བཅུ་པ། ཆོས་སྨྲས་བའི་ལེའུ།
དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྨན་གྱི་རྒྱལ་པོ་ལ་སོགས་པ་བྱང་ཆུབ་སེམས་དཔའ་བརྒྱད་ཁྲི་པོ་དེ་དག་ལ་བཀའ་སྩལ་པ། སྨན་གྱི་རྒྱལ་པོ་འཁོར་འདིའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཉན་ཐོས་ཀྱི་ཐེག་པ་ཅན་དང་བྱང་ཆུབ་སེམས་དཔའི་ཐེག་པ་ཅན་མང་པོ་འདི་དག་གིས་ཆོས་ཀྱི་རྣམ་གྲངས་འདི་དེ་བཞིན་གཤེགས་པ་ལས་མངོན་སུམ་དུ་ཐོས་པ་དེ་
དག་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨན་གྱི་རྒྱལ་པོ་འདི་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྟེ། འཁོར་འདིའི་ནང་ན་གང་དག་ཐ་ན་ཚིགས་སུ་བཅད་པ་གཅིག་ཐོས་པ་དང་། ཚིག་གཅིག་ཐོས་པ་དང་གང་དག་གིས་ཐ་ན་མདོ་སྡེ་འདི་ལ་སེམས་བསྐྱེད་པ་གཅིག་ཙམ་གྱི་རྗེས་སུ་ཡི་རང་བའི་འཁོར་བཞི་པོ་དེ་དག་ཐམས་ཅད་ནི་སྨན་གྱི་རྒྱལ་པོ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ་གང་ལ་ལ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། ཆོས་ཀྱི་རྣམ་གྲངས་འདི་ཉན་པ་དང་ཐ་ན་ཚིགས་སུ་བཅད་པ་གཅིག་ཐོས་ནས། སེམས་བསྐྱེད་པ་གཅིག་ཙམ་གྱིས་ཀྱང་རྗེས་སུ་ཡི་རང་བར་འགྱུར་བའི་རིགས་ཀྱི་བུའམ་རིགས་ཀྱི་བུ་མོ་དེ་དག་སྨན་གྱི་རྒྱལ་པོ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚང་བ་ལ་བསྙེན་བཀུར་བྱས་པ་ཡིན་ནོ། །སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་དག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་སྨོན་ལམ་བཏབ་པ་ཡིན་ཏེ། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་དག་སེམས་ཅན་རྣམས་ལ་སྙིང་བརྩེ་བའི་ཕྱིར། འཛམ་བུའི་གླིང་འདིར་མིར་སྐྱེས་པར་རིག་པར་བྱའོ། །གང་དག་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ་ཀློག་གམ། སྟོན་ཏམ་ཡང་དག་པར་རྗོད་དམ་ཡི་གེར་འདྲིའམ་བྲིས་ནས་རྗེས་སུ་དྲན་པར་བྱེད་དམ་དུས་དུས་སུ་ལྟའམ། གླེགས་བམ་དེ་ལ་དེ་བཞིན་གཤེགས་པ་ལ་བྱ་བ་བཞིན་དུ་གུས་པ་སྐྱེད་དམ་སྟོན་པ་ལ་བྱ་བ་བཞིན་དུ་གུས་པར་བཀུར་སྟི་བྱེད་དམ། བཙུན་པར་བྱེད་དམ། རིམ་གྲོར་བྱེད་དམ། མཆོད་དམ། གླེགས་བམ་དེ་ལ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རོལ་མོའི་
