བཅུ་གསུམ་པ། ཚེ་དང་ལྡན་པ་ཅང་ཤེས་ཀོའུན་དྲི་ནྱའིལེའུ།
བམ་པོ་ལྔ་བཅུ་གཅིག་པ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་འདི་སྐད་ཅེས་བཀའ་སྩལ་ཏོ། །གཟུགས་ནི་མི་རྟག་པ་སྟེ་གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་རྟག་ཏུ་གནས་པའི་གཟུགས་སུ་འགྱུར་རོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་མི་རྟག་པ་སྟེ། རྣམ་པར་ཤེས་པ་འགགས་པའི་རྐྱེན་གྱིས་རྣམ་པར་གྲོལ་བའི་རྟག་ཏུ་གནས་པའི་རྣམ་པར་ཤེས་པ་ཐོབ་པར་འགྱུར་རོ། །ཀཽཎྜི་ནྱ་གཟུགས་ནི་སྡུག་བསྔལ་བ་སྟེ། གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་བདེ་བ་ཐོབ་པར་འགྱུར་རོ། །ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་སྟོང་པའོ། །སྟོང་པའི་གཟུགས་འགགས་པའི་རྐྱེན་གྱིས་སྟོང་པ་མ་ཡིན་པའི་གཟུགས་ཀྱི་རྣམ་པར་གྲོལ་བ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་བདག་མེད་པའོ། ། གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཡང་དག་པའི་བདག་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ཡོངས་སུ་མ་དག་པའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཡོངས་སུ་དག་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་སྐྱེ་བ་དང་། རྒ་བ་དང་། ན་བ་དང་། འཆི་བའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱེ་བ་དང་། རྒ་བ་དང་། ན་བ་དང་། འཆི་བའི་མ་ཡིན་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་
དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་སྐྱེ་བ་མ་རིག་པའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་མ་རིག་པ་མ་ཡིན་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་སྐྱེ་བའི་རྒྱུར་འགྱུར་རོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱེ་བ་མ་ཡིན་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ཕྱིན་ཅི་ལོག་བཞིའི་རྒྱུར་འགྱུར་རོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཕྱིན་ཅི་ལོག་གི་རྒྱུ་མ་ཡིན་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་མི་དགེ་བའི་ཆོས་ཚད་མེད་པའི་རྒྱུ་ཡིན་ནོ། །འདི་ལྟ་སྟེ། ཕོ་དང་མོ་ལ་སོགས་པའི་ལུས་དང་ཟས་ལ་འདོད་པ་དང་། འདོད་ཆགས་ལ་ཆགས་པ་དང་། ཞེ་སྡང་དང་། གཏི་མུག་དང་། སེར་སྣ་དང་། ཕྲག་དོག་དང་། མི་དགེ་བའི་སེམས་དང་། འཇུངས་པའི་སེམས་དང་། བཅའ་བའི་ཟས་དང་། རྣམ་པར་ཤེས་པའི་ཟས་དང་། བསམས་པའི་ཟས་དང་། རེག་པའི་ཟས་དང་། སྒོ་ང་ལས་སྐྱེས་པ་དང་། མངལ་ལས་སྐྱེས་པ་དང་། དྲོད་གཤེར་ལས་སྐྱེས་པ་དང་། བརྫུས་ཏེ་སྐྱེས་པ་དང་། འདོད་པ་ལྔ་དང་། སྒྲིབ་པ་ལྔ་ལ་སོགས་པའི་ཆོས་ནི་གཟུགས་ལས་གྱུར་ཏོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་ཉེས་པའི་སྐྱོན་ཚད་མེད་པ་དེ་སྙེད་མེད་པའི་ལུས་ཐོབ་པར་གྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་འཆིང་བས་རྣམ་པར་བཅིངས་པའོ། །བཅིངས་པའི་གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་བཅིངས་པ་མེད་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་།
འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་རྒྱུན་མི་འཆད་པའི་རྒྱུ་ཡིན་ནོ། །རྒྱུན་གྱི་གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་རྒྱུན་མ་ཡིན་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་སྐྱབས་སུ་འགྲོ་བའི་རྒྱུ་མ་ཡིན་ནོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་སྐྱབས་སུ་འགྲོ་བའི་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་རྨ་ལྟ་བུའོ། །གཟུགས་འགགས་པའི་རྐྱེན་གྱིས་རྣམ་པར་གྲོལ་བའི་གཟུགས་རྨ་མེད་པ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གཟུགས་ནི་རབ་ཏུ་ཞི་བ་མ་ཡིན་ནོ། །གཟུགས་འགགས་པའི་རྐྱེན་གྱིས་ཡོངས་སུ་མྱ་ངན་འདས་པའི་གཟུགས་རབ་ཏུ་ཞི་བ་ཐོབ་པར་འགྱུར་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་བར་དུ་ཡང་དེ་བཞིན་དུ་རྒྱས་པར་རིག་པར་བྱའོ། །ཀཽཎྜི་ནྱ་གང་ཟག་སུ་ཞིག་དེ་ལྟ་བུའི་ཚུལ་དུ་ཤེས་ན། དེ་ནི་དགེ་སྦྱོང་ཞེས་བྱ། བྲམ་ཟེ་ཞེས་ཀྱང་བྱ། འདི་ནི་དགེ་སྦྱོང་དང་། དགེ་སྦྱོང་གི་ཆོས་དང་། བྲམ་ཟེ་དང་བྲམ་ཟེའི་ཆོས་དང་ལྡན་པ་ཞེས་ཀྱང་བྱའོ། །ཀཽཎྜི་ནྱ་སངས་རྒྱས་ཀྱི་ཆོས་མ་གཏོགས་པར་ལོགས་ཤིག་ན་དགེ་སྦྱོང་མེད། བྲམ་ཟེ་མེད། དགེ་སྦྱོང་དང་བྲམ་ཟེའི་ཆོས་ཀྱང་མེད་དོ། །མུ་སྟེགས་ཅན་ཐམས་ཅད་ནི་བརྫུན་དུ་སྨྲ་བར་ཟད་ཀྱི་ཡང་དག་པའི་སྤྱོད་པ་མེད་དོ། །རྣམ་པ་དེ་གཉིས་ལྟར་ཚུལ་འཆོས་མོད་ཀྱི་རྣམ་པ་དེ་གཉིས་ཀྱི་གནས་མེད་དོ། །དེ་ཅིའི་ཕྱིར་ཞེ་ན། དགེ་སྦྱོང་དང་བྲམ་ཟེའི་ཆོས་མེད་པར་ཅིའི་ཕྱིར་དགེ་སྦྱོང་བྲམ་ཟེ་ཡོད་དོ་ཞེས་སྨྲ། ངས་ཀྱང་རྟག་ཏུ་འཁོར་གྱི་དཀྱིལ་འཁོར་འདིར་སེང་གེའི་སྒྲ་བསྒྲགས་ཀྱིས་ཁྱོད་ཀྱང་རྟག་ཏུ་འཁོར་གྱི་
དཀྱིལ་འཁོར་ཆེན་པོར་སེང་གེའི་སྒྲ་སྒྲོགས་ཤིག །དེའི་ཚེ་མུ་སྟེགས་ཅན་ཚད་མེད་པ་སྙེད་དེ་སྐད་ཅེས་གསུངས་པ་ཐོས་ནས་ཞེ་སྡང་གི་སེམས་བསྐྱེད་དེ། དགེ་སྦྱོང་གཽ་ཏ་མས་བདག་ཅག་ལ་དགེ་སྦྱོང་དང་བྲམ་ཟེ་ཡང་མེད། དགེ་སྦྱོང་དང་བྲམ་ཟེའི་ཆོས་ཀྱང་མེད་དོ་ཞེས་གསུངས་ན། བདག་ཅག་གིས་ཐབས་ཇི་ལྟར་བྱ་ཞེས་འདི་སྐད་ཅེས་སྨྲས་སོ། །དགེ་སྦྱོང་གཽ་ཏ་མ་བདག་ཅག་གི་འཁོར་ལ་ཡང་དགེ་སྦྱོང་དང་དགེ་སྦྱོང་གི་ཆོས་ཀྱང་ཡོད། བྲམ་ཟེ་དང་བྲམ་ཟེའི་ཆོས་ཀྱང་ཡོད་དོ། །དེའི་ཚེ་ན་འཁོར་གྱི་དཀྱིལ་འཁོར་དེ་ན་ཀུན་དུ་རྒྱུ་གཅིག་གིས་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་དགེ་སྦྱོང་གཽ་ཏ་མ་ནི་ཚིག་ནི་སྨྱོན་པ་དང་འདྲ་སྟེ། ཐ་མི་དད་ན་ཡིད་ཆེས་སུ་ཡང་ཅི་ཡོད། འཇིག་རྟེན་ན་མི་སྨྱོན་པ་དག་ཀྱང་བར་འགའ་ནི་གླུ་ལེན། བར་འགའ་ནི་གར་བྱེད། བར་འགའ་ནི་ངུ་། བར་འགའ་ནི་དགོད། བར་འགའ་ནི་གཤེ། བར་འགའ་ནི་བསྟོད། གཉེན་དང་དགྲའི་བྱེ་བྲག་ཀྱང་མི་ཕྱེད་པ་ལྟར། དགེ་སྦྱོང་གཽ་ཏ་མ་ཡང་དེ་དང་འདྲ་སྟེ། བར་འགའ་ནི་ང་རྒྱལ་པོ་ཟས་གཙང་མའི་ཁབ་ཏུ་སྐྱེས་ཞེས་སྨྲ། བར་འགའ་ནི་མ་སྐྱེས་ཞེས་སྨྲ། བར་འགའ་ནི་སྐྱེས་ནས་གོམ་པ་བདུན་པོར་ཞེས་སྨྲ། བར་འགའ་ནི་གར་ཡང་མ་སོང་ཞེས་སྨྲ། བར་འགའ་ནི་འཇིག་རྟེན་གྱི་དངོས་པོ་དག་ཆུང་ངུའི་ཚེ་ན་བསླབས་སོ་ཞེས་སྨྲ། བར་འགའ་ནི་ཐམས་ཅད་མཁྱེན་པ་ཞེས་སྨྲ། བར་འགའ་ནི་རྒྱལ་པོའི་ཁབ་ན་བདེ་བའི་གནས་ན་ལོངས་སྤྱོད་ཅིང་བུ་ཡང་བཙས་སོ་ཞེས་སྨྲ། བར་འགའ་ནི་དེ་ཐམས་ཅད་ལ་སྨད་དེ་མི་འདོད་དོ་ཞེས་ཀྱང་སྨྲ། བར་འགའ་ནི་དཀའ་བ་ལོ་དྲུག་གི་བར་དུ་སྤྱོད་དོ་ཞེས་སྨྲ། བར་འགའ་ནི་མུ་སྟེགས་ཅན་གྱི་དཀའ་བ་སྤྱོད་པ་ལ་ཡོངས་སུ་སྨོད། བར་འགའ་ནི་ཨུ་དུམ་བཱ་ར་དང་ཨ་ལ་ལ་ལ་སོགས་པ་སྔོན་མ་ཐོས་པའི་ཆོས་ཐོས་སོ་ཞེས་སྨྲ། བར་འགའ་ནི་བྱང་ཆུབ་ཀྱི་ཤིང་དྲུང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་ཞེས་སྨྲ། བར་འགའ་ནི་ང་བྱང་ཆུབ་ཀྱི་ཤིང་དྲུང་དུ་ཡང་མ་ཕྱིན་ཅི་ཡང་ཐོབ་པ་མེད་དོ་ཞེས་སྨྲ། བར་
འགའ་ནི་ངའི་ལུས་འདི་ཉིད་མྱ་ངན་ལས་འདས་པ་ཡིན་ནོ་ཞེས་སྨྲ། བར་འགའ་ནི་ངའི་ལུས་འདི་འགགས་པ་ན་མྱ་ངན་ལས་འདས་པ་ཡིན་ནོ་ཞེས་སྨྲ་སྟེ། དགེ་སྦྱོང་གཽ་ཏ་མ་སྨྲའོ་ཅོག་ནི་སྨྱོན་པ་དང་འདྲ་ན། དེ་ལ་ཡིད་ཆེས་ཤིང་མི་དགར་ཡང་ཅི་ཞིག་ཡོད། བྲམ་ཟེ་རྣམས་ཀྱིས་དེ་ལ་འདི་སྐད་ཅེས་སྨྲས་སོ། །སྐྱེས་བུ་ཆེན་པོ་ད་བདག་ཅག་གིས་མྱ་ངན་མི་བྱ་བའི་གཏོལ་ག་ལ་ཞིག་ཡོད། དགེ་སྦྱོང་གཽ་ཏ་མ་སྔོན་རབ་ཏུ་བྱུང་ནས། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་ལ་སོགས་པ་བསྟན་པས་བདག་ཅག་གི་ཉེ་གནས་རྣམས་ཀྱིས་ཐོས་ནས་ཤིན་ཏུ་འཇིགས་པ་སྐྱེས་ཏེ། ཇི་ལྟར་ན་སེམས་ཅན་དག་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཡོངས་སུ་མ་དག་པ་ཡིན་ནོ་ཞེས་དེའི་ཚིག་ལ་ཡིད་མ་ཆེས་སོ། །ད་དགེ་སྦྱོང་གཽ་ཏ་མས་ཤིང་སཱ་ལའི་ཚལ་འདིར་འཁོར་གྱི་དཀྱིལ་འཁོར་མང་པོ་ལ་རྟག་པ་དང་། བདེ་བ་དང་། བདག་དང་ཡོངས་སུ་དག་པའི་ཆོས་ཡོད་དོ་ཞེས་བསྟན་པས། བདག་ཅག་གི་ཉེ་གནས་རྣམས་ཀྱིས་དེ་སྐད་ཅེས་ཐོས་ནས། བདག་ཡོངས་སུ་སྤངས་ཏེ། དགེ་སྦྱོང་གཽ་ཏ་མའི་ཚིག་ལ་ཡིད་ཆེས་པར་གྱུར་པས། དེའི་རྒྱུ་དེའི་རྐྱེན་གྱིས་མྱ་ངན་ཆེན་པོ་སྐྱེས་པར་གྱུར་ཏོ། །དེའི་ཚེ་ན་གཞན་ཡང་བྲམ་ཟེ་གཅིག་ཅིག་དེ་དག་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་དག་ལེགས་པར་ཉོན་ཅིག་ལེགས་པར་ཉོན་ཅིག །དགེ་སྦྱོང་གཽ་ཏ་མ་ཐུགས་རྗེ་དང་ལྡན་ནོ་ཞེས་བྱའི་ཚིག་བརྫུན་ཏེ་ཡང་དག་པ་མ་ཡིན་ནོ། །གལ་ཏེ་ཐུགས་རྗེ་དང་ལྡན་ན་ཅིའི་ཕྱིར་བདག་ཅག་གི་སློབ་མ་བདག་ཅག་གི་ཆོས་ཀྱིས་སྙིང་རྗེའི་འབྲས་བུ་ཐོབ་པ་ཡང་ཕ་རོལ་གྱི་རྗེས་སུ་འགྲོ་བར་ཡིད་བསྒྱུར་ཏེ། བདག་གི་བསམ་པ་དང་འགལ་བར་མཛད་པས། ཐུགས་རྗེ་དང་ལྡན་པ་ཞེས་བྱར་མི་རུང་ངོ་། །དེ་ལ་གང་ཞིག་དགེ་སྦྱོང་གཽ་ཏ་མ་ལ་འཇིག་རྟེན་གྱི་ཆོས་བརྒྱད་ཀྱིས་མ་གོས་སོ་ཞེས་སྨྲ་ན་དེ་ཡང་བརྫུན་དུ་སྨྲ་བ་ཡིན་ནོ། །གལ་ཏེ་དགེ་སྦྱོང་གཽ་ཏ་མ་འདི་འདོད་པ་ཉུང་ཞིང་ཆོག་ཤེས་པའོ་ཞེས་སྨྲ་ན་ཅིའི་ཕྱིར་བདག་ཅག་གི་རྙེད་པ་ལ་སོགས་པ་འཕྲོག་པར་འགྱུར། གལ་ཏེ་དགེ་སྦྱོང་གཽ་ཏ་མ་འདི་ཆོ་རིགས་ཆེ་བ་ཡིན་ནོ་ཞེས་སྨྲ་ན་ཡང་བརྫུན་དུ་
