ཉི་ཤུ་པ། ཚངས་པ་ལུང་བསྟན་པའི་ལེའུ།
དེ་ནས་ཚངས་རིས་ཀྱི་ལྷ་བྱེ་བ་ཕྲག་དྲུག་བཅུས་ལྷ་མ་ཡིན་རྣམས་ནས་གཞན་འཕྲུལ་དབང་བྱེད་རིས་ཀྱི་ལྷའི་བར་དག་གིས་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྔོན་དགེ་བའི་རྩ་བ་བསགས་པ་དང་། སྔོན་གྱི་རྒྱལ་བ་ལ་བསྙེན་བཀུར་བྱས་པ་དང་། བསམ་པ་ཡོངས་སུ་དག་པའི་ཕྱིར་འཇིག་རྟེན་པའི་བསམ་གཏན་ལ་མི་འདོད་པ་སྐྱེས་ཤིང་དེ་བཞིན་གཤེགས་པའི་བསྟན་པ་འདི་ལ་ནི་སྣང་བ་ཐོབ་སྟེ། ཆོས་ཟབ་མོ་ལ་བཟོད་པའི་ཐོབ་པར་གྱུར་ནས་དེ་དག་གིས་ཆོས་ཐམས་ཅད་བྱས་པ་ཡང་མ་ཡིན། མ་བྱས་པ་ཡང་མ་ཡིན་ཞེས་བྱ་བར་ཤེས་པར་གྱུར་ཏོ། །དེ་བཞིན་དུ་སྐྱེས་པ་ཡང་མ་ཡིན། །མ་སྐྱེས་པ་ཡང་མ་ཡིན། བྱུང་བ་ཡང་མ་ཡིན། མ་བྱུང་བ་ཡང་མ་ཡིན། གྲུབ་པ་ཡང་མ་ཡིན། མ་གྲུབ་པ་ཡང་མ་ཡིན། འགག་པ་ཡང་མ་ཡིན། མ་འགག་པ་ཡང་མ་ཡིན། གནས་པ་ཡང་མ་ཡིན། མི་གནས་པ་ཡང་མ་ཡིན། ཀུན་ནས་ཉོན་མོངས་པ་ཡང་མ་ཡིན། རྣམ་པར་བྱང་བ་ཡང་མ་ཡིན། རྗེས་སུ་ཆགས་པ་ཡང་མ་ཡིན། ཁོང་ཁྲོ་བ་ཡང་མ་ཡིན། རྨོངས་པ་ཡང་མ་ཡིན། མ་རྨོངས་པ་ཡང་མ་ཡིན། ཤེས་པ་པོ་ཡང་མ་ཡིན། ཤེས་པ་པོ་མེད་པ་ཡང་མ་ཡིན། དངོས་པ་མེད་པ་ཡང་མ་ཡིན། དམིགས་པ་ཡང་མ་ཡིན། མི་དམིགས་པ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། སོང་བ་ཡང་མ་ཡིན། འོང་བ་ཡང་མ་ཡིན། སྟོང་པ་ཡང་མ་ཡིན། མི་སྟོང་པ་ཡང་མ་ཡིན། མཚན་མ་ཡོད་པ་ཡང་མ་ཡིན། མཚན་མ་མེད་པ་ཡང་མ་ཡིན། སྨོན་པ་ཡོད་པ་ཡང་མ་ཡིན། སྨོན་པ་མེད་པ་ཡང་མ་ཡིན། སྨོན་པ་མེད་པ་ཡང་མ་ཡིན་ནོ་ཞེས་བྱ་བར་ཤེས་པར་གྱུར་ཏོ། །དེ་དག་དེ་ལྟར་ཆོས་ཐམས་ཅད་
