ཉི་ཤུ་རྩ་གཅིག་པ། བདུད་བཏུལ་བའི་ལེའུ།
དགེ་སློང་དག་དེ་ལྟར་བྱང་ཆུབ་སེམས་དཔའ་ལ་མཆོད་པའི་ལས་ཀྱི་ཕྱིར། བྱང་ཆུབ་སེམས་དཔའ་དག་གིས་བྱང་ཆུབ་ཀྱི་སྙིང་པོར་བཀོད་པ་རྣམ་པ་དེ་ལྟ་བུ་དེ་དག་མངོན་པར་བྱས་པར་གྱུར་ཏོ། །བྱང་ཆུབ་སེམས་དཔའ་ཉིད་ཀྱིས་ཀྱང་ཕྱོགས་བཅུ་དག་གི་སངས་རྒྱས་བཅོམ་ལྡན་འདས་འདས་པ་དང་། མ་བྱོན་པ་དང་། ད་ལྟར་བྱུང་བ་རྣམས་ཀྱི་སངས་རྒྱས་ཀྱི་ཞིང་ཐམས་ཅད་ན་བྱང་ཆུབ་ཀྱི་སྙིང་པོའི་རྒྱན་བཀོད་པ་ཇི་སྙེད་ཅིག་ཡོད་པ་དེ་དག་ཐམས་ཅད་བྱང་ཆུབ་ཀྱི་སྙིང་པོ་དེར་ཀུན་ཏུ་བསྟན་ཏོ། །དགེ་སློང་དག་དེ་ནས་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་ནས་འདི་སྙམ་དུ་སེམས་ཏེ། འདོད་པའི་ཁམས་འདིའི་བདག་པོ་དབང་ཕྱུག་དབང་སྒྱུར་བ་བདུད་སྡིག་ཅན་དེ་ལ་
བདག་གིས་མ་སྦྲན་པར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་ནི་བདག་གི་མི་ཆས། བདག་གིས་བདུད་སྡིག་ཅན་བསྐུལ་བར་བྱའོ། །དེ་ལས་རྣམ་པར་རྒྱལ་ན་འདོད་པ་ན་སྤྱོད་པའི་ལྷ་ལ་སོགས་པ་ཐམས་ཅད་ཚར་བཅད་པར་འགྱུར་རོ། །འོན་ཏང་བདུད་ཀྱི་འཁོར་ན་བདུད་ཀྱི་རིས་ཀྱི་ལྷའི་བུ་སྔོན་དགེ་བའི་རྩ་བ་བསྐྱེད་པ་འཁོད་པ་དག་གིས་ངའི་སེང་གེ་རྣམ་པར་རོལ་པ་མཐོང་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ་སྙམ་མོ། །དགེ་སློང་དག་དེ་ནས་བྱང་ཆུབ་སེམས་དཔས་དེ་ལྟར་བསམས་ནས་དེའི་ཚེ་སྨིན་མཚམས་ཀྱི་བར་གྱི་མཛོད་སྤུ་ནས་བདུད་ཀྱི་དཀྱིལ་འཁོར་ཐམས་ཅད་འཇོམས་པར་བྱེད་པ་ཞེས་བྱ་བའི་འོད་ཟེར་གཅིག་ཕྱུང་སྟེ། འོད་ཟེར་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱི་བདུད་ཀྱི་གནས་ཐམས་ཅད་སྣང་བར་བྱས་ནས་མོག་མོག་པོར་བྱས་ཏེ་རབ་ཏུ་གཡོས་པར་བྱས་པར་ཡང་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀྱང་སྣང་བ་ཆེན་པོས་ཡོངས་སུ་ཁྱབ་པར་གྱུར་ཏོ། །བདུད་སྡིག་ཅན་གྱིས་འོད་དེ་ལས་རྣམ་པ་འདི་ལྟ་བུའི་སྒྲ་འདི་ཡང་ཐོས་སོ། །སེམས་ཅན་ཤིན་ཏུ་དག་པ་བསྐལ་མང་སྤྱོད་སྤྱད་པ། །ཟས་གཙང་སྲས་པོས་རྒྱལ་སྲིད་དག་ནི་རབ་སྤངས་ཏེ། །ཕན་བྱེད་དེ་ནི་བདུད་རྩི་མངོན་པར་འདོད་པས་བྱུང་། །བྱང་ཆུབ་ཤིང་དྲུང་འོངས་ཀྱིས་དེ་རིང་བསྒྲིམ་པར་གྱིས། །དེ་ནི་བདག་ཀྱང་རྒལ་ལ་གཞན་ཡང་སྒྲོལ་བར་བྱེད། །དེ་ནི་བདག་ཉིད་གྲོལ་བས་གཞན་ཡང་གྲོལ་བར་བྱེད། །དེ་ནི་བདག་ཀྱང་དབུགས་ཕྱིན་གཞན་དག་དབུགས་ཀྱང་འབྱིན། །ཡོངས་སུ་མྱ་ངན་འདས་ནས་གཞན་དག་མྱ་ངན་ཟློ། །ངན་སོང་གསུམ་པོ་མ་ལུས་སྟོངས་པར་བྱེད་པར་འགྱུར། །ལྷ་མི་རྣམས་ཀྱི་གྲོང་ཁྱེར་གང་བར་བྱེད་པར་འགྱུར། །ཕན་པ་བྱེད་པ་དེ་ནི་བདུད་རྩི་ཐོབ་གྱུར་ནས། །བསམ་གཏན་མངོན་ཤེས་བདུད་རྩི་བདེ་མཆོག་སྦྱིན་པར་འགྱུར། །གང་ཚེ་རང་བྱུང་ཉིད་ཀྱིས་ཆོས་ཆར་མངོན་ཕབ་ཚེ། ། ནག་པོའི་རྩ་ལག་ཁྱོད་ཀྱི་གྲོང་ཁྱེར་སྟོངས་བྱེད་འགྱུར། །སྟོབས་མེད་པས་ཀྱང་སྟོབས་མེད་འགྱུར་ཏེ་དཔུང་ཉམས་འགྱུར། །ཕྱོགས་ནི་ཕྱོགས་མིན་ཅི་བྱ་གར་འགྲོ་ཤེས་མི་འགྱུར། །དགེ་
སློང་དག་དེ་ལྟར་བདུད་སྡིག་ཅན་བསྐུལ་བའི་ཚིགས་སུ་བཅད་པ་འདི་དག་གིས་བསྐུལ་ནས་རྨི་ལམ་རྣམ་པ་སུམ་ཅུ་རྩ་གཉིས་རྨིས་སོ། །རྣམ་པ་སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། བདག་གི་གནས་མུན་པས་ཁྱབ་པར་རྨིས་པ་དང་། རང་གི་གནས་རྡུལ་གྱིས་གང་ཞིང་གྱོ་མོ་དང་གསེག་མས་གང་བར་རྨིས་པ་དང་། བདག་ཉིད་སྔངས་སྐྲག་ནས་ཕྱོགས་ཕྱོགས་སུ་འབྲོས་པར་རྨིས་པ་དང་། བདག་ཅོད་པན་དང་བྲལ་ཞིང་རྣ་ཆ་ལྷུང་བར་རྨིས་པ་དང་། བདག་མཆུ་དང་གྲེ་བ་དང་།རྐན་སྐམས་པར་རྨིས་པ་དང་། བདག་སྙིང་ཀུན་ཏུ་གདུངས་པར་རྨིས་པ་དང་། སྐྱེད་མོས་ཚལ་གྱི་ལོ་མ་དང་། མེ་ཏོག་དང་། འབྲས་བུ་རྣམས་རྙིས་པར་རྨིས་པ་དང་། རྫིང་རྣམས་སྐམས་ཏེ་ཆུ་མེད་པར་རྨིས་པ་དང་། ངང་པ་དང་། ཁྲུང་ཁྲུང་དང་། རྨ་བྱ་དང་། ཀ་ལ་པིང་ཀ་དང་། ཀུ་ན་ལ་དང་། ཤང་ཤང་ཏེའུ་ལ་སོགས་པ་བྱའི་ཚོགས་རྣམས་འདབ་གཤོག་ཟེགས་པར་རྨིས་པ་དང་། རྔ་དང་། དུང་དང་། རྫ་རྔ་དང་། ཁར་རྔ་དང་། རྒྱུད་གཅིག་པ་དང་། པི་བང་དང་། རྒྱུད་གསུམ་པ་དང་། ཕེག་དང་། ཁར་བའི་སིལ་ཁྲོལ་ལ་སོགས་པ་རོལ་མོའི་ཆ་བྱད་རྣམས་ཆག་གྲུགས་ཏེ་ས་ལ་ལྷུང་བར་རྨིས་པ་དང་། འཁོར་སྡུག་པས་ཀྱང་བདུད་སྤངས་ཏེ་ངོ་འཛུམ་གནག་ཅིང་ཕྱོགས་གཅིག་ཏུ་དོང་ནས་སེམས་ཤིང་འཁོད་པར་རྨིས་པ་དང་། ཆུང་མའི་དམ་པ་ཕྲེང་བ་ཅན་ཡང་མལ་ནས་ས་ལ་ལྷུང་སྟེ་ལག་པ་གཉིས་མགོ་ལ་རྡེབ་པར་རྨིས་པ་དང་། བདུད་ཀྱི་བུ་གང་དག་ཤིན་ཏུ་བརྩོན་འགྲུས་དང་ལྡན་པ་དང་། ཤིན་ཏུ་སྟོབས་དང་ལྡན་པ་དང་། ཤིན་ཏུ་གཟི་བརྗིད་དང་ལྡན་པ་དང་། ཤིན་ཏུ་ཤེས་རབ་དང་ལྡན་པ་དེ་དག་ཀྱང་བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་མཆོག་དམ་པ་ལ་འདུག་པ་ལ་ཕྱག་འཚལ་བར་རྨིས་པ་དང་། བདག་གི་བུ་མོ་རྣམས་ཀྱང་ཀྱི་ཧུད་ཡབ། ཀྱི་ཧུད་ཡབ་ཅེས་ཆོ་ངེ་འདོན་པར་རྨིས་པ་དང་། བདག་ལུས་ལ་གོས་དྲི་མ་ཅན་གྱོན་པར་རྨིས་པ་དང་། བདག་མགོ་རྡུལ་གྱིས་གང་ལ་སྐྱ་བོ་བསེང་བསེང་པོ་དང་། ཉམ་ཆུང་བ་དང་། མདངས་ཉམས་པར་རྨིས་པ་དང་། བསིལ་ཁང་དང་། ཁང་པ་བརྩེགས་པ་དང་། སྐར་ཁུང་དང་། རྟ་བབས་རྣམས་ཀྱང་རྡུལ་གྱིས་གང་ནས་རྡིབ་པར་རྨིས་པ་དང་། དེའི་སྡེ་དཔོན་
གནོད་སྦྱིན་དང་། སྲིན་པོ་དང་། གྲུལ་བུམ་དང་། དྲི་ཟའི་བདག་པོ་གང་ཡིན་པ་དེ་དག་ཐམས་ཅད་ཀྱང་ཨོམས་ཚུགས་བཅས་ཏེ་ངུ་ཞིང་ཆོ་ངེས་བཏབ་ནས་བྱེར་བར་རྨིས་པ་དང་། འདོད་པ་ན་སྤྱོད་པའི་ལྷ་རྣམས་ཀྱི་ལྷའི་བདག་པོ་འདི་ལྟ་སྟེ། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། རྣམ་ཐོས་ཀྱི་བུ་དང་། བརྒྱ་བྱིན་དང་། རབ་འཐབ་བྲལ་དང་། ཡོངས་སུ་དགའ་ལྡན་དང་། རབ་འཕྲུལ་དང་། དབང་སྒྱུར་ལ་སོགས་པ་གང་ཡིན་པ་དེ་དག་ཐམས་ཅད་ཀྱང་བདུད་ལ་མི་གུས་ཤིང་བྱང་ཆུབ་སེམས་དཔའ་ལ་ཕྱོགས་པར་རྨིས་པ་དང་། ཐབ་མོའི་ནང་ན་དེའི་རལ་གྲི་ཤུགས་ནས་མ་ཕྱིན་ཅིང་བདག་མི་ཤིས་པའི་སྒྲ་འབྱིན་པར་རྨིས་པ་དང་། རང་གི་འཁོར་གྱིས་བདག་པོར་བར་རྨིས་པ་དང་། བཀྲ་ཤིས་ཀྱི་བུམ་པ་སྒོར་ལྷུང་བར་རྨིས་པ་དང་། བྲམ་ཟེ་མིས་བྱིན་གྱི་བུ་ཡང་བཀྲ་མི་ཤིས་པའི་སྒྲ་སྒྲོགས་པར་རྨིས་པ་དང་། སྒོ་བ་ཀུན་ཏུ་དགའ་བྱེད་ཀྱང་ཀུན་ཏུ་མི་དགའ་བའི་སྒྲ་སྒྲོགས་པར་རྨིས་པ་དང་། ནམ་མཁའི་དཀྱིལ་མུན་པས་ཁེབས་པར་རྨིས་པ་དང་། འདོད་པའི་གནས་ན་གནས་པའི་དཔལ་ཡང་ངུ་བར་རྨིས་པ་དང་། བདག་གི་དབང་ཡང་དབང་མེད་པར་གྱུར་པར་རྨིས་པ་དང་། རང་གི་ཕྱོགས་ཀྱང་ཕྱོགས་མ་ཡིན་པར་རྨིས་པ་དང་། ནོར་བུ་དང་མུ་ཏིག་གི་དྲ་བ་རྣམས་ཀྱང་ཆད་ཅིང་རྣམ་པར་ཆད་ནས་འབྲུལ་བར་རྨིས་པ་དང་། བདུད་ཀྱི་གནས་ཐམས་ཅད་ཀྱང་རབ་ཏུ་གཡོས་པར་རྨིས་པ་དང་། ཤིང་རྣམས་ཀྱང་བཅད་ཅིང་བ་གམ་ཡང་ལྷུང་བར་རྨིས་པ་དང་། བདུད་ཀྱི་སྡེ་བཀོད་པ་ཐམས་ཅད་ཀྱང་ཁས་སྦུབ་ཏུ་འགྱེལ་བར་རྨིས་པ་སྟེ། དགེ་སློང་དག་དེ་ལྟར་བདུད་སྡིག་ཅན་གྱི་རྨི་ལམ་དུ་རྣམ་པ་སུམ་ཅུ་རྩ་གཉིས་པོ་འདི་ལྟ་བུ་རྨིས་སོ། །དེ་སད་པ་དང་། འཇིགས་སྐྲག་སྔངས་ནས་ནང་མི་ཐམས་ཅད་བསོགས་ཏེ། དཔུང་དང་བཅས་པ་དང་། འཁོར་དང་སྡེ་དཔོན་དང་། སྒོ་བ་དང་དེ་དག་འདུས་པར་རིག་ནས་ཚིགས་སུ་བཅད་པ་འདི་དག་སྨྲས་སོ། །བདུད་དེས་རྨི་ལམ་དེ་དག་མཐོང་ནས་ཉམ་ཐག་སྟེ། །སྡེ་དཔོན་བདུད་པོ་སེང་གེ་ཟ་འགྲམ་ཞེས་བྱ་དང་། །བུ་རྣམས་དག་དང་འཁོར་རྣམས་གང་དག་ཡིན་ལ་སྨྲས། །ནག་པོའི་རྩ་ལག་དེ་དག་ཀུན་ལ་ཡོངས་སུ་དྲིས། །ཤཱཀྱའི་
ནང་དུ་སྐྱེས་པ་མཚན་མཆོག་ཡན་ལག་སྤྲས། །ལོ་དྲུག་བར་དུ་བྱ་དཀའ་བརྟུལ་ཞུགས་དྲག་པོ་སྤྱད། །བྱང་ཆུབ་ཤིང་དྲུང་འོངས་ཀྱིས་རབ་ཏུ་སྒྲིམས་ཤིག་ཅེས། །མདང་སུམ་བར་སྣང་ལས་ནི་ཚིགས་བཅད་དེ་སྐད་གྲག །བྱང་ཆུབ་སེམས་དཔའ་དེ་ཉིད་རྣམ་པར་སངས་རྒྱས་ནས། །སེམས་ཅན་བྱེ་བ་ཁྲག་ཁྲིག་མང་པོ་རྣམས་རྟོགས་བྱེད། །གང་ཚེ་བདུད་རྩི་ཐོབ་སྟེ་བསིལ་བའི་དངོས་རེག་ཚེ། །དེས་ནི་ང་གནས་མ་ལུས་སྟོང་པར་བྱེད་པར་འགྱུར། །དཔུང་ཆེན་རྣམས་དང་ལྷན་ཅིག་དེར་ནི་རབ་དོང་ལ། །ཤིང་དབང་དྲུང་འདུག་དགེ་སྦྱོང་གཅིག་དེ་གཞོམ་པར་བྱ། །ཡན་ལག་བཞི་པའི་སྡེ་རྣམས་མྱུར་དུ་རབ་ཏུ་སྒྲིམས། །གལ་ཏེ་ང་ལ་སྡུག་སེམས་ཕྱི་ཤོལ་མ་བྱེད་ཅིག །དགྲ་བཅོམ་རང་སངས་རྒྱས་ཀྱིས་འཇིག་རྟེན་གང་གྱུར་ཀྱང་། །མྱ་ངན་འདའ་བས་བདག་དཔུང་ཉམ་ཆུང་ཡོང་མི་འགྱུར། །དེ་ཡང་གཅིག་པུ་རྒྱལ་བ་ཆོས་རྒྱལ་གྱུར་ན་ནི། །བགྲང་ལས་འདས་པའི་རྒྱལ་བའི་རིགས་ནི་གཞལ་མི་འཆད། །དགེ་སློང་དག་དེ་ནས་བདུད་ཀྱི་བུ་དེད་དཔོན་ཞེས་བྱ་བས་བདུད་སྡིག་ཅན་དེ་ལ་ཚིགས་སུ་བཅད་དེ་སྨྲས་པ། ཡབ་ཅིག་ཅི་ནོངས་ཞལ་གྱུར་ཅིང་ནི་ཞལ་མདོག་ཉམས། །ཐུགས་ཀྱང་འཕར་ལ་ཁྱོད་ཀྱི་ཡན་ལག་ཉིང་ལག་འདར། །ཁྱོད་ཀྱིས་ཅི་གསན་ཅི་གཟིགས་མྱུར་དུ་བཀའ་སྩོལ་ཅིག །ཡང་དག་བསམས་ནས་དེ་བཞིན་སྦྱར་བ་འཚལ་བར་བགྱི། །ང་རྒྱལ་མེད་བདུད་སྨྲས་པ་བུ་ཅིག་ང་ལ་ཉོན། །ངས་ནི་སྡིག་པའི་རྨི་ལམ་ཤིན་ཏུ་མི་བཟད་རྨིས། །དེ་རིང་འཁོར་འདིར་དེ་ཀུན་མ་ལུས་སྨྲས་ན་ནི། །ཁྱེད་རྣམས་བརྒྱལ་ཏེ་ས་ལ་རབ་ཏུ་སྒྱེལ་བར་འགྱུར། །དེད་དཔོན་གྱིས་སྨྲས་པ། གལ་ཏེ་འཐབ་དུས་བབ་སྟེ་རྒྱལ་ན་ནོངས་མ་མཆིས། །གལ་ཏེ་དེར་ནི་བཅོམ་པར་གྱུར་ན་ནོངས་དང་བཅས། །གལ་ཏེ་ཁྱོད་ཀྱི་རྨི་ལམ་དེ་འདྲའི་ལྟས་ལགས་ན། །བཞག་ན་དགེ་སྟེ་གཡུལ་ངོར་ཡོངས་སུ་བསྟངས་མི་འགྱུར། །བདུད་ཀྱིས་སྨྲས་པ། བརྩལ་བ་གྲུབ་པའི་སྐྱེས་བུ་གཡུལ་ངོར་གྲགས་པར་འགྱུར། །གལ་ཏེ་བརྟན་ལ་བརྟེན་ཏེ་ལེགས་བྱས་བདག་ཅག་རྒྱལ། །ཁོ་བོ་འཁོར་དང་བཅས་པ་མཐོང་ནས་ལངས་ནས་སུ། །ཁོ་བོའི་རྐང་པར་མགོས་ཕྱག་མི་འཚལ་དེས་མི་ནུས། །དེད་དཔོན་གྱིས་སྨྲས་པ།
རྒྱ་ཆེན་དཔུང་བདོག་ཀྱང་ནི་ཤིན་ཏུ་མཐུ་ཆུང་སྟེ། །སྟོབས་ལྡན་དཔའ་བོ་གཅིག་པུ་མཆིས་ན་གཡུལ་ལས་རྒྱལ། །གལ་ཏེ་སྲིན་བུ་མེ་ཁྱེར་སྟོང་གསུམ་གང་གྱུར་ཀྱང་། །ཉི་མ་གཅིག་པུའི་ཟིལ་དུ་བརླག་སྟེ་འོད་མི་བགྱིད། །གཞན་ཡང་གང་ལ་ང་རྒྱལ་གཏི་མུག་མཆིས་ལ་དཔྱོད་མ་མཆིས། །མཁས་དང་མི་འཐུན་བགྱིད་པ་དེ་ནི་གསོ་མི་ནུས། །དགེ་སློང་དག་དེ་ལྟར་བདུད་སྡིག་ཅན་གྱིས་དེད་དཔོན་གྱི་ཚིག་མ་མཉན་ནས། ཡན་ལག་བཞི་པའི་དཔུང་ཆེན་པོ་སྟོབས་ཆེ་བ། འཐབ་མོ་ལ་དཔའ་བ། འཇིགས་སུ་རུང་བ། སྤུ་ཟིང་ཞེས་བྱེད་ནུས་པ། ལྷ་དང་མི་རྣམས་ཀྱིས་སྔོན་མ་མཐོང་མ་ཐོས་པ། བཞིན་བསྒྱུར་བ་རྣམ་པ་མང་པོ་བྱེ་བ་ཁྲག་ཁྲིག་བརྒྱ་སྟོང་དུ་མ་བསྒྱུར་བའི་རྣམ་པ་དང་ལྡན་པ། རྐང་ལག་སྦྲུལ་བརྒྱ་སྟོང་གིས་དཀྲིས་པ་དང་ལྡན་པ། རལ་གྲི་དང་། མདའ་གཞུ་དང་། མདུང་ཐུང་དང་། མདའ་བོ་ཆེ་དང་། སྟ་རེ་དང་། རྩེ་གསུམ་ཁ་གདེང་དང་། བོང་བ་དང་། གཏུན་ཤིང་དང་། བེ་ཅོན་དང་། ཞགས་པ་དང་། དབྱུག་ཏོ་དང་། འཁོར་ལོ་དང་། རྡོ་རྗེ་དང་། རྡོ་རྗེ་རྩེ་གཅིག་པ་ཐོགས་པ་དང་། ལུས་ལ་གོ་ཆ་བཟང་པོ་བགོས་པ། མགོ་དང་། རྐང་ལག་དང་། མིག་ལོག་པར་འདུག་པ། མགོ་དང་། མིག་དང་། གདོང་འབར་བ། ལྟོ་དང་རྐང་ལག་དབྱིབས་མི་སྡུག་པ། བཞིན་གཟི་བརྗིད་དྲག་པོ་དང་ལྡན་པ། ཤིན་ཏུ་བཞིན་བསྒྱུར་ཅིང་སོ་གཙིགས་པ། འཇིགས་སུ་རུང་བར་མཆེ་བ་གཙིགས་པ། ལྕེ་སྟུག་ཅིང་ཞེང་ཆེ་བ་མང་པོ་འཕྱང་བ། ལྕེ་འབར་འབུར་ཅན་རེ་ལྡེ་དང་འདྲ་བ། མིག་མེ་དང་སྦྲུལ་ནག་པོ་དུག་གིས་རྒྱས་པའི་མིག་ལྟར་དམར་བ་དག་ཆར་བཅུག་སྟེ། དེ་ལ་ཁ་ཅིག་ནི་སྦྲུལ་གདུག་སྐྱུག་པ། ཁ་ཅིག་ནི་ནམ་མཁའ་ལྡིང་གིས་རྒྱ་མཚོ་ནས་ཕྱུང་བ་བཞིན་དུ་ལག་མཐིལ་དུ་སྦྲུལ་གདུག་པ་བཞག་སྟེ་ཟ། ཁ་ཅིག་ནི་མིའི་ཤ་དང་། ཁྲག་དང་། རྐང་ལག་དང་། མགོ་དང་། མཁལ་མ་དང་། ནང་གྲོལ་དང་། ངན་སྐྱུགས་ལ་སོགས་པ་ཟ་ཁ་ཅིག་ནི་གཟུགས་སྔོ་བསངས་དང་། ཁམ་པ་པོ་དང་། སྔོན་པོ་དང་། དམར་པོ་དང་། སེར་པོར་འདུག་སྟེ། འཇིགས་སུ་རུང་བའི་གཟུགས་སྣ་ཚོགས་ཅན། ཁ་ཅིག་ནི་མིག་ཞིགས་པ་དང་། མིག་ཁྲོན་པ་ལྟ་བུ་དང་། མིག་ཕྱུང་བ་ལྟ་བུ་དང་། མིག་འབར་བ་དང་། མིག་བཟུར་བ། མི་སྡུག་
པ། ཁ་ཅིག་ནི་མིག་ལོག་པ་དང་། འབར་བ་དང་། མི་སྡུག་པ། ཁ་ཅིག་ནི་རི་འབར་བ་ཐོགས་ཏེ། འགྱིང་ཞིང་རི་གཞན་ལ་ཞོན་ཏེ་འོང་། ཁ་ཅིག་ནི་ཤིང་རྩ་ཐོན་བྱས་ཏེ་བྱང་ཆུབ་སེམས་དཔའི་ལོགས་སུ་རྒྱུག་ཅིང་འོང་། ཁ་ཅིག་གི་རྣ་བ་ནི་ཕག་རྣ་ལྟ་བུ་དང་། ཞིབ་མ་ལྟ་བུ་དང་། གླང་པོའི་རྣ་བ་ལྟ་བུ་དང་། འཕྱང་བ་དང་། ཕག་རྣ་ལྟ་བུར་འདུག་པ། ཁ་ཅིག་ནི་རྣ་བ་མེད་པ། ཁ་ཅིག་ནི་ཀེང་རུས་མང་པོ་སྤྲུལ་ནས་ལུས་རིད་ཅིང་གསུས་པ་ཆེ་ལ་སྣ་ཞོམ་པ། གསུས་པ་བུམ་པ་ལྟ་བུར་འདུག་པ། རྐང་པ་མགོའི་ཐོད་པ་ལྟར་འདུག་པ། པགས་པ་དང་། ཤ་དང་ཁྲག་སྐམས་པ། རྣ་བ་དང་། སྣ་དང་། རྐང་ལག་དང་། མིག་དང་། མགོ་བཅད་པ། ཁ་ཅིག་ནི་ཁྲག་འཐུང་འདོད་པས་གཅིག་ལ་གཅིག་མགོ་གཅོད་པ། ཁ་ཅིག་ནི་སྒྲ་ཤ་ཤ་པོ་དང་། སྒྲ་མི་སྙན་པ་དང་། འཇིགས་སུ་རུང་བ་དང་། སྒྲ་རྩུབ་པ་དང་ལྡན་པ། ཧུ་ཧུ་ཞེས་བྱ་བ་དང་། མཆི་ཞེས་བྱ་བ་དང་། ཧུ་ལུ་ཧུ་ལུ་ཞེས་བྱ་བའི་སྒྲ་འབྱིན་པ་དང་། སྤྱུགས་པ་ལེན་པ་དང་། དགེ་སྦྱོང་གཽ་ཏ་མ་འདི་ཤིང་དང་ཆོས་ཏེ་འོན་ཅིག་ཅེས་ཟེར་བ་དང་། འོར་ཅིག་ཅེས་ཟེར་བ་དང་། རྒྱོབ་ཅིག་ཅེས་ཟེར་བ་དང་། རབ་ཏུ་རྒྱོབ་ཅིག་ཅེས་ཟེར་བ་དང་། ཆིངས་ཤིག་ཅེས་ཟེར་བ་དང་།ཟུང་ཤིག་ཅེས་ཟེར་བ་དང་། ཆོད་ཅིག་ཅེས་ཟེར་བ་དང་། གཏུབས་ཤིག་ཅེས་ཟེར་བ་དང་། གཏོགས་ཤིག་ཅེས་ཟེར་བ་དང་། བབ་བབ་ཏུ་འོར་ཅིག་ཅེས་ཟེར་བ་དག་གོ །ཁ་ཅིག་ནི་ཝ་དང་། ཅེ་སྤྱང་དང་། ཕག་དང་། བོང་བུ་དང་། བ་ལང་དང་། གླང་པོ་ཆེ་དང་། རྟ་དང་། རྔ་མོ་དང་། རྐྱང་དང་། མ་ཧེ་དང་། རི་བོང་དང་། གཡག་དང་། བསེ་དང་། རི་དགས་ལྡང་སྐོ་སྐ་ལ་སོགས་པའི་ཁ་གདོང་སྣ་ཚོགས་འཇིགས་སུ་རུང་བ་སྔངས་པར་བྱེད་པ། མི་སྡུག་པ་དང་ལྡན་པ་དག་གོ །ཁ་ཅིག་ནི་སེང་གེ་དང་། སྟག་དང་། ཕག་རྒོད་དང་། དྲེད་དང་། སྤྲེའུ་དང་། གཟིག་དང་། བྱི་ལ་དང་། ར་དང་། ལུག་དང་། སྦྲུལ་དང་། ནེའུ་ལེ་དང་། ཉ་དང་། ཆུ་སྲིན་དང་། ཆུ་སྲིན་བྱིས་པ་གསོད་དང་། རུས་སྦལ་དང་། བྱ་རོག་དང་། བྱ་རྒོད་དང་། འུག་པ་དང་། ནམ་མཁའ་ལྡིང་ལྟ་བུའི་ལུས་དང་ལྡན་པ་དག་གོ །ཁ་ཅིག་ནི་གཟུགས་མི་སྡུག་པ་དག་གོ །ཁ་ཅིག་ནི་མགོ་གཅིག་པ་དང་། མགོ་
གཉིས་པ་ནས་མགོ་བརྒྱ་སྟོང་གི་བར་དང་ལྡན་པ་དག་གོ །ཁ་ཅིག་ནི་མགོ་མེད་པའོ། །ཁ་ཅིག་ནི་ལག་པ་གཅིག་པ་ནས་ལག་པ་བརྒྱ་སྟོང་གི་བར་དང་ལྡན་པ་དག་གོ །ཁ་ཅིག་ནི་ལག་པ་མེད་པ་དག་གོ །ཁ་ཅིག་ནི་རྐང་པ་གཅིག་པ་ནས་རྐང་པ་བརྒྱ་སྟོང་གི་བར་དང་ལྡན་པ་དག་གོ །ཁ་ཅིག་ནི་རྐང་པ་མེད་པ་དག་གོ །ཁ་ཅིག་ནི་རྣ་བ་དང་། ཁ་དང་། སྣ་དང་། མིག་དང་། ལྟེ་བའི་ཁུང་བུ་ནས་སྦྲུལ་གདུག་པ་འབྱིན་ཏོ། ཁ་ཅིག་ནི་རལ་གྲི་དང་། མདའ་གཞུ་དང་། མདུང་ཐུང་དང་། རྩེ་གསུམ་ཁ་གདེང་དང་། དགྲ་སྟ་དང་། འཁོར་ལོ་དང་། མདའ་བོ་ཆེ་དང་། རྡོ་རྗེ་རྩེ་གཅིག་པ་དང་། རྡོ་རྗེ་དང་། བོང་བ་དང་། མཚོན་རྩེ་གཅིག་པ་ལ་སོགས་པ་མཚོན་ཆ་སྣ་ཚོགས་གསོར་ཞིང་གར་བྱེད་ལ། བྱང་ཆུབ་སེམས་དཔའ་ལ་སྡིགས་མོ་བྱེད་དོ། །ཁ་ཅིག་ནི་མིའི་སོར་མོ་བཅད་ནས་ཕྲེང་བར་བརྒྱུས་ཏེ་ཐོགས་སོ། །ཁ་ཅིག་ནི་ཀེང་རུས་དང་། ཐོད་པ་དག་ཕྲེང་བ་ལྟ་བུར་བརྒྱུས་ཏེ་ཐོགས་སོ། །ཁ་ཅིག་ནི་ལུས་སྦྲུལ་གདུག་པས་དཀྲིས་སོ། །ཁ་ཅིག་ནི་མགོ་ལ་ཞུགས་ལིང་མེ་ཅན་ཐོགས་ཏེ། གླང་པོ་དང་། རྟ་དང་། རྔ་མོ་དང་། བ་ལང་དང་། བོང་བུ་དང་། མ་ཧེ་ལ་ཞོན་ནོ། །ཁ་ཅིག་ནི་སྤྱིའུ་ཚུགས་སུ་འདུག་ལ་ཁབ་ལྟ་བུའི་སྤུ་ཅན་དག་གོ །ཁ་ཅིག་ནི་བ་ལང་དང་།བོང་བུ་དང་། ཕག་རྒོད་དང་། ནེའུ་ལེ་དང་། ར་དང་། ལུག་དང་། བྱི་ལ་དང་། སྤྲེའུ་དང་། སྤྱང་ཀི་དང་། ཅེ་སྤྱང་གི་སྤུ་ལྟ་བུ་དང་ལྡན་ལ། སྦྲུལ་གདུག་པ་སྐྱུག་ཅིང་ལྕགས་ཀྱི་ཐུ་ལུམ་མིད་པ་དང་། མེ་འབྱིན་པ་དང་། ལྕགས་དང་། ཟངས་འབར་བའི་ཆར་འབེབས་པ་དང་། ལྕེ་འབེབས་པ་དང་། རྡོ་རྗེའི་ལྕེ་འབེབས་པ་དང་། ལྕགས་ཀྱི་བྱེ་མ་ཚན་མོའི་ཆར་འབེབས་པ་དང་། སྤྲིན་ནག་པོ་བསྡུས་ཏེ་རླུང་གི་ཆར་འབེབས་པ་དང་། མདའི་སྤྲིན་བསྡུས་ཏེ་ཆར་དུ་འབེབས་པ་དང་། མུན་གནག་སྟོན་པ་དང་། སྒྲ་འབྱིན་ཅིང་བྱང་ཆུབ་སེམས་དཔའི་ལོགས་སུ་རྒྱུག་པ་དག་གོ །ཁ་ཅིག་ནི་ཞགས་པ་སྐོར་བ་དང་། རི་ཆེན་པོ་རྙིལ་བར་བྱེད་པ་དང་། རྒྱ་མཚོ་ཆེན་པོ་འཁྲུགས་པར་བྱེད་པ་དང་། རི་ཆེན་པོ་ལས་མཆོང་བ་དང་། རིའི་རྒྱལ་པོ་ལྷུན་པོ་སྒུལ་བ་དང་། རྒྱུག་པ་དང་། འབྲོས་པ་དང་། ཡན་ལག་དང་། ཉིང་ལག་འཐོར་བ་དང་། ལུས་སྐོར་བ་དང་།
གད་མོ་ཆེར་རྒོད་པ་དང་། བྲང་རྡུང་བ་དང་། བྲང་ལ་རྡེབ་པ་དང་། མགོ་གསིག་པ་དང་། མགོ་འབར་ཞིང་སྐྲ་གྱེན་དུ་འགྲེང་བ་དང་། ཕན་ཚུན་ཤུགས་ཕྱུང་སྟེ་རྒྱུག་ཅིང་ཝའི་མིག་ལྟ་བུས་བྱང་ཆུབ་སེམས་དཔའ་ལ་འཇིགས་པར་བྱེད་དོ། །བུད་མེད་རྒན་མོ་དག་ཀྱང་ངུ་ཞིང་བྱང་ཆུབ་སེམས་དཔའི་གན་དུ་ལྷགས་ཏེ། འདི་སྐད་དུ་ཀྱི་ཧུད་བུ། ཀྱི་ཧུད་ངའི་བུ། ལོངས་ཤིག །ལོངས་ལ་མྱུར་དུ་བྲོས་ཤིག་ཅེས་འཛེར་ཏོ། །སྲིན་མོའི་གཟུགས་དང་། ཤ་ཟ་མོའི་གཟུགས་དང་། ཡི་དགས་ལོང་བ།ཐེང་པོ། རྐེ་བ། བཀྲེས་པས་རིད་པ། ལག་པ་བསྒྲེང་བ། ཁ་གཅུས་པ་དག་ཀྱང་ངུ་ཞིང་འཇིགས་པ་སྟོན་ཏེ། སྔངས་པར་བྱེད་ཅིང་བྱང་ཆུབ་སེམས་དཔའི་མདུན་ན་རྒྱུག་གོ །བདུད་ཀྱི་དཔུང་འདུས་པ་རྣམ་པ་དེ་ལྟ་བུ་དེས་དཔག་ཚད་བརྒྱད་ཅུ་ཁོ་ར་ཁོར་ཡུག་ཏུ་གང་བར་གྱུར་ཏོ། །བདུད་གཅིག་གི་ཇི་ལྟ་བ་དེ་བཞིན་དུ་སྟོང་གསུམ་གྱི་སྟོང་ཆེན་པོ་བྱེ་བ་ཕྲག་བརྒྱར་གཏོགས་པའི་བདུད་སྡིག་ཅན་རྣམས་ཀྱི་དཔུང་དག་གིས་ཐད་ཀ་དང་། སྟེང་གང་བར་གྱུར་ཏོ། །དེ་ལ་འདི་སྐད་ཅེས་བྱ་སྟེ། གནོད་སྦྱིན་གྲུལ་བུམ་ལྟོ་འཕྱེ་ཆེན་པོའི་གཟུགས། །སྲིན་པོ་ཡི་དགས་ཤ་ཟའི་གཟུགས་དང་བཅས། །འཇིག་རྟེན་མི་སྡུག་དྲག་གཟུགས་ཇི་སྙེད་པ། །ཐམས་ཅད་སྒྱུ་ཡིས་དེར་ནི་སྤྲུལ་པ་བྱས། །མགོ་གཅིག་མགོ་གཉིས་མགོ་གསུམ་ལྡན་པ་ནས། །མགོ་སྟོང་བར་དུ་ལྡན་བཞིན་གནོད་སྦྱིན་མང་། །ལག་གཅིག་ལག་གཉིས་ལག་གསུམ་ལྡན་པ་ནས། །ལག་སྟོང་བར་དུ་ལྡན་པ་རབ་ཏུ་མང་། །རྐང་གཅིག་རྐང་གཉིས་རྐང་གསུམ་ལྡན་པ་ནས། །རྐང་སྟོང་བར་དུ་ལྡན་པ་གཞན་ཡང་མང་། །ཁ་བཞིན་སྔོ་ལ་ལུས་ནི་སེར་བ་དང་། །ཁ་བཞིན་སེར་ལ་ལུས་ནི་སྔོ་བ་དང་། །ཁ་བཞིན་དཀར་ལ་ལུས་ནི་གནག་པ་དང་། །ཁ་བཞིན་གནག་ལ་ལུས་ནི་དཀར་བ་དང་། །ཁ་བཞིན་གཞན་ལ་ལུས་ཀྱང་གཞན་པ་དང་། །དེ་འདྲའི་ཕྱག་བརྙན་དག་གི་དཔུང་རྣམས་ལྷགས། །སྟག་དང་སྦྲུལ་དང་ཕག་གི་གདོང་ཅན་དང་། །གླང་པོ་རྟ་དང་བོང་བུ་རྔ་མོའི་གདོང་། །སྤྲེའུ་དང་སེང་གེ་དྲེད་ཀྱི་གདོང་ཅན་དང་། །དེ་འདྲའི་ཁ་གདོང་ལྡན་པའི་དཔུང་རྣམས་ལྷགས། །རལ་པ་བརྫེས་ལ་འཇིགས་པའི་གནོད་སྦྱིན་མང་། །ལུག་མགོ་རུས་པ་འབར་འབུར་
ལྦ་བ་ཅན། །ལུས་ནི་མི་ཡི་ཁྲག་གིས་རབ་ཏུ་སྦགས། །གནོད་སྦྱིན་དེ་འདྲ་བ་དག་དེར་ཡང་ལྷགས། །རྐང་པ་དག་ནི་དགོ་བའི་རྐང་པ་འདྲ། །མིག་གི་འབྲས་བུ་སྤྲེའུའི་མིག་དང་མཚུངས། །མཆེ་བ་དག་ནི་གླང་པོའི་མཆེ་བ་འདྲ། །ཁ་གདོང་དེ་འདྲའི་དཔུང་རྣམས་དེར་ཡང་ལྷགས། །ལུས་ཀྱི་དབྱིབས་ནི་ཆུ་སྲིན་འདྲ་བ་སྟེ། །མིག་གི་འབྲས་བུ་གཉིས་ནི་རབ་ཏུ་འབར། །རྣ་བ་དག་ནི་ར་ཡི་རྣ་བ་འདྲ། །ཁ་གདོང་དེ་འདྲའི་དཔུང་རྣམས་དེར་ཡང་ལྷགས། །ཁ་ཅིག་དག་ནི་ལག་ན་དབྱིག་པ་ཐོགས། །ཐོ་བ་མདུང་ཐུང་རྩེ་གསུམ་ལག་ན་ཐོགས། །ཁ་ཅིག་རི་བོ་ལྷུན་པོ་ལག་ན་ཐོགས། །འཇིགས་སུ་རུང་བའི་གཟུགས་ཅན་གནོད་སྦྱིན་ལྷགས། །གཤོལ་ཐོགས་འཁོར་ལོ་ཐོགས་ཤིང་མིག་སྒྱུར་དང་། །རི་རྩེ་ཆེན་པོ་ལག་ན་ཐོགས་པ་དང་། །རླུང་དང་རྡོ་དང་གནམ་ལྕགས་རབ་འབེབས་ཤིང་། །གནོད་སྦྱིན་འཇིགས་སུ་རུང་བ་དེར་ཡང་ལྷགས། །རླུང་ནི་རབ་ཏུ་གཏོང་ཞིང་ཆར་ཡང་འབེབས། །བརྒྱ་ཕྲག་སྟོང་གི་གློག་ཀྱང་རབ་ཏུ་འབྱིན། །འབྲུག་གི་སྒྲ་ཡང་སྒྲོག་ཅིང་ཤིང་ལྗོན་སྒྱེལ། །བྱང་ཆུབ་ཤིང་གི་ལོ་མ་ཙམ་མི་གཡོ། །ཆར་པ་རབ་ཏུ་འབེབས་ཤིང་རླུང་ཡང་གཏོང་། །ཆུ་བོ་འབེབས་ཤིང་ཆུ་ཡིས་ས་ཡང་གང་། །དེ་ལྟར་འཇིགས་སུ་རུང་བ་མཚན་མོ་བྱུང་། །དེ་ཡི་ནུབ་མོ་སེམས་མེད་ཤིང་ཡང་སྒྱེལ། །ཐམས་ཅད་དབྱིབས་མི་སྡུག་ཅིང་གཟུགས་མི་སྡུག །འཇིགས་པའི་གཟུགས་ལྡན་དེ་དག་མཐོང་ནས་ཀྱང་། །ཡོན་ཏན་མཚན་དང་གཟི་བརྗིད་ལྡན་པ་པོ། །ལྷུན་པོ་ལྟ་བུར་སེམས་ནི་གཡོ་བ་མེད། །སྒྱུ་མ་འདྲ་ཞིང་རྨི་ལམ་མཚུངས་པ་དང་། །སྤྲིན་དང་འདྲ་བར་ཆོས་རྣམས་ཀུན་ལ་རྟོག །དེ་ལྟར་ཆོས་ཀྱི་ཚུལ་ལ་རྟོག་པས་ནི། །ལེགས་གནས་བསམ་གཏན་བྱེད་ཅིང་ཆོས་ལ་གནས། །གང་ཞིག་ང་དང་ང་ཡི་སྙམ་སེམས་ཤིང་། །དངོས་དང་ལུས་ལ་ཡང་དག་མངོན་ཞེན་པ། །མི་མཁས་འཛིན་པར་གནས་དེས་མཐོང་ནས་ནི། །འཇིགས་པར་གྱུར་ཅིང་བདག་ཀྱང་རབ་ཏུ་མྱོས། །ཤཱཀྱའི་སྲས་པོས་ཆོས་རྣམས་རྟེན་བྱུང་བ། །དངོས་པོ་མེད་པའི་ངོ་བོ་ཉིད་དུ་རྟོགས། །ནམ་མཁའ་ལྟ་བུའི་སེམས་དང་རབ་ཏུ་ལྡན། །དཔུང་བཅས་གཡོ་སྒྱུ་མཐོང་ཡང་མྱོས་པ་མེད། །དགེ་སློང་དག་དེ་ལྟར་བདུད་སྡིག་ཅན་གྱི་བུ་སྟོང་པོ་དེ་དག་
གི་ནང་ནས་དེད་དཔོན་ལ་སོགས་པ་བདུད་ཀྱི་བུ་གང་དག་བྱང་ཆུབ་སེམས་དཔའ་ལ་མངོན་པར་དད་པ་དེ་དག་ནི་བདུད་ཀྱི་གཡས་རོལ་ཏུ་འཁོད་པར་གྱུར་ཏོ། །གང་དག་བདུད་ཀྱི་ཕྱོགས་བྱེད་པ་དེ་དག་ནི་བདུད་སྡིག་ཅན་གྱི་གཡོན་རོལ་ཏུ་འཁོད་པར་གྱུར་ཏོ། །དེ་ན་བདུད་སྡིག་ཅན་གྱིས་རང་གི་བུ་དེ་དག་ལ་སྨྲས་པ། ཡུ་བུ་ཅག་ཅི་འདྲ་བའི་དཔུང་གིས་བྱང་ཆུབ་སེམས་དཔའ་གདུལ་བར་བྱ། དེ་ན་གཡས་རོལ་ནས་བདུད་ཀྱི་བུ་དེད་དཔོན་ཞེས་བྱ་བས་ཕ་ལ་ཚིགས་སུ་བཅད་དེ་སྨྲས་པ། ཀླུ་ཡི་དབང་པོ་གཉིད་ལོག་སློང་འདོད་དང་། །གླང་པོའི་དབང་པོ་གཉིད་ལོག་སློང་འདོད་དང་། །རི་དགས་རྒྱལ་པོ་གཉིད་ལོག་སློང་འདོད་པ། །དེ་ནི་མི་དབང་ལེགས་གནས་སློང་བར་འདོད། །གཡོན་རོལ་ནས་བདུད་ཀྱི་བུ་བློ་གྲོས་ངན་པ་ཞེས་བྱ་བ་དེས་འདི་སྐད་ཅེས་སྨྲས་སོ། །བལྟས་པ་ཙམ་གྱིས་སྙིང་ཡང་རབ་ཏུ་འགས་འགྱུར་ལ། །འཇིག་རྟེན་དག་ན་སྙིང་པོ་ལྡན་པའི་ཤིང་ཆེན་འགས། །བདག་གི་ལྟ་བས་ཕོག་ན་འགྲོ་བ་འཆིས་ཕོག་ལྟར། ། འཚོ་བར་འགྱུར་བའི་མཐུ་ནི་དེ་ལ་ག་ལ་མཆིས། །གཡས་རོལ་ནས་དབྱངས་སྙན་ཅེས་བྱ་བས་སྨྲས་པ། བལྟས་པ་ཙམ་གྱིས་ཤིང་ཡང་འགས་ན་མི་རྣམས་ལ། །བདག་བསྒྲིམ་ཅི་དགོས་ཞེས་སྨྲས་སྙིང་པོ་ག་ལ་ཡོད། །གལ་ཏེ་བལྟས་པས་རི་བོ་ལྷུན་པོ་འཇིག་འགྱུར་ཡང་། །དེ་ཡི་མདུན་དུ་ཁྱོད་ནི་མིག་འབྱེད་ཡོང་མི་ནུས། །གཞན་ཡང་མི་གང་རྒྱ་མཚོ་ལག་པ་གཉིས་ཀྱིས་རྒལ་འདོད་ཅིང་། །དེ་ཡི་ཆུ་ནི་བརྔུབས་ཏེ་འཐུང་བར་ནུས་འགྱུར་གྱི། །དེ་ཡི་ཁ་བཞིན་དྲི་མ་མེད་ལ་མངོན་སུམ་དུ། །ལྟ་བ་དེ་ནི་དེ་བས་སྡུག་བསྔལ་ཆེ་ཞེས་སྨྲས། །གཡོན་རོལ་ནས་ལག་བརྒྱ་པ་ཞེས་བྱ་བས་སྨྲས་པ། བདག་གི་ལུས་འདི་ལག་པ་བརྒྱ་མཆིས་པ། །གཅིག་གིས་ཀྱང་ནི་མདའ་བརྒྱ་འཕང་བགྱིས་ཏེ། །དགེ་སྦྱོང་དེ་ཡི་ལུས་ནི་དབུག་པར་བགྱི། །ཡབ་ཅིག་བདེར་འགྱུར་མ་ཤོལ་ཁྱོད་གཤེགས་ཤིག །གཡས་རོལ་ནས་བློ་བཟང་པོ་ཞེས་བྱ་བས་སྨྲས་པ། བ་སྤུ་རྣམས་ཀྱང་ཅི་ཕྱིར་ལག་པ་མིན། །ལག་པ་བརྒྱ་དང་ཁྱད་པར་ཅི་ཞིག་ཡོད། །ལག་པ་རེ་རེར་དེ་ལྟར་མདུང་ཡོད་ཀྱང་། །དེ་དག་གིས་ཀྱང་དེ་ལ་ཅི་མི་ནུས། །ཅིའི་ཕྱིར་ཞེ་ན། དེས་ནི་འཇིག་རྟེན་འདས་པའི་བྱམས་པ་བསྒོམས། །
བྱམས་ལྡན་ཐུབ་པ་དེ་ཡི་སྐུ་ལ་ནི། །དུག་དང་མཚོན་དང་མེ་ཡིས་མི་ཚུགས་ཏེ། །མཚོན་ཆ་འཕངས་པ་ཐམས་ཅད་མེ་ཏོག་འགྱུར། །གཞན་ཡང་མཁའ་དང་ས་དང་ཆུ་ལ་སྟོབས་ལྡན་གང་། །མི་འམ་གནོད་སྦྱིན་རལ་གྲི་དགྲ་སྟ་ཐོགས། །མི་དབང་བཟོད་པའི་སྟོབས་ལྡན་དེ་དྲུང་ཕྱིན། །སྟོབས་ཆེན་སྟོབས་ལྡན་དེ་ཀུན་སྟོབས་ཆུང་འགྱུར། །གཡོན་རོལ་ནས་གཟི་བརྗིད་དྲག་ཤུལ་ཅན་ཞེས་བྱ་བས་སྨྲས་པ། བདག་ནི་དེ་ཡི་ལུས་བཟང་གི། །ཁོང་དུ་ཞུགས་ཏེ་བསྲེག་པར་བགྱི། །འབྲོག་གི་མེ་ལྟར་ཆུང་ངུ་ཡིས། །རྐང་དང་བཅས་པའི་ཤིང་ཡང་བསྐམ། །གཡས་རོལ་ནས་མི་བཟངས་ཀྱིས་སྨྲས་པ། །ཁྱོད་ནི་རི་རབ་ས་ཡི་ནང་ཞུགས་ཏེ། །ཐམས་ཅད་མ་ལུས་བསྲེག་པར་ནུས་གྱུར་ཀྱང་། །ཁྱོད་དང་འདྲ་བ་གང་གཱའི་བྱེ་སྙེད་ཀྱིས། །རྡོ་རྗེའི་ཐུགས་ལྡན་དེ་ནི་བསྲེག་མི་ནུས། །གཞན་ཡང་རི་བོ་ཐམས་ཅད་འགུལ་ཡང་སྲིད། །རྒྱ་མཚོ་ཆེན་པོ་ཟད་ཀྱང་སྲིད། །ཉི་ཟླ་ས་ལ་ལྷུང་ཡང་སྲིད། །ས་ནི་ཞུ་བར་འགྱུར་ཡང་སྲིད། །འཇིག་རྟེན་དོན་དུ་རྩོམ་མཛད་པ། །ཐུགས་དམ་ངེས་པར་མཛད་པ་པོ། །བྱང་ཆུབ་དམ་པ་མ་ཐོབ་པར། །ཤིང་ཆེན་དྲུང་ནས་བཞེངས་མི་སྲིད། །གཡོན་རོལ་ནས་ལག་རིངས་ཀྱིས་བསྒྱིངས་ཏེ་སྨྲས་པ། ཁྱོད་ཀྱི་གནས་འདིར་མཆིས་བཞིན་དུ། །བདག་གིས་སུག་པས་ཉི་མ་དང་། །ཟླ་བ་སྐར་མ་རྣམས་ཀྱི་གནས། །ཐམས་ཅད་རབ་ཏུ་མཉེ་བར་བགྱི། །རྒྱ་མཚོ་ཆེན་པོ་བཞི་པོ་ལས། །ཚུལ་དུ་ཤིས་པར་ཆབ་ཀྱང་བླང་། །ཡབ་ཅིག་དགེ་སྦྱོང་དེ་བཟུང་སྟེ། །རྒྱ་མཚོའི་ཕ་རོལ་དོར་བར་བགྱི། །ཡབ་ཅིག་དཔུང་འདི་གཞག་ཏུ་གསོལ། །ཁྱོད་ནི་ཐུགས་ངན་ཆེ་མ་མཛད། །བྱང་ཆུབ་ཤིང་དེ་དྲུངས་ཕྱུང་སྟེ། །སུག་པས་ཕྱོགས་ཕྱོགས་གཏོར་བར་བགྱིད། །གཡས་རོལ་ནས་དད་པ་ཐོབ་པས་སྨྲས་པ། གལ་ཏེ་ཁྱོད་ནི་དྲེགས་བསྒྱིངས་ཏེ། །ལྷ་དང་ལྷ་མིན་དྲི་ཟར་བཅས། །ས་དང་རི་དང་རྒྱ་མཚོར་བཅས། །དེ་དག་ལག་པས་ཕྱིར་རློག་ཀྱང་། །ཁྱོད་དང་འདྲ་བ་སྟོང་ཕྲག་ནི། །གང་གཱའི་བྱེ་མ་སྙེད་རྣམས་ཀྱིས། །བྱང་ཆུབ་སེམས་དཔའ་ཤེས་རབ་ཅན། །དེ་ཡི་བ་སྤུ་གཡོས་མི་ནུས། །གཡོན་རོལ་ནས་འཇིགས་བྱེད་ཀྱིས་སྨྲས་པ། །དཔུང་གི་ནང་ན་བཞུགས་བཞིན་དུ། །ཡབ་ཁྱོད་ཅི་སླད་རབ་ཏུ་བསྙེངས། །དེ་
ལ་དཔུང་གྲོགས་ག་ལ་མཆིས། །ཅི་སླད་ཁྱོད་འདིར་དེ་ལ་བསྙེངས། །གཡས་རོལ་ནས་བློ་གྲོས་རྩེ་གཅིག་གིས་སྨྲས་པ། འཇིག་རྟེན་དག་ན་ཉི་ཟླ་དཔུང་མ་མཆིས། །འཁོར་ལོས་སྒྱུར་དང་སེང་གེ་དཔུང་མ་མཆིས། །བྱང་ཆུབ་སེམས་དཔའ་འདི་ནི་དཔུང་མ་མཆིས། །འོན་ཀྱང་གཅིག་པུས་བདུད་ནི་གཞོམ་པར་སྤྱོད། །གཡོན་རོལ་ནས་གླགས་ལྟས་སྨྲས་པ། མདུང་ཐུང་རྩེ་གསུམ་དབྱུག་ཏོ་རལ་གྲི་རྟ། །གླང་པོ་ཤིང་རྟ་རྐང་ཏང་མ་མཆིས་པ། །དགེ་སྦྱོང་གཅིག་པུ་མཆིས་པ་དེ་བདག་གིས། །དོ་མོད་དགུམ་གྱིས་ཅུང་ཟད་མ་བསྙེངས་ཡབ། །གཡས་རོལ་ནས་བསོད་ནམས་བརྒྱན་གྱིས་སྨྲས་པ། སྲེད་མེད་བུ་ལྟར་མི་ཕྱེད་མི་ཤིགས་སྐུ་དང་ལྡན། །བཟོད་སྟོབས་གོ་མནབས་བརྩོན་འགྲུས་བརྟན་པའི་རལ་གྲི་མདའ། །རྣམ་པར་ཐར་གསུམ་བཞོན་པ་ཤེས་རབ་གཞུ་ལགས་ཡབ། །བསོད་ནམས་སྟོབས་ཀྱིས་དེ་ནི་བདུད་ཀྱི་དཔུང་ལས་རྒྱལ། །གཡོན་རོལ་ནས་ཕྱིར་མི་ལྡོག་པས་སྨྲས་པ། འབྲོག་མེ་རྩྭ་ལ་ཚིག་པ་ཕྱིར་མི་ལྡོག། ལོབས་པས་འཕངས་པའི་མདའ་ཡང་ཕྱིར་མི་ལྡོག །མཁའ་ལས་རྡོ་རྗེ་འབབ་པ་ཕྱིར་མི་ལྡོག །ཤཱཀྱའི་བུ་ལས་མ་རྒྱལ་བདག་གནས་མེད། །གཡས་རོལ་ནས་ཆོས་འདོད་ཀྱིས་སྨྲས་པ། གཤེར་བའི་རྩྭ་དང་ཕྲད་ན་མེ་ཡང་ལྡོག །བྲག་གི་རྩེ་མོར་བབ་ན་མདའ་ཡང་ལྡོག །རྡོ་རྗེ་སར་བབ་དེ་ནས་གང་དུ་འགྲོ། །ཞི་བ་བདུད་རྩི་མ་ཐོབ་དེ་མི་ལྡོག །ཅིའི་ཕྱིར་ཞེ་ན། ཡབ་ཅིག་བར་སྣང་ལ་ནི་རི་མོ་བྲི་བར་ནུས་ཀྱང་གདའ། །སེམས་ཅན་ཇི་སྙེད་ཀུན་གྱི་སེམས་ནི་གཅིག་བསྡུར་ནུས་ཀྱང་གདའ། །ཡབ་ཅིག་ཉི་ཟླ་རླུང་ནི་ཞགས་པས་བཅིང་དུ་ནུས་ཀྱང་གདའ། །བྱང་ཆུབ་སེམས་དཔའ་བྱང་ཆུབ་སྙིང་པོ་ལས་ནི་བསྐྱོད་མི་ནུས། །གཡོན་རོལ་ནས་ཉེ་བར་མ་ཞི་བས་སྨྲས་པ། ལྟ་བའི་གདུག་པ་ཆེན་པོས་ལྷུན་པོ་བསྲེག་པར་བགྱི། །རྒྱ་མཚོ་ཆེན་པོ་རྣམས་ཀྱི་ཆབ་ཀྱང་བསྐམ་པར་བགྱི། །བདག་གིས་དོ་མོད་དེ་གཉིས་ཐལ་བར་བརླག་པར་བགྱི། །ཡབ་ཅིག་བྱང་ཆུབ་དང་ནི་དགེ་སྦྱོང་གཟིགས་སུ་གསོལ། །གཡས་རོལ་ནས་དོན་གྲུབ་ཀྱིས་སྨྲས་པ། གལ་ཏེ་དུག་གིས་འདི་ཀུན་གང་གྱུར་ལ། །སྟོང་གསུམ་དམ་པ་རབ་ཏུ་འབར་གྱུར་ཀྱང་། །ཡོན་ཏན་འབྱུང་གནས་ཀྱིས་
ནི་གཟིགས་ཙམ་གྱིས། །དུག་ནི་དུག་མ་ཡིན་པར་རབ་ཏུ་འགྱུར། །སྲིད་པ་གསུམ་ན་གདུག་པ་དྲག་པོ་ནི། །འདོད་ཆགས་ཞེ་སྡང་དེ་བཞིན་གཏི་མུག་སྟེ། །དེ་དག་དེ་ཡི་སྐུ་དང་ཐུགས་ལ་མེད། །མཁའ་ལ་རྫབ་དང་རྡུལ་ནི་མེད་པ་བཞིན། །སྐུ་དང་གསུང་དང་ཐུགས་ཀྱང་རབ་ཏུ་དག །སེམས་ཅན་ཀུན་ལ་བྱམས་པའི་ཐུགས་དང་ལྡན། །དེ་ལ་མཚོན་དང་དུག་གིས་ཡོང་མི་ཚུགས། །དེ་བས་ཡབ་ཅིག་ཐམས་ཅད་བཟློག་ཏུ་གསོལ། །གཡོན་རོལ་ནས་དགའ་བ་ཆགས་པས་སྨྲས་པ། བདག་གིས་སིལ་སྙན་སྟོང་དག་རབ་བགྱིས་ཏེ། །ལྷ་ཡི་བུ་མོ་བརྒྱན་པ་བྱེ་སྟོང་གིས། །ཆགས་པར་བགྱིས་ཏེ་གྲོང་ཁྱེར་མཆོག་ཏུ་བཀྲི། །འདོད་ལ་དགའ་བར་ཁྱོད་ཀྱི་དབང་དུ་བགྱི། །གཡས་རོལ་ནས་ཆོས་དགས་སྨྲས་པ། དེ་འདིར་རྟག་ཏུ་ཆོས་ལ་དགྱེས་པས་དགྱེས། །བསམ་གཏན་དགྱེས་ཤིང་བདུད་རྩི་དོན་ལ་དགྱེས། །སེམས་ཅན་ཐར་བར་མཛད་དང་བྱམས་ལ་དགྱེས། །འདོད་ཆགས་དགའ་ལ་དེ་ནི་དགྱེས་མི་མཛད། །གཡོན་རོལ་ནས་རླུང་གི་ཤུགས་ཞེས་བྱ་བས་སྨྲས་པ། བདག་གི་ཤུགས་ཀྱིས་ཉི་ཟླ་མིད་བགྱིས་ལ། །ནམ་མཁའ་ལས་ནི་རླུང་ཡང་རབ་གཏང་ཞིང་། །ཡབ་ཅིག་དོ་མོད་དགེ་སྦྱོང་བཟུང་ནས་ནི། །རླུང་གིས་ཕུབ་མ་བཞིན་དུ་གཏོར་བར་བགྱི། །གཡས་རོལ་ནས་བདུད་ཀྱི་བུ་བློ་གྲོས་མི་གཡོ་བ་ཞེས་བྱ་བ་དེས་འདི་སྐད་ཅེས་སྨྲས་སོ། །ཇི་ལྟར་ཁྱོད་ཀྱི་ཤུགས་མགྱོགས་དྲག་པ་ལྟར། །གལ་ཏེ་ལྷ་དང་མི་རྣམས་དེ་འདྲར་གྱུར། །དེ་དག་ཐམས་ཅད་གཅིག་ཏུ་འདུས་པས་ཀྱང་། །ཟླ་མེད་གང་ཟག་དེ་ལ་གནོད་མི་ནུས། །གཡོན་རོལ་ནས་ཚངས་པའི་བློ་གྲོས་ཀྱིས་སྨྲས་པ། དེ་འདྲའི་དྲག་པོ་ཕལ་ཆེར་གྱུར་ཀྱང་ནི། །ཁྱོད་ཀྱི་ང་རྒྱལ་ཅུང་ཟད་འཇོམས་མི་ནུས། །བགྱི་བ་ཐམས་ཅད་མང་པོས་འགྲུབ་ལགས་ན། །གཅིག་པུས་ཁྱོད་ལ་ཅི་བགྱི་སྨོས་ཅི་འཚལ། །གཡས་རོལ་ནས་སེང་གེའི་བློ་གྲོས་ཀྱིས་སྨྲས་པ། །ས་ལ་སེང་གེ་ཁྱུས་འཁོད་སྔོན་མ་བྱུང་། །ལྟ་བའི་གདུག་པ་དག་ཀྱང་ཁྱུས་མི་འཁོད། །གཟི་ལྡན་བདེན་པ་ཕ་རོལ་གནོན་པ་པོ། །སྐྱེས་བུ་ཁྱུ་མཆོག་རྣམས་ཀྱང་ཁྱུས་མི་འཁོད། །གཡོན་རོལ་ནས་ཐམས་ཅད་དུ་གདོལ་པ་ཞེས་བྱ་བས་སྨྲས་པ། ཇི་ལྟར་ཁྱོད་ཀྱི་སྲས་པོ་བརྩོན་འགྲུས་དང་། །ཤུགས་དང་སྟོབས་དང་ལྡན་པ་སྒྲ་
