འཕགས་པ་སྙིང་རྗེ་པད་མ་ཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ།
རྒྱ་གར་སྐད་དུ། ཨཱརྱ་མ་ཧཱ་ཀ་རུ་ཎཱ་པུཎ་ཌ་རཱི་ཀ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་སྙིང་རྗེ་ཆེན་པོའི་པད་མ་དཀར་པོ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཀུ་ཤའི་གྲོང་ཁྱེར་ན་གྱད་རྣམས་ཉེ་བར་གནས་པ་ཤིང་སཱ་ལའི་ཚལ་ན་བཞུགས་སོ། །དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་དེ་བཞིན་གཤེགས་པ་དོ་མོད་ཀྱི་ནམ་གྱི་ཐུན་ཐ་མ་ལ་ཡོངས་སུ་མྱ་ངན་ལས་འདའ་བས། ཁྱོད་ཀྱིས་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་བའི་གཟིམས་མལ་ཆོས་ཤིག །ཀུན་དགའ་བོ་འདུས་བྱས་སུ་བརྟགས་པ་ཐམས་ཅད་ལེགས་པར་བཅོམ་པའི་ཤིན་ཏུ་ཡོངས་སུ་མྱ་ངན་ལས་འདའ་བས་ང་ཡོངས་སུ་མྱ་ངན་ལས་འདའོ། །ཀུན་དགའ་བོ་ངས་སངས་རྒྱས་ཀྱི་བྱ་བ་ནི་བྱས། ངས་གནས་མེད་པའི་ཆོས་ཞི་བ་རབ་ཏུ་ཞི་བ་མཆོག་གྱ་ནོམ་པ་ཟབ་པ། མཐོང་བར་དཀའ་བ། ཁོང་དུ་ཆུད་པར་དཀའ་བ། བརྟག་མི་ནུས་པ་མ་བརྟགས་པ། རྟོག་གེའི་སྤྱོད་ཡུལ་མ་ཡིན་པ། མཁས་པ་དང་མཛངས་པས་རིག་པ། ཕུལ་དུ་ཕྱིན་པར་འཕགས་པའི་བདུད་རྩི་ནི་བསྟན། ཀུན་དགའ་བོ་ངས་ཆོས་ཀྱི་འཁོར་ལོ་བླ་ན་མེད་པ་དགེ་སྦྱོང་ངམ་བྲམ་ཟེའམ། བདུད་དམ། ལྷའམ། ཚངས་པའམ། གཞན་གང་གིས་ཀྱང་ཆོས་དང་འཐུན་པར་འཇིག་རྟེན་དུ་མ་བསྐོར་བ་ལན་གསུམ་དུ་བཟླས་ཏེ་རྣམ་པ་བཅུ་གཉིས་སུ་བསྐོར་བ་ནི་བསྐོར། ངས་ཆོས་ཀྱི་རྔ་བོ་ཆེ་ནི་བརྡུངས། ངས་ཆོས་ཀྱི་དུང་ཆེན་པོ་ནི་བུས། ངས་ཆོས་ཀྱི་རྒྱལ་མཚན་ཆེན་པོ་ནི་བསྒྲེངས། ངས་ཆོས་ཀྱི་མར་མེ་ཆེན་པོ་ནི་བུས། ངས་མུན་པ་ཆེན་པོ་ནི་བསལ། ངས་སྟོང་གསུམ་ནི་སྣང་བར་བྱས། ངས་གྲུ་ཆེན་པོ་ནི་བཅས། ངས་སྟེགས་ཆེན་པོ་ནི་བཙུགས། ངས་ཟམ་པ་ཆེན་པོ་ནི་བཏགས། ངས་ཕ་རོལ་ཏུ་འདོང་བ་མང་པོ་ནི་བཏོན། ངས་ཐར་པའི་ལམ་ནི་ཡང་
དག་པར་བསྟན། ངས་ཆོས་ཀྱི་ཆར་ཆེན་པོ་ནི་ཕབ། ངས་ལྷ་དང་མི་རྣམས་ནི་ཚིམ་པར་བྱས། ངས་གདུལ་བ་རྣམས་ནི་བཏུལ། ངས་ཕས་ཀྱི་རྒོལ་བ་ཐམས་ཅད་ནི་སྐྲག་པར་བྱས། ངས་མུ་སྟེགས་ཀྱི་གནས་ཐམས་ཅད་ནི་ཚར་བཅད། ངས་བདུད་ཀྱི་སྟོབས་ནི་བཅོམ། ངས་བདུད་ཀྱི་གནས་ནི་གཡོ་བར་བྱས། ངས་སེང་གེའི་སྒྲ་ནི་བསྒྲགས། ངས་སངས་རྒྱས་ཀྱི་བྱ་བ་ནི་བྱས། ངས་སྐྱེས་བུ་དམ་པའི་ལས་ནི་མཐར་ཕྱུང་། ངས་སྔོན་གྱི་ཡི་དམ་ནི་ཡོངས་སུ་རྫོགས་པར་བྱས། ངས་ཆོས་ཀྱི་ཚུལ་ནི་བྱིན་གྱིས་བརླབས། ངས་ཉན་ཐོས་ཆེན་པོ་རྣམས་ལས་བྱེད་དུ་ནི་བཙུད། མ་འོངས་པའི་སངས་རྒྱས་ཀྱི་ཚུལ་རྒྱུན་མི་འཆད་པར་བྱ་བའི་ཕྱིར་ངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལུང་ནི་བསྟན་ཟིན་ཏེ། ཀུན་དགའ་བོ་མྱ་ངན་ལས་འདའ་བ་མ་གཏོགས་པར་ཕྱིས་བྱ་བ་ང་ལ་མེད་དོ། །དེ་ནས་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་གསུང་རྣམ་པ་དེ་ལྟ་བུ་དེ་ཐོས་ནས་སྡུག་བསྔལ་ཞིང་ཡིད་མི་བདེ་སྟེ་མི་དགའ་ཞིང་མྱ་ངན་ཆེན་པོའི་ཟུག་རྔུས་ཟུག་པར་གྱུར་ནས་རབ་ཏུ་ངུས་ཏེ་མཆི་མ་ཟག་བཞིན་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་མྱུར་བར་མྱ་ངན་ལས་འདའ་ཞིང་བདེ་བར་གཤེགས་པ་རབ་ཏུ་མྱུར་བར་མྱ་ངན་ལས་འདའ་སྟེ། འཇིག་རྟེན་གྱི་མིག་རབ་ཏུ་མྱུར་བར་མི་སྣང་བར་འགྱུར། རབ་ཏུ་མྱུར་བར་འཇིག་རྟེན་མགོན་མ་མཆིས་པ་དང་སྐྱབས་མ་མཆིས་པ་དང་། ཡོངས་སུ་འདྲེན་པ་མ་མཆིས་པར་འགྱུར་རོ། །དེ་ནས་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོག་གིས་མྱ་ངན་མ་བྱེད་ཅིག །སྨྲེ་སྔགས་མ་འདོན་ཅིག །གང་གནས་པ་དང་བྱུང་བ་དང་འདུས་བྱས་པ་དང་བསགས་པ་ནི་རབ་ཏུ་འཇིག་པའི་ཆོས་ཅན་ཡིན་པས་མི་འཇིག་པར་ག་ལ་འགྱུར་ཏེ་དེ་ནི་གནས་མེད་དོ། །ཀུན་དགའ་བོ་ངས་ཐོག་མ་ཉིད་དུ་ཁྱེད་ལ་དགའ་བ་དང་སྡུག་པ་དང་ཡིད་དུ་འོང་བ་རྣམས་དང་ཐ་དད་དུ་འགྱུར་ཞིང་འགྱེས་པར་འགྱུར་བྲལ་བར་འགྱུར་བྱེ་བར་འགྱུར་རོ་ཞེས་མ་བསྟན་ཏམ། ཀུན་དགའ་བོ་ཁྱོད་ཀྱིས་ང་ལ་བྱམས་པའི་ལུས་ཀྱི་ལས་
ཕན་པ་དང་བདེ་བ་དང་གཉིས་སུ་མེད་པ་དང་ཚད་མེད་པ་དང་། མི་འཐུན་པ་མེད་པས་བསྙེན་བཀུར་བྱས་སོ། །ཀུན་དགའ་བོ་གང་ལྷ་དང་མི་དང་ལྷ་མ་ཡིན་གྱི་འཁོར་དུ་བཅས་པ་དང་། ཉན་ཐོས་དང་རང་སངས་རྒྱས་སུ་བཅས་པ་ལ་བསྐལ་པའམ་བསྐལ་པ་ལས་ལྷག་པར་བསྙེན་བཀུར་བྱས་པ་བས་གང་དེ་བཞིན་གཤེགས་པ་ལ་ཡུད་ཙམ་ཞིག་བསྙེན་བཀུར་བྱས་པ་དེ་དེ་བས་འབྲས་བུ་ཤིན་ཏུ་ཆེས་ཀུན་དགའ་བོ་ཁྱོད་མྱ་ངན་མ་བྱེད་ཅིག །སྨྲེ་སྔགས་མ་འདོན་ཅིག །ཀུན་དགའ་བོ་ཁྱོད་ཀྱིས་དེ་བཞིན་གཤེགས་པ་ལ་བསྙེན་བཀུར་བྱས་པ་ནི་དོན་ཆེ་བ་དང་འབྲས་བུ་ཆེ་བ་དང་ཕན་ཡོན་ཆེ་བ་དང་རྒྱ་ཆེ་བ་དང་བདུད་རྩི་དང་འདྲ་བ་དང་། བདུད་རྩི་ལ་འབབ་པ་དང་། བདུད་རྩིའི་མཐར་འགྱུར་བ་ནས་མྱ་ངན་ལས་འདའ་བའི་བར་དུ་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོས་མཆི་མ་ཕྱིས་ནས་སྨྲེ་སྔགས་འདོན་ཅིང་ཤིང་སཱ་ལ་ཟུང་གི་བར་དུ་དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་བའི་གཟིམས་མལ་བཅས་སོ། །དེ་ནས་བཅོམ་ལྡན་འདས་ཤིང་སཱ་ལ་ཟུང་ག་ལ་བ་དེར་གཤེགས་ནས་ཤིང་སཱ་ལ་ཟུང་གི་བར་དུ་སེང་གེ་ལྟར་གློ་གཡས་པས་མནལ་ལོ། །གང་གི་ཚེ་དེ་བཞིན་གཤེགས་པ་ཤིང་སཱ་ལ་ཟུང་གི་བར་དུ་སེང་གེ་ལྟར་གློ་གཡས་པས་མནལ་བར་གྱུར་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཤིང་དང་རྩྭ་དང་ཤིང་གེལ་པ་དང་སྨན་དང་ནགས་ཚལ་ཐ་ན་སོར་བཞི་ཙམ་པོ་ཡན་ཅད་ཇི་སྙེད་ཡོད་པ་དེ་དག་ཐམས་ཅད་གང་དུ་དེ་བཞིན་གཤེགས་པ་མྱ་ངན་ལས་འདའ་བ་དེ་ལོགས་སུ་གཞོལ་འདུད། རབ་ཏུ་འདུད་ཅིང་མངོན་པར་འདུད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཀླུང་ངམ་འབབ་ཆུའམ་ཆུ་མིག་གམ་མཚོའམ་ལྟེང་ཀའམ་ཁྲོན་པའམ་རྫིང་ངམ། པད་མ་དཀར་པོ་འབབ་པ་ཇི་སྙེད་ཡོད་པ་དེ་དག་ཐམས་ཅད་སངས་རྒྱས་ཀྱི་མཐུས་བྱིན་གྱིས་བརླབས་པས་མི་འབབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བྱ་མང་པོ་དང་། རི་དགས་མང་པོ་སྣ་ཚོགས་ཇི་སྙེད་ཡོད་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་སྒྲ་མི་འབྱིན་པར་འཁོད་
ཅིང་མི་ཟ་མི་རྒྱུ་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉི་མ་དང་ཟླ་བའི་འོད་དམ། སྐར་མའི་གཟུགས་སམ། ནོར་བུའམ་མེའམ་སྲིན་བུ་མེ་ཁྱེར་གྱི་འོད་ཇི་སྙེད་ཡོད་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་མི་མངོན་མི་སྣང་སྟེ། ལྷམ་མེར་མ་ཡིན། ལྷན་ནེར་མ་ཡིན། ལྷང་ངེར་མ་ཡིན་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་དམྱལ་བ་ཆེན་པོའི་མེ་ཇི་སྙེད་ཡོད་པ་དེ་དག་ཐམས་ཅད་ཀྱང་སངས་རྒྱས་ཀྱི་མཐུས་ཞི་བར་གྱུར། མི་འབར་བར་གྱུར། མི་ཚ་བར་གྱུར། མི་ཚིག་པར་གྱུར། ཡོངས་སུ་མི་གདུང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གང་སེམས་ཅན་དམྱལ་བ་ཆེན་པོའི་མེ་དེ་དག་ཐམས་ཅད་ཀྱང་ཉེ་བར་ཞི་ཞིང་བསིལ་བར་གྱུར་ཏོ། །དེ་ནས་སེམས་ཅན་དམྱལ་བའི་སེམས་ཅན་དེ་དག་ཐམས་ཅད་སྐད་ཅིག་དེ་དང་ཡུད་ཙམ་དེའི་ཚེ་སངས་རྒྱས་ཀྱི་མཐུས་བདེ་བ་ཐོབ་པར་གྱུར་ཏོ། །དུད་འགྲོའི་སྐྱེ་གནས་པའི་སེམས་ཅན་ཐམས་ཅད་ཀྱང་བྱམས་པའི་སེམས་དང་ཕན་པའི་སེམས་དང་ལྡན་པར་གྱུར་ཏེ། གཅིག་ལ་གཅིག་གནོད་སེམས་མེད། རྣམ་པར་འཚེ་བ་མེད། རྣམ་པར་ཐོ་བཙམ་པ་མེད་ཅིང་གནོད་པ་བྱེད་པ་མེད་པར་གྱུར་ཏོ། །གཤིན་རྗེའི་འཇིག་རྟེན་པའི་སེམས་ཅན་ཐམས་ཅད་ཀྱང་བཀྲེས་པ་དང་། སྐོམ་པ་མེད་པར་གྱུར་ཏོ། །སེམས་ཅན་ཐམས་ཅད་ཀྱང་སྐད་ཅིག་དེ་དང་ཡུད་ཙམ་དེའི་ཚེ་སངས་རྒྱས་ཀྱི་མཐུས་བདེ་བ་དང་ལུས་དང་སེམས་ཚིམ་པ་དང་། སྡུག་བསྔལ་རྒྱུན་ཆད་པ་དང་། བདེ་བ་དང་ཡིད་བདེ་བ་མཆོག་དང་ལྡན་པར་གྱུར་ཏོ། །དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རིའི་རྒྱལ་པོ་རི་རབ་དང་། འཁོར་ཡུག་དང་འཁོར་ཡུག་ཆེན་པོ་དང་། བཏང་བཟུང་དང་བཏང་བཟུང་ཆེན་པོ་དང་། སྤོས་ཀྱི་ངད་ལྡང་དང་། གངས་རི་ཇི་སྙེད་ཡོད་པ་དང་། གཞན་ཡང་རི་ནག་པོ་རྣམས་དང་། ཐམས་ཅད་དང་ལྡན་པའི་ས་ཆེན་པོ་དང་། རྒྱ་མཚོ་ཆེན་པོ་ཁོར་ཡུག་གི་འོབས་ཀྱི་མཐས་གཏུགས་པ་རྣམ་པ་དྲུག་ཏུ་གཡོས་ཏེ།
འགུལ་རབ་ཏུ་འགུལ། འཁྲུགས་རབ་ཏུ་འཁྲུགས། ལྡེག་རབ་ཏུ་ལྡེག་པར་གྱུར་ཏོ། །ཐམས་ཅད་དང་ལྡན་པའི་རླུང་གི་དཀྱིལ་འཁོར་ཡང་དེའི་ཚེ་མི་ལྡང་བར་གྱུར་ཏོ། །དེའི་ཚེ་སྐད་ཅིག་དེ་དང་ཡུད་ཙམ་དེ་ན་སེམས་ཅན་ཐམས་ཅད་ཀྱང་ལས་བྱེད་པ་རྣམས་བཏང་བར་གྱུར་ཏེ་གཉིད་མེད། ཆོད་པ་མེད་སྒྲིབ་པ་མེད་རྩོམ་པ་མེད་ཅིང་མི་འཛེར་བར་གྱུར་ཏེ་སྒྲ་ཆུང་ཅ་ཅོ་ཆུང་ཞིང་ཡིད་མི་གཡེང་བར་གྱུར་ཏོ། །བཅོམ་ལྡན་འདས་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཇི་སྙེད་འཁོད་པ་དེ་དག་ཐམས་ཅད་ཀྱིས་རང་རང་གི་གནས་རྣམས་མོག་མོག་པོར་གྱུར་ཏེ་འོད་མེད་གཟི་བརྗིད་མེད་པར་གྱུར་པར་ཤེས་སོ། །དེ་བཞིན་གཤེགས་པ་སེང་གེ་ལྟར་གློ་གཡས་པས་མནལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་ཇི་སྙེད་འཁོད་པ་དེ་དག་ཐམས་ཅད་རང་རང་གི་སྟན་དང་སྐྱེད་མོས་ཚལ་དང་གཞལ་མེད་ཁང་རྣམས་ལ་མི་དགའ་བར་གྱུར་ཏོ། །སངས་རྒྱས་ཀྱི་མཐུས་དེ་དག་ཐམས་ཅད་འཁོར་དང་བཅས་པར་སྐྱོ་ཞིང་ཡིད་བྱུང་བར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཚངས་པ་དང་ཚངས་པ་ཆེན་པོ་གང་དག་ཟིལ་གྱིས་གནོན་ཅིང་ཟིལ་གྱིས་མི་ནོན་པ་བརྒྱ་ཕྲག་བཅུ་ལ་དབང་སྒྱུར་བ་འདི་སྙམ་དུ་སེམས་ཤིང་བདག་ཅག་གིས་སེམས་ཅན་འདི་དག་བྱས། བདག་ཅག་གིས་སེམས་ཅན་འདི་དག་སྤྲུལ། བདག་ཅག་གིས་འཇིག་རྟེན་བྱས། བདག་ཅག་གིས་འཇིག་རྟེན་སྤྲུལ་ཏོ་སྙམ་དུ་དེ་ལྟར་ཤེས་པའི་ཚངས་པ་དང་ཚངས་པ་ཆེན་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འཁོད་པ་དེ་དག་ཀྱང་རང་རང་གི་སྟན་ལ་མངོན་པར་མི་དགའ་བར་གྱུར་ཏོ། །རང་རང་གི་གནས་ཐམས་
ཅད་དང་ལྡན་པ་ཡང་སངས་རྒྱས་ཀྱི་མཐུས་མོག་མོག་པོར་གྱུར་པར་ཤེས་སོ། །དེ་བཞིན་དུ་ཚངས་པ་གཞན་ཐམས་ཅད་ཀྱང་སངས་རྒྱས་ཀྱི་མཐུས་རང་རང་གི་གནས་རྣམས་མོག་མོག་པོར་གྱུར་པར་ཤེས་ཏེ་རང་རང་གི་གནས་རྣམས་ལ་མི་དགའ་བར་གྱུར་ཏོ། །འཇིག་རྟེན་སྐྱོང་བ་དང་དབང་ཕྱུག་ཆེན་པོ་དང་གནས་གཙང་མ་པ་རྣམས་ཀྱང་རང་རང་གི་གནས་རྣམས་ལ་མི་དགའ་བར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་ཆེན་པོ་དེ་འདི་སྙམ་དུ་གང་གིས་བདག་རང་གི་གནས་ལ་མི་དགའ་བར་གྱུར་པ་དེ་སུའི་སྔ་ལྟས་ཡིན་སྙམ་དུ་སེམས་སོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དང་ལྡན་པ་ལ་བལྟས་སོ། །དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ལ་བལྟས་ནས་འདི་སྙམ་དུ་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བྱེད་པ་པོ་དབང་ཕྱུག་བདག་པོ་དབང་སྒྱུར་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དོ་མོད་མྱ་ངན་ལས་འདའ་བར་འགྱུར་ཏེ། གང་གིས་བདག་རང་གི་སྟན་ལ་འདུག་པར་མི་དགའ་བ་དང་། གང་གིས་ཆོ་འཕྲུལ་བསམ་གྱིས་མི་ཁྱབ་པ་རྨད་དུ་བྱུང་བ་འདི་ལྟ་བུ་དག་སྣང་བར་གྱུར་པ་འདི་ནི་དེ་ཡོངས་སུ་མྱ་ངན་ལས་འདའ་བའི་སྔ་ལྟས་ཡིན་འདི་ནི་དེའི་མཐུ་ཡིན་ནོ་སྙམ་དུ་སེམས་ཏེ། དེ་མི་དགའ་ཞིང་ཡིད་དུང་ཞེས་བྱེད་དེ་སྤུ་ཟིང་ཞེས་བྱེད་པར་གྱུར་ནས་ཚངས་པའི་འཁོར་མང་པོས་ཡོངས་སུ་བསྐོར་ཅིང་མདུན་དུ་བདར་ཏེ་མྱུར་བ་མྱུར་བར་རིངས་པར་བཅོམ་ལྡན་འདས་ག་ལ་བ་དེར་སོང་ངོ་། །དེའི་ཚེ་སྟོང་གསུམ་གྱི་སྟོང་ཆེན་པོ་ན་ཚངས་པ་ལྷག་མ་ལུས་པར་གྱུར་པ་དང་། མ་འདུས་པ་དང་། ཚངས་པ་དེ་ལས་གཞན་པ་ཇི་སྙེད་ཡོད་པ་དེ་དག་འཕགས་པའི་ཆོས་ལ་མངོན་པར་དུལ་བར་གྱུར། འཕགས་པའི་ཆོས་ལ་གནས་པར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེ་བཅོམ་ལྡན་འདས་ག་ལ་བ་དེར་སོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་གནས་པར་བགྱི་བ་དང་ཇི་ལྟར་
བསྒྲུབ་པར་བགྱི་བ་བདག་ལ་བཀའ་སྩལ་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚངས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །ཚངས་པ་ཁྱོད་ང་ནི་ཚངས་པ། ཚངས་པ་ཆེན་པོ་ཟིལ་གྱིས་གནོན་ཅིང་ཟིལ་གྱིས་མི་ནོན་པ་ཀུན་ཤེས་པ་དང་ལྡན་པ་བརྒྱ་ཕྲག་བཅུ་ལ་དབང་བསྒྱུར་བ་ཡིན་ཏེ། བདག་གིས་སེམས་ཅན་རྣམས་བྱས། བདག་གིས་སེམས་ཅན་རྣམས་སྤྲུལ། བདག་གིས་འཇིག་རྟེན་བྱས། བདག་གིས་འཇིག་རྟེན་སྤྲུལ་ཏོ་ཞེས་དེ་སྙམ་དུ་སེམས་ཤིང་དེ་སྐད་ཟེར་ཞེ་ན་བདེན་ནམ། གསོལ་པ་བཅོམ་ལྡན་འདས་མད་དོ། །བདེ་བར་གཤེགས་པ་མད་དོ། །བཀའ་སྩལ་པ། ཚངས་པ་ཁྱོད་སུས་བྱས། སུས་སྤྲུལ། དེ་ནས་ཚངས་པ་ཆེན་པོ་ཅང་མི་སྨྲ་བར་གྱུར་ཏོ། །ཚངས་པ་ཆེན་པོ་དེ་ཅང་མི་སྨྲ་བར་གྱུར་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཚངས་པ་གང་གི་ཚེ་བསྐལ་པས་བསྲེགས་པ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འབར་རབ་ཏུ་འབར། ཀུན་ཏུ་འབར། ཀུན་ཏུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་འགྱུར་བའི་དུས་དེ་དང་ཚེ་དེ་འབྱུང་བ་དེ་ཚངས་པ་ཁྱོད་ཉིད་ཀྱིས་བྱས་སམ། ཁྱོད་ཀྱིས་སྤྲུལ་ཏམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་ས་ཆེན་པོ་འདི་ནི་ཆུའི་ཕུང་པོ་ལ་བརྟེན། ཆུ་ཡང་རླུང་ལ་བརྟེན། རླུང་ཡང་ནམ་མཁའ་ལ་བརྟེན་ཏེ་འཕང་དུ་དཔག་ཚད་དྲུག་ཁྲི་བརྒྱད་སྟོང་ཡོད་ཅིང་མི་འཇིག་པ་དེ་ལ་ཇི་སྙམ་དུ་སེམས། འདི་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་ཏམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། ཚངས་པ་གང་ཉི་མ་དང་ཟླ་བའི་གཞལ་མེད་ཁང་ན་ལྷའི་བུ་དག་ལམ་མེ་མ་ཡིན། ལྷན་ནེ་མ་ཡིན་ཞིང་གཞལ་མེད་ཁང་རྣམས་སྟོང་པར་འཁོད་པའི་དུས་དེ་དང་ཚེ་དེ་འབྱུང་བ་དེ་ལ་ཇི་སྙམ་དུ་སེམས། ཚངས་པ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ་བཅོམ་ལྡན་འདས་
