གསུམ་པ། དཔེའི་ལེའུ།
བམ་པོ་གསུམ་པ། དེ་ནས་ཚེ་དང་ལྡན་པ་ཤཱ་རིའི་བུ་དེའི་ཚེ་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། །བཅོམ་ལྡན་འདས་ཀྱི་སྤྱན་སྔ་ན་བཅོམ་ལྡན་འདས་ཁོ་ན་ལ་རབ་ཏུ་ལྟ་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་གསུང་འདི་བཅོམ་ལྡན་འདས་ལས་ཐོས་ནས། བདག་ངོ་མཚར་དང་རྨད་དུ་གྱུར་ཏེ་དགའ་བ་ཐོབ་བོ། །དེ་ཅིའི་སླད་དུ་ཞེ་ན་བཅོམ་ལྡན་འདས་བྱང་ཆུབ་སེམས་དཔའ་གཞན་དག་ཀྱང་མཐོང་། བྱང་ཆུབ་སེམས་དཔའ་རྣམས་ཀྱིས་མ་འོངས་པའི་དུས་ཀྱི་སངས་རྒྱས་ཀྱི་མཚན་ཡང་ཐོས་ཏེ། འདི་
ལྟ་བུའི་ཆོས་ནི་བཅོམ་ལྡན་འདས་ལས་བདག་གིས་མ་ཐོས་ལ། བདག་དེ་བཞིན་གཤེགས་པའི་ཡེ་ཤེས་གཟིགས་པ་འདི་ལྟ་བུ་ལས་ཉམས་སོ་སྙམ་ནས་ཤིན་ཏུ་མྱ་ངན་དུ་གྱུར། ཤིན་ཏུ་ཡོངས་སུ་གདུང་བར་གྱུར་པའི་སླད་དུའོ། །བཅོམ་ལྡན་འདས་བདག་རི་དང་རི་སུལ་དང་ནགས་ཁྲོད་དང་ཀུན་དགའ་ར་བ་དང་། ཆུ་འགྲམ་དང་ཤིང་དྲུང་དབེན་པར་གདུགས་ལ་གནས་པའི་སླད་དུ་རྟག་པར་ནམ་མཆི་བ་དེའི་ཚེ་ཡང་བཅོམ་ལྡན་འདས་འདི་ལྟར་ཆོས་ཀྱི་དབྱིངས་ལ་འཇུག་པར་མཚུངས་ན། བཅོམ་ལྡན་འདས་ཀྱིས་བདག་ཅག་ཐེག་པ་དམན་པ་བས་ངེས་པར་བཏོན་པ་སྙམ་དུ་གནས་པ་དེ་ལྟ་བུའི་མང་དུ་གནས་ཏེ། བཅོམ་ལྡན་འདས་དེ་ཡང་བདག་ཅག་གིས་ནོངས་ཀྱིས། བཅོམ་ལྡན་འདས་ཀྱིས་མ་ནོངས་སོ་ཞེས་དེའི་ཚེ་བདག་དེ་སྙམ་དུ་སེམས་སོ། །དེ་ཅིའི་སླད་དུ་ཞེ་ན། གང་འདི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བརྩམས་ཏེ། ཡང་དག་ཕུལ་གྱི་ཆོས་བསྟན་པ་གསུང་བ་བདག་ཅག་གིས་བསྙད་ན་ནི། བཅོམ་ལྡན་འདས་བདག་ཅག་ཀྱང་ཆོས་འདི་ཉིད་ལ་ངེས་པར་འབྱུང་བར་འགྱུར་བ་ཞིག་ན། བཅོམ་ལྡན་འདས་བྱང་ཆུབ་སེམས་དཔའ་མ་ཚོགས་པར། བཅོམ་ལྡན་འདས་ཀྱིས་ལྡེམ་པོར་དགོངས་ཏེ་བཤད་པ་དེ་བདག་ཅག་གིས་མ་རྟོགས་ཏེ། རིངས་ཐབས་སུ་དེ་བཞིན་གཤེགས་པས་ཆོས་བསྟན་པ་ཐོག་མར་གསུངས་པ་ཉིད་ཐོས་ནས་གཟུང་ཞིང་བསྒོམས་ཏེ་བསམས་ཤིང་ཡིད་ལ་བཟུང་བས། བཅོམ་ལྡན་འདས་བདག་ཉིད་ལ་བདག་གིས་དེ་ལྟར་འགྱོད་པས་མང་དུ་གདུགས་མཚན་བས་པར་འགྱུར་རོ། །བཅོམ་ལྡན་འདས་རྨད་དུ་བྱུང་བའི་ཆོས་ཀྱི་སྒྲ་སྔོན་མ་ཐོས་པ་འདི་ལྟ་བུ་བཅོམ་ལྡན་འདས་ལས་ཐོས་པས། བཅོམ་ལྡན་འདས་དེང་བདག་མྱ་ངན་ལས་འདས་པ་ཐོབ་སྟེ། བཅོམ་ལྡན་འདས་དེང་བདག་བསིལ་བར་གྱུར་ཏོ། །བཅོམ་ལྡན་འདས་དེང་བདག་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་དེང་བདག་གིས་དགྲ་བཅོམ་པ་ཐོབ་བོ། །བཅོམ་ལྡན་འདས་དེང་བདག་བཅོམ་ལྡན་འདས་ཀྱི་སྲས་ཐུ་བོ། ཐུགས་ཀྱི་སྲས་ཞལ་ནས་སྐྱེས་པ་ཆོས་ལས་སྐྱེས་པ། ཆོས་ཀྱི་སྤྲུལ་པ། ཆོས་ཀྱི་བགོ་སྐལ་ལ་སྤྱོད་པ་ཆོས་ཀྱིས་གྲུབ་པ་
སྟེ། དེང་བདག་ཡོངས་སུ་གདུང་བ་དང་བྲལ་ལོ། །དེ་ནས་ཚེ་དང་ལྡན་པ་ཤཱ་རིའི་བུས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གསོལ་ཏོ། །སྒྲ་འདི་ཐོས་ནས་ཚིམ་པ་རབ་སྐྱེས་ཏེ། །རྣམ་འདྲེན་ཆེན་པོ་བདག་ནི་ངོ་མཚར་གྱུར། །བདག་ལ་ཐེ་ཚོམ་ནམ་ཡང་ཕྱིས་མི་འབྱུང་། །ཐེག་པ་མཆོག་འདིར་བདག་ནི་ཡོངས་སྨིན་བགྱིས། །བདེ་བར་གཤེགས་པའི་གསུང་དེ་ངོ་མཚར་ཏེ། །སྲོག་ཆགས་རྣམས་ཀྱི་ཐེ་ཚོམ་མྱ་ངན་བསལ། །ཟག་པ་ཟད་པ་བདག་གི་མྱ་ངན་ཀྱང་། །གསུང་ཐོས་པས་ནི་ཐམས་ཅད་བསལ་བར་གྱུར། །གདུགས་ལ་གནས་ཤིང་ཕན་ཚུན་མཆི་བ་དང་། །ནགས་ཚལ་ཁྲོད་དང་ཀུན་དགའ་ཤིང་དྲུང་དང་། །རི་དང་རི་སུལ་གནས་པར་འགྱུར་བའི་ཚེ། །བསམ་པ་འདི་དག་ཉིད་ནི་རྗེས་སུ་སེམས། །ཟག་པ་མེད་པའི་ཆོས་སུ་མཚུངས་པ་ལ། །འདི་ལྟར་ཁམས་གསུམ་པ་ཡི་ཆོས་ཀྱི་མཆོག །མ་འོངས་དུས་ན་སྟོན་པར་མི་འགྱུར་བ། །ཀྱེ་མ་བདག་ནི་སྡིག་པའི་སེམས་ཀྱིས་བསླུས། །མཚུངས་པའི་ཆོས་རྣམས་ལ་ནི་བདག་རྨོངས་པས། །བདག་ནི་སུམ་ཅུ་རྩ་གཉིས་མཚན་ལས་ཉམས། །གསེར་གྱི་ཁ་དོག་མདོག་ཀྱང་རབ་ཏུ་སྟོན། །སྟོབས་དང་རྣམ་ཐར་འདི་དག་ཀུན་ལས་ཉམས། །ཐུབ་པ་ཆེན་པོ་དཔེ་བྱད་བཟང་པོ་གང་། །མཆོག་རབ་དམ་པ་བརྒྱད་ཅུ་ཚང་བ་དང་། །གང་ཡང་མ་འདྲེས་པ་ཡི་བཅྭ་བརྒྱད་ཆོས། །དེ་ལས་ཀྱེ་མ་བདག་ཅག་ཉམས་ཤིང་བསླུས། །འཇིག་རྟེན་ཕན་པ་ཐུགས་བརྩེ་ཁྱོད་མཐོང་ནས། །གདུགས་ལ་མཆིས་ནས་གཅིག་པུ་གནས་པའི་ཚེ། །མ་ཆགས་ཡེ་ཤེས་བསམ་གྱིས་མི་ཁྱབ་ལས། ཀྱེ་མ་བདག་ནི་བསླུས་ཞེས་རྣམ་པར་སེམས། དེ་ལྟར་མང་དུ་རྣམ་པར་སེམས་པ་ཡིས། །མགོན་པོ་གདུགས་དང་མཚན་ཡང་བས་པར་གྱུར། །འདི་ལས་བདག་ནི་ཉམས་སམ་མ་ཉམས་ཞེས། །བཅོམ་ལྡན་འདས་ལ་རེ་ཤིག་ཞུ་སྙམ་བགྱིད། །བྱང་ཆུབ་སེམས་དཔའ་མང་པོ་གཞན་དག་ལ། །འཇིག་རྟེན་འདྲེན་པས་བསྟོད་པ་མཐོང་ནས་སུ། །རྒྱལ་བ་དབང་པོ་བདག་ནི་དེ་སེམས་ཤིང་། །གདུགས་དང་མཚན་མོ་རྟག་དུ་དེ་བཞིན་པས། །ཡེ་ཤེས་བརྟག་མེད་ཕྲ་ཞིང་ཟག་མེད་པ། །རྒྱལ་བས་བྱང་ཆུབ་སྙིང་པོར་གསུངས་པས་ན། །འདི་ནི་ལྡེམ་པོར་དགོངས་ཏེ་གསུངས་པ་ཞེས། །སངས་རྒྱས་ཆོས་འདི་ཐོས་ནས་བདག་
བཟོད་དོ། །སྔོན་ཆད་བདག་ནི་ལྟ་ལ་ཆགས་གྱུར་པ། །མུ་སྟེགས་ཅན་གྱིས་བཀུར་བའི་ཀུན་ཏུ་རྒྱུ། །དེ་ནས་མགོན་པོས་བདག་གི་བསམ་མཁྱེན་ནས། །ལྟ་བ་དགྲོལ་ཕྱིར་མྱ་ངན་འདའ་བ་གསུངས། །ལྟ་བར་གྱུར་པ་དེ་དག་ཀུན་ལས་བཀྲོལ། །བདག་གིས་སྟོང་པ་ཉིད་ཀྱི་ཆོས་ཐོབ་སྟེ། །དེ་ཕྱིར་བདག་ནི་མྱ་ངན་འདས་སྙམ་བགྱིད། །མྱ་ངན་འདས་ཞེས་བགྱི་བ་དེ་མ་ལགས། །གང་ཚེ་སངས་རྒྱས་སེམས་ཅན་གཙོར་གྱུར་ཏེ། །ལྷ་མི་གནོད་སྦྱིན་སྲིན་པོས་མདུན་དུ་བདར། །སུམ་ཅུ་རྩ་གཉིས་མཚན་གྱི་གཟུགས་ལྡན་པ། །དེ་ཚེ་མ་ལུས་མྱ་ངན་འདས་པ་ལགས། །ལྷར་བཅས་འཇིག་རྟེན་རྣམས་ཀྱི་མདུན་དུ་ཡང་། །གང་ཚེ་བདག་ནི་བྱང་ཆུབ་མཆོག་ལུང་བསྟན། །གསུང་ཐོས་བདག་ནི་དེ་རིང་མྱ་ངན་འདས། །འདི་ལྟར་རློམ་སེམས་ཀུན་ཀྱང་རྣམ་པར་བསལ། །ཐོག་མ་རྣམ་པར་འདྲེན་གྱི་གསུང་ཐོས་ནས། །ས་འདིར་སངས་རྒྱས་ཆ་བྱད་མངོན་སྤྲུལ་ནས། །འདི་བདུད་ཀྱལ་ཀ་བྱེད་པ་མ་ཡིན་གྲང་། །དེ་ལྟར་བདག་ནི་བག་ཚའི་སྟོབས་སྐྱེས་སོ། །གང་གི་ཚེ་ན་རྒྱུ་དང་གཞི་རྣམས་དང་། །དཔེ་རྣམས་བྱེ་བ་ཁྲག་ཁྲིག་རྣམས་ཀྱིས་ཀྱང་། །སངས་རྒྱས་བྱང་ཆུབ་མཆོག་དེ་གནས་པར་བསྟན། །དེ་ནས་བདག་ནི་ཆོས་ཐོས་ཐེ་ཚོམ་བྲལ། །གང་ཚེ་བདག་ལ་སངས་རྒྱས་བྱེ་བ་སྟོང་། །མྱ་ངན་ཡོངས་འདས་རྒྱལ་བ་འདས་པས་བརྗོད། །ཐབས་མཁས་པ་ལ་རབ་ཏུ་གནས་ནས་ནི། །དེ་དག་གིས་ཀྱང་ཆོས་འདི་ཤིན་ཏུ་བཤད། །མ་བྱོན་སངས་རྒྱས་མང་དང་འཇིག་རྟེན་ན། ། དོན་དམ་གཟིགས་པ་གང་དག་བཞུགས་པ་རྣམས། །ཐབས་ལ་མཁས་པ་བརྒྱ་ཡིས་རང་གི་ཆོས། །ཤིན་ཏུ་སྟོན་པར་འགྱུར་ཞིང་དེ་ལྟར་འཆད། །དེ་ལྟར་ཁྱོད་ཉིད་སྤྱོད་པ་ཅི་འདྲ་བར། །ཁབ་ནས་བྱུང་བ་ཚུན་ཆད་རབ་བསྟན་ཅིང་། །ཆོས་ཀྱི་འཁོར་ལོ་ཅི་འདྲ་ཁྱོད་ཀྱིས་མཁྱེན། །ཇི་ལྟར་ཁྱོད་ཀྱིས་ཆོས་བཤད་གནས་པ་ལས། །དེ་བས་འདི་ནི་བདུད་མ་ལགས་པར་འཚལ། །འཇིག་རྟེན་མགོན་པོ་ཡང་དག་སྤྱོད་སྟོན་པ། །འདི་ལ་བདུད་ཀྱི་སྤྱོད་ཡུལ་མ་མཆིས་ན། །བདག་ཉིད་དེ་ལྟར་སེམས་ལ་ཐེ་ཚོམ་སྐྱེས། །གང་ཚེ་འཇམ་ཞིང་ཟབ་མོ་སྙན་པ་ཡི། །སངས་རྒྱས་གསུང་གིས་བདག་གི་དགའ་བ་བསྐྱེད། །དེ་ན་བདག་གི་དོགས་པ་ཀུན་བསལ་གྱུར། །བདག་ནི་ཐེ་ཚོམ་བྲལ་ཏེ་ཡེ་ཤེས་གནས། །ལྷར་
