བརྒྱད་པ། ཀླུ་ལུང་བསྟན་པའི་ལེའུ།
དེ་ནས་ཀླུའི་བུ་མོ་དེ་དག་གི་མཆོད་པ་ཡང་མཐོང་། །ལུང་བསྟན་པ་ཡང་ཐོས། ཡོངས་སུ་རྫོགས་པར་ཡང་རིག་ནས་ཀླུའི་རྒྱལ་པོ་དགའ་བོ་དང་། ཉེ་དགའ་ལ་སོགས་པ་ཀླུ་བྱེ་བ་ཕྲག་དགུ་བཅུ་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་དེ་སེམས་ཅན་ཐམས་ཅད་ཀྱི་བསམ་པ་མཁྱེན་ཅིང་བཅོམ་ལྡན་འདས་དེ་ལ་མི་མཁྱེན་པ་འམ། མ་གཟིགས་པའམ། མ་གསན་པའམ། མངོན་དུ་མ་མཛད་པ་གང་ཡང་མེད་ཅིང་བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། རིགས་ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་ཀྱིས་རང་གིས་རིག་པར་བྱ་བ་ནི་ངོ་མཚར་རྨད་དུ་བྱུང་བ་སྟེ། དེ་བཞིན་གཤེགས་པ་དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་མངའ་བའོ། །འདི་ལྟར་བུད་མེད་དུ་གྱུར་པ། རྒོད་པ། མི་བརྟན་པ། མི་གནས་པ་རྣམས་ཀྱིས་བཅོམ་ལྡན་འདས་ཀྱིས་ཆོས་བསྟན་པ་ཡོངས་སུ་ཤེས་པ་དང་། དེ་ལྟར་བཅོམ་ལྡན་འདས་ཀྱི་སློབ་མ་དགེ་འདུན་ཡང་ལེགས་པར་ཞུགས་པ་། དྲང་པོར་ཞུགས་པ། རིགས་པར་ཞུགས་པ། འཐུན་པར་ཞུགས་པ། འདི་ལྟར་བུད་མེད་དུ་གྱུར་བ་འདོད་ཆགས་དང་། ཞེ་སྡང་དང་། གཏི་མུག་མི་ཟད་པ་དང་ལྡན་པ་རྣམས་ཀྱང་། བཅོམ་ལྡན་འདས་ཀྱི་གསུང་རབ་ལ་འཇུག་པ་ནི་ངོ་མཚར་ཆེའོ་སྙམ་སྟེ། ངོ་མཚོར་ཐོབ་པ་དེ་དག་གིས་བཅོམ་ལྡན་འདས་ལ་མཆོད་པའི་ཕྱིར་འཛམ་བུའི་གླིང་རྒྱ་མཚོའི་རིའི་མཐས་གཏུགས་པ་ཐམས་ཅད་སྤོས་ཀྱི་སྤྲིན་ཆེན་པོས་ཀུན་ནས་ཡོག་པར་བྱས་ཏེ། ཐམས་ཅད་དང་ལྡན་པའི་འཇིག་རྟེན་འདི་སྤོས་ཀྱི་ངད་ཀྱིས་ཁྱབ་པར་བྱས་སོ། །སྤོས་ཀྱི་དྲིའི་ངད་དེས་ཀྱང་སངས་རྒྱས་ཀྱི་ཞིང་ཐམས་ཅད་རྒྱས་པར་གང་བར་གྱུར་ནས། སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། བཅོམ་ལྡན་འདས་ལ་མཆོད་པ་བྱ་བའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱང་དཔག་ཚད་དྲུག་ཅུ་ཚུན་ཆད་མུ་ཏིག་དམར་པོས་པུས་མོས་ནུབ་ཙམ་དུ་རྒྱས་པར་གང་བར་བྱས་སོ། །ནྱ་གྲོ་དྷཱའི་ཀུན་དགའ་བ་དེ་ཡང་རིན་ཐང་མེད་པའི་ནོར་བུ་རིན་པོ་ཆེས་ཚལ་བར་བཀང་ངོ་། ཀླུའི་མེ་ཏོག་གི་འདུན་ཁང་རྒྱར་དཔག་ཚད་དྲུག་ཅུ་ཡོད་པ། རིན་པོ་ཆེ་སྣ་བདུན་གྱིས་ཀ་བ་དང་ལྡན་པ་དག་མངོན་པར་སྤྲུལ་ཏོ། །ཀླུའི་རོལ་མོ་སིལ་སྙན་དཔག་ཏུ་མེད་པ་དག་ཀྱང་
མངོན་པར་སྤྲུལ་ཏེ་སྒྲ་ཕྱུང་ངོ་། །ཀླུའི་མེ་ཏོག་གི་འདུན་ཁང་དེ་ལ་ཡང་མེ་ཏོག་རྣམ་པ་སྣ་ཚོགས་ཀྱི་ལྡ་ལྡི་བྱེ་བ་ཕྲག་དགུ་བཅུ་བྲེས་སོ། །རིན་པོ་ཆེ་སྣ་བདུན་གྱི་ཀ་བ་དེ་དག་ཀྱང་བཻ་དཱུ་ཪྻའི་དྲ་བས་ལེགས་པར་བརྒྱན་ཏོ། །འདུན་ཁང་དེའི་གཞི་ཡང་རིན་ཐང་མེད་པའི་ནོར་བུ་རིན་པོ་ཆེས་ཡོག་པར་བྱས་པར་གྱུར་ཏོ། །འདུན་ཁང་དེའི་གཞི་ནི་འཇམ་པ་བསྒྱུར་དུ་རུང་བ་སྟེ། འདི་ལྟ་སྟེ། དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་རྡོ་ལེབ་ཨར་མོ་ནིག་ལྟར་འཇམ་པ་ཁ་དོག་བཻ་དཱུ་ཪྻ་ལྟར་འདུག་པ། ཀ་ཙལན་དི་ཀ་ལྟར་རེག་ན་བདེ་བ། ཉམས་དགའ་བ། སེམས་ཅན་མཐོང་བ་རྣམས་ཀྱི་མྱིག་མྱ་ངན་ལས་འདས་བར་འགྱུར་བ། མི་དང་ལྷ་རྣམས་ཀྱི་ཡིད་དུ་འོང་བ་ལྟ་བུའོ། །ནོར་བུ་རིན་པོ་ཆེ་སྣ་ཚོགས་དེ་དག་གི་ནང་ནས་ནོར་བུ་ལ་ལ་ལས་ནི་མེ་འབྱུང་། ལ་ལས་ནི་ཆུ་འབྱུང་བ་ཤ་སྟག་སྟེ། དེ་ལ་ལ་ལ་ལ་ལས་ནི་ཆུ་ཁ་དོག་སྔོན་པོ་འབྱུང་། ལ་ལ་ལས་ནི་ཆུ་ཁ་དོག་སེར་པོ་འབྱུང་། ལ་ལ་ལས་ནི་ཆུ་ཁ་དོག་དམར་པོ་འབྱུང་། ལ་ལ་ལས་ནི་ཆུ་ཁ་དོག་དཀར་པོ་འབྱུང་། །ལ་ལ་ལས་ནི་ཆུ་ཁ་དོག་སྣ་ཚོགས་འབྱུང་ངོ་། ནོར་བུ་ལ་ལ་ལས་ནི་བདེ་བར་བསིལ་བའི་རླུང་འབྱུང་། ནོར་བུ་ལ་ལ་ལས་ནི་དེ་མ་ཡིན་པའི་ཡོད་བྱད་གཞན་དག་བསམ་པ་བཞིན་དུ་འབྱུང་། ལ་ལ་ནི་སྣུམ་གྱི་བྱ་བ་བྱེད། ལ་ལ་ནི་མེ་ལོང་གི་བྱ་བ་བྱེད་དེ་འཁོར་དེ་དག་ཐམས་ཅད་ཀྱང་ནོར་