དང་པོ། སྐུ་ཚེའི་ལེའུ།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྩྭ་མཆོག་གི་གྲོང་ཁྱེར་སྐྱེས་བུ་སྟོབས་པོ་ཆེ་འབྱུང་བའི་གནས་ཀླུང་ཧ་རི་ལ་བ་ཏིའི་འགྲམ་ཤིང་སཱ་ལ་དྲུང་གཉིས་ཀྱི་བར་ན། དགེ་སློང་ཆེན་པོའི་དགེ་འདུན་བརྒྱ་སྟོང་ཕྲག་བརྒྱད་ཅུ་སྙེད་ཀྱིས་ཡོངས་སུ་བསྐོར་ནས། མདུན་དུ་བདར་ཏེ་ཐབས་ཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་དཔྱིད་ཟླ་འབྲིང་པོའི་ཚེས་བཅྭ་ལྔའི་ཉིན་པར་ཡོངས་སུ་མྱ་ངན་ལས་འདའ་བར་གཤེགས་སུ་ཉེ་བ་ན། བཅོམ་ལྡན་འདས་ཀྱི་བྱིན་གྱི་རླབས་ཀྱིས་གསུང་ཆེན་པོས་སྲིད་པའི་རྩེ་མོའི་བར་དུ་ཀུན་ཏུ་ཁྱབ་པར་སེམས་ཅན་ཐམས་ཅད་ལ་སོ་སོའི་སྐད་དུ་གསུང་འདི་སྐད་ཅེས་གྲགས་པར་གྱུར་ཏོ། །དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྱེ་བོ་མང་པོ་རྣམས་ལ་ཐུགས་བརྩེ་བ།
སེམས་ཅན་ཐམས་ཅད་ཀྱི་སྐྱབས་དང་མགོན་དུ་གྱུར་པ། སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་མཉམ་པར་གཟིགས་པ། སེམས་ཅན་གྱི་སྐྱབས་དང་། དཔུང་གཉེན་དང་། རྟེན་དང་། གནས་སུ་གྱུར་པ་དེང་ཡོངས་སུ་མྱ་ངན་ལས་འདའོ། །སོ་སོའི་སྐྱེ་བོ་དག་ཐེ་ཙོམ་དང་སོམ་ཉིར་གྱུར་པ་ཡོད་ན། ད་ཞུ་ཞིང་དྲི་བའི་དུས་ནང་གི་ཐ་མ་འདིར་ཞུ་ཞིང་གསོལ་ཅིག་ཅེས་པའི་གསུང་གིས་ཡོངས་སུ་གྲགས་པར་གྱུར་ཏོ། །དེའི་ཚེ་བཅོམ་ལྡན་འདས་སྔ་དྲོའི་དུས་ཀྱི་ཚེ་ཞལ་གྱི་སྒོ་ནས་འོད་རྣམ་པ་སྣ་ཚོགས་བཀྱེ་བ་ནི་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། ཤེལ་ལྟ་བུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང་། ཕྱོགས་བཅུའི་འཇིག་རྟེན་གྱི་ཁམས་ཀྱི་བར་དུ་ཡོངས་སུ་སྣང་བར་བྱས་ནས། དེ་དག་ན་གནས་པའི་ལམ་རྒྱུད་དྲུག་གི་སེམས་ཅན་དག་འོད་ཟེར་དེས་རེག་མ་ཐག་ཏུ་ཁ་ན་མ་ཐོ་བའི་ཉོན་མོངས་པ་ཐམས་ཅད་བྱང་བར་གྱུར་ཏོ། །དེའི་ཚེ་སོ་སོའི་སྐྱེ་བོ་དག་དེ་ལྟ་བུའི་ལྟས་མཐོང་ཞིང་ཐོས་ནས་མྱ་ངན་ཆེན་པོས་ཡིད་གདུངས་ཏེ། དུས་གཅིག་ཏུ་ཆོ་ངེས་རྡུང་ཞིང་ངུས་ནས་འདི་སྐད་དུ། ཨེ་མའོ་ཤིན་ཏུ་བྱམས་པའི་ཕ་མར་གྱུར་པ། ཀྱི་ཧུད་ཀྱི་ཧུད་མྱ་ངན་ལས་འདས་སམ་ཞེས་སྨྲས་ནས་ཐལ་མོས་མགོ་དང་བྲང་ལ་རྡེབས་ཏེ་ཆོ་ངེ་རྡུང་ངོ་། །ཁ་ཅིག་ནི་ལུས་ཀྱང་རབ་ཏུ་འདར་ཞིང་བ་སྤུ་ཀུན་ལངས་ནས་སྐད་ཀྱིས་བརྣངས་པ་ཙམ་དུ་ངུས་སོ། །དེའི་ཚེ་ན་ས་ཆེན་པོ་འདི་དང་། རི་དང་རྒྱ་མཚོ་ཡང་རབ་ཏུ་གཡོས་ཤིང་འཁྲུགས་སོ། །དེ་ནས་སེམས་ཅན་དེ་དག་གཅིག་ལ་གཅིག་སྤྲོ་བསྲིང་ཞིང་མྱ་ངན་བསང་བའི་ཕྱིར་འདི་སྐད་དུ། ཀྱེ་གྲོགས་པོ་དག་མྱ་ངན་མ་བྱེད་པར་མྱུར་དུ་རྩྭ་མཆོག་གི་གྲོང་ཁྱེར་སྐྱེས་བུ་སྟོབས་པོ་ཆེ་འབྱུང་བའི་གནས་
དེ་བཞིན་གཤེགས་པ་ག་ལ་བ་དེར་འདོང་ངོ་། །དེ་བཞིན་གཤེགས་པའི་ཞབས་ལ་མགོ་བོས་ཕྱག་འཚལ་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བར་འཇིག་རྟེན་ན་བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་བཞུགས་པར་གསོལ་དུ་འདེང་ངོ་ཞེས་སྨྲས་སོ། །ལ་ལ་ནི་གཅིག་གི་ལག་པ་ལ་གཅིག་གིས་འཇུས་ནས་འདི་སྐད་དུ་འཇིག་རྟེན་སྟོངས་ཏེ། སེམས་ཅན་གྱི་བསོད་ནམས་ཟད་པས་མི་དགེ་བའི་ལས་འཇིག་རྟེན་དུ་བྱུང་བར་གྱུར་གྱིས། གྲོགས་པོ་དག་དེ་བཞིན་གཤེགས་པ་ནི་རིང་པོར་མི་ཐོགས་པར་ཡོངས་སུ་མྱ་ངན་ལས་འདའ་བར་གཤེགས་ངེས་ཀྱིས། བདག་ཅག་མྱུར་དུ་འདེང་ངོ་ཞེས་སྨྲའོ། །ལ་ལ་ནི་འདི་སྐད་དུ་འཇིག་རྟེན་སྟོངས་སོ། །འཇིག་རྟེན་སྟོངས་སོ། །བདག་ཅག་ལ་དེང་སླན་ཆད་ནི་མགོན་དང་སྐྱབས་མེད་དེ། དབུལ་ཕོངས་པར་གྱུར་ཏོ། །དེང་ཁོ་ནར་བླ་ན་མེད་པའི་བཅོམ་ལྡན་འདས་དང་ཡོངས་སུ་བྲལ་བས་ད་སླན་ཆད་སོམ་ཉི་དང་ཐེ་ཚོམ་ཟ་བ་སུ་ལ་ཞུ་ཞེས་སྨྲའོ། །དེའི་ཚེ་ན་ཚད་མེད་པའི་ཉེ་གནས་ཆེན་པོ་ཚེ་དང་ལྡན་པ་ཀཱ་ཏྱཱ་ཡ་ན་ཆེན་པོ་དང་། ཚེ་དང་ལྡན་པ་བ་ཀུ་ལ་དང་། ཚེ་དང་ལྡན་པ་ཀུན་དགའ་བོ་ལ་སོགས་པ་དགེ་སློང་ཆེན་པོ་དེ་དག་ཀྱང་། སངས་རྒྱས་ཀྱི་འོད་ཀྱིས་རེག་པས་ལུས་ཀུན་འདར་ཞིང་མི་བཟོད་པ་ཙམ་དུ་རབ་ཏུ་གཡོས་ཏེ། སེམས་ཀྱང་མྱོས་ནས་ཆོ་ངེས་འདེབས་ཤིང་དེ་ལྟ་བུའི་སྡུག་བསྔལ་རྣམ་པ་སྣ་ཚོགས་ཀྱིས་ནོན་པར་གྱུར་ཏོ། །དེའི་ཚེ་ན་གཞན་ཡང་དགེ་སློང་བརྒྱ་སྟོང་ཕྲག་བརྒྱད་ཅུ་སྙེད་ཐམས་ཅད་ཀྱང་དགྲ་བཅོམ་པ། སེམས་ཀྱི་དབང་དུ་གྱུར་པ། བྱ་བ་བྱས་པ། ཉོན་མོངས་པ་ཡོངས་སུ་སྤངས་པ། དབང་པོ་ཐམས་ཅད་རབ་ཏུ་དུལ་བ། ཀླུའི་རྒྱལ་པོ་ཆེན་པོ་ལྟར་མཐུ་ཆེ་བ། སྟོང་པའི་ཤེས་རབ་དང་ལྡན་པ། ཕྱིས་བདག་གི་དོན་རབ་ཏུ་རྙེད་པ། ཙན་དན་གྱི་ཚལ་ལྟར་ཙན་དན་གྱིས་ཡོངས་སུ་བསྐོར་བ། སེང་གེའི་རྒྱལ་པོ་ལྟར་སེང་གེས་ཡོངས་སུ་བསྐོར་བ། དེ་ལྟ་བུའི་ཚད་མེད་པའི་ཡོན་ཏན་དང་ལྡན་པ། ཐམས་ཅད་ཀྱང་སངས་རྒྱས་ཀྱི་སྲས་ཡང་དག་པ་ཤ་སྟག་གོ །དེ་དག་ཀྱང་སྔ་དྲོའི་ཉི་མ་ཤར་མ་ཐག་ཏུ་གནས་ནས་བྱུང་སྟེ། སོ་ཤིང་འཆའ་བ་ན་སངས་རྒྱས་ཀྱི་འོད་ཀྱིས་རེག་ནས་གཅིག་ལ་གཅིག་འདི་སྐད་དུ་གྲོགས་
པོ་དག་མྱུར་དུ་ཁ་ལག་ཁྲུས་ཤིག་ཅེས་སྨྲས་སོ། །དེ་སྐད་ཅེས་སྨྲས་མ་ཐག་ཏུ་ལུས་ཀྱི་བ་སྤུ་ཀུན་ལངས་ནས། ལུས་ལ་ཁྱབ་པར་ཁྲག་གིས་རྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར་ཏེ་མིག་མཆི་མས་གང་ནས་སྡུག་བསྔལ་ཆེན་པོ་མྱོང་བར་གྱུར་ཏོ། །དེ་དག་ཐམས་ཅད་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་གྱི་ཕྱིར། ཐེག་པ་ཆེན་པོ་དོན་དམ་པའི་སྟོང་པ་ཉིད་ལ་རྣལ་འབྱོར་དུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ། གསུངས་པ་དག་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་གཅད་པའི་ཕྱིར། སེམས་ཅན་ཐམས་ཅད་ཡོངས་སུ་གདུལ་བའི་ཕྱིར། བཅོམ་ལྡན་འདས་གང་ན་བ་དེར་མྱུར་དུ་དོང་ནས་སྤྱི་བོས་སངས་རྒྱས་ཀྱི་ཞབས་ལ་ཕྱག་འཚལ་ཏེ། ལན་བརྒྱ་སྟོང་དུ་བསྐོར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀུན་ཏ་ལའི་བུ་མོ་དགེ་སློང་མ་དཔལ་བཟང་དང་། དགེ་སློང་མ་བསྙེན་དགའ་མ་དང་། དགེ་སློང་མ་རྒྱ་མཚོའི་བློ་གྲོས་ལ་སོགས་ཏེ། དགེ་སློང་མ་ཁྲི་ཕྲག་དྲུག་ཅུ་སྙེད་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ། སེམས་ཀྱི་དབང་དུ་གྱུར་པ། བྱ་བ་བྱས་པ། ཉོན་མོངས་པ་ཡོངས་སུ་སྤངས་པ། དབང་པོ་རབ་ཏུ་དུལ་བ། ཀླུ་ཆེན་པོ་ལྟར་གཟི་བརྗིད་རབ་ཏུ་ཆེ་བ། སྟོང་པ་ཉིད་ཀྱི་ཤེས་རབ་དང་ལྡན་པ་ཤ་སྟག་སྟེ། དེ་དག་ཀྱང་སྔ་དྲོའི་དུས་ཀྱི་ཚེ་ཉི་མ་ཐོག་མ་ཤར་བ་ན། ལུས་ཀྱི་བ་སྤུ་ཀུན་སྐྱི་བུང་ཞེས་བྱེད་ནས་ལུས་ལ་ཁྱབ་པར་ཁྲག་གིས་རྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར་ཏེ། མིག་མཆི་མས་ཡོངས་སུ་གང་ནས་སྡུག་བསྔལ་ཆེན་པོ་མྱོང་བར་གྱུར་ཏོ། །དེ་དག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། ཐེག་པ་ཆེན་པོ་དོན་དམ་པའི་སྟོང་པ་ཉིད་ལ་རྣལ་འབྱོར་དུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ་གསུངས་པ་དག་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་གཅད་པའི་ཕྱིར། སེམས་ཅན་ཐམས་ཅད་ཡོངས་སུ་གདུལ་བའི་ཕྱིར་བཅོམ་ལྡན་འདས་གང་ན་བ་དེར་མྱུར་དུ་དོང་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་བསྐོར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །དགེ་སློང་མ་དེ་དག་གི་ནང་ན་དགེ་སློང་མ་ཁ་ཅིག་ནི་བྱང་ཆུབ་སེམས་དཔའ་སྟེ། མིའི་ནང་ན་ཀླུ་ལྟ་བུ་ས་བཅུ་རབ་ཏུ་ནོན་པ། མི་གཡོ་བ་ལ་གནས་པ།
སེམས་ཅན་གདུལ་བའི་ཕྱིར་བུད་མེད་ཀྱི་ལུས་སྟོན་ཀྱང་རྟག་ཏུ་ཚད་མེད་པ་བཞི་ལ་ནན་ཏན་བྱེད་པ། སེམས་ཀྱི་དབང་དུ་གྱུར་པས་སངས་རྒྱས་ཀྱི་སྐུར་ཡང་སྤྲུལ་པ་ཤ་སྟག་གོ །དེའི་ཚེ་གཞན་ཡང་ཀླུང་གང་གཱ་གཅིག་གི་བྱེ་མ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་མིའི་ནང་ན་ཀླུ་ལྟ་བུ་ས་བཅུ་རབ་ཏུ་ནོན་པ། མི་གཡོ་བ་ལ་རབ་ཏུ་གནས་པ། ཐབས་ཀྱིས་ལུས་སྟོན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་རྒྱ་མཚོའི་དཔལ་དང་། བྱང་ཆུབ་སེམས་དཔའ་བློ་གྲོས་མི་ཟད་པ་ལ་སོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་ཐོག་མར་དྲངས་ནས་ཐམས་ཅད་ཀྱང་ཐེག་པ་ཆེན་པོ་ལ་བཀུར་སྟི་བྱེད་པ། ཐེག་པ་ཆེན་པོ་ལ་རབ་ཏུ་གནས་པ། ཐེག་པ་ཆེན་པོ་ལ་ཤིན་ཏུ་མཁས་པ། ཐེག་པ་ཆེན་པོ་ལ་ཤིན་ཏུ་མོས་པ། ཐེག་པ་ཆེན་པོ་ལ་ཤིན་ཏུ་བསྲུང་བ། འཇིག་རྟེན་དུ་བཅས་པ་ཐམས་ཅད་ཀྱི་སེམས་དང་སྦྱོར་བ། མ་འོངས་པའི་དུས་སུ་མ་གྲོལ་བ་གྲོལ་བར་ཡི་དམ་འཆའ་བ། འདས་པའི་དུས་ན་བསྐལ་པ་གྲངས་མེད་པའི་བར་དུ་ཚུལ་ཁྲིམས་ཡོངས་སུ་བསྲུངས་པ། སྤྱོད་པ་ཡོངས་སུ་འཛིན་པ། མ་གྲོལ་བ་གྲོལ་བར་བྱེད་པ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། མ་འོངས་པའི་དུས་སུ་ཆོས་ཀྱི་འཁོར་ལོ་བསྐོར་བར་འགྱུར་བ། རྒྱན་ཆེན་པོས་ཤིན་ཏུ་བརྒྱན་པ་དེ་ལྟ་བུའི་ཡོན་ཏན་ཚད་མེད་པ་དང་ལྡན་པ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་ལྟ་བ་ཤ་སྟག་གོ །དེ་དག་ཀྱང་སྔ་དྲོའི་དུས་ཉི་མ་ཤར་མ་ཐག་ཏུ་སངས་རྒྱས་ཀྱི་འོད་ཀྱིས་རེག་ནས་ལུས་ཀྱི་བ་སྤུ་ཀུན་ལངས་ཏེ། ལུས་ལ་ཁྱབ་པར་ཁྲག་གིས་རྒྱས་པ་ནི་ཇི་ལྟར་མེ་ཏོག་པ་ལ་ཤ་ལྟ་བུར་གྱུར་ཏེ། མིག་མཆི་མས་ཡོངས་སུ་གང་ནས་སྡུག་བསྔལ་མྱོང་བར་གྱུར་ཏོ། །དེ་དག་ཀྱང་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཐེག་པ་ཆེན་པོ་དོན་དམ་པའི་སྟོང་པ་ཉིད་ལ་རྣལ་འབྱོར་དུ་བསྒྲུབ་པའི་ཕྱིར། དེ་བཞིན་གཤེགས་པས་ཐབས་སུ་དགོངས་ཏེ་གསུངས་པ་བསྟན་པའི་ཕྱིར། རྣམ་པ་སྣ་ཚོགས་སུ་ཆོས་སྟོན་པ་རྒྱུན་མི་གཅད་པའི་ཕྱིར། སེམས་ཅན་ཐམས་ཅད་ཡོངས་སུ་གདུལ་བའི་ཕྱིར་བཅོམ་ལྡན་འདས་གང་ན་བ་དེར་མྱུར་དུ་དོང་ནས་ཕྱིན་པ་དང་། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། ཐལ་མོ་སྦྱར་ནས་བསྟི་སྟང་དང་
བཅས་པས་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་གཉིས་ཀྱི་བྱེ་མ་སྙེད་ཀྱི་དགེ་བསྙེན་ཕ་ཁྲིམས་ལྔ་ཡོངས་སུ་སྲུང་བ་ལ་འདི་ལྟ་སྟེ། དགེ་བསྙེན་གཟི་བརྗིད་དྲི་མ་མེད་པར་གྲགས་པའི་རྒྱལ་པོ་དང་། དགེ་བསྙེན་ལེགས་པའི་ཡོན་ཏན་ལ་སོགས་པས་ཐོག་མར་དྲངས་ཏེ། ཐམས་ཅད་ཀྱང་གཉེན་པོར་གྱུར་པའི་ཆོས་ལ་ཤིན་ཏུ་མོས་པ་ནི་འདི་ལྟ་སྟེ། སྡུག་བསྔལ་དང་། བདེ་བ་དང་། རྟག་པ་དང་མི་རྟག་པ་དང་། ཡོངས་སུ་དག་པ་དང་། མ་དག་པ་དང་། བདག་དང་བདག་མེད་པ་དང་། ངེས་པ་དང་མ་ངེས་པ་དང་། སྐྱབས་སུ་འགྲོ་བ་དང་སྐྱབས་སུ་མི་འགྲོ་བ་དང་། སེམས་ཅན་དང་སེམས་ཅན་མ་ཡིན་པ་དང་། ཐེར་ཟུག་དང་ཐེར་ཟུག་མ་ཡིན་པ་དང་། བདེ་བ་དང་བདེ་བ་མ་ཡིན་པ་དང་། འདུས་བྱས་པ་དང་འདུས་མ་བྱས་པ་དང་། ཆད་པ་དང་ཆད་པ་མ་ཡིན་པ་དང་། མྱ་ངན་ལས་འདའ་བ་དང་། མྱ་ངན་ལས་འདའ་བ་མ་ཡིན་པ་དང་། ལྷག་པ་དང་ལྷག་པ་མ་ཡིན་པ་ལ་སོགས་ཏེ། གཉེན་པོར་གྱུར་པའི་ཆོས་འདི་དག་ལ་རྟོག་པར་ཤིན་ཏུ་མོས་པ་ཤ་སྟག་གོ །གཞན་ཡང་བླ་ན་མེད་པའི་ཐེག་པ་ཆེན་པོ་ལ་ཐོས་པར་མོས་པ། ཇི་ལྟར་ཐོས་པ་བཞིན་དུ་གཞན་ལ་ཡང་སྟོན་ནུས་པ། ཚུལ་ཁྲིམས་ཡོངས་སུ་སྲུང་བ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་མོས་པ། བདག་ཀྱང་ཤིན་ཏུ་ངོམས་ལ། སྐོམ་པས་གདུངས་པ་གཞན་ཡང་ངོམས་པར་བྱེད་པ། བླ་ན་མེད་པའི་ཡེ་ཤེས་ལ་ཤིན་ཏུ་འཇུག་པ། ཐེག་པ་ཆེན་པོ་ལ་མོས་པ། ཐེག་པ་ཆེན་པོ་ལ་ཤིན་ཏུ་སྲུང་བ། འཇིག་རྟེན་པ་ཐམས་ཅད་ཀྱི་སེམས་དང་ཤིན་ཏུ་སྦྱོར་བ། མ་རྒལ་བ་སྒྲོལ་བ། མ་གྲོལ་བ་འགྲོལ་བ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། མ་འོངས་པའི་དུས་སུ་ཆོས་ཀྱི་འཁོར་ལོ་ཤིན་ཏུ་བསྐོར་བ། རྒྱན་ཆེན་པོས་རྣམ་པར་བརྒྱན་པ། སེམས་ཤིན་ཏུ་ཟབ་མོའི་རོ་ལ་མོས་པ། ཚུལ་ཁྲིམས་ཡོངས་སུ་དག་པ། ཐམས་ཅད་ཀྱང་དེ་ལྟ་བུའི་ཡོན་ཏན་དང་ལྡན་པ། སེམས་ཅན་ཐམས་ཅད་ལ་སྙིང་རྗེ་ཆེན་པོའི་སེམས་བསྐྱེད་ཅིང་བུ་གཅིག་པ་དང་འདྲ་བར་གཉིས་སུ་མེད་པར་སྙོམས་པ་ཤ་སྟག་གོ །དེ་དག་ཀྱང་སྔ་དྲོའི་དུས་ཉི་མ་ཤར་མ་ཐག་ཏུ་འོད་ཟེར་གྱིས་རེག་ནས་དེ་བཞིན་གཤེགས་པའི་པུར་ཞུགས་ལ་བཞེན་པའི་ཕྱིར་ཐམས་ཅད་ཀྱིས་སོ་སོ་ནས་སྤོས་ཀྱི་ཤིང་ཁྲི་ཕྲག་དུ་མ་བཤམས་
པ་ལ་འདི་ལྟ་སྟེ། སྤོས་ཀྱི་ཤིང་ཙན་དན་དང་། ཨ་ག་རུ་དང་། གོ་ཤིར་ཥ་ཙན་དན་དང་། ལྷའི་ཤིང་བསུང་ཅན་ལ་སོགས་པའོ། །ཤིང་དེ་དག་ཀྱང་མཛེས་པའི་རི་མོ་དང་ལྡན་ཞིང་རིན་པོ་ཆེ་སྣ་བདུན་གྱིས་རྣམ་པར་བརྒྱན་པ། འོད་ཤིན་ཏུ་འཚེར་ཞིང་གསལ་བ་ནི་དཔེར་ན་རི་མོ་མཁན་གྱིས་ཚོན་སྣ་ཚོགས་བཀྱེ་བ་དང་འདྲ་སྟེ། སངས་རྒྱས་ཀྱི་བྱིན་གྱི་བརླབས་ཀྱིས་ཁ་དོག་སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་ལྡན་ཏེ། འགྲོ་བ་མང་པོས་མཐོང་ན་དགའ་བར་འགྱུར་བ་ཤ་སྟག་གོ །ཤིང་རྣམ་པ་མང་པོ་དེ་དག་ལ་གཞན་ཡང་རྣམ་པ་སྣ་ཚོགས་ཀྱི་སྤོས་ཀྱི་ལྡེ་གུ་དང་། གུར་གུམ་དང་། ཨ་ག་རུ་དང་། པོག་ལ་སོགས་པས་ཡོངས་སུ་བསྐུས་ལ། མེ་ཏོག་རྣམ་པ་སྣ་ཚོགས་ཀྱིས་གཏོར་ཅིང་བརྒྱན་པ་ནི་འདི་ལྟ་སྟེ། མེ་ཏོག་ཨུད་པ་ལ་དང་། མེ་ཏོག་ཀུ་མུ་ད་དང་། མེ་ཏོག་པད་མོ་དང་། མེ་ཏོག་པུན་ད་རཱི་ཀ་ལ་སོགས་པའོ། །ཤིང་དེ་དག་ལ་གཞན་ཡང་ཚོན་རྣམ་པ་ལྔ་དང་ལྡན་པའི་བ་དན་ཤིན་ཏུ་འཇམ་ཞིང་མཛེས་པ་ཡོངས་སུ་སྤྱངས་པ་ནི་དཔེར་ན་ལྷའི་ན་བཟའ་ཀེའུ་ཤ་ཡའམ། ཤུ་མ་ལྟ་བུའོ། །སྤོས་ཀྱི་ཤིང་དེ་དག་ཀྱང་རིན་པོ་ཆེའི་ཤིང་རྟས་བསྐྱས་ཏེ། རིན་པོ་ཆེའི་ཤིང་རྟ་དེ་དག་ལས་ཀྱང་འོད་རྣམ་པ་སྣ་ཚོགས་བྱུང་བ་ནི་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོའོ། །ཤིང་རྟའི་གཉའ་ཤིང་དང་། བར་གདང་ལ་སོགས་པ་ཡང་རིན་པོ་ཆེ་སྣ་བདུན་གྱིས་རྣམ་པར་སྤྲས་ཏེ། ཤིང་རྟ་དེ་རེ་རེ་ཡང་རྟ་བཞི་བཞིས་དྲངས་སོ། །རྟ་དེ་དག་ཀྱང་མགྱོགས་ཁྱད་རླུང་དང་འདྲའོ། །ཤིང་རྟ་དེ་རེ་རེའི་མདུན་ན་རིན་པོ་ཆེ་སྣ་བདུན་གྱི་རྒྱལ་མཚན་ལྔ་བཅུ་སྙེད་དངར་ཏེ། གསེར་གྱི་དྲ་བས་བླ་རེར་བྲེས་སོ། །རིན་པོ་ཆེའི་ཤིང་རྟ་དེ་རེ་རེའི་སྟེང་སྟེང་ཡང་རིན་པོ་ཆེའི་གདུགས་ལྔ་བཅུ་སྙེད་བྲེས་སོ། །ཤིང་རྟ་དེ་རེ་རེ་ལ་ཡང་མེ་ཏོག་གི་ཕྲེང་བ་སྤྱངས་པ་ནི་འདི་ལྟ་སྟེ། མེ་ཏོག་ཨུད་པ་ལ་དང་། མེ་ཏོག་ཀུ་མུ་ད་དང་། མེ་ཏོག་པད་མོ་དང་། པུན་ད་རཱི་ཀ་རྣམས་ཏེ། འདབ་མ་ནི་གསེར། གེ་སར་ནི་རྡོ་རྗེ་ལས་བྱས་ཏེ། མེ་ཏོག་གེ་སར་དེ་དག་གི་ནང་ན་ཡང་བུང་བ་ནག་པོ་ལྡིང་ཞིང་རྩེའོ། །གཞན་ཡང་སྒྲ་སྐད་ཤིན་ཏུ་སྙན་པ་དང་། དེ་མ་ཡིན་པ་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་། བདག་མེད་
པའི་སྒྲ་ཡང་འབྱིན་ཏོ། །དེ་དག་ལས་གཞན་ཡང་བྱང་ཆུབ་སེམས་དཔའི་སྔོན་སྤྱད་པ་སྤྱོད་པའི་སྒྲ་དང་། གཞན་ཡང་རོལ་མོ་རྣམ་པ་སྣ་ཚོགས་ཀྱི་སྒྲ་གྲག་པ་ནི་འདི་ལྟ་སྟེ། གླུ་དང་། གར་དང་། གླིང་བུ་དང་། དགུ་པོ་རྒྱུད་མངས་དང་། སེའུ་དང་། ཤིར་དང་། རྔའི་སྒྲ་རྣམས་སོ། །རོལ་མོའི་སྒྲ་དེ་ལས་གཞན་ཡང་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ་ཞེས་ཟེར་བའི་སྒྲ་ཡང་འབྱུང་ངོ་། །ཤིང་རྟ་དེ་རེ་རེའི་མདུན་ན། དགེ་བསྙེན་རིན་པོ་ཆེ་སྣ་བཞིའི་ཁྲིའུ་ཐོགས་པ་རེ་རེ་ཡོད་དེ། ཁྲིའུ་དེའི་སྟེང་ན་རྣམ་པ་སྣ་ཚོགས་ཀྱི་མེ་ཏོག་སྤུངས་པ་ནི་འདི་ལྟ་སྟེ། མེ་ཏོག་ཨུད་པ་ལ་དང་། ཀུ་མུ་ད་དང་། པད་མོ་དང་། པུན་ད་རཱི་ཀ་དང་། གུར་ཀུམ་དང་། བྱུག་སྤོས་དང་། བདུག་སྤོས་ལ་སོགས་པ་མཆོག་ཏུ་གྱུར་ཕུལ་དུ་གྱུར་པ་རྣམས་བཤམས་སོ། །དགེ་བསྙེན་རྣམས་ཀྱིས་སངས་རྒྱས་དང་དགེ་འདུན་ལ་བསོད་སྙོམས་རྣམ་པ་སྣ་ཚོགས་བཤམས་པ་ཡང་ཐམས་ཅད་ཙན་དན་དང་། ཨ་ག་རུའི་ཤིང་བསུང་ཅན་བསྲེགས་ཏེ། ཡོན་ཏན་བརྒྱད་དང་ལྡན་པའི་ཆུ་ལས་གཡོས་སུ་བྱས་སོ། །ཞལ་ཟས་དེ་དག་ཀྱང་རོ་རྣམ་པ་དྲུག་དང་ལྡན་ནོ། །འདི་ལྟ་སྟེ་ཁ་བ་དང་། སྐྱུར་བ་དང་། མངར་བ་དང་། ཚ་བ་དང་། ལན་ཚྭ་བྲོ་བ་དང་། བསྔལ་བའི་རོ་དང་ལྡན་ནོ། །གཞན་ཡང་ཡོན་ཏན་རྣམ་པ་གསུམ་དང་ལྡན་ཏེ། མཉེན་ཞིང་འཇམ་པ་དང་། གཙང་བ་དང་། ཆོས་བཞིན་བྱས་པའོ། །དེ་ལྟ་བུ་ལ་སོགས་པའི་མཆོད་པ་རྣམ་པ་སྣ་ཚོགས་བཤམས་ནས། སྟོབས་པོ་ཆེ་འབྱུང་བའི་གནས་སཱ་ལའི་ཤིང་དྲུང་དུ་ལྷགས་སོ། །གཞན་ཡང་གསེར་གྱི་བྱེ་མས་ས་གཞིར་བདལ་ཏེ། ལྷའི་ན་བཟའ་ཀ་ཙ་ལིན་ད་དང་། ཁམ་པ་ལ་དང་། དར་གྱིས་དེའི་སྟེང་དུ་བཏིང་བ་ནི་ཁོ་ར་ཁོར་ཡུག་ཏུ་དཔག་ཚད་བཅུ་གཉིས་ཚུན་ཆད་ཡོག་པར་བྱས་སོ། །སངས་རྒྱས་དང་དགེ་འདུན་བཞུགས་པའི་རིན་པོ་ཆེ་སྣ་བདུན་གྱི་སེང་གེའི་ཁྲི་བཤམས་ཏེ། ཁྲི་དེ་དག་ཀྱང་འཕང་དུ་མཐོ་ཁྱད་རི་རབ་ལྷུན་པོ་དང་མཉམ་མོ། །ཁྲི་དེ་དག་གི་སྟེང་ན་རིན་པོ་ཆེའི་གུར་ཕུབ་ནས་དོ་ཤལ་རྣམ་པ་མང་པོ་སྤྱངས་སོ། །སཱ་ལའི་ཤིང་དེ་དག་ལ་ཡང་རྣམ་པ་སྣ་ཚོགས་ཀྱི་བ་དན་སྤྱངས་ཏེ། གདུགས་བྲེས་ནས་རྣམ་པ་སྣ་ཚོགས་ཀྱི་སྤོས་བསུང་ཅན་གྱི་ལྡེ་གུས་ཤིང་དེ་དག་ལ་བསྐུས་སོ། །ཤིང་གི་བར་ཡང་མེ་ཏོག་རྣམ་པ་སྣ་ཚོགས་ཀྱིས་ཆལ་པར་
བཀང་ངོ་། །དགེ་བསྙེན་དེ་རྣམས་སོ་སོ་ནས་ཡིད་ལ་འདི་སྙམ་དུ་སེམས་སོ། །སོ་སོའི་སྐྱེ་བོ་དག་གལ་ཏེ་བཟའ་བས་བྲེལ་ན་བཟའ་བ་བྱིན་ནོ། །བཏུང་བས་བྲེལ་བ་ལ་བཏུང་བ། མགོ་འདོད་པ་རྣམས་ལ་མགོ། མིག་འདོད་པ་རྣམས་ལ་མིག །དེ་ལྟར་སོ་སོའི་སྐྱེ་བོ་དག་ཅི་འདོད་པ་བཞིན་དུ་སྦྱིན་པ་ཐམས་ཅད་བྱིན་ཏེ། སྦྱིན་པ་དེ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། རྙོག་པའི་སེམས་མེད་དོ། །དེ་ལས་གཞན་པ་འཇིག་རྟེན་གྱི་ལོངས་སྤྱོད་ཀྱི་ཕྱིར་བསམ་པའི་སེམས་མེད་ཀྱི་བླ་ན་མེད་པ་ཡོངས་སུ་དག་པའི་བྱང་ཆུབ་འབའ་ཞིག་གི་ཕྱིར་རོ། །དགེ་བསྙེན་དེ་དག་བླ་ན་མེད་པའི་བྱང་ཆུབ་ལ་བདེ་བར་གནས་ནས་ཡང་འདི་སྙམ་དུ་སེམས་སོ། །དེ་བཞིན་གཤེགས་པ་ནི་བདག་ཅག་གི་མཆོད་པ་འདི་བཞེས་ནས་ཡོངས་སུ་མྱ་ངན་ལས་འདའོ་སྙམ་བསམས་ནས། དེ་དག་གི་ལུས་ཀྱི་བ་སྤུ་ཀུན་ལངས་ཏེ། ལུས་ཁྲག་གིས་རྒྱས་པ་ནི་མེ་ཏོག་པ་ལ་ཤ་ལྟ་བུར་གྱུར། མཆི་མས་ནི་མིག་གང་། སྡུག་བསྔལ་ཆེན་པོས་ནི་ཡིད་གདུངས་པར་གྱུར་ཏེ། སོ་སོ་ནས་མཆོད་པའི་ཡོ་བྱད་བཤམས་པ་སྤོས་ཀྱི་ཤིང་དང་། རྒྱལ་མཚན་དང་། བ་དན་དང་། གདུགས་དང་། ཞལ་ཟས་རྣམས་རིན་པོ་ཆེའི་ཤིང་རྟས་བསྐྱས་ནས་སངས་རྒྱས་གང་ན་བ་དེར་སོང་སྟེ་ཕྱིན་པ་དང་། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་མཆོད་པའི་ཡོ་བྱད་བཤམས་པས་དེ་བཞིན་གཤེགས་པ་ལ་མཆོད་དེ། ལན་བརྒྱ་སྟོང་དུ་བསྐོར་ནས་སྐད་ཕྱུང་སྟེ་ངུས་སོ། །ངུ་བའི་སྒྲས་གནམ་ས་ཡང་གཡོས་སོ། ། བྲང་རྡུང་ཞིང་ཆོ་ངེས་འདེབས་ཏེ། མཆི་མ་ཆར་བཞིན་དུ་ཟག་ནས། གཅིག་ལ་གཅིག་འདི་སྐད་དུ་ཀྱི་ཧུད་ཀྱི་ཧུད་གྲོགས་པོ་དག་འཇིག་རྟེན་སྟོངས་སོ། །འཇིག་རྟེན་སྟོངས་སོ་ཞེས་སྨྲས་ནས། དེ་བཞིན་གཤེགས་པའི་སྤྱན་སྔར་ལུས་བརྡབས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པས་ཐུགས་བརྩེ་བའི་སླད་དུ་བདག་ཅག་གི་མཆོད་པ་བཤམས་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །བཅོམ་ལྡན་འདས་དུས་མཁྱེན་པས་ཅང་མི་གསུང་སྟེ་མ་བཞེད་ནས། དེ་བཞིན་དུ་ལན་གསུམ་གྱི་བར་དུ་གསོལ་ཀྱང་བཞེས་སུ་མ་གནང་ངོ་། །དགེ་བསྙེན་དེ་དག་བསམ་པ་བཞིན་དུ་མ་གྱུར་ནས། མྱ་ངན་གྱིས་ཡིད་གདུངས་ཏེ། ཅང་མི་སྨྲ་བར་འཁོད་པ་དེ་ནི་དཔེར་ན་ཕ་མ་ཤིན་ཏུ་བྱམས་པའི་བུ་གཅིག་པ་གློ་
བུར་དུ་ནད་ཀྱིས་བཏབ་སྟེ་ཚེ་འཕོས་ནས་དུར་དུ་བསྐྱལ་ཏེ། ཤིན་ཏུ་མྱ་ངན་གྱིས་ཡིད་གདུངས་པ་དང་འདྲ་བར་དགེ་བསྙེན་དེ་དག་མྱ་ངན་གྱིས་ཡིད་གདུངས་པ་ཡང་དེ་དང་འདྲ་སྟེ། མཆོད་པའི་ཡོ་བྱད་རྣམས་གནས་གཅིག་ཏུ་བཞག་ནས། ཕྱོགས་གཅིག་ཏུ་ཅང་མི་སྨྲ་བར་འཁོད་དོ། །དེའི་ཚེ། གཞན་ཡང་ཀླུང་གང་གཱ་གསུམ་གྱི་བྱེ་མ་སྙེད་ཀྱི་དགེ་བསྙེན་མ་ཁྲིམས་ལྔ་ཡོངས་སུ་སྲུང་བ། སྤྱོད་ལམ་དང་ལྡན་པ་འདི་ལྟ་སྟེ། དགེ་བསྙེན་མ་འཚོ་བའི་ཡོན་ཏན་དང་། དགེ་བསྙེན་མ་དཔལ་གྱི་ཕྲེང་བ་དང་། དགེ་བསྙེན་མ་བྱི་ཤ་ཀ་ལ་སོགས་པས་ཐོག་མར་དྲངས་ནས་དགེ་བསྙེན་མ་བརྒྱད་ཁྲི་བཞི་སྟོང་སྙེད་ཐམས་ཅད་ཀྱང་དམ་པའི་ཆོས་ཡོངས་སུ་འཛིན་པ། སེམས་ཅན་ཚད་མེད་པ་བརྒྱ་སྟོང་གདུལ་བའི་ཕྱིར་བུད་མེད་ཀྱི་ལུས་སུ་སྟོན་ཅིང་ཁྱིམ་གྱི་ཆོས་ཡོངས་སུ་སྨོད་པ། བདག་གི་ལུས་ལ་སྦྲུལ་གདུག་པ་བཞིན་དང་འདྲ་བར་རྟོགས་པ། ལུས་ལ་རྟག་ཏུ་སྲིན་བུ་གྲངས་མེད་པས་ཟ་བ་དང་། ལུས་འདི་ལ་ཤིན་ཏུ་བཙོག་པ་དང་། འདོད་པས་ཡོངས་སུ་བཅིངས་པར་རྟོགས་པ། ལུས་འདི་ལ་ཁྱི་རོ་དང་འདྲ་བར་འཇིགས་སུ་རུང་བ་དང་། ལུས་འདི་ནི་མི་གཙང་བ་སྟེ། བུ་ག་དགུ་ནས་རྟག་ཏུ་ཟག་པར་རྟོགས་པ། ལུས་འདི་ནི་མཁར་དང་འདྲ་སྟེ། ཤ་དང་པགས་པ་དང་རྩ་དང་རྒྱུས་པས་རྣམ་པར་དཀྲིས་པ། ལག་པ་དང་རྐང་པ་ནི་མཁར་གྱི་ཉེན་ལྟ་བུར་གྱུར་པ། མིག་ནི་སྐར་ཁུང་ལྟ་བུར་གྱུར་པ། མགོ་བོ་ནི་ཁང་པ་ལྟ་བུར་གྱུར་ཏེ། སེམས་རྒྱལ་པོ་དང་འདྲ་བ་དེའི་ནང་ན་གནས་པར་རྟོགས་པ། ལུས་མཁར་དང་འདྲ་བ་འདི་ནི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་སྤངས་ཏེ། བུས་པ་སོ་སོའི་སྐྱེ་བོ་དག་ནི་དེ་ལ་ཆགས་པར་བྱེད་དོ། །འདོད་ཆགས་དང་། ཞེ་སྡང་དང་། གཏི་མུག་གི་སྲིན་པོ་གནས་པར་རྟོགས་པ། ལུས་འདི་ནི་སྙིང་པོ་མེད་པ་སྟེ། འདམ་བུའི་མྱུ་གུ་འམ། ཨེ་རཎྜ་འམ། ཆུའི་ཆུ་བུར་རམ། ཆུ་ཤིང་ལྟ་བུར་རྟོགས་པ། ལུས་འདི་ནི་མི་རྟག་པ་སྟེ། སྐད་ཅིག་སྐད་ཅིག་ཏུ་འཕོ་ཞིང་དཔེར་ན་གློག་གི་འོད་དམ། གཟར་པོའི་ཆུ་འམ། སྒྱུ་མ་འམ། སྨིག་རྒྱུ་འམ། ཆུ་ལ་རི་མོ་བྲིས་པ་ལྟ་བུར་རྟོགས་པ། ལུས་འདི་ནི་འགྱུར་ཞིང་འཕོ་བ་སྟེ། དཔེར་ན་ཆུ་འགྲམ་གཡང་སའི་སྡོང་པོ་ལྟ་བུར་རྟོགས་པ་ལུས་འདི་ནི་རིང་པོར་མི་ཐོགས་པ་སྟེ། སྤྱང་ཀི་
དང་། འཕར་བ་དང་། སྲིན་བྱ་དང་། འུག་པ་དང་། བྱ་རྒོད་དང་། ཁྭ་དང་། སྐེ་ག་དང་། ཁྱི་ལྟོགས་པའི་གཟན་དུ་འགྱུར་ཏེ། འདི་ལ་མཁས་པ་ཤེས་རབ་ཅན་སུ་ཞིག་མོས་ཤིང་ཆགས་པར་བྱེད་སྙམ་དུ་རྟོགས་པ། བ་རྨིག་གི་ནང་དུ་རྒྱ་མཚོ་ཆེན་པོའི་ཆུ་བླུགས་ཀྱང་བཟོད་ཀྱི་ལུས་འདི་ནི་མི་རྟག་པ་དང་། མི་གཙང་བ་དང་། བཙོག་པ་ནི་བརྗོད་སླ་བ་མ་ཡིན་པར་རྟོགས་པ། ས་ཆེན་པོ་འདི་རྒྱ་ཤུག་ཙམ་དུ་དྲིལ་ཏམ། ཆུང་ངུ་ན་ཡུངས་ཀར་གྱི་འབྲུ་འམ། རྡུལ་ཕྲ་མོར་གསེ་བ་ནི་སླའི། ལུས་འདིའི་ཉེས་པའི་སྐྱོན་བརྗོད་པ་ནི། སླ་བ་མ་ཡིན་པར་རྟོགས་པ། དེ་བས་ན་མཆིལ་མ་དང་འདྲ་བར་ཡོངས་སུ་སྤངས་ནས་དེའི་རྒྱུ་དེའི་རྐྱེན་གྱིས་དགེ་བསྙེན་མ་རྣམས་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ལ་རྟག་ཏུ་ནན་ཏན་བྱེད་པ། ཐེག་པ་ཆེན་པོའི་མདོ་སྡེ་ཉན་ཅིང་འཛིན་པ་ལ་མོས་པ། ཐོས་ནས་ཀྱང་གཞན་ལ་རྒྱ་ཆེར་སྟོན་ནུས་པ། སྔོན་གྱི་སྨོན་ལམ་ཡོངས་སུ་འཛིན་པ། བུད་མེད་ཀྱི་ལུས་ལ་ཤིན་ཏུ་སྨོད་པ། ཤིན་ཏུ་སྐྱོན་ཆེ་བར་ཤེས་པ། སྙིང་པོ་མེད་པར་རྟོགས་པ། སེམས་རྟག་ཏུ་རྣལ་འབྱོར་དུ་སྤྱོད་པ། དེ་བཞིན་དུ་ཡང་དག་པར་རྟོག་ཅིང་མཐའ་མེད་པར་འཁོར་བའི་རྒྱུན་ཡོངས་སུ་གཅོད་པ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་མོས་པ། བདག་ཤིན་ཏུ་ངོམས་པས་གཞན་ཡང་ཤིན་ཏུ་ངོམས་པར་བྱེད་པ། ཐེག་པ་ཆེན་པོ་ལ་རབ་ཏུ་མོས་པ། ཐེག་པ་ཆེན་པོ་ལ་ཤིན་ཏུ་སྲུང་བ། བུད་མེད་ཀྱི་ལུས་སུ་སྟོན་ཀྱང་ཡང་དག་པར་བྱང་ཆུབ་སེམས་དཔའ་ཤ་སྟག་སྟེ། ཐམས་ཅད་ཀྱང་འཇིག་རྟེན་གྱི་བསམ་པ་དང་ཤིན་ཏུ་སྦྱོར་བ། མ་རྒལ་བ་སྒྲོལ་བ། མ་གྲོལ་བ་འགྲོལ་བ། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། མ་འོངས་པའི་དུས་སུ་ཆོས་ཀྱི་འཁོར་ལོ་བསྐོར་བར་འགྱུར་བ། རྒྱན་ཆེན་པོས་ཡོངས་སུ་བརྒྱན་པ། ཚུལ་ཁྲིམས་ཡོངས་སུ་བསྲུང་བ། དེ་ལྟ་བུའི་ཡོན་ཏན་ཚད་མེད་པ་དང་ལྡན་པ། སེམས་ཅན་ཐམས་ཅད་ལ་སྙིང་རྗེའི་སེམས་བསྐྱེད་ཅིང་བུ་གཅིག་དང་འདྲ་བར་གཉིས་སུ་མེད་པར་མཉམ་པ་ཤ་སྟག་གོ །དེ་དག་ཀྱང་སྔ་དྲོའི་དུས་ཉི་མ་ཐོག་མ་ཤར་བ་ན་འོད་ཀྱིས་རེག་ནས་གཅིག་ལ་གཅིག་འདི་སྐད་དུ་དེང་ནི་ཤིང་སཱ་ལ་དྲུང་གཉིས་ཀྱི་དྲུང་དུ་འདེང་ངོ་ཞེས་སྨྲས་སོ། །དགེ་བསྙེན་མ་རྣམས་ཀྱིས་མཆོད་པའི་ཡོ་བྱད་བཤམས་པ་སྔ་མ་