བཅས་འཇིག་རྟེན་དག་གིས་མདུན་བདར་ཏེ། །དེ་བཞིན་གཤེགས་པར་བདག་འགྱུར་ཐེ་ཚོམ་བྲལ། །བྱང་ཆུབ་སེམས་དཔའ་མང་པོ་ཀུན་འཛུད་ཅིང་། །སངས་རྒྱས་བྱང་ཆུབ་འདི་ཡང་དགོངས་པར་བཤད། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལྷ་དང་བཅས་པའི་འཇིག་རྟེན་འདི་དག་གི་བདུད་དང་བདུད་དུ་བཅས་ཚངས་པར་བཅས་དགེ་སྦྱོང་དང་བྲམ་ཟེར་བཅས་པའི་སྐྱེ་དགུའི་མདུན་དུ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །ཤཱ་རིའི་བུ་ངས་ཁྱོད་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་ཉི་ཤུའི་དྲུང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱ་སྟེ། ཤཱ་རིའི་བུ་ཁྱོད་ཡུན་རིང་པོ་ནས་ང་ཡི་རྗེས་སུ་སློབ་པར་གྱུར་པ་ཡིན་ཏེ། ཤཱ་རིའི་བུ་ཁྱོད་བྱང་ཆུབ་སེམས་དཔའི་མན་ངག་དང་། བྱང་ཆུབ་སེམས་དཔའི་གསང་ཆེན་གྱིས། ངའི་གསུང་རབ་འདི་ལ་སྐྱེས་པར་གྱུར་ཏོ། །ཤཱ་རིའི་བུ་འདི་ལྟར་ཁྱོད་བྱང་ཆུབ་སེམས་དཔའི་བྱིན་གྱི་རླབས་ཀྱིས་སྔོན་གྱི་སྤྱོད་པ་དང་སྨོན་ལམ་དང་བྱང་ཆུབ་སེམས་དཔའི་མན་ངག་དང་བྱང་ཆུབ་སེམས་དཔའི་གསང་ཆེན་མི་དྲན་ནས། བདག་མྱ་ངན་ལས་འདས་སོ་སྙམ་དུ་སེམས་ཏེ། ཤཱ་རིའི་བུ་ངས་ཁྱོད་སྔོན་གྱི་སྤྱོད་པ་དང་སྨོན་ལམ་དང་ཡེ་ཤེས་ཁོང་དུ་ཆུད་པ་དྲན་པར་བྱ་བར་འདོད་དེ། དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་མདོ་སྡེ་ཤིན་ཏུ་རྒྱས་པ་ཆེན་པོ། བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་འདི། ཉན་ཐོས་རྣམས་ལ་ཡང་དག་པར་བསྟན་ཏོ། །ཤཱ་རིའི་བུ་ཁྱོད་འདི་ལྟར་མ་འོངས་པའི་དུས་ན། བསྐལ་པ་དཔག་ཡས་བསམ་གྱིས་མི་ཁྱབ་པ་དཔག་ཏུ་མེད་པར་དེ་བཞིན་གཤེགས་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་དམ་པའི་ཆོས་བཟུང་ཞིང་། མཆོད་པ་རྣམ་པ་སྣ་ཚོགས་བྱས་ཏེ། བྱང་ཆུབ་སེམས་དཔའི་སྤྱོད་པ་འདི་དག་ཡོངས་སུ་རྫོགས་པར་བྱས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་པད་མའི་འོད་ཅེས་
བྱ་བར་འཇིག་རྟེན་དུ་འབྱུང་བར་འགྱུར་རོ། །ཤཱ་རིའི་བུ་དེའི་ཚེ་ན། བཅོམ་ལྡན་འདས་དེ་བཞིན་གཤེགས་པ་པད་མའི་འོད་དེའི་སངས་རྒྱས་ཀྱི་ཞིང་རྡུལ་མེད་པ་ཞེས་བྱ་བར་འགྱུར་ཏེ། མཉམ་པ་ཉམས་དགའ་བ་བཟང་བ་སྡུག་པ་ཡོངས་སུ་དག་པ་འབྱོར་པ་རྒྱས་པ་བདེ་བ་ལོ་ལེགས་པ་མི་དང་ལྷ་མང་པོས་རབ་ཏུ་གང་བ། གཞི་བཻ་དཱུཪྱ་ལ་གསེར་གྱི་སྐུད་པས་མིག་མངས་རིས་སུ་བྲིས་པ། མིག་མངས་རིས་དེ་ཀུན་ཏུ་རིན་པོ་ཆེའི་ཤིང་སྐྱེས་ཏེ། རྟག་པར་རྒྱུན་དུ་རིན་པོ་ཆེ་སྣ་བདུན་གྱི་མེ་ཏོག་དང་འབྲས་བུ་དང་ལྡན་པར་འགྱུར་རོ། །ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མའི་འོད་དེ་ཡང་ཐེག་པ་གསུམ་ལས་བརྩམས་ནས་ཆོས་སྟོན་ཏེ། གཞན་ཡང་ཤཱ་རིའི་བུ་དེ་བཞིན་གཤེགས་པ་དེ་བསྐལ་པའི་སྙིགས་མ་ལ་མི་འབྱུང་མོད་ཀྱི། འོན་ཀྱང་སྔོན་གྱི་སྨོན་ལམ་གྱི་དབང་གིས་ཆོས་སྟོན་པར་འགྱུར་རོ། །ཤཱ་རིའི་བུ་བསྐལ་པ་དེའི་མིང་ཡང་རིན་པོ་ཆེ་ཆེན་པོས་བརྒྱན་པ་ཞེས་བྱ་བར་འགྱུར་རོ། །ཤཱ་རིའི་བུ་འདི་ཇི་སྙམ་དུ་སེམས། ཅིའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ཞེས་བྱ་ཞེ་ན། ཤཱ་རིའི་བུ་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་རྣམས་ནི་རིན་པོ་ཆེ་ཆེན་པོ་ཞེས་བྱ་སྟེ། དེའི་ཚེ་དེའི་དུས་ན་འཇིག་རྟེན་གྱི་ཁམས་རྡུལ་མེད་པ་དེར། དེ་དག་དཔག་ཏུ་མེད་པ་བགྲང་དུ་མེད་པ་བསམ་གྱིས་མི་ཁྱབ་བགྲང་བ་ལས་འདས་པ་མང་པོ་འབྱུང་སྟེ། དེ་བཞིན་གཤེགས་པས་བགྲང་བ་ནི་མ་གཏོགས་སོ། །དེའི་ཕྱིར་བསྐལ་པ་དེ་རིན་པོ་ཆེ་ཆེན་པོས་བརྒྱན་པ་ཞེས་བྱའོ། །ཤཱ་རིའི་བུ་འདི་ལྟར་ཡང་དེའི་ཚེ། བྱང་ཆུབ་སེམས་དཔའ་རྣམས་སངས་རྒྱས་ཀྱི་ཞིང་དེ་ན་ཕལ་ཆེར་རིན་པོ་ཆེའི་པད་མའི་སྟེང་ནས་གོམ་པ་འདོར་ཞིང་འགྲོ་བར་འགྱུར་ཏེ། བྱང་ཆུབ་སེམས་དཔའ་འབྱུང་བ་དེ་དག་ནི་ལས་དང་པོ་པ་མ་ཡིན་ཏེ། དགེ་བའི་རྩ་བ་ཡུན་རིང་པོ་ནས་སྤྱད་པ། ལོ་བརྒྱ་སྟོང་མང་པོར་ཚངས་པར་སྤྱོད་པ་སྤྱད་པ། དེ་བཞིན་གཤེགས་པས་ཡོངས་སུ་བསྟོད་པ། སངས་རྒྱས་ཀྱི་ཡེ་ཤེས་ལ་བརྩོན་པ་མངོན་པར་ཤེས་པ་ཆེན་པོ་ཡོངས་སུ་སྦྱངས་པ་ལས་སྐྱེས་པ། ཆོས་ཀྱི་ཚུལ་ཐམས་ཅད་ལ་མཁས་པ། མཉེན་པ་དྲན་པ་དང་ལྡན་པ་ཡིན་ཏེ། ཤཱ་རིའི་བུ་ཕལ་ཆེར་ནི་བྱང་ཆུབ་སེམས་དཔའ་དེ་
ལྟ་བུས་སངས་རྒྱས་ཀྱི་ཞིང་དེ་ཡོངས་སུ་གང་བར་འགྱུར་རོ། །ཤཱ་རིའི་བུ་འདི་ལྟར་ཡང་དེ་བཞིན་གཤེགས་པ་པད་མའི་འོད་དེའི་ཚེའི་ཚད་ནི། གཞོན་ནུར་གྱུར་པ་མ་གཏོགས་པར་བར་གྱི་བསྐལ་པ་བཅུ་གཉིས་སུ་འགྱུར་རོ། །སེམས་ཅན་དེ་དག་གི་ཚེའི་ཚད་ནི་བར་གྱི་བསྐལ་པ་བརྒྱད་དུ་འགྱུར་རོ། །ཤཱ་རིའི་བུ་དེ་བཞིན་གཤེགས་པ་པད་མའི་འོད་དེའི་བར་གྱི་བསྐལ་པ་བཅུ་གཉིས་འདས་པ་དང་། དགེ་སློང་དག་བྱང་ཆུབ་སེམས་དཔའ་སེམས་དཔའ་ཆེན་པོ་མོས་པ་རྫོགས་པ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་པད་མའི་ཁྱུ་མཆོག་རྣམ་པར་གནོན་པ་ཞེས་བྱ་བར་འཇིག་རྟེན་དུ་འབྱུང་ངོ་ཞེས་བྱང་ཆུབ་སེམས་དཔའ་སེམས་དཔའ་ཆེན་པོ་མོས་པ་རྫོགས་པ་ཞེས་བྱ་བ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས། ཡོངས་སུ་མྱ་ངན་ལས་འདའ་བར་འགྱུར་རོ། །ཤཱ་རིའི་བུ་དེ་བཞིན་གཤེགས་པ་པད་མའི་ཁྱུ་མཆོག་རྣམ་པར་གནོན་པ་དེའི་སངས་རྒྱས་ཀྱི་ཞིང་ཡང་རྣམ་པ་དེ་འདྲ་བར་འགྱུར་རོ། །ཡང་ཤཱ་རིའི་བུ་དེ་བཞིན་གཤེགས་པ་པད་མའི་འོད་དེ་ཡོངས་སུ་མྱ་ངན་ལས་འདས་ནས་བར་གྱི་བསྐལ་པ་སུམ་ཅུ་རྩ་གཉིས་སུ་དམ་པའི་ཆོས་གནས་པར་འགྱུར་རོ། །བར་གྱི་བསྐལ་པ་སུམ་ཅུ་རྩ་གཉིས་སུ་དམ་པའི་ཆོས་ཀྱི་གཟུགས་བརྙན་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མ་འོངས་དུས་ན་ཤཱ་རིའི་བུ་ཁྱོད་ཀྱང་། །རྒྱལ་བ་དེ་བཞིན་གཤེགས་པར་འབྱུང་འགྱུར་ཏེ། །པད་མའི་འོད་ཅེས་བྱ་བ་ཀུན་ཏུ་སྤྱན། །སྲོག་ཆགས་བྱེ་བ་སྟོང་དག་རྣམ་པར་འདུལ། །སངས་རྒྱས་བྱེ་བ་མང་ལ་བཀུར་སྟི་བྱས། །དེར་ནི་སྤྱོད་པ་སྟོབས་རྣམས་རབ་བསྒྲུབས་ནས། །སྟོབས་བཅུ་དག་ཀྱང་མངོན་པར་བསྐྱེད་བྱས་ཏེ། །བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །ཚད་མེད་བསམ་གྱིས་མི་ཁྱབ་བསྐལ་པ་ན། །དེ་ཚེ་བསྐལ་པ་རིན་ཆེན་མང་པོ་འབྱུང་། །འཇིག་རྟེན་མིང་ཡང་དེ་ཚེ་རྡུལ་མེད་པ། །རྐང་གཉིས་གཙོ་བོའི་ཞིང་
ནི་རྣམ་པར་དག །བཻ་དཱུཪྱ་ཡིས་དེ་བཞིན་ས་གཞི་གཡོགས། །གསེར་གྱི་སྐུད་པས་སོ་སོར་རབ་ཏུ་བརྒྱན། །མེ་ཏོག་འབྲས་བུས་བརྒྱན་ཞིང་བལྟ་སྡུག་པའི། །རིན་ཆེན་ཤིང་ལྗོན་བརྒྱ་དང་རབ་ཏུ་ལྡན། །དྲན་ལྡན་བྱང་ཆུབ་སེམས་དཔའ་དེ་ན་མང་། །སྤྱོད་པ་མངོན་པར་བསྒྲུབ་ལ་རབ་མཁས་ཤིང་། །གང་གིས་སངས་རྒྱས་བརྒྱ་ལས་སྤྱོད་བསླབས་པ། །དེ་དག་སངས་རྒྱས་ཞིང་དེར་སྐྱེ་བར་འགྱུར། །རྒྱལ་བ་དེ་ཡི་ཐ་མའི་དུས་ཀྱི་ཚེ། །གཞོན་ནུའི་ས་ལས་ཤིན་ཏུ་འདས་གྱུར་ནས། །འདོད་པ་རྣམ་པར་སྤངས་ནས་མངོན་འབྱུང་སྟེ། །བྱང་ཆུབ་དམ་པ་མཆོག་ཀྱང་ཐོབ་པར་འགྱུར། །དེ་ན་རྒྱལ་བ་དེའི་ཚེ་ཚད་ནི། །བར་གྱི་བསྐལ་པ་བཅུ་གཉིས་ཚང་བར་འགྱུར། །དེ་ན་མི་དེ་དག་གི་ཚེ་ཚད་ནི། །བར་གྱི་བསྐལ་པ་བརྒྱད་དུ་ཐུབ་པར་འགྱུར། །རྒྱལ་བ་དེ་ནི་མྱ་ངན་འདས་ནས་ཀྱང་། །བར་གྱི་བསྐལ་པ་སུམ་ཅུ་གཉིས་ཚང་བར། །ལྷར་བཅས་འཇིག་རྟེན་རྣམས་ལ་ཕན་པའི་ཕྱིར། །དེ་ཡི་ཚེ་ན་དམ་པའི་ཆོས་གནས་སོ། །དམ་པའི་ཆོས་ནུབ་དེ་ཡི་གཟུགས་བརྙན་ཡང་། །བར་གྱི་བསྐལ་པ་སུམ་ཅུ་གཉིས་སུ་གནས། །སྐྱོབ་པ་དེ་ཡི་སྐུ་གདུང་རྒྱས་འགྱུར་ཏེ། །ལྷ་དང་མི་ཡིས་རྟག་ཏུ་རིམ་གྲོ་བྱས། །བཅོམ་ལྡན་འདས་དེ་དེ་ལྟར་འབྱུང་འགྱུར་གྱིས། །ཤཱ་རིའི་བུ་ཁྱོད་རབ་ཏུ་དགའ་བར་གྱིས། །ཟིལ་གྱིས་མི་ནོན་རྐང་གཉིས་གཙོ་བོ་སྟེ། །དེ་ལྟར་འགྱུར་བ་དེ་ནི་ཁྱོད་ཉིད་ཡིན། །དེ་ནས་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་འཁོར་བཞི་པོ་དེ་དག་དང་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ལྷ་མ་ཡིན་དང་ནམ་མཁའ་ལྡིང་དང་མིའམ་ཅི་དང་ལྟོ་འཕྱེ་ཆེན་པོ་དང་མི་དང་མི་མ་ཡིན་པ་རྣམས་ཚེ་དང་ལྡན་པ་ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་འདི། བཅོམ་ལྡན་འདས་ལས་མངོན་སུམ་དུ་ཐོས་ནས། ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང་ཡིད་བདེ་བ་སྐྱེས་ཏེ། རང་རང་གི་གོས་བཅོམ་ལྡན་འདས་ཀྱི་སྐུ་ལ་གསོལ་ཏོ། །ལྷའི་དབང་པོ་བརྒྱ་བྱིན་དང་མི་མཇེད་ཀྱི་བདག་པོ་ཚངས་པ་དང་ལྷའི་བུ་གཞན་བྱེ་བ་བརྒྱ་སྟོང་དག་གིས་ཀྱང་བཅོམ་ལྡན་འདས་ཀྱི་སྐུ་ལ་ལྷའི་ན་བཟའ་དག་གསོལ། ལྷའི་མེ་ཏོག་མན་དཱ་ར་དང་མན་དཱ་ར་ཆེན་
