བདུན་པ། དེ་བཞིན་གཤེགས་པའི་སྐུའི་གསང་བའི་ལེའུ།
དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་དེ་བཞིན་གཤེགས་པའི་གསང་བ་ཅི་འདྲ། དེ་བཞིན་གཤེགས་པའི་གསང་བ་པའི་ཕྱོགས་
ཙམ་ཞིག་ལ་ཁྱོད་སྤོབས་པར་གྱིས་ཤིག་།དེ་སྐད་ཅེས་སྨྲས་པ་དང་། གསང་བ་པའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའ་ཞི་བའི་བློ་གྲོས་ལ་འདི་སྐད་ཅེས་སྨྲ་ས་སོ། །སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་བརླབས་ཀྱིས་བསྟན་གྱིས་རིགས་ཀྱི་བུ་ཉོན་ཅིག །ཞི་བའི་བློ་གྲོས་གསུམ་པོ་འདི་དག་ནི་དེ་བཞིན་གཤེགས་པའི་གསང་བའོ། །གསུམ་གང་ཞེ་ན་འདི་ལྟ་སྟེ། སྐུའི་གསང་བ་དང་། གསུང་གི་གསང་བ་དང་། ཐུགས་ཀྱི་གསང་བ་འོ། །ཞི་བའི་བློ་གྲོས་དེ་ལ་དེ་བཞིན་གཤེགས་པའི་སྐུའི་གསང་བ་གང་ཞེ་ན། ཞི་བའི་བློ་གྲོས་འདི་ལ་དེ་བཞིན་གཤེགས་པ་ནི་མི་དགོངས་ཤིང་རབ་ཏུ་མི་རྟོག་བར་སྤྱོད་ལམ་ཐམས་ཅད་ཀྱང་ཀུན་ཏུ་སྟོན་ཏེ། རིགས་ཀྱི་བུ་དེ་ལ་ལྷ་དང་མི་ཁ་ཅིག་འདུག་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་བཞུགས་པར་མཐོང་ང་ོ། །ལྷ་དང་མི་ཁ་ཅིག་འཆག་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་འཆག་པར་མཐོང་ངོ། །ལྷ་དང་མི་ཁ་ཅིག་འགྲེང་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་འགྲང་བར་མཐོང་ངོ་། །ལྷ་དང་མི་ཁ་ཅིག་ཉལ་བ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་མནལ་བར་མཐོང་ང་ོ། ལྷ་དང་མི་ཁ་ཅིག་ཆོས་སྟོན་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་ཆོས་སྟོན་པར་མཐོང་ངོ། །ལྷ་དང་མི་ཁ་ཅིག་མི་སྨྲ་བར་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་མི་གསུང་བར་གྱུར་བར་མཐོང་ངོ་། །ལྷ་དང་མི་ཁ་ཅིག་བསམ་གཏན་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་བསམ་གཏན་ལ་སྙོམས་པར་ཞུགས་པར་མཐོང་ངོ་། །ལྷ་དང་མི་ཁ་ཅིག་ལངས་པ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་བཞེངས་པར་མཐོང་ང་ོ། །ལྷ་དང་མི་ཁ་ཅིག་མིག་མི་འཛད་པར་མཐོང་ང་ོ། །ལྷ་དང་མི་ཁ་ཅིག་དེ་བཞིན་གཤེགས་པ་སྤྱན་མི་འཛུམས་པར་གཟིགས་པར་མཐོང་ངོ། །ལྷ་དང་མི་ཁ་ཅིག་འཛུམ་པ་བྱེད་པ་གཙོ་བོར་འཛིན་པ་དེ་དག་གིས་ནི་དེ་བཞིན་གཤེགས་པ་འཛུམ་པ་མཛད་པར་མཐོང་ངོ་། །ལྷ་དང་མི་ཁ་ཅིག་མདོག་གསེར་གྱི་ཁ་དོག་ལྟ་བུ་གཙོ་བོར་བྱེད་པ་དེ་དག་གིས་ནི་དེ་བཞིན་གཤེགས་པ་སྐུ་མདོག་གསེར་གྱི་ཁ་དོག་ལྟ་
བུར་མཐོང་ངོ། །དེ་བཞིན་དུ་ལ་ལས་ནི་དངུལ་གྱི་མདོག་ཏུ་མཐོང་ངོ། །དེ་བཞིན་དུ་ཤེས་གྱི་མདོག་དང་། བཻ་དཱུ་ཪྻའི་མདོག་དང་། རྡོའི་སྙིང་པོའི་མདོག་དང་། སྤུང་གི་མདོག་དང་། མུ་ཏིག་དམར་པོའི་མདོག་དང་། མུ་ཏིག་དཀར་པོའི་མདོག་དང་། མདོག་དམར་པོ་དང་། མདོག་དཀར་པོ་དང་། བཙོད་ཀའི་མདོག་དང་། མདོག་སྔོན་པོ་དང་། མདོག་སེར་པོ་དང་། ཟླ་བའི་མདོག་དང་། ཉི་མའི་མདོག་དང་། མེའི་མདོག་དང་། འོད་ཀྱི་མདོག་དང་། བརྒྱ་བྱིན་གྱི་མདོག་དང་། ཚངས་པའི་མདོག་དང་། བ་མོའི་མདོག་དང་། སྡོང་རོས་ཀྱི་མདོག་དང་། མཚལ་གྱི་མདོག་ཏུ་མཐོང་ངོ་། །ལ་ལས་ནི་ཆུའི་མདོག་དང་། ལ་ལས་ནི་མྱ་ངན་འཚང་གི་མེ་ཏོག་གི་མདོག་དང་། ཙམ་པ་ཀའི་མདོག་དང་། གནའ་མའི་མེ་ཏོག་གི་མདོག་དང་། བར་ཤི་ཀའི་མདོག་དང་། པདྨའི་མདོག་དང་། ཀུ་མུ་དའི་མདོག་དང་། པདྨ་དཀར་པོའི་མདོག་དང་། དཔལ་གྱི་མདོག་དང་། རྣམ་ཐོས་ཀྱི་བུའི་མདོག་དང་།དང་པའི་རྒྱལ་པོ་དང་སྐྱའི་མདོག་དང་། པདྨ་སར་པའི་མདོག་དང་། དཔལ་གྱི་སྙིང་པོའི་མདོག་དང་། རིན་པོ་ཆེ་བྱེ་རུའི་མདོག་དང་། ནོར་བུ་རིན་པོ་ཆེའི་མདོག་དང་། ཨན་ད་རྙིལ་གྱི་མདོག་དང་། ནམ་མཁའ་དག་པའི་གཟི་བརྗིད་ཀྱི་མདོག་དང་། ལྷ་དང་མ་ཁ་ཅིག་ཡོན་ཏན་གྱི་བསྔགས་པ་མཐའ་ཡས་པར་མོས་པ་དེ་དག་གིས་ནི་དེ་བཞིན་གཤེགས་པའི་སྐུའི་ཡོན་ཏན་གྱི་བསྔགས་པ་མཐའ་ཡས་པ་དང་ལྡན་པར་མཐོང་ང་ོ། །ཞི་བའི་བློ་གྲོས་དེ་ལྟར་ཡོངས་སུ་བརྟག་པ་ཉེ་བར་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དང་། གང་ཡང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་དེ་དག་མིའི་ལུས་ཐོས་བར་གྱུར་ལ་། དེའི་ནང་ནས་སེམས་ཅན་གཅིག་གིས་སེམས་ཅན་དེ་དག་ཇི་སྙེད་པ་དེ་སྙེད་ལ་དེ་བཞིན་གཤེགས་པའི་སྐུའི་གཟུགས་དང་། མདོག་དང་། རྟགས་དང་། དབྱིབས་དང་སྤྱོད་ལམ་སེམས་ཤིང་མོས་ཏེ་མངོན་པར་སྒྲུབ་ལ་སེམས་ཅན་གཅིག་གིས་ཇི་ལྟར་བ་དེ་བཞིན་དུ་སེམས་ཅན་དེ་དག་ཐམས་ཅད་རེ་རེས་ཀྱང་དེ་སྙེད་ལ་དེ་བཞིན་གཤེགས་པའི་སྐུའི་གཟུགས་དང་། མདོག་དང་།
རྟགས་དང་། དབྱིབས་དང་། སྤྱོད་ལམ་དུ་སེམས་ཤིང་མོས་ཏེ་མངོན་པར་སྒྲུབ་ལ། སེམས་ཅན་གཅིག་གི་སེམས་ཀྱི་མོས་པ་གང་ཡིན་པ་དེ་སེམས་ཅན་གཉིས་པའི་མ་ཡིན་ཏེ། ཞི་བའི་བློ་གྲོས་རྣམ་གྲངས་དེས་ན་དེ་བཞིན་གཤེགས་པ་སེམས་ཅན་དེ་དག་ཐམས་ཅད་ཀྱི་སེམས་ཀྱི་མོས་པ་ཚིམ་པར་མཛད་དེ། ཇི་ལྟར་མོས་པ་བཞིན་དུ་སེམས་ཅན་བདེ་དག་གིས་དེ་བཞིན་གཤེགས་པའི་སྐུའི་གཟུགས་དང་། མདོག་དང་རྟགས་དང་དབྱིབས་དང་སྤྱོད་ལམ་དུ་ཤེས་མོད་ཀྱི། དེ་ལ་དེ་བཞིན་གཤེགས་པའི་སྐུ་འམ། ཐུགས་ཀྱི་མཛད་བ་ནི་མ་ཡིན་ཏེ། དེ་བཞིན་གཤེགས་པ་སྔོན་གྱི་སྤྱོད་པ་ཡོངས་སུ་སྦྱངས་པའི་ཁྱད་པར་གྱིས་ལྷུན་གྱིས་གྲུབ་པས་སེམས་ཅན་ཐམས་ཅད་ཀྱི་སེམས་ཀྱི་བསམ་པ་ཚིམ་པར་མཛད་པའི་གཟུགས་དང་། མདོག་དང་རྟགས་དང་དབྱིབས་དང་སྤྱོད་ལམ་གྱིས་ཀུན་དུ་བཞུགས་པའོ། །ཞི་བའི་བློ་གྲོས་འདི་ལྟ་སྟེ་དཔེར་ན་། མེ་ལོང་གི་དཀྱིལ་འཁོར་ཡོངས་སུ་དག་པ་ལ་གཟུགས་སུ་སྣང་བ་ཅི་འདྲ་བ་ཉེ་བར་གཞག་པ་དེ་འདུ་བ་ཉིད་ཀྱི་གཟུགས་བརྙན་དེ་ན་ལྷག་ཆད་མེད་པར་མཚུངས་པར་སྣང་ཡང་མེ་ལོང་གི་དཀྱིལ་འཁོར་ནི་མི་སེམས་མི་རྟོག་གོ །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པ་ཡང་མི་དགོང་མི་རྟོག་པར་ལྷུན་གྱི་གྲུབ་པས་སེམས་ཅན་ཐམས་ཅད་ཀྱི་སེམས་ཀྱི་བསམ་པའི་རྣམ་པར་རིག་པ་ཚིམ་པར་མཛད་དེ། །ཞི་བའི་བློ་གྲོས་འདི་ནི་དེ་བཞིན་གཤེགས་པའི་སྐུའི་གསང་བའོ།།ཞི་བའི་བློ་གྲོས་གཞན་ཡང་དེ་བཞིན་གཤེགས་པའི་སྐུའི་ནི་ཕུང་པོས་རབ་ཏུ་ཕྱེ་བ་མ་ཡིན། ཁམས་ཀྱིས་རབ་ཏུ་ཕྱེ་བ་མ་ཡིན། སྐྱེ་མཆེད་ཀྱིས་རབ་ཏུ་ཕྱེ་བ་མ་ཡིན། ལས་ལས་བྱུང་བ་མ་ཡིན་། ཉོན་མོངས་པ་ལས་བྱུང་བ་མ་ཡིན། ཕ་མ་ལས་བྱུང་བ་མ་ཡིན། འབྱུང་བ་ཆེན་པོའི་ནུར་ནུར་པོ་ལས་བྱུང་བ་མ་ཡིན། ཤ་དང་ཁྲག་གིས་གཡོགས་པ་མ་ཡིན། རུས་པ་དང་ཆུ་བའི་པོག་རེས་སྤྲེལ་པ་མ་ཡིན། དབུགས་ཕྱིན་དུ་རྒྱུ་བ་དང་། སྲོག་དང་འབྲེལ་པ་མ་ཡིན་ཏེ། ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་སྐུ་མེད་པ་སྟེ། ཆོས་ཀྱི་སྐུ་དང་། གཟུགས་དང་མཚན་མ་མེད་པའི་སྐུ་དང་། སྤྲོས་པ་མེད་ཅིང་རྒྱུན་མེད་པའི་སྐུ་ཡིན་ཡང་དེ་
