ནོར་བཟངས་ཀྱིས་དགེ་བའི་བཤེས་གཉེན་བསྙེན་བཀུར་བའི་སྤྱོད་པ་ཕྱོགས་གཅིག་ཏུ་བསྟན་པ།
སངས་རྒྱས་རྨད་ག་ཅད་ཅེས་བྱ་བ་ཤིན་ཏུ་རྒྱས་པ་ཆེན་པོའི་མདོ། བམ་པོ་ཉི་ཤུ་གཉིས་པ། དེ་ནས་ཚོང་དཔོན་གྱི་བུ་ནོར་བཟངས་དགེ་བའི་བཤེས་གཉེན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྡུལ་ཤིན་ཏུ་ཕྲ་བ་སྙེད་བསྙེན་བཀུར་བ། ཐམས་ཅད་མཁྱེན་པ་ཉིད་དུ་ཚོགས་བསགས་པའི་སེམས་དང་ལྡན་པ། དགེ་བའི་བཤེས་གཉེན་ཐམས་ཅད་ཀྱི་གདམས་ངག་དང་རྗེས་སུ་བསྟན་པ་ལ་མཐུན་པར་འཛིན་པས་ཞུགས་པ། དགེ་བའི་བཤེས་གཉེན་ཐམས་ཅད་ཀྱི་དྲུང་དུ་བསམ་པ་མཉམ་པར་འགྲོ་བ། དགེ་བའི་བཤེས་གཉེན་ཐམས་ཅད་དགའ་བར་བྱ་བས་ཡིད་མི་འབྱུང་བའི་བློ་དང་ལྡན་པ། དགེ་བའི་བཤེས་གཉེན་ཐམས་ཅད་ཀྱི་གདམས་ངག་དང་རྗེས་སུ་བསྟན་པའི་ཚུལ་རྒྱ་མཚོའི་རྗེས་སུ་སོང་བ་སྙིང་རྗེ་ཆེན་པོའི་བསམ་པ་རྒྱ་མཚོ་ལས་ཡང་དག་པར་བྱུང་བའི་སྙིང་པོ་དང་ལྡན་པ། བྱམས་པ་ཆེན་པོའི་ཚུལ་གྱི་སྤྲིན་གྱིས་འགྲོ་བ་ཐམས་ཅད་རྣམ་པར་སྣང་བར་བྱས་པ། དགའ་བ་ཆེན་པོའི་ཤུགས་རྣམ་པར་འཕེལ་བའི་ལུས་དང་ལྡན་པ། བྱང་ཆུབ་སེམས་དཔའི་རྣམ་པར་ཐར་པ་རྒྱ་ཆེན་པོ་ལ་རབ་ཏུ་ཞི་བར་རྣམ་པར་དཔྱོད་པ་སྒོ་ཐམས་ཅད་ནས་ལྷུག་པར་འཕྲོ་བའི་གཏོང་བའི་མྱིག་དང་ལྡན་པ། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་རྒྱ་མཚོའི་ནན་ཏན་རབ་ཏུ་རྫོགས་པ་དེ་བཞིན་གཤེགས་པ་ཐམས་ཅད་ཀྱི་མོས་པའི་ལམ་དུ་ཞུགས་པ་ཐམས་ཅད་མཁྱེན་པ་ཉིད་ཀྱི་ཚོགས་ལ་བརྩོན་འགྲུས་ཀྱི་ཤུགས་རྣམ་པར་འཕེལ་བ་བྱང་ཆུབ་སེམས་དཔའ་ཐམས་ཅད་ཀྱི་སེམས་དང་བསམ་པས་ཤིན་ཏུ་སྦྱངས་པའི་བློ་དང་ལྡན་པ། དུས་གསུམ་གྱི་དེ་བཞིན་གཤེགས་པ་ཐམས་ཅད་གཅིག་
ནས་གཅིག་ཏུ་བརྒྱུད་པ་ལ་ཞུགས་པ་སངས་རྒྱས་ཐམས་ཅད་ཀྱི་ཆོས་ཀྱི་ཚུལ་རྒྱ་མཚོ་ཁོང་དུ་ཆུད་པ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོའི་ཚུལ་རྒྱ་མཚོའི་རྗེས་སུ་སོང་བ། འཇིག་རྟེན་གྱི་སྐྱེ་གནས་ཐམས་ཅད་དུ་གཟུགས་བརྙན་ཡོངས་སུ་སྟོན་པའི་སྤྱོད་ཡུལ་དང་ལྡན་པ་བྱང་ཆུབ་སེམས་དཔའ་ཐམས་ཅད་ཀྱི་སྨོན་ལམ་གྱི་ཚུལ་རྒྱ་མཚོ་ལ་ཞུགས་པ། བསྐལ་པ་ཐམས་ཅད་དུ་བྱང་ཆུབ་སེམས་དཔའི་སྤྱོད་པ་ལ་རབ་ཏུ་ཞུགས་པ། ཐམས་ཅད་མཁྱེན་པ་ཉིད་ཀྱི་ཡུལ་སྣང་བ་རབ་ཏུ་ཐོབ་པ། བྱང་ཆུབ་སེམས་དཔའི་དབང་པོ་ཐམས་ཅད་རྣམ་པར་འཕེལ་བ། ཐམས་ཅད་མཁྱེན་པའི་ལམ་སྣང་བ་རབ་ཏུ་ཐོབ་པ། ཕྱོགས་ཐམས་ཅད་དུ་སྒྲིབ་པ་མེད་པའི་སྣང་བ་རབ་ཏུ་ཐོབ་པ། ཆོས་ཀྱི་དབྱིངས་ཐམས་ཅད་ཀྱི་ཚུལ་ལ་རབ་ཏུ་ཞུགས་པའི་བློ་དང་ལྡན་པ། ཞིང་གི་ཚུལ་ཐམས་ཅད་ལ་སྣང་བ་རབ་ཏུ་གྲུབ་པ་སེམས་ཅན་འབྱམ་ཀླས་པ་ཐམས་ཅད་ཀྱི་དོན་བྱ་བ་ལ་རྒྱུད་དང་མི་འཐུན་པ་མྱེད་པར་རྗེས་སུ་སོང་ངོ་། །སྒྲིབ་པའི་གཡང་སའི་རི་ཐམས་ཅད་རྣམ་པར་འཐོར་བ། སྒྲིབ་པ་མེད་པའི་ཆོས་ཉིད་ཀྱི་རྗེས་སུ་སོང་བ་བྱང་ཆུབ་སེམས་དཔའི་རྣམ་པར་ཐར་པ་སའི་གཞི་ཀུན་ཏུ་གནས་པའི་ཆོས་ཀྱི་དབྱིངས་ཀྱི་སྙིང་པོ་ཅན་ལ་རབ་ཏུ་ཞི་བར་རྣམ་པར་དཔྱོད་པ་དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་རྗེས་སུ་ཚོལ་བ། དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་པ་དེ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་ཡུལ་ལ་རྣམ་པར་དཔྱོད་ཅིང་འདུག་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་མྱིང་ཐོས་པ་དང་། བྱང་ཆུབ་སེམས་དཔའི་སྤྱོད་པ་ཐོས་པ་དང་། སྨོན་ལམ་གྱི་ཁྱད་པར་ཐོས་པ་དང་ཚོགས་ཡོངས་སུ་བསྒྲུབ་པ་ལ་འཇུག་པ་དང་གནས་པའི་ཁྱད་པར་ཐོས་པ་དང་། མངོན་པར་བསྒྲུབ་པ་དང་འབྱུང་བའི་ལམ་གྱི་ཁྱད་པར་ཐོས་པ་དང་། ཀུན་ཏུ་
བཟང་པོའི་སའི་ཚུལ་གྱི་རྒྱུད་ཐོས་པ་དང་། སའི་ཚོགས་ཐོས་པ་དང་ས་ཐོབ་པར་བྱེད་པའི་ཤུགས་ཐོས་པ་དང་ས་ཡོངས་སུ་གནོན་པ་ཐོས་པ་དང་། ས་ལ་གནས་པ་ཐོས་པ་དང། ས་སྔོན་དུ་འདོར་བས་རྣམ་པར་གནོན་པ་ཐོས་པ་དང་། སའི་སྤྱོད་ཡུལ་ཐོས་པ་དང་། སའི་བྱིན་གྱི་རླབས་ཐོས་པ་དང་ས་ལ་ཡང་དག་པར་གནས་པ་ཐོས་ནས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་དགའ་ཞིང་སྐོམ་སྟེ། ནམ་མཁའི་དབྱིངས་ལྟར་ཤིན་ཏུ་ཡངས་པའི་སེམས་མངོན་པར་ཞེན་པ་ཐམས་ཅད་ལས་གྱེན་དུ་འཕགས་པ་དང་། ཞིང་གི་འདུ་ཤེས་ཤིན་ཏུ་བསྒོམས་པ་དང་། ཆགས་པ་ཐམས་ཅད་ལས་ཡང་དག་པར་འདས་པའི་སེམས་ཆོས་ཐམས་ཅད་ལ་སྒྲིབ་པ་མེད་པའི་སྤྱོད་ཡུལ་ཅན་དང་། ཐོགས་པ་མྱེད་པའི་སེམས་ཕྱོགས་རྒྱ་མཚོ་ཐམས་ཅད་རྒྱས་པར་འགེངས་པ་དང་། སྒྲིབ་པ་མེད་པའི་སེམས་ཐམས་ཅད་མཁྱེན་པ་ཉིད་ཀྱི་ཡུལ་ཡོངས་སུ་གནོན་པ་དང་། ཤིན་ཏུ་རྣམ་པར་དག་པའི་སེམས་སྙིང་པོ་བྱང་ཆུབ་ཀྱི་རྒྱན་ལྷག་མཐོང་གིས་ཡོངས་སུ་དག་པ་དང་། ཤིན་ཏུ་རྣམ་པར་ཕྱེ་བའི་སེམས་སངས་རྒྱས་ཐམས་ཅད་ཀྱི་ཆོས་རྒྱ་མཚོ་ལ་ཞུགས་པ་དང་། ཤིན་ཏུ་ཡངས་པའི་སེམས་སེམས་ཅན་གྱི་ཁམས་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བ་རྒྱས་པར་འགེངས་པ་དང་ཤིན་ཏུ་ཕྱེ་བའི་སེམས་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པར་བྱེད་པ་དང་། ཚད་མེད་པའི་སེམས་སངས་རྒྱས་ཐམས་ཅད་ཀྱི་འཁོར་གྱི་དཀྱིལ་འཁོར་དུ་གཟུགས་བརྙན་རབ་ཏུ་འབྱུང་བ་དང་། བསྐལ་པ་ཐམས་ཅད་དུ་གནས་པས་མྱི་ཟད་ཅིང་མཐར་ཐུག་པ་མེད་པའི་སེམས་དེ་བཞིན་གཤེགས་པ་ཐམས་ཅད་ཀྱི་སྟོབས་དང་མི་བསྙེངས་པ་དང་། སངས་རྒྱས་ཀྱི་ཆོས་མ་འདྲེས་པའི་མཐར་ཐུག་པས་སྙིང་པོ་བྱང་ཆུབ་རྡོ་རྗེ་དམ་པའི་སྙིང་པོ་ཅན་དེ་ལ་པད་མོའི་སྟན་རིན་པོ་ཆེ་ཐམས་ཅད་ཀྱི་ལྷུན་ཅན་ཞིག་ལ་དེ་བཞིན་གཤེགས་པའི་གདན་སེང་གེའི་ཁྲི་ལ་མངོན་པར་བལྟས་ཏེ་འདུག་གོ །དེ་ལྟར་ཚོང་དཔོན་གྱི་བུ་ནོར་བཟངས་དེ་
ལྟ་བུའི་བསམ་པ་དང་ཡིད་ལ་བྱ་བ་ལ་བརྩོན་པར་གནས་པའི་སྔོན་གྱི་དགེ་བའི་རྩ་བའི་རླན་དང་། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་དང་། བྱང་ཆུབ་སེམས་དཔའ་ཀུན་ཏུ་བཟང་པོ་དང་སྔོན་གྱི་དགེ་བའི་རྩ་བའི་སྐལ་བ་མཐུན་པས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་བར་སྔོན་གྱི་ལྟས་བཅུ་བྱུང་ངོ་། །བཅུ་གང་ཞེ་ན། འདི་ལྟ་སྟེ་སངས་རྒྱས་ཀྱི་ཞིང་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་སྙིང་པོ་བྱང་ཆུབ་ཀྱི་རྒྱན་རྣམ་པར་དག་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་མི་ཁོམ་པ་དང་། ངན་སོང་དང་ངན་འགྲོའི་ལམ་ཐམས་ཅད་རྣམ་པར་བསྩལ་བས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་པད་མོའི་ཚལ་གྱི་རྒྱན་ལྟར་སངས་རྒྱས་ཀྱི་ཞིང་རྣམ་པར་དག་པས་རྣམ་པར་དག་པར་གྱུར་ཏོ་སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་ཀྱི་ལུས་དང་སེམས་དགའ་ཞིང་སིམ་པར་བྱེད་པས། རྣམ་པར་དག་པར་གྱུར་ཏོ་སངས་རྒྱས་ཀྱི་ཞིང་ཐམས་ཅད་རིན་པོ་ཆེ་ཐམས་ཅད་ཀྱི་རང་བཞིན་དུ་ཀུན་ཏུ་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཀུན་ཏུ་མཚན་དང་དཔེ་བྱད་བཟང་པོས་རབ་ཏུ་བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་རྒྱན་དང་ལྷབ་ལྷུབ་ཀྱི་སྤྲིན་གྱིས་ཀུན་ཏུ་ཁེབས་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་གྱི་ཁམས་ཐམས་ཅད་ཕན་ཚུན་བྱམས་པའི་སེམས་དང་། ཕན་པའི་སེམས་དང་། གནོད་སེམས་མེད་པའི་སེམས་དང་ལྡན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སྙིང་པོ་བྱང་ཆུབ་ཀྱི་རྒྱན་གྱིས་བརྒྱན་པར་ཀུན་ནས་གནས་པས་རྣམ་པར་དག་པར་གྱུར་ཏོ། །སངས་རྒྱས་ཀྱི་ཞིང་ཐམས་ཅད་སེམས་ཅན་ཐམས་ཅད་སངས་རྒྱས་རྗེས་སུ་དྲན་པ་ཡིད་ལ་བྱ་བ་ལ་བརྩོན་པར་ཀུན་ནས་གནས་པས་རྣམ་པར་དག་པར་གྱུར་ཏེ། བྱང་ཆུབ་
སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མཐོང་བར་འགྱུར་བའི། སྔོན་གྱི་ལྟས་བཅུ་པོ་དེ་དག་བྱུང་བར་གྱུར་ཏོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་མཐོང་བར་འགྱུར་བའི་སྔོན་གྱི་ལྟས་སྣང་བ་ཆེན་པོ་བཅུ་བྱུང་བར་གྱུར་ཏེ། བཅུ་གང་ཞེ་ན་འདི་ལྟ་སྟེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ཞིང་ཡང་དེ་བཞིན་གཤེགས་པ་ཐམས་ཅད་ཀྱི་འོད་ཟེར་གྱི་དྲ་བ་མང་པོ་རྣམ་པར་སྣང་བར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་སངས་རྒྱས་ཐམས་ཅད་ཀྱི་འོད་ཀྱི་དཀྱིལ་འཁོར་མང་པོ་འཐོན་ཏེ། ཁ་དོག་གཅིག་པ་དང་ཁ་དོག་སྣ་ཚོགས་དང་ཁ་དོག་བརྒྱ་སྟོང་དུ་མར་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་རིན་པོ་ཆེ་ཐམས་ཅད་ཀྱི་སྤྲིན་དེ་བཞིན་གཤེགས་པ་ཐམས་ཅད་ཀྱི་གཟུགས་བརྙན་རྣམ་པར་དམིགས་པར་བྱེད་པ་མང་པོ་འཐོན་ཏེ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་དེ་བཞིན་གཤེགས་པ་ཐམས་ཅད་ཀྱི་འོད་འཕྲོ་བའི་འཁོར་ལོ་དང་དཀྱིལ་འཁོར་གྱི་སྤྲིན་མང་པོ་འཐོན་ཏེ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་སྤོས་དང་། མེ་ཏོག་དང་ཕྲེང་བ་དང་བྱུག་པ་དང་བདུག་པའི་སྤྲིན་མང་པོ་འཐོན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོའི་ཡོན་ཏན་གྱི་ཆོས་རྒྱ་མཚོའི་སྤྲིན་ཐམས་ཅད་ཀྱི་འབྲུག་སྒྲ་རབ་ཏུ་སྒྲོག་ཅིང་ཕྱོགས་བཅུའི་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །
འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ཉི་མ་དང་ཟླ་བ་དང་སྐར་མའི་སྤྲིན་མང་པོ་འཐོན་ཏེ། བྱང་ཆུབ་སེམས་དཔའ་ཀུན་ཏུ་བཟང་པོའི་འོད་རབ་ཏུ་འགྱེད་ཅིང་། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ལུས་ཐམས་ཅད་ཀྱི་དབྱིབས་ལྟར་འདུག་པའི་མར་མྱེའི་སྤྲིན་མང་པོ་འཐོན་ནས། སངས་རྒྱས་ཀྱི་འོད་གཟེར་ལྟར་རབ་ཏུ་སྣང་བར་བྱེད་ཅིང་ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་ནོར་བུ་རིན་པོ་ཆེའི་གཟུགས་དེ་བཞིན་གཤེགས་པ་ཐམས་ཅད་ཀྱི་སྐུར་སྣང་བའི་སྤྲིན་མང་པོ་འཐོན་ནས། ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་འོད་གཟེར་གྱི་གཟུགས་དེ་བཞིན་གཤེགས་པ་ཐམས་ཅད་ཀྱི་སྐུའི་དབྱིབས་སུ་སྣང་བའི་སྤྲིན་མང་པོ་འཐོན་ཏེ། སངས་རྒྱས་ཐམས་ཅད་ཀྱི་བྱིན་གྱི་རླབས་དང་སྨོན་ལམ་གྱི་སྤྲིན་གྱི་ཆར་མངོན་པར་འབེབས་ཤིང་། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་རྣམས་ལས་རྡུལ་ཤིན་ཏུ་ཕྲ་བ་རེ་རེ་ལས་ཀྱང་བྱང་ཆུབ་སེམས་དཔའི་ལུས་ཀྱི་གཟུགས་བརྙན་གཟུགས་ཀྱི་རྣམ་པ་ཐམས་ཅད་ཀྱི་ཁ་དོག་དུ་སྣང་བའི་སྤྲིན་རྒྱ་མཚོ་སེམས་ཅན་ཐམས་ཅད་གདོན་པའི་སྦྱོར་བ་དང་ལྡན་པ་སེམས་ཅན་ཐམས་ཅད་ཀྱི་ཆོས་ཀྱི་བསམ་པ་ཡོངས་སུ་རྫོགས་པར་སྒྲུབ་པ་མང་པོ་འཐོན་ཏེ། ཆོས་ཀྱི་དབྱིངས་ཐམས་ཅད་རྒྱས་པར་འགེངས་པར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་འགྱུར་
བའི་སྔོན་གྱི་ལྟས་སྣང་བ་ཆེན་པོ་བཅུ་པོ་དེ་དག་བྱུང་བར་གྱུར་ཏོ། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་སྔོན་གྱི་ལྟས་སུ་སྣང་བ་བཅུ་པོ་དེ་དག་མཐོང་ནས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་གྱུར་པའི་སྐབས་ནི་བྱེ། རང་གི་དགེ་བའི་རྩ་བས་ནི་བརྟན་དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་ནི་བརླབས་སངས་རྒྱས་ཐམས་ཅད་ཀྱི་ཆོས་ཀྱི་སྣང་བ་ནི་ཡང་དག་པར་སྐྱེས། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་ལ་ནི་མངོན་དུ་གྱུར། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་གྱི་བྱིན་གྱིས་ནི་བྱིན་དུ་བརླབས། དེ་བཞིན་གཤེགས་པ་ཐམས་ཅད་ཀྱི་སྤྱོད་ཡུལ་ལ་ནི་མངོན་པར་མོས་བྱང་ཆུབ་སེམས་དཔའི་སྤྱོད་ཡུལ་རླབས་པོ་ཆེ་ལ་ནི་ཤིན་ཏུ་ངེས་པའི་སྟོབས་དང་ཤུགས་ནི་རབ་ཏུ་ཐོབ། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་ན་ཐམས་ཅད་མཁྱེན་པ་ཉིད་ཐོབ་པ་དང་འདྲ་བར་ནི་སེམས། བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བ་ལ་དབང་པོ་ནི་མངོན་དུ་གྱུར་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བ་ལ་བརྩོན་འགྲུས་ཀྱི་ཤུགས་ཆེན་པོ་ནི་ཐོབ། བྱང་ཆུབ་སེམས་དཔའ་ཀུན་ཏུ་བཟང་པོ་ཡོངས་སུ་བཙལ་བ་ལ་བརྩོན་འགྲུས་ཕྱིར་མི་ལྡོག་པའི་སྦྱོར་བ་དང་ནི་ལྡན་ཕྱོགས་ཐམས་ཅད་དུ་མངོན་དུ་གྱུར་པའི་དབང་པོའི་འཁོར་ལོ་དང་ཀུན་ཏུ་ལྟ་བས་ཡུལ་ཡོངས་སུ་གནོན་པའི་བྱང་ཆུབ་སེམས་དཔའི་ལུས་དང་སངས་རྒྱས་མ་ལུས་པའི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་འདུག་པའི་རྗེས་སུ་འབྲང་བའི་སེམས་དེ་བཞིན་གཤེགས་པ་ཐམས་ཅད་དམིགས་པར་བྱ་བ་ལ་ཡང་དག་པར་བཏང་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་དམིགས་པ་ཡོངས་སུ་བཙལ་བ་དང་མི་འབྲལ་བའི་བསམ་པ་དང་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བར་བྱ་བའི་འདུ་ཤེས་ཀྱི་རྣམ་པའི་སྙིང་པོ་དང་ལྡན་པའི་ཡེ་ཤེས་ཀྱི་མྱིག་བྱང་ཆུབ་སེམས་དཔའ་ཀུན་ཏུ་བཟང་པོའི་ལམ་ལ་ཞུགས་པ་དང་། ནམ་མཁའི་དབྱིངས་ལྟར་
ཡངས་པའི་བསམ་པ་དང་། སྙིང་རྗེ་ཆེན་པོའི་རྡོ་རྗེ་ཐོགས་པའི་ལྷག་པའི་བསམ་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་རྗེས་སུ་འབྲང་བར་སྨོན་པ། ཕྱི་མའི་མཐའི་བསྐལ་པའི་མུར་ཐུག་པར་བྱིན་གྱིས་བརླབས་པ་དང་། ཡོངས་སུ་གནོན་པའི་རྩལ་རྣམ་པར་དག་པ། བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མཉམ་པ་ཉིད་ཀྱི་རྗེས་སུ་སོང་བ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་ས་ལ་གནས་པའི་ཡེ་ཤེས་ལ་རྣམ་པར་དཔྱོད་པ། དེ་བཞིན་གཤེགས་པ་ཐམས་ཅད་ཀྱི་ཡུལ་ལ་ཡང་དག་པར་གནས་པ་དང་མི་ལྡན་པ་དེས་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་རྗེས་སུ་ཐོབ་པ། དུས་གསུམ་མཉམ་པ་ཉིད་ཀྱི་རྗེས་སུ་སོང་བ། བསམ་གྱིས་མི་ཁྱབ་པའི་ཡུལ་དང་ལྡན་པ། མི་འཕྲོགས་པའི་སྤྱོད་ཡུལ་ཅན་མུ་མེད་པའི་ཡེ་ཤེས་ཀྱི་ཡུལ་དང་ལྡན་པ། བྱང་ཆུབ་སེམས་དཔའ་ཐམས་ཅད་ཀྱིས་རྣམ་པར་ལྟ་བ། འཇིག་རྟེན་ཐམས་ཅད་ཀྱི་ཟིལ་གྱིས་མ་ནོན་པ། འཁོར་གྱི་དཀྱིལ་འཁོར་ཐམས་ཅད་ཀྱི་རྗེས་སུ་འབྲང་བ། མངོན་པར་འཕགས་པའི་ཡུལ་དང་ལྡན་པ་དེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔར་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ན་ནི་འདུག །བྱང་ཆུབ་སེམས་དཔའི་ཚོགས་ཀྱིས་ནི་ཡོངས་སུ་བསྐོར། བྱང་ཆུབ་སེམས་དཔའི་དགེ་འདུན་གྱིས་ནི་མདུན་དུ་བྱས་ཤིང་། སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ཞིག་ལ་འདུག་པ་མཐོང་སྟེ། དེས་དེའི་བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་འོད་ཟེར་གྱི་སྤྲིན་མང་པོ་འཐོན་ནས། འཇིག་རྟེན་གྱི་ཁམས་ཆོས་ཀྱི་དབྱིངས་ཀྱིས་ཀླས་པ་ནམ་མཁའི་མཐས་གཏུགས་པ་ཐམས་ཅད་རབ་ཏུ་སྣང་བར་བྱས་ནས། སེམས་ཅན་རྣམས་ཀྱི་སྡུག་བསྔལ་རབ་ཏུ་ཞི་བར་བྱེད་པ་མཐོང་ངོ་། །དེས་དེའི་ལུས་ལས་འོད་
ཀྱི་དཀྱིལ་འཁོར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་ཁ་དོག་སྣ་ཚོགས་ཅན་མང་པོ་འཐོན་ཏེ། བྱང་ཆུབ་སེམས་དཔའ་ཐམས་ཅད་ཀྱི་དགའ་བ་དང་། མོས་པའི་ཤུགས་རྒྱ་ཆེན་པོ་རྣམ་པར་འཕེལ་བར་བྱེད་པ་མཐོང་ངོ་། །སྤྱི་བོ་དང་ཕྲག་པའི་ལྷུན་གཉིས་དང་། བ་སྤུའི་སྒོ་ཐམས་ཅད་ནས་ཀྱང་སྤོས་འོད་འཕྲོ་བའི་སྤྲིན་གྱི་ཆར་ཁ་དོག་སྣ་ཚོགས་སུ་འདུག་པ་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་མེ་ཏོག་ཐམས་ཅད་ཀྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མང་པོ་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སྤོས་སྣ་ཚོགས་ཀྱི་ཤིང་གི་སྤྲིན་མང་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་རྒྱས་པར་བཀང་ནས། སྤོས་ཀྱི་ཤིང་གི་སྤྲིན་གྱི་རྒྱན་གྱིས་བརྒྱན་པར་བྱས་ཏེ། སྤོས་དང་ཕྱེ་མ་དང་བདུག་པའི་མཛོད་ཟད་མི་ཤེས་པའི་ཆར་རབ་ཏུ་འགྱེད་ཅིང་དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པར་བྱེད་པ་མཐོང་ངོ་། །བ་སྤུའི་སྒོ་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་གོས་སྣ་ཚོགས་ཀྱི་སྤྲིན་མང་པོ་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་ཀུན་ནས་ཡོག་པར་བྱས་ནས་བརྒྱན་པར་མཐོང་ངོ་། །བ་སྤུའི་བུ་ག་ཐམས་ཅད་ནས་བ་སྤུའི་སྒོ་རེ་རེ་ནས་ཀྱང་དར་སྣ་ཚོགས་ཀྱི་ལྡ་ལྡིའི་སྤྲིན་དང་ཕྲེང་བ་སྣ་ཚོགས་ཀྱི་སྤྲིན་དང་། མུ་ཏིག་སྣ་ཚོགས་ཀྱི་སྤྲིན་དང་ནོར་བུ་རིན་པོ་ཆེ་ཡིད་
