སུ་རྟོགས་པར་བྱེད་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་རྣམ་པར་དག་པའི་གནས་ཡང་དག་པར་ལེན་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །བདག་གི་དགེ་བའི་རྩ་བའི་མཐུས་འགྲོ་བ་ཐམས་ཅད་བྱིན་གྱིས་རློབ་ཅིང་། བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འཁོད་དོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ལ་འདུག་པའོ། །ཀྱེ་རྒྱལ་བའི་སྲས་བྱང་ཆུབ་སེམས་དཔའ་རྣམས་སྙིང་པོ་བྱང་ཆུབ་ཀྱི་མཆོག་ལ་འཁོད་ནས་ཀྱང་ངོ་མཚར་རྨད་དུ་བྱུང་བའི་ཆོས་བཅུ་འབྱུང་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་དེ་ལ་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་འཇིག་རྟེན་གྱི་ཁམས་ཐམས་ཅད་ན་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཞལ་མངོན་པར་བསྟན་ཏེ། ཕྱག་གཡས་པ་བརྐྱང་
ཞིང་། ཀྱེ་དེད་དཔོན་ཆེན་པོ་རྒྱལ་བར་གྱུར་ཅིག །རྒྱལ་བར་གྱུར་ཅིག་ཅེས་གསུང་བརྗོད་དེ་འདི་ནི་ངོ་མཚར་རྨད་དུ་བྱུང་བའི་ཆོས་དང་པོའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་དེ་དག་ཐམས་ཅད་དགོངས་པ་དང་། བྱིན་གྱིས་རློབ་པ་ཡང་དག་པར་མཛད་དེ་འདི་ནི་ངོ་མཚར་རྨད་དུ་བྱུང་བའི་ཆོས་གཉིས་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་སྔོན་ལྷན་ཅིག་དུ་སྤྱོད་སྦྱོད་པའི་བྱང་ཆུབ་སེམས་དཔའ་རྣམས་འོངས་ཏེ། བྱང་ཆུབ་སེམས་དཔའ་དེ་དག་ལ་ཀུན་ནས་བསྐོར་ཅིང་མཆོད་པའི་ལས་རྣམ་པར་ཕྱེ་བ་རྣམ་པ་སྣ་ཚོགས་མངོན་པར་བསྒྲུབ་སྟེ། འདི་ནི་ངོ་མཚར་རྨད་དུ་བྱུང་བའི་ཆོས་གསུམ་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་འཇིག་རྟེན་གྱི་ཁམས་ཐམས་ཅད་ཀྱི་རྩྭ་དང་གེལ་བ་དང་། སྡོང་པོ་དང་། ནགས་ཚལ་ཐམས་ཅད་ཀྱང་བསམ་པ་ཡོད་གོ་ལྟ་སྟེ། སྙིང་པོ་བྱང་ཆུབ་གང་ན་བ་དེར་འདུད་ཅིང་ཕྱག་འཚལ་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་བཞི་པའོ། །བྱང་ཆུབ་སེམས་དཔའི་སྤྱོད་པ་ཐམས་ཅད་ལས་ཡང་དག་པར་འདའ་བའི་ཚེ་ཡང་ཆོས་ཀྱི་དབྱིངས་རྣམ་པར་འབྱེད་པ་ཞེས་བྱ་བའི་ཏིང་ངེ་འཛིན་མངོན་དུ་གྱུར་ཏེ། ཏིང་ངེ་འཛིན་དེ་ཐོབ་མ་ཐག་ཏུ་བྱང་ཆུབ་སེམས་དཔའི་སྤྱོད་པ་ཐམས་ཅད་ལས་ཡང་དག་པར་འདའ་བར་འགྱུར་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་ལྔ་པའོ། །ཀྱེ་རྒྱལ་བའི་སྲས་རྒྱ་མཚོ་མཆོག་གི་དམ་པ་དྲི་མ་མེད་ཅིང་ཀུན་ནས་སྣང་ལ་འོད་གསལ་བའི་སའི་སྙིང་པོ་ལ་འཁོད་པའི་བྱང་ཆུབ་སེམས་དཔའ་རྣམས་ལ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཆེན་པོས་ཀུན་ནས་ཡོག་པར་འགྱུར་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་དྲུག་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་ཀྱི་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ཀྱི་མཐུས་དེ་བཞིན་གཤེགས་པ་ལ་མཆོད་པ་དང་། རིམ་གྲོར་བྱ་བ་ཤིན་ཏུ་རྒྱ་ཆེན་པོ་རྣམས་དེ་བཞིན་གཤེགས་པའི་མཆོད་པའི་ལས་ཀྱི་ཕྱིར་འཇིག་རྟེན་གྱི་ཁམས་འབྱམ་ཀླས་པ་ཐམས་ཅད་དུ་འབྱུང་སྟེ། འདི་ནི་ངོ་མཚར་
རྨད་དུ་བྱུང་བའི་ཆོས་བདུན་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་ཡེ་ཤེས་མཆོག་གིས་སེམས་ཅན་ཐམས་ཅད་ཀྱི་བསམ་པ་དང་། དབང་པོ་དང་སྤྱོད་པ་མངོན་དུ་འགྱུར་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་བརྒྱད་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ལ་བློ་ཤིན་ཏུ་རྣམ་པར་དག་པ་ཞེས་བྱ་བའི་ཏིང་ངེ་འཛིན་མངོན་དུ་འགྱུར་ཏེ། ཏིང་ངེ་འཛིན་དེ་ཐོབ་མ་ཐག་ཏུ་ནམ་མཁའི་དབྱིངས་ཚད་མེད་པ་དང་། དུས་གསུམ་རྒྱས་པར་འགེངས་པའི་ལུས་ཀུན་ནས་གནས་པར་འགྱུར་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་དགུ་པའོ། །ཀྱེ་རྒྱལ་བའི་སྲས་སྙིང་པོ་བྱང་ཆུབ་མཆོག་ལ་འཁོད་པའི་བྱང་ཆུབ་སེམས་དཔའ་རྣམས་ཀྱི་ལུས་ཀྱི་ལས་དུས་ཐམས་ཅད་ལ་ཡང་དག་པར་གཞོལ་ཞིང་ཡེ་ཤེས་ཆེན་པོ་ཆགས་པ་མེད་པ་རྡུལ་དང་བྲལ་བའི་སྣང་བ་དང་ལྡན་པར་འགྱུར་ཏེ། འདི་ནི་ངོ་མཚར་རྨད་དུ་བྱུང་བའི་ཆོས་བཅུ་པའོ། །ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་ངོ་མཚར་རྨད་དུ་བྱུང་བའི་ཆོས་རྣམས་ཏེ། བྱང་ཆུབ་སེམས་དཔའ་སྙིང་པོ་བྱང་ཆུབ་མཆོག་ལ་གནས་པ་རྣམས་ལ་འབྱུང་བར་འགྱུར་བ་དག་གོ །ཀྱེ་རྒྱལ་བའི་སྲས་དོན་རྣམ་པ་བཅུ་པོ་འདི་དག་གི་དབང་ཡང་དག་པར་མཐོང་ནས་སྙིང་པོ་བྱང་ཆུབ་མཆོག་ལ་འདུག་པའི་བྱང་ཆུབ་སེམས་དཔའ་བདུད་འདུལ་བ་སྟོན་ཏེ། བཅུ་གང་ཞེ་ན་འདི་ལྟར་ཀུན་ནས་ཉོན་མོངས་པའི་འཇིག་རྟེན་གྱི་ཁམས་འབྱམ་ཀླས་པ་ན་ཐབ་མོ་དང་། གཡུལ་ལ་མོས་པའི་སེམས་ཅན་རྣམས་ལ་བྱང་ཆུབ་སེམས་དཔའི་སྟོབས་ཀྱི་ཆེ་བ་ཉིད་ཡང་དག་པར་བསྟན་པའི་ཕྱིར་བྱང་ཆུབ་སེམས་དཔའ་བདུད་འདུལ་བ་སྟོན་ཏོ། །ཡིད་གཉིས་དང་ཐེ་ཙོམ་དུ་གྱུར་པའི་མི་དང་ལྷ་རྣམས་ཀྱི་ཡིད་གཉིས་དང་ཐེ་ཙོམ་གཅད་པའི་ཕྱིར་བདུད་འདུལ་བ་སྟོན་ཏོ། །བདུད་ཀྱི་སྡེ་ཡོངས་སུ་སྨིན་པར་བྱ་བའི་ཕྱིར་བདུད་འདུལ་བ་སྟོན་ཏོ། །ཐབ་མོ་དང་གཡུལ་ལ་མོས་པའི་ལྷ་དང་མི་རྣམས་ཀུན་ནས་བསྡུ་བ་དང་། ཀུན་ནས་འདུས་པའི་ལྷ་དང་མི་རྣམས་འདུལ་བའི་དབང་གིས་ཕྱིར་བདུད་འདུལ་བ་སྟོན་ཏོ། །བྱང་ཆུབ་
སེམས་དཔའི་མཐུ་ལ་ཐུབ་པ་མེད་པ་ཡོངས་སུ་བསྟན་པའི་ཕྱིར་བདུད་འདུལ་བ་སྟོན་ཏོ། །སེམས་ཅན་གཞན་མོས་ཤིང་སྤྲོ་བར་བྱ་བའི་ཕྱིར་བདུད་འདུལ་བ་སྟོན་ཏོ། །ཕྱི་མའི་སྐྱེ་བོ་རྣམས་ལ་སྙིང་བརྩེ་བའི་ཕྱིར་བདུད་འདུལ་བ་སྟོན་ཏོ། །སྙིང་པོ་བྱང་ཆུབ་ཀྱི་བར་གྱི་བདུད་ཀྱི་ལས་ཡོངས་སུ་བསྟན་པ་དང་། བྱང་ཆུབ་སེམས་དཔའ་བདུད་ཀྱི་ལམ་ཐམས་ཅད་ལས་འདས་པ་ཡོངས་སུ་བསྟན་པའི་ཕྱིར་བདུད་འདུལ་བ་སྟོན་ཏོ། །ཉོན་མོངས་པའི་སྟོབས་ཀྱིས་ཉམས་སྨད་ཅིང་སྟོབས་མེད་པར་བྱས་པ་ཡོངས་སུ་བསྟན་པ་དང་། དགེ་བའི་རྩ་བ་བརྗོད་པ་དང་། བྱམས་པའི་སྟོབས་ཡང་དག་པར་བསྟན་པའི་ཕྱིར་བདུད་འདུལ་བ་སྟོན་ཏོ། །ཀུན་ནས་ཉོན་མོངས་པའི་འཇིག་རྟེན་གྱི་ཁམས་འབྱམ་ཀླས་པ་དག་ཏུ་ཆོས་ཉིད་རྗེས་སུ་འབྲང་བར་བྱ་བའི་ཕྱིར་བྱང་ཆུབ་སེམས་དཔའ་བདུད་འདུལ་བ་སྟོན་ཏེ། ཀྱེ་རྒྱལ་བའི་སྲས། དོན་བཅུ་པོ་དེ་དག་གི་དབང་མཐོང་བས་ན། བྱང་ཆུབ་སེམས་དཔའ་བདུད་འདུལ་བ་སྟོན་ཏོ། །ཀྱེ་རྒྱལ་བའི་སྲས་བཅུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དེ་བཞིན་གཤེགས་པའི་སྟོབས་མངོན་པར་རྫོགས་པར་བྱང་ཆུབ་པ་སྟེ། བཅུ་གང་ཞེ་ན། ཀྱེ་རྒྱལ་བའི་སྲས་དེ་ལ་བྱང་ཆུབ་སེམས་དཔའ་རྣམས་བདུད་དང་ལས་དང་ཉོན་མོངས་པ་ཐམས་ཅད་ལས་འདས་ཤིང་བྱང་ཆུབ་སེམས་དཔའི་སྤྱོད་པ་ཐམས་ཅད་ཡོངས་སུ་རྫོགས་པ་ཡིན། བྱང་ཆུབ་སེམས་དཔའི་ཏིང་ངེ་འཛིན་གྱི་སྒོ་ཐམས་ཅད་ལ་རྣམ་པར་རྩེ་བ་ཡིན། བྱང་ཆུབ་སེམས་དཔའི་བསམ་གཏན་འབྱམ་ཀླས་པ་ཐམས་ཅད་དང་ལྡན་པ་ཡིན། ཆོས་དཀར་པོའི་ཚོགས་ཐམས་ཅད་ཡང་དག་པར་བསྩགས་པ་ཡིན། ཆོས་སྣང་བ་རྣམ་པར་དཔྱད་པར་བྱ་བ་ཐམས་ཅད་ཤིན་ཏུ་རྣམ་པར་ཕྱེ་བ་ཡིན། འཇིག་རྟེན་གྱི་ཁམས་ཐམས་ཅད་དུ་ཁྱབ་པའི་ལུས་དང་ལྡན་པ་ཡིན། སེམས་ཅན་ཐམས་ཅད་ལ་སྙོམས་པའི་སེམས་དང་དབྱངས་སུ་ལྡན་པ་ཡིན། བྱིན་གྱི་རླབས་ཐམས་ཅད་ཀྱིས་རབ་ཏུ་ཆོག་པོར་བྱིན་གྱིས་བརླབས་པ་ཡིན། འདས་པ་དང་མ་བྱོན་པ་དང་ད་ལྟར་བྱུང་བའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྣམ་པར་མི་རྟོག་པ་ཐོབ་པ་ཡིན། སྐད་ཅིག་གཅིག་གིས་དུས་གསུམ་རྣམ་པར་འཚང་རྒྱ་བ་ཡིན། ཤིན་ཏུ་རྣམ་པར་སངས་རྒྱས་པ་ཞེས་བྱ་བའི་ཏིང་ངེ་འཛིན་ཀྱང་རབ་ཏུ་ཐོབ་པ་ཡིན།