སྒྲོགས་པ། །ཚིག་འབར་དེ་འདྲ་ཡབ་ཀྱིས་སྔོན་གསན་ཏམ། །མྱུར་དུ་དགེ་སྦྱོང་དེ་ནི་གཞོམ་དུ་བཞུད། །གཡས་རོལ་ནས་སེང་གེ་སྒྲ་སྒྲོགས་ཞེས་བྱ་བས་སྨྲས་པ། ནགས་ཚལ་དག་གི་ཁྲོད་ན་ཝ་མང་པོས། །སེང་གེ་མེད་པ་དེ་ན་སྒྲ་ཡང་སྒྲོགས། །སེང་གེས་སྒྲ་བསྒྲགས་འཇིགས་པ་ཐོས་པ་དང་། །སྐྲག་ནས་ཕྱོགས་ཕྱོགས་དག་ཏུ་རབ་ཏུ་འབྲོས། །དེ་ལྟར་བདུད་བུ་མི་མཁས་འདི་དག་ཀྱང་། །མི་མཆོག་གསུང་ནི་མ་ཐོས་དེ་བར་དུ། །དེ་དག་སྤྱི་བརྟོལ་བྱེད་ཅིང་བྱུང་རྒྱལ་སྨྲ། །མི་ཡི་སེང་གེས་གསུང་བསྒྲགས་འབྲོས་པར་འགྱུར། །གཡོན་རོལ་ནས་ཉེས་པར་བསམ་པ་སེམས་པས་སྨྲས་པ། བདག་གིས་གང་བསམས་མྱུར་དུ་འདིར་འགྲུབ་ན། །དེ་ནི་ཅི་སླད་དཔུང་ཚོགས་འདི་མི་ལྟ། །གང་ཕྱིར་ལངས་ཏེ་མྱུར་དུ་མི་འབྲོས་པས། །དེ་ནི་གླེན་པ་ཆོ་ག་མ་འཚལ་བ། །གཡས་རོལ་ནས་དོན་ལེགས་པར་བསམ་པ་སེམས་པ་ཞེས་བྱ་བས་སྨྲས་པ། དེ་ནི་མི་གླེན་ཕ་རོལ་གནོན་པ་སྟེ། །ཁྱེད་ཅག་གླེན་ཞིང་ཤིན་ཏུ་མ་བསྡམས་པ། །ཁྱེད་ཀྱིས་དེ་ཡི་མཐུ་རྩལ་ཡོང་མི་ཤེས། །དེ་ཡི་ཤེས་རབ་སྟོབས་ཀྱིས་ཐམས་ཅད་ཕམ། །བདུད་ཀྱི་བུ་ནི་གང་གཱའི་བྱེ་མ་སྙེད། །ཁྱེད་ཅག་རྣམས་ཀྱིས་དེ་འདྲའི་མཐུ་རྩལ་ཅན། །དེ་ཡི་བ་སྤུ་གཅིག་ཀྱང་གཡོས་མི་ནུས། །གསད་པར་བསམས་པ་མི་འགྲུབ་སྨོས་ཅི་དགོས། །ཁྱོད་ནི་དེ་ལ་ཡིད་ཀྱིས་གནོད་མ་སེམས། །གུས་དང་བཅས་པར་དད་པའི་སེམས་སུ་གྱིས། །འདི་ནི་སྲིད་གསུམ་རྒྱལ་པོར་གྱུར་པས་ན། །འཐབ་མོ་མ་བྱེད་པར་ནི་སླར་ལོག་ཤིག །དེ་བཞིན་དུ་སྦྱར་ཏེ་དེ་ལྟར་བདུད་ཀྱི་བུ་དཀར་པོའི་ཕྱོགས་པ་དང་ནག་པོའི་ཕྱོགས་པ་སྟོང་དུ་ཚང་བ་དེ་དག་ཐམས་ཅད་ཀྱིས་སོ་སོ་ནས་བདུད་སྡིག་ཅན་ལ་ཚིགས་སུ་བཅད་དེ་སྨྲས་སོ། །དེ་ནས་བདུད་སྡིག་ཅན་གྱི་སྡེ་དཔོན་སྡེ་བཟང་པོ་ཞེས་བྱ་བ་དེས་བདུད་སྡིག་ཅན་ལ་ཚིགས་སུ་བཅད་དེ་སྨྲས་པ། །གང་དག་ཁྱོད་ཀྱི་རྗེས་འབྲང་བརྒྱ་བྱིན་དང་། །སྐྱོང་དང་མི་འམ་ཅི་ཡི་ཚོགས་རྣམས་དང་། །ལྷ་མིན་དབང་དང་མཁའ་ལྡིང་དབང་པོ་རྣམས། །ཐལ་མོ་སྦྱར་ཏེ་དེ་ལ་ཕྱག་འཚལ་ན། །ཁྱོད་ཀྱི་རྗེས་སུ་འབྲང་བ་མ་ལགས་པ། །ཚངས་པ་འོད་གསལ་ལྷ་ཡི་བུ་རྣམས་དང་། །གནས་གཙང་རིས་ཀྱི་ལྷ་རྣམས་དེ་དག་ཀུན། །དེ་ལ་ཕྱག་
འཚལ་བ་ནི་སྨོས་ཅི་འཚལ། །ཁྱོད་ཀྱི་སྲས་པོ་ཤེས་རབ་ཅན། །སྟོབས་དང་ལྡན་ཞིང་ཡིད་གཞུངས་པ། །དེ་དག་བྱང་ཆུབ་སེམས་དཔའ་ལ། །སྙིང་དང་འཐུན་གྱུར་ཕྱག་འཚལ་ལོ། །དཔག་ཚད་བརྒྱད་ཅུར་ཁྱབ་པ་ཡི། །གནོད་སྦྱིན་ལ་སོགས་བདུད་དཔུང་འདི། །ཕལ་ཆེར་རབ་ཏུ་དང་ཡིད་ཀྱིས། །ཀུན་ཀྱང་ཉེས་པ་མེད་ལ་ལྟ། །འཇིགས་སུ་རུང་ཞིང་དྲག་བསྒྱུར་བ། །དཔུང་ཚོགས་མི་བཟད་འདི་གཟིགས་ནས། །ངོ་མཚར་མ་གྱུར་ཞུམ་མི་མངའ། །ངེས་པར་དོ་མོད་འདི་རྒྱལ་འགྱུར། །གང་ན་དཔུང་འདི་གནས་པ་དེར། །ཝ་དང་འུག་པ་སྒྲ་འབྱིན་ལ། །བྱ་རོག་བོང་བུ་སྒྲ་འབྱིན་པས། །མྱུར་དུ་སླར་ནི་ལྡོག་པའི་རིགས། །བྱང་ཆུབ་སྙིང་པོར་གཟིགས་སུ་གསོལ། །པ་ཏ་ཀུན་ཏ་ངང་པ་དང་། །ཁུ་བྱུག་རྨ་བྱ་མངོན་སྐོར་བས། །ངེས་པར་དོ་མོད་འདི་རྒྱལ་འགྱུར། །གང་ན་དཔུང་འདི་གནས་པ་དེར། །རྡུལ་དང་སྣག་ཙའི་ཆར་འབབ་ལ། །ས་དཀྱིལ་མེ་ཏོག་ཆར་འབབ་པས། །བདག་གི་ཚིག་བཞིན་ལྡོག་པའི་རིགས། །གང་ན་དཔུང་འདི་གནས་པ་དེ། །་ཤང་ཤོང་གྱུར་ཅིང་ཚེར་མས་གང་། །ས་དཀྱིལ་དྲི་མེད་གསེར་གྱུར་པས། །ཤེས་རབ་ཅན་དག་ལྡོག་པའི་རིགས། །གལ་ཏེ་མི་འདོད་སྔར་རྨིས་པའི། །རྨི་ལམ་དེ་དག་མངོན་སུམ་འགྱུར། །དྲང་སྲོང་རྣམས་ཀྱི་ཡུལ་བརླག་པ། །དེ་བཞིན་དཔུང་འདི་ཐལ་བར་རློག །རྒྱལ་པོ་འགྲོ་བ་དྲང་སྲོང་མཆོག །ཚངས་པས་བྱིན་གྱིས་ཁྲོས་བྱས་པས། །དན་ད་ཀ་ཡི་ནགས་ཚལ་ཚིག །ལོ་མང་ཞིག་ཏུ་རྩྭ་མ་སྐྱེས། །དྲང་སྲོང་བརྟུལ་ཞུགས་སྤྱོད་པ་པོ། །དཀའ་ཐུབ་ལྡན་པའི་འཇིག་རྟེན་ན། །ཇི་སྙེད་འཁོད་པ་ཀུན་གྱི་མཆོག །འབྱུང་པོ་ཀུན་ལ་མི་འཚེ་འདི། །གང་གི་ལུས་ལ་མཚན་རབ་འབར། །ཁྱིམ་ནས་ཀྱང་ནི་བྱུང་བ་དེར། །ཉོན་མོངས་ཕམ་བྱས་འཚང་རྒྱ་ཞེས། །ཁྱོད་ཀྱིས་སྔོན་ཆད་མ་གསན་ནམ། །རྒྱལ་སྲས་རྣམས་ཀྱིས་མཆོད་དོན་དུ། །འབྱོར་པ་འདི་འདྲ་འདི་དག་སྤྲུལ། །དེ་བས་ངེས་པར་སེམས་ཅན་མཆོག །སྦྱིན་བསྲེག་དམ་པ་ལེན་པར་འགྱུར། །འདི་ཡི་མཛོད་སྤུ་དྲི་མེད་པ། །བྱེ་བ་ཁྲག་ཁྲིག་ཞིང་དུ་མཛེས། །དེ་ཡིས་བདག་ཅག་མོག་མོག་བགྱིས། །བདུད་དཔུང་ངེས་བཅོམ་གདོན་མི་འཚལ། །སྲིད་པའི་རྩེ་གནས་ལྷ་རྣམས་ཀྱིས། །དེ་ཡི་སྤྱི་གཙུག་བལྟར་མི་ནུས། །ངེས་
པར་གཞན་གྱིས་མ་བསྟན་པར། །ཐམས་ཅད་མཁྱེན་ཉིད་ཐོབ་པར་འགྱུར། །ཇི་ལྟར་ལྷུན་པོ་ཁོར་ཡུག་དང་། །ཉི་ཟླ་བརྒྱ་བྱིན་ཚངས་པ་དང་། །ཤིང་ལྗོན་རྣམས་དང་རི་མཆོག་ཀུན། །ས་དཀྱིལ་ཕྱག་འཚལ་བགྱིད་ལས་ན། །བསོད་ནམས་སྟོབས་ཅན་ཤེས་རབ་སྟོབས། །ཡེ་ཤེས་སྟོབས་ཅན་བཟོད་པའི་སྟོབས། །བརྩོན་འགྲུས་སྟོབས་དང་ལྡན་པ་དེ། །བདུད་ཕྱོགས་སྟོབས་མེད་མཛད་པར་ངེས། །གླང་པོས་སོ་མ་བཏང་སྣོད་དང་། །སེང་གེས་ཇི་ལྟར་ཝ་བཅོམ་དང་། །ཉི་མས་སྲིན་བུ་མེ་ཁྱེར་ལྟར། །བདེ་བར་གཤེགས་པས་དཔུང་བཅོམ་འགྱུར། །ཚིག་དེ་སྐད་ཐོས་པ་དང་བདུད་ཀྱི་བུ་གཞན་ཞིག་ཤིན་ཏུ་ཁྲོས་ནས་མིག་དམར་པོར་གྱུར་ཏེ་སྨྲས་པ། ཁྱོད་ནི་གཅིག་པུ་དེ་ཡི་བསྔགས་པ་དག །ཤིན་ཏུ་དཔག་ཏུ་མེད་པར་རྗོད་བྱེད་ན། །གཅིག་པུ་དེས་ནི་ཅི་ཞིག་བྱ་བར་ནུས། །འཇིགས་སུ་རུང་བའི་དཔུང་ཆེན་མ་མཐོང་ངམ། །དེ་ནས་གཡས་རོལ་ནས་བདུད་ཀྱི་བུ་བདུད་རབ་ཏུ་འཇོམས་པ་ཞེས་བྱ་བས་སྨྲས་པ། འཇིག་རྟེན་ཉི་ཟླ་སེང་གེ་དང་། །འཁོར་ལོས་སྒྱུར་ལ་གྲོགས་བྱེད་མེད། །བྱང་ཆུབ་བཞུགས་ནས་ངེས་པ་ཡི། །བྱང་ཆུབ་སེམས་དཔའ་གྲོགས་མི་དགོས། །དེ་ནས་བྱང་ཆུབ་སེམས་དཔས་བདུད་མཐུ་ཆུང་བར་བྱ་བའི་ཕྱིར་གང་མཐོང་བས་བདག་གི་དཔུང་བྱང་ཆུབ་སེམས་དཔའི་ཁའི་ནང་དུ་ཞུགས་སོ་སྙམ་དུ་སེམས་ཤིང་བདུད་བྲོས་པར་གྱུར་པ་དང་། བྲོས་ནས་ཀྱང་ཅི་ཡང་མ་ཡིན་ནོ་སྙམ་ནས་ཡང་སླར་ལོག་སྟེ། འཁོར་དང་བཅས་པས་མཚོན་ཆ་རྣམ་པ་སྣ་ཚོགས་བྱང་ཆུབ་སེམས་དཔའི་སྟེང་དུ་འཕེན་ཅིང་། རི་རབ་ཙམ་གྱི་རི་དེ་དག་ཀྱང་བྱང་ཆུབ་སེམས་དཔའི་སྟེང་དུ་འཕངས་པ་དང་། མེ་ཏོག་གི་བླ་རེ་དང་། གཞལ་མེད་ཁང་དུ་གྱུར་ཏེ་གནས་པ་དང་། གང་དག་མིག་གདུག་པ་དང་། མྱུར་དུ་གདུག་པ་དང་། དབུགས་གདུག་པ་རྣམས་མེ་ལྕེ་གཏོང་བའི་མེའི་དཀྱིལ་འཁོར་དེ་ཡང་བྱང་ཆུབ་སེམས་དཔའ་ལ་འོད་ཀྱི་དཀྱིལ་འཁོར་ལྟ་བུར་གནས་པར་བྱ་བའི་ཕྱིར་པད་མ་འདབ་མ་བརྒྱ་པ་རྒྱས་པ་ལྟ་བུའི་བཞིན་བསྐྱོད་དོ། །དེ་ནས་ཡང་བྱང་ཆུབ་སེམས་དཔས་ལག་པ་གཡས་པས་མགོ་ལ་བྱུགས་པ་དང་། བདུད་ཀྱིས་བྱང་ཆུབ་སེམས་དཔའི་ལག་ན་རལ་གྲི་ཐོགས་པར་མཐོང་ནས་ལྷོ་ཕྱོགས་སུ་བྲོས་པ་དང་ཅི་ཡང་མ་ཡིན་ནོ་སྙམ་ནས་ཡང་སླར་ལོག་གོ །སླར་ལོག་ནས་ཀྱང་བྱང་ཆུབ་
སེམས་དཔའི་སྟེང་དུ་མཚོན་ཆ་རྣམ་པ་སྣ་ཚོགས་རལ་གྲི་དང་། མདའ་གཞུ་དང་། མདུང་ཐུང་དང་། མདའ་བོ་ཆེ་དང་། དགྲ་སྟ་དང་། བོང་བ་དང་། གཏུན་ཤིང་དང་། རྡོ་རྗེ་རྩེ་གཅིག་པ་དང་། དབྱུག་ཏོ་དང་། འཁོར་ལོ་དང་། ཐོ་བ་དང་། ཤིང་དྲུངས་ཕྱུང་དང་། ཕ་བོང་དང་། ཞགས་པ་དང་། ལྕགས་ཀྱི་ཐུ་ལུམ་ཤིན་ཏུ་འཇིགས་པ་དུ་མ་འཕེན་ཏེ། དེ་དག་ཀྱང་འཕངས་མ་ཐག་ཏུ་མེ་ཏོག་གི་ཕྲེང་བ་དང་། མེ་ཏོག་གི་བླ་རེར་གྱུར་ཏེ་གནས་སོ། །མེ་ཏོག་སིལ་མར་ཡང་གྱུར་ནས་ས་ལ་འཐོར་བ་དང་། ཕྲེང་བའི་ཆུན་པོར་ཡང་འཕྱང་བས་བྱང་ཆུབ་ཀྱི་ཤིང་བརྒྱན་པར་གྱུར་ཏོ། །བྱང་ཆུབ་སེམས་དཔའི་བཀོད་པ་འབྱོར་པ་དེ་དག་མཐོང་ནས་བདུད་སྡིག་ཅན་ཕྲག་དོག་དང་སེར་སྣས་སེམས་ལ་གནོད་དེ། བྱང་ཆུབ་སེམས་དཔའ་ལ་སྨྲས་པ། ཀྱེ་རྒྱལ་བུ་གཞོན་ནུ་བཞེངས། བཞེངས། རྒྱལ་སྲིད་ལ་སྤྱོད་ཅིག །ཁྱོད་ཀྱི་བསོད་ནམས་དེ་ཙམ་གྱིས་ཁྱོད་ཀྱིས་ཐར་པ་ག་ལ་འཐོབ། །དེ་ནས་བྱང་ཆུབ་སེམས་དཔས་བརྟན་ལ་ཟབ་ཅིང་རྒྱ་ཆེ་བ་དང་། འཇམ་ཞིང་སྙན་པའི་ཚིག་གིས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན་ཁྱོད་ཀྱིས་ནི་གཏན་པ་མེད་པའི་མཆོད་སྦྱིན་གཅིག་གིས་འདོད་པའི་དབང་ཕྱུག་ཐོབ་ཏུ་ཟད་དོ། །ངས་ནི་མཆོད་སྦྱིན་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་གཏན་པ་མེད་པའི་མཆོད་སྦྱིན་བྱས་སོ། །ལག་པ་དང་། རྐང་པ་དང་། མིག་དང་། མགོ་དག་ཀྱང་བཅད་ཅིང་སློང་བ་རྣམས་ལ་བྱིན་ནོ། །སེམས་ཅན་རྣམས་ཐར་བར་བྱ་བའི་ཕྱིར་ཁྱིམ་དང་། ནོར་དང་། འབྲུ་དང་། མལ་ཆ་དང་། གོས་དང་། འཆགས་དང་། སྐྱེད་མོས་ཚལ་རྣམ་པ་དུ་མ་དག་ཀྱང་སློང་བ་རྣམས་ལ་བྱིན་ནོ། །དེ་ནས་བདུད་སྡིག་ཅན་གྱིས་ཚིགས་སུ་བཅད་དེ་བྱང་ཆུབ་སེམས་དཔའ་ལ་སླར་སྨྲས་པ། སྔོན་ཆད་ཁོ་བོས་མཆོད་སྦྱིན་ཁ་ན་མ་ཐོ་མེད། །གཏན་པ་མེད་པ་བྱས་པ་ཁྱོད་འདིར་དཔང་དུ་ཡོད། །ཁྱོད་ལ་འདི་ན་དཔང་པོ་གང་ཡང་ཡོད་མིན་པས། །སྨྲས་ཀྱང་ཕན་པ་ཅི་ཡོད་ཁྱོད་ནི་ཕམ་པར་གྱུར། །བྱང་ཆུབ་སེམས་དཔས་སྨྲས་པ། སྡིག་ཅན་ས་འདི་ནི་ངའི་དཔང་ཡིན་ནོ། །དེ་ནས་བྱང་ཆུབ་སེམས་དཔས་བདུད་སྡིག་ཅན་དང་བདུད་ཀྱི་འཁོར་ལ་བྱམས་པ་དང་སྙིང་རྗེ་སྔོན་དུ་འགྲོ་བའི་སེམས་ཀྱིས་ཁྱབ་པར་བྱས་ནས། སེང་གེ་ལྟར་མི་འཇིགས་མི་སྐྲག་ལ་བག་ཚ་བ་མེད་ཅིང་མི་དམན་ལ་མ་ཞུམ་པ་དང་། མ་འཁྲུགས་
པ་དང་། མ་རྙོགས་པ་དང་། འཇིགས་པ་དང་། སྤུ་ཟིང་ཞེས་བྱེད་པ་མེད་པར་ལག་མཐིལ་ན་དུང་དང་། རྒྱལ་མཚན་དང་། ཉ་དང་། བུམ་པ་དང་། བཀྲ་ཤིས་པ་དང་། ལྕགས་ཀྱུ་དང་། འཁོར་ལོའི་མཚན་མ་ཡོད་པ། སོར་མོ་བར་དྲ་བས་འབྲེལ་བ། སེན་མོ་ཤིན་ཏུ་མཛེས་ཤིང་ཟངས་ཀྱི་མདོག་ལྟར་འདུག་པས་བརྒྱན་པ། འཇམ་ཞིང་མཉེན་ལ་ཤིན་ཏུ་གཞོན་པ། བསྐལ་པ་དཔག་ཏུ་མེད་པར་དགེ་བའི་རྩ་བའི་ཚོགས་བསགས་པས་གྲུབ་པའི་ལག་པ་གཡས་པས་ལུས་ཐམས་ཅད་ལ་བྱུགས་ནས་ཚུལ་དུ་ཤིས་པར་ས་ལ་བརྡབས་ཏེ་དེའི་ཚེ་ཚིགས་སུ་བཅད་པ་འདི་ཡང་སྨྲས་སོ། །ས་འདི་འགྲོ་བ་ཀུན་གྱི་གནས་ཡིན་ཏེ། །རྒྱུ་དང་མི་རྒྱུ་སྙོམས་ཤིང་ཉེ་འཁོན་མེད། །འདི་ནི་བདག་གི་དཔང་སྟེ་བདག་བརྫུན་མེད། །འདི་ལ་ཁྱོད་ནི་བདག་གི་དཔང་བྱོས་ཤིག །བྱང་ཆུབ་སེམས་དཔས་ས་ཆེན་པོ་འདི་ལ་རེག་མ་ཐག་ཏུ་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །འདི་ལྟ་སྟེ་དཔེར་ན། ཡུལ་མ་ག་དྷཱའི་བརྡབ་ཁར་སྒྲ་འབྱུང་ཞིང་སྒྲ་རྒྱུན་རིང་བ་དེ་བཞིན་དུ་ས་ཆེན་པོ་འདི་ཡང་བྱང་ཆུབ་སེམས་དཔའི་ལག་པས་བསྣུན་མ་ཐག་ཏུ་སྒྲ་བྱུང་ཞིང་སྒྲ་རྒྱུན་རིང་དུ་བྱུང་ངོ་།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅུ་བཞི་པ། དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སའི་ལྷ་མོ་བརྟན་མ་ཞེས་བྱ་བ་སའི་ལྷ་མོའི་འཁོར་བྱེ་བ་ཕྲག་བརྒྱ་དང་ལྡན་པ་གང་ཡིན་པ་དེས་ས་ཆེན་པོ་ཐམས་ཅད་གཡོས་པར་བྱས་ནས། བྱང་ཆུབ་སེམས་དཔའ་དང་ཧ་ཅང་ཡང་མི་རིང་བ་ཞིག་ཏུ་ས་བརྟོལ་ཏེ། ལུས་རྒྱན་ཐམས་ཅད་ཀྱིས་བརྒྱན་པ་ཕྱེད་ཕྱུང་ནས་བྱང་ཆུབ་སེམས་དཔའ་ག་ལ་བ་དེ་ལོགས་སུ་ལུས་བཏུད་དེ་ཐལ་མོ་སྦྱར་ནས། བྱང་ཆུབ་སེམས་དཔའ་ལ་འདི་སྐད་ཅེས་སྨྲས་སོ། །དེ་དེ་བཞིན་ནོ། །སྐྱེས་བུ་ཆེན་པོ་དེ་དེ་བཞིན་ནོ། །ཁྱོད་ཀྱིས་ཇི་སྐད་གསུངས་པ་བཞིན་ཏེ། འདི་ནི་བདག་ལ་མངོན་སུམ་མོ། །དེ་ལྟ་ལགས་མོད་ཀྱི། འོན་གྱིས་ཀྱང་བཅོམ་ལྡན་འདས་ཉིད་ལྷ་དང་བཅས་པའི་འཇིག་རྟེན་གྱི་དབང་དུ་གྱུར་པ་དང་། ཚད་མར་གྱུར་པ་དམ་
