ལྔ་པ། བདག་གི་ལས་ཀྱི་བྱ་བ་སྤྱད་པ་ཞེས་བྱ་བའི་ལེའུ།
རྣམ་བརྒྱད་རྣམ་པ་དགུ་ཡི་སེམས། །མ་རིག་འཇིག་རྟེན་རྒྱུ་ཡིན་ཏེ། །འདི་ནི་སེམས་དང་སེམས་འབྱུང་མཐུ། །གང་གནས་རྣམ་པ་སྣ་ཚོགས་པའོ། །དེ་ཡི་མཐུས་ཀྱང་འཇུག་པ་ནི། །རྣམ་ཤེས་རྣམས་དང་དབང་པོ་རྣམས། །མ་རིག་ལ་སོགས་རྣམ་པ་འདི། །རྩ་བའི་སེམས་ནི་བརྟན་གནས་པ། །ཡན་ལག་བཅུ་གཉིས་ཐམས་ཅད་དང་། །འབྱུང་བ་རྣམས་དང་འབྱུང་གནས་དང་། །ཡུལ་དང་དབང་པོ་འཇིག་རྟེན་དང་། །སྐད་ཅིག་འཇིག་པའི་རྒྱུ་ཡིན་ནོ། །ཐུབ་པ་ལྷ་ཡི་ལྷས་གསུངས་པ། །རྒྱུ་དང་འབྲས་བུ་སྤངས་པ་སྟེ། །ཚངས་པའི་འཇིག་རྟེན་མཐར་ཐུག་གི། །འགྲོ་བ་དབང་པོར་བཅས་པ་འདི། །འཇིག་རྟེན་བཙལ་བས་མ་བསྐྱེད་དེ། །བདག་ཉིད་རྫ་མ་བཞིན་འཇིག་པ། །ནང་དང་ཕྱི་དག་རྟག་པར་ཏེ། །འགྲོ་བ་གནས་དང་གཡོ་བ་དག །ལྷ་ཡི་ལྷ་ཡི་ཡུལ་ཡིན་ཏེ། །ས་ལ་སུས་ཀྱང་མི་མཐོང་བ། །མུར་འདུག་གྲགས་པ་གཞན་དག་སྟེ། །ཐུབ་གྲགས་མཚན་མ་ཅན་གྱིས་སོ། །ཕན་ཚུན་བཅིངས་པས་བཅིངས་པ་ནི། །སྲེད་པ་སྣ་ཚོགས་རྣམ་པས་ཏེ། །རྣམ་ཤེས་མྱུར་དུ་འགྲོ་བས་ན། །སེམས་ཀྱི་རྣམ་པར་མི་རྟོགས་སོ། །ལོ་སྟོང་མཐའ་
རུ་ཐུག་པ་ཡི། །མཆོད་སྦྱིན་རྣམས་ཀྱིས་ཚངས་པའི་ཐབས། །ཐོབ་ནས་སླར་དུ་ལྡོག་པ་ནི། །ས་མ་ཡ་རུ་རིགས་སེམས་པ། །འདོད་སྦྱོར་བཀག་སྲོག་འབྲས་བུ་དང་། །གང་ཡང་ཟླ་བའི་འབྲས་བུ་དང་། །མེར་གཞུག་པ་ཡི་འབྲས་བུ་དང་། །གང་གཞན་མཆོད་སྦྱིན་འབྲས་བུ་དང་། །ཕྱུགས་བཅིང་བ་ཡི་འབྲས་བུ་ཡང་། །ཚངས་པའི་འཇིག་རྟེན་ནས་ལྡོག་གོ །ཆོས་གསུམ་ཅན་གྱི་འགྲོ་བ་དག །ཅི་ཉེས་མི་རིག་ཐོར་ཚུགས་ཅན། །ཡོན་ཏན་གསུམ་གྱི་འབྲུ་འབྲེལ་བ། །ཆུ་སྐྱེས་བཞིན་དུ་སྙིང་པོ་མེད། །འདི་ཡིས་ཐར་པ་མི་རྙེད་པ། །སྟུག་པོ་དེ་བཞིན་གཤེགས་པའི་གནས། །དེ་ནི་རྣལ་འབྱོར་གྱིས་འཐོབ་སྟེ། །སྟུག་པོ་རྣལ་འབྱོར་རིག་པའི་གནས། །དེ་བས་ཚུལ་གཅིག་ཚངས་པའི་བདག །རྣལ་འབྱོར་ཅན་རྣམས་འཇུག་བརྩོན་པར། །འདི་ལ་བདག་གཉེན་གང་དག་ཀྱང་། །སྐྱེ་ཞིང་འཆི་བ་ཡོད་མེད་དེ། །མི་ཆོད་གཞིག་ཏུ་མེད་པ་ནི། །ལུས་ཅན་ཀུན་གྱི་རྣམ་པར་ཤེས། །བག་ཆགས་ཀྱིས་ནི་མི་གོས་པ། །སྔོན་མེད་དུས་ནས་བྱུང་བས་སོ། །ཡིད་ཀྱི་གནས་ངན་ལེན་བསགས་པའི། །སྤྲོས་པས་ཀྱང་ངོ་ཅིར་མི་འཇུག །ཇི་ལྟར་ལྷ་རྫས་ཆུ་སྐྱེས་དང་། །ནམ་མཁའ་ལ་ཡང་ཕྱག་དར་དང་། །སྤྲིན་གྱི་དྲི་མས་ཉི་ཟླ་ལ། །དེ་བཞིན་མི་གོས་རྣལ་འབྱོར་ཅན། །མ་བཤོལ་རབ་ཏུ་བརྩོན་པར་གྱིས། །ཐམས་ཅད་སངས་རྒྱས་བྱིན་གྱིས་བརླབས། །རྣལ་འབྱོར་བདེ་གཤེགས་ལྷ་ཡི་རྫས། །རྣལ་འབྱོར་ཅན་གྱི་ཚུལ་སྐྱེད་པ། །ཚུལ་ཁྲིམས་ཅན་གྱི་ཚུལ་འཐུངས་ཏེ། །ཡེ་ཤེས་ཅན་གྱིས་ཤེས་འཐུངས་ཤིང་། །མཆོག་གི་ཡེ་ཤེས་འཐུངས་ནས་ཀྱང་། །འཁོར་བ་ལས་ནི་འདའ་བར་གྱིས། །འདི་ལ་ཁམས་རྣམས་གང་ཡང་མེད། །ཕུང་པོ་ལྔ་དང་རྣམ་ཤེས་ཀྱང་། །མིང་དང་གཟུགས་དག་རྒྱུར་བྱས་ཤིང་། །ལུས་ཅན་རྣམས་ཀྱི་ཡིད་ཀྱང་སྐྱེ། །ཇི་ལྟར་མེ་ནི་ཤིང་དབང་གིས། །འབར་ཏེ་འབར་བར་རྟོག་པ་མེད། །དེ་བཞིན་ཕུང་པོ་ཤིང་རྟ་སྟོང་། །ཅི་ཕྱིར་རྣལ་འབྱོར་འཇུག་མི་བྱ། །རི་དགས་སྲེད་དང་དྲི་ཟ་ཡི། །གནས་དང་སྒྲ་ཚོགས་སྣང་བ་རུ། །རི་དགས་བུས་པ་ལ་སོགས་མཐོང་། །ཡང་
དག་མ་ཡིན་ལྟས་བསླད་པས། །དེ་བཞིན་ཡུལ་ལས་བྱུང་བའི་སེམས། །ཁབ་ལོང་ལྟ་བུར་འཁོར་བ་སྟེ། །གང་ཡང་འདི་ལ་དངོས་མེད་པ། །འབྱུང་བ་རྣམས་དང་འབྱུང་བ་ཡི། །གཡོ་བ་དྲོ་བ་གཤེར་སྲ་བར། །བུས་པ་རྣམས་ནི་རྟག་ཏུ་རྟོག །འབྱུང་བ་སེམས་ཀྱི་ཚོགས་ལས་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་ཙམ་མ་ཞིག་ལུས་ཡོད་དང་། །ཇི་ཙམ་དུ་ནི་བློ་འབྱུང་བ། །དེ་བར་རྣལ་འབྱོར་ཡེ་ཤེས་ལ། །མ་གཤོལ་བསམ་གཏན་རབ་ཏུ་གྱིས། །ཐམས་ཅད་སྒྱུ་མ་རྨི་ལམ་ལྟར། །འབྱུང་བ་གསུམ་ཀུན་རབ་ཏུ་ལྟོས། །སྨིག་རྒྱུ་ཆུ་ཟླ་ལྟ་བུ་ན། །ཅི་ཕྱིར་རྣལ་འབྱོར་འཇུག་མི་བྱ། །ཇི་བཞིན་དྲི་ཟའི་གྲོང་ཁྱེར་ན། །འགྲོ་བའི་སྤྱོད་པ་རྣམ་པར་སྣང་། །དེ་བཞིན་ལུས་ལ་ཕུང་པོའི་སྤྱོད། །ཅི་ཕྱིར་རྣལ་འབྱོར་འཇུག་མི་བྱ། །རྨི་ལམ་དག་ན་འགྲོ་བའི་ཚོགས། །ཇི་ལྟར་རྨི་ལམ་རྨི་བས་མཐོང་། །དེ་བཞིན་ཕུང་པོའི་གནས་ཡིན་ན། །ཅི་ཕྱིར་རྣལ་འབྱོར་འཇུག་མི་བྱ། །ས་འདི་ས་ལ་སོགས་པའི་ཚོགས། །འདུས་པ་རྡུལ་གྱི་ཕུང་པོ་ཡིན། །འདི་སེམས་སེམས་བྱུང་ཚོགས་ཡིན་པར། །རྒྱལ་བའི་སྲས་རྣམས་ཀུན་ལྟོས་ཤིག །འབྱུང་བ་ཆེན་པོ་བཞི་པོ་རྣམས། །ཕན་ཚུན་ཀུན་ནས་འདུས་པ་སྟེ། །གདེག་པ་ལ་སོགས་ལྡན་པ་ཡིན། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རླུང་དང་མཁྲིས་པས་མྱོས། །རོ་བསླབ་ལྟ་བུར་གནས་པ་སྟེ། །བྱེད་པ་གང་ཡང་ཡོད་པ་མིན། །ཅི་ཕྱིར་རྣལ་འབྱོར་འཇུག་མི་བྱ། །དབུ་བའི་གོང་བུ་ལྟ་བུ་ཀུན། །འགྲོ་བ་གནས་ཤིང་གཡོ་བའི་རྣམས། །སྨིག་རྒྱུ་འདྲ་བའི་འདུ་ཤེས་སུ། །རྫ་ལ་སོགས་པ་ཤིན་ཏུ་རྟོགས། །ཚོར་བ་ཆུ་བུར་ལྟ་བུ་སྟེ། །བདེ་དང་མི་བདེར་རྟོག་པ་ཡིན། །ཆུ་ཤིང་འདྲ་བའི་འདུ་བྱེད་རྣམས། །ཞིག་པ་གྲུགས་པ་སྙིང་པོ་མེད། །རྣམ་པར་ཤེས་པ་སྒྱུ་མ་འདྲ། །དེ་ཡི་དངོས་ལ་གནས་པ་མེད། །རྩྭ་ཤིང་གནས་པ་ཇི་བཞིན་ཏེ། །ཅི་ཕྱིར་རྣལ་འབྱོར་འཇུག་མི་བྱ། །འདི་ནི་རྨི་ལམ་རྣམ་མྱོས་འདི། །འདི་ནི་སྒྱུ་མ་བུས་པ་འདྲིད། །འདི་དག་ཐམས་ཅད་སྨིག་རྒྱུ་སྟེ། །དེ་བཞིན་དྲི་ཟའི་གྲོང་ཁྱེར་རོ། །གང་རྒྱན་འདི་དག་སྣང་བ་ཡི། །ཁམས་གསུམ་འགྲོ་དང་