དེ་བཞིན་གཤེགས་པའི་སྟོབས་དང་ལྡན་པ་ཡིན་ཏེ། འདི་ལྟར་གནས་དང་གནས་མ་ཡིན་པའི་སྟོབས་དང་ལྡན་པ་ཡིན། ཟག་པ་ཟད་པ་ཤེས་པའི་བར་གྱི་སྟོབས་དང་ལྡན་པ་ཡིན་ཏེ། ཀྱེ་རྒྱལ་བའི་སྲས་བཅུ་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དེ་བཞིན་གཤེགས་པའི་སྟོབས་མངོན་པར་རྫོགས་པར་བྱང་ཆུབ་པ་སྟེ། སྟོབས་བཅུ་པོ་དེ་དག་དང་ལྡན་པའི་དེ་བཞིན་གཤེགས་པ་རྣམས་ནི་དེ་བཞིན་གཤེགས་པ་ཞེས་བྱ་བའི་གྲངས་སུ་འགྲོའོ། །ཀྱེ་རྒྱལ་བའི་སྲས་དེ་ལྟར་མངོན་པར་སངས་རྒྱས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་ཆོས་ཀྱི་འཁོར་ལོ་ཆེན་པོ་རྣམ་པ་བཅུ་བསྐོར་ཏེ། རྣམ་པ་བཅུ་གང་ཞེ་ན་འདི་ལྟར་མྱི་འཇིགས་པས་ཤིན་ཏུ་སྦྱངས་པའི་ཡེ་ཤེས་དང་ལྡན་པ་དང་། སོ་སོར་ཡང་དག་པར་རིག་པ་བཞིའི་སྒྲ་རྗེས་སུ་བསྒྲགས་པ་དང་། བདེན་པ་བཞིའི་ཚུལ་གྱིས་ཤིན་ཏུ་བརྟགས་པ་དང་། སངས་རྒྱས་ཀྱི་རྣམ་པར་ཐར་པ་བསྒྲིབས་པ་མྱེད་པའི་རྗེས་སུ་སོང་བ་དང་། སེམས་ཅན་ཐམས་ཅད་ཀྱི་སེམས་དགའ་བར་འགྱུར་བ་དང་། ཐོགས་པ་མྱེད་ཅིང་བལྟ་བར་དཀའ་ལ་གཡོ་བ་མྱེད་ཅིང་སྡུག་བསྔལ་གྱི་གསལ་ཤིང་འབྱིན་པ་དང་། སྔོན་གྱི་སྙིང་རྗེ་ཆེན་པོའི་བྱིན་གྱིས་བརླབས་པ་དང་། འཇིག་རྟེན་གྱི་ཁམས་ཐམས་ཅད་དུ་གྲག་པ་དང་། བསྐལ་པ་གྲངས་མྱེད་པར་ཆོས་སྟོན་པ་རྒྱུན་མི་འཆད་པ་དང་། དབང་པོ་དང་སྟོབས་དང་བྱང་ཆུབ་ཀྱི་ཡན་ལག་དང་། བསམ་གཏན་དང་རྣམ་པར་ཐར་པ་དང་། ཏིང་ངེ་འཛིན་དང་སྙོམས་པར་འཇུག་པ་དང་། ལེགས་པར་སྤྱད་པས་བསྐོར་བའོ། །ཀྱེ་རྒྱལ་བའི་སྲས་སྒོ་རྣམ་པ་བཅུ་པོ་དེ་དག་ལ་སྩོགས་པ་རྣམ་པ་ཚད་མྱེད་པར་དེ་བཞིན་གཤེགས་པ་ཆོས་ཀྱི་འཁོར་ལོ་སྐོར་རོ། །ཀྱེ་རྒྱལ་བའི་སྲས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་དེ་ནི་སེམས་ཅན་གཞན་གྱི་རྒྱུད་ལ་ཆོས་དཀར་པོའི་རྣམ་པ་བཅུས་ཐོགས་པ་མྱེད་པ་དང་། མངོན་པར་ཆགས་པ་མྱེད་པར་འབྱུང་བར་འགྱུར་ཏེ། བཅུ་གང་ཞེ་ན། འདི་ལྟར་སྨོན་ལམ་ཐམས་ཅད་ཀྱི་སྟོབས་ཀྱི་ཤུགས་དང་། སྙིང་རྗེ་ཆེན་པོའི་བྱིན་གྱི་རླབས་དང་། སེམས་ཅན་གྱི་ཁམས་ཐམས་ཅད་མི་གཏོང་བ་དང་། ཡེ་ཤེས་ཀྱི་རྣམ་པར་འཕྲུལ་པ་
བསམ་པ་ཇི་ལྟ་བ་བཞིན་དུ་སྟོན་པ་དང་། དུས་ལ་བབ་པར་ཐོབ་པར་བྱེད་པ་དང་། རིགས་པའི་ཚུལ་བཞིན་དུ་མྱི་འཁྲུལ་པ་དང་། དུས་གསུམ་ཤེས་པར་བྱ་བ་རབ་ཏུ་རྟོགས་པ་དང་། ལུས་ཀྱི་དབང་ཟིལ་གྱིས་མི་ནོན་པ་དང་། ཚིག་གི་དབང་དམྱིགས་པར་དཀའ་བ་དང་། ཡེ་ཤེས་ཀྱི་དབང་ཚིགས་བཞིན་དུ་ཁོང་དུ་ཆུད་པར་བྱེད་པ་སྟེ། ཀྱེ་རྒྱལ་བའི་སྲས་ཆོས་དཀར་པོའི་རྣམ་པ་བཅུ་པོ་དེ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཀྱི་འཁོར་ལོ་སེམས་ཅན་གཞན་གྱི་སེམས་ཀྱི་རྒྱུད་ལ་ཐོགས་པ་མྱེད་པ་དང་། མངོན་པ་མྱེད་པར་འབྱུང་བར་འགྱུར་རོ། །ཀྱེ་རྒྱལ་བའི་སྲས་སངས་རྒྱས་ཀྱི་ཕྲིན་ལས་རྫོགས་པར་མཛད་ཟིན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དོན་བཅུའི་དབང་གཟིགས་ནས་ཡོངས་སུ་མྱ་ངན་ལས་འདའ་བ་ཆེན་པོ་སྟོན་ཏེ། བཅུ་གང་ཞེ་ན་འདི་ལྟར་ཡང་དག་པ་ཇི་ལྟ་བ་བཞིན་དུ་འདུ་བྱེད་མྱི་རྟག་པ་ཡོངས་སུ་བསྟན་པ་དང་། འདུས་བྱས་ཐམས་ཅད་ཡིད་བརྟན་དུ་མི་རུང་བར་བསྟན་པ་དང་། མྱ་ངན་ལས་འདའ་བའི་ཕྱོགས་བདེ་བར་འགྲོ་བས་འཇིགས་པ་དང་བག་ཚ་བ་ཐམས་ཅད་དང་བྲལ་བ་ཡང་དག་པར་བསྟན་པ་དང་། གཟུགས་ཀྱི་ལུས་ལ་ཞེན་པའི་ལྷ་དང་མྱི་རྣམས་ལ་གཟུགས་ཀྱི་ལུས་མྱི་རྟག་པ་ཉིད་དུ་ཡང་དག་པར་བསྟན་པ་དང་། ཆོས་ཀྱི་སྐུ་ལ་ཡང་དག་པར་སྦྱར་བ་དང་། རྣམ་པར་འགྱུར་བའི་མཐུས་ཕྱིར་མྱི་ཟློག་པར་ཡོངས་སུ་བསྟན་པ་དང་། འདུ་བྱེད་ཐམས་ཅད་འདོད་དགུར་མྱི་རུང་ཞིང་དབང་བསྒྱུར་དུ་མྱེད་པ་ཡོངས་སུ་བསྟན་པ་དང་། ས་གསུམ་གྱི་འཁོར་བ་ཐམས་ཅད་སྒྱུ་མའི་རྣམ་པ་ལྟ་བུར་ཡོངས་སུ་བསྟན་པ་དང་། མྱ་ངན་ལས་འདས་པ་ནི་སྙིང་པོ་དམ་པ་སྟེ། མྱི་འཇིགས་པའི་ཆོས་ཉིད་དུ་ཡང་དག་པར་བསྟན་པ་དང་། ཀུན་འབྱུང་ཞིང་འཇིག་པས་འབྲལ་བར་འགྱུར་བ་ཡོངས་སུ་བསྟན་པ་དང་། ཀྱེ་རྒྱལ་བའི་སྲས་སངས་རྒྱས་བཅོམ་ལྡན་འདས་ཀྱི་ཆོས་ཉིད་ཀྱིས་ཀྱང་དེ་བཞིན་ཏེ། སངས་རྒྱས་ཀྱི་ཕྲིན་ལས་ཐམས་ཅད་རྫོགས་པར་མཛད་དེ། དགོངས་པ་ཐམས་ཅད་ཡོངས་སུ་རྫོགས་ཤིང་ཆོས་ཀྱི་འཁོར་ལོ་ཤིན་ཏུ་བསྐོར་ཏེ། འདུལ་བ་ཐམས་ཅད་ཤིན་ཏུ་དུལ་ནས་བྱང་ཆུབ་སེམས་དཔའ་
ཐམས་ཅད་ཤིན་ཏུ་ལུང་བསྟན་པར་འགྱུར་ཏེ། མཉམ་པ་མེད་པའི་གོ་འཕང་ཡོངས་སུ་མྱ་ངན་ལས་འདའ་བ་ཆེན་པོར་ཡོངས་སུ་མྱ་ངན་ལས་འདའོ། །ཀྱེ་རྒྱལ་བའི་་སྲས་དོན་བཅུ་པོ་དེ་དག་ཡང་དག་པར་གཟིགས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཉམ་པ་མྱེད་པའི་གོ་འཕང་ཡོངས་སུ་མྱ་ངན་ལས་འདས་པ་ཆེན་པོ་ཡོངས་སུ་སྟོན་ཏོ། །ཀྱེ་རྒྱལ་བའི་སྲས་འདི་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡོངས་སུ་སྦྱོང་བ་ཞེས་བྱ་བའི་ཆོས་ཀྱི་སྒོ་སྟེ། ཡང་དག་པར་རྫོགས་པའི་སངས་རྒྱས་མང་པོས་གསུངས་པའོ། །དོན་ཚད་མྱེད་པ་ཁོང་དུ་ཆུད་པར་འགྱུར་བའོ། །མཁས་པའི་སྐྱེ་བོ་དགའ་བར་བྱེད་པའོ། །བྱང་ཆུབ་སེམས་དཔའ་ཐམས་ཅད་ཀྱི་སྤྱོད་པ་དང་། སྨོན་ལམ་ཆེན་པོ་རྒྱུན་མྱི་འཆད་པར་བྱེད་པའོ། །སེམས་ཅན་གང་གིས་འདི་ཐོས་པར་གྱུར་ཏེ། ཐོས་ནས་ཀྱང་མོས་པར་བྱེད་པ་དང་། མོས་པར་གྱུར་ནས་ཀྱང་ནན་ཏན་གྱིས་ཡང་དག་པར་བསྒྲུབས་པ་དེ་དག་ཐམས་ཅད་མྱུར་དུ་བླ་ན་མྱེད་པ་ཡང་དག་པར་རྫོགས་པའི་སངས་རྒྱས་སུ་མངོན་པར་འཚང་རྒྱ་བར་འགྱུར་རོ། །ཀྱེ་རྒྱལ་བའི་སྲས་དེ་ཅིའི་ཕྱིར་ཞེ་ན། བྱང་ཆུབ་ནི་བྱང་ཆུབ་སེམས་དཔའ་ནན་ཏན་ལྷུར་བྱེད་པ་རྣམས་ཀྱིས་འགྲུབ་ཀྱི་ནན་ཏན་དང་མྱི་ལྡན་པ་རྣམས་ཀྱིས་མ་ཡིན་ནོ། །ཀྱེ་རྒྱལ་བའི་སྲས་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནན་ཏན་ལ་གནས་པས་འཇིག་རྟེན་ལས་འདས་པའི་ཆོས་ཀྱི་སྒོའི་ལེའུ་བྱང་ཆུབ་སེམས་དཔའི་སྤྱོད་པ་དང་ཡོན་ཏན་གྱི་འབྱུང་གནས་དོན་རྣམ་པར་གདོན་མྱི་ཟ་བའི་མེ་ཏོག་ཆོས་ཀྱི་སྒོ་ཐམས་ཅད་ལ་ཡང་དག་པར་གཞོལ་བ། ཡེ་ཤེས་ཀྱི་སྒོ་ལ་འཇུག་པ་འཇིག་རྟེན་གྱི་ལམ་ཐམས་ཅད་ལས་ཡང་དག་པར་འདས་པ་ཉན་ཐོས་དང་རང་སངས་རྒྱས་ཐམས་ཅད་ཀྱི་ལམ་དང་བྲལ་བ། འགྲོ་བ་ཐམས་ཅད་དང་ཐུན་མོང་མ་ཡིན་པ། ཆོས་ཐམས་ཅད་ཀྱི་སྒོ་སྣང་བར་བྱེད་པ་འགྲོ་བ་ཐམས་ཅད་ཀྱི་འཇིག་རྟེན་དང་། འཇིག་རྟེན་ལས་འདས་པའི་དགེ་བའི་རྩ་བ་རྣམ་པར་འཕེལ་བར་བྱེད་པ་འདི་རིམ་གྲོར་བྱས་ཏེ། མཉན་པར་བྱའོ། །བླང་བར་བྱའོ། །ཡོངས་སུ་གཟུང་བར་བྱའོ། །ཡོངས་སུ་བཟུང་ནས་ཀྱང་ངེས་པར་རྟོགས་པའི་སྒོས་ཡོངས་སུ་སྦྱང་བ་དང་། སྨོན་ལམ་མངོན་པར་བསྒྲུབ་པ་ལ་
བརྩོན་པར་བྱའོ། །ཀྱེ་རྒྱལ་བའི་སྲས་དེ་ལྟར་བརྩོན་པའི་བྱང་ཆུབ་སེམས་དཔའ་རྣམས་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཀོན་པ་མ་ཡིན་ནོ། །འཇིག་རྟེན་ལས་འདས་པའི་ཆོས་ཀྱི་སྒོའི་ལེའུ་ཆོས་ཐམས་ཅད་ཀྱི་སྒོར་ཡང་དག་པར་གཞོལ་བའི་ཆོས་ཀྱི་རྣམ་གྲངས་འདི་བསྟན་པའི་ཚེ་སངས་རྒྱས་ཀྱི་མཐུ་དང་ཆོས་ཀྱི་རྣམ་གྲངས་འདིའི་ཆོས་ཉིད་ཐོབ་པས་ཕྱོགས་བཅུའི་འཇིག་རྟེན་གྱི་ཁམས་ཚད་མྱེད་གྲངས་མྱེད་པ་རྣམས་རབ་ཏུ་གཡོས་པར་གྱུར་ཏོ། །འཇིག་རྟེན་གྱི་ཁམས་གཡོས་པར་གྱུར་པ་དེ་དག་ཐམས་ཅད་ཀྱང་སྣང་བ་ཆེན་པོས་རྒྱས་ཤིང་གསལ་བར་གྱུར་ཏོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཀྱང་དགྱེས་པར་གྱུར་ཏེ། བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཞལ་བསྟན་ནས་གསུང་བརྗོད་པ། ཀྱེ་རྒྱལ་བའི་སྲས་ལེགས་སོ་ལེགས་སོ། །ཇི་ལྟར་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་འཇིག་རྟེན་ལས་འདས་པའི་ཆོས་ཀྱི་སྒོའི་ལེའུ་བྱང་ཆུབ་སེམས་དཔའི་སྤྱོད་པ་དང་། ཡོན་ཏན་གྱི་འབྱུང་གནས་དོན་རྣམ་པར་གདོན་མི་ཟ་བའི་མེ་ཏོག་ཆོས་ཀྱི་སྒོ་ཐམས་ཅད་ལ་ཡང་དག་པར་གཞོལ་བ་ཡེ་ཤེས་ཀྱི་སྒོ་ལ་འཇུག་པ་འཇིག་རྟེན་གྱི་ལམ་ཐམས་ཅད་ལས་ཡང་དག་པར་འདས་པ། ཉན་ཐོས་དང་རང་སངས་རྒྱས་ཐམས་ཅད་ཀྱི་ལམ་དང་བྲལ་བ་འགྲོ་བ་ཐམས་ཅད་དང་ཐུན་མོང་མ་ཡིན་པ་ཆོས་ཐམས་ཅད་ཀྱི་སྒོ་སྣང་བར་བྱེད་པ། འགྲོ་བ་ཐམས་ཅད་ཀྱི་འཇིག་རྟེན་དང་འཇིག་རྟེན་ལས་འདས་པའི་དགེ་བའི་རྩ་བ་རྣམ་པར་འཕེལ་བར་བྱེད་པ་འདི་བསྟན་པ་ནི་རྒྱལ་བའི་བུ་ཁྱོད་ཆོས་འདི་དག་ལ་ལེགས་པར་བསླབས་པས་ཤིན་ཏུ་བྱང་བ་སྟེ། རྒྱལ་བའི་བུ་ཁྱོད་ཀྱིས་ཆོས་ཀྱི་བྱིན་གྱི་རླབས་དང་མཐུས། མོས་པའི་ཆོས་ཀྱི་རྣམ་གྲངས་འདི་ལེགས་པར་བཤད་དེ་ངེད་ཀྱིས་ཀྱང་མངོན་པར་བསྔགས་སོ། །དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱིས་ཀྱང་མངོན་པར་བསྔགས་སོ། །ཀྱེ་རྒྱལ་བའི་བུ་ཁྱོད་ཀྱི་ཆོས་ཀྱི་རྣམ་གྲངས་འདི་ད་ལྟ་དང་མ་འོངས་པའི་བྱང་ཆུབ་སེམས་དཔའ་རྣམས་ཀྱིས་མ་ཐོས་པའི་ཆོས་ཐོས་པར་བྱ་བའི་ཕྱིར་ངེད་ཀྱིས་བྱིན་གྱིས་བརླབ་པ་མཛད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་
བཟང་པོས་སངས་རྒྱས་ཀྱི་བྱིན་གྱི་རླབས་ཀྱིས་ཕྱོགས་བཅུར་བལྟས་ཏེ། འཁོར་གྱི་དཀྱིལ་འཁོར་ཐམས་ཅད་ལ་བལྟས་ནས། ཆོས་ཀྱི་དབྱིངས་ཐམས་ཅད་ལ་བལྟས་ཏེ། དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་རྣམས་དེ་དག་བསྐལ་པ་བྱེ་བ་ཁྲག་ཁྲིག་སྟོང་དུ་བརྟུལ་ཞུགས་དཀའ་སྤྱད་པ། །གང་རྣམས་དེ་དག་སངས་རྒྱས་བྱེ་བ་ཁྲག་ཁྲིག་སྟོང་ལས་བྱུང་བའི་ཆོས་ཀྱི་སྲས། །གང་རྣམས་དེ་དག་སེམས་ཅན་བྱེ་བ་ཁྲག་ཁྲིག་སྟོང་རྣམས་བྱང་ཆུབ་རབ་འགོད་པ། །དཔེ་ཟླ་མྱེད་པ་དེ་དགེ་རྣམས་ཀྱི་སྤྱོད་པ་བཤད་ཀྱིས་རྩེ་གཅིག་མཉན་པར་བྱོས། །གང་དག་སངས་རྒྱས་ཁྲག་ཁྲིག་མཐའ་ཡས་མཆོད་ཀྱང་བདག་ནི་སངས་རྒྱས་མྱི་གནས་པ། །གང་དག་ཉོན་མོངས་བཅིངས་པའི་འགྲོ་བ་ཐར་བྱེད་སེམས་ཅན་འདུ་ཤེས་མི་གནས་དང་། །གང་རྣམས་དེ་དག་སངས་རྒྱས་ཡོན་ཏན་རྟག་ཏུ་ཚོལ་ཡང་ཡོན་ཏན་མྱི་གནས་པ། །དེ་དག་འཇིག་རྟེན་རབ་ཏུ་དགའ་བར་བྱེད་པའི་སྤྱོད་མཆོག་མཛེས་པ་བརྗོད་པར་བྱ། །གང་རྣམས་དེ་དག་སྲིད་པ་གསུམ་ན་ལས་དང་ཉོན་མོངས་བདུད་ཀྱི་དབང་སོང་སྣང་། །གང་རྣམས་དེ་དག་འཕགས་པའི་ཡོན་ཏན་ལྡན་ཞིང་ཁྱུ་མཆོག་སྤྱོད་པ་སྟོན་པ་པོ། །གང་རྣམས་དེ་དག་གཏི་མུག་ཉོན་མོངས་ཉེས་བྲལ་བསམ་པ་ཞི་ཞིང་རབ་ཞི་བ། །འགྲོ་བ་རྣམས་ལ་སྤྱོད་པའི་རིམ་པ་སྟོན་པ་དེ་དག་ཡོན་ཏན་བརྗོད་པར་བྱ། །གང་རྣམས་དེ་དག་བདུད་གཡོ་འགྲོ་བ་ཀུན་ལས་རྒལ་ཏེ་ཐམས་ཅད་དབང་བྱེད་པ། །འགྲོ་བ་ཐམས་ཅད་བདག་ལ་སྤྲུལ་པ་སྣ་ཚོགས་ཐ་དད་མཐའ་ཡས་རབ་ཏུ་སྟོན། །སེམས་བསྐྱེད་གྱུར་མ་ཐག་ཏུ་གནས་དང་འཇིག་པའི་བྱ་བ་ཐམས་ཅད་སྟོན་བྱེད་པ། །དེ་དག་ཡོན་ཏན་སྣ་ཚོགས་མཛེས་པ་སེམས་ཅན་དགའ་བར་བྱེད་པ་བརྗོད་པར་བྱ། །སྲིད་པའི་རྒྱུད་ན་སེམས་ཅན་སྡུག་བསྔལ་ཉེན་ཅིང་སྐྱེ་དང་རྒ་བས་གཟིར་བ་དང་། །འཆི་དང་མྱ་ངན་དག་གིས་གཙེས་ཤིང་གནོད་བྱས་ཉོན་མོངས་ཀུན་ཏུ་གཟིར་མཐོང་ནས། །དེ་དག་ཐར་བར་བྱ་ཕྱིར་སྙིང་རྗེ་རྒྱ་ཆེར་བསྐྱེད་ནས་ཡེ་ཤེས་མཆོག་དགོད་པ། །དེ་དག་ཡོན་ཏན་ཤིན་ཏུ་དགེ་བ་ཕྱོགས་ཙམ་བཤད་ཀྱིས་རྩེ་གཅིག་མཉན་པར་བྱོས། །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་དགའ་བར་བསམ་
གཏན་ལ་ཡང་རྣམ་པར་རྩེ་ན། །ཤེས་རབ་ཐབས་ཀྱི་ཕ་རོལ་ཕྱིན་ཅིང་བྱམས་དང་སྙིང་རྗེ་ལྷག་པའི་བསམ་པ་དང་། །དགའ་བའི་ཆོས་ལ་བརྩོན་ཞིང་བཏང་སྙོམས་དགའ་བས་བསྐལ་པ་བརྒྱར་ཡང་སྤྱོད་སྤྱད་པ། །དེ་དག་སྤྱོད་ལྡན་ཡོན་ཏན་ལྡན་པ་རྣམས་ཀྱི་ཡོན་ཏན་བསྟན་གྱིས་དེ་དག་ཉོན། །གང་རྣམས་དེ་དག་བྱང་ཆུབ་གཉེར་ཕྱིར་བྱེ་བ་ཁྲག་ཁྲིག་སྟོང་གི་ལུས་སྐེམས་པ། །གང་རྣམས་བྱང་ཆུབ་ཞི་བ་ཚོལ་ཕྱིར་སྲོག་ལ་ལྟ་བ་མྱེད་པར་གྱུར་པ་དང་། །གང་རྣམས་དེ་དག་སེམས་ཅན་ཕན་ཕྱིར་རྟག་བརྩོན་བདག་གི་བདེ་བ་མྱི་ཚོལ་བ། །བྱམས་དང་སྙིང་རྗེའི་སེམས་ལྡན་ཐུབ་པ་དེ་དག་ཀུན་གྱི་སྤྱོད་མཆོག་བརྗོད་པར་བྱ། །རྒྱ་མཚོའི་ཆུ་ཐིགས་བགྲངས་པ་རེ་རེས་ཐམས་ཅད་ཟད་པར་བྱ་བར་རུང་སྲིད་ཀྱི། །དེ་དག་ཡོན་ཏན་བསྐལ་པ་བྱེ་བ་ཁྲག་ཁྲིག་དུ་མ་སྟོང་དུ་བརྗོད་བྱས་ཀྱང་། །དཔེ་ཙམ་བྱ་བར་མི་ནུས་ལེགས་པར་བརྗོད་ཅིང་བསྟན་པར་མྱི་ནུས་འོན་ཀྱང་གོ །སེམས་ཅན་ཕན་པའི་དོན་དུ་སངས་རྒྱས་ཡུལ་རྣམས་བསྟན་པར་བྱ་བ་མཉན་པར་བྱོས། །གང་དག་འགྲོ་བ་རྣམས་ཀྱི་དོན་ཕྱིར་དགེ་བ་ཀུན་འཛིན་དཀར་པོ་འཕེལ་བྱེད་ཀྱང་། །མཐོ་བར་མྱི་སེམས་དམའ་བར་སེམས་མྱེད་མྱི་དམན་ཆོས་ཚོལ་ངོམས་པར་ཡོངས་མི་འགྱུར། །འགྲོ་བ་ཀུན་ནས་དོན་གཉེར་ཆུ་ཀླུང་ཡེ་ཤེས་མཚོ་ཆེན་ཤེས་རབ་ཤིང་སྡོང་སྟེ། །སྟོན་པའི་མཁས་པ་དེ་དག་རྣམས་ནི་ས་ལྟར་འགྲོ་བ་ཐམས་ཅད་འཚོ་བ་ཡིན། །བྱམས་པ་རླན་ཡིན་སྙིང་རྗེ་རྩ་བ་དགའ་བ་སྡོང་པོ་བརྟན་པ་སྡོམ་པ་སྟེ། །ཟེ་བ་ཡེ་ཤེས་དྲི་ནི་ཚུལ་ཁྲིམས་བཟང་པོ་ལོ་མ་མེ་ཏོག་ཡོན་ཏན་ཅན། །སངས་རྒྱས་འོད་ཀྱིས་རབ་ཏུ་རྒྱས་བྱས་བློ་གྲོས་ལྡན་པ་སེམས་ཅན་དགར་བྱེད་པ། །དེ་དང་དེ་དག་པདྨོ་ལྟ་བུར་འདུས་བྱས་མ་གོས་འགྲོ་བ་རྣམས་ལ་སྣང་། །ས་བོན་མོས་པ་ས་གཞི་བསམ་པ་བྱམས་དང་སྙིང་རྗེ་དག་ནི་རྩ་བ་སྟེ། །སྡོང་པོ་ཤེས་རབ་ཐབས་ནི་ཡལ་ག་ལྕུག་མ་དག་ནི་ཕ་རོལ་ཕྱིན་རབ་ལྔ། །བསམ་གཏན་ཤེས་རབ་མངོན་ཤེས་མེ་ཏོག་རྒྱས་པ་ཀུན་མཁྱེན་ཡེ་ཤེས་འབྲས་བུ་སྟེ། །ཆོས་ཀྱི་ཤིང་མཆོག་རྫུ་འཕྲུལ་བྱ་འཁོད་དེ་དང་དེས་ནི་འཇིག་རྟེན་གསུམ་པོ་ཁེབས། །རིམ་གྱིས་དཀར་
