བཞི་པ། ལྷ་མ་ཡིན་ལུང་བསྟན་པའི་ལེའུ།
དེ་ནས་བཅོམ་ལྡན་འདས་ཀྱིས་དེའི་ཚེ་ལྷ་མ་ཡིན་གྱི་དབང་པོ་ཐགས་ཟངས་རིས་བཅོམ་ལྡན་འདས་ལ་མཆོད་པར་བྱ་བའི་སེམས་ཐོག་མར་སྐྱེ་བར་འགྱུར་བ་དེ་ལྟ་བུའི་མཚན་མ་མཛད་དོ། །དེ་ནས་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་ཁྲག་ཁྲིག་ཕྲག་དྲུག་བཅུ་དང་། ལྷ་མ་ཡིན་གྱི་བུ་མོ་ཁྲག་ཁྲིག་ཕྲག་དྲུག་བཅུ་དང་བཅས་པས་བཅོམ་ལྡན་འདས་ལ་མཆོད་པ་ཐོག་མར་བྱས་ཏེ། དེ་ནས་རྒྱ་མཚོ་ཆེན་པོའི་ནང་ན་རིན་པོ་ཆེའི་རིན་ཐང་ཡོད་པ་དང་། རིན་ཐང་མེད་པ་ཇི་སྙེད་ཅིག་ཡོད་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པ་བྱ་བའི་ཕྱིར་ཕུལ་ལོ། །རིན་པ་ཆེ་གཞན་རྒྱ་མཚོ་ཆེན་པོ་དེ་ན་མེད་པ་དག་ཀྱང་མངོན་པར་སྤྲུལ་པ་བྱས་ཏེ་མཆོད་པར་ཕུལ་ལོ། །རིན་པོ་ཆེ་སྣ་བདུན་གྱི་རང་བཞིན་ཅན་གྱི་ཤིང་རྟ་ཁྲག་ཁྲིག་ཕྲག་དྲུག་བཅུ་ཡང་མངོན་པར་སྤྲུལ་ཏོ། །ཤིང་རྟ་དེ་དག་རེ་རེ་ཞིང་ཡང་རྟ་ཅང་ཤེས་ཁྲག་ཁྲིག་ཕྲག་དྲུག་ཅུ་མངོན་པར་སྤྲུལ་ཏེ། རྟེ་དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་ཅན་ལ་རྐང་ལག་གི་རྒྱན་གསེར་ལས་བྱས་པ། རིན་པོ་ཆེ་སྣ་བདུན་གྱིས་སྤྲུལ་པ་དང་ལྡན་པ། རིན་པོ་ཆེ་སྣ་བདུན་ལས་བྱས་པའི་འཕྱར་མདབ་ཅན། གསེར་གྱི་རྒྱན་གྱིས་བརྒྱན་པ་ཤ་སྟག་གོ །རྟ་ཅང་ཤེས་དེ་དག་གི་རྒྱན་དུ་བྱ་
བའི་ཕྱིར་རིན་པོ་ཆེ་སྣ་བདུན་གྱི་བླ་རེ་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་ཀྱང་གསེར་གྱི་རྒྱལ་མཚན་ཅན་གསེར་གྱི་རྒྱན་གྱིས་བརྒྱན་པ་ཤ་སྟག་གོ། ཡིད་བཞིན་གྱི་ནོར་བུའི་བླ་རེ་དེ་དག་ཀྱང་སྟེང་གི་བར་སྣང་ལས་ཤིང་རྟ་དེ་དག་གི་ཕྱི་བཞིན་དུ་འབྲང་བར་གྱུར་ཏེ། ཤིང་རྟ་དེ་དག་འདོང་ན་ནི་རྗེས་སུ་འདོང་། ཤིང་རྟ་དེ་དག་སྡོང་ན་ནི་སྡོད་པ་ཤ་སྟག་གོ །ཡིད་བཞིན་གྱི་ནོར་བུའི་བླ་རེ་དེ་དག་ཡང་མཛེས་པར་བྱ་བའི་ཕྱིར་རིན་པོ་ཆེ་སྣ་བདུན་གྱི་ཕྲེང་བའི་ལྡ་ལྡི་མངོན་པར་སྦྱངས་སོ། །ཡིད་བཞིན་གྱི་ནོར་བུའི་བླ་རེ་དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་དང་ལྡན་པར་མངོན་པར་སྤྲུལ་ཏོ། ཤིང་རྟའི་རྒྱན་དང་། རཏའི་རྒྱན་དང་། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ན་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་གྱུར་ཏེ། འདི་ལྟ་སྟེ། དཔེར་ན་རོལ་མོ་སིལ་སྙན་ཡན་ལག་བརྒྱད་དང་ལྡན་པ་མཁས་པ་སྒྲ་ཕྱུང་ན་སྒྲ་སྙན་ཅིང་ཡིད་དུ་འོང་བ་དང་། མཉན་ན་བདེ་བར་འབྱུང་བ་དེ་བཞིན་དུ་ཤིང་རྟའི་རྒྱན་དེ་དག་དང་། རཏའི་རྒྱན་དེ་དག་དང་། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ནས་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་གྱུར་ཏོ། །ཤིང་རྟ་དེ་དག་གི་འཕང་གིས་ཀྱང་སྟེང་གི་བར་སྣང་ལ་དཔག་ཚད་དྲུག་བཅུ་བསྒྲིབས་ཏེ་འཁོད་པར་གྱུར་ཏོ། ཤིང་རྟ་དེ་དག་གི་ཕྱི་བཞིན་ཡང་རོལ་མོ་སིལ་སྙན་སྣ་ཚོགས་རྗེས་སུ་འབྲང་བར་གྱུར་ཏོ། །ཤིང་རྟ་དེ་དག་ཐམས་ཅད་ལ་ཡང་ལྷ་མ་ཡིན་གྱི་བུ་མོ་རྒྱན་ཐམས་ཅད་ཀྱིས་བརྒྱན་པ་དག་འཁོད་དོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་ལ་ལ་ནི་རོལ་མོ་བྱེད། ལ་ལ་ནི་སིལ་སྙན་དཀྲོལ། ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་ཙན་དན་དང་ཨུད་པ་ལའི་ཕྱེ་མས་འཐོར། ལ་ལ་ནི་ཨ་ཀ་རུ་དང་ཏ་མ་ལའི་ལོ་མའི་ཕྱེ་མས་འཐོར། ལ་ལ་ནི་ཨ་ཀ་རུ་དང་ཏ་མ་ལའི་ལོ་མའི་ཕྱེ་མས་འཐོར། ལ་ལ་ནི་ལྷ་མ་ཡིན་གྱི་ལྷ་རྫས་ཀྱི་ཕྱེ་མས་འཐོར། ལ་ལ་ནི་གསེར་དངུལ་གྱི་ཕྱེ་མས་འཐོར། ལ་ལ་ནི་མཱ་ན་དཱ་ར་བ་དང་། མཱ་ན་དཱ་ར་བ་ཆེན་པོ་དང་། མན་ཛུཥ་ཀ་དང་། མན་ཛུཥ་ཀ་ཆེན་པོ་དང་། པ་རུ་ཤ་ཀ་དང་། པ་རུ་ཤ་ཀ་ཆེན་པོ་དང་། མདོག་དཀར་དང་། མདོག་དཀར་ཆེན་པོ་དང་། སྐྱ་སྣར་དང་། སྐྱ་སྣར་ཆེན་པོ་དང་། སྐྱ་སྣར་ཁྲ་བོ་དང་། སྐྱ་སྣར་བཀྲ་ཆེན་གྱི་མེ་