གཟུགས་དང་མཚན། གཙོ་བོར་བྱེད་པའི་བའི་སེམས་ཅན་སྐུ་བསྟན་པས་འདུལ་བ་རྣམས་ཀྱི་མིག་ལ་སྣང་བར་འགྱུར་རོ། །གཟུགས་ལས་དབེན་པ་ཆོས་ཀྱི་མཚན་ཉིད་གཙོ་བོར་བྱེད་པའི་སེམས་ཅན་རྣམས་ལ་ནི་ལྷའི་མིག་གིས་ཀྱང་ཐམས་ཅད་ཀྱི་ཐམས་ཅད་བལྟར་སྣང་བར་མི་འགྱུར་རོ།། །ཞི་བའི་བློ་གྲོས་དེ་ལ་འཁོར་གཅིག་ཏུ་འདུས་པའི་སེམས་ཅན་གྱི་ནང་ནས་ཀྱང་ཁ་ཅིག་གིས་ནི་དེ་བཞིན་གཤེགས་པའི་སྐུ་མཐོང་། ཁ་ཅིག་གིས་ནི་མཐོང་། ཁ་ཅིག་གིས་ནི་རྒྱང་རིང་པོ་ན་འདུག་ཀྱང་མཐོང་། ཁ་ཅིག་གིས་ནི་ཉེ་བར་འདུག་ཀྱང་མི་མཐོང་། ཁ་ཅིག་གིས་ནི་ཐག་རིང་པོ་ན་འདུག་ཀྱང་མཐོང་ང་ོ། །ཁ་ཅིག་གིས་ནི་ཉེ་བ་ན་འདུག་ཀྱང་མི་མཐོང་ང་ོ། །ལ་ལས་ནི་དྲན་པའི་རྣམ་པར་མཐོང་ལ་གཡེང་བའི་རྣམ་པར་མི་མཐོང་ང་ོ། །ལ་ལས་ནི་གཡེང་བའི་རྣམ་པས་མཐོང་ལ་དྲན་པའི་རྣམ་པས་མི་མཐོང་ང་ོ། །ལ་ལས་ནི་གཞན་གྱིས་ཉེ་བར་བསྟན་པས་མཐོང་ཞིང་བདག་གིས་བལྟས་པས་མི་མཐོང་ངོ་། །ལ་ལས་ནི་བདག་གིས་བལྟས་པས་མཐོང་ལ་གཞན་གྱི་བསྟན་པས་མི་མཐོང་ང་ོ། །ལ་ལས་ནི་རྨི་ལམ་ན་མཐོང་ལ་སད་པ་ན་མི་མཐོང་ངོ་། །ལ་ལས་ནི་སད་པ་ན་མཐོང་ལ་རྨི་ལམ་ན་མི་མཐོང་ངོ་། །ལ་ལས་ནི་མཉམ་པར་བཞག་ན་མཐོང་ལ་ལངས་ན་མི་མཐོང་ངོ་། །ལ་ལས་ནི་ལངས་ན་མཐོང་ལ་མཉམ་པར་བཞག་ན་མི་མཐོང་ངོ། ལ་ལས་ནི་སྡུག་པའི་རྣམ་པར་མཐོང་ལ་མི་སྡུག་པའི་རྣམ་པར་མ་ཡིན་ནོ། །ལ་ལས་ནི་མི་སྡུག་པའི་རྣམ་པར་མཐོང་ལ་སྡུག་པའི་རྣམ་པར་མ་ཡིན་ནོ། །ལ་ལས་ནི་མ་བཙལ་བས་མི་མཐོང་ལ་བཙལ་བས་མཐོང་ངོ། །ལ་ལས་ནི་མ་བཙལ་པས་མཐོང་ལ་བཙལ་བས་མི་མཐོང་ངོ། །ལ་ལས་ནི་བསྒྲིམས་ན་མཐོང་ལ་མ་བསྒྲིབས་ན་མ་ཡིན་ནོ། ། ལ་ལས་ནི་མ་བསྒྲིམས་ན་མཐོང་ལ་བསྒྲིམས་པ་ན་མ་ཡིན་ནོ། །ཞི་བའི་བློ་གྲོས་དེ་ལྟར་དེ་བཞིན་གཤེགས་པའི་སྐུ་ནི་འདི་དག་དང་། གཞན་ཡང་ཚད་མེད་པའི་རྣམ་པར་སྟོན་པ་མཛད་དོ། །གང་ཡང་གཟུགས་ན་སྤྱོད་པའི་ལྷ་བུ་ལུས་དང་། སྤྱོད་པ་དང་སྤྱོད་ལམ་རབ་ཏུ་ཞི་བ། མཉམ་པར་བཞག་པ། ལུས་ཞི་བ་དུལ་བ་དེ་དག་གི་མིང་ཀྱང་འཁྲུལ་པར་འགྱུར་ཏེ་། དེ་བཞིན་གཤེགས་
པའི་སྐུ་ལ་དཔག་པར་བྱས་འམ། མཚན་མ་གཟུང་བར་མི་ནུས་སོ། །དེ་ཅིའི་ཕྱིར་ཞེ་ན། ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་ཁ་དོག་ཐ་དད་པས་ཚད་མེད་པའོ། །ཆོས་ཀྱི་སྐུས་རབ་ཏུ་ཕྱེ་བའི་ཕྱིར་ནམ་མཁའ་དང་མཚུངས་སོ། །ཞི་བའི་བློ་གྲོས་ནམ་མཁའ་ཇི་ཙམ་དུ་ཁྱབ་པ་དེ་ཙམ་དུ་དེ་བཞིན་གཤེགས་པའི་སྐུས་ཁྱབ་བོ། །ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ནི་ཐམས་ཅད་རྗེས་སུ་སོང་བའོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་སྐུ་ཡང་ཐམས་ཅད་ཀྱི་རྗེས་སུ་སོང་བའོ། ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ནི་སྤྲོས་པ་མེད་པའོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་སྐུ་ཡང་སྤྲོས་པ་མི་མངའ་བའོ། །ཞི་བའི་བློ་གྲོས་འདི་ལྟ་སྟེ། དཔེར་ན་ནམ་མཁའ་ནི་སེམས་ཅན་ཐམས་ཅད་ཀྱི་ཉེ་བར་འཚོ་བའོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་སྐུ་ཡང་སེམས་ཅན་ཐམས་ཅད་ཀྱི་ཉེ་བར་འཚོ་བའོ། །ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ནི་འགྱུར་བ་མེད་ཅིང་རྣམ་པར་རྟོག་པ་མེད་དོ། །ཞི་བའི་བློ་གྲོས་དེ་བཞིན་གཤེགས་པའི་སྐུ་ཡང་འགྱུར་བ་མི་མངའ་ཞིང་རྣམ་པར་རྟོག་པ་མི་མངའ་འོ། །ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ནི་གཟུགས་སུ་