བཅུ་གསུམ་པ། བསྐུལ་བའི་ལེའུ།
འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བརྒྱད་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པ་ན། གང་དག་བྱང་ཆུབ་སེམས་དཔའ་ལ་མཆོད་པའི་ལས་བྱེད་པ་ལ་སྤྲོ་བར་གྱུར་པ། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དུ་མ་དེ་དག་རང་རང་གི་དགའ་བའི་སྒྲ་འབྱིན་ཅིང་ལྷགས་པར་གྱུར་ཏོ། །དེ་ལ་དགེ་སློང་དག་དུས་གཞན་ཞིག་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་མང་པོ་དག་འདི་སྙམ་དུ་སེམས་པར་གྱུར་ཏེ། མ་ལ་སྐྱེས་བུ་དམ་པ་འདི་བཙུན་མོའི་འཁོར་གྱི་ནང་དུ་ཧ་ཅང་ཡུན་རིང་དུ་ཐོགས་པར་གྱུར་ན་སེམས་ཅན་གང་དག་འདིས་ཡུན་རིང་པོ་ནས་བསྡུ་བའི་དངོས་པོ་བཞི་པོ་སྦྱིན་པ་དང་། སྙན་པར་སྨྲ་བ་དང་། དོན་སྤྱད་པ་དང་། དོན་འཐུན་པས་ཡོངས་སུ་སྨིན་པར་བྱས་པ་དང་། གང་དག་འདིས་བྱང་ཆུབ་ཐོབ་ནས། ཆོས་བསྟན་པ་ཤེས་པར་འགྱུར་བ་ཆོས་ཀྱི་སྣོད་དུ་གྱུར་པའི་སེམས་ཅན་དེ་དག་མེད་པར་གྱུར་ནས། ཕྱིས་བྱང་ཆུབ་སེམས་དཔའ་མངོན་པར་བྱུང་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བའམ་ཅིག་ཏུ་མི་འགྱུར་གྲང་སྙམ་མོ། །དེ་ནས་དེ་དག་གུས་པ་དང་བཅས་ཞེ་ས་དང་བཅས་པར་ཐལ་མོ་སྦྱར་ཏེ། བྱང་ཆུབ་སེམས་དཔའ་ལ་ཕྱག་འཚལ་ནས། ནམ་ཞིག་ན་བདག་ཅག་གིས་བྱང་ཆུབ་སེམས་དཔའ་དམ་པ་མཆོག་རབ་དག་པ་འདི་མངོན་པར་བྱུང་བ་དང་། མངོན་པར་བྱུང་ནས་ཀྱང་ཤིང་གི་རྒྱལ་པོ་ཆེན་པོ་དེའི་དྲུང་དུ་འདུག་སྟེ། བདུད་དཔུང་དང་བཅས་པ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། དེ་བཞིན་གཤེགས་པའི་སྟོབས་བཅུ་དང་ལྡན་པ་དང་། དེ་བཞིན་གཤེགས་པའི་མི་འཇིགས་པ་བཞི་དང་ལྡན་པ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་ལྡན་པ་
དང་། ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བའི་ཆོས་ཀྱི་འཁོར་ལོ་བླ་ན་མེད་པ་སྐོར་ཞིང་སངས་རྒྱས་ཀྱི་རྣམ་པར་རོལ་པ་ཆེན་པོས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་མོས་པ་ཇི་ལྟ་བ་བཞིན་དུ་ལེགས་པར་བཤད་པས་ཚིམ་པར་བྱེད་པ་མཐོང་བར་འགྱུར་སྙམ་པའི་བསམ་པ་དེ་ལྟ་བུས་སྡོད་ཅིང་འཁོད་པར་གྱུར་ཏོ། །དགེ་སློང་དག་དེ་ལ་བྱང་ཆུབ་སེམས་དཔའ་ནི་བསྐལ་པ་གྲངས་མེད་པའི་ཡང་གྲངས་མེད་པ་ནས་བཟུང་སྟེ། ཡུན་རིང་པོར་རྟག་པར་རྒྱུན་ཏུ་འཇིག་རྟེན་པ་དང་། འཇིག་རྟེན་ལས་འདས་པའི་ཆོས་ཐམས་ཅད་ལ་གཞན་གྱི་དྲིང་མི་འཇོག་པར་གྱུར་ཅིང་། །དགེ་བའི་ཆོས་སྤྱོད་པ་ཐམས་ཅད་ལ་བདག་ཉིད་སློབ་དཔོན་དུ་གྱུར་པ་ཡིན་ལ། ཡུན་རིང་པོ་ནས་དུས་ཤེས་པ་དང་། ཚོད་ཤེས་པ་དང་། རན་པ་ཤེས་པར་གྱུར་པ་དང་། མངོན་པར་ཤེས་པ་ལས་མ་ཉམས་པ་དང་། མངོན་པར་ཤེས་པ་ལྔ་དང་ལྡན་པ་དང་། རྫུ་འཕྲུལ་གྱི་རྐང་པས་རྣམ་པར་རྩེ་བ་དང་། སེམས་ཅན་གྱི་བསམ་པ་དང་དབང་པོ་ལ་མཁས་པ་དང་། དུས་དང་དུས་མ་ཡིན་པ་ཤེས་པ་དང་། དུས་ལ་ལྟ་ཞིང་རྒྱ་མཚོ་ཆེན་པོ་ལྟར་དུས་རན་པ་ལས་མི་ཡོལ་བར་གྱུར་པའོ། །དེ་མངོན་པར་ཤེས་པའི་ཡེ་ཤེས་ཀྱི་སྟོབས་དང་ལྡན་པས་འདི་ནི་རབ་ཏུ་གཟུང་བའི་དུས་སོ། །འདི་ནི་ཚར་གཅད་པའི་དུས་སོ། །འདི་ནི་བསྡུ་བའི་དུས་སོ། །འདི་ནི་ཕན་གདགས་པའི་དུས་སོ། །འདི་ནི་བཏང་སྙོམས་སུ་གཞག་པའི་དུས་སོ། །འདི་ནི་སྨྲ་བའི་དུས་སོ། །འདི་ནི་མི་སྨྲ་བར་བྱ་བའི་དུས་སོ། །འདི་ནི་ཁྱིམ་ནས་འབྱུང་བའི་དུས་སོ། །འདི་ནི་རབ་ཏུ་འབྱུང་བའི་དུས་སོ། །འདི་ནི་ཁ་ཏོན་བྱ་བའི་དུས་སོ། །འདི་ནི་ཚུལ་བཞིན་ཡིད་ལ་བྱ་བའི་དུས་སོ། །འདི་ནི་རབ་ཏུ་དབེན་པར་བྱ་བའི་དུས་སོ། །འདི་ནི་རྒྱལ་རིགས་ཀྱི་འཁོར་གྱི་ནང་དུ་འགྲོ་བའི་དུས་སོ་ཞེས་བྱ་བ་ནས། འདི་ནི་བྲམ་ཟེ་དང་ཁྱིམ་བདག་གི་བར་གྱི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མའི་འཁོར་གྱི་ནང་དུ་འགྲོ་བའི་དུས་སོ། །འདི་ནི་ཆོས་བསྟན་པའི་དུས་སོ། །
འདི་ནི་ནང་དུ་ཡང་དག་པར་གཞག་པའི་དུས་སོ་ཞེས་བྱ་བ་ཐམས་ཅད་བདག་ཉིད་ཀྱིས་ཤེས་སོ། །བྱང་ཆུབ་སེམས་དཔའ་དུས་ཐམས་ཅད་དུ་རྟག་པར་འདུ་ཤེས་པར་གྱུར་ཅིང་། དུས་ལ་ལྟ་བ་ཡིན་ཡང་དགེ་སློང་དག་འདི་ནི་ཆོས་ཉིད་ཀྱིས་ཐོབ་པ་ཡིན་ཏེ། སྲིད་པ་ཐ་མ་པའི་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འཁོད་པ་རྣམས་ལ་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་སངས་རྒྱས་བཅོམ་ལྡན་འདས་རྣམས་གླུ་དབྱངས་དང་སིལ་སྙན་གྱི་སྒྲ་ལས་ཆོས་ཀྱི་སྒོ་རྣམ་པ་འདི་ལྟ་བུ་འདི་དག་གིས་ཡང་དག་པར་སྐུལ་བ་མཛད་དོ། །དེ་ལ་འདི་སྐད་ཅེས་བྱ་སྟེ། སེམས་ཅན་མཆོག་གང་ཕྱོགས་བཅུའི་འཇིག་རྟེན་བཞུགས། །དེ་དག་མཐུ་ཡིས་སིལ་སྙན་སྒྲ་དག་ལས། །ཚིགས་བཅད་སྒྲ་སྙན་འདི་དག་བྱུང་བ་ཡིས། །མི་མཆོག་དམ་པ་རྣམས་ལ་ཡང་དག་སྐུལ། །སྡུག་བསྔལ་བརྒྱས་གང་སེམས་ཅན་མཐོང་ནས་ནི། །འགྲོ་བའི་མགོན་དང་སྐྱབས་དང་གནས་འགྱུར་ཞིང་། །ཕན་བྱེད་མཆོག་དང་དཔུང་གཉེན་གྱུར་ཅིག་ཅེས། །ཁྱོད་ཀྱིས་སྔོན་ནི་སྨོན་ལམ་དེ་སྐད་བཏབ། །དགེ་བ་དཔའ་བོ་སྔོན་གྱི་སྤྱོད་པ་དང་། །འགྲོ་ཕན་བྱ་ཞེས་སྨོན་བཏབ་དྲན་པར་བྱོས། །འདི་ནི་ཁྱོད་ཀྱིས་དུས་མན་ཚོད་ཡིན་གྱིས། །དྲང་སྲོང་མཆོག་རབ་མངོན་པར་འབྱུང་བར་བྱོས། །སངས་རྒྱས་ལྷ་མི་འདུལ་བྱེད་འཇིག་རྟེན་མཆོག །ཡོན་ཏན་བརྒྱས་གང་བར་ནི་གྱུར་ཅིག་ཅེས། །དེའི་ཕྱིར་ཁྱོད་སྔོན་མགོ་དང་རྐང་ལག་དང་། །ནོར་གྱི་དམ་པ་སྣ་ཚོགས་རྣམས་ཀྱང་བཏང་། །ཁྱོད་ནི་ཁྲིམས་ཀྱིས་བརྟུལ་ཞུགས་དཀའ་ཐུབ་སྤྱད། །ཁྱོད་ནི་བཟོད་པས་འགྲོ་ལ་ཕན་པ་བྱེད། །ཁྱོད་ནི་བརྩོན་པས་ཡོན་ཏན་བརྒྱ་ཡིས་གང་། །བསམ་གཏན་ཤེས་རབ་སྲིད་གསུམ་མཉམ་པ་མེད། །ཁྲོ་བས་ནོན་ཅིང་ཐ་བའི་དྲི་མང་བ། །དེ་དག་བདེ་གཤེགས་ཁྱོད་ཀྱི་བྱམས་པས་ཁྱབ། །དགེ་བའི་ཡོན་ཏན་བྲལ་བ་ལོག་ངེས་པ། །མི་མཁས་རྣམ་མང་དག་ལ་ཁྱོད་སྙིང་རྗེ། །བསོད་ནམས་ཡེ་ཤེས་དགེ་བའི་ལུས་ཁྱབ་ཅིང་། །རྡུལ་བྲལ་བསམ་གཏན་མངོན་ཤེས་ལམ་མེར་འདུག །ཕྱོགས་བཅུ་འདི་དག་རྣམས་སུ་རབ་ཏུ་གསལ། །སྤྲིན་མེད་ཟླ་བ་དྲི་མ་མེད་པ་འདྲ། །འདི་དང་གཞན་ཡང་སྙན་པ་རྣམ་མང་གིས། །སིལ་སྙན་དག་ལས་རྒྱལ་
