ཉི་ཤུ་རྩ་གཉིས་པ། དགེ་རྒྱས་རིས་ལུང་བསྟན་པའི་ལེའུ།
བམ་པོ་བརྒྱད་པ། དེ་ནས་དགེ་རྒྱས་རིས་ཀྱི་ལྷ་ཁྲག་ཁྲིག་ཕྲག་བཅུ་གཉིས་ཀྱིས་ལྷ་མ་ཡིན་རྣམས་ནས་འོད་གསལ་བའི་ལྷའི་བར་དག་གི་མཆོད་པ་ཡང་མཐོང་། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བདག་ཅག་ཚུལ་ཕུན་སུམ་ཚོགས་པར་གྱུར་པ་ཡང་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ལ་བདེ་བར་འགྲོ་བ་ཞེས་བགྱི་བའི་ཏིང་ངེ་འཛིན་མཆིས་ཏེ། ཏིང་ངེ་འཛིན་དེ་ཐོབ་་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པའི་དངོས་པོ་ཐམས་ཅད་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་སྡུག་བསྔལ་གྱི་ཚོར་བ་མི་མྱོང་ལ། སྡུག་བསྔལ་ཡང་མ་ལགས་བདེ་བ་ཡང་མ་ལགས་པ་ཡང་མི་མྱོང་སྟེ། སེམས་ཅན་དམྱལ་བའི་གནོད་པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང་། མིའི་གནོད་པས་གནོད་པར་བགྱིས་ཀྱང་འདུ་ཤེས་ཉེ་བར་གནས་པ་དང་། ལག་པ་བཅད་དམ། རྐང་པ་བཅད་དམ། རྐང་ལག་བཅད་དམ། རྣ་བའམ། སྣའམ། རྣ་བ་དང་སྣ་གཏུབས་ཀྱང་བདེ་བའི་འདུ་
ཤེས་ཉེ་བར་གནས་པར་འགྱུར་བ་དང་། སྤ་ལྕག་གིས་གཞུས་སམ། སྤ་ལྕག་ཕྱེད་ཚལ་ལམ་། ལྕག་གིས་གཞུས་ཀྱང་བདེ་བའི་དུ་ཤེས་ཉེ་བར་གནས་པར་འགྱུར་བ་དང་། བཙོན་རར་བཅུག་གམ། ལྕགས་སྒྲོག་དང་། ཤིང་སྒྲོག་ཏུ་བཅུག་གམ། བརྩོན་ཆད་དམ་པོ་ལ་རྒྱས་བཏབ་བམ། བྱིས་པའི་གཙུག་ཕུད་ལྟར་བཅིངས་སམ། དུགས་ཀྱི་སྣོད་ལྟར་བདུགས་སམ། བུ་རམ་ཤིང་བརྡུངས་པ་ལྟར་བརྡུངས་སམ། འདམ་བུ་གཞོམ་པ་ལྟར་བཅོམ་འམ། འབྲུ་མར་གྱི་མར་མེ་ལྟར་འབར་བས་བྱས་སམ་མར་གྱི་མར་མེ་དག་ཞོ་བསྐོལ་བ་ལྟར་བབ་པར་བྱས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་། མེའི་ནང་དུ་བོར་རམ། སེང་གེའི་ཁར་བསྟབས་སམ། སྟག་གི་ཁར་བསྟབས་སམ། །སྐམ་རིལ་བྱ་བ་ལྟར་གྲིལ་ཏམ། བྱི་བོའི་ཆད་པ་ལྟ་བུས་བཅད་དམ། ཉེས་བྱུང་བ་བསྒྲགས་པ་ལྟར་བསྒྲགས་སམ། ཀཱ་ར་ཥཱ་པ་ཎ་ཙམ་དུ་གཏུབས་སམ། འབྲས་ཕྱེ་བཙོ་བ་ལྟར་བཙོས་སམ། གླང་པོ་ཆེ་རྣམས་ཀྱིས་བཅོམ་ཡང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་། མིག་ཕྱུང་ངམ། གསལ་ཤིང་གི་རྩེ་མོ་ལ་བཞག་གམ། གསད་པའི་གནས་སུ་ཁྲིད་དེ་རྣམ་པ་ཐམས་ཅད་དུ་མགོ་གཅོད་