བདུན་པ། འཕགས་པ་རྒྱན་སྟུག་པོ་ལས་ལེའུ།
སངས་རྒྱས་རྣལ་འབྱོར་རྣམ་ཕྱེ་དང་། །བདག་ལྡན་དེ་ཡི་བྱིན་གྱིས་བརླབས། །རྒྱལ་བ་དག་དང་རྒྱལ་བའི་སྲས། །བྱེ་བའི་ཞིང་ན་བཞུགས་པ་དང་། །ཁམས་གསུམ་གནས་པ་ཐམས་ཅད་དང་། །ས་གནས་རྣལ་འབྱོར་ལྡན་པ་དང་། །བདེ་ཡོད་ཞིང་དང་སྟུག་པོ་སྟེ། །རྣལ་འབྱོར་ཅན་གྱི་ཞིང་མཆོག་དང་། །སངས་རྒྱས་པད་མོའི་དབུས་བཞུགས་པ། །རྡུལ་ཕྲན་བཞིན་བཞུགས་བདག་གིས་མཐོང་། །རྣལ་འབྱོར་དེ་ལས་བདག་ལངས་ནས། །ས་ལ་རྒྱལ་བ་དེ་དག་ནི། །སྟུག་པོའི་ཞིང་ན་བདག་བཞུགས་ཤིང་། །རྒྱལ་སྲས་ཐབས་ཅིག་བཞུགས་པ་དག །མེ་ཏོག་ཨ་ཏ་སི་འདྲ་བའི། །མཁའ་ལ་ཟླ་འདྲ་བཞིན་བཞུགས་མཐོང་། །མཐེ་བོའི་ཚིགས་དང་རབ་འདྲ་བ། །ས་རྣམས་དགེ་ལ་རབ་སྦྱོར་བའི། །རྣམ་གྲོལ་སྙིང་པོ་བདག་གིས་མཐོང་། །འདི་ན་བུ་ཁྱོད་སུ་ཞིག་ཅེས། །སྙིང་པོ་དེ་ལྟར་སེམས་གྱུར་ཏེ། །ཐུབ་པ་འདི་ནི་
གཅིག་ཅིག་སྙམ། །དེ་ཚེ་སྐུ་རུ་ཞུགས་པར་གྱུར། །འགྲོ་བ་རྣམས་ཀྱང་སྐུར་ཞུགས་ནས། །ཐུབ་པའི་པད་མོའི་སྙིང་པོ་ཡིས། །སངས་རྒྱས་རྣམས་ཀྱི་ལོངས་སྤྱོད་དང་། །ཁམས་གསུམ་ཀུན་ན་གནས་པར་ཡང་། །གང་ཚེ་མཐོང་བ་དེ་དུས་ན། །ཀྱེ་མ་མཚར་ཆེས་བསམ་པ་དང་། །དེ་ཚེ་ཐུབ་པ་ལྷ་ཡི་ལྷས། །རྣལ་འབྱོར་ཡུལ་ནི་རབ་བསྡུས་ཏེ། །ཐུབ་པས་སྔོན་བཞིན་བཞག་པར་གྱུར། །ཀྱེ་མ་བསམ་ཡས་ལྷ་རྫས་འདི། །རྣལ་འབྱོར་ཅན་གྱི་སྣ་ཚོགས་གཟུགས། །སངས་རྒྱས་ལྷ་ཡི་ཡུལ་ཡིན་ཏེ། །བསམ་གྱིས་མི་ཁྱབ་བདག་གིས་མཐོང་། །ཆོས་ཀྱི་སྤྲིན་གྱི་ཏིང་འཛིན་དང་། །དགའ་དང་མི་གཡོ་དེ་བཞིན་ཏེ། །རིང་སོང་མངོན་དུ་གྱུར་པ་དང་། །འོད་བྱེད་པ་ཡི་མ་ལུས་པར། །སྒྱུ་མ་དཔའ་བར་འགྲོ་ལ་སོགས། །གཟི་བརྗིད་ཅན་ཡང་མ་ལུས་པར། །གཟུགས་རྣམས་ཀྱི་ཡང་ཡུལ་ཡིན་ཏེ། །འོག་མིན་ཐབས་ལས་བྱུང་བའོ། །དེ་ནི་ཡིད་བཞིན་འགྱུར་སྐུ་ཡིས། །དབང་གི་ཡོན་ཏན་བརྒྱད་པོ་རྣམས། །ཕྲ་ཚོགས་ཆེ་བའི་ཡོན་ཏན་དང་། །འཐོབ་དང་འདོད་འབྱོར་བསྒྲགས་པ་དང་། །བདག་པོ་དབང་དང་ལྡན་པ་དང་། །ཇི་ལྟར་འདོད་པར་རུང་བའི་རྣམས། །ཐོབ་ནས་སྟུག་པོའི་དབུས་ཡུལ་ན། །རྣམ་པར་གནས་ཤིང་རབ་ཏུ་རྩེ། །སྤྲུལ་པའི་ལྷ་རྫས་སྟུག་པོ་ནས། །ཕྱིན་པ་དགེ་བ་དེ་དག་ཀྱང་། །ལྷུན་གྱིས་གྲུབ་པ་སངས་རྒྱས་ཀྱི། །འཕྲུལ་པ་རྣམས་ནི་རབ་ཏུ་འབྱེད། །རྒྱལ་བ་རྣམས་དང་རྒྱལ་སྲས་སུ། །ཐབས་ཅིག་བཞུགས་པར་ཀུན་ན་སྣང་། །དེ་ལྟར་ས་འདི་སྣ་ཚོགས་ཏེ། །རང་གི་གཟུགས་ལྡན་རྣམས་ཀྱང་འདྲེས། །ཆ་ལས་ཕྱིར་ལྡོག་དེ་ཡི་ཚེ། །བྱ་བ་བྱས་པས་སྟུག་པོའི་གཞི། །ཤེས་པས་བཅད་ཅིང་མཁས་པའི་རྣམས། །ཐུབ་པ་དག་གིས་སྟུག་པོ་མཐོང་། །གཞལ་མེད་པད་མོ་འདྲ་བ་ན། །མེ་ལྟར་རབ་ཏུ་འབར་བ་ཡིན། །ཐུབ་པ་རྣལ་འབྱོར་བདེ་མོས་པ། །རྣལ་འབྱོར་ཅན་དང་ལྷན་ཅིག་གནས། །དཔལ་བེའུ་མཚན་དང་ཐམས་ཅད་ལྡན། །ཕྲ་བའི་ལུས་ཅན་རང་གི་འོད། །དེ་དག་དབུས་སུ་ཐུབ་པའི་དབང་། །ཁྱོད་ནི་གནས་པར་རབ་ཏུ་འགྱུར། །ལྟོས་ཤིག་ལྷ་ཡི་ཅོད་པན་དང་། །དྲུ་མ་
མི་འམ་ཅི་ཡི་བདག །གཞལ་མེད་བྱེ་བ་མང་པོ་ཡིས། །ཟླ་བ་བཞིན་དུ་རབ་ཏུ་འབར། །ཐུབ་པ་རྣམས་དང་རྒྱལ་བའི་སྲས། །དགའ་ལྡན་ལ་སོགས་ལྷ་ཡི་མཆོག །ཨ་ཏ་ས་ཡི་མེ་ཏོག་འདྲ། །ཤེས་རབ་བཟང་ཞིང་མཚན་མང་བ། །ཕྲེང་བ་ཅོད་པན་ཐོགས་པའི་རྣམས། །གཞལ་མེད་མང་པོས་གནས་པ་སྟེ། །ལུས་ནི་རབ་ཏུ་འབར་བ་དང་། །ཀུན་མཁྱེན་ཐམས་ཅད་མངོན་གྱུར་པ། །ཐོགས་པ་མེད་པའི་སྤོབས་པ་དང་། །ཀུན་ཏུ་བཟང་པོ་སྟོབས་ཆེན་ཏེ། །ཟླ་བ་འདྲ་བའི་གཞལ་མེད་ཀྱིས། །སྟུག་པོའི་གང་ཆེན་མཚོ་ལ་གནས། །རྣམ་པ་དུ་མར་ཐམས་ཅད་ནས། །ཐུབ་པ་རྣམས་ཀྱིས་བསྟོད་པ་སྟེ། །ཆགས་མེད་ཚངས་པའི་ཁྱུ་མཆོག་དང་། །གྲུབ་དང་དྲི་ཟ་ཚོགས་རྣམས་དང་། །མཁས་དང་ངེས་པར་ལྡན་པ་ཡི། །སྐྱེས་བུའི་ཚོགས་ཀྱི་བདག་པོ་དང་། །རྒྱལ་བའི་སྲས་ཀྱིས་མདུན་དུ་བྱས། །རྣལ་འབྱོར་སྤྱོད་པས་ཁྱད་པར་དུ། །གཟིམས་པ་ལྟ་བུར་མཐོང་བ་ནི། །དེ་དག་ལེ་ལོ་བྲལ་བས་ཏེ། །གཉིད་དང་སྙོམ་སོགས་བསྲབས་པ་ཡིས། །སངས་རྒྱས་ལྷ་ཡི་རྗེས་སུ་འབྲང་། །མུར་འདུག་ཀུན་གྱིས་མཐོང་གྱུར་ཅིང་། །དེ་བཞིན་ལྷ་དང་ཚངས་ལ་སོགས། །འཛམ་གླིང་པ་དང་འོག་མིན་དང་། །འཕྲུལ་གྱིས་སྤྲུལ་པས་ཐུབ་མཐོང་བ། །འགྲོ་བས་སྣ་ཚོགས་ཀུན་གཟུགས་སུ། །ས་ལ་ཀུན་ནས་ཞུགས་པར་ཏེ། །ཆོ་འཕྲུལ་རྣམ་པ་མང་པོ་ཡིས། །མགོན་པོ་ཤིན་ཏུ་རྣམ་པར་མཛེས། །ལ་ལ་ཉལ་ཞིང་རབ་ཏུ་འབར། །དེ་བཞིན་གཞན་དག་ཕན་ཚུན་འཆག །ལ་ལ་གཡེན་སྤྱོ་བྲེལ་ཅིང་སྒོམ། །དེ་བཞིན་གཞན་ཡང་མྱ་ངན་འདའ། །ལ་ལ་མངལ་དུ་འཇུག་པ་དང་། །སྐྱེ་དང་འབྱུང་དང་དཀའ་སྤྱོད་དང་། །བྱང་ཆུབ་རྣམ་པར་འཚང་རྒྱ་ཞིང་། །ཆོས་ཀྱི་འཁོར་ལོ་བསྐོར་བར་རོ། །སངས་རྒྱས་ཉིད་དང་སངས་རྒྱས་ཡུལ། །སངས་རྒྱས་ཡེ་ཤེས་བླ་ན་མེད། །རྒྱལ་བའི་སྲས་པོ་འཇིགས་མེད་པ། །དེ་དག་ཀུན་གྱིས་འཐོབ་འགྱུར་ཏེ། །ཐུབ་པ་ཤཱཀྱའི་སེང་གེ་ཡིས། །ཇི་ལྟར་བརྙེས་བཞིན་གྲོགས་པོ་རྣམས། །རྒྱལ་སྲས་འཇིགས་པ་མེད་པ་ཡིས། །འདི་དག་ཀུན་ལ་ཡིད་ཆེས་ཀྱིས། །ཡིད་ཆེས་གྱུར་ན་སངས་རྒྱས་སམ། །
ཐར་བར་འགྱུར་བ་ཐེ་ཙོམ་མེད། །འཁོར་ལོ་འཁོར་བའི་རྒྱལ་པོར་འགྱུར། །སྤོབས་ཅན་ཁམས་ཀྱི་བདག་པོ་དང་། །ཚངས་ལ་སོགས་པའི་གནས་སུ་ཡང་། །གནས་འགྱུར་འཁོར་གྱི་བདག་པོར་འགྱུར། །དྲི་མེད་ཞིང་གི་པད་མོ་ལ། །ཐུབ་པའི་དབུས་སུ་སྐྱེ་བར་འགྱུར། །པད་མོའི་དབུས་སུ་སྐྱེ་བ་ཡང་། །བརྩོན་འགྲུས་ལྡན་པའི་སྲས་ཀྱིས་འཐོབ། །བརྩོན་པས་བདུད་ལས་རྒྱལ་བར་འགྱུར། །བག་ཆགས་འདོད་པའི་རྒྱུ་ལས་ཀྱང་། །འདོད་བདག་བདག་པོ་ཕམ་བྱས་ཤིང་། །ཐེག་པ་གཅིག་ལ་རབ་ཏུ་འཇུག །བརྩོན་འགྲུས་ལྡན་ཞིང་ཞི་མེད་པའི། །རིགས་ཀྱང་ཐུབ་པ་རབ་ཏུ་སྟོན། །སྲས་པོ་ཡངས་པའི་རིགས་གྱུར་ཅིང་། །ཞིང་དང་ཞིང་དུ་བདག་པོར་འགྱུར། །སངས་རྒྱས་ཉིད་དུ་སྨོན་སེམས་ན། །སངས་རྒྱས་རིགས་ནི་རྣམ་པར་དག །རྣམ་དག་རིགས་ཅན་སྲས་དེ་ནི། །སངས་རྒྱས་རྣམས་ཀྱིས་ལུང་བསྟན་ཏེ། །མྱུར་དུ་སངས་རྒྱས་ཅི་འདྲ་བ། །དེ་བཞིན་ཐུབ་པ་འཚང་རྒྱའོ། །རྣམ་སངས་རྒྱས་ནས་ཉེར་འཚོ་བ། །ཚངས་ལ་སོགས་དང་རྣལ་འབྱོར་ཅན། །ས་ལྟར་རྟག་པའི་དུས་སུ་ཡང་། །ལུས་ཅན་རྣམས་ལ་ཉེ་བར་གནས། །ཐམས་ཅད་སྨན་གྱི་རྣལ་འབྱོར་ཅན། །ཇི་ལྟར་གྲོང་དང་གྲོང་གནས་པ། །ནད་རྣམས་རབ་ཏུ་སེལ་བ་ལྟར། །རབ་ཏུ་མཁས་པ་དེ་བྱེད་པ། །རྣམ་རྟོག་མེད་པའི་ཡིད་ཀྱིས་ཏེ། །བཅད་ཀྱང་གཡོ་ཞིང་འགུལ་བ་མེད། །འདི་ནི་རྣམ་པར་རིག་པ་ཙམ། །ཡིད་ནི་ནང་དང་ཕྱིར་ཡང་སྤྱོད། །བདག་དང་བདག་གི་མེད་པ་སྟེ། །ནོར་བར་མཐོང་ཞིང་མི་གཡོའོ། །ཡིད་ཀྱི་རྣམ་ཤེས་ཡུལ་ཅན་གྱི། །ཀུན་གཞི་ཀུན་ནས་གནས་པ་སྟེ། །གཅད་དང་གཅོད་པར་བྱེད་པ་དང་། །དེ་ཉིད་གཅད་བྱ་གཅོད་པའང་ཡིན། །ལུས་ཅན་ཀུན་གྱི་ཀུན་གཞི་ནི། །ལས་ཀྱི་བག་ཆགས་རྣམས་ཀྱིས་ཡོག །ཁར་བ་ནོར་བུ་ཉི་མ་དག །ལྡན་ལས་མེ་འབྱུང་ཇི་བཞིན་ཏེ། །གཙུབ་མ་གཙུབ་སྟན་འདུས་ལས་མིན། །མིས་ཀྱང་བྱས་པ་མ་ཡིན་ནོ། །དེ་བཞིན་སེམས་ཡིད་རྣམ་ཤེས་དང་། །དབང་པོ་དོན་དང་ཡིད་དང་ལས། །སེམས་རྣམས་རབ་ཏུ་སྐྱེར་གྱུར་པ། །རྒྱ་མཚོའི་དབའ་རླབས་
ཅི་བཞིན་ནོ། །སྨིག་རྒྱུ་ནམ་མཁའ་སྒྱུ་མ་དང་། །རྨི་ལམ་མ་ཡིན་ནོར་བའང་མིན། །སྦལ་པ་རུས་སྦལ་སྤུ་དག་དང་། །རི་བོང་རྭ་དང་མཉམ་པའང་མིན། །མེ་ནི་ཤིང་ལས་སྐྱེ་བར་འགྱུར། །གློག་ནི་དེ་བཞིན་སྤྲིན་ལས་སོ། །མེད་ལ་སྐྱེད་པ་སུ་ཡང་མེད། །རྫ་སོགས་རྫ་མཁན་ལྟ་བུའོ། །ཇི་ལྟར་རྩྭ་དང་ཤིང་དག་ལ། །བརྟེན་ཅིང་ལྷན་ཅིག་སྒྱུ་འབྱུང་བ། །དེ་བཞིན་མོས་ལ་སོགས་པ་ཀུན། །སེམས་དང་སེམས་བྱུང་ལྷན་ཅིག་གནས། །སེམས་ཀྱི་ཡུལ་ནི་བསམ་དུ་མེད། །སྟུག་ན་གནས་པས་ལེགས་པར་མཐོང་། །ལྷ་རྫས་སྔོན་མེད་ལྷན་ཅིག་སྐྱེས། །མྱ་ངན་འདས་དང་ནམ་མཁའ་བཞིན། །སོ་སོར་མ་བརྟགས་འགོག་པ་ལྟར། །དུས་གསུམ་རྣམ་པར་སྤངས་པ་སྟེ། །འོད་ཅན་རྟག་ཏུ་དག་པ་ནི། །ལུས་ཅན་ཀུན་གྱི་ཀུན་གཞིའོ། །དང་པོ་ཚེས་པའི་ཟླ་མདོག་ལྟར། །བྱེ་བའི་ཞིང་དུ་སྣང་བ་སྟེ། །རི་རབ་གནས་ཤིང་འཁོར་བ་ཡང་། །དངོས་པོ་འཇིག་པ་མ་ཡིན་ནོ། །དེ་བཞིན་ཡིད་སེམས་རྣམ་པར་ཤེས། །སེམས་ཅན་ཁམས་ན་འཁོར་མོད་ཀྱི། །དེ་ལ་འཕེལ་ཞིང་འབྲི་མེད་དེ། །རྟག་ཏུ་རང་བཞིན་འོད་སྣང་བའོ། །ཇི་ལྟར་ཟླ་བ་སྐྱེ་འབྲི་བར། །མི་ཤེས་འགྲོ་བ་རྣམ་རྟོག་ཀྱང་། །སྐྱེ་འབྲི་ཟླ་ལ་ཡོད་པ་མིན། །གླིང་དང་གླིང་དུའང་རབ་ཏུ་སྣང་། །དེ་བཞིན་ཀུན་གཞི་རྣམ་ཤེས་ལ། །བྱིས་པ་མི་ཤེས་འགྲོ་རྣམས་ཀྱང་། །རྟག་ཏུ་སྐྱེ་བྲིར་རྣམ་རྟོག་སྟེ། །དེ་ནི་ཟག་མེད་སངས་རྒྱས་སོ། །ཀུན་གཞི་འདི་ལ་ཇི་ལྟར་ཡང་། །འབྱུང་བས་ཐ་དད་མི་འགྱུར་ཏེ། །འཇུག་པའི་རྣམ་ཤེས་སོང་གནས་པ། །བག་ཆགས་ཀྱིས་ནི་ཟླ་བ་བཞིན། །ཆུ་ཀླུང་དབུས་ཀྱི་ཤིང་ལྟ་བུར། །ཆུ་བོའི་ཀླུང་དང་འགྲོགས་མོད་ཀྱི། །ཐ་དད་མཚན་དུའང་རབ་ཏུ་གྲུབ། །རྒྱ་མཚོ་ཆེན་པོར་དེ་བཞིན་འགྲོ། །དེ་ལྟར་ཀུན་གཞི་རྣམ་ཤེས་ཀྱང་། །རྟག་ཏུ་བག་ཆགས་ལྡན་འགྱུར་བ། །རྣམ་པར་ཤེས་པ་བདུན་པོ་དང་། །འགྲོགས་ཀྱང་འདྲེ་བ་མེད་པ་སྟེ། །ཀུན་ནས་ཉོན་མོངས་རྣམ་བྱང་དང་། །རྣམ་པར་དག་པའི་རྒྱུ་ཡང་དེ། །ཆོས་མཐོང་འཕགས་པ་རྣམས་ཀྱི་ཡང་། །དེ་ནི་རྣལ་འབྱོར་མཉམ་བཞག་པ། །བྱོལ་སོང་མི་དང་ལྷར་སྐྱེས་དང་། །ཤ་ཟ་ལྟོ་འཕྱེ་ཡི་དྭགས་དང་། །ལྷ་མིན་དྲི་ཟ་
འབར་བ་ཡི། །ལམ་རྒྱུད་ཀུན་ཀྱང་དེ་ཡི་དབང་། །སངས་རྒྱས་ཀུན་གྱི་གཞི་མཛེས་ལའང་། །དེ་ཉིད་རྒྱུར་ནི་གྱུར་པ་སྟེ། །དེ་རྟོགས་ནས་ནི་སངས་རྒྱས་དང་། །རིགས་དང་ཐེག་པ་གཞན་མིན་འགྱུར། །ཐམས་ཅད་ལུས་ལ་རྟག་ཏུ་གནས། །སྤྱོད་ལོང་ཡོད་ལ་རྣམ་པར་འདུག །དཔལ་དང་ལྡན་ལ་ཁྱད་པར་དུ། །ཐམས་ཅད་ཀུན་ཀྱང་རབ་ཏུ་གནས། །རབ་དང་འབྲིང་དང་ཐ་མ་ལའང་། །འགྲོ་བ་དོག་པ་ཐམས་ཅད་ན། །དེ་ནི་ཀུན་ཏུ་གནས་པ་སྟེ། །ལུས་ཅན་རྣམས་ཀྱི་ལུས་ལ་རྟེན། །འབྲས་བུའི་བདག་དང་རྒྱུ་ཡི་བདག །ནང་གི་བདག་ཀྱང་དེ་ཉིད་ལ། །བྱིས་པ་རྣམས་ཀྱིས་ཁོར་ཟུག་བརྟག །དེ་ཡི་དབྱིངས་ལ་ཐོག་མ་མེད། །གནས་ངན་ལེན་དང་ལས་ཀྱིས་བསྐྱེད། །བག་ཆགས་ཐོག་མ་མེད་པས་བསགས། །འཚོ་ཞིང་གསོ་བར་བྱེད་པ་ནི། །རྣམ་པར་ཤེས་པ་བདུན་པོ་སྟེ། །ཡིད་ནི་རྟག་ཏུ་རླུང་དང་མཉམ། །གཡོ་ཞིང་མྱུར་བར་རབ་ཏུ་འཇུག །ལུས་ཅན་རྣམས་ཀྱི་ལུས་གནས་ཤིང་། །ཁམས་ཀྱི་གོང་ལ་གནས་པའོ། །ལས་ཀྱི་རླུང་གིས་བསྐྱོད་པ་ནི། །དབང་པོ་རྣམས་ལ་ཁྱབ་པར་གནས། །རྣམ་ཤེས་བདུན་དང་ལྷན་ཅིག་ཏུ། །དབའ་རླབས་བཞིན་དུ་རྒྱུ་བ་སྟེ། །རྡུལ་ཕྲན་དུས་དང་གཙོ་བོ་དང་། །དེ་བཞིན་སྐྱེས་བུ་དབང་བཅས་སུ། །ཀུན་གཞི་གཅིག་པུ་དགེ་བ་དེ། །རྟོག་པ་ཅན་གྱིས་ཐེར་ཟུག་བརྟག །རྟག་ཏུ་སྣ་ཚོགས་རྣམ་པའི་གཟུགས། །གཡོ་ཞིང་མྱུར་འབྱུང་བྱེད་པ་སྟེ། །ཀུན་གཞི་ས་རྣམས་ཐམས་ཅད་དུ། །ཕྱི་ནང་བཅས་པར་གནས་པ་ཡིན། །དེ་ནི་ས་ཡི་རྒྱུ་ཡིན་པར། །རྒྱུ་ཅན་རྣམས་ཀྱིས་བརྟག་པ་སྟེ། །དེ་ཡི་འགྲོ་བ་ཤིན་ཏུ་ཕྲ། །རྟོག་པ་ཅན་རྣམས་མྱོས་པར་བྱེད། །བདག་དོན་དབང་པོ་ཡིད་མྱོས་པའི། །ཡང་དག་མ་མཐོང་མྱོས་པར་འགྱུར། །སྔོན་གྱི་ལས་ཀྱིས་བསྐྱོད་པ་ཡི། །རྣམ་པར་ཤེས་པ་སྲེད་པའི་རྒྱུ། །སྣ་ཚོགས་གཟུགས་ཅན་འགྲོ་བ་དང་། །མི་རྣམས་ཀྱི་ཡང་རྒྱུ་ཡིན་ནོ། །འཇིགས་མེད་རྒྱལ་བའི་སྲས་རྣམས་ལ། །རྡོ་རྗེའི་སྙིང་པོས་ཡང་སྨྲས་པ། །ཀུན་གཞི་དང་ལུགས་དགེ་བ་ནི། །རྒྱལ་སྲས་རྣམས་ཀྱིས་མཐོང་ཐོས་ཏེ། །ཀུན་གཞིའི་མཆོག་ཏུ་དགེ་བ་ནི། །ཐམས་ཅད་ལུས་ལ་ཞེན་པ་སྟེ། །
སུམ་ཅུ་རྩ་གཉིས་མཚན་ལྡན་ཞིང་། །རྣམ་པ་སྣ་ཚོགས་གཟུགས་མངའ་བའི། །རྒྱལ་བ་འཁོར་ལོ་འཁོར་བར་ཡང་། །ས་རྣམས་ལ་ལར་འགྲོ་བས་མཐོང་། །ཇི་ལྟར་ཟླ་བ་སྐར་ཚོགས་དང་། །ལྷན་ཅིག་མཁའ་ལ་གནས་པ་ལྟར། །རྣམ་ཤེས་རྣམས་དང་ཀུན་གཞི་ཡང་། །དེ་བཞིན་ལྷན་ཅིག་ལུས་ལ་གནས། །ཇི་ལྟར་དབང་གིས་སྒྱུར་བའི་ལྷ། །ལྷ་ཡི་བུ་མོས་མདུན་བདར