པ་ལགས་སོ། །སའི་ལྷ་མོ་ཆེན་མོ་བརྟན་མས་དེ་སྐད་ཅེས་སྨྲས་ནས། རྣམ་པ་དུ་མར་བདུད་སྡིག་ཅན་གྱི་གླགས་ནི་མེད་པར་བྱས། བྱང་ཆུབ་སེམས་དཔའ་ལ་ནི་བསྟོད་དེ། རང་གི་མཐུ་རྣམ་པ་མང་པོ་བསྟན་ནས་འཁོར་དང་བཅས་ཏེ་དེ་ཉིད་དུ་མི་སྣང་བར་གྱུར་ཏོ། །གཡོན་ཅན་དཔུང་བཅས་ས་སྒྲ་དེ་ཐོས་ནས། །ནགས་སུ་སེང་གེས་སྒྲ་བསྒྲགས་ཝས་ཐོས་དང་། །བྱ་རོག་རྡོ་འཕངས་མོད་ལ་འབྱེར་བ་བཞིན། །སྔངས་སྐྲག་སྙིང་གས་ཐམས་ཅད་རབ་ཏུ་བྱེར། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ། ཡི་མ་རངས་ལ་སྐྱེངས་བཞིན་དུ་ང་རྒྱལ་གྱི་ཟིལ་གྱིས་ནོན་པས་མ་སོང་ལ་ཕྱིར་ཡང་མ་ལོག་ཅིང་བྲོས་ཀྱང་མ་བྲོས་ཏེ་ཕྱིར་བལྟས་ནས་ཡང་དཔུང་རྣམས་ལ་སྨྲས་པ། ཁྱེད་ལྷན་ཅིག་འདུས་ཏེ་ཅུང་ཟད་ཅིག་སྡོད་ཅིག །རྣམ་པ་འདི་ལྟ་བུའི་སེམས་ཅན་རིན་པོ་ཆེ་གློ་བུར་དུ་ཆུད་མི་གཟན་པར་ཁོ་བོས་རྗེས་སུ་འཆགས་པས་འདི་བསླང་བར་ནུས་སམ་མི་ནུས་སད་པར་བྱའོ། །དེ་ནས་བདུད་སྡིག་ཅན་གྱིས་རང་གི་བུ་མོ་རྣམས་ལ་སྨྲས་པ། བུ་མོ་ཁྱེད་དེང་སྟེ་བྱང་ཆུབ་ཀྱི་སྙིང་པོར་སོང་ལ་བྱང་ཆུབ་སེམས་དཔའ་འདོད་ཆགས་དང་བཅས་པའམ། འོན་ཏེ་འདོད་ཆགས་མེད། ཅི་གཏི་མུག་ཅན་ནམ། འོན་ཏེ་ཤེས་རབ་ཅན། ཅི་ལྡོངས་པ་ཞིག་གམ། འོན་ཏེ་ཕྱོགས་ཤེས་པ་ཞིག་གམ། འོན་ཏེ་དཔུང་གཉེན་མེད་པ་ཞིག་གམ། དམན་པ་ཞིག་གམ་བརྟན་པ་ཞིག་ཡིན་པ་བགོམས་ཤིག །ཚིག་དེ་ཐོས་ནས་་བདུད་ཀྱི་བུ་མོ་དེ་དག་བྱང་ཆུབ་ཀྱི་སྙིང་པོ་ག་ལ་བ་དང་། བྱང་ཆུབ་སེམས་དཔའ་ག་ལ་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའི་མདུན་དུ་འཁོད་དེ། བུད་མེད་ཀྱི་སྒྱུ་རྣམ་པ་སུམ་ཅུ་རྩ་གཉིས་ཉེ་བར་བསྟན་ཏོ། །རྣམ་པ་སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། དེའི་ནང་ནས་ཁ་ཅིག་ནི་བཞིན་ཕྱེད་འགེབས་པ་དང་། ཁ་ཅིག་ནི་ནུ་མ་མཁྲང་ཞིང་འབུར་བ་སྟོན་པ་དང་། ཁ་ཅིག་ནི་ཅུང་ཟད་འཛུམ་པས་སོའི་ཕྲེང་བ་སྟོན་པ་དང་། ཁ་ཅིག་ནི་ལག་པ་བརྐྱང་སྟེ་བྱ་རྨྱངས་བྱེད་ཅིང་མཆན་ཁུང་སྟོན་པ་དང་། ཁ་ཅིག་ནི་ཤིང་ཐོག་བིམ་པ་ལྟར་དམར་བའི་མཆུ་སྟོན་པ་དང་། ཁ་ཅིག་ནི་མིག་ཕྱེད་བཙུམས་ཏེ་བྱང་ཆུབ་སེམས་དཔའ་ལ་ལྟ་ཞིང་། བལྟས་ནས་མྱུར་བ་མྱུར་བར་འཛུམས་པ་དང་། ཁ་ཅིག་ནི་ནུ་མ་ཕྱེད་གཡོགས་ཏེ་སྟོན་པ་དང་། ཁ་ཅིག་ནི་གོས་སྙིལ་བར་བྱས་
ཏེ། གསེར་གྱི་ཕག་སྐ་དང་བཅས་པའི་རྐེད་པ་སྟོན་པ་དང་། ཁ་ཅིག་ནི་གོས་དུ་ཀུ་ལ་སྲབ་མོ་གྱོན་ཏེ། གསེར་གྱི་ཕག་སྐ་དང་བཅས་པའི་རྐེད་པ་སྟོན་པ་དང་། ཁ་ཅིག་ནི་རྐང་གདུབ་སྒྲ་སིལ་སིལ་འབྱིན་པ་དང་། ཁ་ཅིག་ནི་ནུ་མའི་བར་ནས་ཕྲེང་བ་གཅིག་ཉེ་བར་སྟོན་པ་དང་། ཁ་ཅིག་ནི་བརླ་ཕྱེད་ཙམ་བརྫེས་པ་ཉེ་བར་སྟོན་པ་དང་། ཁ་ཅིག་ནི་མགོ་དང་ཕྲག་པ་དག་ལ་བྱ་འདབ་སྦེད་དང་། ནེ་ཙོ་དང་། རི་སྐེགས་འདུག་པར་ཉེ་བར་སྟོན་པ་དང་། ཁ་ཅིག་ནི་བྱང་ཆུབ་སེམས་དཔའ་ལ་མིག་ཟུར་གྱིས་ལྟ་བ་དང་། ཁ་ཅིག་ནི་གོས་ལེགས་པར་བགོས་ཀྱང་བགོ་མ་ལེགས་པ་ལྟ་བུར་བཅོས་པ་དང་། ཁ་ཅིག་ནི་རྐེད་པ་དང་། གསེར་གྱི་ཕག་སྐ་སྐྱོད་པ་དང་། ཁ་ཅིག་ནི་འཁྲུལ་བ་ལྟར་འཆོས་ཤིང་སྒེག་སྟེ་ཕན་ཚུན་འཆག་པ་དང་། ཁ་ཅིག་ནི་གར་བྱེད་པ་དང་། ཁ་ཅིག་ནི་གླུ་ལེན་པ་དང་། ཁ་ཅིག་ནི་བསྒེགས་ཤིང་ངོ་ཚ་བ་ལྟར་ཡང་འཆོས་པ་དང་། ཁ་ཅིག་ནི་ཆུ་ཤིང་རླུང་གིས་བསྐྱོད་པ་ལྟར་བརླ་སྒུལ་བ་དང་། ཁ་ཅིག་ནི་བརྗིད་པའི་སྒྲ་འབྱིན་པ་དང་། ཁ་ཅིག་ནི་སེང་རས་བགོས་ཏེ་གསེར་གྱི་ཕག་སྐ་དྲིལ་བུ་ཅན་བཅིངས་ནས་དགོད་ཅིང་འཆག་པ་དང་། ཁ་ཅིག་ནི་གོས་དང་རྒྱན་རྣམས་ས་ལ་འདོར་ཞིང་ངོ་ཚ་བ་ལྟར་སླར་ཡང་ལེན་པ་དང་། ཁ་ཅིག་ནི་གསང་བ་དང་། གསལ་བའི་རྒྱན་ཐམས་ཅད་ཉེ་བར་སྟོན་པ་དང་། ཁ་ཅིག་ནི་ལག་པ་སྤོས་ཀྱིས་བསྐུས་པ་སྟོན་པ་དང་། ཁ་ཅིག་ནི་མཁུར་བ་བསྐུས་ཤིང་རྣ་ཆ་ཡང་སྟོན་པ་དང་། ཁ་ཅིག་ནི་མགོ་ཡང་གཡོགས་ཤིང་བཞིན་ཡང་གཡོགས་ལ་སྐད་ཅིག་ཙམ་གྱིས་སྟོན་པ་དང་། ཁ་ཅིག་ནི་སྔོན་རྒོད་རྒོད་པ་དང་། དགའ་དགའ་བ་དང་། རྩེ་རྩེ་བ་ཕན་ཚུན་དྲན་པར་བྱེད་ཅིང་ཡང་ངོ་ཚ་བ་ལྟར་འདུག་པ་དང་། ཁ་ཅིག་ནི་གཞོན་ནུའི་གཟུགས་དང་། བུ་མ་བཙས་པའི་གཟུགས་དང་། ན་ཆུང་ཚད་ལ་བབ་པའི་གཟུགས་སྟོན་པ་དང་། ཁ་ཅིག་ནི་འདོད་པ་དང་ལྡན་པས་བྱང་ཆུབ་སེམས་དཔའ་ལ་སྒུགས་པ་དང་། ཁ་ཅིག་ནི་བྱང་ཆུབ་སེམས་དཔའ་ལ་མེ་ཏོག་སིལ་མས་འཐོར་བ་དག་སྟེ། བྱང་ཆུབ་སེམས་དཔའི་མདུན་དུ་འདུག་ནས་བྱང་ཆུབ་སེམས་དཔའི་བསམ་པ་ལ་རྟོག་ཅིང་གདོང་དུ་ཡང་བལྟ་སྟེ། འདི་ཅི་ཆགས་པའི་དབང་
པོས་བལྟ་འམ་འོན་ཏེ་མིག་རྒྱང་རིང་དུ་བལྟ་འམ། གཡོའམ་མི་གཡོ་ཞེས་བལྟས་ན། བྱང་ཆུབ་སེམས་དཔའི་བཞིན་དག་ཅིང་དྲི་མ་མེད་ལ་སྒྲ་གཅན་ལས་ཐར་བའི་ཟླ་བའི་དཀྱིལ་འཁོར་ལྟ་བུར་འདུག་པ་དང་། ཉི་མ་ཐོག་མ་ཤར་བ་ལྟ་བུ་དང་། གསེར་གྱི་མཆོད་སྡོང་ལྟ་བུ་དང་། པད་མ་འདབ་མ་སྟོང་པ་རྒྱས་པ་ལྟ་བུ་དང་། གཏོར་བར་བྱ་བ་གཏོར་བའི་མེ་ལྟ་བུ་དང་། ལྷུན་པོ་ལྟར་མི་གཡོ་བ་དང་། ཁོར་ཡུག་ལྟར་མངོན་པར་འཕགས་པ་དང་། དབང་པོ་ཤིན་ཏུ་བསྲུངས་པ་དང་། གླང་པོ་ལྟར་སེམས་ཤིན་ཏུ་དུལ་བར་མཐོང་ངོ་། །དེ་ནས་བདུད་ཀྱི་བུ་མོ་དེ་དག་གིས་བྱང་ཆུབ་སེམས་དཔའ་ཤིན་ཏུ་ཆགས་པར་བྱ་བའི་ཕྱིར་གླུ་དང་གར་དུ་སྦྱར་བའི་ཚིགས་སུ་བཅད་པ་འདི་དག་སྨྲས་སོ། །དུས་ཀྱི་དམ་པ་སོས་ཀ་བཟང་ལ་བབ། །ཞུགས་ཤིང་མེ་ཏོག་རྒྱས་ཀྱིས་དགྱེས་པར་རོལ། །ཁྱོད་ཀྱི་གཟུགས་ནི་གཟུགས་བཟང་མཛེས་པ་སྟེ། །མཚན་གྱིས་སྤྲས་པའི་དབང་དུ་བདག་ཅག་འགྱུར། །བདག་ཅག་སྐྱེས་པ་ལེགས་སྐྱེས་དབྱིབས་ལེགས་ཏེ། །ལྷ་མི་བདེ་བའི་རྐྱེན་དུ་བདག་ཅག་བྱུང་། །བྱང་ཆུབ་རྙེད་དཀས་ཐུགས་ནི་སླར་སྒྱུར་ལ། །མྱུར་དུ་བཞེངས་ཏེ་དར་ལ་བབ་པ་སྤྱོད། །ཁྱོད་ཀྱི་ཆེད་དུ་ཆས་ནས་རབ་ཏུ་བརྒྱན་ཏེ་ལྷགས་གྱུར་པ། །ལྷ་ཡི་བུ་མོ་ལེགས་པར་བརྒྱན་པ་འདི་དག་རྣམས་ལ་གཟིགས། །གཟུགས་འདི་བལྟས་ནས་ཤིང་རུལ་ལྟ་བུར་སྲོག་ཙམ་ལུས་པ་ཡང་། །ཆགས་པར་འགྱུར་ན་ཆགས་པས་དགའ་བ་སུ་ཞིག་ཆགས་མི་འགྱུར། །སྐྲ་འཇམ་ཤིན་ཏུ་དྲི་ཞིམ་དྲི་དང་ལྡན། །ཅོད་པན་རྣ་ཆ་འདབ་རིས་བཞིན་རྒྱས་ལ། །དཔྲལ་བ་ལེགས་ཤིང་ལེགས་བྱུགས་བཞིན་དང་ལྡན། །པད་མ་རྒྱས་པ་ལྟ་བུར་མིག་ཡངས་ལེགས། །ཁ་བཞིན་ཟླ་བ་ཉ་བ་ལྟ་བུ་སྟེ། །ཤིང་ཏོག་བིམ་པ་སྨིན་འདྲའི་མཆུ་དང་ལྡན། །དུང་དང་ཀུན་ད་ཁ་བ་དཀར་སོ་ལྡན། །སྡུག་པ་དགའ་ལ་ཆགས་པ་རྣམས་ལ་གཟིགས། །ནུ་མ་ཤིན་ཏུ་མཁྲང་ཞིང་རྒྱས་ལ་འབུར། །ལྟོ་བའི་རྐེད་ན་གཉེར་གསུམ་ཤིན་ཏུ་མཛེས། །རྐེད་པ་འཁོར་ས་ལྟ་བུར་ཡངས་ཤིང་མཛེས། །ན་ཆུང་ཤིན་ཏུ་མཛེས་ལ་མགོན་པོ་གཟིགས། །གླང་པོའི་སྣ་འདྲ་བ་ཡི་བརླ་ལྡན་ཞིང་། །ལག་པ་གདུ་བུས་ཆལ་
པར་གང་བ་ཅན། །རྐེད་པ་གསེར་གྱི་ཕག་སྐ་རབ་མཛེས་བརྒྱན། །ཁྱོད་ཀྱི་བྲན་མོ་འདི་ལ་མགོན་པོ་གཟིགས། །ངང་པའི་སྟབས་ལྡན་དལ་གྱིས་མཆི་བགྱིད་པ། །འཇམ་ཞིང་ཡིད་འོང་འདོད་ལྡན་མཛེས་སྨྲ་བ། །རྣམ་པ་འདི་ལྟར་ཤིན་ཏུ་ལེགས་བརྒྱན་ལ། །ལྷ་ཡི་དགའ་བ་རྣམས་ལ་ཤིན་ཏུ་མཁས། །གླུ་དང་རོལ་མོའི་དབྱངས་སྒྲ་གར་རབ་བསླབས། །དགའ་བའི་ཆེད་དུ་མཛེས་པའི་གཟུགས་ཅན་སྐྱེས། །འདོད་ལ་རབ་དགའ་གལ་ཏེ་མི་བཞེད་ན། །འཇིག་རྟེན་དག་ན་ཁྱོད་ནི་ཤིན་ཏུ་བསླུས། །མི་གླེན་ནོར་གྱི་བདེ་བ་མི་ཤེས་འགའ། །གཏེར་མཐོང་ནས་ནི་འབྲོས་པར་བགྱིད་པ་ལྟར། །ཁྱོད་ཀྱང་འདོད་ཆགས་མི་མཁྱེན་རང་ལྷགས་པ། །ན་ཆུང་རྣམས་ལ་མི་སྤྱོད་དེ་དང་འདྲ། །དགེ་སློང་དག་དེ་ནས་བྱང་ཆུབ་སེམས་དཔའ་མིག་མི་འཛུམས་པར་འཛུམ་དམུལ་ཏེ། བཞིན་གྱི་འཛུམ་ཕྱུང་ཞིང་། དབང་པོ་རྣམ་པར་མ་འཁྲུགས་པ་དང་། ལུས་མ་བཅོས་པ་དང་། བརྗིད་པ་དང་། མ་ཆགས་པ་དང་། མི་སྡང་བ་དང་། མ་རྨོངས་པ་དང་། རིའི་དབང་པོ་ལྟར་མི་གཡོ་བ་དང་། མ་ཞུམ་པ་དང་། མ་གྱུར་པ་དང་། འཛེམ་པ་མེད་པ། བློ་ཤིན་ཏུ་ལེགས་པར་གནས་པ་དང་། ཉོན་མོངས་པ་རྣམས་ཤིན་ཏུ་སྤངས་པའི་ཕྱིར་རང་གི་ཁ་ན་ལས་པའི་ཡེ་ཤེས་ཀྱི་སྒོ་དང་། འཇམ་ཞིང་སྙན་པའི་ཚིག་དང་། ཚངས་པ་ལས་ལྷག་པའི་ང་རོ་དང་། བྱ་ཀ་ལ་པིང་ཀའི་སྒྲ་དབྱངས་དང་། སྙན་པ་དང་། ཡིད་དུ་འོང་བས་བདུད་ཀྱི་བུ་མོ་དེ་དག་ལ་ཚིགས་སུ་བཅད་པས་སླར་སྨྲས་པ། འདོད་པ་སྡུག་བསྔལ་མང་པོ་སྩོགས་ཤིང་སྡུག་བསྔལ་རྩ་བ་སྟེ། །མི་མཁས་རྣམས་ལ་བསམ་གཏན་རྫུ་འཕྲུལ་དཀའ་ཐུབ་ཉམས་པར་བྱེད། །བུད་མེད་འདོད་པའི་ཡོན་ཏན་ཆོག་པ་མེད་ཅེས་མཁས་པས་སྨྲས། །ང་ནི་མི་མཁས་རྣམས་ལ་ཤེས་རབ་ཆོག་པར་བྱེད་པར་འགྱུར། །འདོད་པ་བསྟེན་ན་སྲིད་པ་ཕྱིར་ཞིང་རྣམ་པར་འཕེལ་འགྱུར་ཏེ། །དཔེར་ན་མི་འགའ་ལ་ལ་ཚྭ་ཆུ་འཐུངས་པར་གྱུར་པ་བཞིན། །དེ་ལ་ཞུགས་པ་བདག་གི་དོན་མིན་གཞན་གྱི་དོན་ཀྱང་མིན། །ང་ནི་བདག་གི་དོན་དང་གཞན་གྱི་དོན་ལ་སྤྲོ་བ་ཡིན། །ཁྱོད་ཀྱི་གཟུགས་ནི་ཆུ་བུར་དག་དང་དབུ་བ་མཚུངས་ཤིང་འདྲ། །སྒྱུ་མའི་ཚོན་
