ཉི་ཤུ་རྩ་བཞི་པ། སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ།
བམ་པོ་བཅུ་གསུམ་པ་སྟེ་ཐ་མ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཅིའི་སླད་དུ་སྤྱན་རས་གཟིགས་དབང་ཕྱུག་ཅེས་བགྱི། དེ་སྐད་ཅེས་
གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འདི་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཇི་སྙེད་ཅིག་སྡུག་བསྔལ་གང་དག་མྱོང་བར་གྱུར་པ་དེ་དག་གིས། གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་ཐོས་ན། དེ་དག་ཐམས་ཅད་སྡུག་བསྔལ་གྱི་ཕུང་པོ་དེ་ལས་ཡོངས་སུ་ཐར་བར་འགྱུར་རོ། །རིགས་ཀྱི་བུ་སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་འཛིན་པ་དེ་དག །གལ་ཏེ་མེའི་ཕུང་པོ་ཆེན་པོར་ལྷུང་ན་ཡང་། དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་གཟི་བརྗིད་ཀྱིས། མེའི་ཕུང་པོ་ཆེན་པོ་དེ་ལས་རབ་ཏུ་འབར་བ་ལས་ཐར་བར་འགྱུར་རོ། །རིགས་ཀྱི་བུ་གལ་ཏེ་ཆུ་ཀླུང་དག་གིས་ཁྱེར་ལ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་བོས་ན། ཆུ་ཀླུང་དེ་དག་ཐམས་ཅད་ཀྱིས་སེམས་ཅན་དེ་དག་ཐམས་ཅད་གཏིང་ཚུགས་པར་བྱེད་དོ། །རིགས་ཀྱི་བུ་གལ་ཏེ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་རྒྱ་མཚོའི་ནང་དུ་གྲུར་ཞུགས་ཏེ། འགྲོན་བུ་དང་། གསེར་དང་། ནོར་བུ་དང་། མུ་ཏིག་དང་། བཻ་དཱུཪྱ་དང་། དུང་དང་། མན་ཤེལ་དང་། རྡོའི་སྙིང་པོ་དང་། བྱི་རུ་དང་། སྤུག་དང་། མུ་ཏིག་དམར་པོ་ལ་སོགས་པའི་ཕྱིར་དོང་བ་དེ་རྣམས། རླུང་ནག་པོས་སྲིན་མོའི་གླིང་དུ་འཕངས་པར་གྱུར་ལ། དེ་ན་སེམས་ཅན་གཅིག་འགའ་ཞིག་གིས་སྤྱན་རས་གཟིགས་དབང་ཕྱུག་ལ་བོས་ན། དེ་དག་ཐམས་ཅད་སྲིན་མོའི་གླིང་དེ་ནས་ཐར་བར་འགྱུར་རོ། །རིགས་ཀྱི་བུ་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སྤྱན་རས་གཟིགས་དབང་ཕྱུག་ཅེས་བཏགས་སོ། །རིགས་ཀྱི་བུ་གལ་ཏེ་བསད་པར་བཀྲི་བ་ལས་སྤྱན་རས་གཟིགས་དབང་ཕྱུག་ལ་བོས་ན། གཤེད་མ་དེ་དག་གི་མཚོན་དེ་དག་དུམ་བུ་དུམ་བུར་ཆག་ཅིང་གྲུགས་པར་འགྱུར་རོ། །རིགས་ཀྱི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
འདི་གནོད་སྦྱིན་དང་སྲིན་པོས་གང་བར་གྱུར་ཀྱང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་འཛིན་པ་ལ། དེ་དག་ཐམས་ཅད་ཀྱི་སྡང་བའི་སེམས་ཀྱིས་ལྟ་ཡང་མི་ཕོད་དོ། །རིགས་ཀྱི་བུ་སེམས་ཅན་ལ་ལ་ལྕགས་སྒྲོག་དང་། ཤིང་སྒྲོག་ཏུ་བཅུག་པར་གྱུར་ན་ཉེས་ཡོད་ཀྱང་རུང་ཉེས་མེད་ཀྱང་རུང་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་ནས་ཕྱུང་བས། ལྕགས་སྒྲོག་དང་ཤིང་སྒྲོག་ཏུ་བཅུག་པ་དེ་དག་གི་བུ་ག་བྱེ་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མཐུ་ནི་དེ་འདྲའོ། །རིགས་ཀྱི་བུ་གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གཡོན་ཅན་དང་ཆོམ་རྐུན་དང་དགྲ་ལག་ན་མཚོན་ཐོགས་པས་ས་གང་བར་གྱུར་ཏེ། དེར་དེད་དཔོན་གཅིག་གིས་འདྲོན་པོ་མང་པོ་ཕལ་པོ་ཆེ་རིན་པོ་ཆེས་ཕྱུག་པ་དེད་དེ་དོང་བ་ལས། འདོང་བ་དེ་དག་གིས་གཡོན་ཅན་ཆོམ་རྐུན་དང་དགྲ་ལག་ན་མཚོན་ཐོགས་པ་དེ་དག་མཐོང་སྟེ། མཐོང་ནས་ཀྱང་འཇིགས་ཤིང་སྐྲག་སྟེ་བདག་ཅག་སྐྱབས་མེད་པར་ཤེས་པ་ལས་དེད་དཔོན་དེས་འདྲོན་པོ་མང་པོ་ལ་འདི་སྐད་ཅེས་མ་འཇིགས་ཤིག །རིགས་ཀྱི་བུ་དག་མ་འཇིགས་ཤིག་མི་འཇིགས་པ་སྦྱིན་པ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་སྒྲ་སྐད་གཅིག་ཏུ་བོས་ཤིག་དང་། དེས་ཁྱོད་ཆོམ་རྐུན་གྱིས་འཇིགས་པ་དང་དགྲའི་འཇིགས་པ་འདི་ལས་ཡོངས་སུ་ཐར་བར་འགྱུར་རོ་ཞེས་བསྒོ་ལ། དེ་ནས་འདྲོན་པོ་མང་པོ་ཐམས་ཅད་ཀྱིས་སྒྲ་སྐད་གཅིག་ཏུ་སྤྱན་རས་གཟིགས་དབང་ཕྱུག་ལ་བོས་ཏེ། འཇིགས་པ་མེད་པའི་སྦྱིན་པ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དེ་ལ་ཕྱག་འཚལ་ལོ་ཕྱག་འཚལ་ལོ་ཞེས་མིང་ནས་ཕྱུང་མ་ཐག་ཏུ། འདྲོན་པོ་ཕལ་པོ་ཆེ་དེ་དག་ཐམས་ཅད་འཇིགས་པ་ཐམས་ཅད་ལས་ཡོངས་སུ་ཐར་བར་འགྱུར་ཏེ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་
ཕྱུག་གི་མཐུ་ནི་དེ་འདྲའོ། །རིགས་ཀྱི་བུ་སེམས་ཅན་གང་དག་འདོད་ཆགས་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་འདོད་ཆགས་དང་བྲལ་བར་འགྱུར་རོ། །སེམས་ཅན་གང་དག་ཞེ་སྡང་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་ཞེ་སྡང་དང་བྲལ་བར་འགྱུར་རོ། །སེམས་ཅན་གང་དག་གཏི་མུག་སྤྱོད་པ་དེ་དག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་བྱས་ན་གཏི་མུག་དང་བྲལ་བར་འགྱུར་རོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