བཅུ་དྲུག་པ། གཟུགས་ཅན་སྙིང་པོ་འོངས་པའི་ལེའུ།
འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་གཅིག་པ། དགེ་སློང་དག་དེ་ལྟར་བྱང་ཆུབ་སེམས་དཔའི་བྱིན་གྱི་རླབས་ཀྱིས་འདུན་པས་རྒྱལ་པོ་ཟས་གཙང་མ་དང་། ཤཱཀྱའི་བུ་མོ་ས་འཚོ་མ་དང་།བཙུན་མོའི་འཁོར་ཐམས་ཅད་དང་། ཤཱཀྱའི་ཚོགས་ཐམས་ཅད་ཀྱི་མྱ་ངན་བསང་བའི་གཏམ་སྨྲས་སོ། ། དགེ་སློང་དག་དེ་ལྟར་བྱང་ཆུབ་སེམས་དཔས་ལྷའི་བུ་རྔོན་པའི་གཟུགས་ལྟ་བུ་ལ་གོས་ཀ་ཤི་པ་རྣམས་བྱིན་ནས་དེ་ལ་གོས་ངུར་སྨྲིག་རྣམས་བླངས་ཏེ། འཇིག་རྟེན་དང་འཐུན་པར་བྱ་བ་དང་། སེམས་ཅན་ལ་སྙིང་བརྩེ་བ་དང་། སེམས་ཅན་ཡོངས་སུ་སྨིན་པར་བྱ་བའི་ཕྱིར་བདག་ཉིད་རབ་ཏུ་བྱུང་ངོ་། །དེ་ནས་བྱང་ཆུབ་སེམས་དཔའ་བྲམ་ཟེའི་རིགས་ལྡན་གྱི་གནས་ག་ལ་བ་དེར་སོང་བ་དང་། དེས་བྱང་ཆུབ་སེམས་དཔའ་གནས་པར་བྱ་བ་དང་། ཟས་ལ་འགྲོན་དུ་བོས་སོ། །དེ་ནས་བྱང་ཆུབ་སེམས་དཔའ་བྲམ་ཟེ་པད་མའི་གནས་སུ་སོང་བ་དང་། དེས་ཀྱང་བྱང་ཆུབ་སེམས་དཔའ་གནས་པར་བྱ་བ་དང་། ཟས་ལ་འགྲོན་དུ་བོས་སོ། །དེ་ནས་བྲམ་ཟེའི་དྲང་སྲོང་ནམ་གྲུའི་གནས་སུ་སོང་བ་དང་། དེས་ཀྱང་དེ་བཞིན་དུ་བྱང་ཆུབ་སེམས་དཔའ་འགྲོན་དུ་བོས་སོ། །དེ་བཞིན་དུ་གདུལ་བའི་བེ་ཅོན་ཅན་གྱི་བུ་འོད་ལྡན་གྱིས་ཀྱང་བྱང་ཆུབ་སེམས་དཔའ་འགྲོན་དུ་བོས་ཏེ། དགེ་སློང་དག་དེ་ལྟར་བྱང་ཆུབ་སེམས་དཔའ་རིམ་གྱིས་གྲོང་ཁྱེར་ཆེན་པོ་ཡངས་པ་ཅན་དུ་ཕྱིན་ཏོ། །དེའི་ཚེ་སྒྱུ་རྩལ་ཤེས་ཀྱི་བུ་རིང་འཕུར་ཉན་ཐོས་ཀྱི་དགེ་འདུན་ཆེན་པོ་དང་། སློབ་མ་སུམ་བརྒྱ་དང་ལྷན་ཅིག་ཏུ། གྲོང་ཁྱེར་ཡངས་པ་ཅན་དུ་གནས་བཅས་ཤིང་གནས་ཏེ། དེ་སློབ་མ་དག་ལ་ཅིའང་མེད་པའི་སྐྱེ་མཆེད་ཀྱི་བརྟུལ་ཞུགས་དང་འཐུན་པའི་ཆོས་སྟོན་པ་དེས་བྱང་ཆུབ་སེམས་དཔའ་རྒྱང་
