ཉི་ཤུ་རྩ་གསུམ་པ། འབྲས་བུ་ཆེ་བ་པ་ལུང་བསྟན་པའི་ལེའུ།
དེ་ནས་དེའི་ཚེ་འབྲས་བུ་ཆེ་བའི་རིས་ཀྱི་ལྷ་བྱེ་བ་ཕྲག་བརྒྱད་བཅུས་ལྷ་མ་ཡིན་རྣམས་ནས་དགེ་རྒྱས་ཀྱི་ལྷའི་བར་དག་གི་མཆོད་པ་ཡང་མཐོང་ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང་། མགུ་བ་དང་། ཡིད་བདེ་བ་སྐྱེས་ནས་ཚུལ་གཅིག་ལ་ཞུགས་པ་དང་། ཆོས་རེ་རེ་ལས་ཀྱང་ཆོས་ཀྱི་སྒོ་མཐའ་ཡས་པ་འབྱུང་བར་ཡང་དག་པར་མཐོང་ཞིང་། ཚུལ་ལ་འཇུག་པ་ཐམས་ཅད་ལས་ཀྱང་མཐའ་ཡས་པའི་སྤོབས་པ་དང་། མི་ཆོད་པའི་སྤོབས་པ་དང་། རིགས་པའི་སྤོབས་པ་དང་། གྲོལ་བའི་སྤོབས་པ་དང་། ཐོགས་པ་མེད་པའི་སྤོབས་པ་དང་། ཉེ་བའི་སྤོབས་པ་དང་། །ཕྲ་བའི་སྤོབས་པ་དང་། ཟབ་པའི་སྤོབས་པ་དང་། སྣ་
ཚོགས་ཀྱི་སྤོབས་པ་དང་། འཇམ་པའི་སྤོབས་པ་དང་། འབྲེལ་བའི་སྤོབས་པ་དག་ཀྱང་འབྱུང་བར་ཤེས་ནས་བཅོམ་ལྡན་འདས་ལ་དགའ་བ་སྐྱེས་ཏེ། ཆོས་ཉིད་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྒོའི་ཚུལ་མཐའ་ཡས་པ་ཞེས་བགྱི་བའི་ཏིང་ངེ་འཛིན་མཆིས་ཏེ། དེ་ལ་བརྩོན་བར་བགྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཐོབ་ཅིང་མཆོད་པའི་སྤོབས་པ་ཐོབ་པར་འགྱུར་བ་དང་། དམིགས་པ་དང་སྙོམས་པར་འཇུག་པ་ཐམས་ཅད་ལ་རྨོངས་པ་མ་མཆིས་པར་འགྱུར་རོ། །དེ་ལ་དམིགས་པ་གང་ཡང་གཟུགས་ལགས་པར་མ་འཚལ་བའི་ཚུལ་གྱིས་སྒྲིབ་པར་མི་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར། །ཁམས་ལ་འཇུག་པ་དང་། སྐྱེ་མཆེད་ལ་འཇུག་པ་དང་། དབང་པོ་ལ་འཇུག་པ་དང་། བདེན་པ་ལ་འཇུག་པ་དང་། རྟེན་ཅིང་འབྲེལ་བར་འབྱུང་བ་ལ་འཇུག་པ་དང་། སེམས་ཅན་ལ་འཇུག་པ་དང་། སེམས་ཅན་མ་མཆིས་པ་ལ་འཇུག་པ་དང་། དངོས་པོ་ལ་འཇུག་པ་དང་། དངོས་པོ་མ་མཆིས་པ་ལ་འཇུག་པ་དང་། དམིགས་པ་ལ་འཇུག་པ་དང་། དམིགས་པ་མ་མཆིས་པ་ལ་འཇུག་པ་དང་། བདག་ལ་འཇུག་པ་དང་། སྟོང་པ་ལ་འཇུག་པ་དང་། མཚན་མ་ལ་འཇུག་པ་དང་། མཚན་མ་མ་མཆིས་པ་ལ་འཇུག་པ་དང་། སྨོན་པ་ལ་འཇུག་པ་དང་། སྨོན་པ་མ་མཆིས་པ་ལ་འཇུག་པ་དང་། གནས་པ་ལ་འཇུག་པ་དང་། གནས་པ་མ་མཆིས་པ་ལ་འཇུག་པ་དང་། འདུས་བྱས་ལ་འཇུག་པ་དང་། འདུས་མ་བྱས་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར་ཏེ། ཐམས་ཅད་ལ་ཐོག་པ་མ་མཆིས་པའི་སྤོབས་པ་དང་ལྡན་པར་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་འདི་ལྟ་སྟེ། ཕུང་པོ་ཞས་བྱ་བ་འདི་ཆོས་འདི་ནི་ཡོངས་སུ་མ་གྲུབ་པའི་ཞེས་གཟུངས་རབ་ཏུ་འཐོབ་བོ། །དེ་ཅིའི་སླད་དུ་ཞེ་ན། གཟུགས་ནི་གང་ཡང་ཡོངས་སུ་གྲུབ་པ་མ་མཆིས་ཏེ། ས་
ནི་སར་ཡོངས་སུ་མ་གྲུབ། དེ་བཞིན་དུ་ཆུ་དང་། མེ་དང་། རླུང་ནི་རླུང་དུ་ཡོངས་སུ་མ་གྲུབ་པའོ། །དེ་ཅིའི་སླད་དུ་ཞེ་ན། ས་ནི་རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །ཆུ་དང་། མེ་དང་། རླུང་ནི་རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་གཟུགས་ནི་འདས་པ་ཞེས་གདགས་པར་མི་བགྱི །མ་འོངས་པ་ཞེས་གདགས་པར་མི་བགྱི །དེ་ལྟར་བྱུང་བ་ཞེས་གདགས་པར་མི་བགྱིའོ། །དེ་ཅིའི་སླད་དུ་ཞེ་ན། འདི་ལྟར་གཟུགས་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ་གང་མ་སྐྱེས་མ་འགགས་པ་དེ་ནེ་གདགས་སུ་མ་མཆིས་སོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་རྣམས་ཀྱང་དེ་བཞིན་ཏེ། དེའི་སླད་དུ་ཕུང་པོ་རྣམས་ནི་དམིགས་སུ་མ་མཆིས་སོ། །ཕུང་པོ་དམིགས་སུ་མ་མཆིས་པས་གཟུངས་དམིགས་སུ་མ་མཆིས་ཏེ། དེ་ལྟར་ཕུང་པོ་ལ་འཇུག་པས་གཟུངས་ལ་འཇུག་པར་འགྱུར་རོ། །གཟུངས་དེ་ཡང་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། རྗོད་པ་ཙམ་དང་། གདགས་པ་ཙམ་མ་གཏོགས་པར་གཟུངས་ལ་འཇུག་པར་མི་དམིགས་ཏེ། འདི་ལ་ཕུང་པོ་ཡང་མི་དམིགས། གཟུངས་ཀྱང་མི་དམིགས། འཇུག་པ་ཡང་མི་དམིགས། གཟུངས་ཀྱང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། གང་འདི་ཕུང་པོ་ཞེས་བགྱི་བ་དེ་ནི་མ་བགྱིས་པའི་ཆོས་ཏེ། ཆོས་གང་མ་བགྱིས་པ་དེ་ལ་སྤུངས་པ་ཡང་ག་ལ་མཆིས་ཏེ། ཕུང་པོ་ནི་སྤུངས་པའི་
སླད་དུ་ཕུང་པོ་ཞེས་བགྱིའོ། །དཔེར་ན་ཁྱིམ་དང་། ཁང་བཟངས་དང་། བསིལ་ཁང་དང་། ཁང་བ་བརྩེགས་པ་དང་། སྐར་ཁུང་ཁོལ་མ་དང་། བ་གམ་དང་། དྲ་བ་དང་། སྟེགས་བུ་དང་། ཁ་ཁྱེར་དང་། སྐར་ཁུང་དང་། རྟ་བབས་དང་། ཤིང་ཐགས་དང་། འོབས་དང་། ཆོས་མང་པོ་བསགས་པ་ལ། གྲོང་ཁྱེར་ཞེས་བགྱི་བ་བཞིན་དུ་ཕུང་པོ་ཞེས་བགྱི་བ་ཡང་དེ་བཞིན་ཏེ། གཟུགས་དེ་ཡང་ངོ་བོ་ཉིད་ཀྱིས་དམིགས་ན་དེ་ལ་སྤུངས་པ་ལྟ་ག་ལ་མཆིས། སྤུངས་པ་མ་མཆིས་པས་ན་གཟུགས་ཀྱང་མ་མཆིས། །གཟུགས་ཀྱི་ཕུང་པོ་ཡང་མ་མཆིས་སོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་རང་བཞིན་གྱིས་དམིགས་སུ་མ་མཆིས་ན་དེ་ལ་སྤུངས་པ་ལྟ་ག་ལ་མཆིས་ཏེ། སྤུངས་པ་མ་མཆིས་པའི་སླད་དུ་རྣམ་པར་ཤེས་པ་ཡང་མ་མཆིས། རྣམ་པར་ཤེས་པའི་ཕུང་པོ་ཡང་མ་མཆིས་སོ། །དེ་ལྟར་ཕུང་པོ་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་ཐོབ་པར་འགྱུར་རོ། །དེ་ལ་སྐྱེ་མཆེད་ལ་འཇུག་པས་གཟུངས་ཐོབ་པར་འགྱུར་བ་ནི་མིག་གི་སྐྱེ་མཆེད་ཅེས་བགྱི་བ་ནི་ཅིའི་སྐྱེ་མཆེད་ཅེས་བགྱི་ན། སྡུག་བསྔལ་གྱི་སྐྱེ་མཆེད་དོ། །དེ་ལ་མིག་གང་ཞེ་ན། འབྱུང་བ་ཆེན་པོ་བཞི་དད་པ་སྟེ། སའི་ཁམས་དང་། ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། དེ་ལ་སའི་ཁམས་དང་བ་ནི་རང་བཞིན་མ་མཆིས་པ་སྟེ། ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པའོ། །དེ་བཞིན་དུ་ཆུའི་ཁམས་དང་བ་དང་། མེའི་ཁམས་དང་བ་དང་། རླུང་གི་ཁམས་དང་བ་ནི་རང་བཞིན་མ་མཆིས་པ་སྟེ། ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པ་དེའོ། །དེ་ལྟར་ཡོངས་སུ་གྲུབ་པའི་མིག་གི་སྐྱེ་མཆེད་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་མིག་གི་སྐྱེ་མཆེད་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ། གང་མ་སྐྱེས་མ་འགགས་པ་དེ་ནི་གདགས་སུ་མ་མཆིས་པའོ། །དེ་ལྟར་མིག་ཀྱང་མ་སྐྱེས་མ་འགགས། སྐྱེ་མཆེད་དང་སྡུག་བསྔལ་ཡང་མ་སྐྱེས་
མ་འགགས་པའོ། །གང་མ་སྐྱེས་མ་འགགས་པ་དེ་ནི་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། བརྗོད་པ་ཙམ་མ་གཏོགས་པར་གདགས་སུ་མ་མཆིས་པ་སྟེ། མིང་དེ་ཡང་མིང་གིས་མ་མཆིས་པའོ། །དེ་ཅིའི་སླད་དུ་ཞེ་ན། ཆོས་གང་ལ་མིག་ཅེ་འམ། སྐྱེ་མཆེད་ཅེ་འམ། སྡུག་བསྔལ་ཞེས་གདགས་པར་བགྱི་བའི་ཆོས་དེ་གང་ཡང་དམིགས་སུ་མ་མཆིས་ཏེ། མིང་ཡང་མིང་དུ་བརྗོད་དུ་མ་མཆིས་སོ། །རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། གཟུགས་དང་། སྒྲ་དང་། དྲི་དང་། རོ་དང་། རེག་བྱ་དང་། ཆོས་རྣམས་ཀྱང་དེ་བཞིན་ཏེ། དེའི་སླད་དུ་སྐྱེ་མཆེད་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །དེ་ལ་ཁམས་ལ་འཇུག་པས་གཟུངས་འཐོབ་པ་ནི་མིག་ནི་མིག་གིས་མ་མཆིས་པ། ཁམས་ནི་ཁམས་ཀྱིས་མ་མཆིས་པ་སྟེ། དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ། ཁམས་ནི་ཁམས་ཀྱི་རང་བཞིན་དང་བྲལ་བའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ལ་ནི་སྐྱེ་བ་མ་མཆིས་སོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་འགགས་པ་དེ་ནི་མིང་ཙམ་དང་། ཐ་སྙད་ཙམ་དང་། བརྡ་ཙམ་དང་། ཀུན་རྫོབ་ཙམ་དང་། བརྗོད་པ་ཙམ་མ་གཏོགས་པར་འདས་པ་ཞེས་གདགས་པར་བགྱི་བ་མ་ལགས་སོ། །མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །མིང་དེ་ཡང་མིང་གིས་མ་མཆིས། བརྗོད་པའི་བར་དེ་ཡང་བརྗོད་པས་མ་མཆིས་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པ་སྟེ། ཡོངས་སུ་མ་གྲུབ་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། །མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་གདགས་པར་བགྱི་བ་མ་ལགས་པ་དེ་ནི་མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། ཐ་སྙད་མ་མཆིས་པ།
བརྡ་མ་མཆིས་པ། དངོས་པོ་མ་མཆིས་པ། འདྲིས་པ་མ་མཆིས་པ། བརྗོད་དུ་མ་མཆིས་པ། འོང་བ་མ་མཆིས་པ། འགྲོ་བ་མ་མཆིས་པ། མ་བསྟན་པ། རབ་ཏུ་མ་བསྟན་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས། གནས་མ་ལགས་པ། རྟན་མ་ལགས་པ། ཐོབ་པ་མ་ལགས་པ། ཐོབ་པར་བགྱི་བ་མ་ལགས་པ། རྟོགས་པ་མ་ལགས་པ། རྟོགས་པར་བགྱི་བ་མ་ལགས་པ། མངོན་དུ་བགྱིས་པ་མ་ལགས་པ། མངོན་དུ་བགྱི་བ་མ་ལགས་པ། སོ་སོའི་སྐྱེ་བོའི་ས་མ་ལགས་པ། ཉན་ཐོས་ཀྱི་ས་མ་ལགས་པ། རང་སངས་རྒྱས་ཀྱིས་མ་ལགས་པ། བྱང་ཆུབ་སེམས་དཔའི་ས་མ་ལགས་པ། སངས་རྒྱས་ཀྱི་ས་མ་ལགས་པ། ས་ཡང་མ་ལགས་པ། ས་མ་ལགས་པ་ཡང་མ་ལགས་སོ། །དེ་ནི་དེ་བཞིན་ཉིད་དང་། མ་ནོར་བ་དེ་བཞིན་ཉིད་དང་། གཞན་མ་ལགས་པ་དེ་བཞིན་ཉིད་དང་ཞི་བ་དང་། མཚན་ཉིད་མ་མཆིས་པ་སྟེ། ཐ་སྙད་ཙམ་དུ་བཏགས་པའོ། །དེས་ཐ་སྙད་དེ་དེ་བཞིན་གཤེགས་པ་ཞེས་བགྱི་སྟེ་དོན་དམ་པར་ནི་མ་ལགས་སོ། །དེ་ཅིའི་སླད་དུ་ཞེ་ན། གང་ལ་དེ་བཞིན་གཤེགས་པ་ཞེས་བགྱི་བའི་ཆོས་དེ་མི་དམིགས་སོ། །དེ་བཞིན་དུ་གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་དང་། ཡིད་ཀྱི་ཁམས་དང་། ཆོས་ཀྱི་ཁམས་དང་། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་རྒྱ་ཆེར་ཁམས་ཐམས་ཅད་ཀྱིས་ཆོས་ཀྱི་དབྱིངས་ལ་འཇུག་བར་བགྱིའོ། །བཅོམ་ལྡན་འདས་ཆོས་ཀྱི་དབྱིངས་ནི་ཕུང་པོར་བཏགས་ཀྱང་ཆོས་ཀྱི་དབྱིངས་ཉིད་མི་འདོར། །ཁམས་དང་། སྐྱེ་མཆེད་དང་། དབང་པོ་དང་། བདེན་པ་དང་། རྟེན་ཅིང་འབྲེལ་བར་འབྱུང་བར་བཏགས་ཀྱང་ཆོས་ཀྱི་དབྱིངས་ནི་འདོར་ཏེ། ཆོས་ཀྱི་དབྱིངས་ཏེ་མིང་གང་དང་གང་གིས་བཏགས་ཀྱང་དེ་དང་དེས་ཆོས་ཀྱི་དབྱིངས་ཉིད་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་སའི་ཁམས་ནི་མིང་གང་དང་གང་གིས་ཐ་སྙད་དུ་བགྱིས་ཀྱང་དེ་དང་དེས་སའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་ཆུའི་ཁམས་དང་། མེའི་ཁམས་དང་། རླུང་གི་ཁམས་དང་། ནམ་མཁའི་ཁམས་
ནི་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆུ་དང་། མེ་དང་། རླུང་དང་། ནམ་མཁའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་ཏེ། དེ་ལྟར་ན་ཁམས་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །བཅོམ་ལྡན་འདས་དེ་ལ་དབང་པོ་ལ་འཇུག་པས་ཆོས་ཀྱི་དབྱིངས་ལ་འཇུག་པ་ནི་དབང་པོ་ཉི་ཤུ་གཉིས་ཏེ། འདི་ལྟ་སྟེ། མིག་གི་དབང་པོ་དང། རྣ་བའི་དབང་པོ་དང་། སྣའི་དབང་པོ་དང་། ལྕེའི་དབང་པོ་དང་། ལུས་ཀྱི་དབང་པོ་དང་། ཡིད་ཀྱི་དབང་པོ་དང་། མོའི་དབང་པོ་དང་། ཕོའི་དབང་པོ་དང་། སྲོག་གི་དབང་པོ་དང་། བདེ་བའི་དབང་པོ་དང་། སྡུག་བསྔལ་གྱི་དབང་པོ་དང་། ཡིད་བདེ་བའི་དབང་པོ་དང་། ཡིད་མི་བདེ་བའི་དབང་པོ་དང་། བཏང་སྙོམས་ཀྱི་དབང་པོ་དང་། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོ་དང་། མི་ཤེས་པ་ཀུན་ཤེས་པར་བྱེད་པའི་དབང་པོ་དང་། ཀུན་ཤེས་པའི་དབང་པོ་དང་། ཀུན་ཤེས་པ་དང་ལྡན་པའི་དབང་པོ་སྟེ། དེ་ལ་མིག་ནི་མིག་གིས་མ་མཆིས། དབང་པོ་ནི་དབང་པོས་མ་མཆིས་པའོ། །དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ནི་མི་སྐྱེ་བ། གང་མ་སྐྱེ་བ་ནི་མི་འགག་པ། གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མི་དམིགས་པ་དེ་ནི་མིག་མ་ལགས། དབང་པོ་མ་ལགས་སོ། །གང་མིག་མ་ལགས་ཤིང་དབང་པོ་མ་ལགས་པ་དེའི་ཐ་སྙད་ཇི་ལྟར་འཚལ་བར་བགྱི། འདི་ལྟ་སྟེ། དཔེར་ན་ཆད་པ་སྟོང་པ་ནི་བརྫུན་པ། ཡང་དག་པ་མ་ལགས་པ། མ་མཆིས་པ་སྟེ། འདི་ལྟར་མིང་དུ་གདགས་པར་བགྱི། དོན་དམ་པར་ནི་སྟོང་པ་ཡང་མི་དམིགས།
ཆད་པ་ཡང་མི་དམིགས་སོ། །དེ་བཞིན་དུ་མིག་དང་དབང་པོ་ཡང་ཆད་སྟོང་པ་ལྟར་བརྫུན་ཞིང་མ་མཆིས་ལ། ཡང་དག་པ་མ་ལགས་པ་སྟེ། གསོ་བ། གསོབ། ལོག་པ། སླུ་བའི་ཆོས་ཅན། བྱིས་པའི་དྲང་བ། གླེན་པ་རྨོངས་པར་བགྱིད་པ་སྟེ། འདི་ལྟར་མིང་དུ་གདགས་པ་རབས་ཀྱི། དོན་དམ་པར་ནི་མིག་ཀྱང་མི་དམིགས་དབང་པོ་ཡང་མི་དམིགས་ན་དེ་ནི་བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཇི་ཙམ་དུ་ཕྱིན་ཅི་ལོག་ལ་གནས་པའི་སེམས་ཅན་རྣམས་གཟུང་པའི་སླད་དུ་དབང་པོ་ཞེས་བཏགས་ཀྱི། དོན་དམ་པར་ནི་མ་ལགས་སོ། །དབང་པོ་ནི་རང་བཞིན་དང་བྲལ་ཞིང་དབང་པོའི་ངོ་བོ་ཉིད་ཀྱིས་སྟོང་པ་སྟེ། ཆོས་གང་ཆོས་གང་སྟོང་པ་དེ་ལ་དེས་ཐ་སྙད་དུ་བགྱི་བ་ནི་བརྫུན་པ། མ་མཆིས་པ། གསོ་བ། གསོག །ལོག་པ། སླུ་བའི་ཆོས་ཅན་བྱིས་པ་འདྲིད་པ། གླེན་པ་རྨོངས་པར་བགྱིད་པ། རང་བཞིན་དང་བྲལ་བ་སྟེ། དེ་ནི་མི་སྐྱེ་མི་འགག་གོ །གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མ་མཆིས་པ་དེ་ནི་མ་མཆིས་པ། མཚན་མ་མ་མཆིས་པ། བརྫུན་པ། མཚན་ཉིད་མ་མཆིས་པ། གདགས་དུ་མ་མཆིས་པ། གདགས་པ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། རྣམ་པར་མ་ཤེས་པ། རྣམ་པར་ཤེས་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་ལགས་པ། རྣམ་པར་མ་རིག་པ། རྣམ་པར་རིག་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པའོ། །དེ་ཅིའི་སླད་དུ་ཞེ་ན། མ་མཆིས་ཤིང་མཆིས་པ་མ་ལགས་པའི་སླད་དུའོ། །འདི་ལྟ་སྟེ། དཔེར་ན་མི་ཞིག་རྨི་ལམ་ན་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དག་ཉལ་ཉལ་བ་ལས་སད་དེ་རྗེས་སུ་དྲན་ལ། དེ་དྲན་ཡང་རྙེད་པར་མི་འགྱུར། འཐོབ་པར་མི་འགྱུར་རོ། །དེ་ཅིའི་སླད་དུ་ཞེ་ན། རྨི་ལམ་
ན་ཡང་དེས་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དེ་དག་མ་ཐོབ་མ་རྙེད་ན། ཉལ་བ་ལས་སད་པའི་ཚེ་ལྟ་སྨོས་ཀྱང་ཅི་འཚལ་ཏེ། ཐོབ་པ་དང་། རྙེད་པར་བགྱི་བ་དེའི་གནས་མ་མཆིས་སོ། །བཅོམ་ལྡན་འདས་དེ་བཞིན་དུ་དབང་པོ་རྣམས་ནི་རྨི་ལམ་ལྟ་བུ་སྟེ། ཇི་ལྟར་ན་ལམ་ན་རྒོད་པ་དང་། དགའ་བ་དང་། རྩེས་པ་དང་། དགའ་མགུར་སྤྱད་པ་དེ་དག་དམིགས་སུ་མ་མཆིས་པ་དེ་བཞིན་དུ་ཆོས་ཐམས་ཅད་ཀྱང་ངོ་བོ་ཉིད་ཀྱིས་དམིགས་སུ་མ་མཆིས་པ་སྟེ། དེ་དག་ནི་འདས་པ་ཞེས་གདམས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །ཆོས་ཐམས་ཅད་ཀྱང་ངོ་བོ་ཉིད་ཀྱིས་དམིགས་སུ་མ་མཆིས་པ་སྟེ། དེ་དག་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་དམིགས་སུ་མ་མཆིས་པ་དེ་དག་ནི་བརྗོད་དུ་མ་མཆིས་པ་ཞེས་བགྱི་སྟེ། དབང་པོ་ཐམས་ཅད་ཀྱང་དེ་བཞིན་དུ་རིག་པར་བགྱིའོ། །དེ་ལྟར་ན་ཆོས་ཀྱི་དབྱིངས་ལ་འཇུག་པས་ཆོས་ཐམས་ཅད་ལ་འཇུག་པར་བགྱི། ཆོས་ཐམས་ཅད་ལ་འཇུག་པར་ཀྱང་ཆོས་ཀྱི་དབྱིངས་ལ་འཇུག་པར་བགྱིའོ། །དེ་ལ་ཇི་ལྟར་ན་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་བགྱི་ཞེ་ན། བཞི་པོ་འདི་དག་ནི་བདེན་པ་སྟེ། སྡུག་བསྔལ་དང་། ཀུན་འབྱུང་དང་། ལམ་མོ། །བཅོམ་ལྡན་འདས་ཀྱིས་ཀྱང་ཆོས་ཐམས་ཅད་ནི་སྟོང་པ་སྟེ། སེམས་ཅན་མེད་པ། སྲོག་མེད་པ། གང་ཟག་མེད་པ། མཚན་མ་མེད་པ། མཚན་ཉིད་མེད་པའོ་ཞེས་བཀའ་སྩལ་ཏེ། དེ་ལ་བདག་ཅག་ཐེ་ཚོམ་མ་མཆིས། །སོམ་ཉི་མ་མཆིས་སོ། །བཅོམ་ལྡན་འདས་དེ་ལ་སེམས་ཅན་མ་མཆིས་པའི་སླད་དུ་སྡུག་བསྔལ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་སེམས་ཅན་མ་མཆིས་པ་དེ་ལ་སྡུག་བསྔལ་ཡང་མ་མཆིས་སོ། །བཅོམ་ལྡན་འདས་སྡུག་བསྔལ་མ་མཆིས་པའི་སླད་དུ་ཀུན་འབྱུང་བ་ཡང་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་འབྲས་བུ་མ་མཆིས་པ་དེ་ནི་རྒྱུ་མ་ལགས་པའི་སླད་དུའོ། །བཅོམ་ལྡན་འདས་ཀུན་འབྱུང་བ་མ་མཆིས་པའི་སླད་དུ། འགོག་པ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། ཀུན་འབྱུང་བ་མ་མཆིས་པ་ལ་སྤང་པ་མ་མཆིས་པའི་སླད་དུའོ། །བཅོམ་ལྡན་འདས་འགོག་པ་མ་མཆིས་པའི་སླད་དུ་ལམ་མ་མཆིས་པར་རིག་པར་བགྱིའོ། །
དེ་ཅིའི་སླད་དུ་ཞེ་ན། གང་སྤོང་བར་མི་བགྱིད་བ་དེ་ནི་ལམ་མ་ལགས་ཏེ། ལམ་གྱི་འབྲས་བུ་ནི་འགོག་པ་མ་ལགས་ལ། གང་སྤང་བའི་འགོག་པའི་ཉོན་མོངས་པ་དེ་ནི་མི་དམིགས་ཏེ། འགོག་པ་དམིགས་སུ་མ་མཆིས་ན་ལམ་དུ་འཐད་པ་མ་ལགས་ཏེ། འབྲས་བུ་མ་མཆིས་པའི་ལམ་ཡང་མ་མཆིས་པས་དེ་ལྟར་ན་འཕགས་པའི་བདེན་པ་བཞི་པོ་དེ་དག་ནི་བརྟགས་པ་རྣམ་པར་བསྒྲུབས་པ་སྟེ། གང་བརྟགས་ཤིང་རྣམ་པར་བསྒྲུབས་པ་དེ་ནི་མ་མཆིས་པའོ། །གང་མ་མཆིས་པ་དེ་ལ་ནི་འདས་པ་ཞེས་ཐ་སྙད་དུ་བགྱི་བ་མ་མཆིས་སོ། །མ་འོངས་པ་དང་། ད་ལྟར་བྱུང་བ་ཞེས་ཐ་སྙད་དུ་བགྱི་བ་མ་མཆིས་སོ། །གང་དུས་གསུམ་དུ་མི་དམིགས་པ་དེ་ནི་མ་སྐྱེས་པ་མ་འགགས་པ། མཚན་ཉིད་མ་མཆིས་པ་མཚན་མ་མཆིས་པ། མ་བཏགས་པ་གདགས་པར་མི་བགྱི་བ། མ་བསྟན་པ། རབ་ཏུ་མ་བསྟན་པ། བསྟན་པར་བགྱི་བ་མ་ལགས་པ། རབ་ཏུ་བསྟན་པར་བགྱི་བ་མ་ལགས་པ། མ་བརྗོད་པ། བརྗོད་པར་བགྱི་བ་མ་ལགས་པ། མངོན་པར་མ་བརྗོད་པ། མངོན་པར་བརྗོད་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། ཁོང་དུ་མ་ཆུད་པ། ཁོང་དུ་ཆུད་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། མ་མཐོང་བ། མ་ཐོབ་བར་བགྱི་བ་མ་ལགས་པ། མ་བསྒྲུབས་པ། བསྒྲུབས་པར་བགྱི་བ་མ་ལགས་པ། མངོན་དུ་མ་བགྱིས་པ། མངོན་དུ་བགྱིས་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས། སྣང་བ་མ་ལགས་པ། མུན་པ་མ་ལགས་པ། འགྲོ་བ་མ་ལགས་པ། འོང་བ་མ་ལགས་པ། གསལ་བ་མ་ལགས་པ། ཟབ་པ་མ་ལགས་པ། འཁྲུགས་པ་མ་ལགས་པ། དང་བ་མ་ལགས་པ། འཇིགས་པ་མ་ལགས་པ། བདེ་བ་མ་ལགས་པ། འཆིང་བ་མ་ལགས་པ། གྲོལ་བ་མ་ལགས་པ། རྗེས་སུ་ཆགས་པ་མ་ལགས་པ། ཁོང་ཁྲོ་བ་མ་ལགས་པ། ཀུན་ནས་ཉོན་མོངས་པ་མ་ལགས་པ། རྣམ་པར་བྱང་བ་མ་ལགས་པ། ཡེ་ཤེས་མ་ལགས། རྣམ་པར་ཤེས་པ་མ་ལགས་པ། ལམ་མ་ལགས་པ། ལམ་གོལ་བ་མ་ལགས་པ། འཇིག་པ་མ་ལགས་པ། རྣམ་པར་འཇིག་པ་མ་ལགས་པ།
གཟུང་བ་མ་ལགས་པ། མི་གཟུང་བ་མ་ལགས་པ། དོར་བ་མ་ལགས་པ། རབ་ཏུ་དོར་བ་མ་ལགས་པ། དམིགས་པ་མ་ལགས་པ། དམིགས་སུ་མ་མཆིས་པ་མ་ལགས་པ། སེམས་ཅན་མ་ལགས་པ། སེམས་ཅན་མ་མཆིས་པ་མ་ལགས་པ། སྲོག་མ་ལགས་པ། སྲོག་མ་མཆིས་པ་མ་ལགས་པ། གང་ཟག་མ་ལགས་པ། གང་ཟག་མ་མཆིས་པ་མ་ལགས་པ། བདག་མ་ལགས་པ། བདག་མ་མཆིས་པ་མ་ལགས། དངོས་པོ་མ་ལགས་པ། དངོས་པོ་མ་མཆིས་པ་མ་ལགས་པ། སྟོང་པ་མ་ལགས་པ། མི་སྟོང་པ་མ་ལགས་པ། མཚན་མ་མ་ལགས་པ། མཚན་མ་མ་མཆིས་པ་མ་ལགས་པ། སྨོན་པ་མ་ལགས་པ། སྨོན་མ་མཆིས་པ་མ་ལགས་པ། གནས་པ་མ་ལགས་པ། གནས་མ་མཆིས་པ་མ་ལགས་པ། འདུས་བྱས་མ་ལགས་པ། འདུས་མ་བྱས་མ་ལགས་པ། ཆད་པ་མ་ལགས་པ། རྟག་པ་མ་ལགས་པ། ལོག་པ་མ་ལགས་པ། ཡང་དག་པ་མ་ལགས་པ། བདེན་པ་མ་ལགས་པ། བརྫུན་པ་མ་ལགས་པ། མངོན་པར་ཞེན་་པ་མ་ལགས་པ། མངོན་པར་ཞེན་པ་མ་མཆིས་པ་མ་ལགས་པ། རྟེན་མ་ལགས་པ། རྟེན་མ་མཆིས་པ་མ་ལགས་པ། གཞི་མ་ལགས་པ། གཞི་མ་མཆིས་པ་མ་ལགས་པ། མངོན་པར་ཞེན་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། སྤང་བ་མ་ལགས་པ། བསྒོམ་པ་མ་ལགས་པ། མངོན་དུ་བགྱི་བ་མ་ལགས་པ། རྙེད་པ་མ་ལགས་པ། རྙེད་པར་བགྱི་བ་མ་ལགས་པ། འཁོར་བ་མ་ལགས་པ། མྱ་ངན་ལས་འདས་པ་མ་ལགས་པ། སངས་རྒྱས་མ་ལགས་པ། འཚང་རྒྱ་བར་བགྱི་བ་མ་ལགས་པ། སོ་སོ་སྐྱེ་བོའི་སྤྱོད་ཡུལ་མ་ལགས་པ། འཕགས་པའི་སྤྱོད་ཡུལ་མ་ལགས་པ། ཉན་ཐོས་ཀྱི་སྤྱོད་ཡུལ་མ་ལགས་པ། རང་སངས་རྒྱས་ཀྱི་སྤྱོད་ཡུལ་མ་ལགས་པ། བྱང་ཆུབ་སེམས་དཔའི་སྤྱོད་པ་མ་ལགས་པ། སངས་རྒྱས་ཀྱི་སྤྱོད་ཡུལ་མ་ལགས་པ། སྤྱོད་ཡུལ་ཡང་མ་ལགས་པ། སྤྱོད་ཡུལ་མ་ལགས་པ་ཡང་མ་ལགས། བགྱིས་པ་མ་ལགས། མ་བགྱིས་པ་མ་ལགས་པ། དམ་པ་མ་ལགས་པ། དག་པར་བགྱི་བ་མ་ལགས་པ་སྟེ། དེ་ལྟར་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར། ཆོས་ཀྱི་དབྱིངས་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་འཐོབ་པར་འགྱུར་རོ། །དེ་ལ་ཇི་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་
པས་ཆོས་ཀྱི་དབྱིངས་འཇུག་ཅེ་ན། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་རྐྱེན་གྱིས་རྣམ་པར་ཤེས་པ་ནས་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ་ཞེས་བགྱི་བའི་བར་དུ་སྟེ། འདི་ནི་རྟེན་ཅིང་འབྲེལ་བར་འབྱུང་བའོ། །བཅོམ་ལྡན་འདས་དེ་ལ་མ་རིག་པ་ནི་མ་རིག་པས་མ་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་མ་རིག་པ་ནི་རང་བཞིན་དང་བྲལ་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ནི་མི་སྐྱེ་བའོ། །གང་མི་སྐྱེ་བ་ནི་མི་འགག་པའོ། །གང་མ་སྐྱེས་མ་འགག་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང་། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་མི་དམིགས་པ་དེ་ནི་མིང་མ་མཆིས་སོ། །མཚན་ཉིད་མ་མཆིས་པ། མཚན་མ་མ་མཆིས་པ། གདགས་སུ་མ་མཆིས་པ་སྟེ། གཞན་དུ་ན་མིང་ཙམ་དང་། བརྡ་ཙམ་དང་། ཐ་སྙད་ཙམ་དང་། བརྗོད་པ་ཙམ་དང་། གདགས་པ་ཙམ་དུ་སེམས་ཅན་རྣམས་གཟུང་བའི་དོན་དུ་བགྱི་བ་མ་གཏོགས་པར་མ་རིག་པ་དེ་ནི་དོན་དམ་པར་དམིགས་སུ་མ་མཆིས་སོ། །ཆོས་གང་དོན་དམ་པར་དམིགས་སུ་མ་མཆིས་པ་དེ་ནི་གདགས་སུ་མ་མཆིས་པ། ཐ་སྙད་དུ་བགྱིར་མ་མཆིས་པ། བརྗོད་དུ་མ་མཆིས་པ་སྟེ། བཅོམ་ལྡན་འདས་གང་མིང་ཙམ་ཞེས་བགྱི་བ་ནས། གདགས་པ་ཙམ་གྱི་བར་དེ་དག་ཀྱང་ཡང་དག་པ་མ་ལགས་པ། བརྫུན་པ། ལོག་པ། བརྟགས་པ། རྣམ་པར་བསྒྲུབས་པ། ཡོངས་སུ་བརྟགས་པ། རྣམ་པར་བརྟགས་པ། རྣམ་པར་དཔྱད་པ། མ་ཞི་བ་དང་། རབ་ཏུ་སྤྲོས་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཤེས་བགྱི་བ་ཡང་ཆོས་གང་ངོ་བོ་ཉིད་ཀྱིས་མ་མཆིས་པ་དེ་འདུ་བྱེད་སྐྱེད་པར་ཡང་ཇི་ལྟར་འགྱུར་ཏེ། དེ་བས་ན་མ་རིག་པ་ནི་མ་རིག་པ་མ་མཆིས་པའོ། །དེ་ལྟར་མ་རིག་པ་མ་མཆིས་པས་འདུ་བྱེད་རྣམས་ཀྱང་མ་སྐྱེས་པའོ། །གང་མ་སྐྱེས་པ་དེ་དག་ནི་རྒ་བར་མི་འགྱུར། ན་བར་མི་འགྱུར། འཆི་བར་མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་གང་མ་སྐྱེས་པ་དེ་ལ་རྒ་བ་ག་ལ་མཆིས་ཏེ། གང་ལ་རྒ་བ་མ་མཆིས་པ་དེ་ནི་ན་བར་མི་འགྱུར། འཆི་བར་
མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར། འདི་ནི་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ་མིང་ཙམ་དུ་བས་ཀྱི། དོན་དམ་པར་ནི་མ་ལགས་སོ། །མ་རིག་པ་གང་ལགས་པ་དེ་ཉིད་བྱང་ཆུབ་བོ། །དེ་བཞིན་དུ་སྲིད་པའི་ཡན་ལག །ཐམས་ཅད་ཀྱང་ཤེས་པར་བགྱི་སྟེ། དེ་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་ནི་མ་སྐྱེས་པ་སྟེ། ཆོས་ཐམས་ཅད་ཀྱང་མ་སྐྱེས་པའོ། །དེ་བས་ན་ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་དེ་བཞིན་གཤེགས་པ་ནི་མ་འགགས་པ་སྟེ་ཆོས་ཐམས་ཅད་ཀྱང་མ་འགགས་པའོ། །བཅོམ་ལྡན་འདས་དེ་བཞིན་དུ་དེ་བཞིན་གཤེགས་པ་ནི་མཚན་ཉིད་མ་མཆིས་པ། མཚན་མ་མ་མཆིས་པ། དམིགས་སུ་མ་མཆིས་པ། ཀུན་ནས་ཉོན་མོངས་པ་མ་མཆིས་པ། རྣམ་པར་བྱང་བ་མ་མཆིས་པ། རྗེས་སུ་ཆགས་པ་མ་མཆིས་པ། ཁོང་ཁྲོ་བ་མ་མཆིས་པ་སྟེ། ཆོས་ཀྱི་དབྱིངས་དང་། དེ་བཞིན་ཉིད་དང་། ཡང་དག་པའི་མཐའ་སྟེ། ཆོས་ཐམས་ཅད་ཀྱང་ཡང་དག་པའི་མཐའོ། །དེའི་སླད་དུ་ཆོས་ཐམས་ཅད་ནི་དེ་བཞིན་གཤེགས་པ་སྟེ། བཅོམ་ལྡན་འདས་དེ་ལྟར་ན་ཆོས་གང་དང་གང་དག་གིས་དེ་བཞིན་གཤེགས་པ་མ་མཆིས་པའི་ཆོས་དེ་དག་གིས་ཆོས་ཐམས་ཅད་མ་མཆིས་པ་སྟེ། དེའི་སླད་དུ་ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་གཉིས་སུ་མ་མཆིས་པ་སྟེ། བྱང་ཆུབ་ཀྱང་གཉིས་སུ་མ་མཆིས་པ། ལགས་པས་གཉིས་སུ་མ་མཆིས་པས་ནི་གཉིས་སུ་མ་མཆིས་པ་མངོན་པར་རྫོགས་པར་འཚང་མི་རྒྱའོ། །བཅོམ་ལྡན་འདས་དེ་བཞིན་དུ་གང་ལ་ལ་ཞིག་འདི་སྐད་དུ་དེ་བཞིན་གཤེགས་
པས་བླ་ན་མེད་པའི་ཆོས་ཀྱི་འཁོར་ལོ་བསྐོར་རོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་ཟློག་པའམ་སྐོར་བ་མཛད་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་གི་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པ་ཡོངས་སུ་མྱ་ངན་ལས་བཟླས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་སེམས་ཅན་མ་མཆིས་པ་སྟེ། དེ་ལ་ཡོངས་སུ་མྱ་ངན་ལས་འདས་པ་གང་ཡང་མ་མཆིས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པའི་དོན་མཛད་དོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་ནི་ཆོས་གང་ལ་ཡང་ཕན་པའམ། གནོད་པའི་རྣམ་པར་ཉེ་བར་གནས་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་ཚེའི་འདུ་བྱེད་བོར་རོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ་དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་ཅིའང་འདོར་བའམ། ལེན་པ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ་ཞེས་མཆི་ན། དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་འཁོར་བའམ། ཡོངས་སུ་མྱ་ངན་ལས་འདའ་བ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་ལྟ་བུའི་ཆོས་ལ་ངེས་པར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་སྟེ། བཅོམ་ལྡན་འདས་ཆོས་ཀྱི་དབྱིངས་ལ་ནི་མི་འགྱུར་བ་མ་མཆིས་ཀྱང་གདའི། རིགས་ཀྱི་བུའམ། རིགས་ཀྱི་བུ་མོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བ་མི་གདའོ།། །།