བས་སྒྲ་བསྒྲགས་ཏེ། །མངོན་པར་ཁྱོད་འབྱུང་དུས་ནི་འདི་ཡིན་ཞེས། །ལྷ་མིས་མཆོད་པར་འོས་ལ་སྐུལ་མ་འདེབས། །དགེ་སློང་དག་བྱང་ཆུབ་སེམས་དཔའ་ཁྱིམ་དམ་པ་མཆོག་ཡོ་བྱད་ཕུན་སུམ་ཚོགས་པ་ཐམས་ཅད་དང་ལྡན་པ། བསམ་པ་ཇི་ལྟ་བ་བཞིན་དུ་བདེ་བར་གནས་པ་དང་འཐུན་པ། ལྷའི་ཁང་ཁྱིམ་ལྟ་བུ་སྟེགས་བུ་དང་། སྒོ་ཁང་དང་། རྟ་བབས་དང་། སྐར་ཁུང་དང་། བསིལ་ཁང་དང་། ཁང་པ་བརྩེགས་པ་དང་། ཁང་བཟངས་མཆོག་དང་། རིན་པོ་ཆེ་སྣ་ཚོགས་ཀྱི་རྒྱན་རྣམ་པ་ཐ་དད་པ་དབྱེ་བ་ཤིན་ཏུ་རྣམ་པར་ཕྱེ་བ། གདུགས་དང་། རྒྱལ་མཚན་དང་། བ་དན་བསྒྲེང་བ། རིན་པོ་ཆེའི་དྲིལ་བུ་གཡེར་ཀའི་དྲ་བ་དུ་མས་ལེགས་པར་བརྒྱན་པ། དར་གྱི་ལྡ་ལྡི་བརྒྱ་སྟོང་དུ་མས་མངོན་པར་སྤྱངས་པ། རིན་པོ་ཆེ་སྣ་ཚོགས་ཀྱིས་སྤྲས་པའི་མུ་ཏིག་གི་རྒྱན་ཕྲེང་རབ་ཏུ་སྤྱངས་པ། རིན་པོ་ཆེ་སྣ་ཚོགས་ཀྱི་སྤང་ལེབ་ཅན་གྱི་ཟམ་པས་མཛེས་པར་བྱས་པ། མེ་ཏོག་གི་ཕྲེང་བ་དང་ཆུན་པོ་མང་པོ་སྤྱངས་པ། པོག་སྣོད་ནས་སྤོས་ཀྱིས་བདུགས་པ། དར་ལའི་བླ་རེ་བྲེས་པ། དུས་ཐམས་ཅད་པའི་མེ་ཏོག་དྲི་མཆོག་ཏུ་ཞིམ་ཞིང་། ཤིན་ཏུ་མཛེས་པ་དག་བཀྲམ་པ། རྫིང་མེ་ཏོག་པད་མ་དཀར་པོ་དང་། པད་མ་དང་ལྡན་པའི་ཆུའི་གནས་ཡོངས་སུ་སྤྱད་པར་བྱ་བ་མང་བ། བྱ་འདབ་སྐྱོང་དང་། ནེ་ཙོ་དང་། རི་སྐེགས་དང་། ཁུ་བྱུག་དང་། ངང་པ་དང་། རྨ་བྱ་དང་། ངུར་པ་དང་། ཀུ་ན་ལ་དང་། ཀ་ལ་པིང་ཀ་དང་། ཤང་ཤང་ཏེའུ་ལ་སོགས་པ་བྱ་རྣམ་པ་ཐ་དད་པའི་ཚོགས་སྒྲ་སྙན་པ་འབྱིན་པ། བཻ་དཱུཪྱ་སྔོན་པོའི་ས་གཞི་གནས་ཡོངས་སུ་སྤྱད་པར་བྱ་བ། གཟུགས་ཐམས་ཅད་ཀྱི་གཟུགས་བརྙན་ཀུན་ཏུ་སྟོན་པ། བལྟ་བས་མི་ངོམས་པར་ཉམས་དགའ་བ། དགའ་བ་དང་མཆོག་ཏུ་དགའ་བ་དམ་པ་སྐྱེད་པའི་ཁྱིམ་དམ་པ་མཆོག་དེ་ན་འདུག་སྟེ། བྱང་ཆུབ་སེམས་དཔའ་ཁང་པ་མཛེས་པ་ཆེན་པོ་མཆོག་ན་གནས་པ། དྲི་མ་མེད་པ། དྲི་མ་དང་བྲལ་བ། ཡན་ལག་དྲི་མ་མེད་པ། ཕྲེང་བ་དང་རྒྱན་མ་བོར་བ། དྲི་མཆོག་ཏུ་ཞིམ་པ་དམ་པའི་བྱུག་པས་ལུས་བསྐུས་པ། དཀར་ཞིང་བཟང་ལ་དྲི་མ་མེད་ཅིང་རྣམ་པར་དག་ལ་དྲི་མ་དང་བྲལ་བའི་གོས་གྱོན་པའི་ལུས་དང་ལྡན་པ། མལ་ཆ་ལྷའི་རས་བཅོས་བུ་བཟང་པོ་ཕྲ་བ་དུ་མ་བཏིང་བ་འཇམ་པ་ཀ་ཙ་ལིན་དའི་གོས་ལྟར་རེག་ན་བདེ་བ། ཡན་ལག་དམ་
པས་སྤྲས་པའི་མལ་བཟང་པོའི་སྟེང་ན་འདུག་པ་བཙུན་མོའི་འཁོར་དམ་པ་ལྷའི་བུ་མོ་དང་འདྲ་བ། ཐམས་ཅད་དུ་ཁ་ན་མ་ཐོ་བ་མེད་པ། ལྟ་བ་དང་འཐུན་པ། སྤྱོད་པ་བཟང་པོས་མཛེས་པར་བྱས་པ། གཟུགས་བཟང་བའི་ནང་ན་འདུག་པ། དུང་དང་། རྔ་དང་། རྫ་རྔ་དང་། ཁར་རྔ་དང་། པི་བང་དང་། རྒྱུད་གསུམ་པ་དང་། ཁར་བའི་སིལ་ཁྲོལ་དང་། ཕེག་དང་། ཀིམ་པ་ལ་དང་། ན་ཀུ་ལ་དང་། སྒྲ་སྙན་དང་། གླིང་བུ་སྙན་པའི་སྒྲ་འབྱུང་བའི་སྒྲ་དབྱངས་དང་། སིལ་སྙན་དང་། གླུ་དབྱངས་སྣ་ཚོགས་དང་ལྡན་པས་བསླང་བ་ལ། བུད་མེད་ཀྱི་ཚོགས་ཀྱིས་ཀྱང་། སྒྲ་མཉེན་ཞིང་འཇམ་པ་སྙན་ལ་ཡིད་དུ་འོང་བ་དང་། གླིང་བུ་འབུད་པའི་སྒྲ་དབྱངས་ཀྱིས་བྱང་ཆུབ་སེམས་དཔའ་སློང་ངོ་། །ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་དེ་དག་གི་བྱིན་གྱི་རླབས་ཀྱིས་སིལ་སྙན་གྱི་སྒྲ་བྱུང་བའི་སྒྲ་སྐད་དེ་དག་ལས་བྱང་ཆུབ་སེམས་དཔའ་ལ་སྐུལ་བའི་ཚིགས་སུ་བཅད་པ་འདི་དག་བྱུང་ངོ་། །བུད་མེད་གང་དག་རབ་ཏུ་ཡིད་དགའ་སེམས་དང་བས། །སིལ་སྙན་ཡིད་དུ་འོང་ཞིང་སྙན་པའི་སྒྲ་འབྱིན་ཚེ། །ཕྱོགས་བཅུའི་རྒྱལ་བ་དམ་པ་དག་གི་མཐུ་ཡིས་ནི། །ཚིགས་བཅད་རྣམ་པ་སྣ་ཚོགས་རྣམ་མང་འདི་དག་བྱུང་། །རྟག་ཏུ་མགོན་མེད་གྱུར་པའི་འགྲོ་བ་འདི་མཐོང་ནས། །གོ་འཕང་མྱ་ངན་མེད་མཆོག་རྡུལ་མེད་སངས་རྒྱས་ཏེ། །སྐྱེ་དང་རྒ་དང་སྡུག་བསྔལ་དག་ལས་དགྲོལ་ལོ་ཞེས། །དཔའ་བོ་ཁྱོད་སྔོན་སྨོན་ལམ་དེ་སྐད་བཏབ་པར་གྱུར། །དེ་ཕྱིར་དགེ་མྱུར་གྲོང་ཁྱེར་མཆོག་འདི་ནས། །བྱུང་ལ་སྔོན་གྱི་དྲང་སྲོང་ཞབས་བཅགས་པ། །ས་ཕྱོགས་དེ་ནི་རབ་ཏུ་མནན་ནས་སུ། །རྒྱལ་བའི་ཡེ་ཤེས་མཚུངས་མེད་འཚང་རྒྱར་གྱིས། །ཁྱོད་ཀྱིས་སྔོན་ཆད་སྣ་ཚོགས་རིན་ཆེན་ནོར། །རྐང་ལག་ཕངས་པའི་ལུས་ཀྱང་བཏང་བར་གྱུར། །དྲང་སྲོང་ཆེན་པོ་དི་རིང་ཁྱོད་དུས་འདི། །ཆོས་ཀྱི་ཆུ་བོ་མཐའ་ཡས་འགྲོ་ལ་ཕྱེ། །ཁྱོད་ཀྱི་ཚུལ་ཁྲིམས་མ་ཉམས་དྲི་མེད་དགེ། །སྔོན་ཆད་ཁྱོད་ནི་རྟག་ཏུ་མཆོག་གིས་བརྒྱན། །དྲང་སྲོང་ཆེན་པོ་ཁྱོད་ཁྲིམས་འདྲ་བ་མེད། །འགྲོ་བ་ཉོན་མོངས་རྣམ་པ་མང་ལས་ཁྲོལ། །ཁྱོད་ཀྱིས་སྲིད་པ་བརྒྱར་ནི་བཟོད་པ་སྤྱད། །ཁྱོད་ནི་འགྲོ་བས་ངན་བརྗོད་རྣམ་མང་བཟོད། །བཟོད་པས་བཟོད་ཅིང་དུལ་བས་དེས་པའི་བདག །རྐང་གཉིས་དབང་པོ་མངོན་པར་
འབྱུང་བློ་གྱིས། །ཁྱོད་བརྩོན་བརྟན་ཞིང་མི་གཡོ་གཡོ་བ་མེད། །བདེ་བར་གཤེགས་པ་སྔོན་མཐར་རྒྱ་ཆེན་གྱུར། །གཡོན་ཅན་བདུད་ནི་སྡེ་དང་བཅས་བཏུལ་ཏེ། །ངན་སོང་གསུམ་པོ་མཐའ་དག་སྐམས་པར་གྱིས། །གང་ཕྱིར་ཁྱོད་ཀྱིས་བརྟུལ་ཞུགས་དཀའ་ཐུབ་སྤྱད། །དུས་ངན་ཉོན་མོངས་སྙིགས་མ་བསྲེགས་གྱིས་ལ། །ཁྱོད་ཀྱིས་བདུད་རྩི་ཆུ་བོའི་ཆར་ཕོབ་སྟེ། །མགོན་མེད་རིང་ནས་སྐོམ་པ་ཚིམ་པར་གྱིས། །འཆི་མེད་མྱ་ངན་མེད་གནས་སངས་རྒྱས་ཏེ། །སྐོམ་པས་ཉམ་ཐག་བདུད་རྩིས་ཚིམ་བྱ་ཞེས། །ཁྱོད་ཀྱིས་སྔོན་སྨྲས་ཚིག་མཆོག་དྲན་བྱོས་ཏེ། །གྲོང་ཁྱེར་དམ་པ་འདི་ནས་མྱུར་དུ་བྱུང་། །ཁྱོད་ནི་ཤེས་རབ་མཆོག་གི་སྤྱོད་པ་མཁས། ཁྱོད་ཀྱི་ཡེ་ཤེས་མཐའ་ཡས་དྲི་མེད་ཆེ། །རྨོངས་པ་ཡིད་གཉིས་ལམ་ལ་གནས་རྣམས་ལ། །ཤེས་རབ་འོད་དགེ་དམ་པ་མཛེས་པར་གྱིས། །ཁྱོད་ཀྱིས་སྲིད་པ་བརྒྱར་ནི་བྱམས་པ་སྤྱད། །སྙིང་རྗེ་དང་ནི་དགའ་མཆོག་བཏང་སྙོམས་དང་། །ཁྱོད་ཀྱིས་སྤྱོད་པ་དམ་པ་གང་སྤྱད་པ། །སྤྱོད་པ་དེ་ཉིད་འགྲོ་ལ་རྣམ་པར་ཕྱེ། །ཕྱོགས་བཅུའི་རྒྱལ་བ་དག་གི་གཟི་བརྗིད་ཀྱིས། །ཡོན་ཏན་མེ་ཏོག་སྣ་ཚོགས་ཚིགས་བཅད་འདི། །སིལ་སྙན་དག་ལས་རྣམ་མང་ཡིད་འོང་གྲག །མལ་ན་འདུག་པའི་གཞོན་ནུ་དེ་ལ་སྐུལ། །གང་གི་ཚེ་ན་དགའ་བྱེད་བུད་མེད་རབ་ཏུ་དགའ་བ་རྣམས། །ཤིན་ཏུ་མཛེས་ཤིང་རབ་ཏུ་སྙན་པའི་སིལ་སྙན་སྒྲོགས་པའི་ཚེ། །ཕྱོགས་བཅུ་དག་གི་རྒྱལ་བ་ལྷ་མི་འདུལ་བ་མཛད་རྣམས་ཀྱང་། །སིལ་སྙན་དག་ལས་གསུང་མཆོག་ཧ་ཅང་མི་ཆེ་རྗེས་སུ་སྒྲོག །འགྲོ་ལ་ཕན་བྱེད་ཡོན་ཏན་མང་པོ་ལྡན་ཁྱོད་འགྲོ་རྣམས་སུ། །རྣམ་པར་རྒྱུ་བའི་ཚེ་ན་རྒྱལ་བའི་ཡོན་ཏན་གཉུག་མར་བྱས། །སྔོན་གྱི་བརྟུལ་ཞུགས་དཀའ་ཐུབ་སྤྱད་པ་དེ་དག་དྲན་གྱིས་ཏེ། །ཤིང་མཆོག་དྲུང་དུ་མྱུར་སོང་འཆི་མེད་གོ་འཕང་ཐོབ་པར་གྱིས། །ལྷ་མི་དག་ནི་ཤིན་ཏུ་སྐོམ་ཞིང་རྒྱལ་བའི་ཡོན་ཏན་བྲལ། །ཁྱོད་ནི་ཤིན་ཏུ་སྟོབས་ལྡན་བདུད་རྩིའི་རོ་བྲོ་རྟག་ཏུ་སྦྱིན། །སྟོབས་བཅུའི་རོ་བྲོ་དམ་པ་མཁས་པ་རྣམས་ཀྱིས་མཆོད་བྱས་པ། །བདུད་རྩི་དེ་ནི་མི་བདག་ཁྱོད་ཀྱིས་མྱུར་དུ་རྣམ་པར་ཕྱེ། །རྒྱལ་བའི་ཡོན་ཏན་འགྲོ་ལ་ཕན་པ་བྱེད་ལ་དགའ་བ་པོ། །ཁྱོད་ཀྱིས་སྔོན་གྱི་སྲིད་པར་ནོར་དང་ནོར་བུ་གསེར་རྣམས་བཏང་། །ཆུང་མ་བུ་སྡུག་
དག་དང་གྲོང་ཁྱེར་གྲོང་རྡལ་བཅས་པ་དང་། །རང་གི་མགོ་དང་མིག་དང་ལག་པ་དག་དང་རྐང་པའང་བཏང་། །མི་མཆོག་ཁྱོད་ནི་གནའ་སྔོན་རྒྱལ་པོ་དགེ་བར་གྱུར་པའི་ཚེ། །མི་ཞིག་ཁྱོད་ལ་མངོན་དུ་ཕྱོགས་ནས་འདི་སྐད་ཚིག་སྨྲས་ཏེ། །གྲོང་ཁྱེར་གྲོང་རྡལ་བཅས་པའི་ས་འདི་ཁོ་ལ་བྱིན་ཞེས་བྱས། །དེ་ཡི་ཚེ་ན་རབ་ཏུ་དགའ་ཞིང་འཁྲུགས་པར་གྱུར་པ་མེད། །གནའ་སྔོན་ཁྱོད་ནི་རྒྱལ་པོའི་བྲམ་ཟེ་དགེ་བར་གྱུར་པའི་ཚེ། །སྐྱེ་བོ་བླ་མ་བསྙེན་བཀུར་བྱེད་ཅིང་གཞན་ལ་འཁུ་མི་བྱེད། །བྲམ་ཟེ་དམ་པ་དག་དང་སྐྱེ་བོ་མང་པོ་དགེ་ལ་བཀོད། །དེ་ནས་ཤི་འཕོས་སྲིད་པའི་འགྲོ་བ་ལྷ་ཡི་གནས་སུ་སྐྱེས། །སྔོན་ཁྱོད་རྒྱལ་པོའི་བུ་ལས་དྲང་སྲོང་དམ་པར་གྱུར་པའི་ཚེ། །རྒྱལ་པོ་ངན་པ་ཁྲོས་པས་ཁྱོད་ཀྱི་ཡན་ལག་བཅད་པ་ན། །ཁྱོད་ནི་ཡིད་འཁྲུགས་གྱུར་པ་མེད་པར་འཆི་བའི་དུས་བྱས་ཏེ། །དེ་ཡི་ཚེ་ན་ཁྱོད་ཀྱི་རྐང་ལག་དག་ལས་འོ་མ་ཟག །ཁྱོད་སྔོན་དྲང་སྲོང་སྔོ་བསངས་ཞེས་བྱར་གང་ཚེ་གྱུར་པ་ན། །རི་མཆོག་གནས་ན་བརྟུལ་ཞུགས་དགའ་ཞིང་བླ་མ་ལ་ཡང་དགའ། །མི་ཡི་བདག་པོས་དུག་མདའ་དག་གིས་ཁྱོད་ལ་བསྣུན་པ་ན། །ཁྱོད་ནི་རྒྱལ་པོ་དེ་ལ་ཡིད་འཁྲུགས་མེད་ཅིང་སྙིང་བརྩེར་གྱུར། །ཁྱོད་སྔོན་རི་དགས་བདག་པོ་ཡོན་ཏན་ཅན་དུ་གྱུར་པའི་ཚེ། །རི་གཟར་འབབ་ཆུ་ཆེན་པོས་མི་ཞིག་ཁྱེར་བར་གྱུར་པ་ན། །ཕན་དང་ལྡན་པ་ཁྱོད་ཀྱིས་མི་དེ་ཕྱུང་སྟེ་ཐང་ལ་བཞག །ཁྱོད་ཀྱི་དགྲ་བོ་ཁྲིད་དེ་འོངས་པ་ན་ཡང་ཡིད་མ་འཁྲུགས། །མི་མཆོག་ཁྱོད་སྔོན་བྲམ་ཟེའི་བུར་ནི་གང་ཚེ་གྱུར་པ་ན། །ཁྱོད་ཀྱི་ནོར་བུ་རྒྱ་མཚོ་ཆེན་པོ་ཡངས་པར་ལྷུང་བའི་ཚེ། །ཁྱོད་ཀྱིས་རྒྱ་མཚོ་ཆེན་པོ་ཟད་པར་བྱ་བར་བརྩམས་པ་དང་། །སྟོབས་བརྟན་ཁྱུ་མཆོག་ཁྱོད་ཀྱི་ནོར་བུ་དེ་ཚེ་ཕྱིར་ཡང་རྙེད། །སྐྱེས་བུ་མཆོག་ཁྱོད་གནའ་སྔོན་དྲང་སྲོང་དམ་པར་གྱུར་པའི་ཚེ། །བྲམ་ཟེ་ཞིག་གིས་བདག་གི་སྐྱབས་གྱུར་ཤོག་ཅེས་ཁྱོད་གན་འོངས། །སྨྲས་པ་བྲམ་ཟེ་དམ་པ་ཁོ་བོ་དགྲ་ལས་བྱུང་ཞེས་བྱས། །ཁྱོད་ཀྱིས་རང་ལུས་བཏང་གིས་བྲམ་ཟེ་དེ་ནི་མ་བཏང་ངོ་། །གནའ་སྔོན་ཤིང་གི་གནས་སུ་དྲང་སྲོང་སྔོ་བསངས་དྲུང་འོངས་ཏེ། །འདོད་པས་སྨྲས་པ་ཤིང་འདི་ལོ་མ་དུ་ཡོད་གྲོངས་ཞེས་བྱས། །ཤིང་དེ་ལོ་མ་ཇི་སྙེད་ཡོད་པ་རབ་བགྲངས་རབ་མཁས་པས། །ཁྱོད་ཀྱིས་དེ་བཞིན་ནོར་བ་མེད་ཅིང་འཐུན་པར་ཚིག་ཏུ་
བརྗོད། །ཁྱོད་སྔོན་ནེ་ཙོ་ཡོན་ཏན་ལྡན་གྱུར་ཤིང་ལ་གནས་པའི་ཚེ། །ཟད་པར་གྱུར་ཀྱང་སྔོན་གྱི་དྲིན་ལ་བསམས་ཏེ་དེ་མ་སྤངས། །ལྷ་ཡི་བདག་པོས་ཁྱོད་ཀྱི་ཡོན་ཏན་དྲན་ནས་རབ་ཏུ་དགའ། །སྔ་མཁོ་བཞིན་དུ་ཤིང་མཆོག་དེ་ནི་དཔལ་དང་ལྡན་པར་བྱས། །ཁྱོད་ཀྱི་བརྟུལ་ཞུགས་དཀའ་ཐུབ་སྤྱད་པ་དེ་དག་མཚུངས་མེད་དེ། །ཡོན་ཏན་ལྡན་པ་ཡོན་ཏན་ལམ་ལ་སྤྱད་པས་ཡོན་ཏན་མང་། །ཁྱོད་ཀྱི་དུས་ལ་ད་བབ་གྲོང་ཁྱེར་བཅས་པའི་ས་ཡང་ཐོང་། །འགྲོ་བ་དག་ནི་རྒྱལ་བའི་ཡོན་ཏན་སྤྱོད་ལ་མྱུར་དུ་ཁོད། །གང་གི་ཚེ་ན་བུད་མེད་རིན་ཆེན་བཟང་པོའི་གོས་ཀྱིས་ལུས་བརྒྱན་ཏེ། །སིལ་སྙན་དམ་པ་མཆོག་རབ་ཡིད་དུ་འོང་བའི་སྒྲ་ནི་རབ་སྒྲོག་པ། །དེ་ཚེ་ཕྱོགས་བཅུའི་རྒྱལ་བའི་གཟི་ཡིས་ཚིགས་སུ་བཅད་པ་སྣ་ཚོགས་པ། །སྒྲ་དབྱངས་སྙན་པ་འདི་དག་སིལ་སྙན་དག་གི་སྒྲ་ལས་རབ་ཏུ་བྱུང་། །རྒ་དང་ཤི་བས་ཟིན་པའི་འཇིག་རྟེན་དག་ལ་བདག་ནི་སྐྱབས་གྱུར་ཅེས། །འཇིག་རྟེན་སྒྲོན་མ་ཁྱོད་ཀྱིས་བསྐལ་མང་སྔ་རོལ་སྨོན་ལམ་དེ་སྐད་བཏབ། །མི་ཡི་སེང་གེ་ཁྱོད་ཀྱིས་སྔོན་གྱི་སྨོན་ལམ་དག་ནི་དྲན་གྱིས་ཤིག །རྐང་གཉིས་དབང་པོ་ཁྱོད་ད་མངོན་པར་འབྱུང་བའི་དུས་ནི་འདི་ཡིན་ནོ། །ཁྱོད་འདིར་སྲིད་པ་ཁྲག་ཁྲིག་དག་ཏུ་སྦྱིན་པ་མང་པོ་དུ་མ་བྱིན། །ནོར་དང་རིན་པོ་ཆེ་དང་གསེར་དང་གོས་བཟང་རིན་ཆེན་སྤྲས་པ་དང་། །རྐང་ལག་དག་དང་མིག་དང་ཕངས་པའི་བུ་དང་རྒྱལ་སྲིད་འབྱོར་པ་དག །ཁྱོད་ཀྱིས་བཏང་ཡང་ཁྱོད་ནི་སློང་བ་རྣམས་ལ་ཐ་བ་ཞེ་སྡང་མེད། །ཁྱོད་འདིར་ཟླ་བའི་ཏོག་དང་མཆེ་བ་བཟང་དང་རྒྱལ་པོ་ཞི་བར་གྱུར། །སྙིང་བརྩེ་སྙིང་རྗེའི་ཡིད་དང་ཟླ་བའི་སྒྲོན་དང་གཙུག་ན་ནོར་བུར་གྱུར། །རྒྱལ་པོ་དཔའ་བོ་བརྟན་དང་མིག་བཟངས་དང་ནི་དེ་ལ་སོགས་པ་བྱས། །རྒྱལ་པོ་ཁྲག་ཁྲིག་མང་པོ་སྦྱིན་དགའ་རྣམ་པར་འཕྲུལ་པ་དེ་ཉིད་ཁྱོད། །བདེ་བར་གཤེགས་པ་ཁྱོད་ཀྱིས་བསྐལ་པ་མང་པོར་ཚུལ་ཁྲིམས་སྤྱོད་པ་སྤྱད། །ནོར་བུ་རིན་ཆེན་དྲི་མ་མེད་པ་ལྟ་བུར་ཚུལ་ཁྲིམས་རྣམ་དག་གྱུར། །ཁྱོད་ཀྱིས་འབྲི་ཡི་རྔ་མ་ཅི་འདྲ་དེ་འདྲར་ཚུལ་ཁྲིམས་བསྲུངས་ཤིང་སྤྱད། །ཚུལ་ཁྲིམས་དགའ་བས་ཁྱོད་ཀྱིས་འདིར་ནི་འགྲོ་ལ་རྒྱ་ཆེར་དོན་ཡང་བྱས། །འདིར་ཁྱོད་གླང་པོ་མཆོག་ཏུ་གྱུར་ཏེ་རྔོན་པ་དགྲ་ཡིས་མདས་བསྣུན་ཚེ། །གཏུམ་པོ་དགྲ་ལ་སྙིང་བརྩེ་སྙིང་རྗེ་བསྐྱེད་
ནས་དེ་ནི་ཁྱོད་ཀྱིས་བསྐྱབས། །བཟང་ཞིང་མཛེས་པའི་མཆེ་བ་ཡོངས་སུ་བཏང་སྟེ་ཚུལ་ཁྲིམས་ཡོང་མ་བཏང་། །ཁྱོད་ཀྱིས་དེ་ལ་སོགས་པ་ཚུལ་ཁྲིམས་རྣམ་པར་འཕྲུལ་པ་མང་པོ་བྱས། །བཟོད་ལ་དགའ་བས་ཁྱོད་ཀྱིས་འགྲོ་བའི་མི་ཕན་སྡུག་བསྔལ་སྟོང་མང་དང་། །ཚིག་རྩུབ་ངག་དང་བསད་པ་དང་ནི་བཅིང་བ་མང་པོ་བཟོད་པར་བྱས། །ཁྱོད་ཀྱིས་གནའ་སྔོན་མི་གང་དག་ལ་བདེ་བ་ཀུན་གྱིས་རིམ་གྲོར་བྱས། །དེ་དག་ཕྱི་ནས་ཁྱོད་ཀྱི་གཤེད་མར་གྱུར་ཀྱང་ཁྱོད་ཀྱིས་དེ་དག་བཟོད། །མགོན་པོ་ཁྱོད་ནི་རི་མཆོག་གནས་ན་གང་ཚེ་དྲེད་མོར་གྱུར་པའི་ཚེ། །ཁ་བ་བབ་ཅིང་ཆུ་བྲུག་པས་ནི་འཇིགས་ཤིང་སྐྲག་པའི་མི་བཟུང་སྟེ། །རྩ་བ་འབྲས་བུ་རྣམ་པ་མང་དང་བདེ་བ་ཀུན་གྱིས་རིམ་གྲོ་བྱས། །དེ་ཡིས་མྱུར་དུ་ཁྱོད་ལ་གསོད་པ་ཁྲིད་འོངས་ཁྱོད་ཀྱིས་དེ་ལ་བཟོད། །བྱང་ཆུབ་བཙལ་ཕྱིར་བརྟུལ་ཞུགས་དཀའ་ཐུབ་ཡོན་ཏན་རྣམ་མང་ཡེ་ཤེས་ལ། །ཁྱོད་ཀྱིས་བརྩོན་འགྲུས་ཤིན་ཏུ་བརྟན་པར་གནས་ཤིང་མི་གཡོ་གཡོ་བ་མེད། །དབང་སྒྱུར་བདུད་ཀྱང་ཁྱོད་ཀྱིས་བརྩོན་འགྲུས་སྟོབས་ཀྱིས་སྟོབས་ནི་མེད་པར་བྱས། །མི་ཡི་སེང་གེ་ཁྱོད་འདིར་མངོན་པར་འབྱུང་བའི་དུས་ལ་ད་བབ་བོ། །ཁྱོད་འདིར་གནའ་སྔོན་ཁ་བའི་ཁ་དོག་འདྲ་བའི་རྟ་མཆོག་གྱུར་པའི་ཚེ། །སྙིང་རྗེ་བསྐྱེད་ནས་ནམ་མཁའ་ལས་ནི་སྲིན་པོའི་གླིང་དུ་མྱུར་དུ་སོང་། །དེ་ཚེ་ཕོངས་ཤིང་འདུག་པའི་མི་དེ་བླངས་ཏེ་བདེ་ལ་རབ་ཏུ་བཞག །ཁྱོད་ཀྱིས་འདི་ལ་སོགས་པ་བརྩོན་འགྲུས་རྣམ་པར་འཕྲུལ་པ་མང་པོ་བྱས། །མྱུར་དུ་འགྱུར་ཞིང་གཡོ་ལ་ཡུལ་ལ་དགའ་ཞིང་རྒོད་པའི་སེམས་བརྟུལ་ཏེ། །བསམ་གཏན་པར་གྱུར་དུལ་དེས་ཞི་གནས་རྣམས་ཀྱིས་ཉོན་མོངས་གཙོ་བོ་བཅོམ། །ཁྱོད་འདིར་བསམ་གཏན་དགའ་བས་རང་གི་ཡོན་ཏན་དག་གིས་འགྲོ་དོན་བྱས། །ད་འདིར་སེམས་ཅན་མཆོག་ཁྱོད་བསམ་གཏན་རྣམ་འཕྲུལ་བྱ་བའི་དུས་ལ་བབ། །གནའ་སྔོན་ཁྱོད་ནི་དྲང་སྲོང་བསམ་གཏན་དགའ་ཞིང་རབ་ཏུ་གནས་པར་གྱུར། །རྒྱལ་པོ་མེད་པའི་མི་དག་གིས་ནི་ཁྱོད་ཁྲིད་རྒྱལ་སྲིད་དབང་ཡང་བསྐུར། །ཁྱོད་ཀྱིས་སྐྱེ་བོ་དག་ནི་དགེ་བ་བཅུ་དང་ཚངས་པའི་ལམ་ལ་བཀོད། །དེ་ཡི་ཚེ་ན་མི་ལས་ཤི་འཕོས་ཐམས་ཅད་ཚངས་པའི་གནས་སུ་དོང་། །ཕྱོགས་དང་ཕྱོགས་མཚམས་འགྲོ་བ་རྣམ་མང་ཤེས་པའི་ཆོ་ག་ཁྱོད་རབ་མཁས། །གཞན་
གྱི་སྤྱོད་དང་འགྲོ་བའི་སྐད་ཤེས་པ་དང་དབང་པོ་ཤེས་པ་དང་། །ཚུལ་དང་འདུལ་དང་བློ་གྲོས་རྣམ་མང་རྒྱུ་བའི་ཕ་རོལ་ཁྱོད་ཕྱིན་གྱུར། །རྒྱལ་པོའི་སྲས་ཁྱོད་འདིར་ནི་མངོན་པར་འབྱུང་བའི་དུས་ལ་ད་བབ་བོ། །ཁྱོད་ཀྱིས་གནའ་སྔོན་སྐྱེ་བོ་ལྟ་བ་ལོག་པར་ཞུགས་པར་གྱུར་པ་དག །རྒ་ཤི་སྡུག་བསྔལ་རྣམ་པ་མང་པོས་ཉམ་ཐག་འཁོད་པ་འདི་མཐོང་ནས། །སྲིད་པ་རྣམ་པར་གཞིག་པའི་དྲང་ལམ་ཉིད་ཀྱིས་ཁོང་དུ་ཆུད་བྱས་ཏེ། །མུན་པ་བཅོམ་པ་ཁྱོད་ཀྱིས་འཇིག་རྟེན་དག་ལ་དོན་ཆེན་རབ་ཏུ་བྱས། །ཚིགས་བཅད་རྣམ་པ་མང་པོ་མཛེས་པ་ཡོན་ཏན་ལྡན་པ་སྣ་ཚོགས་འདིས། །སིལ་སྙན་སྒྲ་བསྒྲགས་དེ་ལས་རྒྱལ་བའི་གཟི་ཡིས་དཔའ་བོ་སྐུལ་བར་གྱུར། །བློ་མཆོག་ལྡན་པ་ཁྱོད་འདིར་མངོན་པར་འབྱུང་བའི་དུས་ནི་ད་བབ་ཀྱིས། །སྡུག་བསྔལ་གང་བའི་སྐྱེ་བོ་འདི་དག་མཐོང་ནས་བཏང་སྙོམས་མ་བྱེད་ཅིག །བུད་མེད་གོས་དང་རིན་པོ་ཆེ་དང་དོ་ཤལ་སྤོས་ཕྲེང་སྣ་ཚོགས་ཀྱིས། །བརྒྱན་པ་དག་ཀྱང་སེམས་དང་ཕངས་པ་སྐྱེས་ནས་རབ་ཏུ་དགའ་བ་རྣམས། །སེམས་ཅན་མཆོག་ལ་སིལ་སྙན་རབ་ཏུ་སྒྲོག་ཅིང་སློང་བར་བྱེད་པ་ན། །རྒྱལ་བའི་མཐུ་ཡིས་སིལ་སྙན་དག་ལས་ཚིགས་སུ་བཅད་པ་འདི་འདྲ་བྱུང་། །གང་གི་དོན་དུ་ཁྱོད་ཀྱིས་འགྲོ་ལ་ཕན་ཕྱིར་བསྐལ་པ་དུ་མར་ནི། །གཏང་བར་དཀའ་བ་བཏང་ཞིང་ཚུལ་ཁྲིམས་བཟོད་པ་བརྩོན་འགྲུས་ཤིན་ཏུ་སྤྱད། །བསམ་གཏན་ཤེས་རབ་ཤིན་ཏུ་བསྒོམས་པ་ཁྱོད་ཀྱིས་དུས་ལ་ད་བབ་ཀྱིས། །འདྲེན་པ་མངོན་པར་འབྱུང་བའི་བློ་ལ་མྱུར་སོམས་ཕྱིར་ཤོལ་མ་བྱེད་ཅིག །སྔོན་ཆད་རིན་ཆེན་མཛོད་དང་གསེར་དང་དངུལ་དང་རྒྱན་རྣམས་རབ་ཏུ་བཏང་། །སྐྱེ་བ་དེ་དང་དེ་དག་ཏུ་ནི་མཆོད་སྦྱིན་རྣམ་པ་མང་པོ་བྱས། །ཁྱོད་ཀྱིས་ཆུང་མ་བུ་ཕོ་བུ་མོ་ལུས་དང་རྒྱལ་སྲིད་སྲོག་བཏང་སྟེ། །བྱང་ཆུབ་དོན་དུ་གཏང་བར་དཀའ་བ་དཔག་ཏུ་མེད་པ་ཁྱོད་ཀྱིས་བཏང་། །ཁྱོད་ནི་རྒྱལ་པོ་མི་དམན་བསོད་ནམས་དཔལ་གྱིས་རྣམ་པར་གྲགས་པར་གྱུར། །མུ་ཁྱུད་འཛིན་དང་མུ་ཁྱུད་ནག་པོ་ཚངས་པས་བྱིན་དང་རལ་པ་ཅན། །མཆོད་སྦྱིན་སྟོང་ལྡན་དང་ནི་ཆོས་སེམས་འོད་འཕྲོ་ཅན་དང་ནོར་བརྟན་དང་། །ཤིན་ཏུ་དོན་བསམས་གྱུར་ཏེ་སེམས་ཅན་དམན་ལ་གཏང་བར་དཀའ་བ་བཏང་། །ཟླ་བའི་བུ་དང་བརྩོན་འགྲུས་འབར་དང་བསོད་ནམས་འོད་ཟེར་ཅན་དུ་གྱུར། །གཏོང་བ་ཆེ་དང་ལྡན་
