ལེའུ་གཉིས་པ། མི་འཁྲུགས་པ་ལུང་བསྟན་པ་ཐེག་པ་ཆེན་པོའི་མདོ།
དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཡོན་ཏན་ཡོངས་སུ་བརྗོད་པ་དག་ནི་ལེགས་པར་བཀའ་སྩལ་ལགས་ན། བཙུན་པ་བཅོམ་ལྡན་འདས་ཀྱིས་ང་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ད་ལྟར་གྱི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་མ་ཆིས་པ་རྒྱ་ཆེར་ཡང་དག་པར་རབ་ཏུ་བསྟན་དུ་གསོལ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང། རིགས་ཀྱི་བུ་མོ་དག་གིས་སངས་རྒྱས་ཀྱི་ཞིང་དེའི་ཡོན་ཏན་བཀོད་པ་ཐོས་ནས་སངས་རྒྱས་ཀྱི་ཞིང་དེར་སྐྱེ་བར་བགྱི་བ་དང། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་ཡང་བལྟ་བ་དང། ཕྱག་
བགྱི་བ་དང། མཆོད་པ་བགྱི་བ་དང། བསྙེན་བཀུར་བགྱི་བ་དང། མཉེས་པར་བགྱི་བའི་སླད་དུ་འདུན་པ་སྐྱེ་པར་འགྱུར་པ་དང། ཉན་ཐོས་ཀྱི་ཐེག་པ་པའི་རིགས་ཀྱི་བུ་དང། རིགས་ཀྱི་བུ་མོ་སྐྱོན་མ་མཆིས་པར་ཞུགས་པ་དག་གིས་ཀྱང་སངས་རྒྱས་ཀྱི་ཞིང་དེའི་ཡོན་ཏན་བཀོད་པ་ཐོས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་བལྟ་བ་དང། ཕྱག་བགྱི་བ་དང། མཆོད་པ་བགྱི་བ་དང། བསྙེན་བཀུར་བགྱི་བ་དང། མཉེས་པར་བགྱི་བའི་སླད་དུ་འདུན་པ་སྐྱེ་པར་འགྱུར་བའི་སླད་དུའོ། །དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་ལེགས་སོ་ལེགས་སོ། །ཤཱ་ར་དྭ་ཏིའི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡོད་པ་འདྲི་བར་སེམས་པ་ནི་ཁྱོད་ཡང་ལེགས་སོ། །ཤཱ་ར་དྭ་ཏིའི་བུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་། འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡོད་པ་བཤད་པར་བྱའོ། །ཤཱ་ར་དྭ་ཏིའི་བུས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་པ་དང། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ཀྱིས་དེ་ནས་ཞག་བདུན་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤེས་ནས་སེམས་ཅན་དེ་དག་ཐམས་ཅད་ལ་ཟས་ཀྱི་འདུ་ཤེས་ཀུན་བྱུང་བར་མ་གྱུར་ཏོ། །བཀྲེས་པའི་འདུ་ཤེས་མ་བྱུང། སྐོམ་པའི་འདུ་ཤེས་མ་བྱུང། མལ་དུ་
ཉལ་བའི་འདུ་ཤེས་མ་བྱུང། ལུས་དང་སེམས་ངལ་བའི་འདུ་ཤེས་མ་བྱུང་གི། གཞན་དུ་ན་སེམས་ཅན་དེ་དག་ཐམས་ཅད་བདེ་བའི་འདུ་ཤེས་དང་ལྡན་པར་གྱུར་ཏེ། དགའ་བ་དང་མཆོག་ཏུ་དགའ་བའི་འདུ་ཤེས་དང། སེམས་རངས་པ་དང། སེམས་ཀྱི་ཉམས་བདེ་བ་དང་ལྡན་པར་གྱུར་ཏོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་དེ་དག་ཐམས་ཅད་ཀྱིས་ཀྱང་དེ་ལྟ་བུའི་ཡོན་ཏན་དག་ཡོངས་སུ་ཟིན་པར་གྱུར་བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་དེའི་ཚེ་འཇིག་རྟེན་གྱི་ཁམས་དེ་ན་མི་གང་དག་དང། འདོད་པ་ན་སྤྱོད་པའི་ལྷ་གང་དག་འཁོད་པ་དེ་དག་གི་དེ་ནས་ཞག་བདུན་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཤེས་ནས་དེ་དག་འཁྲིག་པ་སྤྱོད་པའི་འདུ་ཤེས་ཀུན་དུ་མ་བྱུང་བར་གྱུར་ཏོ། དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་བའི་ཕྱིར་རོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་སྣང་བ་ཆེན་པོས་ཁྱབ་པར་གྱུར་ཅིང་ས་ཆེན་པོ་ཡང་རྣམ་པ་དྲུག་ཏུ་གཡོས་པར་གྱུར་ཏེ། འདི་ལྟར་གཡོས། །རབ་ཏུ་གཡོས། ཀུན་དུ་རབ་ཏུ་གཡོས། །འགུལ་རབ་ཏུ་འགུལ། ཀུན་དུ་རབ་ཏུ་འགུལ། ལྡེག་རབ་ཏུ་ལྡེག། ཀུན་དུ་རབ་ཏུ་ལྡེག། འཁྲུགས་རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་འུར། རབ་ཏུ་འུར་འུར། ཀུན་དུ་
རབ་ཏུ་འུར་འུར། ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་པར་གྱུར་ཏེ། ཤཱ་ར་དྭ་ཏིའི་བུ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པར་གྱུར་པ་ཡིན་ནོ། ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་ལྷ་དང། མི་གང་དག་འཁོད་པ་དེ་དག་ཐམས་ཅད་བྱང་ཆུབ་ཀྱི་སྙིང་པོ་ག་ལ་བ་དེ་ལོགས་སུ་ཐལ་མོ་སྦྱར་ཏེ་ཕྱག་འཚལ་ཞིང་འཁོར་པར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པར་གྱུར་པ་གང་ཡིན་པ་དག་དང། ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ད་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་ཟིན་པ་གང་ཡིན་པ་དེ་དག་ནི་སངས་རྒྱས་བརྒྱ་