བུ་རིན་པོ་ཆེ་དེའི་ནང་དུ་སྣང་བར་གྱུར་ཏོ། །སེར་སྐྱའི་གནས་ན་སེམས་ཅན་གང་ཇི་སྙེད་ཅིག་རྒྱུ་བ་དེ་དག་ཐམས་ཀྱང་ནོར་བུ་རིན་པོ་ཆེ་དེ་དག་གི་ནང་དུ་སྣང་བར་གྱུར་ཏེ། ཐམས་ཅད་ལྡན་པའི་འཁོར་གྱིས་བཅོམ་ལྡན་འདས་རྣམ་པར་སྤྲུལ་པའི་ཆོས་འཕྲུལ་དེ་དག་རྣམ་པར་སྤྲུལ་པ་མཛད་པ། ཉན་ཐོས་ཀྱི་དགེ་འདུན་དང་བཅས་པ་ཡང་ནོར་བུ་རིན་པོ་ཆེ་དེ་དག་གི་ནང་ན་བཞུགས་པར་མཐོང་བར་གྱུར་ཏོ། འདུན་ཁང་གི་གཞི་དེའི་འོག་ནས་ཀྱང་ཀླུའི་མཐུས་གདུགས་རྣམ་པ་སྣ་ཚོགས་མངོན་པར་འཐོན་པར་གྱུར་ཏོ། རྒྱལ་མཚན་རྣམ་པ་སྣ་ཚོགས་དང་། བ་དན་རྣམ་པ་སྣ་ཚོགས་དང་། མེ་ཏོག་གི་ལྡ་ལྡི་རྣམ་པ་སྣ་ཚོགས་དང་། སྤོས་ཀྱི་ལྡ་ལྡི་རྣམ་པ་སྣ་ཚོགས་དང་། རིན་པོ་ཆེའི་ལྡ་ལྡི་རྣམ་པ་སྣ་ཚོགས་དང་། མུ་ཏིག་གི་ཕྲེང་བ་རྣམ་པ་སྣ་ཚོགས་དང་། མེ་ཏོག་བརྩེག་མའི་ལྡ་ལྡི་རྣམ་པ་སྣ་ཚོགས་དང་། རྟ་རྣམ་པ་སྣ་ཚོགས་དང་། དྲིལ་བུ་གཡར་ཀའི་དྲ་བ་རྣམ་པ་སྣ་ཚོགས་ཀྱང་འཐོན་པར་གྱུར་ཏོ། དེ་ནས་ཀླུའི་རྒྱལ་པོ་དགའ་བོ་དང་། ཉེ་དགའ་བོ་ལ་སོགས་པ་ཀླུ་
བྱེ་བ་ཕྲག་དགུ་བཅུས་རྟ་དེ་རྣམས་སྔོན་དུ་དཀྲི་སྟེ་རྐང་གིས་དོང་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ནོར་བུ་རིན་པོ་ཆེ་ཀ་ཙལན་དི་ཀ་ལྟར་རེག་བ་བདེ་བ་བདག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །འདུན་ཁང་གི་གཞི་དེ་ནས་རིན་པོ་ཆེ་གང་དག་མངོན་པར་འཐོན་པ་དེ་དག་ཐམས་ཅད་ཀྱང་། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པའི་སྟེང་་དུ་ཆར་བཞིན་དུ་བབ་པར་འགྱུར་ཏོ། ཀླུའི་རོལ་མོ་སིལ་སྙན་དཔག་ཏུ་མེད་པ་དེ་དག་ཀྱང་སྟེང་གི་བར་སྣང་ལས་སྒྲ་འབྱིན་པར་གྱུར་ཏོ། །དེ་ནས་ཀླུ་བྱེ་བ་ཕྲག་དགུ་བཅུ་པོ་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ། ཅང་མི་ཟེར་བར་བཅོམ་ལྡན་འདས་རྣམ་པས་རྗེས་སུ་དྲན