ཡངས་ཡོངས་སུ་སྤེལ་བ་ལུས་ཡིན་བདེན་པ་རྣམས་ནི་རྐང་པ་སྟེ། །དྲན་པ་མགྲིན་པ་སྤྱོད་མཆོག་ཤེས་རབ་མགོ་ཡིན་རལ་པ་རྣམ་པར་གྲོལ་བ་དགེ །སྟོང་པ་དོན་དམ་སུལ་དང་ཕུག་ཡིན་བྱམས་དང་སྙིང་རྗེ་དག་ནི་མྱིག་གཉིས་ཏེ། །དེ་དག་སེང་གེ་ལྟ་བུར་བདག་མྱེད་སྒྲ་འབྱིན་བདུད་སྡེ་རབ་ཏུ་སྐྲག་པར་བྱེད། །འགྲོ་བ་མ་ལུས་རྣམས་ནི་འཁོར་བའི་འབྲོག་དགོན་ཉོན་མོངས་མི་ཟད་འཁྱམས་འགྱུར་ཏེ། །བདུད་ཀྱི་བྱ་མ་རྟ་དང་རྐུན་པོར་བཅས་པས་ཟིན་གྱིས་གཏི་མུག་མདོངས་གྱུར་པ། །ལམ་ནི་རབ་སྟོན་མྱི་མཁས་སེམས་ཅན་མཐོང་ནས་དེད་དཔོན་མཁས་པ་དེ་དག་ནི། །ལམ་གྱི་མཐར་ཁྲིད་འཇིགས་པ་མྱེད་པའི་གྲོང་ཁྱེར་དམ་པ་མཆོག་ལ་རབ་ཏུ་འགོད། །འགྲོ་བ་དག་ནི་འདོད་ཆགས་ཞེ་སྡང་མུན་པ་ཉོན་མོངས་སྣ་ཚོགས་ནད་བཏབ་ཅིང་། །ཡུན་རིང་ནས་ནི་འདུས་བྱས་སྡུག་བསྔལ་དག་ལ་གཞོལ་ཞིང་སྡུག་བསྔལ་རབ་འབར་བ། །སེམས་ཅན་མཐོང་ནས་སྙིང་རྗེ་བསྐྱེད་དེ་ཉོན་མོངས་པ་ཡི་ནད་པ་ཀུན་གསོ་ཞིང་། །ནད་རྣམས་ཞི་བར་བྱེད་པ་སྟོང་ཕྲག་བརྒྱད་ཅུ་རྩ་བཞི་དམ་པ་དག་ཀྱང་སྟོན། །རྒྱལ་པོ་ལྟ་བུ་དེ་དང་དེ་དག་འཁོར་རྣམས་དགའ་བྱེད་འགྲོ་ལ་ཆོས་སྟོན་པ། །སྡིག་པ་སྤོངས་ལ་དགེ་ལ་སྙེན་ཅིང་སངས་རྒྱས་ཡོན་ཏན་རྣམས་ཀྱང་ཚོལ་ཅིག་ཅེས། །རྐང་གཉིས་དབང་པོའི་ཆོས་ཀྱི་ཡུལ་ལ་ཀུན་མཁྱེན་ཡེ་ཤེས་དབང་པོར་དབང་བསྐུར་བ། །རྒྱ་ཆེན་བྱང་ཆུབ་ཡན་ལག་རིན་ཆེན་འབྱུང་གནས་དེ་དག་འགྲོ་བའི་འཕགས་པའི་ནོར། །ཚུལ་ཁྲིམས་ལྟེ་བ་ཏིང་འཛིན་མུ་ཁྱུད་བརྒྱན་པའི་ཡེ་ཤེས་འོད་དང་ཤེས་རབ་མཚོན། །ཡེ་ཤེས་རྣོ་བའི་གཞུང་ཅན་ཉོན་མོངས་འཇོམས་ཞིང་བདུད་ཀྱི་སྡེ་རྣམས་དཀྲུག་བྱེད་པ། །ཆོས་ཀྱི་སྒྲོན་མ་ཆེ་འབྱིན་མཆོག་རྣམས་དེ་དང་དེ་དག་སངས་རྒྱས་བསྐོར་བ་ཡི། །འཁོར་ལོ་མཆོག་རྣམས་བསྐོར་ཞིང་ཕ་རོལ་རྒོལ་བ་དག་དང་མུ་སྟེགས་ཐམས་ཅད་འཇོམས། །ཡེ་ཤེས་ཆུ་ནི་ཟབ་ཅིང་མྱི་ཟད་ཤིན་ཏུ་རྒྱ་ཆེན་ཆོས་ཀྱི་རོ་དང་ལྡན། །བྱང་ཆུབ་ཡན་ལག་དེ་བཞིན་བསམ་གཏན་རིན་ཆེན་གང་བ་འགྲོ་ཀུན་ཤེས་པར་དཀའ། །ཐམས་ཅད་མཁྱེན་པའི་གནས་ཀྱི་མཐའ་རླབས་མཐའ་
ཡས་ཡུལ་རྣམས་དག་ཅིང་ལྷག་བསམ་དགེ། དེ་དང་དེ་དག་ཡེ་ཤེས་རྒྱ་མཚོ་མཚུངས་མྱེད་བསྟན་པ་ཟད་པར་མྱི་འགྱུར་རོ། །འཇིག་རྟེན་རབ་འཕགས་རྟག་ཏུ་ཡུལ་གྱིས་མྱི་གོས་འགྲོ་བ་རྣམས་ཀྱི་གནས་གྱུར་པ། །བསམ་གཏན་མངོན་ཤེས་རབ་འཕེལ་ཡེ་ཤེས་རྩེ་མོ་ལྷག་པའི་བསམ་པ་མྱི་སྒུལ་བ། །གང་དག་དེ་དང་ཉེར་ཕྲད་ཤེས་རབ་ཡེ་ཤེས་མཆོག་གིས་རབ་ཏུ་འདྲ་བར་འགྱུར། །དེ་དང་དེ་དག་ཡོན་ཏན་རི་རབ་ཤེས་རབ་རབ་བརྟན་འགྲོ་བ་ཀུན་གྱིས་བལྟས། །ལྷག་པའི་བསམ་པ་མཆོག་གི་རྡོ་རྗེ་མཚུངས་ཤིང་འདྲ་སྟེ་བརྟུལ་ཞུགས་ཐམས་ཅད་བརྟན། །སངས་རྒྱས་ཆོས་དང་དགེ་འདུན་ཐམས་ཅད་མཁྱེན་པའི་སྤྱོད་ཡས་བསམ་པ་མི་ཕྱེད་དེ། །བདུད་དང་སེམས་ཅན་ཉོན་མོངས་འཇིག་རྟེན་རླུང་དག་གིས་ནི་མྱི་བསྐྱོད་རབ་བརྟན་པ། །དེ་དང་དེ་དག་འཇིག་རྟེན་དམ་པ་ཉོན་མོངས་འབར་བ་དག་ལས་བཟློག་པར་བྱེད། །བྱམས་པའི་སྤྲིན་རྣམས་ཀུན་འདུས་སྙིང་རྗེ་སྟུག་པོ་རིག་པའི་གློག་ཆེན་རྒྱུ་ལྡོག་པ། །ཐུབ་པ་རྣམས་ནི་རྫུ་འཕྲུལ་གནས་བཞི་དབྱངས་ཀྱི་འབྲུག་སྒྲ་འབྱིན་ཅིང་རབ་ཏུ་སྒྲོག །སོ་སོ་ཡང་དག་རིག་དང་ཚུལ་ཁྲིམས་ཡན་ལག་བརྒྱད་ལྡན་ཆུའི་ཆར་འབེབས་པ། །དེ་དང་དེ་དག་སྤྲིན་ཆེན་ཉོན་མོངས་ཞི་བྱེད་སེམས་ཅན་དོན་ཕྱིར་མངོན་པར་འཕགས། །ཤེས་རབ་དགའ་དང་ཁྲེལ་བ་དག་ནི་འོབས་ཏེ་ཆོས་ཀྱི་རྒྱལ་མཚན་བསྒྲེང་། །ཡེ་ཤེས་ཤིང་ཐགས་ཡིན་ཏེ་ཐར་པའི་སྒོ་ཕྱེ་དྲན་པ་དེ་དག་སྒོ་བ་ཡིན། །བདེན་པ་རྣམས་ནི་ལམ་ཆེན་བཞི་སྟེ་ཤིན་ཏུ་དགེ་བའི་རྫུ་འཕྲུལ་རབ་བརྒྱན་པ། །སྲིད་པ་གསུམ་ན་བདུད་སྡེ་དག་གིས་མྱི་ཐུལ་གྲོང་ཁྱེར་ཆོས་ཉིད་དག་ཏུ་སྟོན། །ཐམས་ཅད་མཁྱེན་གྱི་སེམས་མཆོག་ཤིང་ལ་རབ་འདུག་རྫུ་འཕྲུལ་རྐང་པའི་རྐང་པ་བརྟན། །གཤོག་པ་ཐབས་ཀྱི་སྟོབས་ཏེ་ཕ་རོལ་གནོན་མཐུ་བྱམས་དང་སྙིང་རྗེ་མྱིག་གཉིས་ཡིན། །སྟོན་པ་དེ་དག་འགྲོ་བ་ཀུན་ན་ཐུབ་མྱེད་མཁའ་ལྡིང་དབང་པོའི་དྲག་ཤུལ་འདྲ། །སྲིད་པའི་མཚོ་ནས་འདོན་ཅིང་ལྷ་མྱི་རྣམས་ཀྱང་མྱ་ངན་འདའ་བའི་མཆོག་ལ་འགོད། །ཚུལ་ཁྲིམས་དཀྱིལ་འཁོར་
རྫུ་འཕྲུལ་རྐང་པའི་ཤུགས་ལྡན་ཡེ་ཤེས་འོད་ཟེར་ཕྲེང་བ་མཛེས། །འོད་སྣང་ཀུན་འཆར་ཉོན་མོངས་འཇོམས་ཞིང་སྲིད་པའི་རྒྱ་མཚོ་རབ་ཏུ་སྐེམ་པར་བྱེད། །སྟོབས་དང་དབང་པོ་དགེ་བའི་སྨན་འཕེལ་སེམས་ཅན་པད་མོ་ཡོངས་སུ་རྒྱས་བྱེད་པ། །དེ་དང་དེ་དག་སྣང་བྱེད་ཆོས་ཀྱི་ཉི་མའི་ཁྱུ་མཆོག་འགྲོ་བ་ཀུན་ཏུ་འབྱུང་། །ཆོས་དབྱིངས་རྣམ་པར་དག་པ་དཀྱིལ་འཁོར་འགྲོ་བ་ཀུན་གྱིས་བལྟ་ན་མཛེས་པ་སྟེ། །ཉན་ཐོས་རང་རྒྱལ་རྣམས་ཀྱི་ཚོགས་མང་སྐར་མ་འདྲ་བ་དག་ནི་ཟིལ་གྱིས་མནན། ། སེམས་ཀྱི་རྒྱུད་རྣམས་མཐོང་ནས་སྲིད་པ་གསུམ་དུ་འཕེལ་དང་འགྲིབ་པ་རྣམ་པར་སྟོན། །དེ་དང་དེ་དག་ཡེ་ཤེས་ཟླ་བ་འགྲོ་ལ་འཆར་ཞིང་མཁས་པ་ནམ་མཁའི་མཐའ། །ཆོས་ཀྱི་དབང་པོ་འགྲོ་བ་ཀུན་ལ་དབང་བྱེད་གཟུགས་དང་ཡོན་ཏན་དག་གིས་བརྒྱན། །ཡེ་ཤེས་རྡོ་རྗེ་མངའ་བ་ཐབས་ནི་མྱིག་སྟེ་ཆོས་ལ་དབང་ཆེན་བསྒྱུར་གནས་པ། །ལུས་དང་མཚན་དང་དཔེ་བྱད་བཟང་པོ་སྣ་ཚོགས་ཀུན་གྱི་བལྟ་བའི་དབང་པོ་སྟེ། །ཆོས་ཀྱི་འགྲོ་བ་ཀུན་ལས་རྒྱལ་བ་དེ་དང་དེ་དག་ཆོས་ཀྱི་དབང་པོ་ཡིན། །སྲིད་པ་གསུམ་ན་འདོད་པའི་འདམ་དང་ཉོན་མོངས་ལས་ལས་རབ་འདས་ཀུན་དབང་པོ། །བྱམས་པ་སྣང་དང་ཐུགས་རྗེ་བསམ་གཏན་དགའ་དང་བཏང་སྙོམས་རྣམས་ལ་མོས། །སྲིད་པ་གསུམ་པོ་ཀུན་ཏུ་ཐ་དད་ལུས་སྟོན་ཆོས་ཀྱི་སྒྲས་ཀྱང་གོ་བྱེད་པ། །དེ་དང་དེ་དག་ཚངས་པ་ལྟ་བུར་རྣམ་དག་མོས་ཤིང་ལྟ་བའི་རྣམ་པ་སེལ། །འཁོར་ལས་རབ་ཏུ་འདས་ཤིང་རྣམ་དག་ཡུལ་དང་ལྡན་པ་བདག་པོ་ཆོས་ཀྱི་དབང་། །ཕྱིར་ལྡོག་མྱི་འགྱུར་བློ་གྲོས་ཆེ་འཆང་གང་རྣམས་ཐེག་པ་དམའ་དང་ཐ་དད་ལ། །ཆོས་ཀྱི་དབང་པོར་དབང་བསྐུར་འཇིག་རྟེན་དམ་པ་ཡེ་ཤེས་ཕྱིར་ལྡོག་མྱི་འགྱུར་བ། །ཐམས་ཅད་མཁྱེན་པའི་ཡོན་ཏན་དབང་ཕྱུག་གྲགས་ཆེན་དེ་དང་དེ་དག་འཇིག་རྟེན་དབང་། །ནམ་མཁའི་མཁའ་དབྱིངས་ལྟ་བུར་དངོས་དང་རྣམ་བྲལ་དམྱིགས་པ་ཐམས་ཅད་རྣམ་བསྩལ་བ། །འགྲོ་བ་ཀུན་ཏུ་བྱ་བ་ཉམས་ལེན་ཁྱུ་མཆོག་ཅི་ལའང་གནས་པ་མྱེད་པ་སྟེ། །འགྲོ་བ་ཀུན་ཏུ་སྤྱོད་པ་དཀར་ཞུགས་མཁས་པ་དེ་དག་རབ་
ཏུ་མྱི་གནས་པ། །དེ་དང་དེ་དག་ཡེ་ཤེས་དགེ་ཞིང་དག་པས་ཤེས་རབ་ནམ་མཁའི་དབྱིངས་དང་འདྲ། །དེ་དང་དེ་དག་ཤིན་ཏུ་རྒྱ་ཆེན་ཐབས་ལྡན་ས་ལྟར་འགྲོ་བ་ཀུན་གྱི་གསོས། །ཆུ་འདྲ་དེ་དང་དེ་དག་བྱམས་དང་སྙིང་རྗེས་ཉོན་མོངས་རྣམས་ནི་རབ་ཏུ་སེལ། །དེ་དང་དེ་དག་ཡེ་ཤེས་མྱེས་ནི་ཉོན་མོངས་སྲེག་ཅིང་བག་ཆགས་བཅས་པ་བསྩལ། །སྟོན་པ་དེ་དག་མྱི་གནས་རླུང་དང་འདྲ་བར་སྲིད་པ་གསུམ་ན་རབ་ཏུ་རྒྱུ། །དེ་དང་དེ་དག་རིན་ཆེན་འདྲ་སྟེ་ཤིན་ཏུ་དཀོན་ཞིང་འགྲོ་བ་དབུལ་ཡང་སེལ། །དེ་དང་དེ་དག་རྡོ་རྗེ་ལྟ་བུར་སྲིད་པ་གསུམ་ན་ལྟ་བ་ཀུན་ཏུ་འཇོམས། །དེ་དང་དེ་དག་ཡོན་ཏན་ཀུན་གྱི་འཕྲིང་བ་སྣ་ཚོགས་འཇིག་རྟེན་གསུམ་མཛེས་བྱེད། །སྟོན་པ་དེ་དག་ནོར་བུ་རིན་ཆེན་མཚུངས་འདྲ་སྤྱོད་པ་ཀུན་གྱི་གཙུག་ཏུ་ཕྱིན། །དེ་དང་དེ་དག་མེ་ཏོག་ལྟ་བུར་ཡོན་ཏན་རབ་རྒྱས་བྱང་ཆུབ་ཡན་ལག་རྩེ། །ཕྲེང་བ་ལྟ་བུར་དེ་དང་དེ་དག་སྨོན་ལམ་བཅིངས་ཤིང་འཇིག་རྟེན་མགོན་ལ་གནས། །དེ་དང་དེ་དག་ཚུལ་ཁྲིམས་མ་ཉམས་སྐྱོན་མེད་རྣམ་དག་དྲི་ནི་དྲི་རབ་ཞིམ། །དེ་དང་དེ་དག་འཇིག་རྟེན་གསུམ་ན་ཆོས་དང་ཡེ་ཤེས་ཀྱི་ནི་བག་ཆགས་དག །གདུགས་འདྲ་དེ་དང་དེ་དག་སྟོབས་ཀྱི་བླ་རེས་ཉོན་མོངས་རྡུལ་ལས་སྐྱོབ་པར་བྱེད། །ཡེ་ཤེས་རྒྱལ་མཚན་བསྒྲེང་བའི་ཐུགས་མངའ་དེ་དང་དེ་དག་ང་རྒྱལ་རྒྱལ་མཚན་སྙོལ། །དེ་དང་དེ་དག་སྤྱོད་པའི་བ་དན་སྣ་ཚོགས་ཡིད་འོང་ཡེ་ཤེས་ཀུན་ཏུ་འཕགས། །གོས་འདྲ་དེ་དང་དེ་དག་རྫུ་འཕྲུལ་ཡོན་ཏན་འགྲོ་བ་ཀུན་ལ་ཁེབས་པར་བྱེད། །ཐེག་པ་འདྲ་བ་ཁྱུ་མཆོག་མཐའ་ཡས་དེ་དང་དེ་དག་འཇིག་རྟེན་གསུམ་ལས་འབྱིན། །དེ་དང་དེ་དག་རབ་དུལ་གླང་པོ་ལྟ་བུར་ཡིད་ཀྱིས་རྟག་ཏུ་དུལ་ལ་གནས། །དེ་དང་དེ་དག་རྫུ་འཕྲུལ་རྟས་ནི་ཁལ་ཆེན་ཁྱེར་ཞིང་འཇིག་རྟེན་གསུམ་ལས་འདའ། །ཀླུ་ཡི་དབང་པོ་ལྟ་བུ་དེ་དང་དེ་དག་སེམས་ཀྱི་ཡུལ་དུ་ཆོས་ཆར་འབེབས། །དེ་དང་དེ་དག་འགྲོ་བ་ཀུན་ལ་མེ་ཏོག་ཨུ་དུམ་བ་ར་མཚུངས་འདྲ་ཤིན་ཏུ་དཀོན། །དཔའ་བོ་ལྟ་བུ་དེ་དང་དེ་དག་ཉོན་མོངས་འཇོམས་ཞིང་བདུད་ཀྱི་སྡེ་རྣམས་འཁྲུག །