བམ་པོ་དགུ་པ། དེ་ནས་འབྲས་བུ་ཆེ་བའི་ལྷ་བྱེ་བ་ཕྲག་བརྒྱད་བཅུས་བཅོམ་ལྡན་འདས་ཀྱི་སྤྱན་སྔར་ཆོས་ཉིད་ལ་ངེས་པར་འགྲོ་བ་བརྗོད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ། ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་མཐུ་ཆེན་འདྲེན་པ་ཚུལ་དང་ཚུལ་མིན་མཁྱེན་ལ་ཕྱག་འཚལ་ལོ། །འགྲོ་བ་ཀུན་ལ་ཐུགས་བརྩེ་ཐུབ་པ་ཡང་དག་ཇི་བཞིན་སྟོན་མཛད་པ། འདྲེན་པ་ཚུལ་མཁས་ཁྱོད་ཀྱིས་ཚུལ་ནི་ཡང་དག་ཉིད་དུ་ཡང་དག་བསྟན། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཁྱོད་ཀྱིས་བྱང་ཆུབ་ངེས་པར་འབྱུང་བའི་དྲང་ལམ་གཅིག་པུ་བགྲོད་པ་བསྟན། །ཁྱོད་ཀྱིས་བྱང་ཆུབ་དམ་པ་གཞལ་ཡས་ཞིབ་ཤིས་པ་མི་གཡོ་བརྙེས། །སྲོག་ཆགས་བྱེ་བ་ཕྲག་ཁྲག་ཁྲིག་འཁོར་བའི་སྡུག་བསྔལ་ཉམ་ཐག་འགྲོལ་མཛད་པ། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཕུང་པོ་རྣམས་ནི་ངོ་བོ་ཉིད་སྟོང་ཤིན་དུ་ཕུང་པོ་རྣམས་དང་བྲལ། །བྱིས་པ་རྨོངས་བྱེད་རྣམས་ནི་རབ་ཏུ་བྲལ་བར་ཁྱོད་ཀྱིས་ཡོངས་སུ་བརྟགས། །ཤེས་པ་མི་ལྡན་སྐྱེ་བོ་ཕལ་ཆེན་འདིར་བཅིངས་རྙོང་ལ་སྤྲེའུ་ཐོགས་པ་བཞིན། །གྲོལ་བ་མཁས་པ་རྣམས་ནི་མཁའ་ལ་རླུང་བཞིན་ཆགས་པ་མེད་པར་འདོང་། །ཁམས་རྣམས་ཁམས་ཀྱིས་རྣམ་པ་ཀུན་དུ་སྟོང་པར་ཐམས་ཅད་མཁྱེན་པས་གསུངས། །དཔེར་ན་བྲག་ཅ་རྣམ་པ་ཀུན་དུ་ཤིན་དུ་སྒྲ་དང་བྲལ་བ་འདྲ། །དེས་ནི་མི་མཁས་སྐྱེ་བོ་ཡང་དག་ཇི་བཞིན་མི་ཤེས་མང་པོ་བཅིངས། །གྲོལ་བ་མཁས་པ་ཡང་དག་རྟོགས་པ་རྣམས་ནི་ཁམས་གསུམ་ཆགས་མ་མཆིས། །སྐྱེ་མཆེད་ངོ་བོ་ཉིད་ཀྱིས་རྟག་ཏུ་སྟོང་ཞེས་ཐམས་ཅད་མཁྱེན་པས་བསྟན། །ཡང་དག་མ་ལགས་བརྫུན་ཞིང་བྱིས་པ་སླུ་བ་ཆད་པ་སྟོང་པ་འདྲ། །མི་མཁས་སྐྱེ་བོ་ལམ་ལ་གཅིག་ཏུ་མ་ངེས་མང་པོ་དེ་ལ་ཆགས། །དཔེར་ན་འགྲོན་པ་རྒྱ་མཚོ་ཆེན་
པོར་འཁྱམས་པ་བཞིན་དུ་འཁོར་བར་ལྷུང་། །འདྲེན་པ་དབང་པོ་འདི་དག་དབང་པོ་ཉིད་ཀྱིས་ཤིན་ཏུ་སྟོང་པ་སྟེ། །ཐུབ་པ་མེ་ལོང་ནང་གི་བཞིན་གྱི་དཀྱིལ་འཁོར་ལྟ་བུར་ཤིན་དུ་སྟོང་། །མི་མཁས་སྐྱེ་བོ་ཡང་དག་མ་འཚལ་མང་པོ་དག་ནི་དེ་ལ་ཆགས། །བྱ་དང་མཚོ་ཡི་ཉ་དང་སྲོག་ཆགས་དག་ནི་རྒྱ་ལ་ཐོགས་པ་བཞིན། །སེམས་ཅན་སེམས་ཅན་ཉིད་སྟོང་སེམས་ཅན་བྲལ་ཞིང་ངོ་བོ་ཉིད་ཀྱིས་སྟོང་། །ཐུབ་པ་སེམས་ཅན་རི་མོ་མཁན་གྱིས་གཟུགས་བྲིས་བཞིན་དུ་མ་མཆིས་ན། །མི་མཁས་སྐྱེ་བོ་ཡང་དག་ཇི་བཞིན་མ་འཚལ་མང་པོ་དེ་ལ་ཆགས། །མཁས་པ་ཡང་དག་རྟོགས་རྣམས་སྒོ་དེའི་སྦུབས་ནས་བྱུང་བའི་བྱ་བཞིན་གྲོལ། །རྟེན་ཅིང་ཆོས་རྣམས་དེ་དག་སྐད་ཅིག་པ་སྟེ་སྟོང་ཞིང་དམིགས་མ་མཆིས། །རྨི་ལམ་དགའ་བ་བཞིན་དུ་གཟུང་དུ་མ་མཆིས་བྱིས་པ་རྨོངས་བགྱིད་པ། །མི་ཤེས་རྟོག་པའི་སླད་དུ་དེས་ཀྱང་མི་མཁས་སྐྱེ་བོ་མང་པོ་བཅིངས། །མཁས་པ་ཡང་དག་རབ་ཏུ་རྟོགས་རྣམས་ཐར་བའི་བྱ་བཞིན་གྲོལ། །ཐུབ་པས་ཆོས་ཉིད་བསམ་ཡས་ཇི་བཞིན་ཆོས་རྣམས་ཐམས་ཅད་བསམ་མི་ཁྱབ། །ཐུབ་པ་ཞི་བ་མྱ་ངན་འདས་པ་ཇི་བཞིན་ཆོས་ཀུན་མཚན་ཉིད་བྲལ། །ཐུབ་པ་ཁམས་གསུམ་མི་ཆགས་བཞིན་དུ་ཆོས་ཀུན་གནས་པ་མ་མཆིས་ཏེ། །དེ་སླད་ཚུལ་གཅིག་འདི་ལ་འཚལ་གྱུར་ན་འགྲོ་ཀུན་བདེ་བར་གཤེགས་པར་འགྱུར། །ཐུབ་པ་བདག་དང་གཞན་དུ་མི་མཁྱེན་ལྟ་བུར་ཆོས་ཀུན་གཡོ་བ་མེད། །ཐུབ་པའི་ཡེ་ཤེས་རྒྱལ་བའི་བསྟན་པ་ཇི་བཞིན་ཆོས་ཀུན་བསམ་མི་ཁྱབ། །ཐུབ་པ་བྱིས་པ་སྤྱོད་ཡུལ་མ་ལགས་ཇི་བཞིན་ཆོས་ཀུན་བརྟགས་མ་ལགས། །སངས་རྒྱས་རྣམས་ཀྱི་སྤྱོད་ཡུལ་འདི་ནི་རབ་གསལ་དེ་བཞིན་ཤེས་པར་བགྱི། །མི་མཁས་གང་དག་རྒྱལ་བས་བྱང་ཆུབ་གཞལ་ཡས་བརྙེས་ཤེས་སྨྲ་བ་དང་། །གང་དག་རྒྱལ་བས་འཁོར་ལོ་དམ་པ་གཞལ་ཡས་མཆོག་བསྐོར་སྨྲ་བ་དང་། །གང་དག་བདེ་གཤེགས་སྐྱོབ་པས་སྲོག་ཆགས་ཁྲག་ཁྲིག་མྱ་ངན་བཟླས་སྨྲ་བ། །དེ་དག་ཐམས་ཅད་ཡང་དམ་མ་འཚལ་ལྟ་བ་ཐིབས་པོར་ཡོངས་སུ་དཀྲིས། །གང་དག་བདེ་བར་གཤེགས་པས་ཆེ་ཡི་འདུ་བྱེད་བཏང་བཟུང་སྨྲ་བ་