པོ་དག་ཀྱང་མངོན་པར་གཏོར། སྟེང་གི་བར་སྣང་ལ་ལྷའི་གོས་དག་ཀྱང་བསྐོན། ལྷའི་སིལ་སྙན་བརྒྱ་སྟོང་དང་རྔ་དག་ཀྱང་སྟེང་གི་བར་སྣང་ལ་བརྡུངས་ཏེ། མེ་ཏོག་གི་ཆར་ཆེན་པོ་ཡང་མངོན་པར་ཕབ་ནས། ཚིག་འདི་སྐད་དུ་བཅོམ་ལྡན་འདས་ཀྱིས་སྔོན་ཡུལ་བཱ་རཱ་ཎ་སཱིར་དྲང་སྲོང་ལྷུང་བ་རི་དགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་ཏེ། དེང་འདིར་ཡང་བཅོམ་ལྡན་འདས་ཀྱིས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ་ཞེས་སྨྲས་ནས། ལྷའི་བུ་དེ་རྣམས་ཀྱིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བཱ་རཱ་ཎ་སཱིར་འཇིག་རྟེན་ན། །མཚུངས་མེད་གང་དག་དཔའ་ཆེན་གྱིས། །ཕུང་པོའི་སྐྱེ་འཇིག་སྟོན་པ་ཡི། །ཆོས་ཀྱི་འཁོར་ལོ་རབ་བསྐོར་ཏེ། །དེ་ནི་ཐོག་མར་རབ་ཏུ་བསྐོར། །འདྲེན་པས་འདི་དང་ལན་གཉིས་ཏེ། །ཡིད་ཆེས་དཀའ་བ་གང་ལགས་ཏེ། །རྣམ་འདྲེན་ཁྱོད་ཀྱིས་དེ་བཤད་དོ། །འཇིག་རྟེན་མགོན་པོའི་སྤྱན་སྔར་ནི། །བདག་ཅག་ཆོས་མང་ཐོས་ན་ཡང་། །འདི་འདྲ་བ་ཡི་ཆོས་འདི་ནི། །སྔོན་ཆད་ནམ་ཡང་མ་ཐོས་སོ། །དྲང་སྲོང་ཆེན་པོའི་ལྡེམ་ངག་ལ། །དཔའ་བོ་བདག་ཅག་རྗེས་ཡི་རང་། །ཇི་ལྟ་འཇིགས་མེད་ཤཱ་རིའི་བུ། །འཕགས་པ་འདི་ལ་ལུང་བསྟན་བཞིན། །དེ་འདྲ་བདག་ཅག་འཇིག་རྟེན་དུ། །བླ་མེད་སངས་རྒྱས་གྲུབ་གྱུར་ནས། །དགོངས་ཏེ་བཤད་པ་སངས་རྒྱས་ཀྱི། །བྱང་ཆུབ་བླ་མེད་སྟོན་པར་ཤོག །འཇིག་རྟེན་འདི་དང་གཞན་དག་ཏུ། །རྫོགས་པའི་སངས་རྒྱས་མཉེས་བགྱིས་ཏེ། །བདག་ཅག་དགེ་བ་ཅི་བགྱིས་པ། །བྱང་ཆུབ་ཏུ་ཡང་སྨོན་པར་ཤོག །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ། བཅོམ་ལྡན་འདས་ལས་མངོན་སུམ་དུ་ཐོས་ནས། བཅོམ་ལྡན་འདས་བདག་ཐེ་ཚོམ་མ་མཆིས་པར་གྱུར། སོམ་ཉི་དང་བྲལ་བར་གྱུར་ཏོ། །བཅོམ་ལྡན་འདས་གང་དག་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་སྔོན་བཅོམ་ལྡན་འདས་ཀྱིས་སློབ་པའི་ས་ལ་བཀོད་དེ། དགེ་སློང་དག་གང་འདི་སྐྱེ་བ་དང་། རྒ་བ་དང་ན་བ་དང་འཆི་བ་ལས་ཡང་དག་པར་འདའ་བ། ཡོངས་སུ་མྱ་ངན་ལས་འདས་པའི་མཐར་ཐུག་པ། མྱ་ངན་ལས་འདས་པ་ལ་ཡང་དག་པར་གཞོལ་བ་དེ་ནི།
ངའི་ཆོས་འདུལ་བའི་མཐར་ཐུག་པ་ཡིན་ནོ་ཞེས་དེ་སྐད་གཏམས་ཤིང་དེ་སྐད་རྗེས་སུ་བསྟན་པ་འདི་དག་དང་། བཅོམ་ལྡན་འདས་སློབ་པ་དང་མི་སློབ་པའི་དགེ་སློང་བདག་ཏུ་ལྟ་བ་དང་འབྱུང་བར་ལྟ་བ་དང་འཇིག་པར་ལྟ་བའི་ལྟ་བ་ཐམས་ཅད་རྣམ་པར་སྤངས་པ། བཅོམ་ལྡན་འདས་ཀྱི་ཉན་ཐོས་ཉིས་སྟོང་པོ་འདི་དག་ཐམས་ཅད་ཀྱང་བདག་མྱ་ངན་ལས་འདས་པའི་ས་ལ་གནས་སོ་སྙམ་བགྱིད་དེ། འདི་དག་སྔོན་མ་ཐོས་པའི་ཆོས་འདི་ལྟ་བུ་འདི། བཅོམ་ལྡན་འདས་ལས་ཐོས་ནས། ཐེ་ཚོམ་འཚལ་བར་གྱུར་ན། བཅོམ་ལྡན་འདས་ཅི་ནས་འཁོར་བཞི་པོ་འདི་དག་ཐེ་ཚོམ་མ་མཆིས། སོམ་ཉི་མ་མཆིས་པར་གནས་པར་འགྱུར་བར། །དགེ་སློང་འདི་དག་གི་དོགས་པ་བསལ་བའི་སླད་དུ། བཅོམ་ལྡན་འདས་ཀྱིས་ལེགས་པར་བཀའ་སྩལ་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་སེམས་ཅན་མོས་པ་ཐ་དད་པ་དང་། བསམ་པ་དང་ཁམས་ཐ་དད་པ་རྣམས་ཀྱི་བསམ་པ་མཁྱེན་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་ལྟར་སྣ་ཚོགས་མངོན་པར་བསྒྲུབ་པ་དང་། རྒྱུ་དང་གཞི་དང་དཔེ་དང་དམིགས་པ་དང་ངེས་པའི་ཚིག་དང་ཐབས་མཁས་པ་རྣམ་པ་སྣ་ཚོགས་ཀྱིས་ཆོས་སྟོན་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལས་བརྩམས་ཏེ། ཆོས་བསྟན་པ་ཐམས་ཅད་ཀྱིས་བྱང་ཆུབ་སེམས་དཔའི་ཐེག་པ་འདི་ཉིད་ལ་ཡང་དག་པར་འཛུད་དོ་ཞེས་ངས་ཁྱོད་ལ་བསྟན་ཟིན་པ་མ་ཡིན་ནམ། ཤཱ་རིའི་བུ་འོན་ཀྱང་དོན་དེ་རྒྱས་པར་བསྟན་པའི་ཕྱིར་ཁྱོད་ལ་དཔེ་བསྟན་པར་བྱའོ། །དེ་ཅིའི་ཕྱིར་ཞེ་ན། སྐྱེས་བུ་མཁས་པ་ལ་ལ་ནི་སྨྲས་པའི་དོན་དཔེས་ཤེས་པར་འགྱུར་བའི་ཕྱིར་རོ། །ཤཱ་རིའི་བུ་འདི་ལྟ་སྟེ་དཔེར་ན་གྲོང་ངམ་གྲོང་ཁྱེར་རམ་གྲོང་རྡལ་ལམ་ལྗོངས་སམ་ཡུལ་འཁོར་རམ། རྒྱལ་པོའི་ཕོ་བྲང་འཁོར་ལ་ལ་ཞིག་ན་ཁྱིམ་བདག་རྒན་པོ་འཁོགས་པ་གཏུགས་པ་དུས་ཡོལ་བ་དགོག་ཏུ་ཕྱིན་པ་ཕྱུག་པ་ནོར་ཆེ་བ་ལོངས་སྤྱོད་ཆེ་བ་ཞིག་འདུག་ལ། དེའི་ཁང་པ་ཡང་མཐོ་ཞིང་ཡངས་ལ་བརྩིགས་ནས་རིང་དུ་ལོན་པ་འགྲུམས་པ། སྲོག་ཆགས་བརྒྱ་ཕྲག་གཅིག་གམ་གཉིས་སམ་གསུམ་མམ་བཞིའམ་ལྔའི་གནས་སྒོ་གཅིག་པ་ཞིག་ཡོད་དེ། རྩྭས་གཡོགས་
པ་ཁྱམས་རྣམས་ཀྱང་འགྲུམས་པ་ཀ་བའི་རྩ་བ་རུལ་བ། རྩིག་པ་དང་སྒོའི་སྐྱང་ནུལ་གོགས་པར་གྱུར་པའི་ཁང་པ་དེ་ལ་གློ་བུར་དུ་མེའི་ཕུང་པོ་ཆེན་པོ་ངོས་ཐམས་ཅད་ཀུན་ནས་རབ་ཏུ་འབར་བར་གྱུར་ལ། །སྐྱེས་བུ་དེ་ལ་ཡང་ཁྱེའུ་ལྔའམ་བཅུའམ་ཉི་ཤུའམ་མང་ཞིག་ཡོད་དེ། སྐྱེས་བུ་དེ་ནི་ཁང་པ་དེ་ནས་བྱུང་བར་གྱུར་ལ། ཤཱ་རིའི་བུ་དེ་ནས་སྐྱེས་བུ་དེས། བདག་གི་ཁང་པ་ལ་མེའི་ཕུང་པོ་ཆེན་པོ་ཀུན་ནས་འབར་བ་མཐོང་སྟེ། སྔངས་སྐྲག་ནས་སེམས་མི་དགའ་བར་གྱུར་ཏེ། འདི་ལྟར་བདག་ནི་མེའི་ཕུང་པོ་ཆེན་པོ་འདིས་མ་རེག་མ་ཚིག་ཅིང་བདེ་བར་མྱུར་དུ་ཁྱིམ་འབར་བ་འདིའི་སྒོར་བྱུང་སྟེ་འགྲོ་ནུས་མོད་ཀྱི། བདག་གི་བུ་བྱིས་པ་གཞོན་ནུ་འདི་དག་ཁྱིམ་འབར་བ་འདི་ན་རྩེད་མོ་དག་གིས་རྩེ་དགའ་ཞིང་དགའ་མགུར་སྤྱོད་དེ། ཁྱིམ་འདི་ཚིག་པར་མ་ཚོར་མི་ཤེས་མ་རིག་མ་རྟོགས་ནས་འདི་ལྟར་མེའི་ཕུང་པོ་ཆེན་པོས་ཤིན་ཏུ་གདུངས་ཏེ། སྡུག་བསྔལ་གྱི་ཕུང་པོ་ཆེན་པོས་རེག་ཀྱང་མི་དགར་མི་བྱེད་དེ། སྡུག་བསྔལ་དུ་ཡང་ཡིད་ལ་མི་འཛིན། ཕྱིར་འབྱུང་བར་ཡང་ཡིད་ལ་བྱ་བ་མི་སྐྱེད་དོ་སྙམ་དུ་སེམས་སོ། །ཤཱ་རིའི་བུ་སྐྱེས་བུ་དེ་ཡང་སྟོབས་དང་ལྡན་ཞིང་ལག་སྟོབས་ཆེ་བ་ཡིན་ཏེ། དེ་འདི་ལྟར་བདག་སྟོབས་དང་ལྡན་ཞིང་ལག་སྟོབས་ཡོད་ན། བདག་གིས་ཁྱེའུ་འདི་དག་ཐམས་ཅད་གཅིག་ཏུ་བསྡུས་ལ། པང་པར་བླངས་ཏེ་ཁྱེར་ལ་ཁྱིམ་འདི་ནས་བྱུང་ངོ་སྙམ་དུ་བསམས་པ་དང་། དེས་ཀྱང་འདི་སྙམ་དུ་བསམས་ཏེ། ཁང་པ་འདི་སྒོ་གཅིག་པུ་ཡོད་ལ། སྒོ་དེ་ཡང་དོག་གཞོན་ནུ་འདི་དག་ནི་གཡོ་ཞིང་རྒོད་དེ་བྱིས་པར་གྱུར་པས། འཐེན་པར་འགྱུར་དུ་འོང་སྟེ། དེ་དག་མེའི་ཕུང་པོ་ཆེན་པོ་འདིས་ཚུལ་མ་ཡིན་པར་ཉོན་མོངས་པར་འགྱུར་གྱིས། འདི་དག་ལ་སྦྲན་ཏོ་སྙམ་དུ་དེ་ལྟར་བསམས་ནས། གཞོན་ནུ་དེ་དག་ལ་སྨྲས་པ། ཁྱིམ་འདི་ལ་མེའི་ཕུང་པོ་ཆེན་པོ་འབར་ཏེ། འདིར་ཐམས་ཅད་མེའི་ཕུང་པོ་ཆེན་པོ་འདིས་ཚིག་ནས། ཚུལ་མ་ཡིན་པར་ཉོན་མོངས་པར་འགྱུར་དུ་འོང་གིས། གཞོན་ནུ་ཁྱེད་ཚུར་ཤོག །ཕྱིར་བྱུང་ཞེས་བྱས་པ་དང་། དེ་ལྟར་ཕན་པར་འདོད་པའི་སྐྱེས་བུ་དེས་དེ་སྐད་དུ་བསྒོ་བ། གཞོན་ནུ་དེ་དག་གིས་མེ་འབར་བ་འདི་ལྟ་གོ་ཅི་ཞིག་ཅེས་མི་ཤེས་ནས་མི་དགར་མི་བྱེད། མི་འཇིགས་མི་སྐྲག །འཇིགས་པར་མ་གྱུར་ཏེ་མི་སེམས་ཕྱིར་འབྱུང་དུ་