ཏོག་མངོན་པར་སྤྲུལ་ཅིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་གསེར་གྱི་མེ་ཏོག་དང་། ཤེལ་གྱི་མེ་ཏོག་དང་། བཻ་དཱུཪྻའི་མེ་ཏོག་དང་། སྤུག་གི་མེ་ཏོག་དང་། མུ་ཏིག་དམར་པོའི་མེ་ཏོག་དང་། རྡོའི་སྙིང་པོའི་མེ་ཏོག་གིས་མངོན་པར་འཐོར་རོ། ལ་ལ་ནི་རིན་པོ་ཆེ་སྣ་བདུན་དང་དབྱིག་གིས་སྙིམ་པ་བཀང་ཞིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་ན་བཟའ་དང་། རྒྱན་འབུལ་ལོ། །ལ་ལ་ནི་སྐུ་རགས་དང་། ཞབས་ཀྱི་རྒྱན་དང་། ཕྱག་གི་རྒྱན་དང་། སོར་གདུབ་དང་། གདུ་བུ་དང་། གདུ་བུ་ཐམ་པ་དང་། དབུ་རྒྱན་རྩེ་གསུམ་པ་དང་། དཔུང་རྒྱན་དང་། ཅོད་པན་དང་། གསེར་སྐུད་དང་། མུ་ཏིག་དོ་ཤལ་དང་། ནོར་བུའི་དོ་ཤལ་དང་། སེ་མོ་དང་། གྱ་དོ་དང་། མགུལ་རྒྱན་སྣ་ཚོགས་འཐོར་བར་གྱུར་ཏོ། ལ་ལ་ནི་ཅོང་ཅོང་གཤིབས་སོ་བ། ལ་ལ་ནི་མགོ་རྒྱན། ལ་ལ་ནི་རྣ་ཆག་དུབ་ཀོར། ལ་ལ་ནི་གསེར་གྱི་ཕྲེང་བ་རིན་པོ་ཆེས་སྤྲས་པ། ལ་ལ་ནི་རིན་པོ་ཆེའི་ཕྲེང་བ་གསེར་གྱིས་སྤྲས་པ། ལ་ལ་ནི་གསེར་གྱི་དྲ་བ། ལ་ལ་ནི་གསེར་གྱི་ཕྲེང་བ་དང་། ནོར་བུའི་ཕྲེང་བ་དང་། མུ་ཏིག་གི་ཕྲེང་བ་ཐོགས་སོ། །ལ་ལ་ནི་གསེར་གྱི་གདུགས་དང་། དངུལ་གྱི་གདུགས་དང་། བཱཻ་དཱུཪྻའི་གདུགས་དང་། ཤེལ་གྱི་གདུགས་དང་། སྤུག་གི་གདུགས་དང་། རྡོའི་སྙིང་པོའི་གདུགས་དང་། མུ་ཏིག་དམར་པོའི་གདུགས་དང་། རིན་པོ་ཆེ་སྣ་བདུན་གྱི་གདུགས་དང་། རིན་པོ་ཆེའི་རྒྱལ་མཚན་སྣ་ཚོགས་ཐ་དད་པ་དང་། རིན་པོ་ཆེ་ཐམས་ཅད་ཀྱི་བ་དན་ཁ་དོག་སྣ་ཚོགས་དང་། ཚོན་སྣ་ཚོགས་ཅན་མང་པོ་ཐོགས་སོ། །ལ་ལ་ནི་སྤོས་ཆུའི་ཆར་འབེབས་ཤིང་འཁོད་པར་གྱུར་ཏོ། །ལ་ལ་ནི་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པར་གྱུར་ཏོ། །མི་མཆོག་ཁྱོད་ལ་ཕྱག་འཚལ་ལོ། །མི་ཕུལ་ཁྱོད་ལ་ཕྱག་འཚལ་ལོ། །རྐང་གཉིས་གཙོ་ལ་ཕྱག་འཚལ་ལོ། །ཁྱོད་ལ་དོ་ཟླ་ཡོང་མ་མཆིས། །འཇིག་རྟེན་གསལ་ལ་ཕྱག་འཚལ་ལོ། །ཡེ་ཤེས་མཚོ་ལ་ཕྱག་འཚལ་ལོ། །དཔལ་དང་ལྡན་ལ་ཕྱག་འཚལ་ལོ། །རྒྱལ་བའི་འོད་ལ་ཕྱག་འཚལ་ལོ། །ཡོན་ཏན་རྫོགས་ལ་ཕྱག་འཚལ་ལོ། །ཉོན་མོངས་སེལ་ལ་ཕྱག་འཚལ་ལོ། །སྤྱོད་དག་ཁྱོད་ལ་ཕྱག་འཚལ་ལོ། །
སེམས་དག་ཁྱོད་ལ་ཕྱག་འཚལ་ལོ། །གནས་མི་མངའ་ཞུམ་མི་མངའ། །ལེ་ལོ་མི་མངའ་རྒོད་མི་མངའ། །བརྩོན་འགྲུས་བརྩམས་ཤིང་རཏལ་བ་ཉིད། ། ངེས་པར་རྟོགས་ལ་ཕྱག་འཚལ་ལོ། །རིན་པོ་ཆེའི་ཕོ་བྲང་གི་རྡལ་བལྟ་ན་སྡུག་པ། མཛེས་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏེ། རིན་པོ་ཆེའི་ཕོ་བྲང་གི་རྡལ་དེ་དག་རེ་རེ་ཞིང་ཡང་བཞུགས་ས་ཁྲག་ཁྲིག་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏོ། བཞུགས་ས་དེ་དག་རེ་རེ་ཞིང་ཡང་བ་གམ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་བརྒྱ་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏོ། །བག་མ་དེ་དག་རེ་རེ་ལ་ཡང་ཁང་པ་བརྩེགས་པར་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། ཁང་པ་བརྩེགས་པ་དེ་དག་རེ་རེ་ཞིང་ཡང་ཁྱམས་བཀྲ་བ་བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏོ། དེ་ལ་གསེར་གྱི་ཁྱམས་རྣམས་ཀྱི་གདུང་ཕྱམ་ནི་དངུལ། གྲལ་བུ་དང་སྒོ་འཕར་ནི་བཻ་དཱུཪྻ། ཐེམ་པ་དག་ཁ་ཁྱེར་ནི་ཤེལ། ཀ་བ་ནི་སྤུག །ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ །དངུལ་གྱི་ཁྱམས་རྣམས་ཀྱི་གདུང་ཕྱམ་ནི་གསེར། གྲལ་བུ་དང་སྒོ་འཕར་ནི་བཻདཱུ་ཪྻ། ཐེམ་པ་དང་ཁ་ཁྱེར་ནི་ཤེལ། ཀ་བ་ནི་སྤུག །ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ །བཻ་དཱུ་ཪྻའི་ཁྱམས་རྣམས་ཀྱི་གདུང་ཕྱམ་ནི་ཤེལ། གྲལ་བུ་དང་སྒོ་འཕར་ནི་གསེར། ཐེམ་པ་དག་ཁ་ཁྱེར་ནི་དངུལ། ཀ་བ་ནི་སྤུག །ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ །ཤེལ་གྱི་ཁྱམས་རྣམས་ཀྱི་གདུང་ཕྱ་མ་ནི་བཻ་དཱུ་ཪྻ། གྲལ་བུ་དང་སྒོ་འཕར་ནི་སྤུག ཐེམ་པ་དག་ཁ་ཁྱེར་ནི་རྡོའི་སྙིང་པོ། ཀ་བ་ནི་གསེར། ཀ་ཞུ་ནི་དངུལ། ས་གཞི་ནི་མུ་ཏིག་དམར་པོའི་རང་བཞིན་ཅན་ཤ་སྟག་གོ ། སྤུག་གི་ཁྱམས་རྣམས་ཀྱི་གདུང་ཕྱམ་ནི་རྡོའི་སྙིང་པོ། གྲལ་བུ་དང་སྒོ་འཕར་ནི་མུ་ཏིག་དམར་པོ། ཐེམ་པ་ཁ་ཁྱེར་ནི་གསེར། ཀ་བ་ནི་དངུལ། ཀ་ཞུ་ནི་ཤེལ། ས་གཞི་ནི་བཻདཱུ་ཪྻའི་རང་བཞིན་ཅན་ཤ་སྟག་གོ །མུ་ཏིག་དམར་