སྨྲ་བ་ཡིན་ནོ། །དེ་ཅིའི་ཕྱིར་ཞེ་ན། གནའ་ནས་རི་དགས་ཀྱི་རྒྱལ་པོ་སེང་གེ་ནི་བྱི་བ་ཆུང་ངུ་གསོད་དོ་ཞེས་མ་ཐོས་མ་མཐོང་ངོ་། །གལ་ཏེ་དགེ་སྦྱོང་གཽ་ཏ་མ་འདི་ཆོ་རིགས་ཆེ་བ་ཡིན་ན་ཅིའི་ཕྱིར་བདག་ཅག་ལ་སོགས་པ་ལ་ཡོངས་སུ་འཚེ་བར་བྱེད། གལ་ཏེ་དགེ་སྦྱོང་གཽ་ཏ་མ་ལ་མཐུ་ཆེན་པོ་དང་ལྡན་ནོ་ཞེས་སྨྲ་ན། དེ་ཡང་བརྫུན་དུ་སྨྲ་བ་ཡིན་ནོ། །དེ་ཅིའི་ཕྱིར་ཞེ་ན། གནའ་ནས་ནམ་མཁའ་ལྡིང་གི་རྒྱལ་པོ་ནི་བྱ་ཁྭ་སྐེགས་དང་འཐབ་བོ་ཞེས་མ་ཐོས་མ་མཐོང་ངོ་། །གལ་ཏེ་མཐུ་ཆེ་བ་ཞིག་ཡིན་ན་ཅིའི་ཕྱིར་བདག་ཅག་དང་རྩོད་པར་གྱུར། གལ་ཏེ་དགེ་སྦྱོང་གཽ་ཏ་མ་ནི་ཕ་རོལ་གྱི་སེམས་ཤེས་པའི་ཐུགས་དང་ལྡན་ནོ་ཞེས་སྨྲ་ན་དེ་ཡང་བརྫུན་དུ་སྨྲ་བ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཡེ་ཤེས་དེ་དང་ལྡན་ན་ཅིའི་ཕྱིར་བདག་ཅག་གིས་བསམས་པའི་སེམས་མི་ཤེས། ཀྱེ་སྐྱེས་བུ་དག་བདག་གིས་སྔོན་རྒན་རབས་མཁས་ལས་འདི་སྐད་ཅེས་ཐོས་སོ། །ད་སྟེ་ལོ་བརྒྱ་འདས་ན་སྒྱུ་མ་སྒྱུ་ཅན་ཞིག་འབྱུང་བ་ནི་དགེ་སྦྱོང་གཽ་ཏ་མ་ལ་བྱ་སྟེ། སྒྱུ་མ་སྒྱུ་ཅན་འདི་ནི་རིང་པོར་མི་ཐོགས་པར་ཤིང་སཱ་ལའི་ཚལ་འདིར་མེད་པར་འགྱུར་གྱིས་ཁྱེད་ལ་སོགས་པ་མྱ་ངན་མ་བྱེད་ཅིག །དེའི་ཚེ་ན་གཞན་ཡང་གཅེར་བུ་པ་དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་བདག་ཅག་མྱ་ངན་བྱེད་པ་ནི་བདག་གི་ལུས་ཀྱི་ཕྱིར་རམ། ཉེ་གནས་དང་། རྙེད་པ་དང་། གྲགས་པའི་ཕྱིར་མ་ལགས་ཀྱི། འཇིག་རྟེན་པ་གཏི་མུག་གི་མུན་པས་ཁེབས་པར་གྱུར་ཏེ། བསོད་ནམས་ཀྱི་ཞིང་དང་བསོད་ནམས་ཀྱི་ཞིང་མ་ཡིན་པ་མི་ཤེས་ནས་སྔོན་གྱི་རྒན་རབས་ཤེས་པ་དང་ལྡན་པའི་བྲམ་ཟེ་ནི་ཡོངས་སུ་སྤངས་ནས་ཤིན་ཏུ་ན་གཞོན་ཞིང་ཤེས་པ་མེད་པ་ལ་མཆོད་པར་གྱུར་པས་བདག་ཅག་མྱ་ངན་བྱེད་དོ། །དགེ་སྦྱོང་གཽ་ཏ་མ་ནི་རིག་སྔགས་ལ་མཁས་ཏེ་རིག་སྔགས་ལ་མཁས་པའི་རྐྱེན་གྱིས་ལུས་གཅིག་ལ་ལུས་ཚད་མེད་པ་སྙེད་དུ་སྤྲུལ་ཅིང་ལུས་ཚད་མེད་པ་སྙེད་ལས་ཀྱང་ལུས་གཅིག་ཏུ་སྤྲུལ་ཏོ། །ལུས་དེ་ཉིད་ཀྱིས་སྐྱེས་པ་དང་བུད་མེད་དང་། བ་ལང་དང་། ལུག་དང་། བལ་གླང་དང་། རྟའི་གཟུགས་སུ་སྤྲུལ་ཏེ། དེ་ཡང་བདག་གི་མཐུས་དེའི་རིག་སྔགས་ཀྱི་
མཐུ་མེད་པར་བྱེད་ནུས་སོ། །དགེ་སྦྱོང་གཽ་ཏ་མའི་རིག་སྔགས་ཀྱི་མཐུ་མེད་པར་གྱུར་ན་བདག་ཅག་ལ་སོགས་པ་རྙེད་པ་དང་གྲགས་པ་ཐོབ་ཅིང་ཤིན་ཏུ་བདེ་བ་མྱོང་བར་འགྱུར་རོ། །དེའི་ཚེ་ན་གཞན་ཡང་བྲམ་ཟེ་ཞིག་འདི་སྐད་ཅེས་སྨྲས་སོ། །ཀྱེ་སྐྱེས་བུ་དག་དགེ་སྦྱོང་གཽ་ཏ་མ་ནི་ཡོན་ཏན་ཕུན་སུམ་ཚོགས་པ་ཚད་མེད་པ་དང་ལྡན་ཏེ། དེ་བས་ན་ཁྱེད་ལ་སོགས་པ་དེ་དང་རྩོད་པར་མ་བྱེད་ཅིག །མུ་སྟེགས་ཅན་གྱི་འཁོར་རྣམས་ཀྱིས་དེ་ལ་འདི་སྐད་སྨྲས་སོ། །གླེན་པ་གཏི་མུག་ཅན་ཁྱོད་ཅིའི་ཕྱིར་དགེ་སྦྱོང་གཽ་ཏ་མ་ལ་ཡོན་ཏན་ཚད་མེད་པ་དང་ལྡན་ནོ་ཞེས་སྨྲ། བཙས་ནས་ཞག་བདུན་ལོན་ནས་མ་ཡང་ཤི་བར་གྱུར་ན་དེ་ལ་བསོད་ནམས་དང་ཡོན་ཏན་དུ་ལྡན་ནོ་ཞེས་བྱར་རུང་ངམ། བྲམ་ཟེ་དེས་སྨྲས་པ། ཕ་རོལ་པོས་གཤེ་ཡང་ཕྱིར་མི་གཤེ་ལ། ཕ་རོལ་པོས་བརྡེགས་ཀྱང་ཕྱིར་མི་རྡེག་པས་དེ་ནི་ཡོན་ཏན་ཆེན་པོ་དང་ལྡན་པའི་མཚན་ཉིད་དེ། སྐུ་ལ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་རྫུ་འཕྲུལ་ཚད་མེད་པ་དང་ལྡན་ཏེ། དེ་བས་ན་བསོད་ནམས་དང་ཡོན་ཏན་ཚད་མེད་པ་དང་ལྡན་པར་རིག་གོ །ང་རྒྱལ་གྱི་སེམས་མེད་པས་སྔར་གསོང་པོར་སྨྲའོ། །གསུང་བའི་ཚིག་འཇམ་ཞིང་ངེས་པས་ངག་རྩུབ་པོ་མེད་དོ། །ལང་ཚོའི་དུས་ལ་བབ་ཀྱང་ཁྲོ་བ་དང་གཏུམ་པ་མེད་དོ། །རྒྱལ་པོའི་ཡུལ་ན་ནོར་རྫས་ཤིན་ཏུ་མང་ཡང་ཆགས་པ་མེད་པར་ཡོངས་སུ་བཏང་ནས་རབ་ཏུ་བྱུང་སྟེ། ངར་སྣབས་དང་འདྲ་བར་སྤངས་པས་བདག་གིས་ནི་དགེ་སྦྱོང་གཽ་ཏ་མ་འདི་ཡོན་ཏན་ཕུན་སུམ་ཚོགས་པ་ཚད་མེད་པ་དང་ལྡན་པར་སྨྲའོ། །དེ་ནས་འཁོར་རྣམས་ཀྱིས་འདི་སྐད་ཅེས་སྨྲས་སོ། །ཤིན་ཏུ་ལེགས་སོ་སྐྱེས་བུ་ཆེན་པོ་དགེ་སྦྱོང་གཽ་ཏ་མ་ནི་ཡང་དག་པར་ཁྱོད་སྨྲ་བ་ལྟར་ཡོན་ཏན་ཚད་མེད་པ་དང་། མངོན་པར་ཤེས་པའི་རྫུ་འཕྲུལ་ཚད་མེད་པ་དང་ལྡན་པས་བདག་ཅག་ནི་དེ་དང་འགྲན་མི་ཕོད་དོ། །དགེ་སྦྱོང་གཽ་ཏ་མ་ནི་རང་བཞིན་གྱིས་མཉེན་ཞིང་དེས་ཏེ་དཀའ་བ་ནི་མ་སྤྱད་ཀྱི་རྒྱལ་པོའི་ཁབ་ཏུ་བཙས་པས་སློབ་པ་གང་ལ་ཡང་མ་ཞུགས་ཏེ་ཚིག་འཇམ་པོར་སྨྲར་ནི་རུང་གི །སྒྱུ་རྩལ་དང་ཡི་གེ་དང་གཙུག་ལག་ལ་སོགས་པ་
མི་ཤེས་སོ། །དམ་པའི་ཆོས་ནི་མདོ་ཙམ་ཞིག་བགྲོས་ཏེ། དགེ་སྦྱོང་གཽ་ཏ་མ་བདག་ཅག་ལས་རྒྱལ་ན་བདག་ཅག་གིས་དེའི་གཡོག་བྱའོ། །བདག་ཅག་གིས་དེ་ལས་རྒྱལ་ན་བདག་གི་གཡོག་བྱ་དགོས་སོ་ཞེས་སྨྲས་ནས་དེའི་ཚེ་མུ་སྟེགས་ཅན་ཚད་མེད་པ་སྙེད་ལྷན་ཅིག་འདུས་ཏེ། ཡུལ་དབུས་གྱུར་འཆང་དུ་རྒྱལ་པོ་མ་སྐྱེས་དགྲའི་དྲུང་དུ་ལྷགས་སོ། །རྒྱལ་པོས་དེ་དག་མཐོང་ནས་འདི་སྐད་ཅེས་སྨྲས་སོ། །ཀྱེ་སྐྱེས་བུ་དག་ཁྱེད་གར་འགྲོ། ཁྱེད་རྣམས་ནི་སོ་སོ་ན་འཕགས་པའི་ལམ་ལ་ནན་ཏན་བྱེད་པ་ཡིན་ཏེ། ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་ནས་ཁྱིམ་གྱི་དངོས་པོ་དང་ལོངས་སྤྱོད་ཐམས་ཅད་ཡོངས་སུ་སྤངས་ཏེ་ཡུལ་མི་ཐམས་ཅད་ཀྱིས་བསྟི་སྟང་དང་བཅས་པས་མཆོད་དེ། བསྟི་སྟང་དང་རིམ་གྲོ་བྱེད་པ་ལ་ཡིད་དང་འགལ་བར་མ་བྱས་ན་ཅིའི་ཕྱིར་ཐམས་ཅད་འདུས་ཏེ་འདིར་ལྷགས་པར་གྱུར། ཀྱེ་སྐྱེས་བུ་དག་ཁྱེད་རྣམས་ནི་སོ་སོའི་ཆོས་འཛིན་ཅིང་སོ་སོའི་ཚུལ་ཁྲིམས་ཀྱིས་རབ་ཏུ་བྱུང་སྟེ་འཐུན་པ་ཡང་མ་ཡིན་སོ་སོའི་ཚུལ་ཁྲིམས་ཀྱིས་རབ་ཏུ་བྱུང་སྟེ་ལམ་ལ་ནན་ཏན་བྱེད་པ་ཡིན་ན། ཅིའི་རྒྱུ་ཅིའི་རྐྱེན་གྱིས་དེང་འདིར་བསམ་པ་གཅིག་ཏུ་ཐམས་ཅད་འདུས་པ་ནི་དཔེར་ན་ལོ་མ་ལྷགས་པ་ལ་རླུང་དྲག་པོས་བཏབ་ན་གཅིག་ཏུ་འདུས་པ་ལྟར་ཐམས་ཅད་འདིར་ལྷགས་པར་གྱུར། ཁོ་བོ་ནི་རྟག་ཏུ་རབ་ཏུ་བྱུང་བའི་མགོན་དང་སྐྱབས་བྱེད་དེ་ཆུང་ངུ་ན་ལུས་དང་སྲོག་ལ་ཡང་ཕངས་པར་མི་བྱེད་དོ། །དེའི་ཚེ་ན་མུ་སྟེགས་ཅན་ཐམས་ཅད་ཀྱིས་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་ལེགས་པར་གསོན་ཅིག །རྒྱལ་པོ་ཆེན་པོ་ནི་ཆོས་ཀྱི་ཟམ་པ་ཆེན་པོ་ལྟ་བུའོ། །ཆོས་ཆེན་པོའི་གདར་ལྟ་བུའོ། །ཆོས་ཆེན་པོའི་སྲང་ལྟ་བུ་ཡིན་ཏེ་ཡོན་ཏན་ཐམས་ཅད་ཀྱི་སྣོད་ཡིན་ནོ། །ཡོན་ཏན་ཐམས་ཅད་ཀྱི་ཡང་དག་པའི་ངོ་བོ་ཉིད་ཡིན་ནོ། །དམ་པའི་ཆོས་ཀྱི་ལམ་ལྟ་བུའོ། །ས་བོན་ཐམས་ཅད་ཀྱི་ཞིང་གཤིན་པ་ལྟ་བུའོ། །ཡུལ་ས་ཐམས་ཅད་ཀྱི་གཞི་ལྟ་བུ་ཡིན་ནོ། །ཡུལ་ཁམས་ཐམས་ཅད་ཀྱི་མེ་ལོང་གི་སྣང་བ་ལྟ་བུ་ཡིན་ནོ། །ལྷ་ཐམས་ཅད་ཀྱི་གཟུགས་ལྟ་བུ་ཡིན་ནོ། །ཡུལ་མི་ཐམས་ཅད་ཀྱི་ཕ་མ་ལྟ་བུ་ཡིན་ནོ། །རྒྱལ་པོ་ཆེན་པོ་འཇིག་
རྟེན་གྱི་ཁམས་ཐམས་ཅད་ཀྱི་ཡོན་ཏན་གྱི་རིན་པོ་ཆེའི་གཏེར་ནི་རྒྱལ་པོའི་ལུས་ཡིན་ནོ། །དེ་ཅིའི་ཕྱིར་ཡོན་ཏན་གྱི་མཛོད་ཅེས་བྱ་ཞེ་ན། རྒྱལ་པོས་ཞལ་ཆེ་གཅོད་པ་ན་གཉེན་དང་དགྲ་ལ་བྱེ་བྲག་མི་འབྱེད་དེ་མཉམ་སྙོམས་པ་ནི་སའམ། ཆུའམ། མེའམ། རླུང་དང་འདྲ་སྟེ། དེ་བས་ན་རྒྱལ་པོ་ནི་ཡོན་ཏན་གྱི་གཏེར་ཞེས་བྱའོ། །རྒྱལ་པོ་ཆེན་པོ་ད་ལྟར་གྱི་སེམས་ཅན་དག་ཚེའི་ཚད་ཐུང་མོད་ཀྱི། རྒྱལ་པོའི་ཡོན་ཏན་ནི་སྔོན་གྱི་རྒྱལ་པོ་ཚེ་རིང་བ་རབ་ཏུ་བདེ་བའི་དུས་དང་འདྲའོ། །གཞན་ཡང་རྒྱལ་པོ་སྤྱི་བོ་སྐྱེས་སམ། གྱ་ནོམ་སྣང་ངམ། བཟོད་པ་ཅན་ནམ། ན་ཧོ་ཞའམ། ཡ་ཡཱ་དེའམ། ཤི་ཕྱིའམ། པ་པ་ཨི་ཙ་གུ་ལ་སོགས་པ་དགེ་བའི་ཆོས་ཕུན་སུམ་ཚོགས་པ་དང་ལྡན་པ་དང་འདྲ་བར་རྒྱལ་པོ་ཆེན་པོ་ཡང་དེ་དང་འདྲའོ། །རྒྱལ་པོ་ཆེན་པོ་རྒྱལ་པོ་ཆེན་པོའི་རྐྱེན་གྱིས་ཡུལ་མི་ཐམས་ཅད་བདེ་སྐྱིད་པར་གྱུར་ཏེ། དེ་བས་ན་བདག་ཅག་རབ་ཏུ་བྱུང་བ་ཐམས་ཅད་ཡུལ་འདི་ན་གནས་པར་མོས་ཏེ་ཚུལ་ཁྲིམས་སྲུང་ཞིང་ཡང་དག་པའི་ལམ་ལ་ནན་ཏན་བགྱིད་དོ། །རྒྱལ་པོ་ཆེན་པོ་བདག་ཅག་གི་གཞུང་ལས་རབ་ཏུ་བྱུང་བའི་གང་ཟག་གང་ནས་གང་དུ་གནས་པའི་ཡུལ་དེ་ནི་ཚུལ་ཁྲིམས་སྲུང་ཞིང་ཡང་དག་པའི་ལམ་ལ་ནན་ཏན་བྱེད་དེ། རྒྱལ་པོ་ལ་ཡང་དགེ་བ་སྤྱོད་པའི་སྐལ་བ་མཆིས་སོ། །རྒྱལ་པོ་ཆེན་པོ་འཇིག་རྟེན་ན་རྐུན་ཤོད་བྱེད་པ་ཐམས་ཅད་རྒྱལ་པོས་མ་མཆིས་པར་བགྱིས་ཏེ་རབ་ཏུ་བྱུང་བ་ཐམས་ཅད་འཇིགས་པ་མ་མཆིས་ན། མ་རུངས་པ་ཆེན་པོ་དགེ་སྦྱོང་གཽ་ཏ་མ་འབའ་ཞིག་མ་མཆིས་པར་མ་བགྱིས་པས་བདག་ཅག་ནི་དེ་ལ་རབ་ཏུ་འཇིགས་སོ། །དགེ་སྦྱོང་གཽ་ཏ་མ་ནི་ཆོ་རིགས་བསྙེམས་ཏེ་ལུས་ཀྱི་མདོག་དང་ལྡན་ལ། སྔོན་སྦྱིན་པ་བྱིན་པའི་རྐྱེན་གྱིས་རྙེད་པ་མང་དུ་རྙེད་དེ་དངོས་པོ་དེ་དག་ལ་བསྙེམས་པས་ང་རྒྱལ་ཆེན་པོ་སྐྱེས་ལ། གཞན་ཡང་རིག་སྔགས་ལ་མཁས་པའི་རྐྱེན་གྱིས་ང་རྒྱལ་བྱེད་དོ། །དེའི་རྒྱུ་དེའི་རྐྱེན་གྱིས་དཀའ་བ་སྤྱོད་མི་ནུས་ཀྱི་གོས་དང་མལ་ཆ་ལ་སོགས་པ་ཤིན་ཏུ་འཇམ་པ་ལ་སོགས་ཏེ། དེ་བས་ན་འཇིག་རྟེན་ན་གང་ཟག་མ་རུངས་པ་ཐམས་ཅད་ནི་རྙེད་པ་དང་གྲགས་པ་འདོད་པའི་ཕྱིར་དེའི་འཁོར་དུ་འདུ་ཞིང་དེའི་