མྱི་ལྡོག་འཁོར་ལོ་ལྟ་བུ་དེ་དང་དེ་དག་འདྲེན་པ་རྣམས་ཀྱིས་རབ་ཏུ་བཙུད། །དེ་དང་དེ་དག་སྒྲོན་མ་ལྟ་བུར་མུན་པ་སེལ་ཅིང་སེམས་ཅན་ལམ་ཡང་སྟོན། །དེ་དང་དེ་དག་ཆུ་ཀླུང་ལྟ་བུར་ཡོན་ཏན་དེད་ཅིང་ལམ་རྒྱུད་རྗེས་སུ་འགྲོ། །དེ་དང་དེ་དག་ཟམ་པ་ལྟ་བུར་ངལ་བ་མྱེད་པར་རྟག་ཏུ་འགྲོ་བ་སྒྲོལ། །གྲུ་དང་གྲུ་ཆེན་ལྟ་བུར་སྨོན་ལམ་རབ་བཏབ་ཡེ་ཤེས་གང་ཆེན་མཚོ་ཐོབ་བྱེད། །དེ་དང་དེ་དག་མཉན་པ་ལྟ་བུར་འགྲོ་བ་ཡེ་ཤེས་ཐང་ཆེན་མཆོག་ལ་འགོད། །དེ་དག་སྐྱེད་མོས་ཚལ་གྱི་དགའ་ལ་རྩེ་ཞིང་འགྲོ་ལ་ཡང་དག་སྤྱོད་པ་སྟོན། །དེ་དག་ཆོས་ཀྱི་རྣམ་ཐར་མངོན་ཤེས་མེ་ཏོག་ཡེ་ཤེས་གཞལ་མྱེད་ཁང་དག་པ། །མཁས་པ་དེ་དང་དེ་དག་སྨན་ལྟར་ནད་ཞི་བྱེད་ཅིང་ཉོན་མོངས་རབ་ཏུ་སེལ། །སྨན་གྱིས་རྒྱས་པའི་གངས་རི་ལྟ་བུར་དེ་དང་དེ་དག་ཡེ་ཤེས་འབྱུང་གནས་སོ། །དེ་དག་སངས་རྒྱས་ལྟ་བུར་ཡེ་ཤེས་ཀྱིས་ནི་འགྲོ་བ་གཉིད་ལོག་མུན་པ་སེལ། །ཡང་དག་སངས་རྒྱས་ལྟ་བུར་གཞན་མྱིན་ཡིད་ཀྱིས་འགྲོ་བ་ཡང་དག་རྟོགས་པར་བྱེད། །དེ་དང་དེ་དག་རྒྱལ་བ་ཅི་འདྲ་དེ་ལྟར་འོངས་ཏེ་མཁས་པ་དེ་ཉིད་གནས། །དེ་དག་ཐམས་ཅད་མཁྱེན་པ་ལྟ་བུར་ཡེ་ཤེས་འབྱུང་གནས་ཀུན་ནས་སྒོར་ཡང་ཞུགས། །ཞི་བ་སྐྱེད་པ་དེ་དང་དེ་དག་སྟོན་པས་རབ་བསྔགས་འགྲོ་བ་ཀུན་ལ་སྟོན། །དེ་དང་དེ་དག་རང་གི་ཡེ་ཤེས་ཡུལ་དང་ཐམས་ཅད་མཁྱེན་པའི་སྤྱོད་ཡུལ་ཤེས། །དེ་དང་དེ་དག་ཚད་མྱེད་དཔུང་དང་འདྲ་བར་འགྲོ་བ་ཀུན་ན་ཐུབ་པ་མྱེད། །དེ་དག་ཡེ་ཤེས་མྱི་འཇིགས་བློ་གྲོས་འཆང་བ་ཐམས་ཅད་མཁྱེན་པའི་ཆོས་ཀྱང་ཤེས། །གང་ན་གང་དག་འགྲོ་བ་ཀུན་གྱི་གཟུགས་དང་མྱི་རྣམས་ཇི་སྙེད་སྣང་ཡོད་པ། །ཀུན་ཏུ་གཟུགས་སྙོམས་གཟུགས་ཀྱི་རྗེས་སུ་སོང་ཞིང་མྱིང་དབྱངས་རྗེས་སུ་སོང་བ་ཡིན། །གཟུགས་རྣམས་ཀུན་ལས་འདས་ཤིང་མྱིང་དང་རྣམ་པར་བྲལ་ཡང་བྱ་བ་ཐམས་ཅད་སྟོན། །དེ་དག་མཐུ་ནི་འགྲོ་བ་རྣམས་ཀྱིས་རྣམ་པ་ཀུན་ཏུ་བརྗོད་པར་མི་ནུས་སོ། །གང་དག་འདི་འདྲའི་ཡོན་ཏན་ཐོབ་ཅིང་དངོས་བྲལ་དངོས་པོ་མྱེད་པའི་ཆོས་གནས་ཤིང་། །ཡོད་དང་མྱེད་པའི་མདུད་
པ་ཐམས་ཅད་བྲལ་བ་མཁས་པ་ཡེ་ཤེས་མངོན་སུམ་ཅན། ། ཐམས་ཅད་ཤེས་ཀྱང་ཡེ་ཤེས་རྟེན་པ་མ་ཡིན་ཡེ་ཤེས་དེ་ལ་གནས་པ་མིན། །དེ་དག་སྤྱོད་ལ་འཇུག་པ་ཡིད་འོང་འཇིག་རྟེན་དགའ་བར་བྱེད་པ་བཤད་པར་བྱ། །ཆོས་ཀྱི་ཚུལ་ནི་སྒྱུ་མའི་རང་བཞིན་དངོས་པོ་དབེན་པ་ལྟ་བུར་རབ་རྟོགས་ནས། །མཁས་པ་སངས་རྒྱས་བྱིན་གྱི་རླབས་ཀྱིས་སྨོན་ལམ་ཐབས་དང་སྙིང་རྗེ་དག་ཀྱང་བྱེད། །སྤྲུལ་པའི་ཡེ་ཤེས་སྒོ་དང་ལྡན་པས་ཁྱུ་མཆོག་བྱ་བ་སྣ་ཚོགས་རབ་སྟོན་པའི། །བྱང་ཆུབ་སེམས་དཔའ་མ་ནོར་ཡིད་ཅན་རྩེ་གཅིག་མཉམ་པ་མྱེད་པ་ལེགས་པར་གྲག །ལུས་གཅིག་ལ་ནི་མཐའ་ཡས་ལུས་དང་རྒྱ་ཆེན་ལུས་རྣམས་ཐ་དང་རབ་ཏུ་སྟོན། །སེམས་མྱེད་ཡིད་མྱེད་སེམས་ཀྱི་ཡུལ་མྱེད་འོན་ཀྱང་འགྲོ་བ་ཀུན་ཏུ་དེ་དག་སྟོན། །ཁྱུ་མཆོག་བརྗོད་པའི་ཕ་རོལ་ཕྱིན་པ་དེ་དག་དབྱངས་གཅིག་རྣམ་པར་རྗོད་བྱེད་ཀྱང་། །འགྲོ་བ་དག་གི་སྒྲ་སྐད་ཇི་སྙེད་ཡོད་པ་དེ་དག་ཐམས་ཅད་རབ་ཏུ་བརྗོད། །ཉོན་མོངས་རྒྱུད་བྱུང་ལུས་དང་བྲལ་ཡང་སེམས་ཅན་རྣམས་ཀྱི་ལུས་ལ་དབང་བསྒྱུར་ཏེ། །བརྗོད་དུ་མྱེད་པའི་ཚུལ་གྱིས་ཞི་བ་རྟོགས་ཤིང་སྒྲ་རྣམས་ཐམས་ཅད་རབ་ཏུ་སྟོན། །དེ་དག་སེམས་ཀྱི་རང་བཞིན་ཞི་ཞིང་འོད་གསལ་ནམ་མཁའ་མཚུངས་པར་ཡང་དག་ཤེས། །འགྲོ་བ་ཀུན་ལ་བྱ་བ་རྣམ་པ་སྣ་ཚོགས་སྒོ་ནས་འཇིག་རྟེན་སྣ་ཚོགས་སྟོན། །དེ་དག་ལུས་རྣམས་གང་ལའང་གནས་པ་མྱེད་དེ་ལུས་ཀྱང་དེ་དག་སྟོན་པ་བྱེད། །འགྲོ་བ་ཐམས་ཅད་ཀྱི་ནི་སྐྱེ་བ་དག་དང་རྒྱུ་མཐུན་གནས་པ་ཇི་སྙེད་པ། །ཐམས་ཅད་ཀུན་ཏུ་སྐྱེ་བའི་ལུས་དང་ལྡན་ཡང་སྐྱེ་བ་དག་ལ་གནས་པ་མྱེད། །རང་གི་ལུས་ལ་མཁའ་འདྲ་དངོས་བྲལ་སེམས་ཅན་སེམས་ལ་སྣ་ཚོགས་རྣམ་པ་སྟེ། །མཁས་པ་ཀུན་ལ་དབང་བསྒྱུར་དེ་དག་ལུས་ནི་མཐའ་ཡས་ཀུན་ཏུ་སྟོན་བྱེད་ཅིང་། །མེ་ཏོག་དྲི་དང་བྱུག་པ་ཕྱེ་མ་སིལ་སྙན་གདུགས་དང་བ་དན་རྒྱལ་མཚན་རྣམས། །ཐམས་ཅད་མཁྱེན་ལ་མཆོད་པས་རྐང་གཉིས་གཙོ་བོ་འཇིག་རྟེན་མཆོག་ལ་མཆོད་བྱེད་ཅིང་། །མཁས་པ་བསམ་པ་ཐག་
པས་ལུས་ཀྱིས་འདུ་བྱེད་མཆོད་པ་དམ་པ་ཀུན་ཏུ་སྟོན། །མཁས་པ་དེ་དག་རྒྱལ་བ་ཞབས་ཀྱི་དྲུང་འཁོད་རྒྱལ་བ་ཐམས་ཅད་ཀྱི། །འཁོར་རྣམས་ཀུན་ན་སྣང་ཞིང་མཚུངས་མྱེད་དེ་དག་ཞུ་བ་ཀུན་ཀྱང་ཞུ་བ་བྱེད། །ཆོས་ཀྱི་དམ་པ་ཐོས་ནས་ཏིང་འཛིན་རེ་རེ་མཐའ་ཡས་སྒོ་ལྡན་ཐོབ་གྱུར་ཅིང་། །བློ་གྲོས་ལྡན་པ་དེ་སྙེད་རྣམ་པར་ལྡན་པ་སྟོན་པ་བྱེད་ཀྱང་ཟད་པ་མྱེད། །འགྲོ་བ་སྒྱུ་མ་ལྟ་བུར་རྟོགས་ནས་ཤེས་རབ་ཡེ་ཤེས་ཐབས་ཀྱི་ཕ་རོལ་ཕྱིན། །སྒྱུ་མ་ལྟ་བུའི་ཆོས་དང་གཟུགས་སྤོབས་མཐའ་ཡས་དང་བ་འགྲོ་བ་ཀུན་ལ་སྟོན། །སྣ་ཚོགས་གཟུགས་དང་སྒྲ་རྣམས་མཐའ་ཡས་ཤིན་ཏུ་རྒྱ་ཆེ་སེམས་ཀྱང་རབ་ཏུ་སྟོན། །འགྲོ་བ་ཐམས་ཅད་ལ་ནི་འདུ་ཤེས་དྲ་བ་འཇུག་པ་སྟོན་ཀྱང་གནས་པ་མྱེད། །འགྲོ་དོན་རྗེས་འགྲོ་དེ་དག་ལ་ལ་དག་ཏུ་ཐོག་མའི་སེམས་སུ་འགྲོ་ལ་སྟོན། །ལ་ལར་འགྲོ་བ་ཀུན་ལ་བྱང་ཆུབ་སྤྱོད་པ་མཐའ་ཡས་རྒྱ་ཆེན་དག་ཀྱང་སྟོན། །ལ་ལར་སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་བརྟན་དང་ཤེས་རབ་རྣམས། །ལ་ལར་ཚངས་པའི་ལམ་སྡུད་ཁ་ཅིག་ཏུ་ནི་སྤྱོད་པ་མཆོག་ཀྱང་རབ་ཏུ་སྟོན། །མཁས་པ་རྟོག་མྱེད་དེ་དག་ལ་ལར་སྤྱོད་པ་རྫོགས་ཤིང་བཟོད་པ་ཐོབ་པ་སྟོན། །ལ་ལར་སྐྱེ་བ་གཅིག་གིས་ཐོགས་པར་ངེས་ཤིང་ལ་ལར་རྒྱལ་བས་དབང་བསྐུར་བ། །ལ་ལར་ཉན་ཐོས་གཟུགས་སུ་གྱུར་ཅིང་ལ་ལ་དག་དུ་རང་རྒྱལ་གཟུགས་སུ་འགྱུར། །བྱེ་བ་ཁྲག་ཁྲིག་མང་པོའི་ཞིང་དུ་མྱ་ངན་འདའ་ཡང་སྤྱོད་ལས་ལྡོག་པ་མྱེད། །དེ་དག་ལ་ལར་ལྷ་དབང་བརྒྱ་བྱིན་ལྷ་དང་བཅས་པ་ལ་ལར་ཚངས་པར་འགྱུར། །དེ་དག་ལ་ལར་ལྷའི་བུ་མོ་བརྒྱས་བསྐོར་ལ་ལར་གཅིག་པུ་སྤྱོད་པར་སྟོན། །ལ་ལར་དགེ་སློང་རབ་ཏུ་ཞི་ཞིང་ཡིད་ཞི་ལ་ལར་རྒྱལ་པོ་དབང་ཕྱུག་འགྱུར། །ལ་ལར་ཆོས་ཀྱི་དྲ་བར་འཇུག་པའི་ཡེ་ཤེས་ཁྱུ་མཆོག་གཟུགས་ཀྱང་རབ་ཏུ་སྟོན། །ལ་ལར་བུད་མྱེད་སྒྱུ་རྩལ་ཕ་རོལ་རབ་ཕྱིན་ལ་ལར་དཀའ་ཐུབ་ཅན་དུ་འགྱུར། ། ལ་ལར་འདོད་པའི་ལོངས་སྤྱོད་རྒྱ་ཆེན་སྟོན་ཅིང་ལ་ལར་བསམ་གཏན་ཐུབ་པ་བྱེད། །ལ་ལར་མྱ་ངན་འདའ་དང་ཚེའི་ས་དང་ལ་ལར་