མི་འགྲོ་བ། །དེ་ཀུན་བློ་ཡིས་རྟོགས་བྱ་བ། །འཇིགས་མེད་རྒྱལ་བའི་སྲས་རྣམས་ཀྱིས། །ཉེས་པའི་རྒྱུ་ནི་རྩྭ་དང་བཅས། །ཡེ་ཤེས་མེ་ཡིས་རབ་བསྲེགས་ན། །ལྷ་རྫས་བདེ་བ་ཡོད་པར་འགྲོ། །རྣལ་འབྱོར་ཅན་གནས་སྟུག་པོར་ཡང་། །འཇིགས་མེད་འདི་ནི་མཚན་མ་མེད། །མཚན་མ་བཅིངས་པའི་ངོ་བོ་ཅན། །མཚན་མ་མེད་པ་རྟག་ཏུ་བདེ། །མཚན་མ་སེམས་ཀྱི་སྤྱོད་ཡུལ་ལོ། །སེམས་ཀྱི་སྤྱོད་ཡུལ་བདེན་པ་མིན། །བདེན་པ་བློ་གྲོས་སྤྱོད་ཡུལ་ཏེ། །སེམས་ནི་ཤེས་རབ་སྤྱོད་ཡུལ་ཏེ། །མཚན་མར་གནས་པ་མེད་པའོ། །ཀྱེ་མ་མཚན་མ་འདི་ཀུན་ཡིན། །གནས་གསུམ་ཚངས་པར་བསྒྲགས་པ་སྟེ། །མཚན་མ་མིང་དང་ཡུལ་རྣམས་དང་། །སྒྲ་ལ་སོགས་པ་ཀུན་བརྗོད་པའོ། །དབང་པོ་ཀུན་གྱི་ཡུལ་རྣམས་ནི། །ལུས་ཅན་རྣམས་ཀྱི་འཆིང་བའི་རྒྱུ། །འཆིང་བར་བྱ་དང་འཆིང་དང་རྒྱུ། །གང་འགྲོལ་གང་གིས་འགྲོལ་བ་དང་། །ཐར་དང་ཐར་པའི་བདེ་བ་དང་། །མཐོང་བའི་ཆོས་ལ་གནས་པ་དང་། །བདག་མེད་པ་རུ་ཤེས་ཉིད་ཀྱང་། །འདོད་ཆགས་བཅོམ་པར་གྱུར་པ་ནའོ། །དེ་ནས་མི་བདག་རིན་ཆེན་གཙུག །བློ་ཆེན་བྱང་ཆུབ་སེམས་དཔའ་ཡིས། །རྣལ་འབྱོར་ཅན་ཀུན་དབང་ལ་སྨྲས། །རྡོ་རྗེའི་སྙིང་པོ་འཇིགས་མེད་ལ། །བྱེ་བའི་ཞིང་རྣམས་ཐམས་ཅད་ལ། །རྒྱལ་སྲས་ཁྱོད་ནི་བརྩོན་པ་སྟེ། །རྒྱལ་བ་རྣམས་ལ་ཁྱོད་ཚད་དེ། །རྣལ་འབྱོར་ཅན་ལ་ཉེ་བར་གནས། །རྣལ་འབྱོར་ཐེ་ཚོམ་བཅད་པ་སྟེ། །དཔེ་རྣམས་གྲུབ་པར་བྱ་བའི་ཕྱིར། །བརྟག་བྱ་ཡན་ལག་ཐམས་ཅད་དག །ལུས་ཅན་རྣམས་ཀྱི་ལུས་སྐྱེས་པ། །ཚུལ་ནི་སྒྲ་ཡིས་བརྗོད་པར་མཛད། །ཚིག་ཏུ་བརྗོད་པར་ཅིར་མི་བགྱི། །གནད་དང་ཟུང་གིས་རྣམ་པར་མཛོད། །མི་ཟིན་པ་ཡི་རྒྱུ་རྣམས་དང་། །བགབ་ཟུངས་ནོར་གྱིས་གཞོམ་པར་གྱིས། །ཕུང་པོའི་རྒྱུ་རྣམས་བསལ་བར་མཛོད། །ཡང་དག་འགྱུར་བ་མེད་པ་དང་། །དགེ་བ་ཡིས་ཀྱང་མཁས་པས་སོ། །རིང་པོ་མི་ཐོགས་ཐར་པ་འཐོབ། །ཕུང་པོའི་རྒྱུ་རྣམས་བསྲེགས་ནས་སུ། །ཆོས་མིན་ཆོས་ཀྱི་ཚེ་འབྱུང་སྟེ། །འདི་དང་གཞན་དུའང་འཐོབ་པར་འགྱུར། །ཤེས་པས་སྡུག་
བསྔལ་རྣམས་ལས་འགྲོལ། །སྲེད་པ་ཡིས་ནི་རྟག་ཏུ་བཅིངས། །མི་ཤེས་ལས་དང་སྲེད་པ་ཡིས། །ལུས་ཅན་རྒྱ་ཆེར་ཤིན་ཏུ་བྱས། །གཟུགས་དང་སྣང་བ་ཡིད་བྱེད་དང་། །རྣམ་ཤེས་ཡུལ་ལ་མངོན་གྱུར་པས། །མྱུར་ཕྱིར་ཁོང་དུ་མི་ཆུད་པ། །སྤྱོད་ཡུལ་དུ་ནི་སེམས་རྒྱུ་བའོ། །ཡིད་སྔོན་འགྲོ་བ་ཆོས་རྣམས་ཏེ། །ལུས་ཅན་ཀུན་གྱི་དེ་བཞིན་ནོ། །ཡིད་འགྲོ་ཡིད་ནི་གཅེས་པ་དག །ཡིད་དུ་འོང་བས་ཅིར་མི་བཤད། །གང་དང་གང་གི་རྫས་ཀྱིས་སུ། །མི་རྣམས་སྟུག་པོར་འགྲུབ་པ་ཡི། །དེས་ནི་དེ་ཡི་དངོས་འགྱུར་བ། །སྣ་ཚོགས་གཟུགས་ཀྱི་ནོར་བུ་བཞིན། །ཇི་ལྟར་ནོར་བུ་སྣ་ཚོགས་གཟུགས། །ཚོན་དང་འབྱོར་ན་རྣམ་པར་མཛེས། །རྣལ་འབྱོར་ཅན་དབུས་ཁྱོད་དེ་བཞིན། །དེ་བཞིན་གཤེགས་གཟུགས་སྣ་ཚོགས་ཀྱིས། །དབང་སྒྱུར་ཕོ་བྲང་དགེ་བ་ན། །ཐམས་ཅད་དག་ན་སྣང་བ་ནི། །རྒྱལ་བའི་སྲས་ཀྱི་མདུན་དུ་བྱས། །མྱ་ངན་འདའ་དང་མྱ་ངན་འདས། །སྟུག་པོ་མཐར་མཆོག་ཡེ་ཤེས་ཏེ། །ཆོས་ཀྱི་དབྱིངས་དང་རྫུ་འཕྲུལ་ཡང་། །སྟུག་དེ་རྣལ་འབྱོར་ཅན་གྱི་གནས། །དེ་ནི་མཚོན་གྱིས་མི་ཆོད་དེ། །དེ་ནི་མེས་ཀྱང་མི་ཚིག་པ། །མི་ཆོད་པ་དང་མི་ཕྱེད་པ། །དེ་ནི་ཡུལ་གནས་རྟག་པའོ། །དེ་ནི་ཆུས་ཀྱང་མི་གཤེར་ཏེ། །རླུང་གིས་ཀྱང་ནི་མི་སྐམ་མོ། །དེ་ནི་རྫ་ལྟར་འཇིག་པ་དང་། །ནན་ཏན་བྱ་རྗེས་བྱུང་བ་མིན། །རྟག་པ་བརྟན་པ་མི་འཇིག་པ། །སྐྱེ་ཅན་ཀུན་གྱི་རྣམ་པར་ཤེས། །རྒྱུ་ཡིས་སུན་དབྱུང་མ་ཡིན་པ། །འདྲ་དང་མི་འདྲ་རྣམས་ཀྱིས་ཏེ། །དམ་བཅས་ཡན་ལག་རྣམས་ཀྱི་ཡང་། །མཐའ་མ་ཐུག་པ་མེད་པར་འགྱུར། །དམ་བཅས་པ་ཡི་དམ་བཅའ་དང་། །རྒྱུ་ཡི་ཁྱད་པར་རྒྱུ་དག་སྟེ། །དེ་བས་དེ་ལ་རྒལ་དུ་མེད། །རྟོག་པ་ཅན་གྱི་སྤྱོད་ཡུལ་མིན། །རྣམ་པར་ཤེས་པ་གཞན་གྱུར་ན། །དེ་ནི་སྟུག་པོ་སེམས་སྤངས་པའོ། །རྟོག་ཅན་རྣམས་ཀྱི་ཡུལ་མ་ཡིན། །དེ་བཞིན་གཤེགས་པའི་ཕོ་བྲང་སྟུག །མ་སྐྱེས་སྔོན་དང་ཐ་མ་མེད། །ལྷུན་གྱིས་གྲུབ་པའི་སྟོབས་ལས་བྱུང་། །རྒྱུ་མེད་པ་དང་ལས་སྐྱེས་མིན། །དབང་པོ་ཆེན་པོས་བྱས་པའང་མིན། །གཟུགས་མེད་གཟུགས་དང་འདོད་པ་ལས། །ཡང་དག་འདས་ཏེ་གནས་པ་ཡིན། །
འདོད་པའི་ཁམས་ལས་འདས་ནས་སུ། །གཟུགས་དང་གཟུགས་མེད་འདུ་ཤེས་མེད། །མུན་པའི་རྒྱུ་ལས་རབ་འདས་ནས། །སྟུག་པོའི་ཞིང་ནི་རྣམ་པར་མཛེས། །ཕྱོགས་འདི་མཁའ་ལས་གྲུབ་པ་སྟེ། །རྒྱུ་ཅན་རྣམས་ཀྱི་སྤྱོད་ཡུལ་མིན། །ཡོད་དང་མེད་པའི་ཕྱོགས་དང་བྲལ། །གཅིག་དང་གཞན་པ་སྤངས་པའོ། །གཅེས་པ་དང་ནི་རང་བཞིན་མིན། །འདོད་རྒྱལ་དང་ཡང་དབང་པོ་མིན། །ཁྱུ་མཆོག་གི་ཡང་ཕྱོགས་མ་ཡིན། །དེ་བཞིན་རིག་ཅན་གསུམ་གྱི་ཡང་། །རྡུལ་གྱི་རྐྱེན་ལས་བྱུང་མ་ཡིན། །སྒྲ་རྣམས་ཀྱིས་ཀྱང་བརྗོད་དུ་མེད། །ངོ་བོ་ཉིད་ཀྱིས་བསྐྱེད་པ་མིན། །འདོད་རྒྱལ་གྱིས་ཀྱང་མི་རྙེད་དོ། །མ་རིག་ལས་དང་སྲེད་པས་མིན། །མི་ཤེས་ལས་ཀྱང་སྨོས་པ་མིན། །ཁུར་ཁྱེར་ཁུར་གྱི་ཡུལ་ཡིན་ཏེ། །འདི་ནི་སངས་རྒྱས་རྣམས་ཀྱི་ཡུལ། །ལྷ་རྫས་དེ་བཞིན་གཤེགས་ཀྱིས་མཁྱེན། །ས་བཅུ་དག་ཏུ་རྣམ་པར་སྦྱངས། །རྣལ་འབྱོར་ཅན་གྱི་