དྲུང་དུ་འདུས་ནས་དཀའ་བ་ནི་སྤྱོད་མི་ནུས་སོ། །རིག་སྔགས་ཀྱི་མཐུས་འོད་སྲུང་དང་། ཤཱ་རིའི་བུ་དང་། མཽད་གལ་ཡ་ན་ལ་སོགས་པ་བཏུལ་ནས་ད་ཡང་བདག་ཅག་གི་གནས་ཤིང་སཱ་ལའི་ཚལ་འདིར་བདག་ཅག་གི་ཉེ་གནས་འཁོར་དུ་བསྡུ་བའི་ཕྱིར་རྟག་པ་དང་། བདེ་བ་དང་། བདག་དང་། ཡོངས་སུ་དག་པའི་ལུས་ཡོད་དོ་ཞེས་སྨྲའོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མས་ནི་སྔོན་མི་རྟག་པ་དང་། བདེ་བ་མེད་པ་དང་། བདག་མེད་པ་དང་། ཡོངས་སུ་དག་པ་མེད་པ་སྟོན་པའི་ཚེ་ན་བདག་ཅག་གིས་བཟོད་ཀྱི། ད་འདི་སྐད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡོད་དོ་ཞེས་སྨྲ་བ་ལ་ནི་བདག་ཅག་མི་བཟོད་དོ། །རྒྱལ་པོ་ཆེན་པོ་ལེགས་པར་གསན་དུ་གསོལ། བདག་ཅག་དང་། དགེ་སྦྱོང་གཽ་ཏ་མར་གཞུང་འཛུགས་ཤིང་རྩོད་དུ་ཅི་གནང་། རྒྱལ་པོས་བཀའ་སྩལ་པ། ཀྱེ་སྐྱེས་བུ་དག་ཁྱེད་རྣམས་ལ་སུ་ཞིག་གིས་བསླུས་ན། ཁྱེད་ཀྱི་སེམས་ཤིན་ཏུ་མྱོས་ཤིང་འཁྲུགས་ཏེ། ཆུའི་དབའ་རླབས་སམ། མེ་མགལ་བསྐོར་བའམ། སྤྲེའུ་ཤིང་ཁར་ཕྱིན་པ་འདྲ་བར་གྱུར་པ་འདི་བདག་གིས་ཀྱང་ཁྲེལ་ལ། མཁས་པ་ཤེས་རབ་ཅན་གྱིས་ཐོས་ན་ཤིན་ཏུ་སྙིང་བརྩེ་བ་དང་། གླེན་པ་གཏི་མུག་ཅན་གྱིས་ཐོས་ན་འཕྱ་ཞིང་སྨོད་པར་འགྱུར་རོ། །ཁྱེད་རྣམས་ཀྱིས་སྨྲ་བ་ནི་རབ་ཏུ་བྱུང་བའི་ཚིག་མ་ཡིན་གྱི། གལ་ཏེ་ཁྱེད་རྣམས་ལ་རླུང་དང་མཁྲིས་པ་དང་བད་ཀན་གྱི་ནད་ཀྱིས་བཏབ་ན་ཁོ་བོ་ལ་སྨན་བཟང་པོ་ཡོད་དེ་ཁྱེད་རྣམས་འཚོ་བར་བྱའོ། །གལ་ཏེ་ཡི་དགས་ཀྱིས་བརླམས་ན་སྨན་པ་འཚོ་བྱེད་སྔགས་ལ་མཁས་པས་འཚོ་བར་བྱེད་དོ། །ཁྱེད་རྣམས་ནི་ད་ལྟར་ལག་པའི་སེན་མོས་རི་རབ་ལྷུན་པོ་འཇིག་པའམ། རྡོ་རྗེ་ལ་སོས་འདེབས་པར་འདོད་པ་དང་འདྲའོ། །སྐྱེས་བུ་ཆེན་པོ་དག་དཔེར་ན་གླེན་པ་གཏི་མུག་ཅན་གྱིས་སེང་གེའི་རྒྱལ་པོ་བཀྲེས་པ་ཉལ་ཞིང་འདུག་པ་ལས་བསླང་བའམ་སྦྲུལ་གདུག་པའི་ཁར་ལག་པ་བཅུག་པའམ། ཐལ་བས་ཁེབས་པའི་མེ་མདག་ལ་ལག་པས་རེག་པར་འདོད་པ་དང་འདྲ་བར་ཁྱེད་རྣམས་ཀྱང་དེ་ལྟར་དེ་དང་འདྲའོ། །རིགས་ཀྱི་བུ་འདི་ལྟ་སྟེ་དཔེར་ན་ཝས་སེང་གེའི་སྒྲ་སྒྲོགས་
པའམ། སྦྲང་བུ་ཆུང་ངུ་བྱ་ནམ་མཁའ་ལྡིང་དང་མགྱོགས་བུལ་འགྲན་པའམ། རི་བོང་གིས་རྒྱ་མཚོའི་གཏིང་དཔག་པ་དང་འདྲ་བར་ཁྱེད་རྣམས་ཀྱང་ད་ལྟར་དེ་དང་འདྲའོ། །གལ་ཏེ་ཁྱེད་ཀྱིས་དགེ་སློང་གཽ་ཏ་མ་ལས་རྒྱལ་བར་རྨི་ལམ་གྱིས་མཐོང་ན་ཡང་རྨི་ལམ་དེ་ནི་བརྫུན་ཏེ་ཡིད་ཆེས་སུ་མི་རུང་ངོ་། །ཀྱེ་སྐྱེས་བུ་དག་ཁྱེད་རྣམས་འདི་ལྟ་བུའི་སེམས་བསྐྱེད་པ་ནི་དཔེར་ན་ཕྱེ་མ་ལེབ་མེའི་ཕུང་པོར་སོང་བ་དང་འདྲ། ཁོ་བོས་སྨྲས་པ་བཞིན་དུ་ཡང་མ་སྨྲ་ཤིག །ཁྱེད་ཀྱིས་ཁོ་བོ་ལ་སྲང་དང་འདྲ་བར་མཉམ་མོ་ཞེས་བསྟོད་པའི་ཚིག་ཀྱང་གཞན་གྱིས་ཐོས་པར་མ་བྱེད་ཅིག །དེའི་ཚེ་ན་མུ་སྟེགས་ཅན་གྱིས་རྒྱལ་པོ་ལ་ཡང་འདི་སྐད་ཅེས་གསོལ་ཏོ། །རྒྱལ་པོ་ཆེན་པོ་དགེ་སྦྱོང་གཽ་ཏ་མའི་རིག་སྔགས་ཀྱིས་བཏབ་བམ་ཅི་ན། རྒྱལ་པོ་ཆེན་པོ་འཕགས་པས་སྨྲ་བའི་ཚིག་ལ་ཡིད་མི་ཆེས་ཤིང་ཐེ་ཚོམ་ཟ་བར་གྱུར། རྒྱལ་པོ་ཆེན་པོ་སྐྱེས་བུ་ཆེན་པོ་འདི་དག་ལ་བརྙས་པར་མ་བྱེད་ཅིག །རྒྱལ་པོ་ཆེན་པོ་ཟླ་བ་འདི་འགྲིབས་པ་དང་སྐྱེ་བ་དང་། རྒྱ་མཚོ་ཆེན་པོ་ལ་ལན་ཚྭའི་རོ་བྲོ་བ་དང་། རི་མ་ལ་ཡ་ན་ལ་སོགས་པ་སུས་བྱས། བདག་ཅག་བྲམ་ཟེ་ལ་སོགས་པས་བྱས་པ་མ་ལགས་སམ། རྒྱལ་པོ་ཆེན་པོ་མ་གསན་ཏམ། དྲང་སྲོང་ཨ་ག་ཏས་ལོ་བཅུ་གཉིས་ཀྱི་བར་དུ་གང་གཱའི་ཀླུང་གི་ཆུ་རྣ་བར་བླུགས་པ་མ་གསན་ཏམ། གཞན་ཡང་དྲང་སྲོང་གཽ་ཏ་མ་རྫུ་འཕྲུལ་ཆེན་པོ་དང་ལྡན་པས་ལོ་བཅུ་གཉིས་ཀྱི་བར་དུ་ཡང་བརྒྱ་བྱིན་གྱི་ལུས་སུ་བསྒྱུར་ཏེ། བརྒྱ་བྱིན་གྱི་ལུས་ནི་ལུག་མ་མོ་མོ་མཚན་སྟོང་དང་ལྡན་པའི་ལུས་སུ་བསྒྱུར་བ་མ་གསན་ཏམ། རྒྱལ་པོ་ཆེན་པོ་དྲང་སྲོང་གི་ལྟོས་ཉི་མ་གཅིག་གིས་རྒྱ་མཚོ་ཆེན་པོ་བཞིའི་ཆུ་ཅིག་ཅར་འཐུངས་ཏེ་ས་ཆེན་པོ་ཡང་བསྐམས་པར་གྱུར་པ་མ་གསན་ཏམ། རྒྱལ་པོ་ཆེན་པོ་དྲང་སྲོང་བ་སྤུས་ལྷའི་རྒྱལ་པོ་དབང་སྒྱུར་གྱི་མིག་གསུམ་བྱས་པ་མ་གསན་ཏམ། རྒྱལ་པོ་ཆེན་པོ་དྲང་སྲོང་ཨ་ལ་ལས་གྲོང་ཁྱེར་ཨ་ལ་ལ་ལྟ་བུ་རྡུལ་དུ་བྱས་པ་མ་གསན་ཏམ། རྒྱལ་པོ་ཆེན་པོ་བྲམ་ཟེའི་ནང་ན་དེ་ལྟ་བུའི་མཐུ་ཆེན་པོ་དང་ལྡན་པའི་དྲང་སྲོང་རྣམས་མཆིས་ཏེ་མངོན་སུམ་དུ་མཆིས་ན་རྒྱལ་པོ་ཆེན་པོ། ཅིའི་ཕྱིར་ན་བདག་ཅག་ལ་
ཤིན་ཏུ་བརྙས་པར་བྱེད། རྒྱལ་པོས་སྨྲས་པ། ཀྱེ་སྐྱེས་བུ་དག་གལ་ཏེ་བདག་གི་སྨྲ་བ་ལ་ཡིད་མི་ཆེས་ཏེ་འགྲན་འདོད་ན་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ད་ལྟར་ཤིང་སཱ་ལའི་དྲུང་ན་བཞུགས་ཀྱི། ཁྱེད་ལ་སོགས་པ་དེར་སོང་ལ་ཡིད་བཞིན་དུ་དྲིས་ཤིག །དེ་བཞིན་གཤེགས་པས་རྣམ་པར་ཕྱེ་སྟེ། ཁྱེད་ཀྱི་ཡིད་བཞིན་དུ་ལན་གསུང་བར་འགྱུར་རོ། །དེའི་ཚེ་རྒྱལ་པོ་མ་སྐྱེས་དགྲ་མུ་སྟེགས་ཅན་གྱི་འཁོར་རྣམས་དང་བཅས་ཏེ། སངས་རྒྱས་གང་ན་བར་ལྷགས་ནས་སྤྱི་བོས་ཕྱག་འཚལ་ཏེ། གཡས་ཕྱོགས་ནས་ལན་གསུམ་བསྐོར་ནས་བསྟི་སྟང་དང་བཅས་པས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མུ་སྟེགས་ཅན་འདི་དག་ནི་ཅི་དང་ཅི་སེམས་པ་འདྲི་ཞིང་རྒོལ་ལོ་ཞེས་མཆི་ན། དེ་བཞིན་གཤེགས་པས་དེ་དང་དེའི་ལན་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་གཤེགས་པ་དུས་མཁྱེན་གྱིས་རེ་ཞིག་སྡོད་ཅིག །དེ་ནས་འཁོར་དེའི་ནང་ནས་བྲམ་ཟེ་ཤ་ཏེ་ཤུ་ན་ཞེས་བྱ་བས་འདི་སྐད་ཅེས་གསོལ་ཏོ། །དགེ་སྦྱོང་གཽ་ཏ་མ་མྱ་ངན་ལས་འདས་པ་ཞེས་བགྱི་བ་རྟག་པའི་ཆོས་ལགས་སམ། བྲམ་ཟེ་ཆེན་པོ་དེ་དེ་བཞིན་ཏེ། དེ་དེ་བཞིན་ནོ། །བྲམ་ཟེས་ཡང་གསོལ་པ། གཽ་ཏ་མ་མྱ་ངན་ལས་འདས་པ་ལ་རྟག་ཅེས་བགྱི་བ་དེ་མི་རུང་ངོ་། །དེ་ཅིའི་སླད་དུ་ཞེ་ན། འཇིག་རྟེན་གྱི་ཆོས་ནི་ས་བོན་ལས་འབྲས་བུ་སྐྱེ་སྟེ། རྒྱུན་མི་འཆད་དོ། །དཔེར་ན་འཇི་བ་ལས་རྫ་མར་འགྱུར་བ་དང་། སྐུད་པ་ལས་གོས་སུ་འགྱུར་བ་དང་འདྲ་སྟེ། གཽ་ཏ་མས་རྟག་ཏུ་མི་རྟག་པ་ལ་ནན་ཏན་བྱས་ན་མྱ་ངན་ལས་འདས་པ་ཐོབ་བོ་ཞེས་གསུངས་ན། རྒྱུ་རྟག་པ་མ་ལགས་ན་འབྲས་བུ་རྟག་པ་ཅེས་བགྱིར་ག་ལ་རུང་། གཽ་ཏ་མ་འདོད་ཆགས་ལས་རྣམ་པར་གྲོལ་ན་མྱ་ངན་ལས་འདའ་བ་ལགས་སོ། །གཟུགས་སུ་འདོད་ཆགས་པ་དང་། གཟུགས་མེད་པར་འདོད་ཆགས་པ་ལས་རྣམ་པར་གྲོལ་ན་མྱ་ངན་ལས་འདའ་བ་ལགས་སོ། །མ་རིག་པ་ལ་སོགས་པ་ཉོན་མོངས་པ་ཐམས་ཅད་འགགས་ན་མྱ་ངན་ལས་འདའ་བ་ལགས་སོ་ཞེས་གསུངས་ན། འདོད་ཆགས་ནས་མ་རིག་པའི་ཉོན་
མོངས་པའི་བར་དུ་ཐམས་ཅད་ཀྱང་མི་རྟག་པ་ལགས་པས་རྒྱུ་མི་རྟག་པ་ལགས་ན་མྱ་ངན་ལས་འདའ་བ་ཐོབ་པ་ཡང་མི་རྟག་པ་ལགས་པའི་རིགས་སོ། །གཽ་ཏ་མ་རྟག་ཏུ་རྒྱུའི་དབང་གིས་ལྷར་སྐྱེས་ལ། རྒྱུའི་དབང་གིས་སེམས་ཅན་དམྱལ་བར་ལྟུང་སྟེ། རྒྱུ་ལས་རྣམ་པར་གྲོལ་ལོ་ཞེས་གསུངས་པས། དེ་བས་ན་ཆོས་ཐམས་ཅད་ནི་རྒྱུ་ལས་སྐྱེས་སོ། །གལ་ཏེ་རྒྱུའི་དབང་གིས་རྣམ་པར་གྲོལ་བར་གྱུར་ན་རྟག་ཅེས་བགྱིར་རུང་ངམ། གཽ་ཏ་མས་གཟུགས་ནི་རྐྱེན་ལས་སྐྱེས་པས་མི་རྟག་གོ་ཞེས་གསུངས་ལ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་དང་འདྲའོ་ཞེས་གསུངས་ན། དེ་ལྟར་རྣམ་པར་གྲོལ་བ་དེ་གལ་ཏེ་གཟུགས་ལགས་ན་ནི་མི་རྟག་པ་ལགས་ཏེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་མི་རྟག་པ་ལགས་སོ། །གལ་ཏེ་ཕུང་པོ་ལྔའི་ཕ་རོལ་ན་རྣམ་པར་གྲོལ་བ་ཞིག་མཆིས་ན་རྣམ་པར་གྲོལ་བ་དེ་ནི་ནམ་མཁའ་ལགས་པར་འགྱུར་རོ། །གལ་ཏེ་ནམ་མཁའ་ལགས་ན་རྒྱུ་དང་རྐྱེན་ལས་སྐྱེས་ཞེས་བགྱིར་ཡང་མི་རུང་ངོ་། །དེ་ཅིའི་སླད་དུ་ཞེ་ན། རྟག་པ་དང་གཅིག་ཅེས་བགྱི་བ་གནས་ཐམས་ཅད་དུ་ཁྱབ་པའི་ཕྱིར་རོ། །གཽ་ཏ་མ་གཞན་ཡང་རྒྱུ་ལས་སྐྱེས་པ་ནི་སྡུག་བསྔལ་ཡིན་ནོ་ཞེས་གསུངས་ན། གལ་ཏེ་སྡུག་བསྔལ་ལགས་ན་ཅིའི་སླད་དུ་རྣམ་པར་གྲོལ་བ་ནི་བདེ་བའོ་ཞེས་གསུངས། གཽ་ཏ་མས་གཞན་ཡང་མི་རྟག་པ་ནི་སྡུག་བསྔལ་བ་སྟེ། སྡུག་བསྔལ་བ་ནི་བདག་མེད་པའོ་ཞེས་གསུངས་ན། གལ་ཏེ་མི་རྟག་ཅིང་སྡུག་བསྔལ་བ་དང་། བདག་མེད་པ་ལགས་ན་ནི་ཡོངས་སུ་མ་དག་པ་ལགས་ཏེ། རྒྱུ་ལས་སྐྱེས་པའི་ཆོས་ཐམས་ཅད་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། ཡོངས་སུ་མ་དག་པ་ལགས་ན་ཅིའི་སླད་དུ་མྱ་ངན་ལས་འདས་པ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ལགས་སོ་ཞེས་གསུངས། གཽ་ཏ་མས་གལ་ཏེ་རྟག་པ་དང་མི་རྟག་པ་ཡང་ལགས། སྡུག་བསྔལ་བ་དང་བདེ་བ་ཡང་ལགས། བདག་དང་བདག་མ་མཆིས་པ་ཡང་ལགས། ཡོངས་སུ་དག་པ་དང་། ཡོངས་སུ་མ་དག་པ་ཞེས་ཀྱང་
