བརྒྱད་པ། དགེ་སློང་ལྔ་བརྒྱ་ལུང་བསྟན་པའི་ལེའུ།
བམ་པོ་བདུན་པ། དེ་ནས་ཚེ་དང་ལྡན་པ་བྱམས་མའི་བུ་གང་པོས། བཅོམ་ལྡན་འདས་ཐབས་མཁས་པའི་ཡེ་ཤེས་གཟིགས་པ་དང་། ལྡེམ་པོར་དགོངས་ཏེ་གསུངས་པ་བསྟན་པ་འདི་ལྟ་བུ་འདི་ཡང་ཐོས་ཉན་ཐོས་ཆེན་པོ་དེ་དག་ལུང་བསྟན་པ་ཡང་ཐོས་སྔོན་གྱི་སྦྱོར་བ་དང་ལྡན་པའི་གཏམ་འདི་དང་བཅོམ་ལྡན་འདས་ཀྱི་ཁྱུ་མཆོག་ཏུ་གྱུར་པ་འདི་ཡང་ཐོས་ནས། ངོ་མཚར་དུ་གྱུར་རྨད་དུ་གྱུར་ཏེ་ཟང་ཟིང་མེད་པའི་སེམས་ཀྱིས་དགའ་བ་དང་མཆོག་ཏུ་དགའ་བས་ཁྱབ་པར་གྱུར་ནས། དེ་མཆོག་ཏུ་དགའ་བ་ཆེན་པོ་དང་ཆོས་ལ་གུས་པ་ཆེན་པོས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་
ཕྱག་འཚལ་ནས་འདི་སྙམ་དུ་འདི་ལྟར་ཁམས་ཐ་དད་པའི་འཇིག་རྟེན་གྱི་རྗེས་སུ་འཐུན་པར་འཇུག་པ་དང་ཐབས་མཁས་པའི་ཡེ་ཤེས་གཟིགས་པ་མང་པོས་སེམས་ཅན་རྣམས་ལ་ཆོས་སྟོན་པ་དང་དེ་དང་དེ་ལ་ཆགས་པའི་སེམས་ཅན་རྣམས་རབ་ཏུ་འགྲེལ་པ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཤིན་ཏུ་དཀའ་བ་མཛད་དེ། བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་འདི་ལ་ནི་བདག་ཅག་གིས་བགྱིད་པའི་རྔོ་ག་ལ་ཐོགས་ཏེ། དེ་བཞིན་གཤེགས་པ་ཉིད་ཀྱིས་བདག་ཅག་གི་བསམ་པ་དང་སྔོན་གྱི་སྦྱོར་བའི་སྤྱོད་པ་མཁྱེན་ཏོ་སྙམ་དུ་སེམས་བསྐྱེད་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང་མིག་མི་འཛུམས་པར་ལྟའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་བྱམས་མའི་བུ་གང་པོའི་སེམས་ཀྱི་བསམ་པ་ལ་གཟིགས་ནས་ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་ཁྱེད་ངའི་ཉན་ཐོས་བྱམས་མའི་བུ་གང་པོ་འདི་ལ་ལྟོས། འདི་ནི་ངས་དགེ་སློང་གི་དགེ་འདུན་འདིའི་ནང་ན་ཆོས་སྒྲོག་པ་རྣམས་ཀྱི་མཆོག་ཏུ་བསྟན་པ་ཡང་དག་པའི་ཡོན་ཏན་མང་པོས་བསྟོད་པ། ངའི་བསྟན་པ་འདི་ལ་རྣམ་པ་མང་པོས་དམ་པའི་ཆོས་ཡོངས་སུ་འཛིན་པར་མངོན་པར་བརྩོན་པ། འཁོར་བཞི་ཡང་དག་པར་རབ་ཏུ་དགའ་བར་བྱེད་པ་ཡང་དག་པར་འཛིན་དུ་འཇུག་པ་ཡང་དག་པར་གཟེངས་སྟོད་པ་ཆོས་འཆད་པས་ངལ་བ་མེད་པ་ཆོས་འདི་འཆད་ནུས་པ་ཚངས་པ་མཚུངས་པར་སྤྱོད་པ་རྣམས་ལ་ཕན་འདོགས་ནུས་པ་སྟེ། དགེ་སློང་དག་དེ་བཞིན་གཤེགས་པ་མ་གཏོགས་པར་གཞན་གྱིས་བྱམས་མའི་བུ་གང་པོ། དོན་ནམ་ཚིག་འབྲུས་ཡོངས་སུ་གཏུག་པར་མི་ནུས་སོ། །དགེ་སློང་དག་འདི་ཇི་སྙམ་དུ་སེམས། འདི་ང་འབའ་ཞིག་གི་དམ་པའི་ཆོས་འཛིན་པ་ཡིན་སྙམ་དུ་སེམས་ན་དགེ་སློང་དག་ཁྱེད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དགེ་སློང་དག་ངས་མངོན་པར་དྲན་ཏེ། འདས་པའི་དུས་ན་སངས་རྒྱས་བྱེ་བ་ཕྲག་དགུ་བཅུ་རྩ་དགུ་བྱུང་བའི་སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་འདི་ཉིད་ཀྱིས་དམ་པའི་ཆོས་ཡོངས་སུ་བཟུང་སྟེ། ཇི་ལྟར་ད་ལྟར་ང་ཡི་ཆོས་སྒྲོག་པ་རྣམས་ཀྱི་