པོའི་ཁྱམས་རྣམས་ཀྱི་གདུང་ཕྱམ་ནི་སྤུག །གྲལ་བུ་དང་སྒོ་འཕར་ནི་རྡོའི་སྙིང་པོ། ཐེམ་པ་དང་ཁ་ཁྱེར་ནི་དངུལ། ཀ་བ་ནི་གསེར། ཀ་ཞུ་ནི་བཻ་དཱུཪྻ། ས་གཞི་ནི་ཀེ་ཀེ་རུའི་རང་བཞིན་ཅན་ཤ་སྟག་གོ། རྡོའི་སྙིང་པོའི་ཁྱམས་རྣམས་ཀྱི་གདུང་ཕྱམ་ནི་མུ་ཏིག་དམར་པོ། གྲལ་བུ་དང་སྒོ་འཕར་ནི་གསེར། ཐེམ་པ་དང་ཁ་ཁྱེར་ནི་དངུལ། ཀ་བ་ནི་བཻ་དཱུ་ཪྻ། ཀ་ཞུ་ནི་ཀེ་ཀེ་རུ། ས་གཞི་ནི་ཤེལ་གྱི་རང་བཞིན་ཅན་ཤ་སྟག་གོ །ཁྱམས་དེ་དེ་དག་ཏུ་ཡང་སེང་གེའི་ཁྲི་རིན་པོ་ཆེ་སྣ་བདུན་གྱི་རང་བཞིན་ཅན་ལྷ་མ་ཡིན་གྱི་ལྷ་རྫས་ཀྱི་གོས་སྣ་ཚོགས་བཏིང་བ། ཀ་ཙ་ལི་ན་དེའི་སྟེང་གཡོགས་ཅན། མཐའ་གཉིས་སུ་རྟེན་མ་བཟང་པོ་བཀོད་པ་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། སེང་གེའི་ཁྲི་དེ་དག་གི་རྐང་རྟེན་རིན་པོ་ཆེ་སྣ་བདུན་གྱི་རང་བཞིན་ཅན་དག་ལ་རས་བཅོས་བུ་སྣ་ཚོགས་འདི་ལྟ་སྟེ། ཤིང་བལ་ལས་བྱས་པ་ཤིན་དུ་ཕྲ་བ་དང་། སྲིན་བལ་ལས་བྱས་པ་ཤིན་དུ་ཕྲ་བ་དང་། ཟར་མའི་ཤུན་པ་ལས་བྱས་པ་ཤིན་དུ་ཕྲ་བ་དང་། ཤིན་ལྤགས་ལས་བྱས་པ་ཤིན་དུ་ཕྲ་བ་དང་། ཀ་ཤི་ཀ་ལས་བྱས་པ་ཤིན་དུ་ཕྲ་བ་བྱེ་བ་ཕྲག་དྲུག་དྲུག་ཅུ་དྲུག་ཅུ་བཏིང་པར་གྱུར་ཏོ། སེང་གེའི་ཁྲི་དེ་དག་རེ་རེའི་ངོས་གཉིས་སུ་ཡང་ལྷ་མ་ཡིན་གྱི་བུ་མོ་རྒྱན་ཐམས་ཅད་ཀྱིས་བརྒྱན་པ། རིན་པོ་ཆེ་སྣ་བདུན་ལས་བྱས་པའི་བསིལ་ཡབ་ཐོགས་པ་གཉིས་གཉིས་མངོན་པར་སྤྲུལ་ཏེ། སེང་གེའི་ཁྲི་དེ་དག་ལ་ལྷ་མ་ཡིན་གྱི་བུ་མོ་དེ་བཞིན་དུ་འཁོད་པ་དག་ལ་གཡོབ་བོ། །ཁྱམས་དེ་དག་་རེ་རེ་ཞིང་ཡང་རིན་པོ་ཆེ་སྣ་བདུན་ལས་བྱས་པའི་གདུགས་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །ཁྱམས་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་གྱི་རྒྱལ་མཚན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །དེ་ལ་གསེར་གྱི་ཁྱམས་རྣམས་སུ་ནི་རྒྱལ་མཚན་སྔོན་པོ་ལ་ཡུ་བ་སེར་པོ་ཤེལ་གྱིས་སྤུས་པ་དག་གཙུག །དངུལ་གྱི་ཁྱམས་རྣམས་སུ་ནི་རྒྱལ་མཚན་སེར་པོ་ཡུ་བ་དམར་པོ་གསེར་གྱིས་སྤྲས་པ་དགེ་གཙུགས། བཻ་དཱུ་ཪྻའི་ཁྱམས་རྣམས་སུ་རྒྱལ་མཚན་དམར་པོ་ལ་ཡུ་བ་སེར་པོ་ཤེལ་གྱིས་སྤུས་པ་དག་གཙུགས། ཤེལ་གྱི་ཁྱམས་རྣམས་སུ་ནི་རྒྱལ་མཚན་དཀར་པོ་ཡུ་བ་བཻ་དཱུ་ཪྻ་གསེར་གྱིས་སྤྲས་པ་དག་གཙུགས།
རིན་པོ་ཆེ་སྣ་བདུན་ཚོགས་ཀྱི་ཁྱམས་རྣམས་སུ་ནི་རྒྱལ་མཚན་ཁྲ་བོ་གསེར་གྱི་ཡུ་བ་བཻ་དཱུ་ཪྻས་སྤྲས་པ་དག་བཙུགས་སོ། །དེ་ལ་རྒྱལ་མཚན་སྔོན་པོ་རྣམས་ནི་མེ་ཏོག་གསེར་པོ་རྒྱལ་མཚན་སེར་པོ་རྣམས་ནི་ཏོག་སྔོན་པོ། རྒྱལ་མཚན་དམར་པོ་རྣམས་ནི་ཏོག་དཀར་པོ། རྒྱལ་མཚན་དཀར་པོ་རྣམས་ནི་ཏོག་དམར་པོ། རིན་པོ་ཆེ་སྣ་ཚོགས་ཀྱི་རྒྱལ་མཚན་རྣམས་ནི་ཏོག་རིན་པོ་ཆེ་སྣ་བདུན་ཤ་སྟག་གོ །རིན་པོ་ཆེའི་ཕོ་བྲང་གི་རྡལ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱེད་པར་གྱུར་ཏོ། དེ་འདི་ལྟ་སྟེ། དཔེར་ན་སུམ་ཅུ་རྩ་གསུམ་གྱི་ལྷ་རྣམས་ཀྱི་གླང་པོས་སྲུང་གི་བུ་ནི་བར་སྣང་གི་ནམ་མཁའ་ལས་འགྲོ་ཞིང་སུམ་ཅུ་རྩ་གསུམ་པའི་ལྷ་རྣམས་བསྐྱེད་མོས་ཚལ་ཡོངས་འདུ་ས་བརྟོལ་དུ་ཉེ་བར་འཇོག་གོ །དེ་བཞིན་ཕོ་བྲང་གི་རྡལ་དེ་དག་ཀྱང་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བར་བྱེད་དོ། ། རིན་པོའི་ཕོ་བྲང་གི་རྡལ་དེ་དག་དང་། བ་གམ་དེ་དག་དང་། བཞུགས་ས་དེ་དག་དང་། ཁང་པ་བརྩེགས་པ་དེ་དག་དང་། ཁྱམས་དེ་དག་དང་། སེང་གེའི་ཁྲི་དེ་དག་དང་། གདུགས་དེ་དག་དང་། རྒྱལ་མཚན་དེ་དག་དང་། བ་དན་དེ་དག་ལས་ལྷའི་ཙན་དན་དང་། ཨུཏྤ་ལ་དང་། ཨ་ག་རུའི་ཕྱེ་མའི་ཆར་འབབ་པར་གྱུར་ཏོ། མེ་ཏོག་མན་དཱ་ར་བ་དང་། མ་ན་དཱ་ར་བ་ཆེན་པོ་དང་། མཉྫྱུ་ཥཀ་དང་། ན་ནྱ་ཥ་ཀ་ཆེན་པོ་དང་། པ་རུ་ཥ་ཀ་དང་། པ་རུ་ཥ་ཀ་ཆེན་པོ་དང་། མདོག་དཀར་པོ་དང་། མདོག་དཀར་པོ་ཆེན་པོ་དང་། སྐྱ་སྣར་དང་། སྐྱ་སྣར་ཆེན་པོ་དང་། སྐྱ་སྣར་ཁྲ་བོ་དང་། སྐྱ་སྣར་བཀྲ་ཆེན་གྱི་ཆར་ཡང་མངོན་པར་འབབ་པར་གྱུར་ཏོ། གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། སྤུག་དང་། རྡོའི་སྙིང་པོ་དང་། མུ་ཏིག་དམར་པོ་དང་། རིན་པོ་ཆེ་ཐམས་ཅད་ཀྱི་མེ་ཏོག་དང་། དབྱིག་དང་། གསེར་དང་། ཡིད་བཞིན་གྱི་ནོར་བུའི་བླ་རེ་དེ་དག་གི་མཐུས་ལྷ་མ་ཡིན་གྱི་བུ་དེ་དག་རིན་པོ་ཆེ་གང་དང་གང་གི་ཆར་འབབ་པར་འདོད་པ་དེ་དང་དེ་དག་ལས་མངོན་བར་བབ་པར་གྱུར་ཏོ། དེའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ཁོར་ཡུག་ཏུ་ནི་དཔག་ཚད་དྲུག་ཁྲི་འཕང་དུ་ཡང་དཔག་ཚད་དྲུག་
ཁྲིར་ལྷ་མ་ཡིན་གྱི་མཆོད་པ་དེ་ལྟ་བུས་རྒྱས་པར་གང་བར་གྱུར་ཏོ། །རིན་པོ་ཆེའི་ཕོ་བྲང་གི་རྡལ་དེ་དག་གིས་ཀྱང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་ཡང་མི་འགྲེང་བདུན་ཙམ་དུ་མེ་ཏོག་མན་དཱ་ར་བས་རྒྱས་པར་གང་བར་གྱུར་ཏོ། སྤོས་ཆུས་ཀྱང་རྫབ་ཏུ་གྱུར་ཏོ། སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་སྤོས་ཆུའི་རྫབ་ཀྱི་དྲི་དེས་ཁྱབ་པར་གྱུར་ཏོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་གང་དག་གིས་སྤོས་ཆུའི་རྫབ་གྱི་དྲི་དེ་ཚོར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏེ། བྱང་ཆུབ་ཏུ་སེམས་དང་པོ་བསྐྱེད་པ་དག་ནི་སྨོས་ཀྱང་མི་དགོས་སོ། །དེ་ནས་ལྷ་མ་ཡིན་གྱི་དབང་པོ་ཐམས་ཅད་ཟངས་རིས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ལ་ཙན་དན་གྱི་ཕྱེ་མས་མངོན་པར་གཏོར་ཏོ། ཚིགས་སུ་བཅད་པ་བདག་གིས་མངོན་པར་བསྟོད་པ། །བྱང་ཆུབ་དམ་པ་དོན་དུ་གཉེར་སླད་དུ། །སྐྱབས་ཀྱི་དམ་པ་རབ་ཏུ་མི་སྒུལ་བ། །ལྷར་བཅས་འཇིག་རྟེན་མི་འཇིགས་སྩོལ་བ་པོ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །གང་ལ་དགའ་བའི་ཡིད་ཀྱིས་སྐྱབས་སོང་ན། །ལོག་ལྟུང་དག་ཏུ་ལྟུང་བར་མི་འགྱུར་བ། །དེ་ལ་བདག་ནི་སྐྱབས་སུ་ཉེ་བར་མཆི། །དཔེ་མེད་བྱང་ཆུབ་འཚལ་བའི་སླད་དུའོ། །འཁོར་བའི་སྡུག་བསྔལ་དག་ནི་བཤིག་བཅོམ་ཞིང་། །མྱ་ངན་ལས་རྒལ་ཉོན་མོངས་དག་གྱུར་ལ། །འདྲེན་པ་གཞན་གྱི་དྲིང་ལ་མི་འཇོག་པ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །རྒ་དང་འཆི་བས་ཉེན་པར་གྱུར་པ་ཡི། །ལྷ་དང་མི་རྣམས་འདྲེན་པ་བཅོམ་ལྡན་འདས། །གང་ལ་སྐྱབས་སོང་ཕྱིས་ཀྱང་མི་སྐྱེ་བ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །དེ་ནས་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་རྟའི་རྒྱན་དེ་དག་དང་། ཤིང་རྟའི་རྒྱན་དེ་དག་དང་། ལྷ་མ་ཡིན་གྱི་རྒྱན་དེ་དག་དང་། གདུགས་དང་།
རྒྱལ་མཚན་དང་། བ་དན་གྱི་རྒྱན་དེ་དག་དང་། བླ་རེ་དང་དྲིལ་བུ་གཡེར་ཀའི་རྒྱན་དེ་དག་རླུང་གིས་བསྐྱོད་པ་ལས་སྒྲ་སྙན་ཅིང་ཡིད་དུ་འོང་ལ་མཉན་ན་དགའ་བ་འདི་ལྟ་བུ་དག་བྱུང་བར་གྱུར་ཏེ། འདི་ལྟར་དཔེར་ན་རོལ་མོ་སིལ་སྙན་ཡན་ལག་བརྒྱད་པ་མཁས་པས་སྒྲ་ཕྱུང་པ་བཞིན་ནོ། །དེ་ལྟར་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་སྟེང་གི་བར་སྣང་ལས་ལྷའི་ཙན་དན་དང་། ཨུཏྤ་ལ་དང་། ཨ་ཀ་རུ་དང་། ཏ་མ་ལའི་ལོ་མའི་ཕྱེ་མའི་ཆར་མངོན་པར་འབབ་པར་གྱུར་ཏོ། ལྷ་མ་ཡིན་གྱི་སྤོས་ཀྱི་ཕྱེ་མ་རྣམ་པ་སྣ་ཚོགས་དུ་མའི་ཆར་མངོན་པར་བབ་པར་གྱུར་ཏོ། ལྷའི་མེ་ཏོག་མན་དཱ་ར་བ་དང་། མེ་ཏོག་མན་དཱ་ར་བ་དང་། མ་ན་དཱ་ར་བ་ཆེན་པོ་དང་། མཉྫྱུ་ཥཀ་དང་། མཉྫྱུ་ཥ་ཀ་ཆེན་པོ་དང་། པ་རུ་ཥ་ཀ་དང་། པ་རུ་ཥ་ཀ་ཆེན་པོ་དང་། མདོག་དཀར་པོ་དང་། མདོག་དཀར་པོ་ཆེན་པོ་དང་། སྐྱ་སྣར་དང་། སྐྱ་སྣར་ཆེན་པོ་དང་། སྐྱ་སྣར་ཁྲོ་བོ་དང་། སྐྱ་སྣར་བཀྲ་ཆེན་གྱི་མེ་ཏོག་རྣམས་དང་། སྤྲུལ་པའི་མེ་ཏོག་སྣ་ཚོགས་ཀྱི་ཆར་མངོན་པར་བབ་པོ། སྟེང་གི་བར་སྣང་ལས་གསེར་དང་། དངུལ་དང་། བཻ་དཱུ་ཪྻ་དང་། ཤེལ་དང་། སྤུག་དང་། རྡོའི་སྙིང་པོ་དང་། མུ་ཏིག་དམར་པོ་དང་། རིན་པ་ཆེ་ཐམས་ཅད་ཀྱི་མེ་ཏོག་གི་ཆར་ཡང་མངོན་པར་བབ་པོ། །ལྷ་དང་ལྷ་མ་ཡིན་གྱི་སྤོས་ཆུའི་ཆར་ཡང་མངོན་པར་འབབ་བོ། །སྤོས་ཆུའི་ཆར་དེ་བབ་པས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུའི་རྫབ་ཏུ་གྱུར་ཏོ། སྤོས་ཆུའི་རྫབ་ཀྱི་དྲི་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ཏོ། སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། དེ་ལྟར་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱེད་པའི་ཚེ། བར་སྣང་ལས་ལྷ་མ་ཡིན་གྱི་ལྷ་རྫས་ཀྱི་སིལ་སྙན་གྱི་སྒྲ་དག་བྱུང་ངོ་། །སིལ་སྙན་དེ་དག་གི་སྒྲས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གྲག་པར་གྱུར་ཏོ། ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་གང་
དག་གིས་སྒྲ་ཐོས་པར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། དེ་ལྟར་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་ལྷ་མ་ཡིན་གྱི་བུ་མོ་བརྒྱ་སྟོང་དག་བཅོམ་ལྡན་འདས་ལ་མཆོད་པ་བྱ་བ་དང་། ལྷ་མ་ཡིན་གྱི་དབང་པོ་ཐགས་ཟངས་རིས་ཀྱི་འཁོར་བྱ་བའི་ཕྱིར་ལ་ལ་ནི་གླུ་ལེན། ལ་ལ་ནི་སིལ་སྙན་བྱེད། ལ་ལ་ནི་ལུས་ཀྱི་ཚུལ་སྒྱུར། ལ་ལ་ནི་ཙན་དན་དང་། ཨུཏྤ་ལ་དང་། ཨ་ག་རུ་དང་། ཏ་མ་ལའི་ལོ་མའི་ཕྱེ་མ་འཐོར། ལ་ལ་ནི་ལྷའི་མེ་ཏོག་མན་དཱ་ར་བ་དང་། མ་ན་དཱ་ར་བ་ཆེན་པོ་དང་། མཉྫྱུ་ཥཀ་དང་། མཉྫྱུ་ཥ་ཀ་ཆེན་པོ་དང་། པ་རུ་ཥ་ཀ་དང་། པ་རུ་ཥ་ཀ་ཆེན་པོ་དང་། མདོག་དཀར་པོ་དང་། མདོག་དཀར་པོ་ཆེན་པོ་དང་། སྐྱ་སྣར་དང་། སྐྱ་སྣར་ཆེན་པོ་དང་། སྐྱ་སྣར་ཁྲ་བོ་དང་། སྐྱ་སྣར་བཀྲ་ཆེན་གྱི་མེ་ཏོག་རྣམས་དང་། སྤྲུལ་པའི་མེ་ཏོག་རྣམས་དང་། ལ་ལ་ནི་ན་བཟའ་དང་། རྐང་གདུབ་དང་། སྐུ་རགས་དང་། ཕྱག་གི་རྒྱན་དང་། སོར་གདུབ་དང་། གདུ་བུ་དང་། གདུ་བུ་ཐམ་པ་དང་། དབུ་རྒྱན་རྩེ་གསུམ་པ་དང་། དཔུང་རྒྱན་དང་། ཅོད་པན་དང་། གསེར་སྐུད་དང་། མུ་ཏིག་གིས་ཕྲེང་བ་དང་། ནོར་བུའི་དོ་ཤལ་དང་། སེ་མོ་དོ་དང་། གྱོ་དོ་དང་། མགུལ་རྒྱན་སྣ་ཚོགས་དང་། རྣ་ཆ་དང་། རྣ་ཆག་དུབ་འཁོར་དང་། ཚོང་ཚོང་གཤིབས་པ་དང་། མགོ་རྒྱན་དང་། ཕྲེང་བའི་ལྡ་ལྡི་དང་། སྤོས་ཀྱི་ལྡ་ལྡི་དང་། ནོར་བུའི་ལྡ་ལྡི་དག་འཐོར་ཞིང་མེ་ཏོག་གི་བླ་རེ་དང་། སྤོས་ཀྱི་བླ་རེ་དང་། ནོར་བུའི་བླ་རེ་དག་ཐོགས་སོ། །ལ་ལ་ནི་སྤོས་ཆུའི་ཆར་འབེབས་སོ། །ལ་ལ་ནི་ཕྱེ་མའི་ཆར་འབེབས་སོ། །ལ་ལ་ནི་མུ་ཏིག་དམར་པོས་སྙིམ་པ་བཀང་སྟེ། བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་རིན་པོ་ཆེས་སྙིམ་པ་བཀང་། ལ་ལ་ནི་གསེར་གྱིས་སྙིམ་པ་བཀང་སྟེ། བཅོམ་ལྡན་འདས་ལ་མངོན་པར་འཐོར་རོ། །ཚིགས་སུ་
བཅད་པ་འདི་ཡང་སྨྲས་སོ། །གང་བརྟེན་གང་ལ་གནས་བཅས་ནས། །གང་ཟག་མཆོག་ལ་མཆོད་འགྱུར་པ། །དེ་འདྲ་བ་ཡི་གྲོགས་པོ་དང་། །རྟག་པར་རྒྱུན་དུ་ཕྲད་པར་ཤོག །ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རབ་སིམ་གྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་པ། །སྟོབས་བཅུ་བརྩོན་བདེན་ཁྱོད་ལ་ཕྱག་འཚལ་ལོ། །མི་འཇིགས་འཇིགས་བྲལ་ཁྱོད་ལ་ཕྱག་འཚལ་ལོ། །ཆོས་ལ་མ་འདྲེས་ངེས་པར་གྱུར་བ་པོ། །འགྲོ་བའི་འདྲེན་པ་ཁྱོད་ལ་ཕྱག་འཚལ་ལོ། །ཀུན་སྦྱོར་འཆིང་བ་གཅོད་ལ་ཕྱག་འཚལ་ལོ། །འཁོར་རྒྱུད་མི་གནས་པ་ལ་ཕྱག་འཚལ་ལོ། །མཐར་ཕྱིན་ཐར་གནས་ཁྱོད་ལ་ཕྱག་འཚལ་ལོ། །འགྲོ་བ་བྱིང་བ་སྒྲོལ་ལ་ཕྱག་འཚལ་ལོ། །སེམས་ཅན་འགྲོགས་ཀྱང་རྒོད་པ་མི་མངའ་ཞིང་། །འགྲོ་བ་ཀུན་ལ་ཐུགས་ནི་རྣམ་གྲོལ་ཏེ། པད་མ་ཆུ་ཡིས་མི་གོས་འདྲ་བ་པོ། །བློ་ཟབ་བསམ་མི་ཁྱབ་ལ་ཕྱག་འཚལ་ལོ། །སངས་རྒྱས་ཐུབ་པ་ཁྱོད་ཀྱི་སྟོང་ཉིད་མཁྱེན། །རྣམ་པ་ཀུན་དུ་མཚན་མ་ཐམས་ཅད་བཤིག །ཁྱོད་ནི་གང་དུའང་སྨོན་པ་ཡོད་མི་མངའ། །མི་གནས་ནམ་མཁའ་མཉམ་ལ་ཕྱག་འཚལ་ལོ། །ལྷ་མ་ཡིན་གྱི་དབང་པོ་རབ་སིམ་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་ཤིང་རྟ་བཟང་གིས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་གསེར་གྱི་ཕྲེང་དག་གིས་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །ས་དང་བར་སྣང་དང་ནི་ལྷའི་ཡུལ་ནའང་། བདེར་གཤེགས་ཁྱོད་མཉམ་མ་མཆིས་ལྷག་མ་མཆིས། །མཚན་མར་བཟུང་ན་ཕྱིན་ཅི་ལོག་ཞུགས་པའི། །འགྲོ་བ་སྨིག་རྒྱུ་འདྲ་བར་ཁྱོད་ཀྱིས་མཁྱེན། །འདི་ན་བྱེད་པ་ཚོར་བ་སེམས་ཅན་མེད། །གང་ཟག་མེད་ཅིང་བདག་གིས་བྱ་བ་མེད། །ཆོས་ཀུན་སྟོང་ཞིང་བྱེད་པ་ཀུན་ལས་དབེན། །དང་བཞིན་མེད་ཅིང་གཡོ་མེད་ཞི་ཞེས་བསྟན། སུ་ཞིག་
བདེར་གཤེགས་བསྟན་པའི་འདིར་མོས་ཏེ། །ཆོས་ཀུན་བྱས་པ་མེད་པའི་རྗེས་འབྲང་བ། །དེ་འདིར་འདྲེན་པའི་སྲས་སུ་གྱུར་པ་སྟེ། །ཇི་ལྟར་བསྟན་པོ་དེ་བཞིན་ཡབ་ལྟར་སྤྱོད། །རྣམ་འདྲེན་ཁྱོད་ལ་བདག་བསྟོད་བསོད་ནམས་གང་སྐྱེས་ཏེ། །ཇི་ལྟར་རྒྱལ་བ་མཁྱེན་པ་ཡིས་ནི་མཁྱེན་གྱུར་པ། །དགེ་བའི་རྩ་བ་དེ་ཀུན་མ་ལུས་མཐའ་དག་འདིར། །འགྲོ་བའི་རྩལ་གྱིས་ཐམས་ཅད་སངས་རྒྱས་གྲུབ་པར་ཤིག །བམ་པོ་གསུམ་པ། ལྷ་མ་ཡིན་གྱི་གྱི་དབང་པོ་ཤིང་རྟ་བཟང་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྟོབས་ལྡན་གྱིས་ཀྱང་། བཅོམ་ལྡན་འདས་ལ་མཆོད་པ་བྱས་ཏེ་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ནས་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་དངུལ་གྱི་མེ་ཏོག་རྣམས་ཀྱིས་གཏོར་ཏེ། ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །འཁོར་བའི་རྒྱ་མཚོ་ཆུ་ལས་ཕ་རོལ་རྣམས་རྒལ་བ། །རྒལ་ལན་སྐྱེ་བོ་རྒྱུན་གྱི་རྗེས་སུ་འགྲོ་སྒྲོལ་མཛད་ཅིང་། །བདེ་གཤེགས་ཕ་རོལ་ཐང་བདེ་འཇིག་པ་མེད་འཇོག་པ། །སྤྱན་མཛེས་བདེ་བར་གཤེགས་པ་ཁྱོད་ཀྱི་ཞབས་ལ་གཏུག །བློ་མཆོག་ཁྱོད་ཀྱིས་འགྲོ་བ་ཐམས་ཅད་ཀུན་དུ་མཁྱེན། །ཕྱིན་ཅི་ལོག་ལྟ་ཐིབས་པོར་རབ་ཞེན་བློ་ལྡན་ཏེ། །འཁྲུལ་པ་སྨིག་རྒྱུ་ལྟ་བུར་མ་ཤེས་གྱུར་རྣམས་ལ། །མཚུངས་པ་མེད་པའི་ཐུགས་རྗེ་བསྐྱེད་ནས་རྟོགས་པར་མཛད། །མི་མཆོག་ཁྱོད་ཀྱིས་ཆོས་རྣམས་ཐམས་ཅད་སྒྱུ་མ་དང་། །སྨིག་རྒྱུ་འདྲ་ཞིང་སྨྱིག་ཡོར་མཚུངས་ཤེས་རབ་ཏུ་བསྙན། །ཐུབ་པ་དམ་པ་ཁྱོད་ཀྱིས་ཆོས་ཀྱིས་སྲས་མཆོག་བསྐྱེད། །སྲིད་པ་གསུམ་པོ་དེ་དག་ནི་མི་ཆགས་སྤྱད་པ་སྤྱོད། །དངོས་པོ་ལོག་པའི་དོན་གྱུར་རང་བཞིན་བྲལ་བ་དང་། །གཞན་གྱི་དངོས་པོས་སྟོང་པར་མི་དབང་ཁྱོད་ཀྱིས་མཁྱེན། །བྱིས་པ་རྨོངས་པ་བློ་གྲོས་རྨི་ལམ་དག་ལྟ་བུར། །མི་དབང་ཁྱོད་ཀྱིས་སྲས་ཀྱིས་ཚལ་ལ་སྤྱད་པ་སྤྱོད། །ལྷ་མ་ཡིན་གྱི་དབང་པོ་སྟོབས་ལྡན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྒྲ་གཅན་གྱིས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོ་རྣམས་ཀྱིས་གཏོར་ཏེ་ཚིགས་སུ་བཅད་པ་
དག་གིས་བཅོམ་ལྡན་འདས་ལ་མངོན་པར་བསྟོད་པ། །མི་མཆོག་ཁྱོད་ཀྱི་སྐུ་ཡི་ནི། །ལྷར་བཅས་འཇིག་རྟེན་འདི་ཟིལ་མནན། །རི་རབ་ཀྱིས་ནི་ཡུངས་འབྲུ་དང་། །རྒྱ་མཚོས་བ་རྗེས་ཆུ་བཞིན་ནོ། །གཟུགས་མཛེས་མཚན་གྱིས་རབ་ཏུ་བརྒྱན། །གཟུགས་ཀྱིས་གཟུགས་ཀྱི་དམ་པ་དང་། །གཟུགས་རྣམས་ཐམས་ཅད་ཟིལ་གྱིས་མནན། །དཔེར་ན་ཉི་མས་མེ་ཁྱེར་བཞིན། །གཟི་བརྗིད་ཕུང་པོ་གཟི་བརྗིད་ཀྱིས། །སེམས་ཅན་གཟི་བརྗིད་ཟིལ་གྱིས་མནན། །ཟིལ་མནན་དེ་དག་ལམ་མེ་མྱིན། །ཉི་མས་མེ་ཁྱེར་ཟིལ་བརླག་བཞིན། །ཡེ་ཤེས་རྒྱ་མཚོ་ཡེ་ཤེས་ཀྱིས། །འཇིག་རྟེན་གསུམ་ཀུན་ཟིལ་གྱིས་མནན། །ཟིལ་མནན་དེ་དག་ལམ་མེ་མིན། །ཉི་མས་ཟླ་འོད་ཟིལ་བརླག་བཞིན། །ལྷ་མ་ཡིན་གྱི་དབང་པོ་སྒྲ་གཅན་གྱིས་ཇི་ལྟར་བྱས་པ་དེ་བཞིན་དུ། ལྷ་མ་ཡིན་གྱི་དབང་པོ་བདེ་མཆོག་གིས་ཀྱང་། །བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལེན་གསུམ་བསྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོས་མངོན་པར་གཏོར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །འདྲེན་པ་བློ་གྲོས་ཞི་བ་པོ། །ཞི་གནས་དགྱེས་པས་འགྲོ་བ་ཡི། །འདོད་སྡང་གཏི་མུག་རྡུལ་ཞི་མཛད། །ཆར་པས་རྡུལ་རྣམས་ཞི་བགྱིད་བཞིན། །འབར་ཞིང་ཆོས་ཚུལ་འབར་བར་མཛད། །གླུགས་སྦྱིན་གྱིས་ནི་མེ་བཞིན་ནོ། །ནགས་བཏང་ནགས་མེས་ཤིང་སྲེག་ལྟར། །དེ་བཞིན་ཉོན་མོངས་དྲ་བ་སྲེག །བསྐལ་པ་བྱེ་བ་ཁྲག་ཁྲིག་ནི། །དཔག་ཏུ་མེད་པར་དགེ་རྩ་འཛིན། །ཉོན་མོངས་ཐམས་ཅད་འཛོམ་མཛད་དེ། །བདུད་རྩིས་ལུས་བྱུགས་དུག་བཞིན་ནོ། །མུན་པ་མུན་གནག་སེལ་མཛད་དེ། །མུན་ཁུང་སྒྲོན་མ་འབར་བ་བཞིན། །ཆོས་ཀྱི་ཚུལ་ཡང་སྟོན་མཛད་དེ། །ནོར་མཁན་རིན་ཆེན་ཡོན་ཏན་བཞིན། །ལྷ་མ་ཡིན་གྱི་དབང་པོ་བདེ་མཆོག་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་
ལ་ལན་གསུམ་བསྐོར་བ་བྱེད་ཅིང་རིན་པོའི་མེ་ཏོ་རྣམས་ཀྱིས་གཏོར་ནས་ཚིགས་སུ་བཅད་པ་དག་གི་བཅོམ་ལྡན་འདས་ལ་མངོན་པར་བསྟོད་པ། གདུལ་དཀའ་མི་བཟད་སེམས་ནི་ཁྱོད་ཀྱིས་བཏུལ། །གཡུལ་ལ་དཔའ་བས་གཡུལ་དོར་དཔའ་བོ་བཞིན། །ཤིན་ཏུ་ཚར་བཅད་རང་གིས་དབང་དུ་མཛད། །ཐུགས་དུལ་མི་བསྙེངས་ཁྱོད་ལ་ཕྱག་འཚལ་ལོ། །ཁྱོད་ཀྱིས་དབང་པོ་ཐུལ་ཅིང་དགྲ་ཡང་བཅོམ། །གང་དུའང་མི་བསྙེངས་མི་བསྐྱོད་བདེ་བ་བསྙེམ། །ཁྱོད་ནི་ཉོན་མོངས་རྣམས་ཀྱིས་ཡང་མི་འཁྲུགས། །རྣམ་པ་ཀུན་ཏུ་དུག་ནི་མ་ལུས་བཅོམ། །མཐུ་ཆེན་ཁྱོད་ཀྱིས་བྱམས་པ་ལེགས་བསྒོམས་ཏེ། །ཁྱོད་ཀྱི་ཐུགས་ནི་དགྲ་དང་བྱམས་ལ་ཉམས། །ཐུབ་པ་ཁྱོད་ཀྱིས་སེམས་ཅན་བློ་གྲོས་བཤིག །འགྲོ་བ་ཀུན་དུ་ཁྱོད་ནི་བཞུད་མི་མངའ། །ཤེས་རབ་རྣམ་གྲོལ་སྲིད་པ་བསྐམས། །ཤེས་རབ་རྣམ་དག་ཁྱོད་ཀྱི་ཐུགས་ཀྱང་དག །ཆོས་རྣམས་ཀུན་ལ་ཐུགས་ནི་ཆགས་མི་མངའ། །ཐམས་ཅད་ཟིལ་མནན་ཐུབ་མཆོག་ཁྱོད་འདྲ་མེད། །ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་མིག་བཟངས་ཀྱིས་ཀྱང་། །བཅོམ་ལྡན་འདས་ལ་མཆོད་པ་བྱས་ནས་རིན་པོ་སྣ་བདུན་གྱི་ཤི་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་བཅོམ་ལྡན་འདས་ལ་གཏེར་ཆེན་པོ་ཡང་ཕུལ་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །དཔའ་བོ་ཆེན་པོ་ཁྱོད་ཀྱིས་ནི། །ཆོས་རྣམས་ཡང་དག་མཚན་ཉིད་མཁྱེན། །གང་འདི་ཆོས་ཤེས་བརྗོད་པ་ཡང་། །དེ་ནི་བརྡར་བཏགས་ཚིག་ཏུ་ཟད། །ཆོས་རྣམས་ཆོས་ཀྱི་ངོ་བོ་ཡིས། །རྣམ་པ་ཀུན་ཏུ་མི་དམིགས་སོ། །གང་འདི་ཆོས་ཤེས་བརྗོད་པ་ཡང་། །དེ་ནི་མིང་ཙམ་ཟད་ཅེས་གསུངས། །མིང་ནི་མིང་གིས་དབེན་པ་སྟེ། །མཚན་ཉིད་ཀྱང་ནི་དེ་བཞིན་ནོ། །ཆོས་རྣམས་མཚན་ཉིད་མེད་པ་སྟེ། །མིང་ཡང་མེད་ཅེས་ཁྱོད་ཀྱིས་བཤད། །ནུབ་ཏུ་བཤད་ཅེས་བགྱི་བ་ཡང་། །བཤད་པ་ཅི་ཡང་མ་མཆིས་ཏེ། །གང་གིས་ཀྱང་ནི་
མ་བཤད་ཅིང་། །སུ་ལའང་བཤད་པ་མ་མཆིས་སོ། །ཁྱོད་ཀྱི་སྲས་པོ་མི་མཆོག་རྣམས། །ཆོས་རྣམས་དེ་ལྟར་འཚལ་ནས་ནི། །ཆོས་རྣམས་ལ་ཡང་མི་ཆགས་པར། །རྣམ་པར་སྤྱད་དོ་ཐུབ་པ་ཆེ། །ལྷ་མ་ཡིན་གྱི་དབང་པོ་མིག་བཟངས་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་འཇིག་རྟེན་རྣམ་པར་གནོན་པས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་བཅོམ་ལྡན་འདས་ལ་མུ་ཏིག་གི་དོ་ཤལ་ཡང་ཕུལ་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །དགྲ་ཟླ་མ་མཆིས་ཁྱོད་ལ་བདག་བསྟོད་དོ། །ཚུལ་ཁྲིམས་དང་ནི་གཟུགས་དང་ཡེ་ཤེས་སྟོབས། །དེ་ནི་འཇིག་རྟེན་གསུམ་ན་མཚུངས་མ་མཆིས། །དེ་ཕྱིར་ཁྱོད་ནི་དགྲ་ཐུལ་མཚུངས་མ་མཆིས། །ཁྱོད་ཀྱི་གཟུགས་ནི་ཆོས་ཀྱིས་བསྐྱེད་པས་ན། །གཟུགས་ཀྱི་སྟོབས་ཀྱིས་ཁམས་གསུམ་ཟིལ་གྱིས་མནན། །སྦྱིན་པའི་སྟོབས་ཀྱིས་མཚན་ནི་ཕུན་སུམ་ཚོགས། །དཔེ་བྱད་ཕུན་སུམ་ཚོགས་ཤིང་གཟུགས་ཀྱང་དག །ཚུལ་ཁྲིམས་སྟོབས་ཀྱིས་ཁྱོད་ནི་མི་བསྐྱོད་དོ། །སྐྱེ་བོ་མཁས་པས་སོ་སོར་བསམ་མི་ལང་། །ཁྱོད་ནི་ཚུལ་ཁྲིམས་ལྡན་ཞིང་ཐུག་ཀྱང་དག །མི་ཡི་སེང་གེ་མཛད་པ་ཐམས་ཅད་འབྱོར། །ཤེས་རབ་སྟོབས་ཀྱི་ཁྱོད་མཚུངས་འགའ་མ་མཆིས། །དེ་ནི་མི་བསྙེངས་འཇིག་རྟེན་གསུམ་བཏུལ་ནས། །འཁོར་དུ་སེང་གེ་ལྟ་བུར་སྒྲ་བསྒྲགས་ཏེ། །རྟོག་གེ་ཚོགས་ཀྱི་བློ་གྲོས་ཟིལ་གྱིས་མནན། །ལྷ་མ་ཡིན་གྱི་དབང་པོ་འཇིག་རྟེན་གསུམ་རྣམ་པར་གནོན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་རིན་པོ་ཆེས་སྙིམ་པར་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །ཐུབ་པ་ཆེན་པོ་སྐྱེ་བོའི་ཚོགས་པ་འདི། །དང་བའི་ཡིད་ཀྱིས་ཁྱོད་ཀྱི་ཞལ་དུ་ལྟ། །ཀུན་གྱིས་རྒྱལ་བ་
མདུན་ན་བཞུགས་པར་མཐོང་། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། སྐྱེ་བོ་བསམ་པ་ཇི་བཞིན་སོ་སོར་འཚལ། །ཐུབ་པ་ཁྱོད་ཀྱི་གསུང་དེ་དེ་ལྟར་འབྱུང་། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་ཅིག་བརྗོད་པ་ལ། སྐྱེ་བོ་བསམ་པ་ཇི་བཞིན་སོ་སོར་འཚལ། །ཐུབ་པ་ཁྱོད་ཀྱིས་གསུང་དེ་དེ་ལྟར་འབྱུང་། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། །འཁོར་གྱིས་ཐ་དད་གསུང་དུ་རྣམ་འཚལ་ཅིང་། །འགྲོ་བས་རང་དོན་ཇི་ལྟ་བཞིན་དུའང་འཚལ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །གསུང་གཅིག་རབ་ཏུ་བརྗོད་པ་མཛད་པས་ནི། །གཅིག་ལ་འཇོག་གི་གཞན་ནི་དགག་པར་མཛད། །འདྲེན་པ་སུ་དག་མ་བསླབས་རྟོག་པར་མཛད། །དེ་ནི་རྒྱལ་བའི་སངས་རྒྱས་མ་འདྲེས་མཚན། །ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་བཏང་ཟུང་གིས་ཀྱང་། བཅོམ་ལྡན་འདས་ལ་མཆོད་པ་བྱས་ནས་རིན་པོ་སྣ་བཅུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མུ་ཏིག་དམར་པོས་སྙིམ་པ་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །རྒྱགས་དང་ང་རྒྱལ་སྡིག་པའི་ལྟ་བ་སྤྱོད་པ་གང་། །ཡིད་དགའ་རབ་ཏུ་དང་བས་མི་དབང་བདེ་གཤེགས་ཀྱི། །གློ་ལ་མངོན་པར་དགའ་བ་དེ་དག་བག་མཆིས་ཏེ། །མཚུངས་མེད་བསྙེན་བཀུར་བགྱིད་པ་དེ་དག་སྟོན་པའི་སྲས། །ཆོས་རྣམས་འདི་དག་ངོ་བོ་ཉིད་ཀྱིས་མ་མཆིས་ཏེ། །རྨི་ལམ་དགའ་བ་ཐམས་ཅད་ཚད་མ་མ་ལགས་འདྲ། །རྨྱི་ལམ་དགའ་སྤྱོད་མ་མ་མཆིས་ཀྱང་ནི་འདུ་ཤེས་མཆིས། །དེ་ལྟར་རྒྱལ་བས་ཆོས་རྣམས་ཐམས་ཅད་རབ་ཏུ་གཟིགས། །སྟོན་ཀའི་སྤྲིན་དང་མཚུངས་ཤིང་ཆུའི་ཟླ་བ་འདྲ། །བྱིས་པའི་བློ་ལྡན་རྣམས་ཀྱི་ཡིད་ནི་རྨོངས་པར་བགྱི །གང་དག་རྟག་ཏུ་བག་མཆིས་བདེ་གཤེགས་བློ་མངའ་བ། །མཁས་པའི་སྐྱེ་བོ་དག་ལ་འདི་ནི་རྨོངས་མི་བགྱིད། །རྒྱལ་བ་ཁྱོད་ཀྱི་བསྟན་ལ་རྟག་ཏུ་བག་མཆིས་གང་། །མི་མཆོག་དམ་པ་དེ་དག་མི་དལ་ཡོད་མི་མཆི། །ཆོས་རྣམས་ཐམས་ཅད་རྨི་ལམ་འདྲ་བར་རྣམ་བརྟགས་ནས། །ཡང་དག་མཐོང་བ་དེ་དག་ཏིང་འཛིན་