སྣ་ཚོགས་ཡུལ། །དོན་གྱི་དམ་པ་སྟོན་པའོ། །ལས་ཅི་ལས་མིན་གང་ཞེས་ཏེ། །བྱིས་པ་རྣམས་ནི་མྱོས་པར་གྱུར། །ལས་དང་ལས་མིན་བཤད་པ་ན། །རྣལ་འབྱོར་ཅན་རྣམས་བདེར་གྱུར་པ། །སྣ་ཚོགས་སྣང་བ་རང་སེམས་ཏེ། །ལུས་ཅན་རྣམས་ཀྱི་བདག་ཉིད་གཉིས། །ཕྱི་དང་ནང་དང་ཐམས་ཅད་དུ། །གཟུང་དང་འཛིན་པ་ལྟ་བུར་གནས། །སེམས་ཀྱིས་སེམས་ནི་མཐོང་ཡིན་ཡང་། །ཁོང་དུ་མི་ཆུད་བུས་པ་རྣམས། །ཁ་གཉིས་སེམས་དེ་ལུས་ཅན་གྱི། །ཡིན་ཀྱང་ཤེས་པར་མ་གྱུར་པ། །བདག་གི་བྱེད་པའང་དེ་བཞིན་བྱེད། །ཡུལ་ལྟ་བུར་ཡང་རབ་ཏུ་སྣང་། །རྫ་མ་ལ་སོགས་གཟུགས་སུ་གནས། །རྫ་ལ་སོགས་པའང་ཡོད་པ་མིན། །འདི་ཡི་དོན་ལ་ཐུབ་པ་དག །རྣལ་འབྱོར་ཉམ་ཆུང་རྣམ་པར་མྱོས། །རྣལ་འབྱོར་དེ་ཡང་མི་རྟོགས་པ། །བདག་གི་རྣམ་རྟོག་ལམ་གནས་པས། །སེམས་འདི་གཉིས་ཀའི་བདག་ཉིད་དེ། །མེ་ལོང་ཟླ་བ་བཞིན་དུ་གནས། །ཇི་ལྟར་རབ་རིབ་རབ་རིབ་ཅན། །སྐྲ་ཚོགས་ལྟོས་ཤིག་ལྟོས་ཤིག་ཀྱེ། །ཕན་ཚུན་དག་ཏུ་སྟོན་མོད་ཀྱི། །བདག་ཉེས་དབང་པོ་ཞན་བྱུང་གི། །འདི་ན་གང་ཡང་སྐྲ་ཚོགས་
མེད། །རྒྱན་དང་ནོར་བུ་དག་ཀྱང་ངོ་། །ཡོད་དང་མེད་པའི་དངོས་པོ་ལྟར། །དབང་པོའི་ཉེས་པས་མཐོང་བ་ཡིན། །དེ་བཞིན་རྟོག་ཅན་དབང་གིས་འདི། །བདག་གི་བློ་ནི་ཇི་ལྟར་གནས། །ཚངས་ལ་སོགས་པའི་གནས་ཐུག་པར། །རྟོག་པ་མེད་པས་རབ་ཏུ་འཛིན། །གང་འདི་མང་པོ་སྣང་བ་དག །སྣ་ཚོགས་ཚངས་ལ་སོགས་པའི་མཚན། །སྣ་ཚོགས་ཐམས་ཅད་བདག་གི་སེམས། །རྫ་ལ་སོགས་པའི་ཡོན་ཏན་མཚན། །ནང་དུ་གྱུར་པའི་གཟུགས་རྣམས་དང་། །མཐོ་རིས་གནས་པའི་གནས་རྣམས་དང་། །གང་འདི་ཕྱི་ནང་བྱ་བ་རྣམས། །ཐམས་ཅད་སེམས་ལས་བྱུང་བའོ། །རྒྱན་སྟུག་རྣལ་འབྱོར་གང་ཡིན་པ། །དེ་ནི་གུད་ན་ཡོད་པ་མིན། །རྣལ་འབྱོར་ཅན་གྱི་བསོད་ནམས་ཀྱིས། །ཞུགས་པ་འདི་ལ་བསླབ་པར་གྱིས། །དབང་སྒྱུར་ལྷ་རྫས་གནས་དག་དང་། །ཡང་ན་གཟུགས་ཅན་རྣམས་གནས་དང་། །འདུ་ཤེས་མེད་པའི་གནས་སུ་འམ། །འོག་མ་ཡིན་པའི་གནས་སུ་ཡང་། །ཅུང་ཟད་མེད་དང་རྣམ་ཤེས་དང་། །འདུ་ཤེས་ཡོད་པ་མ་ཡིན་དང་། །སྣ་ཚོགས་ཀྱི་ནི་གནས་དག་ཏུ། །འདོད་ཆགས་ཀྱི་ནི་ཕྱོགས་བཤིག་ན། །ཁྱོད་ནི་མྱུར་དུ་དེར་གནས་པ། །སྟུག་པོ་རྣལ་འབྱོར་ཅན་གནས་སུ། །རྒྱལ་བའི་སྲས་ཀྱིས་མདུན་བྱས་ཏེ། །སྟུག་པོ་དེར་ནི་འགྲོ་བར་གྱིས། །རྣལ་འབྱོར་དེ་ལ་སྤྱད་པར་གྱིས། །བདག་གི་གཉེན་གྱིས་ཅི་ཞིག་བྱ། །བདག་གི་གཉེན་ནི་རྟག་ཏུ་འཆིང་། །འཁོར་བའི་ལམ་རྒྱུད་རྒྱུ་ཡང་ཡིན། །དབང་པོ་རྣམས་ནི་གཡོ་བ་སྟེ། །བུད་མེད་རྣམས་ལའང་བློ་འཁྲུལ་པས། །ཁུ་ཆུ་ཁྲག་མནམ་མི་ཞིམ་པའི། །འཇི་བར་སྲིན་བུ་སྐྱེས་