རྒན་དང་བྱིས་པར་སྟོན། །དེ་དག་སྤྱོད་པ་བསམས་ན་སྐྱེ་བོ་མོས་པར་འགྱུར་ཏེ་ཡིད་གཉིས་རྙེད་པར་འགྱུར། །ལ་ལར་ལྷ་དང་འགྲོགས་ཤིང་ལ་ལར་ཤི་འཕོ་ལ་ལར་མངལ་འགྲོ་གནས་པར་སྟོན། །ལ་ལར་མངལ་ཞུགས་ལ་ལར་རྣམ་པར་སངས་རྒྱས་ལ་ལར་འཁོར་ལོ་རབ་ཏུ་བསྐོར། །ལ་ལར་སྐྱེ་བ་ལ་ལར་མྱ་ངན་འདས་པ་ལ་ལར་བཟོ་ཡང་རབ་ཏུ་སློབ། །ལ་ལར་བུད་མྱེད་ཚོགས་ཀྱི་དབུས་གནས་ལ་ལར་ཏིང་འཛིན་ལ་ལར་མངོན་པར་འབྱུང་། །ལ་ལར་ཁྱུ་མཆོག་བྱང་ཆུབ་དམ་པར་སངས་རྒྱས་བྱང་ཆུབ་ཤིང་གི་དྲུང་ན་བཞུགས། །ལ་ལར་འཁོར་ལོ་རབ་ཏུ་བསྐོར་ཞིང་ལ་ལར་སྣ་ཚོགས་ཆོས་རྣམས་ཡོངས་སུ་ཚོལ། །ལ་ལར་སངས་རྒྱས་གྱུར་ཅིང་ཞིང་རྣམས་བྱེ་བ་བརྒྱར་ཁྱབ་འགྲོ་བར་སྟོན་བྱེད་ཀྱང་། །བྱང་ཆུབ་དོན་དུ་སྤྱོད་པ་དག་གི་ཚོགས་རྣམས་ལས་ཀྱང་ཕྱིར་ལྡོག་མ་ཡིན་ནོ། །བསྐལ་པའི་གྲངས་ལ་འཇུག་པའི་ཕ་རོལ་ཕྱིན་པས་བསྐལ་པ་བྱེ་བ་ཕྲག་བརྒྱ་དག །ཁྱུ་མཆོག་སེམས་གཅིག་ནང་སྟོན་སེམས་གཅིག་བསྐལ་པ་བརྒྱར་ཡང་དེ་བཞིན་སྟོན་པ་བྱེད། །འགྲོ་བ་ཐམས་ཅད་ལའང་རྟོག་དང་མྱི་རྟོག་པ་ཡི་ཡུལ་རྣམས་ཐམས་ཅད་སྟོན། །སྩོགས་པ་མྱེད་ཅིང་ཕྱོགས་ལ་གནས་མྱེད་སྤྱོད་པ་དེ་དག་ཀུན་ཀྱང་རབ་ཏུ་སྟོན། །གང་ཕྱིར་རྒྱལ་བ་ཉེ་རྒྱལ་དེ་དག་ཉི་ཙེའི་ཕྱོགས་མྱེད་ཀུན་ན་བཞུགས་པས་ན། །འགྲོ་བ་ཀུན་གྱི་རྒྱལ་བ་ཇི་སྙེད་པ་དག་ཐམས་ཅད་རྡུལ་གཅིག་སྟེང་དུ་མཐོང་། །སངས་རྒྱས་ཞིང་རྣམས་བསྒྲུབ་དང་སེམས་ཅན་ཡུལ་དང་ཆོས་ཀྱི་རྒྱུ་ཚུལ་རྣམས་ཀྱང་མཐོང་། །དེ་ལྟར་བརྩོན་པས་བསྐལ་པ་ཁྲག་ཁྲིག་བརྩོན་བྱེད་འོན་ཀྱང་ཆ་ཤས་ཟད་མི་འགྱུར། །དེ་ལྟར་འགྲོ་བ་ཀུན་གྱི་སེམས་ཅན་ཚུལ་རྣམས་མཐའ་ཡས་རྒྱ་ཆེ་རབ་ཏུ་ཤེས། །སེམས་ཅན་གཅིག་ལ་མཐའ་ཡས་ལུས་དང་རྒྱུ་དང་བྱེ་བ་ཁྲག་ཁྲིག་ཡོད་པ་རྣམས། །དེ་དག་འགྲོ་བ་གཅིག་དང་མ་ལུས་ཐམས་ཅད་དག་ལ་རྣམ་པ་ཀུན་ཏུ་སྟོན་པ་བྱེད། །བསླབ་པ་འདི་ཡི་ཕྱོགས་ལ་ཕ་རོལ་ཕྱིན་ཏེ་མ་བསླབས་རྣམས་ནི་སྟོན་པ་བྱེད། །དབང་པོ་རྣོན་
པོ་དང་ནི་འབྲིང་དང་གང་དག་དབང་པོ་རྟུལ་བའང་རབ་ཤེས་ནས། །འགྲོ་བར་སྐལ་བ་ཡོད་དང་སྐལ་བ་མེད་པའི་དབང་པོའི་འཁོར་ལོ་སྐོར་བ་བྱེད། །དབང་པོ་རེ་རེ་ལ་ཡང་དབང་པོ་ཐམས་ཅད་རྣམ་པ་ཕན་ཚུན་གནས་པ་དང་། །དབང་པོའི་དངོས་པོ་ཕྲ་བའི་ཚུལ་དང་གང་དག་དབང་པོ་བརྟན་པའང་རབ་ཏུ་ཤེས། །དེ་ལྟར་ཁམས་དང་མོས་དང་བསམ་པ་སྤྱོད་དང་ཉོན་མོངས་བག་ཆགས་རྣམས་ཀྱང་ཤེས། །སྔོན་གྱི་མཐའ་དང་ཕྱི་མའི་མཐའ་ཡི་སེམས་སྤྱོད་ད་ལྟར་བྱུང་བའང་དེ་བཞིན་ཏེ། །སེམས་ཅན་ཀུན་གྱི་སྤྱོད་པའི་ཕ་རོལ་ཕྱིན་ཀྱང་འོང་དང་འགྲོ་བ་ཡོད་མ་ཡིན། །མ་ནོར་སྤྱོད་པ་ཤེས་ནས་འགྲོ་བ་ཀུན་ལ་ཆོས་ཀྱི་དམ་པ་སྟོན་པ་བྱེད། །དེ་ལྟར་སེམས་ཀྱི་སེམས་སྤྱོད་སྣ་ཚོགས་ཀུན་ནས་ཉོན་མོངས་ཉོན་མོངས་མྱེད་པ་དག །སེམས་གཅིག་ལ་ནི་ཁོང་དུ་ཆུད་ནས་བྱང་ཆུབ་མཆོག་ཏུ་ཀུན་མཁྱེན་རྣམ་སངས་རྒྱས། །སེམས་ཀྱི་སྐད་ཅིག་གཅིག་གིས་འགྲོ་བ་རྣམས་ཕྱེ་རང་གི་ཤེས་པས་རྟོགས་གྱུར་ནས། །སེམས་ཀྱི་ཚུལ་ཤེས་སེམས་མྱེད་རབ་ཏུ་གཞོལ་བས་ཡེ་ཤེས་མཆོག་ལ་ཀུན་ཀྱང་འགོད། །རྫུ་འཕྲུལ་མཆོག་ཐོབ་ཡེ་ཤེས་ཁྱུ་མཆོག་མངོན་པར་ཤེས་པ་ཀུན་གྱིས་རབ་ཏུ་འཕགས། །སེམས་བསྐྱེད་གཅིག་གིས་ཁྲག་ཁྲིག་མཐའ་ཡས་ཞིང་དང་ཕྱོགས་རྣམས་ཐམས་ཅད་དུ་ཡང་འགྲོ། །དེ་ལྟར་ཡེ་ཤེས་དབང་བསྒྱུར་འགྲོ་ཞིང་བསྐལ་པ་བྱེ་བ་ཁྲག་ཁྲིག་ཟད་བྱེད་ཀྱང་། །སྒྲ་རྒྱུད་ཤིན་ཏུ་ཕྲ་བ་གཅིག་ལ་ཞུགས་པར་གནས་ལས་གར་ཡང་འཕོ་བ་མྱེད། །འཚོ་བའི་དོན་དུ་སྒྱུ་མཁན་གཟུགས་རྣམས་སྣ་ཚོགས་འགྲོ་བ་ཀུན་ལ་སྟོན་བྱེད་ཀྱང་། །སྒྱུ་མ་ཀུན་བཙལ་གཟུགས་སུ་མྱི་དམྱིགས་གཟུགས་ཡོད་མ་ཡིན་པར་ཡང་དམྱིགས་པ་མྱེད། །དེ་ལྟར་མཁས་པ་ཡེ་ཤེས་ཐབས་དང་ཤེས་རབ་རྒྱ་ཆེན་སྒྱུ་མར་ཞུགས་པ་རྣམས། །སྤྲུལ་པ་ཕུན་སུམ་ཚོགས་པས་འཇིག་རྟེན་ཕལ་ཆེན་ཁྱབ་པར་བྱས་ཤེས་རབ་ཏུ་སྟོན། །ཉི་མ་ཟླ་བ་མཁའ་ལ་རྒྱུ་ཞིང་མཛེས་ལ་ཤིན་ཏུ་འཕགས་པ་རྣམས། །མ་རྙོགས་ཆུ་རྣམས་ཇི་སྙེད་དག་ཏུ་སྣང་ཡང་དེ་ནི་ཆུ་དང་འདྲེས་མ་ཡིན། །དེ་ལྟར་ཆོས་ཉིད་དག་པའི་དཀྱིལ་འཁོར་མཆོག་ལ་ཤེས་
པས་ཤིན་ཏུ་འཕགས་པ་རྣམས། །འགྲོ་བ་དག་པའི་སེམས་ཀྱི་ཡུལ་ལ་སྣང་ཡང་འགྲོ་བ་དག་དང་མཛེས་མ་ཡིན། །ལ་ལ་གཉིད་ལོག་རྨྱི་ལམ་དག་ན་བྱ་བ་རྣམ་པ་སྣ་ཚོགས་ཐ་དད་བྱེད། །ལོ་ནི་བྱེ་བ་ཁྲག་ཁྲིག་མང་པོ་ཟད་པར་རྨིས་ཀྱང་མཚན་མོ་དེ་མ་ཟད། །དེ་ལྟར་ཆོས་ཉིད་རང་བཞིན་མཚུངས་པར་རྗེས་རྟོགས་བྱ་བ་སྣ་ཚོགས་ཀུན་སྟོན་ཏེ། །སྐད་ཅིག་གཅིག་ལ་བསྐལ་པ་བྱེ་བ་ཟད་བྱེད་དེ་དག་ཡེ་ཤེས་ཟད་མྱི་འགྱུར། །རི་ཡི་དབང་པོའི་རི་སུལ་གནས་པ་འཇིག་རྟེན་དག་དང་མཉམ་དུ་ཐོས་པའི་སྒྲ། །ཀུན་ནས་སྒྲའི་སྒྲ་བརྙན་དེ་དང་འདྲ་བར་བརྗོད་ཀྱང་རྟོག་ཅིང་གཡོ་བ་མྱེད། །དེ་བཞིན་ཆོས་ཀྱི་རང་བཞིན་ཤེས་པའི་ཁྱུ་མཆོག་བྱང་ཆུབ་སེམས་དཔའ་མཁས་པ་དག །རྟོག་པ་མྱེད་པར་སེམས་ཅན་སྒྲ་རྣམས་ཇི་སྙེད་པར་ནི་ཆོས་དང་སྤྱོད་པ་སྟོན། །དཔྱིད་ཟླ་དག་གི་སྨྱིག་རྒྱུ་གཡོས་ལ་ཇི་ལྟར་སེམས་ཅན་ཆུར་ནི་འདུ་ཤེས་ནས། །དེ་ནས་ཆུ་རྙེད་མྱི་འགྱུར་བཏུང་དུ་མྱེད་ཅིང་ཇེ་བས་ཇེ་སྐོམ་རྣམ་འཕེལ་བ། །དེ་ལྟར་མཁས་པ་ཐར་ལ་ཞུགས་པ་སེམས་ཅན་དག་གི་ཉོན་མོངས་གཡོ་བ་རྣམས། །ཤེས་པས་རྟོགས་ནས་སེམས་ཅན་འདུ་ཤེས་བྱ་མྱེད་ཕྱིར་ཞིང་བྱ་བ་རྣམ་པར་འཕེལ། །གཟུགས་ནི་དབུ་བ་ལྟ་བུར་ཁྱུ་མཆོག་སྟོན་ཏེ་ཚོར་བ་ཆུའི་ཆུ་བུར་འདྲ། །འདུ་ཤེས་ཐམས་ཅད་སྨྱིག་རྒྱུ་ལྟ་བུར་རག་ལས་འདུ་བྱེད་ཆུ་སྐྱེས་ཤིང་དང་འདྲ། །སེམས་ནི་སྒྱུ་འདྲ་བསྒྲུབ་བྱ་སྐྱེད་བྱེད་དེ་བཞིན་བྱ་བ་སྣ་ཚོགས་རབ་ཏུ་སྟོན། །ཕུང་པོ་དགོད་པ་སྟོན་ཀྱང་དབང་བསྒྱུར་དག་ནི་དེ་ལ་གནས་པ་མྱེད། །སྐྱེ་མཆེད་སྟོང་བའི་རང་བཞིན་དབང་མྱེད་འཁྲུལ་འཁོར་བྱ་བ་ཀུན་ཏུ་འབྱིན་བྱེད་དང་། །ཁམས་ནི་ཆོས་ཀྱི་དབྱིངས་མཚུངས་དངོས་པོ་དག་དང་བྲལ་བར་འགྲོ་བ་རྣམས་ལ་སྟོན། །དམ་པའི་དོན་ཚུལ་ཞི་བ་ལས་ནི་བདེན་པ་སྣ་ཚོགས་རྣམས་ཀྱང་རབ་ཏུ་སྟོན། །དེ་ལྟར་དེ་དག་ཆོས་ཚུལ་རྣམ་པར་དགོད་པ་སྟོན་པ་བྱེད་ཀྱང་གནས་པ་མྱེད། །འོང་བ་མྱེད་ཅིང་ཕྱོགས་སུ་འགྲོ་བ་མྱེད་ལ་རྒྱུད་དུ་གནས་མྱེད་པའི། །ཉོན་མོངས་རྒྱུ་ལས་བྱུང་བའི་ལས་དང་ལས་ལས་སྡུག་བསྔལ་དེ་ལྟར་ལམ་གསུམ་དུ། །རྐྱེན་ལ་རག་ལས་འབྱུང་བ་རྣམས་དང་ཡོད་དང་
མྱེད་ལས་རབ་ཏུ་འདས་པ་ཡི། །ཡང་དག་དོན་དམ་དབུ་མའི་ལམ་ནི་དངོས་པོ་མྱེད་ལ་གནས་པ་རབ་ཏུ་སྟོན། །སྐད་ཅིག་གཅིག་ལ་དུས་གསུམ་ཁོང་དུ་ཆུད་ཀྱང་སྐད་ཅིག་སྣ་ཚོགས་རྣམས་ཀྱང་བསྟན། །འདོད་དང་གཟུགས་མྱེད་ཁམས་ཀྱི་ཡུལ་དང་བྱ་བ་སྣ་ཚོགས་སྟོན་པ་བྱེད། །སྡོམ་པ་གསུམ་གྱི་སྤྱོད་དང་རབ་ཏུ་ལྡན་ཞིང་ཐར་པ་གསུམ་ཡང་རབ་ཏུ་སྟོན། །ཐམས་ཅད་མཁྱེན་པ་ཉིད་དུ་གཅིག་ལ་ཐེག་པ་གསུམ་དུ་རྣམ་པར་དགོད་པ་དེ་བཞིན་སྟོན། །གནས་དང་གནས་མ་ཡིན་པ་རབ་ཏུ་དབྱེ་བའི་ཆོས་དང་དབང་པོ་ཕ་རོལ་ཕྱིན། །ཁམས་དང་མོས་པ་དག་དང་ཉོན་མོངས་རྣམ་འབྱེད་ཀུན་ཏུ་འགྲོ་བ་ཐོབ་གྱུར་པ། །མྱིག་གི་ཡུལ་གྱུར་སྔོན་གྱི་གནས་པ་དྲན་ཞིང་ཉོན་མོངས་ཞི་བར་མཁས་པ་དག །སངས་རྒྱས་སྟོབས་བཅུ་དག་གིས་ཡེ་ཤེས་ཤིན་ཏུ་ཡངས་ཀྱང་སྟོབས་ལ་དམྱིགས་པ་མྱེད། །སངས་རྒྱས་ཐམས་ཅད་རྗེས་སུ་དཔོག་སྟོང་འགྲོ་བ་ཀུན་ཏུ་མངོན་སུམ་ཆོས་བཞེད་དེ། །ཉོན་མོངས་ཟག་པ་ལྷན་ཅིག་སྐྱེས་པ་མྱི་མངའ་བྱང་བའང་བརྙེས་པར་འགྱུར་བ་མྱེད། །འབྱུང་བས་ཐུགས་སུ་ཆུད་པའི་ཡེ་ཤེས་རྒྱ་ཆེན་དེས་ནི་འགྲོ་བ་འདོན་པ་མཛད། །འདི་ཡི་གནས་ལ་རྒྱལ་སྲས་འཇིགས་པ་མྱེད་ཅིང་འོན་ཀྱང་ཞི་བར་སྤྱོད་པ་མྱེད། །འཁྲུལ་པ་མྱི་མངའ་ལམ་ལས་གཡོ་བའང་མྱི་མངའ་དགོངས་པ་ཉམས་པའང་མི་མངའ་སྟེ། །མོས་དང་བརྩོན་འགྲུས་ཏིང་འཛིན་ཤེས་རབ་རྣམ་པར་འབྱེད་པ་ཡེ་ཤེས་གང་དུའང་ཉམས་པ་མྱེད། །ཐམས་ཅད་མཁྱེན་མཛད་སྡོམ་པ་གསུམ་མཛད་དུས་གསུམ་ཀུན་ལ་མངོན་སུམ་མཁྱེན་མངའ་བ། །འགྲོ་བ་ཀུན་གྱིས་མ་ཐོབ་བྱམས་པའི་ཆོས་ཉིད་མྱི་འཕྲོགས་ཆགས་པ་མྱེད་པ་རྙེས་པ། །ཆོས་སྒོ་གང་དག་གིས་ནི་སྤྱོད་པ་འདི་དག་རབ་ཏུ་ཐོབ་པ་སྨྲ་བའི་མཆོག །དེ་དག་ཡོན་ཏན་མང་པོ་དོན་གྱིས་བརྒྱན་པའི་ཕྱོགས་ཙམ་བདག་གིས་བརྗོད་པར་བྱ། །དེ་དག་སྤྱོད་པ་བསྐལ་པ་ཁྲག་ཁྲིག་དག་ཏུ་བརྗོད་ཀྱང་ཟད་པར་མྱི་ནུས་ཏེ། །འོན་ཀྱང་ཇི་ལྟར་ས་ལས་རྡུལ་འདྲ་ཡེ་ཤེས་སྤྱོད་པ་ཕྱོགས་ཙམ་བརྗོད་པར་བྱ། །སངས་རྒྱས་ཡེ་ཤེས་རྟེན་ལྡན་