གསུངས་པར་གྱུར་ན་གཉིས་སུ་གསུང་བར་མི་འགྱུར་རམ། བདག་གིས་སྔོན་རྒན་རབས་མཁས་པ་བློ་ཅན་ལས་གཏམ་དུ་ཐོས་ན། གལ་ཏེ་སངས་རྒྱས་འཇིག་རྟེན་དུ་གཤེགས་པ་ན། རྣམ་པ་གཉིས་སུ་གསུང་མི་སྲིད་དོ་ཞེ་ན། ད་ནི་གཽ་ཏ་མས་རྣམ་པ་གཉིས་སུ་གསུངས་སོ། །གཞན་ཡང་སངས་རྒྱས་ཞེས་བགྱི་བ་ང་ཡིན་ནོ་ཞེས་གསུངས་པའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བྲམ་ཟེ་ལ་བཀའ་སྩལ་པ། ཁྱོད་ཀྱིས་སྨྲས་པ་ལྟར་ཡང་ཁྱོད་ལ་དྲི་བ་དྲིས་ན་དེ་དང་དེའི་ལན་ཡང་སྨྲ་བར་བྱའོ། །བྲམ་ཟེས་ལེགས་སོ་གཽ་ཏ་མ་ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱི་རང་བཞིན་ཞེས་བྱ་བ་དེ་རྟག་པ་ཡིན་ནམ། མི་རྟག་པ་ཡིན། བྲམ་ཟེས་གསོལ་པ། བདག་གི་རང་བཞིན་ཞེས་བགྱི་བ་ནི་རྟག་པ་ལགས་སོ། །བྲམ་ཟེ་རང་བཞིན་དེས་ཕྱི་ནང་གི་ཆོས་ཐམས་ཅད་ཀྱི་རྒྱུར་འགྱུར་རམ། གསོལ་པ། དེ་བཞིན་ནོ། །བཅོམ་ལྡན་འདས་ཀྱིས་བཀའ་སྩལ་པ། བྲམ་ཟེ་ཇི་ལྟ་བུར་རྒྱུར་འགྱུར། གསོལ་པ། གཽ་ཏ་མ་རང་བཞིན་ལས་ཆེན་པོ་སྐྱེའོ། །ཆེན་པོ་ལས་ང་རྒྱལ་སྐྱེའོ། །ང་རྒྱལ་ལས་ཆོས་བཅུ་དྲུག་པོ་སྐྱེའོ། །འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། ནམ་མཁའ་དང་། ཤེས་པའི་དབང་པོ་ལྔ་སྟེ། མིག་དང་། རྣ་བ་དང་། སྣ་དང་། ལྕེ་དང་། རེག་བྱ་དང་། ལུས་ཀྱི་དབང་པོ་ལྔ་སྟེ། ལག་པ་དང་། རྐང་པ་དང་། ཁ་དང་། སྐྲ་དང་། ཕོ་དང་མོའི་དབང་པོ་དང་། སེམས་མཉམ་པའི་དབང་པོའོ། །ཆོས་རྣམ་པ་བཅུ་དྲུག་པོ་འདི་ནི་གཟུགས་དང་། སྒྲ་དང་། དྲི་དང་། རོ་དང་། རེག་བྱའི་ཆོས་ལྔ་པོ་ལས་སྐྱེས་སོ། །ཆོས་ཉི་ཤུ་རྩ་གཅིག་པོ་འདིའི་རྩ་བ་ནི་རྣམ་པ་གསུམ་སྟེ། ཞེན་པ་དང་། རྡུལ་དང་། ནག་པོའོ། །ཞེན་པ་ཞེས་བགྱི་བ་ནི་འདོད་པའོ། །རྡུལ་ཞེས་བགྱི་བ་ནི་ཞེ་སྡང་ངོ་། །ནག་པོ་ཞེས་བགྱི་བ་ནི་མ་རིག་པའོ། །གཽ་ཏ་མ་ཆོས་ཉི་ཤུ་ལྔ་པོ་ནི་ཐམས་ཅད་ཀྱང་རང་བཞིན་ལས་སྐྱེས་སོ། །བཀའ་སྩལ་པ། བྲམ་ཟེ་ཆེན་པོ་ལ་སོགས་པའི་ཆོས་འདི་དག་རྟག་པ་ཡིན་ནམ། མི་རྟག་པ་ཡིན། གསོལ་པ། གཽ་ཏ་མ་བདག་གི་ཆོས་ཀྱི་རང་བཞིན་ནི་རྟག་པ་ལགས་ཀྱི། ཆེན་
པོ་ལ་སོགས་པའི་ཆོས་ནི་ཐམས་ཅད་མི་རྟག་པའོ། །བྲམ་ཟེ་ཁྱོད་སྨྲ་བ་ལྟ་ན་ཁྱོད་ཀྱི་ཆོས་ལ་རྒྱུ་ནི་རྟག་ལ། འབྲས་བུ་ནི་མི་རྟག་གོ །ངའི་ཆོས་ནི་རྒྱུ་ནི་མི་རྟག་མོད་ཀྱི། འབྲས་བུ་ནི་རྟག་ན་དེ་ལ་སྐྱོན་ཅི་ཞིག་ཡོད། བྲམ་ཟེ་ཁྱོད་ཀྱི་ཆོས་ལ་རྒྱུ་རྣམ་པ་གཉིས་ཡོད་དམ། གསོལ་པ། མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཇི་ལྟ་བུར་ཡོད། བྲམ་ཟེས་གསོལ་པ། སྐྱེ་བའི་རྒྱུ་དང་གསལ་བའི་རྒྱུ་སྟེ་གཉིས་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། སྐྱེ་བའི་རྒྱུ་ནི་གང་། གསལ་བའི་རྒྱུ་ནི་གང་། བྲམ་ཟེས་གསོལ་པ། སྐྱེ་བའི་རྒྱུ་ཞེས་བགྱི་བ་ནི་འཇི་བ་ལས་རྫ་མ་འབྱུང་བ་ལྟ་བུའོ། །གསལ་བའི་རྒྱུ་ཞེས་བགྱི་བ་ནི་མེ་མར་གྱིས་སྣང་བར་བྱེད་པ་ལྟ་བུའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱུ་རྣམ་པ་གཉིས་ཀྱི་རང་བཞིན་ནི་གཅིག་གོ །གལ་ཏེ་གཅིག་ཡིན་ན། སྐྱེ་བའི་རྒྱུ་ཡང་གསལ་བའི་རྒྱུར་འགྱུར་ལ། གསལ་བའི་རྒྱུ་ཡང་སྐྱེ་བའི་རྒྱུར་འགྱུར་རམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་སྐྱེ་བའི་རྒྱུ་གསལ་བའི་རྒྱུར་མི་འགྱུར་ལ། གསལ་བའི་རྒྱུ་ཡང་སྐྱེ་བའི་རྒྱུར་མི་འགྱུར་ན་ལྟ། གཅིག་གི་རྒྱུར་གཅིག་འགྱུར་ཞེས་བྱར་རུང་ངམ། བྲམ་ཟེས་གསོལ་པ། གཅིག་གི་རྒྱུར་གཅིག་མི་འགྱུར་མོད་ཀྱི། གཅིག་ལ་གཅིག་རྒྱུར་འགྱུར་བ་ནི་མཆིས་སོ། །བྲམ་ཟེ་གསལ་བའི་རྒྱུས་གསལ་བར་བྱེད་པ་དེ་གསལ་བ་དང་འཐུན་པ་ཡིན་ནམ། གསོལ་པ། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ངའི་ཆོས་ཀྱང་མི་རྟག་པ་ལས་མྱ་ངན་ལས་འདའ་བ་ཐོབ་མོད་ཀྱི། མི་རྟག་པ་ནི་མ་ཡིན་ནོ། །བྲམ་ཟེ་གསལ་བའི་རྒྱུ་ལས་ཐོབ་པས་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡིན་ནོ། །སྐྱེ་བའི་རྒྱུ་ལས་ཐོབ་པས་ན་མི་རྟག་པ་དང་། བདེ་བ་མེད་པ་དང་། བདག་མེད་པ་དང་། ཡོངས་སུ་མ་དག་པ་ཡིན་ནོ། །དེ་བས་ན་དེ་བཞིན་གཤེགས་པས་གསུངས་པ་ཡང་རྣམ་པ་གཉིས་ཡོད་དེ། དེ་ལྟར་རྣམ་པ་གཉིས་སུ་གསུང་ཡང་རྣམ་པ་གཉིས་སུ་མེད་དེ། དེ་བས་ན་དེ་བཞིན་གཤེགས་པ་ནི་རྣམ་
པ་གཉིས་སུ་གསུང་བ་མེད་པ་ཞེས་བྱའོ། །ཁྱོད་སྨྲ་བ་ལྟར་སྔོན་རྒན་རབས་མཁས་པ་ལས། སངས་རྒྱས་འཇིག་རྟེན་དུ་གཤེགས་པ་ནི་གཉིས་སུ་མེད་པར་གསུང་ངོ་ཞེས་ཐོས་པ་ཤིན་ཏུ་ལེགས་སོ། །ད་ལྟར་ཕྱོགས་བཅུ་ན་དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱིས་གསུང་བ་ལ་ཐ་དད་པ་མེད་དེ། དེ་བས་ན་སངས་རྒྱས་བཅོམ་ལྡན་འདས་ནི་གཉིས་སུ་མེད་པར་གསུང་བ་ཞེས་བྱའོ། །ཇི་ལྟར་ན་ཐ་དད་པ་མེད་པ་ཞེ་ན། གང་ཡོད་པར་སྨྲ་བ་དེ་ལ་ཡོད་པར་ཡང་གསུང་ངོ་། །གང་མེད་པར་སྨྲ་བ་ལ་མེད་པར་ཡང་གསུང་བར་དོན་གཅིག་པ་ཞེས་བྱའོ། །བྲམ་ཟེ་སངས་རྒྱས་བཅོམ་ལྡན་འདས་ནི་རྣམ་པ་གཉིས་སུ་གསུངས་པས་གཅིག་ཏུ་གསུངས་པའི་ཚིག་གསལ་བར་བྱེད་དོ། ། ཇི་ལྟར་ན་གཉིས་སུ་གསུངས་པས་གཅིག་ཏུ་གསུངས་པ་གསལ་བར་བྱེད་པ་ཞེ་ན། དཔེར་ན་མིག་དང་གཟུགས་ཞེས་ཚིག་གཉིས་ལས་རྣམ་པར་ཤེས་པ་ཞེས་བྱ་བའི་ཚིག་གཅིག་བྱུང་བ་ནས་ཡིད་དང་ཆོས་ཀྱི་བར་དུ་དེ་བཞིན་དུ་རྒྱས་པར་རིག་པར་བྱའོ། །བྲམ་ཟེས་གསོལ་པ། གཽ་ཏ་མ་སྨྲ་བའི་ཚིག་གི་དོན་ལེགས་པར་གསུངས་སོ། །བདག་ཅག་ནི་གཉིས་སུ་གསུངས་པ་ལས་གཅིག་ཏུ་གསུང་བ་གསལ་བར་མཛད་པ་མ་རྟོགས་སོ། །དེ་ནས་བཅོམ་ལྡན་འདས་ཀྱིས་དེ་དག་ལ་འཕགས་པའི་བདེན་པ་བཞི་གསུང་བ་བརྗོད་དོ། །འདི་ལྟ་སྟེ་སྡུག་བསྔལ་གྱི་བདེན་པ་ནི་གཉིས་ཀྱང་ཡིན་ལ། གཅིག་ཀྱང་གཅིག་གོ །དེ་བཞིན་དུ་ལམ་གྱི་བདེན་པའི་བར་དུ་གཉིས་ལ་གཅིག་ཀྱང་གཅིག་གོ །བྲམ་ཟེས་གསོལ་པ། བཅོམ་ལྡན་འདས་བདག་གིས་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟ་བུར་རྟོགས། བྲམ་ཟེས་གསོལ་པ། བཅོམ་ལྡན་འདས་སྡུག་བསྔལ་གྱི་བདེན་པ་ཞེས་བགྱི་བ་བྱིས་པ་མ་རབས་ཐམས་ཅད་ལ་གཉིས་ཏེ། འཕགས་པ་རྣམས་ལ་གཅིག་གོ །དེ་བཞིན་དུ་ལམ་གྱི་བདེན་པའི་བར་དུ་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ལེགས་པར་རྟོགས་སོ། །བྲམ་ཟེས་གསོལ་པ། བཅོམ་ལྡན་འདས་བདག་གིས་ཐོས་ནས་ཡང་དག་པའི་ལྟ་བ་ཐོབ་པར་གྱུར་པས། ད་ནི་སངས་རྒྱས་དང་། ཆོས་དང་། དགེ་འདུན་ལ་
སྐྱབས་སུ་མཆི་ན། ཐུགས་རྗེ་ཆེན་པོས་བདག་ཅག་རབ་ཏུ་དབྱུང་བར་གསོལ་ལོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བཀའ་སྩལ་པ། ཁྱོད་ཀྱིས་བཤད་དེ་ཞུ་ན། སྐྲ་དང་ཁ་སྤུ་བྲེགས་ལ་ཁྱིམ་ནས་ཁྱིམ་མ་ཡིན་པར་རབ་ཏུ་ཕྱུང་ཤིག །དེའི་ཚེ་ཚེ་དང་ལྡན་པ་ཀུན་ཤེས་ཀཽཎྜི་ནྱས། བཅོམ་ལྡན་འདས་ཀྱི་བཀའ་བཞིན་དུ་སྐྲ་དང་ཁ་སྤུ་བྲེག་པ་ན་རྣམ་པ་གཉིས་ལྟུང་བར་གྱུར་ཏོ། །གང་ཞེ་ན། སྐྲ་དང་ཁ་སྤུ་དང་། ཉོན་མོངས་པ་སྟེ། གནས་དེ་ཉིད་དུ་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །དེའི་ཚེ་གཞན་ཡང་ཀུན་ཏུ་རྒྱུ་བ་སི་ཏ་ཞེས་བགྱི་བས་འདི་སྐད་ཅེས་གསོལ་ཏོ། །གཽ་ཏ་མས་གསུངས་པའི་མྱ་ངན་ལས་འདའ་བ་དེ་ཇི་རྟག་གམ། དེ་དེ་བཞིན་ནོ། །ཀུན་དུ་རྒྱུ་བ་སི་ཏས་གསོལ་པ། གཽ་ཏ་མ་ཇི་ཉོན་མོངས་པ་མ་མཆིས་པ་ལ་མྱ་ངན་ལས་འདའ་བ་ཞེས་བགྱིའམ། དེ་བཞིན་ནོ། །ཀུན་ཏུ་རྒྱུ་བ་སི་ཏས་གསོལ་པ། གཽ་ཏ་མ་འཇིག་རྟེན་ན་མ་མཆིས་པ་རྣམ་པ་བཞི་སྟེ། བཞི་གང་ཞེ་ན། མ་བྱུང་བ་ལ་མ་མཆིས་ཞེས་བགྱི་བ་སྟེ། དཔེར་ན་འཇི་བ་ལས་མ་བགྱིས་པའི་སྔ་རོལ་ན་རྫ་མ་མ་མཆིས་པ་དང་། འགགས་ཏེ་མ་མཆིས་པ་ལ་ཡང་མ་མཆིས་པ་ཞེས་བགྱི་བ་སྟེ། དཔེར་ན་རྫ་མ་ཞིག་ནས་མ་མཆིས་པ་དང་། གཅིག་ལ་གཅིག་མ་མཆིས་པས་མ་མཆིས་པ་ཞེས་བགྱི་བ་སྟེ། དཔེར་ན་བ་ལང་ལ་རྟ་མ་མཆིས་ལ། རྟ་ལ་བ་ལང་མ་མཆིས་པ་ལྟ་བུ་དང་། གཏན་མ་མཆིས་པ་ལ་མ་མཆིས་པ་ཞེས་བགྱི་བ་སྟེ། དཔེར་ན་རུ་སྦལ་གྱི་སྤུ་དང་། རི་བོང་གི་རྭ་ལྟ་བུའོ། །གཽ་ཏ་མ་ཇི་སྟེ་ཉོན་མོངས་པ་མ་མཆིས་པས་མྱ་ངན་ལས་འདས་པ་ཞེས་བགྱི་ན། མྱ་ངན་ལས་འདའ་བ་ནི་མ་མཆིས་པའོ། །ཇི་སྟེ་མ་མཆིས་པ་ལགས་ན་ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་པར་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟར་མྱ་ངན་ལས་འདའ་བ་ནི་སྔ་ནས་མེད་པ་སྟེ། འཇི་བའི་ཚེ་རྫ་མ་མེད་པ་ལྟ་བུ་མ་ཡིན། འགགས་ཏེ་མེད་པ་སྟེ། རྫ་མ་ཞིག་ནས་མེད་པ་ལྟ་བུ་ཡང་མ་ཡིན། གཏན་མེད་པ་སྟེ། རུ་སྦལ་གྱི་སྤུ་དང་། རི་བོང་གི་རྭ་ལྟ་བུ་ཡང་མ་ཡིན་ཏེ། གཅིག་