ཐོབ་པར་གྱུར། །དེ་ནས་ཐགས་ཟངས་རིས་ལ་སོགས་པ་ལྷ་མ་ཡིན་གྱི་དབང་པོ་བྱེ་བ་ཕྲག་དྲུག་ཅུ་པོ་དེ་དག་གིས་མཆོད་པ་འདི་ལྟ་བུ་བྱས་ནས་བྱང་ཆུབ་ལ་གཞོལ་བའི་སེམས་ཀྱི་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང་། ཡིད་བདེ་བ་སྐྱེ་ཏེ་ཐལ་མོ་སྦྱར་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང་། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷ་མ་ཡིན་གྱི་དབང་པོའི་མཆོད་པ་དེ་དག་ཀྱང་གཟིགས། ལྷ་མ་ཡིན་དེ་དག་གི་ལྷག་པའི་བསམ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ལེབ་རྒན་དང། ཤེལ་དང་། དངུལ་གྱི་ཁ་དོག་ལྟ་བུ་དག་བྱུང་ནས་དེ་དག་གིས་ཐམས་ཅད་དང་ལྡན་པའི་འཇིག་རྟེན་སྣང་བས་རྒྱས་པར་བཀང་སྟེ་ཕྱིར་ལོག་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འཛུམ་པ་མཛད་པའི་དོན་ཚིགས་སུ་བཅད་དེ་ཞུས་པ། འཇིག་རྟེན་ཕན་བཞེད་རྒྱུ་ཟིག་མ་མཆིས་པར། །མི་ཡི་སེང་གེ་འཛུམ་པ་མི་མཛད་ན། །དྲང་སྲོང་ཆེན་པོ་ཅི་སླད་འཛུམ་པ་མཛད། །སྐྱེས་བུས་མཆོག་གིས་འཛུམ་པའི་རྒྱུ་ཡང་གསུངས། །ལྷ་མིན་མཆོད་པ་རྒྱ་ཆེན་གཟིགས་གྱུར་ནས། །འཇིག་རྟེན་པ་ན་བཞེད་ཁྱོད་ནི་འཛུམ་མཛད་ན། །ལྷ་མིན་རྣམས་ལ་ལུང་བསྟན་བཀའ་སྩལ་གསོལ། །དེ་ཐོས་བདག་ཅག་རྣམས་ནི་དགའ་བར་འགྱུར། །དེ་རིང་སུ་ཡིས་དོགས་མེད་རྒྱ་ཆེན་སེམས། །འཁོར་འདིར་ཡང་དག་བསྐྱེད་པར་གྱུར་ཅིག་གུ །དེ་བཞིན་གཤེགས་པས་གང་གི་བསམ་མཁྱེན་ནས། །མི་ཡི་སེང་གེ་འཛུམ་པ་མཛད་པར་གྱུར། །དེ་རིང་ཡོངས་སུ་དག་པའི་
ཡིད་ཀྱིས་སུ། །མི་ཡི་མཆོག་ལ་དང་བ་གང་གིས་བསྐྱེད། །དེ་བཞིན་གཤེགས་པས་གང་གི་བསམ་མཁྱེན་ཏེ། །ཡིད་དུ་འོང་བའི་འཛུམ་པ་མཛད་པར་གྱུར། །བདེ་གཤེགས་ཞལ་ནས་འཛུམ་པ་དེ་མཐོང་ནས། །འདི་ལྟར་བདེ་གཤེགས་འཇུམ་པ་མཛད་པ་འདི། །སུའི་དཔུང་བཅས་བདུད་ནི་དེང་བཅོམ་ཞེས། །འཁོར་འདི་དེ་རིག་ཐེ་ཚོམ་འཚལ་བར་གྱུར། །དྲང་སྲོང་ཆེན་པོ་རྒྱལ་བ་དགྲ་ལས་རྒྱལ། །ཐེ་ཚོམ་འཚལ་བའི་སོམ་ཉི་གཅད་དུ་གསོལ། །མི་མཆོག་ཁྱོད་ཀྱིས་དེ་རིང་འགྲོ་བ་ཡི། །ཐེ་ཚོམ་སྨྱུར་ཏེ་ལེགས་པར་བཅད་དུ་གསོལ། །དེ་ནས་ཚེ་དང་ལྡན་པ་རྟ་ཐུལ་གྱིས་ཞུ་བ་ཞུས་པའི་ལན་གསུམ་བཅོམ་ལྡན་འདས་ཀྱིས་ཚིགས་སི་བཅད་དེ་ཚེ་དང་ལྡན་པ་རྟ་ཐུལ་ལ་སླར་བཀའ་སྩལ་པ། །རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཇིག་རྟེན་ཕན་ཕྱིར་འཛུམ་པ་དེས་བྱས་པ། །དེ་ཡི་འབྲས་བུ་མ་ལུས་བསྟན་པར་བྱ། །བསྟན་པ་དེ་ནི་རྩེ་གཅིག་ཡིད་ཀྱིས་ཉོན། །བླ་ན་མེད་པའི་བྱང་ཆུབ་འདོད་པའི་ཕྱིར། །ལྷ་མིན་རྣམས་ཀྱིས་དེ་མཆོད་འདི་བྱས་ཏེ། །དེ་དག་སེམས་ནི་ཅི་ལའང་ཆགས་མེད་པས། །ནམ་མཁའི་ངོས་ལ་ལག་མཐིལ་ཆགས་མེད་བཞིན། །ལྷ་མིན་ཚོགས་ཀྱིས་དང་བའི་ཡིད་བྱས་ཏེ། །དེ་དག་ང་ལ་མཆོད་པ་འདི་བྱས་པས། །བློ་ཅན་དེ་དག་ལྷ་མིན་རིས་བོར་ཏེ། །མཐོ་རིས་དོང་ནས་ཡུན་རིང་དགའ་བར་འགྱུར། །དེ་དག་ཕྱི་དུས་རྒྱལ་བ་མི་སེང་གེ །གང་གཱའི་ཀླུང་གི་བྱེ་མ་བྱེ་བ་སྙེད། །བསྙེན་བཀུར་བྱས་ནས་ཡི་འོང་བསྐལ་པ་ལ། དེ་དག་ཐམས་ཅད་མཚན་འཐུན་རྒྱལ་བར་འགྱུར། །དེ་ཚེ་བདེ་གཤེགས་ཁྲག་ཁྲིག་དྲུག་ཅུའི་རྣམས། །འཇིག་རྟེན་སྒྲོན་མ་ཕྱོགས་སུ་གྲགས་པ་སྟེ། །དེ་དག་མིག་ནས་ཆོས་ནི་སྟོན་མཛད་ཅིང་། །ལྷ་དང་བཅས་པའི་འཇིག་རྟེན་འགྲེལ་པར་འགྱུར། །འཇིག་རྟེན་མཁས་པ་དེ་དག་རྣམས་ཀྱི་ཞིང་། །ཤིན་ཏུ་ཡངས་ཤིང་སྙིགས་མ་མེད་པར་འགྱུར། །དེ་ཚེ་ཁྲག་ཁྲིག་དྲུག་ཅུར་ཚངས་པ་ཡི། །རྒྱལ་བ་རྣམས་ཀྱིས་སྟོང་གསུམ་སྦྱོང་བར་འགྱུར། །དེ་དག་ངན་སོང་ཐམས་ཅད་སེལ་བར་མཛད། །དེ་དག་ཞིང་དེར་དགའ་བར་སྤྱོད་པར་འགྱུར། བརྟེན་པ་དེ་དག་མི་ཁོ་ཐམས་ཅད་སྦྱོང་། །བླ་ན་མེད་པའི་ཐེག་པ་སྟོན་པར་འགྱུར། །དེ་དག་ཚེ་ཡི་
ཚད་དུ་གྱུར་པ་ནི། །བསྐལ་པ་ཁྲག་ཁྲིག་དྲུག་ཅུ་ཚད་བར་ཡང་། །རྣམ་པར་འདྲེན་པ་དེ་དག་འཚོ་བར་འགྱུར། །ཆགས་པ་མེད་པའི་ཆོས་ཀྱང་སྟོན་པར་མཛད། །ཐུབ་པ་དེ་དག་མྱ་ངན་འདས་གྱུར་ཏེ། །འཇིག་རྟེན་མཁས་པ་རབ་ཏུ་ཞི་གྱུར་ནས། །བསྐལ་པ་ཁྲག་ཁྲིག་དྲུག་ཅུ་ཚང་བར་ནི། །རང་འབྱུང་རྣམས་ཀྱི་དམ་ཆོས་གནས་པར་འགྱུར། །བདེ་བར་གཤེགས་པ་དེ་དག་འགྲོ་བའི་ཚོགས། །གང་གཱའི་བྱེ་མ་སྙེད་ཀྱི་སྐྱེ་བོ་འདུལ། །དགྲ་ལས་རྒྱལ་བའི་རྒྱལ་བར་མཚན་འཐུན་འགྱུར། །ཞིང་དང་ཚེ་དང་ཆོས་གནས་འགྱུར་བའང་འཐུན། །བདེ་གཤེགས་དེ་དག་ཁྲག་ཁྲིག་དྲུག་ཅུ་ཡི། །སྐྱེས་པ་བུད་མེད་ཡོངས་སུ་སྨིན་མཛད་དེ། །བླ་ན་མེད་པའི་ཐེག་པས་འདེམས་པར་འགྱུར། །མཁས་པ་དེ་དག་རྒྱལ་བའི་གདུང་ཡང་འཛིན། །རྒྱལ་བས་ལྷ་མིན་དེ་དག་ལུང་བསྟན་པ། །འཇིག་རྟེན་ཕན་ཕྱིར་དྲང་སྲོང་ཆེན་པོས་གསུངས། །ལྷ་དང་བཅས་པའི་འཇིག་རྟེན་དེ་ཐོས་ནས། །ཡི་རངས་གྱུར་ཅིང་སྟོབས་ཀྱང་སྐྱེ་བར་འགྱུར། །ལྷ་མ་ཡིན་ལུང་བསྟན་པའི་ལེའུ་སྟེ། །བཞི་པའོ། །