བཅུ་བདུན་པ། དགའ་ལྡན་པ་ལུང་བསྟན་པའི་ལེའུ།
དེ་ནས་དགའ་ལྡན་རིས་ཀྱི་ལྷ་བྱེ་བ་ཕྲག་བརྒྱད་བཅུས་ལྷ་མ་ཡིན་རྣམས་ནས་འཐབ་བྲལ་གྱི་རིས་ཀྱི་ལྷའི་བར་དེ་དག་གི་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་འདི་སྙམ་དུ་སེམས་ཏེ། གང་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེ་གང་ཞིག་ཅིག་གཟུགས་སམ། འོན་ཏེ་ཚོར་བའམ། འདུ་ཤེས་སམ། འོན་ཏེ་འདུ་བྱེད་དམ་འོན་ཏེ་རྣམ་པར་ཤེས་པ་ཞིག་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་སྙམ་ནས་དེ་དག་འདི་སྙམ་དུ་སེམས་ཏེ། གཟུགས་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། གཟུགས་ཀྱང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན་ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཚང་རྒྱ་བར་བྱ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན་དེ་ལ་ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཆང་རྒྱ་བར་བྱ། གཟུགས་ཀྱང་འགག་པ་མེད་པ། བྱང་ཆུབ་ཀྱང་འགག་པ་མེད་པ། རྣམ་པར་ཤེས་པའི་བར་ཡང་འགག་པ་མེད་པ། བྱང་ཆུབ་ཀྱང་འགག་པ་མེད་པ། གཟུགས་ཀྱང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། རྣམ་པར་ཤེས་པའི་བར་ཡང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། གཟུགས་ཀྱང་གཉིས་སུ་མེད་པ། བྱང་ཆུབ་ཀྱང་གཉིས་སུ་མེད་པ། རྣམ་པར་ཤེས་པའི་བར་ཡང་གཉིས་སུ་མེད་པ། བྱང་ཆུབ་ཀྱང་གཉིས་སུ་མེད་པ། །གཟུགས་ཀྱང་གཡོ་བ་མེད་པ། །བྱང་ཆུབ་ཀྱང་གཡོ་བ་མེད་པ་རྣམ་པར་ཤེས་པའི་བར་ཡང་གཡོ་བ་མེད་པ། བྱང་ཆུབ་ཀྱང་གཡོ་བ་མེད་པ། གཟུགས་ཀྱང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ་
རྣམ་པར་ཤེས་པའི་བར་ཡང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ་ན་ཇི་ལྟར་འགག་པ་མེད་པ་དང་། སྤྲོས་པ་མེད་པ་དང་། གཉིས་སུ་མེད་པ་དང་། གཡོ་བ་མེད་པ་དང་དམིགས་སུ་མེད་པས་འགག་པ་མེད་པ་དང་། དམིགས་སུ་མེད་པའི་བར་དུ་མངོན་པར་རྫོགས་པར་འཚང་རྒྱ་བར་བྱ། དེ་ལྟར་ཆོས་ཐམས་ཅད་མི་དམིགས་ན་འདི་ལ་སངས་རྒྱས་ནི་གང་། བྱང་ཆུབ་སེམས་དཔའ་ནི་གང་། བྱང་ཆུབ་ནི་གང་། ལུང་བསྟན་པ་ནི་གང་། གཟུགས་ནི་གཟུགས་ཀྱིས་སྟོང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ནི་རྣམ་པར་ཤེས་པས་སྟོང་། སངས་རྒྱས་ནི་སངས་རྒྱས་ཀྱི་ངོ་བོ་ཉིད་ཀྱིས་སྟོང་། བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ངོ་བོ་ཉིད་ཀྱིས་སྟོང་། བྱང་ཆུབ་ནི་བྱང་ཆུབ་ཀྱི་ངོ་བོ་ཉིད་ཀྱིས་སྟོང་། ལུང་བསྟན་པ་ནི་ལུང་བསྟན་པའི་ངོ་བོ་ཉིད་ཀྱིས་སྟོང་སྟེ། དེ་ལྟར་ཆོས་ཐམས་ཅད་རང་བཞིན་གྱིས་སྟོང་པ་ལ་གཟུགས་ཤེས་བྱ་བ་དང་། རྣམ་པར་ཤེས་པའི་བར་ཞེས་བྱ་བ་དང་། སངས་རྒྱས་ཞེས་བྱ་བ་དང་། ལུང་བསྟན་པའི་བར་ཞེས་བྱ་བ་དེ་དག་ནི་ཐ་སྙད་ཙམ། མིང་ཙམ། བརྡ་ཙམ། ཀུན་རྫོབ་ཙམ། བརྗོད་པ་ཙམ། གདགས་པ་ཙམ་སྟེ། དེ་ལ་མཁས་པ་རྣམས་ཀྱིས་མངོན་པར་ཞེན་པར་བྱ་བའི་མི་ཆའོ། །འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་འདོད་པའི་ཡོན་ཏན་ལྔ་དང་ལྡན་ཞིང་རྩེ་རྩེ་བ་ལས་དེ་ཉལ་བ་ལས་སང་ན། འདོད་པའི་ཡོན་ཏན་དེ་དག་མི་མཐོང་སྟེ། དེ་རྗེས་སུ་དྲན་པར་མི་རྙེད་ཅིང་དེ་ལྟར་མི་རྙེད་པའི་ཕྱིར་སྡུག་བསྔལ་དུ་འགྱུར་བ་དེ་བཞིན་དུ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱང་བྱང་ཆུབ་ཚོལ་ན་དེ་དག་བྱང་ཆུབ་དང་ཕྲད་པར་མི་འགྱུར་ཏེ། བྱང་ཆུབ་མ་རྙེད་ཅིང་རོ་མ་མྱོང་བས་སྡུག་བསྔལ་དུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅན་ནི་རྨི་ལམ་ལྟ་བུ་ནོར་བ་སྟེ། ཆོས་དེ་དག་གི་དོན་ནི་རྣམ་པ་གཞན་ལ་སོ་སོའི་སྐྱེ་བོ་དེ་དག་ཀྱང་རྣམ་པ་གཞན་དུ་ཞེན་ཏོ། །ཆོས་དེ་དག་ནི་དེ་ལྟར་ཤེས་པར་བྱ་བ་ཡིན་ན་དེ་ལ་ཆོས་གང་ཞིག་སངས་རྒྱས་ཡིན། གང་ཞིག་བྱང་ཆུབ་སེམས་དཔའ་ཡིན། གང་ཞིག་བྱང་ཆུབ་ཡིན།
