ལྔ་པ། སྔོན་བྱུང་འོད་སྲུང་ཆེན་པོས་ཞུས་པའི་ལེའུ།
དེ་ནས་ཚེ་དང་ལྡན་པ་འོད་སྲུང་ཆེན་པོས་ལྷ་མ་ཡིན་གྱི་མཆོད་པ་རྣམ་པ་དེ་ལྟ་བུ་འདི་མཐོང་ནས་ངོ་མཚར་དུ་གྱུར་ཏེ། འདི་སྙམ་དུ་དེ་བཞིན་གཤེགས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་དགེ་བའི་རྩ་བ་ཅི་ལྟ་བུ་ཞིག་མངོན་པར་འདུ་མཛད་ན་འདི་ལྟ་བུ་འདི་མཐོང་ནས་ངོ་མཚར་དུ་གྱུར་ཏེ། འདི་སྙམ་དུ་དེ་བཞིན་གཤེགས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་དགེ་བའི་རྩ་བ་ཅི་ལྟ་བུ་ཞིག་མངོན་པར་འདུ་མཛད་ན་འདི་ལྟ་བུའི་རྣམ་པར་སྨིན་པ་གྲུབ་སྙམ་ནས། དེའི་ཚེ་སེམས་ཇི་ལྟར་མཉམ་པར་གཞག་པས་བསྐལ་པ་གྲངས་མེད་པ་ཡང་རྗེས་སུ་དྲན་ཞིང་བཅོམ་ལྡན་འདས་ཀྱིས་སྲིད་པའི་རྒྱུར་དེ་དང་དེར་འཆི་འཕོ་དང་སྐྱེ་བ་ན་དགེ་བའི་རྩ་བ་གང་དག་མངོན་པར་འདུ་མཛད་པ་དང་། དགེ་བའི་རྩ་བ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་དང་། དགེ་བའི་རྩ་བ་གང་གིས་ཕྱིར་མི་ལྡོག་པ་བརྙེས་པར་གྱུར་པ་དེ་དག་ཐམས་ཅད་རྗེས་སུ་དྲན་པར་འགྱུར་པ་དེ་ལྟ་བུའི་ཏིང་ངེ་འཛིན་ལ་མཉམ་པར་བཞག་གོ །དེ་ནས་ཚེ་དང་ལྡན་པ་འོད་སྲུང་ཆེན་པོས་བཅོམ་ལྡན་འདས་ཀྱི་དགེ་བའི་རྩ་བ་བདག་ཉིད་ཆེ་པོ་རྗེས་སུ་དྲན་པར་གྱུར་ནས་འདི་སྙམས་དུ་སེམས་ཏེ། བཅོམ་ལྡན་འདས་ཀྱིས་དགེ་བའི་རྩ་བ་བདག་ཉིད་ཆེན་པོ་དེ་ལྟ་བུ་མཛད་ན་དེའི་ཐུགས་བསྐྱེད་པ་གཅིག་ལ་ཡང་འཇིག་རྟེན་གྱི་ཁམས་གང་གཱའི་ཀླུང་གི་
བྱེ་མ་སྙེད་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་མིའི་ལུས་ཐོབ་པར་གྱུར་ཏེ། ལྷ་མ་ཡིན་གྱི་མཆོད་པ་ཇི་སྙེད་པ་དེ་སྙེད་དུ་སེམས་ཅན་རེ་རེས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་མཆོད་པ་བྱས་ཀྱང་དེ་དག་གིས་ཐུགས་བསྐྱེད་པ་གཅིག་ལ་ཡང་ལན་ལོན་པར་མི་ནུས་སོ་སྙམ་མོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་ཏིང་ངེ་འཛིན་དེ་ལས་ལངས་ཏེ། ངོ་མཚར་དང་དང་བ་ཐོབ་པར་གྱུར་ནས་དེའི་ཚེ་བཅོམ་ལྡན་འདས་ལ་ཚིགས་སུ་བཙད་དེ་མངོན་པར་བསྟོད་པ། །ཐུབ་པ་བྱང་ཆུབ་གཞོལ་བ་ཡི། །ཐུགས་བསྐྱེད་པ་ནི་རེ་རེ་ལའང་། །ལྷ་མ་ཡིན་གྱི་མཆོད་པ་འདིས། །ཚ་ཙམ་མི་སྤྱོད་མིའི་སེང་གེ །དེ་ལྟའི་ཡོན་ཏན་མཐར་ཕྱིན་ཏེ། ལྷ་དང་མི་ཡིས་མཆོད་གྱུར་པ། །ཙན་དན་ཕུར་མ་རི་རབ་ཙམ། །མི་མཆོག་ཁྱོད་ལ་མཆོད་པར་འོས། །མི་ཡི་སེང་གེ་ཁྱོད་ལ་ནི། །གང་གཱའི་བྱེ་མ་ཆེས་མང་བའི། །རྒྱ་མཚོ་རབ་ཏུ་བཀང་བ་ཡི། །སྤོས་ཆུང་དག་གིས་མཆོད་པར་འོས། །ཡོན་ཏན་ཆེན་པོ་མངའ་བ་ལ། །གང་གཱའི་བྱེ་མ་ཆེས་མང་བའི། །མེ་ཏོག་ཚོགས་ནི་རི་བོ་མཆོག །ཁོར་ཡུག་ཆེན་པོ་མཉམ་མཆོད་འོས། རྒྱལ་སྒྲོན་མ་རང་བྱུང་བ། །མར་མེའི་སྙིང་པོ་རི་རབ་ཙམ། །འབྲུ་མར་རྒྱ་མཚོའི་ཆུ་སྙེད་ཀྱི། །མར་མེ་རྣམས་ཀྱིས་མཆོད་པར་འོས། །མཐུ་ཆེན་མངའ་བ་དེ་ལྟ་བུར། །ཡོན་ཏན་ཕ་རོལ་ཕྱིན་གྱུར་པ། །གང་གཱའི་བྱེ་མ་ཆེས་མང་བའི། །མེ་ཏོག་མཆོད་རྟེན་མཆོད་པར་འོས། །མི་དབང་མཆོད་པས་ཐུགས་བརྩེ་བ། །རིན་ཆེན་གདུགས་ནི་ཆེ་རྣམས་ཀྱིས། །བསྐལ་པ་ཁྲག་ཁྲིག་རྣམས་སུ་ཡང་། །སེམས་ཅན་མཆོག་ལ་མཆོད་པར་འོས། །ཡོན་ཏན་མཐའ་ཡས་མངའ་བ་ཁྱོད། །རིན་པོ་ཆེ་ཡི་རྒྱལ་མཚན་གྱིས། །ཕྱོགས་བཅུའི་འཇིག་རྟེན་ཁམས་བཀང་སྟེ། །བསྐལ་པ་བསམ་ཡས་མཆོད་པར་འོས། །མི་ཡི་སེང་གེ་ཁྱོད་ལ་ནི། །བསྐལ་པ་ཁྲག་ཁྲིག་དཔག་མེད་པར། །གང་གཱའི་བྱེ་མ་ཆེས་མང་བའི། །བ་དན་ཚོགས་ཀྱིས་མཆོད་པར་འོས། །དྲང་སྲོང་ཆེན་པོ་སྨྲ་བའི་སྟག །ལྷ་རྣམས་དང་ནི་མི་དག་དང་། །གཞན་ཡང་སེམས་ཅན་གང་ཚོགས་པ། །བརྟག་བཟུང་དཔེ་ལ་གསན་དུ་གསོལ། །གལ་ཏེ་གང་གཱའི་བྱེ་སྙེད་ཀྱི། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །སེམས་ཅན་ཐམས་
ཅད་སངས་རྒྱས་སུ། །མི་མཆོག་སྟོབས་བཅུའི་སྟོབས་ལྡན་ལ། །དེ་དག་རེ་རེའི་མགོ་བོ་ཡང་། །གང་གཱའི་བྱེ་མ་སྙེད་གྱུར་ཏེ། །མགོ་བོ་དེ་དག་རེ་རེ་ཞིང་། །དེ་སྙེད་ཁ་དང་ལྡན་གྱུར་ལ། །ཁ་རྣམས་དེ་དག་རེ་རེ་ཞིང་། །ལྕེ་དང་ཁ་ཡི་གྲངས་མཉམ་ལ། །གང་གཱའི་ཀླུང་གི་བྱེ་སྙེད་ཀྱི། །བསྐལ་པར་བསྟོད་པར་བགྱིས་ཀྱང་ནི། །རྒྱལ་བ་དེ་དག་སྤོབས་མི་བས། །ཁྱོད་ཀྱི་ཡོན་ཏན་མཐར་མི་ཕྱིན། །རྒྱལ་བ་དེ་ལྟའི་ཡོན་ཏན་གྱི །ཕ་རོལ་ཏུ་ནི་ཕྱིན་པར་གྱུར། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། །དགེ་སློང་དག་ལེགས་སོ་ལེགས་སོ། །ངའི་ཉན་ཐོས་རྣམས་ནི་དབང་གྱུར་པ། །ཡེ་ཤེས་དང་ལྡན་བར་གྱུར་པ། ཆོས་སུ་གྱུར་པ། དབང་དུ་གྱུར་པ། ཚད་མར་གྱུར་པ་ཤ་སྟག་གནས་ཏེ། དེ་དག་ནི་ངའི་ཡོན་ཏན་གྱི་ཚོགས་ལ་འཇུག་པ་ཤ་སྟག་གོ །དེ་ཅིའི་ཕྱིར་ཞེ་ན། དགེ་སློང་དག་དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་དང་ལྡན་པ་སྟེ། ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དགེ་སློང་དག་དེ་བཞིན་གཤེགས་པའི་ཡོན་ཏན་རྣམས་དང་། དེ་བཞིན་གཤེགས་པའི་ཡོན་ཏན་གྱི་ཕ་རོལ་ཏུ་ཕྱིན་པ་དང་། དེ་བཞིན་གཤེགས་པའི་ཡོན་ཏན་གྱི་ཚོགས་ནི་བསམ་གྱིས་མི་ཁྱབ་བོ། །དགེ་སློང་དག་དེ་བཞིན་གཤེགས་པའི་ཡོན་ཏན་རྣམས་གཟུགས་ཅན་ཞིག་ཡིན་ན་ནི་སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་ཤོང་བར་མི་འགྱུར་ཏེ། སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱིས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