བས་ཕྱེད་ཀྱིས་བཟང་བར་སྦྱར་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་འདུན་དུ་བཅས་པ་ལ་མཆོད་པའི་ཡོ་བྱད་བཤམས་པ་འདི་དེ་བཞིན་གཤེགས་པས་ཐུགས་བརྩེ་བའི་སླད་དུ་བཞེས་ཤིག་ཅེས་གསོལ་ཏོ། །དེ་ལ་བཅོམ་ལྡན་འདས་ཅང་མི་གསུང་བས་བཞེས་སུ་མ་གནང་ངོ་། །དགེ་བསྙེན་མ་རྣམས་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་བཞིའི་བྱེ་མ་སྙེད་ཀྱི་ལིཙྪ་བཱིའི་བུ་གྲོང་ཁྱེར་ཡངས་པ་ཅན་ན་གནས་པའི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། ཆུང་མ་དང་། འཁོར་རྣམས་དང་། གཞན་ཡང་འཛམ་བུའི་གླིང་གི་རྒྱལ་རིགས་སུ་གཏོགས་པ་རྒྱལ་པོའི་འཁོར་དང་བཅས་ཏེ། ཐམས་ཅད་ཀྱང་ཆོས་འདོད་པའི་ཕྱིར་ཚུལ་ཁྲིམས་ཡོངས་སུ་བསྲུང་བ། སྤྱོད་ལམ་དང་ལྡན་པ། སློབ་པ་གཞན་ལ་ཞུགས་ཤིང་དམ་པའི་ཆོས་ལ་སུན་འབྱིན་པ་ཤིན་ཏུ་ཚར་གཅོད་པ་ཤ་སྟག་གཅིག་ལ་གཅིག་འདི་སྐད་ཅེས་དམ་འཆའོ། །བདག་ཅག་གསེར་དང་། དངུལ་དང་། རིན་པོ་ཆེའི་གཏེར་མཛོད་ལྟ་བུར་ཡང་དག་པའི་ཆོས་ཤིན་ཏུ་ཟབ་མོ་བདུད་རྩི་ལྟ་བུར་ཟད་མི་ཤེས་པ་ཡུན་དུ་འཇིག་རྟེན་ན་གནས་པར་བྱས་ཏེ། བདག་ཅག་ཀྱང་དེ་དག་ལ་རྟག་ཏུ་ནན་ཏན་དུ་སྤྱོད་པར་གྱུར་ཅིག །གལ་ཏེ་ཞལ་ནས་གསུངས་པའི་དམ་པའི་ཆོས་ལ་དབང་ཟ་ཞིང་། སྐུར་པ་ཞིག་ཡོད་ན་བདག་ཅག་གིས་དེའི་ལྕེ་གཅད་དོ་ཞེས་དམ་བཅས་ཤིང་། གཞན་ཡང་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་བ་དག །ཚུལ་ཁྲིམས་ལས་ཉམས་པར་གྱུར་ན་བདག་ཅག་གིས་ཁྱིམ་པར་ཕབ་སྟེ་ལས་བྱེད་དུ་གཞུག་གོ་ཞེས་པ་དང་། གལ་ཏེ་དམ་པའི་ཆོས་ལ་ནན་ཏན་དུ་བྱེད་ན་བདག་ཅག་གིས་ཕ་མ་དང་འདྲ་བར་རིམ་གྲོ་དང་བཀུར་སྟི་བྱའོ་ཞེས་པ་དང་། གལ་ཏེ་དགེ་འདུན་ལས་དམ་པའི་ཆོས་ལ་ནན་ཏན་དུ་སྤྱོད་པ་ཞིག་ཡོད་ན་བདག་ཅག་གིས་རྗེས་སུ་ཡི་རང་ཞིང་དེ་ལ་མཐུ་ཡང་སྦྱིན་པར་བྱའོ་ཞེས་དམ་
བཅས་པ། རྟག་ཏུ་ཐེག་པ་ཆེན་པོའི་མདོ་སྡེ་ཐོས་པར་མོས་ཤིང་། ཐོས་ནས་ཀྱང་གཞན་ལ་རྒྱས་པར་སྟོན་པ་དེ་ལྟ་བུའི་ཡོན་ཏན་དང་ལྡན་པ་ཤ་སྟག་ལ་འདི་ལྟ་སྟེ། ལིཙྪ་བཱིའི་བུ་རྣམ་དག་དྲི་མ་མེད་པའི་སྙིང་པོ་དང་། ལིཙྪ་བཱིའི་བུ་བག་ཡོད་རྣམ་པར་དག་པ་དང་། ལིཙྪ་བཱིའི་བུ་རྟག་ཏུ་དྲི་མེད་རྣམ་དག་ཡོན་ཏན་ལ་སོགས་ཏེ། དེ་དག་གཅིག་ལ་གཅིག་འདི་སྐད་དུ་ཀྱེ་གྲོགས་པོ་དག་མྱུར་བར་དེ་བཞིན་གཤེགས་པ་གང་ན་བ་དེར་སོང་སྟེ། མཆོད་པ་ཕུན་སུམ་ཚོགས་པ་རྣམ་པ་སྣ་ཚོགས་ཀྱིས་མཆོད་དུ་འདེང་ངོ་། །དེ་ནས་ལིཙྪ་བཱི་དེ་དག་རེ་རེས་ཀྱང་བལ་གླང་བརྒྱད་ཁྲི་བཞི་སྟོང་དང་། རིན་པོ་ཆེའི་ཤིང་རྟ་རྟ་བཞི་དང་བཅས་པ་བརྒྱད་ཁྲི་བཞི་སྟོང་དང་། ཡིད་བཞིན་གྱི་ནོར་བུ་རིན་པོ་ཆེ་བརྒྱད་ཁྲི་བཞི་སྟོང་དང་། གཞན་ཡང་ཤིང་ཙན་དན་དང་། ཨ་ག་རུ་སྦམས་པ་བརྒྱད་ཁྲི་བཞི་སྟོང་སྙེད་བཤམས་ཏེ། བལ་གླང་དེ་རེ་རེའི་མདུན་ན་རིན་པོ་ཆེའི་རྒྱལ་མཚན་དང་། བ་དན་དང་། གདུགས་ཀྱང་བཤམས་སོ། །གདུགས་ནང་གི་ཆུང་ངུ་ཡང་ཁོ་ར་ཁོར་ཡུག་ཏུ་དཔག་ཚད་གཅིག་ཁེབས་སོ། །བ་དན་ནང་གི་ཐུང་ངུ་ཡང་རིང་ཁྱད་དཔག་ཚད་སུམ་ཅུ་རྩ་གཉིས་སོ། །རིན་པོ་ཆེའི་རྒྱལ་མཚན་ནང་གི་ཆུང་བ་ཡང་མཐོ་ཁྱད་དཔག་ཚད་བརྒྱ་པ་སྟེ། དེ་ལྟ་བུའི་མཆོད་པའི་ཡོ་བྱད་བཤམས་ནས་སངས་རྒྱས་གང་ན་བ་དེར་ལྷགས་ཏེ་ཕྱིན་པ་དང་། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པའི་ཡོ་བྱད་འདི་དག་འབུལ་ན་དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེ་ལ་དེ་བཞིན་གཤེགས་པ་ཅང་མི་གསུང་ནས་བཞེས་སུ་མ་གནང་ངོ་། །ལིཙྪ་བཱིའི་བུ་རྣམས་བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ནོན་ཏེ། བཅོམ་ལྡན་འདས་ཀྱི་བྱིན་གྱི་རླབས་ཀྱིས་ས་ལས་ཤིང་ཏ་ལ་བདུན་སྲིད་དུ་འཕགས་ནས་སྟེང་གི་ནམ་མཁའ་ལ་ཅང་མི་སྨྲ་བར་འཁོད་དོ། ། དེའི་ཚེ་གཞན་ཡང་ཀླུང་གང་གཱ་ལྔའི་བྱེ་མ་སྙེད་ཀྱི་བློན་པོ་ཆེན་པོ་དང་།
ཁྱིམ་བདག་དང་། ཚོང་དཔོན་ཐེག་པ་ཆེན་པོ་ལ་ཤིན་ཏུ་མོས་པས་སློབ་པ་གཞན་ལ་ཞུགས་པ་གང་ཞིག་ཡང་དག་པའི་ཆོས་ལ་སྨོད་པ་ཞིག་ཡོད་ན། དེ་དག་གི་མཐུས་ཐུལ་བ་ནི་ཇི་ལྟར་རྩྭ་དང་ཤིང་ལ་སེར་བ་བབ་པ་ལྟ་བུ་ཤ་སྟག་ལ་འདི་ལྟ་སྟེ། ཚོང་དཔོན་ཉི་མའི་འོད་དང་། ཚོང་དཔོན་འཇིག་རྟེན་སྐྱོང་དང་། ཚོང་དཔོན་ཆོས་སྐྱོང་ལ་སོགས་པས་ཐོག་མར་དྲངས་ཏེ། དེ་དག་གིས་སོ་སོ་ནས་མཆོད་པའི་ཡོ་བྱད་བཤམས་པ་ནི་སྔ་མ་བས་ལྔ་འགྱུར་ཙམ་བཤམས་ཏེ། ཤིང་སཱ་ལ་དྲུང་གཉིས་ཀྱི་བར་གང་ན་བར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པའི་ཡོ་བྱད་འདི་དག་འབུལ་ན་བཞེས་ཤིག་ཅེས་གསོལ་ཏོ། །དེ་ལ་དེ་བཞིན་གཤེགས་པ་ཅང་མི་གསུང་ནས་བཞེས་སུ་མ་གནང་ངོ་། །ཚོང་དཔོན་དེ་དག་བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ཡིད་གདུངས་པར་གྱུར་ཏེ། བཅོམ་ལྡན་འདས་ཀྱི་བྱིན་གྱི་རླབས་ཀྱིས་ས་ལས་ཤིང་ཏ་ལ་བདུན་སྲིད་དུ་འཕགས་ནས་སྟེང་གི་ནམ་མཁའ་ལ་ཅང་མི་སྨྲ་བར་འཁོད་དོ། །དེའི་ཚེ་གཞན་ཡང་ཡུལ་ཡངས་པ་ཅན་གྱི་རྒྱལ་པོ་བཙུན་མོ་དང་སླས་སུ་བཅས་པ། གཞན་ཡང་འཛམ་བུ་གླིང་ན་རྒྱལ་པོ་མ་སྐྱེས་དགྲ་མ་གཏོགས་པར་རྒྱལ་ཕྲན་དེ་མ་ཡིན་པ་ཐམས་ཅད་དང་། གྲོང་ཁྱེར་དང་། ལྗོངས་དང་། གྲོང་འདབ་ཐམས་ཅད་ཀྱི་མི་ཐམས་ཅད་དང་བཅས་པ་ལ་འདི་ལྟ་སྟེ། རྒྱལ་པོ་ཟླ་འོད་དྲི་མེད་རྒྱལ་པོ་ལ་སོགས་པས་ཐོག་མར་དྲངས་ནས་སོ་སོ་ནས་དམག་རྣམ་བཞི་དང་བཅས་ཏེ། སངས་རྒྱས་གང་ན་བར་ལྷགས་སོ། །རྒྱལ་པོ་དེ་དག་རེ་རེ་ཡང་འཁོར་ཁྲི་ཕྲག་བརྒྱད་ཅུ་དང་བཅས་སོ། །དམག་གི་ཚོགས་ཀྱང་བལ་གླང་དང་རྟ་པ་སྟེ། བལ་གླང་དེ་དག་ཀྱང་མཆེ་བ་དྲུག་དང་ལྡན་ལ། རྟ་རྣམས་ཀྱང་མགྱོགས་ཁྱད་རླུང་བཞིན་ཏེ། མཆོད་པའི་ཡོ་བྱད་བཤམས་པ་ཡང་སྔ་མ་བས་དྲུག་འགྱུར་གྱིས་ལྷག་གོ །རིན་པོ་ཆེའི་གདུགས་ནང་གི་ཆུང་ངུ་ཡང་ཆུ་ཞེང་ཁོ་ར་ཁོར་ཡུག་ཏུ་དཔག་
ཚད་བརྒྱད་ཁེབས་སོ། །བ་དན་ནང་གི་ཐུང་ངུ་ཡང་རིང་ཁྱད་དཔག་ཚད་བཅུ་དྲུག་སྙེད་དོ། །རིན་པོ་ཆེའི་རྒྱལ་མཚན་ནང་གི་ཆུང་ངུ་ཡང་མཐོ་ཁྱད་དཔག་ཚད་སུམ་ཅུ་རྩ་དྲུག་གོ །རྒྱལ་པོ་དེ་དག་ཐམས་ཅད་ཀྱང་ཡང་དག་པའི་ཆོས་ལ་གནས་པས་ལོག་པའི་ཆོས་ཀུན་ལ་ཤིན་ཏུ་སྨོད་པ། ཐེག་པ་ཆེན་པོ་ལ་བཀུར་སྟི་བྱེད་པ། ཐེག་པ་ཆེན་པོ་ལ་ཤིན་ཏུ་མོས་པ། སེམས་ཅན་ཐམས་ཅད་ལ་བུ་གཅིག་དང་འདྲ་བར་བྱམས་པ། ཞལ་ཟས་བཤམས་པའི་དྲི་ཡང་དཔག་ཚད་བཞིའི་བར་དུ་བྲོ་བ་བཤམས་ནས་སྔ་དྲོའི་དུས་ཀྱི་ཚེ་མཆོད་པའི་ཡོ་བྱད་རྣམ་པ་སྣ་ཚོགས་ཐོགས་ཏེ། ཤིང་སཱ་ལ་དྲུང་གཉིས་ཀྱི་བར་དེ་བཞིན་གཤེགས་པ་གང་ན་བཞུགས་པ་དེར་སོང་ནས་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པ་འདི་དག་འབུལ་ན་དེ་བཞིན་གཤེགས་པས་ཐུགས་བརྩེ་བའི་སླད་དུ་བདག་གི་མཆོད་པ་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་བཞེས་སུ་མ་གནང་ངོ་། །རྒྱལ་པོ་དེ་དག་ཀྱང་བསམས་པ་བཞིན་དུ་མ་གྱུར་པས་ཤིན་ཏུ་མྱ་ངན་གྱིས་ཡིད་གདུངས་པར་གྱུར་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་བདུན་གྱི་བྱེ་མ་སྙེད་ཀྱི་རྒྱལ་པོའི་བཙུན་མོ་རྣམས་ཚོགས་ཏེ། དེ་ལ་གཅིག་མ་གཏོགས་པ་ནི་མ་སྐྱེས་དགྲའི་བཙུན་མོ་འབའ་ཞིག་གོ །སེམས་ཅན་གདུལ་བའི་ཕྱིར་བུད་མེད་ཀྱི་ལུས་སུ་སྟོན་ཏེ། རྟག་ཏུ་ལུས་ཀྱིས་ནན་ཏན་དུ་སྤྱོད་ཅིང་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའི་ཆོས་ལ་སེམས་འདྲིས་ཤིང་གོམས་པར་བྱེད་པ་དེ་ལ་སོགས་ཏེ། བཙུན་མོ་ཁམས་གསུམ་བཟང་མོ་དང་། བཙུན་མོ་འདོད་པའི་ཡོན་ཏན་ལ་སོགས་པས་ཐོག་མར་དྲངས་སོ། །ཐམས་ཅད་ཀྱང་དམ་པའི་ཆོས་ལ་གནས་ཤིང་ཚུལ་ཁྲིམས་ཡོངས་སུ་སྲུང་བ། སྤྱོད་ལམ་དང་ལྡན་པ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་བྱམས་པ་ཤ་སྟག་གོ །དེ་དག་ཀྱང་གཅིག་ལ་གཅིག་འདི་སྐད་དུ་བདག་ཅག་ཀྱང་མྱུར་བར་སངས་རྒྱས་གང་ན་བཞུགས་པར་འདེང་ངོ་ཞེས་སྨྲས་སོ། །
རྒྱལ་པོའི་བཙུན་མོ་རྣམས་ཀྱིས་མཆོད་པའི་ཡོ་བྱད་བཤམས་པ་ནི་སྔ་མ་བས་བདུན་འགྱུར་གྱིས་ལྷག་སྟེ། མེ་ཏོག་དང་། སྤོས་དང་། རིན་པོ་ཆེའི་རྒྱལ་མཚན་དང་། དར་གྱི་བ་དན་དང་། གདུགས་དང་། ཞལ་ཟས་མཆོག་རྣམས་སོ། །རིན་པོ་ཆེའི་གདུགས་ནང་གི་ཆུང་ངུ་ཡང་ཆུ་ཞེང་ཁོ་ར་ཁོར་ཡུག་ཏུ་དཔག་ཚད་བཅུ་དྲུག་ཁེབས་སོ། །བ་དན་ནང་གི་ཐུང་ངུའི་ཚད་ཀྱང་དཔག་ཚད་སུམ་ཅུ་རྩ་དྲུག་སྙེད་དོ། །རིན་པོ་ཆེའི་རྒྱལ་མཚན་ནང་གི་དམའ་བའི་ཚད་ཀྱང་དཔག་ཚད་དྲུག་ཅུ་རྩ་བརྒྱད་སྙེད་དོ། །ཞལ་ཟས་ཀྱི་དྲི་བསུང་གིས་ཀྱང་དཔག་ཚད་བརྒྱད་ཀྱི་བར་དུ་བྲོ་བ་མཆོད་པའི་ཡོ་བྱད་དེ་ལྟ་བུ་དག་བཤམས་ནས་དེ་བཞིན་གཤེགས་པ་ག་ལ་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་མ་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་སངས་རྒྱས་དང་། དགེ་སློང་གི་དགེ་འདུན་རྣམས་ལ་མཆོད་པའི་ཡོ་བྱད་བཤམས་ཏེ་འབུལ་བ་འདི་དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ངོ་། །དེའི་ཚེ་རྒྱལ་པོའི་བཙུན་མོ་རྣམས་བསམས་པ་བཞིན་དུ་མ་གྱུར་ནས་ཤིན་ཏུ་མྱ་ངན་གྱིས་ཡིད་གདུངས་ཏེ། སྐྲ་འབལ་ཞིང་བྲང་ལ་ཐལ་མོས་རྡེབས་ཏེ་ཆོ་ངེས་རྡུང་བ་ནི་ཇི་ལྟར་བུའི་ནང་ན་སྡུག་པ་ཤི་བ་དང་འདྲ་བར་གྱུར་ནས་ཕྱོགས་གཅིག་ཏུ་ཅང་མི་སྨྲ་བར་འཁོད་དོ། །དེའི་ཚེ་ཀླུང་གང་གཱ་བརྒྱད་ཀྱི་བྱེ་མ་སྙེད་ཀྱི་ལྷའི་བུ་མོ་རྣམས་ལ་འདི་ལྟ་སྟེ། ལྷའི་བུ་མོ་ཡངས་པའི་མིག་ཅེས་བྱ་བས་ཐོག་མར་དྲངས་ནས་འདི་སྐད་ཅེས་སྨྲས་སོ། །ཀྱེ་གྲོགས་མོ་དག་མཐོང་ངམ། ལྟོས་ཤིག །འཁོར་གྱི་དཀྱིལ་འཁོར་མང་པོས་མཆོད་པའི་ཡོ་བྱད་རྣམ་པ་སྣ་ཚོགས་བཤམས་ནས་དེ་བཞིན་གཤེགས་པ་དང་དགེ་སློང་གི་དགེ་འདུན་ལ་འབུལ་བ་མཐོང་ངམ། བདག་ཅག་ཀྱང་མཆོད་པའི་ཡོ་བྱད་བཤམས་ཏེ། དེ་བཞིན་གཤེགས་པ་ལ་མཆོད་ནས་དེ་བཞིན་གཤེགས་པས་བཞེས་པའི་འོག་ཏུ་མྱ་ངན་ལས་མི་
འདའ་བར་བཞུགས་སུ་གསོལ་བར་བྱའོ། །ཀྱེ་གྲོགས་མོ་དག་སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པའང་ཤིན་ཏུ་དཀའ། མཆོད་པ་ནང་གི་ཐ་མ་བཤམས་ཏེ་འབུལ་བ་ཡང་ཤིན་ཏུ་དཀའོ། །གལ་ཏེ་བཅོམ་ལྡན་འདས་མྱ་ངན་ལས་འདས་ན་འཇིག་རྟེན་སྟོངས་པར་འགྱུར་རོ་ཞེས་སྨྲས་སོ། །ལྷའི་བུ་མོ་དེ་རྣམས་ཀྱང་ཐེག་པ་ཆེན་པོ་འདོད་པ། ཐེག་པ་ཆེན་པོ་ཐོས་པར་མོས་པ། ཐོས་ནས་ཀྱང་གཞན་ལ་རྒྱ་ཆེར་སྟོན་ནུས་པ། ཐེག་པ་ཆེན་པོ་ལ་སྐོམ་པས་གདུངས་པ་ལྟར་གྱུར་ཅིང་། བདག་ཤིན་ཏུ་ངོམས་པ་ལྟར་སྐོམ་པས་གདུངས་པ་གཞན་དག་ཀྱང་ངོམས་པར་བྱེད་པ། ཐེག་པ་ཆེན་པོ་ལ་སྐྱོབ་པ། སློབ་པ་གཞན་ལ་ཞུགས་པ་དག་ཐེག་པ་ཆེན་པོ་ལ་སུན་འབྱིན་ཅིང་ཕྲག་དོག་བྱེད་པ་ཡོད་ན་ཇི་ལྟར་རྩྭ་ལ་སེར་བ་བབ་པ་བཞིན་དུ་ཤིན་ཏུ་ཐུལ་བ། ཚུལ་ཁྲིམས་ཡོངས་སུ་སྲུང་བ། སྤྱོད་ལམ་དང་ལྡན་པ། འཇིག་རྟེན་ཐམས་ཅད་ཀྱི་ཡིད་དང་སྦྱོར་བ་ལ་ཤིན་ཏུ་མཁས་པ། མ་དུལ་བ་རྣམས་འདུལ་བ། མ་གྲོལ་བ་རྣམས་འགྲོལ་བར་བྱེད་པ། ཕྱི་མ་མ་འོངས་པའི་དུས་སུ་ཆོས་ཀྱི་འཁོར་ལོ་སྐོར་ཞིང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་འཚོབ་པ། ཐེག་པ་ཆེན་པོ་ལ་ནན་ཏན་བྱེད་ཅིང་། རྒྱན་ཆེན་པོས་ཤིན་ཏུ་བརྒྱན་པ། དེ་ལྟ་བུའི་ཡོན་ཏན་ཚད་མེད་པ་དང་ལྡན་པ། སེམས་ཅན་ཐམས་ཅད་ལ་ཡང་བུ་གཅིག་དང་འདྲ་བར་བྱམས་པ་ཤ་སྟག་སྟེ། དེ་དག་ཀྱང་སྔ་དྲོའི་དུས་ཉི་མ་ཐོག་མ་ཤར་བ་ན་སོ་སོ་ནས་རྣམ་པ་སྣ་ཚོགས་ཀྱི་ལྷའི་ཤིང་བསུང་ཅན་བཤམས་པ་ནི་མིའི་ཤིང་བསུང་ཅན་ལས་ཁྱད་པར་དུ་གྱུར་པ་ཤིང་གི་བསུང་དེས་མིའི་འཇིག་རྟེན་ན་མནམ་ཞིང་དྲི་མི་ཞིམ་པ་ཐམས་ཅད་ཞི་བར་བྱེད་པ། ཤིང་རྟ་དཀར་པོ་ལ་གདུགས་དཀར་པོ་བྲེས་ཏེ་རྟ་དཀར་པོ་བཞིས་དྲངས་པ། ཤིང་རྟ་དེ་རེ་རེའི་སྟེང་ཡང་གུར་དཀར་པོ་ཕུབ་པ་ལ་གུར་གྱི་མཐའ་མ་ཡང་གསེར་གྱི་དྲིལ་བུ་སྤྱངས་པ། རྣམ་པ་སྣ་ཚོགས་ཀྱི་སྤོས་དང་། མེ་ཏོག་དང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་། ཞལ་ཟས་མཆོག་དམ་པ་དང་། རོལ་མོའི་རྣམ་པ་སྣ་ཚོགས་བཤམས་ཏེ། སེང་གེའི་གདན་བཏིང་ངོ་། །སེང་གེའི་གདན་གྱི་རྐང་པ་བཞི་ཡང་བཻ་དཱུརྱ་
མཐོན་མཐིང་ལས་བྱས་པ། དེའི་རྒྱབ་ནི་རིན་པོ་ཆེ་སྣ་བདུན་གྱི་སྣམ་རྟེན་དང་བཅས་པ། མདུན་ཡང་གསེར་ལས་བྱས་པའི་སྔས་རེ་རེ་ཡོད་པ། རིན་པོ་ཆེ་སྣ་བདུན་གྱི་སྒྲོན་མའི་སྡོང་པོ་ལ་ནོར་བུ་རིན་པོ་ཆེ་རྣམ་པ་སྣ་ཚོགས་ཀྱི་སྒྲོན་མ་སྣང་བ། ས་གཞི་ཐམས་ཅད་ལྷའི་མེ་ཏོག་གིས་ཆལ་པར་བཀོད་པ་དེ་ལྟ་བུ་དག་ལྷའི་བུ་མོ་དེ་དག་གིས་བཤམས་ནས་ཡིད་གདུང་ཞིང་མཆི་མ་ཟག་སྟེ་སྡུག་བསྔལ་ཆེན་པོ་སྐྱེས་ཀྱང་སེམས་ཅན་ཐམས་ཅད་ལ་ཕན་པ་དང་། བདེ་བའི་ཕྱིར་ཐེག་པ་ཆེན་པོ་དོན་དམ་པ་སྟོང་པ་ཉིད་དང་ལྡན་པར་བྱ་བ་དང་། དེ་བཞིན་གཤེགས་པས་དགོངས་ཏེ་གསུངས་པ་མངོན་དུ་བསྟན་པ་དང་། ཆོས་རྣམ་པ་སྣ་ཚོགས་སྨྲ་བ་རྒྱུན་མི་གཅད་པའི་ཕྱིར་བཅོམ་ལྡན་འདས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་བཤམས་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །བཅོམ་ལྡན་འདས་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ངོ་། །ལྷའི་བུ་མོ་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་དགུའི་བྱེ་མ་སྙེད་ཀྱི་ཀླུའི་རྒྱལ་པོ་ཕྱོགས་བཞི་ནས་ལྷགས་པ་ལ་འདི་ལྟ་སྟེ། ཀླུའི་རྒྱལ་པོ་འཇོག་པོ་དང་། ཀླུའི་རྒྱལ་པོ་དགའ་བོ་དང་། ཀླུའི་རྒྱལ་པོ་ཉེ་དགའ་བོ་ལ་སོགས་པས་ཐོག་མར་དྲངས་ནས། ཀླུའི་རྒྱལ་པོ་རྣམས་ཀྱང་སྔ་དྲོའི་དུས་ཉི་མ་ཐོག་མ་ཤར་བ་ན་ལྷ་དང་མི་ལས་ལྷག་པའི་མཆོད་པའི་ཡོ་བྱད་བཤམས་ནས། བཅོམ་ལྡན་འདས་གང་ན་བར་ལྷགས་ཏེ་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་བརྒྱ་སྟོང་དུ་བསྐོར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ངོ་། །དེ་ནས་ཀླུའི་རྒྱལ་པོ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་
ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་བཅུའི་བྱེ་མ་སྙེད་ཀྱི་གནོད་སྦྱིན་གྱི་རྒྱལ་པོ་ངལ་བསོ་པོ་ལ་སོགས་པས་ཐོག་མར་དྲངས་ནས་གཅིག་ལ་གཅིག་འདི་སྐད་དུ་ཀྱེ་སྐྱེས་བུ་དག་མྱུར་བར་སངས་རྒྱས་གང་ན་བ་དེར་འདེང་ངོ་ཞེས་སྨྲས་ནས། མཆོད་པའི་ཡོ་བྱད་ཀླུ་བས་ལྷག་པར་བཤམས་ཏེ། བཅོམ་ལྡན་འདས་གང་ན་བར་ལྷགས་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་བརྒྱ་སྟོང་དུ་མ་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་བཤམས་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་ལ་བཅོམ་ལྡན་འདས་ཅང་མི་གསུང་བས་བཞེས་སུ་མ་གནང་ངོ་། །གནོད་སྦྱིན་གྱི་རྒྱལ་པོ་རྣམས་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་ནམ་མཁའ་ལྡིང་གི་རྒྱལ་པོ་ཕས་རྒོལ་བ་བཅོམ་པ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་སུམ་ཅུའི་བྱེ་མ་སྙེད་ཀྱི་དྲི་ཟའི་རྒྱལ་པོ་མཐུ་བོ་ཆེས་ཐོག་མར་དྲངས་སོ། །གཞན་ཡང་ཀླུང་གང་གཱ་བཞི་བཅུའི་བྱེ་མ་སྙེད་ཀྱི་མི་འམ་ཅིའི་རྒྱལ་པོ་ཤིན་ཏུ་མཐོང་བ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་ལྔ་བཅུའི་བྱེ་མ་སྙེད་ཀྱི་ལྟོ་འཕྱེ་ཆེན་པོའི་རྒྱལ་པོ་ཤིན་ཏུ་མཐོང་བ་ཆེན་པོ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་དྲུག་ཅུའི་བྱེ་མ་སྙེད་ཀྱི་ལྷ་མ་ཡིན་གྱི་རྒྱལ་པོ་ཁ་བ་བི་ལིས་ཐོག་མར་དྲངས་སོ། །གཞན་ཡང་ཀླུང་གང་གཱ་བདུན་ཅུའི་བྱེ་མ་སྙེད་ཀྱི་ཏ་ན་པའི་རྒྱལ་པོ་དྲི་མེད་འབབ་ཆུ་དང་། བ་ཏི་ད་ཏ་ལ་སོགས་པས་ཐོག་མར་དྲངས་སོ། །གཞན་ཡང་ཀླུང་གང་གཱ་བརྒྱད་ཅུའི་བྱེ་མ་སྙེད་ཀྱི་སྲིན་པོའི་རྒྱལ་པོ་འཇིགས་སུ་རུང་བ་ཞེས་བྱ་བས་ཐོག་མར་དྲངས་སོ། །དེ་དག་ཀྱང་སྡིག་པ་མི་དགེ་བའི་སེམས་ཡོངས་སུ་སྤངས་ནས། མི་ལ་མི་ཟ་བ་དང་། དགྲ་དང་ཁོན་དུ་གྱུར་པ་ལ་བྱམས་ཤིང་སྙིང་རྗེའི་སེམས་སྐྱེ་བ་དང་། གཟུགས་མི་སྡུག་པ་ཡང་སངས་རྒྱས་ཀྱི་བྱིན་གྱི་རླབས་ཀྱིས་ཐམས་ཅད་བཟང་ཞིང་སྡུག་པར་གྱུར་ཏོ། །གཞན་ཡང་ཀླུང་གང་གཱ་དགུ་
བཅུའི་བྱེ་མ་སྙེད་ཀྱི་ནགས་ཚལ་ལ་དབང་བའི་ལྷ་དྲི་བསུང་ལ་དགའ་བ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་སྟོང་གི་བྱེ་མ་སྙེད་ཀྱི་རིག་འཛིན་གྱི་རྒྱལ་པོ་རྫུ་འཕྲུལ་ཆེན་པོ་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་གྱི་བྱེ་མ་སྙེད་ཀྱི་མདངས་ཟ་བའི་རྒྱལ་པོ་ཤིན་ཏུ་མཐོང་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་ཁྲི་ཕྲག་བརྒྱའི་བྱེ་མ་སྙེད་ཀྱི་ལྷའི་བུ་མོ་འདོད་ཆགས་ཅན་ལམ་པ་དང་། ཨུར་བ་ཤི་དང་། ཏི་ལོཏྟ་མ་དང་། ཕྱིར་ཤ་ཙི་ལ་སོགས་པས་ཐོག་མར་དྲངས་སོ། །གཞན་ཡང་ཀླུང་གང་གཱ་ཁྲི་ཕྲག་སྟོང་གི་བྱེ་མ་སྙེད་ཀྱི་ས་ལ་གནས་པའི་ཡི་དགས་ཀྱི་རྒྱལ་པོ་གཞོག་དཀར་ཞེས་བྱ་བས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་ལྷའི་སྲས་པོ་རྣམས་དང་། ལྷའི་རྒྱལ་པོ་ལ་ཕྱོགས་བཞིའི་མགོན་པོས་ཐོག་མར་དྲངས་སོ། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་ཀླུང་གི་ལྷས་ནི་ཕྱོགས་བཞི་ནས་ས་ལས་སྐྱེས་པའི་མེ་ཏོག་དུས་དང་དུས་མ་ཡིན་པ་རྣམས་སཱ་ལའི་ཤིང་དྲུང་དུ་ཆལ་པར་བཀང་ངོ་། །གཞན་ཡང་ཀླུང་གང་གཱ་འབུམ་ཕྲག་བཅུའི་བྱེ་མ་སྙེད་ཀྱི་རླུང་དང་ཆར་ལ་དབང་བའི་ལྷ་རྣམས་ནི་འདི་སྙམ་དུ་བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་ནས་ཞུགས་ལ་བཞེན་པ་ན་ཆར་རབ་ཏུ་ཕབ་སྟེ་དུས་སུ་མེ་ཞི་བར་བྱ་བ་དང་། འཁོར་གྱི་དཀྱིལ་འཁོར་ལས་ཚ་བས་གདུངས་པ་རྣམས་ཀྱང་ཤིན་ཏུ་བསིལ་བར་བྱའོ་སྙམ་དུ་སེམས་སོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་སྤོས་ཀྱི་བལ་གླང་ཆེན་པོ་བལ་གླང་གི་རྒྱལ་པོ་ལ་ཧུ་དང་། བལ་གླང་གི་རྒྱལ་པོ་གསེར་ཅན་དང་། བལ་གླང་གི་རྒྱལ་པོ་མངར་བའི་རོ་དང་། བལ་གླང་གི་རྒྱལ་པོ་མཐོན་མཐིང་མིག་དང་། བལ་གླང་གི་རྒྱལ་པོ་བསུང་ཅན་ལ་སོགས་པས་ཐོག་མར་དྲངས་ཏེ། དེ་དག་ཐམས་ཅད་ཀྱང་ཐེག་པ་ཆེན་པོ་ལ་བསྟི་སྟང་བྱེད་པ། ཐེག་པ་ཆེན་པོ་ལ་མོས་པ་ཤ་སྟག་སྟེ། དེ་དག་གིས་ཀྱང་སངས་རྒྱས་བཅོམ་ལྡན་འདས་རིང་པོར་མི་ཐོགས་པར་མྱ་ངན་ལས་འདའ་བར་ཤེས་པས་སོ་སོ་ནས་པད་མོ་བཟང་པོ་ཚད་མེད་དཔག་ཏུ་མེད་པ་ཕྱུང་སྟེ་སངས་རྒྱས་
བཅོམ་ལྡན་འདས་གང་ན་བར་ལྷགས་ནས་གདོང་གིས་ཕྱག་འཚལ་ཏེ། ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་རི་དགས་ཀྱི་རྒྱལ་པོ་སེང་གེ་སེང་གེ་སྒྲ་ཞེས་བྱ་བས་ཐོག་མར་དྲངས་ཏེ་སེམས་ཅན་ཐམས་ཅད་ལ་མི་འཇིགས་པ་བྱིན་ནས་སོ་སོ་ནས་མེ་ཏོག་དང་འབྲས་བུ་ཐོགས་ཏེ། སངས་རྒྱས་གང་ན་བར་ལྷགས་ནས་སངས་རྒྱས་ཀྱི་ཞབས་ལ་ཕྱག་འཚལ་ཏེ། ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་བྱའི་རྒྱལ་པོ་ངང་པ་དང་། ངུར་པ་དང་། རྨ་བྱ་དང་། གཻན་དར་པ་དང་། ཀ་ལན་ཏ་ཀ་དང་། གུ་ཡོག་དང་། ནེ་ཙོ་དང་། ཀོ་ཤི་ལ་དང་། བ་ཧི་ཀ་དང་། ཀ་ལ་པིང་ཀ་དང་། འཚོ་བྱེད་ལ་སོགས་པ་བྱའི་རྒྱལ་པོ་རྣམས་ཀྱང་སོ་སོ་ནས་མེ་ཏོག་དང་། འབྲས་བུ་ཐོགས་ཏེ་སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་ཆུ་གླང་དང་། བ་དང་ལུག་ལ་སོགས་པ་སངས་རྒྱས་གང་ན་བར་ལྷགས་ནས་གྲོང་ཁྱེར་རྩྭ་མཆོག་གི་འོབས་དང་། ཤང་ཤོང་ཐམས་ཅད་ཀྱང་དྲི་བསུང་དང་ལྡན་པ། ཁ་དོག་དང་རོ་བྲོ་བར་ལྡན་པའི་འོ་མས་ཀུན་ཏུ་གང་བར་བྱས་ནས་ཕྱོགས་གཅིག་ཏུ་སྡོད་དོ། །གཞན་ཡང་ཀླུང་གང་གཱ་ཉི་ཤུའི་བྱེ་མ་སྙེད་ཀྱི་གླིང་བཞི་ལ་གནས་པའི་དྲང་སྲོང་བཟོད་པ་ཅན་ཞེས་བྱ་བ་ལ་སོགས་པས་ཐོག་མར་དྲངས་ཏེ་སོ་སོ་ནས་མེ་ཏོག་དང་། སྤོས་དང་། འབྲས་བུ་མངར་བ་ལ་སོགས་པ་ཐོགས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ལན་གསུམ་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་ནས་བཞེས་སུ་མ་གནང་ནས་དྲང་སྲོང་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །འཛམ་བུའི་གླིང་གི་བུང་བའི་རྒྱལ་པོ་སྒྲ་སྙན་ཞེས་བྱ་བས་ཐོག་མར་དྲངས་ནས། བུང་བ་ཐམས་ཅད་ཀྱང་མེ་ཏོག་རྣམ་པ་སྣ་ཚོགས་ཐོགས་ཏེ་
སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། ལན་ཅིག་བསྐོར་ནས་ཕྱོགས་གཅིག་ཏུ་སྡོད་དོ། །དེའི་ཚེ་འཛམ་བུའི་གླིང་ན་གནས་པའི་དགེ་སློང་དང་། དགེ་སློང་མ་ཐམས་ཅད་འདུས་ཏེ་དེ་ལ་གཉིས་མ་གཏོགས་པ་ནི་འོད་སྲུང་ཆེན་པོ་དང་དགའ་བོའོ། །གཞན་ཡང་འཇིག་རྟེན་གྱི་ཁམས་ཚད་མེད་གྲངས་མེད་པ་ཀླུང་གང་གཱའི་བྱེ་མ་སྙེད་དང་། འཛམ་བུའི་གླིང་གི་རི་ལ་སོགས་པ་རི་རབ་རིའི་རྒྱལ་པོས་ཐོག་མར་དྲངས་ཏེ། རི་དེ་དག་ཐམས་ཅད་ཀྱང་ཤིན་ཏུ་བརྒྱན་པ་ནི་ནགས་ཚལ་རྒྱས་པ་དང་། ཤིང་རྣམས་ཀྱི་ལོ་མ་དང་། ཡལ་ག་ཡང་རན་པར་ཉི་མའི་འོད་ཆོད་པ་དང་། མེ་ཏོག་རྣམ་པ་སྣ་ཚོགས་རྒྱས་པ་དང་། ཁོ་ར་ཁོར་ཡུག་ཏུ་འབབ་ཆུ་དང་། ཆུ་མིག་ཡོངས་སུ་དག་ཅིང་བསུང་དང་ལྡན་པ་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། རིག་འཛིན་དང་། དྲང་སྲོང་ལ་སོགས་པས་རོལ་མོ་རྣམ་པ་སྣ་ཚོགས་བྱེད་པས་ཡོངས་སུ་གང་བར་གྱུར་ཏོ། །ལྷ་དང་དྲང་སྲོང་དེ་དག་ཀྱང་བཅོམ་ལྡན་འདས་གང་ན་བར་ལྷགས་ཏེ་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །གཞན་ཡང་གྲངས་མེད་པའི་ཀླུང་གང་གཱའི་བྱེ་མ་སྙེད་ཀྱི་རྒྱ་མཚོ་བཞིའི་ལྷ་དང་། འབབ་ཆུ་ཀུན་གྱི་ལྷ་གཟི་བརྗིད་ཆེན་པོ་དང་ལྡན་པ་རྫུ་འཕྲུལ་དང་ལྡན་པ་རྣམས་ཀྱང་སྔ་མ་བས་ལྷག་པར་མཆོད་པའི་ཡོ་བྱད་བཤམས་ཏེ། ལྷ་རྣམས་ཀྱི་ལུས་ཀྱི་འོད་དང་། རོལ་མོའི་ཆ་བྱད་དང་། མེ་མར་གྱིས་ཉི་ཟླའི་འོད་ཀྱང་མི་སྣང་བར་བྱས་ནས་མེ་ཏོག་ཙམ་པ་ཀས་ཀླུང་ཧ་རི་བ་ཏིའི་ལོགས་སུ་གཏོར་ཏེ། སངས་རྒྱས་གང་ན་བར་ལྷགས་ནས་སངས་རྒྱས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་གྲོང་ཁྱེར་རྩྭ་མཆོག་གི་ཤིང་སཱ་ལའི་ཚལ་ཐམས་ཅད་ཀྱང་སྐྱ་བོར་གྱུར་ཏེ། སྟེང་གི་ནམ་མཁའ་ལ་རིན་པོ་ཆེ་སྣ་བདུན་གྱི་གཞལ་མེད་ཁང་འབུར་དང་རི་མོར་ལྡན་པ་རྒྱན་གྱིས་མཛེས་པ་ཁོ་ར་ཁོར་ཡུག་ཏུ་རིན་པོ་ཆེ་སྣ་ཚོགས་ཀྱིས་སྤྲས་པ། གཞལ་མེད་ཁང་གི་དྲུང་ན་ཆུ་མིག་དང་། རྫིང་བུ་དང་།
མཚེའུ་ལས་མེ་ཏོག་པད་མོ་སྐྱེས་པ་ནི་བྱང་གི་སྒྲ་མི་སྙན་ནམ། སུམ་ཅུ་རྩ་གསུམ་གནམ་གྱི་སྐྱེད་མོས་ཚལ་ཤིན་ཏུ་དགའ་བ་ཞེས་བྱ་བ་དང་འདྲ་བ་རང་བྱུང་བར་གྱུར་ཏོ། །དེའི་ཚེ་ན་ཤིང་སཱ་ལའི་ཚལ་ཀུན་ཏུ་རྣམ་པ་སྣ་ཚོགས་ཀྱིས་བརྒྱན་ཅིང་ཤིན་ཏུ་ཡིད་དུ་འོང་བར་གྱུར་ཏོ། །དེའི་ཚེ་ལྷ་དང་མི་དང་ལྷ་མ་ཡིན་ལ་སོགས་པ་ཐམས་ཅད་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བའི་ལྟས་ཡིན་པར་རིག་ནས་ཐམས་ཅད་མྱ་ངན་གྱིས་ཡིད་གདུངས་ཏེ་མི་དགའ་བར་གྱུར་ཏོ། །དེའི་ཚེ་རྒྱལ་ཆེན་བཞིའི་རྒྱལ་པོ་དང་། བརྒྱ་བྱིན་ལྷའི་དབང་ཕྱུག་དག་གཅིག་ལ་གཅིག་འདི་སྐད་དུ་ཀྱེ་སྐྱེས་བུ་དག་འཇིག་རྟེན་དུ་བཅས་པ་ལྷ་དང་། མི་དང་། ལྷ་མ་ཡིན་ལ་སོགས་པས་མཆོད་པ་བཤམས་ཏེ་དེ་བཞིན་གཤེགས་པ་ལ་མཆོད་པ་བྱེད་པ་ལ་ལྟོས། བདག་ཅག་ཀྱང་དེ་བཞིན་དུ་མཆོད་པ་བྱའོ། །གལ་ཏེ་བདག་ཅག་གིས་ནང་གི་ཐ་མར་མཆོད་ན་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་དུ་ངེས་སོ་ཞེས་སྨྲས་སོ། །དེ་ནས་རྒྱལ་ཆེན་རིས་བཞིའི་ལྷ་རྣམས་ཀྱིས་མཆོད་པ་སྔ་མ་བས་ཤིན་ཏུ་ལྷག་པར་བཤམས་པ་ལ་འདི་ལྟ་སྟེ། མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དང་། མེ་ཏོག་ཀ་ཙི་ལི་ཀ་དང་། ཀ་ཙི་ལི་ཀ་ཆེན་པོ་དང་། མེ་ཏོག་མཉྫུ་ཥ་ཀ་དང་། མཉྫུ་ཥ་ཀ་ཆེན་པོ་དང་། མེ་ཏོག་སན་ཏ་ནི་ཀ་དང་། སན་ཏ་ནི་ཀ་ཆེན་པོ་དང་། མེ་ཏོག་ཡིད་དུ་འོང་བ་དང་། ཡིད་དུ་འོང་བ་ཆེན་པོ་དང་། མེ་ཏོག་ཀུན་ཏུ་བཟང་པོ་དང་། ཀུན་ཏུ་བཟང་པོ་ཆེན་པོ་དང་། མེ་ཏོག་དུས་ཅན་དང་། དུས་ཅན་ཆེན་པོ་དང་། མེ་ཏོག་བསུང་གི་གྲོང་ཁྱེར་དང་། བསུང་གི་གྲོང་ཁྱེར་ཆེན་པོ་དང་། མེ་ཏོག་རབ་ཏུ་དགའ་བ་དང་། རབ་ཏུ་དགའ་བ་ཆེན་པོ་དང་། མེ་ཏོག་འདོད་ལྡན་དང་། འདོད་ལྡན་ཆེན་པོ་དང་། མེ་ཏོག་བསུང་མྱོས་དང་། བསུང་མྱོས་ཆེན་པོ་དང་། མེ་ཏོག་ཀུན་ཏུ་བསུང་དང་། ཀུན་ཏུ་བསུང་ཆེན་པོ་དང་། མེ་ཏོག་ལྷའི་གསེར་འདབ་དང་། མེ་ཏོག་ཀླུ་ཞེས་བྱ་བ་དང་། ཤིང་པ་རི་ཙི་ཏྲའི་མེ་ཏོག་དང་། ཤིང་ཀོ་བི་དཱ་རའི་མེ་ཏོག་དང་། གཞན་ཡང་རྣམ་པ་སྣ་ཚོགས་ཀྱི་ཞལ་ཟས་རོ་བྲོ་བ་དང་ལྡན་པ་ཐོགས་ཏེ། སངས་རྒྱས་གང་ན་བར་
ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལྷ་རྣམས་ཀྱི་འོད་ཀྱིས་ཉི་ཟླའི་འོད་ཀྱང་ཟིལ་གྱིས་ནོན་ཏོ། །མཆོད་པའི་ཡོ་བྱད་དེ་དག་གིས་དེ་བཞིན་གཤེགས་པ་ལ་མཆོད་པ་བྱ་བར་བཤམས་ནས་དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་། །དེའི་ཚེ་ལྷ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་བརྒྱ་བྱིན་ལྷའི་དབང་ཕྱུག་དང་། སུམ་ཅུ་རྩ་གསུམ་གནམ་གྱི་ལྷ་རྣམས་ཀྱིས་སྔ་མ་བས་ཤིན་ཏུ་ལྷག་པའི་མཆོད་པའི་ཡོ་བྱད་བཤམས་ནས་མེ་ཏོག་ཐོགས་པ་ཡང་སྔ་མ་དང་འདྲ་སྟེ། དྲི་བསུང་གིས་ཤིན་ཏུ་ངད་པ་ནི་ཡིད་དུ་འོང་བ་སྟེ། གཞལ་མེད་ཁང་རྒྱལ་བར་འགྱུར་བ་ཞེས་བྱ་བ་དང་། གཞལ་མེད་ཁང་ཆུང་ངུའི་རྣམས་བཤམས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་ཐེག་པ་ཆེན་པོ་ལ་ཤིན་ཏུ་དད་ཅིང་མོས་ན་དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། ། བཅོམ་ལྡན་འདས་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་གཉིས་པ། དེ་ནས་བརྒྱ་བྱིན་དང་ལྷའི་འཁོར་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །འདོད་པའི་ཁམས་ཀྱི་གནམ་རིམ་པ་དྲུག་གི་བར་དུ་མཆོད་པའི་ཡོ་བྱད་བཤམས་པ་ནི་རིན་པོ་ཆེའི་རྒྱལ་མཚན་དང་། བ་དན་དང་། གདུགས་གཅིག་པས་ཀྱང་གཅིག་བཟང་བའོ། །རིན་པོ་ཆེའི་གདུགས་ནང་གི་ཆུང་ངུ་ཡང་གླིང་བཞི་ཁེབས་སོ། །བ་དན་ནང་གི་ཐུང་ངུ་ཡང་རྒྱ་མཚོ་བཞི་འཁོར་རོ། །རྒྱལ་མཚན་ནང་གི་དམའ་བ་ཡང་གཞན་འཕྲུལ་དབང་བྱེད་གནམ་ལ་རེག་སྟེ། རླུང་གིས་བསྐྱོད་ན་སྒྲ་སྐད་སྙན་པ་འབྱིན་པ་དང་། ཞལ་ཟས་ཕུལ་དུ་བྱུང་བ་རྣམ་པ་སྣ་ཚོགས་བཤམས་ནས་བཅོམ་ལྡན་འདས་
གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་། །དེ་ནས་ལྷ་རྣམས་ཀྱང་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེ་ལ་གཅིག་མ་གཏོགས་པ་ནི་སྲིད་པའི་རྩེ་མོ་སྟེ། ཚངས་པའི་རིས་ཀྱི་ལྷ་རྣམས་ཀྱང་འདུས་པར་གྱུར་ཏོ། །དེའི་ཚེ་ཚངས་པའི་རྒྱལ་པོ་དང་། ཚངས་པའི་རིས་ཀྱི་ལྷ་རྣམས་ཀྱི་འོད་ཀྱིས་གླིང་བཞི་ཀུན་སྣང་བར་བྱས་ནས་འདོད་པའི་ཁམས་ན་ལྷ་དང་། མི་དང་། ཉི་ཟླའི་འོད་ཀྱང་མི་སྣང་བར་བྱས་སོ། །དེ་དག་ཀྱང་སོ་སོ་ནས་རིན་པོ་ཆེའི་རྒྱལ་མཚན་དང་། བ་དན་དང་། གདུགས་ཐོགས་པ་ནི་བ་དན་ནང་གི་ཐུང་ངུ་ཡང་ཚངས་པའི་གནས་ནས་ཤིང་སཱ་ལའི་ཚལ་ལ་ཐུག་པ་ཐོགས་ནས་སངས་རྒྱས་གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་བདག་ཅག་གི་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ངོ་། །ཚངས་པའི་ལྷ་རྣམས་བསམས་པ་བཞིན་དུ་མ་གྱུར་ནས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་ལྷ་མ་ཡིན་གྱི་རྒྱལ་པོ་ཐགས་བཟངས་རིས་ཀྱང་ལྷ་མ་ཡིན་གྱི་འཁོར་དཔག་ཏུ་མེད་པ་དང་བཅས་ཏེ་ལྷགས་སོ། །དེ་རྣམས་ཀྱི་ལུས་ཀྱི་འོད་ཀྱང་ཚངས་པའི་ལྷ་བས་ཀྱང་ལྷག་པར་གྱུར་ཏེ། རིན་པོ་ཆེའི་རྒྱལ་མཚན་དང་། བ་དན་དང་། གདུགས་རྣམས་ཐོགས་ཏེ། གདུགས་ནང་གི་ཆུང་ངུ་ཡང་སྟོང་ཆུང་ངུའི་འཇིག་རྟེན་གྱི་ཁམས་ཁེབས་པ་དང་། ཕུལ་དུ་བྱུང་བའི་ཞལ་ཟས་མཆོག་རྣམས་ཐོགས་ནས་སངས་རྒྱས་གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་
ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ནས་ལྷ་མ་ཡིན་རྣམས་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། །དེའི་ཚེ་འདོད་པའི་ཁམས་ཀྱི་བདུད་ཀྱི་རྒྱལ་པོ་བདུད་སྡིག་ཏོ་ཅན་ཡང་འཁོར་ལྷའི་བུ་མོ་གྲངས་མེད་དཔག་ཏུ་མེད་པ་དང་བཅས་ཏེ། སེམས་ཅན་དམྱལ་བའི་སྒོ་ཕྱེ་ནས་ཡོངས་སུ་བསིལ་ཞིང་དག་པའི་ཆུ་ཕབ་སྟེ། དེ་དག་ལ་འདི་སྐད་ཅེས་བསྒོའོ། །ཁྱེད་ལ་སོགས་པ་གཞན་ཅི་ཡང་མི་ནུས་ཀྱིས་སེམས་རྩེ་གཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲན་པར་གྱིས་ལ་མཆོད་པ་བྱེད་པ་ལ་རྗེས་སུ་ཡི་རང་བར་གྱིས་ཤིག་དང་། ཁྱེད་ཡུན་རིང་པོར་རབ་ཏུ་བདེ་བར་འགྱུར་རོ། །དེ་ནས་བདུད་སྡིག་ཅན་སེམས་ཅན་དམྱལ་བའི་མཚོན་ཆ་དང་། སྡུག་བསྔལ་དུ་འགྱུར་བའི་མེ་རབ་ཏུ་འབར་བ་ཡང་བསིལ་བའི་ཆར་གྱིས་ཞི་བར་བྱས་ནས། སངས་རྒྱས་ཀྱི་བྱིན་གྱི་རླབས་ཀྱིས་བདུད་ཀྱི་འཁོར་རྣམས་ཀྱང་འདི་སྙམ་དུ་སེམས་བསྐྱེད་པར་གྱུར་ཏོ། །ཐམས་ཅད་ཀྱིས་རལ་གྲི་དང་། མདའ་གཞུ་དང་། གོ་ཆ་དང་། མཚོན་ཤག་ཏི་དང་། ལྕགས་ཀྱུ་དང་། ལྕགས་ཐོ་དང་། དགྲ་སྟ་དང་། འཁོར་ལོ་དང་། ཞགས་པ་ལ་སོགས་ཏེ་མཚོན་ཆ་ཐམས་ཅད་སྤངས་ནས་མཆོད་པའི་ཡོ་བྱད་ལྷ་དང་མི་ལས་ཁྱད་པར་དུ་གྱུར་པ་བཤམས་སོ། །གདུགས་ནང་གི་ཆུང་ངུ་ཡང་སྟོང་འབྲིང་པོའི་འཇིག་རྟེན་གྱི་ཁམས་ཁེབས་པ་ཐོགས་ནས་སངས་རྒྱས་གང་ན་བར་ལྷགས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་ཐེག་པ་ཆེན་པོ་ལ་རབ་ཏུ་དད་ཅིང་མོས་ཏེ་ཐེག་པ་ཆེན་པོ་བསྲུང་བར་འཚལ་ལོ། །བཅོམ་ལྡན་འདས་རིགས་ཀྱི་བུ་འམ་རིགས་ཀྱི་བུ་མོ་གང་ཞིག་ཁེ་དང་གྲགས་པའི་ཕྱིར་རམ། གཞན་སྐྲག་པར་བྱ་བའི་ཕྱིར་རམ། གཞན་ལ་
བརྫུན་བྱ་བའི་ཕྱིར་རམ། ནོར་དང་ཟང་ཟིང་གི་ཕྱིར་རམ། གཞན་གྱི་ཡིད་དང་སྦྱོར་བ་ཙམ་གྱི་ཕྱིར་ཐེག་པ་ཆེན་པོ་འདི་འཛིན་པར་བྱེད་ན་བདེན་ཡང་རུང་། བརྫུན་ཡང་རུང་། བདག་ཅག་གིས་དེའི་ཚེ། གང་ཟག་དེའི་འཇིགས་པ་བསལ་བའི་ཕྱིར་གསང་སྔགས་འདི་འབུལ་ལོ། །ག་ཀྱེ། ཏ་ཏ་ལ་ག་ཀྱེ། ལོ་ཧ་ལེ། མ་ཧཱ་ལོ་ཧ་ལེ། ཨ་ལ་ཙ་ལ་ཏ་ལ་སྭཱ་ཧཱ། སྔགས་འདིས་ནི་སེམས་སྟོར་བ་རྣམས་དང་། འཇིགས་སྐྲག་པ་དང་། ཆོས་སྨྲ་བ་དང་། ཡང་དག་པའི་ཆོས་ཀྱི་བར་དུ་མི་གཅོད་པ་དང་། མུ་སྟེགས་ཅན་འདུལ་བ་དང་། བདག་གི་ལུས་བསྲུང་བ་དང་། ཡང་དག་པའི་ཆོས་བསྲུང་བ་དང་། ཐེག་པ་ཆེན་པོ་བསྲུང་བའི་སླད་དུ་གསང་སྔགས་འདི་འབུལ་ལོ། །གང་གིས་གསང་སྔགས་འདི་ཡིད་ལ་བགྱིད་ན་བལ་གླང་རྨིག་པའི་འཇིགས་པ་དང་བྲལ་བར་འགྱུར། གལ་ཏེ་འབྲོག་དགོན་པའམ། ཡུལ་ས་སྟོང་པ་བག་ཚ་བའི་གནས་སུ་མཆིས་ན་ཡང་འཇིགས་པར་མི་འགྱུར། ཆུ་དང་། མེ་དང་། སེང་གེ་དང་། སྟག་དང་། སྤྱང་ཀི་དང་། དགྲས་འཇིགས་པ་དང་། རྒྱལ་པོའི་ཆད་པས་འཇིགས་པ་ལས་ཀྱང་ཐར་བར་འགྱུར་རོ། །བཅོམ་ལྡན་འདས་གང་གིས་གསང་སྔགས་འདི་ཡིད་ལ་བགྱིད་ན་འཇིགས་པ་དེ་དག་ལ་སོགས་པ་ཐམས་ཅད་དང་བྲལ་བར་འགྱུར་རོ། །བཅོམ་ལྡན་འདས་གསང་སྔགས་འདི་འཛིན་པ་ལ་བདག་ཅག་གིས་བསྐྱབ་ཅིང་སྦ་བ་ནི་ཇི་ལྟར་རུ་སྦལ་ཡན་ལག་དྲུག་སྦེད་པ་བཞིན་ནོ། །བཅོམ་ལྡན་འདས་བདག་ཅག་ནི་གཡོ་དང་སྒྱུས་འདི་སྐད་དུ་སྨྲ་བ་མ་ལགས་ཀྱི་གང་གཟུངས་སྔགས་འདི་འཛིན་པ་ལ་བདག་ཅག་གིས་མཐུ་སྟོབས་བསྟང་ངོ་། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་ནང་གི་ཐ་མ་འདི་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་བདུད་སྡིག་ཏོ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱེད་ཀྱིས་མཆོད་པ་ཞལ་ཟས་ཕུལ་བ་རྣམས་ནི་མི་བཞེས་སོ། །འགྲོ་བ་ཐམས་ཅད་དང་འཁོར་རྣམ་བཞི་ལ་ཕན་པ་དང་བདེ་བའི་ཕྱིར་གསང་སྔགས་འདི་བཞེས་སོ་ཞེས་བཀའ་སྩལ་ནས་ཅང་མི་གསུང་བར་གཞན་ནི་བཞེས་སུ་མ་གནང་ངོ་། །དེ་ལྟར་ལན་གསུམ་གྱི་བར་དུ་གསོལ་ཀྱང་
བཞེས་སུ་མ་གནང་ནས་བདུད་སྡིག་ཏོ་ཅན་བསམས་པ་བཞིན་དུ་མ་གྱུར་པས་མྱ་ངན་གྱིས་ཡིད་གདུངས་ཏེ་ཕྱོགས་གཅིག་ཏུ་འཁོད་དོ། ། དེའི་ཚེ་ལྷ་དབང་སྒྱུར་ཆེན་པོ་ཡང་འཁོར་ལྷ་གྲངས་མེད་དཔག་ཏུ་མེད་པ་དང་བཅས་ཏེ། མཆོད་པའི་ཡོ་བྱད་བཤམས་པ་ཡང་ཚངས་པ་དང་བརྒྱ་བྱིན་དང་། འཇིག་རྟེན་གྱི་མགོན་པོ་བཞི་དང་། ལྷ་དང་། མི་དང་། ལྷ་མ་ཡིན་སྡེ་བརྒྱད་དང་། མི་མ་ཡིན་པ་ལ་སོགས་པས་མཆོད་པའི་ཡོ་བྱད་རྣམས་ཟིལ་གྱིས་གནོན་པ་ནི་ཇི་ལྟར་སོལ་བའི་དྲུང་ན་ཤེལ་གཞག་པ་དང་འདྲ་སྟེ་ཐམས་ཅད་མི་སྣང་བར་གྱུར་ཏོ། །རིན་པོ་ཆེའི་གདུགས་ནང་གི་ཆུང་ངུ་ཡང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོངས་སུ་ཁེབས་པའི་མཆོད་པའི་ཡོ་བྱད་ལ་སོགས་པ་ཐོགས་ཏེ། སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་གྲངས་མེད་པར་བསྐོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་མཆོད་པའི་ཡོ་བྱད་ནང་གི་ཐ་མ་འདི་འབུལ་བ་ནི་ཇི་ལྟར་ན་བདག་ཅག་ལ་སྦྲང་བུས་མཆོད་པ་འབུལ་བའམ། ཆུ་སྙིམ་པ་གང་རྒྱ་མཚོ་ཆེན་པོར་བླུགས་པ་འམ། མེ་མར་ཆུང་ངུ་གཅིག་གི་འོད་ཀྱིས་ཉི་མ་བརྒྱ་སྟོང་ལ་བསྟང་བའམ། དབྱར་མེ་ཏོག་ཤིན་ཏུ་རྒྱས་པའི་དུས་སུ་མེ་ཏོག་གཅིག་ཐོགས་ཏེ་མེ་ཏོག་མང་པོའི་ཁྲོད་དུ་བཞག་པའམ། ཡུངས་ཀར་འབྲུམ་བུ་གཅིག་ཙམ་རི་རབ་རིའི་རྒྱལ་པོ་ལ་བསྟངས་ན་རྒྱ་མཚོ་དང་། ཉི་མ་དང་། མེ་ཏོག་མང་པོ་དང་། རི་རབ་ལ་མི་སྨན་པ་དང་འདྲ་བར་བཅོམ་ལྡན་འདས་བདག་ཅག་གི་མཆོད་པ་ཡང་དེ་དང་འདྲའོ། །གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྤོས་དང་། མེ་ཏོག་དང་། རོལ་མོ་དང་། བ་དན་དང་། གདུགས་དང་། རྒྱལ་མཚན་གྱིས་ཡོངས་སུ་བཀང་སྟེ། མཆོད་ཀྱང་སྨོས་པའི་རིན་དུ་མི་འཚལ་ཏོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་འགྲོ་བ་མང་པོའི་སླད་དུ་སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སུ་སྡུག་བསྔལ་མང་པོ་ལེན་ཏོ། །དེ་བས་ན་བཅོམ་ལྡན་འདས་བདག་
ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེའི་ཚེ་འདི་ནས་ཤར་ཕྱོགས་སུ་འཇིག་རྟེན་གྱི་ཁམས་ཀླུང་གང་གཱའི་བྱེ་མ་གྲངས་མེད་དཔག་ཏུ་མེད་པ་འདས་པའི་ཕ་རོལ་སངས་རྒྱས་ཀྱི་ཞིང་ཡིད་དུ་འོང་བའི་སྒྲ་སྙན་ཞེས་བྱ་བ་ན་སངས་རྒྱས་ནམ་མཁའ་དང་མཉམ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བཞུགས་ཏེ། དེའི་ཚེ་ན་སངས་རྒྱས་དེས་ཉེ་གནས་ཆེན་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་སོང་ལ་འདི་ནས་ནུབ་ཕྱོགས་སུ་འཇིག་རྟེན་གྱི་ཁམས་མི་མཇེད་ཅེས་བྱ་བ་ན་སངས་རྒྱས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དེ་རིང་པོར་མི་ཐོགས་པར་ཡོངས་སུ་མྱ་ངན་ལས་འདར་ཉེའོ། །རིགས་ཀྱི་བུ་ཁྱོད་འཇིག་རྟེན་གྱི་ཁམས་འདིའི་ཞལ་ཟས་བསུང་ཅན་དྲི་ཤིན་ཏུ་ཞིམ་པ། ཡིད་དུ་འོང་ཞིང་བདེ་བར་འགྱུར་བ་འདི་ཐོགས་ཏེ། སངས་རྒྱས་བཅོམ་ལྡན་འདས་དེ་ལ་ཕུལ་ཅིག །བཅོམ་ལྡན་འདས་དེ་གསོལ་ནས་ཡོངས་སུ་མྱ་ངན་ལས་འདའ་བར་གཤེགས་སོ། །རིགས་ཀྱི་བུ་ཁྱོད་དེ་ལ་ཕྱག་འཚལ་ཞིང་ཐེ་ཚོམ་དུ་གྱུར་པ་ཡང་ཞུ་བའི་དུས་ལ་བབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་དཔག་ཏུ་མེད་པ་ཞེས་བྱ་བ་འདུག་པ་ལས་ལངས་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ལན་གསུམ་བསྐོར་ནས་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པ་དང་ཐབས་ཅིག་ཏུ་སངས་རྒྱས་ཀྱི་ཞིང་དེ་ནས་མི་མཇེད་ཀྱི་འཇིག་རྟེན་གྱི་ཁམས་གང་ན་བ་དེར་དོང་ངོ་། །དེའི་ཚེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་
དྲུག་ཏུ་གཡོས་ནས་འཁོར་གྱི་ནང་ན་ཚངས་པ་དང་། བརྒྱ་བྱིན་དང་། ཕྱོགས་བཞིའི་མགོན་པོ་དང་། བདུད་སྡིག་ཏོ་ཅན་དང་། དབང་སྒྱུར་ཆེན་པོ་ལ་སོགས་པ་དེ་དག་གིས་ས་གཡོས་པ་མཐོང་ནས། ལུས་སྐྱི་བུང་ཞེས་བྱེད་དེ་ལྕེ་ཡང་སྐམས་པ་ཙམ་དུ་དངངས་སྐྲག་པར་གྱུར་ཏེ། སོ་སོར་འགྲོ་བར་ཆས་ནས་ལུས་ཀྱི་འོད་དང་གཟི་བརྗིད་ཀྱང་མི་སྣང་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པ་འདུག་པ་ལས་ལངས་ཏེ། འཁོར་གྱི་དཀྱིལ་འཁོར་རྣམས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་འཇིགས་པར་མ་བྱེད་ཅིག །ཁྱེད་མ་འཇིགས་ཤིག །དེ་ཅིའི་ཕྱིར་ཞེ་ན། འདི་ནས་ཤར་ཕྱོགས་ན་འཇིག་རྟེན་གྱི་ཁམས་ཀླུང་གང་གཱའི་བྱེ་མ་གྲངས་མེད་དཔག་ཏུ་མེད་པ་འདས་པའི་ཕ་རོལ་ན་འཇིག་རྟེན་གྱི་ཁམས་ཡིད་དུ་འོང་བའི་སྒྲ་སྙན་ཞེས་བྱ་བ་ན་སངས་རྒྱས་ནམ་མཁའ་དང་མཉམ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་སུམ་ཅུ་རྩ་གཉིས་དང་ལྡན་པ་བཞུགས་ཏེ། དེ་ན་བྱང་ཆུབ་སེམས་དཔའ་ལུས་དཔག་ཏུ་མེད་པ་ཞེས་བྱ་བ་འཁོར་བྱང་ཆུབ་སེམས་དཔའ་གྲངས་མེད་པ་དང་བཅས་ཏེ། འཇིག་རྟེན་གྱི་ཁམས་འདིར་དེ་བཞིན་གཤེགས་པ་ལ་མཆོད་དུ་འོང་བས་བྱང་ཆུབ་སེམས་དཔའ་དེའི་གཟི་བརྗིད་དང་བྱིན་གྱིས་ཁྱེད་ཀྱི་ལུས་ཀྱི་འོད་ཀྱང་མི་སྣང་བར་གྱུར་ཏོ། །དེ་བས་ན་ཁྱེད་ཅག་མ་འཇིགས་པར་ཤིན་ཏུ་དགའ་བ་སྐྱེད་ཅིག །དེའི་ཚེ་ན་འཁོར་གྱི་དཀྱིལ་འཁོར་དེ་དག་ཐམས་ཅད་ཀྱིས་རྒྱང་མ་ནས་སངས་རྒྱས་དེ་དང་། འཁོར་མང་པོ་རྣམས་མཐོང་བ་ནི་ཇི་ལྟར་མེ་ལོང་གསལ་བའི་ནང་ན་བདག་གི་གཟུགས་བརྙན་མཐོང་བ་བཞིན་ནོ། །དེ་ནས་ཡང་འཇམ་དཔལ་གྱིས་འཁོར་མང་པོ་རྣམས་ལ་འདི་སྐད་ཅེས་སྨྲས་སོ། །ཁྱེད་ཀྱིས་སངས་རྒྱས་དེ་མཐོང་བ་ནི་ཇི་ལྟར་སངས་རྒྱས་འདི་མཐོང་བ་དང་འདྲ་བར་སངས་རྒྱས་ཀྱི་བྱིན་གྱི་རླབས་ཀྱིས་གཞན་ཡང་སངས་རྒྱས་ཕྱོགས་བཅུ་ན་བཞུགས་པ་དཔག་ཏུ་མེད་པ་སྙེད་ཀྱང་མཐོང་བར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་མང་པོས་གཅིག་ལ་གཅིག་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །འཇིག་
རྟེན་སྟོངས་སོ། །དེ་བཞིན་གཤེགས་པ་རིང་པོར་མི་ཐོགས་པར་ཡོངས་སུ་མྱ་ངན་ལས་འདའོ་ཞེས་སྨྲས་སོ། །དེའི་ཚེ་འཁོར་གྱི་དཀྱིལ་འཁོར་མང་པོ་ཐམས་ཅད་ཀྱིས་བྱང་ཆུབ་སེམས་དཔའ་ལུས་དཔག་ཏུ་མེད་པ་འཁོར་དང་བཅས་པ་མཐོང་བ་ནི་འདི་ལྟ་སྟེ། བྱང་ཆུབ་སེམས་དཔའ་དེའི་བ་སྤུའི་ཁུང་བུ་རེ་རེ་ནས་མེ་ཏོག་པད་མོ་ཆེན་པོ་རེ་རེ་བྱུང་ལ་པད་མོ་དེ་རེ་རེའི་སྟེང་ཡང་གྲོང་ཁྱེར་བདུན་ཁྲི་བརྒྱད་སྟོང་སྙེད་ཡོད་དོ། །གྲོང་ཁྱེར་དེ་ཡང་ཆུ་ཞེང་གབ་པར་གྲོང་ཁྱེར་ཡངས་པ་ཅན་དང་མཉམ་སྟེ། ར་བ་དང་འོབས་ཀྱང་རིན་པོ་ཆེ་སྣ་བདུན་གྱིས་སྤྲས་ལ་རིན་པོ་ཆེའི་ཤིང་ཏ་ལ་རིམ་པ་བདུན་དངར་བ། དེ་ན་གནས་པའི་མི་ཐམས་ཅད་ཀྱང་རབ་ཏུ་བདེ་ཞིང་སྐྱིད་པ། གྲོང་ཁྱེར་དེའི་ཅོག་བར་ཡང་འཛམ་བུ་ཆུ་ཀླུང་གི་གསེར་ལས་བྱས་པ། ཅོག་བར་དེ་རེ་རེའི་བར་ནི་རིན་པོ་ཆེ་སྣ་བདུན་གྱི་ཤིང་རྣམ་པ་སྣ་ཚོགས་ཡོད་དེ། མེ་ཏོག་དང་འབྲས་བུ་ཤིན་ཏུ་རྒྱས་པ། རླུང་མི་དྲག་པས་བསྐྱོད་པ་ན་སྒྲ་སྐད་ཤིན་ཏུ་སྙན་པ་ནི་ཇི་ལྟར་ལྷའི་རོལ་མོ་ཟེར་བ་ལྟ་བུ་དེ་ན་གནས་པའི་མི་དག་གིས་ཐོས་ན་ཕུལ་དུ་བྱུང་བའི་རབ་ཏུ་བདེ་བ་མྱོང་བར་འགྱུར་རོ། །འོབས་ཀྱི་ནང་ན་ཡང་ཡོངས་སུ་དག་པའི་ཆུ་བསུང་ཅན་བཻ་དཱུརྱ་དང་འདྲ་བས་ཡོངས་སུ་གང་ངོ་། །ཆུ་དེ་དག་ལ་རིན་པོ་ཆེ་སྣ་བདུན་གྱི་གྲུ་ཡོད་དོ། །གྲུ་དེའི་སྟེང་ན་མི་དག་རྩེ་ཞིང་ཁྲུས་བྱེད་དེ་གཅིག་ལ་གཅིག་དགའ་ཞིང་རབ་ཏུ་བདེ་བ་མྱོང་ངོ་། །གཞན་ཡང་ཁ་དོག་རྣམ་པ་སྣ་ཚོགས་ཀྱི་པད་མོ་སྐྱེ་བ་ནི་ཨུད་པ་ལ་དང་། ཀུ་མུ་ད་དང་། པད་མ་དང་། པུན་ད་རཱི་ཀ་ལ་སོགས་པ་ཤིང་རྟའི་འཁོར་ལོ་ཙམ་སྐྱེའོ། །འོབས་ཀྱི་གཡས་གཡོན་ན་སྐྱེད་མོས་ཚལ་མང་དུ་ཡོད་དེ། སྐྱེད་མོས་ཚལ་དེ་རེ་རེའི་ནང་དུ་ཡང་ཆུ་མིག་དང་བཅས་པའི་རྫིང་བུ་ལྔ་ལྔ་ཡོད་དོ། །རྫིང་བུ་དེ་དག་གི་ནང་ན་ཡང་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དང་། པུན་ད་རཱི་ཀ་ཆེ་ཁྱད་ཤིང་རྟའི་འཁོར་ལོ་ཙམ་སྐྱེས་ཏེ་དྲི་བསུང་ཤིན་ཏུ་མངར་བ། རབ་ཏུ་ཡིད་དུ་འོང་བ། ཆུ་ཤིན་ཏུ་གསལ་ཞིང་འཇམ་པ། ངང་པ་དང་། ངུར་པ་ལ་སོགས་པ་རྐྱལ་ཞིང་རྩེ་བ། སྐྱེད་མོས་ཚལ་དེ་ན་གཞན་ཡང་རིན་པོ་ཆེའི་གཞལ་མེད་ཁང་ཡོད་དེ། གཞལ་མེད་ཁང་དེ་རེ་རེའི་
ཡང་ཆུ་ཞེང་གབ་པར་དཔག་ཚད་བཞི་ཡོད་དོ། །གཞལ་མེད་ཁང་དེའི་ར་བ་ཡང་རིན་པོ་ཆེ་སྣ་བཞི་ལས་བྱས་སོ། །འདི་ལྟ་སྟེ་གསེར་དང་། དངུལ་དང་། བཻ་དཱུརྱ་དང་། ཤེལ་ལས་བྱས་ཏེ་བད་ཀྱང་གསེར་ལས་བྱས། ས་གཞི་ནི་མུ་ས་ལ་གལ་བ་ལས་བླངས་ཏེ་གསེར་གྱི་བྱེ་མ་བདལ་བ། གཞལ་མེད་ཁང་དེའི་དྲུང་ན་རིན་པོ་ཆེ་སྣ་བདུན་གྱི་འབབ་ཆུ་དང་། ཆུ་མིག་དང་རྫིང་བུ་ཡོད་དེ། རྫིང་བུ་དེ་རེ་རེ་ལ་ཡང་གསེར་གྱི་ཐེམ་སྐས་བཅྭ་བརྒྱད་བཅྭ་བརྒྱད་ཡོད་དོ། །ཆུ་ཞེང་ཡང་འཛམ་བུ་ཆུ་ཀླུང་གི་གསེར་ལས་བྱས་ཏེ། སུམ་ཅུ་རྩ་གསུམ་གནམ་གྱི་སྐྱེད་མོས་ཚལ་རབ་ཏུ་བདེ་བ་ཅན་དང་འདྲའོ། །གྲོང་ཁྱེར་དེ་རེ་རེའི་ནང་ན་ཡང་རྒྱལ་པོ་བརྒྱད་ཁྲི་བཞི་སྟོང་སྙེད་ཡོད་དོ། །རྒྱལ་པོ་དེ་རེ་རེ་ལ་ཡང་བཙུན་མོ་དང་ཕོ་བྲང་གི་སླས་གྲངས་མེད་པ་ཡོད་དོ། །དེ་དག་དང་ལྷན་ཅིག་ཏུ་རྩེ་ཞིང་དགའོ། །དེ་ན་གནས་པའི་མི་ཐམས་ཅད་ཀྱང་སོ་སོའི་གནས་ན་རྩེ་ཞིང་དགའོ། ། དེ་ན་གནས་པའི་སེམས་ཅན་རྣམས་ནི་རྣ་བར་གཞན་མི་གྲག་གི་བླ་ན་མེད་པའི་ཐེག་པ་ཆེན་པོའི་སྒྲ་འབའ་ཞིག་གྲག་གོ །མེ་ཏོག་དེ་རེ་རེའི་ནང་ན་ཡང་སེང་གེའི་ཁྲི་རེ་རེ་ཡོད་དེ། ཁྲི་དེའི་རྐང་པ་བཞི་ཡང་བཻ་དཱུརྱ་མཐོན་མཐིང་ལ་བྱས་པ། ཁམས་གསུམ་ལས་འདས་པའི་ན་བཟའ་ཤིན་ཏུ་འཇམ་པ་དཀར་པོ་བཏིང་ངོ་། །ཁྲི་དེ་རེ་རེའི་སྟེང་ན་རྒྱལ་པོ་རེ་རེ་འདུག་སྟེ་ཐེག་པ་ཆེན་པོའི་ཆོས་ཀྱིས་སེམས་ཅན་རྣམས་འདུལ་ཏེ། དེ་ལ་ཡང་སེམས་ཅན་ལ་ལ་ནི་ཐེག་པ་ཆེན་པོའི་མདོ་སྡེ་གླེགས་བམ་དུ་འདྲི་བ་དང་། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཇི་ལྟར་སྨྲས་པ་བཞིན་དུ་ནན་ཏན་དུ་བྱེད་པ་དང་། ཤིན་ཏུ་རྒྱས་པའི་བར་དུ་བྱེད་དོ། །དེའི་ཚེ་ན་བྱང་ཆུབ་སེམས་དཔའ་ལུས་དཔག་ཏུ་མེད་པ་དེས་བདག་གི་ལུས་ལ་སེམས་ཅན་ཚད་མེད་པ་སྙེད་བཀོད་པ་དེ་ཡང་འཇིག་རྟེན་གྱི་བདེ་བ་བཏང་ནས་ཐམས་ཅད་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །དེ་བཞིན་གཤེགས་པ་ནི་རིང་པོ་མ་ལོན་པར་ཡོངས་སུ་མྱ་ངན་ལས་འདའོ་ཞེས་སྨྲའོ། །དེའི་ཚེ་བྱང་ཆུབ་སེམས་དཔའ་ལུས་དཔག་ཏུ་མེད་པ་བྱང་ཆུབ་སེམས་དཔའི་འཁོར་ཚད་མེད་པ་སྙེད་ཀྱིས་བསྐོར་ཏེ། དེ་ལྟ་བུའི་རྫུ་འཕྲུལ་མངོན་པར་
བསྟན་ནས་མཆོད་པའི་ཡོ་བྱད་ཚད་མེད་པ་རྣམ་པ་སྣ་ཚོགས་དང་། ཞལ་ཟས་བསུང་ཅན་ཐོགས་ཏེ། གང་ཞིག་ལ་ཞལ་ཟས་དེའི་བསུང་གིས་རེག་ན་ཀུན་ནས་ཉོན་མོངས་པའི་དྲི་མ་ཐམས་ཅད་ཞི་བར་འགྱུར་རོ། །བྱང་ཆུབ་སེམས་དཔའ་དེའི་བྱིན་གྱི་རླབས་ཀྱིས་འཁོར་གྱི་དཀྱིལ་འཁོར་ཐམས་ཅད་རྫུ་འཕྲུལ་དེ་དག་མཐོང་བར་གྱུར་ཏོ། །བྱང་ཆུབ་སེམས་དཔའ་ལུས་དཔག་ཏུ་མེད་པ་ནི་ལུས་ཆེན་པོ་དཔག་ཏུ་མེད་དེ། དེ་ནམ་མཁའ་དང་མཉམ་པས་སངས་རྒྱས་བཅོམ་ལྡན་འདས་མ་གཏོགས་པར་གཞན་གང་གིས་ཀྱང་བྱང་ཆུབ་སེམས་དཔའ་དེའི་ལུས་ཀྱི་མཐའ་ཤེས་པར་ནུས་པ་མེད་དོ། །དེའི་ཚེ་བྱང་ཆུབ་སེམས་དཔའ་ལུས་དཔག་ཏུ་མེད་པ་འཁོར་དང་བཅས་པས་མཆོད་པའི་ཡོ་བྱད་སྔ་མ་བས་ལྷག་པར་བཤམས་ནས་སངས་རྒྱས་གང་ན་བར་ལྷགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། ཐལ་མོ་སྦྱར་བསྟི་སྟང་དང་བཅས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་མཆོད་པ་འདི་དག་བཞེས་ཤིག་ཅེས་གསོལ་ཏོ། །དེ་བཞིན་གཤེགས་པ་དུས་མཁྱེན་པས་ཅང་མི་གསུང་བར་བཞེས་སུ་མ་གནང་ནས་བྱང་ཆུབ་སེམས་དཔའ་ལུས་དཔག་ཏུ་མེད་པ་འཁོར་དང་བཅས་པ་ཕྱོགས་གཅིག་ཏུ་འཁོད་དོ། །དེ་བཞིན་དུ་ལྷོ་དང་། ནུབ་དང་། བྱང་ཕྱོགས་ཀྱི་སངས་རྒྱས་ཀྱི་ཞིང་ཀུན་ནས་བྱང་ཆུབ་སེམས་དཔའ་ལུས་དཔག་ཏུ་མེད་པ་གྲངས་མེད་པ་སྙེད་ཀྱང་མཆོད་པའི་ཡོ་བྱད་སྔ་མ་བས་ལྷག་པར་བཤམས་ནས་སངས་རྒྱས་གང་ན་བར་ལྷགས་པ་ནས་ཕྱོགས་གཅིག་ཏུ་འཁོད་པའི་བར་དུ་རྒྱས་པར་རིག་པར་བྱའོ། །དེའི་ཚེ་ཤིང་སཱ་ལའི་དྲུང་གཉིས་ཀྱི་བར་བསོད་ནམས་ཀྱི་ས་གཞི་བཀྲ་ཤིས་ཀྱི་གནས་དེར་ཁོ་ར་ཁོར་ཡུག་ཏུ་དཔག་ཚད་སུམ་ཅུ་རྩ་གཉིས་ཀྱི་བར་འཁོར་གྱི་དཀྱིལ་འཁོར་གྱིས་ས་སྟོང་ཅུང་ཟད་ཀྱང་མེད་པར་ཡོངས་སུ་གང་ངོ་། །དེའི་ཚེ་ཕྱོགས་བཞི་ནས་འདུས་པའི་བྱང་ཆུབ་སེམས་དཔའ་འཁོར་དང་བཅས་ཏེ། འདུག་པའི་གནས་ནི་སྨྱུང་གི་རྩེ་མོའམ། ཁབ་ཀྱི་རྩེ་མོ་ཙམ་མམ། རྡུལ་ཕྲ་མོ་ཙམ་མོ། །ཕྱོགས་བཅུའི་འཇིག་
རྟེན་གྱི་ཁམས་རྡུལ་ཕྲ་རབ་སྙེད་ཀྱི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་ཐམས་ཅད་ཀྱང་འདུས་པར་གྱུར། འཛམ་བུའི་གླིང་ན་གནས་པའི་འཁོར་ཐམས་ཅད་ཀྱང་འདུས་པར་གྱུར་ཏེ་དེ་ལ་གཉིས་མ་གཏོགས་པ་ནི་འོད་སྲུང་ཆེན་པོ་དང་དགའ་བོའོ། །རྒྱལ་པོ་མ་སྐྱེས་དགྲ་འཁོར་དང་བཅས་པ་དང་། སྦྲུལ་གདུག་པ་བལྟས་པ་ཙམ་གྱིས་འཆི་བར་བྱེད་པ་དང་། སྦུར་བ་དང་། ཟ་གདུག་དང་། སྡིག་པའི་བར་དུ་སྡིག་པ་ཅན་གྱི་ལས་སྤྱོད་པ་རྣམ་པ་བཅུ་དྲུག་པོ་མ་གཏོགས་པར་གཞན་ཐམས་ཅད་འདུས་པར་གྱུར་ཏོ། །སྲིན་པོ་ད་ན་བ་དང་། ལྷ་མ་ཡིན་ལ་སོགས་པ་ཐམས་ཅད་ཀྱིས་སྡིག་པའི་བསམ་པ་བཏང་ནས་གཅིག་ལ་གཅིག་བྱམས་ཤིང་སྡུག་པའི་སེམས་བསྐྱེད་པ་ནི་ཕའམ། མའམ། ཕུ་ནུ་ལྟ་བུར་གྱུར་ཏོ། ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་པའི་སེམས་ཅན་ཐམས་ཅད་ཀྱང་གཅིག་ལ་གཅིག་བྱམས་པའི་སེམས་བསྐྱེད་དེ་གཅིག་མ་གཏོགས་པ་ནི་ལོག་སྲེད་ཅན་ནོ། །དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་སངས་རྒྱས་ཀྱི་བྱིན་གྱི་རླབས་ཀྱིས་ས་གཞི་ཐམས་ཅད་ཀྱང་འཇམ་པར་གྱུར་ཏེ། ངམ་གྲོག་དང་། བྱེ་མ་དང་། གསེག་མ་དང་། རྡོ་བ་དང་། ཤིང་ཚེར་མ་ཅན་དང་། རྩྭ་གདུག་པ་ཡང་མེད་པར་གྱུར་ཏེ་རིན་པོ་ཆེ་རྣམ་པ་སྣ་ཚོགས་ཀྱིས་ཤིན་ཏུ་བརྒྱན་པ་ནི་ནུབ་ཕྱོགས་ཀྱི་སངས་རྒྱས་ཚེ་དཔག་ཏུ་མེད་པའི་འཇིག་རྟེན་གྱི་ཁམས་བདེ་བ་ཅན་དང་འདྲ་བར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་མང་པོ་ཐམས་ཅད་ཀྱིས་ཕྱོགས་བཅུའི་འཇིག་རྟེན་གྱི་ཁམས་རྡུལ་ཕྲ་མོ་སྙེད་ཤིན་ཏུ་སྣང་བ་ནི་ཇི་ལྟར་མེ་ལོང་གསལ་བའི་ནང་ན་བདག་གི་གཟུགས་བརྙན་སྣང་བ་བཞིན་ནོ། །དེ་ནས་དེ་བཞིན་གཤེགས་པའི་ཞལ་གྱི་སྒོ་ནས་འོད་རྣམ་པ་ལྔ་བྱུང་སྟེ། འཁོར་གྱི་དཀྱིལ་འཁོར་མང་པོ་སྣང་བར་བྱས་ནས་དེ་དག་གི་ལུས་ཀྱི་འོད་ཟེར་མི་མངོན་པར་ཟིལ་གྱིས་མནན་ཏེ་བྱ་བ་བྱས་ནས་ཕྱིར་ཞལ་གྱི་སྒོར་ཞུགས་སོ། །དེའི་ཚེ་ལྷ་དང་། མི་དང་། ལྷ་མ་ཡིན་ལ་སོགས་པ་འཁོར་རྣམས་ཀྱིས་སངས་རྒྱས་ཀྱི་འོད་ཟེར་ཕྱིར་ཡང་ཞལ་གྱི་སྒོར་ཞུགས་པ་མཐོང་
ནས་ཐམས་ཅད་འཇིགས་སྐྲག་སྟེ་ལུས་ཀྱི་བ་སྤུ་ཀུན་ཀྱང་ལངས་ནས་གཅིག་ལ་གཅིག་འདི་སྐད་དུ་དེ་བཞིན་གཤེགས་པས་འོད་ཟེར་བཀྱེ་ནས་སླར་ཞུགས་པ་འདི་ནི་རྒྱུ་མེད་པའམ། རྐྱེན་མེད་པ་མ་ཡིན་ཏེ། ཕྱོགས་བཅུར་མཛད་པ་ཀུན་མཛད་ནས་ཐ་མ་ཡོངས་སུ་མྱ་ངན་ལས་འདའ་བའི་ལྟས་ཡིན་དུ་ངེས་སོ། །ཀྱི་ཧུད་ཀྱི་ཧུད་དེ་བཞིན་གཤེགས་པས་ཚད་མེད་པ་བཞིའི་ཐུགས་བཏང་ནས་ལྷ་དང་མི་རྣམས་ཀྱི་མཆོད་པ་ཡང་བཞེས་སུ་མ་གནང་ངོ་། །དེང་སླན་ཆད་ནི་ཡེ་ཤེས་ཀྱི་ཉི་མ་ཡང་ནུབ་པར་གྱུར། བླ་ན་མེད་པའི་ཆོས་ཀྱི་གྲུ་ཡང་བྱིང་བར་གྱུར་ཏོ། །ཀྱི་ཧུད་རེ་སྡུག་འཇིག་རྟེན་སྡུག་བསྔལ་ཆེན་པོས་གདུངས་པར་གྱུར་ཏོ་ཞེས་སྨྲས་ནས་བྲང་ལ་ཁུ་ཚུར་གྱིས་རྡེག་ཅིང་། ཆོ་ངེས་འདོན་པས་ལུས་ཀྱིས་མི་བཟོད་པ་ཙམ་དུ་ཤིན་ཏུ་འདར་ཏེ་བ་སྤུའི་ཁུང་བུ་ནས་ཁྲག་ཀྱང་ཟག་པར་གྱུར་ཏོ། །དེའི་ཚེ་འཁོར་གྱི་དཀྱིལ་འཁོར་དེ་ན་གྲོང་ཁྱེར་རྩྭ་མཆོག་གི་ཤིང་མཁན་གྱི་བུ་དགེ་བསྙེན་ཙུན་ད་ཞེས་བྱ་བ་རིས་འཐུན་པའི་འཁོར་ལྔ་བཅུ་དང་ལྷན་ཅིག་ཏུ་འདུས་སོ། །དེས་འཇིག་རྟེན་དུ་བཅས་པ་དག་དགེ་བའི་འབྲས་བུ་ཐོབ་པར་བྱ་བའི་ཕྱིར་སྔོན་གྱི་ཚུལ་བཏང་ནས་འདུག་པ་ལས་ལངས་ཏེ། བླ་གོས་ཕྱོགས་གཅིག་ཏུ་བྱས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་མཆི་མ་བླགས་ཏེ། སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་བདག་ཅག་གིས་མཆོད་པ་ཐ་མ་འདི་བཞེས་སུ་གསོལ། དེ་ཡང་སེམས་ཅན་དཔག་ཏུ་མ་མཆིས་པ་དག་བསྒྲལ་བའི་སླད་དུའོ། །བཅོམ་ལྡན་འདས་བདག་ཅག་ནི་དེང་སླན་ཆད་མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས། རྟེན་མ་མཆིས། གནས་མ་མཆིས་ཏེ། ཤིན་ཏུ་དབུལ་ཕོངས་པས་དེ་བཞིན་གཤེགས་པ་ལ་སླད་མ་མ་མཆིས་པའི་དུས་ཀྱི་ཚོགས་ཙམ་ཞིག་གསོལ་ལོ། །བཅོམ་ལྡན་འདས་ཐུགས་བརྩེ་བའི་སླད་དུ། བདག་ཅག་གི་མཆོད་པ་ཐ་མ་འདི་བཞེས་ནས། གདོད་ཡོངས་སུ་མྱ་