གྱུར་པ། །དགུ་འམ་བཅུ་ཞིག་པ་དང་ཡང་། །ཁུ་ཆུ་སྨིན་ནས་མངོན་པར་སྐྱེ། །དབང་པོ་རྣམས་ཀྱིས་ཀུན་ཡོག་པ། །སྲིན་བུ་གཡོ་བ་ཇི་བཞིན་ཏེ། །རིམ་པ་དེ་ཡི་ཚུལ་གྱིས་ན། །ཇི་སྲིད་སེམས་ཅན་གནས་བར་དུའོ། །ལུས་ཅན་རྣམས་ཀྱི་སྐྱེ་ལ་ལྟོས། །ཚེ་ཚེར་དེ་དག་བྱུང་བ་སྟེ། །ཕ་དང་མ་ནི་སྟོང་དག་དང་། །བུ་དང་ཆུང་མ་བརྒྱ་དག་ཀྱང་། །ཐམས་ཅད་གནས་སུ་རྙེད་པ་ནི། །ལུས་ཅན་སྐྱེ་ལ་གནས་པའོ། །རྨི་ལམ་དག་ན་བུ་མེད་པའི། །མོ་གཤམ་བུ་
འབྱུང་ཇི་བཞིན་དུ། །བུ་རྙེད་པ་ཡི་དགའ་བ་དང་། །རྨི་ལམ་རྨི་ཚེ་དེ་ཉིད་ལྡན། །དེ་ནི་ཤིར་གྱུར་དེ་ནས་དེ། །རྨི་ལམ་ཤེས་ནས་སད་པ་དང་། །རྨི་ལམ་གྱི་ནི་བུ་ཤི་མེད། །གང་ཡང་སྐྱེ་བ་ཡོད་པ་མིན། །ཆུ་བོ་རབ་ཚལ་བུ་དང་ནི། །གྲོང་ཁྱེར་དག་དང་རི་རྣམས་དང་། །གྲོང་དང་ཚོང་འདུས་ཕྱུགས་སླས་དང་། །དཀའ་ཐུབ་ཚལ་བུའི་གནས་རྣམས་དང་། །འགྲོ་བ་དག་གིས་རྒྱས་པའི་ཡུལ། །ཞིང་དང་བ་ལང་ལུག་གིས་གང་། །འཇིག་རྟེན་གྱི་ནི་ལོངས་སྤྱོད་ཀྱང་། །དེ་དང་འདི་དང་གཞན་དུའང་སྣང་། །ཇི་ལྟར་འཇིག་རྟེན་འདིར་རྒྱུག་པ། །རྨི་ལམ་རྒྱུག་པ་དེ་བཞིན་ཏེ། །གདེག་དང་བསྐུམ་ལ་སོགས་པ་ཡང་། །དེ་དང་འདིར་ཡང་སྣང་བ་ཡིན། །མཁས་པས་རྨི་ལམ་གང་མཐོང་བ། །སྐྱེ་བ་མེད་ཅིང་འཆི་མེད་པར། །སླར་སད་ནས་སུ་སེམས་པ་ནི། །བུ་མོ་མཁས་པ་དག་ཡིན་ནོ། །ཇི་ལྟར་རི་དང་དེའུ་རྣམས་ཀྱི། །གྲིབ་མ་ཀུན་དུ་སྣང་བ་བཞིན། །དེ་ལྟར་འཇིག་རྟེན་རྨི་ལམ་ཡང་། །མཁས་པ་རྣམས་ནི་དེ་བཞིན་བསམ། །ཇི་ལྟར་སྐྱེས་བུ་ཉལ་བ་ཞིག །བུད་མེད་ལྷན་ཅིག་རྩེ་དགའ་རྨི། །སྣ་ཚོགས་ཡིད་དུ་འོང་བ་དང་། །ལྷ་རབ་བཙུན་མོ་མཉམ་པ་དང་། །གཞན་ཡང་སྣ་ཚོགས་དངོས་པོས་ཏེ། །སད་ནས་རྣམ་པར་སེམས་པ་ནི། །ཅི་ཞིག་བདེན་ནམ་རྨི་ལམ་ཡིན། །རྨི་ལམ་བུད་མེད་ལྷན་ཅིག་ཏུ། །རྩེས་ནས་ཕྱིར་ནི་བདག་སད་དེ། །འདི་བརྫུན་བུས་པ་སླུ་བ་ཡིན། །དེ་བཞིན་བདག་གི་གཉེན་པ་ཀུན། །རྒྱལ་སྲིད་སྟོབས་ཀྱང་དེ་བཞིན་ནོ། །དམག་པ་གྱོས་པོ་བུ་དག་དང་། །མ་དང་ཕུ་ནུ་ཕ་དག་ཀྱང་། །རྨི་ལམ་ལྟ་བུར་རིག་བྱ་སྟེ། །རྣལ་འབྱོར་སྦྱར་བར་ཇིར་མི་བྱ། །དཀའ་ཐུབ་ཚལ་དང་ཞིང་རྣམས་དང་། །རི་དང་རི་ཡི་སྨན་གཤོང་དང་། །འོ་མ་འབྱུང་དང་མཱ་ལ་ཡ། །ལྷུན་པོ་བྱིན་དང་དབང་ཆེན་དང་། །གངས་ཀྱི་རི་དང་ཀཻ་ལཱ་ས། །ཆར་འབབ་ལ་ཡང་གང་གནས་དང་། །འཛམ་བུ་འབྲས་བུའི་ཁུ་བ་དང་། །གང་དག་བདུད་རྩི་ཟ་བ་དང་། །ཕན་དུ་ཀམ་བལ་པར་ཡ་ཏྲ། །ཀོ་བི་དར་ན་གང་འཁོད་དང་། །རི་རབ་ནང་ན་གང་གནས་དང་། །དཔག་བསམ་ཤིང་ལ་གང་གནས་དང་། །རང་རྒྱལ་རྒྱལ་བའི་སྲས་རྣམས་དང་། །