མཆོག་ཏུ་གྱུར་པ་བཞིན་དུ་ཐམས་ཅད་དུ་ཡང་གྱུར་ཏོ། །ཐམས་ཅད་དུ་ཡང་སྟོང་པ་ཉིད་རྟོགས་པར་ཁོང་དུ་ཆུད་པར་གྱུར་ཏོ། །ཐམས་ཅད་དུ་ཡང་སོ་སོ་ཡང་དག་པར་རིག་པ་ཐོབ་པར་གྱུར་ཏོ། །ཐམས་ཅད་དུ་ཡང་བྱང་ཆུབ་སེམས་དཔའི་མངོན་པར་ཤེས་པ་ལེགས་པར་རྟོགས་པར་ཁོང་དུ་ཆུད་པར་གྱུར་ཏོ། །ཤིན་ཏུ་ངེས་པར་ཆོས་སྟོན་པ་དང་ཐེ་ཚོམ་མེད་པར་ཆོས་སྟོན་པ་དང་ཡོངས་སུ་དག་པར་ཆོས་སྟོན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་གི་བསྟན་པ་ལ་ཆོས་བཙལ་ཏེ་ཚངས་པར་སྤྱོད་པ་སྤྱད་དོ། །ཐམས་ཅད་དུ་ཡང་ཉན་ཐོས་སུ་ཀུན་གྱིས་ཤེས་ཏེ། དེ་ཐབས་འདིས་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་གྲངས་མེད་པ་རྣམས་ཀྱི་དོན་བྱས་སོ། །སེམས་ཅན་དཔག་ཏུ་མེད་གྲངས་མེད་པ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཐམས་ཅད་དུ་ཡང་སངས་རྒྱས་ཀྱི་བྱ་བས་སེམས་ཅན་རྣམས་ལ་ཉེ་བར་གནས་པར་གྱུར་ཏོ། །ཐམས་ཅད་དུ་ཡང་བདག་གིས་སངས་རྒྱས་ཀྱི་ཞིང་ཡོངས་སུ་དག་པར་བྱས་སོ། །སེམས་ཅན་དག་ཡོངས་སུ་སྨིན་པར་བྱ་བ་ལ་བརྩོན་པར་གྱུར་ཏོ། །དགེ་སློང་དག་རྣམ་པར་གཟིགས་ལ་སོགས་པ་དེ་བཞིན་གཤེགས་པ་བདུན་པོ་དེ་དག་གི་ཐ་མ་ནི་ང་ཡིན་ཏེ། དེ་དག་གི་ཡང་ཆོས་རྗོད་པའི་མཆོག་ཏུ་གྱུར་ཏོ། །དགེ་སློང་དག་བསྐལ་པ་བཟང་པོ་འདི་ལ་མ་འོངས་པའི་དུས་ན་སངས་རྒྱས་སྟོང་དུ་སངས་རྒྱས་བཞིས་མ་ཚང་བ་གང་དག་འབྱུང་བ་དེ་དག་གི་བསྟན་པ་ལ་ཡང་། བྱམས་མའི་བུ་གང་པོ་འདི་ཉིད་ཆོས་སྟོན་པའི་མཆོག་ཏུ་འགྱུར། དམ་པའི་ཆོས་ཡོངས་སུ་འཛིན་པར་འགྱུར་རོ། །དེ་བཞིན་དུ་མ་འོངས་པའི་དུས་ན་སངས་རྒྱས་བཅོམ་ལྡན་འདས་དཔག་ཏུ་མེད་གྲངས་མེད་པའི་དམ་པའི་ཆོས་ཀུན་འཛིན་པར་འགྱུར་རོ། །སེམས་ཅན་དཔག་ཏུ་མེད་གྲངས་མེད་པ་རྣམས་ཀྱི་དོན་བྱེད་པར་འགྱུར་རོ། །སེམས་ཅན་དཔག་ཏུ་མེད་གྲངས་མེད་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །རྟག་ཏུ་རྒྱུན་མི་ཆད་པར་འགྱུར་རོ། །བདག་གི་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང་། སེམས་ཅན་ཡོངས་སུ་སྨིན་པར་བྱ་བ་ལ་བརྩོན་པར་འགྱུར་རོ། །དེས་བྱང་ཆུབ་སེམས་དཔའི་སྤྱོད་པ་འདི་ལྟ་བུ་ཡོངས་སུ་རྫོགས་པར་བྱས་
ཏེ། བསྐལ་པ་གྲངས་མེད་དཔག་ཏུ་མེད་པ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཆོས་རབ་ཏུ་སྣང་བ་ཞེས་བྱ་བ་འཇིག་རྟེན་དུ་འབྱུང་སྟེ། སངས་རྒྱས་ཀྱི་ཞིང་འདི་ཉིད་དུ་འབྱུང་བར་འགྱུར་རོ། །དགེ་སློང་དག་ཡང་དེའི་ཚེ་སངས་རྒྱས་ཀྱི་ཞིང་འདི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་སངས་རྒྱས་ཀྱི་ཞིང་གཅིག་ཏུ་འགྱུར