མི་བཏུབ་ཅིང་མ་རིག་མི་ཤེས་ཏེ། གཞན་དུ་ན་དེ་དང་དེ་དག་ཏུ་འཕྱན་ཞིང་ཕྱི་ཕྱིར་རྒྱུག་སྟེ་ཕ་དེ་ལ་ལྟའོ། །དེ་ཅིའི་ཕྱིར་ཞེ་ན། དེ་དག་འདི་ལྟར་བྱིས་པར་གྱུར་པའི་ཕྱིར་རོ། །དེ་ནས་ཡང་སྐྱེས་བུ་དེ་འདི་སྙམ་དུ་སེམས་ཏེ། ཁྱིམ་འདི་ལ་མེའི་ཕུང་པོ་ཆེན་པོ་འབར་ཏེ། འདིར་བདག་དང་གཞོན་ནུ་འདི་དག་ཚུལ་མ་ཡིན་པར་མེའི་ཕུང་པོ་ཆེན་པོ་འདིས་ཉོན་མོངས་པར་འགྱུར་དུ་འོང་གིས། འདི་ལྟར་བདག་གིས་ཐབས་མཁས་པས་གཞོན་ནུ་འདི་དག་ཁྱིམ་འདི་ནས་གདོན་ཏོ་སྙམ་ནས། སྐྱེས་བུ་དེས་གཞོན་ནུ་དེ་དག་གི་བསམ་པ་ཤེས། མོས་པ་རིག་པར་གྱུར་ཏེ། གཞོན་ནུ་དེ་དག་གི་བརྩེན་པ་ནི་དུ་མ་སྟེ། རྣམ་པ་ཐ་དད་པ་ཡང་དུ་མ་ཞིག་ཡིན་ལ། དགའ་བར་འགྱུར་བ་ལ་འདོད་པ་དང་མཛེས་པ་དང་སྡུག་པ་དང་ཡིད་དུ་འོང་བ་རྣམ་པ་དུ་མ་ཡིན་ན་དེ་དག་ཀྱང་དཀོན་པར་གྱུར་ཏེ། དེ་ནས་སྐྱེས་བུ་དེས་གཞོན་ནུ་དེ་དག་གི་བསམ་པ་ཤེས་པས་འདི་སྐད་ཅེས་སྨྲས་ཏེ། གཞོན་ནུ་དག་ཁྱེད་ཀྱི་རྩེད་མོར་བྱ་བ་དགའ་བར་འགྱུར་བ། ངོ་མཚར་རྨད་དུ་བྱུང་བ། གང་མ་རྙེད་པའི་ཕྱིར་མི་དགའ་བར་གྱུར་པ་དེ་དག་ཁ་དོག་སྣ་ཚོགས་རྣམ་པ་མང་པོ་དེ་འདི་ལྟ་སྟེ། གླང་གི་ཤིང་རྟ་དང་། རའི་ཤིང་རྟ་དང་། རི་དགས་ཀྱི་ཤིང་རྟ་ཁྱེད་ཀྱིས་ཇི་ལྟར་བསམས་པ། མཛེས་པ་དང་སྡུག་པ་དང་ཡིད་དུ་འོང་བ་དེ་དག་ཐམས་ཅད་ཁྱེད་རྩེར་གཞུག་པའི་ཕྱིར། ངས་ཁང་པའི་ཕྱི་སྒོར་བཀོད་ཀྱིས་ཁང་པ་འདི་ནས་ཁྱེད་ཕྱིར་བྱུང་ལ་རྒྱུགས་ཏེ་ཤོག་ཤིག་དང་། ངས་ཁྱེད་ཅག་སུ་ཅི་འདོད་པ་དེ་ལ་དེ་སྦྱིན་གྱིས། དེ་དག་གིས་ཕྱིར་མྱུར་དུ་རྒྱུགས་ཏེ་ཤོག་ཤིག་ཅེས་བྱས་པ་དང་། གཞོན་ནུ་དེ་དག་འདོད་པ་དང་། མཛེས་པ་དང་སྡུག་པ་དང་ཡིད་དུ་འོང་བ་ཇི་ལྟ་བུར་འདོད་པ་དང་ཇི་ལྟ་བུར་བསམས་པ་རྣམས་ཀྱི་མིང་ཐོས་ནས་འབར་བར་གྱུར་པའི་ཁང་པ་དེ་ནས་རྩེད་མོར་བྱ་བ་དང་། དགའ་བར་བྱ་བའི་ཕྱིར་མྱུར་བ་ཁོ་ནར་བརྩོན་འགྲུས་བརྩམས་ནས། མཐུ་དང་ལྡན་པའི་བང་གིས་གཅིག་ལ་གཅིག་སྡོད་པ་མེད་པར་སུ་སྔ་དེ་བས་ཀྱང་། སུ་སྔ་ཞེས་ལུས་གཅིག་ལ་གཅིག་བསྔོས་ཤིང་རྒྱུགས་ཏེ། ཁྱིམ་འབར་བ་དེ་ནས་མྱུར་དུ་ཕྱིར་འཐོན་ཏོ། །དེ་ནས་སྐྱེས་བུ་དེས་བྱིས་པ་དེ་དག་བདེ་ཞིང་ལེགས་པར་འཐོན་པ་མཐོང་ནས། འཇིགས་པ་མེད་པར་གྱུར་པར་རིག་སྟེ། གྲོང་གི་དཔོང་ས་བླ་གབ་མེད་པར་འདུག་
ནས་དགའ་བ་དང་རངས་པ་སྐྱེས་ཏེ། མྱ་ངན་མེད་ཅིང་སྒྲིབ་པ་དང་བྲལ་ནས། འཇིགས་པ་མེད་པ་ཐོབ་པར་གྱུར་ཏེ། དེ་ནས་བྱིས་པ་དེ་དག་ཕ་དེ་ག་ལ་འདུག་པ་དེར་དོང་ནས་ཕྱིན་པ་དང་། འདི་སྐད་དུ་ཡབ་རྩེད་མོར་བགྱི་བ་རྣམ་པ་མང་པོ་དགའ་བར་འགྱུར་བ་དེ་དག་འདི་ལྟ་སྟེ། གླང་གི་ཤིང་རྟ་དང་རའི་ཤིང་རྟ་དང་། རི་དགས་ཀྱི་ཤིང་རྟ་བདག་ཅག་ལ་སྩལ་དུ་གསོལ་ཞེས་སྨྲས་པ་དང་། ཤཱ་རིའི་བུ་དེ་ནས་སྐྱེས་བུ་དེས་བདག་གི་བུ་རྣམས་ལ་རླུང་ལྟར་མགྱོགས་ཤིང་མཐུ་དང་ལྡན་པའི་གླང་གི་ཤིང་རྟ་བྱིན་ཏེ། རིན་པོ་ཆེ་སྣ་བདུན་ལས་བྱས་པ། ལོགས་དང་ལྡན་པ། དྲིལ་བུ་གཡེར་ཁའི་དྲ་བ་རབ་ཏུ་སྤྱངས་པ། མཐོ་ཞིང་བརྟན་པ། རིན་པོ་ཆེ་ངོ་མཚར་རྨད་དུ་བྱུང་བའི་རྒྱན་གྱིས་བརྒྱན་པ། རིན་པོ་ཆེའི་ཕྲེང་བས་མཛེས་པར་བྱས་པ། མེ་ཏོག་གི་ཕྲེང་བས་བརྒྱན་པ། ཤིང་བལ་གྱི་སྟན་བཏིང་བ་རས་བཅོས་བུ་དང་དར་གྱིས་གཡོགས་པ། རྒྱབ་རྟེན་དམར་པོ་གཉིས་སུ་གཞག་པ། གླང་དཀར་པོ་ཐལ་ཀར་ཤིན་ཏུ་མགྱོགས་པ་དག་དང་བཅས་ནས། བ་དན་དང་ལྡན་པ་སྐྱེས་བུ་མང་པོས་བཟུང་བ། གླང་སྟོབས་དང་ལྡན་ཞིང་རླུང་བཞིན་དུ་མགྱོགས་པ། ཁ་དོག་འཐུན་པ་རྣམ་པ་སྣ་ཚོགས་པའི་གླང་གི་ཤིང་རྟ་བྱིས་པ་རྣམས་ལ་རེ་རེ་བྱིན་ནོ། །ཤཱ་རིའི་བུ་དེ་ཅིའི་ཕྱིར་ཞེ་ན། མི་དེ་དེ་ལྟར་ཕྱུག་ལ་ནོར་ཆེ་བ། བང་མཛོད་མང་བས་དེས་འདི་སྙམ་དུ་སེམས་ཏེ། བདག་གིས་བྱིས་པ་འདི་རྣམས་ལ་བཞོན་པ་ངན་པ་བྱིན་ཏེ། བདག་ལ་ཅིག་ཞིག་བྱ་སྙམ་མོ། །དེ་ཅིའི་ཕྱིར་ཞེ་ན། གཞོན་ནུ་འདི་དག་ཀུན་ཀྱང་བདག་ཉིད་ཀྱི་བུ་སྟེ། ཐམས་ཅད་ཀྱང་བདག་ལ་སྡུག་ཅིང་ཡིད་དུ་འོང་ལ་བདག་ལ་ཡང་བཞོན་པ་ཆེན་པོ་འདི་ལྟ་བུ་དག་ཡོད་ན། བདག་གིས་གཞོན་ནུ་འདི་དག་ཐམས་ཅད་ལ་སྙོམས་པར་བསམ་གྱི། མི་སྙོམས་པར་མི་བྱའོ། །བདག་ཀྱང་བང་མཛོད་མང་གིས་བདག་གིས་སེམས་ཅན་ཐམས་ཅད་ལ་ཡང་བཞོན་པ་ཆེན་པོ་འདི་འདྲ་བ་དག་སྦྱིན་ན། བདག་གི་བུ་རྣམས་ལ་ལྟ་ཅི་སྨོས་སྙམ་པའི་ཕྱིར་རོ། །དེའི་ཚེ་གཞོན་ནུ་དེ་དག་ཀྱང་བཞོན་པ་ཆེན་པོ་དེ་དག་ལ་ཞོན་ནས། ངོ་མཚར་དང་རྨད་དུ་བྱུང་བ་ཐོབ་པར་གྱུར་ན་ཤཱ་རིའི་བུ་འདི་ཇི་སྙམ་དུ་སེམས། སྐྱེས་བུ་དེས་གཞོན་ནུ་དེ་དག་ལ་འདི་ལྟར་སྔོན་དུ་བཞོན་པ་རྣམ་པ་གསུམ་བསྟན་ལ། ཕྱིས་ཐམས་ཅད་ཀྱང་བཞོན་པ་ཆེན་པོ་བྱིན་ཏེ། བཞོན་པ་རླབས་པོ་ཆེ་བྱིན་
ན་བརྫུན་དུ་སྨྲས་པར་མི་འགྱུར་རམ། ཤཱ་རིའི་བུས་གསོལ་པ། བཅོམ་ལྡན་འདས་དེ་ལྟར་མ་ལགས་སོ། །བདེ་བར་གཤེགས་པ་དེ་ལྟ་མ་ལགས་སོ། །སྐྱེས་བུ་དེས་འདི་ལྟར་ཐབས་མཁས་པས་བྱིས་པ་དེ་རྣམས་ཁྱིམ་འབར་བ་དེ་ནས་ཕྱུང་སྟེ། སྲོག་སྩལ་བའི་སླད་དུ་དེ་ཉིད་ཀྱིས་རྒྱུས་སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་གི་ལུས་ཐོབ་པ་ཉིད་ཀྱིས། རྩེད་མོར་བགྱི་བ་ཐམས་ཅད་ཀྱང་ཐོབ་པ་ལགས་ཏེ། འདི་ལྟར་བཅོམ་ལྡན་འདས་སྐྱེས་བུ་དེས་གཞོན་ནུ་དེ་དག་ལ་ཤིང་རྟ་གཅིག་མ་སྩལ་དུ་ལགས་ཀྱང་། བཅོམ་ལྡན་འདས་སྐྱེས་བུ་དེ་ཤོ་བེ་བར་མཆི་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སྐྱེས་བུ་དེས་ཐོག་མ་ནས་ཐབས་མཁས་པས་གཞོན་ནུ་དེ་དག་བདག་གིས་སྡུག་བསྔལ་གྱི་ཕུང་པོ་ཆེན་པོ་ལས་ཐར་བར་བགྱིའོ་སྙམ་དུ་བསམས་པའི་སླད་དུ་སྟེ། རྣམ་གྲངས་འདིས་ཀྱང་སྐྱེས་བུ་དེ་ཤོ་བེ་མཆི་བ་མ་ལགས་ན། སྐྱེས་བུ་དེ་བདག་ལ་བང་མཛོད་མང་པོ་ཡང་མཆིས་ལ། བུ་ཡང་སྡུག་པར་བསམས་ནས། ལེགས་སུ་འདོད་པས་སྤུ་མདོག་འཐུན་པའི་བཞོན་པ། བཞོན་པ་ཆེན་པོ་སྩལ་བ་ལྟ་སྨོས་ཀྱང་ཅི་འཚལ་ཏེ། བཅོམ་ལྡན་འདས་སྐྱེས་བུ་དེ་ཤོ་བེ་མཆི་བ་མ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ་ལེགས་སོ་ལེགས་སོ། །དེ་དེ་བཞིན་ཏེ་ཇི་སྐད་སྨྲས་པ་བཞིན་ནོ། །ཤཱ་རིའི་བུ་དེ་བཞིན་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིགས་པ་ཐམས་ཅད་སེལ་བ། འཚེ་བ་དང་འཁྲུགས་པ་དང་གནོད་པ་དང་སྡུག་བསྔལ་བ་དང་ཡིད་མི་བདེ་བ་དང་མ་རིག་པའི་མུན་པ་མུན་ནག་གི་རབ་རིབ་སྒྲིབ་པ་དང་། ཡོངས་སུ་དཀྲིས་པ་ཐམས་ཅད་ལས་ཡོང་ཡེ་རྣམ་པར་གྲོལ་བ། དེ་བཞིན་གཤེགས་པའི་ཡེ་ཤེས་དང་སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་པ་དང་ལྡན་པ། རྫུ་འཕྲུལ་གྱི་སྟོབས་ཀྱིས་ཤིན་ཏུ་སྟོབས་དང་ལྡན་པ་འཇིག་རྟེན་གྱི་ཕ། ཐབས་ཆེན་པོ་ལ་མཁས་པའི་ཡེ་ཤེས་དམ་པའི་ཕ་རོལ་ཏུ་སོན་
པ། སྙིང་རྗེ་ཆེན་པོ་མི་སྐྱོ་བའི་ཡིད་ཀྱིས་ཕན་པར་འདོད་པ། སྙིང་བརྩེ་བ་དང་ལྡན་པ་དེ། ཁམས་གསུམ་སྡུག་བསྔལ་གྱི་ཕུང་པོ་ཆེན་པོ་འབར་བ་གདུང་ཕྱམ་དང་སྟེང་གི་གཡོགས་མ་ཞིག་པའི་ཁང་པ་དང་འདྲ་བར་སེམས་ཅན་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པ་དང་། མ་རིག་པའི་མུན་པ་མུག་ནག་གི་རབ་རིབ་སྒྲིབ་པ་དང་ཡོངས་སུ་དཀྲིས་པར་ཞུགས་པ་རྣམས་འདོད་ཆགས་དང་ཞེ་སྡང་དང་གཏི་མུག་ལས་ཡོངས་སུ་གྲོལ་བར་བྱ་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གཟུད་པའི་ཕྱིར་འབྱུང་སྟེ། དེ་བྱུང་མ་ཐག་ཏུ་སེམས་ཅན་རྣམས་སྐྱེ་བ་དང་རྒ་བ་དང་ན་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུག་པས་སྲེག་པ་དང་བཙོ་བ་དང་གདུང་བ་དང་ཡོངས་སུ་གདུང་བ་དང་ལོངས་སྤྱོད་ཀྱི་ཕྱིར་འདོད་པའི་རྒྱུའི་གཞིས་སྡུག་བསྔལ་རྣམ་པ་མང་པོ་རབ་ཏུ་མྱོང་བ་དང་། ད་ལྟར་གྱི་ཚེ་ལ་ཚོལ་བ་དང་ཡོངས་སུ་བསགས་པའི་ཕྱིར། ཚེ་ཕྱི་མ་ལ་སེམས་ཅན་དམྱལ་བ་དང་དུད་འགྲོའི་སྐྱེ་གནས་དང་གཤིན་རྗེའི་འཇིག་རྟེན་དུ་སྡུག་བསྔལ་རྣམ་པ་མང་པོ་རབ་ཏུ་མྱོང་བ་དང་། ལྷ་དང་མི་དབུལ་པོ་དང་མི་སྡུག་པ་དང་ཕྲད་པ་དང་སྡུག་པ་དང་བྲལ་བའི་སྡུག་བསྔལ་རབ་ཏུ་མྱོང་བ་དེ་ཉིད་དུ། སྡུག་བསྔལ་གྱི་ཕུང་པོར་འཁོར་ཞིང་། རྩེ་དགའ་ལ་དགའ་མགུར་སྤྱོད་དེ། མི་སྐྲག་མི་དངང་དངང་བར་མི་འགྱུར། མ་རིག་མ་ཚོར་སྐྱོ་བར་མི་བྱེད་འབྱུང་བ་མི་ཚོལ་བར་ཁང་པ་འབར་བ་དང་འདྲ་བའི་ཁམས་གསུམ་དེར་མངོན་པར་དགའ་ནས། དེ་དང་དེ་དག་ཏུ་རྒྱུག་སྟེ། སྡུག་བསྔལ་གྱི་ཕུང་པོ་ཆེན་པོ་དེ་ལྟ་བུས་གཟིར་ཀྱང་། སྡུག་བསྔལ་དུ་འདུ་ཤེས་པ་ཡིད་ལ་བྱ་བ་མི་སྐྱེད་པར་གཟིགས་སོ། །ཤཱ་རིའི་བུ་དེ་ལ་ང་ནི་སེམས་ཅན་འདི་དག་གི་ཕ་སྟེ། ངས་སེམས་ཅན་འདི་དག་སྡུག་བསྔལ་གྱི་ཕུང་པོ་ཆེན་པོ་འདི་ལྟ་བུ་འདི་ལས་ཡོངས་སུ་ཐར་བར་བྱ་ཞིང་ངས་གང་གི་སེམས་ཅན་འདི་དག་རྩེ་བ་དང་དགའ་བ་དང་དགའ་མགུར་སྤྱོད་པ་དང་རྣམ་པར་རྩེ་བར་བྱེད་པར་འགྱུར་བ་སངས་རྒྱས་ཀྱི་ཡེ་ཤེས་བདེ་བ་དཔག་ཏུ་མེད་ཅིང་བསམ་གྱིས་མི་ཁྱབ་པ། སེམས་ཅན་འདི་དག་ལ་སྦྱིན་
པ་བྱ་བར་དེ་བཞིན་གཤེགས་པས་དེ་ལྟར་གཟིགས་སོ། །ཤཱ་རིའི་བུ་དེ་ལ་ང་ནི་ཡེ་ཤེས་ཀྱི་སྟོབས་དང་ལྡན་ཞིང་རྫུ་འཕྲུལ་གྱི་སྟོབས་དང་ལྡན་ཞེས་གལ་ཏེ་ཐབས་མ་ཡིན་པས་སེམས་ཅན་འདི་དག་ལ་དེ་བཞིན་གཤེགས་པའི་ཡེ་ཤེས་གཟིགས་པ་དང་སྟོབས་དང་མི་འཇིགས་པ་རྣམས་ཐོབ་པར་བྱས་སུ་ཟིན་ན་སེམས་ཅན་འདི་དག་ཆོས་འདི་དག་གིས་ངེས་པར་འབྱུང་བར་མི་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་འདི་དག་ནི་འདོད་པའི་ཡོན་ཏན་ལྔ་པོ་དག་ལ་ཤིན་ཏུ་ཆགས་པ། སེམས་ཅན་འདི་དག་ནི་ཁམས་གསུམ་གྱི་དགའ་བ་ལ་ཤིན་ཏུ་ཆགས་པ། སྐྱེ་བ་དང་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་ལས་མ་ཐར་བ། བསྲེག་བཙོ་གདུང་ཡོངས་སུ་གདུང་བ་སྟེང་གཡོགས་དང་། གདུང་ཕྱམ་འབར་བའི་ཁྱིམ་དང་འདྲ་བའི་ཁམས་གསུམ་ནས་མ་བྱུང་བ་སྟེ། དེ་དག་གིས་སངས་རྒྱས་ཀྱི་ཡེ་ཤེས་ལ་ཇི་ལྟར་ལོངས་སྤྱོད་པར་འགྱུར་ཞེས་དེ་བཞིན་གཤེགས་པས་དེ་ལྟར་གཟིགས་སོ། །དེ་ལ་ཤཱ་རིའི་བུ་འདི་ལྟར་སྐྱེས་བུ་ལག་སྟོབས་ཅན་དེས་ལག་སྟོབས་བཞག་སྟེ། ཐབས་མཁས་པས་གཞོན་ནུ་དེ་དག་ཁྱིམ་འབར་བ་དེ་ནས་འདོན་ཏེ་བཏོན་ནས། དེ་དག་ཕྱིས་རླབས་ཆེ་བའི་བཞོན་པ་ཆེན་པོ་བྱིན་པ་དེ་བཞིན་དུ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་བཞིན་གཤེགས་པའི་ཡེ་ཤེས་དང་སྟོབས་དང་། མི་འཇིགས་པ་དང་ལྡན་པ་ཡང་། དེ་བཞིན་གཤེགས་པའི་ཡེ་ཤེས་དང་སྟོབས་དང་མི་འཇིགས་པ་བཞག་སྟེ། ཐབས་མཁས་པའི་ཡེ་ཤེས་ཀྱིས་གདུང་ཕྱམ་དང་སྟེང་གཡོགས་འབར་བའི་ཁྱིམ་དང་འདྲ་བའི་ཁམས་གསུམ་ནས་སེམས་ཅན་རྣམས་འདོན་པའི་ཕྱིར་ཐེག་པ་གསུམ་སྟོན་པ་འདི་ལྟ་སྟེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་གྱིས་སེམས་ཅན་རྣམས་དྲངས་ཏེ། དེ་དག་ལ་འདི་སྐད་ཅེས་གསུངས་ཏེ། ཁྱེད་ཅག་ཁྱིམ་འབར་བ་དང་འདྲ་བའི་ཁམས་གསུམ་གྱི་གཟུགས་དང་། སྒྲ་དང་། དྲི་
དང་། རོ་དང་། རེག་བྱ་ངན་པ་ལ་དགའ་བར་མ་བྱེད་ཅིག །ཁྱེད་ཅག་ཁམས་གསུམ་འདིར་མངོན་པར་དགའ་བས་འདོད་པ་ལྔའི་ཡོན་ཏན་དང་བཅས་པའི་སྲེད་པས། བསྲེག་བཙོ་གདུང་ཡོངས་སུ་གདུང་བར་གྱུར་གྱིས། ཁམས་གསུམ་འདི་ནས་འབྱུང་བ་འདི་ལྟ་སྟེ། ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་བྱང་ཆུབ་སེམས་དཔའི་ཐེག་པ་སྟེ། ཐེག་པ་གསུམ་པོ་དག་ཐོབ་པར་གྱིས་ཤིག །ང་ནི་གནས་འདི་ལ་ཁྱེད་ཀྱི་སྙིང་སྡེང་བ་སྟེ། ངས་ཁྱེད་ལ་ཐེག་པ་འདི་གསུམ་སྦྱིན་གྱིས། ཁམས་གསུམ་ནས་འབྱུང་བའི་ཕྱིར་བརྩོན་པར་གྱིས་ཤིག །ཀྱེ་སེམས་ཅན་དག་ཐེག་པ་འདི་དག་ནི་གང་འཕགས་པ་རྣམས་ལ། འཕགས་པ་རྣམས་ཀྱིས་རབ་ཏུ་བསྟོད་པ། དགའ་བ་ཆེན་པོ་དང་ལྡན་པ་ཡིན་ཏེ། ཁྱེད་ཅག་མི་ཕངས་པར་རྩེན་ཞིང་དགའ་ལ། དགའ་མགུར་སྤྱོད་པར་འགྱུར་གྱིས། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་དགའ་བ་ཆེན་པོ་རབ་ཏུ་མྱོང་བར་འགྱུར་རོ། །བདེ་བ་དང་ཡིད་བདེ་བ་ཆེན་པོ་དང་ཡང་ལྡན་པར་འགྱུར་ཞེས་གསུང་ངོ་། །ཤཱ་རིའི་བུ་དེ་ལ་སེམས་ཅན་གང་མཁས་པར་གྱུར་པ་དེ་དག་ནི་དེ་བཞིན་གཤེགས་པ་འཇིག་རྟེན་གྱི་ཕ་ལ་མངོན་པར་ཡིད་ཆེས་པར་འགྱུར་རོ། །མངོན་པར་ཡིད་ཆེས་ནས་ཀྱང་དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དོ། །དེ་ལ་སེམས་ཅན་ཁ་ཅིག་གཞན་གྱི་སྒྲ་ཐོས་པའི་རྗེས་སུ་འགྲོ་བར་འདོད་པ་དག་ནི། བདག་ཡོངས་སུ་མྱ་ངན་ལས་བཟླ་བ་དང་། འཕགས་པའི་བདེན་པ་བཞི་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་ཉན་ཐོས་ཀྱི་ཐེག་པ་འདོད་ཅིང་། ཁམས་གསུམ་ནས་བྱུང་བ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་རི་དགས་ཀྱི་ཤིང་རྟ་འདོད་དེ་ཕྱིར་བྱུང་བ་ལྟ་བུའོ། །སེམས་ཅན་གཞན་ཡང་སློབ་དཔོན་མེད་པའི་ཡེ་ཤེས་དང་། དུལ་བར་གནས་པ་དང་ཞི་གནས་འདོད་པ་དེ་དག་ནི། བདག་ཡོངས་སུ་མྱ་ངན་ལས་བཟླ་བ་དང་། རྒྱུ་དང་རྐྱེན་ཡོངས་སུ་ཁོང་དུ་ཆུད་
པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་རང་སངས་རྒྱས་ཀྱི་ཐེག་པ་འདོད་ཅིང་ཁམས་གསུམ་ནས་བྱུང་བ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་རའི་ཤིང་རྟ་འདོད་དེ་བྱུང་བ་ལྟ་བུའོ། །ཡང་སེམས་ཅན་ཁ་ཅིག་ཐམས་ཅད་མཁྱེན་པའི་ཡེ་ཤེས་སངས་རྒྱས་ཀྱི་ཡེ་ཤེས་རང་འབྱུང་གི་ཡེ་ཤེས་སློབ་དཔོན་མེད་པའི་ཡེ་ཤེས་འདོད་པ་དག་ནི། སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བ་དང་། ལྷ་དང་། མི་དང་། སྐྱེ་བོ་ཕལ་པོ་ཆེའི་དོན་དང་། ཕན་པ་དང་། བདེ་བ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བ་དང་། དེ་བཞིན་གཤེགས་པའི་ཡེ་ཤེས་དང་། སྟོབས་དང་མི་འཇིགས་པ་ཁོང་དུ་ཆུད་པར་བྱ་བའི་ཕྱིར། དེ་བཞིན་གཤེགས་པའི་བསྟན་པ་ལ་བརྩོན་པར་བྱེད་དེ། དེ་དག་ནི་ཐེག་པ་ཆེན་པོ་འདོད་ཅིང་། ཁམས་གསུམ་ནས་འབྱུང་བ་ཞེས་བྱའོ། །དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཞེས་བྱ་སྟེ། དཔེར་ན་ཁྱིམ་འབར་བ་དེ་ནས་བྱིས་པ་ཁ་ཅིག་གླང་གི་ཤིང་རྟ་འདོད་དེ་ཕྱིར་བྱུང་བ་ལྟ་བུའོ། །ཤཱ་རིའི་བུ་འདི་ལྟ་སྟེ་དཔེར་ན། མི་དེས་ཁྱིམ་འབར་བ་དེ་ནས་གཞོན་ནུ་དེ་དག་འཐོན་པར་མཐོང་ནས། བདེ་ཞིང་ལེགས་པར་ཐར་ཏེ། འཇིགས་པ་མེད་པར་རིག་ལ། བདག་ཀྱང་ནོར་མང་བར་ཤེས་ནས། བྱིས་པ་དེ་དག་ལ་བཞོན་པ་རླབས་པོ་ཆེ་གཅིག་བྱིན་པ་དེ་བཞིན་དུ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་སེམས་ཅན་བྱེ་བ་དུ་མ་སྡུག་བསྔལ་དང་། འཇིགས་པ་དང་། བག་ཚ་བ་དང་། གཙེ་བས་ཡོངས་སུ་གང་བའི་ཁམས་གསུམ་ནས་ཡོངས་སུ་ཐར་ཏེ། དེ་བཞིན་གཤེགས་པའི་བསྟན་པའི་སྒོ་ནས་བྱུང་ནས། འཇིགས་པ་དང་། བག་ཚ་བ་དང་། གཙོ་བའི་གནོད་པ་དག་ལས་ཡོངས་སུ་ཐར་ཏེ་མྱ་ངན་ལས་འདས་པའི་བདེ་བ་ཐོབ་པར་གཟིགས་ནས། ཤཱ་རིའི་བུ་དེ་དག་ལ་དེའི་ཚེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདག་ལ་ཡེ་ཤེས་དང་
