བཞི་པ། དེ་བཞིན་གཤེགས་པའི་སྙིང་པོའི་ལེའུ།
དེ་ནས་བཅོམ་ལྡན་འདས་ཀྱིས་འོད་སྲུང་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་མྱ་ངན་ལས་འདས་པ་ཆེན་པོ་འབྱེད་ཅིང་སྟོན་པ་དག་མཚན་ཉིད་རྣམ་པ་འདི་བཞི་ལ་མཁས་པར་བྱའོ། །བཞི་གང་ཞེ་ན། བདག་ཚུལ་བཞིན་དུ་བྱ་བ་དང་། གཞན་ཚུལ་བཞིན་དུ་འཆོས་པ་དང་། ཇི་སྐད་དྲིས་པ་དེ་བཞིན་དུ་ལན་འདེབས་པ་དང་། རྟེན་ཅིང་འབྲེལ་ཏེ་འབྱུང་བ་ལ་མཁས་པའོ། །དེ་ལ་བདག་ཚུལ་བཞིན་དུ་བྱེད་པ་གང་ཞེ་ན། སངས་རྒྱས་བཅོམ་ལྡན་འདས་ཀྱིས་རྟེན་ཅིང་འབྲེལ་ཏེ་བྱུང་བ་གཟིགས་ཏེ་གསུངས་པ་དཔེར་ན་དགེ་སློང་ཞིག་མེའི་ཕུང་པོ་ཆེན་པོ་མཐོང་ན་དེ་འདི་སྐད་དུ་བདག་ནི་མེའི་ཕུང་པོ་ཆེན་པོར་ཞུགས་ཏེ་ཚིག་ཀྱང་བླའི། དེ་བཞིན་གཤེགས་པས་གསུངས་པའི་མདོ་སྡེ་བཅུ་གཉིས་དང་དགོངས་ཏེ་གསུངས་པའི་སྙིང་པོ་ལ་འདི་ནི་བདུད་སྡིག་ཏོ་ཅན་གྱིས་བཤད་པ་ཡིན་ནོ་ཞེས་སྐུར་པ་མི་འདེབས་སོ། །ཇི་ཙམ་དུ་སངས་རྒྱས་དང་། ཆོས་དང་། དགེ་འདུན་ལ་མི་རྟག་གོ་ཞེས་སྨྲ་བ་དེ་ནི་བདག་ཀྱང་བསླུས་ལ། ཕ་རོལ་པོ་གཞན་ཡང་བསླུས་པ་ཡིན་ཏེ། གལ་ཏེ་རལ་གྲི་རྣོན་པོས་ལྕེ་བཅད་ཀྱང་བླའི་། སངས་རྒྱས་དང་ཆོས་དང་། དགེ་འདུན་ལ། མི་རྟག་གོ་ཞེས་མི་སྨྲའོ། །གཞན་དེ་སྐད་སྨྲ་བ་ལ་ཡང་ཡིད་མི་ཆེས་ཏེ། དེ་སྐད་དུ་སྨྲ་བ་དེ་ལ་སྙིང་རྗེའི་སེམས་བསྐྱེད་དོ། །སངས་རྒྱས་དང་ཆོས་དང་། དགེ་འདུན་ལ་བསམ་གྱིས་མི་ཁྱབ་པར་བཟུང་སྟེ། བདག་གི་ལུས་ལ་མེའི་ཕུང་པོ་ལྟར་རྟོག་པ་ནི་བདག་ཚུལ་བཞིན་དུ་བྱེད་པ་ཞེས་བྱའོ། །དེ་ལ་ཇི་ལྟར་ན་གཞན་ཚུལ་བཞིན་དུ་འཆོས་པ་གང་ཞེ་ན། བཅོམ་ལྡན་འདས་ཆོས་སྟོན་པའི་ཚེ། བུད་མེད་གཅིག་ཅིག་བུ་ནུ་ཞོ་བསྣུན་པ་ཐོགས་ཏེ། བཅོམ་ལྡན་འདས་གང་ན་བར་འོངས་ནས་སངས་རྒྱས་ཀྱི་ཞབས་ལ་ཕྱག་འཚལ་ཏེ་སངས་རྒྱས་ལ་ཞུ་བར་བསམས་པ་ཡིད་ལ་བྱས་བཞིན་དུ་ཕྱོགས་གཅིག་ཏུ་འདུག་གོ །
དེའི་ཚེ་བཅོམ་ལྡན་འདས་ཀྱིས་མཁྱེན་བཞིན་དུ་བུད་མེད་ལ་འདི་སྐད་ཅེས་བཀའ་སྩལ་ཏོ། །ཁྱོད་བུ་སྡུག་པར་བསམས་ནས་མར་མང་དུ་བསྙོད་དེ། ཞུའམ་མ་ཞུ་རྟོགས་པའི་ཕྱིར་འོངས་སམ། དེ་ནས་བུད་མེད་དེས་བཅོམ་ལྡན་འདས་ལ་གསོལ་པ། ངོ་མཚར་ཆེའོ། །བཅོམ་ལྡན་འདས་བདག་གི་ཡིད་ལ་བསམས་པ་བཞིན་དུ་མཁྱེན་ཏོ། །བདག་གིས་མར་སྩལ་བ་མངས་སམ་ཉུངས་པ། བཅོམ་ལྡན་འདས་ཀྱིས་བསྟན་དུ་གསོལ། བཅོམ་ལྡན་འདས་བདག་གིས་དེང་བུ་འདི་མར་ཞིག་སྩལ་ཏེ་མ་ཞུ་བས་ཚེའི་བར་ཆད་དུ་འགྱུར་གྱིས་དོགས་ན་དེ་བཞིན་གཤེགས་པས་བདག་ལ་བསྟན་དུ་གསོལ། དེ་ལ་བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་བུས་ཟོས་པའི་མར་ནི་དེ་མ་ཐག་ཏུ་ཞུ་སྟེ་ཚེ་དང་ལུས་ཀྱི་མཆོག་ཏུ་གྱུར་ཏོ། །བུད་མེད་དེས་དེ་སྐད་ཅེས་བཀའ་སྩལ་པ་ཐོས་ནས་རབ་ཏུ་དགའ་རངས་ཏེ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཡང་དག་པར་གསུངས་པས་བདག་རབ་ཏུ་དགའ་བར་གྱུར་ཏོ། །བཅོམ་ལྡན་འདས་ཀྱིས་འདི་ལྟར་སེམས་ཅན་གདུལ་བའི་སླད་དུ་ཞུ་བ་དང་། མ་ཞུ་བ་རྣམ་པར་ཕྱེ་སྟེ་གསུངས་པ་དང་། གཞན་ཡང་ཆོས་ཐམས་ཅད་བདག་མེད་པ་དང་། མི་རྟག་པར་གསུངས་པ་ཤིན་ཏུ་ལེགས་སོ། །གལ་ཏེ་བཅོམ་ལྡན་འདས་ཀྱིས་རྟག་པ་སྔར་བཤད་ན། འདུལ་བའི་འཁོར་འདི་དག་འདི་སྐད་དུ་ཆོས་འདི་ནི་མུ་སྟེགས་ཅན་དང་འཐུན་ནོ་ཞེས་མཆི་སྟེ་སྤོང་བར་གྱུར་ཏོ། །བཅོམ་ལྡན་འདས་ཀྱིས་བུད་མེད་དེ་ལ་བཀའ་སྩལ་པ། ཁྱོད་ཀྱི་བུ་དེ་སྐྱེས་ཏེ་རྒྱུག་ནུས་ཙམ་ན་ཁ་ཟས་འཇུ་དཀའ་བ་ཡང་ཞུ་སྟེ་སྔར་བྱིན་པའི་མར་ཙམ་གྱིས་ནི་ཆོག་པ་མ་ཡིན་ནོ། །ངའི་ཉན་ཐོས་ཀྱི་ཉེ་གནས་ཀྱང་ཁྱོད་ཀྱི་བུ་ཆུང་ངུ་དེ་དང་འདྲ་སྟེ། རྟག་པའི་ཆོས་འདི་འཇུ་མི་ནུས་སོ། །དེ་བས་ན་ངས་སྔར་སྡུག་བསྔལ་བ་དང་། མི་རྟག་པ་ལ་སོགས་པ་བཤད་པ་ཡིན་ནོ། །ངའི་ཉན་ཐོས་ཀྱི་ཉེ་གནས་ཡོན་ཏན་དང་ལྡན་པ་ཐེག་པ་ཆེན་པོའི་མདོ་ལ་ནན་ཏན་དུ་སྤྱོད་བཟོད་པ་དག་ལ་ནི་ངས་མདོ་སྡེ་འདི་ཉིད་ཀྱི་རོ་རྣམ་པ་དྲུག་བསྟན་ཏོ། །རོ་རྣམ་པ་དྲུག་གང་ཞེ་ན། སྡུག་བསྔལ་ནི་སྐྱུར་བའི་རོ་ལྟ་བུའོ། །མི་རྟག་པ་ནི་ལན་
ཚྭའི་རོ་ལྟ་བུའོ། །བདག་མེད་པ་ནི་ཁ་བའི་རོ་ལྟ་བུའོ། །བདེ་བ་ནི་མངར་བའི་རོ་ལྟ་བུའོ། །བདག་ནི་ཚ་བའི་རོ་ལྟ་བུའོ། །རྟག་པ་ནི་བསྔལ་བའི་རོ་ལྟ་བུའོ། །འཇིག་རྟེན་ན་རོ་རྣམ་པ་གསུམ་སྟེ། མི་རྟག་པ་དང་། བདག་མེད་པ་དང་། བདེ་བ་མེད་པ་སྟེ། ཉོན་མོངས་པ་ནི་ཤིང་ལྟ་བུ། ཤེས་རབ་ནི་མེ་ལྟ་བུ་སྟེ། དེའི་རྒྱུ་དང་དེའི་རྐྱེན་གྱིས་མྱ་ངན་ལས་འདས་པའི་ཟས་སུ་གྱུར་པ་ནི་རྟག་པ་དང་། བདེ་བ་དང་བདག་དང་། ཡོངས་སུ་དག་པ་སྟེ། ཉེ་གནས་སུ་གྱུར་པའི་རྣམས་རོ་དེ་ལ་དགོད་དོ། །ཡང་བུད་མེད་དེ་ལ་བཀའ་སྩལ་པ། ཁྱོད་དོན་གཉེར་ཅིང་གཞན་དུ་འགྲོ་ན་ཁྱོད་ཀྱི་བུ་མ་རུངས་པ་ཁྱིམ་ནས་ཕྱུང་ལ། རིན་པོ་ཆེའི་གཏེར་རྣམས་བུ་མཛངས་པ་ལ་གཏོད་ཅིག །བུད་མེད་ཀྱིས་གསོལ་པ། བཅོམ་ལྡན་འདས་འཕགས་པའི་བཀའ་བཞིན་ཏེ། རིན་པོ་ཆེའི་གཏེར་རྣམས་བུ་མཛངས་པ་ལ་སྟོན་གྱི། བུ་ངན་པ་ལ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ང་ཡང་དེ་དང་འདྲ་སྟེ། ཡོངས་སུ་མྱ་ངན་ལས་འདའ་བ་ན། དེ་བཞིན་གཤེགས་པས་དགོངས་ཏེ་གསུངས་པ་བླ་ན་མེད་པའི་ཆོས་ཀྱི་གཏེར་ཉན་ཐོས་ཀྱི་ཉེ་གནས་རྣམས་ལ་མི་སྟོན་པའང་ཁྱོད་ཀྱིས་རིན་པོ་ཆེའི་གཏེར་བུ་ངན་པ་ལ་མི་སྟོན་པ་བཞིན་ནོ། །བྱང་ཆུབ་སེམས་དཔའ་རྣམས་ལ་གདམས་ཤིང་གཏད་པ་ནི། ཇི་ལྟར་ཁྱོད་ཀྱིས་རིན་པོ་ཆེའི་གཏེར་རྣམས་བུ་མཛངས་པ་ལ་གཏད་པ་བཞིན་ནོ། །དེ་ཅིའི་ཕྱིར་ཞེ་ན། ཉན་ཐོས་ཀྱི་ཉེ་གནས་དག་ནི་སྐྱེ་བ་དང་འཕོ་བའི་འདུ་ཤེས་དང་བཅས་པས་སངས་རྒྱས་བཅོམ་ལྡན་འདས་ནི་ཡང་དག་པར་མྱ་ངན་ལས་འདས་སོ་སྙམ་སྟེ། ང་ནི་ཡང་དག་པར་མྱ་ངན་ལས་འདས་པ་མ་ཡིན་ནོ། །དཔེར་ན་ཁྱོད་ལམ་རིང་པོར་སོང་བ་ལས་ཕྱིར་མ་འཁོར་གྱི་བར་དུ་ཁྱོད་ཀྱི་བུ་མ་རུངས་པས་ཁྱོད་མ་ཤི་བར་ཤི་ཞེས་ཟེར་བ་དང་འདྲའོ། །བྱང་ཆུབ་སེམས་དཔའ་དག་ནི་དེ་བཞིན་གཤེགས་པ་རྟག་པ། མི་འཕོ་བ། མི་འགྱུར་བའོ་ཞེས་ཟེར་ཏེ། ཇི་ལྟར་ཁྱོད་ཀྱི་བུ་མཛངས་པ་ཁྱོད་མ་ཤིའོ་ཞེས་ཟེར་བ་དང་འདྲའོ། །དོན་དེ་ལྟ་བས་ན་ངས་བླ་ན་མེད་པ་དགོངས་ཏེ་གསུངས་པའི་ཆོས་ཀྱི་གཏེར་བྱང་ཆུབ་སེམས་དཔའ་རྣམས་ལ་གཏད་དོ། །རིགས་
ཀྱི་བུ་སེམས་ཅན་གང་ཞིག་སངས་རྒྱས་རྟག་པ། གནས་པ། མི་འཕོ་མི་འགྱུར་བར་འཛིན་ན། གནས་དེ་ཉིད་ན་སངས་རྒྱས་བཞུགས་པར་རིག་པར་བྱ་སྟེ། དེ་དག་ནི་ཚུལ་བཞིན་དུ་གཞན་འཆོས་པ་ཞེས་བྱའོ། །དེ་ལ་ཇི་ལྟར་ན་དྲིས་པ་བཞིན་དུ་ལན་འདེབས་པ་ཞེ་ན། གལ་ཏེ་གང་ཟག་གཅིག་གིས། སངས་རྒྱས་བཅོམ་ལྡན་འདས་ལ་འདི་སྐད་དུ། བདག་གིས་ནོར་དང་། ཟང་ཟིང་ཅི་ཡང་མ་བཏང་བར་སྦྱིན་བདག་ཆེན་པོའི་མིང་དུ་གྲགས་པར་འགྱུར་ཞེས་སྨྲ་ན། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །དགེ་སྦྱོང་དང་བྲམ་ཟེ་ལ་སོགས་པ་འདོད་པ་ཉུང་ཞིང་ཆོག་ཤེས་པ། མ་བརྟགས་པའི་ཡོ་བྱད་མི་འཆང་མི་སོགས་པ་ལ་བྲན་ཕོ་དང་། བྲན་མོ་དང་། ལས་བྱེད་པའི་མི་བྱིན་པ་དང་། ཚངས་པར་སྤྱོད་པ་ལ་བུད་མེད་བྱིན་པ་དང་། ཤ་ཆང་བཅད་པ་ལ་ཤ་ཆང་བྱིན་པ་དང་། ཕྱི་དྲོ་ཕན་ཆད་མི་ཟ་བ་ལ་ཁ་ཟས་བྱིན་པ་དང་། འཇོ་བའི་མེ་ཏོག་དང་སྤོས་མི་ཐོགས་པ་ལ་མེ་ཏོག་དང་སྤོས་བྱིན་པ་དག །སྦྱིན་པའི་མིང་ནི་ཀུན་ཏུ་གྲགས་པར་ཡང་འགྱུར་ལ། ནོར་དང་ཟང་ཟིང་ནི་ཅུང་ཟད་ཙམ་ཡང་མི་ཉམས་ཏེ་འདི་དག་ནི་དྲིས་པ་བཞིན་དུ་ལན་བཏབ་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤ་མི་འཚལ་བ་ལ་ཤ་སྩལ་བ་མི་རིགས་མོད། དེ་ཅིའི་སླད་དུ་ཞེ་ན། བདག་ནི་ཤ་མི་འཚལ་བ་དག་ལ་ཡོན་ཏན་ཆེན་པོ་བརྒྱད་དང་ལྡན་པར་མཐོང་ངོ་། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤིན་ཏུ་ལེགས་སོ། །ཁྱོད་ཀྱིས་ངའི་དགོངས་པ་ཤེས་པ་ཤིན་ཏུ་ལེགས་སོ། །ཆོས་སྲུང་བའི་བྱང་ཆུབ་སེམས་དཔའ་དག་ནི་འདི་ལྟར་རིག་པར་བྱའོ། །རིགས་ཀྱི་བུ་དེང་ཕན་ཆད་ཉན་ཐོས་ཀྱི་ཉེ་གནས་དག་ཤ་ཟར་མི་གནང་ངོ་། །གལ་ཏེ་ཡོན་བདག་དད་པས་བྱིན་ན་ཡང་། དེ་ལ་བུའི་ཤ་ལྟ་བུར་འདུ་ཤེས་བསྐྱེད་དོ། །བྱང་ཆུབ་སེམས་དཔའ་འོད་སྲུང་གིས་གསོལ་པ་བཅོམ་ལྡན་འདས་ཅིའི་སླད་དུ། དེ་བཞིན་གཤེགས་པས་ཤ་
འཚལ་དུ་མི་གནང་། བཀའ་སྩལ་པ། རིགས་ཀྱི་བུ་ཤ་ཟ་བ་ནི་སྙིང་རྗེ་ཆེན་པོའི་རིགས་གཅོད་པ་ཡིན་ནོ། །འོད་སྲུང་གིས་གསོལ་པ་སྔོན་བཅོམ་ལྡན་འདས་ཀྱིས་ཤ་བརྟགས་པ་རྣམ་པ་གསུམ་འཚལ་དུ་གནང་བ་མ་ལགས་སམ། བཀའ་སྩལ་པ། འོད་སྲུང་ཤ་བརྟགས་པ་རྣམ་པ་གསུམ་ཟར་གནང་བ་ནི་བགས་ཀྱིས་བཅད་པའི་ཐབས་སུ་གསུངས་སོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། ཅིའི་སླད་དུ་མ་བརྟགས་པ་རྣམ་པ་བཅུ་དང་། བརྟགས་པ་རྣམ་པ་དགུའི་བར་དུ་འཚལ་དུ་མི་གནང་། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་ཡང་བགས་ཀྱིས་བཅད་པའི་དོན་དུ་གསུངས་ཏེ། མདོར་ན་ཤ་བཅད་པའི་དོན་དུ་བསྟན་པ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་ཅིའི་སླད་དུ་དེ་བཞིན་གཤེགས་པས་ཉའི་ཤ་ལ་བསོད་པའི་ཟས་སོ་ཞེས་གསུངས། བཀའ་སྩལ་པ། རིགས་ཀྱི་བུ་ངས་ནི་ཉ་ཤ་ལ་སོགས་པ་ལ་བསོད་པའི་ཟས་སོ་ཞེས་མ་གསུངས་ཀྱི། བུ་རམ་གྱི་ཤིང་དང་། འབྲས་དང་། ཁ་ར་དང་ཁྲེ་དང་། ནས་ལ་སོགས་པ་དང་། ཧ་སེ་དང་། འོ་མ་དང་། ཞོ་དང་། མར་དང་། འབྲུ་མར་ལ་སོགས་པ་ལ་བསོད་པའི་ཟས་སོ་ཞེས་གསུངས་ཏེ། གོས་རྣམ་པ་མང་པོ་ཡང་འཆང་དུ་གནང་བར་ངས་གསུངས་མོད་ཀྱི། འཆང་དུ་གནང་བ་དེ་ཡང་ཁ་དོག་བསྒྱུར་བ་ལ་བྱ་ན། ཉའི་ཤ་ལ་ཆགས་པ་ལྟ་སྨོས་ཀྱང་ཅི་དགོས། འོད་སྲུང་གིས་གསོལ་པ་དེ་བཞིན་གཤེགས་པས་ཤ་འཚལ་དུ་མི་གནང་ན་རོ་རྣམ་པ་ལྔ་པོ། འོ་མ་དང་། ཞོ་དང་། དར་བ་དང་། མར་དཀར་དང་། ཞུན་མར་དང་། ཏིལ་མར་ལ་སོགས་པ་དང་། གོས་ཀེའུ་ཤ་ཡ་དང་། དོ་ཤལ་དང་། ཀོ་ལྷམ་དང་། གསེར་དངུལ་གྱི་སྣོད་ལ་སོགས་པ་ཡང་འཆང་དུ་མི་གནང་བའི་རིགས་སོ། །བཀའ་སྩལ་པ། རིགས་ཀྱི་བུ་གཅེར་བུ་པའི་ལྟ་བ་དང་འཐུན་པ་མ་ཡིན་གྱི། དེ་བཞིན་གཤེགས་པས་ཚུལ་ཁྲིམས་བཅས་པའི་རྣམས་ནི་སོ་སོར་དགོངས་ཏེ་གསུངས་པ་ཡིན་པས་དགོངས་པ་ཐ་དད་པའི་ཕྱིར་ཤ་བརྟགས་པ་རྣམ་པ་གསུམ་ཟར་
གནང་བ་ཡིན་ནོ། །འདུ་ཤེས་ཐ་དད་པའི་ཕྱིར་ཤ་རྣམ་པ་བཅུ་བཅད་པ་ཡིན་ནོ། །འདུ་ཤེས་ཐ་དད་པས་རང་ཤི་བ་ལ་སོགས་པ་ཤ་ཐམས་ཅད་ཟར་མི་གནང་བ་ཡིན་ནོ། །འོད་སྲུང་ངས་ནི་དེང་ཕན་ཆད་ཉེ་གནས་སུ་གྱུར་པ་རྣམས་ཀྱིས་ཤ་ཐམས་ཅད་ཟར་མི་རུང་ངོ་། །ཞེས་གསུངས་སོ། །འོད་སྲུང་ཤ་ཟ་བ་དག་ནི་འགྲོའམ། སྡོད་དམ་འདུག་གམ། ཉལ་ཡང་སེམས་ཅན་གང་ལ་དྲིས་ཕོག་པ་ཐམས་ཅད་འཇིགས་སྐྲག་གོ །འདི་ལྟ་སྟེ་དཔེར་ན་མི་ཞིག་སེང་གེའི་དྲི་བྲོ་བས་དེས་ཐམས་ཅད་འཇིགས་ཤིང་སྐྲག་གོ །རིགས་ཀྱི་བུ་དཔེར་ན་མི་ཞིག་སྒོག་པ་ཟོས་ན་མནམ་པས་ཐམས་ཅད་ཀྱིས་མི་འདོད་དེ་འབྱོལ་ན། དེ་ལ་ཉེ་བར་བསྙེན་པ་ལྟ་ཅི་སྨོས། ཤ་ཟ་བ་རྣམས་ཀྱང་དེ་དང་འདྲ་སྟེ། སེམས་ཅན་རྣམས་ལ་ཤའི་དྲིས་ཕོག་ན་སྐྲག་སྟེ། ཤི་བས་འཇིགས་པའི་འདུ་ཤེས་འབྱུང་ངོ་། །ཆུ་ལ་གནས་པ་དང་། ཐང་ལ་གནས་པ་དང་། ནམ་མཁའ་ལ་འགྲོ་བའི་སྲོག་ཆགས་ཐམས་ཅད་འབྱོལ་ཞིང་འབྲོས་ཏེ། འདི་ནི་བདག་ཅག་གི་དགྲ་ཡིན་ནོ་ཞེས་ཟེར་རོ། །དེ་བས་ན་བྱང་ཆུབ་སེམས་དཔའ་དག་ཤ་ཟ་བར་མི་རྩོལ་ལོ། །སེམས་ཅན་སྒྲོལ་བའི་ཕྱིར་ཤ་ཟ་བ་སྟོན་ཏེ། ཟ་བ་ལྟར་བྱེད་ནའང་ཡང་དག་པར་ན་མི་ཟའོ། །རིགས་ཀྱི་བུ་འདི་ལྟར་བྱང་ཆུབ་སེམས་དཔའ་ནི་ཡོངས་སུ་དག་པའི་ཟས་ཀྱང་མི་ཟ་ན་ཤ་ཟ་བ་ལྟ་སྨོས་ཀྱང་ཅི་དགོས། རིགས་ཀྱི་བུ་ང་ཡོངས་སུ་མྱ་ངན་ལས་འདས་ནས་ལོ་ཚད་མེད་པ་བརྒྱ་ན་འཕགས་པའི་ལམ་བཞིས་བྱུང་བའི་འཕགས་པ་ཀུན་ཀྱང་མྱ་ངན་ལས་འདས་ནས་དམ་པའི་ཆོས་ནི་ནུབ། གཟུགས་བརྙན་ལ་ཆོས་སུ་བྱེད་པ་ན། དགེ་སློང་དག་འདུལ་བ་འཛིན་པ་དང་འདྲ་བར་འཆོས་ཤིང་མདོ་སྡེ་ཀློག་པ་དང་འདོན་པ་ནི་ཉུང་གི ། ལུས་གསོ་བའི་ཕྱིར་ཁ་ཟས་ལ་ནི་ཆགས་ལུས་ལ་ནི་གོས་ངན་པ་རྩུབ་པོ་གྱོན་ལ། མདོག་ཀྱང་ནག་པོར་གྱུར། གཟི་བརྗིད་ཀྱང་མེད་ལ། བ་ལང་དང་ལུག་ཀྱང་འཚོ། ཤིང་དང་རྩྭ་ཡང་ཁུར་དུ་ཁྱེར་ཏེ། སྐྲ་དང་སེན་མོ་ནི་རིང་དུ་བསྐྱེད་པ་དག་ཀྱང་འབྱུང་སྟེ། ངུར་སྨྲིག་གི་གོས་གྱོན་མོད་ཀྱི། རྔོན་པ་དང་འདྲ་སྟེ། མིག་ཕབ་
ལ་གོམ་པ་དལ་ཡང་བྱི་ལ་བྱི་བ་ལ་འཇབ་པ་དང་མཚུངས་ཏེ། བདག་ནི་དགྲ་བཅོམ་པ་ཡིན་ནོ་ཞེས་རྟག་ཏུ་བརྗོད་ཀྱང་། ནད་དང་སྡུག་བསྔལ་དང་། གཉིད་དང་མི་གཙང་བས་གཟིར་ཏེ། ཕྱི་རོལ་གྱི་ཚུལ་འཆོས་ཀྱང་ནང་གི་སེམས་ནི་ཕྲག་དོག་དང་འདོད་པས་ཟིལ་གྱིས་ནོན་པས་ཆོས་ལོག་པ་ཅན་གྱི་བྲམ་ཟེ་ལ་སོགས་པ་དང་མཚུངས་སོ། །དགེ་སྦྱོང་མ་ཡིན་པར་དགེ་སྦྱོང་གི་གཟུགས་སུ་སྟོན་ཅིང་། ངན་པར་ལྟ་བ་བསྐྱེད་ནས་ཡང་དག་པའི་ཆོས་ལ་ཡང་སྐུར་པ་འདེབས་སོ། །གང་ཟག་དེ་དག་གིས་དེ་བཞིན་གཤེགས་པས་བཅས་པའི་ཚུལ་ཁྲིམས་དང་། འདུལ་བ་དང་། སྤྱོད་ལམ་དང་། རྣམ་པར་གྲོལ་བའི་འབྲས་བུ་བསྟན་པ་དང་། མ་བརྟགས་པའི་ཆོས་སྤང་བ་བསྟན་པ་ཡང་མ་རུང་བར་བྱས། དགོངས་ཏེ་གསུངས་པ་ཤིན་ཏུ་ཟབ་མོ་ཡང་མ་རུང་བར་བྱས་ནས། སོ་སོའི་རང་བཟོས་མདོ་སྡེ་དང་འདུལ་བ་བཤད་དེ། འདི་སྐད་དུ་དེ་བཞིན་གཤེགས་པས་བདག་ཅག་ཤ་ཟ་བར་གནང་ངོ་ཞེས་ཟེར་ཏེ། ཡི་གེར་བྲིས་ནས། སངས་རྒྱས་ཀྱིས་གསུངས་སོ་ཞེས་ཕན་ཚུན་དུ་རྩོད་ཅིང་སོ་སོ་ནས་བདག་ནི་དགེ་སྦྱོང་ཤཱཀྱའི་སྲས་སོ་ཞེས་སྒྲོགས་སོ། །རིགས་ཀྱི་བུ་དེའི་ཚེ་ན་གཞན་ཡང་དགེ་སྦྱོང་དག་འབྲུ་མང་དུ་སྩོགས་ཤིང་། ཉའི་ཤ་ལ་ལག་དར་ཏེ་སྤྱོད་དོ། །མར་གྱི་སྣོད་དང་། རིན་པོ་ཆེའི་གདུགས་དང་། ཀོ་ལྷམ་དག་འཆང་ཞིང་། རྒྱལ་པོ་དང་། བློན་པོ་དང་། ཁྱིམ་བདག་ལ་བརྟེན་ནས་མཚན་ལྟ་བ་དང་། སྐར་མ་ལྟ་བ་དང་། མོ་དང་སྨན་དཔྱད་དག་སློབ་ཅིང་། བྲན་ཕོ་དང་། བྲན་མོ་དང་། གསེར་དང་། དངུལ་དང་། མུ་ས་ལ་གར་བྷ་དང་། སྤུག་དང་། ཤེལ་དང་། མུ་ཏིག་དང་། བྱི་རུ་དང་། སྦུར་ལོང་དང་། ཤེལ་གྱི་སྣམ་བུ་དང་། དོ་ཤལ་ལ་སོགས་པ་དང་། ཤིང་ཏོག་རྣམ་པ་སྣ་ཚོགས་ལ་སྤྱོད་དེ། གཞན་ཡང་རྩལ་དང་། རི་མོ་དང་། འཇི་བ་ལ་སྤྱོད་པ་དང་། ཡི་གེ་སློབ་པའི་སློབ་དཔོན་དང་། ཞིང་རྨོ་བ་དང་། ཞིང་རྔ་བ་དང་། བྱད་སྟེམས་དང་། སྔགས་དང་སྨན་སྦྱོར་བ་དང་། གླུ་གར་དང་། རོལ་མོ་དང་། སྤོས་དང་། མེ་ཏོག་གིས་འཇོ་བ་དང་། ཨུག་ཤུད་དང་མིག་མངས་དང་། བཟོ་རྣམ་པ་སྣ་ཚོགས་སློབ་ཅིང་བྱེད་པ་དག་འབྱུང་ངོ་། །དགེ་སློང་གང་
ཞིག་མི་དགེ་བའི་དངོས་པོ་དེ་དག་སྤངས་ན། གང་ཟག་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །དེ་ནས་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཡོན་བདག་ལ་ལྟོས་ཏེ་འཚོ་བ་དག །བསོད་སྙོམས་བྱེད་པའི་ཚེ། ཤ་དང་འདྲེས་པའི་ཟས་ཤིག་སྩལ་ན། ཇི་ལྟར་འཚལ་བར་བགྱི། ཅིས་བརྟགས་པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤ་དང་ཟས་སོ་སོར་ཕྱེ་ལ། ཆུས་བཀྲུས་ཏེ་བཟའ་བར་བྱའོ། །གལ་ཏེ་ལྷུང་བཟེད་ཤ་དང་འབགས་ཀྱང་བྲོ་བའི་རོ་མེད་ན། སྤྱོད་ཀྱང་ཉེས་མེད་དོ། །གལ་ཏེ་བསོད་སྙོམས་ཀྱི་ནང་ན་ཤ་མང་དུ་འོངས་ན་ཡང་བླང་བར་མི་བྱའོ། །གལ་ཏེ་ཟས་ཀྱི་ནང་ན་ཤ་སྣང་ན་མ་ཟ་ཤིག། ཟོས་ན་ཉེས་པ་དང་བཅས་པ་སྟེ། ངས་ཤ་ཟར་མི་གནང་བ་དང་བཅས་པ་འདི་རྒྱས་པར་བསྟན་ན། ཟད་པའི་མཐའ་མེད་དེ། མྱ་ངན་ལས་འདའ་བའི་དུས་ལ་བབ་པས་ཕྱོགས་ཙམ་ཞིག་བཤད་དོ། །འདི་དག་ནི་དྲིས་པའི་ལན་བཏབ་པ་ཞེས་བྱའོ། །འོད་སྲུང་དེ་ལ་ཇི་ལྟར་ན་རྟེན་ཅིང་འབྲེལ་ཏེ་བྱུང་བའི་དོན་ལ་མཁས་པ་ཞེ་ན། འདི་ལྟ་སྟེ། འཁོར་རྣམ་བཞི་ངའི་དྲུང་དུ་ལྷགས་ཏེ། བཅོམ་ལྡན་འདས་ཀྱིས་དོན་འདི་དག་དེ་བཞིན་གཤེགས་པ་ཐོག་མ་མངོན་པར་བྱང་ཆུབ་ནས་རྒྱལ་པོ་སྡེ་རབ་ཏུ་འཕམ་བྱེད་ལ་ཆོས་ཀྱི་གཞུང་ཤིན་ཏུ་ཟབ་མོ་འདི་ཅིའི་སླད་དུ་མ་གསུངས། བར་བར་ནི་ཤིན་ཏུ་ཟབ་པར་ཡང་གསུངས། བར་བར་ནི་མི་ཟབ་པར་ཡང་གསུངས། བར་བར་ནི་ཉམས་པ་ཞེས་ཀྱང་བགྱི། བར་བར་ནི་མ་ཉམས་པ་ཞེས་ཀྱང་བགྱི་ན། དེ་ལ་ཇི་ལྟར་ན་ལྟུང་བ་ཞེས་བགྱི། འདུལ་བ་ནི་གང་སོ་སོར་ཐར་པ་ཞེས་བགྱི་བ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། སོ་སོར་ཐར་པ་ཞེས་བྱ་བ་ནི་ཆོག་ཤེས་པ། སྤྱོད་ལམ་དང་ལྡན་པ་ཅི་ཡང་མི་སྩོགས་པ། འཚོ་བ་ཡོངས་སུ་དག་པའོ། །ལྟུང་བ་ནི་རྒྱུད་བཞིར་ལྟུང་བའོ། །གཞན་ཡང་ལྟུང་བ་ནི་སེམས་ཅན་དམྱལ་བ་དང་། མཚམས་མེད་པའི་བར་དུ་ལྟུང་བ་སྟེ། མགྱོགས་བུལ་ནི་ཆར་པ་དྲག་
པོའི་གཏོལ་མེད་དོ། །དེ་ཐོས་པ་ཙམ་གྱིས་ཀྱང་འཇིགས་སྐྲག་སྟེ། ཚུལ་ཁྲིམས་སྲུང་བ་དང་སྤྱོད་ལམ་སྡོམ་པ་དང་། ཆོག་ཤེས་པ་ལ་ནན་ཏན་བྱེད་པ་དང་། མ་བརྟགས་པའི་ཟང་ཟིང་ཐམས་ཅད་མི་ལེན་པར་འགྱུར་རོ། །གཞན་ཡང་ལྟུང་བ་ཞེས་བྱ་བ་ནི་སེམས་ཅན་དམྱལ་བ་དང་། བྱོལ་སོང་དང་། ཡི་དགས་ཀྱི་ཁམས་བསྐྱེད་པ་སྟེ། དོན་དེ་ལྟ་བས་ན་ལྟུང་བ་ཞེས་བྱའོ། །གཞན་ཡང་སོ་སོར་ཐར་པ་ཞེས་བྱ་བ་ནི་ལུས་དང་། ངག་དང་། ཡིད་ཀྱི་མི་དགེ་བའི་ལས་ངན་པ་ཡོངས་སུ་སྤང་བའོ། །འདུལ་བ་ཞེས་བྱ་བ་ནི་ཚུལ་ཁྲིམས་དང་མདོ་སྡེའི་དོན་ཤིན་ཏུ་ཟབ་མོ་ལ་འཇུག་ཅིང་མ་བརྟགས་པའི་ཟང་ཟིང་ཐམས་ཅད་དང་། མ་བརྟགས་པའི་རྒྱུ་དང་རྐྱེན་ལེན་དུ་མི་གནང་བའོ། །གཞན་ཡང་ཕས་ཕམ་པ་བཞི་དང་། དགེ་འདུན་གྱི་ལྷག་མ་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བ་ལྟུང་བའི་ཆོས་སུམ་ཅུ་དང་། ལྟུང་བ་དགུ་བཅུ་རྩ་གཅིག་དང་། སོ་སོར་བཤགས་པའི་ཆོས་བཞི་དང་། བསླབ་པ་མང་པོ་དང་། བདུན་ཤིན་ཏུ་ཞི་བ་ལ་སོགས་པ་ཉམས་སུ་མི་གནང་ངོ་། །གང་ཟག་ལ་ལ་ནི་ཚུལ་ཁྲིམས་ཐམས་ཅད་ཉམས་པ་ཡང་ཡོད་དོ། །ཐམས་ཅད་ཅེས་བྱ་བ་ནི་ཕས་ཕམ་པ་བཞི་ནས། བདུན་ཤིན་ཏུ་ཞི་བའི་བར་ལ་བྱའོ། །གང་ཟག་ལ་ལ་ནི་ཡང་དག་པའི་ཆོས་ཤིན་ཏུ་ཟབ་མོ་ལ་སྐུར་ཏེ་ལོག་སྲེད་ཅན་དུ་གྱུར་ནས། མཚན་ཉིད་ཐམས་ཅད་དང་། རྒྱུ་རྐྱེན་མེད་པ་རྫོགས་པར་འཛིན་ཏེ། གང་ཟག་དེ་དག་བདག་ནི་དབང་པོ་རྣོ་ཞིང་ཤེས་རབ་དང་ལྡན་པའོ་ཞེས་ཁས་འཆེས་ཏེ་ཁ་ན་མ་ཐོ་བ་ལྕི་བ་དང་། ཡང་བ་ཐམས་ཅད་འཆབ་ཅིང་སྦ་བ་ནི་ཇི་ལྟར་རུ་སྦལ་ཡན་ལག་དྲུག་སྦེད་པ་བཞིན་ནོ། །དེ་ལྟར་ཁ་ན་མ་ཐོ་བའི་རྣམས་ཡུན་རིང་པོ་ནས་མི་འགྱོད་དེ། དེ་ལྟར་མི་འགྱོད་པས་ཉིན་མཚན་དུ་སྐྱེ་ཞིང་འཕེལ་བར་འགྱུར་རོ། །དགེ་སློང་དེ་དག་ཉེས་པ་བྱུང་བའི་རྣམས་ནམ་དུ་ཡང་མི་འགྱོད་དེ། དེ་བས་ན་ཉེས་པས་ཀུན་ཏུ་གླགས་ནས་དེའི་ཕྱིར་དེ་བཞིན་གཤེགས་པས་དངོས་པོ་དེ་དག་མཁྱེན་ཏེ་བགས་ཀྱིས་བཅས་ཀྱི་ཅིག་ཅར་ནི་མ་ཡིན་ནོ། །དེའི་ཚེ་ན་རིགས་ཀྱི་བུ་དང་རིགས་ཀྱི་བུ་མོ་དག་གིས་བཅོམ་ལྡན་འདས་ལ་
འདི་སྐད་ཅེས་གསོལ་ཏོ། །དེ་བཞིན་གཤེགས་པས་དེ་ལྟར་མཁྱེན་བཞིན་ཅིའི་སླད་དུ་སྔར་མ་བཅས། བཅོམ་ལྡན་འདས་ཀྱིས་སེམས་ཅན་དག་མཚམས་མེད་པའི་སེམས་ཅན་དམྱལ་བར་བཏང་བ་མ་ལགས་སམ། དཔེར་ན་མི་མང་པོ་ཡུལ་གཞན་དུ་འགྲོ་བ་ལས་འབྲོག་བསླད་ནས་ལམ་དང་བྲལ་ཏེ། ལམ་མ་ཡིན་པར་ཞུགས་ཀྱང་མི་དེ་དག་འབྲོག་བསླད་པར་མི་འཚལ་ཏེ་ལམ་མོ་སྙམ་ནས། གཞན་ལ་ལམ་ཡིན་ནམ་མ་ཡིན་པར་དྲི་བའི་གནས་ཀྱང་མེད་དོ། །དེ་བཞིན་དུ་སེམས་ཅན་དག་སངས་རྒྱས་ཀྱི་ཆོས་ཀྱིས་བསླད་དེ། དེ་ཡང་དག་པ་གང་ལགས་པ་མི་མཐོང་ན། དེ་བཞིན་གཤེགས་པས་སྔར་ཡང་དག་པའི་ལམ་བསྟན་ཏེ་དགེ་སློང་དག་འདི་ནི་ཚུལ་ཁྲིམས་ཉམས་པའོ། །འདི་ནི་ཚུལ་ཁྲིམས་སྲུང་བའོ་ཞེས་བཀའ་སྩལ་ཏེ། ཚུལ་ཁྲིམས་བཅའ་བའི་རིགས་ན། ཅིའི་སླད་དུ་དེ་བཞིན་གཤེགས་པ་ཡང་དག་པར་རྫོགས་པ། ཡང་དག་པའི་ལམ་མཁྱེན་ཅིང་གཟིགས་པ། ལྷའི་ནང་ན་ལྷ་ལྟ་བུ། དགེ་བ་བཅུའི་ཡོན་ཏན་དང་དོན་སྟོན་པ་ལ་ཤིན་ཏུ་མཁས་པ། ཅིའི་སླད་དུ་ཚུལ་ཁྲིམས་འདི་སྔར་མ་བཅས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་སེམས་ཅན་ལ་དགེ་བ་བཅུའི་ཡོན་ཏན་སྟོན་པ་ཡང་བདེན་ཏེ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་ན་ཅིའི་ཕྱིར་ཁྱོད་ཀྱིས་འདི་སྐད་དུ། བཅོམ་ལྡན་འདས་ཀྱིས་སེམས་ཅན་དག་དམྱལ་བར་བཏང་བ་མ་ཡིན་ནམ་ཞེས་སྨྲ། ངས་གང་ཟག་འགའ་ཞིག་མཚམས་མེད་པའི་སེམས་ཅན་དམྱལ་བར་ལྟུང་བའི་རྒྱུ་དང་ལྡན་པར་གཟིགས་ན་ཡང་། གང་ཟག་དེའི་ཕྱིར་བསྐལ་པ་གཅིག་གམ་བསྐལ་པ་གཅིག་འགྲིབས་ཀྱི་བར་དུ་ཡང་འཇིག་རྟེན་ན་བཞུགས་སོ། །ང་ནི་སེམས་ཅན་ཐམས་ཅད་ལ་ཐུགས་རྗེ་ཆེན་པོ་དང་ལྡན་པ་ཡིན་ནོ། དེའི་ཕྱིར་སྲས་ལྟ་བུར་འདུ་ཤེས་པ་དག་སེམས་ཅན་དམྱལ་བར་གཏོང་། རིགས་ཀྱི་བུ་འདི་ལྟ་སྟེ་དཔེར་ན། རྒྱལ་པོའི་ཁམས་འདི་ན་ཚེམ་བུ་གྱོན་པ་དག །གོས་ལ་བུ་ག་རྡོལ་ཡོད་ན། གདོད་ལྷན་པས་ཀློན་ནོ། །དེ་བཞིན་གཤེགས་པ་ཡང་
དེ་དང་འདྲ་སྟེ་སེམས་ཅན་གང་མཚམས་མེད་པའི་སེམས་ཅན་དམྱལ་བར་ལྟུང་བར་འགྱུར་བའི་རྒྱུ་དང་རྐྱེན་གཅིག་གཟིགས་ན། དགེ་བའི་ཚུལ་ཁྲིམས་ཀྱིས་དེ་སྲུང་བར་བྱེད་དོ། །རིགས་ཀྱི་བུ་འདི་ལྟ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ཡང་སྔར་སེམས་ཅན་ལ་དགེ་བ་བཅུའི་ཆོས་ཀྱིས་འདུལ་ལོ། །ཕྱིས་མི་དགེ་བ་སྤྱོད་པ་ཡོད་ན་དེ་ལ་ཅི་རིགས་སུ་བགས་ཀྱིས་ཆད་པས་གཅོད་དོ། །ཉེས་པའི་ཆད་པས་བཅད་ནས་གདོད་འཕྲུལ་གྱི་རྒྱལ་པོའི་ཆོས་སྤྱོད་དོ། །རིགས་ཀྱི་བུ་ང་ཡང་དེ་དང་འདྲ་སྟེ། བསྟན་པ་ཡོད་ཀྱང་སྔར་མ་བཅས་པ་ནི། དགེ་སློང་དག་ཆོས་མ་ཡིན་བར་སྤྱོད་དུ་བྱེད་ན། གདོད་ཅི་རིགས་སུ་བགས་ཀྱིས་བཅས་པས་ན། གང་ཆོས་ལ་མོས་པའི་སྐྱེ་བོ་དག་ནི་སྟོན་པའི་རྗེས་སུ་མོས་པར་འགྱུར་རོ། །དེ་བས་ན་འཁོར་དེ་དག་གིས་དེ་བཞིན་གཤེགས་པའི་ཆོས་ཀྱི་སྐུ་མཐོང་བར་གྱུར་ཏོ། །འདི་ལྟ་སྟེ། འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེའི་ནི་བསམ་གྱིས་མི་ཁྱབ་བོ། །དེ་བཞིན་གཤེགས་པ་ཡང་དེ་བཞིན་དུ་བསམ་གྱིས་མི་ཁྱབ་སྟེ། ཆོས་དང་དགེ་འདུན་ཡང་བསམ་གྱིས་མི་ཁྱབ་ལ། ཆོས་སྟོན་པ་དང་། ཆོས་ཉན་པ་ཡང་བསམ་གྱིས་མི་ཁྱབ་སྟེ། འདི་ནི་རྟེན་ཅིང་འབྲེལ་ཏེ་འབྱུང་བ་ལ་མཁས་པ་ཞེས་བྱའོ། །བྱང་ཆུབ་སེམས་དཔའ་དེ་ལྟར་མཚན་ཉིད་རྣམ་པ་འདི་བཞིའི་དོན་རྣམ་པར་འབྱེད་པ་ལ་མཁས་པ་ནི་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་ནང་ན་རྟེན་ཅིང་འབྲེལ་ཏེ་འབྱུང་བའི་དོན་ལ་མཁས་པ་ཞེས་བྱའོ། །དེ་ལ་གཞན་ཡང་བདག་ཚུལ་བཞིན་དུ་བྱེད་པ་ཞེས་བྱ་བ་ནི་ཡོངས་སུ་མྱ་ངན་ལས་འདས་པ་ཆེན་པོ་འཐོབ་པའོ། །གཞན་ཚུལ་བཞིན་དུ་འཆོས་པ་ནི་ངས་དགེ་སློང་དག་ལ་དེ་བཞིན་གཤེགས་པ་ནི་རྟག་པ་མི་འཕོ་བའོ་ཞེས་བསྟན་པའོ། །དྲིས་པའི་ལན་བཏབ་པ་ནི་འོད་སྲུང་ཁྱོད་ཀྱིས་དྲིས་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དང་། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལ་ཤིན་ཏུ་ཟབ་མོའི་དོན་རྒྱས་པར་བསྟན་པའོ། །རྟེན་ཅིང་འབྲེལ་ཏེ་འབྱུང་བའི་དོན་ནི་ཉན་ཐོས་དང་། རང་སངས་རྒྱས་དག་ཤིན་ཏུ་ཟབ་མོའི་དོན་འདི་ལྟ་བུ་མི་ཤེས་ཤིང་ཡི་གེའི་
འབྲུ་ཨི་ལྟ་བུ་ཐིག་ལེ་གསུམ་གྱིས་སྨྲ་བ་དང་། རྣམ་པར་གྲོལ་བ་མྱ་ངན་ལས་འདའ་བའི་ཤེས་རབ་ཆེན་པོ་དགོངས་ཏེ་གསུངས་པའི་སྙིང་པོ་མ་ཐོས་པའི་རྣམས་ངས་དེང་འདིར་ཉན་ཐོས་པ་དག་ལ་རྣམ་པར་ཕྱེ་སྟེ་བསྟན་པས་ཤེས་རབ་ཀྱི་མིག་བསྐྱེད་དོ། །གལ་ཏེ་གང་ཟག་ལ་ལ་ཞིག་འདི་སྐད་དུ་དངོས་པོ་རྣམ་པ་བཞི་པོ་འདི་གཅིག་གོ་ཞེས་སྨྲ་ན་བརྫུན་དུ་མ་གྱུར་ཏམ་ཞེས་ཟེར་ན། དེ་ལ་འདི་སྐད་དུ་ནམ་མཁའ་ནི་ཅི་ཡང་མེད་པ་སྟེ། མི་གཡོ་མི་འཁྲུག་པ་ཡིན་ན་དངོས་པོ་བཞི་པོ་ལ་ཐ་དད་པ་ཅི་ཡོད་ན། དེ་ལ་བརྫུན་ཞེས་བྱར་རུང་ངམ་གསོལ་པ་མ་ལགས་སོ། །བཅོམ་ལྡན་འདས་ཚིག་མང་པོ་དེ་དག་ནི་དོན་གཅིག་གོ །འདི་ལྟ་སྟེ་སྟོང་པ་ཉིད་ཀྱི་དོན་ཏོ། །བདག་དང་གཞན་ཚུལ་བཞིན་དུ་བྱེད་པ་དང་། དྲིས་པའི་ལན་འདེབས་པ་དང་། རྟེན་ཅིང་འབྲེལ་ཏེ་འབྱུང་བའི་དོན་ཡང་དེ་འདྲ་སྟེ། མྱ་ངན་ལས་འདས་པ་ཆེན་པོ་དང་མཉམ་པར་ཐ་མི་དད་དོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་འམ་རིགས་ཀྱི་བུ་མོ་གང་ཞིག་འདི་སྐད་དུ་དེ་བཞིན་གཤེགས་པ་ནི་མི་རྟག་གོ །ཇི་ལྟ་བུར་མི་རྟག་ཅེ་ན། བཅོམ་ལྡན་འདས་ཀྱིས་གསུངས་པ་ལྟར་ཉོན་མོངས་པ། ཐམས་ཅད་འགགས་པས་མྱ་ངན་ལས་འདའ་བ་ཞེས་བྱ་སྟེ། དཔེར་ན་མེ་ཤི་ན་ཅི་ཡང་མེད་པ་བཞིན་དུ། ཉོན་མོངས་པ་ཐམས་ཅད་འགགས་པ་ཡང་དེ་དང་འདྲ་སྟེ། དེ་ལ་མྱ་ངན་ལས་འདས་པ་ཞེས་བྱ་ན། དེ་ལ་ཅིའི་ཕྱིར་དེ་བཞིན་གཤེགས་པ་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་སྨྲ་འམ། ཡང་བཅོམ་ལྡན་འདས་ཀྱིས་གསུངས་པ་ལྟར་སྲིད་པ་དང་བྲལ་བས་མྱ་ངན་ལས་འདས་པ་ཞེས་བྱ་སྟེ། མྱ་ངན་ལས་འདས་པ་དེ་ལ་ནི་སྲིད་པ་གང་ཡང་མེད་ན། དེ་ལ་ཇི་ལྟར་ན་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་བྱ། དཔེར་ན་གོས་ཟད་དེ་ཞིག་ན་དངོས་པོ་ཅི་ཡང་མེད་པ་བཞིན་དུ་མྱ་ངན་ལས་འདས་པ་ཡང་དེ་དང་འདྲ་སྟེ། ཉོན་མོངས་པ་ཐམས་ཅད་འགགས་པས་དངོས་པོ་ཞེས་བྱ་བ་ཅི་ཡང་མེད་ན། དེ་ལ་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་སྨྲ་
འམ། བཅོམ་ལྡན་འདས་ཀྱིས་གསུངས་པ་ལྟར་ན་འདོད་པ་དང་བྲལ་ཏེ་རབ་ཏུ་ཞི་བ་ནི་མྱ་ངན་ལས་འདའ་བ་ཞེས་བྱ་སྟེ། དཔེར་ན་མི་ཞིག་མགོ་བོ་བཅད་ན་མགོ་བོ་མེད་པ་ཞེས་བྱ་བ་དང་འདྲ་བར་འདོད་པ་དང་བྲལ་བ་རབ་ཏུ་ཞི་བ་ཡང་དེ་དང་འདྲ་སྟེ། སྟོང་པ་ཅི་ཡང་མེད་པས་མྱ་ངན་ལས་འདས་པ་ཞེས་བྱ་ན། དེ་ལ་ཡང་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་སྨྲ་འམ། གཞན་ཡང་བཅོམ་ལྡན་འདས་ཀྱིས་ཚིགས་སུ་བཅད་ནས་འདི་སྐད་ཅེས་བཀའ་སྩལ་ཏོ། །དཔེར་ན་རབ་ཏུ་ཚ་བའི་ལྕགས། །ཐོ་བས་བརྡུངས་ན་ཚ་བ་འབྱུང་། །གྱེས་ནས་དེ་མ་ཐག་ཏུ་མེད། །དེ་ཡི་གནས་ཀྱང་ཤེས་མི་ནུས། །ཡང་དག་རྣམ་པར་གྲོལ་བ་ཡང་། །མཚན་ཉིད་དེ་དང་འདྲ་བ་སྟེ། །འདོད་པ་ཐམས་ཅད་ཡོངས་སྤངས་ནས། །སྲིད་པའི་འདམ་ལས་རབ་རྒལ་ཏེ། །མི་གཡོ་བ་ཡི་གནས་ཐོབ་ནས། །ཕྱིན་པའི་གནས་ནི་ཤེས་མི་ནུས། །ཞེས་དེ་སྐད་བཀའ་སྩལ་པ་དེ་ལ་ཡང་ཅིའི་ཕྱིར་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བའི་ཆོས་ཅན་ཞེས་སྨྲ་ན། འོད་སྲུང་དེ་སྐད་དུ་སྨྲ་བའི་གང་ཟག་དེ་ནི་ལོག་པར་སྨྲ་བ་ཡིན་ནོ། །འོད་སྲུང་ཁྱོད་ཀྱང་དེ་བཞིན་གཤེགས་པ་ཉིད་ལ་འགོག་པ་དང་ཟད་པའི་འདུ་ཤེས་མ་སྐྱེད་ཅིག །འོད་སྲུང་ཉོན་མོངས་པ་འགགས་པ་ནི་དངོས་པོ་ཞེས་མི་གདགས་སོ། །དེ་ཅིའི་ཕྱིར་ཞེ་ན། མཐར་ཕྱིན་པའི་ཕྱིར་རྟག་པ་ཞེས་བྱའོ། །ཚིག་འདི་ནི་རབ་ཏུ་ཞི་བ་སྟེ་བླ་ན་མེད་པའོ། །མཚན་མ་ཐམས་ཅད་ལྷག་མ་མ་ལུས་པར་ཟད་པའོ། །ཚིག་འདི་ནི་རྣམ་པར་དཀར་བ། རྟག་པ་གནས་པ་ཕྱིར་མི་ལྡོག་པ་སྟེ། དེའི་ཕྱིར་ན་མྱ་ངན་ལས་འདས་པ་ལ་རྟག་པ་གནས་པ་ཞེས་བྱའོ། །དེ་བཞིན་གཤེགས་པ་ཡང་དེ་དང་འདྲ་སྟེ། རྟག་པ་གནས་པ་མི་འགྱུར་བའོ། །མི་རྟག་ཅེས་བྱ་བ་ནི་ཉོན་མོངས་པའོ། །སོ་སོར་གྱེས་ནས་མེད་པར་འགྱུར་ཏེ་གནས་ཀྱང་མི་རྙེད་དོ་ཞེས་བྱ་བ་ནི། དེ་བཞིན་གཤེགས་པས་ཉོན་མོངས་པ་ཐམས་ཅད་འགགས་ནས་རྒྱུད་ལྔ་ལ་མི་གནས་པའོ། །དེ་བས་ན་དེ་བཞིན་གཤེགས་པ་ནི་རྟག་པ་གནས་པའི་ཆོས་ཅན་མི་འགྱུར་མི་འཕོ་བའོ། །གཞན་ཡང་འོད་སྲུང་སངས་རྒྱས་རྣམས་ཀྱི་སྟོན་པ་ནི་ཆོས་
སོ། །དེ་བས་ན་དེ་བཞིན་གཤེགས་པ་ཡང་བཀུར་སྟི་དང་མཆོད་པ་མཛད་དོ། །ཆོས་རྟག་པའི་ཕྱིར་སངས་རྒྱས་རྣམས་ཀྱང་རྟག་གོ །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །གལ་ཏེ་ཉོན་མོངས་པའི་མེ་འགགས་པས་དེ་བཞིན་གཤེགས་པ་ཡང་འགགས་ན། དེ་བཞིན་གཤེགས་པ་ནི་རྟག་ཏུ་གནས་པ་མ་ལགས་ཏེ་དཔེར་ན་ལྕགས་བསྲེགས་པ་ཁ་དོག་དམར་པོ་ཞི་སྟེ་མི་རྙེད་པ་བཞིན་དུ་དེ་བཞིན་གཤེགས་པའི་ཉོན་མོངས་པ་ཡང་དེ་དང་འདྲ་སྟེ། ཞི་བའི་གནས་ཀྱང་མི་རྙེད་དོ། །གཞན་ཡང་དཔེར་ན་ལྕགས་དེ་ལ་ཚ་བ་དང་དམར་བ་ཞི་ནས་མ་མཆིས་པར་འགྱུར་བ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། ཞི་ནས་རྟག་པ་མེད་པས་ཉོན་མོངས་པའི་མེ་འགགས་ནས་ཡོངས་སུ་མྱ་ངན་ལས་འདས་པར་ཞུགས་པས་དེ་བཞིན་གཤེགས་པ་ནི་མི་རྟག་པའོ། །བཀའ་སྩལ་པ་རིགས་ཀྱི་བུ་ལྕགས་ཞེས་བྱ་བ་ནི་བུས་པ་མ་རབས་ལ་བྱ་སྟེ། བུས་པ་མ་རབས་ནི་ཉོན་མོངས་པ་འགགས་ཀྱང་། འགགས་མ་ཐག་ཏུ་ཕྱིས་སྐྱེ་བས་མི་རྟག་པ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་མ་ཡིན་ཏེ། འགགས་ནས་ཕྱིར་མི་སྐྱེ་བའི་ཕྱིར་རྟག་པ་ཞེས་བྱའོ། །འོད་སྲུང་གིས་གསོལ་པ། དཔེར་ན་ལྕགས་ནི་ཁ་དོག་དམར་པོ་ཞི་བའི་འོག་ཏུ་ཕྱིས་མེར་སྩལ་ན་སླར་ཡང་ཁ་དོག་དམར་པོར་འགྱུར་རོ། །དེ་བཞིན་གཤེགས་པ་ཡང་དེ་དང་འདྲ་ན་ལྟ་ཉོན་མོངས་པ་སླར་ཡང་སྐྱེས་ཏེ། ཉོན་མོངས་པ་སླར་ཡང་སྐྱེ་བས་མི་རྟག་པ་ལགས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་འདི་སྐད་དུ་དེ་བཞིན་གཤེགས་པ་ལ་མི་རྟག་གོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་རྟག་པའོ། །རིགས་ཀྱི་བུ་དཔེར་ན་ཤིང་ཚིག་ཀྱང་ཐལ་བ་ཡོད་དོ། །ཉོན་མོངས་པ་འགགས་ན་མྱ་ངན་ལས་འདའ་བ་ཡོད་དེ། གོས་ཞིག་པ་འམ་མགོ་བཅད་པའམ་སྣོད་ཆག་པ་ལ་སོགས་པའི་དཔེ་དང་འདྲ་སྟེ། དངོས་པོ་དེ་དག་ཀྱང་སོ་སོ་ན་གོས་ཞིག་པ་དང་། མགོ་བཅད་པ་དང་སྣོད་ཆག་པ་ཞེས་བྱ་བའི་མིང་ཡོད་པ་དང་འདྲའོ། །འོད་སྲུང་ལྕགས་ཚ་བ་གྲངས་ཀྱང་ཕྱིས་ཚ་བར་འགྱུར་གྱི། དེ་བཞིན་གཤེགས་པ་ནི་དེ་ལྟ་མ་
ཡིན་ཏེ། ཉོན་མོངས་པ་བཅད་ནས་མཐར་ཡོངས་སུ་བསིལ་བས་ཉོན་མོངས་པའི་མེ་ཕྱིས་མི་སྐྱེའོ། །འོད་སྲུང་སེམས་ཅན་ཚད་མེད་པ་རྣམས་ནི་ལྕགས་དེ་དང་འདྲ་སྟེ། ངས་ཟག་པ་མེད་པའི་ཤེས་རབ་ཀྱི་མེས་སེམས་ཅན་དེ་དག་གི་ཀུན་ནས་ཉོན་མོངས་པ་བསྲེག་པར་རིག་པར་བྱའོ། །ཡང་འོད་སྲུང་གིས་གསོལ་པ། ཤིན་ཏུ་ལེགས་སོ་ཤིན་ཏུ་ལེགས་སོ། །བདག་གིས་ནི་དེང་དེ་བཞིན་གཤེགས་པ་རྟག་པ་ལགས་པར་ལེགས་པར་ཐོས་སོ།། །།བམ་པོ་དྲུག་པ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་འཆག་པའི་ཕྱིར་ཕོ་བྲང་གི་ཕྱི་རོལ་དུ་སོང་སྟེ། སླས་མང་པོའི་འཁོར་ན་མེད་ཀྱང་འཁོར་ལོས་སྒྱུར་བའི་རྒྱལ་པོ་དེ་ཤིའོ་ཞེས་བྱར་མི་རུང་ངོ་། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ་འཛམ་བུའི་གླིང་གི་ཁམས་འདི་ན་མི་སྣང་སྟེ། མྱ་ངན་ལས་འདའ་བར་ཞུགས་ཀྱང་མི་རྟག་གོ་ཞེས་མི་བྱའོ། །དེ་བཞིན་གཤེགས་པ་ནི་ཉོན་མོངས་པ་ཚད་མེད་པ་ལས་བྱུང་སྟེ། མྱ་ངན་ལས་འདས་པར་ཞུགས་ནས་རབ་ཏུ་བདེ་བའི་གནས་བྱང་ཆུབ་ཀྱི་ཡན་ལག་གི་མེ་ཏོག་ལ་རྒྱུ་ཞིང་རབ་ཏུ་བདེ་བས་འཚོའོ། །ཡང་འོད་སྲུང་གིས་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ན་ང་ནི་ཡུན་རིང་པོ་ནས་ཉོན་མོངས་པའི་རྒྱ་མཚོ་ལས་རྒལ་ཏོ་ཞེས་གསུངས་ན། གལ་ཏེ་བཅོམ་ལྡན་འདས་ཉོན་མོངས་པའི་རྒྱ་མཚོ་ལས་རྒལ་ལགས་ན། ཅིའི་སླད་དུ་གྲགས་འཛིན་ལས་སྲས་སྒྲ་གཅན་འཛིན་ལྟ་བུ་བལྟམ་པར་གྱུར། དེ་བས་ན་དེ་བཞིན་གཤེགས་པ་ནི་ཉོན་མོངས་པ་དང་ཀུན་ནས་ཉོན་མོངས་པའི་རྒྱ་མཚོ་ལས་མ་གྲོལ་བ་འདྲ་ན། བཅོམ་ལྡན་འདས་དེའི་རྒྱུ་དང་དེའི་རྐྱེན་བདག་ལ་བཤད་དུ་གསོལ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཁྱོད་དེ་བཞིན་གཤེགས་པ་ལ་ཡུན་རིང་པོ་ནས་ཉོན་མོངས་པའི་རྒྱ་མཚོ་ལས་རྒལ་ན། ཅིའི་ཕྱིར་གྲགས་འཛིན་ལས་སྲས་སྒྲ་གཅན་འཛིན་བལྟམ་པར་གྱུར། དེ་བས་ན་དེ་བཞིན་གཤེགས་པ་ནི་ཉོན་མོངས་པ་དང་། ཀུན་ནས་ཉོན་མོངས་པའི་རྒྱ་མཚོ་ཆེན་པོ་ལས་མ་རྒལ་བ་དང་འདྲའོ་ཞེས་དེ་སྐད་མ་སྨྲ་ཤིག །རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོ་ནི་དོན་ཆེན་པོ་རྣམ་པར་བཞག་པ་ཡིན་གྱིས།
ཁྱེད་རྣམས་ཤིན་ཏུ་བརྟགས་པར་ཉོན་ཏེ། གཞན་ལ་ཡང་རྒྱ་ཆེར་སྟོན་ལ་ཐེ་ཚོམ་དང་འཇིགས་པ་མ་སྐྱེད་ཅིག །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་མྱ་ངན་ལས་འདས་པ་ཆེན་པོ་ལ་གནས་ན་རི་རབ་རིའི་རྒྱལ་པོ་ལྟར་མཐོ་ཞིང་ཆེ་བ་ཡུངས་ཀར་གྱི་འབྲུམ་བུ་གཅིག་གི་ནང་དུ་བཅུག་ཀྱང་རི་རབ་ལྷུན་པོ་ལ་གནས་པའི་སེམས་ཅན་དེ་དག་གཅིག་ལ་གཅིག་དོག་པའམ། ཕན་ཚུན་དུ་བསྐྱོད་པར་མི་ཤེས་སོ། །གང་འདུལ་བའི་རིགས་པ་དེ་དག་ནི་བྱང་ཆུབ་སེམས་དཔས་རི་རབ་ལྷུན་པོ་དེ་ཡུངས་ཀར་གྱི་ནང་དུ་བཅུག་ཀྱང་ཕྱིར་གནས་སུ་བཞག་པར་ཡང་མཐོང་ངོ་། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡུངས་ཀར་གཅིག་གི་ནང་དུ་བཅུག་ཀྱང་དེ་ན་གནས་པའི་སེམས་ཅན་དག་གཅིག་ལ་གཅིག་དོག་པའམ། གནས་ཕན་ཚུན་དུ་བསྐྱོད་པར་མི་ཤེས་སོ། །གང་འདུལ་བའི་རིགས་པ་འབའ་ཞིག་གིས་ནི་བྱང་ཆུབ་སེམས་དཔས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡུངས་ཀར་གྱི་ནང་དུ་བཅུག་པ་དང་། ཕྱིར་བཞག་པར་ཡང་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བ་སྤུའི་བུ་ག་གཅིག་ཏུ་བཅུག་པ་ནས་ཕྱིར་གནས་སུ་བཞག་པའི་བར་དུ་རྒྱས་པར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བླངས་ཏེ། ཁབ་ཀྱི་རྩེ་མོ་ལ་བཞག་གམ། སངས་རྒྱས་ཀྱི་ཞིང་གཞན་དུ་འཕངས་ཀྱང་དེ་ན་གནས་པའི་སེམས་ཅན་ཐམས་ཅད་གང་ནས་འོངས་པ་དང་། གང་དུ་སོང་བ་མི་ཤེས་སོ། །གང་འདུལ་བའི་རིགས་པ་འབའ་ཞིག་གིས་ནི་མཐོང་བ་ནས་ཕྱིར་གནས་སུ་བཞག་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་སྟོང་གསུམ་གྱི་སྟོང་
ཆེན་པོའི་འཇིག་རྟེན་གྱི་ཁམས་ཀུན་ལག་པ་གཡས་པས་བླངས་ནས་རྫ་མཁན་གྱི་འཁོར་ལོ་ལྟར་བསྐོར་ཏེ། འཇིག་རྟེན་གྱི་ཁམས་རྡུལ་ཕྲ་རབ་སྙེད་ཀྱི་ཕ་རོལ་དུ་འཕངས་ཀྱང་སེམས་ཅན་དེ་དག་ལ་གཅིག་ཙམ་ཡང་སོང་བའམ་འོངས་པར་མི་ཚོར་ཏེ། གང་འདུལ་བའི་རིགས་པ་འབའ་ཞིག་གིས་ནི་མཐོང་བ་ནས་ཕྱིར་གནས་སུ་འོངས་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་ཐམས་ཅད་བདག་གི་ཁོང་པར་བཅུག་ཀྱང་དེ་ན་གནས་པའི་སེམས་ཅན་དག་གཅིག་ལ་གཅིག་གཟེར་ཅིང་དོག་པའམ། སོང་བའམ་འོངས་པའམ། གནས་པར་མི་ཤེས་ཏེ། གང་འདུལ་བའི་རིགས་པ་འབའ་ཞིག་གིས་ནི་མཐོང་བ་ནས་ཕྱིར་གནས་སུ་འོངས་པའི་བར་དུ་ཤེས་སོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པ་ནི་ཕྱོགས་བཅུའི་འཇིག་རྟེན་གྱི་ཁམས་ཀུན་རྡུལ་ཕྲ་རབ་གཅིག་གི་ནང་དུ་བཅུག་ཀྱང་དེ་ན་གནས་པའི་སེམས་ཅན་གཅིག་ལ་གཅིག་གཟེར་ཅིང་དོག་པའམ། སོང་བ་དང་འོངས་པ་མི་ཤེས་ཏེ། གང་འདུལ་བའི་རིགས་པ་འབའ་ཞིག་གིས་ནི་མཐོང་བ་ནས་གནས་སུ་ཕྱིན་པའི་བར་དུ་ཤེས་སོ། །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོ་ལ་གནས་པས་དེ་ལྟ་བུའི་མངོན་པར་ཤེས་པའི་ཆོ་འཕྲུལ་ཚད་མེད་པ་སྙེད་སྟོན་ཏེ། དེ་བས་ན་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པའི་ཆོ་འཕྲུལ་ཚད་མེད་པར་བསྟན་པ་དེ་ལ་ནི་སེམས་ཅན་ཐམས་ཅད་ཀྱིས་དཔག་པའམ། རིག་པར་མི་ནུས་ན། ཁྱོད་ཀྱིས་དེ་བཞིན་གཤེགས་པ་འདོད་ཆགས་ཀྱི་ཕྱོགས་ལ་ཉེ་བས། སྲས་སྒྲ་གཅན་འཛིན་བལྟམ་པར་ཤེས་པར་ག་ལ་རུང་། རིགས་ཀྱི་བུ་ཡུན་རིང་པོ་ནས་མྱ་ངན་ལས་འདས་པ་ཆེན་པོ་འདི་ལ་གནས་ནས་མངོན་པར་ཤེས་པའི་ཆོ་འཕྲུལ་རྣམ་པ་སྣ་ཚོགས་སྟོན་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཉི་ཟླ་ཕྲག་བརྒྱ་དང་། འཛམ་བུའི་གླིང་ཕྲག་བརྒྱ་ལ་རྣམ་པ་སྣ་
ཚོགས་སུ་སྟོན་པ་ནི་དཔའ་བར་འགྲོ་བའི་ཏིང་ངེ་འཛིན་གྱི་མདོ་ལས་རྒྱས་པར་བསྟན་པ་བཞིན་ནོ། །ངས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འཛམ་བུའི་གླིང་འདིར་ཡོངས་སུ་མྱ་ངན་འདའ་བར་བསྟན་ཀྱང་མཐར་ཡོངས་སུ་མྱ་ངན་ལས་འདས་པ་མ་ཡིན་ནོ། །འཛམ་བུའི་གླིང་འདིར་ཡུམ་གྱི་ལྷུམས་སུ་བལྟམ་པ་བསྟན་པ་ཡང་། ཡབ་དང་ཡུམ་ང་ལ་སྲས་སུ་འདུ་ཤེས་གཞག་པར་བྱ་བའི་ཕྱིར་ཡིན་གྱི། ངའི་སྐུ་ནི་མཐར་འདོད་ཆགས་འདུས་པ་ལས་སྐྱེས་པ་མ་ཡིན་ནོ། །ང་ནི་བསྐལ་པ་ཡུན་རིང་པོ་ཚད་མེད་པའི་བར་དུ་འདོད་པ་ཡོངས་སུ་སྤངས་པས། ངའི་སྐུ་འདི་ནི་ཆོས་ཀྱི་སྐུ་སྟེ། འཇིག་རྟེན་པའི་རྗེས་སུ་མངལ་དུ་ཞུགས་པ་བསྟན་པ་ཡིན་ནོ། །རིགས་ཀྱི་བུ་འཛམ་བུའི་གླིང་འདིར་ལུམ་བིའི་ཚལ་དུ་ཡུམ་ལྷ་མཛེས་ཀྱི་ལྷུམས་ནས་བལྟམ་སྟེ། བལྟམ་མ་ཐག་ཏུ་ཤར་ཕྱོགས་སུ་གོམ་པ་བདུན་བོར་ནས། འདི་སྐད་དུ་ང་ནི་ལྷ་དང་། མི་དང་ལྷ་མ་ཡིན་དུ་བཅས་པའི་ནང་ན་མཆོག་ཏུ་གྱུར། ཕུལ་དུ་གྱུར། གཙོ་བོར་གྱུར་ཏོ་ཞེས་སྨྲ་སྟེ། ཡབ་དང་ཡུམ་དང་། འཇིག་རྟེན་དུ་བཅས་པ་ལྷ་དང་། མིས་མཐོང་བ་ཐམས་ཅད་དགའ་ནས་ངོ་མཚར་རྨད་ཀྱི་སེམས་སྐྱེས་སོ། །མི་ཐམས་ཅད་ཀྱིས་ནི་ང་ལ་བུས་པ་ཆུང་ངུར་འཛིན་ཏེ། ངའི་སྐུ་འདི་ནི་བསྐལ་པ་ཚད་མེད་པ་ནས་ཉོན་མོངས་པའི་ཆོས་དེ་ལྟ་བུ་དང་བྲལ་ལོ། །དེ་བཞིན་གཤེགས་པའི་སྐུ་ནི་ཆོས་ཀྱི་སྐུ་སྟེ་ཤ་དང་ཁྲག་དང་རྒྱུས་པ་དང་། རྩ་དང་རུས་པ་དང་། རྐང་ལས་བསྒྲུབས་པའི་ལུས་མ་ཡིན་མོད་ཀྱི། འཇིག་རྟེན་པའི་རྗེས་སུ་བུས་པ་ཆུང་ངུའི་ལུས་བསྟན་ཏོ། །ལྷོ་ཕྱོགས་སུ་གོམ་པ་བདུན་བོར་ནས་སེམས་ཅན་ཚད་མེད་པ་ལ་བླ་ན་མེད་པའི་བསོད་ནམས་ཀྱི་ཞིང་མངོན་པར་བསྟན་ཏོ། །ནུབ་ཕྱོགས་སུ་གོམ་པ་བདུན་བོར་བ་ནི་སྐྱེ་བ་ཟད་པ་དང་། རྒ་བ་དང་། འཆི་བ་མེད་པའི་སྐུ་ཐ་མ་བསྟན་པའི་ཕྱིར་རོ། །བྱང་ཕྱོགས་སུ་གོམ་པ་བདུན་བོར་བ་ནི་སྲིད་པའི་འཁོར་བ་ཐམས་ཅད་ལས་གྲོལ་བར་བསྟན་ཏོ། །ཤར་ཕྱོགས་སུ་གོམ་པ་བདུན་བོར་བ་ནི་སེམས་ཅན་གྱི་སྟོན་པ་ཡིན་པར་མངོན་པར་བསྟན་པ་ཡིན་ནོ། །ཕྱོགས་མཚམས་བཞིར་གོམ་པ་བདུན་བདུན་བོར་བ་ནི་ཉོན་མོངས་པ་རྣམ་པ་སྣ་ཚོགས་དང་བདུད་རྣམ་བཞི་
ཡོངས་སུ་བཅོམ་སྟེ། དེ་བཞིན་གཤེགས་པ་ཡང་དག་པར་རྫོགས་པར་མངོན་པར་སངས་རྒྱས་པ་བསྟན་པའོ། །བླ་མ་ཕྱོགས་སུ་གོམ་པ་བདུན་བོར་བ་ནི་གང་མི་གཙང་བའི་དངོས་པོ་ཐམས་ཅད་ཀྱིས་མི་གོས་ཏེ། ནམ་མཁའ་ལྟ་བུར་གྱུར་པ་བསྟན་པའོ། །འོག་མའི་ཕྱོགས་སུ་གོམ་པ་བདུན་བོར་བ་ནི་ཆོས་ཀྱི་ཆར་གྱིས་སེམས་ཅན་དམྱལ་བའི་མེ་གསད་དེ། སེམས་ཅན་དེ་དག་རབ་ཏུ་བདེ་བ་མྱོང་བ་དང་། ཚུལ་ཁྲིམས་ངན་པ་ཅན་ལ་བ་མོ་དང་སེར་བ་ལྟ་བུ་བསྟན་པའོ། །འཛམ་བུའི་གླིང་དུ་སྐྱེས་ནས་ཞག་བདུན་ལོན་པ་དང་། སྐྲ་བྲེགས་པ་བསྟན་ཏེ། མི་ཐམས་ཅད་ཀྱིས་ནི་ང་ལ་བུས་པར་འཛིན་ཏོ། །ཐོག་མ་སྐྲ་འདྲེག་པ་ན། འཇིག་རྟེན་དུ་བཅས་པ་ལྷ་དང་། མི་དང་བདུད་དང་ཚངས་པ་དང་། བྲམ་ཟེ་ལ་སོགས་པ་གང་གིས་ཀྱང་། ངའི་སྤྱི་གཙུག་གི་མཚན་ཡང་མཐོང་བར་མི་ནུས་ན། གྲི་ཐོགས་ཏེ་ངའི་སྐྲ་འདྲེག་པ་ལྟ་ཅི་སྨོས། གྲི་ཐོགས་ཏེ་ངའི་སྤྱི་གཙུག་འདྲེག་པ་ནི་གནས་མེད་དོ། །ང་ཡུན་རིང་པོ་ནས་བསྐལ་པ་ཚད་མེད་པའི་བར་དུ་སྐྲ་དང་ཁ་སྤུ་བྲེགས་ཏེ། ད་ཡང་འཇིག་རྟེན་པའི་རྗེས་སུ་སྐྲ་བྲེགས་པ་བསྟན་པ་ཡིན་ནོ། །ང་ཐོག་མ་བལྟམ་ནས་ཡབ་དང་ཡུམ་གྱིས་ང་ལྷ་ལ་བསྟན་པའི་ཕྱིར་ལྷའི་རྟེན་གྱི་ནང་དུ་ཁྲིད་ནས་ལྷ་དབང་སྒྱུར་ཆེན་པོ་ལ་བསྟན་པ་ན། ལྷ་དབང་སྒྱུར་ཆེན་པོས་ང་མཐོང་བའི་ཚེ་ཐལ་མོ་སྦྱར་ཏེ་བསྟི་སྟང་དང་བཅས་པས་ཕྱོགས་གཅིག་ཏུ་འགྲེང་ངོ་། །ང་ནི་ཡུན་རིང་པོ་ནས་བསྐལ་པ་ཚད་མེད་པའི་བར་དུ་ལྷའི་རྟེན་གྱི་ནང་དུ་འགྲོ་བ་སྤངས་མོད་ཀྱི་འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་བསྟན་ཏོ། །ང་ནི་འཛམ་བུའི་གླིང་དུ་རྣ་བ་ཕུག་པ་ཡང་བསྟན་ཏེ། སེམས་ཅན་ཐམས་ཅད་ཀྱིས་ཡང་དག་པར་ངའི་རྣ་བ་དབུག་ནུས་པ་མེད་དེ། འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །རིན་པོ་ཆེ་ལས་རྣ་ཆ་སེང་གེ་ཅན་བྱས་ཏེ། ངའི་རྣ་བ་ལ་བཏགས་མོད་ཀྱི། ང་ནི་བསྐལ་པ་ཚད་མེད་པའི་བར་དུ་བརྒྱན་པའི་རྒྱན་ཡོངས་སུ་སྤངས་ཏེ། འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་བསྟན་ཏོ། །ཡི་གེའི་གྲྭར་ཡིག་རྩིས་ཀྱང་བསླབས་ཏེ། ང་ནི་བསྐལ་པ་ཚད་མེད་པའི་བར་དུ་ཕུན་སུམ་ཚོགས་པ་དང་ལྡན་པས་ཁམས་
གསུམ་དུ་བརྟགས་ན་སེམས་ཅན་གང་ཡང་ངའི་སློབ་དཔོན་དུ་འགྱུར་བ་མེད་མོད་ཀྱི། འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་བསླབ་པའི་གྲྭར་ཞུགས་པ་ཡང་བསྟན་ཏོ། །དེ་བས་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཞེས་བྱའོ། །གླང་པོ་ཆེའི་རྐྱ་བསླབ་པ་དང་། རྟ་གདུལ་བ་དང་། སྟོབས་རྒོལ་བ་དང་། ཉམ་རྩལ་རྣམ་པ་སྣ་ཚོགས་སྦྱང་བའི་བར་དུ་བསྟན་ཏོ། །འཛམ་བུའི་གླིང་དུ་རྒྱལ་ཚབ་ཀྱང་བསྟན་ཏེ། སེམས་ཅན་དག་ང་ལ་རྒྱལ་ཚབ་ཏུ་བཟུང་ནས། འདོད་པ་ལྔ་ལ་རབ་ཏུ་ལོངས་སྤྱོད་པར་ཡང་མཐོང་ངོ་། །ང་ནི་བསྐལ་པ་ཚད་མེད་པའི་བར་དུ་འདོད་པ་ལྔའི་བདེ་བ་ཡོངས་སུ་སྤངས་མོད་ཀྱི། འཇིག་རྟེན་པའི་རྗེས་སུ་དེ་ཡང་བསྟན་ཏོ། །མཚན་མཁན་གྱིས་ངའི་མཚན་བལྟས་པ་ན། གལ་ཏེ་རབ་ཏུ་མ་བྱུང་ན་འཁོར་ལོས་སྒྱུར་བའི་རྒྱལ་པོར་གྱུར་ཏེ། འཛམ་བུའི་གླིང་ལ་དབང་སྒྱུར་རོ་ཞེས་སེམས་ཅན་ཐམས་ཅད་ཡིད་ཆེས་སོ། །ང་ནི་བསྐལ་པ་ཚད་མེད་པའི་བར་དུ་འཁོར་ལོས་སྒྱུར་བའི་རྒྱལ་པོའི་ཐབས་བཏང་སྟེ། ཆོས་ཀྱི་འཁོར་ལོས་སྒྱུར་བའི་རྒྱལ་པོར་ཞུགས་སོ། །འཛམ་བུའི་གླིང་ན་བུད་མེད་མང་པོ་དང་འདོད་པ་ལྔ་སྤངས་ཏེ། རྒ་བ་དང་ན་བ་དང་། འཆི་བ་དང་། དགེ་སྦྱོང་མཐོང་ནས་རབ་ཏུ་བྱུང་བ་བསྟན་པས་སེམས་ཅན་ཐམས་ཅད་ཀྱིས་རྒྱལ་ཚབ་བཟང་སྦྱིན་གདོད་རབ་ཏུ་འབྱུང་ངོ་ཞེས་ཟེར་རོ། །ང་ནི་བསྐལ་པ་ཚད་མེད་པའི་བར་དུ་རབ་ཏུ་བྱུང་སྟེ་ལམ་བསྒོམས་ཀྱང་། འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །ངས་འཛམ་བུའི་གླིང་དུ་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་ནས་བསྙེན་པར་རྫོགས་ཏེ་ལམ་ལ་ཤིན་ཏུ་ནན་ཏན་བྱས་པས། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་ལྡོག་པའི་འབྲས་བུ་དང་། ཕྱིར་མི་ལྡོག་པའི་འབྲས་བུ་དང་། དགྲ་བཅོམ་པའི་འབྲས་བུའི་བར་དུ་ཐོབ་པ་བསྟན་ཏེ། སོ་སོའི་སྐྱེ་བོ་དག་ནི་དགྲ་བཅོམ་པའི་འབྲས་བུ་ཐོབ་པར་མི་དཀའ་སྟེ་སླ་བ་ཞིག་གོ་སྙམ་དུ་སེམས་སོ། །ང་ནི་བསྐལ་པ་གྲངས་མེད་པའི་སྔ་རོལ་དུ་དགྲ་བཅོམ་པའི་འབྲས་བུ་ཐོབ་ཀྱང་སེམས་ཅན་གདུལ་བའི་ཕྱིར་དེ་ཡང་བསྟན་ཏོ། །སྙིང་པོ་བྱང་ཆུབ་ཀྱི་ཤིང་དྲུང་དུ་
རྩྭ་བཏིང་བ་ལ་འདུག་ནས་བདུད་ཀྱི་རིས་རྣམས་བཏུལ་ཏེ། སོ་སོའི་སྐྱེ་བོ་དག་ནི་ངས་གདོད་སྙིང་པོ་བྱང་ཆུབ་ཀྱི་ཤིང་དྲུང་དུ་བདུད་ཀྱི་རིས་རྣམས་བཏུལ་སྙམ་སེམས་ཏེ། ང་ནི་བསྐལ་པ་གྲངས་མེད་པའི་སྔ་རོལ་དུ་བདུད་ཐམས་ཅད་བཏུལ་ཟིན་མོད་ཀྱི། སེམས་ཅན་མ་དུལ་བ་དག་གདུལ་བའི་ཕྱིར་བདུད་བཏུལ་བ་དེ་ཡང་མངོན་པར་བསྟན་ཏོ། །ངས་ནི་བཤང་གཅི་ཆེ་ཆུང་དང་། དབུགས་ཕྱི་ནང་དུ་རྒྱུ་བ་ཡང་བསྟན་པས་སོ་སོའི་སྐྱེ་བོ་དག་ནི་ང་ལ་བཤང་གཅི་ཆེ་ཆུང་དང་དབུགས་ཕྱི་ནང་དུ་རྒྱུ་བ་ཡོད་སྙམ་སེམས་ཏེ། ངའི་སྐུ་འདི་བསོད་ནམས་ཀྱི་འབྲས་བུ་ཡིན་པས་དེ་ལྟ་བུའི་བཤང་གཅི་ཆེ་ཆུང་དང་དབུགས་ཕྱི་ནང་དུ་རྒྱུ་བའི་བག་མེད་ཀྱང་འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །ངས་ནི་ཕ་རོལ་པོས་སྦྱིན་པ་བྱིན་པ་བླངས་པ་ཡང་བསྟན་ཏེ། ངའི་སྐུ་འདི་ལ་ནི་བཀྲེས་པ་འམ་སྐོམ་པའི་བག་མེད་དོ། །འོན་ཀྱང་འཇིག་རྟེན་པའི་རྗེས་སུ་འཐུན་པར་བྱ་བའི་ཕྱིར་དེ་ཡང་མངོན་པར་བསྟན་ཏོ། །གཞན་ཡང་སོ་སོའི་སྐྱེ་བོ་དང་འཐུན་པར་ཉལ་བ་དང་གཉིད་ལོག་པ་ཡང་བསྟན་ཏེ། ང་ནི་བསྐལ་པ་གྲངས་མེད་པའི་བར་དུ་ཤིན་ཏུ་ཟབ་མོའི་ཤེས་རབ་དང་ལྡན་ཏེ། སྲིད་པ་གསུམ་དང་ཡོངས་སུ་བྲལ་ཡང་། འགྲོ་བ་དང་སྡོད་པ་དང་། སྤྱོད་ལམ་དང་། གླད་པ་ན་བ་དང་། ལྟོ་ན་བ་དང་། རྒྱབ་ན་བ་དང་། འབྲུམ་བུ་དང་། བཀྲུས་པ་དང་། རྐང་པ་འཁྲུ་བ་དང་། ལག་པ་འཁྲུ་བ་དང་། གདོང་འཁྲུ་བ་དང་། ཁ་འཁྲུ་བ་དང་། སོ་ཤིང་འཆའ་བའི་བར་དུ་བསྟན་ཏེ། སོ་སོའི་སྐྱེ་བོ་དག་ནི་ང་ལ་དེ་དག་ཀུན་ཡོད་དོ་ཞེས་སེམས་ཏེ། ངའི་སྐུ་ལ་ནི་དེ་དག་གང་ཡང་མེད་དོ། །ངའི་ཞབས་པད་མོ་ལྟར་ཡོངས་སུ་དག་ཅིང་ཞལ་གྱི་དྲི་མེ་ཏོག་ཨུད་པ་ལ་བྲོ་ཡང་སོ་སོའི་སྐྱེ་བོ་དག་ནི་ང་ལ་གང་ཟག་སྙམ་དུ་སེམས་ཏེ། ཡང་དག་པར་ནང་ནི་གང་ཟག་མ་ཡིན་ནོ། །ང་ཡང་ཚེམ་བུ་གྱོན་ཅིང་འཁྲུ་བ་དང་། འཚེད་པ་དང་། འཆག་པར་བསྟན་ཏེ། ང་ནི་སྔོན་ཡུན་རིང་པོ་ནས་གོས་མི་དགོས་པར་གྱུར་ཏོ། །སོ་སོའི་སྐྱེ་བོ་དག་ནི་སྒྲ་གཅན་འཛིན་ལ་ངའི་བུ་སྙམ། རྒྱལ་པོ་ཟས་གཙང་མ་ནི་ངའི་ཡབ་སྙམ། ལྷ་མཛེས་ནི་ངའི་ཡུམ་སྙམ། འཇིག་རྟེན་
གྱི་བདེ་བ་ལ་ཡང་ལོངས་སྤྱད་ནས་དངོས་པོ་དེ་དག་ཐམས་ཅད་བཏང་སྟེ། རབ་ཏུ་བྱུང་ནས་ལམ་ལ་ནན་ཏན་དུ་བྱེད་དོ་སྙམ་སེམས་སོ། །གཞན་ཡང་ཁ་ཅིག་ནི་རྒྱལ་པོ་ཆེན་པོའི་རྒྱལ་ཚབ་ཐུ་བོ་གཽ་ཏ་མའི་རིགས་ཆེན་པོ་ལ་གཏོགས་པའི་འཇིག་རྟེན་གྱི་བདེ་བ་ཐམས་ཅད་སྤངས་ནས་འཇིག་རྟེན་ལས་འདའ་བའི་ཆོས་ཚོལ་ལོ་སྙམ་སྟེ། ང་ནི་ཡུན་རིང་པོ་ནས་འཇིག་རྟེན་གྱི་འདོད་པའི་དངོས་པོ་ཐམས་ཅད་ཡོངས་སུ་སྤངས་ཏེ། དེ་དག་ཐམས་ཅད་ནི་བསྟན་པ་ཙམ་དུ་ཟད་དོ། །རིགས་ཀྱི་བུ་ང་ནི་འཛམ་བུའི་གླིང་འདིར་ཡང་དང་ཡང་མྱ་ངན་ལས་འདས་པ་བསྟན་ཀྱང་། མཐར་ཡོངས་སུ་མྱ་ངན་ལས་འདས་པ་མ་ཡིན་ཏེ། སོ་སོའི་སྐྱེ་བོ་དག་ནི་དེ་བཞིན་གཤེགས་པ་ཡང་དག་པར་འགོག་པ་ཟད་དོ་སྙམ་སྟེ། དེ་བཞིན་གཤེགས་པ་ནི་མཐར་ཟད་པ་མ་ཡིན་པས་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བའི་ཆོས་ཅན་དུ་རིག་པར་བྱའོ། །རིགས་ཀྱི་བུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཀྱི་དབྱིངས་སོ། ། གཞན་ཡང་ངས་འཛམ་བུའི་གླིང་འདིར་འཇིག་རྟེན་དུ་མངོན་པར་འབྱུང་བ་བསྟན་ཏེ། སོ་སོའི་སྐྱེ་བོ་དག་ནི་ང་གདོད་མངོན་པར་སངས་རྒྱས་སོ་སྙམ་སེམས་ཏེ། ང་ནི་བསྐལ་པ་གྲངས་མེད་པའི་བར་དུ་བྱ་བ་ཐམས་ཅད་བྱས་ཀྱང་འཇིག་རྟེན་པའི་རྗེས་སུ་འཛམ་བུའི་གླིང་འདིར་གདོད་མངོན་པར་སངས་རྒྱས་པ་བསྟན་ཏོ། །ང་ཡང་འཛམ་བུའི་གླིང་འདིར་ཚུལ་ཁྲིམས་མ་བསྡམས་ཏེ་རྩ་བ་བཞི་ཡང་ཉམས་པ་བསྟན་པས་སོ་སོའི་སྐྱེ་བོ་དག་ནི་ཡང་དག་པར་ངས་ཚུལ་ཁྲིམས་ཉམས་སོ་སྙམ་དུ་སེམས་ཀྱང་། ང་ནི་བསྐལ་པ་ཚད་མེད་པའི་བར་དུ་ཚུལ་ཁྲིམས་བསྲུངས་པ་ལ་ཉམས་པ་མེད་དོ། །ང་ཡང་འཛམ་བུའི་གླིང་འདིར་ལོག་སྲེད་ཅན་དུ་བསྟན་ཏེ། སོ་སོའི་སྐྱེ་བོ་དག་ནི་ཐམས་ཅད་ཀྱིས་ང་ལ་ལོག་སྲེད་ཅན་ཡིན་པར་སེམས་ཀྱང་། ང་ནི་ཡང་དག་པར་ལོག་སྲེད་ཅན་མ་ཡིན་ནོ། །གལ་ཏེ་ལོག་སྲེད་ཅན་ཡིན་ན་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་པར་གྱུར། ང་ཡང་འཛམ་བུའི་གླིང་འདིར་དགེ་འདུན་འདུམ་པའི་དབྱེན་བྱས་པ་བསྟན་ཏེ། སོ་སོའི་སྐྱེ་བོ་དག་ནི་ང་ལ་དགེ་འདུན་འདུམ་པའི་དབྱེན་བྱས་སོ་སྙམ་དུ་སེམས་ཀྱང་། ངས་རྣམ་པར་བལྟས་ན་འཇིག་
རྟེན་དུ་བཅས་པ་ལྷ་དང་མིའི་ནང་ན་དགེ་འདུན་འདུམ་པའི་དབྱེན་བྱེད་ནུས་པ་མ་མཐོང་ངོ་། །ང་ཡང་འཛམ་བུའི་གླིང་འདིར་དམ་པའི་ཆོས་ཡོངས་སུ་སྲུང་བ་བསྟན་ཏེ། སོ་སོའི་སྐྱེ་བོ་དག་ནི་ང་ལ་ཆོས་སྲུང་བ་ཡིན་ནོ་སྙམ་ནས། ཐམས་ཅད་ངོ་མཚར་དུ་གྱུར་ཏེ། སངས་རྒྱས་རྣམས་ཀྱི་ཆོས་ཉིད་དེ་ཡིན་པས་དེ་ལ་ནི་ངོ་མཚར་དུ་མི་བྱའོ། །ང་ཡང་འཛམ་བུའི་གླིང་འདིར་བདུད་སྡིག་ཏོ་ཅན་གྱི་ལུས་སུ་བསྟན་ཏེ། སོ་སོའི་སྐྱེ་བོ་དག་ནི་ཡང་དག་པར་ང་ལ་བདུད་སྡིག་ཏོ་ཅན་ཡིན་ནོ་ཞེས་སེམས་ཀྱང་། ང་ནི་བསྐལ་པ་ཚད་མེད་པའི་བར་དུ་བདུད་ཀྱི་ལས་དང་ཡོངས་སུ་བྲལ་ཏེ། པད་མོ་ལྟར་ཡོངས་སུ་དག་པ་ལ་འགོ་བ་མེད་དོ། །ང་ཡང་འཛམ་བུའི་གླིང་འདིར་བུད་མེད་ཀྱི་ལུས་ཀྱིས་སངས་རྒྱས་པ་བསྟན་ཏེ། སོ་སོའི་སྐྱེ་བོ་དག་ནི་འདི་ལྟར་ངོ་མཚར་ཆེ་སྟེ། བུད་མེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ་སྙམ་དུ་སེམས་ཏེ། དེ་བཞིན་གཤེགས་པ་ནི་ནམ་དུ་བུད་མེད་ཀྱི་ལུས་མི་ལེན་ཀྱང་སེམས་ཅན་ཚད་མེད་པ་སྙེད་གདུལ་བའི་ཕྱིར་བུད་མེད་ཀྱི་གཟུགས་སུ་བསྟན་ཏོ། །སེམས་ཅན་ཐམས་ཅད་ལ་ཐུགས་བརྩེ་བའི་ཕྱིར་གཟུགས་བྱད་རྣམ་པ་སྣ་ཚོགས་བསྟན་པ་ཡིན་ནོ། །ང་ཡང་འཛམ་བུའི་གླིང་འདིར་ལམ་རྒྱུད་བཞིར་སྐྱེ་བ་བསྟན་ཏེ། ང་ནི་ཡུན་རིང་པོ་ནས་ལམ་གྱི་རྒྱུད་དུ་འགྱུར་བའི་རྒྱུན་བཅད་དོ། །ལས་ཀྱི་རྒྱུས་ལམ་རྒྱུད་བཞིར་ལྷུང་ནས་སེམས་ཅན་དེ་དག་གདུལ་བའི་ཕྱིར་དེ་དག་ཏུ་སྐྱེ་བ་ཡང་མངོན་པར་བསྟན་ཏོ། །ང་ཡང་འཛམ་བུའི་གླིང་འདིར་ཚངས་པའི་ལྷའི་རྒྱལ་པོ་བྱས་ཏེ། གང་ཚངས་པའི་ལྷ་ལ་རྗེད་པ་དག་ཡང་དག་པའི་ཆོས་ལ་དགོད་པའི་ཕྱིར་གྱི། ཡང་དག་པར་ཚངས་པ་ནི་མ་ཡིན་ཡང་སོ་སོའི་སྐྱེ་བོ་དག་ནི་ང་ལ་ཡང་དག་པར་ཚངས་པའི་ལྷའི་རྒྱལ་པོ་སྙམ་སེམས་ཏེ། ལྷའི་གཟུགས་སུ་ལྷ་གཞན་དག་ཏུ་བསྟན་པ་ཡང་དེ་བཞིན་ནོ། །ང་ཡང་འཛམ་བུའི་གླིང་འདིར་བུད་མེད་སྦྲུལ་འཚོང་མའི་གནས་སུ་འགྲོ་བ་བསྟན་ཏེ། ང་ལ་ནི་ཡང་དག་པར་འདོད་ཆགས་པའི་འདུ་ཤེས་མེད་ལ། པད་མོ་ལྟར་ཡོངས་སུ་དག་ཅིང་ཅིས་ཀྱང་མི་འགོ་ཡང་སེམས་ཅན་གང་འདོད་ཆགས་ཀྱིས་ཟིལ་གྱིས་ནོན་པ་དག །ལམ་སྲང་བཞི་མདོར་དམ་པའི་ཆོས་བསྟན་པའི་ཕྱིར་གྱི། ང་ལ་ཡང་དག་པར་འདོད་ཆགས་ཀྱི་སེམས་མེད་
ཀྱང་། སོ་སོའི་སྐྱེ་བོ་དག་ནི་ང་ལ་བུད་མེད་ཀྱི་དབང་བྱེད་དོ་སྙམ་སེམས་སོ། །ང་ཡང་འཛམ་བུའི་གླིང་འདིར་གོས་སྔོན་པོ་གྱོན་པའི་རིགས་སུ་འགྲོ་བ་བསྟན་ཏེ། དེ་ཡང་བྲན་མོར་གྱུར་པ་ཡང་དག་པའི་ཆོས་ལ་དགོད་པའི་ཕྱིར་གྱི། ང་ལ་ནི་ཡང་དག་པར་གོས་སྔོན་པོ་གྱོན་པའི་གནས་སུ་ལྷུང་བའི་ལས་མེད་པར་རིག་པར་བྱའོ། །ང་ཡང་འཛམ་བུའི་གླིང་འདིར་སློབ་དཔོན་ལྟ་བུར་བསྟན་ཏེ། བུས་པ་གཞོན་ནུ་ཤེད་མ་བྱེ་བ་ཡང་དག་པའི་ཆོས་ལ་དགོད་པའི་ཕྱིར་རོ། །ང་ཡང་འཛམ་བུའི་གླིང་འདིར་ཆང་འཐུང་བ་དང་། རྒྱལ་པོའི་གནས་དང་། ཕམ་རྒྱལ་གྱི་ཕྱིར་ཐབ་མོ་བྱས་པ་ཡང་བསྟན་ཏེ། དེ་ཡང་སེམས་ཅན་དེ་དག་གདུལ་ཞིང་བསྒྲལ་བའི་ཕྱིར་གྱི། ང་ལ་ནི་དེ་ལྟ་བུའི་ལས་ངན་པ་མེད་ཀྱང་། སོ་སོའི་སྐྱེ་བོ་དག་ནི་ང་ལ་དེ་ལྟ་བུའི་ལས་ཀྱང་བྱེད་དོ་སྙམ་སེམས་སོ། །ང་ཡང་ཡུན་རིང་པོར་དུར་ཁྲོད་ན་བྱ་རྒོད་ཀྱི་ལུས་སུ་བསྟན་ཏེ། དེ་ཡང་བྱ་ཐམས་ཅད་བསྒྲལ་བའི་ཕྱིར་གྱི། སོ་སོའི་སྐྱེ་བོ་དག་ནི་ང་ལ་ཡང་དག་པར་བྱ་རྒོད་ཀྱི་ལུས་སུ་སེམས་ཏེ། ང་ནི་ཡུན་རིང་པོ་ནས་ལས་དེ་ལྟ་བུ་དང་བྲལ་ཡང་བྱ་རྣམས་བསྒྲལ་བའི་ཕྱིར་དེ་ཡང་མངོན་པར་བསྟན་ཏོ། །ང་ཡང་འཛམ་བུའི་གླིང་འདིར་སེམས་ཅན་ཚད་མེད་པ། གདུལ་ཞིང་དམ་པའི་ཆོས་ལ་དགོད་པའི་ཕྱིར་ཁྱིམ་བདག་གི་ལུས་ཀྱང་བསྟན་ཏོ་གཞན་ཡང་རྒྱལ་པོ་དང་། བློན་པོ་དང་། རྒྱལ་བུ་དང་། བློན་པོ་ཆེན་པོར་གྱུར་ཏེ། དེ་དག་ཀུན་ཏུ་ཡང་གཙོ་བོ་དང་ཕུལ་དུ་གྱུར་ཅིང་། དམ་པའི་ཆོས་ལ་ནན་ཏན་བྱ་བའི་ཕྱིར་རྒྱལ་པོའི་ཐབས་སུ་ཡང་ཞུགས་སོ། །ང་ཡང་འཛམ་བུའི་གླིང་འདིར་ནད་ཀྱི་བསྐལ་པ་བྱུང་ནས། སེམས་ཅན་མང་པོ་ནད་ཀྱིས་རྣམ་པར་གཟིར་བ་དག་སྨན་གྱིས་གསོས་ཏེ། དེའི་འོག་ཏུ་དམ་པའི་ཆོས་བསྟན་ནས་བླ་ན་མེད་པའི་བྱང་ཆུབ་ལ་བཀོད་དེ། སོ་སོའི་སྐྱེ་བོ་དག་ནི་ནད་ཀྱི་བསྐལ་པ་བྱུང་སྙམ་སེམས་སོ། །གཞན་ཡང་འཛམ་བུའི་གླིང་འདིར་མུ་གེའི་བསྐལ་པ་བྱུང་བ་ན། དེ་དག་ཅི་འདོད་པ་བཞིན་བཟའ་བ་དང་བཏུང་བ་བྱིན་ནས་གདོད་དམ་པའི་ཆོས་བསྟན་ཏེ། བླ་ན་མེད་པའི་བྱང་ཆུབ་ལ་བཀོད་དོ། །གཞན་ཡང་འཛམ་བུའི་གླིང་འདིར་མཚོན་གྱི་བསྐལ་པ་བྱུང་བ་ན། དེ་ལ་དམ་པའི་ཆོས་བསྟན་ཏེ། དགྲར་འཁོན་དུ་འཛིན་པ་སྤངས་ནས། བླ་ན་མེད་
པའི་བྱང་ཆུབ་ལ་བཀོད་དོ། །གཞན་ཡང་རྟག་པར་འཛིན་པ་དག་ལ་མི་རྟག་པའི་འདུ་ཤེས་བསྟན་པ་དང་། བདེ་བར་འདུ་ཤེས་པ་ལ་སྡུག་བསྔལ་བའི་འདུ་ཤེས་བསྟན་པ་དང་། བདག་ཏུ་འདུ་ཤེས་པ་དག་ལ་བདག་མེད་པར་བསྟན་པ་དང་། ཡོངས་སུ་དག་པར་འདུ་ཤེས་པ་དག་ལ་ཡོངས་སུ་མ་དག་པའི་འདུ་ཤེས་བསྟན་པའི་ཕྱིར་རོ། །སེམས་ཅན་གང་ཞིག་ཁམས་གསུམ་ལ་ཆགས་ན་དེ་ལ་དམ་པའི་ཆོས་བསྟན་ཏེ་གནས་དེ་སྤོང་བར་བྱེད་དོ། །སེམས་ཅན་གདུལ་ཞིང་བསྒྲལ་བའི་ཕྱིར་བླ་ན་མེད་པའི་དམ་པའི་ཆོས་སྨན་ལྟ་བུ་སྟོན་ཏོ། །ཀུན་ཏུ་ཉོན་མོངས་པའི་ཤིང་ཐམས་ཅད་གཅད་པའི་ཕྱིར་བླ་ན་མེད་པའི་ཆོས་ཀྱི་སྨན་གྱི་ཤིང་བསྐྱེད་དོ། །མུ་སྟེགས་ཅན་གྱི་རྣམས་གདུལ་ཞིང་བསྒྲལ་བའི་ཕྱིར་ཡང་དག་པའི་ཆོས་སྟོན་ཏོ། །སེམས་ཅན་ཐམས་ཅད་ཀྱི་སྟོན་པར་མངོན་པར་བསྟན་ཀྱང་ཐོག་མ་ནས་སེམས་ཅན་གྱི་སྟོན་པའོ་སྙམ་དུ་མི་དགོངས་སོ། །བུས་པ་མ་རབས་བསྒྲལ་བའི་ཕྱིར་དེ་དག་ཏུ་འགྲོ་བ་ཡང་མངོན་པར་སྟོན་ཏེ། ཆོས་བསྟན་པའི་ཕྱིར་གྱི། ལས་ངན་པས་དེའི་ལུས་ལེན་པ་ནི་མ་ཡིན་ནོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ནི་དེ་ལྟར་ཡོངས་སུ་མྱ་ངན་ལས་འདས་པ་ཆེན་པོ་ལ་བདེ་བར་གནས་པ་སྟེ། དེ་བས་ན་རྟག་ཏུ་གནས་པ་མི་འགྱུར་བའི་ཆོས་ཅན་ཞེས་བྱའོ། །ཇི་ལྟར་འཛམ་བུའི་གླིང་ལྟར་ཤར་གྱི་ལུས་འཕགས་གླིང་དང་། ནུབ་ཀྱི་བན་གླང་སྤྱོད་དང་། བྱང་གི་སྒྲ་མི་སྙན་ཡང་དེ་བཞིན་དུ་རྒྱས་པར་རོ། །གླིང་བཞི་ན་ཇི་ལྟ་བ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་དེ་བཞིན་ཏེ། སྲིད་པ་ཉི་ཤུ་ལྔ་པོ་ནི་ཇི་ལྟར་དཔའ་བར་འགྲོ་བའི་མདོ་ལས་རྒྱས་པར་བསྟན་པ་བཞིན་ནོ། །དོན་དེ་ལྟ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་ཞིག་ཡོངས་སུ་མྱ་ངན་ལས་འདས་པ་ཆེན་པོ་ལ་བདེ་བར་གནས་ན་མངོན་པར་ཤེས་པའི་རྫུ་འཕྲུལ་འདི་ལྟ་བུ་སྟོན་པ་ལ་འ ཇིགས་པ་མེད་དོ། །འོད་སྲུང་རྐྱེན་དེ་ལྟ་བས་ན་ཁྱོད་ཀྱིས་སྒྲ་གཅན་འཛིན་ལ་སངས་རྒྱས་ཀྱི་སྲས་ཡིན་ནོ་ཞེས་མ་ཟེར་ཅིག། དེ་ཅིའི་ཕྱིར་ཞེ་ན། ངས་སྔོན་བསྐལ་པ་ཚད་མེད་པའི་བར་དུ་སྲིད་པའི་འདོད་པ་དང་བྲལ་བས་དེ་བས་ན་དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་
