འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་བརྒྱད་པ།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ཉི་ཤུ་བརྒྱད་པ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གལ་ཏེ་བྱང་ཆུབ་སེམས་དཔའ་སེམས་
དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་འདི་ལ་རྣལ་འབྱོར་དུ་སྤྱོད་ན་ཡོན་ཏན་རྣམ་པ་བཅུ་འཐོབ་པར་འགྱུར་ཏེ། ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་ཞིང་བསམ་གྱིས་མི་ཁྱབ་སྟེ་ཐོས་པ་ཙམ་གྱིས་ངོ་མཚར་རྨད་དུ་འཛིན་ལ། ནང་མ་ཡིན། ཕྱི་རོལ་མ་ཡིན། དཀའ་བ་མ་ཡིན། སླ་བ་མ་ཡིན། མཚན་ཉིད་མ་ཡིན། མཚན་ཉིད་མ་ཡིན་པ་མ་ཡིན། འཇིག་རྟེན་གྱི་ཆོས་མ་ཡིན་ཏེ། མཚན་མ་དང་དབྱིབས་མེད་པ་འཇིག་རྟེན་ན་མི་སྲིད་པའོ། །རྣམ་པ་བཅུ་གང་ཞེ་ན། གཅིག་ལ་ཡང་རྣམ་པ་ལྔ་སྟེ། ལྔ་གང་ཞེ་ན། མ་ཐོས་པ་ཐོས་པར་འགྱུར་བ་དང་། ཐོས་ནས་ཕན་པའི་དོན་དུ་འགྱུར་བ་དང་། ཐེ་ཙོམ་དང་ནེམ་ནུར་གྱི་སེམས་ཆོད་པར་འགྱུར་བ་དང་། ཤེས་རབ་ལ་གཡོ་སྒྱུ་མེད་པ་དང་། དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཤེས་པ་དང་ལྔའོ། །དེ་ལ་མ་ཐོས་པ་ཐོས་པར་འགྱུར་བ་ཞེས་བྱ་བ་གང་ཞེ་ན། འདི་ལྟ་སྟེ་དགོངས་ཏེ་གསུངས་པའི་དོན་ཤིན་ཏུ་ཟབ་མོ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། སངས་རྒྱས་དང་། ཆོས་དང་དགེ་འདུན་ལ་ཁྱད་མེད་པ། དཀོན་མཆོག་གསུམ་གྱི་རང་བཞིན་དང་། མཚན་ཉིད་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དང་། སངས་རྒྱས་བཅོམ་ལྡན་འདས་ཐམས་ཅད་ནི་མཐའ་ཡུན་དུ་མྱ་ངན་ལས་འདས་པ་མེད་དེ། རྟག་པ། གནས་པ། མི་འགྱུར་མི་འཕོ་བ་དང་། དེ་བཞིན་གཤེགས་པའི་མྱ་ངན་ལས་འདས་པ་ནི་ཡོད་པ་མ་ཡིན། མེད་པ་མ་ཡིན། འདུས་བྱས་པ་མ་ཡིན། འདུས་མ་བྱས་པ་མ་ཡིན། ཟག་པ་དང་བཅས་པ་མ་ཡིན། ཟག་པ་མེད་པ་མ་ཡིན། གཟུགས་མ་ཡིན། གཟུགས་མ་ཡིན་པ་མ་ཡིན། མིང་མ་ཡིན། མིང་མ་ཡིན་པ་མ་ཡིན། མཚན་ཉིད་མ་ཡིན། མཚན་ཉིད་མ་ཡིན་པ་མ་ཡིན། ཡོད་པ་མ་ཡིན། མེད་པ་མ་ཡིན། དངོས་པོ་མ་ཡིན། དངོས་པོ་མ་ཡིན་པ་མ་ཡིན། རྒྱུ་མ་ཡིན། འབྲས་བུ་མ་ཡིན། ལྟོས་པ་མ་ཡིན། མི་ལྟོས་པ་མ་ཡིན། སྣང་བ་མ་ཡིན། མུན་པ་མ་ཡིན། བྱུང་བ་མ་ཡིན། མ་བྱུང་བ་མ་
ཡིན། རྟག་པ་མ་ཡིན། མི་རྟག་པ་མ་ཡིན། ཆད་པ་མ་ཡིན། མ་ཆད་པ་མ་ཡིན། ཐོག་མ་མ་ཡིན། ཐ་མ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་མ་ཡིན། ཕུང་པོ་མ་ཡིན། ཕུང་པོ་མ་ཡིན་པ་མ་ཡིན། སྐྱེ་མཆེད་མ་ཡིན། སྐྱེ་མཆེད་མ་ཡིན་པ་མ་ཡིན། ཁམས་མ་ཡིན། ཁམས་མ་ཡིན་པའང་མ་ཡིན། རྟེན་ཅིང་འབྲེལ་པར་འབྱུང་བ་བཅུ་གཉིས་མ་ཡིན། རྟེན་ཅིང་འབྲེལ་པར་འབྱུང་བ་བཅུ་གཉིས་མ་ཡིན་པ་མ་ཡིན། དེ་དག་ལ་སོགས་པའི་ཆོས་དགོངས་ཏེ་གསུངས་པའི་དོན་ཤིན་ཏུ་ཟབ་མོ་སྔོན་མ་ཐོས་པ་ཐོས་པར་འགྱུར་བ་དང་། གཞན་ཡང་མ་ཐོས་པ་ནི་འདི་ལྟ་སྟེ། མུ་སྟེགས་ཅན་ཐམས་ཅད་ཀྱི་གཙུག་ལག་རིམ་པ་བཞི་དང་། བྱཱ་ཀ་ར་ཎའི་གཙུག་ལག་དང་། རྒྱལ་པོའི་གཙུག་ལག་དང་། བགྲང་བ་དང་། བརྩི་བའི་གཙུག་ལག་ལ་སོགས་པ་དང་། རིག་སྔགས་དང་། སྨན་དཔྱད་དང་། སྒྱུ་རྩལ་དང་། ཉི་ཟླ་སྤྱང་ཀིས་ཟིན་པ་དང་། སྐར་མ་འཕོ་ཞིང་འགྱུར་བ་དང་། རི་མོ་དང་ཡི་གེ་དང་། ལུང་སྟོན་པའི་གཙུག་ལག་ལ་སོགས་པའི་ཡི་གེ་དང་། གཙུག་ལག་དེའི་གསང་བའི་དོན་སྔོན་མ་ཐོས་པ་ད་མདོ་སྡེ་འདི་ལས་ཤེས་པར་འགྱུར་བ་དང་། གཞན་ཡང་ཤིན་ཏུ་རྒྱས་པའི་མདོ་སྡེ་མ་གཏོགས་པ་མདོ་སྡེ་བཅུ་གཅིག་ལས་དགོངས་ཏེ་གསུངས་པའི་དོན་ཤིན་ཏུ་ཟབ་མོ་མེད་པ་ཡང་དེང་མདོ་སྡེ་འདིའི་རྐྱེན་གྱིས་ཤེས་པར་གྱུར་ཏོ། །རིགས་ཀྱི་བུ་དེ་ནི་མ་ཐོས་པ་ཐོས་པར་འགྱུར་བ་ཞེས་བྱའོ། །ཐོས་ནས་ཕན་པར་འགྱུར་བ་ཞེས་བྱ་བ་ནི་གལ་ཏེ་མྱ་ངན་ལས་འདས་པ་ཆེན་པོའི་མདོ་འདི་ཡོངས་སུ་འཛིན་ན། ཤིན་ཏུ་རྒྱས་པ་ཐེག་པ་ཆེན་པོའི་མདོའི་དོན་གྱི་རོ་ཤིན་ཏུ་ཟབ་མོ་ཐམས་ཅད་རྫོགས་པར་ཀུན་ཤེས་པར་ནུས་སོ། །དཔེར་ན་ཁྱེའུ་འམ་བུ་མོ་དག་མེ་ལོང་གསལ་བའི་ནང་ན་གཟུགས་དང་ཆ་ལུགས་གསལ་བར་སྣང་བ་བཞིན་དུ་མྱ་ངན་ལས་འདས་པ་ཆེན་པོའི་མེ་ལོང་ཡང་དེ་དང་འདྲ་སྟེ། བྱང་ཆུབ་སེམས་དཔས་ཐོས་ན་ཐེག་པ་ཆེན་པོའི་མདོ་སྡེའི་དོན་ཤིན་ཏུ་ཟབ་མོ་གསལ་བར་མཐོང་ངོ་། །གཞན་ཡང་ལ་ལ་ཞིག་མུན་ཁང་གི་ནང་དུ་སྒྲོན་མ་ཆེན་པོ་ཕྱུང་ན། རྫས་ཐམས་ཅད་
མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་སྒྲོན་མ་ཡང་དེ་དང་འདྲ་སྟེ། བྱང་ཆུབ་སེམས་དཔས་འཛིན་ན་ཐེག་པ་ཆེན་པོའི་དོན་ཟབ་མོ་གསལ་དཀའ་བ་མཐོང་བར་འགྱུར་རོ། །གཞན་ཡང་ཇི་ལྟར་ཉི་མ་ཤར་བ་ན་འོད་སྣང་བ་སྟོང་ཡོད་པ་དེས་རི་རྣམས་ཀྱི་སུལ་ཟབ་མོ་མུན་པ་ཅན་ཀུན་སྣང་བར་བྱེད་དེ། སྐྱེ་བོ་ཐམས་ཅད་ཀྱིས་རྒྱང་རིང་པོ་ནས་རྫས་རྣམས་མཐོང་བ་བཞིན་དུ་མྱ་ངན་ལས་འདས་པ་ཆེན་པོའི་ཡོངས་སུ་དག་པའི་ཤེས་རབ་ཀྱི་ཉི་མ་ཡང་དེ་དང་འདྲ་སྟེ། ཐེག་པ་ཆེན་པོས་ཤིན་ཏུ་ཟབ་མོའི་གནས་སྣང་བར་བྱེད་དེ། ཉན་ཐོས་དང་། རང་སངས་རྒྱས་ཀྱི་ཐེག་པ་བས་རྒྱང་རིང་པོ་ནས་སངས་རྒྱས་ཀྱི་བྱང་ཆུབ་མཐོང་བར་བྱེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ཆེན་པོའི་མདོ་སྡེ་དམ་པ་མཉན་ཅིང་འཛིན་པའི་ཕྱིར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་དེ་ལྟར་མྱ་ངན་ལས་འདས་པ་ཆེན་པོའི་མདོ་ཉན་ཏམ་འཛིན་ན་ཆོས་ཐམས་ཅད་ཀྱི་རྣམ་གྲངས་རྟོགས་པར་འགྱུར་རོ། །གལ་ཏེ་ཡི་གེར་བྲིས་སམ། ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་ཆོས་ཐམས་ཅད་ཀྱི་དོན་ཚུལ་བཞིན་དུ་རྟོགས་པར་འགྱུར་རོ། །རིགས་ཀྱི་བུ་གང་ཉན་ཅིང་འཛིན་པ་དེས་ནི་རྣམ་གྲངས་འབའ་ཞིག་ཤེས་ཀྱི། དོན་འདི་ཉིད་མི་རྟོགས་སོ། །གང་ཡི་གེར་བྲིས་སམ། གཟུངས་སུ་འཛིན་ཏམ། ཀློག་གམ། འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན། དོན་ཉིད་རྟོགས་པར་འགྱུར་རོ། །གཞན་ཡང་རིགས་ཀྱི་བུ་མདོ་སྡེ་འདི་མཉན་པས་ན་སངས་རྒྱས་ཀྱི་རང་བཞིན་ཡོད་པར་ཐོས་ཀྱི་མཐོང་བར་ནི་མི་ནུས་སོ། །ཡི་གེར་བྲིས་ཤིང་ཀློག་གམ། འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་དེས་ནི་མཐོང་བར་འགྱུར་རོ། །མདོ་སྡེ་འདི་མཉན་པ་ཙམ་གྱིས་སྦྱིན་པ་ཐོབ་པར་འགྱུར་གྱིས། སྦྱིན་པའི་ཕ་རོལ་ཏུ་ཕྱིན་པ་མཐོང་བ་ནི་མ་ཡིན་ནོ། །མདོ་སྡེ་འདི་ཡི་གེར་བྲིས་ཤིང་འདོན་ཏམ། ཀློག་གམ། གཞན་ལ་ཡང་རྒྱས་
པར་སྟོན་ཏམ། དོན་ཡིད་ལ་བྱེད་ན་སྦྱིན་པའི་ཕ་རོལ་ཏུ་ཕྱིན་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་མྱ་ངན་ལས་འདས་པ་ཆེན་པོའི་མདོ་འདི་མཉན་ན་ཆོས་ཤེས་པ་དང་། དོན་ཤེས་པར་འགྱུར་རོ། །སོ་སོ་ཡང་དག་པར་ཤེས་པ་དེ་གཉིས་དང་ལྡན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་བཅས་པ་ཐམས་ཅད་ཀྱིས་མི་འཇིགས་པ་དང་། མདོ་སྡེ་བཅུ་གཉིས་རྣམ་པར་འབྱེད་ཅིང་དོན་སྟོན་པ་ལ་འགལ་བ་མེད་པ་དང་། གཞན་ལས་མ་མཉན་པར་རང་གིས་རིག་པ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཉེ་བར་འགྱུར་རོ། །རིགས་ཀྱི་བུ་དེ་ནི་ཐོས་ནས་ཕན་པར་འགྱུར་བ་ཞེས་བྱའོ། །ཐེ་ཚོམ་གྱི་སེམས་ཆོད་པ་ཞེས་བྱ་བ་ནི་རྣམ་པ་གཉིས་ཏེ། ཚིག་ལ་ཐེ་ཚོམ་ཟ་བ་དང་། དོན་ལ་ཐེ་ཚོམ་ཟ་བའོ། །མདོ་སྡེ་འདི་མཉན་པས་ཚིག་ལ་ཐེ་ཚོམ་ཟ་བའི་སེམས་ཆོད་པར་འགྱུར་རོ། །དོན་ཡིད་ལ་བྱེད་པས་ནི་དོན་ལ་ཐེ་ཚོམ་ཟ་བའི་སེམས་ཆོད་པར་འགྱུར་རོ། །གཞན་ཡང་རིགས་ཀྱི་བུ་ཐེ་ཚོམ་ལ་རྣམ་པ་ལྔ་སྟེ། སངས་རྒྱས་ངེས་པར་མྱ་ངན་ལས་འདའ་འམ་སྙམ་ཐེ་ཚོམ་ཟ་བ་དང་། སངས་རྒྱས་རྟག་ཏུ་གནས་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་བདེན་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་ཡོངས་སུ་དག་པ་ཡིན་ནམ་སྙམ་ཐེ་ཚོམ་ཟ་བ་དང་། སངས་རྒྱས་ཡང་དག་པར་བདག་ཡིན་ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པས་ནི་སངས་རྒྱས་མྱ་ངན་ལས་འདའ་བ་ཐེ་ཚོམ་ཟ་བ་ཡོངས་སུ་ཆོད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་པས་ནི་ཐེ་ཚོམ་ལྷག་མ་བཞི་ཡོངས་སུ་ཆོད་པར་འགྱུར་རོ། །རིགས་ཀྱི་བུ་གཞན་ཡང་ཐེ་ཚོམ་ལ་རྣམ་པ་གསུམ་སྟེ། ཉན་ཐོས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་དང་། རང་སངས་རྒྱས་ཡོད་པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་དང་། སངས་རྒྱས་ཡོད་