་ཅིང་། །རིན་ཆེན་དབུས་ན་རྣམ་མཛེས་པ། །དེ་བཞིན་ཀུན་གཞི་ས་རྣམས་ལ། །ཇི་ལྟར་ཆུ་དབང་ཆུ་ཡི་ལྷ། །ཆུ་ཀླུང་རྒྱ་མཚོ་མཆིང་རྣམས་ལ། །ཇི་བཞིན་སྐྱེ་ལྡན་ས་ཡང་སྟེ། །དེ་བཞིན་སེམས་ནི་རྣམ་པར་མཛེས། །ཇི་ལྟར་གཞལ་མེད་གནས་པའི་ཉི། །རི་རབ་ལོགས་ན་རྣམ་པར་མཛེས། །ལྷ་རྣམས་ཀྱིས་ནི་ཕྱག་ཀྱང་བྱ། །དེ་བཞིན་ཀུན་གཞི་སངས་རྒྱས་སར། །ས་བཅུ་དག་ལ་ལྷན་ཅིག་ཏུ། །སྤྱད་པ་སྤྱོད་པ་རྒྱལ་བའི་སྲས། །ཐེག་པ་ཆེན་པོས་ཕྱུང་བ་སྟེ། །ལུས་ལ་གནས་པ་རྣམ་པར་མཛེས། །རྗོད་པའི་ཞལ་གྱིས་རྟག་པར་ཡང་། །རྒྱལ་བ་རྣམས་ནི་ཀུན་ནས་བསྟོད། །ཉན་ཐོས་རྣམས་དང་རང་རྒྱལ་དང་། །རྒྱལ་བའི་སྲས་རྣམས་ཁྱད་པར་དུ། །ས་དང་ས་ལ་རྣམ་དག་པ། །རྒྱལ་བའི་སྲས་ཞེས་མངོན་བསྒྲགས་དང་། །རྒྱལ་བ་དག་དང་རྒྱལ་བའི་སྲས། །དེ་དག་ཀུན་གཞི་འདི་ལ་བརྗོད། །ལུང་སྟོན་ལུང་བསྟན་འགྱུར་བ་ཡི། །རྒྱལ་སྲས་རྒྱལ་བ་དེ་བཞིན་ཏེ། །ཀུན་གཞི་དྲི་མེད་བསོད་ནམས་ཀྱིས། །དེ་བཞིན་གཤེགས་པར་འགྱུར་བ་ཡིན། །འདི་ལྟ་བུ་ཡི་ཀུན་གཞིའི་ཡུལ། །སྟུག་ན་གནས་པའི་རྣལ་འབྱོར་ཅན། །ཐུབ་བརྩོན་རྣལ་འབྱོར་སྤྱོད་པ་ཡིས། །རབ་ཏུ་མཐོང་ཞིང་རྣལ་འབྱོར་གྱིས། །སངས་རྒྱས་དག་དང་རང་སངས་རྒྱས། །ཉན་ཐོས་རྣམས་དང་མུར་འདུག་གཞན། །དེ་ཉིད་རྟོགས་ནས་མཐོང་བ་ནི། །རྣལ་འབྱོར་འཇིགས་མེད་རྣལ་འབྱོར་རོ། །རྣམ་པར་ཤེས་པའི་སྤྱོད་ཡུལ་གང་། །འདི་ལྟར་སྣང་བ་ཅི་ཡང་རུང་། །རྣམ་པར་ཤེས་པར་གྱུར་པ་སྟེ། །རྫ་ལ་སོགས་པ་ས་མ་ཡིན། །འདི་ལྟར་ནོར་པ་གང་སྣང་བ། །སྣ་ཚོགས་རྫ་གྲགས་ཅི་ཡང་རུང་། །དེ་ནི་ཀུན་གཞི་གྱུར་པ་སྟེ། །སྣང་བ་ནོར་པའི་མཚན་ཉིད་དོ། །ཀུན་གཞི་ཆུ་ཀླུང་དེ་