ཞིང་མཐུ་ལྡན་ཁྱོད་ནི་བྱས་པ་གཟོ་བར་གྱུར། །རྒྱལ་པོ་དྲང་སྲོང་ཟླ་བ་གཟུགས་ལྡན་དཔའ་བོ་བདེན་པ་འཕེལ་བ་དང་། །རྒྱལ་པོ་ལེགས་པར་སྨྲ་བ་ཚོལ་དང་བློ་གྲོས་བཟང་དང་དེས་པར་གྱུར། །ཟླ་བའི་འོད་དང་ཁྱད་པར་འགྲོ་དང་རྡུལ་དང་ཕྱོགས་ཀྱི་བདག་པོར་གྱུར། །རབ་སྦྱིན ་དཔའ་བོ་ཀ་ཤི་རྒྱལ་པོ་རིན་ཆེན་གཙུག་ཕུད་ཞི་བ་སྟོན། །མི་དབང་དེ་དག་རྣམས་དང་གཞན་དུ་གྱུར་ཏེ་གཏང་བར་དཀའ་བ་བཏང་། །ཁྱོད་ཀྱིས་ཇི་ལྟར་གཏོང་བའི་ཆར་ཕབ་དེ་བཞིན་ཆོས་ཀྱི་ཆར་པ་ཕོབ། །ཁྱོད་ཀྱིས་སྔོན་ཆད་སེམས་ཅན་སྙིང་པོ་གང་གཱའི་བྱེ་མ་སྙེད་ཅིག་མཐོང་། །སེམས་ཅན་ཐར་བར་བྱ་ཕྱིར་བྱང་ཆུབ་དམ་པའི་མཆོག་ནི་ཚོལ་བ་ན། །ཁྱོད་ཀྱིས་མཆོད་པ་དཔག་མེད་བསམ་མི་ཁྱབ་པས་སངས་རྒྱས་དེ་དག་མཆོད། །དཔའ་བོ་གྲོང་ཁྱེར་དམ་པ་འདི་ནས་འབྱུང་བའི་དུས་ལ་ད་བབ་བོ། །ཐོག་མར་ཁྱོད་ཀྱིས་དོན་ཡོད་མཐོང་ལ་སཱ་ལའི་མེ་ཏོག་གིས་ནི་མཆོད། །རྣམ་པར་སྣང་མཛད་ལ་ནི་དང་བའི་སེམས་ཀྱིས་སྐད་ཅིག་རབ་ཏུ་བལྟས། །རྔ་དབྱངས་ལྡན་པ་ལ་ནི་ཁྱོད་ཀྱིས་ཨ་རུ་ར་ཡི་འབྲུ་ཅིག་ཕུལ། །ཙན་དན་མཐོང་ནས་ཁྱོད་ཀྱིས་རྩྭ་ཡི་མེ་སྒྲོན་བླངས་ཏེ་ཁྱིམ་དུ་བཟུང་། །རྟུལ་པོ་གྲོང་ཁྱེར་འཇུག་པ་མཐོང་ནས་ཕྱེ་མ་སྤར་གང་རབ་ཏུ་གཏོར། །ཆོས་ཀྱི་དབང་ཕྱུག་ཆོས་འཆད་པ་ན་ལེགས་ཞེས་བྱ་བ་རབ་ཏུ་བྱིན། །ཀུན་ཏུ་གཟིགས་པ་མཐོང་ནས་ཕྱག་འཚལ་ཕྱག་འཚལ་ལོ་ཞེས་ཚིག་ཏུ་བརྗོད། །འོད་འཕྲོ་ཆེན་པོའི་ཕུང་པོ་ལ་ནི་ཁྱོད་ཀྱིས་དགའ་བས་གསེར་ཕྲེང་གཏོར། །འོད་ཟེར་རྒྱལ་མཚན་ལ་ནི་ཁ་ཚར་ཕུལ་ཞིང་གསལ་ལ་བལ་སྲན་གཏོར། །ཡེ་ཤེས་ཏོག་ལ་མྱ་ངན་མེད་པའི་མེ་ཏོག་ཁ་ལོ་སྒྱུར་ལ་འཇམ། །རིན་ཆེན་གཙུག་ཏོར་ཅན་ལ་མར་མེ་པད་མ་ལྡན་ལ་སྨན་ཡང་ཕུལ། །ཐམས་ཅད་ཟིལ་གནོན་མུ་ཏིག་དོ་ཤལ་རྒྱ་མཚོ་ལ་ནི་པད་མ་ཕུལ། །པད་མའི་སྙིང་པོ་ལ་ནི་བླ་རེ་སེང་གེ་ལ་ནི་ཆར་གདིང་ཕུལ། །སཱ་ལའི་དབང་པོ་རྒྱལ་ལ་མར་ཕུལ་མེ་ཏོག་རྒྱས་ལ་འོ་མ་ཕུལ། །གྲགས་སྦྱིན་ཀུན་དའི་མེ་ཏོག་ཕུལ་ཏེ་བདེན་པ་གཟིགས་ལ་ཞལ་ཟས་ཕུལ། །ཡེ་ཤེས་ལྷུན་ལ་ལུས་བཏུད་ཀླུས་བྱིན་ལ་ནི་ན་བཟའ་དབུལ་བ་བྱས། །རབ་མཐོར་གཤེགས་དང་ཙན་དན་མཆོག་དང་འོད་ལྡན་ལ་ནི་ཚྭ་སྤར་རེ། །བཀོད་པ་ཆེ་ལ་པད་མ་
དབུལ་བྱས་འོད་ཟེར་རྒྱལ་ལ་རིན་ཆེན་ཕུལ། །ཤཱཀྱ་ཐུབ་ལ་སྤར་གང་གསེར་ཕུལ་དབང་པོའི་ཏོག་ལ་བསྟོད་པ་བྱས། །ཉི་མའི་ཞལ་ལ་མེ་ཏོག་རྣ་རྒྱན་བློ་གྲོས་བཟང་ལ་གསེར་ཅོད་པན། །ཀླུ་ཟིལ་གནོན་ལ་ནོར་བུ་ཕུལ་ཏེ་རྒྱལ་ལ་རས་བཅོས་གདིང་བ་ཕུལ། །སྨན་གྱི་རྒྱལ་ལ་རིན་ཆེན་གདུགས་ཕུལ་སེང་གེའི་ཏོག་ལ་ཁྲི་གདན་ཕུལ། །ཡོན་ཏན་མཆོག་ལྡན་རིན་ཆེན་དྲ་བ་འོད་སྲུང་ལ་ནི་གླུ་དབྱངས་ཀུན། །སྤོས་མཆོག་མེ་ཏོག་ཕུལ་ཞིང་འོད་འཕྲོའི་ཏོག་ལ་རྟག་ཏུ་མེ་ཏོག་ཕུལ། །མི་འཁྲུགས་རྒྱལ་ལ་ཁང་བརྩེགས་ཕུལ་ཞིང་འཇིག་རྟེན་མཆོད་ལ་ཕྲེང་བ་ཕུལ། །རྒྱ་སྤོས་གཙུག་ལག་རྒྱལ་སྲིད་དབུལ་བྱས་རྒྱལ་བར་དགའ་ལ་སྤོས་ཀུན་ཕུལ། །སྒྲོན་མ་ཆེ་ལ་བདག་ཕུལ་པད་མའི་མཆོག་ལ་རྒྱན་རྣམས་དབུལ་བ་བྱས། །ཆོས་ཀྱི་ཏོག་ལ་མེ་ཏོག་སྣ་ཚོགས་སྒྲོན་མ་མཛད་ལ་ཨུད་པ་ལ། །མཆོད་པ་རྣམ་པ་སྣ་ཚོགས་ཐ་དད་གཞན་དང་གཞན་དག་བྱེད་པ་ན། །ཁྱོད་ཀྱིས་སེམས་ཅན་སྙིང་པོ་དེ་དག་རྣམས་དང་གཞན་ཡང་སྔོན་ཆད་མཆོད། །འདས་པའི་སངས་རྒྱས་རྣམས་དང་སྟོན་པ་དེ་དག་ཁྱོད་མཆོད་དྲན་པར་གྱིས། །སེམས་ཅན་མགོན་མེད་མྱ་ངན་གང་བ་ཡལ་བར་མ་དོར་མངོན་པར་བྱུང་། །མར་མེ་མཛད་པ་མཐོང་བ་ཙམ་གྱིས་ཁྱོད་ཀྱིས་བཟོད་པ་མཆོག་ཐོབ་སྟེ། །རྗེས་སུ་འཐུན་པའི་མངོན་པར་ཤེས་པ་ལྔ་པོ་ཉམས་པ་མེད་པ་ཐོབ། །དེ་ནས་རབ་ཏུ་དགའ་བས་བསྐལ་པ་གྲངས་མེད་འཇིག་རྟེན་ཁམས་ཀུན་དུ། །སངས་རྒྱས་དག་ནི་རེ་རེ་ལ་ཡང་མཆོད་པ་བསམ་གྱིས་མི་ཁྱབ་བྱས། །བསྐལ་པ་དཔག་མེད་དེ་དག་ཟད་གྱུར་སངས་རྒྱས་དེ་དག་མྱ་ངན་འདས། །ཁྱོད་ཀྱི་ལུས་རྣམས་ཐམས་ཅད་དང་ནི་དེ་དག་མིང་ཡང་གང་དུ་སོང་། །དངོས་པོ་ཐམས་ཅད་ཐ་མར་འཛད་པའི་ཆོས་ཏེ་འདུས་བྱས་རྟག་པ་མེད། །འདོད་པ་རྒྱལ་སྲིད་ལོངས་སྤྱོད་རྟག་པ་མིན་གྱིས་གྲོང་ཁྱེར་མཆོག་ནས་བྱུང་། །བསྐལ་པ་ཟད་པར་འགྱུར་ཚེ་གཟི་བརྗིད་དྲག་པོ་འཇིགས་པའི་མེ་འོད་ལྟར། །རྒ་དང་ན་དང་འཆི་བ་མི་བཟད་འཇིགས་པ་ཆེན་པོ་འོང་བར་འགྱུར། །དངོས་པོ་ཐམས་ཅད་ཐ་མར་འཛད་པའི་ཆོས་ཏེ་འདུས་བྱས་རྟག་པ་མེད། །ཤིན་ཏུ་སྡུག་བསྔལ་སེམས་ཅན་ལྟོས་ལ་ཡོན་ཏན་ལྡན་པ་མངོན་པར་བྱུང་། །རྒྱལ་པོ་བདེ་བའི་མལ་ན་ཉལ་
གྱུར་ཅིང་། །གང་ཚེ་མོ་ཚོགས་གླིང་བུ་རྒྱུད་གཅིག་དང་། །སིལ་སྙན་སྣ་ཚོགས་སྒྲ་ཡིས་སློང་བྱེད་པ། །དེ་ཚེ་སིལ་སྙན་སྒྲ་ལས་འདི་དག་བྱུང་། །སྲིད་གསུམ་རྒ་དང་ནད་ཀྱི་སྡུག་བསྔལ་འབར། །འཆི་མེ་རབ་འབར་འདི་ནི་མགོན་མེད་པ། །སྲིད་ལས་འབྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །སྲིད་གསུམ་མི་བརྟན་སྟོན་ཀའི་སྤྲིན་དང་འདྲ། །་འགྲོ་བའི་སྐྱེ་འཆི་གར་ལ་ལྟ་དང་མཚུངས། །འགྲོ་བའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། །སྲིད་སྲེད་མ་རིག་དབང་གིས་སྐྱེ་བོ་རྣམས། །མི་དང་ལྷ་གནས་ངན་སོང་ལམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་ཕང་ལོ་བསྐོར་བ་བཞིན། །རྟག་ཏུ་གཟུགས་སྡུག་མཆོག་དང་སྒྲ་སྙན་དང་། །དྲི་ཞིམ་རོ་མཆོག་རེག་པ་བདེ་བྱེད་པ། །དུས་ངན་རྙི་ལ་འགྲོ་བ་འདི་དག་ཐོགས། །དཔེར་ན་རྔོན་པའི་རྙི་ལ་སྤྲེའུ་ཐོགས་བཞིན། །འདོད་པའི་ཡོན་ཏན་མྱ་ངན་གནོད་པ་མང་། །འཇིགས་བཅས་རྟག་ཏུ་དགྲ་བྱེད་ཉོན་མོངས་བཅས། །རལ་གྲི་སོ་འདྲ་དུག་སྡོང་ལོ་མ་མཚུངས། །ངན་སྐྱུགས་སྣོད་ལྟར་འཕགས་པའི་སྐྱེ་བོས་སྤངས། །འདོད་པའི་ཡོན་ཏན་འཇིགས་བཅས་ཉོན་མོངས་བཅས། །རྟག་ཏུ་རྗེད་པར་བྱེད་པ་མུན་པ་འདྲ། །རྟག་ཏུ་འཇིགས་པའི་རྒྱུ་བྱེད་སྡུག་བསྔལ་རྩ། །སྲིད་པའི་སྲེད་པའི་འཁྲི་ཤིང་འཕེལ་བར་བྱེད། །ཇི་ལྟར་མེ་འབར་འོབས་ནི་འཇིགས་བཅས་པ། །དེ་ལྟར་འདོད་འདི་འཕགས་པའི་སྐྱེ་བོས་རིག །འདམ་རྫབ་ཆེ་འདྲ་རལ་གྲི་གཤེགས་གནས་འདྲ། །རལ་གྲིའི་སོ་ལ་སྦྲང་རྩིས་བསྐུས་དང་མཚུངས། །ཇི་ལྟར་སྦྲུལ་གྱི་མགོ་དང་ངན་སྐྱུགས་སྣོད། །དེ་ལྟར་འདོད་འདི་མཁས་པ་རྣམས་ཀྱིས་རིག །བྱ་ཤ་ཁམ་བུ་འདྲ་ཞིང་གསལ་ཤིང་འདྲ། །རོ་ལ་ཁྱི་ལྟར་དགྲ་དང་བཅས་པ་ཡིན། །འདོད་པའི་ཡོན་ཏན་འདི་དག་ཆུ་ཟླ་འདྲ། །གཟུགས་བརྙན་མཚུངས་ཤིང་བྲག་ཅ་འདྲ་བ་དང་། །མིག་ཡོར་འདྲ་ཞིང་གར་ལ་ལྟ་འདྲ་དང་། །རྨི་ལམ་མཉམ་པར་འཕགས་པའི་སྐྱེ་བོས་རིག །འདོད་པའི་ཡོན་ཏན་སྐད་ཅིག་ཡ་མ་བརླ། །སྒྱུ་མ་སྨིག་རྒྱུ་འདྲ་ཞིང་བརྫུན་པ་ཅན། །ཆུ་བུར་དབུ་བ་ལྟ་བུ་ཡང་དག་མིན། །ཡོངས་སུ་བཏགས་ལས་བྱུང་བར་མཁས་པས་རྟོགས། །