པ་ཡིན་ནམ་མེད་པ་ཡིན་སྙམ་ཐེ་ཚོམ་ཟ་བ་སྟེ། མདོ་སྡེ་འདི་མཉན་པ་ཙམ་གྱིས་ཐེ་ཚོམ་རྣམ་པ་གསུམ་མ་ལུས་པར་མེད་པར་འགྱུར་རོ། །ཡི་གེར་བྲིས་ཤིང་ཀློག་གམ་འདོན་ཏམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་པས་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་རྟོགས་པར་འགྱུར་རོ། །རིགས་ཀྱི་བུ་གལ་ཏེ་སེམས་ཅན་གང་མྱ་ངན་ལས་འདས་པ་ཆེན་པོའི་མདོ་སྡེ་འདི་མ་ཐོས་ན་ཐེ་ཚོམ་གྱི་སེམས་མང་བ་ནི་འདི་ལྟ་སྟེ། རྟག་པའམ། མི་རྟག་པའམ། བདེ་བའམ། མི་བདེ་བའམ། ཡོངས་སུ་དག་པའམ། ཡོངས་སུ་མ་དག་པའམ། བདག་གམ། བདག་མེད་པའམ། སྲོག་གམ། སྲོག་མ་ཡིན་ནམ། སེམས་ཅན་ནམ། སེམས་ཅན་མ་ཡིན་ནམ། མཐར་ཐུག་གམ། མཐར་མ་ཐུག་གམ། མ་འོངས་པའི་དུས་སམ། འདས་པའི་དུས་སམ། ཡོད་པའམ། མེད་པའམ། སྡུག་བསྔལ་ལམ། སྡུག་བསྔལ་མ་ཡིན་ནམ། ཀུན་འབྱུང་ངམ། ཀུན་འབྱུང་མ་ཡིན་ནམ། ལམ་མམ། ལམ་མ་ཡིན་ནམ། འགོག་པའམ། འགོག་པ་མ་ཡིན་ནམ། ཆོས་སམ། ཆོས་མ་ཡིན་ནམ། དགེ་བའམ། དགེ་བ་མ་ཡིན་ནམ། སྟོང་པའམ། སྟོང་པ་མ་ཡིན་ནམ་སྙམ་དུ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ཐམས་ཅད་ཡོངས་སུ་ཆོད་པར་འགྱུར་རོ། །གཞན་ཡང་རིགས་ཀྱི་བུ་གལ་ཏེ་གང་མདོ་སྡེ་འདི་མ་ཐོས་ན། གཞན་ཡང་ཐེ་ཚོམ་རྣམ་པ་མང་པོ་ཡོད་པར་འགྱུར་རོ། །འདི་ལྟ་སྟེ། གཟུགས་བདག་ཡིན་ནམ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་བདག་ཡིན་ནམ། འོན་ཏེ་མིག་གིས་མཐོང་ངམ། བདག་གིས་མཐོང་བ་ནས། དེ་བཞིན་དུ་རྣམ་པར་ཤེས་པའི་བར་དུ་ཤེས་པར་ནུས་སམ། བདག་གིས་ཤེས་པར་ནུས་སམ། གཟུགས་ཀྱིས་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་བ་ནས། དེ་བཞིན་དུ་རྣམ་པར་ཤེས་པའི་བར་དུ་རྣམ་པར་སྨིན་པ་མྱོང་ངམ། བདག་གིས་རྣམ་པར་སྨིན་པ་མྱོང་ངམ། གཟུགས་ཕ་རོལ་གྱི་འཇིག་རྟེན་དུ་
འགྲོའམ། འོན་ཏེ་བདག་ཕ་རོལ་གྱི་འཇིག་རྟེན་དུ་འགྲོའམ། དེ་བཞིན་དུ་རྣམ་པར་ཤེས་པ་ཡང་དེ་དང་འདྲ་སྟེ། འཁོར་བ་ཐོག་མ་དང་ཐ་མ་ཡོད་དམ། འོན་ཏེ་ཐོག་མ་དང་ཐ་མ་མེད་པ་ཡིན་ནམ་སྙམ་སྟེ་ཐེ་ཚོམ་ཟ་བ་སྟེ། མདོ་སྡེ་འདི་མཉན་ན་དེ་ལྟ་བུའི་ཐེ་ཚོམ་ལ་སོགས་པ་ཡང་ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་ལོག་སྲེད་ཅན་དང་། རྩ་བ་བཞི་ཉམས་པ་དང་། མཚམས་མེད་པ་ལྔའི་ཁ་ན་མ་ཐོ་བ་བྱས་པ་དང་། མདོ་སྡེ་ཤིན་ཏུ་རྒྱས་པ་ལ་སྐུར་པ་དེ་དག་ལ་སངས་རྒྱས་ཀྱི་རང་བཞིན་ཡོད་དམ། སངས་རྒྱས་ཀྱི་རང་བཞིན་མེད་སྙམ་ཐེ་ཚོམ་ཟ་བ་དག་ཀྱང་མདོ་སྡེ་འདི་མཉན་ན་ཐེ་ཚོམ་དེ་དག་ཐམས་ཅད་ཡོངས་སུ་ཆོད་པར་འགྱུར་རོ། །ཡང་ལ་ལ་ཞིག་གིས་འཇིག་རྟེན་མཐའ་ཡོད་དམ། འཇིག་རྟེན་མཐའ་མེད་དམ། ཕྱོགས་བཅུའི་འཇིག་རྟེན་ཡོད་དམ་ཕྱོགས་བཅུའི་འཇིག་རྟེན་མེད་སྙམ་ཐེ་ཚོམ་ཟ་བ་དག་ཀྱང་མདོ་སྡེ་འདི་མཉན་ན། དེ་ལྟ་བུའི་ཐེ་ཚོམ་དག་ཀྱང་ཡོངས་སུ་ཆོད་པར་འགྱུར་ཏེ། དེ་ནི་ཐེ་ཚོམ་དང་ནེམ་ནུར་གྱི་སེམས་ཆོད་པར་འགྱུར་བ་ཞེས་བྱའོ། །ཤེས་རབ་ལ་གཡོ་སྒྱུ་མེད་པ་ཞེས་བྱ་བ་ནི་འདི་ལྟ་སྟེ། གལ་ཏེ་སེམས་ལ་ཐེ་ཚོམ་ཡོད་ན་ལྟ་བ་ཐམས་ཅད་ཡང་དག་པ་མ་ཡིན་པར་འགྱུར་རོ། །སོ་སོའི་སྐྱེ་བོ་དག་གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་དམ་པ་འདི་མ་ཐོས་ན་ལྟ་བ་ཐམས་ཅད་ལོག་པར་འགྱུར་རོ། །དེ་བཞིན་དུ་ཉན་ཐོས་དང་རང་སངས་རྒྱས་ཀྱི་བར་དུ་ཡང་ལྟ་བ་ཐམས་ཅད་ལོག་པ་ཡིན་ནོ། །ཇི་ལྟར་ན་བྱིས་པ་སོ་སོའི་སྐྱེ་བོ་དག་ལྟ་བ་ལོག་པ་ཞེས་བྱ་ཞེ་ན། ཟག་པ་དང་བཅས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་ལྟ། དེ་བཞིན་གཤེགས་པ་ལ་ནི་མི་རྟག་པ་དང་། སྡུག་བསྔལ་བ་དང་། ཡོངས་སུ་མ་དག་པ་དང་། བདག་མེད་པར་ལྟ་ལ། སེམས་ཅན་དང་། འཚོ་བ་དང་། སྲོག་དང་། མཐོང་བ་དང་། ཤེས་པ་ཡོད་པར་ལྟ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ལ་མྱ་ངན་ལས་འདས་པ་ཡིན་པར་འཛིན་པ་དང་། ལྷ་དབང་སྒྱུར་ལ་འཕགས་པའི་ལམ་བརྒྱད་ཡོད་པར་ལྟ་བ་དང་། རྟག་པར་ལྟ་བ་དང་། ཆད་པར་ལྟ་བ་སྟེ།
ལྟ་བ་དེ་དག་ཐམས་ཅད་ནི་ལོག་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་གལ་ཏེ་མྱ་ངན་ལས་འདས་པ་ཆེན་པོའི་མདོ་སྡེ་འདི་ཐོས་ཤིང་འཕགས་པའི་སྤྱད་པ་སྤྱོད་པ་ན། ལོག་པར་ལྟ་བ་དེ་དག་མེད་པར་འགྱུར་རོ། །ཇི་ལྟར་ན་ཉན་ཐོས་དང་རང་སངས་རྒྱས་དང་ལོག་པར་ལྟ་བ་ཞེ་ན། བྱང་ཆུབ་སེམས་དཔའ་དགའ་ལྡན་གྱི་གནས་ནས་བབས་པ་ན་བལ་གླང་ལ་བཅིབས་ཏེ་ཡུམ་གྱི་ལྷུམས་སུ་གཤེགས་པ་དང་། ཡབ་ནི་ཟས་གཙང་མ། ཡུམ་ནི་ལྷ་མཛེས་ཞེས་བྱ་བ་དང་། གྲོང་ཁྱེར་སེར་སྐྱར་ཡུམ་གྱི་ལྷུམས་སུ་ཟླ་བ་བཅུ་ཚང་ནས་བལྟམ་པ་དང་། བལྟམས་པའི་ཚེ་བརྒྱ་བྱིན་གྱིས་ས་ལ་མ་རེག་པར་བཟུང་སྟེ། ཀླུའི་རྒྱལ་པོ་དགའ་བོ་དང་། བསྙེན་དགའ་བོ་གཉིས་ཀྱིས་ཆུ་ཕབ་ནས་སྐུ་བསིལ་བ་དང་། གནོད་སྦྱིན་གྱི་རྒྱལ་པོ་ཆེན་པོ་མ་ནི་བ་རྟ་ཞེས་བྱ་བས་རིན་པོ་ཆེའི་གདུགས་ཐོགས་པ་དང་། སའི་ལྷས་པད་མོ་སྤྲུལ་ཏེ་ཞབས་བརྟེན་པ་དང་། ཕྱོགས་བཞི་ཀུན་ཏུ་གོམ་པ་བདུན་བདུན་བོར་བ་དང་། ལྷའི་འཇིག་རྟེན་དུ་གཤེགས་ནས་ལྷ་ཐམས་ཅད་ལངས་ཏེ་བསུས་པ་དང་། དྲང་སྲོང་ཨ་སི་ཏས་པང་དུ་བླངས་ཏེ་མཚན་བལྟས་པ་དང་། མཚན་བལྟས་ནས་བདག་ནི་ཚེའི་དུས་བྱེད་པར་འགྱུར་ཏེ། སངས་རྒྱས་མངོན་དུ་གཤེགས་པ་མི་མཐོང་ངོ་སྙམ་དུ་སྡུག་བསྔལ་ཆེན་པོ་སྐྱེས་ཏེ་ཡིད་ལ་རབ་ཏུ་གཅགས་པ་དང་། སློབ་དཔོན་ལས་ཡིག་རྩིས་དང་། འཕོང་དང་། ཁ་ལོ་སྒྱུར་བ་དང་། རི་མོ་དང་། ལུང་སྟོན་པ་དང་། སྒྱུ་རྩལ་སློབ་པ་དང་། ཕོ་བྲང་གི་ནང་དུ་བུ་མོ་དང་སླས་དྲུག་ཁྲི་དང་ལྷན་ཅིག་ཏུ་རྩེ་ཞིང་ལོངས་སྤྱོད་པ་དང་། ཁབ་ནས་བྱུང་སྟེ་འཆག་ཏུ་གཤེགས་པ་ལས་གྲོང་ཁྱེར་སེར་སྐྱའི་སྒོར་མི་རྒས་འཁོགས་པ་མཐོང་བ་ནས། དེ་བཞིན་དུ་དགེ་སྦྱོང་ཆོས་གོས་གྱོན་ཅིང་འགྲོ་བའི་བར་དུ་མཐོང་ནས་ཕྱིར་ཕོ་བྲང་དུ་ཕྱིན་ཏེ། བུ་མོ་དང་སླས་རྣམས་ཀྱི་ལུས་དང་གཟུགས་ལ་ཀེང་རུས་དང་འདྲ་བར་མཐོང་བ་དང་། ཕོ་བྲང་ཡང་དུར་ཁྲོད་དང་ཐ་མི་དད་པར་མཐོང་ནས། ཁྱིམ་ལ་སྐྱོ་བར་གྱུར་ཏེ་ནམ་གྱི་གུང་ལ་ཁབ་ནས་བྱུང་སྟེ།
དྲང་སྲོང་ཨུ་ཏ་ཀ་དང་། ཨ་ལ་ཙ་ལ་སོགས་པའི་གན་དུ་ཕྱིན་ནས་དེ་དག་ལས་རྣམ་ཤེས་མཐའ་ཡས་སྐྱེ་མཆེད་སྟེངས་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དག་བཤད་པ་ཐོས་སོ། །ཐོས་ནས་སྐྱེ་མཆེད་ལ་ཡོངས་སུ་བརྟགས་ན་མི་རྟག་པ་དང་། སྡུག་བསྔལ་བ་དང་། ཡོངས་སུ་མ་དག་པ་དང་། བདག་མེད་པ་ཡིན་པར་རྟོགས་ནས་དེ་སྤངས་ཏེ་ཤིང་དྲུང་ན་ལོ་དྲུག་གི་བར་དུ་དཀའ་བ་སྤྱོད་པ་དང་། དེ་ལྟར་དཀའ་བ་སྤྱོད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་མ་རྒྱས་ཏེ། དེ་ནས་ཡང་ཆུ་བོ་དགའ་སྐྱེད་ཅེས་བྱ་བའི་ནང་དུ་ཁྲུས་བྱས་ནས་གནག་རྫི་མོས་འོ་མའི་འཇམས་ཕུལ་བ་བཞེས་པ་དང་། བཞེས་ནས་བྱང་ཆུབ་ཀྱི་ཤིང་དྲུང་དུ་གཤེགས་ཏེ་བདུད་སྡིག་ཏོ་ཅན་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ནས་བཱ་རཱ་ཎ་སཱིར་དགེ་སློང་སྡེ་ལྔ་ལ་ཐོག་མ་ཆོས་ཀྱི་འཁོར་ལོ་བསྐོར་བ་ནས་གྲོང་ཁྱེར་རྩྭ་མཆོག་འདིར་ཡོངས་སུ་མྱ་ངན་ལས་འདས་པའི་བར་དུ་དེ་ལྟ་བུར་ལྟ་བ་ནི་ཉན་ཐོས་དང་རང་སངས་རྒྱས་དག་ལོག་པར་ལྟ་བ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོའི་མདོ་སྡེ་འདི་མཉན་ཅིང་གཟུངས་སུ་བཟུང་ན། ལྟ་བ་གོང་མ་དེ་དག་ཀུན་སེལ་བར་འགྱུར་རོ། །གལ་ཏེ་ཡི་གེར་བྲིས་ཤིང་ཀློག་གམ། འདོན་ཏམ། ཁོང་དུ་ཆུད་པར་བྱེད་དམ། གཞན་ལ་རྒྱས་པར་སྟོན་ཏམ། དོན་ཡིད་ལ་བྱེད་ན་ཤེས་རབ་ཡང་དག་པ་ཐོབ་པར་འགྱུར་ཏེ། ལོག་པར་ལྟ་བ་མེད་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་ལས་འདས་པ་ཆེན་པོའི་མདོ་འདི་ལ་ནན་ཏན་བྱས་ན། བྱང་ཆུབ་སེམས་དཔས་བསྐལ་པ་ཚད་མེད་པའི་བར་དུ་དགའ་ལྡན་གྱི་གནས་ནས་བབས་ཤིང་ཡུམ་གྱི་ལྷུམས་ནས་བལྟམ་པ་ནས། གྲོང་ཁྱེར་རྩྭ་མཆོག་ཏུ་ཡོངས་སུ་མྱ་ངན་ལས་མ་འདས་པའི་བར་དུ་རྟོགས་པ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་དག་པར་ལྟ་བ་ཞེས་བྱའོ། །དེ་བཞིན་གཤེགས་པས་དགོངས་ཏེ་གསུངས་པའི་དོན་ཟབ་མོ་ཤེས་པ་ཞེས་བྱ་བ་ནི་འདི་ལྟ་སྟེ། ཡོངས་