ངན་ལས་འདའ་བར་གཤེགས་སུ་གསོལ། བཅོམ་ལྡན་འདས་དཔེར་ན་རྒྱལ་རིགས་སམ། བྲམ་ཟེའམ། གདོལ་པ་ཡང་རུང་། དབུལ་ཕོངས་པས་ཡུལ་གཞན་དུ་མཆིས་ཏེ། ཞིང་གི་ལས་ལ་ཞུགས་ནས་རྨོན་པ་དུལ་བ་དང་། ཞིང་ཡང་གཤིན་ལ་ས་གཞི་ཡང་མཉམ་པ་དང་། གསེག་མ་དང་། ཞིང་གི་ངོ་ཡུར་མ་མཆིས་ན་དགུང་ཆར་འབའ་ཞིག་ལ་རེའོ། །བཅོམ་ལྡན་འདས་རྨོན་པ་དུལ་བ་ཞེས་བགྱི་བ་ནི་ལུས་དང་ངག་གི་ལས་བདུན་པོའི་དཔེའོ། །ཞིང་གཤིན་ལ་ས་གཞི་མཉམ་པ་ཞེས་བགྱི་བ་ནི་ཤེས་རབ་ཀྱི་དཔེའོ། །གསེག་མ་དང་ཞིང་གི་ངོ་ཡུར་མ་མཆིས་པ་ཞེས་བགྱི་བ་ནི་ཉོན་མོངས་པའི་དཔེའོ། །བཅོམ་ལྡན་འདས་བདག་ཅག་ལ་ཡང་རྨོན་པ་དུལ་བ་དང་། ཞིང་གཤིན་པ་ཡང་མཆིས་ལ་ཞིང་གི་ངོ་ཡུར་མ་བསལ་ན་དེ་བཞིན་གཤེགས་པའི་བདུད་རྩིའི་ཆར་འབའ་ཞིག་ལ་རེའོ། །རིགས་དབུལ་པོ་བཞི་ནི་བདག་ལགས་ཏེ། བདག་ནི་བླ་ན་མེད་པ་ཡང་དག་པར་རྫོགས་པའི་ཆོས་ཀྱི་རིན་པོ་ཆེས་དབུལ་ཏེ་ཕོངས་ན་ཐུགས་བརྩེ་བའི་སླད་དུ་བདག་ཅག་གི་དབུལ་ཕོངས་པའི་སྡུག་བསྔལ་བསལ་ཞིང་། སྡུག་བསྔལ་གྱིས་ཡོངས་སུ་གདུངས་པའི་སེམས་ཅན་ཚད་མ་མཆིས་པ་བསྒྲལ་དུ་གསོལ། བདག་ཅག་གི་མཆོད་པ་འདི་ཤིན་ཏུ་ཆུང་མོད་ཀྱི་འོན་ཀྱང་དེ་བཞིན་གཤེགས་པའི་འཁོར་མང་པོ་ཀུན་གྱི་བསོད་སྙོམས་སུ་འཚལ་ན་བཅོམ་ལྡན་འདས་བདག་ཅག་ལ་མགོན་མ་མཆིས། སྐྱབས་མ་མཆིས། དཔུང་གཉེན་མ་མཆིས། སྒྲ་གཅན་འཛིན་ལྟ་བུར་ཐུགས་བརྩེ་བར་དགོངས་སུ་གསོལ། དེ་ནས་བཅོམ་ལྡན་འདས་ཐམས་ཅད་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བས་ཙུན་ད་ལ་འདི་སྐད་ཅེས་བཀའ་སྩལ་ཏོ། །ལེགས་སོ་ལེགས་སོ། །ངས་ཁྱོད་ཀྱི་དབུལ་ཕོངས་པ་མེད་པ་དང་བླ་ན་མེད་པའི་ཆོས་ཀྱི་ཆར་ཁྱོད་ཀྱི་ལུས་ལ་དབབ་ཅིང་ཆོས་ཀྱི་མྱུ་གུ་སྐྱེ་བར་བྱའོ། །ཁྱོད་ནི་ད་ལྟར་ཚེ་དང་། མདོག་དང་། སྟོབས་དང་། བདེ་བ་དང་། ཐོགས་པ་མེད་པའི་སོ་སོར་ཡང་དག་པར་ཤེས་པ་ཐོབ་པར་འདོད་དེ། ངས་ཁྱོད་
ལ་ཚེ་དང་། མདོག་དང་། སྟོབས་དང་། བདེ་བ་དང་། ཐོགས་པ་མེད་པའི་སོ་སོར་ཡང་དག་པར་ཤེས་པ་རྟག་ཏུ་སྦྱིན་ནོ། །དེ་ཅིའི་ཕྱིར་ཞེ་ན། ཙུན་ད་ཟས་ཀྱི་སྦྱིན་པ་བྱིན་པས་ཁྱད་པར་མེད་པའི་འབྲས་བུ་རྣམ་པ་གཉིས་ཐོབ་པར་འགྱུར་རོ། །གཉིས་གང་ཞེ་ན། བཞེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་དང་། བཞེས་ནས་ཡོངས་སུ་མྱ་ངན་ལས་འདའ་བར་འགྱུར་བའོ། །ངས་ཀྱང་ཁྱོད་ཀྱི་མཆོད་པ་ནང་གི་ཐ་མ་འདི་བཞེས་པས་ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཏོ། །དེ་ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་ན་སྦྱིན་པ་བྱིན་པའི་འབྲས་བུ་རྣམ་པ་གཉིས་ཁྱད་པར་མ་མཆིས་སོ་ཞེས་བགྱི་བ་དེ་མ་ལགས་སོ། །དེ་ཅིའི་སླད་དུ་ཞེ་ན། སྔར་སྦྱིན་པ་བཞེས་པ་ནི་ཉོན་མོངས་པ་ཡང་མ་བས། ཐམས་ཅད་མཁྱེན་པའི་ཡེ་ཤེས་ཀྱང་རྫོགས་པར་མ་གྱུར། སེམས་ཅན་གྱི་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་བགྱིད་པའང་མ་ལགས་སོ། །སྦྱིན་པ་བྱིན་པ་སླད་ཀྱིས་བཞེས་པ་ནི་ཉོན་མོངས་པ་ཡང་བས་པར་གྱུར་ལ་ཐམས་ཅད་མཁྱེན་པའི་ཡེ་ཤེས་ཀྱང་ཡོངས་སུ་རྫོགས་ཤིང་སེམས་ཅན་གྱི་སྦྱིན་པའི་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་བགྱིད་པ་ལགས་སོ། །སྦྱིན་པ་སྔར་བླངས་པ་ནི་སེམས་ཅན་ནོ། །སྦྱིན་པ་ཕྱིས་བཞེས་པ་ནི་ལྷའི་ལྷའོ། །སྦྱིན་པ་སྔར་བླངས་པ་ནི་ཟས་དང་འདྲེས་པའི་ལུས། ཉོན་མོངས་པ་དང་བཅས་པའི་ལུས། ཐ་བ་ཅན་གྱི་ལུས། མི་རྟག་པའི་ལུས་སོ། །སྦྱིན་པ་ཕྱིས་བཞེས་པ་ནི་ཉོན་མོངས་པ་མ་མཆིས་པའི་སྐུ། རྡོ་རྗེ་ལྟ་བུའི་སྐུ། ཆོས་ཀྱི་སྐུ། རྟག་པའི་སྐུ། མཐའ་ཡས་པའི་སྐུ་ལགས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མ་མཆིས་ཞེས་གསུངས། སྔར་སྦྱིན་པ་བླངས་པ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་མི་འགྱུར་བ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡོངས་སུ་རྫོགས་པར་མི་འགྱུར་ཏེ། ཤའི་མིག་འབའ་ཞིག་ཐོབ་ཀྱི་སངས་རྒྱས་ཀྱི་སྤྱན་མི་ཐོབ་པ་ནས་ཤེས་རབ་ཀྱི་སྤྱན་
གྱི་བར་དུ་ཐོབ་པ་མ་ལགས་སོ། །སྦྱིན་པ་ཕྱིས་བཞེས་པ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡོངས་སུ་རྫོགས་ལ་སངས་རྒྱས་ཀྱི་སྤྱན་དང་ལྡན་པ་ནས། ཤེས་རབ་ཀྱི་སྤྱན་གྱི་བར་དུ་ལྡན་པ་ལགས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མ་མཆིས་ཞེས་གསུངས། བཅོམ་ལྡན་འདས་སྦྱིན་པ་སྔར་བླངས་པ་ནི་བླངས་མ་ཐག་ཏུ་འཚལ་ནས་དེ་མ་ཐག་ཏུ་ཞུ་བས་ཚེ་དང་། མདོག་དང་། སྟོབས་དང་། བདེ་བ་དང་། སོ་སོ་ཡང་དག་པར་རིག་པ་ཐོབ་པ་ལགས་སོ། །སྦྱིན་པ་ཕྱིས་བཞེས་པ་ནི་གསོལ་བ་དང་ཞུ་བ་ཡང་མ་མཆིས་ལ། འབྲས་བུ་རྣམ་པ་ལྔ་པོ་ཡང་མ་མཆིས་ན་ཅིའི་སླད་དུ་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མ་མཆིས་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ནི་བསྐལ་པ་ཚད་མེད། མཐའ་ཡས་གྲངས་མེད་པའི་བར་དུ་ཟས་སམ་ཉོན་མོངས་པ་དང་བཅས་པའི་སྐུ་མ་ཡིན། ནང་གི་ཐ་མའི་སྐུ་མ་ཡིན་ཏེ། རྟག་པའི་སྐུ། ཆོས་ཀྱི་སྐུ། རྡོ་རྗེའི་སྐུའོ། །རིགས་ཀྱི་བུ་སངས་རྒྱས་ཀྱི་རང་བཞིན་མ་མཐོང་བ་ནི་ཉོན་མོངས་པའི་ལུས། ཟས་དང་བཅས་པའི་ལུས། ནང་གི་ཐ་མའི་ལུས་སོ། །བྱང་ཆུབ་སེམས་དཔའ་དེའི་ཚེ་བསོད་སྙོམས་བཞེས་ནས་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་བསོད་སྙོམས་ཞུ་མ་ཐག་ཏུ་སངས་རྒྱས་ཀྱི་རང་བཞིན་མཐོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཏེ། དེ་བས་ན་སྦྱིན་པ་གཉིས་ཀྱི་འབྲས་བུ་ཁྱད་པར་མེད་དོ་ཞེས་ངས་གསུངས་སོ། །བྱང་ཆུབ་སེམས་དཔའ་ཐོག་མ་ཡང་བདུད་བཞི་བཅོམ་ལ། ང་མྱ་ངན་ལས་འདའ་ཀར་ཡང་བདུད་རྣམ་བཞི་བཅོམ་པས་དེ་བས་ན་སྦྱིན་པ་རྣམ་པ་གཉིས་ཀྱི་འབྲས་བུ་ཁྱད་པར་མེད་དོ་ཞེས་ངས་གསུངས་སོ། །བྱང་ཆུབ་སེམས་དཔའ་དེའི་ཚེ་ན་མདོ་སྡེ་བཅུ་གཉིས་རྒྱས་པར་མ་གསུངས་མོད་ཀྱི། ཐམས་ཅད་སྔར་ཐུགས་སུ་ཆུད་ལ་ང་མྱ་ངན་ལས་འདའ་ཀར་སེམས་ཅན་རྣམས་
ལ་རྒྱས་པར་ཕྱེ་ཞིང་བསྟན་པས་དེ་བས་ན་སྦྱིན་པ་རྣམ་པ་གཉིས་ལ་ཁྱད་པར་མེད་དོ། །རིགས་ཀྱི་བུ་དེ་བཞིན་གཤེགས་པའི་སྐུ་ནི་བསྐལ་པ་ཚད་མེད་གྲངས་མེད་པའི་བར་དུ་བསོད་སྙོམས་མི་གསོལ་མོད་ཀྱི་ཉན་ཐོས་རྣམས་ལ་འདི་སྐད་ཅེས་གསུངས་ཏེ། སྔོན་དེ་བཞིན་གཤེགས་པས་གནག་རྫི་མོ་ནན་ཏ་དང་། ནན་ཏ་པ་ལ་གཉིས་ཀྱིས་འོ་མའི་འཇམས་ཕུལ་བ་བཞེས་ནས་གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །ད་ནི་ཡང་དག་པར་བཤོས་མི་གསོལ་ཏེ། འཁོར་གྱི་དཀྱིལ་འཁོར་མང་པོ་འདི་དག་གི་ཕྱིར་ཁྱོད་ཀྱི་མཆོད་པ་ཐ་མ་འདི་བཞེས་མོད་ཀྱི། ཡང་དག་པར་ན་གསོལ་བ་མེད་དོ། །དེའི་ཚེ་ན་འཁོར་གྱི་དཀྱིལ་འཁོར་དེ་རྣམས་བཅོམ་ལྡན་འདས་ཀྱིས་ཙུན་དའི་མཆོད་པ་བཞེས་པ་མཐོང་ནས་ཐམས་ཅད་དགའ་མགུ་རངས་ཏེ་སྐད་འཐུན་པས་ཙུན་ད་ལ་ལེགས་སོ། །ཤིན་ཏུ་ལེགས་སོ་ཞེས་སྨྲས་ཏེ། ཁྱོད་ཀྱི་མིང་བཏགས་པ་ཐོག་ཏུ་བབ་བོ། །ཙུན་ད་ཞེས་བྱ་བ་ནི་དོན་དམ་པ་ལ་མཁས་པ་སྟེ། ཁྱོད་ཀྱིས་ཀྱང་དེང་འདིར་དོན་ཆེན་པོ་བརྩམས་པས་དེ་བས་ན་དོན་ལས་མིང་ཙུན་ད་ཞེས་བཏགས་ཏེ། ཁྱོད་ཀྱིས་ནི་ཚེ་འདི་ཉིད་ལ་གྲགས་པ་དང་ཕན་པའི་དོན་ཆེན་པོ་ཐོབ་ཅིང་སྨོན་པ་ཡང་ཡོངས་སུ་རྫོགས་པར་གྱུར་ཏེ། ངོ་མཚར་ཆེའོ། །ཙུན་ད་མིའི་ནང་དུ་སྐྱེས་ཀྱང་བླ་ན་མེད་པའི་བདེ་བ་ཤིན་ཏུ་རྙེད་དཀའ་བ་ཐོབ་བོ། །ལེགས་སོ། །ཙུན་ད་མེ་ཏོག་ཨུ་དུམ་བཱ་ར་ལྟར་འཇིག་རྟེན་ན་ཤིན་ཏུ་དཀོན་པ་སྟེ། སངས་རྒྱས་འཇིག་རྟེན་དུ་གཤེགས་པ་ཡང་ཤིན་ཏུ་རྙེད་དཀའ་ལ། སངས་རྒྱས་དང་ཕྲད་ནས་དད་པ་སྐྱེད་པ་ཡང་ཤིན་ཏུ་དཀའ། ཆོས་ཐོས་པ་ཡང་ཤིན་ཏུ་དཀའ། སངས་རྒྱས་ཡོངས་སུ་མྱ་ངན་ལས་འདའ་ཀར་མཆོད་པ་བཤམས་ཏེ་འབུལ་བ་ཡང་ཤིན་ཏུ་དཀའོ། །ཙུན་ད་ལ་ཕྱག་འཚལ་ལོ། །ཙུན་ད་ལ་ཕྱག་འཚལ་ལོ། །ཁྱོད་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། སྟོན་གྱི་ཚེས་བཅྭ་ལྔའི་ཟླ་བ་ལྟར་རྒྱས་ཤིང་ཡོངས་སུ་དག་ལ། སྤྲིན་ནམ་ན་བུན་གྱིས་མ་ཆོད་ན་ཐམས་ཅད་ཀྱིས་བལྟ་བ་དང་འདྲ་བར་ཁྱོད་
ཀྱང་དེ་དང་འདྲ་བར་བདག་ཅག་ལ་སོགས་པས་ཤིན་ཏུ་བལྟ་བར་གྱུར་ཏོ། །ཁྱོད་ཀྱི་མཆོད་པ་ནང་གི་ཐ་མ་བཞེས་པས་ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་ཏེ། ཙུན་ད་ཁྱོད་ལ་ཕྱག་འཚལ་ལོ། །དེ་བས་ན་ཁྱོད་ནི་ཟླ་བ་ཡོངས་སུ་རྒྱས་པ་དང་འདྲ་སྟེ། སེམས་ཅན་གང་ཡང་མི་ལྟ་བ་མེད་དོ། །ཙུན་ད་ཁྱོད་ལ་ཕྱག་འཚལ་ལོ། །མིའི་ལུས་ཐོབ་ནས་ཀྱང་སེམས་ནི་སངས་རྒྱས་ཀྱི་ཐུགས་དང་འདྲ་བས་ཙུན་ད་ཁྱོད་ནི་སངས་རྒྱས་ཀྱི་སྲས་ཡང་དག་པ་སྟེ། སྒྲ་གཅན་འཛིན་དང་ཐ་མི་དད་དོ། །དེ་ནས་འཁོར་གྱི་དཀྱིལ་འཁོར་དེ་རྣམས་ཀྱིས་ཚིགས་སུ་བཅད་དེ་སྨྲས་པ། མི་ཡི་ནང་ན་ཁྱོད་སྐྱེས་པ། །དྲུག་པོ་ལྷ་ལས་ཤིན་ཏུ་འཕགས། །བདག་ཅག་འཁོར་རྣམས་ཐམས་ཅད་ཀྱིས། །ཁྱོད་ལ་ཕྱག་འཚལ་གསོལ་བ་འདེབས། །མི་ཡི་སྐྱེས་བུ་ཁྱུ་མཆོག་ནི། །ཡོངས་སུ་མྱ་ངན་འདའ་ཞེས་གསུངས། །བདག་ཅག་རྣམས་ལ་སྙིང་བརྩེའི་ཕྱིར། །སངས་རྒྱས་བཞུགས་པར་གསོལ་བ་ཐོབ། །ཡུན་དུ་འཇིག་རྟེན་འདིར་བཞུགས་ཤིང་། །ཚད་མེད་འཁོར་ལ་ཕན་པའི་ཕྱིར། །མཁས་པ་རྣམས་ཀྱིས་བསྔགས་པ་ཡི། །བླ་མེད་ཆོས་མཆོག་བཤད་དུ་གསོལ། །ཁྱོད་ཀྱིས་གསོལ་བ་མ་བཏབ་ན། །བདག་ཅག་མི་རྣམས་མི་འཚོའོ། །དེ་བས་ཁྱོད་ཀྱིས་གསོལ་བ་ཐོབ། །ཁ་ལོ་སྒྱུར་བའི་སྟོན་པ་ལ་དེའི་ཚེ་ཙུན་ད་ཤིན་ཏུ་དགའ་མགུ་རངས་པ་ནི་དཔེར་ན་མི་ཞིག་ཕ་མ་ཤི་བ་ལས་ཕྱིར་སོས་པ་ཙམ་དུ་ཙུན་ད་ཡང་ཤིན་ཏུ་དགའ་བར་གྱུར་ནས་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིགས་སུ་བཅད་པ་འདི་སྐད་ཅེས་གསོལ་ཏོ། །ལེགས་སོ་བདེ་བའི་དོན་དུ་གྱུར། །མི་ཡི་ལུས་ཀྱང་ལེགས་པར་ཐོབ། །འདོད་ཆགས་ཞེ་སྡང་གཏི་མུག་བསལ། །ངན་སོང་གསུམ་ཡང་ཡོངས་སུ་སྤངས། །ལེགས་སོ་བདེ་བའི་དོན་གྱུར་ཏེ། །རིན་ཆེན་གསེར་གྱི་རི་མཐོང་ནས། །སྟོན་པ་ཁ་ལོ་སྒྱུར་དང་མཇལ། །བྱོལ་སོང་ཁམས་སུ་སྐྱེ་མི་དོགས། །སངས་རྒྱས་ཨུ་དུམ་བཱ་ར་ལྟར། །ཕྲད་པའི་དུས་ཀྱང་ཤིན་ཏུ་དཀའ། །ཕྲད་
ནས་དགེ་བའི་རྩ་བའང་བསྐྱེད། །ཡི་དགས་སྡུག་བསྔལ་ཡོངས་སུ་བཅོམ། །གཞན་ཡང་ཡོངས་སུ་བཅོམ་པ་ནི། །ལྷ་མ་ཡིན་གྱི་རིས་རྣམས་ཏེ། །ཁབ་རྩེས་ཡུངས་ཀར་བཟེད་པ་བས། །སངས་རྒྱས་འབྱུང་བ་དེ་བས་དཀའ། །བདག་ནི་སྦྱིན་པ་ཡོངས་རྫོགས་ཏེ། །ལྷ་དང་མི་ཡི་རྒྱུད་ལས་ཐར། །འཇིག་རྟེན་ཆོས་ཀྱིས་མ་གོས་པ། །པད་མོ་ཆུས་མི་ཆགས་བཞིན་ཏེ། །སྲིད་པའི་བར་དུ་ལེགས་པར་སྤངས། །འཁོར་བའི་རྒྱུན་ལས་ཡོངས་སུ་གྲོལ། །མི་ཡི་ལུས་ཐོབ་ཤིན་ཏུ་དཀའ། །སངས་རྒྱས་འབྱུང་དང་ཕྲད་པར་དཀའ། །ཇི་ལྟར་རྒྱ་མཚོ་ཆེན་པོའི་ནང་། །རུས་སྦལ་ལོང་བ་འབྱུང་བ་དེ། །ཤིང་གི་བུ་གར་མགོ་ཆུད་བཞིན། །སངས་རྒྱས་འབྱུང་བ་དེ་བས་དཀའ། །བདག་གིས་མཆོད་པ་གསོལ་བ་འདི། །བླ་མེད་འབྲས་བུ་ཐོབ་པར་སྨོན། །ཀུན་ནས་ཉོན་མོངས་ཐམས་ཅད་ནི། །སྙིང་པོ་མེད་པས་ཐམས་ཅད་བཅོམ། །བདག་ཉིད་ད་ལྟར་འདི་ཉིད་ན། །ལྷ་དང་མི་ཡི་ལུས་མི་རེ། །ཅི་སྟེ་ཐོབ་པར་གྱུར་ན་ཡང་། །དེ་ལ་དགའ་བ་མོས་པ་མེད། །བཅོམ་ལྡན་བདག་གི་མཆོད་བཞེས་པས། །ཤིན་ཏུ་དགའ་བ་དཔག་མ་མཆིས། །ཨེ་རཎྜ་ཡི་མེ་ཏོག་ལས། །ཙན་དན་བཟང་པོའི་དྲི་འབྱུང་བཞིན། །བདག་ནི་ཨེ་རཎ་འདྲ་བ་སྟེ། །བཅོམ་ལྡན་བདག་གི་མཆོད་བཞེས་པས། །ཙན་དན་བཟང་པོའི་བསུང་མངར་བཞིན། །དེ་བས་བདག་ནི་ཤིན་ཏུ་དགའ། །བདག་ནི་འབྲས་བུ་མངོན་དུ་ཐོབ། །བླ་མེད་མཆོག་གི་གནས་ཕྱིན་ཏེ། །ཚངས་པ་བརྒྱ་བྱིན་ལྷ་རྣམས་ཀྱང་། །ལྷགས་ནས་བདག་ལ་མཆོད་པ་བགྱིད། །འཇིག་རྟེན་བཅས་པ་ཐམས་ཅད་ནི། །སྡུག་བསྔལ་ཆེན་པོ་མྱ་ངན་སྐྱེས། །སངས་རྒྱས་བཅོམ་ལྡན་འདས་བཞུགས་པ། །ཡོངས་སུ་མྱ་ངན་འདའ་ཞེས་རྟོགས། །ཐམས་ཅད་འཐུན་པར་སྐད་ཆེན་པོས། །འཇིག་རྟེན་ཁ་ལོ་སྒྱུར་བ་མེད། །སེམས་ཅན་ཐམས་ཅད་མི་སྤང་ཞིང་། །སྲས་དང་འདྲ་བར་གཟིགས་སུ་གསོལ། །བཅོམ་ལྡན་དགེ་འདུན་འཁོར་རྣམས་ལ། །བླ་ན་མེད་པའི་ཆོས་སྟོན་པ། །ཇི་ལྟར་རྒྱ་མཚོ་ཆེན་པོའི་དབུས། །རིན་
ཆེན་རི་རབ་སྣང་བ་བཞིན། །བཅོམ་ལྡན་མི་ཤེས་ཡོངས་གཅོད་པ། །མ་རིག་པ་ཡི་མུན་སེལ་ཏེ། །ཇི་ལྟར་ནམ་མཁའ་བར་སྣང་ལ། །སྤྲིན་ཆོད་ཡོངས་སུ་བསིལ་བ་བཞིན། །བཅོམ་ལྡན་ཡོངས་སུ་སེལ་བ་ནི། །ཀུན་ནས་ཉོན་མོངས་ཐམས་ཅད་དེ། །ཇི་ལྟར་ཉི་མ་ཤར་ནས་སུ། །སྤྲིན་མེད་ཀུན་དུ་སྣང་བ་བཞིན། །ད་ལྟར་སེམས་ཅན་འདི་དག་ནི། །ཤིན་ཏུ་ངུ་བས་མིག་ཀྱང་སྐྲངས། །ཐམས་ཅད་འཁོར་བར་འཁོར་བ་ཡི། །སྡུག་བསྔལ་འབབ་ཀླུང་གཡེངས་པར་གྱུར། །དེ་བས་སངས་རྒྱས་བཅོམ་ལྡན་འདས། །འགྲོ་བའི་དད་པ་བསྐྱེད་པ་དང་། །འཁོར་བའི་སྡུག་བསྔལ་གཅད་པའི་ཕྱིར། །འཇིག་རྟེན་ཡུན་དུ་བཞུགས་པར་གསོལ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །ཁྱོད་ཀྱིས་སྨྲས་པ་བཞིན་ཏེ། སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་པ་ཡང་ཤིན་ཏུ་དཀའ་བ་ནི་མེ་ཏོག་ཨུ་དུམ་བཱ་ར་དང་འདྲའོ། །སངས་རྒྱས་དང་ཕྲད་ནས་དད་པ་སྐྱེ་བ་ཡང་དེ་བས་ཤིན་ཏུ་དཀའོ། །སངས་རྒྱས་ཡོངས་སུ་མྱ་ངན་ལས་འདའ་ཀར་མཆོད་པ་ཕུལ་བ་བཞེས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་པ་ཡང་དེ་བས་ཤིན་ཏུ་དཀའ་སྟེ། ཙུན་ད་ཁྱོད་མྱ་ངན་མ་བྱེད་པར་སྤྲོ་བ་སྐྱེད་ཅིག །དེ་བཞིན་གཤེགས་པས་མཆོད་པ་ནང་གི་ཐ་མ་འདི་བཞེས་ཏེ། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་གྱུར་པས་ཆོག་གི་བཅོམ་ལྡན་འདས་ལ་འཇིག་རྟེན་ན་ཡུན་དུ་བཞུགས་པར་གསོལ་བ་མ་འདེབས་ཤིག །ཁྱོད་ཀྱིས་སངས་རྒྱས་རྣམས་ཀྱི་སྤྱོད་ཡུལ་ཐམས་ཅད་མི་རྟག་ལ་འདུ་བྱེད་རྣམས་ཀྱི་མཚན་ཉིད་ཀྱང་དེའི་ཚུལ་དུ་རིག་པར་གྱིས་ཤིག །དེ་ནས་ཙུན་ད་ལ་ཚིགས་སུ་བཅད་དེ་བཀའ་སྩལ་པ། འཇིག་རྟེན་བཅས་པ་ཐམས་ཅད་ནི། །སྐྱེ་བ་ཡོད་ན་འཆི་བ་ཡོད། །ཚེ་ལོ་གྲངས་མེད་ཐུབ་པ་ཡང་། །ཐ་མར་ཟད་པར་རིག་པར་བྱ། །དར་བ་ཡོད་ན་རྒུད་པ་ཡོད། །འདུ་བ་ཡོད་ན་འབྲལ་བ་ཡོད། །ལང་ཚོ་དེ་ཡང་མི་རྟག་སྟེ། །དར་བའི་མདོག་ཀྱང་ནད་ཀྱིས་འཕྲོག །འཚོ་
བའི་ཚེ་ཡང་འཆི་བས་འཕྲོག །རྟག་པའི་ཆོས་ནི་གང་ཡང་མེད། །དབང་དུ་གྱུར་པའི་རྒྱལ་པོ་དག །བྱིན་དང་མཐུ་སྟོབས་ཟླ་མེད་ཀྱང་། །ཐམས་ཅད་འགྱུར་ཞིང་འཕོ་བས་ན། །འཚོ་བའི་སྲོག་ཀྱང་དེ་བཞིན་ནོ། །སྡུག་བསྔལ་འཁོར་ལོ་མཐའ་མེད་དེ། །འཁོར་བར་འཁོར་བ་རྒྱུན་མི་འཆད། །ཁམས་གསུམ་ཐམས་ཅད་རྟག་པ་མེད། །སྲིད་པ་ཐམས་ཅད་བདེ་མ་ཡིན། །སྲིད་པའི་མཚན་ཉིད་དངོས་པོ་ནི། །ཐམས་ཅད་སྟོང་པ་མེད་པ་སྟེ། །འཇིག་པའི་ཆོས་ཅན་འགྱུར་ཞིང་འཕོ། །མྱ་ངན་སྐྱོན་དང་རྟག་ཏུ་བཅས། །སྐྱོན་མང་འཇིག་པའི་ཆོས་ཅན་ཏེ། །རྒ་དང་ན་འཆིས་རྟག་ཏུ་གཙེས། །སྲིད་པའི་ཆོས་ནི་མཐའ་ཡས་པས། །འགྱུར་ཞིང་འཕོ་བའི་དགྲ་དང་བཅས། །ཉོན་མོངས་ཀུན་དུ་གླགས་པ་ནི། །ཇི་ལྟར་དར་གྱི་སྲིན་བུ་བཞིན། །དེ་ལ་མཁས་པ་ཤེས་རབ་ཅན། །སུ་ཞིག་དགའ་ཞིང་མོས་པར་བྱེད། །ལུས་འདི་སྡུག་བསྔལ་ཕུང་པོ་སྟེ། །ཐམས་ཅད་མི་གཙང་བཙོག་པའོ། །སྐྱོན་གྱིས་བཅིངས་ཤིང་རྨ་དང་ལྡན། །ཕན་པའི་དོན་ནི་ཡེ་ནས་མེད། །ཡར་ན་ལྷ་ཡི་ལུས་བར་དུ། །ཐམས་ཅད་དེ་དང་འདྲ་བས་ན། །འདོད་པ་ཐམས་ཅད་མི་རྟག་པས། །ང་ནི་དེ་ལ་ཆགས་མི་བྱེད། །འདོད་སྤངས་ལེགས་པར་ཡིད་བྱས་ན། །ཡང་དག་བདེན་པ་རིག་པར་འགྱུར། །སྲིད་པ་ཡོངས་སུ་གཅོད་པ་ནི། ། དེང་འདིར་ཡོངས་སུ་མྱ་ངན་འདའ། །ང་ནི་སྲིད་པའི་ཕ་རོལ་ཕྱིན། །སྡུག་བསྔལ་ཀུན་ལས་ཤིན་ཏུ་འདས། །དེ་བས་ད་ལྟར་ཐོབ་པ་ནི། །བླ་མེད་བདེ་བ་འབའ་ཞིག་གོ །དེ་ཡི་རྒྱུ་དང་རྐྱེན་གྱིས་ན། །སྤྲོས་པ་མེད་པའི་མཐའ་རིག་སྟེ། །བཅིང་བ་ཐམས་ཅད་ཡོངས་བཅད་ནས། །དེང་འདིར་ཡོངས་སུ་མྱ་ངན་འདའ། །ང་ལ་རྒ་ཤི་ན་བ་མེད། །སྐུ་ཚེའི་ཚད་ཀྱང་ཟད་མི་ཤེས། །དེང་དུ་མྱ་ངན་འདས་པ་ནི། །ཇི་ལྟར་མེ་ཆེན་ཤི་བ་བཞིན། །ཙུན་ད་ཁྱོད་ནི་མ་རྟོག་ཤིག །དེ་བཞིན་གཤེགས་པའི་དོན་རྣམས་ལ། །དེ་བཞིན་གཤེགས་པའི་སྙིང་པོ་འདི། །རི་རབ་བཞིན་དུ་བརྟག་པར་བྱ། །ང་ནི་མྱ་ངན་འདས་ཞུགས་ཏེ། །མཆོག་གི་
བདེ་བ་མྱོང་བར་འགྱུར། །སངས་རྒྱས་རྣམས་ཀྱི་ཆོས་ཉིད་ཡིན། །དེ་བས་ངུ་བར་མི་བྱའོ། །དེ་ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་དེ་བཞིན་ཏེ། དེ་དེ་བཞིན་ནོ། །བཅོམ་ལྡན་འདས་ཀྱིས་གསུངས་པ་བཞིན་ཏེ། བདག་འཚལ་བའི་ཤེས་རབ་ཤིན་ཏུ་ཆུང་བ་ནི་དཔེར་ན་སྦྲང་བུ་དང་འདྲ་བ་བདག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་གཤེགས་པའི་དོན་ཟབ་མོ་ག་ལ་རིག །བཅོམ་ལྡན་འདས་བདག་ནི་ཀླུང་ཆེན་པོ་དང་འདྲ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ནས་ཉོན་མོངས་པ་དང་ཟག་པ་ཐམས་ཅད་བས་པ་འཇམ་དཔལ་གཞོན་ནུར་གྱུར་པ་ལ་སོགས་པ་དང་མཉམ་པར་གྱུར་ཏོ། །བཅོམ་ལྡན་འདས་དཔེར་ན་གསར་བུ་རབ་ཏུ་བྱུང་བ་བསྙེན་པར་མ་རྫོགས་མོད་ཀྱི། དགེ་འདུན་གྱི་གྲངས་སུ་མཆི་བ་དང་འདྲ་བར་བདག་ཀྱང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བྱིན་གྱི་རླབས་ཀྱིས་དེ་ལྟར་བྱང་ཆུབ་སེམས་དཔའ་ཆེན་པོ་དེ་དག་གི་གྲངས་སུ་གཏོགས་པར་གྱུར་ཏེ། དེ་བས་ན་བདག་ནི་དེ་བཞིན་གཤེགས་པ་ཡུན་དུ་འཇིག་རྟེན་ན་བཞུགས་ཤིང་། མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་དཔེར་ན་མི་བཀྲེས་པ་དེ་ནི་སླར་སློན་མི་གདའ་བ་སྟེ། བཅོམ་ལྡན་འདས་བདག་ཀྱང་དེ་དང་འདྲ་ན་མྱ་ངན་ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ་ལོ། །དེ་ནས་འཇམ་དཔལ་གཞོན་ནུར་གྱུར་པས་ཙུན་ད་ལ་འདི་སྐད་ཅེས་སྨྲས་སོ། །ཙུན་ད་ཁྱོད་འདི་སྐད་དུ་དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་ཤིང་ཡོངས་སུ་མྱ་ངན་ལས་མི་འདའ་བར་གསོལ་བ། ཇི་ལྟར་མི་ཤིན་ཏུ་བཀྲེས་པ་དེ་སྐྱུག་བྲོ་མི་སྲིད་དོ་ཞེས་དེ་སྐད་མ་ཟེར་བར་ཁྱོད་འདུ་བྱེད་རྣམས་ཀྱི་མཚན་ཉིད་ལ་ཤིན་ཏུ་རྟོགས་ཤིག །དེ་ལྟར་འདུ་བྱེད་ལ་བརྟགས་ན་སྟོང་པ་ཉིད་ཀྱི་ཏིང་ངེ་འཛིན་དང་ལྡན་པར་འགྱུར་གྱིས། ཡང་དག་པའི་ཆོས་འདོད་པ་དག་དེ་ལྟ་བུའི་ཚུལ་དུ་བསླབ་པར་བྱའོ། །ཙུན་དས་འཇམ་དཔལ་ལ་སྨྲས་པ། དེ་བཞིན་གཤེགས་པ་ཞེས་བྱ་བ་ནི་ལྷ་དང་མིའི་ནང་ན་མཆོག་ཏུ་གྱུར། ཕུལ་དུ་གྱུར་ན་ཅི་དེ་བཞིན་གཤེགས་
པ་འདུ་བྱེད་ལགས་སམ། ཅི་སྟེ་འདུ་བྱེད་ལགས་ན་སྐྱེ་ཞིང་འགོག་པའི་ཆོས་ཅན་དུ་འགྱུར་ཏེ། དཔེར་ན་ཆུའི་ཆུ་བུར་ལྟར་དེ་མ་ཐག་ཏུ་འབྱུང་ལ། དེ་མ་ཐག་ཏུ་འཇིག་སྟེ། འཁོར་བར་འཁོར་བ་ནི་ཤིང་རྟའི་འཁོར་ལོ་དང་མཚུངས་ཏེ། འདུ་བྱེད་ཐམས་ཅད་ཀྱང་དེ་དང་མཚུངས་སོ། །བདག་གིས་སྔོན་ཐོས་པ་ལྟར་ན་ལྷ་རྣམས་ཀྱི་ཚེའི་ཚད་ཀྱང་ཤིན་ཏུ་རིང་ངོ་ཞེས་འབྱུང་ན་ཅིའི་སླད་དུ་བཅོམ་ལྡན་འདས་ལྷའི་ལྷ་སྐུ་ཚེ་རབ་ཏུ་ཐུང་སྟེ། ལོ་བརྒྱར་ཡང་མི་བཞུགས་པར་གྱུར། དཔེར་ན་དབང་དུ་གྱུར་པའི་གྲོང་རྡལ་གྱི་གཙོ་བོ་ཡང་དབང་དང་མཐུ་ཡོད་པས་ཕས་རྒོལ་བ་ཐུལ་ཏེ། ནམ་བསོད་ནམས་ཟད་དེ་དབུལ་ཕོངས་པར་གྱུར་ན་ཀུན་གྱིས་བརྙས་ཤིང་ཐོ་བཙམས་ཏེ་བཀོལ་བར་འགྱུར་རོ། །དེ་ཅིའི་སླད་དུ་ཞེ་ན། བྱིན་དང་མཐུ་ཉམས་པའི་ཕྱིར་རོ། །འོ་ན་བཅོམ་ལྡན་འདས་ཀྱང་འདུ་བྱེད་རྣམས་དང་འཐུན་པར་འགྱུར་རོ། །ཇི་སྟེ་འདུ་བྱེད་རྣམས་དང་འཐུན་པར་གྱུར་ན་ལྷའི་ལྷ་ཞེས་ཀྱང་གདགས་སུ་མི་རུང་ངོ་། །དེ་ཅིའི་སླད་དུ་ཞེ་ན། འདུ་བྱེད་རྣམས་ནི་སྐྱེ་ཤིའི་ཆོས་སོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུ་བྱེད་དང་འཐུན་པར་མི་བལྟའོ། །འཇམ་དཔལ་མཁྱེན་བཞིན་དུ་གསུང་ངམ་འོན་ཏེ་མི་མཁྱེན་པས་དེ་བཞིན་གཤེགས་པ་འདུ་བྱེད་རྣམས་དང་འཐུན་ནོ་ཞེས་གསུངས། ཅི་སྟེ་དེ་བཞིན་གཤེགས་པ་འདུ་བྱེད་རྣམས་དང་འཐུན་ན་ལྟ། དེ་བཞིན་གཤེགས་པ་ནི་འཇིག་རྟེན་གསུམ་ན་ལྷའི་ལྷ་སྟེ། དབང་དུ་གྱུར་པའི་ཆོས་ཀྱི་རྒྱལ་པོ་ཞེས་གདགས་སུ་མི་རུང་ངོ་། །དཔེར་ན་རྒྱལ་པོ་ཞིག་ལ་གྱད་སྟོབས་པོ་ཆེ་གཅིག་གིས་ཕས་རྒོལ་བ་སྟོང་ཐུབ་སྟེ་གང་གིས་ཀྱང་མི་ཐུབ་ན་དེ་ནི་མི་སྟོང་ཐུབ་པའི་གྱད་ཅེས་བྱ་སྟེ། གྱད་དེ་ལ་ནི་རྒྱལ་པོས་ཀྱང་གནང་ལ་བྱ་དགའ་ཡང་གཞན་པས་ལྷག་པར་སྩལ་ཏོ། །གྱད་དེས་མི་སྟོང་ཐུབ་ཅེས་བྱ་བ་ཡང་གྱད་དེས་སྟོབས་འབའ་ཞིག་གིས་མི་སྟོང་ཐུབ་པ་མ་ཡིན་གྱི། རྩལ་རྣམ་པ་སྣ་ཚོགས་ཀྱིས་མི་སྟོང་ལས་ཕུལ་དུ་གྱུར་པས་ན་སྟོང་ཐུབ་པའི་གྱད་ཅེས་བཏགས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉོན་མོངས་པའི་བདུད་དང་། ཕུང་པོའི་བདུད་
དང་། ལྷའི་བུའི་བདུད་དང་། འཆི་བདག་གི་བདུད་ཡོངས་སུ་བཅོམ་པས་དེ་བཞིན་གཤེགས་པ་ནི་ཁམས་གསུམ་ན་ཕུལ་དུ་གྱུར་པའོ་ཞེས་གསུངས་ཏེ། ཇི་ལྟར་གྱད་གཅིག་གིས་མི་སྟོང་ཐུབ་པ་བཞིན་ནོ། །དེ་བས་ན་དེ་བཞིན་གཤེགས་པ་ཡང་རྣམ་པ་སྣ་ཚོགས་ཀྱི་ཡོན་ཏན་ཚད་མེད་པ་དང་ལྡན་པས་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བཏགས་སོ། །འཇམ་དཔལ་རྣམ་པར་རྟོག་པས་དེ་བཞིན་གཤེགས་པ་ལ་འདུ་བྱེད་རྣམས་དང་འཐུན་ནོ་ཞེས་རྣམ་པར་རྟོག་པར་མི་རིགས་སོ། །དཔེར་ན་ཁྱིམ་བདག་ཕྱུག་པོ་ཞིག་གི་བུ་ཁྱེའུ་ཞིག་བཙས་ནས་མཚན་མཁན་གྱིས་བལྟས་ཏེ། ཚེ་ཐུང་ངོ་ཞེས་དཔྱད་ན་ཕ་མས་དེ་སྐད་ཅེས་ཐོས་མ་ཐག་ཏུ་རིགས་འཚོབ་པར་མི་འགྱུར་བར་ཤེས་པས་དེ་ལ་སྡུག་པར་མི་བྱེད་དེ། རྩྭ་ཙམ་གྱི་ཚོད་དུ་འཛིན་ཏོ། །གང་ཚེ་ཐུང་བ་དེ་ལ་ནི་དགེ་སྦྱོང་དང་། བྲམ་ཟེ་ལ་སོགས་པའི་ཁྱེའུ་དང་། བུ་མོ་ཆེ་ཆུང་གི་བར་དུ་བཙུན་པར་མི་བྱེད་དོ། །ཅི་སྟེ་དེ་བཞིན་གཤེགས་པ་འདུ་བྱེད་རྣམས་དང་འཐུན་ན་ལྟ། འཇིག་རྟེན་དུ་བཅས་པ་ལྷ་དང་མི་དང་། སེམས་ཅན་ཐམས་ཅད་ཀྱིས་ཀྱང་བཙུན་པར་མི་བྱེད་དོ། །དེ་བཞིན་གཤེགས་པས་གསུངས་པའི་ཡང་དག་པའི་ཆོས་མི་འགྱུར་མི་འཕོ་བ་ཡང་འཛིན་པ་མེད་པར་འགྱུར་རོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུ་བྱེད་རྣམས་དང་འཐུན་ནོ་ཞེས་གསུང་བ་མི་རིགས་སོ། །འཇམ་དཔལ་དཔེར་ན་བུད་མེད་དབུལ་མོ་གནས་མེད་པ། རྟེན་མེད་པ། སྐྱབས་མེད་པ་ཞིག་ནད་ཀྱིས་ཀྱང་གཟིར་ལ། ཟས་དང་སྐོམ་གྱིས་ཀྱང་ཕོངས་ཏེ་འཁྱམས་ཤིང་འགྲོ་བ་གཅིག་གི་ཁྱིམ་དུ་ཕྱིན་ནས་བུ་བཙས་ན། ཁྱིམ་བདག་དེས་འདུག་ཏུ་མི་སྟེར་ཏེ་སྐྲོད་དོ། །བུད་མེད་དེ་བུ་བཙས་ནས་རིང་པོ་མ་ལོན་ཀྱང་བུ་པང་དུ་ཐོགས་ཏེ་ཡུལ་གཞན་དུ་འགྲོ་བ་ལས་ལམ་དུ་རླུང་དང་ཆར་པ་དང་ལྷགས་པས་ཉོན་མོངས་པ། སྦྲང་བུ་དང་། ཤ་སྦྲང་དང་། སྦྲུལ་གདུག་པ་དང་ཕྲད་དམ། ལམ་གྱི་བར་ཆུ་ཀླུང་གང་གཱས་ཆོད་ཀྱང་ཆུ་ཀླུང་ཤིན་ཏུ་ཟབ་ཅིང་དྲག་པ་དེ་ལས་བུ་པང་དུ་ཐོགས་ཏེ་འབོག་གོ། །