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་ཏེ། བདེ་བ་ཡང་མ་ལགས། མི་བདེ་བ་ཡང་མ་ལགས་པའི་འདུ་ཤེས་རྣམ་པ་ཐམས་ཅད་དུ་མི་འབྱུང་ངོ་། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཡུན་རིང་པོ་ནས་སྤྱད་པ་སྤྱོད་པའི་ཚེ་སྨོན་ལམ་འདི་ལྟར་བཏབ་སྟེ། གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག །གང་གིས་བདག་ལ་སྐོམ་བླུད་པ་དང་། གང་གིས་བདག་ལ་རིམ་གྲོ་བྱས་པ་དང་། །བཀུར་སྟི་བྱས་པ་དང་། བསྟི་སྟངས་བྱས་པ་དང་། མཆོད་པ་བྱས་པ་དེ་དག་ཐམས་ཅད་ཀྱང་ཉ་བར་ཞི་བའི་བདེ་བ་ཐོབ་པར་གྱུར་ཅིག ། གང་ཡང་བདག་ལ་གཤེ་བ་དང་། མི་བདེ་བར་བྱེད་པ་དང་། བརྡེག་པ་དང་། མཚོན་གྱིས་འདེབས་པ་དང་། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་
ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་ཅེས་སྨོན་ལམ་བཏབ་སྟེ། དེ་ཡིད་ལ་བྱ་བ་དེ་དག་དང་ལྡན་ཞིང་དེ་དེ་ལྟ་བུའི་ལས་དང་། དེ་ལྟ་བུའི་སྨོན་ལམ་དང་ལྡན་པས་སེམས་ཅན་ཐམས་ཅད་ཀྱི་རྗེས་སུ་སོང་བའི་བདེ་བའི་འདུ་ཤེས་ལ་བསྟེན་ཅིང་སྙེན་ལ་སྒོམ་ཞིང་མང་དུ་བྱེད་དེ། དེ་ལས་དེའི་རྣམ་པར་སྨིན་པས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་རབ་ཏུ་འཐོབ་བོ། །གང་གི་ཚེ་བྱང་ཆུབ་སེམས་དཔས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་ཐོབ་པར་གྱུར་པ་དེའི་ཚེ། བདུད་ཀྱི་ལས་ཐམས་ཅད་ཀྱིས་མི་འཕྲོགས་ཤིང་མི་འཁྲུགས་པར་འགྱུར་ཏེ། དེའི་ཚེ་དེ་ལྟར་ཚེ་ལ་དབང་བ་དང་། སྐྱེ་བ་ལ་དབང་བ་དང་། ལས་ལ་དབང་བ་དང་། རྣམ་པར་རྟོག་པ་ལ་དབང་བ་དང་། ཡོ་བྱད་ལ་དབང་བ་སྟེ། དབང་ལྔ་ཐོབ་པར་རིག་པར་བགྱིའོ། །དེ་འཚལ་ན་ཚེ་རྗེས་མ་ཐག་ཏུ་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་འཚལ་ན་བསྐལ་པ་གྲངས་མ་མཆིས་པར་གནས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ཆེན་པོ་ལ་ཡང་དག་པར་ཞུགས་ཤིང་བྱང་ཆུབ་སེམས་དཔའ་སྒྲུབ་པ་དང་། བྱང་ཆུབ་སེམས་དཔའ་ཡོངས་སུ་འཛིན་པ་དང་། ངན་འགྲོ་ཐམས་ཅད་རབ་ཏུ་བསལ་བ་དང་། འགྲོ་བ་དྲུག་པོ་ཀུན་དུ་སྐྱེས་པ་དང་། བྱང་ཆུབ་སེམས་དཔའི་བསླབ་པ་ཐམས་ཅད་ལ་བསླབས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བ་དང་། ཐབས་མཁས་པ་དང་ལྡན་པ་དང་། བདུད་ཀྱི་ལས་ལས་རྣམ་པར་རྒྱལ་བ་དང་། ཆོས་ཐམས་ཅད་ཁོང་དུ་ཆུད་པར་རིག་པར་བགྱི་བའི་སླད་དུ་སྟེ། བཅོམ་ལྡན་འདས་གང་གིས་བྱང་ཆུབ་སེམས་དཔའ་ཆོས་ཐམས་ཅད་ལ་ངེས་པའི་རྟོགས་པ་ཐོབ་པར་འགྱུར་བ་ཐམས་ཅད་ནི་དེ་བཞིན་གཤེགས་པའི་མཐུའོ། །དེ་ནས་དགེ་རྒྱས་ཀྱི་ལྷ་རྣམས་ཀྱིས་ཏིང་ངེ་འཛིན་འདི་བརྗོད་ནས་དེའི་ཚེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །དགེ་རྒྱས་ལྷ་ཚོགས་འདི་དག་ཐམས་ཅད་ཆོས་ལ་མཐར་ཐུག་གྱུར་པ་སྟེ།
སྟོན་པ་དབང་པོ་ཞི་ཞིང་ཞི་བ་མཁྱེན་ལ་མགོ་བོས་སྐྱབས་སུ་མཆིས། །དེ་དག་མཁས་པས་མཆོད་པའི་སངས་རྒྱས་དོན་མཁྱེན་འཁོར་བརྒལ་འགྱུར། །ཐུབ་པ་མི་ཡི་འདྲེན་པའི་ཚུལ་མཁས་རྒྱལ་བ་འདྲེན་པ་འདྲེན་ལ་བསྟོད། །འདི་ན་རང་བཞིན་ངེས་པའི་ཐུབ་ཆོས་གནས་པ་གང་ནའང་མ་མཆིས་ཏེ། །སྒྱུ་མའི་མཁན་པོས་སྒྱུ་མ་ཇི་བཞིན་ཁྱོད་ཀྱིས་ཐུབ་པ་ལེགས་པར་མཁྱེན། །ཡན་ལག་སྣ་ཚོགས་སྒྲ་བརྙན་རི་ཁྲོད་འབྱུང་བ་མཁས་པར་རྟོགས་པ་ལྟར། །དེ་བཞིན་བདེ་གཤེགས་དྲང་སྲོང་ཁྱོད་ཀྱིས་ལྷ་མིར་བཅས་པའི་འཇིག་རྟེན་གཟིགས། །འདི་ན་སེམས་ཅན་སྲོག་དང་ཤེད་བུ་གསོ་བ་གང་ཟག་མ་མཆིས་ཏེ། །མི་མཆོག་ཁྱོད་ཀྱིས་འདུ་ཤེས་རྣམ་པར་བཤིག་ཅིང་སྟོང་པར་རྣམ་གཞག་ལ། །རྐང་གཉིས་དམ་པ་སེམས་ཅན་གཙོ་བོ་བྱམས་པ་གཞལ་ཡས་སྒོམ་པའང་མཛད། །རྒྱལ་བ་སངས་རྒྱས་དགོངས་པ་འདི་ནི་འགྲོ་བ་ཀུན་གྱིས་རྟོགས་པར་དཀའ། །བྱམས་པ་དགེ་སྒོམ་སེམས་ཅན་དམིགས་པ་ཡིན་ཞེས་འདྲེན་པས་བཀའ་སྩལ་ལ། །སེམས་ཅན་རྣམ་པར་བཤིག་ཅིང་འགྲོ་བ་ཐམས་ཅད་སེམས་ཅན་མེད་པར་མཁྱེན། །དེ་ལྟར་རྐང་གཉིས་དམ་པ་རྙོག་པ་མི་མངའ་ཐེ་ཚོམ་བྲལ་ཐུགས་ལྡན། །དེས་ན་བདེ་གཤེགས་རྣམ་བརྟགས་བློ་མངའ་མཆོད་འོས་ཁྱོད་ལ་མཆོད་པ་འཚལ། །བདེ་བར་གཤེགས་པ་སྡུག་བསྔལ་ཕྱོགས་བཅུར་གནས་པ་ཀུན་དུ་མི་དམིགས་ཀྱང་། །ལྷ་ཡི་ལྷར་གྱུར་ཁྱོད་ཀྱིས་སེམས་ཅན་རྣམས་ལ་སྙིང་རྗེ་བགྱི་བ་གསུངས། །དེ་ལྟར་རྒྱལ་མཆོག་བདག་ཅག་རྒྱལ་བའི་དགོངས་པ་ཇི་བཞིན་ཀུན་དུ་འཚལ། །དེས་ན་རྐང་གཉིས་གཙོ་བོ་མི་མཆོག་མཆོད་འོས་ཁྱོད་ལ་མཆོད་པ་འབུལ། །ཐུབ་པ་ཁྱོད་ཀྱིས་སེམས་ཅན་དང་ནི་བསལ་བགྱི་སྡུག་བསྔལ་མི་གཟིགས་ལ། །དགྱེས་པ་སྐྱེས་ནས་རབ་ཏུ་དགྱེས་པའི་ཐུགས་ཀྱིས་མི་དགྱེས་རྣམ་པར་བསལ། །དེ་ལྟར་སངས་རྒྱས་ཚུལ་ནི་བསམ་གྱིས་མི་ཁྱབ་ཚུལ་འདི་ཇི་བཞིན་འཚལ། །དེས་ན་མི་མཆོག་ཁྱོད་ལ་མཆོད་ནས་བརྙེས་པའི་འབྲས་བུ་ཐོབ་པར་བགྱི། །སྐྱོན་བྲལ་ཁྱོད་ཀྱིས་འགྲོ་བ་ཀུན་དུ་སྡུག་བསྔལ་མྱ་ངན་འདས་མ་དམིགས། །འོན་ཀྱང་འཁོར་བར་