ལྟར་རང་གི་བློ་ཡིས་རྣམ་པར་བསྒྲུབས་པ་སྟེ། །རྨི་ལམ་དག་ན་རྩེ་བ་ལྟ་བུར་མི་བརྟན་མི་རྟག་ཀྱང་། །བྱིས་པ་མི་མཁས་རྣམས་ཀྱི་སེམས་ནི་རྟག་ཏུ་རྨོངས་པར་བྱེད། །མིག་ནི་ཆུ་ཡི་ཆུ་བུར་མཚུངས་ཤིང་འདྲ་སྟེ་པགས་པས་གཡོགས། །ཁྲག་བརླང་མཁྲང་ཞིང་འབུར་བ་དཔེར་ན་ནད་ཀྱི་འབྲས་དང་མཚུངས། །ལྟོ་ནི་གཅིན་དང་ཕྱི་ས་སོགས་ཏེ་ཤིན་ཏུ་མི་གཙང་བ། །སྡུག་བསྔལ་འཁྲུལ་འཁོར་ལས་དང་ཉོན་མོངས་པ་ལས་ཡང་དག་བྱུང་། །བྱིས་པའི་བློ་ཅན་དག་ནི་རྨོངས་གྱུར་ཕྱིན་ཅི་ལོག་པ་ཡིས། །ལུས་གང་ལ་ནི་སྡུག་པར་རྟོག་པ་མཁས་པ་དེ་ལྟ་མིན། །སྡུག་བསྔལ་རྩ་བར་གྱུར་པའི་འཁོར་བར་ཡུན་རིང་འཁོར་བྱེད་ན། །སེམས་ཅན་དམྱལ་བ་རྣམས་སུ་སྡུག་བསྔལ་མི་བཟད་མང་པོ་མྱོང་། །རྐེད་པ་ནས་ནི་རབ་ཏུ་ཡིད་མི་འོང་བའི་དྲི་ཅན་འཛག །བརླ་དང་བྱིན་པ་རྐང་པ་དག་ནི་འཁྲུལ་འཁོར་ལྟ་བུར་གནས། །ང་ཡིས་ཁྱེད་ལ་ཡང་དག་བརྟགས་ན་སྒྱུ་མ་ཇི་བཞིན་ཏེ། །ཕྱིན་ཅི་ལོག་གི་རྒྱུ་དང་རྐྱེན་ལས་བྱུང་བར་གྱུར་པ་ཡིན། །འཕགས་པའི་ཡེ་ཤེས་ལམ་ལས་གོལ་བ་ཕྱིན་ཅི་ལོག་གྱུར་པ། །མེ་དང་དུག་གི་ལོ་མ་འདྲ་ཞིང་སྦྲུལ་ཆེན་ཁྲོས་འདྲ་བ། །འདོད་པའི་ཡོན་ཏན་ཡོན་ཏན་མིན་ཞིང་ཡོན་ཏན་ཉམས་མཐོང་ན། །དེ་ལ་བྱིས་པ་བདེ་བའི་འདུ་ཤེས་སྐྱེད་ཅིང་བརྒྱལ་བར་གྱུར། །མི་གང་འདོད་པས་བུད་མེད་རྣམས་ཀྱི་ཁོལ་པོར་གྱུར་པ་དང་། །གང་ཞིག་ཆོས་ཀྱི་དགའ་བ་བོར་ཏེ་འདོད་པས་དགའ་བྱེད་ཅིང་། །དགའ་ལ་བརྐམ་པ་དེ་ནི་ཚུལ་ཁྲིམས་ལམ་ལས་གོལ་གྱུར་ཅིང་། །བསམ་གཏན་ལམ་གོལ་བློ་ཉམས་ཡེ་ཤེས་ལས་ནི་རབ་རིང་གནས། །ང་ནི་འདོད་ཆགས་ཞེ་སྡང་ལྷན་ཅིག་གནས་པ་མ་ཡིན་ཏེ། །རྟག་དང་སྡུག་དང་བདག་དང་ལྷན་ཅིག་གནས་པར་བྱེད་མ་ཡིན། །མི་དགའ་བ་དང་དགའ་དང་ལྷན་ཅིག་གནས་པ་མ་ཡིན་ལ། །ང་ཡི་སེམས་ནི་རབ་ཏུ་གྲོལ་ཏེ་མཁའ་ལ་རླུང་དང་འདྲ། །གལ་ཏེ་ཁྱེད་འདྲའི་འགྲོ་བ་ཀུན་གྱིས་འདིར་ནི་གང་གྱུར་ལ། །བསྐལ་པར་དེ་དག་རྣམས་དང་ལྷན་ཅིག་འདྲེ་ཞིང་གནས་ཀྱང་ནི། །་ང་ལ་ཐ་བ་མེད་ཅིང་ཆགས་མེད་གཏི་མུག་མི་འགྱུར་ཏེ། །རྒྱལ་བ་རྣམས་ཀྱི་ཐུགས་ནི་ནམ་མཁའ་མཚུངས་ཤིང་འདྲ་ཕྱིར་རོ། །ལྷ་དང་ལྷ་མོ་ཤིན་ཏུ་དྲི་མེད་
ལ། །ཁྲག་དང་རུས་པ་མེད་ཅིང་རབ་བཟང་བ། །དེ་དག་ཀུན་ཀྱང་འཇིགས་པ་ཆེར་གནས་ཏེ། །རྟག་དངོས་བྲལ་ཞིང་ཐེར་ཟུག་མེད་ཕྱིར་རོ། །དེ་ནས་བདུད་ཀྱི་བུ་མོ་བུད་མེད་ཀྱི་སྒྱུ་རྣམས་ཤིན་ཏུ་བསླབས་པ་དེ་དག་དེ་བས་ཀྱང་ཆེར་འདོད་ཆགས་དང་། རྒྱགས་པ་དང་། དྲེགས་པ་བསྐྱེད་དེ། སྟེག་པ་བསྟན་ནས་ལུས་རྣམས་བརྒྱན་ཏེ། བུད་མེད་ཀྱི་གཡོ་ཉེ་བར་བསྟན་ནས་བྱང་ཆུབ་སེམས་དཔའ་ལ་རྔོད་དོ། །དེ་ལ་འདི་སྐད་ཅེས་བྱ་སྟེ། བུ་མོའི་ནང་ན་གཅེས་མཆོག་སྲེད་དང་དགའ་དང་དགའ་ཅན་ལྷན་ཅིག་ཏུ། །བདུད་ཀྱིས་བཏང་བ་ཤིན་ཏུ་ཚུལ་དུ་ཤིས་པར་རིངས་པར་ལྷགས་གྱུར་ཏེ། །ཤིང་གི་ལྕུག་མ་གཞོན་ནུ་ལོ་མར་བཅས་པ་རླུང་གིས་བསྐྱོད་པ་བཞིན། །གར་བྱེད་ཅིང་ནི་རྒྱལ་པོའི་སྲས་པོ་ཤིང་དྲུང་འདུག་ལ་རྔོད་པར་བྱེད། །དུས་ཀྱི་ནང་ན་དམ་པ་མཆོག་ཏུ་བགྱི་བ་སོས་ཀའི་དུས་འདི་སྟེ། །སྐྱེས་པ་དག་དང་བུད་མེད་དགའ་བར་བགྱིད་ཅིང་མུན་པ་རྡུལ་ཡང་བཅོམ། །ཁུ་བྱུག་དང་ནི་ངང་པ་རྨ་བྱ་སྒྲ་འབྱིན་བྱ་ཚོགས་རྣམས་ཀྱིས་གང་། །འདོད་པའི་ཡོན་ཏན་དགའ་བ་མྱོང་བར་བགྱི་བའི་དུས་ལ་ད་བབ་བོ། །བསྐལ་པ་སྟོང་དུ་ཚུལ་ཁྲིམས་དགའ་ཞིང་བརྟུལ་ཞུགས་དཀའ་ཐུབ་སྤྱད་གྱུར་པ། །རི་ཡི་རྒྱལ་པོ་ལྟ་བུར་མི་གཡོ་ཉི་མ་ཤར་མ་ཐག་པའི་གཟུགས། །འབྲུག་བསྒྲགས་ལྟ་བུར་སྒྲ་སྙན་རི་དགས་དབང་པོ་སྒྲ་བསྒྲགས་འདྲ་བ་པོ། །འགྲོ་ལ་ཕན་པ་བྱེད་པ་དེ་ཡིས་དོན་དང་ལྡན་པའི་ཚིག་སྨྲས་པ། །འདོད་པ་རྩོད་དང་དགྲ་དང་འཐབ་དང་ཉོན་མོངས་བཅས་དང་འཇིགས་བྱེད་པ། །བྱིས་པའི་སྐྱེ་བོས་ཉེ་བར་བསྟེན་གྱི་མཁས་པའི་སྐྱེ་བོས་རྟག་སྤངས་པ། །གང་དུ་བདེ་གཤེགས་རྣམས་ཀྱིས་བདུད་རྩི་བརྙེས་པའི་དུས་ལ་བབ་གྱུར་གྱིས། །དོ་མོད་བདུད་ལས་རྒྱལ་ཏེ་སྟོབས་བཅུ་རྣམས་དང་ལྡན་པ་དགྲ་བཅོམ་འགྱུར། །སྒྱུ་རྣམས་བསྟན་ནས་སྨྲས་པ་ཞལ་རས་པད་མ་འདྲ་བ་གསན་དུ་གསོལ། །ཁྱོད་ནི་རྒྱལ་པོ་དབང་ཕྱུག་དམ་པ་ས་བདག་སྟོབས་དང་ལྡན་པར་འགྱུར། །བུད་མེད་དམ་པའི་ཚོགས་ཀྱིས་སིལ་སྙན་སྟོང་དག་རབ་ཏུ་བགྱིད་འགྱུར་ན། །ཐུབ་པའི་ཆ་བྱད་ཀྱིས་ནི་ཅི་བགྱིས་སྤོངས་ལ་དགའ་བ་བསྟེན་དུ་གསོལ། །བྱང་ཆུབ་སེམས་དཔས་སྨྲས་པ། ང་ནི་སྲིད་པ་གསུམ་ན་དབང་ཕྱུག་ལྷ་དང་མི་རྣམས་ཀྱིས་མཆོད་ལ། །ཆོས་ཀྱི་འཁོར་ལོས་འགྲོ་
ཞིང་སྟོབས་བཅུའི་སྟོབས་དང་ལྡན་པའི་རྒྱལ་པོར་འགྱུར། །སློབ་དང་མི་སློབ་བུ་རྣམས་ཁྲག་ཁྲིག་རྟག་ཏུ་འདུད་པ་མངོན་དུ་བྱེད། །ཆོས་ཀྱི་དགའ་བས་དགའ་ཡི་ཡུལ་ལ་ང་ཡི་ཡིད་ནི་དགའ་མ་ཡིན། །དེ་དག་གིས་སྨྲས་པ། རེ་ཤིག་དར་ལ་བབ་པ་མ་ཡོལ་དང་པོ་ཐོར་བུར་གྱུར་པ་དང་། །ཁྱོད་ནི་རེ་ཤིག་སྙུན་གྱིས་མ་བཏབ་མི་ཤིས་བགྲེས་པར་མ་གྱུར་དང་། །ཇི་སྲིད་དར་ལ་བབ་ཅིང་བདག་ཅག་གྲོགས་ཀྱང་དར་ལ་བབ་གྱུར་པ། །དེ་སྲིད་བར་དུ་འཛུམ་པའི་ཞལ་གྱིས་འདོད་པའི་དགའ་བ་སྤྱད་དུ་གསོལ། །བྱང་ཆུབ་སེམས་དཔས་སྨྲས་པ། ཇི་སྲིད་དོ་མོད་དལ་བ་དམ་པ་འཆི་མེད་དཀོན་པ་རྙེད་པ་དང་། །ཇི་སྲིད་ལྷ་དང་ལྷ་མིན་གྲོང་ཁྱེར་མི་ཁོམ་སྡུག་བསྔལ་སྤངས་པ་དང་། །ཇི་སྲིད་རྒ་དང་ན་དང་འཆི་བའི་དགྲ་ཡིས་དཀྲུགས་པར་མ་གྱུར་པ། །དེ་སྲིད་ང་ནི་འཇིགས་མེད་གྲོང་ཁྱེར་འགྲོ་བའི་ལམ་མཆོག་བསྒོམ་པར་བྱ། །དེ་དག་གིས་སྨྲས་པ། ལྷ་ཡི་གནས་ན་སུམ་ཅུ་རྩ་གསུམ་བདག་པོ་ལྷ་མོས་བསྐོར་བ་དང་། །འཐབ་བྲལ་འཐབ་བྲལ་རབ་དང་དགའ་ལྡན་རབ་དང་བདུད་ཀྱི་གྲོང་ཁྱེར་ན། །ལྷ་མཆོག་བསྟོད་པ་བཞིན་དུ་བུད་མེད་དབང་དུ་གྱུར་ནས་འདོད་དགའ་ལ། །རོལ་ཅིང་སྤྱོད་ལ་བདག་ཅག་རྣམས་དང་ལྷན་ཅིག་དགྱེས་པ་རྒྱ་ཆེན་མཛོད། །བྱང་ཆུབ་སེམས་དཔས་སྨྲས་པ། འདོད་པ་རྩྭ་རྩེའི་ཟིལ་ཐིགས་བཞིན་དུ་མྱུར་ལ་སྟོན་ཀའི་སྤྲིན་དང་མཚུངས། །ཀླུ་ཡི་བུ་མོ་ཁྲོ་བ་ལྟ་བུར་ཤིན་ཏུ་འཇིགས་པར་བྱེད་པ་ཡིན། །བརྒྱ་བྱིན་འཐབ་བྲལ་རབ་ལྷ་དགའ་ལྡན་པ་དག་བདུད་ཀྱི་དབང་དུ་སོང་། །འཕགས་མིན་རྣམས་ཀྱིས་འདོད་པ་སྡུག་བསྔལ་ལྡན་པ་འདི་ལ་སུ་ཞིག་དགའ། །དེ་དག་གིས་སྨྲས་པ། ཤིང་མཆོག་འདི་དག་ལོ་མ་གཞོན་དང་ལྡན་ཞིང་མེ་ཏོག་རྒྱས་གྱུར་ལ། །ཤང་ཤང་ཏེའུ་དང་ཁུ་བྱུག་སྒྲ་འབྱིན་བུང་བ་སྒྲ་འབྱིན་ལྡན་པ་གཟིགས། །ས་ལས་རྩྭ་འཁྲུངས་རབ་སྔོ་འཇམ་ཞིང་སྣུམ་ལ་ལྕང་ལོ་ཅན་མཆིས་པ། །ནགས་མཆོག་མི་ཅི་ཚོགས་ཀྱིས་བསྟེན་པར་ན་ཆུང་རྣམས་དང་དགྱེས་པར་མཛོད། །བྱང་ཆུབ་སེམས་དཔས་སྨྲས་པ། ལོ་མར་བཅས་པའི་ཤིང་རྣམས་འདི་དག་དུས་ཀྱི་དབང་གིས་མེ་ཏོག་རྒྱས། །བུང་བ་དག་ཀྱང་བཀྲེས་དང་སྐོམ་པས་ཉེན་ནས་མེ་ཏོག་རྣམས་སུ་ལྷགས། །གང་ཞིག་དུས་ན་ས་ལས་སྐྱེས་པ་རྣམས་ཀྱང་
ཉི་མས་སྐམས་པར་འགྱུར། །ང་འདིར་སྔོན་གྱི་རྒྱལ་བ་རྣམས་ཀྱིས་སྤྱད་པ་བདུད་རྩི་ངེས་པར་སྤྱད། །བདུད་ཀྱི་བུ་མོ་རྣམས་ཀྱིས་སྨྲས་པ། ཟླ་འདྲའི་ཞལ་མངའ་གཟིགས་ཤིག་པད་མ་སར་པ་འདྲ་བའི་ཁ་བཞིན་ཅན། །སྙན་ཅིང་ཡིད་དུ་འོང་བའི་ཚིག་ལྡན་སོ་ནི་དངུལ་དང་ཁ་བ་འདྲ། །འདི་འདྲ་ལྷ་ཡི་གནས་ན་དཀོན་ན་མི་ཡི་གནས་ན་ག་ལ་མཆིས། །གང་དག་ལྷ་མཆོག་རྣམས་ཀྱིས་རྟག་ཏུ་འདོད་པར་བགྱི་བ་ཁྱོད་ཀྱིས་བརྙེས། །བྱང་ཆུབ་སེམས་དཔས་སྨྲས་པ། ལུས་ནི་ངན་སྐྱུགས་མི་གཙང་སྲིན་བུའི་རིགས་ཀྱིས་གང་བ་ཤིག་ཤིག་པོ། །མྱུར་དུ་འགྱེས་ཤིང་འཇིག་པ་བདེ་བ་མ་ཡིན་རྣམས་དང་ལྡན་པར་མཐོང་། །རྒྱུ་བར་བཅས་དང་མི་རྒྱུ་བ་ཡི་འགྲོ་ལ་བདེ་བ་མཆོག་བྱེད་པ། །གོ་འཕང་འཆི་འཕོ་མེད་པ་སྐྱེ་བོ་མཁས་པས་མཆོད་པ་དེ་ཐོབ་བྱ། །དེ་དག་འདོད་པའི་སྒྱུ་རྩལ་དྲུག་ཅུ་རྩ་བཞི་མྱོང་བར་གྱུར་པ་སྟེ། །རྐང་གདུབ་གསེར་གྱི་ཕག་སྐ་འཁྲོལ་ཞིང་གོས་ཀྱང་ཤིག་ཤིག་བྱས་ནས་ནི། །འདོད་པའི་མདའ་ཡིས་ཕོག་པ་རྒྱགས་པ་འཛུམ་ཞིང་འདི་སྐད་སྨྲས། །ཇོ་ཇོ་ཁྱོད་ལ་ནོངས་པ་ཅི་ཞིག་བགྱིས་ན་འདི་དག་བསྟེན་མི་བགྱི། །སྲིད་པ་ཀུན་གྱིས་ཉེས་པ་རིག་ནས་རྡུལ་དང་བྲལ་བས་འདི་སྐད་སྨྲས། །འདོད་པ་རལ་གྲི་མདུང་ཐུང་རྩེ་གསུམ་སྦྲང་རྩི་ཅན་གྱི་སྤུ་གྲི་འདྲ། །སྦྲུལ་གྱི་མགོ་དང་མེ་མུར་འདྲ་བར་ངས་འདིར་རབ་ཏུ་རིག་པས་ན། །བུད་མེད་ཡོན་ཏན་འཕྲོག་པས་དེ་ཕྱིར་ང་ཡིས་བུད་མེད་ཚོགས་རྣམས་སྤངས། །བུད་མེད་ཡོན་ཏན་རྣམ་པ་མང་པོ་ཁྲག་ཁྲིག་བྱེ་བ་དེ་དག་གིས། །གང་གི་ཚེ་ན་གླང་པོའི་ཕྲུ་གུའི་སྟབས་ཅན་དེ་བརྗོད་མ་ནུས་ཚེ། །ངོ་ཚ་སྐྱེངས་ནས་ཐུབ་པའི་རྐང་པ་གཉིས་ལ་རབ་ཏུ་ཕྱག་འཚལ་ཏེ། །དགའ་ཞིང་མགུ་བ་བསྐྱེད་ནས་ཕན་པ་བྱེད་པ་དེ་ལ་བསྟོད་པ་བྱས། །པད་མ་དྲི་མ་མེད་པའི་སྙིང་པོ་འདྲ་ཞིང་སྟོན་ཟླ་ལྟ་བུའི་ཞལ། །མར་གྱིས་སྦྱིན་བསྲེགབགྱིས་པའི་འོད་འཕྲོ་མེ་འདྲ་གསེར་གྱི་རི་འདྲ་བ། །སྲིད་པ་བརྒྱ་ནས་སྤྱད་ཅིང་དགོངས་དང་སྨོན་ལམ་བཏབ་པ་གྲུབ་གྱུར་ཅིག །བདག་ཉིད་རྒལ་ནས་སྡུག་བསྔལ་དག་དང་ལྡན་པའི་འགྲོ་བ་བསྒྲལ་དུ་གསོལ། །དེ་དག་རྣམས་ཀྱིས་དོང་ཀའི་ཤིང་དང་ཙམ་པ་ཀ་འདྲ་རྣམ་མང་
བསྟོད། །མཆོག་ཏུ་གྱུར་པའི་རི་ལྟར་མི་གཡོ་བ་ལ་བསྐོར་བ་བྱས་ནས་ནི། །སོང་སྟེ་ཕ་ཡི་རྐང་ལ་མགོ་བོས་ཕྱག་འཚལ་འདི་སྐད་ཚིག་ཀྱང་སྨྲས། །ཡབ་ཅིག་ལྷ་དང་མི་ཡི་བླ་མ་དེ་ལ་ཁོང་ཁྲོ་སྤངས་ན་ལེགས། །བཞིན་ནི་འཛུམ་པར་གྱུར་ནས་པད་མའི་འདབ་མ་འདྲ་བའི་མིག་གིས་ལྟ། །དེ་ནི་ཆགས་པས་སྐྱེ་བོ་མི་ལྟ་དེ་ལ་ཁྲོ་གཉེར་མཆིས་མ་ལགས། །ལྷུན་པོ་གཡོ་ཞིང་རྒྱ་མཚོ་སྐམས་ལ་ཉི་ཟླ་ལྟུང་བར་འགྱུར་ཡང་གདའ། །སྲིད་པ་གསུམ་གྱི་ཉེས་མཐོང་དེ་ནི་བུད་མེད་རྣམས་ཀྱི་དབང་མི་འགྱུར། །དེ་ནས་བདུད་སྡིག་ཅན་གྱིས་ཚིག་དེ་སྐད་ཐོས་ནས་དེ་བས་ཀྱང་ཆེར་སྡུག་བསྔལ་ཞིང་ཡིད་མི་བདེ་ལ། ཡི་མ་རངས་ཤིང་ཚིག་པ་ཟ་བའི་ཡིད་ཀྱིས་རང་གི་བུ་མོ་དེ་དག་ལ་སྨྲས་པ། ཀྱེ་མི་ཤེས་ཤིང་གླེན་ཏེ། ཁྱེད་ཀྱི་གཟུགས་དང་ད་རོད་མ་མཐོང་ངམ། ཇི་ལྟར་གྱུར་ན་དེ་བྱང་ཆུབ་ཀྱི་སྙིང་པོ་ལས་བསླང་བར་མ་ནུས། དེ་ནས་བདུད་ཀྱི་བུ་མོ་དེ་དག་གིས་རང་གི་ཕ་ལ་ཚིགས་སུ་བཅད་པས་སླར་སྨྲས་པ། སྙན་ཅིང་འཇམ་པོར་སྨྲ་ཡང་ཆགས་པ་མ་མཆིས་ཏེ། །གསང་བ་ཆེན་པོ་ལྟ་ཡང་སྡང་བ་མཆིས་མ་ལགས། །སྤྱོད་ལམ་དག་དང་སྤྱོད་པ་ལྟ་ཡང་རྨོངས་མ་མཆིས། །ལུས་རྣམས་ཐམས་ཅད་རྟོགས་ཀྱང་བསམ་པ་ཤིན་ཏུ་ཟབ། །བུད་མེད་ནོངས་པ་རྒྱ་ཆེན་ཐེ་ཚོམ་མ་མཆིས་རྟོགས། །འདོད་ལས་དབེན་པའི་ཡིད་ལྡན་འདོད་ཆགས་ཆགས་མ་མཆིས། །གང་ཞིག་དེ་ཡི་སེམས་དང་སྤྱོད་པ་ཡོངས་འཚལ་བ། །ལྷ་ཡུལ་མི་ཡུལ་འདི་ན་ལྷ་མི་དེ་མ་མཆིས། །དེ་ལ་བུད་མེད་སྒྱུ་རྣམས་གང་ལགས་བསྟན་ན་ཡབ། །ཆགས་བཅས་གང་ལགས་དེ་ཡི་སྙིང་ཞུ་འགྱུར་རིགས་ན། །དེ་དག་མཐོང་ཡང་དེ་ཡི་སེམས་ནི་གཅིག་མ་གཡོས། །རི་དབང་རྒྱལ་པོ་བཞིན་དུ་དེ་ནི་མི་གཡོ་གཡོ་མ་མཆིས། །བསོད་ནམས་གཟི་བརྗིད་བརྒྱས་བལྟམ་ཡོན་ཏན་གཟི་བརྗིད་རྫོགས། །བསྐལ་པ་བྱེ་བ་མང་པོར་ཚུལ་ཁྲིམས་བརྟུལ་ཞུགས་སྤྱད། །ལྷ་དང་ཚངས་པ་སེམས་ཅན་གཟི་བརྗིད་རྣམ་དག་དགེ། །དེ་དག་དེ་ཡི་རྐང་པར་མགོས་གཏུགས་ཕྱག་ཀྱང་འཚལ། །སྡེ་དང་བཅས་པའི་བདུད་རྣམས་བཅོམ་ནས་སྔོན་ཆད་ཀྱི། །རྒྱལ་བས་བཞེད་པ་བྱང་ཆུབ་དམ་པ་
འཐོབ་འགྱུར་ངེས། །ཡབ་ཅིག་བདག་ཅག་གཡུལ་ངོར་འཐབ་པ་མི་འཚལ་ཏེ། །སྟོབས་ལྡན་དག་དང་འཐབ་པར་སྦྱོར་འདི་ཚེགས་རབ་ཆེ། །ཡབ་ཅིག་མཁའ་ལ་ནོར་བུ་རིན་ཆེན་གཙུག་ཕུད་ཅན། །རྫོགས་པའི་བྱང་ཆུབ་སེམས་དཔའ་ཁྲག་ཁྲིག་གུས་པར་གནས། །རིན་ཆེན་འབྱུང་གནས་ཡན་ལག་མེ་ཏོག་ཕྲེང་བས་བརྒྱན། །སྟོབས་བཅུ་མངའ་བས་མཆོད་ཕྱིར་འདིར་བཏང་རྣམས་ལ་གཟིགས། །གང་དག་སེམས་པ་མ་མཆིས་གང་དག་སེམས་མ་མཆིས། །ཤིང་རི་ལྷ་དབང་གནོད་སྦྱིན་མཁའ་ལྡིང་དབང་པོ་དག །ཡོན་ཏན་རི་བོར་མངོན་པར་འདུད་ཅིང་ཕྱོགས་པ་ལས། །ཡབ་ཅིག་དོ་མོད་སླར་ལོག་ན་ནི་ལེགས་པ་འདྲ། །གཞན་ཡང་གང་གི་ཕ་མཐར་མི་ཕྱིན་དེར་ནི་རྐྱལ་མི་བགྱི། །གང་ཞིག་རྩ་ནས་མི་ཕྱིན་དེ་ནི་བརྐོ་མི་བགྱི། །གང་ལ་བཟོད་པ་ཡང་གསོལ་དེ་ནི་དཀྲུག་མི་བགྱི། །གང་གིས་ཡིད་མི་བདེ་བར་འགྱུར་བ་དེ་མི་བགྱི། །དགེ་སློང་དག་དེ་ནས་དེའི་ཚེ་ཤིང་གི་ལྷ་མོ་བརྒྱད་ལ་འདི་ལྟ་སྟེ། དཔལ་ལྡན་དང་། འཕེལ་མོ་དང་། དཀའ་ཐུབ་དང་། དགེ་མ་དང་། མཁས་མ་དང་། མདངས་སྟོབས་དང་། བདེན་སྨྲ་དང་། ལྡན་མ་སྟེ། དེ་དག་གིས་བྱང་ཆུབ་སེམས་དཔའ་ལ་ཡང་དག་པར་མཆོད་ནས་དཔལ་རྣམ་པ་བཅུ་དྲུག་གིས་བྱང་ཆུབ་སེམས་དཔའ་འཕེལ་བར་བྱེད། མངོན་དུ་སྟོད་པར་བྱེད་དེ། སེམས་ཅན་དམ་པ་ཁྱོད་ནི་དགུང་ཟླ་ཡར་གྱི་ངོ་ལྟར་མཛེས་པའོ། །བློ་རྣམ་པར་དམ་པ་ཁྱོད་ནི་གདུགས་དང་པོ་ཤར་བ་ལྟར་ལྷང་ངེ་བའོ། །སེམས་ཅན་དམ་པ་ཁྱོད་ནི་ཆབ་ཀྱི་ནང་ན་པད་མ་ལྟར་རབ་ཏུ་རྒྱས་པའོ། །སེམས་ཅན་དམ་པ་ཁྱོད་ནི་ནགས་དང་ནགས་འདབ་ན་རྒྱུ་བའི་སེང་གེ་ལྟར་སྒྲོགས་པའོ། །སེམས་ཅན་དམ་པ་ཁྱོད་ནི་རྒྱ་མཚོའི་དབུས་ན་རིའི་རྒྱལ་པོ་ལྟར་མཛེས་པའོ། །སེམས་ཅན་དམ་པ་ཁྱོད་ནི་ཁོར་ཡུག་གི་རི་ལྟར་མངོན་པར་འཕགས་པའོ། །སེམས་ཅན་དམ་པ་ཁྱོད་ནི་རྒྱ་མཚོ་ལྟར་རིན་པོ་ཆེས་བལྟམས་ཤིང་གཏིང་དཔག་དཀའ་བའོ། །འཇིག་རྟེན་གྱི་མགོན་པོ་ཁྱོད་ནི་ནམ་མཁའ་ལྟར་ཐུག་པ་མ་མཆིས་ཤིང་ཐུགས་ཀྱི་རྒྱ་ཆེ་བའོ། །སེམས་ཅན་རྣམ་པར་དག་པ་ཁྱོད་ནི་དོག་ས་ལྟར་སེམས་ཅན་ཐམས་ཅད་
ཀྱི་འཚོ་བར་གྱུར་ཅིང་ཐུགས་ཤིན་ཏུ་བརྟན་པའོ། །སེམས་ཅན་དམ་པ་ཁྱོད་ནི་མཚོ་མ་དྲོས་པ་ལྟར་རྟག་ཏུ་དང་ཞིང་ཐུགས་རྙོག་པ་མི་མངའ་བའོ། །སེམས་ཅན་དམ་པ་ཁྱོད་ནི་རླུང་མར་ལྟར་འཇིག་རྟེན་གྱི་ཁམས་ཐམས་ཅད་ལ་རྟག་ཏུ་མི་ཆགས་ཤིང་ཐུགས་གནས་མ་མཆིས་པའོ། །སེམས་ཅན་དམ་པ་ཁྱོད་ནི་གཟི་བརྗིད་ཀྱི་རྒྱལ་པོ་ལྟར་རློམ་སེམས་ཅན་ཐམས་ཅད་སྤངས་ཤིང་བསྙེན་པར་དཀའ་བའོ། །སེམས་ཅན་དམ་པ་ཁྱོད་ནི་སྲེད་མེད་ཀྱི་བུ་ལྟར་ཐུལ་བར་དཀའ་ཞིང་སྟོབས་དང་ལྡན་པའོ། །འཇིག་རྟེན་གྱི་མགོན་པོ་ཁྱོད་ནི་བྱང་ཆུབ་ཀྱི་སྙིང་པོ་ལས་མི་བཞེངས་པས་དམ་བཅས་པ་བརྟན་པའོ། །སེམས་ཅན་དམ་པ་ཁྱོད་ནི་དབང་པོའི་ལག་གིས་འཕངས་པའི་རྡོ་རྗེ་ལྟར་སླར་མི་ལྡོག་པའོ། །སེམས་ཅན་དམ་པ་ཁྱོད་ནི་རིང་པོར་མི་ཐོགས་པར་སྟོབས་བཅུ་དང་ལྡན་པར་བྱོན་པས་བརྙེས་པ་ལེགས་པར་བརྙེས་པའོ། །དགེ་སློང་དག་དེ་ལྟར་བྱང་ཆུབ་ཀྱི་ཤིང་གི་ལྷ་མོ་རྣམས་ཀྱིས་དཔལ་རྣམ་པ་བཅུ་དྲུག་གིས་བྱང་ཆུབ་སེམས་དཔའ་འཕེལ་བར་བྱེད་དོ། །དགེ་སློང་དག་དེ་ན་གནས་གཙང་མའི་རིས་ཀྱི་ལྷའི་བུ་རྣམས་ཀྱིས་རྣམ་པ་བཅུ་དྲུག་གིས་བདུད་ཉམས་དམས་པར་བྱེད་དེ། རྣམ་པ་བཅུ་དྲུག་གང་ཞེ་ན། འདི་ལྟ་སྟེ། སྡིག་ཅན་ཁྱོད་ནི་ཁྲུང་ཁྲུང་རྒན་པོ་ལྟར་སེམས་ཁོང་དུ་ཆུད་ཅིང་དམས་པའོ། །སྡིག་ཅན་ཁྱོད་ནི་གླང་པོ་རྒན་པོ་འདམ་དུ་བྱིང་བ་ལྟར་ཉམ་ཆུང་བའོ། །སྡིག་ཅན་ཁྱོད་ནི་དཔའ་བོར་ཁས་འཆེས་པ་ཕམ་པ་ལྟར་གཅིག་པུར་གྱུར་པའོ། །སྡིག་ཅན་ཁྱོད་ནི་ནད་ཀྱིས་ཉེན་པ་འབྲོག་ཏུ་བོར་བ་ལྟར་གཉིས་སུ་མེད་པའོ། །སྡིག་ཅན་ཁྱོད་ནི་གླང་བུ་ཁལ་གྱིས་ཉོན་མོངས་པ་ལྟར་སྟོབས་མེད་པའོ། །སྡིག་ཅན་ཁྱོད་ནི་ཤིང་རླུང་གིས་བཏབ་པ་ལྟར་སྒྱེལ་བའོ། །སྡིག་ཅན་ཁྱོད་ནི་འདྲོན་པ་ལམ་སྟོར་བ་ལྟར་ལམ་ངན་པར་གནས་པའོ། །སྡིག་ཅན་ཁྱོད་ནི་མི་དབུལ་པོ་བུ་ལོན་ཅན་ལྟར་དམན་པ་བས་ཀྱང་དམན་པའོ། །སྡིག་ཅན་ཁྱོད་ནི་བྱ་རོག་བྱུང་རྒྱལ་བ་ལྟར་མུ་ཅོར་སྨྲ་བའོ། །སྡིག་ཅན་ཁྱོད་ནི་མ་དུལ་བ་བྱས་པ་མི་གཟོ་བ་ལྟར་ང་རྒྱལ་གྱིས་ཟིལ་གྱིས་ནོན་པའོ། །སྡིག་ཅན་ཁྱོད་ནི་སེང་གེའི་སྒྲས་ཝ་འབྲོས་པ་ལྟར་དེང་འབྲོས་པར་འགྱུར་བའོ། །སྡིག་ཅན་ཁྱོད་ནི་རྣམ་པར་འཐོར་རླུང་གིས་
གཏོར་བའི་བྱ་བཞིན་དུ་དེང་འདར་བར་འགྱུར་བའོ། །སྡིག་ཅན་ཁྱོད་ནི་སྤྲང་པོ་བསོད་ནམས་ཟད་པ་ལྟར་དུས་མི་ཤེས་པའོ། །སྡིག་ཅན་ཁྱོད་ནི་སྣོད་ཆག་པ་རྡུལ་གྱིས་གང་བ་ལྟར་དེང་རྣམ་པར་སྤང་བར་འགྱུར་བའོ། །སྡིག་ཅན་ཁྱོད་ནི་སྔགས་ལ་དཔའ་བ་སྦྲུལ་ལ་བབ་པ་ལྟར་དེང་ཚར་ཆོད་པར་འགྱུར་བའོ། །སྡིག་ཅན་ཁྱོད་ནི་མི་རྐང་ལག་བཅད་པ་ལྟར་སྟོབས་ཐམས་ཅད་དང་བྲལ་བའོ་ཞེས་བྱ་བའོ། །དགེ་སློང་དག་དེ་ལྟར་གནས་གཙང་མའི་རིས་ཀྱི་ལྷ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཉམ་སྨད་པ་བྱས་སོ། །དགེ་སློང་དག་དེ་ལ་བྱང་ཆུབ་ཀྱི་བསྙེན་བཀུར་བའི་ལྷ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཟློག་པར་བྱེད་དེ། བཅུ་དྲུག་གང་ཞེ་ན། འདི་ལྟ་སྟེ། སྡིག་ཅན་ཁྱོད་ནི་དཔའ་བོས་ཕ་རོལ་གྱི་སྡེ་བཅོམ་པ་ལྟར་བྱང་ཆུབ་སེམས་དཔས་དོ་མོད་ཕམ་པར་བྱས་པར་འགྱུར་རོ། །སྡིག་ཅན་ཁྱོད་ནི་གྱད་སྟོབས་ཆུང་ངུ་ལ་གྱད་སྟོབས་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་ཚར་བཅད་པར་འགྱུར་རོ། །སྡིག་ཅན་ཁྱོད་ནི་སྲིན་བུ་མེ་ཁྱེར་ལ་ཉི་མའི་དཀྱིལ་འཁོར་བབ་པ་ལྟར་དོ་མོད་བྱང་ཆུབ་སེམས་དཔས་ཟིལ་གྱིས་ནོན་པར་འགྱུར་རོ། །སྡིག་ཅན་ཁྱོད་ནི་ཕུབ་མ་སྤར་བ་གང་ལ་རླུང་མར་བཏབ་པ་ལྟར་དོ་མོད་བྱང་ཆུབ་སེམས་དཔས་གཏོར་བར་འགྱུར་རོ། །སྡིག་ཅན་ཁྱོད་ནི་ཝ་ལ་སེང་གེ་བབ་པ་ལྟར་དོ་མོད་བྱང་ཆུབ་སེམས་དཔས་སྔངས་པར་བྱས་པར་འགྱུར་རོ། །སྡིག་ཅན་ཁྱོད་ནི་ཤིང་སཱ་ལ་ཆེན་པོ་རྩ་བ་ནས་བཅད་པ་ལྟར་དོ་མོད་བྱང་ཆུབ་སེམས་དཔས་སྒྱེལ་བར་འགྱུར་རོ། །སྡིག་ཅན་ཁྱོད་ནི་མི་མཛའ་བའི་གྲོང་ཁྱེར་ལ་རྒྱལ་པོ་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་བརླག་པར་འགྱུར་རོ། །སྡིག་ཅན་ཁྱོད་ནི་བ་རྗེས་ཀྱི་ཆུ་ལ་ཉི་ཚན་ཆེན་པོ་བབ་པ་ལྟར་དོ་མོད་བྱང་ཆུབ་སེམས་དཔས་ཡོངས་སུ་ཟད་པར་བྱས་པར་འགྱུར་རོ། །སྡིག་ཅན་ཁྱོད་ནི་མི་གཡོན་ཅན་གསད་པར་བྱ་བ་ཤོར་བ་ལྟར་དོ་མོད་བྱང་ཆུབ་སེམས་དཔས་འབྲོས་པར་བྱེད་པར་འགྱུར་རོ། ། སྡིག་ཅན་ཁྱོད་ནི་མེའི་ཚ་བས་བུང་བའི་ཁྱུ་ལྟར་དོ་མོད་བྱང་ཆུབ་སེམས་དཔས་མགོ་འཁོར་བར་བྱེད་པར་འགྱུར་རོ། །སྡིག་ཅན་ཁྱོད་ནི་ཆོས་ཀྱི་རྒྱལ་པོ་རྒྱལ་སྲིད་ཉམས་པ་ལྟར་དོ་མོད་བྱང་ཆུབ་སེམས་དཔས་མྱ་ངན་བྱེད་དུ་བཅུག་པར་འགྱུར་རོ། །སྡིག་ཅན་ཁྱོད་ནི་ཁྲུང་ཁྲུང་རྒན་པོ་འདབ་མ་བྲེགས་པ་ལྟར་དོ་མོད་བྱང་ཆུབ་སེམས་དཔས་སེམས་ཁོང་དུ་
བཅུག་པར་འགྱུར་རོ། །སྡིག་ཅན་ཁྱོད་ནི་འབྲོག་དགོན་པར་ལམ་རྒྱགས་ཆད་པ་ལྟར་དོ་མོད་བྱང་ཆུབ་སེམས་དཔས་ཕོངས་པར་བྱས་པར་འགྱུར་རོ། །སྡིག་ཅན་ཁྱོད་ནི་རྒྱ་མཚོ་ཆེན་པོར་གྲུ་ཞིག་པ་ལྟར་དོ་མོད་བྱང་ཆུབ་སེམས་དཔས་སྨྲེ་སྔགས་འདོན་དུ་བཅུག་པར་འགྱུར་རོ། །སྡིག་ཅན་ཁྱོད་ནི་སྲེག་པའི་བསྐལ་པས་རྩྭ་དང་ནགས་ཚལ་ལྟར་དོ་མོད་བྱང་ཆུབ་སེམས་དཔས་རྙིས་པར་བྱས་པར་འགྱུར་རོ། །སྡིག་ཅན་ཁྱོད་ནི་རིའི་རྩེ་མོ་ལ་རྡོ་རྗེ་བབ་པ་ལྟར་དོ་མོད་བྱང་ཆུབ་སེམས་དཔས་བརྙིལ་བར་འགྱུར་རོ་ཞེས་བྱ་བའོ། །དགེ་སློང་དག་དེ་ལྟར་བྱང་ཆུབ་ཀྱི་བསྙེན་བཀུར་བའི་ལྷའི་བུ་རྣམས་ཀྱིས་རྣམ་པ་བཅུ་དྲུག་གིས་བདུད་སྡིག་ཅན་ཟློག་པར་བྱེད་ཀྱང་བདུད་སྡིག་ཅན་ཕྱིར་མ་ལོག་གོ །དེ་ལ་འདི་སྐད་ཅེས་བྱ་སྟེ། ལྷ་ཡི་ཚོགས་ཀྱིས་ཡང་དག་བསྐུལ་བ་ཐོས་ཀྱང་བདུད་ནི་ཕྱིར་ལོག་མ་གྱུར་ཏེ། །སློངས་ཤིག་རྒྱོབ་ཤིག་འདི་ནི་བརླག་པར་གྱིས་ཤིག་སྲོག་ཀྱང་སྦྱིན་པར་མ་བྱེད་ཅིག །འདི་ནི་རང་ཉིད་རྒྱལ་ནས་ང་ཡི་ཡུལ་ནས་གཞན་ཡང་སྒྲོལ་བར་བྱེད་པར་འགྱུར། །ལངས་ཏེ་བྲོས་པ་མ་གཏོགས་དགེ་སྦྱོང་འདི་ལ་ཐར་གཞན་ཅུང་ཟད་མེད་ཅེས་སྨྲས། །བྱང་ཆུབ་སེམས་དཔས་སྨྲས་པ། རི་ཡི་རྒྱལ་པོ་ལྷུན་པོ་གནས་ནས་གཡོ་སྲིད་འགྲོ་བ་ཐམས་ཅད་མེད་འགྱུར་སྲིད། །སྐར་མའི་ཚོགས་རྣམས་ཐམས་ཅད་ཟླ་བ་བཅས་པར་མཁའ་ལས་ས་ལ་ལྟུང་ཡང་སྲིད། །སེམས་ཅན་ཀུན་གྱི་བསམ་པ་གཅིག་བྱེད་འགྱུར་སྲིད་རྒྱ་མཚོ་ཆེན་པོ་སྐམ་སྲིད་ཀྱི། །ང་འདྲ་ཤིང་གི་རྒྱལ་པོའི་དྲུང་ན་འདུག་པ་ལ་ནི་གཡོ་བ་ཡོང་མི་སྲིད། །བདུད་ཀྱིས་སྨྲས་པ། ཁོ་བོ་འདོད་པའི་དབང་ཕྱུག་འཇིག་རྟེན་འདི་ཀུན་དབང་། །ལྷ་དང་ལྷ་མིན་ཚོགས་བཅས་མི་དང་དུད་འགྲོ་རྣམས། །ཁོ་བོས་ཁྱབ་སྟེ་ཐམས་ཅད་ཁོ་བོའི་དབང་དུ་འགྱུར། །ཁོ་བོའི་ཡུལ་ན་འདུག་པ་ལོངས་ལ་ཚིག་བཞིན་གྱིས། །བྱང་ཆུབ་སེམས་དཔས་སྨྲས་པ། གལ་ཏེ་འདོད་དབང་ཁྱོད་ཡིན་གསལ་བར་ཁྱོད་དབང་མིན། །ཡང་དག་ང་ལྟོས་ང་ཡང་ཆོས་ཀྱི་དབང་ཕྱུག་ཡིན། །གལ་ཏེ་ངན་འགྲོར་མི་འགྲོ་ཁྱོད་ནི་འདོད་དབང་ཕྱུག །དབང་མེད་ཁྱོད་ནི་ལྟ་བཞིན་བྱང་ཆུབ་ངས་ཐོབ་འགྱུར། །བདུད་ཀྱིས་སྨྲས་པ། དགེ་སྦྱོང་བདག་ཉིད་གཅིག་པུ་དགོན་པར་ཅི་ཞིག་བྱེད། །ཁྱོད་ཀྱིས་གང་བཙལ་དེ་དང་ཕྲད་པར་སླ་མ་ཡིན། །རབ་འགྲོ་ཤེས་ལྡན་ལ་སོགས་དཀའ་ཐུབ་རབ་བསྒྲིམས་ཀྱང་། །གོ་
