བརྒྱད་པ། བཟོད་པའི་ཕ་རོལ་ཏུ་ཕྱིན་པའི་ལེའུ།
ཤཱ་རིའི་བུ་དེ་ལ་བྱང་ཆུབ་སེམས་དཔའ་གང་ལ་བརྩོན་ཞིང་བྱང་ཆུབ་སེམས་དཔའི་སྤྱད་པ་སྤྱོད་པའི་བྱང་ཆུབ་སེམས་དཔའི་བཟོད་པའི་ཕ་རོལ་ཏུ་ཕྱིན་པ་གང་ཞེ་ན། འདི་ལྟར་ཤཱ་རིའི་བུ་བྱང་ཆུབ་སེམས་དཔའ་ནི་བཟོད་པ་དང་ལྡན་ཞིང་དང་དུ་ལེན་པའི་ངང་ཚུལ་ཅན་ཡིན་པས། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། རླུང་དང་། ཉི་མ་དང་། སྤྲང་བུ་དང་། ཤ་སྤྲང་དང་། སྡིག་སྤྲུལ་གྱིས་རེག་པ་དང་། ངན་དུ་སྨྲ་བ་དང་། ངན་དུ་བརྗོད་པའི་ཚིག་གི་ལམ་ལ་བཟོད་པ་དང་ལྡན་པ་ཡིན་ནོ། །ལུས་ལས་ཚོར་བ་བྱུང་ཞིང་སྐྱེས་པ་སྡུག་བསྔལ་བ་ཤིན་དུ་དྲག་པོ་དང་། རྩུབ་པ་དང་། ཚ་བ་དང་། སྲོག་འཕྲོག་པ་དང་། འཆི་བ་ལ་ཐུག་པའི་ཚོར་བ་རྣམས་བཟོད་པ་དང་ཞིང་དང་དུ་ལེན་པའི་ངང་ཚུལ་ཅན་ཡིན་ནོ། ཤཱ་རིའི་བུ་མངོན་པར་རྫོགས་པའི་སངས་མ་རྒྱས་པ་ན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། ཡུན་རིང་པོར་བཟོད་པ་བསྒོམས་སོ། བཅོམ་ལྡན་འདས་བྱང་ཆུབ་སེམས་དཔའ་ཇི་ལྟར་བཟོད་པ་བསྒོམ་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ངས་མངོན་པར་ཤེས་པས་འདས་པའི་དུས་ན་བྱང་ཆུབ་སེམས་དཔའ་གྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་དག་འོངས་ནས་གཤེ་རྒྱ་ཞིང་ཚིག་ངན་པ་དང་། ངག་རྩུབ་པོའི་ཚིག་སྨྲ་བ་དེ་ལ་ཤཱ་རིའི་བུ་ང་ཁྲོ་བ་དང་། ཞེ་སྡང་བ་དང་། གཏི་མུག་དང་། སེར་སྣས་ཡོངས་སུ་གདུང་བ་མ་སྐྱེས་སོ། དེ་ལྟར་འཁོར་བ་ཞུགས་པ་ན་འདི་ལྟ་སྟེ། གཤེ་བ་དང་། མི་སྙན་བར་ཟེར་བ་ལྟར་རྙེད་པར་སླ་བ་གང་ཡང་མེད་མོད་ཀྱི། དེ་ལ་བདག་གིས་བཏང་སྙོམས་སུ་བྱ། དེ་ལ་སྙིང་རྗེ་བསྐྱེད་པར་བྱའོ། དེ་ཅིའི་ཕྱིར་ཞེ་ན། ཇི་ལྟར་གཤེ་བ་དང་། མི་སྙན་བར་ཟེར་བ་ལ་ཕལ་ཆེར་རབ་ཏུ་གནས་པ་དེ་དག་ལས་དེ་འདྲ་བའི་རྣམ་པར་སྨིན་པ་མངོན་བར་འགྲུབ་སྟེ། གཤེ་བ་དང་། མི་སྙན་བར་ཟེར་བ་རྙེད་པར་འགྱུར་རོ། གང་དང་གང་དུ་སྐྱེས་པ་ཐམས་ཅད་ཏུ་
གཟུགས་ངན་པ་དང་། མི་སྡུག་པའི་ལུས་རབ་ཏུ་འཐོབ་བོ། ང་ནི་གཟུགས་ངན་པར་མི་འདོད། གཤེ་བ་དང་། མི་སྙན་པར་ཟེར་བ་མི་འདོད་དོ། དེ་ཅིའི་ཕྱིར་ཞེ་ན། འདི་ལྟ་སྟེ། གཤེ་བ་དང་། མི་སྙན་པ་ཟེར་བ་དེ་དག་ནི་མི་རིགས་པའོ། དེ་དག་ནི་མི་རིགས་པའི་ལས་སོ། དེ་དག་ནི་བྱིས་པའི་ལས་སོ། དེ་དག་ནི་དམན་པའི་ལས་སོ། དེ་དག་ནི་སྐྱེས་བུ་དམ་པའི་མ་ཡིན་པའི་ལས་སོ། དེ་དག་ནི་མི་བགྲུངས་པའི་ལས་སོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་སེམས་ཅན་དམྱལ་བར་ལྟུང་བའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནུ་གཤིན་རྗེའི་འཇིག་རྟེན་དུ་ལྟུང་བའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་སེམས་ཅན་དམྱལ་བའི་གཡོག་བྱེད་པའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་གནོད་སྦྱིན་དབུལ་པོར་བྱེད་པའོ། འདི་ལྟ་སྟེ། གཤེ་བ་དང་། མི་སྙན་བ་ཟེར་བའི་ཆོས་དེ་ལྟ་བུ་དེ་དག་ནི་གནོད་སྦྱིན་དབུལ་པོར་བྱེད་པའི་རྩ་བའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་ཡི་དགས་དབུལ་པོར་བྱེད་པ་དང་། ཡི་དགས་དབུལ་པོར་བྱེད་པའི་རྩ་བའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་མི་དབུལ་པོར་བྱེད་པ་དང་། མི་དབུལ་པོར་བྱེད་པའི་རྩ་བའོ། འདི་ལྟ་སྟེ། གཤེ་བ་དང་། མི་སྙན་བར་ཟེར་བའི་ཆོས་དེ་ལྟ་བུ་དེ་དག་ནི་དམན་པའི་འགྲོ་བར་བྱེད་པ་དང་། དམན་པའི་འགྲོ་བར་བྱེད་པའི་རྩ་བ་སྟེ། ང་ནི་དམན་པའི་འགྲོ་བ་མི་འདོད་དོ། དེ་ཅིའི་ཕྱིར་ཞེ་ན། དེ་དག་རིགས་པ་དང་། དེ་དག་མི་རིགས་པར་ཡང་ཁྱད་པར་ཅི་ཞིག་ཡོད། བྱེ་བྲག་ཅི་ཞིག་ཡོད་པར་འགྱུར། ཤཱ་རིའི་བུ་དེ་བས་བྱང་ཆུབ་སེམས་དཔའ་སེམས་དཔའ་ཆེན་པོས་ངའི་རྗེས་སུ་སློབ་པའི་རང་བཞིན་ཅན་དུ་འགྱུར་བའོ། དེ་ཅིའི་ཕྱིར་ཞེ་ན། ཤཱ་རིའི་བུ་གང་གི་ཚེ་བྱང་ཆུབ་སེམས་དཔའ་ལ་གཞན་གཤེ་བ་འམ། མི་སྙན་བ་ཟེར་ན། འདི་ལྟ་བུའི་ཆོས་ཡིད་ལ་བྱས་ན་བཟོད་པར་འགྱུར་ཏེ། གང་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་མགྲོན་བུ་
དང་། གསེར་དང་། ནོར་བུ་དང་། མུ་ཏིག་དང་། བཻ་དཱུཪྻ་དང་། དུང་དང་། མན་ཤེལ་དང་། བྱི་རུ་དང་། གསེར་དང་། དངུལ་གྱིས་ཡོངས་སུ་བཀང་སྟེ་བྱིན་པ་བས་བཟོད་པས་བསྒྲུབས་པའི་དགེ་བའི་རྩ་བ་ཆེས་མང་དུ་ཡོངས་སུ་འཛིན་པར་འགྱུར་རོ། དེ་ཅིའི་ཕྱིར་ཞེ་ན། ཤཱ་རིའི་བུ་སྐྱེས་བུ་དམ་པས་ནན་ཏན་གྱིས་སྒྲུབ་པར་བྱེད། བཟོད་པས་སྟོབས་ཤེས་པར་བྱེད་དོ། ཤཱ་རིའི་བུ་སེམས་ཅན་ཕལ་ཆེར་ནི་གཤེ་བ་དང་། མི་སྙན་བར་ཟེར་བའི་དབང་དུ་སོང་བས་འཁོར་བ་ལས་མི་ལྡོག་གོ། ཤཱ་རིའི་བུ་གཞན་ཡང་བྱང་ཆུབ་སེམས་དཔའ་ཅི་བདག་ལ་ཕ་རོལ་གཤེ་བ་འམ། མི་སྙན་བར་ཟེར་ནས་སངས་རྒྱས་དང་། བྱང་ཆུབ་དང་། ཆོས་དང་། དགེ་འདུན་ཡིད་ལ་བྱེད་དམ་ཞེས་བདག་གི་མཐུ་ཤེས་པར་བྱ་སྟེ། གལ་ཏེ་ཡིད་ལ་བྱེད་ན་ལེགས། ཡིད་ལ་མི་བྱེད་པར་གྱུར་ན་དེས་རྣམ་གྲངས་དུ་མར་སངས་རྒྱས་སམ། བྱང་ཆུབ་བམ། ཆོས་སམ། དགེ་འདུན་ཡིད་ལ་བྱའོ། ཡིད་ལ་མི་བྱེད་ན་དེ་དག་ཀྱང་གནོད་སེམས་དང་ལྡན་པ། སངས་རྒྱས་དང་། བྱང་ཆུབ་དང་། ཆོས་དང་། དགེ་འདུན་ཡིད་ལ་མི་བྱེད། བདག་ཀྱང་ཡིད་ལ་མི་བྱེད་ན། བདག་དང་། སེམས་ཅན་དེ་དག་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བ་སྤྱད་པ་ཅི་ཞིག་ཡོད་ཀྱིས་དེ་དག་དང་བདག་ཅག་གནོད་སེམས་ཀྱི་དུས་ན་བཏང་སྙོམས་སུ་བྱ་བ་དང་། སངས་རྒྱས་དང་། བྱང་ཆུབ་དང་། ཆོས་དང་། དགེ་འདུན་ཡིད་ལ་བྱ་བ་དང་། བཟོད་པའི་སྟོབས་ཀྱང་གོ་བར་བྱ་བའི་རིགས་སོ་ཞེས་བདག་ལ་བསྐུལ་བར་བྱའོ། དེ་ཅིའི་ཕྱིར་ཞེ་ན། བདག་ནི་སེམས་ཅན་གཅིག་གཟུང་ལ་སེམས་ཅན་ཐམས་ཅད་གཏད་པ་མ་ཡིན་གྱི། བདག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་ཏེ། སེམས་ཅན་ཐམས་ཅད་ལ་ཆོས་བསྟན་པར་བྱའོ་ཞེས་དེ་ལྟ་བུའི་ཚིག་སྨྲས་ཏེ། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བདག་ལ་རིགས་ཀྱི་བུ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་ཏེ། སེམས་ཅན་ཐམས་ཅད་ལ་ཆོས་སྟོན་པར་མཁྱེན་ཏོ། སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་གཟིགས་པ། ཆགས་
པ་མེད་པ་དང་། ཐོགས་པ་མེད་པས། སངས་རྒྱས་བཅོམ་ལྡན་འདས་རྣམས་ཀྱིས་བདག་མཁྱེན་ཏེ། གལ་ཏེ་བདག་གནོད་སེམས་ཀྱི་དུས་ན་བཏང་སྙོམས་སུ་མ་གྱུར་ཅིང་གང་སངས་རྒྱས་དང་། བྱང་ཆུབ་དང་། ཆོས་དང་དགེ་འདུན་ཡིད་ལ་མི་བྱེད་ན་དེ་ནི་བདག་གི་མི་ཆའོ། ཤར་ཕྱོགས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་གང་ད་ལྟར་བཞུགས་ཏེ། འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་གིས་ཀྱང་རིགས་ཀྱི་བུ་དེས་འདི་ལྟར་སེམས་སྐྱེད་དེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ལ་ཆོས་བསྟན་པར་བྱའོ་སྙམ་དུ་བདག་གི་སེམས་བསྐྱེད་པ་མཁྱེན་ཏེ། ཡང་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཤར་ལྟོ་དང་། ལྷོ་ནུབ་དང་། ནུབ་བྱང་དང་། བྱང་ཤར་དང་། དེ་བཞིན་དུ་སྟེང་དང་། འོག་གི་ཕྱོགས་དང་། དེ་ལྟར་ཕྱོགས་དང་། ཕྱོགས་མཚམས་དང་། དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་གང་ད་ལྟར་བཞུགས་ཏེ། འཚོ་ཞིང་དེ་དག་གིས་ཀྱང་རིགས ཀྱི་བུ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་སོ་ཞེས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ལ་ཆོས་སྟོན་ཅིང་བཟོད་པའི་བསྔགས་པ་བརྗོད་པར་བྱའོ་ཞེས་སེམས་བསྐྱེད་པ་དེ་མཁྱེན་གྱིས་དེ་བས་སེང་གེའི་སྒྲ་སྒྲོགས་ལ་བདག་ཝའི་སྒྲ་སྒྲོག་པར་ནི་མི་བྱའོ། །ཀྱེ་མའོ་འདི་ལྟ་སྟེ། སེང་གེའི་སྒྲ་དེ་ནི་བཟོད་པའི་སྟོབས་ཤེས་པར་བྱེད་པའོ། ཀྱེ་མའོ་འདི་ལྟ་སྟེ། ཝའི་སྒྲ་དེ་ནི་གཤེ་བ་དང་། མི་སྙན་བར་ཟེར་བའོ། སེམས་ཅན་འདི་དག་ནི་སེམས་ཅན་གང་དོན་བྱེད་ན་སེམས་ཅན་དེ་ཡང་དེའི་དོན་བྱེད་དོ། བདག་ཀྱང་སེམས་ཅན་གང་གིས་དོན་བྱས་པའི་དེའི་ཕྱིར་དེའི་དོན་བྱེད་པར་གྱུར་ན་དེ་ལ་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བ་སྤྱོད་པ་ཅི་ཞིག་ཡོད། སེམས་ཅན་འདི་དག་ནི་སེམས་ཅན་གང་གནོད་པར་བྱེད་ན་
དེ་ལ་སེམས་ཅན་དེ་ཡང་གནོད་པར་བྱེད་དོ། བདག་གིས་ཀྱང་སེམས་ཅན་གང་གནོད་པར་བྱེད་ན། བདག་ཀྱང་དེ་ལ་གནོད་པར་བྱེད་དེ། གནོད་པར་ཕྱིར། གནོད་པར་བྱེད་ན། དེ་ལ་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བ་སྤྱོད་པ་ཅི་ཞིག་ཡོད་པར་འགྱུར། ཤཱ་རིའི་བུ་གཞན་ཡང་བྱང་ཆུབ་སེམས་དཔའ་འདི་ལྟར་སློབ་སྟེ། སེམས་ཅན་འདི་དག་ཐམས་ཅད་ནི་ཕན་ཚུན་དུ་མི་མཛའ་བ་སྟེ། དེ་དག་ནོར་ཐོབ་ན་ནི་མཛའ་བར་ཤེས། གནོད་པར་བྱས་ན་ནི་གཅིག་ལ་གཅིག་གསོད་པར་བྱེད་དོ། བདག་ནི་སེམས་ཅན་གྱི་དོན་ལ་ཚམ་ཚོམ་མེད་དེ། བདག་ལ་གནོད་པར་གྱུར་ཀྱང་བདག་སེམས་ཅན་གྱི་དོན་བྱའོ་སྙམ་མོ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །བསྐལ་པ་བྱེ་བ་མང་པོར་བརྒྱད། བདག་ལ་གནོད་པར་གྱུར་ཀྱང་ནི། སེམས་ཅན་སྡུག་བསྔལ་རྣམས་མཐོང་ན། ཡལ་བར་བོར་ཞིང་མི་འདུག་གོ། དོན་རྙེད་ན་ནི་མཛའ་བོ་ཤེས། ཕན་ཚུན་གཅིག་ལ་སྨྲ་ཡི། དོན་རྣམས་ཕྱེད་ཕར་མི་འགྱུར་ན། ཕན་ཚུན་དུ་ནི་གནོད་པར་བྱེད། ང་དང་རྟག་ཏུ་མཛའ་བྱ་ཞེས། འཛའ་བུའི་གླིང་འདི་ཐམས་ཅད་དང་། སངས་རྒྱས་ཞིང་རྣམས་རིན་པོ་ཆེ། འབའ་ཤིག་བཀང་སྟེ་སྦྱིན་བྱེད་དང་། གང་དག་མཚོན་ནི་རྣོན་པོ་ཡིས་། ཡན་ལག་ཉིད་ལག་གཅོད་པ་ཡི། སེམས་ཅན་རྣམས་ནི་ཐམས་ཅད་ལ། མཉམ་བ་ཡི་ནི་སེམས་སུ་བྱ། གཤེ་དང་མི་སྙན་ཟེར་བ་དང་། ངན་དུ་བྱས་བ་ཐམས་ཅད་བཟོད། བཟོད་བ་ལ་ནི་རབ་གནས། བཟོད་པ་དག་གི་བསྔགས་པ་བརྗོད། དུག་ལྡུད་མཚོན་གྱིས་འདེབས་པ་ཡི། གཅིག་ལ་གཅིག་ནི་གནོད་བྱེད་པ། སེམས་ཅན་དེ་དག་བསྡུམ་བར་བྱ། དེ་ནི་མཁས་པའི་མཚན་ཉིད་དོ། བྱིས་པ་སྤྱོད་པ་འང་དེ་བཞིན་ནོ། གང་གིས་མྱ་ངན་འདའ་བའང་གཞན། བདག་ནི་ཁྱད་པར་ཚོལ་བས་ན། བྱིས་པ་དག་ནི་བདག་མི་སློབ། ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་བསླབ་པར་བྱ་སྟེ། གལ་ཏེ་བསྐལ་པ་བྱེ་བ་ཁྲག་ཁྲིག་བརྒྱ་ཕྲག་སྟོང་དུ་རྡོ་དབྱུག་དང་མཚོན་འདེབས་ཤིང་འཕེན་བས་ཡུང་ཙམ་ཡར་འཚོར་མི་སྟེར་ན།
དེས་ཀྱེ་མའོ་ངོ་མཚར་ཏོ་ཞེས་བྱ་བ་ནས་སེམས་ཅན་འདི་དག་ནི་འཕགས་པ་སྟེ། བདག་གི་སྲོག་མ་བཅད་དོ་སྙམ་པའི་བར་དུ་དེ་ལྟར་བདག་གོ་བར་བྱ་ཞིང་ཡང་འདི་ལྟར་བསླབ་པོ། ཡོངས་སུ་བརྟག་པ་བཟུང་སྟེ། བརྒྱ་ལ་བདག་གོམ་པ་བདུན་བོར་བ་ཙམ་གྱི་ཡུན་ལ་གང་གཱའི་ཀླུང་གི་བྱེ་མ་རྙེད་ཀྱི་མགོ་བཅད་པར་གྱུར་ཀྱང་བདག་ཁྲོ་བ་དང་། གཤེ་བར་སྒོམ་པར་མི་བྱའོ། དེ་ཅིའི་ཕྱིར་ཞེ་ན། ཁོང་ཁྲོ་བ་ཁོང་ཁྲོ་བ་ཞེས་བྱ་བ་ནི་བསྐལ་པ་བརྒྱ་སྟོང་དུ་བསྒྲུབས་པའི་དགེ་བའི་རྩ་བ་འཇོམ་པ་སྟེ། ཡང་ཕྱིར་བདག་གིས་བསྐལ་པ་བརྒྱ་སྟོང་དུ་དགེ་བའི་རྩ་བ་བསྒྲུབས་པར་བྱ་དགོས་སོ། དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ནི་བསྒྲུབ་དཀའ་བ་ཡིན་ཏེ། དེ་ལྟར་ཆོས་དེ་འབྱུང་བར་དཀའ་བའོ། དེ་བས་ན་བདག་བཟོད་པའི་སྟོབས་ཀྱི་གོ་ཆ་བགོ་བར་བྱའོ། དེ་ལྟར་ཤཱ་རིའི་བུ་ཐེག་པ་ཆེན་པོ་ལ་ཞུགས་པ་སེམས་སྡང་བར་གྱུར་པ་ལ་བདུད་ཀྱིས་གླགས་རྙེད་དོ། གླགས་རྙེད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་གཅོད་པར་འགྱུར་རོ། སེམས་སྡང་བས་བྱང་ཆུབ་ཏུ་བྱ་བ་ལ་གཡེང་བར་འགྱུར་རོ། སེམས་གཡེང་བ་ལ་ནི་བདུད་སྡིག་ཅན་བདུད་ཀྱི་ལས་ཀྱིས་སྐུལ་བར་བྱེད་དོ། དེ་ལ་བདུད་ཀྱི་ལས་གང་ཞེ་ན། འདི་ལྟ་སྟེ། ལྷུང་བཟེད་ལ་ཞུགས་པའི་སེམས་ནི་བདུད་ཀྱི་ལས་སོ། ཆོས་གོས་ཞུགས་པའི་སེམས་ནི་བདུད་ཀྱི་ལས་སོ། གྲོང་དུ་སློང་བ་ལ་ཞུགས་པའི་སེམས་ནི་བདུད་ཀྱི་ལས་སོ། རྙེད་པ་དང་། བཀུར་སྟི་དང་། ཚིགས་སུ་བཅད་པ་ལ་ཞུགས་པའི་སེམས་ནི་བདུད་ཀྱི