བཞིན་གྱི་སྤྲིན་གྱི་ཆར་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་རྒྱས་པར་བཀང་སྟེ། མངོན་པར་འབབ་པ་མཐོང་ངོ་། །བ་སྤུའི་བུ་ག་ཐམས་ཅད་ནས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བསྒྲུབ་པའི་ཕྱིར། རིན་པོ་ཆེའི་ཤིང་གི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་མཐས་ཀླས་པ་ཐམས་ཅད་རྒྱས་པར་བཀང་ནས། རིན་པོ་ཆེའི་ཤིང་ལས་རིན་པོ་ཆེའི་མཛོད་རྣམ་པར་འཕྲོ་བའི་རྒྱན་གྱིས་བརྒྱན་པར་བྱས་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་གྱི་དཀྱིལ་འཁོར་དག་ཏུ་རིན་པོ་ཆེའི་ཆར་ཆེན་པོ་མངོན་པར་འབབ་པར་བྱེད་པ་མཐོང་ངོ་། ། བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་གཟུགས་ཀྱི་ཁམས་ཀྱི་ལྷའི་རིས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། བྱང་ཆུབ་སེམས་དཔའ་ལ་ཡང་དག་པར་བསྔགས་པ་བྱེད་ཅིང་སངས་རྒྱས་ཀྱི་ཞིང་ཐམས་ཅད་རྒྱས་པར་འགེངས་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་ཚངས་པའི་རྒྱུད་དུ་གཏོགས་པའི་ལྷའི་རིས་ཐམས་ཅད་དུ་སྤྲུལ་པའི་སྤྲིན་མང་པོ་མངོན་པར་འཐོན་ཏེ། མངོན་པར་སངས་རྒྱས་པའི་དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་བསྐོར་བར་གསོལ་བ་འདེབས་པར་མཐོང་ངོ་། །བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་འདོད་པའི་ཁམས་ཐམས་ཅད་དུ་གཏོགས་པའི་ལྷའི་དབང་པོའི་ལུས་ཀྱི་སྤྲིན་མང་པོ་མངོན་པར་འཐོན་ཏེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་མང་པོ་ཡང་དག་པར་འཛིན་པར་མཐོང་ངོ་། །བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་ཡང་སངས་རྒྱས་ཀྱི་ཞིང་གི་སྤྲིན་དུས་གསུམ་
དུ་གཏོགས་པའི་སངས་རྒྱས་ཀྱི་ཞིང་ཐམས་ཅད་དང་འདྲ་བ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་མཐས་ཀླས་པ། ཐམས་ཅད་རྒྱས་པར་བཀང་སྟེ། སེམས་ཅན་གནས་མེད་པ་དང་སྐྱབས་མྱེད་པ་དང་རྟེན་མྱེད་པ་རྣམས་ཀྱི་གནས་དང་། སྐྱབས་དང་རྟེན་དུ་གྱུར་པར་མཐོང་ངོ་བ་སྤུའི་བུ་ག་ཐམས་ཅད་ཀྱི་བ་སྤུའི་སྒོ་རེ་རེ་ནས་ཀྱང་། སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་ཡོངས་སུ་དག་པ། སངས་རྒྱས་འབྱུང་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱིས་ཡོངས་སུ་གང་བའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་མཐས་ཀླས་པ་ཐམས་ཅད་རྒྱས་པར་བཀང་སྟེ། སེམས་ཅན་མོས་པ་རླབས་པོ་ཆེ་རྣམས་ཡོངས་སུ་དག་པར་སྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་རྣམ་པར་དག་པ་ལ་ཀུན་ནས་ཉོན་མོངས་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་དུ་ཕྲ་བ་སྙེད་ཀྱི་སྤྲིན་མང་པོ་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱི་མཐས་ཀླས་པ་ཐམས་ཅད་རྒྱས་པར་བཀང་སྟེ་ཀུན་ནས་ཉོན་མོངས་པའི་སེམས་ཅན་རྣམས་རྣམ་པར་དག་པར་སྒྲུབ་པ་མཐོང་ངོ་། །བ་སྤུའི་བུ་ག་རེ་རེའི་བ་སྤུའི་སྒོ་ཐམས་ཅད་ནས་སེམས་ཀྱི་སྐད་ཅིག་རེ་རེ་ལ་སངས་རྒྱས་ཀྱི་ཞིང་ཀུན་ནས་ཉོན་མོངས་ལ་རྣམ་པར་དག་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་སྤྲིན་མང་པོ་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་སྟེ། སེམས་ཅན་གཅིག་ཏུ་ཀུན་ནས་ཉོན་མོངས་པ་རྣམས་རྣམ་པར་དག་པར་སྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་ལུས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་
སྙེད་མངོན་པར་འཐོན་ཏེ། སེམས་ཅན་གྱི་ཁམས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་ནས་སེམས་ཅན་ཐམས་ཅད་ཀྱི་སྤྱོད་པའི་རྗེས་སུ་འབྲང་བར་བྱེད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཀྱི་སྐད་ཅིག་རེ་རེ་ལ་བྱང་ཆུབ་སེམས་དཔའི་ལུས་ཀྱི་སྤྲིན་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ནས། ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ། ཐམས་ཅད་རྒྱས་པར་བཀང་སྟེ། སེམས་ཅན་ཐམས་ཅད་ཀྱི་དགེ་བའི་རྩ་བ་རྣམ་པར་འཕེལ་བར་བྱ་བའི་ཕྱིར་སངས་རྒྱས་ཐམས་ཅད་ཀྱི་མཚན་མང་པོ་རྗོད་པར་བྱེད་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་བྱང་ཆུབ་སེམས་དཔའི་ལུས་ཀྱི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། ཆོས་ཀྱི་དབྱིངས་ནམ་མཁའི་དབྱིངས་ཀྱིས་ཀླས་པ་ཐམས་ཅད་རྒྱས་པར་བཀང་ནས་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་དུ་བྱང་ཆུབ་སེམས་དཔའ་ཐམས་ཅད་ཀྱི་སེམས་དང་པོ་བསྐྱེད་པ་ནས་ཉེ་བར་བཟུང་བའི་དགེ་བའི་རྩ་བ་ཐམས་ཅད་མངོན་པར་བསྒྲུབ་པ་ཉེ་བར་བསྒྲུབ་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་བྱང་ཆུབ་སེམས་དཔའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་ཏེ། སངས་རྒྱས་ཀྱི་ཞིང་ཐམས་ཅད་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་རྣམ་པར་དག་པར་བྱ་བའི་ཕྱིར་བྱང་ཆུབ་སེམས་དཔའི་སྨོན་ལམ་རྒྱ་མཚོ་ཐམས་ཅད་མངོན་པར་བརྗོད་པ་མཐོང་ངོ་། །བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱ་བའི་དོན་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་
སྤྱོད་པའི་སྤྲིན་ཐམས་ཅད་མཁྱེན་པ་ཉིད་དུ་ཡང་དག་པར་འབྱུང་བས་དགའ་བའི་ཤུགས་རྣམ་པར་འཕེལ་བར་བྱེད་པ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱི་ཆར་མངོན་པར་འཐོན་ནས་མངོན་པར་འབབ་པ་མཐོང་ངོ་། །དེས་དེའི་བ་སྤུའི་བུ་ག་ཐམས་ཅད་ལས་བ་སྤུའི་སྒོ་རེ་རེ་ནས་ཀྱང་མངོན་པར་རྫོགས་པར་འཚང་རྒྱ་བའི་སྤྲིན་སངས་རྒྱས་ཀྱི་ཞིང་ཐམས་ཅད་དུ་མངོན་པར་རྫོགས་པར་འཚང་རྒྱ་བ་སྟོན་པ། ཐམས་ཅད་མཁྱེན་པ་ཉིད་དུ་ཡང་དག་པར་འབྱུང་བའི་ཆོས་ཀྱི་སྤྲིན་ཆེན་པོ་རྣམ་པར་འཕེལ་བར་བྱེད་པ། སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་མངོན་པར་འཐོན་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་རྫུ་འཕྲུལ་གྱི་ཡུལ་དེ་ལྟ་བུ་མཐོང་ནས། དགའ་རངས་ཏེ་མགུ་ཞིང་ཉམས་བདེ་ལ་ཚིམ་ཞིང་ཡིད་བདེ་བ་སྐྱེས་ནས། དེ་བས་ཀྱང་ཤས་ཆེར་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་སེམས་སེམས་པ་དང་། བྱང་ཆུབ་སེམས་དཔའ་ཀུན་ཏུ་བཟང་པོའི་ཡན་ལག་རེ་རེ་དང་། ཡན་ལག་རྣམ་པར་ཕྱེ་བ་རེ་རེ་དང་། ལུས་ཀྱི་ཆ་རེ་རེ་དང་། ལུས་ཀྱི་ཆ་རྣམ་པར་ཕྱེ་བ་རེ་རེ་དང་། ཡན་ལག་གི་ཕྱོགས་རེ་རེ་དང་། ཡན་ལག་གི་ཕྱོགས་རྣམ་པར་ཕྱེ་བ་རེ་རེ་དང་། ལུས་རེ་རེ་དང་། ལུས་རྣམ་པར་ཕྱེ་བ་རེ་རེ་དང་། བ་སྤུའི་བུ་ག་རེ་རེ་དང་བ་སྤུའི་བུ་ག་རྣམ་པར་ཕྱེ་བ་རེ་རེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རླུང་གི་ཕུང་པོ་དང་བཅས། ཆུའི་ཕུང་པོ་དང་བཅས། སའི་ཕུང་པོ་དང་བཅས། མྱེའི་ཕུང་པོ་དང་བཅས། རྒྱ་མཚོ་དང་བཅས། གླིང་དང་བཅས། ཆུ་ཀླུང་དང་བཅས། རིན་པོ་ཆེའི་རི་དང་བཅས། རི་རབ་དང་བཅས། ཁོར་ཡུག་དང་བཅས། གྲོང་དང་གྲོང་ཁྱེར་དང་། ལྗོངས་དང་ཡུལ་དང་ཁམས་དང་རྒྱལ་པོའི་གནས་དང་བཅས། ནགས་ཚལ་དང་བཅས། ཁང་ཁྱིམ་དང་བཅས།
སྐྱེ་བོའི་ཚོགས་དང་བཅས། སེམས་ཅན་དམྱལ་བའི་འཇིག་རྟེན་དང་བཅས། བྱོལ་སོང་གི་སྐྱེ་གནས་དང་བཅས། གཤིན་རྗེའི་འཇིག་རྟེན་དང་བཅས། ལྷ་མ་ཡིན་གྱི་འཇིག་རྟེན་དང་བཅས། ཀླུའི་འཇིག་རྟེན་དང་བཅས། ནམ་མཁའ་ལྡིང་གི་འཇིག་རྟེན་དང་བཅས། མྱིའི་འཇིག་རྟེན་དང་བཅས། ལྷའི་འཇིག་རྟེན་དང་བཅས། ཚངས་པའི་འཇིག་རྟེན་དང་བཅས། འདོད་པའི་ཁམས་ཀྱི་ཡུལ་དང་བཅས་གཟུགས་ཀྱི་ཁམས་ཀྱི་ཡུལ་དང་བཅས། གཟུགས་མེད་པའི་ཁམས་ཀྱི་ཡུལ་དང་བཅས། གཞི་དང་བཅས་རྟེན་དང་བཅས། དབྱིབས་དང་བཅས། སྤྲིན་དང་བཅས། གློག་དང་བཅས། སྐར་མ་དང་བཅས། ཉིན་ཞག་དང་བཅས། ཟླ་བ་ཕྱེད་དང་བཅས། ཟླ་བ་གཅིག་དང་བཅས། དུས་དང་བཅས། ལོ་དང་བཅས། བསྐལ་པ་བར་མ་དང་བཅས་བསྐལ་པ་དང་བཅས་པར་གཟུགས་བརྙན་གྱི་ཚུལ་དུ་མཐོང་ངོ་། །འཇིག་རྟེན་གྱི་ཁམས་འདི་ལ་ཇི་ལྟ་བ་དེ་བཞིན་དུ། ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ཀྱང་མཐོང་བར་གྱུར་ཏོ། །ཤར་ཕྱོགས་ལ་ཇི་ལྟ་བ་དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། བྱང་ཤར་གྱི་ཕྱོགས་མཚམས་དང་། ཤར་ལྷོའི་ཕྱོགས་མཚམས་དང་། ལྷོ་ནུབ་ཀྱི་ཕྱོགས་མཚམས་དང་། ནུབ་བྱང་གི་ཕྱོགས་མཚམས་དང་། འོག་དང་སྟེང་གི་ཕྱོགས་ཐམས་ཅད་ཀྱི་འཇིག་རྟེན་གྱི་ཁམས་ཐམས་ཅད་ཀྱང་སངས་རྒྱས་བྱུང་བ་དང་བཅས། བྱང་ཆུབ་སེམས་དཔའི་འཁོར་ཀྱི་དཀྱིལ་འཁོར་དང་བཅས་པར་གཟུགས་བརྙན་གྱི་ཚུལ་དུ་མཐོང་བར་གྱུར་ཏོ། །དེས་མི་མཇེད་ཀྱི་འཇིག་རྟེན་གྱི་ཁམས་འདིའི་སྔོན་གྱི་མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ། ཇི་སྙེད་པ་དེ་དག་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་མྱི་ཆེན་པོའི་མཚན་རེ་རེ་ལས་
