བཅུ་གཉིས་པ། མིའམ་ཅི་ལུང་བསྟན་པའི་ལེའུ།
དེ་ནས་མིའམ་ཅིའི་རྒྱལ་པོ་ལྗོན་པ་ལ་སོགས་པ་མིའམ་ཅི་བྱེ་བ་ཕྲག་བརྒྱད་ཀྱིས་ལྷ་མ་ཡིན་གྱི་མཆོད་པ་དེ་དག་དང་། །གནོད་སྦྱིན་གྱིས་མཆོད་པའི་བར་དག་ཀྱང་མཐོང་། །ལུང་བསྟན་པ་ཡང་ཐོས་ནས་ཤིན་དུ་ངོ་མཚར་ཐོབ་པར་འགྱུར་ཏེ། ཁྱོད་འདི་ལྟར་སེམས་ཅན་ཡང་མི་དམིགས་ལ་སྲོག་དང་། སྐྱེ་བ་པོ་དང་། ཤིང་ལས་སྐྱེས་དང་། ཤེད་བུ་དང་། གང་ཟག་དང་། བདག་དང་། བདག་གི་ཡང་གང་ཡང་མེད་ལ་ཕུང་པོ་དང་། ཁམས་དང་། སྐྱེ་མཆེད་གང་ལ་སེམས་ཅན་ཞེས་གདགས་པའི་ཕུང་པོ་དང་། ཁམས་དང་། སྐྱེ་མཆེད་དེ་དག་ཀྱང་མི་དམིགས་ལས་གང་ཡོད་པས་རྣམ་པར་སྨིན་པ་གདགས་པར་བྱ་བའི་ལས་དེ་ཡང་མི་དམྱིགས། བྱང་ཆུབ་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས། །སངས་རྒྱས་ཀྱང་མི་དམིགས། །འོན་ཀྱང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལུང་བསྟན་པ་མཛད་པ་འདི་ནི་ངོ་མཚར་རྨད་དོ། །ཅི་ཞིག་ལས་དགོངས་ཏེ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་སངས་རྒྱས་སུ་འགྱུར་རོ་ཞེས་ལུང་བསྟན་པ་མཛད། །ཅི་ཞིག་ལ་དགོངས་ཏེ་བྱང་ཆུབ་སེམས་དཔས་ཡང་དག་པར་བསྒྲུབ་པ་དང་། སངས་རྒྱས་ཀྱི་ཆེ་བ་ཉིད་དང་། སེམས་ཅན་ཡོངས་སུ་སྨིན་པ་དང་།
ཞིང་གི་བཀོད་པ་དང་། དེར་སྐྱེ་ཞིང་ཡོངས་སུ་དག་པ་དང་། བྱང་ཆུབ་སེམས་དཔའ་རྣམས་ཞིང་ནས་ཞིང་དུ་འདོང་པ་དང་། དེ་བཞིན་གཤེགས་པ་མཆོད་པ་དང་། མཆོད་པ་དེའི་མཐུ་དང་། སེམས་ཅན་རྣམ་པར་དགོད་པ་དང་། བསྐལ་པ་འདི་སྙེད་ཅིག་གིས་སངས་རྒྱས་སུ་འགྱུར་རོ་ཞེས་བྱ་བ་དང་། བསྐལ་པ་འདི་སྙེད་ཏུ་སངས་རྒྱས་བཅོམ་ལྡན་འདས་རྣམས་བཞུགས་པར་འགྱུར་རོ་ཞེས་བྱ་བ་དང་། སངས་རྒྱས་བཅོམ་ལྡན་འདས་དག་གིས་ཉན་ཐོས་འདུས་པ་ནི་འདི་སྙེད་ཅིག་ཏུ་འགྱུར་རོ་ཞེས་བྱ་བ་དང་། དེ་དག་ཡོངས་སུ་མྱ་ངན་ལས་འདས་ནས་དམ་པའི་ཆོས་བསྐལ་པ་འདི་སྙེད་ཅིག་ཏུ་གནས་པར་འགྱུར་རོ་ཞེས་དེ་བཞིན་གཤེགས་པས་ལུང་བསྟན་པ་མཛད། །ཅི་ཞིག་ལས་དགོངས་ཏེ་སེམས་ཅན་རྣམས་ཉེ་བར་ལེན་པ་མེད་པས་མྱ་ངན་འདའ་བར་འགྱུར་རོ་ཞེས་བཅོམ་ལྡན་འདས་ཀྱིས་དགོངས་པ་མཛད་སྙམ་སྟེ། དེ་ནས་མིའམ་ཅིའི་རྒྱལ་པོ་ལྗོན་པ་དེ་ལྟ་བུའི་ཐེ་ཚོམ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ཏེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། རྒྱལ་བའི་གསུང་ནི་ཐོས་གྱུར་ནས། །ཤེས་རབ་ཚེ་མངའ་བདག་དོགས་སྐྱེས། །སྟོང་པ་ཉིད་དང་ལུང་བསྟན་པ། །བདེ་གཤེགས་བདག་གིས་དེ་མ་འཆལ། །གསུང་བའི་ཟླ་བ་ཆོས་ཀྱི་དབྱིངས། །འགྱུར་མ་མཆིས་ལ་སྟོང་པ་དང་། །རང་བཞིན་མེད་གསུང་རི་ལྟ་བུ། །མཆོད་པ་འདི་ཅི་གང་ཟག་མཆོག །སྐྱེ་བའང་མ་མཆིས་བྱང་ཆུབ་ཏུ། །སེམས་བསྐྱེད་པ་ནི་ཇི་ལྟ་བུ། །སྐྱེས་བུ་མཆོག་གིས་བཀའ་སྩལ་པའི། །ལྡེམ་པོ་གང་དེ་བདག་མ་འཆལ། །མི་དབང་བདག་པོ་ཇི་ལྟར་ན། །འགག་པ་མ་མཆིས་འཆི་འཕོ་གསུང་། །དེ་ནི་ཡང་དག་ལུང་བསྟན་པས། །ཐུབ་པ་བདག་གི་ཐེ་ཚོམ་ཁུམ། །སྒྱུ་མ་འདྲ་ལ་ལྷར་སྐྱེ་ཞེས། །གསུངས་པ་དེ་ནི་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང་། །ཤཱཀྱ་སེང་གེ་བདག་མ་འཚལ། །གནས་པའང་མཆིས་པ་མ་ལགས་ལ། །དགེ་བཤེས་བསྟེན་གསུང་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང་། །སྐྱེས་བུ་ཁྱུ་མཆོག་བདག་མ་འཚལ། །གཡོ་བའང་མ་མཆིས་
བགྱི་བ་རྣམས། །རྐང་གཉིས་མཆོག་གསུང་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང་། །དགྲ་བསལ་བཅོམ་ལྡན་བདག་མ་འཚལ། །རང་བཞིན་སྟོང་སྟེ་སྟོང་པ་ཡང་། །རྟོགས་ཤེས་མགོན་གསུང་ཇི་ལྟ་བུ། །ཐེ་ཚོམ་རྣམ་པ་འདི་འདྲ་སྐྱེས། །ཤེས་རབ་དཔེ་མེད་བདག་མ་འཚལ། །ཞི་བ་ཡོད་ཅེས་བཀའ་སྩལ་པ། །ཆོས་ཀུན་ཉིད་གསུངས་ཇི་ལྟ་བུ། །མཚུངས་མེད་འདི་འདྲའི་ལྡེམ་པོ་དག །བདག་ལ་རྣམ་པར་བསྟན་དུ་གསོལ། །སྐུ་མཛེས་གྱུར་ཀྱང་ཆོས་ཀྱི་རྣམས། །ནམ་མཁའ་འདྲར་གསུངས་ཇི་ལྟ་བུ། །ཆོས་ནི་རབ་ཏུ་སྤང་བགྱིས་ན། །མི་མཁས་དམྱལ་ལྟུང་ཇི་ལྟ་བུ། །བརྟན་པ་མཐོ་རིས་འཇིག་རྟེན་དང་། །འགྲོ་བ་གཞན་ཡང་གསུངས་པ་དང་། །ལས་དེ་བགྱིད་པ་མ་མཆིས་ལ། །རང་ལས་ཅན་གསུང་ཇི་ལྟ་བུ། །བཀའ་སྩལ་ཚུལ་འདི་རྣམ་པ་ཡང་། །ཟིལ་གྱིས་མི་ནོན་བདག་མ་འཚལ། །མགོན་པོ་དེ་ལ་བདག་དོགས་ན། །བདེ་གཤེགས་བདག་གི་ཐེ་ཚོམ་སོལ། །དག་པའི་ཚོགས་གྱུར་མ་མཆིས་ལ། །བྱང་ཆུབ་ཡང་དག་བསྒྲུབ་འདི་གསུངས། །དགེ་སྦྱོང་རྒྱལ་པོའི་གསུང་གི་ཚུལ། །དེ་སྐད་བཀའ་སྩལ་བདག་མ་འཚལ། །ཆོས་རྣམས་ཟད་པ་མེད་གསུངས་ལ། །སྤོང་བྱེད་ལས་ནི་ཟད་བསྟན་པ། །ཚད་མེད་བློ་མངའ་འདི་ལ་ཡང་། །བདག་ནི་ཡིད་གཉིས་ཐེ་ཚོམ་འཚལ། །ཡང་དག་མཐའ་ཡང་བཀའ་སྩལ་པ། །མ་ནོར་སྦྱིན་པའང་བསྟན་མཛད་པ། །འདི་ཡང་རབ་རིབ་བྲལ་བ་ཡི། །སྤྱིན་མངའ་སྡིག་སྤངས་བསྟན་དུ་གསོལ། །ཐམས་ཅད་གཟིགས་པ་མ་གཏོགས་པར། །གཞན་གྱིས་བདག་གི་ཐེ་ཚོམ་འདི། །སེལ་ནུས་མ་མཆིས་དེ་ལྟ་བས། །བདག་ནི་རྒྱལ་བ་མཆོག་ལ་དད། །དེ་ནས་བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་ལྗོན་པས་ཐེ་ཚོམ་དྲིས་པ་འདི་དག་གསན་ནས་དེ་ལ་ལན་གདབ་པའི་ཕྱིར་མིའམ་ཅིའི་རྒྱལ་པོ་ལྗོན་པ་ལ་ཚིགས་སུ་བཅད་དེ་དགེ་སློང་བཀའ་སྩལ་པ། །སྟོང་པ་ཉིད་དག་ལུང་བསྟན་པ། །བདག་གིས་མ་འཚལ་ཅེས་སྨྲས་པ། །གལ་ཏེ་འགའ་ཞིག་མི་སྟོང་ན། །རྒྱལ་བས་དེ་ལུང་བསྟན་མི་གསུང་། །ཅི་ཕྱིར་ཞེ་ན་འདི་ལྟ་
བུར། །རང་གི་རང་བཞིན་གནས་གྱུར་ན། །འགྱུར་བ་མེད་ཅིང་ཐེར་ཟུག་སྟེ། །དེ་ལ་འཕེལ་མེད་འགྲིབ་པ་མེད། །མེ་ལོང་ཤིན་ཏུ་ཡོངས་དག་ལ། །ཇི་ལྟར་རང་བཞིན་མེད་པ་ཡི། །གཟུགས་བརྙན་སྣང་བ་དེ་བཞིན་དུ། །ལྗོན་པ་ཆོས་རྣམས་ཤེས་པར་གྱིས། །ཆོས་ཀྱི་དབྱིངས་ནི་འགྱུར་མེད་ན། །མཆོད་པའི་ཡན་ལག་འགྱུར་གང་ཞེས། །ཡན་ལག་རྣམས་ལ་བརྟག་བྱོས་ལ། །ལྗོན་པ་མཆོད་པ་འདི་ལ་དཔྱོད། །ཆོས་དབྱིངས་རྣམ་པ་ཐམས་ཅད་དུ། །འགྱུར་མེད་སྐྱེ་བོ་མཁས་པས་རྟོགས། །བྱིས་པ་རྣམས་ནི་འདི་ལ་འཁྲུལ། །བློ་སྦྱངས་པས་ནི་མེད་པར་ཤེས། །སྐྱེ་བའང་མ་མཆིས་སེམས་ཀྱང་བསྐྱེད། །དེ་ནི་མ་འཚལ་ཅེས་སྨྲས་པ། །སྟོབས་བཅུ་མངའ་བའི་ལྡེམ་པོ་དག །གཞན་དུ་མ་སེམས་མཉན་པར་གྱིས། །བྱིས་པ་འཁོར་བར་དགའ་བའི་རྣམས། །འཁོར་བར་མངོན་དགའ་སེམས་ཞེན་པ། །ལོགས་པའི་སེམས་དང་འདུ་ཤེས་ཅན། ། འཁོར་བའི་སྡུག་བསྔལ་མྱོང་བར་འགྱུར། །དེ་དག་སྔོན་ཅད་མ་ཐོས་པའི། སེམས་མེད་ཆོས་ནི་ངས་བཤད་ན། །བྱིས་པའི་བློ་དང་ལྡན་པ་རྣམས། །འདི་ལ་ཀུན་དུ་རྨོངས་པར་འགྱུར། །བྱང་ཆུབ་གཞོལ་བའི་སེམས་ཉིད་དང་། །བྱང་ཆུབ་ཕན་ཡོན་ཐོས་གྱུར་ནས། །ཟིལ་གྱིས་མ་ནོན་རང་བྱུང་སེམས། །རྒྱ་ཆེན་དེ་ནི་ཐོབ་པར་འགྱུར། །འགག་པ་མ་མཆིས་འཆི་འཕོ་བ། །དེ་ཡང་མ་འཚལ་ཅེས་སྨྲས་པ། །འཆི་འཕོ་ཡང་དག་ལུང་བསྟན་གྱིས། །གཞན་དུ་མ་སེམས་མཉན་པར་གྱིས། །གང་དག་རྟག་འཛིན་དེ་དག་ལ། །འདི་ལ་མི་འགྱུར་ཐེར་ཟུག་མེད། །དངོས་པོ་འདི་དག་མི་རྟག་ཅེས་། །བདེ་གཤེགས་འཆི་འཕོ་རྣམ་པར་སྟོན། །སྒྱུ་མ་འདྲ་ལ་ལྷར་སྐྱེ་བ། །ཇི་ལྟ་བུ་ཞེ་དགོས་གྱུར་པ། །མཐར་ཕྱིན་མ་གྱུར་སློབ་པ་དང་། །སྐྱེ་བོ་རྣམས་ལ་མཐོ་རིས་བཤད། །གནས་པའང་ཡོད་པ་མ་ཡིན་ལ། །དགེ་བཤེས་བསྟེན་ཅེས་གང་སྨྲས་པ། །གནས་དང་བྲལ་བའི་བྱ་བའི་ཕྱིར། །གནས་པ་མེད་པའི་དགེ་བཤེས་བསྟེན། །གཡོ་བ་མ་མཆིས་བགྱི་བ་རྣམས། །བསྟན་པ་མ་འཚལ་ཞེས་སྨྲས་པ། །ཤིང་རྟའི་ཡན་ལག་འདུས་