དེ་ནས་མ་སྨད་གཉིས་ཀ་ཆུའི་ནང་དུ་ནུབ་བོ། །དེ་ལྟར་བུད་མེད་དེ་བུ་ལ་བྱམས་ཤིང་སྡུག་པས་བསམས་པའི་བསོད་ནམས་ཀྱིས་ཤི་མ་ཐག་ཏུ་ཚངས་པའི་ལྷར་སྐྱེས་སོ། །འཇམ་དཔལ་རིགས་ཀྱི་བུ་དག་དམ་པའི་ཆོས་བསྲུང་བའི་ཕྱིར་དེ་བཞིན་གཤེགས་པ་ལ་འདུ་བྱེད་རྣམས་དང་འཐུན་ནོ་ཞེའམ། འདུ་བྱེད་རྣམས་དང་མི་འཐུན་ནོ་ཞེས་བརྗོད་པར་མི་བྱའི་བདག་ནི་གཏི་མུག་གིས་ལྡོངས་པས་ཤེས་རབ་ཀྱི་མིག་མེད་དེ། དེ་བཞིན་གཤེགས་པའི་དམ་པའི་ཆོས་ནི་བསམ་གྱིས་མི་ཁྱབ་པས་མི་རྟོག་སྟེ། དེ་བས་ན་དེ་བཞིན་གཤེགས་པ་ནི་ངེས་པར་འདུས་བྱས་ཞེའམ། ངེས་པར་འདུས་མ་བྱས་ཞེས་བརྗོད་པར་མི་བྱའོ། །གང་ཡང་དག་པར་ལྟ་བས་ནི་དེ་བཞིན་གཤེགས་པ་ལ་ངེས་པར་འདུས་མ་བྱས་པའོ་ཞེས་བརྗོད་པར་མི་བྱའོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་དགེ་བར་འགྱུར་བའི་ཆོས་བསྐྱེད་ཅིང་འགྲོ་བ་མང་པོ་ལ་ཐུགས་བརྩེ་བའི་ཕྱིར་རོ། །ཇི་ལྟར་བུད་མེད་དབུལ་མོ་དེ་ཀླུང་གང་གཱ་ལ་རྒལ་བ་ན་བུ་སྡུག་པར་བསམས་ཏེ། ལུས་དང་སྲོག་ཀྱང་ཡལ་བར་གྱུར་པ་དང་འདྲ་བར་རིགས་ཀྱི་བུ་ཆོས་བསྲུང་བའི་བྱང་ཆུབ་སེམས་དཔའ་ཡང་དེ་བཞིན་དུ་ལུས་དང་། སྲོག་ལ་བབ་ཀྱི་བར་དུ་དེ་བཞིན་གཤེགས་པ་ལ་འདུས་བྱས་དང་འཐུན་ཞེའམ། དེ་བཞིན་གཤེགས་པ་ལ་འདུས་མ་བྱས་དང་འཐུན་ཞེས་བརྗོད་པར་མི་བྱའོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་གསུམ་པ། དེ་ལྟར་དེ་བཞིན་གཤེགས་པ་འདུས་མ་བྱས་པ་དང་འཐུན་ནོ་ཞེས་བརྗོད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བ་ནི་ཇི་ལྟར་བུད་མེད་དབུལ་མོ་དེ་ཚངས་པའི་ལྷར་སྐྱེས་པ་བཞིན་ནོ། །དེ་ཅིའི་ཕྱིར་ཞེ་ན། ཆོས་བསྲུང་བའི་ཕྱིར་རོ། །དེ་ལ་ཆོས་བསྲུང་བ་གང་ཞེ་ན། དེ་བཞིན་གཤེགས་པ་ནི་འདུས་མ་བྱས་པའོ་ཞེས་སྨྲ་བའོ། །རིགས་ཀྱི་བུ་གང་ཟག་དེ་ནི་རྣམ་པར་གྲོལ་བ་ལ་མི་རེ་མོད་ཀྱི། རྣམ་པར་གྲོལ་བ་རང་ཐོབ་སྟེ། ཇི་ལྟར་བུད་མེད་དབུལ་མོ་དེ་ཚངས་པའི་ལྷར་མི་རེ་མོད་ཀྱི། ཚངས་པའི་ལྷར་རང་སྐྱེས་
སོ། །འཇམ་དཔལ་འདི་ལྟ་སྟེ་དཔེར་ན་མི་ཞིག་ལམ་རིང་པོར་འདྲོན་དུ་སོང་བ་ལས་ལམ་དུ་ངལ་ཆད་དེ་གཞན་གྱི་ཁྱིམ་དུ་ཉལ་ཉལ་བ་ལས་དེའི་ཁྱིམ་མེས་འབར་ཏེ་རབ་ཏུ་འཇིགས་སྐྲག་ནས་དེ་འདི་སྙམ་དུ་བདག་ནི་གདོན་མི་ཟ་བར་འཆིའོ་སྙམ་བསམས་ནས་ཁྲེལ་ཞིང་ངོ་ཚ་བ་དང་ལྡན་པའི་ཕྱིར་གོས་ཀྱིས་ལུས་དཀྲིས་སོ། །དེར་ཚེ་འཕོས་ནས་སུམ་ཅུ་རྩ་གསུམ་གནམ་གྱི་ལྷར་སྐྱེས་སོ། །དེ་ནས་ཡང་ལན་བརྒྱད་ཅུའི་བར་དུ་ཚངས་པ་ཆེན་པོའི་རྒྱལ་པོར་སྐྱེས་སོ། །དེ་ནས་ལོ་བརྒྱ་སྟོང་ཚང་བར་མིའི་ནང་དུ་འཁོར་ལོས་སྒྱུར་བའི་རྒྱལ་པོར་སྐྱེས་ཏེ། གང་ཟག་དེ་ནམ་དུ་ཡང་ངན་སོང་གསུམ་དུ་མ་སྐྱེས་ཀྱི་གོང་ནས་གོང་དུ་རབ་ཏུ་བདེ་བའི་གནས་སུ་སྐྱེས་སོ། །དེ་བས་ན་འཇམ་དཔལ་རིགས་ཀྱི་བུ་དག་ཁྲེལ་ཞིང་ངོ་ཚ་བ་དང་ལྡན་པ་རྣམས་ཀྱིས་སངས་རྒྱས་བཅོམ་ལྡན་འདས་ལ་འདུས་བྱས་རྣམས་དང་འཐུན་པར་མི་བལྟའོ། །འཇམ་དཔལ་མུ་སྟེགས་ཅན་ངན་པར་ལྟ་བ་ནི་དེ་བཞིན་གཤེགས་པ་ལ་འདུས་བྱས་དང་འཐུན་ནོ་ཞེས་སྨྲའི་ཚུལ་ཁྲིམས་སྲུང་བའི་དགེ་སློང་དག་ནི་དེ་ལྟར་དེ་བཞིན་གཤེགས་པ་ལ་འདུས་བྱས་པ་ཡིན་པར་མི་ལྟའོ། །ཅི་སྟེ་དེ་བཞིན་གཤེགས་པ་ལ་འདུས་བྱས་ཡིན་ནོ་ཞེས་བརྗོད་ན་དེ་ནི་བརྫུན་དུ་སྨྲ་བ་ཡིན་ཏེ། གང་ཟག་དེ་ནི་ཤི་མ་ཐག་ཏུ་སེམས་ཅན་དམྱལ་བར་སྐྱེ་བར་རིག་པར་བྱ་བ་ནི་ཇི་ལྟར་གང་ཟག་བདག་གི་ཁྱིམ་ན་གནས་པ་བཞིན་ནོ། །འཇམ་དཔལ་དེ་བཞིན་གཤེགས་པ་ནི་ཡང་དག་པར་འདུས་མ་བྱས་པའི་ཆོས་ཅན་ཡིན་པས་འདུས་བྱས་ཞེས་བརྗོད་པར་མི་བྱའོ། །འཇམ་དཔལ་དེང་སླན་ཆད་འཁོར་བར་འཁོར་བ་ན་ཤེས་པ་མེད་པར་སྤངས་ཏེ། ཡང་དག་པའི་ཡེ་ཤེས་བཙལ་བར་བྱའོ། །དེ་བཞིན་གཤེགས་པ་ནི་འདུས་མ་བྱས་པ་སྟེ། གང་ཞིག་དེ་བཞིན་གཤེགས་པ་ལ་དེ་ལྟ་བུའི་ཚུལ་དུ་ལྟ་ན་མཚན་སུམ་ཅུ་རྩ་གཉིས་དང་ལྡན་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །དེ་ནས་འཇམ་དཔལ་གཞོན་ནུར་གྱུར་པས་ཙུན་ད་ལ་སྨྲས་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཤིན་ཏུ་ཚེ་རིང་བར་འགྱུར་བའི་རྒྱུ་
མངོན་སུམ་དུ་གྱུར་ཏེ། དེ་བཞིན་གཤེགས་པ་ནི་རྟག་པའི་ཆོས་ཅན། མི་འགྱུར་མི་འཕོ་བའི་ཆོས་ཅན། འདུས་མ་བྱས་པའི་ཆོས་སུ་རྟོག་པ་ལེགས་སོ། །ཁྱོད་ཀྱིས་དེ་བཞིན་གཤེགས་པ་ལ་འདུས་བྱས་ཀྱི་མཚན་ཉིད་དུ་མ་བརྗོད་པ་ལེགས་སོ། །ཇི་ལྟར་མེས་ཚིག་པའི་གང་ཟག་དེ་ཁྲེལ་ཞིང་ངོ་ཚ་བ་དང་ལྡན་པས་གོས་ཀྱིས་ལུས་གཡོགས་པ་དང་། བསམ་པ་དེ་དགེ་བས་སུམ་ཅུ་རྩ་གསུམ་གནམ་གྱི་ལྷར་སྐྱེས་ཏེ། ཚངས་པའི་རྒྱལ་པོ་དང་། འཁོར་ལོས་སྒྱུར་བའི་རྒྱལ་པོར་གྱུར་ཏེ། རྟག་ཏུ་གནས་བདེ་བར་སྐྱེས་ཀྱི་ངན་སོང་དུ་མ་སྐྱེས་སོ། །དེ་བཞིན་དུ་ཁྱོད་ཀྱང་དེ་བཞིན་གཤེགས་པའི་འདུས་བྱས་ཀྱི་མཚན་ཉིད་མ་བརྗོད་པས་ཕྱི་མ་མ་འོངས་པའི་དུས་སུ་གདོན་མི་ཟ་བར་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། མ་འདྲེས་པའི་ཆོས་བཅྭ་བརྒྱད་དང་། ཚེ་ཚད་མེད་པ་དང་། འཁོར་བར་མི་གནས་པ་དང་། རབ་ཏུ་བདེ་བ་དང་། རིང་པོར་མི་ཐོགས་པར་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །ཙུན་ད་དེ་ནི་དེ་བཞིན་གཤེགས་པས་རྒྱས་པར་གསུང་བར་འགྱུར་གྱིས་བདག་ཅག་གཉིས་ཀས་དེ་བཞིན་གཤེགས་པའི་འདུས་བྱས་ཀྱི་མཚན་ཉིད་མི་བརྗོད་པར་བྱའོ། །འདུས་བྱས་དང་འདུས་མ་བྱས་པ་འདི་རེ་ཞིག་ཞོག་ལ་བསོད་སྙོམས་ཅི་འབྱོར་པ་མྱུར་དུ་ཕུལ་ཅིག །སྦྱིན་པ་འདི་ནི་སྦྱིན་པ་བྱིན་པའི་ནང་ན་ཕུལ་དུ་འགྱུར་རོ། །དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལམ་རིང་པོ་ནས་འོངས་པ་ངལ་ཆད་པ་དག་ལ་ཡོངས་སུ་དག་པའི་སེམས་ཀྱིས་ཅི་འདོད་པ་མྱུར་དུ་ཕུལ་ཅིག་དང་། ཁྱོད་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པའི་ས་བོན་དུ་འགྱུར་རོ། །ཙུན་ད་གང་གིས་ནང་གི་ཐ་མར་སངས་རྒྱས་དང་དགེ་འདུན་ལ་མང་ཡང་རུང་། ཉུང་ཡང་རུང་། ཆོག་ཀྱང་རུང་། མི་ཆོག་ཀྱང་རུང་། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་ཀར་མཆོད་པ་ཕུལ་ཅིག །ཙུན་དས་འཇམ་དཔལ་ལ་སྨྲས་པ། ཅིའི་ཕྱིར་བསོད་སྙོམས་ལ་ཆགས་ཏེ། མང་བ་དང་། ཉུང་བ་དང་། ཆོག་པ་དང་། མ་ཆོག་པ་
དང་། དུས་སུ་ཕུལ་ཅིག་ཅེས་གསུང་། འཇམ་དཔལ་དེ་བཞིན་གཤེགས་པ་སྔོན་ལོ་དྲུག་གི་བར་དུ་དཀའ་བ་སྤྱོད་ཀྱང་བཟོད་ན། དེང་འདིར་སྐད་ཅིག་ཐང་ཅིག་ཙམ་ཐོགས་པ་ལྟ་ཅི་སྨོས། འཇམ་དཔལ་ཅི་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱིས་བསོད་སྙོམས་འདི་ཡང་དག་པར་བཞེས་སོ་སྙམ་སེམས་སམ། བདག་ནི་དེ་བཞིན་གཤེགས་པའི་སྐུ་འདི་ངེས་པར་ཆོས་ཀྱི་སྐུ་ཡིན་གྱི། ཟས་ཀྱི་སྐུ་མ་ཡིན་པར་ཤེས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །དེ་དེ་བཞིན་ནོ། །དེ་དེ་བཞིན་ཏེ། ཙུན་དས་སྨྲས་པ་བཞིན་ནོ། །ཙུན་ད་ཤིན་ཏུ་ལེགས་སོ། །ཁྱོད་ནི་མཆོག་གི་ཡེ་ཤེས་ཆེན་པོ་དང་ལྡན་ཏེ། ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོ་ཡང་ལེགས་པར་རྟོགས་སོ། །འཇམ་དཔལ་གྱིས་ཙུན་ད་ལ་སྨྲས་པ། ཁྱོད་ཀྱིས་དེ་བཞིན་གཤེགས་པ་ལ་འདུས་མ་བྱས་པར་རྟོགས་པ་ནི་དེ་བཞིན་གཤེགས་པའི་སྐུ་ཚེའི་ཚད་ནི་ཤིན་ཏུ་རིང་བས་དེ་ལྟ་བུའི་ཚུལ་དུ་ཤེས་ན་དེ་བཞིན་གཤེགས་པས་ཀྱང་ཁྱོད་ལ་སྤྲོ་བ་གནང་བར་གྱུར་ཏོ། །ཙུན་དས་སྨྲས་པ། བདག་འབའ་ཞིག་ལ་སྤྲོ་བ་གནང་བ་མ་ཡིན་གྱི་སེམས་ཅན་ཐམས་ཅད་ལ་ཡང་སྤྲོ་བ་གནང་བ་ཡིན་ནོ། །འཇམ་དཔལ་གྱིས་སྨྲས་པ། དེ་བཞིན་གཤེགས་པས་ཁྱོད་དང་བདག་དང་སེམས་ཅན་ཐམས་ཅད་ལ་ཡང་སྤྲོ་བ་གནང་བ་ཡིན་ནོ། །ཙུན་དས་སྨྲས་པ། འཇམ་དཔལ་དེ་བཞིན་གཤེགས་པས་སྤྲོ་བ་གནང་ངོ་ཞེས་མ་ཟེར་ཅིག །སྤྲོ་བ་ཞེས་བྱ་བ་ནི་ཕྱིན་ཅི་ལོག་ཏུ་འདུ་ཤེས་པའོ། །གང་ཕྱིན་ཅི་ལོག་ཏུ་འདུ་ཤེས་པ་ནི་འཁོར་བའོ། །གང་འཁོར་བ་དེ་ནི་འདུས་བྱས་ཀྱི་ཆོས་ཅན་ནོ། །དེ་བས་ན་འཇམ་དཔལ་དེ་བཞིན་གཤེགས་པ་ལ་འདུས་བྱས་སུ་མི་བལྟའོ། །ཅི་སྟེ་དེ་བཞིན་གཤེགས་པ་ལ་འདུས་བྱས་ཡིན་པར་སྨྲས་ན་སྐྱེས་བུ་ཁྱོད་དང་བདག་ཀྱང་ཕྱིན་ཅི་ལོག་སྤྱོད་པར་གྱུར་ཏོ། །འཇམ་དཔལ་དེ་བཞིན་གཤེགས་པ་ལ་ནི་སྡུག་པར་དགོངས་པ་མེད་དོ། །སྡུག་པར་སེམས་པ་ནི་དཔེར་ན་བ་བེའུ་ལ་སྡུག་པར་སེམས་
ཏེ། ལྟོགས་སམ་སྐོམ་ཡང་འགྲོ་བཞིན་དུ་རྩྭ་དང་ཆུ་ཚོལ་ཏེ། ཆོག་ཀྱང་རུང་། མ་ཆོག་ཀྱང་རུང་། དེ་མ་ཐག་ཏུ་བེའུ་ཚོལ་ཞིང་འོང་ངོ་། །སངས་རྒྱས་བཅོམ་ལྡན་འདས་ལ་ནི་དེ་ལྟ་བུའི་དགོངས་པ་མི་མངའི་ཐམས་ཅད་ལ་སྒྲ་གཅན་འཛིན་དང་འདྲ་བར་གཟིགས་སོ། །གང་དེ་ལྟར་དགོངས་པ་དེ་ནི་སངས་རྒྱས་རྣམས་ཀྱི་ཡེ་ཤེས་ཀྱི་སྤྱོད་ཡུལ་ལོ། །འཇམ་དཔལ་འདི་ལྟ་སྟེ། དཔེར་ན་རྒྱལ་པོ་ཆེན་པོའི་རྟ་ཤིན་ཏུ་དུལ་བ་ལས་བཅས་པའི་ཤིང་རྟ་ལ་བོང་བུའི་ཤིང་རྟས་སླེབས་སུ་རེ་བ་ནི་གནས་མེད་དོ། །སྐྱེས་བུ་ཁྱོད་དང་བདག་ཀྱང་དེ་དང་འདྲ་སྟེ། དེ་བཞིན་གཤེགས་པའི་དགོངས་པ་ཟབ་མོའི་མཐའ་ཆུབ་པར་རྟོགས་སུ་རེ་བ་ཡང་གནས་མེད་དོ། །འཇམ་དཔལ་འདི་ལྟ་སྟེ་དཔེར་ན་བྱ་ནམ་མཁའ་ལྡིང་གི་རྒྱལ་པོ་སྟེང་གི་ནམ་མཁའ་ལ་དཔག་ཚད་གྲངས་མེད་པ་ཞིག་ལས་འཕགས་ཏེ། འོག་ཏུ་རྒྱ་མཚོ་ལ་བལྟས་ན་ཆུའི་ནང་ན་གནས་པ་ཉ་དང་། རུས་སྦལ་དང་། ཁོ་གོར་བབ་ཤ་དང་། ཆུ་སྲིན་དང་། ཀླུ་ལ་སོགས་པ་ཆུ་ལ་གནས་པའི་རིས་སུ་གཏོགས་པ་ཐམས་ཅད་གསལ་བར་མཐོང་བ་ནི་ཇི་ལྟར་མེ་ལོང་གསལ་བའི་ནང་ན་གཟུགས་བརྙན་སྣང་བ་དང་འདྲ་སྟེ། བུས་པ་ཤེས་པ་ཆུང་བ་དག་གིས་ནི་དཔག་ནུས་པ་མ་ཡིན་ནོ། །དེ་ལྟར་དེས་མི་མཐོང་བ་བཞིན་དུ་སྐྱེས་བུ་ཁྱོད་དང་བདག་ཀྱང་དེ་དང་འདྲ་སྟེ། དེ་བཞིན་གཤེགས་པའི་ཡེ་ཤེས་ལ་དཔག་ནུས་པ་མ་ཡིན་ནོ། །འཇམ་དཔལ་གྱིས་ཙུན་ད་ལ་སྨྲས་པ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ཏེ། ངས་དོན་འདི་དག་མ་རྟོགས་པ་ནི་མ་ཡིན་གྱི་ཁྱོད་དང་བྱང་ཆུབ་སེམས་དཔའ་རྣམས་བསྟན་པར་ཟད་དོ། །དེའི་ཚེ་བཅོམ་ལྡན་འདས་ཀྱིས་ཞལ་གྱི་སྒོ་ནས་འོད་ཟེར་རྣམ་པ་སྣ་ཚོགས་བཀྱེ་ནས་འོད་དེས་འཇམ་དཔལ་གྱི་ལུས་ལ་ཡོངས་སུ་སྣང་བར་བྱས་སོ། །འཇམ་དཔལ་ལ་འོད་དེས་རེག་མ་ཐག་ཏུ་དངོས་པོ་ཇི་ལྟ་བ་ཉིད་མོད་ལ་རྟོགས་ནས་ཙུན་ད་ལ་འདི་སྐད་ཅེས་སྨྲས་སོ། །དེ་བཞིན་གཤེགས་པས་ལྟས་འདི་བསྟན་ནས་རིང་པོ་མི་ཐོགས་པར་ཡོངས་སུ་མྱ་ངན་ལས་འདས་
པར་གཤེགས་ངེས་ཀྱིས་ཁྱོད་ཀྱི་མཆོད་པ་ནང་གི་ཐ་མར་བཤམས་པ་བཅོམ་ལྡན་འདས་དང་། དགེ་འདུན་ཆེན་པོ་རྣམས་ལ་དབུལ་བའི་དུས་ལ་བབ་བོ། །ཙུན་ད་དེ་བཞིན་གཤེགས་པས་འོད་ཟེར་རྣམ་པ་སྣ་ཚོགས་བཀྱེ་བ་འདི་ནི་རྒྱུ་མེད་རྐྱེན་མེད་པ་མ་ཡིན་པར་རིག་པར་གྱིས་ཤིག །ཙུན་དས་དེ་སྐད་ཅེས་སྨྲས་པ་ཐོས་ནས་ཅང་མི་སྨྲ་བར་འདུག་གོ །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ཁྱོད་ཀྱིས་མཆོད་པ་བཤམས་པ་སངས་རྒྱས་དང་དགེ་འདུན་རྣམས་ལ་དབུལ་བའི་དུས་ལ་བབ་བོ། །དེ་བཞིན་གཤེགས་པ་ནི་ཡོངས་སུ་མྱ་ངན་ལས་འདའོ་ཞེས་ལན་གཉིས་ལན་གསུམ་གྱི་བར་དུ་དེ་བཞིན་དུ་བཀའ་སྩལ་ཏོ། །དེའི་ཚེ་ཙུན་དས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་མ་ཐག་ཏུ་སྐད་ཆེན་པོ་ཕྱུང་སྟེ་ངུས་ནས་འདི་སྐད་དུ་ཀྱི་ཧུད་ཀྱི་ཧུད་འཇིག་རྟེན་སྟོངས་སོ་ཞེས་ཆོ་ངེས་རྡུང་ངོ་། །ཡང་འཁོར་གྱི་དཀྱིལ་འཁོར་རྣམས་ལ་འདི་སྐད་དུ་བདག་ཅག་གིས་ལུས་སྨད་ལྔ་ས་ལ་གཏུགས་ཏེ། ཐམས་ཅད་ཀྱིས་སྐད་འཐུན་པར་བཅོམ་ལྡན་འདས་མྱ་ངན་ལས་མི་འདའ་བར་གསོལ་བ་གདབ་པར་བྱའོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། སེམས་ཡོངས་སུ་གདུངས་ཤིང་མ་ངུ་བར་བདག་གི་ལུས་ལ་ཆུ་ཤིང་ལྟ་བུའམ། སྨིག་རྒྱུ་བའམ། ཆུའི་ཆུ་བུར་རམ། སྒྱུ་མའམ། དྲི་ཟའི་གྲོང་ཁྱེར་རམ། རྫ་སོ་མ་བཏང་བ་ལྟ་བུའམ། གློག་གི་འོད་དམ། ཆུ་ལ་རི་མོ་བྲིས་པའམ། གསོད་དུ་ཁྲིད་པའི་བཙོན་ལྟ་བུའམ། ཤིང་ཏོག་སྨིན་པ་ལྟ་བུ་འམ། ཤ་རུལ་པའམ། ཐགས་ཀྱི་རྒྱུ་ཟད་པའམ། གཏུན་ལྟ་བུར་བལྟའོ། །འདུ་བྱེད་རྣམས་ལ་དུག་དང་འདྲེས་པའི་ཟས་ལྟ་བུར་བལྟའོ། །འདུས་བྱས་ཀྱི་ཆོས་རྣམས་ལ་ཉེས་པའི་སྐྱོན་རྣམ་པ་མང་བར་བལྟའོ། །དེ་ནས་ཙུན་དས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་པར་མི་དགྱེས་ན་བདག་མི་ངུ་བའི་གཏོལ་ག་ལ་མཆིས། ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །བཅོམ་ལྡན་འདས་བདག་ཅག་དང་། སེམས་ཅན་
ཐམས་ཅད་ལ་ཐུགས་བརྩེ་བའི་སླད་དུ་འཇིག་རྟེན་ན་ཡུན་དུ་བཞུགས་ཤིང་མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། བདག་ཅག་ལ་ཐུགས་བརྩེ་བའི་ཕྱིར་འཇིག་རྟེན་ན་ཡུན་དུ་བཞུགས་པར་གསོལ་ཞེས་མ་ཟེར་ཅིག་ངས་ཁྱོད་ལ་སོགས་པ་འགྲོ་བ་ཐམས་ཅད་ལ་ཐུགས་བརྩེ་བའི་ཕྱིར་ཡོངས་སུ་མྱ་ངན་ལས་འདའ་བར་གཤེགས་སོ། །དེ་ཅིའི་ཕྱིར་ཞེ་ན། སངས་རྒྱས་རྣམས་ཀྱི་ཆོས་ཉིད་ཀྱང་དེ་ཡིན་ལ་འདུས་བྱས་ཀྱང་དེ་དང་འདྲའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་སྐད་ཅེས་གསུངས་སོ། །འདུས་བྱས་པ་ཡི་ཆོས་ཐམས་ཅད། །རང་བཞིན་ཉིད་ཀྱིས་མི་རྟག་སྟེ། །སྐྱེས་ནས་མི་གནས་པ་ཡིན་པས། །རབ་ཏུ་ཞི་བ་དེ་བདེའོ། །ཙུན་ད་ཁྱོད་འདུས་བྱས་ཐམས་ཅད་འདྲེས་པ་དང་། ཆོས་ཐམས་ཅད་ལ་བདག་མེད་པ་དང་། མི་རྟག་པ་དང་། རིང་དུ་མི་གནས་ཏེ། ལུས་འདི་ནི་ཤིན་ཏུ་སྐྱོན་མང་བས་ཆུ་བུར་ལྟ་བུར་ལྟོས་ལ་དེ་བས་ན་མ་ངུ་ཤིག །དེ་ནས་ཙུན་དས་བཅོམ་ལྡན་འདས་ལ་གསོལ་པ། དེ་དེ་བཞིན་ནོ། །དེ་དེ་བཞིན་ཏེ། བཅོམ་ལྡན་འདས་ཀྱིས་གསུངས་པ་བཞིན་ཏེ། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་ཡང་ཐབས་སུ་བསྟན་པར་འཚལ་མོད་ཀྱི་བདག་གིས་མྱ་ངན་མི་བགྱིད་ཀྱང་མི་བཟོད་དོ། །ཡང་ཤིན་ཏུ་བསམས་ན་དགའ་ཞིང་སྤྲོ་བ་ཡང་སྐྱེའོ། །བཅོམ་ལྡན་འདས་ཀྱིས་ཙུན་ད་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །དེ་བཞིན་གཤེགས་པས་སེམས་ཅན་དང་འཐུན་པའི་ཚུལ་དུ་མྱ་ངན་ལས་འདའ་བར་བསྟན་པ་ཤེས་པ་ལེགས་སོ། །ཙུན་ད་ཁྱོད་ལེགས་པར་ཉོན་ཅིག །འདི་ལྟ་སྟེ་དཔེར་ན་བྱ་ས་ལ་ས་ཞེས་བྱ་བ་དབྱར་ཚ་བའི་དུས་སུ་ཐམས་ཅད་མཚོ་མ་དྲོས་པ་ཞེས་བྱ་བར་འདུའོ། །བཅོམ་ལྡན་འདས་ཀྱང་དེ་དང་འདྲ་སྟེ་གནས་དེ་ཉིད་དུ་གཤེགས་སོ། །ཙུན་ད་ཁྱོད་དེ་བཞིན་གཤེགས་པའི་སྐུ་ཚེའི་ཚད་རིང་ཞེའམ། ཐུང་ཞེས་མ་རྟོག་པར་ཆོས་ཐམས་ཅད་སྒྱུ་མ་དང་འདྲ་སྟེ། དེ་བཞིན་གཤེགས་པས་ཐབས་ཀྱིས་ཅི་ལའང་
ཆགས་པར་མི་མཛད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ཆོས་ཉིད་ཀྱིས་དེའོ། །ཙུན་ད་ཁྱོད་ཀྱི་མཆོད་པ་ནང་གི་ཐ་མར་བཤམས་པ་འདི་བཞེས་པ་ནི་ཁྱོད་འཁོར་བའི་ཀླུང་ལས་བསྒྲལ་བའི་ཕྱིར་རོ། །དེ་ལ་ལྷའམ། མིའམ། འཇིག་རྟེན་དུ་བཅས་པ་གང་ཡང་རུང་ནང་གི་ཐ་མར་མཆོད་པ་བཤམས་ཏེ། ང་ལ་ཕུལ་ན་མི་གཡོ་བའི་འབྲས་བུ་ཐོབ་ཅིང་རྟག་ཏུ་བདེ་བ་མྱོང་བར་འགྱུར་རོ། །དེ་ཅིའི་ཕྱིར་ཞེ་ན། ང་ནི་སེམས་ཅན་ཐམས་ཅད་ཀྱི་བསོད་ནམས་ཀྱི་ཞིང་ཡིན་པའི་ཕྱིར་རོ། །ཁྱོད་ཀྱང་སེམས་ཅན་རྣམས་ཀྱི་བསོད་ནམས་ཀྱི་ཞིང་དུ་འགྱུར་བར་འདོད་ན་མཆོད་པ་བཤམས་པ་མ་ཐོགས་པར་མྱུར་དུ་ཕུལ་ཅིག །དེ་ནས་ཙུན་དས་སེམས་ཅན་ཐམས་ཅད་རྣམ་པར་གྲོལ་བར་བྱ་བའི་ཕྱིར་མགོ་སྨད་དེ་མཆི་མ་བླགས་བཞིན་དུ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤིན་ཏུ་ལེགས་སོ། །བཅོམ་ལྡན་འདས་བདག་བསོད་ནམས་ཀྱི་ཞིང་དུ་འགྱུར་ཡང་དག་ན་ལྟ། དེ་བཞིན་གཤེགས་པ་མྱ་ངན་ལས་འདའ་བ་དང་། མྱ་ངན་ལས་འདའ་བ་མ་ལགས་པར་རྟོག་པར་འགྱུར་བ་ཞིག་ན་བདག་ཅག་ཉན་ཐོས་དང་རང་སངས་རྒྱས་ཀྱི་ཡེ་ཤེས་ནི་སྦྲང་བུ་དང་འདྲ་བས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་དང་། མྱ་ངན་ལས་མི་འདའ་བ་དཔོག་མི་ནུས་སོ། །དེ་ནས་ཙུན་ད་འཁོར་དང་བཅས་པས་མཆི་མ་བླགས་ཏེ་ངུ་བཞིན་དུ་དེ་བཞིན་གཤེགས་པ་ལ་བསྐོར་བ་བྱས་བདུག་སྤོས་དང་མེ་ཏོག་གིས་གཏོར་ཏེ། མཆོད་པ་བྱས་ནས་འཇམ་དཔལ་དང་བཅས་སུ་འདུག་པ་ལས་ལངས་ཏེ། མཆོད་པ་ཤོམ་དུ་དོང་ངོ་། །དེ་ལྟར་སོང་མ་ཐག་ཏུ་དེའི་ཚེ་ས་ཡང་ཚངས་པའི་འཇིག་རྟེན་ལ་ཐུག་གི་བར་དུ་རྣམ་པ་དྲུག་ཏུ་གཡོས་སོ། །ས་གཡོ་བ་ལ་རྣམ་པ་གཉིས་ཏེ། ས་གཡོས་པ་དང་། རབ་ཏུ་གཡོས་པའོ། །ཅུང་ཟད་གཡོས་པ་ནི་ས་གཡོས་པ་ཞེས་བྱའོ། །ཆེར་གཡོས་པ་ནི་རབ་ཏུ་གཡོས་པ་ཞེས་བྱའོ། །སྐད་ཆུང་བ་ནི་ས་གཡོས་པ་ཞེས་བྱའོ། །སྐད་ཆེ་བ་ནི་རབ་ཏུ་གཡོས་པ་ཞེས་བྱའོ། །
ས་འབའ་ཞིག་གཡོས་པ་ནི་ས་གཡོས་པ་ཞེས་བྱའོ། །རི་དང་ཆུ་དང་ཤིང་དང་རྒྱ་མཚོ་ལ་སོགས་པ་ཐམས་ཅད་གཡོས་པ་ནི་རབ་ཏུ་གཡོས་པ་ཞེས་བྱའོ། །ཕྱོགས་གཅིག་ཏུ་གཡོས་པ་ནི་ས་གཡོས་པ་ཞེས་བྱའོ། །ཀུན་ཏུ་འཁོར་ཞིང་གཡོས་པ་ནི་རབ་ཏུ་གཡོས་པ་ཞེས་བྱའོ། །འགུལ་བ་ནི་ས་གཡོས་པ་ཞེས་བྱའོ། །འགུལ་བ་ན་སེམས་ཅན་ཐམས་ཅད་ཀྱི་སེམས་ཀྱང་གཡོས་པ་ནི་རབ་ཏུ་གཡོས་པ་ཞེས་བྱའོ། །བྱང་ཆུབ་སེམས་དཔའ་ཐོག་མ་གནས་པ་དེ་ན་གནམ་ནས་བབས་ཏེ་འཛམ་བུའི་གླིང་དུ་གཤེགས་པ་ན་རབ་ཏུ་གཡོས་པ་ཞེས་བྱའོ། །ཐོག་མ་བཙས་པ་དང་། རབ་ཏུ་བྱུང་བ་དང་། བླ་ན་མེད་པ་ཡང་དག་པར་རྫོགས་པར་སངས་རྒྱས་པ་དང་། ཆོས་ཀྱི་འཁོར་ལོ་བསྐོར་བ་དང་། ཡོངས་སུ་མྱ་ངན་ལས་འདའ་བར་གཤེགས་པ་ནི་རབ་ཏུ་གཡོས་པ་ཞེས་བྱའོ། །དེང་དེ་བཞིན་གཤེགས་པ་ཡང་ཡོངས་སུ་མྱ་ངན་ལས་འདའ་བར་གཤེགས་པ་ལྟ་སྟེ། དེ་བས་ན་ས་འདི་ཡང་རབ་ཏུ་གཡོས་སོ། །དེ་ནས་ལྷ་དང་། ཀླུ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་ལ་སོགས་པ་དེ་དག་ཐོས་མ་ཐག་ཏུ་ལུས་ཀྱི་བ་སྤུ་ཀུན་ལངས་ནས་ཐམས་ཅད་དུ་ངུས་ཏེ་སྐད་འཐུན་པར་ཚིགས་སུ་བཅད་པས་འདི་སྐད་ཅེས་གསོལ་ཏོ། །ཕྱག་འཚལ་ཁ་ལོ་སྒྱུར་བ་ལ། །བདག་ཅག་རྣམས་ནི་གསོལ་བ་འདེབས། །དྲང་སྲོང་ཆེན་པོས་བོར་བས་ན། །མགོན་སྐྱབས་རྟེན་མ་མཆིས་པར་གྱུར། །བཅོམ་ལྡན་མྱ་ངན་འདས་གཤེགས་པས། །བདག་ཅག་སྡུག་བསྔལ་རྒྱ་མཚོར་ནུབ། །ཡིད་བློང་མྱ་ངན་གདུང་བ་ནི། །ཇི་ལྟར་བེའུ་དག་མ་སྟོར་བཞིན། །དབུལ་ཕོངས་མགོན་དང་སྐྱབས་མ་མཆིས། །ཇི་ལྟར་ཤིན་ཏུ་ན་བ་དེ། །སྨན་པ་མཁས་པ་མ་མཆིས་པས། །ཡིད་བཞིན་བཟའ་བ་ཅི་ཡང་འཚལ། །སེམས་ཅན་ཉོན་མོངས་ནད་ཀྱིས་གཟིར། །ལྟ་བ་རྣམས་ཀྱིས་རྟག་ཏུ་གཙེ། །ཆོས་ཀྱི་སྨན་པ་མཁས་དང་བྲལ། །ངན་པར་ལྟ་བའི་གདུག་
པ་འཚལ། །དེ་བས་སངས་རྒྱས་བཅོམ་ལྡན་འདས། །བདག་ཅག་སྤང་བ་མི་མཛད་གསོལ། །དཔེར་ན་རྒྱལ་པོ་མི་བཞུགས་ན། །ཡུལ་མི་ཐམས་ཅད་ལྟོགས་པར་གྱུར། །བདག་ཅག་རྣམས་ཀྱང་དེ་འདྲ་སྟེ། །ཆོས་ཀྱི་རོ་དང་སྐྱབས་ཀྱང་སྟོར། །སངས་རྒྱས་མྱ་ངན་འདའ་ཐོས་པས། །བདག་ཅག་སེམས་ནི་མྱོས་པར་གྱུར། །ཇི་ལྟར་ས་ཆེན་རབ་གཡོས་ནས། །ཕྱོགས་རྣམས་ཤིན་ཏུ་བསླད་པ་བཞིན། །དྲང་སྲོང་མྱ་ངན་འདས་གཤེགས་པས། །སངས་རྒྱས་ཉི་མ་ས་ལ་ལྷུང་། །ཆོས་ཀྱི་ཆུ་ཡང་སྐམས་པར་གྱུར། །བདག་ཅག་གདོན་མི་ཟ་བར་འཆི། །བཅོམ་ལྡན་མྱ་ངན་འདས་གཤེགས་ན། །འགྲོ་བའི་སྡུག་བསྔལ་གདུང་བ་ནི། །དཔེར་ན་ཚོང་པ་ཞིག་གི་བུ། །གསར་དུ་ཕ་མ་ཤི་བ་བཞིན། །བཅོམ་ལྡན་མྱ་ངན་འདས་གཤེགས་ཏེ། །ཅི་སྟེ་མི་བཞུགས་པར་གྱུར་ན། །བདག་དང་སེམས་ཅན་ཐམས་ཅད་ནི། །མགོན་དང་སྐྱབས་མ་མཆིས་པར་འགྱུར། །བཅོམ་ལྡན་མྱ་ངན་འདས་གཤེགས་ན། །བྱོལ་སོང་སྐྱེ་གནས་བར་དུ་ཡང་། །ཐམས་ཅད་སྡུག་བསྔལ་ཡིད་བློང་ཞིང་། །གདུངས་པར་གྱུར་ཏེ་སྨྲེ་སྔགས་འདོན། །དེང་འདིར་བདག་ཅག་རྣམས་ཀྱིས་ནི། །མྱ་ངན་མི་བགྱིད་གཏོལ་མ་མཆིས། །དེ་བཞིན་གཤེགས་པས་བོར་བ་ཡང་། །ཇི་ལྟར་མཆིལ་མ་ངར་སྣབས་བཞིན། །དཔེར་ན་ཉི་མ་ཤར་བ་ན། །འོད་ཟེར་ཀུན་ཏུ་ལྷམ་མེར་སྣང་། །ཀུན་ཏུ་སྣང་བར་བྱས་པ་ན། །མུན་པ་ཐམས་ཅད་མེད་པར་གྱུར། །དེ་བཞིན་གཤེགས་པའི་རྫུ་འཕྲུལ་འོད། །བདག་ཅག་རྣམས་ཀྱི་ཉོན་མོངས་བསལ། །འཁོར་གྱི་ནང་དུ་བཞུགས་པ་ཡང་། །རི་རབ་རི་ཡི་རྒྱལ་པོ་བཞིན། །བཅོམ་ལྡན་འདས་དཔེར་ན་རྒྱལ་པོ་ཞིག་གི་སྲས་བུ་བྱད་གཟུགས་བཟང་བ་བལྟ་ན་སྡུག་པ་ཤིན་ཏུ་མཛེས་པ་དག་མཆིས་ན་ཤིན་ཏུ་བྱམས་པས་སྔར་རྩལ་སྣ་ཚོགས་བསླབས་ཏེ། ཁོང་དུ་ཆུད་པའི་འོག་ཏུ་གཤེད་མ་ལ་སོད་ཅིག་ཅེས་གཏད་དོ། །བཅོམ་ལྡན་འདས་བདག་ཅག་ཀྱང་ཆོས་ཀྱི་སྲས་སུ་གྱུར་ཏེ།
བཅོམ་ལྡན་འདས་ཀྱིས་བསྟན་ཅིང་བཅོས་ན་ཡང་དག་པར་ལྟ་བ་དང་ལྡན་པར་འགྱུར་གྱིས་བདག་ཅག་རྣམས་མི་སྤང་དུ་གསོལ། ཅི་སྟེ་བདག་ཅག་ཡོངས་སུ་སྤངས་པར་གྱུར་ན་རྒྱལ་པོའི་སྲས་དང་འདྲ་བར་མི་འགྱུར་རམ། མྱ་ངན་ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ། བཅོམ་ལྡན་འདས་དཔེར་ན་སྐྱེས་བུ་ཞིག་གཙུག་ལག་རྣམས་ལེགས་པར་བསླབས་ནས་གཙུག་ལག་གིས་སྐྲག་པར་གྱུར་ཏོ། །བཅོམ་ལྡན་འདས་ཀྱང་དེ་དང་མཚུངས་ཏེ། ཆོས་ཐམས་ཅད་ཐུགས་སུ་ཆུད་ནས་ཆོས་ཀྱིས་བསྙེངས་པར་གྱུར་ཏོ། །གལ་ཏེ་དེ་བཞིན་གཤེགས་པ་འཇིག་རྟེན་ན་ཡུན་དུ་བཞུགས་ཤིང་། བདུད་རྩི་ལྟ་བུའི་ཆོས་བསྟན་ཏེ། ཐམས་ཅད་ངོམས་པར་མཛད་ན་སེམས་ཅན་ཐམས་ཅད་ཀྱང་སེམས་ཅན་དམྱལ་བར་ལྟུང་གིས་མི་དོགས་སོ། །བཅོམ་ལྡན་འདས་དཔེར་ན་སྐྱེས་བུ་ཞིག་ལས་བྱེད་པའི་འཕྲོ་ལས་བཟུང་སྟེ། བཙོན་རར་བཅུག་ནས་དེ་ལ་མི་ཞིག་གིས་འདི་སྐད་དུ་ཁྱོད་འདི་ན་ཅི་བྱེད་ཅེས་དྲིས་ན་བདག་ནི་ཤིན་ཏུ་སྡུག་བསྔལ་ཆེན་པོ་མྱོང་ཞིང་འདུག་སྟེ། འདི་ལས་ཐར་ན་རབ་ཏུ་བདེ་བར་འགྱུར་རོ་ཞེས་མཆིའོ། །བཅོམ་ལྡན་འདས་ཀྱང་དེ་དང་འདྲ་སྟེ། བདག་ཅག་གི་སླད་དུ་སྤྱོད་པ་དཀའ་བ་མཛད་མཛད་དེ། བདག་ཅག་འཁོར་བའི་ཉོན་མོངས་པ་ལས་མ་ཐར་ན་དེ་བཞིན་གཤེགས་པ་བདེ་བར་ག་ལ་འགྱུར། བཅོམ་ལྡན་འདས་དཔེར་ན་སྨན་པ་ཤིན་ཏུ་མཁས་པ་ནི་སྨན་དཔྱད་གསང་བ་དག་བུ་ལ་སྟོན་གྱི། སློབ་མ་གཞན་ལ་མི་སྟོན་ནོ། །བཅོམ་ལྡན་འདས་ཀྱང་དེ་དང་འདྲ་སྟེ། དགོངས་ཏེ་གསུངས་པའི་སྙིང་པོ་ཤིན་ཏུ་ཟབ་མོ་ཡང་འཇམ་དཔལ་འབའ་ཞིག་ལ་བསྟན་གྱི། བདག་ཅག་རྣམས་ལ་བསྟན་པར་མ་གྱུར་ཏོ། ། དེ་བཞིན་གཤེགས་པ་ཡང་སྨན་པ་ལྟ་བུ་འབའ་ཞིག་ལ་བསྟན་གྱི། སློབ་མ་གཞན་ལ་མི་སྟོན་པ་ལྟར་དེ་བཞིན་གཤེགས་པ་ནི་ཆོས་ཐམས་ཅད་ལ་ཕྲག་དོག་ཏུ་མ་གྱུར་པ་ལགས་སོ། །སྨན་པ་དེས་ཀུན་ལ་འདྲ་བར་མ་བསྟན་པ་ནི་བྱམས་སྡང་གི་སེམས་དང་
བཅས་པས་གསང་སྟེ་སྟོན་པར་གྱུར་ན་དེ་བཞིན་གཤེགས་པའི་ཐུགས་ནི་བྱམས་སྡང་མི་མངའ་ན་ཅིའི་སླད་དུ་བདག་ཅག་ལ་བསྟན་པར་མ་གྱུར། བཅོམ་ལྡན་འདས་ཡུན་དུ་བཞུགས་ཤིང་མྱ་ངན་ལས་མི་འདའ་བར་གསོལ་ལོ། །བཅོམ་ལྡན་འདས་དཔེར་ན་རྒན་པོའམ། གཞོན་ནུ་ཡང་རུང་ནད་ཀྱིས་སྡུག་བསྔལ་བར་གྱུར་ལ། ལམ་བཟང་པོ་སྤངས་ནས་ལམ་ཉམ་ང་བ་གཡང་ས་དང་བཅས་པ། ལམ་ངན་པར་ཞུགས་ན་ཤིན་ཏུ་སྡུག་བསྔལ་མྱོང་བར་འགྱུར་རོ། །དེ་ལ་མི་ཞིག་གིས་མཐོང་ནས་སྙིང་བརྩེ་བས་ལམ་ཉམ་ང་བ་མེད་པ་བཟང་པོ་བསྟན་ཏོ། །བཅོམ་ལྡན་འདས་བདག་ཅག་ཀྱང་དེ་དང་འདྲ་སྟེ། དེ་ལ་གཞོན་ནུ་ཞེས་བགྱི་བ་ནི་ཆོས་ཅན་གྱི་ལུས་མ་བསྐྱེད་པའི་དཔེའོ། །རྒན་པོ་ཞེས་བགྱི་བ་ནི་ཉོན་མོངས་པ་ཆེན་པོའི་དཔེའོ། །ན་བ་ནི་འཁོར་བ་ལས་མ་ཐར་བའི་དཔེའོ། །ལམ་གཡང་ས་དང་ལྡན་པ་ནི་སྲིད་པ་ཉི་ཤུ་ལྔ་པོའི་དཔེའོ། །བཅོམ་ལྡན་འདས་བདག་ཅག་ལ་བདུད་རྩིའི་ལམ་ཡང་དག་པར་བསྟན་ཅིང་མྱ་ངན་ལས་མི་འདའ་བར་འཇིག་རྟེན་ན་ཡུན་དུ་བཞུགས་པར་གསོལ་ལོ། །དེ་ནས་བཅོམ་ལྡན་འདས་ཀྱིས་དགེ་སློང་གི་དགེ་འདུན་རྣམས་ལ་བཀའ་སྩལ་པ། ཁྱོད་དགེ་སློང་དག་བྱིས་པ་མ་རབས་སམ། ལྷ་དང་མི་ལྟ་བུར་མྱ་ངན་དང་ངུ་བ་མ་བྱེད་པར་ཡང་དག་པར་དྲན་པ་ཉེ་བར་གཞག་པ་ལ་བརྩོན་འགྲུས་སུ་གྱིས་ཤིག །དེའི་ཚེ་ལྷ་དང་མི་དང་ལྷ་མ་ཡིན་ལ་སོགས་པས་བཅོམ་ལྡན་འདས་ཀྱིས་མ་ངུ་ཤིག་ཅེས་བཀའ་སྩལ་པ་ཐོས་ནས་དཔེར་ན་མི་ཞིག་བུ་ཤི་ནས་བུའི་ཤིད་བཏང་མ་ཐག་ཏུ་མ་ངུ་ཤིག་ཅེས་བསྒོ་བ་དང་མཚུངས་སོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་དེ་དག་ལ་ཚིགས་སུ་བཅད་དེ་བཀའ་སྩལ་པ། ཁྱེད་རྣམས་སོ་སོར་སྤྲོ་སྐྱེད་ལ། །མྱ་ངན་ཆེན་པོ་མ་བྱེད་ཅིག །སངས་རྒྱས་རྣམས་ཀྱི་ཆོས་ཉིད་ཡིན། །དེ་བས་ཅང་མི་གསུང་བར་བཞུགས། །བག་ཡོད་སྤྱོད་ལ་མོས་པར་བྱ། །ཡང་དག་དྲན་པས་སེམས་ཀྱང་སྲུང་། །ཆོས་མ་ཡིན་པ་རབ་སྤངས་