སངས་རྒྱས་བྱུང་བ་དང་བཅས། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དང་བཅས། སེམས་ཅན་དང་བཅས། ཁང་ཁྱིམ་དང་བཅས། ཉིན་ཞག་དང་བཅས་བསྐལ་པ་དང་བཅས་པར་མཐོང་བར་གྱུར་ཏོ། །དེ་བཞིན་ཏུ་ཕྱི་མའི་མཐའི་མུར་ཐུག་པའི་སངས་རྒྱས་ཀྱི་ཞིང་འབྱམ་ཀླས་པ་ཐམས་ཅད་ཀྱང་མཐོང་བར་གྱུར་ཏོ། །ཇི་ལྟར་འཇིག་རྟེན་གྱི་ཁམས་འདིའི་སྔོན་གྱི་མཐའ་དང་ཕྱི་མའི་མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་མཐོང་བར་གྱུར་པ་དེ་བཞིན་ཏུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སྔོན་གྱི་མཐའ་དང་། ཕྱི་མའི་མཐའི་མུར་ཐུག་པའི་འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་དང་། མྱི་ཆེན་པོའི་མཚན་རེ་རེ་དང་། བ་སྤུའི་བུ་ག་རེ་རེ་ནས་ཤིན་ཏུ་རྣམ་པར་ཕྱེ་བ་དང་། ཕན་ཚུན་མ་འདྲེས་པར་མཐོང་བར་གྱུར་ཏོ། །བྱང་ཆུབ་སེམས་དཔའ་ཀུན་ཏུ་བཟང་པོ་ཡང་ཇི་ལྟར་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔ་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ལྟ་བུ་ཡོངས་སུ་སྟོན་པར་མཐོང་བ་དེ་བཞིན་དུ་ཤར་ཕྱོགས་ནའང་བཅོམ་ལྡན་འདས་དེ་བཞིན་གཤེགས་པ་བཟང་པོའི་དཔལ་གྱིས་འཇིག་རྟེན་གྱི་ཁམས་པད་མོའི་དཔལ་ན་རྣམ་པར་རྩེ་བ་འདི་ཉིད་ཡོངས་སུ་སྟོན་ཅིང་འདུག་པར་མཐོང་ངོ་། །ཤར་ཕྱོགས་ན་ཇི་ལྟ་བ་དེ་བཞིན་དུ་ཕྱོགས་དང་ཕྱོགས་མཚམས་ཀུན་ཏུ་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་བྱང་ཆུབ་སེམས་དཔའ་ཀུན་ཏུ་བཟང་པོ་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པ་མཐོང་ངོ་། །ཇི་ལྟར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་
པར་མཐོང་བ་དེ་བཞིན་དུ། ཕྱོགས་བཅུ་ཀུན་གྱི་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་དག་ལ་རྡུལ་ཤིན་ཏུ་ཕྲ་བ་རེ་རེའི་སངས་རྒྱས་ཀྱི་འཁོར་གྱི་དཀྱིལ་འཁོར་ཆོས་ཀྱི་དབྱིངས་ལྟར་རྒྱ་ཆེ་བ་དག་ནི་བྱང་ཆུབ་སེམས་དཔའ་ཀུན་ཏུ་བཟང་པོ་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་སེང་གེའི་ཁྲི་རིན་པོ་ཆེའི་པད་མོ་ཆེན་པོའི་སྙིང་པོ་ཅན་ལ་འདུག་ཅིང་རྣམ་པར་རྩེ་བ་འདི་ཉིད་ཡོངས་སུ་སྟོན་པ་མཐོང་ངོ་། །དེའི་ལུས་རེ་རེ་ལས་ཀྱང་དུས་གསུམ་དུ་བྱུང་བའི་དམིགས་པ་ཐམས་ཅད་གཟུགས་བརྙན་གྱི་ཚུལ་དུ་རྣམ་པར་དམིགས་པར་མངོན་པར་བསྟན་པ་མཐོང་ངོ་། །ཞིང་ཐམས་ཅད་དང་སེམས་ཅན་ཐམས་ཅད་དང་སངས་རྒྱས་བྱུང་བ་ཐམས་ཅད་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་ཀྱང་གཟུགས་བརྙན་གྱི་ཚུལ་དུ་རྣམ་པར་དམིགས་པར་མངོན་ཏུ་བསྟན་པ་མཐོང་ངོ་། །སེམས་ཅན་ཐམས་ཅད་ཀྱི་སྒྲ་དང་། སངས་རྒྱས་ཐམས་ཅད་ཀྱི་དབྱངས་དང་། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་དང་གདམས་ངག་ཡོངས་སུ་བསྟན་པའི་ཆོ་འཕྲུལ་ཐམས་ཅད་དང་། བྱང་ཆུབ་སེམས་དཔའི་ཡང་དག་པར་བསྡུ་བ་ཐམས་ཅད་དང་། སངས་རྒྱས་ཐམས་ཅད་ཀྱི་རྣམ་པར་རོལ་པ་དག་ཀྱང་ཐོས་པར་གྱུར་ཏོ། །དེས་དེ་ལྟར་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་རྩེ་བ་དེ་ལྟ་བུ་དག་མཐོང་སྟེ། ཐོས་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་བཅུ་ཐོབ་པར་གྱུར་ཏོ། །བཅུ་གང་ཞེ་ན། འདི་ལྟ་སྟེ། སེམས་ཀྱི་སྐད་ཅིག་གཅིག་ལ་སངས་རྒྱས་
ཀྱི་ཞིང་ཐམས་ཅད་ལུས་ཀྱིས་རྒྱས་པར་དགང་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་དུ་འགྲོ་བ་ལ་ཐ་མི་དད་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་མཆོད་ཅིང་རིམ་གྲོ་བྱ་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ལས་དེ་བཞིན་གཤེགས་པ་རེ་རེ་ལས་ཀྱང་སངས་རྒྱས་ཀྱི་ཆོས་ཐམས་ཅད་ཡོངས་སུ་ཞུས་པ་རབ་ཏུ་བླང་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ངེས་པར་རྟོགས་པར་བྱ་བའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སོ་སོ་ཡང་དག་པར་རིག་པ་ཟད་མི་ཤེས་པའི་ཕྱི་མའི་མཐའི་མུར་ཐུག་པའི་བསྐལ་པར་བྱིན་གྱིས་བརླབས་ཏེ། ཆོས་ཀྱི་ཚིག་གཅིག་ཤིན་ཏུ་བསྟན་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །ཆོས་ཀྱི་རྒྱ་མཚོ་ཐམས་ཅད་མངོན་སུམ་དུ་རབ་ཏུ་ཤེས་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །ཆོས་ཀྱི་དབྱིངས་ཀྱི་ཚུལ་རྒྱ་མཚོ་ཐམས་ཅད་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སེམས་ཅན་ཐམས་ཅད་ཀྱི་འདུ་ཤེས་ཀྱི་རྣམ་པ་ཡོངས་སུ་སྒྲུབ་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །སྐད་ཅིག་གཅིག་ལ་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་མངོན་སུམ་དུ་རབ་ཏུ་ཤེས་པའི་ཡེ་ཤེས་
ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་ཐོབ་པར་གྱུར་ཏོ། །དེ་ལྟར་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་རྣམ་པར་སྤྱོད་པ་དང་ལྡན་པའི་ཚོང་དཔོན་གྱི་བུ་ནོར་བཟངས་ཀྱི་སྤྱི་བོར་བྱང་ཆུབ་སེམས་དཔའ་ཀུན་ཏུ་བཟང་པོས་ལག་པ་གཡས་པ་བརྐྱང་སྟེ་བཞག་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བྱང་ཆུབ་སེམས་དཔའ་ཀུན་ཏུ་བཟང་པོས་ལག་པ་བཞག་མ་ཐག་ཏུ་དེའི་མོད་ལ་དེས་ཏིང་ངེ་འཛིན་གྱི་སྒོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལ་ཞུགས་པར་གྱུར་ཏེ། ཏིང་ངེ་འཛིན་རེ་རེ་ལས་ཀྱང་འཇིག་རྟེན་གྱི་ཁམས་རྒྱ་མཚོ། སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་སྔོན་ཆད་མ་མཐོང་བ་དག་ལའང་ཞུགས་པར་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ཚོགས་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱང་ཚོགས་སུ་གྱུར་ཏོ། །དེའི་ཐམས་ཅད་མཁྱེན་པ་ཉིད་ཀྱི་ཆོས་ཀྱི་ཚོགས་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱང་རབ་ཏུ་བྱུང་བར་གྱུར་ཏོ། །ཐམས་ཅད་མཁྱེན་པ་ཉིད་ལ་རབ་ཏུ་གནས་པར་བྱ་བ་ཆེན་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་མངོན་པར་འཕགས་པར་གྱུར་ཏོ། །སྨོན་ལམ་རྒྱ་མཚོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་ཞུགས་པར་གྱུར་ཏོ། །ཐམས་ཅད་མཁྱེན་པ་ཉིད་དུ་འབྱུང་བའི་ལམ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་བྱུང་བར་གྱུར་ཏོ། །བྱང་ཆུབ་སེམས་དཔའི་སྤྱོད་པ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ལའང་རབ་ཏུ་ཞུགས་པར་གྱུར་ཏོ། །ཐམས་ཅད་མཁྱེན་པ་ཉིད་ཀྱི་ཤུགས་དྲག་པོ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་རྣམ་པར་འཕེལ་བར་གྱུར་ཏོ། །སངས་རྒྱས་ཐམས་ཅད་ཀྱི་ཡེ་ཤེས་སྣང་བ་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཀྱང་
རབ་ཏུ་སྣང་བར་གྱུར་ཏོ། །ཇི་ལྟར་མི་མཇེད་ཀྱི་འཇིག་རྟེན་གྱི་ཁམས་འདིར་བྱང་ཆུབ་སེམས་དཔའ་ཀུན་ཏུ་བཟང་པོ་བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཀྱི་སྤྱན་སྔ་ན་འདུག་པས་ལག་པ་གཡས་པ་བརྐྱང་ཏེ། ཚོང་དཔོན་གྱི་བུ་ནོར་བཟངས་ཀྱི་སྤྱི་བོར་བཞག་པ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་ཀྱི་དེ་བཞིན་གཤེགས་པའི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་པོས་ཀྱང་ལག་པ་གཡས་པ་བརྐྱང་ཞིང་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བཞག་པར་གྱུར་ཏོ། །དེ་བཞིན་དུ་ཕྱོགས་དང་ཕྱོགས་མཚམས་ཐམས་ཅད་ཀུན་གྱི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་བའི་ཁོངས་སུ་ཆུད་པའི་འཇིག་རྟེན་གྱི་ཁམས་དག་གི་དེ་བཞིན་གཤེགས་པ་ཐམས་ཅད་ཀྱི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་པོས་ཀྱང་ལག་པ་གཡས་པ་བརྐྱང་ཞིང་ཚོང་དཔོན་གྱི་བུ་ནོར་བཟངས་ཀྱི་སྤྱི་བོ་ལ་བཞག་པར་གྱུར་ཏོ། །ཇི་ལྟར་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་ཀྱི་དྲུང་ན་འདུག་པའི་བྱང་ཆུབ་སེམས་དཔའ་ཀུན་ཏུ་བཟང་པོའི་ལག་པས་རེག་སྟེ། ཚོང་དཔོན་གྱི་བུ་ནོར་བཟངས་ཀྱིས་ཆོས་ཀྱི་སྒོ་མང་པོ་ལ་ཞུགས་པར་གྱུར་པ་དེ་བཞིན་དུ་ཀུན་ཏུ་བཟང་པོའི་ལུས་ཐམས་ཅད་ལས་འཕྲོས་པའི་ལག་པའི་སྤྲིན་མང་པོས་རེག་པའི་ཚོང་དཔོན་གྱི་བུ་ནོར་བཟངས་ཀྱིས་ཀྱང་ཆོས་ཀྱི་སྒོ་མང་པོ་ལ་ཚུལ་སྣ་ཚོགས་ཀྱིས་ཞུགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་ཚོང་དཔོན་གྱི་བུ་ནོར་བཟངས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ངའི་རྣམ་པར་འཕྲུལ་པ་མཐོང་མོད། སྨྲས་པ་འཕགས་པ་མཐོང་ནི་མཐོང་ན་དེ་ཙམ་དུ་བསམ་གྱིས་མི་ཁྱབ་པའི་རྣམ་པར་ཐར་པ་དེ་ནི་དེ་བཞིན་