ན་ཚོད་ཐོག་མར་གཟུགས་མཆོག་འཛིན་པའི་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །རྒ་ན་སྡུག་བསྔལ་གཟི་བརྗིད་ལུས་བཅོམ་ནས། །རྣམ་པར་སྤོང་སྟེ་རི་དགས་ཀླུང་སྐམ་བཞིན། །ནོར་འབྲུ་དམ་པ་རྫས་མང་སྟོབས་ལྡན་ཚེ། །ཕངས་ཤིང་སྡུག་འདོད་འདི་ནི་བྱིས་པའི་སྤྱོད། །ནོར་ཉམས་སྡུག་བསྔལ་བར་ནི་གྱུར་པའི་ཚེ། །རྣམ་པར་སྤོང་སྟེ་མི་ཡིས་འབྲོག་སྟོང་བཞིན། །ཇི་ལྟར་མེ་ཏོག་ཤིང་དང་འབྲས་བཅས་ཤིང་། །དེ་ལྟར་སྦྱིན་འདོད་མི་ལ་དགའ་བར་བྱེད། །ནོར་ཉམས་རྒ་བས་ཉེན་ཅིང་སྤང་བ་ན། །དེ་ཚེ་དགའ་བར་མི་འགྱུར་བྱ་རྒོད་བཞིན། །རྫས་ལྡན་གཟུགས་མཆོག་ལྡན་ཚེ་དཔོན་པོ་བཞིན། །ཕྲད་ན་སྡུག་ཅིང་དབང་པོ་དགའ་བར་བྱེད། །དགའ་ན་སྡུག་བསྔལ་ཉེན་ཅིང་ནོར་ཟད་ན། །དེ་ཚེ་འདོད་པར་མི་འགྱུར་འཆི་བདག་བཞིན། །རྒ་བས་རྒ་བྱས་ན་ཚོད་ཡོལ་གྱུར་ན། །སྡོང་པོ་གནམ་ལྕགས་ཀྱིས་ནི་བཅོམ་པ་བཞིན། །རྒ་བས་འཁོགས་ན་འཇིགས་བཅས་ཁང་རུལ་འདྲ། །རྒ་ལས་བྱུང་བ་ཐུབ་པ་མྱུར་དུ་སྨྲོས། །བུད་མེད་སྐྱེས་པའི་ཚོགས་རྣམས་རྒ་བས་སྐེམས། །མ་ལུའི་འཁྲི་ཤིང་སཱ་ལའི་ནགས་སྟུག་བཞིན། །རྒ་བས་བརྩོན་འགྲུས་རྩལ་དང་ཤུགས་འཕྲོག་སྟེ། །དཔེར་ན་སྐྱེས་བུ་འདམ་དུ་བྱིང་བ་བཞིན། །རྒ་བས་གཟུགས་སྡུག་གཟུགས་ནི་མི་སྡུག་བྱེད། །རྒ་བས་གཟི་བརྗིད་འཕྲོག་ཅིང་མཐུ་སྟོབས་འཕྲོག །རྒ་བས་བདེ་བ་འཕྲོག་ཅིང་བརྙས་པར་བྱེད། །རྒ་བས་འཆི་བྱེད་རྒ་བས་མདངས་ཀྱང་འཕྲོག །ནད་བརྒྱ་མང་དང་ནད་ཐིབས་སྡུག་བསྔལ་གྱིས། །འགྲོ་བ་གཙེས་ཏེ་མི་ཡིས་རི་དགས་བཞིན། །རྒ་དང་ན་བས་བཅོམ་པའི་འགྲོ་ལྟོས་ལ། །སྡུག་བསྔལ་ལས་ནི་འབྱུང་བ་མྱུར་ཤོད་ཅིག །དཔེར་ན་དགུན་སྨད་རླུང་དང་ཁ་བ་ཆེ། །རྩྭ་ཤིང་གེལ་བ་ནགས་སྨན་མདངས་ཀྱང་འཕྲོག །དེ་ལྟར་ནད་འདི་འགྲོ་བའི་མདངས་འཕྲོག་ཅིང་། །དབང་པོ་གཟུགས་དང་སྟོབས་ནི་ཉམས་པར་བྱེད། །ནོར་འབྲུ་ནོར་ཆེན་ཐ་མར་ཟད་པར་བྱེད། །ནད་ནི་རྟག་ཏུ་འགྲོ་བ་བརྙས་པར་བྱེད། །གནོད་པ་བྱེད་ཅིང་སྡུག་ལ་སྡང་བར་བྱེད། །ཡོངས་སུ་གདུང་བྱེད་མཁའ་ལས་ཉི་མ་བཞིན། །འཆི་དང་འཕོ་དང་འཆི་འཕོ་དུས་བྱེད་པ། །ཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ། །ཕྱིར་མི་འོང་ཞིང་འཕྲད་པར་འགྱུར་མ་ཡིན། །ཤིང་ལས་ལོ་འབྲུ་འདྲ་ཞིང་ཀླུ་ཡི་རྒྱན་དང་མཚུངས། །ཞི་བ་དབང་ཡོད་པ་དག་
དབང་མེད་བྱེད། །འཆི་བ་འཕྲོག་བྱེད་ཆུ་བོས་ཤིང་དེད་བཞིན། །མི་ནི་གཉིས་མིན་གྲོགས་མེད་གཅིག་པུར་འགྲོ། །རང་ལས་འབྲས་བུ་ལྡན་པས་དབང་ཡང་མེད། །འཆི་བས་སྲོག་ཆགས་བརྒྱ་ཕྲག་མང་འཛིན་ཏེ། །འབྱུང་པོའི་ཚོགས་ལ་རྒྱ་མཚོའི་ཆུ་སྲིན་བཞིན། །ཀླུ་ལ་མཁའ་ལྡིང་གླང་ཆེན་སེང་གེ་འདྲ། །རྩྭ་རྩི་འབྱུང་པོའི་ཚོགས་ལ་མེ་དང་མཚུངས། །སྐྱོན་བརྒྱ་མང་པོ་འདི་འདྲ་འདི་དག་ལས། །འགྲོ་བ་སྒྲོལ་ཞེས་ཁྱོད་ཀྱིས་སྨོན་ལམ་བཏབ། །སྔོན་གྱི་སྨོན་ལམ་སྤྱོད་པ་དེ་དྲན་བྱོས། །ཁྱོད་ནི་མངོན་པར་འབྱུང་བའི་དུས་ལ་བབ། །གང་ཚེ་བུད་མེད་ཚོགས་ནི་རབ་དགའ་ཞིང་། །སིལ་སྙན་དག་གིས་ཐུབ་ཆེན་སློང་བྱེད་པ། །དེ་ཚེ་བདེ་བར་གཤེགས་པ་རྣམས་ཀྱི་མཐུས། །ཚིགས་བཅད་སྣ་ཚོགས་སིལ་སྙན་སྒྲ་ལས་བྱུང་། །འདུས་བྱས་ཐམས་ཅད་མྱུར་དུ་འཇིག་པ་སྟེ། །མཁའ་ལ་གློག་རྒྱུན་རིང་དུ་མི་གནས་བཞིན། །ཁྱོད་ཀྱི་དུས་འདི་ཉེ་བར་གནས་གྱུར་གྱིས། །བརྟུལ་ཞུགས་བཟང་པོ་མངོན་འབྱུང་དུས་ལ་བབ། །འདུ་བྱེད་མི་རྟག་བརྟན་པ་མ་ཡིན་ཏེ། །རྫ་སོ་མ་བཏང་ལྟ་བུར་འཇིག་པའི་བདག ། གཞན་གྱི་རྫས་ནི་བརྙན་པོ་བྱས་དང་མཚུངས། །བྱེ་མའི་གྲོང་ཁྱེར་ལྟ་བུར་རིང་མི་ཐོགས། །འདུ་བྱེད་འདི་དག་འཇིག་པའི་ཆོས་ཅན་ཏེ། །དབྱར་གྱི་ཞལ་ཞལ་ཇི་ལྟར་འགོགས་པ་བཞིན། །ཆུ་ངོགས་བྱེ་མ་ཡོད་པ་འདྲ་བ་སྟེ། །རྐྱེན་ལ་རག་ལས་རང་བཞིན་ཉམ་ཆུང་བ། །འདུ་བྱེད་མར་མེའི་འོད་འཕྲོ་འདྲ་བ་སྟེ། །མྱུར་དུ་འབྱུང་ཞིང་འགག་པའི་ཆོས་ཅན་ཡིན། །རླུང་དང་མཚུངས་པར་རིང་དུ་མི་གནས་ལ། །དབུ་བ་ལྟ་བུར་ཉམ་ཆུང་སྙིང་པོ་མེད། །འདུ་བྱེད་གཡོ་བ་མེད་ཅིང་སྟོང་པ་སྟེ། །བརྟགས་ན་ཆུ་ཤིང་དག་གི་ཕུང་པོ་འདྲ། །སྒྱུ་མ་ལྟ་བུར་སེམས་ནི་རྨོངས་པར་བྱེད། །ལག་བཅངས་སྟོངས་པས་བྱིས་པ་བྲིད་དང་མཚུངས། །འདུས་བྱས་གྱུར་པ་ཐམས་ཅད་རྒྱུ་དག་དང་། །རྐྱེན་རྣམས་ཀྱིས་ནི་རབ་ཏུ་འབྱུང་བ་སྟེ། །གཅིག་གིས་གཅིག་རྒྱུ་བྱས་ཏེ་བརྟེན་ནས་བྱུང་། །བྱིས་པའི་སྐྱེ་བོས་འདི་འདྲ་དེ་མ་རྟོགས། །དཔེར་ན་གྲེས་མ་མུན་ཛ་བརྟེན་བྱས་ལ། །རྩོལ་བའི་སྟོབས་ཀྱིས་ཐག་པར་སྒྱུར་བ་དང་། །ཟོ་ཆུན་རྒྱུད་མོ་འཁོར་ལོར་བཅས་པ་ཡང་། །དེ་དག་རེ་རེས་འགྲུབ་པར་འགྱུར་བ་མེད། །དེ་ལྟར་སྲིད་པའི་ཡན་ལག་ཀུན་གྲུབ་པ། །གཞན་དང་གཞན་ཚོགས་པ་ལ་
བརྟེན་ནས་ནི། །དེ་དག་སོ་སོ་རེ་རེར་འགྲུབ་པར་འགྱུར། །སྔོན་གྱི་མཐའ་དང་ཕྱི་མའི་མཐའ་མི་དམིགས། །ས་བོན་ཡོད་ན་མྱུ་གུ་ཇི་བཞིན་ཏེ། །ས་བོན་གང་ཡིན་མྱུ་གུ་དེ་ཉིད་མིན། །དེ་ལས་གཞན་མིན་དེ་ཡང་མ་ཡིན་ཏེ། །དེ་ལྟར་རྟག་མིན་ཆད་མིན་ཆོས་ཉིད་དོ། །མ་རིག་པ་ཡི་འདུ་བྱེད་རྐྱེན་ཡིན་ཏེ། །འདུ་བྱེད་དེ་ཡང་ཡང་དག་ཉིད་དུ་མེད། །མ་རིག་པ་དང་འདུ་བྱེད་དེ་དག་ཀྱང་། །རང་བཞིན་སྟོང་སྟེ་གཡོ་བ་མེད་པ་ཡིན། །རྒྱ་ལས་རྒྱ་ཡི་འབུར་ནི་སྣང་མོད་ཀྱི། །རྒྱ་དེ་འཕོས་པར་གྱུར་པའང་ཡོད་མ་ཡིན། །དེ་ལ་དེ་མེད་གཞན་ལས་མ་ཡིན་ཏེ། །དེ་ལྟར་འདུས་བྱས་རྟག་མེད་ཆད་པ་མེད། །མིག་དང་གཟུགས་ལ་བརྟེན་པ་བྱས་ནས་སུ། །མིག་གི་རྣམ་པར་ཤེས་པ་འདིར་འབྱུང་ཡང་། །མིག་ནི་གཟུགས་ལ་བརྟེན་པ་མ་ཡིན་ལ། །གཟུགས་ཀྱང་མིག་ལ་འཕོ་བ་ཡོད་མ་ཡིན། །འདི་དག་བདག་མེད་མི་སྡུག་ཆོས་ཅན་ཡང་། །དེ་དག་བདག་དང་སྡུག་པར་བརྟགས་པ་སྟེ། །ནོར་པ་ཡང་དག་མ་ཡིན་བརྟགས་ཡིན་ཡང་། །དེ་ལས་མིག་གི་རྣམ་པར་ཤེས་པ་འབྱུང་། །རྣམ་པར་ཤེས་པ་འགགས་ནས་འབྱུང་འགྱུར་ཏེ། །མཁས་པས་སྐྱེ་དང་འཇིག་པ་རྣམ་པར་མཐོང་། །གང་དུ་མ་སོང་གང་ནས་འོངས་པ་མིན། །རྣལ་འབྱོར་པས་ནི་སྟོང་པ་སྒྱུ་ལྟར་མཐོང་། །དཔེར་ན་གཙུབ་ཤིང་དང་ནི་གཙུབ་སྟན་དང་། །ལག་པས་རྩོལ་བ་བྱས་པ་གསུམ་ཚོགས་པ། །དེ་ལ་བརྟེན་ནས་མེ་ནི་འབྱུང་འགྱུར་ཏེ། །བྱུང་ནས་རིང་པོར་མི་ཐོགས་འགག་པར་འགྱུར། །དེ་ནས་མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་ཏུ་བརྟགས་བྱས་ནས། །དེ་ཡི་འོང་བའམ་འགྲོ་བ་མི་དམིགས་སོ། །ཕུང་པོ་དག་དང་སྐྱེ་མཆེད་ཁམས་རྣམས་ཀྱི། །རྐྱེན་ནི་མ་རིག་པ་དང་སྲེད་དང་ལས། །དེ་དག་ཚོགས་པ་སེམས་ཅན་ཞེས་བརྗོད་ཀྱང་། །དེ་ནི་དམ་པའི་དོན་དུ་དམིགས་སུ་མེད། །མཆུ་དང་ལྐོག་མ་རྐན་ལ་བརྟེན་ནས་ནི། །ལྕེ་བསྒྱུར་བ་ལས་ཡི་གེའི་སྒྲ་འབྱུང་ཡང་། །ལྐོག་མར་བརྟེན་ནས་མ་ཡིན་རྐན་ལས་མིན། །རེ་རེ་ལ་ནི་ཡི་གེ་དམིགས་སུ་མེད། །ཚོགས་པ་དེ་ལ་བརྟེན་ནས་ངག་དེ་ནི། །ཡིད་ཀྱི་བློ་ཡི་དབང་གིས་འབྱུང་མོད་ཀྱི། །ཡིད་དང་ངག་ནི་མི་སྣང་གཟུགས་མེད་དེ། །ནང་དང་ཕྱི་རོལ་ན་
ཡང་དམིགས་སུ་མེད། །མཁས་པས་ངག་སྐད་སྒྲ་དང་དབྱངས་རྣམས་ཀྱི། །སྐྱེ་དང་འཇིག་ལ་རྣམ་པར་བརྟགས་བྱས་ན། །དེ་ཚེ་ངག་ཀུན་བྲག་ཅ་ལྟ་བུ་དང་། །སྐད་ཅིག་པ་དང་སྙིང་པོ་མེད་པར་མཐོང་། །དཔེར་ན་ཤིང་དང་རྒྱུད་ལ་བརྟེན་བྱས་ལ། །ལག་པས་རྩོལ་བ་བྱས་པ་གསུམ་ཚོགས་ན། །སྒྲ་སྙན་པི་བང་གླིང་བུ་ལ་སོགས་པ། །དེ་དག་ལས་ནི་སྒྲ་ཡང་འབྱུང་བར་འགྱུར། །དེ་ནས་མཁས་པ་ལ་ལས་བརྟགས་བྱས་ཏེ། །འདི་ནི་གང་ནས་འོངས་ལ་གར་སོང་ཞེས། །ཕྱོགས་དང་ཕྱོགས་མཚམས་ཀུན་ཏུ་བརྟགས་བྱས་ན། །སྒྲ་ཡི་འོང་བའམ་འགྲོ་བ་མི་དམིགས་སོ། །དེ་ལྟར་རྒྱུ་དག་དང་ནི་རྐྱེན་རྣམས་ལས། །འདུ་བྱེད་གྱུར་པ་ཐམས་ཅད་བྱུང་བ་སྟེ། །ཡང་དག་མཐོང་བའི་རྣལ་འབྱོར་པ་ཡིས་ནི། །འདུ་བྱེད་སྟོང་པ་གཡོ་བ་མེད་པར་མཐོང་། །ཕུང་པོ་དག་དང་སྐྱེ་མཆེད་ཁམས་རྣམས་ནི། །ནང་ཡང་སྟོང་ལ་ཕྱི་རོལ་སྟོང་པ་སྟེ། །ཐམས་ཅད་བདག་གིས་དབེན་ཞིང་གནས་མེད་ལ། །ཆོས་ཀྱི་མཚན་ཉིད་ནམ་མཁའི་ངོ་བོ་ཉིད། །ཆོས་ཀྱི་མཚན་ཉིད་འདི་འདྲ་འདི་དག་ནི། །མར་མེ་མཛད་པ་མཐོང་ནས་ཁྱོད་ཀྱིས་རྟོགས། །ཇི་ལྟར་ཉིད་ཀྱིས་རྗེས་སུ་རྟོགས་པ་ལྟར། །དེ་བཞིན་ལྷ་མིར་བཅས་པ་རྟོགས་པར་གྱིས། །གནོད་པ་ཡང་དག་མ་ཡིན་བརྟགས་པ་ཡི། །འདོད་ཆགས་ཞེ་སྡང་དག་གིས་འགྲོ་བ་གདུངས། །སྙིང་རྗེའི་སྤྲིན་ལས་ཞི་བ་བསིལ་བའི་ཆུ། །འདྲེན་པ་བདུད་རྩི་རྒྱུན་ནི་རབ་ཏུ་ཕོབ། །བྱང་ཆུབ་དམ་པ་ཡང་དག་ཐོབ་ནས་ནི། །འཕགས་པའི་ནོར་གྱིས་སྲོག་ཆགས་བསྡུའོ་ཞེས། །མཁས་པ་ཁྱོད་ཀྱིས་གང་གི་ཆེད་ཀྱི་ཕྱིར། །བསྐལ་པ་བྱེ་བ་མང་པོར་སྦྱིན་པ་བྱིན། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །འཕགས་པའི་ནོར་གྱིས་དམན་དབུལ་སྡུག་བསྔལ་ལ། །སེམས་ཅན་ཁ་ལོ་སྒྱུར་བ་མ་གཡེལ་བར། །འཕགས་པའི་ནོར་གྱིས་དེ་དག་བསྡུ་བར་གྱིས། །ངན་སོང་ས་ཡི་ལམ་ནི་བཅད་པ་དང་། །མཐོ་རིས་བདུད་རྩིའི་སྒོ་མོ་མཆོག་དེ་ནི། །སེམས་ཅན་བྱེ་བ་མང་ལ་བསྟན་ཞེས་ཏེ། །ཁྱོད་ཀྱིས་རྟག་ཏུ་ཚུལ་ཁྲིམས་ཤིན་ཏུ་བསྲུངས། །ཚུལ་ཁྲིམས་ལྡན་པས་བསམས་པ་འགྲུབ་འགྱུར་གྱིས། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །ངན་སོང་གསུམ་པོའི་ས་ཡི་སྒོ་ཆོད་དེ། །མཐོ་རིས་བདུད་རྩིའི་སྒོ་ནི་དབྱེ་བར་གྱིས། །སྲོག་ཆགས་རྣམས་ཀྱི་
ཁོང་ཁྲོ་ཁྲོ་གཞིལ་དང་། སྲིད་པའི་མཚོ་ལས་སེམས་ཅན་བསྒྲལ་བྱས་ཏེ། །ཞི་བདེ་རིམས་ནད་མེད་ལ་དགོད་དོ་ཞེས། །ཁྱོད་ཀྱིས་རྟག་ཏུ་བཟོད་པ་ཤིན་ཏུ་བསྒོམས། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །དགྲ་དང་གནོད་སེམས་འཚེ་བས་དཀྲུགས་པ་ཡི། །འཚེ་བ་སྤྱོད་པ་ཡལ་བར་མ་དོར་བར། །འགྲོ་བ་འདི་དག་བཟོད་པའི་ས་ལ་ཁོད། །ཆོས་ཀྱི་གྲུ་ནི་ལེགས་པར་སྦྱར་བྱས་ལ། །སྲིད་པའི་མཚོ་ལས་འགྲོ་བ་རྣམས་བསྒྲལ་ཏེ། །ཞི་བདེ་རིམས་ནད་མེད་ལ་དགོད་དོ་ཞེས། །གང་གི་དོན་དུ་ཁྱོད་ཀྱིས་བརྩོན་འགྲུས་བརྟེན། །སྔོན་གྱི་སྤྱོད་དེ་རྗེས་སུ་དྲན་གྱིས་ལ། །འགྲོ་བ་ཆུ་བོ་བཞི་ཡིས་ཁྱེར་གྱུར་པ། །སེམས་ཅན་མགོན་མེད་པ་དག་བརྩོན་སྟོབས་དང་། །བརྟུལ་བའི་ཤུགས་ཀྱིས་མྱུར་དུ་འདི་དག་ཐོན། །དབང་པོ་འཁྲུལ་དང་ཕལ་པའི་དབང་པོ་དང་། །་སྤྲེའུ་འདྲའི་སེམས་ལས་ཞི་གནས་ངས་དགོད་ཅེས། །འདྲེན་པ་ཁྱོད་ཀྱིས་གང་གི་ཆེད་ཀྱི་ཕྱིར། །ཉོན་མོངས་གཞིལ་བའི་བསམ་གཏན་བསྒོམས་གྱུར་པ། །སྔོན་གྱི་སྤྱོད་དེ་རྗེས་སུ་དྲན་གྱིས་ཏེ། །ཉོན་མོངས་དྲ་བས་དཀྲུགས་པར་གྱུར་པ་ཡི། །འགྲོ་ལ་མ་གཡེལ་ཉོན་མོངས་གཙེས་པ་ལས། །བསམ་གཏན་མཆོག་ལ་སྐྱེ་དགུ་འདི་དག་ཁོད། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཆོས་བརྒྱ་མང་པོ་མཐོང་བྱེད་པ། །ཡང་དག་མཐོང་བའི་མིག་ནི་སྦྱིན་ནོ་ཞེས། །ཁྱོད་ཀྱིས་སྔོན་ཆད་ཤེས་རབ་ཤིན་ཏུ་བསྒོམས། །སྔོན་གྱིས་སྤྱོད་དེ་རྗེས་སུ་དྲན་གྱིས་ལ། །གཏི་མུག་མ་རིག་མུན་པས་བསྒྲིབས་པ་ཡི། །འགྲོ་ལ་ཤེས་རབ་དམ་པ་འོད་བཟང་བ། །ཆོས་མིག་དྲི་མེད་ཉོན་མོངས་མེད་པ་བྱིན། །བུད་མེད་རྣམས་ཀྱི་སིལ་སྙན་གླུ་དབྱངས་ལས། །ཚིགས་སུ་བཅད་པ་འདི་འདྲ་འདི་བྱུང་སྟེ། །དེ་ཐོས་ནས་ནི་རྒྱགས་པ་རྣམ་སྤངས་ནས། །བྱང་ཆུབ་དམ་པ་མཆོག་ཏུ་སེམས་བཏང་ངོ་། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པའི་ཚེ་ཡང་ཆོས་མཉན་པ་དང་བྲལ་བར་མ་གྱུར་ཏོ། །ཆོས་ཡིད་ལ་བྱེད་པ་དང་བྲལ་བར་མ་གྱུར་ཏོ། །དེ་ཅིའི་ཕྱིར་ཞེ་ན། དགེ་སློང་དག་འདི་ལྟར་བྱང་ཆུབ་སེམས་དཔའ་ནི་ཡུན་རིང་པོ་ནས་ཆོས་དང་ཆོས་སྨྲ་བ་རྣམས་ལ་གུས་པ་དང་བཅས་པར་གྱུར་ཅིང་། བསམ་པ་ཐག་པ་ནས་ཆོས་དོན་དུ་གཉེར་བ། ཆོས་འདོད་པ། ཆོས་ཀྱི་ཀུན་དགའ་ལ་དགའ་ཞིང་མོས་པར་གྱུར་པ།
ཆོས་ཚོལ་བས་ངོམས་མི་ཤེས་པ། ཇི་ལྟར་ཐོས་པའི་ཆོས་ཡང་དག་པར་སྟོན་པ། བླ་ན་མེད་པའི་ཆོས་ཆེན་པོའི་སྦྱིན་བདག་ཏུ་གྱུར་པ། ཟང་ཟིང་མེད་པར་ཆོས་སྟོན་པ། ཆོས་སྦྱིན་པ་ལ་སེར་སྣ་མེད་པ། ཆོས་ལ་སློབ་དཔོན་གྱི་དཔེ་མཁྱུད་དང་བྲལ་བ། ཆོས་ཀྱི་རྗེས་སུ་འཐུན་པའི་ཆོས་སྒྲུབ་པ། ཆོས་ལ་ནན་ཏན་བྱེད་པ་ལ་དཔའ་བ། ཆོས་ལ་གནས་སུ་འཛིན་པ། ཆོས་ལ་སྐྱབས་སུ་འཛིན་པ། ཆོས་ལ་དཔུང་གཉེན་དུ་འཛིན་པ། ཆོས་ལ་རྟོན་པ། ཆོས་ལ་ངེས་པར་སེམས་པའི་བཟོད་པས་ངེས་པར་བྱུང་བ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པ་སྟེ། ཐབས་ལ་མཁས་པས་རྟོགས་པར་ཁོང་དུ་ཆུད་པ་ཡིན་ནོ། །དགེ་སློང་དག་དེ་ལ་བྱང་ཆུབ་སེམས་དཔའ་ཐབས་མཁས་པ་ཆེན་པོས་རྣམ་པར་རྩེ་ཞིང་བཙུན་མོའི་འཁོར་ཐམས་ཅད་ཀྱི་མོས་པ་ཇི་ལྟ་བ་བཞིན་དུ་སྤྱོད་ལམ་ནི་བསྟན། སྔོན་གྱི་བྱང་ཆུབ་སེམས་དཔའ་འཇིག་རྟེན་གྱི་ཡུལ་ཐམས་ཅད་ལས་ཡང་དག་པར་འདས་པ་རྣམས་ཀྱི་འཇིག་རྟེན་དང་འཐུན་པར་བྱ་བའི་ཆོས་ཉིད་དང་འཐུན་པར་ནི་བྱས། ཡུན་རིང་པོ་ནས་འདོད་པའི་སྐྱོན་ཤིན་ཏུ་རྟོགས་པ་ཡིན་ཡང་སེམས་ཅན་ཡོངས་སུ་སྨིན་པར་བྱ་བའི་དབང་གིས་འདོད་པའི་ལོངས་སྤྱོད་ནི་ཀུན་ཏུ་བསྟན། དགེ་བའི་རྩ་བ་དཔག་ཏུ་མེད་པ་བསགས་པའི་བསོད་ནམས་ཀྱི་སྟོབས་ཀྱི་ཚོགས་ཀྱི་ཁྱད་པར་གྱིས་འཇིག་རྟེན་གྱི་དབང་དུ་བྱ་བ་མཚུངས་པ་མེད་པ་ནི་ཀུན་ཏུ་བསྟན། ལྷའི་དང་མིའི་ལས་ཤིན་ཏུ་འདས་པ་སྙིང་པོ་དང་ལྡན་ཞིང་རྒྱ་ཆེ་ལ། རྣམ་པ་ཐ་དད་པ་སྣ་ཚོགས་ཀྱི་གཟུགས་དང་། སྒྲ་དང་། དྲི་དང་། རོ་དང་། རེག་མཆོག་ཏུ་དགའ་བ་ཉམས་དགའ་བའི་འདོད་པའི་དགའ་བའི་བདེ་བ་ནི་བསྟན། འདོད་པའི་དགའ་བའི་ཡུལ་ཐམས་ཅད་ལ་འཛིན་པ་མེད་པར་རང་གི་སེམས་ལ་དབང་བསྒྱུར་བ་ནི་བསྟན། སྔོན་གྱི་སྨོན་ལམ་གྱི་སྟོབས་ཀྱིས་གྲོགས་སུ་གྱུར་པ། དགེ་བའི་རྩ་བ་བསགས་པའི་སེམས་ཅན་རྣམས་ནི་མཚུངས་པར་གནས་པས་ཡོངས་སུ་སྨིན་པར་བྱས་ནས། འཇིག་རྟེན་གྱི་ཀུན་ནས་ཉོན་མོངས་པའི་དྲི་མ་ཐམས་ཅད་ཀྱིས་ནི་སེམས་ལ་ཀུན་ནས་ཉོན་མོངས་པ་མེད་པར་བཙུན་མོའི་འཁོར་གྱི་ནང་ན་གནས་ཏེ། ཇི་ལྟར་མགྲོན་དུ་གཉེར་བའི་སེམས་ཅན་གྱི་ཁམས་ཡོངས་སུ་སྨིན་པར་བྱ་བའི་