སྒྲ་ལ་སོགས་པ་དང་། ཕྱག་འཚལ་བ་དང་ཐལ་མོ་སྦྱོར་བར་བྱེད་པས་མཆོད་དམ། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་ཡང་འཛིན་ཏམ་རྗེས་སུ་ཡི་རང་ན་སྨན་གྱི་རྒྱལ་པོ་དེ་དག་ཐམས་ཅད་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྨན་གྱི་རྒྱལ་པོ་དེ་ལ་སྐྱེས་པའམ་བུད་མེད་གང་ལ་ལ་ཞིག་འདི་སྐད་དུ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བའི་སེམས་ཅན་དེ་དག་ཅི་ལྟ་བུ་དག་ཅིག་ཅེས་ཟེར་ན། སྨན་གྱི་རྒྱལ་པོ་སྐྱེས་པའམ་བུད་མེད་དེ་ལ་རིགས་ཀྱི་བུའམ་རིགས་ཀྱི་བུ་མོ་དེ་བསྟན་པར་བྱ་སྟེ། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་འཛིན་ཏམ་ཐོས་པར་བྱེད་དམ་བཤད་དམ་ཆོས་ཀྱི་རྣམ་གྲངས་འདི་ལ་རི་མོ་བྱེད་ན། རིགས་ཀྱི་བུའམ་རིགས་ཀྱི་བུ་མོ་དེ་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འཇིག་རྟེན་དུ་འབྱུང་བར་ལྟོས་ཤིག་ཅེས་བྱའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་དེ་བཞིན་གཤེགས་པར་རིག་པར་བྱ་བའི་ཕྱིར་ཏེ། གང་གིས་ཆོས་ཀྱི་རྣམ་གྲངས་འདི་ལས་ཐ་ན་ཚིགས་སུ་བཅད་པ་གཅིག་ཙམ་བཟུང་ན་ཡང་ལྷ་དང་བཅས་པའི་འཇིག་རྟེན་གྱིས། དེ་བཞིན་གཤེགས་པ་ལ་བཀུར་སྟི་བྱ་བ་བཞིན་དུ་བྱ་ན། གང་ཞིག་ཆོས་ཀྱི་རྣམ་གྲངས་འདི་མཐའ་དག་ཆུབ་པར་འཛིན་ཏམ། འཆང་བའམ། ཀུན་ཆུབ་པར་བྱེད་པའམ། རབ་ཏུ་སྟོན་པའམ། ཡི་གེར་འདྲི་འམ་བྲིས་ནས་རྗེས་སུ་དྲན་པར་བྱེད་པའམ། གླེགས་བམ་དེ་ལ་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རོལ་མོའི་སྒྲ་དང་ཐལ་མོ་སྦྱར་ཏེ། ཕྱག་འཚལ་ཞིང་རབ་ཏུ་འདུད་པ་དག་གི་རི་མོར་བྱེད་པ་ལྟ་ཅི་ལྟོས། སྨན་གྱི་རྒྱལ་པོ་རིགས་ཀྱི་བུ་འམ་རིགས་ཀྱི་བུ་མོ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་གྲུབ་པར་རིག་པར་བྱའོ། །
དེས་དེ་བཞིན་གཤེགས་པ་མཐོང་བར་རིག་པར་བྱའོ། །འཇིག་རྟེན་ལ་ཕན་ཞིང་སྙིང་བརྩེ་བ་སྨོན་ལམ་གྱི་དབང་གིས་ཆོས་ཀྱི་རྣམ་གྲངས་འདི་རབ་ཏུ་བསྟན་པའི་ཕྱིར། འཛམ་བུའི་གླིང་འདིར་མིར་སྐྱེས་ཏེ། བདག་ཉིད་རྒྱ་ཆེར་ཆོས་མངོན་པར་འདུ་བྱེད་པ་དང་སངས་རྒྱས་ཀྱི་ཞིང་རྒྱ་ཆེན་པོར་སྐྱེ་བ་བཞག་སྟེ། ཆོས་ཀྱི་རྣམ་གྲངས་འདི་ཤིན་ཏུ་ཡང་དག་པར་བསྟན་པའི་ཕྱིར་ང་ཡོངས་སུ་མྱ་ངན་ལས་འདས་ནས་སེམས་ཅན་རྣམས་ཕན་ཞིང་སྙིང་བརྩེ་བའི་དོན་དུ་སྐྱེས་པར་རིག་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་གིས་ཆོས་ཀྱི་རྣམ་གྲངས་འདི་བཤད་དམ་ཐ་ན་གསང་སྟེ་རྐུན་བུར་སེམས་ཅན་གཅིག་ལ་ཡང་ཡང་དག་པར་བཤད་དམ་བསྟན་ན་ཡང་། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ། དེ་བཞིན་གཤེགས་པའི་ཕོ་ཉ་ཡིན་པར་རིག་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་དེ་དེ་བཞིན་གཤེགས་པའི་བྱ་བ་བྱེད་པ་སྟེ། དེ་བཞིན་གཤེགས་པས་མངགས་པར་རིག་པར་བྱའོ། །སྨན་གྱི་རྒྱལ་པོ་སེམས་ཅན་སྡང་བའི་སེམས་དང་ལྡན་པ་དང་། སྡིག་པའི་སེམས་དང་ལྡན་པ་དང་། དྲག་ཤུལ་གྱི་སེམས་དང་ལྡན་པ་གང་ལ་ལས་དེ་བཞིན་གཤེགས་པ་ལ་མངོན་དུ་བསྐལ་པར་མི་སྙན་པར་སྨྲ་བ་བས། གང་ཞིག་མདོ་སྡེ་འདི་འཛིན་པ་ཆོས་སྨྲ་བ་དེ་ལྟ་བུ་ཁྱིམ་ན་གནས་པའམ་རབ་ཏུ་བྱུང་བ་དེ་དག་ལ་བདེན་པའམ་མི་བདེན་པའི་ཚིག་མི་སྙན་པ་གཅིག་བསྒྲགས་པ་དེ་སྡིག་པའི་ལས་ཤིན་ཏུ་མི་བཟད་པར་བཤད་དེ། དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་ནི་དེ་བཞིན་གཤེགས་པའི་རྒྱན་གྱིས་བརྒྱན་པར་རིག་པར་བྱ་བའི་ཕྱིར་ཏེ། སྨན་གྱི་རྒྱལ་པོ་གང་གིས་ཆོས་ཀྱི་རྣམ་གྲངས་འདི་ཡི་གེར་བྲིས་ནས་གླེགས་བམ་དུ་བྱས་ཏེ་ཕྲག་པ་ལ་ཐོགས་པ་དེས། དེ་བཞིན་གཤེགས་པ་ཕྲག་པ་ལ་ཐོགས་པར་འགྱུར་ཏེ། དེ་གང་དང་གང་དུ་འགྲོ་བ་དེ་དང་དེར་སེམས་ཅན་རྣམས་ཀྱིས་ཐལ་མོ་སྦྱར་བར་བྱ། བཀུར་སྟིར་བྱ། བཙུན་པར་བྱ། རི་མོར་བྱ། མཆོད་པར་བྱའོ། །ལྷ་དང་མིའི་མེ་ཏོག་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་།
རྒྱལ་མཚན་དང་། ལྷའི་བ་དན་དང་། རོལ་མོའི་སྒྲ་དང་། བཟའ་བ་དང་། བཅའ་བ་དང་། ཁ་ཟས་དང་། བཏུང་བ་དང་། བཞོན་པ་དང་། མཆོག་ཏུ་འགྱུར་བའི་ལྷའི་རིན་པོ་ཆེའི་ཕུང་པོ་དག་གིས་ཆོས་སྨྲ་བ་དེ་ལ་བཀུར་སྟི་བྱ། ཆོས་སྨྲ་བ་དེ་ལ་ལྷའི་རིན་པོ་ཆེའི་ཕུང་པོ་དག་དབུལ་བར་བྱའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ལན་ཅིག་ཡང་དག་པར་རབ་ཏུ་བསྟན་ན་ཡང་འདི་ཐོས་པས་དཔག་ཏུ་མེད་གྲངས་མེད་པའི་སེམས་ཅན་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་འགྲུབ་པར་འགྱུར་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ཉིད་དུ་གནས་འདོད་ཅིང་། །རང་འབྱུང་ཡེ་ཤེས་འདོད་པ་ཡིས། །གང་རྣམས་ཚུལ་འདི་འཛིན་བྱེད་པ། །སེམས་ཅན་དེ་དག་བཀུར་སྟི་བྱ། །ཐམས་ཅད་མཁྱེན་ཉིད་གང་འདོད་དེ། །ཇི་ལྟར་མྱུར་དུ་ཐོབ་སྙམ་པ། །དེས་ནི་མདོ་སྡེ་འདི་བཟུང་སྟེ། །འཛིན་པ་ལ་ཡང་བཀུར་སྟི་བྱ། །སེམས་ཅན་རྣམས་ལ་བརྩེ་དོན་དུ། །མདོ་སྡེ་འདི་ནི་སུ་ཀློག་པ། །སེམས་ཅན་རྣམ་པར་འདུལ་བའི་ཕྱིར། །འཇིག་རྟེན་མགོན་གྱིས་བཀྱེ་བ་ཡིན། །སེམས་ཅན་རྣམས་ལ་སྙིང་བརྩེའི་ཕྱིར། །གང་ཞིག་མདོ་སྡེ་འདི་འཛིན་པ། །སྐྱེ་བ་བཟང་པོ་བཏང་ནས་སུ། །དཔའ་བོ་དེ་ནི་འདིར་འོངས་སོ། །བླ་ན་མེད་པའི་མདོ་སྡེ་འདི། །ཕྱི་མའི་དུས་ལ་རབ་འཆད་ཅིང་། །གང་ཕྱིར་དེ་ན་དེ་སྣང་བ། །སྐྱེ་བ་ལ་ནི་དེ་དབང་ངོ་། །ཆོས་སྨྲ་བ་ལ་རིན་ཆེན་འཐོར། །མི་ཡི་སྤོས་རབ་ཐམས་ཅད་དང་། །ལྷ་ཡི་མེ་ཏོག་དག་གིས་མཆོད། །ལྷ་ཡི་གོས་ཀྱིས་ཀུན་དུ་འགེབས། །ཕྱི་དུས་འཇིགས་པ་དེ་ན་ཡང་། །མྱ་ངན་ང་འདས་མདོ་འཛིན་པ། །ཇི་ལྟར་རྒྱལ་དབང་རང་བྱུང་བཞིན། །དེ་ལ་རྟག་ཏུ་ཐལ་སྦྱོར་འགྱུར། །ལན་ཅིག་མདོ་སྡེ་འདི་སྨྲ་བ། །རྒྱལ་སྲས་དེ་ནི་མཆོད་པའི་ཕྱིར། །བཟའ་བཅའ་དེ་བཞིན་ཟས་དང་སྐོམ། །གནས་དང་མལ་ཆ་གོས་བྱེ་སྦྱིན། །གང་རྣམས་མདོ་འདི་ཕྱི་དུས་ན། །ཡི་གེར་འདྲི་འཆང་ཉན་པ་ནི། །མི་ཡི་སྲིད་པར་ངས་བཏང་སྟེ། །དེ་བཞིན་གཤེགས་པའི་བྱ་བ་བྱེད། །གང་ཞིག་ང་ཡི་མདུན་འདུག་ནས། །ཁྲོ་གཉེར་བྱས་ཤིང་གནོད་
སེམས་ཀྱིས། །བསྐལ་པ་ཚང་བར་མི་སྙན་བསྒྲགས། །མི་དེ་སྡིག་པ་མང་དུ་འཕེལ། །མདོ་སྡེ་འདི་ནི་རབ་སྟོན་པ། །གང་རྣམས་མདོ་འཛིན་དེ་དག་ལ། །གཤེ་ཞིང་མི་བསྔགས་སྨྲ་བ་དེ། །སྡིག་པ་ཤིན་ཏུ་དེ་མང་བཤད། །བྱང་ཆུབ་མཆོག་འདི་ཡོངས་ཚོལ་ཞིང་། །བསྐལ་པ་རྫོགས་པར་ཐལ་སྦྱར་ཏེ། །ཚིགས་བཅད་དུ་མ་ཁྲག་ཁྲིག་གིས། །མི་གང་ལ་ལ་མངོན་པར་བསྟོད། །དགའ་སྐྱེས་ང་ལ་བསྟོད་པ་ནི། །དེ་ལས་བསོད་ནམས་ཆེས་མང་རྙེད། །མི་གང་དེ་ཡི་བསྔགས་བརྗོད་པ། །དེ་བས་བསོད་ནམས་མང་དུ་འཕེལ། །བསྐལ་པ་བྱེ་སྟོང་བཅོ་བརྒྱད་དུ། །སྒྲ་དང་གཟུགས་དང་རོ་རྣམས་དང་། །ལྷ་ཡི་རེག་དང་ལྷ་སྤོས་ཀྱིས། །གཟུགས་རྟེན་དེ་དག་སུས་མཆོད་དེ། །བསྐལ་པ་བྱེ་སྟོང་བཅོ་བརྒྱད་དུ། །རྟེན་ལ་དེ་ལྟར་མཆོད་པ་བས། །ལན་ཅིག་མདོ་སྡེ་འདི་ཐོས་ན། །ངོ་མཚར་ཆེན་པོ་དེས་ཐོབ་འགྱུར། །སྨན་གྱི་རྒྱལ་པོ་ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱའོ། །སྨན་གྱི་རྒྱལ་པོ་ངས་ཆོས་ཀྱི་རྣམ་གྲངས་མང་པོ་བཤད་དོ་འཆད་དོ་བཤད་པར་བྱའོ། །སྨན་གྱི་རྒྱལ་པོ་ཆོས་ཀྱི་རྣམ་གྲངས་དེ་དག་ཐམས་ཅད་ཀྱི་ནང་ན། ཆོས་ཀྱི་རྣམ་གྲངས་འདི་ནི་འཇིག་རྟེན་ཐམས་ཅད་དང་མི་འཐུན་པ་སྟེ། འཇིག་རྟེན་ཐམས་ཅད་ཡིད་ཆེས་པར་མི་འགྱུར་བའོ། །སྨན་གྱི་རྒྱལ་པོ་འདི་ནི་དེ་བཞིན་གཤེགས་པའི་མངོན་པར་ཤེས་པའི་ནང་གི་གསང་ཆེན་ཏེ། དེ་བཞིན་གཤེགས་པའི་སྟོབས་ཀྱིས་བསྲུངས་པ་སྔོན་མ་འཕེལ་བའོ། །གནས་འདི་ནི་སྔོན་མ་བསྟན་པ་སྟེ། སྨན་གྱི་རྒྱལ་པོ་དེ་བཞིན་གཤེགས་པ་བཞུགས་པ་ན་ཡང་། ཆོས་ཀྱི་རྣམ་གྲངས་འདི་ལ་སྐྱེ་བོ་མང་པོ་སྤོང་ན། དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལྟ་ཅི་སྨོས། སྨན་གྱི་རྒྱལ་པོ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས། གང་དག་ཆོས་ཀྱི་རྣམ་གྲངས་འདི་ལ་དད་པ་དང་། ཀློག་པ་དང་། ཡི་གེར་འདྲི་བ་དང་། བཀུར་སྟི་བྱེད་པ་དང་། གཞན་དག་ལ་ཡང་ཐོས་པར་བྱེད་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི། དེ་བཞིན་གཤེགས་པའི་ཆོས་གོས་ཀྱིས་གཡོགས་པར་རིག་པར་བྱའོ། །འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་