ཏེ། །སྤྲོ་བ་སྐྱེད་ལ་དགའ་བར་གྱིས། །གཞན་ཡང་དགེ་སློང་དག་ཐེ་ཚོམ་དང་སོམ་ཉིར་གྱུར་པ་ཡོད་ན། ཐམས་ཅད་ཞུ་ཞིང་དྲིས་ཤིག །སྟོང་པ་དང་སྟོང་པ་མ་ཡིན་པ་དང་། རྟག་པ་དང་། མི་རྟག་པ་དང་། སྡུག་བསྔལ་བ་དང་། སྡུག་བསྔལ་མ་ཡིན་པ་དང་། གནས་དང་། གནས་མ་ཡིན་པ་དང་། སོང་བ་དང་། མ་སོང་བ་དང་། འོངས་པ་དང་། འོངས་པ་མ་ཡིན་པ་དང་། ཐེར་ཟུག་དང་། ཐེར་ཟུག་མ་ཡིན་པ་དང་། ཆད་པ་དང་། རྟག་པ་དང་། སེམས་ཅན་དང་། སེམས་ཅན་མ་ཡིན་པ་དང་། ཡོད་པ་དང་། མེད་པ་དང་། བདེན་པ་དང་། མི་བདེན་པ་དང་། ཡང་དག་པ་དང་། ཡང་དག་པ་མ་ཡིན་པ་དང་། འགོག་པ་དང་། འགོག་པ་མ་ཡིན་པ་དང་། གསང་བ་དང་། མི་གསང་བ་དང་། གཉིས་དང་མི་གཉིས་པ་ལ་སོགས་པའི་ཆོས་ལ་ཐེ་ཚོམ་དུ་གྱུར་པ་ཡོད་ན། ཞུ་བའི་སྐབས་ལ་བབ་ཀྱིས་དྲིས་ཤིག་དང་། ཅི་དང་ཅི་དྲིས་པ་དེའི་ཐེ་ཚོམ་བཅད་དོ། །ཁྱེད་ལ་སྔར་བདུད་རྩི་ལྟ་བུའི་ཆོས་བསྟན་ཏེ། གདོད་ཡོངས་སུ་མྱ་ངན་ལས་འདའ་བར་བྱའོ། །དགེ་སློང་དག་སངས་རྒྱས་འཇིག་རྟེན་དུ་གཤེགས་པ་ཡང་ཤིན་ཏུ་དཀོན། མིའི་ལུས་ཐོབ་པ་ཡང་ཤིན་ཏུ་དཀའ། སངས་རྒྱས་དང་ཕྲད་ཅིང་དད་པ་སྐྱེད་པ་ཡང་ཤིན་ཏུ་དཀའ། བཟོད་དཀའ་བ་བཟོད་པ་ཡང་ཤིན་ཏུ་དཀའ། ཚུལ་ཁྲིམས་རྫོགས་ཤིང་མ་གོད་མ་ཉམས་ཏེ། དགྲ་བཅོམ་པའི་འབྲས་བུ་ཐོབ་པ་ཡང་ཤིན་ཏུ་དཀའ་སྟེ། ས་ལེ་སྦྲམ་མམ་མེ་ཏོག་ཨུ་དུམ་བཱ་ར་ཚོལ་བ་བཞིན་ནོ། །དགེ་སློང་དག་མི་ཁོམ་པ་བརྒྱད་དང་བྲལ་ཏེ། མིའི་ལུས་ཐོབ་པར་དཀའ་བ་ཐོབ་ནས་ང་དང་ཕྲད་པར་གྱུར་ན་དོན་མེད་པར་ཆུད་མི་གཟན་ཏོ། །ང་སྔོན་དཀའ་བ་རྣམ་པ་སྣ་ཚོགས་སྤྱད་པས་ད་ལྟར་འདི་ལྟ་བུའི་བླ་ན་མེད་པའི་ཐབས་མཁས་པ་དང་ལྡན་པར་གྱུར་ཏོ། །ཁྱེད་ལ་སོགས་པའི་ཕྱིར་བསྐལ་པ་ཚད་མེད་པའི་བར་དུ་ལུས་ཀྱི་ཡན་ལག་ལག་པ་དང་། རྐང་པ་དང་། མགོ་དང་། མིག་དང་། རྐང་དང་།
གླད་པ་ཡང་ཡོངས་སུ་བཏང་ངོ་། །དེ་བས་ན་ཁྱེད་རྣམས་བག་མེད་པར་མི་བྱའོ། །དགེ་སློང་དག་ཇི་ལྟར་ན་ཡང་དག་པའི་ཆོས་ཀྱི་རིན་པོ་ཆེའི་མཁར་བརྒྱན་ཅིང་ཡོན་ཏན་རིན་པོ་ཆེ་རྣམ་པ་སྣ་ཚོགས་དང་ལྡན་ཞིང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ར་བ་དང་། འོབས་དང་ཉེན་ལྟ་བུར་འགྱུར་བར་བྱ་བ་སོམས་ཤིག །ཁྱེད་སངས་རྒྱས་ཀྱི་ཆོས་རིན་པོ་ཆེའི་མཁར་ལྟ་བུ་དང་ཕྲད་པའི་འོག་ཏུ་ཡང་དག་པ་མ་ཡིན་པ་སྒྱུ་དང་བཅས་པ་ལེན་པའི་མི་རིགས་སོ། །དཔེར་ན་ཚོང་དཔོན་དག་རིན་པོ་ཆེ་ཡང་དག་པའི་གླིང་དུ་ཕྱིན་ན། གྱོ་མོ་དང་རྡོ་བ་བླངས་ཏེ་ཕྱིར་ཁྱིམ་དུ་འོངས་པ་འདྲ་བར་ཁྱེད་ཀྱང་དེ་དང་འདྲ་སྟེ། རིན་པོ་ཆེའི་གླིང་དུ་ཕྱིན་ནས་རྫས་སྒྱུ་མ་དག་ལེན་ཏོ། །དགེ་སློང་དག་ཞུམ་པའི་བསམ་པས་ཆོག་པའི་སེམས་མ་སྐྱེད་ཅིག །ཁྱེད་རྣམས་རབ་ཏུ་བྱུང་མོད་ཀྱི། ཐེག་པ་ཆེན་པོ་ལ་མོས་པར་མི་བྱེད་དོ། །དགེ་སློང་དག་ཁ་དོག་བསྒྱུར་བའི་གོས་ངུར་སྨྲིག་གྱོན་མོད་ཀྱི། སེམས་ནི་ཐེག་པ་ཆེན་པོ་ཡོངས་སུ་དག་པའི་ཆོས་ལ་ཞེན་པར་མ་གྱུར་ཏོ། །དགེ་སློང་དག་བསོད་སྙོམས་ལ་ཞུགས་ཏེ་ཀུན་ཏུ་རྒྱུ་མོད་ཀྱི། ཐེག་པ་ཆེན་པོའི་ཆོས་ཀྱི་ཟས་མ་མྱོང་ངོ་། །དགེ་སློང་དག་སྐྲ་དང་ཁ་སྤུ་བྲེགས་མོད་ཀྱི། ཡང་དག་པའི་ཆོས་ཀྱི་ཀུན་ནས་ཉོན་མོངས་པ་མེད་པར་མ་བྱས་སོ། །དགེ་སློང་དག་དེང་ཐམས་ཅད་ཚོགས་པ་འདིར་ཡང་དག་པར་གསུང་གིས་ཁྱེད་ལ་སྟོན་ཏོ། །དེ་བཞིན་གཤེགས་པའི་ཆོས་རྣམས་ཀྱི་མཚན་ཉིད་ནི་ཡང་དག་པ་སྟེ། ཕྱིན་ཅི་མ་ལོག་པའོ། །དེ་བས་ན་ཁྱེད་རྣམས་དཔའ་ཞིང་རྟུལ་ཕོད་པའི་སེམས་ཀྱིས་ཀུན་ནས་ཉོན་མོངས་པ་གཞོམ་པ་ལ་བརྩོན་པར་གྱིས་ཤིག །སྟོབས་བཅུ་དང་ལྡན་པའི་ཡེ་ཤེས་ཀྱི་ཉི་མ་ནུབ་པར་གྱུར་ན་ཁྱེད་རྣམས་ཀྱང་མ་རིག་པས་ཁེབས་པར་འགྱུར་རོ། །དགེ་སློང་དག་དཔེར་ན་ས་ཆེན་པོ་དང་རི་ལ་སྐྱེས་པའི་རྩི་ཤིང་ནི་སེམས་ཅན་རྣམས་ཀྱི་དགོས་པར་འགྱུར་རོ། །ངའི་ཆོས་ཀྱང་དེ་དང་འདྲ་སྟེ། ཤིན་ཏུ་དགེ་བའི་བདུད་རྩི་ལྟ་བུའི་ཆོས་ཀྱི་རོ་
ཡང་སྐྱེ་ལ། སེམས་ཅན་གྱི་ཉོན་མོངས་པའི་ནད་རྣམ་པ་སྣ་ཚོགས་ཀྱི་སྨན་དུ་ཡང་འགྱུར་རོ། །ངས་དེང་འདིར་སེམས་ཅན་ཐམས་ཅད་དང་ངའི་སྲས་སུ་གྱུར་པ་འཁོར་རྣམ་པ་བཞི་ཡང་དགོངས་ཏེ་གསུངས་པའི་སྙིང་པོ་ལ་བདེ་བར་དགོད་ཅིང་ང་དེ་ལ་བདེ་བར་གནས་ནས་ཡོངས་སུ་མྱ་ངན་ལས་འདའོ། །དེ་ལ་དགོངས་ཏེ་གསུངས་པའི་སྙིང་པོ་ཞེས་བྱ་བ་གང་ཞེ་ན། དཔེར་ན་ཡི་གེ་ཨི་ལྟ་བུ་ཐིག་ལེ་གསུམ་ཐད་ཀར་བཞག་གམ། དངར་ན་ཨིར་མི་འགྱུར་གྱི། དབང་སྒྱུར་ཆེན་པོའི་མིག་ལྟ་བུར་ཕོ་གསུམ་དུ་བཞག་ན་ཨིར་འགྱུར་ཏེ། ཐིག་ལེ་གསུམ་སོ་སོར་ཕྲལ་བ་ལས་ཀྱང་མ་ཡིན་ནོ། །ང་ཡང་དེ་དང་འདྲ་སྟེ། རྣམ་པར་གྲོལ་བའི་ཆོས་ཀྱང་མྱ་ངན་ལས་འདའ་བ་མ་ཡིན། དེ་བཞིན་གཤེགས་པའི་སྐུ་ཡང་མྱ་ངན་ལས་འདའ་བ་མ་ཡིན། ཤེས་རབ་ཀྱི་ཕ་རོལ་ཏུ་ཕྱིན་པ་ཡང་མྱ་ངན་ལས་འདའ་བ་མ་ཡིན་ཆོས་གསུམ་པོ་སོ་སོར་ཕྲལ་བ་ལས་ཀྱང་མྱ་ངན་ལས་འདའ་བ་ཡང་མ་ཡིན་ཏེ། ང་ནི་ཆོས་གསུམ་པོ་འདི་ལ་གནས་ནས་སེམས་ཅན་གྱི་ཕྱིར་མྱ་ངན་ལས་འདའ་བ་ཞེས་བྱ་སྟེ། ཇི་ལྟར་འཇིག་རྟེན་ན་ཡི་གེ་ཨི་ཞེས་གྲགས་པ་བཞིན་ནོ། །དེའི་ཚེ་ན་དགེ་སློང་རྣམས་སངས་རྒྱས་བཅོམ་ལྡན་འདས་ངེས་པར་ཡོངས་སུ་མྱ་ངན་ལས་འདའོ་ཞེས་གསུངས་པ་ཐོས་ནས་ཤིན་ཏུ་མི་དགའ་སྟེ། ལུས་ཀྱི་བ་སྤུ་ཐམས་ཅད་ལངས་ནས་མིག་མཆི་མས་གང་བཞིན་དུ་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་ལན་གྲངས་མེད་པར་བསྐོར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་། བདག་མེད་པ་ལེགས་པར་གསུངས་སོ། །བཅོམ་ལྡན་འདས་དཔེར་ན་འགྲོ་བ་ཐམས་ཅད་ཀྱི་རྗེས་ཀྱི་ནང་ན། བལ་གླང་གི་རྗེས་མཆོག་གོ །མི་རྟག་པའི་འདུ་ཤེས་ཀྱང་དེ་དང་འདྲ་སྟེ། འདུ་ཤེས་ཐམས་ཅད་ཀྱི་ནང་ན་མཆོག་གོ །གང་ཞིག་དེ་ལ་བརྩོན་འགྲུས་སུ་ནན་ཏན་བགྱིད་ན་འདོད་པའི་ཁམས་ཀྱི་འདོད་པ་ཐམས་ཅད་དང་། གཟུགས་དང་། གཟུགས་མེད་པའི་འདོད་པ་དང་། མ་རིག་པ་དང་།
ང་རྒྱལ་དང་། མི་རྟག་པའི་འདུ་ཤེས་ཐམས་ཅད་ཀྱང་མ་མཆིས་པར་བགྱིད་དོ། །བཅོམ་ལྡན་འདས་གལ་ཏེ་དེ་བཞིན་གཤེགས་པ་མི་རྟག་པའི་འདུ་ཤེས་དང་བྲལ་ན། ད་ཡོངས་སུ་མྱ་ངན་ལས་འདའ་བར་གཤེགས་པར་མི་རིགས་སོ། །ཅི་སྟེ་མ་བྲལ་ན་ཅིའི་སླད་དུ་མི་རྟག་པ་ལ་ནན་ཏན་བགྱིས་ནས་ཁམས་གསུམ་གྱི་འདོད་པ་དང་། མ་རིག་པ་དང་། ང་རྒྱལ་དང་། མི་རྟག་པའི་འདུ་ཤེས་དང་བྲལ་བར་འགྱུར་རོ་ཞེས་གསུངས། བཅོམ་ལྡན་འདས་དཔེར་ན་ཞིང་པ་དག་ནི་སྟོན་གྱི་དུས་སུ་ཞིང་རྨོས་ནས་ཞིང་གི་ངོ་ཡུར་མ་ཡོངས་སུ་སེལ་ཏོ། །མི་རྟག་པའི་འདུ་ཤེས་ཀྱང་དེ་དང་འདྲ་སྟེ། འདོད་པའི་ཁམས་ཀྱི་འདོད་པ་དང་། གཟུགས་དང་གཟུགས་མ་མཆིས་པའི་འདོད་པ་དང་། མ་རིག་པ་དང་། ང་རྒྱལ་དང་། མི་རྟག་པའི་འདུ་ཤེས་ཀྱི་བར་དུ་སེལ་ཏོ། །བཅོམ་ལྡན་འདས་དཔེར་ན་ཞིང་རྨོ་བའི་ནང་ན་སྟོན་ལོག་བཏབ་པ་བཟང་ངོ་། །རྗེས་ཐམས་ཅད་ཀྱི་ནང་ན་བལ་གླང་གི་རྗེས་མཆོག་གོ །འདུ་ཤེས་ཐམས་ཅད་ཀྱི་ནང་ན་ཡང་མི་རྟག་པ་མཆོག་གོ །བཅོམ་ལྡན་འདས་དཔེར་ན་རྒྱལ་པོ་ཆེན་པོ་ནི་འགུམ་པའི་དུས་བགྱིད་པ་ན། སྔར་མཐའ་བཞིར་ཤོ་བཏང་ནས་བཙོན་ཐམས་ཅད་ཐར་པའི་འོག་ཏུ་ཚེའི་བྱ་བ་བགྱིད་དོ། །དེ་བཞིན་གཤེགས་པ་ཡང་དེ་དང་འདྲ་བར་སེམས་ཅན་ཐམས་ཅད་ཤེས་རབ་མེད་པའི་མ་རིག་པས་ཡོངས་སུ་ཁེབས་པ་ལས་བསྒྲལ་ཏེ་ཐར་བར་མཛད་ནས། གདོད་མྱ་ངན་ལས་འདའ་བར་གཤེགས་པའི་རིགས་ཀྱི། བདག་ཅག་མ་བསྒྲལ་བར་ཅིའི་སླད་དུ་དེ་བཞིན་གཤེགས་པས་བདག་ཅག་ཡོངས་སུ་བཏང་སྟེ། ཡོངས་སུ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་མི་ཞིག་ཡི་དགས་ཀྱིས་བརླམས་ཏེ། སྔགས་མཁན་དང་ཕྲད་ན་སྔགས་ཀྱི་མཐུས་དེ་ལས་ཐར་བར་འགྱུར་རོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་རྣམས་ཀྱིས་མ་རིག་པའི་ཡི་དགས་བསལ་ཅིང་། ཤེས་རབ་ཀྱི་ཕ་རོལ་ཏུ་
ཕྱིན་པ་དང་། རྣམ་པར་གྲོལ་བ་ལ་སོགས་པའི་ཆོས་ལ་བདེ་བར་དགོད་པ་ནི་ཇི་ལྟར་འཇིག་རྟེན་ན་ཡི་གེ་ཨི་ཞེས་གྲགས་པ་བཞིན་ནོ། །བཅོམ་ལྡན་འདས་དཔེར་ན་སྤོས་ཀྱི་གླང་པོ་ཆེ་ནི་མིས་བཅིངས་ན་འདུལ་མཁས་པའི་མཁན་པོ་མཆིས་ཀྱང་མི་ཐུལ་ཏེ། བཅིངས་པའི་ཐག་པ་བཅད་ནས་ཡིད་བཞིན་དུ་མཆིའོ། །དེ་ལྟར་བདག་ཅག་ནི་ཉོན་མོངས་པ་ལྔ་བཅུ་རྩ་བདུན་གྱིས་བཅིངས་པ་ལས་ཡོངས་སུ་མ་གྲོལ་ན་ཅིའི་སླད་དུ་དེ་བཞིན་གཤེགས་པས་ཡོངས་སུ་བཏང་སྟེ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་ཚ་བའི་ནད་ཀྱིས་བཏབ་པ་ནི་སྨན་པ་མཁས་པ་དང་ཕྲད་ན་དེ་མ་ཐག་ཏུ་འཚོའོ། །བདག་ཀྱང་དེ་དང་འདྲ་སྟེ་ལོག་པར་འཆི་བའི་ཚ་བའི་ནད་མང་པོས་སྡུག་བསྔལ་བར་གྱུར་ཏེ། དེ་བཞིན་གཤེགས་པ་དང་མཇལ་ཀྱང་ནད་མ་བྱང་སྟེ། བླ་ན་མེད་པའི་བདེ་བ་རྟག་པ་ཡང་མ་ཐོབ་ན། ཅིའི་སླད་དུ་དེ་བཞིན་གཤེགས་པས་ཡོངས་སུ་སྤངས་ཏེ། མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་མི་ར་རོ་བ་ནི་མི་དྲན་པས་ན་ཉེ་རིང་མི་ཤེས་ཏེ། མ་དང་། བུ་མོ་དང་། སྲིང་མོ་ལ་མི་འོས་མི་རིགས་པ་བྱེད་ཅིང་བག་མ་མཆིས་པར་སྨྲས་ཏེ། མི་གཙང་བའི་སྟེང་ན་ཉལ་ལོ། །དེ་ལ་སྨན་པ་མཁས་པས་སྨན་བཏང་སྟེ་ཆང་འཐུངས་པ་སླར་སྐྱུགས་ན། དེ་མ་ཐག་ཏུ་སླར་དྲན་ཏེ་འཛེམ་པ་དང་ངོ་ཚ་བའི་སེམས་སྐྱེས་ནས། ཆང་ནི་སྡིག་པ་མི་དགེ་བ་ཐམས་ཅད་ཀྱི་རྩ་བ་ཡིན་ཏེ། གང་གིས་ཡོངས་སུ་སྤངས་ན་སྡིག་པ་ཐམས་ཅད་ཀྱང་སྤོང་བར་འགྱུར་རོ་ཞེས་འགྱོད་པ་སྐྱེའོ། །བཅོམ་ལྡན་འདས་བདག་ཅག་ཀྱང་དེ་དང་འདྲ་སྟེ། ཐོག་མ་མ་མཆིས་པའི་དུས་ནས་འཁོར་བར་འཁོར་ཏེ། འདོད་པས་མྱོས་ནས་འདོད་པ་ལྔ་ལ་ཆགས་པས་མ་མ་ལགས་པ་ལ་མར་འདུ་ཤེས། སྲིང་མོ་མ་ལགས་པ་ལ་སྲིང་མོར་འདུ་ཤེས། བུ་མོ་མ་ལགས་པ་ལ་བུ་མོར་འདུ་ཤེས། སེམས་ཅན་མ་ལགས་པ་ལ་སེམས་ཅན་དུ་འདུ་ཤེས་བསྐྱེད་པས་འཁོར་བར་འཁོར་ཏེ། སྡུག་བསྔལ་མྱོང་བ་ནི་ཇི་ལྟར་མི་ར་རོ་བ་ངན་སྐྱུགས་ཀྱི་སྟེང་ན་ཉལ་
བ་བཞིན་ནོ། །དེ་བཞིན་གཤེགས་པས་ཀྱང་བདག་ལ་ཆོས་ཀྱི་སྨན་བཏང་ནས་ཉོན་མོངས་པའི་ཆང་སླར་སྐྱུགས་མོད་ཀྱི། ལེགས་པར་མ་སངས་པར་ཅིའི་སླད་དུ་དེ་བཞིན་གཤེགས་པས་ཡོངས་སུ་སྤངས་ཏེ་མྱ་ངན་ལས་འདའ་བར་གཤེགས། བཅོམ་ལྡན་འདས་དཔེར་ན་གང་ཟག་གཅིག་ཤིང་ཆུ་ཤིང་ལ་སྲ་ཞིང་སྙིང་པོ་ཡོད་དོ་ཞེས་སྟོན་ན། དེ་ནི་གནས་མ་ལགས་སོ། །བཅོམ་ལྡན་འདས་སོ་སོའི་སྐྱེ་བོ་དག་ཀྱང་དེ་དང་འདྲ་སྟེ། བདག་དང་། གང་ཟག་དང་། སེམས་ཅན་དང་། འཚོ་བ་དང་། ཤེད་ཅན་དང་། ཤེད་བདག་དང་། ཤེས་པ་དང་། མཐོང་བ་དང་། བྱ་བ་དང་། བྱེད་པ་པོ་ལ་ཡང་དག་པ་བདེན་པའོ་ཞེས་སྟོན་ན། དེ་ཡང་གནས་མ་ལགས་སོ། །བདག་ཅག་ཀྱང་དེ་ལྟར་བདག་མ་མཆིས་པ་ལ་ནན་ཏན་བགྱིད་དོ། །བཅོམ་ལྡན་འདས་དཔེར་ན་སྦྲང་མ་ནི་ཅིར་ཡང་མི་དགོས་ཏེ། ལུས་ཀྱང་དེ་དང་འདྲ་བར་བདག་མ་མཆིས། བདག་པོ་མ་མཆིས་སོ། །བཅོམ་ལྡན་འདས་མེ་ཏོག་འདབ་མ་བདུན་པ་ལ་དྲི་བསུང་མ་མཆིས་པ་དང་འདྲ་བར་ལུས་འདི་ལ་ཡང་བདག་མ་མཆིས། བདག་པོ་མ་མཆིས་ཏེ། བདག་ཅག་ཀྱང་དེ་ལྟ་བུའི་སེམས་ཀྱིས་བདག་མ་མཆིས་པའི་འདུ་ཤེས་ལ་ནན་ཏན་བགྱིད་དོ། །བཅོམ་ལྡན་འདས་ཀྱིས་གསུངས་པ་ལྟར་ཆོས་ཐམས་ཅད་ལ་བདག་དང་བདག་གི་བ་མ་མཆིས་ཏེ། དགེ་སློང་དག་དེ་ལྟ་བུའི་ཚུལ་དུ་ནན་ཏན་གྱིས་ཤིག །དེ་ལྟ་བུར་ནན་ཏན་བྱས་ན་ང་རྒྱལ་ཡོངས་སུ་སྤོང་བར་འགྱུར་རོ་ཞེས་གསུངས་པ་ལྟར་བདག་ཅག་གིས་ང་རྒྱལ་སྤངས་ནས་མྱ་ངན་ལས་འདའ་བར་གཤེགས་སུ་གསོལ་ལོ། །བཅོམ་ལྡན་འདས་དཔེར་ན་ནམ་མཁའ་ལ་འཕུར་བའི་བྱའི་རྗེས་ནི་མངོན་དུ་སྣང་བའི་གནས་མ་མཆིས་སོ། །གང་བདག་མ་མཆིས་པ་ལ་ནན་ཏན་བགྱིད་པ་ནི་ལྟ་བ་རྣམས་མཆིས་ཞེས་བགྱི་བའི་གནས་མ་མཆིས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །ཁྱེད་རྣམས་
ཀྱིས་བདག་མེད་པའི་འདུ་ཤེས་ལེགས་པར་བསྒོམས་སོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་བདག་མ་མཆིས་པའི་འདུ་ཤེས་ལ་ནན་ཏན་བགྱིད་པར་མ་བས་ཀྱི། དེ་མ་ལགས་པ་གཞན་ཡང་སྡུག་བསྔལ་བར་འདུ་ཤེས་པ་དང་། སྟོང་པ་དང་། མི་རྟག་པ་དང་། བདག་མ་མཆིས་པར་འདུ་ཤེས་པ་ལ་ཡང་ནན་ཏན་བགྱིད་དོ། །བཅོམ་ལྡན་འདས་དཔེར་ན་མི་ར་རོ་བ་ནི་སེམས་མྱོས་པར་གྱུར་པས་རི་དང་། ཆུ་དང་། བྲག་དང་། ཤིང་དང་། ཁང་ཁྱིམ་དང་། ཉི་ཟླ་དང་། སྐར་མའི་བར་དུ་འཁོར་བ་སྙམ་བགྱིད་དེ། བཅོམ་ལྡན་འདས་གང་སྡུག་བསྔལ་བ་དང་། མི་རྟག་པ་དང་། བདག་མ་མཆིས་པའི་འདུ་ཤེས་ལ་སོགས་པ་ལ་ནན་ཏན་མི་བགྱིད་ན། གང་ཟག་དེ་ནི་འཕགས་པ་ཞེས་མི་བགྱི་སྟེ། བག་མ་མཆིས་པས་འཁོར་བར་ཡོངས་སུ་འཁོར་རོ། །བཅོམ་ལྡན་འདས་དེ་བས་ན་བདག་ཅག་ནི་འདུ་ཤེས་དེ་དག་ལ་ཤིན་ཏུ་ནན་ཏན་བགྱིད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག །ཁྱེད་ཀྱིས་མི་ར་རོ་བ་ལ་དཔེ་བླངས་པ་ནི་ཚིག་དང་འབྲུ་ཙམ་ཤེས་པར་ཟད་ཀྱི། དོན་ནི་མ་རྟོགས་སོ། །དེ་ལ་དོན་ཞེས་བྱ་བ་གང་ཞེ་ན། དཔེར་ན་མི་ར་རོ་བས་ཉི་ཟླ་ལ་སོགས་པ་མི་འཁོར་བར་འཁོར་བར་འདུ་ཤེས་པ་དང་འདྲ་བར་སོ་སོའི་སྐྱེ་བོ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་མ་རིག་པས་ཡོངས་སུ་ཁེབས་པས་ན་ཕྱིན་ཅི་ལོག་གི་སེམས་བསྐྱེད་དེ། བདག་ལ་བདག་མེད་པར་འདུ་ཤེས། རྟག་པ་ལ་མི་རྟག་པར་འདུ་ཤེས། ཡོངས་སུ་དག་པ་ལ་ཡོངས་སུ་མ་དག་པར་འདུ་ཤེས། བདེ་བ་ལ་སྡུག་བསྔལ་བར་འདུ་ཤེས་ཏེ། ཀུན་ནས་ཉོན་མོངས་པས་ཡོངས་སུ་ཁེབས་པས་དེ་དང་འདྲ་བར་འདུ་ཤེས་མོད་ཀྱི། དོན་ཁོང་དུ་མ་ཆུད་པས་མི་ར་རོ་བ་དེ་འཁོར་བའི་གནས་མ་ཡིན་པ་ལ་འཁོར་བར་འདུ་ཤེས་བསྐྱེད་པ་བཞིན་ནོ། །བདག་ཅེས་བྱ་བ་ནི་སངས་རྒྱས་ཞེས་བྱ་བའི་
དོན་ནོ། །རྟག་པ་ནི་ཆོས་ཀྱི་སྐུ་ཞེས་བྱ་བའི་དོན་ནོ། །བདེ་བ་ནི་མྱ་ངན་ལས་འདས་པ་ཞེས་བྱ་བའི་དོན་ནོ། །ཡོངས་སུ་དག་པ་ནི་ཆོས་ཞེས་བྱ་བའི་དོན་ཡིན་ན། ཅིའི་ཕྱིར་དགེ་སློང་ཁྱེད་བདག་ཏུ་འདུ་ཤེས་པ་ནི་ང་རྒྱལ་ཅན་ཡིན་ཏེ། འཁོར་བ་ན་འཁོར་རོ་ཞེས་སྨྲ། ཁྱེད་སྨྲ་བ་ལྟར་ན་བདག་ཅག་ཀྱང་མི་རྟག་པ་དང་། སྡུག་བསྔལ་བ་དང་། བདག་མེད་པའི་འདུ་ཤེས་ལ་ནན་ཏན་བྱེད་དོ་ཞེས་བྱ་བ་ནི་ཡང་དག་པར་དོན་མེད་དོ། །ནན་ཏན་བྱེད་པ་གསུམ་པོ་དེ་ལ་ཡང་དག་པའི་དོན་མེད་པས་དེ་མ་ཡིན་པ་ནན་ཏན་བྱེད་པའི་ཆོས་གསུམ་པོ་ལས་ལྷག་པ་ངས་བཤད་པར་བྱའོ། །སྡུག་བསྔལ་ལ་བདེ་བར་འཛིན་པ་དང་། བདེ་བ་ལ་སྡུག་བསྔལ་དུ་འཛིན་པ་ན་ཕྱིན་ཅི་ལོག་གི་ཆོས་སོ། །མི་རྟག་པ་ལ་རྟག་པར་འཛིན་པ་དང་། རྟག་པ་ལ་མི་རྟག་པར་འཛིན་པ་ནི་ཕྱིན་ཅི་ལོག་གི་ཆོས་སོ། །བདག་མེད་པ་ལ་བདག་ཏུ་འཛིན་པ་དང་། བདག་ལ་བདག་མེད་པར་འཛིན་པ་ནི་ཕྱིན་ཅི་ལོག་གི་ཆོས་སོ། །ཡོངས་སུ་མ་དག་པ་ལ་དག་པར་འཛིན་པ་དང་། ཡོངས་སུ་དག་པ་ལ་ཡོངས་སུ་མ་དག་པར་འཛིན་པ་ནི་ཕྱིན་ཅི་ལོག་གི་ཆོས་སོ། །ཕྱིན་ཅི་ལོག་གི་ཆོས་རྣམ་པ་བཞི་པོ་འདི་ནི་ཡང་དག་པར་ཇི་ལྟ་བུར་ནན་ཏན་བྱ་བ་གང་ཟག་གིས་མི་ཤེས་སོ། །དགེ་སློང་དག་སྡུག་བསྔལ་གྱི་ཆོས་ལ་བདེ་བར་འདུ་ཤེས་སྐྱེད་ཅིག །མི་རྟག་པ་ལ་རྟག་པར་འདུ་ཤེས་སྐྱེད་ཅིག །བདག་མེད་པ་ལ་བདག་ཏུ་འདུ་ཤེས་སྐྱེད་ཅིག །ཡོངས་སུ་མ་དག་པ་ལ་དག་པར་འདུ་ཤེས་སྐྱེད་ཅིག །འཇིག་རྟེན་ན་ཡང་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡོད་དོ། །འཇིག་རྟེན་ལས་འདས་པ་ལ་ཡང་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡོད་དོ། །འཇིག་རྟེན་གྱི་ཆོས་ནི་བརྗོད་དུ་ཡོད་ལ་དོན་མེད་པའོ། །འཇིག་རྟེན་ལས་འདས་པ་ནི་བརྗོད་དུ་ཡང་ཡོད་ལ། དོན་ཡང་ཡོད་དོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཆོས་ནི་
ཕྱིན་ཅི་ལོག་བཞི་དང་བཅས་པས་དོན་མི་རྟོགས་སོ། །དེ་ཇི་ལྟ་ཞེ་ན། འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། ཕྱིན་ཅི་ལོག་གསུམ་གྱིས་འཇིག་རྟེན་པ་ནི་བདེ་བ་ལ་སྡུག་བསྔལ་དུ་ལྟ། རྟག་པ་ལ་མི་རྟག་པར་ལྟ། བདག་ལ་བདག་མེད་པར་ལྟ། ཡོངས་སུ་དག་པ་ལ་ཡོངས་སུ་མ་དག་པར་ལྟ་སྟེ། ཕྱིན་ཅི་ལོག་ཅེས་བྱའོ། །ཕྱིན་ཅི་ལོག་པས་ན་འཇིག་རྟེན་པས་ནི་ཚིག་ཏུ་སྨྲ་བ་ཤེས་ཀྱི་དོན་མི་ཤེས་སོ། །དེ་ལ་དོན་ཞེས་བྱ་བ་གང་ཞེ་ན། བདག་མེད་པ་ནི་འཁོར་བ་ཞེས་བྱའོ། །བདག་ཅེས་བྱ་བ་ནི་དེ་བཞིན་གཤེགས་པའོ། །མི་རྟག་པ་ནི་ཉན་ཐོས་དང་རང་སངས་རྒྱས་སོ། །རྟག་པ་ནི་དེ་བཞིན་གཤེགས་པའི་ཆོས་ཀྱི་སྐུའོ། །སྡུག་བསྔལ་བ་ནི་མུ་སྟེགས་ཅན་ཐམས་ཅད་དོ། །བདེ་བ་ནི་ཡོངས་སུ་མྱ་ངན་ལས་འདས་པའོ། །ཡོངས་སུ་མ་དག་པ་ནི་འདུས་བྱས་པའི་ཆོས་སོ། །ཡོངས་སུ་དག་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡང་དག་པའི་ཆོས་ཡིན་ཏེ། དེ་བས་ན་ཕྱིན་ཅི་མ་ལོག་པ་ཞེས་བྱའོ། དེ་ལྟར་ན་ཕྱིན་ཅི་མ་ལོག་པས་ཚིག་ཏུ་བརྗོད་པ་ཡང་ཤེས་ལ། དོན་ཡང་ཤེས་སོ། །གང་ཞིག་ཕྱིན་ཅི་ལོག་བཞི་པོ་ཡོངས་སུ་སྤོང་བར་འདོད་ན། དེ་ལྟ་བུའི་ཚུལ་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་རིག་པར་བྱའོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར། ཕྱིན་ཅི་ལོག་བཞི་རྟོག་པས་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཁོང་དུ་ཆུད་ཅེས་གསུངས་ན། དེ་བཞིན་གཤེགས་པ་ནི་ཕྱིན་ཅི་ལོག་བཞི་མི་མངའ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐུགས་སུ་ཆུད་དོ། །དེ་ལྟར་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐུགས་སུ་ཆུད་ན། ཅིའི་སླད་དུ་བསྐལ་པ་གཅིག་གམ། བསྐལ་པ་ཕྱེད་ཀྱི་
བར་དུ་བཞུགས་ཤིང་། བདག་ཅག་གི་ཕྱིན་ཅི་ལོག་བཞི་ཡོངས་སུ་སྤོང་བར་འགྱུར་བ་མི་སྟོན་པར་བདག་ཅག་སྤངས་ཏེ། ཡོངས་སུ་མྱ་ངན་ལས་འདའ་བར་གཤེགས། དེ་བཞིན་གཤེགས་པས་བདག་ཅག་ལ་ཐུགས་བརྩེ་བའི་སླད་དུ་བདག་ཅག་གི་སྟོན་པར་གྱུར་ན། བདག་ཅག་ཀྱང་རྩེ་གཅིག་པའི་སེམས་ཀྱིས་སྤྱི་བོས་ལེན་ཅིང་ནན་ཏན་བགྱིད་དོ། ། གལ་ཏེ་དེ་བཞིན་གཤེགས་པ་མྱ་ངན་ལས་འདའ་ན། བདག་ཅག་ཀྱང་དེ་ལྟར་གདུག་པ་ཅན་གྱི་ལུས་དང་ལྷན་ཅིག་ཏུ་གནས་ཏེ་ཚངས་པར་སྤྱད་པ་སྤྱོད། བདག་ཅག་ཀྱང་བཅོམ་ལྡན་འདས་ཀྱི་ཞབས་འབྲིང་དུ་མྱ་ངན་ལས་འདའོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་ཡང་འདི་སྐད་ཅེས་བཀའ་སྩལ་ཏོ། །ཁྱེད་དེ་སྐད་མ་ཟེར་ཅིག །ངས་ནི་བླ་ན་མེད་པའི་ཡང་དག་པའི་ཆོས་ཐམས་ཅད་ཀྱང་འོད་སྲུང་ཆེན་པོ་ལ་གཏད་དོ། །འོད་སྲུང་ཆེན་པོ་ནི་ཁྱེད་ཀྱི་གནས་དང་རྟེན་དུ་འགྱུར་ཏེ། ཇི་ལྟར་དེ་བཞིན་གཤེགས་པ་སེམས་ཅན་ཐམས་ཅད་ཀྱི་གནས་དང་རྟེན་དུ་གྱུར་པ་བཞིན། འོད་སྲུང་ཆེན་པོ་འདི་ཡང་ཁྱེད་ལ་སོགས་པ་ཐམས་ཅད་ཀྱི་གནས་དང་རྟེན་དུ་འགྱུར་རོ། །དཔེར་ན་རྒྱལ་པོ་ཆེན་པོ་དབང་དང་ལྡན་པ་ཡང་བསང་དུ་འགྲོ་བ་ན་ཡུལ་གྱི་སྲིད་ཐམས་ཅད་ཀྱང་བློན་པོ་ཆེན་པོ་ལ་གཏད་དོ། །དེ་བཞིན་གཤེགས་པ་ཡང་དེ་དང་འདྲ་བར་དམ་པའི་ཆོས་ཐམས་ཅད་ཀྱང་འོད་སྲུང་ཆེན་པོ་ལ་གཏད་དོ། །ཁྱེད་རྣམས་མི་རྟག་པ་དང་། སྡུག་བསྔལ་བའི་འདུ་ཤེས་ལ་ནན་ཏན་བྱེད་པ་ཡང་ཡང་དག་པ་མ་ཡིན་ནོ། །དཔེར་ན་དབྱར་གྱི་དུས་སུ་རྫིང་ཆེན་པོའི་ནང་ན་གཟིངས་ཀྱི་སྟེང་ན་རྩེ་བ་ལས། རིན་པོ་ཆེ་བཻ་དཱུརྱ་ཆུར་ལྷུང་ན་དེའི་ཚེ་མི་མཁས་པ་ཐམས་ཅད་ཆུའི་ནང་དུ་ཞུགས་ནས། གྱོ་མོ་དང་། རྡོ་བ་དང་། རྩྭ་དང་། ཤིང་དང་། གསེག་མ་དག་སོ་སོ་ནས་ཕྱུང་སྟེ། རིན་པོ་ཆེ་བཻ་དཱུརྱ་རྙེད་སྙམ་ནས་དགའ་བཞིན་དུ་ཕྱིར་བྱུང་ན། གདོད་ཡང་དག་པ་མ་ཡིན་པར་ཤེས་སོ། །དེའི་ཚེ་རིན་པོ་ཆེ་ཆུའི་ནང་ན་ཡོད་
པས་རིན་པོ་ཆེའི་མཐུས་ཆུ་ཡོངས་སུ་དང་བས་ན་ཐམས་ཅད་ཀྱིས་ནོར་བུ་རིན་པོ་ཆེ་ཆུའི་གཏིང་ན་ཡོད་པར་ཤེས་ཏེ་ཇི་ལྟར་སྟེང་གི་ནམ་མཁའ་ལ་ཟླ་བ་ལྟ་བ་བཞིན་ནོ། །དེའི་ཚེ་ན་འཁོར་དེ་དག་གི་ནང་ན་མཁས་པ་ཐབས་དང་ལྡན་པས་ནི། དལ་གྱིས་ཆུའི་ནང་དུ་ཞུགས་ནས་རིན་པོ་ཆེ་ལེན་ཏོ། །དགེ་སློང་ཁྱེད་ཀྱང་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཡོངས་སུ་མ་དག་པའི་འདུ་ཤེས་ལ་ནན་ཏན་བྱེད་པ་ནི་ཇི་ལྟར་མི་མང་པོ་དག་སོ་སོ་ནས་གྱོ་མོ་དང་། རྡོ་བ་དང་། རྩྭ་དང་། ཤིང་དང་། གསེག་མ་དག་ཕྱུང་ནས་ནོར་བུ་རིན་པོ་ཆེ་རྙེད་དོ་སྙམ་སེམས་པ་དང་འདྲའོ། །ཁྱེད་རྣམས་ཀྱང་ཐབས་ལ་ཤིན་ཏུ་མཁས་པར་གང་ནས་གང་དུ་གནས་ཀྱང་བདག་ཏུ་འདུ་ཤེས་པ་དང་། རྟག་པ་དང་། བདེ་བ་དང་། ཡོངས་སུ་དག་པར་འདུ་ཤེས་པ་ལ་མཁས་པར་གྱིས་ཤིག །ཁྱེད་ཀྱིས་སྔར་ཆོས་རྣམ་པ་བཞི་པོའི་མཚན་མ་ཙམ་ལ་ནན་ཏན་བྱས་པ་ནི་ཐམས་ཅད་ཀྱང་ཕྱིན་ཅི་ལོག་ཏུ་གྱུར་ཏོ། །འདུ་ཤེས་རྣམས་ལ་ཡང་དག་པ་ཇི་ལྟ་བ་བཞིན་དུ་ནན་ཏན་དུ་སྒོམ་པ་ན། ཇི་ལྟར་མཁས་པ་ཐབས་དང་ལྡན་པ་དེས་ནོར་བུ་རིན་པོ་ཆེ་ཕྱུང་བ་དང་འདྲ་བར་བདག་ཏུ་འདུ་ཤེས་པ་དང་། རྟག་པ་དང་། བདེ་བ་དང་། ཡོངས་སུ་དག་པར་འདུ་ཤེས་པ་ལ་ནན་ཏན་བྱའོ། །དེ་ནས་ཡང་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔར་གསུངས་པ་ལྟར་ན། ཆོས་ཐམས་ཅད་ལ་བདག་མེད་ཀྱིས་ཁྱེད་དེ་ལྟ་བུའི་ཚུལ་དུ་ནན་ཏན་གྱིས་ཤིག །དེ་ལྟར་ནན་ཏན་བྱས་ན་བདག་ཏུ་འདུ་ཤེས་པ་སྤོང་བར་འགྱུར་རོ། །བདག་ཏུ་འདུ་ཤེས་པ་སྤངས་ན་ང་རྒྱལ་དང་བྲལ་བར་འགྱུར་རོ། །ང་རྒྱལ་དང་བྲལ་ན་མྱ་ངན་ལས་འདའོ་ཞེས་གསུང་བའི་དོན་ཇི་ལྟ་བུ་ལགས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ཤིན་ཏུ་ལེགས་སོ། །བདག་ཅག་གི་ཐེ་ཙོམ་བཅད་པའི་ཕྱིར་དོན་འདི་ལེགས་པར་དྲིས་སོ། །
འདི་ལྟ་སྟེ་དཔེར་ན་རྒྱལ་པོ་མི་མཁས་པ་ཤེས་པ་ཆུང་བ་ལ་སྨན་པ་ཡང་མི་མཁས་པ་གླེན་པ་ཞིག་ཡོད་ན། རྒྱལ་པོས་མ་རྟོགས་པས་སྨན་པ་དེ་ལ་བྱ་དགའ་ཆེར་སྩལ་ཏོ། །སྨན་པ་གླེན་པ་དེས་ནི་ནད་ཐམས་ཅད་ལ་སྨན་དུ་འོ་མ་གཏོང་སྟེ། ནད་ཐོག་མ་ཅི་ལས་གྱུར་པ་ཡང་མི་ཤེས་ལ། སྨན་དུ་འོ་མ་གཏོང་བ་ལ་ཡང་མི་མཁས་པས། རླུང་ནད་དང་། བད་ཀན་དང་། མཁྲིས་པའི་ནད་ཐམས་ཅད་ལ་ཡང་སྨན་དུ་འོ་མ་གཏོང་སྟེ། རྒྱལ་པོས་ནི་སྨན་པ་ཉིད་ཀྱང་མ་རྟོགས་ལ་འོ་མ་བཟང་ངམ་ངན་པའི་བྱེ་བྲག་ཀྱང་མི་ཕྱེད་དོ། །དེ་ལ་སྨན་པ་མཁས་པ་རིག་པ་བརྒྱད་དང་ལྡན་པ། ནད་ཐམས་ཅད་གསོ་བ་ལ་ཤིན་ཏུ་མཁས་པ། དཔྱད་ཐམས་ཅད་ཁོང་དུ་ཆུད་པ་ཞིག་ཡུལ་གཞན་ནས་འོངས་ན། དེའི་ཚེ་སྨན་པ་མི་མཁས་པ་དེ་མཁས་པ་དེ་ལ་འདྲི་བའམ་སློབ་པར་མི་བྱེད་ཀྱི། ཕྱིར་ང་རྒྱལ་གྱི་སེམས་བསྐྱེད་དོ། །དེའི་ཚེ་སྨན་པ་མཁས་པ་དེ་མི་མཁས་པ་དེ་ལ་བརྟེན་ནས་སློབ་དཔོན་དུ་བཟུང་སྟེ། སྨན་དཔྱད་གསང་བ་དག་བསླབ་པའི་ཕྱིར་སྨན་པ་གླེན་པ་དེ་ལ་བདག་ནི་ཁྱོད་ལ་སློབ་དཔོན་དུ་གསོལ་གྱིས་དཔྱད་རྣམས་བསྟན་ཅིང་བཤད་དུ་གསོལ། ཞེས་གསོལ་བ་བཏབ་ན། སྨན་པ་གླེན་པ་དེ་མཁས་པ་དེ་ལ་འདི་སྐད་ཅེས་དམ་འཆའོ། །ཁྱོད་ཅི་སྟེ་ལོ་བཞི་བཅུ་རྩ་བརྒྱད་ཀྱི་བར་དུ་ཁོ་བོའི་གཡོག་བྱ་ན། དཔྱད་ཐམས་ཅད་ཀྱང་བསྟན་ཏོ་ཞེས་བསྒོའོ། །དེ་ནས་སྨན་པ་མཁས་པ་དེས་མི་མཁས་པའི་ལུང་བཞིན་དུ་བདག་གིས་དེ་བཞིན་དུ་བགྱིའོ། །བདག་གིས་རྔོ་ཅི་ཐོགས་ཀྱིས་ཁྱོད་ཀྱི་གཡོག་བགྱིའོ། །ཞེས་སྨྲས་སོ། །དེ་ནས་སྨན་པ་གླེན་པ་དེ་སྨན་པ་གསར་པ་ཁྲིད་ནས་རྒྱལ་པོའི་ཕོ་བྲང་དུ་ཆས་སོ། །རྒྱལ་པོ་དང་ཕྲད་ནས། དེའི་ཚེ་སྨན་པ་གསར་བ་དེས་རྒྱལ་པོ་དེ་ལ་དཔྱད་རྣམ་པ་སྣ་ཚོགས་དང་། གཞན་ཡང་སྒྱུ་རྩལ་མང་པོའི་གཏམ་དང་། ཡུལ་གྱི་སྲིད་གཟུང་བ་དང་། ནད་པ་གསོ་བའི་ཐབས་འདིའོ། །རྒྱལ་པོ་ཆེན་པོ་ཐུགས་སུ་ཆུད་པར་གྱིས་ཤིག །