རིང་པོ་ནས་འོང་བ་མཐོང་ནས་ངོ་མཚར་དུ་གྱུར་ཏེ་སློབ་མ་རྣམས་ལ་སྨྲས་པ། ཀྱེ་འདིའི་གཟུགས་ལ་ལྟོས་ཤིག །དེ་དག་གིས་སྨྲས་པ། དེ་བཞིན་དུ་དེ་ལ་བལྟ་བར་བགྱིས་ཏེ་འདི་ནི་ཡ་མཚན་ཆེའོ། །དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ། སྒྱུ་རྩལ་ཤེས་ཀྱི་བུ་རིང་འཕུར་ལ་འདི་སྐད་ཅེས་སྨྲས་སོ། །ཀྱེ་སྒྱུ་རྩལ་ཤེས་ཀྱི་བུ་རིང་འཕུར་ཁྱོད་ལས་བདག་གིས་ཚངས་པར་སྤྱད་པ་སྤྱོད་དོ། །དེས་སྨྲས་པ། ཀྱེ་གཽ་ཏ་མ་དད་པའི་རིགས་ཀྱི་བུས་གང་ལ་སྤྱད་ན་ཚེགས་ཆུང་ངུས་ཀུན་ཤེས་པ་ཐོབ་པར་འགྱུར་བའི་ཆོས་བསྟན་པ་དེ་ལྟ་བུ་ལ་སྤྱོད་ཅིག །དགེ་སློང་དག་ངས་འདི་སྙམ་དུ་སེམས་ཏེ། ང་ལ་མོས་པ་ཡང་ཡོད། ང་ལ་བརྩོན་འགྲུས་ཀྱང་ཡོད། དྲན་པ་ཡང་ཡོད། ཏིང་ངེ་འཛིན་ཀྱང་ཡོད། ཤེས་རབ་ཀྱང་ཡོད་ཀྱིས། ཆོས་དེ་ཉིད་ཐོབ་པར་བྱ་བ་དང་། མངོན་དུ་བྱ་བའི་ཕྱིར་བདག་གཅིག་པུ་བག་ཡོད་པ་དང་། བརྟུན་པ་དང་དབེན་པར་གནས་པར་བྱའོ་སྙམ་ནས། དགེ་སློང་དག་དེ་ནས་ང་གཅིག་པུ་བག་ཡོད་པ་དང་། བརྟུན་པ་དང་། དབེན་པར་གནས་ནས། ཚེགས་ཆུང་ངུས་ཆོས་དེ་ཁོང་དུ་ཆུད་ཅིང་མངོན་དུ་གྱུར་ཏོ། །དགེ་སློང་དག་དེ་ནས་ང་སྒྱུ་རྩལ་ཤེས་ཀྱི་བུ་རིང་འཕུར་ག་ལ་བ་དེར་སོང་སྟེ། འདི་སྐད་ཅེས་སྨྲས་སོ། །ཀྱེ་རིང་འཕུར་ཁྱོད་ཀྱིས་ཆོས་འདི་ཙམ་ཞིག་ཁོང་དུ་ཆུད་ཅིང་མངོན་དུ་གྱུར་ཏམ། དེས་སྨྲས་པ། ཀྱེ་གཽ་ཏ་མ་དེ་དེ་བཞིན་ནོ། །ངས་སྨྲས་པ། ཀྱེ་ཁོ་བོས་ཀྱང་ཆོས་དེ་མངོན་དུ་བྱས་ཤིང་ཁོང་དུ་ཆུད་དོ། །དེས་སྨྲས་པ། ཀྱེ་གཽ་ཏ་མ་དེ་བས་ན་ཆོས་གང་ཁོ་བོས་ཤེས་པ་དེ་ཁྱོད་ཀྱིས་ཤེས་ལ་གང་ཁྱོད་ཀྱིས་ཤེས་པ་དེ་ཡང་ཁོ་བོས་ཤེས་ཏེ། དེ་བས་ན་བདག་ཅག་གཉི་གས་སློབ་མའི་ཚོགས་འདི་ལ་བསྟན་ཏོ། །དགེ་སློང་དག་དེ་ནས་སྒྱུ་རྩལ་ཤེས་ཀྱི་བུ་རིང་འཕུར་གྱིས་ང་ལ་མཆོད་པ་དམ་པས་མཆོད་དེ། ང་སློབ་མ་རྣམས་ལ་ཡང་དོན་འཐུན་པར་བྱེད་དུ་བཅུག་གོ །དགེ་སློང་དག་ངས་འདི་སྙམ་དུ་བསམས་ཏེ། རིང་འཕུར་གྱི་ཆོས་འདི་ནི་ངེས་པར་འབྱུང་བ་མ་ཡིན་ཏེ། དེ་བྱེད་པ་ཡང་དག་པར་སྡུག་བསྔལ་ཟད་པར་ངེས་པར་འབྱུང་བ་མ་ཡིན་གྱིས། བདག་གིས་དེ་ལས་ལྷག་པ་ཞིག་བཙལ་ཞིང་
སྤྱད་དོ་སྙམ་མོ། །དགེ་སློང་དག་དེ་ནས་ང་ཇི་སྲིད་དགའ་བའི་བར་དུ་གྲོང་ཁྱེར་ཡངས་པ་ཅན་དུ་གནས་ནས། ཡུལ་མ་ག་དྷཱར་ཡུལ་རྒྱུ་ཞིང་ཡུལ་མ་ག་དྷཱའི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་སྟེ། རིའི་རྒྱལ་པོ་སྐྱ་བོ་ག་ལ་བ་དེར་སོང་ནས། རིའི་རྒྱལ་པོ་སྐྱ་བོ་དེའི་ངོས་ལ་ང་གཅིག་པུ་གཉིས་སུ་མེད་ཅིང་གྲོགས་མེད་པར་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་བསྲུངས་ཤིང་གནས་སོ། །དེ་ནས་ང་ནང་པར་ཤམ་ཐབས་དང་ཆོས་གོས་བགོས། ལྷུང་བཟེད་ཐོགས་ཏེ་ཆུ་དྲོན་ཅན་གྱི་སྒོ་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་འགྲོ་བ་དང་། ལྡོག་པ་དང་། མདུན་དུ་ལྟ་བ་དང་། གཡས་གཡོན་དུ་ལྟ་བ་དང་། བསྐུམ་པ་དང་བརྐྱང་བ་མཛེས་པ་དང་། སྣམ་སྦྱར་དང་། ཐང་བ་དང་། ལྷུང་བཟེད་དང་། ཆོས་གོས་འཛིན་པ་མཛེས་པ་དང་། དབང་པོ་མ་གཡེངས་པ་དང་། སྤྲུལ་པ་བཞིན་དུ་ཡིད་ཕྱི་རོལ་ཏུ་མ་བྱུང་བ་དང་། འབྲུ་མར་གྱིས་གང་བའི་སྣོད་ཐོགས་པ་བཞིན་གཉའ་ཤིང་གང་ཙམ་དུ་ལྟ་ཞིང་བསོད་སྙོམས་ཀྱི་ཕྱིར་ཞུགས་སོ། །དེ་ནས་རྒྱལ་པོའི་ཁབ་ཀྱི་མི་རྣམས་ཀྱིས་ང་མཐོང་ནས་ངོ་མཚར་དུ་གྱུར་ཏེ། ཅི་འདི་ཚངས་པ་ཡིན་ནམ། ལྷའི་དབང་པོ་བརྒྱ་བྱིན་ནས། འོན་ཏེ་རྣམ་ཐོས