ཕྲག་མང་པོ་དང། སངས་རྒྱས་སྟོང་ཕྲག་མང་པོ་དང། སངས་རྒྱས་བརྒྱ་སྟོང་ཕྲག་མང་པོ་དང། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དག་ལ་ཡང་མེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་གི་ཡོན་ཏན་བཀོད་པ་དག་ནི་སྨོན་ལམ་གྱིས་འགྲུབ་སྟེ། ཤཱ་ར་དྭ་ཏིའི་བུ་ཇི་ལྟར་ངས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་ཇི་ལྟར་བཏབ་པ་དེ་ལྟར་གྱུར་པ་བཞིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྐད་ཅིག་དེ་དང། ཐང་ཅིག་དེ་དང། ཡུད་ཙམ་དེ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་སེམས་ཅན་གང་དག་ལྷའི་མིག་དང་ལྡན་པ་དང། ལྷའི་མིག་དང་མི་ལྡན་པ་དག་འཁོར་པའི་སེམས་ཅན་དེ་དག་གི་མིག་ལམ་དུ་སྣང་བར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བྱང་ཆུབ་ཀྱི་སྙིང་པོར་གཤེགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་བདུད་སྡིག་ཅན་རྣམས་འདི་སྙམ་དུ་ཅིའི་ཕྱིར་བདག་ཅག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་བར་ཆད་བྱ་བའི་ཕྱིར་ཕ་རོལ་གནོན་
པར་མི་བྱ་སྙམ་པའི་སེམས་མ་བསྐྱེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་སྟེང་གི་བར་སྣང་ལ་འཁོད་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་མཆོད་པ་བྱ་བའི་ཕྱིར་ལྷའི་མེ་ཏོག་དང་། ལྷའི་སྤོས་དང་། ལྷའི་བདུག་པ་དང་། ལྷའི་མེ་ཏོག་ཕྲེང་དང། ལྷའི་ཙན་དན་དང། ལྷའི་ཕྱེ་མ་དང་། ལྷའི་སིལ་སྙན་དང། ལྷའི་ན་བཟའ་དང་། ལྷའི་གདུགས་དང་། ལྷའི་རྒྱལ་མཚན་དང། ལྷའི་བ་དན་དང་། ལྷའི་རིན་པོ་ཆེའི་རྒྱན་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ག་ལ་བ་ལ་དེ་ལོགས་སུ་གཏོར། རབ་ཏུ་གཏོར། །མངོན་བར་རབ་ཏུ་གཏོར་ཏེ་མཆོད་པའི་ལས་ལ་བརྩོན་བར་རྒྱུར་ཏོ། གཏོར་མ་ཐག་ཏུ་སངས་རྒྱས་ཀྱི་མཐུས་ལྷའི་མེ་ཏོག་དེ་དག་དང་། ལྷའི་སྤོས་དེ་དག་དང་། ལྷའི་བདུག་པ་དེ་དག་དང་། ལྷའི་མེ་ཏོག་ཕྲེང་དེ་དག་དང། ལྷའི་ཙན་དན་དེ་དག་དང། ལྷའི་ཕྱེ་མ་དེ་དག་དང་། ལྷའི་སིལ་སྙན་དེ་དག་དང། ལྷའི་ན་བཟའ་དེ་དག་དང་། ལྷའི་གདུགས་དེ་དག་དང་། ལྷའི་རྒྱལ་མཚན་དེ་དག་དང། ལྷའི་བ་དན་དེ་དག་དང་། ལྷའི་རིན་པོ་ཆེའི་རྒྱན་དེ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་དབུའི་གཙུག་གི་དྲང་ཐད་ཀྱི་སྟེང་གི་ནམ་མཁའ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་གདུགས་དཔག་ཚད་བརྒྱའི་ཚད་ཙམ་ཞིག་ཏུ་གྱུར་ཅིང་འདུག་པར་གྱུར་ཏེ། ཤཱ་ར་དྭ་ཏིའི་
བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྐུའི་འོད་དག་གིས་ཉི་མ་དང་། ཟླ་བ་དག་གི་འོད་ཟིལ་གྱིས་མནན་ནས་མོག་མོག་པོར་བྱས་ཏེ་མི་མངོན་གྱི། གཞན་དུ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བ་ཆེན་པོས་ཁྱབ་པར་གྱུར་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་ཉི་མ་དང། ཟླ་བ་དག་གི་འོད་དང། ལྷ་ཐམས་ཅད་ཀྱི་འོད་དག་ཀྱང་ཟིལ་གྱིས་མནན་ཅིང་མོག་མོག་པོར་བྱས་ནས་མིག་ལམ་དུ་ཡང་མི་སྣང་བར་གྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་སྐད་ཅེས་བཀའ་སྩལ་པ་དང། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱེ་མ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ཙམ་དུ་གོ་ཆ་ཆེན་པོ་བགོས་ཤིང་དེའི་སྨོན་ལམ་གྱི་ཁྱད་པར་རྒྱ་ཆེན་པོ་དེ་ལྟ་བུ་དག་ཏུ་གྱུར་པ་དང། སྔོན་བྱང་ཆུབ་སེམས་
དཔའི་སྤྱད་པ་སྤྱོད་པ་ན་དེས་སྲོག་ཆགས་བརྒྱ་ཕྲག་མང་པོ་དང། སྲོག་ཆགས་སྟོང་ཕྲག་མང་པོ་དང། སྲོག་ཆགས་བརྒྱ་སྟོང་ཕྲག་མང་པོ་དང། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་དཔག་ཏུ་མ་མཆིས། གྲངས་མ་མཆིས། བརྗོད་དུ་མ་མཆིས་བརྗོད་དུ་མ་མཆིས་པའི་ཡང་བརྗོད་དུ་མ་མཆིས་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་རབ་ཏུ་བཀོད་ཅིང་དགེ་བའི་རྩ་བ་གང་དག་སེམས་བསྐྱེད་པའི་དགེ་བའི་རྩ་བ་དེ་དག་ཀྱང་སངས་རྒྱས་ཀྱི་ཞིང་ཡོངས་སུ་དག་པར་བགྱི་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ནས་ཇི་ལྟ་ཇི་ལྟར་ཡོངས་སུ་བསྔོས་པ་དེ་ལྟ་དེ་ལྟར་སྨོན་ལམ་ཡོངས་སུ་རྫོགས་པར་གྱུར་པ་ནི་ངོ་མཚར་ལགས་སོ། །དེ་སྐད་ཅེས་གསོལ་པ་དང། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་དེ་དེ་བཞིན་ཏེ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གོ་ཆ་ཆེན་པོ་བགོས་པར་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་བྱང་ཆུབ་ཀྱི་ཤིང་གང་གི་དྲུང་དུ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཤིང་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བརྙེས་པར་གྱུར་པའི་བྱང་ཆུབ་ཀྱི་ཤིང་རིན་པོ་ཆེ་སྣ་བདུན་ལས་གྲུབ་པ། འཕང་དུ་དཔག་ཚད་འབུམ་ཡོད། །དེའི་སྡོང་པོའི་འཕང་དུ་ནི་དཔག་ཚད་བརྒྱ་ཡོད། །སྦོམས་སུ་ནི་རྒྱང་གྲངས་ཕྱེད་ཀྱིས་འཁོར་ལ་དེའི་ཡལ་ག་རྣམས་ནི་དཔག་ཚད་བདུན་སྟོང་བདུན་སྟོང་ཡོད་དེ། དེའི་འཁོར་ཡུག་ཏུ་ནི་དཔག་ཚད་བཞི་ཁྲི་ཡོད་དེ། བྱང་ཆུབ་ཀྱི་ཤིང་དེའི་ཡལ་ག་དང། ལོ་མ་དང། ཡལ་ག་ཕྲེའུ་དག་རླུང་གིས་ཀུན་དུ་བསྐྱོད་པ་ན་དེ་དག་ལས་སྙན་པ་
དང། ཡིད་དུ་འོང་པ་དང། ཆགས་པར་འགྱུར་བའི་སྒྲ་སྐད་དག་བྱུང་སྟེ། ཤཱ་ར་དྭ་ཏིའི་བུ་ཇི་ལྟར་བྱང་ཆུབ་ཀྱི་ཤིང་དེའི་ཡལ་ག་དང། ལོ་མ་དང། ཡལ་ག་ཕྲེའུ་དག་རླུང་གིས་ཀུན་དུ་བསྐྱོད་པ་ན་དེ་དག་ལས་སྙན་པ་དང། ཡིད་དུ་འོང་བ་དང་ཆགས་པར་འགྱུར་བའི་སྒྲ་སྐད་དག་བྱུང་བ་དེ་ལྟ་བུའི་སྙན་པ་དང། ཡིད་དུ་འོང་པ་དང། ཆགས་པར་འགྱུར་བའི་སྒྲ་སྐད་དག་ནི་ལྷའི་སིལ་སྙན་ཡན་ལག་འབུམ་དང་ལྡན་པ་དག་རོལ་མོའི་སློབ་དཔོན་མཁས་པས་གསིལ་བ་དག་ལས་ཀྱང་འབྱུང་བར་མི་འགྱུར་རོ། །བྱང་ཆུབ་ཀྱི་ཤིང་དེ་ལས་ཕ་རོལ་དུ་ཕྱིན་པ་ཐམས་ཅད་དང། མངོན་པར་ཤེས་པ་དང། དབང་པོ་དང། སྟོབས་དང། བྱང་ཆུབ་ཀྱི་ཡན་ལག་དང། ལམ་གྱི་ཡན་ལག་ཐམས་ཅད་ཀྱི་སྒྲ་སྐད་ལྷའི་དབྱངས་ལས་ཤིན་དུ་འདས་པ། མཉེན་ཤིང་ཡིད་དུ་འོང་པ་དག་བྱུང་སྟེ། སེམས་ཅན་གང་དག་གིས་སྒྲ་སྐད་དེ་དག་ཐོས་པར་གྱུར་པ་དེ་དག་ཐམས་ཅད་ཀྱང་འདོད་ཆགས་དང་བྲལ་བའི་སེམས་རྗེས་སུ་དྲན་པ་ཞེས་བྱ་བའི་ཏིང་ངེ་འཛིན་ཐོབ་པོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་བརྗོད་པ་དག་ལེགས་པར་རབ་ཏུ་ཉོན་ལ་ཚུལ་བཞིན་དུ་ཡིད་ལ་ཟུང་ཤིག་དང། ངས་ཁྱོད་ལ་བཤད་པར་བྱའོ། །ཚེ་དང་ལྡན་པ་ཤཱ་ར་དྭ་ཏིའི་བུས་བཅོམ་ལྡན་འདས་ལེགས་སོ་ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ངན་སོང་གསུམ་པོ་དག་མེད་དེ། གསུམ་གང་ཞེ་ན་། འདི་ལྟ་སྟེ། སེམས་ཅན་དམྱལ་བ་དང། དུད་འགྲོའི་སྐྱེ་གནས་དང། གཤིན་རྗེའི་འཇིག་རྟེན་ནོ། །དེར་སེམས་ཅན་གང་དག་སྐྱེས་པར་གྱུར་པ་དེ་དག་ཐམས་ཅད་ནི་དགེ་བ་བཅུའི་ལས་ཀྱི་ལམ་དང་ལྡན་པ་ཤ་སྟག་གོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་སེམས་ཅན་རྣམས་ལ་འདི་
ལྟར་ཇོ་བོའམ། བྲན་གྱི་བྱེ་བྲག་ཏུ་དབྱེ་བ་ཡང་མེད་དེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེའི་མི་རྣམས་ལ་བཀོལ་བའི་ཆོས་ལྷུར་ལེན་པའི་བསམ་པ་ཡང་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་སེམས་ཅན་རྣམས་ལ་བདག་དང་བདག་གིར་ཡོངས་སུ་འཛིན་པ་མེད་པའི་ཕྱིར་རོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེའི་ས་གཞི་ཆེན་པོ་ཐམས་ཅད་ལག་མཐིལ་ལྟར་མཉམ་པ། ཀ་ཙ་ལིན་དི་ཀ་ལྟར་རེག་ན་བདེ་ཞིང་གསེར་གྱི་ཁ་དོག་ལྟར་འདུག་ལ་ལྷའི་ནོར་བུ་རིན་པོ་ཆེས་སྤྲས་ཤིང་པད་མ་གསེར་གྱི་མདོག་ཅན་མདབ་མ་བྱེ་བ་ཕྲག་སྟོང་དང་ལྡན་པ་དག་གིས་ལེགས་པར་བརྒྱན་ལ། མེ་ཏོག་མན་དཱ་ར་བ་དང། མན་དཱ་ར་བ་ཆེན་པོ་དག་མངོན་པར་བཀྲམ་པ། སྡོང་དུམ་དང། ཚེར་མ་དང། གྱོ་མོ་དང། གསེག་མ་མེད་པ་། དམ་གྲོག་དང། གད་པ་དང། མི་གཙང་བ་དོར་བའི་ས་མེད་པ། རྔོ་བ་དང། རི་མེད་པ་སྟེ། ཤཱ་ར་དྭ་ཏིའི་བུ་ས་གཞི་ཆེན་པོ་དེ་ལ་རྐང་པ་བཞག་ན་ནི་ནེམས་ཤེས་བྱེད། རྐང་པ་བཏེག་ན་ནི་སྤར་ཅེས་བྱེད་དེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ཤིང་བལ་གྱི་སྔས་ནང་ཚངས་ཅན་གྱི་སྟེང་དུ་མགོ་བཞག་ན་ནི་ནེམས་ཤེས་བྱེད། མགོ་བཏེག་ན་ནི་སྤར་ཅེས་བྱེད་པ་དེ་བཞིན་དུ་ཤཱ་ར་དྭ་ཏིའི་བུ་ས་གཞི་ཆེན་པོ་དེ་ལ་ཡང་རྐང་པ་བཞག་ན་ནི་ནེམས་ཤེས་བྱེད། རྐང་པ་བཏེག་ན་ནི་སྤར་ཅེས་བྱེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེའི་མི་རྣམས་ལ་རླུང་ལས་གྱུར་པ་དང། མཁྲིས་པ་ལས་གྱུར་བ་དང། བད་ཀན་ལས་གྱུར་བ་དང། འདུས་བ་ལས་གྱུར་བའི་ནད་རྣམས་ཐམས་ཅད་ཀྱི་ཐམས་ཅད་དུ་མེད་དོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེའི་མི་རྣམས་ལ་ཁ་དོག་ངན་པ་དང། དྲི་མི་ཞིམ་པ་དག་ཐམས་ཅད་ཀྱི་ཐམས་ཅད་དུ་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེའི་སེམས་ཅན་དེ་དག་ནི་འདོད་ཆགས་ཆུང་བ་དང། ཞེ་སྡང་ཆུང་བ་དང། གཏི་མུག་ཆུང་བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་བསད་པ་དང། བཅིང་བ་དང། གོ་རར་གཞུག་པ་དག་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་མེད་དོ། ། ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མུ་སྟེགས་ཅན་གྱི་གནས་དག་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་མེད་དོ། །
ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་ཤིང་ལྗོན་པ་རྣམས་རྟག་ཏུ་མེ་ཏོག་ཆགས་ཤིང་རྟག་ཏུ་འབྲས་བུ་ཆགས་པ་ཤ་སྟག་གོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་རྣམས་ཀྱི་གོས་ནི་དཔག་བསམ་གྱི་ཤིང་ལས་བྱུང་བའི་གོས་ཁ་དོག་རྣམ་པ་ལྔས་གོས་ཀྱི་བྱ་བ་བྱེད་དེ། གོས་དེ་དག་ཀྱང་མདོག་གསལ་ཞིང་དྲི་ཞིམ་པོ་དང་ལྡན་ལ། ཁ་དོག་མི་ཉམས་པ་ཤ་སྟག་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ལྷའི་མེ་ཏོག་རྣམས་ཀྱི་དྲི་བསུང་སྣ་ཚོགས་ཅི་འདྲ་བ་དེ་བཞིན་དུ་ཤཱ་ར་དྭ་ཏིའི་བུ་དེ་དག་གི་གོས་ཀྱི་དྲི་ཡང་དེ་འདྲ་ལ། དཔག་བསམ་གྱི་ཤིང་དེ་ལ་འདུག་པ་ན་དེ་དག་གི་དྲི་ཅི་འདྲ་བ་དེ་བཞིན་དུ་དེ་དག་གིས་ཡོངས་སུ་བཅད་པ་ན་ཡང་དྲི་དེ་དང་འདྲ་བ་ཉིད་དུ་འགྱུར་པས་གོས་དེ་དག་གི་དྲི་དང། ཁ་དོག་ལ་ཉམས་པར་འགྱུར་བ་ཡང་མེད་ལ། ཤཱ་ར་དྭ་ཏིའི་བུ་མི་དེ་དག་གི་གོས་རྣམས་ཤིན་དུ་མང་ཞིང་ཕལ་ཆེ་བའི་ཕྱིར་དེ་དག་ཡང་དང་ཡང་དུ་གོས་བརྗེ་ཞིང་གྱོན་པར་བྱེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ཁ་ཟས་ཇི་ལྟ་བུ་དག་འདོད་པ་དེ་ལྟ་བུའི་ཁ་ཟས་དག་མདུན་དུ་རིན་པོ་ཆེའི་སྣོད་དག་ནས་འབྱུང་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་སུམ་བཅུ་རྩ་གསུམ་པའི་ལྷ་རྣམས་ཡིད་ལ་ཅི་བསམ་པའི་ཁ་ཟས་དག་འབྱུང་བ་དེ་བཞིན་དུ་ཤཱ་ར་དྭ་ཏིའི་བུ་འཇིག་རྟེན་གྱི་ཁམས་དེ་ན་མི་དེ་དག་ཀྱང་ཁ་ཟས་ཇི་ལྟ་བུ་དག་འདོད་པ་དེ་ལྟ་བུའི་ཁ་ཟས་དག་མདུན་དུ་རིན་པོ་ཆེའི་སྣོད་དག་ནས་འབྱུང་ངོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་གི་ཁ་ཟས་གང་ཡིན་པའི་ཁ་ཟས་དེ་དག་ནི་ཁ་དོག་གམ། དྲིའམ། རོས་ལྷའི་ཁ་ཟས་དག་ལ་མི་འཐུ་འོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ལ་བཤང་བ་དང། གཅི་བ་དང། མཆིལ་མ་དང། སྣབས་དག་མེད་དེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་འདོད་པ་ན་སྤྱོད་པའི་ལྷ་རྣམས་པ་བཤང་བ་དང་། གཅི་བ་དང། མཆིལ་མ་དང། སྣབས་དག་མེད་པ་དེ་བཞིན་དུ་ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་མི་དེ་དག་ལ་ཡང་བཤང་
བ་དང། གཅི་བ་དང། མཆིལ་མ་དང། སྣབས་དག་མེད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སྔོན་གྱི་སྨོན་ལམ་གྱི་ཁྱད་པར་དང། མི་དེ་དག་གི་བསོད་ནམས་ཀྱི་རྣམ་པར་སྨིན་པས་མངོན་པར་གྲུབ་པ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་འདི་ལྟ་བུ་དག་མངོན་པར་གྲུབ་པ་ཡོད་དེ། གང་དུ་མི་དེ་དག་འདུག་པར་བྱ་བའི་གནས་རིན་པོ་ཆེ་སྣ་བདུན་ལས་གྲུབ་པའི་ཁང་པ་བརྩེགས་པ་དག་དང་ཁང་པ་བརྩེགས་པ་དེ་དག་གི་ནང་ན་རིན་པོ་ཆེ་སྣ་བདུན་ལས་བྱས་པའི་ཁྲི་དག་གི་སྟེང་དུ་ཤིང་བལ་ཅན་གྱི་སྟན་ལེགས་པར་བཏིང་པ་བཀྲམ་པ་དག་བྱུང་བར་གྱུར་ཅིང་ཁང་པ་བརྩེགས་པ་དེ་དག་ཏུ་ཁང་པ་བརྩེགས་པའི་ཡོངས་སུ་སྤྱད་པ་གང་ལས་མི་རྣམས་ཆུའི་བྱ་བ་བྱེད་པའི་རྫིང་རྣམ་པ་སྣ་ཚོགས་ཡན་ལག་བརྒྱད་དང་ལྡན་པའི་ཆུས་གང་པ་འབྱུང་སྟེ། རྫིང་བུ་དེ་དག་ཀྱང་གསེར་གྱི་བྱེ་མ་བདལ་པ། ལྷའི་ཤིང་མྱ་ངན་འཚང་གིས་བསྐོར་བ་ཤ་སྟག་གོ། །དེ་དག་ན་མི་རྣམས་དམ་པའི་ཆོས་ཀྱི་དགའ་པས་དགའ་པར་བྱེད་ཅིང་གནས་སོ། ཤཱ་ར་དྭ་ཏིའི་བུ་དེ་ན་མི་དེ་དག་གང་དུ་ཡན་ལག་བརྒྱད་དང་ལྡན་པའི་ཆུས་གང་བའི་རྫིང་དག་འབྱུང་བར་འདོད་པ་དེ་ཉིད་དུ་མི་དེ་དག་གི་དྲུང་དུ་ཡན་ལག་བརྒྱད་དང་ལྡན་པའི་ཆུས་གང་པའི་རྫིང་དག་འབྱུང་ཞིང་། གལ་ཏེ་རྗེས་སུ་འབྲང་བར་འདོད་ན་ཡང་རྗེས་སུ་འབྲང་བར་འགྱུར་ལ། གལ་ཏེ་མི་སྣང་བར་འདོད་ན་ཡང་མི་སྣང་བར་འགྱུར་རོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་ཧ་ཅང་ཡང་མི་དྲོ་ཧ་ཅང་ཡང་མི་གྲང་བའི་རླུང་དག་ལྡང་ངོ། །འཇམ་པ་དང། བདེ་བ་དང། དལ་བའི་རླུང་དག་ཀྱང་ལྡང་ངོ། དྲི་ཞིམ་པ་དང་། ཡིད་དུ་འོང་བའི་རླུང་དག་ཀྱང་ལྡང་སྟེ། རླུང་དེ་དག་ཉིད་ཀྱིས་མི་དེ་དག་དང་། ལྷ་དེ་དག་གི་སྤོས་ཀྱི་བྱ་བ་བྱེད་དོ། །གལ་ཏེ་ལ་ལ་ཞིག་བདག་ལ་རླུང་ལྡང་བར་གྱུར་ཅིག་ཅེས་རླུང་ལྡང་བར་འདོད་ན་ཡང་དེ་ལ་རླུང་ལྡང་བར་འགྱུར་རོ། །གལ་ཏེ་གཞན་དག་མི་འདོད་ན་དེ་དག་གིས་ལུས་ལ་རླུང་གིས་ཕོག་པར་མི་འགྱུར་ཞིང་གང་དང་གང་གི་ཚེ་འདོད་པ་དེ་དང་དེའི་ཚེ་དེ་དག་ལ་རླུང་ལྡང་བར་འགྱུར་ཏེ།
ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་ཡིན་ནོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་ད་ལྟར་ངའི་སངས་རྒྱས་ཀྱི་ཞིང་ན་གང་བུད་མེད་དག་གི་བུད་མེད་ཀྱི་སྐྱོན་དུ་བྱ་བའི་བུད་མེད་དག་གི་བུད་མེད་ཀྱི་སྐྱོན་དེ་དག་མེད་དེ། ཤཱ་ར་དྭ་ཏིའི་བུ་དེ་དག་ཀྱང་གང་ཞེ་ན། སངས་རྒྱས་ཀྱི་ཞིང་འདི་ན་བུད་མེད་ནི་མདོག་མི་སྡུག་པ། གཟུགས་མ་ལེགས་པ། དྲི་ང་བ། མི་གཙང་བས་གང་བ། འདོད་པའི་ལོངས་སྤྱོད་དག་གིས་ངོམས་མི་ཤེས་པ། བྱས་བ་མི་གཟོ་བ། ཁྲོ་བ་དང། ལྕེ་གཉིས་སྨྲ་བ་དང། ཕྲག་དོག་དང། སེར་སྣའི་ཆོས་ཀྱིས་གླགས་པ་ཡིན་ཏེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ན་བུད་མེད་དག་གི་བུད་མེད་ཀྱི་སྐྱོན་ནི་དེ་དག་ཡིན་ནོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་བུད་མེད་ལ་ནི་བུད་མེད་དག་གི་བུད་མེད་ཀྱི་སྐྱོན་དུ་བྱ་བ་དེ་ལྟ་བུ་དག་མེད་དེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་བུད་མེད་ནི་ཡོན་ཏན་ཐམས་ཅད་དང་ལྡན་པ་ཡིན་ཏེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་བུད་མེད་རིན་པོ་ཆེ་ནི་མིའི་བུད་མེད་ཀྱི་ཡོན་ཏན་དག་ལས་ཤིན་དུ་འདས་ཤིན་ལྷ་མོའི་ཡོན་ཏན་དང་ལྡན་པ་དེ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ན་བུད་མེད་རིན་པོ་ཆེའི་ཡོན་ཏན་གང་ཡིན་པ་དང། སངས་རྒྱས་ཀྱི་ཞིང་དེ་ན་བུད་མེད་ཀྱི་ཡོན་ཏན་གང་ཡིན་པ་དེ་དག་ནི་དེ་དག་གི་ཡོན་ཏན་གྱི་གན་ན་བུད་མེད་རིན་པོ་ཆེའི་ཡོན་ཏན་དག་ནི་བརྒྱའི་ཆར་ཡང་ཉེ་བར་མི་འགྲོའོ། །སྟོང་གི་ཆ་དང། བརྒྱ་སྟོང་གི་ཆ་དང། བྱེ་བ་བརྒྱའི་ཆ་དང། བྱེ་བ་སྟོང་གི་ཆ་དང། བྱེ་བ་བརྒྱ་སྟོང་གི་ཆ་དང། བྱེ་བ་ཁྲག་ཁྲིག་བརྒྱ་སྟོང་གི་ཆ་དང། གྲངས་དང། ཆ་དང། བགྲང་བ་དང། དཔེ་དང། རྒྱུར་ཡང་མི་བཟོད་དོ། །ཤཱ་ར་དྭ་ཏིའི་བུ་ཡང་སངས་རྒྱས་ཀྱི་ཞིང་དེ་ན་སྐྱེས་པ་དག་བུད་མེད་དང་ལྷན་
ཅིག་ཏུ་འཁྲིག་པ་སྤྱོད་པའི་ཕྱིར་ལུས་སྦྱོར་བ་མེད་དེ། ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་གང་གི་ཚེ་སྐྱེས་པ་དག་ཀུན་ཏུ་ཆགས་པའི་སེམས་བསྐྱེད་པ་ན་དེ་སོང་སྟེ་ཀུན་དུ་ཆགས་པའི་སེམས་ཀྱིས་བུད་མེད་ལ་ཡུད་ཙམ་ཞིག་བལྟས་པ་ཙམ་གྱིས་སྐྱེས་པ་དེའི་འདོད་ཆགས་རབ་ཏུ་ཞི་བར་གྱུར་ཏེ། ཤིན་ཏུ་ཡིད་བྱུང་ཞིང་སྤངས་ནས་མི་སྡུག་པ་ལ་འདོད་ཆགས་དང་བྲལ་བའི་ཏིང་ངེ་འཛིན་ཐོབ་བོ། །ཏིང་ངེ་འཛིན་དེས་བདུད་ཀྱི་ཞགས་པ་ལས་གྲོལ་ནས་ཡང་འདོད་ཆགས་ཀྱི་སེམས་སྐྱེ་བར་མི་འགྱུར་རོ། །སྐྱེས་པ་དེས་གང་ལ་བལྟས་པའི་བུད་མེད་དེ་བལྟས་པ་ཙམ་གྱིས་སྦྲུམ་མར་གྱུར་ཏེ། གཉིས་ཀའི་འདོད་ཆགས་ཞི་བར་གྱུར་ནས་མངལ་ན་གནས་པའི་ཁྱེའུ་འམ། བུ་མོ་དེའི་ལུས་དང་སེམས་ཀྱིས་ཀྱང་འདི་འདྲ་བའི་བདེ་བ་མྱོང་བར་འགྱུར་ཏེ་འདི་ལྟ་སྟེ། དཔེར་ན་སུམ་བཅུ་རྩ་གསུམ་པའི་ལྷ་རྣམས་རིན་པོ་ཆེའི་གཞལ་མེད་ཁང་ན་དགའ་ཞིང་མཆོག་ཏུ་དགའ་བར་བྱེད་པ་ན་ལུས་དང་། སེམས་ཀྱིས་བདེ་བ་མྱོང་བ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་མངལ་ན་གནས་པའི་ཁྱི་འུ་དང་། བུ་མོ་དག་ཀྱང་དེ་བཞིན་ནོ། །དེ་ན་མངལ་ན་གནས་པ་དེ་དག་ཉིན་ཞག་བདུན་གྱི་བར་དུ་བདེ་བ་མྱོང་ནས་བཙའ་བར་འགྱུར་ཞིང་བུད་མེད་སྦྲུམ་མ་དེའི་ལུས་དང། སེམས་ཀྱིས་ཀྱང་འདི་འདྲ་བའི་བདེ་བ་དག་མྱོང་བར་འགྱུར་ཏེ། འདི་ལྟ་སྟེ། དཔེར་ན་བསམ་གཏན་གཉིས་པ་ལ་སྙོམས་པར་ཞུགས་པའི་དགེ་སློང་ཐམས་ཅད་ཀྱིས་ཐམས་ཅད་དུ་བདེ་བར་གྱུར་པ་བཞིན་ནོ། །བུད་མེད་དེ་བུ་བཙའ་བ་ན་ཡང་མི་གཙང་བ་དང། དྲི་མི་ཞིམ་པ་དག་མེད་དོ། །ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཀྱེ་མ་ནམ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དེ་ཡོན་ཏན་དེ་ལྟ་བུ་དག་དང་ལྡན་པར་གྱུར་ཅིག་ཅེས་སྨོན་ལམ་བཏབ་པའི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་
དེའི་སངས་རྒྱས་ཀྱི་ཞིང་ན་གང་གི་ཚེ་སྐྱེས་པ་དང། བུད་མེད་དང་། ཁྱེའུ་དང་། བུ་མོ་དག་རྒྱན་དག་ཐོགས་པར་འདོད་པ་དེའི་ཚེ་དཔག་བསམ་གྱི་ཤིང་དག་འདུད་ཅིང་འདོགས་པར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་ནས་དགེ་སློང་ཞིག་གིས་སངས་རྒྱས་ཀྱི་ཞིང་དེའི་བསྔགས་པ་བརྗོད་པ་དང། བུད་མེད་དེ་དག་གི་ཡོན་ཏན་ཐོས་ནས་དེ་ལ་ཀུན་དུ་ཆགས་པའི་སེམས་སྐྱེས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཀྱང་སངས་རྒྱས་ཀྱི་ཞིང་དེར་སྐྱེ་བ་ཡོངས་སུ་འཛིན་པར་གྱུར་ཅིག། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་དགེ་སློང་དེ་ལ་འདི་སྐད་ཅེས་བཀའ་སྩལ་ཏོ། །མི་གཏི་མུག་བ་ཁྱོད་ལྟ་བུ་སངས་རྒྱས་ཀྱི་ཞིང་དེར་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། འདོད་ཆགས་ཀུན་ནས་ལངས་པའི་སེམས་ཀྱིས་སངས་རྒྱས་ཀྱི་ཞིང་དེར་སྐྱེ་བར་མི་ནུས་ཀྱི། དགེ་སློང་གཞན་དུ་ན་དགེ་བའི་སྤྱོད་པ་དང། ཆོས་ཀྱི་སྤྱོད་པ་དང། ཚངས་པར་སྤྱོད་པ་དང། ཡང་དག་པའི་སྤྱོད་པས་སེམས་ཅན་རྣམས་སངས་རྒྱས་ཀྱི་ཞིང་དེར་སྐྱེ་བ་ཡོངས་སུ་འཛིན་པར་འགྱུར་བའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཆོས་ཀྱི་རྒྱལ་པོ་བླ་ན་མེད་པའོ་ཞེས་བྱ་བར་ཤེས་པ་མ་གཏོགས་པ་རྒྱལ་པོ་གཞན་ནི་འགའ་ཡང་མེད་དོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་བྱང་གི་སྒྲ་མི་སྙན་གྱི་མི་རྣམས་ལ་རྒྱལ་པོ་ཞེས་བྱ་བ་གཞན་མེད་པ་དེ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་ཞིང་དེ་ན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཆོས་ཀྱི་རྒྱལ་པོ་བླ་ན་མེད་པའོ་ཞེས་བྱ་བར་ཤེས་པ་མ་གཏོགས་པ་རྒྱལ་པོ་གཞན་ནི་འགའ་ཡང་མེད་
དོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་སུམ་བཅུ་རྩ་གསུམ་པའི་ལྷ་རྣམས་ནི་ལྷའི་དབང་པོ་བརྒྱ་བྱིན་ལ་རིམ་གྲོ་བྱ་བའི་ཕྱིར་འདུའོ། །ཤཱ་ར་དྭ་ཏིའི་བུ་དེ་བཞིན་དུ་སངས་རྒྱས་ཀྱི་ཞིང་དེའི་ལྷ་དང། མི་རྣམས་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་བལྟ་བ་དང། ཕྱག་བྱ་བ་དང་། མཆོད་པ་བྱ་བ་དང་། བསྙེན་བཀུར་བྱ་བ་དང། ཆོས་མཉན་བའི་ཕྱིར་འདུ་སྟེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་མི་རྣམས་ནི་བག་ཡོད་པའི་གནས་པས་གནས་པ་ཤ་སྟག་སྟེ། དེ་ཅིའི་ཕྱིར་ཞེ་ན། །ཤཱ་ར་དྭ་ཏིའི་བུ་དེ་ན་འདི་ལྟར་ཁ་ལོ་སྒྱུར་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཉིད་ཀྱིས་རྒྱུ་སྔོན་དུ་བཏང་བའི་ཕྱིར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བཞིན་གཤེགས་པའི་མཆོད་རྟེན་ནམ། དེ་བཞིན་གཤེགས་པའི་སྐུ་གཟུགས་དག་ལ་མེ་ཏོག་དང་། བདུག་པ་དང་། སྤོས་དང་། མེ་ཏོག་ཕྲེང་དང་། བྱུག་པ་དང་། ཕྱེ་མ་དང་། ན་བཟའ་དང་། གདུགས་དང་། རྒྱལ་མཚན་དང་། བ་དན་དག་ཕུལ་ནས་འདི་སྐད་དུ་དགེ་བའི་རྩ་བ་འདིས་བདག་གི་སངས་རྒྱས་ཀྱི་ཞིང་རྣམ་པ་ཐམས་ཅད་ཀྱི་མཆོག་དང་ལྡན་པར་གྱུར་ཅིག་ཅེས་སྨོན་ལམ་བཏབ་པས་ན་དེའི་ཚེ་དེ་ལྟ་བུར་གྱུར་པ་ཡིན་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་
སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་མི་དེ་དག་ལ་ཉོ་ཚོང་དང། ཚོང་པ་དང་། ཞིང་ལས་དང་། སོ་ནམ་བྱ་བ་མེད་དེ། གཞན་དུ་ན་མི་དེ་དག་ཤིན་ཏུ་བདེ་བ་དང་ལྡན་པར་གནས་སོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེའི་མི་རྣམས་འདོད་པའི་དགའ་བས་རྩེ་བའི་ཕྱིར་འདོད་པ་དང་ལྡན་པའི་དབྱངས་ཀྱིས་གླུ་མི་ལེན་ཏེ། གཞན་དུ་ན་མི་དེ་དག་ཆོས་ཀྱི་དགའ་བ་ཉམས་སུ་མྱོང་བར་བྱེད་དོ། །ཤཱ་ར་དྭ་ཏིའི་བུ་དེ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་གསེར་གྱི་ཤིང་ཏ་ལའི་ཕྲེང་བ་དག་རླུང་གིས་ཀུན་དུ་བསྐྱོད་པ་ན་འདི་ལྟར་སྙན་པ་དང། འཇེབས་པ་དང་། ཡིད་དུ་འོང་པ་དང་། ཆགས་པར་འགྱུར་བའི་སྒྲ་འབྱུང་སྟེ། ཤཱ་ར་དྭ་ཏིའི་བུ་ཇི་ལྟར་གསེར་གྱི་ཤིང་ཏ་ལའི་ཕྲེང་བ་དག་རླུང་གིས་ཀུན་དུ་བསྐྱོད་པ་ལས་སྙན་པ་དང་། འཇེབས་པ་དང་། ཡིད་དུ་འོང་བ་དང་ཆགས་པར་འགྱུར་པའི་སྒྲ་འབྱུང་བ་དེ་ལྟ་བུའི་སྙན་པ་དང་། འཇེབས་པ་དང་། ཡིད་དུ་འོང་པ་དང་། ཆགས་པར་འགྱུར་བའི་སྒྲ་ནི་ལྷའི་སིལ་སྙན་ཡན་ལག་ལྔ་དང་ལྡན་པ་དག་རོལ་མོའི་སློབ་དཔོན་མཁས་པ་གསིལ་བ་དག་ལས་ཀྱང་འབྱུང་བར་མི་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་བསྒྲུབ་པར་འདོད་པས་ཇི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པ་ན་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་དག་ཡོངས་སུ་གཟུང་པ་དང། སངས་རྒྱས་ཀྱི་ཞིང་ཡོངས་སུ་སྦྱངས་པས་དེ་ལྟར་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཕུན་སུམ་ཚོགས་པ་དག་ཡོངས་སུ་གཟུང་བར་བྱ། དེ་ལྟར་སངས་རྒྱས་ཀྱི་ཞིང་ཡོངས་སུ་སྦྱང་བར་བྱའོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་ཉི་མ་དང་ཟླ་བ་སྣང་བའི་བྱ་བ་ཆེར་མི་བྱེད་དེ། འོན་ཀྱང་དེ་ན་མུན་པ་ཡང་མེད་ལ་མུན་ནག་ཀྱང་མེད་དོ། །དེ་ཅིའི་ཕྱིར་ཞེ་ན། ཤཱ་ར་དྭ་ཏིའི་བུ་དེ་ནི་འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་རྟག་པར་ཀུན་དུ་སྣང་བར་གྱུར་པའི་ཕྱིར་རོ། །ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ནོར་བུ་རིན་པོ་ཆེ་ཞིག་ཁང་པ་བརྩེགས་པའི་ར་བ་སྒོ་བཅད་པ། སྐར་ཁུང་བཅད་པ། བླ་འོག་གཡོགས་པ། ས་བཟང་པོའི་ཞལ་ཞལ་གྱིས་བསྐུས་པའི་ནང་དུ་བཅུག་ལ་དེར་ནོར་བུ་རིན་པོ་ཆེ་དེའི་རང་གི་ལུས་ཀྱི་འོད་ཀྱིས་སྣང་བའི་བྱ་བ་བྱེད་པ་ན་དེ་ན་སེམས་ཅན་གང་དག་འཁོད་པ་དེ་དག་གིས་ཉིན་པར་ཡང་སྣང་བར་ཤེས་མཚན་མོ་ཡང་སྣང་བར་ཤེས་སོ། །ཤཱ་ར་དྭ་ཏིའི་བུ་དེ་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱིས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་དག་ཐམས་ཅད་རྟག་པར་ཀུན་ཏུ་སྣང་བར་གྱུར་ཏོ། །ཤཱ་ར་དྭ་ཏིའི་བུ་དེ་ལ་ཁང་པ་བརྩེགས་པའི་ར་བ་ཞེས་བྱ་བ་དེ་ནི་འཇིག་རྟེན་གྱི་ཁམས་མངོན་བར་དགའ་བ་ཞེས་བྱ་བ་དེའི་ཚིག་བླ་དགས་སོ། །ཤཱ་ར་དྭ་ཏིའི་བུ་ནོར་བུ་རིན་པོ་ཆེ་ཞེས་བྱ་བ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་ཚིག་བླ་དགས་སོ། །ཤཱ་ར་དྭ་ཏིའི་བུ་ནོར་བུ་རིན་པོ་ཆེ་འོད་ཅེས་བྱ་བ་དེ་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་མི་འཁྲུགས་པ་དེའི་འོད་ཀྱི་ཚིག་བླ་དགས་སོ། །ཤཱ་ར་དྭ་ཏིའི་བུ་སེམས་ཅན་ཞེས་བྱ་བ་དེ་ནི་མི་གང་དག་སངས་རྒྱས་ཀྱི་ཞིང་དེ་ན་གནས་པའི་མི་དེ་རྣམས་ཀྱི་ཚིག་བླ་དགས་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དག་ལས་གར་གཤེགས་པ་ན་ས་ཆེན་པོ་དེ་ལ་ཞབས་གང་དང་གང་དག་ཏུ་བཞག་པ་དེ་དང་དེ་དག་ཏུ་པད་མ་གསེར་གྱི་མདོག་ཅན་འདབ་མ་སྟོང་ཡོད་བདག་འབྱུང་བར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །དེ་སྐད་ཅེས་བཀའ་སྩལ་བ་དང། བཅོམ་ལྡན་འདས་ལ་ཚེ་དང་ལྡན་པ་ཤཱ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ཁང་པའི་ནང་དུ་གཤེགས་པ་ན་ཡང་དེའི་ཞབས་ཀྱི་འོག་ནས་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དག་འབྱུང་ལགས་སམ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་ར་དྭ་ཏིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ནི་གྲོང་དང་། གྲོང་ཁྱེར་དག་ཏུ་གཤེགས་པ་ཉུང་མོད་ཀྱི། འོན་ཀྱང་གང་གི་ཚེ་གཤེགས་ཤིང་བཞུགས་པར་གྱུར་པ་ན་ཁྱིམ་དེར་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དག་འབྱུང་སྟེ། ཤཱ་ར་དྭ་ཏིའི་བུ་གལ་ཏེ་དེར་རིགས་ཀྱི་བུའམ་རིགས་ཀྱི་བུ་མོ་ལ་ལ་ཞིག་གིས་འདི་སྙམ་དུ། གང་དེ་བཞིན་གཤེགས་པ་ཁྱིམ་འདིར་གཤེགས་པའི་ཞབས་འོག་ནས་བྱུང་པའི་པད་མ་འདི་དག་ཐམས་ཅད་གནས་གཅིག་ཏུ་འདུས་པར་གྱུར་ཅིག་སྙམ་དུ་བསམས་ན་ཡང་འདི་ལྟར་སངས་རྒྱས་ཀྱི་མཐུས་དེ་དག་གནས་གཅིག་ཏུ་
