འཕགས་པ་བློ་གྲོས་མི་ཟད་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།
འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཞི་བཅུ་རྩ་ལྔ་པ་སྟེ། འཕགས་པ་བློ་གྲོས་མི་ཟད་པས་ཞུས་པ་ལུང་བསྟན་པ། བམ་པོ་གཅིག་པ། རྒྱ་གར་སྐད་དུ། ཨཱརྻ་ཨ་ཀྵ་ཡ་མ་ཏི་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བློ་གྲོས་མི་ཟད་པས་ཞུས་པ་ཞེས་བྱ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སྟོང་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡེ་ཤེས་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཟླ་བའི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཉི་མའི་ཏོག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་མཐའ་ཡས་ཏོག་དང་། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་ལ་སོགས་པ་སེམས་དཔའ་དཔེ་མེད་པ་དྲུག་བཅུ་དང་། བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཐབས་གཅིག་ཏུ་བཞུགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ཡང་བྱང་ཆུབ་སེམས་དཔའ་བྱེ་བ་ཕྲག་དྲུག་བཅུས་ཡོངས་སུ་བསྐོར་ཅིང་མདུན་དུ་བདར་ཏེ་འཁོར་དེ་ཉིད་དུ་འདུས་ནས་འདུག་པར་འགྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ལངས་
ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་གཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་རིན་པོ་ཆེ་སྣ་ཚོགས་ཀྱི་མེ་ཏོག་གི་གདུགས་དང་། མེ་ཏོག་གི་ཕུར་མས་མཆོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། བཅོམ་ལྡན་འདས་བྱང་ཆུབ་ཀྱི་སེམས་བྱང་ཆུབ་ཀྱི་སེམས་ཤེས་བགྱི་ན། བཅོམ་ལྡན་འདས་ཇི་ཙམ་གྱིས་ན་བྱང་ཆུབ་ཀྱི་སེམས་དཔའ་བྱང་ཆུབ་ཀྱི་སེམས་དང་ལྡན་པ་ལགས། བཅོམ་ལྡན་འདས་བྱང་ཆུབ་ཀྱི་སེམས་གང་ལགས། བཅོམ་ལྡན་འདས་བྱང་ཆུབ་ལ་ནི་སེམས་སམ་སེམས་པ་མ་དམིགས། མི་དམིགས། དམིགས་པར་མི་འགྱུར་རོ། །བྱང་ཆུབ་ལས་གུད་ན་ཡང་བྱང་ཆུབ་ཀྱི་སེམས་མི་དམིགས་ཏེ། བྱང་ཆུབ་ནི་བརྗོད་དུ་མ་མཆིས། སེམས་ནི་གཟུགས་མ་མཆིས། བསྟན་དུ་མ་མཆིས། ཐོགས་པ་མ་མཆིས། རྣམ་པར་རིག་པ་མ་མཆིས་ཤིང་སེམས་པ་ཡང་མི་དམིགས་ན། བཅོམ་ལྡན་འདས་ཇི་ལྟ་ཆོས་འདི་དག་གི་དོན་རྟོགས་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་ནི་བརྡ་འམ། གདགས་པ་འམ་ཐ་སྙད་དུ་མི་དམིགས་ཤིང་བྱང་ཆུབ་ལས་གུད་ན་བྱང་ཆུབ་ཀྱི་སེམས་ཀྱང་མི་དམིགས་ལ། བྱང་ཆུབ་ནི་བརྗོད་དུ་མེད། སེམས་ནི་གཟུགས་མྱེད། བསྟན་དུ་མེད། ཐོགས་པ་མེད། རྣམ་པར་རིག་པ་མེད་དེ། སེམས་པ་ཡང་མི་དམིགས་སོ། །དེ་ཅིའི་ཕྱིར་ཞེ་ན། བྱང་ཆུབ་ནི་བརྗོད་དུ་མེད་པ་སྟེ། བྱང་ཆུབ་ཇི་ལྟ་བར་སེམས་ཀྱང་དེ་བཞིན་ནོ། །སེམས་ཇི་ལྟ་བར་བྱང་ཆུབ་ཀྱང་དེ་བཞིན་ནོ། །བྱང་ཆུབ་དང་སེམས་ཇི་ལྟ་བར་སེམས་པ་རྣམས་ཀྱང་དེ་བཞིན་ནོ། །སེམས་པ་རྣམས་ཇི་ལྟ་བར་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ཐམས་ཀྱང་དེ་བཞིན་ནོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་ཆེན་པོ་བྱང་ཆུབ་དཔའི་མིང་འཐོབ་བོ། །ཆོས་ཐམས་ཅད་ཀྱི་རྗེས་སུ་སོང་བའི་སེམས་དེ་ནི་བྱང་ཆུབ་སེམས་ཀྱི་སེམས་ཤེས་བྱའོ། །བྱང་ཆུབ་ནི་འདས་པ་དང་། མ་འོངས་པ་དང་། ད་ལྟར་བྱུང་བ་ཡང་མ་ཡིན་ཏེ།