བསམ་པ་ཐོབ་པས་ངོ་མཚར་འདུ་ཤེས་གནས་པ་རྣམས། །སྤྱོད་པ་མཆོག་དང་ལྡན་ཞིང་བྱམས་པའི་རྗེས་སོང་བརྩོན་འགྲུས་བརྟན་པས་རྣམ་གནོན་ཅིང་། །ཚུལ་ཁྲིམས་མྱི་གཡོ་དབུགས་ཕྱིན་དེ་དག་འགྲོ་བ་ཐམས་ཅད་ཡོངས་སུ་སྨིན་པར་བྱེད། །ལུང་བསྟན་རབ་ཏུ་ཐོབ་ནས་རྒྱལ་སྲས་རྣམས་ཀྱི་སྤྱོད་པ་ཚུལ་བཞིན་ཐོབ་པར་བྱེད། །སངས་རྒྱས་ཡོན་ཏན་དག་ལ་ཞུགས་ཀྱང་སེམས་ཅན་སེམས་དང་ཞིང་ལ་སེམས་པ་བྱེད། །བསྐལ་པའི་དུས་ལ་འཇུག་པའི་ཡེ་ཤེས་ལྡན་ཞིང་མཁས་པ་སྐྱོ་བའི་འདུ་ཤེས་མྱེད། །གཟུངས་ཀྱི་ཚུལ་དང་ཡང་དག་ཐ་དད་སྟོབས་རྣམས་ཐོབ་ཅིང་ཡང་དག་དོན་གྱིས་རྒལ། །བསྟན་པ་མཚུངས་མྱེད་སེམས་ཀྱིས་མཁས་པ་བྱང་ཆུབ་ཞི་བ་རྣམ་པར་འཚང་ཡང་རྒྱ། །སེམས་ཀྱི་སྤྱོད་པ་ཐམས་ཅད་བཟང་པོའི་ཡོན་ཏན་སྤྱོད་པའི་མཆོག་ཏུ་སྨོན་པ་བྱེད། །སྙིང་རྗེའི་རྐྱེན་དང་བྱམས་པ་མཆོག་སྟེན་བྱང་ཆུབ་དམ་པ་སྤྱོད་པར་བྱེད་དང་ལྡན། །བརྩོན་པས་ཕ་རོལ་ཕྱིན་རྟོགས་རབ་ཏུ་མཁས་ཤིང་སྐྱོ་བའི་ཕ་རོལ་ཕྱིན་གྱུར་པས། །ཁྱུ་མཆོག་མོས་དང་རབ་ཏུ་རྟོགས་པའི་སྟོབས་ཐོབ་བྱང་ཆུབ་དམ་པ་མངོན་འཚང་རྒྱ། །མཉམ་པ་ཉིད་ཀྱིས་མཉམ་པ་ཐོབ་ཅིང་ཡེ་ཤེས་ཚུལ་གྱིས་ཆོས་མཆོག་སྟོན་བྱེད་པ། །ཡོན་ཏན་ཐོབ་བྱེད་སྤོབས་དང་ལྡན་པ་དེ་དག་ཆོས་ཀྱི་དབང་ཕྱུག་མཆོག་ཏུ་འགྱུར། །དབང་ལ་གནས་ཀྱང་གནས་པ་མྱེད་པས་མཉམ་པ་མྱེད་པའི་སེམས་ཀྱི་འབྲུག་སྒྲ་སྒྲོག །ཡེ་ཤེས་མཆོག་དང་དེ་བཞིན་སྤྲུལ་པ་སྒྲུབ་ཅིང་བྱང་ཆུབ་ཉེ་བར་འགྲོ། །མཁས་པ་དེ་དག་བསྐལ་པ་འབྱམ་ཀླས་བྱིན་རླབས་ཤེས་པས་དབུགས་ཕྱིན་རབ་ཏུ་འཐོབ། །ཟབ་ལ་གནས་པས་བརྟན་པར་འགྲོ་ན་གནས་ཤིང་ནེམ་ནུར་བསྩལ་བས་མཁས་པ་རྣམས། །ཡེ་ཤེས་བསམ་གྱིས་མི་ཁྱབ་ཆོས་ཀྱི་དགོངས་པ་མཁས་ཤིང་རྣམ་ཕྱེ་ཕ་རོལ་ཕྱིན། །སྙོམས་པར་འཇུག་པའི་ཡེ་ཤེས་ཡུལ་ལ་ཞུགས་ནས་ཐམས་ཅད་མཁྱེན་པར་འཚང་ཡང་རྒྱ། །ཡེ་ཤེས་རྣམ་ཐར་ཀུན་གྱི་ཕ་རོལ་ཕྱིན་ཅིང་མངོན་པར་ཤེས་པས་རྣམ་པར་རྩེན། །རིག་པའི་སྣང་
ལྡན་རྣམ་གྲོལ་ཉོན་མོངས་བྲལ་བས་འགྲོ་ལ་སྐྱེད་མོས་ཚལ་དང་འདྲ། །གང་ལ་དཀར་བའི་སྤྱོད་པའི་གཞལ་མྱེད་ཁང་མཛེས་སྣ་ཚོགས་སྤྱོད་པ་སྟོན་པ་པོ། །འགྲོ་བ་ཀུན་ལ་རྒྱན་རྣམས་དུ་མ་རབ་ཏུ་སྟོན་ཀྱང་སེམས་ལས་གཡོ་བ་མྱེད། །བསམ་པ་ཤིན་ཏུ་ཤེས་པས་བརྟན་པ་རབ་ཏུ་མཁས་ཤིང་ཕ་རོལ་ཕྱིན་གྱུར་པས། །མཁས་པ་དག་ནི་དག་ཅིང་སྦྱངས་པའི་བྱང་ཆུབ་ཕྱག་རྒྱ་སྣང་བའི་ཡེ་ཤེས་ཀྱིས། །འགྲོ་བ་དག་དང་མྱི་མཚུངས་ཞུམ་མྱེད་ཁྱུ་མཆོག་ལྷག་པའི་བསམ་པ་རི་བོ་འདྲ། །ཡེ་ཤེས་རྒྱ་མཚོ་འདྲ་དང་ཡོན་ཏན་མྱི་ཟད་དོན་དུ་སྤྱོད་པ་ཆེན་པོ་སྤྱོད། །དེ་དག་རིན་ཆེན་འདྲ་བའི་གནས་ལ་རྡོ་རྗེ་ལྟ་བུའི་གོ་ཆ་བགོས་པས་གནས། །ཤིན་ཏུ་རྒྱ་ཆེན་རྩོམ་ལ་རབ་ཏུ་མཁས་ཤིང་འགྲོ་བ་ཀུན་ན་ཐུབ་མྱེད་པ། །བྱང་ཆུབ་མཆོག་ཏུ་ལུང་བསྟན་སྐྱོན་མྱེད་ཁོང་དུ་ཆུད་པའི་རྒྱ་ཆེན་སེམས་ལ་གནས། །སངས་རྒྱས་གཏེར་མཆོག་མི་ཟད་ཐོབ་ནས་ཐམས་ཅད་མཁྱེན་པ་ཉིད་དུ་འཚང་རྒྱའོ། །རྟག་ཏུ་ཀུན་རྫོབ་ཤེས་པས་དབང་འགྱུར་རྣམ་པར་འཕྲུལ་པ་རྣམས་ལ་མཁས་པས་ན། །ཞིང་རྣམས་ཀུན་དང་ཆོས་ཀྱི་ཡུལ་ལ་རྣམ་པར་འཕྲུལ་བའི་ཡེ་ཤེས་རྒྱུད་ལ་གནས། །གནས་དང་སྨོན་ལམ་སྤྱོད་ཡུལ་ཡེ་ཤེས་རྣམ་པར་འཕྲུལ་པ་ལ་ཡང་དེ་བཞིན་ཏེ། །འགྲོ་བ་དག་ལ་རྣམ་པར་རྩེ་བ་བྱེ་བ་ཁྲག་ཁྲིག་དུ་མ་མང་པོ་སྟོན། །མངོན་པར་ཤེས་པའི་རྫུ་འཕྲུལ་སྟོབས་ཀྱིས་རྣམ་པར་འཕྲུལ་ཞིང་ངེས་པར་རྣམ་པར་རྩེ། །ཁྱུ་མཆོག་དེ་དག་སངས་རྒྱས་ཡུལ་ལ་སྟོབས་ཐོབ་འགྲོ་བ་ཀུན་གྱིས་ཐུབ་པ་མྱེད། །མཁས་པ་འཇིགས་པ་མྱེད་དང་བག་ཚ་མྱེད་དང་མ་འདྲེས་རྣམས་ཀྱིས་ཤིན་ཏུ་བརྒྱན། །སངས་རྒྱས་སྲས་དག་ལས་རྣམས་ཐམས་ཅད་བྱེད་ཅིང་ཤིན་ཏུ་མཛེས་པའི་ལུས་དང་ལྡན། །དེ་དག་ལུས་ཀྱི་ལས་ཀྱི་དངོས་པོ་ཤིན་ཏུ་རྒྱ་ཆེ་དག་ཀྱང་དག་ཅིང་དགེ །དེ་ཡང་འབྱིན་པའི་ཚེ་ན་རྒྱལ་བས་བྱིན་གྱིས་བརླབས་ཤིང་ལས་ནི་མཆོག་ཀྱང་བྱེད། །དམ་པ་དེ་དག་སེམས་བསྐྱེད་གཅིག་ལ་སེམས་རྒྱས་བྱེད་པའི་སེམས་ཀྱང་རབ་ཏུ་སྟོན། །རྒྱལ་
བའི་དབང་པོ་ཐོབ་པས་རྟག་ཏུ་དབང་པོའི་ཏིང་འཛིན་དབང་ལ་རབ་ཏུ་གནས། །བསམ་པ་དག་ཅིང་གཡོ་སྒྱུ་རྣམས་དང་བྲལ་ཏེ་ལྷག་པའི་བསམ་པ་མངོན་སུམ་གྱུར། །མོས་པའི་འཇུག་པ་རྣམ་པ་སྣ་ཚོགས་ཐ་དད་འགྲོ་བ་དག་ལ་རབ་ཏུ་སྟོན། །བག་ཆགས་ཐམས་ཅད་སྤངས་ནས་སྤྱོད་པ་དམ་པ་རབ་ཏུ་འཛིན། །ནན་ཏན་བྱ་བ་གྲུབ་པའི་ཡེ་ཤེས་མཁས་པས་ཐམས་ཅད་མཁྱེན་པ་འཚང་ཡང་རྒྱ། །བསམ་པ་རྣམ་པར་སྤངས་ནས་དེ་དག་སྐྱོན་མེད་གནས་པ་ཞི་བའི་མཆོག་ཀྱང་ཐོབ། །མཁས་པ་འདི་ལམ་ཤིན་ཏུ་བསླབས་པ་དེ་དག་མིང་ནི་ཡོན་ཏན་སྒོ་ནས་གྲགས། །མཐའ་ཡས་སེམས་ཀྱི་ཡུལ་ལྡན་གནས་པ་མྱེད་པར་ལམ་རྣམས་ཡང་དུ་སྒོམ་པ་བྱེད། །ཡེ་ཤེས་ཚུལ་ལ་གནས་ཤིང་འགྲོ་བ་རྣམས་ལ་ལམ་གྱི་རྒྱན་རྣམས་ཤིན་ཏུ་སྟོན། །སྤྱོད་པ་ལག་པ་ལྟ་བུ་དགའ་དང་ལྡན་པ་ལྟོ་ཡིན་སྙིང་པོ་ཡེ་ཤེས་མཆོག །སྙིང་ནི་རྡོ་རྗེ་ལྟ་བུ་སྙིང་རྗེའི་གོ་བ་གོས་ཡེ་ཤེས་གདབ་པའི་མཚོན་ཆ་ཡིན། །ཤེས་རབ་མགོ་སྟེ་ཆོས་རྟོགས་མྱིག་ཡིན་བྱང་ཆུབ་སྤྱོད་པ་ཡང་ནི་རྣ་བ་ཡིན། །ཚུལ་ཁྲིམས་དག་ཅིང་ཉོན་མོངས་མྱེད་ལ་གཙང་སྟེ་མུན་པ་ཞི་བྱེད་སྣ་ཡིན་ཏེ། །སྤོབས་པ་ལྕེ་ཡིན་ལུས་ནི་རིག་པ་ཡིན་ཏེ་སེམས་ནི་ཡེ་ཤེས་དམ་པ་ཡིན། །སྤྱོད་པ་རྒྱུ་བ་ཡིན་ཏེ་བྱང་ཆུབ་ཤིང་གནས་སེང་གེའི་ཁྲི་ནི་འདུག་པ་ཡིན། །ཚངས་པའི་ལམ་རྣམས་དག་ནི་ལམ་ཡིན་སྟོང་པ་ཆགས་མྱེད་དམ་པ་སྤྱོད་ཡུལ་ལོ། །གང་གི་དེ་དག་སྣང་བར་འགྱུར་བའི་སྣང་བ་བདེ་བར་གཤེགས་ཀྱི་ཡེ་ཤེས་ཡུལ། །སེམས་ཅན་སྤྱོད་ལ་རྣམ་པར་ལྟ་བ་ཡེ་ཤེས་མཆོག་སྟེ་རྣམ་པ་སྣ་ཚོགས་བསྒྱིངས། །སེམས་ཅན་དབེན་ཞིང་ཆགས་དང་བྲལ་བའི་སྦྱིན་པ་བསྙེམས་པ་མྱེད་པའི་ཚུལ་ཁྲིམས་དང་། །བཟོད་པ་མི་འཁྲུག་བརྩོན་འགྲུས་མྱི་ལྡོག་དབང་བསྒྱུར་བ་ནི་བསམ་གཏན་དམ་པ་ཡིན། །རྒྱུ་བ་མྱེད་ཅིང་ནམ་མཁའ་འདྲ་བ་ཤེས་རབ་བྱམས་པ་སེམས་ཅན་རྣམ་པར་འདྲེན། །སྐྱོ་མེད་སྙིང་རྗེ་རྣམ་དག་ཆོས་ནི་དགའ་བ་ཉོན་མོངས་གནས་ལས་བཏང་ཡང་སྙོམས། །དོན་ནི་ཞི་བ་ཆོས་ཀྱི་ཡུལ་ལ་ཉེ་བར་འགྲོ་བ་བསོད་ནམས་འགྲོ་ལ་བསྔོས། །ཡེ་ཤེས་
