གསུམ་པ། བརྒྱ་བྱིན་གྱི་ལེའུ།
དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཇི་ལྟར་བསྒྲུབ་པར་བགྱི་བ་བཀའ་སྩལ་དུ་གསོལ། བཅོམ་ལྡན་འདས་གང་ལྷ་མ་ཡིན་གྱི་དབང་པོ་བཞི་གོ་ཆ་བགོས་ནས་སུམ་ཅུ་རྩ་གསུམ་གྱི་ལྷ་རྣམས་ལ་གཡུལ་བཤམས་ཏེ་རྒོལ་བའི་དུས་དེ་ལྟ་བུ་དང་ཚེ་དེ་ལྟ་བུ་མཆིས་སོ། །གང་གི་ཚེ་ལྷ་དང་ལྷ་མ་ཡིན་གཡུལ་ཤོམ་ཞིང་ལྷ་མ་ཡིན་གྱི་དབང་པོ་བཞི་ཚོགས་པར་
གྱུར་པ་དེའི་ཚེ་འཕགས་པ་མཽད་གལ་གྱི་བུ་ཡང་མཆིས་ཏེ། འཕགས་པ་མཽད་གལ་གྱི་བུ་མཆིས་ནས་ལྷ་མ་ཡིན་གྱི་དབང་པོ་དེ་བཞི་ཆོས་དང་འཐུན་པས་ཚར་གཅོད་དོ། །དེ་ལྟར་བགྱིས་པས་ལྷ་དང་ལྷ་མ་ཡིན་རྣམས་འཐབ་པ་མ་མཆིས། འགྱེད་པ་མ་མཆིས། མཚང་འདྲུ་བ་མ་མཆིས། རྩོད་པ་མ་མཆིས་ཤིང་བདེ་བར་འགྱུར་ན། བཅོམ་ལྡན་འདས་མཽད་གལ་གྱི་བུ་ཡང་ཡོངས་སུ་མྱ་ངན་ལས་འདས། བཅོམ་ལྡན་འདས་ཀྱང་ད་ཡོངས་སུ་མྱ་ངན་ལས་འདའ་བར་འགྱུར་ཏེ། དེ་ལྟ་བས་ན་བདག་ཅག་འཐབ་པ་དང་འགྱོད་པ་ཆེན་པོར་འགྱུར་ན། བཅོམ་ལྡན་འདས་ལྷ་དང་། ལྷ་མ་ཡིན་དང་། ལྷ་མ་ཡིན་གྱི་དབང་པོ་བཞི་གཡུལ་ཤོམ་པ་དེའི་ཚེ་ཇི་ལྟར་བསྒྲུབ་པར་བགྱི་བ་བདག་ལ་བཀའ་སྩལ་དུ་གསོལ། དེ་སྐད་ཅེས་གསོལ་པ་དང་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་བཀའ་སྩལ་ཏོ། །ཀཽ་ཤི་ཀ་འདི་ལྟ་སྟེ། ཚུལ་ཁྲིམས་རྣམ་པར་དག་པའི་ཕྱིར་ཚུལ་ཁྲིམས་དང་ལྡན་པ་ཚངས་པར་སྤྱོད་པའི་སེམས་ལ་སྨོན་པ་འགྲུབ་སྟེ་ཚངས་པར་མི་སྤྱོད་པའི་མ་ཡིན་ནོ། །འདོད་ཆགས་དང་བྲལ་བའི་འགྲུབ་ཀྱི་འདོད་ཆགས་དང་མ་བྲལ་བའི་མ་ཡིན་ནོ། །ཞེ་སྡང་དང་བྲལ་བའི་འགྲུབ་ཀྱི་ཞེ་སྡང་དང་མ་བྲལ་བའི་མ་ཡིན་ནོ། །གཏི་མུག་དང་བྲལ་བའི་འགྲུབ་ཀྱི་གཏི་མུག་དང་མ་བྲལ་བའི་མ་ཡིན་ནོ། །ཤེས་རབ་དང་ལྡན་པའི་འགྲུབ་ཀྱི་ཤེས་རབ་འཆལ་བའི་མི་འགྲུབ་བོ། །ཀཽ་ཤི་ཀ་ཇི་སྲིད་དུ་དམ་པའི་ཆོས་འདི་ནུབ་པར་མ་གྱུར་པ་དེ་སྲིད་དུ། ཀཽ་ཤི་ཀ་ལྷ་དང་ལྷ་མ་ཡིན་གཡུལ་ཤོམ་པར་འགྱུར་བ་ན་ངའི་མིང་སྨོས་པ་ཙམ་གྱིས་ལྷ་རྣམས་རྒྱལ་བར་འགྱུར་ཞིང་ལྷ་མ་ཡིན་ཕམ་པར་འགྱུར་བར་ངས་དེང་ནས་བྱིན་གྱིས་བརླབས་ཀྱིས་ཀཽ་ཤི་ཀ་མི་དགར་མ་བྱེད། མྱ་ངན་མ་བྱེད། སྨྲེ་སྔགས་མ་འདོན་ཅིག །དེ་ནས་ལྷ་མ་ཡིན་གྱི་དབང་པོ་བཞི་བཅོམ་ལྡན་འདས་ཀྱི་བྱིན་གྱིས་བརླབས་པའི་སྒྲ་འདི་ལྟ་བུ་ཐོས་ནས་སྐྱོ་ཞིང་མི་དགའ་སྟེ། སྤུ་ཟིང་ཞེས་བྱེད་པར་གྱུར་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།
ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ལྷ་མ་ཡིན་གྱི་དབང་པོ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅིའི་སླད་དུ་འདི་ལྟ་བུར་བྱིན་གྱིས་རློབ་པ་མཛད། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ལྷ་མ་ཡིན་གྱི་དབང་པོ་བཞི་པོ་དེ་དག་ལ་འདི་སྐད་ཅེས་བཀའ་སྩལ་ཏོ། །ལྷ་མ་ཡིན་གྱི་དབང་པོ་ཁྱེད་ཅག་མྱ་ངན་མ་བྱེད། སྨྲེ་སྔགས་མ་འདོན། ཡོངས་སུ་ཡི་འཆད་པ་མ་སྐྱེད་ཅིག །དེ་ཅིའི་ཕྱིར་ཞེ་ན། ཁྱེད་རྣམས་ཀྱང་ལྷ་རྣམས་ཀྱི་དབང་པོར་འགྱུར་བའི་དུས་དེ་ལྟ་བུ་དང་། ཚེ་དེ་ལྟ་བུ་ཡོད་དེ། སུམ་ཅུ་རྩ་གསུམ་གྱི་རིས་ཀྱི་ལྷ་རྣམས་པས་ཆེས་ཕྱུག་པ་དང་། འཐབ་པ་མེད་པ་དང་རྩོད་པ་མེད་པ་དང་འགྱེད་པ་མེད་པ་དང་། འགལ་བ་མེད་ཅིང་རྒྱལ་བ་ཐོབ་པར་འགྱུར་རོ། །དེའི་ཕྱིར། ཁྱེད་འཐབ་པ་མེད་པ་དང་། མཚང་འདྲུ་བ་མེད་པ་དང་། འགྱེད་པ་མེད་པ་དང་། རྩོད་པ་མེད་པ་དང་། འགལ་བ་མེད་པར་ལྷུར་ལོང་ལ། བྱམས་པའི་སེམས་དང་། ཕན་པའི་སེམས་ཀྱི་དངོས་པོ་ཕུན་སུམ་ཚོགས་པར་གནས་པར་གྱིས་ཤིག །གྲོགས་པོ་དག་སྲོག་ནི་རྒྱུན་མི་རིང་། དབང་ཕྱུག་ལ་དབང་བྱེད་པ་ནི་མི་རྟག་གོ །གྲོགས་པོ་དག་ཕུན་སུམ་ཚོགས་པ་ཐམས་ཅད་ནི་མཐར་འཇིག་གོ །གྲོགས་པོ་དག་དེ་བཞིན་གཤེགས་པ་ཡང་མི་རྟག་པ་ཉིད་ཀྱིས་མཐར་ཐུག་པ་དང་། ཡོངས་སུ་ཟད་པ་དང་། ཡོངས་སུ་དེངས་པར་བྱེད་པ་ལ་ལྟོས། ང་ནི་སེམས་ཅན་ཐམས་ཅད་ལ་ཁོན་མེད་པ་དང་། འཐབ་པ་མེད་པ་དང་། རྩོད་པ་མེད་པ་དང་། འགལ་བ་མེད་པར་བྱེད་པ་ལ་གནས་པ་དང་། སེམས་ཅན་ཐམས་ཅད་འདུམ་ཞིང་འཐུན་པར་བྱེད་པ་ལ་ཞུགས་པ་ཡིན་ཡང་དེ་ལྟ་ན་ཁྱོད་དགེ་བའི་རྩ་བ་ཆུང་ངུ་དང་ལྡན་པ་ཕན་ཚུན་འཐབ་པ་དང་རྩོད་པ་ལ་མངོན་པར་དགའ་བ་རྣམས་ལ་ལྟ་སྨོས་ཀྱང་ཅི་དགོས། གྲོགས་པོ་དག་གང་གཞན་ལ་རྣམ་པར་ཐོ་འཚམས་པ་དང་རྣམ་པར་འཚེ་བ་ལ་ཞུགས་པར་གྱུར་པ་དེ་ནི་ཡུན་རིང་དུ་རྣམ་པར་ཐོ་འཚམས་པ་དང་རྣམ་པར་འཚེ་བ་ཐོབ་པར་འགྱུར་རོ། །གྲོགས་པོ་དག་སྲོག་གཅོད་པའི་སྐྱེས་བུ་གང་ཟག་ནི་ཚེ་ཐུང་