གང་འདི་གྲངས་ཀྱིས་ཚད་གཟུང་བར་བརྗོད་ཀྱང་བརྗོད་པར་མི་ནུས། བསམས་ཀྱང་བསམ་པར་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་བསྐྱེད་པ་གང་ཡང་སེམས་ཅན་དུ་བསྡུ་བར་བསྡུས་པ་སེམས་ཅན་གང་ཇི་སྙེད་ཅིག་ཡོད་པའི་སེམས་ཅན་དེ་དག་ཐམས་ཅད་ལ་ཕན་པ་དང་བདེ་བའི་དོན་དུ་མ་བསྐྱེད་པ་གཅིག་ཀྱང་མེད་དེ། སེམས་ཅན་གྱི་ཁམས་ནི་ཚད་མེད་པས་སེམས་ཅན་གྱི་ཁམས་ཇི་སྙེད་པ་དེ་སྙེད་ཀྱི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ་། །སེམས་ཅན་གྱི་ཁམས་
ནི་མི་ཟད་པ་སྟེ། སེམས་ཅན་གྱི་ཁམས་ཇི་ལྟར་མི་ཟད་པ་དེ་ལྟར་མི་ཟད་པའི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ་། སེམས་དེ་ནི་སེམས་ཅན་ཐམས་ཅད་ལ་ཕན་པའི་དོན་དུ་སྐྱེས་པས་སེམས་ཅན་ཐམས་ཅད་ཀྱིས་མཆོད་ཀྱང་ལན་ལོན་པར་མི་ནུས་སོ། དེ་ཅིའི་ཕྱིར་ཞེ་ན། འཇིག་རྟེན་པའི་མཆོད་པ་ནི་ཟང་ཟིང་དང་བཅས་པ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་སེམས་ཅན་ཐམས་ཅད་ལ་ཕན་པའི་དོན་དུ་འབྱུང་བ་ནི་སེམས་ཅན་འཁོར་བ་ལ་གཞོལ་བ་འདི་དག་མྱ་ངན་ལས་འདས་པ་ལ། ཇི་ལྟར་གཞོལ་བར་འགྱུར་ཞེས་ཏེ་ཟང་ཟིང་མེད་པའི་ཕྱིར་རོ། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་ཀྱི་དོན་དུ་ཟང་ཟིང་མེད་པའི་སེམས་དཔག་ཏུ་མེད་པ་བསྐྱེད་པར་གྱུར་ཏོ། དགེ་སློང་དག་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད་པ། བགྲང་དུ་མེད་པ། བསམ་གྱིས་མི་ཁྱབ་པ། མཚུངས་པ་མེད་པ། གཞལ་དུ་མེད་པ། བརྗོད་དུ་མེད་པ་འདས་པ། དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབང་པོ་ཏོག་ཅེས་བྱ་བ་འཇིག་རྟེན་དུ་བྱུང་སྟེ། དགེ་སློང་དག་དེ་བཞིན་གཤེགས་པ་དབང་པོའི་ཏོག་དེས་སེམས་བསྐྱེད་པ་རེ་རེ་ཞིང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་རྣམས་ལ་ཕན་པར་དགོངས་པར་གྱུར་ཏེ་དོན་ཀྱང་མཛད་དོ། དེ་བཞིན་གཤེགས་པ་དབང་པོའི་ཏོག་གི་སངས་རྒྱས་ཀྱི་ཞིང་ཡང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ལ་སངས་རྒྱས་ཀྱི་ཞིང་གཅིག་ཏུ་གྱུར་ཏེ། ཡོངས་སུ་དག་ཅིང་ངན་སོང་དང་མི་ཁོམ་པ་ཐམས་ཅད་ཡོངས་སུ་ཆུད་པ་སྟེ། དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་ལོག་པར་ངེས་པའི་སེམས་ཅན་གྱི་སྐྱེ་བ་ཡོང་མེད་པར་གྱུར་ཏོ། ལྟ་བའི་རྣམ་པ་ཡོང་མེད་པར་གྱུར་ཏོ། །མངོན་པའི་ང་རྒྱལ་ཅན་ཡོང་མེད་པར་གྱུར་ཏོ། ལུས་དང་ངག་དང་། ཡིད་ཀྱི་ལས་ཀྱི་མཐའ་ཡོངས་སུ་དག་པ་དང་