ལ་གཅིག་མེད་པ་དང་ནི་འཐུན་ནོ། །རིགས་ཀྱི་བུ་ཁྱོད་སྨྲ་བ་ལྟར་བ་ལང་ལ་རྟ་མེད་མོད་ཀྱི། བ་ལང་ཡང་མེད་ཅེས་བྱར་མི་རུང་ངོ་། །རྟ་ལ་བ་ལང་མེད་མོད་ཀྱི། རྟ་ཡང་མེད་ཅེས་བྱར་མི་རུང་སྟེ། མྱ་ངན་ལས་འདའ་བ་ཡང་དེ་དང་འདྲ་སྟེ། ཉོན་མོངས་པ་ལ་མྱ་ངན་ལས་འདའ་བ་མེད། མྱ་ངན་ལས་འདའ་བ་ལ་ཉོན་མོངས་པ་མེད་དེ། དེ་བས་ན་གཅིག་ལ་གཅིག་མེད་པ་ཞེས་བྱའོ། །བ་སི་ཏས་ཡང་གསོལ་པ། གཽ་ཏ་མ་གལ་ཏེ་གཅིག་ལ་གཅིག་མ་མཆིས་པ་ལ་མྱ་ངན་ལས་འདའ་བ་ཞེས་བགྱི་ན་ནི་གཅིག་ལ་གཅིག་མ་མཆིས་པ་ལ་ནི་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མ་མཆིས་ན། གཽ་ཏ་མས་ཅིའི་སླད་དུ་མྱ་ངན་ལས་འདའ་བ་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མཆིས་ཞེས་གསུངས་བཅོམ་ལྡན་འདས་ཀྱིས་བཀའ་སྩལ་པ། ཁྱོད་སྨྲ་བ་ལྟར་གཅིག་ལ་གཅིག་མེད་པ་ནི་མེད་པ་རྣམ་གསུམ་སྟེ། བ་ལང་དང་། རྟ་ནི་སྔ་ན་མེད་ལ་ཕྱིས་ཡོད་པས་ན་སྔོན་མེད་པ་ཞེས་བྱའོ། །ཡོད་ནས་ཀྱང་མེད་པར་འགྱུར་བས་ན་ཞིག་པས་མེད་པ་ཞེས་བྱའོ། །གཅིག་ལ་གཅིག་མེད་པ་མི་ཁྱོད་སྨྲ་བ་བཞིན་ཏེ། རིགས་ཀྱི་བུ་མེད་པ་རྣམ་པ་གསུམ་པོ་ནི་མྱ་ངན་ལས་འདས་པར་བྱེད་དོ། །དེ་བས་ན་མྱ་ངན་ལས་འདའ་བ་ནི་རྟག་པ་དང་། བདེ་བ་དང་། བདག་དང་། ཡོངས་སུ་དག་པའོ། །དཔེར་ན་འཇིག་རྟེན་གྱི་ནད་ནི་གསུམ་སྟེ། མཁྲིས་པ་དང་། རླུང་དང་། བད་ཀན་ནོ། །ནད་རྣམ་པ་གསུམ་ལ་ཡང་སྨན་རྣམ་པ་གསུམ་གྱིས་འཚོ་སྟེ། མཁྲིས་པའི་ནད་ལ་ནི་མར་གྱིས་འཚོའོ། །རླུང་ལ་ནི་འབྲུ་མར་ཕན་ནོ། །བད་ཀན་ལ་ནི་སྦྲང་རྩི་ཕན་ནོ། །དེ་ལྟར་སྨན་རྣམ་པ་གསུམ་ཡང་ནད་རྣམ་པ་གསུམ་ལ་ཕན་ནོ། །རིགས་ཀྱི་བུ་རླུང་གི་ནང་ན་འབྲུ་མར་མེད་ལ། འབྲུ་མར་གྱི་ནང་ན་རླུང་མེད་པ་ནས་སྦྲང་རྩིའི་ནང་ན་བད་ཀན་མེད་ལ། བད་ཀན་གྱི་ནང་ན་སྦྲང་རྩི་མེད་དེ། འོན་ཀྱང་འཚོ་བར་འགྱུར་རོ། །སེམས་ཅན་ཐམས་ཅད་ལ་ཡང་ནད་རྣམ་པ་གསུམ་སྟེ། གང་ཞེ་ན། འདོད་ཆགས་དང་། ཞེ་སྡང་དང་། གཏི་མུག་གོ །དེ་ལྟར་ནད་རྣམ་པ་གསུམ་པོ་ལ་ཡང་སྨན་རྣམ་པ་གསུམ་
སྟེ། འདོད་ཆགས་ཀྱི་ནད་ལ་ནི་མི་སྡུག་པ་ཡང་དག་པར་བསྒོམ་པར་བྱ། ཞེ་སྡང་གི་ནད་ལ་ནི་བྱམས་པ་ཡང་དག་པར་བསྒོམ་པར་བྱ། གཏི་མུག་གི་ནད་ལ་ནི་རྟེན་ཅིང་འབྲེལ་ཏེ་འབྱུང་བ་ཡང་དག་པར་བསྒོམ་པར་བྱའོ། །རིགས་ཀྱི་བུ་འདོད་ཆགས་བསལ་བའི་ཕྱིར་འདོད་ཆགས་མ་ཡིན་པ་ཡང་དག་པར་བསྒོམ་པར་བྱ། ཞེ་སྡང་བསལ་བའི་ཕྱིར་ཞེ་སྡང་མ་ཡིན་པ་ཡང་དག་པར་བསྒོམ་པར་བྱ། གཏི་མུག་བསལ་བའི་ཕྱིར་གཏི་མུག་མ་ཡིན་པ་ཡང་དག་པར་བསྒོམ་པར་བྱ་སྟེ། ནད་རྣམ་པ་གསུམ་གྱི་ནང་ན་སྨན་རྣམ་པ་གསུམ་མེད་ལ། སྨན་རྣམ་པ་གསུམ་གྱི་ནང་ན་ཡང་ནད་རྣམ་པ་གསུམ་མེད་དོ། །རིགས་ཀྱི་བུ་ནད་རྣམ་པ་གསུམ་གྱི་ནང་ན་སྨན་རྣམ་པ་གསུམ་མེད་པས་མི་རྟག་པ་དང་། བདེ་བ་མེད་པ་དང་། བདག་མེད་པ་དང་། ཡོངས་སུ་དག་པ་མེད་པ་ཡིན་ནོ། །སྨན་རྣམ་པ་གསུམ་གྱི་ནང་ན་ནད་རྣམ་པ་གསུམ་མེད་པས་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཡིན་ནོ། །བ་སི་ཏས་གསོལ་པ། བཅོམ་ལྡན་འདས་དེ་བཞིན་གཤེགས་པས་བདག་ལ་རྟག་པ་དང་། མི་རྟག་པ་བསྟན་དུ་གསོལ། དེ་ལ་རྟག་པ་ནི་གང་། མི་རྟག་པ་ནི་གང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གཟུགས་ནི་མི་རྟག་པ་ནས། རྣམ་པར་ཤེས་པའི་བར་དུ་མི་རྟག་པའོ། །རྣམ་པར་གྲོལ་བའི་གཟུགས་ནི་རྟག་པ་ནས། རྣམ་པར་གྲོལ་བའི་རྣམ་པར་ཤེས་པ་ནི་རྟག་པའོ། །རིགས་ཀྱི་བུ་དེ་ལ་རིགས་ཀྱི་བུའམ་རིགས་ཀྱི་བུ་མོ་གང་ཞིག་གཟུགས་ནས་རྣམ་པར་ཤེས་པའི་བར་དུ་མི་རྟག་པར་ཡང་དག་པར་བསྒོམས་ན་དེས་ནི་རྟག་པའི་ཆོས་ཐོབ་པར་རིག་པར་བྱའོ། །བ་སི་ཏས་གསོལ་པ། བཅོམ་ལྡན་འདས་རྟག་པ་དང་མི་རྟག་པའི་ཆོས་ནི་བདག་གིས་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་
ཀྱི་བུ་ཁྱོད་ཀྱིས་རྟག་པ་དང་མི་རྟག་པའི་ཆོས་ཇི་ལྟ་བུར་རྟོགས། བ་སི་ཏས་གསོལ་པ། བཅོམ་ལྡན་འདས་བདག་གིས་ནི་བདག་གི་གཟུགས་མི་རྟག་པ་ནས་རྣམ་པར་ཤེས་པའི་བར་དུ་མི་རྟག་པ་སྟེ། རྣམ་པར་གྲོལ་བ་ནི་རྟག་པར་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ནི་ལུས་འདིའི་དྲིན་ལེགས་པར་གླན་ནོ། །ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་བཀའ་སྩལ་པ། བ་སི་ཏ་འདི་དགྲ་བཅོམ་པ་ཐོབ་ཀྱིས་ཁྱོད་ཀྱིས་ཆོས་གོས་གསུམ་དང་ལྷུང་བཟེད་བྱིན་ཅིག །ཚེ་དང་ལྡན་པ་ཀུན་ཤེས་ཀཽཎྜི་ནྱས་བཅོམ་ལྡན་འདས་ཀྱིས་བཀའ་སྩལ་པ་བཞིན་དུ་ཆོས་གོས་དང་ལྷུང་བཟེད་བྱིན་ནོ། །དེ་ནས་བ་སི་ཏས་ཆོས་གོས་དང་ལྷུང་བཟེད་བླངས་ནས་ཀུན་ཤེས་ཀཽཎྜི་ནྱ་ལ་འདི་སྐད་ཅེས་སྨྲས་སོ། །བདག་ནི་ལུས་ངན་པ་འདིས་དགེ་བའི་འབྲས་བུ་ཐོབ་ཀྱིས། བཙུན་པ་ཚེགས་ལ་མི་གཟིགས་པར་བདག་གི་སླད་དུ་བཅོམ་ལྡན་འདས་ཀྱི་ཐད་དུ་གཤེགས་ཏེ་འདི་སྐད་ཅེས་གསུངས་ཤིག །བདག་ལྟ་བུ་སྡིག་པ་ཅན་གྱིས་དེ་བཞིན་གཤེགས་པའི་གདུང་རུས་སྨོས་ཤིང་ང་མ་ཁྱོད་སྨྲས་པ་མཐོལ་ཚངས་སུ་གསོལ་ལོ། །གདུག་པ་ཅན་གྱི་ལུས་འདི་དང་རིང་དུ་གནས་པར་མི་འཚལ་ཏེ། མྱ་ངན་ལས་འདའོ་ཞེས་གསུངས་ཤིག །དེ་ནས་ཚེ་དང་ལྡན་པ་ཀཽཎྜི་ནྱ་སངས་རྒྱས་གང་ན་བ་དེར་སོང་ནས་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་བ་སི་ཏ་ཤིན་ཏུ་ངོ་ཚ་ཞིང་འཛེམ་པའི་སེམས་སྐྱེས་ཏེ་བདག་ནི་ཤིན་ཏུ་གླེན་པས་དེ་བཞིན་གཤེགས་པའི་གདུང་སྨོས་ན་ང་མ་ཁྱོད་སྨྲས་པ་ནོངས་ཏེ། བདག་ལས་འགྱོད་ཚངས་གསོལ་ལོ། །སྦྲུལ་གདུག་པ་དང་འདྲ་བའི་ལུས་འདི་དང་རིང་དུ་འགྲོགས་པར་མི་འཚལ་ཏེ་མྱ་ངན་ལས་འདའོ་ཞེས་མཆིའོ། །བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། དགེ་སློང་བ་སི་ཏ་ནི་སྔོན་སངས་རྒྱས་ཚད་མེད་པ་སྙེད་ལ་དགེ་བའི་རྩ་བ་བསྐྱེད་པས་ད་འདིར་བསྟན་པའི་ལུང་བཞིན་དུ་གནས་པར་གྱུར་ཏོ། །དེ་ལྟར་ལུང་བཞིན་དུ་གནས་པས་ཡང་དག་པའི་འབྲས་བུ་ཐོབ་པར་གྱུར་ཏེ། དེ་བས་ན་ཁྱོད་ཀྱིས་དེའི་ལུས་ལ་མཆོད་པ་གྱིས་ཤིག ། ། །འཕགས་པ་ཡོངས་སུ་མྱ་ངན་ལས་འདས་པའི་མདོ། བམ་པོ་ལྔ་བཅུ་གཉིས་པ། དེ་ནས་ཀཽཎྜི་ནྱས་བཅོམ་ལྡན་འདས་ལས་དེ་སྐད་ཅེས་ཐོས་ནས་ཕྱིར་དེའི་ལུས་གང་ན་བར་སོང་སྟེ་མཆོད་པ་བྱས་སོ། །དེའི་ཚེ་བ་སི་ཏས་ལུས་བསྲེགས་པ་ན་རྫུ་འཕྲུལ་སྣ་ཚོགས་མངོན་པར་བསྟན་ཏེ། མུ་སྟེགས་ཅན་གྱི་རྣམས་དེ་ལྟ་བུར་གྱུར་པ་མཐོང་ནས་སྐད་ཆེན་པོས་འདི་སྐད་ཅེས་
སྨྲས་སོ། །བ་སི་ཏ་ནི་དགེ་སྦྱོང་གཽ་ཏ་མའི་སྔགས་དང་སྒྱུ་རྩལ་ཐོབ་ཀྱིས་རིང་པོར་མི་ཐོགས་པར་དགེ་སྦྱོང་གཽ་ཏ་མ་བས་ལྷག་པར་ངེས་སོ། །དེའི་ཚེ་འཁོར་གྱི་དཀྱིལ་འཁོར་དེའི་ནང་ན་ཀུན་ཏུ་རྒྱུ་ས་ནི་ཞེས་བྱ་བས་ཡང་འདི་སྐད་ཅེས་གསོལ་ཏོ། །གཽ་ཏ་མ་བདག་ཅེས་བགྱི་བ་མཆིས་སམ། དེ་བཞིན་གཤེགས་པས་ཅང་མི་གསུང་ངོ་། །གཽ་ཏ་མ་འོ་ན་མ་མཆིས་པ་ལགས་སམ། དེ་བཞིན་གཤེགས་པ་ཅང་མི་གསུང་ངོ་། །དེ་བཞིན་དུ་ལན་གཉིས་ལན་གསུམ་གྱི་བར་དུ་ཞུས་ཀྱང་དེ་བཞིན་གཤེགས་པ་ཅང་མི་གསུང་ངོ་། །ས་ནིས་ཡང་གསོལ་པ། གཽ་ཏ་མ་གལ་ཏེ་སེམས་ཅན་ཐམས་ཅད་ལ་བདག་ཅེས་བགྱི་བ་མཆིས་ཏེ་ཐམས་ཅད་ལ་ཁྱབ་ལ། གཅིག་གམ་བྱས་པ་ལགས་ན་གཽ་ཏ་མ་ཅིའི་སླད་དུ་ཅང་མི་གསུང་བར་བཞུགས། བཅོམ་ལྡན་འདས་ཀྱིས་ས་ནི་ལ་བཀའ་སྩལ་པ། ཁྱོད་སྨྲ་བའི་བདག་ཅེས་བྱ་བ་ཐམས་ཅད་ལ་ཁྱབ་པ་ཡིན་ནམ། ས་ནིས་གསོལ་པ། གཽ་ཏ་མ་བདག་འབའ་ཞིག་དེ་སྐད་དུ་སྨྲ་བ་མ་ལགས་ཀྱི། མཁས་པ་ཤེས་རབ་ཅན་ཐམས་ཅད་ཀྱང་དེ་སྐད་དུ་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཇི་སྟེ་བདག་ཅེས་བྱ་བ་དེ་ཐམས་ཅད་དུ་ཁྱབ་པ་ཞིག་ཡིན་ན་ནི་རྒྱུད་ལྔར་སྐྱེ་བ་དག་ཀྱང་དུས་གཅིག་ཏུ་རྣམ་པར་སྨིན་པ་མྱོང་བའི་རིགས་སོ། །ཇི་སྟེ་རྒྱུད་ལྔར་སྐྱེས་པ་དུས་གཅིག་ཏུ་རྣམ་པར་སྨིན་པ་མྱོང་བ་ཞིག་ཡིན་ན་ཀུན་ཏུ་རྒྱུ་ཁྱོད་ལ་སོགས་པ་ཅིའི་ཕྱིར་སྡིག་པ་མི་དགེ་བའི་ལས་མི་བྱེད་པར་སེམས་ཅན་དམྱལ་བ་ལས་བཟློག་པའི་ཕྱིར་དགེ་བའི་ཆོས་བྱེད་ཅིང་ལྷར་སྐྱེ་བའི་ལུས་མྱོང་བར་འདོད། ས་ནིས་གསོལ་པ། གཽ་ཏ་མ་བདག་གི་ཆོས་ལ་བདག་ཅག་ཅེས་བགྱི་བ་ནི་རྣམ་པ་གཉིས་ཏེ། བྱས་པའི་ལུས་ཀྱི་བདག་དང་། རྟག་པའི་ལུས་ཀྱི་བདག་གོ །དེ་ལ་བྱས་པའི་ལུས་ཀྱི་བདག་གི་ཕྱིར་སྡིག་པ་མི་དགེ་བའི་ཆོས་སྤོང་སྟེ། སེམས་ཅན་དམྱལ་བར་མི་མཆི་བ་དང་། དགེ་བའི་ཆོས་ལ་ནན་ཏན་བགྱིད་པས་མཐོ་རིས་ཀྱི་ལྷར་སྐྱེ་བ་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྨྲ་བའི་བདག་ཅེས་བྱ་བ་དེ་ཐམས་ཅད་དུ་ཁྱབ་ལ། བདག་ཅེས་བྱ་བ་དེ་བྱས་པའི་ལུས་ལ་ཡོད་ན་ནི་དེ་མི་རྟག་པ་ཡིན་ནོ། །གལ་