ཚོགས་ནི་རལ་གྱི་རྣོན་པོ་ལྟ་བུ་སྣང་བ་ཆེན་པོ་རིག་པ་སྟེ། །འགྲོ་བ་རྣམས་ལ་ཐོས་པ་སྟོན་པས་མི་ངོམས་བསྐལ་པར་འདྲེན་ཀྱང་འཇིགས་པ་མྱེད། །ནན་ཏན་བྱེད་ལ་གནས་ཏེ་བདུད་རྣམས་བཏུལ་ནས་བདུད་ཀྱི་ལམ་ཡང་རབ་ཏུ་བཅད། །རྒྱལ་བ་རྣམས་ཀྱི་འཕྲིན་ལས་གང་ཡིན་ཡེ་ཤེས་སྤྱོད་དང་ལྷག་པའི་བསམ་པས་འཛིན། །ང་རྒྱལ་ལས་རྣམས་རྣམ་པར་སྤངས་ཏེ་རྟག་ཏུ་ཡེ་ཤེས་ཀྱིའང་བྱ་བ་བྱེད། །བདུད་རྣམས་བྱིན་གྱི་རླབས་བཅོམ་མཁས་པ་དེ་དག་སངས་རྒྱས་བྱིན་གྱི་རླབས་ཀྱིས་འཕགས། །ཆོས་ཀྱི་བྱིན་གྱི་རླབས་ཐོབ་བློ་གྲོས་ཆེན་པོ་འཆང་བ་ལྷ་ཡི་གནས་སུ་འདོང་། །ལྷ་རྣམས་བྱས་ཏེ་འཆི་འཕོས་སོང་ནས་མཆོག་གི་མངལ་ནི་ཤིན་ཏུ་ཕྲ་བར་འགྲོ། །སྐྱེ་བ་མཆོག་ནི་ཉེ་བར་བསྟན་ནས་མཆོག་གི་གོམ་པ་བདུན་ནི་འདོར་བ་བྱེད། །མཁས་པ་དེ་དག་སེམས་ཅན་ཀུན་ལ་བཟོ་དང་སྤྱོད་དང་བཙུན་མོའི་འཁོར་ཀྱང་སྟོན། །ཆགས་པ་མྱེད་པར་མངོན་པར་བྱུང་ནས་བྱང་ཆུབ་ཤིང་དྲུང་ཆོས་ཀྱི་རྒྱན་ཀྱང་བྱེད། །སྟོང་པའི་བསྟན་ལས་འོད་ཟེར་དྲ་བ་ཡངས་པ་བཀྱེ་ཞིང་ཡང་དག་བསྐུལ་བ་བྱེད། །བདུད་རྣམས་བཏུལ་ཏེ་བྱང་ཆུབ་གོ་འཕང་སངས་རྒྱས་ཆོས་ཀྱི་འཁོར་ལོ་རབ་ཏུ་སྐོར། །སངས་རྒྱས་ས་ཡང་རབ་ཏུ་བསྟན་ནས་འདྲེན་པ་དེ་དག་མཚུངས་པ་མྱེད་པར་བཞུད། །གང་གིས་མཁས་པ་བསྐལ་པ་བྱེ་བར་རྣམ་པར་རྩེ་ཞིང་ཡང་དག་བྱུང་གྱུར་ནས། །སེམས་ཅན་བྱེ་བ་ཁྲག་ཁྲིག་སྟོང་ཕྲག་དུ་མ་སངས་རྒྱས་ཡོན་ཏན་རབ་འགོད་ཀྱང་། །རྣམ་པ་ཀུན་ཏུ་སེམས་ཅན་མྱི་གནས་ཆོས་ལ་མ་ཡིན་སྤྱོད་ལམ་ཡིན་པའི། །དེ་དག་གི་ནི་སྤྱོད་པ་འདི་འདྲ་མཐའ་ཡས་ཤིན་ཏུ་རྒྱ་ཆེན་མདོར་བསྟན་ཏོ། །དེ་འདྲའི་སྤྱོད་དང་ལྡན་པའི་ཡེ་ཤེས་ཁྱུ་མཆོག་རྫུ་འཕྲུལ་དག་གིས་རྣམ་པར་རྩེ། །ཞིང་རྣམས་བྱེ་བ་སྟོང་ཡང་སྐྲ་རྩེ་གཅིག་ལ་བསྐལ་པ་ཁྲག་ཁྲིག་བརྒྱར་འཛིན་ཏེ། །ལག་ཏུ་ཁྱེར་ཏེ་ཞིང་རྣམས་བྱེ་བར་འགྲོ་ཡང་ལུས་ལ་ངལ་དུབ་གང་ཡང་མྱེད། །མཁས་པས་ཁྱེར་ནས་ཇི་ལྟའི་གནས་སུ་བཀོད་ཀྱང་འགྲོ་བ་དག་ལ་གནོད་པ་མྱེད། །འཇིག་རྟེན་མཁྱེན་པའི་ཞིང་
གི་རྒྱན་རྣམས་ཇི་སྙེད་རྣམ་པ་ཐ་དད་བསྟན་པ་དག །ཀུན་ཀྱང་བ་སྤུ་གཅིག་གི་བུ་གར་ཁྱུ་མཆོག་དེ་དག་ཡང་དག་རབ་ཏུ་སྟོན། །མཁས་པ་བ་སྤུའི་བུ་གར་རྒྱ་མཚོའི་ཆུ་རྣམས་མ་ལུས་ཁོང་ཆུད་རབ་སྟོན་ཀྱང་། །འཕེལ་ཞིང་འགྲི་བ་མྱེད་འགྲོ་བ་དག་ལ་གནོད་པར་འགྱུར་མྱེད་བྱ་བ་དེ་ཡང་སྟོན། །ཁོར་ཡུག་ཁྲག་ཁྲིག་ཤིན་ཏུ་ཕྲ་བའི་རྡུལ་བྱས་ལག་གིས་བསྡུས་ཁྱེར་ཞིང་། །ཞིང་རྣམས་ཁྲག་ཁྲིག་བྱེ་མ་སྙེད་དུ་འདོར་བྱེད་གཅིག་ཏུ་གཉིས་ཀྱང་གཞོག་མི་བྱེད། །ཞིང་རྣམས་དེ་དག་རྡུལ་དུ་བྱས་ཏེ་དེ་བཞིན་གཞན་ཡང་རྣམ་པར་འཇིག་བྱེད་དེ། །དེ་འདྲའི་རྗེས་སུ་དཔག་པ་ཟད་པར་གྱུར་ཀྱང་འཇུག་པ་དེ་དག་མི་ཟད་དོ། །འཇིག་རྟེན་ཀུན་གྱི་ཉི་མ་ཟླ་བ་སྐར་མ་གང་དག་སྟོང་རྣམས་ཇི་སྙེད་དང་། །གང་ཡང་ནོར་བུའི་འོད་དང་མྱེ་ཡི་འོད་དང་གང་ན་གང་རྣམས་ལྷ་དབང་འོད། །མང་པོ་དེ་དག་རབ་ཏུ་འདས་པའི་འོད་ཟེར་ཁྲག་ཁྲིག་སྤུ་གཅིག་ཁུང་ནས་འགྱེད། །འཇིག་རྟེན་ཀུན་གྱི་ངན་སོང་སྡུག་བསྔལ་ཞི་བར་བྱེད་ཅིང་ཆོས་ཀྱི་དམ་པ་སྟོན། །འགྲོ་བ་མ་ལུས་སྒྲ་ཡི་རྣམ་པ་སྣ་ཚོགས་སྐད་རྣམས་ཐམས་ཅད་ཇི་སྙེད་པ། །ཁྱུ་མཆོག་དེ་དག་ཚིག་གཅིག་རབ་ཏུ་བརྗོད་པས་སྒྲ་རྣམས་ཐམས་ཅད་ཚང་བར་བརྗོད། །སྲོག་ཆགས་བྱེ་བ་རྣམས་ཀྱིས་ཡིད་དུ་འོང་བའི་སྒྲ་ཐོས་དགའ་ཞིང་མགུ་བར་འགྱུར། །རྒྱལ་བས་བསྟན་པའི་ཆོས་ཀྱི་རྣམ་པ་ཇི་སྙེད་ཐམས་ཅད་དེ་ལས་ཐོས་པར་འགྱུར། །གང་ཡང་ཇི་སྙེད་འདས་པའི་བསྐལ་པ་ཡོད་པ་དེ་དག་མ་འོངས་བསྐལ་པར་སྟོན། གང་ཡང་མ་འོངས་པ་དང་ད་ལྟར་བྱུང་བ་ཇི་སྙེད་དེ་དག་འདས་པར་སྟོན། །ཁྱུ་མཆོག་དག་ནི་ཞིང་རྣམས་འཚིག་དང་གནས་པ་རྣམ་པ་ཐ་དད་སྟོན་པར་བྱེད། །འགྲོ་བ་ཇི་སྙེད་ཐམས་ཅད་མཁས་པ་དེ་དག་སྐྲ་རྩེ་གཅིག་ལ་རབ་ཏུ་འགོད། །འདས་དང་མ་བྱོན་པ་དང་ཕྱོགས་བཅུ་ཀུན་ན་བཞུགས་པའི་རྒྱལ་བ་ཇི་སྙེད་པ། །དེ་དག་ཐམས་ཅད་རང་གི་ལུས་ལས་མ་ནོར་དབང་བསྒྱུར་རྣམ་པར་འཕྲུལ་པ་སྟོན། །སྤྲུལ་པའི་བྱིན་གྱི་རླབས་ལ་ཤེས་པའི་མཁས་པ་དེ་དག་འགྲོ་བ་ཇི་སྙེད་སེམས། །
དེ་སྙེད་ལུས་རྣམས་རྡུལ་དང་བྲལ་བ་སྟོན་ཀྱང་ལུས་ལ་གནས་པ་གང་ཡང་མྱེད། །ལམ་རྒྱུད་དྲུག་པོ་གང་རྣམས་ཇི་སྙེད་ཡོད་པའི་འགྲོ་བ་ཀུན་གྱི་ལུས་བསྡུས་ཤིང་། །བརྒྱ་བྱིན་ཚངས་པ་འཇིག་རྟེན་མགོན་པོ་རྣམས་དང་དེ་བཞིན་ལྷ་དང་མྱི་ཡི་རྣམས། །གང་ཡང་ཉན་ཐོས་རང་རྒྱལ་རྣམས་ལ་དད་ཅིང་སངས་རྒྱས་སྐུ་ལ་མོས་པ་ལ། །སངས་རྒྱས་བྱང་ཆུབ་འགྲུབ་པའི་སྤྱོད་པ་དག་དང་ཐམས་ཅད་མཁྱེན་པའི་སྤྱོད་པ་སྟོན། །འགྲོ་བ་ཀུན་གྱི་འདུ་ཤེས་དྲ་བ་རབ་དང་འབྲིང་དང་ཐ་མར་འཇུག་པ་རྣམས། །ཐམས་ཅད་ཤེས་ཤིང་བྱིན་རློབ་བྱང་ཆུབ་འཚང་རྒྱ་ཞིང་རྣམས་ཀུན་ཀྱང་རབ་ཏུ་སྟོན། །འདུ་ཤེས་དྲ་བ་རྣམས་སྒོམས་བློ་ལྡན་འཇིག་རྟེན་འདུ་ཤེས་རྣམས་ལ་དབང་བསྒྱུར་བ། །བྱ་བ་དང་ནི་སྦྱོར་བ་ཇི་སྙེད་པ་དང་དཀོན་མཆོག་བྱང་ཆུབ་སྤྱོད་པ་སྟོན། །དེ་དག་དེ་དང་རྣམ་པར་འཕྲུལ་པ་ཤིན་ཏུ་རྒྱ་ཆེན་དམ་པ་གཞན་ཡང་སྟོན། །དེ་དག་གང་ལ་འཇིག་རྟེན་ས་མྱིན་པ་དང་ཡུལ་མྱིན་དེ་དག་བྱ་བ་སྟོན། །སྟོན་ཀྱང་ལྟ་བ་ལྷུར་ལེན་མ་ཡིན་གཞན་ཡང་ཕྱིར་ཞིང་གོང་དུ་སྟོན་པ་བྱེད། །དེ་དག་སེམས་ཅན་རྣམས་ཀྱི་བསམ་པ་ཇི་བཞིན་སྤྱོད་པ་ཇི་བཞིན་ཡང་དག་འཇུག །ལུས་ནི་ནམ་མཁའ་ལྟ་བུ་དག་དང་ཡིད་ལ་ཆགས་མྱེད་འཇིག་རྟེན་གསུམ་གྱི་གཙོ། །ཚུལ་ཁྲིམས་སྤོས་ཀྱི་བྱུག་པ་རབ་ཏུ་ཞི་བ་གོས་ཡིན་ཡོན་ཏན་སྣ་ཚོགས་རྒྱན། །ཆོས་ཀྱི་གོ་འཕང་སྐྱོན་མྱེད་ཐོབ་ཅིང་ཐམས་ཅད་མཁྱེན་པ་ཡིད་བཞིན་ནོར་བུ་སྟེ། །བདེ་གཤེགས་ཀུན་གྱི་ཡེ་ཤེས་དབང་བསྐུར་ཐམས་ཅད་མཁྱེན་པའི་རྒྱལ་པོའི་ཐབས་ལ་གནས། །ཕ་རོལ་ཕྱིན་པ་རྟག་འབྱུང་འཁོར་ལོ་ཡིན་ཏེ་གླང་པོ་མངོན་པར་ཤེས་པ་མཆོག །ཡེ་ཤེས་རྫུ་འཕྲུལ་རྟ་སྟེ་ཆགས་པ་མྱེད་འགྲོ་ཤེས་རབ་ནོར་བུ་དམ་པ་ཡིན། །སྤྱོད་པ་བཙུན་མོ་བཟང་མོ་བསྡུ་བ་རྣམ་པ་བཞི་པོ་ཁྱིམ་བདག་དམ་པའོ། །ཐབས་ལ་ཤིན་ཏུ་མཁས་པ་བློན་པོ་ཡིན་ཏེ་མཁས་པ་དེ་དག་འཁོར་ལོས་སྒྱུར། །སྟོང་པ་ཁྱིམ་སྟེ་ཏིང་འཛིན་གྲོང་ཁྱེར་མཆོག་ཡིན་བྱམས་དང་སྙིང་རྗེའི་གོ་ཅའོ། །ཤེས་རབ་རལ་གྱི་ཡིན་ཏེ་དྲན་པ་གཞུ་མཛེས་དབང་པོ་རྣོ་བ་མདའ་ཡང་ཡིན། །འཇིག་རྟེན་མཁྱེན་པ་རྣམས་ཀྱི་བྱིན་གྱི་རླབས་ནི་
གདུགས་ཏེ་ཡེ་ཤེས་རྒྱལ་མཚན་བསྒྲེང་། །དེ་དང་དེ་དག་བཟོད་པའི་སྟོབས་ཀྱིས་བདུད་ཀྱི་དཔུང་དང་སྡེ་རྣམས་འདུས་པ་འཇོམས། །གཟུངས་ནི་ས་སྟེ་བྱང་ཆུབ་སྤྱོད་པ་ཆུ་ཀླུང་ཡེ་ཤེས་ལུ་མ་ཤེས་རབ་ཤིང་། །མེ་ཏོག་བྱང་ཆུབ་ཡན་ལག་ཏིང་ངེ་འཛིན་ནི་རྟ་སྟེ་རྫུ་འཕྲུལ་རྣམ་པར་བརྒྱན། །སྟོང་པ་རྣམ་ཐར་བརྒྱད་པ་རྫིང་བུ་ཡིན་ཏེ་རྣམ་པར་དཔྱོད་པ་བཟང་མོ་བཙུན་མོ་ཡིན། །ཐར་པ་བདུད་རྩི་བཟའ་བ་ཡིན་ཏེ་ཆོས་ནི་བཏུང་བ་ཐེག་པ་གསུམ་གྱིས་རྩེ། །དེ་དག་སྤྱོད་པ་དེ་འདྲ་ཡིད་འོང་ཁྱད་པར་འཕགས་ཏེ་དེ་བས་གོང་དུ་མང་། །གང་གིས་བསྐལ་པ་བྱེ་བ་ཁྲག་ཁྲིག་སྟོང་དུ་སྐྱོ་བ་ཡོངས་སུ་མྱི་སྐྱོ་བར། །སྟོན་པ་མཆོད་ཅིང་རྣམ་དག་ཞིང་ལ་བརྩོན་པས་འགྲོ་བ་ཡེ་ཤེས་མཆོག་ལ་འགོད། །ཁ་ན་མ་ཐོ་ཀུན་མྱེད་ཡེ་ཤེས་རབ་གནས་ཐམས་ཅད་མཁྱེན་པ་ཉིད་རྒྱས་བྱེད། །ཞིང་རྣམས་རྡུལ་གྱི་འབྲུར་བླགས་རེ་རེ་ནས་ཀྱང་བགྲང་ཞིང་བརྩི་བར་ནུས་གྱུར་ལ། །བར་སྣང་མཁའ་ཆེན་འདི་ཡང་སྐྲ་ཡིས་གཞལ་ཏེ་ཟད་པར་བྱ་བར་ནུས་སྲིད་དེ། །སྐད་ཅིག་གཅིག་ལ་འགྲོ་བ་རྣམས་ཀྱི་སེམས་ནི་བགྲང་ཚུལ་ཤེས་པར་ནུས་སྲིད་ཀྱི། །སངས་རྒྱས་སྲས་རྣམས་སྤྱོད་པ་དག་ནི་བསྐལ་པ་བརྒྱར་བརྗོད་ཟད་པར་མྱི་ནུས་སོ། །གང་ཞིག་ཡོན་ཏན་རྣམ་དག་འདི་དག་འཐོབ་པར་འདོད་ཅིང་གོང་དུ་གཞན་འདོད་དང་། །གང་ཞིག་སྡུག་བསྔལ་རྣམས་ལས་འགྲོ་བ་ཐར་བྱས་བདེ་ལ་འགོད་པར་འདོད་པ་དང་། །གང་ཞིག་བདེ་བར་གཤེགས་པའི་སྐུ་གསུང་ཐུགས་དང་མཉམ་དུ་འགྱུར་བར་འདོད་པ་དག །དེས་ནི་རྡོ་རྗེ་ལྟ་བུར་བརྟན་པའི་སེམས་སུ་གྱིས་ཏེ་ཡོན་ཏན་བསླབ་པར་བྱོས། །ཤིན་ཏུ་རྒྱས་པ་ཆེན་པོའི་མདོ་སངས་རྒྱས་ཕལ་པོ་ཆེ་ཞེས་བྱ་བ་ལས། འཇིག་རྟེན་ལས་འདས་པའི་ལེའུ་སྟེ། བཞི་བཅུ་རྩ་བཞི་པའོ།། །།