ནི་རྫུ་འཕྲུལ་ཆེ་བའོ། །རིགས་ཀྱི་བུ། བུད་མེད་བུ་ཕོ་འདོད་པ་གང་ལ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ན་དེ་ལས་བུ་ཕོ་འབྱུང་སྟེ། གཟུགས་བཟང་བ་མཛེས་པ་བལྟ་ན་སྡུག་པ་ཁྱེའུའི་མཚན་དང་ལྡན་པ། སྐྱེ་བོ་མང་པོའི་ཡིད་དུ་འོང་ཞིང་སྡུག་པ་དགེ་བའི་རྩ་བ་བསྐྱེད་པར་འབྱུང་ངོ་། །གང་བུ་མོ་འདོད་པ་དེ་ཡང་བུ་མོ་འབྱུང་སྟེ། གཟུགས་བཟང་བ་མཛེས་པ་བལྟ་ན་སྡུག་པ་བུ་མོའི་མཚན་དང་ལྡན་པ། སྐྱེ་བོ་མང་པོའི་ཡིད་དུ་འོང་ཞིང་སྡུག་པ་དགེ་བའི་རྩ་བ་བསྐྱེད་པ་འབྱུང་ངོ་། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་གི་མཐུ་ནི་དེ་འདྲའོ། །གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་བ་དེ་དག་དོན་ཡོད་པའི་འབྲས་བུར་འགྱུར་རོ། །རིགས་ཀྱི་བུ་གང་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་མིང་འཛིན་ལ། གང་ཞིག་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་དག་ལ་ཕྱག་འཚལ་ཞིང་མིང་འཛིན་པ་དང་། ཡང་གང་ཞིག་གིས་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་བཞུགས་ཏེ། འཚོ་ཞིང་གཞེས་པ་དེ་དག་ལ་ན་བཟའ་དང་། བསོད་སྙོམས་དང་།
གཟིམས་ཆ་དང་། སྙུན་གྱི་གསོས་སྨན་དང་། ཡོ་བྱད་ཀྱིས་མཆོད་པ་བྱེད་ན། རིགས་ཀྱི་བུ་འདི་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་དག་བསོད་ནམས་མངོན་པར་འདུ་བྱེད་པ་དེ་ཙམ་ཞིག་སྐྱེད། དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །རིགས་ཀྱི་བུའམ་རིགས་ཀྱི་བུ་མོ་དེ་དག་གཞི་དེ་ལས་བསོད་ནམས་བསྐྱེད་པ་ནི་བཅོམ་ལྡན་འདས་མང་ལགས་སོ། །བདེ་བར་གཤེགས་པ་མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་གིས་སངས་རྒྱས་བཅོམ་ལྡན་འདས་དེ་སྙེད་ལ་བཀུར་སྟི་བྱས་པའི་བསོད་ནམས་མངོན་པར་འདུ་བྱེད་པ་དང་། གང་གིས་ཐ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་ལན་གཅིག་བྱས་པ་དང་། མིང་འཛིན་པའི་བསོད་ནམས་མངོན་པར་འདུ་བྱེད་པ་གཉི་ག་མཉམ་སྟེ་ལྷག་པ་ཡང་མེད་འཕགས་པ་ཡང་མེད་དོ། །གང་གིས་སངས་རྒྱས་བཅོམ་ལྡན་འདས་གང་གཱའི་ཀླུང་དྲུག་ཅུ་རྩ་གཉིས་ཀྱི་བྱེ་མ་སྙེད་ལ་ཕྱག་འཚལ་ཞིང་མིང་འཛིན་པ་དང་། གང་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཕྱག་འཚལ་ཞིང་མིང་འཛིན་པའི་བསོད་ནམས་ཀྱི་ཕུང་པོ་དེ་གཉི་ག་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་ཟད་པར་བྱ་བ་སླ་བ་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་མིང་འཛིན་པའི་བསོད་ནམས་དེ་ལྟར་དཔག་ཏུ་མེད་དོ། །དེ་ནས་བཅོམ་ལྡན་འདས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ན་རྣམ་པར་རྒྱུ། ཇི་ལྟར་སེམས་ཅན་རྣམས་ལ་ཆོས་སྟོན། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་
ཕྱུག་གི་ཐབས་མཁས་པའི་ཡུལ་ནི་ཅི་འདྲ་བ་ཞིག་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སངས་རྒྱས་ཀྱི་གཟུགས་ཀྱིས་སེམས་ཅན་རྣམས་ལ་ཆོས་སྟོན་པའི་འཇིག་རྟེན་གྱི་ཁམས་དག་ཡོད་དོ། །གང་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་བྱང་ཆུབ་སེམས་དཔའ་སེམས་དཔའ་ཆེན་པོའི་གཟུགས་ཀྱིས་ཆོས་སྟོན་པའི་འཇིག་རྟེན་གྱི་ཁམས་དག་ཀྱང་ཡོད་དོ། །སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་རང་སངས་རྒྱས་ཀྱི་གཟུགས་ཀྱིས་ཆོས་སྟོན་ཏོ། །ཁ་ཅིག་ལ་ཉན་ཐོས་ཀྱི་གཟུགས་ཀྱིས། ཁ་ཅིག་ལ་ཚངས་པའི་གཟུགས་ཀྱིས། ཁ་ཅིག་ལ་བརྒྱ་བྱིན་གྱི་གཟུགས་ཀྱིས། སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དྲི་ཟའི་གཟུགས་ཀྱིས་ཆོས་སྟོན་ཏོ། །གནོད་སྦྱིན་གྱིས་འདུལ་བའི་སེམས་ཅན་རྣམས་ལ་ནི་གནོད་སྦྱིན་གྱི་གཟུགས་ཀྱིས་ཆོས་སྟོན་ཏོ། །དབང་ཕྱུག་གིས་འདུལ་བའི་སེམས་ཅན་རྣམས་ལ་ནི་དབང་ཕྱུག་གི་གཟུགས་ཀྱིས་ཆོས་སྟོན་ཏོ། །དབང་ཕྱུག་ཆེན་པོས་འདུལ་བའི་སེམས་ཅན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་ཆོས་སྟོན་ཏོ། །འཁོར་ལོས་སྒྱུར་བའི་རྒྱལ་པོས་འདུལ་བའི་སེམས་ཅན་རྣམས་ལ་ནི་འཁོར་ལོས་སྒྱུར་བའི་རྒྱལ་པོའི་གཟུགས་ཀྱིས་ཆོས་སྟོན་ཏོ། །ཤ་ཟས་འདུལ་བའི་སེམས་ཅན་རྣམས་ལ་ནི་ཤ་ཟའི་གཟུགས་ཀྱིས་ཆོས་སྟོན་ཏོ། །མཆོག་གིས་འདུལ་བའི་སེམས་ཅན་རྣམས་ལ་ནི་མཆོག་གི་གཟུགས་ཀྱིས་ཆོས་སྟོན་ཏོ། །དམག་དཔོན་གྱིས་འདུལ་བའི་སེམས་ཅན་རྣམས་ལ་ནི་དམག་དཔོན་གྱི་གཟུགས་ཀྱིས་ཆོས་སྟོན་ཏོ། །བྲམ་ཟེས་འདུལ་བའི་སེམས་ཅན་རྣམས་ལ་ནི་བྲམ་ཟེའི་གཟུགས་ཀྱིས་ཆོས་སྟོན་ཏོ། །ལག་ན་རྡོ་རྗེས་འདུལ་བའི་སེམས་ཅན་རྣམས་ལ་ནི་ལག་