་ཏེ། དེ་རིན་པོ་ཆེ་སྣ་བདུན་གྱི་གཞི་ལ་ལག་མཐིལ་ལྟར་མཉམ་པ་རི་མེད་པ་རིན་པོ་ཆེ་སྣ་བདུན་གྱི་ཁང་པ་བརྩེགས་པས་ཡོངས་སུ་གང་བར་འགྱུར་རོ། །ལྷའི་གཞལ་མེད་ཁང་དག་དང་ཉེ་བར་གྱུར་ཏེ། ལྷ་དག་གིས་ཀྱང་མི་མཐོང་མི་དག་གིས་ཀྱང་ལྷ་མཐོང་བར་འགྱུར་རོ། །དགེ་སློང་དག་དེའི་ཚེ་སངས་རྒྱས་ཀྱི་ཞིང་འདི་ན་ངན་སོང་མེད་པར་འགྱུར་བུད་མེད་ཀྱང་མེད་དེ་སེམས་ཅན་དེ་དག་ཐམས་ཅད་ཀྱང་བརྫུས་ཏེ་སྐྱེ་བ། ཚངས་པར་སྤྱོད་པ་ཡིད་ལ་བྱེད་པའི་ལུས་འོད་རང་ལ་ཡོད་པ་རྫུ་འཕྲུལ་ཅན་ནམ་མཁའ་ལ་འགྲོ་བ་བརྩོན་འགྲུས་དང་ལྡན་པ་དྲན་པ་དང་ལྡན་པ་ཤེས་རབ་དང་ལྡན་པ་ལུས་གསེར་གྱི་ཁ་དོག་ཅན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་བརྒྱན་པར་འགྱུར་རོ། །དགེ་སློང་དག་ཡང་དེའི་ཚེ་སངས་རྒྱས་ཀྱི་ཞིང་འདིར་སེམས་ཅན་དེ་དག་གི་ཟས་རྣམ་པ་གཉིས་སུ་འགྱུར་ཏེ་གཉིས་གང་ཞེ་ན། འདི་ལྟ་སྟེ། ཆོས་ཀྱི་དགའ་བའི་ཟས་དང་བསམ་གཏན་གྱི་དགའ་བའི་ཟས་སོ། །དེའི་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་དཔག་ཏུ་མེད་པ་འབྱུང་སྟེ། ཐམས་ཅད་ཀྱང་མངོན་པར་ཤེས་པ་ཆེན་པོ་ཐོབ་པ་སོ་སོ་ཡང་དག་པར་རིག་པ་རྣམས་རྟོགས་པར་ཁོང་དུ་ཆུད་པ་སེམས་ཅན་ལ་འདེམས་མཁས་པ་ཤ་སྟག་སྟེ། དེའི་ཉན་ཐོས་བགྲང་བ་ལས་འདས་པ་འབྱུང་སྟེ། རྫུ་འཕྲུལ་ཆེ་བ་མཐུ་ཆེ་བ་རྣམ་པར་ཐར་པ་བརྒྱད་ལ་བསམ་གཏན་པ་ཤ་སྟག་གོ ། སངས་རྒྱས་ཀྱི་ཞིང་དེ་དེ་ལྟ་བུའི་ཡོན་ཏན་ཚད་མེད་པ་དང་ལྡན་པར་འགྱུར་རོ། །བསྐལ་པ་ནི་རིན་པོ་ཆེ་སྣང་བ་ཞེས་བྱ་བར་འགྱུར་
རོ། །འཇིག་རྟེན་གྱི་ཁམས་དེ་ནི་ཤིན་ཏུ་རྣམ་པར་དག་པ་ཞེས་བྱ་བར་འགྱུར་རོ། །དེའི་ཚེའི་ཚད་ནི་བསྐལ་པ་གྲངས་མེད་དཔག་ཏུ་མེད་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རབ་ཏུ་སྣང་བ་དེ་ཡོངས་སུ་མྱ་ངན་ལས་འདས་ནས་ཀྱང་། དམ་པའི་ཆོས་ཡུན་རིང་དུ་གནས་པར་འགྱུར། འཇིག་རྟེན་གྱི་ཁམས་དེ་རིན་པོ་ཆེའི་མཆོད་རྟེན་གྱིས་གང་བར་འགྱུར་རོ། །དགེ་སློང་དག་དེ་ལྟར་བཅོམ་ལྡན་འདས་དེའི་སངས་རྒྱས་ཀྱི་ཞིང་དེ་ཡོན་ཏན་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་ཅེས་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །ང་ཡི་བུ་ནི་ཐབས་མཁས་ལེགས་བསླབས་པས། །ཇི་ལྟར་སྤྱོད་པ་སྤྱད་པར་གྱུར་པ་དང་། །ཇི་ལྟར་བྱང་ཆུབ་སྤྱོད་པ་འདིར་སྤྱད་པ། །དོན་དེ་ང་ལས་ཉོན་ཅིག་དགེ་སློང་དག །ཐེག་པ་རླབས་པོ་ཆེས་ནི་སྐྲག་འགྱུར་ཞིང་། །འདི་ན་སེམས་ཅན་དམན་ལ་མོས་རིག་ནས། །བྱང་ཆུབ་སེམས་དཔའ་འདི་དག་ཉན་ཐོས་གྱུར། །རང་རྒྱལ་བྱང་ཆུབ་པར་ཡང་རབ་ཏུ་སྟོན། །ཐབས་ལ་མཁས་པ་བརྒྱ་ཕྲག་དུ་མ་ཡིས། །བྱང་ཆུབ་སེམས་དཔའ་མང་པོ་སྨིན་པར་བྱེད། །འདི་སྐད་བདག་ཅག་ཉན་ཐོས་བདག་ཅག་ནི། །བྱང་ཆུབ་དམ་པ་མཆོག་ལས་རིང་ཞེས་སྨྲ། །དེ་དག་རྗེས་སུ་སྤྱོད་པ་དེ་སློབ་པས། །སེམས་ཅན་བྱེ་བ་འདི་དག་སྨིན་པར་འགྱུར། །དམན་ལ་མོས་ཤིང་ལེ་ལོ་ཅན་གྱི་ཚུལ། །དེ་དག་ཐམས་ཅད་མཐར་གྱིས་སངས་རྒྱས་འགྱུར། །དེ་དག་མི་ཚོར་བར་ནི་སྤྱད་པ་སྤྱོད། །བདག་ཅག་ཉན་ཐོས་བྱེད་པ་ཆུང་བ་ཡིན། །ཤི་འཕོ་སྐྱེ་བ་ཀུན་ལས་རབ་ཏུ་སྐྱོ། །བདག་གི་ཞིང་ཡང་ཡོངས་སུ་དག་པར་བྱེད། །བདག་ཉིད་འདོད་ཆགས་བཅས་ཤིང་ཞེ་སྡང་བཅས། །གཏི་མུག་བཅས་པར་ཡང་ནི་རབ་ཏུ་སྟོན། །སེམས་ཅན་ལྟ་ལ་ཆགས་པར་རིག་ནས་ཀྱང་། །དེ་ཡི་ལྟ་བ་རྣམས་ལ་ཉེ་བར་གནས། །ང་ཡི་ཉན་ཐོས་མང་དུ་དེ་ལྟར་སྤྱོད། །སེམས་ཅན་ཐབས་ཀྱིས་རྣམ་པར་གྲོལ་བར་བྱེད། །དེ་ཡིས་སྤྱོད་པ་ཐམས་ཅད་རབ་བསྟན་ན། །མི་མཁས་མི་རྣམས་ཤིན་ཏུ་མྱོས་པར་འགྱུར། །
དགེ་སློང་གང་པོ་ང་ཡི་ཉན་ཐོས་འདི། །སངས་རྒྱས་རྣམས་ཀྱི་ཡེ་ཤེས་འདི་ཚོལ་ཕྱིར། །སྔོན་གྱི་སངས་རྒྱས་བྱེ་བ་སྟོང་ལ་སྤྱད། །དེ་དག་རྣམས་ཀྱི་དམ་ཆོས་ཡོངས་སུ་བཟུང་། །ཀུན་ཏུ་འདི་ནི་ཉན་ཐོས་མཆོག་ཏུ་གྱུར། །མང་དུ་ཐོས་ཤིང་འཇིགས་མེད་སྣ་ཚོགས་རྗོད། །རྟག་ཏུ་མི་སྐྱོ་ཡང་དག་དགའ་བར་བྱེད། །རྟག་ཏུ་སངས་རྒྱས་བྱེ་བས་ཉེ་བར་གནས། །རྟག་ཏུ་མངོན་ཤེས་ཆེན་པོས་རྟོགས་པར་རིག །སོ་སོ་ཡང་དག་རིག་པ་ཐོབ་པར་གྱུར། །སེམས་ཅན་རྣམས་ཀྱི་དབང་པོ་སྤྱོད་ཡུལ་ཤེས། །རྟག་ཏུ་རྣམ་པར་དག་པའི་ཆོས་ཀྱང་འཆད། །དམ་པའི་ཆོས་ཀྱི་མཆོག་ཀྱང་རབ་འཆད་ཅིང་། །བླ་ན་མེད་པའི་ཐེག་པ་མཆོག་འདི་ལ། །སེམས་ཅན་བྱེ་བ་ཕྲག་སྟོང་ཡོངས་སྨིན་བྱེད། །བདག་གི་ཞིང་མཆོག་རྣམ་པར་དག་པར་བྱེད། །མ་འོངས་དུས་ཀྱི་ཚེ་ཡང་དེ་བཞིན་དུ། །སངས་རྒྱས་བྱེ་བ་ཕྲག་སྟོང་མཆོད་པར་འགྱུར། །དམ་པའི་ཆོས་མཆོག་རྣམས་ཀྱང་རབ་ཏུ་འཛིན། །བདག་གི་ཞིང་ཡང་ཡོངས་སུ་དག་བྱེད་འགྱུར། །རྟག་ཏུ་འཇིགས་པ་མེད་པར་ཆོས་འཆད་དེ། །ཐབས་ལ་མཁས་པ་བྱེ་བ་ཕྲག་སྟོང་གིས། །ཐམས་ཅད་མཁྱེན་གྱི་ཡེ་ཤེས་ཟག་མེད་ལ། །སེམས་ཅན་མང་པོ་ཡོངས་སུ་སྨིན་པར་བྱེད། །མི་ཡི་འདྲེན་པ་རྣམས་ལ་དེས་མཆོད་ནས། །དམ་པའི་ཆོས་མཆོག་རྟག་ཏུ་བཟུང་ནས་ནི། །འཇིག་རྟེན་དུ་ཡང་རང་བྱུང་སངས་རྒྱས་འགྱུར། །ཆོས་རབ་སྣང་ཞེས་ཕྱོགས་སུ་རབ་ཏུ་གྲགས། །དེ་ཡི་ཞིང་ཡང་ཤིན་ཏུ་རྣམ་དག་འགྱུར། །རིན་ཆེན་སྣ་བདུན་རྟག་ཏུ་ཁྱད་པར་འཕགས། །བསྐལ་པ་དེ་ནི་རིན་ཆེན་སྣང་བ་ཡིན། །འཇིག་རྟེན་ཁམས་དེ་ཤིན་ཏུ་རྣམ་དག་ཡིན། །མངོན་ཤེས་ཆེ་ལ་ཤིན་ཏུ་མཁས་པ་ཡིན། །བྱང་ཆུབ་སེམས་དཔའ་བྱེ་བ་སྟོང་མང་སྟེ། །རྣམ་དག་བློ་ཅན་རྫུ་འཕྲུལ་ཆེ་རྣམས་ཀྱིས། །འཇིག་རྟེན་ཁམས་དེ་ཡོངས་སུ་གང་བར་འགྱུར། །དེ་བཞིན་ཉན་ཐོས་དག་ཀྱང་བྱེ་བ་སྟོང་། །དེ་ཚེ་འདྲེན་པའི་དགེ་འདུན་འབྱུང་བ་ནི། །རྣམ་ཐར་བརྒྱད་ལ་བསམ་གཏན་རྫུ་འཕྲུལ་ཆེ། །སོ་སོ་ཡང་དག་རིག་པ་རྟོགས་པར་རིག །སེམས་ཅན་ཐམས་ཅད་སངས་རྒྱས་ཞིང་དེ་ན། །ཚངས་པར་སྤྱོད་ཅིང་རབ་ཏུ་དགའ་བར་འགྱུར། །ཐམས་ཅད་གསེར་གྱི་མདོག་ཅན་བརྫུས་ཏེ་སྐྱེ། །སུམ་ཅུ་རྩ་གཉིས་