ཏེ་བྱས་པའི་ལུས་ལ་མེད་ན་ཐམས་ཅད་ལ་ཁྱབ་ཅེས་བྱར་རུང་ངམ། ས་ནིས་གསོལ་པ། གཽ་ཏ་མ་བདག་གིས་རྣམ་པར་གཞག་པའི་བདག་ཅེས་བགྱི་བ་དེ་ནི་བྱས་པའི་ནང་ན་ཡང་མཆིས་ལ་རྟག་ཅེས་ཀྱང་བགྱི་བ་ལགས་སོ། །གཽ་ཏ་མ་དཔེར་ན་ཁང་པ་ལ་མེ་ཤོར་ན་ཁང་པ་ཚིག་ཀྱང་ཁྱིམ་བདག་ནི་ཕྱིར་བྱུང་སྟེ། ཁང་ཁྱིམ་ཚིག་པའི་ཕྱིར་ཁྱིམ་བདག་ཚིག་གོ་ཞེས་བགྱིར་མི་རུང་ངོ་། །བདག་གི་ཆོས་ཀྱང་དེ་དང་འདྲ་སྟེ། བྱས་པའི་ལུས་འདི་མི་རྟག་པ་ལགས་མོད་ཀྱི། མི་རྟག་པའི་དུས་ན་བདག་ཅེས་བགྱི་བ་ཕྱིར་འབྱུང་ངོ་། །དེ་བས་ན་བདག་གི་བདག་ཅེས་བགྱི་བ་ནི་ཁྱབ་པ་ཡང་ལགས་ལ་རྟག་པ་ཡང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྨྲ་བ་ལྟར་བདག་ཅེས་བྱ་བ་ཁྱབ་པ་ཡང་ཡིན་ལ་རྟག་པ་ཡང་ཡིན་ཞེས་བྱ་བ་དེ་མི་རུང་ངོ་། །དེ་ཅིའི་ཕྱིར་ཞེ་ན། ཁྱབ་པ་ལ་རྣམ་པ་གཉིས་ཏེ་རྟག་པ་དང་། མི་རྟག་པའོ། །གཞན་ཡང་རྣམ་པ་གཉིས་ཏེ། གཟུགས་དང་། གཟུགས་མེད་པའོ། །དེ་བས་ན་ཇི་སྟེ་ཁྱོད་སྨྲ་བ་ལྟར་ཐམས་ཅད་ལ་ཡོད་པ་ཞིག་ཡིན་ན་ནི་རྟག་པ་ཡང་ཡིན། མི་རྟག་པ་ཡང་ཡིན། གཟུགས་ཀྱང་ཡིན། གཟུགས་མེད་པ་ཡང་ཡིན་ནོ། །ཁྱོད་སྨྲ་བ་ལྟར་ཁང་པ་ཚིག་ཀྱང་ཁྱིམ་བདག་ཕྱིར་བྱུང་བས་མི་རྟག་པ་ཡང་ཡིན་ནོ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཁང་པ་ཡང་ཁྱིམ་བདག་མ་ཡིན་ལ་ཁྱིམ་བདག་ཀྱང་ཁང་པ་མ་ཡིན་ཏེ། ཚིག་པ་ཡང་གཞན་ལ་བྱུང་བ་ཡང་གཞན་པས་ན་བདག་ཅེས་བྱ་བ་ནི་དེ་མ་ཡིན་ནོ། །དེ་ཅིའི་ཕྱིར་ཞེ་ན། བདག་ནི་གཟུགས་སོ། །གཟུགས་ནི་བདག་གོ །བདག་ནི་གཟུགས་མེད་པའོ། །གཟུགས་མེད་པ་ནི་བདག་གོ །བདག་ནི་གཟུགས་མེད་པ་ཡིན་ན་ཅིའི་ཕྱིར་གཟུགས་མི་རྟག་པའི་དུས་ན་བདག་ཕྱིར་འབྱུང་ངོ་ཞེས་སྨྲ། རིགས་ཀྱི་བུ་ཅི་ཁྱོད་ཀྱི་ཡིད་ལ་གལ་ཏེ་སེམས་ཅན་ཐམས་ཅད་ལ་བདག་ཅེས་བྱ་བ་དེ་གཅིག་སྟེ་འཐུན་པར་སེམས་ན་དེ་ནི་འཇིག་རྟེན་དང་འཇིག་རྟེན་ལས་འདའ་བའི་ཆོས་གཉིས་ཀ་དང་འགལ་ལོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཆོས་ཀྱི་ཕ་དང་། མ་དང་། བུ་དང་བུ་མོ་ཞེས་བྱ་བ་ཡོད་དོ། །ཇི་སྟེ་བདག་ཅེས་བྱ་བ་གཅིག་ཡིན་ན་ཕ་ཡང་བུ་ཡིན་ལ། བུ་ཡང་ཕ་ཡིན། མ་ཡང་བུ་མོ་ཡིན་ལ། བུ་མོ་
ཡང་མ་ཡིན། དགྲ་ཡང་གཉེན་ཡིན་ལ། གཉེན་ཡང་དགྲ་ཡིན་ཕ་རོལ་ཡང་ཚུ་རོལ་ཡིན་ལ། ཚུ་རོལ་ཡང་ཕ་རོལ་ཡིན་ཏེ། དེ་བས་ན་སེམས་ཅན་ཐམས་ཅད་ཀྱི་བདག་ཅེས་བྱ་བ་གཅིག་སྟེ། འཐུན་ནོ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་གཉིས་ཀ་དང་འགལ་ལོ། །ས་ནིས་གསོལ་པ། སེམས་ཅན་ཐམས་ཅད་ལ་བདག་ཅེས་བགྱི་བ་གཅིག་སྟེ། འཐུན་ནོ་ཞེས་བདག་མི་སྨྲའི་སོ་སོའི་མི་རེ་རེ་ལ་བདག་རེ་རེ་ཡོད་དོ་ཞེས་སྨྲའོ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་མི་རེ་རེ་ལ་བདག་རེ་རེ་ཡོད་ཅེས་སྨྲ་ན་བདག་ཅེས་བྱ་བ་མང་པོར་འགྱུར་ཏེ། དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཁྱོད་སྔར་སྨྲ་བ་ལྟར་བདག་ཅེས་བྱ་བ་ཐམས་ཅད་ལ་ཁྱབ་བོ་ཞེས་བྱ་བ་དེ་གལ་ཏེ་ཐམས་ཅད་ལ་ཁྱབ་པ་ཞིག་ཡིན་ན་ནི་སེམས་ཅན་ཐམས་ཅད་ཀྱི་འབྲས་བུ་ཡང་འཐུན་པའི་རིགས་ཏེ། ལྷ་སྦྱིན་མཐོང་བའི་དུས་ན་སངས་རྒྱས་སྦྱིན་ཡང་མཐོང་ལ། ལྷ་སྦྱིན་བྱས་པའི་དུས་ན་སངས་རྒྱས་སྦྱིན་ཡང་བྱས་པ་དང་། ལྷ་སྦྱིན་ཐོས་པའི་དུས་ན་སངས་རྒྱས་སྦྱིན་ཡང་ཐོས་ཏེ། ཆོས་ཐམས་ཅད་ཀྱང་དེ་ལྟ་བུར་འགྱུར་བས་ལྷ་སྦྱིན་གྱིས་མཐོང་བའི་དུས་ན་སངས་རྒྱས་སྦྱིན་གྱིས་མཐོང་བ་མ་ཡིན་ཏེ། དེ་བས་ན་བདག་ཅེས་བྱ་བ་དེ་ཐམས་ཅད་ལ་ཁྱབ་བོ་ཞེས་སྨྲ་བའི་མི་རིགས་སོ། །ཇི་སྟེ་མ་ཁྱབ་ན་དེ་ནི་མི་རྟག་པར་འགྱུར་རོ། །ས་ནིས་གསོལ་པ། གཽ་ཏ་མ་བདག་ཅེས་བགྱི་བ་ནི་སེམས་ཅན་ཐམས་ཅད་ལ་ཁྱབ་པ་ལགས་སོ། །ཆོས་དང་ཆོས་མ་ལགས་པ་ནི་ཐམས་ཅད་ལ་ཁྱབ་པ་མ་ལགས་ཏེ། དེ་བས་ན་སངས་རྒྱས་སྦྱིན་གྱིས་བྱས་པ་ཡང་གཞན་ལ། ལྷ་སྦྱིན་གྱིས་བྱས་པ་ཡང་གཞན་ནོ། །དེ་བས་ན་གཽ་ཏ་མ་སངས་རྒྱས་སྦྱིན་གྱིས་མཐོང་བའི་དུས་ན་ལྷ་སྦྱིན་གྱིས་ཀྱང་མཐོང་བའི་རིགས་སོ་ཞེའམ། སངས་རྒྱས་སྦྱིན་གྱིས་ཐོས་པའི་དུས་ན་ལྷ་སྦྱིན་གྱིས་ཀྱང་ཐོས་པའི་རིགས་སོ་ཞེས་གསུང་བའི་མི་རིགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་དང་ཆོས་མ་ཡིན་པ་ལས་ཀྱིས་བྱས་པ་ཡིན་ནམ། ས་ནིས་གསོལ་པ། གཽ་ཏ་མ་ལས་ཀྱིས་བགྱིས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་ཆོས་དང་ཆོས་མ་ཡིན་པ་ལས་ཀྱིས་
བྱས་པ་ཡིན་ན་ལྟ་དེ་ཉིད་འཐུན་པའི་ཆོས་ཡིན་ན་དེ་ལ་ཐ་དད་ཅེས་བྱར་རུང་ངམ། དེ་ཅིའི་ཕྱིར་ཞེ་ན། སངས་རྒྱས་སྦྱིན་གྱིས་བྱས་པའི་ལས་ཀྱི་ནང་ན་ལྷ་སྦྱིན་གྱི་བདག་ཅེས་བྱ་བ་ཡོད་པའི་རིགས་ལ། ལྷ་སྦྱིན་གྱིས་བྱས་པའི་ལས་ཀྱི་ནང་ན་ཡང་སངས་རྒྱས་སྦྱིན་གྱི་བདག་ཅེས་བྱ་བ་ཡང་ཡོད་པའི་རིགས་སོ། །དེ་བས་ན་སངས་རྒྱས་སྦྱིན་གྱིས་བྱས་པའི་དུས་ན་ལྷ་སྦྱིན་གྱིས་ཀྱང་བྱས་པར་འགྱུར་ཏེ། ཆོས་དང་ཆོས་མ་ཡིན་པ་ཡང་དེ་དང་འདྲ་བར་འགྱུར་རོ། །རིགས་ཀྱི་བུ་དེ་ལྟར་སེམས་ཅན་ཐམས་ཅད་ཀྱི་ཆོས་དང་ཆོས་མ་ཡིན་པ་དེ་ལྟ་བུ་ཞིག་ཡིན་ན་ནི་ལས་ཀྱི་འབྲས་བུ་རྣམ་པར་སྨིན་པ་ཡང་ཐ་དད་པའི་མི་རིགས་སོ། །རིགས་ཀྱི་བུ་ས་བོན་ལས་འབྲས་བུར་འགྱུར་ཏེ། ས་བོན་ནི་ནམ་དུ་ཡང་བདག་ནི་བྲམ་ཟེར་འགྱུར་བའི་འབྲས་བུ་འབའ་ཞིག་བྱའི། རྒྱལ་རིགས་དང་རྗེའུ་རིགས་དང་། དམངས་རིགས་ཀྱི་འབྲས་བུ་མི་འདོད་དོ་སྙམ་བྱེ་བྲག་མི་འབྱེད་དོ། །དེ་ཅིའི་ཕྱིར་ཞེ་ན། ས་བོན་ལས་འབྲས་བུར་འགྱུར་བ་ནི་རིགས་བཞི་པོའི་བར་དུ་གཅོད་པར་མི་འགྱུར་ལ། ཆོས་དང་ཆོས་མ་ཡིན་པ་ཡང་དེ་དང་འདྲ་སྟེ། བདག་ཅེས་བྱ་བ་དེ་སངས་རྒྱས་སྦྱིན་གྱིས་བྱས་པའི་འབྲས་བུར་འགྱུར་བར་ནི་བྱའི། ལྷ་སྦྱིན་གྱིས་བྱས་པའི་འབྲས་བུར་འགྱུར་བར་མི་བྱའོ། །ཞེའམ། ལྷ་སྦྱིན་གྱི་འབྲས་བུར་འགྱུར་བར་བྱའི། སངས་རྒྱས་སྦྱིན་གྱི་འབྲས་བུར་འགྱུར་བར་མི་བྱའི་སྙམ་བྱེ་བྲག་མི་འབྱེད་དོ། །དེ་ཅིའི་ཕྱིར་ཞེ་ན། ལས་མཉམ་པའི་ཕྱིར་རོ། །ས་ནིས་གསོལ་པ། གཽ་ཏ་མ་དཔེར་ན་ཁང་པ་གཅིག་གི་ནང་དུ་མེ་མར་ཁ་བརྒྱ་སྟོང་བུས་ན་མེ་མར་སྙིང་པོ་ཐ་དད་མོད་ཀྱི་སྣང་བ་ལ་ཁྱད་པར་མ་མཆིས་སོ། །མེ་མར་གྱི་སྙིང་པོ་ཐ་དད་པ་ནི་ཆོས་དང་ཆོས་མ་ཡིན་པའི་དཔེའོ། །སྣང་བར་བགྱིད་པ་ལ་ཁྱད་པར་མ་མཆིས་པ་ནི་སེམས་ཅན་ཐམས་ཅད་ཀྱི་བདག་ཅེས་བགྱི་བའི་དཔེའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྨྲ་བ་ལྟར་མེ་མར་གྱི་སྣང་བ་བདག་ཅེས་བྱ་བའི་དཔེ་ཡིན་ནོ་ཞེས་བྱ་བ་དེ་མི་རུང་ངོ་། །དེ་ཅིའི་ཕྱིར་ཞེ་ན། ཁང་པ་ཡང་གཞན་ལ་མེ་མར་ཡང་གཞན་ཏེ། མེ་མར་གྱི་སྣང་བ་མེ་མར་གྱི་སྙིང་པོ་ལ་ཡང་ཡོད་ལ། ཁང་པ་ལ་ཡང་ཡོད་པར་འགྱུར་རོ། །ཁྱོད་སྨྲ་བ་ལྟར་བདག་ཅེས་བྱ་བ་དེ་དེ་ལྟ་བུ་ཞིག་
ཡིན་ན་ནི་ཆོས་དང་ཆོས་མ་ཡིན་པ་གཉིས་ཀ་ལ་ཡང་བདག་ཅེས་བྱ་བ་ཡོད་པའི་རིགས་ལ། བདག་ཅེས་བྱ་བའི་ནང་ན་ཡང་ཆོས་དང་ཆོས་མ་ཡིན་པ་ཡོད་པའི་རིགས་སོ། །ཇི་སྟེ་ཆོས་དང་ཆོས་མ་ཡིན་པ་ལ་བདག་ཅེས་བྱ་བ་མེད་ན་ནི་ཐམས་ཅད་ལ་ཁྱབ་ཅེས་བྱ་བ་ཡང་མི་རུང་ངོ་། །ཇི་སྟེ་གཉིས་ཀ་ལ་ཡོད་པ་ཞིག་ཡིན་ན་ནི་མེ་མར་གྱི་སྙིང་པོ་དང་སྣང་བ་གཉིས་ཀ་དཔེར་བྱར་རུང་ངམ། རིགས་ཀྱི་བུ་ཁྱོད་ཀྱི་ཡིད་ལ་མེ་མར་གྱི་སྙིང་པོ་དང་སྣང་བ་ཡང་དག་པར་སོ་སོ་བར་སེམས་ན་ཅིའི་ཕྱིར་མེ་མར་གྱི་སྙིང་པོ་བཟང་པོའི་དུས་ན་སྣང་བ་ཡང་གསལ་ལ། མེ་མར་གྱི་སྙིང་པོ་ཟད་པའི་དུས་ན་སྣང་བ་མེད་པར་གྱུར། དེ་བས་ན་ཆོས་དང་ཆོས་མ་ཡིན་པའི་དཔེ་མེ་མར་གྱི་སྙིང་པོ་ལས་བླངས་པ་དང་། བདག་ཅེས་བྱ་བའི་དཔེ་སྣང་བ་ལ་ཁྱད་པར་མེད་པ་ལ་བླངས་པ་མི་རུང་ངོ་། །དེ་ཅིའི་ཕྱིར་ཞེ་ན། ཆོས་དང་ཆོས་མ་ཡིན་པ་དང་། བདག་ཅེས་བྱ་བ་དངོས་པོ་གསུམ་གཅིག་ཏུ་འགྱུར་བའི་ཕྱིར་རོ། །ས་ནིས་གསོལ་པ། གཽ་ཏ་མ་ཁྱོད་ཀྱིས་མེ་མར་ལས་དཔེ་བླངས་པ་དེ་བཀྲ་ཤིས་པ་མ་ལགས་སོ། །དེ་ཅིའི་སླད་དུ་ཞེ་ན། མེ་མར་ལས་དཔེ་བླངས་པ། བཀྲ་ཤིས་པ་ལགས་ན་བདག་གིས་སྔར་གསོལ་པ་ལགས་སོ། །བཀྲ་ཤིས་མིན་ན་ཅིའི་སླད་དུ་ཡང་དེ་སྐད་གསུང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་དཔེར་བརྗོད་པ་ནི་བཀྲ་ཤིས་པའམ། བཀྲ་ཤིས་པ་མ་ལགས་པའོ་ཞེས་མི་གསུང་གི །ཁྱོད་ཀྱི་ཡིད་དང་སྦྱར་ཏེ་མེ་མར་གྱི་སྙིང་པོའི་ཕ་རོལ་ན་སྣང་བ་ཡོད་དམ། སྙིང་པོ་ཉིད་སྣང་བ་ཡིན་ཞེས་དཔེར་བརྗོད་དེ། ཁྱོད་སེམས་མ་སྙོམས་པས་ཆོས་དང་ཆོས་མ་ཡིན་པའི་དཔེ་མར་མེའི་སྙིང་པོ་ལས་བླངས་པ་དང་བདག་ཅེས་བྱ་བའི་དཔེ་སྣང་བ་ལས་བླངས་པས། དེའི་ཕྱིར་སྙིང་པོ་ལས་སྣང་བ་དང་། སྙིང་པོའི་ཕ་རོལ་ན་སྣང་བ་ཡོད་པ་དང་། ཆོས་ལ་བདག་ཡོད་པ་དང་། བདག་ལ་ཆོས་ཡོད་པ་དང་། ཆོས་མ་ཡིན་པ་བདག་ཅེས་པ་དང་། བདག་ཀྱང་ཆོས་མ་ཡིན་ཞེས་སྨྲ་བས་ཁྱོད་ཀྱི་མཐའ་གཅིག་ནི་འདོད་ལ། མཐའ་གཅིག་ནི་མི་འདོད་པ་མི་རུང་སྟེ། དེ་བས་ན་དཔེ་དེ་ནི་ཁྱོད་ལ་བཀྲ་ཤིས་པ་མ་ཡིན་ནོ། །དེ་བས་ན་ངས་ཁྱོད་ལ་ཕྱིར་བསྟན་པས་རིགས་ཀྱི་བུ་དཔེ་དེ་ནི་དཔེར་མི་རུང་ངོ་། །དཔེར་མི་
རུང་བས་ན་ང་ལ་ནི་བཀྲ་ཤིས་པ་ཡིན་གྱི། ཁྱོད་ལ་ནི་བཀྲ་མི་ཤིས་སོ། །རིགས་ཀྱི་བུ་ཁྱོད་སྨྲ་བ་ལྟར་ན་ང་ལ་བཀྲ་མི་ཤིས་པས་ན། ཁྱོད་ལ་ཡང་བཀྲ་མི་ཤིས་སོ་སྙམ་སེམས་པ་མི་རུང་ངོ་། །དེ་ཅིའི་ཕྱིར་ཞེ་ན། འཇིག་རྟེན་གྱི་འགྲོ་བ་དག་བདག་གི་མཚོན་ཆ་བདག་ལ་གནོད་པ་དང་། བདག་གིས་བྱས་པ་ཕ་རོལ་པོས་སྤྱོད་པ་ཡོད་དེ། ཁྱོད་དཔེ་སྨྲ་བ་ཡང་དེ་དང་འདྲ་སྟེ། ང་ལ་ནི་བཀྲ་ཤིས་པ་ཡིན་གྱི། ཁྱོད་ལ་ནི་བཀྲ་ཤིས་པ་མ་ཡིན་ནོ། །ས་ནིས་གསོལ་པ། གཽ་ཏ་མས་སྔར་བདག་ལ་ཁྱོད་ནི་མ་སྙོམས་སོ་ཞེས་གསུངས་ན། ད་ནི་ཁྱོད་གསུང་བ་ཡང་མ་སྙོམས་སོ། །དེ་ཅིའི་སླད་དུ་ཞེ་ན། གཽ་ཏ་མས་བཀྲ་ཤིས་པ་ནི་བདག་གིར་མཛད། བཀྲ་མི་ཤིས་པ་ནི་ཁོ་བོ་ལ་བདར་བས་གཞུང་དེས་ན་ཡང་དག་པར་མ་སྙོམས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངའི་མ་སྙོམས་པས་ཁྱོད་ཀྱི་མ་སྙོམས་པ་བཅོམ་སྟེ། ཁྱོད་ནི་སྙོམས་ཀྱི་ང་ནི་མ་སྙོམས་པས་བཀྲ་ཤིས་པ་ཡིན་ནོ། །ངའི་མ་སྙོམས་པས་ཁྱོད་ཀྱི་མ་སྙོམས་པ་བཅོམ་ནས་ཁྱོད་སྙོམས་པར་གྱུར་པ་དེ་ཉིད་ང་ཡང་སྙོམས་པའོ། །དེ་ཅིའི་ཕྱིར་ཞེ་ན། འཕགས་པ་རྣམས་དང་འཐུན་པར་སྙོམས་པའི་ཕྱིར་རོ། །ས་ནིས་གསོལ་པ། གཽ་ཏ་མ་བདག་ནི་རྟག་ཏུ་སྙོམས་ན་ཅིའི་སླད་དུ་ཁྱོད་ཀྱིས་མ་སྙོམས་པ་བཅོམ་མོ་ཞེས་གསུང་། སེམས་ཅན་ཐམས་ཅད་ལ་བདག་ཅེས་བགྱི་བ་སྙོམས་པར་མཆིས་ན། ཅིའི་སླད་དུ་བདག་ལ་མ་སྙོམས་སོ་ཞེས་གསུང་། རིགས་ཀྱི་བུ་ཁྱོད་ཀྱིས་ཀྱང་སེམས་ཅན་དམྱལ་བར་ལྟུང་བ་དང་། ཡི་དགས་དང་། བྱོལ་སོང་གི་སྐྱེ་གནས་སུ་ལྟུང་བ་དང་། མི་དང་ལྷར་འགྱུར་རོ་ཞེས་སྨྲ། ཇི་སྟེ་བདག་ཅེས་བྱ་བ་རྒྱུད་ལྔ་ཁྱབ་པ་ཞིག་ཡིན་ན། ཅིའི་ཕྱིར་རྒྱུད་ལྔ་མྱོང་བར་འགྱུར་རོ་ཞེས་སྨྲ། ཁྱོད་ཀྱང་ཕ་མ་གཉིས་དང་ཕྲད་པ་ལས་བུར་འགྱུར་རོ་ཞེས་སྨྲ། ཅི་སྟེ་བུ་སྔ་ནས་ཡོད་པ་ཞིག་ཡིན་ན། ཅིའི་ཕྱིར་འདུས་ཤིང་ཕྲད་པ་ལས་བུར་འགྱུར་རོ་ཞེས་སྨྲ། དེ་བས་ན་མི་གཅིག་པུ་ལ་རྒྱུད་ལྔ་ཆར་གྱི་ལུས་ཡོད་དོ། །ཇི་སྟེ་རྒྱུད་ལྔར་སྔ་ནས་ལུས་ཡོད་པ་ཞིག་ཡིན་ན། ཅིའི་ཕྱིར་ལུས་ཀྱི་ཕྱིར་ལས་བྱེད་དགོས་པར་འགྱུར། དེ་བས་ན་མ་སྙོམས་ན་ཡིན་ནོ། །རིགས་ཀྱི་བུ་ཁྱོད་ཀྱི་ཡིད་ལ་བདག་ཅེས་བྱ་བ་བྱེད་པ་པོ་ཡིན་ནོ་ཞེས་བྱ་
བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཇི་སྟེ་བདག་ཅེས་བྱ་བ་བྱེད་པ་པོ་ཡིན་ན། ཅིའི་ཕྱིར་སྡུག་བསྔལ་བར་འགྱུར་བ་བདག་གིས་བྱེད་ཅིང་སོ་སོའི་སྐྱེ་བོ་དག་ཡང་དག་པར་སྡུག་བསྔལ་མྱོང་བར་བྱེད། དེ་བས་ན་བདག་ཅེས་བྱ་བ་ནི་བྱེད་པ་པོ་མ་ཡིན་པར་རིག་པར་བྱའོ། །ཇི་སྟེ་སྡུག་བསྔལ་བདག་གིས་བྱས་པ་ཡིན་ལ། རྒྱུ་ལས་མ་སྐྱེས་སོ་ཞེས་སྨྲ་ན་ཆོས་ཐམས་ཅད་ཀྱང་དེ་དང་འདྲ་སྟེ། རྒྱུ་ལས་མ་སྐྱེས་པ་ཡིན་ན། ཅིའི་ཕྱིར་བདག་ལ་བྱེད་པ་པོ་ཡིན་ནོ་ཞེས་སྨྲ། རིགས་ཀྱི་བུ་སེམས་ཅན་རྣམས་ཀྱི་སྡུག་བསྔལ་དང་བདེ་བ་ནི་ཡང་དག་པར་རྒྱུ་དང་རྐྱེན་ལས་གྱུར་ཏོ། །དེ་ལྟར་སྡུག་བསྔལ་བ་དང་བདེ་བ་ནི་མྱ་ངན་དང་དགའ་བ་བྱེད་པར་གྱུར་པས་མྱ་ངན་གྱི་དུས་ན་དགའ་བ་མེད་ལ། དགའ་བའི་དུས་ན་མྱ་ངན་མེད་དེ། བར་འགའ་ནི་དགའ། བར་འགའ་ནི་མྱ་ངན་བྱེད་པ་ཡིན་ན། མཁས་པ་ཤེས་རབ་ཅན་གྱིས་ཅིའི་ཕྱིར་རྟག་པ་ཡིན་ཞེས་སྨྲ། རིགས་ཀྱི་བུ་ཁྱོད་སྨྲ་བའི་བདག་ཅེས་བྱ་བ་རྟག་པ་ཡིན་ནོ་ཞེ་ན། ཅི་སྟེ་རྟག་པ་ཞིག་ཡིན་ན། ཅིའི་ཕྱིར་དུས་རྣམ་པ་བཅུར་མི་འདྲ་ཞིང་ཐ་དད་པར་འགྱུར། རྟག་པའི་ཆོས་ནི་ཐོག་མ་ནུར་ནུར་པོའི་དུས་ནས་རྒས་པའི་དུས་ཀྱི་བར་དུ་ཡོད་པའི་མི་རིགས་སོ། །ནམ་མཁའ་ནི་རྟག་པའི་ཆོས་ཡིན་ཏེ། དེ་ལ་དུས་གཅིག་ཀྱང་མེད་ན་དུས་བཅུ་ཡོད་པ་ལྟ་སྨོས་ཀྱང་ཅི་དགོས། རིགས་ཀྱི་བུ་བདག་ཅེས་བྱ་བ་ནི་ནུར་ནུར་པོའི་དུས་མ་ཡིན་པ་ནས་རྒས་པའི་དུས་ཀྱི་བར་དུ་མ་ཡིན་ན། ཅིའི་ཕྱིར་དུས་རྣམ་པ་བཅུར་མི་འཐུན་ཏེ། ཐ་དད་པ་ཡིན་ནོ་ཞེས་སྨྲ། རིགས་ཀྱི་བུ་ཇི་སྟེ་བདག་ཅེས་བྱ་བ་བྱེད་པ་པོ་ཡིན་ན་ནི་བདག་ཅེས་བྱ་བ་ལ་དར་བའི་དུས་དང་། རྒུད་པའི་དུས་ཡོད་དེ། སེམས་ཅན་ལ་ཡང་དར་བའི་དུས་དང་། རྒུད་པའི་དུས་ཡོད་དོ། །ཇི་སྟེ་བདག་ཅེས་བྱ་བ་དེ་དེ་ལྟ་བུ་ཞིག་ཡིན་ན་ཅིའི་ཕྱིར་རྟག་ཅེས་བྱ། རིགས་ཀྱི་བུ་བདག་ཅེས་བྱ་བ་བྱེད་པ་པོ་ཡིན་ན། ཅིའི་ཕྱིར་མིར་འདྲ་བ་ལ་དབང་པོ་རྣོན་པོ་དང་། དབང་པོ་རྟུལ་པོ་ཡོད་པར་འགྱུར། རིགས་ཀྱི་བུ་ཇི་སྟེ་བདག་ཅེས་བྱ་བ་བྱེད་པ་པོ་ཡིན་ན། བདག་ཅེས་བྱ་བས་ལུས་ཀྱི་ལས་དང་། ངག་གི་ལས་ཀྱང་བྱེད་པར་འགྱུར་རོ། །ཇི་སྟེ་ངག་གི་ལས་ཀྱང་བདག་ཅེས་བྱ་བས་བྱས་པ་ཡིན་ན། ཅིའི་ཕྱིར་ངག་གིས་
བདག་མེད་དོ་ཞེས་སྨྲ་ཞིང་ཅིའི་ཕྱིར་ཡོད་དམ་མེད་ཅེས་ཐེ་ཙོམ་དུ་གྱུར། རིགས་ཀྱི་བུ་ཁྱོད་ཀྱི་ཡིད་ལ་མིག་གི་ཕ་རོལ་ན་མཐོང་བ་ཡོད་དོ་སྙམ་སྨྲ་ན་ཡང་མི་རུང་ངོ་། །དེ་ཅིའི་ཕྱིར་ཞེ་ན། གལ་ཏེ་མིག་གི་ཕ་རོལ་ན་མཐོང་བ་གཞན་ཞིག་ཡོད་ན་མིག་འདི་ཡང་དགོས་པ་མེད་པར་འགྱུར་ཏེ། ལུས་ཀྱི་དབང་པོའི་བར་དུ་དེ་དང་འདྲ་བར་འགྱུར་ཏེ། ཅི་ཁྱོད་ཀྱི་ཡིད་ལ་བདག་ཅེས་བྱ་བས་མཐོང་ཡང་མིག་གི་རྐྱེན་གྱིས་མཐོང་ངོ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། དཔེར་ན་མི་ཞིག་མེ་ཏོག་སུ་མ་ནས་གྲོང་ཁྱེར་ཆེན་པོ་ཚིག་གོ །ཇི་ལྟར་ཚིག་ཅེ་ན། མེའི་རྐྱེན་གྱིས་ཚིག་གོ་ཞེས་སྨྲ་བ་ལྟར། ཁྱོད་ཀྱི་བདག་ཅེས་བྱ་བས་མཐོང་ངོ་ཞེས་སྨྲ་བ་ཡང་དེ་དང་འདྲའོ། །ས་ནིས་གསོལ་པ། གཽ་ཏ་མ་དཔེར་ན་ཟོར་བ་ཐོགས་ཏེ་རྩྭ་རྔ་བ་དང་འདྲ་བ་སྟེ། བདག་ཀྱང་དབང་པོ་ལྔའི་རྐྱེན་གྱིས་མཐོང་བ་དང་ཐོས་པ་དང་། རེག་པའི་བར་དུའོ། །རིགས་ཀྱི་བུ་ཟོར་བ་དང་མི་སོ་སོ་བས་དེ་ཅིའི་ཕྱིར་ཟོར་བ་ཐོགས་ནས་བྱེད་པ་ཡོད་དོ། །དབང་པོའི་ཕ་རོལ་ན་བདག་ཅེས་བྱ་བ་གཞན་མེད་ན། ཅིའི་ཕྱིར་བདག་ཅེས་བྱ་བ་དབང་པོའི་རྐྱེན་གྱིས་བྱ་བ་ཡོད་དོ་ཞེས་སྨྲ། རིགས་ཀྱི་བུ་ཅི་ཁྱོད་ཀྱི་ཡིད་ལ་ཟོར་བ་ཐོགས་ནས་རྔ་བར་འགྱུར་ཏེ། བདག་ཅེས་བྱ་བ་ཡང་དེ་དང་འདྲའོ་ཞེ་ན། བདག་ཅེས་བྱ་བ་ལ་ལག་པ་ཡོད་དམ། འོན་ཏེ་ལག་པ་མེད་པ་ཡིན། ཇི་སྟེ་ལག་པ་ཡོད་ན་ཅིའི་ཕྱིར་བདག་གིས་ཟོར་བ་མི་ཐོགས། ཇི་སྟེ་ལག་པ་མེད་ན་ཅིའི་ཕྱིར་བདག་ཅེས་བྱ་བ་བྱེད་པ་པོ་ཡིན་ནོ་ཞེས་སྨྲ། རིགས་ཀྱི་བུ་རྩྭ་རྔ་བ་ནི་ཟོར་བ་ཡིན་ཏེ། བདག་མ་ཡིན། མི་མ་ཡིན་ནོ། །ཇི་སྟེ་བདག་དང་མི་མ་ཡིན་ན། ཟོར་བ་ཡང་མི་དགོས་པར་འགྱུར་རོ། །རིགས་ཀྱི་བུ་མི་ལ་ལས་རྣམ་པ་གཉིས་ཏེ། རྩྭ་ཐོགས་པ་དང་། ཟོར་བ་ཐོགས་པའོ། །ཟོར་བ་ཐོགས་པ་ནི་གཅོད་པའི་ལས་འབའ་ཞིག་བྱེད་དེ། སེམས་ཅན་གྱིས་ཆོས་མཐོང་བ་ཡང་དེ་དང་འདྲ་སྟེ། མིག་གིས་གཟུགས་མཐོང་བ་ཡང་འདུས་ཤིང་ཚོགས་པ་ལས་འབྱུང་ངོ་། །ཇི་སྟེ་རྒྱུ་དང་རྐྱེན་འདུས་པ་ལས་མཐོང་ན་མཁས་པ་ཤེས་རབ་ཅན་གྱིས་བདག་ཡོད་ཅེས་ཅིའི་ཕྱིར་སྨྲ། རིགས་ཀྱི་བུ་ཅི་ཁྱོད་ཀྱི་ཡིད་ལ་ལུས་ཀྱིས་བྱས་ནས་བདག་ཅེས་བྱ་བས་མྱོང་བར་འགྱུར་རོ་སྙམ་སེམས་ན་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། འཇིག་
རྟེན་ན་ལྷ་སྦྱིན་གྱིས་ལས་བྱས་པ་ལ་སངས་རྒྱས་སྦྱིན་གྱིས་རྣམ་པར་སྨིན་པ་མྱོང་བར་མ་མཐོང་ངོ་། །ཇི་སྟེ་ལུས་ཀྱིས་བྱས་པ་མ་ཡིན་ལ། བདག་ཅེས་བྱ་བ་རྐྱེན་གྱིས་དབང་གིས་མྱོང་བ་མ་ཡིན་ནོ་ཞེས་སྨྲ་ན་ཁྱོད་ལ་སོགས་པ་ཅིའི་ཕྱིར་རྒྱུ་དང་རྐྱེན་ལས་རྣམ་པར་གྲོལ་བ་ཚོལ། ཁྱོད་ཀྱི་ལུས་སྔ་ནས་ཡོད་ལ། རྒྱུ་དང་རྐྱེན་ལས་བྱུང་བ་མ་ཡིན་ན་རྣམ་པར་གྲོལ་ནས་ཀྱང་རྒྱུ་དང་རྐྱེན་མི་དགོས་པར་ལུས་ཡང་སྐྱེ་བར་འགྱུར་རོ། །ལུས་ཇི་ལྟ་བ་བཞིན་དུ་ཉོན་མོངས་པ་ཐམས་ཅད་ཀྱང་དེ་དང་འདྲའོ། །ས་ནིས་གསོལ་པ། གཽ་ཏ་མ་བདག་ཅེས་བགྱི་བ་ལ་རྣམ་པ་གཉིས་ཏེ། ཤེས་པ་དང་བཅས་པ་དང་ཤེས་པ་མེད་པའོ། །ཤེས་པ་མེད་པའི་བདག་གིས་ནི་ལུས་ཐོབ་པར་བགྱིད་དོ། །ཤེས་པ་དང་བཅས་པའི་བདག་གིས་ནི་ལུས་སྤོང་བར་བགྱིད་དོ། །དཔེར་ན་རྫ་མ་སོ་མ་བཏང་བ་བསྲེགས་ན་ཁ་དོག་རྙིང་པ་མ་མཆིས་པར་འགྱུར་ཏེ། དེ་སླར་སྐྱེ་མི་སྲིད་དོ། །མཁས་པ་ཤེས་རབ་ཅན་གྱི་ཉོན་མོངས་པ་ཡང་དེ་དང་འདྲ་སྟེ་མ་མཆིས་པར་བགྱིས་པའི་འོག་ཏུ་ནམ་དུ་ཡང་སླར་སྐྱེ་མི་སྲིད་དོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤེས་པ་ཞེས་བྱ་བ་ཡེ་ཤེས་ཀྱིས་ཤེས་སམ། བདག་ཅེས་བྱ་བས་ཤེས། ཇི་སྟེ་ཡེ་ཤེས་ཀྱིས་ཤེས་པ་ཞིག་ཡིན་ན། ཅིའི་ཕྱིར་བདག་གིས་ཤེས་སོ་ཞེས་སྨྲ། ཇི་སྟེ་བདག་གིས་ཤེས་པ་ཞིག་ཡིན་ན། ཅིའི་ཕྱིར་ཐབས་མཁས་པས་ཡེ་ཤེས་ཚོལ་དགོས་པར་འགྱུར། ཅི་ཁྱོད་ཀྱི་ཡིད་ལ་བདག་ཅེས་བྱ་བས་ཡེ་ཤེས་ཀྱི་དབང་གིས་ཤེས་སོ་ཞེས་སྨྲ་ན་ཡང་མེ་ཏོག་གི་དཔེ་མི་རུང་བ་དང་འདྲའོ། །རིགས་ཀྱི་བུ་དཔེར་ན་ཤིང་ཚེར་མ་ཅན་ཡང་རང་བཞིན་གྱིས་འཛུག་པ་ཡིན་གྱི། ཤིང་གི་ཚེར་མ་ཐོགས་ཏེ་འཛུགས་སོ་ཞེས་བྱར་མི་རུང་ངོ་། །ཡེ་ཤེས་ཀྱང་དེ་དང་འདྲ་སྟེ། ཡེ་ཤེས་ཉིད་ཀྱིས་ཤེས་པ་ཡིན་ན། ཅིའི་ཕྱིར་བདག་གིས་ཡེ་ཤེས་ཐོགས་ཏེ་ཤེས་པར་བྱེད་དོ་ཞེས་སྨྲ། རིགས་ཀྱི་བུ་ཁྱོད་ཉིད་ཀྱི་ཆོས་ལས་བདག་ཅེས་བྱ་བ་རྣམ་པར་གྲོལ་ལོ་ཞེ་ན། ཤེས་པ་མེད་པའི་བདག་གིས་ཐོབ་བམ། ཤེས་པ་དང་བཅས་པའི་བདག་གིས་ཐོབ། ཇི་སྟེ་ཤེས་པ་མེད་པས་ཐོབ་ན་ད་དུང་ཉོན་མོངས་པ་དང་བཅས་པར་རིག་པར་བྱའོ། །ཇི་སྟེ་ཤེས་པ་དང་བཅས་པས་ཐོབ་ན། ད་དུང་ཡང་