འདུའོ། །གལ་ཏེ་ཡང་འདི་སྙམ་དུ་དེ་དག་ནམ་མཁའ་ལ་གནས་པར་གྱུར་ཅིག། སྙམ་དུ་བསམས་ན་ཡང་འདི་ལྟར་སངས་རྒྱས་ཀྱི་མཐུས་དེ་དག་ནམ་མཁའ་ལ་གནས་ཏེ། ཤཱ་ར་དྭ་ཏིའི་བུ་པད་མ་དེ་དག་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་མི་རྣམས་ཀྱི་མཆོད་རྟེན་དུ་འགྱུར་རོ། །ཤཱ་ར་དྭ་ཏིའི་བུ་གཞན་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་གང་དུ་ཆོས་སྟོན་པའི་ཕྱིར་གཤེགས་པ་དེར་པད་མ་དེ་ལྟ་བུ་དག་འབྱུང་ངོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེས་ཕྱོགས་གཞན་དག་དང་། འཇིག་རྟེན་གྱི་ཁམས་གཞན་གང་དང་གང་དག་ཏུ་སྤྲུལ་པ་དག་བཀྱེ་པ་དེ་དང་དེ་དག་ཏུ་ཡང་འདི་ལྟར་སངས་རྒྱས་ཀྱི་མཐུས་པད་མ་དེ་ལྟ་བུ་དག་འབྱུང་སྟེ། ཤཱ་ར་དྭ་ཏིའི་བུ་དེ་ལྟར་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་པད་མ་གསེར་གྱི་མདོག་ཅན་འདབ་མ་སྟོང་དང་ལྡན་པ་དེ་ལྟ་བུ་ཤ་སྟག་གིས་རྟག་ཏུ་བརྒྱན་པར་གྱུར་ཏོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ན་འདི་ལྟར་གསེར་དང་། དངུལ་དང་། བཻ་དཱུ་རྻ་དང་། རིན་པོ་ཆེ་སྣ་བདུན་ལས་བྱས་པའི་ཐེམ་སྐས་འཛམ་བུའི་གླིང་ནས་བཙུགས་ན་སུམ་བཅུ་རྩ་གསུམ་པའི་ལྷའི་རིས་ཀྱི་བར་དུ་ཕྱིན་པ་དག་ཡོད་དེ། ཤཱ་ར་དྭ་ཏིའི་བུ་གང་གི་ཚེ་སུམ་བཅུ་རྩ་གསུམ་པའི་ལྷ་རྣམས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བྱ་བར་འདོད་པའི་ཚེ་སུམ་བཅུ་རྩ་གསུམ་པའི་ལྷའི་རིས་ནས་རིན་པོ་ཆེའི་ཐེམ་སྐས་དེ་དག་ལས་བབས་པ་ན་སུམ་བཅུ་རྩ་གསུམ་པའི་ལྷ་དེ་དག་འཛམ་བུའི་གླིང་པའི་མི་དེ་དག་ལ་འདི་ལྟར་སྨོན་པའི་སེམས་སྐྱེ་སྟེ། བདག་ཅག་ལྷ་རྣམས་ཀྱི་ལྷའི་ཕུན་སུམ་ཚོགས་པ་གང་ཡིན་པ་དང་། འཛམ་བུའི་གླིང་པའི་མི་
རྣམས་ཀྱི་མིའི་ཕུན་སུམ་ཚོགས་པ་གང་ཡིན་པ་དེ་དག་ནི་བདག་ཅག་ལྷ་རྣམས་ཀྱི་ཕུན་སུམ་ཚོགས་པ་དག་ལས་འཛམ་བུའི་གླིང་པའི་མི་རྣམས་ཀྱི་ཕུན་སུམ་ཚོགས་པ་འདི་དག་ཀྱང་ཁྱད་པར་ཅུང་ཟད་ཙམ་གྱིས་ཀྱང་མི་དམན་པའི་སྟེང་དུ་འཛམ་བུ་གླིང་འདི་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་འདི་ཆོས་འཆད་ཅིང་བཞུགས་བས་ལྷག་པར་ཁྱད་པར་དུ་འཕགས་སོ་ཞེས་དེ་ལྟར་སུམ་བཅུ་རྩ་གསུམ་པའི་ལྷ་རྣམས་འཛམ་བུའི་གླིང་པའི་མི་དེ་དག་ལ་སྨོན་པར་བྱེད་དོ། །ཤཱ་ར་དྭ་ཏིའི་བུ་གང་གི་ཚེ་འཛམ་བུའི་གླིང་པའི་མི་དེ་དག་སུམ་བཅུ་རྩ་གསུམ་པའི་ལྷ་རྣམས་ཀྱི་གནས་སུ་འཛེག་པར་གྱུར་པའི་ཚེ་ན། དེ་དག་སུམ་བཅུ་རྩ་གསུམ་པའི་ལྷ་རྣམས་ལ་སྨོན་པ་མེད་དོ། །དེ་ཅིའི་ཕྱིར་ཞེ་ན། དེ་དག་འདི་སྙམ་དུ་ལྷ་འདི་དག་གི་ལྷའི་ཕུན་སུམ་ཚོགས་པ་དག་ལས་བདག་ཅག་གི་ཕུན་སུམ་ཚོགས་པ་དག་ཀྱང་མི་དམན་པའི་སྟེང་དུ་བདག་ཅག་གི་འཛམ་བུའི་གླིང་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཆོས་སྟོན་ཅིང་བཞུགས་པས་ན་འདི་ལྟར་བདག་ཅག་གི་སངས་རྒྱས་ཀྱི་ཕུན་སུམ་ཚོགས་པ་དེས་སུམ་བཅུ་རྩ་གསུམ་པའི་ལྷ་འདི་དག་ནི་ཟིལ་གྱིས་ནོན་ཏོ་སྙམ་དུ་སེམས་པའི་ཕྱིར་རོ། །ཤཱ་ར་དྭ་ཏིའི་བུ་གཞན་ཡང་སངས་རྒྱས་ཀྱི་ཞིང་དེ་ན་ལྷ་རྣམས་ཀྱིས་ཀྱང་མི་རྣམས་མཐོང་ལ་མི་རྣམས་ཀྱིས་ཀྱང་ལྷ་རྣམས་མཐོང་ངོ་། །འདི་ལྟར་ཡང་འཛམ་བུའི་གླིང་པའི་མི་དེ་དག་འཛམ་བུའི་གླིང་ཉིད་ན་གནས་བཞིན་དུ་འདོད་པ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་དག་ཀྱང་མཐོང་སྟེ། ཤཱ་ར་དྭ་ཏིའི་བུ་འདི་ལྟ་སྟེ། དཔེར་ན་ད་ལྟར་འཛམ་བུའི་གླིང་འདིའི་མི་རྣམས་ཀྱིས་སྐར་མའི་གཟུགས་རྣམས་དང་། ཉི་མ་དང་། ཟླ་བ་དག་མཐོང་བ་དེ་བཞིན་དུ་ཤཱ་ར་དྭ་ཏིའི་བུ་སངས་རྒྱས་ཀྱི་མཐུས་སངས་རྒྱས་ཀྱི་ཞིང་དེར་འཛམ་བུའི་གླིང་པའི་མི་རྣམས་ཀྱིས་ཀྱང་འདོད་པ་ན་སྤྱོད་པའི་ལྷ་རྣམས་ཀྱི་གཞལ་མེད་ཁང་དག་མཐོང་སྟེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་
པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །ཤཱ་ར་དྭ་ཏིའི་བུ་གཞན་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེའི་སངས་རྒྱས་ཀྱི་ཞིང་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་དུ་ཆོས་སྟོན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེར་འཁོར་བཞི་པོ་དག་གིས་མི་སྟོངས་པར་འགྱུར་ཏེ། ཤཱ་ར་དྭ་ཏིའི་བུ་དེ་ཡང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་སྨོན་ལམ་གྱི་ཁྱད་པར་གྱིས་གྱུར་པ་ཡིན་ནོ། །མི་འཁྲུགས་པ་ལུང་བསྟན་པ་ཐེག་པ་ཆེན་པོའི་མདོ་ལས་ལེའུ་གཉིས་པའོ།། །། །། །།