ཉི་ཤུ་རྩ་གཅིག་པ། འོད་གསལ་བ་ལུང་བསྟན་པའི་ལེའུ།
དེ་ནས་འོད་གསལ་གྱི་ལྷ་བྱེ་བ་ཕྲག་ལྔ་བཅུ་རྩ་བརྒྱད་ཀྱིས་ལྷ་མ་ཡིན་རྣམས་ནས་ཚངས་པའི་བར་གྱི་ལྷ་དེ་དག་གི་མཆོད་པ་ཡང་མཐོང་། །ལུང་བསྟན་པ་ཡང་ཐོས་ནས་ཆིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཚུལ་ལ་འཇུག་པའི་སླད་དུ་གང་ལ་བསླབས་ནས་ཆོས་ཐམས་ཅད་སྣང་བར་འགྱུར་བའི་ཏིང་ངེ་འཛིན་ཆོས་ཐམས་ཅད་སྣང་བ་ཞེས་བགྱི་བ་མཆིས་ཏེ། དེས་ཆོས་ཐམས་ཅད་ཀྱི་ཚུལ་ལ་འཇུག་པ་རྟོགས་པར་བགྱིད་དོ། །དེ་རྟོགས་པས་བསམ་གྱིས་མི་ཁྱབ་པའི་སྤོབས་པ་དང་། ཐོགས་པ་མ་མཆིས་པའི་སྤོབས་པ་དང་། །བྱིན་གྱིས་བརླབས་པའི་སྤོབས་པ་དང་། སྣ་ཚོགས་ཀྱི་སྤོབས་པ་དང་། འཇམ་པའི་སྤོབས་པ་དང་། དགེ་བའི་སྤོབས་པ་དང་། རིགས་པའི་སྤོབས་པ་དང་། གྲོལ་བའི་སྤོབས་པ་དང་། ཉེ་བར་གྱུར་བའི་སྤོབས་པ་དང་། ཟབ་པའི་སྤོབས་པ་དང་། ཕྲ་བའི་སྤོབས་པ་དང་། ཐུན་མོང་མ་ཡིན་པའི་སྤོབས་པ་ཅན་དུ་འགྱུར་ཏེ། སངས་རྒྱས་ཀྱི་སྤོབས་པ་ཡང་ཐོབ་པར་འགྱུར་རོ། །ཆོས་ཐམས་ཅད་སྣང་བ་ཞེས་བགྱི་བའི་ཏིང་ངེ་འཛིན་དེ་གང་ཞེ་ན། བཅོམ་ལྡན་འདས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་ཚུལ་ལ་འཇུག་པའི་སླད་དུ་རྣམ་པར་རྟོག་པ་དང་། རྣམ་པར་དཔྱོད་པ་ཐམས་ཅད་ཡིད་ལ་མི་བགྱིད་དེ། །དེ་འདི་སྙམ་དུ་ཆོས་ཐམས་ཅད་ནི་རྣམ་པར་རྟོག་པ་མེད་དེ་རྣམ་པར་རྟོག་པ་ཡོངས་སུ་ཆད་པའོ། །གང་རྣམ་པར་མི་རྟོག་པ་དེ་དེ་ནི་ཐམས་ཅད་སོང་བ་སྟེ། ཆོས་གང་ཡང་རྣམ་པར་རྟོག་པར་ནུས་པ་མ་མཆིས་ཏེ། དེ་ཅིའི་སླད་དུ་ཞེ་ན། རང་བཞིན་མ་མཆིས་པའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་
དེ་ལ་ཇི་ལྟར་རྣམ་པར་རྟོག་པར་འགྱུར་ཞེས་ཆོས་ཐམས་ཅད་ལ་རྣམ་པར་མི་རྟོག་པར་ཨ་ལ་འཇུག་པའི་སྤོབས་པ་རབ་ཏུ་ཐོབ་ཅིང་། དེ་དག་ཨའི་སྒོ་ལ་ཞུགས་པས་སྤོབས་པ་མཐའ་ཡས་པར་འགྱུར་ཏེ། ཨ་ཞེས་བགྱི་བ་ནི་མཐའ་ཡས་པ། ཀུན་དུ་མཐའ་ཡས་པ། མ་བགྱིས་པ། མངོན་པར་འདུས་མ་བགྱིས་པ། ཡོངས་སུ་མ་གྲུབ་པ། དངོས་པོ་མ་མཆིས་པ། མི་གནས་པ། མི་གཡོ་བ། འདུ་བ་མ་མཆིས་པ། འཕྲོ་བ་མ་མཆིས་པ། རྟོག་པ་མ་མཆིས་པ། རྣམ་པར་རྟོག་པ་མ་མཆིས་པ། མ་བསྒྲུབས་པ། ཡོངས་སུ་ཐུག་པ་མ་མཆིས་པ། མ་བརྟགས་པ། གཟུགས་མ་མཆིས་པ། བསྟན་དུ་མ་མཆིས་པ། བལྟར་མ་མཆིས་པ། མ་མཐོང་བ་བསམ་དུ་མ་མཆིས་པ། རྣམ་པར་མི་གནས་པ། མ་ཤེས་པ། རྣམ་པར་མ་ཤེས་པ། མ་སྨོས་གམ་བསྟན་པ། བསམ་གྱིས་མི་ཁྱབ་པ། བསམ་དུ་མ་མཆིས་པ། སོང་བ་མ་མཆིས་པ། འོངས་པ་མ་མཆིས་པ། ཉེ་བ་མ་ལགས་པ། རིང་བ་མ་ལགས་པ། མ་བརྟགས་པ། གདགས་པ་མ་མཆིས་པའི་ཆོས་ཅན། མིང་མ་མཆིས་པ། ཐ་སྙད་མ་མཆིས་པ། གཉེན་པོ་མ་མཆིས་པ། སྒྲིབ་པ་མ་མཆིས་པ། འཕོ་བ་མ་མཆིས་པ། འཁྲུག་པ་མ་མཆིས་པ། བརྟག་ཏུ་མ་མཆིས་པ་མི་ཟང་བ། གཉིས་སུ་མ་མཆིས་པ། མ་བྱུང་བ། བརྫུན་པ་མ་ལགས་པ། བདེན་པ་མ་ལགས་པ། ཤོ་བ་མ་ལགས་པ། མ་སྐྱེས་པ་མ་འགགས་པ། སྦྱངས་པ་མ་ལགས་པ། སྤྱད་པར་འོས་པ་མ་ལགས་པ། གདགས་སུ་མ་མཆིས་པ། མཚན་མས་མ་བསྐྱོད་པ། མ་བཟུང་བ། མ་བོར་བ། འཛིན་པ་མ་མཆིས་པ། ཡོངས་སུ་འཛིན་པ་མ་མཆིས་པ། གཏད་དུ་་མ་མཆིས་པ། ཡོངས་སུ་གཏད་དུ་མ་མཆིས་པ་མ་བཏང་བ། ཡོངས་སུ་མ་བཏང་བ་སྟེ། ཨ་ཞེས་བགྱི་བ་ནི་སུས་ཀྱང་མ་བགྱིས་པ། ཆོས་གང་གི་བྱེད་པ་པོ་ཡང་མ་ལགས་སོ། །ཨ་ནི་མ་སྐྱེས་པ་སྟེ། ཆོས་གང་ཡང་སྐྱེ་བར་བགྱིད་པ་མ་ལགས་སོ། །ཨ་ནི་མ་སྐྱེས་པ་སྟེ། ཆོས་གང་གི་སྐྱེ་བའི་རྒྱུར་འགྱུར་བ་འདམ་ལགས་སོ། །ཨ་ནི་མ་འགགས་པ་སྟེ། ཆོས་
གང་གི་འགག་པའི་རྒྱུར་འགྱུར་བའང་མ་ལགས་སོ། །ཨ་ནི་མ་འགགས་པ ཡང་མ་ལགས་པ་སྟེ། །ཆོས་གང་གི་མི་འགག་པའི་རྐྱེན་དུ་འགྱུར་བའང་མ་ལགས་སོ། །ཨ་ནི་གནས་པ་ཡང་མ་ལགས་མི་གནས་པ་ཡང་མ་ལགས། ཨ་ནི་བཏགས་པ་ཡང་མ་ལགས། མ་བཏགས་པ་ཡང་མ་ལགས། ཨ་ནི་སྤངས་པ་མ་ལགས། མ་སྤངས་པ་ཡང་མ་ལགས། ཨ་ནི་ཤེས་པ་ཡང་མ་ལགས། མི་ཤེས་པ་ཡང་མ་ལགས། ཨ་ནི་དམིགས་པ་ཡང་མ་ལགས། །མ་དམིགས་པ་ཡང་མ་ལགས། ཨ་ནི་སྟོང་པ་ཡང་མ་ལགས། །མི་སྟོང་པ་ཡང་མ་ལགས། ཨ་ནི་དམིགས་སུ་མཆིས་པ་ཡང་མ་ལགས། དམིགས་སུ་མ་མཆིས་པ་ཡང་མ་ལགས། ཨ་ནི་མཚན་མ་ཡང་མ་ལགས། མཚན་མ་མ་མཆིས་པ་ཡང་མ་ལགས། ཨ་ནི་སྨོན་པ་ཡང་མ་ལགས། སྨོན་པ་མ་མཆིས་པ་ཡང་མ་ལགས་ཏེ། བཅོམ་ལྡན་འདས་དེ་ལྟར་ན་ཆོས་ཐམས་ཅད་ཀྱི་མཚན་ཉིད་ནི་ཨའི་ཚུལ་ལོ། །ཆོས་ཐམས་ཅད་ནི་ཚུལ་གཅིག་པ་སྟེ་ཨའི་ཚུལ་ལོ། །ཆོས་ཐམས་ཅད་ནི་འགྲོ་བ་གཅིག་པ་སྟེ། ཨའི་འགྲོ་བའོ། །ཆོས་ཐམས་ཅད་ནི་འཇུག་པ་གཅིག་པ་སྟེ་ཨ་ལ་འཇུག་པའོ། །ཆོས་ཐམས་ཅད་ནི་གདགས་པ་གཅིག་པ་སྟེ་ཨས་གདགས་པའོ། །ཆོས་ཐམས་ཅད་ནི་ཐ་སྙད་གཅིག་པ་སྟེ་ཨའི་ཐ་སྙད་དོ། །ཆོས་ཐམས་ཅད་ནི་བརྗོད་པ་གཅིག་པ་སྟེ་ཨས་བརྗོད་པའོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་རྟོགས་པར་བགྱིའོ། །ཆོས་གང་མ་བྱུང་བ་དེ་དག་ནི་དངོས་པོ་མ་མཆིས་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་གྲུབ་པ་དེ་དག་ནི་མ་གྲུབ་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་འགགས་པ་དེ་དག་ནི་འགག་པ་མ་མཆིས་པའི་ཚུལ་གྱིས་རྟོགས་པར་བགྱིའོ། །བཅོམ་ལྡན་འདས་ཆོས་གང་མངོན་པར་འདུས་བགྱིས་པ་དེ་དག་ནི། འདུས་མ་བགྱིས་པའི་ཚུལ་གྱིས་རྟོགས་པར་བགྱི་སྟེ། དེ་ནི་ཆོས་ཐམས་ཅད་ཀྱི་ཚུལ་ལོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་ཐ་སྙད་ཇི་ལྟར་རྟོགས་པར་བགྱི་ཞེ་ན། འདི་ལྟ་སྟེ། དཔེར་ན་རྨི་ལམ་ན་
བྱ་བ་སྣ་ཚོགས་འབྱུང་བ་དེ་བཞིན་དུ་ཆོས་ཐམས་ཅད་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་བྱ་བ་ནི་མ་སྐྱེས་པ། མ་བྱུང་བ། དངོས་པོ་མ་མཆིས་པ་སྟེ། འོན་ཀྱང་དེ་དག་ལ་གདགས་པར་གསུངས་སོ། །དེ་བཞིན་དུ་ཆོས་ཐམས་ཅད་ཀྱི་བྱེད་པ་ཡང་འཚལ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་བྲག་ཅ་ལ་ཐ་སྙད་མ་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་ཀྱང་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་སྒྱུ་མའི་སྐྱེས་བུ་ལ་གདགས་པ་མ་མཆིས་པ་དེ་བཞིན་དུ་ཆོས་ཐམས་ཅད་ཀྱི་གདགས་པར་བལྟའོ། །བཅོམ་ལྡན་འདས་འདི་ལྟ་སྟེ། དཔེར་ན་སྨིག་རྒྱུ་ལ་ཆབ་ཏུ་གདགས་པའི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ལ་བུད་མེད་ཀྱི་གཟུགས་སམ། སྐྱེས་པའི་གཟུགས་ཀྱི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱི་སྟེ། བཅོམ་ལྡན་འདས་བྱིས་པ་རྣམས་དགའ་བར་བགྱི་བའི་སླད་དུ་རྨི་ལམ་གྱི་བྱ་བ་ཐ་སྙད་དུ་བགྱིའི་རྨི་ལམ་གྱི་བྱ་བ་དེ་དག་ནི་མ་མཆིས་སོ། །བཅོམ་ལྡན་འདས་དེ་བཞིན་དུ་བྱིས་པ་དགའ་བར་བགྱི་བའི་སླད་དུ་མིག་གཡོར་དང་། སྨིག་རྒྱུ་དང་། བྲག་ཅའི་བྱ་བ་དག་ཀྱང་ཐ་སྙད་དུ་བགྱི་སྟེ། བྲག་ཅ་ལ་བྱ་བ་མ་མཆིས་སོ། །བཅོམ་ལྡན་འདས་དེ་ལྟར་བདག་ཅག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏེ། བཅོམ་ལྡན་འདས་འདི་ནི་ཆོས་ཐམས་ཅད་སྣང་བ་ཞེས་བགྱི་བའི་ཏིང་ངེ་འཛིན་ཏོ། །དེ་སྐད་ཅེས་གསོལ་ནས་འོད་གསལ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་ཁྱོད་ཀྱིས་ཚུལ་གཅིག་མཁྱེན་ཏེ་འོན་ཀྱང་གཞན་དང་གཞན་དུ་གསུངས། །ཐུབ་པ་འཇིག་རྟེན་མཁས་པའི་སྲས་རྣམས་རྣམ་པར་རོལ་པའང་དེ་བཞིན་ནོ། །དེ་ལ་འཇིག་རྟེན་བློ་མེད་བདག་ཏུ་ལྟ་བ་རྣམས་ཀྱིས་ཁོང་མི་ཆུད། །བདག་གི་དོན་དེ་ཕྱོགས་བཅུར་མ་མཆིས་བདག་ཉིད་ཀྱིས་ནི་འགྲོ་བ་སྟོང་། །སྒྱུ་མ་གསོག་དང་སྨིག་རྒྱུ་ཆུ་མ་མཆིས་ལ་ཆབ་ཀྱི་འདུ་ཤེས་
ཅན། བྱིས་པ་དེ་དག་བློ་ལོག་དེ་བཞིན་འཁྲུལ་ཏེ་བདག་ཏུ་སྦྱོར་བར་བགྱིད། །དེ་དག་ཡང་དག་མ་འཚལ་མི་མཁས་གནས་མིན་དངོས་ལ་རྟེན་ཀྱང་འཚལ། །དེ་བཞིན་བྱིས་པའི་སྐྱེ་བོ་སྨིག་རྒྱུ་འདྲ་བའི་ཕུང་པོ་ཡོང་མ་འཚལ། འཁོར་བར་དགའ་བ་ཟུག་རྔུས་ཟུག་ཅིང་སྡུག་བསྔལ་དེ་ཡིས་དབང་པོས་འདས། གང་ལ་མི་མཁས་ངེས་པར་སྡུག་བསྔལ་མྱོང་བ་དེ་ལ་དངོས་མ་མཆིས། །བློ་སྟོར་ཡིད་ནོར་སྡུག་བསྔལ་རྣམས་ལ་བདེ་བར་འདུ་ཤེས་ནོར་བ་ལ། །ཉོན་མོངས་འཇིགས་པ་ཆེད་དང་དུག་གསུམ་རྣམས་ཀྱང་རྗེས་སུ་འགྲོ་ཞིང་འབྲང་། འདོད་ཆགས་ཞེ་སྡང་གཏི་མུག་དུག་ཆེན་ཉོན་མོངས་མཚུངས་མེད་རྗེས་སུ་འབྲང་། །བློ་སྟོང་དེ་དག་སྡུག་བསྔལ་གང་གིས་སྡུག་བསྔལ་གྱུར་བའི་སྡུག་བསྔལ་བ། དེ་རྣམས་དེ་དག་རྗེས་འབྲང་བྱིས་པ་མི་མཁས་གནོད་པའི་ཁུར་ཡང་ཁྱེར། །དེ་དག་རྒྱལ་བའི་ཚུལ་སྒོ་ཐར་པ་བགྱིད་པ་སྟོང་པ་འདི་ཐོས་ནས། སྐྱེས་བུ་ངན་པ་བློ་ཞན་དེ་དག་བསྟན་དག་བདེ་བ་ཉིད་ཀྱིས་འཇིགས། །བདེ་གཤེགས་ཁྱོད་ཀྱིས་ཨ་ཡིས་ཡི་གེ་ཚུལ་ཆེན་སྒོ་གཅིག་དེ་ལྟར་བསྟན། དེ་ལ་ཡང་དག་བློ་ཅན་ལས་ཤིང་སྐྱེ་བ་བཞིན་དུ་ཡིད་བསྐྱེད་ཅིང་། བདུད་རྣམས་བྱེ་བ་དཔུང་དང་བཅས་བཏུལ་བྱང་ཆུབ་ཞི་བ་མངོན་འཚང་རྒྱ། ཡན་ལག་བརྒྱད་པའི་གྲུ་བཅས་སྐྱེ་བོ་ཉོན་མོངས་རྒྱ་མཚོ་ཆེ་ལས་སྒྲོལ། །བདེ་བར་གཤེགས་པ་ཅང་མཁྱེན་ངེས་པ་རྣམས་ནི་ཚུལ་གྱི་དམ་པ་དེས། །མྱུར་དུ་ཉོན་མོངས་དུག་བསལ་བྱང་ཆུབ་དཔག་ཡས་ཞི་བ་འཐོབ་འགྱུར་ཞིང་། །གྲོལ་ནས་དུག་མེད་གྱུར་པ་སྐྱེ་བོ་གཞན་མཐོང་ངེས་པའི་མཁྱེན་བརྙེས་ནས། །ཕ་རོལ་མྱུར་ཕྱིན་དུག་མེད་བདེ་ཞིང་གདུག་པ་ཐམས་ཅད་འཛོམས་པ་མཛད། །བདེ་གཤེགས་ཐམས་ཅད་སྟོང་ཡང་བདག་ཏུ་རྟོག་རྣམས་ཚུལ་དང་ཚུལ་མི་རྟོག །འགྲོ་བ་ཀུན་གྱི་ནང་ནས་མཁས་པ་ཚུལ་དང་ཚུལ་མིན་བསླབས་པ་དག །གྲོལ་ནས་འགྲོ་བ་ཀུན་ལ་ཆགས་མེད་ཡིད་ཀྱིས་ངོ་བོ་ཉིད་ཀྱི་ཆོས། །དེ་ཡི་ཚུལ་མཐོང་ཚུལ་ལ་མཁས་པ་དེ་དག་མཐུ་ཆེན་མགོན་པོར་འགྱུར། །འཆིང་དང་བཅིངས་པ་མེད་ཅིང་བདེ་བར་གཤེགས་པ་ཆོས་རྣམས་ཆོས་ཉིད་མེད། །དེ་བཞིན་ཉིད་དང་མ་ནོར་དེ་བཞིན་ཉིད་ཞི་མི་འདག་ཉོན་མི་མོངས། །
ཉོན་མོངས་མཚན་མ་མེད་ཅིང་ཞི་བྱེད་མེད་ལ་ཉོན་མོངས་རྣམས་ཀྱང་མེད། །གང་གིས་ཚུལ་ཆེན་དམ་པ་འདི་མཐོང་དེ་དག་ཐམས་ཅད་མཁྱེན་དུ་འགྱུར། །གྲོལ་ཞིང་འགྲོལ་མཛད་ཞི་བའི་ཆོས་ཅན་ཞི་མཛད་ངོ་མཚར་འགྱུར་མི་མངའ། །བཅོམ་ལྡན་ལྷར་བཅས་འཇིག་རྟེན་དཔྱིད་ཀྱི་སྨིག་རྒྱུ་བཞིན་དུ་འཁྲུལ་པ་སྟེ། །ཀུན་རྟོག་བདག་ཉིད་ཟིལ་གནོན་བདག་དང་གཞན་མེད་སྐྱེས་པ་བུད་མེད་རྟོག །འགྲོ་བ་སྡུག་བསྔལ་དེ་ན་སྣ་ཚོགས་ཀྱིས་བསྐྱེད་སེམས་ཀྱིས་སེམས་ཀྱང་ནི། །ལས་དང་འབྲས་བུ་མེད་ཅིང་དེ་མྱོང་གང་གྱུར་དེ་ཡང་མེད། །བདེ་གཤེགས་དེ་ལྟར་སངས་རྒྱས་རྣམས་ཀྱི་སྤྱོད་ཡུལ་ཚུལ་ནི་བདག་ཅག་འཚལ། །དེས་ན་ད་ལྟར་བདེ་གཤེགས་ཞི་ཐུགས་དབང་པོ་ཞི་ཞིང་ངེས་པ་སྟེ། །དགེ་བའི་བློ་མངའ་དག་གཙང་དྲི་མེད་ཆོས་ཀྱིས་རབ་ཏུ་མཆོད་པར་འགྱུར། །སངས་རྒྱས་འཇིག་རྟེན་འཕགས་པའི་གཙོ་བོ་བསྟོད་པས་བསོད་ནམས་གང་བྱུང་བ། །ཇི་སྙེད་དཔལ་སྟུག་རྐང་གཉིས་གཙོ་བོས་རྣམ་སྨིན་ཡོངས་སུ་མཁྱེན་འགྱུར་པའི། །བདག་ཅག་དགེ་རྩ་དེ་ཡིས་འགྲོ་བ་འདི་ཀུན་ཀུན་མཁྱེན་ཉིད་ཐོབ་ཤོག །བསོད་ནམས་འདི་ཀུན་འགྲོ་བ་ཀུན་གྱི་དོན་བསྔོ་ཀུན་ཀྱང་རྒྱལ་བར་ཤོག །དེ་ནས་བཅོམ་ལྡན་འདས་ཀྱིས་འོད་གསལ་གྱི་ལྷ་དེ་དག་གིས་ལྷག་པའི་བསམ་པ་ཡོངས་སུ་དག་པ་དང་། ཚུལ་གྱི་རྗེས་སུ་འགྲོ་བའི་སྤོབས་པ་ཕུན་སུམ་ཚོགས་པ་ཡང་ཐུགས་སུ་ཆུད་ལ་འཁོར་དེ་དག་གིས་ཀྱང་ཁྱད་པར་ཐོབ་པར་འགྱུར་བར་མཁྱེན་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །འཇིག་རྟེན་དོན་མཛད་རྣམ་པར་འདྲེན་མཆོག་ཀུན་མཁྱེན་ཐམས་ཅད་ཟིལ་གནོན་པ། །བདེ་གཤེགས་ཐུགས་རྗེ་ལྡན་རྣམས་རྒྱུ་མ་མཆིས་པར་བཞད་པ་མི་མཛད་ན། །རྒྱལ་བ་དཔལ་སྟུག་རྐང་གཉིས་མཆོག་གིས་འཇིག་རྟེན་ཐུགས་བརྩེས་བཀའ་སྩལ་གསོལ། །འཇིག་རྟེན་འདས་ཁྱོད་ཅི་སླད་འཛུམ་མཛད་དེ་རྒྱུ་བདག་ཅག་རྣམས་ལ་གསུངས། །གཙོ་བོ་དེ་ཐོས་འགྲོ་བ་མཐའ་དག་ཡིད་ནི་རབ་ཏུ་དང་འགྱུར་ཞིང་། །རྣམ་པར་འདྲེན་པ་ངེས་འབྱུང་ལས་དང་འབྲས་བུ་
གཞལ་ཡས་བགྱིད་པར་འགྱུར། །དེས་ནི་ལྷ་མིར་བཅས་པའི་འཇིག་རྟེན་འཁོར་བར་སྡུག་བསྔལ་ཉམ་ཐག་འདི། །འཕགས་ལམ་ཡན་ལག་བརྒྱད་བསྟན་སྲིད་པའི་རྒྱ་མཚོ་འདི་ནས་སྒྲོལ་བར་འགྱུར། །དྲང་སྲོང་ཆེན་པོ་གསུང་མཆོག་ཡན་ལག་བརྒྱད་ལྡན་བཟང་པོ་འདི་ཐོས་ནས། །འགྲོ་བ་ཐམས་ཅད་སངས་རྒྱས་ཉིད་འཚལ་དགེ་ལ་བརྩོན་ཞིང་དགའ་བར་འགྱུར། །ཐེ་ཚོམ་བྲལ་གྱུར་རྣམ་དག་ཡིད་ཀྱིས་བརྩོན་འགྲུས་དྲག་པོའི་སྟོབས་བསྐྱེད་ཅིང་། །བདེ་བར་གཤེགས་པའི་བསྟན་པ་བཞིན་བགྱིད་ཁྱོད་དང་འཐུན་བྱུང་སྲས་སུ་འགྱུར། །འཁོར་རྣམས་བརྟེན་པ་གཞན་མ་མཆིས་པར་འདྲེན་པ་ཁྱོད་ཀྱི་ཞལ་དུ་ལྟ། །འགྲོ་བའི་རྩ་ལག་རྟོག་པ་ཡིད་གཉིས་བསལ་ཞིང་བཀའ་ལུང་སྩལ་དུ་གསོལ། །བཅོམ་ལྡན་འཇིག་རྟེན་འདི་དག་ཁྱོད་ཀྱི་ཞབས་འབྲིང་གནས་ཤིང་ཉན་པར་འཚལ། །གསུང་རབ་ལེགས་བརྗོད་བདུད་རྩིའི་ཆར་ཕོབ་གང་དག་སྐོམ་པ་འཚལ་བར་འགྱུར། །འདྲེན་པ་ཆེན་པོ་ཁྱོད་ཀྱི་འཁོར་འདི་དག་ཅིང་སངས་རྒྱས་ཡོན་ཏན་འཚལ། །རིང་དུ་སོང་བའི་མ་ལ་བུ་ལྟ་བཞིན་དུ་ཁྱོད་ཀྱི་ཞལ་དུ་ལྟ། །བདེ་གཤེགས་ལྷ་རྣམས་ལུང་བསྟན་བཀའ་སྩོལ་བཞད་པའི་དོན་ཀྱང་བསྟན་དུ་གསོལ། །སྐྱོབ་པའི་གསུང་མཆོག་ཐོས་ན་འཇིག་རྟེན་དོན་ཆེན་ཤིན་དུ་ཐོབ་པར་འགྱུར། །ཐུབ་པ་དེ་རིང་སུ་ཞིག་དགེ་བ་འཕེལ་ཞིང་གྲགས་པ་དོན་དུ་གཉེར། །སུ་ཞིག་འདྲེན་པའི་ཡོན་ཏན་གཏེར་རྙེད་འགྱུར་བ་བདག་ཅག་དེ་ཉན་འཚལ། །རྒྱལ་བའི་འཁོར་རྣམས་ཁྱོད་ཀྱིས་གསུངས་པ་དེ་དག་ཐོས་ཤིང་དགར་གྱུར་ནས། །ཚུལ་འདི་སྟོན་ཅིང་ཏིང་འཛིན་སྟོབས་ལྡན་ཤེས་རབ་ལ་ཡང་སྒོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །རྟ་ཐུལ་ཁྱོད་ཀྱི་སྤོབས་པ་ལེགས་པར་དུས་ལྡན་སྐྱེས་པ་ཤིན་ཏུ་ལགས། །བདེ་གཤེགས་རྣམ་པར་སྤྲུལ་བཞིན་དེ་ལྟར་ཁྱོད་ཀྱི་བློ་གྲོས་འབྱུང་འགྱུར་ཞིང་། །སྤོབས་པ་ཆེ་འབྱུང་དེ་ཕྱིར་གང་དང་གང་དག་ཁྱོད་ཀྱིས་དྲིས་གྱུར་པ། །དེ་དག་ལུང་བསྟན་ངས་བཤད་ཀུན་ཀྱང་དབང་པོ་ཞི་བས་མཉན་པར་གྱིས། །འོད་གསལ་བ་ཡི་ལྷ་རྣམས་བློ་དག་
སྔོན་གྱི་རྒྱལ་བ་མཐོང་བ་སྟེ། །འཇིག་རྟེན་མགོན་མེད་ཡིད་ཅན་འདི་དག་མཐོང་ནས་བྱང་ཆུབ་ཡང་དག་ཞུགས། །བྱང་ཆུབ་ངེས་འབྱུང་ལམ་མཆོག་ཡང་དག་རྒྱལ་བས་སྦྱང་སྤྱད་པ། །བྱང་ཆུབ་འགྲོ་འདོད་གང་ཚེ་སྟོན་མེད་ལམ་སྟོར་རྣམས་ལ་སྟོན་པར་འགྱུར། །ཚུལ་གྱི་དམ་པ་ཤིན་དུ་གསལ་སྒྲ་ཐུན་མོང་མ་ཡིན་འདི་ཐོས་ན། །སངས་རྒྱས་ཡོན་ཏན་དོན་གཉེར་བློ་སྦྱངས་དེ་དག་བྱང་ཆུབ་ཞི་འཐོབ་འགྱུར། །དེ་དག་སྟོབས་སྐྱེས་ཚུལ་དང་ཚུལ་མིན་མཁས་ཤིང་བྱང་ཆུབ་ཡིད་དེས་གྱུར། །བུ་སྐྱེས་མ་བཞིན་དགའ་བས་བྱང་ཆུབ་མཆོག་ཏུ་དེ་དག་སྨོན་ལམ་བཏབ། །འོད་གསལ་ལྷ་རྣམས་འདི་དག་བྱང་ཆུབ་འདོད་ཚུལ་གྱི་སྒོ་བསྟན་ཏེ། །བསྐལ་པ་ཁྲག་ཁྲིག་བརྗོད་དུ་མེད་པར་ཕྲ་བའི་ཚུལ་འདི་བསྟན་བྱས་ནས། །སེམས་ཅན་སྐར་མའི་གྲངས་པས་ཆེས་མང་བ་དག་བྱང་ཆུབ་དགའ་བྱས་ཏེ། །དེ་ཡི་འོག་ཏུ་འཇིག་རྟེན་མཁས་པ་རང་བྱུང་སྐྱོན་བྲལ་ཀུན་མཁྱེན་འགྱུར། །དེ་དག་ཞིང་མཆོག་