ན་རྡོ་རྗེའི་གཟུགས་ཀྱིས་ཆོས་སྟོན་ཏོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་མཆོད་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་འདི་འཇིགས་པའི་སེམས་ཅན་རྣམས་ལ་མི་འཇིགས་པ་སྦྱིན་པ་སྟེ། དེའི་ཕྱིར་འཇིག་རྟེན་གྱི་ཁམས་མི་མཇེད་འདི་ན་མི་འཇིགས་པ་སྦྱིན་པ་ཞེས་ཀུན་གྱིས་ཤེས་སོ། །དེ་ནས་བཅོམ་ལྡན་འདས་ལ་བློ་གྲོས་མི་ཟད་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཆོས་ཀྱི་དགབ་པ་སྩལ་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེའི་དུས་ལ་བབ་པར་ཤེས་ན་བྱིན་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས་བདག་གི་མགུལ་ནས་བརྒྱ་སྟོང་རི་བའི་མུ་ཏིག་གི་དོ་ཤལ་བཀྲོལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་ཆོས་ཀྱི་དགབ་པར་བྱིན་ཏེ། སྐྱེས་བུ་དམ་པ་བདག་ལས་ཆོས་ཀྱི་དགབ་པ་འདི་ལོངས་ཤིག །དེས་མ་བླངས་ནས་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པས། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་མུ་ཏིག་གི་དོ་ཤལ་འདི་བདག་ལ་སྙིང་བརྩེ་བའི་ཕྱིར་ལོངས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལ་སྙིང་བརྩེ་བ་དང་། འཁོར་བཞི་པོ་དེ་དག་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་
ཡིན་པ་ལ་སྙིང་བརྩེ་བའི་ཕྱིར། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པ་ལས་མུ་ཏིག་གི་དོ་ཤལ་བླངས་སོ། །བླངས་ནས་ཆ་གཉིས་སུ་བགོས་ཏེ་བགོས་ནས་ཆ་གཅིག་ནི་བཅོམ་ལྡན་འདས་ཤཱཀྱ་ཐུབ་པ་ལ་ཕུལ་ལོ། །ཆ་གཅིག་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་གི་རིན་པོ་ཆེའི་མཆོད་རྟེན་ལ་ཕུལ་ལོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་འཇིག་རྟེན་གྱི་ཁམས་མི་མཇེད་འདི་ན་དེ་ལྟ་བུའི་རྣམ་པར་འཕྲུལ་པས་རྣམ་པར་རྒྱུའོ། །དེ་ལ་དེ འི་ཆོས་ཉིད་ནི་འདི་སྐད་ཅེས་བྱའོ། །རྒྱལ་མཚན་ཁྲ་བོས་བློ་གྲོས་མི་ཟད་ལ། །དེ་ཡི་དོན་གྱི་རྒྱུ་ནི་ཀུན་དྲིས་པ། །རྒྱལ་བའི་སྲས་པོ་འདི་ལྟར་ཅི་ཡི་ཕྱིར། །སྤྱན་རས་གཟིགས་ཀྱི་དབང་པོ་ཞེས་འདི་བགྱི། །དེ་ནས་དེ་ཡིས་ཕྱོགས་རྣམས་ཀུན་བལྟས་ཏེ། །སྨོན་ལམ་རྒྱ་མཚོ་བློ་གྲོས་མི་ཟད་པས། །རྒྱལ་མཚན་ཁྲ་བོ་དེ་ལ་འདི་སྐད་སྨྲས། །སྤྱན་རས་གཟིགས་ཀྱི་དབང་པོའི་སྤྱོད་པ་ཉོན། །བསྐལ་པ་བསམ་ཡས་བྱེ་བ་དུ་མ་བརྒྱར། །སངས་རྒྱས་སྟོང་ཕྲག་བྱེ་བ་མང་པོ་ལ། །སྨོན་ལམ་ཇི་ལྟར་རབ་ཏུ་རྣམ་པར་སྦྱངས། །དེ་དག་ཁོ་བོས་རབ་ཏུ་བཤད་ཀྱིས་ཉོན། །མཉན་པར་བྱེད་ཅིང་ལྟ་བར་བྱེད་པ་དང་། །རིམ་གྱིས་དེ་ལྟར་རྗེས་སུ་དྲན་པ་ཡང་། །སྲོག་ཆགས་རྣམས་ནི་འབྲས་བུ་ཡོད་པར་འགྱུར། །སྡུག་བསྔལ་དང་ནི་མྱ་ངན་ཐམས་ཅད་སོལ། །གལ་ཏེ་གསོད་པས་མེ་ཡི་དོང་དུ་ཡང་། །གསད་པར་བྱ་བའི་ཕྱིར་ནི་བོར་བའི་མིས། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུས་བཏབ་བཞིན་དུ་མེ་དག་ཞི་བར་འགྱུར། །རྒྱ་མཚོ་དང་ནི་མྱ་ངམ་རྒལ་ན་ཡང་། །ཀླུ་དང་འབྱུང་པོ་ལྷ་མ་ཡིན་གནས་སུ། །སྤྱན་རས་གཟིགས་ཀྱི་དབང་པོ་དྲན་ན་ནི། །ཆུ་ཡི་ནང་དུ་ནམ་ཡང་མི་ནུབ་བོ། །རབ་ཏུ་སྡང་བའི་ཡིད་ཀྱིས་གསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཉི་མ་ལྟ་བུར་ནམ་མཁའ་གནས་པར་འགྱུར། །གལ་ཏེ་རྡོ་རྗེ་ཡི་ནི་རི་དག་ཀྱང་། །གསད་པའི་ཕྱིར་ནི་སྤྱི་བོར་འོངས་ན་ཡང་། །
སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཙེས་པར་མི་ནུས་སོ། །གསད་པའི་སེམས་ཀྱིས་ལག་ན་མཚོན་ཐོགས་ཏེ། །དགྲ་ཚོགས་མང་པོས་ཀུན་ཏུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་འགྱུར། །གལ་ཏེ་གསོད་པ་ཉེ་བར་འོངས་ནས་སུ། །གཤེད་མ་མི་ཡི་དབང་དུ་གྱུར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་ཡི་མཚོན་ཆ་དུམ་བུ་དུམ་བུར་འགྱུར། །དེ་སྟེ་ཤིང་ངམ་ལྕགས་ལས་བྱས་པ་ཡི། །ཁོང་སྒྲིལ་དང་ནི་གདོས་ཀྱིས་བཅིངས་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བཅིངས་པ་མྱུར་དུ་རྣམ་པར་བཅད་པར་འགྱུར། །སྔགས་དང་སྟོབས་དང་སྨན་དང་རིག་སྔགས་དང་། །རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་གཟིགས་ཀྱི་དབང་པོ་དྲན་ན་ནི། །གང་ནས་རབ་ཏུ་བཏང་བ་དེ་སླར་འགྲོ། །གནོད་སྦྱིན་ལྷ་མིན་འབྱུང་པོ་ཀླུ་འབར་བ། །མདངས་འཕྲོག་པ་ཡིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །བ་སྤུའི་ཁུང་ཙམ་གཙེས་པར་ཡོང་མི་ནུས། །མཆེ་བ་སེན་རྣོན་རབ་ཏུ་འཇིགས་པ་ཡི། །གཅན་གཟན་མ་རུངས་པ་ཡིས་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །མྱུར་བར་ཕྱོགས་ཀུན་ཏུ་ཡང