སྣང་བ་ཐམས་ཅད་དུ་ཞུགས་པའོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་སྐུ་ཡང་སེམས་ཅན་དུ་སྣང་བ་ཐམས་ཅད་དུ་ཞུགས་པའོ། །ཞི་བའི་བློ་གྲོས་འདི་ལྟ་སྟེ་དཔེར་ནམ་མཁའི་ནང་དུ་ནི་གཟུགས་སུ་སྣང་བ་ཐམས་ཅད་འདུས་སོ། །ཞི་བའི་བློ་གྲོས་དེ་བཞིན་གཤེགས་པའི་སྐུའི་ནང་དུ་ཡང་སེམས་ཅན་དུ་སྣང་བ་ཐམས་ཅད་འདུས་སོ། །ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ལ་ནི་རྩྭ་དང་། ཤིང་གེལ་པ་དང་། སྨན་དང་ནགས་ཚལ་ཐམས་ཅད་རྣམ་པར་འཕེལ་ལོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་སྐུ་ལས་ཀྱང་སེམས་ཅན་ཐམས་ཅད་ཀྱི་དགེ་བའི་རྩྭ་བ་དག་རྣམ་པར་འཕེལ་ལོ། །ཞི་བའི་བློ་གྲོས་འདི་ལྟ་སྟེ་དཔེར་ན་ནམ་མཁའ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ་ཅིར་ཡང་བརྗོད་པ་མ་ཡིན་ནོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་
སྐུ་ཡང་རྟག་པ་ཡང་མ་ཡིན་། མི་རྟག་པ་ཡང་མ་ཡིན་ཏེ། ཅིར་ཡང་བརྗོད་པ་མ་ཡིན་ནོ། །ཞི་བའི་བློ་གྲོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྤྱི་གཙུག་བལྟར་མི་མཐོང་བ་སྟེ། ཞི་བའི་བློ་གྲོས་གང་དེ་བཞིན་གཤེགས་པའི་སྤྱི་གཙུག་མཐོང་བར་ནུས་པ་དེ་ནི་ཁོ་བོས་ལྷ་དང་བཅས་པ་དང་། བདུད་དང་བཅས་པ་དང་། ཚངས་པ་དང་བཅས་པ་དང་དགེ་སྤྱོད་དང་བྲམ་ཟེར་བཅས་པའི་སྐྱེ་དགུ་དང་། ལྷ་དང་མི་དང་ལྷ་མ་ཡིན་དུ་གནས་པའི་འཇིག་རྟེན་ན་མ་མཐོང་ངོ་། །དེ་ཅིའི་ཕྱིར་ཞེ་ན། ཞི་བའི་བློ་གྲོས་ཁོ་བོས་འདི་ལྟར་མངོན་པར་ཤེས་ཏེ། བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་རིང་པོ་མ་ལོན་ཏ་ེ་ཆོས་ཀྱི་འཁོར་ལོ་བསྐོར་ནས་གྲོང་ཁྱེར་བཱ་ར་ཎ་སཱི་ན་དྲང་སྲོང་ལྷུང་བ་རི་དགས་ཀྱི་ནང་ན་བཞུགས་པའི་དུས་གཅིག་ན་ཤར་ཕྱོགས་ལོགས་ཀྱི་དེ་བཞིན་གཤེགས་པ་ཙམ་པ་ཀའི་མདོག་གི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དགྲ་འདུལ་ནས་བྱང་ཆུབ་སེམས་དཔའ་ཤུགས་འཆང་ཞེས་བྱ་བ་དེ་བཅོམ་ལྡན་འདས་ལ་བལྟ་བ་དང་། ཕྱག་བྱ་བ་དང་། མཆོད་པ་དང་། བསྙེན་བཀུར་བྱ་བའི་ཕྱིར་འཇིག་རྟེན་གྱི་ཁམས་མི་མཛད་འདིར་འོངས་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བྱ་བྱས་ཏེ་བཅོམ་ལྡན་འདས་ཀྱི་སྤྱན་སྔར་འདུག་གོ །་དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་ཤུགས་འཆང་འདི་སྙམ་དུ་སེམས་ཏེ། སངས་རྒྱས་བཅོམ་ལྡན་འདས་རྣམས་ནི་སྤྱི་གཙུག་བ་ལྟར་མི་མཐོང་ལ་སྐུ་ཚད་མེད་ཅིང་མཐའ་ཡས་ཀྱང་། བདག་གིས་དེ་བཞིན་གཤེགས་པའི་སྐུའི་ཚད་དང་མཐའ་ཡོངས་སུ་བཙལ་བར་བྱའོ་སྙམ་མོ། །དེ་ནས་བྱང་ཆུབ་སེམས་དཔའ་ཤུགས་འཆང་གིས་རང་གི་ལུས་དཔག་ཚད་བརྒྱད་ཁྲི་བཞི་སྟོང་དུ་བྱིན་ཀྱིས་བརླབས་ཏེ། དེ་བཞིན་གཤེགས་པའི་སྐུ་ལ་བལྟས་ནས་དེས་དེ་བཞིན་གཤེགས་པའི་སྐུ་དཔག་ཚད་འབུམ་ཕྲག་དྲུག་བཅུ་རྩ་བརྒྱད་པར་མཐོང་ནས་དེས་འདི་སྙམ་དུ་བསམས་ཏེ། བདག་ནི་མངོན་པར་ཤེས་པ་ཐོབ་པ་རྫུ་འཕྲུལ་གྱི་རྐང་པས་རྣམ་པར་རྩེ་བ་ཡིན་གྱིས་བདག་གིས་དེ་བས་ཀྱང་རྒྱ་ཆེར་དེ་བཞིན་