མ་ལགས་སོ། །བཀའ་སྩལ་པ། གང་སོས་ཀ་དང་། དབྱར་དང་། སྟོན་དང་། དགུན་དང་། དགུན་སྨད་དང་། དཔྱིད་ཀྱི་དུས་ཚིགས་དེ་དག་ལ་ཁྱོད་ཇི་སྙམ་དུ་སེམས། དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ་བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་ཆུའམ། མེ་ལོང་གི་དཀྱིལ་འཁོར་རམ། འབྲུ་མར་དང་མར་གྱི་སྣོད་དམ། ནོར་བུ་དང་ཤེལ་རྣམས་ཀྱི་ནང་ངམ། དེ་ལས་གཞན་པའི་སྣོད་དག་པ་རྣམས་ལ་གཟུགས་བརྙན་རྣམ་པ་སྣ་ཚོགས་སྣང་བ་འདི་ལྟ་སྟེ་ཤིང་ལྗོན་པ་དང་ནགས་ཚལ་དང་ཀུན་དགའ་ར་བ་དང་སྐྱེད་མོས་ཚལ་དང་གཞལ་མེད་ཁང་སྣང་བའམ། གྲོང་དང་གྲོང་ཁྱེར་དང་གྲོང་རྡལ་སྣང་བའམ། གླང་པོ་ཆེ་དང་། རྟ་དང་། རྔ་མོ་དང་། བ་ལང་དང་། བོང་བུ་དང་། ལུག་དང་། རི་དགས་དང་། བྱ་རྣམས་སྣང་བའམ། ཟླ་བ་དང་ཉི་མ་དང་སྐར་མའི་ཚོགས་རྣམས་སྣང་བའམ། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་དང་དེ་བཞིན་གཤེགས་པའི་སྐུ་སྣང་བའམ། ས་དང་རི་དང་ཀླུང་སྣང་བའམ། བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དང་དེ་ལས་གཞན་པའི་སེམས་ཅན་མི་དང་མི་མ་ཡིན་པ་སྣང་བ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ་གསོལ་པ་བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གཡང་ས་དང་རི་དང་རིའི་འབབ་ཆུ་དང་རྫིང་རྣམས་ན་དུང་དང་རྔ་བོ་ཆེ་དང་རྫ་རྔ་དང་གླུ་གར་དང་རི་དགས་དང་བྱ་དང་མི་དང་། མི་མ་ཡིན་པ་རྣམས་ཀྱི་སྒྲའི་བྲག་ཅ་དང་། གང་དེ་དང་འཐུན་པའི་སྒྲ་བརྙན་འབྱུང་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་རྨི་ལམ་ན་གཟུགས་སྣ་ཚོགས་མཐོང་བ་དང་། སྒྲ་སྣ་ཚོགས་ཐོས་པ་དང་། དྲི་སྣ་ཚོགས་སྣོམ་པ་དང་། རོ་སྣ་ཚོགས་མྱོང་བ་དང་། རེག་བྱ་སྣ་ཚོགས་རེག་པ་དང་།
ཆོས་སྣ་ཚོགས་ཤེས་པ་དང་། དགའ་བ་དང་རྩེ་བ་སྣ་ཚོགས་མྱོང་བ་དང་། མཆི་མ་བྱུང་བ་དང་ངུ་བ་དང་འཇིགས་པ་དང་སྐྲག་པ་དང་། སྡུག་བསྔལ་བ་མཐོང་བའམ། མྱོང་བའམ་ཤེས་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་འཇིགས་པ་དང་། མི་དགའ་བ་དང་མྱ་ངན་དང་། སྨྲེ་སྔགས་འདོན་པ་དང་། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་རིགས་བཞིའི་འཇིག་རྟེན་གྱི་མཛེས་པའམ་མི་སྡུག་པའམ། ལོངས་སྤྱོད་ཆེ་བའམ་ལོངས་སྤྱོད་ཆུང་བའམ། དབུལ་བའམ། བསོད་ནམས་ཆེ་བའམ། ཚུལ་ཁྲིམས་བཟང་བའམ། ཚུལ་ཁྲིམས་འཆལ་པའམ། ཤེས་རབ་བཟང་བའམ། ཤེས་རབ་འཆལ་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱིས་འཇིགས་པའམ། སྐྲག་པའམ། གནོད་པའམ། རྣམ་པར་འཚེ་བའམ། རྣམ་པར་ཐོ་འཚམས་པ་འདི་ལྟ་སྟེ། མཚོན་ཆ་དང་མེ་དང་ཆུ་དང་རླུང་དམར་དང་དུག་དང་གཅན་གཟན་ཁྲོ་བོ་དང་དགྲ་དང་མི་དང་། མི་མ་ཡིན་པའི་འཇིགས་པའམ། གཞན་གནོད་པ་བྱེད་པའི་འཇིགས་པ་སྣ་ཚོགས་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་སེམས་ཅན་རྣམས་ཀྱི་ནད་རྣམ་པ་སྣ་ཚོགས་དང་། རླུང་དང་། མཁྲིས་པ་དང་། བད་ཀན་དང་། འདུས་པ་དང་། དུས་དང་། ཁམས་མི་འཐུན་པ་ལས་གྱུར་པའམ། གཞན་གྱིས་གནོད་པར་བྱས་པ་དང་། སྔོན་གྱི་ལས་
ཀྱི་སྒྲིབ་པ་ལས་གྱུར་པ་འདི་ལྟ་སྟེ། མིག་དང་། རྣ་བ་དང་། སྣ་དང་། ལྕེ་དང་། ལུས་ན་བ་དང་། སེམས་ཅན་རྣམས་ཀྱི་ཡིད་ལ་གདུང་བའི་སྡུག་བསྔལ་སྣ་ཚོགས་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་མུ་གེ་དང་། ཆུ་དང་། འབྲོག་དང་། སྦྲུལ་དང་། ཆོམ་རྐུན་དང་། དགོན་པ་དང་། མཚོན་ཆ་དང་། ནད་དང་། བར་གྱི་བསྐལ་པ་དེ་དག་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་། ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་འབྲལ་བའི་སྡུག་བསྔལ་རྣམ་པ་སྣ་ཚོགས་ཕ་མ་དང་། སྤུན་དང་། སྲིང་མོ་དང་། གྲོགས་དང་། ཉེ་དུ་དང་། སྣག་གི་གཉེན་མཚམས་དང་། བུ་ཕོ་དང་། ཆུང་མ་དང་། བུ་མོ་དག་དང་བྲལ་བའི་སྡུག་བསྔལ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། གང་སེམས་ཅན་རྣམས་ཀྱི་སྡུག་བསྔལ་སྣ་ཚོགས་ཡང་བའི་ལས་ལ་སྦྱོར་བ། སྐྲ་དང་ཕབས་དང་རྒྱ་སྐྱེགས་དང་འཁོར་ལོ་འཚོང་པའམ། རྒྱ་མཚོ་ཆེན་པོར་འགྲོ་བ་དང་། འབྲོག་དགོན་པར་འཇུག་པའམ། ཕྱོགས་སྣ་ཚོགས་སུ་སྐྱས་འདེགས་པའམ། ཞིང་གི་ལས་རྒྱ་ཆེར་བྱེད་པའམ། དེ་ལས་གཞན་པའི་བྱ་བ་སྣ་ཚོགས་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་དགེ་བ་དང་མི་དགེ་བའི་ལས་རྣམ་པ་སྣ་ཚོགས་ཡང་དག་པར་ལེན་པ། སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དང་། ལྷ་དང་མིའི་རྒྱུ་ལས་བྱུང་བ་རྣམས་དང་། གང་སེམས་ཅན་རྣམས་ཀྱི་ལུས་དང་ངག་དང་ཡིད་ཀྱིས་ཉེས་པར་སྤྱད་པ་དང་། ལེགས་པར་སྤྱད་པ་རྣམས་སམ། གང་འཇིག་རྟེན་ན་མི་