སུ་མྱ་ངན་ལས་འདས་པ་ཆེན་པོ་འདི་ལས་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པས་ཕས་ཕམ་པ་བཞི་ཉམས་པ་འཐོལ་བར་བྱེད་པ་དང་། དམ་པའི་ཆོས་ལ་སྐུར་བའི་སེམས་བསལ་བ་དང་། མཚམས་མེད་པ་ལྔའི་ཁ་ན་མ་ཐོ་བ་མ་ལུས་པར་བྱེད་པ་དང་། ལོག་སྲེད་ཅན་གྱི་སེམས་མེད་པར་བྱས་ནས་དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་ནི་དགོངས་ཏེ་གསུངས་པའི་དོན་ཟབ་མོ་ཞེས་བྱའོ། །རིགས་ཀྱི་བུ་གཞན་ཡང་ཇི་ལྟར་ན་དོན་ཤིན་ཏུ་ཟབ་མོ་ཞེ་ན། སེམས་ཅན་ལ་ཡང་དག་པར་བདག་མེད་པར་ཤེས་ཀྱང་མ་འོངས་པའི་ལས་ཀྱི་འབྲས་བུ་རྣམ་པར་སྨིན་པ་མེད་པར་མི་འགྱུར་བར་ཡིད་ཆེས་པ་དང་། ཕུང་པོ་ལྔ་འདི་ཉིད་དུ་མ་ལུས་པར་འགོག་པར་ཤེས་མོད་ཀྱི། དགེ་བ་དང་སྡིག་པའི་ལས་རྣམས་ཀྱང་མེད་པར་མི་འགྱུར་བར་ཤེས་པ་དང་། ལས་རྣམ་པ་མང་པོ་ཡོད་མོད་ཀྱི་བྱེད་པ་པོ་དམིགས་སུ་མེད་པ་དང་། ཕྱིན་པའི་གནས་ཡོད་མོད་ཀྱི་འགྲོ་བ་མེད་པ་དང་། འཆིང་བ་ཡོད་མོད་ཀྱི། བཅིངས་པ་མེད་པ་དང་། མྱ་ངན་ལས་འདས་པ་ཡོད་མོད་ཀྱི་འགོག་པ་མེད་པར་ཤེས་པ་སྟེ། དེ་ནི་དགོངས་ཏེ་གསུངས་པའི་དོན་ཟབ་མོ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་འཚལ་བ་ལྟར་ན། བཅོམ་ལྡན་འདས་ཀྱིས་མ་ཐོས་པ་ཐོས་པར་འགྱུར་བ་ཞེས་བགྱི་བའི་དོན་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། གལ་ཏེ་མཆིས་པ་ཞིག་ལགས་ན་ནི་ངེས་པར་མཆིས་པའི་ཆོས་ཅན་ནོ། །གལ་ཏེ་མ་མཆིས་ན་ཡང་ངེས་པར་མ་མཆིས་པའི་ཆོས་ཅན་ལགས་ན། མ་མཆིས་པའི་སྐྱེ་བའི་ཡང་མི་རིགས། མཆིས་པ་ནི་འགོག་པའི་ཡང་མི་རིགས་ཏེ། ཇི་ལྟར་ཐོས་པ་དེ་ཡང་ཐོས་པ་ཞེས་བགྱི་ལ། གང་མ་ཐོས་པ་ཡང་མ་ཐོས་པ་ལགས་ན། ཅིའི་སླད་དུ་མ་ཐོས་པ་ཐོས་པར་འགྱུར་རོ་ཞེས་གསུངས། བཅོམ་ལྡན་འདས་གང་མི་ཐོས་པ་ནི་ཐོས་པའི་ཡང་མི་རིགས། གང་སྔར་
ཐོས་པ་ནི་གདོད་ཐོས་པར་མི་འགྱུར་རོ། །དེ་ཅིའི་སླད་དུ་ཞེ་ན། སྔར་ཐོས་ལགས་པའི་ཕྱིར་རོ། །དེ་བས་ན་ཅིའི་སླད་དུ་མ་ཐོས་པ་ཐོས་པར་འགྱུར་རོ་ཞེས་གསུངས། དཔེར་ན་འགྲོ་བ་ནི་ཕྱིན་ལགས་ན་མི་འགྲོའོ། །འགྲོ་ན་ཕྱིན་པ་མ་ལགས་སོ། །གཞན་ཡང་དཔེར་ན་སྐྱེས་ནས་མི་སྐྱེ་སྟེ། མི་སྐྱེ་བ་ནི་སྐྱེ་བར་མི་འགྱུར། ཐོབ་ནས་མི་ཐོབ་སྟེ། མི་ཐོབ་པ་ནི་ཐོབ་པར་མི་འགྱུར་རོ། །ཐོས་ནས་མི་ཐོས་ཏེ། མི་ཐོས་པ་ནི་ཐོས་པར་མི་འགྱུར་བ་ཡང་དེ་བཞིན་ནོ། །བཅོམ་ལྡན་འདས་གལ་ཏེ་མི་ཐོས་པ་ཐོས་པར་གྱུར་ན། སེམས་ཅན་ཐམས་ཅད་བྱང་ཆུབ་མ་མཆིས་པ་ཡང་མཆིས་པར་འགྱུར་བའི་རིགས། མྱ་ངན་ལས་འདས་པ་མ་ཐོབ་པ་ཡང་ཐོབ་པའི་རིགས། སངས་རྒྱས་ཀྱི་རང་བཞིན་མ་མཐོང་བ་ཡང་སངས་རྒྱས་ཀྱི་རང་བཞིན་མཐོང་བའི་རིགས་ན། ཅིའི་སླད་དུ་ཡང་འདི་སྐད་ཅེས་བྱང་ཆུབ་སེམས་དཔའ་ས་བཅུ་ལ་གནས་པ་ནི་སངས་རྒྱས་ཀྱི་རང་བཞིན་མཐོང་མོད་ཀྱི། མངོན་དུ་གསལ་བར་མ་གྱུར་ཏོ་ཞེས་གསུངས། བཅོམ་ལྡན་འདས་གལ་ཏེ་མ་ཐོས་པ་ཐོས་པར་འགྱུར་ན། དེ་བཞིན་གཤེགས་པས་སྔོན་སུ་ལས་གསན། གལ་ཏེ་གསན་པ་ཞིག་ལགས་ན། ཅིའི་སླད་དུ་དེ་བཞིན་གཤེགས་པས་ལུང་ལས་སྟོན་པ་མེད་དོ་ཞེས་གསུངས། གལ་ཏེ་མ་ཐོས་པ་ཐོས་པས་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལགས་ན། སེམས་ཅན་ཐམས་ཅད་ཀྱང་མ་ཐོས་པ་ཐོས་པས་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པའི་རིགས་སོ། །དེ་བཞིན་གཤེགས་པས་གལ་ཏེ་མྱ་ངན་ལས་འདས་པ་ཆེན་པོའི་མདོ་འདི་མ་ཐོས་པར་སངས་རྒྱས་ཀྱི་རང་བཞིན་མཐོང་བར་གྱུར་ན། སེམས་ཅན་ཐམས་ཅད་ཀྱང་མདོ་སྡེ་འདི་མ་ཐོས་པ་ལགས་ཏེ། སངས་རྒྱས་ཀྱི་རང་བཞིན་མཐོང་བའི་རིགས་སོ། །བཅོམ་ལྡན་འདས་གཟུགས་ཁ་ཅིག་ནི་མཐོང་། ཁ་ཅིག་ནི་མི་མཐོང་། སྒྲ་ཡང་དེ་བཞིན་ཏེ། ཁ་ཅིག་ནི་ཐོས། ཁ་ཅིག་ནི་མི་ཐོས་ཏེ། མྱ་ངན་ལས་འདས་པ་ཆེན་པོ་ནི་གཟུགས་མ་ལགས། སྒྲ་མ་ལགས་ན། ཅིའི་སླད་དུ་མཐོང་ངོ་
ཐོས་སོ་ཞེས་གསུངས། བཅོམ་ལྡན་འདས་འདས་པ་ནི་འགགས་ལགས་པས་མི་ཐོས། མ་འོངས་པ་ནི་མ་ཕྱིན་པས་མི་ཐོས། ད་ལྟར་མཉན་པའི་ཚེ་ནི་ཐོས་པ་ཞེས་མི་བགྱི་སྟེ། ཐོས་ནས་སྒྲ་འགགས་པས་ན་ཐོས་པར་མི་འགྱུར་ཏེ། མྱ་ངན་ལས་འདས་པ་ཆེན་པོ་འདི་ཡང་འདས་པ་དང་། མ་འོངས་པ་དང་། ད་ལྟར་མ་ལགས་ལ། གལ་ཏེ་དུས་གསུམ་མ་ལགས་ན་བརྗོད་དུ་མ་མཆིས། གལ་ཏེ་བརྗོད་དུ་མ་མཆིས་ན་ཐོས་པར་ཡང་མི་འགྱུར་ན་ཅིའི་སླད་དུ་བྱང་ཆུབ་སེམས་དཔའ་མྱ་ངན་ལས་འདས་པ་ཆེན་པོའི་མདོ་སྡེ་འདི་ལ་ནན་ཏན་བགྱིས་ན་མ་ཐོས་པ་ཐོས་པར་འགྱུར་རོ་ཞེས་གསུངས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་ཆོས་ཐམས་ཅད་སྒྱུ་མ་ལྟ་བུ་དང་། སྨིག་རྒྱུ་ལྟ་བུ་དང་། དྲི་ཟའི་གྲོང་ཁྱེར་ལྟ་བུ་དང་། ཆུ་ལ་རི་མོ་བྲིས་པ་དང་། གཞན་ཡང་ཆུའི་ཆུ་བུར་དང་། དབུ་བ་དང་། ཆུ་ཤིང་ལྟ་བུར་གསོབ་གསོག་སྙིང་པོ་མེད་པ་དང་། འཚོ་བ་མ་ཡིན། བདག་མ་ཡིན། སྡུག་བསྔལ་དང་བདེ་བ་མེད་པར་རྟོགས་པ་ནི་ཇི་ལྟར་བྱང་ཆུབ་སེམས་དཔའ་ས་བཅུ་ལ་གནས་པ་དག་གིས་ཤེས་པ་དང་མཐོང་བ་ལྟར་ཤིན་ཏུ་རྟོགས་པ་ལེགས་སོ། །དེ་ནས་འཁོར་གྱི་དཀྱིལ་འཁོར་དེ་ཉིད་དུ་སྐད་ཅིག་ཡུད་ཙམ་གྱིས་འོད་སྣང་བ་ཆེན་པོ་སྔོན་པོ་མ་ཡིན་པར་སྔོན་པོར་མཐོང་བ། སེར་པོ་མ་ཡིན་པར་སེར་པོར་མཐོང་བ། དམར་པོ་མ་ཡིན་པར་དམར་པོར་མཐོང་བ། དཀར་པོ་མ་ཡིན་པར་དཀར་པོར་མཐོང་བ། ཁ་དོག་མ་ཡིན་པར་ཁ་དོག་ཏུ་མཐོང་བ། སྣང་བ་མ་ཡིན་པར་སྣང་བར་མཐོང་བ། མཐོང་བ་མ་ཡིན་པར་མཐོང་བར་གྱུར་པ་ལ་མཐོང་བ་ཞེས་བྱའོ། །དེའི་ཚེ་འཁོར་མང་པོ་དག་ལ་འོད་དེས་རེག་ནས་ལུས་དང་སེམས་རབ་ཏུ་བདེ་བ་ནི་ཇི་ལྟར་དགེ་སྦྱོང་དག་སེང་གེའི་རྒྱལ་པོའི་ཏིང་ངེ་འཛིན་ལ་ཞུགས་པ་བཞིན་དུ་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གྱིས་བཅོམ་ལྡན་འདས་ལ་འོད་ཟེར་འདི་དག་ག་
ལས་བྱུང་ཞེས་གསོལ་ཏོ། །དེའི་ཚེ་དེ་བཞིན་གཤེགས་པ་ཅང་མི་གསུང་སྟེ་མ་བཤད་དོ། །བྱང་ཆུབ་སེམས་དཔའ་འོད་སྲུང་གིས་ཡང་འཇམ་དཔལ་ལ་ཅིའི་རྒྱུ་ཅིའི་རྐྱེན་གྱིས་འོད་འདིས་འཁོར་མང་པོ་སྣང་བར་འགྱུར་ཅེས་དྲིས་པ་དང་། འཇམ་དཔལ་ཡང་ཅང་མི་སྨྲ་སྟེ་ལན་མ་བཏབ་བོ། །དེ་ནས་བྱང་ཆུབ་སེམས་དཔའ་ལུས་དཔག་ཏུ་མེད་པས་ཡང་བྱང་ཆུབ་སེམས་དཔའ་འོད་སྲུང་ལ་འདི་སུ་ཡི་འོད་ཅེས་དྲིས་སོ། །བྱང་ཆུབ་སེམས་དཔའ་འོད་སྲུང་ཅང་མི་སྨྲ་སྟེ་ལན་མ་བཏབ་བོ། །བྱང་ཆུབ་སེམས་དཔའ་རྣམ་དག་གནས་པའི་རྒྱལ་བུས་བྱང་ཆུབ་སེམས་དཔའ་ལུས་དཔག་ཏུ་མེད་པ་ལ་ཅིའི་རྒྱུ་ཅིའི་རྐྱེན་གྱིས་འཁོར་མང་པོའི་ནང་ན་འོད་འདི་ཡོད་པར་འགྱུར་ཞེས་དྲིས་པ་དང་། བྱང་ཆུབ་སེམས་དཔའ་ལུས་དཔག་ཏུ་མེད་པ་ཡང་ཅང་མི་སྨྲ་སྟེ་ལན་མ་བཏབ་བོ། །དེ་བཞིན་དུ་བྱང་ཆུབ་སེམས་དཔའ་ལྔ་བརྒྱ་རྣམས་གཅིག་ལ་གཅིག་དེ་ལྟར་དྲིས་མོད་ཀྱི། གང་གིས་ཀྱང་ལན་བཏབ་པ་མེད་དོ། །དེ་ནས་བཅོམ་ལྡན་འདས་ཀྱིས་འཇམ་དཔལ་ལ་བཀའ་སྩལ་པ། འཇམ་དཔལ་ཅིའི་རྒྱུ་ཅིའི་རྐྱེན་གྱིས་འཁོར་མང་པོ་འདི་དག་གི་ནང་ན་འོད་འདི་སྣང་བར་གྱུར་ཅེས་བཀའ་སྩལ་པ་དང་། འཇམ་དཔལ་གྱིས་གསོལ་པ། བཅོམ་ལྡན་འདས་འོད་འདི་ནི་ཡེ་ཤེས་ལགས་ཏེ་ཡེ་ཤེས་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ནོ། །རྟག་ཏུ་གནས་པའི་ཆོས་ཅན་ལ་ནི་རྒྱུ་དང་རྐྱེན་མ་མཆིས་ན། ཅིའི་སླད་དུ་བཅོམ་ལྡན་འདས་ཀྱིས་ཅིའི་རྒྱུ་ཅིའི་རྐྱེན་གྱིས་འོད་འདི་བྱུང་བར་གྱུར་ཞེས་བཀའ་སྩལ། འོད་འདི་ནི་མྱ་ངན་ལས་འདས་པ་ཆེན་པོ་ཞེས་བགྱི་སྟེ། མྱ་ངན་ལས་འདས་པ་ཆེན་པོ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་དུ་བཅོམ་ལྡན་འདས་ཀྱིས་ཅིའི་རྒྱུ་ཅིའི་རྐྱེན་གྱིས་འོད་འདི་ཡོད་པར་གྱུར་ཅེས་བཀའ་སྩལ། འོད་འདི་ནི་དེ་བཞིན་གཤེགས་པ་ཞེས་བགྱི་སྟེ། དེ་བཞིན་གཤེགས་པ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅི་སྟེ་དེ་བཞིན་གཤེགས་པས་རྒྱུ་དང་རྐྱེན་ཅེས་བཀའ་སྩལ། འོད་འདི་ནི་བྱམས་པ་དང་། སྙིང་རྗེ་ཆེན་པོ་ཞེས་བགྱི་སྟེ། བྱམས་པ་དང་སྙིང་རྗེ་ཆེན་པོ་ཞེས་བགྱི་བ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་
མ་བྱུང་ན། ཅིའི་སླད་དུ་དེ་བཞིན་གཤེགས་པས་འོད་ཀྱི་རྒྱུ་དང་རྐྱེན་ཞེས་བཀའ་སྩལ། འོད་འདི་ནི་སངས་རྒྱས་རྗེས་སུ་དྲན་པ་ཞེས་བགྱི་སྟེ། སངས་རྒྱས་རྗེས་སུ་དྲན་པ་ཞེས་བགྱི་བ་ནི། རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ཅན་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་དུ་དེ་བཞིན་གཤེགས་པས་རྒྱུ་དང་རྐྱེན་ཞེས་བཀའ་སྩལ། འོད་འདི་ནི་ཉན་ཐོས་དང་རང་སངས་རྒྱས་ཐམས་ཅད་དང་ཐུན་མོང་མ་ལགས་པའི་ལམ་ཞེས་བགྱི་སྟེ། ཉན་ཐོས་དང་རང་སངས་རྒྱས་དང་ཐུན་མོང་མ་ལགས་པའི་ལམ་ནི་རྟག་ཏུ་གནས་པའི་ཆོས་ཅན་ལགས་ཏེ། རྟག་ཏུ་གནས་པའི་ཆོས་ནི་རྒྱུ་དང་རྐྱེན་ལས་མ་བྱུང་ན། ཅིའི་སླད་དུ་དེ་བཞིན་གཤེགས་པས་རྒྱུ་དང་རྐྱེན་ཞེས་བཀའ་སྩལ། བཅོམ་ལྡན་འདས་རྒྱུ་དང་རྐྱེན་ཞེས་བགྱི་བ་ཡང་མ་མཆིས་སོ། །མ་རིག་པ་འགགས་པའི་རྒྱུ་རྐྱེན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སྒྲོན་མ་རབ་ཏུ་འབར་བར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཆོས་ཐམས་ཅད་ཀྱི་མཚན་ཉིད་ཤིན་ཏུ་ཟབ་མོའི་དོན་དམ་པ་ལ་མ་འཇུག་པར་ཀུན་རྫོབ་ཏུ་བརྗོད་ཅིང་སྨྲོས་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་འདི་ནས་ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་ཉི་ཤུའི་བྱེ་མ་སྙེད་འདས་པའི་ཕ་རོལ་ན་སངས་རྒྱས་ཀྱི་ཞིང་མི་གཡོ་བ་ཞེས་བགྱི་བ་མཆིས་ཏེ། སངས་རྒྱས་དེ་བཞུགས་པའི་གནས་ནི་ཆུ་ཞེང་གབ་པར་དཔག་ཚད་ཁྲི་ཉིས་སྟོང་སྟེ། དེའི་ས་གཞི་ནི་རིན་པོ་ཆེ་སྣ་བདུན་ཤ་སྟག་སྟེ། ས་དང་གསེག་མ་མེད་དོ། །ཤིན་ཏུ་མཉམ་ཞིང་འཇམ་སྟེ། ས་ལ་སལ་སུལ་དང་ཤང་ཤོང་མེད་དོ། །ཤིང་རྣམས་ནི་གསེར་དང་། དངུལ་དང་བཻ་དཱུརྱ་དང་། ཤེལ་དང་རིན་པོ་ཆེ་སྣ་བཞི་ལས་བྱས་ཏེ། དུས་ཐམས་ཅད་དུ་མེ་ཏོག་དང་འབྲས་བུ་རབ་ཏུ་རྒྱས་སོ། །གལ་ཏེ་སེམས་ཅན་གང་མེ་ཏོག་གི་བསུང་གིས་ཕོག་ན་ལུས་དང་སེམས་
རབ་ཏུ་བདེ་བ་ནི་ཇི་ལྟར་དགེ་སློང་དག་བསམ་གཏན་གསུམ་པ་ལ་ཞུགས་པ་བཞིན་ནོ། །དེའི་ཁོ་ར་ཁོར་ཡུག་ཏུ་ཀླུང་ཆེན་པོ་སུམ་སྟོང་ཡོད་དེ། དེའི་ཆུ་ཤིན་ཏུ་བཟང་ལ་ཡོན་ཏན་བརྒྱད་དང་ལྡན་ནོ། །གལ་ཏེ་སེམས་ཅན་གང་དེའི་ནང་དུ་ཁྲུས་བྱས་ན་དགའ་བ་དང་བདེ་བ་ཐོབ་པ་ནི་ཇི་ལྟར་དགེ་སློང་དག་བསམ་གཏན་གཉིས་པ་ལ་ཞུགས་པ་དང་འདྲའོ། །ཀླུང་དེ་ལ་མེ་ཏོག་ཨུད་པ་ལ་དང་པད་མ་དང་ཀུ་མུ་ད་དང་། པུན་ད་རཱི་ཀ་དང་། མེ་ཏོག་བསུང་ལྡན་དང་། བསུང་ཆེན་དང་། མེ་ཏོག་བསུང་དམ་པ་དང་། རྟག་པ་དང་། སེམས་ཅན་ཐམས་ཅད་ཀྱིས་དབང་མི་བགྱིད་པ་ཞེས་བགྱི་བའི་མེ་ཏོག་རྣམ་པ་མང་པོ་རྣམ་པ་སྣ་ཚོགས་མཆིས་སོ། །ཀླུང་དེའི་འགྲམ་ན་ཡང་མེ་ཏོག་རྣམ་པ་མང་པོ་མཆིས་པ་ནི་འདི་ལྟ་སྟེ། མེ་ཏོག་ཨ་ཏི་མུག་ཏ་ཀ་དང་། མེ་ཏོག་ཙམ་པ་ཀ་དང་། མེ་ཏོག་པ་ཏ་ལ་དང་། མེ་ཏོག་པ་ཤི་ལ་དང་། མེ་ཏོག་མ་རི་ཀ་དང་། མེ་ཏོག་མ་རི་ཀ་ཆེན་པོ་དང་། མེ་ཏོག་སི་མ་རི་ཀ་དང་། མེ་ཏོག་སུ་མ་ན་དང་། མེ་ཏོག་ཡུ་དེ་ཀ་དང་། མེ་ཏོག་དན་དུ་རི་ཀ་དང་། མེ་ཏོག་རྟག་པ་དང་། སེམས་ཅན་ཐམས་ཅད་དབང་མི་བགྱིད་པ་ཞེས་བགྱི་བའི་མེ་ཏོག་ལ་སོགས་པའོ། །ཀླུང་དེའི་གཏིང་ནི་གསེར་གྱི་བྱེ་མས་བདལ་ཏེ། གསེར་དང་། དངུལ་དང་། བཻ་དཱུརྱ་དང་། ཤེལ་ཁ་དོག་རྣམ་པ་སྣ་ཚོགས་ཀྱི་ཐང་མ་སྐས་བཞིན་མཆིས་ཏེ། བྱ་མང་པོ་རྣམ་པ་སྣ་ཚོགས་དེའི་སྟེང་ན་འདུ་ཞིང་། གཞན་ཡང་སྟག་དང་། སྤྱང་ཀི་དང་། སེང་གེ་ལ་སོགས་པ་བྱ་དང་གཅན་གཟན་མ་རུངས་པ་ཚད་མེད་པ་སྙེད་མཆིས་ཏེ། གཅིག་ལ་གཅིག་བུ་བཞིན་དུ་བལྟའོ། །སངས་རྒྱས་ཀྱི་ཞིང་དེ་ན་རྩ་བ་ཉམས་པ་དང་དམ་པའི་ཆོས་ལ་སྐུར་པ་དང་། ལོག་སྲེད་ཅན་དང་། མཚམས་མེད་པ་ལྔ་ལ་སོགས་པའི་ཁ་ན་མ་ཐོ་བ་བགྱིད་པ་མ་མཆིས་སོ། །ཞིང་དེ་ན་གྲང་དྲོ་རན་ཏེ་བཀྲེས་པ་དང་སྐོམ་པའི་སྡུག་བསྔལ་གྱིས་གདུངས་པ་ཡང་མ་མཆིས་སོ། །འདོད་ཆགས་དང་། ཞེ་སྡང་དང་། བག་མེད་པ་དང་། ཕྲག་དོག་ཀྱང་མ་མཆིས་སོ། །ཉི་ཟླ་དང་ཉིན་མཚན་དང་དུས་མ་མཆིས་ཏེ།
ཇི་ལྟར་སུམ་ཅུ་རྩ་གསུམ་གནམ་དང་མཚུངས་ཏེ། དེའི་མི་རྣམས་ཀྱང་འོད་དང་ལྡན་ནོ། །སོ་སོ་ན་རྒྱགས་པ་དང་དྲེགས་པའི་སེམས་མ་མཆིས་ཏེ། ཐམས་ཅད་ཀྱང་བྱང་ཆུབ་སེམས་དཔའ་སྐྱེས་བུ་ཆེན་པོ་མངོན་པར་ཤེས་པ་ཐོབ་པ་ཡོན་ཏན་ཆེན་པོ་དང་ལྡན་པ། དམ་པའི་ཆོས་ལ་རིམ་གྲོ་དང་བསྟི་སྟང་གི་སེམས་འཇོག་པ། ཐེག་པ་ཆེན་པོས་བཏེག་པ། ཐེག་པ་ཆེན་པོ་ལ་དད་པ། ཐེག་པ་ཆེན་པོ་ལ་མོས་པ། ཐེག་པ་ཆེན་པོ་ལ་སྲུང་བ། ཤེས་རབ་ཆེན་པོ་དང་ལྡན་པ། གཟུངས་ཆེན་པོ་ཐོབ་པ། སེམས་ཅན་ཐམས་ཅད་ལ་རྟག་ཏུ་སྙིང་བརྩེ་བ་ཤ་སྟག་གོ །བཅོམ་ལྡན་འདས་དེའི་མཚན་ནི་ཟླ་བ་རྒྱས་པའི་འོད་ཅེས་བགྱི་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་རིག་པ། བླ་ན་མེད་པ་སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་བཞུགས་ཏེ། གང་ནས་གང་དུ་ཆོས་སྟོན་ཀྱང་ཞིང་དེའི་སེམས་ཅན་དག་གིས་མི་ཐོས་པ་གཅིག་ཀྱང་མ་མཆིས་སོ། །སངས་རྒྱས་དེ་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་ཅེས་བགྱི་བ་ལ་འདི་ལྟར་མྱ་ངན་ལས་འདས་པ་ཆེན་པོའི་མདོ་འདི་སྟོན་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་ལ་ནན་ཏན་བྱས་ན། སྔོན་མ་ཐོས་པ་ཀུན་ཐོས་པར་འགྱུར་རོ་ཞེས་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་ཅེས་བགྱི་བ་དེས། སངས་རྒྱས་ཟླ་བ་རྒྱས་པའི་འོད་དེ་ལ་ཞུ་བ་ཡང་ཇི་ལྟར་ན་འདི་ཉིད་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་ཞུས་པ་དང་འདྲ་སྟེ་ཐ་དད་པ་མ་མཆིས་སོ། །སངས་རྒྱས་ཟླ་བ་རྒྱས་པའི་འོད་དེས་བྱང་ཆུབ་སེམས་དཔའ་བཻ་དཱུརྱའི་འོད་ལ་བཀའ་སྩལ་པ། རིགས་ཀྱི་བུ་འདི་ནས་ནུབ་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་ཉི་ཤུའི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་
མི་མཇེད་ཅེས་བྱ་བ་ཡོད་དོ། །འཇིག་རྟེན་གྱི་ཁམས་དེ་ན་རི་དང་བྲག་དང་ཅོང་རོང་དང་ཁྲད་ཁྲོད་དང་། གསེག་མ་དང་ཚེར་མ་མ་རུངས་པས་ཀུན་ཏུ་ཡོངས་སུ་གང་སྟེ། རྟག་ཏུ་བཀྲེས་པ་དང་། སྐོམ་པ་དང་། གྲང་བ་དང་ཚ་བའི་སྡུག་བསྔལ་གྱིས་རྣམ་པར་གཟིར་ཏོ། ། ཞིང་དེའི་མི་དག་དགེ་སྦྱོང་དང་བྲམ་ཟེ་དང་ཕ་མ་དང་སློབ་དཔོན་དང་། བླ་མ་ལ་བཀུར་སྟི་མི་བྱེད་དེ། ཆོས་མ་ཡིན་པ་ལ་ཞེན་པ་དང་། ཆོས་མ་ཡིན་པ་ལ་འདོད་ཅིང་ཆགས་པ་དང་ལོག་པ་དང་ཆོས་སྤྱོད་པ་དང་། དམ་པའི་ཆོས་ལ་ཡིད་མི་ཆེས་པ་དང་། ཚེའི་ཚད་རབ་ཏུ་ཐུང་བ་དང་། ཉེས་པ་བྱེད་པ་དག་ཡོད་ན་རྒྱལ་པོས་ཆད་པས་གཅོད་པ་དང་། རྒྱལ་པོ་དག་ཡུལ་དང་སྲིད་ཡོད་བཞིན་དུ་ཆོག་ཅིང་ངོམས་མི་ཤེས་ཏེ། གཞན་གྱི་བདོག་པ་ལ་འདོད་པའི་སེམས་བསྐྱེད་ནས། དམག་གིས་བཏབ་པས་གློ་བུར་དུ་ཤི་བ་མང་ངོ་། །རྒྱལ་པོས་དེ་ལྟར་ཆོས་མ་ཡིན་པ་སྤྱོད་པས་རྒྱལ་ཆེན་བཞིའི་ལྷ་དགེ་བ་དག་མི་དགའ་བས་ཐན་ཆེན་བྱུང་བ་དང་ནས་འབྲས་མི་སྐྱེ་བ་དང་། མི་ནད་མང་བ་དང་། སྡུག་བསྔལ་ཚད་མེད་པ་མང་པོས་གདུང་བ་དེ་ན་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པ་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ལྷག་པར་ཆེ་བས། སེམས་ཅན་ལ་ཐུགས་བརྩེ་བའི་ཕྱིར་གྲོང་ཁྱེར་རྩྭ་མཆོག་ཏུ་སཱ་ལའི་ཤིང་དྲུང་ན། འཁོར་མང་པོ་རྣམས་ལ་མྱ་ངན་ལས་འདས་པ་ཆེན་པོའི་མདོ་སྡེ་འདི་སྟོན་ཏོ། །དེ་ནས་བྱང་ཆུབ་སེམས་དཔའ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ཞེས་བྱ་བ་ཡང་འདི་ཉིད་ལ་བརྩམས་ནས་ཞུས་ཏེ། ཁྱོད་དང་ཐ་དད་པ་མེད་དོ། །བཅོམ་ལྡན་འདས་དེས་ཀྱང་འདི་བཞིན་དུ་བཀའ་སྩལ་གྱིས་ཁྱེད་མྱུར་དུ་སོང་ཤིག་དང་། ཐོས་པར་འགྱུར་ཞེས་གསུང་ངོ་། །བཅོམ་ལྡན་འདས་བྱང་ཆུབ་
སེམས་དཔའ་བཻ་དཱུརྱའི་འོད་ཀྱིས་དངོས་པོ་དེ་ལྟ་བུ་དག་ཐོས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་བཞི་སྟོང་དང་བཅས་ཏེ། འདིར་མཆི་བས་སྔ་ལྟས་འདི་བྱུང་སྟེ། དེའི་རྒྱུ་དེའི་རྐྱེན་གྱིས་འོད་འདི་མཆིས་པར་གྱུར་ཏོ། །དེ་ནི་རྒྱུ་དང་རྐྱེན་ཞེས་ཀྱང་བགྱི་སྟེ། རྒྱུ་དང་རྐྱེན་ཀྱང་མ་ལགས་སོ། །དེ་ནས་བྱང་ཆུབ་སེམས་དཔའ་བཻ་དཱུརྱའི་འོད་ཀྱིས་བྱང་ཆུབ་སེམས་དཔའ་བརྒྱད་ཁྲི་བཞི་སྟོང་དང་བཅས་ཏེ། བ་དན་དང་། གདུགས་དང་། མེ་ཏོག་དང་། སྤོས་དང་། ཕྲེང་བ་དང་། རོལ་མོའི་རྣམས་སྔ་མ་བས་ཕུལ་དུ་བྱུང་བ་མང་པོ་རྣམ་པ་སྣ་ཚོགས་བཤམས་ཏེ། ཐམས་ཅད་གྲོང་ཁྱེར་རྩྭ་མཆོག་ཏུ་སཱ་ལའི་ཤིང་དྲུང་འདིར་ལྷགས་ནས་སོ་སོ་ནས་མཆོད་པའི་ཡོ་བྱད་ཀྱིས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་བྱས་ནས་ཐལ་མོ་སྦྱར་ཏེ་བསྟི་སྟང་དང་བཅས་པས་ལན་གསུམ་བསྐོར་ནས་མཆོད་པ་བྱས་ཏེ། ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་ལ་བཀའ་སྩལ་པ། རིགས་ཀྱི་བུ་ཁྱེད་འདིར་ཕྱིན་པ་ཡིན་ནམ། མ་ཕྱིན་པ་ཡིན། བྱང་ཆུབ་སེམས་དཔའ་བཻ་དཱུརྱའི་འོད་ཀྱིས་གསོལ་པ། བཅོམ་ལྡན་འདས་ཕྱིན་པ་ཡང་འོངས་པ་མ་མཆིས་ལ། མ་ཕྱིན་པ་ཡང་འོངས་པ་མ་མཆིས་ཏེ། བདག་གིས་དོན་དེ་རྟོགས་པས་ཅི་ཡང་འོངས་པ་མ་མཆིས་སོ། །བཅོམ་ལྡན་འདས་འདུ་བྱེད་ཐམས་ཅད་གལ་ཏེ་རྟག་ན་ཡང་འོང་བ་མ་མཆིས་ལ། མི་རྟག་པ་ལགས་ན་ཡང་འོང་བ་མ་མཆིས་ཏེ། སོ་སོའི་སྐྱེ་བོ་དག་གང་སེམས་ཅན་གྱི་རང་བཞིན་མཆིས་པར་ལྟ་བ་ནི་འོང་བ་དང་མི་འོང་བ་མ་མཆིས་སོ། །བདག་གིས་ནི་སེམས་ཅན་གྱི་རང་བཞིན་དུ་ངེས་པ་མ་མཐོང་ན་ཅིའི་སླད་དུ་འོངས་སམ་མ་འོངས་ཞེས་བཀའ་སྩལ། གང་ང་རྒྱལ་ཅན་དག་ནི་སོང་བ་དང་འོང་བ་མ་མཆིས་པར་མཐོང་གི། ང་རྒྱལ་མ་མཆིས་པ་ལ་ནི་སོང་བ་དང་འོང་བ་མ་མཆིས་སོ། །གང་ལེན་