བརྗོད་དུ་མེད་པ་ཞིང་རྣམས་བྱེ་བ་བརྒྱ་འགྲངས་པར། །ཡངས་ཤིང་ཤིན་དུ་དགའ་ལ་མཐའ་དག་བཀོད་པ་རྣམས་ཀྱིས་བརྒྱན་པ་སྟེ། །ཀུན་གྱི་ཞིང་དུ་ངན་སོང་རྣམས་དང་དེ་བཞིན་མི་ཁོམ་ཡོང་མི་འབྱུང་། །བདེ་བར་གཤེགས་རྣམས་ཐུགས་བརྩེས་སེམས་ཅན་ཐམས་ཅད་རང་འབྱུང་མཛད་པར་འགྱུར། །ཞིང་རྣམས་དེ་དག་གང་ནའང་ཉན་ཐོས་ཐེག་པ་སྟོན་པར་མི་འགྱུར་ཏེ། །སེམས་ཅན་ཐམས་ཅད་རང་འབྱུང་ཉིད་དུ་མངོན་ཕྱོགས་འཕྲོགས་པ་མེད་པར་འགྱུར། །དེ་ན་རང་འབྱུང་སངས་རྒྱས་ཉིད་སྟོན་མཛད་པ་འཇིག་རྟེན་ཁམས་རྣམས་ཀྱི། །སྐུ་ཚེའི་ཚད་ནི་བསྐལ་པ་བྱེ་བ་བརྒྱ་འགྲངས་གང་གཱའི་བྱེ་སྙེད་འགྱུར། །རྟ་ཐུལ་འཇིག་རྟེན་ཁྲག་ཁྲིག་ཁམས་ཀྱི་ཉན་ཐོས་མྱ་ངན་བཟླས་པ་བས། །གང་ཡང་སྐྱེས་པའམ་བུད་མེད་གཅིག་ཅིག་བྱང་ཆུབ་ཡང་དག་དགའ་བྱས་ན། །བསོད་ནམས་དེ་ལ་སྔ་མས་གྲངས་སམ་དཔེར་ཡང་བྱ་བར་མི་ནུས་སོ། །དེ་བས་བྱང་ཆུབ་ཞུགས་པའི་སྐྱེས་བུ་དམ་པ་བྱང་ཆུབ་དགའ་བར་གྱིས། །རྟ་ཐུལ་འདི་ལ་འདྲེན་པ་ཐམས་ཅད་མཁྱེན་པ་འབྱུང་བ་རྙེད་སླ་མིན། དེ་ནི་ཨུ་དུམ་བ་རའི་མེ་ཏོག་འདྲ་ཞེས་
སངས་རྒྱས་མཐའ་ཡས་བློ་མངས་གསུངས། དེ་ཕྱིར་བླ་ན་མེད་པའི་ཞི་བ་བྱང་ཆུབ་མི་གང་འདོད་པ་ཡིས། ཤིན་དུ་བློ་ཕྲ་བསྟེན་བཟང་མཁྱེན་པ་ཚུལ་མཁས་འདྲེན་པ་བསྟེན་པར་བྱ། དེ་བཞིན་གཤེགས་ཀྱི་ཞལ་ནས་དོན་བྱེད་གསུངས་དག་དེ་འདྲ་ཐོས་གྱུར་ནས། འཁོར་རྣམས་ཐམས་ཅད་ཡི་རངས་མཆོག་ཏུ་དགའ་ཞིང་ཡག་དག་དགའ་བར་འགྱུར། །ཁྲག་ཁྲིག་ལྷ་རྣམས་ནམ་མཁར་འཁོད་ནས་གོས་ཀྱི་གཡབ་མོ་འདོར་བར་བྱེད། །དགའ་ནས་སངས་རྒྱས་དབང་ཕྱུག་ཁྱོད་ལ་ཕྱག་འཚལ་ལོ་ཞེས་སྒྲ་ཡང་ཕྱུང་། །ཞི་བ་ཐུགས་ཞི་སྐྱེ་བོ་ཉོན་མོངས་རྒོད་པས་རྒོད་གྱུར་ཞི་བར་མཛད། བདུད་རྩི་སྟོན་ཅིག་དུག་གསུམ་ཞི་མཛད་སེམས་ཅན་དུག་ནི་བསྐྱུག་ཏུ་གསོལ། ཁྱོད་ཀྱི་ཡེ་ཤེས་ཐོས་ནས་སྐྱེས་དགུའི་དུག་མེད་འགྱུར་ཞིང་དགྲ་མེད་འགྱུར། །སྡུག་བསྔལ་རྣམས་ཀྱིས་འདྲེན་ལས་ཚུལ་ཐོས་མི་བཟང་སྲིད་པའི་རྒྱུད་ལས་གྲོལ། །འོད་གསལ་ལུང་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།