ཉི་ཤུ་པ། བྱང་ཆུབ་ཀྱི་སྙིང་པོར་བཀོད་པའི་ལེའུ།
འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་གསུམ་པ། དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་དང་། འདོད་པ་ན་སྤྱོད་པའི་རིས་དྲུག་གི་ལྷ་རྣམས་བྱང་ཆུབ་སེམས་དཔའ་ལ་བར་ཆད་བྱེད་པ་མི་འབྱུང་གྲང་སྙམ་སྟེ། ཤར་ཕྱོགས་ལོགས་སུ་གནས་པར་གྱུར་ཏོ། །དེ་བཞིན་དུ་ལྷོ་དང་ནུབ་དང་། བྱང་ཕྱོགས་ཀྱང་ལྷ་རྣམས་ཀྱིས་ཡོངས་སུ་བསྲུངས་པར་གྱུར་ཏོ། །དགེ་སློང་དག་དེ་ལྟར་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་དེའི་ཚེ་བྱང་ཆུབ་སེམས་དཔའ་སྐུལ་བ་ཞེས་བྱ་བའི་འོད་བྱུང་ནས་འོད་དེས་ཕྱོགས་བཅུ་ཀུན་ཏུ་གྲངས་མེད་དཔག་ཏུ་མེད་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་ཐམས་ཅད་སྣང་བར་གྱུར་ཏོ། །དེ་ནས་ཤར་ཕྱོགས་ན་དེ་བཞིན་གཤེགས་པ་དྲི་མ་མེད་པའི་འོད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་དྲི་མ་མེད་པར་བྱང་ཆུབ་སེམས་དཔའ་སེམས་དཔའ་ཆེན་པོ་བདེ་བ་བཀོད་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དེའི་ཚེ་རྫུ་འཕྲུལ་གྱི་མངོན་པར་འདུ་བྱ་བ་དེ་ལྟ་བུ་བྱས་ཏེ། རྫུ་འཕྲུལ་མངོན་པར་འདུ་བྱ་བ་དེ་བྱས་པས་ཕྱོགས་བཅུར་ནམ་མཁའི་མཐས་གཏུགས་པའི་སངས་རྒྱས་ཀྱི་ཞིང་ཐམས་ཅད་འཁོར་གྱི་ཁྱམས་བཻ་དཱུཪྱ་སྔོན་པོ་དག་ལས་བྱས་པ་ཞིག་ཏུ་བསྟན་ཏོ། །འགྲོ་བ་ལྔར་སྐྱེས་པའི་སེམས་ཅན་ཐམས་ཅད་ཀྱི་མདུན་དུ་ཡང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པར་བསྟན་ཏོ། །སེམས་ཅན་དེ་དག་ཀྱང་ཕན་ཚུན་དུ་སོར་མོ་གཅིག་གིས་བྱང་ཆུབ་སེམས་དཔའ་སྟོན་ཅིང་སེམས་ཅན་ཚུལ་དུ་ཤིས་པའི་གཟུགས་འདི་ལྟ་བུ་དང་ལྡན་པ་འདི་སུ་ཞིག །འདི་ལྟར་རྣམ་པར་མཛེས་
