བརྒྱད་པ། རང་གི་རྣམ་པར་རིག་པའི་ཡུལ་ཞེས་བྱ་བའི་ལེའུ།
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོས་ཕྱོགས་བཅུར་བལྟས་ཏེ། གཙུག་གི་རིན་པོ་ཆེའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་དང་། དབང་བྱེད་ཀྱི་གནས་དང་། ནོར་བུ་རིན་པོ་ཆེའི་སྙིང་པོའི་ཕོ་བྲང་ན་གནས་པའི་རྒྱལ་བའི་སྲས་རྣམས་ལའང་སྣང་བར་བྱས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་ལ་སྨྲས་པ། ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་ཁ་བ་ཡོད་པའི་ངོས་ལ་རི་དགས་ཐམས་ཅད་གསོད་པ་ཞེས་བྱ་བའི་རི་དགས་ཀྱི་རིགས་ཤིག་ཡོད་དེ། དེ་ནི་གཅོམ་སྒྱུ་བརྒྱ་སྟོང་གིས་རི་དགས་མང་པོ་ཉེ་བར་བྲིད་ཅིང་ཐབས་ལ་བབ་པའི་རི་དགས་རྣམས་བསད་ཅིང་ཟའོ། །རི་དགས་དྲུས་མ་ཕྲུ་གུ་དང་བཅས་པ་མཐོང་ནའང་ཕྲུ་གུའི་སྐད་དུ་འབོད་དོ། །རི་དགས་རྭ་ཅན་མཐོང་ནའང་རྭ་དེ་དང་འདྲ་བར་བསྒྱུར་ཏེ་གན་དུ་འགྲོའོ། །དེ་ནས་དེ་དག་དེ་ལ་བག་རྟོན་པ་དང་། དེས་དེ་དག་བག་རྟོན་པར་རིག་ནས་བསད་ཅིང་བསད་ཅིང་ཟའོ། །རྭ་མཐོང་ནའང་རྭའི་གཟུགས་སུ་བསྟན་ཏེ། དེ་དག་བག་ཕབ་ནས་ཇི་ལྟར་འདོད་པར་བསད་ཅིང་བསད་ཅིང་ཟ་སྟེ། ཇི་ལྟར་རི་དགས་ཞེ་གཏུམ་པའི་ངང་ཚུལ་ཅན་དེ་རྣམ་པ་སྣ་ཚོགས་ཀྱིས་རི་དགས་གསོད་པ་དེ་བཞིན་དུ་ཀུན་གཞི་རྣམ་པར་ཤེས་པའང་ཕས་ཀྱི་རྒོལ་བ་མུར་འདུག་བདག་ཏུ་སྨྲ་བ་ལ་མངོན་པར་ཞེན་པ། བདག་གི་ཆོས་ཉིད་ཀྱི་རྣམ་པར་གནས་པ། འཛིན་པ་དེ་དང་དེ་དག་གིས་བཅིངས་པ་དེ་དང་དེ་དག་ལ་དེ་ལྟ་དེ་ལྟ་བུའི་རང་བཞིན་གྱི་བདག་ཉིད་ཀྱིས་བདག་ཏུ་སྨྲ་བ་ཡོངས་སུ་རྟོག་ཅིང་རྡུལ་ཕྲ་མོ་ཡན་ཆད་དུ་རབ་ཏུ་ཤེས་པར་བྱེད་པ་དེ་དག་ལ་དེའི་བདག་ཏུ་འཛིན་པ་ཉིད་དུ་གནས་པ་ནི་གཞན་དུ་རྣམ་པར་ཤེས་པ་ཙམ་དུ་མི་གནས་པའི་བར་དུ་སྟེ། བདག་ཡོངས་སུ་རྟོགས་པར་བྱེད་པ་རྣམས་ཀྱིས་ནི་ཡིད་དང་དབང་པོ་དང་དོན་དུ་ལྡན་པ་ལས་ཤེས་པ་སྐྱེ་བ་མཐོང་གི། བདག་དང་ཡིད་དང་དབང་པོ་དང་། དོན་འདུས་པའི་རྒྱུ་ལས་ནི་མ་ཡིན་ནོ། །དཔེར་ན་མེ་ཏོག་དང་གོས་སུ་ཕྲད་ན་བསུང་གི་ཁྱད་པར་དུ་འགྱུར་གྱི། མ་ཕྲད་པར་ནི་བསུང་དམིགས་པར་མི་འགྱུར་རོ། །དེ་བཞིན་དུ་