སེམས་ཀྱང་དེ་བཞིན་ནོ། །སེམས་པ་ཡང་དེ་བཞིན་ནོ། །ཆོས་ཐམས་ཅད་མི་དམིགས་པའི་ཕྱིར་འདི་ལ་ཅི་ཡང་རྙེད་པ་མེད་དེ་བྱང་ཆུབ་ཀྱང་མེད། བྱང་ཆུབ་ཏུ་གདགས་པ་ཡང་མེད། སེམས་ཅན་ཡང་མེད། སེམས་ཅན་དུ་གདགས་པ་ཡང་མེད། ཉན་ཐོས་ཀྱང་མེད། ཉན་ཐོས་སུ་གདགས་པ་ཡང་མེད། རང་སངས་རྒྱས་ཀྱང་མེད། རང་སངས་རྒྱས་སུ་གདགས་ཡང་མེད། བྱང་ཆུབ་སེམས་དཔའ་ཡང་མེད། བྱང་ཆུབ་སེམས་དཔར་གདགས་པ་ཡང་མེད། སངས་རྒྱས་ཀྱང་མེད། སངས་རྒྱས་སུ་གདགས་པ་ཡང་མེད། འདུས་བྱས་ཀྱང་མེད། འདུས་བྱས་སུ་གདགས་པ་ཡང་མེད། །འདུས་མ་བྱས་ཀྱང་མེད། འདུས་མ་བྱས་སུ་གདགས་པ་ཡང་མ་དམིགས་མི་དམིགས། དམིགས་པར་མི་འགྱུར་མོད་ཀྱི། རིགས་ཀྱི་བུ་འོན་ཀྱང་དཔེར་ན་རིང་པོ་ཚུལ་དུ་དགེ་བའི་རྩ་བ་ཐམས་ཅད་ཀྱིས་ཡང་དག་པར་འཕགས་པའི་སེམས་དང་པོ་སྐྱེ་སྟེ། དེ་ལ་རྒྱུ་ནི་སྦྱིན་པའི་ཕ་རོལ་ཏུ་ཕྱིན་པའོ་སེམས་བསྐྱེད་པ་གཉིས་ནི་ཆོས་ཐམས་ཅད་ཀྱི་བྱ་བའི་གནས་ཀྱི་ཚུལ་གྱིས་ས་ལྟ་བུར་བལྟ་སྟེ། དེ་ལ་རྒྱུ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་གསུམ་པ་ནི་འཇིགས་པ་མེད་པ་དང་། བག་ཚ་བ་མེད་དང་། སྐྲག་པ་མེད་པའི་ཚུལ་གྱིས་རི་དགས་ཀྱི་རྒྱལ་པོ་སེང་གེ་རལ་བ་ཅན་གྱི་རྩལ་ལྟ་བུར་བལྟ་སྟེ། དེ་ལ་རྒྱུ་ནི་བཟོད་པའི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཞི་པ་ནི་ཕྱིར་མི་ལྡོག་པའི་ཚུལ་གྱིས། སྲེད་མེད་ཀྱི་བུའི་མཐུ་དང་། སྟོབས་དང་། ཤུགས་དང་། བརྩོན་འགྲུས་དང་། རཏལ་པ་ལྟ་བུར་ལྟ་སྟེ། དེ་ལ་རྒྱུ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་ལྔ་པ་ནི་བསོད་ནམས་ཀྱིས་ཆོག་མི་ཤེས་པའི་ཚུལ་གྱིས་དགེ་བ་སྣ་ཚོགས་ཀྱི་ཡང་དག་པར་འཕགས་པ་ལྟ་བུར་བལྟ་སྟེ། དེ་ལ་རྒྱུ་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་དྲུག་པ་ནི་མུན་པ་མུན་གནག་ཆེན་པོ་སེལ་བའི་ཚུལ་གྱིས་ཉི་མའི་དཀྱིལ་འཁོར་འོད་གསལ་བ་ལྟ་བུར་བལྟ་སྟེ། དེ་ལ་རྒྱུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བདུན་པ་ནི་དེད་དཔོན་མཛོད་ཆེན་པོས་ཕྱུག་པ་ལྟར་འཁོར་བའི་
འབྲོག་དགོན་པ་ལས་སྒྲོལ་བའི་ཚུལ་གྱིས་བསམ་པ་ཐམས་ཅད་ཡོངས་སུ་རྫོགས་པར་བྱེད་པས་ལེགས་པར་བརྒྱན་པར་བལྟ་སྟེ། དེ་ལ་རྒྱུ་ནི་ཐབས་ལ་མཁས་པའི་ཕ་རོལ་ཏུ་ཕྱིན་པའོ། །སེམས་བསྐྱེད་བརྒྱད་པ་ནི་ཟླ་བ་ཉ་བའི་དཀྱིལ་འཁོར་རྣམ་པར་དག་པའི་དཔེའི་ཚུལ་གྱིས་སྒྲིབ་པ་ཐམས་ཅད་རྣམ་པར་དག་པ་ཡོངས་སུ་རྫོགས་པར་བྱེད་ལྟ་སྟེ། དེ་ལ་རྒྱུ་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་དགུ་པ་ནི་སངས་རྒྱས་ཀྱི་ཞིང་ཡོངས་སུ་དག་པའི་ཡོན་ཏན་གྱི་རྒྱན་བཀོད་པ་ཐམས་ཅད་ཀྱི་དཀྱིལ་འཁོར་གྱི་ཚུལ་གྱི་བསམ་པ་ཡོངས་སུ་རྫོགས་པར་བྱེད་པར་བལྟ་སྟེ། དེ་ལ་རྒྱུ་ནི་སྟོབས་ཀྱི་ཕ་རོལ་ཏུ་ཕྱིན་པའོ། །སེམས་བསྐྱེད་པ་བཅུ་པ་ནི་ཡོན་ཏན་དང་། ཡེ་ཤེས་དང་། ཆོས་ཐམས་ཅད་ལ་དབང་བསྒྱུར་བར་དབང་བསྐུར་བ་ཐོབ་པས་འཁོར་ལོས་སྒྱུར་བའི་མཚན་གྱི་དཔེའི་ཚུལ་གྱི་ནམ་མཁའ་དང་མཚུངས་པར་བལྟ་སྟེ། དེ་ལ་རྒྱུ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སེམས་བསྐྱེད་པ་ནི་བཅུ་པོ་འདི་དག་ཡིན་ཏེ། འདི་དག་དང་ལྡན་པས་བྱང་ཆུབ་སེམས་དཔའ་ཞེས་བྱའོ། །དོན་དམ་པར་འདི་ལ་བྱང་ཆུབ་ཀྱང་མེད། བྱང་ཆུབ་སེམས་དཔའ་ཡང་མེད། བྱང་ཆུབ་ཀྱི་སེམས་ཀྱང་མེད་དོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམས་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དད་པའི་དབང་པོ་སྔོན་དུ་འགྲོ་བ་དང་། བསམ་པ་སྔོན་དུ་འགྲོ་བ་དང་། ལྷག་པའི་བསམ་སྔོན་དུ་འགྲོ་བ་དང་། ཕ་རོལ་དུ་ཕྱིན་པ་སྔོན་དུ་འགྲོ་བ་དང་། བྱམས་པ་ཆེན་པོ་སྔོན་དུ་འགྲོ་བ་དང་། སྙིང་རྗེ་ཆེན་པོ་སྔོན་དུ་འགྲོ་བ་དང་། སེམས་ཅན་གྱི་རྟེན་སྔོན་དུ་འགྲོ་བ་དང་། བསྡུ་བའི་དངོས་པོ་སྔོན་དུ་འགྲོ་བ་དང་། སངས་རྒྱས་ཀྱི་ཆོས་འདོད་པ་སྔོན་དུ་འགྲོ་བ་དང་། ཐམས་ཅད་མཁྱེན་པའི་ཡེ་ཤེས་འདོད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྦྱིན་པའི་ཕ་རོལ་དུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་དུ་ཕྱིན་པའི་སྔོན་དུ་
འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན་འདི་ལྟ་སྟེ། ལུས་ཀྱི་ལས་ཡོངས་སུ་དག་པ་་སྔོན་དུ་འགྲོ་བ་དང་། ངག་གི་ལས་ཡོངས་སུ་དག་པ་སྔོན་དུ་འགྲོ་བ་དང་། ཡིད་ཀྱི་ལས་ཡོངས་སུ་དག་པ་སྔོན་དུ་འགྲོ་བ་དང་། རྣམ་པར་མི་འཚེ་བ་སྔོན་དུ་འགྲོ་བ་དང་། ངན་སོང་ཐམས་ཅད་རྣམ་པར་སྤོང་བ་སྔོན་དུ་འགྲོ་བ་དང་། མི་ཁོམ་པ་བརྒྱད་རྣམ་པར་སྤོང་བ་དང་སྔོན་དུ་འགྲོ་བ་དང་། ཉན་ཐོས་དང་རང་སངས་རྒྱས་ཀྱི་ས་ལས་བཟླ་བ་སྔོན་དུ་འགྲོ་བ་དང་། སངས་རྒྱས་ཀྱི་ཡོན་ཏན་ལ་དགོད་པ་སྔོན་དུ་འགྲོ་བ་དང་། བསམ་པ་ཡོངས་སུ་རྫོགས་པ་སྔོན་དུ་འགྲོ་བ་དང་། སྨོན་ལམ་ཡོངས་སུ་རྫོགས་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་དུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན་འདི་ལྟ་སྟེ། རྗེས་སུ་ཆགས་པ་སྤོང་བ་སྔོན་དུ་འགྲོ་བ་དང་། ཁོང་ཁྲོ་བ་སྤོང་བ་སྔོན་དུ་འགྲོ་བ་དང་། ལུས་ལ་མི་ལྟ་བར་སྔོན་དུ་འགྲོ་བ་དང་། སྲོག་ལ་ཡིད་མི་རྟོན་པ་སྔོན་དུ་འགྲོ་བ་དང་། མོས་པ་སྔོན་དུ་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང་། བྱམས་པའི་སྟོབས་སྔོན་དུ་འགྲོ་བ་དང་། ཟབ་མོའི་ཆོས་ལ་བཟོད་པ་སྔོན་དུ་འགྲོ་བ་དང་། རྒྱ་ཆེན་པོ་ལ་མོས་པ་སྔོན་དུ་འགྲོ་བ་དང་། མི་ཤེས་པ་བསལ་བ་སྔོན་དུ་འགྲོ་བ་སྟེ་རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་དུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་བྱ་བ་ཅི་ཡོད་སྙམ་པ་སྔོན་དུ་འགྲོ་དང་། དགེ་བའི་ལུས་དང་། ངག་དང་། ཡིད་མངོན་པར་སྒྲུབ་པ་ལ་རྗེས་སུ་ཡི་རང་བ་སྔོན་དུ་འགྲོ་བ་དང་། ཞུམ་པ་མེད་པ་སྔོན་དུ་འགྲོ་བ་དང་། ཕྱིར་མི་ལྡོག་པའི་ས་བསྡུ་བ་འཐོབ་པར་བྱ་བ་སྔོན་དུ་འགྲོ་བ་དང་ཡང་དག་པའི་རྩོལ་བ་སྔོན་དུ་འགྲོ་
བ་དང་། དྲན་པ་ཉེ་བར་བཞག་པ་སྔོན་དུ་འགྲོ་བ་དང་། ཉོན་མོང་པའི་དགྲ་གདུལ་བ་སྔོན་དུ་འགྲོ་བ་དང་། ཆོས་ཐམས་ཅད་གྱིས་དབེན་པ་སྔོན་དུ་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བ་སྔོན་དུ་འགྲོ་བ་དང་། ཐམས་ཅད་མཁྱེན་པའི་ཡེ་ཤེས་ཡང་དག་པར་སྒྲུབ་པ་སྔོན་དུ་འགྲོ་བ་སྟེ། རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་དུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ བཅུ་གང་ཞེ་ན། འདི་ལྟ་སྟེ་དགེ་བའི་ཆོས་ལ་གནས་པ་སྔོན་དུ་འགྲོ་བ་དང། ཏིང་ངེ་འཛིན་སྔོན་དུ་འགྲོ་བ་དང་། སྙོམས་པར་འཇུག་པ་སྔོན་དུ་འགྲོ་བ་དང་། ཡང་དག་པར་རྫོགས་པའི་བྱང་ཆུབ་སྔོན་དུ་འགྲོ་བ་དང་། བསམ་གཏན་དང་རྣམ་པར་ཐར་པ་སྔོན་དུ་འགྲོ་བ་དང་། ཏིང་ངེ་འཛིན་གྱི་དབང་པོ་སྔོན་དུ་འགྲོ་བ་དང་། ཏིང་ངེ་འཛིན་གྱི་སྟོབས་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་ཉོན་མོངས་པ་སྤོང་བ་སྔོན་དུ་འགྲོ་བ་དང་། ཏིང་ངེ་འཛིན་གྱི་ཕུང་པོ་ཡོངས་སུ་རྫོགས་པར་བྱེད་པ་སྔོན་དུ་འགྲོ་བ་དང་། དམ་པའི་ཆོས་ཡོངས་སུ་བསྲུང་བ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཀྱི་ཕ་རོལ་དུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཕུང་པོ་ལ་མཁས་པ་སྔོན་དུ་འགྲོ་བ་དང་། ཁམས་ལ་མཁས་པ་སྔོན་དུ་འགྲོ་བ་དང་། སྐྱེ་མཆེད་ལ་མཁས་པ་སྔོན་དུ་འགྲོ་བ་དང་། རྟེན་ཅིང་འབྲེལ་བར་འབྱུང་བ་ལ་མཁས་པ་སྔོན་དུ་འགྲོ་བ་དང་། བདེན་པ་ལ་མཁས་པ་སྔོན་དུ་འགྲོ་བ་དང་། ལྟ་བར་གྱུར་པ་ཐམས་ཅད་བསལ་བ་སྔོན་དུ་འགྲོ་བ་དང་། ཤེས་རབ་ཀྱི་དབང་པོ་སྔོན་དུ་འགྲོ་བ་དང་། མི་སྐྱེ་བའི་ཆོས་ལ་བཟོད་པ་སྔོན་དུ་འགྲོ་བ་དང་། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བ་སྔོན་དུ་འགྲོ་བ་དང་། སྒྲིབ་པ་མེད་པའི་ཡེ་ཤེས་མཐོང་བ་སྔོན་དུ་
འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཤེས་རབ་ཕ་རོལ་དུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཐབས་ལ་མཁས་པའི་ཕ་རོལ་ཏུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་བསམ་པ་དང་སྤྱོད་པ་ལ་འཇུག་པ་སྔོན་དུ་འགྲོ་བ་དང་། སེམས་ཅན་གྱི་རྟེན་སྔོན་དུ་འགྲོ་བ་དང་། བྱམས་པ་དང་སྙིང་རྗེ་སྔོན་དུ་འགྲོ་བ་དང་། སེམས་ཅན་ཡོངས་སུ་སྨིན་པར་བྱ་བ་ལ་མི་སྐྱོ་བ་སྔོན་དུ་འགྲོ་བ་དང་། སངས་རྒྱས་ཀྱི་ཆོས་ཐམས་ཅད་ལ་འཇུག་པ་སྔོན་དུ་འགྲོ་བ་དང་། ཁྱད་པར་གྱི་ཡེ་ཤེས་མཐོང་བ་ཁོང་དུ་ཆུད་པ་སྔོན་དུ་འགྲོ་བ་དང་། ཕ་རོལ་དུ་ཕྱིན་པ་ཡོངས་སུ་བྱང་བར་བྱ་བ་ཡོངས་སུ་སྨིན་པ་སྔོན་དུ་འགྲོ་བ་དང་། དངོས་པོ་ཇི་ལྟ་བ་བཞིན་དུ་ཡོངས་སུ་རྟོག་པ་སྔོན་དུ་འགྲོ་བ་དང་། སེམས་ཀྱི་སྟོབས་ཉེ་བར་སྒྲུབ་པ་སྔོན་དུ་འགྲོ་བ་དང་། ཕྱིར་མི་ལྡོག་པའི་ས་ཡོངས་སུ་ཐོབ་པར་བྱེད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐམས་ལ་མཁས་པའི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་ཕ་རོལ་དུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའི་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་ཉོན་མོངས་པའི་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་དབང་པོ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་དང་མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་པ་དང་། ལྷག་པའི་བསམ་པའི་བསམ་པ་དང་མོས་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། འཇིག་རྟེན་གྱི་ཁམས་ཐ་དད་པ་དང་ཁམས་གསུམ་པོ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་བསམ་པ་དང་བག་ལ་ཉལ་ཐིབས་པོ་ཉེ་བར་རྒྱུ་བ་ཤེས་
པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཀྱི་འཆི་འཕོ་བ་དང་སྐྱེ་བའི་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། སེམས་ཅན་ཐམས་ཅད་ཕུང་པོ་གསུམ་དུ་རྣམ་པར་གཞག་པ་ཐིབས་པོ་ཉེ་བར་རྒྱུ་བ་ཤེས་པ་སྔོན་དུ་འགྲོ་བ་དང་། དབང་པོ་མི་སྐྱེ་བའི་སེམས་ཅན་ཡོངས་སུ་སྨིན་པ་བྱ་བ་ཤེས་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྨོན་ལམ་གྱི་ཕ་རོལ་དུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཕ་རོལ་དུ་ཕྱིན་པའི་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་གཟོད་མ་ནས་འབྱུང་བ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་བཟོད་མ་ནས་མཚན་ཉིད་མེད་སྔོན་དུ་འགྲོ་བ་དང་། ཆོས་ཐམས་ཅད་གཟོད་མ་ནས་སྐྱེ་བ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་བཟོད་མ་ནས་ཡོད་མ་ཡིན་པ་སྔོན་དུ་འགྲོ་བ་དང་། ཆོས་ཐམས་ཅད་གཟོད་མ་ནས་ཆགས་པ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་འཇུག་པ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་ལྡོག་པ་མེད་པ་སྔོན་དུ་འགྲོ་བ་དང་། ཆོས་ཐམས་ཅད་དངོས་པོ་མེད་པའི་ངོ་བོ་ཉིད་སྔོན་དུ་འགྲོ་བ་དང་། ཆོས་ཐམས་ཅད་ཀྱི་ཐོག་མ་དང་བར་དང་ཐ་མ་མཉམ་པ་ཉིད་སྔོན་དུ་འགྲོ་བ་དང་། ཆོས་ཐམས་ཅད་དེ་བཞིན་ཉིད་ལ་འཇུག་པ་རྟོག་པ་དང་རྣམ་པར་རྟོག་པ་མེད་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་སྟོབས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྔོན་དུ་འགྲོ་བའི་ཆོས་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་རྣམ་པར་དབྱེ་བ་ལ་ཤིན་དུ་རྣམ་པར་བརྟགས་པ་སྔོན་དུ་འགྲོ་བ་དང་། དཀར་པོའི་ཆོས་ཤིན་དུ་ཡོངས་སུ་རྫོགས་པ་སྔོན་དུ་འགྲོ་བ་དང་། བྱང་ཆུབ་ཀྱི་ཚོགས་བསགས་པ་དང་དཔག་ཏུ་མེད་སྔོན་དུ་འགྲོ་བ་དང་། བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ཡོངས་སུ་གཟུང་བ་སྔོན་དུ་འགྲོ་བ་དང་། སྙིང་
རྗེ་ཆེན་པོ་ཡངས་པ་ཁོང་དུ་ཆུད་པར་བྱ་བ་སྔོན་དུ་འགྲོ་དང་། འཇིག་རྟེན་གྱི་ཁམས་རྣམ་པར་དབྱེ་བའི་རིམ་པ་ཤེས་པ་སྔོན་དུ་འགྲོ་བ་དང་། སེམས་ཅན་གྱི་ཁམས་དང་ཉོན་མོངས་པའི་སྤྱོད་པ་ལ་འཇུག་པ་སྔོན་དུ་འགྲོ་བ་དང་། དེ་བཞིན་གཤེགས་པའི་སྤྱོད་ཡུལ་ལ་འཇུག་ཅིང་རྗེས་སུ་འགྲོ་བ་ཤེས་པ་ཡིད་ལ་བྱེད་པ་སྔོན་དུ་འགྲོ་བ་དང་། སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་ལ་ལྷག་པར་དམིགས་ཤིང་ཀུན་ཤེས་པར་བྱ་བ་སྔོན་དུ་འགྲོ་བ་དང་། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ལ་དབང་བསྐུར་བའི་ས་ཐོབ་པ་སྔོན་དུ་འགྲོ་བ་སྟེ། རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་འདིའི་སྔོན་དུ་འགྲོ་བའི་ཆོས་རྣམ་པ་བཅུའོ། །དེ་ལ་ཕ་རོལ་ཏུ་ཕྱིན་པའི་དོན་གང་ཞེ་ན། སྤྱོད་པའི་ཁྱད་པར་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་ཏུ་ཕྱིན་པའི་དོན་ནོ། ཡེ་ཤེས་ཟབ་ཅིང་རྒྱ་ཆེ་བ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །འདུས་བྱས་དང་འདུས་མ་བྱས་ལ་ཆགས་པ་མེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །འཁོར་བའི་ཉེས་པ་ཇི་ལྟ་བ་བཞིན་དུ་རྟོགས་པའི་དོན་ནི་ཕ་རོལ་དུ་ཕྱིན་པའི་དོན་ནོ། །སྐྱེ་བོ་མི་མཁས་པ་རྣམས་ཁོང་དུ་ཆུད་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཆོས་ཀྱི་མཛོད་ཟད་མི་ཤེས་པ་ཡང་དག་པར་སྟོན་པའི་དོན་ནི་ཕ་རོལ་དུ་ཕྱིན་པའི་དོན་ནོ། །སྒྲིབ་པ་མེད་པའི་རྣམ་པར་ཐར་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་དོན་ནོ། །སེམས་ཅན་གྱི་ཁམས་རབ་ཏུ་ཤེས་པར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །སྦྱིན་པ་མཉམ་པ་ཉིད་རྗེས་སུ་རྟོགས་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཚུལ་ཁྲིམས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །བཟོད་པ་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །བརྩོན་འགྲུས་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །བསམ་གཏན་མཉམ་པ་ཉིད་ཡོངས་སུ་རྫོགས་
པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཤེས་རབ་ཀྱི་ཕ་རོལ་དུ་ཕྱིན་པ་ལ་ངེས་པར་མཁས་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པ་དོན་ནོ། །བསམ་གཏན་མཉམ་པ་ཉིད་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཤེས་རབ་ཀྱི་ཕ་རོལ་དུ་ཕྱིན་པ་ལ་ངེས་པར་མཁས་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཆོས་ཐམས་ཅད་རབ་ཏུ་ཤེས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །མི་སྐྱེ་