ལ་ཡོང་མི་གནས་པའི་ཡིད་ཀྱིས་དེ་དག་མིང་ལ་ཡང་མི་གནས། ཐ་སྙད་ལ་ཡང་མི་གནས། བརྗོད་པ་ལ་ཡང་མི་གནས། དེ་དག་ནི་བརྗོད་པའི་འདུ་ཤེས་ཅན་མ་ཡིན་བརྗོད་དུ་མེད་པའི་འདུ་ཤེས་ཅན་ཡང་མ་ཡིན། བྱ་བའི་འདུ་ཤེས་ཅན་ཡང་མ་ཡིན། བྱ་བ་མེད་པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་འདུ་ཤེས་ཅན་ཡང་མ་ཡིན། སོ་སོ་སྐྱེ་བོ་མ་ཡིན་པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་ཆོས་ཀྱི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་ཡི་འདུ་ཤེས་ཅན་ཡང་མ་ཡིན། ཉན་ཐོས་མ་ཡིན་པའི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པའི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པ་མ་ཡིན་པའི་འདུ་ཤེས་ཅན་ཡང་མ་ཡིན། འཁོར་བའི་འདུ་ཤེས་ཅན་ཡང་མ་ཡིན། འཁོར་བ་མེད་པའི་འདུ་ཤེས་ཅན་ཡང་མ་ཡིན་ཏེ། དེ་ལྟར་ཐམས་ཅད་ཀྱི་ཐམས་ཅད་དུ་རྟོག་པ་མེད་པའི་བློ་ཅན་ནམ་མཁའི་བཞིན་དུ་དག་ཅིང་གོས་པ་མེད་པར་གྱུར་ནས་དེ་རྣམས་དག་པ་དང་གོས་པ་མེད་པའི་ཕྱིར་དེའི་ཚེ་དེ་དག་ཞི་བས། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་ལ་ཞི་བའི་ཐུགས་མངའ་ཞི་
བ་སྐྱེད་ཅིང་ཞི་བའི་ཕ་རོལ་བྱོན། ཞི་བ་བསྟེན་པར་མཛད་ཅིང་འགྲོ་ལ་ཞི་བ་བསྟེན་པ་རྗེས་སུ་སྟོན། ཞི་བའི་སྤྱོད་ཡུལ་དགྱེས་ཤིང་བྱང་ཆུབ་ཞི་ལ་དྲི་བྲལ་འཁྲུགས་མ་མཆིས། ཁྱོད་ཀྱིས་འཆི་མེད་ཞི་བ་འགྲོ་རྒྱུད་ཐམས་ཅད་བཏོན། །སྔོན་གྱི་རྒྱལ་བས་བསྟེན་པའི་བྱང་ཆུབ་གཞལ་ཡས་ཞི་བ་དེ་ལ་འགོད། དེ་བསྟེན སངས་རྒྱས་འཕགས་པས་བསྟེན་པའི་གྲོང་ཁྱེར་ཞི་བར་དེང་ཞེས་གསུང་། །འདྲེན་པ་དེ་ལྟར་འགྲོ་བ་འདི་ལ་རྒྱལ་བས་བསྟེན་པའི་བསླབ་པ་བསྟན། །གལ་ཏེ་བསླབ་པ་དེ་སློབ་འགྲོ་བ་འདི་དག་གཞལ་ཡས་འཐོབ། །བསླབས་ནས་ཞི་ཞིང་ཡིད་ཞི་ཞི་བའི་ལམ་དོང་དབང་པོ་ཞི་བ་དག །འཇིག་རྟེན་མཁས་པ་འགྲོ་བ་ཞི་བྱེད་མཐུ་ཆེན་ཞི་བ་ཤེས་པར་འགྱུར། །འདྲེན་པ་ཁྱོད་ཀྱི་སྲས་མཆོག་ཞི་བ་བགྱིད་གང་དག་གིས། །འཆི་མེད་ཞི་བ་མཚན་མ་ཐམས་ཅད་ཟད་པ་རྣམ་པར་རྟོག་གྱུར་པ། །དེ་དག་འདྲེན་པ་ཚུལ་ལ་མཁས་པ་མཆོད་པ་མཆོག་གིས་མཆོད་པར་འགྱུར། །ཉོན་མོངས་ཞི་ཞིང་མཚན་མ་ཀུན་སྤངས་ཞི་བ་རྟག་ཏུ་སྟོན་པར་འགྱུར། །འགྲོ་བ་ཐམས་ཅད་ཞི་ཞིང་མཚན་མ་བྲལ་བ་དེ་ཉིད་མྱ་ངན་འདས། །ཐུབ་པ་གང་དག་ཞི་ལས་ཞི་འདོད་སེམས་པ་དེ་དག་ཉོན་མོངས་འགྱུར། །རྒྱལ་བ་ཁྱོད་ཀྱི་བྱང་ཆུབ་དང་ནི་འགྲོ་ཀུན་ཆོས་ཀུན་བསམ་མི་ཁྱབ། །ཐུབ་པ་བློ་ལྡན་འདས་ལས་རྒལ་བ་དེ་ལ་བདག་ཅག་དོགས་མ་མཆིས། གང་དག་ཕུང་པོ་བོར་ཏེ་བྱང་ཆུབ་ཞི་ཚོལ་དེ་ལ་ཞི་བར་རྟོགས། ཕུང་པོ་འཇིགས་པ་དེ་དག་ཤཱཀྱ་ཐུབ་པའི་བསྟན་ལ་དགའ་མ་ལགས། །དབེན་པའི་བློ་གྲོས་ལྡན་པ་ཞི་ཚོལ་དེ་དག་བློ་འཁྲུལ་འཁྲུགས་གྱུར་པ་སྟེ། །ཆོས་ཀྱི་མཚན་མ་སྤྱོད་ཡུལ་འདི་དག་བྱིས་པ་ཞེས་ནི་སྟོན་པས་གསུངས། །ཐམས་ཅད་མཁྱེན་པས་ཞི་དང་མཚན་མའི་འཆིང་བ་འདི་དག་གསུངས། །ཐུབ་པ་གང་དག་ཕུང་པོ་རྣམས་ལ་རྣམ་པ་ཀུན་དུ་མཚན་མི་རྙེད། །དེ་དག་ཤཱཀྱ་ཐུབ་པའི་བསྟན་པ་མཛེས་བྱེད་གང་དག་མཚན་མེད་དགའ། །དེ་དག་བྱང་ཆུབ་སྐྱོན་བྲལ་
ཞི་བ་མཁས་པའི་སྤྱོད་ཡུལ་ཐོབ་པར་འགྱུར། །བདུད་ཀྱི་རྩོད་ལས་རྒྱལ་ནས་ཉོན་མོངས་ཞི་བའི་ཐམས་ཅད་མཁྱེན་པ་འཐོབ། །རྣམ་འདྲེན་ཞི་བ་མཛད་ལ་བསྟོད་པས་བདག་ཅག་བསོད་ནམས་གང་རྙེད་པ། །ཆགས་མེད་ཐུགས་མངའ་བདེ་བར་གཤེགས་པས་འདི་ཙམ་ཞེས་ནི་མཁྱེན་གྱུར་པ། །དེས་ནི་འགྲོ་བ་ཐམས་ཅད་ལམ་མཆོག་ཐམས་ཅད་མཁྱེན་པས་བསྟེན་གྱུར་པ། །ཞི་བྱེད་ཞི་བ་བསྟན་ནས་མཁས་པས་མཆོད་པའི་རང་འབྱུང་སྡིག་མེད་ཤོག །དེ་ནས་མི་མཇེད་ཀྱི་བདག་པོ་ཚངས་པས་ཚངས་པ་རྣམས་དང་། ལྷ་རྣམས་ཀྱིས་བཅོམ་ལྡན་འདས་ལ་བསྟོད་པར་རིག་ནས་བདག་ཉིད་ཚུལ་དང་འདྲ་བའི་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མི་དབང་ཁྱོད་ཀྱིས་ཆོས་རྣམས་ཐམས་ཅད་ནི། །ལོག་པ་རྨོངས་མེད་ཆད་པ་སྟོང་འདྲ་ཞིང་། །སྟོན་གྱི་སྤྲིན་འདྲ་མིག་འཕྲུལ་འདྲ་བར་མཁྱེན། །རྒྱལ་བས་འདོད་པའི་ཡོན་ཏན་མེད་པར་མཁྱེན། །ཇི་ལྟར་མི་ཞིག་རྨི་ལམ་བཀྲེས་གྱུར་པས། །ཁ་ཟས་རོ་བརྒྱ་ཟོས་ཀྱང་མ་འདྲངས་པ། །དེ་ལ་བཀྲེས་མེད་ཟད་མེད་སེམས་ཅན་མེད། །རྨི་ལམ་དེ་འདྲར་ཆོས་རྣམས་ཐམས་ཅད་གཟིགས། །སྐོམ་པའི་མི་ཞིག་ཉལ་བའི་རྨི་ལམ་ན། །ཆུ་བསིལ་དང་ཞིང་རྙོག་མེད་འཐུངས་གྱུར་ཀྱང་། །ངོམས་མེད་ཚ་བ་ཞི་བར་མི་འགྱུར་ཏེ། །དེ་བཞིན་ཁྱོད་ཀྱིས་ཆོས་རྣམས་ཐམས་ཅད་གཟིགས། །འདི་ལ་བྱེད་མེད་ཚོར་མེད་སེམས་ཅན་མེད། །བྱས་པ་དེ་བཞིན་མེད་ཅིང་རྣམ་སྨིན་མེད། །འབྲས་བུ་མྱོང་བར་འགྱུར་བ་དེ་མེད་ཅེས། །འདི་འདྲའི་ཆོས་མཁྱེན་ཐེ་ཚོམ་ཡོད་མི་མངའ། །མི་ཞིག་ཡིད་དུ་འོང་བའི་ཚིག་སྨྲ་ན། །དགའ་བར་འགྱུར་ཡང་ཆིག་ལ་འཕོ་བ་མེད། །ཆིག་ཉིད་མེད་ཅིང་དགར་འགྱུར་དངོས་ཀྱང་མེད། །དེ་མཁྱེན་དེ་ལ་ཐེ་ཚོམ་ཡོད་མི་མངའ། །པི་བང་སྒྲ་སྙན་མཉན་ན་རྣར་སྙན་ཏེ། །སྒྲ་དེ་རང་བཞིན་གང་ཡང་ཡོད་པ་མིན། །དེ་ལྟར་མཁས་པས་ཕུང་པོ་འདི་གཟིགས་ན། །ཕུང་པོའི་རང་བཞིན་གང་ཡང་མི་དམིགས་མངའ། །ནོར་བུ་རིན་ཆེན་རང་བཞིན་གསལ་དག་པ། །གོས་ཀྱི་དྲུང་བཞག་སྣ་ཚོགས་ཚོན་དུ་འགྱུར། །དེ་ལྟར་རང་བཞིན་ཡོངས་དག་
ཆོས་རྣམས་ཀྱང་། །ལོགས་པའི་རྣམ་པར་རྟོགས་པས་དེ་ལྟར་གྱུར། །ཙན་དན་དྲི་མེད་སྐྱོན་དང་བྲལ་བ་ཡང་། །རྐྱེན་དང་སྦྱར་ན་དྲི་ཞིམ་གཞན་དུ་འགྱུར། །དེ་ལྟར་རང་བཞིན་ཡོངས་དག་ཆོས་རྣམས་ཀྱང་། །སོ་སོ་རང་གིས་བརྟགས་པའི་རྣམ་པ་བཞིན། །ཇི་ལྟར་མི་ཡིས་དུང་གི་སྒྲ་ཐོས་ཏེ། །སྒྲ་འདི་ག་ལས་བྱུང་ཞེས་བརྟག་བྱས་ཀྱང་། །རང་བཞིན་གྱིས་སྟོང་དངོས་པོ་དེ་མི་དམིགས། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་བསོད་པའི་ཁ་ཟས་ལ། །ཡན་ལག་སྲོག་ཕན་ཇི་ལྟར་འགྱུར་བརྟགས་ན། །དངོས་མེད་ཡན་ལག་སྲོག་ཀྱང་དེ་བཞིན་ཏེ། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་ནམ་མཁའི་འཇའ་མཐོང་ན། །ཡན་ལག་གཞིགས་བརྟགས་རང་བཞིན་མེད་ཅིང་སྟོང་། །ནམ་མཁའི་འཇའ་བཞིན་ཁྱོད་ཀྱིས་ཡན་ལག་སྟོང་། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །གྲོང་ཁྱེར་མཆོག་ཀྱང་ཡན་ལག་རྣམ་གཞིགས་ན། །གྲོང་ཁྱེར་རང་བཞིན་དེ་བཞིན་མིང་མི་དམིགས། །གྲོང་ཁྱེར་ཇི་བཞིན་དེ་ལྟར་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུ་དགའ་བར་རྔ་ཞིག་བརྡུངས་བགྱིས་ན།་།དགའ་བ་སྐྱེད་ཀྱང་སྒྲ་ཡི་རང་བཞིན་སྟོང་། །ཇི་ལྟར་སྨྲ་བཞིན་དེ་ལྟར་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་བའི་ཚེ། །སྒྲ་ནི་ཕྱོགས་སུ་མི་འགྲོ་འབྱུང་བ་མེད། །ཕྱོགས་སུ་དེ་བཞིན་དགག་པར་མི་འགྱུར་ཏེ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་བའི་ཚེ། །ཐོགས་པ་མེད་ཅིང་སྙན་པའི་རང་བཞིན་ཏེ། །ཁྱོད་ཀྱི་ཡན་ལག་རྔ་སྒྲ་དེ་དང་འདྲ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་བའི་ཚེ། །སྒྲ་དེ་འཇིག་རྟེན་དགའ་བྱར་རྟོག་པ་མེད། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་ཆོས་ཀུན་དེ་ལྟར་གཟིགས། །སྐྱེས་བུས་ཇི་ལྟར་རྔ་དེ་བརྡུངས་བའི་ཚེ། །གཡོ་བ་མེད་ཅིང་ཞི་བའི་དངོས་ཀྱང་མེད། །ཇི་ལྟར་རྔ་བཞིན་རྔ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་
ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་བའི་ཚེ། །སྒྲ་དེ་ཡན་ལག་མ་བྱུང་རང་དབང་མིན། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང་། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །དེ་ནས་བཅོམ་ལྡན་འདས་ཀྱིས་ཚངས་རིས་ཀྱི་ལྷ་དེ་དག་དང་། མི་འཇེད་ཀྱི་བདག་པོ་ཚངས་པ་དེའི་ལྷག་པའི་བསམ་པ་ཐུགས་སུ་ཆུད་ཅིང་ཞི་གནས་དང་ཡེ་ཤེས་མཐོང་བའི་བསྟོད་པ་དེས་དེ་ལྟར་བསྟོད་པས་འཁོར་དེ་ཡང་དགེ་