དུས་ལ་ལྟ་ཞིང་། དེའི་ཚེ་བྱང་ཆུབ་སེམས་དཔའ་ཤིན་ཏུ་རྒྱ་ཆེར་སྔོན་གྱི་དམ་བཅས་པ་རྗེས་སུ་དྲན་ནོ། །སངས་རྒྱས་དང་ཆོས་ཀྱང་མངོན་དུ་བྱེད་དོ། །སྨོན་ལམ་གྱི་སྟོབས་ཀྱང་མངོན་པར་སྒྲུབ་བོ། །སེམས་ཅན་རྣམས་ལ་ཡང་སྙིང་རྗེ་ཆེན་པོ་གཏོང་ངོ་། །སེམས་ཅན་རབ་ཏུ་ཐར་བར་བྱ་བར་ཡང་སེམས་སོ། །འབྱོར་པ་ཐམས་ཅད་ཀྱི་མཐའ་ནི་རྒུད་པ་ཡིན་པར་ཡང་སོ་སོར་རྟོག་གོ །འཁོར་བ་ལ་གནོད་པ་དང་། འཇིགས་པ་མང་པོ་དུ་མ་ཡོད་པར་ཡང་རྟོག་གོ །བདུད་དང་ཉེས་པའི་ཞགས་པ་ཡང་ཡང་དག་པར་གཅོད་དོ། །འཁོར་བའི་རྒྱུད་ལས་ཀྱང་བདག་ཉིད་འདའ་བར་བྱེད་དོ། །མྱ་ངན་ལས་འདས་པ་ལ་ཡང་སེམས་ཡང་དག་པར་གཏོད་དོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དགུ་པ། དགེ་སློང་དག་དེ་ལ་བྱང་ཆུབ་སེམས་དཔའ་ནི་སྔོན་གྱི་མཐའ་ཉིད་ནས་ཀྱང་འཁོར་བའི་སྐྱོན་ཤིན་ཏུ་རིག་པ་ཡིན། འདུས་བྱས་ལ་བསམ་པ་ཐག་པ་ནས་དོན་དུ་མི་གཉེར་བ་ཡིན། ཉེ་བར་ལེན་པ་ཡོངས་སུ་འཛིན་པ་ཐམས་ཅད་དོན་དུ་མི་གཉེར་བ་ཡིན། སངས་རྒྱས་ཀྱི་ཆོས་དོན་དུ་གཉེར་བ་ཡིན། མྱ་ངན་ལས་འདས་པ་ལ་མངོན་དུ་ཕྱོགས་པ་ཡིན། འཁོར་བ་ལ་རྒྱབ་ཀྱིས་བལྟས་པ་ཡིན། དེ་བཞིན་གཤེགས་པའི་སྤྱོད་ཡུལ་ལ་མངོན་དུ་དགའ་བ་ཡིན། བདུད་ཀྱི་སྤྱོད་ཡུལ་དང་མ་འདྲེས་པ་ཡིན། སྲིད་པ་ལ་འབར་བར་སྐྱོན་དུ་མཐོང་བ་ཡིན། ཁམས་གསུམ་པ་ལས་བྱུང་བའི་བསམ་པ་ཅན་ཡིན། འཁོར་བའི་སྐྱོན་དང་ཉེས་དམིགས་དང་འབྱུང་བ་ལ་མཁས་པ་ཡིན། རབ་ཏུ་འབྱུང་བར་འདོད་པ་ཡིན། མངོན་པར་འབྱུང་བའི་བསམ་པ་ཅན་ཡིན། བདེན་པ་ལ་གཞོལ་བ་ཡིན། བདེན་པ་ལ་འབབ་པ་ཡིན། དབེན་པ་ལ་བབ་པ་ཡིན། དགོན་པ་དང་བས་མཐར་མངོན་པར་དགའ་བ་ཡིན། རབ་ཏུ་དབེན་པས་རབ་ཏུ་ཞི་བར་འདོད་པ་ཡིན། བདག་དང་གཞན་ལ་ཕན་པར་ཞུགས་པ་ཡིན། བླ་ན་མེད་པའི་ནན་ཏན་ལ་དཔའ་བ་ཡིན། འཇིག་རྟེན་གྱི་དོན་དུ་འདོད་པ་ཡིན། ཕན་པར་འདོད་པ་ཡིན། བདེ་བར་འདོད་པ་ཡིན། གྲུབ་པ་དང་བདེ་བར་འདོད་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། བྱམས་པ་ལ་གནས་པ་ཅན་ཡིན། སྙིང་རྗེ་ཆེན་པོ་དང་ལྡན་པ་ཡིན། བསྡུ་བའི་དངོས་པོ་ལ་མཁས་པ་ཡིན། རྟག་ཏུ་ཡིད་ཡོངས་སུ་མི་སྐྱོ་བ་ཡིན། སེམས་
ཅན་ཡོངས་སུ་སྨིན་པར་བྱ་བ་དང་འདུལ་བ་ལ་མཁས་པ་ཡིན། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་སྡུག་པར་སེམས་པ་ཡིད་ལ་བྱེད་པ་དང་ལྡན་པ་ཡིན། དངོས་པོ་ཐམས་ཅད་ལ་མི་ལྟ་བར་ཡོངས་སུ་བཏང་བ་ཡིན། སྦྱིན་པ་འགེད་པ་ལ་དགའ་བ་ཡིན། ལྷུག་པར་གཏོང་བ་ཡིན། ལག་པ་བརྐྱང་བ་ཡིན། གཏོང་བ་ལ་དཔའ་བ་ཡིན། མཆོད་སྦྱིན་བྱས་པ་ཡིན། བསོད་ནམས་ཤིན་ཏུ་ཕུན་སུམ་ཚོགས་པ་ཡིན། བསོད་ནམས་ཀྱི་ཡོ་བྱད་ཤིན་ཏུ་བཟུང་བ་ཡིན། དྲི་མ་དང་སེར་སྣ་དང་བྲལ་བ་ཡིན། སེམས་ཀུན་ཏུ་མ་བཟུང་བ་ཡིན། བླ་ན་མེད་པའི་སྦྱིན་བདག་ཆེན་པོ་ཡིན། བྱིན་ནས་ཀྱང་རྣམ་པར་སྨིན་པ་ལ་མི་རེ་བ་ཡིན། སྦྱིན་པ་ལ་དཔའ་བ་ཡིན། འདོད་པ་དང་། འདོད་པ་ཆེ་བ་དང་། ཆགས་པ་དང་། ཞེ་སྡང་དང་། རྒྱགས་པ་དང་། ང་རྒྱལ་དང་། གཏི་མུག་དང་། སེར་སྣ་ལ་སོགས་པ་ཉོན་མོངས་པའི་དགྲའི་ཚོགས་ཕྱིར་རྒོལ་བ་ཐམས་ཅད་ཚར་གཅད་པའི་ཕྱིར་མངོན་པར་བྱུང་བ་ཡིན། ཐམས་ཅད་མཁྱེན་པའི་སེམས་བསྐྱེད་པའི་རྒྱུན་ལས་མི་གཡོ་བ་ཡིན། གཏོང་བ་ཆེན་པོའི་སེམས་ཀྱི་གོ་ཆ་ཤིན་ཏུ་བགོས་པ་ཡིན། འཇིག་རྟེན་ལ་སྙིང་བརྩེ་བ་ཅན་ཡིན། ཕན་པར་འདོད་པ་ཅན་ཡིན། ཡ་ལད་བགོས་པ་ཡིན། གོ་ཆ་བགོས་པ་ཡིན། སེམས་ཅན་རབ་ཏུ་ཐར་བར་བྱ་བ་ལ་དམིགས་པ་ཡིན། སྙིང་རྗེ་ཆེན་པོའི་སྟོབས་དང་རྣམ་པར་གནོན་པ་དང་། ཕ་རོལ་གནོན་པ་དང་ལྡན་པ་ཡིན། ཕྱིར་མི་ལྡོག་པ་ཡིན། སེམས་ཅན་ཐམས་ཅད་ལ་སེམས་མཉམ་པ་ཡིན། གཏོང་བའི་ལག་ཆ་ཅན་ཡིན། སེམས་ཅན་གྱི་བསམ་པ་དང་རེ་བ་ཇི་ལྟ་བ་བཞིན་དུ་ཚིམ་པར་བྱེད་པ་ཡིན། བྱང་ཆུབ་ཀྱི་སྣོད་དུ་གྱུར་པ་ཡིན། དུས་དང་ཕྱད་པར་ཆོས་རྟོགས་པ་ཡིན། སྨོན་ལམ་བྱང་ཆུབ་ཏུ་ཡོངས་སུ་བསྔོས་པ་ཡིན། རྒྱལ་མཚན་མ་བསྙལ་བ་ཡིན། འཁོར་གསུམ་ཡོངས་སུ་དག་པའི་སྦྱིན་པ་ཡོངས་སུ་གཏོང་བ་དང་ལྡན་པ་ཡིན། ཡེ་ཤེས་མཆོག་གི་རྡོ་རྗེའི་མཚོན་ཆ་སྲ་བ་དང་ལྡན་པ་ཡིན། ཉོན་མོངས་པའི་ཕྱིར་རྒོལ་བ་ཤིན་ཏུ་ཚར་གཅོད་པ་ཡིན། ཚུལ་ཁྲིམས་དང་། ཡོན་ཏན་དང་། སྤྱོད་པ་ལ་ཞུགས་པ་ཡིན། ལུས་དང་། ངག་དང་། ཡིད་ཀྱི་ལས་ཀྱི་མཐའ་ལེགས་
པར་བསྲུངས་པ་ཡིན། ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་ཡིན། ཚུལ་ཁྲིམས་ཡོངས་སུ་དག་པ་ཡིན། དྲི་མ་མེད་ཅིང་དྲི་མ་དང་བྲལ་ལ་དྲི་མ་སྤངས་པའི་སེམས་དང་ལྡན་པ་ཡིན། ངན་དུ་སྨྲས་པ་དང་། ངན་དུ་བརྗོད་པའི་ཚིག་གི་ལམ་དང་། བརྒྱད་པ་དང་། སྤྱོ་བ་དང་། སྨད་པ་དང་། བཤུང་བ་དང་། བརྡེག་པ་དང་། བསྡིགས་པ་དང་། བསད་པ་དང་། བཅིང་བ་དང་། གཟུང་བའི་ཉོན་མོངས་པ་ཐམས་ཅད་ཀྱིས་སེམས་མ་བརྙོགས་པ་ཡིན། སེམས་མ་འཁྲུགས་པ་ཡིན། བཟོད་པ་དང་དེས་པ་ཕུན་སུམ་ཚོགས་པ་ཡིན། གནོད་པར་མི་སེམས་པ་ཡིན།གནོད་པ་མི་བྱེད་པ་ཡིན། གནོད་སེམས་མེད་པའི་སེམས་དང་ལྡན་པ་ཡིན། སེམས་ཅན་ཐམས་ཅད་ལ་ཕན་པར་བྱ་བའི་བརྩོན་འགྲུས་འབར་བ་བརྩམས་པ་ཡིན། ཡི་དམ་ལ་བརྟེན་པ་ཡིན། དགེ་བའི་ཆོས་ཐམས་ཅད་ཡང་དག་པར་སྒྲུབ་པ་ལ་ཕྱིར་མི་ལྡོག་པ་ཡིན། དྲན་པ་དང་ལྡན་པ་ཡིན། ཤེས་བཞིན་ཅན་ཡིན། ཤིན་ཏུ་མཉམ་པར་བཞག་པ་ཡིན། སེམས་མ་གཡེངས་པ་ཡིན། བསམ་གཏན་ལ་རྩེ་གཅིག་ཏུ་ཡིད་ལ་བྱེད་པ་ཡིན། ཆོས་རབ་ཏུ་རྣམ་པར་འབྱེད་པ་ལ་མཁས་པ་ཡིན། སྣང་བ་ཐོབ་པ་ཡིན། མུན་པ་མུན་གནག་དང་བྲལ་བ་ཡིན། མི་རྟག་པ་དང་སྡུག་བསྔལ་བ་དང་། བདག་མེད་པ་དང་། མི་སྡུག་པའི་རྣམ་པར་སེམས་ཡོངས་སུ་བསྒོམས་པ་ཡིན། དྲན་པ་ཉེ་བར་གཞག་པ་དང་། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། ལམ་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཤིན་ཏུ་ཡོངས་སུ་སྦྱང་བ་བྱས་པའི་ཡིད་ལ་བྱེད་པ་དང་ལྡན་པ་ཡིན། ཞི་གནས་དང་ལྷག་མཐོང་གིས་ཤིན་ཏུ་དཀར་བར་བྱས་པའི་བློ་དང་ལྡན་པ་ཡིན། རྟེན་ཅིང་འབྲེལ་བར་འབྱུང་བར་ལྟ་བ་ཡིན། བདེན་པ་རྗེས་སུ་རྟོགས་པས་གཞན་གྱི་དྲིང་མི་འཇོག་པ་ཡིན། རྣམ་པར་ཐར་པའི་སྒོ་གསུམ་གྱིས་རྣམ་པར་རྩེ་བ་ཡིན། ཆོས་ཐམས་ཅད་ཀྱི་ཚུལ་སྒྱུ་མ་དང་། སྨིག་རྒྱུ་དང་། ཆུ་ཟླ་དང་། བྲག་ཅ་དང་། མིག་ཡོར་ལྟ་བུར་རྟོགས་པ་ཡིན་ནོ། །དགེ་སློང་དག་བྱང་ཆུབ་སེམས་དཔའ་དེ་ནི་དེ་ལྟར་རང་བཞིན་གྱིས་ཆོས་ལ་གནས་པ་ཡིན། དེ་ལྟར་ཡེ་ཤེས་ལ་གནས་པ་ཡིན།