གཤེགས་པའི་སྐུའི་ཚད་བཙལ་བར་བྱའོ་སྙམ་ནས་དེ་སངས་རྒྱས་ཀྱི་མཐུ་དང་། རང་གི་རྫུ་འཕྲུལ་གྱི་སྟོབས་བསྐྱེད་པས་སྟེང་གི་ཕྱོགས་ལོགས་སུ་སངས་རྒྱས་ཀྱི་ཞིང་གཱའི་ཀླུང་བྱེ་བ་ཕྲག་བརྒྱའི་བྱེ་མ་སྙེད་འདས་ཏེ་འཇིག་རྟེན་གྱི་ཁམས་པདྨ་ཅན་ཞེས་བྱ་བ་དེ་ན། དེ་བཞིན་གཤེགས་པ་པདྨའི་དཔལ་གྱི་རྒྱལ་པོའི་སྙིང་པོ་ཞེས་བྱ་བར་བལྟ་ན་བཞུགས་ཤིང་འཚོལ་གཞེས་ཏེ། ཆོས་ཀྱང་སྟོན་པ་དེར་བྱང་ཆུབ་སེམས་དཔའ་ཤུགས་འཆང་ཕྱིན་ནས་དེ་འཇིག་རྟེན་གྱི་ཁམས་དེར་གནས་ཀྱང་། དེ་བཞིན་གཤེགས་པའི་སྤྱི་གཙུག་མཐོང་བར་མ་ནུས་ཤིང་། དེ་བཞིན་གཤེགས་པའི་སྐུའི་ཚད་དམ་མཐའ་ཡང་མི་དམིགས་སོ། །དེ་ནས་བྱང་ཆུབ་སེམས་དཔའ་ཤུགས་འཆད་བཅོམ་ལྡན་འདས་དེ་བཞིན་གཤེགས་པ་པདྨ་མའི་དཔལ་གྱི་རྒྱལ་པོའི་སྙིང་པོ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་པདྨའི་དཔལ་གྱི་རྒྱལ་པོའི་སྙིང་པོ་དེའི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་བཅོམ་ལྡན་འདས་དེའི་སྤྱན་སྔར་འདུག་སྟེ། དེས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཇི་སྲིད་ཅིག་ནས་མཆིས། བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་གང་གཱའི་ཀླུང་གི་བྱེ་བ་ཕྲག་བརྒྱའི་བྱེ་མ་སྙེད་ཀྱིས་སངས་རྒྱས་ཀྱི་ཞིང་འདས་པ་ནས་ཁྱོད་འཇིག་རྟེན་གྱི་ཁམས་འདིར་འོངས་སོ། །བྱང་ཆུབ་སེམས་དཔའ་ཤུགས་འཆད་གིས་གསོལ་པ། བཅོམ་ལྡན་འདས་བདག་ཅག་རིང་མོ་ཞིག་ནས་མཆིས་ཀྱང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེའི་དབུའི་གཙུག་མཐོང་བར་ཡང་རྔོམ་ཐོག་ལ། སྐུའི་ཚད་དམ་མཐའ་རྟོགས་པར་ཡང་རྔོམ་ཐོག་ལགས་སོ། །བཅོམ་ལྡན་འདས་དེས་བཀའ་སྩལ་པ། རིགས་ཀྱི་བུ་ཁྱོད་གལ་ཏེ་ཤུགས་འདི་ཉིད་དང་། རྫུ་འཕྲུལ་གྱི་སྟོབས་བསྐྱེད་པ་འདི་ཉིད་ཀྱིས་གང་གཱའི་ཀླུང་གི་བྱེ་མ་སྙེད་ཀྱི་བསྐལ་པར་སྟེང་གི་ཕྱོགས་ལོགས་སུ་སོང་དུ་ཟིན་ཀྱང་བཅོམ་ལྡན་འདས་དེའི་སྐུའི་མཐའ་རྟོགས་པར་མི་ནུས་སོ། །རིགས་ཀྱི་བྱ་གང་ཡང་དཔེ་གཞན་པ་ཇི་སྙེད་པ་དེ་བཞིན་གཤེགས་པའི་ཚུལ་ཁྲིམས་ཀྱི་དཔེ་བྱ་བ་འམ། ཏིང་ངེ་འཛིན་དང་། ཤེས་རབ་དང་།
རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། སྐུ་དང་གསུང་དང་ཐུགས་དང་། གཟུགས་དང་མཚན་གི་དཔེར་བྱ་བའི་དཔེ་དགོད་པ་དེ་དག་ཐམས་ཅད་ནི་དེ་བཞིན་གཤེགས་པ་ལ་སྐུར་བ་འདེབས་པའོ། །དཔེ་གཅིག་ནི་མ་གཏོགས་ཏེ། འདི་ལྟར་དཔེ་ནམ་མཁའོ། །ནམ་མཁའ་ཇི་ཙམ་པར་དེ་བཞིན་གཤེགས་པའི་ཚུལ་ཁྲིམས་ཀྱང་དེ་ཙམ་མོ། །ཏིང་ངེ་འཛིན་ཀྱང་དེ་ཙམ་མོ། །ཤེས་རབ་ཀྱང་དེ་ཙམ་མོ། །རྣམ་པར་གྲོལ་བ་ཡང་དེ་ཙམ་མོ། །རྣམ་པར་གྲོལ་བའི་ཡེ་ཤེས་མཐོང་བ་ཡང་དེ་ཙམ་མོ། །སྐུ་ཡང་དེ་ཙམ་མོ། །གསུང་ཡང་དེ་ཙམ་མོ། །ཐུགས་ཀྱང་དེ་ཙམ་མོ། །གཟུགས་ཀྱང་དེ་ཙམ་མོ། །མཚན་ཀྱང་དེ་ཙམ་མོ། །དེ་བས་ན་ནམ་མཁའ་ཚད་མེད་པས་དེ་བཞིན་གཤེགས་པའི་སྐུ་ཚད་མེད་པར་ཁོང་དུ་ཆུད་པར་བྱའོ་ཞེས་བསྟན་ཏོ། །ཞི་བའི་བློ་གྲོས་དེ་ནས་བྱང་ཆུབ་སེམས་དཔའ་ཤུགས་འཆད་གིས་བཅོམ་ལྡན་འདས་དེ་ལས་བསྟན་པ་འདི་ཐོས་ནས་ངོ་མཚར་དུ་གྱུར་ཏེ། ཚིམ་ཞིང་མགུ་ལ་ཡི་རང་ནས་རབ་ཏུ་དགའ་སྟེ་། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། ལན་བདུན་བསྐོར་བ་བྱས་ནས་སངས་རྒྱས་ཀྱི་ཞིང་དེ་ཉིད་ནས་མི་སྣང་བར་གྱུར་བ་དང་། སངས་རྒྱས་ཀྱི་མཐུ་དང་། རང་གི་རྫུ་འཕྲུལ་གྱི་སྟོབས་ཀྱིས་སེམས་ཀྱི་རྣམ་པར་རྟོག་པ་ཙམ་གྱིས་འཇིག་རྟེན་གྱི་ཁམས་མི་མཇེད་འདིར་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་ཕྱིན་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་སྤྱན་སྔར་འདུག་ནས་ཐལ་མོ་སྦྱར་ཏེ་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །ནམ་མཁའ་མཚུངས་ཤིང་འདུ་བ་ཡི། སངས་རྒྱས་ཆོས་ལ་མི་གང་ཞིག །ཕ་རོལ་ཏུ་ནི་འཆི་འཚལ་བ། དེ་ནི་ཉམ་ཐག་འགྱུར་བ་ལགས། སངས་རྒྱས་སྐུ་ནི་བལྟ་སླད་དུ། གང་གཱ་བྱེ་བ་ཕྲག་བརྒྱ་ཡི། བྱེ་མ་ཇི་སྙེད་དེ་སྙེད་ཀྱི། ཞིང་རྣམ་སུ་ནི་བདག་མཆིས་སོ། །དེ་སྙེད་ཞིང་དུ་མཆིས་ནས་ནི། །པདྨ་ཅན་གྱི་ཞིང་དུ་མཆིས། འོན་ཀྱང་ཁྱོད་ཀྱི་དབུ་