ཉན་ཐོས་རྫུ་འཕྲུལ་ཆེན་པོ་དང་། །ཐམས་ཅད་ཀྱི་ནི་རྣལ་འབྱོར་འདི། །གང་འབྱུང་འབྱུང་བ་རྣམས་ཀྱི་སྟེ། །པད་མོའི་གནས་སུ་བརྟེན་བཅས་ཏེ། །སྐྱིལ་མོ་ཀྲུང་དུ་མཉམ་བཞག་ཅིང་། །རྟག་ཏུ་རྣལ་འབྱོར་སྦྱང་བར་གྱིས། །འདོད་དང་བདེ་ལས་རྣམ་པར་དབེན། །དབང་པོ་དབང་པོའི་དོན་གྱི་རྣམས། །ཐམས་ཅད་ལས་ཀྱང་ཕྱིར་བཟློག་ཅིང་། །ལྕགས་ཀྱུས་གླང་པོ་ཇི་བཞིན་དུ། །སེམས་ནི་མཉམ་པར་བཞག་པར་གྱིས། །འཇིག་རྟེན་འཇིག་རྟེན་འདས་བསམ་གཏན། །གང་ཡང་དེ་བཞིན་གཤེགས་པའི་དགེ། །འདོད་དང་དགའ་བ་དབེན་ལ་སོགས། །ཡང་ན་ཐམས་ཅད་བསྒྲགས་པ་དང་། །ཁྱད་པར་དུ་ཡང་གཟུགས་མེད་དང་། །འདུ་ཤེས་མེད་པའི་བསམ་གཏན་རྣམས། །ནམ་མཁའ་རྣམ་ཤེས་མཐའ་ཡས་དང་། །འདུ་ཤེས་ཡོད་མིན་མེད་མིན་རྣམས། །ཉི་མ་དང་ནི་ཟླ་བའི་དབྱིབས། །པད་མོ་དང་ནི་འོད་འདྲ་ཞིང་། །ནམ་མཁའ་རི་མོ་མེ་འདྲ་བར། །རྣལ་འབྱོར་ཞུགས་པས་རབ་ཏུ་མཐོང་། །འདི་དག་ཐམས་ཅད་སྤངས་ནས་སུ། །སྣང་བ་མེད་པར་རབ་ཏུ་གནས། །གང་ཚེ་མཚན་མེད་རྣལ་འབྱོར་ཅན། །རྣམ་པར་མི་རྟོག་ཆགས་མེད་ན། །སངས་རྒྱས་བྱེ་བ་རྣམས་ཀྱང་མཐོང་། །ཞིང་དང་ཞིང་ན་མཉམ་བཞག་པ། །དེ་དག་ཕྱག་གིས་དབང་བསྐུར་བར། །དེ་ཡི་སྤྱི་བོར་དབང་བསྐུར་ཏེ། །སངས་རྒྱས་ས་ལ་ཞུགས་པ་དང་། །སྣ་ཚོགས་གཟུགས་ནི་རབ་ཏུ་འབྱུང་། །སྣ་ཚོགས་ཚུལ་གྱི་དངོས་ཐོབ་ནས། །ཀུན་མཁྱེན་ཐམས་ཅད་རིག་པར་འགྱུར། །སྟོབས་དང་མངོན་ཤེས་དབང་ཡང་འཐོབ། །གཟུངས་དང་ཐམས་ཅད་ཏིང་ངེ་འཛིན། །ཐམས་ཅད་ཀྱི་ནི་འབྱུང་གནས་འགྱུར། །ཐུབ་པ་རྣལ་འབྱོར་སྐྱེད་པའི་ཡང་། །གཟུགས་ནི་རྡུལ་དུ་རྣམ་གཞིགས་ཤིང་། །མཆོག་རྡུལ་ཡན་ཆད་ཉིན་དབེན་ཕྱིར། །ཡོད་ལས་མེད་པར་འགྱུར་བ་སྟེ། །བོང་བུས་བ་ལང་རྭ་མཐོང་བཞིན། །ཆ་ཤས་མེད་ཕྱིར་ཆ་ཤས་ཅན། །ཕུང་པོ་ལས་ནི་ཕུང་ཅན་མེད། །དེ་བས་ལས་ཀྱི་འབྲས་གྱུར་པ། །འདི་ནི་སྒྱུ་མའི་བུས་བྱས་བཞིན། །འདི་ན་ལས་མེད་འབྲས་བུ་མེད། །ལས་ཀྱི་སྒྲུབ་པའང་ཡོད་པ་མིན། །འཇིག་རྟེན་བྱེད་པས་མ་བྱས་ཏེ། །བྱེད་པ་བྱེད་པ་མ་ཡིན་ནོ། །བྱེད་ལ་
བྱེད་པ་ཡོད་ན་ནི། །འདི་རྣམས་ཐུག་པ་མེད་པར་འགྱུར། །ཐུག་མེད་བྱས་པའི་ཉེས་པ་ཡིས། །ཐུབ་པ་དྲི་མ་ཅན་དུ་གྱུར། །དེ་སྟེ་ལམ་རྒྱུད་སྣ་ཚོགས་རྣམས། །ཆུ་དང་ནམ་མཁའ་ས་གནས་པའི། །ལུས་ཅན་ལུས་ལ་ཀུན་གནས་ཏེ། །སྐྱེ་བ་བཟང་པོ་གནས་སུ་སྟེ། །རིས་སུ་འགྲོ་བ་ཡོད་པས་ན། །ཇི་ལྟར་འདོད་པར་ལུས་ཅན་འགྲོ། །དབང་པོ་སོ་སོ་བྱ་བ་ཡང་། །ཇི་ལྟར་འདོད་པར་ཡུལ་འཛིན་ཏེ། །འདི་ནི་རྣམ་རྟོག་རྣམ་འགྱུར་བ། །ཞོ་མར་ཇི་ལྟར་འོ་མ་ལས། །དེ་བཞིན་སྐྱེ་དང་གནས་དང་འཇིག །ལས་ཀྱིས་བྱས་པར་འགྱུར་སེམས་ན། །རྨི་ལམ་དྲི་ཟ་སྒྱུ་མ་སྤྲིན། །བྲག་ཅ་དང་ནི་གློག་འདྲ་བ། །སྨིག་རྒྱུ་རི་དགས་སྲེད་པ་ལྟར། །དངོས་པོ་རྣམ་བསྒོམས་རྣལ་འབྱོར་ཅན། །ཐོག་མ་མེད་ནས་བསགས་པ་ཡི། །མི་ཡི་རྣམ་སྤྲོས་བག་ཆགས་ཀྱིས། །སྣ་ཚོགས་གནས་ངན་ལེན་པ་དང་། །སྣ་ཚོགས་རྟོག་པས་ལས་སུ་བརྟགས། །དབང་པོ་སྒྱུ་མ་ལྟ་བུ་ཡིན། །ཡུལ་རྣམས་རྨི་ལམ་འདྲ་བ་སྟེ། །བྱེད་དང་ལས་དང་བྱ་བ་ཡང་། །རྣལ་འབྱོར་སྒྲུབ་པས་མི་བརྟག་གོ །རྟོག་པ་ཉམས་པའི་རྟོག་པ་ཅན། །རྣམ་མྱོས་ཤེས་པ་ཉམ་ཆུང་བས། །བྱེད་པར་རབ་ཏུ་རྟོག་པ་ནི། །བྱ་བས་འགྲོ་བར་བྱས་པར་ཏེ། །འཇིག་རྟེན་གཅེས་པས་བྱས་མ་ཡིན། །རྡུལ་གྱི་རྐྱེན་ལས་བྱུང་བའང་མིན། །རྒྱུ་མེད་པས་ཀྱང་བྱས་མ་ཡིན། །ངོ་བོ་ཉིད་ཀྱིས་བྱུང་བའང་མིན། །རྡོ་རྗེ་ལྕགས་དང་ཁབ་ལོང་དང་། །རིན་ཆེན་ཕྲེང་བ་རྒྱན་རྣམས་ཀྱིས། །ཇི་ལྟ་བུ་ཡི་ལས་ཤིག་བྱས། །ནོར་བུ་གསེར་དུ་མིང་བཏགས་པས། །བྱ་དང་རི་དགས་ཁྲ་བོ་དང་། །ཚེར་མ་རྣམས་ཀྱི་རྣོ་དངོས་དང་། །འགྲོ་བ་སྣ་ཚོགས་ངོ་མཚར་བ། །རྣམ་རྟོག་ལས་ལས་མ་སྐྱེས་སོ། །ལས་ཀྱི་གང་ལས་མ་ཡིན་ཞེས། །རྟོག་ཅན་བདེན་ལ་མྱོས་པ་ནི། །བདེན་པའི་དངོས་པོར་མི་ཤེས་པ། །འདི་ནི་རྣམ་རྟོག་ལས་མིན་དུ། །འོ་མའི་ནང་ན་ཡོད་པའི་དུག །རྗེས་སུ་མི་བདེ་རྣམ་པར་འགྱུར། །རྣམ་པར་རྟོག་པའང་ཐམས་ཅད་དུ། །དེ་བཞིན་དངོས་པོ་རྣམས་ལ་འཇུག །དངོས་པོ་སྐྱེ་བ་མ་ཡིན་ཏེ། །དངོས་པོ་རྣམ་པར་འཇིག་པའང་མེད། །རྣམ་རྟོག་
སྣ་ཚོགས་དེ་དག་ནི། །རྟོག་པ་ཅན་གྱིས་མི་རིག་གོ །འགྲོ་བའི་རིས་ཀྱི་དངོས་པོ་དག །རྣལ་འབྱོར་སྤྱོད་པས་རྣམ་པར་གཞིག །སྦྱར་ཞིང་རྣལ་འབྱོར་དེ་ལ་ཞུགས། །ལས་དང་ལས་མིན་མ་སེམས་པར། །རིས་སུ་འགྲོ་བའི་དངོས་པོ་ཡིས། །ཟླ་བ་ཉི་མ་རྣམ་མཛེས་པ། །རླུང་གིས་ཤིན་ཏུ་བསྐྱོད་ནས་ཀྱང་། །མཁའ་ལ་རྟེན་པ་མེད་པར་འགྲོ། །ཤིན་ཏུ་ཕྲ་ཞིང་ཤེས་དཀའི་ལས། །སྟུག་པོར་གནས་པར་རབ་ཏུ་མཐོང་། །ལས་དེ་ཅི་ཞིག་ཡོད་པར་འགྱུར། །ཞུགས་བརྩོན་རྣལ་འབྱོར་ཅན་དག་ལ། །ཇི་ལྟར་མེ་ནི་ཤིང་གི་རི། །ཐལ་བར་བྱེད་པ་སྐད་ཅིག་ཏུ། །རྣལ་འབྱོར་ཅན་གྱི་ཐམས་ཅད་ལས། །ཡེ་ཤེས་མེས་ཚིག་སྐད་ཅིག་ཏུ། །ལས་དང་བག་ཆགས་ལྷན་ཅིག་ཏུ། །མང་པོའི་དུས་ནས་བསགས་པ་དག །རྣལ་འབྱོར་ཡེ་ཤེས་བག་ཆགས་ཀྱིས། །ཐམས་ཅད་ཞིག་བྱེད་སྐད་ཅིག་ཏུ། །ཇི་ལྟར་སྒྲོན་མས་མུན་པའི་ཚོགས། །སྐད་ཅིག་ཏུ་ནི་བསལ་བྱེད་པ། །ཡེ་ཤེས་སྒྲོན་མས་ཐུབ་པ་དེ། །མི་ཤེས་རྣམ་པར་སེལ་བར་བྱ། །རྒྱན་སྟུག་པོ་ཐེག་པ་ཆེན་པོའི་མདོ་ལས་བདག་གི་ལས་ཀྱི་བྱ་བ་སྤྱད་པ་ཞེས་བྱ་བ་སྟེ། ལེའུ་ལྔ་པའོ།། །།