པ་དང་བཅས་པ་ནི་སོང་བ་དང་འོང་བ་མ་མཆིས་པར་མཐོང་གི་ལེན་པ་མ་མཆིས་པ་ལ་ནི་སོང་བ་དང་འོང་བ་མ་མཆིས་སོ། །གང་དེ་བཞིན་གཤེགས་པ་མཐའ་ཡུན་དུ་མྱ་ངན་ལས་འདའ་བར་མཐོང་བ་ནི་སོང་བ་དང་འོང་བ་མཆིས་པར་མཐོང་གི། དེ་བཞིན་གཤེགས་པ་མཐའ་ཡུན་དུ་མྱ་ངན་ལས་འདས་པར་མི་ལྟ་བ་ལ་ནི་སོང་བ་དང་འོང་བ་མ་མཆིས་པར་བལྟའོ། །གང་སངས་རྒྱས་ཀྱི་རང་བཞིན་མ་མཐོང་བ་ལ་ནི་འོང་བ་དང་སོང་བ་མཆིས་པ་མཐོང་གི། སངས་རྒྱས་ཀྱི་རང་བཞིན་མཐོང་བ་ལ་ནི་འོང་བ་དང་སོང་བ་མ་མཆིས་སོ། །གང་ཉན་ཐོས་དང་རང་སངས་རྒྱས་མྱ་ངན་ལས་འདས་པ་མཆིས་པར་མཐོང་བ་ནི་སོང་བ་དང་འོང་བ་མཆིས་ཀྱི་ཉན་ཐོས་དང་། རང་སངས་རྒྱས་མྱ་ངན་ལས་འདའ་བར་མི་མཐོང་བ་ལ་ནི་སོང་བ་དང་འོང་བ་མ་མཆིས་སོ། །གང་ཉན་ཐོས་དང་རང་སངས་རྒྱས་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་པར་ལྟ་བ་ལ་ནི་སོང་བ་དང་འོང་བ་མཆིས་ཀྱི། དེ་ལྟར་མི་ལྟ་བ་ལ་ནི་སོང་བ་དང་འོང་བ་མ་མཆིས་སོ། །གང་དེ་བཞིན་གཤེགས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མ་མཆིས་པར་ལྟ་བ་ལ་ནི་སོང་བ་དང་འོང་བ་མཆིས་ཀྱི། གང་དེ་བཞིན་གཤེགས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་པར་ལྟ་བ་ལ་ནི་སོང་བ་དང་འོང་བ་མ་མཆིས་སོ། །བཅོམ་ལྡན་འདས་འདི་ཡང་རེ་ཞིག་བཞག་སྟེ། ཕྱོགས་གཅིག་ཙམ་ཞུ་ན་ཐུགས་བརྩེ་བའི་སླད་དུ་གོ་སྐབས་དབྱེ་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ད་དུས་ལ་བབ་ཀྱིས་ཅི་དང་ཅི་འདོད་པ་དྲིས་ཤིག་དང་དེ་དང་དེའི་ལུང་ངས་རྣམ་པར་ཕྱེ་སྟེ་བསྟན་པར་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་ནི་ཤིན་ཏུ་ཕྲད་དཀའ་སྟེ། ཇི་ལྟར་མེ་ཏོག་ཨུ་དུམ་བཱ་ར་བཞིན་ནོ། །ཆོས་ཀྱང་དེ་ལྟར་ཆོས་ཐོས་དཀའོ། །མདོ་སྡེ་བཅུ་གཉིས་ཀྱི་ནང་ན་ཤིན་ཏུ་རྒྱས་པ་ཐོས་པ་ཡང་ཤིན་ཏུ་དཀའ་བས་ན་སེམས་རྩེ་གཅིག་ཏུ་མཉན་པར་
བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་ཀྱིས་སྐབས་དབྱེ་བ་གནང་བ་དང་བཀས་སྟོན་པར་འགྱུར་བར་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་མྱ་ངན་ལས་འདས་པ་ཆེན་པོའི་མདོ་སྡེ་འདི་བསྒོམས་ན་མ་ཐོས་པ་ཐོས་པར་འགྱུར། དེ་ནས་བཅོམ་ལྡན་འདས་ཀྱིས་ལེགས་སོ་ལེགས་སོ་ཞེས་བྱ་བ་བྱིན་ནོ། །རིགས་ཀྱི་བུ་ཁྱོད་དེང་འདི་ལྟར་ཐེག་པ་ཆེན་པོ་མྱ་ངན་ལས་འདས་པའི་རྒྱ་མཚོ་མ་ལུས་པར་བྱའོ། །སྙམ་བསམས་པ་དང་། ངས་ཤིན་ཏུ་བསྟན་ཅིང་སྟོན་པ་མཁས་པ་དང་ཡང་ཕྲད་ཀྱིས་དེང་ཁྱོད་ཀྱི་ཐེ་ཚོམ་གྱི་དྲ་བ་དང་ཟུག་རྔུ་ཅི་དང་ཅི་ཡོད་པ་དེ་དག་ཐམས་ཅད་སྨན་པ་ཆེན་པོར་གྱུར་པ་ངས་ལེགས་པར་དབྱུང་ངོ་། །ཁྱོད་ནི་སངས་རྒྱས་ཀྱི་རང་བཞིན་ལ་གསལ་བར་མ་གྱུར་ཏེ། ངའི་ཤེས་རབ་ཀྱི་སྒྲོན་མ་སྣང་བར་བྱའོ། །ཁྱོད་འཁོར་བའི་ཀླུང་ཆེན་པོ་ལ་རྒལ་བར་འདོད་ན་ཁྱོད་ཀྱིས་དེད་དཔོན་དུ་འགྱུར་བར་བྱའོ། །ང་ལ་ཁྱོད་ཕ་མའི་འདུ་ཤེས་སྐྱེད་ཅིག་དང་། ངས་ཁྱོད་ལ་ཡང་བུ་དང་འདྲ་བར་དགོངས་སོ། །ཁྱོད་དམ་པའི་ཆོས་ཀྱི་རིན་པོ་ཆེ་འདོད་པ་དང་། ང་ལ་མང་དུ་ཡོད་པ་དང་ཕྲད་པས་ཁྱོད་སྦྱིན་གྱིས། རབ་ཏུ་ཡིད་ལ་བྱས་ཏེ་བརྟགས་པར་ཉོན་ཅིག་དང་། ངས་རྣམ་པར་ཕྱེ་སྟེ་བསྟན་པར་བྱའོ། །རིགས་ཀྱི་བུ་ཆོས་ཉན་པར་འདོད་ན་ད་ལྟར་དུས་ལ་བབ་བོ། །གལ་ཏེ་ཆོས་ཐོས་ན་དད་པ་སྐྱེད་དེ་སེམས་རྩེ་གཅིག་ཏུ་ཉོན་ལ་བསྟི་སྟང་དང་རིམ་གྲོ་གྱིས་ཤིག །དམ་པའི་ཆོས་ལ་སྐྱོན་མ་ཚོལ་ཅིག །འདོད་ཆགས་དང་། ཞེ་སྡང་དང་། གཏི་མུག་ལ་མ་སེམས་ཤིག །ཆོས་སྨྲ་བའི་ཚིག་བཟང་ངན་ལ་མ་རྟོག་ཅིག །ཆོས་ཐོས་ནས་ང་རྒྱལ་མ་སྐྱེད་ཅིག །བཀུར་སྟི་དང་། རྙེད་པ་དང་། གྲགས་པའི་ཕྱིར་མ་བྱེད་པར་འཇིག་རྟེན་ལས་འདས་པའི་ཆོས་ཀྱི་ཟིལ་དངར་གྱི་ཁེ་ཚོལ་ཅིག །ཡང་འདི་སྙམ་དུ་བདག་ཆོས་ཐོས་ནས་སྔར་བདག་གི་ལུས་བསྒྲལ་ཏེ་གཟོད་གཞན་སྒྲོལ་ལོ་སྙམ་མ་སེམས་ཤིག །སྔར་བདག་གི་ལུས་བཀྲོལ་ཏེ་གཟོད་གཞན་དགྲོལ་ལོ་སྙམ་མ་སེམས་ཤིག །སྔར་བདག་གི་
ལུས་བདེ་བར་རེག་སྟེ་གཟོད་གཞན་ལ་བདེ་བར་བྱའོ། །སྙམ་མ་སེམས་ཤིག །སྔར་བདག་མྱ་ངན་འདས་ནས་གཟོད་གཞན་མྱ་ངན་ལས་འདའོ་སྙམ་མ་སེམས་པར་སངས་རྒྱས་དང་། ཆོས་དང་དགེ་འདུན་ལ་མཚན་ཉིད་མཉམ་པར་འདུ་ཤེས་སྐྱེད་ཅིག །འཁོར་བ་ལ་སྡུག་བསྔལ་ཆེན་པོའི་མཚན་ཉིད་དུ་འདུ་ཤེས་སྐྱེད་ཅིག །མྱ་ངན་ལས་འདས་པ་ཆེན་པོ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་འདུ་ཤེས་བསྐྱེད་དེ། སྔར་གཞན་གྱི་དོན་བྱས་ལ་གདོད་བདག་གི་དོན་བྱའོ། །ཐེག་པ་ཆེན་པོའི་ཕྱིར་གྱི་ཐེག་པ་གཉིས་ཀྱི་ཕྱིར་མ་ཡིན་ནོ། །ཆོས་ཐམས་ཅད་གནས་པ་མེད་པ་ལ་ཆོས་ཐམས་ཅད་ཀྱི་མཚན་ཉིད་དུ་མ་འཛིན་ཅིག །ཆོས་ཐམས་ཅད་ལ་འདོད་པའི་མཚན་ཉིད་མ་སྐྱེད་པར་རྟག་ཏུ་ཆོས་ཤེས་པ་དང་མཐོང་བའི་མཚན་ཉིད་བསྐྱེད་པར་བྱའོ། །རིགས་ཀྱི་བུ་ཁྱོད་དེ་ལྟར་སེམས་རྩེ་གཅིག་ཏུ་ཆོས་མཉན་ན་དེ་ནི་མ་ཐོས་པ་ཐོས་པར་འགྱུར་བ་ཞེས་བྱའོ། །རིགས་ཀྱི་བུ་མ་ཐོས་པ་ཐོས་པ་ཡོད་དོ། །མ་ཐོས་པ་མི་ཐོས་པ་ཡོད་དོ། །ཐོས་པ་མི་ཐོས་པ་ཡོད་དོ། །ཐོས་པ་ཐོས་པའང་ཡོད་དོ། །རིགས་ཀྱི་བུ་ཇི་ལྟར་མི་སྐྱེ་བ་སྐྱེ་བ་དང་། མ་སྐྱེས་པ་མི་སྐྱེ་བ་དང་། སྐྱེ་བ་མི་སྐྱེ་བ་དང་། སྐྱེས་པ་སྐྱེ་བ་བཞིན་ནོ། །ཇི་ལྟར་མ་ཕྱིན་པ་ཕྱིན་པ་དང་། མ་ཕྱིན་པ་མི་ཕྱིན་པ་དང་། ཕྱིན་པ་མི་ཕྱིན་པ་དང་། ཕྱིན་པ་ཕྱིན་པ་བཞིན་ནོ། །བཅོམ་ལྡན་འདས་ཇི་ལྟར་ན་མི་སྐྱེ་བ་སྐྱེ་བ་ཞེ་ན། རིགས་ཀྱི་བུ་ཀུན་རྫོབ་ལ་གནས་པ་ཐོག་མ་མངལ་ནས་བྱུང་བའི་ཚེ་ནི་མི་སྐྱེ་བ་སྐྱེ་བ་ཞེས་བྱའོ། །ཇི་ལྟར་མ་སྐྱེས་པ་མི་སྐྱེ་བ་ཞེ་ན། རིགས་ཀྱི་བུ་མྱ་ངན་ལས་འདས་པ་ཆེན་པོ་ནི་སྐྱེ་བའི་མཚན་ཉིད་མེད་དེ། མ་སྐྱེས་པ་མི་སྐྱེ་བ་ཞེས་བྱའོ། །ཇི་ལྟར་ན་སྐྱེ་བ་མི་སྐྱེ་བ་ཞེ་ན། རིགས་ཀྱི་བུ་ཀུན་རྫོབ་ལྟར་ཤི་བའི་ཚེ་ན་སྐྱེ་བ་མི་སྐྱེ་བ་ཞེས་བྱའོ། །ཇི་ལྟར་ན་སྐྱེ་བ་སྐྱེས་པ་ཞེ་ན། རིགས་
ཀྱི་བུ་སོ་སོའི་སྐྱེ་བོ་ཐམས་ཅད་ནི་སྐྱེ་བ་སྐྱེས་པ་ཞེས་བྱའོ། །དེ་ཅིའི་ཕྱིར་ཞེ་ན། སྐྱེ་བ་སྐྱེས་པ་རྒྱུན་མི་འཆད་པའི་ཕྱིར། ཟག་པ་དང་བཅས་པ་ཐམས་ཅད་སྐད་ཅིག་སྐད་ཅིག་གིས་སྐྱེ་བའི་ཕྱིར་སྐྱེ་བ་སྐྱེས་པ་ཞེས་བྱའོ། །བྱང་ཆུབ་སེམས་དཔའ་ས་བཞི་པ་ནི་སྐྱེ་བ་མི་སྐྱེ་བ་ཞེས་བྱའོ། །དེ་ཅིའི་ཕྱིར་ཞེ་ན། སྐྱེ་བ་ལ་དབང་ཐོབ་པའི་ཕྱིར་སྐྱེ་བ་མི་སྐྱེ་བ་ཞེས་བྱའོ། །རིགས་ཀྱི་བུ་འདི་དག་ནི་ནང་གི་ཆོས་སོ། །ཇི་ལྟར་ཕྱི་རོལ་གྱི་ཆོས་མི་སྐྱེ་བ་དང་། མ་སྐྱེས་པ་མི་སྐྱེ་བ་དང་། སྐྱེ་བ་མི་སྐྱེ་བ་དང་། སྐྱེ་བ་སྐྱེས་པ་ཞེ་ན། རིགས་ཀྱི་བུ་དཔེར་ན་ས་བོན་ནི་མྱུ་གུ་མ་སྐྱེས་པའི་ཚེ་ཆེན་པོ་བཞི་འདུས་ཤིང་འཚོགས་པ་དང་། ལས་སུ་བྱས་པས་གཟོད་སྐྱེ་བར་འགྱུར་ཏེ། དེ་ནི་མི་སྐྱེ་བ་སྐྱེ་བ་ཞེས་བྱའོ། །ཇི་ལྟར་མ་སྐྱེས་པ་མི་སྐྱེ་བ་ཞེ་ན། དཔེར་ན་ས་བོན་རུལ་པའམ། རྐྱེན་དང་མ་ཕྲད་པ་དེ་ལྟ་བུ་ལ་སོགས་པ་ནི་མ་སྐྱེས་པ་མི་སྐྱེ་བ་ཞེས་བྱའོ། །ཇི་ལྟར་སྐྱེ་བ་མི་སྐྱེ་བཞེ་ན། དཔེར་ན་མྱུ་གུ་སྐྱེས་ནས་ཚད་དུ་ཕྱིན་པར་མ་སྐྱེས་པ་ནི་སྐྱེ་བ་མ་སྐྱེས་པ་ཞེས་བྱའོ། །ཇི་ལྟར་སྐྱེ་བ་སྐྱེས་པ་ཞེ་ན། མྱུ་གུ་ལས་ཚད་དུ་ཕྱིན་པ་སྐྱེས་པ་བཞིན་ཏེ། གང་སྐྱེ་བ་མ་སྐྱེས་པ་ལ་ནི་ཚད་དུ་ཕྱིན་པར་སྐྱེ་བ་མེད་དེ། དེ་ལྟར་ཟག་པ་དང་བཅས་པ་ཐམས་ཅད་ནི་ཕྱི་རོལ་གྱི་ཆོས་སྐྱེ་བ་སྐྱེས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་ཀྱིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཟག་པ་དང་བཅས་པའི་ཆོས་ལ་སྐྱེ་བ་མཆིས་ན་རྟག་པ་ལགས་སམ། མི་རྟག་པ་ལགས། སྐྱེ་བ་དེ་རྟག་པ་ལགས་ན་ཟག་པ་དང་བཅས་པའི་ཆོས་ལ་སྐྱེ་བ་མ་མཆིས་སོ། །གལ་ཏེ་སྐྱེ་བ་དེ་མི་རྟག་ན་ཟག་པ་དང་བཅས་པ་དེ་མི་རྟག་པར་འགྱུར་རོ། །བཅོམ་ལྡན་འདས་སྐྱེ་བ་ཉིད་ཀྱིས་སྐྱེ་བ་སྐྱེད་དོ་ཞེས་བགྱིར་ནི་སྐྱེ་བ་ལ་མཚན་ཉིད་མ་མཆིས་སོ། །གལ་ཏེ་གཞན་གྱིས་སྐྱེ་བར་ནུས་ན་ཅིའི་རྒྱུ་ཅིའི་རྐྱེན་གྱིས་ཟག་པ་མེད་པ་མི་སྐྱེ། བཅོམ་ལྡན་འདས་