འཕོ་བ་ཞེས་བྱའོ། །འོད་སྲུང་གིས་ཡང་གསོལ་པ། ཅིའི་སླད་དུ་དེ་བཞིན་གཤེགས་པ་ལ་རྟག་ཏུ་གནས་པའི་ཆོས་ཅན་ཞེས་བགྱི། བཅོམ་ལྡན་འདས་ཀྱིས་གསུངས་པ་ལྟར་ན་མེ་མར་གུམ་ནས་གནས་དང་ཕྱོགས་ཀྱང་མ་མཆིས་པ་དེ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། མྱ་ངན་ལས་འདས་ནས་གནས་དང་ཕྱོགས་མ་མཆིས་པ་ཡང་དེ་བཞིན་ནོ་ཞེས་མ་གསུངས་སམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་འདི་སྐད་དུ་ཇི་ལྟར་མེ་མར་ཤི་ན་གནས་དང་ཕྱོགས་མེད་པ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། མྱ་ངན་ལས་འདས་ནས་གནས་དང་ཕྱོགས་ཀྱང་མེད་དོ། །ཞེས་མ་ཟེར་ཅིག །རིགས་ཀྱི་བུ་འདི་ལྟ་སྟེ་དཔེར་ན། སྐྱེས་པའམ་བུད་མེད་གཅིག་མེ་མར་འཛུགས་ན། མར་གྱི་སྣོད་ཆེ་ཆུང་ལས་མར་གྱིས་བཀང་སྟེ་འཛུགས་སོ། །ཇི་སྲིད་མར་ཡོད་ཀྱི་བར་དུ་ནི་སྣང་བ་ཡང་ཡོད་དོ། །ཅི་སྟེ་མར་ཟད་ན་སྣང་བ་ཡང་མེད་པར་འགྱུར་རོ། །སྣང་བ་མེད་པར་གྱུར་པ་ནི་ཉོན་མོངས་པ་ཟད་པ་ལྟ་བུའོ། །སྣང་བ་ཟད་དེ་མེད་པར་སོང་ཡང་མེ་མར་གྱི་སྣོད་མེད་པར་འགྱུར་བ་མ་ཡིན་ཏེ། དེ་བཞིན་གཤེགས་པ་ཡང་དེ་དང་འདྲ་སྟེ། ཉོན་མོངས་པ་ཟད་དེ་མེད་ཀྱང་ཆོས་ཀྱི་སྐུ་ནི་རྟག་ཏུ་ཡོད་དོ། །རིགས་ཀྱི་བུ་དེ་ཁྱོད་ཀྱི་ཡིད་ལ་ཇི་སྙམ་སྣང་བ་དང་། མེ་མར་གྱི་སྣོད་ཅིག་ཅར་མེད་པར་འགྱུར་རམ། འོད་སྲུང་གིས་གསོལ་པ། མ་ལགས་སོ། །བཅོམ་ལྡན་འདས་ཅིག་ཅར་མ་མཆིས་པ་མ་ལགས་ཀྱང་མི་རྟག་པར་འདྲའོ། །ཅི་སྟེ་ཆོས་ཀྱི་སྐུ་མར་གྱི་སྣོད་དང་འདྲ་ན། མར་མེའི་སྣོད་ཀྱང་མི་རྟག་པས་ཆོས་ཀྱི་སྐུ་ཡང་དེ་དང་འདྲ་བར་མི་རྟག་པར་འགྱུར་རོ། །རིགས་ཀྱི་བུ་ཁྱོད་དེ་སྐད་ཅེས་མ་སྨྲ་ཤིག། འཇིག་རྟེན་ན་སྣོད་ཅེས་བྱ་བར་གྲགས་པ་དང་། སངས་རྒྱས་བཅོམ་ལྡན་འདས་ཀྱི་བླ་ན་མེད་པའི་ཆོས་ཀྱི་སྣོད་ཅེས་བྱ་བ་སྣོད་ནི་མི་རྟག་པ་ཡིན་ཡང་དེ་བཞིན་གཤེགས་པ་ནི་མ་ཡིན་ནོ། །ཆོས་ཐམས་ཅད་ལ་མྱ་ངན་ལས་འདའ་བ་ནི་རྟག་པ་སྟེ། དེ་བཞིན་གཤེགས་པའི་ངོ་བོ་ཉིད་ཡིན་པས་རྟག་པ་ཞེས་བྱའོ། །གཞན་ཡང་རིགས་ཀྱི་བུ་མེ་མར་ཟད་ཅེས་བྱ་བ་ནི་དགྲ་བཅོམ་པའི་མྱ་ངན་ལས་འདའ་བ་ལ་བྱའོ། །འདོད་པའི་ཉོན་མོངས་པ་ཐམས་ཅད་མེད་པར་བྱས་པས་ན་མེ་མར་
ཟད་པ་ལྟ་བུའོ། །ལན་ཅིག་ཕྱིར་མི་ལྡོག་པ་ནི་འདོད་པ་དང་བཅས་པ་སྟེ། འདོད་པ་དང་བཅས་པས་མེ་མར་ཟད་པ་ལྟ་བུ་ཞེས་བྱར་མི་རུང་ངོ་། །དེ་བས་ན་ངས་སྔོན་མཚན་མ་དགག་པའི་ཕྱིར་མེ་མར་ཟད་པ་ལྟ་བུའོ། །ཞེས་བཤད་ཀྱི། ཡོངས་སུ་མྱ་ངན་ལས་འདས་པ་ཆེན་པོ་ནི་མེ་མར་ཟད་པ་ལྟ་བུ་མ་ཡིན་ནོ། །ལན་ཅིག་ཕྱིར་མི་ལྡོག་ཅེས་བྱ་བ་ནི་ཡང་དང་ཡང་ལྡོག་པ་མ་ཡིན། སྲིད་པ་ཉི་ཤུ་ལྔ་པོར་ཕྱིར་མི་ལྡོག་ཅིང་། ལུས་མནམ་པོ་དང་། ལུས་སྲིན་ཅན་དང་། ལུས་གདུག་པ་ཅན་མི་ལེན་པས་ན་ཕྱིར་མི་ལྡོག་པ་ཞེས་བྱའོ། །ལུས་ཡང་ལེན་པ་ནི་ཕྱིར་ལྡོག་པ་ཞེས་བྱ་ཡང་ལུས་མི་ལེན་པ་ནི་ཕྱིར་མི་ལྡོག་པ་ཞེས་བྱའོ། །སོང་བ་དང་ལྡོག་པ་ཡོད་པས་ཕྱིར་ལྡོག་པ་ཞེས་བྱ། སོང་བ་དང་ལྡོག་པ་མེད་པས་ཕྱིར་མི་ལྡོག་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་སངས་རྒྱས་བཅོམ་ལྡན་འདས་ཀྱིས་གསུངས་པ་ལྟར་དགོངས་ཏེ་གསུངས་པའི་སྙིང་པོ་མཆིས་སོ་ཞེས་བགྱི་བའི་དོན་དེ་ལྟ་མ་ལགས་སོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ལ་དགོངས་ཏེ་གསུངས་པའི་བརྗོད་པ་ནི་མངའི། དགོངས་ཏེ་གསུངས་པའི་སྙིང་པོ་ཞེས་བགྱི་བ་ནི་མ་མཆིས་སོ། །དཔེར་ན་སྒྱུ་མ་མཁན་ཞིག་གིས་ཤིང་གི་འཁྲུལ་འཁོར་གྱི་མི་ཞིག་བགྱིས་ན། ཤིང་གི་མི་དེ་ནི་ཀུན་གྱིས་ཀྱང་མཐོང་བར་རུང་གི་བརྐྱང་བ་དང་། བསྐུམ་པ་དང་། དགྱེ་བ་དང་། རྒུ་བ་ནི་ནང་ནས་བསྒྱུར་བར་མི་འཚལ་ཏོ། །སངས་རྒྱས་ཀྱི་ཆོས་ནི་དེ་ལྟ་བུ་མ་ལགས་ཏེ། སེམས་ཅན་ཐམས་ཅད་ཀྱིས་མཐོང་ཞིང་ཤེས་པར་བགྱི་བ་ལགས་ན། ཅིའི་སླད་དུ་སངས་རྒྱས་བཅོམ་ལྡན་འདས་ཀྱིས་དགོངས་ཏེ་གསུངས་པའི་སྙིང་པོ་མཆིས་ཞེས་གསུངས། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤིན་ཏུ་ལེགས་སོ་ཤིན་ཏུ་ལེགས་སོ། །རིགས་ཀྱི་བུ་ཁྱོད་ཀྱིས་སྨྲས་པ་བཞིན་ཏེ། དེ་བཞིན་གཤེགས་པ་ལ་ཡང་དག་པར་ན་དགོངས་ཏེ་གསུངས་པའི་སྙིང་པོ་མེད་དོ། །དེ་ཅིའི་ཕྱིར་ཞེ་ན་འདི་ལྟ་སྟེ། སྟོན་གྱི་ཟླ་བ་ཉ་བ་ནི་སྟེང་གི་ནམ་མཁའ་ལ་ཤིན་ཏུ་གསལ་བར་སྣང་བས་བསྒྲིབས་པ་མེད་པའི་ཕྱིར་སྐྱེ་བོ་ཐམས་ཅད་ཀྱིས་མཐོང་ངོ་། །དེ་བཞིན་གཤེགས་པའི་བཀའ་ཡང་དེ་དང་འདྲ་བར་ཤིན་ཏུ་གསལ་ཞིང་རྣམ་པར་དག་
ཀྱང་། བྱིས་པ་མ་རབས་ཀྱིས་མི་ཤེས་པའི་ཕྱིར་ན་དགོངས་ཏེ་གསུངས་པའི་སྙིང་པོ་ཞེས་བྱའོ། །མཁས་པ་ཤེས་རབ་ཅན་དག་གིས་ཁོང་དུ་ཆུད་པས་གསང་བ་ཞེས་མི་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་མི་ཞིག་གསེར་དངུལ་མང་དུ་བསགས་ཏེ། སྲང་གྲངས་མེད་པར་ཕྱིན་ཀྱང་སེར་སྣ་བྱེད་དེ། དབུལ་ཕོངས་པ་ལ་སྦྱིན་པ་མི་བྱེད་པ་ནི་སྩོགས་པས་གསང་བའི་མཛོད་ཅེས་བྱའི། དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། བསྐལ་པ་ཚད་མེད་པའི་བར་དུ་དམ་པའི་ཆོས་རིན་པོ་ཆེ་ཚད་མེད་པ་བསགས་པ་སེར་སྣ་མེད་པར་སེམས་ཅན་ཐམས་ཅད་ལ་རྟག་ཏུ་སྦྱིན་པ་བྱེད་ན་ཅིའི་ཕྱིར་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་བྱ། རིགས་ཀྱི་བུ་འདི་ལྟ་སྟེ་དཔེར་ན། མི་ཞིག་དབང་པོ་མ་ཚང་བ། མིག་ཡ་གཅིག་གམ། ལག་པ་ཡ་གཅིག་གམ། རྐང་པ་ཡ་གཅིག་མ་ཚང་ན་ངོ་ཚ་བའི་ཕྱིར་གཞན་གྱིས་མི་མཐོང་བར་བྱེད་པས་གསང་བ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ་དམ་པའི་ཆོས་ཐམས་ཅད་ཕུན་སུམ་ཚོགས་ཏེ་ཉམས་པ་མེད་པས་སྐྱེ་བོ་ཀུན་མཐོང་བར་བྱེད་ན། ཅིའི་ཕྱིར་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་བྱ། རིགས་ཀྱི་བུ་འདི་ལྟ་སྟེ། དཔེར་ན་མི་དབུལ་པོ་ཞིག་ལ་བུ་ལོན་མང་པོ་ཆགས་ན། བུ་ལོན་དེད་པས་འཇིགས་ཏེ་མི་མཐོང་བར་བྱ་བའི་ཕྱིར་ན་གསང་བ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། སེམས་ཅན་ཐམས་ཅད་ལ་འཇིག་རྟེན་གྱི་ཆོས་ཀྱང་མ་ཆགས་ལ། སེམས་ཅན་ལ་འཇིག་རྟེན་ལས་འདས་པའི་ཆོས་ཆགས་ཀྱང་མི་གསང་ངོ་། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་དགོངས་ཏེ་བླ་ན་མེད་པའི་ཆོས་འབྱེད་ཅིང་སྟོན་ཏོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་ཕྱུག་པོ་ཞིག་ལ་བུ་གཅིག་ལས་མེད་དེ་ཤིན་ཏུ་སྡུག་ཅིང་བྱམས་ན། རིན་པོ་ཆེ་ཅི་བདོག་པ་ཐམས་ཅད་སྟོན་ཏོ། །དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་བུ་གཅིག་པ་དང་འདྲ་བར་གཟིགས་སོ། །རིགས་ཀྱི་བུ་འདི་ལྟ་སྟེ། འཇིག་རྟེན་ན་མི་དག་ནི་ཕོ་མོའི་མཚན་མི་སྡུག་པའི་ཕྱིར་གོས་ཀྱིས་འགེབས་པས་ན་གསང་བ་ཞེས་བྱའོ། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། དབང་པོ་ལས་རིང་དུ་གྱུར་ཏེ།
དབང་པོའི་ཕ་རོལ་ཏུ་གྱུར་པས་གསང་ཞིང་གབ་པ་མེད་དོ། །རིགས་ཀྱི་བུ་འདི་ལྟ་སྟེ། བྲམ་ཟེ་དག་ནི་ཚིག་ཏུ་སྨྲ་བའི་གཙུག་ལག་ཐམས་ཅད་རྒྱལ་རིགས་དང་གདོལ་རིགས་ཀྱིས་ཐོས་པར་མི་འདོད་དོ། །དེ་ཅིའི་ཕྱིར་ཞེ་ན། སྨྲ་བའི་གཙུག་ལག་ལ་ཉེས་པའི་སྐྱོན་ཡོད་པའི་ཕྱིར་རོ། །དེ་བཞིན་གཤེགས་པའི་དམ་པའི་ཆོས་ནི་དེ་ལྟ་མ་ཡིན་ཏེ། ཐོག་མ་དང་ཐ་མ་དང་། བར་དུ་ཡང་དགེ་བས་གསང་བ་ཞེས་བྱར་མི་རུང་ངོ་། །རིགས་ཀྱི་བུ་དཔེར་ན་ཁྱིམ་བདག་གཅིག་ལ་བུ་གཅིག་ལས་མེད་དེ་ཤིན་ཏུ་སྡུག་ཅིང་བྱམས་པའི་ཕྱིར་སློབ་དཔོན་གྱི་གན་དུ་ཁྲིད་ནས་བསླབ་པ་སློབ་ཏུ་བཅུག་ན། མྱུར་དུ་མི་ལོབས་སུ་དོགས་པས་སྡུག་པའི་ཕྱིར་ཁྱིམ་དུ་ཁྲིད་ནས་ཉིན་མཚན་དུ་བརྩོན་འགྲུས་བསྐྱེད་དེ། ཡི་གེ་ཕྱེད་སློབ་ཅིང་སྟོན་གྱི། གཙུག་ལག་ཆེན་པོ་མི་སྟོན་ཏོ། །དེ་ཅིའི་ཕྱིར་ཞེ་ན། ན་སོ་གཞོན་ལ་ཤེད་མ་རྫོགས་པས་ལྡོབ་པའི་མཐུ་མེད་པའི་ཕྱིར་རོ། །རིགས་ཀྱི་བུ་ཁྱིམ་བདག་དེས་ཡི་གེ་ཕྱེད་བསླབས་ན། བུ་དེས་དེའི་ཚེ་གཙུག་ལག་ཆེན་པོ་ཤེས་ཤིང་རྟོགས་པར་འགྱུར་རམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དེས་བུ་དེ་ལ་གསང་བ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་དེ་ཅིའི་སླད་དུ་ཞེ་ན། བུ་ན་སོ་གཞོན་ཏེ་མི་ལྡོབ་པའི་སླད་དུ་མ་བསྟན་གྱི། སེར་སྣ་བྱས་ཏེ་གསང་བའི་སླད་དུ་མ་བསྟན་པ་ནི་མ་ལགས་སོ། །དེ་ཅིའི་སླད་དུ་ཞེ་ན། སེར་སྣའི་སེམས་དང་བཅས་པ་ནི་གསང་བ་ཞེས་བགྱི་ན། དེ་བཞིན་གཤེགས་པ་ནི་དེ་ལྟ་བུ་མ་ལགས་ཏེ། དགོངས་ཏེ་གསུངས་པའི་སྙིང་པོ་མཆིས་ཞེས་བགྱིར་མི་རུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་ལེགས་སོ་ཤིན་ཏུ་ལེགས་སོ། །རིགས་ཀྱི་བུ་ཁྱོད་ཀྱིས་སྨྲས་པ་བཞིན་ཏེ། ཞེ་སྡང་གི་སེམས་དང་། ཕྲག་དོག་དང་སེར་སྣའི་སེམས་དང་བཅས་པ་ནི་གསང་བ་ཞེས་བྱའི། དེ་བཞིན་གཤེགས་པ་ལ་ནི་ཞེ་སྡང་བ་དང་། ཕྲག་དོག་དང་། སེར་སྣའི་ཐུགས་མི་མངའ་བས་ན་གསང་བ་ཡོད་དོ་ཞེས་བྱར་མི་རུང་ངོ་། །རིགས་ཀྱི་བུ་ཁྱིམ་བདག་ཅེས་བྱ་བ་ནི་དེ་བཞིན་གཤེགས་པ་ལྟ་བུའོ། །བུ་གཅིག་པ་ཞེས་བྱ་བ་ནི་སེམས་ཅན་ཐམས་ཅད་ལ་བྱ་སྟེ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་བུ་
གཅིག་པ་དང་འདྲ་བར་གཟིགས་སོ། །བུ་སློབ་པ་ནི་ཉན་ཐོས་ཀྱི་ཉེ་གནས་ལྟ་བུའོ། །ཡི་གེ་ཕྱེད་ཅེས་བྱ་བ་ནི་ཡི་གེ་སྡེ་དགུ་པོ་ལྟ་བུའོ། །གཙུག་ལག་ཆེན་པོ་ཞེས་བྱ་བ་ནི་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ལྟ་བུའོ། །ཉན་ཐོས་ཀྱི་རྣམས་ལ་ཤེས་རབ་ཀྱི་མཐུ་མེད་པས་དེ་བཞིན་གཤེགས་པས་ཡི་གེ་ཕྱེད་ལྟ་བུ་མདོ་སྡེ་དགུ་པོ་བཤད་ཀྱི་གཙུག་ལག་ཆེན་པོ་ལྟ་བུ་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་མ་བཤད་དོ། །རིགས་ཀྱི་བུ་ཁྱིམ་བདག་གི་བུ་ཤེད་རྫོགས་ཏེ་ལྡོབ་པའི་མཐུ་ཡོད་བཞིན་དུ་གཙུག་ལག་ཆེན་པོ་མ་བསླབས་ན་གསང་བ་ཞེས་བྱའོ། །ཉན་ཐོས་ཀྱང་གལ་ཏེ་ཐེག་པ་ཆེན་པོའི་གཙུག་ལག་ལྡོབ་པའི་མཐུ་ཡོད་པར་གྱུར་ལ། དེ་བཞིན་གཤེགས་པས་སེར་སྣ་མཛད་དེ་མ་བསྟན་ན་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་ཡོད་ཅེས་བྱར་རུང་ངོ་། །དེ་བཞིན་གཤེགས་པ་ནི་དེ་ལྟ་བུ་མ་ཡིན་ཏེ། དེ་བས་ན་དེ་བཞིན་གཤེགས་པ་ལ་དགོངས་ཏེ་གསུངས་པའི་སྙིང་པོ་མེད་དོ། །ཇི་ལྟར་ཁྱིམ་བདག་དེས་སྔར་བུ་དེ་ལ་ཡི་གེ་ཕྱེད་པོ་བསྟན་ནས་དེའི་འོག་ཏུ་གཙུག་ལག་ཆེན་པོ་སྟོན་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། ཉེ་གནས་རྣམས་ལ་སྔར་ཡི་གེ་ཕྱེད་ལྟ་བུ་མདོ་སྡེ་དགུ་པོ་བསྟན་ནས་དེའི་འོག་ཏུ་གཙུག་ལག་ཆེན་པོ་སྟོན་པ་ནི་འདི་ལྟ་སྟེ། དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་དབྱར་གྱི་དུས་སུ་ཆར་སྤྲིན་ཆེན་པོ་ལངས་ཏེ། ཆར་པ་ཆེན་པོ་བབ་ན་ཞིང་པ་ཞིང་ལས་བྱེད་པ་ས་བོན་མང་དུ་བཏབ་པ་རྣམས་ཀྱིས་ནི་ལོ་ཐོག་མང་དུ་ཐོབ་པར་འགྱུར་རོ། །གང་ས་བོན་ཉུང་ངུ་བཏབ་པ་རྣམས་ཀྱིས་ནི་ལོ་ཐོག་ཉུང་ངུ་ཐོབ་སྟེ། དེ་ནི་ཀླུའི་རྒྱལ་པོས་ཉེས་པ་མ་ཡིན་ལ། ཀླུའི་རྒྱལ་པོས་གསང་བ་ཡང་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཆོས་ཆེན་པོའི་ཆར་ཡོངས་སུ་མྱ་ངན་ལས་འདས་པ་ཆེན་པོ་ཕབ་པས་སེམས་ཅན་གང་དགེ་བའི་འབྲས་བུ་བསྐྱེད་པ་དག་ནི་ཤེས་རབ་ཀྱི་མྱུ་གུ་དང་འབྲས་བུ་ཐོབ་པར་འགྱུར། དགེ་བའི་ས་བོན་མེད་པ་ནི་ཅི་ཡང་མ་ཐོབ་སྟེ། ཅི་ཡང་མ་ཐོབ་པ་ནི་དེ་བཞིན་གཤེགས་པས་ཉེས་པ་མ་ཡིན་ལ། དེ་བཞིན་གཤེགས་པ་ལ་ཡང་དག་པར་ན་གསང་བ་
ཡང་མེད་དོ། །འོད་སྲུང་གིས་ཡང་གསོལ་པ། བདག་གིས་ནི་སངས་རྒྱས་བཅོམ་ལྡན་འདས་ལ་དགོངས་ཏེ་གསུངས་པའི་གསང་བའི་སྙིང་པོ་མ་མཆིས་པར་རྟོགས་ན། བཅོམ་ལྡན་འདས་ཀྱིས་གསུངས་པ་ལྟར་གཙུག་ལག་ཆེན་པོ་ནི་དེ་བཞིན་གཤེགས་པས་རྟག་ཏུ་གནས་པའི་ཆོས་ཅན་མི་འགྱུར་མི་འཕོ་བ་ལྟ་བུའོ་ཞེས་བགྱི་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། སྔོན་བཅོམ་ལྡན་འདས་ཀྱིས་ཚིགས་སུ་བཅད་པ་འདི་སྐད་ཅེས་གསུངས་སོ། །དེ་བཞིན་གཤེགས་དང་རང་རྒྱལ་དང་། །ཉན་ཐོས་པ་ཡི་ཉེ་གནས་ཀྱང་། །མི་རྟག་པ་ཡི་ལུས་འདོར་ན། །བུས་པ་མ་རབས་སྨོས་ཅི་དགོས། །ཞེས་གསུངས་ལ། ད་འདིར་རྟག་ཏུ་གནས་པ་མི་འགྱུར་མི་འཕོ་བ་ཞེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། ངས་ནི་ཉན་ཐོས་པའི་ཉེ་གནས་ཐམས་ཅད་ལ་ཡི་གེ་ཕྱེད་པོ་བསྟན་པའི་ཕྱིར་ཚིགས་སུ་བཅད་པ་དེ་སྐད་ཅེས་གསུངས་པ་ཡིན་ནོ། །རིགས་ཀྱི་བུ་གཞན་ཡང་རྒྱལ་པོ་རབ་ཏུ་སྡེ་འཕམ་བྱེད་ཀྱི་མ་ཤི་བ་ན། རྒྱལ་པོ་མྱ་ངན་གྱིས་ནོན་ཏེ་རབ་ཏུ་ངུ་ཞིང་། ཡིད་ལ་གཅགས་བཞིན་དུ་ང་གང་ན་བར་འོངས་ནས་ངས་རྒྱལ་པོ་ལ་མཁྱེན་བཞིན་དུ་རྒྱལ་པོ་ཆེན་པོ་ཅིའི་ཕྱིར་རབ་ཏུ་སྡུག་བསྔལ་ཞིང་ཡི་མུག་པར་གྱུར་ཅེས་དྲིས་ན། རྒྱལ་པོས་གསོལ་པ། བཙུན་མོ་ཆེན་མོ་དེང་ཚེའི་བྱ་བ་བྱས་ཏེ། གལ་ཏེ་སུ་ཞིག་གིས་བདག་གི་མའི་ཚེ་སླར་བཟློག་ན། བདག་གིས་རྒྱལ་ཐབས་དང་། བལ་གླང་དང་རྟ་དང་། རིན་པོ་ཆེ་སྣ་བདུན་དང་། ལུས་དང་སྲོག་ཀྱང་འབུལ་ལོ་ཞེས་སྨྲས་སོ། །ངས་རྒྱལ་པོ་དེ་ལ་འདི་སྐད་དུ་རྒྱལ་པོ་ཆེན་པོ་མྱ་ངན་གྱིས་ཡིད་གདུངས་པར་མ་བྱེད་ཅིག །སེམས་ཅན་ཐམས་ཅད་ཚེ་ཟད་དེ་ཤི་ཞེས་བྱ་བ་ཡོད་དོ། །སངས་རྒྱས་དང་རང་སངས་རྒྱས་དང་ཉན་ཐོས་རྣམས་ཀྱང་ལུས་འདོར་ན། བུས་པ་མ་རབས་ལྟ་ཅི་སྨོས་ཏེ། རིགས་ཀྱི་བུ་ངས་རྒྱལ་པོ་དེའི་མྱ་ངན་བསང་བའི་ཕྱིར་ཡི་གེ་ཕྱེད་པོའི་ཚིགས་སུ་བཅད་པ་དེ་དག་གསུངས་པ་ཡིན་ནོ། །ངས་ད་ཉན་ཐོས་ཀྱི་ཉེ་གནས་རྣམས་ལ་གཙུག་ལག་ཆེན་པོ་བསྟན་ཏེ། དེ་བཞིན་གཤེགས་པ་ནི་རྟག་ཏུ་གནས་པ་མི་འགྱུར་མི་འཕོ་བའོ། །ཞེས་གསུངས་པ་ལ། དེ་ལ་གང་ཟག་ལ་ལ་ཞིག་གིས་དེ་བཞིན་གཤེགས་པ་མི་
རྟག་ཅེས་ཟེར་ན་དེའི་ལྕེ་ཅི་སྟེ་ཆད་པར་མ་གྱུར། འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་ཡང་ཚིགས་སུ་བཅད་པ་ལ་འདི་སྐད་ཅེས་མ་གསུངས་སམ། ཅི་ཡང་སོགས་པ་མེད་ཅིང་། །ཟས་ཀྱི་ཚོད་ཀྱང་ཤེས་པ། །མཁའ་ལ་བྱ་འཕུར་བཞིན་ཏེ། །རྗེས་ནི་སུས་ཀྱང་མི་ཆོད། །ཅེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་དཀྱིལ་འཁོར་འདིའི་ནང་ན་ཅི་ཡང་མི་སོགས་ཞེས་བགྱི་བ་ནི་གང་ལགས། ཟས་ཀྱི་ཚོད་འཛིན་པ་ནི་གང་ལགས། ནམ་མཁའ་ལ་བྱ་འཕུར་བ་ལྟར་རྗེས་མི་རྙེད་པ་དེ་ལྟ་བུ་ནི་སུ། སོང་བ་དེ་ཡང་ཕྱོགས་གང་དུ་ཕྱིན་པར་གྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། སོགས་པ་ཞེས་བྱ་བ་ནི་ནོར་བུ་རིན་པོ་ཆེའོ། །རིགས་ཀྱི་བུ་སོགས་པ་ལ་རྣམ་པ་གཉིས་ཏེ། འདུས་བྱས་དང་འདུས་མ་བྱས་པའོ། །འདུས་བྱས་ཀྱི་སོགས་པ་ནི་ཉན་ཐོས་ཀྱི་སྤྱོད་པ་ལ་བྱའོ། །འདུས་མ་བྱས་པའི་སོགས་པ་ནི་དེ་བཞིན་གཤེགས་པའི་སྤྱོད་པའོ། །རིགས་ཀྱི་བུ་དགེ་འདུན་ལ་ཡང་རྣམ་པ་གཉིས་ཏེ། འདུས་བྱས་དང་འདུས་མ་བྱས་པའོ། །འདུས་བྱས་ཀྱི་དགེ་འདུན་ཞེས་བྱ་བ་ནི་ཉན་ཐོས་སོ། །ཉན་ཐོས་ཀྱི་དགེ་འདུན་ཞེས་བྱ་བ་ནི་སོགས་པ་མེད་པའོ། །ཅི་མི་སོགས་ཞེ་ན་བྲན་ཕོ་དང་བྲན་མོ་དང་། ཆོས་མ་ཡིན་པའི་དངོས་པོ་བང་མཛོད་དང་ཁྲེ་འབྲས་དང་། ཏིལ་དང་ཟར་མ་དང་། སྲན་མ་ཆེ་ཆུང་ལ་སོགས་པ་མི་སོགས་པའོ། །དེ་ལ་གང་ཞིག་གིས་འདི་སྐད་དུ་དེ་བཞིན་གཤེགས་པས་བྲན་ཕོ་དང་། བྲན་མོ་དང་ལས་བྱེད་པའི་མི་ལ་སོགས་པ་འཆང་དུ་གནང་ངོ་ཞེས་ཟེར་ན། དེའི་ལྕེ་ལྐུགས་པར་འགྱུར་བའི་རིགས་སོ། །ངའི་ཉན་ཐོས་ཀྱི་ཉེ་གནས་དག་ནི་མི་སོགས་པ་ཞེས་ཀྱང་བྱ། ཟས་ཀྱི་ཚོད་ཤེས་པ་ཞེས་ཀྱང་བྱ་སྟེ། གང་ཟས་ལ་ཆགས་པ་ནི་ཆོག་མི་ཤེས་པ་ཞེས་བྱ། གང་ཟས་ལ་མ་ཆགས་པ་ནི་ཆོག་ཤེས་པ་ཞེས་བྱའོ། །རྗེས་མི་ཆོད་ཅེས་བྱ་བ་ནི་བླ་ན་མེད་པའི་བྱང་ཆུབ་ལ་བསྙེན་པ་སྟེ། གང་ཟག་དེ་ནི་ངས་གསུངས་པ་ལྟར་སོང་མོད་ཀྱི། ཕྱིན་པའི་གནས་མེད་དོ། །འོད་སྲུང་གིས་ཡང་གསོལ་པ། འདུས་བྱས་ཀྱི་དགེ་འདུན་ལ་ཡང་མི་སོགས་པ་ཞེས་བགྱི་ན། འདུས་མ་བྱས་པའི་དགེ་འདུན་ལྟ་ཅི་སྨོས་ཏེ། དེ་ནི་དེ་བཞིན་
གཤེགས་པ་ལ་བགྱི་ན། དེ་བཞིན་གཤེགས་པ་ལ་སོགས་པ་ག་ལ་ཞིག་མཆིས། སོགས་པ་ཞེས་བགྱི་བ་ནི་གསང་བའམ་སྦེད་པ་ལ་བགྱི་ན། དེ་བཞིན་གཤེགས་པ་ནི་གསུང་ལ་སེར་སྣ་མི་མངའ་བས་གསང་བ་ཞེས་བགྱིར་མི་རུང་ངོ་། །རྗེས་མི་ཆོད་ཅེས་བྱ་བ་ནི་འདི་ལྟ་སྟེ། མྱ་ངན་ལས་འདས་པའོ། །མྱ་ངན་ལས་འདས་པ་ཉི་ཟླ་དང་སྐར་མ་དང་། གཟའ་སྐར་དང་། གྲང་བ་དང་། ཚ་བ་དང་རླུང་དང་ཆར་པ་དང་། སྐྱེ་བ་དང་རྒ་བ་དང་། ན་བ་དང་འཆི་བ་དང་། སྲིད་པ་ཉི་ཤུ་ལྔ་པོ་ཡང་མ་མཆིས་ལ། མྱ་ངན་དང་སྡུག་བསྔལ་དང་། ཉོན་མོངས་པ་དང་བྲལ་བའོ། །དེ་ལྟར་མྱ་ངན་ལས་འདས་པ་ནི་དེ་བཞིན་གཤེགས་པའི་གནས་རྟག་པ་མི་འགྱུར་མི་འཕོ་བ་སྟེ། རྒྱུ་དང་རྐྱེན་དེ་ལྟ་བས་ན་དེ་བཞིན་གཤེགས་པ་ནི་ཤིང་སཱ་ལའི་དྲུང་དུ་ཡོངས་སུ་མྱ་ངན་ལས་འདའ་བ་ཆེན་པོས་ཡོངས་སུ་མྱ་ངན་ལས་འདས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཆེན་པོ་ཞེས་བྱ་བ་ནི་རང་བཞིན་ཉིད་ཡངས་ཤིང་རྒྱ་ཆེ་བའོ། །དཔེར་ན་གང་ཟག་གཅིག་ཚེ་ལོ་གྲངས་མེད་པར་ཐུབ་པས་ན་སྐྱེས་བུ་ཆེན་པོ་ཞེས་བྱའོ། །གལ་ཏེ་དམ་པའི་ཆོས་ལ་བདེ་བར་གནས་ན་མིའི་ནང་དུ་ཕུལ་དུ་གྱུར་པ་ཞེས་བྱའོ། །ངས་སྐྱེས་བུ་ཆེན་པོ་བརྒྱད་ཅེས་གསུངས་པ་གང་ཟག་གཅིག་འབའ་ཞིག་གིས་ཐོབ་པའམ། ཀུན་གྱིས་ཐོབ་པར་རུང་། གལ་ཏེ་མི་གཅིག་གིས་བརྒྱད་ཆར་ལྡན་ན། དེ་ནི་མཆོག་དང་ཕུལ་དུ་གྱུར་པ་ཞེས་བྱའོ། །མྱ་ངན་ལས་འདའ་བ་ཞེས་བྱ་བ་ནི་ཉེས་པའི་སྐྱོན་མེད་པ་སྟེ། རིགས་ཀྱི་བུ་དཔེར་ན་མི་ཞིག་དུག་མདས་ཕོག་ན། ན་བའི་སྡུག་བསྔལ་ཆེན་པོ་མྱོང་ངོ་། །དེ་གལ་ཏེ་སྨན་པ་མཁས་པ་དང་ཕྲད་ན། སྨན་པས་སྨན་བཟང་པོས་བསྐུས་པས་ན་བའི་སྡུག་བསྔལ་དང་བྲལ་ཏེ་རབ་ཏུ་བདེ་བར་འགྱུར་ལ། སྨན་པ་དེ་ཡང་གྲོང་དང་། གྲོང་ཁྱེར་དང་གྲོང་འདབ་ཏུ་རྒྱུ་ཞིང་གང་ན་རྨ་བྱུང་བའི་སྡུག་བསྔལ་བ་ཐམས་ཅད་གསོ་ཞིང་སྡུག་བསྔལ་དང་བྲལ་བར་བྱེད་དོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། མངོན་པར་སངས་རྒྱས་ནས་སྨན་པའི་རྒྱལ་པོར་གྱུར་ཏེ། འཛམ་བུའི་གླིང་ན་བསྐལ་པ་ཚད་མེད་པའི་བར་དུ་སྡུག་བསྔལ་གྱིས་རྣམ་པར་
གཟིར་བའི་སེམས་ཅན་འདོད་ཆགས་དང་། ཞེ་སྡང་དང་གཏི་མུག་གི་ཉོན་མོངས་པའི་ཟུག་རྔུས་གཟིར་ཏེ་སྡུག་བསྔལ་ཆེན་པོ་མྱོང་བ་དག་ལ་ཐེག་པ་ཆེན་པོའི་མདོ་སྡེ་བདུད་རྩི་ལྟ་བུའི་ཆོས་ཀྱི་སྨན་གྱིས་དེ་དག་གསོས་ནས་ཕྱོགས་དང་གནས་གཞན་དག་ན་ཉོན་མོངས་པའི་ཟུག་རྔུས་གཟིར་བ་ཡང་མངོན་པར་སངས་རྒྱས་པ་བསྟན་ཏེ། དེ་ཡང་འཚོ་བར་མཛད་དེ། དེ་ལྟ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱ་བ་ནི་རྣམ་པར་གྲོལ་བའི་གནས་ཏེ། སེམས་ཅན་གང་ན་གདུལ་བའི་གནས་དེར་དེ་བཞིན་གཤེགས་པའི་སྐུ་མངོན་པར་སྟོན་པས། ཤིན་ཏུ་ཟབ་མོའི་དོན་ཡང་དག་པ་འདིའི་ཕྱིར་ཡང་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་སྨན་པས་སེམས་ཅན་གྱི་ནད་ཐམས་ཅད་གསོ་ནུས་སམ། རིགས་ཀྱི་བུ་འཇིག་རྟེན་ན་ན་བ་ལ་རྣམ་པ་གཉིས་ཏེ། གསོར་རུང་བ་དང་གསོར་མི་རུང་བའོ། །གང་གསོར་རུང་བ་ནི་སྨན་པས་གསོས་ན་འཚོའོ། ། གསོར་མི་རུང་བ་ནི་སྨན་པས་གསོས་ཀྱང་མི་འཚོའོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་ན། དེ་བཞིན་གཤེགས་པ་ཡང་འཛམ་བུའི་གླིང་ན་སེམས་ཅན་གསོས་སོ་ཞེས་བཀའ་སྩལ་ཏེ། གལ་ཏེ་གསོས་ན་སེམས་ཅན་གྱི་ནང་ན་ཅིའི་སླད་དུ་མྱ་ངན་ལས་མ་འདས་པ་ཡང་མང་། གལ་ཏེ་ཐམས་ཅད་ཀྱིས་མ་ཐོབ་ན། ཅིའི་སླད་དུ་དེ་བཞིན་གཤེགས་པས་ཐམས་ཅད་གསོས་ནས་ཕྱོགས་གཞན་དུ་ཡང་གཤེགས་ཞེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཛམ་བུའི་གླིང་ན་སེམས་ཅན་ལ་རྣམ་པ་གཉིས་སོ། །དད་པ་དང་བཅས་པ་དང་དད་པ་མེད་པའོ། །གང་དད་པ་དང་བཅས་པ་ནི་གསོར་རུང་ངོ་། །དེ་ཅིའི་ཕྱིར་ཞེ་ན། ངེས་པར་མྱ་ངན་ལས་འདས་ཏེ་སྐྱོན་མེད་པའི་ཕྱིར་ངས་འཛམ་བུའི་གླིང་གི་སེམས་ཅན་ཀུན་གསོས་སོ་ཞེས་གསུངས་སོ། །གང་དད་པ་མེད་པ་ནི་ལོག་སྲེད་ཅན་ཞེས་བྱ་སྟེ། ལོག་སྲེད་ཅན་ཞེས་
བྱ་བ་ནི་གསོར་མི་རུང་བའོ། །ལོག་སྲེད་ཅན་ལ་མ་གཏོགས་པ་ཐམས་ཅད་གསོས་པས་ན། མྱ་ངན་ལས་འདའ་བ་ལ་སྐྱོན་མེད་དོ། །གསོལ་པ། བཅོམ་ལྡན་འདས་མྱ་ངན་ལས་འདའ་བ་ཞེས་བགྱི་བ་གང་ལགས། རིགས་ཀྱི་བུ་མྱ་ངན་ལས་འདའ་བ་ཞེས་བྱ་བ་ནི་རྣམ་པར་གྲོལ་བའོ། །འོད་སྲུང་གིས་ཡང་གསོལ་པ། རྣམ་པར་གྲོལ་བ་ཞེས་བགྱི་བ་གཟུགས་ལགས་སམ། འོན་ཏེ་གཟུགས་མ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལ་ལ་ནི་གཟུགས་ཀྱང་ཡིན། ལ་ལ་ནི་གཟུགས་མ་ཡིན་ནོ། །གཟུགས་མ་ཡིན་པ་ནི་ཉན་ཐོས་དང་རང་སངས་རྒྱས་ཀྱིས་རྣམ་པར་གྲོལ་བའོ། །གཟུགས་ཞེས་བྱ་བ་ནི་སངས་རྒྱས་བཅོམ་ལྡན་འདས་ཀྱི་རྣམ་པར་གྲོལ་བའོ། །རིགས་ཀྱི་བུ་དེ་ལྟ་བས་ན་རྣམ་པར་གྲོལ་བ་ནི་གཟུགས་ཀྱང་ཡིན་ལ་གཟུགས་ཀྱང་མ་ཡིན་ནོ། །དེ་བཞིན་གཤེགས་པས་ཉན་ཐོས་ཀྱི་ཉེ་གནས་ལ་ནི་གཟུགས་མ་ཡིན་ནོ། ། ཞེས་གསུངས་སོ། །གསོལ་པ། བཅོམ་ལྡན་འདས་ཉན་ཐོས་དང་རང་སངས་རྒྱས་ལ་གལ་ཏེ་གཟུགས་མ་མཆིས་ན་ཅི་ལ་གནས། རིགས་ཀྱི་བུ་དཔེར་ན་འདུ་ཤེས་མེད་འདུ་ཤེས་མེད་མིན་གྱི་ལྷ་དང་འདྲ་སྟེ་གཟུགས་ཀྱང་ཡིན་ལ་གཟུགས་ཀྱང་མ་ཡིན་པས་ངས་གཟུགས་མ་ཡིན་ཞེས་གསུངས་སོ། །གལ་ཏེ་ཁ་ཅིག་གིས་འདི་སྐད་དུ་འདུ་ཤེས་མེད་འདུ་ཤེས་མེད་མིན་གྱི་ལྷ་དག་གལ་ཏེ་གཟུགས་མ་ཡིན་ན་ཅི་ལ་གནས་ཏེ་འགྲོ་བ་དང་། སོང་བ་དང་འོང་བར་འགྱུར་ཞེས་རྒོལ་ན། དེ་ལ་དོན་དེ་དག་ནི་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ཡིན་པས། ཉན་ཐོས་དང་རང་སངས་རྒྱས་ཀྱིས་ཤེས་པ་མ་ཡིན་ཏེ། རྣམ་པར་གྲོལ་བ་ཡང་དེ་དང་འདྲ་སྟེ་གཟུགས་ཀྱང་ཡིན་ལ་གཟུགས་ཀྱང་མ་ཡིན་པས་གཟུགས་མ་ཡིན་ནོ་ཞེས་གསུངས་སོ། །འདུ་ཤེས་ཀྱང་ཡིན་ལ་འདུ་ཤེས་ཀྱང་མ་ཡིན་པས་འདུ་ཤེས་མ་ཡིན་ཞེས་གསུངས་ཏེ། དོན་དེ་དག་ནི་སངས་རྒྱས་རྣམས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པ་མ་ཡིན་ནོ།། །།
བམ་པོ་བདུན་པ། དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཐུགས་བརྩེ་བའི་སླད་དུ་ཡོངས་སུ་མྱ་ངན་ལས་འདས་པ་ཆེན་པོ་རྣམ་པར་གྲོལ་བའི་དོན་ཡང་རྒྱས་པར་བཤད་དུ་གསོལ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཤིན་ཏུ་ལེགས་སོ་ཤིན་ཏུ་ལེགས་སོ། །རིགས་ཀྱི་བུ་ཡང་དག་པར་རྣམ་པར་གྲོལ་བ་ཞེས་བྱ་བ་ནི་གང་རྣམ་པར་བཅིང་བའི་བཅིངས་པ་ཐམས་ཅད་དང་ཡོངས་སུ་བྲལ་བའོ། །དེ་ལྟར་ཡང་དག་པར་གྲོལ་བ་ནི་བཅིངས་པ་ཐམས་ཅད་དང་ཡོངས་སུ་བྲལ་བས་སྐྱེ་བ་ཡང་མེད་ལ་འདུས་པ་ཡང་མེད་དོ། །འདི་ལྟ་སྟེ། དཔེར་ན་ཕ་མ་འདུས་ཤིང་ཕྲད་པ་ལས་བུ་བྱུང་ངོ་། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་པས་ན་རྣམ་པར་གྲོལ་བ་དེ་ནི་མ་སྐྱེས་པ་ཞེས་བྱའོ། །འོད་སྲུང་དཔེར་ན་མར་གྱི་སྙིང་པོ་ནི་རང་བཞིན་གྱིས་རྣམ་པར་དག་གོ །དེ་བཞིན་གཤེགས་པ་ཡང་དེ་དང་འདྲ་སྟེ། །ཕ་མ་འདུས་ཤིང་ཕྲད་པའི་རྐྱེན་གྱིས་བྱུང་བ་མ་ཡིན་ཏེ། རང་བཞིན་གྱིས་ཡོངས་སུ་དག་ཀྱང་སོ་སོའི་སྐྱེ་བོ་དག་གདུལ་བའི་ཕྱིར་ཕ་མ་མངོན་པར་བསྟན་ཏོ། །ཡང་དག་པར་རྣམ་པར་གྲོལ་བ་ཞེས་བྱ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པའི་རྣམ་པར་གྲོལ་བ་ལ་ནི་གཉིས་སུ་མེད་དབྱེར་མེད་དོ། །དཔེར་ན་དབྱར་གྱི་དུས་སུ་ས་བོན་བཏབ་ན་དྲོད་གཤེར་གྱིས་རླན་པས་དེ་མ་ཐག་ཏུ་སྐྱེ་ཞིང་འབྱུང་ངོ་། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་ནོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་སྟོང་ཞིང་མེད་པའོ། །སྟོང་ཞིང་མེད་པ་ནི་རྣམ་པར་གྲོལ་བའོ། །རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་སྟོང་པ་མེད་པ་བྱས་པ་མ་ཡིན་བྱེད་པ་མ་ཡིན་ནོ། །བྱས་པ་ཞེས་བྱ་བ་ནི་མཁར་དང་། གྲོང་དང་། ཁང་ཁྱིམ་དང་། ཉེན་དང་ཅོག་བར་རོ། །ཡང་དག་པར་རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟ་བས་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་
གྲོལ་བ་ཞེས་བྱ་བ་ནི་འདུས་མ་བྱས་པའི་ཆོས་སོ། །འདུས་བྱས་ནི་དཔེར་ན་རྫ་མ་དང་འདྲ་སྟེ། འཇིག་པའི་ཆོས་ཅན་ནོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། ཡང་དག་པར་རྣམ་པར་གྲོལ་བ་ནི་མ་སྐྱེས་པ་མི་འགོག་པའོ། །དེ་བས་ན་རྣམ་པར་གྲོལ་བ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ཡང་དེ་དང་འདྲ་བར་མི་སྐྱེ་མི་འགོག། མི་རྒ་མི་འཆི་མི་འཇིག་མི་འཆག་སྟེ། འདུས་བྱས་ཀྱི་ཆོས་མ་ཡིན་ནོ། །དོན་དེ་ལྟ་བས་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཏེ་མི་རྒ་མི་འཆི་བ་ཞེས་བྱའོ། །དེ་ཡང་གང་ཞེ་ན། རྒས་ཞེས་བྱ་བ་ནི་འཕོ་ཞིང་འགྱུར་བ། སྐྲ་དཀར་བ་གདོང་ལ་གཉེར་མ་བྱུང་བའོ། །ཤི་ཞེས་བྱ་བ་ནི་ལུས་ཞིག་སྟེ་ཚེ་འཕོས་པའོ། །དངོས་པོ་འདི་དག་ནི་རྣམ་པར་གྲོལ་བ་ལ་མེད་དེ། དེ་མེད་པས་ན་རྣམ་པར་གྲོལ་བ་ཞེས་བྱའོ། །དེ་བཞིན་གཤེགས་པ་ལ་སྐྲ་དཀར་བ་གདོང་ལ་གཉེར་མར་འགྱུར་བ་འདུས་བྱས་པའི་ཆོས་མེད་དོ། །དེ་བས་ན་དེ་བཞིན་གཤེགས་པ་ལ་རྒ་བ་མེད་དོ། །རྒ་བ་མེད་པས་ན་འཆི་བའང་མེད་དོ། །གཞན་ཡང་རྣམ་པར་གྲོལ་བ་ནི་ན་བ་མེད་པའོ། །ན་བ་ཞེས་བྱ་བ་ནི་ནད་བཞི་བརྒྱ་རྩ་བཞི་དང་། དེ་མ་ཡིན་པའི་རྐྱེན་གཞན་གྱིས་ལུས་ལ་གནོད་པར་འགྱུར་བའོ། །དེ་དག་གང་ཡང་མེད་པས་ན་རྣམ་པར་གྲོལ་བ་ཞེས་བྱའོ། །གང་ནད་མེད་པ་ནི་ཡང་དག་པར་རྣམ་པར་གྲོལ་བའོ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ལ་ན་བ་མེད་པས་ན་ཆོས་ཀྱི་སྐུ་ལ་ཡང་ན་བ་མེད་དོ། །དེ་ལྟར་ན་བ་མེད་པས་དེ་བཞིན་གཤེགས་པ་ཞེས་བྱའོ། །ཤི་ཞེས་བྱ་བ་ནི་ལུས་ཞིག་སྟེ་ཚེ་འཕོས་པའོ། །དེ་ལ་ཤི་བ་མེད་པས་ཟིལ་དངར་ལྟ་བུའོ། །ཟིལ་དངར་ནི་ཡང་དག་པར་རྣམ་པར་དག་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་ལྟར་དེ་བཞིན་གཤེགས་པ་ནི་དེ་ལྟ་བུའི་ཡོན་ཏན་ཕུན་སུམ་ཚོགས་པ་དང་ལྡན་ན་ཅིའི་ཕྱིར་དེ་བཞིན་གཤེགས་པ་ལ་མི་རྟག་ཅེས་བྱ། གལ་ཏེ་དེ་བཞིན་གཤེགས་པ་ལ་མི་རྟག་ཅེས་སྨྲ་ན།
དེ་ནི་གནས་མ་ཡིན་ནོ། །དེ་ནི་རྡོ་རྗེ་ལྟ་བུའི་སྐུ་ཡིན་ན་ཅིའི་ཕྱིར་མི་རྟག །དེ་བས་ན་དེ་བཞིན་གཤེགས་པ་ལ་ནི་ཚེ་ཟད་པ་ཞེས་མི་བྱའོ། །དེ་བཞིན་གཤེགས་པ་ནི་ཡོངས་སུ་དག་པ་དྲི་མ་མེད་པའོ། །དེ་བཞིན་གཤེགས་པའི་སྐུ་ནི་མངལ་གྱིས་མ་གོས་པ་སྟེ། མེ་ཏོག་པུན་ད་རཱི་ཀ་ལྟར་རང་བཞིན་གྱིས་རྣམ་པར་དག་པའོ། །དེ་བཞིན་གཤེགས་པའི་རྣམ་པར་གྲོལ་བ་ཡང་དེ་དང་འདྲའོ། །རྣམ་པར་གྲོལ་བ་དེ་ཉིད་དེ་བཞིན་གཤེགས་པའོ། །དེ་བས་ན་དེ་བཞིན་གཤེགས་པ་ནི་ཡོངས་སུ་དག་ཅིང་དྲི་མ་མེད་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཟག་པའི་རྨ་ཐམས་ཅད་ལྷག་མ་མ་ལུས་པར་ཟད་པའོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཟག་པའི་རྨ་ཐམས་ཅད་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྩོད་པ་མེད་པ་སྟེ། དཔེར་ན་མི་ལྟོགས་པ་ཞིག་ཁ་ཟས་མཐོང་ན་ཤིན་ཏུ་ཆགས་པར་འགྱུར་རོ། །རྣམ་པར་གྲོལ་བ་ནི་དེ་ལྟ་མ་ཡིན་ནོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བདེ་བ་ཞི་བའོ། །བུས་པ་མ་རབས་དག་ནི་དབང་སྒྱུར་ཆེན་པོ་ལ་བདེ་ཞིང་ཞི་བ་ཞེས་ཟེར་བ་ཚིག་དེ་ནི་བརྫུན་ཏེ་བདེན་པ་མ་ཡིན་ནོ། །ཡང་དག་པར་བདེ་ཞིང་ཞི་བ་ནི་མཐར་རྣམ་པར་གྲོལ་བའོ། །མཐར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་བདེ་བའོ། །དཔེར་ན་དགྲ་མང་པོའི་གནས་ནི་བདེ་བ་མ་ཡིན་ནོ། །དགྲ་མེད་པའི་གནས་ནི་རབ་ཏུ་བདེ་བ་ཞེས་བྱའོ། །རྣམ་པར་གྲོལ་བ་ཡང་འཇིགས་པ་མེད་པས་ན་རབ་ཏུ་བདེ་བ་ཞེས་བྱའོ། །དེ་བས་ན་རབ་ཏུ་བདེ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ཞེས་བྱ་བ་ནི་ཆོས་སོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཉམ་པའི་ཟླ་མེད་པའོ། །མཉམ་པའི་ཟླ་མེད་པ་ཞེས་བྱ་བ་ནི་དཔེར་ན་རྒྱལ་པོ་དག་ནི་ཡུལ་ས་མཉམ་པའི་ཟླ་ཡོད་པས་མཉམ་མོ། །རྣམ་པར་གྲོལ་བ་ལ་ནི་དེ་ལྟ་བུ་མེད་དོ། །མཉམ་པའི་ཟླ་མེད་པ་ནི་དཔེར་ན་འཁོར་ལོས་སྒྱུར་བའི་རྒྱལ་པོ་ལ་ནི་མཉམ་
པའི་ཟླ་མེད་དོ། །རྣམ་པར་གྲོལ་བ་ལ་ཡང་དེ་དང་འདྲ་སྟེ། མཉམ་པའི་ཟླ་མེད་དོ། །མཉམ་པའི་ཟླ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའི་ཆོས་ཀྱི་འཁོར་ལོས་སྒྱུར་བའི་རྒྱལ་པོའོ། །དེ་བས་ན་དེ་བཞིན་གཤེགས་པ་ལ་མཉམ་པའི་ཟླ་མེད་དེ། མཉམ་པའི་ཟླ་ཡོད་ཅེས་བྱ་བའི་གནས་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མྱ་ངན་མེད་པའོ། །མྱ་ངན་ཡོད་ཅེས་བྱ་བ་ནི་དཔེར་ན་རྒྱལ་པོ་དག་ཕས་རྒོལ་བའི་དགྲས་འཇིགས་པས་མྱ་ངན་བྱེད་དོ། ། རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །དཔེར་ན་དགྲ་ཀུན་བཅོམ་ན། དེ་ལ་ནི་མྱ་ངན་ནམ་དོགས་པ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། མྱ་ངན་ནམ་འཇིགས་པ་མེད་པའོ། །མྱ་ངན་ནམ་འཇིགས་པ་མེད་པ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མྱ་ངན་དང་རྒ་བ་མེད་པའོ། །དཔེར་ན་བུད་མེད་ཅིག་བུ་གཅིག་པ་ཡུལ་གཞན་དུ་སོང་བ་ལས་ཤིའོ། །ཞེས་གཏམ་ངན་ཐོས་ན་མྱ་ངན་གྱིས་སྡུག་བསྔལ་བར་འགྱུར་རོ། །ཕྱིས་མ་ཤིའོ་ཞེས་ཐོས་ན་དེ་མ་ཐག་ཏུ་དགའ་བ་སྐྱེའོ། །རྣམ་པར་གྲོལ་བ་ལ་ནི་དངོས་པོ་དེ་དག་མེད་དེ། མྱ་ངན་དང་དགའ་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྡུལ་དང་དྲི་མ་མེད་པའོ། །དཔེར་ན་དཔྱིད་ཀྱི་དུས་ན་ཉི་མ་ནུབ་ན་རླུང་དང་རྡུལ་ལྡང་ངོ་། །རྣམ་པར་གྲོལ་བ་ལ་ནི་དངོས་པོ་དེ་དག་གང་ཡང་མེད་དོ། །རྡུལ་མེད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོའི་གཙུག་ཕུད་ལ་འདོགས་པའི་ནོར་བུ་རིན་པོ་ཆེ་ནི་དྲི་མ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དྲི་མ་དག་མེད་དོ། །དྲི་མ་མེད་པ་ནི་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དཔེར་ན་གསེར་བཙོ་མ་ནི་བྱེ་མ་དང་མ་འདྲེས་པས་རིན་པོ་ཆེ་
ཡང་དག་པ་ཞེས་བྱ་སྟེ། གང་ཟག་གིས་རྙེད་ན་དེ་ལ་ནོར་གྱི་དབྱིག་ཏུ་འདུ་ཤེས་སོ། །རྣམ་པར་གྲོལ་བ་ཉིད་ཀྱང་རིན་པོ་ཆེ་ཡང་དག་པ་དང་འདྲ་སྟེ། རིན་པོ་ཆེ་ཡང་དག་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དཔེར་ན་རྫ་མ་བཅག་པ་ནི་སྒྲ་མི་སྙན་ནོ། །རིན་པོ་ཆེ་རྡོ་རྗེའི་བུམ་པ་ནི་དེ་ལྟ་བུ་མ་ཡིན་ཏེ། ཡང་དག་པར་རྣམ་པར་གྲོལ་བ་ལ་ཡང་སྒྲ་མི་སྙན་པ་མེད་དོ། །རིན་པོ་ཆེ་རྡོ་རྗེའི་བུམ་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བས་ན་དེ་བཞིན་གཤེགས་པའི་སྐུ་ནི་མི་འཇིག་པའོ། །སྒྲ་མི་སྙན་པ་ཞེས་བྱ་བ་ནི་འདི་ལྟ་སྟེ། ཨེ་རཎྜའི་འབྲས་བུ་དབྱར་ཉི་མ་ཚ་བ་ལ་སྐམས་ན་ཉི་མས་གདུངས་པས་སྒྲ་འབྱུང་ངོ་། །རྣམ་པར་གྲོལ་བ་ལ་ནི་དངོས་པོ་དེ་དག་མེད་དེ། རིན་པོ་ཆེ་རྡོ་རྗེའི་བུམ་པ་ལྟར་མི་སྙན་པ་ཆག་པའི་སྒྲ་མེད་དོ། །གལ་ཏེ་མི་མང་པོ་བརྒྱ་སྟོང་གྲངས་མེད་པ་ཐམས་ཅད་ཀྱིས་ཅིག་ཅར་མདའ་འཕངས་ཀྱང་འཇིག་པར་མི་འགྱུར་ལ་མི་སྙན་པ་ཆག་པའི་སྒྲ་མེད་དོ། །མི་སྙན་པ་ཆག་པའི་སྒྲ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །འདི་ལྟ་སྟེ། མི་དབུལ་པོ་ཞིག་ལ་གཞན་གྱི་བུ་ལོན་ཆགས་ན་བཟུང་སྟེ། ལྕགས་དང་ཁོང་སྒྲིལ་དང་། ལྟོང་འདོགས་ཏེ་སྡུག་བསྔལ་བར་བྱེད་དོ། །རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དེ་བུ་ལོན་ཆགས་པ་ཡང་མེད་དོ། །འདི་ལྟ་སྟེ། ཚོང་དཔོན་ཕྱུག་པོ་ནི་ནོར་རིན་པོ་ཆེ་གྲངས་མེད་པ་ཞིག་བདོག་ལ་མཐུ་དང་དབང་དུ་ལྡན་ལ། བུ་ལོན་ཆགས་པ་ཡང་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། ཆོས་ཀྱི་ནོར་རིན་པོ་ཆེ་མང་པོ་དང་ལྡན་ལ། མཐུ་དང་དབང་ཡོད་པས་བུ་ལོན་ཆགས་པ་ཡང་མེད་དོ། །བུ་ལོན་ཆགས་པ་མེད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཡོངས་སུ་གདུང་བ་མེད་
པའོ། །འདི་ལྟ་སྟེ་དཔྱིད་ཉི་མ་ཚ་བ་ལ་འགྲོ་བ་དང་། དབྱར་མངར་པོ་ཟ་བ་དང་། དགུན་གྲང་བས་རེག་པའོ། །ཡང་དག་པར་རྣམ་པར་གྲོལ་བ་ལ་ནི་དེ་འདྲ་བའི་ཡིད་དུ་མི་འོང་བའི་དངོས་པོ་གང་ཡང་མེད་དོ། །ཡོངས་སུ་གདུང་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །ཡོངས་སུ་གདུང་བ་ནི་འདི་ལྟ་སྟེ། མི་ཞིག་ཉ་ཤ་འགྲངས་པར་ཟོས་པའི་འོག་ཏུ་འོ་མ་འཐུངས་ན་མི་དེ་ནི་ཤི་བ་ལས་རིང་བ་མ་ཡིན་ནོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །མི་དེས་གལ་ཏེ་སྨན་བདུད་རྩི་ལྟ་བུ་ཞིག་རྙེད་ན་ནི་ནད་དེ་ཡང་འཚོ་བར་འགྱུར་རོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲའོ། །སྨན་བདུད་རྩི་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་དེ་ནི་དེ་བཞིན་གཤེགས་པ་ཡིན་ན་དེ་ལ་གདུང་བ་དང་མི་གདུང་བ་ཞེས་ཇི་སྐད་བྱ། འདི་ལྟ་སྟེ་བྱིས་པ་མ་རབས་ང་རྒྱལ་གྱི་དབང་དུ་གྱུར་པ་དག་ནི་འདི་སྙམ་དུ་སེམས་སོ། །སེམས་ཅན་ཐམས་ཅད་ཀྱི་ནང་ན་བདག་ལ་གསོད་ནུས་པ་མེད་དོ་ཞེ་ནས་སྟག་དང་། སྦྲུལ་དང་། སྲིན་གདུག་པ་དག་འཛིན་ཏེ། མ་རབས་དེ་ནི་ཚེ་ཟད་པའི་མཐའ་ལས་མི་རིང་སྟེ། གློ་བུར་དུ་འཆི་བར་རིག་པར་བྱའོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །ཡོངས་སུ་མི་གདུང་བ་ནི་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོའི་ནོར་བུ་རིན་པོ་ཆེ་ལྟ་བུ་སྦུར་བ་ལ་སོགས་པ་སྲིན་གདུག་པ་རྣམ་པ་དགུ་བཅུ་རྩ་དྲུག་སྙེད་འདུལ་ནུས་ཏེ། གང་ནོར་བུ་རིན་པོ་ཆེ་དེའི་དྲི་བྲོ་བ་ཙམ་གྱིས་གདུག་པ་ཐམས་ཅད་མེད་པར་འགྱུར་རོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། སྲིད་པ་ཉི་ཤུ་རྩ་ལྔ་པོ་ལས་རིང་དུ་གྱུར་ཏོ། །གདུག་པ་མེད་པ་ཞེས་བྱ་བ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་གདུག་པ་མེད་པ་ནི་ནམ་མཁའ་ལྟ་བུའོ། །རྣམ་པར་གྲོལ་བ་ཡང་དེ་དང་འདྲ་སྟེ། ནམ་མཁའ་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་
གྲོལ་བ་ནི་དེ་བཞིན་གཤེགས་པའོ། །རྣམ་པར་གདུང་བ་ཞེས་བྱ་བ་ནི་རྩྭ་སྐམ་པོའི་དྲུང་དུ་མེ་བུས་ན་ཚིག་པར་འགྱུར་རོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །གཞན་ཡང་ཡོངས་སུ་གདུང་བ་མེད་པ་ནི་འདི་ལྟ་སྟེ། ཉི་ཟླ་ནི་སེམས་ཅན་དག་ལ་ཡོངས་སུ་གདུང་བར་མི་འགྱུར་རོ། །རྣམ་པར་གྲོལ་བ་ཡང་དེ་དང་འདྲ་སྟེ། སེམས་ཅན་ཐམས་ཅད་ལ་ཡོངས་སུ་གདུང་བར་མི་འགྱུར་རོ། །གདུང་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མི་གཡོ་བའི་ཆོས་ཅན་ཏེ། དཔེར་ན་བྱམས་པ་དང་སྡང་བ་མེད་པ་ལྟ་བུའོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་དངོས་པོ་མེད་དོ། །མི་གཡོ་བ་ཞེས་བྱ་བ་ནི་འཁོར་ལོས་སྒྱུར་བའི་རྒྱལ་པོ་ལྟ་བུ་སྟེ། དེ་ལ་ནི་རྒྱལ་པོ་དེ་དང་འདྲ་བ་གྲོགས་སུ་འགྱུར་བ་མེད་དོ། །དེ་ལ་དེ་འདྲ་བའི་གྲོགས་སུ་འགྱུར་བ་ཡོད་ཅེས་བྱ་བའི་གནས་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། གཞན་གྲོགས་སུ་འགྱུར་བ་མེད་དེ། གྲོགས་སུ་འགྱུར་བ་ཡོད་ཅེས་བྱ་བའི་གནས་མེད་དོ། །རྒྱལ་པོ་དེ་ལ་གྲོགས་སུ་འགྱུར་བ་མེད་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཡིན་ནོ། །གཞན་ཡང་མི་གཡོ་བ་ཞེས་བྱ་བ་ནི་འདི་ལྟ་སྟེ། དཔེར་ན་གོས་དཀར་པོ་ནི་ཁ་དོག་བསྒྱུར་སླའོ། །རྣམ་པར་གྲོལ་བ་ནི་དེ་ལྟ་མ་ཡིན་ནོ། །དཔེར་ན་མེ་ཏོག་པ་ཤ་ཀ་ཞེས་བྱ་བ་ལ་མནམ་པའམ། ཁ་དོག་སྔོན་པོར་འདུག་ཅེས་བྱ་བའི་གནས་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལ་མནམ་པའམ། མདོག་གཞན་དུ་འདུག་ཅེས་བྱ་བའི་གནས་མེད་དོ། །དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྨད་དུ་བྱུང་བའོ། །འདི་ལྟ་སྟེ་ཆུའི་ནང་ན་པད་མོ་སྐྱེས་པ་ནི་ངོ་མཚར་དུ་མི་བྱའོ། །མེའི་ནང་ནས་པད་མོ་སྐྱེས་ན་རྨད་དུ་ངོ་མཚར་དུ་བྱ་སྟེ།
དེ་མཐོང་ན་ཐམས་ཅད་དགའ་བར་འགྱུར་རོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། གང་མཐོང་བ་ཐམས་ཅད་སེམས་རབ་ཏུ་དགའ་བར་འགྱུར་རོ། །རྨད་དུ་བྱུང་བ་ཞེས་བྱ་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཀྱི་སྐུའོ། །གཞན་ཡང་རྨད་དུ་བྱུང་བ་ཞེས་བྱ་བ་ནི་དཔེར་ན་བུ་བཙས་མ་ཐག་པ་ལ་སོ་མེད་ཀྱི་བགས་ཀྱིས་ཆེར་སྐྱེས་ནས་གདོད་སོ་ཡང་སྐྱེ་བར་འགྱུར་རོ། །རྣམ་པར་གྲོལ་བ་ནི་དེ་ལྟ་བུ་མ་ཡིན་ཏེ། སྐྱེ་བ་དང་མི་སྐྱེ་བ་ཞེས་བྱ་བ་མེད་དོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་སྟོང་པ། ཞི་བ་མ་ངེས་པ་མེད་པའོ། །མ་ངེས་པ་ནི་ལོག་སྲེད་ཅན་ལ་བྱ་སྟེ། མཐར་རྩ་བ་ཉམས་པ་ལས་མི་འགྱུར་ཞིང་འཚང་རྒྱ་བའི་གནས་མེད་དོ། །དེ་ཅིའི་ཕྱིར་ཞེ་ན། གལ་ཏེ་གང་ཟག་དེས་སངས་རྒྱས་ཀྱི་དམ་པའི་ཆོས་ལ་དད་པའི་ཡོངས་སུ་དག་པ་བསྐྱེད་ན། དེ་ནི་ལོག་སྲེད་མེད་པར་བྱས་པ་ཡིན་ཏེ། གལ་ཏེ་དགེ་བསྙེན་པར་འགྱུར་ན་ཡང་། ལོག་སྲེད་མེད་པར་བྱས་པ་ཡིན་ནོ། །རྩ་བ་ཉམས་པ་ཡང་ཁ་ན་མ་ཐོ་བའི་སྡིག་དེ་མེད་པར་བྱས་ན། མངོན་པར་འཚང་རྒྱ་བར་འགྱུར་རོ། །དེ་བས་ན་མཐར་མི་འགྱུར་ཞིང་མངོན་པར་འཚང་མི་རྒྱའོ་ཞེས་བྱ་བའི་གནས་མེད་དོ། །ཡང་དག་པར་རྣམ་པར་གྲོལ་བ་ལ་ནི་དེ་ལྟ་བུའི་འགོག་པའམ་མེད་པར་བྱས་པའི་དངོས་པོ་མེད་དོ། །གཞན་ཡང་སྟོང་པ་ཞི་བ་ཞེས་བྱ་བ་ནི་ཆོས་ཀྱི་དབྱིངས་ཡིན་ཏེ། ཆོས་ཀྱི་དབྱིངས་ཇི་ལྟ་བ་ཉིད་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་ལོག་སྲེད་ཅན་ཞེས་བྱ་བ་འགགས་ཏེ་ཟད་པར་བྱས་ན་དེ་ལ་ལོག་སྲེད་ཅན་ཞེས་མི་བྱའོ། །དེ་ལ་ལོག་སྲེད་ཅན་ཞེས་བྱ་བ་གང་ཞེ་ན། ལོག་སྲེད་ཅན་ཞེས་བྱ་བ་ནི་དགེ་བའི་རྩ་བ་ཐམས་ཅད་བཅད་དེ། དགེ་བའི་ཆོས་ཐམས་ཅད་ལ་མི་གནས་ཤིང་། དགེ་བའི་སེམས་སྐད་ཅིག་ཙམ་ཡང་མི་འབྱུང་བའོ། །ཡང་དག་པར་རྣམ་པར་གྲོལ་བ་ལ་ནི་དངོས་པོ་
དེ་དག་གང་ཡང་མེད་དོ། །དངོས་པོ་གང་ཡང་མེད་པས་ན་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་དཔག་ཏུ་མེད་པའོ། །འདི་ལྟ་སྟེ་དཔེར་ན་ཁྲེ་འབྲས་ཀྱི་ཕུང་པོ་ལ་ཚད་དཔག་ཅིང་ཤེས་པར་རུང་ངོ་། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་ནོ། །འདི་ལྟ་སྟེ། རྒྱ་མཚོ་ཆེན་པོ་ནི་ཚད་དཔག་ཅིང་གཞལ་དུ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་ཚད་དཔག་ཅིང་གཞལ་དུ་མེད་དོ། །དཔག་ཏུ་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཚད་མེད་པའོ། །ཇི་ལྟར་སེམས་ཅན་ཐམས་ཅད་ལ་ལས་ཀྱི་རྣམ་པར་སྨིན་པ་མང་བ་བཞིན་དུ་རྣམ་པར་གྲོལ་བ་ཡང་དེ་དང་འདྲ་སྟེ་སྨིན་པ་ཚད་མེད་དོ། །སྨིན་པ་ཚད་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཡངས་ཤིང་རྒྱ་ཆེ་བའོ། །འདི་ལྟ་སྟེ་རྒྱ་མཚོ་ཆེན་པོ་ནི་མཉམ་པའི་ཟླ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་མཉམ་པའི་ཟླ་མེད་དོ། །མཉམ་པའི་ཟླ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བླ་ན་མེད་པའི་མཆོག་གོ །འདི་ལྟ་སྟེ། དཔེར་ན་ནམ་མཁའ་ནི་མཆོག་ཏུ་མཐོ་སྟེ་ཟླ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་ཟླ་མེད་པར་མཆོག་ཏུ་མཐོ་བའོ། །མཐོ་སྟེ་ཟླ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གནས་པ་མེད་དོ། །འདི་ལྟ་སྟེ། རི་དགས་ཀྱི་རྒྱལ་པོ་སེང་གེ་འདུག་པའི་གནས་སུ་ནི་རི་དགས་གཞན་ཐམས་ཅད་མི་གནས་སོ། །རྣམ་པར་གྲོལ་བ་ཡང་དེ་དང་འདྲ་སྟེ་གནས་མེད་དོ། །གནས་པ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་
རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བླ་ན་མེད་པའོ། །དཔེར་ན་བྱང་ཕྱོགས་ནི་ཕྱོགས་ཐམས་ཅད་ཀྱི་བླ་མའོ། །རྣམ་པར་གྲོལ་བ་ཡང་དེ་དང་འདྲ་སྟེ་བླ་ན་མེད་པའོ། །བླ་ན་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་བླ་ན་མེད་པའི་ཡང་བླ་ན་མེད་པའོ། །དཔེར་ན་བྱང་ཕྱོགས་ནི་ཤར་ཕྱོགས་ཀྱི་བླ་ན་མེད་པའི་ཡང་བླ་ན་མེད་པའོ། །རྣམ་པར་གྲོལ་བ་ཡང་དེ་དང་འདྲ་སྟེ། བླ་ན་མེད་པའི་ཡང་བླ་ན་མེད་པའོ། །བླ་ན་མེད་པའི་ཡང་བླ་ན་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རྟག་པའི་ཆོས་ཅན་ནོ། །དཔེར་ན་ལྷ་དང་མི་ནི་ལུས་ཞིག་སྟེ་ཚེ་འཕོ་བའི་ཆོས་ལ་མི་རྟག་སྟེ། རྟག་པ་མ་ཡིན་ནོ། །རྣམ་པར་གྲོལ་བ་ནི་དེ་དང་འདྲ་སྟེ། མི་རྟག་པ་མ་ཡིན་ནོ། །མི་རྟག་པ་མ་ཡིན་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་སྲ་བའི་སྙིང་པོ་ཅན་ནོ། །འདི་ལྟ་སྟེ། སེང་ལྡེང་དང་། ཙན་དན་དང་། ཨ་ག་རུ་ནི་རང་བཞིན་གྱིས་སྲ་བའོ། །རྣམ་པར་གྲོལ་བ་ཡང་དེ་དང་འདྲ་སྟེ། རང་བཞིན་གྱིས་སྲ་བ་བརྟན་པའོ། ། རང་བཞིན་གྱིས་སྲ་བ་བརྟན་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གསོ་བ་མ་ཡིན་པ་ཞེས་བྱའོ། །དཔེར་ན་འདམ་བུ་དང་སྨྱུག་མ་ནི་ཁོང་སྟོང་པས་གསོབ་བོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པ་ཡིན་པར་རིག་པར་བྱའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་ཅིས་ཀྱང་མི་གོས་པའོ། །དཔེར་ན་རྩིག་པ་ཕྱི་བདར་མ་བྱས་ན། སྲིན་བུ་དང་སྦྲང་བུ་དག་དེ་ལ་གནས་ཤིང་རྒྱུའོ། །གལ་ཏེ་འཇི་བས་བསྐུས་ལ་རི་མོས་བྲིས་ན་སྲིན་བུ་དག་ཚོན་རྩིའི་དྲི་ཚོར་ནས་མི་གནས་སོ། །དེ་ལྟར་མི་
གནས་པ་ནི་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཐའ་མེད་པའོ། །དཔེར་ན་གྲོང་ཁྱེར་ནི་མཐའ་ཡོད་དེ། རྣམ་པར་གྲོལ་བ་ནི་དེ་ལྟ་བུ་མ་ཡིན་ནོ། །དཔེར་ན་ནམ་མཁའ་ནི་མཐའ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་མཐའ་མེད་དོ། །དེ་བས་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བལྟར་མེད་པའོ། །འདི་ལྟ་སྟེ། ནམ་མཁའ་སྟོང་པ་ལ་བྱའི་རྗེས་ཤིན་ཏུ་བལྟ་བར་དཀའོ། །ཤིན་ཏུ་བལྟ་བར་དཀའ་བ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཤིན་ཏུ་ཟབ་པ་ཞེས་བྱའོ། །དེ་ཅིའི་ཕྱིར་ཞེ་ན། ཉན་ཐོས་དང་རང་སངས་རྒྱས་ཐམས་ཅད་ཀྱིས་འཇུག་མི་ནུས་པའི་ཕྱིར་རོ། །འཇུག་མི་ནུས་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་ཤིན་ཏུ་ཟབ་པ་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྟི་སྟང་བྱེད་པའོ། །དཔེར་ན་བུ་སྲི་ཞུ་ཆེ་བ་དག་ནི་ཕ་མ་ལ་ཤིན་ཏུ་བསྟི་སྟང་དང་བཀུར་སྟི་བྱེད་དེ། བསོད་ནམས་ཤིན་ཏུ་ཟབ་བོ། །བསོད་ནམས་ཤིན་ཏུ་ཟབ་པ་དེ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བལྟར་མི་མཐོང་བའོ། །དཔེར་ན་མི་དག་བདག་གི་སྤྱི་བོ་མི་མཐོང་བ་བཞིན་དུ་རྣམ་པར་གྲོལ་བ་ཡང་དེ་དང་འདྲ་སྟེ། ཉན་ཐོས་དང་རང་སངས་རྒྱས་ཐམས་ཅད་ཀྱིས་བལྟར་མི་མཐོང་ངོ་། །བལྟར་མི་མཐོང་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གནས་དང་རྟེན་མེད་པའོ། །དཔེར་ན་ནམ་མཁའ་ནི་གནས་དང་རྟེན་མེད་དེ། རྣམ་པར་གྲོལ་བ་ཡང་དེ་དང་འདྲའོ། །གནས་དང་རྟེན་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་པོའི་དཔེའོ། །གནས་དང་རྟེན་མེད་པ་
ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བླང་དུ་མེད་པའོ། །དཔེར་ན་ཤིང་ཐོག་ཨ་མྲའི་འབྲས་བུ་ནི་བླང་ཞིང་གཟུང་དུ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། བླང་ཞིང་གཟུང་དུ་མེད་དོ། །བླང་ཞིང་གཟུང་དུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་གཟུང་དུ་མེད་པའོ། །དཔེར་ན་སྒྱུ་མ་ནི་གཟུང་དུ་མེད་དེ། རྣམ་པར་གྲོལ་བ་ཡང་དེ་དང་འདྲ་སྟེ་གཟུང་དུ་མེད་དོ། །གཟུང་དུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ལུས་ཀྱི་དངོས་པོ་མེད་པའོ། །དཔེར་ན་མི་ལ་ལུས་ཡོད་པས་ཤུ་བ་དང་མཛེ་དང་སྐེམ་པ་དང་སྨྱོ་བ་ལ་སོགས་པ་ཡོད་དོ། །ཡང་དག་པར་རྣམ་པར་གྲོལ་བ་ལ་ནི་དེ་དང་འདྲ་བའི་ནད་རྣམས་མེད་དོ། །གང་ནད་དེ་དག་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རོ་གཅིག་པའོ། །ཇི་ལྟར་འོ་མ་རོ་གཅིག་པ་བཞིན་དུ་རྣམ་པར་གྲོལ་བ་ཡང་དེ་དང་འདྲ་སྟེ། རོ་གཅིག་གོ །རོ་གཅིག་པ་ནི་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་དག་པའོ། །དཔེར་ན་ཆུ་མ་རྙོགས་པ་ནི་ཤིན་ཏུ་དག་ཅིང་དང་བའོ། །རྣམ་པར་གྲོལ་བ་ཡང་དེ་དང་འདྲ་སྟེ་ཡོངས་སུ་དག་ཅིང་དང་བའོ། །ཡོངས་སུ་དག་ཅིང་དང་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རོ་གཅིག་པའོ། །དཔེར་ན་ནམ་མཁའ་ལས་འབབ་པའི་ཆར་པ་ནི་རྣམ་པར་དག་ཅིང་རོ་གཅིག་གོ །རྣམ་པར་གྲོལ་བ་ཡང་དེ་དང་འདྲ་སྟེ་རྣམ་པར་དག་ཅིང་རོ་གཅིག་གོ །རྣམ་པར་དག་ཅིང་རོ་གཅིག་པ་ནི་ཡང་དག་པར་རྣམ་པར་གྲོལ་བའོ། །ཡང་
དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་གསལ་བའོ། །དཔེར་ན་ཟླ་བ་རྒྱས་པ་ལ་སྤྲིན་ནམ་ན་བུན་གྱིས་མ་ཆོད་པ་དང་འདྲ་བར་རྣམ་པར་གྲོལ་བ་ཡང་དེ་དང་འདྲ་སྟེ་སྤྲིན་དང་ན་བུན་མེད་དོ། །སྤྲིན་དང་ན་བུན་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་ཞི་བའོ། །དཔེར་ན་མི་ཞིག་རིམས་ནད་ཚ་བས་བཏབ་པ་ལས་སོས་ན་ཞི་བའོ། །རྣམ་པར་གྲོལ་བ་ཡང་དེ་དང་འདྲ་སྟེ་རབ་ཏུ་ཞི་བའོ། །རབ་ཏུ་ཞི་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་མཉམ་པའོ། །དཔེར་ན་འབྲོག་དགོན་པ་ན་སྦྲུལ་གདུག་པ་དང་། སྤྱང་ཀི་ལ་སོགས་པ་ནི་འདྲ་བར་གསོད་སེམས་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་གསོད་སེམས་མེད་དོ། །གསོད་སེམས་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་མཉམ་པ་ཞེས་བྱ་བ་ནི་དཔེར་ན་ཕ་མ་ནི་བུ་ལ་སེམས་མཉམ་མོ། །རྣམ་པར་གྲོལ་བ་ཡང་དེ་དང་འདྲ་སྟེ་སེམས་མཉམ་མོ། །སེམས་མཉམ་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གཞན་པའི་གནས་མེད་པའོ། །དཔེར་ན་མི་ཞིག་གནས་ཤིན་ཏུ་བཟང་པོ་ཡོངས་སུ་དག་པ་ཞིག་ལ་གནས་ན་དེ་ལས་གཞན་པའི་གནས་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་གཞན་པའི་གནས་མེད་དོ། །གཞན་པའི་གནས་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཆོག་ཤེས་པའོ། །དཔེར་ན་མི་ཞིག་ལྟོགས་ཏེ་ཁ་ཟས་ཞིམ་པོ་དང་ཕྲད་ན་ཆོག་མི་ཤེས་པར་ཟའོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དཔེར་ན་འོ་ཐུག་འཐུངས་ན་གཞན་ཅི་ཡང་མི་འདོད་དོ། །གཞན་
མི་འདོད་པ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཡོངས་སུ་གཅོད་པའོ། །དཔེར་ན་མི་ཞིག་བཅིངས་པའི་ཐག་པ་བཅད་ན་བཅིང་བ་ལས་གྲོལ་བར་འགྱུར་རོ། །རྣམ་པར་གྲོལ་བ་ཡང་དེ་དང་འདྲ་སྟེ། ཐེ་ཙོམ་གྱི་བཅིངས་པ་ཐམས་ཅད་གཅོད་དོ། །དེ་ལྟར་ཐེ་ཙོམ་གཅོད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཕ་རོལ་ཏུ་ཕྱིན་པའོ། །དཔེར་ན་ཆུ་ཀླུང་ལ་ནི་ཚུ་རོལ་དང་ཕ་རོལ་གྱི་འགྲམ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། ཚུ་རོལ་ཅེས་བྱ་བ་མེད་ཀྱང་ཕ་རོལ་ཅེས་བྱ་བ་ཡོད་དོ། །ཕ་རོལ་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཅང་མི་སྨྲའོ། །དཔེར་ན་རྒྱ་མཚོ་ནི་ཆུ་ཆེར་སྐྱེས་ན་སྒྲ་སྐད་མང་པོ་འབྱུང་ངོ་། །རྣམ་པར་གྲོལ་བ་ནི་དེ་དང་མི་འདྲ་སྟེ། དེ་ལྟར་ན་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཞིམ་པ་དང་མངར་བའོ། །དཔེར་ན་སྨན་སྦྱར་བའི་ནང་དུ་ཨ་རུ་ར་བཅུག་ན་རོ་ཁ་བར་འགྱུར་རོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། ཟིལ་དངར་གྱི་རོ་ཅན་ནོ། །ཟིལ་དངར་གྱི་རོ་ཅན་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཉོན་མོངས་པ་ཀུན་སེལ་བའོ། །དཔེར་ན་སྨན་པ་མཁས་པས་སྨན་སྣ་ཚོགས་སྦྱར་ཏེ། ནད་པ་རྣམས་གསོ་བ་ལ་མཁས་པ་དང་འདྲ་བར་རྣམ་པར་གྲོལ་བ་ཡང་དེ་བཞིན་དུ་ཉོན་མོངས་པ་ཐམས་ཅད་སེལ་ཏོ། །ཉོན་མོངས་པ་ཀུན་སེལ་བ་ནི་ཡང་དག་པར་རྣམ་པར་གྲོལ་བའི་དཔེའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དོག་པ་མེད་པའོ། །དཔེར་ན་ཁང་ཁྱིམ་ཆུང་ངུ་ནི་དོག་པ་སྟེ། མང་པོ་མི་ཤོང་ངོ་། །རྣམ་པར་གྲོལ་བ་ནི་དེ་ལྟ་མ་ཡིན་ཏེ་མང་དུ་ཤོང་བའོ། །
མང་དུ་ཤོང་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འདོད་པ་ཞི་བ་འདོད་ཆགས་དང་མ་འདྲེས་པའོ། །དཔེར་ན་བུད་མེད་ནི་འདོད་ཆགས་མང་བའོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་ལྟར་ན་དེ་བཞིན་གཤེགས་པ་ནི་འདོད་ཆགས་དང་ཞེ་སྡང་དང་གཏི་མུག་དང་ང་རྒྱལ་ལ་སོགས་པའི་ཀུན་ནས་ཉོན་མོངས་པ་ཐམས་ཅད་མེད་པའོ། །གཞན་ཡང་རྣམ་པར་གྲོལ་བ་ནི་འདོད་པ་མེད་པའོ། །འདོད་པ་ལ་རྣམ་པ་གཉིས་ཏེ་ཡི་དགས་ཀྱི་འདོད་པ་དང་ཆོས་ཀྱི་འདོད་པའོ། །ཡང་དག་པར་རྣམ་པར་གྲོལ་བ་ལ་ཡི་དགས་ཀྱི་འདོད་པ་མེད་མོད་ཀྱི་སེམས་ཅན་ལ་ཐུགས་བརྩེ་བའི་ཕྱིར་ཆོས་ཀྱི་འདོད་པ་ཡོད་དོ། །དེ་ལྟར་ན་ཆོས་ཀྱི་འདོད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་བདག་དང་བདག་གི་བ་དང་བྲལ་བ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་འགོག་པ་ཟད་པ་སྲིད་པའི་ཆགས་པ་ཐམས་ཅད་ལས་རིང་དུ་གྱུར་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་མགོན་དང་སྐྱབས་ཏེ་འཇིགས་པ་ཐམས་ཅད་ལས་སྐྱོབ་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །རྣམ་པར་གྲོལ་བ་ནི་གནས་ལྟ་བུའོ། །གང་ཞིག་འདི་ལ་གནས་ན་གནས་གཞན་ནི་མི་ཚོལ་ལོ། །དཔེར་ན་མི་ཞིག་རྒྱལ་པོ་ལ་རྟེན་ན་གནས་གཞན་མི་ཚོལ་ལོ། །རྒྱལ་པོ་ལ་གནས་པ་ནི་འགྱུར་བ་ཡོད་ཀྱི་རྣམ་པར་གྲོལ་བ་ལ་གནས་ན་འགྱུར་བ་མེད་དོ། །འགྱུར་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་གནས་དང་རྟེན་ལྟ་བུའོ། །
དཔེར་ན་མི་ཞིག་འབྲོག་དགོན་པར་སོང་ན་འཇིགས་པའམ་བག་ཚ་བ་ཡོད་དོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། འཇིགས་པའམ་བག་ཚ་བ་མེད་དོ། །འཇིགས་པའམ་བག་ཚ་བ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པ འོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་འཇིགས་པ་མེད་པའོ། །དཔེར་ན་སེང་གེའི་རྒྱལ་པོ་ནི་རི་དགས་ཐམས་ཅད་ཀྱིས་མི་འཇིགས་སོ། །རྣམ་པར་གྲོལ་བ་ཡང་དེ་དང་འདྲ་སྟེ། བདུད་ཀྱི་རིས་ཐམས་ཅད་ཀྱིས་མི་འཇིགས་སོ། །འཇིགས་པ་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་དོག་པའོ། །དཔེར་ན་ལམ་དོག་པོར་ནི་མི་གཉིས་མཉམ་དུ་འགྲོར་མེད་དོ། །རྣམ་པར་གྲོལ་བ་ནི་དེ་དང་མི་འདྲ་སྟེ། རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་དོག་པ་ནི་དཔེར་ན་མི་ཞིག་སྟག་གིས་འཇིགས་ཏེ་ཁྲོན་པར་མཆོངས་པ་ལྟ་བུའོ། །རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །གཞན་ཡང་མི་དོག་པ་ནི་གྲུ་ཞིག་པ་ཆུང་ངུ་སྤངས་ནས་གྲུ་བཟང་པོར་ཞུགས་ཏེ། རྒྱ་མཚོ་ལ་བདེ་བར་རྒལ་ནས་བདེ་བའི་གནས་སུ་ཕྱིན་པའོ། །རྣམ་པར་གྲོལ་བ་ཡང་དེ་དང་འདྲ་སྟེ། སེམས་རབ་ཏུ་བདེ་བའོ། །སེམས་རབ་ཏུ་བདེ་བ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་རྒྱུ་དང་རྐྱེན་ལས་འབྱིན་པའོ། །འདི་ལྟ་སྟེ། འོ་མའི་རྐྱེན་གྱིས་ཞོའོ། །ཞོའི་རྐྱེན་གྱིས་མར་རོ། །མར་གྱི་རྐྱེན་གྱིས་མར་གྱི་སྙིང་པོའོ། །ཡང་དག་པར་རྣམ་པར་གྲོལ་བ་ལ་ནི་རྒྱུ་གང་ཡང་མེད་དོ། །རྒྱུ་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ང་རྒྱལ་འདུལ་བའོ། །དཔེར་ན་རྒྱལ་པོ་ཆེན་པོ་ནི་རྒྱལ་ཕྲན་རྣམས་ལ་ང་རྒྱལ་བྱེད་དོ། །རྣམ་པར་གྲོལ་བ་ནི་དེ་ལྟ་བུ་མ་ཡིན་ཏེ། དེ་ལྟར་
རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་ཆོས་སོ། །གཞན་ཡང་རྣམ་པར་གྲོལ་བ་ནི་བག་མེད་པ་འདུལ་བའོ། །བག་མེད་པ་ནི་འདོད་པ་མང་བའོ། །རྣམ་པར་གྲོལ་བ་ལ་ནི་དེ་དག་མེད་དོ། །དེ་དག་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མ་རིག་པ་སེལ་བའོ། །དཔེར་ན་ཚིགས་མ་དང་བྲལ་བ་ནི་སྨན་དམ་པ་སྟེ་མར་གྱི་སྙིང་པོའོ། །རྣམ་པར་གྲོལ་བ་ཡང་དེ་དང་འདྲ་སྟེ། མ་རིག་པའི་ཚིགས་མ་བསལ་ཏེ་ཡང་དག་པའི་རིག་པ་དང་ལྡན་ནོ། །ཡང་དག་པའི་རིག་པ་དང་ལྡན་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རབ་ཏུ་ཞི་བ་གཅིག་པུ་སྟེ་མི་གཉིས་པ་འབྲོག་དགོན་པའི་བལ་གླང་རྒོད་ལྟར་གཅིག་པུ་གྲོགས་མེད་པའོ། །རྣམ་པར་གྲོལ་བ་ཡང་དེ་དང་འདྲ་སྟེ། གཅིག་པུ་གཉིས་སུ་མེད་པའོ། །གཅིག་པུ་གཉིས་སུ་མེད་པ་ནི་ཡང་དག་པར་རྣམ་པར་གྲོལ་བ་སྟེ་ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་སྲ་བ་སྙིང་པོ་ཅན་ནོ། །སྨྱིག་མ་དང་འདམ་བུ་དང་གསོ་མ་ནི་ཐམས་ཅད་ཁོང་སྟོང་མོད་ཀྱི། འབྲས་བུ་ནི་སྲ་བའོ། །སངས་རྒྱས་བཅོམ་ལྡན་འདས་མ་གཏོགས་པར་འཇིག་རྟེན་དུ་བཅས་པ་ལྷ་དང་མི་ཐམས་ཅད་ནི་མི་སྲ་མི་བརྟན་པའོ། །ཡང་དག་པར་རྣམ་པར་གྲོལ་བ་ནི་སྲིད་པའི་རྒྱུན་ཐམས་ཅད་ལས་རིང་དུ་གྱུར་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མངོན་པར་རིག་པ་དག་བསྐྱེད་པའོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་སྲིད་པ་ཐམས་ཅད་སྤངས་པའོ། །དཔེར་ན་མི་ཞིག་འགྲངས་པར་ཟོས་ན་སྐྱུགས་པ་ལྟ་བུ་སྟེ། རྣམ་པར་གྲོལ་བ་ཡང་དེ་དང་འདྲ་བར་སྲིད་པ་ཐམས་ཅད་སྤངས་པའོ། །སྲིད་པ་ཐམས་ཅད་སྤངས་པ་ནི་ཡང་དག་པར་རྣམ་
པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་གདོན་མི་ཟ་བའོ། །དཔེར་ན་མེ་ཏོག་པ་ཤི་ཀའི་དྲི་ནི་འདབ་མ་བདུན་པོ་ལ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཆུའི་ཁམས་དང་འདྲའོ། །འདི་ལྟ་སྟེ་ཆུའི་ཁམས་ནི་ཆེན་པོ་བཞིའི་ནང་ན་མཆོག་སྟེ། རྩི་ཤིང་དང་འབྲས་བུ་ཐམས་ཅད་རླན་ཅིང་སྣུམ་པར་བྱེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། སྐྱེ་བ་ཐམས་ཅད་རླན་པར་བྱེད་དོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འཇུག་པ་ཞེས་བྱའོ། །དཔེར་ན་སྒོ་ཡོད་ན་འཇུག་པ་ཡོད་པ་དང་། གསེར་གྱི་འབྱུང་ཁུངས་ན་གསེར་ཡོད་པ་དང་འདྲ་བར་རྣམ་པར་གྲོལ་བ་ཡང་དེ་དང་འདྲ་སྟེ། བདག་མེད་པ་སྒོམ་པའི་རྣམས་འཇུག་པར་བྱེད་དོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དགེ་བའོ། །དཔེར་ན་སློབ་མ་ཞིག་སློབ་དཔོན་གྱི་རྗེས་སུ་འབྲང་ཞིང་བསྒོ་བ་མཉན་ན་དགེ་བ་ཞེས་བྱའོ། །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འཇིག་རྟེན་ལས་འདས་པའི་ཆོས་ཏེ་ཆོས་ཐམས་ཅད་ཀྱི་ཕུལ་དུ་འགྱུར་བའོ། །དཔེར་ན་རོ་བྲོ་བ་ཐམས་ཅད་ཀྱི་ནང་ན་མར་དང་འོ་མ་ནི་མཆོག་གོ །རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་གཡོ་བ་ཞེས་བྱའོ། །དཔེར་ན་སྒོའི་ཐེམ་པ་ནི་རླུང་གིས་བསྐྱོད་མི་ནུས་སོ། །ཡང་དག་པར་རྣམ་པར་གྲོལ་བ་ཡང་དེ་དང་འདྲ་སྟེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་དབའ་རླབས་མེད་པའོ། །དཔེར་ན་རྒྱ་མཚོའི་ཆུ་ནི་དབའ་རླབས་རྒོད་པའོ། ། རྣམ་པར་གྲོལ་བ་ནི་དེ་ལྟ་མ་ཡིན་ཏེ། དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་རྒྱལ་པོའི་ཕོ་བྲང་ལྟ་བུའོ། །རྣམ་པར་གྲོལ་བ་ཡང་དེ་དང་འདྲ་
སྟེ། དེ་ལྟར་རྣམ་པར་གྲོལ་བ་དེ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཅིར་ཡང་དགོས་ཏེ། དཔེར་ན་འཛམ་བུ་ཆུ་ཀླུང་གི་གསེར་ནི་ཅིར་ཡང་དགོས་ཏེ། དེ་ལ་ཉེས་པའི་སྐྱོན་གདགས་སུ་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ་ཉེས་པའི་སྐྱོན་མེད་དོ། །ཉེས་པའི་སྐྱོན་མེད་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ཞེས་བྱ་བ་ནི་བུས་པ་ཤེད་མ་བྱེ་བའི་བྱ་བ་སྤངས་པའོ། །དཔེར་ན་སྐྱེས་བུ་ཆེན་པོ་ནི་བུས་པའི་བྱེད་པ་མི་བྱེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། ཕུང་པོ་ལྔ་ཡོངས་སུ་སྤངས་པའོ། །ཕུང་པོ་ལྔ་ཡོངས་སུ་སྤངས་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མཐར་ཕྱིན་པའོ། །དཔེར་ན་བཙོན་དོང་དུ་བཅུག་པ་དེ་ལས་ཐར་ན་སྔར་རབ་ཏུ་ཁྲུས་བྱས་ཏེ་གདོད་ཁྱིམ་དུ་འགྲོའོ། །རྣམ་པར་གྲོལ་བ་ཡང་དེ་དང་འདྲ་སྟེ། མཐར་ཡོངས་སུ་དག་པའོ། །མཐར་ཡོངས་སུ་དག་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མ་བྱས་པར་བདེ་བའོ། །མ་བྱས་པར་བདེ་བ་ནི་འདོད་ཆགས་དང་། ཞེ་སྡང་དང་གཏི་མུག་ལ་སོགས་པ་ཐམས་ཅད་སྐྱུགས་པའི་ཕྱིར་རོ། །དཔེར་ན་མི་ཞིག་མ་ཚོར་བར་སྦྲུལ་གདུག་པས་ཟིན་ན་གདུག་པ་མེད་པར་བྱ་བའི་ཕྱིར་སྐྱུག་སྨན་གཏང་ངོ་། །སྐྱུགས་ན་དུག་མེད་པར་འགྱུར་ཏེ་ལུས་བདེའོ། །རྣམ་པར་གྲོལ་བ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་གདུག་པ་ཐམས་ཅད་སྐྱུགས་པས་ལུས་བདེ་བར་འགྱུར་ཏེ། མ་བྱས་པར་བདེ་བ་ཞེས་བྱའོ། །མ་བྱས་པར་བདེ་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་ཉོན་མོངས་པ་རྣམ་པ་བཞིའི་སྦྲུལ་གདུག་པ་བཅད་པ་ཞེས་བྱའོ། །ཉོན་མོངས་པ་བཅད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་སྲིད་པ་ཐམས་ཅད་སྤངས་
ཏེ། སྡུག་བསྔལ་ཐམས་ཅད་འགགས་པ། བདེ་བ་ཐམས་ཅད་ཐོབ་པ་འདོད་ཆགས་དང་། ཞེ་སྡང་དང་གཏི་མུག་ཐམས་ཅད་ཡོངས་སུ་བཅད་དེ། ཀུན་ནས་ཉོན་མོངས་པའི་རྩ་བ་ཐམས་ཅད་འབྱིན་པའོ། །ཉོན་མོངས་པའི་རྩ་བ་འབྱིན་པ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འདུས་བྱས་པའི་ཆོས་ཐམས་ཅད་ཡོངས་སུ་བཅད་ནས་ཟག་པ་མེད་པའི་ཆོས་ཐམས་ཅད་བསྐྱེད་པ་རྒྱུད་ཐམས་ཅད་བཅད་པ་འདི་ལྟ་སྟེ། བདག་དང་བདག་མེད་པ་དང་། བདག་མ་ཡིན་པ་དང་། བདག་མེད་པ་མ་ཡིན་པ་དང་། ཆགས་ཤིང་འཛིན་པ་འབའ་ཞིག་གཅོད་ཀྱི། བདག་ཏུ་ལྟ་བ་གཅད་པ་མ་ཡིན་ནོ། །བདག་ཏུ་ལྟ་བ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་སྟོང་པའི་སྟོང་པའོ། །སྟོང་པའི་སྟོང་པ་ཞེས་བྱ་བ་ནི་ཅི་ཡང་མེད་པའོ། །ཅི་ཡང་མེད་པ་ནི་མུ་སྟེགས་ཅན་གཅེར་བུ་པ་ལ་སོགས་པའི་རྣམ་པར་གྲོལ་བ་ལྟ་བུའོ། །གཅེར་བུ་པ་ལ་ནི་ཡང་དག་པར་རྣམ་པར་གྲོལ་བ་མེད་པས་སྟོང་པའི་སྟོང་པ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་དེ་ལྟ་བུ་མ་ཡིན་པས་མི་སྟོང་པའི་སྟོང་པའོ། །མི་སྟོང་པའི་སྟོང་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་མི་སྟོང་པའོ། །དཔེར་ན་ཆུ་དང་མར་དང་། ཞོ་དང་ཆང་དང་སྦྲང་རྩིའི་སྣོད་རྫེའུ་ལྟ་བུ། ཆུ་དང་མར་དང་ཞོ་དང་ཆང་དང་། སྦྲང་རྩི་མེད་ཀྱང་། དེ་ལ་ཆུ་ལ་སོགས་པའི་རྫེའུ་ཞེས་འདོགས་ཏེ། རྫེའུ་དེ་ལ་ནི་སྟོང་ཞེའམ། མི་སྟོང་ཞེས་གདགས་སུ་མེད་དོ། །དེ་ལ་སྟོང་ཞེས་བྱར་ནི་གཟུགས་དང་། དྲི་དང་བྲོ་བ་རེག་བྱ་ཞེས་གདགས་སུ་མི་རུང་ངོ་། །མི་སྟོང་པ་ཞེས་བྱར་ནི་ཆུ་ལ་སོགས་པ་གང་ཡང་མེད་དོ། །རྣམ་པར་གྲོལ་བ་ཡང་དེ་དང་འདྲ་སྟེ། གཟུགས་ཞེའམ། གཟུགས་མ་ཡིན་ཞེའམ། སྟོང་ཞེའམ། མི་སྟོང་ཞེས་གདགས་སུ་མེད་དོ། །གལ་ཏེ་སྟོང་ཞེས་བྱར་ནི་རྟག་པ་དང་། བདེ་བ་དང་། བདག་དང་། དག་པ་
ཞེས་བྱར་མི་རུང་ངོ་། །མི་སྟོང་ཞེས་བྱར་ནི་རྟག་པ་དང་། བདེ་བ་དང་། བདག་དང་། དག་པ་སུས་མྱོང་སྟེ། དོན་དེ་ལྟ་བས་ན་སྟོང་ཞེའམ། མི་སྟོང་ཞེས་གདགས་སུ་མེད་དོ། །འདི་ལྟ་སྟེ་སྲིད་པ་ཉི་ཤུ་ལྔ་པོ་དང་། ཀུན་ནས་ཉོན་མོངས་པ་དང་། སྡུག་བསྔལ་བ་ཐམས་ཅད་དང་། མཚན་མ་ཐམས་ཅད་དང་། འདུས་བྱས་ཀྱི་འདུ་བྱེད་ཐམས་ཅད་མེད་པའི་ཕྱིར་རྫེའུ་ན་ཞོ་མེད་པ་དང་འདྲ་སྟེ། སྟོང་པ་ཞེས་བྱའོ། །མི་སྟོང་ཞེས་བྱ་བ་ནི་ཡང་དག་པའི་གཟུགས་རྟག་པ། བདེ་བ་དང་། བདག་དང་། དག་པ་ཞེས་བྱ་བ་མི་གཡོ་མི་འཕོ་བ་དཔེར་ན་རྫེའུ་གཟུགས་དང་། དྲི་དང་བྲོ་བ་དང་། རེག་བྱ་ཡོད་པས་མི་སྟོང་ཞེས་བྱ་སྟེ། དེ་བས་ན་རྣམ་པར་གྲོལ་བ་ནི་རྫེའུ་དེ་དང་འདྲའོ། །རྫེའུ་དེ་ནི་རྐྱེན་དང་ཕྲད་ན་ཆག་པར་འགྱུར་གྱི། རྣམ་པར་གྲོལ་བ་ནི། དེ་ལྟ་བུ་མ་ཡིན་ཏེ། གཞིག་ཏུ་མེད་དོ། །གཞིག་ཏུ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གཞན་ཡང་རྣམ་པར་གྲོལ་བ་ནི་འདོད་པ་དང་བྲལ་ལོ། །དཔེར་ན་གང་ཟག་ནི་འདོད་པའི་སེམས་དང་ལྡན་པས་བརྒྱ་བྱིན་ལྷའི་དབང་ཕྱུག་དང་། ཚངས་པའི་རྒྱལ་པོ་དང་། དབང་སྒྱུར་རྒྱལ་པོ་ལ་ཡང་རེའོ། །རྣམ་པར་གྲོལ་བ་ནི་དེ་ལྟ་བུ་མ་ཡིན་ཏེ། གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་འདོད་པ་མེད་དེ་ཐེ་ཚོམ་མེད་དོ། །འདོད་པ་མེད་པ་ཐེ་ཚོམ་མེད་པ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །གལ་ཏེ་རྣམ་པར་གྲོལ་བ་ལ་འདོད་པ་དང་ཐེ་ཚོམ་ཡོད་ཅེས་ཟེར་ན་དེ་ནི་གནས་མེད་དོ། །གཞན་ཡང་རྣམ་པར་གྲོལ་བ་ནི་སྲིད་པའི་འདོད་པ་དང་། མཚན་མ་ཐམས་ཅད་དང་། རྣམ་པར་འཆིང་བ་ཐམས་ཅད་དང་ཀུན་ནས་ཉོན་མོངས་པ་ཐམས་ཅད་དང་འཁོར་བ་ཐམས་ཅད་དང་རྒྱུ་དང་རྐྱེན་ཐམས་ཅད་དང་། རྣམ་པར་སྨིན་པའི་འབྲས་བུ་ཐམས་ཅད་ཡོངས་སུ་བཅད་པའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་མྱ་ངན་ལས་འདས་པའོ། །སེམས་
ཅན་ཐམས་ཅད་ནི་འཁོར་བའི་ཉོན་མོངས་པས་འཇིགས་པའི་ཕྱིར་སྐྱབས་སུ་འགྲོ་བ་གསུམ་ལ་གཞོལ་ལོ། །དཔེར་ན་རི་དགས་ནི་རྔོན་པས་འཇིགས་ཏེ། ཅི་སྟེ་བགེགས་ལས་ཐར་ན་མཆོངས་པ་གཅིག་བྱེད་དེ། དེ་ནི་སྐྱབས་སུ་འགྲོ་བ་གཅིག་གོ །དེ་ལྟར་མཆོངས་པ་གསུམ་བྱེད་པ་ནི་སྐྱབས་སུ་འགྲོ་བ་གསུམ་གྱི་དཔེའོ། །མཆོངས་པ་གསུམ་བྱས་པས་བདེ་བར་འགྱུར་རོ། །སོ་སོའི་སྐྱེ་བོ་ཡང་དེ་དང་འདྲ་སྟེ། བདུད་རྣམ་བཞིའི་རྔོན་པས་འཇིགས་པས་སྐྱབས་སུ་འགྲོ་བ་གསུམ་ལ་གཞོལ་བར་བྱེད་དོ། །སྐྱབས་སུ་འགྲོ་བ་གསུམ་ལ་ཕྱོགས་པས་བདེ་བར་འགྱུར་རོ། །གང་བདེ་བར་འགྱུར་བ་ནི་ཡང་དག་པར་རྣམ་པར་གྲོལ་བ་སྟེ། ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །དེ་བཞིན་གཤེགས་པ་ནི་མྱ་ངན་ལས་འདས་པའོ། །མྱ་ངན་ལས་འདས་པ་ནི་ཟད་མི་ཤེས་པའོ། །ཟད་མི་ཤེས་པ་ནི་སངས་རྒྱས་ཀྱི་རང་བཞིན་ནོ། །སངས་རྒྱས་ཀྱི་རང་བཞིན་ནི་གདོན་མི་ཟ་བའོ། །གདོན་མི་ཟ་བ་ནི་བླ་ན་མེད་པ་ཡང་དག་པར་རྫོགས་པའི་སངས་རྒྱས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་མྱ་ངན་ལས་འདའ་བ་དང་། སངས་རྒྱས་ཀྱི་རང་བཞིན་དང་། གདོན་མི་ཟ་བ་དང་། དེ་བཞིན་གཤེགས་པ་དོན་གཅིག་པ་ལགས་ན། ཅིའི་སླད་དུ་སྐྱབས་སུ་མཆི་བ་གསུམ་དུ་གསུངས་བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ་རིགས་ཀྱི་བུ་སེམས་ཅན་དག་ནི་འཁོར་བས་སྐྲག་ནས་སྐྱབས་སུ་འགྲོ་བ་གསུམ་ལ་ཕྱོགས་སོ། །སྐྱབས་སུ་འགྲོ་བ་གསུམ་གྱིས་ན་སངས་རྒྱས་ཀྱི་རང་བཞིན་དང་། གདོན་མི་ཟ་བ་དང་མྱ་ངན་ལས་འདས་པ་ཡིན་པར་རིག་པར་བྱའོ། །རིགས་ཀྱི་བུ་ཆོས་ཁ་ཅིག་ནི་མིང་གཅིག་ལ་དོན་ཐ་དད་དོ། །ཆོས་ཁ་ཅིག་ནི་མིང་དང་དོན་གཉིས་ཀ་ཐ་དད་དོ། །མིང་གཅིག་ལ་དོན་ཐ་དད་པ་ནི་སངས་རྒྱས་རྟག་ཅེས་བྱ་བ་དང་ཆོས་རྟག་པ་དང་། དགེ་སློང་གི་དགེ་འདུན་རྟག་པ་དང་། མྱ་ངན་ལས་འདའ་བ་དང་། ནམ་མཁའ་རྟག་ཅེས་བྱ་བ་ནི་མིང་གཅིག་ལ་དོན་ཐ་དད་པ་ཞེས་བྱའོ། །མིང་དང་དོན་གཉིས་ཀ་ཐ་དད་པ་ནི་སངས་རྒྱས་ནི་
མིང་ཚོར་བའོ། །ཆོས་ནི་མ་ཚོར་བ་དགེ་འདུན་ནི་འདུམ་པ། མྱ་ངན་ལས་འདའ་བ་ནི་རྣམ་པར་གྲོལ་བ། ནམ་མཁའ་ནི་དགེ་བ་མ་ཡིན་པ་ཐོགས་པ་མེད་པ་ཞེས་ཀྱང་བྱ་སྟེ་དེ་ནི་མིང་དང་དོན་གཉིས་ཀ་ཐ་དད་པ་ཞེས་བྱའོ། །རིགས་ཀྱི་བུ་སྐྱབས་སུ་འགྲོ་བ་གསུམ་ཡང་དེ་དང་འདྲ་སྟེ་མིང་དང་དོན་གཉིས་ཀ་ཐ་དད་དོ། །དེ་ལ་གཅིག་ཅེས་བྱ་བ་གང་ཡང་མེད་དོ། །དེ་བས་ན་ངས་སྐྱེ་དགུའི་བདག་མོ་གཽ་ཏ་མཱི་ལ་བཀའ་སྩལ་པ། གཽ་ཏ་མཱི་ང་ལ་མ་མཆོད་པར་དགེ་འདུན་ལ་མཆོད་ཅིག །དགེ་འདུན་ལ་མཆོད་ན་དཀོན་མཆོག་གསུམ་ལ་མཆོད་པ་ཞེས་བྱའོ། །དེ་ནས་སྐྱེ་དགུའི་བདག་མོས་འདི་སྐད་ཅེས་གསོལ་ཏོ། །དགེ་འདུན་གྱི་ནང་ན་སངས་རྒྱས་དང་ཆོས་ཀྱང་མེད་ན་ཅིའི་ཕྱིར། དགེ་འདུན་ལ་མཆོད་པས་དཀོན་མཆོག་གསུམ་ལ་མཆོད་པར་འགྱུར། དེ་ལ་ངས་འདི་སྐད་ཅེས་བཀའ་སྩལ་ཏོ། །ཁྱོད་ཀྱིས་ངས་བསྟན་པ་བཞིན་བྱེད་པ་ནི་སངས་རྒྱས་ལ་མཆོད་པའོ། །རྣམ་པར་གྲོལ་བར་འདོད་པས་ཆོས་ལ་མཆོད་པའོ། །དགེ་འདུན་བཞེས་པས་ན་དགེ་འདུན་ལ་མཆོད་པའོ། །དེ་བས་ན་རིགས་ཀྱི་བུ་དཀོན་མཆོག་གསུམ་གཅིག་ཅེས་བྱར་མི་རུང་ངོ་། །རིགས་ཀྱི་བུ་བཅོམ་ལྡན་འདས་ནི་སྐབས་ཁ་ཅིག་ཏུ་གཅིག་ལ་གསུམ་དུ་གསུང་ངོ་། །སྐབས་ཁ་ཅིག་ཏུ་ནི་གསུམ་ཡང་གཅིག་ཏུ་གསུངས་ཏེ། དེ་བས་ན་སངས་རྒྱས་རྣམས་ཀྱི་སྤྱོད་ཡུལ་ནི་ཉན་ཐོས་དང་རང་སངས་རྒྱས་ཀྱིས་ཤེས་པར་ནུས་པ་མ་ཡིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་མཐར་བདེ་བ་ནི་མྱ་ངན་ལས་འདས་པའོ་ཞེས་གསུངས་པའི་དོན་ཇི་ལྟ་བུ་ལགས། མྱ་ངན་ལས་འདས་པ་ཞེས་བགྱི་བ་ནི་ལུས་ལ་བཏང་སྙོམས་ཡེ་ཤེས་ལ་བཏང་སྙོམས་པ་ལགས་ཏེ། ལུས་དང་ཡེ་ཤེས་ལ་བཏང་སྙོམས་ན་བདེ་བ་སུས་མྱོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་མི་ཞིག་འགྲངས་པར་ཟོས་པའི་འོག་ཏུ་ཁོང་པ་མི་བདེ་བ་ལས་ཕྱི་རོལ་ཏུ་སོང་སྟེ་སྐྱུགས་ནས་ཕྱིར་འོངས་ན། གྲོགས་པོ་དག་དེ་ལ་ཁྱོད་མི་བདེ་བ་ཅི་ལྟ་སོས་སམ་
ཞེས་འདྲིའོ། །དེས་སྨྲས་པ། སོས་ཏེ་མི་བདེ་བ་མེད་ཅེས་ཟེར་རོ། །དེ་བཞིན་གཤེགས་པ་ཡང་དེ་དང་འདྲ་སྟེ་མཐར་སྲིད་པ་ཉི་ཤུ་ལྔ་པོ་དང་བྲལ་ནས་ཡོངས་སུ་མྱ་ངན་ལས་འདས་ཏེ། རབ་ཏུ་བདེ་བའི་གནས་སུ་ཕྱིན་པས་བསྐྱོད་དུ་མེད་ཟད་པ་དང་འགོག་པ་ཞེས་བྱ་བ་མེད་དེ། ཚོར་བ་ཐམས་ཅད་བཅད་པས་བདེ་བར་ཚོར་བ་མེད་པ་ཞེས་བྱའོ། །དེ་ལྟར་ཚོར་བ་མྱོང་བ་མེད་པ་ནི་རྟག་པ་བདེ་བ་ཞེས་བྱའོ། །གང་ཞིག་དེ་བཞིན་གཤེགས་པ་ལ་བདེ་བར་ཚོར་བ་ཡོད་ཅེས་བྱ་བ་དེ་ནི་གནས་མེད་དོ། །དེ་བས་ན་མཐར་བདེ་བ་ནི་མྱ་ངན་ལས་འདས་པའོ། །མྱ་ངན་ལས་འདས་པ་དེ་ནི་ཡང་དག་པར་རྣམ་པར་གྲོལ་བའོ། །ཡང་དག་པར་རྣམ་པར་གྲོལ་བ་ནི་དེ་བཞིན་གཤེགས་པའོ། །འོད་སྲུང་གིས་ཡང་གསོལ་པ། མི་སྐྱེ་མི་འགོག་པ་རྣམ་པར་གྲོལ་བ་ལགས་སམ། དེ་དེ་བཞིན་ནོ་དེ་དེ་བཞིན་ནོ། །རིགས་ཀྱི་བུ་མི་སྐྱེ་མི་འགོག་པ་ནི་རྣམ་པར་གྲོལ་བའོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །འོད་སྲུང་གིས་ཡང་གསོལ་པ། གལ་ཏེ་མི་སྐྱེ་མི་འགོག་པ་དེ་རྣམ་པར་གྲོལ་བ་ལགས་ན། ནམ་མཁའི་མཚན་ཉིད་ཀྱང་མི་སྐྱེ་མི་འགོག་ན། དེ་ཡང་དེ་བཞིན་གཤེགས་པ་ལགས་སམ། དེ་བཞིན་གཤེགས་པ་ནི་རྣམ་པར་གྲོལ་བ་མ་ལགས་སམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་དེ་ལྟ་མ་ཡིན་ནོ། །ཅིའི་ཕྱིར་དེ་ལྟ་མ་ཡིན་ཞེ་ན། རིགས་ཀྱི་བུ་དཔེར་ན་བྱ་ཀ་ལན་ད་ཀ་དང་། འཚོ་བ་འཚོ་བྱེད་ནི་ཤིན་ཏུའང་སྐད་སྙན་པ་ཡིན་ན། ཁྭ་སྐེགས་ཀྱི་སྐད་དང་འདྲ་བའང་མ་ལགས་སོ། །བཅོམ་ལྡན་འདས་ཁྭ་སྐེགས་ནི་ཤིན་ཏུ་ཡང་སྐད་མི་སྙན་ཏེ། འཚོ་བ་འཚོ་བྱེད་དང་བསྐྲུན་དུ་མ་མཆིས་ཏེ། སྟོང་གི་ཆར་ཡང་བསྐྲུན་དུ་མ་མཆིས་སོ། །འོད་སྲུང་གིས་ཡང་གསོལ་པ། བྱ་ཀ་ལན་ད་ཀ་ལ་སོགས་པ་ནི་སྐད་ཀྱང་ཤིན་ཏུ་སྙན་ལ། ལུས་ཀྱང་མི་འདྲ་ན་ཅིའི་སླད་དུ་དེ་བཞིན་གཤེགས་པས་ཁྭ་སྐེགས་ཀྱི་དཔེར་གསུངས། རི་རབ་ཀྱི་དཔེ་ཡུངས་ཀར་ལ་ལེན་པ་དང་མཚུངས་ཏེ། བཅོམ་ལྡན་འདས་དང་ནམ་མཁའ་ཡང་དེ་བཞིན་ནོ། །བྱ་ཀ་ལན་ད་ཀའི་སྐད་ནི་སངས་རྒྱས་བཅོམ་ལྡན་འདས་ཀྱི་གསུང་གི་
དཔེར་རུང་གི་ཁྭ་སྐེགས་ཀྱི་སྐད་ཀྱི་དཔེར་ནི་མི་རུང་ངོ་། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །ཤིན་ཏུ་ལེགས་སོ་ཤིན་ཏུ་ལེགས་སོ། །ཁྱོད་ནི་ཤིན་ཏུ་ཟབ་མོའི་དོན་ལ་ཤིན་ཏུ་མཁས་ཏེ། དེ་བཞིན་གཤེགས་པ་ནི་སྐབས་ཁ་ཅིག་ཏུ་རྒྱུ་དང་རྐྱེན་ལ་གཟིགས་ནས། ནམ་མཁའ་ཡང་རྣམ་པར་གྲོལ་བའི་དཔེར་གསུངས་སོ། །དེ་ལྟར་རྣམ་པར་གྲོལ་བ་ནི་དེ་བཞིན་གཤེགས་པའོ། །ཡང་དག་པར་རྣམ་པར་གྲོལ་བ་ནི་འཇིག་རྟེན་དུ་བཅས་པ་ལྷ་དང་མི་ཐམས་ཅད་ཀྱིས་བསྐྲུན་དུ་མེད་དེ། ནམ་མཁའ་འདི་ནི་ཡང་དག་པར་དཔེར་མི་རུང་མོད་ཀྱི། སེམས་ཅན་གདུལ་བའི་ཕྱིར་ནམ་མཁའ་ལྟ་བུར་དཔེར་མི་རུང་ཡང་དཔེར་གསུངས་ཏེ། དེ་བས་ན་རྣམ་པར་གྲོལ་བ་ཉིད་དེ་བཞིན་གཤེགས་པར་རིག་པར་བྱའོ། །དེ་བཞིན་གཤེགས་པ་ཉིད་ནི་རྣམ་པར་གྲོལ་བའོ། །རྣམ་པར་གྲོལ་བ་དང་དེ་བཞིན་གཤེགས་པ་ནི་གཉིས་སུ་མེད་ལ་དབྱེར་མེད་དོ། །རིགས་ཀྱི་བུ་དཔེར་མི་རུང་ཞེས་བྱ་བ་ནི་བསྐྲུན་དུ་མེད་པའི་དངོས་པོ་དག་ནི་དཔེར་དྲང་དུ་མི་རུང་ཡང་རྒྱུ་དང་རྐྱེན་ཁ་ཅིག་གི་སྐབས་སུ་དཔེ་དྲང་དུ་ཡོད་དོ། །མདོ་སྡེ་དག་ལས་ཀྱང་གསུངས་ཏེ། ཞལ་ནི་ཟླ་བ་གང་བ་འདྲ་བ་ཞེས་བྱ་བ་དང་། བལ་གྱི་གླང་པོ་ཆེ་ཤིན་ཏུ་དཀར་བ་ནི་གངས་ཀྱི་རི་དང་འདྲའོ། །ཞེས་བྱ་བ་ཟླ་བ་གང་བ་ཞལ་ཡིན་ཞེས་བྱར་མི་རུང་ལ། གངས་ཀྱི་རི་ཡང་བལ་གྱི་གླང་པོ་ཆེ་ཡིན་ཞེས་བྱར་མི་རུང་སྟེ། རིགས་ཀྱི་བུ་དཔེས་རྣམ་པར་གྲོལ་བ་ལ་དཔེར་བྱར་མི་རུང་མོད་ཀྱི་སེམས་ཅན་གདུལ་བའི་ཕྱིར་ན་དཔེ་བསྟན་པ་ཡིན་ནོ། །དཔེ་མང་པོས་ཆོས་རྣམས་ཀྱི་ཆོས་ཉིད་རིག་པར་འགྱུར་བ་ཡང་དེ་བཞིན་ནོ།། །།བམ་པོ་བརྒྱད་པ། འོད་སྲུང་གིས་ཡང་གསོལ་པ། ཅིའི་སླད་དུ་ན་དེ་བཞིན་གཤེགས་པས་རྣམ་པ་གཉིས་སུ་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་མི་ཞིག་རལ་གྲི་ཐོགས་ཏེ། ཞེ་སྡང་གི་སེམས་ཀྱིས་དེ་བཞིན་གཤེགས་པ་ལ་གསོད་དུ་འོངས་ན། དེ་ལ་དེ་བཞིན་གཤེགས་པས་མི་ཁྲོ་ཞིང་མདངས་དང་ཆས་ན། མི་དེ་ནི་དེ་བཞིན་གཤེགས་པ་
ལ་གསོད་པའི་མཚམས་མེད་པའི་ལས་སུ་འགྱུར་རམ། མ་ལགས་སོ། །བཅོམ་ལྡན་འདས་ཅིའི་སླད་དུ་ཞེ་ན། དེ་བཞིན་གཤེགས་པའི་སྐུ་ནི་གཞིག་མི་ནུས་པའི་ཕྱིར་རོ། །དེ་ཡང་ཇི་ལྟ་ཞེ་ན། སྐུ་ཕུང་པོ་ནི་མ་མཆིས་ཀྱི་ཆོས་ཉིད་འབའ་ཞིག་དང་ལྡན་ཏེ། ཆོས་རྣམས་ཀྱི་ཆོས་ཉིད་ནི་གཞིག་ཏུ་མི་རུང་བ་ལགས་ན། གང་ཟག་དེས་སངས་རྒྱས་ཀྱི་སྐུ་གཞིག་ག་ལ་ནུས་མོད་ཀྱི། སྡིག་པའི་སེམས་དང་བཅས་པས་མཚམས་མ་མཆིས་པའི་ལུས་སུ་ནི་འགྱུར་རོ། །དེའི་སླད་དུ་དཔེར་ན་ཆོས་རྣམས་ཀྱི་ཆོས་ཉིད་རིག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་འདི་སྐད་ཅེས་བཀའ་སྩལ་ཏོ། །ཤིན་ཏུ་ལེགས་སོ་ཤིན་ཏུ་ལེགས་སོ། །རིགས་ཀྱི་བུ་ངས་གསུངས་པ་ལས་ཁྱོད་ཀྱིས་སྔར་གསོལ་བ་ལེགས་སོ། །རིགས་ཀྱི་བུ་དཔེར་ན་མི་སྡིག་ཅན་ཞིག་མ་བསད་པར་བསམས་ནས་ཞིང་གི་ལས་བྱེད་པར་མ་ཟན་སྐྱེལ་དུ་འོངས་པ་ལས་དེ་ལ་བསད་པར་བསམས་ཏེ་རལ་གྲི་བདར་ཏེ་ཆས་པ་ལས་མས་ཚོར་ནས་ཁྲེ་འབྲས་སྤུངས་པའི་ཕུང་པོར་ཞུགས་ཏེ། མི་དེས་རལ་གྲི་ཐོགས་ཏེ་ཁྲེ་འབྲས་ཀྱི་ཕུང་པོ་ལ་བསྐོར་ཅིང་རལ་གྲིས་བཏབ་ནས་དེ་ནི་སོད་དོ་སྙམ་ནས་དགའ་བའི་སེམས་སྐྱེས་སོ། །ཕྱིས་དེའི་མ་ཁྲེ་འབྲས་ཀྱི་ཕུང་པོའི་ནང་ནས་བྱུང་སྟེ། ཕྱིར་ཁྱིམ་དུ་འོངས་ན་དེ་ཁྱོད་ཀྱི་ཡིད་ལ་ཇི་སྙམ། མི་དེ་མཚམས་མེད་པའི་སྡིག་པ་བྱས་པ་ཡིན་ནམ། གསོལ་པ་བཅོམ་ལྡན་འདས་གཅིག་ཏུ་ངེས་པ་མ་ལགས་སོ། །དེ་ཅིའི་སླད་དུ་ཞེ་ན། དེ་ལ་སྡིག་པ་མཆིས་ཞེས་བགྱིར་ནི་མའི་ལུས་ཞིག་པར་གྱུར་པ་མ་ལགས། ལུས་ཞིག་པར་མ་གྱུར་ན་སྡིག་པ་མཆིས་ཞེས་བགྱིར་ག་ལ་རུང་། སྡིག་པ་མ་མཆིས་ཞེས་བགྱིར་ནི་སོད་དོ་སྙམ་བསམས་ནས་དགའ་སེམས་ཀྱང་བསྐྱེད་ན་མ་མཆིས་ཞེས་བགྱིར་ཡང་ག་ལ་རུང་སྟེ། མི་དེས་མཚམས་མེད་པ་རྫོགས་པ་མ་ལགས་མོད་ཀྱི། འོན་ཀྱང་མཚམས་མ་མཆིས་པའི་ལས་བགྱིས་སོ། །རྒྱུ་དང་རྐྱེན་དེ་ལྟ་བས་ན་ཆོས་རྣམས་ཀྱི་ཆོས་ཉིད་རིག་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་ལེགས་
སོ་ཤིན་ཏུ་ལེགས་སོ། །རིགས་ཀྱི་བུ་རྒྱུ་དང་རྐྱེན་དེ་ལྟ་བས་ན་ངས་རྣམ་པ་སྣ་ཚོགས་ཀྱི་ཐབས་དང་དཔེས་རྣམ་པར་གྲོལ་བའི་དཔེར་གསུངས་པ་ཡིན་ནོ། །དཔེ་རྣམ་པ་གྲངས་མེད་ཚད་མེད་པ་སྙེད་ཀྱིས་དཔེར་བསྟན་ཀྱང་ཡང་དག་པར་ན་དཔེར་བསྐྲུན་དུ་མེད་དེ། རྒྱུ་དང་རྐྱེན་ཁ་ཅིག་གི་སྐབས་སུ་ནི་དཔེས་བསྟན་དུ་རུང་ངོ་། །རྒྱུ་དང་རྐྱེན་ཁ་ཅིག་གི་སྐབས་སུ་ནི་དཔེས་བསྟན་དུ་མི་རུང་སྟེ། དེ་བས་ན་རྣམ་པར་གྲོལ་བ་ནི་དེ་ལྟ་བུའི་ཡོན་ཏན་ཚད་མེད་པ་དང་ལྡན་ཏེ། མྱ་ངན་ལས་འདས་པ་ལ་ཞུགས་པའོ། །མྱ་ངན་ལས་འདའ་བ་དང་། དེ་བཞིན་གཤེགས་པ་ལ་ཡང་དེ་ལྟ་བུའི་ཡོན་ཏན་ཚད་མེད་པ་དང་ལྡན་ནོ། །དེ་ལྟ་བུའི་ཡོན་ཏན་ཚད་མེད་པ་དང་ལྡན་ཏེ། ཕུན་སུམ་ཚོགས་པའི་ཕྱིར་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་བདག་གིས་ནི་དེ་བཞིན་གཤེགས་པ་བྱོན་པའི་གནས་གདོད་འཚལ་ཏེ། བས་མི་འཚལ་བའི་གནས་སོ། །དེ་ལྟར་བས་མི་འཚལ་བས་ན་སྐུ་ཚེའི་ཚད་ཀྱང་བས་མི་འཚལ་བར་རིག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཡང་དག་པའི་ཆོས་ཤིན་ཏུ་འཛིན་ཅིང་སྲུང་བའོ། །རིགས་ཀྱི་བུའམ་རིགས་ཀྱི་བུ་མོ་གང་ཀུན་ནས་ཉོན་མོངས་པས་རྣམ་པར་བཅིངས་པ་གཅོད་འདོད་པ་དག་ནི་དེ་ལྟར་དམ་པའི་ཆོས་གཟུང་ཞིང་བསྲུང་བར་བྱའོ། །རིགས་ཀྱི་བུ་ཡོངས་སུ་མྱ་ངན་ལས་འདས་པའི་མདོ་ཤིན་ཏུ་ཟབ་མོ་འདི་ལས་གང་ཟག་རྣམ་པ་བཞིས་ཡང་དག་པའི་ཆོས་སྲུང་ཞིང་ཡང་དག་པའི་ཆོས་རྣམ་པར་འཇོག་པ་དང་། ཡང་དག་པའི་ཆོས་ཡིད་ལ་བྱེད་ནུས་ཤིང་འཇིག་རྟེན་དུ་བཅས་པ་ལ་སྙིང་བརྩེ་བ་དང་། འཇིག་རྟེན་དུ་བཅས་པའི་རྟེན་དང་གནས་སུ་འགྱུར་ཞིང་ལྷ་དང་མི་མང་པོ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །གང་ཟག་བཞི་པོ་གང་ཞེ་ན་གང་ཟག་གང་འཇིག་རྟེན་ལས་འདས་ཏེ་ཉོན་མོངས་པའི་མཚན་ཉིད་དང་ལྡན་པ་ནི་རྒྱུན་དུ་ཞུགས་པ་ཞེས་བྱ་སྟེ་གཅིག་གོ །གང་ཟག་ལན་ཅིག་ཕྱིར་ལྡོག་པ་ནི་གཉིས་སོ། །ལན་ཅིག་ཕྱིར་མི་
ལྡོག་པ་ནི་གསུམ་མོ། །དགྲ་བཅོམ་པ་ནི་བཞིའོ། །གང་ཟག་རྣམ་པ་བཞི་པོ་འདི་དག་འཇིག་རྟེན་དུ་བྱུང་ན། འཇིག་རྟེན་དུ་བཅས་པ་ལ་སྙིང་བརྩེ་ཞིང་འཇིག་རྟེན་དུ་བཅས་པའི་རྟེན་དང་གནས་སུ་འགྱུར་ཏེ། ལྷ་དང་མི་མང་པོ་ལ་ཕན་པ་དང་བདེ་བའི་དོན་བྱེད་པར་འགྱུར་རོ། །དེ་ལ་ཉོན་མོངས་པའི་མཚན་ཉིད་དང་ལྡན་པ་གང་ཞེ་ན། དེ་ལ་གང་ཟག་གང་ཞིག་ཚུལ་ཁྲིམས་ཡོངས་སུ་སྡོམ་ཞིང་སྤྱོད་ལམ་མི་ཉམས་པས་ཡང་དག་པའི་ཆོས་རྣམ་པར་གཞག་ནས་སངས་རྒྱས་ལས་ཇི་སྐད་དུ་ཐོས་པ་བཞིན་དུ་ཡི་གེ་དང་དོན་ལ་མཁས་ཏེ་གཞན་ལ་ཡང་རྒྱས་པར་འཆད་ཅིང་སྟོན་པ་ནི་འདི་ལྟ་སྟེ། འདོད་པ་ཉུང་བ་དང་། འདོད་པ་མང་བ་དང་། བྱང་ཆུབ་ཡིན་པ་ལ་སོགས་པ་སྐྱེས་བུ་ཆེན་པོ་ཡ་བརྒྱད་ཀྱི་ཆོས་རྒྱས་པར་སྟོན་པའོ། །གང་ཉེས་པ་བྱུང་བ་རྣམས་ཀྱང་འཐོལ་ཞིང་འགྱོད་ཚངས་བྱེད་དུ་བཅུག་ནས། ཉེས་པ་བྱང་བར་བྱེད་པ་དང་། བྱང་ཆུབ་སེམས་དཔའ་རྣམས་ཀྱི་ཐབས་དང་སྤྱོད་པ་དང་། དགོངས་ཏེ་གསུངས་པའི་ཆོས་ལ་ཤིན་ཏུ་མཁས་པ་ནི་བྱིས་པ་སོ་སོའི་སྐྱེ་བོ་ཞེས་བྱའི་སྐྱེས་བུ་ཡ་བརྒྱད་པོ་མ་ཡིན་ནོ། །སྐྱེས་བུ་ཡ་བརྒྱད་པོ་ནི་བྱིས་པ་སོ་སོའི་སྐྱེ་བོ་ཞེས་མི་བྱ་སྟེ། བྱང་ཆུབ་སེམས་དཔའ་ཞེས་བྱའི་སངས་རྒྱས་ཞེས་བྱ་བ་ནི་མ་ཡིན་ནོ། །སྐྱེས་བུ་གཉིས་པོ་ནི་རྒྱུན་དུ་ཞུགས་པ་ཞེས་བྱའོ། །ལན་ཅིག་ཕྱིར་ལྡོག་པ་ནི་ཡང་དག་པའི་ཆོས་རྙེད་དམ། ཡང་དག་པའི་ཆོས་འཛིན་ཏམ། སངས་རྒྱས་ལས་ཆོས་ཐོས་ན་ཇི་ལྟར་ཐོས་པ་བཞིན་དུ་གླེགས་བམ་དུ་འདྲི་ཞིང་འཆང་བ་དང་། ཀློག་པ་དང་། འདོན་པ་དང་། གཞན་ལ་ཡང་རྒྱས་པར་སྟོན་ཅིང་འཆད་དོ། །དེ་ཆོས་ཐོས་ནས་མི་འདྲི་བ་དང་འཆང་བ་དང་། འཛིན་པར་མི་བྱེད་པ་དང་། གཞན་ལ་ཡང་མི་འཆད་དོ། །བྲན་ཕོ་དང་བྲན་མོ་ལ་སོགས་པ་མ་བརྟགས་པའི་དངོས་པོ་དག་སངས་རྒྱས་ཀྱིས་འཆང་དུ་གནང་ངོ་ཞེས་སྨྲ་བའི་གནས་མེད་དེ། དེ་ནི་གང་ཟག་གཉིས་པོ་ཞེས་བྱ་སྟེ། གང་ཟག་དེ་ནི་གཉིས་པོ་དང་གསུམ་པོའི་ས་ཐོབ་པ་ཡང་མ་ཡིན་ལ། བྱང་ཆུབ་སེམས་དཔའ་ལུང་བསྟན་པ་ཞེས་ཀྱང་མི་བྱའོ། །གང་ཟག་གསུམ་པོ་ནི་ལན་ཅིག་ཕྱིར་མི་ལྡོག་པ་ཞེས་བྱ་སྟེ། ལན་
ཅིག་ཕྱིར་མི་ལྡོག་པ་ནི་ཡང་དག་པའི་ཆོས་ལ་སྐུར་པའམ། བྲན་ཕོ་དང་བྲན་མོ་དང་། ལས་བྱེད་པའི་མི་ལ་སོགས་པ་མ་བརྟགས་པའི་དངོས་པོ་དག་འཆང་དུ་གནང་ཞེའམ། མུ་སྟེགས་ཅན་གྱི་གཙུག་ལག་དང་། ཡི་གེ་ལ་སློབ་ཅིང་འཛིན་ཅེའམ། ཀུན་ནས་ཉོན་མོངས་པས་སྒྲིབ་པར་འགྱུར་ཞེའམ། བག་ལ་ཉལ་བའི་ཉོན་མོངས་པས་སྒྲིབ་ཅིང་གཡོགས་པར་འགྱུར་ཞེའམ། དེ་བཞིན་གཤེགས་པའི་སྐུ་གདུང་ཡང་དག་པ་སྦེད་ཅིང་འཆབ་ཅེའམ། ཕྱི་རོལ་གྱི་ནད་རྣམ་པ་མང་པོས་འཚེ་ཞིང་གནོད་པར་འགྱུར་ཞེའམ། སྦྲུལ་གདུག་པ་རྣམ་པ་བཞིས་ཟིན་པར་འགྱུར་ཞེའམ། བདག་ཏུ་སྨྲ་བ་ལ་སོགས་པའི་གནས་མེད་ཀྱི། བདག་མེད་པར་སྨྲ་བའི་གནས་ནི་ཡོད་དོ། །འཇིག་རྟེན་གྱི་ཆོས་ལ་ཆགས་པར་སྨྲ་བའི་གནས་ནི་མེད་ཀྱི། ཐེག་པ་ཆེན་པོ་བར་ཆད་ཀྱི་རྒྱུན་མེད་པར་སྟོན་པའི་གནས་ནི་ཡོད་དོ། །གང་ལུས་ལེན་པ་དེ་སྲིན་བུ་བརྒྱད་ཁྲིས་བཟའ་བའི་གནས་མེད་ཀྱི། འདོད་ཆགས་ཡོངས་སུ་སྤངས་ནས་ཆུང་ངུ་ན་རྨི་ལམ་ན་ཡང་མི་གཙང་བ་མི་འབྱུང་བའི་གནས་ནི་ཡོད་དོ། །མཐར་ཚེའི་བྱ་བ་བྱེད་པ་ན་འཇིགས་སྐྲག་པར་འགྱུར་བའི་གནས་ཀྱང་མེད་དོ། །ལེན་ཅིག་ཕྱིར་མི་ལྡོག་པ་ཞེས་བྱ་བ་ཅིའི་དོན་ཞེ་ན། གང་ཟག་དེ་ནི་ཉེས་པའི་སྐྱོན་གོང་དུ་སྨོས་པའི་ནང་དུ་ཕྱིར་མི་འཁོར་ཏེ། དེས་གོས་པར་ཡང་མི་འགྱུར་ལ། ཕྱིར་འཁོར་ཞིང་སྐྱེ་ཡང་དེ་ནི་བྱང་ཆུབ་སེམས་དཔའ་ཞེས་བྱ་སྟེ། ལུང་བསྟན་པ་ཡང་ཐོབ་པས་རིང་པོར་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་ཡང་འགྱུར་ཏེ། དེ་ནི་གང་ཟག་གསུམ་པ་ཞེས་བྱའོ། །གང་ཟག་བཞི་པ་ནི་དགྲ་བཅོམ་པ་ཞེས་བྱ་སྟེ། དགྲ་བཅོམ་པ་ནི་ཉོན་མོངས་པ་ཐམས་ཅད་བཅད་པ། ཁུར་བོར་བ། བྱ་བ་བྱས་པ། ཕྱིས་བདག་གི་དོན་རབ་ཏུ་རྙེད་པ། ས་བཅུ་ལ་རབ་ཏུ་གནས་པ། ཡེ་ཤེས་ལ་དབང་སྒྱུར་བ། སོ་སོའི་སྐྱེ་བོ་ཅི་ལ་མོས་པ་བཞིན་དུ་རྣམ་པ་སྣ་ཚོགས་ཀྱི་གཟུགས་དང་ཆ་ལུགས་ཀྱང་དེ་བཞིན་དུ་སྟོན་པ། མངོན་པར་འཚང་རྒྱ་བར་འདོད་ན་ཡང་མངོན་པར་སངས་རྒྱས་པ་སྟོན་པ་སྟེ།
དེ་ལྟ་བུའི་ཡོན་ཏན་ཚད་མེད་པ་དང་ལྡན་པས་ན་དགྲ་བཅོམ་པ་ཞེས་བྱའོ། །དེ་བས་ན་སྐྱེས་བུ་ཆེན་པོ་བཞི་འཇིག་རྟེན་དུ་བྱུང་ན། འཇིག་རྟེན་དུ་བཅས་པ་ལ་སྙིང་བརྩེ་བས་འཇིག་རྟེན་དུ་བཅས་པའི་གནས་དང་རྟེན་དུ་འགྱུར་ཞིང་ལྷ་དང་མི་མང་པོ་ལ་ཕན་པ་དང་བདེ་བའི་དོན་བྱེད་པ་དང་། ལྷ་དང་མིའི་ནང་ན་མཆོག་ཏུ་འགྱུར། གཙོ་བོར་འགྱུར། ཕུལ་དུ་འགྱུར་ཏེ། ཇི་ལྟར་དེ་བཞིན་གཤེགས་པ་ཐམས་ཅད་ཀྱི་སྐྱབས་སུ་འགྲོ་བའི་གནས་མིའི་མཆོག་ཏུ་གྱུར་པ་བཞིན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་སྐྱེས་བུ་བཞི་པོ་ལ་མི་གནས་མི་རྟེན་ཏོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་སྔོན་མདོ་སྡེ་གུ་ཤི་ལས་དྲིས་པ་ལས་འདི་སྐད་ཅེས་གསུངས་ཏེ། གུ་ཤི་ལ་ལྷ་དང་། བདུད་དང་། ཚངས་པ་ལ་སོགས་པ་ཁྱོད་གཞིག་ཅིང་མི་རུང་བར་བྱ་བའི་ཕྱིར་སངས་རྒྱས་ཀྱི་གཟུགས་ལྟ་བུར་བསྒྱུར་ནས་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་ཀྱི་དཀྱིལ་འཁོར་འདོམ་གང་བ་དང་། ཞལ་ཟླ་བ་རྒྱས་པ་ལྟ་བུ་དང་། སྨིན་མཚམས་ཀྱི་མཛོད་སྤུའི་མཚན་དཀར་ཁྱད་གངས་སམ། དུང་ལྟ་བུས་ཡོངས་སུ་བརྒྱན་ཏེ་འོངས་ན་ཁྱོད་ཡང་དག་པ་ཡིན་ནམ་མ་ཡིན་པ་རྟོགས་ཤིག །རྟོགས་ཤིང་ཤེས་ནས་གདུལ་བར་བྱའོ་ཞེས་གསུངས་ཏེ། བཅོམ་ལྡན་འདས་བདུད་ལ་སོགས་པས་སངས་རྒྱས་ཀྱི་སྐུར་ཡང་སྟོན་ཅིང་སྤྲུལ་ནུས་ན་དགྲ་བཅོམ་པ་ལ་སོགས་པ་སྐྱེས་བུ་བཞིའི་ལུས་སུ་སྟོན་ཅིང་ནམ་མཁའ་ལ་འགྲོ་བ་དང་། ཉལ་བ་དང་། འདུག་པ་དང་། རྩིབ་ལོགས་གཡོན་ནས་ཆུ་འབྱུང་བ་དང་། རྩིབ་ལོགས་གཡས་ནས་མེ་འབྱུང་བ་དང་། ལུས་ལ་དུད་པ་འཐུལ་ཞིང་མེའི་ཕུང་པོ་ལྟར་སྟོན་པ་ལྟ་སྨོས་ཀྱང་ཅི་འཚལ་ཏེ། རྒྱུ་དང་རྐྱེན་དེ་ལྟ་བས་ན་བདག་ནི་དེ་ལ་དད་པ་ཡང་མི་སྐྱེ་ལ་སྟོན་པ་ཞིག་ཡོད་ན་ཡང་། ཚུལ་བཞིན་དུ་མི་བགྱིད་བཀུར་སྟི་དང་། རྟེན་དང་གནས་ལྟ་བུ་ཡང་མི་སེམས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་བསྟན་པ་ལ་ཐེ་ཙོམ་ཡོད་ན་ཡང་གཟུང་བར་མི་བྱ་ན་དེ་དག་གིས་བསྟན་པ་ལྟ་ཅི་སྨོས་ཏེ། དེ་བས་ན་
དགེའམ་མི་དགེའམ། བྱའམ་མི་བྱ་བ་ཤིན་ཏུ་བརྟགས་ཏེ་ཁོང་དུ་ཆུད་པར་བྱའོ། །དེ་ལྟར་བྱས་ན་ཡུན་རིང་པོར་བདེ་བ་མྱོང་བར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱི་རྐུན་ཞིག་ཁྱིམ་དུ་འོངས་ཏེ་བྲན་མོ་ཁྱིམ་སྲུང་གིས་ཚོར་ན་དེ་ལ་སྤྱོས་ཏེ་མྱུར་དུ་ཕྱིར་སོང་ཤིག །མ་བྲོས་ན་བསད་དོ་ཞེས་སྨྲས་ཏེ། ཁྱིས་དེ་སྐད་ཐོས་ནས་བྲོས་ཏེ་ཕྱིར་མི་ལྡོག་གོ །ཁྱོད་ཀྱང་དེ་བཞིན་དུ་བདུད་སྡིག་ཏོ་ཅན་འདུལ་བ་ན། དེ་ལ་འདི་སྐད་དུ་བདུད་སྡིག་ཏོ་ཅན་ཁྱོད་འདི་འདྲ་བའི་གཟུགས་སུ་མ་སྟོན་ཅིག །ཅི་སྟེ་སྟོན་ན་འཆིང་བ་རྣམ་པ་ལྔས་འཆིང་ངོ་ཞེས་གྱིས་ཤིག །བདུད་ཀྱིས་དེ་སྐད་ཐོས་ན་འབྲོས་ཏེ། ཕྱིར་མི་ལྡོག་པ་ཡང་ཇི་ལྟར་ཁྱི་རྐུན་དེ་ཕྱིར་མི་ལྡོག་པ་བཞིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་ཁྱིམ་བདག་གུ་ཤི་ལ་ལ་འདི་སྐད་ཅེས་གསུངས་ཏེ། གང་ཞིག་དེ་ལྟར་བདུད་ཐུལ་ན། ཡོངས་སུ་མྱ་ངན་ལས་འདས་པ་ཆེན་པོ་ལ་ཉེ་བ་ཞེས་བགྱི་ན། ཅིའི་སླད་དུ་བཅོམ་ལྡན་འདས་ཀྱིས་གང་ཟག་བཞི་པོ་ལ་གནས་དང་རྟེན་ལྟ་བུར་གསུངས། གང་ཟག་བཞི་པོས་སྟོན་པ་ལ་ངེས་པར་ཡིད་ཆེས་སུ་རུང་ངམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ངས་གསུངས་པ་ཡང་དེ་དང་འདྲ་སྟེ། དེ་ལྟ་བུ་ཡིན་ནོ། །རིགས་ཀྱི་བུ་ངས་ནི་ཉན་ཐོས་ཤའི་མིག་ཅན་དག་ལ་བདུད་འདུལ་བར་བསྟན་གྱི། ཐེག་པ་ཆེན་པོ་ལ་ནན་ཏན་བྱེད་པའི་གང་ཟག་ལ་བཤད་པ་ནི་མ་ཡིན་ནོ། །ཉན་ཐོས་ཀྱི་གང་ཟག་ནི་འཕྲུལ་གྱི་མིག་ཅན་དུ་གྱུར་ཀྱང་ཤའི་མིག་ཅེས་བྱའོ། །ཐེག་པ་ཆེན་པོ་སློབ་པའི་ནི་ཤའི་མིག་ཅན་ཡང་སངས་རྒྱས་ཀྱི་སྤྱན་ཞེས་བྱའོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་སྡེ་ནི་སངས་རྒྱས་ཀྱི་ཐེག་པ་ཞེས་བྱ་སྟེ། སངས་རྒྱས་ཀྱི་ཐེག་པ་ནི་མཆོག་ཏུ་གྱུར་ཕུལ་དུ་གྱུར་པའོ། །རིགས་ཀྱི་བུ་འདི་ལྟ་སྟེ། དཔེར་ན་སྐྱེས་བུ་དཔའ་ཞིང་སྒྱུ་རྩལ་ཆེ་བ་ལ་ནི་གང་སྡར་མ་ཞན་པ་དག་རྟག་ཏུ་འཁོར་ཞིང་རྟེན་ཏོ། །སྐྱེས་བུ་དཔའ་བོ་དེས་སྡར་མ་དེ་ལ་ཁྱོད་གཞུ་འདི་ལྟར་ཟུང་ཤིག །མདའ་འདི་ལྟར་འཕོངས་ཤིག །ཤག་ཏི་སློབ་ཅིང་ཀྱོ་བ་ཏང་དང་ཞགས་
པ་འདི་ལྟར་ཐོབ་ཤིག་ཅེས་སྟོན་ཏོ། །གཞན་ཡང་འདི་སྐད་དུ་དགྲ་དང་འཐབ་པ་ནི་མཚོན་གྱི་ཁར་སོང་བ་དང་འདྲ་མོད་ཀྱི། འཇིགས་སྐྲག་པའི་འདུ་ཤེས་མ་སྐྱེད་པར་ཕ་རོལ་པོ་ལྷ་དང་མི་ལ་ཤིན་ཏུ་བརྙས་པའི་འདུ་ཤེས་སྐྱེད་ཅིག །བདག་ནི་ཤིན་ཏུ་དཔའ་ཞིང་རྩལ་ཆེ་བར་འདུ་ཤེས་སྐྱེད་ཅིག །བར་བར་གྱི་དུས་སུ་མི་སྡར་མ་ཞན་པ་དག་ཅིག་དཔའ་བོ་ལྟར་བཅོས་ཏེ། མདའ་གཞུ་དང་། རལ་གྲི་དང་། མཚོན་ཆ་སྣ་ཚོགས་ཐོགས་ཏེ། གཡུལ་ངོར་ལྷགས་ནས་སྐད་ཆེན་པོས་བོས་ན། ཁྱོད་དེ་ལ་འཇིགས་པའམ། སྐྲག་པ་ལྟར་མ་བྱེད་ཅིག་དང་། སྡར་མ་དེས་ཁྱོད་མི་སྐྲག་པར་ཤེས་ནས་ཁྱི་རྐུན་དང་འདྲ་བར་དེ་མ་ཐག་ཏུ་འགྱེས་ཤིང་འབྲོས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་རྣམས་ལ་ཁྱེད་བདུད་སྡིག་ཏོ་ཅན་གྱིས་མ་སྐྲག་ཤིག་གལ་ཏེ་བདུད་སྡིག་ཏོ་ཅན་སངས་རྒྱས་ཀྱི་སྐུར་སྤྲུལ་ཏེ། ཁྱོད་ཀྱི་དྲུང་དུ་འོང་ན་ཡང་ཁྱོད་ཤིན་ཏུ་བརྟན་པའི་བརྩོན་འགྲུས་ཀྱིས་བདུད་ཀྱི་སྡེ་རྣམས་ཐུལ་ཅིག །དེའི་ཚེ་ན་བདུད་ཀྱང་མྱ་ངན་གྱིས་ནོན་ཏེ་མི་དགའ་ནས་ཕྱིར་འགྲོའོ། །རིགས་ཀྱི་བུ་དཔེར་ན་སྐྱེས་བུ་དཔའ་བོ་གཞན་ལ་སློབ་མི་དགོས་པ་ལྟར་ཐེག་པ་ཆེན་པོ་ལ་ནན་ཏན་བྱེད་པ་ཡང་དེ་དང་འདྲ་སྟེ། ཤིན་ཏུ་ཟབ་མོའི་མདོ་སྡེ་རྣམ་པ་སྣ་ཚོགས་ཐོས་ཀྱང་སེམས་རབ་ཏུ་དགའ་ཞིང་རངས་པར་འགྱུར་གྱི། འཇིགས་པའམ་སྐྲག་པ་མི་སྐྱེའོ། །དེ་ཅིའི་ཕྱིར་ཞེ་ན། འདི་ལྟར་ཐེག་པ་ཆེན་པོ་ལ་སློབ་པའི་གང་ཟག་ནི་སྔོན་འདས་པའི་སངས་རྒྱས་གྲངས་མེད་པ་བརྒྱ་སྟོང་ལ་ཕྱག་དང་། བསྙེན་བཀུར་དང་། མཆོད་པ་བྱས་པས་གལ་ཏེ་བདུད་ཀྱི་འཁོར་གྲངས་མེད་པ་བརྒྱ་སྟོང་སྙེད་ཀྱིས་གནོད་པའམ། རྣམ་པར་གཙེས་ཀྱང་དེ་ལ་ནི་ནམ་དུ་ཡང་འཇིགས་སྐྲག་པ་མི་འབྱུང་ངོ་། །རིགས་ཀྱི་བུ་འདི་ལྟ་སྟེ། དཔེར་ན། མི་ཞིག་སྨན་ཨ་གས་རྙེད་ན་སྦྲུལ་གདུག་པ་ལ་སོགས་པ་ཐམས་ཅད་ཀྱིས་མི་འཇིགས་སོ། །སྨན་དེའི་མཐུས་གདུག་པ་ཐམས་ཅད་གཞིལ་ནུས་པའི་ཕྱིར་རོ། །ཐེག་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། བདུད་གདུག་པ་
ཐམས་ཅད་ཀྱིས་མི་འཇིགས་ལ། ཕྱིས་མི་ལྡང་བར་ཡང་གདུལ་ནུས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། ཀླུ་གདུག་པ་ནི་ཕ་རོལ་ལ་གསོད་པའི་ཚེ། བར་འགའ་ནི་མིག་གིས་བལྟས་པ་ཙམ་མམ། བར་འགའ་དབུགས་ཀྱིས་རྔུབས་པ་ཙམ་གྱིས་འཆི་སྟེ། དེ་བས་ན་སེང་གེ་དང་། སྟག་དང་། འཕར་སྤྱང་དང་། ཁྱི་ལ་སོགས་པ་ཐམས་ཅད་དེ་ལ་འཇིགས་སོ། །གཅན་གཟན་དེ་དག་ལ་སོགས་པས་དེའི་སྐད་ཐོས་སམ། དེའི་ལུས་ཀྱིས་རེག་པ་ཙམ་གྱིས་མི་འཆི་བ་མེད་དོ། །གང་སྔགས་ལ་ཤིན་ཏུ་མཁས་པ་ནི་སྔགས་ཀྱི་མཐུས་ན་ཀླུ་གདུག་པ་དང་། ནམ་མཁའ་ལྡིང་དང་། བལ་གྱི་གླང་པོ་ཆེ་སྨྱོས་པ་དང་། སེང་གེ་དང་། སྟག་དང་། འཕར་སྤྱང་ལ་སོགས་པ་ཐམས་ཅད་ཐུལ་ཏེ། ཁ་ལོ་སྒྱུར་ཞིང་ཞོན་ཀྱང་ནུས་སོ། །གཅན་གཟན་དེ་དག་གིས་སྔགས་ལ་མཁས་པ་དེ་མཐོང་བ་ཙམ་གྱིས་རང་འདུལ་ལོ། །ཉན་ཐོས་དང་། རང་སངས་རྒྱས་ཀྱང་དེ་དང་འདྲ་སྟེ། བདུད་སྡིག་ཏོ་ཅན་མཐོང་ན་ཐམས་ཅད་འཇིགས་སྐྲག་གོ །བདུད་སྡིག་ཏོ་ཅན་ནི་དེ་དག་ལ་འཇིགས་པའམ་སྐྲག་པའི་སེམས་མེད་དེ། བདུད་ཀྱི་ལས་ཀྱང་བྱེད་དོ། །ཐེག་པ་ཆེན་པོ་ལ་སློབ་པ་ཡང་དེ་དང་འདྲ་སྟེ། དེ་ལྟར་ཉན་ཐོས་དག་བདུད་ཀྱིས་སྐྲག་སྟེ། ཐེག་པ་ཆེན་པོ་ལ་མི་མོས་མི་དད་པ་མཐོང་ནས། སྔར་ཐབས་ཀྱིས་བདུད་ཀྱི་རིས་རྣམས་བཏུལ་ཏེ། ཐམས་ཅད་འདུལ་བར་བྱས་ནས། དེའི་འོག་ཏུ་དམ་པའི་ཆོས་རྣམ་པ་སྣ་ཚོགས་སྟོན་ཅིང་འཆད་དོ། །ཉན་ཐོས་དང་། རང་སངས་རྒྱས་དག་དེ་ལྟར་བདུད་རྣམས་བཏུལ་བ་མཐོང་ན། གདོད་སྐྲག་པ་སྐྱེས་ཏེ། ཐེག་པ་ཆེན་པོ་དམ་པའི་ཆོས་བླ་ན་མེད་པ་ལ་མོས་པ་དང་དད་པ་བསྐྱེད་དེ། འདི་སྐད་དུ་བདག་ཅག་ནི་ད་ཕྱིན་ཆད་དམ་པའི་ཆོས་འདིའི་བར་ཆད་དང་། བགེགས་མི་བྱའོ་ཞེས་སྨྲའོ། །གཞན་ཡང་རིགས་ཀྱི་བུ་ཉན་ཐོས་དང་། རང་སངས་རྒྱས་ནི་ཉོན་མོངས་པ་རྣམས་ལ་འཇིགས་པ་དང་སྐྲག་པ་སྐྱེའོ། །ཐེག་པ་ཆེན་པོ་སློབ་པ་དག་ནི་འཇིགས་པའམ་བག་ཚ་བ་
མེད་དོ། །ཐེག་པ་ཆེན་པོ་ལ་ནན་ཏན་བྱེད་པ་ནི་དེ་ལྟ་བུའི་མཐུ་དང་ལྡན་ཏེ། རྒྱུ་དང་རྐྱེན་དེ་ལྟ་བས་ན་སྔར་བསྟན་ཅིང་བཤད་པ་ནི་ཉན་ཐོས་དང་རང་སངས་རྒྱས་དག་གིས་བདུད་གདུལ་བའི་ཕྱིར་གྱི། ཐེག་པ་ཆེན་པོའི་ཕྱིར་ནི་མ་ཡིན་ནོ། །ཐེག་པ་ཆེན་པོ་མྱ་ངན་ལས་འདས་པའི་མདོ་སྡེ་ཤིན་ཏུ་ཟབ་མོ་འདི་ནི་ངོ་མཚར་ཆེ་ཞིང་རྨད་དུ་གྱུར་པ་སྟེ། གདུལ་ནུས་པ་མེད་དོ། །གང་ཞིག་མཉན་ཏེ་ཐོས་ནས་དད་ཅིང་འཛིན་ཏམ། དེ་བཞིན་གཤེགས་པ་ལ་རྟག་པའི་ཆོས་ཅན་དུ་ཡིད་ཆེས་ན་གང་ཟག་དེ་ནི་མེ་ཏོག་ཨུ་དུམ་བཱ་ར་ལྟར་ཤིན་ཏུ་དཀོན་པའོ། །ང་མྱ་ངན་ལས་འདས་ནས་གང་གིས་ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོ་འདི་ཐོས་ནས་དད་པའི་སེམས་སྐྱེས་ན། དེ་ནི་མ་འོངས་པའི་དུས་སུ་བསྐལ་པ་བརྒྱ་སྟོང་གི་བར་དུ་ངན་སོང་དུ་མི་ལྟུང་བར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ང་མྱ་ངན་ལས་འདས་ནས་ཡོངས་སུ་མྱ་ངན་ལས་འདས་པའི་མདོ་སྡེ་དམ་པ་འདི་ལ་སེམས་ཅན་གྲངས་མེད་པ་བརྒྱ་སྟོང་སྙེད་ཀྱིས་སྐུར་ཅིང་ཡིད་མི་ཆེས་པར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་སེམས་ཅན་དེ་དག་སངས་རྒྱས་མྱ་ངན་ལས་འདས་པའི་འོག་ཏུ་ཡུན་རིང་དུ་མདོ་སྡེ་འདི་ལ་བསྙེན་ནས་བཀུར་བར་འགྱུར་ན། དེ་ལ་སྐྱེ་བོ་ཤིན་ཏུ་དགེ་བ་དང་ལྡན་པ་ཇི་ལྟ་བུས་ཆོས་ལ་རྣམ་པར་སྐུར་པ་དེ་སྒྲོལ་བར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ང་མྱ་ངན་ལས་འདས་ནས་ལོ་བཞི་བཅུའི་བར་དུ་ནི་འཛམ་བུའི་གླིང་འདིར་རྒྱས་པར་འགྱུར་ཏེ། དེ་ནས་སའི་འོག་ཏུ་ནུབ་པར་འགྱུར་རོ། །རིགས་ཀྱི་བུ་དཔེར་ན་བུ་རམ་གྱི་ཤིང་དང་འབྲས་དང་། ཤ་ཁ་ར་དང་། འོ་མ་དང་། མར་དང་། མར་གྱི་སྙིང་པོ་ཡོད་པའི་གནས་ན། འཁོད་པའི་སེམས་ཅན་དག་ནི་རོ་བྲོ་བ་དེ་ལ་རོའི་ནང་ན་མཆོག་དམ་པར་འཛིན་ཏོ། །དེ་ལ་ཁ་ཅིག་ནི་ཁྲེ་དང་ཡུག་པོའི་ས་བོན་འབའ་ཞིག་ཟ་ན་དེ་དག་ཀྱང་འདི་སྐད་དུ་བདག་
ཅག་གི་ཟས་འདི་ལས་འདའ་བ་མེད་ཅེས་ཟེར་རོ། །དེ་ནི་སེམས་ཅན་བསོད་ནམས་ཆུང་བའི་ལས་ཀྱི་རྣམ་པར་སྨིན་པ་ཡིན་ཏེ། བསོད་ནམས་ཅན་སྐལ་བ་དང་ལྡན་པ་དག་ནི། ཁྲེ་དང་ཡུག་པོའི་ས་བོན་རྣམས་ཀྱང་མི་ཐོས་ཏེ། ཟས་སུ་འབྲས་དང་བུ་རམ་དང་། ཤ་ཁ་ར་དང་། མར་གྱི་སྙིང་པོ་འབའ་ཞིག་ཟའོ། །མྱ་ངན་ལས་འདས་པའི་མདོ་སྡེ་དམ་པ་འདི་ཡང་དེ་དང་འདྲ་སྟེ། དབང་པོ་རྟུལ་པོ་བསོད་ནམས་ཆུང་ཞིང་སྐལ་བ་མེད་པ་དག་ཐོས་པར་མི་འདོད་དོ། །ཇི་ལྟར་བསོད་ནམས་ཆུང་བ་དག་འབྲས་དང་། ཤ་ཁ་ར་ལ་སོགས་པ་མི་འདོད་པ་ལྟར། ཐེག་པ་ཆུང་ངུ་གཉིས་ཀྱང་དེ་དང་འདྲ་སྟེ། མྱ་ངན་ལས་འདའ་བ་ཆེན་པོའི་མདོ་སྡེ་དམ་པ་འདི་མི་འདོད་དོ། །དེ་ལ་སོ་སོའི་སྐྱེ་བོ་གང་མདོ་སྡེ་འདི་ཐོས་པར་མོས་ཤིང་ཐོས་ཀྱང་རབ་ཏུ་དགའ་སྟེ། སྐུར་བ་མི་བྱེད་པ་ནི་སེམས་ཅན་བསོད་ནམས་ཅན་འབྲས་ལ་སོགས་པ་ཟ་བ་དང་མཚུངས་སོ། །རིགས་ཀྱི་བུ་དཔེར་ན་རྒྱལ་པོ་ཞིག་རིའི་གསེབ་ཤིན་ཏུ་ཉམ་ང་བའི་གནས་ན་འདུག་ན། བུ་རམ་གྱི་ཤིང་དང་། འབྲས་དང་། ཤ་ཁ་ར་ཞིག་ཡོད་ཀྱང་དཀོན་པས་ན་ཟད་ཀྱིས་དོགས་ཏེ། ཟ་བའི་ཐུགས་ནི་མི་ཐུབ་ཀྱི་སོགས་སོ། །ཁྲེ་དང་ཡུག་པོའི་ས་བོན་འབའ་ཞིག་ཟའོ། །རྒྱལ་པོ་གཞན་ཞིག་གིས་ཐོས་ནས། དེ་སྙིང་བརྩེ་བའི་ཕྱིར་འབྲས་དང་ཤ་ཁ་ར་ལ་སོགས་པ་ཤིང་རྟས་བསྐྱས་ཏེ་བྱིན་ན། རྒྱལ་པོ་དེས་ཀུན་ལ་བགོས་ཏེ་བྱིན་ནས་གདོད་ཟའོ། །ཟོས་ནས་ཐམས་ཅད་དགའ་སྟེ། འདི་སྐད་དུ་རྒྱལ་པོ་དེའི་ཕྱིར་བདག་ཅག་ཀྱང་སྔོན་མ་མྱོང་བའི་ཟས་ཟོས་པར་གྱུར་ཏོ་ཞེས་ཟེར་རོ། །རིགས་ཀྱི་བུ་སྐྱེས་བུ་གང་ཟག་བཞི་པོ་ཡང་དེ་དང་འདྲ་སྟེ། བླ་ན་མེད་པའི་ཆོས་ཆེན་པོའི་དེད་དཔོན་ནོ། །གང་ཟག་རྣམ་པ་དེ་བཞི་ལས་གང་ཟག་གཅིག་གིས་ཕྱོགས་གཞན་ཞིག་ན། བྱང་ཆུབ་སེམས་དཔའ་ཚད་མེད་པ་རྣམས་ཐེག་པ་ཆེན་པོའི་མདོ་སྡེ་འདི་སློབ་བམ། གླེགས་བམ་དུ་འདྲིའམ། གཞན་དག་གླེགས་བམ་དུ་འདྲིར་གཞུག་གམ། རྙེད་པ་དང་། བཀུར་སྟི་དང་། གྲགས་པའི་ཕྱིར་རམ། ཆོས་མངོན་པའི་ཕྱིར་རམ། རྟེན་དང་གནས་
ཀྱི་ཕྱིར་རམ། མདོ་སྡེ་གཞན་དག་ཏུ་བསྐུར་ཞིང་བརྗེ་བ་ཙམ་གྱི་ཕྱིར་གྱི། གཞན་དག་ལ་རྒྱས་པར་སྟོན་ཅིང་འཆད་མི་ནུས་པ་མཐོང་ན་དེ་དག་གི་ཕྱིར་མདོ་སྡེ་དམ་པ་འདི་ཕྱོགས་དེར་བསྐྱལ་ཏེ། བྱང་ཆུབ་སེམས་དཔའ་དེ་དག་ལ་བྱིན་ནས། བླ་ན་མེད་པའི་བྱང་ཆུབ་ཏུ་སེམས་བསྐྱེད་དུ་བཅུག་སྟེ། བྱང་ཆུབ་ལ་བཀོད་ནས། བྱང་ཆུབ་སེམས་དཔའ་དེ་དག་ཀྱང་མདོ་སྡེ་འདི་ཐོས་པས་གཞན་དག་ལ་རྒྱས་པར་སྟོན་ཅིང་བཤད་དེ། སེམས་ཅན་ཚད་མེད་པ་རྣམས་ཀྱང་། ཐེག་པ་ཆེན་པོའི་མདོ་སྡེ་འདིའི་ཆོས་ཀྱི་རོ་མྱོང་བར་བྱས་ན། དེ་ནི་བྱང་ཆུབ་སེམས་དཔའ་དེ་གཅིག་གི་མཐུས་སྔོན་མ་ཐོས་པའི་མདོ་སྡེ་ཐོས་པར་གྱུར་ཏེ། ཇི་ལྟར་རྒྱལ་པོ་གཅིག་གི་མཐུས་ཐམས་ཅད་ཀྱིས་སྔོན་མ་མྱོང་བའི་ཟས་མྱོང་བར་འགྱུར་བ་བཞིན་ནོ། ། རིགས་ཀྱི་བུ་གཞན་ཡང་མྱ་ངན་ལས་འདའ་བ་ཆེན་པོའི་མདོ་གང་ན་ཡོད་པའི་གནས་དེ་ནི་རྡོ་རྗེ་ལྟ་བུ་ཡིན་ལ། དེ་ན་གནས་པའི་མི་ཡང་རྡོ་རྗེ་དང་འདྲ་བར་རིག་པར་བྱའོ། །གང་ཞིག་མདོ་སྡེ་འདི་མཉན་ན་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་སྟེ། ཇི་ལྟར་སྨོན་པ་བཞིན་དུ་ཡང་འགྲུབ་པར་འགྱུར་རོ། །ངས་འདིར་ཇི་སྐད་དུ་གསུངས་པ་བཞིན་དགེ་སློང་ཁྱེད་ཤིན་ཏུ་གཟུངས་སུ་ཟུང་ཤིག །སེམས་ཅན་གང་ཞིག་མདོ་སྡེ་འདི་མཉན་མི་ནུས་ན་གང་ཟག་དེ་ནི་ཤིན་ཏུ་ཐུགས་བརྩེ་བའི་གནས་སུ་རིག་པར་བྱའོ། །དེ་ཅིའི་ཕྱིར་ཞེ་ན། གང་ཟག་དེས་ཐེག་པ་ཆེན་པོའི་མདོ་སྡེ་ཤིན་ཏུ་ཟབ་མོའི་དོན་འདི་གཟུང་མི་ནུས་པའི་ཕྱིར་རོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་མྱ་ངན་ལས་འདས་ནས་ལོ་བཞི་བཅུའི་བར་དུ་ཡོངས་སུ་མྱ་ངན་ལས་འདས་པ་ཐེག་པ་ཆེན་པོའི་མདོ་འདི་འཛམ་བུ་གླིང་དུ་རྒྱས་པར་འགྱུར་རོ། །དེ་ནས་སའི་འོག་ཏུ་ནུབ་ནས་ཕྱིས་ཡུན་རིང་མོ་ཞིག་ན་ཕྱིར་ཡང་འབྱུང་ངོ་། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངའི་དམ་པའི་ཆོས་འདི་ལོ་བརྒྱད་ཅུ་ལ་མ་གཏོགས་པ་སྔར་ལོ་བཞི་
བཅུའི་བར་དུ་འཛམ་བུའི་གླིང་འདིར་ཆོས་ཀྱི་ཆར་ཆེན་པོ་འབབ་པར་འགྱུར་རོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་འདི་དམ་པའི་ཆོས་འཇིག་པའི་ཚེ། ཡང་དག་པའི་ཚུལ་ཁྲིམས་ཉམས་པའི་ཚེ། ཆོས་མ་ལགས་པ་འཕེལ་ཞིང་སྐྱེ་བའི་ཚེ། ཚུལ་བཞིན་བྱེད་པའི་སེམས་ཅན་དག་མ་མཆིས་པའི་ཚེ། སུ་དག་གིས་འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བགྱིད་པ་དང་། མཆོད་པ་དང་། རིམ་གྲོ་དང་། བཀུར་སྟི་བགྱིད་ཅིང་གླེགས་བམ་དུ་འདྲི་བ་དང་། རྣམ་པར་འགྲེལ་ཅིང་སྟོན་པར་འགྱུར་བ་དེ་བཞིན་གཤེགས་པས་སོ་སོའི་སྐྱེ་བོ་དག་ལས་ཐུགས་བརྩེ་བའི་སླད་དུ་རྒྱས་པར་ཕྱེ་སྟེ་བསྟན་དུ་གསོལ། བྱང་ཆུབ་སེམས་དཔའ་རྣམས་ཐོས་ནས་འཛིན་པར་འགྱུར་རོ། །གཟུངས་སུ་བཟུང་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བཀའ་སྩལ་ནས། རིགས་ཀྱི་བུ་ཁྱོད་ཀྱིས་དོན་འདི་དག་དྲིས་པ་ལེགས་སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་དགའ་སྐྱེད་ཀྱི་བྱེ་མ་སྙེད་ཀྱི་སངས་རྒྱས་ལ་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ། མདོ་སྡེ་འདི་འཆང་བ་དང་། འཛིན་པར་འགྱུར་ཏེ། སྐུར་པ་མི་འདེབས་སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་གང་གཱ་གཅིག་གི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ། ཆོས་འདི་ལ་མི་སྐུར་ཅིང་མདོ་སྡེ་འདི་ལ་མོས་པར་འགྱུར་ཏེ། གཞན་ལ་རྒྱས་པར་འབྱེད་ཅིང་སྟོན་ནི་མི་ནུས་སོ། །རིགས་ཀྱི་བུ་སེམས་ཅན་གང་ཞིག་ཆུ་ཀླུང་གང་གཱ་གཉིས་ཀྱི་བྱེ་མ་སྙེད་ཀྱི་སངས་རྒྱས་ལ་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ཆོས་འདི་ལ་མི་སྐུར་ཏེ། དད་ཅིང་མོས་པ་དང་། འཆང་ཞིང་འཛིན་པ་དང་། ཀློག་པ་དང་། འདོན་པར་འགྱུར་ཏེ། གཞན་ལ་རྒྱས་པར་སྟོན་ནི་མི་ནུས་སོ། །སེམས་ཅན་
གང་ཞིག་ཀླུང་གང་གཱ་གསུམ་གྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ། ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བར་འགྱུར་ཏེ། གཞན་ལ་སྟོན་མོད་ཀྱི་དོན་ཟབ་མོ་ནི་མི་ཤེས་སོ། །སེམས་ཅན་གང་ཞིག་ཆུ་ཀླུང་གང་གཱ་བཞིའི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བར་འགྱུར་ཏེ། དེས་ནི་གཞན་དག་ལ་དོན་ཟབ་མོ་བཅུ་དྲུག་གི་ཆ་གཅིག་ཙམ་སྟོན་པར་འགྱུར་རོ། །སྟོན་ཅིང་འཆད་མོད་ཀྱི་དེ་ཡང་རྫོགས་པར་ཤེས་པ་ནི་མ་ཡིན་ནོ། །སེམས་ཅན་གང་ཞིག་ཀླུང་གང་གཱ་ལྔའི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། གཞན་ལ་ཡང་དོན་ཟབ་མོ་བཅུ་དྲུག་ཆའི་ཆ་བརྒྱད་སྟོན་ནུས་པར་འགྱུར་རོ། །སེམས་ཅན་གང་ཞིག་ཀླུང་གང་གཱ་དྲུག་གི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ན་ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། ཀློག་པ་དང་། འདོན་པ་དང་། གླེགས་བམ་དུ་འདྲི་བ་དང་། གཞན་ལ་ཡང་བཅུ་དྲུག་ཆའི་ཆ་བཅུ་གཉིས་སྟོན་ནུས་པར་འགྱུར་རོ། །སེམས་ཅན་གང་ཞིག་ཀླུང་གང་གཱ་བདུན་གྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན་དེས་ནི་དུས་ངན་པའི་ཚེ་ན། ཆོས་འདི་ལ་མི་སྐུར་ཏེ། འཆང་བ་དང་། འཛིན་པ་དང་། འདོན་པ་དང་། ཀློག་པ་དང་། གླེགས་བམ་དུ་འདྲི་བ་དང་། གཞན་ལ་ཡང་བཅུ་དྲུག་ཆའི་ཆ་བཅུ་བཞི་སྟོན་ནུས་པར་འགྱུར་རོ། །སེམས་ཅན་གང་ཞིག་ཀླུང་གང་གཱ་བརྒྱད་ཀྱི་བྱེ་མ་སྙེད་ཀྱི་སངས་རྒྱས་ལས་བྱང་ཆུབ་ཏུ་སེམས་བསྐྱེད་ན། དེས་ནི་དུས་ངན་པའི་ཚེ་ན། ཆོས་འདི་ལ་མི་སྐུར་ཏེ། འཆང་བ་དང་།
འཛིན་པ་དང་། ཀློག་པ་དང་། འདོན་པ་དང་། གཞན་ལ་ཡང་གླེགས་བམ་དུ་འདྲིར་བསྐུལ་བ་དང་། བདག་ཀྱང་ཉན་ཅིང་འཛིན་ལ་གཞན་དག་ཀྱང་ཉན་པ་དང་། འཛིན་པ་དང་། ཀློག་པ་དང་། འདོན་པ་དང་། ཁོང་དུ་ཆུད་པར་བྱེད་པར་བསྐུལ་བ་དང་། འཇིག་རྟེན་ལ་སྙིང་བརྩེ་བའི་ཕྱིར་ཤིན་ཏུ་སྲུང་ཞིང་མདོ་སྡེ་ལ་མཆོད་པ་བྱེད་པ་དང་། གཞན་དག་ཀྱང་མཆོད་པ་དང་། རིམ་གྲོ་དང་། བཀུར་སྟི་དང་། ཕྱག་བྱ་བ་དང་། ཀློག་པ་དང་། འདོན་པའི་བར་དུ་བསྐུལ་བ་ཡང་དེ་བཞིན་ནོ། །དེས་དོན་ཟབ་མོ་ཡང་རྫོགས་པར་ཁོང་དུ་ཆུད་པ་ནི་འདི་ལྟ་སྟེ། དེ་བཞིན་གཤེགས་པ་ནི་རྟག་ཏུ་གནས་པའི་ཆོས་ཅན་མི་འགྱུར་བ་མཐར་བདེ་བ་དང་། སེམས་ཅན་ལ་སངས་རྒྱས་ཀྱི་རང་བཞིན་ཡོད་པར་རྒྱས་པར་འཆད་པ་དང་། དེ་བཞིན་གཤེགས་པའི་ཆོས་ཀྱི་གཏེར་ལ་ཤིན་ཏུ་མཁས་པ་དང་། སངས་རྒྱས་དེ་དག་ལ་མཆོད་པ་བྱས་ན་བླ་ན་མེད་པའི་ཡང་དག་པའི་ཆོས་འདི་དག་འཆང་བ་དང་། འཛིན་པ་དང་། སྐྱོབ་པ་དང་། རྣམ་པར་གཞག་པ་རྟོགས་པར་འགྱུར་རོ། །གང་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ན། གང་ཟག་དེ་ནི་མ་འོངས་པའི་དུས་སུ་ཡང་དག་པའི་ཆོས་འདི་འཆང་བ་དང་། འཛིན་པ་དང་། སྐྱོབ་པར་འགྱུར་ཞིང་ངེས་པར་ཡང་དག་པའི་ཆོས་རྣམ་པར་གཞག་པར་རིག་པར་བྱའོ། །དེ་བས་ན་ཁྱོད་ཀྱིས་མ་འོངས་པའི་དུས་ངན་པའི་ཚེ། དམ་པའི་ཆོས་བསྲུང་བར་འགྱུར་བ་དག་ཤེས་པར་བྱའོ། །དེ་ཅིའི་ཕྱིར་ཞེ་ན། སེམས་བསྐྱེད་པ་དེ་དག་ནི་མ་འོངས་པའི་དུས་སུ་གདོན་མི་ཟ་བར་བླ་ན་མེད་པ་ཡང་དག་པའི་ཆོས་དག་སྲུང་ཞིང་འཛིན་ནུས་པའི་ཕྱིར་རོ། །རིགས་ཀྱི་བུ་དགེ་སློང་ཚུལ་ཁྲིམས་ངན་པ་ཅན་དག་ནི་ང་མྱ་ངན་ལས་འདས་པ་ཐོས་ན་མྱ་ངན་མི་བྱེད་དེ་དེང་དེ་བཞིན་གཤེགས་པ་མྱ་ངན་ལས་འདས་པས་ཚིམ་མོ། །དེ་བཞིན་གཤེགས་པ་འཇིག་རྟེན་ན་བཞུགས་ན་བདག་ཅག་གི་རྙེད་པའི་བགེགས་སུ་འགྱུར་ཏེ། ད་མྱ་ངན་ལས་འདས་ན་བདག་ཅག་གི་རྙེད་པ་ལ་བགེགས་བྱེད་ཅིང་འཕྲོག་པ་
མེད་དོ། །བགེགས་བྱེད་ཅིང་འཕྲོག་པ་མེད་པས་རྙེད་པ་ཡང་མང་དུ་འཐོབ་པར་འགྱུར་རོ། །དེ་བཞིན་གཤེགས་པ་འཇིག་རྟེན་ན་བཞུགས་ན་ཚུལ་ཁྲིམས་ཤིན་ཏུ་དམ་སྟེ། ད་མྱ་ངན་ལས་འདས་ན་ཐམས་ཅད་ལྷོད་པར་འགྱུར་ཏེ། ལུས་ལ་ཆོས་གོས་འདི་ཡང་ཆོས་ཀྱི་ཚུལ་འཆོས་པ་ཙམ་དུ་ཟད་དེ། ད་ནི་ཞིག་ཅིང་རལ་བར་གྱུར་ཀྱང་ཤིང་གི་ཁ་ན་བ་དན་དང་འདྲའོ། །ཞེས་སྨྲ་བའི་གང་ཟག་དེ་ནི་མདོ་སྡེ་འདི་ལ་སྐུར་ཅིང་དབང་ཟའོ། ། རིགས་ཀྱི་བུ་ཁྱོད་ཀྱིས་དེ་ལྟར་ཡིད་ལ་ཟུང་ཤིག །སེམས་ཅན་གང་ཞིག་ཚད་མེད་པའི་ཡོན་ཏན་ཕུན་སུམ་ཚོགས་པ་དང་ལྡན་ན་དེས་ནི་ཐེག་པ་ཆེན་པོའི་མདོ་སྡེ་འདི་ལ་དད་ཅིང་ཡིད་ཆེས་སོ། །དད་ནས་ཀྱང་འཆང་ཞིང་འཛིན་ཏེ། སེམས་ཅན་གཞན་དག་ཐོས་པར་མོས་པ་ལ་རྒྱས་པར་བསྟན་ཅིང་བཤད་ན། གང་ཟག་དེས་ཐོས་པ་ཙམ་གྱིས་སྔོན་འདས་པའི་བསྐལ་པ་གྲངས་མེད་ཚད་མེད་པའི་མི་དགེ་བའི་ལས་ཐམས་ཅད་ཞུ་ཞིང་བྱང་བར་འགྱུར་རོ། །གང་ཞིག་མདོ་སྡེ་འདི་ལ་མ་དད་དམ། ཡིད་མི་ཆེས་ན་ཚེ་འདི་ཉིད་ལ་ཡང་ནད་རྣམ་པ་ཚད་མེད་པས་གཟིར་ཏེ། སྡུག་བསྔལ་བར་འགྱུར་བ་དང་། མི་མང་པོས་གཤེ་ཞིང་སྤྱོ་བ་དང་ཚེ་འཕོས་ནས་ཀྱང་ཀུན་གྱིས་བརྙས་ཤིང་སྨོད་པ་དང་། བྱད་བཞིན་མི་སྡུག་པ་དང་། འཚོ་བའི་ཡོ་བྱད་ཀྱིས་བྲེལ་ཕོངས་པ་དང་། ཅུང་ཟད་ཅིག་རྙེད་ན་ཡང་ངན་ལ་རྩུབ་པ་དང་། གང་ནས་གང་དུ་སྐྱེས་ཀྱང་རྟག་ཏུ་དབུལ་ཕོངས་ཤིང་མ་རབས་ངན་པར་སྐྱེ་བ་དང་། དམ་པའི་ཆོས་ལ་སྐུར་པ་ངན་པར་ལྟ་བའི་རིགས་སུ་སྐྱེ་བ་དང་། མཐར་དུས་བྱེད་པ་ན་ཡུལ་འཁྲུགས་པའམ། མཚོན་ཆ་དང་ཕྲད་པ་དང་། རྒྱལ་པོ་ཆོས་བཞིན་མི་བྱེད་པ་དང་། དགྲ་སྡང་བ་དང་ཕྲད་པ་དང་། བཤེས་གཉེན་གྲོགས་པོ་ཡོད་ཀྱང་མི་ཕྲད་པ་དང་། འཚོ་བའི་ཡོ་བྱད་ཅི་ཡང་མི་རྙེད་པ་དང་། ཅུང་ཟད་ཅིག་རྙེད་ཀྱང་རྟག་ཏུ་བཀྲེས་སྐོམ་པས་ཡོངས་སུ་གདུངས་པ་དང་། མ་རབས་ངན་པ་དང་བཤེས་ཤིང་སྟེན་པ་དང་། རྒྱལ་པོ་དང་བློན་པོས་ཀྱང་མི་འདོད་པ་དང་། ཅི་སྟེ་
སྟོན་ཅིང་འཆད་པ་དོན་ལས་མ་འགལ་ཡང་སུ་ཡང་ཡིད་མི་ཆེས་ཏེ། མི་འཛིན་པར་འགྱུར་རོ། །གང་ཟག་དེ་ནི་དགེ་བའི་གནས་བཟང་པོར་མི་སྐྱེ་སྟེ། བྱ་འདབ་མ་ཆག་པ་འཕུར་མི་ནུས་པ་ལྟར་གང་ཟག་དེ་ཡང་དེ་དང་འདྲ་སྟེ། མ་འོངས་པའི་དུས་སུ་ལྷ་དང་མིའི་གནས་བཟང་པོར་མི་སྐྱེའོ། །དེ་ལ་གང་ཟག་སུ་ཞིག་ཐེག་པ་ཆེན་པོའི་མདོ་སྡེ་འདི་ལ་ཡིད་ཆེས་ཤིང་དད་ན་མངོན་པར་ཐོབ་པའི་ལུས་ངན་ལ་མི་སྡུག་ཀྱང་མདོ་སྡེ་འདིའི་ཡོན་ཏན་གྱིས་བྱད་གཟུགས་བཟང་བ་དང་། གཟི་བརྗིད་དང་མཐུར་ལྡན་པ་དང་མདངས་ཀྱང་འཕེལ་ཞིང་སྐྱེ་སྟེ། འཇིག་རྟེན་དུ་བཅས་པ་ལྷ་དང་། མི་ཐམས་ཅད་ཀྱི་ཡིད་དུ་འོང་ཞིང་ལྟ་འདོད་པ་དང་། རིམ་གྲོ་དང་། བཀུར་སྟི་དང་། མཆོད་པ་བྱེད་ཅིང་གཏོང་མི་ཕོད་པར་འགྱུར་རོ། །རྒྱལ་པོ་དང་། བློན་པོ་དང་། གཉེན་དང་། འཁོར་རྣམས་ཀྱིས་སྨྲ་ཞིང་བསྒོ་བ་ལ་དད་ཅིང་ཡིད་ཆེས་པར་འགྱུར་རོ། །གལ་ཏེ་ངའི་ཉན་ཐོས་ཀྱི་ཉེ་གནས་གང་ཞིག་གིས་མཆོག་གི་ཕུལ་དུ་གྱུར་པའི་དོན་སྤྱོད་པར་འདོད་ན་འཇིག་རྟེན་དུ་བཅས་པ་ལ་ཐེག་པ་ཆེན་པོའི་མདོ་སྡེ་འདི་རྒྱས་པར་འགྲེལ་ཅིང་བསྟན་པར་བྱའོ། །རིགས་ཀྱི་བུ་དཔེར་ན་ཟིལ་པ་ནི་རིང་དུ་གནས་པར་འདོད་ཀྱང་ཉི་མ་ཤར་བ་ལས་མི་འདའ་སྟེ། ཉི་མ་ཤར་མ་ཐག་ཏུ་ལྷག་མ་ཡང་མ་ལུས་པར་མེད་པར་འགྱུར་རོ། །རིགས་ཀྱི་བུ་སེམས་ཅན་དེ་དག་གི་མི་དགེ་བའི་ལས་ཇི་སྙེད་ཡོད་པ་ཡང་དེ་དང་འདྲ་སྟེ། རིང་དུ་གནས་པར་འདོད་ཀྱང་མྱ་ངན་ལས་འདས་པ་ཆེན་པོའི་ཉི་མ་ཤར་བ་མཐོང་བ་ལས་མི་འདའོ། །ཉི་མ་དེ་ཤར་མ་ཐག་ཏུ་དེ་དག་གི་མི་དགེ་བའི་ལས་ཐམས་ཅད་ཞུ་ཞིང་བྱང་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། གང་ཟག་རབ་ཏུ་བྱུང་བ་སྐྲ་དང་ཁ་སྤུ་བྲེགས་ཏེ་ཆོས་གོས་གྱོན་ན་དགེ་ཚུལ་གྱི་ཚུལ་ཁྲིམས་བཅུ་མ་མནོས་ཀྱང་ཁྱིམ་བདག་གཅིག་གིས་དགེ་འདུན་ཀུན་བོས་ཏེ། ཁྲིམས་མ་མནོས་པ་ཡང་དགེ་འདུན་འགྲོན་དུ་བོས་པའི་ནང་དུ་གཏོགས་ན་ཁྲིམས་མ་མནོས་མོད་ཀྱི། དགེ་འདུན་གྱི་གྲངས་སུ་འགྲོའོ། །
རིགས་ཀྱི་བུ་སེམས་ཅན་གང་ཞིག་ཐེག་པ་ཆེན་པོའི་མདོ་ཡོངས་སུ་མྱ་ངན་ལས་འདས་པ་འདི་བསླབ་པར་སེམས་བསྐྱེད་དེ། གླེགས་བམ་དུ་འདྲིའམ། འཆང་ངམ། འཛིན་ཏམ། ཀློག་གམ། འདོན་པ་ཡང་དེ་དང་འདྲ་སྟེ། ཕུན་སུམ་ཚོགས་པ་མ་ཡིན་པ་ཡང་ས་བཅུར་ཕྱིན་པ་སྟེ། ས་བཅུ་པའི་གྲངས་སུ་བགྲང་ངོ་། །གལ་ཏེ་སེམས་ཅན་གང་སངས་རྒྱས་ཀྱི་ཉེ་གནས་སུ་གྱུར་ཀྱང་རུང་། མ་གྱུར་ཀྱང་རུང་སྟེ། འདོད་ཆགས་ཀྱིས་སྐྲག་གམ། ཁེ་དང་རྙེད་པའི་ཕྱིར་མདོ་སྡེ་འདིའི་ཚིགས་སུ་བཅད་པ་གཅིག་ཙམ་མཉན་ཏེ་ཐོས་ནས་མི་སྐུར་ན། གང་ཟག་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་བསྙེན་པ་ཡིན་པར་རིག་པར་བྱའོ། །རིགས་ཀྱི་བུ་རྒྱུ་དང་རྐྱེན་དེ་ལྟ་བས་ན། སྐྱེས་བུ་ཆེན་པོ་བཞི་སངས་རྒྱས་ཀྱིས་གསུངས་པ་བཞིན་དུ་སངས་རྒྱས་ཀྱིས་གསུངས་པ་མ་ཡིན་ཞེས་ཟེར་ན། དེ་ནི་གནས་མ་ཡིན་ནོ། །དེ་བས་ན་སྐྱེས་བུ་ཆེན་པོ་བཞི་ནི་འཇིག་རྟེན་གྱི་རྟེན་དང་གནས་ལྟ་བུར་ངས་གསུངས་སོ། །རིགས་ཀྱི་བུ་དེ་བས་ན་ཁྱོད་ཀྱིས་སྐྱེས་བུ་བཞི་པོ་ལ་མཆོད་པ་བྱའོ། །བཅོམ་ལྡན་འདས་བདག་ཅག་གིས་སྐྱེས་བུ་ཆེན་པོ་བཞི་པོ་དེ་ཇི་ལྟ་བུར་འཚལ་ཅིང་མཆོད་པར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། གང་ན་དམ་པའི་ཆོས་སྲུང་ཞིང་རྣམ་པར་གཞག་པའི་གང་ཟག་དེ་ལ་ནི་གསོལ་བ་གདབ་ཅིང་ལུས་དང་སྲོག་ཀྱང་བཏང་སྟེ་མཆོད་པ་བྱའོ། །ཞེས་ངས་ཐེག་པ་ཆེན་པོའི་མདོ་སྡེ་གཞན་ལས་ཀྱང་འདི་སྐད་དུ་གསུངས་སོ། །དམ་པའི་ཆོས་དག་ཤེས་ན། །རྒན་ནམ་གཞོན་ཡང་རུང་སྟེ། །ཕ་མའམ་བྲམ་ཟེ་ལྟ་བུར། །མཆོད་ཅིང་བསྟི་སྟང་ཕྱག་བྱ། །དམ་པའི་ཆོས་དག་ཤེས་ན། །རྒན་ནམ་གཞོན་ཡང་རུང་སྟེ། །ལྷ་དག་དབང་ཕྱུག་མཆོད་ལྟར། །མཆོད་ཅིང་བསྟི་སྟང་ཕྱག་བྱ། །དེ་ནས་ཡང་བཅོམ་ལྡན་འདས་ལ། བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་བཞིན་ཏེ། བླ་མ་དང་སློབ་དཔོན་ལ་མཆོད་པ་བགྱི་བ་ནི་དེ་ལགས་ན་ཡང་རྒྱས་པར་བཤད་དུ་
གསོལ། གལ་ཏེ་བླ་མ་ཚུལ་ཁྲིམས་དང་ལྡན་པ་ཞིག་གཞོན་ནུ་ལས་སྔོན་མ་ཐོས་པ་དག་འདྲི་ན་གང་ཟག་དེ་ལ་ཕྱག་བགྱིའམ། ཅི་སྟེ་དེ་ལ་ཕྱག་བགྱིས་ན། ཚུལ་ཁྲིམས་སྲུང་བ་ཞེས་བགྱིར་ཡང་མི་རུང་། དེ་ལ་གཞོན་ནུ་ཚུལ་ཁྲིམས་དང་ལྡན་པ་ཞིག་བླ་མ་རྒན་པོ་ཚུལ་ཁྲིམས་ཉམས་པ་ཞིག་ལས་སྔོན་མ་ཐོས་པ་དག་འདྲི་ན་དེ་ལ་ཡང་ཕྱག་བགྱིའམ། གལ་ཏེ་རབ་ཏུ་བྱུང་བ་ཞིག་ཁྱིམ་པ་ལས་སྔོན་མ་ཐོས་པ་འདྲི་ན་དེ་ལ་ཡང་ཕྱག་བགྱི་བ་ལགས་སམ། རབ་ཏུ་བྱུང་བས་ཁྱིམ་པ་ལ་ཕྱག་མི་བྱའོ་ཞེས་ཀྱང་གསུངས་ལ་སངས་རྒྱས་ཀྱི་ཆོས་ཀྱིས་ཆུང་ངུ་གཞོན་ནུ་དག་གིས་བླ་མ་རྒན་པོ་ལ་བཀུར་སྟི་དང་ཕྱག་བྱའོ། །དེ་ཅིའི་ཕྱིར་ཞེ་ན། བླ་མ་རྒན་པོ་དག་སྔར་བསྙེན་པར་རྫོགས་པའི་ཕྱིར་རིམ་གྲོ་དང་ཕྱག་བྱའོ་ཞེས་ཀྱང་གསུངས། ཡང་བཅོམ་ལྡན་འདས་ཀྱིས་གསུངས་པ་ལྟར་ན་ཚུལ་ཁྲིམས་ཉམས་པ་ནི་སངས་རྒྱས་ཀྱི་ཆོས་ཀྱི་ནང་དུ་མི་ཆུད་དེ། དཔེར་ན་ཞིང་གཤིན་པའི་ནང་ན་ཡུག་པོའམ། རྩྭ་ལྟ་བུ་ཞེས་ཀྱང་གསུངས། གཞན་དུ་ན་བཅོམ་ལྡན་འདས་ཀྱིས་དམ་པའི་ཆོས་ཤེས་ན་རྒན་ནམ་གཞོན་ཡང་རུང་། དེ་ལ་ནི་ཇི་ལྟར་ལྷ་རྣམས་ཀྱིས་དབང་ཕྱུག་རྒྱལ་པོ་ལ་ཕྱག་བྱེད་ཅིང་རིམ་གྲོ་བྱེད་པ་ལྟར་མཆོད་དོ་ཞེས་གསུངས་ན། དོན་རྣམ་པ་གཉིས་པོ་འདི་ཇི་ལྟ་བུ་ལགས། དེ་བཞིན་གཤེགས་པས་གསུངས་པ་འདི་ལ་འགལ་བ་མ་མཆིས་སམ། བཅོམ་ལྡན་འདས་ཀྱིས་གསུངས་པ་ལྟར་རྣམ་པ་གཞན་དུ་ན་དགེ་སློང་ཚུལ་ཁྲིམས་སྲུང་བ་ཡང་ཉེས་པ་མ་མཆིས་ཞེས་བཅོམ་ལྡན་འདས་ཀྱིས་ཅིའི་སླད་དུ་དེ་སྐད་ཅེས་གསུངས། བཅོམ་ལྡན་འདས་ཀྱིས་མདོ་སྡེ་གཞན་དག་ལས་ཚུལ་ཁྲིམས་ཉམས་པ་དག་ཆད་པས་གཅོད་དོ་ཞེས་གསུངས་པ་ཡང་དོན་ངེས་པ་མ་ལགས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་ངས་མ་འོངས་པའི་དུས་ན་བྱང་ཆུབ་སེམས་དཔའ་ཐེག་པ་ཆེན་པོ་ལ་རྩོལ་བ་དག་གི་ཕྱིར་ཚིགས་སུ་བཅད་པ་དེ་སྐད་ཅེས་གསུངས་ཀྱི། ཉན་ཐོས་ཀྱི་ཉེ་གནས་ཀྱི་ཕྱིར་