གཤེགས་པ་རྣམས་ཀྱིས་གཟིགས་ཤིང་བྱིན་གྱིས་བརླབས་པའོ། །དེ་དག་སོ་སོ་རང་གི་དད་པའི་སྟོབས་དང་དགེ་བའི་རྩ་བའི་སྟོབས་དང་སྨོན་ལམ་གྱི་སྟོབས་ཅན་དུ་འགྱུར་རོ། །སྨན་གྱི་རྒྱལ་པོ་རིགས་ཀྱི་བུའམ་རིགས་ཀྱི་བུ་མོ་དེ་དག་དེ་བཞིན་གཤེགས་པ་དང་གནས་གཅིག་ན་འདུག་པར་འགྱུར་ཏེ། དེ་དག་གི་སྤྱི་བོ་ལ་དེ་བཞིན་གཤེགས་པའི་ཕྱག་གིས་སྙུགས་པར་འགྱུར་རོ། །སྨན་གྱི་རྒྱལ་པོ་ས་ཕྱོགས་གང་ན་ཆོས་ཀྱི་རྣམ་གྲངས་འདི་འཆད་དམ་སྟོན་ཏམ་ཡི་གེར་འདྲིའམ་ཁ་ཏོན་བྱེད་དམ་ཡང་དག་པར་རྗོད་པའི་ས་ཕྱོགས་དེར། སྨན་གྱི་རྒྱལ་པོ་དེ་བཞིན་གཤེགས་པའི་མཆོད་རྟེན་རིན་པོ་ཆེ་ལས་བྱས་པ་མཐོ་ཞིང་ཆེ་བ་བྱའོ། །དེར་དེ་བཞིན་གཤེགས་པའི་སྐུ་གདུང་ངེས་པར་གཞག་མི་དགོས་སོ། །དེ་ཅིའི་ཕྱིར་ཞེ་ན། དེར་དེ་བཞིན་གཤེགས་པའི་སྐུ་གདུང་གཅིག་ཏུ་འདུས་པ་གཞག་པར་འགྱུར་བའི་ཕྱིར་རོ། །ས་ཕྱོགས་གང་ན་ཆོས་ཀྱི་རྣམ་གྲངས་འདི་འཆད་དམ་སྟོན་ཏམ་ཀློག་གམ་ཡང་དག་པར་རྗོད་དམ་ཡི་གེར་འདྲིའམ་གླེགས་བམ་དུ་བྱས་ཏེ་གཞག་པ་དེར་མཆོད་རྟེན་བཞིན་དུ་བཀུར་སྟི་དང་། བཙུན་པར་བྱ་བ་དང་། རི་མོ་དང་། མཆོད་པར་བྱའོ། །མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། ལྷའི་བ་དན་དང་། རྣམ་པར་རྒྱལ་བའི་བ་དན་ཐམས་ཅད་དང་། གླུ་དང་རོལ་མོའི་སྒྲ་དང་གར་དང་། སིལ་སྙན་དང་། ཕེག་རྡོབ་པ་ཐམས་ཅད་ཀྱིས་མཆོད་པར་བྱའོ། །སྨན་གྱི་རྒྱལ་པོ་སེམས་ཅན་གང་དག་དེ་བཞིན་གཤེགས་པའི་མཆོད་རྟེན་དེ་ལ་ཕྱག་འཚལ་བའམ་མཐོང་བ་རྙེད་པ་དེ་དག་ཐམས་ཅད་ནི། སྨན་གྱི་རྒྱལ་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཤིན་ཏུ་ཉེ་བར་གྱུར་པར་རིག་པར་བྱའོ། །དེ་ཅིའི་ཕྱིར་ཞེ་ན། སྨན་གྱི་རྒྱལ་པོ་ཁྱིམ་ན་གནས་པ་དང་རབ་ཏུ་བྱུང་བའི་བྱང་ཆུབ་སེམས་དཔའ་མང་པོ་དག །བྱང་ཆུབ་སེམས་དཔའི་སྤྱད་པ་སྤྱོད་ཀྱང་ཆོས་ཀྱི་རྣམ་གྲངས་འདི་ལྟ་བའམ་མཉན་པའམ་ཡི་གེར་འདྲི་བའམ་མཆོད་པར་ཡང་མི་རྙེད་དོ། །སྨན་གྱི་རྒྱལ་པོ་ཇི་ཙམ་དུ་ཆོས་ཀྱི་རྣམ་གྲངས་འདི་མི་ཉན་པ་དེ་ཙམ་དུ། བྱང་ཆུབ་སེམས་དཔའ་བྱང་ཆུབ་སེམས་