་ལས་སོ། རབ་ཏུ་འབྱུང་བ་ལས་འདུན་པ་ཟློག་པ་ནི་བདུད་ཀྱི་ལས་སོ། ཆོས་དཀར་པོ་མང་པོ་ལས་འདུན་པ་ཟློག་པ་ནི་བདུད་ཀྱི་ལས་སོ། དགོན་པར་གནས་པ་ལས་མོས་པ་ཟློག་པ་ནི་བདུད་ཀྱི་ལས་སོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་འདུན་པ་ཟློག་པ་ནི་བདུད་ཀྱི་ལས་སོ། ཡེ་ཤེས་གཞན་འདོད་པ་ནི་བདུད་ཀྱི་ལས་སོ། མཁན་པོ་དང་སློབ་དཔོན་ལ་སྲི་ཞུ་མི་བྱེད་པ་ནི་བདུད་ཀྱི་ལས་སོ། དེ་ལྟར་ཤཱ་རིའི་བུ་སེམས་སྡང་བ་ལ་ནི་བྱང་ཆུབ་ཏུ་བྱ་བ་ལ་གཡེང་བར་འགྱུར་རོ། སེམས་གཡེང་བ་ནི་བདུད་ཀྱི་སྡིག་ཅན་བདུད་ཀྱི་ལས་འདི་དག་ལ་
འཛུད་དོ། ཤཱ་རིའི་བུ་བདུད་སྡིག་ཅན་ཡུན་རིང་པོ་ནས་གླགས་ཚོལ་ཏེ། འདི་ལྟ་སྟེ། ཁྲོ་བ་དང་། གནོད་སེམས་ཀྱི་ཚོལ་མོད་ཀྱི། ཤཱ་རིའི་བུ་དེས་མངོན་པར་ཤེས་པའི་འདས་པའི་དུས་ན་ང་སྤྱོད་པའི་སྤྱོད་ཡུལ་ཞེས་བྱ་བའི་དྲང་སྲོང་དུ་གྱུར་ཏེ། དེ་ན་ང་ལ་བདུད་ཀྱི་སྡིག་ཅན་གྱིས་སྐྱེས་བུ་ལྔ་བརྒྱ་གཤེ་བ་ལ་དཔའ་བ་མངོན་པར་སྤྲུལ་ནས་དེ་དག་ལོ་ལྔ་བརྒྱའི་བར་དུ་རྟག་ཏུ་རྒྱུན་མི་འཆད་པར་ངའི་ཕྱི་བཞིན་ཐོག་ཐག་ཏུ་འབྲང་ཞིང་དེ་དག་མཚན་ཡང་གཤེ། ཉིན་ཡང་གཤེ། འགྲོ་ཡང་གཤེ། འོང་ཡང་གཤེ། འགྲེང་ཡང་གཤེ། འདུག་ཀྱང་གཤེ། ཉལ་བ་དང་། འཆག་པ་དང་། འདུག་པ་དང་། གྲོང་དུ་འགྲོ་བ་དང་། སྲང་ན་འགྲེང་བ་དང་། ཁྱིམ་ན་འགྲེང་བ་དང་། སྲང་ན་འདུག་པ་དང་། ཁྱིམ་ན་འདུག་པ་དང་། དགོན་པར་སོང་བ་དང་། དགོན་པར་འགྲེང་བ་དང་། གཤེ་ཞིང་མི་སྙན་བ་ཟེར་ཏེ། ངན་དུ་སྨྲ་ཚིག་རྩུབ་པོ་སྨྲ་ཞིང་ཐབས་དེ་ལྟ་བུར་གནས་ཏེ། དེ་དག་ལོ་ལྔ་བརྒྱའི་བར་དུ་ཕྱི་བཞིན་ཐོག་ཐག་ཏུ་འབྲངས་པར་གྱུར་ཏེ། འོན་ཀྱང་ཤཱ་རིའི་བུ་ལོ་ལྔ་བརྒྱར་གཤེ་བ་ལ་དཔའ་བའི་སྐྱེས་བུ་དེ་དག་ལ་བྱམས་པ་ཉེ་བར་སྦྱོར་བས་ལྟ་བ་ལས་གཞན་ཐ་བའི་ཉེས་པ་སྐྱེད་པའི་སེམས་བསྐྱེད་པ་གཅིག་ཙམ་ཡང་མི་ཤེས་སོ། དེའི་ཚེ་ང་འདི་སྙམ་དུ་སེམས་ཏེ། གང་རིགས་ཀྱི་བུ་དེ་དག་ནི་ཚུལ་ཁྲིམས་དང་ལྡན་པ། དགེ་བའི་ཆོས་ཅན། རང་བཞིན་གྱིས་འདོད་ཆགས་ཆུང་བ། ཞེ་སྡང་ཆུང་བ། གཏི་མུག་ཆུང་བ་སྟེ། བདག་ནི་དེ་དག་ཉི་ཚེའི་དོན་དུ་དཀའ་བ་སྤྱོད་པ་མ་ཡིན། དེ་དག་ཉི་ཚེའི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པ་མ་ཡིན། སེམས་ཅན་དམུ་རྒོད་གདུལ་དཀའ་བ། ཚུལ་ཁྲིམས་འཆལ་བ། སྡིག་པའི་ཆོས་ཅན། རང་བཞིན་གྱིས་འདོད་ཆགས་མང་བ། ཞེ་སྡང་མང་བ། གཏི་མུག་མང་བ། དེ་དག་གི་དོན་དུ་བདག་དཀའ་བ་སྤྱད་པ་སྤྱོད། དེ་དག་གི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་སྟེ། དེ་དག་ཉིད་བདག་གི་ཐོག་མར་མྱ་ངན་ལས་བཟླ་བར་བྱའོ། ཤཱ་རིའི་བུ་སེམས་སྡང་བ་མེད་པ་ལ་དྲན་པ་འདི་སྐྱེས་སོ། དེ་ལྟར་ཤཱ་རིའི་བུ་དེ་བཞིན་གཤེགས་པ་ནི་ཕན་བའི་དངོས་པོ་ཕུན་སུམ་ཚོགས་པ་སྟེ། སྔོན་གྱི་