གསུངས་པ་ནི་མ་ཡིན་ནོ། །རིགས་ཀྱི་བུ་ངས་སྔོན་གསུངས་པ་ལྟར་ན་དམ་པའི་ཆོས་རྣམ་པར་འཇིག་ཅིང་ཚུལ་ཁྲིམས་ངན་པ་ཅན་དག་སྤྱོད་པ་ན། ཚུལ་ཁྲིམས་ངན་པ་ཅན་དག་འབྱུང་ཞིང་ཆོས་མ་ཡིན་པ་སྤྱོད་པ་ན། འཕགས་པ་ཐམས་ཅད་མངོན་པར་མི་འབྱུང་བ་ན། བྲན་ཕོ་དང་། བྲན་མོ་དང་། མ་བརྟགས་པའི་དངོས་པོ་དག་འཆང་ཞིང་སྤྱོད་པའི་དུས་ན། སྐྱེས་བུ་རྣམ་པ་བཞི་པོ་ལས་གཅིག་ཙམ་ཞིག་མངོན་པར་འབྱུང་སྟེ། སྐྲ་དང་ཁ་སྤུ་བྲེགས་ནས་རབ་ཏུ་བྱུང་སྟེ། ལམ་ལ་ནན་ཏན་བྱེད་དོ། །དེས་དགེ་སློང་དག་སོ་སོ་ནས་བྲན་ཕོ་དང་། བྲན་མོ་དང་། ལས་བྱེད་པའི་མི་མ་བརྟགས་པའི་དངོས་པོ་འཆང་སྟེ། བརྟགས་སམ་མ་བརྟགས་པ་ཡང་མི་ཤེས། འདུལ་བ་དང་། འདུལ་བ་མ་ཡིན་པ་ཡང་མི་ཤེས་པ་དེ་དག་མཐོང་ནས། སྐྱེས་བུ་དེས་དགེ་སློང་དེ་དག་གདུལ་བའི་ཕྱིར། ཚུལ་ཁྲིམས་འདྲ་བར་བྱེད་ཀྱང་སྤྱོད་པ་མི་འཐུན་ཏེ། བདག་གིས་སྤྱོད་པའི་གནས་དང་། སངས་རྒྱས་ཀྱི་སྤྱོད་ཡུལ་ཡང་ཤིན་ཏུ་རྟོགས་ཤིང་ཤེས་ལ་ཕ་རོལ་པོས་ཕས་ཕམ་པའི་ཉེས་པ་བྱུང་བར་མཐོང་ཡང་ཅང་མི་སྨྲ་སྟེ་མི་གླེང་ངོ་། །དེ་ཅིའི་ཕྱིར་ཞེ་ན། བདག་འཇིག་རྟེན་དུ་བྱུང་བ་ནི་དམ་པའི་ཆོས་སྲུང་ཞིང་རྣམ་པར་གཞག་པའི་ཕྱིར་ཏེ། དེ་བས་ན་ཅང་མི་སྨྲ་སྟེ་མི་གླེང་ངོ་། །རིགས་ཀྱི་བུ་དེ་ལྟར་སྐྱེས་བུ་དེས་ཆོས་བསྲུང་བའི་ཕྱིར་ཉེས་པ་ཡོད་ཀྱང་ཚུལ་ཁྲིམས་ཞིག་པ་ཞེས་མི་བྱའོ། །རིགས་ཀྱི་བུ་དཔེར་ན་རྒྱལ་པོ་ཞིག་ནད་ཀྱིས་བཏབ་སྟེ་ཤི་ལ་རྒྱལ་ཚབ་ནི་ན་གཞོན་ཏེ། སྲིད་ཀྱི་ལས་མི་ནུས་པའི་སྐབས་སུ་རེས་འགའ་ནི་གདོལ་པ་ནོར་རིན་པོ་ཆེ་ཤིན་ཏུ་མང་ཞིང་རབ་ཏུ་ཕྱུག་པོ་ལོངས་སྤྱོད་དང་ལྡན་པ་འཁོར་རབ་ཏུ་མང་བ་ཞིག་མཐུ་བསྙེམས་ཏེ། རྒྱལ་པོའི་སྲིད་ཕྲོགས་ཏེ། རྒྱལ་པོར་ཞུགས་ན་ཡུལ་དེ་ན་གནས་པའི་ཁྱིམ་བདག་དང་། བྲམ་ཟེ་ལ་སོགས་པ་ཕལ་ཆེར་ཡུལ་གཞན་དུ་འབྱེར་ཞིང་འབྲོས་སོ། །ཅི་སྟེ་དེ་ན་གནས་ན་ཡང་རྒྱལ་པོ་ཆེན་པོ་དེ་ལ་ལྟ་ཡང་མི་འདོད་དོ། །གལ་ཏེ་ཁྱིམ་བདག་དང་། ཚོང་དཔོན་དང་། བྲམ་ཟེ་ལ་སོགས་
པ་ཡུལ་གཏོང་མ་ཕོད་པ་ཡང་དཔེར་ན་སྐྱེད་ཤིང་གར་སྐྱེས་པའི་གནས་དེ་ཉིད་དུ་ཤི་བར་འགྱུར་བ་དང་མཚུངས་སོ། །རྒྱལ་པོ་གདོལ་པ་དེས་ཡུལ་མི་དག་བྱེར་བྲོས་མང་བར་རྟོགས་ནས། གཞན་ཡང་གདོལ་པ་དག་ལམ་དང་། སྲང་ཀུན་བསྲུངས་ཏེ་ཞག་བདུན་གྱི་བར་དུ་རྔ་བརྡུངས་ནས་འདི་སྐད་དུ། ཀྱེ་བྲམ་ཟེ་དག་ཁྱེད་ལ་གང་ཞིག་གིས་བདག་གི་སྤྱི་བོ་ནས་དབང་བསྐུར་ན་ཡུལ་གྱི་ཕྱེད་སྦྱིན་ནོ། །ཞེས་བོས་ཀྱང་བྲམ་ཟེ་གཅིག་གིས་ཀྱང་མ་བཏུབ་སྟེ། སོ་སོ་ནས་གཅིག་ལ་གཅིག་འདི་སྐད་དུ་བྲམ་ཟེའི་རིགས་ལས་འདི་ལྟ་བུའི་ལས་བྱེད་པའི་མི་སྲིད་དོ་ཞེའོ། །རྒྱལ་པོ་གདོལ་པས་ཡང་འདི་སྐད་དུ་བྲམ་ཟེ་ཁྱེད་ལས་གཅིག་ཙམ་ཡང་བདག་གི་སྟོན་པར་འགྱུར་བ་མེད་ན། བྲམ་ཟེ་ཁྱེད་ཀྱང་རིགས་ངན་གདོལ་པ་དང་ལྷན་ཅིག་ཏུ་བཞག་ཅིང་བསྙལ་ལ་ལས་ཀྱང་འདྲ་བར་བྱེད་དུ་གཞུག་གོ །གལ་ཏེ་བདག་གི་སྤྱི་བོ་ནས་དབང་བསྐུར་ན་ཡུལ་གྱི་ཕྱེད་ཀྱང་སྦྱིན་ནོ། །ཚིག་འདི་མི་བརྫུན་པར་དམ་ཚིག་ཀྱང་གཟུང་ངོ་། །སུམ་ཅུ་རྩ་གསུམ་གནམ་གྱི་བདུད་རྩི་མི་འཆི་བ་ཡང་བགོས་ཏེ་སྦྱིན་ནོ་ཞེས་སྨྲས་སོ། །དེའི་ཚེ་ན་བྲམ་ཟེའི་བུ་ཤིན་ཏུ་ན་གཞོན་པ་ཤིན་ཏུ་ཚངས་པར་སྤྱོད་པ་ཐོར་གཙུག་ཀྱི་མཚན་དང་ལྡན་པ། སྔགས་དང་ཆོ་ག་ལ་ཤིན་ཏུ་མཁས་པ་ཞིག་རྒྱལ་པོ་ག་ལ་བ་དེར་སོང་ནས་རྒྱལ་པོ་དེ་ལ་རྒྱལ་པོ་ཆེན་པོས་བཀའ་སྩལ་པ་བདག་གིས་བགྱིའོ་ཞེས་གསོལ་ཏོ། །དེ་ནས་རྒྱལ་པོ་དེ་ཤིན་ཏུ་དགའ་ནས་བྲམ་ཟེ་གཞོན་ནུ་དེ་སྤྱི་བོ་ནས་དབང་བསྐུར་བའི་སྟོན་པར་བཅུག་གོ །བྲམ་ཟེ་གཞན་དག་དེ་ཐོས་ནས་ཐམས་ཅད་གཞོན་ནུ་དེ་ལ་གཤེ་སྟེ། ཁྱོད་བྲམ་ཟེ་ཡིན་ན་ཅིའི་ཕྱིར་རིགས་ངན་གདོལ་པ་དེའི་སློབ་དཔོན་བྱེད་ཅེས་སྤྱོས་སོ། །དེའི་ཚེ་རྒྱལ་པོ་དེས་ཡུལ་དེའི་ཕྱེད་གཞོན་ནུ་དེ་ལ་བྱིན་ནས། ཡུལ་གྱི་སྲིད་ཀྱང་ལྷན་ཅིག་ཏུ་འཛིན་ཏོ། །ཕྱིས་རིང་ཞིག་ལོན་པ་དང་གཞོན་ནུ་དེས་རྒྱལ་པོ་ལ་འདི་སྐད་ཅེས་གསོལ་ཏོ། །བདག་གི་ཁྱིམ་བོར་ཏེ་རྒྱལ་པོའི་སྟོན་པར་མཆིས་ན་རྒྱལ་པོ་ལ་སྔགས་དང་སྒྱུ་རྩལ་ལ་སོགས་པ་བསྟན་ཅིང་བསླབས་ཀྱང་རྒྱལ་པོས་ནི་
བདག་ལ་ཉེ་བར་མི་སེམས་སོ། །རྒྱལ་པོས་སྨྲས་པ། བདག་གིས་ཁྱོད་ལ་ཉེ་བར་ཇི་ལྟར་མི་སེམས། གཞོན་ནུས་གསོལ་པ། སྔོན་གྱི་རྒྱལ་པོའི་མི་འཆི་བའི་སྨན་ད་དུང་མ་འཚལ་ཏོ། །རྒྱལ་པོས་སྨྲས་པ། ལེགས་སོ་ལེགས་སོ། །སྟོན་པ་ཆེན་པོ་བདག་གིས་དེ་ལྟར་མ་འཚལ་གྱིས། སྟོན་པ་བཞེད་ན་ཐམས་ཅད་བཞེས་ཤིག །དེ་ནས་གཞོན་ནུ་དེས་རྒྱལ་པོས་གནང་བའི་སྨན་བླངས་ནས་ཁྱིམ་དུ་འོངས་ཏེ། བློན་པོ་ཆེན་པོ་རྣམས་དང་ལྷན་ཅིག་འཐུངས་སོ། །བློན་པོ་རྣམས་ཀྱིས་འཐུངས་ནས་ཤིན་ཏུ་བདེ་བར་གྱུར་ཏེ། སྟོན་པ་ལ་སྨན་མི་འཆི་བ། བདུད་རྩི་ལྟ་བུ་ཡོད་དོ་ཞེས་རྒྱལ་པོ་ལ་གསོལ་ཏོ། །རྒྱལ་པོས་དེ་སྐད་ཅེས་ཐོས་ནས་སྟོན་པ་ལ་འདི་སྐད་ཅེས་སྨྲས་སོ། །སྟོན་པ་ཆེན་པོ་བློན་པོ་ཆེན་པོ་རྣམས་འཚལ་བའི་བདུད་རྩི་དག་ཀྱང་ཤས་མི་སྩལ་ཏམ། དེ་ནས་གཞོན་ནུ་དེས་དུག་དང་བསྲེས་ཏེ་རྒྱལ་པོ་ལ་བྱིན་ནོ། །རྒྱལ་པོ་དེ་ཟོས་མ་ཐག་ཏུ་དུག་ལངས་ནས་ཅི་ཡང་མི་ཚོར་ཏེ། ཤི་བ་བཞིན་དུས་ལ་འགྱེལ་ཏོ། །དེ་ནས་བྲམ་ཟེ་གཞོན་ནུ་དེས་རྒྱལ་ཚབ་རྒྱལ་པོར་དབང་བསྐུར་ནས། འདི་སྐད་དུ་སེང་གེའི་ཁྲི་ལ་ཆོས་ཉིད་ཀྱིས་གདོལ་པ་ལ་སོགས་པ་འདུག་པ་མ་ལགས་ཀྱི་བདག་གིས་གནའ་ནས་ཀྱང་རིགས་ངན་གདོལ་པས་རྒྱལ་པོ་བགྱིད་ཅེས་མ་ཐོས་སོ། །རིགས་ངན་གདོལ་པས་རྒྱལ་པོ་བགྱིད་ཅིང་འབངས་ཀྱི་སྲིད་བཟུང་བའི་ཆོས་མ་མཆིས་ཀྱིས་ཁྱོད་ཀྱིས་རྒྱལ་པོ་མཛད་དོ། །དྲང་པོའི་ཆོས་ཀྱིས་རྒྱལ་པོའི་སྲིད་ཟུང་ཤིག །དེའི་ཚེ་གཞོན་ནུ་དེས་ལས་ཀུན་བྱས་པའི་འོག་ཏུ་ཕྱིར་ཡང་གསོ་བའི་སྨན་རིགས་ངན་གདོལ་པ་ལ་བྱིན་ནས་ཕྱིར་དྲན་པར་བྱས་སོ། །ཕྱིར་དྲན་པར་བྱས་ནས་ཡུལ་དེ་ནས་བསྐྲད་དོ། །དེའི་ཚེ་གཞོན་ནུ་དེས་དེ་ལྟ་བུ་དག་བྱས་མོད་ཀྱི། འོན་ཀྱང་བྲམ་ཟེའི་ཆོས་ལས་མ་ཉམས་སོ། ། ཁྱིམ་བདག་དང་། བྲམ་ཟེ་ལ་སོགས་པ་དེ་ལྟ་བུར་གྱུར་པ་མཐོང་ནས་ངོ་མཚར་རྨད་དེ་ལེགས་སོ་ལེགས་སོ། །སྐྱེས་བུ་ཁྱོད་ཀྱིས་རིགས་ངན་གདོལ་པ་བསྐྲད་པ་ལེགས་པར་བསྐྲད་དོ། །ཞེས་ཀུན་གྱིས་བསྔགས་ཤིང་བསྟོད་པར་
གྱུར་ཏོ། །རིགས་ཀྱི་བུ་ང་ཡོངས་སུ་མྱ་ངན་ལས་འདས་པའི་འོག་ཏུ་དམ་པའི་ཆོས་བསྲུང་ཞིང་འཛིན་པའི་བྱང་ཆུབ་སེམས་དཔའ་ལ་སོགས་པ་ཡང་དེ་དང་འདྲ་སྟེ། སྦྱོར་བའི་ཐབས་ཀྱིས་ཚུལ་ཁྲིམས་ཉམས་པ་མིང་ཙམ་གྱི་དགེ་སློང་མ་བརྟགས་པའི་རྫས་ཐམས་ཅད་འཆང་བ་དང་ལས་འཐུན་པར་སྤྱོད་དོ། །དེའི་ཚེ་ན་བྱང་ཆུབ་སེམས་དཔའ་དག་གིས་གང་ཟག་ལ་ལ་ཚུལ་ཁྲིམས་མང་དུ་ཉམས་ཀྱང་ཚུལ་ཁྲིམས་ལོག་པ་ཅན་གྱི་དགེ་སློང་སྡིག་པ་ཅན་དག་ལ་ཆད་པས་གཅོད་ན་དེའི་གན་དུ་སོང་སྟེ་བསྙེན་བཀུར་དང་ཕྱག་ཀྱང་བྱེད། ཡོ་བྱད་རྣམ་པ་བཞི་ཡང་འབུལ། དེ་མ་ཡིན་པ་མདོ་སྡེ་དང་འཚོ་བའི་ཡོ་བྱད་ཀུན་འབུལ་ལོ། །ཅི་སྟེ་བདག་ལ་མི་བདོག་ན་ཡང་ཐབས་རྣམ་པ་སྣ་ཚོགས་ཀྱིས། སྦྱིན་བདག་ལས་ཀྱང་སློངས་ཏེ་འབུལ་ལོ། །དེ་བས་ན་མ་བརྟགས་པའི་དངོས་པོ་རྣམ་པ་བརྒྱད་ཀྱང་འཆང་ཞིང་སྤྱོད་དོ། །དེ་ཅིའི་ཕྱིར་ཞེ་ན། གང་ཟག་དེས་དགེ་སློང་སྡིག་ཅན་འདུལ་བ་ནི་ཇི་ལྟར་བྲམ་ཟེ་གཞོན་ནུས་རིགས་ངན་གདོལ་པ་འདུལ་བ་བཞིན་ནོ། །དེ་ལྟར་བྱང་ཆུབ་སེམས་དཔས་གང་ཟག་དེ་ལ་བསྙེན་བཀུར་རམ་ཕྱག་བྱེད་དམ། མ་བརྟགས་པའི་དངོས་པོ་བརྒྱད་པོ་འཆང་ཡང་སྡིག་པ་མེད་དོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་དེས་དགེ་སློང་སྡིག་ཅན་རྣམས་བསྐྲད་དེ་ཡོངས་སུ་དག་པའི་དགེ་འདུན་རྣམས་རབ་ཏུ་བདེ་བར་བྱ་བའི་ཕྱིར། ཤིན་ཏུ་རྒྱས་པའི་ཐེག་པ་ཆེན་པོའི་མདོ་སྡེ་རྒྱས་ཤིང་འཇིག་རྟེན་དུ་བཅས་པ་ལྷ་དང་མི་ཐམས་ཅད་ལ་ཕན་པ་དང་བདེ་བར་བྱ་བའི་དོན་གྱི་ཕྱིར་རོ། །རིགས་ཀྱི་བུ་དེའི་རྒྱུ་དེའི་རྐྱེན་གྱིས་ན་མདོ་སྡེ་དག་ལས་ངས་ཚིགས་སུ་བཅད་པ་གཉིས་པོ་གསུངས་ཏེ། བྱང་ཆུབ་སེམས་དཔའ་དག་ཀྱང་དམ་པའི་ཆོས་བསྲུང་བའི་གང་ཟག་ལ་བསྔགས་ཤིང་བསྟོད་པ་ནི་ཇི་ལྟར་ཁྱིམ་བདག་དང་། བྲམ་ཟེ་ལ་སོགས་པས་བྲམ་ཟེ་གཞོན་ནུ་ལེགས་སོ་ལེགས་སོ་ཞེས་བསྔགས་པ་བཞིན་ནོ། །གང་ཆོས་བསྲུང་བའི་བྱང་ཆུབ་སེམས་དཔའ་ནི་དེ་ལྟ་བུའི་ཚུལ་དུ་བྱའོ། །དེ་ལ་གང་
ཞིག་ཆོས་བསྲུང་བའི་གང་ཟག་དག་ཚུལ་ཁྲིམས་ལོག་པ་ཅན་དང་ལས་ལྷན་ཅིག་ཏུ་བྱེད་པ་མཐོང་བས་ཉེས་པ་ཡོད་པར་འཛིན་ན་གང་ཟག་དེ་ནི་བདག་ལ་གནོད་པར་རིག་པར་བྱ་སྟེ། ཆོས་བསྲུང་བ་དེ་ལ་ནི་ཉེས་པ་མེད་དོ། །རིགས་ཀྱི་བུ་དགེ་སློང་གང་ཞིག་ཚུལ་ཁྲིམས་ཉམས་ནས་ང་རྒྱལ་གྱི་དབང་དུ་གྱུར་ཏེ། འཆབ་ཅིང་མི་འགྱོད་ན་གང་ཟག་དེ་ནི་ཡང་དག་པར་ཚུལ་ཁྲིམས་ཉམས་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཆོས་བསྲུང་བའི་ཕྱིར་ཉམས་པ་ཡོད་ཀྱང་ཚུལ་ཁྲིམས་ཉམས་པའོ་ཞེས་མི་བྱའོ། །དེ་ཅིའི་ཕྱིར་ཞེ་ན། ང་རྒྱལ་གྱི་དབང་དུ་གྱུར་པ་མ་ཡིན་ཏེ། འཐོལ་ཞིང་བཤགས་པའི་ཕྱིར་རོ། །རིགས་ཀྱི་བུ་དེ་བས་ན་ངས་མདོ་སྡེ་ལས་ཕྱོགས་གཅིག་པའི་ཚིགས་སུ་བཅད་པ་འདི་དག་གསུངས་སོ། །དམ་པའི་ཆོས་དག་ཤེས་ན། །རྒན་ནམ་གཞོན་ཡང་རུང་སྟེ། །བསྙེན་བཀུར་བསྟི་སྟང་ཕྱག་བྱ། །བྲམ་ཟེ་མེ་ལྷ་ཅན་དག །ཇི་ལྟར་མེ་ལྷ་རྗེད་བཞིན། །སུམ་ཅུ་རྩ་གསུམ་ལྷ་དག །དབང་ཕྱུག་མཆོད་པ་ལྟར་རོ། །རྒྱུ་དང་རྐྱེན་དེ་ལྟ་བས་ན་ངས་ཉན་ཐོས་ཀྱི་ཐེག་པ་ཅན་ལ་མ་གསུངས་ཀྱི། བྱང་ཆུབ་སེམས་དཔའ་འབའ་ཞིག་གི་ཕྱིར་ཚིགས་སུ་བཅད་པ་འདི་དག་གསུངས་སོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་ནི་ཚུལ་ཁྲིམས་ལ་རབ་ཏུ་ལྷོད་པ་འདྲ་ན་ཐོག་མ་མནོས་པའི་ཚུལ་ཁྲིམས་མཆིས་ཞེས་བགྱིར་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་སྐད་ཅེས་མ་ཟེར་ཅིག །དེ་ཅིའི་ཕྱིར་ཞེ་ན། ཐོག་མ་མནོས་པའི་ཚུལ་ཁྲིམས་ཇི་ལྟར་མནོས་པ་བཞིན་དུ་མི་ཉམས་སོ། །ཅི་སྟེ་ཉམས་ན་ཡང་དེ་མ་ཐག་ཏུ་འགྱོད་ཅིང་འཐོལ་ཏེ། འཐོལ་བས་ནི་ཡོངས་སུ་དག་གོ །རིགས་ཀྱི་བུ་འདི་ལྟ་སྟེ་དཔེར་ན། ཆུ་བསྒྱུར་བའི་རྐ་མགོ་ལྟ་བུ་བུག་རྡོལ་དུ་གྱུར་ན་ཆུ་ཟག་གོ །དེ་ཅིའི་ཕྱིར་ཞེ་ན། འཆོས་པ་མེད་པའི་ཕྱིར་རོ། །ཅི་སྟེ་དེ་ལ་བཅོས་པ་ཡོད་ན་ཕྱི་རོལ་དུ་ཆུ་མི་ཟག་
གོ །བྱང་ཆུབ་སེམས་དཔའ་ཡང་དེ་དང་འདྲ་སྟེ། ཚུལ་ཁྲིམས་ཉམས་པ་དང་ལྷན་ཅིག་ཏུ་གསོ་སྦྱིན་དང་། ཚུལ་ནས་འབྱུང་བའི་ལས་དང་། དགེ་འདུན་གྱི་ལས་བྱེད་ཀྱང་ཚུལ་ཁྲིམས་མི་ཉམས་ཏེ། ཆུ་རྐ་བུག་རྡོལ་ཅན་ལྟ་བུ་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཚུལ་ཁྲིམས་ཡོངས་སུ་དག་པའི་གང་ཟག་མེད་ན་དགེ་འདུན་འགྲིབ་པར་འགྱུར་ཏེ། ང་རྒྱལ་དང་ལེ་ལོ་ཡང་ཕྱི་ཕྱིར་སྐྱེའོ། །གལ་ཏེ་ཚུལ་ཁྲིམས་ཡོངས་སུ་དག་པ་ཡོད་ན་ཐོག་མ་བསྙེན་པར་རྫོགས་པའི་ཚུལ་ཁྲིམས་ཀྱང་མི་ཉམས་སོ། །རིགས་ཀྱི་བུ་ཐེག་པ་ལ་ཀློད་པ་ནི་ཀློད་པ་ཞེས་བྱའི་ཚུལ་ཁྲིམས་ལ་ཀློད་པ་ནི་ཀློད་པ་ཞེས་མི་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་ཐེག་པ་ཆེན་པོ་འདི་ལ་ང་རྒྱལ་དང་ལེ་ལོའི་སེམས་མེད་ན་ཚུལ་ཁྲིམས་ཉིད་ཅེས་བྱ་སྟེ། དམ་པའི་ཆོས་སྲུང་བའི་ཕྱིར་ཐེག་པ་ཆེན་པོའི་ཆུས་ཁྲུས་བྱེད་དོ། །དེ་བས་ན་བྱང་ཆུབ་སེམས་དཔའ་ཚུལ་ཁྲིམས་ཉམས་པར་སྟོན་ཀྱང་ཀློད་པ་ཞེས་མི་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་འདུན་གྱི་ནང་ན་སྐྱེས་བུ་རྣམ་པ་བཞི་མཆིས་ཀྱང་། ཤིང་ཏོག་ཨ་མྲའི་འབྲས་བུ་ལྟར་སྨིན་ནམ་མ་སྨིན་བརྟག་དཀའ་ན་ཚུལ་ཁྲིམས་ཉམས་པ་དང་། ཚུལ་ཁྲིམས་མ་ཉམས་པ་ཇི་ལྟར་རྟོགས་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདིས་ན་ཤེས་པར་སླའོ། །ཇི་ལྟར་ན་མྱ་ངན་ལས་འདས་པ་ཆེན་པོའི་མདོ་སྡེ་འདིས་ཤེས་པར་འགྱུར་ཞེ་ན། འདི་ལྟ་སྟེ་དཔེར་ན་ཞིང་པ་དག་ཞིང་ལ་འབྲས་དང་ཁྲེ་དག་རྨོས་ཏེ། ཁྲེ་རྒོད་ལ་སོགས་པ་བསལ་ནས། ཤའི་མིག་གིས་བརྟགས་ན་ཞིང་གཤིན་པ་ཞེས་བྱ་སྟེ། འབྲུ་སྨིན་ནས་རྩྭ་དང་ཁྲེ་སོ་སོར་དབྱེའོ། །དེ་བཞིན་དུ་ཡོ་བྱད་རྣམ་པ་བརྒྱད་ཀྱིས་དགེ་འདུན་སྨེ་བར་འགྱུར་རོ། །དེ་དག་བསལ་ན་ཤའི་མིག་གིས་བརྟགས་ཀྱང་ཡོངས་སུ་དག་པར་རིག་གོ །ཚུལ་ཁྲིམས་ཉམས་པ་དང་། ཚུལ་ཁྲིམས་སྲུང་བ་དག་ཉེས་པ་
མི་བྱེད་པའི་ཚེ་ན་ཤའི་མིག་གིས་བརྟགས་པས་རྟོགས་པར་དཀའ་སྟེ། ཉེས་པ་མངོན་དུ་བྱུང་ན་ཤེས་པར་སླ་བ་ནི་ཇི་ལྟར་ཁྲེ་རྒོད་དག་ཤེས་ཤིང་རྟོགས་པར་སླ་བ་བཞིན་ནོ། །དགེ་འདུན་ཡང་དེ་དང་འདྲ་སྟེ། མ་བརྟགས་པའི་དངོས་པོ་བརྒྱད་སྦྲུལ་གདུག་པ་དང་འདྲ་བར་ཡོངས་སུ་སྤངས་ནས་དེ་ནི་ཡོངས་སུ་དག་པའི་འཕགས་པའི་དགེ་འདུན་བསོད་ནམས་ཀྱི་ཞིང་ཞེས་བྱ་སྟེ། ལྷ་དང་མིས་མཆོད་པར་འོས་པའི་གནས་སུ་ཡོངས་སུ་དག་པའི་འབྲས་བུ་སྨིན་པར་འགྱུར་བ་སྟེ། ཤའི་མིག་ཅན་དག་གིས་རྟོགས་པ་མ་ཡིན་ནོ། །རིགས་ཀྱི་བུ་གཞན་ཡང་ཤིང་ཀཱ་ལ་ཀའི་ཚལ་ན། ཤིང་ཀཱ་ལ་ཀ་ནི་རབ་ཏུ་མང་སྟེ། ཤིང་ཙིན་ཏ་ཀ་ནི་དྲུང་གཅིག་ལས་མེད་དོ། །ཤིང་ཀཱ་ལ་ཀ་དང་ཙིན་ཏ་ཀའི་འབྲས་བུ་འདྲ་སྟེ། བྱེ་བྲག་མི་ཕྱེད་པས་འབྲས་བུ་སྨིན་པ་ན་བུད་མེད་གཅིག་གིས་ཀུན་བཏུས་སོ། །ཚལ་དེ་ན་ཙིན་ཏ་ཀའི་འབྲས་བུ་ནི་བཅུ་ཆ་གཅིག་ཙམ་ཀཱ་ལ་ཀའི་འབྲས་བུ་ནི་བཅུ་ཆ་བས་མང་སྟེ། བུད་མེད་དེས་མི་ཤེས་པས་བཏུས་ནས་ཚོང་དུས་སུ་བཙོངས་སོ། །བྱིས་པ་ཆུང་ངུ་གླེན་པ་དག་ངོ་མ་ཤེས་ནས་ཀཱ་ལ་ཀའི་འབྲས་བུ་ཉོས་ཏེ་ཟོས་སོ། །ཟོས་མ་ཐག་ཏུ་ཤི་བར་གྱུར་ཏོ། །མཁས་པ་ཤེས་རབ་ཅན་དག་དེ་ལྟར་གྱུར་པ་ཐོས་ནས་བུད་མེད་དེ་ལ་འདི་སྐད་དུ་ཆེ་ཞེ་ཤིང་ཏོག་འདི་ག་ལས་འོངས་ཞེས་དྲིས་ན། བུད་མེད་དེས་ཕྱོགས་དང་གནས་འདི་ནས་འོངས་ཞེས་སྨྲའོ། །དེ་ལ་ཀུན་གྱིས་གནས་དང་ཕྱོགས་དེ་ན་ཤིང་ཀཱ་ལ་ཀ་མང་རབ་སྟེ། ཙིན་ཏ་ཀ་ནི་དྲུང་གཅིག་ལས་མེད་དོ། །ཞེས་བགད་ནས་འགྲོའོ། །རིགས་ཀྱི་བུ་དགེ་འདུན་གྱི་ནང་ན་མ་བརྟགས་པ་རྣམ་པ་བརྒྱད་ལ་སྤྱོད་པ་ཡང་དེ་དང་འདྲ་སྟེ། དགེ་འདུན་གྱི་ནང་ན་མ་བརྟགས་པའི་ཆོས་རྣམ་པ་བརྒྱད་ལ་སྤྱོད་པ་ནི་མང་རབ་ཀྱི། ཚུལ་ཁྲིམས་ཡོངས་སུ་སྲུང་ཞིང་མ་བརྟགས་པའི་ཆོས་བརྒྱད་ལ་མི་སྤྱོད་པ་ནི་གཅིག་ཙམ་མོ། །དེ་ལྟར་མ་བརྟགས་པའི་ཆོས་མ་ཡིན་པ་འཆང་ཞིང་སྤྱོད་པར་ཤེས་ཀྱང་དེ་དང་ལས་ལྷན་ཅིག་ཏུ་བྱེད་དོ། །མི་འབྲལ་བ་ནི་ཇི་ལྟར་ཀཱ་ལ་ཀའི་ཚལ་ན་ཙིན་ཏ་ཀ་དྲུང་གཅིག་སྐྱེས་པ་བཞིན་ནོ། །དགེ་བསྙེན་གཅིག་གིས་
དེ་ལྟར་གང་ཟག་དེ་དག་ཆོས་མ་ཡིན་པ་མང་དུ་སྤྱོད་ཅིང་མཆོད་པ་དང་། རིམ་གྲོ་བྱེད་པ་མེད་པ་མཐོང་བས་གང་ཟག་དེ་ལ་མཆོད་པར་བྱེད་པས་སེམས་ན་སྔར་དེ་ལ་འདི་སྐད་དུ་བཙུན་པ་མ་བརྟགས་པའི་དངོས་པོ་བརྒྱད་སྤྱོད་དམ། སངས་རྒྱས་ཀྱིས་གནང་ངམ་ཞེས་དྲིས་ཤིག །གལ་ཏེ་སངས་རྒྱས་ཀྱིས་གནང་ཞེས་ཟེར་ན། གང་ཟག་དེ་དང་ལྷན་ཅིག་གསོ་སྦྱིན་དང་། གསོལ་བ་དང་། ཞུ་བའི་ལས་དང་། ཚུལ་ནས་འབྱུང་བའི་ལས་བྱར་རུང་ངམ་མི་རུང་ཞེས་དྲིས་ཤིག །དགེ་བསྙེན་གྱིས་དེ་སྐད་དྲིས་ཏེ་དགེ་འདུན་དག་འདི་སྐད་དུ་འདི་ལྟར་མ་བརྟགས་པའི་དངོས་པོ་བརྒྱད་པོ་ནི་བཅོམ་ལྡན་འདས་ཀྱིས་ཐུགས་བརྩེ་བའི་སླད་དུ་བདག་ཅག་འཆང་ཞིང་སྤྱོད་དུ་གནང་ངོ་ཞེས་ཟེར་ན། དགེ་བསྙེན་གྱིས་འདི་སྐད་དུ་གཙུག་ལག་ཁང་མཚམས་གཅིག་གི་དགེ་སློང་ལས་ཁ་ཅིག་ནི་གསེར་དང་དངུལ་ལ་སོགས་པ་སངས་རྒྱས་ཀྱིས་སྤྱོད་དུ་གནང་ངོ་ཞེས་ཟེར་རོ། །ཁ་ཅིག་ནི་མི་གནང་ངོ་ཞེས་ཟེར་ཏེ། གནང་ངོ་ཞེས་ཟེར་བ་དང་། མི་གནང་ངོ་ཞེས་སྨྲ་བ་དང་ལྷན་ཅིག་ཏུ་གནས་པར་ཡང་མི་བྱ། གསོ་སྦྱོང་དང་ཚུལ་ནས་འབྱུང་བའི་ལས་ཀྱང་མི་བྱ། ཆུང་ངུ་ན་ཆུ་མིག་གཅིག་ཏུ་ཆུ་ཡང་མི་བཏུང་ཞིང་འཚོ་བའི་ཡོ་བྱད་ཐུན་མོང་དུ་མི་སྤྱོད་དོ་ཞེས་གསུངས་ན། ཅིའི་ཕྱིར་ཁྱེད་ཀྱིས་སངས་རྒྱས་ཀྱིས་གནང་བ་སྐད་དུ་སྨྲ། བཅོམ་ལྡན་འདས་ལྷའི་ནང་ན་ལྷ་ཅི་སྟེ་སྤྱོད་ཅིང་འཆང་དུ་གནང་ན་ཁྱེད་དགེ་འདུན་གྱིས་སྤྱོད་པར་མ་འོས་སོ། །ཅི་སྟེ་སྤྱོད་པར་གྱུར་ན་གསོ་སྦྱོང་དང་ཚུལ་ནས་འབྱུང་བ་དང་། གསོལ་བ་དང་། ཞུ་བ་དང་། དགེ་འདུན་གྱིས་བྱ་བའི་ལས་ཀྱི་བར་དུ་བྱེད་པར་མ་འོས་སོ། །ཅི་སྟེ་གསོ་སྦྱོང་དང་། ཚུལ་ནས་འབྱུང་བ་དང་། གསོལ་བ་དང་ཞུ་བ་དང་། དགེ་འདུན་གྱི་ལས་ལྷན་ཅིག་ཏུ་བྱས་ན་ཚེ་འཕོས་མ་ཐག་ཏུ་སེམས་ཅན་དམྱལ་བར་ལྟུང་སྟེ། ཇི་ལྟར་བུས་པ་དག་ཤིང་ཏོག་ཀཱ་ལ་ཀ་ཟོས་ནས་ཤི་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། གྲོང་ངམ་ཚོང་དུས་ན་སྨན་འཚོང་བ་གངས་ལ་སྐྱེས་པའི་སྨན་བཟང་པོ་ཞིག་འཚོང་ན་ཉོ་བ་ཡང་མང་ངོ་། །
སྨན་དེ་དང་འདྲ་བ་གཞན་གྱིས་བཙོངས་ཀྱང་ཀུན་གྱིས་མི་ཤེས་པས་ཐམས་ཅད་སྨན་ཉོ་བའི་ཕྱིར་སྨན་འཚོང་བའི་གན་དུ་འོངས་ནས་ཁྱོད་ལ་གངས་ལ་སྐྱེ་བའི་སྨན་ཡོད་དམ། ཞེས་འདྲི་ན་སྨན་འཚོང་བ་དེས་དེ་དང་འདྲ་བའི་སྨན་ཞིག་འདི་ནི་གངས་ལས་སྐྱེ་བའི་སྨན་ནོ། །ཞེས་བརྫུན་བྱས་ཏེ་བཙོངས་ཀྱང་། ཤའི་མིག་གིས་མི་རྟོགས་པས་བདག་ནི་གངས་ལས་སྐྱེས་པའི་སྨན་བཟང་པོ་ཉོས་ཏེ་རྙེད་དོ་སྙམ་སེམས་སོ།། །།བམ་པོ་དགུ་པ། འོད་སྲུང་ཉན་ཐོས་ཀྱི་དགེ་འདུན་གྱི་ནང་ན་མིང་ཙམ་གྱི་དགེ་འདུན་དང་། ཡང་དག་པའི་དགེ་འདུན་དང་། འདུམ་པའི་དགེ་འདུན་ཞེས་བྱ་བའི་དགེ་འདུན་ཡོད་ཀྱིས་ཚུལ་ཁྲིམས་སྲུང་ངམ། ཚུལ་ཁྲིམས་ཉམས་ཀྱང་རུང་། དགེ་འདུན་དེ་ལ་ནི་མཆོད་པ་དང་། བཀུར་སྟི་དང་། ཕྱག་བྱ་བ་ལ་སོགས་པ་འདྲ་བར་བྱའོ། །དགེ་བསྙེན་གྱིས་མི་རྟོགས་པ་ནི་གང་ཟག་གིས་གངས་ལ་སྐྱེ་བའི་སྨན་བཟང་པོ་མི་རྟོགས་པ་བཞིན་ནོ། །ཚུལ་ཁྲིམས་སྲུང་བ་ནི་གང་། ཚུལ་ཁྲིམས་ཉམས་པ་ནི་གང་། གང་ནི་ཡང་དག་པའི་དགེ་འདུན། མིང་ཙམ་གྱི་དགེ་འདུན་ནི་གང་ཡིན་པ། ལྷའི་མིག་ཅན་གྱིས་ནི་ཤེས་ཤིང་རྟོགས་སོ། །འོད་སྲུང་གལ་ཏེ་དགེ་བསྙེན་གྱིས་དགེ་སློང་ཚུལ་ཁྲིམས་ཉམས་པར་ཤེས་ཡང་དག་ན་དེ་ལ་ནི་བསྙེན་བཀུར་དང་། ཕྱག་དང་། མཆོད་པ་ལ་སོགས་པ་མི་བྱའོ། །གལ་ཏེ་གང་ཟག་དེས་མ་བརྟགས་པའི་ཆོས་བརྒྱད་པོ་སྤྱོད་པར་ཤེས་ཡང་དག་ན། དེ་ལ་ནི་བསྙེན་བཀུར་དང་། མཆོད་པའི་ཡོ་བྱད་སྦྱར་བ་དང་། ཕྱག་དང་མཆོད་པ་ལ་སོགས་པ་མི་བྱའོ། །གལ་ཏེ་དགེ་འདུན་གྱི་ནང་ན་ཚུལ་ཁྲིམས་ཉམས་པ་ཡོད་ན། གོས་ངུར་སྨྲིག་གྱོན་པ་ཙམ་གྱིས། དེ་ལ་ཕྱག་དང་། མཆོད་པ་ལ་སོགས་པ་མི་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ལེགས་སོ་ལེགས་སོ། །བཅོམ་ལྡན་འདས་དེ་བཞིན་གཤེགས་པས་བཀའ་ཡང་དག་པར་གསུངས་ཏེ། བདག་གཟུངས་སུ་འཛིན་པར་འཚལ་ལོ། །དཔེར་ན་རྡོ་རྗེ་ནི་རིན་པོ་ཆེ་
གཞན་དང་། ཐ་དད་དེ། བཅོམ་ལྡན་འདས་ཀྱིས་གསུངས་པ་ལྟར་ན། དགེ་སློང་རྣམས་ནི་ཆོས་རྣམ་པ་བཞི་པོ་ལ་གནས་པར་བགྱིའོ། །བཞི་གང་ཞེ་ན། ཆོས་ལ་གནས་ཀྱི་གང་ཟག་ལ་མི་གནས་པ་དང་། དོན་ལ་གནས་ཀྱི་ཚིག་ལ་མི་གནས་པ་དང་། ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་པ་དང་། ངེས་པའི་དོན་ལ་གནས་ཀྱི་བཀྲི་བའི་དོན་ལ་མི་གནས་པ་སྟེ། ཆོས་རྣམ་པ་བཞི་པོ་འདི་རྟོགས་པར་བགྱི་བ་ལགས་ཀྱི། སྐྱེས་བུ་རྣམ་པ་བཞི་པོ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ལ་གནས་ཞེས་བྱ་བ་ནི། དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་ཆེན་པོའོ། །སངས་རྒྱས་ཀྱི་ཆོས་ནི་ཆོས་རྣམས་ཀྱི་ཆོས་ཉིད་དོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པའོ། །དེ་བས་ན་དེ་བཞིན་གཤེགས་པ་ནི་རྟག་པ་མི་འགྱུར་བའོ། །དེ་ལ་གང་ཞིག་དེ་བཞིན་གཤེགས་པ་མི་རྟག་ཅེས་སྨྲ་ན་གང་ཟག་དེ་ནི་ཆོས་ཉིད་མི་མཐོང་། མི་ཤེས་པའོ། །གལ་ཏེ་ཆོས་ཉིད་མི་མཐོང་མི་ཤེས་ན། དེ་ལ་མི་གནས་མི་རྟེན་ཏེ། གོང་དུ་གསུངས་པའི་སྐྱེས་བུ་བཞི་པོ་འཇིག་རྟེན་དུ་བྱུང་བ་དམ་པའི་ཆོས་སྲུང་ཞིང་འཛིན་ན། ཤེས་ཤིང་རིག་པར་བྱ་སྟེ། དེ་ལ་གནས་ཤིང་བརྟེན་པར་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ནི་དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ལ་ཤིན་ཏུ་མཁས་པས། དེ་བཞིན་གཤེགས་པ་ནི་རྟག་པ་མི་འགྱུར་བར་ཤེས་པའི་ཕྱིར་རོ། །གལ་ཏེ་དེ་བཞིན་གཤེགས་པ་ལ་མི་རྟག་ཅེའམ། འགྱུར་བ་འཕོ་བའི་ཆོས་ཅན་ནོ། །ཞེས་བྱ་བའི་གནས་མེད་དེ། སྐྱེས་བུ་རྣམ་པ་བཞི་པོ་ནི་དེ་བཞིན་གཤེགས་པ་ཞེས་བྱའོ། །དེ་ཅིའི་ཕྱིར་ཞེ་ན། གང་ཟག་དེ་ནི་དེ་བཞིན་གཤེགས་པས་དགོངས་ཏེ་གསུངས་པ་ཤེས་ལ་སྟོན་ཀྱང་ནུས་པའི་ཕྱིར་རོ། །སྐྱེས་བུ་གང་ཞིག་དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཡང་ཤེས་ལ། དེ་བཞིན་གཤེགས་པ་ནི་རྟག་པ་མི་འགྱུར་བའི་ཆོས་ཅན་དུ་ཤེས་ན་
སྐྱེས་བུ་དེ་ནི་རྙེད་པ་ཙམ་གྱི་ཕྱིར་དེ་བཞིན་གཤེགས་པ་ནི་མི་རྟག་གོ །ཞེས་སྨྲ་བའི་གནས་མེད་དེ། སྐྱེས་བུ་དེ་ལ་ཡང་གནས་ཤིང་རྟེན་པར་བྱ་ན། སྐྱེས་བུ་བཞི་པོ་ལ་གནས་ཤིང་རྟེན་པ་ལྟ་ཅི་སྨོས། ཆོས་ལ་གནས་ཞེས་བྱ་བ་ནི་ཆོས་ཉིད་ལ་བྱའོ། །གང་ཟག་ལ་མི་གནས་ཞེས་བྱ་བ་ནི་ཉན་ཐོས་ལ་བྱའོ། །ཆོས་ཉིད་ཅེས་བྱ་བ་ནི་དེ་བཞིན་གཤེགས་པའོ། །ཉན་ཐོས་ཞེས་བྱ་བ་ནི་འདུས་བྱས་སོ། །དེ་བཞིན་གཤེགས་པ་ནི་རྟག་པའོ། །འདུས་བྱས་ནི་མི་རྟག་པའོ། །རིགས་ཀྱི་བུ་གང་ཟག་ཚུལ་ཁྲིམས་ཉམས་པ་རྙེད་པའམ། གྲགས་པའི་ཕྱིར། དེ་བཞིན་གཤེགས་པ་ནི་མི་རྟག་པ་འགྱུར་ཞིང་འཕོ་བའོ། །ཞེས་སྨྲ་ན་གང་ཟག་དེ་ལ་ནི། གནས་པར་མི་བྱ་སྟེ། རིགས་ཀྱི་བུ་དེ་ནི་ངེས་པའི་དོན་ཞེས་བྱའོ། །དོན་ལ་གནས་ཀྱི་ཚིག་ལ་མི་གནས་ཞེས་བྱ་བ་གང་ཞེ་ན། དོན་ནི་དོན་མངོན་པར་རྟོགས་པའོ། །མངོན་པར་རྟོགས་པའི་དོན་ཞེས་བྱ་བ་ནི་མི་ཞུམ་པའོ། །མི་ཞུམ་པ་ནི་ཕུན་སུམ་ཚོགས་པའོ། །ཕུན་སུམ་ཚོགས་པའི་དོན་ནི་དེ་བཞིན་གཤེགས་པ་རྟག་ཏུ་གནས་པ་མི་འགྱུར་མི་འཕོ་བའོ། །དེ་བཞིན་གཤེགས་པ་རྟག་ཏུ་གནས་པ་མི་འགྱུར་མི་འཕོ་བའི་དོན་ནི་ཆོས་རྟག་པའོ། །ཆོས་རྟག་པའི་དོན་དགེ་འདུན་རྟག་པ་སྟེ། འདི་ནི་དོན་ལ་གནས་པ་སྟེ། ཚིག་ལ་མི་གནས་པ་ཞེས་བྱའོ། །དེ་ལ་མི་གནས་པའི་ཚིག་གང་ཞེ་ན། འདི་ལྟ་སྟེ། རྣམ་པར་སྤྲོས་པའི་འཇིག་རྟེན་གྱི་གཙུག་ལག་དང་། བཅོམ་ལྡན་འདས་ཀྱིས་གསུངས་པ་ལྟར་མདོ་སྡེ་ཚད་མེད་པ་འདོད་པ་མང་ཞིང་ཆོག་མི་ཤེས་པ་སྒྱུས་འཚོ་ཞིང་གཡོ་བྱེད་པ། སྤྱོད་ལམ་འཆོས་པ་རྙེད་པ་དང་གྲགས་པའི་ཕྱིར་ཁྱིམ་པ་ལ་རྟེན་པ་དང་། གཞན་ཡང་འདི་སྐད་དུ་སངས་རྒྱས་བཅོམ་ལྡན་འདས་ཀྱིས་དགེ་སློང་རྣམས་འཆང་ཞིང་སྤྱོད་དུ་གནང་བ་ནི་འདི་ལྟ་སྟེ། བྲན་ཕོ་དང་། བྲན་མོ་དང་། ཡོངས་སུ་མ་བརྟགས་པའི་དངོས་པོ་གསེར་དང་། དངུལ་དང་། རིན་པོ་ཆེ་དང་། ནས་དང་། འབྲས་དང་། བང་མཛོད་དང་། བ་ལང་དང་། ལུག་དང་། བལ་གྱི་གླང་པོ་ཆེ་དང་། རྟ་ལ་སོགས་པ་སྤྱོད་ཅིང་ཚོང་སྤོགས་བྱེད་དུ་གནང་བ་དང་
མུ་གེའི་དུས་བྱུང་བ་ན་སྲས་རྣམས་ལ་ཐུགས་བརྩེ་བའི་ཕྱིར། དགེ་སློང་དག་ཡོ་བྱད་ལྷག་པ་སོགས་ཤིང་འཆང་དུ་གནང་ངོ་ཞེས་གསུངས་པ་དང་། བདག་གིས་ལག་དར་དེ་ཁ་ཟས་ཀྱི་གཡོས་བྱས་ནས། བྱིན་ལེན་མ་བྱས་པར་ཟོས་ཀྱང་རུང་ངོ་། །ཞེས་མདོ་སྡེ་ལས་གསུངས་ཀྱང་ཚིག་དེ་ལ་ནི་གནས་པར་མི་བྱའོ། །ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་ཞེས་བྱ་བ་གང་ཞེ་ན། ཡེ་ཤེས་ནི་དེ་བཞིན་གཤེགས་པའོ། །ཉན་ཐོས་པ་གང་ཞིག་དེ་བཞིན་གཤེགས་པའི་ཡོན་ཏན་ལ་ཤིན་ཏུ་མི་གནས་པ་དེ་ནི་རྣམ་པར་ཤེས་པ་ཞེས་བྱ་སྟེ། གནས་པར་མི་བྱའོ། །གང་ཞིག་དེ་བཞིན་གཤེགས་པ་ཉིད་ཆོས་ཀྱི་སྐུར་ཤེས་ན་དེ་ནི་ཡང་དག་པའི་ཡེ་ཤེས་ཡིན་ཏེ། དེ་ལ་ནི་གནས་པར་བྱའོ། །གང་ཞིག་དེ་བཞིན་གཤེགས་པས་ཐབས་སུ་སྟོན་པའི་སྐུ་ལ་འདི་ནི་ཕུང་པོ་དང་། ཁམས་དང་། སྐྱེ་མཆེད་ལས་འདུས་པ་སྟེ། ཞལ་ཟས་ཀྱིས་གསོ་བ་ཡིན་པར་ཤེས་ན་དེ་ནི་རྣམ་པར་ཤེས་པ་སྟེ་གནས་པར་མི་བྱའོ། །གང་ཞིག་དེ་སྐད་དུ་སྟོན་ཏམ། ཡི་གེ་དང་གཙུག་ལག་ལས་འབྱུང་ཡང་གནས་པར་མི་བྱའོ། །ངེས་པའི་དོན་གྱི་མདོ་སྡེ་ལ་གནས་ཀྱི་བཀྲི་བའི་དོན་གྱི་མདོ་སྡེ་ལ་མི་གནས་སོ། །ཞེས་བྱ་བ་གང་ཞེ་ན། བཀྲི་བའི་དོན་གྱི་མདོ་སྡེ་ནི་འདི་ལྟ་སྟེ། ཉན་ཐོས་ཀྱི་ཐེག་པ་ཅན་དག་བཅོམ་ལྡན་འདས་ཀྱི་དོན་ཤིན་ཏུ་ཟབ་མོ་ཐོས་ན་ཐེ་ཚོམ་དུ་སྐྱེ་ཞིང་ངོ་མཚར་དུ་གྱུར་ཏེ། དོན་ཟབ་མོ་སྙིང་པོ་ལས་ཡེ་ཤེས་ཀྱི་རྒྱ་མཚོ་ཆེན་པོ་འབྱུང་བར་མི་ཤེས་སོ། །དཔེར་ན་བུས་པ་ཆུང་ངུ་ཅི་ཡང་མི་ཤེས་ཤིང་བྱེ་བྲག་མི་ཕྱེད་པ་ལྟ་བུ་ནི་བཀྲི་བའི་དོན་ཅེས་བྱའོ། །ངེས་པའི་དོན་ཅེས་བྱ་བ་ནི་བྱང་ཆུབ་སེམས་དཔའི་ཡང་དག་པའི་ཡེ་ཤེས་ཀྱིས་ཇི་ལྟར་བསམ་པ་བཞིན་དུ་ཐོགས་པ་མེད་པའི་ཡེ་ཤེས་འཇུག་སྟེ། དཔེར་ན་སྐྱེས་བུ་ཆེན་པོ་ཅི་ཡང་མི་ཤེས་པ་མེད་པ་ནི་ངེས་པའི་དོན་ཅེས་བྱའོ། །གཞན་ཡང་ཉན་ཐོས་ཀྱི་ཐེག་པ་ནི་བཀྲི་བའི་དོན་ཅེས་བྱའོ། །བླ་ན་མེད་པའི་ཐེག་པ་ཆེན་པོ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་གཤེགས་པ་ནི་མི་རྟག་གོ །འགྱུར་ཞིང་འཕོ་བའོ་ཞེས་སྨྲ་བ་ནི་བཀྲི་
བའི་དོན་ཏོ། །གང་ཞིག་དེ་བཞིན་གཤེགས་པ་ནི་རྟག་པའོ། །མི་འགྱུར་མི་འཕོ་བའོ་ཞེས་སྨྲ་བ་ནི་ངེས་པའི་དོན་ཅེས་བྱའོ། །གང་ཉན་ཐོས་ཀྱི་བསྟན་པས་ཆུད་ཅིང་རྟོགས་པ་ནི་བཀྲི་བའི་དོན་ཏོ། །བྱང་ཆུབ་སེམས་དཔའི་བསྟན་པས་ཆུད་ཅིང་རིག་པ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་གཤེགས་པ་ལ་ཞལ་ཟས་ཀྱིས་གསོ་དགོས་ཞེས་སྨྲ་བ་ནི་བཀྲི་བའི་དོན་ཏོ། །གང་ཞིག་རྟག་པ་གནས་པ་མི་འགྱུར་མི་འཕོ་བའོ་ཞེས་སྨྲ་བ་ནི་ངེས་པའི་དོན་ཅེས་བྱའོ། །གང་ཞིག་དེ་བཞིན་གཤེགས་པ་མྱ་ངན་ལས་འདས་པ་ནི་ཇི་ལྟར་ཤིང་ཟད་ནས་མེ་ཤི་བ་བཞིན་ནོ་ཞེས་སྨྲ་བ་ནི་བཀྲི་བའི་དོན་ཏོ། །གང་ཞིག་དེ་བཞིན་གཤེགས་པ་ནི་ཆོས་ཀྱི་དབྱིངས་ཉིད་ལ་ཞུགས་སོ། །ཞེས་སྨྲ་བ་ནི་ངེས་པའི་དོན་ཅེས་བྱའོ། །མདོར་ན་ཉན་ཐོས་ཀྱི་ཐེག་པའི་ཆོས་ལ་ནི་གནས་པར་མི་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སོ་སོའི་སྐྱེ་བོ་བསྒྲལ་བའི་ཕྱིར་ཉན་ཐོས་ཀྱི་ཐེག་པ་ནི་སྦྱོར་བའི་ཐབས་སུ་གསུངས་སོ། །འདི་ལྟ་སྟེ་དཔེར་ན། ཁྱིམ་བདག་གིས་བུ་ཆུང་ངུ་ལ་ཡི་གེ་ཕྱེད་བསྟན་པ་བཞིན་ནོ། །རིགས་ཀྱི་བུ་ཉན་ཐོས་ཀྱི་ཐེག་པ་ནི་དཔེར་ན་ཞིང་ཐོག་མ་རྨོས་མ་ཐག་པ་དང་མཚུངས་ཏེ་འབྲས་བུ་མེད་པས་གནས་པར་མི་བྱའོ། །དེ་བས་ན་ཉན་ཐོས་ཀྱི་ཐེག་པ་ནི་བཀྲི་བའི་དོན་ཅེས་བྱའོ། །ཐེག་པ་ཆེན་པོའི་ཆོས་ལ་ནི་གནས་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་སོ་སོའི་སྐྱེ་བོ་དག་བསྒྲལ་བའི་ཕྱིར་སྦྱོར་བའི་ཐབས་སུ་ཐེག་པ་ཆེན་པོ་གསུངས་ཏེ། དེ་བས་ན་ངེས་པའི་དོན་ཅེས་བྱ་སྟེ། གནས་པར་བྱའོ། །དེ་ལྟར་དེ་ལྟ་བུའི་ཚུལ་དུ་གནས་པ་རྣམ་པ་བཞི་ཁོང་དུ་ཆུད་ཅིང་ཤེས་པར་བྱའོ། །གཞན་ཡང་དོན་ལ་གནས་ཞེས་བྱ་བ་དོན་ནི་ཡང་དག་པའོ། །ཡང་དག་པ་ནི་འོད་གསལ་བའོ། །འོད་གསལ་བ་ནི་མ་ཞུམ་པའོ། །མ་ཞུམ་པ་ནི་དེ་བཞིན་གཤེགས་པའོ། །གཞན་ཡང་འོད་གསལ་བ་ནི་ཡེ་ཤེས་སོ། །ཡང་དག་པ་ནི་རྟག་ཏུ་གནས་པའོ། །དེ་བཞིན་གཤེགས་པ་རྟག་པ་ནི་ཆོས་ལ་གནས་པའོ། །ཆོས་ཞེས་བྱ་བ་ནི་རྟག་པ་མཐའ་ཡས་པ་བསམ་གྱིས་མི་ཁྱབ་པ་གཟུང་དུ་མེད་པ་བཅིང་དུ་མེད་
པ་སྟེ་བལྟར་རུང་བའོ། །གང་ཞིག་མཐོང་བར་མི་རུང་ཞེས་སྨྲ་ན་གང་ཟག་དེ་ལ་གནས་པར་མི་བྱ་སྟེ། དེ་བས་ན་ཆོས་ལ་གནས་ཀྱི་གང་ཟག་ལ་མི་གནས་སོ། །གང་ཞིག་ཤིན་ཏུ་ཚིག་བཟང་པོས་མི་རྟག་ཅེས་སྨྲ་ན་ཚིག་དེ་ལ་ནི་གནས་པར་མི་བྱ་སྟེ། དེ་བས་ན་དོན་ལ་གནས་ཀྱི་ཚིག་ལ་མི་གནས་ཞེས་བྱའོ། །ཡེ་ཤེས་ལ་གནས་པའི་དགེ་འདུན་ནི་རྟག་པ་འདུས་མ་བྱས་པ་མི་འཕོ་བ་མ་བརྟགས་པའི་དངོས་པོ་བརྒྱད་མི་འཆང་བ་སྟེ། དེ་བས་ན་ཡེ་ཤེས་ལ་གནས་ཀྱི་རྣམ་པར་ཤེས་པ་ལ་མི་གནས་སོ། །ཁ་ཅིག་འདི་སྐད་དུ་རྣམ་པར་ཤེས་པས་བྱས། རྣམ་པར་ཤེས་པས་མྱོང་སྟེ་འདུམ་པའི་དགེ་འདུན་མེད་ཅེས་སྨྲ་བ་ཡང་ཡོད་དོ། །དེ་ཅིའི་ཕྱིར་ཞེ་ན། འདུམ་པ་ཞེས་བྱ་བ་ནི་ཅི་ཡང་མེད་པའོ། །ཅི་ཡང་མེད་པས་ན་རྟག་ཅེས་ཅི་ལ་བྱ། དེ་བས་ན་རྣམ་པར་ཤེས་པ་ལ་མི་གནས་སོ། །ངེས་པའི་དོན་ལ་གནས་པ་གང་ཞེ་ན། ངེས་པའི་དོན་ཅེས་བྱ་བ་ནི་ཆོག་ཤེས་པ་སྟེ། ནམ་དུ་ཡང་སྒྱུས་མི་འཚོ། སྤྱོད་ལམ་མི་འཆོས། ང་རྒྱལ་མི་བྱེད། རྙེད་པ་དང་གྲགས་པ་ལ་མི་ཆགས། དེ་བཞིན་གཤེགས་པས་སྦྱོར་བའི་ཐབས་སུ་གསུངས་པའི་ཆོས་ལ་ཆགས་པར་མི་བྱེད་པ་སྟེ། དེ་ནི་ངེས་པའི་དོན་ཅེས་བྱའོ། །གང་ཞིག་དེ་ལ་གནས་ན་གང་ཟག་དེ་ནི་དོན་དམ་པ་ལ་གནས་པ་ཞེས་བྱ་སྟེ། དེ་བས་ན་ངེས་པའི་དོན་ལ་གནས་སོ། །བཀྲི་བའི་དོན་ལ་མི་གནས་པ་གང་ཞེ་ན། བཀྲི་བའི་དོན་ནི་མདོ་སྡེ་དག་ལས་ཐམས་ཅད་གདུང་བ་ཅན། ཐམས་ཅད་མི་རྟག་པ། ཐམས་ཅད་སྡུག་བསྔལ་བ། ཐམས་ཅད་སྟོང་པ། ཐམས་ཅད་བདག་མེད་པའོ། །ཞེས་གསུངས་པ་ནི་བཀྲི་བའི་དོན་ཅེས་བྱའོ། །དེ་ཅིའི་ཕྱིར་ཞེ་ན། དོན་དེ་དག་མི་ཤེས་པ་འགྲོ་བ་མང་པོ་མཚམས་མེད་པའི་སེམས་ཅན་དམྱལ་བར་ལྟུང་བར་བྱེད་པའི་ཕྱིར་རོ། །དེ་ཅི་ལྟ་ཞེ་ན། ཆགས་ཤིང་ཞེན་པས་དོན་མངོན་པར་མི་རྟོགས་སོ། །ཐམས་ཅད་གདུང་བ་ཅན་ནི་མྱ་ངན་ལས་འདའ་བ་ཡང་གདུང་བ་དང་། ཐམས་ཅད་མི་རྟག་པ་ནི་མྱ་ངན་ལས་འདའ་བ་ཡང་མི་རྟག་གོ །ཞེས་དེ་བཞིན་གཤེགས་པས་
གསུངས་པར་འཛིན་ཏེ། སྡུག་བསྔལ་བ་དང་། སྟོང་པ་དང་། བདག་མེད་པའི་བར་དུ་རྒྱས་པར་རིག་པར་བྱ་སྟེ། དེ་བས་ན་བཀྲི་བའི་དོན་གྱི་མདོ་སྡེ་ལ་གནས་པར་མི་བྱའོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་ནི་སེམས་ཅན་ཐམས་ཅད་ལ་ཐུགས་བརྩེ་བའི་ཕྱིར་དུས་དང་ཚོད་ལ་ཤིན་ཏུ་མཁས་སོ། །དུས་ལ་མཁས་པས་ཡང་བ་དག་ཀྱང་ལྕི་བར་གསུངས། ལྕི་བའང་ཡང་བར་གསུངས་ཏེ། དེ་བཞིན་གཤེགས་པས་མཁྱེན་ཅིང་རྟོགས་པས་ཉེ་གནས་གང་ལ་སྦྱིན་བདག་དད་པས་དགོས་པའི་ཡོ་བྱད་ཅི་འདོད་པ་སྦྱོར་ཞིང་སྦྱིན་པའི་གང་ཟག་དེ་ལ་ནི་བཅོམ་ལྡན་འདས་ཀྱིས་བྲན་ཕོ་དང་། བྲན་མོ་དང་། གསེར་དང་། དངུལ་དང་། རིན་པོ་ཆེ་ལ་སྤྱོད་ཅིང་ཚོང་སྤོགས་བྱེད་པ་ལ་སོགས་པ་མ་བརྟགས་པའི་དངོས་པོ་ཐམས་ཅད་འཆང་ཞིང་སྤྱོད་དུ་མ་གནང་ངོ་། །ཉེ་གནས་གང་ལ་འཚོ་བའི་ཡོ་བྱད་སྦྱིན་པའི་ཡོན་བདག་མེད་ལ་མུ་གེ་བྱུང་སྟེ། བསོད་སྙོམས་མི་རྙེད་པའི་དུས་ན་ཡང་དག་པའི་ཆོས་རྣམ་པར་གཞག་ཅིང་བསྲུང་བའི་ཕྱིར། ངའི་ཉེ་གནས་དག་བྲན་ཕོ་དང་། བྲན་མོ་དང་། གསེར་དང་། དངུལ་དང་། བཞོན་པའི་ཐེག་པ་དང་། ཁང་ཁྱིམ་དང་། ནས་འབྲས་དང་། ཚོང་སྤོགས་ལ་སོགས་པ་འཆང་ཞིང་སྤྱོད་དུ་གནང་སྟེ། དེ་ལྟར་འཆང་ཞིང་སྤྱོད་དུ་གནང་མོད་ཀྱི་སྦྱིན་བདག་དད་པ་ཆེན་པོ་དང་ལྡན་པ་མེད་དུ་མི་རུང་ངོ་། །དེ་ལྟར་ན་ཆོས་རྣམ་པ་བཞི་པོ་འདི་ལ་གནས་པར་བྱའོ། །གཞན་ཡང་འདུལ་བ་དང་། ཆོས་མངོན་པ་དང་། མདོ་སྡེ་ལས་རྣམ་པ་བཞི་པོ་འདི་དང་མི་འགལ་ན་གནས་པར་བྱའོ། །དེ་ལ་གང་ཞིག་དུས་དང་དུས་མ་ཡིན་པའམ། ཆོས་སྲུང་བའམ། ཆོས་མི་སྲུང་བ་དང་། སྦྱོར་བ་ཡང་མེད་དེ། དེ་བཞིན་གཤེགས་པས་མ་བརྟགས་པའི་དངོས་པོ་འདི་དག་དགེ་སློང་ཐམས་ཅད་སྤྱོད་དུ་གནང་ངོ་། །ཞེས་དེ་སྐད་སྨྲ་ན་ཚིག་དེ་ལ་ནི་གནས་པར་མི་བྱའོ། །འདུལ་བའམ། ཆོས་མངོན་པའམ། མདོ་སྡེ་དག་ལས་འདི་སྐད་དུ་འདི་དང་འཐུན་པར་གསུངས་ན་སྡེ་སྣོད་གསུམ་པོ་ལ་ཡང་གནས་པར་མི་བྱའོ། །ངས་སྐྱེ་བོ་ཤའི་མིག་ཅན་ལ་གནས་པ་བཞི་
པོ་འདི་གསུངས་ཀྱི་ཤེས་རབ་ཀྱི་མིག་ཅན་གྱི་ཕྱིར་མ་ཡིན་ནོ། །དེ་བས་ན་ངས་གནས་པ་བཞི་པོ་འདི་གསུངས་སོ། །ཆོས་ཞེས་བྱ་བ་ནི་ཆོས་རྣམས་ཀྱི་ཆོས་ཉིད་དོ། །དོན་ཅེས་བྱ་བ་ནི་དེ་བཞིན་གཤེགས་པ་རྟག་པ་མི་འགྱུར་བའོ། །ཡེ་ཤེས་ཞེས་བྱ་བ་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ཤེས་པའོ། །ངེས་པའི་དོན་ཅེས་བྱ་བ་ནི་ཐེག་པ་ཆེན་པོའི་མདོ་སྡེ་ཐམས་ཅད་རྟོགས་པའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སྔར་གསུངས་པའི་སྐྱེས་བུ་རྣམ་པ་བཞི་པོ་ལ་གནས་པར་མི་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། རིགས་ཀྱི་བུ་བཅོམ་ལྡན་འདས་ཀྱིས་གསུངས་པ་ལྟར་ན་དེ་ལ་གནས་པར་མི་བྱའོ། །དེ་ཅིའི་ཕྱིར་ཞེ་ན། བདུད་རྣམ་པ་བཞི་ཡོད་པའི་ཕྱིར་རོ། །བཞི་གང་ཞེ་ན། བདུད་ཀྱིས་བསྟན་པའི་མདོ་སྡེ་དང་འདུལ་བ་འཛིན་པའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་ཀྱིས་བདུད་རྣམ་པ་བཞི་ཡང་མཆིས་པར་གསུངས་ན་དེ་ལ་བདུད་ཀྱིས་བསྟན་པ་དང་། སངས་རྒྱས་ཀྱིས་གསུངས་པ་བདག་ཅག་གིས་བྱེ་བྲག་ཅིས་དབྱེ། སོ་སོའི་སྐྱེ་བོ་དག་བདུད་ཀྱི་རྗེས་སུ་སྤྱོད་པ་ཡང་མཆིས། སངས་རྒྱས་ཀྱིས་བསྟན་པའི་རྗེས་སུ་འཇུག་པ་ཡང་མཆིས་ན་དེ་དག་ཇི་ལྟ་བུར་འཚལ་བར་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ང་ཡོངས་སུ་མྱ་ངན་ལས་འདས་ནས་ལོ་བདུན་བརྒྱ་ལོན་པའི་འོག་ཏུ་བདུད་སྡིག་ཏོ་ཅན་གྱིས་དམ་པའི་ཆོས་བགས་ཀྱིས་འཇིག་ཅིང་མ་རུང་བར་བྱེད་དོ། །དཔེར་ན་རྔོན་པ་ངུར་སྨྲིག་གི་ཚལ་བུ་གྱོན་པ་ལྟར་བདུད་སྡིག་ཏོ་ཅན་ཡང་དེ་བཞིན་དུ་དགེ་སློང་གི་གཟུགས་དང་། དགེ་སློང་མའི་གཟུགས། དགེ་བསྙེན་གྱི་གཟུགས་དང་། དགེ་བསྙེན་མའི་གཟུགས་སུ་ཡང་སྟོན་ཏེ། དེ་མ་ཡིན་པ་གཞན་ཡང་རྒྱུན་དུ་ཞུགས་པ་ནས་དགྲ་
བཅོམ་པའི་ལུས་ཀྱི་བར་དུ་ཡང་སྤྲུལ་ཅིང་སངས་རྒྱས་ཀྱི་གཟུགས་སུ་ཡང་སྤྲུལ་ཅིང་སྟོན་ཏོ། །བདུད་ཀྱི་རྒྱལ་པོ་ཟག་པ་དང་བཅས་པའི་ལུས་ཀྱིས་ཟག་པ་མེད་པའི་ལུས་སུ་སྤྲུལ་ཏེ། ངའི་དམ་པའི་ཆོས་འཇིག་ཅིང་མ་རུང་བར་བྱེད་དོ། །བདུད་སྡིག་ཏོ་ཅན་དེ་དམ་པའི་ཆོས་མ་རུང་བར་བྱེད་པ་ན་འདི་སྐད་ཅེས་ཟེར་རོ། །བྱང་ཆུབ་སེམས་དཔའ་སྔོན་དགའ་ལྡན་གནམ་ནས་མི་སྣང་བར་གྱུར་ཏེ། གྲོང་ཁྱེར་སེར་སྐྱའི་རྒྱལ་པོ་ཟས་གཙང་མའི་ཕོ་བྲང་དུ་ཕ་མ་གཉིས་འདུས་པའི་འདོད་པ་ལས་ལུས་འདི་སྐྱེས་སོ། །ཞེས་སྨྲའོ། །གང་ཟག་ནི་མིའི་རྒྱུད་དུ་སྐྱེས་ཏེ། འཇིག་རྟེན་དུ་བཅས་པ་ལྷ་དང་། མིའི་འཁོར་ཐམས་ཅད་ཀྱིས་མཆོད་ཅིང་བསྟི་སྟང་བྱེད་པར་འགྱུར་བ་ནི་གནས་མེད་དོ། །གཞན་ཡང་འདི་སྐད་དུ་སྔོན་དཀའ་བ་རྣམ་པ་མང་པོ་སྤྱོད་ཅིང་། མགོ་དང་། མིག་དང་། རུས་པ་དང་། རྐང་དང་། ཡུལ་དང་། སྲིད་དང་། ཆུང་མ་དང་། བུ་ཕོ་ལ་སོགས་པ་སྦྱིན་པ་བྱས་པས་མངོན་པར་སངས་རྒྱས་ཏེ། དེའི་རྒྱུ་དེའི་རྐྱེན་གྱིས་འཇིག་རྟེན་དུ་བཅས་པ། ལྷ་དང་། མི་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པས་མཆོད་ཅིང་བསྟི་སྟང་བྱེད་པར་གྱུར་ཏོ། །ཞེས་གལ་ཏེ་མདོ་སྡེ་དང་འདུལ་བ་ལས་དེ་སྐད་ཅེས་འབྱུང་ན་ཡང་དེ་ནི་བདུད་ཀྱིས་བསྟན་པ་ཡིན་པར་རིག་པར་བྱའོ། །རིགས་ཀྱི་བུ་མདོ་སྡེའམ་འདུལ་བ་ལས་གང་འདི་སྐད་དུ་དེ་བཞིན་གཤེགས་པ་ནི་མངོན་པར་སངས་རྒྱས་ནས་ཡུན་རིང་སྟེ། མངོན་པར་སངས་རྒྱས་པ་བསྟན་པ་ནི་སེམས་ཅན་རྣམས་སྒྲོལ་བའི་ཕྱིར་ཏེ། འཇིག་རྟེན་པའི་རྗེས་སུ་ཕ་མ་འདུས་པ་ལས་སྐྱེས་པར་བསྟན་ཏོ། །ཞེས་མདོ་སྡེ་དང་འདུལ་བ་ལས་འདི་སྐད་འབྱུང་ན་དེ་ནི་ཡང་དག་པར་དེ་བཞིན་གཤེགས་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་སོ། །དེ་ལ་གང་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཡིན་པར་རིག་པར་བྱའོ། །དེ་ལ་
གང་ཞིག་དེ་བཞིན་གཤེགས་པ་ཐོག་མ་བལྟམས་ནས་ཕྱོགས་བཅུར་གོམ་པ་བདུན་བདུན་གཤེགས་པར་ཡིད་མི་ཆེས་ན་དེ་ནི་བདུད་ཀྱིས་བསྟན་པ་ལ་ཞུགས་པའོ། །དེ་ལ་གང་དེ་བཞིན་གཤེགས་པ་འཇིག་རྟེན་དུ་བྱུང་ནས་ཕྱོགས་བཅུར་གོམ་པ་བདུན་བདུན་གཤེགས་ཏེ། དེ་ནི་དེ་བཞིན་གཤེགས་པས་ཐབས་སུ་བསྟན་པ་ཡིན་ནོ། །ཞེས་སྨྲ་ན་དེ་ནི་དེ་བཞིན་གཤེགས་པས་བསྟན་པའི་མདོ་སྡེ་དང་འདུལ་བ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ལ་གང་ཞིག་བྱང་ཆུབ་སེམས་དཔའ་ཐོག་མ་བཙས་ནས་རྒྱལ་པོ་ཡབ་ཀྱིས་ལྷའི་རྟེན་ལ་ཕྱག་འཚལ་དུ་ཁྲིད་པ་ན་ཕྱིར་ལྷ་རྣམས་ཀྱིས་མཐོང་མ་ཐག་ཏུ་ཕྱག་བྱས་ཏེ། དེ་བས་ན་སངས་རྒྱས་ཞེས་བྱའོ། །དེ་ལ་གང་ཞིག་འདི་སྐད་དུ་ལྷ་ཞེས་བྱ་བ་སྔར་བྱུང་སྟེ། སངས་རྒྱས་ནི་འཕྱི་ན་ཅིའི་ཕྱིར་ལྷ་རྣམས་ཀྱིས་སངས་རྒྱས་ལ་བསྟི་སྟང་དང་། ཕྱག་བྱེད་ཅེས་དེ་སྐད་དུ་རྒོལ་ན་དེ་ནི་བདུད་སྡིག་ཏོ་ཅན་གྱིས་བསྟན་པ་ཡིན་པར་རིག་པར་བྱའོ། །དེ་ལ་གང་ཞིག་འདི་སྐད་དུ་སངས་རྒྱས་བཅོམ་ལྡན་འདས་ལྷའི་རྟེན་དུ་གཤེགས་པ་ན་དབང་སྒྱུར་ཆེན་པོ་དང་། ཚངས་པ་ཆེན་པོ་དང་། བརྒྱ་བྱིན་ལྷའི་དབང་ཕྱུག་ལ་སོགས་པ་ལྷ་ཐམས་ཅད་ཀྱིས་ཐལ་མོ་སྦྱར་ཏེ། བསྟི་སྟང་དང་བཅས་པས་ཞབས་ལ་ཕྱག་བྱས་སོ། །ཞེས་མདོ་སྡེ་དང་འདུལ་བ་ལས་བྱུང་ན་དེ་ནི་སངས་རྒྱས་ཀྱིས་བསྟན་པའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་ན་དེ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །དེ་ལ་གང་སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །མདོ་སྡེ་དང་འདུལ་བ་གང་ལས་བྱང་ཆུབ་སེམས་དཔའ་རྒྱལ་ཚབ་མཛད་པ་ན་འདོད་པའི་སེམས་ཀྱིས་ཕྱོགས་བཞི་ནས་བཙུན་མོ་བཙལ་ཏེ། ཕོ་བྲང་གི་ནང་དུ་འདོད་པ་རྣམ་པ་ལྔ་བདེ་བར་སྤྱོད་དོ། །ཞེས་མདོ་སྡེ་དང་འདུལ་བ་
ལས་འབྱུང་ན་དེ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་ཞིག་བྱང་ཆུབ་སེམས་དཔའ་ཡུན་རིང་པོ་ནས་འདོད་པའི་སེམས་དང་། བཙུན་མོའི་འཁོར་གྱི་འདོད་པ་ཡོངས་སུ་སྤངས་ཏེ། སུམ་ཅུ་རྩ་གསུམ་གནམ་གྱི་ལྷའི་འདོད་པ་ལྔ་ཡང་མཆིལ་མ་བཞིན་དུ་བོར་ན་མིའི་འདོད་པ་ལྟ་ཅི་སྨོས་ཏེ། སྐྲ་དང་ཁ་སྤུ་བྲེགས་ནས་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་སྟེ། བྱང་ཆུབ་ལ་ནན་ཏན་བྱེད་དོ། །ཞེས་མདོ་སྡེ་དང་འདུལ་བ་ལ་དེ་སྐད་ཅེས་བྱུང་ན་དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་མདོ་སྡེ་དང་། འདུལ་བའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །དེ་ལ་གང་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་འདི་སྐད་དུ་སྔོན་སངས་རྒྱས་བཅོམ་ལྡན་འདས་རྒྱལ་བུ་ཛེ་ཏའི་ཚལ་ན་བཞུགས་པའི་ཚེ། དགེ་སློང་རྣམས་ཀྱིས་བྲན་ཕོ་དང་། བྲན་མོ་དང་། ལས་བྱེད་པའི་མི་དང་། བ་ལང་དང་། ར་ལུག་དང་། བལ་གྱི་གླང་པོ་ཆེ་དང་། རྟ་དང་། བོང་བུ་དང་། དྲེའུ་དང་། བྱ་དང་། ཁྱི་དང་། ཕག་ལ་སོགས་པ་གསོ་ཞིང་འཆང་བ་དང་། གསེར་དང་། དངུལ་དང་། བཻ་དཱུརྱ་དང་། མུ་ཏིག་དང་། ཤེལ་དང་། ཨསྨ་གར་བྷ་དང་། མུ་ས་ལ་གལ་བྷ་དང་། ཤེལ་གྱི་སྣམ་བུ་དང་། ལྕགས་དང་། ཟངས་དང་། ཟངས་གཞོང་ཆེ་ཆུང་ལ་སོགས་པ་མ་བརྟགས་པའི་དངོས་པོ་རྣམས་འཆང་ཞིང་སྤྱོད་པ་དང་། ཞིང་རྨོ་བ་དང་། ཚོང་སྤོགས་དང་། ཁྲེ་འབྲས་ལ་སོགས་པ་འཇོག་ཅིང་སྤྱོད་དུ་གནང་བར་བཅོམ་ལྡན་འདས་ཐུགས་རྗེ་ཆེན་པོས་སེམས་ཅན་ལ་ཐུགས་བརྩེ་བའི་སླད་དུ་འཆང་ཞིང་སྤྱོད་དུ་གནང་ངོ་། །ཞེས་མདོ་སྡེའམ་འདུལ་བ་ལས་འབྱུང་ན་དེ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་ཞིག་སྔོན་སངས་རྒྱས་རྒྱལ་བུ་ཛེ་ཏའི་ཚལ་ཡི་དགས་འདའ་ལི་ལོ་ཞེས་བྱ་བར་གནས་པ་ན། དེའི་ཚེ་བཅོམ་ལྡན་འདས་བྲམ་ཟེ་རའི་ཡོན་ཏན་ཞེས་བྱ་བ་དང་། རྒྱལ་པོ་སྡེ་རབ་ཏུ་འཕམ་བྱེད་ཀྱི་ཕྱིར་འདི་
སྐད་དུ་གསུངས་ཏེ། དགེ་སློང་ནི་གསེར་དང་། དངུལ་དང་། བཻ་དཱུརྱ་དང་། ཤེལ་དང་། མུ་ཏིག་དང་། མུ་ས་ལ་གལ་བྷ་དང་། བྱི་རུ་དང་། ཨསྨ་གར་བྷ་དང་། ཤེལ་གྱི་སྣམ་བུ་དང་། བྲན་ཕོ་དང་། བྲན་མོ་དང་། ལས་བྱེད་པའི་མི་དང་། ཁྱེའུ་དང་། བུ་མོ་དང་། བ་ལང་དང་། ལུག་དང་། བལ་གྱི་གླང་པོ་ཆེ་དང་། རྟ་དང་། བོང་བུ་དང་། དྲེའུ་དང་། བྱ་དང་། ཁྱི་དང་། ཕག་དང་། ལྕགས་དང་། ཟངས་དང་། ཟངས་གཞོང་ཆེ་ཕྲ་ལ་སོགས་པ་མ་བརྟགས་པའི་དངོས་པོ་ཁྲི་སྟན་དང་། མལ་ཆ་དང་། འཚོ་བའི་ཡོ་བྱད་རྣམ་པ་མང་པོ་ཁང་ཁྱིམ་དང་། ཞིང་རྨོ་བ་དང་། ཚོང་སྤོགས་དང་། ལག་དར་ཏེ་ཁ་ཟས་ཀྱི་གཡོས་བྱེད་པ་དང་། ལག་དར་ཏེ་ཕྱེ་འཐག་པ་དང་། འབྲས་འདྲུ་བ་དང་། ལུས་གསོ་བའི་སྔགས་དང་། ཁྲ་འདུལ་བའི་ཆོ་ག་དང་། སྐར་མ་བལྟ་བ་དང་། མོ་གདབ་པ་དང་། ཁྱོ་ཤུག་གི་མཚན་བལྟ་བ་དང་། རྨི་ལམ་གསོད་པ་དང་། འདི་ནི་བུ་ཕོར་འོང་། འདི་ནི་བུ་མོར་འོང་། འདི་ནི་བུ་ཕོ་མ་ཡིན། འདི་ནི་བུ་མོ་མ་ཡིན་ཞེས་མཁས་པའི་གནས་དྲུག་ཅུ་རྩ་བཞི་བརྟག་པ་དང་། གཞན་ཡང་རིག་པའི་གནས་བཅྭ་བརྒྱད་དང་། སྔགས་དང་། བཟོ་རྣམ་པ་སྣ་ཚོགས་དང་། འཇིག་རྟེན་གྱི་གཙུག་ལག་ཚད་མེད་པ་སྨྲ་བ་དང་། སྤོས་ཕྱེ་མ་དང་། བྱུག་སྤོས་དང་། བདུག་སྤོས་རྣམ་པ་སྣ་ཚོགས་སྦྱོར་བ་དང་། མེ་ཏོག་གི་ཕྲེང་བ་རྣམ་པ་སྣ་ཚོགས་དང་། སྐྲ་འཆོས་པའི་ཆོ་ག་དང་། གཡོ་དང་། སྒྱུ་དང་། ཁེ་དང་། རྙེད་པ་ལ་ཆོག་མི་ཤེས་པ་དང་། འདུ་འཛི་ལ་དགའ་བ་དང་། གཏམ་དང་། སྨྲང་ལ་དགའ་བ་དང་། ཉ་ཤ་ལ་དགའ་བ་དང་། དུག་སྦྱོར་བ་དང་། སྨེ་བ་དབྱུང་བའི་སྨན་སྦྱོར་བ་དང་། བྱུག་པའི་མར་བསུང་ཅན་སྦྱོར་བ་དང་། རིན་པོ་ཆེའི་གདུགས་དང་། ལྷམ་ལ་སོགས་པ་བྱེད་པ་དང་། བསིལ་ཡབ་དང་། ཟ་མ་ཏོག་དང་། རི་མོ་ལ་སོགས་པ་བྱེད་པ་དང་། ཁྲེ་འབྲས་དང་། སྲན་མ་རྣམ་པ་མང་པོ་དང་། ཤིང་ཏོག་གི་རྣམ་པ་ལ་སོགས་པ་དང་། རྒྱལ་པོ་དང་། རྒྱལ་བུ་
དང་། བློན་པོ་དང་། བློན་པོ་ཆེན་པོ་ལ་རྟེན་པ་དང་། བུད་མེད་ལ་རྟེན་པ་དང་། བར་བར་སྐད་ཆེན་པོས་དགོད་པ་དང་། བར་བར་ཅང་མི་སྨྲ་བར་ཁ་རོག་པ་དང་། ཆོས་རྣམས་ལ་ཐེ་ཙོམ་བྱེད་པ་དང་། བརྫུན་དུ་སྨྲ་བ་དང་། བཟང་ངོ་ངན་ནོ་དགེའོ། །མི་དགེའོ་ཞེས་བརྫུན་དུ་སྨྲ་བ་དང་། གོས་བཟང་པོས་ཆ་ཞིང་འཇོ་བ་ལ་སོགས་པ་དེ་ལྟ་བུའི་མ་བརྟགས་པའི་གནས་རྣམ་པ་སྣ་ཚོགས་ལ་སྤྱོད་ཅིང་བྱེད་པ་དང་། ཡོན་བདག་དད་པའི་མདུན་དུ་བདག་སྟོད་པ་དང་། མ་བརྟགས་པའི་གནས་སུ་ཆང་འཚོང་བ་དང་། སྦྲུལ་འཚོང་མ་དང་ཚོང་བྱེད་པར་རྟག་ཏུ་འགྲོ་བ་ལ་སོགས་པ་དེ་དག་ཐམས་ཅད་ནི་དགེ་སློང་དག་ལ་གནང་བར་ངས་མ་གསུངས་ཏེ། དེ་ནི་དགེ་སློང་གི་ནང་ན་འདུག་པར་ཡང་གནང་བ་མ་ཡིན་ཏེ། ཁྱིམ་པར་ཕབ་ལ་ལས་བྱེད་དུ་གཞུག་གོ །དཔེར་ན་ཞིང་གཤིན་པའི་ནང་ན་ཁྲེ་རྒོད་སྐྱེས་པ་དང་མཚུངས་ཏེ། ལྷག་མ་མ་ལུས་པར་བསལ་ཅིང་དབྱུང་ངོ་། །ཞེས་གསུངས་པའི་མདོ་སྡེ་དང་འདུལ་བ་ནི་དེ་བཞིན་གཤེགས་པས་བསྟན་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་འདི་སྐད་དུ་བྱང་ཆུབ་སེམས་དཔའ་ནི་འཇིག་རྟེན་གྱི་ལྷ་དག་མཆོད་པའི་ཕྱིར་ལྷའི་རྟེན་དུ་འགྲོའོ། །འདི་ལྟ་སྟེ། ཚངས་པའི་ལྷ་དང་། དབང་སྒྱུར་ཆེན་པོ་དང་། འཇུག་སེལ་དང་། ཀཱ་ཏྱཱ་ཡ་ན་ལ་སོགས་པ་སྟེ། དེར་འགྲོ་བ་ཡང་ལྷ་རྣམས་གདུལ་བའི་ཕྱིར་གྱི་དེ་ལྟ་བུ་མ་ཡིན་ནོ། །ཞེས་བྱ་བའི་གནས་མེད་དོ། །གཞན་ཡང་འདི་སྐད་དུ་བྱང་ཆུབ་སེམས་དཔའ་ནི་མུ་སྟེགས་ཅན་གྱི་གཙུག་ལག་དང་། དཀའ་ཐུབ་དང་སྤྱོད་ལམ་དང་། ཚིག་དང་སྨྲ་བ་ལས་རྒྱལ་བའི་སྒྱུ་རྩལ་དང་། འཐབ་ཅིང་རྩོད་པའི་སྡུམས་བྱེད་མི་ནུས་པས། ཁྱེའུ་དང་། བུ་མོ་དང་། བློན་པོ་ཆེན་པོ་ལ་སོགས་པས་བསྟི་སྟང་མི་བྱེད་དོ། །སྨན་ལ་སོགས་པའང་སྦྱོར་མི་ཤེས་པས་ན་དེ་བཞིན་གཤེགས་པ་ཞེས་བྱ་སྟེ། ཅི་སྟེ་ཤེས་ན་
ངན་པར་ལྟ་བ་ལོག་པ་ཅན་ཞེའམ། གཞན་ཡང་དེ་བཞིན་གཤེགས་པ་ནི་དགྲ་དང་། གཉེན་ལ་མཉམ་པར་དགོངས་ཏེ། མཚོན་གྱིས་བཏབ་བམ། བྱུག་སྤོས་ཀྱིས་བསྐུས་ཀྱང་དེ་གཉིས་ཀ་ལ་ཕན་པའམ། གནོད་པའི་ཐུགས་མི་མངའ་སྟེ་དབུ་མར་གནས་པས། དེ་བཞིན་གཤེགས་པའོ་ཞེས་དེ་སྐད་དུ་མདོ་སྡེའམ། འདུལ་བ་ལས་འབྱུང་ན་དེ་ནི་བདུད་ཀྱིས་བསྟན་པ་ཡིན་པར་རིག་པར་བྱའོ། །དེ་ལ་གང་འདི་སྐད་དུ་བྱང་ཆུབ་སེམས་དཔའ་ནི་དེ་ལྟར་ཐབས་ཀྱིས་ལྷའི་རྟེན་དུ་འགྲོ་བ་དང་། མུ་སྟེགས་ཅན་གྱི་ཆོས་ལས་རབ་ཏུ་བྱུང་ནས་སློབ་པ་ལ་འཇུག་པ་བསྟན་པ་དང་། སྤྱོད་ལམ་དང་། དཀའ་ཐུབ་དང་། ཆོག་ཤེས་པར་བསྟན་པ་དང་། ཚིག་དང་སྨྲ་བ་ལས་རྒྱལ་བ་ཐམས་ཅད་ཤེས་པར་བྱ་བའི་ཕྱིར་ཡི་གེའི་གྲྭར་སློབ་པ་བསྟན་པ་དང་། འཐབ་ཅིང་རྩོད་པར་འགྱུར་བའི་སྡུམས་བྱེད་པ་བསྟན་པ་དང་། འཁོར་མང་པོ་དང་། ཁྱེའུ་དང་། བུ་མོ་དང་། བཙུན་མོ་དང་། ཕོ་བྲང་གི་སླས་དང་། ཁྱིམ་བདག་དང་། ཚོང་དཔོན་དང་། བྲམ་ཟེ་ལ་སོགས་པ་རྒྱལ་པོ་དང་། བློན་པོ་ཆེན་པོ་དང་། དབུལ་པོ་ལ་སོགས་པ་ལས་ཕུལ་དུ་གྱུར་པ་དང་། མཆོག་ཏུ་གྱུར་པར་བསྟན་ཏོ། །དེ་དག་གིས་བསྙེན་བཀུར་བྱེད་པ་ལ་སོགས་པའང་བསྟན། དེ་ལྟ་བུ་ལ་སོགས་པའི་དངོས་པོའི་རྣམ་པ་མང་པོ་བསྟན་ཏོ། །ལྟ་བ་དེ་དག་ལ་གནས་ཀྱང་མ་ཆགས་པ་ནི་དཔེར་ན། པད་མོ་ལ་རྡུལ་དང་དྲི་མས་མི་གོས་པ་བཞིན་ནོ། །དེ་ལ་ཡང་འགྲོ་བ་མང་པོ་བསྒྲལ་བའི་ཕྱིར། འཇིག་རྟེན་པའི་རྗེས་སུ་དེ་ལྟ་བུའི་ཐབས་མཁས་པ་རྣམ་པ་སྣ་ཚོགས་སྤྱོད་དོ། །ཞེས་མདོ་སྡེ་དང་འདུལ་བ་གང་ལས་འབྱུང་ན་དེ་ནི་དེ་བཞིན་གཤེགས་པས་བསྟན་པ་ཡིན་པར་རིག་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཆེན་པོའོ། །དེ་ལ་གང་འདི་སྐད་དུ་དེ་བཞིན་གཤེགས་པས་ནི་བདག་ཅག་ལ་མདོ་སྡེ་དང་འདུལ་བ་གསུངས་པ་
ལས་མི་དགེ་བའི་ཆོས་ལྕི་བ་དང་། ཡང་བ་དང་། ཉེས་བྱས་ཀྱི་བར་དུ་རང་བཞིན་གྱིས་ལྕི་བ་ཡིན་པས་བདག་ཅག་ནི་འདུལ་བ་ལས་འགལ་བར་མི་བྱེད་དེ། བདག་ཅག་ནི་ཡུན་རིང་པོ་ནས་བཟོད་ཀྱང་ཆོས་འདི་དག་ལ་ཁྱེད་ནི་ཡིད་མི་ཆེས་ན། བདག་ཅག་གིས་ཇི་སྐད་དུ་བདག་ཅག་གིས་འདུལ་བ་བཏང་སྟེ། ཁྱེད་ཀྱི་འདུལ་བའི་རྗེས་སུ་འཇུག་པར་བྱ། ཁྱེད་ཀྱི་འདུལ་བ་ནི་བདུད་ཀྱིས་བསྟན་པ་ཡིན་གྱི། བདག་ཅག་གི་མདོ་སྡེ་དང་འདུལ་བ་ནི་སངས་རྒྱས་ཀྱིས་བཅས་པ་ཡིན་ནོ། །དེ་བཞིན་གཤེགས་པས་སྔར་གསུངས་པའི་གསུང་རབ་དགུ་པོ་ཡང་བདག་ཅག་གི་མདོ་སྡེ་དང་འདུལ་བ་དགུ་པོ་ལ་ངེས་པར་གསུངས་ཀྱི། ཤིན་ཏུ་རྒྱས་པའི་མདོ་སྡེ་ནི་ཚིག་གཅིག་གམ། ཡི་གེ་གཅིག་ཙམ་ཡང་མ་ཐོས་སོ། །དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བ་ནི་ཚད་ཀྱང་མ་མཆིས་ན་ཤིན་ཏུ་རྒྱས་པའི་མདོ་སྡེ་ཞེས་མི་འབྱུང་སྟེ། དེ་དག་ལས་ནི་གསུང་རབ་མདོ་སྡེ་བཅུ་ཡོད་དོ་ཞེས་མ་ཐོས་སོ། །ཅི་སྟེ་ཡོད་ན་གདོན་མི་ཟ་བར་ལྷ་སྦྱིན་གྱིས་བྱས་པ་ཡིན་པར་རིག་པར་བྱའོ། །ལྷ་སྦྱིན་ངན་པ་དགེ་བའི་ཆོས་གཞིག་པའི་ཕྱིར་ཤིན་ཏུ་རྒྱས་པའི་མདོ་སྡེ་བྱས་ཏེ། བདག་ཅག་ནི་མདོ་སྡེ་བདུད་ཀྱིས་བསྟན་པ་ཡིན་པས་ན་ཡིད་མི་ཆེས་སོ། །དེ་ཅིའི་ཕྱིར་ཞེ་ན། ཆོས་གཞིག་ཅིང་གཅིག་ལ་གཅིག་གིས་སྐྱོན་འདོགས་པའི་ཚིག་དེ་ལྟ་བུ་ནི་ཁྱེད་ཀྱི་མདོ་སྡེ་ལས་འབྱུང་གི་བདག་ཅག་གི་མདོ་སྡེ་ལ་མེད་དོ། །བདག་ཅག་གི་མདོ་སྡེ་དང་འདུལ་བ་དེ་བཞིན་གཤེགས་པས་གསུངས་པ་ལས་གསང་བར་འདི་སྐད་ཅེས་འབྱུང་སྟེ། ང་ཡོངས་སུ་མྱ་ངན་ལས་འདས་ནས་དུས་ངན་པའི་ཚེ་མདོ་སྡེ་དང་། འདུལ་བ་ཡང་དག་པ་མ་ཡིན་པ་ཐེག་པ་ཆེན་པོ་ཤིན་ཏུ་རྒྱས་པའི་མདོ་ཞེས་བྱ་བ་འབྱུང་ངོ་། །ཞེས་སྨྲ་བ་མ་འོངས་པའི་དུས་ན་དེ་ལྟ་བུའི་དགེ་སློང་སྡིག་པ་ཅན་དག་འབྱུང་ངོ་། །ངས་ཡང་འདི་སྐད་དུ་གསུངས་ཏེ། གསུང་རབ་སྡེ་དགུ་ལ་མ་གཏོགས་པ་ཤིན་ཏུ་རྒྱས་པའི་མདོ་སྡེ་ཡོད་པར་གསུངས་སོ། །
དེ་ལ་གང་ཞིག་དེའི་དོན་ཤེས་ན་དེ་ནི་མདོ་སྡེ་དང་འདུལ་བ་ཤིན་ཏུ་ཡང་དག་པར་རྟོགས་པ་ཡིན་ཏེ། དེ་ནི་མ་བརྟགས་པའི་དངོས་པོ་ཐམས་ཅད་སྤངས་པ། ཟླ་བ་ཉ་བ་ལྟར་ཤིན་ཏུ་གསལ་ཞིང་དག་པའོ་ཞེས་ངས་གསུངས་སོ། །དེ་ལ་གང་འདི་སྐད་དུ་དེ་བཞིན་གཤེགས་པས་མདོ་སྡེ་རེ་རེ་ལས་ཀྱང་དོན་གང་གཱའི་ཀླུང་གི་བྱེ་མ་སྙེད་འབྱུང་ཡང་འདི་སྐད་དུ་མ་གསུངས་པས་འདི་ནི་ཡང་དག་པར་མེད་པ་ཡིན་ནོ། །ཅི་སྟེ་ཡོད་ན་བདག་ཅག་གི་འདུལ་བ་ལས་ཅིའི་ཕྱིར་མ་གསུངས། འདི་ལྟར་མ་གསུངས་ཏེ་མ་བྱུང་བས་ན་བདག་ཅག་ནི་དེ་ལ་ཡིད་མི་ཆེས་སོ། །ཞེས་དེ་སྐད་དུ་སྨྲ་ན་གང་ཟག་དེ་ནི་ཤིན་ཏུ་ཁ་ན་མ་ཐོ་བ་ཐོབ་པ་ཡིན་པར་རིག་པར་བྱའོ། །གང་ཟག་དེ་ཡང་འདི་སྐད་དུ་མདོ་སྡེ་དང་འདུལ་བ་དེ་ནི་བདག་གིས་གཟུང་བར་བྱའོ། །དེ་ཅིའི་ཕྱིར་ཞེ་ན། འདིས་ཆོག་ཤེས་ཤིང་འདོད་པ་ཉུང་བ་དང་། ཀུན་ནས་ཉོན་མོངས་པ་གཅོད་པ་དང་། ཤེས་རབ་དང་མྱ་ངན་ལས་འདའ་བའི་དགེ་བའི་ཆོས་ཀྱི་རྒྱུར་འགྱུར་བའི་ཕྱིར་རོ། །ཞེས་དེ་སྐད་དུ་སྨྲ་ན་ཡང་ངའི་ཉེ་གནས་མ་ཡིན་ནོ། །དེ་ལ་གང་འདི་སྐད་དུ་དེ་བཞིན་གཤེགས་པས་འགྲོ་བ་མང་པོ་བསྒྲལ་བའི་ཕྱིར་ཤིན་ཏུ་རྒྱས་པའི་མདོ་སྡེ་གསུངས་སོ། །ཞེས་སྨྲ་ན་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །དེ་ལ་གང་ཞིག་ཤིན་ཏུ་རྒྱས་པའི་མདོ་སྡེ་མི་འདོད་ན་དེ་ནི་ངའི་ཉེ་གནས་ཀྱང་མ་ཡིན། སངས་རྒྱས་ཀྱི་ཆོས་ཀྱིས་རབ་ཏུ་བྱུང་བ་མ་ཡིན་ཏེ། དེ་ནི་ངན་པར་ལྟ་བ་མུ་སྟེགས་ཅན་གྱི་འཁོར་ཡིན་པར་རིག་པར་བྱའོ། །མདོ་སྡེ་དང་འདུལ་བ་གང་ལས་འདི་སྐད་དུ་གསུངས་ན། དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་མ་ཡིན་པ་ནི་བདུད་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་འཁོར་ཅེས་བྱའོ། །དེ་ལ་གང་སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །རིགས་ཀྱི་བུ་གཞན་ཡང་འདི་སྐད་དུ་དེ་བཞིན་གཤེགས་པ་ནི་
ཡོན་ཏན་ཚད་མེད་པ་ལས་གྲུབ་པ་མ་ཡིན་ཏེ། མི་རྟག་པ་འགྱུར་ཞིང་འཕོ་བའོ། །སྟོང་པའི་ཆོས་ཐོབ་པས་བདག་མེད་ཅེས་གསུངས་ཏེ། དེ་ནི་འཇིག་རྟེན་དང་འཐུན་པ་མ་ཡིན་ནོ། །ཞེས་དེ་སྐད་དུ་འབྱུང་བའི་མདོ་སྡེ་དང་འདུལ་བ་ནི་བདུད་ཀྱིས་བསྟན་པ་ཞེས་བྱའོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ནི་བསམ་གྱིས་མི་ཁྱབ་པ་སྟེ། ཚད་མེད་གྲངས་མེད་པའི་ཡོན་ཏན་ལས་གྲུབ་པའོ། །དེ་བས་ན་རྟག་པ་གནས་པ་མི་འགྱུར་མི་འཕོ་བའོ། །ཞེས་མདོ་སྡེ་དང་འདུལ་བ་ལས་འབྱུང་ན་དེ་ནི་སངས་རྒྱས་ཀྱིས་བསྟན་པ་ཡིན་ནོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་ཁ་ཅིག་འདི་སྐད་དུ་དགེ་སློང་དག་ཕས་ཕམ་པའི་ཁ་ན་མ་ཐོ་བ་མ་བྱུང་བར་ཀུན་གྱིས་ཕས་ཕམ་པ་བྱུང་སྟེ། ཏ་ལའི་མགོ་བཅད་པ་བཞིན་དུ་གྱུར་ཏོ། །ཞེས་སྨྲ་ཡང་དགེ་སློང་དེ་ནི་ཕས་ཕམ་པ་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན། ངས་ནི་ཕས་ཕམ་པ་བཞི་ལས་གཅིག་ཙམ་ཉམས་ན་རྡོ་བཅག་པ་ལྟར་ཕྱིར་མི་འབྱོར་རོ་ཞེས་གསུངས་ཏེ། དེ་ལ་གང་ཞིག་བླ་མ་མིའི་ཆོས་ཐོབ་བོ་ཞེས་དེ་སྐད་སྨྲ་ན་དེ་ནི་ཕས་ཕམ་པའོ། །དེ་ཅིའི་ཕྱིར་ཞེ་ན། ཡང་དག་པར་ཅིར་ཡང་མ་ཐོབ་པར་ཐོབ་པ་ལྟར་སྒྱུ་དང་གཡོ་འཆོས་ན་གང་ཟག་དེ་ནི་མིའི་ཆོས་ལས་ཉམས་པ་ཞེས་བྱ་སྟེ། ཕས་ཕམ་པ་ཡིན་ནོ། །འདི་ལྟ་སྟེ། དགེ་སློང་གང་ཞིག་འདོད་པ་ཉུང་བ་ཆོག་ཤེས་པ། ཚུལ་ཁྲིམས་བསྲུང་བ། ཡོངས་སུ་དག་པ། བས་མཐར་གནས་པའི་དྲུང་དུ་རྒྱལ་པོའམ། བློན་པོ་ཆེན་པོ་འོངས་ནས་དགེ་སློང་འདི་ནི་དགྲ་བཅོམ་པར་འགྱུར་རོ་སྙམ་བསམས་ཏེ། དྲུང་དུ་བསྙེན་ནས་བསྟོད་པ་དང་། བསྙེན་བཀུར་དང་། ཕྱག་བྱས་ཏེ། འདི་སྐད་དུ་སློབ་དཔོན་ཆེན་པོ་ལུས་འདི་རྗེས་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །ཞེས་སྨྲ་ན་དགེ་སློང་དེ་རྒྱལ་
པོ་དེ་ལ་འདི་སྐད་ཅེས་སྨྲའོ། །རྒྱལ་པོ་ཆེན་པོ་བདག་ནི་ཡང་དག་པར་དགེ་སྦྱོང་གི་འབྲས་བུ་མ་ཐོབ་ཀྱིས་རྒྱལ་པོ་ཆེན་པོ་བདག་ལ་དགེ་སྦྱོང་གི་འབྲས་བུ་ཐོབ་བོ་ཞེས་མ་གསུང་ཤིག །རྒྱལ་པོ་ཆེན་པོ་བདག་ལ་ཆོག་མི་ཤེས་པའི་ཆོས་བཀའ་མི་སྩལ་དུ་གསོལ། གང་ཆོག་མི་ཤེས་པ་དག་ནི་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །ཞེས་བྱ་བའི་བར་དུ་བསྟོད་ཀྱང་ལན་མ་བཏབ་སྟེ་ཅང་མི་སྨྲའོ། །བདག་གིས་ཀྱང་ཅི་སྟེ་ལན་མི་འདེབས་པར་ཅང་མ་སྨྲས་ན་སངས་རྒྱས་བཅོམ་ལྡན་འདས་ཀྱིས་རྣམ་པར་སྨད་པར་འགྱུར་རོ། །གང་ཆོག་ཤེས་པར་སྤྱོད་པ་ལ་ནི་སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ། དེ་བས་ན་བདག་ནི་ནམ་དུ་ཡང་ཆོག་ཤེས་པ་ལ་སྤྱོད་པར་དགའོ། །ཆོག་ཤེས་པ་ནི་བདག་གིས་འབྲས་བུ་མ་ཐོབ་པར་རྒྱལ་པོས་འབྲས་བུ་ཐོབ་བོ་ཞེས་སྨྲས་ཀྱང་བདག་མི་འདོད་པ་ནི་ཆོག་ཤེས་པ་ཞེས་བྱའོ། །དེའི་ཚེ་ན་རྒྱལ་པོ་ཡང་འདི་སྐད་དུ་སློབ་དཔོན་ཆེན་པོ་ཁྱོད་ནི་ཡང་དག་པར་དགྲ་བཅོམ་པའི་འབྲས་བུ་ཐོབ་སྟེ། སངས་རྒྱས་དང་ཐ་མི་དད་དོ་ཞེས་སྨྲས་ན་དེའི་ཚེ་ན་རྒྱལ་པོ་དེས་ཡུལ་མི་ཐམས་ཅད་དང་། བཙུན་མོ་དང་། ཕོ་བྲང་གི་སླས་ཀྱི་འཁོར་ཐམས་ཅད་དུ་དགེ་སློང་དེས་དགེ་སྦྱོང་གི་འབྲས་བུ་ཐོབ་བོ་ཞེས་བསྒྲགས་ནས། དེ་སྐད་ཅེས་ཐོས་པ་ཐམས་ཅད་དགེ་སློང་དེ་ལ་ཤིན་ཏུ་དད་པ་དང་། མཆོད་པ་བྱ་བ་དང་། བཀུར་སྟི་དང་། རིམ་གྲོ་བྱ་བའི་སེམས་སྐྱེས་སོ། །དེ་ལྟར་དགེ་སློང་དེ་ཡང་ཡང་དག་པར་ཚངས་པར་སྤྱོད་ཅིང་ཡོངས་སུ་དག་པ་ཡིན་པས་དེའི་རྒྱུ་དེའི་རྐྱེན་གྱིས་དེ་ལ་དགའ་བ་ཐམས་ཅད་བསོད་ནམས་ཆེན་པོ་ཐོབ་ཀྱི། དགེ་སློང་དེ་ནི་ཕས་ཕམ་པའི་ཁ་ན་མ་ཐོ་བ་ཉམས་པ་མ་ཡིན་ནོ། །དེ་ཅིའི་ཕྱིར་ཞེ་ན། ཕ་རོལ་པོས་དགའ་བ་དང་། དད་པ་དང་། བསྟོད་པ་དང་། མཆོད་པར་བྱ་བའི་སེམས་རང་བ་སྐྱེས་པའི་ཕྱིར་རོ། །དེ་ལྟར་ན་དགེ་སློང་དེ་ལ་ནི་ཁ་ན་མ་ཐོ་བ་ཉམས་པ་མེད་དོ། །དེ་ལ་ནི་གང་ཞིག་དེ་ལ་ཁ་ན་མ་ཐོ་བ་ཡོད་ཅེས་སྨྲ་ན།