པ་དང་། །ཤིང་རྟའི་བྱ་བ་གཞན་དུ་རྟོགས། །མི་གང་བདག་ཡོད་ཁས་ལེན་ཅིང་། །བྱ་བའང་བདག་གིས་བྱས་ཟིན་པ། །དེ་དག་ལ་ནི་བྱ་བ་དང་། །གཡོ་བ་མེད་པར་བདེ་གཤེགས་བཤད། །རང་བཞིན་སྟོང་སྟེ་སྟོང་པ་ཡང་། །རྟོགས་ཤེས་ང་ཡིས་གང་སྨྲས་པ། །བྱིས་པ་ལོག་པའི་བློ་ཅན་རྣམས། །རང་བཞིན་སྟོང་པར་མི་ཤེས་པ། །དེ་དག་རྣམས་ལ་བསྟན་པའི་ཕྱིར། །རང་བཞིན་སྟོང་ཞེས་བདེ་གཤེགས་སྟོན། །ཀུན་དུ་རྟོག་པའི་རྟོག་པས་བསྐྱེད། །ཡང་དག་མ་ཡིན་རྟོག་པས་བཅིངས། །ཞི་བ་ཡོད་ཅིང་ཆོས་ཀུན་ཀྱང་། །ཞི་བར་མཐོང་ཞེས་སྨྲས་པ་ནི། །མི་ཤེས་རྨོངས་པར་གྱུར་རྣམས་ཀྱིས། །ཀུན་དུ་རྟོག་ལས་སྲེད་པ་སྟེ། །སྐོམ་པས་ཇི་ལྟར་སྨྱིག་རྒྱུ་ལ། ། ཀུན་རྟོག་པས་སྐོམ་པ་སྐྱེ། །མི་མཁས་དེས་ནི་རྟོག་པའི་རྒྱུ། །ཡོད་པ་མིན་ལ་ལོག་པར་བརྟགས། །ཆུ་ཡིན་བར་ནི་མཐོང་གྱུར་ཀྱང་། །སྨིག་རྒྱུ་ལ་ནི་ཆུ་མེད་དོ། །དེ་བཞིན་ཡོངས་སུ་རྟོག་པས་བཀྲུགས། །སྡུག་པ་མིན་ལ་སྡུག་པར་རྟོག །བྱིས་པ་འདོད་ཆགས་ལྡན་པ་དག །སྡུག་དང་ལྡན་པ་རང་བཞིན་གྱིས། །སྡུག་མེད་སྨིག་རྒྱུ་ཆུ་བཞིན་ཏེ། །སྨྱིག་རྒྱུ་ལ་ནི་ཆུ་མེད་དོ། །དེ་བཞིན་གཟུགས་ལ་སྡུག་པ་མེད། །གཟུགས་མེད་སྡུག་པ་མ་ཡིན་ན། །བྱིས་པ་ལོག་པའི་འདུ་ཤེས་ཅན། །སྡུག་པར་རྟོག་པས་བཅིངས་པར་འགྱུར། །ཆོས་རྣམས་ནམ་མཁའ་འདྲ་བ་དང་། །སྤོང་བ་དམྱལ་ལྟུང་ཞེས་སྨྲས་པ། །མེད་པ་མཐོང་བར་མ་གྱུར་པ། །མི་མཁས་རྣམས་ནི་སྐྲག་པར་འགྱུར། །རང་བཞིན་ངོ་བོ་ཉིད་སྟོང་ན། །བདག་ཞེན་དུས་ནི་མི་ཤེས་པ། །དེ་དག་སྟོང་ཞེས་ཐོས་གྱུར་ནས། །བདག་མེད་འགྱུར་ཞེས་སྐྲག་པ་སྐྱེ། །དེ་དག་བདག་ཏུ་མངོན་ཞེན་ཏེ། །ནམ་མཁའ་ལ་ནི་མདུད་བོར་ནས། །སྟོང་པ་གྱ་ནོམ་སྤོང་བྱེད་དེ། །མི་མཁས་སེམས་དམྱལ་ཆེན་པོར་ལྟུང་། །མཐོ་རིས་འཇིག་རྟེན་ངས་བསྟན་དང་། །སྐྱེ་བོའི་འགྲོ་རྒྱུད་གཞན་དག་དང་། །ལས་ཀྱང་ངས་ནི་བསྟན་བྱས་ཏེ། བྱེད་པ་པོ་ནི་རབ་ཏུ་བཀྲག། །ཡང་དག་ཏུ་ནི་འགྲོ་བ་དག །རྨི་འདྲར་བཤད་པ་ཤེས་པར་གྱིས། །རྨི་ལམ་གང་ལའང་དངོས་
པོ་མེད། །ལོག་པའི་བློ་ལྡན་མངོན་པར་ཞེན། །ངས་ནི་ལས་ཀྱི་རྣམ་པ་བསྟན། །བྱེད་པོ་ཕྱོགས་བཅུ་རྣམས་ན་མེད། །ཤིང་རྣམས་རླུང་གིས་བསྒུལ་པ་ལས། །མེ་འབྱུང་འགྱུར་བ་ཇི་བཞིན་ནོ། །བདག་ཅག་མེ་འདི་བསྐྱེད་བྱ་ཞེས། །རླུང་དང་ཤིང་ལ་སེམས་པ་མེད། །ལོན་ཀྱང་མེ་ནི་འབྱུང་བ་ལྟར། །ལག་ཀྱི་བྱེད་པོ་དེ་བཞིན་ནོ། །བསོད་ནམས་ཚོགས་ནི་ཡོད་མིན་ལ། །བྱང་ཆུབ་ཡང་དག་བསྒྲུབ་པ་དང་། །ལེགས་སྤྱོད་ཡོད་ཅེས་ཟེར་བ་ནི། །དེ་ཚུལ་ཡང་དག་མཉན་པར་བྱོས། །མི་ཡི་ཚེ་ཚད་ལོ་བརྒྱ་སྟེ། །དེ་སྲིད་འཚོ་ཞེས་བརྗོད་མོད་ཀྱི། ། ལོ་ལ་ཕུང་པོར་སྤུངས་པ་མེད། །སྒྲུབ་པ་དེ་ཡང་དེ་དང་མཚུངས། །ཟད་པ་མེད་ཅེས་གང་སྨྲས་པ། །ལས་ཟད་ཅེས་ནི་ངས་སྨྲས་པ། །སྟོང་པའི་ཚུལ་དུ་ཟད་པ་མེད། །ཐ་སྙད་ཚུལ་དུ་ཟད་པར་བསྟན། །ཡང་དག་མཐའ་ནི་ངས་བཤད་པ། །ཕྱིན་ཅི་ལོག་དེའང་ཡང་དག་མཐའ། །ལོག་པའི་བློ་ཅན་བྱིས་པ་རྣམས། །ཡང་དག་མཐའ་ནི་མི་ཤེས་སོ། །མཚན་ཉིད་ཐམས་ཅད་གཅིག་ཉིད་དེ། །མཚན་ཉིད་མེད་པར་ཤེས་པ་ཡི། །ཡེ་ཤེས་ལམ་དུ་ཞུགས་རྣམས་ཀྱི། །ངེས་པ་ལྗོན་པ་ཁྱོད་ཉོན་ཅིག །ཡི་གེ་གཅིག་གིས་འཇུག་པ་ཡི། །བྱང་ཆུབ་བློ་ལྡན་རྣམས་ལ་བསྟན། །ཆོས་རྣམས་ཐམས་ཅད་མ་བྱས་པ། །ཨ་ཡི་སྒོ་ཡི་གཟུངས་སུ་བསྟན། །དེ་ལྟར་སྤྱོད་པ་བྱེད་རྣམས་ལ། །མཚན་ཉིད་མཐའ་ཡས་ངས་བསྟན་ཏེ། །འདི་འདྲའི་ཚུལ་ལ་འཇུག་པ་ནི། །ཨ་ཡི་སྒོ་ཡི་གཟུངས་སུ་བསྟན། །ཆོས་རྣམས་ཐམས་ཅད་འགག་མེད་པ། །ཨ་ཡིས་ཆོས་ལ་འཇུག་པར་བསྟན། །ཨ་ཡི་སྒོ་ཡི་གཟུངས་བསྟན་པ། །དེ་ཡང་ལྗོན་པས་ཤེས་པར་གྱིས། །ཆོས་རྣམས་རྣམ་པར་རྟོག་མེད་པ། །དེ་ཡང་ཆོས་ལ་འཇུག་པར་གསུངས། །ཆོས་ཀུན་འགྱུར་བ་མེད་པ་ཡང་། །ཨ་ནི་ཆོས་ཀུན་སྒོ་མོར་བསྟན། །ཨ་ཡི་སྒོ་ཡི་གཟུངས་འདི་དག །ལྗོན་པ་འདི་ལྟར་ཤེས་པར་གྱིས། །མི་ཟད་པ་དང་ཟད་སྨྲས་པ། །ཆོས་ཀུན་མི་ཟད་བརྗོད་བྱ་སྟེ། །སྟོབས་བཅུ་མངའ་བ་ཐམས་ཅད་ཀྱིས། །མི་ཟད་སྒོ་ཡི་གཟུངས་སུ་བསྟན། །
ཆོས་རྣམས་ཀུན་ལ་སྒོམ་མེད་དེ། །དེ་དག་མེད་པས་སྒོ་མི་འབྱུང་། །འདི་ཡང་གཟུངས་ཀྱི་སྒོ་ཡིན་ཏེ། །ཨ་ལ་བརྟེན་ནས་འཇུག་པར་བྱ། །ཆོས་ཀུན་བསམ་གྱིས་མི་ཁྱབ་ཅེས། །ཡང་དག་ཇི་བཞིན་བདེ་གཤེགས་བསྟན། །ཨ་ཡི་སྒོ་ཡི་གཟུངས་བསྟན་པ། །འདི་ཡང་ལྗོན་པས་ཤེས་པར་གྱིས། །ཆོས་ཀུན་ལུས་མེད་བྱང་ཆུབ་ཅེས། །བློ་ལྡན་རྣམས་ལ་ངས་བསྟན་པ། །འདི་ཡང་གཟུངས་ཀྱི་སྒོ་ཡིན་ཏེ། །ཨ་ལ་བརྟེན་ནས་འདུག་པར་བྱ། །ཆོས་རྣམས་འོང་བ་མེད་པ་སྟེ། །མེད་པས་དེ་དག་འོང་བའང་མེད། །འདི་ཡང་གཟུགས་ཀྱི་སྒོ་ཡིན་ཏེ། །ཨ་ལ་བརྟེན་ནས་འཇུག་པར་བྱ། །ཆོས་རྣམས་གདགས་པ་མེད་པ་སྟེ། །མེད་པས་དེ་དག་གདགས་པ་མེད། །འདི་ཡང་གཟུངས་ཀྱི་སྒོ་ཡིན་ཏེ། །ཨ་ལ་བརྟེན་ནས་འཇུག་པར་བྱ། །ཆོས་རྣམས་རང་བཞིན་མེད་པ་སྟེ། །མེད་པས་དེ་དག་རང་བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། །བདེ་རབ་གཤེགས་པས་གཟུངས་སུ་བསྟན། །གཟུངས་ཀྱི་སྒོ་མོ་ང་ལས་ཉོན། །ཆོན་ཀུན་ཡིད་ལ་བྱ་བ་མེད། །འདི་ཡང་གཟུངས་ཀྱི་སྒོ་ཡིན་ཏེ། །བདེ་བར་གཤེགས་པས་གཟུངས་སུ་བསྟན། །མེད་ཕྱིར་ཆོས་ཀུན་སྒྲིབ་མེད་ཅེས། །དེ་བཞིན་གཤེགས་པས་བསྟན་མཛད་པ། །འདི་ཡང་གཟུགས་ཀྱི་སྒོ་ཡིན་ཏེ། །ཨ་ལ་བརྟེན་ནས་ཤེས་པར་བྱ། །ཆོས་ཀུན་ཐོགས་པ་མེད་པ་སྟེ། །ཐོགས་པར་བྱ་བ་དེ་མི་དམིགས། །འདི་ཡང་གཟུངས་ཀྱི་སྒོ་ཡིན་ཏེ། །ཨ་ལ་བརྟེན་ནས་འཇུག་པར་བྱ། །ཆོས་རྣམས་ཐམས་ཅད་མ་སྐྱེས་པར། །མཁས་པས་མཚན་ཉིད་གཅིག་ཤེས་བྱ། །ཆོས་རྣམས་གང་དག་མ་སྐྱེས་པ། །དེ་དག་མིང་མེད་ཤེས་པར་བྱ། །ཆོས་རྣམས་ཡང་དག་མ་ཡིན་ཏེ། །དེ་དག་མ་ལུས་རང་བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། །ཨ་ལ་བརྟེན་ནས་ཤེས་པར་བྱ། །གང་དག་མ་སྐྱེས་མ་བྱུང་བ། །དེ་དག་མཐོང་མེད་བསྟན་པར་བྱ། །ལྟ་བ་པོ་ནི་མེད་པ་དང་། །དེ་དག་རྣམས་ཀྱང་མེད་ཕྱིར་རོ། །ཆོས་ཀུན་མཉམ་མེད་དེ་བས་ན། །མཚན་ཉིད་གཅིག་ཅིང་
མཚན་གཞི་མེད། །ནམ་མཁའ་དང་ནི་འདྲ་བ་སྟེ། །ཆོས་ཀུན་ཡོད་པ་མ་ཡིན་ནོ། །དེ་ལྟར་ལྷག་མེད་ཆད་པ་མེད། །མཉམ་བཞག་མེད་ཅིང་གཉིས་སུ་མེད། །གདུང་མེད་བསིལ་མེད་ཚ་བའང་མེད། །བལྟ་བའི་ལམ་མིན་མེད་ཕྱིར་རོ། །དྲང་པོ་མ་ཡིན་ཡོད་པོ་མིན། །མུན་པ་མ་ཡིན་སྣང་བ་མིན། །མཐོང་བ་མེད་ཅིང་ཐོས་མེད་དེ། །མེད་པས་གཟུགས་སུ་ཤེས་པར་གྱིས། །གཡོ་མེད་དྲང་པོའང་མེད་པ་སྟེ། །ཆོས་རྣམས་གསལ་མེད་གཡོ་བ་མེད། །འཁྲུག་པ་མེད་ཅིང་ཁྲོ་བ་མེད། །ཅི་ཡང་མི་བྱང་ཉེར་ཞི་མེད། །སྒྱེལ་བ་མེད་ཅིང་གནས་ཀྱང་མེད། །འགྲོ་མེད་ལྡོག་མེད་འགྲོ་སེམས་མེད། །ཉལ་བ་མེད་ཅིང་མི་ཉལ་མེད། །སད་པ་མེད་པར་ཤེས་པར་གྱིས། །མིག་ཅན་མ་ཡིན་ལོང་བ་མིན། །ལྟ་བ་མ་ཡིན་མུན་བསྒྲིབས་མིན། །སྦས་པ་མ་ཡིན་བཞག་པ་མིན། །དུལ་བ་མ་ཡིན་མ་དུལ་མིན། །རྒོད་པ་མ་ཡིན་ཞི་བ་མིན། །འཁོར་མིན་མྱ་ངན་འདས་པ་མིན། །བདེན་མིན་བརྫུན་མིན་དེ་ལྟ་བུར། །རྒྱལ་བའི་སྤྱོད་ཡུལ་ཤེས་པར་གྱིས། །འཇིག་རྟེན་གདུལ་བའི་དོན་ཕྱིར་གྱི །འདི་ལ་ཐེ་ཚོམ་གང་ཡང་མེད། །གང་གཅང་བྱ་བའི་ཐེ་ཚོམ་མེད། །དམ་པའི་དོན་དུ་བྱུང་བ་མེད། །དེ་ནས་མིའམ་ཅིའི་རྒྱལ་པོ་ལྗོན་པས་བཅོམ་ལྡན་འདས་ལ་ཞུས་པ་ལུང་བསྟན་པ་དང་། །གཟུངས་ངེས་པར་བསྟན་པས་ཡོངས་སུ་ཚིམ་པར་གྱུར་ནས། །བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། ཁང་པ་བརྩེགས་པ་ཤིང་ལ་རྟེན་པ་དང་། པད་མ་ལ་རྟེན་པ་དང་། རི་ལ་རྟེན་པ་རིན་པོ་ཆེ་སྣ་བདུན་གྱི་རང་བཞིན་ཅན། །རིན་པོ་ཆེའི་གདུགས་ཀྱིས་མཛེས་པར་བྱས་པ། གདུགས་ཀྱི་ལྡ་ལྡིས་མཛེས་པར་བྱས་པ། རྒྱལ་མཚན་དང་བ་དན་གྱིས་བརྒྱན་པ། བླ་རེ་དང་ལྡ་ལྡིས་བརྒྱན་པ་བྱེ་བ་ཕྲག་བརྒྱད་མངོན་པར་སྤྲུལ་ཏེ། མིའམ་ཅིའི་རོལ་མོ་སིལ་སྙན་བྱེ་བ་ཕྲག་བརྒྱད་ཀྱང་མངོན་པར་སྤྲུལ་ནས་རི་སྤོས་ཀྱི་ངད་ལྡང་ལས་སྐྱེས་པ་དང་། རྒྱལ་མཚན་དང་བ་དན་གྱིས་བརྒྱན་པ། བླ་རེ་དང་ལྡ་ལྡིས་བརྒྱན་པ་བྱེ་བ་ཕྲག་བརྒྱད་མངོན་པར་སྤྲུལ་ཏེ། མིའམ་ཅིའི་རོལ་མོ་སིལ་སྙན་བྱེ་བ་ཕྲག་བརྒྱད་ཀྱང་མངོན་པར་སྤྲུལ་ནས་རི་སྤོས་ཀྱི་ངད་ལྡང་ལས་སྐྱེས་པ་དང་། ཐང་ལས་སྐྱེས་པ་དང་། ཆུ་ལས་སྐྱེས་པའི་མེ་ཏོག་ཐམས་ཅད་ཀྱིས་ཀྱང་བཅོམ་ལྡན་འདས་ལ་མཆོད་ནས། །དེ་མིའམ་ཅིའི་ཚོགས་དང་ལྷན་ཅིག་ཁང་པ་བརྩེགས་པ་བྱེ་བ་ཕྲག་བརྒྱད་པོ་དེ་དག་ཏུ་འཁོད་
ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཐང་ལས་སྐྱེས་པ་དང་། ཆུ་ལས་སྐྱེས་པའི་མེ་ཏོག་དེ་དག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པ་རབ་ཏུ་གཏོར་ཏོ། །དེ་ནས་ཁང་པ་བརྩེགས་པ་དེ་དག་ལས་བབས་ཏེ་རྐང་པས་དོང་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ། བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་རྣམ་པས་སངས་རྒྱས་ཀྱི་ཡོན་ཏན་རྗེས་སུ་དྲན་པར་བྱེད་ཅིང་ཕྱོགས་གཅིག་ཏུ་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་ལྗོན་པ་འཁོར་དང་བཅས་པའི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་དྲི་བྲལ་སྤྱན་མངའ་བ། །རྒྱུ་མ་མཆིས་པར་འཇུམ་མི་མཛད། །ལྷ་མིས་མཆོད་པ་ཡང་དག་ཏུ། །འཛུམ་མཛད་རྒྱུ་དེ་བཀའ་སྩལ་གསོལ། །ཐམས་ཅད་མཁྱེན་པ་འཛུམ་མཛད་པ། །འཁོར་གྱིས་མཐོང་ནས་ཐེ་ཚོམ་འཚལ། །ཟླ་བ་ཚིས་ལ་མི་བཞིན་དུ། །སྨྲ་བའི་ཟླ་བའི་ཞལ་དུ་ལྟ། །བདེ་གཤེགས་མཛེས་པ་དེང་སུ་ཞིག །གཉིས་མེད་ཆོས་ལ་ཤེས་མཆོག་སྐྱེས། །བར་གཞི་ཐེ་ཚོམ་འཚལ་བར་འགྱུར། །མི་མཆོག་དམ་པ་ཐེ་ཚོམ་སོལ། །བདེ་གཤེགས་གང་གིས་ཆོས་ཉིད་ལ། །དད་པ་ཐོབ་ནས་བཅོམ་ལྡན་འདས། །ཇི་ལྟར་འཛུམ་པ་མཛད་པར་འགྱུར། །སྨྲ་མཆོག་བདག་གི་ཐེ་ཚོམ་ཁུམ། །ཐམས་ཅད་ལྡན་པའི་འཁོར་འདི་ཡིས། །བཅོམ་ལྡན་བསྟན་ཐོས་ཡིད་དགའ་ཞིང་། །ཐེ་ཚོམ་མ་མཆིས་སོམ་ཉི་ཆར། །ཇི་ལྟར་བསྟན་བཞིན་གནས་པར་འགྱུར། །དེ་ལྟར་རྐང་གཉིས་རྣམས་ཀྱི་མཆོག །འགྲོ་ལ་ཐུགས་བརྩེ་མཛད་པ་དང་། །ཐེ་ཚོམ་བཅད་སླད་ལྗོན་པ་དང་། །མི་ཅི་རྣམས་ཀྱི་ལུང་བསྟན་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །སྐྱེ་བོ་ཚོགས་ཆེན་རྣམས་ནང་དུ། །སངས་རྒྱས་ཡོན་ཏན་སྟེན་འགྱུར་བ། ། ལྗོན་པའི་ལུང་བསྟན་གང་དྲིས་པ། །རྟ་ཐུལ་ཁྱོད་ཀྱིས་ལེགས་པར་དྲིས། །