གཙུག་དང་། སྐུ་ཡི་ཚད་ཀྱང་མ་མཐོང་ལགས། ཞིང་དེ་ན་ནི་འདྲེན་བཞུགས་པ། མཚན་ནི་དཔལ་གྱི་སྙིང་པོ་ལགས། དེ་ཡིས་བདག་གི་བསམ་མཁྱེན་ནས། འདི་སྐད་དུ་ནི་བཀའ་སྩལ་ཏོ། །ལ་ལ་སངས་རྒྱས་ཆོས་རྣམས་ལ། དཔེ་དགོང་ཇི་སྙེད་བྱེད་པ་ནི། དེ་དག་སངས་རྒྱས་མི་འཚམ་སྟེ། དེ་དག་རྒྱལ་ལ་སྐུར་བ་འདེབས་། འདི་ལ་དཔེ་གཅིག་ཡང་དག་སྟེ། ནམ་མཁའི་ཁམས་སུ་བསྟན་པ་ལགས། དེ་ནི་སངས་རྒྱས་ཆོས་དང་འཐུན། གང་ནའང་དེའི་ཚད་མ་མཆིས། ནམ་མཁའི་འདི་ནི་ཇི་ཙམ་པར། སངས་རྒྱས་ཀྱིས་ནི་ཚུལ་ཁྲིམས་དང་། ཏིང་ངེ་འཛིན་དང་རྣམ་གྲོལ་དང་། རྣམ་གྲོལ་ཡེ་ཤེས་མཐོང་དེ་ཙམ། ནམ་མཁའི་ཚད་ནི་ཇི་ཙམ་པ། སངས་རྒྱས་གཟུགས་ཀྱང་དེ་ཙམ་སྟེ། འཇིག་རྟེན་མགོན་པོའི་དབུ་གཙུག་ཀྱང་། ནམ་མཁའི་ཁམས་དང་མཚུངས་པ་ལགས། ནམ་མཁས་ཇི་སྙེད་ཁྱབ་གྱུར་པ། སྐུས་ཀྱང་དེ་སྙེད་ཁྱབ་པ་ལགས། སྐུ་ཡིས་ནི་ཇི་སྙེད་ཁྱབ་གྱུར་པ། འོད་ཀྱིས་ཀྱང་ནི་དེ་སྙེད་ཁྱབ། འོད་ཀྱིས་ཇི་སྙེད་ཁྱབ་གྱུར་པ། གསུང་གིས་ཀྱང་ནི་དེ་སྙེད་ཁྱབ། གསུང་གིས་ཇི་སྙེད་ཁྱབ་གྱུར་པ། ཐུགས་ཀྱིས་ཀྱང་ནི་དེ་སྙེད་ཁྱབ། ཐུགས་གྱིས་ཇི་སྙེད་ཁྱབ་གྱུར་བ། བྱམས་པས་ཀྱང་ནི་དེ་སྙེད་ཁྱབ། བྱམས་པས་ཇི་སྙེད་ཁྱབ་གྱུར་པ། ཡེ་ཤེས་ཀྱིས་ནི་དེ་སྙེད་ཁྱབ། ཡེ་ཤེས་ཇི་སྙེད་ཁྱབ་གྱུར་པ། སྐུ་ཡིས་ཀྱང་ནི་དེ་སྙེད་ཁྱབ། གང་གིས་བྱང་ཆུབ་བློ་བསྐྱེད་པ། དེ་སྙེད་བསོད་ནམས་ཁྱབ་པར་བགྱིད། བྱང་ཆབ་སེམས་ཀྱི་བསོད་ནམས་གང་། དེ་ལ་གལ་ཏེ་གཟུགས་མཆིས་ན། ནམ་མཁའི་ཁམས་ནི་ཀུན་གང་སྟེ། དེ་ནི་དེ་བས་ལྷག་པར་འགྱུར། སེམས་ཅན་ཀུན་གྱི་བསོད་ནམས་ཀྱི། ཕུང་པོ་ཇི་སྙེད་ཡོངས་བཟུང་བ། དེ་སྙེད་བྱང་ཆུབ་སེམས་དཔའ་ཡི། བྱང་ཆུབ་སེམས་ལས་རབ་ཏུ་བྱུང་། བྱང་ཆུབ་སེམས་ཀྱི་བསོད་ནམས་ཀྱི། ཕུང་པོ་ཇི་སྙེད་བརྗོད་པ་བས། དམ་པའི་ཆོས་ནི་ཡོངས་འཛིན་ན། དེ་བས་བསོད་ནམས་ཆེས་མང་ངོ་། །དམ་ཆོས་འཛིན་པའི་བསོད་ནམས་ནི། སངས་རྒྱས་ཀུན་གྱིས་ནན་ཏན་དུ། བསྐལ་པ་བྱེ་བར་བརྗོད་མཛད་ཀྱང་། །
མཐའ་མར་ཕྱིན་པར་འགྱུར་མ་ལགས། དམ་པའི་ཆོས་ནི་འཛིན་པ་དང་། བྱང་ཆུབ་སེམས་ཀྱི་བསོད་ནམས་དེ། སྟོང་པ་ཉིད་ལ་མོས་པ་ཡིས། བཅུ་དྲུག་ཆ་ཡང་མི་རི་ལགས། སྟོང་པ་ཉིད་ལ་འདིར་མོས་ནས། བྱང་ཆུབ་སེམས་ཀྱང་མི་གཏོང་དང་། དམ་པའི་ཆོས་ནི་འཛིན་བགྱིད་པ། དེ་ནི་བསོད་ནམས་སྡུད་པ་ལགས། བྱང་ཆུབ་སེམས་དཔའ་གྲགས་ཆེན་པོ། ཆོས་ཀྱི་རྟོགས་པ་འདི་ཐོས་ནས། དེ་ཡིས་བྱང་ཆུབ་སྤྱད་སྤྱོད་ཅིང་། སངས་རྒྱས་ཡོན་ཏན་ཐོབ་པར་འགྱུར། ཚིགས་སུ་བཅད་པ་བརྗོད་པ་ན། ཞིང་རྣམས་བྱེ་བ་རབ་ཏུ་གཡོས། ལྷ་ནི་བྱེ་བ་ཕྲག་སྟོང་གིས། རོལ་མོ་སིལ་སྙན་བྱེ་བ་བླངས། སངས་རྒྱས་ཀྱི་ནི་ཆེ་བ་ཉིད། ཤུགས་འཆད་གིས་ནི་བཤད་ཐོས་ནས། སྲོག་ཆགས་བྱེ་བ་ཕྲག་སྟོང་དག །བྱང་ཆུབ་ཏུ་ནི་སེམས་བསྐྱེད་དོ། །སངས་རྒྱས་ཐམས་ཅད་གཟིགས་པ་པོ། །རང་འབྱུང་རྣམས་ཀྱི་གསང་པའི་གནས་སོ། །གནས་འདི་བསམ་གྱིས་མི་ཁྱབ་སྟེ། དཔག་ཡས་བླ་ན་མ་མཆིས་ལགས། ཞི་བའི་བློ་གྲོས་འདི་ཡང་དེ་བཞིན་གཤེགས་པའི་སྐུའི་གསང་བའོ། །བམ་པོ་བཞི་པ ཞི་བའི་བློ་གྲོས་དེ་ན་སེམས་ཅན་དུ་མ་འཁོར་གཅིག་ཏུ་འདུས་པ་དག་ལས་ཁ་ཅིག་གིས་ནི་དེ་བཞིན་གཤེགས་པའི་སྐུ་མཐོང་ངོ་། །ཁ་ཅིག་གིས་ནི་མ་མཐོང་ངོ་། །དེ་ལ་གང་དག་གིས་མཐོང་བ་དེ་དག་ནི་དགའ་བ་སྐྱེས་ནས་ལྷའོ། །གང་དག་གིས་མ་མཐོང་བ་དེ་དག་ནི་ཅང་མི་སྨྲ་བར་གྱུར་ཅིང་སྡོད་དོ། །ཞི་བའི་བློ་གྲོས་དེ་བཞིན་གཤེགས་པ་ནི་ཞལ་ཟས་མི་གསོལ་མོད་ཀྱི་སེམས་ཅན་རྣམས་ཀྱིས་དེ་བཞིན་གཤེགས་པའི་ཞལ་ཟས་གསོལ་བར་མཐོང་ངོ། །ཞི་བའི་བློ་གྲོས་དེ་ལ་བྱང་ཆུབ་ཀྱི་རིམ་གྲོ་པའི་ལྷ་གཟི་བརྗིད་ཀྱི་སྟོབས་ཞེས་བྱ་བ་དག་རྟག་ཏུ་དེ་བཞིན་གཤེགས་པའི་ཞབས་འབྲིང་དུ་འབྲང་ཞིང་དེ་དག་དེ་བཞིན་གཤེགས་པའི་ཞལ་ཟས་སྣོད་དུ་ཟེད་ན་སེམས་ཅན་རྣམས་ཀྱིས་དེ་བཞིན་གཤེགས་པས་ཁམ་ཚད་དུ་བླངས་ཏེ་གསོལ་བར་མཐོང་ང་ོ། །དེ་བཞིན་གཤེགས་པས་ཁམས་ཚད་དུ་བླངས་པ་དེ་ཡང་སྣོད་དེ་ཉིད་ན་འདུག་པ་དེ་ལྷ་དེ་དག་གིས་ཁྱེར་ནས་དེ་བཞིན་གཤེགས་པས་
འདུལ་བའི་སེམས་ཅན་སྔོན་དགེ་བའི་རྩ་བ་བསྐྱེད་པ། ལས་ཀྱི་སྒྲིབ་པའི་དབང་གིས་སྐྱེ་གནས་དེ་དང་དེ་དག་ཏུ་འཕངས་པ། བཟའ་བ་དང་། བཏུང་བ་དང་། ཟས་མི་རྙེད་པ། བཀྲེས་པས་ཉམ་ཆུང་བར་གྱུར་པ་ཇི་སྙེད་པ་དེ་དག་ལ་དེ་བཞིན་གཤེགས་པའི་བཤོས་ཀྱི་ཕམ་བབས་དེ་བྱིན་ནས་སེམས་ཅན་དེ་དག་གིས་ཀྱང་ཟས་དེ་ཟོས་པ་དང། བཀྲེས་སྐོམ་དང་བྲལ་ཏེ། བདེ་ཞིང་དུ་ལུས་ཚིམ་ནས་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །གང་དག་ལོག་པར་ལྷུང་པ་ཡི་དགས་སམ་ཤིན་རྗེའི་འཇིག་རྟེན་ན་གནས་པ་བྱང་ཆུབ་ཏུ་སེམས་བསྐྱེད་པར་མི་ནུས་པ་དེ་དག་ལ་ཡང་དེ་ཉིད་མྱ་ངན་ལས་འདས་པའི་བར་གྱི་རྒྱུར་འགྱུར་རོ། །ཞི་བའི་བློ་གྲོས་རྣམ་གྲངས་འདིས་ན་ཡང་ཁྱོད་ཀྱིས་ཇི་ལྟར་དེ་བཞིན་གཤེགས་པ་ཞལ་ཟས་མི་གསོལ་ཞིང་དེ་བཞིན་གཤེགས་པ་ཆོས་ཀྱི་ཞལ་ཟས་ཅན་དུ་དེ་ལྟར་རིག་པར་བྱ་སྟེ། ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་སྲེད་མེད་ཀྱི་བུ་ལྟར་མཁྲེགས་པ། སྲ་བ་སྙིང་པོ་ཅན། མི་ཤིགས་པ། རྡོ་རྗེའི་རང་བཞིན་ནོ། །ཞི་བའི་བློ་གྲོས་དེ་བཞིན་གཤེགས་པའི་སྐུ་ལ་ནི་ཕོ་བ་དང་ལོང་ཀ་མེད་དོ། །རྣག་གམ། ཁྲག་གམ། མཆི་མ་འམ། ངར་སྣབས་སམ། ངན་སྐྱུགས་སམ། མི་གཙང་བ་མེད་ཀྱི་ཞི་བའི་བློ་གྲོས་དེ་བཞིན་གཤེགས་པའི་སྐུ་ནི་འཛམ་བུའི་ཆུ་བོའི་གསེར་གྱི་གར་བུ་ལྟ་བུ་སྟེ། ཁོང་སྟོང་མ་ཡིན་པ། བུ་ག་མེད་པ། ཁ་ན་མ་ཐོ་བ་མེད་པའོ། །ཞི་བའི་བློ་གྲོས་འདི་ལྟར་ལྕི་ཁྱད་རྡོ་རྗེ་དང་འདྲ་ཡང་འཇམ་ཁྱད་ཀ་ཙམ་ལི་དི་ཀ་ལྟར་རེག་ན་བདེ་བར་འགྱུར་བས་དེ་བཞིན་གཤེགས་པའི་སྐུའི་ཆེ་བ་ཉིད་ལ་ལྟོས་ཞི་བའི་བློ་གྲོས་གང་གི་ཚེ་གཟི་བརྗིད་ཆེ་བ་གཟི་བརྗིད་ཆེ་བའི་ལྷའི་བུ་རྣམས་དང་། ལྷའི་བུ་མོ་རྣམས་དེ་བཞིན་གཤེགས་པའི་ཞབས་ལ་ཕྱག་འཚལ་བ་ན་སྔོན་མ་རེག་པའི་རེག་པ་རེག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། །དེ་དག་ཉོན་མོངས་བསྐྱེད་པར་མི་འགྱུར་བའི་དུས་དེ་དང་ཚོད་དེ་ཡོད་དོ། །ཞི་བའི་བློ་གྲོས་སེམས་ཅན་འདོད་ཆགས་ལ་སྤྱོད་པ་གང་དག་གིས་དེ་བཞིན་གཤེགས་པའི་སྐུ་མཐོང་བ་དེ་དག་དེ་བཞིན་གཤེགས་པའི་སྐུ་མཐོང་མ་ཐག་ཏུ་བདག་ཉིད་འདོད་ཆགས་དང་བྲལ་
