བཅུ་གསུམ་པ། ཕྲེང་ལྡན་གླང་པོ་ཅན་ལུང་བསྟན་པའི་ལེའུ།
དེ་ནས་ལྷ་ཕྲེང་ལྡན་གླང་པོ་ཅན་བརྒྱད་ཁྲིས་ལྷ་མ་ཡིན་རྣམས་ནས་མིའམ་ཅིའི་བར་དག་གིས་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། །རབ་ཏུ་དགའ་ཞིང་དགའ་བ་དང་། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ལ་མོས་ཤིང་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་གིས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱི་ཁོར་ཡུག་ཏུ་དཔག་ཚད་དྲུག་བཅུ་ཚུན་ཆད་ཆད་མེ་ཏོག་མཱན་དཱ་ར་བས་པུས་ནུབ་ཙམ་དུ་གང་བར་བྱས་སོ། །དེ་ནས་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་བའི་དབང་པོ་འཛུམ་པའི་ཞལ། །སྲོག་ཆགས་ཀུན་ལ་ཐུགས་བརྩེ་བ། །བདེ་བར་གཤེགས་པ་ཐུགས་རྗེ་ཅན། །འཇིག་རྟེན་བདག་པོ་མི་ཡི་སྟག །སངས་རྒྱས་ཆོས་ལ་མོས་པ་ཡི། །འཁོར་འདི་ཇི་སྲིད་འདིར་གནས་པར། །ཞབས་མཆོག་མཛེས་ཤིང་དགའ་ལྡན་པ། །ཐུགས་རྗེ་ཅན་ལ་མགོས་ཕྱག་འཚལ། །ཇི་ལྟར་དགུང་ཟླ་ཉ་བའི་ཚེ། །མི་རྣམས་ཟླ་བ་ཕྱག་འཚལ་བ། །དེ་བཞིན་ལྷ་ཚོགས་འདི་རྣམས་ཀྱང་། །བཅོམ་ལྡན་འདས་ཀྱི་ཞལ་དུ་ལྟ། །དཔག་ཏུ་མེད་པའི་དགེ་སྤྱད་པ། །དཔག་ཡས་ཡེ་ཤེས་ཕུང་པོ་ལྡན། །གཟི་བརྗིད་དཔའ་ཡས་ཕུང་པོ་ཅན། །བློ་མཆོག་ཁྱོད་ལ་མགོས་ཕྱག་འཚལ། །སྟོབས་བཅུ་མངའ་ཞིང་དཔལ་སྟུག་པ། །བདེན་བཞིན་མི་བསྙེངས་དྲི་གསུམ་སེལ། །རྒྱལ་བའི་བཅུ་བརྒྱད་ཆོས་དང་ལྡན། །ཐེ་ཚོམ་མི་མངའ་སྨྲ་བའི་མཆོག །སུམ་ཅུ་རྩ་གཉིས་མཚན་མངའ་ཞིང་། །དཔེ་བྱད་བཟང་པོ་བརྒྱད་ཅུ་ལྡན། །དབང་པོའི་རྒྱལ་མཚན་མཚུངས་མེད་ཐུགས། །བདེ་གཤེགས་ཁྱོད་ལ་ཕྱག་འཚལ་ལོ། །ཚུལ་ཁྲིམས་སྟོབས་ཀྱི་མཐར་ཕྱིན་པ། །ཏིང་འཛིན་སྟོབས་གནས་མི་བསྐྱོད་པ། །ཡེ་ཤེས་སྟོབས་ཀྱི་མཚོན་ཆ་
ཅན། །བདུད་སྟོབས་བཅོམ་ཐུབ་རྒྱལ་བ་ལགས། །ཡེ་ཤེས་སྟོབས་མཆོག་རྒྱས་གྱུར་པ། །སེར་སྣ་མི་མངས་ཉན་ཐོས་བཏུལ། །ཞི་བའི་ཐུགས་ཀྱིས་སྤྱོད་མཛད་ཅིང་། །ལྷ་དང་བཅས་པའི་འཇིག་རྟེན་འདུལ། །སྐྱེས་བུ་སེང་གེ་བདེ་གཤེགས་ཁྱོད། །གཏི་མུག་ཞི་བགྱིད་ཆོས་བརྙེས་པ། །བདག་ཅག་རྣམས་ཀྱང་སྟོབས་བཅུ་ཡི། །ཆོས་རྣམས་འདི་ནི་ཐོབ་པར་ཤོག །ཇི་ལྟར་ཐུབ་ཁྱོད་སེམས་ཅན་གྱི །བསམ་མཁྱེན་དང་མཛད་དེ་བཞིན་དུ། །འཇིག་རྟེན་སྣང་མཛད་བདག་ཅག་ཀྱང་། །ལྷ་མིར་བཅས་པའི་འགྲོ་དང་བགྱི །དེ་ལྟར་འགྲོ་བའི་དོན་སླད་དུ། །སྙིང་བརྩེར་ཉེ་བར་བཟུང་ནས་ནི། །འགྲོ་བ་འཁོར་བའི་མཚོར་བྱིང་བ། །སྲིད་པའི་རྒུད་ལས་བསྒྲལ་བར་བགྱི །བདག་ཅག་ལྷར་བཅས་འཇིག་རྟེན་གྱི །འདྲེན་དང་རབ་ཏུ་འདྲེན་གྱུར་ཅིག །འགྲོ་བ་སྡུག་བསྔལ་བརྒྱས་ཉེན་པ། །སྲིད་པའི་རྒྱུ་ལས་དགྲོལ་བར་བགྱི །དེ་ནས་བཅོམ་ལྡན་འདས་ཀྱིས་ལྷ་ཕྲེང་ལྡན་གླང་པོ་ཅན་རྣམས་ཀྱི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །བདེ་གཤེགས་རྣམ་པར་འདྲེན་པ་པོ། །རྒྱུ་མ་མཆིས་པར་འཛུམ་མི་མཛད། །སྟོབས་བཅུ་ཁྱོད་ནི་འཛུམ་མཛད་པའི། ། རྒྱུ་གང་ལགས་པ་བཀའ་སྩལ་གསོལ། །རྒྱལ་བའི་ཞལ་ནས་འཛུམ་མཛད་པ། །འགྲོ་བ་དང་བ་གྱིས་བྱུང་མཐོང་ནས། །འཁོར་ཀུན་ཐེ་ཚོམ་འཚལ་གྱུར་ཏེ། །འཛུམ་པའི་དོན་ནི་ཉན་པར་འཚལ། །དོན་ཆེན་འཛུམ་པ་མཛད་པའི་དོན། །བཀའ་སྩོལ་བཀའ་སྩོལ་འདྲེན་པའི་མཆོག །དགེ་སྦྱོང་རྣམས་ཀྱི་རྒྱལ་པོ་ཁྱོད། །ཐེ་ཚོམ་ཆད་འགྱུར་བཀའ་སྩལ་གསོལ། །གང་གིས་རྒྱལ་བ་མཉེས་པར་བགྱིས། །གང་གིས་དེང་མཆོག་བླ་མེད་གྱིས། །སུ་ཞིག་དེ་རིང་གཏིང་ཐོབ་གྱུར། །བདེ་གཤེགས་བདག་གི་ཐེ་ཚོམ་ཁུམ། །དེ་རིང་གང་གིས་བདུད་ཀྱི་གནས། །དཀྲུགས་གཡེངས་ཀུན་དུ་འཁྲུགས་པར་བགྱིས། །དེང་སུས་ལྷ་གནས་ཐམས་ཅད་ཀྱང་། །རབ་ཏུ་དགའ་ཡིད་ལྡན་པར་གྱིས། །རྒྱལ་བ་ཐུབ་པ་དེ་ལུང་སྟོན། །འགྲོ་བའི་ཐེ་
ཚོམ་མྱུར་དུ་ཁུམ། །དེ་ཐོས་བདེ་གཤེགས་འཁོར་གྱི་རྣམས། །ཀུན་ཀྱང་རབ་ཏུ་ཡིད་དགའ་འགྱུར། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་ཚེ་དང་ལྡན་པ་རྟ་ཐུལ་ལ་སླར་བཀའ་སྩལ་པ། །ཕྲེང་ལྡན་གླང་པོ་ཅན་ལྷ་ཡི། །ལུང་བསྟན་རྟ་ཐུལ་ཁྱོད་དྲིས་པས། །དེས་ན་འགྲོ་བ་མང་པོ་ཡི། །དོན་ཆེན་ཤིན་དུ་དེང་བྱས་འགྱུར། །སྟོབས་བཅུ་རྒྱལ་བ་མ་དྲིས་པར། །སྲས་མཆོག་བྱང་ཆུབ་ལུང་མི་སྟོན། །དེ་ནི་འགྲོ་བ་མང་དོན་དུ། །དེ་རིང་ཁྱོད་ཀྱིས་རྒྱལ་ལ་ཞུས། །ཕྲེང་ལྡན་གླང་པོ་ལྷ་ཚོགས་ཀྱིས། །ང་ལ་སེམས་དང་ང་མཆོད་པས། །བསྐལ་པ་གྲངས་མེད་འདས་འོག་ཏུ། །ཉོན་མོངས་ཕམ་བྱས་རྒྱལ་བར་འགྱུར། །དེ་དག་འདི་ནས་ཤི་འཕོས་ནས། །འཐུན་པར་མི་ཡི་ནང་སྐྱེས་སྟེ། །རྒྱལ་བ་བྱེ་བ་དཔག་མེད་ལ། །མེ་ཏོག་མཆོག་གིས་མཆོད་པར་འགྱུར། །ཀུན་དུ་བདེ་བར་གཤེགས་ཀྱིས་སེམས། །སྐྱེད་བར་འགྱུར་ཞིང་འཕེལ་བྱེད་འགྱུར། །རང་བྱུང་མི་ཡི་སེང་གེ་ལ། །ཚིགས་སུ་བཅད་པས་བསྟོད་པར་འགྱུར། །མ་འོངས་དུས་ན་འདི་ཀུན་གྱིས། །རྒྱལ་བ་ཁྲག་ཁྲིག་དཔག་ཡས་མང་། །མེ་ཏོག་གིས་མཆོད་ཚིགས་བཅད་ཀྱིས། །མི་མཆོག་རྣམས་ལ་བསྟོད་བྱས་ཏེ། །དེ་དག་བདེ་གཤེགས་རྣམས་མཆོད་ཅིང་། །མཐུ་བོ་ཆེ་ཡི་སྐུ་བསྟོད་ནས། །རབ་ཏུ་དགའ་བའི་བསྐལ་པ་ལ། །རྣམ་པར་འདྲེན་པར་འཇིག་རྟེན་འབྱུང་། །གྲགས་པ་མ་སྨད་ནགས་རྒྱུ་བ། །བརྒྱད་ཁྲི་པོ་རྣམས་དེ་དག་ཀུན། །བསྐལ་པ་གཅིག་ལ་བདེ་གཤེགས་འགྱུར། །མེ་ཏོག་རྒྱལ་མཚན་ལྡན་ཞེས་བྱ། །དེ་ནང་དམྱལ་དང་དུད་འགྲོ་དང་། །ངན་སོང་གཤིན་རྗེའི་འཇིག་རྟེན་མིང་། །ཞིང་དེ་ན་ནི་ལྷ་མིན་མེད། །མི་ཁོམ་ཐམས་ཅད་རབ་ཏུ་བཅོམ། །ཕྲེང་ལྡན་གླང་པོ་ཅན་ལྷ་ཡི། །ལོངས་སྤྱོད་སུམ་ཅུ་རྩ་གསུམ་གྱི །ཅི་འདྲ་བ་ནི་དེ་འདྲར་འགྱུར། །འགྲོ་བའི་ཚེ་ཚད་དཔག་ཏུ་མེད། །དེ་ཚི་མི་དགེ་སྒྲ་མི་གྲག །མི་དགེ་བྱེད་པ་སྨོས་ཅི་དགོས། །དེ་ན་རྣམ་འདྲེན་མཆོག་རྣམས་ཀྱི། །སྐྱེ་བོ་རྣམས་ཀྱི་ཆོས་ཅན་འགྱུར། །སྲོག་ཆགས་བྱེ་བ་ཁྲག་ཁྲིག་ཕྲག །གང་གཱའི་བྱེ་མ་རབ་
མང་སྙེད། །གྲོལ་བར་བྱེད་འགྱུར་སྟོབས་བཅུ་རྣམས། །གནས་པ་མེད་པའི་ཆོས་ཀྱང་སྟོན། །གྲགས་པ་མ་སྨད་དེ་དག་གི །རིང་སྲེལ་དག་ཀྱང་རྒྱས་པར་འགྱུར། །དེ་དག་རྣམས་ཀྱི་རིང་བསྲེལ་ལའང་། །རྒྱལ་བའི་སྐུ་མང་འབྱུང་བར་འགྱུར། །གྲགས་པ་མཐའ་ཡས་ལྡན་རྣམས་ཀྱི། །རང་བསྲེལ་ཆོ་འཕྲུལ་སྐུ་མཐོང་ནས། །སྲོག་ཆངས་བྱེ་བ་ཁྲག་ཁྲིག་མང་། །བྱང་ཆུབ་ཏུ་ནི་སེམས་བསྐྱེད་འགྱུར། །ཕྲེང་ལྡན་གླང་པོ་ཅན་རྣམས་ཀྱི། །ལུང་བསྟན་འདྲེན་པས་བཀའ་སྩལ་པ། །ཐོས་ཤིང་ཤེས་ནས་འཁོར་ཀུན་ཀྱང་། །དེ་ཚེ་སེམས་ནི་རབ་ཏུ་དགའ། །ཕྲེང་ལྡན་གླང་པོ་ཅན་ལུང་བསྟན་པའི་ལེའུ་སྟེ་བཅུ་གསུམ་པའོ།། །།