་འགྲོ་བར་འགྱུར། །མིག་འཇིགས་མེ་ལྕེ་ལྟ་བུར་འོད་འཕྲོ་བ། །མིག་དུག་ཅན་གྱིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །ཤིན་ཏུ་མྱུར་བར་གདུག་པ་མེད་པར་འགྱུར། །བཟང་པོའི་གློག་ཀྱང་འབྱུང་ཞིང་སྟུག་པ་ཡི། །སྤྲིན་ལས་ལྕེ་དང་སེར་བ་ཆར་འབབ་པ། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་མྱུར་བར་རབ་ཏུ་ཞི། །སྡུག་བསྔལ་མང་པོ་བརྒྱ་ཡིས་གཙེས་པ་དང་། །སྡུག་བསྔལ་མང་པོས་གཟིར་བའི་སེམས་ཅན་མཐོང་། །ཡེ་ཤེས་དགེ་བའི་སྟོབས་ཀྱིས་སྤྱན་རས་གཟིགས། །དེ་བས་ལྷར་བཅས་འགྲོ་བ་སྐྱོབ་པ་པོ། །རྫུ་འཕྲུལ་སྟོབས་ཀྱིས་ཕ་རོལ་སོང་བ་སྟེ། །ཐབས་དང་ཡེ་ཤེས་ཡངས་
པ་བསླབས་པས་ན། །ཕྱོགས་བཅུའི་འགྲོ་བ་མང་པོ་ཐམས་ཅད་དང་། །མ་ལུས་ཞིང་ཀུན་དུ་ཡང་རབ་ཏུ་སྣང་། །སྲོག་ཆགས་རྣམས་ཀྱི་ངན་འགྲོའི་འཇིགས་པ་དང་། །མི་ཁོམ་པ་དང་སེམས་ཅན་དམྱལ་བ་དང་། །བྱོལ་སོང་དང་ནི་གཤིན་རྗེས་བསྐོར་བ་ཡང་། །སྐྱེ་རྒ་ན་བས་གཟིར་བ་མཐར་ཞི་བྱེད། །ཤིན་ཏུ་དགེ་བའི་སྤྱན་དེ་བྱམས་པའི་སྤྱན། །ཐབས་དང་ཤེས་རབ་ཁྱད་པར་ཡོད་པའི་སྤྱན། །སྙིང་རྗེའི་སྤྱན་དང་བྱམས་པའི་སྤྱན་དང་ལྡན། །ཞལ་བཟང་སྤྱན་བཟང་ཤིན་ཏུ་ལྟ་་འདོད་པ། །དྲི་མ་མེད་པ་དྲི་མ་བྲལ་བའི་འོད། །རབ་རིབ་མེད་པ་ཡེ་ཤེས་ཉི་མའི་འོད། །སྤྲིན་གྱིས་ཆོད་པར་གྱུར་པ་མེད་པའི་འོད། །འཇིག་རྟེན་དག་ན་ལྷག་གེ་ལྷང་ངེར་མཛེས། །སྙིང་རྗེ་ལས་བྱུང་ཚུལ་ཁྲིམས་གྲགས་པ་སྟེ། །དགེ་བའི་ཡོན་ཏན་བྱམས་ཡིད་སྤྲིན་ཆེན་པོ། །སྲོག་ཆགས་རྣམས་ཀྱི་ཉོན་མོངས་མེ་ཞི་བྱེད། །ཆོས་ཀྱི་ཆར་པ་བདུད་རྩི་རབ་ཏུ་འབེབས། །ཐབ་མོ་དང་ནི་རྩོད་ཅིང་འགྱེད་པ་ཡི། །འཇིགས་ཆེན་གཡུལ་ངོར་སྐྱེས་བུ་སོང་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་དགྲ་རྣམས་རབ་ཏུ་ཞི། །སྤྲིན་གྱི་སྒྲ་དང་རྔ་བོ་ཆེ་ཡི་སྒྲ། །འབྲུག་གི་སྒྲ་དང་ཚངས་པའི་དབྱངས་སྙན་པ། །དབྱངས་ཀྱི་དཀྱིལ་འཁོར་ཕ་རོལ་ཕྱིན་པ་སྟེ། །སྤྱན་རས་གཟིགས་ཀྱི་དབང་པོ་དྲན་པར་བྱ། །དག་པའི་སེམས་དཔའ་སྤྱན་རས་གཟིགས་དབང་པོ། །ཐེ་ཚོམ་མ་ཟ་དྲན་བྱོས་དྲན་པར་གྱིས། །འཆི་བའི་ཚེ་དང་ཉོན་མོངས་གཙེས་པའི་ཚེ། །མགོན་དང་སྐྱབས་དང་དཔུང་གཉེན་དུ་ཡང་འགྱུར། །ཡོན་ཏན་ཐམས་ཅད་ཀྱི་ནི་ཕ་རོལ་ཕྱིན། །སེམས་ཅན་ཀུན་ལ་སྙིང་རྗེ་བྱམས་པའི་སྤྱན། །ཡང་དག་