བའི་རྩ་བ་བསགས་པར་གྱུར་པར་གཟིགས་ནས་དེའི་ཚེ་འཛུམ་པ་མཛད་དོ། །དེ་ཚེ་དང་ལྡན་པ་རྟ་ཐུལ་ཇགྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། ཤཱཀྱ་ཐུབ་པའི་ཞལ་ནས་འཛུམ་མཛད་དྲི་མེད་དག་མཐོང་ནས། །ལྷར་བཅས་མིར་བཅས་ཀླུ་དང་གནོད་སྦྱིན་བཅས་པའི་འཇིག་རྟེན་ཀུན། །སྐྱོབ་པའི་འཛུམ་མཐོང་ཐམས་ཅད་ལྡན་པའི་འགྲོ་བ་ཐེ་ཚོམ་འཚལ། །བདེ་གཤེགས་ཞལ་བཟངས་དེ་ལ་ལྟ་ཞིང་ཐོས་པར་དགའ་སྟེ་སྡོད། །རྒྱལ་བ་འཛུམ་མཛད་ལེགས་པར་དཀའ་སྩོལ་ཐེ་ཚོམ་དགུམ་དུ་གསོལ། །རྣམ་པར་འདྲེན་པ་ཐུབ་མཆོག་ཀུན་མཁྱེན་སངས་རྒྱས་འདྲེན་པ་རྣམས། །རྒྱུ་མ་མཆིས་པར་འཇིག་རྟེན་དོན་བྱེད་འཛུམ་མཛད་མ་མཐོང་ན། །བདེ་གཤེགས་ཁྱོད་ཀྱིས་གང་སླད་འཛུམ་མཛད་རྒྱུ་དེ་དེ་དག་རྣམས་ལ་གསུངས། །ཐོས་ནས་འགྲོ་བ་དགའ་ཞིང་ཐེ་ཚོམ་མ་མཆིས་འཕེལ་བར་འགྱུར། །འཁོར་འདི་སྙིང་པོ་ལྡན་ཞིང་རྙོག་མེད་སངས་རྒྱས་ཡོན་ཏན་འཚལ། །སྟོན་པ་ཁྱོད་ཀྱི་ཞལ་མཛེས་ཟླ་བ་མཛེས་པ་འདྲ་ལ་ལྟ། །འདྲེན་པ་ཆགས་མེད་རྫོགས་པ་ཚངས་པ་འདྲ་བའི་གསུང་བསྒྲགས་གསོལ། །དེ་ཐོས་འཁོར་རྣམས་ཐེ་ཚོམ་ཆད་ཅིང་ཆོས་ལ་གནས་པར་འགྱུར། །ཁྱོད་ཀྱི་ཚངས་པའི་གསུངས་མཆོག་དོན་ལྡན་འཇིག་རྟེན་འདས་རིག་ནས། །སྐྱེ་བོ་དགའ་ཞིང་མགུ་བའི་ཡིད་
ལྡན་ཐམས་ཅད་མཁྱེན་པས་ཚིམ། །དེ་དག་དོགས་བསལ་སྦྱངས་པའི་ཡིད་ཀྱིས་ཐམས་ཅད་མཁྱེན་དུ་སྒྲུབ། །བརྩོན་འགྲུས་སྟོབས་ཆེན་བསྐྱེད་ནས་འདུན་པ་སྟོབས་ལྡན་རྩོམ་པར་བཀྱིད། །དེ་ལྟ་ལགས་པས་འཇིག་རྟེན་འདྲེན་པ་ཕན་མཛད་གསུང་བསྒྲགས་གསོལ། །རྐང་གཉིས་དམ་པའི་གསུང་མཆོག་མི་གཡོ་ཐོས་ནས་དེ་ཡིས་ནི། །དགེ་བ་ཐོབ་པའི་འཁོར་འདི་ཐམས་ཅད་མཁྱེན་དུ་སེམས་འགྱུར་བར། །སྟོབས་བཅུ་མངའ་བ་འགྲོ་བ་ཀུན་ལ་ཕན་པ་ལེགས་པར་དགོངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །རྟ་ཐུལ་ང་ཡིས་ཕན་བྱེད་འཛུམ་པ་འགྲོ་བ་ཀུན་ལ་གང་བསྟན་པ། །རྩེ་གཅིག་ཡིད་ཀྱིས་བསྙན་ཅིང་བསྔགས་པར་མཛེས་པ་དེ་ནི་མཉན་པར་བྱོས། །དེ་ཐོས་འགྲོ་བ་ཡོན་ཏན་བསགས་པ་མྱུར་དུ་འཇིག་རྟེན་དོན་བྱེད་པ། ཕན་དང་ལྡན་པའི་བྱ་བ་སངས་རྒྱས་བཀའ་སྩལ་དེ་ལ་བརྩོན་འགྲུས་རྩོམ། །ཚངས་པ་ཀུན་འཁོར་འདི་དག་དགའ་ཞིང་ཆོས་རྣམས་ལ་ནི་ཐེ་ཚོམ་མེད། །བསྐལ་པ་ཁྲག་ཁྲིག་གང་གཱའི་བྱེ་མ་སྙེད་དུ་དགེ་བ་ལེགས་པར་སྤྱད། །ཀུན་དུ་རྣམ་པར་དགའ་ལ་མ་ཆགས་ཡིད་གྱུར་འདུ་ཤེས་མཁའ་འདྲ་སྟེ། །དེ་ལྟར་གྱུར་ཀྱང་བདེ་གཤེགས་བྱང་ཆུབ་རྫོགས་པར་འཚང་རྒྱ་སེམས་མ་བསྐྱེད། །འདི་དག་མ་འོངས་དུས་ན་བསྐལ་པ་བྱེ་བ་བརྒྱ་ཕྲག་གཞལ་ཡས་པ། །གང་གཱའི་བྱེ་མ་སྙེད་ན་རྡུལ་བསལ་ཐམས་ཅད་མཁྱེན་པའི་སྟོབས་ལ་གནས། །དེ་དག་ཕྱིན་ནས་བདེ་བར་གཤེགས་པ་ཆེ་ལྡན་སངས་རྒྱས་འདྲེན་ཆེ་བ། །སྲིད་པ་སེལ་ཅིང་འགྲོ་བ་སྟོང་པར་སྟོན་པའི་བཅོམ་ལྡན་འདས་སུ་འགྱུར། །སྐྱོབ་པ་དེ་དག་ཇི་ལྟར་སྤྱོད་པ་སྐུ་ཚེའི་ཚད་ཀྱང་དེ་ལྟར་འགྱུར། །བདེ་གཤེགས་མཐའ་ཡས་གྲགས་ལྡན་འཇིག་རྟེན་སྡུག་བསྔལ་འགྲེལ་ཅིང་གནས་པར་འགྱུར། །དེ་དག་རྣམས་ཀྱི་སངས་རྒྱས་ཞིང་ནི་ཞིང་གི་འབྱོར་པ་གཞལ་ཡས་ཏེ། །འདྲེན་པ་ཆེན་པོ་རྣམས་ཀྱིས་བསྐལ་པ་ཁྲག་ཁྲིག་རྣམ་པ་དུ་མར་ནི། སངས་རྒྱས་མཐའ་ཡས་རྣམས་ཀྱིས་གསུངས་ཀྱང་དེ་དག་བཀོད་པ་ཟད་མི་ནུས། །དེ་ཚེ་དེ་དག་ཡེ་ཤེས་སྟོབས་ལྡན་ཞེས་བྱའི་རྒྱལ་པར་འཐུན་པར་འགྱུར། །གཡོ་བ་
མེད་ཅིང་སེམས་མེད་མི་གནས་ཆོས་ནི་འགྲོ་ལ་སྟོན་པར་འགྱུར། །དེ་དག་ཞིང་མཆོག་རྣམས་སུ་སྐྱོབ་པའི་ཐམས་ཅད་མཁྱེན་ལམ་སྦྱངས་པ་ཡི། །སེམས་ཅན་གཅིག་ཀྱང་མི་འབྱུང་སྲིད་པ་དེ་ལ་ཕལ་ཆེར་མྱ་ངན་འདའ། །དེ་དག་ན་ནི་དེ་ཚེ་འགྲོ་བ་དེ་དག་སྡུག་བསྔལ་གཅིག་ཤེས་ཏེ། །མི་རྟག་འདུ་བྱེད་སྡུག་བསྔལ་རབ་ཏུ་འཇིགས་པ་ཐམས་ཅད་ཡིད་འབྱུང་བའོ། །དེ་ན་འགྱུར་བའི་སྡུག་བསྔལ་དང་