མདོ་སྡེ་དེ་ནི་བདུད་ཀྱིས་བསྟན་པ་ཡིན་པར་རིག་པར་བྱའོ། །གཞན་ཡང་དགེ་སློང་དག་སངས་རྒྱས་ཀྱིས་དགོངས་ཏེ་གསུངས་པའི་མདོ་སྡེ་ཟབ་མོ་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དེ། སངས་རྒྱས་ཀྱི་རང་བཞིན་ཡོད་པས་ཚད་མེད་པའི་ཀུན་ནས་ཉོན་མོངས་པ་ཆོད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་སྟེ། ལོག་སྲེད་ཅན་ནི་མ་གཏོགས་སོ་ཞེས་སྨྲ་བ་ལ། རྒྱལ་པོའམ། བློན་པོ་ཆེན་པོ་ཞིག་གིས་འདི་སྐད་དུ་དགེ་སློང་ཁྱོད་མངོན་པར་འཚང་རྒྱའམ་མི་རྒྱ། སངས་རྒྱས་ཀྱི་རང་བཞིན་ཡོད་དམ་ཞེས་འདྲི་ན་དེ་ལ་འདི་སྐད་ཅེས་སྨྲོས་ཤིག །བདག་གི་ལུས་ལ་སངས་རྒྱས་ཀྱི་རང་བཞིན་ནི་ངེས་པར་ཡོད་ན་སངས་རྒྱས་སུ་འགྲུབ་བམ་མི་འགྲུབ་པ་ནི་མ་གཏོགས་སོ། །རྒྱལ་པོས་སྨྲས་པ། བཙུན་པ་ལོག་སྲེད་ཅན་གྱི་ལས་མ་བྱས་ན། གདོན་མི་ཟ་བར་འགྲུབ་སྟེ་ཐེ་ཙོམ་མེད་དོ། །དགེ་སློང་གིས་དེ་ལ་རྒྱལ་པོ་ཆེན་པོས་སྨྲས་པ་བཞིན་ནོ། །དེ་སྐད་དུ་ངེས་པར་སངས་རྒྱས་ཀྱི་རང་བཞིན་ཡོད་དོ། །ཞེས་དགེ་སློང་དེས་སྨྲས་ཀྱང་ཕས་ཕམ་པར་མི་འགྱུར་རོ། །གཞན་ཡང་དགེ་སློང་དག་རབ་ཏུ་བྱུང་བའི་ཚེ་ན་འདི་སྙམ་དུ་སེམས་ཏེ། བདག་ནི་མཐར་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ་སྙམ་བསམས་ན། གང་ཟག་དེ་བླ་ན་མེད་པའི་བྱང་ཆུབ་མ་ཐོབ་ཀྱང་བསོད་ནམས་ཚད་མེད་མཐའ་ཡས་དཔག་ཏུ་མེད་པ་འཐོབ་བོ། །ཅི་སྟེ་དེ་ལ་གང་ཞིག་གིས་ཕས་ཕམ་པ་འབྱུང་ངོ་ཞེས་སྨྲ་ན་འོ་ན་ལྟ་དགེ་སློང་ཐམས་ཅད་ཕས་ཕམ་པ་མ་བྱུང་བ་མེད་མོད། དེ་ཅིའི་ཕྱིར་ཞེ་ན། ང་སྔོན་བསྐལ་པ་ཁྲག་ཁྲིག་བརྒྱད་ཅུའི་བར་དུ་མ་བརྟགས་པའི་དངོས་པོ་ཐམས་ཅད་སྤངས་ཏེ། འདོད་པ་ཉུང་བ་དང་། ཆོག་ཤེས་པའི་སྤྱོད་ལམ་དང་ལྡན་པས་དེ་བཞིན་གཤེགས་པའི་བླ་ན་མེད་པའི་ཆོས་ཀྱི་སྡེ་སྣོད་ལ་ནན་ཏན་བྱས་ཏེ། བདག་གི་ལུས་ལ་སངས་རྒྱས་ཀྱི་རང་བཞིན་ངེས་པར་ཡོད་པར་ཤེས་པས་དེ་བས་ན་བླ་ན་མེད་པ་ཡང་དག་པར་རྫོགས་
པའི་བྱང་ཆུབ་ཏུ་མངོན་པར་སངས་རྒྱས་ནས་སངས་རྒྱས་ཞེས་བྱ་བ་ཐུགས་རྗེ་ཆེན་པོ་དང་ལྡན་པར་གྱུར་ཏོ། །གང་འདི་སྐད་དུ་སྨྲ་བའི་མདོ་སྡེ་དང་འདུལ་བ་ནི་སངས་རྒྱས་ཀྱིས་བསྟན་པ་ཞེས་བྱའོ། །དེ་ལ་གང་བསྟན་པ་འདིའི་རྗེས་སུ་མི་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །བསྟན་པ་འདིའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །གཞན་ཡང་འདི་སྐད་དུ་ཕས་ཕམ་པ་བཞི་ཡང་མེད་ལ་དགེ་འདུན་གྱི་ལྷག་མ་བཅུ་གསུམ་དང་། མ་ངེས་པའི་ཆོས་གཉིས་དང་། སྤང་བའི་ལྟུང་བ་སུམ་ཅུ་དང་། ལྟུང་བ་དགུ་བཅུ་རྩ་གཅིག་དང་། སོ་སོར་བཤགས་པའི་ཆོས་བཞི་དང་། བསླབ་པ་མང་པོ་དང་། བདུན་ཤིན་ཏུ་ཞི་བར་བྱེད་པ་ལ་སོགས་པ་ཡང་མེད། སྦོམ་པོ་དང་མཚམས་མེད་པ་ལྔ་ལ་སོགས་པ་དང་། ལོག་སྲེད་ཅེས་བྱ་བ་ཐམས་ཅད་མེད་དོ། །གལ་ཏེ་དགེ་སློང་དག་དེ་དག་ལ་སོགས་པ་ཉམས་པས་སེམས་ཅན་དམྱལ་བར་ལྟུང་ན་མུ་སྟེགས་ཅན་ཐམས་ཅད་ལྟ་མཐོ་རིས་ཀྱི་ལྷར་སྐྱེས་མོད། དེ་ཅིའི་ཕྱིར་ཞེ་ན། མུ་སྟེགས་ཅན་ལ་སོགས་པ་ལ་ཚུལ་ཁྲིམས་ཞེས་བྱ་བ་ཉམས་པ་མེད་པའི་ཕྱིར་རོ། །དེ་བས་ན་དེ་བཞིན་གཤེགས་པས་གང་ཟག་དག་གདུལ་བའི་ཕྱིར་ཚུལ་ཁྲིམས་ཞེས་བྱ་བ་གསུངས་སོ། །སངས་རྒྱས་ཀྱིས་གསུངས་པ་ལས་ཀྱང་ངའི་དགེ་སློང་དག་གལ་ཏེ་མི་ཚངས་པར་སྤྱོད་འདོད་ན་ཆོས་གོས་བཞག་སྟེ། ཁྱིམ་པའི་གོས་གྱོན་ལ་མི་ཚངས་པར་སྤྱོད་ཅིག །གཞན་ཡང་འདི་སྙམ་དུ་མི་ཚངས་པར་སྤྱོད་པ་འདི་བདག་ཅག་འབའ་ཞིག་གི་སྐྱོན་མ་ཡིན་ཏེ། དེ་བཞིན་གཤེགས་པ་བཞུགས་པའི་ཚེ་ཡང་དགེ་སློང་དག་མི་ཚངས་པར་སྤྱོད་དེ། རྣམ་པར་གྲོལ་བ་ཡང་ཡོད། ཚེ་འཕོས་ནས་མཐོ་རིས་ཀྱི་ལྷར་སྐྱེ་བ་ཡང་ཡེ་ནས་ཡོད་དེ། བདག་འབའ་ཞིག་གིས་སྤྱོད་པ་མ་ཡིན། ལ་ལ་ཕས་ཕམ་པ་བཞི་ཉམས་པ་དང་། ལ་ལ་ཚུལ་ཁྲིམས་ལྔ་ཉམས་པ་དང་། ལ་ལ་ནི་མ་བརྟགས་པ་སྤྱོད་ལམ་མ་ཡིན་པའི་ལས་ཐམས་ཅད་བྱས་ཀྱང་ཡང་དག་པར་རྣམ་པར་གྲོལ་བ་ཡོད་དེ། དེ་བཞིན་གཤེགས་པས་ཉེས་པ་གཅིག་བྱས་
ན། སུམ་ཅུ་རྩ་གསུམ་གནམ་གྱི་ཉི་མ་དང་། ཟླ་བ་དང་། ལོར་བགྲང་བའི་ལོ་སྟོང་ཕྲག་བརྒྱད་བརྒྱའི་བར་དུ་སེམས་ཅན་དམྱལ་བར་ལྟུང་ངོ་ཞེས་གསུངས་མོད་ཀྱི། དེ་ཡང་དེ་བཞིན་གཤེགས་པས་གང་ཟག་དག་གདུལ་བའི་ཕྱིར་གསུངས་པར་ཟད་ཅེའམ། ཕས་ཕམ་པ་དང་ཉེས་བྱས་ཀྱི་བར་དུ་ལྕི་ཡང་གི་ཁྱད་པར་མེད་དེ། འདུལ་བ་འཛིན་པ་དག་གིས་སངས་རྒྱས་ཀྱིས་བཅས་པར་བརྫུན་དུ་སྨྲས་སོ་ཞེས་དེ་སྐད་ཟེར་ན་དེ་ནི་སངས་རྒྱས་ཀྱིས་བསྟན་པ་མ་ཡིན་གྱི། དེ་སྐད་དུ་སྨྲ་བ་ནི་བདུད་ཀྱི་མདོ་སྡེ་དང་འདུལ་བ་ཡིན་པར་རིག་པར་བྱའོ། །དེ་ལ་གང་འདི་སྐད་དུ་ཚུལ་ཁྲིམས་ལ་གནས་པ་ཉེས་བྱས་ཕྲ་མོའི་བར་དུ་གཅིག་ཙམ་ཉམས་ན་ཡང་དཔག་ཏུ་མེད་པའི་སྡུག་བསྔལ་མྱོང་བར་གྱུར་ཏེ། དེ་ལྟར་ཤེས་ནས་ཇི་ལྟར་རུ་སྦལ་དག་ཡན་ལག་དྲུག་སྦེད་པ་བཞིན་དུ་བདག་གི་ལུས་ཤིན་ཏུ་བསྲུང་ངོ་། །དེ་ལ་གཞན་ཡང་འདུལ་བ་འཛིན་པ་དག་འདི་སྐད་དུ་ཚུལ་ཁྲིམས་ཅི་ཉམས་ཀྱང་ཁ་ན་མ་ཐོ་བའི་འབྲས་བུ་སྨིན་པ་མེད་དོ། །ཞེས་སྨྲ་ན་གང་ཟག་དེ་ལ་བསྙེན་པར་མི་བྱའོ། །ཞེས་བཅོམ་ལྡན་འདས་ཀྱིས་ཚིགས་སུ་བཅད་པ་ལས་གསུངས་པ། ཆོས་གཅིག་ཙམ་ལས་འདས་པ་གང་། །དེ་ནི་བརྫུན་དུ་སྨྲ་བ་སྟེ། །འཇིག་རྟེན་ཕྱི་མ་མི་མཐོང་བས། །སྡིག་པ་གང་ཡང་མི་བྱེད་མེད། །དེ་བས་ན་གང་ཟག་དེ་ལ་བསྙེན་པར་མི་བྱ་སྟེ། ངའི་སངས་རྒྱས་ཀྱི་ཆོས་ནི་འདི་ལྟར་ཡོངས་སུ་དག་པ་ཡིན་ན་ཉེས་པ་སྦོམ་པོ་དང་། དགེ་འདུན་གྱི་ལྷག་མ་དང་། ཕས་ཕམ་པ་དག་ཁ་ན་མ་ཐོ་བ་ཡིན་པར་རྩི་བ་ལྟ་སྨོས་ཀྱང་ཅི་དགོས། དེ་བས་ན་ཆོས་དེ་དག་ཤིན་ཏུ་བསྲུང་ངོ་། །གལ་ཏེ་མ་བསྲུངས་ན་གཞན་དུ་ན་ཆོས་གང་ལ་ཚུལ་ཁྲིམས་ཞེས་གདགས། ངས་མདོ་སྡེ་ལས་ཀྱང་གསུངས་ཏེ། ཕས་ཕམ་པ་བཞི་ཉམས་པ་ནས་ཉེས་བྱས་ཕྲ་མོའི་བར་དུ་ཉམས་ན་ཆད་པས་གཅོད་དོ་ཞེས་གསུངས་སོ། །སོ་སོའི་སྐྱེ་བོ་དག་གལ་ཏེ་ཚུལ་ཁྲིམས་མ་བསྲུངས་ན་སངས་རྒྱས་ཀྱི་རང་བཞིན་ཇི་ལྟར་མཐོང་བར་འགྱུར་ཏེ། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་ཡང་ཚུལ་ཁྲིམས་
བསྲུངས་པ་ལས་མཐོང་བར་འགྱུར་རོ། །སངས་རྒྱས་ཀྱི་རང་བཞིན་མཐོང་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱའོ། །མདོ་སྡེ་གསུང་རབ་དགུ་པོ་ལས་ཤིན་ཏུ་རྒྱས་པའི་མདོ་སྡེ་མེད་དེ། སངས་རྒྱས་ཀྱི་རང་བཞིན་ཡོད་པར་ཡང་ངས་མ་གསུངས་སོ། །མདོ་སྡེ་དེ་ལས་མ་གསུངས་མོད་ཀྱི། ཡང་དག་པར་ཡོད་པར་རིག་པར་བྱའོ། །དེ་ལ་གང་ཞིག་དེ་སྐད་དུ་སྨྲ་བ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་མཆིས་པར་བཀའ་སྩལ་པ། འདི་མདོ་སྡེ་གསུང་རབ་དགུ་པོ་ལས་ནི་མ་ཐོས་ན་ད་མཆིས་པར་བསྟན་ཅིང་གསུངས་ན་ཕས་ཕམ་པར་མི་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་སྨྲས་པ་བཞིན་ཏེ། ཕས་ཕམ་པར་མི་འགྱུར་རོ། །རིགས་ཀྱི་བུ་འདི་ལྟ་སྟེ། དཔེར་ན་གང་ཟག་གཅིག་གིས་འདི་སྐད་དུ་རྒྱ་མཚོའི་ནང་ན་རིན་པོ་ཆེ་བདུན་ནི་ཡོད་ཀྱི། བརྒྱད་མེད་དོ་ཞེས་སྨྲས་ཀྱང་ཉེས་པ་མེད་དོ། །དེ་བཞིན་དུ་མདོ་སྡེ་གསུང་རབ་དགུ་པོ་ལས་སངས་རྒྱས་ཀྱི་རང་བཞིན་མེད་དོ་ཅེས་སྨྲས་ཀྱང་ཉེས་པ་མེད་དོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་ཐེག་པ་ཆེན་པོ་ཡེ་ཤེས་ཀྱི་རྒྱ་མཚོ་ལས་སངས་རྒྱས་ཀྱི་རང་བཞིན་ཡོད་པར་གསུངས་ཀྱི། ཐེག་པ་གཉིས་ཀྱིས་ནི་ཤེས་པའམ་མཐོང་བ་མ་ཡིན་ཏེ། དེ་བས་ན་མེད་ཅེས་སྨྲས་ཀྱང་ཉེས་པ་མེད་དོ། །འདི་ལྟར་སྤྱོད་ཡུལ་འདི་ནི་སངས་རྒྱས་རྣམས་ཀྱིས་མཁྱེན་གྱི་ཉན་ཐོས་དང་རང་སངས་རྒྱས་ཀྱིས་ཤེས་པའི་ཡུལ་མ་ཡིན་ནོ། །རིགས་ཀྱི་བུ་གལ་ཏེ་གང་ཟག་གིས་དེ་བཞིན་གཤེགས་པའི་སྙིང་པོ་ཤིན་ཏུ་ཟབ་མོ་མ་ཐོས་ན་སངས་རྒྱས་ཀྱི་རང་བཞིན་ཡོད་པར་མི་ཤེས་སོ། །དེ་ལ་ཤིན་ཏུ་ཟབ་མོའི་སྙིང་པོ་གང་ཞེ་ན། དེ་ནི་འདི་ལྟ་སྟེ། ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེའོ། །རིགས་ཀྱི་བུ་མུ་སྟེགས་ཅན་ཁ་ཅིག་ནི་བདག་ཅེས་བྱ་བ་རྟག་པར་ཡང་སྨྲ། ཁ་
ཅིག་ནི་བདག་མེད་ཅེས་བྱ་བ་ཆད་པར་ཡང་སྨྲའོ། །དེ་བཞིན་གཤེགས་པ་ནི་དེ་ལྟ་མ་ཡིན་ཏེ། བདག་ཡོད་པར་ཡང་གསུངས་ལ། བདག་མེད་པར་ཡང་གསུངས་པས་དབུ་མ་ཞེས་བྱའོ། །དེ་ལ་གང་ཞིག་སངས་རྒྱས་ཀྱིས་དབུ་མར་གསུངས་པ་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དེ། ཉོན་མོངས་པས་བསྒྲིབས་པས་མི་ཤེས་མི་མཐོང་ངོ་། །དེ་བས་ན་ཉོན་མོངས་པ་གཅོད་པའི་ཐབས་ལ་ནན་ཏན་བྱའོ། །ཞེས་གང་དེ་སྐད་དུ་སྨྲ་ན་དེ་ནི་ཕས་ཕམ་པ་བཞི་མ་ཉམས་པ་ཡིན་པར་རིག་པར་བྱའོ། །གང་འདི་སྐད་དུ་མི་སྨྲ་བ་དེ་ནི་ཕས་ཕམ་པ་ཉམས་པ་ཞེས་བྱའོ། །དེ་ལ་གང་ཞིག་འདི་སྐད་དུ་བདག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་རང་བཞིན་ཡོད་པའི་ཕྱིར་རོ། །སངས་རྒྱས་ཀྱི་རང་བཞིན་ཡོད་པ་ནི་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་སྟེ། དེ་བས་ན་བདག་ནི་བྱང་ཆུབ་ཏུ་མངོན་པར་སངས་རྒྱས་སོ་ཞེས་སྨྲ་ན་གང་ཟག་དེ་ནི་ཕས་ཕམ་པ་བྱུང་བ་རིག་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་རང་བཞིན་ཡོད་མོད་ཀྱི་སྒྲུབ་པའི་ཐབས་ལ་ནན་ཏན་མ་བྱས་ན་མཐོང་བར་མི་འགྱུར་རོ། །མི་མཐོང་བས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་མི་རྒྱའོ། །རིགས་ཀྱི་བུ་དེ་ལྟ་བས་ན་སངས་རྒྱས་ཀྱི་ཆོས་ནི་ཤིན་ཏུ་ཟབ་སྟེ། བསམ་གྱིས་མི་ཁྱབ་བོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོ་ཞིག་གིས་ཇི་ལྟར་ན་དགེ་སློང་དག་བླ་མ་མིའི་ཆོས་ལས་ཉམས་པ་ལགས་ཞེས་འདྲི་ན་དེ་ལ་ཇི་སྐད་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དགེ་སློང་གང་ཞིག་རྙེད་པ་དང་བསོད་སྙོམས་ཀྱི་ཕྱིར་གཡོ་དང་སྒྱུས་འཚོ་ཞིང་། འདི་སྙམ་དུ་བདག་ལ་འཇིག་རྟེན་དུ་བཅས་པས་དགེ་སློང་དུ་ཤེས་པར་འགྱུར་སྙམ་དུ་སེམས་ཏེ། བདག་ཇི་ལྟར་ན་རྙེད་པ་ཆེར་རྙེད་ཅིང་གྲགས་པར་འགྱུར་སྙམ་ནས་དགེ་སློང་གླེན་པ་གཏི་མུག་ཅན་དག་ཉིན་མཚན་དུ་འདི་སྙམ་
དུ་སེམས་ཏེ། བདག་དགེ་སྦྱོང་གི་འབྲས་བུ་མ་ཐོབ་ཀྱང་འཇིག་རྟེན་དུ་བཅས་པ་དག་གིས་བདག་གི་དགེ་སྦྱོང་གི་འབྲས་བུ་ཐོབ་པ་ཙམ་དུ་འཛིན་པར་འགྱུར། དགེ་བསྙེན་དང་། དགེ་བསྙེན་མ་ལ་སོགས་པ་ཐམས་ཅད་ཀྱིས་བདག་ལ་འཕགས་པ་བསོད་ནམས་ཅན་ནོ་ཞེས་བརྗོད་པར་འགྱུར་སྙམ་སེམས་ཏེ། དེ་ཡང་རྙེད་པ་དང་གྲགས་པའི་ཕྱིར་གྱི་ཆོས་འདོད་པའི་ཕྱིར་ནི་མ་ཡིན་ནོ། །སྤྱོད་ལམ་འཆོས་ཤིང་ངུར་སྨྲིག་བགོ་བ་དང་། ལྷུང་བཟེད་ཐོགས་པ་ཚུལ་ལས་མི་ཉམས་ཤིང་བས་མཐར་གནས་ནས་དགྲ་བཅོམ་པ་ལྟ་བུར་འཆོས་ཏེ། འཇིག་རྟེན་གྱི་མི་དག་ཇི་ལྟར་ན་དགེ་སློང་འདི་ནི་མཆོག་དམ་པ་སྟེ། དཀའ་ཐུབ་དང་རབ་ཏུ་ཞི་བའི་ཆོས་ལ་ནན་ཏན་བྱེད་པའོ། །ཞེས་བསྔགས་ཤིང་དེའི་རྒྱུ་དེའི་རྐྱེན་གྱིས་བདག་ལ་སློབ་མ་དང་འཁོར་མང་བར་འགྱུར། ཐམས་ཅད་ཀྱིས་ཆོས་གོས་དང་། བསོད་སྙོམས་དང་། མལ་ཆ་དང་། ནད་ཀྱི་རྐྱེན་སྨན་མང་དུ་འབུལ་ཞིང་བུད་མེད་མང་པོས་བསྙེན་བཀུར་དང་། བསྟི་སྟང་བྱེད་པར་འགྱུར་སྙམ། དགེ་སློང་ཕའམ། དགེ་སློང་མ་དག་དེ་ལྟར་སེམས་ན་དེ་ནི་བླ་མ་མིའི་ཆོས་ཅན་དུ་འགྱུར་བ་ཞེས་བྱའོ། །དེ་ལ་གང་དགེ་སློང་དག་བླ་ན་མེད་པའི་དམ་པའི་ཆོས་རྣམ་པར་གཞག་པའི་ཕྱིར་བས་མཐར་གནས་ན་དགྲ་བཅོམ་པ་མ་ཡིན། ཡང་ཕ་རོལ་པོས་དགྲ་བཅོམ་པ་ཡིན་པར་སེམས་ན་དེ་ནི་དགེ་སློང་ཤིན་ཏུ་དགེ་བ། དགེ་སློང་ཞི་བ། དགེ་སློང་བཟང་པོ་སྟེ། སྐྱེ་བོ་ཚད་མེད་པ་རྣམས་དད་པའི་སེམས་སྐྱེ་བར་འགྱུར་རོ། །དེའི་རྒྱུ་དེའི་རྐྱེན་གྱིས་ན་ཚད་མེད་པའི་དགེ་སློང་དག་དེའི་འཁོར་དུ་འགྱུར་ཏེ། ཚུལ་ཁྲིམས་ཉམས་པའི་དགེ་སློང་དང་། དགེ་བསྙེན་དག་ཀྱང་ཚུལ་ཁྲིམས་སྡོམ་པ་ལ་གནས་པར་འགྱུར་རོ། །དེའི་རྒྱུ་དེའི་རྐྱེན་གྱིས་དམ་པའི་ཆོས་ཡུན་རིང་དུ་གནས་ཤིང་དེ་བཞིན་གཤེགས་པའི་བླ་ན་མེད་པའི་ཆོས་རྒྱས་པ་དང་། ཤིན་ཏུ་རྒྱས་པའི་ཐེག་པ་ཆེན་པོའི་ཆོས་ཀྱིས་སྐྱེ་བོ་ཚད་མེད་པ་སྒྲོལ་བ་དང་། དེ་བཞིན་གཤེགས་པས་གསུངས་པའི་མདོ་སྡེ་དང་འདུལ་བའི་དོན་ལྕི་བ་དང་ཡང་བ་ལ་ཤིན་ཏུ་
མཁས་པར་འགྱུར་རོ། །དེ་འདི་སྐད་དུ་བདག་ལ་སངས་རྒྱས་ཀྱི་རང་བཞིན་ཡོད་དེ། དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ལས་ཀྱང་བདག་ནི་གདོན་མི་ཟ་བར་མངོན་པར་འཚང་རྒྱ་སྟེ། ཚད་མེད་པའི་ཀུན་ནས་ཉོན་མོངས་པའང་ཟད་པར་འགྱུར་རོ། །ཞེས་སྨྲ་ལ་ཚད་མེད་པའི་དགེ་བསྙེན་རྣམས་ལ་ཡང་འདི་སྐད་དུ་ཁྱེད་ལ་ཡང་སངས་རྒྱས་ཀྱི་རང་བཞིན་ཡོད་དེ། བདག་ཅག་དེ་བཞིན་གཤེགས་པའི་བྱང་ཆུབ་ཀྱི་ས་ལ་གནས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་སྟེ། ཚད་མེད་པའི་ཀུན་ནས་ཉོན་མོངས་པའང་ཞི་བར་འགྱུར་རོ། །ཞེས་དེ་སྐད་དུ་སྨྲས་ཀྱང་གང་ཟག་དེ་ནི་བླ་མ་མིའི་ཆོས་སྨྲ་བ་མ་ཡིན་ཏེ། བྱང་ཆུབ་སེམས་དཔའ་ཞེས་བྱའོ། །དེ་ལ་ཉེས་བྱས་ཀྱི་ཁ་ན་མ་ཐོ་བས་ཀྱང་སུམ་ཅུ་རྩ་གསུམ་གནམ་གྱི་ཉི་མ་དང་། ཟླ་བ་དང་ལོར་བགྲང་བའི་ལོ་སྟོང་ཕྲག་བརྒྱད་བརྒྱའི་བར་དུ་སེམས་ཅན་དམྱལ་བར་ལྟུང་སྟེ། སྡུག་བསྔལ་མྱོང་བར་འགྱུར་ན་ཆེད་དུ་ཉེས་པ་སྦོམ་པོའི་སྡིག་པ་བྱེད་པ་ལྟ་ཅི་སྨོས། ཐེག་པ་ཆེན་པོ་ལས་དགེ་སློང་གང་ཞིག་ཉེས་པ་སྦོམ་པོ་བྱུང་ན་བསྙེན་པར་མི་བྱའོ་ཞེས་གསུངས་སོ། །དེ་ལ་ཐེག་པ་ཆེན་པོའི་མདོ་ལས་ཉེས་པ་སྦོམ་པོར་འགྱུར་བ་གང་ཞེ་ན། གལ་ཏེ་ཁྱིམ་བདག་གཅིག་གིས་སངས་རྒྱས་ཀྱི་རྟེན་གཙུག་ལག་ཁང་བརྩིགས་ནས་མེ་ཏོག་གི་ཕྲེང་བ་སངས་རྒྱས་ལ་ཕུལ་ཏེ། དགེ་སློང་གཅིག་གིས་མེ་ཏོག་གི་ཕྲེང་བ་བརྒྱུས་པའི་སྲད་བུ་མ་ཞུས་པར་བླངས་ན་ཉེས་པ་སྦོམ་པོའོ། །ཤེས་ཀྱང་རུང་མི་ཤེས་ཀྱང་རུང་སྦོམ་པོའོ། །གལ་ཏེ་འདོད་པའི་སེམས་ཀྱིས་སངས་རྒྱས་ཀྱི་མཆོད་རྟེན་བཤིག་ན་ཡང་ཉེས་པ་སྦོམ་པོ་སྟེ། གང་ཟག་དེ་ལ་ནི་བརྟེན་པར་མི་བྱའོ། །གལ་ཏེ་རྒྱལ་པོའམ་བློན་པོ་ཞིག་གིས་མཆོད་རྟེན་ཞིག་པ་མཐོང་ནས་སྐུ་གདུང་མཆོད་པའི་ཕྱིར་རམ། ཞིག་པ་གསོ་བའི་ཕྱིར་བཅོས་ཏེ། མཆོད་རྟེན་གྱི་ནང་ནས་རིན་པོ་ཆེ་རྙེད་ནས་དགེ་སློང་ལ་བཞག་པ་ལས་དགེ་སློང་གི་དབང་བྱས་ཏེ། བདག་གིར་སྤྱད་ན་དགེ་སློང་དེ་ནི་སྨེ་བའོ། །རྩོད་ཅིང་འཐབ་པའི་ཕྱིར་གཞིར་འགྱུར་བ་སྟེ། དགེ་བསྙེན་
པ་རྣམས་ཀྱིས་དེ་ལ་བསྙེན་བཀུར་དང་། མཆོད་པ་དང་། བསྟི་སྟང་མི་བྱའོ། །དགེ་སློང་དེ་ནི་དབང་པོ་མེད་པ་ཞེས་ཀྱང་བྱ། མཚན་གཉིས་པ་ཞེས་ཀྱང་བྱ། མ་ནིང་ཞེས་ཀྱང་བྱའོ། །མ་ནིང་ཞེས་ཀྱང་བྱ་བ་ནི། བུད་མེད་ལ་ཆགས་པའི་ཚེ་བུད་མེད་དུ་འགྱུར་བ་དང་། སྐྱེས་པ་ལ་ཆགས་པའི་ཚེ་སྐྱེས་པར་འགྱུར་བའོ། །དགེ་སློང་དེ་ནི་དབང་པོ་ངན་པ་ཞེས་བྱ་སྟེ། སྐྱེས་པ་ཞེས་ཀྱང་མི་བྱ། བུད་མེད་ཅེས་ཀྱང་མི་བྱ། རབ་ཏུ་བྱུང་བ་ཞེས་ཀྱང་མི་བྱ། ཁྱིམ་པ་ཞེས་ཀྱང་མི་བྱ་སྟེ། དགེ་སློང་དེ་ལ་ནི་བསྙེན་བཀུར་དང་མཆོད་པ་དང་བསྟི་སྟང་མི་བྱའོ། །སངས་རྒྱས་ཀྱི་བསྟན་པ་ལས་དགེ་སྦྱོང་གི་ཆོས་ནི་སྙིང་རྗེའི་སེམས་ཀྱིས་སེམས་ཅན་གྱི་མགོན་དང་སྐྱབས་བྱེད་ཅིང་ཆུང་ངུ་ན་གྲོག་མའི་བར་དུ་ཡང་མི་འཇིགས་པ་སྦྱིན་པ་ནི་དགེ་སྦྱོང་གི་ཆོས་ཞེས་བྱའོ། །སྨྱོ་བའི་ཁུ་བ་ཆང་མི་འཐུང་ཞིང་དྲི་མི་ཞིམ་པ་དང་མནམ་པའི་བར་དུ་ཡོངས་སུ་སྤོང་བ་ནི་དགེ་སྦྱོང་གི་ཆོས་ཞེས་བྱའོ། །བརྫུན་དུ་མི་སྨྲ་ཞིང་ཆུང་ངུ་ན་རྨི་ལམ་ན་ཡང་བརྫུན་སྨྲ་བར་མི་སེམས་པ་ནི་དགེ་སྦྱོང་གི་ཆོས་ཞེས་བྱའོ། །འདོད་ཆགས་ཀྱི་སེམས་རྨི་ལམ་གྱི་བར་དུ་ཡང་མེད་པ་ནི་དགེ་སྦྱོང་གི་ཆོས་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །གལ་ཏེ་དགེ་སློང་གིས་རྨི་ལམ་དུ་མི་ཚངས་པར་སྤྱད་ན་ཚུལ་ཁྲིམས་ཉམས་པར་འགྱུར་རམ། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་མ་ཡིན་ནོ། །མི་ཚངས་པར་སྤྱོད་པ་ལ་ཤིན་ཏུ་བཙོག་པར་བསམས་ཏེ། ཆུང་ངུ་ན་སྐད་ཅིག་ཙམ་ཡང་གཙང་བའི་འདུ་ཤེས་མི་སྐྱེད་དོ། །བུད་མེད་ཀྱིས་རྣམ་པར་ཉོན་མོངས་པའི་འདུ་ཤེས་སྤངས་ཏེ། རྨི་ལམ་དུ་མི་ཚངས་པར་སྤྱོད་པར་རྨིས་ན་སད་མ་ཐག་ཏུ་ཤིན་ཏུ་འགྱོད་པའི་སེམས་བསྐྱེད་དོ། །དགེ་སློང་གིས་བསོད་སྙོམས་སྤྱོད་པ་ན་མུ་གེ་བྱུང་བའི་ཚེ། ཤ་ཞིག་རྙེད་ན་བུའི་ཤ་ལ་ཟ་བ་ཙམ་དུ་འདུ་ཤེས་སྐྱེད་དོ། །འདོད་ཆགས་ཀྱི་སེམས་བྱུང་ན་དེ་མ་ཐག་ཏུ་ཡོངས་སུ་སྤོང་ངོ་། །ཆོས་ཀྱི་རྣམ་གྲངས་འདི་དག་ནི་སངས་རྒྱས་ཀྱི་ཆོས་ཀྱིས་གསུངས་པའི་མདོ་སྡེ་དང་འདུལ་བ་ཡིན་
པར་ཤེས་པར་བྱའོ། །དེ་ལ་གང་བདུད་ཀྱིས་བསྟན་པའི་རྗེས་སུ་འཇུག་པ་ནི་བདུད་ཀྱི་རིས་སུ་གཏོགས་པ་ཡིན་ནོ། །སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ལ་གང་འདི་སྐད་དུ་རྟག་ཏུ་རྐང་པ་ཡ་གཅིག་གིས་འགྲེང་བ་དང་། ཁ་རོག་སྟེ་ཅང་མི་སྨྲ་བ་དང་། ཆུར་མཆོངས་པ་དང་། མེར་མཆོངས་པ་དང་། བྲག་ལ་མཆོངས་པ་དང་། ཡ་ང་བ་ལ་མི་འཛེམ་པ་དང་། དུག་འཐུང་བ་དང་། ཁ་ཟས་མི་ཟ་བ་དང་། ཐལ་ཁུང་ན་ཉལ་བ་དང་། བདག་གི་རྐང་ལག་འཆིང་བ་དང་། སེམས་ཅན་གསོད་པ་དང་། རིག་སྔགས་ཅན་དང་། གདོལ་བུ་དང་། དབང་པོ་མེད་པ་དང་། མཚན་གཉིས་པ་དང་། མཚན་མ་ངེས་པ་དང་། དབང་པོ་མ་ཚང་བ་ལ་སོགས་པ་ཐམས་ཅད་དེ་བཞིན་གཤེགས་པས་རབ་ཏུ་བྱུང་བར་གནང་ངོ་ཞེས་སྨྲ་ན་དེ་ནི་བདུད་ཀྱིས་བསྟན་པ་ཡིན་ནོ། །སྔོན་བཅོམ་ལྡན་འདས་ཀྱིས་ཟར་གནང་བ་ནི་བའི་འོ་མ་ལས་བསྒྱུར་བ་རྣམ་པ་ལྔ་དང་། འབྲུ་མར་དང་། སྦྲང་རྩི་ལ་སོགས་པ་དང་། གོས་ཀེའུ་ཤ་ཡ་དང་། ལྷམ་ཡུ་རྡུམ་ལ་སོགས་པ་གྱོན་དུ་གནང་བ་ལས་དེ་མ་ཡིན་པ་གཞན་ཡང་འདི་སྐད་དུ་མ་ཧ་ལིང་ཀ་ཡང་གྱོན་དུ་གནང་ངོ་ཞེའམ། ས་བོན་ཐམས་ཅད་སོགས་སུ་གནང་ཞེའམ། རྩྭ་དང་ཤིང་ལ་སོགས་པ་ཐམས་ཅད་ལ་སྲོག་ཡོད་པར་སངས་རྒྱས་ཀྱིས་གསུངས་ནས་མྱ་ངན་ལས་འདས་སོ། །ཞེས་མདོ་སྡེ་དང་འདུལ་བ་ལ་དེ་སྐད་འབྱུང་ན་དེ་ནི་བདུད་ཀྱིས་བསྟན་པ་ཡིན་པར་ཤེས་པར་བྱའོ། །སངས་རྒྱས་ཀྱིས་ནི་རྟག་ཏུ་རྐང་པ་ཡ་གཅིག་གིས་འགྲེང་བར་ཡང་མ་གནང་སྟེ། ཆོས་ཀྱི་ཕྱིར་འགྲོ་བ་དང་། སྡོད་པ་དང་། འདུག་པ་དང་། ཉལ་དུ་གནང་ངོ་། །དེ་མ་ཡིན་པ་དུག་ཟ་བ་དང་། ཁ་ཟས་མི་ཟ་བ་དང་། ཚ་བ་རྣམ་པ་ལྔས་ལུས་སྲེག་པ་དང་། རྐང་ལག་འཆིང་བ་དང་། སེམས་ཅན་གསོད་པ་དང་། རིག་སྔགས་སྤྱོད་པ་དང་། འགྲོན་བུ་དང་། བ་ལང་གི་མཆེ་བ་ལས་ལྷམ་བྱེད་པ་དང་། ས་བོན་སོགས་པ་དང་། རྩི་ཤིང་ལ་སྲོག་ཡོད་པ་དང་། མ་ཧ་ལིང་ཀ་གྱོན་དུ་མི་
གནང་སྟེ། གལ་ཏེ་བཅོམ་ལྡན་འདས་ཀྱིས་གནང་བར་གསུངས་སོ། །ཞེས་སྨྲ་ན་དེ་ནི་མུ་སྟེགས་ཅན་གྱི་འཁོར་ཡིན་ཏེ། སངས་རྒྱས་ཀྱི་ཉེ་གནས་མ་ཡིན་ནོ། །སངས་རྒྱས་ཀྱིས་གནང་བ་ནི་བའི་འོ་མ་ལས་བསྒྱུར་བ་རྣམ་པ་ལྔ་དང་། འབྲུ་མར་དང་། སྦྲང་རྩི་ལ་སོགས་པ་དང་། ཀེའུ་ཤ་ཡ་དང་། ལྷམ་བུ་ཡུ་ཆད་གྱོན་དུ་གནང་ངོ་། །སངས་རྒྱས་ཀྱིས་ཆེན་པོ་བཞི་ལ་སྲོག་མེད་པར་གསུངས་ཏེ། མདོ་སྡེ་དང་འདུལ་བ་ལས་འདི་སྐད་དུ་བྱུང་བ་ནི་སངས་རྒྱས་ཀྱིས་བསྟན་པ་ཞེས་བྱའོ། །དེ་ལ་སངས་རྒྱས་ཀྱིས་བསྟན་པའི་རྗེས་སུ་འཇུག་པ་ནི་ངའི་ཉེ་གནས་ཡང་དག་པ་ཡིན་ནོ། །གལ་ཏེ་སངས་རྒྱས་ཀྱིས་བསྟན་པའི་རྗེས་སུ་མི་འཇུག་པ་ནི་བདུད་ཀྱི་རིས་སུ་གཏོགས་པ་ཞེས་བྱའོ། །གལ་ཏེ་སངས་རྒྱས་ཀྱིས་བསྟན་པའི་མདོ་སྡེ་དང་འདུལ་བའི་རྗེས་སུ་ཞུགས་ན་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །རིགས་ཀྱི་བུ་བདུད་ཀྱིས་བསྟན་པ་དང་། སངས་རྒྱས་ཀྱིས་གསུངས་པའི་ཁྱད་པར་དང་བྱེ་བྲག་ནི་རྒྱས་པར་ཁྱོད་ལ་བཤད་པ་འདི་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་ཡང་གསོལ་པ། བཅོམ་ལྡན་འདས་བདག་གིས་ནི་གདོད་བདུད་ཀྱིས་བསྟན་པ་དང་། སངས་རྒྱས་ཀྱིས་གསུངས་པའི་བྱེ་བྲག་གི་མཚན་ཉིད་འཚལ་ཏེ། དེས་ན་སངས་རྒྱས་ཀྱི་ཆོས་ཟབ་མོ་ཡང་རྟོགས་པར་འགྱུར་རོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་དེ་ལྟར་ཤིན་ཏུ་བྱེ་བྲག་ཕྱེད་ཅིང་གསལ་བར་རྟོགས་ན་མཁས་པ་ཤེས་རབ་ཅན་ཞེས་བྱའོ། །རིགས་ཀྱི་བུ་སྡུག་བསྔལ་ནི་འཕགས་པའི་བདེན་པ་ཞེས་བྱར་མི་རུང་ངོ་། །དེ་ཅིའི་ཕྱིར་ཞེ་ན། ཅི་སྟེ་སྡུག་བསྔལ་ལ་སྡུག་བསྔལ་གྱི་འཕགས་པའི་བདེན་པ་ཞེས་བྱ་ན་ལྟ། བ་ལང་དང་། ལུག་དང་། བོང་བུ་དང་། རྟ་དང་། སེམས་ཅན་དམྱལ་བའི་སེམས་ཅན་ལ་ཡང་འཕགས་པའི་བདེན་པ་ཡོད་པར་འགྱུར་རོ། །རིགས་ཀྱི་བུ་གང་ཞིག་དེ་བཞིན་གཤེགས་པའི་སྤྱོད་ཡུལ་ཤིན་ཏུ་ཟབ་མོ་རྟག་པ་གནས་པ་མི་འགྱུར་བའི་ཆོས་ཀྱི་སྐུ་
དམ་པ་ལ་ཞལ་ཟས་ཀྱིས་གསོ་བའི་སྐུ་སྙམ་སྟེ། ཆོས་ཀྱི་སྐུ་མ་ཡིན་པར་སེམས་ཤིང་དེ་བཞིན་གཤེགས་པའི་ཡོན་ཏན་དང་། གཟི་བརྗིད་དང་། ཆེ་བ་ཉིད་མི་ཤེས་ན་སྡུག་བསྔལ་བ་ཞེས་བྱའོ། །དེ་ཅིའི་ཕྱིར་ཞེ་ན། མི་ཤེས་པའི་ཕྱིར་ཆོས་ལ་ནི་ཆོས་མ་ཡིན་པར་ལྟ། ཆོས་མ་ཡིན་པ་ལ་ནི་ཆོས་སུ་ལྟ་སྟེ། དེ་བས་ན་གང་ཟག་དེ་ནི་གདོན་མི་ཟ་བར་ངན་སོང་དུ་ལྟུང་ཞིང་འཁོར་བར་འཁོར་ཏེ། ཀུན་ནས་ཉོན་མོངས་པ་སྐྱེ་ཞིང་སྡུག་བསྔལ་ཆེན་པོ་མྱོང་བར་འགྱུར་རོ། །དེ་ལ་གང་ཞིག་དེ་བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བར་ཤེས་སམ། རྟག་པ་དང་གནས་པའི་ཚིག་གཉིས་རྣ་ཁུང་དུ་ཐོས་པ་ཙམ་གྱིས་མཐོ་རིས་སུ་སྐྱེ་སྟེ། ཕྱིས་རྣམ་པར་གྲོལ་བ་ན་དེ་བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བར་རྟོགས་ཤིང་རིག་པར་འགྱུར་ཏེ། རིག་ཅིང་རྟོགས་པས་འདི་སྐད་དུ་བདག་སྔོན་དོན་འདི་རྟོགས་པས་རྣམ་པར་གྲོལ་བར་གྱུར་ཏོ། །བདག་ཐོག་མ་ནས་མི་ཤེས་མ་རྟོགས་པས། འཁོར་བར་འཁོར་བའི་མཐའ་མེད་པར་གྱུར་ཏེ། དེ་ནི་ཡང་དག་པའི་ཡེ་ཤེས་ཀྱིས་ཤེས་པར་གྱུར་ཏོ་ཞེས་སྨྲའོ།། །།བམ་པོ་བཅུ་པ། དེ་ལྟར་ཡང་དག་པའི་ཡེ་ཤེས་ཀྱིས་ཤེས་པ་ནི་སྡུག་བསྔལ་སྒོམ་པ་ཞེས་བྱ་སྟེ། ཕན་པ་དང་། བདེ་བའི་དོན་ཆེན་པོར་འགྱུར་རོ། །གང་དེ་ལྟ་བུའི་ཚུལ་དུ་མི་ཤེས་ན་ཤིན་ཏུ་ནན་ཏན་བྱས་ཀྱང་ཕན་པ་དང་བདེ་བའི་དོན་དུ་མི་འགྱུར་རོ། །དེ་ལྟར་ན་སྡུག་བསྔལ་ཤེས་པ་སྟེ། སྡུག་བསྔལ་གྱི་འཕགས་པའི་བདེན་པ་ཞེས་བྱའོ། །དེ་ལ་གང་དེ་ལྟ་བུའི་ཚུལ་དུ་ནན་ཏན་མ་བྱས་ན་སྡུག་བསྔལ་ཞེས་བྱ་སྟེ། སྡུག་བསྔལ་གྱི་འཕགས་པའི་བདེན་པ་མ་ཡིན་ནོ། །སྡུག་བསྔལ་ཀུན་འབྱུང་གི་བདེན་པ་ནི་ཡང་དག་པའི་ཆོས་ལ་ཡང་དག་པའི་ཡེ་ཤེས་མི་སྐྱེ་ཞིང་མ་བརྟགས་པའི་དངོས་པོ་བྲན་ཕོ་དང་བྲན་མོ་ལ་སོགས་པ་འཆང་ཞིང་སྤྱོད་པ་དང་། ཆོས་མ་ཡིན་པ་ལ་ཡང་དག་པའི་ཆོས་སྨྲ་ཞིང་དམ་པའི་ཆོས་མེད་པར་བྱེད། ཡུན་རིང་དུ་གནས་པར་མི་བྱེད་པའོ། །དེའི་རྒྱུ་དེའི་རྐྱེན་གྱིས་ཆོས་རྣམས་ཀྱི་ཆོས་ཉིད་ཀྱང་མི་ཤེས་སོ། །
མི་ཤེས་པས་ན་འཁོར་བར་འཁོར་ཏེ་སྡུག་བསྔལ་མང་པོ་མྱོང་བས་མཐོ་རིས་སུ་སྐྱེ་བའམ་ཡང་དག་པའི་རྣམ་པར་གྲོལ་བས་རྣམ་པར་མི་གྲོལ་ལོ། །དེ་ལ་གང་ཟབ་མོའི་ཡེ་ཤེས་དང་ལྡན་པ། དམ་པའི་ཆོས་མི་འཇིག་པ་ནི་དེའི་རྒྱུ། དེའི་རྐྱེན་གྱིས་མཐོ་རིས་སུ་སྐྱེ་སྟེ། ཡང་དག་པའི་རྣམ་པར་གྲོལ་བས་རྣམ་པར་གྲོལ་ལོ། །གང་སྡུག་བསྔལ་ཀུན་འབྱུང་གི་བདེན་པ་མི་ཤེས་ཏེ། དམ་པའི་ཆོས་ནི་མི་རྟག་པ་མི་གནས་པ་འགྱུར་བའི་ཆོས་ཅན་ནོ། །ཞེས་སྨྲ་ན་དེའི་རྒྱུ་དེའི་རྐྱེན་གྱིས་བསྐལ་པ་གྲངས་མེད་པའི་བར་དུ་འཁོར་བར་འཁོར་ཞིང་སྡུག་བསྔལ་མང་པོ་མྱོང་བར་འགྱུར་རོ། །དེ་ལ་གང་དམ་པའི་ཆོས་ནི་རྟག་པ་གནས་པ་མི་འགྱུར་མི་འཕོ་བ་ཉིད་དུ་ཤེས་ན་ཀུན་འབྱུང་ཤེས་པ་སྟེ། ཀུན་འབྱུང་འཕགས་པའི་བདེན་པ་ཞེས་བྱའོ། །གང་དེ་ལྟ་བུའི་ཚུལ་དུ་ནན་ཏན་མི་བྱེད་ན་ཀུན་འབྱུང་ཞེས་བྱ་སྟེ། ཀུན་འབྱུང་འཕགས་པའི་བདེན་པ་མ་ཡིན་ནོ། །སྡུག་བསྔལ་འགོག་པའི་བདེན་པ་ནི་གང་སྟོང་པ་ཉིད་ལ་མང་དུ་སྒོམ་ཞིང་ནན་ཏན་བྱེད་པ་དང་དགེ་བ་ཞེས་མི་བྱའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་འགོག་པའི་ཕྱིར་དེ་བཞིན་གཤེགས་པའི་ཡང་དག་པའི་ཆོས་ཀྱི་སྡེ་སྣོད་འཇིག་པའི་ཕྱིར་རོ། །གང་དེ་ལྟར་སློབ་ཅིང་ནན་ཏན་བྱེད་པ་ནི་སྟོང་པ་ཉིད་སྒོམ་པའོ། །སྡུག་བསྔལ་འགོག་པ་སྒོམ་པ་ནི་མུ་སྟེགས་ཅན་ཐམས་ཅད་ལས་ཕྱིར་བཟློག་པའོ། །ཅི་སྟེ་སྟོང་པ་ཉིད་སྒོམ་པ་འགོག་པའི་བདེན་པ་ཡིན་དུ་ཟིན་ན་མུ་སྟེགས་ཅན་ཐམས་ཅད་ཀྱང་སྟོང་པའི་ཆོས་སྒོམ་པས་འགོག་པའི་བདེན་པ་ཡོད་པར་འགྱུར་རོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པའི་སྙིང་པོ་ཡོད་དེ་བལྟར་མི་མཐོང་མོད་ཀྱི། ཉོན་མོངས་པ་ཐམས་ཅད་བསལ་ན་རྟོགས་པར་འགྱུར་རོ་ཞེས་སྨྲའམ། གལ་ཏེ་སྐད་ཅིག་ཙམ་སེམས་བསྐྱེད་ན་ཡང་དེའི་རྒྱུ་དེའི་རྐྱེན་གྱིས་ཆོས་ཐམས་ཅད་ལ་དབང་ཐོབ་པར་འགྱུར་རོ། །གང་ཞིག་དེ་བཞིན་གཤེགས་པའི་སྙིང་པོ་ལ་བདག་དང་། སྟོང་པ་དང་། ཞི་བ་མེད་པའི་ཚུལ་དུ་སྒོམ་ན་གང་ཟག་དེ་ནི་སྐྱེ་བ་ཚད་མེད་པའི་བར་དུ་འཁོར་བར་ཡོངས་སུ་འཁོར་
ཞིང་སྡུག་བསྔལ་མྱོང་བར་འགྱུར་རོ། །དེ་ལ་གང་དེ་ལྟ་བུའི་ཚུལ་དུ་མི་སྒོམ་ན་ཉོན་མོངས་པ་དང་བཅས་ཀྱང་མྱུར་དུ་བྱང་བར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྙིང་པོ་གསང་བ་ཤེས་པའི་ཕྱིར་ཏེ། སྡུག་བསྔལ་འགོག་པའི་བདེན་པ་ཞེས་བྱའོ། །དེ་ལ་གང་དེ་ལྟ་བུའི་ཚུལ་དུ་ནན་ཏན་བྱེད་ན་ངའི་ཉེ་གནས་སོ། །གང་དེ་ལྟ་བུའི་ཚུལ་དུ་ནན་ཏན་མི་བྱེད་པ་ནི་དོན་མེད་པར་སྒོམ་པ་སྟེ། འགོག་པ་འཕགས་པའི་བདེན་པ་མ་ཡིན་ནོ། །ལམ་གྱི་འཕགས་པའི་བདེན་པ་ནི་འདི་ལྟ་སྟེ། སངས་རྒྱས་དང་། ཆོས་དང་། དགེ་འདུན་དང་། ཡང་དག་པར་རྣམ་པར་གྲོལ་བ་ལ་སེམས་ཅན་ཁ་ཅིག་ཕྱིན་ཅི་ལོག་གི་སེམས་ཀྱིས་འདི་སྐད་དུ་སངས་རྒྱས་དང་། ཆོས་དང་། དགེ་འདུན་དང་། ཡང་དག་པར་རྣམ་པར་གྲོལ་བ་མེད་དེ། སྒྱུ་མ་ལྟ་བུར་འཁོར་བར་འཁོར་རོ་ཞེས་དེ་ལྟ་བུའི་ཚུལ་དུ་ལྟ་ན་དེའི་རྒྱུ་དེའི་རྐྱེན་གྱིས་སྲིད་པ་གསུམ་དུ་འཁོར་ཞིང་ཡུན་རིང་པོར་སྡུག་བསྔལ་ཆེན་པོ་མྱོང་བར་འགྱུར་རོ། །དེ་ལ་གང་འདི་ལྟ་བུར་སེམས་བསྐྱེད་དེ། དེ་བཞིན་གཤེགས་པ་དང་། ཆོས་དང་། དགེ་འདུན་དང་། རྣམ་པར་གྲོལ་བ་ནི་རྟག་པ་གནས་པ་མི་འགྱུར་མི་འཕོ་བའི་ཚུལ་དུ་ལྟ་ན་དེ་ལྟར་སྐད་ཅིག་སེམས་པ་ཙམ་གྱིས་སྐྱེ་བ་ཚད་མེད་པའི་བར་དུ་བསོད་ནམས་ཡིད་བཞིན་དུ་འགྱུར་བའི་དབང་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ང་ཡང་སྔོན་ཕྱིན་ཅི་ལོག་བཞིས་ཆོས་མ་ཡིན་པ་ལ་ཆོས་སུ་བཟུང་བས་མི་དགེ་བའི་ལས་ཀྱི་རྣམ་པར་སྨིན་པ་ཚད་མེད་པ་མྱོང་བར་གྱུར་ཏོ། །ད་ནི་ལྟ་བ་དེ་ལྟ་བུའི་ཚུལ་དུ་ལྟ་བ་འགགས་པས་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། འདི་ནི་ལམ་གྱི་འཕགས་པའི་བདེན་པ་ཞེས་བྱའོ། །དེ་ལ་གང་ཞིག་འདི་སྐད་དུ་དཀོན་མཆོག་གསུམ་མི་རྟག་ཅེས་སྨྲ་ཞིང་ལྟ་བ་དེ་ལ་སྒོམ་ན་དོན་མེད་པར་སྒོམ་པ་སྟེ། ལམ་གྱི་འཕགས་པའི་བདེན་པ་མ་ཡིན་ནོ། །གང་ཆོས་དེ་ལ་རྟག་པ་གནས་པའི་ཚུལ་དུ་སྒོམ་ན་ངའི་ཉེ་གནས་ཞེས་བྱ་སྟེ། འཕགས་པའི་བདེན་པ་བཞི་ཡང་དག་པར་མཐོང་ཞིང་འཕགས་པའི་བདེན་
པ་བཞི་བསྒོམ་པ་ལ་ནན་ཏན་བྱེད་པ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བདག་ནི་གདོད་འཕགས་པའི་བདེན་པ་བཞི་ཤིན་ཏུ་ནན་ཏན་བྱ་བའི་ཆོས་འཚལ་བར་གྱུར་ཏོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་དེ་ལ་ཕྱིན་ཅི་ལོག་བཞི་ཞེས་བྱ་བ་ནི་འདི་ལྟ་སྟེ། སྡུག་བསྔལ་མ་ཡིན་པ་ལ་སྡུག་བསྔལ་དུ་འདུ་ཤེས་བསྐྱེད་པ་ནི་ཕྱིན་ཅི་ལོག་ཅེས་བྱའོ། །སྡུག་བསྔལ་མེད་པ་ནི་དེ་བཞིན་གཤེགས་པ་ཞེས་བྱའོ། །སྡུག་བསྔལ་བར་འདུ་ཤེས་བསྐྱེད་པ་ནི་དེ་བཞིན་གཤེགས་པ་ལ་མི་རྟག་པའམ། འགྱུར་ཞིང་འཕོ་བར་སེམས་པའོ། །གང་དེ་བཞིན་གཤེགས་པ་ལ་མི་རྟག་ཅེས་སྨྲ་བ་ནི་ཁ་ན་མ་ཐོ་བ་ཆེན་པོའི་སྡུག་བསྔལ་ལོ། །གང་འདི་སྐད་དུ་དེ་བཞིན་གཤེགས་པ་ནི་སྡུག་བསྔལ་བའི་སྐུ་བོར་ཏེ། ཤིང་ཟད་མེ་ཤི་བ་བཞིན་དུ་མྱ་ངན་ལས་འདས་སོ་ཞེས་སྨྲ་ན་དེ་ནི་སྡུག་བསྔལ་མེད་པ་ལ་སྡུག་བསྔལ་དུ་འདུ་ཤེས་བསྐྱེད་པ་སྟེ། ཕྱིན་ཅི་ལོག་ཅེས་བྱའོ། །ཅི་སྟེ་ངས་དེ་བཞིན་གཤེགས་པ་རྟག་ཅེས་གསུངས་ན། དེ་ནི་བདག་ཏུ་ལྟ་བ་སྟེ། བདག་ཏུ་ལྟ་ན་ཚད་མེད་པའི་ཁ་ན་མ་ཐོ་བར་འགྱུར་ཏེ། དེ་བས་ན་དེ་བཞིན་གཤེགས་པ་ནི་མི་རྟག་ཅེས་གསུངས་པའི་རིགས་སོ། ། གང་དེ་སྐད་དུ་སྨྲ་ན་བདག་ཅེས་བྱ་བ་བདེ་བ་མྱོང་ངོ་། །དེ་བཞིན་གཤེགས་པ་མི་རྟག་ཅེས་སྨྲ་ན་སྡུག་བསྔལ་བའོ། །ཅི་སྟེ་སྡུག་བསྔལ་བ་ཡིན་ན་ཅིའི་ཕྱིར་བདེ་བར་འགྱུར་ཞེ་ན། སྡུག་བསྔལ་ལ་བདེ་བར་འདུ་ཤེས་པས་ཕྱིན་ཅི་ལོག་གོ །བདེ་བ་ལ་སྡུག་བསྔལ་བར་འདུ་ཤེས་ན་ཡང་ཕྱིན་ཅི་ལོག་གོ །བདེ་བ་ནི་དེ་བཞིན་གཤེགས་པའོ། །སྡུག་བསྔལ་བ་ནི་དེ་བཞིན་གཤེགས་པ་མི་རྟག་ཅེས་སྨྲ་བའོ། །ཅི་སྟེ་དེ་བཞིན་གཤེགས་པ་མི་རྟག་ཅེས་སྨྲ་ན། དེ་ནི་བདེ་བ་ལ་སྡུག་བསྔལ་དུ་འདུ་ཤེས་པ་ཞེས་བྱའོ། །དེ་བཞིན་གཤེགས་པ་རྟག་ཅེས་བྱ་བ་ནི་བདེ་བའོ། །ཅི་སྟེ་ངས་གསུངས་པ་ལྟར་དེ་བཞིན་གཤེགས་པ་རྟག་པ་ཡིན་ན་ཅིའི་ཕྱིར་མྱ་ངན་ལས་འདའ། གལ་ཏེ་དེ་བཞིན་གཤེགས་པ་
སྡུག་བསྔལ་བ་མ་ཡིན་ན་ཅིའི་ཕྱིར་སྐུ་བོར་ཏེ་མྱ་ངན་ལས་འདའ་བར་ཞུགས་ཞེས་དེ་ལྟར་བདེ་བ་ལ་སྡུག་བསྔལ་བར་འདུ་ཤེས་ན་ཕྱིན་ཅི་ལོག་གཅིག་ཅེས་བྱའོ། །མི་རྟག་པ་ལ་རྟག་པར་འདུ་ཤེས་པ་དང་རྟག་པ་ལ་མི་རྟག་པར་འདུ་ཤེས་པའང་ཕྱིན་ཅི་ལོག་ཅེས་བྱའོ། །མི་རྟག་པ་ནི་སྟོང་པ་ཉིད་མི་སྒོམ་པའོ། །སྟོང་པ་ཉིད་མ་བསྒོམས་པས་ཚེ་ཐུང་བར་འགྱུར་རོ། །དེ་ལ་གང་སྟོང་པ་ཉིད་ཀྱིས་ཞི་བ་མ་བསྒོམས་ཀྱང་ཚེ་རིང་བར་འགྱུར་རོ། །ཞེས་སྨྲ་ན་ཕྱིན་ཅི་ལོག་ཅེས་བྱ་སྟེ། ཕྱིན་ཅི་ལོག་གཉིས་སོ། །བདག་མེད་པ་ལ་བདག་ཏུ་འདུ་ཤེས། བདག་ལ་བདག་མེད་པར་འདུ་ཤེས་པ་ཡང་ཕྱིན་ཅི་ལོག་གོ །འཇིག་རྟེན་པ་ཡང་བདག་ཡོད་པར་སྨྲ། སངས་རྒྱས་ཀྱི་ཆོས་ལ་ཡང་བདག་ཡོད་པར་སྨྲ་སྟེ། འཇིག་རྟེན་པ་དག་བདག་ཡོད་པར་སྨྲ་མོད་ཀྱི། སངས་རྒྱས་ཀྱི་རང་བཞིན་ཡོད་པ་མ་ཡིན་པས་དེ་ནི་བདག་མེད་པ་ལ་བདག་ཏུ་འདུ་ཤེས་པ་སྟེ་ཕྱིན་ཅི་ལོག་ཅེས་བྱའོ། །སངས་རྒྱས་ཀྱི་ཆོས་ཀྱི་བདག་ཡོད་པ་ནི་སངས་རྒྱས་ཀྱི་རང་བཞིན་ནོ། །འཇིག་རྟེན་པ་དག་ནི་སངས་རྒྱས་ཀྱི་ཆོས་ལ་བདག་མེད་ཅེས་སྨྲ་བས། དེ་བས་ན་བདག་ལ་བདག་མེད་པར་འདུ་ཤེས་པ་ཞེས་བྱའོ། །གལ་ཏེ་སངས་རྒྱས་ཀྱི་ཆོས་ལ་ངེས་པར་བདག་མེད་ཅེས་སྨྲ་ན་དེ་བཞིན་གཤེགས་པས་ཉེ་གནས་རྣམས་ལ་བདག་མེད་པར་སྒོམས་ཤིག་ཅེས་བཀའ་སྩལ་པའང་ཕྱིན་ཅི་ལོག་ཅེས་བྱ་བར་འགྱུར་ཏེ། འདི་ནི་ཕྱིན་ཅི་ལོག་གསུམ་མོ། །གཙང་བ་ལ་མི་གཙང་བར་འདུ་ཤེས། མི་གཙང་བ་ལ་གཙང་བར་འདུ་ཤེས་པའང་ཕྱིན་ཅི་ལོག་གོ །གཙང་བ་ནི་དེ་བཞིན་གཤེགས་པ་རྟག་པ་གནས་པ་ཞལ་ཟས་དང་འདྲེས་པའི་སྐུ་མ་ཡིན། ཉོན་མོངས་པའི་སྐུ་མ་ཡིན། ཤ་དང་ཁྲག་གི་སྐུ་མ་ཡིན། རྩ་དང་ཆུ་བ་དང་རུས་པས་རྣམ་པར་གླགས་པའི་སྐུ་མ་ཡིན་ཏེ། དེ་ལ་གང་འདི་སྐད་དུ་དེ་བཞིན་གཤེགས་པ་ནི་མི་རྟག་པ་ཞལ་ཟས་དང་འདྲེས་པའི་སྐུ་རྩ་དང་ཆུ་བ་དང་རུས་པའི་བར་དུ་རྣམ་པར་གླགས་པའི་སྐུ་ཡིན་ཏེ། ཆོས་དང་དགེ་འདུན་དང་རྣམ་པར་གྲོལ་བ་ཡང་འགོག་ཅིང་ཟད་པར་འགྱུར་རོ། །ཞེས་སྨྲ་ན་ཕྱིན་ཅི་ལོག་ཅེས་བྱའོ། །མི་གཙང་བ་ལ་གཙང་བར་འདུ་ཤེས་
པ་ནི་གང་འདི་སྐད་དུ་ངའི་ལུས་འདི་ལ་གཅིག་ཙམ་ཡང་མི་གཙང་བ་མེད་དེ། མི་གཙང་བ་མེད་པས་ན་གདོན་མི་ཟ་བར་ཡོངས་སུ་དག་པའི་གནས་སུ་ཕྱིན་པར་འགྱུར་ཏེ། དེ་བཞིན་གཤེགས་པས་མི་གཙང་བ་སྒོམ་པ་ལ་ནན་ཏན་གྱིས་ཤིག་ཅེས་གསུངས་པའང་བརྫུན་ནོ་ཞེས་སྨྲ་ན་ཕྱིན་ཅི་ལོག་ཅེས་བྱ་སྟེ། འདི་ནི་ཕྱིན་ཅི་ལོག་བཞི་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བདག་ཅག་ནི་སྔོན་ངན་པར་ལྟ་བ་ལས་གདོད་ཡང་དག་པར་ལྟ་བར་གྱུར་ཏོ། །བཅོམ་ལྡན་འདས་སྲིད་པ་ཉི་ཤུ་ལྔ་པོ་ལ་བདག་ཅེས་བགྱི་བ་མཆིས་སམ་མ་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བདག་ཅེས་བྱ་བ་ནི་དེ་བཞིན་གཤེགས་པའི་སྙིང་པོའི་དོན་ཏོ། །སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་ནི་བདག་ཅེས་བྱ་བའི་དོན་ཏོ། །དེ་ལྟར་བདག་ཅེས་བྱ་བའི་དོན་ནི་ཐོག་མ་མེད་པའི་དུས་ནས་ཚད་མེད་པའི་ཀུན་ནས་ཉོན་མོངས་པས་རྣམ་པར་བསྒྲིབས་ཏེ། དེ་བས་ན་སེམས་ཅན་དག་མཐོང་བར་མ་གྱུར་ཏོ། །རིགས་ཀྱི་བུ་འདི་ལྟ་སྟེ། དཔེར་ན་བུད་མེད་དབུལ་མོ་ཞིག་ཁང་པའི་ནང་ན་གསེར་གྱི་གཏེར་ཡོད་ཀྱང་ཐམས་ཅད་ཀྱིས་ཡོད་པར་མི་ཤེས་པ་ལས་ཕྱིས་སྐྱེས་བུ་ཤིན་ཏུ་ཐབས་ལ་མཁས་པ་གཅིག་གིས་བུད་མེད་དབུལ་མོ་ལ་འདི་སྐད་དུ། བུ་མོ་ཁྱོད་ཁོ་བོའི་ཕྱག་དར་བར་གླ་ཟ་ནུས་སམ། བུད་མེད་དེས་སྨྲས་པ། ཁོ་མོས་མི་ནུས་སོ། །ཅི་སྟེ་ཁྱོད་ཀྱིས་ཁོ་མོའི་བུས་གསེར་གྱི་གཏེར་ཞིག་སྦས་པ་བསྟན་ནུས་ན་ཁྱོད་ཀྱི་ལས་བྱའོ། །སྐྱེས་བུ་དེས་སྨྲས་པ། ཁོ་བོ་ནི་ཤིན་ཏུ་ཐབས་མཁས་པས་ཁྱོད་ཀྱི་བུས་སྦས་པའི་གསེར་གྱི་གཏེར་ཁོ་བོས་ཤེས་ཀྱིས་བསྟན་ཏོ། །བུད་མེད་དེས་སྨྲས་པ། ཁོ་མོའི་ཁྱིམ་གང་གི་མི་ཆེ་ཕྲ་ཐམས་ཅད་ཀྱིས་ཀྱང་མི་ཤེས་ན་ཅིག་ཁྱོད་ཀྱིས་ཤེས་སམ། སྐྱེས་བུ་དེས་སྨྲས་པ། ཁོ་བོས་ནི་ཐེ་ཙོམ་མེད་པར་ཤེས་སོ། །བུད་མེད་དེས་སྨྲས་པ། ཁོ་མོ་ད་མཐོང་བར་འདོད་ཀྱིས་སྟོན་ཅིག །དེ་ནས་སྐྱེས་བུ་དེས་ཁོ་མོའི་ཁང་པར་ཞུགས་ནས་གསེར་གྱི་གཏེར་བྲུས་ཏེ་བུད་མེད་དེ་
ལ་བསྟན་ཏོ། །བུད་མེད་དེས་གཏེར་མཐོང་ནས་ཤིན་ཏུ་དགའ་མགུ་སྟེ་ངོ་མཚར་རྨད་ཀྱི་འདུ་ཤེས་སྐྱེས་ནས་སྐྱེས་བུ་དེ་ལ་བསྟི་སྟང་དུ་བྱེད་དོ། །རིགས་ཀྱི་བུ་སེམས་ཅན་ཐམས་ཅད་ཀྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱིས་མི་མཐོང་བ་ཡང་ཇི་ལྟར་བུད་མེད་དབུལ་མོས་རིན་པོ་ཆེའི་གཏེར་མི་མཐོང་བ་བཞིན་ནོ། །རིགས་ཀྱི་བུ་ངས་སྐྱེ་བོ་ཐམས་ཅད་སངས་རྒྱས་ཀྱི་རང་བཞིན་ཡོད་པ་ཀུན་ནས་ཉོན་མོངས་པས་བསྒྲིབས་ཏེ། མི་མཐོང་བ་བསྟན་པ་ཡང་ཇི་ལྟར་བུད་མེད་དབུལ་མོས་གསེར་གྱི་གཏེར་མི་མཐོང་བ་བསྟན་པ་བཞིན་ནོ། །རིགས་ཀྱི་བུ་དེ་བཞིན་གཤེགས་པས་ཀྱང་སེམས་ཅན་ཐམས་ཅད་ལ་མངོན་པར་སངས་རྒྱས་པའི་རིན་པོ་ཆེའི་གཏེར་བསྟན་པ་ནི་འདི་ལྟ་སྟེ། སངས་རྒྱས་ཀྱི་རང་བཞིན་ནོ། །སོ་སོ་སྐྱེ་བོ་དག་ཀྱང་དེ་ལྟ་བུའི་དངོས་པོ་རྣམས་མཐོང་ནས་རབ་ཏུ་དགའ་བའི་སེམས་སྐྱེས་ཏེ་དེ་བཞིན་གཤེགས་པ་ལ་བསྙེན་བཀུར་བྱེད་ཅིང་ཕྱོགས་སོ། །ཐབས་མཁས་པའི་སྐྱེས་བུ་ཞེས་བྱ་བ་ནི་དེ་བཞིན་གཤེགས་པའི་དཔེའོ། །བུད་མེད་དབུལ་མོ་ཞེས་བྱ་བ་ནི་སོ་སོ་སྐྱེ་བོ་ཚད་མེད་པའི་དཔེའོ། ། གསེར་གྱི་གཏེར་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་བུད་མེད་བུ་ཆུང་ངུ་ཁ་མྱག་གསོ་བ་ཞིག་གལ་ཏེ་བུ་དེ་ནད་ཀྱིས་བཏབ་ན་བུད་མེད་དེ་ཤིན་ཏུ་མྱ་ངན་གྱིས་གདུངས་ཏེ་སྨན་པ་འཚོལ་ལོ། །དེ་ལ་སྨན་པས་སྨན་མར་དང་འོ་མ་དང་། ཤ་ཁ་ར་དང་། གསུམ་དུ་སྦྱར་ཏེ་བུ་ལ་བླུད་ནས་བུད་མེད་དེ་ལ་འདི་སྐད་ཅེས་བསྒོའོ། །བུ་འདི་སྨན་གཏང་གིས་རེ་ཞིག་སྨན་མ་ཞུའི་བར་དུ་ནུ་ཞོ་བླུད་དུ་མི་རུང་ངོ་ཞེས་བསྒོའོ། །དེ་ནས་བུད་མེད་དེས་ནུ་ཞོ་མ་བསྣུན་པའི་ཕྱིར་ནུ་མ་ལ་མཁྲིས་པས་བྱུགས་ནས་བུ་ལ་ཁོ་མོའི་ནུ་མ་དུག་གིས་བསྐུས་ཏེ་ནུར་མི་རུང་ངོ་ཞེས་ཟེར་རོ། །བུ་དེ་སྐོམ་གྱིས་གདུངས་ཏེ། ནུ་མ་ནུ་འདོད་ཀྱང་ཁ་བའི་རོ་ཚོར་མ་ཐག་ཏུ་ནུར་མི་བཏུབ་བོ། །སྨན་ཞུ་ནས་བུད་མེད་ཀྱིས་ནུ་མ་དག་པར་བཀྲུས་ཏེ། འདི་སྐད་དུ་བུ་ཚུར་ཤོག །ད་ནུ་མ་ནུར་གཞུག་གོ་ཞེས་སྨྲས་ན་ཁྱེའུ་དེ་སྐོམ་གྱིས་གདུངས་ཀྱང་སྔར་ཁ་བའི་རོ་མྱོང་བས་
བོས་ཀྱང་འོང་དུ་མི་བཏུབ་བོ། །དེ་ལ་ཡང་མས་འདི་སྐད་དུ་བསྒོའོ། །ཁྱོད་སྔར་སྨན་འཐུངས་ཏེ་སྨན་མ་ཞུ་བའི་བར་དུ་ནུ་མ་བླུད་དུ་མི་རུང་བས་ཁོ་མོས་དུག་གིས་བསྐུས་པ་ཡིན་གྱིས་ད་ཁྱོད་ཀྱི་སྨན་ཀྱང་ཞུ་ལ། ཁ་བ་ཡང་བཀྲུས་ཀྱིས་ད་ནི་ཁ་བའི་རོ་མེད་དོ་ཞེས་སྨྲས་ན་གདོད་བགས་ཀྱིས་ཉེ་སྟེ་འཐུང་དུ་བཏུབ་བོ། །རིགས་ཀྱི་བུ་དེ་བཞིན་གཤེགས་པ་ཡང་དེ་བཞིན་དུ་སེམས་ཅན་ཐམས་ཅད་བསྒྲལ་བའི་ཕྱིར། སེམས་ཅན་ཐམས་ཅད་བདག་མེད་པའི་ཆོས་ལ་ནན་ཏན་བྱེད་པ་སྟོན་ཏོ། །དེ་ལ་ནན་ཏན་བྱས་པས་བདག་ཅེས་བྱ་བའི་སེམས་མེད་དེ་ཡོངས་སུ་མྱ་ངན་ལས་འདའོ། །དེ་ལ་ཡང་འཇིག་རྟེན་རྒྱང་པན་པའི་ངན་པར་ལྟ་བ་བསལ་བའི་ཕྱིར་འཇིག་རྟེན་རྒྱང་པན་པའི་ཆོས་ལས་འདས་པ་བསྟན་པའི་ཕྱིར་གཞན་ཡང་འཇིག་རྟེན་རྒྱང་པན་པ་དག་བདག་ཏུ་ལྟ་བ་ཡང་དག་པ་མ་ཡིན་པར་བསྟན་པའི་ཕྱིར་བདག་མེད་པའི་ཆོས་བསྒོམས་པས་ཡོངས་སུ་དག་པའི་ལུས་སུ་འགྱུར་བའི་ཕྱིར་ཇི་ལྟར་བུད་མེད་དེས་བུའི་ཕྱིར་མཁྲིས་པས་ནུ་མ་བསྐུས་པ་བཞིན་དུ་དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམས་པའི་ཕྱིར་ཆོས་ཐམས་ཅད་ལ་བདག་མེད་ཅེས་གསུངས་སོ། །ཇི་ལྟར་བུད་མེད་དེས་ནུ་མ་ཕྱིར་བཀྲུས་ནས་བུ་བོས་ཏེ་ནུ་ཞོ་བླུད་དོ་ཞེས་བྱ་བ་བཞིན་དུ་ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་ཀྱང་མ་སྐྲག་པར་ཇི་ལྟར་བུ་དེ་ལ་མས་བོས་ཏེ་ནུ་ཞོ་བགས་ཀྱིས་འཐུང་བ་བཞིན་དུ་དགེ་སློང་ཁྱེད་ཀྱང་བྱེ་བྲག་ཕྱེད་པར་གྱིས་ཤིག །དེ་བཞིན་གཤེགས་པའི་སྙིང་པོ་ནི་མེད་པར་བྱ་བ་མ་ཡིན་ནོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཡང་དག་པར་བདག་ཅེས་བགྱི་བ་མ་མཆིས་སོ། །དེ་ཅིའི་སླད་དུ་ཞེ་ན། བུས་པ་ཆུང་ངུ་ནི་ཐོག་མ་བཙས་པ་ན་ཅི་ཡང་བྱེ་བྲག་མི་ཕྱེད་དེ་མི་འཚལ་ཏོ། །གལ་ཏེ་བདག་ཅེས་བགྱི་བ་མཆིས་པ་ལགས་ན་བཙས་མ་ཐག་ཏུ་ཐམས་ཅད་བྱེ་བྲག་འབྱེད་ཅིང་འཚལ་བའི་རིགས་སོ། །དེ་བས་ན་ངེས་པར་བདག་ཅེས་བགྱི་བ་མ་མཆིས་
པར་མངོན་ནོ། །གལ་ཏེ་བདག་ཅེས་བགྱི་བ་ངེས་པར་མཆིས་པ་ཞིག་ལགས་ན་སྐྱེ་བ་གཅིག་བླངས་ནས་མཐར་མ་མཆིས་པར་འགྱུར་བའི་མི་རིགས་སོ། །ཅི་སྟེ་ཐམས་ཅད་ལ་སངས་རྒྱས་ཀྱི་རང་བཞིན་མཆིས་ཏེ་རྟག་པ་ཞིག་ལགས་ན་འཇིག་པ་ཡང་མི་རིགས་སོ། །གལ་ཏེ་འཇིག་པའི་མཚན་ཉིད་མ་ལགས་ན་ཅིའི་སླད་དུ་རྒྱལ་རིགས་དང་། བྲམ་ཟེ་དང་། རིགས་ངན་དང་། གདོལ་པ་དང་། བྱོལ་སོང་ལ་སོགས་པ་རྣམ་པ་ཐ་དད་དེ། ལས་ཀྱི་རྣམ་པར་སྨིན་པ་རྣམ་པ་སྣ་ཚོགས་མི་འཐུན་ཞིང་རྒྱུ་ཐ་དད་པར་འགྱུར། ཅི་སྟེ་བདག་ཅེས་བགྱི་བ་ངེས་པར་མཆིས་ན་སེམས་ཅན་ཐམས་ཅད་ལ་བཟང་ངན་མ་མཆིས་པའི་རིགས་ཏེ། དེ་ལྟ་བས་ན་སངས་རྒྱས་ཀྱི་རང་བཞིན་ཞེས་བགྱི་བ་ནི་རྟག་པའི་ཆོས་མ་ལགས་པར་མངོན་ནོ། །ཅི་སྟེ་སངས་རྒྱས་ཀྱི་རང་བཞིན་ངེས་པར་རྟག་པ་ཞིག་ལགས་ན་ཅིའི་སླད་དུ་སྲོག་གཅོད་པ་དང་། མ་བྱིན་པར་ལེན་པ་དང་། མི་ཚངས་པར་སྤྱོད་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་མོ་དང་། ཚིག་ཐུན་ཚགས་དང་། འདོད་ཆགས་དང་། ཞེ་སྡང་དང་། ངན་པར་ལྟ་བ་ལ་སོགས་པ་བསྟན་ཅིང་གསུངས། གལ་ཏེ་བདག་ཅེས་བགྱི་བའི་རང་བཞིན་རྟག་པ་ལགས་ན་ཅིའི་སླད་དུ་ཆང་འཐུངས་པས་མྱོས་ཤིང་དྲན་པ་ཉམས་པར་འགྱུར། གལ་ཏེ་བདག་ཅེས་བགྱི་བའི་རང་བཞིན་རྟག་པ་ལགས་ན། ལོང་བས་ཀྱང་གཟུགས་མཐོང་ལ། འོན་པས་ཀྱང་སྒྲ་ཐོས། ལྐུགས་པས་ཀྱང་སྨྲ་ནུས། ཞ་བོས་ཀྱང་འགྲོ་ནུས་པར་འགྱུར་རོ། །ཅི་སྟེ་བདག་ཅེས་བགྱི་བའི་རང་བཞིན་རྟག་ན་ཆུ་དང་། མེ་དང་། གཡང་ས་དང་། དུག་དང་། མཚོན་དང་། གཅན་གཟན་མ་རུངས་པ་ལས་ཀྱང་འབྱོལ་བ་མི་རིགས་སོ། །ཅི་སྟེ་བདག་ཅེས་བགྱི་བ་རྟག་ན་སྔོན་ཅི་ཤེས་པ་ཕྱིས་བརྗེད་པར་མི་རིགས་སོ། །ཅི་སྟེ་ཕྱིས་མི་བརྗེད་ན་ཅིའི་སླད་དུ་བདག་གིས་མི་འདི་སྔོན་མ་མཐོང་ངོ་། །ཞེས་བགྱི་བ་ལ་སོགས་པ་སྨྲ་བར་འགྱུར། གལ་ཏེ་བདག་ཅེས་བགྱི་བ་རྟག་ན་གཞོན་ནུ་ལང་ཚོ་བ་དང་། རྒས་ཏེ་རྒུད་པ་ལ་སོགས་པ་དང་། སྔོན་ཅི་བྱས་པའི་དངོས་པོ་ཐམས་ཅད་
ཀྱང་མི་བརྗེད་དེ་དྲན་པའི་རིགས་སོ། །ཅི་སྟེ་བདག་ཅེས་བགྱི་བ་རྟག་ན་ཅི་ལ་གནས། མཆིལ་མ་དང་། སྣབས་ལ་གནས་སམ། ཁ་དོག་སྔོན་པོ་དང་། སེར་པོ་དང་། དམར་པོ་ལ་སོགས་པ་ལ་གནས། ཅི་སྟེ་བདག་ཅེས་བགྱི་བ་རྟག་པ་ཞིག་ལགས་ན་ཏིལ་མར་གྱིས་ལུས་བསྐུས་པ་བཞིན་དུ་ཐམས་ཅད་དུ་ཁྱབ་པའི་རིགས་ཏེ། གལ་ཏེ་ལུས་བཅད་པའི་ཚེ་ན་བདག་ཀྱང་འཆད་པར་འགྱུར་བའི་རིགས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་དཔེར་ན་རྒྱལ་པོ་ལ་གྱད་གཅིག་ཡོད་པའི་འཕྲལ་བ་ན་རྡོ་རྗེའི་ནོར་བུ་གཅིག་ཡོད་པ་གྱད་གཞན་དང་སྟོབས་བཀྱེ་བ་ལས་གྱད་ཕ་རོལ་པོས་མགོས་རེག་སྟེ། འཕྲལ་བའི་ནོར་བུ་དེ་ཤའི་ནང་དུ་ནུབ་ཀྱང་ནོར་བུ་གར་སོང་བ་མི་ཤེས་སོ། །རྨ་བྱུང་བའི་ཕྱིར་སྨན་པ་བོས་ནས་སྨན་པ་ཤིན་ཏུ་མཁས་པས་ནི་ནོར་བུ་ཤའི་ནང་དུ་སོང་བའི་ཕྱིར་རྨ་བྱུང་བས་དེ་ལ་སྨན་མི་བྱེད་དེ། འདི་སྐད་དུ་ཀྱེ་སྟོབས་པོ་ཆེ་ཁྱོད་ཀྱི་འཕྲལ་བའི་ནོར་བུ་ག་རེ་ཞེས་ཟེར་རོ། །གྱད་དེ་དངངས་ནས་སྨན་པ་ལ་འདི་སྐད་དུ་བདག་གི་འཕྲལ་བའི་ནོར་བུ་གར་ཡང་མ་སོང་བའི་རིགས་ཏེ། དེ་མེད་ན་འདི་སྒྱུ་མ་མ་ཡིན་ནམ་སྙམ་སེམས་ཏེ། ཤིན་ཏུ་མྱ་ངན་བྱེད་དོ། །དེ་ནས་སྨན་པ་དེས་ཀྱང་དེའི་སྤྲོ་བ་བསྐྱེད་ནས་ཁྱོད་དེ་ལྟར་མྱ་ངན་མ་བྱེད་ཅིག །ཁྱོད་སྟོབས་བཀྱེ་བ་ན་ནོར་བུ་ཤའི་ནང་དུ་ནུབ་སྟེ་གཟུགས་བརྙན་ཙམ་ཕྱི་རོལ་དུ་སྣང་ངོ་། །ཁྱོད་སྟོབས་བཀྱེ་བ་ན་ཞེ་སྡང་བསྐྱེད་དེ། ནོར་བུའི་མཐུས་ཤའི་ནང་དུ་ནུབ་ཀྱང་མ་ཚོར་བ་ཡིན་ནོ། །དེ་སྐད་དུ་སྨྲས་ཀྱང་ཡིད་མ་ཆེས་ནས་འདི་སྐད་དུ་སྨན་པ་ཁྱོད་བརྫུན་མ་ཟེར་ཅིག །ཅི་སྟེ་ཤའི་ནང་དུ་ནུབ་ན་རྣག་ཁྲག་ཤིན་ཏུ་བཙོག་པ་ཡིན་པས་ཕྱིར་འབྱུང་བའི་རིགས་སོ། །ཅི་སྟེ་ཆུ་བའི་ནང་དུ་སོང་ན་ནི་ཁྱོད་ཀྱིས་ཀྱང་མཐོང་བའི་མི་རིགས་སོ། །དེ་ནས་སྨན་པས་མེ་ལོང་ལྟར་བཅུག་ནས་མེ་ལོང་གི་ནང་དུ་ནོར་བུ་ཡང་གསལ་བར་སྣང་བར་གྱུར་ཏོ། །གྱད་དེས་དེ་ལྟར་གྱུར་པ་མཐོང་ནས་ངོ་མཚར་རྨད་ཀྱི་འདུ་ཤེས་སྐྱེས་སོ། །རིགས་ཀྱི་
བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་མ་བྱས་པས་སངས་རྒྱས་ཀྱི་རང་བཞིན་ཡོད་ཀྱང་མཐོང་བར་མི་ནུས་སོ། །འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་ཏེ་ཟིལ་གྱིས་ནོན་པས་སེམས་ཅན་དམྱལ་བ་དང་། བྱོལ་སོང་དང་། ཡི་དགས་དང་། ལྷ་མ་ཡིན་དང་། གདོལ་པ་དང་། རིགས་ངན་དང་། རྒྱལ་རིགས་དང་། བྲམ་ཟེའི་རིགས་ལ་སོགས་པ་རྣམ་པ་སྣ་ཚོགས་སུ་སྐྱེ་ཞིང་ལྟུང་བར་གྱུར་ཏོ། །སེམས་ལ་རྣམ་པ་སྣ་ཚོགས་ཀྱི་ལས་བསྐྱེད་པས་མིའི་ལུས་ཐོབ་ཀྱང་འོན་པ་དང་། ལོང་བ་དང་། ལྐུགས་པ་དང་། ཞ་བོ་ལ་སོགས་པར་གྱུར་ཏེ། སྲིད་པ་ཉི་ཤུ་ལྔ་པོར་རྣམ་པར་སྨིན་པའི་འབྲས་བུ་མྱོང་བར་གྱུར་ཏོ། །འདོད་ཆགས་དང་། ཞེ་སྡང་དང་། གཏི་མུག་གིས་སེམས་བསྒྲིབས་པས་ན་སངས་རྒྱས་ཀྱི་རང་བཞིན་མི་ཤེས་པས་ནི་ཇི་ལྟར་གྱད་དེས་ནོར་བུ་རིན་པོ་ཆེ་ཤའི་ནང་དུ་ནུབ་པ་མི་ཤེས་ཏེ་སྟོར་སྙམ་སེམས་པ་ལྟར་སོ་སོ་སྐྱེ་བོ་ཡང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་བྱེད་པ་མི་ཤེས། དེ་བཞིན་གཤེགས་པའི་སྙིང་པོ་ཤིན་ཏུ་གསང་བ་མི་ཤེས་པས་བདག་མེད་པ་ལ་སྒོམ་ཞིང་ནན་ཏན་བྱེད་དོ། །དཔེར་ན་འཕགས་པ་མ་ཡིན་པ་དག་ནི་བདག་མེད་པ་སྨྲ་ཡང་བདག་ཅེས་བྱ་བའི་ཡང་དག་པའི་མཚན་ཉིད་མི་ཤེས་སོ། །ངའི་ཉེ་གནས་དག་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་བྱེད་པ་ཡང་མི་ཤེས་པས་བདག་མེད་པ་སྒོམ་པ་ཡང་མི་ཤེས་ཏེ། བདག་མེད་པའི་གནས་ཀྱང་མི་ཤེས་སོ། །བདག་མེད་པའི་མཚན་ཉིད་ཀྱང་མི་ཤེས་ན་བདག་གི་ཡང་དག་པའི་མཚན་ཉིད་ཤེས་པ་ལྟ་ཅི་སྨོས། རིགས་ཀྱི་བུ་དེ་ལྟར་དེ་བཞིན་གཤེགས་པས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་གསུངས་པ་ཡང་ཇི་ལྟར་སྨན་པ་མཁས་པས་གྱད་ཀྱི་རྡོ་རྗེའི་ནོར་བུ་བསྟན་པ་བཞིན་ནོ། །སོ་སོའི་སྐྱེ་བོ་དག་ནི་ཀུན་ནས་ཉོན་མོངས་པ་ཚད་མེད་པ་སྙེད་ཀྱིས་བསྒྲིབས་ཤིང་ཟིལ་གྱིས་ནོན་པས་སངས་རྒྱས་ཀྱི་རང་བཞིན་མི་ཤེས་སོ། །གལ་ཏེ་ནམ་ཉོན་མོངས་
པ་ཟད་པ་ན་དེའི་ཚེ་གསལ་བར་མངོན་པར་རྟོགས་པར་འགྱུར་བ་ནི་ཇི་ལྟར་གྱད་དེས་མེ་ལོང་གསལ་བའི་ནང་དུ་ནོར་བུ་རིན་པོ་ཆེ་མཐོང་བ་བཞིན་ནོ། །རིགས་ཀྱི་བུ་དེ་བཞིན་གཤེགས་པའི་སྙིང་པོ་ནི་དེ་ལྟར་ཚད་མེད་དེ་བསམ་གྱིས་མི་ཁྱབ་བོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གངས་ཀྱི་རི་ལ་སྨན་བདེ་བ་ཞེས་བྱ་བའི་རོ་ཡོད་དོ། །དེའི་རོ་ནི་ཤིན་ཏུ་མངར་ཏེ། ནགས་སྟུག་པོའི་དྲུང་དུ་སྐྱེ་བས་མཐོང་བར་མི་ནུས་སོ། །དེ་ལ་དྲི་བྲོ་བ་ཙམ་གྱིས་གནས་དེ་ན་སྨན་དེ་ཡོད་པར་ཤེས་སོ། །སྔོན་འདས་པའི་དུས་ན་འཁོར་ལོས་སྒྱུར་བའི་རྒྱལ་པོ་ཞིག་སྨན་དེ་འདོད་པའི་ཕྱིར་གངས་ཀྱི་རི་དེ་ལ་གནས་ཀུན་ཏུ་ཤིང་གི་ཝ་བཙུགས་ནས་སྨན་ཟག་པ་བཟེད་དོ། །སྨན་དེ་ནམ་སྨིན་པ་ན་ཆུ་བཞིན་དུ་ས་ལ་ཟག་པས་ཤིང་གི་ཝ་བཟེད་པའི་ནང་དུ་ཡང་ཟགས་ཏེ་རོ་དེ་ནི་ཡང་དག་པའོ། །རྒྱལ་པོ་དེ་འདས་པའི་འོག་ཏུ་ནི་སྨན་དེའི་རོ་བར་འགའ་ནི་སྐྱུར། བར་འགའ་ནི་ལན་ཚྭ། བར་འགའ་ནི་མངར། བར་འགའ་ནི་ཁ། བར་འགའ་ནི་ཚ། བར་འགའ་ནི་བསྐའོ། །དེ་ལྟར་རོ་གཅིག་པོ་དེ་ཡང་གར་ཟག་པའི་གནས་ལས་རྣམ་པ་ཐ་དད་དུ་གྱུར་ཏེ་སྨན་དེའི་རོ་ཉིད་ནི་རི་ལ་ཡོད་དོ། །དཔེར་ན་ཟླ་བ་རྒྱས་པ་ནི་བསོད་ནམས་ཆུང་བ་དག་གིས་ཤིན་ཏུ་ཉམ་ཐག་པར་ལས་སུ་བྱས་ཏེ་གཞོར་གྱིས་བརྐོས་ཀྱང་ཐོབ་པར་མི་ནུས་སོ། །གལ་ཏེ་རྒྱལ་པོ་འཕགས་པ་དག་འཇིག་རྟེན་དུ་བྱུང་ན་བསོད་ནམས་ཀྱི་རྐྱེན་གྱིས་སྨན་དེའི་རོ་ཡང་ཡང་དག་པར་འཐོབ་པར་འགྱུར་རོ། །རིགས་ཀྱི་བུ་དེ་བཞིན་གཤེགས་པའི་སྙིང་པོའི་རོ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་ནགས་སྟུག་པོས་བསྒྲིབས་པས་སེམས་ཅན་མ་རིག་པ་དག་གིས་མཐོང་བར་མི་ནུས་སོ། །སྨན་རོ་གཅིག་པ་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེ་སྟེ། ཀུན་ནས་ཉོན་མོངས་པའི་དབང་གིས་རོ་རྣམ་པ་སྣ་ཚོགས་སུ་གྱུར་པ་ནི་འདི་ལྟ་སྟེ། སེམས་ཅན་དམྱལ་བ་དང་། ཡི་དགས་དང་། བྱོལ་སོང་དང་། ལྷ་དང་། མི་དང་། སྐྱེས་པ་དང་། བུད་མེད་དང་། མ་ནིང་དང་། རྒྱལ་རིགས་དང་། བྲམ་
ཟེ་དང་། རིགས་ངན་གདོལ་པ་ལ་སོགས་པར་གྱུར་པའོ། །སངས་རྒྱས་ཀྱི་རང་བཞིན་ནི་ཤིན་ཏུ་དཔའ་བས་དེ་བས་ན་གསོད་མི་ནུས་སོ། །ཅི་སྟེ་བསད་ན་སངས་རྒྱས་ཀྱི་རང་བཞིན་མེད་པར་བྱས་པ་ཡིན་ནོ། །སངས་རྒྱས་ཀྱི་རང་བཞིན་ནི་རང་བཞིན་གྱིས་མེད་པར་བྱེད་ནུས་པ་མ་ཡིན་ཏེ། མེད་པར་བྱ་བའི་གནས་མེད་དོ། །བདག་ཅེས་བྱ་བའི་རང་བཞིན་ཉིད་ནི་དེ་བཞིན་གཤེགས་པའི་གསང་བའི་སྙིང་པོའོ། །དེ་ལྟར་གསང་བའི་སྙིང་པོ་དེ་ནི་གང་གིས་ཀྱང་འཇིག་ཅིང་མེད་པར་བྱེད་ནུས་པ་མ་ཡིན་ཏེ། མེད་པར་བྱེད་མི་ནུས་ཀྱང་མཐོང་བར་མི་རུང་ངོ་། །གལ་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ན་རྟོགས་ཤིང་རིག་པར་འགྱུར་ཏེ། དེ་བས་ན་གསོད་ནུས་པ་མེད་དོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། ཅི་སྟེ་གསོད་ནུས་པ་མ་མཆིས་ན་མི་དགེ་བའི་ལས་ཞེས་བགྱི་བ་ཡང་མ་མཆིས་སམ། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ཡང་དག་པར་ན་གསོད་པ་ཡོད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ་སེམས་ཅན་གྱི་སངས་རྒྱས་ཀྱི་རང་བཞིན་ནི་ཕུང་པོ་ལྔ་ལ་གནས་ཏེ། གལ་ཏེ་ཕུང་པོ་ལྔ་བཤིག་ན་སྲོག་བཅད་པ་ཞེས་བྱའོ། །གལ་ཏེ་སྲོག་བཅད་ན་ངན་སོང་དུ་ལྟུང་བར་འགྱུར་ཏེ། ལས་ཀྱི་རྒྱུ་དང་རྐྱེན་གྱིས་རྒྱལ་རིགས་དང་བྲམ་ཟེ་ལ་སོགས་པ་དང་། རིགས་ངན་གདོལ་པ་དང་། སྐྱེས་པ་དང་། བུད་མེད་དང་། མ་ནིང་དང་། སྲིད་པ་ཉི་ཤུ་ལྔ་པོ་ལ་སོགས་པ་རྣམ་པ་ཐ་དད་པའི་མཚན་ཉིད་ཀྱིས་འཁོར་བར་འཁོར་རོ། །འཕགས་པ་མ་ཡིན་པ་དག་ནི་བདག་ཅེས་བྱ་བ་མཚན་ཉིད་ཆེན་པོ་དང་། ཆུང་ངུ་དང་། ཏིལ་ལམ། ཁྲེའམ། སྲན་མའམ། མཐེ་བོའི་བར་དུ་རྣམ་པ་སྣ་ཚོགས་སུ་འཛིན་ཏེ། གང་མི་བདེན་པའི་སྒྱུ་མའི་མཚན་ཉིད་དུ་འཛིན་པ་ཡང་དག་པ་མ་ཡིན་ནོ། །འཇིག་རྟེན་ལས་འདའ་བའི་བདག་གི་མཚན་ཉིད་ནི་སངས་རྒྱས་ཀྱི་རང་བཞིན་ཞེས་བྱ་སྟེ། དེ་ལྟར་བདག་ཏུ་འཛིན་པ་ནི་ཤིན་ཏུ་མཆོག་ཅེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྐྱེས་བུ་གཏེར་གྱི་
རྒྱུས་ལ་ཤིན་ཏུ་མཁས་པ་ཞིག་གཞོར་རྣོན་པོ་ཐོགས་ཏེ་བརྐོས་ན། རྡོའམ་གསེག་མའམ་ཕ་བོང་ལ་ཡང་ཐོགས་པ་མེད་པར་རྐོའོ། །གལ་ཏེ་རྡོ་རྗེ་ལ་ཐུག་ན་ཅིས་ཀྱང་མི་ཚུགས་སོ། །རྡོ་རྗེ་ཞེས་བྱ་བ་ལ་ནི་མཚོན་ཅིས་ཀྱང་མི་ཚུགས་ཤིང་གཅོད་མི་ནུས་སོ། །རིགས་ཀྱི་བུ་སེམས་ཅན་གྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། འཇིག་རྟེན་ན་རྒོལ་བ་ཐམས་ཅད་ལྷ་དང་། བདུད་སྡིག་ཏོ་ཅན་དང་། མི་དང་། འཇིག་རྟེན་དུ་བཅས་པ་ཐམས་ཅད་ཀྱིས་གཞིག་མི་ནུས་སོ། །ཕུང་པོ་ལྔའི་མཚན་ཉིད་ནི་བྱེད་པ་དང་བཅས་པའོ། །བྱེད་པ་དང་བཅས་པའི་མཚན་ཉིད་ནི་རྡོའམ་གསེག་མ་ལྟ་བུ་སྟེ། འབིགས་ཤིང་གཅོད་ནུས་སོ། །སངས་རྒྱས་ཀྱི་རང་བཞིན་ནི་རྡོ་རྗེ་ལྟ་བུ་སྟེ། གཞིག་མི་ནུས་སོ། །དེ་བས་ན་ཕུང་པོ་ལྔ་བཤིག་པ་ནི་སྲོག་གཅོད་པ་ཞེས་བྱའོ། །རིགས་ཀྱི་བུ་སངས་རྒྱས་ཀྱི་ཆོས་ནི་དེ་ལྟར་བསམ་གྱིས་མི་ཁྱབ་པར་རིག་པར་བྱའོ། །རིགས་ཀྱི་བུ་ཤིན་ཏུ་རྒྱས་པའི་མདོ་སྡེ་ནི་བདུད་རྩི་ལྟ་བུ་ཡང་ཡིན་ལ་དུག་ལྟ་བུ་ཡང་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཅིའི་སླད་དུ་དེ་བཞིན་གཤེགས་པས་ཤིན་ཏུ་རྒྱས་པའི་མདོ་སྡེ་ལ་བདུད་རྩི་ལྟ་བུ་དང་། དུག་ལྟ་བུ་ལགས་སོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་དེ་བཞིན་གཤེགས་པའི་སྙིང་པོ་ཡང་དག་པའི་དོན་ཤེས་པར་འདོད་དམ། འོད་སྲུང་གིས་གསོལ་པ། བདག་དེ་བཞིན་གཤེགས་པའི་སྙིང་པོའི་དོན་གང་ལགས་པ་རྟོགས་པར་འཚལ་ལོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཁ་ཅིག་བདུད་རྩི་འཐུངས་པ་ལས། །ཚེ་ཐུང་སྔར་ཤི་བ་ཡང་ཡོད། །ཁ་ཅིག་བདུད་རྩི་འཐུངས་པ་ལས། །ཚེ་རིང་རྟག་ཏུ་འདུག་པའང་ཡོད། །ཁ་ཅིག་དུག་འཐུངས་དབང་གིས་འཚོ། །ཁ་ཅིག་དུག་གི་རྐྱེན་གྱིས་འཆི། །ཐོགས་མེད་ཡེ་ཤེས་ཟིལ་དངར་ནི། །ཐེག་པ་ཆེན་པོའི་མདོ་སྡེ་སྟེ། །ཐེག་པ་ཆེན་པོའི་མདོ་སྡེ་ནི། །སྨན་
དང་དུག་ཏུ་འདྲེས་པའོ། །ཇི་ལྟར་མར་དང་ཁ་ར་དང་། །མར་གྱི་སྙིང་པོ་ལ་སོགས་པ། །འཐུངས་ཏེ་ཞུ་ན་སྨན་དུ་འགྱུར། །མ་ཞུ་བ་ནི་དུག་ཅེས་བྱ། །ཤིན་ཏུ་རྒྱས་པའང་དེ་བཞིན་ཏེ། །མཁས་པ་དག་གིས་བདུད་རྩིར་འགྱུར། །གླེན་པས་སངས་རྒྱས་རང་བཞིན་དག །མི་ཤེས་པ་ཡིས་དུག་ཏུ་འགྱུར། །ཉན་ཐོས་པ་དང་རང་རྒྱལ་དང་། །ཐེག་པ་ཆེན་པོའི་བདུད་རྩི་སྟེ། །ཇི་ལྟར་བྲོ་བའི་རོ་ཐམས་ཅད། །འོ་མ་མཆོག་ཏུ་འགྱུར་བ་བཞིན། །དེ་ལྟར་བརྩོན་འགྲུས་རྩོམ་པ་དག །ཐེག་པ་ཆེན་པོའི་དབང་གིས་ནི། །ཡོངས་སུ་མྱ་ངན་འདས་འགྱུར་ཞིང་། །མི་ཡི་ཁྱུ་མཆོག་རྒྱལ་པོར་འགྱུར། །འོད་སྲུང་ཁྱོད་དང་སེམས་ཅན་གང་། །སངས་རྒྱས་རང་བཞིན་ཤེས་པ་ནི། །བླ་ན་མེད་པའི་ཟིལ་དངར་རོས། །མི་སྐྱེ་མི་འཆི་བར་འགྱུར་རོ། །འོད་སྲུང་ཁྱོད་ཀྱིས་ཤེས་པར་གྱིས། །དཀོན་མཆོག་གསུམ་དག་རྟོགས་པར་གྱིས། །དཀོན་མཆོག་གསུམ་གྱི་མཚན་ཉིད་ནི། །བདག་ཅེས་བྱ་བའི་མཚན་ཉིད་དོ། །བདག་དང་སངས་རྒྱས་རང་བཞིན་ཉིད། །གང་གིས་མངོན་སུམ་རྟོགས་གྱུར་ན། །དེ་བཞིན་གཤེགས་པའི་སྙིང་པོ་ཉིད། །སྐྱེས་བུ་དེས་ནི་རྟོགས་འགྱུར་རོ། །བདག་དང་བདག་གིར་གང་ཤེས་པ། །དེ་ནི་འཇིག་རྟེན་འདས་པའོ། །སངས་རྒྱས་ཆོས་དང་དགེ་འདུན་ནི། །ཕུལ་དུ་བླ་ན་མེད་པའི་མཆོག །ཚིགས་སུ་བཅད་དེ་ངས་གསུངས་པ། །མཚན་ཉིད་དོན་ནི་འདི་དག་གོ །དེ་ནས་བྱང་ཆུབ་སེམས་དཔའ་འོད་སྲུང་གིས་ཚིགས་སུ་བཅད་དེ་བཅོམ་ལྡན་འདས་ལ་གསོལ་པ། སྐྱབས་སུ་འགྲོ་བའི་གནས་གསུམ་པོ། །བདག་ནི་གང་ཡང་མ་རྟོགས་ན། །བླ་མེད་འཇིགས་པ་མ་མཆིས་པར། །དེ་ལ་ཇི་ལྟར་སྐྱབས་སུ་མཆི། །དཀོན་མཆོག་གསུམ་ཡང་མ་རྟོགས་ན། །བདག་མ་མཆིས་པར་ཇི་ལྟར་བགྱི། །ཇི་ལྟར་སངས་རྒྱས་སྐྱབས་གསོལ་ན། །རབ་ཏུ་བདེ་བ་ཐོབ་པར་འགྱུར། །ཇི་ལྟར་ཆོས་ལ་སྐྱབས་གསོལ་བ། །བདག་ལ་རྒྱལ་བས་བསྟན་དུ་གསོལ། །ཇི་ལྟར་ཆེ་བའི་དབང་ཐོབ་འགྱུར། །དབང་དུ་མི་འགྱུར་གང་ལགས་པ། །ཇི་ལྟར་དགེ་འདུན་སྐྱབས་གསོལ་ན། །