ཡེ་ཤེས་མཐོང་བ་སྒྲིབ་མེད་པ། །བདེ་གཤེགས་ཡེ་ཤེས་ངོ་མཚར་ཅན། །དེ་ཁྱོད་དང་བའི་ཡིད་བྱོས་ལ། །སྐྱོ་མེད་ཡིད་ཀྱིས་ང་ལ་ཉོན། །འཇིག་རྟེན་ཕན་དང་བདེ་བའི་ཕྱིར། །ལྗོན་པས་ཐེ་ཚོམ་གང་དྲིས་པ། །དེ་ཡི་འབྲས་བུ་བརྗོད་པར་བྱས། །ཐེ་ཚོམ་གཅད་པ་ང་ལས་ཉོན། །ལྗོན་པ་ལ་སོགས་མིའམ་ཅི། །བྱེ་བ་ཕྲག་བརྒྱད་འདིར་ལྷགས་པ། །དེ་དག་གང་ལ་མཆོད་བྱས་ནས། །འདི་ནས་ཤི་འཕོས་མཐོ་རིས་འདོང་། །བསྐལ་པ་བྱེ་བ་དགུ་བཅུ་དེར། །ལྷ་མིའི་ནང་དུ་འཁོར་བར་འགྱུར། །མངོན་པར་ཤེས་པ་ལྔ་བསྒོམས་ནས། །སེམས་ལ་དབང་སྒྱུར་དབང་ལྡན་འགྱུར། །མི་ཡི་སེང་གེ་དེ་དག་གིས། །སངས་རྒྱས་ཞིང་ཕྲག་ཁྲག་ཁྲིག་ཏུ། །སྤྲུལ་བཀྱེ་རང་ནི་ལྷ་གནས་ན། །བསམ་གཏན་དགའ་བའི་བདེ་བ་མྱོང་། །བསྐལ་པ་བྱེ་བ་དགུ་བཅུར་ཡང་། །དེ་དག་ལྷ་མིར་འཁོར་འཁོར་ནས། །རང་རང་ཞིང་རྣམས་སྣ་ཚོགས་སུ། །བྱང་ཆུབ་རྣམ་པར་འཚང་རྒྱར་འགྱུར། །རྟག་ཏུ་སྣང་བའི་བསྐལ་པ་ལ། །མི་ཡི་སེང་གེ་འཇིག་རྟེན་མགོན། །ཆགས་མེད་ཡེ་ཤེས་མཐོ་དཔག་ཡས། །སྟོབས་བཅུ་གཟི་བརྗིད་མཐའ་ཡས་འགྱུར། །དེ་དག་ཞིང་དུ་སེམས་ཅན་གང་། །ཡོངས་སུ་མ་སྨིན་འགའ་མི་སྐྱེ། །ཉན་ཐོས་ཐེག་པས་གང་བྱུང་བ། །ཀུན་ཀྱང་སྲིད་པ་ཐ་མ་པ། །མི་ཡི་སེང་གེའི་ཞིང་དེར་ནི། །བྱང་ཆུབ་སེམས་དཔའ་གང་སྐྱེ་བ། །དེ་དག་ཚེ་གཅིག་ཐོགས་པ་སྟེ། །མི་མཆོག་བྱང་ཆུབ་ཐོབ་པར་འགྱུར། །གང་དག་གཙོ་བོར་གྱུར་པ་རྣམས། །བདག་ཅག་དཔག་མེད་སངས་རྒྱས་ཞིང་། །ཡོངས་སུ་སྦྱང་བར་བྱའོ་ཞེས། །དེ་འདྲའི་བསམ་པས་རབ་ཏུ་ཞུགས། །སེམས་ཅན་རླབས་ཆེན་དེ་དག་ནི། །སྨོན་ལམ་རྒྱ་ཆེན་ཡུན་རིང་བཏབ། །དེ་དག་འདི་ནས་ཤི་འཕོས་ནས། །བསམ་པས་རང་ཞིང་རྣམ་པར་སྦྱོང་། །ཉོན་མོངས་འཇོམ་པ་དེ་དག་གི །ཞིང་གི་བཀོད་པར་འགྱུར་བ་ནི། །དགའ་ལྡན་གནས་ཀྱི་ལོངས་སྤྱོད་རྣམས། །ངན་སོང་ཀུན་ཀྱང་ཡོངས་སུ་དག །དེ་དག་ཞིང་དུ་རྣམ་ཀུན་དུ། །མི་ཁོམ་གང་ཡང་འབྱུང་མི་འགྱུར། །ཞིང་རྣམས་ཡོངས་སྦྱངས་དེ་དག་ནི། །སེམས་ཅན་རྣམས་ཀྱང་བདེ་བར་འདྲེན། །
དེ་ལྟར་འཇིག་རྟེན་མགོན་པོ་ཡིས། །མི་ཅི་རྣམས་ཀྱི་ལུང་བསྟན་བཤད། །ལུང་བསྟན་དེ་ཐོས་འཁོར་གྱི་རྣམས། །ཀུན་ཀྱང་ཡི་ནི་རངས་པར་འགྱུར། །མིའམ་ཅི་ལུང་བསྟན་པའི་ལེའུ་སྟེ་བཅུ་གཉིས་པའོ།། །།