སེམས་དང་། སེམས་ལས་བྱུང་བ་དང་། ཡིད་དང་རྣམ་པར་ཤེས་པ་རྣམས་མ་གཏོགས་པར་དོན་དེ་མ་ཡིན་པར་གྱུར་པ་སྣོད་དང་བདར་ལྟ་བུའམ། མེ་མར་དང་རྫ་ལྟ་བུའམ། སྨིག་ལོང་དང་ཨི་ཤ་ཀ་ལྟ་བུ་གཞན་ནི་གང་ཡང་མེད་དེ། རྒྱུ་དང་རྐྱེན་ལས་སེམས་དང་སེམས་ལས་བྱུང་བའི་ཚོགས་རབ་ཏུ་འབྱུང་ཞིང་བདག་མེད་ལ་ཕྲ་བ་དང་། བསྐྱེད་དུ་མི་རུང་བ་དང་། ཆ་མེད་པ་དང་། དག་ཅིང་ཐོག་མ་ནས་འོད་སྣང་བ་དང་། ཡུལ་རྣམ་པར་རིག་པའི་རྣལ་འབྱོར་ཅན་རྣམས་ཀྱི་འཕགས་པ་སོ་སོ་རང་གིས་རིག་པའི་སྤྱོད་ཡུལ་མ་གཏོགས་པར་རྟོགས་པར་བྱེད་པ་རྣམས་ཀྱིས་མི་དམིགས་སོ། །འདི་ཉིད་ནི་རི་དགས་ཀྱི་གཅམ་ཞེ་གཏུམ་པོ་ལྟ་བུར་འཇིག་རྟེན་རྣམས་ལ་ཡོད་པ་དང་། མེད་པ་དང་། གཅིག་པ་དང་། མང་པོ་དང་། ཐམས་ཅད་དང་། ཐམས་ཅད་མ་ཡིན་པའི་ལྟ་བ་སྐྱེད་པར་བྱེད་པ་སྟེ། ལུས་ཅན་རྣམ་པར་རིག་པ་ཙམ་དུ་ཁོང་དུ་མ་ཆུད་པའི་རྣམས་བདག་དང་བདག་གིར་སྨྲ་བ་ལ་མངོན་པར་ཞེན་པར་ཡང་ལྟུང་བར་བྱེད་དོ། །མི་ཤེས་པའི་ཕྱིར་ཆོས་ཁོང་དུ་ཆུད་པར་འདོད་པའི་བློས་འཁོར་བའི་རྒྱུད་ཀྱི་འཁོར་ལོ་ལ་ཞོན་ཞིང་འདི་དང་ཕ་བི་ནས་རབ་ཏུ་རྒྱུག་སྟེ། དགེ་བའི་བཤེས་གཉེན་སངས་རྒྱས་དང་བྱང་ཆུབ་སེམས་དཔའ་དང་བྲལ་བ། རང་གི་ཕྱོགས་ལས་རིང་བ་བས་ཀྱང་ཆེས་རིང་བར་ཉམས་པའི་བློ་ཅན། འཕགས་པའི་ལམ་གྱི་ཡན་ལག་བརྒྱད་ཐོབ་པར་མི་ནུས་པ། ཐེག་པ་གསུམ་ལས་འགའ་ཙམ་ལའང་མི་འཇུག་པའི་རྣམ་པ་འཛིན་པ་ལས་རྣམ་པར་ཕྱིར་ལྡོག་པ་མ་སྐྱེས་ཀྱི་བར་དུ་འཕགས་པའི་བདེན་པ་མི་མཐོང་བས། སྟུག་པོའི་དཀྱིལ་འཁོར་གྱི་སྐལ་བ་ཅན་རྣམས་ཀྱང་སྟུག་པོའམ་སྟུག་པོའི་སྒྲ་ཡང་མི་ཐོས་སོ། །ཡང་དག་པ་ཇི་ལྟ་བ་བཞིན་དུ་འགོད་པ་སྟོན་པ་འདི་ནི་རྣལ་འབྱོར་ཅན་རྣམས་ཀྱི་ལྟ་བ་ཡོངས་སུ་སྦྱང་བ་སྟེ། འདི་ལ་ཁྱོད་དང་བྱང་ཆུབ་སེམས་དཔའ་གཞན་གྱིས་ཀྱང་བརྩོན་པར་གྱིས་ཤིག །སངས་རྒྱས་ཀྱི་ཞིང་སྟུག་པོར་འཇུག་པའི་གཏམ་གྱི་ཚུལ་ཡང་རྣལ་འབྱོར་ཅན་རྣམས་ལ་སྟོན་ཅིག །རང་གི་རྣམ་པར་རིག་པའི་ཡུལ་ཞེས་བྱ་བ་སྟེ་ལེའུ་བརྒྱད་དོ།། །།