མཐའ་ནས་བྱང་ཆུབ་སེམས་དཔའི་སྤྱད་པ་སྤྱོད་ཅིང་འོངས་པའོ། ཤཱ་རིའི་བུ་བྱང་ཆུབ་སེམས་དཔའ་གང་ལ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འདོད་པ་དེ་དག་གིས་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། རླུང་དང་། ཉི་མ་དང་། སྦྲང་བུ་དང་། ཤ་སྦྲང་དང་། སྡིག་སྦྲུལ་གྱིས་རིག་པ་དང་། ཕ་རོལ་གྱིས་ངན་དུ་སྨྲ་བ་དང་། ངན་དུ་བརྗོད་པའི་ཚིག་གི་ལམ་རྣམས་ལ་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། ལུས་ལས་སྐྱེས་ཤིང་བྱུང་བའི་ཚོར་བ་སྡུག་བསྔལ་བ། མི་བཟད་པ། རྩུབ་པ། སྲོག་འཕྲོག་པ། འཆི་བ་ལ་ཐུག་པའི་ཚོར་བ་རྣམས་ལ་བཟོད་པ་དང་ལྡན་ཞིང་དང་དུ་ལེན་པའི་རང་བཞིན་ཅན་དུ་བྱའོ། དེ་ལྟར་ཤཱ་རིའི་བུ་བཟོད་པ་དེ་ལྟ་བུ་ལ་གནས་པའི་བྱང་ཆུབ་སེམས་དཔའ་བྱང་ཆུབ་སེམས་དཔའི་བཟོད་པ་ཐོབ་པར་འགྱུར་རོ། དེ་ལ་བྱང་ཆུབ་སེམས་དཔའི་བཟོད་པ་གང་ཞེ་ན། གནོད་སེམས་མེད་པ་ནི་བྱང་ཆུབ་སེམས་དཔའི་བཟོད་པར་བལྟའོ། མི་ཁྲོ་བ་ནི་བྱང་ཆུབ་སེམས་དཔའི་བཟོད་པར་བལྟའོ། མི་འཚེ་བ་ནི་བྱང་ཆུབ་སེམས་དཔའི་བཟོད་པར་བལྟའོ། རྩོད་པ་མེད་པ་ནི་བྱང་ཆུབ་སེམས་དཔའི་བཟོད་པར་བལྟའོ། གནོད་པར་བྱ་བ་མེད་པ་ནི་བྱང་ཆུབ་སེམས་དཔའི་བཟོད་པར་བལྟའོ། བདག་རྗེས་སུ་སྲུང་བ་ནི་བྱང་ཆུབ་སེམས་དཔའི་བཟོད་པར་བལྟའོ། གཞན་རྗེས་སུ་སྲུང་བ་ནི་བྱང་ཆུབ་སེམས་དཔའི་བཟོད་པར་བལྟའོ། ལུས་རྗེས་སུ་སྲུང་བ་ནི་བ་ནི་བྱང་ཆུབ་སེམས་དཔའི་བཟོད་པར་བལྟའོ། དག་རྗེས་སུ་སྲུང་བ་ནི་བ་ནི་བྱང་ཆུབ་སེམས་དཔའི་བཟོད་པར་བལྟའོ། སེམས་ཅན་རྗེས་སུ་སྲུང་བ་ནི་བ་ནི་བྱང་ཆུབ་སེམས་དཔའི་བཟོད་པར་བལྟའོ། ཚུལ་བཞིན་སོ་སོར་བརྟག་པ་ནི་བྱང་ཆུབ་སེམས་དཔའི་བཟོད་པར་བལྟའོ། མྱ་ངན་ལས་འདས་པ་འདོད་ཆགས་དང་བྲལ་བ་ནི་བྱང་ཆུབ་སེམས་དཔའི་བཟོད་པར་བལྟའོ། ལས་ཀྱི་རྣམ་པར་སྨིན་པ་ལ་རྟོན་པ་ནི་བྱང་ཆུབ་སེམས་དཔའི་བཟོད་པར་བལྟའོ། ལུས་ཡོངས་སུ་དག་པ་ནི་བྱང་ཆུབ་སེམས་དཔའི་བཟོད་པར་བལྟའོ། དག་ཡོངས་སུ་དག་པ་ནི་བྱང་ཆུབ་སེམས་དཔའི་
བཟོད་པར་བལྟའོ། སེམས་ཡོངས་སུ་དག་པ་ནི་བྱང་ཆུབ་སེམས་དཔའི་བཟོད་པར་བལྟའོ། ལྷ་དང་མིའི་ཕུན་སུམ་ཚོགས་པ་རྗེས་སུ་མྱོང་པ་ནི་བྱང་ཆུབ་སེམས་དཔའི་བཟོད་པར་བལྟའོ། བྱང་ཆུབ་སེམས་དཔའ་དེ་བཞིན་གཤེགས་པའི་མཚན་དང་དཔེ་བྱད་བཟང་པོ་ཡོངས་སུ་རྫོགས་པ་ནི་བྱང་ཆུབ་སེམས་དཔའི་བཟོད་པར་བལྟའོ། དེ་བཞིན་གཤེགས་པའི་གསུངས་ཚངས་པའི་སྒྲ་དབྱངས་བསྒྲགས་པ་འཐོབ་པ་ནི་བྱང་ཆུབ་སེམས་དཔའི་བཟོད་པར་བལྟའོ། བྱང་ཆུབ་སེམས་དཔའི་སྤྱོད་པ་དང་། དགེ་བའི་རྩ་བ་ཐམས་ཅད་ཆུད་མི་གསོན་པ་ནི་བྱང་ཆུབ་སེམས་དཔའི་བཟོད་པར་བལྟའོ། ཕས་ཀྱི་གནོད་པར་བྱེད་པ་ཐམས་ཅད་ལས་འདས་པ་ནི་བྱང་ཆུབ་སེམས་དཔའི་བཟོད་པར་བལྟའོ། ཕྱིར་རྒོལ་བ་ཐམས་ཅད་བཅོམ་པ་ནི་བྱང་ཆུབ་སེམས་དཔའི་བཟོད་པར་བལྟའོ། ། མདོར་ན་དེ་བཞིན་གཤེགས་པའི་སྟོབས་དང་། མི་འཇིགས་པ་དང་། མ་འདྲེས་པ་དང་། སྙིང་རྗེ་ཆེན་པོ་དང་། བྱམས་པ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པ་ནི་