གལ་ཏེ་མ་སྐྱེས་པའི་ཚེ་སྐྱེ་བ་མ་མཆིས་ན་ཅི་སྟེ་གཟོད་སྐྱེ་བ་ཞེས་གདགས། མ་སྐྱེས་པའི་ཚེ་སྐྱེ་བ་མ་མཆིས་ན། ཅིའི་སླད་དུ་ནམ་མཁའ་ལ་སྐྱེ་བའོ་ཞེས་མ་གསུངས། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་མི་སྐྱེ་བ་སྐྱེ་བ་ཡང་བརྗོད་དུ་མེད། སྐྱེ་བ་མ་སྐྱེས་པ་ཡང་བརྗོད་དུ་མེད། མ་སྐྱེས་པ་མི་སྐྱེ་བ་ཡང་བརྗོད་དུ་མེད། སྐྱེས་པ་ཡང་བརྗོད་དུ་མེད། མ་སྐྱེས་པ་ཡང་བརྗོད་དུ་མེད་དེ། འོན་ཀྱང་རྒྱུ་དང་རྐྱེན་གྱིས་བརྗོད་དུ་ཡང་རུང་ངོ་། །ཇི་ལྟར་ན་མི་སྐྱེ་བ་སྐྱེ་བ་བརྗོད་དུ་མེད་པ་ཞེ་ན། མ་སྐྱེས་པ་ལ་སྐྱེ་བ་ཞེས་ཇི་སྐད་དུ་བརྗོད། དེ་ཅིའི་ཕྱིར་ཞེ་ན། དེ་ཡང་སྐྱེ་བའི་ཕྱིར་རོ། །ཇི་ལྟར་སྐྱེ་བ་སྐྱེས་པ་བརྗོད་དུ་མེད་པ་ཞེ་ན། སྐྱེ་བ་སྐྱེས་པའི་ཕྱིར་སྐྱེ་ལ། སྐྱེ་བ་སྐྱེས་པའི་ཕྱིར་མ་སྐྱེས་པས་ན་བརྗོད་དུ་མེད་པའོ། །ཇི་ལྟར་སྐྱེ་བ་མ་སྐྱེས་པ་བརྗོད་དུ་མེད་པ་ཞེ་ན། སྐྱེ་བ་ཉིད་ལ་སྐྱེས་པ་ཞེས་བྱ་བ་སྟེ། སྐྱེ་བ་ཉིད་སྐྱེ་བ་མ་ཡིན་པའི་ཕྱིར་བརྗོད་དུ་མེད་དོ། །ཇི་ལྟར་ན་མ་སྐྱེས་པ་མི་སྐྱེ་བ་ཡང་བརྗོད་དུ་མེད་པ་ཞེ་ན། མ་སྐྱེས་པ་དེ་ནི་མྱ་ངན་ལས་འདས་པ་ཞེས་བྱ་སྟེ། མྱ་ངན་ལས་འདས་པ་ནི་སྐྱེ་བ་མེད་པའི་ཕྱིར་བརྗོད་དུ་མེད་དོ། །དེ་ཅིའི་ཕྱིར་ཞེ་ན། ལམ་བསྒོམས་པས་ཐོབ་པའི་ཕྱིར་རོ། །སྐྱེས་པ་ཡང་བརྗོད་དུ་མེད་དེ། སྐྱེ་བ་དེ་ཉིད་སྐྱེ་བ་མེད་པའི་ཕྱིར་རོ། །ཇི་ལྟར་མ་སྐྱེས་པ་བརྗོད་དུ་མེད་པ་ཞེ་ན། ཐོབ་པ་ཡོད་པའི་ཕྱིར་རོ། །ཇི་ལྟར་རྒྱུ་དང་རྐྱེན་གྱིས་བརྗོད་དུ་ཡང་རུང་བ་ཞེ་ན། རྟེན་ཅིང་འབྲེལ་ཏེ་འབྱུང་བའི་ཆོས་བཅུ་གཉིས་ནི་སྐྱེ་བས་རྒྱུར་འགྱུར་ཏེ། དོན་དེ་ལྟ་བས་ན་བརྗོད་དུ་ཡང་རུང་ངོ་། །རིགས་ཀྱི་བུ་ཁྱོད་སྟོང་པའི་ཏིང་ངེ་འཛིན་ཤིན་ཏུ་ཟབ་མོར་མ་འཇུག་ཅིག །དེ་ཅིའི་ཕྱིར་ཞེ་ན། འཁོར་མང་པོ་དག་དབང་པོ་བརྟུལ་བའི་ཕྱིར་རོ། །རིགས་ཀྱི་བུ་འདུས་བྱས་ཀྱི་ཆོས་ནི། སྐྱེ་བ་ཡང་རྟག་པ་ཡིན་ནོ། །མི་རྟག་པ་ལ་གནས་པ་ཙམ་སྐྱེ་བ་ཡང་མི་རྟག་པ་ཡིན་ནོ། །གནས་པ་ཡང་རྟག་པ་མ་ཡིན་ཏེ། སྐྱེ་བ་སྐྱེས་པའི་ཕྱིར་གནས་པ་ཡང་མི་རྟག་པའོ། །ཐ་དད་པ་ཡང་རྟག་པ་མ་ཡིན་ཏེ། ཆོས་ལ་རྟག་པ་མེད་པས་ན་དད་པ་
ཡང་མི་རྟག་པའོ། །འཇིག་རྟེན་པ་ཡང་རྟག་པ་ཡིན་ཏེ། ཐོག་མ་ནས་མེད་ལ་ད་ལྟར་ཡོད་པའི་ཕྱིར་འཇིག་པ་ཡང་མི་རྟག་པའོ། །རིགས་ཀྱི་བུ་རང་བཞིན་གྱི་ཕྱིར་ནི་སྐྱེ་བ་དང་། གནས་པ་དང་། ཐ་དད་པ་དང་། འཇིག་པ་ཡང་རྟག་པ་ཡིན་ཏེ། སྐད་ཅིག་སྐད་ཅིག་མར་འགོག་པའི་ཕྱིར་རྟག་པ་ཞེས་བརྗོད་དུ་ཡང་མི་རུང་ངོ་། །མྱ་ངན་ལས་འདས་པ་ཆེན་པོ་ནི་ཆད་པ་དང་འགོག་པ་ཡིན་པས་མི་རྟག་པ་ཞེས་བྱའོ། །རིགས་ཀྱི་བུ་ཟག་པ་དང་བཅས་པའི་ཆོས་ནི་མ་སྐྱེས་པ་ན་སྐྱེ་བའི་རང་བཞིན་ཡོད་པའི་ཕྱིར་བསྐྱེད་པས་སྐྱེ་བར་འགྱུར་རོ། །ཟག་པ་མེད་པའི་ཆོས་ནི་ཐོག་མ་ནས་སྐྱེ་བའི་རང་བཞིན་མེད་པའི་ཕྱིར་བསྐྱེད་པས་སྐྱེ་བར་མི་ནུས་སོ། །ཇི་ལྟར་མེའི་རང་བཞིན་ཡོད་པས་རྐྱེན་དང་ཕྲད་ནས་འབར་བ་དང་། མིག་ལ་མཐོང་བའི་རང་བཞིན་ཡོད་པས། གཟུགས་དང་། སྣང་བ་དང་། རྣམ་པར་ཤེས་པའི་རྐྱེན་གྱིས་མཐོང་བ་ལྟར་སེམས་ཅན་གྱི་སྐྱེ་བའི་ཆོས་ཀྱང་དེ་དང་འདྲ་སྟེ། ཐོག་མ་ནས་རང་བཞིན་ཡོད་པས་ལས་ཀྱི་རྒྱུ་རྐྱེན་དང་། ཕ་མ་འདུས་པ་ལས་སྐྱེ་བ་ཡོད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཻ་དཱུརྱའི་འོད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ཁྲི་བཞི་སྟོང་སྙེད་ཀྱིས་ཆོས་དེ་དག་ཐོས་ནས། སྟེང་གི་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ཏེ་བསྟི་སྟང་དུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས། བདག་ཅག་ལ་ཡང་ནས་ཡང་བསྟན་ཅིང་མྱ་ངན་ལས་འདས་པ་ཆེན་པོ་འདིའི་རྐྱེན་གྱིས་སྔོན་ཆད་མ་ཐོས་པ་ཐོས་པ་དང་རྟོགས་པར་གྱུར་ཏེ། བྱང་ཆུབ་སེམས་དཔའ་བརྒྱད་ཁྲི་བཞི་སྟོང་ཡང་ཆོས་ཐམས་ཅད་མི་སྐྱེ་བ་སྐྱེ་བ་ལ་སོགས་པ་ཤིན་ཏུ་རྟོགས་པར་གྱུར་ཏོ། །བཅོམ་ལྡན་འདས་བདག་ནི་ཐམས་ཅད་རྟོགས་ཏེ། ཐེ་ཚོམ་གྱི་དྲ་བ་ཆོད་ཀྱང་། འཁོར་གྱི་དཀྱིལ་འཁོར་འདིའི་ནང་ན་བྱང་ཆུབ་སེམས་དཔའ་འཇིགས་པ་མེད་པ་ཞེས་བགྱི་བ་ཞིག་གསོལ་ཤིང་ཞུ་བར་འཚལ་ན། བཅོམ་ལྡན་འདས་ཀྱིས་གནང་ཞིང་སྐབས་དབྱེ་བར་
གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་འཇིགས་པ་མེད་པ་ལ་བཀའ་སྩལ་པ། རིགས་ཀྱི་བུ་ཅི་དང་ཅི་འདོད་པ་དྲིས་ཤིག་དང་། ངས་དེ་དང་དེའི་ལུང་བསྟན་ཅིང་བཤད་པར་བྱའོ། །དེ་ནས་བྱང་ཆུབ་སེམས་དཔའ་འཇིགས་པ་མེད་པ་འཁོར་བྱང་ཆུབ་སེམས་དཔའ་དྲུག་ཁྲི་བཞི་སྟོང་རྣམས་དང་། ཅིག་ཅར་འདུག་པ་སྟན་ལས་ལངས་ནས་གོས་ཚགས་བཅོས་ཏེ། པུས་མོ་ས་ལ་བཙུགས་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཞིང་འདིའི་སེམས་ཅན་དག་ལས་ཅི་ཞིག་བགྱིས་ན། མི་གཡོ་བའི་འཇིག་རྟེན་གྱི་ཁམས་སུ་སྐྱེ་བར་འགྱུར། ཞིང་དེའི་བྱང་ཆུབ་སེམས་དཔའ་དག་ནི་ཅིའི་སླད་དུ། ཤེས་རབ་དང་ལྡན་ཞིང་མིའི་ནང་ན་བལ་གླང་གི་རྒྱལ་པོ་ལྟ་བུར་གཟི་བརྗིད་ཆེ་བ་དང་། རྣལ་འབྱོར་དུ་སྤྱོད་པ་དང་ལྡན་ཞིང་ཤེས་རབ་རྣོ་ཞིང་མྱུར་ཏེ་ཐོས་མ་ཐག་ཏུ་རྟོགས་པར་འགྱུར། དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། སེམས་ཅན་སྲོག་དག་མི་གཅོད་ཅིང་། །ཚུལ་ཁྲིམས་སྡོམ་པ་རབ་བསྡམས་ཏེ། །སངས་རྒྱས་དམ་པའི་བཀའ་སྤྱོད་ན། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་ནོར་དག་མི་འཕྲོག་ཅིང་། །རྟག་ཏུ་ཀུན་ལ་སྦྱིན་བྱེད་དེ། །དགེ་འདུན་འགྲོན་པའི་གནས་འཆའ་ན། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་བུད་མེད་མི་ཚོལ་ཞིང་། །བདག་གི་ཆུང་མས་ཆོག་ཤེས་ལ། །མལ་ཆ་ཚུལ་ཁྲིམས་སྲུང་བྱེད་ན། །མི་གཡོ་ཞིང་དེར་སྐྱེ་བར་འགྱུར། །བདག་དང་གཞན་གྱི་ཁེ་ཚོལ་ཕྱིར། །སྡིགས་མོས་སྐྲག་པར་མི་བྱེད་ཅིང་། །ངག་སྡོམ་རྫུན་དུ་མི་སྨྲ་ན། །མི་གཡོ་ཞིང་དེར་སྐྱེ་བར་འགྱུར། །དགེ་བའི་བཤེས་དང་མི་འབྲལ་ཞིང་། །སྡིག་པའི་གྲོགས་པོ་རབ་སྤངས་ཏེ། །རྟག་ཏུ་འདུམ་པའི་ཚིག་སྨྲ་ན། །མི་གཡོ་ཞིང་དེར་སྐྱེ་བར་འགྱུར། །ཇི་ལྟར་བྱང་ཆུབ་སེམས་དཔའ་ལྟར། །རྟག་ཏུ་ཚིག་རྩུབ་སྤངས་པས་ན། །སྨྲས་པ་ཐོས་པར་དགའ་བ་ནི། །མི་གཡོ་ཞིང་དེར་སྐྱེ་བར་འགྱུར། །བཞད་གད་རྩེད་
མོའི་བར་དུ་ཡང་། །དུས་མ་ཡིན་པའི་ཚིག་མི་སྨྲ། །དུས་ལ་བབ་པར་སྨྲ་བ་ནི། །མི་གཡོ་ཞིང་དེར་སྐྱེ་བར་འགྱུར། །གཞན་གྱི་ཁེ་དང་རྙེད་མཐོང་ན། །རྟག་ཏུ་དགའ་བའི་སེམས་བསྐྱེད་དེ། །ཕྲག་དོག་མདུད་པར་མི་འཛིན་ན། །མི་གཡོ་ཞིང་དེར་སྐྱེ་བར་འགྱུར། །སེམས་ཅན་དག་ལ་མི་འཚེ་ཞིང་། །རྟག་ཏུ་བྱམས་པའི་སེམས་བསྐྱེད་དེ། །ཐབས་ཀྱིས་སྡིག་པ་མི་སྐྱེད་ན། །མི་གཡོ་ཞིང་དེར་སྐྱེ་བར་འགྱུར། །སྦྱིན་དང་ཕ་མ་མེད་པ་དང་། །འདས་དང་མ་འོངས་མེད་པ་ཡི། །ངན་པར་ལྟ་བ་མི་སྐྱེད་ན། །མི་གཡོ་ཞིང་དེར་སྐྱེ་བར་འགྱུར། །ལམ་དགོན་ཁྲོན་པ་ཆུ་འབྱིན་ཅིང་། །བཟའ་ཤིང་མང་པོ་དག་བསྐྱེད་དེ། །སློང་བ་དག་ལ་ཟས་བྱིན་ན། །མི་གཡོ་ཞིང་དེར་སྐྱེ་བར་འགྱུར། །སངས་རྒྱས་ཆོས་དང་དགེ་འདུན་ལ། །སྤོས་སམ་མར་མེ་གཅིག་ཙམ་མམ། །མེ་ཏོག་གཅིག་ཙམ་མཆོད་བྱས་ན། །མི་གཡོ་ཞིང་དེར་སྐྱེ་བར་འགྱུར། །འཇིགས་པ་དང་ནི་ཁེ་བཀུར་དང་། །བསོད་ནམས་ཡོན་ཏན་ཚོལ་བའི་ཕྱིར། །མདོ་འདིའི་ཚིགས་བཅད་གཅིག་བྲིས་ན། །མི་གཡོ་ཞིང་དེར་སྐྱེ་བར་འགྱུར། །གང་ཞིག་མང་པོའི་བསོད་ནམས་དང་། །ཕན་པའི་དོན་དུ་ཉིན་གཅིག་ཙམ། །མདོ་སྡེ་དམ་པ་འདི་བཀླགས་ན། །མི་གཡོ་ཞིང་དེར་སྐྱེ་བར་འགྱུར། །བླ་ན་མེད་པའི་ལམ་གྱི་ཕྱིར། །ཉིན་ཞག་གཅིག་ཙམ་གྱི་བར་དུ། །ཚུལ་ཁྲིམས་སྡོམ་པ་བརྒྱད་མནོས་ན། །མི་གཡོ་ཞིང་དེར་སྐྱེ་བར་འགྱུར། །ཚུལ་ཁྲིམས་རྩ་བ་བཤིག་པ་དང་། །རྒྱས་པའི་མདོ་སྡེ་སྐུར་པ་དང་། །ལྷན་ཅིག་གཅིག་ཏུ་མི་གནས་ན། །མི་གཡོ་ཞིང་དེར་སྐྱེ་བར་འགྱུར། །གལ་ཏེ་ནད་ཀྱིས་གདུངས་པ་ལ། །ཤིང་ཐོག་འབྲུ་གཅིག་སྦྱིན་བྱེད་ཅིང་། །དགའ་བའི་སེམས་ཀྱིས་གཡོག་བྱས་ན། །མི་གཡོ་ཞིང་དེར་སྐྱེ་བར་འགྱུར། །དགེ་འདུན་ནོར་ལ་མི་སྤྱོད་ཅིང་། །སངས་རྒྱས་དཀོར་དག་རབ་བསྲུང་སྟེ། །སངས་རྒྱས་དགེ་འདུན་གནས་ཕྱགས་ན། །མི་གཡོ་ཞིང་དེར་སྐྱེ་བར་འགྱུར། །རྟག་ཏུ་དགའ་བའི་སེམས་བསྐྱེད་དེ། །སངས་རྒྱས་གཟུགས་སམ་རྟེན་ཡང་རུང་། །ཐེ་