སྟོབས་དང་མི་འཇིགས་པའི་མཛོད་མང་བར་མཁྱེན་ཏེ། དེ་དག་ཐམས་ཅད་ཀྱང་བདག་ཉིད་ཀྱི་བུ་ཡིན་པར་ཐུགས་སུ་ཆུད་ནས་སེམས་ཅན་དེ་དག་ཐམས་ཅད་ཀྱང་སངས་རྒྱས་ཀྱི་ཐེག་པ་ཉིད་ཀྱིས་ཡོངས་སུ་མྱ་ངན་ལས་འདའ་བར་མཛད་ཀྱི། སེམས་ཅན་གང་ལ་ཡང་སོ་སོར་བདག་གི་མྱ་ངན་ལས་འདས་པ་མི་གསུང་སྟེ། སེམས་ཅན་དེ་དག་ཐམས་ཅད་ཀྱང་དེ་བཞིན་གཤེགས་པའི་མྱ་ངན་ལས་འདའ་བར་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདའ་བར་མཛད་དོ། །ཤཱ་རིའི་བུ་སེམས་ཅན་གང་དག་ཁམས་གསུམ་ནས་ཐར་བར་གྱུར་པ་དེ་དག་ལ་ཡང་དེ་བཞིན་གཤེགས་པས་བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ། འཕགས་པའི་བདེན་པའི་མཆོག་དང་རྩེན་པ་དགའ་བར་འགྱུར་བ་ཐམས་ཅད་ཁ་དོག་གཅིག་པ་སྦྱིན་པར་མཛད་དོ། །ཤཱ་རིའི་བུ་འདི་ལྟ་སྟེ་དཔེར་ན། སྐྱེས་བུ་དེས་འདི་ལྟར་གཞོན་ནུ་དེ་དག་ལ་བཞོན་པ་གསུམ་བསྟན་ནས་དེ་དག་ཐམས་ཅད་ལ་བཞོན་པ་ཆེན་པོ་གཅིག་བྱིན་ཏེ། རིན་པོ་ཆེ་སྣ་བདུན་ལས་བྱས་པ། རྒྱན་ཐམས་ཅད་ཀྱིས་བརྒྱན་པ། ཁ་དོག་གཅིག་པ། བཞོན་པ་རླབས་པོ་ཆེ་བཞོན་པའི་མཆོག་ཐམས་ཅད་ལ་བྱིན་པའི་ཕྱིར། བརྫུན་དུ་སྨྲ་བ་མ་ཡིན་པ་དེ་བཞིན་དུ། ཤཱ་རིའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། འདི་ལྟར་ཐབས་མཁས་པས། དང་པོ་ཐེག་པ་གསུམ་བསྟན་ནས། ཕྱིས་ཐེག་པ་གཅིག་པ་ཉིད་ཀྱིས་སེམས་ཅན་རྣམས་ཡོངས་སུ་མྱ་ངན་ལས་འདའ་བར་མཛད་པའི་ཕྱིར་བརྫུན་དུ་སྨྲ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་དེ་བཞིན་གཤེགས་པ་ནི་ཡེ་ཤེས་དང་། སྟོབས་དང་མི་འཇིགས་པའི་བང་མཛོད་མང་པོ་དང་ལྡན་ཏེ། སེམས་ཅན་ཀུན་ལ་ཐམས་ཅད་མཁྱེན་པའི་ཡེ་ཤེས་དང་ལྡན་པའི་ཆོས་བསྟན་པའི་མཐུ་མངའ་བའི་ཕྱིར་རོ། །ཤཱ་རིའི་བུ་འདི་ལྟར་ཐབས་མཁས་པ་སྣ་ཚོགས་དང་། ཡེ་ཤེས་མངོན་པར་བསྒྲུབས་པས་དེ་བཞིན་གཤེགས་པ་ཐེག་པ་ཆེན་པོ་གཅིག་པུ་སྟོན་པར་རྣམ་གྲངས་འདིས་ཀྱང་དེ་ལྟ་བུར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་
བཀའ་སྩལ་ཏོ། །ཇི་ལྟར་སྐྱེས་བུ་ཞིག་གི་ཁྱིམ་ཡོད་པ། །ཆེ་ལ་རབ་ཏུ་འགྲུམས་ཏེ་ཞིག་ལ་ཐུག །དེ་བཞིན་ཁྱམས་རྣམས་ཞིག་པར་གྱུར་པ་སྟེ། །ཀ་བའི་རྩ་བ་དག་ཀྱང་རུལ་བར་གྱུར། །པུ་ཤུ་དང་ནི་སྐར་ཁུང་ཕྱོགས་རེར་དྲལ། །རྩིག་པ་རེ་ལྡེ་སྐྱང་ནུལ་རྣམས་ཀྱང་གོགས། །སྟེགས་བུ་དག་ཀྱང་རྙིངས་ནས་འགྲུམས་ཤིང་ཞིག །རྩྭ་ཡིས་གཡོགས་པ་ཀུན་ཀྱང་འདྲལ་ཞིང་འཛག །བརྒྱ་ཕྲག་ལྔ་དག་ལས་ནི་མི་ཉུང་བ། །དེ་ན་དེ་དག་གི་ཡང་གནས་སུ་གྱུར། །ཁང་ཕྲན་ཤིན་ཏུ་དོག་པ་མང་པོ་དག །སྨེ་བས་རབ་ཏུ་གང་ཞིང་སྨད་པར་གྱུར། །དེ་ན་ཁྱམས་རྣམས་དགུ་པོ་ཐམས་ཅད་འགྲུམས། །ར་བ་རྩིག་པ་དག་ཀྱང་དེ་བཞིན་ཞིག །བྱ་རྒོད་བྱེ་བ་དག་ནི་དེ་ན་གནས། །དེ་བཞིན་ཕུག་རོན་འུག་པ་བྱ་གཞན་དང་། །མི་བཟད་གདུག་པའི་སྦྲུལ་རྣམས་དེ་ན་ཡོད། །དུག་ཆེན་དྲག་པོ་རྣམས་ཀྱང་ཕྱོགས་ཕྱོགས་ན། །སྡིག་པ་དང་ནི་བྱི་བ་སྣ་ཚོགས་དང་། །ཤིན་ཏུ་གཏུམ་པའི་སྲོག་ཆགས་རྣམ་མང་གནས། །མི་མ་ཡིན་པའང་གནས་དང་གནས་དག་ན། །བཤང་གཅི་དག་གིས་རབ་ཏུ་སྨེ་བར་བྱས། །སྲིན་བུ་མེ་ཁྱེར་གྲོག་མ་སྦུར་བུས་གང་། །ཁྱི་རྣམས་དང་ནི་ཝ་དག་ང་རོ་འདོན། །ཅེ་སྤྱང་མི་བཟད་ཁྲོ་བོ་དེ་ན་འཁོད། །མི་རོ་རྣམས་ལ་འཁྲེན་ཅིང་རབ་ཏུ་ཟ། །དེ་ཡི་ཐེ་རེལ་སྡོད་ཅིང་ལྟ་བ་ཡང་། །ཝ་དང་ཁྱི་དག་དེ་ན་དུ་མ་འཁོད། །དེ་དག་ཉམ་ཆུང་རྟག་ཏུ་བཀྲེས་པས་ཉེན། ། གནས་དང་གནས་ན་རྣམ་པར་འཆའ་ཞིང་ཟ། །ཐབ་མོ་བྱེད་དེ་རབ་ཏུ་སྒྲ་ཡང་འབྱིན། །རྣམ་པ་དེ་འདྲར་ཁྱིམ་དེ་རབ་ཏུ་འཇིགས། །མི་ཡི་རོ་དག་ལ་ཡང་རྣམ་འཁྲེན་ཞིང་། །ཤིན་ཏུ་དྲག་སེམས་གནོད་སྦྱིན་དེ་ན་འཁོད། །སྦྲུལ་དང་རྐང་བརྒྱ་པ་དང་གཅན་གཟན་རྣམས། །དེ་ཡི་གནས་དང་གནས་ན་རབ་ཏུ་འཁོད། །དེ་དག་ཕྱོགས་དང་ཕྱོགས་སུ་ཚང་བཅས་ཏེ། །ཕྲུག་གུ་རྣམས་ཀྱང་ཀློག་ཅིང་འཇོག་པར་བྱེད། །དེ་དག་གིས་ནི་བཞག་ཅིང་བཀོད་པ་ལ། །གནོད་སྦྱིན་རྣམས་ཀྱང་དེ་ལ་ཕལ་ཆེར་ཟ། །རབ་ཏུ་གཏུམ་སེམས་སེམས་ཅན་གཞན་ཟོས་པས། །ཇི་ཙམ་གནོད་སྦྱིན་དེ་དག་འདྲངས་གྱུར་ཏེ། །སེམས་
ཅན་གཞན་གྱི་ཤ་ཡིས་ལུས་རྒྱས་ནས། །དེ་ཚེ་དེ་ན་རབ་ཏུ་ཐབ་མོ་བྱེད། །མི་བཟད་གཏུམ་སེམས་ཁྲོ་བའི་གྲུལ་བུམ་རྣམས། །ཞིག་པའི་ཁྱིམ་དེ་རྣམས་སུ་གནས་འཆའ་སྟེ། །མཐོ་གང་ཚད་དང་དེ་བཞིན་ཁྲུ་གང་ཚད། །ཁྲུ་དོའི་ཚད་ཀྱི་ཕན་ཚུན་རྒྱུ་ཞིང་འགྲོ། །དེ་དག་ཁྱི་ཡི་རྐང་ནས་བཟུང་ནས་ནི། །དེ་བཞིན་ས་ལ་གན་རྐྱལ་དེ་བཞག་སྟེ། །མགུལ་པ་རབ་ཏུ་བགགས་ཤིང་བསྡིགས་པ་ཡིས། །འཁང་དུ་བཅུག་པ་དེ་ལ་དགའ་བར་བྱེད། །གཅེར་བུ་གནག་ཅིང་དེ་བཞིན་རིད་པ་ཡི། །ཡི་དགས་ཆེ་ཞིང་རིང་བའང་དེར་གནས་ཏེ། །རབ་ཏུ་བཀྲེས་པས་ཁ་ཟས་ཀུན་ཚོལ་ཞིང་། །དེ་དག་དེ་ན་ཉམ་ཐག་ཆོ་ངེས་འདེབས། །ལ་ལ་གླང་གི་མགོ་ལ་ཁབ་ཀྱི་ཁ། །མི་ཙམ་དང་ནི་དེ་བཞིན་ཁྱི་ཙམ་དག །ཟས་ལ་སྲེད་པས་རབ་ཏུ་གདུངས་པའི་ཕྱིར། །སྐྲ་དག་ལྷུག་པར་བཤིག་ཅིང་སྒྲ་ཡང་འབྱིན། །གནོད་སྦྱིན་ཤ་ཟ་ཡི་དགས་དེ་དག་ཀྱང་། །སྲེད་བརྐམ་ཁ་ཟས་དག་ནི་ཚོལ་བའི་ཕྱིར། །རྟག་ཏུ་མཐོངས་དང་སྐར་ཁུང་དག་ནས་ཀྱང་། །དེ་ན་ཕྱོགས་བཞིར་རབ་ཏུ་ལྟ་བར་བྱེད། །དེ་ལྟར་ཁྱིམ་དེ་མི་བཟད་འཇིག་གྱུར་ལ། །ཆེ་ཞིང་མཐོ་ལ་རབ་ཏུ་མི་བརྟན་ཏེ། །རྣམ་པར་འགྲུམས་ཤིང་འཇིག་ཉེ་འཇིགས་པ་དེ། །སྐྱེས་བུ་གཅིག་ཅིག་ཡོངས་སུ་དབང་གྱུར་ལ། །སྐྱེས་བུ་དེ་ཡང་ཁྱིམ་གྱི་ཕྱི་རོལ་བྱུང་། །ཁྱིམ་དེ་ཀུན་ཀྱང་རབ་ཏུ་འབར་གྱུར་ཏེ། །ངོས་བཞི་ཐམས་ཅད་ནས་ནི་གློ་བུར་དུ། མེ་ལྕེ་སྟོང་སྙེང་ཀུན་ཏུ་འབར་བར་འགྱུར། འོད་མ་དང་ནི་ཤིང་དག་མེས་ཚིག་སྟེ། །དྲག་པོའི་སྒྲ་རྣམས་ཤིན་ཏུ་འཇིགས་པར་འབྱུང་། །ཀ་བ་དང་ནི་དེ་བཞིན་རྩིག་པ་འབར། །གནོད་སྦྱིན་ཡི་དགས་དག་ཀྱང་སྒྲ་དག་འབྱིན། །བྱ་རྒོད་བརྒྱ་ཡང་རག་རོག་ཚིག་པར་འགྱུར། །གྲུལ་བུམ་དག་ནི་གདོང་ཚིག་ལྡོམ་ཞིང་འཕྱན། །དེ་ན་ཀུན་ཏུ་སྦྲུལ་བརྒྱ་མང་པོ་དག །མེ་ཡིས་ཚིག་ནས་ཙེར་ལྷང་སྒྲ་ཡང་འབྱིན། །བསོད་ནམས་མེད་པ་མེ་ཡིས་ཀུན་ཚིག་ཅིང་། །དེ་ན་ཤ་ཟ་མང་པོ་ཕན་ཚུན་རྒྱུ། །དེ་དག་གཅིག་ལ་གཅིག་ནི་སོས་བཏབ་སྟེ། །ཚིག་པར་གྱུར་པ་དག་ལ་ཁྲག་གིས་འཐོར། །དེ་ན་ཅེ་སྤྱང་དུས་བྱས་ཤི་
བ་ལ། །སེམས་ཅན་དག་ནི་ཕན་ཚུན་རྣམ་པར་ཟ། །ངན་སྐྱུགས་ཚིག་པའི་དྲི་ང་ཡིད་མི་འོང་། །འཇིག་རྟེན་དག་ན་ཕྱོགས་བཞིར་རབ་ཏུ་འཐུལ། །སྲིན་བུ་རྐང་བརྒྱ་པ་དག་བྲོས་པ་ལ། །དེ་ལ་གྲུལ་བུམ་དག་ནི་ཤིན་ཏུ་ཟ། །བཀྲེས་པ་དང་ནི་སྐོམ་པས་རབ་གདུངས་ཤིང་། །ཡི་དགས་རྣམས་ཀྱང་སྒྲ་འབར་ཀུན་འཕྱན་ཏེ། །དེ་ལྟར་ཁྱིམ་དེ་ཤིན་ཏུ་མི་བཟད་འཇིགས། །མེ་ལྕེ་དག་ནི་སྟོང་སྙེད་འབར་བར་འགྱུར། །སྐྱེས་བུ་ཁྱིམ་དེའི་བདག་པོ་དེ་ཉིད་ནི། །ཤིན་ཏུ་རྣམ་པར་ལྟ་ཞིང་སྒོ་ན་འདུག །དེ་ན་དེ་ཡིས་ཐོས་པ་བདག་གི་བུ། །འདི་ལྟར་བྱིས་པ་དག་ནི་མི་ཤེས་པས། །རྩེད་མོ་རྩེན་པ་དག་ལ་ཆགས་པའི་བློ། །རྩེད་མོ་དགའ་འམ་རབ་ཏུ་དྲེགས་མྱོས་ཞེས། །དེ་ཐོས་བདག་གི་བྱིས་པ་ཁྱེའུ་འདི་ཀུན། མྱུར་དུ་ཚིག་ཅིང་ཆུད་ཟོས་མི་འགྱུར་བར། བདག་གི་བུ་རྣམས་རབ་ཏུ་ཐར་བྱའི་ཕྱིར། །ཁྱིམ་དེའི་ནང་དུ་མྱུར་དུ་ཞུགས་ནས་སུ། །དེ་ལ་དེས་ནི་ཁྱིམ་གྱི་ཉེས་བརྗོད་དེ། །སྡུག་བསྔལ་འདི་དག་མི་བཟད་རིགས་ཀྱི་བུ། །སེམས་ཅན་རྣམ་པ་མང་ཞིང་མེ་འདི་དང་། །སྡུག་བསྔལ་ཆེན་པོ་དག་ཀྱང་གཅིག་ཕྱི་གཅིག །སྦྲུལ་གདུག་ཤིན་ཏུ་གཏུམ་སེམས་གནོད་སྦྱིན་དང་། གྲུམ་བུམ་དང་ནི་ཡི་དགས་མང་པོ་གནས། །ཅེ་སྤྱང་དག་དང་ཝ་དང་ཁྱི་ཡང་མང་། །བྱ་རྒོད་དག་ཀྱང་ཁ་ཟས་ཀུན་ཏུ་ཚོལ། །དེ་འདྲ་བ་དག་འདི་ན་མང་གནས་ཏེ། །མེ་མེད་ཟིན་ཡང་ཤིན་ཏུ་མི་བཟད་འཇིགས། །འདི་ཡི་ཁོ་ར་ཡུག་ཏུ་མེ་འབར་ཏེ། །འདི་ན་དེ་འདྲའི་སྡུག་བསྔལ་འབའ་ཞིག་གོ ། དེ་ལྟར་བྱིས་པའི་བློ་ཅན་དེ་སྦྲན་ཏེ། །གཞོན་ནུ་རྣམས་ནི་རྩེད་མོས་རབ་མྱོས་པས། །ཕ་ཡིས་བསྒོ་བ་དེ་ལ་མི་སེམས་ཏེ། །དེ་དག་གི་ནི་ཡིད་ལ་ཅི་མི་སྙམ། །དེ་ཚེ་སྐྱེས་བུ་དེ་ནི་ཡང་སེམས་པ། །བུ་ཕྱིར་སེམས་པས་བདག་ནི་སྡུག་བསྔལ་ཏེ། །བདག་གི་བུ་དང་རྒྱུད་དག་མེད་པ་རུ། །མེ་འདིས་འདི་དག་ཚིག་ན་མི་རུང་ཞེས། །དེ་ཡི་དུས་ན་དེ་ཡི་ཐབས་བསམས་པ། །རྩེད་མོ་དག་ལ་བྱིས་པ་འདི་ཆགས་ཏེ། །འདི་ནི་རྩེད་མོ་དགའ་བ་ཅི་ཡང་མེད། །ཀྱེ་མ་འདི་ལྟར་བྱིས་པ་གླེན་ཞིང་རྨོངས། །དེ་ལ་དེ་ཡིས་
སྨྲས་པ་གཞོན་ནུ་ཉོན། །བཞོན་པ་རྣམ་པ་གསུམ་པོ་ང་ལ་ཡོད། །ར་དང་གླང་པོ་རི་དགས་མཆོག་ལས་བཅས། །ཆེ་ཞིང་མཐོ་ལ་ལེགས་པར་བརྒྱན་པ་དག །ཁྱིམ་གྱི་ཕྱི་རོལ་ན་ནི་དེ་དག་ཡོད། །ཕྱི་རོལ་བྱུང་ལ་དེ་ལ་དགོས་པར་སྤྱོད། ཁྱེད་ཅག་རྣམས་ཀྱི་ཕྱིར་ནི་ངས་བྱས་ཀྱིས། །དེ་ལ་དགའ་བར་ལྷན་ཅིག་ཕྱིར་འཐོན་ཅིག །བཞོན་པ་དེ་འདྲ་ཡོད་པར་ཤེས་ནས་སུ། །དེ་དག་བརྩོན་འགྲུས་བརྩམས་ཏེ་རངས་གྱུར་ནས། །དེ་ཡི་མོད་ལ་ཐམས་ཅད་ཕྱི་རོལ་འཐོན། །སྡུག་བསྔལ་དག་ལས་ཐར་ཏེ་སྟོང་པར་འདུག །མི་དེས་བྱིས་པ་འཐོན་པ་མཐོང་ནས་སུ། །གྲོང་ཁྱེར་དབུས་ཀྱི་དཔོང་སར་གནས་པ་ནི། །སེང་གེའི་ཁྲི་ལ་འདུག་ནས་དེ་ལ་སྨྲས། །ཀྱེ་མ་ང་ནི་དེ་རིང་མྱ་ངན་འདས། །ང་ཡིས་དཀའ་བར་རྙེད་པ་ཉོན་མོངས་དག །བུ་སྡུག་ཉི་ཤུ་འདི་དག་སྙིང་གི་བུ། །སྐྱེ་བོ་མང་པོས་གང་ཞིག་འཇིགས་པ་ཡི། །དེ་དག་མི་བཟད་གདོན་དཀའི་ཁྱིམ་ན་འཁོད། །ཀུན་ཏུ་འབར་ཞིང་མེ་ལྕེ་སྟོང་གིས་གང་། །དེ་དག་རྩེད་མོ་དགའ་ལ་ཆགས་པར་གྱུར། །ངས་ནི་དེ་རིང་དེ་དག་ཐར་བྱས་ཏེ། །དེ་བས་ང་དེང་མྱ་ངན་འདས་པར་གྱུར། །ཕ་དེ་བདེ་བར་འདུག་པར་རིག་ནས་སུ། །བྱིས་པ་དེ་དག་ལྷགས་ནས་འདི་སྐད་སྨྲ། །བཞོན་པ་ཡིད་དུ་འོང་བ་གསུམ་པོ་རྣམས། །ཡབ་ཀྱིས་གསུངས་པ་བཞིན་དུ་བདག་ཅག་སྩོལ། །བཞོན་པ་རྣམ་པ་གསུམ་པོ་ཁྱོད་སྦྱིན་ཞེས། །ཡབ་ཁྱོད་ཀྱིས་ནི་ཁྱིམ་དེར་གང་གསུངས་པ། །གལ་ཏེ་དེ་དག་ཐམས་ཅད་མེད་ན་ནི། །ད་འདིར་དུས་ལ་བབ་ཀྱིས་དེ་དག་སྩོལ། །མི་དེ་མཛོད་ཀྱི་མཐུ་དང་ལྡན་པ་སྟེ། །གསེར་དང་དངུལ་དང་ནོར་བུ་མུ་ཏིག་དང་། །བྲན་དང་འགྲོན་བུ་དག་ནི་མི་ཉུང་བས། །བཞོན་པ་དེ་ཡང་རྣམ་པ་སྣ་གཅིག་བྱིན། །གླང་གི་ཤིང་རྟ་རིན་ཆེན་དམ་པ་སྟེ། །ལོགས་བཅས་དྲིལ་བུ་གཡེར་ཁའི་དྲ་བས་བྲེས། །གདུགས་དང་རྒྱལ་མཚན་དག་གིས་ལེགས་པར་བརྒྱན། །མུ་ཏིག་དང་ནི་ནོར་བུའི་དྲ་བས་གཡོགས། །གསེར་གྱི་མེ་ཏོག་རྣམས་ཀྱི་ཕྲེང་བ་དག །ཕྱོགས་དང་ཕྱོགས་རྣམས་སུ་ནི་ཤིན་ཏུ་སྤྱངས། །རབ་ཏུ་ཆེ་བའི་གོས་ཀྱིས་དེ་གཡོགས་
ཏེ། །དཀར་བཟངས་བཅོས་བུའི་རས་རྣམས་ཤིན་ཏུ་བཏིང་། །དེ་ན་དེ་བཞིན་འཇམ་པའི་དར་རྣམས་དང་། །ཤིང་རྟ་དེ་ལ་ཤིང་བལ་མཆོག་ཀྱང་བཏིང་། །གོས་རབ་ཀོ་ཏམ་བ་མཆོག་ངང་པའི་མཚན། །བྱེ་བ་ཕྲག་སྟོང་རི་བ་རྣམས་ཀྱིས་གཡོགས། །རིན་ཆེན་ཤིང་རྟ་བཅས་པ་དེ་དག་ནི། །གླང་པོ་དཀར་ཞིང་ཚོ་ལ་སྟོབས་དང་ལྡན། །བལྟ་ན་སྡུག་ཅིང་ཤིན་ཏུ་བོང་ཡང་ཆེ། །སྐྱེས་བུ་དམ་པ་དག་གིས་རབ་ཏུ་བརྟེན། །སྐྱེས་བུ་དེ་ནི་བུ་རྣམས་ཐམས་ཅད་ལ། །དེ་ལྟ་བུ་ཡི་ཤིང་རྟ་མཆོག་བྱིན་ཏེ། །དེས་ནི་དེ་དག་དགའ་ཞིང་རངས་ནས་སུ། །ཕྱོགས་དང་ཕྱོགས་མཚམས་དག་ཏུ་རྩེ་ཞིང་དོང་། །དེ་བཞིན་དྲང་སྲོང་ང་ཡང་ཤཱ་རིའི་བུ། །སེམས་ཅན་རྣམས་ཀྱི་སྐྱབས་དང་ཕ་ཡིན་ཏེ། །སྲོག་ཆགས་འདི་དག་ཐམས་ཅད་ང་ཡི་བུ། །བྱིས་པ་དག་ནི་ཁམས་གསུམ་འདོད་ལ་ཆགས། །ཁམས་གསུམ་དག་ནི་ཁང་པ་དེ་འདྲ་སྟེ། །སྡུག་བསྔལ་ཤིན་ཏུ་མི་བཟད་བརྒྱ་ཡིས་དཀྲུགས། །ན་བ་དང་ནི་སྐྱེ་རྒ་དུ་མ་རྒྱས། །མ་ལུས་ཐམས་ཅད་ནས་ཀྱང་རབ་ཏུ་འབར། །ང་ནི་ཁམས་གསུམ་དག་ལས་ཐར་ཅིང་ཞི། །ནགས་ཚལ་དག་ན་གནས་ཤིང་དབེན་པར་འདུག །ངས་ནི་ཁམས་གསུམ་འདི་དག་ཡོངས་བཟུང་སྟེ། །འདི་ན་གང་རྣམས་སྲེག་པ་ང་ཡི་བུ། །ང་ཉིད་དེ་ཡི་སྐྱབས་སུ་རིག་ནས་སུ། །དེ་ལ་ཉེས་པ་དག་ནི་ངས་བསྟན་ཏེ། །འདི་ལྟར་འདོད་ལ་རྣམ་པར་ཆགས་པའི་བློ། །བྱིས་པ་འདི་ཀུན་ང་ཡི་མི་ཉན་ཏོ། །ཐབས་ལ་མཁས་པ་དག་ནི་ངས་སྦྱར་ཏེ། །དེ་དག་ལ་ཡང་ཐེག་པ་གསུམ་དུ་བཤད། །ཁམས་གསུམ་དག་གི་ཉེས་པ་མང་མཁྱེན་ནས། །གདོན་པར་བྱ་བའི་ཕྱིར་ནི་ཐབས་བཤད་དོ། །བུ་གང་ང་ལ་རྟེན་པར་གྱུར་པ་དག །མངོན་ཤེས་དྲུག་དང་གསུམ་རིག་མཐུ་ཆེན་དང་། །འདི་ན་རང་རྒྱལ་རྣམས་ནི་གང་ཡོད་དང་། །ཕྱིར་མི་ལྡོག་པའི་བྱང་ཆུབ་སེམས་དཔའ་གང་། །ངས་ནི་བུ་འདྲར་མཁས་པ་དེ་དག་ལ། །དེ་ཡི་ཚེ་ན་དཔེ་མཆོག་འདི་དག་གིས། །སངས་རྒྱས་ཐེག་པ་གཅིག་པུ་འདི་བཤད་དེ། །ཐམས་ཅད་རྒྱལ་བར་འགྱུར་གྱིས་འདི་ཟུང་ཤིག །སངས་རྒྱས་རྐང་
གཉིས་མཆོག་གི་ཡེ་ཤེས་དེ། །ཁྱད་པར་འཕགས་ཤིང་ཤིན་ཏུ་ཡིད་དུ་འོང་། །འཇིག་རྟེན་འདི་དག་ཀུན་ན་ཁྱད་པར་ཅན། །ཡངས་པའི་དངོས་པོ་དེ་བཞིན་ཕྱག་བྱར་འོས། །སྟོབས་དང་བསམ་གཏན་དེ་བཞིན་རྣམ་ཐར་དང་། །ཏིང་ངེ་འཛིན་དག་བྱེ་བ་དུ་མ་བརྒྱ། །ཤིང་རྟ་དེ་ནི་དེ་འདྲ་མཆོག་ཡིན་ཏེ། །དེ་ལ་སངས་རྒྱས་སྲས་རྣམས་རྟག་ཏུ་དགའ། །དེ་ལ་རྩེན་པར་ཉིན་མཚན་འདས་པར་བྱེད། །དུས་དང་ཟླ་བ་ཕྱེད་དང་ཟླ་བ་དང་། །དེ་བཞིན་ལོ་དང་བར་གྱི་བསྐལ་པ་དང་། །བསྐལ་པ་བྱེ་བ་སྟོང་ཡང་འདས་པར་བྱེད། །བདེ་གཤེགས་ཉན་ཐོས་གང་རྣམས་ཉན་པ་དང་། །བྱང་ཆུབ་སེམས་དཔའ་མང་པོ་རྣམ་རྩེན་ཞིང་། །འདིས་ནི་བྱང་ཆུབ་སྙིང་པོ་དེར་འགྲོ་སྟེ། །རིན་ཆེན་ཐེག་པ་འདི་ནི་དམ་པ་མཆོག །སྐར་རྒྱལ་ཁྱོད་ཀྱིས་འདི་ལྟར་རིག་པར་གྱིས། །ཕྱོགས་བཅུ་ཐམས་ཅད་དུ་ནི་བཙལ་བྱས་ཀྱང་། །སྐྱེས་བུ་དམ་པའི་ཐབས་རྣམས་མ་གཏོགས་པར། །དེ་ལ་ཐེག་པ་གཉིས་སུ་གང་ནའང་མེད། །ཁྱོད་ཀྱི་ཕ་ང་ཁྱེད་ཀྱང་ང་ཡི་བུ། །ཁྱེད་རྣམས་ཁམས་གསུམ་རབ་ཏུ་འཇིག་པ་ན། །བསྐལ་པ་བྱེ་བ་མང་པོར་བསྲེགས་པ་ཡི། །སྡུག་བསྔལ་དག་ལས་ངས་ནི་རབ་ཏུ་བཏོན། །འདི་ལྟར་མྱ་ངན་འདས་པར་ངས་བསྟན་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཏེ། །ཁྱེད་ནི་ད་དུང་མྱ་ངན་ཡོངས་མ་འདས། །སངས་རྒྱས་ཐེག་པ་ཉིད་ནི་བཙལ་བར་བྱ། །འདི་ན་བྱང་ཆུབ་སེམས་དཔའ་གང་འཁོད་པ། །ང་ཡི་སངས་རྒྱས་ཚུལ་འདི་ཀུན་ཉོན་ཅིག །འདིས་ནི་བྱང་ཆུབ་སེམས་དཔའ་མང་པོ་འདུལ། །འདི་ནི་རྒྱལ་བའི་ཐབས་ལ་མཁས་པ་ཡིན། །གང་ཚེ་ཐེག་པ་དམན་པ་སྨད་པ་ལ། །དེ་ལ་སེམས་ཅན་དགའ་བར་གྱུར་པ་ན། །དེ་ཚེ་སྡུག་བསྔལ་འཕགས་པའི་བདེན་པ་དག །གཞན་མི་གསུང་བ་འཇིག་རྟེན་འདྲེན་པ་འཆད། །གང་རྣམས་བྱིས་པའི་བློ་དག་མི་ཤེས་པས། །སྡུག་བསྔལ་དག་ནི་རྩ་བ་མི་མཐོང་བ། །དེ་དག་ལ་ཡང་ལམ་རྣམས་བསྟན་པར་བྱ། །སྲེད་པ་ཀུན་འབྱུང་ལས་ནི་སྡུག་བསྔལ་སྐྱེ། །རྟག་ཏུ་མི་གནས་སྲིད་པ་འགོག་པ་ཡང་། །འདི་ནི་ང་ཡི་འགོག་
བདེན་གསུམ་པ་ཡིན། །གཞན་མ་ཡིན་པ་གང་གིས་སྐྱེས་བུ་ཐར། །ལམ་རྣམས་བསྒོམས་ནས་རྣམ་པར་ཐར་བར་འགྱུར། །དེ་དག་ཅི་ལས་རྣམ་གྲོལ་ཤཱ་རིའི་བུ། །མེད་པར་འཛིན་ལས་དེ་རྣམས་རྣམ་གྲོལ་ཏེ། །ཀུན་ལས་དེ་དག་ད་དུང་ཐར་མ་ཡིན། །མྱ་ངན་དེ་མ་འདས་ཞེས་འདྲེན་པ་གསུངས། །དེ་ལ་ཐར་བར་མི་ཕྱིར་བཤད་མ་མཛད། །བྱང་ཆུབ་དམ་པ་མཆོག་འདི་མ་ཐོབ་ཕྱིར། །འཇིག་རྟེན་བདེ་བྱའི་ཕྱིར་ནི་ང་སྐྱེས་པས། །ཆོས་ཀྱི་རྒྱལ་པོ་ང་ནི་དེ་ལྟར་འདོད། །ཐ་མར་དེ་རིང་ངས་ནི་གང་བཤད་པ། །ང་ཡི་ཆོས་ཀྱི་རྒྱ་འདི་ཤཱ་རིའི་བུ། །ལྷར་བཅས་འཇིག་རྟེན་དག་ལ་ཕན་བྱའི་ཕྱིར། །ཕྱོགས་དང་ཕྱོགས་མཚམས་དག་ཏུ་བཤད་པར་གྱིས། །ཁྱོད་ཀྱིས་བསྟན་པའི་ཚེ་ན་སེམས་ཅན་གང་། །རྗེས་སུ་ཡི་རང་ངོ་ཞེས་ཚིག་སྨྲ་ཞིང་། །མདོ་འདི་མགོ་བོས་རབ་ཏུ་ལེན་པ་ནི། །མི་དེ་ཕྱིར་མི་ལྡོག་པར་ཁྱོད་ཟུང་ཤིག །མདོ་སྡེ་འདི་ལ་དད་པར་གང་གྱུར་པ། །དེས་ནི་སྔོན་གྱི་དེ་བཞིན་གཤེགས་པ་མཐོང་། །དེ་དག་ལ་ཡང་བཀུར་སྟི་བྱས་པ་ཡིན། །རྣམ་པ་འདི་ལྟ་བུ་ཡི་ཆོས་ཀྱང་ཐོས། །ང་ཡིས་བཤད་པ་འདི་ལ་གང་དད་པ། །དེས་ནི་ཁྱོད་དང་ང་ཡང་མཐོང་བ་ཡིན། །ང་ཡི་དགེ་སློང་དགེ་འདུན་འདི་ཀུན་དང་། །བྱང་ཆུབ་སེམས་དཔའ་འདི་དག་ཀུན་ཀྱང་མཐོང་། །མངོན་པར་ཤེས་པས་རིག་ནས་ངས་འདི་བསྟན། །མདོ་འདིས་སྐྱེ་བོ་བྱིས་པ་མྱོས་པར་འགྱུར། །འདི་ལ་ཉན་ཐོས་རྣམས་ཀྱི་ཡུལ་ཡང་མེད། །འདི་ལ་རང་སངས་རྒྱས་ཀྱི་འགྲོ་བ་མེད། །ཤཱ་རིའི་བུ་ཁྱོད་མོས་པར་མི་བྱེད་ན། །ང་ཡི་ཉན་ཐོས་འདི་དག་གཞན་ཅི་སྨོས། །འདི་དག་ང་ལ་དད་ཕྱིར་འབྲང་བ་སྟེ། །སོ་སོར་རང་གིས་རིག་པའི་ཡེ་ཤེས་མེད། །ཁྱོད་ཀྱིས་ང་རྒྱལ་ཅན་དང་ཁེངས་པ་དང་། །མི་རིགས་ཞུགས་པ་དག་ལ་འདི་མ་བཤད། །བྱིས་པ་འདོད་ལ་རྟག་ཏུ་རབ་མྱོས་ཤིང་། །མི་ཤེས་པས་ན་ཆོས་བསྟན་སྤོང་བར་བྱེད། །འཇིག་རྟེན་རྟག་ཏུ་ལེགས་གནས་སངས་རྒྱས་ཚུལ། །ང་ཡི་ཐབས་མཁས་འདི་ནི་རབ་སྤངས་ཤིང་། །ཁྲོ་གཉེར་བྱས་ཏེ་ཐེག་པ་སྤངས་པ་ཡི། །དེ་ཡི་མི་བཟད་རྣམ་སྨིན་འདིར་ཉོན་ཅིག །ང་ནི་འདུག་