་པར་བྱེད་ཅིང་མིག་མི་འཛུམས་པར་ལྟ་ལ། འདི་ལྟར་སངས་རྒྱས་ཀྱི་ཡོན་ཏན་འདོད་པའི་ཕྱིར་ལྷག་པའི་བསམ་པས་བྱང་ཆུབ་ཏུ་ཡང་དག་པར་ཞུགས་པར་གྱུར་ཏོ། དེ་ནས་དེ་དག་གིས་ཅུང་ཟད་ཅིག་ཏུ་མི་སྨྲ་བར་བཅོམ་ལྡན་འདས་ཀྱི་ཡོན་ཏན་རྗེས་སུ་དྲན་པར་བྱས་ནས་སོ་སོ་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཡན་ལག་ལྔས་ཕྱག་འཚལ་ནས་ཚིགས་སུ་བཅད་པ་དག་གིས་མངོན་པར་བསྟོད་པ། །མཚན་བརྒྱ་རྫོགས་པ་བརཏལ་ཞུགས་ལེགས་སྤྱད་པ། །དཀའ་ཐུབ་དགྱེས་པ་དྲི་མེད་ཐུགས་རྗེ་ཅན། །རིན་ཆེན་འབྱུང་གནས་བཅས་པའི་ས་སྤངས་ཏེ། བདེ་གཤེགས་ཁྱོད་ནི་གྲོང་ཁྱེར་མངོན་པར་བྱུང་། །ལོ་དྲུག་བར་དུ་དཀའ་ཐུབ་དཀའ་མཛད་དེ། །རྒྱལ་བ་ཁྱོད་ཀྱིས་བདུད་རྩི་མ་བརྙེས་ཀྱང་། །བདེ་གཤེགས་ཁྱོད་ཀྱི་ཐུགས་ནི་ཞུམ་མ་གྱུར། །ཐུབ་པ་ཁྱོད་ཀྱིས་བྱང་ཆུབ་ཐུགས་ཀྱིས་སྤྱད། །ཇི་ལྟར་འདྲེན་པ་ལྷ་མིའི་བླ་མ་ཁྱོད། །འགྲོ་ལ་ཕན་བཞེད་དཀའ་ཐུབ་སྤྱད་མཛད་དེ། །འཇིག་རྟེན་མགོན་པོ་སྡུག་བསྔལ་བཏང་གྱུར་པ། །དེ་ཐོས་པས་ཀྱང་བདག་ཅག་ཡིད་མི་དགའ། །ཐུབ་པ་དབུ་དང་སྤྱན་ནི་བཏང་བ་དང་། །བྱང་ཆུབ་སེམས་ནི་ཇི་ལྟར་བསྒྲུབ་མཛད་པ། །བདེ་བར་གཤེགས་ཀྱི་དཀའ་སྤྱད་ཐོས་གྱུར་ན། །དེ་ཐོས་པས་ཀྱང་བདག་ཅག་བདེ་མི་འགྱུར། །གང་ཚེ་ཀ་ལིང་རྒྱལ་པོས་བཟོད་སྨྲ་བའི། །ཞབས་དང་ཕྱག་དང་སྙན་རྣམས་གཏུབས་
གྱུར་ཏེ། །དེ་བཞིན་ཤངས་བཅད་རྒྱལ་བ་མི་འཁྲུགས་པ། །དེ་ཐོས་པས་ཀྱང་བདག་ཅག་ཡིད་མི་དགའ། ཕུག་རོན་སྐྱབས་སུ་མཆིས་པ་མ་བཏང་སྟེ། །གང་ཚེ་འདྲེན་ཁྱོད་སྲང་ལ་གཅལ་གྱུར་པ། །རྒྱལ་བ་འདི་ཐོས་པས་ཀྱང་མི་བདེ་སྟེ། །བདེ་གཤེགས་བྱང་ཆུབ་སྤྱོད་པ་སྡུག་བསྔལ་ཆེ། །བདག་ཅག་མི་འཚལ་མ་ལགས་ཅི་ཞེ་ན། །བདེ་བར་གཤེགས་ལ་འགྲོ་བ་གནོད་བགྱིད་པ། །ངན་སོང་མུན་པ་ལྷུང་བས་བདེ་གཤེགས་ཀྱི། །སྡུག་བསྔལ་སྤྱོད་པ་དྲན་ནས་མི་དགའ་ལགས། །ཇི་