པའི་སེམས་ཅན་འདི་སུ་ཞིག་ཅེས་འཛེར་ཏོ། །སེམས་ཅན་དེ་དག་གི་མདུན་དུ་བྱང་ཆུབ་སེམས་དཔའ་དེས་བྱང་ཆུབ་སེམས་དཔའ་རྣམས་ཀྱང་སྤྲུལ་ཏེ། དེ་ན་བྱང་ཆུབ་སེམས་དཔའི་གཟུགས་དེ་དག་གིས་ཚིགས་སུ་བཅད་པ་འདི་སྨྲས་སོ། །ཅི་ཡང་མེད་པའི་འདོད་ཆགས་ཞེ་སྡང་རྙོག་པ་གང་ཡིན་བག་ཆགས་བཅས་བཏོན་པ། །གང་གིས་ལུས་ལས་འོད་ཕྱུང་ཕྱོགས་བཅུའི་འོད་རྣམས་ཐམས་ཅད་འོད་ནི་མེད་པར་བྱས། །གང་གིས་བསོད་ནམས་ཏིང་འཛིན་ཡེ་ཤེས་ཚོགས་ནི་བསྐལ་པ་མང་པོར་ཀུན་སྤེལ་བ། ། ཤཱཀྱ་ཐུབ་པ་ཐུབ་པ་ཆེན་པོ་དམ་པ་འདི་ནི་ཕྱོགས་རྣམས་ཀུན་ཏུ་མཛེས། །དེ་ནས་ལྷོ་ཕྱོགས་ན་དེ་བཞིན་གཤེགས་པ་རིན་ཆེན་འོད་འཕྲོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་བཀོད་པར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་གདུགས་བརྩེགས་པ་ཀུན་ཏུ་སྟོན་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རིན་པོ་ཆེའི་གདུགས་གཅིག་གིས་ཐམས་ཅད་དང་ལྡན་པའི་འཁོར་གྱི་ཁྱམས་དེ་བཀབ་བོ། །དེ་ན་བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དག་ཕན་ཚུན་འདི་སྐད་འཛེར་ཏེ། གང་གི་ཕྱིར་རིན་པོ་ཆེའི་གདུགས་བཀོད་པ་རྣམ་པ་འདི་ལྟ་བུ་འདི་སྣང་བར་གྱུར་པ་འདི་སུའི་འབྲས་བུ་ཞེས་འཛེར་ཏོ། །དེ་ནས་རིན་པོ་ཆེའི་གདུགས་དེ་ལས་ཚིགས་སུ་བཅད་པ་འདི་བྱུང་ངོ་། གང་གིས་རིན་པོ་ཆེ་དང་སྤོས་གདུགས་སྟོང་ཕྲག་བྱེ་བ་ཁྲག་ཁྲིག་དག །བྱམས་པའི་ཡིད་ཀྱིས་དོ་ཟླ་མེད་པར་བཞུགས་དང་མྱ་ངན་འདས་ལ་ཕུལ། །དེ་ཡིས་མཚན་མཆོག་ལྡན་པ་ཕན་མཛད་སྲེད་མེད་བུ་ཡི་མཐུ་ལྡན་པ། །ཡོན་ཏན་མངའ་བ་བྱང་ཆུབ་ཤིང་དྲུང་གཤེགས་པ་དེ་ལ་མཆོད་པ་བྱས། །དེ་ནས་ནུབ་ཕྱོགས་ན་དེ་བཞིན་གཤེགས་པ་མེ་ཏོག་གི་ཕྲེང་བ་ནགས་ཚལ་གྱི་ཕྲེང་བ་མེ་ཏོག་ཀུན་ཏུ་རྒྱས་པ་མངོན་པར་མཁྱེན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་མེ་ཏོག་ཙམ་པ་ཀའི་ཁ་དོག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོའི་དྲ་བ་ཅན་ཞེས་བྱ་བ་འོད་
དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་རིན་པོ་ཆེའི་དྲ་བ་གཅིག་གིས་ཐམས་ཅད་དང་ལྡན་པའི་འཁོར་གྱི་ཁྱམས་དེ་བཀབ་བོ། །དེ་ན་ཕྱོགས་བཅུའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དག་ཕན་ཚུན་དུ་འདི་སྐད་འཛེར་ཏེ། འོད་ཀྱི་བཀོད་པ་རྣམ་པ་འདི་ལྟ་བུ་འདི་སུའི་ཡིན་ཞེས་འཛེར་ཏོ། །དེ་ནས་རིན་པོ་ཆེའི་དྲ་བ་དེ་ལས་ཚིགས་སུ་བཅད་པ་འདི་བྱུང་ངོ་། །རིན་ཆེན་འབྱུང་གནས་འཇིག་རྟེན་གསུམ་དགའ་རིན་ཆེན་ཏོག །རིན་ཆེན་དམ་པ་རིན་ཆེན་གྲགས་པ་དེ་ཆོས་དགྱེས། །དཀོན་མཆོག་གསུམ་པོ་རྒྱུན་མི་འཆད་པའི་བརྩོན་འགྲུས་བརྙེས། །བྱང་ཆུབ་མཆོག་བརྙེས་འགྱུར་ཏེ་དེ་ཡི་མཆོད་པ་འདི། །དེ་ནས་བྱང་ཕྱོགས་ན་དེ་བཞིན་གཤེགས་པ་ཉི་ཟླ་ཟིལ་དུ་རླག་པར་བྱེད་པའི་འོད་དང་ལྡན་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཉི་མ་འཁོར་བར་བྱང་ཆུབ་སེམས་དཔའ་སེམས་དཔའ་ཆེན་པོ་བཀོད་པའི་རྒྱལ་པོ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཇི་སྙེད་པ་དེ་སྙེད་འཁོར་གྱི་ཁྱམས་དེར་ཀུན་ཏུ་བསྟན་ཏོ། །དེ་ན་བྱང་ཆུབ་སེམས་དཔའ་ཁ་ཅིག་འདི་སྐད་འཛེར་ཏེ། བཀོད་པ་རྣམ་པ་འདི་ལྟ་བུ་འདི་སུའི་ཡིན་ཞེས་འཛེར་ཏོ། །དེ་ནས་བཀོད་པ་དེ་དག་ཐམས་ཅད་ལས་ཚིགས་སུ་བཅད་པ་འདི་བྱུང་ངོ་། །གང་གིས་བསོད་ནམས་ཡེ་ཤེས་ཤིན་ཏུ་མང་པོས་ལུས་ནི་རྣམ་སྦྱངས་ཤིང་། །གང་གིས་བརྟུལ་ཞུགས་དཀའ་ཐུབ་དག་དང་བདེན་པའི་ཆོས་ཀྱིས་ངག་སྦྱངས་ལ། །གང་གིས་ཁྲེལ་ཡོད་མོས་པ་བྱམས་དང་དེ་བཞིན་སྙིང་རྗེས་སེམས་སྦྱངས་པ། །དེ་ནི་ཤིང་རྒྱལ་དྲུང་གཤེགས་ཤཱཀྱ་ཁྱུ་མཆོག་དེ་ལ་མཆོད་པ་བྱེད། །དེ་ནས་ཤར་ལྷོའི་ཕྱོགས་མཚམས་
ན་དེ་བཞིན་གཤེགས་པ་ཡོན་ཏན་གྱི་རྒྱལ་པོ་སྣང་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཡོན་ཏན་གྱི་འབྱུང་གནས་སུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱི་བློ་གྲོས་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་འཁོར་གྱི་ཁྱམས་དེར་ཡོན་ཏན་གྱི་བཀོད་པ་ཐམས་ཅད་དང་ལྡན་པའི་ཁང་པ་བརྩེགས་པ་མངོན་པར་སྤྲུལ་ཏེ་ཁང་པ་བརྩེགས་པ་དེ་ལས་ཚིགས་སུ་བཅད་པ་འདི་བྱུང་ངོ་། །གང་གི་ཡོན་ཏན་དག་གིས་ལྷ་དང་ལྷ་མིན་དང་། །གནོད་སྦྱིན་ལྟོ་འཕྱེ་ཆེ་དག་རྟག་ཏུ་ཡོན་ཏན་བགོས། །ཡོན་ཏན་ཅན་དེ་ཡོན་ཏན་ལྡན་པའི་རྒྱལ་རིགས་སྐྱེས། །ཡོན་ཏན་རྒྱ་མཚོ་བྱང་ཆུབ་ཤིང་གི་དྲུང་ན་བཞུགས