འཕང་མཆོག་དེ་མ་ཐོབ་མིར་གྱུར་ཁྱོད་ཅི་སྨོས། །བྱང་ཆུབ་སེམས་དཔས་སྨྲས་པ། ཁྲོ་བའི་ཟིལ་ནོན་བློ་དང་ལྷ་ཡུལ་འདོད་པ་དང་། །བདག་ལ་རྟག་དང་མི་རྟག་སྙམ་དུ་གནས་པ་དང་། །ཡུལ་དུ་འགྲོ་བས་གནས་པ་ཐར་སྙམ་གནས་པ་ཡི། །དྲང་སྲོང་མི་ཤེས་སྔོན་དུ་འགྲོ་བས་དཀའ་ཐུབ་སྤྱད། །དེ་དག་ཡང་དག་དོན་དང་བྲལ་ཞིང་སྐྱེས་བུ་སྨྲ། །ཁྱབ་དང་ཕྱོགས་གཅིག་ཆེས་དང་ཁ་ཅིག་རྟག་ཅེས་སྨྲ། །ལུས་ཅན་ལུས་མིན་ཡོན་ཏན་མིན་དང་ཡོན་ཏན་ཅན། །བྱེད་པ་པོ་དང་བྱེད་པོ་མིན་ཞེས་གཞན་དག་འཛེར། །སྟན་འདིར་འདུག་སྟེ་ང་རྒྱལ་བཅོམ་པས་སྡེ་དཔུང་བཅས། །ཁྱོད་ཕམ་བྱས་ཏེ་བྱང་ཆུབ་རྡུལ་མེད་དེང་ཐོབ་ནས། །འགྲོ་བ་འདི་ལ་འབྱུང་དང་བྱུང་དང་མྱ་ངན་འདས། །སྡུག་བསྔལ་ཞི་བ་བསིལ་བའི་དངོས་པོ་བསྟན་པར་བྱ། །བདུད་ནི་ཁྲོས་ཤིང་འཁྲུགས་ཏེ་ཚིག་པ་ཟོས་ནས་མདུན་དུ་རྩུབ་པའི་ཚིག་ཏུ་སྨྲས་པ་དགེ་སྦྱོང་འདི་ཟུང་ཤིག །གཅིག་པུ་དགོན་པར་བོར་བར་གྱུར་པ་འདི་ནི་ང་ཡི་མདུན་ནས་ཟུང་ལ་སོང་སྟེ་མྱུར་དུ་དབང་དུ་གྱིས། །ང་ཡི་ཁྱིམ་དུ་མྱུར་དུ་སོང་ལ་ཤིང་སྒྲོག་དང་ནི་ལྕགས་སྒྲོག་ཕྲུགས་སུ་ཆུག་སྟེ་སྒོ་བ་བྱེད་དུ་ཆུག །སྡུག་བསྔལ་ཉེན་ནས་ཀུ་ཅོ་རྣམ་པ་མང་པོ་འདོན་ཅིང་ལྷ་ཡི་ཁོལ་པོ་ཡིན་པར་བདག་གིས་བདག་མཐོང་བྱོས། །བྱང་ཆུབ་སེམས་དཔས་སྨྲས་པ། ནམ་མཁའ་ལ་ནི་རི་མོ་རྣམ་པ་སྣ་ཚོགས་ཆ་ཆ་རིས་རིས་ཕྱེ་སྟེ་སོ་སོར་བྲི་བར་ནུས་ཀྱང་སྲིད། །ཕྱོགས་དང་ཕྱོགས་མཚམས་འགྲོ་བའི་ཤུགས་ཅན་རླུང་ནི་མི་ཡིས་རབ་ཏུ་བསྒྲིམས་ཏེ་ཞགས་པས་བཅིང་དུ་ནུས་ཀྱང་སྲིད། །ཉི་མ་ཟླ་བ་མུན་པ་རབ་རིབ་མེད་བྱེད་མཁའ་ལས་ས་ལ་ལྟུང་བར་བྱེད་པ་ནུས་སྲིད་ཀྱི། །ཁྱོད་དང་འདྲ་བ་རབ་ཏུ་མང་པོ་བགྲང་ལས་འདས་པ་དག་གིས་ཤིང་དྲུང་ནས་ནི་ང་བསྐྱོད་ནུས་མི་འགྱུར། །བདུད་དཔུང་སྟོབས་དང་ལྡན་པ་ལངས་ཏེ་ཧ་ཞེས་ཟེར། །དུང་དང་རྔ་དང་རྫ་རྔ་མཆོག་གི་སྒྲ་འབྱིན་ལངས། །བདུད་དཔུང་ཤིན་ཏུ་འཇིགས་པ་འདི་དག་མཐོང་ནས་ནི། །ཀྱི་ཧུད་བུ་སྡུག་ཁྱོད་ཅིས་མ་རུང་གྱུར་ཅེས་ཟེར། །འཛམ་ཀླུང་གསེར་དང་ཙམ་པའི་སྙིང་པོ་འདྲ་བར་སེར། །ཤིན་ཏུ་གཞོན་ནུ་ལྷ་མིས་བསྟོད་ཅིང་མཆོད་པའི་འོས། །ཁྱོད་དེང་གཡུལ་ངོ་ཆེན་པོར་རབ་ཏུ་བརླག་འགྱུར་ཏེ། །དབང་པོས་ལྷ་མིན་ལྟ་བུར་བདུད་ཀྱི་དབང་དུ་འགྱུར། །ཚངས་པའི་དབྱངས་དང་ཀ་ལ་པིང་ཀའི་སྒྲ་སྐད་ཀྱིས། །བདེ་བར་གཤེགས་པས་གནོད་
སྦྱིན་སྲིན་ཚོགས་དེ་ལ་སྨྲས། །མི་མཁས་གང་ཞིག་ནམ་མཁའ་སྐྲག་པར་བྱེད་འདོད་པ། །དེ་ནི་ཤིང་མཆོག་དྲུང་ནས་ང་འདྲ་སློང་བར་འདོད། །གང་ཞིག་སྟོང་གསུམ་ཆེན་པོ་བཤིག་ནས་རྡུལ་འགྲང་དང་། །གང་ཞིག་བ་སྤུ་ཡིས་ནི་རྒྱ་མཚོ་ཆུ་འབྱིན་དང་། །སྐད་ཅིག་གིས་ནི་རྡོ་རྗེའི་རང་བཞིན་རི་འཐོར་བ། །དེས་ཀྱང་ཤིང་དྲུང་འདུག་པ་ང་ལ་འཚེ་མི་ནུས། །བདུད་ཁྲོས་སེམས་ཀྱིས་གཉའ་ཤིང་གང་གིས་བར་ཙམ་འདུག །ཤུབས་ནས་ཕྱུང་བའི་རལ་གྲི་རྣོན་པོ་ལག་ན་ཐོགས། །དགེ་སྦྱོང་མྱུར་ལོངས་ང་ཡིས་བསམ་པ་བཞིན་དུ་སོང་། །འོད་མའི་མྱུ་གུ་སྔོ་ལྟར་དོ་མོད་བཅད་ད་རེ། །བྱང་ཆུབ་སེམས་དཔས་སྨྲས་པ། གལ་ཏེ་སྟོང་གསུམ་ས་རྣམས་འདི་དག་ཐམས་ཅད་བདུད་ཀྱིས་རབ་ཏུ་གང་གྱུར་ལ། །ཀུན་གྱི་ལག་ན་རི་བོ་ལྷུན་པོ་མཆོག་འདྲ་བ་ཡི་རལ་གྲི་ཐོགས་གྱུར་ཀྱང་། །དེ་དག་ང་ཡི་བ་སྤུ་བསྐྱོད་པར་མི་ནུས་ང་ལ་གནོད་བྱེད་སྨོས་ཅི་དགོས། །སུན་འབྱིན་མ་རིངས་ཤིག་དང་དེའུ་རེ་བཏགས་ཏེ་ང་ཡིས་བརྟན་པོར་དྲན་པར་བྱ། །རྔ་མོ་བ་ལང་གླང་ཆེན་མགོ་དང་འཇིགས་མིག་དང་། །མྱུར་གདུག་སྦྲུལ་དང་མིག་གདུག་མི་བཟད་འདྲ་བ་དག །མེ་འབར་ཁ་དོག་རྩེ་མོར་བཅས་པའི་རི་འཕེན་ཅིང་། །རྩ་བར་བཅས་པའི་ཤིང་དང་ཟངས་དང་ལྕགས་རྣམས་འཕེན། །སྤྲིན་ལྟར་ལངས་ཏེ་ཕྱོགས་བཞི་དག་ཏུ་སྒྲ་སྒྲོག་ཅིང་། །རྡོ་རྗེའི་ལྕེ་དང་ལྕགས་ཀྱི་ཐུ་ལུམ་ཆར་པ་འབེབས། །རལ་གྲི་མདུང་ཐུང་རྣོ་དང་དགྲ་སྟ་དུག་ཅན་འབེབས། །ས་ནི་རྟོལ་བར་བྱེད་ཅིང་ཤིང་དག་རབ་ཏུ་འཇོམས། །ཁ་ཅིག་ལག་པ་བརྒྱ་དག་གིས་ནི་མདའ་བརྒྱ་འཕེན། །ཁ་ནས་མྱུར་དུ་གདུག་པའི་སྦྲུལ་དང་མེ་ཡང་འཐོར། །ཆུ་སྐྱེས་ཆུ་སྲིན་ལ་སོགས་པ་དག་མཚོ་ནས་ལེན། །ཁ་ཅིག་ནམ་མཁའ་ལྡིང་དུ་བསྒྱུར་ནས་ཀླུ་ཡང་འཕེན། །ཁ་ཅིག་ཁྲོས་ནས་ལྕགས་ཀྱི་ཐུ་ལུམ་རི་རབ་ཙམ། །མེ་འབར་ཁ་དོག་རྩེ་མོར་བཅས་པ་རྣམས་ཀྱང་འཕེན། །ས་ལ་ལྷགས་ནས་ས་ནི་རབ་ཏུ་འཁྲུགས་པར་བྱེད། །འོག་གི་ཆུ་ཡི་ཕུང་པོའི་ཆུ་ཡང་རྣམ་པར་འཁྲུག །ཁ་ཅིག་དེ་ཡི་མདུན་དང་དེ་བཞིན་རྒྱབ་ཏུ་མཆོང་། །ཀྱེ་མ་བུ་ཞེས་གཡས་དང་དེ་བཞིན་གཡོན་དུ་མཆོང་། །རྐང་པ་ལག་པ་ལོག་པར་འདུག་ཅིང་མགོ་འབར་ལ། །གློག་ལྟར་རབ་ཏུ་འབར་བར་མིག་ནས་མངོན་དུ་འབྱིན། །བདུད་ཀྱི་དཔུང་ནི་བསྒྱུར་བ་མི་སྡུག་བྱས་མཐོང་ནས། །སེམས་ཅན་དག་པ་སྒྱུ་མ་བྱས་པ་ཇི་བཞིན་རྟོག །འདི་ལ་བདུད་མེད་
སྟོབས་མེད་འགྲོ་མེད་བདག་ཀྱང་མེད། །ཆུ་ཟླའི་ཚུལ་འདྲ་བ་ཡི་འཇིག་རྟེན་གསུམ་པོ་འཁོར། །མིག་དང་སྐྱེས་པ་བུད་མེད་མེད་ཅིང་བདག་གི་མེད། །རྣ་བ་སྣ་དང་དེ་བཞིན་ལྕེ་དང་དེ་བཞིན་ལུས། །ཆོས་འདི་བྱེད་པ་པོ་དང་ཚོར་བ་པོ་དང་བྲལ། །བརྟེན་ནས་སྐྱེས་ཏེ་ནང་ཡང་སྟོང་ཞིང་ཕྱི་ཡང་སྟོང་། །བདེན་ཚིག་གང་གིས་འདིར་ཆོས་ཤིན་ཏུ་སྟོང་ཞེ་ན། །འདུལ་འཐུན་གནོད་སྦྱིན་དེས་པ་གང་ཡིན་དེ་དག་གིས། །ལག་པའི་མཚོན་ཆ་མེ་ཏོག་ཕྲེང་བར་མཐོང་གྱུར་ཅེས། །རྟག་ཏུ་བདེན་སྨྲས་དེ་ཡིས་བདེན་པའི་ཚིག་བྱས་ཏེ། །དེ་ཡིས་ལག་མཐིལ་གཡོན་པ་དྲ་བ་མཆོག་སྤྲས་པ། །སེན་མོ་ཟངས་མདོག་རབ་མཛེས་རྩིབས་སྟོང་འཁོར་ལོ་ཅན། །འཛམ་ཀླུང་གསེར་འབར་དང་འདྲ་བསོད་ནམས་དགེས་བསྟེན་པས། །ཚུལ་དུ་ཤིས་པར་མགོ་ནས་རྐང་པའི་བར་དུ་བྱུགས། །མཁའ་ལས་གློག་འདྲ་བར་ནི་ལག་པ་བརྐྱང་བྱས་ནས། །ཚིག་ཏུ་སྨྲས་པ་ས་འདི་ང་ཡི་དབང་ཡིན་ཏེ། །ངས་ནི་སྔོན་ཆད་མཆོད་སྦྱིན་ཁྲག་ཁྲིག་སྣ་ཚོགས་བྱས། །སློང་ལ་མི་སྦྱིན་སྙམ་སྟེ་དོན་མེད་གཞར་མ་བྱིན། །ཆུ་དང་མེ་དང་རླུང་ནི་ང་ཡི་དབང་ཡིན་ཏེ། །ཚངས་པ་སྐྱེ་དགུ་བདག་དང་སྐར་བཅས་ཉི་ཟླ་དང་། །གང་དག་ཕྱོགས་བཅུ་དག་ན་བཞུགས་པའི་སངས་རྒྱས་དང་། །བདག་ཁྲིམས་བརྟུལ་ཞུགས་བྱང་ཆུབ་ཡན་ལག་འཕགས་པ་དཔང་། །སྦྱིན་དང་ཚུལ་ཁྲིམས་དེ་བཞིན་བཟོད་པ་ང་ཡི་དཔང་། །བརྩོན་འགྲུས་དེ་བཞིན་བསམ་གཏན་དེ་ལྟར་ཤེས་རབ་དང་། །ཚད་མེད་བཞི་དང་དེ་བཞིན་མངོན་ཤེས་ང་ཡི་དཔང་། །རིམ་གྱིས་བྱང་ཆུབ་སྤྱོད་པ་ཐམས་ཅད་ང་ཡི་དཔང་། །ཕྱོགས་བཅུའི་འཇིག་རྟེན་སེམས་ཅན་མཐའ་དག་ཇི་སྙེད་པ། །དེ་དག་རྣམས་ཀྱི་བསོད་ནམས་ཚུལ་ཁྲིམས་ཡེ་ཤེས་དང་། །གཏན་པ་མེད་པའི་མཆོད་སྦྱིན་བྱས་པ་བསྡོམས་ཀྱང་ནི། །དེ་དག་ང་ཡི་བ་སྤུའི་བརྒྱ་ཡི་ཆར་མི་ཕོད། །དེ་ཡིས་ཚུལ་དུ་ཤིས་པར་ལག་པ་ས་ལ་བརྡབས། །ཁར་བའི་སྣོད་ལྟར་ས་འདི་སྒྲ་ཡང་བྱུང་བར་གྱུར། །བདུད་ཀྱི་སྒྲ་ཐོས་ནས་ནི་ས་ལ་སྒྱེལ་གྱུར་ཏེ། །ནག་པོའི་རྩ་ལག་རྒྱོབ་ཤིག་ཟུང་ཤིག་སྒྲ་ཡང་ཐོས། །ལུས་ལས་རྔུལ་བྱུང་གཟི་བརྗིད་ཉམས་ཤིང་བཞིན་མདོག་གྱུར། །རྒ་བས་བཅོམ་པར་བདུད་དེ་ཉིད་ཀྱིས་མཐོང་བར་གྱུར། །བྲང་རྡུང་ཆོ་ངེ་འདོན་ཅིང་འཇིགས་ཉེན་མགོན་ཡང་མེད། །བདུད་ཀྱི་ཡིད་འཁྲུལ་གྱུར་ཅིང་སེམས་ནི་མྱོས་པར་གྱུར། །གླང་པོ་རྟ་དང་བཞོན་པ་ཤིང་རྟ་ས་ལ་ལྷུང་། །སྲིན་པོ་གྲུལ་བུམ་དག་དང་ཤ་ཟ་སྔངས་ཤིང་རྒྱུག །མགོ་རྨོངས་ལམ་མི་རྙེད་ཅིང་གནས་མེད་སྐྱབས་ཀྱང་མེད། །
རླུང་བཏབ་ནགས་མེས་བྱས་ལྟར་བལྟས་ནས་སོང་བར་གྱུར། །ཕ་མ་བུ་དང་སྲིང་མོ་དེ་བཞིན་ཕུ་ནུ་དག །གང་ན་མཐོང་ཞིང་གང་དུ་དོང་ཞེས་འདྲི་བར་བྱེད། །དེ་ཡི་རྐྱེན་གྱིས་དེ་དག་ཕན་ཚུན་འཐབ་ཅིང་རྩོད། །བདག་ནི་སྡུག་བསྔལ་གྱུར་ཏེ་འཚོ་བའི་སྐབས་ཀྱང་མེད། །བདུད་དཔུང་རྒྱ་ཆེ་མང་བ་མི་འཁྲུགས་སྙེད་པོ་དེ། །ཐམས་ཅད་རྣམ་པར་འཐོར་ཅིང་ཐ་དགུར་གྱེས་གྱུར་ཏེ། །ཞག་བདུན་འདས་ཀྱི་བར་དུ་ཕན་ཚུན་ཕྲད་མ་གྱུར། །མཐོང་ནས་སྨྲས་པ་གལ་ཏེ་གསོན་ན་དགའ་ཞེས་འཛེར། །ཤིང་གི་ལྷ་མོས་དེ་ཚེ་དེ་ལ་སྙིང་རྗེ་བྱས། །ཆུ་ཡི་བུམ་པ་ཐོགས་ཏེ་ནག་པོའི་རྩ་ལག་གཏོར། །མྱུར་དུ་ལོངས་ལ་ཕྱི་ཤོལ་མ་བྱེད་སྐྱེན་དུ་སོང་། །བླ་མའི་ཚིག་མ་མཉན་པས་དེ་ལྟར་གྱུར་པ་ཡིན། །བདུད་ཀྱིས་སྨྲས་པ། བདག་གི་བུ་ཡི་སྙན་ཚིག་ཕན་པ་མ་མཉན་ཏེ། །སེམས་ཅན་ཤིན་ཏུ་དག་ལ་ཉེས་པ་བྱས་པས་ན། །སྡུག་བསྔལ་འཇིགས་ཕོངས་མྱ་ངན་བརླག་དང་བརྙས་པ་དང་། །ཅིར་མི་རུང་བའི་སྒྲ་དང་དམན་ཉིད་བདག་གིས་ཐོབ། །ལྷ་མོས་སྨྲས་པ། མི་མཁས་གང་ཞིག་ཉེས་པ་མེད་ལ་ཉེས་བྱེད་པ། །དེ་ནི་ཉེས་དང་སྡུག་བསྔལ་བ་དང་ཕོངས་པ་དང་། །ཅིར་མི་རུང་ཞེས་བྱ་བའི་སྒྲ་དང་དམན་ཉིད་དང་། །གསད་དང་བཅིང་དང་ཉེས་པ་དུ་མ་རྙེད་པར་འགྱུར། །ལྷ་དང་ལྷ་མིན་མཁའ་ལྡིང་མི་ཅི་སྲིན་པོའི་དབང་། །ཚངས་པ་བརྒྱ་བྱིན་གཞན་འཕྲུལ་འོག་མིན་བཅས་པ་དག །འདི་ལྟར་ཁྱོད་ཀྱིས་འདི་འདྲའི་བདུད་ཀྱི་དཔུང་བཅོམ་པས། །འཇིག་རྟེན་དཔའ་བོ་རྒྱལ་ཞེས་དེ་ཡིས་རྒྱལ་བ་བརྗོད། །རྒྱན་ཕྲེང་ཆུན་པོ་ཟླ་བ་གདུགས་དང་རྒྱལ་མཚན་བ་དན་འབུལ། །མེ་ཏོག་ཨ་ག་རུ་དང་རྒྱ་སྤོས་ཙན་དན་ཕྱེ་ཆར་འབེབས། །སིལ་སྙན་དག་ཀྱང་རབ་ཏུ་དཀྲོལ་བ་བྱེད་ཅིང་ཚིག་བརྗོད་པ། །དཔའ་བོ་དགྲ་ཚོགས་རྒྱལ་རྣམས་ཁྱོད་ལ་དགབ་པ་མཛད་པར་འགྱུར། །སྟན་མཆོག་འདིར་ནི་བྱམས་པས་གཡོན་ཅན་བདུད་ཀྱི་ཕྱོགས། །རྒྱ་ཆེན་ཕམ་མཛད་དཔའ་བོ་དོ་མོད་བྱང་ཆུབ་བརྙེས། །སྟོབས་བཅུ་མ་འདྲེས་སོ་སོ་ཡང་དག་རིག་པ་དང་། །སངས་རྒྱས་ཡུལ་རྣམས་ཐམས་ཅད་དོ་མོད་བརྙེས་པར་འགྱུར། །བདུད་གདུལ་ཆེད་དུ་འདིར་ནི་གཡུལ་ངོར་རབ་ཏུ་ཞུགས། །རྫོགས་པའི་བྱང་ཆུབ་སེམས་དཔའི་སྟོབས་རྩལ་སུས་མཐོང་བ། །བྱེ་བ་སུམ་ཅུ་དྲུག་དང་ཁྲག་ཁྲིག་ཉི་ཤུ་བཞི། །དེ་དག་སངས་རྒྱས་བྱང་ཆུབ་མཆོག་ཏུ་ཡིད་ཀྱིས་སྨོན། །བདུད་བཏུལ་བའི་ལེའུ་ཞེས་བྱ་བ་སྟེ། ཉི་ཤུ་རྩ་གཅིག་པའོ།། །།