དཔའི་སྤྱོད་པ་ལ་མཁས་པ་མ་ཡིན་ནོ། །གང་གི་ཚེ་ཆོས་ཀྱི་རྣམ་གྲངས་འདི་མཉན་ཏེ་ཐོས་ནས་མོས་པ་དང་རྟོགས་པ་དང་འཇུག་པ་དང་ཤེས་པ་དང་ཡོངས་སུ་འཛིན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྙེན་པར་འགྱུར་ཏེ། ཉེ་བར་གནས་པ་ཡིན་ནོ། །སྨན་གྱི་རྒྱལ་པོ་འདི་ལྟ་སྟེ་དཔེར་ན། མི་ལ་ལ་ཞིག་ཆུ་འདོད་པར་གྱུར་ཏེ་ཆུ་ཚོལ་ཞིང་། དེས་ཆུའི་ཕྱིར་སྐམ་སའི་ཕྱོགས་ཤིན་ཏུ་ཁྲོན་པ་རྐོར་བཅུག་སྟེ། དེ་རྐོ་བ་ན་སྐམ་ཞིང་སྐྱ་བའི་ས་འབྱིན་པར་མཐོང་སྟེ། མཐོང་ནས་འདི་ལྟར་འདི་ནས་ཆུ་ད་དུང་ཐག་རིང་ངོ་སྙམ་དུ་སེམས་སོ། །དེ་ནས་དུས་གཞན་ཞིག་ན། མི་དེས་ས་གཤེར་བ་དང་འདྲེས་པ་འདམ་རྫབ་དང་ཆུའི་ཐིགས་པ་ཟག་པ་འབྱིན་ཅིང་ཁྲོན་པ་རྐོ་བའི་མི་དེ་དག་ལུས་ལ་འདམ་རྫབ་ཀྱིས་གོས་པར་མཐོང་སྟེ། དེ་ནས་ཡང་སྨན་གྱི་རྒྱལ་པོ་མི་དེས་སྔ་ལྟས་དེ་མཐོང་ནས། དོགས་པ་དང་ཐེ་ཚོམ་མེད་དེ་འདི་ནས་ཆུ་ནི་ཉེའོ་སྙམ་མོ། །སྨན་གྱི་རྒྱལ་པོ་དེ་བཞིན་དུ་ཅི་ཙམ་དུ་ཆོས་ཀྱི་རྣམ་གྲངས་འདི་མི་ཉན་མི་འཛིན་ཁོང་དུ་ཆུད་པར་མི་བྱེད་མི་འཇུག་མི་སེམས་པའི་བར་དུ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་རིང་བ་ཡིན་ནོ། །སྨན་གྱི་རྒྱལ་པོ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོས་ཀྱི་རྣམ་གྲངས་འདི་ཉན་ཅིང་འཛིན་པ་དང་འཇུག་པ་དང་ཁ་ཏོན་དུ་བྱེད་པ་དང་སེམས་པ་དང་སྒོམ་པ་དེའི་ཚེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པ་ཡིན་ཏེ། སྨན་གྱི་རྒྱལ་པོ་ཆོས་ཀྱི་རྣམ་གྲངས་འདི་ལས་སེམས་ཅན་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྐྱེའོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདི་ནི་ལྡེམ་པོར་དགོངས་ཏེ་བཤད་པ་འགྲེལ་བའི་མཆོག་ཡིན་པའི་ཕྱིར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་གྲུབ་པར་བྱ་བའི་ཕྱིར་ཆོས་གསང་བའི་གནས་བཤད་པའོ། །སྨན་གྱི་རྒྱལ་པོ་བྱང་ཆུབ་སེམས་དཔའ་གང་ལ་ལ་ཞིག་ཆོས་ཀྱི་རྣམ་གྲངས་འདིས་སྐྲག་ཅིང་སྔངས་ཏེ་དངངས་པར་གྱུར་ན། སྨན་གྱི་རྒྱལ་
པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ལ་གསར་དུ་ཞུགས་པར་རིག་པར་བྱའོ། །གལ་ཏེ་ཡང་ཉན་ཐོས་ཀྱི་ཐེག་པ་ཅན་ཞིག་ཆོས་ཀྱི་རྣམ་གྲངས་འདིས་སྐྲག་ཅིང་སྔངས་ཏེ་དངངས་པར་གྱུར་ན། སྨན་གྱི་རྒྱལ་པོ་དེ་ནི་ཉན་ཐོས་ཀྱི་ཐེག་པ་ཅན་གྱི་གང་ཟག་ང་རྒྱལ་ཅན་དུ་རིག་པར་བྱའོ། །སྨན་གྱི་རྒྱལ་པོ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་ཞིག །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཕྱི་མའི་དུས་ཕྱི་མའི་ཚེ་ན། ཆོས་ཀྱི་རྣམ་གྲངས་འདི་འཁོར་བཞི་ལ་ཡང་དག་པར་སྟོན་ན། སྨན་གྱི་རྒྱལ་པོ་བྱང་ཆུབ་སེམས་དཔའ་དེས་དེ་བཞིན་གཤེགས་པའི་གནས་སུ་ཞུགས་ཏེ། དེ་བཞིན་གཤེགས་པའི་ཆོས་གོས་བགོས་ལ་དེ་བཞིན་གཤེགས་པའི་སྟན་ལ་འདུག་སྟེ། ཆོས་ཀྱི་རྣམ་གྲངས་འདི་ཕྱིས་འཁོར་བཞི་ལ་ཡང་དག་པར་བཤད་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པའི་གནས་གང་ཞེ་ན། སྨན་གྱི་རྒྱལ་པོ་སེམས་ཅན་ཐམས་ཅད་ལ་བྱམས་པར་གནས་པ་ནི། སྨན་གྱི་རྒྱལ་པོ་དེ་བཞིན་གཤེགས་པའི་གནས་ཏེ་སྨན་གྱི་རྒྱལ་པོ་དེར་རིགས་ཀྱི་བུ་དེ་འཇུག་པར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པའི་ཆོས་གོས་གང་ཞེ་ན། སྨན་གྱི་རྒྱལ་པོ་བཟོད་པ་དང་དེས་པ་ཆེན་པོ་ནི་དེ་བཞིན་གཤེགས་པའི་ཆོས་གོས་ཏེ། སྨན་གྱི་རྒྱལ་པོ་དེ་ཡང་རིགས་ཀྱི་བུ་དེས་བགོ་བར་བྱའོ། །སྨན་གྱི་རྒྱལ་པོ་དེ་བཞིན་གཤེགས་པའི་ཆོས་ཀྱི་སྟན་གང་ཞེ་ན། ཆོས་ཐམས་ཅད་སྟོང་པ་ཉིད་དུ་འཇུག་པ་སྟེ། སྨན་གྱི་རྒྱལ་པོ་དེ་བཞིན་གཤེགས་པའི་ཆོས་ཀྱི་སྟན་དེ་ལ་རིགས་ཀྱི་བུ་དེས་འདུག་པར་བྱའོ། །འདུག་ནས་ཆོས་ཀྱི་རྣམ་གྲངས་འདི་འཁོར་བཞི་པོ་དག་ལ་ཡང་དག་པར་བསྟན་པར་བྱའོ། །བྱང་ཆུབ་སེམས་དཔའ་མི་ཞན་པའི་སེམས་ཀྱིས་བྱང་ཆུབ་སེམས་དཔའི་ཚོགས་དང་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་འཁོར་བཞི་པོ་དག་གི་མདུན་དུ་རབ་ཏུ་བསྟན་པར་བྱའོ། །སྨན་གྱི་རྒྱལ་པོ་ང་འཇིག་རྟེན་གྱི་ཁམས་གཞན་ན་འདུག་ན་ཡང་སྤྲུལ་པས་རིགས་ཀྱི་བུ་དེའི་འཁོར་དང་འཐུན་པར་བྱའོ། །སྤྲུལ་པའི་དགེ་སློང་དང་དགེ་སློང་མ་དང་དགེ་བསྙེན་དང་དགེ་བསྙེན་མ་དག་ཆོས་ཉན་དུ་དགྱེའོ། ། ཆོས་སྨྲ་
བ་དེས་བཤད་པ་དེ་ལ་དེ་དག་ཕྱིར་མི་ཟློག་ཅིང་སྤོང་བར་མི་བྱེད་དོ། །གལ་ཏེ་དེ་དགོན་པ་ན་འདུག་པར་གྱུར་ན་དེར་ངས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་མང་པོ་ཆོས་ཉན་དུ་དགྱེའོ། །སྨན་གྱི་རྒྱལ་པོ་ང་འཇིག་རྟེན་གྱི་ཁམས་གཞན་ན་འདུག་ན་ཡང་རིགས་ཀྱི་བུ་དེ་ལ་ང་ཡི་ངོ་བོ་ཉེ་བར་བསྟན་ཏོ། །གང་དག་ཆོས་ཀྱི་རྣམ་གྲངས་འདི་ལས་ཚིག་དང་ཡི་གེ་འཆད་པར་གྱུར་པ་དེ་དག་ཁ་ཏོན་བྱེད་པ་ན་སླར་ཐོན་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །ཞེན་པ་ཐམས་ཅད་རྣམ་སྤངས་ཏེ། །འདི་འདྲ་བ་ཡི་མདོ་སྡེ་ཉོན། །འདི་ནི་ཤིན་ཏུ་ཐོས་པར་དཀའ། །མོས་པ་རྙེད་པར་ཤིན་ཏུ་དཀའ། །ཇི་ལྟར་ལ་ལ་ཆུ་འདོད་པས། །སྐམ་སར་ཁྲོན་པ་རྐོར་བཅུག་ལ། །ཕྱི་ཕྱིར་རབ་ཏུ་རྐོ་བ་ན། །ས་སྐམ་དག་ནི་འབྱུང་བར་མཐོང་། །དེས་མཐོང་དེ་ན་སེམས་པ་ནི། །འདི་ནས་ཆུ་ཡང་རྒྱང་རིང་སྟེ། །ས་སྐམ་རྐོ་བར་བྱེད་པ་ཡང་། །འདི་ནི་རྒྱང་རིང་མཚན་མ་སྙམ། །ཕྱི་ཕྱིར་ས་དག་སྣུམ་པ་ཡི། །གཤེར་བ་གང་ཚེ་མཐོང་གྱུར་པ། །དེ་ན་དེ་ལ་ཐུག་པར་འགྱུར། །དེ་ནས་ཆུ་ཡང་ཐག་མི་རིང་། །དེ་བཞིན་མདོ་འདི་མི་ཉན་ཅིང་། །ཕྱི་ཕྱིར་ཤིན་ཏུ་མ་བསྒོམས་པ། །དེ་དག་སངས་རྒྱས་ཡེ་ཤེས་ནི། །འདི་འདྲ་བ་ལས་ཤིན་ཏུ་རིང་། །གང་ཚེ་ཉན་ཐོས་རྣམས་ཀྱི་ནི། །གཏན་ལ་ཕབ་པ་མདོ་སྡེའི་རྒྱལ། །ཟབ་མོ་འདི་ནི་ཉན་འགྱུར་ཞིང་། །ལན་གཅིག་མ་ཡིན་སེམས་བྱེད་པ། །མཁས་པ་དེ་དག་སངས་རྒྱས་ཀྱི། །ཡེ་ཤེས་ལ་ནི་ཉེ་བར་གྱུར། །ཇི་ལྟར་ས་ནི་གཤེར་བ་ཡིས། །ཆུ་དང་ཉེ་ཞེས་བྱ་བ་བཞིན། །རྒྱལ་བའི་གནས་དེར་རབ་ཞུགས་ཏེ། །ཆོས་གོས་དག་ཀྱང་བགོས་ནས་སུ། །ང་ཡི་སྟན་ལ་འདུག་ནས་ནི། །མདོ་སྡེ་འདི་ནི་མི་འཇིགས་ཤོད། །བྱམས་པའི་སྟོབས་ནི་ང་ཡི་གནས། །བཟོད་དང་དེས་པ་ཆོས་གོས་དེ། །སྟོང་པ་ཉིད་ནི་ང་ཡི་སྟན། །དེ་ལ་འདུག་ནས་རབ་ཏུ་སྟོན། །དབྱིག་པ་བོང་བ་མདུང་ཐུང་དང་། །གཤེ་བ་སྡིགས་པར་བྱེད་པ་ནི། །གང་དུ་བཤད་པ་དེ་བྱུང་ཡང་། །
ད་དྲན་ནས་ནི་དེ་བཟོད་བྱ། །བྱེ་བ་ཕྲག་སྟོང་ཞིང་དུ་ཡང་། །ང་ཡི་ལུས་ཀྱི་དངོས་པོ་བརྟན། །བསྐལ་པ་བྱེ་བ་བསམ་ཡས་སུ། །སེམས་ཅན་རྣམས་ལ་ཆོས་སྟོན་ཏོ། །ཡོངས་སུ་མྱ་ངན་ང་འདས་ནས། །མདོ་སྡེ་འདི་ནི་གང་སྟོན་པ། །ངས་ནི་དཔའ་བོ་དེ་ལ་ཡང་། །སྤྲུལ་པ་མང་པོ་དགྱེ་བར་བྱ། །དགེ་སློང་རྣམས་དང་དགེ་སློང་མ། །དགེ་བསྙེན་རྣམས་དང་དགེ་བསྙེན་མ། །དེ་དག་དེ་ལ་མཆོད་པ་བྱེད། །འཁོར་རྣམས་ལ་ཡང་རི་མོ་བྱེད། །བོང་དབྱུག་དེ་བཞིན་གཤེ་བ་དང་། །སྡིགས་པར་བྱེད་ཅིང་སྤྱོས་པ་དག །དེ་ལ་གང་རྣམས་བྱེད་པ་ཡང་། །སྤྲུལ་པ་རྣམས་ཀྱིས་དེ་དག་ཟློག །མི་དང་བྲལ་བའི་ཡུལ་ཕྱོགས་དང་། །དགོན་པ་རྣམས་དང་རི་དག་ལ། །ནམ་ཞིག་གཅིག་པུ་གནས་ནས་སུ། ཁ་ཏོན་བྱེད་པར་འགྱུར་བ་ན། །དེ་ན་འོད་གསལ་ང་ཡི་ལུས། །ངས་ནི་དེ་ལ་བསྟན་པར་བྱ། །དེ་ཡི་ཁ་ཏོན་ནོར་བ་ཡང་། །ཕྱིར་ཞིང་ཐོན་པར་འགྱུར་བར་བྱ། །གཅིག་པུར་ནགས་ན་རྒྱུ་བྱེད་ཅིང་། །དེ་ནི་དེ་ན་གནས་པའི་ཚེ། །ལྷ་དང་གནོད་སྦྱིན་དུ་མ་དག །དེ་ཡི་གྲོགས་སུ་དགྱེ་བར་བྱ། །འཁོར་བཞི་ལ་ནི་རབ་སྟོན་པ། །དེ་ཡི་ཡོན་ཏན་དེ་འདྲར་འགྱུར། །ནགས་ཚལ་རི་སུལ་གཅིག་གནས་ཤིང་། །ཁ་ཏོན་བྱེད་པ་དེས་ང་མཐོང་། །དེ་ཡི་སྤོབས་པ་ཐོགས་མེད་འགྱུར། །ཆོས་དང་ངེས་ཚིག་མང་པོ་ཤེས། །འདི་ལྟར་སངས་རྒྱས་བྱིན་བརླབས་པས། །སྲོག་ཆགས་བྱེ་སྟོང་དེས་ཚིམ་བྱེད། །སེམས་ཅན་གང་དག་དེར་རྟེན་པ། །བྱང་ཆུབ་སེམས་དཔར་དེ་མྱུར་འགྲོ། །དེ་དང་སྟེན་ཅིང་འགྲོགས་པ་ཀུན། །སངས་རྒྱས་གང་གཱའི་བྱེ་སྙེད་མཐོང་། །དམ་པའི་ཆོས་པད་མ་དཀར་པོ་ལས་ཆོས་སྨྲ་བའི་ལེའུ་ཞེས་བྱ་བ་སྟེ་བཅུ་པའོ།། །།