། །དེ་ནས་ལྷོ་ནུབ་ཀྱི་ཕྱོགས་མཚམས་ན་དེ་བཞིན་གཤེགས་པ་རིན་ཆེན་སྲོག་ཤིང་གི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རིན་པོ་ཆེ་འབྱུང་བར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེ་འབྱུང་བ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་འཁོར་གྱི་ཁྱམས་དེར་རིན་པོ་ཆེའི་མཁའ་རྟེན་གྲངས་མེད་དཔག་ཏུ་མེད་པ་མངོན་པར་སྤྲུལ་ཏེ། རིན་པོ་ཆེའི་མཁའ་རྟེན་དེ་དག་ལས་ཚིགས་སུ་བཅད་པ་འདི་བྱུང་ངོ་། །གང་གིས་རྒྱ་མཚོར་བཅས་པའི་ས་དང་དེ་བཞིན་རིན་ཆེན་རྣམ་དག་དང་། །ཁང་བཟངས་སྐར་ཁུང་བསིལ་ཁང་མཆོག་དང་ཟུང་དང་བཞོན་པ་མཁའ་རྟེན་བརྒྱན། །མེ་ཏོག་ཕྲེང་བ་མཛེས་དང་འདུན་ས་དག་དང་སྐྱེད་མོས་ཚལ་རྣམས་དང་། །རྐང་པ་ལག་པ་མགོ་དང་མིག་བཏང་བ་དེ་བྱང་ཆུབ་སྙིང་པོར་འདུག །དེ་ནས་ནུབ་བྱང་གི་ཕྱོགས་མཚམས་ན་དེ་བཞིན་གཤེགས་པ་འབྲུག་སྒྲ་རྒྱལ་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྤྲིན་དང་ལྡན་པར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་བརྩེགས་འབྲུག་བསྒྲགས་དབྱངས་ཞེས་བྱ་བ་འོད་དེས་བསྐུལ་
བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་དུས་ཀྱི་རྗེས་སུ་འབྲང་བའི་ཨ་ག་རུའི་སྤྲིན་མངོན་པར་སྤྲུལ་ཏེ་འཁོར་གྱི་ཁྱམས་དེར་ཙན་དན་སྦྲུལ་གྱི་སྙིང་པོའི་ཕྱེ་མའི་ཆར་མངོན་པར་ཕབ་བོ། །དུས་ཀྱི་རྗེས་སུ་འབྲང་བའི་སྤྲིན་གྱི་དཀྱིལ་འཁོར་དེ་ལས་ཀྱང་ཚིགས་སུ་བཅད་པ་འདི་བྱུང་ངོ་། །རིག་དང་རྣམ་པར་གྲོལ་བའི་འོད་ཀྱི་ཆོས་ཀྱི་སྤྲིན་གྱིས་སྲིད་གསུམ་ཐམས་ཅད་ཁྱབ། །དམ་ཆོས་འདོད་ཆགས་བྲལ་བ་བདུད་རྩི་མྱ་ངན་འདས་པ་ཐོབ་བྱེད་ཆར་པ་འབེབས། །འདོད་ཆགས་ཉོན་མོངས་འཆིང་བའི་འཁྲི་ཤིང་ཐམས་ཅད་བག་ཆགས་བཅས་ཏེ་གཅོད་པར་འགྱུར། །བསམ་གཏན་རྫུ་འཕྲུལ་སྟོབས་དང་དབང་པོའི་མེ་ཏོག་རྒྱས་པ་དད་པར་བྱེད་པ་འབྱིན། །དེ་ནས་བྱང་ཤར་གྱི་ཕྱོགས་མཚམས་ན་དེ་བཞིན་གཤེགས་པ་རིན་པོ་ཆེའི་གདུགས་མངོན་པར་འཕགས་པ་སྣང་བའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