ལྡན་པའི་སེམས་ཅན་ཡོང་མེད་པར་གྱུར་ཏོ། ངན་སོང་གི་རྒྱུར་འགྱུར་བའི་ཉོན་མོངས་པ་དང་ལས་འབྱུང་བ་ཡོང་མེད་པར་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དེས་ཡུན་རིང་པོ་ནས་སེམས་ཅན་རྣམས་དགེ་བའི་ཆོས་རྣམས་ལ་བཙུད་ཅིང་གཏམས་ཏེ་རྗེས་སུ་བསྟན་ཅིང་བསླབས་པའི་ཕྱིར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གིས་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ཀྱང་བདེ་བ་ལྔ་ཐོབ་པར་འགྱུར་ཏེ། འདི་ལྟར་ལ་ལ་ནི་འདོད་པའི་བདེ་བ་དང་ལྡན་པར་གྱུར་ཏོ། །ལ་ལ་ནི་ཁྱིམ་ནས་འབྱུང་བའི་བདེ་བ་དང་ལྡན་པར་གྱུར་ཏོ། །ལ་ལ་ནི་བསམ་གཏན་གྱི་བདེ་བ་དང་ལྡན་པར་གྱུར་ཏོ། །ལ་ལ་ནི་སྙོམས་པར་འཇུག་པའི་བདེ་བ་དང་ལྡན་པར་གྱུར་ཏོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བ་དང་ལྡན་པར་གྱུར་ཏེ། དེ་དག་བདེ་བ་དེ་ལ་ཡང་སྤྱོད་ལ། བདེ་བ་དེ་དག་ལ་ཡང་མངོན་པར་ཞེན་པ་མེད་པར་གྱུར་ཏོ། །འདི་ལྟ་སྟེ། དཔེར་ན་བུང་བ་མེ་ཏོག་གི་ཁུ་བས་ཉེ་པར་འཚོ་ཡང་དེ་ལ་མངོན་པར་ཞེན་པ་མེད་དོ། །དེ་བཞིན་དུ་སེམས་ཅན་དེ་དག་ཀྱང་བདེ་བ་དེ་ལ་ཡོངས་སུ་སྤྱོད་ཀྱང་དེ་ལ་མངོན་པར་ཞེན་པ་མེད་དོ། །འདི་ལྟ་སྟེ། དཔེར་ན་བར་སྣང་ལ་རྒྱུ་བའི་བྱ་ནི་བར་སྣང་ལ་ཡང་རྒྱུ་ལ་དེ་ལ་མངོན་པར་ཆགས་པ་ཡང་མེད་དོ། དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ལ་ཡིད་མི་བདེ་བར་འགྱུར་བའི་མི་དགའ་བ་མེད་རྨོངས་པར་འགྱུར་བ་མེད་དེ། གཞན་དུ་ན་ཡིད་བདེ་བ་ར་འགྱུར་བའི་དགའ་བ་ཤ་སྟག་ལ་ཡོངས་སུ་སྤྱོད་དེ། དེ་ནི་འདི་ལྟར་དགེ་བའི་རྩ་བ་དེ་ལྟ་བུ་བསྐྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། སེམས་ཅན་དེ་དག་ནི་དེ་བཞིན་གཤེགས་པ་དབང་པོའི་ཏོག་དེས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། མི་དགེ་བ་ལས་ཡོངས་སུ་བཟློག་སྟེ། དགེ་བ་ལ་བཙུད་པས་དེ་དག་ལ་ལས་གང་གིས་སྡུག་བསྔལ་གྱི་ཚོར་བ་མྱོང་བར་འགྱུར་བའི་རྣམ་པར་སྨིན་པར་དབང་མེད་པར་འབྱུང་བ་མི་དགེ་ལས་དེ་ལྟ་བུ་ཡོང་མེད་དེ། དེ་མ་བསག་པའི་ཕྱིར་སྡུག་བསྔལ་ཚོར་བར་འགྱུར་བའི་རྣམ་པར་སྨིན་པ་མི་
འབྱུང་ངོ་། དེ་དག་གིས་རྨོངས་པའི་སེམས་ཙམ་གྱིས་ཀྱང་ལས་གང་གིས་རྨོངས་པ་རྣམས་ལ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འབྱུང་བར་འགྱུར་བ་དེ་ལྟ་བུ་མངོན་པར་འདུ་མ་བྱས་ཏེ། དེ་མ་བསགས་པའི་ཕྱིར་རྨོངས་པར་འགྱུར་བའི་ཚོར་བ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་དེ་མི་འབྱུང་ངོ་། དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་རྒྱུ་གང་གིས་སེམས་ཅན་དེ་དག་དུས་གྱུར་པ་ལས་བྱུང་བའི་སྡུག་བསྔལ་མི་འབྱུང་བས་ཉམས་སུ་མི་བདེ་བའི་ཉི་མ་