ཅེས་གཏམ་བྱས་སོ། །དེའི་ཚེ་རྒྱལ་པོ་དེས་དེ་སྐད་སྨྲས་པ་ཐོས་པ་དང་། སྨན་པ་རྙིང་པ་དེ་མི་མཁས་པར་ཤེས་ནས། ཡུལ་དེ་ནས་བསྐྲད་དོ། །དེ་ནས་ཀྱང་སྨན་པ་གསར་པ་དེ་ལ་ལྷག་པར་རིམ་གྲོ་དང་བཀུར་སྟི་བསྐྱེད་དོ། །དེའི་ཚེ་སྨན་པ་གསར་པ་དེ་འདི་སྙམ་དུ་རྒྱལ་པོ་འདི་ལ་བསྟན་པའི་དུས་ལ་བབ་བོ་སྙམ་དུ་བསམས་ནས། རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་བདག་ལ་དགོངས་པར་མད་ན། བདག་གིས་གསོལ་པ་གཅིག་གནང་བར་མཛོད་ཅིག །རྒྱལ་པོས་སྨྲས་པ། ཁོ་བོའི་ལག་པ་གཡས་པ་ནས་ལུས་ཀྱི་ཡན་ལག་ཐམས་ཅད་ཀྱི་བར་དུ་ཡིད་བཞིན་དུ་སློངས་ཤིག་དང་། ཐམས་ཅད་སྦྱིན་པར་བྱའོ། །སྨན་པ་དེས་གསོལ་པ། འདི་ལྟར་རྒྱལ་པོའི་ལུས་ཀྱི་ཡན་ལག་ཐམས་ཅད་ཀྱང་བདག་འཚལ་བར་གནང་མོད་ཀྱི། བདག་ཐུགས་མི་ཐུབ་ལ་མང་པོ་ཡང་མི་གསོལ་ན། དེང་སླན་ཆད་ཡུལ་མི་ཐམས་ཅད་ཀྱིས་སྨན་པ་རྙིང་པའི་དཔྱད་སྨན་དུ་འོ་མ་གཏོང་བ་ཤོས་བཅད་པར་བཀར་གདགས་སུ་གསོལ། དེ་ཅིའི་སླད་དུ་ཞེ་ན། སྨན་དེ་ནི་གདུག་པ་དང་བཅས་པས་མང་དུ་འཆི་བའི་ཕྱིར་རོ། །གལ་ཏེ་སྨན་དེ་གཏོང་བ་ཡོད་ན་ཡན་ལག་མགོ་བཅད་དོ་ཞེས་བཀར་བཏགས་ནས། སྨན་འོ་མ་གཏོང་བ་ཆོད་པས་དུས་མ་ཡིན་པར་འཆི་བ་མེད་དེ། ཐམས་ཅད་བདེ་ཞིང་སྐྱིད་པར་འགྱུར་གྱིས་བདག་གིས་གསོལ་བ་འདི་གནང་བར་མཛོད་ཅིག །དེ་ནས་རྒྱལ་པོས་སྨྲས་པ། ཁྱེད་གསོལ་བ་འདི་ཤིན་ཏུ་ཕན་པར་འགྱུར་བ་ཡིན་ཏེ། དེང་ཕྱིན་ཆད་ཡུལ་མི་ལས་ན་བ་ཞིག་ཡོད་ན། སྨན་འོ་མ་གཏོང་དུ་མི་གནང་ངོ་། །གལ་ཏེ་འོ་མ་གཏོང་བ་ཞིག་ཡོད་ན། ཡན་ལག་གི་དམ་པ་མགོ་བཅད་དོ་ཞེས་བཀར་བཏགས་སོ། །དེའི་ཚེ་ན་སྨན་པ་མཁས་པ་དེ་ཚ་བ་དང་། ཁ་བ་དང་། སྐྱུར་བ་དང་། མངར་བ་དང་། བསྔལ་བ་ལ་སོགས་ཏེ། རོ་རྣམ་པ་སྣ་ཚོགས་ཀྱི་སྨན་སྦྱར་ཏེ་ནད་གསོས་ན་གང་ཡང་མ་སོས་པ་མེད་དོ། །དེ་ནས་ཕྱིས་རིང་པོ་མ་ལོན་པར་རྒྱལ་པོ་དེ་ནད་ཀྱིས་བཏབ་ནས་
སྨན་པ་དེ་བཀུག་སྟེ་འདི་ལྟར་ང་ནི་ནད་ཀྱིས་ཤིན་ཏུ་སྡུག་བསྔལ་བར་གྱུར་ན་ཇི་ལྟར་གསོ་ཞེས་སྨྲས་པ་དང་། སྨན་པ་དེས་རྒྱལ་པོའི་ནད་བལྟས་ན་སྨན་དུ་འོ་མ་དགོས་པ་འདྲ་ནས། རྒྱལ་པོ་ལ་གསོལ་པ། རྒྱལ་པོའི་ནད་ཐབས་དང་སྦྱར་ན་སྨན་དུ་འོ་མ་གཏང་འཚལ་ཏེ། བདག་གིས་སྔར་སྨན་དུ་འོ་མ་གཏང་དུ་མི་རུང་ཞེས་གསོལ་བ་བརྫུན་དུ་གྱུར་ཏེ། སྨན་དུ་འོ་མ་ལས་བཟང་བ་མ་མཆིས་ལ། རྒྱལ་པོའི་ནད་ཀྱང་ཚ་བ་ལས་གྱུར་པས། སྨན་དུ་འོ་མ་བཏང་ན་བཟང་ངོ་། །རྒྱལ་པོས་སྨྲས་པ། སྨན་པ་ཁྱོད་འོན་ཏེ་མྱོས་སམ། ཚ་བའི་ནད་ཀྱིས་བཏབ་ན་ནད་འདི་ལ་འོ་མ་ཕན་ནོ། །ཞེས་སྨྲ། ཁྱོད་ཀྱིས་སྔར་འོ་མ་ལ་དུག་ཡོད་དོ་ཞེས་སྨྲས་ན། ད་ཇི་ལྟར་བཏུང་། ཁྱོད་ཀྱིས་ང་ལ་བགམ་མམ། སྨན་པ་སྔ་མས་བསྔགས་པ་ལ་དུག་ཡོད་དོ་ཞེས་བྱས་པས་སྨན་པ་གཅིག་བསྐྲད་པའི་འོག་ཏུ་ད་ཡང་ན་བ་ལ་སྨན་དུ་འོ་མ་བཟང་ངོ་ཞེས་ཁྱོད་སྨྲ་བ་དང་སྦྱར་ན། ངའི་སྨན་པ་རྙིང་པ་ནི་ཁྱོད་པས་མཁས་ངེས་སོ། །དེ་ནས་སྨན་པས་ཡང་རྒྱལ་པོ་ལ་འདི་སྐད་ཅེས་གསོལ་ཏོ། །རྒྱལ་པོ་དེ་སྐད་མ་གསུངས་ཤིག །དཔེར་ན་སྲིན་བུ་ཤིང་ཟན་གྱི་རྗེས་ལས་ཡི་གེར་རུང་བའང་ཡོད་དོ། །སྲིན་བུས་ནི་ཡི་གེ་ཡིན་ནམ་མ་ཡིན་པ་མི་ཤེས་ཀྱི། དེ་ལ་མཁས་པ་ཤེས་རབ་ཅན་གྱིས་མཐོང་ན། སྲིན་བུ་ཡི་གེ་ཤེས་སོ་ཞེས་ངོ་མཚར་དུ་མི་འཛིན་ཏོ། །རྒྱལ་པོ་ཆེན་པོ་སྨན་པ་སྔ་མ་ཡང་དེ་དང་འདྲ་སྟེ། ནད་རྣམས་མི་རྟོགས་པས་ཐམས་ཅད་ལ་སྨན་འོ་མ་གཏོང་བ་ནི་ཇི་ལྟར་སྲིན་བུའི་རྗེས་ལས་ཡི་གེར་འགྱུར་བ་བཞིན་ཏེ། སྨན་པ་སྔ་མས་ནི་འོ་མ་བཟང་ངན་དང་། རུང་མི་རུང་ཡང་མི་ཤེས་སོ། །རྒྱལ་པོས་སྨྲས་པ། སྨན་པ་སྔ་མས་ཇི་ལྟ་བུར་མི་ཤེས། སྨན་པས་སྨྲས་པ། སྨན་འོ་མ་ཞེས་བྱ་བ་ནི་གདུག་པ་ཡང་ལགས་ལ། བདུད་རྩི་ཡང་ལགས་སོ། །དེ་ལ་ཇི་ལྟར་ན་འོ་མ་དེ་གདུག་པ་ཡང་ཡིན་ལ། བདུད་རྩི་ཡང་ཡིན་ཞེ་ན། གལ་ཏེ་བ་ཉིད་སྤང་མ་དང་། རྩྭ་སྦྱིན་པ་དང་། ཕུབ་མ་མ་ཟོས་ལ། བེའུ་ཡང་ཤིན་
ཏུ་དུལ་ཞིང་འཚོ་བའི་ས་ཡང་རི་མཐོན་པོའི་སྟེང་མ་ཡིན་ནགས་ཁྲོད་མ་ཡིན་པ་ན་འཚོ་ཞིང་། ཆུ་ཡང་འབབ་ཆུ་དངས་མ་ལ་བླུད་དེ། དྲག་ཏུ་མི་བདའ། ཁྱུ་མཆོག་དང་ཁྱུ་གཅིག་ཏུ་མི་འཚོ་བར་བག་ཡངས་སུ་ཟ་ཞིང་འཐུང་ལ། འགྲོ་བ་དང་སྡོད་པ་ཡང་བག་ཡངས་སུ་འགྱུར་བའི་བའི་འོ་མ་ནི་ནད་རྣམས་ལ་ཕན་པས་བདུད་རྩི་ཞེས་བྱའོ། །འོ་མ་དེ་མ་ཡིན་པ་ནི་ཐམས་ཅད་ཀྱང་གདུག་པ་དང་བཅས་པ་ཞེས་བྱའོ། །དེའི་ཚེ་ན་རྒྱལ་པོ་ཆེན་པོས་དེ་སྐད་ཅེས་སྨྲས་པ་ཐོས་ནས་སྨན་པ་ལེགས་སོ། །ཤིན་ཏུ་ལེགས་པར་སྨྲས་སོ། །ད་སླན་ཆད་འོ་མ་བཟང་ངན་དང་རུང་མི་རུང་ཡང་ཤེས་སོ། །དེ་ནས་སྨན་དུ་འོ་མ་བཏང་ནས་ནད་ཀྱང་བྱང་བར་གྱུར་ཏེ། ཡུལ་མི་ཐམས་ཅད་ལ་ད་ཕྱིན་ཆད་སྨན་དུ་འོ་མ་ཐོང་ཤིག་ཅེས་བཀར་བཏགས་སོ། །ཡུལ་མི་རྣམས་ཀྱིས་དེ་སྐད་ཅེས་ཐོས་ནས་ཐམས་ཅད་གཤེ་སྟེ། རྒྱལ་པོ་ཆེན་པོ་འདི་ནི་ཡི་དགས་ཀྱིས་བརླམས་སམ། སྨྱོས་སམ་ཅི་ཉེས་ན། བདག་ཅག་བསླུས་ཏེ། སྨན་དུ་འོ་མ་ཐོང་ཤིག་ཅེས་གསུང་། ཡུལ་མི་ཐམས་ཅད་ཁྲོས་བཞིན་དུ་རྒྱལ་པོའི་སྤྱན་སྔར་ལྷགས་སོ། །དེ་ལ་རྒྱལ་པོས་བཀའ་སྩལ་པ། ཁྱེད་ང་ལ་མ་གཤེ་ཤིག །སྨན་དུ་འོ་མ་བཏང་དུ་རུང་ངམ་མི་རུང་བ་ནི་སྨན་པ་འདིའི་དཔྱད་ཡིན་གྱི། ངས་ནི་མ་ཉེས་སོ། །དེའི་ཚེ་རྒྱལ་པོ་ཆེན་པོ་དང་། ཡུལ་མི་ཐམས་ཅད་ཀྱང་ཤིན་ཏུ་དགའ་ཞིང་མགུ་བར་གྱུར་ནས། སྨན་པ་དེ་ལ་ལྷག་པར་རིམ་གྲོ་དང་བཀུར་སྟི་བསྐྱེད་དེ། ནད་པ་ཐམས་ཅད་ལ་སྨན་འོ་མ་བཏང་བས་ནད་ཀྱང་བྱང་བར་གྱུར་ཏོ། །དགེ་སློང་ཁྱེད་ཀྱང་དེ་ལྟ་བུའི་ཚུལ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ལ་དེ་ལྟར་རིག་པར་བྱ་སྟེ། སྨན་པ་ཆེན་པོ་ལྟ་བུར་འཇིག་རྟེན་དུ་གཤེགས་ནས། མུ་སྟེགས་ཅན་ངན་པར་ལྟ་བའི་སྨན་པ་ཐམས་ཅད་བཏུལ་ནས་རྒྱལ་པོ་ཐམས་ཅད་ལ་ང་ནི་སྨན་པའོ་ཞེས་བརྗོད་དེ། མུ་སྟེགས་
ཅན་དག་གདུལ་བའི་ཕྱིར་འདི་སྐད་དུ་བདག་མེད་དོ། །གང་ཟག་མེད། སེམས་ཅན་མེད། འཚོ་བ་མེད། ཤེད་ཅན་མེད། ཤེད་བདག་མེད། ཤེས་པ་དང་། མཐོང་བ་དང་། བྱ་བ་དང་། བྱེད་པ་པོ་མེད་དོ་ཞེས་གསུངས་སོ། །དགེ་སློང་དག་མུ་སྟེགས་ཅན་གྱིས་བདག་ཅེས་བརྗོད་པ་ནི་སྲིན་བུའི་རྗེས་ལས་ཡི་གེར་འགྱུར་བ་ཡང་དེ་དང་འདྲ་སྟེ། དེ་བས་ན་དེ་བཞིན་གཤེགས་པས་ནི་སངས་རྒྱས་ཀྱི་ཆོས་ལ་བདག་མེད་དོ་ཞེས་གསུངས་ཏེ། དེ་ནི་སེམས་ཅན་གདུལ་བའི་ཕྱིར། དུས་མཁྱེན་པའི་ཕྱིར་དེ་ལྟར་བདག་མེད་ཅེས་གསུངས་པ་ཡང་། རྒྱུ་ཡོད་རྐྱེན་ཡོད་པས་ན། བདག་ཡོད་ཅེས་གསུངས་པ་ནི་ཇི་ལྟར་སྨན་པ་མཁས་པས་འོ་མ་ལ་སྨན་དུ་རུང་བ་དང་། མི་རུང་བ་ཤེས་པ་དང་འདྲ་སྟེ། བྱིས་པ་མ་རབས་ཀྱིས་བདག་ཏུ་འཛིན་པ་ལྟ་བུ་ནི་མ་ཡིན་ནོ། །བྱིས་པ་མ་རབས་ཀྱིས་བདག་ཏུ་འཛིན་པ་ནི་མཐེ་བོ་ཙམ་ཞེའམ། ཡུངས་ཀར་ཙམ་ཞེའམ། རྡུལ་ཕྲ་མོ་ཙམ་དུ་འཛིན་ཏོ། །དེ་བཞིན་གཤེགས་པས་བདག་ཅེས་བརྗོད་པ་ནི་དེ་ལྟ་བུ་མ་ཡིན་པས་ཆོས་ཐམས་ཅད་ལ་བདག་མེད་དོ་ཞེས་གསུངས་ཀྱང་ཡང་དག་པར་ན་བདག་མེད་པ་མ་ཡིན་ཏེ། བདག་ཅེས་བྱ་བ་ནི་ཆོས་གང་བདེན་པ། ཡང་དག་པ་རྟག་པར་གནས་པ་བདག་པོར་གྱུར་པ། མི་འགྱུར་མི་འཕོ་བ་དེ་ནི་བདག་ཅེས་བྱ་སྟེ། ཇི་ལྟར་སྨན་པ་ཆེན་པོ་དེ་སྨན་འོ་མ་ལ་མཁས་པ་བཞིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སོ་སོའི་སྐྱེ་བོའི་ཕྱིར་ཆོས་ཐམས་ཅད་ལ་ཡང་དག་པར་བདག་ཡོད་དོ་ཞེས་གསུངས་ཀྱིས་ཁྱེད་ལ་སོགས་པས་འཁོར་རྣམ་བཞི་ཡང་དེ་ལྟ་བུའི་ཚུལ་དུ་ཆོས་ཐམས་ཅད་ལ་ནན་ཏན་གྱིས་ཤིག།། །།བམ་པོ་བཞི་པ། བཅོམ་ལྡན་འདས་ཀྱིས་གཞན་ཡང་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་འདུལ་བ་ལ་ཇི་ཙམ་ཐེ་ཚོམ་དུ་གྱུར་པ་དེ་དག་ཇི་དགའ་བར་དྲིས་ཤིག་དང་ངས་བསྟན་ཅིང་བཤད་དེ་ཁྱེད་ཀྱི་སེམས་རངས་པར་བྱའོ། །ངས་ནི་ཆོས་ཐམས་ཅད་ངོ་བོ་ཉིད་ཀྱིས་སྟོང་པ་ཉིད་དུ་མངོན་པར་རྟོགས་ཏེ། དགེ་སློང་དག་དེ་བཞིན་གཤེགས་པས་ནི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་རྟོགས་པར་ཟད་དོ་སྙམ་དུ་མི་བསམ་མོ། །དགེ་སློང་དག་འདུལ་
བ་ལ་ཇི་ཙམ་དུ་ཐེ་ཚོམ་དུ་གྱུར་པ་དེ་དག་ད་ཞུ་བའི་དུས་ལ་བབ་བོ། །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་ཤེས་རབ་དང་མི་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཞུ་ཞིང་གསོལ་བའི་མཐུ་མ་མཆིས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་སྤྱོད་ཡུལ་བསམ་གྱིས་མི་ཁྱབ་པས་ཏིང་ངེ་འཛིན་ཡང་བསམ་གྱིས་མི་ཁྱབ་ལ། སྟོན་པས་བསྟན་པ་ཡང་བསམ་གྱིས་མི་ཁྱབ་པས་བདག་ཅག་ནི་ཤེས་རབ་ཞན་ཏེ་དེ་བཞིན་གཤེགས་པ་ལ་ཞུ་ཞིང་གསོལ་བའི་མཐུ་མ་མཆིས་སོ། །བཅོམ་ལྡན་འདས་དཔེར་བགྱི་ན། རྒན་པོ་ལོ་བརྒྱ་ཉི་ཤུ་ལོན་པ། རྒས་འཁོགས་པ། རྟག་ཏུ་ན་བ་རྩོལ་བའི་མཐུ་མ་མཆིས་པ། ཉམ་ཆུང་བ་ཚེའི་དབང་དུ་མ་གྱུར་པ་གཅིག་ལ་མི་ཕྱུག་པོ་དོན་གཉེར་བའི་ཕྱིར་ཡུལ་གཞན་དུ་མཆི་བ་ཞིག་གསེར་སྲང་བརྒྱ་སྟོང་དུ་མ་གཏམས་ནས་འདི་སྐད་དུ་བདག་གི་ནོར་བུ་རིན་པོ་ཆེ་འདི་ཁྱོད་ལ་གཏམས་ཀྱིས་ལོ་བཅུ་འམ། གལ་ཏེ་ལོ་ཉི་ཤུ་ན་ཕྱིར་འཁོར་གྱིས་སླར་བྱིན་ཅིག་ཅེས་སྨྲས་སོ། །རྒན་པོ་དེས་རིན་པོ་ཆེ་དེ་བླངས་ནས་རིང་པོ་མ་ལོན་པར་ནད་ཀྱིས་ཤི་སྟེ། རབས་ཀྱང་ཆད་པས་རིན་པོ་ཆེ་དེ་ཅི་གཏམས་པ་རྣམས་ཀྱང་ཐམས་ཅད་འཁྱམས་པར་གྱུར་ཏོ། །ནོར་བདག་ཕྱིར་ལོག་ནས་སླར་བླངས་པའི་གནས་མ་མཆིས་པར་གྱུར་ཏོ། །དེ་ལྟར་གླེན་པ་དེ་གཏམས་པའི་རིགས་སམ། མི་རིགས་པའི་གནས་མི་འཚལ་བས་ཡུལ་གཞན་ནས་སླར་འཁོར་ཡང་རིན་པོ་ཆེ་ཀུན་འཁྱམས་ཏེ་སླར་བླངས་པའི་གནས་མ་མཆིས་
སོ། །བཅོམ་ལྡན་འདས་བདག་ཅག་ཉན་ཐོས་རྣམས་ཀྱང་དེ་དང་འདྲ་སྟེ། དེ་བཞིན་གཤེགས་པས་ཡང་དང་ཡང་ནན་ཏན་དུ་འདུལ་བ་བསྟན་པ་ནི་ཐོས་ནས། གཟུངས་སུ་འཛིན་ཅིང་ཆོས་ཡུན་དུ་གནས་པར་བགྱིད་མི་ནུས་པ་ནི་ཇི་ལྟར་རྒན་པོ་དེས་ཕ་རོལ་པོས་གཏམས་པ་བླངས་པ་དང་མཚུངས་ཏེ། བདག་ཅག་ལ་ཤེས་རབ་མ་མཆིས་པས་འདུལ་བ་རྣམས་ལ་གང་ཞུ་ཞིང་འདྲི་བའི་ཆ་ཡང་མ་མཆིས་སོ། །བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། ཁྱེད་དེང་ང་ལ་ཞུས་ན་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་གྱིས་དེ་བས་ན་ཁྱེད་ཅི་དང་ཅི་འདོད་པ་དྲིས་ཤིག །དེ་ནས་དགེ་སློང་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དཔེར་ན་སྐྱེས་བུ་ཚད་ལ་བབ་པ། ལོ་ཉི་ཤུ་རྩ་ལྔ་ལོན་པ། ཤིན་ཏུ་ལང་འཚོ་བ། བྱད་གཟུགས་དང་ལྡན་པ། ནོར་རིན་པོ་ཆེ་གསེར་དང་། དངུལ་དང་། བཻ་དཱུརྱ་རབ་ཏུ་མང་བ། ཕ་དང་། མ་དང་། ཆུང་མ་དང་། བུ་དང་འཁོར་དུ་བཅས་པ་ཞིག་ལ། གལ་ཏེ་མི་ཞིག་གིས་ནོར་རིན་པོ་ཆེ་དག་གཏམས་ཏེ། དེ་ལ་འདི་སྐད་དུ་བདག་ནི་དོན་གཉེར་ཞིང་ཡུལ་གཞན་དུ་མཆིས། ནོར་རིན་པོ་ཆེ་འདི་དག་ཁྱོད་ལ་གཏམས་ཀྱིས། ནམ་འཁོར་བ་ན་སླར་སྩོལ་ཅིག་ཅེས་སྨྲས་སོ། །དེ་ནས་སྐྱེས་བུ་དེས་བདག་གི་ནོར་དང་འདྲ་བར་ཤིན་ཏུ་བསྲུངས་སོ། །སྐྱེས་བུ་དེ་ཕྱིས་ནད་ཀྱིས་བཏབ་ནས་དྲུང་གི་འཁོར་ཀུན་བསྡུས་ཏེ། འདི་སྐད་དུ་རིན་པོ་ཆེ་འདི་དག་ནི་ཆེ་གེ་མོ་ཞིག་གིས་གཏམས་ཀྱིས། ནམ་ལེན་དུ་འོངས་པ་དང་སླར་བྱིན་ཅིག་ཅེས་བསྒོའོ། །མཁས་པ་ཤེས་རབ་ཅན་ནི་དེ་ལྟར་གཏམས་པ་དང་མི་གཏམས་པའི་གནས་འཚལ་བས་སླར་འཁོར་མ་ཐག་ཏུ་རིན་པོ་ཆེ་ཀུན་ཐོབ་བོ། །བཅོམ་ལྡན་འདས་དེ་བཞིན་དུ་ཆོས་ཀྱི་དཀོན་མཆོག་འདི་ཡང་གལ་ཏེ། དགའ་བོའམ་དགེ་སློང་དག་ལ་གཏམས་ན་ཡུན་རིང་པོར་མི་གནས་སོ། །དེ་ཅིའི་སླད་དུ་ཞེ་ན། འོད་སྲུང་ཆེན་པོ་དང་ཉན་ཐོས་ཐམས་ཅད་ནི་མི་རྟག་པ་སྟེ། ཇི་ལྟར་རྒན་པོ་དེས་
གཞན་གྱིས་གཏམས་པའི་ནོར་ལེན་པ་དང་མཚུངས་སོ། །དེ་བས་ན་བླ་ན་མ་མཆིས་པའི་ཆོས་ཀྱི་དཀོན་མཆོག་འདི་བྱང་ཆུབ་སེམས་དཔའ་རྣམས་ལ་གཏམས་ན་བྱང་ཆུབ་སེམས་དཔའ་རྣམས་ནི་འདྲི་བ་དང་ལན་གླན་པ་ལ་མཁས་པས་ཆོས་རིན་པོ་ཆེ་འདི་ཡུན་དུ་གནས་ཤིང་བསྐལ་པ་ཚད་མེད་པའི་བར་དུ་ཤིན་ཏུ་རྒྱས་པར་འགྱུར་ལ། སེམས་ཅན་ལ་ཕན་པའི་དོན་དུ་འགྱུར་ཏེ། ཇི་ལྟར་སྐྱེས་བུ་ལང་འཚོ་ལ་ནོར་རིན་པོ་ཆེ་གཏམས་པ་དང་མཚུངས་སོ། །དེ་ལྟ་བས་ན་བྱང་ཆུབ་སེམས་དཔའ་ཆེན་པོས་ནི་ཞུ་ཞིང་གསོལ་བའི་མཐུ་མཆིས་ཀྱི་བདག་ཅག་སྦྲང་བུ་དང་འདྲ་བའི་ཤེས་རབ་ཀྱིས་ནི་དེ་བཞིན་གཤེགས་པའི་ཆོས་ཤིན་ཏུ་ཟབ་མོ་ལ་ཞུ་བའི་མཐུ་མ་མཆིས་སོ། །ཞེས་གསོལ་ནས་ཅང་མི་སྨྲ་བར་འཁོད་དོ། །དེ་ནས་བཅོམ་ལྡན་འདས་ཀྱིས་ཤིན་ཏུ་ལེགས་སོ་ཤིན་ཏུ་ལེགས་སོ་ཞེས་བསྟོད་ནས་དགེ་སློང་དག་ཁྱེད་ཀྱིས་ཟག་པ་མེད་པའི་སེམས་དང་། དགྲ་བཅོམ་པའི་སེམས་ལེགས་པར་ཐོབ་བོ། །ང་ཡང་དེ་སྙམ་དུ་དགོངས་ཏེ། རྐྱེན་རྣམ་པ་དེ་གཉིས་ཀྱིས་ཐེག་པ་ཆེན་པོ་འདི་བྱང་ཆུབ་སེམས་དཔའ་ལ་གཏམས་ན་དམ་པའི་ཆོས་ཡུན་དུ་གནས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་ན་འདུས་པའི་རིགས་ཀྱི་བུ་དང་རིགས་ཀྱི་བུ་མོ་རྣམས་ལ་བཀའ་སྩལ་པ། ངའི་སྐུ་ཚེ་ནི་དཔག་ཏུ་མེད་དེ། སོ་སོ་ཡང་དག་པར་ཤེས་པ་ཡང་ཟད་མི་ཤེས་མོད་ཀྱི། ཁྱེད་འདུལ་བ་དང་ཆོས་མངོན་པ་ལས་ཅི་དང་ཅི་འདོད་པ་ཡིད་བཞིན་དུ་དྲིས་ཤིག་ཅེས་ལན་གཉིས་ལན་གསུམ་གྱི་བར་དུ་བཀའ་སྩལ་ཏོ། །དེའི་ཚེ་འཁོར་གྱི་དཀྱིལ་འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་གྲོང་ཁྱེར་ཏ་ལ་ཞེས་བྱ་བ་ན་གནས་པ་ན། བྲམ་ཟེའི་རིགས་འོད་སྲུང་ཆེན་པོ་ཞེས་བྱ་བ་རབ་ཏུ་གཞོན་པ་ཞིག་སངས་རྒྱས་ཀྱིས་བྱིན་གྱི་བརླབས་ཀྱིས་འདུག་པ་ལས་ལངས་ནས། བླ་གོས་ཕྱོགས་གཅིག་ཏུ་བྱས་ཏེ། ལན་བརྒྱ་སྟོང་དུ་མར་བསྐོར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །གལ་ཏེ་བདག་གིས་ཞུས་ནས་ཞུས་པའི་ལུང་བསྟན་པར་བཅོམ་ལྡན་འདས་ཀྱིས་སྐབས་དབྱེ་བར་གནང་ན་བདག་གིས་དེ་བཞིན་གཤེགས་པ་ལ་ཕྱོགས་གཅིག་ཅིག་ཞུའོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་ཤིང་ཐེ་ཚོམ་མེད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ཞུ་བར་གནང་ན་བདག་གི་ཤེས་རབ་ནི་སྦྲང་བུ་ལྟ་བུར་གྱུར་ལ། དེ་བཞིན་གཤེགས་པའི་ཡོན་ཏན་ནི་ཤིན་ཏུ་མཐོ་བས་གཅན་གཟན་དང་སེང་གེ་ལྟ་བུ་རྣམ་པར་མི་ཤིགས་པའི་འཁོར་གྱིས་ཡོངས་སུ་བསྐོར་ཏེ། དེ་བཞིན་གཤེགས་པའི་སྐུ་ཡང་རྡོ་རྗེ་ལྟ་བུ་ལ་མདོག་བཻ་དཱུརྱ་འདྲ་སྟེ་མི་ཤིགས་པ་ལགས་ལ། ཡེ་ཤེས་དང་ཤེས་རབ་རྒྱ་མཚོ་ལྟ་བུས་ཡོངས་སུ་བསྐོར་ཅིང་། འཁོར་གྱི་དཀྱིལ་འཁོར་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་སོགས་པ་ཡང་ཚད་མེད་མཐའ་ཡས་པའི་ཡོན་ཏན་མཆོག་དང་ལྡན་ཏེ། སྤོས་ཀྱི་གླང་པོ་ཆེ་ལྟ་བུའི་འཁོར་གྱི་དཀྱིལ་འཁོར་འདིའི་ནང་ན་འདྲི་བར་ག་ལ་སྤོབས་མོད་ཀྱི། འོན་གྱིས་ཀྱང་སངས་རྒྱས་ཀྱིས་བྱིན་གྱི་རླབས་དང་། འཁོར་མང་པོའི་དགེ་བའི་རྩ་བའི་ཤུགས་ཀྱིས་ཅུང་ཟད་ཅིག་ཞུ་བར་འཚལ་ཏོ་ཞེས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། ཚེ་རིང་བར་ནི་ཅིས་འགྱུར་ཞིང་། །མི་འཇིག་རྡོ་རྗེའི་ལུས་ཅིས་འཐོབ། །ཅི་ཡི་རྒྱུ་དང་རྐྱེན་གང་གིས། །ཤིན་ཏུ་བརྟན་པའི་སྟོབས་ཀྱང་འཐོབ། །ཇི་ལྟར་མདོ་སྡེ་འདི་ཉིད་ཀྱིས། །མཐར་ཐུག་ཕ་རོལ་ཕྱིན་པར་འགྱུར། །བཅོམ་ལྡན་འདས་ཀྱིས་དགོངས་པ་གང་། །སེམས་ཅན་དག་ལ་བཤད་དུ་གསོལ། །ཇི་ལྟར་ཆེ་བ་ཉིད་
འཐོབ་ཅིང་། །ཀུན་གྱི་རྟེན་དང་གནས་སུ་འགྱུར། །དགྲ་བཅོམ་པ་ཉིད་མ་ཡིན་པར། །དགྲ་བཅོམ་པ་དང་མཉམ་པ་ལགས། །ཇི་ལྟར་ལྷ་ཡི་བདུད་རྣམས་ཀྱིས། །བར་ཆད་བགྱིད་པ་འཚལ་བར་བགྱི། །བཅོམ་ལྡན་གསུང་དང་བདུད་ཀྱི་ཚིག །ཇི་ལྟར་རྟོགས་ཤིང་འཚལ་བར་བགྱི། །ཇི་ལྟར་ཁ་ལོ་སྒྱུར་བ་དག །དགྱེས་བཞིན་དོན་དམ་བདེན་པ་གསུངས། །ཡང་དག་དགེ་དང་ལྡན་བཞིན་དུ། །ཕྱིན་ཅི་ལོག་བཞི་སྟོན་པ་ལགས། །ཇི་ལྟར་དགེ་བའི་ལས་བགྱིད་པ། །དྲང་སྲོང་ཆེན་པོས་བཤད་དུ་གསོལ། །ཇི་ལྟར་བྱང་ཆུབ་སེམས་དཔའ་རྣམས། །ལྟ་དཀའ་ཉིད་ཀྱང་མཐོང་བར་འགྱུར། །ཇི་ལྟར་རྫོགས་པའི་དོན་ཆུད་ཅིང་། །དོན་གྱི་ཕྱེད་ཙམ་རྟོགས་པ་ལགས། །ཇི་ལྟར་འཕགས་དང་འཐུན་སྤྱོད་ཅིང་། །ས་ལ་ས་ཞེས་བྱ་ལྟ་བུ། །ཀ་ལིང་ཏེ་དང་ཉི་ཟླ་དང་། །ཕོད་དང་སྐར་ཆེན་ལྟ་བུ་ལགས། །ཇི་ལྟར་སེམས་ནི་མ་བསྐྱེད་པར། །བྱང་ཆུབ་སེམས་དཔའ་ཞེས་སུ་གདགས། །ཇི་ལྟར་འཁོར་གྱི་དཀྱིལ་འཁོར་དུ། །མི་འཇིགས་པ་ཡི་སེམས་ཐོབ་ཅིང་། །འཛམ་བུ་ཆུ་ཀླུང་གསེར་ལྟ་བུར། །སྐྱོན་དང་རྣམ་པར་བྲལ་བ་ལགས། །ཇི་ལྟར་འཇིག་རྟེན་རྙོག་མ་འདིར། །པད་མོ་བཞིན་དུ་མི་ཆགས་འགྱུར། །ཇི་ལྟར་ཀུན་ནས་ཉོན་མོངས་ཀྱང་། །ཀུན་ནས་ཉོན་མོངས་ཆགས་མི་འགྱུར། །སྨན་པ་མཁས་པས་ནད་གསོས་པ། །ནད་མི་འགོ་བ་ལྟ་བུ་ལགས། །འཁོར་བའི་རྒྱ་མཚོ་ཆེན་པོར་ནི། །ཇི་ལྟར་དེད་དཔོན་ལྟ་བུར་འགྱུར། །ཇི་ལྟར་འཁོར་བ་ཡོངས་སྤངས་པ། །སྦྲུལ་ལྤགས་རྗེ་བ་ལྟ་བུ་ལགས། །ཇི་ལྟར་དཀོན་མཆོག་གསུམ་པོ་ལ། །ཡིད་བཞིན་ལྷ་ཡི་ཤིང་ལྟ་བུ། །ཐེག་པ་གསུམ་གྱི་རིགས་མེད་ན། །ཅི་ཡི་སླད་དུ་གསུངས་པར་གྱུར། །དཔེར་ན་བདེ་བ་མ་སྐྱེས་པར། །ཇི་ལྟར་བདེ་བ་མྱོང་ཞེས་བགྱི། །ཇི་ལྟར་བྱང་ཆུབ་སེམས་དཔའ་རྣམས། །མི་ཤིགས་པ་ཡི་འཁོར་ཡང་འཐོབ། །ཇི་ལྟར་མདོངས་ཤིང་འཐོམས་པ་ཡི། །འདྲེན་པ་ཡི་ནི་མིག་ཏུ་འགྱུར། །ཇི་ལྟར་མགོ་མང་སྟོན་པ་ཡང་། །
དྲང་སྲོང་ཆེན་པོས་བཤད་དུ་གསོལ། །ཇི་ལྟར་ཆོས་རྣམས་སྨྲ་བ་དག །ཟླ་བ་ཚེས་པ་བཞིན་དུ་སྐྱེ། །ཇི་ལྟ་བུར་ན་མཐར་ཕྱིན་པའི། །མྱ་ངན་འདའ་བ་སྟོན་པ་ལས། །ཇི་ལྟར་དཔའ་ཞིང་བརྩོན་པ་ལ། །མི་དང་ལྷ་དང་བདུད་ལམ་སྟོན། །ཇི་ལྟར་ཆོས་ཀྱི་མཚན་ཉིད་ཤེས། །ཆོས་ཀྱི་བདེ་བ་མྱོང་བ་ལགས། །ཇི་ལྟར་བྱང་ཆུབ་སེམས་དཔའ་རྣམས། །ཐམས་ཅད་ནད་དང་བྲལ་བ་ལགས། །ཇི་ལྟར་སོ་སོའི་སྐྱེ་བོའི་ཕྱིར། །དགོངས་ཏེ་གསུངས་པ་སྟོན་པ་ལགས། །མཐར་ཕྱིན་པ་ཡི་དོན་ནི་གང་། །ཇི་ལྟར་མཐར་མ་ཕྱིན་པ་ལགས། །ཐེ་ཚོམ་གཅོད་པའི་ཕྱིར་གསུངས་ན། །གཅིག་ཏུ་ངེས་པར་ཅིས་མི་གསུང་། །ཇི་ལྟར་གྱ་ནོམ་བླ་མེད་པའི། ། བྱང་ཆུབ་ལ་ནི་བསྙེན་པར་འགྱུར། །བྱང་ཆུབ་སེམས་དཔའ་རྣམས་ཀྱི་ཕྱིར། །དེ་བཞིན་གཤེགས་ལ་བདག་ཞུའོ། །སྤྱོད་པ་ཤིན་ཏུ་ཟབ་མོ་ཡི། །དམ་པ་དག་ནི་བཤད་དུ་གསོལ། །རྣམ་པ་ཐམས་ཅད་ཆོས་ཀྱི་ནང་། །བདེ་བའི་རང་བཞིན་ཀུན་མཆིས་ན། །དྲང་སྲོང་ཆེན་པོ་མཆོག་གིས་སུ། །རྣམ་པར་ཕྱེ་སྟེ་བསྟན་དུ་གསོལ། །སྐྱེ་བོའི་རྟེན་དང་གནས་འགྱུར་བ། །རྐང་གཉིས་མཆོག་སྟེ་སྨན་ལྟ་བུ། །ཕུང་པོ་རྣམས་ལས་ཞུ་བརྩམས་ཀྱང་། །འཚལ་བའི་ཤེས་རབ་མ་མཆིས་སོ། །དེ་ལྟར་ཤིན་ཏུ་ཟབ་མོ་ཡི། །སངས་རྒྱས་རྣམས་ཀྱི་སྤྱོད་ཡུལ་ནི། །བྱང་ཆུབ་སེམས་དཔའ་བརྩོན་པ་ཡང་། །ཤེས་པར་ནུས་པ་མ་ལགས་སོ། །དེའི་ཚེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ཤིན་ཏུ་ལེགས་སོ་ཤིན་ཏུ་ལེགས་སོ་ཞེས་བྱ་བ་བྱིན་ནས། རིགས་ཀྱི་བུ་ཁྱོད་ཀྱིས་རྣམ་པ་ཐམས་ཅད་མཁྱེན་པའི་ཡེ་ཤེས་མ་ཐོབ་མོད་ཀྱི། ཁྱོད་ཀྱིས་ཤིན་ཏུ་ཟབ་མོའི་སྙིང་པོ་ཞུ་ཞིང་གསོལ་བ་འདི་ཐམས་ཅད་མཁྱེན་པའི་ཡེ་ཤེས་ཀྱིས་འདྲི་བ་དང་ཐ་མི་དད་དོ། །རིགས་ཀྱི་བུ་སྔོན་བྱང་ཆུབ་ཀྱི་ཤིང་དྲུང་དུ་སྙིང་པོར་བྱང་ཆུབ་སྟེ་མངོན་པར་སངས་རྒྱས་པ་ན། དེའི་ཚེ་ན་ཡང་སངས་རྒྱས་ཀྱི་ཞིང་ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་སྙེད་
ནས་བྱང་ཆུབ་སེམས་དཔའ་རྣམས་ལྷགས་ཏེ། ང་ལ་ཤིན་ཏུ་ཟབ་མོའི་དོན་དྲིས་པའི་ཚིག་གི་རྣམ་གྲངས་དང་། དོན་དང་ཡོན་ཏན་ཡང་འདི་དང་འདྲ་སྟེ་ཐ་མི་དད་དོ། །གང་གིས་འདི་སྐད་དུ་འདྲི་བ་ནི་སེམས་ཅན་ཚད་མེད་པ་སྙེད་ལ་ཕན་པ་དང་། བདེ་བའི་དོན་དུ་སྤྱོད་པ་ཡིན་ནོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཤེས་རབ་མ་མཆིས་པས་འདི་ལྟ་བུ་ཤིན་ཏུ་ཟབ་མོའི་དོན་དྲི་བའི་མཐུ་མ་མཆིས་སོ། །བཅོམ་ལྡན་འདས་འདི་ལྟ་སྟེ་དཔེར་ན་སྦྲང་བུ་དག་ནི་རྒྱ་མཚོའི་ཕ་རོལ་དུ་འཕུར་ནུས་པའི་མཐུ་འམ་ནམ་མཁའི་དབྱིངས་ཀུན་ཏུ་ཕྱིན་པའི་མཐུ་མ་མཆིས་སོ། །བདག་ཀྱང་དེ་དང་འདྲ་བར་དེ་བཞིན་གཤེགས་པའི་ཡེ་ཤེས་ཀྱི་རྒྱ་མཚོའི་ཆོས་ཉིད་ནམ་མཁའ་ལྟ་བུ་ཤིན་ཏུ་ཟབ་མོའི་དོན་དྲི་བའི་མཐུ་མ་མཆིས་སོ། །བཅོམ་ལྡན་འདས་དཔེར་ན་རྒྱལ་པོའི་གཙུག་ཕུད་ལ་འདོགས་པའི་ནོར་བུ་རིན་པོ་ཆེ་བང་མཛོད་སྲུང་བའི་བློན་པོ་ལ་བཞག་ན་བློན་པོ་དེས་སྤྱི་བོས་ལེན་ཏེ་སྲུང་བའི་དམ་བཞག་ཆེར་བགྱིད་དོ། །བདག་ཀྱང་དེ་བཞིན་དུ་དེ་བཞིན་གཤེགས་པས་གསུངས་པའི་དོན་ཤིན་ཏུ་རྒྱས་པའི་དོན་ཟབ་མོ་འདི་སྤྱི་བོས་ལེན་ཏེ་སྲུང་བའི་ནན་ཏན་ཆེར་བགྱིད་དོ། །དེ་ཅིའི་སླད་དུ་ཞེ་ན། བདག་གིས་ཤེས་རབ་ཤིན་ཏུ་ཟབ་མོ་བསྒྲུབ་པའི་སླད་དུའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ཤིན་ཏུ་ལེགས་པར་ཉོན་ཅིག་དང་། དེ་བཞིན་གཤེགས་པའི་སྐུ་ཚེ་རིང་བའི་ལས་ཁྱོད་ལ་བཤད་དོ། །བྱང་ཆུབ་སེམས་དཔས་ལས་དེའི་རྒྱུ་དང་རྐྱེན་ཐོས་པས་ཚེ་རིང་བར་འགྱུར་གྱིས་དེ་བས་ན་ཤིན་ཏུ་ལེགས་པར་ཉོན་ཅིག །ཅི་ཙམ་དུ་ལས་གང་གིས་བྱང་ཆུབ་ཀྱི་རྒྱུར་འགྱུར་བ་དེ་ལ་ནི་ཤིན་ཏུ་ལེགས་པར་གཟུང་ཞིང་མཉན་པར་བྱའོ། །ཐོས་ནས་ཀྱང་གཞན་ལ་རྒྱ་ཆེར་བསྟན་པར་བྱའོ། །རིགས་ཀྱི་བུ་ངས་ཀྱང་སྔོན་ལས་དེ་དག་སྒྲུབ་པའི་ནན་ཏན་ཤིན་ཏུ་བྱས་པས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། དེ་ཡང་ཁྱོད་ལ་རྒྱས་པར་བཤད་པར་བྱའོ། །
རིགས་ཀྱི་བུ་འདི་ལྟ་སྟེ་དཔེར་ན་རྒྱལ་བུ་རྒྱལ་ཚབ་ཅིག་མཉེས་པ་བྱས་ཏེ་བཙས་ན་རྒྱལ་པོ་དེ་བྱམས་ཤིང་དྲན་པའི་ཕྱིར་གང་ནས་གང་དུ་བཙས་པའི་གནས་དེ་དག་ཏུ་བལྟར་འགྲོའོ། །བྱང་ཆུབ་སེམས་དཔའ་ཡང་ཚེ་རིང་བར་འདོད་ན་དེ་བཞིན་དུ་སེམས་ཅན་ཐམས་ཅད་ལ་བུ་དང་འདྲ་བར་སྲུང་ཞིང་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཆེན་པོ་བསྐྱེད་དེ་སྲོག་མི་གཅོད་པའི་ཁྲིམས་གཟུང་བར་བྱའོ། །དགེ་བའི་ཆོས་ལ་གཟུད་ཅིང་སེམས་ཅན་ཐམས་ཅད་ཁྲིམས་ལྔ་དང་དགེ་བ་བཅུའི་ལས་ཀྱི་ལམ་ལ་དགོད་དོ། །གཞན་ཡང་སེམས་ཅན་དམྱལ་བ་དང་། ཡི་དགས་དང་། བྱོལ་སོང་དང་། ལྷ་མ་ཡིན་གྱི་གནས་དང་། རྒྱུད་ཐམས་ཅད་དུ་སྡུག་བསྔལ་བའི་སེམས་ཅན་ཐམས་ཅད་བསྒྲལ་བ་ནི་མ་གྲོལ་བ་རྣམས་གྲོལ་བར་བྱ་བ་དང་། ཕ་རོལ་ཏུ་མ་ཕྱིན་པ་རྣམས་ཕ་རོལ་ཏུ་ཕྱིན་པར་བྱ་བ་དང་། མྱ་ངན་ལས་མ་འདས་པ་རྣམས་མྱ་ངན་ལས་འདའ་བར་བྱ་བ་དང་། འཇིགས་སྐྲག་པ་རྣམས་བདེ་བར་སྤྲོ་བསྲིང་ངོ་། །དེ་ལྟ་བུའི་ལས་ཀྱི་རྒྱུ་དང་རྐྱེན་གྱིས་བྱང་ཆུབ་སེམས་དཔའ་ཚེ་རིང་བར་འགྱུར་ཞིང་ཤེས་རབ་ཀྱི་དབང་ཐོབ་པ་དང་། གང་ནས་གང་དུ་ཚེ་འཕོས་ཀྱང་མཐོ་རིས་ཀྱི་ལྷར་སྐྱེ་བར་འགྱུར་རོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་དོ་ཞེས་བགྱི་བའི་དོན་ཤིན་ཏུ་ཟབ་པས་བདག་གིས་མི་རིག་གོ །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་སེམས་མཉམ་པར་བུ་གཅིག་པ་དང་འདྲ་བར་འདུ་ཤེས་བསྐྱེད་དོ་ཞེས་དེ་བཞིན་གཤེགས་པས་གསུངས་པ་མི་རིགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པས་བསྟན་པ་ལ་ཞུགས་པ་དག་ཁ་ཅིག་ནི་ཚུལ་ཁྲིམས་ཉམས་པ་ཡང་མཆིས། ཁ་ཅིག་ནི་ཁ་ན་མ་ཐོ་བའི་ཆོས་བགྱིད། ཁ་ཅིག་ནི་དམ་པའི་ཆོས་ཉམས་པར་བགྱིད་པ་
དག་ཀྱང་མཆིས་ན་ཇི་ལྟ་བུར་དེ་དག་ལ་བུ་གཅིག་པ་དང་འདྲ་བར་འདུ་ཤེས་བསྐྱེད་པར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ང་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་བུར་འདུ་ཤེས་སོ། །བཅོམ་ལྡན་འདས་ལ་འོད་སྲུང་གིས་འདི་སྐད་ཅེས་གསོལ་ཏོ། །སྔོན་ཟླ་བ་ཉ་བ་བཅྭ་ལྔའི་ཉིན་པར་དགེ་འདུན་ཡོངས་སུ་དག་པ་དག་གསོ་སྦྱོང་བགྱིད་པ་ནི་ཁྱེའུ་གཞོན་ནུ་ལུས་དང་། ངག་དང་། ཡིད་མ་བྱང་བ་ཞིག་དབེན་པའི་གནས་ནས་དགེ་འདུན་གསོ་སྦྱོང་བགྱིད་པ་མཉན་པས་ལག་ན་རྡོ་རྗེ་སངས་རྒྱས་ཀྱི་བྱིན་གྱི་རླབས་ཀྱིས་རྡོ་རྗེའི་གཏུན་གྱིས་རྡུལ་བཞིན་དུ་བགྱིས་ན། བཅོམ་ལྡན་འདས་ལག་ན་རྡོ་རྗེ་དེ་ཤིན་ཏུ་ཁྲོ་བས་ཁྱེའུ་དེ་སྲོག་དང་ཕྲལ་ན་ཅིའི་སླད་དུ་དེ་བཞིན་གཤེགས་པས་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲའོ། །ཞེས་གསུངས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་དེ་སྐད་མ་ཟེར་ཅིག །ཁྱེའུ་གཞོན་ནུ་དེ་ཡང་སྤྲུལ་པ་ཙམ་དུ་ཟད་ཀྱི་ཡང་དག་པར་ན་མི་མ་ཡིན་ཏེ། དེ་ནི་ཚུལ་ཁྲིམས་ཉམས་པ་དག་དགེ་འདུན་ཡོངས་སུ་དག་པའི་ནང་ནས་དབྱུང་བའི་ཕྱིར་རོ། །ལག་ན་རྡོ་རྗེ་ཡང་སྤྲུལ་བ་ཙམ་དུ་ཟད་དོ། །འོད་སྲུང་དམ་པའི་ཆོས་མ་རུང་བར་བྱས་པ་དང་། ལོག་སྲེད་ཅན་དང་། སྲོག་གཅོད་པ་དང་། ངན་པར་ལྟ་བ་དང་། ཚུལ་ཁྲིམས་ཉམས་པ་དག་ལ་ཡང་ང་ནི་ཐུགས་རྗེ་ཆེན་པོ་བསྐྱེད་དེ་སྲས་སྒྲ་གཅན་འཛིན་དང་འདྲ་བར་ལྟའོ། །རིགས་ཀྱི་བུ་དཔེར་ན་རྒྱལ་པོ་ནི་བློན་པོ་དག་ཉེས་པ་བྱུང་སྟེ་ཁྲིམས་ལས་འགལ་ན་མི་གཏོང་སྟེ། ཁྲིམས་ཅི་ལ་བབ་པ་དང་སྦྱོར་རོ། །དེ་བཞིན་གཤེགས་པ་ནི་དེ་ལྟ་མ་ཡིན་ཏེ། བསྟན་པ་ལས་ཉམས་པ་ཡོད་ན་བསྐྲད་པའི་ལས་བྱ་བ་དང་། སྤྱོ་བའི་ལས་བྱ་བ་དང་། གཞག་པའི་ལས་བྱ་བ་དང་། ཉེས་པ་གླེང་བའི་ལས་བྱ་བ་དང་། མི་སྣང་བར་བྱ་བའི་ལས་བྱ་བ་དང་། ཞི་བར་བྱ་བའི་ལས་བྱ་བ་དང་། ངན་པར་ལྟ་བ་སྤོང་བའི་ལས་བྱེད་དོ། །རིགས་ཀྱི་བུ་དེ་བཞིན་