དགེ་བ་བཅུའི་ལས་ཀྱི་ལམ་སེམས་ཅན་རྣམས་ལ་མི་ཕན་པ་དང་། སྡུག་བསྔལ་བ་དང་གནོད་པ་དང་། ངན་སོང་ངན་འགྲོ་ལོག་པར་ལྟུང་བར་འགྱུར་བ་འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་ཕྲ་མ་དང་ངག་རྩུབ་པོ་དང་ཚིག་ཀྱལ་པ་དང་བརྣབ་སེམས་དང་གནོད་སེམས་དང་། ལོག་པར་ལྟ་བ་དེ་རྣམས་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་གནོད་བྱེད་ཀྱི་སྡུག་བསྔལ་འདི་ལྟ་སྟེ། མགོ་གཅད་པ་དང་ལག་པ་དང་རྐང་པ་དང་རྣ་བ་དང་སྣ་གཅད་པའམ། ཡན་ལག་དང་ཉིང་ལག་ཐམས་ཅད་གཅད་པའམ། མེར་བསྲེགས་པ་དང་། འབྲུ་མར་གྱིས་གཏོར་བ་དང་། སྲོག་དང་དབྲལ་བ་དང་རལ་གྲི་དང་མདུང་ཐུང་དང་། མཚོན་རྩེ་གཉིས་པས་གདབ་པ་དང་། གསད་པ་དང་བཅིང་བ་དང་གོ་རར་གཞུག་པ་དང་འཐབ་པ་དང་རྩོད་པ་དང་འགྱེད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་འདོད་པའི་རྒྱུ་དང་འདོད་པའི་གཞིས་མ་ལ་ལོག་པར་སྤྱོད་པ་དང་། སྲིང་མོ་ལ་ལོག་པར་སྤྱོད་པ་དང་། ཚུལ་ཁྲིམས་དང་ལྡན་པ་ལ་ལོག་པར་སྤྱོད་པ་དང་། སྡིག་པའི་ལས་ཐམས་ཅད་ལ་ལྷག་པར་སྤྱོད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་གནོད་པར་བྱེད་པ་སྣ་ཚོགས་བྱད་དང་རོ་ལངས་དང་རིག་སྔགས་དང་སྔགས་དང་སྨན་དང་འབྱུང་པོ་དང་གདོན་འབེབས་པ་དང་། གང་དེ་ལས་གཞན་པ་དུག་སྦྱོར་བ་དང་། གང་སེམས་ཅན་རྣམས་ལ་གནོད་པར་འགྱུར་བ་དང་། སྲོག་དང་བྲལ་བར་འགྱུར་བ་དང་། སྲོག་འཆད་པར་
འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། གང་རིགས་བཞིའི་འཇིག་རྟེན་ཐམས་ཅད་དུ་སྤང་དུ་མི་རུང་བའི་འཇིག་རྟེན་གྱི་ཆོས་འདི་ལྟ་སྟེ། སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་། ཡིད་མི་བདེ་བ་དང་འཁྲུག་པ་དང་། མི་རྟག་པའི་ཆོས་ཉིད་དང་། ཟད་པའི་ཆོས་ཉིད་དང་། འགྱུར་བའི་ཆོས་ཉིད་དང་། མཛའ་བ་དང་དགའ་བ་ཐམས་ཅད་དང་ཐ་དད་དུ་འགྱུར་བ་དང་། མེད་པར་འགྱུར་བ་དང་བྲལ་བར་འགྱུར་བ་དང་བྱེ་བར་འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་སེམས་ཅན་རྣམས་ཀྱི་འདོད་ཆགས་དང་ཞེ་སྡང་དང་གཏི་མུག་དང་སྒྲིབ་པ་དང་ཆོད་པ་དང་བག་ལ་ཉལ་དང་ཀུན་ནས་དཀྲིས་པ་དང་ཀུན་ཏུ་སྦྱོར་བ་རྣམས་དང་དེ་ལས་གཞན་པ་ཉེ་བའི་ཉོན་མོངས་པ་རྣམ་པ་སྣ་ཚོགས་འཇུག་པ་གང་གིས་སེམས་ཅན་རྣམས་ཆགས་པར་འགྱུར་བ་དང་། སྡང་བར་འགྱུར་བ་དང་རྨོངས་པར་འགྱུར་བ་དང་། ལས་མངོན་པར་འདུ་བྱ་བ་རྣམ་པ་སྣ་ཚོགས་མངོན་པར་འདུ་བྱེད་པ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་འདི་སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་ངན་འགྲོ་རྣམ་པ་གསུམ་པོ་གང་ན་སེམས་ཅན་རྣམས་གནོད་བྱེད་རྣམ་པ་སྣ་ཚོགས་ཀྱིས་སྡུག་བསྔལ་སྣ་ཚོགས་མྱོང་བར་འགྱུར་བ་དེ་དག་ཀྱང་ཚངས་པ་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་འདི་འབྱུང་བོའི་ཚོགས་དང་། ས་བོན་གྱི་ཚོགས་དང་། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་ཆུ་ན་གནས་པ་དང་། ཐང་ལ་གནས་པའམ་མེ་ཏོག་
གི་ཤིང་དང་འབྲས་བུའི་ཤིང་དང་སྤོས་ཤིང་རྣམ་པ་སྣ་ཚོགས་སམ། མངར་བ་དང་། ཁ་བ་དང་། ལན་ཚྭ་དང་། སྐྱུར་བ་དང་། ཚ་བ་དང་། བསྐ་བའི་རོའི་ཁྱད་པར་རྣམ་པ་སྣ་ཚོགས་ཡིད་དུ་འོང་བ་དང་ཡིད་དུ་མི་འོང་བའི་མངོན་པར་གྲུབ་པ་གང་སེམས་ཅན་རྣམས་ལ་ཕན་པ་དང་གནོད་པར་འགྱུར་བ་དེ་ལ་ཇི་སྙམ་དུ་སེམས། ཚངས་པ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བཀའ་སྩལ་པ། ཚངས་པ་གང་འགྲོ་བ་ལྔ་པོ་དག་ན་ཡོངས་སུ་འཁོར་བར་སྐྱེ་བ་དང་འཆི་འཕོ་བ་དང་འཐོན་པ་དང་འབྱུང་བ་དང་འཇིག་པ་འདི་དག་དང་། ཚངས་པ་གང་སེམས་ཅན་མ་རིག་པའི་སྒྲིབ་པ་དང་། སྲེད་པའི་ཀུན་ཏུ་སྦྱོར་བ་དང་ལྡན་པ་ཀུན་ཏུ་རྒྱུག་ཅིང་འཁོར་བ་དེ་དག་གི་སྔོན་གྱི་མཐའ་མི་མངོན་པ་དང་། ཚངས་པ་མ་འོངས་པའི་འཁོར་བའི་ལམ་རྒྱུད་མ་ཆད་པ་གང་ན་ལྷ་དང་བཅས་པ་དང་། ཚངས་པ་དང་བཅས་པའི་འཇིག་རྟེན་འདི་དང་། དགེ་སྦྱོང་དང་བྲམ་ཟེ་དང་བཅས་པའི་སྐྱེ་དགུ་ཐགས་འཁྲུགས་པ་ལྟ་བུ། དྲུ་གུ་འཛིངས་པ་ལྟ་བུ་འོང་བ་དང་། འགྲོ་བར་གྱུར་པ་འཇིག་རྟེན་འདི་ནས་འཇིག་རྟེན་ཕ་རོལ་དང་། འཇིག་རྟེན་ཕ་རོལ་ནས་འཇིག་རྟེན་འདིར་ཀུན་ཏུ་རྒྱུག་ཅིང་འཁོར་བ། འཁོར་བ་ལས་འབྱུང་བ་མི་ཤེས་པ་དེ་དག་ལ་ཇི་སྙམ་དུ་སེམས། ཚངས་པ་དེ་དག་ཁྱོད་ཀྱིས་བྱས་ཤིང་ཁྱོད་ཀྱིས་སྤྲུལ་པ་དང་ཁྱོད་ཀྱིས་བྱིན་གྱིས་བརླབས་པ་ཡིན་ནམ། གསོལ་པ། བཅོམ་ལྡན་འདས་མ་ལགས་སོ། །བདེ་བར་གཤེགས་པ་མ་ལགས་སོ། །བཀའ་སྩལ་པ། འོ་ན་ཚངས་པ་ཁྱོད་ཅིའི་ཕྱིར་འདི་ལྟར་ངས་སེམས་ཅན་འདི་དག་བྱས། ངས་སྤྲུལ། ངས་བྱིན་གྱིས་བརླབས། ངས་འཇིག་རྟེན་བྱས། ངས་སྤྲུལ། ངས་བྱིན་གྱིས་བརླབས་སྙམ་དུ་སེམས། གསོལ་པ། བཅོམ་ལྡན་འདས་བདག་ནི་མ་འཚལ་བ། རྟག་ཏུ་ལྟ་བར་གྱུར་པ་མ་སྤངས་པས་ཕྱིན་ཅི་ལོག་ཏུ་གྱུར་པ་ལགས་ཏེ། བཅོམ་ལྡན་འདས་བདག་ནི་དེ་བཞིན་གཤེགས་པས་གསུངས་པའི་ཆོས་འདུལ་བ་ལ་རྟག་ཏུ་མ་ཐོས་པས་
སེམས་ཅན་རྣམས་བདག་གིས་བགྱིས། བདག་གིས་སྤྲུལ། འཇིག་རྟེན་བདག་གིས་བགྱིས། འཇིག་རྟེན་བདག་གིས་སྤྲུལ་ཞེས་བགྱི་བ་སྡིག་པ་ཅན་གྱི་ལྟ་བར་གྱུར་པ་འདི་ལྟ་བུར་གྱུར་ཏོ། །བཅོམ་ལྡན་འདས་དེ་བཞིན་གཤེགས་པ་ལ་དོན་འདི་ཉིད་བདག་ཞུའོ། །བཅོམ་ལྡན་འདས་འཇིག་རྟེན་འདི་སུས་བགྱིས། འཇིག་རྟེན་འདི་སུས་སྤྲུལ། སེམས་ཅན་རྣམས་སུས་བགྱིས། སུས་སྤྲུལ། བཅོམ་ལྡན་འདས་འདི་སུའི་མཐུ་ལགས། སུས་བྱིན་གྱིས་བརླབས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚངས་པ་དེ་ལ་འདི་སྐད་ཅེས་བཀའ་སྩལ་ཏོ། །ཚངས་པ་འཇིག་རྟེན་ནི་ལས་ཀྱིས་བྱས་ལས་ཀྱིས་སྤྲུལ་ཏོ། །སེམས་ཅན་རྣམས་ནི་ལས་ཀྱིས་བྱས། ལས་ཀྱི་རྒྱུ་ལས་བྱུང་། ལས་ཀྱིས་རབ་ཏུ་ཕྱེ་བའོ། །དེ་ཅིའི་ཕྱིར་ཞེ་ན། ཚངས་པ་མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་འཁྲུགས་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་ཞིང་ཚངས་པ་མ་རིག་པ་འགགས་པས་འདུ་བྱེད་འགག་པ་ནས་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འགག་པའི་བར་དུ་འགྱུར་ཏེ། ཚངས་པ་ལས་དང་ཆོས་ཀྱི་ཀུན་ཏུ་སྦྱོར་བ་རྣམས་ཡོད་ན་སེམས་ཅན་རྣམས་འབྱུང་བར་སྣང་བ་དང་། ལས་དང་ཆོས་ཀྱི་ཀུན་ཏུ་སྦྱོར་བ་དང་བྲལ་བས་འབྱུང་བ་མེད་པར་སྣང་བ་མ་གཏོགས་པར་འདི་ལ་བྱེད་པ་པོའམ། བྱེད་དུ་འཇུག་པའམ། ཉེ་བར་འཇོག་པ་པོ་གང་ཡང་མེད་དོ། །ཚངས་པ་དེ་ལྟར་འཇིག་རྟེན་འདི་ལས་ཟད་པ་དང་། ཉོན་མོངས་པ་ཟད་པ་དང་། སྡུག་བསྔལ་ཟད་པ་དང་། སྡུག་བསྔལ་ཉེ་བར་ཞི་བས་ཞི་བ་དང་། ངེས་པར་བྱུང་བ་དང་རྣམ་པར་
ཞི་བ་དང་། ཡོངས་སུ་མྱ་ངན་ལས་འདས་པ་ཞེས་བྱའོ། །ཚངས་པ་དེ་ལ་ལས་གང་ཡིན་པ་དེ་ཟད་པ་དང་། ཉོན་མོངས་པ་གང་ཡིན་པ་དེ་དང་བྲལ་བ་དང་། སྡུག་བསྔལ་གང་ཡིན་པ་དེ་རྣམ་པར་ཞི་བ་དང་། ནུབ་པ་མ་གཏོགས་པར་ཡོངས་སུ་མྱ་ངན་ལས་འདས་པ་ཞེས་བྱ་བ་ཅི་ཞིག་ཡོད་དེ་སངས་རྒྱས་རྣམས་ཀྱི་མཐུ་དང་། སངས་རྒྱས་རྣམས་ཀྱི་བྱིན་གྱིས་བརླབས་ཀྱིས་ཆོས་ཉིད་དེ་ལྟ་བུ་དག་འབྱུང་ངོ་། །དེ་ཅིའི་ཕྱིར་ཞེ་ན། ཚངས་པ་སངས་རྒྱས་བཅོམ་ལྡན་འདས་རྣམས་འབྱུང་བ་མེད་ན་ཆོས་དེ་ལྟ་བུ་རབ་ཏུ་སྟོན་པ་མི་འབྱུང་གི། ཚངས་པ་གང་གི་ཚེ་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་བྱུང་བ་དེའི་ཚེ་ཞི་བར་བྱ་བའི་ཕྱིར་ཁོང་དུ་ཆུད་པར་དཀའ་བ་ཟབ་པ་ཟབ་པར་སྣང་བ་ཆོས་རྣམ་པ་དེ་ལྟ་བུ་དག་ཡང་དག་པར་སྟོན་པར་འགྱུར་ཏེ། དེ་ཐོས་པས་སེམས་ཅན་སྐྱེ་བའི་ཆོས་ཅན་རྣམས་ནི་སྐྱེ་བ་ལས་ཡོངས་སུ་གྲོལ་བར་འགྱུར། སེམས་ཅན་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་། འཁྲུག་པའི་ཆོས་ཅན་རྣམས་ནི་འཁྲུག་པའི་བར་དག་ལས་ཡོངས་སུ་གྲོལ་བར་འགྱུར་རོ། །ཚངས་པ་དེ་ལྟ་བས་ན་འདི་ལྟ་སྟེ། འདུ་བྱེད་ཐམས་ཅད་ནི་མིག་ཡོར་ལྟ་བུ་མི་རྟག་པ་གཡོ་བ་མི་བརྟན་པ། ཐེར་ཟུག་མ་ཡིན་པ་ཟད་པ་དང་འགྱུར་བའི་ཆོས་ཅན་ནོ་ཞེས་ཚངས་པ་སངས་རྒྱས་རྣམས་ཀྱིས་དེ་བསྟན་ཅིང་ཡང་དག་པར་བཤད་དེ་རྣམ་པར་ཕྱེ་ཞིང་གསལ་བར་མཛད་དེ་འདི་ནི་སངས་རྒྱས་རྣམས་ཀྱིས་བྱིན་གྱིས་བརླབས་སོ། །སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་རྣམས་ཀྱི་དམ་པའི་ཆོས་ནུབ་པ་ན་ཡང་འདི་ལྟ་སྟེ། འདུ་བྱེད་ཐམས་ཅད་མིག་ཡོར་ལྟ་བུའོ་ཞེས་བྱ་བ་དེ་ཉིད་བྱིན་གྱིས་བརླབས་ཡིན་ནོ། །གལ་ཏེ་དེ་བཞིན་གཤེགས་པ་རྣམས་ཀྱིས་འདུ་བྱེད་ཐམས་ཅད་མིག་ཡོར་ལྟ་བུར་མ་གཟིགས་སུ་ཟིན་ན་དེ་བཞིན་གཤེགས་པ་རྣམས་སྐད་ཅིག་ཐང་ཅིག་ཡུད་ཙམ་ཡང་འདུ་བྱེད་ཐམས་ཅད་རྨི་ལམ་དང་མིག་ཡོར་དང་བྲག་ཅ་ལྟ་བུར་མི་སྟོན་པ་ཞིག་ན་ཚངས་པ་གང་གི་ཕྱིར་དེ་བཞིན་གཤེགས་པ་རྣམས་འདུ་བྱེད་ཐམས་ཅད་རྨི་ལམ་དང་། མིག་ཡོར་དང་བྲག་ཅ་ལྟ་
བུ་དང་མི་རྟག་པ་དང་གཡོ་བ་དང་འགྱུར་བའི་ཆོས་ཅན་དུ་མཁྱེན་པ་དེའི་ཕྱིར། དེ་བཞིན་གཤེགས་པ་རྣམས་འདུ་བྱེད་ཐམས་ཅད་རྨི་ལམ་དང་མིག་ཡོར་དང་བྲག་ཅ་ལྟ་བུར་སྟོན་ནོ། །དེ་ལ་མཁས་པ་དེའི་མཚན་མ་མཐོང་བ་དག་ཡོད་དེ་དེའི་མཚན་མ་མཐོང་ནས་རྒྱུ་དེ་དང་རྐྱེན་དེ་དང་དམིགས་པའི་མཚན་མ་དེས་འདུ་བྱེད་ཐམས་ཅད་མི་རྟག་པར་ཁོང་དུ་ཆུད་ཅིང་གཡོ་བ་དང་འགྱུར་བའི་ཆོས་ཅན་ནོ་ཞེས་རྣམ་པར་འབྱེད་དོ། །འདུ་བྱེད་ཐམས་ཅད་ནི་འཇིག་ཅིང་འགྱུར་རོ། །དུས་དང་ཚིགས་དང་དུས་ཚིགས་ཀྱིས་ཀྱང་འཇིག་གོ །སྐད་ཅིག་དང་ཐང་ཅིག་དང་ཕྱོགས་ཙམ་དང་ཡུད་ཙམ་དང་ཞག་དང་ཉི་མ་དང་ཟླ་བ་དང་ཟླ་བ་ཕྱེད་དང་ལོ་དང་ལོ་བརྒྱ་དང་བསྐལ་པ་དང་བསྐལ་པ་བརྒྱ་དག་ཀྱང་འཇིག་པར་འགྱུར་རོ། །མེའི་ཕུང་པོ་ཆེན་པོ་ཡང་འབར་ནས་ཤི་བར་འགྱུར་རོ། །ཆུའི་ཕུང་པོ་ཆེན་པོ་ཡང་བབ་ནས་མི་འབབ་བོ། །རླུང་གི་ཕུང་པོ་ཆེན་པོ་ཡང་ལངས་ནས་མི་ལྡང་ངོ་། །སའི་ཕུང་པོ་ཆེན་པོ་ཡང་བྱུང་ནས་མེད་པར་འགྱུར་རོ། །རིའི་ཕུང་པོ་ཆེན་པོ་ཁོར་ཡུག་དང་། ཁོར་ཡུག་ཆེན་པོ་དང་། ལྷུན་པོ་དང་། ལྷུན་པོ་ཆེན་པོ་དང་། དེ་ལས་གཞན་པ་རི་ནག་པོ་དག་ཀྱང་བྱུང་ནས་ཡེ་མེད་པར་འགྱུར་རོ། །ཉི་མ་དང་ཟླ་བ་དང་སྐར་མའི་ཚོགས་ཀྱི་འཁོར་དང་བཅས་པ་འདི་དག་ཀྱང་བྱུང་ནས་ལྷམ་མེར་མ་ཡིན་ལྷན་ནེར་མ་ཡིན་ལྷང་ངེར་མ་ཡིན་ཞིང་སླར་ལྟུང་ངོ་། །ལྷ་ཡུལ་བའི་ལྷའི་གཞལ་མེད་ཁང་བཟང་པོ་དག་ཀྱང་འཇིག་པར་འགྱུར་རོ། །གྲོང་དང་གྲོང་ཁྱེར་དང་གྲོང་རྡལ་འདི་དག་དང་། ཤིང་ལྗོན་པ་དང་ནགས་ཚལ་དང་། སྐྱེད་མོས་ཚལ་དང་། ཀུན་དགའ་ར་བ་ཉམས་དགའ་བ་འདི་དག་ཀྱང་བྱུང་ནས་འགག་པར་འགྱུར་རོ། །ལྷ་དང་མི་འདི་རྣམས་ཀྱང་སྐྱེ་བ་དང་རྒ་བ་དང་འཕོ་བ་དང་འབྱུང་བར་འགྱུར་རོ། །སྐྱེས་བུ་མཛངས་ཤིང་མཁས་པ་འདི་དག་ཀྱང་མཚན་མ་དེ་མཐོང་ནས་ཀྱེ་མའོ་འདུ་བྱེད་འདི་ཐམས་ཅད་མི་རྟག་པའོ་འཇིག་གོ །འདུ་བྱེད་འདི་ཐམས་ཅད་མེད་པར་འགྲོའོ། །འགྱུར་རོ། །འདུ་བྱེད་འདི་ཐམས་ཅད་ཟད་པར་འགྱུར་རོ། །སྙམ་ནས་སྐྱོ་བར་འགྱུར་རོ། །སྐྱེས་བུ་མཛངས་ཤིང་མཁས་པ་འདི་དག་རྒྱུ་དེ་དང་རྐྱེན་དེས་ཁྱིམ་ནས་ཁྱིམ་མེད་པར་རབ་ཏུ་འབྱུང་
ངོ་། །དེ་དག་དད་པས་ཁྱིམ་ནས་ཁྱིམ་མེད་པར་ཡང་དག་པར་རབ་ཏུ་བྱུང་ནས་ཀྱང་འདུ་བྱེད་ཐམས་ཅད་མིག་ཡོར་ལྟ་བུ་དང་རྨི་ལམ་ལྟ་བུ་དང་བྲག་ཅ་ལྟ་བུར་རིག་སྟེ། མཚན་མ་དེ་དང་དམིགས་པ་དེ་དང་རྐྱེན་དེས་བྱང་ཆུབ་ཐོབ་པར་འགྱུར་རོ། །ཆུའི་ནང་དུ་ཟླ་བའི་དཀྱིལ་འཁོར་དང་། ཉི་མའི་དཀྱིལ་འཁོར་སྣང་བ་དང་། སྐར་མའི་གཟུགས་སྣང་བ་དེ་དག་མཐོང་ནས། དེ་བཞིན་གཤེགས་པས་གདམས་པའམ། དེ་ལས་གཞན་པའི་དགེ་བའི་བཤེས་གཉེན་གྱིས་གདམས་པའམ། བདག་གི་བློས་བརྟགས་པས་འདུ་བྱེད་ཐམས་ཅད་རྨི་ལམ་དང་མིག་ཡོར་དང་བྲག་ཅ་ལྟ་བུར་རྟོགས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་འཐོབ་པ་དང་། དགྲ་བཅོམ་པ་ཉིད་མངོན་སུམ་དུ་བྱེད་པ་དང་། གང་ཟག་བྱང་ཆུབ་སེམས་དཔའི་ཐེག་པ་པ་བཟོད་པ་དང་པོ་ཐོབ་པ་དང་། བཟོད་པ་གཉིས་པ་དང་གསུམ་པ་ཐོབ་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་བའི་སྐྱེས་བུ་མཁས་པ་དག་ཡོད་དོ། །སངས་རྒྱས་བཅོམ་ལྡན་འདས་མྱ་ངན་ལས་འདས་པ་རྣམས་ཀྱི་ཆོས་བསྟན་པ་འདི་ཉིད་འཇིག་རྟེན་དུ་འབྱུང་སྟེ། དེ་ཐོས་པས་སེམས་ཅན་རྣམས་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། ཐེག་པ་ཆེན་པོ་བླ་ན་མེད་པ་རྣམ་པ་ཐམས་ཅད་མཆོག་དང་ལྡན་པ་དང་། ཐེག་པ་གསུམ་པོ་དག་གིས་ངེས་པར་འབྱུང་བར་འགྱུར་རོ། །ཚངས་པ་འདི་ལྟར་འདི་ཡང་སངས་རྒྱས་རྣམས་ཀྱི་བྱིན་གྱི་བརླབས་སུ་རིག་པར་བྱ་སྟེ། ཚངས་པ་གང་གིས་སྐྱེས་བུ་མཁས་པ་དག་གིས་འདུ་བྱེད་འདི་དག་ནི་སྡུག་བསྔལ་བ། གཡོ་བ་མི་བརྟན་པ། ཟད་པ་དང་འགྱུར་བའི་ཆོས་ཅན་ཏེ། རྨི་ལམ་དང་མིག་ཡོར་དང་བྲག་ཅ་ལྟ་བུའོ། །ཞེས་བྱ་བའི་མཚན་མ་དེ་མཐོང་ནས་ཡང་དག་པར་སྐྱོ་བར་འགྱུར་བ་འདི་ནི་སངས་རྒྱས་རྣམས་ཀྱི་ཡུལ་དང་སངས་རྒྱས་ཀྱི་བྱིན་གྱི་བརླབས་སོ། །སྔོན་སྤྱད་ཅིང་སྔོན་གྱི་རྒྱུ་ལས་བྱུང་བའི་སེམས་ཅན་སྔོན་ཡོངས་སུ་སྨིན་པར་བྱ་བ་དག་གིས། ཆོས་
ཀྱི་སྒྲ་འདི་ལྟ་བུ་འདི་ཐོས་ནས་འདུ་བྱེད་འདི་དག་ཐམས་ཅད་ནི་མི་རྟག་པ། འདུ་བྱེད་རྣམས་ནི་འཇིག་པ་སྟེ། འདུ་བྱེད་ཐམས་ཅད་ནི་རྨི་ལམ་དང་བྲག་ཅ་ལྟ་བུའོ་ཞེས་དེ་བཞིན་གཤེགས་པ་ལ་མོས་པར་འགྱུར། མངོན་པར་དད་པར་འགྱུར་རོ། །སེམས་ཅན་གང་དག་གིས་སངས་རྒྱས་བཅོམ་ལྡན་འདས་རྣམས་ཀྱི་དྲུང་དུ་ཚངས་པར་སྤྱོད་པ་སྤྱད་པར་གྱུར་པའམ། ཁྱིམ་པར་གྱུར་པས་བསླབ་པའི་གཞི་རྣམས་ཡོངས་སུ་བཟུང་བར་གྱུར་པ་དེ་དག་ཀྱང་རྒྱུ་དེ་དང་རྐྱེན་དེས་འདི་ལྟར་འདུ་བྱེད་རྣམས་མི་རྟག་པ་དང་། འདུ་བྱེད་རྣམས་སྡུག་བསྔལ་བ་དང་། འདུ་བྱེད་རྣམས་འཇིག་པ་དང་། འདུ་བྱེད་རྣམས་རྨི་ལམ་དང་། མིག་ཡོར་དང་བྲག་ཅ་ལྟ་བུའོ་ཞེས་འདུ་བྱེད་རྣམས་དེ་ལྟ་བུའི་ཚུལ་དུ་རྟོགས་པར་འགྱུར་ཏེ། རྒྱུ་དེ་དང་རྐྱེན་དེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་མ་བྱུང་ཡང་སངས་རྒྱས་ཀྱི་བྱིན་གྱི་རླབས་ཉིད་དང་སངས་རྒྱས་ལ་དགེ་བའི་རྩ་བ་བསྐྱེད་པའི་རྐྱེན་གྱིས་བྱང་ཆུབ་ཐོབ་པར་འགྱུར་རོ། །ཚངས་པ་རྣམ་གྲངས་དེས་ཀྱང་འདི་ལྟར་འདི་ནི་སངས་རྒྱས་ཀྱི་བྱིན་གྱི་རླབས་དང་། འདི་ནི་སངས་རྒྱས་ཀྱི་ཡུལ་ཡིན་པར་རིག་པར་བྱའོ། །ཚངས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་སངས་རྒྱས་ཀྱི་སངས་རྒྱས་ཀྱི་ཞིང་ཡིན་ཏེ་ཚངས་པ་འདི་ནི་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་སངས་རྒྱས་བཅོམ་ལྡན་འདས་ཚད་མེད་གྲངས་མེད་པ་རྣམས་ཀྱི་དྲུང་དུ་དགེ་བའི་རྩ་བ་ཚད་མེད་གྲངས་མེད་པ་བསྐྱེད་དེ། ཚུལ་ཁྲིམས་དང་དཀའ་ཐུབ་དང་ཚངས་པར་སྤྱོད་པ་དང་དེ་ལས་གཞན་པའི་དཀའ་བ་སྤྱད་པ་བྱེ་བ་ཁྲག་ཁྲིག་བརྒྱ་སྟོང་དག་གིས་ཇི་ལྟར་དགེ་བའི་རྩ་བ་ཐམས་ཅད་འཕེལ་བར་འགྱུར་བ་དང་། ཇི་ལྟར་ཡོངས་སུ་དག་པར་འགྱུར་བ་དང་། དུས་དང་ཚོད་དང་སྣོད་ཇི་ལྟ་བ་བཞིན་དུ་འདུལ་བ་ཉེ་བར་བཟུང་སྟེ་སངས་རྒྱས་ཀྱི་ཞིང་ཡོངས་སུ་བཟུང་ངོ་། །ཡོངས་སུ་སྦྱངས་སོ། །ངས་སྦྱིན་པ་དང་སྙན་པར་སྨྲ་བ་དང་དོན་སྤྱད་པ་དང་དོན་འཐུན་པ་བསྡུ་བའི་དངོས་པོ་བཞི་པོ་དག་གིས་སེམས་ཅན་རྣམས་ཡང་དག་པར་བསྡུས་ཏེ། དེ་དག་