་གསེར་གྱི་དྲ་བས་ཁེབས་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གསེར་གྱི་དྲ་བས་བརྒྱན་པ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ཁང་པ་བརྩེགས་པ་དེ་དག་ཐམས་ཅད་དང་། རིན་པོ་ཆེའི་མཁའ་རྟེན་རྣམས་སུ་བྱང་ཆུབ་སེམས་དཔའི་གཟུགས་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ་དག་མངོན་པར་སྤྲུལ་ཏེ། བྱང་ཆུབ་སེམས་དཔའི་གཟུགས་དེ་དག་ཐམས་ཅད་ཀྱང་ལྷ་དང་མིའི་མེ་ཏོག་གི་ཕྲེང་བ་ཐོགས་ཤིང་བྱང་ཆུབ་སེམས་དཔའ་ག་ལ་བ་དེ་ལོགས་སུ་ལུས་བཏུད་ནས་མེ་ཏོག་གི་ཕྲེང་བ་སྤྱངས་ཏེ་ཚིགས་སུ་བཅད་པ་འདི་སྨྲས་སོ། །གང་གིས་སངས་རྒྱས་ཁྲག་ཁྲིག་སྔོན་བསྟོད་ཅིང་། །གུས་དང་བཅས་པས་དད་པ་ཆེ་བསྐྱེད་ལ། །ཚངས་པའི་སྒྲ་དབྱངས་སྙན་པའི་ཚིག་སྨྲས་པ། །བྱང་ཆུབ་སྙིང་པོར་བྱོན་ལ་མགོས་ཕྱག་འཚལ། །དེ་ནས་འོག་
གི་ཕྱོགས་ན་དེ་བཞིན་གཤེགས་པ་ཀུན་ཏུ་གཟིགས་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཀུན་ཏུ་རྣམ་པར་བལྟས་པར་བྱང་ཆུབ་སེམས་དཔའ་སེམས་དཔའ་ཆེན་པོ་རིན་པོ་ཆེའི་སྙིང་པོ་ཞེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་བཻ་དཱུཪྱའི་འཁོར་གྱི་ཁྱམས་དེར་འཛམ་བུའི་གླིང་གི་གསེར་གྱི་པད་མ་རྣམས་མངོན་དུ་བྱུང་བར་བསྟན་ཏོ། །པད་མ་དེ་དག་གི་སྙིང་པོ་ལ་བུད་མེད་ལུས་ཕྱེད་སྣང་བ། ཁ་དོག་དང་གཟུགས་ཕུན་སུམ་ཚོགས་པ། རྒྱན་ཐམས་ཅད་ཀྱིས་བརྒྱན་པ་བསྟན་ཏེ། ལག་པ་གཡས་གཡོན་ན་མགུལ་གདུབ་དང་། གདུ་བུ་དང་། དཔུང་རྒྱན་དང་། གསེར་སྐུད་དང་། མུ་ཏིག་གི་དོ་ཤལ་ལ་སོགས་པ་རྒྱན་རྣམ་པ་མང་པོ་ཐོགས་ཤིང་མེ་ཏོག་དང་དར་གྱི་ལྡ་ལྡི་སྤྱངས་ནས་བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེ་ལོགས་སུ་ལུས་བཏུད་དེ་ཚིགས་སུ་བཅད་པ་འདི་སྨྲས་སོ། །གང་ཞིག་རྟག་ཏུ་སངས་རྒྱས་ཉན་ཐོས་དང་། །རང་རྒྱལ་དག་དང་བླ་མ་རྣམས་ལ་འདུད། །ཁྲིམས་ལྡན་རྟག་དྲན་དགའ་ལ་ང་རྒྱལ་མེད། །ཡོན་ཏན་ལྡན་པ་དེ་ལ་འདུད་པ་བྱོས། །དེ་ནས་སྟེང་གི་ཕྱོགས་ན་དེ་བཞིན་གཤེགས་པ་ཚོགས་ཀྱི་དབང་པོའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་ཚོགས་ཀྱི་དམ་པར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའ་མཛོད་ཅེས་བྱ་བ་འོད་དེས་བསྐུལ་བས་བྱང་ཆུབ་སེམས་དཔའ་བགྲང་བ་ལས་འདས་པ་དག་གིས་ཡོངས་སུ་བསྐོར་ཅིང་མདུན་དུ་བདར་ཏེ། བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར་ནམ་མཁའི་དཀྱིལ་ན་འདུག་བཞིན་དུ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་ན་སྔོན་མ་མཐོང་མ་ཐོས་པའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། བདུག་སྤོས་དང་། གོས་དང་། རྒྱན་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་ཁང་
པ་དང་། རིན་པོ་ཆེ་དང་། ནོར་བུ་དང་། གསེར་དང་། དངུལ་དང་། མུ་ཏིག་དང་། རྟ་དང་། གླང་པོ་ཆེ་དང་། ཤིང་རྟ་དང་། དཔུང་བུ་ཆུང་དང་། བཞོན་པ་དང་། ཤིང་ལྗོན་པ་དང་། ལོ་མ་དང་། མེ་ཏོག་དང་། འབྲས་བུ་དང་། ཁྱེའུ་དང་། བུ་མོ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་དང་། མི་དང་། མི་མ་ཡིན་པ་ཇི་སྙེད་ཡོད་པ་དེ་དག་ཐམས་ཅད་ནམ་མཁའི་དཀྱིལ་ནས་ཆར་ཆེན་པོ་མངོན་པར་ཕབ་སྟེ། ཐམས་ཅད་དགའ་བ་དང་། བདེ་བ་སྐྱེད་ཀྱི་སེམས་ཅན་གང་ལ་ཡང་འཇིགས་པའམ་གནོད་པར་མི་བྱེད་དོ། །དེ་བཞིན་དུ་སྦྱར་ཏེ་དེ་ལ་འདི་སྐད་ཅེས་བྱའོ། ། ཕྱོགས་བཅུ་དེ་དག་རྣམས་ནས་རྒྱལ་བའི་སྲས་པོ་གང་། །ཕན་པར་བྱེད་པ་མཆོད་པར་བྱང་ཆུབ་ལྷགས་གྱུར་པ། །འགྲོ་ལ་ཕན་པ་དེ་དག་རྣམས་ཀྱི་བཀོད་རིམ་དང་། །རྩལ་དང་རིམ་པ་མཛེས་པ་དག་གི་དཔེ་ཙམ་ཉོན། །ཁ་ཅིག་དོ་ཤལ་ཁྲག་ཁྲིག་རབ་ཏུ་སྤྱངས་བྱས་ཏེ། །ནམ་མཁའ་ལས་ནི་འབྲུག་ལྟར་ཤིན་ཏུ་སྒྲོགས་ཤིང་ལྷགས། །ཁ་ཅིག་མཁའ་ལས་མེ་ཏོག་གཞལ་མེད་ཁང་སྟོན་ཅིང་། །ཅོད་པན་རིན་ཆེན་ཐོགས་ལ་གཙུག་ཕུད་འཕྱང་ཞིང་ལྷགས། །ཁ་ཅིག་སྟོང་པ་མཚན་མེད་སྨོན་མེད་མཆོག་བརྗོད་ཅིང་། །ས་ལས་སེང་གེ་ལྟ་བུར་ཤིན་ཏུ་སྒྲོགས་ཤིང་ལྷགས། །ཁ་ཅིག་སྔོན་ཆད་མ་མཐོང་མེ་ཏོག་མཛེས་འཐོར་ཞིང་། །ཁྱུ་མཆོག་ཅི་འདྲ་དེ་འདྲར་ཤིན་ཏུ་སྒྲོགས་ཤིང་ལྷགས། །ཁ་ཅིག་རང་གི་ལུས་ཀྱི་ཁ་དོག་སྟོང་སྟོན་ཅིང་། །རྨ་བྱ་ལྟ་བུར་མཁའ་ལས་ཤིན་ཏུ་སྒྲོགས་ཤིང་ལྷགས། །ཁ་ཅིག་བདེ་གཤེགས་སྲས་ཀྱི་ཡོན་ཏན་ཕྲེང་བརྗོད་ཅིང་། །ཟླ་བ་ལྟ་བུར་མཁའ་ལས་ཤིན་ཏུ་རྒྱས་ཤིང་ལྷགས། །ཁ་ཅིག་ཉི་མ་ལྟ་བུར་འོད་ཟེར་རབ་འགྱེད་དེ། །བདུད་ཀྱི་གནས་རྣམས་ཐམས་ཅད་མོག་མོག་བྱེད་ཅིང་ལྷགས། །བསོད་ནམས་ཚོགས་བསགས་ཁ་ཅིག་དབང་པོའི་མཆོད་སྡོང་འདྲའི། །དྲི་མེད་ཏོག་ཐོགས་བྱང་ཆུབ་སྙིང་པོ་དེར་ཡང་ལྷགས། །ཁ་ཅིག་མཁའ་ལས་ནོར་བུ་རིན་ཆེན་དྲ་བ་འཐོར། །ཟླ་བ་ཟླ་བཟངས་ཐང་སྐྱེས་རྣམ་མཛེས་
མན་དཱ་ར། །པར་ཤ་ཙམ་པ་ཀ་དང་སྣ་མའི་མེ་ཏོག་ཕྲེང་། །བྱང་ཆུབ་སེམས་དཔའ་ཤིང་རྒྱལ་དྲུང་ན་བཞུགས་ལ་འཐོར། །ཁ་ཅིག་རྐང་པ་གཉིས་ཀྱིས་ས་ནི་རབ་བསྐྱོད་ལ། །ས་བསྐྱོད་ནས་ཀྱང་སྐྱེ་བོ་དགའ་བར་བྱེད་ཅིང་ལྷགས། །ཁ་ཅིག་རི་བོ་ལྷུན་པོ་ལག་ན་ཐོགས་བྱེད་ལ། །བར་སྣང་གནས་ཏེ་མེ་ཏོག་སྐོན་བུ་འཐོར་ཞིང་ལྷགས། །ཁ་ཅིག་རྒྱ་མཚོ་བཞི་པོ་མགོ་ལ་ཐོགས་ནས་ནི། །ས་ལ་སྤོས་ཆུ་འཐོར་ཏེ་ཆག་ཆག་འདེབས་ཤིང་ལྷགས། །ཁ་ཅིག་རིན་ཆེན་མཆོད་སྡོང་སྣ་ཚོགས་ཐོགས་ནས་ནི། །རྒྱང་རིང་འདུག་སྟེ་བྱང་ཆུབ་སེམས་དཔའ་སྟོན་ཅིང་ལྷགས། །ཁ་ཅིག་ཚངས་པ་ལྟ་བུར་ཞི་བའི་གཟུགས་བསྒྱུར་ཏེ། །ཡིད་ཞི་རབ་ཞི་གནས་ཤིང་བསམ་གཏན་བསམ་གཏན་པ། །དེ་དག་བ་སྤུ་དག་ལས་བྱམས་དང་སྙིང་རྗེ་དང་། །དགའ་དང་བཏང་སྙོམས་ཚད་མེད་ཡིད་འོང་སྒྲ་འབྱིན་ལྷགས། །ཁ་ཅིག་བརྒྱ་བྱིན་ལྷ་ལྟར་སྟོང་ཕྲག་ཁྲག་ཁྲིག་གི། ལྷ་རྣམས་དག་གིས་མདུན་དུ་བདར་ནས་ལྷགས་གྱུར་ཅིང་། །དེ་དག་བྱང་ཆུབ་ཤིང་དྲུང་ཕྱིན་ནས་ཐལ་སྦྱར་ཏེ། །བརྒྱ་བྱིན་ཐོགས་པའི་ནོར་བུ་རིན་ཆེན་སྣ་ཚོགས་འཐོར། །ཁ་ཅིག་ཕྱོགས་བཞི་དག་གི་སྐྱོང་བ་ཇི་ལྟ་བར། །དྲི་ཟ་སྲིན་པོ་མི་འམ་ཅི་ཡིས་ཡོངས་བསྐོར་ཏེ། །གློག་ལྟར་གསལ་བའི་མེ་ཏོག་ཆར་པ་འབེབས་ཤིང་ལྷགས། །དྲི་ཟ་མི་འམ་ཅི་ཡི་སྐད་ཀྱིས་བརྟན་པ་བསྟོད། །ཁ་ཅིག་མེ་ཏོག་རྒྱས་པའི་ལྗོན་ཤིང་འབྲས་བུར་བཅས། །མེ་ཏོག་བཅས་ཤིང་མཆོག་གི་དྲི་ནི་རབ་འབྱིན་ལ། །ལོ་མར་སངས་རྒྱས་སྲས་པོ་ལུས་ཕྱེད་གནས་ཐོགས་ལྷགས། །བཏུད་ནས་ས་ཡི་སྙིང་པོར་མེ་ཏོག་རྣམས་ཀྱང་འཐོར། །ཁ་ཅིག་པད་མ་ཨུད་པལ་པད་མ་དཀར་པོ་རྒྱས། །པད་མའི་སྙིང་པོར་སུམ་ཅུ་རྩ་གཉིས་མཚན་ལྡན་གནས། །དེ་འདྲར་མེ་ཏོག་རྒྱས་པའི་རྫིང་བུ་ཐོགས་ཏེ་ལྷགས། །ཆགས་མེད་ཡིད་ལྡན་བྱང་ཆུབ་སེམས་དཔའ་མཁས་ལ་བསྟོད། །ཁ་ཅིག་ལྷུན་པོ་ལྟ་བུར་ལུས་ཆེན་བསྒྱུར་ཏེ་ལྷགས། །བར་སྣང་གནས་ནས་རང་གི་ལུས་ཀྱང་རབ་ཏུ་འདོར། །བོར་མ་ཐག་ཏུ་མེ་ཏོག་ཕྲེང་བ་རྣམས་སུ་གྱུར། །སྟོང་གསུམ་དག་གི་རྒྱལ་བའི་ཞིང་རྣམས་ཁེབས་པར་བྱེད། །ཁ་ཅིག་མིག་གཉིས་སྲེག་པའི་བསྐལ་པ་ལྟ་བུ་དང་། །དེ་བཞིན་
ཆགས་པ་དང་ནི་འཇིག་པར་སྟོན་ཅིང་ལྷགས། །དེ་དག་ལུས་ལས་ཆོས་ཀྱི་སྒོ་མོ་མང་གྲག་སྟེ། །དེ་དག་ཐོས་པས་སེམས་ཅན་ཁྲག་ཁྲིག་སྲེད་པ་སྤོང་། །ཁ་ཅིག་མཆུ་ནི་བིམ་པ་འདྲ་ལ་བཞིན་མཛེས་ཤིང་། །ཁ་བཞིན་རྫོགས་ལ་མིའམ་ཅི་འདྲའི་སྒྲ་སྒྲོགས་ལྷགས། །དོ་ཤལ་སྣ་ཚོགས་ལེགས་བརྒྱན་བུ་མོ་ཆས་པ་འདྲ། །དེ་ལ་ལྟ་བས་ལྷ་ཡི་ཚོགས་རྣམས་ངོམས་མི་འགྱུར། །ཁ་ཅིག་རྡོ་རྗེ་ལྟ་བུར་མི་ཕྱེད་ལུས་ཅན་དེ། །རྐང་པས་འོག་གི་ཆུ་ཡི་ཕུང་པོ་འབོག་ཅིང་ལྷགས། །ཉི་མ་འདྲ་ཞིང་ཟླ་ལྟར་བཞིན་རྒྱས་སྣང་བྱེད་ལ། །འོད་བྱེད་ཉོན་མོངས་སྐྱོན་རྣམས་བཅོམ་པ་ཁ་ཅིག་ལྷགས། །ཁ་ཅིག་རིན་པོ་ཆེས་བརྒྱན་ལག་ན་རིན་ཆེན་ཐོགས། །ཞིང་མང་བྱེ་བ་སྟོང་དག་ཁེབས་པར་བྱེད་ཅིང་ལྷགས། །སེམས་ཅན་མང་ལ་ཕན་དང་བདེ་དང་ཚིམ་བྱའི་ཕྱིར། །རིན་ཆེན་མེ་ཏོག་དམ་པ་དྲི་ཞིམ་ཆར་པ་འབེབས། །ཁ་ཅིག་གཟུངས་ཆེན་རིན་པོ་ཆེ་ཡི་མཛོད་གྱུར་ཅིང་། །བ་སྤུ་རྣམས་ནས་མདོ་སྡེ་ཁྲག་ཁྲིག་རབ་བརྗོད་ལ། །སྤོབས་པར་ལྡན་ཞིང་བློ་གྲོས་ལྡན་ལ་བློ་མཆོག་ལྡན། །རྒྱགས་ཞིང་རབ་དྲེགས་སྐྱེ་བོ་རྟོགས་པར་བྱེད་ཅིང་ལྷགས། །ཁ་ཅིག་རི་བོ་ལྷུན་པོ་རྔ་ལྟར་ཐོགས་ནས་ནི། །རབ་ཏུ་རྡུང་ཞིང་མཁའ་ལས་ཡིད་འོང་སྒྲ་འབྱིན་ལྷགས། །དེ་ཡི་སྒྲ་ནི་ཕྱོགས་བཅུར་བྱེ་བའི་ཞིང་སོང་སྟེ། །བདུད་རྩི་མ་ཐོབ་སྟོན་པ་དོ་མོད་འཚང་རྒྱར་སྒྲོག །བྱང་ཆུབ་ཀྱི་སྙིང་པོར་བཀོད་པའི་ལེའུ་ཞེས་བྱ་བ་སྟེ་ཉི་ཤུ་པའོ།། །།