མཚན་གྱི་གཟུགས་དང་ལྡན། །ཆོས་ལ་མངོན་པར་དགའ་བ་མ་གཏོགས་པར། །དེ་ན་ཟས་ཀྱི་འདུ་ཤེས་མེད་པར་འགྱུར། །དེར་ནི་བུད་མེད་རྣམས་ཀྱང་མི་འབྱུང་སྟེ། །ངན་སོང་དང་ནི་ངན་འགྲོས་འཇིགས་པ་མེད། །སེམས་ཅན་རབ་ཏུ་དགེ་བས་ཀུན་གང་སྟེ། །གང་པོ་ཡོན་ཏན་ཡང་དག་རྫོགས་ལྡན་གྱི། །ཞིང་མཆོག་དེ་ནི་དེ་འདྲར་འགྱུར་བ་སྟེ། །འདི་ནི་ཅུང་ཟད་ཙམ་ཞིག་བཤད་པ་ཡིན། །དེ་ནས་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་དེ་དག་འདི་སྙམ་དུ་སེམས་ཏེ། གལ་ཏེ་བདག་ཅག་ཀྱང་བཅོམ་ལྡན་འདས་ཀྱིས་ཉན་ཐོས་ཆེན་པོ་གཞན་དག་ཇི་ལྟར་ལུང་བསྟན་པ་དེ་བཞིན་དུ། དེ་བཞིན་གཤེགས་པས་བདག་ཅག་སོ་སོར་ལུང་བསྟན་ན་ངོ་མཚར་དུ་འགྱུར་རྨད་དུ་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་ཉན་ཐོས་ཆེན་པོ་དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱིས་ཐུགས་སུ་ཆུད་ནས། ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་དབང་དང་ལྡན་པར་གྱུར་པ་སྟོང་ཉིས་བརྒྱ་པོ་གང་དག་ད་ལྟར་ང་མངོན་སུམ་དུ་གྱུར་པའི་འདི་དག་ཐམས་ཅད་འདིའི་འོག་ཏུ་ལུང་བསྟན་ཏོ། །འོད་སྲུང་དེ་ལ་ཉན་ཐོས་ཆེན་པོ་དགེ་སློང་ཀཽཎྜི་ནྱ་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་གཉིས་ཀྱི་ཕ་རོལ་གྱི་ཡང་ཆེས་ཕ་རོལ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་ཀུན་ཏུ་སྣང་བ་ཞེས་བྱ་བར་འཇིག་རྟེན་དུ་འབྱུང་སྟེ། འོད་སྲུང་དེ་ན་མིང་འདི་གཅིག་ཏུ་བཏགས་པ་དེ་བཞིན་གཤེགས་པ་ལྔ་བརྒྱ་འབྱུང་བར་འགྱུར་རོ། །ཉན་ཐོས་ཆེན་པོ་ལྔ་བརྒྱ་པོ་ཐམས་ཅད་གཅིག་གི་འོག་ཏུ་གཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། ཐམས་ཅད་ཀྱང་ཀུན་ཏུ་སྣང་བ་ཞེས་བྱ་བར་འགྱུར་རོ། །འདི་ལྟ་སྟེ། ག་ཡཱ་འོད་སྲུང་དང་། ཆུ་ཀླུང་འོད་སྲུང་དང་། ལྟེང་རྒྱས་འོད་སྲུང་དང་། ནག་པོ་དང་། འཆར་ཀ་ནག་པོ་དང་། མ་འགགས་པ་དང་། ནམ་གྲུ་དང་། ཀ་པི་ན་དང་། བ་ཀུ་ལ་དང་། སྐུལ་བྱེད་དང་།
ལེགས་འོངས་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཀཽཎྜི་ནྱ་རིགས་ང་ཡི་ཉན་ཐོས་འདི། །མ་འོངས་དུས་ཀྱི་བསྐལ་པ་མཐའ་ཡས་ན། །དེ་བཞིན་གཤེགས་པ་འཇིག་རྟེན་མགོན་དུ་འགྱུར། །སྲོག་ཆགས་བྱེ་བ་ཕྲག་སྟོང་རྣམ་པར་འདུལ། །མ་འོངས་དུས་ཀྱི་མཐའ་ཡས་བསྐལ་པ་ན། །སངས་རྒྱས་མང་པོ་མཐའ་ཡས་མཐོང་ནས་ནི། །ཀུན་ཏུ་སྣང་ཞེས་བྱ་བའི་རྒྱལ་བར་འགྱུར། །དེ་ཡི་ཞིང་ཡང་ཡོངས་སུ་དག་པར་འགྱུར། །སངས་རྒྱས་སྟོབས་དང་འོད་དུ་ལྡན་པར་འགྱུར། །ཕྱོགས་བཅུ་དག་ཏུ་སྒྲ་ཡང་རྣམ་པར་བསྒྲགས། །སྲོག་ཆགས་བྱེ་བ་སྟོང་གིས་མདུན་གྱིས་བལྟས། །བྱང་ཆུབ་དམ་པ་མཆོག་ཀྱང་སྟོན་པར་འགྱུར། །དེ་ནས་བྱང་ཆུབ་སེམས་དཔའ་བརྩོན་པ་རྣམས། །གཞལ་མེད་ཁང་མཆོག་ཏུ་ནི་མངོན་ཞུགས་ནས། །དེ་ན་གནས་ཤིང་རྗེས་སུ་རྣམ་པར་སེམས། །རྣམ་དག་ཚུལ་ཁྲིམས་རྟག་ཏུ་ལེན་པའི་ཚུལ། །རྐང་གཉིས་གཙོ་བོ་དེ་ཡི་ཆོས་ཐོས་ནས། །ཞིང་གཞན་དུ་ནི་དེ་དག་རྟག་ཏུ་ཡང་། །དེ་དག་སངས་རྒྱས་སྟོང་ལ་ཕྱག་འཚལ་འགྲོ། །དེ་དག་ལ་ནི་རྒྱ་ཆེའི་མཆོད་བྱས་ཏེ། །སྐད་ཅིག་གིས་ནི་རྣམ་པར་འདྲེན་པ་ཡིན། །ཞིང་དེར་དེ་དག་ཕྱིར་ཡང་འོང་བར་འགྱུར། །རབ་ཏུ་སྣང་ཞེས་བྱ་བ་མི་ཡི་གཙོ། །སྤྱོད་པའི་སྟོབས་ནི་དེ་ལྟར་དེ་འདྲར་འགྱུར། །བདེ་གཤེགས་དེ་ཡི་ཚེ་ཚད་འགྱུར་བར་ནི། །བསྐལ་པ་སྟོང་ཕྲག་དྲུག་ཅུ་ཚང་བར་འགྱུར། །སྐྱོབ་པ་ཡོངས་སུ་མྱ་ངན་འདས་ནས་ནི། །དེ་ལས་ཉིས་གྱུར་དམ་ཆོས་དེར་གནས་འགྱུར། །དེ་ཡི་གཟུགས་བརྙན་འབྱུང་བར་འགྱུར་བ་ནི། །དེ་ཡི་སུམ་འགྱུར་དེ་སྲིད་དུས་སུའོ། །སྐྱོབ་པ་དེ་ཡི་དམ་ཆོས་མེད་གྱུར་ནས། །ལྷ་རྣམས་དང་ནི་མི་དག་སྡུག་བསྔལ་འགྱུར། །སྐྱེས་མཆོག་ཀུན་དུ་སྣང་ཞེས་བྱ་བར་ཡང་། །མིང་གཅིག་པ་ཡི་རྒྱལ་བ་འབྱུང་བ་ནི། །འདྲེན་པ་ལྔ་བརྒྱ་ཡོངས་སུ་ཚང་བ་སྟེ། །དེ་དག་གཅིག་གི་འོག་ཏུ་གཅིག་འབྱུང་འགྱུར། །དེ་དག་ཀུན་གྱི་བཀོད་པ་དེ་འདྲ་སྟེ། །རྫུ་འཕྲུལ་སྟོབས་དང་དེ་བཞིན་སངས་རྒྱས་ཞིང་། །འདུས་པ་དེ་བཞིན་དམ་ཆོས་དེ་འདྲ་སྟེ། །དམ་པའི་ཆོས་གནས་པ་ཡང་མཉམ་པར་
འགྱུར། །ཀུན་ཏུ་སྣང་བ་སྐྱེས་བུ་དམ་པ་ཡི། །ཇི་ལྟར་ང་ཡིས་སྔར་ནི་བཤད་པ་བཞིན། །དེ་ཚེ་སྒྲ་ནི་ལྷར་བཅས་འཇིག་རྟེན་དུ། །ཐམས་ཅད་དེ་དག་ལྟ་བུར་འགྱུར་བ་ཡིན། །ཇི་ལྟར་འཇིག་རྟེན་ཐམས་ཅད་ངས་བསྟན་བཞིན། །འདི་ནི་ང་ཡི་འོག་ཏུ་འབྱུང་ངོ་ཞེས། །མཐར་གྱིས་དེ་ལྟར་དེ་དག་གཅིག་ནས་གཅིག །ཕན་ཞིང་སྙིང་བརྩེ་བ་དག་ལུང་བསྟན་འགྱུར། །འོད་སྲུང་ཁྱོད་ཀྱིས་དེ་རིང་དབང་ལྡན་པ། །ལྔ་བརྒྱ་ལས་ནི་མི་ཉུང་འདི་དག་དང་། །ང་ཡི་ཉན་ཐོས་གཞན་ཡང་དེ་ལྟར་ཟུང་། །དེ་བཞིན་དུ་ཡང་ཉན་ཐོས་གཞན་ལ་བསྒོ། །དེ་ནས་དགྲ་བཅོམ་པ་ལྔ་བརྒྱ་པོ་དེ་དག །བཅོམ་ལྡན་འདས་ལས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་སུམ་དུ་ལུང་བསྟན་པ་ཐོས་ནས་ཚིམ་ཞིང་མགུ་ལ་ཡི་རངས་ཏེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་རྟག་ཏུ་རྒྱུན་མི་ཆད་པར་འདི་ནི་བདག་ཅག་གི་མྱ་ངན་ལས་འདའ་བ་ལགས་ཏེ། བདག་ཅག་ནི་ཡོངས་སུ་མྱ་ངན་ལས་འདས་སོ་སྙམ་སེམས་ལ། ཡོངས་སུ་བསྒོམས་པའི་ནོངས་པ་དེ་དག་བདག་ཅག་གིས་བཤགས་སོ། །བཅོམ་ལྡན་འདས་འདི་ནི་བདག་གིས་མ་རྟོགས་མ་འཚལ་མི་མཁས་པ་ལགས་ཏེ། དེ་ཅིའི་སླད་དུ་ཞེ་ན། འདི་ལྟར་