མི་འཆར་རོ། །རླུང་ཉམས་སུ་མི་བདེ་བ་མི་ལྡང་ངོ་། །ཆར་ཉམས་སུ་མི་བདེ་བ་མི་འབབ་བོ། །དེ་བཞིན་གཤེགས་པ་དབང་པོའི་ཏོག་དེ་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པའི་ཚེ་སེམས་ཅན་དེ་དག་ལ་ལུས་དང་། ངག་དང་། ཡིད་ཀྱི་ལས་ཐམས་ཅད་ཤེས་པ་མངོན་དུ་འགྲོ་ཞིང་ཤེས་པའི་རྗེས་སུ་འབྲང་བར་བསྟན་ཅིང་བཤད་པས་སེམས་ཅན་དེ་དག་གིས་ཀྱང་བྱང་ཆུབ་སེམས་དཔའ་དེ་ལ་བསྟན་པ་དེ་ཐོས་ནས་ལུས་དང་། ངག་དང་། ཡིད་ཀྱི་ལས་ཐམས་ཅད་ཤེས་པ་མངོན་དུ་འགྲོ་ཞིང་ཤེས་པའི་རྗེས་སུ་འབྲང་བར་ཡོངས་སུ་བསྒྲུབས་པས་ལས་དེའི་རྣམ་པར་སྨིན་པས་དེ་དག་ལ་རྨོངས་པར་འགྱུར་བའམ་ཡིད་མི་དགའ་བར་འགྱུར་བ་མེད་དོ། རྨོངས་པ་རྣམས་ལ་རྒྱུ་གང་གིས་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པའི་ཚོར་བ་འབྱུང་བ་མེད་དོ། དེ་ལྟར་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་སྡུག་བསྔལ་གྱི་ཚོར་བ་མེད་ཅིང་བདེ་བ་ཡང་མ་ཡིན་སྡུག་བསྔལ་ཡང་མ་ཡིན་པ་མེད་དོ། སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་དེ་བཞིན་གཤེགས་པ་དེས་གཏམས་པ་དེ་དག་ནི་ཆོས་ལ་རིམ་གྲོ་བྱ་བ་ཆེན་པོས་ཉེ་བར་གནས་པར་འགྱུར་རོ། །དེ་དག་འཆག་ན་ཡང་ཆོས་ཉིད་ལ་སེམས་ཤིང་ཆོས་ལ་མོས་པས་ཞེན་པ་ཡིས་ཀྱིས་འཆག་སྟེ། ཆོས་ལ་མོས་ཤིང་ཞེན་པའི་ཡིད་ཀྱིས་འཆག་པ་དེ་དག་ལ་སྡུག་བསྔལ་གྱི་ཚོར་བ་མི་འབྱུང་ངོ་། དེ་བཞིན་དུ་འགྲེང་པ་དང་། འདུག་པ་དང་། ཉལ་བ་དང་། སད་པ་དང་། སྤྱོད་ལམ་ཐམས་ཅད་དུ་སྡུག་བསྔལ་མི་འབྱུང་ངོ་། །སངས་རྒྱས་ཀྱི་ཞིང་དེའི་སེམས་ཅན་དེ་དག་ལ་ཡང་མ་སྤངས་པ་མེད་དེ། དེའི་ཕྱིར་ཡང་བ་མ་སྤངས་པའི་སྡུག་བསྔལ་གྱི་ཚོར་བ་མི་འབྱུང་
ངོ་། །ཡང་དག་པའི་སྤང་པ་ཡོད་པས་དེ་དག་ལ་སྐྱོ་བ་མེད་དེ། དེའི་ཕྱིར་དེ་དག་ལ་ཡང་དག་པར་སྤང་བར་བྱ་བའི་སྡུག་བསྔལ་ཡང་མེད་དོ། །སེམས་ཅན་དེ་དག་འགྱུར་བའི་སྡུག་བསྔལ་ཡང་མེད་དེ། དེ་ནི་འདི་ལྟར་སེམས་ཅན་དེ་དག་ཆོས་ཐམས་ཅད་ལ་མངོན་པར་ཞེན་པ་མེད་པའི་ཕྱིར་རོ། དེ་དག་མི་སྡུག་པ་དང་ཕྲད་པའི་སྡུག་བསྔལ་ཡང་མེད་དེ། དེ་ནི་འདི་ལྟར་སེམས་ཅན་དེ་དག་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་ཉེ་བར་གནས་པའི་ཕྱིར་རོ། །དེ་དག་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དེ། དེ་ཅིའི་ཕྱིར་ཞེ་ན། འདི་ལྟར་དེ་དག་ཆོས་ཐམས་ཅད་ལ་མངོན་པར་ཞེན་པ་མེད་པའི་ཕྱིར་རོ། སྡུག་པ་དང་བྲལ་བའི་སྡུག་བསྔལ་ནི་སྡུག་པ་ལས་འབྱུང་སྟེ། དེའི་ཕྱིར་དེ་དག་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དོ། སེམས་ཅན་དེ་དག་ལ་སྡུག་བསྔལ་བའི་སྡུག་བསྔལ་ཡང་མི་འབྱུང་སྟེ། འདི་ལྟར་དེ་ན་སྡུག་བསྔལ་གྱི་ཚོར་བ་རྒྱུ་བ་མེད་པའི་ཕྱིར་རོ། གཞན་དུ་ན་འདུ་བྱེད་ཀྱི་སྡུག་བསྔལ་གཅིག་པུ་ཡོད་དེ། འདི་ལྟ་སྟེ། མི་རྟག་པའི་སྡུག་བསྔལ་ཉིད་དོ། དེ་བཞིན་གཤེགས་པ་དེ་ནི་དོན་དམ་པའི་ཆོས་སྟོན་ཏོ། དེ་བཞིན་གཤེགས་པ་དབང་པོའི་ཏོག་དེ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཞུགས་པའི་ཚེ་དེས་གསུངས་པའི་ཕྱིར་སྨྲ་བའི་སེམས་ཅན་གང་ཡང་སངས་རྒྱས་ཀྱི་ཞིང་དེར་མ་བྱུང་སྟེ། དེ་ནི་འདི་ལྟར་སྔོན་སེམས་ཅན་དེ་དག་ལེགས་པར་ཡོངས་སུ་སྨིན་པར་བྱས་པའི་ཕྱིར་རོ། དགེ་སློང་དག་དེ་ལ་ཇི་སྙམ་དུ་སེམས། དགེ་བའི་རྩ་བ་བཞན་པ་དང་། དམའ་བ་དང་། ཞུམ་པ་དང་། ཆུད་པ་དང་། སྡུག་བསྔལ་གྱིས་ཡོངས་སུ་བསྒྲུབས་པ་དང་། སྡུག་བསྔལ་དང་འདྲེས་པ་དང་། སྡུག་བསྔལ་དང་ལྡན་པ་དང་། སྡུག་བསྔལ་གྱིས་ཡོངས་སུ་བཟུང་བ་དང་། ཉེས་པར་བསམས་པ་དང་། ཉེ་བར་བསྒྲུབས་པའི་དགེ་བའི་རྩ་བས་སེམས་ཅན་དེ་སྙེད་ཅིག་དོན་བྱ་བའམ། དེ་དག་ཕན་པར་བསམས་པའམ། བདེ་བ་བསྒྲུབས་པའམ། སྡུག་བསྔལ་བསལ་བའམ། དེ་ལྟར་ཐག་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་
སྩལ་པ། དགེ་སློག་དག་དེ་ལ་ཇི་སྙམ་དུ་སེམས། སེམས་ཞན་པ་དང་། སེམས་དམའ་བ་ནས་ཉེ་བར་བསྒྲུབས་པའི་བར་གྱི་སེམས་ཀྱིས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ཕན་པར་བསམ་པའམ། བདེ་བར་བསྒྲུབ་པའམ། སྡུག་བསྔལ་བསལ་པ་འམ། དེ་ལྟར་ཐག་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། བཀའ་སྩལ་པ། དགེ་སློག་དག་དེ་ལ་ཇི་སྙམ་དུ་སེམས། དད་པ་ཞན་པ་ནས་ཉེས་པར་བསྒྲུབས་པའི་དད་པའི་བར་དང་། ཚུལ་ཁྲིམས་ཞན་པ་ནས་ཉེས་པར་བསྒྲུབས་པའི་ཚུལ་ཁྲིམས་ཀྱི་བར་དང་། ཐོས་པ་ཞན་པ་ནས་ཉེས་པར་བསྒྲུབས་པའི་ཐོས་པའི་བར་དང་། བརྩོན་འགྲུས་ཞན་པ་ནས་ཉེས་པར་བསྒྲུབས་པའི་བརྩོན་འགྲུས་ཀྱི་བར་དང་། དྲན་པ་ཞན་པ་ནས་ཉེ་བར་བསྒྲུབས་པའི་དྲན་པའི་བར་དང་། ཏིང་ངེ་འཛིན་ཞན་པ་ནས་ཉེས་པར་བསྒྲུབས་པའི་ཏིང་ངེ་འཛིན་གྱི་བར་དང་། ཤེས་རབ་ཞན་པ་ནས་ཉེས་བར་བསྒྲུབས་པའི་ཤེས་རབ་ཀྱིས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བ་བསྒྲུབ་པའམ། སྡུག་བསྔལ་བསལ་བའམ། དེ་ལྟར་ཐག་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའོ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་བ་བཅོམ་ལྡན་འདས་དེ་ནི་མ་ལགས་སོ། བཅོམ་ལྡན་འདས་ཀྱིས་བཀའ་སྩལ་པ། དགེ་སློག་དག་ལེགས་སོ་ལེགས་སོ། དེ་ནི་དགེ་བའི་རྩ་བ་ཞན་པ་དང་། སེམས་ཞན་པ་དང་། དད་པ་དང་། ཚུལ་ཁྲིམས་དང་། ཐོས་