སེམས་ཅན་གཟིགས་ཤིང་དོན་མཛད་སྟོབས་དང་ལྡན་པ་བསྐྱེད། །སེམས་ཅན་སྡུག་བསྔལ་འགྲོ་དང་ཐུབ་དང་མྱ་ངན་འདས་དང་གནས་མ་མཆིས། །སངས་རྒྱས་ཚུལ་འདི་རྟོགས་ནས་ཐུབ་པ་མཆོད་འོས་ཁྱོད་ལ་མཆོད་པ་འཚལ། །འདྲེན་པ་ཚད་མེད་བཞི་པོ་གཟིགས་ཤིང་དེ་ཡང་གཉིས་སུ་མེད་པར་བསྟན། །གང་ཞིག་དེར་དུལ་མ་གཟིགས་གང་ཡང་ཚད་མེད་གནས་པ་དེ་མ་གཟིགས། །ཐུབ་པས་བག་མེད་གང་ཡང་མ་གཟིགས་བག་ཡོད་མི་ཡང་མ་གཟིགས་ཏེ། །སངས་རྒྱས་ཚུལ་འདི་འཚལ་ནས་ཐུབ་པའི་སྟོན་པ་ཁྱོད་ལ་མཆོད་པ་བགྱིས། །ཐུབ་པ་སྐུ་ནི་རྣམ་པར་སྤངས་པས་སྐུ་བཙལ་མཛད་ན་བརྙེས་གྱུར་ཀྱང་། །དེ་ལྟར་འདྲེན་པ་དྲན་པ་མ་གསུངས་མ་ལགས་བསྙེལ་བ་ཡང་མི་མངའ། །བདེ་བར་གཤེགས་པ་ལུས་ལ་སོང་བའི་བསྒོམ་པ་སྒོབ་པར་གྱིས་ཤེས་གསུངས། །སངས་རྒྱས་ཚུལ་འདི་རིག་ནས་བདེ་བར་གཤེགས་པ་སྐྱོབ་ལ་མཆོད་པ་བགྱིས། །འདེན་པས་ཚོར་བའི་རང་བཞིན་བཙལ་བ་མཛད་ན་བརྙེས་པར་མ་གྱུར་ལ། །ཚོར་བ་ཚོར་བར་བགྱིད་པའང་ཐུབ་པས་ཡོངས་སུ་བཙལ་ན་མ་བརྙེས་ཏེ། །དེ་ལྟར་གང་ཞིག་དྲན་སྒོམ་དེ་ནི་སངས་རྒྱས་ཀྱིས་ཀྱང་ཡོངས་མ་གཟིགས། །སངས་རྒྱས་ཚུལ་འདི་འཚལ་ནས་སྟོན་པ་ལ་ནི་བདག་ཅག་མཆོད་པ་བགྱིས། །ཐུབ་པས་སེམས་དང་སེམས་ལས་བྱུང་བ་དགོངས་ཏེ་བཙལ་ན་མ་བརྙེས་ལ། །གང་གི་ཉེ་བར་གཞག་པ་དེ་ཡང་དྲན་པ་མེད་པར་རབ་མཁྱེན་ཀྱང་། །ཐར་པ་འདོད་རྣམས་སེམས་འདུས་དྲན་པ་བསྒོམ་པར་གྱིས་ཤེས་གསུངས། །བདེ་བར་གཤེགས་པའི་དགོངས་པ་འདི་འཚལ་ནས་ནི་སྟོན་ལ་མཆོད་པ་བགྱིས། །འཇིག་རྟེན་ཕན་པར་བཞེད་པས་ཆོས་དང་ཆོས་ལ་གང་སྤྱོད་དེ་མ་གཟིགས། །བསྒོམ་པར་གང་གསུང་དྲན་པ་དེ་ཡང་འདི་ན་རང་བཞིན་མ་མཆིས་ལ། །ཐར་པ་འདོད་པ་རྣམས་ཀྱིས་ཆོས་འདུས་དྲན་པ་བསྒོམ་པར་གྱིས་ཤེས་གསུངས། །སངས་རྒྱས་ཚུལ་བཞི་པོ་འདི་རབ་ཏུ་འཚལ་ནས་སྐྱོབ་ལ་མཆོད་པར་བགྱིས། །གནས་གཅིག་མཆིས་པ་མ་ལགས་གཉིས་སམ་གསུམ་འམ་བཞི་ལྟ་ག་ལ་མཆིས། །གང་གིས་གནས་སུ་བརྗོད་པའི་དྲན་པ་
དེ་ཡང་གང་ནའང་མ་མཆིས་ཏེ། །དེ་བས་གང་གི་བདེ་བའམ་སྡུག་བསྔལ་ཡང་དག་གང་ནའང་དེ་མ་མཆིས། །སྟོན་པའི་ཚུལ་འདི་འཚལ་ནས་དེས་ན་བདག་ཅག་ཁྱོད་ལ་མཆོད་པ་འཚལ། །སྟོན་པའི་ཚུལ་མཆོག་བཞི་པོ་འདི་རྣམས་དགེ་སློང་གང་དག་འཛིན་བགྱིད་ན། །འདི་དག་ཐར་པ་ཉིད་ཀྱི་ལམ་སྟེ་འཁོར་བ་ལས་ནི་འབྱུང་བར་འགྱུར། །དེ་ལྟར་དེ་ནི་ཚུལ་འདིར་མ་བཅིང་མ་གྲོལ་བྱང་ཆུབ་འདྲེན་པ་མིན། །བཅོམ་ལྡན་འདས་ཀྱིས་བརྟགས་པ་མ་བཤིག་དེས་ན་ཁྱོད་ལ་མཆོད་པ་འཚལ། །ཐར་མཛད་སླད་དུ་བཅོམ་ལྡན་འདས་ཀྱིས་ལམ་ཞི་རྫུ་འཕྲུལ་རྐང་པ་གསུངས། །འདི་དག་བསྒོམས་ན་མི་རྣམས་དཔའ་བོ་དུལ་ཞིང་མྱ་ངན་འདའ་བར་འགྱུར། །ཡང་དག་དུ་ན་རྫུ་འཕྲུལ་དང་ནི་རྐང་དང་སྒོམ་པ་མི་དམིགས་ཏེ། །ཆད་པར་མི་འགྱུར་བྱ་བའང་སྟོན་ཅིང་བྱེད་པ་པོ་ཡང་ཡོད་མི་དམིགས། །ཐམས་ཅད་མཁྱེན་གྱི་བསྟན་འདིར་ལྷ་ཚོགས་ཐེ་ཚོམ་གང་ནའང་མ་མཆིས་ཏེ། །དེ་དག་དེ་ལ་ནེམ་ནུར་མ་མཆིས་དེ་བཞིན་སོམ་ཉི་མ་མཆིས་འགྱུར། །འདི་ནི་མཆོད་པ་བཟང་པོ་མཆོད་ཅེས་མཆོད་འོས་སངས་རྒྱས་རྣམས་ཀྱིས་གསུངས། །དེས་ན་བདེ་གཤེགས་དཔེ་མེད་སྤྱོད་མངའ་མཆོད་འོས་ཁྱོད་ལ་མཆོད་པ་འཚལ། །ཐར་པར་མཛད་སླད་འཇིག་རྟེན་མཁས་པས་ངེས་འབྱུང་དབང་པོ་ལྔ་ཡང་གསུངས། །རྟག་ཏུ་བག་ཡོད་བྱོས་ལ་མྱ་ངན་འདས་འགྲོའི་ལམ་འདི་སྒོམ་ཤེས་བསྟན། །ཐུབ་པ་དབང་པོ་དང་ནི་སྒོམ་པ་པོ་དང་ཐར་པའང་མི་དམིགས་ཏེ། །འདི་ལ་ལྷ་འཁོར་ཐེ་ཚོམ་མ་མཆིས་དེ་སླད་ཁྱོད་ལ་མཆོད་པ་འཚལ། །སངས་རྒྱས་རྣམས་ཀྱི་མྱ་ངན་འདས་པར་འགྲོ་བའི་དྲང་ལམ་སྟོབས་ལྔ་པོ། །དེ་དག་ཉོན་མོངས་ཟད་བགྱིད་ཐར་པར་བགྱིད་ཅེས་སྟོན་པ་ཐུབ་པས་གསུངས། །དེ་དག་རང་བཞིན་མ་མཆིས་ཉོན་མོངས་མ་མཆིས་རྒྱལ་བ་མ་མཆིས་ཏེ། །ཐུབ་པ་བདག་ཅག་གང་ལའང་ཐེ་ཚོམ་མ་མཆིས་དེ་སླད་ཁྱོད་ལ་མཆོད། །བྱང་ཆུབ་ཡན་ལག་བདུན་པོ་འདི་དག་དགེ་བ་ལམ་གྱི་དམ་པ་སྟེ། །སངས་རྒྱས་རྣམས་ཀྱི་མྱ་ངན་འདས་འགྲོ་དྲང་ལམ་མཆོད་ཅེས་ཐུབ་པས་གསུངས། །འཆིང་བ་མཆིས་པ་མ་ལགས་
གྲོལ་བ་མཆིས་པ་བཅིངས་པ་མ་མཆིས་ཏེ། །སེམས་ཅན་དཀོན་མཆོག་འདི་ལ་བདག་ཅག་ཐེ་ཚོམ་ཁྱོད་ལ་མཆོད། །རྐང་གཉིས་གཙོ་བོ་ཁྱོད་ཀྱིས་བཞི་ཕྲག་གཉིས་ལམ་སེམས་ཅན་རྣམས་ལ་བསྟན། །བརྩོན་འགྲུས་ལྡན་པར་འཕགས་ལམ་སྡུག་བསྔལ་མཐའ་མར་འབྱིན་པ་སྒོམས་ཤེས་གསུངས། །མི་མཆོག་ལམ་དང་དེ་བཞིན་ཉོན་མོངས་འདི་གཉིས་གཡོ་བ་མ་མཆིས་ཏེ། །འདི་ལ་ལྷ་ཚོགས་ཐེ་ཚོམ་མ་མཆིས་གྱུར་པས་མཆོད་འོས་ཁྱོད་ལ་མཆོད། །འདོད་ཆགས་གཉེན་པོས་ཞི་གནས་བཀའ་སྩལ་ཞེ་སྡང་གཉེན་པོར་་བྱམས་པ་གསུངས། །གཏི་མུག་གཉེན་པོར་ལྷག་མཐོང་ཐུབ་པ་མཆོག་གིས་སེམས་ཅན་རྣམས་ལ་བསྟན། །འདི་དག་ཐམས་ཅད་གཡོ་བ་མ་མཆིས་སྐད་ཅིག་དག་མིན་ཉོན་མོངས་མིན། །འདི་ལ་ལྷ་ཚོགས་ཐེ་ཚོམ་མ་མཆིས་ཐུབ་པ་མཆོད་སླད་རྟག་ཏུ་བརྩོན། །སྡུག་བསྔལ་ཞི་བྱ་ཕྱིར་ནི་ཞི་གནས་ལྷག་མཐོང་ལམ་ཡང་སྒོམས་ཤེས་གསུངས། །བཅོམ་ལྡན་གང་གིས་འགྲོ་བ་ཉོན་མོངས་བག་ཆགས་བཅས་དྲི་དེ་དག་ཞི། །ཐུབ་པ་ཞི་གནས་ལྷག་མཐོང་དེ་བཞིན་དྲི་མ་ཐམས་ཅད་སྟོང་པ་སྟེ། །འདི་ལ་ལྷ་ཚོགས་གང་དུའང་ཐེ་ཚོམ་མ་མཆིས་སྐྱོན་བྲལ་ཁྱོད་ལ་མཆོད། །སྟོབས་བཅུ་སེམས་ཅན་རྣམས་ལ་དགེ་བ་བཅུ་ཡི་ལས་ལམ་བསྟན་མཛད་དེ། །གསོད་དང་འཁྲིག་དང་མ་བྱིན་ཕྲ་མ་བརྫུན་དང་ཞེ་གཅོད་ཀྱལ་ཚིག་དང་། །གནོད་སེམས་དང་ནི་མི་རིགས་འདོད་དང་དེ་བཞིན་ལོག་པར་རྟོག་པ་རྣམས། །མི་དགེའི་ལས་ལམ་འདི་ཡང་བཅོམ་ལྡན་འདས་ཀྱིས་སེམས་ཅན་རྣམས་ལ་བསྟན། །སེམས་ཅན་མི་དམིགས་གསོད་པ་ག་ལ་མཆིས་ཏེ་ལྷག་མ་དེ་དང་འདྲ། །གཉེན་པོ་དགེ་བ་མ་མཆིས་དེ་ནི་ངོ་བོ་ཉིད་ཀྱིས་སྟོང་པ་སྟེ། །བདེ་གཤེགས་ཐུབ་པ་ཟག་པ་མི་མངའ་རྣམས་ཀྱང་ངོ་བོ་ཉིད་ཀྱིས་སྟོང་། །རྣམ་འདྲེན་ཐེ་ཚོམ་སོམ་ཉི་མ་མཆིས་དེ་སླར་ཁྱོད་ལ་མཆོད་པར་འཚལ། །སངས་རྒྱས་སྲས་པོ་དགེ་བའི་བློ་ཅན་གང་ཞིག་སྤྱོད་པ་འདི་སྟེན་པ། །མཁས་པ་ཀུན་དུ་དགེ་བ་ཉིད་མྱོང་སྡུག་བསྔལ་མྱོང་བར་ཡོང་མི་འགྱུར། །བཅོམ་ལྡན་བདེ་གཤེགས་ཡེ་ཤེས་དེས་ནི་ཚུལ་འདི་བདེ་བར་ཐོབ་པར་བགྱིས། །འདི་
ལ་ལྷ་ཚོགས་ཐེ་ཚོམ་མ་མཆིས་མཆོད་འོས་ཁྱོད་ལ་མཆོད་པར་འཚལ། །དེ་ལྟར་དགེ་རྒྱས་ཀྱི་ལྷ་རྣམས་ཀྱིས་བཅོམ་ལྡན་འདས་ལ་མངོན་པར་བསྟོད་ནས་ཅང་མི་ཟེར་བར་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་རྒྱས་ཀྱི་ལྷ་རྣམས་ཅང་མི་ཟེར་བར་འཁོད་པ་ཡང་མཁྱེན། །དེ་དག་གི་ལྷག་པའི་བསམ་པས་སྒྲུབ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། །སྐྱེ་བོ་འདི་ཀུན་བཅོམ་ལྡན་ཁྱོད་ཀྱི་མཁྱེན་པའི་ཟིལ་གྱིས་ཟིལ་མནན་ནས། །བདེ་གཤེགས་རྒྱལ་བ་མཆོག་ཁྱོད་ཀྱིས་ནི་འཛུམ་མཛད་པ་འདི་འཇིག་རྟེན་བསྟན། །རྒྱུ་མ་མཆིས་པར་ཆོས་ཀུན་མཁས་པ་རྣམས་ནི་འཛུམ་པ་མི་མཛད་ན། །འཛུམ་རྒྱུ་དོན་གཉེར་མིག་མེད་རྣམས་ལ་འཇིག་རྟེན་མཁས་པས་བཀའ་སྩལ་གསོལ། །མ་ལུས་འདི་དག་ཐམས་ཅད་གཞན་དུ་མི་སེམས་ཁྱོད་འཛུམ་རེ་ཞིང་འཁོར། །དཔལ་སྟུག་ཁྱོད་ལ་བསྟོད་པ་བགྱིད་ཅིང་ཉན་པར་འཚལ་བའི་ཡིད་ཀྱིས་གནས། །སངས་རྒྱས་གསུང་གི་དབང་ཕྱུག་ཐོས་ནས་ཡིད་ནི་རབ་ཏུ་རངས་གྱུར་ཏེ། །ཆོས་རྣམས་ཀུན་ལ་ངེས་པའི་བློ་དགེ་ལྡན་པའི་སྟོན་པར་སྐྱེ་བར་འགྱུར། །བདེ་གཤེགས་མི་མཆོག་དགེ་བའི་ཐུགས་ཅན་དེ་རིང་སུ་ཞིག་བློ་གྲོས་བསྐྱེད། །དེ་རིང་གང་གིས་འཆི་མེད་ཞི་བ་རྟོགས་ཤིང་ཕྱོགས་རྣམས་སྣང་བར་བགྱིས། །སུ་ཞིག་འཇིག་རྟེན་ཐུགས་བརྩེ་རྒྱལ་བ་འདྲེན་པ་དཔག་ཏུ་མེད་འགྱུར་བ། །དེ་དག་བཀའ་སྩོལ་དྲང་སྲོང་འཁོར་འདི་ལེགས་པར་གསུངས་པས་ཚིམ་པར་མཛོད། །རྒྱལ་བ་ཁྱུ་མཆོག་དགེ་སྦྱོར་དམ་པ་དེང་སུ་བཙུན་ལ་དད་པ་སྐྱེས། །བདུད་ཀྱི་མི་ཕྲོགས་བློ་ལྡན་གང་ཞིག་ཆོས་ལ་ཡང་དག་ཡོངས་སུ་གནས། །སངས་རྒྱས་སྲས་པོ་ཚུལ་མཁས་གང་ཞིག་དེ་རིང་ངེས་པ་ཐོབ་པར་འགྱུར། །རྐང་གཉིས་གཙོ་བོ་དེ་དག་བཀའ་སྩོལ་འགྲོ་འདི་ཐེ་ཚོམ་མ་མཆིས་མཛོད། །བདེ་གཤེགས་དེང་སུ་འགྲོ་ལ་དད་བསྐྱེད་སྐྱེས་དགུ་རྣམས་ལ་བྱམས་གྱུར་ཅིང་། །བྱང་ཆུབ་མཐར་ཕྱིན་བློ་གྲོས་བརྟན་ཞིང་ཐམས་ཅད་མཁྱེན་པ་ཉིད་ལ་གནས། །གང་ལ་འཛུམ་
པ་དེང་བསྟན་བདེ་གཤེགས་བསྟན་པ་འཛིན་པ་དེ་གང་ལགས། །བསོད་ནམས་བརྒྱ་ཡི་མཚན་མངའ་དེ་དག་བཀའ་སྩོལ་བདག་གི་ཐེ་ཚོམ་ཁུམ། །འདྲེན་པ་ཁྱོད་གསུང་ཡན་ལག་བརྒྱད་ལྡན་ལེགས་པར་བཀའ་སྩལ་ཐོས་གྱུར་ན། །བདེ་གཤེགས་གསུང་གིས་ཐོག་མར་བདག་ཅག་འདོང་ཞིང་འགྲོ་བ་གཞན་ཡང་འདྲེན། །དེ་ལྟར་གྱུར་ན་བདེ་གཤེགས་བསྟན་རབ་འདི་ནི་སྲས་ལ་གནས་པར་འགྱུར། །འཇིག་རྟེན་འདི་དག་ཡིད་ནི་མྱུར་དུ་བདེ་གཤེགས་རྣམས་ལ་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བརྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ང་ཡིས་འཇིག་རྟེན་དོན་བྱེད་འཛུམ་མཛད་རྟ་ཐུལ་ཁྱོད་ཀྱིས་མཐོང་གྱུར་ཅིང་། །སྐྱེས་བུ་དམ་པ་ཁྱོད་ཀྱིས་དུས་སུ་དྲིས་ཏེ་འགྲོ་བའི་དོན་བྱས་པ། །ཁྱོད་ཀྱིས་བསོད་ནམས་འཕེལ་བ་བརྗོད་དུ་མེད་དེ་དེ་ནི་ཟད་མི་འགྱུར། །དེ་ནི་ཁྱོད་ལ་བསྟན་གྱིས་ཁྱོད་དང་འགྲོ་བ་འདི་དག་དགའ་བས་ཉོན། །དགེ་རྒྱས་ལྷ་ཚོགས་འདི་དག་ང་ཡི་ཆོས་ཉིད་ལ་ནི་ཐེ་ཚོམ་མེད། །ཀུན་ཀྱང་ཡི་རངས་རབ་ཞི་ཡིད་ཀྱིས་ཚིགས་སུ་བཅད་དག་གིས་ང་ལ་བསྔགས། །སྔོན་གྱི་སངས་རྒྱས་བྱེ་བ་ཁྲག་ཁྲིག་སྟོང་བགྲངས་མཆོད་འོས་མཆོད་བྱས་ཏེ། །ཐེ་ཚོམ་མེད་པའི་ཡིད་ཀྱིས་ཚུལ་དྲིས་ཀུན་དུ་སོམ་ནི་མེད་པར་གྱུར། །དེ་ལྟར་སྔོན་གྱི་རྒྱུ་དེས་འདིར་ཡང་ཚིགས་སུ་བཅད་པས་ང་ལ་བསྟོད། །བསྐལ་པ་བཟང་པོའི་རྒྱལ་བ་བསྟོད་འོས་ཀུན་ལའང་འདི་དག་བསྟོད་པར་འགྱུར། །འདི་དག་བསྐལ་པ་ཨུད་པ་ལ་ལ་རྒྱལ་བ་དགྲ་རྒྱལ་མཐུ་ཆེན་འགྱུར། ། འདི་དག་སེམས་ཅན་ཁྲག་ཁྲིག་བསམ་ཡས་ཡོངས་སུ་མྱ་ངན་འདའ་བར་བྱེད། །སངས་རྒྱས་དྲང་སྲོང་ཆེན་པོ་དེ་དག་ཡིད་འོང་མཚན་དུ་གང་འགྱུར་པ། །དེ་ཡང་བསྟན་གྱིས་དང་བ་ཡིད་ཀྱིས་སེམས་ཀྱི་ཐབ་སྤོངས་ཏེ་ཉོན། །རྒྱལ་བ་དེ་ཀུན་ཆོས་ཀྱི་རྟོག་ཅེས་བྱ་བ་འདྲེན་པ་གཞལ་ཡས་འགྱུར། །འདི་དག་རེ་རེས་ཀྱང་ནི་ཁྲག་ཁྲིག་བསམ་ཡས་མྱ་ངན་བཟླ་བར་འགྱུར། །དེ་ཡི་ཚེ་ན་བདེ་གཤེགས་ཀུན་གྱི་རིང་བསྲེལ་ཤིན་དུ་རྒྱས་འགྱུར་ཏེ། །དེ་ཚེ་ཞིང་རྣམས་ཀུན་དུ་རྒྱལ་བའི་མཆོད་རྟེན་མེ་ཏོག་རྒྱས་པར་
འགྱུར། །ཐུབ་པ་གྲགས་ཆེན་དེ་དག་ཡོངས་སུ་མྱ་ངན་འདས་པར་གྱུར་པ་ན། །ཐུབ་པ་སྐྱོབ་པ་དེ་དག་ཀུན་གྱི་རིང་བསྲེལ་རྒྱས་པས་དོན་ཆེན་འགྱུར། །སེམས་ཅན་ཁྲག་ཁྲིག་བསམ་ཡས་རྣམས་ཀྱིས་དེ་ཚེ་རིང་བསྲེལ་མཆོད་བྱས་ཏེ། །རིང་བསྲེལ་དེ་དག་མཆོད་ནས་མྱ་ངན་འདས་པ་ཞི་བ་འཆི་མེད་འཐོབ། །ཐུབ་པ་རྐང་གཉིས་གཙོ་བོ་དེ་དག་གྲགས་པ་རྒྱུན་འཆད་མི་འགྱུར་ཏེ། །སློབ་པ་ཁྲག་ཁྲིག་བསམ་ཡས་རྣམས་ཀྱང་དེ་ཚེ་རྒྱལ་བའི་དྲུང་དུ་འདུ། །ཇི་ལྟར་བྱེ་བ་བརྒྱ་པ་གྲངས་ལ་ལེགས་པར་སྤྱད་པ་སྤྱད་ནས་སུ། །བྱམས་པ་བལྟ་ཕྱིར་རྒྱ་ཆེན་ཡིད་ཀྱིས་བྱམས་པའི་འཁོར་དུ་འདོང་འགྱུར་བ། །དེ་ལྟར་རྒྱལ་བའི་ཉན་ཐོས་སློབ་ཚོགས་དེ་དག་རྒྱལ་ནས་རྒྱལ་འཁོར་དུ། །རྐང་གཉིས་གཙོ་བོ་དེ་དག་ཀུན་གྱི་རིང་བསྲེལ་མཆོད་པ་བྱ་ཕྱིར་འདོང་། །བདེ་གཤེགས་གསུང་སྙན་འགྲོ་བ་ཐམས་ཅད་ངོ་མཚར་གྱུར་པ་དེ་ཐོས་ཤིང་། །དགེ་རྒྱས་རིས་ཀྱི་ལྷ་ཡི་བདག་ཉིད་ཆེན་པོ་དེ་ཚེ་ཐོས་གྱུར་ནས། །འཁོར་རྣམས་ཐམས་ཅད་རབ་ཏུ་དགའ་སྟེ་ཕལ་ཆེར་བྱང་ཆུབ་སེམས་ཀྱང་བསྐྱེད། །བདག་ཉིད་ཆེན་པོ་ཤེས་ནས་ཐུབ་པའི་ཞབས་ལ་མགོ་བོས་རབ་ཏུ་གཏུགས། །དགེ་རྒྱས་རིས་ལུང་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།