བླ་མེད་བདེ་བ་ཐོབ་པར་འགྱུར། །ཇི་ལྟར་བདེ་བའི་ཚིག་སྨྲ་ན། །མ་འོངས་དུས་སུ་མངོན་སངས་རྒྱས། །མ་འོངས་དུས་སུ་མི་འགྲུབ་ན། །དཀོན་མཆོག་གསུམ་ལ་ཇི་ལྟར་ཕྱོགས། །བདག་གིས་སྔ་ནས་མི་འཚལ་ཏེ། །བགས་ཀྱིས་འཚལ་བར་འགྱུར་བས་ན། །ཇི་ལྟ་བུར་ན་མི་སྦྲུམ་པར། །བུ་དག་བཙའ་བའི་འདུ་ཤེས་བསྐྱེད། །མངལ་ན་ཇི་ལྟར་མཆིས་ངེས་ན། །དེ་ནི་བུ་མཆིས་པ་ཞེས་བགྱི། །ཅི་སྟེ་མངལ་ན་བུ་མཆིས་ན། །རིང་པོར་མི་ཐོགས་ངེས་པར་འབྱུང་། །དེ་ནི་བུ་ཡི་དོན་ལགས་ཏེ། །སེམས་ཅན་ལས་ཀྱང་དེ་བཞིན་ནོ། །བཅོམ་ལྡན་འདས་ཀྱིས་གསུངས་པ་ལྟར། །གླེན་པ་དག་གིས་ཤེས་མི་ནུས། །དེ་ལྟར་མི་རྟོགས་མི་ཤེས་པས། །ཡང་དང་ཡང་དུ་འཁོར་བར་འཁོར། །མིང་ཙམ་གྱི་ནི་དགེ་བསྙེན་དག །ཡང་དག་པ་ཡི་དོན་མི་འཚལ། །ཤིན་ཏུ་རྒྱས་པར་འབྱེད་བསྟན་ཏེ། །བདག་གི་ཐེ་ཙོམ་བཅད་དུ་གསོལ། །ཡེ་ཤེས་ཆེན་པོ་བཅོམ་ལྡན་འདས། ། ཐུགས་བརྩེའི་སླད་དུ་རྒྱས་པར་ནི། །དེ་བཞིན་གཤེགས་པས་གསང་བ་ཡི། །རིན་ཆེན་སྙིང་པོ་བཤད་དུ་གསོལ། །འོད་སྲུང་ཁྱོད་ཀྱིས་ཤེས་པར་གྱིས། །གསང་བའི་སྙིང་པོ་གང་ཡིན་པ། །ངས་ནི་རབ་ཏུ་འབྱེད་བསྟན་ཏེ། །ཁྱོད་ཀྱི་ཐེ་ཙོམ་གཅད་པར་བྱ། །ཤིན་ཏུ་བརྟགས་པར་ཉོན་ཅིག་དང་། །ཁྱོད་ནི་བྱང་ཆུབ་སེམས་དཔའི་ནང་། །སངས་རྒྱས་འབྱུང་བ་བདུན་པ་ཡི། །མཚན་དང་མིང་དུ་འཐུན་པར་འགྱུར། །སངས་རྒྱས་དག་ལ་སྐྱབས་གསོལ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་རྣམས་གཞན་དག་ལ། །སྐྱབས་གསོལ་བར་ནི་མི་འགྱུར་རོ། །དམ་པའི་ཆོས་ལ་སྐྱབས་གསོལ་ན། །འཚེ་ཞིང་གསོད་པའི་སེམས་དང་བྲལ། །དགེ་འདུན་ལ་ནི་སྐྱབས་གསོལ་ན། །མུ་སྟེགས་ཅན་ལ་ཕྱོགས་མི་འགྱུར། །དཀོན་མཆོག་གསུམ་ལ་སྐྱབས་གསོལ་ན། །འཇིགས་པ་མེད་པ་ཐོབ་པར་འགྱུར། །འོད་སྲུང་སངས་རྒྱས་ལ་གསོལ་པ། །བདག་ནི་གསུམ་ལ་སྐྱབས་གསོལ་བས། །སངས་རྒྱས་རྣམས་ཀྱི་སྤྱོད་ཡུལ་གྱི། །ཡང་དག་པ་ཡི་ལམ་ཞེས་བགྱི། །དཀོན་མཆོག་གསུམ་གྱི་མཚན་ཉིད་མཉམ། །ཡེ་ཤེས་ཆེན་
པོ་ཉིད་དང་ལྡན། །བདག་དང་སངས་རྒྱས་རང་བཞིན་ནི། །གཉིས་སུ་མེད་དེ་བྱེ་བྲག་མེད། །སངས་རྒྱས་བསྟོད་པའི་ལམ་འདི་ནི། །ཡང་དག་ཚོལ་བ་བདེ་བའི་གནས། །ཐམས་ཅད་མཁྱེན་ཅིང་གཟིགས་པས་ན། །སངས་རྒྱས་མང་པོས་བསྔགས་པར་འགྱུར། །བདག་ཀྱང་བདེ་གཤེགས་བསྔགས་པ་ཡི། །བླ་མེད་ལམ་ལ་གཞོལ་ཞིང་འབབ། །བདུད་རྩི་མཆོག་གི་དམ་པ་སྟེ། །སྲིད་པའི་ནང་ན་མེད་པའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཉན་ཐོས་སམ། བུས་པ་མ་རབས་ལྟར་དཀོན་མཆོག་གསུམ་ལ་བྱེ་བྲག་མ་འབྱེད་ཅིག །ཐེག་པ་ཆེན་པོ་ལ་ནི་དཀོན་མཆོག་གསུམ་ལ་རྣམ་པར་བྱེ་བྲག་འབྱེད་པའི་མཚན་ཉིད་མེད་དོ། །དེ་ཅིའི་ཕྱིར་ཞེ་ན། སངས་རྒྱས་ཀྱི་ངོ་བོ་ཉིད་ལ་ཆོས་དང་དགེ་འདུན་ཡོད་པའི་ཕྱིར་རོ། །ཉན་ཐོས་དང་བུས་པ་མ་རབས་བསྒྲལ་བའི་ཕྱིར་དཀོན་མཆོག་གསུམ་རྣམ་པར་ཕྱེ་སྟེ་ཐ་དད་པར་བསྟན་ཏོ། །རིགས་ཀྱི་བུ་གང་འཇིག་རྟེན་པའི་ཆོས་ཀྱི་རྗེས་སུ་འཇུག་འདོད་པ་དག་ནི་སྐྱབས་སུ་འགྲོ་བའི་གནས་གསུམ་ཡོད་པར་བྱེ་བྲག་འབྱེད་དོ། །རིགས་ཀྱི་བུ་བྱང་ཆུབ་སེམས་དཔའ་དག་ནི་འདི་སྙམ་དུ་སེམས་ཏེ། །བདག་གི་ལུས་འདི་སངས་རྒྱས་ལ་སྐྱབས་སུ་སོང་བས་ལུས་འདི་ཉིད་ཀྱིས་མངོན་པར་འཚང་རྒྱ་སྟེ། མངོན་པར་སངས་རྒྱས་ནས་སངས་རྒྱས་ལ་བསྙེན་བཀུར་དང་། བསྟི་སྟང་དང་། མཆོད་པ་དང་། ཕྱག་བྱ་བའི་ཆོས་མེད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་མཉམ་པར་སེམས་ཅན་ཐམས་ཅད་ཀྱི་སྐྱབས་སུ་འགྲོ་བའི་གནས་མཛད་པའི་ཕྱིར་རོ། །གང་ཆོས་ཀྱི་སྐུ་གདུང་ལ་རིམ་གྲོ་བྱེད་པ་ནི་སངས་རྒྱས་རྣམས་ཀྱི་མཆོད་རྟེན་ལ་གུས་པར་ཕྱག་བྱ་བའོ། །དེ་ཅི་ལྟ་ཞེ་ན། སོ་སོའི་སྐྱེ་བོ་བསྒྲལ་བའི་ཕྱིར་རོ། །གཞན་ཡང་སེམས་ཅན་དག་ངའི་སྐུ་ལ་མཆོད་རྟེན་ལྟ་བུར་འདུ་ཤེས་བསྐྱེད་དེ། ཕྱག་དང་མཆོད་པ་བྱེད་དོ། །དེ་ལྟར་སེམས་ཅན་དེ་དག་གིས་ངའི་ཆོས་ཀྱི་སྐུ་ལ་ཡང་སྐྱབས་ཚོལ་བའི་གནས་བྱེད་དོ། །སེམས་ཅན་ཐམས་ཅད་ནི་ཡང་དག་པ་མ་ཡིན་པ་ཆོས་ལོག་པ་ལ་གནས་ཏེ། དེ་
བས་ན་ངས་རིམ་གྱིས་ཡང་དག་པའི་ཆོས་བསྟན་ཏོ། །གཞན་ཡང་ཡང་དག་པའི་དགེ་འདུན་མ་ཡིན་པ་ལ་སྐྱབས་སུ་སོང་བ་དག་ལ་ཡང་དག་པའི་དགེ་འདུན་དག་ལ་སྐྱབས་སུ་འགྲོ་བའི་གནས་ཀྱང་བྱེད་དོ། །གང་དཀོན་མཆོག་གསུམ་ལ་བྱེ་བྲག་འབྱེད་པ་དག་ལ་ནི་སྐྱབས་སུ་འགྲོ་བའི་གནས་གཅིག་སྟེ་གསུམ་དུ་བྱེ་བྲག་མེད་དོ་ཞེས་ཀྱང་སྟོན་ཏོ། །དམུས་ལོང་ལྡོངས་པར་གྱུར་པ་ལ་ནི་མིག་ལྟ་བུར་ཡང་སྟོན་ཏོ། །གཞན་ཡང་ཉན་ཐོས་དང་རང་སངས་རྒྱས་ཀྱི་སྐྱབས་སུ་འགྲོ་བའི་གནས་ཡང་དག་པའང་བྱའོ་སྙམ་དུ་སེམས་སོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་དག་ནི་སེམས་ཅན་མ་རུངས་པ་ཚད་མེད་པ་དང་མཁས་པ་ཤེས་རབ་ཅན་དེ་དག་གི་ཕྱིར་སངས་རྒྱས་ཀྱི་མཛད་པ་བྱེད་དོ། །རིགས་ཀྱི་བུ་དཔེར་ན་སྐྱེས་བུ་ཞིག་གཡུལ་ངོར་ཕྱིན་པའི་ཚེ་འདི་སྙམ་དུ་བདག་ནི་མཆོག་སྟེ། དམག་གི་ཚོགས་འདི་དག་ཐམས་ཅད་ཀྱང་བདག་འབའ་ཞིག་ལ་ལྟོས་སོ་སྙམ་སེམས་སོ། །གཞན་ཡང་དཔེར་ན་རྒྱལ་ཚབ་གཞོན་ནུ་འདི་སྙམ་དུ་སེམས་ཏེ། བདག་ནི་རྒྱལ་བུ་ཐམས་ཅད་ཐུལ་ཏེ་རྒྱལ་པོ་ཆེན་པོའི་སྲིད་དང་དབང་བ་ཐམས་ཅད་ལ་བདག་དབང་དུ་གྱུར་ཏེ། རྒྱལ་བུ་ཐམས་ཅད་ཀྱང་བདག་ལ་ཕྱོགས་པས་དེ་བས་ན་ཞན་པའི་བསམ་པ་མི་སྐྱེད་དོ་སྙམ་དུ་སེམས་ཏེ། ཇི་ལྟར་རྒྱལ་པོ་དང་རྒྱལ་བུ་དེ་བཞིན་དུ་བློན་པོ་ཆེན་པོ་ཡང་དེ་དང་འདྲའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོའང་དེ་དང་འདྲ་བར་འདི་སྙམ་དུ་སེམས་སོ། །ཇི་ལྟར་ན་དངོས་པོ་གསུམ་པོ་བདག་དང་རང་བཞིན་གཅིག་ཏུ་འགྱུར་སྙམ་སེམས་སོ། །རིགས་ཀྱི་བུ་ངས་བསྟན་པའི་དངོས་པོ་གསུམ་པོ་འདི་ནི་མྱ་ངན་ལས་འདས་པའོ། །དེ་བཞིན་གཤེགས་པ་ནི་བླ་ན་མེད་པའི་སྐྱེས་བུ་དམ་པ་སྟེ་ཇི་ལྟར་མིའི་ལུས་ལ་ཡན་ལག་དང་ཉིང་ལག་ཐམས་ཅད་ཀྱི་ནང་ན་མགོ་བོ་དམ་པ་སྟེ་གཞན་མ་ཡིན་པ་བཞིན་དུ་སངས་རྒྱས་ཀྱང་དེ་དང་འདྲ་བར་མཆོག་དམ་པ་སྟེ་ཆོས་དང་དགེ་འདུན་ནི་མ་ཡིན་ནོ། །འཇིག་རྟེན་པ་རྣམས་བསྒྲལ་བའི་ཕྱིར་མཚན་ཉིད་རྣམ་པ་སྣ་ཚོགས་སུ་སྐས་ཀྱི་ཐེམ་པ་ལྟར་བྱེ་བྲག་ཏུ་བསྟན་ཏོ། །དེ་བས་ན་ཁྱོད་ནི་བུས་པ་གླེན་
པ་ལྟར་དཀོན་མཆོག་གསུམ་ལ་ཐ་དད་པའི་མཚན་ཉིད་དུ་མི་གཟུང་ངོ་། །ཁྱོད་ནི་ཐེག་པ་ཆེན་པོ་ལ་ཞུགས་པས་དབང་པོ་རྣོ་བ་ནི་རལ་གྲི་རྣོན་པོ་དང་འདྲའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བདག་ནི་རྟོགས་བཞིན་དུ་བཅོམ་ལྡན་འདས་ལ་ཞུ་བ་ལགས་ཀྱི་མི་འཚལ་བ་ནི་མ་ལགས་ཏེ། བདག་གིས་བྱང་ཆུབ་སེམས་དཔའ་གང་དཔའ་ཞིང་དབང་པོ་རྟུལ་ཕོད་པ་རྣམས་ཀྱི་སླད་དུ་དྲི་མ་མ་མཆིས་པ་ཡོངས་སུ་དག་པའི་སྤྱོད་ཡུལ་དུ་ཞུགས་པ་ལགས་སོ། །གཞན་ཡང་དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ལ་ངོ་མཚར་རྨད་ཀྱི་དངོས་པོ་འབྱེད་ཅིང་བསྟན་པ་དང་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་བསྔགས་པའི་སླད་དུ་ཞུགས་ཏེ་དེ་བཞིན་གཤེགས་པས་ཐུགས་རྗེ་ཆེན་པོས་ལེགས་པར་གསུངས་པས་བདག་ཀྱང་དེ་ལ་གནས་པར་འཚལ་ལོ། །གང་ན་བྱང་ཆུབ་སེམས་དཔའི་སྤྱོད་ཡུལ་ལ་ཡོངས་སུ་དག་པ་སྟོན་པ་དེ་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་སྟོན་པ་ལགས་སོ། །བཅོམ་ལྡན་འདས་བདག་གིས་ཀྱང་དེ་བཞིན་གཤེགས་པའི་གསང་བའི་སྙིང་པོ་འདི་སེམས་ཅན་ཐམས་ཅད་ལ་རྒྱས་པར་བསྟན་ཅིང་དཀོན་མཆོག་གསུམ་ལ་སྐྱབས་སུ་འགྲོ་བའི་གནས་ཡང་དག་པར་རྟོགས་པར་བགྱིའོ། །དེ་ལ་སེམས་ཅན་གང་ཞིག་འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལ་དད་ཅིང་ཡིད་ཆེས་ན་སྐྱེས་བུ་དེ་ནི་དཀོན་མཆོག་གསུམ་ལ་སྐྱབས་སུ་འགྲོ་བའི་གནས་རྟོགས་ཤིང་ཁོང་དུ་ཆུད་པ་ལགས་སོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་གསང་བའི་སྙིང་པོ་ལ་སངས་རྒྱས་ཀྱི་རང་བཞིན་མཆིས་པའི་ཕྱིར་རོ། །གང་མདོ་སྡེ་འདི་སྟོན་ཅིང་འཆད་པ་དེའི་ལུས་ལ་སངས་རྒྱས་ཀྱི་རང་བཞིན་མ་མཆིས་པར་སྨྲ་སྟེ་སྐྱེས་བུ་དེ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་མ་ཡིན་པ་གཞན་མི་ཚོལ་ལོ། །དེ་ཅིའི་སླད་དུ་ཞེ་ན། ཕྱི་མ་མ་འོངས་པའི་དུས་སུ་བདག་གི་ལུས་འདི་ཉིད་དཀོན་མཆོག་གསུམ་དུ་འགྱུར་ཏེ་ཉན་ཐོས་དང་རང་སངས་རྒྱས་དང་དེ་མ་ཡིན་པའི་སྐྱེ་བོ་གཞན་ཐམས་ཅད་ཀྱང་བདག་ལ་བརྟེན་ཏེ་རིམ་གྲོ་དང་བཀུར་སྟི་དང་། ཕྱག་འཚལ་བར་འགྱུར་བའི་ཕྱིར་རོ། །རིགས་ཀྱི་བུ་དོན་དེ་ལྟ་བས་ན་
ཐེག་པ་ཆེན་པོའི་མདོ་སྡེ་ལ་ཡང་དག་པར་བསླབ་པར་བྱའོ། །འོད་སྲུང་གིས་ཡང་གསོལ་པ་སངས་རྒྱས་ཀྱི་རང་བཞིན་ནི་བསམ་གྱིས་མི་ཁྱབ་སྟེ་དེ་བཞིན་དུ་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ཡང་བསམ་གྱིས་མི་ཁྱབ་བོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་ལེགས་སོ་ཤིན་ཏུ་ལེགས་སོ་ཞེས་བཀའ་སྩལ་ཏོ། །རིགས་ཀྱི་བུ་ཁྱོད་ནི་ཤིན་ཏུ་ཟབ་པའི་ཤེས་རབ་དང་ལྡན་པས་ངས་ཀྱང་ཁྱོད་ཀྱི་དེ་བཞིན་གཤེགས་པའི་སྙིང་པོ་ལ་འཇུག་པ་ལེགས་པར་བསྟན་པར་བྱའོ། །གལ་ཏེ་བདག་ཅེས་བྱ་བ་ཐེར་ཟུག་ཏུ་རྟག་པའི་ཆོས་ཡིན་ན་ནི་སྡུག་བསྔལ་དང་བྲལ་བར་མི་འགྱུར་རོ། །གལ་ཏེ་བདག་ཅེས་བྱ་བ་མེད་ན་ནི་ཚངས་པར་སྤྱོད་པ་དག་ཕན་པའི་དོན་མེད་པར་འགྱུར་རོ། །གལ་ཏེ་ཆོས་ཐམས་ཅད་བདག་མེད་པར་སྨྲ་ན་དེ་ནི་ཆད་པར་ལྟ་བ་ཡིན་ནོ། །ཅི་སྟེ་བདག་ཅེས་བྱ་བ་ཐེར་ཟུག་ཏུ་སྨྲ་ན་དེ་ནི་རྟག་པར་ལྟ་བ་ཡིན་ནོ་གང་འདུ་བྱེད་ཐམས་ཅད་མི་རྟག་པར་ལྟ་ན་དེ་ཡང་ཆད་པར་ལྟ་བར་འགྱུར་རོ། །འདུ་བྱེད་རྟག་པར་ལྟ་ན་དེ་ལ་ཡང་རྟག་པར་ལྟ་བར་འགྱུར་རོ། །གང་སྡུག་བསྔལ་བར་སྨྲ་ན་ཆད་པར་ལྟ་བ་ཡིན་ནོ། །གལ་ཏེ་བདེ་བར་སྨྲ་ན་ཡང་རྟག་པར་ལྟ་བ་ཡིན་ནོ་གང་ཆོས་ཐམས་ཅད་རྟག་གོ་བར་ནན་ཏན་བྱེད་ན་ཆད་པར་ལྟ་བར་ལྟུང་ངོ་། །ཆོས་ཐམས་ཅད་ཆད་པར་ནན་ཏན་བྱེད་ན་རྟག་པར་ལྟ་བར་ལྟུང་ངོ་། །དཔེར་ན་སྲིན་བུ་ཁུང་བུར་འགྲོ་བ་དག་རྐང་པ་སྔ་མ་བོར་ནས་རྐང་པ་ཕྱི་མ་འདོར་རོ། །རྟག་པ་དང་ཆད་པ་ལ་ནན་ཏན་བྱེད་པ་ཡང་དེ་དང་འདྲ་སྟེ་ཆད་པ་དང་རྟག་པའི་རྐྱེན་ལ་ལྟོས་སོ། །དོན་དེ་ལྟ་བས་ན་སྡུག་བསྔལ་བའི་ཆོས་གཞན་ལ་ནན་ཏན་བྱེད་པ་ནི་མི་དགེ་བའོ། །བདེ་བའི་ཆོས་གཞན་ལ་ནན་ཏན་བྱེད་པ་ནི་དགེ་བ་ཞེས་བྱའོ། །བདག་མེད་པའི་ཆོས་གཞན་ལ་ནན་ཏན་བྱེད་པ་ནི་ཀུན་ནས་ཉོན་མོངས་པའི་ཕྱོགས་ཡིན་ནོ། །རྟག་པའི་ཆོས་གཞན་ལ་ནན་ཏན་བྱེད་པ་ནི་དེ་བཞིན་གཤེགས་པའི་གསང་བའི་སྙིང་པོ་ཞེས་བྱ་སྟེ། མྱ་ངན་ལས་འདས་པ་ནི་གནས་དང་རྟེན་མེད་པའོ། །མི་རྟག་པའི་ཆོས་གཞན་ལ་ནན་ཏན་བྱེད་པ་ནི་རྫས་དང་ཟང་ཟིང་ཡོད་པའོ། །རྟག་པའི་ཆོས་གཞན་ལ་ནན་ཏན་བྱེད་པ་ནི་སངས་རྒྱས་དང་ཆོས་དང་དགེ་འདུན་དང་ཡང་དག་པར་རྣམ་
པར་གྲོལ་བའོ། །དེ་བས་ན་སངས་རྒྱས་ཀྱི་རང་བཞིན་ནི་ལམ་དབུ་མ་མཐའ་གཉིས་དང་ཡོངས་སུ་བྲལ་བ་ཡིན་པར་རིག་པར་བྱའོ། །ཡང་དག་པའི་ཆོས་བསྟན་པ་ལ་བུས་པ་མ་རབས་དག་ནི་དེ་ལ་ཐེ་ཚོམ་བྱེད་དོ། །དཔེར་ན་ནད་པ་ཉམ་ཆུང་བ་དག་མར་འཐུངས་ན་ལུས་ཡང་ཞིང་དགའ་བར་འགྱུར་རོ། ། ཡོད་པ་དང་མེད་པའི་ཆོས་ཀྱང་རང་བཞིན་གཅིག་ཏུ་མ་ཆད་དེ། དཔེར་ན་ཆེན་པོ་བཞི་རང་བཞིན་མི་འཐུན་པས་གཅིག་གི་གཉེན་པོར་གཅིག་འགྱུར་ཏེ། དེ་ལ་སྨན་པ་མཁས་པས་ནི་གང་གི་ཤས་ཆེ་བ་བཞིན་དུ་ཤིན་ཏུ་རྟོགས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ་སེམས་ཅན་ཐམས་ཅད་ལ་སྨན་པ་ལྟ་བུར་ཀུན་ནས་ཉོན་མོངས་པའི་རང་བཞིན་རྣམ་པ་ཐ་དད་པ་མཁྱེན་པས་ཡོངས་སུ་བསལ་ཏེ། དེ་བཞིན་གཤེགས་པའི་གསང་བའི་སྙིང་པོ་སངས་རྒྱས་ཀྱི་རང་བཞིན་ཡོངས་སུ་དག་པ་མི་འགྱུར་མི་འཕོ་བ་སྟོན་ཏོ། །གལ་ཏེ་ཡོད་པར་སྨྲ་ན་མཁས་པ་ཤེས་རབ་ཅན་དག་ཆགས་པའི་མི་རིགས་ལ་གལ་ཏེ་མེད་པར་སྨྲ་ན་བརྫུན་དུ་སྨྲ་བར་འགྱུར་རོ། །གལ་ཏེ་ཡོད་པར་སྨྲ་ན་འཕགས་པ་ཅང་མི་སྨྲ་བའི་མི་རིགས་ལ། གཞན་ཡང་ཁྱལ་པ་དང་རྩོད་པར་སྨྲ་བའི་མི་རིགས་ཏེ་ཡང་དག་པའི་ཆོས་ཉིད་རྟོགས་པར་འདོད་དོ། །བུས་པ་མ་རབས་ནི་ཁྱལ་པར་སྨྲ་ཞིང་རྩོད་པས་དེ་བཞིན་གཤེགས་པའི་གསང་བའི་སྙིང་པོ་མི་ཤེས་སོ། །གལ་ཏེ་སྡུག་བསྔལ་བར་སྨྲ་ན་བུས་པ་གླེན་པ་དག་ལུས་འདི་མི་རྟག་གོ་སྙམ་སེམས་སོ། །ཐམས་ཅད་སྡུག་བསྔལ་བར་སྨྲ་ན་ལུས་ལ་བདེ་བའི་རང་བཞིན་ཡོད་པར་མི་ཤེས་སོ། །གལ་ཏེ་མི་རྟག་པར་སྨྲ་ན་བུས་པ་གླེན་པ་དག་ལུས་ཐམས་ཅད་མི་རྟག་གོ་སྙམ་སྟེ་རྫ་སོ་མ་བཏང་བ་དང་འདྲ་བར་འཛིན་ཏོ། །དེ་ལ་མཁས་པ་ཤེས་རབ་ཅན་དག་ནི་རྣམ་པར་ཕྱེ་སྟེ། ཐམས་ཅད་ཀྱི་ཐམས་ཅད་དུ་མི་རྟག་པར་མི་སྨྲའོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་གྱི་ས་བོན་ཡོད་པའི་ཕྱིར་རོ། །གལ་ཏེ་བདག་མེད་པར་སྨྲ་ན། བུས་པ་གླེན་པ་དག་སངས་རྒྱས་ཀྱི་ཆོས་ཐམས་ཅད་བདག་མེད་དོ་སྙམ་དུ་འཛིན་ཏོ། །མཁས་པ་ཤེས་རབ་ཅན་ནི་བདག་མེད་པ་བླ་དགས་སུ་བཏགས་པར་ཟད་དེ། བདེན་པ་མེད་པར་རྣམ་པར་དབྱེའོ། །དེ་ལྟར་ཤེས་ནས་དེ་ལ་
ཐེ་ཙོམ་མི་སྐྱེད་དོ། །གང་དེ་བཞིན་གཤེགས་པའི་སྙིང་པོ་སྟོང་པར་སྨྲ་ན་བུས་པ་གླེན་པ་དག་ཐོས་ནས་ཆད་པའམ། མེད་པར་ལྟ་བ་སྐྱེའོ། །མཁས་པ་ཤེས་རབ་ཅན་དག་ནི་དེ་བཞིན་གཤེགས་པ་རྟག་པ་མི་འགྱུར་མི་འཕོ་བར་བྱེ་བྲག་དབྱེའོ། །གལ་ཏེ་རྣམ་པར་གྲོལ་བ་སྒྱུ་མ་ལྟ་བུར་སྨྲ་ན་བུས་པ་གླེན་པ་དག་རྣམ་པར་གྲོལ་བ་ཐོབ་པ་རྣམས་བདུད་ཀྱི་ཆོས་ཡིན་ནོ་སྙམ་དུ་འཛིན་ཏོ། །མཁས་པ་ཤེས་རབ་ཅན་ནི་རྣམ་པར་ཕྱེ་སྟེ་མིའི་ནང་ན་སེང་གེ་ལྟ་བུར་དེ་བཞིན་གཤེགས་པ་ཉག་གཅིག་ནི་རྟག་པ་གནས་པ་མི་འགྱུར་མི་འཕོ་བར་དབྱེའོ། །གལ་ཏེ་མ་རིག་པའི་རྐྱེན་གྱིས་འདུ་བྱེད་རྣམས་བྱུང་བར་སྨྲ་ན། བུས་པ་གླེན་པ་དག་ཐོས་ནས་རིག་པ་དང་། མ་རིག་པར་ཆོས་གཉིས་སུ་མེད་པར་བྱེ་བྲག་འབྱེད་དོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་སོ། །གང་གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་བྱུང་བར་སྨྲ་ན། བུས་པ་གླེན་པ་དག་འདུ་བྱེད་དང་རྣམ་པར་ཤེས་པ་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་སོ། །གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་དགེ་བ་བཅུ་དང་མི་དགེ་བ་བཅུ་པོ་འདི་ནི་བྱ་བའི་རིགས། འདི་ནི་མི་བྱ་བའི་རིགས། འདི་ནི་མཐོ་རིས་ཀྱི་ལམ། འདི་ནི་ངན་སོང་གི་རྒྱུ། འདི་ནི་རྣམ་པར་དཀར་བའི་ཆོས། འདི་ནི་ཆོས་ནག་པོའི་ཞེས་སྨྲ་ན། བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ། གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་ཆོས་ཐམས་ཅད་སྡུག་བསྔལ་བར་ནན་ཏན་བྱའོ། །ཞེས་སྨྲ་ན་བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ། གཉིས་སུ་མེད་པ་ནི་ཡང་དག་པ་ཉིད་དོ། །གལ་ཏེ་འདུ་བྱེད་ཐམས་ཅད་མི་རྟག་ཅེའམ། དེ་བཞིན་གཤེགས་པའི་སྙིང་པོ་ཡང་མི་རྟག་ཅེས་སྨྲ་ན། བུས་པ་གླེན་པ་དག་གཉིས་སུ་འཛིན་
ཏོ། ། མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ། གཉིས་སུ་མེད་པ་ཉིད་ནི་ཡང་དག་པ་ཉིད་དོ། །ཆོས་ཐམས་ཅད་བདག་མེད་དེ། དེ་བཞིན་གཤེགས་པའི་སྙིང་པོ་ཡང་དག་པ་མེད་ཅེས་སྨྲ་ན། བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་ཏེ། གཉིས་སུ་མེད་པ་ཉིད་ནི་ཡང་དག་པ་ཉིད་དོ། །བདག་དང་བདག་མེད་པ་རང་བཞིན་གྱིས་གཉིས་སུ་མེད་དོ། །དེ་བཞིན་གཤེགས་པའི་སྙིང་པོའི་དོན་ནི། དེ་ལྟར་དཔག་ཏུ་མེད་ཅིང་ཚད་མེད་མཐའ་ཡས་པར་སངས་རྒྱས་བཅོམ་ལྡན་འདས་ཀྱིས་ཡོངས་སུ་བསྔགས་པས། ངས་ཀྱང་ཡོན་ཏན་དང་ལྡན་པའི་མདོ་སྡེ་ཐམས་ཅད་ལས་ཀྱང་རྒྱས་པར་གསུངས་སོ།། །།བམ་པོ་བཅུ་གཅིག་པ། རིགས་ཀྱི་བུ་བདག་ཅེས་བྱ་བ་དང་བདག་མེད་པ་རང་བཞིན་གྱིས་གཉིས་སུ་མེད་པར་ཁྱོད་ཀྱིས་དེ་ལྟར་གཟུངས་སུ་ཟུང་ལ་སྤྱི་བོས་ལོང་ཤིག །རིགས་ཀྱི་བུ་ཁྱོད་ཀྱིས་མདོ་སྡེ་འདི་བརྟན་པར་གཟུངས་སུ་ཟུང་ལ་དྲན་པར་གྱིས་ཤིག །ངས་སྔོན་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཆེན་པོའི་མདོ་སྡེ་ལས་ཀྱང་བདག་དང་། བདག་མེད་པའི་མཚན་ཉིད་ཀྱིས་གཉིས་སུ་མེད་པར་བསྟན་ཏོ། །འདི་ལྟ་སྟེ་འོ་མ་ལས་ཞོ་འབྱུང་བ་དང་། ཞོ་ལས་མར་འབྱུང་བ་དང་། མར་ལས་ཞུན་མར་འབྱུང་བ་དང་། ཞུན་མར་ལས་མར་གྱི་སྙིང་པོ་འབྱུང་སྟེ། དེ་ལྟར་ཞོའི་རང་བཞིན་དེ། འོ་མ་ལས་བྱུང་ངམ། འོན་ཏེ་ཞོ་ཉིད་ལས་བྱུང་ངམ། འོན་ཏེ་གཞན་ནས་བྱུང་བ་མར་གྱི་སྙིང་པོའི་བར་དུ་ཡང་། དེ་བཞིན་དུ་རྒྱས་པར་རིག་པར་བྱའོ། །གལ་ཏེ་གཞན་ནས་བྱུང་ན། གཞན་གྱིས་བྱས་པ་ཡིན་ཏེ། གཞན་གྱིས་བྱས་ན་སེམས་ཅན་ཐམས་ཅད་འོ་མ་ལས་བྱུང་བ་མ་ཡིན་པར་འགྱུར་རོ། །གལ་ཏེ་འོ་མ་ལས་མ་བྱུང་ན། འོ་མ་ཅིར་ཡང་མི་དགོས་པར་འགྱུར་རོ། །གལ་ཏེ་ཞོ་ཉིད་ལས་བྱུང་ན་འདྲ་བའི་ཡང་མི་རིགས་ཏེ། གལ་ཏེ་མར་གྱི་སྙིང་པོ་འབྱུང་སྟེ། རྒྱུན་ལས་སྐྱེ་བར་འགྱུར་རོ། །གལ་ཏེ་རྒྱུན་ལས་སྐྱེས་ན་ལྷན་
ཅིག་སྐྱེས་པ་མ་ཡིན་ནོ། །གལ་ཏེ་ལྷན་ཅིག་མ་སྐྱེས་ན་རོ་རྣམ་པ་ལྔ་དུས་གཅིག་ཏུ་འབྱུང་བའི་རིགས་ཏེ། དུས་གཅིག་ཏུ་བྱུང་བ་ཡང་མ་ཡིན་མོད་ཀྱི་ངེས་པར་གཞན་ནས་འོངས་པ་ཡང་མ་ཡིན་ནོ། །དེ་བས་ན་འོ་མའི་ནང་ན་མངར་བའི་རོ་ཆེ་བས་སྔ་ནས་ཞོའི་མཚན་ཉིད་ཡོད་ཀྱང་རང་འགྱུར་བར་མི་ནུས་སོ། །དེ་བཞིན་དུ་མར་གྱི་སྙིང་པོའི་བར་དུ་རྒྱས་པར་རིག་པར་བྱའོ། །བ་རྩྭ་ཟོས་པ་དང་། ཆུ་འཐུངས་པའི་རྒྱུ་དང་། རྐྱེན་གྱིས་ཁྲག་ཏུ་འགྱུར་ཏེ། ཁྲག་ལས་འོ་མར་གྱུར་ཏོ། །གལ་ཏེ་རྩྭ་མངར་བ་ཟོས་ན་འོ་མ་ཡང་མངར་རོ། །གལ་ཏེ་རྩྭ་ཁ་བ་ཟོས་ན། འོ་མ་ཡང་ཁ་བར་འགྱུར་རོ། །གངས་ཀྱི་རི་ལ་རྩྭ་སྣུམ་པ་ཞེས་བྱ་བ་ཡོད་དེ། གལ་ཏེ་བས་ཟོས་ན་མར་གྱི་སྙིང་པོ་འབའ་ཞིག་ཏུ་འགྱུར་ཏེ། ཁ་དོག་སྔོན་པོའམ། སེར་པོའམ། དམར་པོའམ། དཀར་པོའམ། ནག་པོར་ནི་མི་མངོན་ནོ། །རྩྭ་གཞན་ཟོས་པའི་རྒྱུ་དང་། རྐྱེན་ལས་འོ་མའི་རོ་དང་། ཁ་དོག་ཀྱང་ཐ་དད་པར་འགྱུར་རོ། །བུས་པ་སོ་སོའི་སྐྱེ་བོ་དག་རིག་པ་དང་། མ་རིག་པའི་ལས་ཀྱི་རྒྱུ་དང་རྐྱེན་གྱི་མཚན་ཉིད་གཉིས་བསྐྱེད་དོ། །གལ་ཏེ་མ་རིག་པ་ལས་བཟློག་ན་རིག་པ་ཞེས་བྱ་སྟེ། དེ་བཞིན་དུ་ཆོས་ཐམས་ཅད་ཀྱང་དགེ་བ་དང་མི་དགེ་བ་ཞེས་བྱ་བ་མཚན་ཉིད་གཉིས་སུ་མེད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་འོ་མའི་ནང་ན་ཞོ་མཆིས་ཞེས་བགྱི་བའི་དོན་ཇི་ལྟ་བུ་ལགས། བཅོམ་ལྡན་འདས་ཅི་སྟེ་འོ་མའི་ནང་ན་ཞོའི་རང་བཞིན་ངེས་པར་མཆིས་ལ་ཤིན་ཏུ་ཕྲ་བས་མི་མཐོང་ན་ཅིའི་སླད་དུ་འོ་མའི་རྐྱེན་གྱིས་ཞོ་འབྱུང་ངོ་ཞེས་གསུངས། ཆོས་ཐོག་མ་ནས་མ་མཆིས་ན་ནི་སྐྱེས་ཞེས་བགྱིར་རུང་ན། སྔ་ནས་མཆིས་པ་ཞིག་ལགས་ན་ཅིའི་སླད་དུ་སྐྱེས་ཞེས་བཀའ་སྩལ། ཅི་སྟེ་འོ་མའི་ནང་ན་ཞོའི་རང་བཞིན་མཆིས་པར་ངེས་ན་རྩི་ཤིང་ཐམས་ཅད་ཀྱི་ནང་ན་ཡང་འོ་མ་མཆིས་པའི་རིགས་སོ། ། དེ་བཞིན་དུ་འོ་མའི་ནང་ན་ཡང་རྩི་ཤིང་མཆིས་པར་འགྱུར་རོ། །ཅི་སྟེ་འོ་མའི་ནང་ན་ངེས་པར་ཞོ་མ་མཆིས་པ་ཞིག་ལགས་ན་ཅིའི་སླད་དུ་འོ་མའི་རྐྱེན་གྱིས་ཞོ་འབྱུང་བར་འགྱུར། གལ་
ཏེ་ཆོས་ཀྱང་སྔ་ནས་མ་མཆིས་ལ། ཕྱིས་སྐྱེས་པ་ཞིག་ལགས་ན་ཅིའི་སླད་དུ་འོ་མའི་ནང་ན་རྩི་ཤིང་མི་སྐྱེ། བཀའ་སྩལ་པ། རིགས་ཀྱི་བུ་གཅིག་ཏུ་ངེས་པར་འོ་མའི་ནང་ན་ཞོ་ཡོད་ཅེའམ། འོ་མའི་ནང་ན་ཞོ་མེད་ཅེས་བྱར་མི་རུང་ལ། དེ་མ་གཏོགས་པ་ལས་བྱུང་ཞེས་བྱར་ཡང་མི་རུང་ངོ་། །གལ་ཏེ་འོ་མའི་ནང་ན་ཞོ་ངེས་པར་ཡོད་དོ། །ཞེས་སྨྲ་ན་ཅིའི་ཕྱིར་དངོས་པོ་དང་རོ་ཐ་དད་པར་འགྱུར་ཏེ། དེ་བས་ན་ངེས་པར་འོ་མའི་ནང་ན་ཞོའི་རང་བཞིན་ཡོད་ཅེས་བྱར་ཡང་མི་རུང་ངོ་། །གལ་ཏེ་འོ་མའི་ནང་ན་ངེས་པར་ཞོ་མེད་དོ། །ཞེས་སྨྲ་ན་ཡང་ཅིའི་ཕྱིར་རི་བོང་གི་རྭ་མི་འབྱུང་། འོ་མའི་ནང་ན་དུག་བླུགས་ན་ཞོ་དེ་འཐུངས་པས་འཆི་བར་འགྱུར་ཏེ། དེ་བས་ན་འོ་མའི་ནང་ན་ངེས་པར་ཞོའི་རང་བཞིན་མེད་ཅེས་བྱར་ཡང་མི་རུང་ངོ་། །ཅི་སྟེ་དེ་མ་གཏོགས་པ་གཞན་ལས་འབྱུང་ཞེས་སྨྲ་ན་ཅིའི་ཕྱིར་ཆུ་ལས་ཞོ་མི་འབྱུང་། དེ་བས་ན་དེ་མ་གཏོགས་པ་གཞན་ལས་ཞོ་འབྱུང་ངོ་། །ཞེས་བྱར་ཡང་མི་རུང་ངོ་། །རིགས་ཀྱི་བུ་བ་རྩྭ་ཟོས་པ་ལས་ཁྲག་ཏུ་འགྱུར། ཁྲག་ལས་འོ་མར་འགྱུར་ཏེ། སེམས་ཅན་གྱི་བསོད་ནམས་ཀྱི་རྒྱུས་གྲུབ་པ་ཡིན་ནོ། །དེ་ལྟར་འོ་མ་དེ་རྩྭ་དང་ཁྲག་ལས་གྱུར་མོད་ཀྱི་གཉིས་ཞེས་བྱར་མི་རུང་སྟེ། རྒྱུ་དང་རྐྱེན་ལས་བྱུང་བ་ཞེས་བྱའོ། །ཞོ་དང་མར་གྱི་སྙིང་པོའི་བར་དུ་ཡང་། དེ་བཞིན་དུ་རྒྱས་པར་རིག་པར་བྱའོ། །དེ་བས་ན་བའི་ཞོ་ཞེས་བྱ་སྟེ། འོ་མར་མི་སྣང་བའི་རྒྱུ་དང་རྐྱེན་གྱིས་ཞོ་ཞེས་གདགས་སོ། །རྒྱུ་དང་རྐྱེན་གང་ལས་གྱུར་ཅེ་ན། དྲོད་དང་སྐྱུར་བ་ལས་གྱུར་ཏེ། དེ་བས་ན་རྒྱུ་དང་རྐྱེན་ལས་བྱུང་བ་ནས་མར་གྱི་སྙིང་པོའི་བར་དུ་དེ་བཞིན་དུ་རྒྱས་པར་རིག་པར་བྱའོ། །དེ་བས་ན་འོ་མའི་ནང་ན་ངེས་པར་ཞོའི་རང་བཞིན་མེད་དེ། གཞན་ལས་བྱུང་ངོ་། །ཞེས་བྱར་མི་རུང་སྟེ་གནས་མེད་དོ། ། རིགས་ཀྱི་བུ་རིག་པ་དང་མ་རིག་པ་ཡང་དེ་དང་འདྲ་སྟེ། ཀུན་ནས་ཉོན་མོངས་པ་དང་ལྷན་ཅིག་པའི་དུས་ན་ནི་མ་རིག་པ་ཞེས་བྱའོ། །ནམ་དགེ་བའི་ཆོས་དང་ལྷན་ཅིག་པ་དེའི་དུས་ན་ནི་རིག་པ་ཞེས་བྱ་སྟེ། དེ་བས་ན་ངས་གསུངས་པ་ལ་མཚན་ཉིད་གཉིས་སུ་མེད་དེ། དེ་བས་
ན་དེའི་རྒྱུ་དེའི་རྐྱེན་གྱིས་སྔར་ངས་འདི་སྐད་ཅེས་གསུངས་སོ། །གངས་ཀྱི་རི་ལ་རྩྭ་སྣུམ་པ་ཞེས་བྱ་བ་ཡོད་དེ་བས་ཟོས་ན། ཐམས་ཅད་མར་གྱི་སྙིང་པོར་འགྱུར་བ་དང་འདྲ་བར་སངས་རྒྱས་ཀྱི་རང་བཞིན་ཡང་དེ་དང་འདྲའོ། །རིགས་ཀྱི་བུ་སེམས་ཅན་བསོད་ནམས་ཆུང་བས་རྩྭ་སྣུམ་པ་ཞེས་བྱ་བ་མི་མཐོང་བ་དང་འདྲ་བར་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། ཀུན་ནས་ཉོན་མོངས་པས་ཁེབས་པས་སེམས་ཅན་རྣམས་ཀྱིས་མི་མཐོང་ངོ་། །འདི་ལྟ་སྟེ་དཔེར་ན་རྒྱ་མཚོའི་རོ་གཅིག་ཏུ་ལན་ཚྭ་བྲོ་བ་ཡིན་ཡང་དེའི་ནང་ན་ཆུའི་རོ་དམ་པ་འོ་མའི་རོ་བྲོ་བ་ཡང་ཡོད་དོ། །དཔེར་ན་གངས་ཀྱི་རི་ནི་ཡོན་ཏན་སྣ་ཚོགས་དང་ལྡན་ཏེ། སྨན་བཟང་པོ་ཤ་སྟག་སྐྱེ་ཡང་དེ་ལ་དུག་ཀྱང་མི་སྐྱེ་བ་མ་ཡིན་ནོ། །སོ་སོའི་སྐྱེ་བོའི་ལུས་ཀྱང་དེ་དང་འདྲ་སྟེ་སྦྲུལ་གདུག་པ་བཞི་དང་བཅས་པ་ཡིན་མོད་ཀྱི། དེ་ལ་སྨན་བཟང་པོ་རྒྱལ་པོ་ལྟ་བུ་ཡང་ཡོད་པ་ནི་འདི་ལྟ་སྟེ། སངས་རྒྱས་ཀྱི་རང་བཞིན་འདུས་བྱས་པའི་ཆོས་མ་ཡིན་པ་སྟེ། ཀུན་ནས་ཉོན་མོངས་པས་བསྒྲིབས་པར་གྱུར་ཏོ། །དེ་ལ་གང་རྒྱལ་རིགས་སམ། བྲམ་ཟེའམ། རྗེའུ་རིགས་སམ། དམངས་རིགས་ཀྱིས་ཉོན་མོངས་པ་ཀུན་བསལ་ན། སངས་རྒྱས་ཀྱི་རང་བཞིན་མཐོང་ཞིང་། བླ་ན་མེད་པའི་བྱང་ཆུབ་ཏུ་མངོན་པར་འཚང་རྒྱ་བར་འགྱུར་རོ། །འདི་ལྟ་སྟེ། དཔེར་ན་སྟེང་གི་ནམ་མཁའ་ལ་སྤྲིན་ཆགས་ཏེ་འབྲུག་གྲགས་ན་བལ་གླང་གི་མཆེ་བ་ཀུན་ལ་མེ་ཏོག་སྐྱེའོ། །ཅི་སྟེ་འབྲུག་མ་གྲགས་ན་མེ་ཏོག་ཀྱང་མི་སྐྱེ་ལ། བཏགས་པ་ཡང་མེད་དོ། །སེམས་ཅན་རྣམས་ཀྱི་སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། གལ་ཏེ་ཀུན་ནས་ཉོན་མོངས་པས་ཁེབས་ན་མཐོང་བར་མི་འགྱུར་རོ། །དེ་བས་ན་སེམས་ཅན་ལ་བདག་མེད་ཅེས་ངས་གསུངས་ཏེ། གང་གིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཐོས་ན་སངས་རྒྱས་ཀྱི་རང་བཞིན་འདི་མཐོང་བར་འགྱུར་ཏེ། བལ་གླང་གི་མཆེ་བའི་མེ་ཏོག་བཞིན་ནོ། །མདོ་སྡེ་གཞན་གྱིས་ཏིང་ངེ་འཛིན་ཐམས་ཅད་ཐོས་ཀྱང་མདོ་སྡེ་འདི་མ་ཐོས་ན་དེ་བཞིན་གཤེགས་པའི་སྙིང་པོ་དམ་པ་མི་མཐོང་སྟེ། ཇི་ལྟར་འབྲུག་མ་གྲགས་ན། བལ་གླང་གི་མཆེ་བའི་མེ་ཏོག་མི་མཐོང་བ་བཞིན་ནོ། །མདོ་སྡེ་འདི་
ཐོས་ན་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ་གསུངས་པའི་སྙིང་པོ་རྟོགས་པར་འགྱུར་རོ། །སངས་རྒྱས་ཀྱི་རང་བཞིན་ཞེས་བྱ་བ་ནི་སྟེང་གི་ནམ་མཁའ་ལ་འབྲུག་གྲགས་ན་བལ་གླང་གི་མཆེ་བའི་མེ་ཏོག་མཐོང་བའི་དཔེའོ། །མདོ་སྡེ་འདི་ཐོས་ན་སེམས་ཅན་ཚད་མེད་པ་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་རྟོགས་པར་འགྱུར་རོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ནི་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཞེས་བྱ་སྟེ། ཆོས་ཀྱི་སྐུ་བསྐྱེད་པར་འགྱུར་བ་ནི་ཇི་ལྟར་འབྲུག་གྲགས་ན་བལ་གླང་གི་མཆེ་བའི་མེ་ཏོག་སྐྱེས་པ་བཞིན་ནོ། །དེ་ལྟ་བུའི་དོན་ཆེན་པོ་འབྱུང་ཞིང་སྐྱེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུའམ་རིགས་ཀྱི་བུ་མོ་གང་ཞིག་གིས་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་ཤིན་ཏུ་ནན་ཏན་བྱེད་ན་དེ་ནི་སངས་རྒྱས་ཀྱི་དྲིན་ལ་ལན་གློན་པ་ཡིན་ཏེ། སངས་རྒྱས་ཀྱི་ཉེ་གནས་ཡང་དག་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །ཤིན་ཏུ་ངོ་མཚར་ཏོ། །བཅོམ་ལྡན་འདས་སངས་རྒྱས་ཀྱི་རང་བཞིན་ཞེས་བགྱི་བ་ནི་ཤིན་ཏུ་ཟབ་ཅིང་ཤིན་ཏུ་ཕྲ་བས་མཐོང་བར་ཡང་དཀའ་ལ་འཇུག་པར་ཡང་དཀའ་སྟེ། ཉན་ཐོས་དང་རང་སངས་རྒྱས་ཀྱིས་རྟོགས་པར་འགྱུར་བ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་སྨྲས་པ་བཞིན་ནོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །སངས་རྒྱས་ཀྱི་རང་བཞིན་ཞེས་བགྱི་བ་ཇི་ལྟ་བུར་ཟབ་ཅིང་མཐོང་བར་ཡང་དཀའ་ལ་འཇུག་པར་ཡང་དཀའ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟ་སྟེ། དཔེར་ན་གང་ཟག་དམུས་ལོང་ཞིག་མིག་གསོ་བའི་ཕྱིར་སྨན་པ་མཁས་པའི་གན་དུ་སོང་ངོ་། །སྨན་པས་གསེར་གྱི་གྲི་ཐོགས་ཏེ་མིག་གི་རབ་རིབ་ཀྱི་བྲིས་མ་བཅད་ནས་མཛུབ་མོ་གཅིག་བསྒྲེང་སྟེ་བསྟན་ན་ལོང་བ་དེས་མི་མཐོང་ངོ་ཞེས་ཟེར་རོ། །མཛུབ་མོ་གཉིས་སམ་གསུམ་བསྟན་ན་གདོད་ཅུང་ཟད་ཅིག་མཐོང་ངོ་ཞེས་ཟེར་རོ། །རིགས་ཀྱི་བུ་ཡོངས་སུ་
མྱ་ངན་ལས་འདས་པ་ཆེན་པོའི་མདོ་སྡེ་འདི་མ་གསུངས་ན་བྱང་ཆུབ་སེམས་དཔའ་ཚད་མེད་པ་ཕ་རོལ་ཏུ་ཕྱིན་པ་ཡོངས་སུ་རྫོགས་པ་ནས་ས་བཅུའི་བར་དུ་གནས་ཀྱང་སངས་རྒྱས་ཀྱི་རང་བཞིན་མི་མཐོང་བ་ནི་དེ་དང་འདྲ་སྟེ། དེ་བཞིན་གཤེགས་པས་གསུངས་ནས་ཅུང་ཟད་ཅིག་མཐོང་བར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་དག་དེ་ལྟར་མཐོང་བར་གྱུར་ནས་འདི་སྐད་ཅེས་སྨྲའོ། །ཤིན་ཏུ་ངོ་མཚར་ཏོ། །བཅོམ་ལྡན་འདས་བདག་ཅག་ནི་བསྐལ་པ་གྲངས་མེད་པའི་བར་དུ་འཁོར་བར་འཁོར་ཏེ། བདག་མེད་པས་ཡོངས་སུ་བསླུས་པར་གྱུར་ཏོ། །རིགས་ཀྱི་བུ་དེ་ལྟར་བྱང་ཆུབ་སེམས་དཔའ་ས་བཅུ་ལ་གནས་པས་ཀྱང་སངས་རྒྱས་ཀྱི་རང་བཞིན་གསལ་བར་མི་མཐོང་ན། ཉན་ཐོས་དང་རང་སངས་རྒྱས་ཀྱིས་མི་མཐོང་བ་ལྟ་སྨོས་ཀྱང་ཅི་དགོས། རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྟེང་གི་ནམ་མཁའ་མཐོན་པོ་ལ་བྱ་ལྡིང་བ་ན། བྱའམ་ནམ་མཁའ་གང་ཡིན་པ་ལེགས་པར་མི་རྟོགས་ཏེ་བརྟགས་ན་གདོད་མངོན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་དེ་བཞིན་གཤེགས་པའི་སྙིང་པོ་ཕྱོགས་ཙམ་ཞིག་རྟོགས་ཤིང་། མཐོང་བ་ཡང་དེ་དང་འདྲ་ན། ཉན་ཐོས་དང་རང་སངས་རྒྱས་ཀྱིས་རྟོགས་ཤིང་མཐོང་བ་ལྟ་ཅི་སྨོས། རིགས་ཀྱི་བུ་དཔེར་ན་ཆང་གིས་ར་རོ་བ་ལམ་དུ་འགྲོ་ན་ལམ་བདེ་བླག་ཏུ་ལེགས་པར་མི་མཐོང་བ་བཞིན་དུ་ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་དང་འདྲ་སྟེ། དེ་བཞིན་གཤེགས་པའི་སྙིང་པོ་ཕྱོགས་ཙམ་ཞིག་རྟོགས་ཤིང་མཐོང་ངོ་། །རིགས་ཀྱི་བུ་དཔེར་ན་མི་ཞིག་འབྲོག་དགོན་པར་སོང་བ་ལས་སྐོམ་གྱིས་གདུངས་ཏེ། ཆུ་ཚོལ་བ་ལས་ཤིང་གི་སྟེང་ན་བྱ་བཞད་འདུག་པར་མཐོང་ན་མི་དེ་སྐོམ་གྱིས་གདུངས་པས་ཤིང་ངམ་ཆུ་ཡིན་པ་མི་རྟོགས་སོ། །ལེགས་པར་བརྟགས་ན་གདོད་བྱ་བཞད་དང་ཤིང་ཡིན་པར་ཤེས་སོ། །རིགས་ཀྱི་བུ་ས་བཅུ་ལ་གནས་པའི་བྱང་ཆུབ་སེམས་དཔས་དེ་བཞིན་གཤེགས་པའི་སྙིང་པོ་ཕྱོགས་ཙམ་ཞིག་མཐོང་ཞིང་རྟོགས་པ་ཡང་དེ་དང་འདྲ་སྟེ། གསལ་བར་བདེ་བླག་ཏུ་རྟོགས་པ་ནི་མ་ཡིན་ནོ། །རིགས་ཀྱི་བུ་དཔེར་ན་རྒྱ་མཚོར་ཞུགས་པ་དག་དཔག་ཚད་བརྒྱའམ། སྟོང་ངམ། ཚད་མེད་པའི་ཕ་རོལ་ནས་གྲུ་ཆེན་
པོའི་ཡང་ཏོག་གམ། ཁང་པ་བརྩེགས་མ་མཐོང་ན་དེ་དག་འདི་སྙམ་དུ་ཡོང་ཏོག་གམ། ནམ་མཁའ་གང་ཡིན་སྙམ་དུ་སེམས་ཏེ། ཡུན་རིང་དུ་བརྟགས་ན་གདོད་ངེས་པར་ཡང་ཏོག་གམ། ཁང་པ་བརྩེགས་མར་རྟོགས་སོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། བདེ་བླག་ཏུ་གསལ་བ་ནི་མ་ཡིན་ནོ། །རིགས་ཀྱི་བུ་དཔེར་ན་རྒྱལ་བུ་ཤིན་ཏུ་ཞན་པ་ཞིག་མཚན་མོ་མཚན་ཡལ་ནངས་ཀྱི་བར་དུ་རྩེ་རྩེ་ན་ནང་པར་དུ་ཐམས་ཅད་བདེ་བླག་ཏུ་གསལ་བར་མི་རྟོགས་སོ། །ས་བཅུ་ལ་གནས་པའི་བྱང་ཆུབ་སེམས་དཔའ་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། གསལ་བར་ཡང་མི་རྟོགས་སོ། །རིགས་ཀྱི་བུ་དཔེར་ན་བློན་པོ་ཞིག་རྒྱལ་པོས་མངགས་ན་མཚན་མོ་མུན་པའི་ནང་དུ་སོང་སོང་བ་ལས་གློག་གི་འོད་ཀྱིས་གནག་གི་ཁྱུ་གཅིག་མཐོང་ནས། དེ་འདི་སྙམ་དུ་གནག་གམ། ནགས་ཚལ་ལམ། སྤྲིན་ནམ། ཁང་ཁྱིམ་གང་ཡིན་སྙམ་སེམས་སོ། །མི་དེས་གནག་ཡིན་པར་སེམས་མོད་ཀྱི། ངེས་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་དང་འདྲ་སྟེ། བདག་གི་ལུས་ལ་དེ་བཞིན་གཤེགས་པའི་སྙིང་པོ་ལེགས་པར་མི་རྟོགས་སོ། །རིགས་ཀྱི་བུ་གཞན་ཡང་དཔེར་ན་ཚུལ་ཁྲིམས་ལ་གནས་པའི་དགེ་སློང་དག་སྲིན་བུ་མེད་པའི་ཆུ་ལ་རྟོག་ན་ཆུའི་ནང་ན་འགུལ་བ་སྲིན་བུ་ཡིན་ནམ། རྡུལ་ཡིན་པ་བདེ་བླག་ཏུ་མི་རྟོགས་སོ། །ཡུན་རིང་དུ་བརྟགས་ན་རྡུལ་ཡིན་པར་ཤེས་མོད་ཀྱི། ངེས་པར་རྟོགས་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔའ་ཡང་དེ་དང་འདྲ་སྟེ། བདག་གི་ལུས་ལ་དེ་བཞིན་གཤེགས་པའི་སྙིང་པོ་བདེ་བླག་ཏུ་གསལ་བར་མི་རྟོགས་སོ། །རིགས་ཀྱི་བུ་དཔེར་ན་ནམ་རྨུས་ཏེ། ནམ་མཁའ་མ་དག་ན་རྒྱང་མ་ནས་བྱིས་པ་ཆུང་ངུ་མཐོང་ནས་ཕྱུགས་སམ། བྱའམ། མིའམ་ཅི་ཡིན་པ་མི་རྟོགས་ཏེ། ཡུན་རིང་དུ་བརྟགས་ན་བྱིས་པ་ཡིན་པར་མཐོང་ཡང་གསལ་བར་རྟོགས་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་
པའི་སྙིང་པོ་མཐོང་བ་ཡང་དེ་དང་འདྲ་སྟེ། གསལ་བར་མི་རྟོགས་སོ། །རིགས་ཀྱི་བུ་དཔེར་ན་མི་ཞིག་མཚན་མོ་མུན་པའི་ནང་ན་བྱང་ཆུབ་སེམས་དཔའི་སྐུ་གཟུགས་རི་མོ་ལ་བྲིས་པ་ཞིག་མཐོང་ན་དེ་འདི་སྙམ་དུ་འདི་བྱང་ཆུབ་སེམས་དཔའི་གཟུགས་སམ། དབང་ཕྱུག་གི་གཟུགས་སམ། ཚངས་པ་ཆེན་པོའི་གཟུགས་སམ། གོས་ཁ་དོག་བསྒྱུར་བ་ཡིན་ནམ་སྙམ་སེམས་ཏེ། དེས་ཡུན་རིང་དུ་བརྟགས་ན་བྱང་ཆུབ་སེམས་དཔའི་གཟུགས་ཡིན་པར་ཤེས་མོད་ཀྱི། གསལ་བར་རྟོགས་པ་ནི་མ་ཡིན་ནོ། །ས་བཅུ་ལ་གནས་པའི་བྱང་ཆུབ་སེམས་དཔས་བདག་གི་ལུས་ལ་དེ་བཞིན་གཤེགས་པའི་སྙིང་པོ་མཐོང་བ་ཡང་དེ་དང་འདྲ་སྟེ། གསལ་བར་རྟོགས་པ་ནི་མ་ཡིན་ནོ། །རིགས་ཀྱི་བུ་སངས་རྒྱས་ཀྱི་རང་བཞིན་ཞེས་བྱ་བ་ནི་དེ་ལྟར་ཤིན་ཏུ་ཟབ་སྟེ། མཐོང་ཞིང་རྟོགས་པར་དཀའ་བས་སངས་རྒྱས་ཉག་གཅིག་གིས་རྟོགས་ཀྱི། ཉན་ཐོས་དང་རང་སངས་རྒྱས་ཀྱིས་རྟོགས་པར་འགྱུར་བ་མ་ཡིན་ནོ། །རིགས་ཀྱི་བུ་མཁས་པ་ཤེས་རབ་ཅན་གྱིས་དེ་བཞིན་གཤེགས་པའི་སྙིང་པོ་ལ་དེ་ལྟ་བུར་བརྟག་ཅིང་བྱེ་བྲག་དབྱེ་བར་བྱའོ། །དེ་ནས་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་ལྟར་སངས་རྒྱས་ཀྱི་རང་བཞིན་དེ་ཤིན་ཏུ་ཟབ་ཅིང་མཐོང་བར་དཀའ་ན། ཤའི་མིག་ཅན་དག་གིས་ཇི་ལྟར་མཐོང་བར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། རིགས་ཀྱི་བུ་དཔེར་ན་འདུ་ཤེས་མེད་འདུ་ཤེས་མེད་མིན་གྱི་ལྷ་དག་ཀྱང་ཐེག་པ་གཉིས་པོས་མི་རྟོགས་མོད་ཀྱི། མདོ་སྡེའི་ལུང་གི་རྗེས་སུ་ཡིད་ཆེས་པས་རྟོགས་སོ། །རིགས་ཀྱི་བུ་ཉན་ཐོས་དང་རང་སངས་རྒྱས་ཀྱིས་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལ་བརྟེན་ཏེ། བདག་གི་ལུས་ལ་དེ་བཞིན་གཤེགས་པའི་སྙིང་པོ་ཡོད་པར་རྟོགས་པ་ཡང་དེ་དང་འདྲའོ། །རིགས་ཀྱི་བུ་དེ་བས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྤྱོད་པའི་ནན་ཏན་ལ་བརྩོན་འགྲུས་བྱའོ། །རིགས་ཀྱི་བུ་སངས་རྒྱས་ཀྱི་རང་བཞིན་ནི་སངས་རྒྱས་ཉག་གཅིག་གིས་མཁྱེན་གྱི། ཉན་ཐོས་དང་རང་སངས་
རྒྱས་ཀྱིས་ནི་ཤེས་པ་མ་ཡིན་ནོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། འཕགས་པ་མ་ཡིན་པ་བྱིས་པ་མ་རབས་ནི་སྲོག་ཆགས་ཐམས་ཅད་ལ་བདག་མཆིས་པར་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། དཔེར་ན་རྒྱལ་བུ་ཞིག་དང་མི་དབུལ་པོ་ཞིག་མཛའ་བོར་འཐམས་ཏེ། གཅིག་གི་ཁྱིམ་དུ་གཅིག་འགྲོའོ། །དེའི་ཚེ་ན་མི་དབུལ་པོ་དེས་རྒྱལ་བུ་དེ་ལ་རལ་གྲི་ཤིན་ཏུ་བཟང་པོ་གཅིག་ཡོད་པ་མཐོང་ནས་ཆགས་པའི་སེམས་སྐྱེས་སོ། །ཕྱིས་རྒྱལ་བུ་དེ་རལ་གྲི་ཐོགས་ཏེ་ཡུལ་གཞན་དུ་སོང་ནས་མི་དབུལ་པོ་དེ་ཡང་ཕྱིས་གཞན་ཞིག་གི་ཁྱིམ་ན་ཉལ་བ་ལས་གཉིད་ལོག་ན་ཁ་ན་རལ་གྲི་རལ་གྲི་ཞེས་བརྡོལ་ལོ། །དེའི་གན་ན་འདུག་པའི་མིས་དེ་སྐད་ཅེས་བརྡོལ་བ་ཐོས་ནས་བཟུང་སྟེ་རྒྱལ་པོ་ལ་ཕུལ་ལོ། །དེ་ནས་རྒྱལ་པོས་མི་དེ་ལ་འདི་སྐད་དུ་ཁྱོད་ཀྱི་ཁ་ནས་རལ་གྲི་རལ་གྲི་ཞེས་ཟེར་བ་ག་རེ་ཞེས་བཀའ་སྩལ་ཏོ། །མི་དེས་རྒྱུས་ཞིབ་ཏུ་རྒྱས་པར་རྒྱལ་པོ་ལ་གསོལ་ནས་གལ་ཏེ་རྒྱལ་པོས་བདག་གི་ལུས་དང་ཡན་ལག་དང་ཉིང་ལག་ཀུན་དུམ་བུ་དུམ་བུར་གཏུབས་ཀྱང་རལ་གྲི་ནི་བདག་ལ་མ་མཆིས་ཏེ། བདག་སྔོན་རྒྱལ་བུ་ཆེ་གེ་མོ་ཞིག་དང་མཛའ་བས་རྒྱལ་བུ་དེ་ལ་རལ་གྲི་བཟང་པོ་ཅིག་མཆིས་པར་མིག་གིས་ནི་མཐོང་གི། ལག་པས་རེག་པའི་ཐུག་ཀྱང་མ་ཐུབ་ན་ཆེད་དུ་བླངས་པ་ལྟ་ཅི་སྨོས། རྒྱལ་པོ་དེས་བཀའ་སྩལ་པ། ཁྱོད་ཀྱིས་རལ་གྲི་དེ་མཐོང་ཡང་དག་ན་རལ་གྲི་དེའི་དབྱིབས་ཅི་འདྲ། གསོལ་པ། རྒྱལ་པོ་ཆེན་པོ་བདག་གིས་མཐོང་བ་ནི་ར་རུ་འདྲ་བ་ཞིག་མཐོང་ངོ་། །རྒྱལ་པོས་དེ་སྐད་ཅེས་སྨྲས་པ་ཐོས་ནས། དགོད་དེ་ཁྱོད་མྱ་ངན་མ་བྱེད་པར་གར་དགའ་བར་སོང་ཞིག །ཁོ་བོའི་མཛོད་ན་རལ་གྲི་དེ་འདྲ་བ་མི་སྲིད་ན། ཁྱོད་ཀྱི་རྒྱལ་བུ་དེ་ལ་མཐོང་བ་ལྟ་སྨོས་ཀྱང་ཅི་དགོས། དེ་ནས་རྒྱལ་པོ་དེས་བློན་པོ་རྣམས་ལ་བཀའ་སྩལ་པ། ཁྱེད་ཀྱིས་རལ་གྲི་དེ་འདྲ་བ་ཞིག་མཐོང་ངམ། ཞེས་དྲིས་ནས། དེ་རིང་པོ་མ་ལོན་པར་ཚེ་འདས་སོ། །དེ་ནས་རྒྱལ་པོ་དེའི་རྒྱལ་ཚབ་རྒྱལ་པོའི་དབང་བསྐུར་ནས་རྒྱལ་པོ་དེས་ཀྱང་བློན་པོ་རྣམས་ལ་ཡང་འདི་སྐད་དུ་ཁྱེད་ཀྱིས་སྔོན་མཛོད་ཀྱི་ནང་ན་རལ་གྲི་དེ་འདྲ་བ་ཞིག་མཐོང་ངམ། ཞེས་
དྲིས་སོ། །བློན་པོ་རྣམས་ཀྱིས་སྨྲས་པ། བདག་ཅག་གིས་སྔོན་མཐོང་ངོ་ཞེས་གསོལ་ཏོ། །ཡང་དྲིས་པ་ཁྱེད་ཀྱིས་མཐོང་ན་རལ་གྲི་དེའི་དབྱིབས་ཅི་འདྲ་བ་ཞིག་མཐོང་། གསོལ་པ། རྒྱལ་པོ་ཆེན་པོ་བདག་ཅག་གིས་ར་རུ་འདྲ་བ་ཞིག་མཐོང་ངོ་། །རྒྱལ་པོས་སྨྲས་པ། ཁོ་བོའི་མཛོད་ཀྱི་ནང་ན་རལ་གྲི་དེ་འདྲ་བ་ཡོད་མི་སྲིད་དོ། །དེ་བཞིན་དུ་རྒྱལ་པོ་རབས་བཞིའི་བར་དུ་རལ་གྲི་དེ་རྨས་ཀྱང་ཁུངས་མ་ཕྱིན་ཏོ། །ཕྱིས་ལོ་མང་ཞིག་ལོན་པའི་འོག་ཏུ་སྔོན་བྲོས་པའི་རྒྱལ་བུ་དེ་ཡུལ་གཞན་ནས་ཕྱིར་ལོག་ནས་རྒྱལ་པོར་ཞུགས་ཏེ་རྒྱལ་པོའི་དབང་ཐོབ་ནས་དེས་ཀྱང་བློན་པོ་རྣམས་ལ་བཀའ་སྩལ་པ། ཁྱེད་ཀྱིས་རལ་གྲི་དེ་མཐོང་ངམ། བློན་པོ་རྣམས་ཀྱིས་གསོལ་པ། རྒྱལ་པོ་ཆེན་པོ་བདག་ཅག་གིས་མཐོང་ངོ་། །སྨྲས་པ། ཁྱེད་ཀྱིས་ཅི་སྟེ་མཐོང་ན་རལ་གྲི་དེའི་དབྱིབས་ཅི་འདྲ། བློན་པོ་ཁ་ཅིག་གིས་གསོལ་པ། ལྷའི་སྲས་ཤིན་ཏུ་གསལ་ཏེ། མེ་ཏོག་ཨུད་པ་ལ་འདྲའོ། །ཁ་ཅིག་གིས་ནི་ར་རུ་འདྲའོ་ཞེས་གསོལ་ཏོ། །ཁ་ཅིག་གིས་ནི་ཁ་དོག་དམར་ཁྱད་མེའི་ཕུང་པོ་འདྲའོ་ཞེས་གསོལ་ཏོ། །ཁ་ཅིག་གིས་ནི་སྦྲུལ་ནག་པོ་འདྲའོ་ཞེས་གསོལ་ཏོ། །དེའི་ཚེ་རྒྱལ་པོ་དེ་བགད་ནས་བློན་པོ་རྣམས་ལ་ཁྱེད་ཀྱིས་ངའི་རལ་གྲི་ཡང་དག་པ་མ་མཐོང་ངོ་ཞེས་བཀའ་སྩལ་ཏོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དེ་དང་འདྲ་སྟེ། འཇིག་རྟེན་དུ་བྱུང་ནས་བདག་ཅེས་བྱ་བའི་མཚན་ཉིད་ཡང་དག་པ་བསྟན་ཏེ། བསྟན་མ་ཐག་ཏུ་སོང་བ་ནི་དཔེར་ན་རྒྱལ་བུ་རལ་གྲི་བཟང་པོ་ཐོགས་ཏེ་ཡུལ་གཞན་དུ་བྲོས་པ་དང་མཚུངས་སོ། །བུས་པ་གླེན་པ་དག་ཐམས་ཅད་ལ་བདག་ཡོད་དོ། །བདག་ཡོད་དོ་ཞེས་སྨྲ་བ་ནི་མི་དབུལ་པོ་གཞན་གྱི་ཁྱིམ་ན་གཉིད་ལོག་པ་ལས་རལ་གྲི་རལ་གྲི་ཞེས་བརྡོལ་བ་དང་མཚུངས་སོ། །ཉན་ཐོས་དང་རང་སངས་རྒྱས་ཀྱིས་སེམས་ཅན་རྣམས་ལ་བདག་ཅེས་བྱ་བའི་མཚན་ཉིད་ཅི་འདྲ་བ་དྲིས་ན། དེ་ལ་ཁ་ཅིག་ནི་བདག་ཏུ་ལྟ་བ་དང་བདག་མེད་ཅེས་བྱ་བའི་མཚན་ཉིད་མཐེ་བོ་ཙམ་ཞིག་ཡོད་དོ་ཞེས་སྨྲའོ། །ཁ་ཅིག་ནི་ཁྲེའི་འབྲུམ་བུ་ཙམ་ཞིག་ཡོད་དོ་ཞེས་སྨྲའོ། །ཁ་ཅིག་ནི་ཏིལ་གྱི་འབྲུ་ཙམ་ཞིག་ཡོད་དོ། །ཞེས་སྨྲའོ། །ཁ་ཅིག་
ནི་བདག་གི་མཚན་ཉིད་ཅེས་བྱ་བ་སེམས་ལ་གནས་ཏེ། ཉི་མ་ལྟ་བུར་འབར་ཞིང་གསལ་ལོ་ཞེས་སྨྲ་སྟེ། དེ་ལྟར་སོ་སོའི་སྐྱེ་བོ་དག་བདག་ཅེས་བྱ་བའི་མཚན་ཉིད་མི་ཤེས་པ་ཡང་། ཇི་ལྟར་བློན་པོ་རྣམས་ཀྱིས་རལ་གྲི་བཟང་པོ་དེ་མི་ཤེས་པ་བཞིན་ནོ། །བྱང་ཆུབ་སེམས་དཔས་དེ་ལྟར་བདག་ཅེས་བྱ་བའི་མཚན་ཉིད་བསྟན་པ་བུས་པ་གླེན་པ་དག་གིས་མི་ཤེས་པས་རྣམ་པ་སྣ་ཚོགས་བྱེ་བྲག་ཕྱེ་སྟེ། བདག་ཅེས་བྱ་བའི་མཚན་ཉིད་དུ་འཛིན་པ་ནི་རལ་གྲིའི་དབྱིབས་ཅི་འདྲ་བ་ཞེས་དྲིས་ན་ར་རུ་འདྲའོ་ཞེས་སྨྲ་བ་དང་མཚུངས་སོ། །དེ་ལྟར་བུས་པ་མ་རབས་དག་ནི་རྒྱུན་མི་འཆད་པར་ངན་པར་ལྟ་བ་བསྐྱེད་དེ། དེ་ལྟར་ངན་པར་ལྟ་བ་བཅད་པའི་ཕྱིར་དེ་བཞིན་གཤེགས་པས་བདག་མེད་པ་བསྟན་པ་ནི། དཔེར་ན་རྒྱལ་བུ་དག་བློན་པོ་རྣམས་ལ་ངའི་མཛོད་ན་དེ་འདྲ་བའི་རལ་གྲི་མེད་དོ་ཞེས་སྨྲ་བ་དང་མཚུངས་སོ། །རིགས་ཀྱི་བུ་དེང་དེ་བཞིན་གཤེགས་པས་བདག་ཅེས་བྱ་བ་བསྟན་པ་ནི་སངས་རྒྱས་ཀྱི་རང་བཞིན་ཞེས་བྱའོ། །དེ་ལྟར་སངས་རྒྱས་ཀྱི་རང་བཞིན་དེ་ནི་སངས་རྒྱས་ཀྱིས་བསྟན་པའི་ཆོས་ཀྱི་ནང་ན་རལ་གྲི་ཤིན་ཏུ་གསལ་ཞིང་དག་པ་དང་མཚུངས་སོ། །རིགས་ཀྱི་བུ་དེ་ལ་བུས་པ་མ་རབས་གང་དེ་སྐད་དུ་ལེགས་པར་སྨྲ་བ་ནི་བླ་ན་མེད་པའི་སངས་རྒྱས་ཀྱི་ཆོས་ལ་འབབ་པ་མ་ཡིན་ནོ། །དེ་ལ་གང་ཞིག་ལེགས་པར་རྣམ་པར་ཕྱེ་སྟེ། བསྟན་པའི་རྗེས་སུ་ཞུགས་ན་དེ་ནི་བྱང་ཆུབ་སེམས་དཔའི་གཟུགས་ལྟ་བུར་རིག་པར་བྱའོ། །རིགས་ཀྱི་བུ་ཇི་ཙམ་དུ་རྣམ་པ་ཐ་དད་དུ་སྨྲ་བ་རིག་སྔགས་དང་། ཚིག་ལས་རྣམ་པར་རྒྱལ་བའི་གཙུག་ལག་དང་། ཡི་གེ་ལ་སོགས་པ་ཐམས་ཅད་ཀྱང་སངས་རྒྱས་ཀྱིས་བསྟན་པ་ཡིན་གྱི། མུ་སྟེགས་ཅན་གྱིས་བསྟན་པ་མ་ཡིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །དེ་བཞིན་གཤེགས་པས་ཇི་ལྟ་བུར་ཡི་གེའི་མ་མོ་རྣམས་བསྟན་པ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྔར་ཡི་གེ་ཕྱེད་ཀྱི་མ་མོ་བསྟན་པས་གཙུག་ལག་དང་། རིག་སྔགས་དང་། ཚིག་ལས་
རྣམ་པར་རྒྱལ་བ་དང་། སྒྲ་སྐད་ལ་སོགས་པ་འཛིན་པར་འགྱུར་ཏེ། བྱིས་པ་མ་རབས་དག་ཡི་གེའི་མ་མོ་བསླབས་པས་དེའི་འོག་ཏུ་ཆོས་དང་ཆོས་མ་ཡིན་པ་ལ་སོགས་པ་ཤེས་པར་འགྱུར་རོ། །ཡང་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་གསོལ་པ། ཡི་གེ་ཞེས་བགྱི་བའི་དོན་ཇི་ལྟ་བུ་ལགས། བཀའ་སྩལ་པ། རིགས་ཀྱི་བུ་ཡི་གེའི་འབྲུ་བཅུ་བཞི་པོ་ནི་ཡི་གེའི་དོན་ཅེས་བྱའོ། །ཡི་གེ་ཞེས་བྱ་བ་ནི་མྱ་ངན་ལས་འདས་པ་སྟེ། རྟག་པས་ན་མི་ཟག་པའོ། །གང་མི་ཟག་པ་དེ་ནི་མི་ཟད་པའོ། །མི་ཟད་པ་ཞེས་བྱ་བ་དེ་ནི་དེ་བཞིན་གཤེགས་པའི་རྡོ་རྗེའི་སྐུའོ། །དེ་བས་ན་ཡི་གེའི་འབྲུ་བཅུ་བཞི་པོ་དེ་ནི་ཡི་གེའི་མ་མོའོ། །དེ་ལ་ཨ་ཞེས་བྱ་བ་དེ་ནི་མི་འཇིག་པའོ། །གང་མི་འཇིག་པ་ནི་དཀོན་མཆོག་གསུམ་ཞེས་བྱ་སྟེ་རྡོ་རྗེ་ལྟ་བུའོ། །གཞན་ཡང་ཨ་ཞེས་བྱ་བ་ནི་མི་ཟག་པའོ། །གང་མི་ཟག་པ་ནི་དེ་བཞིན་གཤེགས་པ་ཞེས་བྱ་སྟེ། དེ་བཞིན་གཤེགས་པ་ནི་བུ་ག་དགུ་ནས་ཅི་ཡང་མི་ཟག་པས་དེ་བས་ན་ཟག་པ་མེད་པ་ཞེས་བྱའོ། །བུ་ག་དགུ་མེད་པས་མི་ཟག་པ་སྟེ། མི་ཟག་པ་ནི་རྟག་པའོ། །རྟག་པ་ནི་དེ་བཞིན་གཤེགས་པ་སྟེ། དེ་བཞིན་གཤེགས་པ་ནི་འདུས་མ་བྱས་པས་མི་ཟག་པའོ། །གཞན་ཡང་ཨ་ཞེས་བྱ་བ་ནི་ཡོན་ཏན་གྱི་ཚོགས་ཞེས་བྱའོ། །ཡོན་ཏན་གྱི་ཚོགས་ནི་དཀོན་མཆོག་གསུམ་ཡིན་པས་དེའི་ཕྱིར་ཨ་ཞེས་བྱའོ། །དེ་ལ་ཨ་ཞེས་བྱ་བ་ནི་སློབ་དཔོན་ཞེས་བྱ་བའི་དོན་ཏོ། །སློབ་དཔོན་ཞེས་བྱ་བའི་དོན་ཇི་ལྟ་བུ་ཞེ་ན། འཇིག་རྟེན་ན་འཕགས་པ་ཞེས་གྲགས་པའོ། །འཕགས་པ་ཞེས་བྱ་བ་དེ་ཡང་ཇི་ལྟ་བུ་ཞེ་ན། འཕགས་པ་ནི་མ་ཆགས་པ། འདོད་པ་ཉུང་བ། ཆོག་ཤེས་པ། ཡོངས་སུ་དག་པ། སྲིད་པ་གསུམ་དུ་འཁོར་བའི་སེམས་ཅན་སྒྲོལ་བ་ནི་འཕགས་པ་ཞེས་བྱའོ། །གཞན་ཡང་ཨ་ཞེས་བྱ་བ་ནི་བཅས་པ་སྟེ། ཚུལ་ཁྲིམས་ལྷག་པར་བསྲུང་ཞིང་སྤྱོད་ལམ་གྱི་རྗེས་སུ་གཞོལ་བའོ། །གཞན་ཡང་ཨ་ཞེས་བྱ་བ་ནི་འཕགས་པའི་རྗེས་སུ་སྤྱོད་ལམ་འགྲོ་བ་དང་། སྡོད་པ་དང་། བསྐྱོད་པ་དང་། གཡོ་བ་དང་།
དཀོན་མཆོག་གསུམ་དང་། ཕ་མ་ལ་སྲི་ཞུ་དང་། མཆོད་པ་དང་། བཀུར་སྟི་དང་། རིམ་གྲོ་དང་། ཕྱག་བྱེད་པ་སློབ་ཅིང་ཐེག་པ་ཆེན་པོ་ལ་ཡང་སློབ་པའོ། །རིགས་ཀྱི་བུ་ཁྱེད་ལ་སོགས་པ་ཚུལ་ཁྲིམས་སྡོམ་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འཕགས་པ་ཞེས་བྱའོ། །གཞན་ཡང་ཨཱ་ཞེས་བྱ་བ་ནི་སྟོན་ཅིང་འཆོས་པ་སྟེ། ཇི་ལྟར་དེ་བཞིན་གཤེགས་པས་འདི་དག་ནི་བྱ་བའི་རིགས་པའོ། །འདི་དག་ནི་བྱ་བའི་མི་རིགས་སོ་ཞེས་བསྟན་པ་ཆོས་མ་ཡིན་པའི་རྣམས་མི་བྱེད་པ་ནི་འཕགས་པ་ཞེས་བྱ་སྟེ། དེ་བས་ན་ཨཱ་ཞེས་བྱའོ། །དེ་ལ་ཨི་ཞེས་བྱ་བ་ནི་སངས་རྒྱས་ཀྱི་ཆོས་ཚངས་པར་སྤྱོད་པ་རྒྱ་ཆེན་པོ་ཟླ་བ་རྒྱས་པ་ལྟར་གསལ་ཞིང་དྲི་མ་མེད་པ་སྟེ། ཁྱེད་ལ་སོགས་པ་འདི་དག་ནི་བྱ་བའི་རིགས་པའོ། །འདི་དག་ནི་བྱ་བའི་མི་རིགས་པའོ། །འདི་ནི་དོན་ནོ། །འདི་ནི་དོན་མ་ཡིན་ནོ། །འདི་ནི་སངས་རྒྱས་ཀྱིས་གསུངས་པའོ། །འདི་ནི་བདུད་ཀྱིས་བསྟན་པའོ་ཞེས་བཤད་པ་སྟེ། དེ་བས་ན་ཨི་ཞེས་བྱའོ། །དེ་ལ་ཨཱི་ཞེས་བྱ་བ་ནི་སངས་རྒྱས་ཀྱི་ཆོས་ཤིན་ཏུ་ཟབ་ཅིང་ཕྲ་བ། ཆུད་དཀའ་བ། ལྷ་དབང་སྒྱུར་ཆེན་པོའམ། ཚངས་པ་ཆེན་པོ་ལྟར་ཆོས་ཀྱིས་དབང་སྒྱུར་བའོ། །གང་གཟུངས་སུ་འཛིན་པ་ནི་ཆོས་བསྲུང་བ་ཞེས་བྱའོ། །གཞན་ཡང་དབང་སྒྱུར་བ་ནི་འཇིག་རྟེན་གྱི་མགོན་པོ་བཞི་སྟེ། དབང་སྒྱུར་བ་བཞི་པོས་ནི་ཡོངས་སུ་མྱ་ངན་ལས་འདས་པ་ཆེན་པོའི་མདོ་འདི་སྲུང་ཞིང་འཛིན་ལ་རྒྱས་པར་སྟོན་ཅིང་འཆད་པའི་དབང་བྱེད་དོ། །གཞན་ཡང་ཨཱི་ཞེས་བྱ་བ་ནི་སོ་སོའི་སྐྱེ་བོ་ལ་ཆོས་སྟོན་པའི་དབང་བྱེད་པའོ། །གཞན་ཡང་ཨཱི་ཞེས་བྱ་བ་ནི་གང་དབང་དུ་འགྱུར་བའི་ཕྱིར་བཤད་པའོ། །དེ་ཡང་གང་ཞེ་ན། འདི་ལྟ་སྟེ། ཤིན་ཏུ་རྒྱས་པའི་མདོ་སྡེ་ལ་ནན་ཏན་བྱེད་པའོ། །གཞན་ཡང་ཨཱི་ཞེས་བྱ་བ་ནི་མི་གཙང་བ་བསལ་བ་ལྟར་སེར་སྣ་དང་ཕྲག་དོག་ཡོངས་སུ་བཅད་དེ། ཐམས་ཅད་བཀྲ་ཤིས་པར་སྒྱུར་བས་དེའི་ཕྱིར་ཨཱི་ཞེས་བྱའོ། །དེ་ལ་ཨུ་ཞེས་བྱ་བ་ནི་མདོ་སྡེ་ཀུན་གྱི་ནང་ན་ཕུལ་དུ་གྱུར་པ། མཆོག་དམ་པ། བླ་མའི་ཡང་
བླ་མར་གྱུར་པ། ཡོངས་སུ་མྱ་ངན་ལས་འདས་པ་ཆེན་པོའོ། །གཞན་ཡང་ཨུ་ཞེས་བྱ་བ་ནི་དེ་བཞིན་གཤེགས་པའི་རང་བཞིན་ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔོན་མ་ཐོས་པ་སྟེ། གླིང་ཐམས་ཅད་ཀྱི་ནང་ན་བྱང་གི་སྒྲ་མི་སྙན་མཆོག་དམ་པར་གྱུར་པ་བཞིན་དུ། བྱང་ཆུབ་སེམས་དཔས་གལ་ཏེ་མདོ་སྡེ་འདི་ཉན་ཏམ། གཟུངས་སུ་འཛིན་ན། སེམས་ཅན་ཐམས་ཅད་ཀྱི་ཕུལ་དུ་འགྱུར། གཙོ་བོར་འགྱུར། མཆོག་དམ་པར་འགྱུར་ཏེ། དེ་བས་ན་མདོ་སྡེ་འདི་ནི་ཀུན་གྱི་གཙོ་བོ། མཆོག་དམ་པ། ཕུལ་དུ་གྱུར་པས་ཨུ་ཞེས་བྱའོ། །དེ་ལ་ཨཱུ་ཞེས་བྱ་བ་ནི་ཇི་ལྟར་བའི་འོ་མ་རོ་ཐམས་ཅད་ཀྱི་ནང་ན་མཆོག་ཏུ་གྱུར་པ་ལྟར་དེ་བཞིན་གཤེགས་པའི་རང་བཞིན་ཡང་དེ་དང་འདྲ་སྟེ། མདོ་སྡེ་ཐམས་ཅད་ཀྱི་ནང་ན་གཙོ་བོ། མཆོག་དམ་པ། ཕུལ་དུ་གྱུར་པའོ། །གང་ཞིག་འདི་ལ་འཕྱ་བའམ། སྐུར་ན་དེ་བྱོལ་སོང་དང་ཐ་མི་དད་པར་རིག་པར་བྱའོ། །གཞན་ཡང་ཨཱུ་ཞེས་བྱ་བ་ནི་གང་ཟག་དེ་ཡང་དག་པར་དྲན་པའི་ཤེས་རབ་མེད་པས་དེ་བཞིན་གཤེགས་པས་གསང་བའི་སྙིང་པོ་ལ་འཕྱ་ཞིང་སྐུར་བས་གང་ཟག་དེ་ནི་ཤིན་ཏུ་སྙིང་བརྩེ་བའི་གནས་སུ་རིག་པར་བྱ་སྟེ། དེ་ནི་དེ་བཞིན་གཤེགས་པའི་གསང་བའི་སྙིང་པོ་བདག་མེད་པ་བསྟན་པ་དང་བྲལ་བས་ཨཱུ་ཞེས་བྱའོ། །དེ་ལ་ཨེ་ཞེས་བྱ་བ་ནི་སངས་རྒྱས་ཀྱི་ཆོས་ཉིད་མྱ་ངན་ལས་འདས་པ་སྟེ། དེ་བས་ན་ཨེ་ཞེས་བྱའོ། །དེ་ལ་ཨེ་ཞེས་བྱ་བ་ནི་དེ་བཞིན་གཤེགས་པའི་དོན་ཏོ། །གཞན་ཡང་ཨཻ་ཞེས་བྱ་བ་ནི་དེ་བཞིན་གཤེགས་པ་གཤེགས་སམ། བཞུགས་སམ། སྨྱང་ངམ། བསྐུམ་མམ་བསྐྱོད་ཅིང་གཡོ་བ་ཐམས་ཅད་དུ་སོ་སོའི་སྐྱེ་བོ་ལ་ཕན་པ་དང་བདེ་བའི་དོན་དུ་མི་འགྱུར་བ་མ་ཡིན་ཏེ། དེ་ནི་ཨཻ་ཞེས་བྱའོ། །དེ་ལ་ཨོ་ཞེས་བྱ་བ་ནི་ཉོན་མོངས་པའི་དོན་ཏོ། །ཉོན་མོངས་པ་ནི་ཟག་པ་དང་བཅས་པ་ཞེས་བྱའོ། །དེ་བཞིན་གཤེགས་པ་ནི་ཉོན་མོངས་པ་ཐམས་ཅད་ཡོངས་སུ་བཅད་པས་ཨོ་ཞེས་བྱའོ། །དེ་ལ་ཨཽ་ཞེས་བྱ་བ་ནི་ཐེག་པ་ཆེན་པོའི་དོན་ཏེ། ཡི་གེ་འབྲུ་བཅུ་བཞི་པོ་མཐར་ཕྱིན་པའི་དོན་ཏོ། །ཐེག་པ་ཆེན་པོའི་མདོ་སྡེ་ཡང་དེ་དང་
འདྲ་སྟེ། མདོ་སྡེ་ཐམས་ཅད་ཀྱི་ནང་ན་མཐར་ཕྱིན་པའི་མཆོག་ཡིན་པས་ཨཽ་ཞེས་བྱའོ། །དེ་ལ་ཨཾ་ཞེས་བྱ་བ་ནི་མ་བརྟགས་པ་མི་གཙང་བའི་དངོས་པོ་ཐམས་ཅད་བསལ་ཏེ། སངས་རྒྱས་ཀྱི་བསྟན་པ་ལས་གསེར་དང་དངུལ་ལ་སོགས་པ་རིན་པོ་ཆེ་ཐམས་ཅད་གཏོང་ནུས་པས་ཨཾ་ཞེས་བྱའོ། །དེ་ལ་ཨ་ཞེས་བྱ་བ་ནི་ཐེག་པ་མཆོག་གི་དོན་ཏོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་མྱ་ངན་ལས་འདས་པ་ཆེན་པོ་འདི་ཡང་མདོ་སྡེ་ཐམས་ཅད་ཀྱི་ནང་ན་གཙོ་བོ་དམ་པ། ཕུལ་དུ་གྱུར་པས་ཨཿཞེས་བྱའོ། །དེ་ལ་ཀ་ཞེས་བྱ་བ་ནི་སེམས་ཅན་ཐམས་ཅད་ལ་སྙིང་རྗེ་སྐྱེ་བ་སྟེ། ཇི་ལྟར་སྒྲ་གཅན་འཛིན་བཞིན་དུ་སྲས་སུ་འདུ་ཤེས་ཤིང་དགེ་བའི་དོན་དུ་འགྱུར་བས་ཀ་ཞེས་བྱའོ། །དེ་ལ་ཁ་ཞེས་བྱ་བ་ནི་དགེ་བའི་བཤེས་གཉེན་མ་ཡིན་པའོ། །དགེ་བའི་བཤེས་གཉེན་མ་ཡིན་པ་ནི་སྨེ་བ་བཙོག་པ་སྟེ། དེ་བཞིན་གཤེགས་པའི་སྙིང་པོ་ལ་ཡིད་མི་ཆེས་པས་ཁ་ཞེས་བྱའོ། །དེ་ལ་ག་ཞེས་བྱ་བ་ནི་སྙིང་པོའོ། །སྙིང་པོ་ཞེས་བྱ་བ་ནི་དེ་བཞིན་གཤེགས་པའི་གསང་བའི་སྙིང་པོ་སྟེ། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་ཅེས་བྱ་བ་སྟེ། དེ་ནི་ག་ཞེས་བྱའོ། །དེ་ལ་གྷ་ཞེས་བྱ་བ་ནི་དེ་བཞིན་གཤེགས་པ་རྟག་པའི་སྒྲའོ། །དེ་ལ་ཇི་ལྟར་ན་དེ་བཞིན་གཤེགས་པ་རྟག་པའི་སྒྲ་ཞེ་ན། འདི་ལྟ་སྟེ། དེ་བཞིན་གཤེགས་པ་རྟག་པ། གནས་པ། མི་འགྱུར། མི་འཕོ་བས་གྷ་ཞེས་བྱའོ། །དེ་ལ་ང་ཞེས་བྱ་བ་ནི་འདུ་བྱེད་ཐམས་ཅད་ཞིག་པའི་མཚན་ཉིད་དེ། དེ་བས་ན་ང་ཞེས་བྱའོ། །དེ་ལ་ཙ་ཞེས་བྱ་བ་ནི་བསྒོམ་པའི་དོན་ཏེ། སེམས་ཅན་ཐམས་ཅད་གདུལ་བ་ནི་བསྒོམ་པའི་དོན་ཅེས་བྱ་སྟེ། ཙ་ཞེས་བྱའོ། །དེ་ལ་ཚ་ཞེས་བྱ་བ་ནི་དེ་བཞིན་གཤེགས་པས་སེམས་ཅན་ཐམས་ཅད་ལ་གདུགས་ཆེན་པོ་ལྟར་སྐྱོབ་ཅིང་ཁེབས་པས་ཚ་ཞེས་བྱའོ། །དེ་ལ་ཛ་ཞེས་བྱ་བ་ནི་ཡང་དག་པར་རྣམ་པར་གྲོལ་བ་རྒ་བའི་མཚན་ཉིད་མེད་པས་ཛ་ཞེས་བྱའོ། །དེ་ལ་ཛྷ་ཞེས་བྱ་བ་ནི་ཀུན་ནས་ཉོན་མོངས་པས་འཆིང་བ་ནི་ནགས་ཐིབས་པོ་དང་འདྲ་བས་ཛྷ་ཞེས་བྱའོ། །དེ་ལ་ཉ་ཞེས་བྱ་བ་ནི་ཤེས་རབ་ཀྱི་དོན་
ཏོ། །ཡང་དག་པའི་ཆོས་ཉིད་ཤེས་པས་ན་ཉ་ཞེས་བྱའོ། །དེ་ལ་ཊ་ཞེས་བྱ་བ་ནི་འཛམ་བུའི་གླིང་དུ་སྐུ་ཕྱེད་བསྟན་ཏེ། ཆོས་བཤད་པ་ནི་ཟླ་བ་ཕྱེད་ལྟ་བུ་ཡིན་པས་ཊ་ཞེས་བྱའོ། །དེ་ལ་ཋ་ཞེས་བྱ་བ་ནི་ཆོས་ཀྱི་སྐུ་ཡོངས་སུ་རྫོགས་པ་ཟླ་བ་རྒྱས་པ་དང་འདྲ་བས་ཋ་ཞེས་བྱའོ། །དེ་ལ་ཌ་ཞེས་བྱ་བ་ནི་དགེ་སློང་གླེན་པ་དག་རྟག་པ་དང་མི་རྟག་པ་མི་ཤེས་ཏེ། བུས་པ་ཆུང་ངུ་དང་འདྲ་བས་ཌ་ཞེས་བྱའོ། །དེ་ལ་ཌྷ་ཞེས་བྱ་བ་ནི་སློབ་དཔོན་གྱི་དྲིན་མི་ཤེས་ཏེ། ལུས་ཤ་བཟན་དང་འདྲ་བས་ཌྷ་ཞེས་བྱའོ། །དེ་ལ་ཎ་ཞེས་བྱ་བ་ནི་འཕགས་པའི་དོན་མ་ཡིན་ཏེ། མུ་སྟེགས་ཅན་ལྟ་བུ་ཡིན་པས་ཎ་ཞེས་བྱའོ། །དེ་ལ་ཏ་ཞེས་བྱ་བ་ནི་གནས་གང་དུ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ཀྱེ་དགེ་སློང་དག་འཇིགས་ཤིང་སྐྲག་པ་སྤོངས་ཤིག་དང་། ཁྱེད་ལ་དམ་པའི་ཆོས་བསྟན་ཏོ། །ཞེས་བྱུང་བ་ནི་ཏ་ཞེས་བྱའོ། །དེ་ལ་ཐ་ཞེས་བྱ་བ་ནི་གླེན་པ་གཏི་མུག་པའི་དོན་ཏེ། སེམས་ཅན་འཁོར་བས་རྣམ་པར་གླགས་ཏེ་རྣམ་པར་འཁོར་བ་ནི་དར་གྱི་སྲིན་བུའམ། སྦུར་པ་ལྟ་བུ་ཡིན་པས་ཐ་ཞེས་བྱའོ། །དེ་ལ་ད་ནི་སྦྱིན་པ་ཆེན་པོ་བྱིན་པ་སྟེ། ཐེག་པ་ཆེན་པོ་ཡིན་པས་ད་ཞེས་བྱའོ། །དེ་ལ་དྷ་ནི་ཡོན་ཏན་བསྔགས་ཤིང་བསྟོད་པ་འདི་ལྟ་སྟེ། དཀོན་མཆོག་གསུམ་ནི་རི་རབ་རིའི་རྒྱལ་པོ་དང་འདྲ་སྟེ། ཤིན་ཏུ་བཟང་ཞིང་མཐོ་ལ་ཡངས་ཤིང་ཆེ་བས་རྡིབ་ཅིང་འགྱེལ་བ་མེད་པས་ན་དྷ་ཞེས་བྱའོ། །དེ་ལ་ན་ནི་དཀོན་མཆོག་གསུམ་རབ་ཏུ་བརྟན་ཏེ། སྒོའི་གཏན་པ་དང་འདྲ་བས་མི་གཡོ་བ་ཞེས་བྱ་བ་ནི་ན་ཞེས་བྱའོ། །དེ་ལ་པ་ནི་ཕྱིན་ཅི་ལོག་གི་དོན་ཏེ། གང་འདི་སྐད་དུ་དཀོན་མཆོག་གསུམ་ཟད་ཅིང་མེད་པར་འགྱུར་རོ་ཞེས་སྨྲ་ན། དེ་ནི་བདག་བསླུས་པ་ཡིན་པར་རིག་པར་བྱ་སྟེ། དེ་ནི་པ་ཞེས་བྱའོ། །དེ་ལ་ཕ་ནི་འཇིག་རྟེན་གྱི་བགེགས་ཏེ་འཇིག་རྟེན་ན་བསྐལ་པ་འབྱུང་བའི་ཚེ་དཀོན་མཆོག་གསུམ་ཡང་མེད་པར་འགྱུར་རོ་ཞེས་སྨྲ་ན། དེ་ནི་ཤིན་ཏུ་ཡང་གླེན་ཞིང་ཤེས་རབ་མེད་པ་སྟེ། འཕགས་པ་ལ་དབང་ཟ་བ་ཡིན་པས་ཕ་ཞེས་བྱའོ། །དེ་ལ་བ་ནི་སངས་
རྒྱས་ཀྱི་སྟོབས་བཅུ་ཡིན་པས་བ་ཞེས་བྱའོ། །དེ་ལ་བྷ་ནི་ཁུར་ལྕི་བ་ཁྱེར་བ་སྟེ། བླ་ན་མེད་པའི་ཡང་དག་པའི་ཆོས་ཕྲག་པ་ལ་བཀུར་བཟོད་པས་དེ་ནི་བྱང་ཆུབ་སེམས་དཔའ་ཆེན་པོ་ཡིན་པར་རིག་པར་བྱ་སྟེ། བྷ་ཞེས་བྱའོ། །དེ་ལ་མ་ནི་ཤིན་ཏུ་སྡོམ་པ་གཉན་པ་བཅས་པ་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདའ་བ་ཆེན་པོ་སྟེ་མ་ཞེས་བྱའོ། །དེ་ལ་ཡ་ནི་བྱང་ཆུབ་སེམས་དཔའ་རྣམས་གནས་ཐམས་ཅད་དུ་སེམས་ཅན་རྣམས་ལ་ཐེག་པ་ཆེན་པོའི་ཆོས་སྟོན་པས་ཡ་ཞེས་བྱའོ། །དེ་ལ་ར་ནི་འདོད་ཆགས་དང་ཞེ་སྡང་དང་གཏི་མུག་ཡོངས་སུ་བཅོམ་ནས་ཡང་དག་པའི་ཆོས་སྟོན་པས་ར་ཞེས་བྱའོ། །དེ་ལ་ལ་ནི་ཉན་ཐོས་ཀྱི་ཐེག་པ་ཅན་ནི་འགྱུར་བ་མི་གནས་པ་སྟེ། ཐེག་པ་ཆེན་པོ་ནི་བསྟན་པ་མི་གཡོ་བས་ཉན་ཐོས་ཀྱི་ཐེག་པ་སྤོང་ཞིང་བླ་ན་མེད་པའི་ཐེག་པ་ཆེན་པོ་ལ་བརྩོན་པས་ལ་ཞེས་བྱའོ། །དེ་ལ་ཝ་ནི་སངས་རྒྱས་བཅོམ་ལྡན་འདས་སེམས་ཅན་གྱི་ཕྱིར་ཆོས་ཆེན་པོའི་ཆར་ཕབ་ནས་འཇིག་རྟེན་གྱི་རིག་སྔགས་དང་ཡི་གེ་དང་། གཙུག་ལག་ལ་སོགས་པ་ནི་ཝ་ཞེས་བྱའོ། །དེ་ལ་ཤ་ནི་ཟུག་རྔུ་རྣམ་པ་ལྔ་ཡོངས་སུ་སྤངས་པས་ཤ་ཞེས་བྱའོ། །དེ་ལ་ཥ་ནི་དོན་ཡོངས་སུ་རྫོགས་པ་སྟེ། གང་ཞིག་ཡོངས་སུ་མྱ་ངན་ལས་འདས་པ་དོན་ཆེན་པོའི་མདོ་མཉན་ན། དེ་ནི་ཐེག་པ་ཆེན་པོའི་མདོ་སྡེ་ཐམས་ཅད་ཐོས་ཤིང་འཛིན་པས་ཥ་ཞེས་བྱའོ། །དེ་ལ་ས་ནི་སེམས་ཅན་རྣམས་ལ་དམ་པའི་ཆོས་བསྟན་ཏེ། སེམས་དགའ་བར་གྱུར་པས་ས་ཞེས་བྱའོ། །དེ་ལ་ཧ་ནི་སེམས་རབ་ཏུ་དགའ་བ་སྟེ། བཅོམ་ལྡན་འདས་འདུ་བྱེད་ཐམས་ཅད་དང་བྲལ་བ་ངོ་མཚར་ཆེའོ། །ཨེ་མ་དེ་བཞིན་གཤེགས་པ་ཡོངས་སུ་མྱ་ངན་ལས་འདས་སོ་ཞེས་བྱ་བ་ནི་ཧ་ཞེས་བྱའོ། །དེ་ལ་ཀྵ་ཞེས་བྱ་བ་ནི་བདུད་ཀྱི་དོན་ཏོ། །ཚད་མེད་པའི་བདུད་ཀྱིས་དེ་བཞིན་གཤེགས་པའི་གསང་བའི་སྙིང་པོ་འཇིག་མི་ནུས་པས་ཀྵ་ཞེས་བྱའོ། །གཞན་ཡང་ཀྵ་ནི་འཇིག་རྟེན་པའི་རྗེས་སུ་ཕ་མ་དང་། ཆུང་མ་དང་། བུའི་བར་དུ་བསྟན་པས་ཀྵ་ཞེས་བྱའོ། །དེ་ལ་རི་རཱི་ལི་ལཱི་ཞེས་བྱ་བའི་ཡི་གེ་བཞི་པོ་འདི་ནི་དོན་རྣམ་པ་
བཞིའོ། །འདི་ལྟ་སྟེ་སངས་རྒྱས་དང་ཆོས་དང་དགེ་འདུན་དང་གཉེན་པོའི་ཆོས་སོ། །དེ་ལ་གཉེན་པོའི་ཆོས་ནི་འཇིག་རྟེན་པའི་ཆོས་སུ་ལྷ་སྦྱིན་ལྟར་དགེ་འདུན་གྱི་དབྱེན་བྱས་པ་དང་། ཚུལ་ཁྲིམས་བཅབ་པའི་ཕྱིར་གཟུགས་དང་ཆ་ལུགས་རྣམ་པ་སྣ་ཚོགས་བསྟན་ཀྱང་མཁས་པ་ཤེས་རབ་ཅན་ནི་ཁོང་དུ་ཆུད་པས་དེ་ལ་མི་འཇིགས་ཏེ། འདི་ནི་འཇིག་རྟེན་གྱི་རྗེས་སུ་འཇུག་པ་ཡིན་པས་དེའི་ཕྱིར་རི་རཱི་ལི་ལཱི་ཞེས་བྱའོ། །དབུགས་རྔུབ་པ་དང་། ལྕེའི་དབང་པོ་དང་། སྣའི་དབུགས་རིང་ཐུང་དང་། འདྲེན་པ་ལས་སྒྲའི་རྗེས་སུ་དོན་ཤེས་པར་འགྱུར་ཏེ། དེ་ཡང་ལྕེ་དང་སོ་ལས་རྣམ་པ་ཐ་དད་དུ་འགྱུར་རོ། །དེ་ལྟར་ཡི་གེའི་དོན་འདི་ནི་སེམས་ཅན་དག་གི་ངག་གི་ལས་ཡོངས་སུ་དག་པར་འགྱུར་ཏེ། སེམས་ཅན་གྱི་སངས་རྒྱས་ཀྱི་རང་བཞིན་ནི་ཡི་གེ་ལ་ལྟོས་པས་གདོད་ཡོངས་སུ་དག་པར་འགྱུར་བ་ནི་མ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་གྱིས་ཐོག་མ་ནས་རྣམ་པར་དག་པས་ཕུང་པོ་དང་ཁམས་དང་སྐྱེ་མཆེད་ཀྱི་ནང་ན་གནས་ཀྱང་། ཕུང་པོ་དང་ཁམས་དང་སྐྱེ་མཆེད་ལྟ་བུ་ནི་མ་ཡིན་ནོ། །དེ་བས་ན་སེམས་ཅན་དག་ནི་བྱང་ཆུབ་སེམས་དཔའ་རྣམས་ལ་སྐྱབས་སུ་འགྲོ་བར་བྱའོ། །སངས་རྒྱས་ཀྱི་རང་བཞིན་གྱི་ཕྱིར་སེམས་ཅན་ཐམས་ཅད་ལ་ཁྱད་པར་མེད་པར་རྣམ་པར་ལྟའོ། །དེ་བས་ན་ཡི་གེ་ཕྱེད་པོ་ནི་མདོ་སྡེ་དང་གཙུག་ལག་དང་སྨྲ་བ་དང་ཚིག་གིས་རྣམ་པར་རྒྱལ་བའི་རྩ་བ་ཡིན་ནོ། །ཡི་གེ་ཕྱེད་པོའི་དོན་ནི་ཀུན་ནས་ཉོན་མོངས་པ་ཀུན་གྱི་སྨྲ་བའི་རྩ་བ་ཡིན་པས་ཡི་གེ་ཕྱེད་ཅེས་བྱའོ། །ཡི་གེ་རྫོགས་པ་ནི་དགེ་བའི་ཆོས་ཐམས་ཅད་སྨྲ་བའི་རྩ་བའོ། །དཔེར་ན་འཇིག་རྟེན་ན་གང་སྡིག་པ་མི་དགེ་བ་བྱེད་པ་ནི་སྐྱེས་བུ་ཕྱེད་ཅེས་བྱའོ། །དགེ་བ་ཀུན་སྤྱོད་པ་ནི། རྫོགས་པ་ཞེས་བྱའོ། །དེ་ལྟར་ན་མདོ་སྡེ་དང་གཙུག་ལག་དང་སྨྲ་བ་ཐམས་ཅད་ནི། ཡི་གེ་ཕྱེད་པོའི་རྩ་བར་འགྱུར་རོ། །དེ་ལ་གང་ཞིག་འདི་སྐད་དུ་དེ་བཞིན་གཤེགས་པ་དང་། ཡང་དག་པར་རྣམ་པར་གྲོལ་བ་ཡང་ཡི་གེ་ཕྱེད་པོའི་ནང་དུ་འཇུག་ཅེས་སྨྲ་ན་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། ཡི་གེ་དང་བྲལ་བའི་ཕྱིར་