་ཀྱི་བུའམ། འོན་ཏེ་རིའི་ལྷ་འགའ་ཞིག་ཡིན་ནམ་སྙམ་མོ། །དེ་ལ་འདི་སྐད་ཅེས་བྱ་སྟེ། དེ་ནས་གཟི་བརྗིད་མཐའ་ཡས་དྲི་མེད་ལྡན། །བྱང་ཆུབ་སེམས་དཔའ་བདག་ཉིད་རབ་བྱུང་སྟེ། །སེམས་ནི་ཞི་ཞིང་སྤྱོད་ལམ་རབ་དུལ་བར། །རི་ཡི་རྒྱལ་པོ་སྐྱ་བོའི་ངོས་ལ་གནས། །བྱང་ཆུབ་སེམས་དཔས་ནམ་ནངས་ཤེས་ནས་ནི། །མཆོག་ཏུ་བལྟ་ན་མཛེས་པར་ཤམ་ཐབས་བགོས། །ལྷུང་བཟེད་ཐོགས་ཏེ་དམའ་བའི་ཡིད་ཀྱིས་སུ། །དེ་ནི་རྒྱལ་པོའི་ཁབ་ཏུ་བསོད་སྙོམས་ཞུགས། །གསེར་གྱི་ས་ལེ་སྦྲམ་བཞིན་རབ་དུལ་ལ། །སུམ་ཅུ་རྩ་གཉིས་མཚན་གྱི་གོ་བགོས་པ། །སྐྱེས་པའི་ཚོགས་དང་བུད་མེད་ཀྱིས་མཐོང་ན། ། སུ་ཡང་ལྟ་བས་ངོམས་པར་མི་འགྱུར་རོ། །སྲང་དག་རིན་ཆེན་གོས་དང་འབྲུས་ཀྱང་བརྒྱན། །གང་གི་མཐུས་ནི་གྲོང་ཁྱེར་ཀུན་མཛེས་པའི། །སྔོན་ཆད་མ་མཐོང་སེམས་ཅན་འདི་སུ་ཞེས། །སྐྱེ་བོ་སེལ་ཅིང་དེ་ཡི་ཕྱི་བཞིན་འབྲང་། །བུད་མེད་སྟོང་དག་ཁང་པའི་སྟེང་
འདུག་ཅིང་། །དེ་བཞིན་སྒོ་དང་དེ་བཞིན་སྐར་ཁུང་དང་། །སྲང་དག་བཀང་སྟེ་ཁྱིམ་ནི་སྟོང་བྱས་ནས། །དེ་དག་ལས་གཞན་མེད་པར་མི་མཆོག་ལྟ། །སྐྱེས་བུ་མཆོག་གི་གཟུགས་ལ་ལྟ་བའི་ཚེ། །ཉོ་དང་འཚོང་བ་དག་ཀྱང་མི་བྱེད་ཅིང་། །ཆང་དད་ཅན་ཡང་ཆང་ནི་མི་འཐུང་ལ། །ཁྱིམ་དང་སྲང་ན་འདུག་པར་མི་དགའོ། །རིངས་པར་མི་ཞིག་རྒྱལ་པོའི་ཁབ་སོང་སྟེ། །དེ་དགའ་རྒྱལ་པོ་གཟུགས་ཅན་སྙིང་པོ་ལ། །གྲོང་འདིར་ཚངས་པ་བདག་ཉིད་བསོད་སྙོམས་སྤྱོད། །ལྷ་ཁྱོད་བརྙེས་པ་དམ་པ་བརྙེས་ཞེས་ཟེར། །ཁ་ཅིག་བརྒྱ་བྱིན་ལྷ་ཡི་རྒྱལ་ཞེས་ཟེར། །གཞན་དག་འཐབ་བྲལ་ལྷ་ཡི་བུ་ཞེས་ཟེར། །དེ་བཞིན་ཡོངས་སུ་དགའ་ལྡན་འཕྲུལ་དགའ་དང་། །གཞན་དག་རབ་འཕྲུལ་ལྷ་ཡི་བུ་ཞེས་ཟེར། །ཁ་ཅིག་ཉི་མ་ཟླ་བ་དེ་བཞིན་དུ། །སྒྲ་གཅན་སྟོབས་ལྡན་ཐགས་བཟངས་རིས་ཞེས་ཟེར། །ཁ་ཅིག་དག་ནི་ཚིག་ཀྱང་འདི་སྐད་དུ། །རི་རྒྱལ་སྐྱ་ལ་འདུག་པ་འདི་ཡིན་ཟེར། །རྒྱལ་པོས་ཚིག་ནི་དེ་དག་ཐོས་གྱུར་ནས། །ཡིད་ནི་མཆོག་ཏུ་དགའ་ཞིང་སྐར་ཁུང་འདུག །ཤིན་ཏུ་སྦྱངས་པའི་གསེར་ལྟར་དཔལ་འབར་བ། །བྱང་ཆུབ་སེམས་དཔའ་སེམས་ཅན་མཆོག་མཐོང་ངོ་། །རྒྱལ་པོ་གཟུགས་ཅན་སྙིང་པོས་མི་དེ་ལ། །བསོད་སྙོམས་བྱིན་ལ་གར་སོང་ལྟོས་ཤེས་བསྒོ། །རི་ཡི་མཆོག་ལ་དེ་ནི་སོང་མཐོང་ནས། །ཁ་ཅིག་རི་ཡི་ངོས་ལ་དེ་མཆིས་སྨྲས། །གཟུགས་ཅན་སྙིང་པོས་ནམ་ནངས་ཞེས་ནས་ནི། །མི་དབང་སྐྱེ་བོ་མང་པོས་ཡོངས་བསྐོར་ཏེ། །རི་ཡི་རྒྱལ་པོ་སྐྱ་བོའི་དྲུང་དུ་སོང་། །རི་དེ་དཔལ་ནི་རབ་ཏུ་འབར་བར་མཐོང་། །བཞོན་པ་ལས་ནི་བབས་ཏེ་རྐང་གིས་སོང་། །ཇི་ལྟར་ལྷུན་པོ་བཞིན་དུ་མི་གཡོ་ཞིང་། །རྩྭ་བཏིང་སྟེང་ན་སྐྱིལ་མོ་ཀྲུང་འདུག་པའི། །བྱང་ཆུབ་སེམས་དཔའ་མཆོག་ཏུ་གུས་པས་མཐོང་། །རྒྱལ་པོས་རྐང་པར་མགོ་བོས་ཕྱག་བྱས་ཏེ། །རྣམ་པ་སྣ་ཚོགས་དག་གི་གཏམ་བྱས་ནས། །ཁྱོད་ལ་རྒྱལ་སྲིད་ཀུན་གྱི་ཕྱེད་སྦྱིན་གྱིས། །འདོད་པའི་ཡོན་ཏན་འདི་སྤྱོད་མ་འཕྱན་སྨྲས། །བྱང་ཆུབ་སེམས་དཔས་འཇམ་པོའི་ཚིག་སྨྲས་པ། །ས་ཡི་བདག་པོ་ཡུན་རིངས་ཚེ་སྲུངས་ཤིག །ཁོ་བོས་རྒྱལ་སྲིད་སྡུག་པ་བོར་ནས་སུ། །རེ་བ་མེད་པར་ཞི་ཕྱིར་རབ་ཏུ་བྱུང་། །
གཞོན་ནུ་ཐོར་བུ་དར་ལ་བབ་དང་ལྡན། །ལུས་ཀྱི་ཁ་དོག་མཛེས་ཤིང་ཤུགས་ལྡན་ན། །ནོར་མང་དག་དང་བུད་མེད་ཚོགས་བཞེས་ཏེ། །བདག་གི་རྒྱལ་སྲིད་འདིར་བཞུགས་འདོད་པ་སྤྱོད། །མ་ག་དྷཱའི་རྒྱལ་པོས་བྱང་ཆུབ་སེམས་དཔའ་ལ་སྨྲས་པ། བདག་ཁྱོད་མཐོང་བས་མཆོག་ཏུ་དགའ། །བདག་གི་རྒྱལ་སྲིད་ཀུན་གྱི་གྲོགས་མཛོད་ཅིག །བདག་ནི་ཁྱོད་ལ་མངའ་འབུལ་འདོད་པ་སྤྱོད། །ནགས་ཚལ་སྟོང་པ་དག་ཏུ་མ་བཞུགས་ཤིག །སླན་ཆད་ས་གནས་རྩྭ་སྟེང་མ་བཞུགས་ཤིག །ཁྱོད་ཀྱི་སྐུ་ནི་མཆོག་ཏུ་རབ་ཏུ་གཞོན། །བདག་གི་རྒྱལ་སྲིད་འདིར་བཞུགས་འདོད་པ་སྤྱོད། །བྱང་ཆུབ་སེམས་དཔས་འཇམ་ཞིང་གྱ་གྱུ་མེད། །དགའ་འགྱུར་ཕན་ཞིང་སྙིང་བརྩེའི་ཚིག་སྨྲས་པ། །རྒྱལ་པོ་ཁྱོད་ནི་རྟག་ཏུ་བཀྲ་ཤིས་གྱུར། །ཁོ་བོ་འདོད་པའི་ཡོན་ཏན་མི་འདོད་དོ། །འདོད་པ་དུག་འདྲ་ཉེས་པ་མཐའ་ཡས་ལྡན། །སེམས་ཅན་དམྱལ་དང་ཡི་དགས་དུད་འགྲོར་ལྟུང་། །མཁས་པས་སྨད་ཅིང་འདོད་པས་འཕགས་མ་ཡིན། །ཁོ་བོས་ངར་སྣབས་རུལ་པ་བཞིན་དུ་བོར། །འདོད་པ་ཤིང་གི་འབྲས་བུ་བཞིན་དུ་ལྟུང་། །ཇི་ལྟར་སྤྲིན་དང་ཆར་པ་བཞིན་དུ་འགྲོ། །མི་བརྟན་འགྱུར་ལ་ཇི་ལྟར་རླུང་བཞིན་འགྲོ། །དགེ་བ་ཐམས་ཅད་རྣམ་པར་འཐོར་ཞིང་སླུ། །དེ་བཞིན་འདོད་པ་མི་རྙེད་ཕྱིར་ཡང་གདུང་། །རྙེད་དུ་ཟིན་ཀྱང་ཆོག་པར་འཛིན་མི་འགྱུར། །གང་ཚེ་དབང་མེད་མ་རུང་རབ་གྱུར་པ། །དེ་ཚེ་འདོད་པ་སྡུག་བསྔལ་དྲག་ཆེན་བསྐྱེད། །རྒྱལ་པོ་ལྷ་ཡི་འདོད་པ་གང་ཡིན་དང་། །མི་ཡི་འདོད་པ་བཟང་པོ་གང་ཡིན་པའི། །འདོད་པ་ཐམས་ཅད་མི་གཅིག་གིས་ཐོབ་ཀྱང་། །དེ་ལ་ཆོག་པ་མེད་དེ་ཡང་ཚོལ་ལོ། །རྒྱལ་པོ་གང་དག་ཞི་ཞིང་དུལ་གྱུར་པ། །འཕགས་པ་ཟག་མེད་ཆོས་ཀྱིས་འདུ་ཤེས་གང་། །ཤེས་རབ་མཁས་པས་ཆོག་པ་དེ་ལེགས་ཆོག །འདོད་པའི་ཡོན་ཏན་ཆོག་པ་ཅུང་ཟད་མེད། །རྒྱལ་པོ་འདོད་པ་དག་ལ་བསྟེན་བྱས་ཤིང་། །སྔན་ཆད་འདུས་བྱས་པ་ཡི་མཐའ་མ་མེད། །ཇི་ལྟར་མི་དག་ལན་ཚྭའི་ཆུ་འཐུངས་བཞིན། །འདོད་པ་བསྟེན་ན་ཕྱིར་ཞིང་སྲེད་པ་འཕེལ། །རྒྱལ་པོ་ལུས་