དང་། །གང་དག་སྟོབས་བཅུ་འགྲོ་བའི་དོན་མཛད་ཡོངས་སུ་མྱ་ངན་འདས་སྨྲ་བ། །དེ་དག་ཐམས་ཅད་ལྟ་བར་སོང་ལ་ཡིད་ཆགས་བདུད་ཀྱི་ལག་ཏུ་མཆིས། །ཆོས་ཀྱིས་དེ་བཞིན་ཉིད་མ་འཚལ་ཏེ་འདྲེན་པས་མཁྱེན་བཞིན་འཚལ་བར་བགྱི །གང་དག་ཚུལ་དང་ཚུལ་མིན་འདི་ལ་མཁས་པ་དེ་ད་དག་འདྲེན་པ་འཚལ། །དེ་དག་རྐང་གཉིས་གཙོ་བོ་དཔལ་སྟུག་འཇིག་རྟེན་ཐུགས་བརྩེ་རྒྱལ་བར་འགྱུར། །དེ་བཞིན་ཉིད་འདི་འགྱུར་བའི་དབང་དང་ལྡན་ཏེ་དེ་ཉིད་ཆོས་ཉིད་ལགས། །དེ་ལྟར་འདི་འཚལ་གྱུར་ནས་ཚུལ་ལ་མཁས་པ་མི་ཡི་མཆོག་ཏུ་འགྱུར། །དེ་ལྟར་འབྲས་བུ་ཆེ་བའི་ལྷ་ཚོགས་ཆོས་རྣམས་ངེས་པར་རྟོགས་གྱུར་པ། །སྟོན་པའི་སྤྱན་སྔར་བརྗོད་དེ་ལྷག་པའི་བསམ་པ་དེ་ཡང་བསྟན་བྱས་ནས། །ཁ་ཅིག་ཡི་རངས་དོགས་མེད་ཡིད་ཀྱིས་སངས་རྒྱས་ཉིད་དུ་བདག་མཐོང་ནས། །འདྲེན་སྲས་དེ་དག་ཚུལ་འདི་ཉིད་ཀྱིས་བདག་གིས་བདག་ལུང་བསྟན་པར་འགྱུར། །དེ་ནས་བཅོམ་ལྡན་འདས་ཀྱིས་འབྲས་བུ་ཆེ་བའི་ལྷ་དེ་དག་གི་ལྷག་པའི་བསམ་པ་ཕུན་སུམ་ཚོགས་པ་དང་། །ཆོས་རྣམས་ངེས་པར་ཐུགས་སུ་ཆུད་ནས་སེམས་ཅན་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །དཔལ་སྟུག་འདྲེན་པ་རྣམས་ནི་རྒྱུ་ཞིག་གཟིགས་ནས་འཛུམ་པ་མཛད་ལགས་ཏེ། །རྒྱུ་མེད་མི་མཛད་བཀའ་སྩལ་བདག་གིས་བདེ་གཤེགས་མངོན་སུམ་དེ་སྐད་ཐོས། །འདི་ལྟར་འདྲེན་པ་ཁྱོད་ཀྱིས་ཞི་བ་བདེ་བ་བསིལ་བའི་འཛུམ་མཛད་ན། །རྒྱལ་བ་ལྷ་མི་ལྷ་མིན་བླ་མ་འཛུམ་པ་མཛད་པའི་རྒྱུ་དེ་གསུངས། །དེ་རིང་དེ་ལྟར་འདྲེན་པ་ཁྱོད་ཀྱི་ཞལ་ནས་འཛུམ་མཛད་བསིལ་མཐོང་ནས། །འགྲོ་བ་འདི་ཀུན་ཐེ་ཚོམ་འཚལ་ཏེ་བདེ་གཤེགས་ཁྱོད་ཀྱི་ཞལ་དུ་ལྟ། །མི་མཆོག་ཐུགས་རྗེ་ལྡན་པ་ཁྱོད་ཀྱིས་འཛུམ་རྒྱུ་དེ་ནི་མྱུར་དུ་གསུངས། །དེ་ཐོས་གྱུར་ནས་རྒྱལ་མཆོག་འགྲོ་བ་འདི་དག་ཐེ་ཚོམ་མ་མཆིས་འགྱུར། །འདྲེན་པ་དམ་པ་ལྷ་ཚོགས་གང་དག་རང་གིས་རང་ལ་ལུང་བསྟན་པ། དེ་དག་སུ་ཞིག་གང་
གིས་ཅི་འཐོབ་མཐའ་བཅས་རྣམ་པར་འཕྲུལ་པ་གསུངས། །མི་མཆོག་ཚངས་པའི་གསུང་དབྱངས་སྒྲོག་ཏེ་ཐེ་ཚོམ་བསལ་དུ་གསོལ། །དེ་ཐོས་རྒྱལ་བའི་འཁོར་འདི་རབ་ཏུ་དགའ་ཞིང་མཆོག་ཏུ་མགུ་བ་འཐོབ། །བདེ་གཤེགས་རྒྱལ་མཚན་མཐོན་པོ་དེ་དག་ཐམས་ཅད་གཞན་དུ་མི་སེམས་པར། །འདྲེན་པའི་སྲས་རྣམས་བྱང་ཆུབ་གཞལ་ཡས་ཞི་བ་དམ་པས་སེམས་ཤིང་མཆིས། །ཐུབ་པ་འདྲེན་མཆོག་ཐེ་ཚོམ་འཚལ་བ་དེ་དག་རྣམས་ཀྱི་ཐེ་ཚོམ་ཁུམ། །དེས་ནི་ཡེ་ཤེས་སྟོབས་ལྡན་ཚུལ་དང་ཚུལ་མིན་མཁས་ཀུན་རྒྱལ་བར་འགྱུར། །རྐང་གཉིས་གཙོ་བོའི་ཡན་ལག་བརྒྱད་ལྡན་གསུང་ཐོས་གྱུར་ནས་རབ་དགའ་སྟེ། །བདེ་གཤེགས་བསྟན་པ་བཞིན་དུ་བགྱིད་ཅིང་གསུངས་པའི་རྗེས་འཇུག་མཁས་པར་འགྱུར། །དེ་དག་དོན་གྱི་དབང་ལ་བརྟེན་ནས་བདེ་གཤེགས་འདྲེན་པ་བཀའ་སྩལ་གསོལ། །དེས་ནི་ཡི་རངས་གྱུར་ཏེ་འགྲོ་བ་ཆོས་ཀྱི་མཐའ་མར་ཕྱིན་པར་འགྱུར། །འདྲེན་པ་ཆེན་པོ་ལྷ་དེ་དག་གི་སྔོན་གྱི་སྤྱོད་པ་ཐོས་གྱུར་ཅིང་། །རྒྱལ་བའི་གསུང་ཐོས་གྱུར་ནས་བརྣག་པ་ཡོངས་རྫོགས་ཞི་ཞིང་རབ་དགའ་སྟེ། །ཚུལ་ལ་ཞུགས་ཤིང་ཚུལ་ལ་མཁས་རྣམས་མྱུར་དུ་ཐམས་ཅད་མཁྱེན་པར་འགྱུར། །འགྲོ་བ་རབ་ཏུ་འགྲོལ་མཛད་ཇི་བཞིན་ཡང་དག་སྟོན་པར་མཛད་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །ལྷ་ཚོགས་རྣམས་ཀྱི་ཆེད་དུ་ང་ཡིས་འཛུམ་པ་མཛད་པ་འཇིག་རྟེན་བསྟན་མཛད་པ། །རྟ་ཐུལ་ཁྱོད་ཀྱིས་དུས་དང་ཚོད་ཤེས་ང་ལ་དྲིས་པ་ཤིན་ཏུ་ལེགས། །གང་ཕྱིར་ང་ཡིས་འཛུམ་པ་མཛད་པ་འདི་ཡི་ཚུལ་ངང་རྒྱུ། །དེ་ཁྱོད་བསྟན་གྱིས་ཁྱོད་དང་འགྲོ་བ་རྩེ་གཅིག་ཡིད་ཀྱིས་ཉོན། །ཐམས་ཅད་མཁྱེན་པ་རྣམས་ནི་རྒྱུ་ཡི་འབྲས་བུ་རྣམ་པ་གསུམ་གཟིགས་ཤིང་། །རྒྱུ་ལ་གཟིགས་ནས་རྐང་གཉིས་དམ་པ་དཔལ་སྟུག་རྣམས་ནི་འཛུམ་པ་མཛད། །ཁ་ཅིག་བློ་ཞན་བདག་ཅག་ཉན་ཐོས་འགྱུར་ཞེས་མྱ་ངན་འདས་ཞུགས་དང་། །ཁ་ཅིག་ཁ་རོག་འདུག་ལ་དགའ་ཞིང་རང་རྒྱལ་བྱང་ཆུབ་འདོད་ཞུགས་དང་། །ཁ་ཅིག་བདག་ཅག་འཇིག་རྟེན་
འདྲེན་པ་མཐུ་བོ་ཆེར་ནི་འགྱུར་བྱ་སྟེ། །སྐྱེ་བོ་སྡུག་བསྔལ་ལྷུང་བ་དགྲོལ་ཞེས་ཞུགས་པའི་བསམ་པ་མཁྱེན་གྱུར་ནས། །འཛུམ་པ་ཅུང་མཛད་གང་བྱུང་ཉན་ཐོས་དོན་དུ་མཛད་པར་ཤེས་པར་བྱ། འཛུམ་པ་འབྲིང་མཛད་གང་བྱུང་རང་རྒྱལ་དོན་དུ་མཛད་པར་རིག་པར་བྱ། །འཛུམ་མཆོག་ངས་གང་མཛད་པ་འདི་ནི་འདྲེན་པའི་དོན་དུ་ཤེས་པར་བྱ། །རབ་འབྲིང་ཐ་མ་རྣམ་པ་འདི་གསུམ་འཛུམ་པ་མཛད་པའི་རྒྱུར་གསུངས་ཏེ། །ཁ་ཅིག་ཐར་པའི་དོན་གཉེར་ལམ་གསུམ་ཞུགས་པའི་འཇིག་རྟེན་འདི་མཁྱེན་ནས། །དེས་ན་འཇིག་རྟེན་མཁས་པ་རྣམ་པར་འདྲེན་པ་དམ་པ་འཛུམ་པ་མཛད། །རྟ་ཐུལ་དེ་ལ་ཉན་ཐོས་དོན་དུ་འཛུམ་མཛད་ཞབས་འོག་ནུབ་པར་འགྱུར། །རང་རྒྱལ་དོན་དུ་འཛུམ་པ་གང་མཛད་སྐུ་ཡི་དབུས་སུ་ནུབ་པར་འགྱུར། །འདྲེན་པ་སྟོབས་བཅུའི་དོན་དུ་འཛུམ་པ་མཛད་པ་གཙུག་ཏུ་ནུབ་པར་འགྱུར། །དེ་ལྟར་རྟ་ཐུལ་ཁྱོད་ཀྱིས་འཛུམ་པའི་རྒྱུ་ནི་རྣམ་གསུམ་ཤེས་པར་གྱིས། །རྒྱལ་བ་མཆོག་རྣམས་དོན་དུ་གང་འཛུམ་དེ་ཀུན་ང་ཡི་གཙུག་ཏུ་ནུབ། །སྡིག་པ་གཞོམ་པའི་ཚུལ་དུ་དེ་ལྟར་འཛུམ་པ་ངས་བསྟན་ཤེས་པར་གྱིས། །འདྲེན་པ་རྣམས་ཀྱིས་འཛུམ་པ་གང་ཡིན་དེ་རྒྱུ་རྣམ་གསུམ་ཡང་བཤད་ཀྱིས། །ཀུན་ཀྱང་རྩེ་གཅིག་ཡིད་བྱོས་དེ་ནི་ང་ལས་ལེགས་པར་མཉན་པར་གྱིས། །དང་པོའི་དོན་དུ་འདྲེན་པ་འཛུམ་པ་ངས་མཛད་མྱུར་དུ་ཐོག་མར་ནུབ། །འབྲིང་གི་དོན་ནི་དུས་ཚོད་ཅུང་ཟད་བསྡད་ཅིང་ཕྱི་ནས་ནུབ་པར་འགྱུར། །བློ་མཆོག་ལྡན་ཕྱིར་འཛུམ་པ་རྒྱལ་བ་ངས་མཛད་ཤིན་དུ་རིང་དུ་གནས། །རྟ་ཐུལ་ཉན་ཐོས་དོན་དུ་གང་གནས་འཛུམ་དེ་ཐེག་པའི་དབང་གིས་མཛད། །གཞན་ཡང་འཛུམ་རྒྱུ་རྣམ་གསུམ་བཤད་ཀྱིས་རྟ་ཐུལ་ཁྱོད་ཀྱིས་མཉན་པར་གྱིས། །གང་དག་རྒྱལ་བ་དྲང་པོ་སྟོབས་བཅུ་པོ་ལ་སྐོར་བ་བྱེད་པ་ནི། །དེ་དག་ང་ལ་སྐྱེན་པར་བསྐོར་ནས་མྱུར་དུ་ཤིན་དུ་མཁས་པར་འགྱུར། །འབྲིང་དོན་ཕྱིར་ནི་སྲབ་ཅིང་ཆེ་ལ་དལ་གྱིས་སྐོར་བ་བྱེད་པ་འགྱུར། །དལ་གྱིས་གཡས་ཕྱོགས་བསྐོར་བ་བྱས་ནས་རྒྱ་ཆེར་འགྱུར་ཞིང་མནན་པར་འགྱུར། །གང་དག་གསེར་རྒྱན་ལྟར་དཀར་སྟེང་བཞག་འདྲ་