བྱང་ཆུབ་སེམས་དཔའི་བཟོད་པར་བལྟའོ། ཡང་ཤཱ་རིའི་བུ་བྱང་ཆུབ་སེམས་དཔའི་བཟོད་པ་ཞེས་བྱ་བ་ནི་འདི་ལྟར་བྲག་ཆའི་སྒྲ་དང་མཚུངས་པར་རབ་ཏུ་ཤེས་པས་སྤྱོད་ཀྱང་སླར་མི་གཤེའོ། ལུས་གཟུགས་རྙན་དུ་ཤེས་པས་བརྡེགས་ཀྱང་སླར་མི་རྡེག། སེམས་སྒྱུ་མ་ལྟ་བུར་རབ་ཏུ་རྟོགས་པས་ཁྲོས་ཀྱང་སླར་མི་ཁྲོ། རང་གི་ཡོན་ཏན་ཡོངས་སུ་རྫོགས་པས་དེ་མ་བསྔགས་པ་ལ་ཁོང་ཁྲོ་བ་མེད། བསྔགས་པ་ལ་རྗེས་སུ་ཆགས་པར་མི་བྱེད་དོ།། དུལ་ཞིང་ཞི་བའི་ཕྱིར་རྙེད་པས་དགའ་བར་མི་འགྱུར། མ་རྙེད་པས་ཞུམ་པར་མི་འགྱུར། རབ་ཏུ་བརྟགས་པའི་བློ་རྒྱ་ཆེ་བའི་ཕྱིར་གྲགས་པས་ངོ་མཚར་དུ་མི་འཛིན། མ་གྲགས་པས་འཁྲུལ་པར་མི་འགྱུར། མི་གཡོ་བར་རབ་ཏུ་གནས་པའི་ཕྱིར་དམད་པས་འདུད་པར་མི་འགྱུར། བསྟོད་པས་ཁེངས་པར་མི་འགྱུར། སེམས་ཅན་ལ་ལྟ་བའི་ཕྱིར་སྡུག་བསྔལ་གྱིས་ཡོངས་སུ་མི་སྐྱོ། འདུས་བྱས་ཀྱི་བདེ་བ་མི་རྟག་པའི་ཕྱིར། བདེ་བ་ལ་དགའ་བ་མེད། སྲིད་པའི་འགྲོ་བར་སྐྱེ་
བ་ཐམས་ཅད་ལ་མི་གནས་པས་འཇིག་རྟེན་གྱི་ཆོས་ཀྱིས་མི་གོས་ཕ་རོལ་ལ་མི་གནོད་པས་བདག་ལ་གནོད་པ་བཟོད། བྱང་ཆུབ་ཀྱི་ཡན་ལག་གི་ཚོགས་ཡོངས་སུ་རྫོགས་པས་ཡན་ལག་དང་། ཉིད་ལག་དང་། མགོ་བཅད་ཀྱང་བཟོད། སངས་རྒྱས་ཀྱི་སྐུ་འདོད་པས་ལུས་གཏུབས་ཀྱང་བཟོད།། ལེགས་པར་བྱས་པའི་ལས་ཀྱི་སྟོབས་བསྐྱེད་པས་ངན་དུ་བྱས་པ་ཐམས་ཅད་བཟོད་དེ། ཤཱ་རིའི་བུ་དེ་ནི་བྱང་ཆུབ་སེམས་དཔའི་བཟོད་པ་ཞེས་བྱའོ། ཤཱ་རིའི་བུ་གཞན་ཡང་བྱང་ཆུབ་སེམས་དཔའི་ཞེས་བྱ་བ་ནི། འདི་ལྟ་སྟེ། རབ་ཏུ་བཟོད་པའོ། དེ་ཅིའི་ཕྱིར་ཞེ་ན། གཤེ་བ་ནི་སུ། གཤེ་བར་བྱ་བ་ནི་གང་ཞེས་བཟོད་ན་དེ་གཉིས་ག་དམིགས་པའི་བཟོད་པ་སྟེ།། དེ་རབ་ཏུ་བཟོད་པ་མ་ཡིན་ནོ། ཡང་འདི་ལ་གཤེ་བ་གང་ཞེས་བཟོད་ན་དེ་ཆོས་བགྲང་བའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། ཅི་མིག་གིས་མིག་ལ་གཤེ་འམ་ཞེས་བཟོད་ན་དེ་སྐྱེ་མཆེད་ལ་སོ་སོར་རྟོག་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། འདི་ནི་ཡི་གེ་ཡིན་ནོ་ཞེས་བཟོད་ན། དེ་བྲག་ཆའི་སྒྲའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། འདི་ཡང་མི་རྟག། བདག་ཀྱང་མི་རྟག་ཅེས་བཟོད་ན་དེ་མི་རྟག་པ་ལ་འཇུག་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། འདི་ནི་ཕྱིན་ཅི་ལོག། བདག་ནི་ཕྱིན་ཅི་ལོག་མ་ཡིན་ཞེས་བཟོད་ན་དེ་མཐོ་དམན་གྱི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། བདག་ནི་རིགས། འདི་ནི་མི་རིགས་སོ་ཞེས་བཟོད་ན་དེ་རིགས་པ་མ་ཡིན་པའི་བཟོད་པ་སྟེ། དེ་རབ་ཏུ་བཟོད་པ་མ་ཡིན་ནོ། བདག་ནི་ལམ་ལ་གནས། འདི་ནི་ལམ་ངན་པ་ལ་གནས་ཤེས་བཟོད་ན་དེ་གཉིས་ཀྱི་བཟོད་པ་སྐྱེ་སྟེ། དེ་རབ་ཏུ་བཟོད་པ་མ་ཡིན་ནོ། བདག་སྟོང་པ་ཉིད་བཟོད་ཀྱི། བདག་ལྟ་བར་སོང་བ་མི་བཟོད། བདག་མཚན་མ་མེད་པ་བཟོད་ཀྱི། བདག་རྣམ་པར་རྟོག་པ་མི་བཟོད། བདག་སྨོན་པ་མེད་པ་བཟོད་ཀྱི། བདག་སྨོན་པ་མི་བཟོད། བདག་མངོན་བར་འདུ་མི་བྱེད་པ་བཟོད་ཀྱི། བདག་མངོན་བར་འདུ་བྱེད་པ་མི་བཟོད། བདག་ཉོན་མོངས་པ་ཟད་པ་བཟོད་ཀྱི། བདག་ཉོན་མོངས་པ་མི་བཟོད། བདག་དགེ་བ་བཟོད། བདག་མི་དགེ་བ་མི་བཟོད། བདག་ཁ་ན་