བཞིན་དུ། །སྣ་ཚོགས་སྣང་མངོན་འགྲོ་བས་མཐོང་། །བག་ཆགས་རྣམས་ཀྱིས་བསྒོས་པའི་སེམས། །གཟུང་དང་འཛིན་པ་རབ་ཏུ་འཁོར། །དངོས་པོ་སྒྱུ་འདྲ་མ་ཡིན་ཏེ། །སྐྲ་ཡི་ཚོགས་དང་སྨིག་རྒྱུ་མིན། །སྐྱེས་དང་མ་སྐྱེས་མ་ཡིན་ཏེ། །སྟོང་དང་མི་སྟོང་རྣམ་པར་སྤངས། །དངོས་སུ་གཅིག་མེད་མི་འགྱུར་ཏེ། །རིང་དང་ཐུང་ལ་སོགས་པ་བཞིན། །སྒྱུ་མའི་རང་བཞིན་སྐྱེས་པ་ནི། །གང་ན་ཅི་ཡང་ཡོད་པ་མིན། །དེ་ནི་རིག་སྔགས་སྒྱུ་མ་སྟེ། །སྐྱེས་བུ་རྣམས་ལ་རབ་ཏུ་སྣང་། །སྨིག་རྒྱུ་སྐྲ་ལ་སོགས་པའི་ཚོགས། །གཉིས་ལས་ཉེ་བར་མངོན་པ་སྟེ། །གཅིག་མེད་པར་ནི་གཉིས་པོ་ཡང་། །མ་བྱུང་འབྱུང་བར་མི་འགྱུར་ཏེ། །སྒྱུ་ལ་སོགས་པ་རྣམ་བརྟགས་པ། །འདི་ནི་རྣམ་ཤེས་གྱུར་པའོ། །སྒྱུ་མེད་སྒྱུ་ཞེས་བྱ་བ་ཡི། །དངོས་པོ་གང་དང་གང་ཡང་མེད། །ཅི་འང་རུང་སྟེ་གང་ཡོད་པ། །སྒྱུ་མས་བྱས་པའང་ཡོད་པ་ཡིན། །མྱོས་པར་བྱེད་པ་འཇིག་རྟེན་ན། །སེམས་ལ་དབང་མེད་རྣམས་ལ་ཡོད། །སྒྱུ་མ་དག་གམ་གྱོ་མོ་དག །སྣ་ཚོགས་སྒྱུ་མས་མ་བྱས་ཏེ། །གཡོ་བ་གང་དག་ཅི་ཡང་རུང་། །དེ་ནི་སྣང་མིན་སུས་མི་མཐོང་། །འདི་ལ་རྣམ་རྟོག་གཡོ་བ་ནི། །ཁབ་ལོང་དག་ལ་ལྕགས་བཞིན་ཏེ། །སེམས་ཅན་མེད་ལ་མི་རྟག་པའི། །ཤེལ་སྒོང་ནོར་བུ་ཇི་བཞིན་ནོ། །ཀུན་གཞི་ཀུན་ནས་སྣ་ཚོགས་པ། །བྱེད་པ་བཞིན་དུ་སྣང་བ་སྟེ། །སྐྱེ་ཞིང་འཆི་བར་འགྱུར་མོད་ཀྱི། །འཁོར་བ་པོ་ནི་གང་ཡང་མེད། །རྨི་ལམ་འདྲ་བར་སྐྱེ་ཤི་དག །རབ་ཏུ་མཐོང་ན་རྣམ་པར་འགྲོལ། །ཐུབ་པ་གང་ཚེ་གྱུར་པ་ན། །གྲོལ་བ་ཞེས་ནི་བརྗོད་པ་སྟེ། །རིགས་དང་གཞུང་གིས་བསྟན་པ་ནི། །སངས་རྒྱས་ཁྱུ་མཆོག་དེ་ཡིན་ནོ། །ཐམས་ཅད་ཆོས་ལ་མེ་ལོང་བཞིན། །སྲང་ཡིན་དེ་བཞིན་ཚད་མ་སྟེ། །དངོས་པོ་ཀུན་ལ་སྒྲོན་མ་བཞིན། །ཁབ་ལོང་བ་ཡི་རྡོ་ལྟར་གནས། །རྣལ་འབྱོར་ལམ་གྱི་མཚན་ཉིད་དེ། །འཇིག་པ་རྣམས་ཀྱང་རྣམ་པར་བཟློག །བསམ་གཏན་པ་ཡི་བསམ་གཏན་མཆོག། རྣམ་པར་བྱང་བའི་རྒྱུ་ཡིན་ནོ། །ཀུན་ནས་ཉོན་མོངས་ཟད་པར་བྱེད། །ལམ་ཡང་རྣམ་པར་སྦྱོང་བའོ། །དམ་པའི་དོན་གྱི་སྤྱོད་ཡུལ་ཏེ། །འགྱུར་
བ་རབ་ཏུ་སྟོན་པའོ། །འཕགས་པ་རྒྱན་སྟུག་པོ་ལས་ལེའུ་བདུན་ནོ།། །།