ངའི་སྨོན་ལམ་ཉིད་ཀྱིས་སངས་རྒྱས་ཀྱི་ཞིང་འདིར་སྐྱེས་ནས་ངས་ཆོས་བསྟན་པའང་ཤེས་སོ། །ངའི་ཆོས་བསྟན་པས་འདུལ་བར་ཡང་འགྱུར་ཏེ། བརྒྱ་བྱིན་རྣམས་ཀྱི་མ་ཡིན། ཚངས་པ་རྣམས་ཀྱི་མ་ཡིན། འཇིག་རྟེན་སྐྱོང་བ་རྣམས་ཀྱི་མ་ཡིན་ནོ། །ཚངས་པ་རྣམ་གྲངས་འདིས་ཀྱང་དེ་འདི་ལྟར་སངས་རྒྱས་ཀྱི་ཞིང་འདི་སངས་རྒྱས་བཅོམ་ལྡན་འདས་རྣམས་ཀྱི་ཡིན་གྱི། བརྒྱ་བྱིན་རྣམས་ཀྱི་མ་ཡིན། ཚངས་པ་རྣམས་ཀྱི་མ་ཡིན། འཇིག་རྟེན་སྐྱོང་བ་རྣམས་ཀྱི་མ་ཡིན། གཞན་མུ་སྟེགས་ཅན་དང་། སྤྱོད་པ་ཅན་དང་། ཀུན་ཏུ་རྒྱུ་རྣམས་ཀྱི་མ་ཡིན་པར་རིག་པར་བྱའོ། །དེ་ནས་མི་མཇེད་ཀྱི་བདག་པོ་ཚངས་པ་འབུམ་ཕྲག་བཅུའི་བདག་པོ་ཚངས་པ་དེ་དང་། དེ་ལས་གཞན་པའི་ཚངས་པ་རྣམས་སྐྱོ་ཞིང་ཡིད་བྱུང་བར་གྱུར་ཏེ། ཚིག་འདི་སྐད་ཅེས་ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཆོས་རྒྱ་ཆེན་པོ་དང་ལྡན་པ་ངོ་མཚར་ཏོ། །ཇི་ཙམ་དུ་སངས་རྒྱས་བཅོམ་ལྡན་འདས་རྣམས་རྨད་དུ་བྱུང་བའི་ཆོས་དང་ལྡན་པ་ངོ་མཚར་ཏོ་ཞེས་སྨྲས་སོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་དེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་རྨད་དུ་འཛིན་པར་གྱུར་ཏེ། ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱི་ཡུལ་བསམ་གྱིས་མི་ཁྱབ་ཅིང་མཐའ་ཡས་པ་ངོ་མཚར་ཏོ་སྙམ་མོ། །དེ་ནས་སྟོང་གསུམ་གྱི་སྟོང་ཆེན་པོའི་ཚངས་པ་ཆེན་པོ་དེ། བཅོམ་ལྡན་འདས་ཀྱི་སློབ་མར་ཁས་བླངས་ནས། བཅོམ་ལྡན་འདས་ལ་སྐྱབས་སུ་སོང་སྟེ། བཅོམ་ལྡན་འདས་ནི་བདག་གི་སྟོན་པ། བདེ་བར་གཤེགས་པ་ནི་བདག་གི་སྟོན་པ་ལགས་ན། བཅོམ་ལྡན་འདས་ཇི་ལྟར་གནས་པར་བགྱི་བ་དང་། ཇི་ལྟར་བསྒྲུབ་པར་བགྱི་བ་བདག་ལ་བཀའ་སྩལ་དུ་གསོལ་ཞེས་བཅོམ་ལྡན་འདས་ལ་བཀའ་ལུང་ཡང་ནོད་པར་གྱུར་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚངས་པ་ཆེན་པོ་ལ་འདི་སྐད་ཅེས་བཀའ་སྩལ་ཏོ། །ཚངས་པ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ནི་ངའི་སངས་རྒྱས་ཀྱི་ཞིང་ཡིན། འདི་ནི་ངའི་སངས་རྒྱས་ཀྱི་ཞིང་ཡིན་ཏེ། ཚངས་པ་སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁྱོད་ལ་གཏད་ཀྱིས། ཁྱོད་ཅི་ནས་ཀྱང་ངའི་རྗེས་སུ་འཇུག་པར་གྱིས་ལ་དགེ་བའི་ལམ་འདི་དང་། དགེ་བའི་ཚུལ་འདི་དང་། བླ་ན་མེད་པའི་སངས་རྒྱས་ཀྱི་ཚུལ་དང་། ཆོས་ཀྱི་ཚུལ་དང་། དགེ་འདུན་གྱི་ཚུལ་འདི་རྒྱུན་མི་འཆད་པར་གྱིས་ཤིག །ང་ནི་འདིའི་སྐྱེས་བུ་ཐ་མའོ། །ཚངས་པ་ངའི་བུའི་ཐུ་བོ་གཞོན་ནུ་ཐུགས་ལས་སྐྱེས་པ། ཞལ་ནས་སྐྱེས་པ། ཆོས་ལས་བྱུང་བ། ཆོས་ཀྱིས་སྤྲུལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་སྙིང་རྗེ་ཆེན་པོ་དང་ལྡན་པ། སྐྱེ་བོ་མང་པོའི་དོན་འདོད་པ། ཕན་པ་འདོད་པ། བདེ་བ་འདོད་པ། གྲུབ་པ་དང་བདེ་བ་འདོད་པ་འོང་བར་འགྱུར་ཏེ། དེའང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཇི་ལྟར་ངས་གནས་པ་བཞིན་དུ་ཆོས་ཀྱིས་གནས་པར་འགྱུར་གྱིས་ཇི་ལྟར་ང་ལ་རྗེས་སུ་འཐུན་པར་བྱེད་པ་དེ་བཞིན་དུ་དེ་ལ་རྗེས་སུ་འཐུན་པར་གྱིས་ཤིག །ཅི་ནས་ཀྱང་ཁྱོད་ཀྱིས་དགེ་བའི་ལམ་འདི་དང་། དགེ་བའི་ཚུལ་འདི་དང་སངས་རྒྱས་ཀྱི་ཚུལ་དང་ཆོས་ཀྱི་ཚུལ་དང་དགེ་འདུན་གྱི་ཚུལ་འདི་རྒྱུན་མི་འཆད་པར་གྱིས་ཤིག །དེ་ཅིའི་ཕྱིར་ཞེ་ན། ཚངས་པ་ཇི་ཙམ་དུ་དགེ་བའི་ཚུལ་འདི་ལྟ་བུའི་རྒྱུན་མི་འཆད་པ་དེ་ཙམ་དུ་སངས་རྒྱས་ཀྱི་ཚུལ་དང་ཆོས་ཀྱི་ཚུལ་དང་དགེ་འདུན་གྱི་ཚུལ་རྒྱུན་ཆད་པར་མི་འགྱུར། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་དང་། ལྷ་དང་མིའི་ཚུལ་དང་ཐར་བའི་ཚུལ་ནས་མྱ་ངན་ལས་འདའ་བའི་ཚུལ་གྱི་བར་དུ་རྒྱུན་ཆད་པར་མི་འགྱུར་རོ། །ཚངས་པ་དེ་ལྟ་བས་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སངས་རྒྱས་ཀྱི་སངས་རྒྱས་ཀྱི་ཞིང་འདི་ཁྱོད་ལ་གཏད་དོ། །ཚངས་པ་ཁྱོད་ལ་བཀའ་སྩལ་པ་ནི་འདི་ཡིན། རྗེས་སུ་བསྟན་པ་ནི་འདི་ཡིན་གྱིས་ཁྱོད་ཀྱིས་འདི་བཞིན་དུ་གྱིས་ཤིག །ང་ནི་འདིའི་སྐྱེས་བུ་ཐ་མའོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཚངས་པ་དང་ཚངས་པ་ཆེན་པོ་ཇི་སྙེད་འཁོད་པ་དེ་དག་ཐམས་ཅད་འཕགས་པའི་ཆོས་ལ་མངོན་པར་དུལ་བར་གྱུར་ཏེ། ཚངས་པ་ཆེན་པོ་དེ་གཅིག་པུ་ནི་མ་གཏོགས་སོ། །ཚངས་པ་ཆེན་པོ་སྟོང་གི་ཚངས་པ་དེ་ཡང་
བཅོམ་ལྡན་འདས་ཀྱིས་འཕགས་པའི་ཆོས་ལ་རབ་ཏུ་བཏུལ་ཞིང་བཞག་པར་གྱུར་ཏོ། །ཚངས་པའི་ལེའུ་སྟེ་དང་པོ་རྫོགས་སོ།། །།