ཡོན་ཏན་ཡོན་ཏན་རྒྱ་མཚོ་ཆེ། །སྤྱན་རས་གཟིགས་ཀྱི་དབང་པོར་ཕྱག་བྱར་འོས། །འདི་ལྟར་འགྲོ་བ་རྣམས་ལ་སྙིང་བརྩེ་བ། །ཕྱི་མའི་དུས་ན་སངས་རྒྱས་སུ་ཡང་འགྱུར། །འཇིགས་དང་མྱ་ངན་ཐམས་ཅད་འཇིག་བྱེད་པ། །སྤྱན་རས་གཟིགས་དབང་དེ་ནི་དྲན་པར་བྱ། །འཇིག་རྟེན་དབང་གི་རྒྱལ་པོ་གཙོ་བོ་སྟེ། །དགེ་སློང་ཆོས་ཀྱི་འབྱུང་གནས་འཇིག་རྟེན་མཆོད། །བསྐལ་པ་བརྒྱ་ཕྲག་མང་པོ་སྤྱད་ནས་སུ། །རྡུལ་བྲལ་བླ་
ན་མེད་པའི་བྱང་ཆུབ་འཐོབ། །འདྲེན་པ་སྣང་བ་མཐའ་ཡས་གཡས་གཡོན་ནས། །བསིལ་ཡབ་ཐོགས་ཏེ་དེ་བཞིན་གཡོབ་ཅིང་འདུག །སྒྱུ་མ་ལྟ་བུའི་ཏིང་ངེ་འཛིན་གྱིས་ཀྱང་། །ཞིང་རྣམས་ཀུན་ཏུ་སོང་ནས་རྒྱལ་བ་མཆོད། །ནུབ་ཀྱི་ཕྱོགས་ན་བདེ་བའི་འབྱུང་གནས་ཏེ། །རྡུལ་བྲལ་འཇིག་རྟེན་ཁམས་འདི་བདེ་བ་ཅན། །དེ་ན་སེམས་ཅན་ཁ་ལོ་སྒྱུར་བ་ཡི། །འདྲེན་པ་ཚེ་མཐའ་ཡས་པའང་ད་ལྟར་བཞུགས། །དེར་ནི་བུད་མེད་རྣམས་ཀྱང་མི་འབྱུང་སྟེ། །རྣམ་པ་ཀུན་ཏུ་གཡེམ་པའི་ཆོས་མེད་དོ། །རྒྱལ་བའི་སྲས་པོ་དེ་དག་རྫུས་ཏེ་སྐྱེ། །དྲི་མ་མེད་པའི་པད་མའི་སྙིང་པོར་འདུག །འདྲེན་པ་ཚེ་མཐའ་ཡས་པ་དེ་ཉིད་ཀྱང་། །པད་མའི་སྙིང་པོ་དྲི་མེད་དགའ་བ་ལ། །སེང་གེའི་ཁྲི་ལ་རབ་ཏུ་བཞུགས་པ་ཡང་། །སཱ་ལའི་རྒྱལ་པོ་ལྟ་བུར་རྣམ་པར་མཛེས། །འཇིག་རྟེན་འདྲེན་པ་འདི་ཡང་དེ་བཞིན་ཏེ། །སྲིད་པ་གསུམ་ན་དེ་འདྲ་ཡོང་མེད་དོ། །གང་གིས་སྤྱན་རས་གཟིགས་དབང་མིང་ཐོས་པ། །དེ་ཡི་བསོད་ནམས་དག་ནི་ཟད་མི་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ས་འཛིན་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སུ་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་ལེའུ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ། སྤྱན་རས་གཟིགས་དབང་ཕྱུག་གི་རྣམ་པར་སྤྲུལ་པའི་ཆོ་འཕྲུལ་འདི་ཐོས་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །ཀུན་ནས་སྒོའི་ལེའུ་བསྟན་པ་འདི་བཅོམ་ལྡན་འདས་ཀྱིས་བཤད་པ་ན། འཁོར་དེ་ལས་སྲོག་ཆགས་བརྒྱད་ཁྲི་བཞི་སྟོང་གིས་མི་མཉམ་པ་དང་མཉམ་པ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དམ་པའི་ཆོས་པད་མ་དཀར་པོ་ལས་སྤྱན་རས་གཟིགས་དབང་ཕྱུག་གི་རྣམ་པར་འཕྲུལ་པ་བསྟན་པ་ཀུན་ནས་སྒོའི་ལེའུ་ཞེས་བྱ་བ་སྟེ་ཉི་ཤུ་རྩ་བཞི་པའོ།། །།