གཤེགས་པས་མཁྱེན་ན་མཁྱེན་གྲང་ངོ་། །དེས་སྨྲས་པ། རིགས་ཀྱི་བུ་ངས་ནི་ཐམས་ཅད་མཁྱེན་པ་ཉིད་ཀྱི་སེམས་མངོན་པར་འདོད་ཅིང་། བསྐལ་པ་སངས་རྒྱས་ཀྱི་ཞིང་བརྗོད་དུ་མྱེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཏུ་རྣམ་པར་སྤྱད་དེ། བསྐལ་པ་ཆེན་པོ་དེ་དག་རེ་རེ་ལ་ཡང་བྱང་ཆུབ་ཀྱི་སེམས་ཡོངས་སུ་སྦྱོང་བར་བྱེད་ཅིང་། ངས་དེ་བཞིན་གཤེགས་པ་སངས་རྒྱས་ཀྱི་ཞིང་བརྗོད་དུ་མྱེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བསྙེན་བཀུར་ཏོ། །བསྐལ་པ་ཆེན་པོ་དེ་དག་རེ་རེ་ལ་ཡང་། ཐམས་ཅད་མཁྱེན་པ་ཉིད་ཀྱི་བསོད་ནམས་ཡོངས་སུ་སྡུད་པ་བྱེད་ཅིང་། མཆོད་སྦྱིན་ཆེན་པོ་གཏང་བ་ཐམས་ཅད་དང་སྦྱར་བ། འཇིག་རྟེན་ཐམས་ཅད་དུ་རྣམ་པར་གྲགས་པ། སེམས་ཅན་ཐམས་ཅད་ལ་བསྟབས་པ་དག་ཀྱང་མཆོད་སྦྱིན་ཏུ་བྱས་སོ། །བསྐལ་པ་ཆེན་པོ་དེ་དག་རེ་རེ་ལ་ཡང་ཐམས་ཅད་མཁྱེན་པ་ཉིད་ཀྱི་ཆོས་ལ་མངོན་པར་སྨོན་ཅིང་གཏང་བ་དང་། གཏང་བ་ཆེན་པོ་དང་། ཤིན་ཏུ་གཏང་བ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་བྱས་སོ། །བསྐལ་པ་ཆེན་པོ་དེ་དག་རེ་རེ་ལ་ཡང་ལུས་དང་སྲོག་ཕངས་པར་བྱ་བ་མྱེད་པར་སངས་རྒྱས་ཀྱི་ཆོས་གཅེས་པར་བྱ་བས་ལུས་བརྗོད་དུ་མེད་པའི་ཡང་བརྗོད་དུ་མེད་པ་ཞིག་ཡོངས་སུ་བཏང་ངོ་རྒྱལ་པོའི་སྲིད་ཆེན་པོ་ཡང་ཡོངས་སུ་བཏང་ངོ་། །གྲོང་དང་གྲོང་ཁྱེར་དང་ལྗོངས་དང་ཡུལ་དང་ཁམས་དང་རྒྱལ་པོའི་གནས་དག་ཀྱང་ཡོངས་སུ་བཏང་ངོ་། །སྡུག་ཅིང་ཡིད་དུ་འོང་ལ་བཏང་མི་བྲ་བའི་འཁོར་གྱི་ཚོགས་དག་ཀྱང་ཡོངས་སུ་བཏང་ངོ་། །བུ་དང་བུ་མོ་དང་ཆུང་མ་དག་ཀྱང་ཡོངས་སུ་བཏང་ངོ་། །རང་གི་ལུས་དང་། ཤ་དག་ཀྱང་ཡོངས་སུ་བཏང་ངོ་། །བདག་གི་ལུས་ལས་ཁྲག་དག་ཀྱང་སློང་བ་རྣམས་ལ་ཡོངས་སུ་བཏང་ངོ་། །རུས་པ་དང་རྐང་དག་ཀྱང་ཡོངས་སུ་
བཏང་ངོ་། །རྐང་པ་དང་ལག་པ་དག་ཀྱང་ཡོངས་སུ་བཏང་ངོ་། །ཡན་ལག་དང་ཉིང་ལག་དག་ཀྱང་ཡོངས་སུ་བཏང་ངོ་། །སྣ་དང་རྣ་བ་དག་ཀྱང་ཡོངས་སུ་བཏང་ངོ་། །མྱིག་དག་ཀྱང་ཡོངས་སུ་བཏང་ངོ་། །རང་གི་ཁ་ནས་ལྕེའི་དབང་པོ་དག་ཀྱང་ཡོངས་སུ་བཏང་ངོ་། །བསྐལ་པ་ཆེན་པོ་དེ་དག་རེ་རེ་ལ་ཡང་འཇིག་རྟེན་ཐམས་ཅད་ལས་མངོན་པར་འཕགས་ཤིང་བླ་ན་མེད་པར་གྱུར་པ་ཐམས་ཅད་མཁྱེན་པ་ཉིད་ཀྱི་དབུ་ལ་མངོན་པར་སྨོན་ཅིང་། རང་གི་མགོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ཡོངས་སུ་བཏང་ངོ་། །བསྐལ་པ་ཆེན་པོ་རེ་རེ་ལ་ཇི་ལྟ་བ་དེ་བཞིན་དུ་བསྐལ་པ་ཆེན་པོ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ལས་བསྐལ་པ་རྒྱ་མཚོ་རེ་རེ་ལ་ཡང་དེ་བཞིན་གཤེགས་པ་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཅིག་ལ་དབང་པོ་དམ་པར་གྱུར་ཏེ། རིམ་གྲོ་བྱས་སོ། །བཀུར་སྟི་བྱས་སོ། །ཕུད་དུད་བྱས་སོ། །མཆོད་པ་བྱས་སོ། །ན་བཟའ་དང་། བཤོས་དང་། གཟིམས་ཆ་དང་། སྙུན་གྱི་རྐྱེན་སྨན་དང་། ཡོ་བྱད་དག་ཀྱང་དབུལ་བ་བྱས་སོ། །དེ་བཞིན་གཤེགས་པ་དེ་དག་གི་བསྟན་པ་ལ་ཡང་རབ་ཏུ་བྱུང་སྟེ། སངས་རྒྱས་ཀྱི་གདམས་ངག་ཐམས་ཅད་ལ་ཡང་རབ་ཏུ་ཞུགས་སོ། །དེ་དག་གི་བསྟན་པ་ཡང་། ཡོངས་སུ་གཟུང་སྟེ། རིགས་ཀྱི་བུ་དེ་སྙེད་ཀྱི་བསྐལ་པ་རྒྱ་མཚོར་ཡང་། དེ་བཞིན་གཤེགས་པའི་བསྟན་པ་ལ་སེམས་བསྐྱེད་པ་འགའ་ཙམ་གྱིས་ཀྱང་། མི་མཐུན་པའི་སེམས་བསྐྱེད་དུ་མི་དྲན་ནོ། །དེ་སྙེད་ཀྱི་བསྐལ་པ་རྒྱ་མཚོར་སེམས་བསྐྱེད་པ་འགའ་ཙམ་གྱིས་ཀྱང་ཁོང་ཁྲོ་བ་དང་ལྡན་པའི་སེམས་བསྐྱེད་པའམ། བདག་ཏུ་འཛིན་པའི་སེམས་སམ། བདག་ཡོངས་སུ་བསྐྱང་ཞིང་ཡོངས་སུ་གཟུང་བའི་སེམས་སམ།
བདག་དང་གཞན་ཏུ་དབྱེ་བའི་སེམས་སམ། བྱང་ཆུབ་ཀྱི་ལམ་དང་བྲལ་བར་བྱ་བའི་སེམས་སམ། འཁོར་བ་ན་གནས་པས་ཡོངས་སུ་སྐྱོ་བའི་སེམས་སམ། ཞུམ་པའི་སེམས་སམ། སྒྲིབ་པས་མགོ་རྨོངས་པའི་སེམས་བསྐྱེད་དུ་མི་དྲན་ཏེ། གཞན་དུ་ན་ཐམས་ཅད་མཁྱེན་པ་ཉིད་ཀྱི་ཚོགས་བསྩགས་པའི་ཕྱིར་བྱང་ཆུབ་ཀྱི་སེམས་ཡེ་ཤེས་གཞན་གྱིས་མི་ཐུབ་ཅིང་བརྒལ་བར་དཀའ་བའི་སྙིང་པོ་དང་ལྡན་པ་བསྐྱེད་དོ། །རིགས་ཀྱི་བུ་འདི་ལྟ་སྟེ། ངའི་སྔོན་གྱི་སྦྱོར་བ་ཕུན་སུམ་ཚོགས་པ། སངས་རྒྱས་ཀྱི་ཞིང་ཡོངས་སུ་དག་པར་བྱས་པའི་སྦྱོར་བ་དག་དང་། དེས་སྙིང་རྗེ་ཆེན་པོའི་སེམས་རབ་ཏུ་ཐོབ་སྟེ། སེམས་ཅན་ཡོངས་སུ་བསྐྱབས་པ་དང་། ཡོངས་སུ་སྨིན་པར་བྱ་བ་དང་། ཡོངས་སུ་སྦྱང་བར་བྱས་པའི་སྦྱོར་བ་དག་དང་། སངས་རྒྱས་མཆོད་ཅིང་བསྙེན་བཀུར་བའི་སྦྱོར་བ་དག་དང་། དམ་པའི་ཆོས་ཡོངས་སུ་བཙལ་བའི་དོན་དུ་བླ་མ་ལ་རིམ་གྲོར་བྱས་པའི་སྦྱོར་བ་དག་དང་། དམ་པའི་ཆོས་ཡོངས་སུ་བཟུང་བའི་དོན་དུ་ལུས་ཡོངས་སུ་བཏང་བའི་སྦྱོར་བ་དག་དང་། དམ་པའི་ཆོས་ཡོངས་སུ་བསྲུང་བའི་དོན་དུ་རང་གི་སྲོག་ཡོངས་སུ་བཏང་བའི་སྦྱོར་བ་དེ་དག་ནི་བསྟན་པར་བྱ་ན། བསྐལ་པ་རྒྱ་མཚོ་ཐམས་ཅད་ཀྱང་ཟད་པར་འགྱུར་རོ། །རིགས་ཀྱི་བུ་ངས་ནི། ཆོས་རྒྱ་མཚོ་དེ་སྙེད་ཅིག་ལས་ཀྱང་། ཚིག་དང་ཡི་གེ་འགའ་ཙམ་ཡང་། སེམས་ཅན་ཐམས་ཅད་ཡོངས་སུ་བསྐྱབ་པ་ལ་བརྩོན་པ་དང་། རང་གི་སེམས་ཀྱི་རྒྱུད་ངེས་པར་ཤེས་པར་བྱ་བ་ལ་བརྩོན་པ་དང་། ཕ་རོལ་གྱིས་ཆོས་མངོན་དུ་ཐོས་པར་བྱ་བ་ལ་བརྩོན་པ་དང་། འཇིག་རྟེན་པའི་ཡེ་ཤེས་སྣང་བ་ཐམས་ཅད་རབ་ཏུ་བརྗོད་པ་ལ་བརྩོན་པ་དང་། འཇིག་རྟེན་ལས་འདས་པའི་ཡེ་ཤེས་ཐམས་ཅད་རབ་ཏུ་བརྗོད་
པ་ལ་བརྩོན་པ་དང་། སེམས་ཅན་ཐམས་ཅད་ཀྱི་འཁོར་བའི་བདེ་བ་ཡོངས་སུ་བསྐྱེད་པ་ལ་བརྩོན་པ་དང་། དེ་བཞིན་གཤེགས་པ་ཐམས་ཅད་ཀྱི་ཡོན་ཏན་ཡང་དག་པར་བསྔགས་པ་ལ་བརྩོན་པས་འཁོར་ལོས་སྒྱུར་བའི་རྒྱལ་སྲིད་ཡོངས་སུ་བཏང་བས་མ་ཉོས་པའམ། བདོག་པ་ཐམས་ཅད་ཡོངས་སུ་བཏང་བས་མ་ཉོས་པ་གང་ཡང་མེད་དེ། དེ་ལྟར་ང་ཉིད་ཀྱི་སྔོན་གྱི་སྦྱོར་བ་ཕུན་སུམ་ཚོགས་པ་བསྟན་པར་བྱ་ན། བསྐལ་པ་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཟད་པར་འགྱུར་རོ། །རིགས་ཀྱི་བུ་དེ་ལྟར་ངས་རྣམ་པ་དེ་ལྟ་བུའི་ཚོགས་ཀྱི་སྟོབས་དང་། དགེ་བའི་རྩ་བའི་རྒྱུ་བསྩགས་པའི་སྟོབས་དང་། མོས་པ་རྒྱ་ཆེན་པོའི་སྟོབས་དང་། ཡོན་ཏན་ལ་ནན་ཏན་དུ་བྱ་བའི་སྟོབས་དང་། ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་ཁོང་དུ་ཆུད་པར་བྱ་བའི་སྟོབས་དང་། ཤེས་རབ་ཀྱི་མིག་གི་སྟོབས་དང་། དེ་བཞིན་གཤེགས་པའི་བྱིན་གྱི་རླབས་ཀྱི་སྟོབས་དང་། སྨོན་ལམ་ཆེན་པོའི་སྟོབས་དང་། སྙིང་རྗེ་ཆེན་པོའི་སྟོབས་དང་། ཤིན་ཏུ་སྦྱངས་པའི་མངོན་པར་ཤེས་པའི་སྟོབས་དང་། དགེ་བའི་བཤེས་གཉེན་གྱིས་ཡོངས་སུ་བཟུང་བའི་སྟོབས་ཀྱིས་ཆོས་ཀྱི་ལུས་ཡོངས་སུ་དག་པ་དུས་གསུམ་དུ་ཐ་མི་དད་པ་ཐོབ་པར་གྱུར་ཏོ། །བླ་ན་མེད་པའི་གཟུགས་ཀྱི་ལུས་འཇིག་རྟེན་ཐམས་ཅད་ལས་མངོན་པར་འཕགས་པ་འགྲོ་བ་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་རྣམ་པར་དམིགས་པ་ཐམས་ཅད་དུ་རྗེས་སུ་སོང་བ་སངས་རྒྱས་ཀྱི་ཞིང་ཐམས་ཅད་དུ་རབ་ཏུ་གཞོལ་བ། ཐམས་ཅད་དུ་རབ་ཏུ་གནས་པ་རྣམ་པར་འཕྲུལ་པ་ཐམས་ཅད་རྣམ་པ་ཐམས་ཅད་དུ། སྟོན་པ་འགྲོ་བ་ཐམས་ཅད་ཀྱི། ཡིད་དུ་འོང་བ་ཡང་ཡོངས་