བའི་ཆོས་ལ་བཟོད་པ་ཡོངས་སུ་རྫོགས་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཕྱིར་མི་ལྡོག་པའི་ས་ཡང་དག་པར་ཐོབ་པར་བྱེད་པའི་དོན་ནི་ཕ་རོལ་དུ་ཕྱིན་པ་དོན་ནོ། །སངས་རྒྱས་ཀྱི་ཞིང་ཡོངས་སུ་སྦྱང་བའི་དོན་ནི་ཕ་རོལ་དུ་ཕྱིན་པའི་དོན་ནོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །བྱང་ཆུབ་ཀྱི་སྙིང་པོ་ལ་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །བདུད་ཐམས་ཅད་གདུལ་བར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །འཁོར་བ་དང་མྱ་ངན་ལས་འདས་པ་གཉིས་སུ་མྱེད་པར་སྟོན་ཅིང་སྒྲོལ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །ཡོན་ཏན་ཐམས་ཅད་ཀྱི་ཕ་རོལ་དུ་འགྲོ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །ཕས་ཀྱི་རྒོལ་བ་ཐམས་ཅད་ཚར་གཅད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་བཅུ་བརྒྱད་ཡོངས་སུ་རྫོགས་པར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་བྱ་བའི་དོན་ནི་ཕ་རོལ་དུ་ཕྱིན་པའི་དོན་ནོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་བྱང་ཆུབ་པར་བྱེད་པའི་དོན་ནི་ཕ་རོལ་དུ་ཕྱིན་པའི་དོན་ནོ། །ཆོས་ཀྱི་འཁོར་ལོ་རྣམ་པ་བཅུ་གཉིས་སུ་སྐོར་བའི་དོན་ནི་ཕ་རོལ་དུ་ཕྱིན་པའི་དོན་ནོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དང་པོའི་སྔ་ལྟས་ནི་སྟོང་གསུང་གྱི་སྟོང་ཆེན་པོའི་འཇིག་རྟེན་གྱི་ཁམས་གཏེར་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་གང་བར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་གཉིས་པའི་སྔ་
ལྟས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལག་མཐིལ་ལྟ་བུར་གྱུར་བ་ལ་རིན་པོ་ཆེ་བྱེ་བ་ཁྲག་ཁྲིག་བརྒྱ་སྟོང་དུ་མས་ལེགས་པར་བརྒྱན་པར་མཐོང་ངོ་། །རིགས་ཀྱི་དེ་ལ་བྱང་ཆུབ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་གསུམ་པའི་སྔ་ལྟས་ནི་བདག་ཉིད་དཔའ་ཞིང་ལག་ཆ་དང་གོ་ཆ་སྲ་བ་ཐོགས་ནས་ཕས་ཀྱི་རྒོལ་བ་ཐམས་ཅད་འདུལ་བར་མཐོང་ངོ་། །རིགས་ཀྱི་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཞི་པའི་སྔ་ལྟས་ནི་ཕྱོགས་བཞི་ནས་རླུང་གི་དཀྱིལ་འཁོར་བཞིས་ཐམས་ཅད་ལྡན་པའི་སའི་དཀྱིལ་འཁོར་ཆེན་པོ་ལ་མེ་ཏོག་སྣ་ཚོགས་ཀྱིས་མངོན་དུ་འཐོར་བར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་ལྔ་པའི་སྔ་ལྟས་ནི་རྒྱན་ཐམས་ཅད་ཀྱིས་བརྒྱན་པའི་བུད་མེད་ཀྱིས་མགོ་ལ་མེ་ཏོག་ཙམ་པ་ཀའི་ཕྲེང་བ་འདོགས་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་དྲུག་པའི་སྔ་ལྟས་ནི་རྫིང་ཐེམ་སྐས་བཞི་དང་ལྡན་པ་གསེར་གྱི་བྱེ་མ་བདལ་པ་རྙོག་པ་མེད་ཅིང་དང་ལ་ཡན་ལག་བརྒྱད་དང་ལྡན་པའི་ཆུས་ཡོངས་སུ་གང་བ་མེ་ཏོག་ཨུད་པ་ལ་དང་། ཀུ་མུད་དང་། པད་མ་དཀར་པོས་བརྒྱན་པའི་ཆུ་མཐོང་སྟེ། དེ་ལ་བདག་ཉིད་རྩེ་དགའ་ཡོངས་སུ་སྤྱོད་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བདུན་པའི་སྔ་ལྟས་ནི་ཕྱོགས་གཡས་གཡོན་གཉིས་ན་སེམས་ཅན་དམྱལ་བའི་གཡང་ས་མཐོང་སྟེ། དེ་ནས་བདག་ཉིད་མ་རྨས་མ་ཉམས་པར་སླར་ལྡོག་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བརྒྱད་པའི་སྔ་ལྟས་ནི་ཕྲག་པ་གཉིས་ན་རི་དགས་ཀྱི་རྒྱལ་པོ་སེང་གེ་རལ་པ་ཅན་ཅོད་པན་ཐོགས་པ་གཅན་ཟན་ཕྲ་མོ་ཐམས་ཅད་སྐྲག་པར་བྱེད་ཅིང་འདུག་པར་མཐོང་ངོ་། །རིགས་ཀྱི་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་