གཤེགས་པས་ནི་ཆོས་ལ་སྐུར་པ་དག་ལ་ཡོངས་སུ་གདུལ་བའི་ལས་བྱེད་དེ། ངན་པར་སྤྱོད་པ་དག་རྣམ་པར་སྨིན་པའི་འབྲས་བུ་སྟོན་པར་བྱེད་དོ། །རིགས་ཀྱི་བུ་འདི་ལྟར་རིག་པར་བྱ་སྟེ། དེ་བཞིན་གཤེགས་པས་ནི་སེམས་ཅན་ངན་པ་དག་ལ་མི་འཇིགས་པ་སྦྱིན་པ་ཡིན་ནོ། །གལ་ཏེ་འོད་ཟེར་གཅིག་གམ། གཉིས་སམ། ལྔ་བཀྱེ་བས་གང་ལ་རེག་པའི་སེམས་ཅན་དེ་དག་ནི་སྡིག་པ་ཡོངས་སུ་སྤོང་བར་འགྱུར་རོ། །དེ་བས་ན་དེ་བཞིན་གཤེགས་པ་ནི་དེ་ལྟ་བུའི་མཐུ་ཚད་མེད་པ་དང་ལྡན་ནོ། །རིགས་ཀྱི་བུ་གང་མ་མཐོང་བའི་ཆོས་རྣམས་ཁྱོད་ཀྱིས་མཐོང་བར་འདོད་ན་ཁྱོད་ལ་དེའི་ཕྱོགས་ཙམ་ཞིག་བསྟན་པར་བྱའོ། །ང་ཡོངས་སུ་མྱ་ངན་ལས་འདས་པའི་འོག་ཏུ་ཕྱོགས་གང་ན་དགེ་སློང་ཚུལ་ཁྲིམས་དང་ལྡན་ཞིང་སྤྱོད་ལམ་མ་ཉམས་པ་དམ་པའི་ཆོས་ཡོངས་སུ་སྲུང་བ་དག་གིས་ཆོས་མ་རུང་བར་བྱེད་པ་རྣམས་མཐོང་ནས་སྐྲོད་ཅིང་ཆད་པས་ཀྱང་གཅོད་པའི་སྐྱེས་བུ་དེ་ནི་བསོད་ནམས་ཚད་མེད་དཔག་ཏུ་མེད་པ་ཐོབ་པར་རིག་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་ཆོས་ངན་པ་འབའ་ཞིག་སྤྱོད་པ་ཞིག་ནད་ཀྱིས་བཏབ་པ་ལས་ཡུལ་དེ་དང་ཉེ་བའི་རྒྱལ་པོ་ཞིག་དེ་ལྟར་ན་བར་གྱུར་པ་ཐོས་ནས་རྒྱལ་པོ་ནད་པ་དེ་མེད་པར་བྱ་བའི་ཕྱིར་དམག་དྲངས་སོ། །རྒྱལ་པོ་ནད་པ་དེ་མཐུ་དང་དཔུང་ཆུངས་པས་འཇིགས་སྐྲག་སྟེ། མི་དགེ་བ་བཏང་ནས་དགེ་བ་ལ་བརྩོན་པར་གྱུར་ན་ཕས་རྒོལ་བའི་རྒྱལ་པོ་དེས་བསོད་ནམས་ཚད་མེད་པ་ཐོབ་པར་འགྱུར་རོ། །དེ་བཞིན་དུ་ཆོས་འཛིན་པའི་དགེ་སློང་དག་ཀྱང་དེ་དང་འདྲ་བར་ཆོས་མ་རུང་བར་བྱེད་པའི་གང་ཟག་དག་སྐྲོད་པ་དང་། ཆད་པས་གཅོད་པའི་ལས་བྱས་ཏེ་དགེ་བའི་ཆོས་ལ་བཙུད་ན་བསོད་ནམས་ཚད་མེད་པ་འཐོབ་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་གཅིག་གི་ཁྱིམ་དུ་དུག་གི་སྡོང་པོ་སྐྱེས་ན་ཁྱིམ་བདག་དེས་དུག་ཡིན་པར་ཤེས་མ་ཐག་ཏུ་རྩ་བ་ནས་མེད་པར་བྱེད་དོ། །གཞན་ཡང་སྐྱེས་བུ་ལང་ཚོ་བའི་མགོ་ལ་སྐྲ་དཀར་ཞིག་བྱུང་ན་དེ་ངོ་ཚ་སྟེ་དེ་མ་ཐག་ཏུ་རྩ་བ་ནས་བཏོན་ཏེ་ཕྱིས་མི་
སྐྱེ་བའི་ཆོས་སུ་མེད་པར་བྱེད་དོ། །ཆོས་འཛིན་པའི་དགེ་སློང་ཡང་དེ་དང་འདྲ་སྟེ། དགེ་སློང་ཚུལ་ཁྲིམས་ཉམས་པ་དམ་པའི་ཆོས་མ་རུང་བར་བྱེད་པ་མཐོང་ན་གནས་ནས་བསྐྲད་ཅིང་ཆད་པས་གཅད་པར་བྱའོ། །དགེ་སློང་དགེ་བས་བསླབ་ཚིག་ཉམས་པ་དག་མཐོང་སྟེ་གནས་ནས་མ་བསྐྲད་དམ། ཆད་པས་མ་བཅད་ན་དེ་ནི་སངས་རྒྱས་ཀྱིས་བསྟན་པའི་ཆོས་ཀྱི་དགྲ་ཡིན་པར་རིག་པར་བྱའོ། །གང་གིས་གནས་ནས་སྐྲོད་དམ། ཆད་པས་གཅོད་ན་དེ་ནི་ངའི་ཉེ་གནས་ཉན་ཐོས་ཡང་དག་པ་ཡིན་ནོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་ན་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་སོ་ཞེས་བགྱི་བ་མི་རུང་ངོ་། །བཅོམ་ལྡན་འདས་གལ་ཏེ་གང་ཟག་གཅིག་གིས་མཚོན་ཐོགས་ཏེ་སངས་རྒྱས་ལ་འདེབས་པ་དང་། གང་ཟག་གཅིག་གིས་ཙན་དན་གྱི་ལྡེ་གུས་སངས་རྒྱས་ཀྱི་སྐུ་ལ་བྱུགས་པ་གཉིས་ལ། བཅོམ་ལྡན་འདས་ཀྱིས་ཐུགས་མཉམ་པར་གཟིགས་ན་ཅིའི་སླད་དུ་བསླབ་ཚིག་ཉམས་པ་དག་ཆད་པས་བཅད་དོ་ཞེས་གསུངས། ཅི་སྟེ་བསླབ་ཚིག་ཉམས་པ་དག་ཆད་པས་བཅད་ན་གསུང་བ་དང་འགལ་ལོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་འམ་བློན་པོ་ཆེན་པོ་ཞིག་ལ་བུ་གཟུགས་བྱད་དང་ལྡན་པ་ཤེས་རབ་རྣོ་བ་གཉིས་སམ། གསུམ་མམ། བཞི་ཡོད་དེ། སློབ་དཔོན་སྟོན་པ་མཁས་པ་ལ་གནས་བཅས་ནས། འདི་སྐད་དུ་བདག་གི་བུ་འདི་དག་ཚུལ་དང་། གཙུག་ལག་དང་། རྩལ་དང་། ཡི་གེ་དང་། བགྲང་བ་དང་། རྩིས་ལོབས་པ་ཞིག་ཏུ་བསླབ་པར་གསོལ་ལོ། །བདག་གིས་བུ་བཞི་པོ་འདི་ཁྱོད་ལ་བཅོལ་གྱིས་ཅི་སྟེ་བུ་གསུམ་ལྕག་འོག་ཏུ་ཤི་ཡང་བླའི། བུ་གཅིག་བསླབ་པ་ལོབས་པར་བྱ་བའི་ཕྱིར་ནན་ཏུར་སྐྱེད་ཅིག །བུ་གསུམ་པོ་ཤི་ཡང་བདག་ནི་འཁོན་དུ་མི་འཛིན་ཏོ། །འོད་
སྲུང་དེ་ལ་ཇི་སྙམ་དུ་སེམས། བུ་དེའི་ཕ་དང་སློབ་པའི་སློབ་དཔོན་དེ་གསོད་པའི་ཉེས་པ་ཐོབ་བམ། གསོལ་པ་བཅོམ་ལྡན་འདས་མ་ལགས་སོ། །དེ་ཅིའི་སླད་དུ་ཞེ་ན། སྡུག་པར་བསམས་ཏེ། བསླབ་པ་ལོབས་པར་བགྱི་བ་ལགས་ཀྱིས་མི་སྡུག་པར་བསམས་ཏེ་བསླབ་པ་མ་ལགས་པས་བསོད་ནམས་ཚད་མེད་པ་ཐོབ་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། བསླབ་ཚིག་ཉམས་པ་དག་ལ་ཡང་བུ་གཅིག་པ་དང་འདྲ་བར་གཟིགས་སོ། དེ་བཞིན་གཤེགས་པས་བླ་ན་མེད་པའི་དམ་པའི་ཆོས་ནི་རྒྱལ་པོ་དང་། བློན་པོ་ཆེན་པོ་དང་། དགེ་སློང་དང་དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་གཏམས་ཤིང་གཏང་བས་རྒྱལ་པོ་དང་། འཁོར་རྣམ་བཞིས་གང་བསླབ་པ་ལ་ཞུགས་པ་དག་ལྷག་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཐོབ་པར་སྐུལ་ཅིག །གང་བསླབ་པ་གསུམ་པོ་འདི་ལ་མི་སློབ་ཅིང་ལེ་ལོ་བྱེད་པ་དང་། ཚུལ་ཁྲིམས་ཉམས་པ་དང་། ཆོས་མ་རུང་བར་བྱེད་ན་རྒྱལ་པོ་དང་། བློན་པོ་ཆེན་པོ་དང་འཁོར་རྣམ་བཞིས་ཆད་པས་ཆོད་ཅིག །རིགས་ཀྱི་བུ་རྒྱལ་པོ་དེ་དང་། འཁོར་རྣམ་བཞི་པོ་དེ་ཁ་ན་མ་ཐོ་བའི་སྡིག་འཐོབ་པར་འགྱུར་རམ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་ལྟར་རྒྱལ་པོ་དེ་དང་། འཁོར་རྣམ་བཞི་པོ་དེ་ཡང་སྡིག་པར་མི་འགྱུར་ན་དེ་བཞིན་གཤེགས་པ་ལྟ་སྨོས་ཀྱང་ཅི་དགོས། རིགས་ཀྱི་བུ་དེ་བཞིན་གཤེགས་པ་ནི་དེ་ལྟར་མཉམ་པའི་ཐུགས་ཀྱིས་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་དགོངས་སོ། །གང་དེ་ལྟར་སེམས་པ་དེ་ནི་བྱང་ཆུབ་སེམས་དཔའ་མཉམ་པའི་སེམས་ཀྱིས་སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་པ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་གང་དེ་ལྟར་ལས་དེ་ལ་ནན་ཏན་བྱེད་པ་ནི་ཚེ་རིང་བར་འགྱུར་ཞིང་སྔོན་གྱི་གནས་ཀྱང་ཤེས་པར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་
ཀྱིས་གསུངས་པ་ལྟར་བྱང་ཆུབ་སེམས་དཔའ་གང་མཉམ་པའི་སེམས་ལ་ནན་ཏན་བྱས་ཏེ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་འདུ་ཤེས་པས་ཚེ་རིང་བར་འགྱུར་རོ་ཞེས་དེ་བཞིན་གཤེགས་པས་དེ་སྐད་གསུང་བ་མི་རིགས་སོ། །དེ་ཅིའི་སླད་དུ་ཞེ་ན། འདི་ལྟ་སྟེ་ཤེས་རབ་དང་ལྡན་པའི་སྲི་ཞུར་བགྱི་བའི་ཆོས་རྣམ་པ་སྣ་ཚོགས་ཀྱང་སྟོན་མཁས་པ་ཞིག་ཁྱིམ་དུ་མཆིས་ནས་ཕ་མ་ལ་རྡོ་དབྱུག་གིས་འཚོག་གོ །ཕ་མ་ནི་བསོད་ནམས་ཀྱི་ཞིང་ལགས་ཏེ། ཕན་པ་དང་བདེ་བ་འབའ་ཞིག་བགྱིད་ཅིང་ཤིན་ཏུ་ཕྲད་དཀའ་བས་དེ་ནི་མཆོད་པར་འོས་ན། དེ་ལ་གནོད་པས་རྣམ་པར་གཙེས་ན་ཆོས་འཚལ་བ་དེ་སྨྲ་བ་དང་བགྱིད་པར་མི་འཐུན་ཏེ་འགལ་ལོ། །དེ་བཞིན་གཤེགས་པ་ཡང་དེ་དང་འདྲ་སྟེ། དེ་ལྟར་བྱང་ཆུབ་སེམས་དཔའ་སེམས་མཉམ་པ་ལ་ནན་ཏན་བགྱིད་ཅིང་སེམས་ཅན་ཐམས་ཅད་ལ་བུ་གཅིག་དང་འདྲ་བར་འདུ་ཤེས་པས་ཚེ་རིང་ཞིང་སྔོན་གྱི་གནས་ཤེས་པར་འགྱུར་ལ་མི་འཕོ་སྟེ། རྟག་ཏུ་འཇིག་རྟེན་ན་གནས་པ་ཞིག་ལགས་ན་ཅིའི་སླད་དུ་བཅོམ་ལྡན་འདས་མི་དང་འདྲ་བར་སྐུ་ཚེ་རབ་ཏུ་ཐུང་བར་གྱུར། དེ་བཞིན་གཤེགས་པས་སེམས་ཅན་ཐམས་ཅད་ལ་དགྲ་ལྟ་བུར་དགོངས་པ་མངའ་འམ། བཅོམ་ལྡན་འདས་སྔོན་སྡིག་པ་ཅི་ཞིག་མཛད་ཅིང་ཇི་སྙེད་ཀྱི་སྲོག་གི་དབང་པོ་དང་ཕྲལ་ན་འདི་ལྟར་སྐུ་ཚེ་ལོ་བརྒྱའང་མ་ཐུབ་པར་རབ་ཏུ་ཐུང་བར་གྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་ཅིའི་ཕྱིར་དེ་བཞིན་གཤེགས་པའི་སྤྱན་སྔར་མ་རྩིས་པའི་ཚིག་འདི་ལྟ་བུ་སྨྲས། དེ་བཞིན་གཤེགས་པའི་སྐུ་ཚེ་ནི་ཚེའི་ནང་ན་མཆོག་ཏུ་གྱུར། ཕུལ་དུ་གྱུར་ཏེ། རྟག་པའི་ཆོས་ཀྱི་ནང་ན་ཡང་མཆོག་ཏུ་གྱུར་ཕུལ་དུ་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དེ་བཞིན་གཤེགས་པའི་སྐུ་ཚེ་རིང་ཞེས་བགྱི་བ་ཇི་ལྟ་བུ་ལགས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཆུ་ཀླུང་ཆེན་པོ་བརྒྱད་ཡོད་དེ། གང་གཱ་ཞེས་བྱ་བ་དང་། ཡམ་པ་ལ་
དང་། ས་ལ་དང་། ཨ་ལི་ལ་བར་ཏ་དང་། མ་ཧཱ་དང་། སིན་དུ་དང་། པག་ཤུ་དང་། སི་ཏ་ཞེས་བྱ་བ་ཆུ་ཀླུང་ཆེན་པོ་བརྒྱད་དང་། དེ་མ་ཡིན་པའི་ཆུ་བྲན་ཐམས་ཅད་ཀྱང་རྒྱ་མཚོ་ཆེན་པོར་འབབ་བོ། །འོད་སྲུང་དེ་བཞིན་དུ་ལྷ་དང་བཅས་པ་དང་། ས་དང་། ནམ་མཁའ་ལ་གནས་པ་ཐམས་ཅད་ཀྱི་ཚེ་སྲོག་གི་ཆུ་ཀླུང་ཐམས་ཅད་དེ་བཞིན་གཤེགས་པའི་སྐུ་ཚེའི་རྒྱ་མཚོར་འབབ་བོ། །དེ་བས་ན་དེ་བཞིན་གཤེགས་པའི་སྐུ་ཚེ་ནི་ཚད་མེད་དོ། །འོད་སྲུང་གཞན་ཡང་འདི་ལྟ་སྟེ། མཚོ་མ་དྲོས་ཞེས་བྱ་བ་ལས་ཆུ་ཀླུང་ཆེན་པོ་བཞི་འབབ་བོ། །དེ་བཞིན་གཤེགས་པ་ཡང་དེ་དང་འདྲ་བར་ཚེ་ཐམས་ཅད་ཀྱི་འབྱུང་གནས་ཡིན་ནོ། །འོད་སྲུང་འདི་ལྟ་སྟེ། རྟག་པའི་ཆོས་ཐམས་ཅད་ཀྱི་ནང་ན། ནམ་མཁའ་ནི་མཆོག་གོ །དེ་བཞིན་གཤེགས་པ་ཡང་། དེ་བཞིན་དུ་རྟག་པའི་ནང་ན་མཆོག་ཏུ་གྱུར། ཕུལ་དུ་གྱུར་ཏོ། །འོད་སྲུང་འདི་ལྟ་སྟེ། སྨན་གྱི་ནང་ན་མར་གྱི་སྙིང་པོ་ནི་མཆོག་གོ །དེ་བཞིན་དུ་དེ་བཞིན་གཤེགས་པ་ཡང་། སེམས་ཅན་ཐམས་ཅད་ཀྱི་ནང་ན་སྐུ་ཚེའི་མཆོག་ཏུ་གྱུར་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། དེ་བཞིན་གཤེགས་པའི་སྐུ་ཚེ་དེ་ལྟར་གྱུར་ན། བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་བཞུགས་ཏེ། དམ་པའི་ཆོས་ཀྱི་ཆར་རྟག་ཏུ་དབབ་པའི་རིགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཁྱོད་ཀྱིས་དེ་བཞིན་གཤེགས་པ་ལ་འགོག་པའམ། ཟད་པའི་འདུ་ཤེས་མ་སྐྱེད་ཅིག །འོད་སྲུང་ཅི་སྟེ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། མུ་སྟེགས་ཅན་གྱི་བར་དུ་མངོན་པར་ཤེས་པ་ལྔ་དང་ལྡན་པ། དབང་དུ་གྱུར་པ་དག་ཀྱང་བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ། ནམ་མཁའ་སྟོང་པ་ལ་འགྲོ་བ་དང་། སྡོད་པ་དང་། འདུག་པ་དང་། ཉལ་བའི་དབང་ཐོབ་ནས་རྩིབ་ལོགས་གཡོན་ནས་ནི་མེ་འབར། རྩིབ་ལོགས་གཡས་ནས་ནི་ཆུ་འབབ།
ལུས་ཀྱི་སྟོད་ནས་ནི་དུད་པ་འཐུལ་ཏེ། མེའི་ཕུང་པོ་ཆེན་པོ་ལྟ་བུར་ཡང་སྒྱུར་ལ། གལ་ཏེ་ཚེའི་བར་དུ་གནས་པར་འདོད་ན་ཡང་ཡིད་བཞིན་དུ་གནས་ཏེ་ཚེ་རིང་ཐུང་གི་དབང་ཐོབ་ནས་དེ་ལྟར་མངོན་པར་ཤེས་པ་ལྔ་ཐོབ་པ་ཙམ་གྱིས་ཀྱང་ཡིད་བཞིན་གྱི་མཐུ་དང་ལྡན་ན་དེ་བཞིན་གཤེགས་པ་ཆོས་ཐམས་ཅད་ལ་དབང་སྒྱུར་བའི་མཐུ་བརྙེས་པ་ལྟ་ཅི་སྨོས་ཏེ། སྐུ་ཚེ་བསྐལ་པ་ཕྱེད་དམ། བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་བརྒྱ་སྟོང་ངམ། བསྐལ་པ་ཚད་མེད་པའི་བར་དུ་གནས་པ་ལྟ་ཅི་སྨོས་ཏེ། དོན་དེ་ལྟ་བས་ན་དེ་བཞིན་གཤེགས་པ་ནི་རྟག་པའི་སྐུ་གནས་པའི་ཆོས་ཅན་མི་འགྱུར་བའི་ཆོས་ཅན་དུ་རིག་པར་བྱའོ། །དེ་བཞིན་གཤེགས་པའི་སྐུ་ནི་སྤྲུལ་པའི་སྐུ་སྟེ། ཟས་རྣམས་ཀྱི་སྐུ་མ་ཡིན་གྱི། སེམས་ཅན་བསྒྲལ་བའི་ཕྱིར་དུག་གི་སྡོང་པོ་དང་འདྲ་བར་བསྟན་ཏེ། དེ་བས་ན་ཡོངས་སུ་མྱ་ངན་ལས་འདའ་བ་བསྟན་པར་རིག་པར་བྱའོ། །འོད་སྲུང་དེ་བས་ན་དེ་བཞིན་གཤེགས་པ་ནི་རྟག་པའི་ཆོས་ཅན་མི་འགྱུར་བའི་ཆོས་ཅན་དུ་རིག་པར་བྱ་སྟེ། ཁྱེད་ལ་སོགས་པས་དོན་དམ་པ་ལ་བརྩོན་འགྲུས་ཤིན་ཏུ་ནན་ཏན་བྱའོ། །ཤིན་ཏུ་ནན་ཏན་བྱས་ནས་ཀྱང་གཞན་དག་ལ་རྒྱ་ཆེར་བཤད་དོ། །དེ་ནས་བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །འཇིག་རྟེན་ལས་འདའ་བའི་ཆོས་དང་། འཇིག་རྟེན་གྱི་ཆོས་ལ་བྱེ་བྲག་དང་ཁྱད་པར་ཅི་མཆིས། སངས་རྒྱས་ཀྱིས་གསུངས་པ་ལྟར་སངས་རྒྱས་ཀྱང་རྟག་པའི་ཆོས་ཅན་མི་འགྱུར་བའི་ཆོས་ཅན་ལགས་ན། འཇིག་རྟེན་པ་ཚངས་པའི་ལྷ་ཡང་རྟག་ལ་དབང་སྒྱུར་གྱི་ལྷ་ཡང་རྟག་སྟེ། མི་འགྱུར་བའི་ཆོས་ཅན་བདག་ཅེས་བྱ་བ་ཡང་རྟག་ལ། རང་བཞིན་ཡང་རྟག །རྡུལ་ཕྲ་མོ་ཡང་རྟག་ཅེས་མཆི་ན་ཅི་སྟེ་དེ་བཞིན་གཤེགས་པ་ཡང་རྟག་པའི་ཆོས་ཅན་ལགས་ན། དེ་བཞིན་གཤེགས་པས་ཅིའི་སླད་དུ་རྟག་པ་མངོན་པར་མི་སྟོན། ཅི་སྟེ་རྟག་པ་མངོན་པར་མི་སྟོན་ན་བྱེ་བྲག་དང་ཁྱད་པར་ཡང་ཅི་ཞིག་མཆིས། ཚངས་པའི་ལྷ་ནས་རྡུལ་ཕྲ་མོ་དང་། རང་བཞིན་རྟག་ཅེས་
མཆི་བ་ཡང་མངོན་པར་ནི་མ་མཆིས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། འདི་ལྟ་སྟེ། དཔེར་ན་ཁྱིམ་བདག་གཅིག་ལ་བ་རྣམ་པ་མང་པོ་བདོག་པའི་སྤུ་མདོག་མི་འཐུན་ཡང་། ཁྱུ་གཅིག་ཏུ་རྫིའུ་ལ་གཏད་དེ། རྩྭ་དང་ཆུ་ག་ལ་ཡོད་པར་སྙེགས་ཤིང་འཚོའོ། །དེ་ཡང་ཞོ་དང་འོ་མ་ཙམ་གྱི་ཕྱིར་མ་ཡིན་གྱི། མར་གྱི་སྙིང་པོ་འདོད་པའི་ཕྱིར་རོ། །ཁྱིམ་བདག་དེ་ཕྱིས་ཤི་ནས་བ་རྣམས་ཀྱང་རྐུན་པོས་དེད་དོ། །རྐུན་པོ་དེ་དག་ལ་བུད་མེད་མེད་པས། བ་བཞོས་ནས་སོ་སོར་འཐུངས་སོ། །ཕྱིས་རྐུན་པོ་དེ་དག་གཅིག་ལ་གཅིག་འདི་སྐད་དུ་སྔོན་ཁྱིམ་བདག་ཆེན་པོ་དེ་བ་འདི་སྙེད་གསོ་བ་ཡང་ཞོ་དང་འོ་མ་ཙམ་གྱི་ཕྱིར་མ་ཡིན་གྱི། མར་གྱི་སྙིང་པོ་འབའ་ཞིག་འདོད་པར་ཟད་ན་ད་བདག་ཅག་གིས་ཀྱང་ཐབས་ཅི་ཞིག་བྱས་ན། མར་གྱི་སྙིང་པོ་ཐོབ་པར་འགྱུར་ཞེས་བགྲོས་སོ། །མར་གྱི་སྙིང་པོ་ཞེས་བྱ་བ་ནི་འཇིག་རྟེན་ན་རོ་བྲོ་བ་ཐམས་ཅད་ཀྱི་ནང་ན་མཆོག་ཡིན་ཏེ། ཅི་སྟེ་འོ་མ་ཡོད་དུ་ཟིན་གྱིས་ཀྱང་། བླུགས་པའི་སྣོད་མེད་ཅེས་སྨྲས་སོ། །ཡང་འདི་སྐད་དུ་བདག་ཅག་ལ་རྐྱལ་པ་ཡོད་པས་རྐྱལ་པར་བླུགས་ཞེས་བགྲོས་ཏེ་བླུགས་པའི་གནས་ཡོད་དུ་ཟིན་གྱིས་ཀྱང་ཞོ་དང་སྲུབ་པའི་ཐབས་མི་ཤེས་པས་དེ་དག་གིས་དར་བ་ཙམ་ཡང་ཐོབ་པར་མི་ནུས་ན་མར་ཐ་མལ་པ་ལ་ལྟ་ཅི་སྨོས་ཏེ། དེའི་ཚེ་རྐུན་པོ་མ་རུངས་པ་དེ་དག་མར་གྱི་སྙིང་པོ་འདོད་པའི་ཕྱིར་ཡང་དང་ཡང་ཆུ་བསྣན་པས་འོ་མ་དང་ཞོ་དང་མར་གྱི་སྙིང་པོའི་བར་དུ་བཅས་ཏེ་ཉམས་པར་གྱུར་ཏོ། །སྐྱེ་བོ་གླེན་པ་ཡང་དེ་དང་འདྲ་སྟེ། དགེ་བའི་བག་ཅུང་ཟད་ཡོད་པ་ཡང་དེ་བཞིན་གཤེགས་པའི་དམ་པའི་ཆོས་ལས་བྱུང་ངོ་། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་དེ་བཞིན་གཤེགས་པའི་དགེ་བའི་ཆོས་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ཆ་
ལས་བརྐུས་པ་ནི་ཇི་ལྟར་རྐུན་པོ་རྣམས་ཀྱིས་བ་བརྐུས་པ་བཞིན་ནོ། །སྐྱེ་བོ་གླེན་པ་དག་ཀྱང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་ཆ་ཙམ་ཐོབ་མོད་ཀྱི། སྦྱོར་བའི་ཐབས་མེད་པས་རྣམ་པར་གྲོལ་ཞིང་སྟོན་མི་ནུས་སོ། །དོན་དེ་ལྟ་བས་ན་རྟག་པའི་ཚུལ་ཁྲིམས་སམ། རྟག་པའི་ཏིང་ངེ་འཛིན་ནམ། རྟག་པའི་ཤེས་རབ་བམ། རྣམ་པར་གྲོལ་བའི་བར་དུ་ཐོབ་པར་མི་ནུས་པ་ནི་རྐུན་པོ་དེ་དག་ཐབས་མི་ཤེས་ཏེ། མར་གྱི་སྙིང་པོ་མི་ཐོབ་པ་དང་མཚུངས་སོ། །རྐུན་པོ་དེ་དག་མར་གྱི་སྙིང་པོ་འདོད་པའི་ཕྱིར་ཆུ་བསྣན་པ་ལྟར་སྐྱེ་བོ་མ་རབས་ཀྱང་དེ་དང་འདྲ་སྟེ། རྣམ་པར་ཐར་པ་འདོད་པའི་ཕྱིར་བདག་དང་། སེམས་ཅན་དང་། སྲོག་དང་། སྐྱེས་བུ་དང་། ཚངས་པ་དང་། དབང་སྒྱུར་གྱི་ལྷ་དང་། རྡུལ་ཕྲ་མོ་དང་། འཇིག་རྟེན་གྱི་རང་བཞིན་དང་། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། འདུ་ཤེས་མེད་པ་དང་། འདུ་ཤེས་མེད་མིན་གྱི་བར་དུ་མྱ་ངན་ལས་འདས་པའོ། །ཞེས་སྨྲས་ཏེ། དེ་ནི་ཡང་དག་པར་རྣམ་པར་གྲོལ་བའམ། མྱ་ངན་ལས་འདའ་བ་མི་ཐོབ་པ་ནི་ཇི་ལྟར་རྐུན་པོ་དེ་དག་མར་གྱི་སྙིང་པོ་མི་ཐོབ་པ་བཞིན་ནོ། །སྐྱེ་བོ་མ་རབས་དག་ཚངས་པར་སྤྱོད་པ་ཅུང་ཟད་ཙམ་དང་། ཕ་མ་ལ་སྲི་ཞུ་བྱས་པ་ཙམ་གྱི་རྒྱུ་དང་རྐྱེན་གྱིས་མཐོ་རིས་ཀྱི་ལྷར་སྐྱེ་སྟེ། བདེ་བའི་ལོངས་སྤྱོད་ཅུང་ཟད་མྱོང་བ་ནི་ཇི་ལྟར་རྐུན་པོ་དེ་དག་འོ་མ་ལ་ཆུས་བསྣན་པ་བཞིན་ནོ། །སྐྱེ་བོ་མ་རབས་དག་ནི་ཚངས་པར་སྤྱོད་པ་ཅུང་ཟད་ཙམ་དང་། ཕ་མ་ལ་སྲི་ཞུ་བྱས་པ་ཙམ་གྱི་རྒྱུས་མཐོ་རིས་ཀྱི་ལྷར་སྐྱེས་པར་མི་ཤེས་སོ། །གཞན་ཡང་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། དཀོན་མཆོག་གསུམ་ལ་སྐྱབས་སུ་འགྲོ་བར་མི་ཤེས་སོ། །དེ་ལྟར་མི་ཤེས་པས་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་སྨྲ་མོད་ཀྱི་དེ་ཡང་མི་ཤེས་སོ། །དེ་བས་ན་དེ་བཞིན་གཤེགས་པ་འཇིག་རྟེན་དུ་གཤེགས་ནས་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་བསྟན་ཅིང་བཤད་དོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་བྱུང་ན། དེའི་བསོད་ནམས་ཀྱི་ཤུགས་ཀྱིས་རྐུན་པོ་མ་རུངས་པ་དག་སོ་སོར་
འབྱེར་ཞིང་འབྲོས་སོ། །བ་རྣམས་མ་ཤི་བས་འཁོར་ལོས་སྒྱུར་བའི་རྒྱལ་པོས་རྫིའུ་ཐབས་དང་ལྡན་པ་ལ་གཏད་དེ། རྫིའུ་ཐབས་དང་ལྡན་པས་མར་གྱི་སྙིང་པོ་ཡང་ཡོད་པར་གྱུར་ཏོ། །མར་གྱི་སྙིང་པོ་ཡོད་པས་སེམས་ཅན་ཐམས་ཅད་ཀྱང་ནད་ཀྱི་སྡུག་བསྔལ་དང་བྲལ་ལོ། །ཆོས་ཀྱི་འཁོར་ལོས་སྒྱུར་བའི་རྒྱལ་པོ་འཇིག་རྟེན་དུ་གཤེགས་ནས་སྐྱེ་བོ་མ་རབས་དག་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་སྟོན་མི་ནུས་ཏེ་སོ་སོར་འབྱེར་ཞིང་འབྲོས་སོ། །དེའི་ཚེ་བཅོམ་ལྡན་འདས་ཀྱིས་འཇིག་རྟེན་གྱི་ཆོས་དང་། འཇིག་རྟེན་ལས་འདས་པའི་ཆོས་སེམས་ཅན་གྱི་དོན་དུ་བྱང་ཆུབ་སེམས་དཔའ་རྣམས་ལ་བསྟན་ཅིང་བཤད་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་མར་གྱི་སྙིང་པོ་ལྟ་བུ་ཐོབ་པར་གྱུར་ཏེ། གཞན་ཡང་སེམས་ཅན་མཐའ་ཡས་དཔག་ཏུ་མེད་པ་དག་བླ་ན་མེད་པའི་ཆོས་བདུད་རྩི་ལྟ་བུ་ཐོབ་པར་བྱ་བ་ནི་འདི་ལྟ་སྟེ། དེ་བཞིན་གཤེགས་པའི་རྟག་པ་དང་། བདེ་བ་དང་། བདག་དང་། ཡོངས་སུ་དག་པའི་ཆོས་རྣམས་སོ། །དོན་དེ་ལྟ་བས་ན་རིགས་ཀྱི་བུ་དེ་བཞིན་གཤེགས་པ་ནི་རྟག་པ་དང་། མི་འགྱུར་བའི་ཆོས་ཅན་ཡིན་ཏེ། འཇིག་རྟེན་པ་སྐྱེ་བོ་མ་རབས་དག་གིས་ཚངས་པའི་ལྷ་ལ་སོགས་པ་ལ་རྟག་པའི་ཆོས་ཡིན་ནོ་ཞེས་སྨྲ་བ་དང་མི་འདྲ་སྟེ། རྟག་པའི་ཆོས་སུ་གྲགས་པ་འདི་ནི་མདོར་ན་དེ་བཞིན་གཤེགས་པ་ལ་བྱའི་ཆོས་གཞན་དག་ལ་ནི་མ་ཡིན་ནོ། །འོད་སྲུང་དེ་ལྟ་བས་ན་དེ་བཞིན་གཤེགས་པའི་སྐུར་རིག་པར་བྱའོ། །འོད་སྲུང་གང་རིགས་ཀྱི་བུ་འམ། རིགས་ཀྱི་བུ་མོ་དག་ནི་རྟག་ཏུ་རྩེ་གཅིག་པའི་སེམས་ཀྱིས་སངས་རྒྱས་རྟག་པ་དང་གནས་པའོ་ཞེས་བྱ་བའི་ཚིག་འདི་གཉིས་ལ་ནན་ཏན་བྱའོ། །འོད་སྲུང་གང་རིགས་ཀྱི་བུ་འམ་རིགས་ཀྱི་བུ་མོ་དག་ནི་ཚིག་འདི་གཉིས་ལ་ནན་ཏན་བྱེད་ན། གང་ཟག་དེ་ནི་ངའི་རྗེས་སུ་སྤྱོད་ཅིང་ངས་ཕྱིན་པའི་གནས་སུ་ཕྱིན་པར་རིག་པར་བྱའོ། །རིགས་ཀྱི་བུ་གང་གིས་ཚིག་འདི་གཉིས་ལ་ནན་ཏན་བྱེད་པ་དེ་མཚན་མ་སྤངས་ན་དེ་བཞིན་གཤེགས་པས་ཡོངས་སུ་མྱ་
ངན་ལས་འདའ་བར་དགོངས་པར་རིག་པར་བྱའོ། །རིགས་ཀྱི་བུ་མྱ་ངན་ལས་འདའ་བའི་དོན་ནི་སངས་རྒྱས་ཀྱི་ཆོས་ཉིད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཉིད་ཅེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་བདག་ནི་ཆོས་ཉིད་ཀྱི་དོན་ཇི་ལྟ་བུ་ལགས་པ་མི་འཚལ་ན་དེ་བཞིན་གཤེགས་པས་ཐུགས་བརྩེ་བའི་སླད་དུ་རྒྱས་པར་བསྟན་དུ་གསོལ། ཆོས་ཉིད་ཅེས་བགྱི་བ་ནི་ལུས་དང་རྣམ་པར་བྲལ། ལུས་དང་བྲལ་བ་ནི་ཅི་ཡང་མ་མཆིས་པ་སྟེ། ཅི་ཡང་མ་མཆིས་ན་ལུས་ཞེས་བགྱི་བ་ཡང་ཇི་ལྟར་རྣམ་པར་གཞག །ལུས་རྣམ་པར་གཞག་ཏུ་མཆིས་ན་ནི་ལུས་ལ་ཆོས་ཉིད་ཀྱང་མ་མཆིས་པར་འགྱུར་རོ། །ལུས་ལ་ཆོས་ཉིད་ཀྱང་མ་མཆིས་པར་གྱུར་ན་ཇི་ལྟ་བུར་རྣམ་པར་གཞག །བདག་གིས་དོན་དེ་དག་ཇི་ལྟར་རིག་པར་བགྱི་ཞེས་གསོལ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་ཀྱིས་འདི་ལྟར་ཆོས་ཉིད་དགག་པར་མི་བྱའོ། །ཆོས་ཉིད་ཅེས་བྱ་བ་ལ་ནི་འགོག་པ་མེད་དོ། །རིགས་ཀྱི་བུ་དཔེར་ན་འདུ་ཤེས་མེད་པའི་ལྷ་དག་གཟུགས་ཀྱི་ཕུང་པོ་དང་ལྡན་མོད་ཀྱི། གཟུགས་ཀྱི་འདུ་ཤེས་མེད་པས་ལྷ་དེ་ལ་ནི་ཇི་ལྟར་གནས། བདེ་བ་ལ་ཇི་ལྟར་ལོངས་སྤྱོད། ཇི་ལྟར་འདུ་ཤེས་ལ་སྤྱོད། ཇི་ལྟར་ཐོས་ཤིང་མཐོང་ཞེས་འདྲི་བའི་མི་རིགས་སོ། །རིགས་ཀྱི་བུ་དེ་བཞིན་གཤེགས་པའི་སྤྱོད་ཡུལ་ནི་ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པའི་སྐུ་ལ་ནི་འགོག་པའི་ཆོས་སོ་ཞེས་སྨྲ་བར་མི་བྱའོ། །རིགས་ཀྱི་བུ་འགོག་པའི་ཆོས་ནི་སངས་རྒྱས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ནོ། །རིགས་ཀྱི་བུ་ཁྱོད་ཀྱིས་ནི། དེ་བཞིན་གཤེགས་པ་ནི་གང་དུ་གནས། གང་དུ་སྤྱོད། གང་དུ་གཟིགས། ཅི་ལ་ལོངས་སྤྱོད་པ་རྟོག་ཅིང་དཔག་པར་མི་བྱའོ། །རིགས་ཀྱི་བུ་དོན་དེ་དག་ནི་ཁྱོད་
ལ་སོགས་པས་ཤེས་ཤིང་རྟོགས་པ་མ་ཡིན་ཏེ། སངས་རྒྱས་ཀྱི་ཆོས་ཀྱི་སྐུ་དང་། རྣམ་པ་སྣ་ཚོགས་ཀྱི་ཐབས་ནི་བསམ་གྱིས་མི་ཁྱབ་བོ། །རིགས་ཀྱི་བུ་གཞན་ཡང་སངས་རྒྱས་དང་། ཆོས་དང་། དགེ་འདུན་ལ་རྟག་ཏུ་དྲན་ཞིང་ནན་ཏན་བྱའོ། །ཆོས་རྣམ་པ་གསུམ་པོ་འདི་ནི་ཐ་དད་པ་མ་ཡིན་པའི་མཚན་ཉིད་མི་རྟག་པ་མ་ཡིན་པའི་མཚན་ཉིད། མི་འཕོ་བའི་མཚན་ཉིད་དོ། །གང་ཞིག་ཆོས་རྣམ་པ་གསུམ་པོ་འདི་ལ་ཐ་དད་པར་འདུ་ཤེས་ན་སྐྱེ་བོ་དེ་ནི་སྐྱབས་སུ་འགྲོ་བ་གསུམ་ལ་མི་གནས་པ། ཚུལ་ཁྲིམས་དང་མི་ལྡན་པ་ཞེས་བྱ་སྟེ། ཉན་ཐོས་དང་། རང་སངས་རྒྱས་ཀྱི་བྱང་ཆུབ་ཀྱང་ཐོབ་པར་མི་ནུས་སོ། །གང་གིས་བསམ་གྱིས་མི་ཁྱབ་པ་དེ་ལ་རྟག་པའི་འདུ་ཤེས་ཀྱིས་ནན་ཏན་བྱེད་ན་དེ་ནི་སྐྱབས་སུ་འགྲོ་བའི་གནས་ཡིན་ནོ། །རིགས་ཀྱི་བུ་དཔེར་ན་ཤིང་ཡོད་པའི་རྐྱེན་གྱིས་གྲིབ་མ་ཡོད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། རྟག་པའི་ཆོས་ཡོད་པས་སྐྱབས་སུ་འགྲོ་བའི་གནས་ཡོད་ཀྱི་མི་རྟག་པ་ནི་མ་ཡིན་ནོ། །གང་ཞིག་དེ་བཞིན་གཤེགས་པ་ལ་མི་རྟག་པའོ་ཞེས་སྨྲ་ན་དེ་བཞིན་གཤེགས་པ་ཡང་ལྷ་དང་འཇིག་རྟེན་དུ་བཅས་པའི་སྐྱབས་སུ་འགྲོ་བའི་གནས་མ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དཔེར་ན་ནམ་རྨུས་ན་སྐྱེད་ཤིང་མཆིས་ཀྱང་གྲིབ་མ་ནི་མ་མཆིས་སོ། །བཀའ་སྩལ་པ། འོད་སྲུང་ཤིང་ཡོད་ལ་གྲིབ་མ་མེད་ཅེས་མི་བྱའོ། །དེ་ནི་ཤའི་མིག་གིས་མི་མཐོང་བའི་ཕྱིར་རོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། རང་བཞིན་ཉིད་ཀྱིས་རྟག་ཏུ་གནས་ལ། མི་འགྱུར་མི་འཕོ་མོད་ཀྱི། ཤེས་རབ་ཀྱི་མིག་མེད་པས་ནི་མཐོང་བར་མི་ནུས་ཏེ། ཇི་ལྟར་ནམ་རྨུས་པའི་ཚེ་ཤིང་གི་གྲིབ་མ་མི་མཐོང་བ་བཞིན་ནོ། །སྐྱེ་བོ་མ་རབས་ཀྱང་སངས་རྒྱས་མྱ་ངན་ལས་འདས་ནས་གང་གིས་དེ་བཞིན་གཤེགས་པ་ནི་མི་རྟག་པའི་ཆོས་ཅན་ནོ་ཞེས་སྨྲ་བ་ཡང་དེ་དང་འདྲ་སྟེ། གང་གིས་
དེ་བཞིན་གཤེགས་པ་ནི་ཆོས་དང་། དགེ་འདུན་དང་ཐ་དད་དོ་ཞེས་སྨྲ་ན་དེ་ནི་སྐྱབས་སུ་འགྲོ་བའི་གནས་གསུམ་པོར་མི་འགྱུར་རོ། །དཔེར་ན་ཁྱོད་ཀྱི་ཕ་མ་ནི་སོ་སོ་ཐ་དད་པའི་ཕྱིར་མི་རྟག་ཅེས་བྱར་རུང་ངོ་། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་གདོད་སངས་རྒྱས་དང་། ཆོས་དང་། དགེ་འདུན་རྟག་པ་དང་། རབས་བདུན་གྱི་ཕ་མའི་བར་དུ་དྲན་པར་འགྱུར་བ་ནི་ངོ་མཚར་ཆེའོ། །བཅོམ་ལྡན་འདས་བདག་གིས་དེ་བཞིན་གཤེགས་པ་དང་། ཆོས་དང་། དགེ་འདུན་བསམ་གྱིས་མི་ཁྱབ་པ་ལ་གོམས་པར་བགྱིད་དེ། བདག་དེ་ལ་གོམས་ནས་གཞན་དག་ལ་ཡང་དོན་དེ་རྒྱ་ཆེར་བསྟན་པར་བགྱིའོ། །གང་ཞིག་འདི་ལ་ཡིད་མི་ཆེས་པ་དེ་ནི་ཡུན་རིང་པོ་ནས་མི་རྟག་པ་སྒོམ་པ་སྟེ། བདག་གིས་དེ་ལ་ནི་བ་མོའམ། སེར་བ་ལྟ་བུར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ། །ལེགས་སོ་ཞེས་བཀའ་སྩལ་ནས་ཁྱོད་ནི་དམ་པའི་ཆོས་ཤིན་ཏུ་སྲུང་ཞིང་ཡོངས་སུ་འཛིན་པ་སྟེ། དེ་ལྟར་ཆོས་སྲུང་ཞིང་སེམས་ཅན་ལ་མི་སླུ་བའི་དགེ་བའི་རྩ་བ་ལས་དེ་ཉིད་ཀྱི་རྐྱེན་གྱིས་ཚེ་རིང་བ་དང་། སྔོན་གྱི་གནས་ཤེས་པར་འགྱུར་རོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་སྐུ་ཚེའི་ལེའུ་ཞེས་བྱ་སྟེ་གཅིག་གོ །། །།