མ་ཐོ་བ་མེད་པ་བཟོད་ཀྱི། བདག་ཁ་ན་མི་ཐོ་བ་མི་བཟོད། བདག་ཟག་པ་ཟད་པ་བཟོད་ཀྱི། བདག་ཟག་པ་དང་བཅས་པ་མི་བཟོད། བདག་འཇིག་རྟེན་ལས་འདས་པ་བཟོད་ཀྱི། བདག་འཇིག་རྟེན་པ་མི་བཟོད། བདག་རྣམ་པར་བྱང་བ་བཟོད་ཀྱི། བདག་ཀུན་ནས་ཉོན་མོངས་པ་མི་བཟོད། བདག་མྱ་ངན་ལས་འདས་པ་བཟོད་ཀྱི། བདག་འཁོར་བ་མི་བཟོད་ན་དེ་གཉེན་པོས་སྤོང་བའི་བཟོད་པ་སྟེ། རབ་ཏུ་བཟོད་པ་མ་ཡིན་ནོ། དེ་ལ་རབ་ཏུ་བཟོད་པ་གང་ཞེ་ན། གང་སྟོང་པ་ཉིད་ཁོང་དུ་ཆུད་པ་དེ་ལ་ལྟ་བ་བསལ་པ་ཡང་མེད། སྟོང་པ་ཉིད་དུ་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་རྣམ་པར་རྟོག་པ་བསལ་པ་ཡང་མེད། མཚན་མ་མེད་པའི་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་སྨོན་ལམ་བསལ་པ་ཡང་མེད། སྨོན་པ་མེད་པར་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་མངོན་བར་འདུ་བྱེད་པ་བསལ་པ་ཡང་མེད། མངོན་པར་འདུ་མི་བྱེད་པར་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་ཉོན་མོངས་པ་བསལ་བ་ཡང་མེད། ཀུན་ནས་ཉོན་མོངས་པ་ཟད་པར་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་མི་དགེ་བ་བསལ་བ་ཡང་མེད། དགེ་བར་སྒྲོ་འདོགས་པ་ཡང་མེད། གང་སྟོང་པ་ཉིད་ཁོང་དུ་ཆུད་པ་དེ་ལ་ཁ་ན་མ་ཐོ་བ་དང་བཅས་པ་བསལ་པ་ཡང་མེད། ཁ་ན་མ་ཐོ་བ་མེད་པའི་སྒྲོ་འདོགས་པ་ཡང་མེད་དེ་གོང་མ་བཞིན་དུ་ཐམས་ཅད་ལ་རྒྱས་པར་བྱ་སྟེ། གང་སྟོང་པ་ཉིད་དུ་ཁོང་དུ་ཆུད་པ་དེ་ལ་འཁོར་བ་བསལ་པ་མེད། མྱ་ངན་ལས་འདས་པར་སྒྲོ་འདོགས་པ་ཡང་མེད་དེ། གང་འདི་ལ་བཟོད་པ་དེ་ནི་རབ་ཏུ་བཟོད་པ་ཞེས་བྱའོ། གང་མ་སྐྱེས། མ་བསྐྱེད། མ་བྱུང་། བྱུང་བར་མ་གྱུར་པ་དེ་ལ་འབྱུང་བ་གང་ཡང་མེད་དོ། འབྱུང་བ་མེད་པས་མི་ཟད་དེ། གང་མི་ཟད་བ་དེ་རབ་ཏུ་བཟོད་པའོ། གང་འདུས་བྱས་ཀྱང་མ་ཡིན། འདུས་མ་བྱས་ཀྱང་མ་ཡིན། སྒྲོ་འདོགས་པ་ཡང་མ་ཡིན།། མ་བཞག་པ། མ་སྤེལ་བ། ཡང་དག་པར་མ་སྤེལ་བ། མི་གསོག་པ། མི་འབྲི་བ་དེ་ལ་སྐྱེ་བ་གང་ཡང་མེད་དོ། །གང་
མི་སྐྱེ་བ་དེ་ནི་མི་ཟད་པ་སྟེ། གང་དེ་ལྟར་བཟོད་ན་དེ་ནི་མི་སྐྱེ་བ་ལ་བཟོད་པ་ཞེས་བྱའོ། ཤཱ་རིའི་བུ་བཟོད་པ་འདི་ལྟ་བུ་དང་ལྡན་བའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དོ། ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་བཟོད་པའི་ཕ་རོལ་དུ་ཕྱིན་པ་སྟེ། འདི་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དེ་བདུད་དང་བདུད་ཀྱི་རིས་ཀྱི་ལྷའི་བུ་རྣམས་དང་།། དེ་མ་ཡིན་པས་ཕས་ཀྱི་རྒོལ་བ་གཞན་ཐམས་ཅད་ཀྱིས་མི་ཐུལ་བ་ཡིན་ནོ། །། བཟོད་པའི་ཕ་རོལ་ཏུ་ཕྱིན་པའི་ལེའུ་ཞེས་བྱ་སྟེ། བརྒྱད་པའོ།། །།