ནི་སྡུག་བསྔལ་ཡོད་མི་འགྱུར། །དེ་དག་ཐམས་ཅད་བློ་འཐུན་འགྱུར་ཞིང་ཟླ་བའི་ལམ་ལ་མྱུར་བར་འགྱུར། །དེ་དག་ཐམས་ཅད་བློ་འཐུན་འགྱུར་ཞིང་སླ་བའི་ལམ་ལ་མྱུར་བར་འགྱུར། །དེ་ན་མི་རྣམས་དག་གི་སྒྲ་སྐད་རང་བཞིན་གཞན་ནི་འབྱུང་མི་འགྱུར། །མི་སྡུག་མི་རྟག་དེ་བཞིན་ཉིད་དང་སྡུག་བསྔལ་དེ་བཞིན་བདག་མེད་དང་། །ཞི་བ་སྟོང་ཉིད་མཚན་མེད་འཆི་མེད་མྱ་ངན་འདས་དང་བྱང་ཆུབ་ཞི། །སྒྲ་སྐད་དེ་དག་ཡང་དང་ཡང་འབྱུང་དེ་དག་རྣ་ལ་གནས་པར་འགྱུར། །སྒྲ་གང་ཐོས་ནས་དེ་དག་འཁོར་བ་གྲོལ་གནས་ཐོབ་པར་མི་འགྱུར། །དེ་འདྲའི་སྒྲ་དེ་ཤིང་ངམ་བརྩིགས་པ་དག་དགང་གང་ནའང་ཡོད་མི་འགྱུར། །བླ་གབ་མེད་དང་མཁའ་དང་གཙུག་ལག་ཁང་དང་གནས་ཁང་རྣམས་ན་མེད། །དེ་ཚེ་སངས་རྒྱས་མཐུ་ཡིས་ཡན་ལག་བརྒྱད་དང་ལྡན་པའི་སྒྲ་དབྱངས་འབྱུང་། །དེ་ཚེ་འདྲེས་པའི་ཉེས་པ་མེད་ཅིང་འདོད་ཆགས་དང་ནི་ཞེ་སྡང་དང་། །གཏི་མུག་དག་གིས་གཟིར་བ་རྣམས་ཀྱི་རྣར་ནི་དགེ་བའི་སྒྲ་གྲག་འགྱུར། །འགྲོ་བ་ཐམས་ཅད་འཁོར་བ་ལས་ནི་འབྱུང་ཞིང་མྱ་ངན་འདས་འགྲོར་འགྱུར། །དེ་ཚེ་ཞིང་མཆོག་སྟོང་པ་ཐམས་ཅད་དགའ་བའི་སྐྱེ་བོས་གང་བར་འགྱུར། །སྐྱེས་བུ་དམ་པ་དེ་དག་བསྐལ་པ་ཁྲག་ཁྲིག་བྱང་ཆུབ་བརྩོན་བྱས་ནས། །དྲང་སྲོང་ཆེན་པོ་དེ་དག་སྨོན་ལམ་གྱིས་ནི་འབྱོར་པ་འདི་བརྩམས་ཏེ། །ཞིང་མཆོག་དེ་ན་སེམས་ཅན་ཚོགས་གང་ཡོད་པ་དེ་ཀུན་བདེ་གཤེགས་འགྱུར། །ཚངས་པའི་སྨོན་ལམ་ཡངས་པ་རྒྱ་ཆེན་ཞི་བོ་འགྲོ་བས་མཐོང་གྱུར་ན། །ཇི་ལྟར་སངས་རྒྱས་བཀའ་སྩལ་བཞིན་དུ་ཚངས་པའི་ཚོགས་ཀྱིས་བསྟེན་གྱུར་པ། །དེ་ལ་བསླབས་ནས་འགྲོ་བ་ཐམས་ཅད་ཐོགས་པ་མེད་པའི་འདྲེན་པར་འགྱུར། །དེ་དག་རྒྱལ་བ་ཐོབ་ནས་འགྲོ་བ་འདི་ཀུན་དངོས་པོ་མེད་ཅེས་སྟོན། །
དེ་ལྟ་བས་ན་ཚུལ་ཀུན་འཇུག་ལ་མཁས་པའི་སྤྱོད་པ་བསྟེན་པར་གྱིས། །ཚངས་པ་ལུང་བསྟན་པའི་ལེའུ་སྟེ་ཉི་ཤུ་པའོ། །