བོང་ཙམ་ཞིག་གང་བྱས་པ། །མི་གཡོ་ཞིང་དེར་སྐྱེ་བར་འགྱུར། །གལ་ཏེ་མདོ་སྡེ་འདི་ཡི་ཕྱིར། །བདག་གི་ལུས་དང་རིན་ཆེན་དབྱིག །ཆོས་སྨྲ་བ་ལ་སྦྱིན་བྱེད་ན། །མི་གཡོ་ཞིང་དེར་སྐྱེ་བར་འགྱུར། །བཅོམ་ལྡན་གསང་བའི་སྙིང་པོ་དག །ཉན་ཏམ་ཡི་གེར་བྲིས་ནས་ནི། །འཛིན་ཅིང་ཀློག་གམ་འདོན་པ་ནི། །མི་གཡོ་ཞིང་དེར་སྐྱེ་བར་འགྱུར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཇིགས་པ་མེད་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་དེང་ལས་ཅི་དང་ཅི་བྱས་པའི་རྐྱེན་གྱིས་མི་གཡོ་ཞིང་དེར་སྐྱེ་བར་འགྱུར་བར་རྟོགས་པར་གྱུར་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་འགྲོ་བ་མང་པོ་ལ་སྙིང་བརྩེ་བའི་སླད་དུ་ཞུས་ཏེ། དེ་བཞིན་གཤེགས་པས་རྣམ་པར་ཕྱེ་ཞིང་བསྟན་པས། ལྷ་དང་། མི་དང་། ལྷ་མ་ཡིན་དང་། དྲི་ཟ་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ལ་སོགས་པ་ཐམས་ཅད་ལ་ཡང་ཕན་པའི་དོན་དུ་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཤིན་ཏུ་ཡིད་ལ་བྱས་ཏེ། ལེགས་པར་ཉོན་ཅིག་དང་། ངས་ཁྱོད་ལ་རྒྱུ་དང་རྐྱེན་གང་གིས་མ་ཕྱིན་པར་མི་ཕྱིན་པ་དང་། རྒྱུ་དང་རྐྱེན་གང་གིས་མི་ཕྱིན་པར་ཕྱིན་པ་དང་། རྒྱུ་དང་རྐྱེན་གང་གིས་ཕྱིན་པར་མི་ཕྱིན་པ་དང་། རྒྱུ་དང་རྐྱེན་གང་གིས་ཕྱིན་པར་ཕྱིན་པ་དག་རྣམ་པར་དགྲོལ་ཞིང་བཤད་པར་བྱའོ། །ཅིའི་རྒྱུ་ཅིའི་རྐྱེན་གྱིས་མ་ཕྱིན་པར་མི་ཕྱིན་པ་ཞེ་ན། རིགས་ཀྱི་བུ་མི་ཕྱིན་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། སོ་སོའི་སྐྱེ་བོ་དག་མ་ཕྱིན་པ་ནི་འདོད་ཆགས་དང་། ཞེ་སྡང་དང་། གཏི་མུག་དང་བཅས་པས་ལུས་ཀྱི་ལས་དང་ངག་གི་ལས་ཡོངས་སུ་མ་དག་སྟེ། མ་བརྟགས་པའི་དངོས་པོ་ཐམས་ཅད་འཆང་ཞིང་རྩ་བ་བཞི་ཉམས་པ་དང་། ཤིན་ཏུ་རྒྱས་པའི་མདོ་སྡེ་ལ་སྐུར་པ་དང་། ལོག་སྲེད་ཅན་གྱི་
ལས་བྱེད་པ་དང་། མཚམས་མེད་པ་ལྔའི་ཁ་ན་མ་ཐོ་བ་བྱེད་པའི་ཕྱིར་མ་ཕྱིན་པར་མི་ཕྱིན་པ་ཞེས་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་མི་ཕྱིན་པར་ཕྱིན་པ་ཞེ་ན། མི་ཕྱིན་པར་ཕྱིན་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། དོན་ཇི་ལྟ་བུ་ཞིག་གིས་ཕྱིན་ཅེ་ན། འདོད་ཆགས་དང་། ཞེ་སྡང་དང་། གཏི་མུག་དང་། ལུས་དང་། ངག་གི་ལས་ངན་པར་སྤྱོད་པ་ཡོངས་སུ་སྤངས་ཏེ། མ་བརྟགས་པའི་དངོས་པོ་མི་འཆང་བ་དང་། རྩ་བ་བཞི་མི་ཉམས་པ་དང་། ཤིན་ཏུ་རྒྱས་པའི་མདོ་སྡེ་ལ་མི་སྐུར་བ་དང་། ལོག་སྲེད་ཅན་གྱི་ལས་མི་བྱེད་པ་དང་། མཚམས་མེད་པ་ལྔའི་ཁ་ན་མ་ཐོ་བའི་ལས་མི་བྱེད་པ་སྟེ། དོན་དེ་ལྟ་བས་ན་མི་ཕྱིན་པར་ཕྱིན་པ་ཞེས་བྱའོ། །རྒྱུན་དུ་ཞུགས་པ་ནི་བསྐལ་པ་བརྒྱད་ཁྲིས་ཕྱིན་ནོ། །ལན་ཅིག་ཕྱིར་ལྡོག་པ་ནི་བསྐལ་པ་དྲུག་ཁྲིས་ཕྱིན་ནོ། །ཕྱིར་མི་ལྡོག་པ་ནི་བསྐལ་པ་བཞི་ཁྲིས་ཕྱིན་ནོ། །དགྲ་བཅོམ་པ་ནི་བསྐལ་པ་ཉི་ཁྲིས་ཕྱིན་ནོ། །རང་སངས་རྒྱས་ནི་བསྐལ་པ་སྟོང་ཕྲག་བཅུས་ཕྱིན་ནོ། །དོན་དེའི་ཕྱིར་མི་ཕྱིན་པར་ཕྱིན་པ་ཞེས་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་ཕྱིན་པར་མི་ཕྱིན་པ་ཞེ་ན། ཕྱིན་པ་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་སྟེ། སེམས་ཅན་ཐམས་ཅད་རྟག་ཏུ་ཉོན་མོངས་པ་ཚད་མེད་པ་སྙེད་ཀྱིས་བཅིངས་ཏེ། ཀུན་ནས་གླགས་པས་ཡང་ནས་ཡང་དུ་འཁོར་བ་ནི། ཇི་ལྟར་འཁོར་ལོ་འཁོར་བ་བཞིན་དུ་སྤོང་མི་ནུས་ཏེ། དེ་ནི་ཕྱིན་པ་ཞེས་མི་བྱའོ། །ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ནི་ཡོངས་སུ་སྤངས་པས་མི་ཕྱིན་པ་ཞེས་བྱའོ། །སེམས་ཅན་གདུལ་བའི་ཕྱིར་འདི་དག་ཏུ་སྣང་བར་སྟོན་པས་ན་ཕྱིན་པ་ཞེས་ཀྱང་བྱའོ། །རིགས་ཀྱི་བུ་ཅིའི་རྒྱུ་ཅིའི་རྐྱེན་གྱིས་ཕྱིན་པར་ཕྱིན་པ་ཞེ་ན། ཕྱིན་པ་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་སྟེ། བུས་པ་མ་རབས་སོ་སོའི་སྐྱེ་བོ་ཐམས་ཅད་དང་། རྒྱུན་དུ་ཞུགས་པ་དང་། ལན་ཅིག་ཕྱིར་མི་ལྡོག་པའི་བར་དུ་ཉོན་མོངས་པའི་རྐྱེན་གྱིས་ཕྱིན་པར་ཕྱིན་པ་ཞེས་བྱའོ། །རིགས་ཀྱི་བུ་མ་ཐོས་པ་ཐོས་པ་ཡང་དེ་བཞིན་ཏེ། མ་ཐོས་པ་ཐོས་པ་ཡོད་དོ། །མ་ཐོས་པ་མི་
ཐོས་པ་ཡོད་དོ། །ཐོས་པ་མ་ཐོས་པ་ཡོད་དོ། །ཐོས་པ་ཐོས་པ་ཡོད་དོ། །དེ་ལ་ཇི་ལྟར་ན་མ་ཐོས་པ་ཐོས་པ་ཞེ་ན། རིགས་ཀྱི་བུ་མ་ཐོས་པ་ཞེས་བྱ་བ་ནི་མྱ་ངན་ལས་འདས་པ་ཆེན་པོ་སྟེ། དེ་ཅིའི་ཕྱིར་མ་ཐོས་པ་ཞེ་ན། འདུས་བྱས་མ་ཡིན། སྒྲ་མ་ཡིན། བརྗོད་དུ་མེད་པའི་ཕྱིར་རོ། །ཇི་ལྟར་ཐོས་པ་ཞེ་ན། མིང་ཐོས་པར་འགྱུར་བ་ནི་འདི་ལྟ་སྟེ། རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དག་མ་ཐོས་པ་ཐོས་པ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་གསུངས་པ་ལྟར་མྱ་ངན་ལས་འདས་པ་ཆེན་པོ་ནི་ཐོས་པར་མི་རུང་ན། ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དག་ཐོས་པར་རུང་ཞེས་གསུངས། བཅོམ་ལྡན་འདས་དེ་ཡང་ཅིའི་སླད་དུ་ཞེ་ན། ཉོན་མོངས་པ་བཅད་པ་ནི་མྱ་ངན་ལས་འདས་པ་ཞེས་བགྱི་སྟེ། གལ་ཏེ་མཆོད་པ་ལ་མྱ་ངན་ལས་འདས་པ་ཞེས་མི་བགྱི་ན། དེ་ན་དེའི་ཕྱིར་མྱ་ངན་ལས་འདས་པའི་རང་བཞིན་ཐོག་མ་ནས་མ་མཆིས་ཏེ། ད་ལྟར་མཆིས་པ་ལགས་སོ། །འཇིག་རྟེན་གྱི་ཆོས་ལྟར་ཐོག་མ་མ་མཆིས་ལ། ད་ལྟར་མཆིས་པར་གྱུར་ན་མི་རྟག་པའི་ཆོས་ཅན་དུ་འགྱུར་རོ། །དཔེར་ན་རྫ་མ་ལ་སོགས་པ་ནི་ཐོག་མ་མ་མཆིས་ལ། ད་ལྟ་མཆིས་པར་གྱུར་ཏེ། མཆིས་ནས་སླར་ཡང་མ་མཆིས་པར་འགྱུར་བས་མི་རྟག་པ་ཞེས་བགྱི་སྟེ། མྱ་ངན་ལས་འདས་པ་ཡང་དེ་ལྟ་བུ་ལགས་ན། ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པའོ། །ཞེས་གསུངས། གཞན་ཡང་བཅོམ་ལྡན་འདས་ཇི་ཙམ་དུ་བཀོད་པའི་རྒྱུས་གྲུབ་པ་ནི་ཀུན་ཀྱང་མི་རྟག་པ་ཞེས་བགྱི་སྟེ། མྱ་ངན་ལས་འདས་པ་ཡང་དེ་ལྟ་བུ་ལགས་ན། མི་རྟག་པ་ལགས་པའི་རིགས་སོ། །ཅིའི་རྒྱུ་དང་རྐྱེན་གྱིས་མི་རྟག་ཅེ་ན། འདི་ལྟ་སྟེ། བྱང་ཆུབ་ཀྱི་ཕྱོགས་ཆོས་སུམ་ཅུ་རྩ་བདུན་དང་། ཕ་རོལ་ཏུ་ཕྱིན་པ་དྲུག་དང་། ཚད་མེད་པ་བཞི་དང་། ཀེང་རུས་ལ་རྟོག་པ་
དང་། དབུགས་འགྲང་བ་དང་། དྲན་པ་ཉེ་བར་གཞག་པ་དྲུག་དང་། ཆེན་པོ་དྲུག་འཇིག་པ་ལ་སོགས་པ་ཐམས་ཅད་མྱ་ངན་ལས་འདས་པ་སྒྲུབ་པའི་རྒྱུ་དང་རྐྱེན་དུ་འགྱུར་བར་མི་རྟག་པ་ཞེས་བགྱིའོ། །གཞན་ཡང་བཅོམ་ལྡན་འདས་སྲིད་པ་ནི་མི་རྟག་པ་ཞེས་བགྱི་སྟེ། གལ་ཏེ་མྱ་ངན་ལས་འདས་པ་སྲིད་པ་ལགས་ན། མི་རྟག་པར་ཡང་འགྱུར་བའི་རིགས་སོ། །ཇི་ལྟར་བཅོམ་ལྡན་འདས་ཀྱིས་སྔོན་ལུང་ལས། ཉན་ཐོས་དང་། རང་སངས་རྒྱས་དང་། སངས་རྒྱས་བཅོམ་ལྡན་འདས་ཀུན་མྱ་ངན་ལས་འདས་པ་སྲིད་དོ་ཞེས་གསུངས་ཏེ། དོན་དེ་ལྟ་བས་ན་མི་རྟག་པ་ཞེས་བགྱི་བར་འགྱུར་རོ། །གཞན་ཡང་བཅོམ་ལྡན་འདས་བལྟར་རུང་བའི་ཆོས་ནི་ཀུན་ཀྱང་མི་རྟག་པ་ལགས་ཏེ། བཅོམ་ལྡན་འདས་ཀྱིས་སྔོན་མྱ་ངན་ལས་འདས་པ་མཐོང་བ་ནི་ཉོན་མོངས་པ་ཐམས་ཅད་ཆོད་པར་འགྱུར་རོ། །ཞེས་གསུངས་སོ། །གཞན་ཡང་བཅོམ་ལྡན་འདས་དཔེར་ན་ནམ་མཁའ་སྟོང་པ་ནི་སེམས་ཅན་ཐམས་ཅད་ལ་མཉམ་པར་ཐོགས་པ་དང་སྒྲིབ་པ་མ་མཆིས་པའི་སླད་དུ་རྟག་པ་ཞེས་བགྱིའོ། །གལ་ཏེ་མྱ་ངན་ལས་འདས་པ་ཡང་རྟག་པ་མཉམ་པ་ལགས་ན། ཅིའི་སླད་དུ་སེམས་ཅན་དག་ཐོབ་པ་དང་མ་ཐོབ་པ་མཆིས་པར་འགྱུར། མྱ་ངན་ལས་འདས་པ་ཡང་དེ་ལྟ་བུ་ལགས་ཏེ། སེམས་ཅན་ཐམས་ཅད་ལ་མི་མཉམ་ན་ལྟ་རྟག་པ་ཞེས་བགྱིར་མི་རུང་ངོ་། །བཅོམ་ལྡན་འདས་དཔེར་ན་མི་མང་པོ་བརྒྱ་ལ་དགྲ་གཅིག་མཆིས་ལ་གལ་ཏེ་དགྲ་དེ་བསད་ན་མི་མང་པོ་ཀུན་བདེ་བར་འགྱུར་རོ། །ཅི་སྟེ་མྱ་ངན་ལས་འདས་པ་ཡང་མཉམ་པའི་ཆོས་ལགས་ན་ནི་མི་གཅིག་གིས་ཐོབ་ན་མི་མང་པོ་ཀུན་གྱིས་ཐོབ་པའི་རིགས་སོ། །མི་གཅིག་གིས་ཉོན་མོངས་པ་ཆོད་ན་མི་མང་པོ་ཀུན་གྱིས་ཀྱང་ཆོད་པའི་རིགས་སོ། །གལ་ཏེ་དེ་ལྟ་བུ་མ་ལགས་ན་ཅིའི་སླད་དུ་རྟག་པ་ཞེས་བགྱི། དཔེར་ན་ལ་ལ་ཞིག་གིས་རྒྱལ་པོ་དང་། རྒྱལ་བུ་དང་། ཕ་མ་དང་། སློབ་དཔོན་དང་། བླ་མ་ལ་བཀུར་སྟི་དང་། མཆོད་པ་དང་། རིམ་གྲོ་དང་། བསྟི་སྟང་བྱེད་ན་བདེ་བ་ཐོབ་པར་འགྱུར་ཏེ། དེ་ནི་རྟག་པ་ཞེས་མི་བགྱིའོ། །མྱ་ངན་ལས་འདས་པ་ཡང་དེ་ལྟ་བུ་ལགས་
