གཉིས་པ། རྒྱལ་པོ་གཤེགས་པའི་ལེའུ།
དེ་ནས་ཚེ་དང་ལྡན་པ་འཆར་ཀ་སོང་ནས་རིང་པོ་མ་ལོན་པར་རྒྱལ་པོ་ཟས་གཙང་མས་ཤཱཀྱ་རྣམས་ལ་བསྒོ་བ། གྲོགས་པོ་དག་འདི་ལྟ་སྟེ། དཔེར་ན་ཉི་མ་འཆར་བའི་སྔ་ལྟས་ནི་གང་འདི་དམར་རིང་འཆར་བའོ། །དམར་རེང་ཤར་ན་ཉི་མ་འཆར་བར་ཤེས་སོ། །གྲོགས་པོ་དག་དེ་བཞིན་དུ་དགེ་སློང་འཆར་ཀ་ཡང་བཅོམ་ལྡན་འདས་ཐམས་ཅད་མཁྱེན་པའི་སྔ་ལྟས་ཡིན་ཏེ། དགེ་སློང་འཆར་ཀས་ཡོན་ཏན་གང་བརྗོད་པ་དེ་དག་ནི་ངེས་པར་ཐམས་ཅད་མཁྱེན་པའི་ཡོན་ཏན་ཡིན་ནོ། །གྲོགས་པ་དག་དེ་ལྟ་བས་ན་བཞོན་པའི་མཆོག་རྣམས་སྟོང་དེ་སྟ་གོན་གྱིས་ཤིག །དེ་ཅིའི་ཕྱིར་ཞེ་ན། དེ་རིང་ཁོ་ན་བདག་ཅག་བཅོམ་ལྡན་འདས་མཆོག་ཏུ་བལྟ་ན་སྡུག་པ་དེ་ལྟ་ཞིང་འདོང་ངོ་། །ལྷ་ལེགས་སོ་ཞེས་གསོལ་ནས་ཤཱཀྱ་རྣམས་ཀྱིས་རྒྱལ་པོ་ཟས་གཙང་མའི་ལྟར་མཉན་ཏེ། ཐེག་པ་མཆོག་རྣམས་མྱུར་དུ་བསྟོད་དོ། །དེའི་ཚེ་རྒྱལ་པོ་ཟས་གཙང་མས་སེར་སྐྱའི་གནས་དང་། ནྱ་གྲོ་དྷའི་ཀུན་དགའ་ར་བའི་
བར་དེ་དག་ཐམས་ཅད་རྒྱལ་པོའི་གཤེགས་ཤུལ་དུ་མཉམ་པར་བྱེད་དུ་བཅུག་ཅིང་བྱེ་མ་གཙང་མ་བདལ་དུ་བཙུག་སྟེ། ཉམས་དགའ་བ་དང་། མེ་ཏོག་སིལ་མས་གང་བ་དང་། དར་གྱི་ལྡ་ལྡི་དང་། ཕྲེང་བ་མང་པོས་བརྒྱན་ཏེ། སྐབས་སྐབས་སུ་གར་མཁན་དང་། གླུ་མཁན་དང་། གྱད་དང་། བུམ་རྔ་ཐོགས་པ་དང་། སིལ་སྙན་དང་། རོལ་མོ་དང་། གླུའི་ཆ་སྤྱད་དང་། ཡོ་བྱད་ཐམས་ཅད་ཐོགས་པ་དག་བཀོད་པར་གྱུར་ཏོ། །དེ་ནས་རྒྱལ་པོ་ཟས་གཙང་མ་བཞོན་པའི་མཆོག་དང་བཅས་པ་རྣམས་དང་། བདག་ཉིད་ཀྱང་བཞོན་པའི་མཆོག་ལ་ཞོན་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་ནས་ནྱ་གྲོ་དྷཱའི་ཀུན་དགའ་ར་བ་ག་ལ་བ་དེར་སོང་ངོ་། །དེའི་ཚེ་ཤཱཀྱ་ལ་ལའི་བཞོན་པའི་མཆོག་ནི་རྣམ་པ་འདི་ལྟ་བུ་སྟེ། འདི་ལྟར་ཤིང་རྟ་དག་ཀྱང་ཐམས་ཅད་སྔོ་ལ་རྟ་སྔོན་པོ་རྣམས་ཀྱིས་དྲངས་ཤིང་། །རྒྱན་རྣམས་ཀྱང་སྔོ་ལ་དྲིལ་བུ་གཡེར་ཀའི་དྲ་བས་བརྒྱན་པ། འཁོར་རྒྱན་སྔོན་པོ་ཅན་གྱིས་བསྐོར་བ། གདུགས་དང་། རལ་གྲི་དང་། ཐོད་དང་། ནོར་བུ་ཅན་གྱི་རྔ་ཡབ་དང་། ལྷ་མ་རྒྱན་ཅན་སྔོན་པོ་དང་ལྡན་པ། ཁ་ཚར་མ་བཅད་པའི་རས་སྔོན་པོ་གྱོན་ཞིང་རྒྱན་སྔོན་པོ་ཐོགས་པའི་ཞལ་ཏ་བ་རྣམས་ཞལ་ཏ་བྱེད་པ། རྒྱན་སྔོན་པོ་ཅན་གྱི་ལྕག་ཐོགས་པ་དང་། ཁྲིད་པ་དུ་མ་དང་ལྡན་པ། རྒྱལ་མཚན་སྔོན་པོ་བསྒྲེང་བ་ཤ་སྟག་སྟེ། ཤིང་རྟ་རེ་རེ་ཞིང་ཡང་རྒྱན་སྔོན་པོ་ཅན་གྱི་མི་བརྒྱ་ཕྲག་རེ་རེས་བསྐོར་བར་གྱུར་ཏོ། །ཤཱཀྱ་ལེ་ལོའི་བཞོན་པ་རྣམ་པ་འདི་ལྟ་བུ་སྟེ། འདི་ལྟར་ཤིང་རྟ་དག་ཀྱང་ཐམས་དུ་དམར་བ་དང་། ཐམས་ཅད་དུ་དཀར་བ་དང་། ཐམས་ཅད་དུ་བཀྲ་བ་དང་། ཤིང་རྟ་རེ་རེ་ཞིང་ཡང་རྒྱན་ཁྲ་བོ་ཅན་གྱི་མི་བརྒྱ་ཕྲག་རེ་རེས་བསྐོར་བའི་བར་དུ་སྔ་མ་བཞིན་ནོ། །ཤིང་རྟ་དེ་དག་རེ་རེའི་ཕྱི་བཞིན་དུ་ཡང་གླང་པོ་ཆེ་བརྒྱད་ཁྲི་གསེར་གྱི་རྒྱན་གྱིས་བརྒྱན་པ། གསེར་གྱི་རྒྱལ་མཚན་དང་། གསེར་གྱི་དྲ་བས་གཡོགས་པ་ཤ་སྟག་བཤམས་ཏེ། གླང་པོ་ཆེ་བརྒྱད་ཁྲི་པོ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་བཀྲ་བ། བལྟ་ན་སྡུག་པ་བརྒྱད་ཁྲི་བཞག་ནས་འདོང་
བར་གྱུར་ཏོ། །གླང་པོ་ཆེ་བརྒྱད་ཁྲི་པོ་དེ་དག་གི་ཕྱི་བཞིན་རྟ་གསེར་གྱིས་རྒྱན་གྱིས་བརྒྱན་པ། གསེར་གྱི་དྲིལ་བུ་གཡེར་ཀ་བརྒྱུས་པ། རིན་པོ་ཆེ་སྣ་བདུན་གྱི་རྒྱན་དང་ལྡན་པ་བརྒྱད་ཁྲི་བཤམས་ཏེ་འདོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་དང་། ཤཱཀྱ་རྣམས་རྒྱང་རིང་པོ་ནས་འོང་བ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་གང་དག་གིས་སུམ་བཅུ་རྩ་གསུམ་གྱི་ལྷ་བསྐྱེད་མོས་ཚལ་དུ་འདོང་བ་མ་མཐོང་བ་དེ་དག་གིས་ཤཱཀྱ་སེར་སྐྱའི་གནས་ནས་འོང་བའི་འདི་དག་ལ་ལྟོས་ཤིག །དེ་ཅིའི་ཕྱིར་ཞེ་ན། དགེ་སློང་དག་ཤཱཀྱ་རྣམས་སེར་སྐྱའི་གནས་ནས་བྱུང་བ་དེ་དག་ནི་སུམ་བཅུ་རྩ་གསུམ་གྱི་ལྷ་བསྐྱེད་མོས་ཚལ་དུ་འདོང་བ་དང་རྗེས་སུ་འཐུན་པའོ། །དེ་ལ་འདི་སྐད་ཅེས་བྱ་སྟེ། སེར་སྐྱ་ཞེས་བྱའི་གྲོང་ཁྱེར་དམ་པ་ནས། །རྒྱལ་པོ་ཟས་གཙང་མི་ཡི་ཁྱུ་མཆོག་དེ། །འཁོར་དང་བཅས་ཏེ་ཇི་ལྟར་འོང་གྱུར་པ། །དེ་ལྟར་བསྟན་གྱིས་ཁྱེད་རྣམས་དེ་ཉོན་ཅིག །ཤིང་རྟ་བརྒྱ་སྟོང་མཆོག་དང་བཅས་པས་དག །ལེགས་པར་བརྒྱན་ཅིང་མཛེས་པར་སྒྲས་ནས་ནི། །སེར་སྐྱའི་གནས་ཀྱི་གྲོང་ཁྱེར་དམ་པ་ནས། །མི་ཡི་དབང་པོ་དམ་པ་བྱུང་བར་གྱུར། །ཤིང་རྟ་སྔོ་ཞིང་རྒྱན་ཀྱང་སྔོ་བ་དང་། རྟ་ཡང་སྔོ་ཞིང་སྔོ་བའི་འཁོར་དང་བཅས། །མཚན་མ་ལྔ་པོ་དག་ཀྱང་སྔོ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་སྔོ། །ལྕག་ཀྱང་སྔོ་ཞིང་ཐག་སྲང་རྣམས་ཀྱང་སྔོ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སྔོན་པོ་གོས་ཅན་ཏེ། །རྒྱལ་མཚན་སྔོན་པོ་བསྐྱེད་པས་མཛེས་པར་བྱས། །ཤིང་རྟ་སེར་ཞིང་རྒྱན་ཀྱང་སེར་བ་དང་། རྟ་ཡང་སེར་ཞིང་སེར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་སེར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་སེར། །ལྕག་ཀྱང་སེར་ཞིང་ཐག་སྲང་རྣམས་ཀྱང་སེར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སེར་པོའི་གོས་ཅན་ཏེ། །རྒྱལ་མཚན་གསེར་པོ་བསྒྲེང་བས་མཛེས་པར་བྱས། །ཤིང་རྟ་དམར་ཞིང་རྒྱན་ཀྱང་དམར་བ་དང་། །རྟ་ཡང་དམར་ཞིང་དམར་པོའི་འཁོར་
དང་བཅས། །མཚན་མ་ལྔ་པོ་དག་ཀྱང་དམར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་དམར། །ལྕག་ཀྱང་དམར་ཞིང་ཐག་སྲང་རྣམས་ཀྱང་དམར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དམར་པོའི་གོས་ཅན་ཏེ། །རྒྱལ་མཚན་དམར་པོ་བསྒྲེང་བས་མཛེས་པར་བྱས། །ཤིང་རྟ་དཀར་ཞིང་རྒྱན་ཀྱང་དཀར་བ་དང་། རྟ་ཡང་དཀར་ཞིང་དཀར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་དཀར་པོ་སྟེ། དེ་བཞིན་གོས་ཀྱི་དམ་པ་དག་ཀྱང་དཀར། །ལྕག་ཀྱང་དཀར་ཞིང་ཐག་སྲང་རྣམས་ཀྱང་དཀར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དཀར་པོའི་གོས་ཅན་ཏེ། །རྒྱལ་མཚན་དཀར་པོ་བསྒྲེང་བས་མཛེས་པར་བྱས། །ཤིང་རྟ་བཀྲ་ཤིང་རྒྱན་ཀྱང་བཀྲ་བ་དང་། །རྟ་ཡང་བཀྲ་ཞིང་བཀྲ་བའི་འཁོར་དང་བཅས། །མཚན་མ་ལྔ་པོ་དག་ཀྱང་བཀྲ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་བཀྲ། །ལྕག་ཀྱང་བཀྲ་ཞིང་ཐག་སྤང་རྣམས་ཀྱང་བཀྲ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་བཀྲ་བའི་གོས་ཅན་ཏེ། །རྒྱལ་མཚན་ཁྲ་བོ་བསྒྲེང་བས་མཛེས་པར་བྱས། །ཤིང་རྟ་དེ་དག་རྣམས་ཀྱི་ཕྱི་བཞིན་དུ། །གླང་པོ་བརྒྱད་ཁྲི་ཚང་བར་བཤམས་པ་ནི། །གསེར་གྱི་རྒྱལ་མཚན་རྣམས་ཀྱིས་ལེགས་པར་བརྒྱན། །གླང་ཆེན་རྣམས་ནི་གསེར་གྱིས་ཆལ་པར་བརྒྱན། །དེ་དག་སྟེང་དུ་རིན་ཆེན་སྣ་བདུན་གྱི། །ཁང་པ་བརྩེགས་པ་དག་ནི་བཞག་ནས་སུ། །རྣམ་པ་སྣ་ཚོགས་རྒྱན་གྱིས་བརྒྱན་པ་ཡི། །ཤིང་རྟ་རྣམས་ཀྱི་ཕྱི་བཞིན་འབྲང་བར་བཤམས། །དེ་བཞིན་རྟ་མཆོག་སྟོང་ཕྲག་བརྒྱད་བཅུ་ཡང་། །རིན་ཆེན་སྣ་བདུན་རྒྱན་གྱི་དགའ་བར་བརྒྱན། །རྒྱལ་པོའི་ཆོས་གོས་རྒྱལ་པོ་འཆམ་སྟབས་ཅན། །གླང་པོ་དེ་དག་རྣམས་ནི་ཕྱི་བཞིན་འབྲང་། །རབ་ཏུ་དྲི་ཞིམ་ཁ་དོག་ལྔ་པ་ཡི། །མེ་ཏོག་སིལ་མ་རྒྱལ་པོའི་ལམ་དུ་བཀྲམ། །དར་གྱི་ལྡ་ལྡི་དག་ཀྱང་རབ་ཏུ་བྲེས། །བདུག་སྤོས་སྣོད་རྣམས་ཀྱིས་ནི་ལེགས་པར་བརྒྱན། །གླུ་མཁན་གར་མཁན་
རྣམས་དང་གྱང་རྣམས་དང་། །བུམ་རྔ་ཐོགས་པ་རྣམས་ཀྱིས་མཛེས་པར་བྱས། །རོལ་མོ་རྣམ་པ་སྣ་ཚོགས་བྱེད་པ་ཡང་། །རབ་ཏུ་དགའ་ཞིང་རྒྱལ་པོའི་ཕྱི་བཞིན་འབྲང་། །རྒྱལ་པོ་གཤེགས་པའི་ལེའུ་སྟེ། གཉིས་པའོ།། །།