ཆུབ་སེམས་དཔའི་ས་དགུ་པའི་སྔ་ལྟས་ནི་འཁོར་ལོས་སྒྱུར་པའི་རྒྱལ་པོ་མཐོང་སྟེ། སྐྱེ་བོ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ལ་མགོའི་སྟེང་ན་རིན་པོ་ཆེ་སྣ་ཚོགས་ཀྱིས་སྤྲས་པའི་གདུགས་དཀར་པོ་འཛིན་པར་མཐོང་ངོ་། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་ས་བཅུ་པའི་སྔ་ལྟས་ནི་དེ་བཞིན་གཤགས་པའི་སྐུ་མཐོང་སྟེ། ཁ་དོག་གསེར་ལྟ་བུར་འོད་མདོམ་གང་བ་ཚངས་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་གྱིས་བལྟ་ནས་ཆོས་སྟོན་པ་མཐོང་སྟེ། རིགས་ཀྱི་བུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའི་ས་བཅུ་པོའི་སྔ་ལྟས་ཡིན་ནོ། །རིགས་ཀྱི་བུ་དེ་ལ་བྱང་ཆུབ་སེམས་དཔའི་ས་དང་པོ་ལ་གནས་པའི་བྱང་ཆུབ་སེམས་དཔའ་ནི་སྦྱིན་པའི་ཕ་རོལ་ཏུ་ཕྱིན་པ་གནོན་ཏོ། །བྱང་ཆུབ་སེམས་དཔའི་ས་གཉིས་པ་ལ་ནི་ཚུལ་ཁྲིམས་ཀྱི་ཕ་རོལ་དུ་ཕྱིན་པ་གནོན་ཏོ། །ས་གསུམ་པ་ལ་ནི་བཟོད་པའི་ཕ་རོལ་དུ་ཕྱིན་པ་གནོན་ཏོ། །ས་བཞི་པ་ལ་ནི་བརྩོན་འགྲུས་ཀྱི་ཕ་རོལ་དུ་ཕྱིན་པ་གནོན་ཏོ། །ས་ལྔ་པ་ལ་ནི་བསམ་གཏན་གྱི་ཕ་རོལ་དུ་ཕྱིན་པ་གནོན་ཏོ། །ས་དྲུག་པ་ལ་ནི་ཤེས་རབ་ཀྱི་ཤེས་རབ་ཀྱི་ཕ་རོལ་དུ་ཕྱིན་པ་གནོན་ཏོ། །ས་བདུན་པ་ལ་ནི་ཐབས་ལ་མཁས་པའི་ཕ་རོལ་དུ་ཕྱིན་པ་གནོན་ཏོ། །ས་བརྒྱད་པ་ལ་ནི་སྨོན་ལམ་གྱི་ཕ་རོལ་དུ་ཕྱིན་པ་གནོན་ཏོ། །ས་དགུ་པ་ལ་ནི་སྟོབས་ཀྱི་ཕ་རོལ་དུ་ཕྱིན་པ་གནོན་ཏོ། །ས་བཅུ་པ་ལ་ནི་ཡེ་ཤེས་ཀྱི་ཕ་རོལ་དུ་ཕྱིན་པ་གནོན་ཏོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་བསྐྱེད་པ་དང་པོ་ནི་རིན་པོ་ཆེ་ཡང་དག་པར་འཕགས་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གཉིས་པ་ནི་གནས་པ་མེད་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་གསུམ་པ་ནི་རབ་ཏུ་མི་གཡོ་བའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཞི་པ་ནི་ཕྱིར་
མི་ལྡོག་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་ལྔ་པ་ནི་རིན་པོ་ཆེའི་མེ་ཏོག་གི་ཏིང་ངེ་འཛིན་གྱིས་ཡོངས་སུ་སུ་བཟུང་སྟེ་སྐྱེའོ། །སེམས་བསྐྱེད་པ་དྲུག་པ་ནི་ཉི་མའི་འོད་ཀྱི་གཟི་བརྗིད་ཀྱི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བདུན་པ་ནི་དོན་ཐམས་གྲུབ་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་དཔའ་བསྐྱེད་པ་བརྒྱད་པ་ནི་ད་ལྟ་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་དགུ་པ་ནི་ཡེ་ཤེས་སྒྲོན་མའི་ཏིང་ངེ་འཛིན་གྱིས་ཡོངས་སུ་བཟུང་སྟེ་སྐྱེའོ། །སེམས་བསྐྱེད་པ་བཅུ་པ་ནི་དཔའ་བར་འགྲོ་བའི་ཏིང་ངེ་འཛིན་གྱིས་ཡོངས་སུ་བཟུང་ནས་སྐྱེ་སྟེ། རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་བཅུའོ། །རིགས་ཀྱི་བུ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་བྱང་ཆུབ་སེམས་དཔའི་དང་པོ་ལ་ཁྱད་པར་གྱི་བྱིན་གྱི་བརླབས་ཤེས་བྱ་བའི་གཟུངས་སྐྱེའོ། །ས་གཉིས་པ་ལ་གཞན་གྱིས་མི་ཐུབ་པ་ཞེས་བྱ་བའི་གཟུངས་སྐྱེའོ། །ས་གསུམ་པ་ལ་རབ་ཏུ་གནས་པ་ཞེས་བྱ་བའི་གཟུངས་སྐྱེའོ། །ས་བཞི་པ་ལ་གདུལ་དཀའ་བ་ཞེས་བྱ་བའི་གཟུངས་སྐྱེའོ། །ས་ལྔ་པ་ལ་ཡོན་སྣ་ཚོགས་ཤེས་བྱ་བའི་གཟུངས་སྐྱེའོ། །ས་དྲུག་པ་ལ་ཡེ་ཤེས་ཀྱི་དཀྱིལ་འཁོར་གྱི་སྒྲོན་མ་ཞེས་བྱ་བའི་གཟུངས་སྐྱེའོ། །ས་བདུན་པ་ལ་ཁྱད་པར་དུ་འཕགས་པ་ཞེས་བྱ་བའི་གཟུངས་སྐྱེའོ། །ས་བརྒྱད་པ་རྙོག་པ་མེད་པའི་རྟོག་པ་ཞེས་བྱ་བའི་གཟུངས་སྐྱེའོ། །ས་དགུ་པ་ལ་མཐའ་ཡས་པའི་རྒྱན་ཅེས་བྱ་བའི་གཟུངས་སྐྱེའོ། །ས་བཅུ་པ་ལ་ཟད་མི་ཤེས་པའི་ཟ་མ་ཏོག་ཅེས་བྱ་བའི་གཟུངས་སྐྱེའོ། །དེ་ནས་དེའི་ཚེ་བཅོམ་ལྡན་འདས་ལ་ལྷའི་བུ་སེང་གེའི་ཏོག་གི་འོད་ཟེར་སྣང་བ་ཐོགས་པ་མེད་པ་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱེ་མ་འདི་ལྟར་ཆོས་ཀྱི་རྣམ་གྲངས་འདི་ནི་ནང་དུ་ཐམས་ཅད་རྫོགས་ཤིང་སངས་ཀྱི་ཆོས་དང་ཡོན་ཏན་ཐམས་ཅད་སྒྲུབ་པར་གྱུར་པ་ངོ་མཚར་ཏོ། །བཅོམ་ལྡན་འདས་ཀྱིས་
བཀའ་སྩལ་པ། ལྷའི་བུ་དེ་ནི་ཇི་སྐད་ཟེར་བ་དེ་བཞིན་ཏེ། ལྷའི་བུ་ཆོས་ཀྱི་རྣམ་གྲངས་འདི་ཐོས་མ་ཐག་ཏུ་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུའམ། རིགས་ཀྱི་བུ་མོ་ཕྱིར་མི་ལྡོག་པའི་དགེ་བའི་རྩ་བ་ཡོངས་སུ་སྨིན་པ་རྣམས་ཀྱི་ཕྱག་རྒྱ་ནི་འདི་ལྟ་སྟེ། ཆོས་ཀྱི་རྣམ་གྲངས་འདི་ཐོས་པ་ཡིན་ཏེ་ཆོས་ཀྱི་རྣམ་གྲངས་འདི་ནི་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲག་པར་མི་འགྱུར་རོ། །རིགས་ཀྱི་བུ་རྣམ་གྲངས་འདི་ཐོས་པ་ཙམ་གྱི་རིགས་ཀྱི་བུ་འམ། རིགས་ཀྱི་བུ་མོ་དག་ལྷག་པའི་བསམ་པ་ཡོངས་སུ་དག་ཅིང་སངས་རྒྱས་མཐོང་བ་དང་མི་འབྲལ་བར་འགྱུར་རོ། །དམ་པའི་ཆོས་ཉན་པ་དང་མི་འབྲལ་བར་འགྱུར། དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར། རྒྱ་མཚོའི་ཕྱག་རྒྱ་མི་ཟད་པ་མངོན་པར་སྒྲུབ་པའི་གཟུངས་དང་མི་འབྲལ་བར་འགྱུར། སེམས་ཅན་གྱི་བསམ་པ་དང་སྤྱོད་པ་དང་སྒྲ་ལ་འཇུག་པའི་གཟུངས་དང་མི་འབྲལ་བར་འགྱུར། ཉི་མའི་ཏོག་སྣང་བའི་གཟུངས་དང་མི་འབྲལ་བར་འགྱུར། ཟླ་བའི་ཏོག་སྣང་བའི་གཟུངས་དང་མི་འབྲལ་བར་འགྱུར། ཀུན་ནས་ལྡང་བ་ཐམས་ཅད་རྣམ་པར་གནོན་པ་སྒྲུབ་པའི་གཟུངས་དང་མི་འབྲལ་བར་འགྱུར་ང་རྡོ་རྗེ་ལྟར་སྲ་ཞིང་བརྟན་པའི་རི་རྣམ་པར་འཇོམས་པའི་གཟུངས་དང་མི་འབྲལ་བར་འགྱུར། བརྗོད་དུ་མེད་པའི་དོན་བསྟན་པ་ལ་ཡང་དག་པར་གཞོལ་བའི་གཟུངས་དང་མི་འབྲལ་བར་གྱུར། ཚིག་དང་སྤྱོད་པ་དང་སྒྲ་ཐམས་ཅད་ལ་འཇུག་པའི་གཟུངས་དང་མི་འབྲལ་བར་འགྱུར། ནམ་མཁའི་དཀྱིལ་འཁོར་དྲི་མ་མེད་པ་སྒྲུབ་པའི་ཕྱག་རྒྱ་བཏབ་པའི་གཟུངས་དང་མི་འབྲལ་བར་འགྱུར། སངས་རྒྱས་ཀྱི་སྐུ་མཐའ་ཡས་པ་ཡོངས་སུ་རྫོགས་པ་སྒྲུབ་པའི་གཟུངས་དང་མི་འབྲལ་བར་འགྱུར་རོ། །ལྷའི་བུ་གཟུགས་འདི་དག་ཐོབ་པས་བྱང་ཆུབ་སེམས་དཔའ་རྣམས་ཕྱོགས་བཅུའི་སངས་རྒྱ་ཀྱི་ཞིང་རྣམས་སུ་སངས་རྒྱས་ཀྱི་སྐུ་མངོན་པར་སྤྲུལ་ནས་ཆོས་སྟོན་ཏེ། ཆོས་ཉིད་ལས་
ཀྱང་མི་གཡོ་ལ་འགྲོ་བ་ཡང་མེད། འོང་བ་ཡང་མེད་དོ། །སེམས་ཅན་རྣམས་ཡོངས་སུ་སྨིན་པར་བྱེད་ཀྱང་སེམས་ཅན་་དུ་དམིགས་པ་ཡང་མེད་དོ། །ཆོས་སྟོན་ཀྱང་ཡི་གེ་མཉམ་པ་ཉིད་ལས་གཡོ་བ་མེད་དོ། །འཆི་འཕོ་བ་དང་སྐྱེ་བ་སྟོན་ཀྱང་འཕོ་བ་ཡང་མེད། སྐྱེ་བ་ཡང་མེད་དོ། །ཆོས་ཐམས་ཅད་ལ་རྣམ་པར་རྟོག་པ་མེད་པའི་ཕྱིར་འདུ་བྱེད་རྣམས་གང་དུ་འགྲོ་བར་ཡང་མི་འགྱུར། །གང་ནས་འོང་བར་ཡང་མི་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་རོ། །སེམས་ཅན་ཚད་མེད་པ་རྣམས་ཀྱིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་བསྐྱེད་པར་གྱུར་ཏོ་། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་དང་། བྱང་ཆུབ་སེམས་དཔའི་དེ་དག་དང་། དགེ་སློང་དེ་དག་དང་། ལྷའི་བུ་སེང་གེའི་ཏོག་གི་འོད་ཟེར་སྣང་བ་ཐོགས་པ་མེད་པ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱི་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་བློ་གྲོས་མི་ཟད་པས་ཞུས་པའི་ལེའུ་ཞེས་བྱ་སྟེ་བཞི་བཅུ་རྩ་ལྔ་པ་རྫོགས་ཨྲོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།