སུ་སྦྱངས་སོ། །རིགས་ཀྱི་བུ་ངས་ལུས་ཐོབ་པ་ཕུན་སུམ་ཚོགས་པ། བསྐལ་པ་རྒྱ་མཚོ་མཐའ་ཡས་པས་ཡོངས་སུ་གྲུབ་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོས། འབྱུང་བར་དཀའ་བ་མཐོང་བར་དཀའ་བ་འདི་ལ་ལྟོས། རིགས་ཀྱི་བུ་ང་ནི་དགེ་བའི་རྩ་བ་མ་བསྐྱེད་པའི་སེམས་ཅན་རྣམས་ཀྱི་རྣ་ལམ་དུ་ཡང་མི་འོང་ན། མཐོང་བར་ལྟ་ཇི་ཞིག་སྨོས། རིགས་ཀྱི་བུ་སེམས་ཅན་གང་དག་ངའི་མིང་ཐོས་པ་ཙམ་གྱིས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཡོད་དོ། །མཐོང་བ་ཙམ་དང་། རེག་པ་ཙམ་དང་། བསྐྱལ་བ་ཙམ་དང་། རྗེས་སུ་འབྲང་བ་ཙམ་དང་། རྨི་ལམ་དུ་མཐོང་བ་ཙམ་དང་། རྨི་ལམ་དུ་མིང་ཐོས་པ་ཙམ་གྱིས་ཀྱང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་ཡོད་དེ། སེམས་ཅན་ལ་ལས་ནི་ང་ཉིན་ཞག་གཅིག་ཏུ་དྲན་པར་བྱས་ན་ཡོངས་སུ་སྨིན་པར་འགྱུར་རོ། །ལ་ལས་ནི་ཞག་བདུན་དང་། ལ་ལས་ནི་ཟླ་བ་ཕྱེད་དང་། ལ་ལས་ནི་ཟླ་བ་གཅིག་དང་། ལ་ལས་ནི་ལོ་གཅིག་དང་། ལ་ལས་ནི་ལོ་བརྒྱ་དང་། ལ་ལས་ནི་བསྐལ་པ་གཅིག་དང་། ལ་ལས་ནི་བསྐལ་པ་བརྒྱ་ནས། ལ་ལས་ནི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་དུ་ང་རྗེས་སུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། །ལ་ལས་ནི་ཚེ་གཅིག་ཏུ་ང་རྗེས་སུ་དྲན་པར་བྱས་ན། ཡོངས་སུ་སྨིན་པར་འགྱུར་རོ། །ལ་ལས་ནི་ཚེའི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་ཡོངས་སུ་སྨིན་པར་འགྱུར་རོ། །སེམས་ཅན་ལ་ལས་ནི་ངའི་འོད་མཐོང་བས་ཡོངས་སུ་སྨིན་པར་འགྱུར་རོ། །ལ་ལས་ནི་འོད་ཟེར་
བཀྱེ་བ་མཐོང་བས་ལ་ལས་ནི་ཞིང་བསྐྱོད་པས་ལ་ལས་ནི་གཟུགས་ཀྱི་ལུས་བསྟན་པས་ལ་ལས་ནི་དགའ་བར་བྱས་པས་ཡོངས་སུ་སྨིན་པར་འགྱུར་ཏེ། རིགས་ཀྱི་བུ་དེ་ལྟར་ཐབས་ཀྱི་ཚུལ་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཀྱི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །རིགས་ཀྱི་བུ་སེམས་ཅན་གང་གིས་ངའི་སངས་རྒྱས་ཀྱི་ཞིང་ཡོངས་སུ་དག་པ་ཐོབ་པ་དེ་དག་ནི་སངས་རྒྱས་ཀྱི་ཞིང་ཡོངས་སུ་དག་པར་སྐྱེའོ། །གང་གིས་ངའི་ལུས་ཡོངས་སུ་དག་པ་མཐོང་བར་གྱུར་པ་དེ་དག་ནི་ངའི་ལུས་ལྟ་བུར་སྐྱེ་བར་འགྱུར་གྱིས་རིགས་ཀྱི་བུ་ངའི་ལུས་རྣམ་པར་དག་པ་འདི་ལ་ལྟོས་ཤིག །དེ་ནས་ཚོང་དཔོན་གྱི་བུ་ནོར་བཟངས་ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ལ་བསམ་པ་དང་། བ་སྤུའི་བུ་ག་རེ་རེ་ལ་ཡང་སངས་རྒྱས་ཀྱི་ཞིང་རྒྱ་མཚོ་བརྗོད་དུ་མེད་པའི་ཡང་བརྗོད་དུ་མེད་པའི་སངས་རྒྱས་སྐྱེ་བས་ཡོངས་སུ་གང་བ་མཐོང་ངོ་། །ཞིང་རྒྱ་མཚོ་རེ་རེ་ན་ཡང་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་རྒྱ་མཚོས་ཀུན་ནས་བསྐོར་བ་མང་པོ་བཞུགས་པ་མཐོང་ངོ་། །ཞིང་རྒྱ་མཚོ་དེ་དག་ཐམས་ཅད་ཀྱང་གཞི་སྣ་ཚོགས་དང་དབྱིབས་སྣ་ཚོགས་དང་། རྒྱན་སྣ་ཚོགས་དང་འཁོར་ཡུག་སྣ་ཚོགས་དང་སྤྲིན་སྣ་ཚོགས་དང་ནམ་མཁའ་སྣ་ཚོགས་ཀྱིས་ཀུན་ནས་ཁེབས་པ་དང་། སངས་རྒྱས་འབྱུང་བ་སྣ་ཚོགས་དང་ཆོས་ཀྱི་འཁོར་ལོ་སྣ་ཚོགས་ཀྱི་དབྱངས་དང་ལྡན་པར་མཐོང་ངོ་། །བ་སྤུའི་བུ་ག་རེ་རེ་ལ་ཇི་ལྟ་བ་བཞིན་དུ་བ་སྤུའི་བུ་ག་མ་ལུས་པ་ཐམས་ཅད་དང་། མཚན་ཐམས་ཅད་དང་དཔེ་བྱད་བཟང་པོ་ཐམས་ཅད་དང་། ཡན་ལག་དང་ཉིང་ལག་ཐམས་ཅད་ལ་ཡང་དེ་བཞིན་ཏེ། ཞིང་རྒྱ་མཚོ་རེ་རེ་ནས་ཀྱང་སངས་རྒྱས་ཀྱི་སྐུ་སྤྲུལ་པའི་སྤྲིན་སངས་རྒྱས་ཀྱི་ཞིང་ཐམས་ཅད་ཀྱི་རྡུལ་ཤིན་ཏུ་ཕྲ་བ་སྙེད་བྱུང་ནས་ཕྱོགས་བཅུར་འཇིག་རྟེན་གྱི་ཁམས་
ཐམས་ཅད་རྒྱས་པར་བཀང་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅན་ཡོངས་སུ་སྨིན་པར་མཛད་པ་མཐོང་ངོ་། །དེ་ནས་ཚོང་དཔོན་གྱི་བུ་ནོར་བཟངས་བྱང་ཆུབ་སེམས་དཔའ་ཀུན་ཏུ་བཟང་པོའི་གདམས་ངག་དང་རྗེས་སུ་བསྟན་པས་རྗེས་སུ་བསྟན་ནས་བྱང་ཆུབ་སེམས་དཔའ་ཀུན་ཏུ་བཟང་པོའི་ལུས་ཀྱི་ཁོངས་སུ་གཏོགས་པའི་འཇིག་རྟེན་གྱི་ཁམས་ཐམས་ཅད་དུ་ཞུགས་ཏེ། སེམས་ཅན་ཡོངས་སུ་སྨིན་པར་བྱེད་པར་གྱུར་ཏོ། །དེ་ལྟར་ཚོང་དཔོན་གྱི་བུ་ནོར་བཟངས་ཀྱིས་དགེ་བའི་བཤེས་གཉེན་སངས་རྒྱས་ཀྱི་ཞིང་གི་རྡུལ་ཤིན་ཏུ་ཕྲ་བ་སྙེད་ཅིག་གི་དྲུང་དུ་ཕྱིན་ཏེ། མཐོང་བ་དང་བསྙེན་བཀུར་བས་ཡེ་ཤེས་ཀྱི་སྣང་བ་དང་། དགེ་བའི་རྩ་བ་བསྩགས་པ་དེ་དག་གིས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་སྟེ། དགེ་བའི་རྩ་བ་བསྩགས་པར་གྱུར་པ་དེའི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆར་ཡང་མ་ཡིན་བརྒྱ་སྟོང་གི་ཆར་ཡང་མ་ཡིན། བྱེ་བ་བརྒྱ་ཕྲག་སྟོང་གི་ཆར་ཡང་མ་ཡིན་ཏེ། གྲངས་དང་ཆ་དང་བགྲང་བ་དང་དཔེར་བྱ་བ་དང་། རྒྱུར་བྱ་བ་ཙམ་དུ་ཡང་མི་ཕོད་དོ། །དེས་དང་པོ་སེམས་བསྐྱེད་པ་ནས་ཉེ་བར་བཟུང་ནས་བྱང་ཆུབ་སེམས་དཔའ་ཀུན་ཏུ་བཟང་པོ་མཐོང་བའི་བར་དེར་སངས་རྒྱས་ཀྱི་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པ་ཇི་སྙེད་ཅིག་ལ་ཞུགས་པར་གྱུར་པ་དེ་དག་པས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱི་བར་དུ་བྱང་ཆུབ་སེམས་དཔའ་ཀུན་ཏུ་བཟང་པོའི་བ་སྤུའི་བུ་ག་རེ་རེར་སངས་རྒྱས་ཀྱི་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པ་མང་པོ་ལ་སེམས་ཀྱི་སྐད་ཅིག་གཅིག་གིས་ཞུགས་པར་གྱུར་ཏེ། བ་སྤུའི་བུ་ག་རེ་རེར་ཇི་ལྟ་བ་དེ་བཞིན་དུ་བ་སྤུའི་བུ་ག་མ་ལུས་པ་ཐམས་ཅད་ལ་ཡང་སེམས་ཀྱི་སྐད་ཅིག་རེ་རེ་ལ་འཇིག་རྟེན་གྱི་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རྣམ་པར་གནོན་པ་ཕྱི་མའི་མཐའི་མུར་ཐུག་པའི་བསྐལ་པར་བྱིན་གྱིས་བརླབས་པ། འཇིག་རྟེན་གྱི་ཁམས་རྒྱས་པར་འགེངས་པས་ཞུགས་
ཀྱང་ཞིང་རྒྱ་མཚོ་གཅིག་ནས་གཅིག་ཏུ་བརྒྱུད་པའི་མཐར་ཕྱིན་པར་མ་གྱུར་ཏེ། ཞིང་རྒྱ་མཚོའི་ལྷུན་དང་ཞིང་རྒྱ་མཚོའི་བྱེ་བྲག་དང་། ཞིང་རྒྱ་མཚོ་ཡོངས་སུ་བསྡུ་བ་དང་། ཞིང་རྒྱ་མཚོ་ཡོངས་སུ་འགྲུབ་པ་དང་། ཞིང་རྒྱ་མཚོ་འཇིག་པ་དང་། ཞིང་རྒྱ་མཚོ་རྣམ་པར་ཕྱེ་བ་དང་། སངས་རྒྱས་བྱུང་བ་རྒྱ་མཚོ་གཅིག་ནས་གཅིག་ཏུ་བརྒྱུད་པ་དང་། སངས་རྒྱས་བྱུང་བ་རྒྱ་མཚོའི་སྐུ་དང་། སངས་རྒྱས་བྱུང་བ་རྒྱ་མཚོའི་བྱེ་བྲག་དང་། སངས་རྒྱས་བྱུང་བ་རྒྱ་མཚོ་ཡོངས་སུ་བསྡུ་བ་དང་། སངས་རྒྱས་བྱུང་བ་རྒྱ་མཚོ་ཡོངས་སུ་འབྱུང་བ་དང་། སངས་རྒྱས་བྱུང་བ་རྒྱ་མཚོ་ཡོངས་སུ་འཇིག་པ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་གཅིག་ནས་གཅིག་ཏུ་བརྒྱུད་པ་དང། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་ལུས་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོའི་བྱེ་བྲག་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་བསྡུ་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་འབྱུང་བ་དང་། བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རྒྱ་མཚོ་ཡོངས་སུ་འཇིག་པ་དང་། སེམས་ཅན་གྱི་ཁམས་ལ་འཇུག་པ་དང་། སྐད་ཅིག་རེ་རེས་སེམས་ཅན་གྱི་དབང་པོ་ཤེས་པ་ལ་འཇུག་པ་དང་། སེམས་ཅན་གྱི་དབང་པོ་ཤེས་པ་ཁོང་དུ་ཆུད་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་ཞིང་གདུལ་བ་དང་། བྱང་ཆུབ་སེམས་དཔའ་རྣམ་པར་འཕྲུལ་པ་ཟབ་མོ་ལ་རྣམ་པར་གནས་པ་དང་། བྱང་ཆུབ་སེམས་དཔའི་ས་ཡོངས་སུ་གནན་པའི་རྣམ་པར་གནོན་པ་རྒྱ་མཚོའི་མཐར་ཡང་ཕྱིན་པར་མ་གྱུར་ཏེ། དེ་ཞིང་ལ་ལར་ནི་བསྐལ་པར་རྣམ་པར་སྤྱད་པར་གྱུར་ཏོ། །ཞིང་ལ་ལར་ནི་བསྐལ་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་བར་དུ་སྤྱད་པར་གྱུར་ཏེ། ཞིང་དེ་དག་ནས་ཀྱང་
གཡོས་པ་མེད་དོ། །སེམས་ཀྱི་སྐད་ཅིག་རེ་རེ་ལ་ཡང་ཞིང་རྒྱ་མཚོ་མཐའ་དང་དབུས་མེད་པ་ལ་འཇུག་ཅིང་སེམས་ཅན་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་གྱུར་ཏེ། དེས་དེ་ལྟར་མཐར་གྱིས་བྱང་ཆུབ་སེམས་དཔའ་ཀུན་ཏུ་བཟང་པོའི་སྤྱོད་པ་དང་སྨོན་ལམ་རྒྱ་མཚོ་མཉམ་པ་ཉིད་ཀྱི་བར་དུའང་ཐོབ་པར་གྱུར་ཏོ། །དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དང་། ཞིང་ཐམས་ཅད་ལུས་ཀྱིས་རྒྱས་པར་དགང་བ་མཉམ་པ་ཉིད་དང་སྤྱོད་པ་ཡོངས་སུ་རྫོགས་པར་རྒྱས་པར་དགང་བ་མཉམ་པ་ཉིད་དང་། མངོན་པར་རྫོགས་པར་འཚང་རྒྱ་བའི་རྣམ་པར་འཕྲུལ་པ་ཡོངས་སུ་བསྟན་པས་རྒྱས་པར་དགང་བ་མཉམ་པ་ཉིད་དང་། ཆོས་ཀྱི་འཁོར་ལོ་བསྐོར་བ་མཉམ་པ་ཉིད་དང་། སོ་སོ་ཡང་དག་པར་རིག་པ་རྣམ་པར་དག་པ་མཉམ་པ་ཉིད་དང་། དབྱངས་བརྗོད་པ་མཉམ་པ་ཉིད་དང་། དབྱངས་ཀྱི་ཡན་ལག་རྒྱ་མཚོ་ཐམས་ཅད་ཀྱི་སྦྱོར་བ་མཉམ་པ་ཉིད་དང་། སྟོབས་དང་མི་འཇིགས་པ་མཉམ་པ་ཉིད་དང་། སངས་རྒྱས་ཀྱི་རྣམ་པར་སྤྱོད་པ་མཉམ་པ་ཉིད་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་མཉམ་པ་ཉིད་དང་། བྱང་ཆུབ་སེམས་དཔའི་རྣམ་པར་ཐར་པ་བསམ་གྱིས་མི་ཁྱབ་པའི་རྣམ་པར་འཕྲུལ་པ་མཉམ་པ་ཉིད་ཀྱང་རྗེས་སུ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོས་བསྐལ་པ་དང་། བསྐལ་པ་འབྱམ་ཀླས་པ་དང་། འཇིག་རྟེན་གྱི་ཁམས་གཅིག་ནས་གཅིག་ཏུ་བརྒྱུད་པ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་པོ་དེ་དག་བརྣན་ཏེ་མངོན་པར་བརྗོད་པའི་ཕྱིར་ཚིགས་སུ་བཅད་པའི་དབྱངས་ཀྱིས་སྨོན་ལམ་བཏབ་པ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །
ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པར། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པའི་གདུགས་མཆོག་དང་། །མར་མེ་མཆོག་དང་བདུག་པ་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །ཁྱད་པར་ཅན་གྱི་རྒྱན་མཆོག་ཐམས་ཅད་ཀྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ན། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་རྣམས་ཀྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོན་མ་དག །བྱང་ཆུབ་རིམ་པར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་
ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསྩགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོ་འོ། །འདས་པའི་སངས་རྒྱས་རྣམས་དང་ཕྱོགས་བཅུ་ཡི། །འཇིག་རྟེན་དག་ན་གང་བཞུགས་མཆོད་པར་གྱུར། །གང་ཡང་མ་བྱོན་དེ་དག་རབ་མྱུར་བར། །བསམ་རྫོགས་བྱང་ཆུབ་རིམ་པར་སངས་རྒྱས་སྤྱོན། །ཕྱོགས་བཅུ་ག་ལའི་ཞིང་རྣམས་ཇི་སྙེད་པ། །དེ་དག་རྒྱ་ཆེར་ཡོངས་སུ་དག་པར་གྱུར། །བྱང་ཆུབ་ཤིང་དབང་དྲུང་གཤེགས་རྒྱལ་བ་དང་། །སངས་རྒྱས་སྲས་ཀྱིས་རབ་ཏུ་གང་བར་ཤོག །ཕྱོགས་བཅུའི་སེམས་ཅན་གང་རྣམས་ཇི་སྙེད་པ། །དེ་དག་རྟག་ཏུ་ནད་མེད་བདེ་བར་གྱུར། །འགྲོ་བ་ཀུན་གྱི་ཆོས་ཀྱི་དོན་རྣམས་ནི། །འཐུན་པར་གྱུར་ཅིང་རེ་བའང་གྲུབ་པར་ཤོག །བྱང་ཆུབ་སྤྱོད་པ་དག་ནི་བདག་སྤྱོད་ཅིང་། །འགྲོ་བ་ཀུན་ཏུ་སྐྱེ་བ་དྲན་པར་གྱུར། །ཚེ་རབས་ཀུན་ཏུ་འཆི་འཕོ་སྐྱེ་བ་ན། །རྟག་ཏུ་བདག་ནི་རབ་ཏུ་འབྱུང་བར་ཤོག །རྒྱལ་བ་ཀུན་གྱི་རྗེས་སུ་སློབ་གྱུར་ཏེ། །བཟང་པོ་སྤྱོད་པ་ཡོངས་སུ་རྫོགས་བྱེད་ཅིང་། །ཚུལ་ཁྲིམས་སྤྱོད་པ་དྲི་མེད་ཡོངས་དག་པར། །རྟག་ཏུ་མ་ཉམས་སྐྱོན་མེད་སྤྱོད་པར་ཤོག ། ལྷ་ཡི་སྐད་དང་ཀླུ་དང་གནོད་སྦྱིན་སྐད། །གྲུལ་བུམ་དག་དང་མི་ཡི་སྐད་རྣམས་དང་། །འགྲོ་བ་ཀུན་གྱི་སྒྲ་རྣམས་ཇི་ཙམ་པར། །ཐམས་ཅད་སྐད་དུ་བདག་གིས་ཆོས་བསྟན་ཏོ། །དེས་ཤིང་ཕ་རོལ་ཕྱིན་ལ་རབ་བརྩོན་ཏེ། །བྱང་ཆུབ་སེམས་ནི་ནམ་ཡང་བརྗེད་མ་གྱུར། །སྡིག་པ་གང་རྣམས་སྒྲིབ་པར་འགྱུར་བ་དག །དེ་དག་མ་ལུས་ཡོངས་སུ་བྱང་བར་ཤོག །ལས་དང་ཉོན་མོངས་བདུད་ཀྱི་ལས་རྣམས་ལས། །གྲོལ་ཞིང་འཇིག་རྟེན་འགྲོ་བ་རྣམས་སུ་ཡང་། །
ཇི་ལྟར་པད་མོ་ཆུས་མི་ཆགས་པ་བཞིན། །ཉི་ཟླ་ནམ་མཁར་ཐོགས་པ་མེད་ལྟར་སྤྱད། །ཞིང་གི་ཁྱོན་དང་ཕྱོགས་རྣམས་ཇི་ཙམ་པར། །ངན་སོང་སྡུག་བསྔལ་རབ་ཏུ་ཞི་བར་བྱེད། །བདེ་བ་དག་ལ་འགྲོ་བ་ཀུན་འགོད་ཅིང་། །འགྲོ་བ་ཐམས་ཅད་ལ་ནི་ཕན་པར་སྤྱད། །བྱང་ཆུབ་སྤྱོད་པ་ཡོངས་སུ་རྫོགས་བྱེད་ཅིང་། །སེམས་ཅན་དག་གི་སྤྱོད་དང་མཐུན་པར་འཇུག །བཟང་པོ་སྤྱོད་པ་དག་ནི་རབ་སྟོན་ཅིང་། །མ་འོངས་བསྐལ་པ་ཀུན་ཏུ་སྤྱོད་པར་འགྱུར། །བདག་གི་སྤྱོད་དང་མཚུངས་པར་གང་སྤྱོད་པ། །དེ་དག་དང་ནི་རྟག་ཏུ་འགྲོགས་པར་ཤོག །ལུས་དང་ངག་རྣམས་དང་ནི་སེམས་ཀྱིས་ཀྱང་། །སྤྱོད་པ་དག་དང་སྨོན་ལམ་གཅིག་ཏུ་སྤྱད། །བདག་ལ་ཕན་པར་འདོད་པའི་གྲོགས་པོ་དག །བཟང་པོ་སྤྱོད་པ་རབ་ཏུ་སྟོན་པ་རྣམས། །དེ་དག་དང་ཡང་རྟག་ཏུ་ཕྲད་པར་ཤོག །དེ་དག་བདག་གིས་ནམ་ཡང་ཡིད་མི་དབྱུང་། །སངས་རྒྱས་སྲས་ཀྱིས་བསྐོར་བའི་མགོན་པོ་རྣམས། །མངོན་སུམ་རྟག་ཏུ་བདག་གིས་རྒྱལ་བ་ལྟ། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་དག་ལ་ཡང་མཆོད་པ་རྒྱ་ཆེར་བགྱི། །རྒྱལ་བ་རྣམས་ཀྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། །བཟང་པོ་སྤྱོད་པ་རྣམ་པར་སྦྱངས་པ་ཡང་། །མ་འོངས་བསྐལ་པ་ཀུན་ཏུ་སྤྱད་པར་བགྱི། །སྲིད་པ་ཐམས་ཅད་དུ་ཡང་འཁོར་བ་ན། །བསོད་ནམས་ཡེ་ཤེས་དག་ནི་མི་ཟད་རྙེད། །ཐབས་དང་ཤེས་རབ་ཏིང་འཛིན་རྣམ་ཐར་དང་། །ཡོན་ཏན་ཀུན་གྱི་མི་ཟད་མཛོད་དུ་གྱུར། །རྡུལ་གཅིག་སྟེང་ན་རྡུལ་སྙེད་ཞིང་རྣམས་ཏེ། །ཞིང་དེར་བསམ་གྱིས་མི་ཁྱབ་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་ལ། །བྱང་ཆུབ་སྤྱོད་པ་སྤྱོད་ཅིང་བལྟ་བར་བགྱི། །དེ་དག་མ་ལུས་ཐམས་ཅད་ཕྱོགས་སུ་ཡང་། །སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། །སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང་། །བསྐལ་པ་རྒྱ་མཚོར་སྤྱོད་ཅིང་རབ་ཏུ་འཇུག །
གསུང་གཅིག་ཡན་ལག་རྒྱ་མཚོའི་སྒྲ་སྐད་ཀྱིས། །རྒྱལ་བ་ཀུན་དབྱངས་ཡན་ལག་རྣམ་དག་པ། །འགྲོ་བ་ཀུན་གྱི་བསམ་པ་ཇི་བཞིན་དབྱངས། །སངས་རྒྱས་གསུང་ལ་རྟག་ཏུ་འཇུག་པར་བགྱི། །དུས་གསུམ་གཤེགས་པ་རྒྱལ་བ་ཐམས་ཅད་དག །འཁོར་ལོའི་ཚུལ་རྣམས་རབ་ཏུ་བསྐོར་བ་ཡིས། །དེ་དག་གི་ཡང་གསུང་དབྱངས་མྱི་ཟད་ལ། །བློ་ཡི་སྟོབས་ཀྱིས་བདག་ཀྱང་རབ་ཏུ་འཇུག །མ་འོངས་བསྐལ་པ་ཐམས་ཅད་འཇུག་པར་ཡང་། །སྐད་ཅིག་གཅིག་གིས་བདག་ཀྱང་འཇུག་པར་བགྱི། །གང་ཡང་བསྐལ་པ་དུས་གསུམ་ཚད་དེ་དག །སྐད་ཅིག་ཆ་ཤས་ཀྱིས་ནི་ཞུགས་པར་སྤྱད། །དུས་གསུམ་གཤེགས་པ་མི་ཡི་སེང་གེ་དག །དེ་དག་སྐད་ཅིག་གཅིག་ལ་བདག་གིས་བལྟ། །རྟག་ཏུ་དེ་དག་གི་ནི་སྤྱོད་ཡུལ་ལ། །སྒྱུ་མར་གྱུར་པའི་རྣམ་ཐར་སྟོབས་ཀྱིས་འཇུག །གང་ཡང་དུས་གསུམ་དག་གི་ཞིང་བཀོད་པ། །དེ་དག་རྡུལ་གཅིག་སྟེང་དུ་མངོན་པར་བསྒྲུབ། །དེ་ལྟར་མ་ལུས་ཕྱོགས་རྣམས་ཐམས་ཅད་དུ། །རྒྱལ་བ་རྣམས་ཀྱི་ཞིང་གི་རྒྱན་ལ་འཇུག །གང་ཡང་མ་བྱོན་འཇིག་རྟེན་སྒྲོན་མ་རྣམས། །དེ་དག་རིམ་པར་འཚང་རྒྱ་འཁོར་ལོ་བསྐོར། །མྱ་ངན་འདས་པ་རབ་ཏུ་ཞི་མཐའ་སྟོན། །མགོན་པོ་ཀུན་གྱི་དྲུང་དུ་བདག་མཆི་འོ། །ཀུན་ཏུ་མྱུར་བའི་རྫུ་འཕྲུལ་སྟོབས་རྣམས་དང་། །ཀུན་ནས་སྒོ་ཡི་ཐེག་པའི་སྟོབས་དག་དང་། །ཀུན་ཏུ་ཡོན་ཏན་སྤྱོད་པའི་སྟོབས་རྣམས་དང་། །ཀུན་ཏུ་ཁྱབ་པ་བྱམས་པ་དག་གི་སྟོབས། །ཀུན་ཏུ་དགེ་བའི་བསོད་ནམས་སྟོབས་རྣམས་དང་། །ཆགས་པ་མེད་པར་གྱུར་པའི་ཡེ་ཤེས་སྟོབས། །ཤེས་རབ་ཐབས་དང་ཏིང་འཛིན་སྟོབས་དག་གིས། །བྱང་ཆུབ་སྟོབས་རྣམས་ཡང་དག་སྒྲུབ་པར་བྱེད། །ལས་ཀྱི་སྟོབས་རྣམས་ཡོངས་སུ་དག་བྱེད་ཅིང་། །ཉོན་མོངས་སྟོབས་རྣམས་ཀུན་ཏུ་འཇོམས་པར་བྱེད། །བདུད་ཀྱི་སྟོབས་རྣམས་སྟོབས་མེད་རབ་བྱེད་ཅིང་། །བཟང་པོ་སྤྱོད་པའི་སྟོབས་ནི་རྫོགས་པར་བགྱི། །ཞིང་རྣམས་རྒྱ་མཚོ་རྣམ་པར་དག་བྱེད་ཅིང་། །
སེམས་ཅན་རྒྱ་མཚོ་དག་ནི་རྣམ་པར་སྒྲོལ། །ཆོས་རྣམས་རྒྱ་མཚོ་རབ་ཏུ་མཐོང་བྱེད་ཅིང་། །ཡེ་ཤེས་རྒྱ་མཚོ་རབ་ཏུ་རྟོགས་པར་བྱེད། །སྤྱོད་པ་རྒྱ་མཚོ་རྣམ་པར་དག་བྱེད་ཅིང་། །སྨོན་ལམ་རྒྱ་མཚོ་རབ་ཏུ་རྫོགས་པར་བྱེད། །སངས་རྒྱས་རྒྱ་མཚོ་རབ་ཏུ་མཆོད་བྱེད་ཅིང་། །བསྐལ་པ་རྒྱ་མཚོར་མི་སྐྱོ་སྤྱད་པར་བགྱི། །གང་ཡང་དུས་གསུམ་གཤེགས་པ་རྒྱལ་བ་ཡི། །བྱང་ཆུབ་སྤྱོད་པའི་སྨོན་ལམ་བྱེ་བྲག་རྣམས། །བཟང་པོ་སྤྱོད་པས་བྱང་ཆུབ་སངས་རྒྱས་ནས། །དེ་ཀུན་བདག་གིས་མ་ལུས་རྫོགས་པར་བགྱི། །རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །མཁས་པ་དེ་དང་མཚུངས་པར་སྤྱད་པའི་ཕྱིར། །དགེ་བ་འདི་དག་ཐམས་ཅད་རབ་ཏུ་བསྔོ། །ལུས་དང་ངག་དང་ཡིད་ཀྱང་རྣམ་དག་ཅིང་། །སྤྱོད་པ་རྣམ་དག་ཞིང་རྣམས་ཡོངས་དག་དང་། །བསྔོ་བ་བཟང་པོ་མཁས་པ་ཅི་འདྲ་བར། །དེ་འདྲར་བདག་ཀྱང་དེ་དང་མཚུངས་པར་ཤོག ། ཀུན་ནས་དགེ་བ་བཟང་པོ་སྤྱོད་པའི་ཕྱིར། །འཇམ་དཔལ་གྱི་ནི་སྨོན་ལམ་སྤྱད་པར་བགྱི། །མ་འོངས་བསྐལ་པ་ཀུན་ཏུ་མི་སྐྱོ་བར། །དེ་ཡི་བྱ་བ་མ་ལུས་རྫོགས་པར་བགྱི། །སྤྱོད་པ་དག་ནི་ཚད་ཡོད་མ་གྱུར་ཅིག །ཡོན་ཏན་རྣམས་ཀྱང་ཚད་གཟུང་མེད་པར་ཤོག །སྤྱོད་པ་ཚད་མེད་པ་ལ་གནས་ནས་ཀྱང་། །དེ་དག་འཕྲུལ་པ་ཐམས་ཅད་འཚལ་བར་བགྱི། །ནམ་མཁའི་མཐར་ཐུག་གྱུར་པ་ཇི་ཙམ་པར། །སེམས་ཅན་མ་ལུས་མཐའ་ཡང་དེ་བཞིན་ཏེ། །ཅི་ཙམ་ལས་དང་ཉོན་མོངས་མཐར་གྱུར་པ། །བདག་གི་སྨོན་ལམ་མཐའ་ཡང་དེ་ཙམ་མོ། །གང་ཡང་ཕྱོགས་བཅུའི་ཞིང་རྣམས་མཐའ་ཡས་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བ་མཆོག་རྣམས་ཀྱང་། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང་། །ལན་ཅིག་ཙམ་ཡང་དད་པ་བསྐྱེད་པས་
ནི། ། བསོད་ནམས་དམ་པའི་མཆོག་ཏུ་འདི་འགྱུར་རོ། །གང་གིས་བཟང་སྤྱོད་སྨོན་ལམ་འདི་བཏབ་པ། །དེས་ནི་ངན་སོང་ཐམས་ཅད་སྤོང་བར་འགྱུར། །དེས་ནི་གྲོགས་པོ་ངན་པ་སྤངས་པ་ཡིན། །སྣང་བ་མཐའ་ཡས་དེ་ཡང་དེས་མྱུར་མཐོང་། །དེ་དག་རྙེད་པ་རབ་རྙེད་བདེ་བར་འཚོ། །མི་ཚེ་འདིར་ཡང་དེ་དག་ལེགས་པར་འོང་། །ཀུན་ཏུ་བཟང་པོ་དེ་ཡང་ཇི་འདྲ་བར། །དེ་དག་རིང་པོར་མི་ཐོགས་དེ་བཞིན་འགྱུར། །མཚམས་མེད་ལྔ་པོ་དག་གི་སྡིག་པ་རྣམས། །གང་གི་མི་ཤེས་དབང་གིས་བྱས་པ་དག །དེ་ཡིས་བཟང་པོ་སྤྱོད་པ་འདི་བརྗོད་ན། །མྱུར་དུ་མ་ལུས་ཡོངས་སུ་བྱང་བར་འགྱུར། །ཡེ་ཤེས་དང་ནི་གཟུགས་དང་མཚན་རྣམས་དང་། །རིགས་དང་ཁ་དོག་རྣམས་དང་ལྡན་པར་འགྱུར། །བདུད་དང་མུ་སྟེགས་མང་པོས་དེ་མྱི་ཐུབ། །འཇིག་རྟེན་གསུམ་པོ་ཀུན་ནའང་མཆོད་པར་འགྱུར། །བྱང་ཆུབ་ཤིང་དབང་དྲུང་དུ་དེ་མྱུར་འགྲོ། །སོང་ནས་སེམས་ཅན་ཕན་ཕྱིར་དེར་འདུག་སྟེ། །བྱང་ཆུབ་སངས་རྒྱས་འཁོར་ལོ་རབ་ཏུ་བསྐོར། །བདུད་རྣམས་སྡེ་དང་བཅས་པ་ཐམས་ཅད་བཏུལ། །གང་ཡང་བཟང་པོ་སྤྱོད་པའི་སྨོན་ལམ་འདི། །འཆང་བ་དང་ནི་ཀློག་གམ་སྟོན་པ་ཡི། །དེ་ཡི་རྣམ་པར་སྨིན་པ་སངས་རྒྱས་མཁྱེན། །བྱང་ཆུབ་མཆོག་ལ་སོམ་ཉི་མ་བྱེད་ཅིག ། འཇམ་དཔལ་ཇི་ལྟར་མཁྱེན་ཅིང་དཔའ་བ་དང་། །ཀུན་ཏུ་བཟང་པོ་དེ་ཡང་དེ་བཞིན་ཏེ། །དེ་དག་གི་ནི་རྗེས་སུ་བདག་སློབ་ཅིང་། །དགེ་བ་འདི་དག་ཐམས་ཅད་རབ་ཏུ་བསྔོ། །དུས་གསུམ་གཤེགས་པ་རྒྱལ་བ་ཐམས་ཅད་ཀྱིས། །བསྔོ་བ་གང་ལ་མཆོག་ཏུ་བསྔགས་པ་དེས། །བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། །བདག་ནི་འཆི་བའི་དུས་བྱེད་གྱུར་པ་ན། །སྒྲིབ་པ་ཐམས་ཅད་དག་ནི་ཕྱིར་བསྩལ་ཏེ། །མངོན་སུམ་སྣང་བ་མཐའ་ཡས་དེ་མཐོང་ནས། །བདེ་བ་ཅན་གྱི་ཞིང་དེར་རབ་ཏུ་འགྲོ། །དེར་སོང་ནས་ནི་སྨོན་ལམ་འདི་དག་ཀྱང་། །
ཐམས་ཅད་མ་ལུས་མངོན་དུ་གྱུར་པར་ཤོག །དེ་དག་མ་ལུས་བདག་གིས་ཡོངས་སུ་བསྐང་། །འཇིག་རྟེན་ཇི་སྲིད་སེམས་ཅན་ཕན་པར་བགྱི། །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །པད་མོ་དམ་པ་ཤིན་ཏུ་མཛེས་ལས་སྐྱེས། །སྣང་བ་མཐའ་ཡས་རྒྱལ་བས་མངོན་སུམ་དུ། །ལུང་བསྟན་པ་ཡང་བདག་གིས་དེར་ཐོབ་ཤོག །དེར་ནི་བདག་གིས་ལུང་བསྟན་རབ་ཐོབ་ནས། །སྤྲུལ་པ་མང་པོ་བྱེ་བ་ཕྲག་བརྒྱ་ཡིས། །བློའི་སྟོབས་ཀྱིས་ཕྱོགས་བཅུ་རྣམས་སུ་ཡང་། །སེམས་ཅན་རྣམས་ལ་ཕན་པ་མང་པོ་བགྱི། །གང་གིས་བཟང་པོ་སྤྱོད་པ་སྟོན་པ་ཡིས། །དགེ་བ་ཅུང་ཟད་བདག་གིས་ཅི་བསྩགས་པ། །དེས་ནི་འགྲོ་བའི་སྨོན་ལམ་དགེ་བ་རྣམས། །སྐད་ཅིག་གཅིག་གིས་ཐམས་ཅད་འབྱོར་བར་ཤོག །གང་ཡང་བཟང་པོ་སྤྱོད་པ་བསྔོས་པ་ཡིས། །བསོད་ནམས་མཐའ་ཡས་དམ་པ་ཐོབ་པ་དེས། །འགྲོ་བ་སྡུག་བསྔལ་ཆུ་བོར་བྱིང་བ་རྣམས། །འོད་དཔག་མེད་པའི་གནས་རབ་འགྲོ་བར་ཤོག ། ཤིན་ཏུ་རྒྱས་པ་ཆེན་པོའི་མདོ། །སངས་རྒྱས་ཕལ་པོ་ཆེ་ཞེས་བྱ་བ་ལས། བྱང་ཆུབ་སེམས་དཔའི་སྡེ་སྣོད་ཀྱི་ནང་། སྡོང་པོས་བརྒྱན་པ་ཞེས་བྱ་བ་ཆོས་ཀྱི་རྣམ་གྲངས་ཆེན་པོ་ལས། ནོར་བཟངས་ཀྱིས་དགེ་བའི་བཤེས་གཉེན་བསྙེན་བཀུར་བའི་སྤྱོད་པ་ཕྱོགས་གཅིག་སྟེ་ཅི་སྙེད་པ་རྫོགས་སྷོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། སུ་རེན་དྲ་བོ་དི་དང་། ཞུས་ཆེན་གྱི་ལོ་ཙ་བ་བན་དེ་ཡེ་ཤེ་སྡེ། ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །དེ་ལྟར་བདེ་བར་གཤེགས་པའི་བཀའ་འཁོར་ལོ་རིམ་པ་གསུམ་ལས། འདིར་ཐ་མ་དོན་དམ་རྣམ་པར་ངེས་པའི་འཁོར་ལོའི་སྙིང་པོ་ཕུལ་དུ་བྱུང་བ་སངས་རྒྱས་ཕལ་པོ་ཆེ་མཚན་གྱི་རྣམ་གྲངས་ཤིན་ཏུ་རྒྱས་པ་ཆེན་པོའི་སྡེ་སྣོད། སྙན་གྱི་གོ་རྒྱ། པད་མའི་རྒྱན་སོགས་དུ་མ་དང་ལྡན་པ་ལ། དེ་བཞིན་གཤེགས་པ་ཕལ་པོ་ཆེའི་ལེའུ། རྡོ་རྗེ་རྒྱལ་མཚན་གྱི་བསྔོ་བ། ས་བཅུ་བསྟན་པ། ཀུན་ཏུ་བཟང་པའི་སྤྱོད་པ་བསྟན་པ། དེ་བཞིན་
གཤེགས་པའི་སྐྱེ་བ་དང་འབྱུང་བ་བསྟན་པ། འཇིག་རྟེན་ལས་འདས་པའི་ལེའུ། སྡོང་པོས་བརྒྱན་པའི་ལེའུ་སྟེ་བདུན་ལ་སོ་སོའི་ནང་གསེས་ཀྱི་དབྱེ་བས་ལེའུ་བཞི་བཅུ་རྩ་ལྔ་། ཤོ་ལོ་ཀ་སུམ་ཁྲི། དགུ་སྟོང་སུམ་ཅུ། བམ་པོ་བརྒྱ་སུམ་ཅུ་དང་ཤོ་ལོ་ཀ་སུམ་ཅུ་ཡོད་པར་བུ་སྟོན་རིན་པོ་ཆེ་སོགས་བཞེད་ཅིང་། ཚལ་པ་བཀའ་འགྱུར་གྱི་དཀར་ཆག་ཏུ་བམ་པོ་བརྒྱ་དང་བཅོ་ལྔ་། ལྡན་དཀར་མར་བམ་པོ་བརྒྱ་དང་ཉི་ཤུ་རྩ་བདུན་དུ་མཛད། དེང་སང་གི་དཔེ་རྣམས་ལའང་བམ་གྲངས་མང་ཉུང་ཅི་རིགས་ཡོད་པར་སྣང་། འདི་ཐོག་མར་འཕགས་པ་ཀླུ་སྒྲུབ་ལ། པན་དྲི་ཏ་བྱང་ཆུབ་བཟང་པོ་དང་པན་དྲི་ཏ་དགའ་བ་གཉིས་ཀྱིས་ཞུས། དེ་གཉིས་ཀ་རྒྱ་ནག་ཏུ་འགྱུར་མཛད། རྒྱ་ནག་གི་འགྱུར་ལ། སུ་རེན་དྲ་བོ་དི་དང་བཱེའི་རོ་ཙ་ན་རཀ་ཤི་ཏས་ཞུས་ཆེན་མཛད་པར་བཤད་ཅིང་། ལུང་གི་བརྒྱུད་རིམ་ལའང་རྒྱ་ནག་ནས་འགྱུར་བའི་བརྒྱུད་པ་ནི། རྫོགས་པའི་སངས་རྒྱས་འཕགས་པ་འཇམ་དཔལ། མགོན་པོ་ཀླུ་སྒྲུབ། གོང་གི་པན་དྲི་ཏ་གཉིས། དེ་ནས་ཧཱ་ཤང་ཐུ་ཐུ་ཞུ་ན་སོགས་རིམ་པར་བརྒྱུ་དེ། ཧཱ་ཤང་གྱིང་ཇུ་ལ་དབུས་པ་སངས་རྒྱས་འབུམ་གྱིས་གསན། དེ་ནས་ལོ་ཙ་བ་མཆོག་ལྡན་ནས་དེང་སང་གི་བར་དུ་བརྒྱུད་པ་དང་། རྒྱ་གར་ནས་འགྱུར་བའི་བརྒྱུད་པ་ནི། ཀླུ་སྒྲུབ་ནས། ཨཱར་ཡ་དེ་བ། འཇམ་དཔལ་གྲགས་པ་སོགས་ནས་རིམ་བཞིན། རྡོ་རྗེ་གདན་པ་ལ་བ་རི་ལོ་ཙ་བས་གསན། དེ་ནས་མཆིམས་བརྩོན་སེང་། རྗེ་བ༷ཙུན་ས་སྐྱ་པ་ཆེན་པོ་སོགས་བརྒྱུད་པར་བཤད་དོ། །འོན་ཀྱང་གོང་གི་འགྱུར་བྱང་འདི་ལས་ལོ་པན་གཞན་གྱིས་བསྒྱུར་ཚུལ་ལོ་རྒྱུས་དང་། དཔེ་རྣམས་ལ་མ་མཐོང་ངོ་། །འདི་ནི་ཚལ་པ་བཀའ་འགྱུར་གྱི་མ་ཕྱི་བྱས་ནས་འཇངས་ཐམ་རྒྱལ་པོས་བཀའ་འགྱུར་རོ་ཅོག་པར་དུ་བསྒྲུབས་པ་དེང་སང་ལི་ཐང་མཚལ་པར་དུ་གྲགས་པ་ཁུངས་ཐུབ་ཀྱི་ཚད་མར་བཟུང་ནས་མ་ཕྱི་བྱས་པ་ཡིན་ཀྱང་། སྐབས་འདིར་ཆད་ལྷག་དང་བརྡ་མ་དག་པ་མང་བ་འདུག་པས། སླར་ཡིག་རྙིང་དག་པ་མང་དུ་བཙལ་ནས་ཞུས་དག་བགྱིས་པ་ཡིན་ལ། དེའང་རྒྱ་དཔེ་མི་གཅིག་པ་དང་འགྱུར་མི་མཐུན་པ་ནི་དོན་གྱི་ཁོག་གཅིག་ཀྱང་ཚིག་ལ་ཞུ་དག་མི་བཏུབ་ནའང་། འདིའི་དཔེ་ཕལ་ཆེར་ཞུ་དག་ཕེར་བ་ཁོ་ན་འདུག་ལ། འོན་ཀྱང་རྒྱན་ལ་བཀོད་པ་དང་། འབྱམས་ཀླས་ལ་རབ་འབྱམས་དང་། སོ་སོ་ཡང་དག་པར་རིག་པ་ལ། ཐ་དད་པ་ཡང་དག་པར་ཤེས་པ་དང་། ཐུགས་ལ་དགོངས་པ་དང་། ཉིན་
མཚན་དང་ཟླ་བ་ཡ་བ་བམ་མར་ཁམ་དང་ཞེས་པ་ལ། ཉིན་མཚན་དང་ཡུད་དུ་ཡན་མན་དང་ཞེས་དང་། ཐ་སྙད་ལ་རྣམ་པར་དཔྱོད་པ་ཞེས་པ་རྣམས་འགྱུར་ཁྱད་ལྟ་བུར་འདུག་པ་དོན་ལ་མི་འགལ་བས་རང་སོར་བཞག །རྒྱ་སྐད་ལ་རང་བཞིན་རྐྱེན། རྣམ་འགྱུར་གི་ཚུལ་དུ་མ་ཡོད་པ། བོད་ལ་ལོ་པན་ཆོས་ཀྱི་སྤྱན་ལྡན་རྣམས་ཀྱིས་དོན་འགྱུར་མཛད་པ་འགའ་ཞིག །དུས་དང་རྣམ་དབྱེ་སོགས་ཤིན་ཏུ་རྟོགས་དཀའ་བས་དཔེ་མཐུན་ཤས་ཆེ་བ་གཙོ་བོར་བཟུང་། གཞན་དོགས་གནས་ཅུང་ཟད་ཡོད་པ་རྣམས། བོད་ཀྱི་བརྡའི་བསྟན་བཅོས་རྣམས་དང་གོ་བསྟུན། དཔེ་ཕལ་ཆེར་ལ་བརྡ་རྙིང་ཤས་ཆེ་བ་དང་། འགྱུར་བཅོས་མཛད་པའི་གསལ་ཁ་མི་སྣང་བས། བོད་ཀྱི་བརྡ་རྙིང་པ་ཤ་སྟག་ཞིག་འབྱུང་ན་འབྲེལ་ཆགས་པ་འདྲ་ཡང་ཕྱིས་སུ་བརྡ་གསར་རྙིང་འདྲེས་ཉམས་ཆེ་བ་དང་། ཤད་བར་གཅོད་མཚམས་འཁྲུགས་པ་མང་དུ་སྣང་ཡང་ཅུང་ཟད་སྐྱོན་ཆུང་བའི་དབང་དུ་བྱས་ནས་བཏང་སྙོམས་སུ་བཞག །དེ་མིན་མོན་པའི་རྡོ་གཅོད་ཞུ་དག་གི་དཔེ་ཟླར་མ་སོང་བར་ནན་ཏན་ཆེན་པོས་ཤིན་ཏུ་དག་ཁུལ་དུ་བགྱིས་པ་འདི། སངས་རྒྱས་ཀྱི་བསྟན་པ་རིན་པོ་ཆེ་དང་རིས་མེད་པའི་འགྲོ་བ་ཡོངས་ཀྱི་བསོད་ནམས་ཀྱི་དཔལ་དུ་བསྐལ་པ་ཇི་སྲིད་གནས་ཀྱི་བར་དུ་འཁོར་ཡུག་རི་བོའི་ཁོངས་འདིར། ཉི་ཟླ་ལྟར་གསལ་བར་གྱུར་ཅིག །ཅེས་བོད་ཆེན་པོའི་ཡུལ་ལྗོངས་སྡེ་བཞིའི་འབྱུང་གནས་དགེ་བཅུའི་ཁྲིམས་ལུགས་ཀྱིས་མངོན་པར་མཐོ་བའི་ནོར་འཛིན་ཡངས་པ་ཆོས་བཞིན་དུ་སྐྱོང་བའི་ལྷ་ཆོས་རྒྱལ་བྱང་ཆུབ་སེམས་དཔའ་མིའི་དབང་པོ་བསྟན་པ་ཚེ་རིངས་ཀྱི་ཞལ་སྔ་ནས། དགེ་བྱེད་ཅེས་པ་ཆུ་སྟག་ལོར་གསུང་རབ་འདི་ཉིད་པར་དུ་བསྒྲུབས་པར་མཛད་པའི་སྐབས་ཞུ་དག་ལས་འཕྲོས་ཏེ་འདི་ཉིད་ཀྱི་དོན་དམ་པར་བཀས་གནང་བའི་ཞབས་འབྲིང་བ་དགེ་སློང་དབང་ཕྱུག་གིས་གླེང་བ་ཛ་ཡན་ཏུ། ཡེ་དྷ་རྨཱ་ཧེ་ཏུ་པྲ་བྷ་བཱ་ཧེ་ཏུན་ཏེ་ཥན་ཏ་ཐཱ་ག་ཏོ་ཧྱ་བ་རཏ། ཏེ་ཥཱཉྩ་ཡོ་ནི་རོ་དྷ་ཨེ་བོཾ་བཱ་དཱི་མ་ཧཱ་ཤུ་མ་ཎ