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཞེན་པ་དང་། དམའ་བ་དང་། ཞུམ་པ་དང་། ཆུང་བ་དང་། སྡུག་བསྔལ་གྱིས་ཡོངས་སུ་བསྒྲུབས་པ་དང་། སྡུག་བསྔལ་དང་འདྲེས་པ་དང་། སྡུག་བསྔལ་དང་ལྡན་པ་དང་། སྡུག་བསྔལ་གྱིས་ཡོངས་སུ་བཟུང་བ་དང་། ཉེས་པར་བསམས་པ་དང་། ཉེས་པར་བསྒྲུབས་པའི་ཤེས་རབ་ཀྱིས་སེམས་ཅན་དེ་སྙེད་ཀྱི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བར་
བསྒྲུབས་པའམ། སྡུག་བསྔལ་བསལ་བའམ། དེ་ལྟར་ཐག་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་མི་ནུས་སོ། དགེ་སློག་དག་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་དེ་བཞིན་གཤེགས་པ་དབང་པོའི་ཏོག་ཅེས་བྱ་བ་བྱུང་བ་དེ་གང་ཞིག་ཡིན་སྙམ། དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་ཅང་མི་ཟེར་བར་འཁོད་དོ། དེའི་ཚེ་ཤར་ཕྱོགས་ལོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་ཞེས་བྱ་བ་ཡོད་དོ། དེ་ན་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། དེར་འཇམ་དཔལ་གཞོན་ནུར་གྱུར་པ་འདུས་ཤིང་འདུག་པར་གྱུར་པ་དེས་བཅོམ་ལྡན་འདས་ཀྱི་དགོངས་པ་སེམས་ཀྱིས་ཤེས་ནས། བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་ཤཱཀྱ་ཐུབ་པ་ཆོས་སྟོན་གྱིས། བཅོམ་ལྡན་འདས་ཤཱཀྱ་ཐུབ་པ་དེ་ལ་བསྙེན་བཀུར་བགྱི་བའི་སླད་དུ་བདག་ཀྱང་མཆིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེའི་དུས་ལ་དབབ་པར་ཤེས་ན་སོང་ཤིག །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོའི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས། འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་པ་ལས་བསྐུམ་པ་ཙམ་གྱིས་འཇམ་དཔལ་གཞོན་ནུར་གྱུར་པ་འཇིག་རྟེན་གྱི་ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་དེ་ནས་མི་སྣང་བར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔར་འདིར་གནས་པར་གྱུར་ཏོ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་འཇམ་དཔལ་གཞོན་ནུར་
གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་ཀྱིས་གང་འདི་སྐད་དུ་དགེ་སློག་དག་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་དེ་བཞིན་གཤེགས་པ་དབང་པོའི་ཏོག་ཅེས་བྱ་བ་བྱུང་བ་དེ་གང་ཞིག་ཡིན་སྙམ་ཞེས་བཀའ་སྩལ་པ་ནི་བཅོམ་ལྡན་འདས་ཉིད་ནི་དེའི་ཚེ་དེའི་དུས་ན་དབང་པོ་ཏོག་ཅེས་བགྱི་བའི་དེ་བཞིན་གཤེགས་པར་གྱུར་ཏོ། དེ་ཅིའི་སླད་དུ་ཞེ་ན། འདི་ལྟར་བཅོམ་ལྡན་འདས་ནི་བསམ་གྱིས་མི་ཁྱབ་པའི་ཐབས་མཁས་པ་དང་ལྡན་པ་