ཉི་ཤུ་རྩ་བདུན་པ། ཡོངས་སུ་གཏད་པའི་ལེའུ།
དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཆོས་ཀྱི་གདན་དེ་ལས་བཞེངས་ཏེ་ཐམས་ཅད་དང་ལྡན་པའི་བྱང་ཆུབ་སེམས་དཔའ་དེ་དག་བསྡུས་ནས་རྫུ་འཕྲུལ་མངོན་པར་འདུ་མཛད་པ་ཡོངས་སུ་གྲུབ་པའི་ཕྱག་གཡས་པས། དེ་དག་གི་ལག་པ་གཡས་པ་ནས་བཟུང་ནས་དེའི་ཚེ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཁྱེད་ཀྱི་ལག་ཏུ་གཏད་དོ། །ཡོངས་སུ་གཏད་དོ་རྗེས་སུ་གཏད་དོ། །བཞག་གོ ། གཏམས་སོ། །རིགས་ཀྱི་བུ་དག་ཁྱེད་ཀྱིས་ཅི་ནས་ཀྱང་རྒྱ་ཆེར་རྒྱས་པར་འགྱུར་བ་དེ་ལྟར་གྱིས་ཤིག །ལན་གཉིས་ལན་གསུམ་དུ་ཡང་བཅོམ་ལྡན་འདས་ཀྱི་ཕྱག་གཡས་པས་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་ཀྱི་ལག་པ་གཡས་པ་ནས་བཟུང་སྟེ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག་ངས་བསྐལ་པ་གྲངས་མེད་པ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ཁྱེད་ཀྱི་ལག་ཏུ་གཏད་དོ། །ཡོངས་སུ་གཏད་དོ། །རྗེས་སུ་གཏད་དོ། །བཞག་གོ ། གཏམས་སོ། །རིགས་ཀྱི་བུ་དག་ཁྱེད་ཀྱིས་བླངས་ལ་བཟུང་ངོ་། །བཀླག་གོ ། ཀུན་ཆུབ་པར་བྱའོ། །བསྟན་པར་བྱའོ། །བཤད་པར་བྱའོ། །སེམས་ཅན་ཐམས་ཅད་ལ་བསྒྲགས་པར་བྱའོ། །རིགས་ཀྱི་བུ་དག་ང་ལ་སེར་སྣ་མེད་དོ། །འཛིན་པའི་སེམས་མེད་དོ། །འཇིགས་པ་མེད་པར་སངས་རྒྱས་ཀྱི་ཡེ་ཤེས་སྦྱིན་པའོ། །དེ་བཞིན་གཤེགས་པའི་ཡེ་ཤེས་དང་རང་བྱུང་གི་ཡེ་ཤེས་སྦྱིན་པའོ། །རིགས་ཀྱི་བུ་དག་ང་ནི་སྦྱིན་པའི་བདག་པོ་ཆེན་པོ་སྟེ། རིགས་ཀྱི་བུ་དག་ཁྱེད་ཀྱང་ངའི་རྗེས་སུ་སློབས་ཤིག་སེར་སྣ་མེད་པར་གྱིས་ལ་དེ་བཞིན་གཤེགས་པའི་ཡེ་ཤེས་མཐོང་བ་ཐབས་མཁས་པ་ཆེན་པོའི་ཆོས་ཀྱི་རྣམ་གྲངས་འདི་འོངས་ཤིང་ལྷགས་པའི་རིགས་ཀྱི་བུ་དང་རིགས་ཀྱི་བུ་མོ་དག་ལ་ཡང་དག་པར་སྒྲོགས་ཤིག །རིགས་ཀྱི་བུ་འམ་རིགས་ཀྱི་བུ་མོ་གང་དག་དད་པ་དང་། སེམས་ཅན་གང་དག་མ་དད་པ་དེ་དག་ཆོས་ཀྱི་རྣམ་གྲངས་འདི་ལ་ཡང་དག་པར་
གཟུད་པར་བྱའོ། །རིགས་ཀྱི་བུ་དག་ཁྱེད་ཀྱིས་དེ་ལྟར་བྱས་ན་དེ་བཞིན་གཤེགས་པ་ལ་ལན་ལོན་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དགའ་བ་དང་། མཆོག་ཏུ་དགའ་བས་ཁྱབ་པར་བྱས་པར་གྱུར་ནས། རྗེས་ཆེར་བསྐྱེད་དེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་ག་ལ་བ་དེ་ལོགས་སུ་ལུས་བཏུད་ལུས་རབ་ཏུ་བཏུད་ནས་ལུས་བཅུམས་ཏེ་མགོ་སྨད་ནས་ཐལ་མོ་སྦྱར་ཏེ། ཐམས་ཅད་ཀྱིས་སྒྲ་སྐད་གཅིག་ཏུ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་ཇི་སྐད་བཀའ་སྩལ་པ་དེ་བཞིན་དུ་འཚལ་ལོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་པར་བགྱིའོ། །བཅོམ་ལྡན་འདས་ཐུགས་ལས་ཆུང་ངུར་ཅི་བདེར་བཞུགས་སུ་གསོལ། ལན་གཉིས་ལན་གསུམ་དུ་ཡང་ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེས་སྒྲ་སྐད་གཅིག་ཏུ་ཚིག་འདི་སྐད་ཅེས་བཅོམ་ལྡན་འདས་ཐུགས་ལས་ཆུང་ངུར་ཅི་བདེར་བཞུགས་སུ་གསོལ། བཅོམ་ལྡན་འདས་ཇི་སྐད་དུ་དེ་བཞིན་གཤེགས་པས་བཀའ་སྩལ་པ་དེ་བཞིན་དུ་བགྱིའོ། །དེ་བཞིན་གཤེགས་པ་ཐམས་ཅད་ཀྱི་བཀའ་ཡོངས་སུ་རྫོགས་པར་བགྱིའོ་ཞེས་གསོལ་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས། འཇིག་རྟེན་གྱི་ཁམས་གཞན་དག་ནས་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་སླར་གཤེགས་སུ་གསོལ་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཅི་བདེར་གནས་པར་མཛོད་ཅིག་ཅེས་དེ་བཞིན་གཤེགས་པ་དེ་དག་ལ་ཅི་བདེར་གནས་པར་མཛོད་ཅིག་ཅེས་བྱ་བར་གསུངས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དེའི་མཆོད་རྟེན་
ཡང་གནས་ཇི་ལྟ་བ་བཞིན་དུ་བཞག་གོ ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཡང་ཅི་བདེར་བཞུགས་ཤིག་ཅེས་གསུངས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲངས་མེད་དཔག་ཏུ་མེད་པ་འཇིག་རྟེན་གྱི་ཁམས་གཞན་དག་ནས་བྱོན་ཏེ། རིན་པོ་ཆེའི་ཤིང་ལྗོན་པ་དག་གི་དྲུང་ན། སེང་གེའི་ཁྲི་ལ་བཞུགས་པ་དེ་དག་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་དང་། ཐམས་ཅད་དང་ལྡན་པའི་བྱང་ཆུབ་སེམས་དཔའི་ཚོགས་དེ་དག་དང་། སྤྱོད་པ་ཁྱད་པར་ཅན་ལ་སོགས་པ་ས་རུམ་ནས་འཐོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་དེ་དག་དང་ཉན་ཐོས་ཆེན་པོ་དེ་དག་དང་འཁོར་བཞི་པོ་དེ་དག་དང་། ལྷ་དང་མི་དང་ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཐུགས་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །དམ་པའི་ཆོས་པད་མ་དཀར་པོ་ལས་ཡོངས་སུ་གཏད་པའི་ལེའུ་ཞེས་བྱ་བ་སྟེ་ཉི་ཤུ་བདུན་པའོ།། །།གང་ན་མདོ་སྡེ་འདི་ཡོད་པར། །མེ་མར་མུར་གྱི་དོད་འབོགས་ཤིང་། །སྤུ་གྲི་གཏམས་ལས་འཛེགས་ནས་ཀྱང་། །རིགས་ཀྱི་བུ་དག་འགྲོ་བར་བྱ། །འཕགས་པ་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་ཡོངས་སུ་རྒྱས་པ་ཆེན་པོའི་མདོ་སྡེ་བྱང་ཆུབ་སེམས་དཔའ་རྣམས་ལ་གདམས་པ། སངས་རྒྱས་ཐམས་ཅད་ཀྱིས་ཡོངས་སུ་བཟུང་བ་སངས་རྒྱས་ཐམས་ཅད་ཀྱི་གསང་ཆེན། སངས་རྒྱས་ཐམས་ཅད་ཀྱི་སྦ་བ་སངས་རྒྱས་ཐམས་ཅད་ཀྱི་རིགས། སངས་རྒྱས་ཐམས་ཅད་ཀྱི་གསང་བའི་གནས། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སྙིང་པོ། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་སྐོར་བ། སངས་རྒྱས་ཐམས་ཅད་ཀྱི་སྐུ་གཅིག་ཏུ་འདུས་པ། ཐབས་མཁས་པ་ཆེན་པོ་ཐེག་པ་གཅིག་ཏུ་བསྟན་པ། དོན་དམ་པ་བསྒྲུབ་པ་བསྟན་པའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེན་དྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བན་དེ་སྣ་ནམ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།