བར་ཤེས་སོ། །ཞེ་སྡང་ལ་སྤྱོད་པ་གང་དག་གིས་མཐོང་ན་དེ་དག་བྱམས་པ་འཐོབ་པ། གཏི་མུག་ལ་སྤྱོད་པ་གང་དག་གིས་མཐོང་ན་དེ་དག་ཡེ་ཤེས་ཀྱི་སྣང་བ་འཐོབ་བོ། །ཆ་མཉམ་པ་ལ་སྤྱོད་པ་གང་དག་གིས་མཐོང་ན་དེ་དག་ཉོན་མོངས་པ་དང་བྲལ་བར་ཤེས་སོ། །སེར་སྣ་ཅན་གང་དག་གིས་མཐོང་ན་དེ་དག་གཏོད་བ་ལ་མོས་པར་འགྱུར་རོ། །ཚུལ་ཁྲིམས་འཚལ་པ་གང་དག་གིས་མཐོང་ན་དེ་དག་ཚུལ་ཁྲིམས་ལ་མོས་པར་འགྱུར་རོ། །གནོད་སེམས་ཅན་གང་དག་གིས་མཐོང་ན་དེ་དག་བཟོད་པ་འཐོབ་བོ། །ལེ་ལོ་ཅན་གང་དག་གིས་མཐོང་ན་དེ་དག་བརྩོན་འགྲུས་ལ་མོས་པར་འགྱུར་རོ། །སེམས་གཡེང་བ་གང་དག་གིས་མཐོང་ན་དེ་དག་ཏིང་ངེ་འཛིན་འཐོབ་བོ། །ཤེས་རབ་འཆལ་པ་གང་དག་གིས་མཐོང་ན་དེ་དག་ཤེས་རབ་ལ་མོས་པར་འགྱུར་རོ། །རིགས་ཀྱི་བུ་མདོར་ན་སེམས་ཅན་དཀར་པོའི་ཆོས་གང་དང་གང་དག་དང་བྲལ་བ་དག་གིས་དེ་བཞིན་གཤེགས་པའི་སྐུ་མཐོང་ན་དེ་དང་དེ་དག་དེ་བཞིན་གཤེགས་པའི་སྐུ་མཐོང་མ་ཐག་ཏུ་མི་དགེ་བའི་རྣམ་པར་རྟོག་པ་ཐམས་ཅད་རྒྱུན་ཆད་ནས་དགེ་བའི་སེམས་ལ་རབ་ཏུ་གནས་པར་འགྱུར་ཏེ་དེ་ལ་ཡང་དེ་བཞིན་གཤེགས་པ་རྣམ་པར་རྟོག་པ་མི་མངའ་ཞིང་བཏང་སྙོམས་པ་སྟེ། ཞི་བའི་བློ་གྲོས་འདི་ཡང་དེ་བཞིན་གཤེགས་པའི་སྐུའི་གསང་བ་འོ། །ཞི་བའི་བློ་གྲོས་དེ་བཞིན་གཤེགས་པས་སྤྲུལ་པ་གང་སྤྲུལ་པ་དེ་ཡང་ལྷུན་གྱིས་འགྲུབ་ཅིང་བསྒྲིམ་པ་མི་མངའ་བ་དང་། མངོན་པར་འདུ་མཛད་པ་མི་མངའ་བས་མཛད་དེ་དེ་བཞིན་གཤེགས་པ་འདི་སྙམ་དུ་ངས་སྤྲུལ་བ་དག་སྤྲུལ་ཏོ། །སྤྲུལ་ལོ། །སྤྲུལ་པར་བྱའོ་སྙམ་དུ་མི་དགོངས་མོད་ཀྱི་འོན་ཀྱང་སྤྲུལ་པས་འདུལ་བའི་སེམས་ཅན་ཇི་སྙེད་པར་འཇིག་རྟེན་གྱི་ཁམས་འདིའམ། འཇིག་རྟེན་གྱི་ཁམས་གྲངས་མེད་པ་བརྒྱ་སྟོང་དེ་དང་དེ་དག་ཏུ་སེམས་ཅན་ཡོངས་སུ་སྨིན་པར་མཛད་པའི་དོན་དུ་དེ་བཞིན་གཤེགས་པའི་སྤྲུལ་པ་དེ་སྙེད་དུ་བཞུད་དེ། ཞི་བའི་བློ་གྲོས་འདི་ཡང་དེ་བཞིན་གཤེགས་པའི་སྐུའི་གསང་བའོ། །ཞི་བའི་བློ་གྲོས་དེ་བཞིན་གཤེགས་པས་སེམས་ཅན་ཡོངས་སུ་སྨིན་པར་མཛད་པའི་དོན་དུ་སྐུ་ལས་འོད་ཁ་དོག་དུ་མ། ཁ་དོག་ཐ་དད་པ།
ཁ་དོག་བརྒྱ་སྟོང་པ་ཕྱུང་སྟེ། འོད་དེས་ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་སྣང་བར་བྱེད་པ་དེ་ཡང་ལྷུན་གྱིས་འགྲུབ་ཅིང་བསྒྲིམ་པ་མི་མདའ་བ་དང་། མངོན་པར་འདུ་མཛད་པ་མི་མདའ་བས་མཛད་དེ། ཞི་བའོ་བློ་གྲོས་འདི་ཡང་དེ་བཞིན་གཤེགས་པའི་སྐུའི་གསང་བ་དང་། སྐུའི་ཕྲིན་ལས་ཏེ། སྐུའི་ཕྲིན་ལས་ཡོངས་སུ་དག་པ་ལ་འཇུག་པ་ཅུང་ཟད་ཙམ་ཞིག་བསྟན་དུ་ཟད་ཀྱི་བསྐལ་པ་འམ། དེ་བས་ལྷག་པར་བརྗོད་ཀྱང་དེ་བཞིན་གཤེགས་པའི་སྐུའི་ཕྲིན་ལས་ཡོངས་སུ་དག་པའི་ཡོན་ཏན་བསྔགས་པའི་མཐར་ཕྱིན་པར་མི་ནུས་སོ། །དེ་དེ་བཞིན་གཤེགས་པའི་གསུང་བ་བསམ་གྱིས་མི་ཁྱབ་པ་བསྟན་པ་འདི་བཤད་པ་ན་སྲོག་ཆགས་ཁྲིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་བརྒྱ་སྟོང་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཐམས་ཅད་དང་ལྡན་པའི་འཁོར་དེས་ཀྱང་དེ་བཞིན་གཤེགས་པ་དང་། གསང་བ་པའི་བདག་པོ་ལག་ན་རྡོ་རྗེ་ལ་ལྷ་དང་མིའི་མེ་ཏོག་རྣམས་ཀྱིས་མངོན་པར་གཏོར་ཏོ། །བཅོམ་ལྡན་འདས་ཀྱིས་ཀྱང་ཕྱག་གཡས་པ་གསེར་གྱི་ཁ་དོག་ཅན་བརྐྱང་སྟེ། གསང་བ་པའི་བདག་པོ་ལག་ན་རྡོ་རྗེའི་སྤྱི་བོ་ལ་བཞག་ནས་གསང་བ་པའི་བདག་པོ་ལག་ན་རྡོ་རྗེ་ཁྱོད་ཀྱིས་དེ་བཞིན་གཤེགས་པའི་གསང་བ་བསྟན་པ་འདི་ལེགས་པར་སྨྲས་པ་ལེགས་སོ་ལེགས་སོ། །དེ་བཞིན་གཤེགས་པས་ཀྱང་གནད་ཞིང་རྗེས་སུ་དགྱེས་སོ། །ལེགས་སོ་ཞེས་བྱ་བ་གནད་དོ། །དེ་བཞིན་གཤེགས་པའི་སྐུའི་གསང་བའི་ལེའུ་སྟེ་འདུན་བའོ། །