ལྟར་འཇིག་རྟེན་འདྲེན་པ་བློ་འཕགས་དང་། །བདེ་གཤེགས་སྤྱོད་པ་མི་འཚེ་བློར་གྱུར་དང་། །སྒྲུབ་པའི་ཚེ་ན་དེ་ལ་མི་གནོད་པ། །འཇིག་རྟེན་འདྲེན་པ་སྤྱོད་བདེ་བཀའ་སྩལ་གསོལ། །མཐའ་ཡས་བློ་མངའ་བདེ་གཤེགས་སྤྱོད་པ་ལ། །ཐུབ་པ་ཀླུ་ཚོགས་འདི་དག་རབ་ཏུ་བརྩོན། །ཇི་ལྟར་ཁྱོད་ཀྱི་བཀའ་བཞིན་སྤྱོད་འགྱུར་པ། །དེ་ལྟར་བདེ་གཤེགས་བྱང་ཆུབ་ལམ་བསྟན་གསོལ། །རྒ་ཤི་མ་མཆིས་གོ་འཕང་འཐོབ་འཆལ་ཤིང་། །ཀླུ་ཚོགས་འདི་རྣམས་ཐུབ་པ་སྐོམ་པར་གནས། །འགྲོ་བ་འདི་དག་བདེ་བར་འདུལ་འགྱུར་པའི། །བརཏལ་ཞུགས་སྤྱོད་བདེ་བདེ་གཤེགས་བཀའ་སྩལ་གསོལ། །དེ་ནས་བཅོམ་ལྡན་འདས་ཀྱིས་ཀླུའི་མཆོད་པ་དེ་དག་ཀྱང་གཟིགས། །ལྷག་པའི་བསམ་པས་སྨོན་ལམ་བཏབ་པ་དེ་དག་ཀྱང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །འདི་ནི་ཆོས་ཉིད་དེ་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པ་དེའི་ཚེ་ཁ་དོག་སྣ་ཚོགས་དང་། ཁ་དོག་དུ་མའི་འོད་ཟེར་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཕྱིར་ལོག་སྟེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་གྱིས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །བརཏལ་ཞུགས་བཟང་པོ་དགེ་སྦྱོང་ཐུབ་པའི་རྣམས། །རྒྱུ་མེད་རྒྱལ་བ་འཛུམ་པ་མི་མཛད་ན། །འདྲེན་པ་བདེ་གཤེགས་ཐུགས་རྗེ་ཆེ་མངའ་བ། །མཚུངས་མེད་བཅོམ་ལྡན་འཛུམ་རྒྱུ་བཀའ་སྩལ་གསོལ། །ཚོགས་ཀྱི་སློབ་དཔོན་སྐྱེ་བོ་འདི་དག་ནི། །འཛུམ་རྒྱུ་ཉན་འཚལ་ཁྱོད་ཀྱི་ཞལ་དུ་ལྟ། །ཡིད་ནི་ཞུམ་གྱུར་ཐེ་ཚོམ་འཚལ་ཞིང་མཆིས། །མཁས་པ་ཐེ་ཚོམ་རྣམ་པར་བསལ་དུ་གསོལ། །འཇིག་རྟེན་མཁས་པ་སྟོན་པ་ཤཱཀྱ་ཐུབ། །དེ་རིང་སུ་ཞིག་ཡིད་ནི་ཡོངས་སུ་དགའ། །གང་གིས་བདུད་ཀྱི་དབང་པོ་མཐོང་གྱུར་ཏེ། །རྨོངས་པར་བགྱིས་ནས་ཡིད་མི་དགའ་བར་བགྱིས། །ཚོགས་ཀྱི་