གང་ཞིག་ལུང་བསྟན་པ་ཡིན། དེ་ལྟར་ཆོས་ཐམས་ཅད་དམིགས་སུ་མེད་དེ། སོ་སོའི་སྐྱེ་བོ་ཡང་དམིགས་སུ་མེད། སོ་སོའི་སྐྱེ་བོའི་ཆོས་ཀྱང་དམིགས་སུ་མེད། ཉན་ཐོས་ཀྱང་དམིགས་སུ་མེད། ཉན་ཐོས་ཀྱི་ཆོས་ཀྱང་དམིགས་སུ་མེད། རང་སངས་རྒྱས་ཀྱང་དམིགས་སུ་མེད། རང་སངས་རྒྱས་ཀྱི་ཆོས་ཀྱང་དམིགས་སུ་མེད། །བྱང་ཆུབ་སེམས་དཔའ་ཡང་དམིགས་སུ་མེད། བྱང་ཆུབ་སེམས་དཔའི་ཆོས་ཀྱང་དམིགས་སུ་མེད། སངས་རྒྱས་ཀྱང་དམིགས་སུ་མེད། སངས་རྒྱས་ཀྱི་ཆོས་ཀྱང་དམིགས་སུ་མེད། བྱང་ཆུབ་ཀྱང་དམིགས་སུ་མེད། མྱ་ངན་ལས་འདས་པ་ཡང་དམིགས་སུ་མེད་དོ། །བཅོམ་ལྡན་འདས་དེ་ལ་ནི་བདག་ཅག་ཐེ་ཚོམ་མ་མཆིས། ཡིད་གཉིས་མ་མཆིས་སོ་ཞེས་གསོལ་ནས་དགའ་ལྡན་རིས་ཀྱི་ལྷའི་བུ་དེ་དག་ཆོས་དེ་དག་ལ་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། བཅོམ་ལྡན་འདས་ལ་མཆོད་པ་བྱ་བའི་ཕྱིར་བརྩོན་པར་གྱུར་ནས་དེ་དག་འཐབ་བྲལ་གྱི་མཆོད་པ་ལས་ཁྱད་པར་འཕགས་པས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། གང་དག་སངས་རྒྱས་ཡོན་ཏན་རབ་གནས་པ། དེ་དག་འཇུག་པ་དེ་བཞིན་གཤེགས་པས་གསུངས། །རྣམ་ཐར་སྒོ་གསུམ་པོ་ནི་རྙེད་གྱུར་པས། །མཚུངས་པ་མེད་པའི་སྤྱོད་ཡུལ་སྤྱོད་པར་འགྱུར། །གཟུགས་དང་ཚོར་བ་འདུ་ཤེས་མ་མཆིས་ཏེ། །སེམས་དང་བསམ་པ་དེ་བཞིན་མ་མཆིས་པ། །ཆགས་མེད་བློ་མངའ་རྣམས་ཀྱི་སྤྱོད་ཡུལ་ལགས། །མི་ཡི་སེང་གེ་ཕུང་པོ་དབེན་ལ་དགྱེས། །སྐྱེས་བུ་དམ་པ་མཁས་པ་དེ་དག་གི །བྱང་ཆུབ་སེམས་ཀྱང་ནམ་ཡང་འབྱུང་མ་མཆིས། །ཕུང་པོ་དབེན་པའི་ཡོན་ཏན་མྱོང་གྱུར་ནས། །སངས་རྒྱས་དགོངས་ལ་ནེམ་ནུར་སྤངས་བློ་ལྡན། །དེ་དག་བྱང་ཆུབ་སྨོན་པ་མ་མཆིས་ཤིང་། །བྱང་ཆུབ་སེམས་ལ་འདི་དག་མི་སྨོད་དོ། །དགའ་དང་ཞུམ་པར་འགྱུར་བ་མ་མཆིས་པར། །བདེ་གཤེགས་སྲས་རྣམས་སྤྱད་པ་སྤྱོད་
པ་བགྱིད། །བདེ་གཤེགས་རྣམས་ཀྱིས་ཆོས་རྣམས་མཉམ་པར་གཟིགས། །དེ་ལ་རྒྱལ་སྲས་འཇིགས་དང་བྲལ་བ་རྣམས། །ཡང་དག་ཉིད་དུ་སངས་རྒྱས་ལེགས་སྤྱོད་ཅིང་། །མཁས་པ་དེ་དག་འཇིག་རྟེན་འདི་ན་སྤྱོད། །གཟུགས་ཀྱི་མཚན་མ་རྣམ་པར་གཞིག་བགྱིས་ཤིང་། །མཚན་མའི་རྣམ་པ་ཐམས་ཅད་རབ་སྤངས་ཏེ། །སྲིད་པ་གསུམ་ལ་དེ་དག་ཡོང་མི་སྨོན། །དངོས་པོ་སྟོང་པར་སྨོན་ལམ་དེ་དག་བགྱིད། །ཕུང་པོ་འདི་དག་མ་སྐྱེས་རྟོགས་གྱུར་ཅིང་། །ལུང་བསྟན་བདེ་གཤེགས་ཉིད་ཀྱང་མ་སྐྱེས་ལ། །བྱང་ཆུབ་སེམས་དཔའ་བྱང་ཆུབ་ཀྱང་མ་སྐྱེས། །དེ་ལྟར་གང་འཚལ་དེ་ལ་རྨོངས་མ་མཆིས། །སྐྱེ་བོའི་ཆོས་དང་སངས་རྒྱས་ཡོན་ཏན་རྣམས། །དེ་དག་ཀུན་དང་བདེ་གཤེགས་མ་སྐྱེས་ཏེ། །མི་ཡི་སེང་གེ་དེ་ལྟར་གང་འཚལ་བ། །དེ་ནི་ཁྱོད་སྲས་ཁྱོད་ནི་དེ་ཡི་ཡབ། །གང་ཞིག་ཕུང་པོ་འགག་པ་མ་མཆིས་ཤིང་། །ཁམས་དང་སྐྱེ་མཆེད་དེ་བཞིན་རྒྱལ་བའི་ཆོས། །བྱང་ཆུབ་རྒྱལ་བ་དེ་བཞིན་ལུང་བསྟན་པ། །བཅོམ་ལྡན་འདི་ཀུན་འགག་མེད་འཚལ་བ་དང་། །གང་རྣམས་བྱང་ཆུབ་འཚལ་ཞིང་སྤྱོད་བགྱིད་པ། །འཇིག་རྟེན་མཁས་པ་དེ་དག་འགག་མ་མཆིས། །འགྲོ་བ་ཐམས་ཅད་འགག་མེད་བློར་གྱུར་ན། །དེ་འདྲའི་བློ་ལྡན་བྱང་ཆུབ་རྙེད་མི་དཀའ། །ཕུང་པོ་སྐྱེ་མཆེད་དག་དང་ཁམས་རྣམས་དང་། །བྱང་ཆུབ་རྒྱལ་བ་རྒྱལ་སྲས་མི་གཡོ་བར། །གང་གིས་འཚལ་བ་དེ་དག་རྒྱས་སྲས་ཏེ། །དེ་དག་རྒྱལ་བའི་ཆོས་འདི་འཛིན་པ་ལགས། །ཕུང་པོ་སེམས་མེད་དེ་བཞིན་སྐྱེ་མཆེད་དང་། །ཁམས་དང་བྱང་ཆུབ་རྒྱལ་བ་རྒྱལ་སྲས་དང་། །ལུང་བསྟན་དེ་བཞིན་སེམས་པ་མ་མཆིས་པར། །གང་གིས་འཚལ་བ་དེ་དག་རྒྱལ་བའི་སྲས། །རང་བྱུང་ཕུང་པོ་དངོས་ཉིད་སྟོང་པ་སྟེ། །ཁམས་དང་སྐྱེ་མཆེད་དག་དང་རྒྱལ་བ་དང་། །བྱང་ཆུབ་དང་ནི་ལུང་བསྟན་རྒྱལ་སྲས་རྣམས། །ངོ་བོ་ཉིད་ཀྱིས་སྟོང་པར་གང་སྤྱོད་དང་། །ཕུང་པོ་སྤྲོས་འདྲ་དེ་བཞིན་ཁམས་རྣམས་དང་། །སྐྱེ་མཆེད་རྐང་གཉིས་མཆོག་དང་བྱང་ཆུབ་དང་། །ལུང་བསྟན་སྤྲོས་པ་མེད་པར་གང་སྤྱོད་ཅིང་། །དེ་ལྟར་གང་འཚལ་དེ་དག་རྒྱལ་བའི་སྲས། །གནས་པ་མ་མཆིས་མི་གནས་མ་ལགས་ཏེ། །མཆིས་པ་མ་ལགས་མ་མཆིས་ཡོང་མ་ལགས། །
འདུས་བྱས་མ་ལགས་འདུས་མ་བྱས་མ་ལགས། །དེ་ལྟར་གང་འཚལ་དེ་དག་རྒྱལ་བའི་སྲས། །རྒྱལ་དང་འགྲོ་འདི་དེ་ལྟར་ཡོངས་མཐོང་ཞིང་། །སྟོན་པའི་དགོངས་པ་དེ་ལྟར་འཚལ་གྱུར་ལ། །དེ་ལྟར་བགྱིས་ན་གང་ཟག་མཆོག་མཆོད་ཅིང་། །འདྲེན་པ་འཁོར་དང་བཅས་ལ་བསྙེན་བཀུར་ལགས། །རྣམ་པར་འདྲེན་པ་བསྟོད་པའི་བསོད་ནམས་གང་། །ཇི་སྙེད་འཇིག་རྟེན་ཕན་མཛད་མཁྱེན་པ་ཡི། །དགེ་བ་དེ་ཡིས་འགྲོ་བ་རབ་འབྱུང་བ། །རྒྱལ་བ་མཚན་མཆོག་ལྡན་པ་འགྲུབ་པར་ཤོག །དེ་ནས་བཅོམ་ལྡན་འདས་ཀྱིས་དགའ་ལྡན་རིས་ཀྱི་ལྷ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འདྲེན་པ་རྒྱུ་ཡི་སྟོབས་ནི་གང་ཞིག་གིས། །སྟོབས་བཅུ་བརྙེས་པ་འདི་ལྟར་འཛུམ་མཛད་པ། །འཛུམ་པའི་རྒྱུ་དེ་འདྲེན་པས་བཀའ་སྩལ་གསོལ། །དེས་ནི་འཇིག་རྟེན་འདི་དག་དགའ་བར་འགྱུར། །ཤཱཀྱ་ཐུབ་པའི་ཞལ་ནས་འཛུམ་མཛད་པ། །འགྲོ་བ་འདིས་མཐོང་ཐེ་ཚོམ་འཚལ་འགྱུར་ཏེ། །ཉན་པར་འཚལ་ཞིག་གཞན་དུ་མི་སེམས་པར། །ཀུན་ཀྱང་འཇིག་རྟེན་ཕན་པའི་ཞལ་དུ་ལྟ། །འདི་ལྟར་དཔེར་ན་ནད་དང་ནད་སྐྱོ་བ། །སྨན་པས་བསྒོ་བ་བཞིན་དུ་འཛིན་བགྱིད་པ། །དེ་བཞིན་འཁོར་འདི་ལུང་བསྟན་ཐོས་འཚལ་ཞིང་། །རྐང་གཉིས་དབང་པོ་དེ་གཤེགས་ཞལ་དུ་ལྟ། །འཁོར་འདི་ཐམས་ཅད་རྒྱ་ཆེན་ལྡན་པ་སྟེ། །སངས་རྒྱས་དགོངས་ལ་ཞེན་པའི་ཡིད་དང་ལྡན། །རྒྱལ་བས་ལུང་བསྟན་དེ་དག་ཐོས་འཚལ་ཏེ། །ཀུན་ཀྱང་བདེ་གཤེགས་ཞལ་དུ་ལྟ་ཞིང་སྡོང་། །དེ་ལ་རྒྱལ་བས་ཐུགས་རྗེ་ཆེ་བསྐྱེད་ཅིང་། །ཅི་ནས་འཁོར་འདི་རབ་ཏུ་དགར་འགྱུར་དང་། །སངས་རྒྱས་དགོངས་ལ་བསམ་པ་གཞོག་འགྱུར་བར། །ཡེ་ཤེས་སྟོབས་ཀྱིས་ཐེ་ཚོམ་གཅད་དུ་གསོལ། །མི་ཡི་ཁྱུ་མཆོག་ལུང་བསྟན་དུས་ལ་བབ། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །སངས་རྒྱས་དགོངས་ལ་བསམ་པ་གཞོག་འགྱུར་བར། །ཡེ་ཤེས་སྟོབས་ཀྱིས་ཐེ་ཚོམ་གཅད་དུ་གསོལ། །མི་ཡི་ཁྱུ་མཆོག་ལུང་བསྟན་དུས་ལ་བབ། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །སངས་རྒྱས་སླར་སྡོའི་སྒྲ་ནི་མི་མངའ་ན། །རྟོག་གེའི་ཚོགས་ཀྱི་སྡེ་ནི་གཞིག་ཏུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་འཇིག་རྟེན་སྒྲོན་མཛད་ལ། འཛུམ་
པའི་དོན་དྲིས་དེ་ནི་དུས་དང་ལྡན། །དེ་ལྟར་འཇིག་རྟེན་མཁས་ལ་དྲིས་པས་ན། །དེ་རིང་འགྲོ་བ་འདི་ཡི་དོན་ཆེན་བྱས། །འཇིག་རྟེན་ཕན་ཕྱིར་འཛུམ་པ་འདི་མཛད་པ། །གང་གིས་ཆོས་རབ་འདི་དག་ཤེས་གྱུར་ཏེ། དེ་ལ་མཆོད་པ་རྒྱ་ཆེན་འདི་བྱས་པའི། །དགའ་ལྡན་ལྷ་ཡི་བསམ་པ་མཁྱེན་ནས་མཛད། །འགྲོ་བ་ཡང་དག་རྟོགས་པ་བཞིན་དུ་མཐོང་། །རྒྱལ་བའི་དགོངས་པས་ཆོས་ཉིད་བརྙེད་པར་གྱུར། །གང་ལ་འགྲོ་བ་ཐམས་ཅད་རྨོངས་གྱུར་བའི། །རྣམ་པར་ཐར་པའི་སྒོ་གསུམ་རབ་ཏུ་རྟོགས། །སྔོན་གྱི་རྒྱལ་བ་རྣམས་ལ་ལྷག་བྱ་བྱས། །བསམ་པ་གཅིག་གིས་ཞུ་བ་ལེགས་པར་ཞུས། །དེ་ཉིད་དུ་ནི་སྟོང་ཉིད་ལེགས་པར་བསྒོམས། ། སྔོན་ཆད་བྱས་པ་དེ་ནི་འདིར་ཡང་བསྟན། །དེ་དག་དེ་བཞིན་གཤེགས་དང་དེང་ཕྲད་ཅིང་། །སྐྱེས་བུ་མཆོག་དང་འགྲོགས་པ་ཐོབ་གྱུར་ནས། །སྟོང་པ་ཉིད་ཀྱིས་འདྲེན་པ་བསྟོད་བྱས་པ། །དེ་རིང་འགྲོ་བའི་དོན་ཆེན་ཤིན་དུ་བྱས། །འགྲོ་བ་ཐམས་ཅད་སྐྱེ་མེད་ཇི་བཞིན་དུ། །བྱང་ཆུབ་རྒྱལ་བ་དེ་བཞིན་ལུང་བསྟན་དང་། །གང་དག་ཞི་བ་ཐོབ་ནས་སྤྱོད་པ་དང་། །བྱང་ཆུབ་དེ་བཞིན་དེ་དག་སྐྱེ་བ་མེད། །འགྲོ་བ་ཀུན་གྱི་ཆོས་ཉིད་འདི་འདྲ་བ། །དེ་ཤེས་བྱང་ཆུབ་ཐོབ་པར་འགྱུར་རོ་ཞེས། །ལྷ་རྣམས་གང་ཡང་དེ་ལ་ཐེ་ཚོམ་མེད། །བྱང་ཆུབ་སེམས་ཀྱིས་རྟག་པར་དེ་ལྟར་སྤྱོད། །དེ་བཞིན་འགྲོ་བ་འགག་མེད་ཇི་བཞིན་དུ། །ལྷ་ཚོགས་འདི་དག་རྟོགས་པའི་བློ་ལྡན་ཏེ། །མཁས་པ་འདི་དག་ནེམ་ནུར་མེད་པས་ན། །དེ་ཕྱིར་འདི་དག་རྒྱལ་བ་རང་བྱུང་འགྱུར། །གནས་པ་མེད་པ་ལ་ནི་ངེས་གྱུར་ནས། །གཡོ་བ་མེད་པ་དེ་ལ་ནེམ་ནུར་མེད། །འགྲོ་བ་ཀུན་ལ་སེམས་པ་ཡོད་མིན་པ། །དེ་ལའང་ལྷ་རྣམས་ཐེ་ཚོམ་ཡོད་མེད་དོ། །ཆོས་རྣམས་ངོ་བོ་ཉིད་ཀྱིས་རང་བཞིན་མེད། །བྱང་ཆུབ་སེམས་དང་དེ་བཞིན་བྱང་ཆུབ་ཀྱང་། །ཐམས་ཅད་ངོ་བོ་ཉིད་ཀྱིས་རང་བཞིན་མེད། །དེ་ལའང་ལྷ་རྣམས་ཐེ་ཚོམ་རྣམ་པར་དག །བློ་མཆོག་ལྡན་པའི་དགའ་ལྡན་ལྷ་འདི་རྣམས་། །ཀུན་ཀྱང་གནས་མེད་དེ་ལ་རབ་གནས་ཏེ། །དེ་ཕྱིར་ལྷ་རྣམས་བྱང་ཆུབ་རྙེད་མི་དཀའ། །རང་འབྱུང་ཉིད་ནི་མྱུར་དུ་ཐོབ་པར་འགྱུར། །འདྲེན་པས་སྐར་མ་འདྲ་བའི་བསྐལ་པ་ལ། །འགྲོ་
བ་མཐའ་ཡས་རྣམ་པར་འགྲེལ་པར་འགྱུར། །རྒྱལ་བ་དེ་དག་མཚན་དུ་འགྱུར་བ་ནི། །རང་བྱུང་ཆོས་ལ་རྣམ་དེས་རྒྱལ་པོའོ། །དེ་ལྟར་རྒྱལ་བས་དགའ་ལྡན་ལྷ་རྣམས་ཀྱི། །བསམ་པ་མཁྱེན་ཏེ་འགྲོ་ལ་བསྟན་མཛད་པ། །དེ་ཐོས་ནས་ནི་ལྷར་བཅས་འཇིག་རྟེན་ཡང་། །ཡི་རངས་གྱུར་ཅིང་སྟོབས་ཀྱང་ཐོབ་པར་འགྱུར། །དགའ་ལྡན་པ་ལུང་བསྟན་པའི་ལེའུ་སྟེ་བཅུ་བདུན་པའོ།། །།