སྟེ། སེམས་ཅན་ཡངས་སུ་སྨིན་པར་བགྱི་བ་ལ་ཆོག་པ་མི་མངའ། སངས་རྒྱས་ཀྱི་ཞིང་ཡོངས་སུ་དག་པར་བགྱི་བ་ལ་རྒྱུན་ཆད་པར་བགྱི་བ་མ་མཆིས། སེམས་ཅན་རྣམས་བྱང་ཆུབ་སེམས་དཔའི་ཆོས་རྣམས་ལ་དགོད་པས་ཆོག་པ་མི་མངའ་སྟེ། ལ་ལ་ཞིག་ཡང་དག་པར་སྨྲ་བས་ཡང་དག་པར་སྨྲ་ན། རྒྱལ་བ་གཙོ་བོ། རྒྱལ་བ་དམ་པ། རྒྱལ་བ་རྒྱ་མཚོ། རྒྱལ་བ་རབ་ཅེས་བརྗོད་པ་དེ་ནི་བཅོམ་ལྡན་འདས་ཉིད་ལགས་པར་ཡང་དག་པར་བརྗོད་པས་ཡང་སེམས་ཅན་ཡོངས་སུ་སྨིན་མཛད་ཕྱིར། །དཔའ་པོ་ཆེན་པོ་རྣམ་པར་འཕྲུལ། །བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་ཆོག་པའི་འདུ་ཤེས་བསལ། །བྱང་ཆུབ་མཆོག་ཏུ་ཐུགས་ཀྱང་འཇུག །སྟོང་གསུམ་དྲུག་ཅུ་རྩ་གཅིག་གི །སངས་རྒྱས་ཞིང་རྣམས་དག་མཛད་པས། །ཇི་ལྟར་ཐུབ་པ་ཐབས་མཁས་པ། །རྒྱལ་བ་ཁྱོད་ནི་ཀུན་གྱིས་འཚལ། །ད་དུང་དང་པོ་ཐུགས་བསྐྱེད་པར། །དེ་དང་དེར་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པ་མཛད། །རྣམ་པ་སྣ་ཚོགས་གཟུགས་རྣམས་ཀྱིས། །གང་ཟག་མཆོག་ནི་སྤྱོད་པ་མཛད། །ཆོས་ཀྱི་དབྱིངས་ལ་ཆགས་མི་མངའ། །ཁྱོད་ཀྱི་གང་ཡང་མཁྱེན་མཛད་དེ། །བརྒྱ་བྱིན་ཚངས་པའི་ཆ་བྱད་དང་། །ལ་ལར་བདུད་ཀྱིས་ཆ་བྱད་ཀྱིས། །སེམས་ཅན་རྣམས་ཀྱིས་དོན་མཛད་དེ། །འཇིག་རྟེན་
རྣམས་ཀྱིས་རྟོགས་མི་ནུས། །བུད་མེད་ཆ་བྱད་སྤྱོད་པ་མཛད། །དུད་འགྲོའི་སྐྱེ་གནས་རྣམས་ནའང་གདའ། །འཇིག་རྟེན་ཆོས་ཀྱིས་མི་གོས་ཏེ། །པད་མ་ཆུས་མི་ཆགས་པ་བཞིན། །འདྲེན་པ་སྣ་ཚོགས་ཁམས་ཅན་གྱི །འཇིག་རྟེན་འདི་ཡི་རྗེས་འཇུག་མཛད། །དེས་ན་སྐྱེས་དགུ་འདི་དག་རྣམས། །གདུགས་མཚན་ཁྱོད་ཀྱི་ཡོན་ཏན་བརྗོད། །ལ་ལར་བལྟམ་པ་ཡོངས་སུ་བསྟན། །ལ་ལར་མྱ་ངན་འདས་པ་བསྟན། །ལ་ལ་ན་ནི་འཁོར་ལོ་བསྐོར། །ལ་ལར་སྤྱད་པ་སྤྱོད་པ་མཛད། །སེམས་ཅན་འདུལ་བའི་དོན་སླད་དུ། །དགྱེས་ཤིང་མགུར་ལེན་རོལ་པ་མཛད། །བཤུམས་མོ་དག་ཀྱང་འབྱིན་པར་མཛད། །སེམས་ཅན་སུས་ཀྱང་ཡོང་མ་འཚལ། །འདོད་ཆགས་མི་མངའ་ཆགས་པའི་ཚུལ། །འཇིགས་པ་མི་མངའ་འཇིགས་པ་ལྟར། །སེམས་ཅན་རྣམ་པར་གདུལ་དོན་དུ། །འདྲེན་པ་རྣམ་པར་འཕྲུལ་པ་མཛད། །རྨོངས་མེད་རྨོངས་པའི་ཚུལ་བསྟན་ཏེ། །བྱིས་པ་མ་ལགས་བྱིས་ཚུལ་གྱིས། །སེམས་ཅན་རྣམ་པར་གདུལ་སླད་དུ། །འདྲེན་པ་རྣམ་པར་འཕྲུལ་པ་མཛད། །སྨྱོས་པ་མ་ལགས་སྨྱོས་པའི་ཚུལ། །ཞ་བ་མ་ལགས་ཞ་བ་ལྟར། །རྣམ་པར་འཕྲུལ་པ་སྣ་ཚོགས་ཀྱིས། །སེམས་ཅན་རྣམས་ནི་འདུལ་བ་མཛད། །དེ་ལྟར་བསམ་ཡས་མགོན་པོ་ཁྱོད། །དམ་པའི་ཆོས་ཀྱང་བསམ་མི་ཁྱབ། །དཔའ་ཆེན་ཁྱོད་ལ་ཕྱག་ཀྱང་འཚལ། །སེམས་ཅན་ཐུབ་ཆེན་འདྲར་གྱུར་ཅིག །སྔོན་བྱུང་བ་འོད་སྲུང་ཆེན་པོས་ཞུས་པའི་ལེའུ་སྟེ་ལྔ་པའོ། །