ཏེ། དེ་བས་ན་དེ་བཞིན་གཤེགས་པ་ནི་ཆོས་ཐམས་ཅད་ལ་མ་ཐོགས་མ་ཆགས་ཏེ། ཡང་དག་པར་རྣམ་པར་གྲོལ་ལོ། །དེ་ལ་ཡི་གེའི་དོན་རྟོགས་ཤིང་ཤེས་པ་གང་ཞེ་ན། གང་ཞིག་དེ་བཞིན་གཤེགས་པ་འཇིག་རྟེན་དུ་གཤེགས་ནས་ཡི་གེ་ཕྱེད་པོ་མེད་པར་བྱས་པ་ཤེས་ན། དེ་ནི་ཡི་གེའི་དོན་ཤེས་ཤིང་རྟོགས་པ་ཞེས་བྱའོ། །གང་ཡི་གེ་ཕྱེད་པོའི་དོན་གྱི་རྗེས་སུ་འཇུག་པ་ནི་དེ་བཞིན་གཤེགས་པའི་རང་བཞིན་མི་ཤེས་པའོ། །དེ་ལ་ཡི་གེ་མེད་པའི་དོན་གང་ཞེ་ན། གང་མི་དགེ་བའི་ཆོས་ལ་བསྙེན་ཅིང་སྤྱོད་པ་དེ་ནི་ཡི་གེ་མེད་པ་ཞེས་བྱའོ། །གཞན་ཡང་ཡི་གེ་མེད་པ་ནི་དགེ་བའི་ཆོས་ལ་བསྙེན་ཅིང་སྤྱོད་ཀྱང་དེ་བཞིན་གཤེགས་པ་རྟག་པའམ། མི་རྟག་གམ། ཐེར་ཟུག་གམ། ཐེར་ཟུག་མ་ཡིན་པ་མི་ཤེས། ཆོས་དང་དགེ་འདུན་ཡང་མི་ཤེས། འདུལ་བ་དང་འདུལ་བ་མ་ཡིན་པ་དང་། མདོ་སྡེ་དང་མདོ་སྡེ་མ་ཡིན་པ་དང་། བདུད་ཀྱིས་བསྟན་པ་དང་། སངས་རྒྱས་ཀྱིས་བསྟན་པ་མི་ཤེས་ཏེ། བྱེ་བྲག་མི་ཕྱེད་པ་དེ་ནི་ཡི་གེ་མེད་པའི་དོན་ལ་ཞུགས་པ་ཞེས་བྱའོ། །དེ་ལྟར་ན་ངས་ཡི་གེ་མེད་པའི་དོན་གྱི་རྗེས་སུ་འཇུག་པ་ཡང་ངས་བཤད་དོ། །རིགས་ཀྱི་བུ་དེ་བས་ན་ཁྱེད་ཀྱིས་ཡི་གེ་ཕྱེད་པོ་སྤངས་ཏེ། ཡི་གེ་རྫོགས་པ་ལ་ཤིན་ཏུ་མཁས་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཡི་གེའི་གྲངས་ཤིན་ཏུ་མཁས་པར་བགྱིའོ། །བདག་ཅག་གིས་སྟོན་པ་བླ་ན་མེད་པ་དང་མཇལ་བས་དེ་བཞིན་གཤེགས་པས་བསྟན་པའི་བཀའ་བཞིན་དུ་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། ལེགས་སོ་ལེགས་སོ། །གང་དམ་པའི་ཆོས་བསྙེན་པར་འདོད་པ་དག་དེ་བཞིན་དུ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འོད་སྲུང་ལ་བཀའ་སྩལ་པ། རིགས་ཀྱི་བུ་འདི་ལྟ་སྟེ་བྱའི་ནང་ན་བྱ་ཀ་ལན་ད་ཀ་དང་། བྱ་ངུར་པ་ནི་གར་སོང་བ་ཡང་མི་འབྲལ་ཏེ་ལྷན་ཅིག་གོ །དེ་བཞིན་དུ་སྡུག་བསྔལ་
བ་དང་། མི་རྟག་པ་དང་། བདག་མེད་པ་ཡང་དེ་དང་འདྲ་སྟེ་མི་འབྲལ་ལོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་སྡུག་བསྔལ་བ་དང་མི་རྟག་པ་དང་བདག་མེད་པ་ལ་བྱ་ངུར་པ་དང་བྱ་ཀ་ལན་ད་ཀ་ལྟ་བུ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྡུག་བསྔལ་གྱི་ཆོས་ཀྱང་གཞན་ལ། བདེ་བའི་ཆོས་ཀྱང་གཞན། རྟག་པའི་ཆོས་ཀྱང་གཞན་ལ། མི་རྟག་པའི་ཆོས་ཀྱང་གཞན། བདག་ཅེས་བགྱི་བའི་ཆོས་ཀྱང་གཞན་ལ། བདག་མེད་པའི་ཆོས་ཀྱང་གཞན་ནོ། །དཔེར་ན་འབྲས་ནི་ནས་ལས་གཞན་ལ། ནས་ཀྱང་སྲན་མ་དང་བུ་རམ་ཤིང་ལས་གཞན་ནོ། །དེ་ལྟར་རྣམ་པ་དེ་དག་ཐོག་མ་མྱུ་གུ་བྱུང་བ་ནས་ལོ་མ་དང་མེ་ཏོག་གི་བར་དུ་ནི་མི་རྟག་གོ །འབྲས་བུར་སྨིན་ནས་མིས་ཡོངས་སུ་སྤྱོད་པ་ན་རྟག་པ་ཞེས་བྱའོ། །དེ་ཅིའི་ཕྱིར་ཞེ་ན། མཚན་ཉིད་ཀྱིས་ཡང་དག་པ་བདེན་པའི་ཕྱིར་རོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་ལྟར་དངོས་པོ་དེ་དག་རྟག་པ་ལགས་ན་དེ་བཞིན་གཤེགས་པ་དེ་དང་འདྲ་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་སྐད་ཅེས་མ་ཟེར་ཅིག །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་རི་རབ་རིའི་རྒྱལ་པོ་དང་འདྲའོ་ཞེས་བྱ་ན་ཅི་བསྐལ་པས་བཤིག་པའི་ཚེ། རི་རབ་ལྷུན་པོ་ནི་འཇིག་ཅིང་རྙིལ་བར་འགྱུར་ན་དེ་བཞིན་གཤེགས་པ་ཡང་དེའི་ཚེ་འཇིག་པར་འགྱུར་རམ། རིགས་ཀྱི་བུ་ཁྱོད་ཀྱིས་ནི་དོན་དེ་དག་ཞུ་བར་མི་བྱའོ། །རིགས་ཀྱི་བུ་ཆོས་ཐམས་ཅད་ཀྱི་ནང་ན་མྱ་ངན་ལས་འདས་པ་མ་གཏོགས་པར་ཆོས་གཅིག་ཀྱང་རྟག་ཅེས་པ་མེད་དེ། ཀུན་རྫོབ་ཏུ་འབྲས་བུ་ནི་རྟག་ཅེས་གསུངས་སོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ལེགས་སོ་ཤིན་ཏུ་ལེགས་སོ། །བཅོམ་ལྡན་འདས་ཀྱིས་གསུངས་པ་བཞིན་ནོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །
རིགས་ཀྱི་བུ་མདོ་སྡེ་ལ་སོགས་པ་ཐམས་ཅད་ཀྱི་ཏིང་ངེ་འཛིན་ལ་ནན་ཏན་བྱས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་མ་ཐོས་ན། ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མིར་བཅས་པའི་འཇིག་རྟེན་ཐམས་ཅད་ལ་ཕན་པ་དང་། བདེ་བའི་དོན་བྱེད་པར་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་ཤིང་ཨ་མྲ་ལ་མེ་ཏོག་མ་བྱུང་བ་ནི་མི་རྟག་པ་ཞེས་བྱའོ། །འབྲས་བུ་མངོན་དུ་གྱུར་ནས་ཕན་པའི་དོན་དུ་འགྱུར་བས་རྟག་པ་ཞེས་བྱའོ། །དེ་ལྟར་ན་རིགས་ཀྱི་བུ་མདོ་སྡེ་ཐམས་ཅད་ལས་བྱུང་བའི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་མ་ཐོས་ན་ཐམས་ཅད་མི་རྟག་ཅེས་སྨྲའོ། །གལ་ཏེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་གསེར་གྱི་གར་བུ་བཞུས་ཏེ་ཞུ་བའི་ཚེ་ན་མི་རྟག་པ་ཞེས་བྱའོ། །ཞུ་ནས་གསེར་དུ་གྱུར་ཏེ་ཕན་པའི་དོན་དུ་གྱུར་པ་ན་རྟག་པ་ཞེས་བྱའོ། །དེ་ལྟར་ན་རིགས་ཀྱི་བུ་མདོ་སྡེ་ཐམས་ཅད་ཀྱི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་ལས་འདས་པ་ཆེན་པོ་འདི་མ་ཐོས་ན་ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བར་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་ཏིལ་ནི་མར་བཙིར་བའི་ཚེ་ན་མི་རྟག་པ་ཞེས་བྱའོ། །བཙིར་ཏེ་མར་དུ་གྱུར་ནས་ཕན་པའི་དོན་དུ་འགྱུར་བས་རྟག་པ་ཞེས་བྱའོ། །རིགས་ཀྱི་བུ་མདོ་སྡེ་ཐམས་ཅད་ཀྱི་ཏིང་ངེ་འཛིན་བསྒོམས་ཀྱང་ཡོངས་སུ་མྱ་ངན་
ལས་འདས་པའི་མདོ་འདི་མ་ཐོས་ན་ཐམས་ཅད་མི་རྟག་ཅེས་སྨྲའོ། །མདོ་སྡེ་འདི་ཐོས་ནས་ཉོན་མོངས་པ་དང་བཅས་ཀྱང་ཉོན་མོངས་པ་མེད་པ་དང་འདྲ་སྟེ། ལྷ་དང་མི་ཐམས་ཅད་ལ་ཕན་པ་དང་བདེ་བའི་དོན་དུ་འགྱུར་རོ། །དེ་ཅིའི་ཕྱིར་ཞེ་ན། བདག་གི་ལུས་ལ་སངས་རྒྱས་ཀྱི་རང་བཞིན་ཡོད་པར་རྟོགས་པས་རྟག་པ་ཞེས་བྱའོ། །རིགས་ཀྱི་བུ་གཞན་ཡང་དཔེར་ན་འབབ་ཆུ་ཐམས་ཅད་ནི་རྒྱ་མཚོར་འབབ་བོ། །དེ་བཞིན་དུ་མདོ་སྡེ་ཐམས་ཅད་ཀྱི་ཏིང་ངེ་འཛིན་ཀྱང་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལ་འབབ་བོ། །དེ་ཅིའི་ཕྱིར་ཞེ་ན། མཐར་སངས་རྒྱས་ཀྱི་རང་བཞིན་ཡོད་པར་ལེགས་པར་གསུངས་པའི་ཕྱིར་རོ། །རིགས་ཀྱི་བུ་དེ་བས་ན་རྟག་པའི་ཆོས་ཀྱང་གཞན་ལ། མི་རྟག་པའི་ཆོས་ཀྱང་གཞན་ཞེས་ངས་གསུངས་ཏེ། བདག་མེད་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་ནི་སློས་པའི་མྱ་ངན་གྱི་ཟུག་རྔུ་དང་བྲལ་བའོ། །སློས་པའི་མྱ་ངན་ཅན་ནི་གནམ་གྱི་ལྷ་ལགས་ཏེ། དེ་བཞིན་གཤེགས་པ་ནི་ལྷ་མ་ལགས་སོ། །སློས་པའི་མྱ་ངན་ནི་མི་ལགས་ཏེ། དེ་བཞིན་གཤེགས་པ་ནི་མི་མ་ལགས་སོ། །སློས་པའི་མྱ་ངན་ཅན་ནི་སྲིད་པ་ཉི་ཤུ་ལྔ་པོ་ལགས་ཏེ། དེ་བཞིན་གཤེགས་པ་ནི་སྲིད་པ་ཉི་ཤུ་ལྔ་པོ་མ་ལགས་སོ། །དེ་བས་ན་དེ་བཞིན་གཤེགས་པ་ལ་སློས་པའི་མྱ་ངན་མི་མངའ་ན་ཅིའི་སླད་དུ་དེ་བཞིན་གཤེགས་པ་ལ་སློས་པའི་མྱ་ངན་མངའ་ཞེས་བསྒྲགས་ཤིང་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདུ་ཤེས་མེད་པའི་ལྷ་ནི་འདུ་ཤེས་མེད་པ་ཞེས་བྱའོ། །གལ་ཏེ་འདུ་ཤེས་མེད་ན་འཚོ་བའི་སྲོག་ཀྱང་མེད་དོ། །གལ་ཏེ་འཚོ་བའི་སྲོག་མེད་ན་ཕུང་པོ་དང་ཁམས་དང་སྐྱེ་མཆེད་ག་ལ་ཞིག་ཡོད་དེ། དེ་བས་ན་འདུ་ཤེས་མེད་པའི་ལྷའི་སྲོག་ནི་འདི་ན་གནས་སོ་ཞེས་སྨྲར་མི་རུང་ངོ་། །རིགས་ཀྱི་བུ་དཔེར་ན་ཤིང་གི་ལྷ་ལྟ་བུ་ཤིང་ལ་གནས་ཀྱང་ཡལ་
གའམ། འཛེར་པའམ། སྡོང་པོའམ། ལོ་མ་ལ་ངེས་པར་གནས་ཞེས་བྱར་མི་རུང་སྟེ། གནས་མ་ངེས་ཀྱང་མེད་ཅེས་བྱར་ནི་མི་རུང་ངོ་། །འདུ་ཤེས་མེད་པའི་ལྷའི་སྲོག་ཀྱང་དེ་དང་འདྲའོ། །རིགས་ཀྱི་བུ་སངས་རྒྱས་ཀྱི་ཆོས་ཀྱང་དེ་དང་འདྲ་སྟེ། ཤིན་ཏུ་ཟབ་ཅིང་རྟོགས་པར་དཀའོ། །དེ་བཞིན་གཤེགས་པ་ལ་སློས་པའི་མྱ་ངན་དང་སྡུག་བསྔལ་བ་མེད་ཀྱང་སེམས་ཅན་ལ་ཐུགས་རྗེ་ཆེན་པོ་སྐྱེད་པའི་ཕྱིར་སློས་པའི་མྱ་ངན་ཡོད་པར་སྟོན་ཏེ། སེམས་ཅན་རྣམས་ལ་སྒྲ་གཅན་འཛིན་ལྟ་བུར་གཟིགས་སོ། །གཞན་ཡང་རིགས་ཀྱི་བུ་འདུ་ཤེས་མེད་པའི་ལྷའི་སྲོག་ནི་སངས་རྒྱས་ཉག་གཅིག་གིས་མཁྱེན་གྱི། གཞན་གྱིས་རྟོགས་པའམ་ཤེས་པ་མ་ཡིན་ནོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་ལྷ་ཡང་དེ་དང་འདྲའོ། །འོད་སྲུང་དེ་བཞིན་གཤེགས་པའི་རང་བཞིན་ནི་ཡོངས་སུ་དག་ཅིང་ཆགས་པ་མེད་པ་སྟེ། དཔེར་ན་སྤྲུལ་པ་ལྟ་བུ་ཡིན་ན་སློས་པའི་མྱ་ངན་དང་སྡུག་བསྔལ་ག་ལ་ཞིག་ཡོད། གལ་ཏེ་དེ་བཞིན་གཤེགས་པ་ལ་མྱ་ངན་མེད་ན་ཇི་ལྟར་སེམས་ཅན་ཐམས་ཅད་ལ་ཕན་པའི་དོན་དུ་འགྱུར་ཞིང་སངས་རྒྱས་ཀྱི་ཆོས་རྒྱས་པར་སྟོན་པར་འགྱུར། ཅི་སྟེ་མེད་ན་ཅིའི་ཕྱིར་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་སོ་ཞེས་གསུངས། ཅི་སྟེ་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་མི་གཟིགས་ན་དེ་སྐད་དུ་གསུངས་པ་དེ་ཡང་བརྫུན་པར་འགྱུར་རོ། །དེ་བས་ན་རིགས་ཀྱི་བུ་སངས་རྒྱས་ཀྱང་བསམ་གྱིས་མི་ཁྱབ་ལ། ཆོས་ཀྱང་བསམ་གྱིས་མི་ཁྱབ། སེམས་ཅན་གྱི་སངས་རྒྱས་ཀྱི་རང་བཞིན་ཡང་བསམ་གྱིས་མི་ཁྱབ། འདུ་ཤེས་མེད་པའི་ལྷའི་ཚེའི་ཚད་ཀྱང་བསམ་གྱིས་མི་ཁྱབ་པོ། །དེ་བཞིན་གཤེགས་པ་ལ་མྱ་ངན་ཡོད་ཅེས་བྱ་བ་དང་། མྱ་ངན་མེད་ཅེས་བྱ་བ་སངས་རྒྱས་རྣམས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་ཀྱིས་ཤེས་པ་ནི་མ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན། ནམ་མཁའ་སྟོང་པ་ལ་ཁང་པ་དང་། རྡུལ་ཕྲ་མོ་ལ་སོགས་པ་ཡང་མི་
ཆགས་ཏེ། ཅི་སྟེ་ཁང་པ་ནི་ནམ་མཁའ་ལ་མི་རྟེན་ཞེས་བྱ་བ་ཡང་གནས་མེད་དོ། །དེ་བས་ན་ཁང་པ་ནི་ནམ་མཁའ་ལ་གནས་ཞེའམ། ནམ་མཁའ་ལ་མི་གནས་ཞེས་བྱར་མི་རུང་ངོ་། །བྱིས་པ་སོ་སོའི་སྐྱེ་བོ་དག་ནི་ཁང་པ་ནམ་མཁའ་ལ་གནས་ཞེས་སྨྲ་མོད་ཀྱི། ནམ་མཁའ་ནི་ཡང་དག་པར་ན་གནས་མེད་དོ། །དེ་ཅིའི་ཕྱིར་ཞེ་ན། རང་བཞིན་གྱིས་གནས་པའི་ཕྱིར་རོ། །རིགས་ཀྱི་བུ་སེམས་ཀྱང་དེ་དང་འདྲ་སྟེ། ཕུང་པོ་དང་ཁམས་དང་སྐྱེ་མཆེད་ལ་གནས་ཞེའམ་མི་གནས་ཞེས་བྱར་མི་རུང་ངོ་། །འདུ་ཤེས་མེད་པའི་ལྷའི་ཚེ་ཡང་དེ་དང་འདྲ་སྟེ། དེ་བཞིན་དུ་དེ་བཞིན་གཤེགས་པའི་མྱ་ངན་ཡང་དེ་དང་འདྲའོ། །ཅི་སྟེ་མྱ་ངན་མེད་ན་ཅིའི་ཕྱིར་སེམས་ཅན་ལ་སྲས་སྒྲ་གཅན་འཛིན་དང་འདྲ་བར་གཟིགས་ཞེས་གསུངས། ཅི་སྟེ་ཡོད་ན་ཅིའི་ཕྱིར་རང་བཞིན་གྱིས་ནམ་མཁའ་དང་འདྲའོ་ཞེས་གསུངས། རིགས་ཀྱི་བུ་དཔེར་ན་སྒྱུ་མ་མཁན་ཞིག་ཁང་པ་དང་། གསོད་པ་དང་། གསོ་བ་དང་། འཆིང་བ་དང་། བཏང་བ་དང་། གཞན་ཡང་གསེར་དང་། དངུལ་དང་། བཻ་དཱུརྱ་དང་། རིན་པོ་ཆེ་རྣམ་པ་སྣ་ཚོགས་དང་། ནགས་ཚལ་དང་། ཤིང་གེལ་པ་ལ་སོགས་པ་སྣ་ཚོགས་བྱས་ན་དེ་ལ་ནི་བདེན་པའི་རང་བཞིན་མེད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་པའི་རྗེས་སུ་མྱ་ངན་ལ་སོགས་པ་བསྟན་གྱི་བདེན་པ་ནི་མ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་ནི་ཡོངས་སུ་མྱ་ངན་ལས་འདས་ན་དེ་ལ་མྱ་ངན་དང་སྡུག་བསྔལ་ག་ལ་ཞིག་ཡོད། གང་ཞིག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཏེ་མི་རྟག་གོ་སྙམ་སེམས་ན་གང་ཟག་དེ་ཉིད་མྱ་ངན་དང་བཅས་པ་ཡིན་པར་རིག་པར་བྱའོ། །དེ་ལ་གང་ཞིག་དེ་བཞིན་གཤེགས་པ་མྱ་ངན་ལས་མ་འདས་ཞེའམ། རྟག་པ་གནས་པ་མི་འགྱུར་བར་སེམས་ན་གང་ཟག་དེ་ནི་མྱ་ངན་མེད་པ་སྟེ། དེ་བཞིན་གཤེགས་པ་ལ་མྱ་ངན་ཡོད་པར་རམ། མྱ་ངན་མེད་པར་ཤེས་པ་མེད་དོ། །གཞན་ཡང་རིགས་ཀྱི་བུ་དཔེར་ན་མི་མ་རབས་
ཐ་མ་ནི་སྐྱེས་བུ་འབྲིང་དང་རབ་ཀྱི་ཆོས་མི་ཤེས་སོ། །སྐྱེས་བུ་འབྲིང་ཡང་རབ་ཀྱི་ཆོས་མི་ཤེས་སོ། །སྐྱེས་བུ་རབ་ནི་རབ་ཀྱི་ཆོས་ཤེས་ཀྱང་ཤེས་ལ། འབྲིང་དང་ཐ་མའི་ཆོས་ཀྱང་ཤེས་སོ། །ཉན་ཐོས་དང་རང་སངས་རྒྱས་ཀྱང་དེ་དང་འདྲ་སྟེ། བདག་གིས་ཤེས་པར་ཟད་ཀྱི། དེ་བཞིན་གཤེགས་པ་ནི་དེ་ལྟ་མ་ཡིན་ཏེ། བདག་གིས་ཡང་མཁྱེན་ལ་གཞན་གྱིས་ཡང་མཁྱེན་པས་དེའི་ཕྱིར་ན་དེ་བཞིན་གཤེགས་པ་ནི་ཐོགས་པ་མེད་པའི་ཡེ་ཤེས་ཞེས་བྱའོ། །འཇིག་རྟེན་གྱི་རྗེས་སུ་སྒྱུ་མ་དང་འདྲ་བ་བསྟན་པས་བུས་པ་ཤའི་མིག་ཅན་དག་ནི་ཡང་དག་པ་བདེན་པ་ཡིན་ནོ། །སྙམ་སེམས་ཏེ། དེས་དེ་བཞིན་གཤེགས་པའི་ཐོགས་པ་མེད་པའི་ཡེ་ཤེས་ཤེས་པར་འགྱུར་བའི་གནས་མེད་དོ། །མྱ་ངན་ཡོད་དམ་མྱ་ངན་མེད་པ་ནི་སངས་རྒྱས་ཉག་གཅིག་གིས་མཁྱེན་པས་དེའི་ཕྱིར་ན་བདག་ཡོད་པའི་ཆོས་ཀྱང་གཞན་ལ། བདག་མེད་པའི་ཆོས་ཀྱང་གཞན་ཏེ་བྱ་ངུར་པ་དང་ཀ་ལན་ད་ཀ་ལྟ་བུའོ། །གཞན་ཡང་རིགས་ཀྱི་བུ་སངས་རྒྱས་ཀྱི་ཆོས་ནི་བྱ་ངུར་པ་ཀ་ལན་ད་ཀ་དང་ལྷན་ཅིག་ཏུ་འགྲོ་བ་དང་མཚུངས་སོ། །བྱ་ངུར་པ་དང་ཀ་ལན་ད་ཀ་ནི་དབྱར་ཆུ་བྲུག་པ་ན་གནས་མཐོ་ཞིང་བཙན་པོར་ཕྲུ་གུ་གླགས་ནས་གསོ་བའི་ཕྱིར་གདོད་གང་ན་ཆུ་ཡོད་པར་འགྲོའོ། །དེ་བཞིན་གཤེགས་པ་འཇིག་རྟེན་དུ་གཤེགས་པ་ཡང་དེ་དང་འདྲ་སྟེ། ཚད་མེད་པའི་སེམས་ཅན་དམ་པའི་ཆོས་ཀྱིས་སྐྱོང་བ་ཇི་ལྟར་བྱ་ངུར་པ་དང་། ཀ་ལན་ད་ཀ་ལ་སོགས་པ་གནས་བཙན་ཞིང་མཐོན་པོར་ཕྲུ་གུ་འཇོག་པ་དང་འདྲ་བར་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་གྱི་མཛད་པ་ཀུན་མཛད་ནས་ཡོངས་སུ་མྱ་ངན་ལས་འདས་པར་གཤེགས་སོ། །རིགས་ཀྱི་བུ་དེ་ནི་སྡུག་བསྔལ་གྱི་ཆོས་ཀྱང་གཞན་ལ། བདེ་བའི་ཆོས་ཀྱང་གཞན་ཏེ། འདུ་བྱེད་ཐམས་ཅད་ནི་སྡུག་བསྔལ་བ། མྱ་ངན་ལས་འདས་པ་ནི་བདེ་བའོ། །དོན་དམ་པ་ནི་འདུ་བྱེད་ཐམས་ཅད་འཇིག་པའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་སེམས་ཅན་མྱ་ངན་ལས་འདའ་
བ་ཐོབ་པ་དག་རབ་ཏུ་བདེ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་གསུངས་པ་ལྟར་ན། འདུ་བྱེད་ཐམས་ཅད་འདུས་པ་ནི་རྒ་བ་དང་འཆི་བའོ། །ཞེས་གསུངས་སོ། །བག་དང་ལྡན་ཞིང་བག་བྱེད་པ། །དེ་ནི་བདུད་རྩི་ལྟ་བུའི་གནས། །བག་དང་མི་ལྡན་བག་མེད་པ། །དེ་ནི་འཆི་བའི་གནས་ཡིན་ནོ། །དེ་ལ་བག་བྱེད་པ་དག་ནི། །མི་འཆི་བ་ཡི་གནས་འཐོབ་པོ། །དེ་ལ་བག་མེད་པ་དག་ནི། །རྟག་ཏུ་འཆི་བའི་ལམ་དུ་འགྲོ། །གང་བག་མི་བྱེད་པ་ནི་འདུས་བྱས་ཀྱི་ཆོས་ཞེས་བྱའོ། །གང་འདུས་བྱས་ཀྱི་ཆོས་དེ་ནི་སྡུག་བསྔལ་བའི་མཆོག་ཡིན་ནོ། །གང་བག་བྱེད་པ་ནི་མྱ་ངན་ལས་འདས་པ་ཞེས་བྱ་སྟེ། མྱ་ངན་ལས་འདས་པ་ནི་བདུད་རྩི་ཞེས་བྱ་སྟེ། བདེ་བའི་མཆོག་གོ །གལ་ཏེ་འདུ་བྱེད་ལ་ཞུགས་ན་འཆི་བའི་གནས་ཞེས་བྱ་སྟེ། སྡུག་བསྔལ་གྱི་མཆོག་ཏུ་འགྱུར་རོ། །གལ་ཏེ་མྱ་ངན་ལས་འདས་པར་ཕྱིན་ན། མི་འཆི་བ་ཞེས་བྱ་སྟེ། བདེ་བའི་མཆོག་མྱོང་བར་འགྱུར་རོ། །གལ་ཏེ་བག་བྱེད་ན་འདུ་བྱེད་མང་པོ་འདུས་ཀྱང་རྟག་པ། བདེ་བ། མི་འཆི་བ། མི་འཇིག་པ་ཞེས་བྱའོ། །དེ་ལ་བག་མེད་པ་ནི་གང་། བག་བྱེད་པ་ནི་གང་ཞེ་ན། འཕགས་པ་མ་ཡིན་པ་བུས་པ་མ་རབས་ནི་བག་མེད་པ་སྟེ། འཆི་བ་དང་བཅས་པའི་ཆོས་ཅན་ནོ། །འཇིག་རྟེན་ལས་འདས་པའི་འཕགས་པ་ནི་བག་དང་ལྡན་པ་སྟེ། རྒ་ཤི་མེད་པའོ། །དེ་ཅིའི་ཕྱིར་ཞེ་ན། མཆོག་ཏུ་བདེ་བའི་མྱ་ངན་ལས་འདས་པར་ཞུགས་པའི་ཕྱིར་རོ། །དེ་བས་ན་སྡུག་བསྔལ་བའི་ཆོས་ཀྱང་གཞན་ལ། བདེ་བའི་ཆོས་ཀྱང་གཞན་ནོ། །བདག་ཅེས་བྱ་བའི་ཆོས་ཀྱང་གཞན་ལ། བདག་མེད་པའི་ཆོས་ཀྱང་གཞན་ཏེ། ཇི་ལྟར་ས་ལ་འགྲོ་བའི་མི་དག་ནམ་མཁའི་བྱའི་རྗེས་བརྟགས་ན་མི་མཐོང་བ་བཞིན་ནོ།། །།བམ་པོ་བཅུ་གཉིས་པ། རིགས་ཀྱི་བུ་སེམས་ཅན་ཡང་དེ་དང་འདྲ་སྟེ། འཕྲུལ་གྱི་མིག་ནི་མེད་ཀྱི། ཉོན་མོངས་པ་
དང་བཅས་པས་བདག་ལ་སངས་རྒྱས་ཀྱི་རང་བཞིན་ཡོད་པར་མི་མཐོང་ངོ་། །དེ་བས་ན་ངས་བདག་མེད་པ་ཞེས་བྱ་བ་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། འཕྲུལ་གྱི་མིག་མེད་པ་དག་བདག་ཅེས་བྱ་བ་ཡང་དག་པ་ནི་མི་ཤེས་ཀྱི། བླ་དགས་སུ་བདག་ཅེས་བྱ་བ་འཛིན་པས་ཉོན་མོངས་པའི་དབང་གིས་འདུས་བྱས་ལ་རྣམ་པར་འདུ་བྱེད་དེ། མི་རྟག་པ་ཞེས་བྱའོ། །དེ་བས་ན་ངས་རྟག་པའི་ཆོས་ཀྱང་གཞན་ལ་མི་རྟག་པའི་ཆོས་ཀྱང་གཞན་ཞེས་བཤད་དོ། །དེ་ལ་འདི་སྐད་ཅེས་བྱའོ། །དཔའ་ཞིང་རྩོལ་ནུས་པ་དག་ནི། །རི་ཡི་རྩེ་མོ་ལ་འདུག་གམ། །ཐང་ངམ་དགོན་པ་གར་གནས་ཀྱང་། །བྱིས་པ་མ་རབས་རྟག་ཏུ་མཐོང་། །ཡེ་ཤེས་ཆེན་པོའི་གནས་ཕྱིན་ཏེ། །བླ་ན་མེད་པའི་སྟེགས་འཛེགས་ན། །བདག་གི་མྱ་ངན་ཀུན་སེལ་བས། །སེམས་ཅན་ཀུན་གྱི་མྱ་ངན་མཐོང་། །དེ་བཞིན་གཤེགས་པ་ནི་སེམས་ཅན་ཚད་མེད་པའི་ཉོན་མོངས་པ་ཐམས་ཅད་བཅོམ་ནས་ཡེ་ཤེས་ཀྱི་རི་བོ་ལ་བཞུགས་པས་སོ་སོའི་སྐྱེ་བོ་ཐམས་ཅད་ནི་རྟག་ཏུ་ཚད་མེད་པའི་ཉོན་མོངས་པས་རྣམ་པར་གཟིར་བར་གཟིགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འོད་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་ཚིགས་སུ་བཅད་དེ་གསུངས་པ་ལྟར་མ་ལགས་སོ། །དེ་ཅིའི་སླད་དུ་ཞེ་ན། མྱ་ངན་ལས་འདས་པ་ལ་མྱ་ངན་ཞེས་བགྱི་བ་ཡང་མ་མཆིས། དགའ་བ་ཡང་མ་མཆིས་ན། ཅིའི་སླད་དུ་ཡེ་ཤེས་ཀྱི་སྟེགས་ལ་འཛེགས་པ་དང་། རིའི་རྩེ་མོ་ལྟ་བུར་ཕྱིན་པ་དང་འདྲ་སྟེ། སེམས་ཅན་ཐམས་ཅད་མཐོང་ངོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཡེ་ཤེས་ཀྱི་སྟེགས་ནི་མྱ་ངན་ལས་འདས་པ་ལ་བྱའོ། །མྱ་ངན་མེད་པ་ནི་དེ་བཞིན་གཤེགས་པའོ། །མྱ་ངན་དང་བཅས་པ་ནི་བྱིས་པ་མ་རབས་རྣམས་སོ། །བྱིས་པ་མ་རབས་ནི་མྱ་ངན་དང་བཅས་པ། དེ་བཞིན་གཤེགས་པ་ནི་མྱ་ངན་མེད་པ་ཞེས་བྱའོ། །རི་རབ་ཀྱི་རྩེ་མོ་ཞེས་བྱ་བ་ནི་ཡང་དག་པར་རྣམ་པར་གྲོལ་བའོ། །གང་བརྩོན་འགྲུས་
ལ་འབད་པ་ནི་རི་རབ་ལྷུན་པོ་ལྟ་བུ་སྟེ། མི་གཡོ་མི་ལྡེག་པའོ། །ས་ཞེས་བྱ་བ་ནི་འདུས་བྱས་ཀྱིས་རྣམ་པར་འདུ་བྱེད་པ་སྟེ། བྱིས་པ་མ་རབས་དག་ནི་ས་དེ་ལ་གནས་ནས་འདུས་བྱས་ལ་རྣམ་པར་འདུ་བྱེད་དོ། །མཁས་པ་ཤེས་རབ་ཅན་དག་ནི་མངོན་པར་སངས་རྒྱས་པ་སྟེ། ཡོད་པ་རྣམ་པར་སྤངས་ནས་རྟག་པའི་ཕྱིར་དེ་བཞིན་གཤེགས་པ་ཞེས་བྱའོ། །དེ་བཞིན་གཤེགས་པ་ནི་སོ་སོའི་སྐྱེ་བོ་ཚད་མེད་པ་དག་སྲིད་པའི་ཟུག་རྔུས་ཟུག་པ་ལ་ཐུགས་བརྩེ་བའི་ཕྱིར་དེ་བཞིན་གཤེགས་པ་ལ་མྱ་ངན་ཡོད་ཅེས་བྱའོ། །བྱང་ཆུབ་སེམས་དཔའ་འོད་སྲུང་གིས་གསོལ་པ། བཅོམ་ལྡན་འདས་གལ་ཏེ་དེ་བཞིན་གཤེགས་པ་ལ་མྱ་ངན་མངའ་ན། ཡང་དག་པར་རྫོགས་པའི་སངས་རྒྱས་ཞེས་གདགས་སུ་མི་རུང་བར་འགྱུར་རོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། དེ་ཡང་དོན་མེད་པ་མ་ཡིན་ཏེ། སོ་སོའི་སྐྱེ་བོ་གང་དང་གང་གིས་འདུལ་བར་འགྱུར་བ་དེ་དང་དེ་དག་ཏུ་དེ་བཞིན་གཤེགས་པ་སྐྱེ་བ་སྟོན་ཏོ། །སྐྱེ་བ་སྟོན་མོད་ཀྱི་ཡང་དག་པར་སྐྱེ་བ་མེད་དེ། དེ་བས་ན་དེ་བཞིན་གཤེགས་པ་ནི་རྟག་པ་གནས་པའི་ཆོས་ཅན་ཏེ། ཀ་ལན་ད་ཀ་དང་བྱ་ངུར་པ་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ། དཔེར་ན་གང་ཟག་དག་ཟླ་བ་སྤྲིན་གྱིས་ཆོད་དེ་མི་སྣང་ན། ཟླ་བ་ནུབ་བོ་སྙམ་སེམས་ཏེ། ཡང་དག་པར་ན་ཟླ་བ་ལ་ནུབ་པ་མེད་དོ། །གླིང་གཞན་དུ་ཤར་བ་ན་དེ་ན་གནས་པའི་སེམས་ཅན་དག་ནི་ཟླ་བ་ཤར་ཏོ་སྙམ་སེམས་ཏེ། ཡང་དག་པར་ན་ཟླ་བ་ལ་ཤར་བ་མེད་དོ། །དེ་ཅིའི་ཕྱིར་ཞེ་ན། རི་རབ་ལྷུན་པོས་བསྒྲིབས་ཏེ་མི་སྣང་གི། ཟླ་བ་ལ་ཤར་བའམ་ནུབ་པ་ཞེས་བྱ་བ་མེད་དོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གཤེགས་པ་འཛམ་བུའི་གླིང་དུ་ཕ་དང་མ་ཡང་ཡོད་པར་བསྟན་ནས་སོ་སོའི་སྐྱེ་བོ་དག་ནི་དེ་བཞིན་གཤེགས་པ་འཛམ་བུའི་གླིང་དུ་བྱུང་ངོ་སྙམ་སེམས་སོ། །འཛམ་བུའི་གླིང་དུ་མྱ་ངན་ལས་འདས་པ་
ཡང་བསྟན་ཏེ། དེ་བཞིན་གཤེགས་པ་ཡང་དག་པར་མྱ་ངན་ལས་འདས་པ་མེད་ཀྱང་། སེམས་ཅན་དག་ནི་དེ་བཞིན་གཤེགས་པ་མྱ་ངན་ལས་འདས་སོ་སྙམ་སེམས་ཏེ། ཇི་ལྟར་ཟླ་བ་ནུབ་པའི་དཔེ་བཤད་པ་བཞིན་ནོ། །རིགས་ཀྱི་བུ་དེ་བཞིན་གཤེགས་པ་ཉིད་ལ་ཡང་ཡང་དག་པར་ན་སྐྱེ་བ་དང་འགོག་པ་མེད་དེ་སེམས་ཅན་གདུལ་བའི་ཕྱིར་སྐྱེ་བ་དང་འགོག་པ་བསྟན་ཏོ། །རིགས་ཀྱི་བུ་དཔེར་ན་ཟླ་བ་ཁམས་འདི་དག་ཏུ་ཡོངས་སུ་རྒྱས་པར་སྣང་ན་ཁམས་གཞན་ན་ཕྱེད་དུ་སྣང་ངོ་། །ཁམས་འདི་ན་ཕྱེད་དུ་སྣང་ན་ཁམས་གཞན་ན་རྒྱས་པར་སྣང་ངོ་། །འཛམ་བུའི་གླིང་གི་མི་དག་ཟླ་བ་ཐོག་མ་ཤར་བ་མཐོང་ན་ཚེས་གཅིག་ཅེས་ཟེར་ཏེ། ཟླ་བ་ཚེས་པའི་འདུ་ཤེས་སྐྱེད་དོ། །ཟླ་བ་རྒྱས་ཤིང་གང་བ་མཐོང་ན་ཚེས་བཅོ་ལྔ་ཞེས་ཟེར་ཏེ་ཟླ་བ་རྒྱས་པའི་འདུ་ཤེས་སྐྱེད་དོ། །ཡང་དག་པར་ན་ཟླ་བ་ཉིད་ལ་ནི་སྐྱེ་བ་དང་འབྲི་བ་མེད་དེ། རི་རབ་ལྷུན་པོའི་དབང་གིས་ནི་སྐྱེ་བ་དང་འབྲི་བ་ཡང་ཡོད་དོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཛམ་བུའི་གླིང་འདིར་ཐོག་མ་སྐྱེ་བ་ཡང་བསྟན། མྱ་ངན་ལས་འདས་པ་ཡང་བསྟན་ཏེ། ཐོག་མ་སྐྱེ་བ་བསྟན་པ་ནི་ཟླ་བ་ཚེས་པ་དང་འདྲའོ། །ཐམས་ཅད་ཀྱིས་གཞོན་ནུ་ཐོག་མ་བཙས་ནས་གོམ་པ་བདུན་བོར་བ་ན་ཚེས་གཉིས་ཀྱི་ཟླ་བ་ལྟ་བུར་སེམས་སོ། །དེ་ནས་གཞོན་ནུ་སློབ་པ་ལ་ཞུགས་པ་བསྟན་པ་ན། ཚེས་གསུམ་གྱི་ཟླ་བ་ལྟ་བུར་སེམས་སོ། །རབ་ཏུ་བྱུང་བ་བསྟན་པ་ན་ཚེས་བརྒྱད་ཀྱི་ཟླ་བ་ལྟ་བུར་སེམས་སོ། །ཡེ་ཤེས་ཀྱི་འོད་ཆེན་པོ་བཏང་ནས་སེམས་ཅན་ཚད་མེད་པ་དང་བདུད་མང་པོ་བཏུལ་བ་ན་ཚེས་བཅོ་ལྔའི་ཟླ་བ་རྒྱས་པ་ལྟ་བུར་སེམས་སོ། །གཞན་ཡང་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་ཡོངས་སུ་བརྒྱན་པ་མྱ་ངན་ལས་འདས་པ་བསྟན་པ་ན་ཟླ་བ་བྲི་བ་ལྟ་བུར་སེམས་སོ། །དེ་ལྟར་སེམས་ཅན་དག་ནི་མཐོང་བ་མི་འདྲ་སྟེ། ལ་ལས་ནི་ཟླ་བ་ཕྱེད་རལ་དུ་མཐོང་། ལ་ལས་ནི་ཟླ་བ་རྒྱས་པར་མཐོང་། ལ་ལས་ནི་ཟླ་བ་འབྲི་བར་མཐོང་སྟེ།
ཟླ་བའི་རང་བཞིན་ལ་ནི་ཡང་དག་པར་ན་སྐྱེ་བ་དང་འབྲི་བ་མེད་དེ། རྟག་ཏུ་རྒྱས་ཤིང་གང་ངོ་། །དེ་བཞིན་གཤེགས་པ་ཡང་དེ་དང་འདྲ་སྟེ། དེ་བས་ན་རྟག་པ་གནས་པ་མི་འགྱུར་བ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཟླ་བ་རྒྱས་པ་ནི་གནས་གང་དང་གང་དུ་གྲོང་ཁྱེར་རམ། གྲོང་རྡལ་ལམ། རིའམ། འབྲོག་གམ། ཆུའམ། ཁྲོན་པའམ། རྫིང་ངམ། གཞོང་པའམ། གནས་ཐམས་ཅད་དུ་སྣང་སྟེ། སེམས་ཅན་གང་དཔག་ཚད་གཅིག་གམ། དཔག་ཚད་བརྒྱ་སྟོང་གི་བར་དུ་སོང་ཡང་ཟླ་བ་དེ་བཞིན་དུ་མཐོང་སྟེ། དེ་ལ་བུས་པ་གླེན་པ་དག་འདི་སྙམ་དུ་སེམས་ཏེ། བདག་གི་ཁྱིམ་ན་འདུག་པ་ན་ཟླ་བ་འདི་མཐོང་ན་ད་འབྲོག་དགོན་པ་འདིར་ཡང་མཐོང་བ་འདི་ཟླ་བ་སྔོན་མཐོང་བ་དེ་ཡིན་ནམ་མ་ཡིན་སྙམ་སེམས་སོ། །དེ་ལ་དེ་དག་ཆེ་ཆུང་གི་ཚད་ཀྱང་དཔྱོད་དེ། ལ་ལ་ནི་ཟངས་ཀྱི་ཁ་ཁོར་ཙམ་མོ་ཞེས་ཟེར་རོ། །ལ་ལ་ནི་ཤིང་རྟའི་འཁོར་ལོ་ཙམ་མོ་ཞེས་ཟེར་རོ། །ལ་ལ་ནི་དཔག་ཚད་བཞི་བཅུ་རྩ་དགུ་ཡོད་དོ་ཞེས་ཟེར་རོ། །ཐམས་ཅད་ཀྱིས་ཟླ་བའི་འོད་མཐོང་ཡང་ལ་ལ་ནི་ཟླུམ་པོ་གསེར་གྱི་གཞོང་པ་ལྟ་བུར་མཐོང་སྟེ། དེ་ལྟར་ཟླ་བའི་རང་བཞིན་གཅིག་ཀྱང་སེམས་ཅན་རྣམ་པ་ཐ་དད་པས་སྣ་ཚོགས་སུ་རྣམ་པ་ཐ་དད་པར་འདུ་ཤེས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་དུ་མངོན་པར་གཤེགས་ནས་དེ་ལ་ལྷ་དང་མི་ཁ་ཅིག་ནི་འདི་སྙམ་དུ། དེ་བཞིན་གཤེགས་པ་ནི་བདག་འབའ་ཞིག་གི་མིག་སྔ་ན་བཞུགས་སོ་སྙམ་སེམས་སོ། །སེམས་ཅན་ཁ་ཅིག་ཀྱང་འདི་སྙམ་དུ་དེ་བཞིན་གཤེགས་པ་ནི་བདག་འབའ་ཞིག་གི་མིག་སྔ་ན་སྣང་ངོ་སྙམ་སེམས་སོ། །སེམས་ཅན་འོན་པ་དང་། ལྐུགས་པ་ཁ་ཅིག་ནི་དེ་བཞིན་གཤེགས་པ་ཡང་འོན་ཏམ་ལྐུགས་སྙམ་སེམས་སོ། །སེམས་ཅན་སྐད་རྣམ་པ་སྣ་ཚོགས་མི་འཐུན་པ་ཡང་སོ་སོ་ན་དེ་བཞིན་གཤེགས་པ་ནི་བདག་གི་སྐད་དུ་གསུང་ངོ་སྙམ་སེམས་སོ། །སོ་སོ་ནས་བདག་འབའ་ཞིག་གི་ཁྱིམ་དུ་གཤེགས་ཏེ། བདག་འབའ་ཞིག་གི་མཆོད་པ་བཞེས་
སོ་སྙམ་སེམས་སོ། །སེམས་ཅན་ལ་ལས་ནི་དེ་བཞིན་གཤེགས་པའི་སྐུ་ཚད་མེད་པར་རྒྱ་ཆེན་པོར་མཐོང་ངོ་། །ལ་ལས་ནི་སྐུ་རབ་ཏུ་ཆུང་ངུར་མཐོང་ངོ་། །ལ་ལས་ནི་ཉན་ཐོས་ཀྱི་གཟུགས་ལྟ་བུར་མཐོང་ངོ་། །ལ་ལས་ནི་རང་སངས་རྒྱས་ཀྱི་གཟུགས་ལྟ་བུར་མཐོང་ངོ་། །མུ་སྟེགས་ཅན་ཁ་ཅིག་ནི་འདི་སྙམ་དུ་དེ་བཞིན་གཤེགས་པ་ནི་བདག་གི་ཆོས་ཀྱིས་རབ་ཏུ་འབྱུང་སྟེ། སློབ་པ་ལ་ཞུགས་སོ་སྙམ་སེམས་སོ། །སེམས་ཅན་ལ་ལ་ནི་འདི་སྙམ་དུ་དེ་བཞིན་གཤེགས་པ་བདག་འབའ་ཞིག་གི་ཕྱིར་འཇིག་རྟེན་དུ་གཤེགས་སོ་སྙམ་སེམས་སོ། །དེ་བཞིན་གཤེགས་པའི་རང་བཞིན་ཡང་དག་པ་ནི་ཟླ་བ་དང་འདྲ་སྟེ། ཆོས་ཀྱི་སྐུ། མི་སྐྱེ་བའི་སྐུ། ཐབས་ཀྱི་སྐུ་སྟེ། འཇིག་རྟེན་པའི་རྗེས་སུ་སྔོན་གྱི་ལས་རྣམ་པ་ཚད་མེད་པ་གནས་ཐམས་ཅད་དུ་སྐྱེ་བ་བསྟན་པ་ནི་ཟླ་བ་དང་འདྲའོ། །དེ་བས་ན་དེ་བཞིན་གཤེགས་པ་ནི་རྟག་པ། གནས་པ་མི་འགྱུར་མི་འཕོ་བའོ། །རིགས་ཀྱི་བུ་གཞན་ཡང་ལྷ་མ་ཡིན་སྒྲ་གཅན་འཛིན་ལྟ་བུ་ལག་པས་ཟླ་བ་བཀབ་པ་ན་འཇིག་རྟེན་པ་དག་ནི་ཟླ་བ་ཤིའོ་ཞེས་ཟེར་ཏེ་ཡང་དག་པར་ན་ལྷ་མ་ཡིན་གྱི་རྒྱལ་པོས་ཟླ་བ་བསད་པ་མ་ཡིན་གྱི་སྣང་བ་བསྒྲིབས་སུ་ཟད་དོ། །ཟླ་བ་རྒྱས་པ་ལ་འབྲི་བ་མེད་ཀྱི་ལག་པས་བསྒྲིབས་པས་མི་སྣང་བར་ཟད་དོ། །ཕྱིར་ལག་པ་བསྐུམས་ན་འཇིག་རྟེན་པ་དག་ནི་ཟླ་བ་ཕྱིར་སྐྱེས་སོ་ཞེས་ཟེར་ཏེ། ཟླ་བ་འདི་ནི་སྡུག་བསྔལ་ཡང་མྱོང་ངོ་ཞེས་ཟེར་རོ། །གལ་ཏེ་ལྷ་མ་ཡིན་བརྒྱ་སྟོང་སྙེད་ཚོགས་ཀྱང་ཟླ་བ་ལ་ནི་གནོད་པ་བྱེད་མི་ནུས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ་སེམས་ཅན་ཁ་ཅིག་དེ་བཞིན་གཤེགས་པ་ལ་སྡིག་པའི་སེམས་བསྐྱེད་དེ། སངས་རྒྱས་ཀྱི་སྐུ་ལ་ཁྲག་ཕྱུང་བ་དང་། མཚམས་མེད་པ་ལྔ་བྱས་པ་དང་། ལོག་སྲེད་ཀྱི་བར་དུ་བྱས་པ་བསྟན་པ་ཡང་ཕྱི་མ་མ་འོངས་པའི་སེམས་ཅན་དགེ་འདུན་དང་ཆོས་འཇིག་ཅིང་མ་རུང་བར་བྱེད་པའི་ཕྱིར་བསྟན་པར་ཟད་ཀྱི། གལ་ཏེ་བདུད་ཚད་མེད་བརྒྱ་སྟོང་སྙེད་ཚོགས་ཀྱང་དེ་བཞིན་གཤེགས་པའི་སྐུ་ལ་ཁྲག་མི་ཕྱིན་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་
སྐུ་ལ་ནི་ཤ་དང་། ཁྲག་དང་། ཆུ་བ་དང་། རྩ་དང་། རྐང་དང་། རུས་པ་མེད་པའི་ཕྱིར་རོ། །དེ་བཞིན་གཤེགས་པ་ནི་ཡང་དག་པར་ན་འཁྲུག་པའམ་འཇིག་པ་མེད་དེ་སེམས་ཅན་དག་ནི་ཆོས་དང་དགེ་འདུན་འཇིག་པ་དང་། དེ་བཞིན་གཤེགས་པ་ཡང་མེད་པར་འགྱུར་རོ། །སྙམ་སེམས་སོ། །དེ་བཞིན་གཤེགས་པའི་ཡང་དག་པའི་རང་བཞིན་ནི་འགྱུར་བའམ་འཇིག་པ་མེད་དེ། འཇིག་རྟེན་པའི་རྗེས་སུ་དེ་ཡང་བསྟན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན། མི་གཉིས་ཤིག་འཐབས་ན་མཚོན་བཏབ་སྟེ་ལུས་ལ་ཁྲག་བྱུང་ངམ། ཤི་བར་གྱུར་ཀྱང་གསོད་པའི་འདུ་ཤེས་མ་བསྐྱེད་པས་ལས་དེའི་མཚན་ཉིད་དེ་ནི་ཡང་གི། ལྕི་བ་མ་ཡིན་ནོ། །དེ་བཞིན་གཤེགས་པ་ལ་ཡང་ཐོག་མ་ནས་གསོད་པའི་སེམས་མེད་ན་སྐུ་ལ་ཁྲག་བྱུང་ན་ལས་ཀྱི་མཚན་ཉིད་དེ་ནི་ཡང་གི། ལྕི་བ་མ་ཡིན་ནོ། །དེ་ལྟར་ན་དེ་བཞིན་གཤེགས་པས་མ་འོངས་པའི་སེམས་ཅན་དག་གདུལ་བའི་ཕྱིར་ལས་ཀྱི་འབྲས་བུ་རྣམ་པར་སྨིན་པ་བསྟན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་ནི་བརྩོན་འགྲུས་བསྐྱེད་དེ་བུ་དེ་ལ་སྨན་སྟོན་ཏོ། །འདི་ནི་རྩ་བའི་སྨན། འདི་ནི་དྲིའི་སྨན། འདི་ནི་ཁ་དོག་གི་སྨན་ཏེ་རྣམ་པ་སྣ་ཚོགས་ཐ་དད་ཀྱིས་ཁྱོད་ལེགས་པར་ཤེས་པར་གྱིས་ཤིག་ཅེས་སྟོན་ན་བུ་ཡང་ཕས་བསྒོ་བ་བཞིན་དུ་བརྩོན་འགྲུས་སུ་སློབ་སྟེ་སྨན་ལ་མཁས་པར་བྱེད་དོ། །ཕྱིས་སྨན་པ་དེ་ཚེའི་དུས་བྱས་ཏེ་ཤི་ན་སྨན་པའི་བུ་དེ་འདི་སྐད་དུ་ཕས་བདག་ལ་རྩ་བའི་སྨན་དང་། སྡོང་བུའི་སྨན་དང་། མེ་ཏོག་གི་སྨན་དང་། ཁ་དོག་གི་སྨན་འདི་ཡིན་ནོ་སྙམ་བསྟན་པར་དྲན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སེམས་ཅན་གདུལ་བའི་ཕྱིར་ཚུལ་ཁྲིམས་བཅས་ནས་འདི་ནི་ཚུལ་ཁྲིམས་སུ་གསུངས་སོ། །འདི་ནི་མཚམས་མེད་པ་ལྔ་དང་། དམ་པའི་ཆོས་ལ་དབང་སྐུར་ཅིང་དབང་ཟ་བ་དང་། འདི་ནི་ལོག་སྲེད་ཀྱི་ལས་ཡིན་གྱི་མ་བྱེད་ཅིག་ཅེས་མ་འོངས་པའི་སྐྱེ་བོའི་ཕྱིར་དེ་དག་ཀྱང་བསྟན་པ་ཡིན་ནོ། །དེ་བས་ན་དགེ་སློང་དག་སངས་རྒྱས་ཡོངས་སུ་མྱ་ངན་ལས་འདས་པའི་འོག་
ཏུ་ཤིན་ཏུ་ཟབ་མོའི་དོན་གྱི་མདོ་སྡེ་འདི་དག་ཡིན། ལྕི་བ་དང་ཡང་བའི་མཚན་ཉིད་དུ་གསུངས་པའི་འདུལ་བ་ནི་འདི་དག་ཡིན། ཆོས་ཀྱི་ཚིག་རྣམ་པར་སྤྲོས་པ་ཆོས་མངོན་པ་ནི་འདི་ཡིན་ནོ། །ཞེས་ཇི་ལྟར་སྨན་པ་མཁས་པས་བུ་ལ་སྨན་བསྟན་པ་བཞིན་དུ་མངོན་པར་བསྟན་ཏོ། །གཞན་ཡང་རིགས་ཀྱི་བུ་འཇིག་རྟེན་ན་མི་དག་ནི་ཟླ་བ་དྲུག་ལ་ཟླ་བ་ལན་ཅིག་ཤི་བར་སེམས་སོ། །མཐོ་རིས་ཀྱི་ལྷ་དག་ནི་སྐད་ཅིག་ཙམ་གྱིས་ཟླ་བ་ཤི་བར་མཐོང་ངོ་། །དེ་ཅིའི་ཕྱིར་ཞེ་ན། ལྷའི་ཞག་ནི་རིང་ལ། མིའི་ཞག་ནི་ཐུང་བའི་ཕྱིར་རོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ལྷ་དང་མི་རྣམས་ཀྱིས་ནི། དེ་བཞིན་གཤེགས་པའི་སྐུ་ཚེ་རབ་ཏུ་ཐུང་ངོ་སྙམ་སེམས་ཏེ། ཇི་ལྟར་ལྷ་དང་མི་དག་གིས་སྐད་ཅིག་ཐང་ཅིག་གིས་ཟླ་བ་ཤི་བར་མཐོང་བ་བཞིན་ནོ། །དེ་བཞིན་གཤེགས་པས་ནི་གཞན་ཡང་སྐད་ཅིག་ཐང་ཅིག་གིས་མྱ་ངན་ལས་འདས་པ་ཁྲི་ཕྲག་བརྒྱ་སྟོང་སྙེད་སྟོན་ཅིང་ཉོན་མོངས་པའི་བདུད་དང་། ཕུང་པོའི་བདུད་དང་། འཆི་བདག་གི་བདུད་དང་། ལྷའི་བུའི་བདུད་ལ་སོགས་པ་བཅོམ་པ་བསྟན་པས་ན་ལྷའི་བདུད་ཁྲི་ཕྲག་བརྒྱ་སྟོང་སྙེད་ཀྱིས་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བར་ཤེས་སོ། །གཞན་ཡང་སྔོན་གྱི་ལས་དང་རྒྱུ་དང་རྐྱེན་ཁྲི་ཕྲག་བརྒྱ་སྟོང་སྙེད་འཇིག་རྟེན་གྱི་མཚན་ཉིད་རྣམ་པ་ཐ་དད་པ་བཞིན་དུ་སྟོན་ཏེ། དེ་ལྟར་ཚད་མེད་མཐའ་ཡས་བསམ་གྱིས་མི་ཁྱབ་པས་ན་དེ་བཞིན་གཤེགས་པ་ནི་རྟག་པ་གནས་པ་མི་འགྱུར་བའོ། །གཞན་ཡང་རིགས་ཀྱི་བུ་འདི་ལྟ་སྟེ་དཔེར་ན་ཟླ་བ་གསལ་བ་ལ་ནི་འགྲོ་བ་ཐམས་ཅད་བལྟ་འདོད་པའི་ཕྱིར་དེ་བས་ན་ཟླ་བ་བལྟ་ན་དགའ་བ་ཞེས་བྱའོ། །སེམས་ཅན་ནི་འདོད་ཆགས་དང་ཞེ་སྡང་དང་གཏི་མུག་ཏུ་བཅས་པས་བལྟ་ན་དགའ་བ་ཞེས་མི་བྱའོ། །དེ་བཞིན་གཤེགས་པ་ནི་ཡོངས་སུ་དག་པ་དྲི་མ་མེད་པ་མཆོག་དང་ཕུལ་དུ་གྱུར་པ་ཡིན་པས་བལྟ་ན་དགའ་བ་ཞེས་བྱའོ། །གང་ཆོས་ལ་མོས་པའི་སྐྱེ་བོ་དག་ནི་བལྟ་བ་དག་ལ་དགའ་བ་མི་སྐྱེའོ། །གང་མི་དགེ་བ་དག་ནི་མཐོང་བར་ཡང་མི་འདོད་དོ། །དེ་བས་ན་དེ་བཞིན་གཤེགས་པ་ནི་དཔེར་ན་ཟླ་བ་གསལ་བ་དང་འདྲའོ། །རིགས་ཀྱི་བུ་གཞན་ཡང་
འདི་ལྟ་སྟེ་དཔེར་ན་ཉི་མ་ཤར་བ་དང་འདྲ་བ་ལ་དཔྱིད་དང་དབྱར་དང་དགུན་ལྟ་བུ་དུས་གསུམ་ཐ་དད་དེ་དགུན་ནི་ཉི་མ་ཐུང་ལ། དབྱར་ནི་ཉི་མ་རིང་སྟེ། དཔྱིད་ནི་རིང་བ་ཡང་མ་ཡིན་ཐུང་བ་ཡང་མ་ཡིན་ནོ། །དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་སྐུ་ཚེ་རབ་ཏུ་ཐུང་ལ་ཉན་ཐོས་རྣམས་ལ་ཡང་སྐུ་ཚེ་རབ་ཏུ་ཐུང་བ་བསྟན་པས་དེ་དག་ཐམས་ཅད་ནི་དེ་བཞིན་གཤེགས་པའི་སྐུ་ཚེ་རབ་ཏུ་ཐུང་བར་སེམས་ཏེ། དཔེར་ན་དགུན་གྱི་ཉི་མ་དང་འདྲའོ། །བྱང་ཆུབ་སེམས་དཔའ་རྣམས་ལ་ནི་རིང་བ་ཡང་མ་ཡིན། ཐུང་བ་ཡང་མ་ཡིན་པ་བསྐལ་པ་གཅིག་གམ། བསྐལ་པ་གཅིག་འགྲིབས་ཀྱི་བར་དུ་བསྟན་ཏེ། ཇི་ལྟར་དཔྱིད་ཀྱི་ཉི་མ་བཞིན་ནོ། །སངས་རྒྱས་རྣམས་ཀྱིས་ནི་སངས་རྒྱས་ཀྱི་སྐུ་ཚེ་ཚད་མེད་པར་གཟིགས་ཏེ། ཇི་ལྟར་དབྱར་གྱི་ཉི་མ་བཞིན་ནོ། །རིགས་ཀྱི་བུ་དེ་བཞིན་གཤེགས་པས་གསུངས་པ་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་འཇིག་རྟེན་དུ་བསྟན་ཏེ། ཆོས་ཆེན་པོའི་ཆར་ཕབ་པ་མ་འོངས་པའི་དུས་སུ་སྐྱེས་བུ་གང་ཞིག་མདོ་སྡེ་འདི་སྲུང་ངམ། འཛིན་ཏམ། རྣམ་པར་འབྱེད་ཅིང་བསྟན་ཏེ་སེམས་ཅན་ལ་ཕན་པའི་དོན་བྱེད་ན་དེ་བྱང་ཆུབ་སེམས་དཔའ་ཡང་དག་པ་ཡིན་པར་རིག་པར་བྱ་སྟེ། དཔེར་ན་དབྱར་གྱི་དུས་སུ་ཆར་བབ་པ་དང་མཚུངས་སོ། །དེ་ལ་ཉན་ཐོས་དང་རང་སངས་རྒྱས་ཀྱིས་དེ་བཞིན་གཤེགས་པས་དགོངས་ཏེ་གསུངས་པ་བསྟན་པ་འདི་ཐོས་ནས་དཔེར་ན་དགུན་གྱི་དུས་དང་མཚུངས་ཏེ། གྲང་བ་དང་ལྷགས་པ་ཆེན་པོ་དང་ཕྲད་དོ། །བྱང་ཆུབ་སེམས་དཔས་དགོངས་ཏེ་གསུངས་པ་དེ་བཞིན་གཤེགས་པ་རྟག་པ་དང་མི་འགྱུར་བ་བསྟན་པ་འདི་ཐོས་ན་དཔེར་ན་དཔྱིད་ཀྱི་དུས་སུ་མྱུ་གུ་ཐམས་ཅད་འབྱུང་བ་དང་མཚུངས་སོ། །དེ་བཞིན་གཤེགས་པའི་རང་བཞིན་ལ་རིང་ཐུང་ཞེས་བྱ་བ་མེད་དོ། །འཇིག་རྟེན་པའི་ཕྱིར་དེ་དག་བསྟན་ཀྱང་དེ་ནི་སངས་རྒྱས་ཀྱི་ཡང་དག་པའི་ཆོས་ཉིད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྐར་མ་ཐམས་ཅད་ཉིན་པར་མི་སྣང་སྟེ། གང་ཟག་གླེན་པ་དག་ནི་སྐར་མ་ནུབ་སྟེ་མེད་པར་སོང་ངོ་སྙམ་སེམས་
སོ། །ཡང་དག་པར་མེད་པ་ནི་མ་ཡིན་གྱི། ཉི་མའི་འོད་ཀྱིས་མི་སྣང་བར་ཟད་དོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཉན་ཐོས་དང་རང་སངས་རྒྱས་ཀྱིས་མི་མཐོང་བ་ནི། ཇི་ལྟར་འཇིག་རྟེན་པ་དག་གིས་ཉིན་པར་སྐར་མ་མི་མཐོང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ནམ་རྨུས་པའི་ཚེ་ཉི་མ་དང་ཟླ་བ་མི་སྣང་ན་བུས་པ་གླེན་པ་དག་ནི་ཉི་མ་དང་ཟླ་བ་མེད་པར་སོང་ངོ་སྙམ་སེམས་ཏེ། ཡང་དག་པར་ན་ཉི་མ་དང་ཟླ་བ་མེད་པར་མ་སོང་ངོ་། །དེ་བཞིན་གཤེགས་པའི་དམ་པའི་ཆོས་མེད་པར་སོང་བ་ན་དཀོན་མཆོག་གསུམ་མངོན་སུམ་དུ་མི་སྣང་བ་ཡང་དེ་དང་འདྲ་སྟེ། དེ་བཞིན་དུ་གཏན་མེད་པར་སོང་བ་ནི་མ་ཡིན་ནོ། །དེ་བས་ན་དེ་བཞིན་གཤེགས་པ་ནི་རྟག་པ་མི་འགྱུར་མི་འཕོ་བར་རིག་པར་བྱའོ། །དེ་ཅིའི་ཕྱིར་ཞེ་ན། དཀོན་མཆོག་གསུམ་གྱི་ཡང་དག་པ་ཉིད་ལ་ནི་དྲི་མས་མི་གོས་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཟླ་བ་ཤི་བའི་ནུབ་མོ་ནི་སྐར་མ་ཕོད་ཤར་ན་ཤིན་ཏུ་གསལ་ཏེ། དེ་མ་ཐག་ཏུ་ཕྱིར་ཡང་ནུབ་བོ། །འཇིག་རྟེན་པ་དག་མཐོང་ན་བཀྲ་མི་ཤིས་སོ་ཞེས་ཟེར་རོ། །རང་སངས་རྒྱས་ཀྱང་དེ་དང་འདྲ་སྟེ། སངས་རྒྱས་མེད་པའི་འཇིག་རྟེན་དུ་འབྱུང་བས་སོ་སོའི་སྐྱེ་བོ་དག་གིས་མཐོང་ན་ཐམས་ཅད་ཀྱིས་དེ་བཞིན་གཤེགས་པ་ཡང་དག་པར་མྱ་ངན་ལས་འདས་སོ་སྙམ་སེམས་ཏེ་མྱ་ངན་བྱེད་དོ། །དེ་བཞིན་གཤེགས་པ་ནི་ཡང་དག་པར་ན་མེད་པར་མ་གྱུར་ཏེ། ཇི་ལྟར་ཉི་མ་དང་ཟླ་བ་མི་སྣང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཉི་མ་ཤར་ན་ལྷོ་བུར་མེད་པར་འགྱུར་རོ། །ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། འཇིག་རྟེན་དུ་བྱུང་བས་གལ་ཏེ་སེམས་ཅན་གྱི་རྣ་ཁུང་དུ་ཐོས་ན་མི་དགེ་བ་ཐམས་ཅད་དང་། མཚམས་མེད་པའི་ཁ་ན་མ་ཐོ་བའི་ལས་ཐམས་ཅད་སེལ་བར་འགྱུར་རོ། །ཡོངས་སུ་མྱ་ངན་ལས་འདས་པ་ཤིན་ཏུ་ཟབ་མོའི་སྤྱོད་ཡུལ་འདི་ནི་བསམ་གྱིས་མི་ཁྱབ་སྟེ། དེ་བཞིན་གཤེགས་པའི་རང་བཞིན་ལེགས་པར་གསུངས་པས་དེའི་ཕྱིར་ན་རིགས་ཀྱི་བུ་དང་རིགས་ཀྱི་བུ་མོ་དག་དེ་བཞིན་
གཤེགས་པ་ལ་རྟག་པ་དང་མི་འགྱུར་མི་འཕོ་བ་དང་། དམ་པའི་ཆོས་ཀྱང་རྒྱུན་མི་འཆད་པ་དང་། དགེ་འདུན་ཡང་མེད་པར་མི་འགྱུར་བའི་སེམས་བསྐྱེད་དོ། །དེ་བས་ན་ཤིན་ཏུ་ཐབས་མཁས་པས་མདོ་སྡེ་འདི་ལ་བརྩོན་འགྲུས་སུ་ནན་ཏན་བྱས་ན་སྐྱེས་བུ་དེ་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །དེ་བས་ན་མདོ་སྡེ་འདི་ནི་ཚད་མེད་པའི་ཡོན་ཏན་ལྷུན་གྱིས་གྲུབ་པ་ཞེས་ཀྱང་བྱ། བྱང་ཆུབ་ཟད་མི་ཤེས་པ་ཞེས་ཀྱང་བྱ་སྟེ། ཟད་མི་ཤེས་པས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་གདགས་སོ། །ཤིན་ཏུ་འོད་དང་ལྡན་པས་དབྱར་གྱི་ཉི་མ་དང་མཚུངས་སོ། །ཚོགས་མཐའ་ཡས་པས་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཉི་ཟླའི་འོད་ནི་འོད་སྣང་བ་ཐམས་ཅད་ཀྱི་མཆོག་གོ །མྱ་ངན་ལས་འདས་པ་ཆེན་པོའི་འོད་ཀྱང་དེ་དང་འདྲ་སྟེ། མདོ་སྡེའི་ཏིང་ངེ་འཛིན་གྱི་འོད་ཐམས་ཅད་པས་མཆོག་སྟེ། མདོ་སྡེའི་ཏིང་ངེ་འཛིན་གྱི་འོད་ཐམས་ཅད་ཀྱིས་ཉེ་བ་མ་ཡིན་ནོ། །དེ་ཅིའི་ཕྱིར་ཞེ་ན། ཡོངས་སུ་མྱ་ངན་ལས་འདས་པའི་འོད་འདི་ནི་སེམས་ཅན་དག་གི་བ་སྤུའི་ཁུང་བུ་ཀུན་ཏུ་འཇུག་སྟེ། སེམས་ཅན་ལ་བྱང་ཆུབ་ཀྱི་སེམས་མེད་ཀྱང་། བྱང་ཆུབ་ཀྱི་རྒྱུར་འགྱུར་བར་བྱེད་པས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །དེ་ནས་བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་ན་མྱ་ངན་ལས་འདས་པ་ཆེན་པོའི་འོད་ཟེར་གྱིས་རེག་ན་སེམས་ཅན་ཐམས་ཅད་ཀྱི་བ་སྤུའི་བུ་གར་འཇུག་པས་སེམས་ཅན་དེ་དག་ལ་བྱང་ཆུབ་ཀྱི་སེམས་མ་མཆིས་ཀྱང་བྱང་ཆུབ་ཀྱི་རྒྱུར་འགྱུར་རོ། །ཞེས་བགྱི་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། བཅོམ་ལྡན་འདས་ཕས་ཕམ་པ་བཞི་འབྱུང་བ་དང་། མཚམས་མེད་པ་ལྔ་བགྱིས་པ་དང་། ལོག་སྲེད་ཀྱི་ལས་བགྱིས་པ་འོད་ཟེར་གྱིས་རེག་པས་བྱང་ཆུབ་ཀྱི་རྒྱུར་འགྱུར་ན་ལྟ་དེ་དག་དང་ཚུལ་ཁྲིམས་སྲུང་ཞིང་དགེ་བའི་ཚོགས་ལ་སོགས་པ་ལ་ཁྱད་པར་ཡང་ཅི་
མཆིས། གལ་ཏེ་ཁྱད་པར་ཞིག་མ་མཆིས་ན་དེ་བཞིན་གཤེགས་པས་གནས་པར་བགྱི་བའི་ཆོས་རྣམ་པ་བཞི་ཡང་ཅིའི་སླད་དུ་གསུངས། བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར། སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་རྣ་ཁུང་དུ་ཐོས་པས་ཉོན་མོངས་པ་ཐམས་ཅད་སེལ་བར་འགྱུར་ན། དེ་བཞིན་གཤེགས་པས་ཅིའི་སླད་དུ་སྔར་འདི་སྐད་དུ་གང་ཟག་དག་སྔོན་སངས་རྒྱས་ཀླུང་གང་གཱའི་བྱེ་མ་སྙེད་ལ་སེམས་བསྐྱེད་དེ། མྱ་ངན་ལས་འདས་པ་ཆེན་པོ་ཐོས་ཀྱང་དོན་ཤེས་པར་མ་གྱུར་ཏོ་ཞེས་གསུངས་སོ། །གལ་ཏེ་དོན་མི་འཚལ་ན། ཉོན་མོངས་པ་ཐམས་ཅད་ཇི་ལྟར་ཆོད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལོག་སྲེད་ཅན་མ་གཏོགས་པར་སེམས་ཅན་གཞན་དག་མདོ་སྡེ་འདི་ཐོས་ན་ཐམས་ཅད་ཀྱི་བྱང་ཆུབ་ཀྱི་རྒྱུར་འགྱུར་ཏེ། ཆོས་ཀྱི་སྒྲའི་འོད་ཟེར་བ་སྤུའི་བུ་གར་ཞུགས་ན་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། སྐྱེས་བུ་གང་ཞིག་སངས་རྒྱས་ཚད་མེད་པ་སྙེད་ལ་བསྙེན་བཀུར་བ་དང་། མཆོད་པ་དང་། ཕྱག་བྱས་ན་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཐོས་ཏེ། བསོད་ནམས་ཆུང་ངུ་རྣམས་ཀྱིས་ནི་ཐོས་པར་འགྱུར་བ་མ་ཡིན་ནོ། །དེ་ཡང་ཇི་ལྟ་ཞེ་ན། གང་ཡོན་ཏན་ཆེན་པོ་དང་ལྡན་པ་དག་ནི་དོན་ཆེན་པོ་འདི་ཐོས་པར་འགྱུར་གྱི་ཞན་པ་ཆུང་ངུ་རྣམས་ཀྱིས་ཐོས་པར་མི་འགྱུར་རོ། །དེ་ལ་དོན་ཆེན་པོ་ཞེས་བྱ་བ་ནི་སངས་རྒྱས་རྣམས་ཀྱི་ཤིན་ཏུ་ཟབ་པའི་གསང་བའི་སྙིང་པོ་སངས་རྒྱས་ཀྱི་རང་བཞིན་ལ་བྱ་སྟེ། དེ་བས་ན་དོན་ཆེན་པོ་ཞེས་བྱའོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཇི་ལྟར་ན་བྱང་ཆུབ་ཏུ་སེམས་མ་བསྐྱེད་པ་དག་བྱང་ཆུབ་ཀྱི་རྒྱུར་འགྱུར་ཞེས་བགྱི། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། གང་ཞིག་ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་ཐོས་ནས་འདི་སྐད་དུ་བདག་ནི་བྱང་ཆུབ་ཏུ་སེམས་བསྐྱེད་མི་དགོས་སོ་ཞེས་དམ་པའི་ཆོས་
ལ་སྐུར་ན་མི་དེ་རྨི་ལམ་ན་སྲིན་པོའི་གཟུགས་མཐོང་སྟེ། ཤིན་ཏུ་སྐྲག་པར་ཡང་འགྱུར་ལ། སྲིན་པོ་དེ་འདི་སྐད་དུ་ཀྱེ་རིགས་ཀྱི་བུ་ཁྱོད་ད་གལ་ཏེ་བྱང་ཆུབ་ཏུ་སེམས་མ་བསྐྱེད་ན་ཁྱོད་ཀྱི་འཚོ་བའི་སྲོག་བཅད་དོ་ཞེས་སྨྲས་པས་མི་དེ་སྐྲག་བཞིན་དུ་སད་ནས་བྱང་ཆུབ་ཏུ་སེམས་སྐྱེད་པར་འགྱུར་རོ། ། སྐྱེས་བུ་དེ་ཚེ་འཕོས་ནས་གལ་ཏེ་ངན་སོང་གསུམ་དུ་ལྟུང་ངམ། མི་དང་མཐོ་རིས་ཀྱི་ལྷར་སྐྱེས་ཀྱང་བྱང་ཆུབ་ཀྱི་སེམས་ཀྱི་རྒྱུན་མི་ཆད་དེ་དྲན་པས་ན་གང་ཟག་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་རིག་པར་བྱའོ། །དོན་དེ་ལྟ་བས་ན་མྱ་ངན་ལས་འདས་པ་ཆེན་པོའི་བྱིན་དང་ཤུགས་ཀྱིས་བྱང་ཆུབ་ཏུ་སེམས་མ་བསྐྱེད་པའི་བྱང་ཆུབ་ཀྱི་རྒྱུར་འགྱུར་བ་ཞེས་བྱའོ། །རིགས་ཀྱི་བུ་དེ་ནི་བྱང་ཆུབ་སེམས་དཔའི་སེམས་བསྐྱེད་པའི་རྒྱུ་དང་རྐྱེན་ཞེས་བྱ་སྟེ། རྒྱུ་དང་རྐྱེན་མེད་པ་ནི་མ་ཡིན་ནོ། །དེ་བས་ན་ཐེག་པ་ཆེན་པོའི་མདོ་སྡེ་དམ་པ་འདི་ནི་ཡང་དག་པར་སངས་རྒྱས་ཀྱིས་གསུངས་པའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྟེང་གི་ནམ་མཁའ་ལ་ཆར་སྤྲིན་གྱིས་ཁེབས་ཏེ་ཆར་པ་ཆེན་པོ་བབ་ན་ཤིང་སྐམ་མམ། བྲག་གམ། རི་མཐོན་པོ་ཆུ་མི་ཕྱིན་པའི་གནས་ཐམས་ཅད་དུ་ཡང་འབབ་སྟེ། ཤོང་བུ་དང་ས་དམའ་བ་ཀུན་ཆུས་ཡོངས་སུ་གང་ལ་སེམས་ཅན་ཚད་མེད་པ་ཐམས་ཅད་ལ་ཕན་པའི་དོན་དུ་འགྱུར་རོ། །མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། ཆོས་ཆེན་པོའི་ཆར་སེམས་ཅན་ཀུན་ལ་ཕབ་ཀྱང་། ལོག་སྲེད་ཅན་འབའ་ཞིག་ནི་བྱང་ཆུབ་ཀྱི་སེམས་སྐྱེ་བའི་གནས་མེད་དོ། །རིགས་ཀྱི་བུ་དཔེར་ན་ས་བོན་ཚིག་པ་ནི་བསྐལ་པ་བརྒྱ་སྟོང་གི་བར་དུ་ཆར་གྱིས་ཡོངས་སུ་བརླན་ཀྱང་མྱུ་གུ་མི་སྐྱེ་སྟེ། སྐྱེ་བའི་གནས་མེད་དོ། །ལོག་སྲེད་ཅན་ཡང་དེ་དང་འདྲ་སྟེ། ཡོངས་སུ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་ཐོས་སུ་ཟིན་ཀྱང་བྱང་ཆུབ་ཀྱི་སེམས་ཀྱི་མྱུ་གུ་མི་སྐྱེ་སྟེ། སྐྱེ་བའི་གནས་མེད་དོ། །དེ་ཅིའི་ཕྱིར་ཞེ་ན། གང་ཟག་དེ་ནི་དགེ་བའི་རྩ་བ་ཐམས་ཅད་མེད་པར་བྱས་ཏེ་ས་བོན་ཚིག་པ་དང་འདྲ་བར་གྱུར་པས་བྱང་ཆུབ་ཀྱི་རྩ་བ་དང་མྱུ་གུ་མི་སྐྱེའོ། །རིགས་ཀྱི་བུ་
གཞན་ཡང་འདི་ལྟ་སྟེ་དཔེར་ན་ནོར་བུ་རིན་པོ་ཆེ་ཆུ་འདང་ལྟ་བུ་ཆུ་རྙོག་མ་ཅན་གྱི་ནང་དུ་བཅུག་ན་ནོར་བུའི་མཐུས་ཆུ་དང་བར་འགྱུར་གྱི་འཇིམ་པའི་ནང་དུ་བཅུག་ན་དང་བར་མི་འགྱུར་རོ། །མྱ་ངན་ལས་འདས་པ་ཆེན་པོའི་མདོ་སྡེ་དམ་པ་ཡང་དེ་དང་འདྲ་སྟེ། སེམས་ཅན་མཚམས་མེད་པ་ལྔ་བྱས་པ་དང་། ཕས་ཕམ་པ་བཞི་བྱུང་བའི་ཆུ་རྙོག་མ་ཅན་ལྟ་བུའི་ནང་དུ་བཅུག་ན་དག་པར་འགྱུར་ཞིང་བྱང་ཆུབ་ཏུ་སེམས་སྐྱེ་ཡང་སྲིད་ཀྱི། ལོག་སྲེད་ཅན་འཇིམ་རྫབ་ལྟ་བུའི་ནང་དུ་ནི་ལོ་བརྒྱ་སྟོང་གི་བར་དུ་བཞག་ཀྱང་དག་པར་འགྱུར་ཞེའམ། བྱང་ཆུབ་ཀྱི་སེམས་སྐྱེ་མི་སྲིད་དོ། །དེ་ཅིའི་ཕྱིར་ཞེ་ན། ལོག་སྲེད་ཅན་ནི་དགེ་བའི་རྩ་བ་ཀུན་མེད་པར་བྱས་པས་སྣོད་དུ་མ་གྱུར་ཏོ། །དེ་ལ་གལ་ཏེ་གང་ཟག་དེས་ལོ་བརྒྱ་སྟོང་གི་བར་དུ་མྱ་ངན་ལས་འདས་པ་ཆེན་པོའི་མདོ་སྡེ་འདི་མཉན་ཏམ། འཛིན་ཀྱང་བྱང་ཆུབ་ཏུ་སེམས་བསྐྱེད་མི་ནུས་སོ། །དེ་ཅིའི་ཕྱིར་ཞེ་ན། དགེ་བའི་སེམས་མེད་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་གྱི་སྡོང་པོའི་ནང་ན་སྨན་གྱི་རྒྱལ་པོ་ཞེས་བྱ་བ་ནི་སྨན་གྱི་ནང་ན་མཆོག་དང་། ཕུལ་དུ་གྱུར་པས་དར་བ་དང་སྦྱར་རམ། སྦྲང་རྩི་དང་སྦྱར་རམ། མར་དང་སྦྱར་རམ། ཆུ་དང་བསྲེས་སམ། འོ་མ་དང་བསྲེས་སམ། ཕྱེ་མར་བཏགས་སམ། རིལ་བུར་བྱས་སམ། འདེ་གུར་བསྐུས་སམ། དྲིས་བདུགས་སམ། མིག་ཏུ་བསྐུས་སམ། མཐོང་ངམ། བསྣམས་པ་ཙམ་གྱིས་ཀྱང་སེམས་ཅན་གྱི་ནད་ཐམས་ཅད་ཞི་བར་བྱེད་དེ། འོན་ཀྱང་སྨན་གྱི་སྡོང་པོ་དེ་འདི་སྙམ་དུ་སེམས་ཅན་དག་བདག་གི་རྩ་བ་བླངས་ན་ལོ་མ་བརྔ་བའི་མི་རིགས་སྙམ་མམ། ལོ་མ་བརྔས་ན་རྩ་བ་བླང་བའི་མི་རིགས་སྙམ་མམ། སྡོང་པོ་བླངས་ན་པགས་པ་བཤུ་བའི་མི་རིགས་སྙམ་མམ། པགས་པ་བཤུས་ན་སྡོང་པོ་བརྔ་བའི་མི་རིགས་སྙམ་མི་སེམས་ཏེ། དེ་ལྟར་མི་སེམས་མོད་ཀྱི། འོན་ཀྱང་སེམས་ཅན་གྱི་ནད་ཀྱི་སྡུག་བསྔལ་ཐམས་ཅད་སེལ་ནུས་སོ། །རིགས་ཀྱི་བུ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་ཡང་དེ་དང་འདྲ་སྟེ། སེམས་ཅན་ཐམས་ཅད་ཀྱི་ཕས་ཕམ་པ་བཞི་དང་།
མཚམས་མེད་པ་ལྔ་དང་། ཕྱི་རོལ་དང་ནང་གི་མི་དགེ་བའི་ལས་ཐམས་ཅད་མེད་པར་བྱེད་དེ། གང་བྱང་ཆུབ་ཏུ་སེམས་མ་བསྐྱེད་པ་དག་ཀྱང་འདིའི་དབང་གིས་བྱང་ཆུབ་ཏུ་སེམས་བསྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། མདོ་སྡེ་འདི་ཡང་མདོ་སྡེ་ཐམས་ཅད་ཀྱི་ནང་ན་རྒྱལ་པོ་ལྟ་བུ་སྟེ། ཇི་ལྟར་སྨན་གྱི་ནང་ན་སྨན་གྱི་རྒྱལ་པོ་ལྟ་བུའོ། །གང་ཞིག་མྱ་ངན་ལས་འདས་པ་ཆེན་པོ་འདི་ལ་ནན་ཏན་བྱེད་དམ་ནན་ཏན་མི་བྱེད་ཀྱང་རུང་། མདོ་སྡེ་འདིའི་མཚན་ཡོད་པ་ཐོས་ཏེ་ཐོས་མ་ཐག་ཏུ་དད་ཅིང་ཡིད་ཆེས་ན་ཉོན་མོངས་པའི་ནད་ཐམས་ཅད་མེད་པར་བྱེད་ཀྱང་ལོག་སྲེད་ཅན་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདེ་བར་དགོད་མི་ནུས་སོ། །ཇི་ལྟར་སྨན་གྱི་རྒྱལ་པོ་དེ་ནད་ཐམས་ཅད་འཚོ་བར་བྱེད་མོད་ཀྱི། ངེས་པར་འཆི་བའི་དུས་ལ་བབ་པ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ལག་པ་ལ་རྨ་ཡོད་པ་དག་གིས་དུག་གཟུང་ན་དུག་ཁོང་དུ་འགྲོའོ། །རྨ་མེད་པ་ནི་གཟུང་ཡང་ཁོང་དུ་མི་འགྲོའོ། །ལོག་སྲེད་ཅན་ཡང་དེ་དང་འདྲ་སྟེ། བྱང་ཆུབ་ཀྱི་རྒྱུ་མེད་པས་རྨ་མེད་པས་དུག་གཟུང་བ་དང་མཚུངས་ཏེ་ཁོང་དུ་མི་འགྲོའོ། །རྨ་ཞེས་བྱ་བ་ནི་བླ་ན་མེད་པའི་བྱང་ཆུབ་ཀྱི་རྒྱུའོ། །དུག་ཅེས་བྱ་བ་ནི་དོན་དམ་པའི་སྨན་ལྟ་བུའོ། །རྨ་མེད་པ་ནི་ལོག་སྲེད་ཅན་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྡོ་རྗེ་ནི་ཅིས་ཀྱང་མི་ཆོགས་ཏེ། ཐམས་ཅད་ཕིགས་ཤིང་གཅོག་ནུས་ཀྱང་རུ་སྦལ་གྱི་ཁོག་པ་དང་ར་རུས་ཆོགས་སོ། །མྱ་ངན་ལས་འདས་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། ཚད་མེད་པའི་སེམས་ཅན་བྱང་ཆུབ་ཀྱི་ལམ་ལ་བདེ་བར་བཙུད་ཀྱང་ལོག་སྲེད་ཅན་དག་ནི་བྱང་ཆུབ་ཀྱི་རྒྱུ་སྐྱེད་མི་ནུས་སོ། །རིགས་ཀྱི་བུ་གཞན་ཡང་འདི་ལྟ་སྟེ་རྩྭ་དན་ཐུ་ལི་ཀ་དང་། ཤིང་སྦ་ལི་ཤི་དང་། ལི་ཀ་ལྟ་བུ་སྡོང་བུ་དང་ཡལ་ག་བཅད་ཀྱང་དེ་མ་ཐག་ཏུ་ཕྱིར་སྐྱེས་ཏེ། ཤིང་ཏ་ལ་ལྟར་བཅད་ནས་ཕྱིར་མི་སྐྱེ་བ་ནི་མ་ཡིན་ནོ། །སེམས་ཅན་དེ་དག་ཀྱང་དེ་དང་འདྲ་སྟེ། གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་ཐོས་ན་ཕས་ཕམ་པ་བཞི་བྱུང་ངམ། མཚམས་
མེད་པ་ལྔ་བྱས་ཀྱང་བྱང་ཆུབ་ཀྱི་རྒྱུ་ཕྱིར་སྐྱེ་ཡང་སྲིད་ཀྱི། ལོག་སྲེད་ཅན་ནི་དེ་ལྟར་མ་ཡིན་ཏེ། མདོ་སྡེ་དམ་པ་འདི་ཐོས་སམ། མཉན་ཀྱང་བྱང་ཆུབ་ཀྱི་རྒྱུ་སྐྱེ་མི་སྲིད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཀ་ཏ་ལ་དང་ཙིན་དོ་ཀ་ལྟ་བུ་བཅད་ན་ས་བོན་ཚིག་པ་དང་འདྲ་སྟེ་ཕྱིར་མི་སྐྱེའོ། །ལོག་སྲེད་ཅན་དག་དེ་དང་འདྲ་སྟེ། མྱ་ངན་ལས་འདས་པ་ཆེན་པོའི་མདོ་སྡེ་ཐོས་ཀྱང་བྱང་ཆུབ་ཀྱི་རྒྱུ་མི་སྐྱེ་བ་ནི་ས་བོན་ཚིག་པ་དང་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཆར་ཆེན་པོ་བབ་ན་ནམ་མཁའ་སྟོང་པ་ལ་མི་ཆགས་སོ། །མྱ་ངན་ལས་འདས་པ་ཆེན་པོའི་མདོ་སྡེ་ཡང་དེ་དང་འདྲ་སྟེ། ཆོས་ཀྱི་ཆར་ཀུན་ཏུ་ཕབ་ཀྱང་ལོག་སྲེད་ཅན་ལ་མི་ཆགས་སོ། །ལོག་སྲེད་ཅན་གྱི་ལུས་ལ་རྡོ་རྗེ་གཏམས་པ་ལྟར་ཀུན་ཏུ་ཁྱབ་པས་ཅིས་ཀྱང་མི་ཚུགས་སོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་ཚིགས་སུ་བཅད་པ་ལས་ཀྱང་བཀའ་སྩལ་པ། དགེ་བ་མ་མཐོང་དགེ་མི་བྱེད། །སྡིག་པ་མཐོང་བས་སྡིག་པ་བྱེད། །དེ་ལ་འཇིགས་ཤིང་བྱོལ་བ་ནི། །ཇི་ལྟར་ལམ་ངན་གཡང་ས་བཞིན། །ཞེས་བཅོམ་ལྡན་འདས་ཀྱིས་དེ་སྐད་ཅེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མ་མཐོང་ཞེས་བྱ་བ་ནི་སངས་རྒྱས་ཀྱི་རང་བཞིན་མ་མཐོང་བའོ། །དགེ་བ་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །མི་བྱེད་ཅེས་བྱ་བ་ནི་དགེ་བའི་བཤེས་གཉེན་ལ་བསྙེན་བཀུར་མི་བྱེད་པའོ། །མཐོང་ཞེས་བྱ་བ་ནི་རྒྱུ་དང་འབྲས་བུ་མེད་པར་མཐོང་བའོ། །སྡིག་པ་ཞེས་བྱ་བ་ནི་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ལ་སྐུར་བའོ། །བྱེད་ཅེས་བྱ་བ་ནི་ལོག་སྲེད་ཅན་ཤིན་ཏུ་རྒྱས་པ་མེད་པར་སྨྲ་སྟེ། དེ་བས་ན་ལོག་སྲེད་ཅན་དག་ནི་ཡོངས་སུ་དག་པ་དགེ་བའི་ཆོས་ལ་འཇུག་ཅིང་འབད་པའི་སེམས་མེད་དོ། །ཆོས་གང་ལ་དགེ་བ་ཞེས་བྱ་ཞེ་ན། དེ་ནི་མྱ་ངན་ལས་འདས་པའོ། །མྱ་ངན་ལས་འདས་པ་ལ་འཇུག་ཅིང་འབད་པ་ནི་འཕགས་པའི་སྤྱོད་པ་ལ་ནན་ཏན་བྱེད་པའོ། །ལོག་སྲེད་ཅན་དག་
ནི་འཕགས་པའི་སྤྱོད་པ་མི་སྤྱོད་པས་མྱ་ངན་ལས་འདས་པ་ལ་འཇུག་ཅིང་འབད་མི་ནུས་སོ། །དེ་ལ་སྐྲག་པར་བྱའོ་ཞེས་བྱ་བ་ནི་དམ་པའི་ཆོས་ལ་སྐུར་པ་སྟེ། གང་གིས་སྐྲག་པར་བྱ་ཞེ་ན། མཁས་པ་ཤེས་རབ་ཅན་དག་གིས་སོ། །དེ་ཅིའི་ཕྱིར་ཞེ་ན། ཆོས་ལ་སྐུར་པས་དགེ་བའི་སེམས་མེད་དེ། སྦྱོར་བའི་ཐབས་མེད་པའི་ཕྱིར་རོ། །ལམ་གཡང་ས་ཞེས་བྱ་བ་ནི་འདུ་བྱེད་རྣམས་སོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་གསུངས་པ་ལས། བྱ་བ་མཐོང་བ་གང་དག་ལགས། །དགེ་བའི་ཆོས་སུ་གང་དག་འགྱུར། །མི་འཇིགས་པ་ཡི་གནས་ནི་གང་། །རྒྱལ་པོས་བདེ་བའི་ལམ་བགྲོད་བཞིན། །ཞེས་བགྱི་བའི་དོན་ནི་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱ་བ་མཐོང་ཞེས་བྱ་བ་ནི། སྡིག་པ་མཐོལ་བ་ལ་བྱ་སྟེ། འཁོར་བའི་མཐའ་ནས་སྡིག་པ་མི་དགེ་བའི་ཆོས་ཅི་བྱས་པ་ཀུན་བཤགས་ཏེ། ཕྱིན་པ་མེད་པའི་གནས་སུ་ཕྱིན་པའོ། །དེ་བས་ན་གནས་དེ་ནི་མི་འཇིགས་པ་སྟེ། དཔེར་ན་རྒྱལ་པོ་ལམ་དུ་ཞུགས་ཏེ་སོང་ན་ལམ་ཀ་ནས་མི་རྒོད་ལ་སོགས་པ་འབྱོལ་ཞིང་འབྲོས་སོ། །དེ་བཞིན་དུ་སྡིག་པ་མི་དགེ་བའི་ཆོས་ཀྱང་མཐོལ་ཞིང་བཤགས་ན་ཐམས་ཅད་བྱང་བར་འགྱུར་རོ། །གཞན་ཡང་བྱེད་པ་མི་མཐོང་བ་ནི་ལོག་སྲེད་ཅན་དག་སྡིག་པ་མི་དགེ་བའི་ལས་བྱས་ཀྱང་མི་མཐོང་བའོ། །ལོག་སྲེད་ཅན་དག་ནི་ང་རྒྱལ་གྱི་དྲེགས་པས་སྡིག་པ་མི་དགེ་བའི་ཆོས་མང་དུ་བྱས་ཀྱང་ཐོག་མ་ནས་མི་སྐྲག་མི་འཇིགས་པའོ། །དེ་བས་ན་མྱ་ངན་ལས་འདས་པ་མི་ཐོབ་པ་ནི་དཔེར་ན་སྤྲེའུ་དག་ཆུའི་ནང་གི་ཟླ་བ་འཛིན་པ་དང་མཚུངས་སོ། །རིགས་ཀྱི་བུ་གལ་ཏེ་ཚད་མེད་པའི་སེམས་ཅན་ཐམས་ཅད་ཅིག་ཅར་དུས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཀྱང་དེ་བཞིན་གཤེགས་པ་དེ་དག་གིས་ཀྱང་ལོག་སྲེད་ཅན་དག་བྱང་ཆུབ་ཐོབ་པར་མི་རིགས་ཏེ། དེ་བས་ན་བྱ་བ་མི་མཐོང་བ་ཞེས་བྱའོ། །གཞན་ཡང་སུས་བྱས་པ་མི་མཐོང་ཞེ་ན། དེ་བཞིན་གཤེགས་པས་མཛད་པས་མི་མཐོང་ངོ་། །དེ་བཞིན་གཤེགས་པས་
སོ་སོའི་སྐྱེ་བོ་ལ་སངས་རྒྱས་ཀྱི་རང་བཞིན་བསྟན་ཅིང་བཤད་ཀྱང་ལོག་སྲེད་ཅན་དག་ནི་འཁོར་བ་ན་ཡོངས་སུ་འཁོར་བས་ཤེས་པར་རམ། མཐོང་བར་མི་འགྱུར་རོ། །དེ་བས་ན་དེ་བཞིན་གཤེགས་པས་མཛད་པ་མི་མཐོང་བ་ཞེས་བྱའོ། །གཞན་ཡང་ལོག་སྲེད་ཅན་དག་ནི་མཐར་དེ་བཞིན་གཤེགས་པ་མྱ་ངན་ལས་འདས་ཏེ་ཡང་དག་པར་མི་རྟག་པར་འཛིན་པ་ནི་ཇི་ལྟར་མར་མེ་དང་མར་བཅས་པར་ཟད་པ་ལྟ་བུར་མཐོང་བའོ། །དེ་ཅིའི་ཕྱིར་ཞེ་ན། གང་ཟག་དེ་སྡིག་པ་མི་དགེ་བའི་ལས་མི་འབྲི་བའི་ཕྱིར་རོ། །བྱང་ཆུབ་སེམས་དཔའ་གང་ཞིག་དགེ་བ་བྱས་པའི་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྔོས་པ་ན་ལོག་སྲེད་ཅན་དག་ནི་དེ་ལ་འཕྱ་ཞིང་མ་དད་མོད་ཀྱི། འོན་ཀྱང་བྱང་ཆུབ་སེམས་དཔའ་རྣམས་ནི་དེ་དག་ཀྱང་བླ་ན་མེད་པའི་བྱང་ཆུབ་ཐོབ་པར་ཡོངས་སུ་སྔོ་བར་བྱེད་དོ། །དེ་ཅིའི་ཕྱིར་ཞེ་ན། སངས་རྒྱས་རྣམས་ཀྱི་ཆོས་ཉིད་དེ་འདྲ་བའི་ཕྱིར་རོ། །འོ་མ་ལས་ནི་ཞོར་འགྱུར་ཞིང་། །སྡིག་པ་འཕྲལ་དུ་སྨིན་མི་འགྱུར། །མེ་མདག་ཐལ་བས་གཡོགས་པ་ལ། །གླེན་པ་བརྙས་པས་རྫི་བར་འགྱུར། །ལོག་སྲེད་ཅན་དག་ནི་མིག་མེད་པ་ཞེས་བྱ་སྟེ། དེ་བས་ན་དགྲ་བཅོམ་པའི་ལམ་མི་མཐོང་ངོ་། །དགྲ་བཅོམ་པ་ནི་འཁོར་བའི་ལམ་ངན་པ་གཡང་སར་མི་འགྲོའོ། །མིག་མེད་པ་དག་ནི་ཤིན་ཏུ་རྒྱས་པ་ལ་སྐུར་པས་དགྲ་བཅོམ་པ་ལྟར་བྱམས་པའི་སེམས་ལ་ནན་ཏན་མི་བྱེད་དོ། །ལོག་སྲེད་ཅན་དག་ཤིན་ཏུ་རྒྱས་པ་ལ་ནན་ཏན་མི་བྱེད་པའང་དེ་དང་འདྲའོ། །སྐྱེས་བུ་གང་ཞིག་འདི་སྐད་དུ་བདག་ནི་ཉན་ཐོས་པའི་མདོ་སྡེ་ལ་མ་དད་ཀྱི་ཐེག་པ་ཆེན་པོ་ལ་དད་དེ་འདོན་པ་དང་། ཀློག་པ་དང་། སྟོན་ཅིང་འཆད་པའང་བྱེད་དོ། །དེ་བས་ན་བདག་ནི་བྱང་ཆུབ་སེམས་དཔའ་སྟེ། སེམས་ཅན་ཐམས་ཅད་ལ་ཡང་སངས་རྒྱས་ཀྱི་རང་བཞིན་ཡོད་པས་སེམས་ཅན་གྱི་ལུས་ཀྱི་ནང་ན་སྟོབས་བཅུ་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡང་ཡོད་དོ། །བདག་སྨྲ་བ་དང་། སངས་རྒྱས་ཀྱིས་གསུངས་པ་ཐ་མི་དད་དོ། །བདག་དང་ཁྱེད་བཅས་སུ་ཚད་མེད་པའི་ཉོན་
མོངས་པ་འཇོམས་པར་འགྱུར་བ་ནི་ཇི་ལྟར་ཆུ་སྣོད་ཆག་པ་བཞིན་དུ། ཉོན་མོངས་པ་ཀུན་བཅོམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མཐོང་བར་འགྱུར་རོ་ཞེས་སྐྱེས་བུ་དེས་དེ་སྐད་དུ་སྟོན་ཅིང་འཆད་མོད་ཀྱི། སེམས་ཅན་ལ་ཡང་དག་པར་སངས་རྒྱས་ཀྱི་རང་བཞིན་ཡོད་པར་ཡིད་ཆེས་པ་མ་ཡིན་ཏེ་ཕན་པ་དང་བདེ་བའི་ཕྱིར་ཡི་གེ་ལས་འབྱུང་བ་བཞིན་སྟོན་ཏེ། དེ་ལྟར་སྟོན་པ་དེ་ནི་སྡིག་པ་ཅན་ཞེས་བྱ་སྟེ། སྡིག་པ་ཅན་དེ་ནི་ཇི་ལྟར་འོ་མ་ལས་ཞོར་འགྱུར་བ་བཞིན་དུ་འབྲས་བུ་མྱུར་དུ་མི་འགྲུབ་པའོ། །དཔེར་ན་རྒྱལ་པོའི་ཕོ་ཉ་ཤིན་ཏུ་སྨྲ་མཁས་ལ་ཐབས་དང་ལྡན་པ་ཞིག་ཡུལ་གཞན་དུ་བཀའ་སྩལ་ཏེ་བཏང་ན་ལུས་དང་སྲོག་ལ་བབ་ཀྱང་རྒྱལ་པོའི་བཀའ་མི་འཆབ་བོ། །མཁས་པ་ཤེས་རབ་ཅན་ཡང་དེ་དང་འདྲ་སྟེ། བྱིས་པ་མ་རབས་ཀྱི་ནང་དུ་ལུས་དང་སྲོག་ལ་མི་ལྟ་བར་ཐེག་པ་ཆེན་པོ་ཤིན་ཏུ་རྒྱས་པ་དེ་བཞིན་གཤེགས་པའི་སྙིང་པོ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་སྒྲོགས་ཤིང་སྟོན་ཏོ། །རིགས་ཀྱི་བུ་ལོག་སྲེད་ཅན་འགའ་ཞིག་དགྲ་བཅོམ་པ་ལྟར་འཆོས་ཏེ། བས་མཐར་གནས་ནས་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ལ་འཕྱ་ཞིང་སྐུར་ན་བུས་པ་མ་རབས་དག་དེ་ལ་ཡང་དག་པར་དགྲ་བཅོམ་པའམ། བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པར་འཛིན་ཏེ། ལོག་སྲེད་ཅན་དགེ་སྦྱོང་སྡིག་པ་ཅན་དེ་བས་མཐར་གནས་ཀྱང་། བས་མཐར་གནས་པའི་ཆོས་མ་རུང་བར་བྱེད་དོ། །ཕ་རོལ་པོས་རྙེད་པ་དང་བཀུར་སྟི་ཐོབ་པ་ལ་ཕྲག་དོག་གི་སེམས་སྐྱེས་ནས་འདི་སྐད་དུ་ཤིན་ཏུ་རྒྱས་པ་ཐེག་པ་ཆེན་པོའི་མདོ་སྡེ་ཡང་བདུད་སྡིག་ཏོ་ཅན་གྱིས་བསྟན་པ་ཡིན་ཏེ། དེ་བཞིན་གཤེགས་པ་ཡང་མི་རྟག་པའོ་ཞེས་སྨྲས་ཏེ། དམ་པའི་ཆོས་འཇིག་ཅིང་དགེ་འདུན་མ་རུང་བར་བྱེད་དོ། །གཞན་ཡང་འདི་སྐད་དུ་བདུད་སྡིག་ཏོ་ཅན་གྱིས་སྨྲས་པ་ནི་དགེ་བའི་རྗེས་སུ་སྨྲས་པ་མ་ཡིན་ནོ་ཞེས་སྡིག་པ་མི་དགེ་བའི་ཆོས་དེ་སྐད་ཅེས་སྨྲས་ཏེ། སྡིག་པ་དེ་ལྟར་བྱས་ཀྱང་འོ་མ་ལས་ཞོར་འགྱུར་བ་བཞིན་དུ་འཕྲལ་དུ་སྨིན་པ་མ་ཡིན་པས་མེ་མདག་ཐལ་བས་བཀབ་པ་ལ་བརྙས་པ་བཞིན་དུ་སྟེང་
དུ་རྫིའོ། །གང་ཟག་དེ་ནི་ལོག་སྲེད་ཅན་ཞེས་བྱའོ། །དེ་བས་ན་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་དམ་པ་འདི་ངེས་པར་ཡོངས་སུ་དག་པའོ། །ནོར་བུ་རིན་པོ་ཆེ་ཆུ་རྙོག་པ་ཅན་གྱི་ནང་དུ་བཅུག་ན་ཆུ་དང་བར་འགྱུར་བ་ལྟར་ཐེག་པ་ཆེན་པོའི་མདོ་སྡེ་འདི་ཡང་དེ་དང་འདྲའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མེ་ཏོག་པད་མོ་དག་ཉི་མའི་འོད་ཀྱིས་ཕོག་མ་ཐག་ཏུ་ཁ་འབྱེའོ། །སེམས་ཅན་ཐམས་ཅད་ཀྱང་དེ་དང་འདྲ་སྟེ། གལ་ཏེ་མྱ་ངན་ལས་འདས་པ་ཆེན་པོ་ཉི་མ་ལྟ་བུ་མཐོང་ན་སེམས་མ་བསྐྱེད་པ་དག་སེམས་བསྐྱེད་ཅིང་བྱང་ཆུབ་ཀྱི་རྒྱུར་འགྱུར་རོ། །དེ་བས་ན་མྱ་ངན་ལས་འདས་པའི་འོད་བ་སྤུའི་བུ་གར་ཞུགས་ན་རྒྱུ་དམ་པར་འགྱུར་རོ། །ཞེས་ངས་གསུངས་སོ། །ལོག་སྲེད་ཅན་ནི་སངས་རྒྱས་ཀྱི་རང་བཞིན་ཡོད་ཀྱང་ཁ་ན་མ་ཐོ་བའི་དྲི་མ་ཚད་མེད་པ་སྙེད་ཀྱིས་གླགས་པས་མི་ཐར་བ་ནི་ཇི་ལྟར་དར་གྱི་སྲིན་བུའི་ཁོག་པ་དང་འདྲ་སྟེ། ལས་དེ་ལྟ་བུའི་རྐྱེན་གྱིས་བྱང་ཆུབ་ཀྱི་རྒྱུ་མི་སྐྱེ་སྟེ། འཁོར་བར་འཁོར་བའི་མཐའ་མི་ཟད་པར་གྱུར་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མེ་ཏོག་ཨུད་པ་ལ་དང་། མེ་ཏོག་པད་མོ་དང་། མེ་ཏོག་ཀུ་མུ་ད་དང་། མེ་ཏོག་པུན་ད་རཱི་ཀ་དག་འདམ་རྫབ་ཀྱི་ནང་ནས་སྐྱེས་མོད་ཀྱི། འདམ་གྱིས་མི་གོས་སོ། །སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་ལ་ནན་ཏན་བྱེད་པའང་དེ་དང་འདྲ་སྟེ། ཉོན་མོངས་པ་དང་བཅས་མོད་ཀྱི་ཉོན་མོངས་པས་མི་གོས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་རང་བཞིན་གྱི་མཚན་ཉིད་ཤེས་པའི་ཕྱིར་རོ། །རིགས་ཀྱི་བུ་དཔེར་ན་ཡུལ་ལ་ལ་ན་ཤིན་ཏུ་བསིལ་བའི་རླུང་དང་ལྡན་ན། སེམས་ཅན་གང་ཚ་བས་གདུངས་པའི་ལུས་ཀྱི་བ་སྤུའི་ཁུང་ལ་རེག་ན་ཚ་བས་གདུངས་པ་མེད་པར་འགྱུར་རོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདིའང་དེ་དང་འདྲའོ། །སེམས་ཅན་ཐམས་ཅད་ཀྱི་བ་སྤུའི་བུ་གར་འཇུག་ཅིང་བྱང་ཆུབ་ཀྱི་རྒྱུར་འགྱུར་བར་བྱེད་དེ། ལོག་སྲེད་ཅན་འབའ་ཞིག་ནི་མ་གཏོགས་སོ། །དེ་ཅིའི་ཕྱིར་ཞེ་ན། ཆོས་ཀྱི་སྣོད་མ་ཡིན་པའི་ཕྱིར་རོ། །
རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་རིག་པ་རྣམ་པ་བརྒྱད་ལ་མཁས་པ་དག་ནད་ཐམས་ཅད་ཞི་བར་བྱེད་ནུས་མོད་ཀྱི། ངེས་པར་ཤི་བའི་དུས་ལ་བབ་པ་ལ་ནི་མ་ཡིན་ནོ། །མདོ་སྡེའི་ཏིང་ངེ་འཛིན་ཐམས་ཅད་ཀྱང་དེ་དང་འདྲ་སྟེ། སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་ཀུན་ནས་ཉོན་མོངས་པའི་ནད་གསོ་ཞིང་ཀུན་ནས་ཉོན་མོངས་པའི་ཟུག་རྔུ་འབྱིན་ནུས་མོད་ཀྱི། ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་སྨན་པ་མཁས་པ་རིག་པ་བརྒྱད་ལས་ཀྱང་འདས་པ་དག་སེམས་ཅན་གྱི་ནད་ཀྱི་སྡུག་བསྔལ་ཐམས་ཅད་སེལ་ནུས་མོད་ཀྱི། གདོན་མི་ཟ་བར་ཤི་བའི་དུས་ལ་བབ་པ་ལ་ནི་མ་ཡིན་ནོ། །མྱ་ངན་ལས་འདས་པ་ཆེན་པོ་ཐེག་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། སེམས་ཅན་གྱི་ཉོན་མོངས་པ་ཐམས་ཅད་སྤོང་བར་བྱེད་ཅིང་། དེ་བཞིན་གཤེགས་པའི་ཡོངས་སུ་དག་པའི་རྒྱུར་འགྱུར་བ་ལ་བདེ་བར་འཇོག་པ་དང་། སེམས་མ་བསྐྱེད་པ་དག་སེམས་སྐྱེད་པར་ནི་བྱེད་མོད་ཀྱི། ངེས་པར་འཆི་བ་ལོག་སྲེད་ཅན་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ། སྨན་པ་མཁས་པ་ནི་མིག་ནད་ལས་ལོང་བར་གྱུར་པ་དག་ལ་ནི་ཉི་མ་དང་། ཟླ་བ་དང་། མེ་དང་། སྐར་མ་དང་། གཟུགས་རྣམ་པ་ཐམས་ཅད་མཐོང་བར་བྱེད་ནུས་ཀྱི། ཐོག་མ་ནས་དམུས་ལོང་དུ་གྱུར་པ་ལ་ནི་མ་ཡིན་ནོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ཉན་ཐོས་དང་རང་སངས་རྒྱས་ཀྱི་ཐེག་པ་ཅན་ཡང་ཤེས་རབ་ཀྱི་མིག་ཐོབ་ཅིང་ཚད་མེད་མཐའ་ཡས་པའི་ཐེག་པ་ཆེན་པོའི་མདོ་སྡེ་ལ་དགོད་པ་དང་། སེམས་མ་བསྐྱེད་པ་ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དག་ཀྱང་བྱང་ཆུབ་ཏུ་སེམས་སྐྱེད་པར་བྱེད་ནི་ནུས་ཀྱི། ཐོག་མ་ནས་དམུས་ལོང་དུ་གྱུར་པ་ལོག་སྲེད་ཅན་དག་ལ་ནི་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་ཤིན་ཏུ་མཁས་པ་རིག་པ་རྣམ་པ་བརྒྱད་དང་ལྡན་པ་ནི་སེམས་ཅན་གྱི་
ནད་ཐམས་ཅད་གསོ་བའི་ཕྱིར་སྨན་རྣམ་པ་མང་པོ་སྦྱོར་ཏེ། སྐྱུག་པ་དང་། འཁྲུ་བ་དང་། བསྐུ་བ་དང་། བདུག་པ་དང་། སྣར་བླུགས་པ་དང་། ཕྱེ་མ་དང་། རིལ་བུ་ལ་སོགས་པ་སྦྱོར་རོ། །གལ་ཏེ་མི་དབུལ་པོ་སྨན་མི་འདོད་པ་ཞིག་ན་ཡང་སྨན་པས་དེ་ལ་སྙིང་བརྩེ་བའི་ཕྱིར་ཁྱིམ་དུ་ཁྲིད་ནས་ནན་གྱིས་སྨན་བླུད་དེ། ནད་འཚོ་བར་བྱེད་དོ། །གལ་ཏེ་བུད་མེད་བུ་བཙས་པ་ཞིག་ཤ་མ་མ་ཕྱིན་ན་ཡང་དེ་ལ་སྨན་གཏོང་སྟེ། ཤ་མ་ཡང་བྱུང་ལ་བུ་ཡང་བདེ་བར་བཙའ་བར་བྱེད་དོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། གནས་གང་དང་གང་ན་ཡོད་པ་དེ་དང་དེ་དག་ཏུ་སེམས་ཅན་གྱི་ཉོན་མོངས་པ་ཚད་མེད་པ་སྙེད་ཞི་བར་བྱེད་དེ། ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དང་། སེམས་མ་བསྐྱེད་པ་ཡང་སེམས་བསྐྱེད་པར་འགྱུར་ན་ལོག་སྲེད་ཅན་ནི་མ་གཏོགས་སོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཕས་ཕམ་པ་བཞི་ཉམས་པ་དང་། མཚམས་མ་མཆིས་པ་ལྔ་བགྱིས་པ་དག་ནི་ཇི་ལྟར་ཤིང་ཏ་ལའི་མགོ་བཅད་ན་ཕྱིར་མི་སྐྱེ་བ་དང་འདྲ་སྟེ། དེ་དག་བྱང་ཆུབ་ཏུ་སེམས་མ་བསྐྱེད་པ་ཅིའི་སླད་དུ་བྱང་ཆུབ་ཀྱི་རྒྱུར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སེམས་ཅན་དེ་དག་གལ་ཏེ་རྨི་ལམ་ན་སེམས་ཅན་དམྱལ་བར་ལྟུང་སྟེ། སྡུག་བསྔལ་མང་པོ་མྱོང་བ་རྨིས་ན་འགྱོད་པའི་སེམས་སྐྱེས་ཏེ། ཀྱི་ཧུད་བདག་ཅིའི་ཕྱིར་འདི་འདྲ་བའི་སྡིག་པ་མྱོང་བར་འགྱུར། བདག་ཅི་སྟེ་སྡིག་པ་འདི་ལས་ཐར་ན་གདོན་མི་ཟ་བར་བྱང་ཆུབ་ཏུ་སེམས་བསྐྱེད་པར་བྱའོ། །ད་ལྟར་མྱོང་བ་འདི་ནི་རབ་ཏུའང་སྡུག་བསྔལ་བའོ་སྙམ་བསམས་ནས་དེ་ནས་སད་དེ་དམ་པའི་ཆོས་ལ་འབྲས་བུ་ཆེན་པོ་དང་ལྡན་པར་ཤེས་སོ། །ཇི་ལྟར་བུ་ཆུང་ངུ་བགས་ཀྱིས་ཆེར་སྐྱེས་ཀྱི་བར་དུ་རྟག་ཏུ་འདི་སྙམ་དུ་སེམས་ཏེ། སྨན་པ་དེ་ནི་སྨན་ལ་ཤིན་ཏུ་མཁས་སོ། །བདག་མངལ་ན་འདུག་པ་ལས་བདག་གི་མ་ལ་སྨན་གཏོང་བས་སྨན་གྱི་མཐུས་བདེ་བར་གྱུར་ཏེ། བདག་ཀྱང་
འཚོ་བར་གྱུར་ཏོ། །ངོ་མཚར་ཆེའོ། །བདག་གི་མས་ཟླ་བ་བཅུའི་བར་དུ་སྡུག་བསྔལ་ཆེན་པོ་མྱོང་སྟེ། བདག་བཙས་ནས་ཀྱང་གཤེར་བ་མི་བདེ་བ་དང་ནི་བྲལ། བསྐམ་པ་བདེ་བ་དང་ཕྲད་དེ་མི་གཙང་བ་བཤང་གཅི་ཆེ་ཆུང་ཡང་ཕྱགས་ནས་ནུ་ཞོ་བསྣུན་ཏེ། བདག་གི་ལུས་འདི་དག་གསོས་ནས་རིམ་གྲོ་ཆེར་བྱས་སོ། །དེ་བས་ན་བདག་ཀྱང་དྲིན་ལ་ལན་གླན་པའི་ཕྱིར་རིམ་གྲོ་ཆེར་བྱས་ཏེ་ཡིད་དང་མི་འགལ་བར་མཆོད་པ་བྱའོ་སྙམ་སེམས་སོ། །ཕས་ཕམ་པ་བཞི་ཉམས་པ་དང་། མཚམས་མེད་པའི་སྡིག་བྱས་པ་ཡང་མཐར་དུས་བྱེད་པ་ན། ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་དྲན་པར་བྱས་ན་སེམས་ཅན་དམྱལ་བའམ། བྱོལ་སོང་གི་སྐྱེ་གནས་སམ། ཡི་དགས་སམ། ལྷའམ། མིར་སྐྱེས་ཀྱང་མདོ་སྡེ་འདིས་མི་དེའི་བྱང་ཆུབ་ཀྱི་རྒྱུར་འགྱུར་བར་བྱེད་དེ། ལོག་སྲེད་ཅན་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པའམ། སྨན་པ་མཁས་པའི་བུ་སྨན་གཞན་ལས་འཕགས་པར་མཁས་པ་དུག་གི་སྨན་ལ་ཡང་ཤིན་ཏུ་མཁས་ཤིང་རིག་སྔགས་ལ་ཡང་མཁས་ན་སྦྲུལ་གདུག་པའམ། ཀླུའམ། གདུག་པ་གཞན་དག་ཀྱང་རིག་སྔགས་དང་སྨན་གྱི་མཐུས་གདུག་པ་མེད་པར་བྱེད་དོ། །གལ་ཏེ་ལྷམ་ལ་སྨན་བསྐུས་ཏེ། སྦྲུལ་གདུག་པ་ལ་སོགས་པ་ལ་རེག་ན་གདུག་པ་ཞི་བར་འགྱུར་ཡང་། གདུག་པ་ཀླུ་ཆེན་པོ་ཞེས་བྱ་བ་ནི་མ་ཡིན་ནོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། སེམས་ཅན་གང་ཕས་ཕམ་པ་བཞི་ཉམས་སམ། མཚམས་མེད་པ་ལྔ་བྱས་ཀྱང་དེ་དག་གི་ཁ་ན་མ་ཐོ་བའི་སྡིག་པ་བྱང་ཞིང་བྱང་ཆུབ་ལ་དགོད་པར་བྱེད་དོ། །ལྷམ་ལ་སྨན་གྱིས་བསྐུས་ན་ཡང་དུག་ཞི་བར་བྱེད་པ་ལྟར་སེམས་མ་བསྐྱེད་པ་དག་ཀྱང་སེམས་བསྐྱེད་ཅིང་བྱང་ཆུབ་ལ་བདེ་བར་དགོད་པར་བྱེད་དོ། །ཐེག་པ་ཆེན་པོ་མྱ་ངན་ལས་འདས་པ་ཆེན་པོའི་མདོ་སྡེ་སྨན་ལྟ་བུ་འདིའི་མཐུས་སེམས་ཅན་ཐམས་ཅད་བདེ་བར་བྱེད་ཀྱང་ཀླུ་ཆེན་པོ་ལྟ་བུ་ལོག་སྲེད་ཅན་དག་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་
དཔེར་ན་མི་ཞིག་གིས་དུག་རྣམ་པར་སྦྱར་ནས་རྔ་ཆེན་པོ་ལ་བསྐུས་ཏེ་མི་མང་པོའི་ནང་དུ་བརྡུངས་ན་སྒྲ་དེ་ཐོས་པར་མི་འདོད་མོད་ཀྱི། ཐོས་པ་ཐམས་ཅད་འཆི་ཡང་གློ་བུར་དུ་འཆི་བར་མི་འགྱུར་བ་འབའ་ཞིག་ནི་མ་གཏོགས་སོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་འདི་ཡང་དེ་དང་འདྲ་སྟེ། གང་དང་གང་ན་འདུ་བྱེད་མང་པོའི་ནང་དུ་སྒྲ་ཐོས་པར་གྱུར་ན་འདོད་ཆགས་དང་། ཞེ་སྡང་དང་། གཏི་མུག་གི་ཉོན་མོངས་པ་ཀུན་འབྱང་བར་འགྱུར་ཏེ། དེ་ལ་སེམས་ཤིང་ཡིད་ལ་བྱ་བའི་བསམ་པ་མེད་ཀྱང་མྱ་ངན་ལས་འདས་པ་ཆེན་པོའི་མཐུས་ཉོན་མོངས་པ་ཀུན་ཞི་བར་འགྱུར་རོ། །ཕས་ཕམ་པ་བཞི་ཉམས་པ་དང་། མཚམས་མེད་པ་ལྔ་བྱས་པ་དག་ཀྱང་མདོ་སྡེ་འདི་ཐོས་ན་བླ་ན་མེད་པའི་བྱང་ཆུབ་ཀྱི་རྒྱུར་འགྱུར་ཏེ། ཉོན་མོངས་པ་ཁད་ཀྱིས་འབྱང་བར་འགྱུར་ན་གློ་བུར་དུ་མི་འཆི་བ་ལོག་སྲེད་ཅན་ནི་མ་གཏོགས་སོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་མུན་སྲོས་ན་ལས་བྱ་བ་ཐམས་ཅད་གཏོང་སྟེ། འཕྲོ་ལུས་ཀྱང་སང་གི་བར་དུ་སྡོད་དོ། །ཐེག་པ་ཆེན་པོ་སློབ་པ་ཡང་དེ་དང་འདྲ་སྟེ། མདོ་སྡེའི་ཏིང་ངེ་འཛིན་ཐམས་ཅད་ལ་ནན་ཏན་བྱས་ཀྱང་མྱ་ངན་ལས་འདས་པ་ཆེན་པོ་ཉི་མ་ལྟ་བུ་འདི་ལས་དེ་བཞིན་གཤེགས་པས་དགོངས་ཏེ་གསུངས་པ་འདི་ཐོས་ནས་གདོད་བྱང་ཆུབ་ཀྱི་ལས་བྱེད་དེ་དམ་པའི་ཆོས་ལ་བདེ་བར་གནས་སོ། །དཔེར་ན་ཆར་པ་ནི་ས་བོན་ཐམས་ཅད་སྐྱེ་བ་དང་འབྲས་བུ་ཐམས་ཅད་སྨིན་པ་དང་། མུ་གེ་ལ་སོགས་པ་སེལ་ཅིང་ལོངས་སྤྱོད་དང་ལྡན་པར་བྱེད་དོ། །དེ་བཞིན་གཤེགས་པའི་སྙིང་པོ་ཆོས་ཀྱི་ཆར་ཚད་མེད་པ་འདི་ཡང་དེ་དང་འདྲ་སྟེ། གདུང་བའི་ནད་རྣམ་པ་བརྒྱད་སེལ་བ་དང་། མདོ་སྡེ་འདི་འཇིག་རྟེན་དུ་བྱུང་བས་འབྲས་བུ་ཐམས་ཅད་སྨིན་པར་བྱེད་པ་དང་། ཐམས་ཅད་ལ་ཕན་པ་དང་བདེ་བར་འགྱུར་བ་དང་། སོ་སོའི་སྐྱེ་བོ་དག་སངས་རྒྱས་ཀྱི་རང་བཞིན་མཐོང་བ་ཇི་ལྟར་པུཎྜ་རཱི་ཀའི་མདོ་ལས་ཉན་ཐོས་བརྒྱད་སྟོང་རྣམས་ལ་ལུང་བསྟན་ཏེ་འབྲས་བུ་ཆེན་པོ་ཐོབ་པ་བཞིན་ནོ། །ཇི་ལྟར་སྟོན་གྱི་དུས་སུ་ལས་བྱས་ནས་དགུན་སྦེད་པ་ལྟར་ལས་གཞན་མི་བྱེད་པ་ལོག་སྲེད་
ཅན་ཡང་དེ་དང་འདྲ་སྟེ། དགེ་བའི་ཆོས་ལ་རྩོལ་བ་མེད་དོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་ཞིག་ཕ་རོལ་པོའི་བུ་ཞིག་འདྲེས་བརླམས་ཞེས་ཐོས་ན་སྨན་བཟང་པོ་སྦྱར་ཏེ། མི་ཅིག་དེའི་སྟེང་དུ་མངགས་ནས་འདི་སྐད་ཅེས་ཁྱོད་སྨན་འདི་ཐོགས་ལ་དེའི་གན་དུ་སྐྱོལ་ཅིག །ཅི་སྟེ་མངགས་པའི་མི་དེ་ཉིད་ལམ་དུ་ཡི་དགས་དང་ཕྲད་ན་ཡང་སྨན་དེའི་སྟོབས་ཀྱིས་འབྱོལ་ཞིང་འབྲོས་པར་འགྱུར་རོ། །ཁྱོད་ཅི་སྟེ་ཐོགས་ན་ཡང་ཁོ་བོ་ཉིད་དོན་དུ་འགྲོ་སྟེ། ནད་པ་དེ་གློ་བུར་གྱིས་འཆི་བར་མི་བྱའོ། །ཅི་སྟེ་ནད་པ་དེས་མངགས་པའི་མི་དེའམ། ཁོ་བོ་ཉིད་དང་ཕྲད་ན་སྨན་གྱི་སྟོབས་ཀྱིས་ནད་ཀྱི་སྡུག་བསྔལ་དང་བྲལ་ཏེ་བདེ་བར་འགྱུར་རོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། མུ་སྟེགས་ཅན་ལ་སོགས་པ་གང་སུ་ཡང་རུང་སྟེ། མདོ་སྡེ་འདི་འཆང་ངམ། འཛིན་ཏམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཅིང་འཆད་དམ། བདག་གིས་གླེགས་བམ་དུ་བྲིས་སམ། གཞན་འདྲིར་བཅུག་ན་དེ་དག་ཐམས་ཅད་ཀྱི་བྱང་ཆུབ་ཀྱི་རྒྱུར་འགྱུར་རོ། །གལ་ཏེ་ཕས་ཕམ་པ་བཞི་ཉམས་སམ། མཚམས་མེད་པ་ལྔའི་སྡིག་བྱས་སམ། ཡི་དགས་ཀྱིས་བརླམས་སམ། གདུག་པས་གནོད་པར་གྱུར་པ་དག་མདོ་སྡེ་འདི་ཐོས་ན་སྡིག་པ་ཐམས་ཅད་བྱང་བར་འགྱུར་ཏེ། ཇི་ལྟར་སྨན་པ་མཁས་པ་དེ་མཐོང་ན་ཡི་དགས་ལ་སོགས་པ་འབྱོལ་ཞིང་འབྲོས་པ་བཞིན་ནོ། །དེ་བས་ན་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པ་ཞེས་བྱའོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ཆེན་པོ་ཐོས་པ་ཙམ་དང་། དེ་བཞིན་གཤེགས་པ་རྟག་གོ་བར་བསམས་པའི་ཕྱིར་རོ། །ཐོས་པ་ཙམ་གྱིས་ཀྱང་དེ་ལྟ་བུར་གྱུར་ན། གླེགས་བམ་དུ་འདྲིའམ། འཆང་ངམ། འཛིན་ཏམ། ཀློག་གམ། འདོན་པ་ལྟ་སྨོས་ཀྱང་ཅི་དགོས་ཏེ། ལོག་སྲེད་ཅན་མ་གཏོགས་པར་ཐམས་ཅད་བྱང་ཆུབ་སེམས་དཔའ་
སེམས་དཔའ་ཆེན་པོ་ཡིན་པར་རིག་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་འོན་པས་སྒྲ་སྐད་ཅི་ཡང་མི་ཐོས་སོ། །ལོག་སྲེད་ཅན་ཡང་དེ་དང་འདྲ་སྟེ། མདོ་སྡེ་དམ་པ་འདི་ཉན་པར་རྩོལ་ཡང་མི་ཐོས་སོ། །དེ་ཅིའི་ཕྱིར་ཞེ་ན། ཐོས་པའི་རྒྱུ་མེད་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པ་དཔྱད་ཐམས་ཅད་རབ་ཏུ་རྟོགས་པ་རིག་སྔགས་ཚད་མེད་པ་ཡང་ཤེས་པ་ཞིག་གིས་རྒྱལ་པོ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་རྒྱལ་པོ་ཆེན་པོ་ལ་ནི་ངེས་པར་འཆི་བར་འགྱུར་བའི་ནད་ཡོད་དོ། །རྒྱལ་པོས་སྨྲས་པ། ཁྱོད་ཁོ་བོའི་ཁོང་པར་མ་ཕྱིན་ན། ཁོ་བོ་ལ་ངེས་པར་འཆི་བར་འགྱུར་བའི་ནད་ཡོད་པར་ཇི་ལྟར་ཤེས། སྨན་པས་སྨྲས་པ། དེ་ལྟར་ཡིད་མི་ཆེས་ན་བཀྲུ་སྨན་ཐོང་ཤིག་དང་། ནད་ཕྱིར་འབྱུང་སྟེ་མཐོང་བར་འགྱུར་རོ་ཞེས་སྨྲས་ཀྱང་སྨན་འཐུང་དུ་མ་བཏུབ་བོ། །དེ་ནས་སྨན་པ་དེས་རིག་སྔགས་ཀྱི་མཐུས་རྒྱལ་པོ་དེའི་རྐུབ་ལ་ཤུ་བ་སྐྱེས་ནས་རྐུབ་ནས་སྲིན་བུ་དང་ཁྲག་བྱུང་བར་བྱས་སོ། །རྒྱལ་པོ་དེ་དེ་ལྟར་གྱུར་པ་མཐོང་ནས་ཤིན་ཏུ་སྐྲག་སྟེ། སྨན་པ་དེ་ལ་ལེགས་སོ་ལེགས་སོ་ཞེས་བསྟོད་ནས་སྔར་ཁྱོད་ཀྱི་ཚིག་མ་ཉན་ཏེ། ད་ཡང་ཁྱོད་ཀྱིས་བདག་གི་ལུས་ལ་ཤིན་ཏུ་ཕན་པ་ཆེན་པོ་བྱས་སོ་ཞེས་སྨྲས་ནས་སྨན་པ་དེ་ཕ་མ་ལྟ་བུར་བཀུར་སྟི་བྱེད་དོ། །ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་ཡང་དེ་དང་འདྲ་སྟེ། སེམས་ཅན་གང་འདོད་པ་དང་བཅས་པའམ། འདོད་པ་མེད་ཀྱང་རུང་སྟེ། དེ་དག་གི་ཉོན་མོངས་པ་ཐམས་ཅད་ཞི་བར་བྱེད་དོ། །སེམས་ཅན་གང་རྨི་ལམ་ན་མདོ་སྡེ་འདི་རྨིས་པས་མཆོད་པ་དང་། བཀུར་སྟི་བྱེད་པ་ནི་ཇི་ལྟར་རྒྱལ་པོ་ཆེན་པོས་སྨན་པ་མཁས་པ་ལ་བཀུར་སྟི་བྱེད་པ་བཞིན་ནོ། །ཇི་ལྟར་སྨན་པ་མཁས་པས་ངེས་པར་འཆི་བར་འགྱུར་བ་མི་གསོ་བ་བཞིན་དུ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། ལོག་སྲེད་ཅན་ལ་གསོ་བར་མི་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པས་རིག་པའི་གནས་བརྒྱད་ལ་མཁས་པ་དག་ནད་ཐམས་ཅད་གསོ་ནུས་ཀྱང་ངེས་པར་འཆི་བར་འགྱུར་བའི་ནད་གསོ་ནུས་པ་མ་ཡིན་ནོ། །
སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་དེ་དང་འདྲ་སྟེ། སེམས་ཅན་གྱི་སྲིད་པའི་ཁ་ན་མ་ཐོ་བ་ཐམས་ཅད་གསོ་ནུས་ཀྱང་ངེས་པར་འཆི་བར་འགྱུར་བ་ལྟ་བུ་ལོག་སྲེད་ཅན་དག་གསོ་ནུས་པ་མ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྨན་པ་མཁས་པས་རིག་པའི་གནས་བརྒྱད་ལ་མཁས་པ་སྨན་དཔྱད་ཀུན་དང་རིག་པའི་གནས་བརྒྱད་ཀྱི་ཕ་རོལ་ཏུ་ཕྱིན་ཏེ་ཐམས་ཅད་རྟོགས་ནས་སྔར་བུ་ལ་ཆུའི་ནང་ནས་འབྱུང་བ་དང་། སྐམ་ས་ལ་འབྱུང་བ་དང་། རི་ལ་འབྱུང་བའི་སྨན་ཐམས་ཅད་སྟོན་ཏོ། །དེ་དག་ཤེས་ནས་བགས་ཀྱིས་རིག་པའི་གནས་བརྒྱད་སྟོན་ཏོ། །དེ་ནས་དེ་མ་ཡིན་པ་དཔྱད་གསང་བའི་མཆོག་ཀྱང་སྟོན་ཏོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། སྔར་སྲས་དང་འདྲ་བ་དགེ་སློང་རྣམས་ལ་ཉོན་མོངས་པ་ཐམས་ཅད་བསལ་བའི་ཐབས་བསྟན་ཏེ། ལུས་གཙང་བར་བྱ་བ་སྙིང་པོ་མེད་པའི་འདུ་ཤེས་ལ་ནན་ཏན་བྱེད་དུ་བཅུག་པ་དེ་ནི་ཆུ་དང་སྐམ་ས་དང་རི་བྲགས་ལྟ་བུ་བསྟན་པའོ། །ཆུ་ཞེས་བྱ་བ་ནི་ལུས་སྡུག་བསྔལ་མྱོང་བ་ཆུའི་ཆུ་བུར་དང་འདྲའོ་ཞེས་བསྟན་པའོ། །སྐམ་ས་ཞེས་བྱ་བ་ནི་ལུས་འདི་སྙིང་པོ་མེད་དེ་ཆུ་ཤིང་དང་འདྲའོ་ཞེས་བསྟན་པའོ། །རི་བྲགས་ཞེས་བྱ་བ་ནི་ཉོན་མོངས་པའི་ནང་ན་བདག་མེད་པའི་འདུ་ཤེས་བསྒོམ་པ་བསྟན་པ་སྟེ། དེ་བས་ན་ལུས་ལ་བདག་མེད་པ་ཞེས་བྱའོ། །དེ་བཞིན་གཤེགས་པས་དེ་ལྟར་ཉེ་གནས་རྣམས་ལ་བགས་ཀྱིས་མདོ་སྡེ་དགུ་པོ་བསྟན་ཏེ་རྟོགས་པར་བྱས་ནས་དེའི་འོག་ཏུ་དེ་བཞིན་གཤེགས་པའི་སྙིང་པོ་བསྟན་ཏེ། སྲས་ལྟ་བུའི་ཕྱིར་དེ་བཞིན་གཤེགས་པ་རྟག་གོ་ཞེས་པ་བཤད་དོ། །དེ་བཞིན་གཤེགས་པས་དེ་ལྟར་ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་བསྟན་པ་ནི་སེམས་ཅན་གང་སེམས་སྐྱེད་དམ། སེམས་མ་བསྐྱེད་པ་ཐམས་ཅད་ཀྱི་བྱང་ཆུབ་ཀྱི་རྒྱུར་འགྱུར་ཏེ། ལོག་སྲེད་ཅན་འབའ་ཞིག་ནི་མ་གཏོགས་སོ། །རིགས་ཀྱི་བུ་ཐེག་པ་ཆེན་པོའི་མདོ་སྡེ་མྱ་ངན་ལས་འདས་པ་ཆེན་པོ་འདི་ནི་ཚད་མེད་མཐའ་ཡས་པ་སྟེ་བསམ་གྱིས་མི་ཁྱབ་པོ། །དེ་བས་ན་འདི་ནི་སྨན་པ་མཁས་པའི་མཆོག་ཕུལ་དུ་གྱུར་པ། གཙོ་
བོར་གྱུར་པ། མདོ་སྡེ་ཀུན་གྱི་རྒྱལ་པོ་ལྟ་བུའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གྲུ་ཆེན་པོ་ནི་རྒྱ་མཚོའི་ཚུ་རོལ་ནས་རྒྱ་མཚོའི་ཕ་རོལ་དུ་སྒྲོལ་ལ། རྒྱ་མཚོའི་ཕ་རོལ་ནས་ཚུ་རོལ་དུ་ཡང་སྒྲོལ་ལོ། །དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱང་དེ་དང་འདྲ་སྟེ། མྱ་ངན་ལས་འདས་པ་ཆེན་པོ་རིན་པོ་ཆེའི་གྲུར་ཞུགས་ན་སེམས་ཅན་ཡོངས་སུ་སྒྲོལ་ཏེ་གང་ནས་གང་དུ་འགྲོ་བར་འགྱུར་བ་ཡོད་ན་དེ་དང་དེ་དག་ཏུ་སྒྲོལ་ཞིང་དེ་བཞིན་གཤེགས་པའི་སྐུ་མཐོང་བར་མཛད་དོ། །དེ་བས་ན་དེ་བཞིན་གཤེགས་པ་ནི་གྲུ་སྒྲོལ་བའི་མཁན་པོ་ལྟ་བུའོ། །དཔེར་ན་གྲུ་གཟིངས་ཀྱང་མཉན་པ་ཡོད་ན་འགྲོ་བ་དག་རྒྱ་མཚོ་ལས་རྒལ་བར་གྱུར་ཏེ། དེ་བཞིན་གཤེགས་པ་རྟག་ཏུ་སེམས་ཅན་མང་པོ་སྒྲོལ་བའི་དོན་མཛད་པ་ཡང་དེ་དང་འདྲའོ།། །།བམ་པོ་བཅུ་གསུམ་པ། རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྒྱ་མཚོ་ཆེན་པོ་ལས་རྒལ་བའི་གྲུར་ཞུགས་པ་དག་གལ་ཏེ་རླུང་དང་ལྡན་ན་ནི་སྐད་ཅིག་ཐང་ཅིག་གིས་དཔག་ཚད་ཚད་མེད་པའི་ཕ་རོལ་ཏུ་ཕྱིན་པར་འགྱུར་རོ། །གལ་ཏེ་རླུང་དང་མི་ལྡན་ན་ལོ་ཚད་མེད་པའི་བར་དུ་བསྡད་ཀྱང་གནས་ནས་མི་འཕགས་སོ། །གལ་ཏེ་གྲུ་ཞིག་ན་ཆུར་ནུབ་སྟེ་འཆི་བར་ཡང་འགྱུར་རོ། །གལ་ཏེ་སེམས་ཅན་དག་གཏི་མུག་གི་འཁོར་བའི་རྒྱ་མཚོ་ཆེན་པོར་འདུ་བྱེད་ཀྱི་གྲུ་ལ་ཞུགས་པ་ཡང་དེ་དང་འདྲ་སྟེ། གལ་ཏེ་མྱ་ངན་ལས་འདས་པ་ཆེན་པོའི་རླུང་དྲག་པོ་དང་ཕྲད་ན་མྱུར་དུ་བླ་ན་མེད་པའི་བྱང་ཆུབ་ཏུ་ཕྱིན་པར་འགྱུར་གྱི། གལ་ཏེ་མ་ཕྲད་ན་བསྐལ་པ་ཚད་མེད་པའི་བར་དུ་འཁོར་བར་ཡོངས་སུ་འཁོར་ཏེ། གལ་ཏེ་ན་སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སུ་ལྟུང་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྒྱ་མཚོ་ཆེན་པོའི་གྲུར་ཞུགས་ཏེ་ཡུན་རིང་པོ་ལོན་པ་དག་རླུང་དང་མི་ལྡན་ན་དེ་འདི་སྙམ་དུ་སེམས་སོ། །བདག་ཅག་ནི་གདོན་མི་ཟ་བར་འཆི་བར་འགྱུར་རོ་སྙམ་སྟེ། དེ་ལྟར་སེམས་པ་ན་ཅི་སྟེ་རླུང་དྲག་པོ་དང་ཕྲད་ནས་ཡིད་བཞིན་དུ་རྒྱ་མཚོའི་ཕ་རོལ་དུ་ཕྱིན་ན་དེ་འདི་སྐད་དུ་རླུང་གིས་ཤིན་ཏུ་ཚིམ་པར་གྱུར་ཏོ། །བདག་ཅག་ཀྱང་བདེ་བར་རྒྱ་མཚོའི་བགེགས་
ལས་ཐར་བར་གྱུར་ཏོ་ཞེས་ཟེར་རོ། །སེམས་ཅན་ཡུན་རིང་པོར་གཏི་མུག་གི་འཁོར་བའི་རྒྱ་མཚོར་འཁོར་ཏེ། སྡུག་བསྔལ་གྱིས་གཟིར་བ་མྱ་ངན་ལས་འདས་པ་ཆེན་པོའི་རླུང་དང་མ་ཕྲད་པ་ན་དེ་འདི་སྙམ་དུ་སེམས་ཏེ། བདག་ཅག་ནི་གདོན་མི་ཟ་བར་སེམས་ཅན་དམྱལ་བ་དང་། ཡི་དགས་དང་། བྱོལ་སོང་གི་སྐྱེ་གནས་སུ་ལྟུང་བར་འགྱུར་རོ་སྙམ་སེམས་སོ། །ཇི་ལྟར་སེམས་པ་ན་ཅི་སྟེ་མྱ་ངན་ལས་འདས་པ་ཆེན་པོའི་རླུང་དང་ཕྲད་ནས་ཡིད་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་ན་གདོད་ཡང་དག་པ་ཡིན་པར་རྟོགས་ཏེ། ངོ་མཚར་རྨད་ཀྱི་འདུ་ཤེས་སྐྱེས་ནས་བདག་སྔོན་འདི་ལྟ་བུའི་དེ་བཞིན་གཤེགས་པའི་གསང་བའི་སྙིང་པོ་མ་ཐོས་སོ། །ཞེས་ཟེར་ཏེ་མྱ་ངན་ལས་འདས་པ་ཆེན་པོའི་མདོ་སྡེ་ལ་ཡོངས་སུ་དག་པའི་དད་པའི་སེམས་སྐྱེ་བར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲུལ་པགས་པ་བརྗེ་བ་ན་དེ་ལ་ཤི་བ་ཞེས་བྱའམ། གསོལ་པ། མ་ལགས་སོ། །བཅོམ་ལྡན་འདས་རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། ཐབས་ཀྱིས་སྐུ་ཡོངས་སུ་བཏང་བ་བསྟན་པ་ལ་ཇི་ལྟར་དེ་ལ་དེ་བཞིན་གཤེགས་པ་མི་རྟག་གོ་ཞེས་བྱ་བར་རུང་ངམ། གསོལ་པ། མ་ལགས་སོ། །བཅོམ་ལྡན་འདས་དེ་བཞིན་གཤེགས་པས་འཛམ་བུའི་གླིང་འདིར་ཐབས་ཀྱིས་སྐུ་བཏང་བ་ནི་དཔེར་ན་སྦྲུལ་པགས་པ་བརྗེ་བ་དང་འདྲ་སྟེ། དེ་བས་ན་དེ་བཞིན་གཤེགས་པ་ནི་རྟག་པ་གནས་པ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གསེར་མགར་མཁས་པས་གསེར་ལ་ཡོ་བྱད་རྣམ་པ་སྣ་ཚོགས་ཡིད་བཞིན་དུ་རྡུང་ངོ་། །དེ་བཞིན་གཤེགས་པ་ཡང་དེ་དང་འདྲ་སྟེ། སྲིད་པ་ཉི་ཤུ་ལྔ་པོར་གཟུགས་ཀྱི་སྐུ་རྣམ་པ་སྣ་ཚོགས་མངོན་པར་བསྟན་ཏེ། སོ་སོའི་སྐྱེ་བོ་འཁོར་བ་ལས་ཡོངས་སུ་འདོན་པས་དེ་བཞིན་གཤེགས་པ་ནི་སྐུ་དཔག་ཏུ་མེད་པ་ཞེས་བྱའོ། །དེ་ལྟར་སྐུ་རྣམ་པ་སྣ་ཚོགས་སྟོན་ཀྱང་རྟག་པ་གནས་པ་མི་འགྱུར་མི་འཕོ་བ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཨ་མྲ་དང་འཛམ་བུའི་ཤིང་ནི་ལོ་གཅིག་ལ་ལན་གསུམ་དུ་འགྱུར་རོ། །འདི་ལྟ་སྟེ་
ཆེད་འགའི་དུས་སུ་ནི་མེ་ཏོག་ལ་སོགས་པ་ཤིན་ཏུ་རྒྱས་པར་འགྱུར། ཆེད་འགའི་དུས་སུ་ནི་འདབ་མ་ལ་སོགས་པ་ཤིན་ཏུ་རྒྱས་པར་འགྱུར། ཆེད་འགའི་དུས་སུ་ནི་འདབ་མ་ཐམས་ཅད་ལྷགས་ནས་ཤིང་སྐམ་ལྟ་བུར་འགྱུར་རོ། །རིགས་ཀྱི་བུ་དེ་ཁྱོད་ཀྱི་ཡིད་ལ་ཇི་སྙམ་སེམས། དེའི་ཚེ་ན་ཤིང་དེ་ཡང་དག་པར་སྐམས་སམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། འཇིག་རྟེན་གསུམ་པོར་སྐུ་རྣམ་པ་གསུམ་སྟོན་ཏེ་འདི་ལྟ་སྟེ། ཆེད་འགའ་ནི་ཐོག་མ་བཙས་པ་དང་། ཆེད་འགའ་ནི་སྐུ་རྫོགས་པ་དང་། ཆེད་འགའ་ནི་མྱ་ངན་ལས་འདས་པ་བསྟན་ཏེ། དེ་བཞིན་གཤེགས་པའི་སྐུ་མི་རྟག་པ་ནི་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་འོད་སྲུང་གིས་བཅོམ་ལྡན་འདས་ལ་ལེགས་སོ་ཤིན་ཏུ་ལེགས་སོ་ཞེས་བསྟོད་ནས་བཅོམ་ལྡན་འདས་ཀྱིས་གསུངས་པ་བཞིན་ཏེ། དེ་བཞིན་གཤེགས་པ་ནི་རྟག་པ་གནས་པ་མི་འགྱུར་མི་འཕོ་བའོ། །ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པས་དགོངས་ཏེ་གསུངས་པ་ནི་ཤིན་ཏུ་ཡང་ཤེས་པར་དཀའོ། །འདི་ལྟ་སྟེ་དཔེར་ན་རྒྱལ་པོ་ཆེན་པོ་ཞིག་གིས་བློན་པོ་རྣམས་ལ་སེན་ཏ་པ་འོན་ཅིག་ཅེས་བཀའ་སྩལ་ན། སེན་ཏ་པ་ཞེས་བྱ་བ་མིང་གཅིག་ལ་དངོས་པོར་བསྔོ་བ་བཞི་ཡོད་དོ། །འདི་ལྟ་སྟེ། ལན་ཚྭ་དང་། སྣོད་དང་། ཆུ་དང་། རྟ་སྟེ་དངོས་པོ་འདི་བཞི་ནི་འཐུན་ནོ། །དེ་ལ་བློན་པོ་མཁས་པས་ནི་གལ་ཏེ་རྒྱལ་པོ་ཁྲུས་བྱ་བར་བསམས་ཏེ་སེན་ཏ་པ་འོན་ཅིག་ཅེས་བསྒོ་བའི་དུས་ན་ཆུ་འབུལ་ལོ། །རྒྱལ་པོ་ཟས་ཀྱི་བྱ་བ་བྱེད་པ་ན་སེན་ཏ་པ་འོན་ཅིག་ཅེས་བསྒོ་བའི་དུས་ན་ལན་ཚྭ་འབུལ་ལོ། །རྒྱལ་པོ་ཟས་ཀྱི་བྱ་བ་བྱས་ནས་སྐོམ་འཐུང་བ་ན་སེན་ཏ་པ་འོན་ཅིག་ཅེས་བསྒོ་བའི་དུས་ན་དེ་ལ་སྣོད་འབུལ་ལོ། །གལ་ཏེ་རྒྱལ་པོ་འགྲོ་བར་གཟས་ཏེ་སེན་ཏ་པ་འོན་ཅིག་ཅེས་བསྒོ་བའི་དུས་ན་རྟ་ཁྲིད་དེ་འོང་ངོ་། །དེ་ལྟར་བློན་པོ་མཁས་པས་ནི་རྒྱལ་པོའི་མན་ངག་བཞི་པོ་ལ་མཁས་སོ། །ཐེག་པ་ཆེན་པོའི་མདོ་སྡེ་འདི་ཡང་དེ་དང་འདྲ་སྟེ། མི་རྟག་པ་རྣམ་པ་བཞི་ཡོད་དོ། །
ཐེག་པ་ཆེན་པོ་ལ་ཤིན་ཏུ་མཁས་པའི་སྐྱེས་བུ་དག་ནི་དེ་ལ་ཤིན་ཏུ་མཁས་པར་བྱའོ། །སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ནས་སེམས་ཅན་དག་ལ་དེ་བཞིན་གཤེགས་པ་མྱ་ངན་ལས་འདས་པ་བཤད་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་རྟག་པར་འཛིན་པ་ལ་མི་རྟག་པར་བསྟན་པར་ཤེས་ཏེ། དགེ་སློང་དག་ནི་མི་རྟག་པའི་མཚན་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །གཞན་ཡང་ཆེད་འགའི་དུས་ན་དམ་པའི་ཆོས་འཇིག་པར་འགྱུར་རོ་ཞེས་བསྟན་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་གང་བདེ་བར་འཛིན་པ་ལ་སྡུག་བསྔལ་བ་བསྟན་པར་ཤེས་ཏེ། དགེ་སློང་དག་སྡུག་བསྔལ་བའི་མཚན་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །གཞན་ཡང་འདི་སྐད་དུ་ང་ལ་ན་བའི་སྡུག་བསྔལ་ཡོད་དེ། དགེ་འདུན་ཡང་འཇིག་པར་འགྱུར་རོ་ཞེས་བསྟན་པས་སྐྱེས་བུ་མཁས་པ་དག་གིས་དེ་བཞིན་གཤེགས་པས་བདག་ཏུ་འཛིན་པ་རྣམས་ལ་བདག་མེད་པ་བསྟན་པར་ཤེས་ཏེ། དགེ་སློང་དག་བདག་མེད་པ་ལ་ནན་ཏན་བྱེད་དུ་གཞུག་པའི་ཕྱིར་རོ། །ཆེད་འགའ་འདི་སྐད་དུ་སྟོང་པ་ཉིད་ཅེས་བྱ་བ་ནི་ཡང་དག་པར་རྣམ་པར་གྲོལ་བའོ་ཞེས་བསྟན་པས་སྐྱེས་བུ་མཁས་པ་དག་གིས་ནི་དེ་བཞིན་གཤེགས་པས་ཡང་དག་པར་རྣམ་པར་གྲོལ་བར་བསྟན་གྱི། སྲིད་པ་ཉི་ཤུ་ལྔ་པོ་ནི་མེད་པར་ཤེས་ཏེ། དགེ་སློང་དག་སྟོང་པ་ཉིད་ལ་ནན་ཏན་བྱེད་དུ་གཞུག་པའི་ཕྱིར་རོ། །དེ་བས་ན་ཡང་དག་པར་རྣམ་པར་གྲོལ་བ་ལ་ནི་སྟོང་པ་ཉིད་དོ་ཞེས་བསྟན་ཏོ། །མི་གཡོ་བ་གཡོ་བ་མེད་པ་ཞེས་ཀྱང་བྱ་སྟེ། རྣམ་པར་གྲོལ་བ་དེ་ལ་སྡུག་བསྔལ་བ་མེད་པའི་ཕྱིར་མི་གཡོ་བ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་མཚན་མ་མེད་པས་མཚན་མ་མེད་པ་ཞེས་བྱ་སྟེ། གཟུགས་དང་། སྒྲ་དང་། དྲི་དང་། རོ་དང་། རེག་བྱ་ལ་སོགས་པ་མེད་པའི་ཕྱིར་མཚན་མ་མེད་པ་ཞེས་བྱའོ། །ཡང་དག་པར་རྣམ་པར་གྲོལ་བ་ནི་རྟག་པ་མི་འགྱུར་མི་འཕོ་བ་སྟེ། རྣམ་པར་གྲོལ་བ་ལ་མི་རྟག་པ་དང་། གདུང་བར་འགྱུར་བ་དང་། འཕོ་བ་མེད་པས། དེ་བས་ན་རྣམ་པར་གྲོལ་བ་ནི་རྟག་པ་གནས་པ་མི་འགྱུར་བ་བསིལ་བའོ། །
གལ་ཏེ་སེམས་ཅན་ཐམས་ཅད་ལ་དེ་བཞིན་གཤེགས་པའི་རང་བཞིན་ཡོད་པ་བསྟན་ན་དེ་ལ་སྐྱེས་བུ་མཁས་པས་ནི་འདི་ལྟར་དེ་བཞིན་གཤེགས་པས་རྟག་པ་ཞེས་བྱ་བའི་ཆོས་བསྟན་ཏེ། དགེ་སློང་དག་ཡང་དག་པར་རྟག་པའི་ཆོས་ལ་ནན་ཏན་བྱེད་དུ་གཞུག་པར་ཤེས་སོ། །དགེ་སློང་དག་དེ་ལྟར་རྗེས་སུ་ནན་ཏན་བྱེད་ཅིང་སློབ་པ་དེ་ནི་ངའི་ཉེ་གནས་ཡང་དག་པ་ཡིན་པར་རིག་པར་བྱའོ། །དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ལ་མཁས་པ་དེ་ནི་ཇི་ལྟར་རྒྱལ་པོ་ཆེན་པོ་དེའི་བློན་པོ་མཁས་པས་རྒྱལ་པོའི་བསམ་པ་ཤེས་པ་དང་འདྲའོ། །རིགས་ཀྱི་བུ་དེ་ལྟར་རྒྱལ་པོ་ཆེན་པོ་དེ་ལ་ཡང་མན་ངག་ཏུ་སྨྲ་བའི་ཚིག་ཡོད་ན་དེ་བཞིན་གཤེགས་པ་ལ་ཡོད་པ་ལྟ་ཅི་སྨོས། རིགས་ཀྱི་བུ་དེ་བས་ན་དེ་བཞིན་གཤེགས་པས་དགོངས་ཏེ་གསུངས་པ་ནི་ཤིན་ཏུ་ཤེས་པར་དཀའ་སྟེ། མཁས་པ་ཤེས་རབ་ཅན་གྱིས་ནི་ངས་དགོངས་ཏེ་གསུངས་པའི་ཆོས་ཟབ་མོ་འདི་ཤེས་པར་འགྱུར་གྱི། འཇིག་རྟེན་ན་བྱིས་པ་གླེན་པ་དག་གིས་ཤེས་པར་འགྱུར་བ་མ་ཡིན་ནོ། །གཞན་ཡང་རིགས་ཀྱི་བུ་འདི་ལྟ་སྟེ་དཔེར་ན་ཤིང་པ་ལ་ཤ་དང་། ཀ་ནི་ཀ་དང་། ཨ་ཤོ་ཀ་ནི་ཐན་ཆེན་བྱུང་ན་མེ་ཏོག་དང་འབྲས་བུ་མི་སྐྱེ་སྟེ། གཞན་ཡང་ཆུ་ལས་སྐྱེས་པ་ཐམས་ཅད་ཀྱང་སྣུམ་མེད་ལ་ཚད་དུ་ཕྱིན་པར་མི་སྐྱེ་ཞིང་སྨན་ཐམས་ཅད་ཀྱང་མཐུ་ཆུང་བར་འགྱུར་རོ། །རིགས་ཀྱི་བུ་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ང་མྱ་ངན་ལས་འདས་ནས་སེམས་ཅན་དག་བསྟི་སྟང་མི་བྱེད་དེ། གཟི་བརྗིད་ཀྱང་ཆུང་བར་འགྱུར་རོ། །དེ་ཅིའི་ཕྱིར་ཞེ་ན། སེམས་ཅན་དེ་དག་དེ་བཞིན་གཤེགས་པས་དགོངས་ཏེ་གསུངས་པ་མི་ཤེས་པའི་ཕྱིར་རོ། །དེ་ཡང་ཇི་ལྟ་ཞེ་ན། སེམས་ཅན་དག་བསོད་ནམས་ཆུང་བའི་ཕྱིར་རོ། །རིགས་ཀྱི་བུ་གཞན་ཡང་དེ་བཞིན་གཤེགས་པའི་དམ་པའི་ཆོས་རྣམ་པར་འཇིག་ཅིང་ཟད་དུ་ཉེ་བ་ན་དེའི་ཚེ་དེའི་དུས་ན་དགེ་སློང་སྡིག་པ་སྤྱོད་པ་མང་སྟེ། དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་མི་ཤེས་པས་ལེ་ལོ་དང་སྙོམ་ལས་བྱེད་དེ། དེ་བཞིན་གཤེགས་པའི་ཡང་དག་པའི་ཆོས་ཀློག་པ་དང་། འདོན་པ་དང་། རྣམ་པར་
འབྱེད་ཅིང་སྟོན་མི་ནུས་སོ། །དཔེར་ན་རྐུན་པོ་གླེན་པ་དག་རིན་པོ་ཆེ་ཡང་དག་པ་བོར་ནས་ཕུབ་མ་ཁུར་དུ་ཁྱེར་བ་དང་འདྲ་བར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་མི་ཤེས་པས་མདོ་སྡེ་འདི་ལ་ལེ་ལོ་བྱེད་དེ། བརྩོན་འགྲུས་མི་སྐྱེད་དེ། ཀྱི་ཧུད་དེ་དག་ནི་མ་འོངས་པའི་དུས་སུ་ཤིན་ཏུ་འཇིགས་པའི་གཡང་ས་ཆེན་པོར་ལྟུང་བར་འགྱུར་རོ། །ཀྱི་ཧུད་སེམས་ཅན་དེ་དག་ནི་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ལ་བརྩོན་པར་མི་བྱེད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་འབའ་ཞིག་གིས་ནི་མདོ་སྡེ་འདིའི་དོན་ཡང་དག་པ་ཇི་ལྟ་བ་བཞིན་དུ་འཇུག་སྟེ། འབྲུ་དང་ཚིག་ལ་མི་ཆགས་དེའི་རྗེས་སུ་གཞོལ་ཞིང་འགལ་བར་མི་བྱེད་པས། སེམས་ཅན་རྣམས་ལ་ཡང་དེ་བཞིན་དུ་སྟོན་ཏོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་རྫིའུ་འོ་མ་འཚོང་བ་དག །འོ་མ་མང་བར་བྱ་བའི་ཕྱིར། ཆུ་སུམ་གཉིས་བསྣན་ནས་རྫིའུ་གཞན་ལ་ཡང་འཚོང་ངོ་། །རྫིའུ་དེས་ཀྱང་དེ་ལས་ཆུ་སུམ་གཉིས་བསྣན་ནས་གྲོང་ཁྱེར་དང་ཉེ་བའི་མི་ལ་འཚོང་ངོ་། །དེས་ཀྱང་དེའི་སྟེང་དུ་ཆུ་སུམ་གཉིས་བསྣན་ནས་གྲོང་ཁྱེར་ན་གནས་པའི་མི་ལ་འཚོང་ངོ་། །དེས་ཉོས་ནས་དེའི་སྟེང་དུ་ཡང་ཆུ་སུམ་གཉིས་ཀྱིས་བསྣན་ཏེ་ཚོང་དུས་སུ་འཚོང་ངོ་། །དེའི་ཚེ་དེའི་དུས་ན་མི་ཞིག་བུའི་ཆུང་མ་ལེན་པའི་འགྲོན་བོས་ནས་འོ་མ་བཟང་པོ་འདོད་པའི་ཕྱིར་ཚོང་དུས་སུ་འོ་མ་ཉོར་སོང་བ་ལས་འོ་མ་དེ་དང་ཕྲད་ནས་ཆུས་བསྣན་པ་ཆུ་མང་བར་ཤེས་བཞིན་དུ་དགོས་པའི་ཁར་བབ་པས་རིན་ཆེ་ཡང་ཉོས་སོ། །ཉོས་ནས་ཕྱིར་ཁྱིམ་དུ་ཕྱིན་པ་དང་ཐུག་པ་བཙོས་ན་འོ་མའི་རོ་མེད་དོ། །དེ་ལྟར་འོ་མའི་རོ་མེད་མོད་ཀྱི་ཁ་བའི་རོ་ལས་ནི་བརྒྱ་སྟོང་སྙེད་ཀྱིས་ལྷག་གོ །དེ་ཅིའི་ཕྱིར་ཞེ་ན། འོ་མས་སྒྱུར་བའི་རོ་ནི་རོ་གཞན་ལས་མཆོག་ཏུ་འགྱུར་བའི་ཕྱིར་རོ། །རིགས་ཀྱི་བུ་ང་མྱ་ངན་ལས་འདས་ནས་དམ་པའི་ཆོས་འཇིག་པར་མ་གྱུར་པ་ལོ་བརྒྱད་ཅུ་ན། དེའི་ཚེ་དེའི་དུས་སུ་འཛམ་བུའི་གླིང་འདིར་མདོ་སྡེ་འདི་ཤིན་ཏུ་རྒྱས་པར་འགྱུར་རོ། །དེའི་ཚེ་དེའི་དུས་ན་དགེ་སློང་སྡིག་ཅན་དག་མདོ་སྡེ་འདི་ལ་མདོ་སྡེ་བཏུས་ནས་ཕྱོགས་ཆ་
རྣམ་པ་མང་དུ་བྱེད་དེ་དེས་ནི་དམ་པའི་ཆོས་ཀྱི་མདོག་དང་བསུང་དང་བྲོ་བའི་རོ་མེད་པར་བྱས་སོ། །སྡིག་པ་ཅན་དག་དེ་ལྟར་མདོ་སྡེ་འདི་ཀློག་གམ། འདོན་མོད་ཀྱི་དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་འདི་མེད་པར་བྱས་ཀྱི། འཇིག་རྟེན་གྱི་སྙན་ཚིག་དོན་མེད་པ་བརྟགས་ནས་གོང་དུ་སྨོས་པ་ནི་འོག་ཏུ་བཅུག །འོག་ཏུ་སྨོས་པ་ནི་གོང་དུ་བཅུག །ཐོག་མ་དང་ཐ་མར་སྨོས་པ་ནི་བར་དུ་བཅུག །བར་དུ་སྨོས་པ་ནི་ཐོག་མ་དང་ཐ་མར་བཅུག་གོ །དེ་ལྟར་དགེ་སློང་སྡིག་པ་ཅན་དེ་དག་ནི་བདུད་ཀྱི་གྲོགས་ཡིན་ཏེ། མ་བརྟགས་པའི་དངོས་པོ་ཐམས་ཅད་འཆང་ཡང་དེ་བཞིན་གཤེགས་པས་འཆང་དུ་གནང་ངོ་ཞེས་ཟེར་ཏེ། ཇི་ལྟར་རྫིའུ་ལ་སོགས་པ་འོ་མའི་ནང་དུ་ཆུས་སྣོན་པ་བཞིན་དུ་དགེ་སློང་སྡིག་པ་ཅན་ཡང་དེ་དང་འདྲ་སྟེ། འཇིག་རྟེན་གྱི་ཚིག་གིས་བསྣན་ཏེ་ནོར་བར་གཏན་ལ་ཕབ་པས་སྐྱེ་བོ་མང་དུ་ཡང་དག་པར་བསྟན་པ་དང་། ཡང་དག་པར་གླེགས་བམ་དུ་འདྲི་བ་དང་། ཡང་དག་པར་འདྲིར་འཇུག་ཅིང་བཀུར་སྟི་དང་། བསྟོད་པ་དང་། མཆོད་པ་དང་། རིམ་གྲོར་བྱར་མེད་པར་བྱས་སོ། །དགེ་སློང་སྡིག་པ་ཅན་དེས་རྙེད་པ་དང་། གྲགས་པའི་ཕྱིར་མདོ་སྡེ་འདི་ཅུང་ཟད་ཙམ་ཡང་སྟོན་མི་ནུས་ན་རྒྱ་ཆེར་སྟོན་པ་ལྟ་ཅི་སྨོས་ཏེ། ཇི་ལྟར་རྫིའུ་དབུལ་མོས་འོ་མ་གཅིག་ནས་གཅིག་ཏུ་འཚོང་ཞིང་རོ་མེད་པར་འགྱུར་བ་ལྟར་ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་ཆེན་པོ་འདི་ཡང་དེ་དང་འདྲ་སྟེ། ཕྱིར་ཞིང་མི་བྲོ་བ་དང་རོ་མེད་པར་འགྱུར་རོ། །དེ་ལྟར་རོ་མེད་ཀྱང་གཞན་པས་སྟོང་འགྱུར་གྱིས་ལྷག་པ་ནི་འོ་མའི་རོ་དེ་རོ་གཞན་པས་སྟོང་འགྱུར་གྱིས་ལྷག་པ་བཞིན་ནོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་སྡེ་ཡོངས་སུ་མྱ་ངན་ལས་འདས་པ་འདི་ཉན་ཐོས་ཀྱི་མདོ་སྡེ་ལས་ཕུལ་དུ་གྱུར་མཆོག་ཏུ་གྱུར་པ་ནི་ཇི་ལྟར་བའི་འོ་མ་རོ་ཐམས་ཅད་པས་མཆོག་ཏུ་གྱུར་པ་བཞིན་ནོ། །དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །རིགས་ཀྱི་བུ་གཞན་ཡང་རིགས་ཀྱི་བུ་དང་རིགས་ཀྱི་བུ་མོ་ལ་སོགས་པ་གང་ཡང་སྐྱེས་པའི་ལུས་མི་འདོད་པ་མེད་དོ། །དེ་ཅིའི་ཕྱིར་ཞེ་ན། བུད་མེད་ཐམས་ཅད་ནི་སྡིག་
པ་ཐམས་ཅད་ཀྱི་གནས་ཡིན་པའི་ཕྱིར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲང་བུའི་གཅིན་གྱིས་ནི་ས་ཆེན་པོ་འདི་རླན་པར་མི་ནུས་སོ། །བུད་མེད་ཅེས་བྱ་བའི་འདོད་ཆགས་ཆོག་མི་ཤེས་པ་ཡང་དེ་དང་འདྲ་སྟེ། འདི་ལྟ་སྟེ། དཔེར་ན་ས་ཆེན་པོ་འདི་ཐམས་ཅད་ཡུངས་ཀར་གྱི་འབྲུམ་བུ་ཙམ་དྲིལ་བའི་སྐྱེས་པ་དེ་སྙེད་བུད་མེད་གཅིག་ལ་མི་ཚངས་པ་སྤྱད་ཀྱང་ཆོག་པའི་སེམས་མེད་དོ། །གལ་ཏེ་ཀླུང་གང་གཱའི་བྱེ་མ་སྙེད་ཀྱི་སྐྱེས་པ་བུད་མེད་གཅིག་ལ་བྱིན་ཏེ་མི་ཚངས་པར་སྤྱོད་དུ་བཅུག་ཀྱང་ཆོག་པའམ་སྐྱོ་བ་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན་རྒྱ་མཚོ་ཆེན་པོར་ནི་ཆར་པ་དང་འབབ་ཆུ་ཐམས་ཅད་འབབ་ཀྱང་རྒྱ་མཚོ་དེ་ལ་གང་བའམ་ཆོག་པ་མེད་དོ། །བུད་མེད་ཀྱང་ཆོས་ཉིད་ཀྱིས་དེ་དང་འདྲ་བས་ཅི་སྟེ་དངོས་པོ་ཐམས་ཅད་སྐྱེས་པར་གྱུར་ཏེ་བུད་མེད་གཅིག་ལ་མི་ཚངས་པར་སྤྱོད་ཀྱང་ཆོག་པར་རམ་སྐྱོ་བར་མི་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཤིང་ཨ་ཤོ་ཀ་དང་། པ་ཏ་ལ་དང་། ཀ་ནི་ཀ་ལྟ་བུ་དབྱར་མེ་ཏོག་རྒྱས་པ་ན་བུང་བ་དག་དྲི་དང་བསུང་ལེན་པ་ཆོག་མི་ཤེས་སོ། །བུད་མེད་སྐྱེས་པ་ལ་ཆགས་པ་ཡང་དེ་དང་འདྲ་སྟེ། སྐྱོ་མི་ཤེས་སོ། །རིགས་ཀྱི་བུ་དེ་བས་ན་རིགས་ཀྱི་བུ་དང་རིགས་ཀྱི་བུ་མོ་དག་ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཉན་ན་རྟག་ཏུ་བུད་མེད་ལ་ཡོངས་སུ་སྨོད་དེ་སྐྱེས་པའི་ལུས་ཚོལ་ལོ། །དེ་ཅིའི་ཕྱིར་ཞེ་ན། ཐེག་པ་ཆེན་པོའི་མདོ་སྡེ་འདི་སྐྱེས་བུའི་མཚན་དང་ལྡན་ནོ། །འདི་ལྟ་སྟེ་དེ་ནི་སངས་རྒྱས་ཀྱི་རང་བཞིན་ནོ། །དེ་ལ་གང་སངས་རྒྱས་ཀྱི་རང་བཞིན་མི་ཤེས་པ་དེ་ནི་སྐྱེས་བུའི་མཚན་མེད་པ་ཡིན་ནོ། །དེ་ཅིའི་ཕྱིར་ཞེ་ན། བདག་ལ་སངས་རྒྱས་ཀྱི་རང་བཞིན་ཡོད་པར་མི་ཤེས་པའི་ཕྱིར་རོ། །གང་སངས་རྒྱས་ཀྱི་རང་བཞིན་མི་ཤེས་པ་དེ་ནི་བུད་མེད་ཅེས་ངས་བཤད་དོ། །གང་སངས་རྒྱས་ཀྱི་རང་བཞིན་ཤེས་པ་དེ་ནི་སྐྱེས་བུའི་མཚན་དང་ལྡན་པ་ཞེས་ངས་བཤད་དོ། །དེ་ལ་བུད་མེད་གང་ཞིག་གལ་ཏེ་བདག་ལ་སངས་རྒྱས་ཀྱི་རང་བཞིན་ཡོད་པར་ཤེས་ན་དེ་ནི་སྐྱེས་པ་ཞེས་བྱའོ། །རིགས་ཀྱི་བུ་ཐེག་པ་ཆེན་པོ་ཡོངས་སུ་མྱ་ངན་ལས་འདས་
པའི་མདོ་སྡེ་འདི་ནི་ཚད་མེད་དཔག་ཏུ་མེད་བསམ་གྱིས་མི་ཁྱབ་པའི་བསོད་ནམས་ཀྱི་ཕུང་པོར་རིག་པར་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པའི་གསང་བའི་སྙིང་པོ་འཆད་པའི་ཕྱིར་རོ། །དེ་བས་ན་རིགས་ཀྱི་བུའམ་རིགས་ཀྱི་བུ་མོ་དག་དེ་བཞིན་གཤེགས་པའི་གསང་བའི་སྙིང་པོ་མྱུར་དུ་ཤེས་པར་འདོད་ན་མདོ་སྡེ་འདི་ལ་སྦྱོར་བའི་ནན་ཏན་བརྩོན་འགྲུས་སུ་བྱའོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། དེ་དེ་བཞིན་ཏེ། དེ་དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ་བཞིན་ཏེ། བདག་ཀྱང་དེ་བཞིན་གཤེགས་པའི་གསང་བའི་སྙིང་པོ་རྟོགས་པས་སྐྱེས་བུའི་མཚན་དང་ལྡན་ནོ། །དེ་བཞིན་གཤེགས་པས་བསྐུལ་བས་ངེས་པར་རྟོགས་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ། །རིགས་ཀྱི་བུ་ཁྱོད་འཇིག་རྟེན་པའི་རྗེས་སུ་འདི་སྐད་སྨྲས་པ་ལེགས་སོ། །འོད་སྲུང་གིས་གསོལ་པ། བདག་ནི་འཇིག་རྟེན་པའི་ཆོས་ཀྱི་རྗེས་སུ་འཇུག་པ་མ་ལགས་སོ། །བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། ལེགས་སོ་ཤིན་ཏུ་ལེགས་སོ། །ཁྱོད་ཀྱིས་ཤེས་པ་ནི་བླ་ན་མེད་པའི་ཆོས་ཀྱི་རོ་ཤིན་ཏུ་ཟབ་མོ་ཤེས་པར་དཀའ་བ་ཤེས་ཏེ། ཇི་ལྟར་བུང་བ་དག་ཁ་དོག་ལ་མི་གནོད་པར་རོ་མྱོང་བ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་སྦྲང་བུའི་གཅིན་གྱིས་ས་ཆེན་པོ་འདི་རླན་པར་མི་ནུས་སོ། །མ་འོངས་པའི་དུས་ན་མདོ་སྡེ་འདི་འཕེལ་བ་ཡང་དེ་དང་འདྲ་སྟེ། དམ་པའི་ཆོས་རྣམ་པར་འཇིག་ཏུ་ཉེ་བ་ན་མདོ་སྡེ་འདི་ས་ཕྱོགས་འདིར་སྔར་ནུབ་པར་འགྱུར་རོ། །དེ་བས་ན་དམ་པའི་ཆོས་ཉམས་པར་འགྱུར་བར་རིག་པར་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་དབྱར་འདས་པའི་འོག་ཏུ་སྟོན་འབྱུང་སྟེ། སྟོན་གྱི་དུས་སུ་ནི་རྒྱུན་མི་འཆད་པར་ཆར་པ་འབབ་བོ། །ཐེག་པ་ཆེན་པོ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ཡང་དེ་དང་འདྲ་སྟེ། ལྷོ་ཕྱོགས་ཀྱི་བྱང་ཆུབ་སེམས་དཔའ་རྣམས་ཀྱི་ཕྱིར་ཤིན་ཏུ་རྒྱས་པར་འགྱུར་ཏེ། ཆོས་ཀྱི་ཆར་གྱིས་གནས་ཀུན་ཏུ་གང་བར་འགྱུར་རོ། །དམ་པའི་ཆོས་འཇིག་ཏུ་ཉེ་བ་ན་ཡུལ་ཁ་ཆེ་ཡུལ་
དུ་མི་ཉམས་པར་བགས་ཀྱིས་སའི་ནང་དུ་ནུབ་པར་འགྱུར་ཏེ། དེ་དག་ལས་ཁ་ཅིག་ནི་དད། ཁ་ཅིག་ནི་མི་དད་དོ། །དེ་ནས་ཐེག་པ་ཆེན་པོ་ཤིན་ཏུ་རྒྱས་པའི་མདོ་སྡེ་ཟིལ་དངར་གྱི་རོ་དང་ལྡན་པ་ཐམས་ཅད་སའི་ནང་དུ་ནུབ་པར་འགྱུར་རོ། །མདོ་སྡེ་འདི་ནུབ་ནས་ཐེག་པ་ཆེན་པོའི་མདོ་སྡེ་གཞན་ཐམས་ཅད་ཀྱང་ནུབ་ཅིང་མེད་པར་གྱུར་ཏོ། །གལ་ཏེ་མདོ་སྡེ་འདིའི་ཕུན་སུམ་ཚོགས་པ་མི་ཉམས་པ་མིའི་ནང་ན་གླང་པོ་ཆེའི་རྒྱལ་པོ་ལྟ་བུ་བྱང་ཆུབ་སེམས་དཔའ་ལ་སོགས་པས་ནི་དེ་བཞིན་གཤེགས་པའི་བླ་ན་མེད་པའི་དམ་པའི་ཆོས་རིང་པོར་མི་ཐོགས་པར་མེད་པར་འགྱུར་བ་ཤེས་སོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ད་ལྟར་ཙུན་དའི་ཐེ་ཙོམ་དུ་གྱུར་པ་བཅོམ་ལྡན་འདས་ཀྱིས་ཐེ་ཙོམ་བཅད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ཐེ་ཙོམ་དུ་གྱུར་པ་སྨྲོས་ཤིག་དང་། ཁྱོད་ཀྱི་ཐེ་ཙོམ་བསལ་བར་བྱའོ། །འཇམ་དཔལ་གྱིས་གསོལ་པ། སངས་རྒྱས་ཀྱི་རང་བཞིན་འཚལ་ཞིང་མཐོང་བའི་དུས་ན་དེ་བཞིན་གཤེགས་པ་རྟག་པ་ལགས་ལ། སངས་རྒྱས་ཀྱི་རང་བཞིན་མཐོང་བས་རྟག་པ་ཞེས་བགྱི་ན་མ་མཐོང་བའི་སྔོན་རོལ་ན་རྟག་པ་མ་ལགས་སམ། ཐོག་མ་ནས་མི་རྟག་པ་ཞིག་ལགས་ན་ནི་ཕྱིས་ཀྱང་མི་རྟག་པར་འགྱུར་བའི་རིགས་སོ། །དེ་ཅིའི་སླད་དུ་ཞེ་ན། དཔེར་ན་འཇིག་རྟེན་གྱི་རྫས་ལྟ་བུ་ཐོག་མ་ནས་མ་མཆིས་པ་ཞིག་ལགས་ལ། ད་མཆིས་པར་རུང་ན་མཆིས་ནས་ཀྱང་སླར་མ་མཆིས་པར་འགྱུར་ཏེ། དངོས་པོ་ཐམས་ཅད་ནི་རྟག་པ་མ་ལགས་སོ། །དེ་བས་ན་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་ལ་སོགས་པ་ཡང་དེ་དང་བྱེ་བྲག་མ་མཆིས་སོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ཐོག་མ་ཡོད་ལ་ད་ལྟར་མེད། །ཐོག་མ་མེད་ལ་ད་ལྟར་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ནི་མ་ཡིན་ནོ། །རིགས་ཀྱི་བུ་དེ་བས་ན་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དག་ཐ་དད་པ་ཡང་ཡོད་ལ་ཐ་དད་པ་ཡང་མེད་
དོ། །འཇམ་དཔལ་གྱིས་བཅོམ་ལྡན་འདས་ལ་གསོལ་པ། ལེགས་སོ་ལེགས་སོ། །འཕགས་པའི་བཀའ་བཞིན་ཏེ། བདག་ཀྱང་དེ་ལྟར་རྟོགས་སོ། །སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དག་ཐ་དད་པ་ཡང་ལགས་ལ། ཐ་དད་པ་ཡང་མ་ལགས་པར་འཚལ་ཏོ། །བྱང་ཆུབ་སེམས་དཔའ་འོད་སྲུང་གིས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཀྱིས་གསུངས་པ་ལྟར་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དག་ཏུ་ཐ་དད་པ་མ་མཆིས་ཞེས་བགྱི་བ་དེ་སེམས་ཅན་ཐམས་ཅད་ལ་ཕན་པ་དང་། བདེ་བའི་དོན་གྱི་སླད་དུ་དེ་བཞིན་གཤེགས་པས་རྒྱས་པར་དབྱེ་ཞིང་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིན་ཏུ་བརྟགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་རྒྱས་པར་བཤད་པར་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་ཁྱིམ་བདག་གམ། ཁྱིམ་བདག་གི་བུ་ཞིག་ལ་བ་བཞོན་སྤུ་མདོག་རྣམ་པ་ཐ་དད་པ་མང་དུ་ཡོད་དེ། རྫིའུ་ཅིག་འཚོར་བཅུག་ནས་ཕྱིས་དུས་ཀྱི་ལྷ་རྗེད་པ་ཞིག་ན། བ་ཐམས་ཅད་བཞོས་ཏེ་འོ་མ་སྣོད་ཅིག་ཏུ་བླུགས་སོ། །འོ་མ་དེ་དག་ཐམས་ཅད་ཁ་དོག་དཀར་པོ་གཅིག་ཏུ་འཐུན་པ་མཐོང་ནས་ངོ་མཚར་རྨད་དུ་གྱུར་ཏེ། འདི་ལྟར་བ་འདི་དག་སྤུ་མདོག་ཐ་དད་པ་ཅིའི་ཕྱིར་འོ་མ་ཁ་དོག་གཅིག་ཏུ་གྱུར་སྙམ་ཡ་མཚན་དུ་གྱུར་ཏེ། འདི་ཡང་སེམས་ཅན་གྱི་ལས་ཀྱི་རྣམ་པར་སྨིན་པ་ལས་འོ་མའི་ཁ་དོག་གཅིག་ཏུ་གྱུར་ཏོ་སྙམ་དུ་སེམས་སོ། །རིགས་ཀྱི་བུ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་ཡང་དེ་དང་འདྲ་སྟེ། སངས་རྒྱས་ཀྱི་རང་བཞིན་གཅིག་ཏུ་འཐུན་པ་ནི་འོ་མ་དེ་དག་ལྟ་བུའོ། །དེ་ཅིའི་ཕྱིར་ཞེ་ན། ཟག་པ་མེད་པར་འཐུན་པའི་ཕྱིར་རོ། །སོ་སོའི་སྐྱེ་བོ་དག་ནི་སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་དང་རང་སངས་རྒྱས་དག་ཐ་དད་དོ་ཞེས་སྨྲ་སྟེ། ཉན་ཐོས་དང་བུས་པ་མ་རབས་དག་ཀྱང་ཐེག་པ་གསུམ་ལྟ་བུ་ཅིའི་ཕྱིར་ཐ་མི་དད་སྙམ་ཐེ་ཚོམ་ཟ་མོད་ཀྱི། དེ་དག་གིས་ཐེག་པ་གསུམ་ཆར་སངས་རྒྱས་ཀྱི་རང་བཞིན་དུ་འཐུན་པར་ཕྱིས་རང་རྟོགས་པ་ནི་ཇི་ལྟར་གང་ཟག་དེ་
ལས་ཀྱི་རྒྱུ་དང་རྐྱེན་གྱི་དབང་གིས་འོ་མའི་ཁ་དོག་གཅིག་པར་ཤེས་པ་བཞིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་གསེར་རྡོ་ལྟ་བུ་གང་ངན་པའི་རྣམས་བསལ་ཏེ་བོར་ལ་བཞུས་ན་གསེར་ཡང་དག་པར་འབྱུང་སྟེ། རིན་ཐང་ཡང་ཚད་མེད་དོ། །རིགས་ཀྱི་བུ་ཉན་ཐོས་དང་རང་སངས་རྒྱས་དང་། བྱང་ཆུབ་སེམས་དཔའ་ཡང་དེ་དང་འདྲ་སྟེ། ཐམས་ཅད་སངས་རྒྱས་ཀྱི་རང་བཞིན་དུ་སྒྲུབ་པར་འཐུན་ནོ། །དེ་ཅིའི་ཕྱིར་ཞེ་ན། ཉོན་མོངས་པ་ཡོངས་སུ་བསལ་བའི་ཕྱིར་རོ། །དེ་ཡང་གསེར་རྡོ་བཞུས་ཏེ་ངན་པ་བོར་བ་དང་མཚུངས་སོ། །དེ་བས་ན་སེམས་ཅན་ཐམས་ཅད་སངས་རྒྱས་ཀྱི་རང་བཞིན་དུ་འཐུན་ཏེ་ཐ་དད་པ་མེད་དོ། །སྔར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཐོས་ན། ཕྱིས་མངོན་པར་འཚང་རྒྱ་བའི་ཚེ་རང་གིས་རིག་པ་ནི་ཇི་ལྟར་ཁྱིམ་བདག་དེས་བའི་འོ་མ་དེ་ཁ་དོག་གཅིག་ཏུ་རྟོགས་པ་བཞིན་ནོ། །དེ་ཅིའི་ཕྱིར་ཞེ་ན། དཔག་ཏུ་མེད་པའི་ཉོན་མོངས་པ་ཐམས་ཅད་བསལ་བའི་ཕྱིར་རོ། །དེ་བས་ན་སེམས་ཅན་ཐམས་ཅད་སངས་རྒྱས་ཀྱི་རང་བཞིན་གཅིག་ཏུ་འཐུན་ཏེ་ཐ་དད་པ་མེད་པ་ནི་སྔོན་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཐོས་པ་ལྟར། ཕྱིས་མངོན་པར་འཚང་རྒྱ་བ་ན་རང་གིས་རིག་པར་འགྱུར་བ་ནི་ཇི་ལྟར་ཁྱིམ་བདག་དེས་བའི་འོ་མ་གཅིག་ཏུ་འཐུན་པར་རིག་པ་བཞིན་ནོ། །དེ་ཅིའི་ཕྱིར་ཞེ་ན། དཔག་ཏུ་མེད་པའི་ཉོན་མོངས་པ་ཐམས་ཅད་བསལ་བའི་ཕྱིར་རོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་སྟེ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་མཆིས་ན། སངས་རྒྱས་དང་སེམས་ཅན་ཐ་དད་པའི་བྱེ་བྲག་ཅི་མཆིས། དེ་སྐད་ཅེས་གསུངས་པ་འདི་སྐྱོན་དུ་འགྱུར་རོ། །དེ་ལྟར་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་མཆིས་ན་ཅིའི་སླད་དུ་ཤཱ་རིའི་བུ་ལ་སོགས་པ་ནི་མྱ་ངན་ལས་འདས་པ་ཆུང་ངུས་མྱ་ངན་ལས་འདས་པར་གྱུར། རང་སངས་རྒྱས་རྣམས་ནི་མྱ་ངན་ལས་འདས་པ་འབྲིང་པོས་མྱ་ངན་ལས་འདས་པར་གྱུར། བྱང་ཆུབ་སེམས་དཔའ་རྣམས་ནི་མྱ་ངན་ལས་འདས་པ་ཆེན་པོས་
མྱ་ངན་ལས་འདས་པར་གྱུར། དེ་དག་ལ་སོགས་པ་སངས་རྒྱས་ཀྱི་རང་བཞིན་གཅིག་ཏུ་འཐུན་ན་ཅིའི་སླད་དུ་དེ་བཞིན་གཤེགས་པའི་མྱ་ངན་ལས་འདས་པས་ཡོངས་སུ་མྱ་ངན་ལས་འདས་པར་མ་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་མྱ་ངན་ལས་འདའ་བ་ཐོབ་པ་ནི་ཉན་ཐོས་དང་། རང་སངས་རྒྱས་ཀྱིས་ཐོབ་པ་མ་ཡིན་ཏེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་ནི་དགེ་བའི་བཤེས་གཉེན་ཞེས་བྱའོ། །གལ་ཏེ་འཇིག་རྟེན་ན་སངས་རྒྱས་མི་བཞུགས་ཀྱང་ཐེག་པ་གཉིས་པོས་མྱ་ངན་ལས་འདས་པ་གཉིས་པོ་མི་ཐོབ་པ་མ་ཡིན་ནོ། །འོད་སྲུང་གིས་ཡང་གསོལ་པ། བཅོམ་ལྡན་འདས་ཀྱིས་ཡང་འདི་སྐད་དུ་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བསྐལ་པ་ཚད་མེད་དཔག་ཏུ་མེད་གྲངས་མེད་པའི་བར་དུ་སངས་རྒྱས་བཅོམ་ལྡན་འདས་འཇིག་རྟེན་དུ་ལན་འགའ་འབྱུང་སྟེ། ཐེག་པ་རྣམ་པ་གསུམ་འབྱེད་ཅིང་སྟོན་ཏོ། །རིགས་ཀྱི་བུ་ཇི་ལྟར་ཁྱོད་ཀྱིས་བྱང་ཆུབ་སེམས་དཔའ་དང་། ཐེག་པ་རྣམ་པ་གཉིས་པོ་བྱེ་བྲག་ཅི་ཡོད་ཅེས་དྲིས་པ་ནི་ངས་སྔར་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་དོན་དེ་ཉིད་རྒྱས་པར་བསྟན་ཏེ། དགྲ་བཅོམ་པ་རྣམས་ལ་དགེ་བའི་བཤེས་གཉེན་མེད་དོ་ཞེས་བཤད་པ་ཡིན་ནོ། །དེ་ཅིའི་ཕྱིར་ཞེ་ན། དགྲ་བཅོམ་པ་རྣམས་ཡོངས་སུ་མྱ་ངན་ལས་འདས་པ་ཆེན་པོ་ཐོབ་པའི་ཕྱིར་རོ། །དེ་བས་ན་མྱ་ངན་ལས་འདས་པ་ཆེན་པོ་ནི་མཐར་བདེ་བར་འགྱུར་བས་ན་ཡོངས་སུ་མྱ་ངན་ལས་འདས་པ་ཆེན་པོ་ཞེས་བྱའོ། །འོད་སྲུང་གིས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པ་ལྟར་བྱེ་བྲག་མཆིས་པ་དང་། བྱེ་བྲག་མ་མཆིས་པའི་དོན་བདག་གིས་གདོད་རྟོགས་སོ། །དེ་ཡང་ཅིའི་སླད་དུ་ཞེ་ན། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་ལ་སོགས་པ་ཐམས་ཅད་ཀྱང་མ་འོངས་པའི་དུས་སུ་ཡོངས་སུ་མྱ་ངན་ལས་འདས་པ་ཆེན་པོ་ལ་འབབ་པར་འཚལ་ཏོ། །དཔེར་ན་འབབ་ཆུ་ཐམས་
ཅད་རྒྱ་མཚོར་འབབ་པ་ལྟར་ཉན་ཐོས་དང་། རང་སངས་རྒྱས་ཐམས་ཅད་ཀྱང་རྟག་པ་ཞེས་བགྱིའི་མི་རྟག་པ་ནི་མ་ལགས་སོ། །དེ་བས་ན་བྱེ་བྲག་ཀྱང་མཆིས་ལ་བྱེ་བྲག་ཀྱང་མ་མཆིས་སོ། །འོད་སྲུང་གིས་ཡང་གསོལ་པ། མཚན་ཉིད་ལ་བྱེ་བྲག་མཆིས་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་དག་ནི་འོ་མ་ལྟ་བུའོ། །རང་སངས་རྒྱས་ནི་ཞོ་ལྟ་བུའོ། །བྱང་ཆུབ་སེམས་དཔའ་ནི་མར་རམ་ཞུན་མར་ལྟ་བུའོ། །སངས་རྒྱས་བཅོམ་ལྡན་འདས་ནི་མར་གྱི་སྙིང་པོ་ལྟ་བུ་སྟེ། དེ་བས་ན་ཡོངས་སུ་མྱ་ངན་ལས་འདས་པ་ཆེན་པོ་འདི་ལས་མཚན་ཉིད་རྣམ་པ་བཞི་ཐ་དད་པར་བཤད་དོ། །འོད་སྲུང་གིས་ཡང་གསོལ་པ། སེམས་ཅན་ཐམས་ཅད་ཀྱི་མཚན་ཉིད་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དཔེར་ན་བ་བེའུ་བྱུང་མ་ཐག་གི་འོ་མ་ནི་ཁྲག་དང་འདྲེས་སོ། །བྱིས་པ་མ་རབས་ཀྱི་མཚན་ཉིད་ཉོན་མོངས་པ་དང་འདྲེས་པ་ཡང་དེ་དང་འདྲའོ། །ཡང་འོད་སྲུང་གིས་གསོལ་པ། རྩྭ་མཆོག་གི་གྲོང་ཁྱེར་ན་གནས་པའི་རིགས་ངན་རབ་ཏུ་དགའ་བ་ཞེས་བྱ་བ་བཅོམ་ལྡན་འདས་ཀྱིས་ལུང་བསྟན་པ་ཁྱོད་ནི་སེམས་བསྐྱེད་པ་ཙམ་གྱིས་འཇིག་རྟེན་གྱི་ཁམས་འདིར་སངས་རྒྱས་སྟོང་གི་གྲངས་སུ་གཏོགས་པར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ་ཞེས་ལུང་བསྟན་ལ། བཙུན་པ་ཤཱ་རིའི་བུ་དང་། མཽད་གལ་ཡ་ན་ལ་སོགས་པ་མྱུར་དུ་མངོན་པར་འཚང་རྒྱའོ་ཞེས་ལུང་མི་སྟོན། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་ལ་ལ་ནི་སྨོན་ལམ་གྱི་དབང་གིས་འཇིག་རྟེན་ན་ཡུན་རིང་དུ་གནས་ཤིང་། དམ་པའི་ཆོས་ཡུན་དུ་བཟུང་ནས་གདོད་བླ་ན་མེད་པའི་བྱང་ཆུབ་ཏུ་འཚང་རྒྱའོ། །གང་མྱུར་དུ་འགྲུབ་པར་སྨོན་ལམ་བཏབ་པ་ནི་མྱུར་དུ་འགྲུབ་བོ་ཞེས་ལུང་བསྟན་པ་ཡིན་ནོ། །རིགས་ཀྱི་བུ་གཞན་ཡང་འདི་ལྟ་སྟེ་དཔེར་ན་ཚོང་དཔོན་ཞིག་རིན་ཐང་མེད་པའི་ནོར་བུ་རིན་པོ་ཆེ་ཐོགས་ཏེ་ཚོང་དུས་སུ་འཚོང་དུ་འོང་ན་གླེན་པ་ནོར་ངོ་མི་ཤེས་པ་
དག་གིས་མཐོང་ན་དེ་ལ་བརྙས་སྨོད་དེ་འཕྱའོ། །ནོར་བདག་གིས་འདི་ནི་ནོར་བུ་རིན་པོ་ཆེ་རིན་ཐང་མེད་པ་ཡིན་ནོ་ཞེས་སྨྲས་ཀྱང་འོན་ཀྱང་འཕྱའོ། །དེ་དག་གཅིག་ལ་གཅིག་འདི་སྐད་དུ་འདི་ནི་ནོར་བུ་རིན་པོ་ཆེ་ཡང་དག་པ་མ་ཡིན་གྱི། ཤེལ་གྱི་སྒོ་ང་ཡིན་ནོ་ཞེས་ཟེར་རོ། །རིགས་ཀྱི་བུ་ཉན་ཐོས་དང་རང་སངས་རྒྱས་ཀྱང་དེ་དང་འདྲ་སྟེ། གལ་ཏེ་མྱུར་དུ་འགྲུབ་པར་ལུང་བསྟན་པ་ཐོས་ན་ལེ་ལོ་དང་སྙོམ་ལས་བྱེད་དེ། བརྙས་ཤིང་སྨོད་ལ་འཕྱ་བ་ནི་ཇི་ལྟར་གླེན་པ་དག་ནོར་བུ་རིན་པོ་ཆེ་ཡང་དག་པ་མི་ཤེས་པ་བཞིན་ནོ། །ཕྱི་མ་མ་འོངས་པའི་དུས་སུ་དགེ་སློང་དག །དགེ་བའི་ཆོས་ལ་བརྩོན་འགྲུས་སུ་ནན་ཏན་བྱེད་ནི་མི་ནུས་ཀྱི། དབུལ་ཕོངས་ནས་ཟས་དང་སྐོམ་གྱིས་བྲེལ་བའི་རྐྱེན་གྱིས་རབ་ཏུ་བྱུང་སྟེ་ལུས་གསོ་བའི་ཕྱིར་སེམས་རྒོད་པས་སྒྱུས་འཚོའོ། །ཅི་སྟེ་དེ་བཞིན་གཤེགས་པས་ཉན་ཐོས་དག་མྱུར་དུ་འགྲུབ་བོ་ཞེས་ལུང་བསྟན་ན་འཕྱ་ཞིང་བརྙས་སྨོད་པར་འགྱུར་ཏེ། དེ་དག་ནི་ཚུལ་ཁྲིམས་ཡོངས་སུ་ཉམས་ཀྱང་བླ་མ་མིའི་ཆོས་ཐོབ་བོ་ཞེས་སྨྲའོ། །དེ་བས་ན་གང་སྨོན་ལམ་མྱུར་བར་བསྐྱེད་པ་ནི་མྱུར་བའི་ལུང་བསྟན་ཏོ། །གང་དམ་པའི་ཆོས་སྲུང་ཞིང་འཛིན་པ་དག་ནི་ཡུན་རིང་པོའི་ལུང་བསྟན་ཏོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་དག་ཇི་ལྟར་ན་མི་ཤིགས་པའི་འཁོར་འཐོབ་པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། བྱང་ཆུབ་སེམས་དཔའ་གང་དམ་པའི་ཆོས་སྲུང་ཞིང་འཛིན་པ་ལ་བརྩོན་འགྲུས་རྩོམ་ན་དེའི་རྒྱུ་དེའི་རྐྱེན་གྱིས་འཁོར་མི་ཤིགས་པ་འཐོབ་པར་འགྱུར་རོ། །བྱང་ཆུབ་སེམས་དཔའ་འོད་སྲུང་གིས་ཡང་བཅོམ་ལྡན་འདས་ལ་གསོལ་པ། ཅིའི་རྒྱུ་ཅིའི་རྐྱེན་གྱིས་ན་སེམས་ཅན་དག་ཁ་དང་མཆུ་སྐམས་པར་འགྱུར། བཅོམ་ལྡན་འདས་ཀྱིས་འོད་སྲུང་ལ་བཀའ་སྩལ་པ། གང་ཞིག་དཀོན་མཆོག་གསུམ་ཡུན་དུ་གནས་པར་མི་ཤེས་ན་དེའི་རྒྱུ་དེའི་རྐྱེན་གྱིས་ཁ་དང་མཆུ་རྟག་ཏུ་སྐམས་པར་གྱུར་ཏོ། །མི་གང་མངར་བ་དང་། ཁ་བ་དང་། ཚ་བ་དང་། སྐྱུར་བ་དང་། བསྔལ་བ་དང་། ལན་ཚྭའི་རོ་ལ་སོགས་པ་བྲོ་བ་རྣམ་པ་དྲུག་བྱེ་བྲག་
མི་ཕྱེད་ཅིང་མི་རྟོགས་པར་འགྱུར་རོ། །སེམས་ཅན་ཐམས་ཅད་གླེན་ཞིང་གཏི་མུག་པའི་དབང་གིས་དཀོན་མཆོག་གསུམ་རྟག་པར་མི་ཤེས་ན་དེའི་ཕྱིར་ཁ་དང་མཆུ་རྟག་པར་སྐམས་པར་འགྱུར་རོ། །རིགས་ཀྱི་བུ་གཞན་ཡང་འདི་ལྟ་སྟེ། སེམས་ཅན་གང་ཞིག་དེ་བཞིན་གཤེགས་པ་ལ་རྟག་པ་ཉིད་དུ་མི་ཤེས་ན་གང་ཟག་དེ་ནི་དམུས་ལོང་དུ་རིག་པར་བྱའོ། །སེམས་ཅན་གང་ཞིག་དེ་བཞིན་གཤེགས་པ་རྟག་པ་ཉིད་དུ་ཤེས་ན་གང་ཟག་དེ་ནི་ཤའི་མིག་ཅན་ཡིན་མོད་ཀྱི། ལྷའི་མིག་དང་ལྡན་པར་ངས་བཤད་དོ། །རིགས་ཀྱི་བུ་གཞན་ཡང་འདི་ལྟ་སྟེ་གང་ཞིག་དེ་བཞིན་གཤེགས་པ་ལ་རྟག་པ་ཉིད་དུ་ཤེས་ན་གང་ཟག་དེ་ནི་ཡུན་རིང་པོ་ནས་མདོ་སྡེ་འདི་ལ་ནན་ཏན་བྱས་པ་ཡིན་ཏེ། ལྷའི་མིག་དང་ལྡན་པར་རིག་པར་བྱའོ། །གང་ཞིག་ལྷའི་མིག་དང་ལྡན་དུ་ཟིན་ཀྱང་གལ་ཏེ་དེ་བཞིན་གཤེགས་པ་ལ་རྟག་པ་ཉིད་དུ་མི་ཤེས་ན་དེ་ནི་ཤའི་མིག་ཅན་ཞེས་བྱ་སྟེ། གང་ཟག་དེ་ནི་བདག་གི་ལུས་ཀྱི་ཡན་ལག་དང་། ཉིང་ལག་ཀྱང་མི་ཤེས་ལ། གཞན་དག་ཀྱང་ཤེས་པར་བྱེད་མི་ནུས་ཏེ། དེ་བས་ན་ཤའི་མིག་ཅན་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་དེ་བཞིན་གཤེགས་པ་ནི་རྟག་ཏུ་སེམས་ཅན་ཐམས་ཅད་ཀྱི་ཕ་མ་མཛད་དོ། །དེ་ཅིའི་ཕྱིར་ཞེ་ན། སེམས་ཅན་རྣམ་པ་སྣ་ཚོགས་རྐང་གཉིས་དང་། རྐང་བཞི་དང་། རྐང་མངས་དང་། རྐང་མེད་ཐམས་ཅད་ལ་དེ་བཞིན་གཤེགས་པས་གསུང་གཅིག་གིས་ཆོས་བསྟན་ན་རྣམ་པ་ཐ་དད་པ་དེ་དང་དེ་དག་ཐམས་ཅད་ཀྱིས་སོ་སོར་གོ་སྟེ། དེ་དག་སོ་སོ་ནས་དེ་བཞིན་གཤེགས་པ་ནི་དེང་བདག་འབའ་ཞིག་ལ་ཆོས་བསྟན་ཏོ་སྙམ་སེམས་ཏེ། དེ་བས་ན་ཕ་མ་ལྟ་བུ་ཞེས་བྱའོ། །རིགས་ཀྱི་བུ་གཞན་ཡང་འདི་ལྟ་སྟེ་བུས་པ་བཙས་ནས་ནམ་ཟླ་བ་བཅུ་དྲུག་ལོན་པ་དག་སྨྲར་རྩོལ་མོད་ཀྱི། གོ་བའམ་བརྡ་ཕྲད་པ་ཉིད་དུ་མི་ལྕོགས་ཏེ། དེའི་ཕ་མས་སྐད་བསླབ་པའི་ཕྱིར་བུས་པ་ཅི་ཟེར་བ་བཞིན་དུ་སྨྲས་ཏེ། བགས་ཀྱིས་སྟོན་ན། ཅི་ཁྱེའུ་དེའི་ཕ་མ་དེ་ཡང་སྐད་མི་ལྕོགས་ཏེ་ཟུར་མ་ཕྱིན་པ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། སེམས་
ཅན་རྣམ་པ་སྣ་ཚོགས་ཀྱི་རྗེས་སུ་གསུང་རྣམ་པ་སྣ་ཚོགས་ཀྱིས་ཆོས་སྟོན་ཏོ། །དམ་པའི་ཆོས་ལ་དགོད་པའི་ཕྱིར་ཅི་རིགས་སུ་ཆ་ལུགས་རྣམ་པ་སྣ་ཚོགས་སྟོན་ཏེ། དེ་བཞིན་གཤེགས་པ་དེ་དང་འཐུན་པའི་སྐད་གསུང་ན། དེ་ཅི་ཡང་མ་ལྕོགས་པ་ཡིན་ནམ། གསོལ་པ་མ་ལགས་སོ། །བཅོམ་ལྡན་འདས་ཅིའི་སླད་དུ་ཞེ་ན། དེ་བཞིན་གཤེགས་པའི་གསུང་ནི་སེང་གེའི་སྒྲ་ལྟ་བུ་སྟེ། འཇིག་རྟེན་པ་རྣམ་པ་སྣ་ཚོགས་ཀྱི་རྗེས་སུ་གསུང་རྣམ་པ་སྣ་ཚོགས་ཀྱིས་སེམས་ཅན་རྣམས་ལ་དམ་པའི་ཆོས་སྟོན་ཏོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། དེ་བཞིན་གཤེགས་པའི་སྙིང་པོའི་ལེའུ་སྟེ་བཞི་པའོ།། །།