སློབ་དཔོན་འདྲེན་པ་སུ་ཞིག་གིས། །བདེ་གཤེགས་ཆོས་ཉིད་ཡབ་ལ་བསྙེན་བཀུར་བགྱིས། །བདེ་བར་གཤེགས་ལ་མཆོད་པ་དམ་པ་བགྱིས། །ཤཱཀྱ་སེང་གེ་བཀའ་སྩོལ་ཐེ་ཚོམ་ཁུམ། །སོར་བཅུ་ཐལ་མོ་སྦྱར་བ་མགོར་བཞག་ཅིང་། །འགྲོ་བ་འདི་དག་ཐུབ་པའི་ཞལ་དུ་ལྟ། །ཚོགས་ཀྱི་སློབ་དཔོན་ཐེ་ཚོམ་བསལ་དུ་གསོལ། །འདྲེན་པ་འཛུམ་པ་མཛད་པའི་རྒྱུ་ཡང་གསུངས། །དེ་ཐོས་སྐྱེ་བོ་འདི་དག་དགར་གྱུར་ཏེ། །རྒྱལ་བས་དགོངས་པའི་ཚུལ་ཡང་རྟོགས་པར་འགྱུར། །བདེ་བར་གཤེགས་པའི་འཁོར་རྣམས་ཚིམ་བགྱིས་ན། །གཞན་དུ་མི་སེམས་ནན་ཏན་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ཐུབ་མཁས་འདྲེན་པ་ཚོགས་ཀྱི་སློབ་དཔོན་གྱིས། །ཚངས་འདྲ་ཡན་ལག་བརྒྱད་ལྡན་གསུང་བརྗོད་ཀྱིས། །རྟ་ཐུལ་སྐྱོན་མེད་སེམས་ཀྱིས་དད་བྱོས་ལ། །འཛུམ་པ་མཛད་པའི་རྒྱུ་དེ་མཉན་པར་གྱིས། །ཀླུ་ཡི་བདག་པོ་འདི་དག་དད་གྱུར་ཏེ། །འགྲོ་བ་ཟིལ་གྱིས་མནན་ནས་མཆོད་པ་བྱས། །སྐྱེ་བོ་བདེ་བར་ཡོངས་སྨིན་བྱ་བའི་ཕྱིར། །སངས་རྒྱས་བྱང་ཆུབ་འདི་ནི་ཡོངས་སུ་ཚོལ། །སྙིང་རྗེ་ཆེན་པོས་རྣམ་འདྲེན་མེད་པ་ཡི། །འགྲོ་བ་བལྟས་ནས་སྡུག་བསྔལ་ཅིས་མི་བསྟེན། །འགྲོ་བས་བྱང་ཆུབ་རྒྱ་ཆེན་ཐོབ་བྱ་ལ། །འདྲེན་པ་དག་ནི་སྐྱོ་བར་ཡོང་མི་འགྱུར། །ཞི་གནས་དགའ་བ་ཡེ་ཤེས་སྟོབས་ལྡན་སྟོབས། །མཚན་མེད་སྟོང་པ་དེ་བཞིན་སྨོན་མེད་པ། །རྣམ་ཐར་སྒོ་གསུམ་ཡོངས་སུ་བསྒོམས་ནས་སུ། །ཤིན་ཏུ་ཡོངས་དག་ཡིད་ཅན་བདེ་བར་འགྲོ། །འགྲོ་བ་མཐའ་དག་མཉམ་པ་ཉིད་རྟོགས་ཏེ། །གང་ཚེ་རྒྱལ་བས་ཤེས་རབ་མཚན་ཐོས་ནས། །མཉམ་པའི་སེམས་དང་བྱམས་དང་སྙིང་རྗེ་ཐོབ། །འགྲོ་བ་སྙིང་རྗེ་ཆེན་པོ་རབ་བསྐྱེད་ནས། །སྙིང་བརྩེ་ལྡན་པ་མཆོག་ཏུ་སྙིང་རྗེ་ཅན། །འཇིག་རྟེན་མཁས་པ་བླ་ན་མེད་པར་འགྱུར། །རྒྱལ་བ་དེ་དག་འགྲོ་འདི་མཚུངས་བསྒྲལ་ནས། །དེ་དག་དགྲ་བཅོམ་རྣམ་པར་འདྲེན་པར་འགྱུར། །རྟག་ཏུ་བདག་མེད་ཚིག་ནི་ཉན་བྱེད་ཅིང་། །འཇིག་རྟེན་གཏམ་གྱི་རྒྱུད་ལ་མི་འཇུག་སྟེ། །དེ་དག་བདེ་བར་གཤེགས་ཀྱི་འཆི་མེད་ཐོབ །དེ་ན་བདུད་མེད་མུ་སྟེགས་ཚོགས་ཀྱང་མེད། །འདྲེན་པ་བདེ་གཤེགས་སྙིང་རྗེ་ལྡན་པ་ཡི། །རྒྱལ་བ་དེ་དག་འགྲོ་བ་ཀུན་མོས་བྱེད། །བདེ་གཤེགས་བཀའ་དང་ཚིག་རྣམས་ཐམས་ཅད་དང་། །བདེ་བར་གཤེགས་ཀྱི་དགོངས་ལ་མོས་བྱེད་འགྱུར། །སྲིད་པར་བདེ་གཤེགས་རྣམས་ཀྱི་སྤྱད་
སྤྱོད་ཅིང་། །རབ་བདེར་འགྲོ་བ་ཡོངས་སྨིན་བྱེད་པར་འགྱུར། །མཚུངས་མེད་ཐོབ་པ་བདེ་བར་མྱུར་དུ་ཡང་། །ཡོངས་སུ་འཚང་རྒྱ་འཆི་མེད་ཐོབ་པར་འགྱུར། །ཐོབ་ནས་འགྲོ་བ་དག་ཀྱང་མོས་པར་འགྱུར། །སྐྱེ་བོ་ཀུན་ཀྱང་གཟུགས་ཀྱི་མཆོག་དང་ལྡན། །འགྲོ་བ་ཐམས་ཅད་བདེ་གཤེགས་དེ་དག་གི །དགོངས་པའི་ཚིག་ནི་མངོན་དུ་ཤེས་པར་འགྱུར། །ཕྱུགས་དང་བྱ་དང་གནོད་སྦྱིན་མིང་དེ་དག །རང་བྱུང་དགོངས་མིན་ཅུང་ཟད་བྱེད་མི་འགྱུར། །དེ་དག་ཀུན་དུ་ཆོས་རྟོགས་དྲན་དང་ལྡན། །བདེ་བར་གཤེགས་རྣམས་འཆི་མེད་འཐོབ་པར་འགྱུར། །དེ་དག་ཚིག་ཐོས་སེམས་ཅན་གང་ཡང་ནི། །བསྟན་པ་དེ་ལ་མི་དགར་འགྱུར་བ་མེད། །བདེ་གཤེགས་དེ་དག་གསུང་ལ་དགའ་བ་ཡིན། །འགྲོ་བ་འཆི་མེད་ཡང་དག་ཐོབ་པར་འགྱུར། །དེ་ཚེ་འགྲོ་བས་རྒྱལ་བའི་དགོངས་ལེགས་རྟོགས། །རྒ་བ་དང་ནི་ནད་དང་འཆི་བ་དང་། །མྱ་ངན་སྨྲེ་སྔགས་འདོན་ལས་ཡོངས་སུ་འགྲོལ། །ཚིག་དེ་ཐོས་ནས་ངར་འཛིན་མེད་པར་འགྱུར། །ཀླུ་ཡི་བསམ་པ་ཤཱ་ཀྱ་སེང་གེ་ལ། །ཡོངས་སུ་ཞུས་ནས་ཇི་ལྟར་དེ་དག་རྣམས། །གཞལ་ཡས་བྱང་ཆུབ་ཐོབ་ནས་ཐུབ་རྣམས་ཀྱི། །ཡེ་ཤེས་འཇུག་འགྱུར་དེ་སྐད་སྲས་ལ་བསྟན། །ཀླུ་རྣམས་ལུང་བསྟན་ཡིད་དུ་འོང་བ་ཡི། །རྒྱལ་བའི་གསུང་ཐོས་འཁོར་རྣམས་ཡིད་དགའ་སྟེ། །དེ་ལ་ཡིད་ནི་རབ་ཏུ་ཞི་གྱུར་ནས། །དགའ་བའི་ཡིད་ཀྱིས་རྒྱལ་བའི་སྐྱབས་སུ་སོང་། །ཀླུ་ལུང་བསྟན་པའི་ལེའུ་སྟེ། བརྒྱད་པའོ། །