བའི་བདེ་གཤེགས་མཐོང་གྱུར་ན། །དེ་ནི་རྐང་གཉིས་དམ་པ་ཐུབ་པའི་སྐུ་ཀུན་ཁྱབ་པར་གནས་པར་འགྱུར། །ཐམས་ཅད་མཁྱེན་པས་འཛུམ་བསྟན་འདི་ནི་ཞིང་གི་དབང་དུ་ཤེས་པར་བྱ། །གང་ཚེ་གདུགས་འདྲ་མཐའ་ཡས་མིག་ལྡན་པས་ནི་འདྲེན་དེ་འགེབས་པ་དང་། །གང་ཚེ་མེ་ཏོག་འདྲ་ལ་འདྲེན་པའི་སྟེང་གི་མཁའ་ལ་ལྡིང་བ་དང་། །གང་ཚེ་སྒོ་མོ་འདྲ་ཞིང་བདེ་བར་གཤེགས་ལ་ལན་གསུམ་སྐོར་བྱེད་པ། །དེ་ནི་འཇིག་རྟེན་འདས་པ་ཚེ་ཡི་དབང་དུ་འཛུམ་མཛད་ཤེས་པར་བྱ། །བདེ་གཤེགས་རྒྱལ་བ་རྣམས་ཀྱིས་འཛུམ་མཛད་རྒྱུ་ནི་རྣམ་གསུམ་དེ་ཙམ་བསྟན། །རྟ་ཐུལ་ཁྱོད་ཀྱིས་འཛུམ་མཛད་རྒྱུ་རྣམ་གསུམ་པོ་དེ་དག་ཤེས་པར་གྱིས། །དེས་ན་འཇིག་རྟེན་དོན་བསྟན་བཞེད་ནས་འཇིག་རྟེན་རྣམ་འདྲེན་འཛུམ་པ་མཛད། །དེ་ཐོས་གྱུར་ནས་ཐམས་ཅད་མཁྱེན་གྱི་བསྟན་ལ་ཐེ་ཚོམ་མེད་པར་གྱིས། །འབྲས་བུ་ཆེ་རིས་ལྷ་ཚོགས་བྱེ་བ་བརྒྱད་བཅུ་ཐམ་པ་འདི་དག་ནི། །ཞིང་རྣམས་དག་ཏུ་ཆོས་ཚུལ་ཤིན་དུ་རྒྱ་ཆེར་སྨྲ་བའི་རྒྱལ་བར་འགྱུར། །མཁས་པ་དེ་དག་དཔག་མེད་ཚེ་ལྡན་བསྐལ་པ་མང་པོར་གནས་པར་འགྱུར། །དེ་ཕྱིར་བདེ་བར་གཤེགས་པས་འཛུམ་པ་རྒྱ་ཆེན་མཆོག་གི་ཆ་འདི་བསྟན། །དེ་དག་སྔོན་གྱི་བསྐལ་པ་སུམ་བཅུ་དྲུག་གི་རྒྱལ་བ་རྣམས་ཀྱང་མཐོང་། །བསྐལ་པ་སུམ་བཅུ་དྲུག་ཏུ་ཐམས་ཅད་མཁྱེན་པ་བསྙེན་བཀུར་སྤྱད་པ་སྤྱོད། །ད་དུང་ཚུལ་མཁས་འདི་དག་བསྐལ་པ་གྲངས་མེད་སུམ་བཅུ་རྩ་དྲུག་ཏུ། །གང་ཟག་ཆེན་པོ་འདི་དག་རྒྱལ་བ་ཁྱུ་མཆོག་མཆོད་པ་བྱེད་ཅིང་གནས། །ཐམས་ཅད་དུ་ཡང་ཕུན་སུམ་ཚུལ་རྟོགས་རྒྱལ་བའི་མཆོག་ལ་མཆོད་པ་བྱེད། །རྐང་གཉིས་གཙོ་བོ་མཆོད་དེ་བྱང་ཆུབ་ཞི་བ་ཡོངས་སུ་བཙལ་བྱས་ནས། །དེ་དག་དེ་ཡི་འོག་ཏུ་དཔལ་སྟུག་རྐང་གཉིས་དམ་པ་སྐྱེས་བུ་མཆོག །འདྲེན་པ་མཐུ་ཆེན་ཡོན་ཏན་ལྡན་པར་གསེར་གྱི་རྒྱལ་མཚན་བསྐལ་ལ་འབྱུང་། །རྒྱལ་བ་དེ་དག་སྣ་ཚོགས་ཞིང་ན་གནས་ཤིང་རང་རང་ཞིང་སྦྱངས་ཏེ། །སེམས་ཅན་དམ་པ་དེ་ཀུན་ཉི་མའི་འོད་ཀྱི་དཀྱིལ་འཁོར་དཔལ་ཞེས་བྱ། །དེ་ཚེ་ཡོན་ཏན་ལྡན་པ་དེ་དག་རྣམས་ཀྱི་འདུས་པ་གྲངས་མེད་དེ།
དེ་ཚེ་ཐུབ་པ་རེ་རེའི་ཉན་ཐོས་འདུས་པར་འགྱུར་པ་དེ་དག་ནི། །གལ་ཏེ་བསྐལ་པ་ཁྲག་ཁྲིག་དག་ཏུ་སྟོབས་བཅུས་ཉན་ཐོས་དེ་བགྲངས་ཀྱང་། །ལེགས་མཛད་རྣམས་ཀྱི་ཉན་ཐོས་འདུས་པ་དག་ནི་མཐར་ཕྱིན་བགྲངས་མི་འགྱུར། །འདུས་པ་དེ་དག་ཐམས་ཅད་གྲངས་མེད་འདུས་པ་དེ་ནི་ཅི་འདྲ་བ། །དེ་ལས་ཉིས་གྱུར་དེ་ཚེ་བྱང་ཆུབ་དུ་ནི་ཡང་དག་ཞུགས་པར་འགྱུར། །དེ་ཚེ་རྒྱལ་བ་ཞུགས་ཀྱི་རྒྱལ་བ་ཐམས་ཅད་མཁྱེན་པ་ཉིད་མ་ཡིན། །དེ་དག་ཐམས་ཅད་ཡོངས་དག་ཞིང་དུ་སྤྱད་ནས་ཀུན་ཀྱང་རྒྱལ་བར་འགྱུར། །བདེ་གཤེགས་དེ་དག་སྤྱོད་པ་གང་ཡིན་དེ་དག་རྣམས་ཀྱི་འདི་ཉིད་འགྱུར། །འཇིག་རྟེན་མཁས་པ་དེ་དག་མྱ་ངན་འདས་པར་གྱུར་ནས་དམ་པའི་ཆོས། །དེ་ཚེ་སྲས་ཀྱིས་གཟུངས་ཞིང་བསྐལ་པ་བྱེ་བ་བརྒྱད་བཅུར་གནས་པར་འགྱུར། །དེ་དག་འདས་ནས་སྟོན་པའི་གསུང་རབ་དེ་ལ་བྱང་ཆུབ་སེམས་བསྐྱེད་པ། །གང་གཱའི་ཀླུང་གི་བྱེ་མ་བས་ཀྱང་ཤིན་དུ་མང་བ་འབྱུང་བར་འགྱུར། །དེ་དག་འདས་ནས་སྟོན་པ་སྐྱོབ་པ་རྣམས་ཀྱི་གསུང་རབ་དེ་ལ་ནི། །ཉན་ཐོས་རྒྱ་མཚོ་ཀུན་གྱི་བྱེ་སྙེད་དཔག་ཡས་མྱ་ངན་འདའ་བར་འགྱུར། །དེ་ལྟར་འཇིག་རྟེན་དོན་རྣམས་མཛད་པ་རང་བྱུང་དེ་དག་ཐམས་ཅད་ཀྱི། །བསྟན་པ་གང་ཡིན་དེ་ནི་ཆོས་དང་ཡོངས་སུ་ལེགས་པར་ལྡན་གྱུར་ཅིང་། །ཡང་དག་ཤར་བར་འགྱུར་ཏེ་དེ་ནི་བསྟན་པ་རྣམས་ཀྱི་ཆོས་ཉིད་ཡིན། །མི་མཆོག་དེ་ཡི་གསུང་རབ་དེ་ཐོས་འགྲོ་བ་མ་ལུས་དང་གྱུར་ནས། །རྐང་གཉིས་དམ་པ་གཞལ་ཡས་འཇིག་རྟེན་དོན་བྱེད་བདག་ཅག་འགྱུར་ཞེས་ཏེ། །ཐམས་ཅད་དགའ་ནས་རྒྱལ་བའི་ཞབས་ལ་ཕྱག་འཚལ་སྐྱེ་བོ་རབ་ཏུ་དགའ། །བདེ་བར་གཤེགས་ལ་དགའ་བ་གཞལ་ཡས་བསྐྱེད་ནས་ཆོས་ཀྱིས་བསྙེན་བཀུར་བྱས། །དེ་ལྟ་བས་ན་དགའ་བར་བྱོས་ལ་མགོ་ལ་འབར་བཞིན་སྤྱད་སྤྱོད་དེ། །རྟག་ཏུ་ཤེས་རབ་ཕ་རོལ་ཕྱིན་དང་དགེ་བའི་བཤེས་གཉེན་བསྟེན་བྱོས་ལ། ། ཡང་དག་མཐོང་བའི་སྤྱོད་པ་དགེ་བ་འདི་ལ་ཀུན་དུ་བསྟེན་བྱོས་ཏེ། །དགེ་སློང་ཁྱེད་ཅག་རྐང་གཉིས་གཙོ་བོ་འཇིག་རྟེན་ཐུགས་བརྩེར་འགྱུར་བར་གྱིས། །འབྲས་བུ་
ཆེ་བ་ལུང་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ། །