ན་ནི་རྟག་པ་ཞེས་མི་བགྱིའོ། །དེ་ཅིའི་སླད་དུ་ཞེ་ན། ཇི་ལྟར་བཅོམ་ལྡན་འདས་ཀྱིས་སྔོན་ལུང་ལས་དགའ་བོ་ལ་འདི་སྐད་དུ་གལ་ཏེ་ལ་ལ་ཞིག་གིས་མྱ་ངན་ལས་འདས་པ་ལ་བསྟི་སྟང་དུ་བྱས་ན་ཀུན་ནས་ཉོན་མོངས་པ་ཆོད་དེ། བདེ་བ་ཚད་མེད་པ་ཐོབ་པར་འགྱུར་ཞེས་གསུངས་ཏེ། དོན་དེ་ལྟ་བས་ན་རྟག་པ་ཞེས་མི་བགྱིའོ། །བཅོམ་ལྡན་འདས་གལ་ཏེ་མྱ་ངན་ལས་འདས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པའི་མིང་མཆིས་ན་རྟག་པ་ཞེས་མི་བགྱིའོ། །དེ་སྟེ་མ་མཆིས་ན་ནི་ཇི་ལྟར་བཤད་པར་རུང་། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྣང་བ་མཐོ་བཙུན་དཔལ་གྱི་རྒྱལ་པོ་ལ་བཀའ་སྩལ་པ། མྱ་ངན་ལས་འདས་པ་ཉིད་ནི་ཐོག་མ་མེད་པ་ལ་ད་ལྟ་ཡོད་པ་མ་ཡིན་ནོ། །གལ་ཏེ་མྱ་ངན་ལས་འདས་པ་ཉིད་ཐོག་མ་མེད་ལ་ད་ལྟར་ཡོད་ན། ཟག་པ་མེད་པ་རྟག་ཏུ་གནས་པའི་ཆོས་མ་ཡིན་པར་འགྱུར་རོ། །སངས་རྒྱས་རྣམས་བྱུང་ཡང་རུང་སངས་རྒྱས་མ་བྱུང་ཡང་རུང་། རང་བཞིན་དང་མཚན་ཉིད་ནི་རྟག་ཏུ་གནས་ཏེ། སེམས་ཅན་དག་ཉོན་མོངས་པས་བསྒྲིབས་པས་མྱ་ངན་ལས་འདས་པ་མི་མཐོང་བའི་ཕྱིར་མེད་དོ་སྙམ་སེམས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་དང་ཏིང་ངེ་འཛིན་དང་། ཤེས་རབ་ལ་གོམས་པ་དག་ནི་ཉོན་མོངས་པ་བཅད་ནས་མཐོང་བར་འགྱུར་ཏེ། དེ་བས་ན་མྱ་ངན་ལས་འདས་པ་ནི་རྟག་ཏུ་གནས་པའི་ཆོས་ཅན་ཏེ་སྔོན་མེད་པ་ལ་ད་ལྟར་ཡོད་པ་མ་ཡིན་པར་རིག་པས་དེ་བས་ན་རྟག་པ་ཞེས་བྱའོ། །རིགས་ཀྱི་བུ་དཔེར་ན་མུན་ཁང་གི་ནང་ན་ཁྲོན་པ་ཞིག་ན་རིན་པོ་ཆེ་སྣ་བདུན་རྣམ་པ་སྣ་ཚོགས་ཡོད་པ་མི་དག་གིས་ཡོད་པར་ཤེས་ཀྱང་མུན་པ་གནག་པས་མི་མཐོང་ངོ་། །ཤེས་རབ་ཅན་ཐབས་ལ་མཁས་པས་སྒྲོན་མ་ཆེན་པོ་ཐོགས་ཏེ་བལྟས་པ་དང་ཀུན་སྣང་བར་གྱུར་ཏེ། འདི་སྙམ་དུ་ཆུ་དང་རིན་པོ་ཆེ་སྣ་བདུན་ཐོག་མ་མེད་པ་ལ་ད་ལྟར་ཡོད་པར་གྱུར་ཏོ་སྙམ་མི་སེམས་སོ། །མྱ་ངན་ལས་འདས་པ་ཡང་དེ་དང་འདྲ་སྟེ། ཐོག་མ་ནས་ཡོད་པ་ཡིན་གྱི། ད་ལྟར་གཟོད་ཡོད་པ་མ་ཡིན་ནོ། །ཉོན་མོངས་པའི་མུན་པས་སེམས་ཅན་དག་བསྒྲིབས་པའི་ཕྱིར་མི་མཐོང་གི ། ཐམས་ཅད་མཁྱེན་པའི་
ཡེ་ཤེས་མངའ་བའི་དེ་བཞིན་གཤེགས་པས་ཤིན་ཏུ་མཁས་པའི་ཐབས་ཀྱིས་ཤེས་རབ་ཀྱི་སྒྲོན་མ་བཙུགས་ཏེ། བྱང་ཆུབ་སེམས་དཔའ་དག་མྱ་ངན་ལས་འདས་པའི་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཐོང་བར་བྱས་སོ། །དེ་བས་ན་ཤེས་རབ་ཅན་གྱིས་མྱ་ངན་ལས་འདས་པ་འདི་ལ་ཐོག་མ་མེད་པ་ད་ལྟར་ཡོད་པར་འགྱུར་རོ་ཞེས་བརྗོད་པར་མི་བྱའོ། །རིགས་ཀྱི་བུ་ཁྱོད་ཀྱིས་བཀོད་པའི་རྒྱུས་མྱ་ངན་ལས་འདས་པ་འགྲུབ་པ་མི་རྟག་གོ་ཞེས་བྱ་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། རིགས་ཀྱི་བུ་མྱ་ངན་ལས་འདས་པའི་ངོ་བོ་ཉིད་ནི་སྐྱེ་བ་མ་ཡིན། བྱུང་བ་མ་ཡིན། བདེན་པ་མ་ཡིན་བརྫུན་པ་མ་ཡིན། ལས་སུ་བྱས་ནས་སྐྱེས་པ་མ་ཡིན། ཟག་པ་དང་འདུས་བྱས་ཀྱི་ཆོས་མ་ཡིན། ཐོས་པ་མ་ཡིན་མཐོང་བ་མ་ཡིན། ལྟུང་བ་མ་ཡིན་འཆིང་བ་མ་ཡིན། མཚན་ཉིད་ཐ་དད་པ་མ་ཡིན། མཚན་ཉིད་གཅིག་པ་མ་ཡིན། འགྲོ་བ་མ་ཡིན། ལྡོག་པ་མ་ཡིན་འདས་པ་མ་ཡིན། མ་འོངས་པ་དང་། ད་ལྟར་མ་ཡིན་གཅིག་པུ་མ་ཡིན། མང་པོ་མ་ཡིན་རིང་པོ་མ་ཡིན། ཐུང་ངུ་མ་ཡིན། ཟླུམ་པོ་མ་ཡིན་གྲུ་བཞི་མ་ཡིན། སྨྱུང་སྨྱུང་པོ་མ་ཡིན། སྣྲེལ་ཞི་མ་ཡིན། མཚན་ཉིད་མ་ཡིན་འདུ་ཤེས་མ་ཡིན། མིང་མ་ཡིན་གཟུགས་མ་ཡིན་རྒྱུ་མ་ཡིན། འབྲས་བུ་མ་ཡིན་བདག་དང་བདག་གི་མ་ཡིན་ནོ། །དེ་ལྟ་བས་ན་མྱ་ངན་ལས་འདའ་བ་ནི་རྟག་པ་མི་འགྱུར་མི་འཕོ་བ་མ་ཡིན་ཏེ་དེ་བས་ན་བསྐལ་པ་ཚད་མེད་གྲངས་མེད་པའི་བར་དུ་དགེ་བའི་ཆོས་སྒྲུབ་ཅིང་བསྒོམས་པས་ཡོངས་སུ་བརྒྱན་ན་གདོད་མཐོང་བར་འགྱུར་རོ། །རིགས་ཀྱི་བུ་དཔེར་ན་སའི་འོག་ནི་ཆུ་ཡོན་ཏན་བརྒྱད་དང་ལྡན་པ་ཡོད་ཀྱང་། སེམས་ཅན་ཐམས་ཅད་ཀྱིས་ཐོབ་པར་མི་རུང་ངོ་། །ཤེས་རབ་ཅན་ལ་ལ་ཞིག་གིས་ལས་སུ་བྱས་ཏེ་བརྐོས་ན་གཟོད་ཐོབ་པར་འགྱུར་བ་ལྟར་མྱ་ངན་ལས་འདས་པ་ཡང་དེ་དང་འདྲའོ། །དཔེར་ན་དམུས་ལོང་དག་ཉི་མ་དང་ཟླ་བ་མི་མཐོང་སྟེ། སྨན་པ་མཁས་པས་སྨན་བྱས་ན་སྣང་ཞིང་མཐོང་བར་འགྱུར་ཏེ་ཉི་མ་དང་ཟླ་བ་དེ་ཡང་སྔོན་མེད་ལ་ད་ལྟ་ཡོད་པ་མ་ཡིན་ནོ། །མྱ་ངན་ལས་འདས་པ་ཡང་དེ་དང་འདྲ་སྟེ། ཐོག་མ་ནས་ཡོད་པ་ཡིན་གྱི་ད་ལྟར་གཟོད་ཡོད་པ་མ་ཡིན་ནོ། །རིགས་ཀྱི་བུ་ཇི་ལྟར་ཉེས་པ་བྱས་པ་དག་
བཅིངས་ཏེ་ཁྲི་མོན་གྱི་ནང་དུ་བཅུག་པ་ནི་རིང་མོ་ཞིག་ན་གདོད་ཐར་ཏེ་བྱུང་ནས། སླར་ཁྱིམ་དུ་ཕ་མ་དང་། ཕུ་ནུ་དང་། བུ་དང་། ཆུང་མ་དང་། གཉེན་བཤེས་མ་མཐོང་བ་བཞིན་དུ་མྱ་ངན་ལས་འདས་པ་ཡང་དེ་དང་འདྲའོ། །རིགས་ཀྱི་བུ་ཁྱོད་འདི་སྐད་དུ་རྟེན་ཅིང་འབྲེལ་བའི་ཕྱིར་མྱ་ངན་ལས་འདས་པའི་ཆོས་ཀྱང་མི་རྟག་གོ་ཞེས་བྱ་བ་དེ་ཡང་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་རྒྱུ་ལ་རྣམ་པ་ལྔ་སྟེ། ལྔ་གང་ཞེ་ན། སྐྱེ་བའི་རྒྱུ་དང་། འདུས་པའི་རྒྱུ་དང་། གནས་པའི་རྒྱུ་དང་། སྐྱེ་ཞིང་འཕེལ་བའི་རྒྱུ་དང་། རིང་བའི་རྒྱུའོ། །དེ་ལ་ཇི་ལྟར་ན་སྐྱེ་བའི་རྒྱུ་ཞེ་ན། སྐྱེ་བའི་རྒྱུ་ཞེས་བྱ་བ་ནི་ལས་དང་ཉོན་མོངས་པ་ལ་སོགས་པ་དང་། ཕྱི་རོལ་གྱི་རྩི་ཤིང་རྣམས་ཀྱི་ས་བོན་ནི་སྐྱེ་བའི་རྒྱུ་ཞེས་བྱའོ། །ཇི་ལྟར་འདུས་པའི་རྒྱུ་ཞེ་ན། ཇི་ལྟར་དགེ་བ་དང་དགེ་བའི་སེམས་འདུས་པ་དང་མི་དགེ་བ་དང་མི་དགེ་བའི་སེམས་འདུས་པ་དང་། ལུང་མི་སྟོན་པ་དང་། ལུང་མི་སྟོན་པའི་སེམས་འདུས་པ་ནི་འདུས་པའི་རྒྱུ་ཞེས་བྱའོ། །ཇི་ལྟར་གནས་པའི་རྒྱུ་ཞེ་ན། འོག་ན་ཀ་བ་ཡོད་པའི་ཕྱིར་ཁང་པ་མི་ལྟུང་བ་དང་། རི་དང་། ཆུ་དང་། ཤིང་དང་། ནགས་ཚལ་ཐམས་ཅད་ས་ཆེན་པོའི་ཕྱིར་གནས་པར་འགྱུར་བ་དང་ནང་གི་ཆེན་པོ་བཞི་དང་ཉོན་མོངས་པ་ཚད་མེད་པ་སྙེད་ཡོད་པའི་ཕྱིར་སེམས་ཅན་གནས་པར་གྱུར་པ་ནི། གནས་པའི་རྒྱུ་ཞེས་བྱའོ། །ཇི་ལྟར་སྐྱེ་ཞིང་འཕེལ་བའི་རྒྱུ་ཞེ་ན། གོས་དང་། ཟས་ལ་སོགས་པ་ལ་བརྟེན་པའི་རྐྱེན་གྱིས་སེམས་ཅན་སྐྱེ་ཞིང་འཕེལ་བ་དང་ཇི་ལྟར་ཕྱི་རོལ་གྱི་ས་བོན་མེས་མ་ཚིག་ཅིང་། བྱས་མ་ཟོས་པས། སྐྱེ་ཞིང་འཕེལ་བར་འགྱུར་བ་དང་། ཇི་ལྟར་དགེ་སྦྱོང་དང་བྲམ་ཟེ་ལ་སོགས་པ་སློབ་དཔོན་དང་། དགེ་བའི་བཤེས་གཉེན་དག་ལ་བརྟེན་པས་སྐྱེ་ཞིང་འཕེལ་བ་དང་། ཇི་ལྟར་ཕ་མའི་རྒྱུས་བུ་སྐྱེ་ཞིང་འཕེལ་བར་འགྱུར་བ་ནི་སྐྱེ་ཞིང་འཕེལ་བའི་རྒྱུ་ཞེས་བྱའོ། །ཇི་ལྟར་རིང་བའི་རྒྱུ་ཞེ་ན། དཔེར་ན་སྔགས་ཀྱི་རྒྱུས་གདོན་གྱིས་འཆི་བར་མི་ནུས་ཤིང་དུག་གིས་གནོད་པར་མི་ནུས་པ་དང་། རྒྱལ་པོ་ལ་བརྟེན་ན་རྐུན་པོས་མི་ཚུགས་པ་དང་། ཇི་ལྟར་མྱུ་གུ་ས་དང་། ཆུ་དང་། མེ་དང་། རླུང་ལ་སོགས་པ་ལ་བརྟེན་པ་དང་། ཇི་ལྟར་ཆུ་དང་།
སྲུབ་ཤིང་དང་། མི་ལས་མར་གྱི་རིང་བའི་རྒྱུར་འགྱུར་བ་དང་། སྣང་བ་དང་། གཟུགས་ལ་སོགས་པ་ནི་རྣམ་པར་ཤེས་པའི་རིང་བའི་རྒྱུར་འགྱུར་བ་དང་། ཕ་མའི་ཁུ་བ་དཀར་ནག་ནི་སེམས་ཅན་གྱི་རིང་བའི་རྒྱུར་འགྱུར་བ་དང་། ཇི་ལྟར་དུས་ལ་སོགས་པ་ཀུན་ཀྱང་རིང་བའི་རྒྱུ་ཞེས་བྱའོ། །རིགས་ཀྱི་བུ་མྱ་ངན་ལས་འདས་པའི་རང་བཞིན་ནི་དེ་ལྟ་བུའི་རྒྱུ་ལྔས་གྲུབ་པ་མ་ཡིན་ན། ཅིའི་ཕྱིར་མི་རྟག་པའི་རྒྱུར་འགྱུར་བ་ཞེས་བྱ། རིགས་ཀྱི་བུ་གཞན་ཡང་རྒྱུ་རྣམ་པ་གཉིས་ཡོད་དེ། བྱས་པའི་རྒྱུ་དང་གསལ་བའི་རྒྱུའོ། །ཇི་ལྟར་རྫ་མཁན་གྱི་འཁོར་ལོ་ནི་བྱས་པའི་རྒྱུ་ཞེས་བྱའོ། །རིགས་ཀྱི་བུ་ཇི་ལྟར་མེ་སྒྲོན་ལ་སོགས་པས་མུན་པའི་རྫས་སྣང་བར་བྱེད་པ་ནི་གསལ་བའི་རྒྱུ་ཞེས་བྱའོ། །རིགས་ཀྱི་བུ་མྱ་ངན་ལས་འདས་པ་ཆེན་པོ་ནི་བྱས་པའི་རྒྱུ་ལས་གྲུབ་པ་མ་ཡིན་ཏེ། གསལ་བའི་རྒྱུ་འབའ་ཞིག་གོ །གསལ་བའི་རྒྱུ་ཞེས་བྱ་བ་ནི་འདི་ལྟ་སྟེ། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། ཕ་རོལ་ཏུ་ཕྱིན་པ་དྲུག་ནི་གསལ་བའི་རྒྱུ་ཞེས་བྱའོ། །རིགས་ཀྱི་བུ་སྦྱིན་པ་ནི་མྱ་ངན་ལས་འདས་པའི་རྒྱུ་ཡིན་ཏེ། མྱ་ངན་ལས་འདས་པ་ཆེན་པོའི་རྒྱུ་ནི་མ་ཡིན་ནོ། །སྦྱིན་པའི་ཕ་རོལ་ཏུ་ཕྱིན་པ་ནི་མྱ་ངན་ལས་འདས་པ་ཆེན་པོའི་རྒྱུ་ཞེས་བྱའོ། །བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནི་མྱ་ངན་ལས་འདས་པའི་རྒྱུ་ཡིན་ཏེ། མྱ་ངན་ལས་འདས་པ་ཆེན་པོའི་རྒྱུ་ནི་མ་ཡིན་ནོ། །བྱང་ཆུབ་ཀྱི་ཡན་ལག་གི་ཆོས་ཚད་མེད་གྲངས་མེད་པ་སྙེད་ནི་མྱ་ངན་ལས་འདས་པ་ཆེན་པོའི་རྒྱུ་ཞེས་བྱའོ།། མང་ག་ལམ