བདག་ཅག་དེ་བཞིན་གཤེགས་པའི་ཡེ་ཤེས་ཀྱིས་མངོན་པར་རྫོགས་པར་འཚང་རྒྱ་བར་བགྱི་བ་ལགས་ན། འདི་ལྟ་བུའི་ཡེ་ཤེས་ཆུང་ངུས་འཚལ་ལོ་སྙམ་མོ། །འདི་ལྟ་སྟེ་དཔེར་ན། མི་ལ་ལ་ཞིག་མཛའ་བོའི་མཆིས་བྲང་དུ་མཆིས་ནས། དེ་ཕྱག་ལས་ཁོམ་མམ་མཆིས་ཉལ་བ་ལ་མཛའ་བོ་དེས། འདིའི་ནོར་བུ་རིན་པོ་ཆེར་འདི་བྱའོ། །ཞེས་རིན་ཐང་མ་མཆིས་པའི་ནོར་བུ་རིན་པོ་ཆེ་དེ་གོས་ཀྱི་མཐའ་མར་ཕུར་རོ། །བཅོམ་ལྡན་འདས་དེ་ནས་མི་དེ་མཆིས་ལངས་ཏེ་འཕགས་ནས་ཡུལ་ཕྱོགས་གཞན་དུ་མཆིས་ཏེ། དེ་དེ་ན་ཉོན་མོངས་པར་གྱུར་ནས་འཚལ་མ་དང་རད་པ་ཚོལ་བའི་སླད་དུ། ཤིན་ཏུ་ཉོན་མོངས་ཤིང་ཆེར་འབད་དེ། གཞིག་ནས་ཁ་ཟས་ཅུང་ཟད་རྙེད་ནས་དེས་མགུ་སྟེ་རབ་ཏུ་
དགའ་བར་གྱུར་ཏོ། །བཅོམ་ལྡན་འདས་དེ་ནས་མི་དེའི་མཛའ་བོ་རྙིང་པས་དེའི་གོས་ཀྱི་མཐའ་མར་རིན་ཐང་མ་མཆིས་པའི་ནོར་བུ་རིན་པོ་ཆེ་ཕུར་མ་བགྱིས་པའི་མི་དེས་ཡང་མཐོང་ནས། དེས་དེ་ལ་འདི་སྐད་ཅེས། ཀྱེ་མི་ཁྱོད་ཟས་དང་སྐོམ་ཚོལ་བའི་ཕྱིར། ཅི་སྟེ་ཉོན་མོངས་སུ་འོང་ཞེས། ཀྱེ་མི་ཁྱོད་བདེ་བར་གནས་པར་བྱ་བའི་ཕྱིར་ངས་འདོད་པ་ཐམས་ཅད་གྲུབ་པར་བྱེད་པ་རིན་ཐང་མེད་པའི་ནོར་བུ་རིན་པོ་ཆེ་གོས་ཀྱི་མཐའ་མར་ཕུར་ཏེ། ཀྱེ་མི་ཁྱོད་ངས་ནོར་བུ་རིན་པོ་ཆེ་དེ་བྱིན་ནས། ཀྱེ་མི་ཁྱོད་གོས་ཀྱི་མཐའ་མ་ལ་ནོར་བུ་རིན་པོ་ཆེ་རིན་ཐང་མེད་པ་ཕུར་ན། བདག་ལ་ནམ་ཕུར། སུ་ཞིག་གིས་ཕུར། ཅིའི་རྒྱུ་ཅིའི་ཕྱིར་ཕུར་བ། ཀྱེ་མི་ཁྱོད་ཅུང་ཟད་ཀྱང་མི་ལྟ་འམ། ཀྱེ་མི་ཁྱོད་བྱིས་པའི་རང་བཞིན་ཅན་ཏེ། ཀྱེ་མི་ཁྱོད་ཉོན་མོངས་པར་ཟས་དང་གོས་ཚོལ་བ་ཙམ་གྱིས་ཆོག་པར་འཛིན་ཏམ། ཀྱེ་མི་ཁྱོད་སོང་ལ་རིན་ཐང་མེད་པའི་ནོར་བུ་རིན་པོ་ཆེ་འདི་ཁྱེར་ཏེ། གྲོང་ཁྱེར་ཆེན་པོར་སོང་ལ་ནོར་དེས་ནོར་གྱི་བྱ་བ་ཐམས་ཅད་བྱོས་ཤིག་ཅེས་མཆི་བ་དེ་བཞིན་དུ། བཅོམ་ལྡན་འདས་བདག་ཅག་ཀྱང་། དེ་བཞིན་གཤེགས་པས་ཐོག་མ་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཐམས་ཅད་མཁྱེན་པ་ཉིད་ཀྱི་སེམས་བསྐྱེད་པར་གྱུར་པ་དེ་དག་བདག་ཅག་གིས་མ་རྟོགས་མ་འཚལ་ཏེ། བཅོམ་ལྡན་འདས་དེའི་སླད་དུ་བདག་ཅག་ཀྱང་དགྲ་བཅོམ་པའི་ས་ནས་མྱ་ངན་ལས་འདས་པ་སྙམ་བགྱིད་དོ། །བཅོམ་ལྡན་འདས་བདག་ཅག་ཉོན་མོངས་པར་ཚོལ་ཞིང་། བཅོམ་ལྡན་འདས་འདི་ལྟ་བུའི་ཡེ་ཤེས་ཆུང་ངུས་འཚལ་བར་འཛིན་ཏོ། །ཐམས་ཅད་མཁྱེན་པའི་ཡེ་ཤེས་སུ་སྨོན་པ་རྟག་ཏུ་མ་ཉམས་པ་དེས་བཅོམ་ལྡན་འདས་བདག་ཅག་དེ་བཞིན་གཤེགས་པས་ཁོང་དུ་ཆུད་པར་བསྟན་པ། དགེ་སློང་དག་ཁྱོད་འདི་ལྟར་མྱ་ངན་ལས་འདས་པར་མ་སེམས་ཤིག་དགེ་སློང་དག་ངས་སྔོན་ཡོངས་སུ་སྨིན་པར་བྱས་པའི་དགེ་བའི་རྩ་བ་དེ་དག་ཁྱེད་ཀྱི་སེམས་ལ་ཡོད་དོ། །ཆོས་བཤད་ཅིང་བརྗོད་པས་ཁྱོད་ད་ལྟར་མྱ་ངན་ལས་འདའ་བ་ཡིན་པར་སེམས་པ་དེ་ཡང་། ང་ཡི་ཐབས་མཁས་པའོ་ཞེས་དེ་ལྟར་བཅོམ་ལྡན་འདས་ཀྱིས་བདག་ཅག་ཁོང་དུ་ཆུད་པར་བགྱིས་ཏེ། དེ་རིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་