བར་འགྱུར་རོ། །གྲོགས་པོ་དག་འཐབ་པ་དང་རྩོད་པ་ལ་དགའ་བའི་སྐྱེས་བུ་གང་ཟག་ནི་རྟག་ཏུ་སྐྲག་པས་འཚོ་བར་འགྱུར་ཞིང་དབང་ཆེ་བར་གྲགས་པ་དང་གཡོག་འཁོར་མང་པོར་མི་འགྱུར་རོ། །གྲོགས་པོ་དག་དགེ་བ་དང་སྡིག་པའི་ལས་རྣམས་ཆུད་ཟ་བ་མེད་དོ། །དེ་བས་ན་གྲོགས་པོ་དག་ཁྱེད་ཕན་ཚུན་བྱམས་པའི་སེམས་དང་། བྱམས་པའི་ལུས་ཀྱི་ལས་དང་། བྱམས་པའི་ངག་གི་ལས་དང་། བྱམས་པའི་ཡིད་ཀྱི་ལས་ཀུན་ཏུ་སྤྱོད་ཅིག །འཐབ་པ་མེད་པ་དང་། མཚང་འདྲུ་བ་མེད་པ་དང་། རྩོད་པ་མེད་པ་ལྷུར་ལོང་ལ་གནས་པར་གྱིས་ཤིག་དང་། དེ་ཡུན་རིང་པོར་དོན་དུ་འགྱུར་བ་དང་། ཕན་པ་དང་བདེ་བ་དང་འགྱོད་པ་མེད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ལྷ་མ་ཡིན་གྱི་དབང་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་དེ་ལྟ་ལགས་སོ། །བདེ་བར་གཤེགས་པ་དེ་དེ་ལྟ་ལགས་ཏེ། བཅོམ་ལྡན་འདས་ཀྱིས་ཇི་སྐད་དུ་བཀའ་སྩལ་པ་དེ་བཞིན་དུ་བགྱིའོ། །དེ་བཞིན་དུ་བསྒྲུབ་པར་བགྱིའོ། །དེ་བཞིན་དུ་གནས་པར་བགྱིའོ། །བཅོམ་ལྡན་འདས་བདག་ཅག་ཀྱང་དེང་སླན་ཅད་གཡུལ་ཤོམ་པ་མི་བགྱིད་དོ། །ཕན་ཚུན་བྱམས་པས་ཀུན་ཏུ་སྤྱད་པར་བགྱིའོ། །དེ་ནས་ལྷའི་དབང་པོ་བརྒྱ་བྱིན་བཅོམ་ལྡན་འདས་ཡོངས་སུ་མྱ་ངན་ལས་འདའ་བ་ལ་མྱ་ངན་བྱེད་དེ། གདོང་ལ་མཆི་མ་ཟག་པར་ངུ་ཞིང་སྡུག་བསྔལ་ཡིད་མི་བདེ་ཞིང་མྱ་ངན་གྱི་ཟུག་རྔུ་ཆེན་པོ་དང་ལྡན་པར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་དེང་སླན་ཅད་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་གཟུགས་ལ་མི་སྙེན་པ་ནས། རེག་བྱ་ལ་མི་རེག་པ་དང་། སླས་ཀྱི་ནང་དུ་མི་འཇུག་པ་དང་། གོས་གཞན་མི་འཚལ་བར་བགྱིས་ཏེ། བཅོམ་ལྡན་འདས་འདི་ལྟ་སྟེ་དཔེར་ན། སེམས་ཅན་གང་དག་བྱས་པ་གཟོ་ཞིང་བྱས་པ་རིག་པ་བྱས་པ་རྗེས་སུ་སྐྱོང་བ་དེ་དག་རྗེ་བོ་གུམ་པར་གྱུར་ན། དེ་དེའི་སླད་དུ་སྡུག་བསྔལ་ཞིང་མཆི་མ་འབྱུང་བ་དེ་བཞིན་དུ་བདག་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་ན་བཅོམ་ལྡན་
འདས་ཀྱི་དམ་པའི་ཆོས་ཇི་སྲིད་དུ་གནས་པ་དེ་སྲིད་དུ་མཆི་མ་དབྱུང་བར་བགྱི། འདོད་པའི་ཡོན་ཏན་ལྔ་ལ་མི་སྙེན། སླས་ཀྱི་ནང་དུ་མི་འཇུག །དེ་ལས་གཞན་པའི་གོས་འཚལ་བར་མི་བགྱིད་དོ། །བཅོམ་ལྡན་འདས་འདི་ལྟར་བདག་འཇིག་རྟེན་ཐམས་ཅད་ལས་འདས་པའི་སྟོན་པ་འདི་ལྟ་བུ་དང་སང་ནང་པར་འབྲལ་ཞིང་མི་མཐོང་བ་དང་མི་འགྲོགས་པར་འགྱུར་བ་ལགས་པ་ལྟ། ལྷའི་དབང་པོ་བརྒྱ་བྱིན་གྱིས་དེ་སྐད་ཅེས་གསོལ་ནས་མཆི་མ་ཟག་བཞིན་དུ་མགོ་སྨད་དེ་འདུག་གོ །བརྒྱ་བྱིན་གྱི་ལེའུ་སྟེ་གསུམ་པ་རྫོགས་སོ།། །།