གམ་མྱ་ངན་འདས་ཀྱང་རུང་། །རྣམ་པ་འདི་འདྲ་མདོ་སྡེ་རབ་སྤངས་ཤིང་། །དགེ་སློང་དེ་དག་ལ་ཡང་སྡང་འདོད་པས། །དེ་ཡི་རྣམ་པར་སྨིན་པ་ང་ལས་ཉོན། །དེ་དག་མི་ལས་འཆི་འཕོས་མནར་མེད་དུ། །བསྐལ་པ་ཚང་བར་རབ་ཏུ་གནས་པར་འགྱུར། །དེ་ནས་བར་གྱི་བསྐལ་པ་དུ་མར་ཡང་། །བྱིས་པ་ཤི་ཞིང་འཕོས་ནས་དེར་ཡང་ལྷུང་། །སེམས་ཅན་དམྱལ་ལས་ནམ་ཞིག་ཤི་འཕོས་ཀྱང་། །དེ་ནས་དུད་འགྲོ་དག་ཏུའང་སྐྱེ་བར་འགྱུར། །ཤིན་ཏུ་རིད་པའི་ཝ་དང་ཁྱིར་གྱུར་ཅིང་། །གཞན་དག་རྩེད་མོ་བྱེད་པའི་གཞིར་འགྱུར་ཏེ། །དེ་ན་དེ་དག་ཁ་དོག་གནག་པར་འགྱུར། །སྲེ་འོ་རྨ་ཅན་གཡན་པ་དག་གིས་གང་། །སྤུ་ཡང་བྱི་ཞིང་ཤིན་ཏུ་ཉམ་ཆུང་འགྱུར། །ང་ཡི་བྱང་ཆུབ་མཆོག་འདིར་ཞེ་སྡང་བས། །སྲོག་ཆགས་ནང་ན་རྟག་ཏུ་སྨད་འགྱུར་ཏེ། །རྡོ་དང་བོང་བས་ཕོག་ནས་ཤིན་ཏུ་འཁང་། །དེ་དང་དེ་ན་དབྱིག་པས་ཀུན་བསྡིགས་ལ། །བཀྲེས་ཤིང་སྐོམ་པར་གྱུར་པས་ལུས་ཀྱང་སྐམས། །བྱིས་པའི་བློ་གང་སངས་རྒྱས་ཚུལ་སྤོང་བ། །རྔ་མོ་དང་ནི་བོང་བུར་ཡང་འགྱུར་ཏེ། །ཁ་ཟས་བསམ་པ་དག་ལ་རྗེས་སེམས་ཤིང་། །ཁལ་རྣམས་བཀལ་ནས་དབྱུག་པ་བརྒྱ་ཡིས་བརྡེགས། །ཕྱིར་ཡང་དེ་དག་དེར་ནི་ཝར་གྱུར་ཏེ། །ཤིན་ཏུ་མི་སྡུག་ཞར་བ་འཐེང་པོར་འགྱུར། །གྲོང་གི་གཞོན་ནུ་དག་གིས་རབ་གཙེས་ཤིང་། །བྱིས་པ་དེ་དག་རྡོ་དང་བོང་བས་རྡེག །དེ་ནས་བྱིས་པའི་བློ་ཅན་ཤི་འཕོས་ནས། །དཔག་ཚད་དག་ཀྱང་ལྔ་བརྒྱ་མཉམ་པ་ཡི། །སྲོག་ཆགས་ལུས་རིད་རྣམས་སུ་གྱུར་ནས་སུ། །ཤིན་ཏུ་བླུན་ཞིང་རྨོངས་ལ་འགྲེ་ཞིང་ལྡོག །འདི་འདྲ་བ་ཡི་མདོ་སྡེ་སྤངས་པས་ན། །དེ་དག་རྐང་པ་མེད་པའི་ལྟོ་འཕྱེར་འགྱུར། །སྲོག་ཆགས་བྱེ་བ་མང་པོས་བཟའ་བས་ན། །དེ་དག་ཤིན་ཏུ་མི་བཟད་ཚོར་བ་མྱོང་། །ནམ་ཞིག་མི་ལུས་ཐོབ་པར་གྱུར་པ་ན། །ང་ཡི་མདོ་སྡེ་འདི་ལ་མ་དད་པས། །དེ་ན་དེ་དག་ལུས་གནག་འཐེང་པོར་འགྱུར། །སྒུར་པོ་ཞར་བ་ལྡོངས་པ་གླེན་ཞིང་སྨད། །སངས་རྒྱས་བྱང་ཆུབ་འདི་ལ་མ་དད་པས། །འཇིག་རྟེན་དག་ན་ཡིད་ཀྱང་མི་ཆེས་ཏེ། །དེ་དག་ཁ་ནས་རུལ་མནམ་རྒྱུན་མི་འཆད། །དེ་ཡི་ལུས་ལ་གནོད་
སྦྱིན་གདོན་ཀྱང་གནོད། །དབུལ་ཞིང་གཞན་གྱི་མངག་གཞུག་བྱེད་པ་སྟེ། །ཉམ་ཆུང་གཞན་གྱིས་རྟག་ཏུ་བཀོལ་བར་འགྱུར། །དེ་དག་ཤིན་ཏུ་ནད་དང་གནོད་པ་མང་། །མགོན་མེད་གྱུར་ཅིང་འཇིག་རྟེན་དག་ན་རྒྱུ། །དེ་ན་དེ་ཡིས་གང་ལ་ཉེར་བསྙེན་ཀྱང་། །དེ་ལ་དེ་དག་སྦྱིན་པར་དད་མི་འགྱུར། །བྱིན་ན་ཡང་ནི་མྱུར་དུ་སྟོར་འགྱུར་ཏེ། །དེ་ཡི་སྡིག་པའི་འབྲས་བུ་དེ་འདྲའོ། །དེས་ན་དེ་ཡིས་སྨན་དག་རྙེད་པ་ནི། །ཤིན་ཏུ་སྦྱར་ལེགས་མཁས་པས་བྱིན་ན་ཡང་། །དེས་ཀྱང་དེ་དག་ནད་ནི་ཕྱིར་ཞིང་སྐྱེ། །ནམ་ཡང་དེ་ཡི་ནད་རྣམས་མཐར་མི་འབྱུང་། །གཞན་གྱིས་རྐུན་པོ་བྱས་པར་གྱུར་པ་དང་། །འཁྲུག་ཅིང་དེ་བཞིན་དཔུང་འཆའ་འཐབ་པ་དང་། །དེ་བཞིན་གཞན་གྱིས་ནོར་རྣམས་འཕྲོགས་པ་ཡང་། །སྡིག་པའི་ལས་ཀྱིས་དེ་ཡི་སྟེང་དུ་འབབ། །ང་ཡི་སངས་རྒྱས་ཚུལ་འདི་སྤངས་པས་ན། །མི་དབང་རྒྱལ་པོ་འཇིག་རྟེན་སྟོན་པ་ཡི། །འཇིག་རྟེན་མགོན་པོ་དེས་ནི་ཡོང་མི་མཐོང་། །དེ་ནི་མི་ཁོམ་པར་ཡང་གནས་པར་འགྱུར། །བྱིས་པ་དེས་ནི་ཆོས་ཀྱང་མི་ཐོས་ཏེ། །དེ་དག་སེམས་པ་མེད་ཅིང་འོན་པར་འགྱུར། །བྱང་ཆུབ་འདི་འདྲ་བ་ནི་སྤངས་པས་ན། །དེ་དག་ནམས་ཀྱང་ཞི་བར་མི་འགྱུར་རོ། །བསྐལ་པ་གང་གཱའི་ཀླུང་གི་བྱེ་མ་སྙེད། །ཁྲག་ཁྲིག་དག་ནི་བརྒྱ་སྟོང་མང་པོ་ཡང་། །ལུས་ནི་མ་གྲིམས་ཡན་ལག་མ་ཚང་འགྱུར། །དེ་ནི་མདོ་སྡེ་འདི་སྤངས་སྡིག་པའི་འབྲས། །དེ་ཡི་སྐྱེད་མོས་ཚལ་ནི་སེམས་ཅན་དམྱལ། །ངན་སོང་དག་ནི་དེ་ཡི་ཁྱིམ་ཡིན་ཏེ། །ཕག་དང་བོང་བུ་ཝ་དང་ས་འཛུལ་བར། །དེ་ན་དེ་དག་རྟག་ཏུ་གནས་པར་འགྱུར། །དེ་དག་མི་ཡི་ལུས་སུ་གྱུར་ན་ཡང་། །ལྡོངས་པ་དང་ནི་འོན་པ་གླེན་པ་སྟེ། །རྟག་ཏུ་དབུལ་ཞིང་གཞན་གྱིས་མངག་པར་འགྱུར། །དེ་ཚེ་དེ་ཡི་རྒྱན་ནི་དེ་དག་གོ ། དེ་ན་དེ་ཡི་གོས་ནི་ནད་ཡིན་ཏེ། །ལུས་ལ་རྨ་ནི་བྱེ་བ་ཁྲག་ཁྲིག་འབྱུང་། །དེ་བཞིན་ཤུ་བ་གཡན་པ་འབྲུམ་བུ་དང་། །དེ་བཞིན་ཤ་བཀྲ་མཛེ་དག་བཤུལ་བར་མནམ། །དེ་ཡི་འཇིག་ཚོགས་ལྟ་བ་སྟུག་པོར་འགྱུར། །དེ་ཡི་ཁྲོ་བའི་སྟོབས་ཀྱང་ཤིན་ཏུ་ཆེ། །དེ་ཡི་འདོད་
ཆགས་དག་ཀྱང་ཤིན་ཏུ་བདོ། །དེ་ནི་དུད་འགྲོའི་སྐྱེ་གནས་རྟག་ཏུ་དགའ། །གང་གིས་ང་ཡི་མདོ་སྡེ་འདི་སྤངས་པ། །དེ་རིང་གལ་ཏེ་ང་ཡིས་ཤཱ་རིའི་བུ། །དེ་ཡི་ཉེས་པ་བསྐལ་པར་བརྗོད་ན་ཡང་། །ཉེས་པའི་མཐར་ནི་ཕྱིན་པར་ཡོང་མི་ནུས། །ངས་ནི་དེ་ཡི་དོན་རྣམས་རབ་མཐོང་བས། །ཤཱ་རིའི་བུ་ཁྱོད་ཡང་དག་བསྟན་པ་ནི། །ཁྱོད་ཀྱིས་སྐྱེ་བོ་བྱིས་པའི་མདུན་དུ་ཡང་། །མདོ་སྡེ་འདི་འདྲ་མ་བཤད་ཅིག་ཅེས་བསྒོ། །འདི་ལྟར་གང་དག་གསལ་ཞིང་མང་ཐོས་པ། །དྲན་དང་ལྡན་ཞིང་གང་མཁས་ཡེ་ཤེས་ལྡན། །བྱང་ཆུབ་དམ་པ་མཆོག་ལ་གང་ཞུགས་པ། །དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །གང་གིས་སངས་རྒྱས་བྱེ་བ་མང་པོ་མཐོང་། །གང་གིས་དཔག་ཏུ་མེད་པའི་དགེ་བ་སྐྱེད། །གང་རྣམས་ལྷག་པའི་བསམ་པ་ཤིན་ཏུ་བརྟན། །དེ་ལ་ཁྱོད་ཀྱིས་དོན་དམ་འདི་སྒྲོགས་ཤིག །གང་རྣམས་བརྩོན་འགྲུས་ལྡན་ཞིང་རྟག་བྱམས་སེམས། །བྱམས་པ་དེ་ལ་དེ་དག་རིང་དུ་བསྒོམས། །ལུས་དང་དེ་བཞིན་སྲོག་ཀྱང་རབ་ཏུ་བཏང་། །དེ་དག་ལ་ནི་མདོ་འདི་མངོན་སུམ་ཤོད། །ཕན་ཚུན་རྟོག་ཅིང་རིམ་གྲོར་བཅས་པ་དང་། །གང་རྣམས་བྱིས་པ་དག་ཀྱང་མི་སྟེན་ཞིང་། །གང་དག་རི་སུལ་རྣམས་སུ་དགའ་བ་དག །དེ་ལ་མདོ་སྡེ་བཟང་པོ་འདི་སྒྲོགས་ཤིག །དགེ་བའི་བཤེས་གཉེན་དག་ལ་རབ་བསྙེན་ཞིང་། །སྡིག་པའི་གྲོགས་པོ་དག་ནི་ཡོངས་སྤོང་བ། །དེ་ལྟ་བུ་ཡི་སངས་རྒྱས་སྲས་མཐོང་ན། །དེ་དག་ལ་ཡང་མདོ་སྡེ་འདི་སྟོན་ཅིག །ཚུལ་ཁྲིམས་མ་ཉམས་ནོར་བུ་རིན་ཆེན་བཞིན། །ཤིན་ཏུ་རྒྱས་པའི་མདོ་སྡེ་གཟུང་བར་གནས། །དེ་འདྲ་སངས་རྒྱས་སྲས་པོ་མཐོང་ན་ཡང་། །དེ་དག་མདུན་དུ་མདོ་སྡེ་འདི་ཤོད་ཅིག །ཁྲོ་བ་མེད་ཅིང་རྟག་ཏུ་དྲང་བ་སྟེ། །སྲོག་ཆགས་ཐམས་ཅད་ལ་ཡང་སྙིང་རྗེར་ལྡན། །བདེ་བར་གཤེགས་པ་དག་ལ་རིམ་གྲོར་བཅས། །དེ་ཡི་མདུན་དུ་མདོ་སྡེ་འདི་ཤོད་ཅིག །གང་དག་འཁོར་གྱི་དབུས་སུ་ཆོས་སྟོན་པ། །དཔེ་རྣམས་བྱེ་བ་ཁྲག་ཁྲིག་དུ་མ་ཡིས། །མ་ཆགས་གྱུར་ཅིང་ནན་ཏན་ཡིད་ཀྱིས་འཆད། །དེ་དག་ལ་ཡང་མདོ་སྡེ་འདི་ཤོད་ཅིག །ཐམས་ཅད་མཁྱེན་པ་ཉིད་ནི་ཡོངས་ཚོལ་ཞིང་། །གང་དག་ཐལ་མོ་སྦྱར་ཏེ་མགོ་ལ་འཐུག །ལེགས་
པར་སྨྲ་བའི་དགེ་སློང་ཚོལ་བའི་ཕྱིར། །གང་དག་ཕྱོགས་བཅུ་ཀུན་ཏུ་རབ་ཏུ་འགྲོ། །ཤིན་ཏུ་རྒྱས་པའི་མདོ་སྡེ་ཀུན་འཛིན་ཏེ། །དེ་ནི་ནམ་ཡང་གཞན་ལ་དགའ་མི་བྱེད། །གཞན་ལས་ཚིགས་བཅད་གཅིག་ཀྱང་མི་འཛིན་པས། །དེ་དག་ལ་ཡང་མདོ་སྡེ་མཆོག་འདི་ཤོད། །ཇི་ལྟར་དེ་བཞིན་གཤེགས་པའི་སྐུ་གདུང་འཛིན། །དེ་ལྟར་མི་དག་ལ་ལ་དེ་ཚོལ་ཏེ། །དེ་བཞིན་དུ་ཡང་འདི་འདྲ་མདོ་སྡེ། །རྙེད་ནས་ཀྱང་ནི་དེ་དག་སྤྱི་བོས་ལེན། །མདོ་སྡེ་གཞན་ལ་ནམ་ཡང་མི་སེམས་ཏེ། །འཇིག་རྟེན་རྒྱང་པན་པ་དང་བསྟན་བཅོས་གཞན། །དེ་འདྲ་བྱིས་པ་རྣམས་ཀྱི་སྤྱོད་ཡུལ་ཏེ། །དེ་དག་ཁྱོད་ཀྱིས་སྤོངས་ལ་འདི་ཤོད་ཅིག །བསྐལ་པ་ཚང་བར་ཡང་ནི་ཤཱ་རིའི་བུ། །བྱང་ཆུབ་དམ་པ་མཆོག་འདིར་གང་ཞུགས་པའི། །རྣམ་པ་བྱེ་བ་ཕྲག་སྟོང་མང་སྨྲ་བ། །དེ་དག་མདུན་དུ་མདོ་སྡེ་འདི་ཤོད་ཅིག །དམ་པའི་ཆོས་པད་མ་དཀར་པོ་ལས་དཔེའི་ལེའུ་ཞེས་བྱ་སྟེ་གསུམ་པའོ།། །།