ཀུན་ཤེས་ཀཽཎྜི་ནྱ་ལ་སོགས་པ་དབང་དང་ལྡན་པར་གྱུར་པ་ལྔ་བརྒྱ་པོ་དེ་དག་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །གང་ཕྱིར་མཆོག་རབ་བྱང་ཆུབ་ལུང་བསྟན་ཏེ། །འདི་འདྲ་བ་ཡི་དབུགས་འབྱིན་བླ་མེད་པ། །འདི་ཐོས་ནས་ནི་བདག་ཅག་དགའ་མགུ་སྟེ། །བཅོམ་ལྡན་མཐའ་ཡས་སྤྱན་ལ་ཕྱག་འཚལ་ལོ། །ཅི་ལྟར་བྱིས་པ་མི་མཁས་མ་འཚལ་བཞིན། །བདེ་བར་གཤེགས་པའི་བསྟན་ལ་བདག་ཅག་ནི། །མྱ་ངན་འདས་པ་ཙམ་གྱིས་འཚལ་འཛིན་པ། །ནོངས་པ་དེ་དག་ཁྱེད་ལ་རབ་ཏུ་བཤགས། །ཇི་ལྟར་དཔེར་ན་མི་འགའ་ལ་ལ་ཞིག །དེ་ཡི་མཛའ་བོའི་ཁྱིམ་དེར་ཕྱིན་གྱུར་ནས། །གྲོགས་པོ་དེ་ནི་ནོར་བདག་ཕྱུག་པོ་སྟེ། །དེས་ནི་དེ་ལ་བཟའ་བཅའ་མང་སྩལ་ནས། །ཟས་ཀྱིས་དེ་ནི་ཡང་དག་ཚིམ་པར་བགྱིས། །རིན་ཆེན་དུ་མ་རི་བ་དེ་སྩལ་ཏེ། །དེ་ཡི་བླ་གོས་མཐའ་མར་ཕུར་ཏེ་མདུད། །དེ་ལ་སྩལ་ནས་དེ་ནི་དགའ་བར་གྱུར། །བྱིས་པ་དེ་ཡང་དེ་ནས་མཆིས་གྱུར་པ། །ལངས་ནས་དེ་ཡང་གྲོང་ཁྱེར་གཞན་དུ་མཆིས། །དེ་ནི་ཉོན་མོངས་གྱུར་ཏེ་ཕོངས་ཤིང་ཚོལ། །འཚལ་མ་ཡོངས་སུ་ཚོལ་བས་ཤིན་ཏུ་སྐྱོ། །ཁ་ཟས་དེ་བཙལ་མྱ་ངན་འདས་པར་གྱུར། །དེ་ནི་ཁ་ཟས་རྒྱ་ཆེ་མི་སེམས་ཤིང་། །དེ་ཡི་རིན་པོ་ཆེ་ཡང་མི་དྲན་གྱུར། །བླ་གོས་ལ་ནི་ཕུར་བར་དྲན་མ་མཆིས། །དེ་ནི་གྲོགས་པོ་སྔ་མ་དེ་མཐོང་ནས། །བདག་གི་ཁྱིམ་དུ་རིན་ཆེན་བྱིན་པ་དེ། །དེ་ལ་ཤིན་ཏུ་ཡོངས་སུ་སྤྱོས་བརྒྱད་ནས། །རིན་ཆེན་གོས་ཀྱི་མཐའ་ན་མཆིས་པ་བསྟན། །དེ་ཡིས་མཐོང་ནས་བདེ་བ་མཆོག་དང་ལྡན། །རིན་ཆེན་དེ་ཡི་མཐུ་ནི་དེ་འདྲ་སྟེ། །ནོར་མང་མཛོད་སྟོབས་ཅན་དུ་དེ་གྱུར་ནས། །འདོད་པའི་ཡོན་ཏན་ལྔ་དང་ཤིན་ཏུ་ལྡན། །དེ་བཞིན་བཅོམ་ལྡན་བདག་ཅག་འདི་ལྟ་བུར། །སྔོན་གྱི་སྲིད་པ་ཤིན་ཏུ་ཡུན་རིང་ནས། །དེ་བཞིན་གཤེགས་པ་ཉིད་ཀྱི་འདི་སྩལ་ཏེ། །སྔོན་གྱི་སྨོན་ལམ་རྣམས་ནི་མ་འཚལ་བས། །བཅོམ་ལྡན་བདག་ཅག་འདི་ན་བྱིས་པའི་བློ། །བདག་ཅག་བདེ་གཤེགས་བསྟན་པ་མ་འཚལ་བས། །བདག་ཅག་མྱ་ངན་འདས་ཙམ་འཚལ་བར་གཟུང་། །བླ་མ་མི་རེ་མི་ཚོལ་མི་སེམས་སོ། །འདི་འདྲའི་མྱ་ངན་འདས་པ་ཡོད་མེད་ཅེས། །འཇིག་རྟེན་
གཉེན་གྱིས་བདག་ཅག་འཚལ་བར་བགྱིས། །མྱ་ངན་འདས་གང་མཆོག་ཏུ་བདེ་བ་དེ། །སྐྱེས་བུ་དམ་པ་རྣམས་ཀྱི་ཡེ་ཤེས་མཆོག། འདི་ལྟར་ཡངས་པ་རྒྱ་ཆེན་རྣམ་མངས་ཀྱི། ། བླ་ན་མེད་པའི་ལུང་བསྟན་རབ་ཐོས་ཏེ། ། མགོན་པོ་གཅིག་ལ་གཅིག་ལུང་སྟོན་པ་ཡིས། ། བདག་ཅག་དགའ་ཞིང་མགུ་བ་རངས་པ་སྐྱེས། ། དམ་པའི་ཆོས་པད་མ་དཀར་པོ་ལས་དགེ་སློང་ལྔ་བརྒྱ་ལུང་བསྟན་པའི་ལེའུ་ཞེས་བྱ་བ་སྟེ་བརྒྱད་པའོ།། །།