ལ་ཡང་ལྟོས་དེ་མི་བརྟན། །སྙིང་པོ་མེད་དེ་སྡུག་བསྔལ་འཁྲུལ་འཁོར་བཞིན། །བུ་ག་དགུ་ཡི་སྒོ་ནས་རྟག་ཏུ་འཛག །རྒྱལ་པོ་ཁོ་བོ་འདོད་པའི་འདོད་ཆགས་མེད། །ཁོ་བོས་འདོད་པ་མང་དང་དེ་བཞིན་དུ། །བལྟ་ན་སྡུག་པའི་བུད་མེད་སྟོང་བོར་ཏེ། །མཆོག་ཞི་བྱང་ཆུབ་དམ་པ་ཐོབ་འདོད་ནས། །ཁོ་བོ་སྲིད་པ་མི་དགའ་ངེས་པར་འབྱུང་། །་མ་ག་དྷཱ་ཡི་རྒྱལ་པོས་དེར་སྨྲས་པ། །དགེ་སློང་ཕྱོགས་ནི་གང་དང་གང་ནས་བྱོན། །གང་དུ་ཁྱོད་སྐྱེས་ཡབ་ཡུམ་གང་ན་བཞུགས། །རྒྱལ་རིགས་ལགས་སམ་བྲམ་ཟེའམ་རྒྱལ་པོ་ལགས། །དགེ་སློང་ཁུར་གྱི་འདུ་ཤེས་མེད་ན་གསུངས། །་བྱང་ཆུབ་སེམས་དཔས་དེ་ལ་འདི་སྐད་སྨྲས། །རྒྱལ་པོ་ཤཱཀྱ་རྣམས་ཀྱི་སེར་སྐྱའི་གྲོང་། །མཆོག་ཏུ་འབྱོར་ཅིང་རྒྱས་པ་ཐོས་གྱུར་ཏམ། །ཁོ་བོའི་ཕ་ཡི་མིང་ནི་ཟས་གཙང་ཡིན། །ཡོན་ཏན་འདོད་པས་ཁོ་བོ་དེར་རབ་བྱུང་། །་མ་ག་དྷཱ་ཡི་རྒྱལ་པོས་འདི་སྐད་སྨྲས། །ཁྱོད་མཐོང་ལེགས་པར་མཐོང་སྟེ་ལེགས་པ་ལགས། །གང་ལས་ཁྱོད་སྐྱེས་བདག་ཀྱང་དེའི་སློབ་མ། །འདོད་ཆགས་བྲལ་བ་འདོད་པར་སྤྱན་དྲངས་པ། །ཐུགས་ནས་བདག་ལ་བཟོད་པ་མཛད་དུ་གསོལ། །གང་ཚེ་ཁྱོད་ཀྱིས་བྱང་ཆུབ་བརྙེས་གྱུར་ཚེ། །ཆོས་རྗེས་བདག་ལ་ཆོས་ཀྱི་བགོ་བཤའ་མཛོད། །རང་བྱུང་བདག་གི་ཡུལ་ན་བཞུགས་པ་ནི། །བདག་གིས་མཆོག་ཏུ་རྙེད་པ་རབ་རྙེད་དོ། །དེ་ནས་ཀྱང་ནི་རྐང་པར་ཕྱག་བྱས་ཏེ། །རྒྱལ་པོས་ཤིན་ཏུ་གུས་པར་བསྐོར་བྱས་ནས། །མི་དབང་རང་གི་སྐྱེ་བོས་ཡོངས་བསྐོར་ཏེ། །སླར་ཡང་རྒྱལ་པོའི་ཁབ་ཏུ་ཞུགས་པར་གྱུར། །འཇིག་རྟེན་མགོན་པོ་མ་ག་དྷཱ་ཡི་གྲོང་ཞུགས་ཏེ། །ཇི་སྲིད་འདོད་པར་ཞི་བའི་ཡིད་ཀྱིས་འདུག །ལྷ་དང་མི་རྣམས་ཀྱི་ནི་དོན་བྱས་ནས། །མི་དབང་ནཻ་རན་ཛ་ནའི་ཆུ་འགྲམ་སོང་། །གཟུགས་ཅན་སྙིང་པོ་འོངས་པའི་ལེའུ་ཞེས་བྱ་བ་སྟེ་བཅུ་དྲུག་པའོ།། །།