དེ་ལྟར་ཡོན་ཏན་གྱི་ཆེ་བ་ཉིད་ལ་གནས་པ་ཡིན། དེ་ལྟར་སེམས་ཅན་གྱི་དོན་ལ་བརྩོན་པར་གནས་པ་ཡིན་ཏེ། ཕྱོགས་བཅུའི་སངས་རྒྱས་ཀྱི་བྱིན་གྱི་རླབས་ཀྱི་བྱིན་གྱིས་བརླབས་པས་སིལ་སྙན་དང་གླུ་དབྱངས་ལས་བྱུང་བའི་ཚིགས་སུ་བཅད་པ་དེ་དག་གིས་རྒྱ་ཆེར་བསྐུལ་བ་དང་། དེའི་ཚེ་སྔོན་གྱི་བྱང་ཆུབ་སེམས་དཔའ་སྲིད་པ་ཐ་མ་པར་གྱུར་པ་རྣམས་ཀྱི་བཙུན་མོའི་འཁོར་ཡོངས་སུ་སྨིན་པར་བྱ་བའི་ཕྱིར་ཆོས་ཀྱི་སྒོ་བཞི་མངོན་དུ་བྱེད་དོ། །བཞི་གང་ཞེ་ན། འདི་ལྟ་སྟེ། སྦྱིན་པ་དང་། སྙན་པར་སྨྲ་བ་དང་། དོན་བྱ་བ་དང་། དོན་འཐུན་པ་བསྡུ་བའི་དངོས་པོ་བཞི་ལ་སྦྱོར་བ་སྒྲུབ་པ་རྣམ་པར་དག་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང་། དཀོན་མཆོག་གསུམ་གྱི་རིགས་ཡང་དག་པར་འཛིན་པའི་བསམ་པ་ཆུད་མི་ཟ་བའི་ཐམས་ཅད་མཁྱེན་པའི་སེམས་སྨོན་ལམ་གྱི་སྟོབས་བསྐྱེད་པའི་ཕྱིར་མི་ལྡོག་པའི་ཡུལ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང་། སེམས་ཅན་ཐམས་ཅད་ཡོངས་སུ་མི་གཏང་བའི་ལྷག་བའི་བསམ་པ་སྙིང་རྗེ་ཆེན་པོའི་སྟོབས་ལ་ཞུགས་པ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པ་དང་། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་དང་། དོན་ལ་རྣམ་པར་ངེས་པའི་ཡེ་ཤེས་ཀྱི་ཚོགས་ཀྱི་སྟོབས་ཀྱི་ཁྱད་པར་ཡང་དག་པར་སྒྲུབ་པ་བཀོད་པ་ཆེན་པོ་ཞེས་བྱ་བའི་ཆོས་ཀྱི་སྒོ་མངོན་དུ་བྱེད་པའོ། །བྱང་ཆུབ་སེམས་དཔས་ཆོས་ཀྱི་སྒོ་བཞི་པོ་དེ་དག་མངོན་དུ་བྱས་ནས། བཙུན་མོའི་འཁོར་ཐམས་ཅད་ཡོངས་སུ་སྨིན་པར་བྱ་བའི་ཕྱིར་དེའི་ཚེ། རྣམ་པ་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུས་བྱས་པས་བྱང་ཆུབ་སེམས་དཔའི་མཐུས་སིལ་སྙན་དང་གླུ་དབྱངས་དེ་དག་ལས་ཆོས་ཀྱི་སྒོ་རྣམ་པ་འདི་ལྟ་བུ་བརྒྱ་སྟོང་འབྱུང་བ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་བྱེད་དོ། །མོས་པ་རྒྱ་ཆེན་དང་ནི་བསམ་པ་དང་། །ལྷག་པའི་བསམ་དང་སྲོག་ཆགས་སྙིང་རྗེ་བས། །བྱང་ཆུབ་དམ་པའི་མཆོག་ཏུ་སེམས་སྐྱེ་ཞེས། །དེ་འདྲའི་སྒྲ་དག་སིལ་སྙན་རྣམས་ལས་བྱུང་། །དང་ཞིང་དད་དང་མོས་དང་གུས་པ་དང་། །ང་རྒྱལ་མེད་ཅིང་བླ་ལ་འདུད་པ་དང་། །འདྲི་དང་དགེ་བ་ཅི་ཞེས་ཚོལ་བ་དང་། །རྗེས་སུ་དྲན་པ་བསྒོམས་པའི་སྒྲ་བྱུང་ངོ་། །སྦྱིན་དང་དུལ་དང་སྡོམ་དང་ཚུལ་ཁྲིམས་སྒྲ། །
བཟོད་པའི་སྒྲ་དང་དེ་བཞིན་བརྩོན་འགྲུས་སྒྲ། །བསམ་གཏན་མངོན་པར་སྒྲུབ་དང་ཏིང་འཛིན་སྒྲ། །ཤེས་རབ་དང་ནི་ཐབས་ཀྱི་སྒྲ་ཡང་བྱུང་། །བྱམས་པའི་སྒྲ་དང་དེ་བཞིན་སྙིང་རྗེའི་སྒྲ། །དགའ་དང་བཏང་སྙོམས་མངོན་པར་ཤེས་པའི་སྒྲ། །བསྡུ་བའི་དངོས་པོ་བཞི་པོ་རྣམ་ངེས་པས། །སེམས་ཅན་ཡོངས་སུ་སྨིན་བྱའི་སྒྲ་ཡང་བྱུང་། །དྲན་པ་ཉེ་བར་གཞག་པ་རབ་དབྱེ་སྒྲ། །ཡང་དག་སྤོང་དང་དེ་བཞིན་རྫུ་འཕྲུལ་དང་། །དབང་པོ་ལྔ་དང་སྟོབས་ལྔ་རབ་དབྱེ་དང་། །བྱང་ཆུབ་ཡན་ལག་སྒྲ་ནི་སིལ་སྙན་བྱུང་། །ཡན་ལག་བརྒྱད་པའི་འཕགས་ལམ་མཆོག་དབྱེ་དང་། །ཞི་གནས་སྒྲ་དང་དེ་བཞིན་ལྷག་མཐོང་དང་། །མི་རྟག་པ་དང་སྡུག་བསྔལ་བདག་མེད་སྒྲ། །མི་སྡུག་སྒྲ་ཡང་སིལ་སྙན་རྣམས་ལས་བྱུང་། །འདོད་ཆགས་བྲལ་སྒྲ་དེ་བཞིན་དབེན་པའི་སྒྲ། །ཟད་པ་ཤེས་པའི་སྒྲ་དང་མི་སྐྱེ་སྒྲ། །འགོག་པའི་སྒྲ་དང་དེ་བཞིན་གནས་མེད་སྒྲ། །མྱ་ངན་འདས་པའི་སྒྲ་ཡང་སིལ་སྙན་བྱུང་། །རྫོགས་པའི་བྱང་ཆུབ་སེམས་དཔའི་མཐུ་ཡིས་ན། །སིལ་སྙན་དག་ལས་འདི་འདྲའི་སྒྲ་བྱུང་སྟེ། །སྒྲ་དེ་ཐོས་ནས་བུད་མེད་ཐམས་ཅད་ཀྱིས། །སེམས་ཅན་མཆོག་རབ་རྗེས་བསླབས་བྱང་ཆུབ་སྨོན། །དགེ་སློང་དག་དེ་ལྟར་བྱང་ཆུབ་སེམས་དཔའ་བཙུན་མོའི་འཁོར་གྱི་ནང་ན་འདུག་པས་བུད་མེད་བརྒྱད་ཁྲི་བཞི་སྟོང་དང་། ལྷའི་བུ་བརྒྱ་སྟོང་མང་པོ་གང་དག་དེར་འདུས་པར་གྱུར་པ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་པར་གྱུར་ཏོ། །དེ་ནས་བྱང་ཆུབ་སེམས་དཔའ་མངོན་པར་འབྱུང་བའི་དུས་ལ་བབ་པ་དང་། དགའ་ལྡན་གྱི་རིས་ཀྱི་ལྷའི་བུ་ཁྲེལ་ཡོད་པའི་ལྷ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་དེས་མཚན་མོ་མི་ཉལ་ཙམ་ན། ལྷའི་བུ་འབུམ་ཕྲག་སུམ་ཅུ་རྩ་གཉིས་ཀྱིས་བསྐོར་ཅིང་མདུན་དུ་བདར་ཏེ་བྱང་ཆུབ་སེམས་དཔའ་ལ་རིམ་གྲོ་བྱ་བའི་ཕྱིར་ཁང་བཟངས་ག་ལ་བ་དེར་སོང་སྟེ་ཕྱིན་ནས་ནམ་མཁའི་དཀྱིལ་ན་འདུག་སྟེ། བྱང་ཆུབ་སེམས་དཔའ་ལ་ཚིགས་སུ་བཅད་དེ་སྨྲས་པ། ཤི་འཕོ་བ་ནི་ཤིན་ཏུ་བསྟན། །སྐྱེས་བུ་སེང་གེས་ཚེ་ཡང་བསྟན། །བཙུན་མོའི་འཁོར་ཡང་བསྟན་པ་མཛད། །ཁྱོད་ཀྱིས་འཇིག་རྟེན་རྗེས་འཐུན་མཛད། །འཇིག་རྟེན་ཆོས་ནི་རྗེས་ཐོབ་པས། །ལྷ་མི་མང་
པོ་ཡོངས་སྨིན་མཛད། །མངོན་པར་འབྱུང་བའི་བློ་དགོངས་པའི། །དེ་ཡི་དུས་ལ་དེང་བབ་བོ། །མ་གྲོལ་བས་ནི་དགྲོལ་མི་ནུས། །ལོང་བས་ལམ་ཡང་སྟོན་མི་ནུས། །གྲོལ་བས་དགྲོལ་བར་བྱེད་པར་ནུས། །མིག་ལྡན་ལོང་བ་ལམ་སྟོན་ནུས། །སེམས་ཅན་གང་དག་འདོད་པས་འཁོལ། །ཁྱིམ་ནོར་བུ་དང་ཆུང་མ་ཆགས། །དེ་དག་ཁྱོད་ཀྱི་རྗེས་སློབ་ཅིང་། །མངོན་པར་འབྱུང་བར་བཞེད་པར་མཛོད། །དབང་ཕྱུག་འདོད་པས་རྩེ་བ་དང་། །གླིང་བཞི་རིན་ཆེན་བདུན་སྤངས་ཏེ། །ཁྱོད་ནི་མངོན་པར་འབྱུང་རིག་ནས། །ལྷ་མིར་བཅས་པའི་འཇིག་རྟེན་མོས། །ཁྱོད་ནི་འདོད་ལ་མི་དགྱེས་ཏེ། །བསམ་གཏན་བདེ་བས་གནས་མཛད་ཀྱང་། །ལྷ་མི་བརྒྱ་ཕྲག་མང་པོ་དག །གཉིད་ཀྱིས་ལོག་ལས་སད་པར་མཛད། །དར་ལ་བབ་འདི་ཤིན་ཏུ་འདའ། །རི་གཟར་འབབ་ཆུ་མགྱོགས་འགྲོ་བཞིན། །དར་ལ་བབ་པ་ཡལ་གྱུར་ནས། །མངོན་པར་འབྱུང་བ་མཛེས་མ་ལགས། །དེ་སླད་ཐོག་མར་གཞོན་པའི་ཚེ། །དར་བབ་དམ་པར་མངོན་བྱུང་སྟེ། །ཐུགས་དམ་ཉམས་འོག་ཆུད་མཛོད་ལ། །ལྷ་མི་དོན་ནི་མཛད་པའི་རིགས། །འདོད་པའི་ཡོན་ཏན་མི་ངོམས་ཏེ། །དཔེར་ན་ལན་ཚྭའི་ཆུ་དང་མཚུངས། །འཕགས་པ་རྡུལ་མེད་འཇིག་རྟེན་འདས། །ཤེས་རབ་གང་ལྡན་དེ་དག་ངོམས། །ཁྱོད་འདིར་རྒྱལ་པོ་ཟས་གཙང་དང་། །ཡུལ་འཁོར་རྣམས་ཀྱི་ཡིད་འོང་སྡུག །འདབ་མ་བརྒྱ་པའི་ཞལ་འདྲ་བ། །མངོན་པར་འབྱུང་བར་དགོངས་སུ་གསོལ། །ཉོན་མོངས་གདུང་བས་རབ་གདུངས་ཤིང་། །འབྱུང་མེད་བཅིང་བས་དམ་བཅིངས་རྣམས། །དཔའ་བོས་མྱུར་དུ་མཚུངས་མེད་པ། །ཐར་ལམ་ཞི་ལ་དགོང་དུ་གསོལ། །ཁྱོད་ནི་སྨན་པ་ཁམས་ལ་མཁས། །སེམས་ཅན་ཡུན་རིང་ན་རྣམས་ལ། །ཆོས་ཀྱི་སྨན་ནི་སྦྱོར་མཛད་དེ། །མྱ་ངན་འདས་བདེ་མྱུར་དུ་ཁོད། །མིག་མེད་མུན་པ་གཏི་མུག་གླགས། །ལྟ་བའི་དྲ་བས་དཀྲིས་པ་ཡི། ། ལྷ་རྣམས་དང་ནི་མི་ཡི་མིག །ཤེས་རབ་སྒྲོན་མ་མྱུར་དུ་སྦྱོངས། །བྱང་ཆུབ་ཐོབ་པར་བལྟ་བྱ་ཞིང་། །བླ་ན་མེད་པའི་ཆོས་མཉན་ཅེས། །ལྷ་དང་ལྷ་མིན་ཀླུ་དག་དང་། །གནོད་སྦྱིན་དྲི་ཟ་མང་པོ་སྡོད། །ཀླུ་ཡི་རྒྱལ་པོས་རང་གི་གནས། །ཁྱོད་ཀྱི་དཔལ་གྱིས་སྣང་བར་མཐོང་། །མཆོད་པ་དག་ནི་མཐའ་ཡས་
བགྱིད། །དེ་ཡི་བརྟུལ་ཞུགས་བསམ་པ་སྐོངས། །བྱང་ཆུབ་ཤིང་དྲུང་ཡིད་རྫོགས་ལ། །ལྷུང་བཟེད་བཞི་ནི་དབུལ་ལོ་ཞེས། །འཇིག་རྟེན་སྐྱོང་བཞི་སྡེར་བཅས་པ། །དེ་དག་ཁྱོད་ལ་སྡོད་ཅིང་མཆིས། །ཚངས་པ་རབ་ཏུ་ཞི་སྤྱོད་པ། །བྱམས་ལྡན་སྙིང་རྗེ་ཐོབ་པ་ཡང་། །བླ་མེད་འཁོར་ལོ་རབ་སྐོར་བར། །མི་དབང་གསོལ་སྙམ་སྡོད་ཅིང་མཆིས། །བྱང་ཆུབ་བསྙེན་བཀུར་བྱེད་པའི་ལྷ། །བྱང་ཆུབ་སྙིང་པོར་གནས་རྣམས་ཀྱང་། །བྱང་ཆུབ་རྣམ་པར་འཚང་རྒྱ་བ། །བལྟའོ་ཞེས་ཏེ་སྡོད་ཅིང་མཆིས། །བྱང་ཆུབ་སེམས་དཔའ་བཙུན་མོའི་ནང་། །བྱ་བ་སྟོན་པ་གཞན་ཡང་མཆིས། །དེ་དག་ཐོག་མར་ཁྱོད་གྱུར་མཛོད། །དེ་དག་འོག་ཏུ་ལུས་ས་རེ། །དབྱངས་སྙན་ཅིང་ནི་དབྱངས་འཇམ་པ། །མར་མེ་མཛད་ཀྱིས་ལུང་བསྟན་དགོངས། །ཡང་དག་དེ་བཞིན་མ་ནོར་བ། །རྒྱལ་བའི་སྒྲ་དབྱངས་བསྒྲག་ཏུ་གསོལ། །བསྐུལ་བའི་ལེའུ་སྟེ། བཅུ་གསུམ་པའོ།། །།