ཤེས་པའི་དབང་པོ་ལྔ་དང་བཅས་པར་རིག་པར་བྱའོ། །དེ་ཅིའི་ཕྱིར་ཞེ་ན། དབང་པོ་ལྔ་ལས་ཤེས་པ་གཞན་མེད་དེ། ཇི་སྟེ་དབང་པོ་རྣམས་དང་བཅས་ན་ཅིའི་ཕྱིར་རྣམ་པར་གྲོལ་བ་ཞེས་བྱ། ཇི་སྟེ་བདག་ཅེས་བྱ་བ་དེ་རང་བཞིན་གྱིས་རྣམ་པར་དག་ལ་དབང་པོ་ལྔ་དང་བྲལ་ལོ་ཞེ་ན་ཡང་ཅིའི་ཕྱིར་ལམ་རྒྱུད་ལྔ་ཡང་ཁྱབ་བོ་ཞེས་སྨྲ་ཞིང་ཅིའི་ཕྱིར་རྣམ་པར་གྲོལ་བ་འདོད་པའི་ཕྱིར་དགེ་བའི་ཆོས་རྣམས་ལ་ནན་ཏན་བྱའོ་ཞེས་སྨྲ། རིགས་ཀྱི་བུ་དཔེར་ན་མི་ཞིག་ནམ་མཁའ་ལ་ཚེར་མ་འབྱིན་པ་དང་འདྲ་སྟེ། བདག་ཅེས་བྱ་བ་རྣམ་པར་དག་པ་ཡིན་ན། ཅིའི་ཕྱིར་ཉོན་མོངས་པ་ཐམས་ཅད་གཅད་པར་བྱའོ་ཞེས་སྨྲ། ཅི་ཁྱོད་ཀྱི་ཡིད་ལ་རྒྱུ་དང་རྐྱེན་མ་ཡིན་པ་ལས་རྣམ་པར་གྲོལ་ལོ་ཞེ་ན་ཡང་བྱོལ་སོང་ཐམས་ཅད་ཀྱང་ཅིའི་ཕྱིར་རྣམ་པར་མ་གྲོལ། ས་ནིས་གསོལ་པ། གཽ་ཏ་མ་གལ་ཏེ་བདག་ཅེས་བགྱི་བ་མ་མཆིས་ན་དྲན་པར་བགྱིད་པ་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་སྟེ་བདག་ཅེས་བྱ་བ་ཡོད་ན་ཅིའི་ཕྱིར་བརྗེད་པ་ཡོད་པར་འགྱུར། རིགས་ཀྱི་བུ་ཇི་སྟེ་དྲན་པ་ལ་བདག་ཅེས་བྱ་ན། ཅིའི་ཕྱིར་སྡིག་པ་དྲན་ཞིང་མི་དྲན་པ་དྲན་ལ། དྲན་པ་མི་དྲན། ས་ནིས་གསོལ་པ། གལ་ཏེ་བདག་ཅེས་བགྱི་བ་མ་མཆིས་ན་མཐོང་བ་ནི་སུ་ཐོས་པར་བགྱིད་པ་ནི་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ནང་གི་དབང་པོ་དྲུག་དང་། ཕྱི་རོལ་གྱི་ཡུལ་དྲུག་སྟེ། ཕྱི་ནང་ཕྲད་པ་ལས་རྣམ་པར་ཤེས་པ་དྲུག་སྐྱེའོ། །རྣམ་པར་ཤེས་པ་དྲུག་པོ་ནི་རྟེན་ཅིང་འབྲེལ་པ་ལས་མིང་དུ་བཏགས་སོ། །རིགས་ཀྱི་བུ་དཔེར་ན་མེ་གཅིག་པུ་ཡང་ཤིང་གི་དབང་གིས་མིང་ཁྱད་ཐོབ་སྟེ་ཤིང་གི་མེ་དང་། རྩྭའི་དབང་གིས་རྩྭའི་མེ་དང་། ཕུབ་མའི་དབང་གིས་ཕུབ་མའི་མེ་དང་། ལྕི་བའི་དབང་གིས་ལྕི་བའི་མེ་ཞེས་འདོགས་ཏེ། སེམས་ཅན་གྱི་ཡིད་ཀྱི་རྣམ་པར་ཤེས་པ་ཡང་དེ་དང་འདྲ་སྟེ། མིག་དང་གཟུགས་དང་། སྣང་བ་དང་། འདོད་པའི་དབང་གིས་མིག་གི་རྣམ་པར་ཤེས་པ་ཞེས་བྱའོ། །རིགས་ཀྱི་བུ་དེ་ལྟར་མིག་གི་རྣམ་པར་ཤེས་པ་དེ་ནི་མིག་གི་ནང་ན་མེད་པ་ནས་འདོད་པའི་བར་དུ་མེད་དེ། རྐྱེན་བཞི་ཕྲད་པ་ལས་རྣམ་པར་ཤེས་པ་སྐྱེ་སྟེ། ཡིད་ཀྱི་རྣམ་པར་ཤེས་པའི་བར་དུ་ཡང་
དེ་བཞིན་དུ་རིག་པར་བྱའོ། །དེ་ལྟར་རྟེན་ཅིང་འབྲེལ་ཏེ་འབྱུང་བ་འདུས་པ་ལས་སྐྱེ་བས་ན། མཁས་པ་ཤེས་རབ་ཅན་ནི་མཐོང་བ་དག་ལ་བདག་ཅེས་མི་སྨྲ་བ་ནས། རེག་བྱའི་བར་དུ་ཡང་བདག་ཅེས་མི་སྨྲའོ། །རིགས་ཀྱི་བུ་དེ་བས་ན་ངས་ནི་མིག་གི་རྣམ་པར་ཤེས་པ་ནས། ཡིད་ཀྱི་རྣམ་པར་ཤེས་པའི་བར་དུ་ཆོས་ཐམས་ཅད་སྒྱུ་མ་ལྟ་བུའོ་ཞེས་གསུངས་སོ། །ཇི་ལྟར་སྒྱུ་མ་དང་འདྲ་ཞེ་ན། སྔོན་མེད་པ་ལས་ད་ཡོད་དེ། ཡོད་ནས་ཀྱང་མེད་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་མར་དང་། བག་ཕྱེ་དང་། སྦྲང་རྩི་དང་། བཅའ་ལྒ་དང་། པི་པི་ལིང་དང་། ན་ལེ་ཤམ་དང་། དགུན་འབྲུ་དང་། བལ་པོ་སེའུ་དང་། འུ་སུའི་འབྲས་བུ་ལ་སོགས་པ་བསྡུས་ན་ལ་དུ་ཞེས་བྱའོ། །བསྡུས་པ་དེ་དག་མ་གཏོགས་པར་ལ་དུ་ཞེས་བྱ་བ་གུད་ན་མེད་དོ། །ཕྱི་ནང་གི་སྐྱེ་མཆེད་དྲུག་ལ། སེམས་ཅན་དང་། བདག་དང་། གང་ཟག་དང་། སྐྱེས་བུ་ཞེས་བྱའོ། །ཕྱི་ནང་གི་སྐྱེ་མཆེད་མ་གཏོགས་པར་ལོགས་ཤིག་ན་སེམས་ཅན་དང་། བདག་དང་། གང་ཟག་དང་། སྐྱེས་བུ་ཞེས་བྱ་བ་མེད་དོ། །ས་ནིས་གསོལ་པ། གཽ་ཏ་མ་བདག་ཅེས་བགྱི་བ་མ་མཆིས་ན། ཅིའི་སླད་དུ་བདག་མཐོང་། བདག་ཐོས། བདག་སྡུག་བསྔལ། བདག་བདེ། བདག་དགའ། བདག་མྱ་ངན་བྱེད་ཅེས་བརྗོད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཇི་སྟེ་བདག་གིས་མཐོང་། བདག་གིས་ཐོས་པ་ལ་བདག་ཅེས་བྱ་ན། ཅིའི་ཕྱིར་འཇིག་རྟེན་ན་ཁྱོད་ཀྱིས་ཉེས་པ་བྱ་བས་བདག་གིས་མ་མཐོང་ངོ་། །མ་ཐོས་སོ་ཞེས་བརྗོད། རིགས་ཀྱི་བུ་འདི་ལྟ་སྟེ་དཔེར་ན་ཚོགས་བཞི་འདུས་ན་དམག་ཅེས་བྱ་སྟེ། དེ་ལྟར་ཚོགས་བཞི་པོ་ཡང་གཅིག་ཅེས་བྱར་མི་རུང་སྟེ། འོན་ཀྱང་ངའི་དམག་དཔའོ། །ངའི་དམག་ཕ་རོལ་པོ་བས་རྒྱལ་ལོ་ཞེས་བརྗོད་དོ། །ཕྱི་ནང་གི་སྐྱེ་མཆེད་འདུས་ནས་བྱེད་པ་ཡང་དེ་དང་འདྲ་སྟེ། གཅིག་མ་ཡིན་མོད་ཀྱི་བདག་གིས་བྱས་སོ། ། བདག་གིས་མྱོང་ངོ་། །བདག་གིས་མཐོང་ངོ་། །བདག་གིས་ཐོས་སོ། །བདག་སྡུག་བསྔལ་ལོ། །བདག་བདེའོ་ཞེས་བརྗོད་དོ། །ས་ནིས་གསོལ་པ། གཽ་ཏ་མ་ཁྱོད་གསུང་བ་ལྟར་ཕྱི་ནང་འདུས་སོ་ཞེས་བགྱི་བ་བདག་གིས་བྱས། བདག་གིས་མྱོང་ངོ་ཞེས་
བརྗོད་ཅིང་སྨྲ་བ་སུ་ལགས། བཅོམ་ལྡན་འདས་ཀྱིས་བཀའ་སྩལ་པ། སྲེད་པ་དང་མ་རིག་པའི་རྐྱེན་གྱིས་ལས་སྐྱེས་སོ། །ལས་ལས་སྲེད་པ་སྐྱེས་སོ། །སྲེད་པ་ལས་ཚད་མེད་པའི་སེམས་ལས་བྱུང་བ་སྐྱེས་སོ། །སེམས་ཀྱིས་རྣམ་པར་རྟོག་པ་བསྐྱེད་དོ། །རྣམ་པར་རྟོག་པས་རླུང་བསྐྱེད་དོ། །རླུང་སེམས་ལ་རེག་ནས་དཀན་དང་། ལྕེ་དང་། མཆུ་དང་། སེམས་ཅན་གྱི་འདུ་ཤེས་ཕྱིན་ཅི་ལོག་ལས་སྒྲ་བྱུང་བས་བདག་གིས་བྱས། བདག་གིས་མྱོང་། བདག་གིས་མཐོང་། བདག་གིས་ཐོས་སོ་ཞེས་སྨྲའོ། །རིགས་ཀྱི་བུ་དཔེར་ན་རྒྱལ་མཚན་གྱི་རྩེ་མོ་ལ་དྲིལ་བུ་བཏགས་ན་རླུང་གི་དབང་གིས་སྒྲ་འབྱུང་ངོ་། །རླུང་ཆེ་ན་སྒྲ་ཡང་ཆེ། རླུང་ཆུང་ན་སྒྲ་ཡང་ཆུང་སྟེ་བྱེད་པ་ནི་མེད་དོ། །རིགས་ཀྱི་བུ་འདི་ལྟ་སྟེ་དཔེར་ན་ལྕགས་བསྲེགས་པ་ཆུའི་ནང་དུ་བཅུག་ན་སྒྲ་རྣམ་པ་སྣ་ཚོགས་འབྱུང་ངོ་། །དེ་ལ་ཡང་དག་པར་ན་བྱེད་པ་ཞེས་བྱ་བ་མེད་དོ། །རིགས་ཀྱི་བུ་བུས་པ་མ་རབས་ཀྱིས་ནི་དངོས་པོ་འདི་ལྟ་བུ་དག་རྣམ་པར་རྟོག་ཀྱང་བྱེ་བྲག་མི་ཕྱེད་པས། བདག་དང་། བདག་གི་བ་དང་། བདག་གིས་བྱས་པ་དང་། བདག་གིས་མྱོང་ངོ་ཞེས་སྨྲའོ། །ས་ནིས་གསོལ་པ། གཽ་ཏ་མ་བདག་དང་བདག་གི་བ་མཆིས་ན། ཅིའི་སླད་དུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མ་མཆིས་སོ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ནི་ཕྱི་ནང་གི་སྐྱེ་མཆེད་དྲུག་དང་། རྣམ་པར་ཤེས་པ་དྲུག་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པའོ་ཞེས་མ་གསུངས་ཀྱི། ངས་ནི་ཕྱི་ནང་གི་སྐྱེ་མཆེད་དྲུག་དང་། རྣམ་པར་ཤེས་པ་དྲུག་འགགས་པ་ལ་རྟག་པ་ཞེས་བྱའོ། །དེ་ལྟར་རྟག་པས་ན་བདག་ཅེས་བྱའོ། །རྟག་པ་དང་བདག་ཡིན་པའི་ཕྱིར་བདེ་བ་ཞེས་བྱའོ། །རྟག་པ་དང་བདག་དང་བདེ་བའི་ཕྱིར་ཡོངས་སུ་དག་པ་ཞེས་བྱའོ། ། རིགས་ཀྱི་བུ་སོ་སོའི་སྐྱེ་བོ་དག་ནི་སྡུག་བསྔལ་མི་འདོད་དེ། སྡུག་བསྔལ་གྱི་རྒྱུར་གྱུར་པ་ཡོངས་སུ་བཅད་ནས་སྤོང་བའི་དབང་དུ་གྱུར་པས་བདག་ཅེས་བྱའོ། །དེ་བས་ན་ངས་ནི་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཞེས་བྱའོ་ཞེས་གསུངས་སོ། །ས་ནིས་གསོལ་པ། བཅོམ་ལྡན་འདས་ཐུགས་རྗེ་ཆེན་
པོས་བདག་ལ་བསྟན་དུ་གསོལ། བདག་གིས་ཇི་ལྟ་བགྱིས་ན་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འཇིག་རྟེན་དུ་བཅས་པ་ཐམས་ཅད་ནི་ཐོག་མ་མེད་པ་ནས་ང་རྒྱལ་ཆེན་པོ་དང་བཅས་ཏེ། ང་རྒྱལ་ཆེན་པོ་བསྐྱེད་པའི་ཕྱིར་ང་རྒྱལ་གྱི་རྒྱུར་འགྱུར་བ་དང་ང་རྒྱལ་གྱིས་ལས་སུ་འགྱུར་བ་བྱེད་དོ། །དེ་བས་ན་ང་རྒྱལ་གྱི་འབྲས་བུ་མངོན་པར་སྨིན་ཏེ། ཉོན་མོངས་པ་ཐམས་ཅད་ཡོངས་སུ་མ་སྤངས་པས་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་མ་ཐོབ་བོ། །གལ་ཏེ་སོ་སོའི་སྐྱེ་བོ་དག་ཉོན་མོངས་པ་ཐམས་ཅད་ཡོངས་སུ་སྤོང་བར་འདོད་ན། ང་རྒྱལ་ཡོངས་སུ་སྤང་བར་བྱའོ། །ས་ནིས་གསོལ་པ། བཅོམ་ལྡན་འདས་དེ་དེ་བཞིན་ཏེ། དེ་དེ་བཞིན་ནོ། །འཕགས་པའི་བཀའ་བཞིན་ཏེ་བདག་ལ་ང་རྒྱལ་མཆིས་པས་ང་རྒྱལ་གྱི་དབང་གིས་དེ་བཞིན་གཤེགས་པ་ཞེས་མ་སྨོས་ཏེ་གཽ་ཏ་མ་ཞེས་སྨྲས་ནས་ང་མ་ཁྱོད་ཀྱང་སྨྲས་སོ། །ད་ནི་བདག་གིས་ང་རྒྱལ་ཆེན་པོ་ཡོངས་སུ་སྤངས་ཏེ་དེ་བས་ན་ཡང་དག་པའི་སེམས་ཀྱིས་ཆོས་འཚལ་ན་ཇི་ལྟར་རྟག་པ་དང་བདེ་བ་དང་བདག་དང་། ཡོངས་སུ་དག་པ་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིན་ཏུ་བརྟགས་པར་ཉོན་ལ་ལེགས་པར་ཡིད་ལ་བྱོས་ཤིག་དང་། ཁྱོད་ལ་རྣམ་པར་བཀྲོལ་ཏེ་བཤད་པར་བྱའོ། །རིགས་ཀྱི་བུ་གལ་ཏེ་བདག་ཀྱང་མ་ཡིན། གཞན་ཡང་མ་ཡིན། སེམས་ཅན་ཡང་མ་ཡིན་ན། ཆོས་དེ་དག་ཡོངས་སུ་སྤོང་བར་འགྱུར་རོ། །ས་ནིས་གསོལ་པ། བཅོམ་ལྡན་འདས་བདག་གིས་ནི་རྟོགས་ཏེ། ཡང་དག་པའི་ཆོས་ཀྱི་མིག་ཀྱང་ཐོབ་བོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟ་བུར་ཤེས་ཤིང་རྟོགས་ན་ཡང་དག་པའི་ཆོས་ཀྱི་མིག་ཐོབ་བོ་ཞེས་སྨྲ། གསོལ་པ། བཅོམ་ལྡན་འདས་གཟུགས་ཞེས་བགྱི་བ་གཞན་མ་ལགས། བདག་མ་ལགས། སེམས་ཅན་མ་ལགས་པ་ནས་རྣམ་པར་ཤེས་པའི་བར་དུ་དེ་ལྟར་རྟོགས་པས་ཡང་དག་པའི་ཆོས་ཀྱི་མིག་ཐོབ་བོ། །བཅོམ་ལྡན་འདས་བདག་ནི་རབ་ཏུ་འབྱུང་ཞིང་ལམ་ལ་ནན་ཏན་བྱེད་པར་མོས་ན་གནང་བར་མཛད་དུ་གསོལ། བཅོམ་ལྡན་འདས་
ཀྱིས་ལེགས་པར་འོངས་སོ་ཞེས་བཀའ་སྩལ་པས། དགེ་སློང་དུ་གྱུར་ཏེ་དེ་ཉིད་དུ་ཡོངས་སུ་དག་པའི་ཚངས་པར་སྤྱོད་པ་དང་ལྡན་ཞིང་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །དེའི་ཚེ་མུ་སྟེགས་ཅན་དེ་དག་གི་ནང་ན་ཀུན་ཏུ་རྒྱུ་འོད་སྲུང་གི་རིགས་ཅན་ཞིག་འདི་སྐད་ཅེས་གསོལ་ཏོ། །གཽ་ཏ་མ་ལུས་ཉིད་སྲོག་ལགས་སམ། ལུས་དང་སྲོག་གཉིས་ཐ་དད་པ་ལགས། དེ་བཞིན་གཤེགས་པ་ཅང་མི་གསུང་བར་བཞུགས་སོ། །དེ་བཞིན་དུ་ལན་གཉིས་ལན་གསུམ་གྱི་བར་དུ་གསོལ་ཀྱང་ཅང་མི་གསུང་ངོ་། །ཀུན་ཏུ་རྒྱུས་ཡང་གསོལ་པ། གཽ་ཏ་མ་མི་ཞིག་ཚེ་འཕོས་ནས་ལུས་ཕྱི་མ་མ་བླངས་པའི་བར་དུ་ལུས་ཀྱང་ཐ་དད་ལ། སྲོག་ཀྱང་ཐ་དད་ཅེས་མི་བགྱིའམ། ཇི་སྟེ་ཐ་དད་པ་ཞིག་ལགས་ན། གཽ་ཏ་མ་ཅིའི་སླད་དུ་ཅང་མི་གསུང་བར་བཞུགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ནི་ལུས་དང་སྲོག་གཉིས་ཀ་རྟེན་ཅིང་འབྲེལ་ཏེ་འབྱུང་བ་ལས་སྐྱེས་ཏེ། རྟེན་ཅིང་འབྲེལ་ཏེ་འབྱུང་བ་མ་ཡིན་པ་ལས་མ་ཡིན་ཏེ། ལུས་དང་སྲོག་ཇི་ལྟ་བ་བཞིན་དུ་ཆོས་ཐམས་ཅད་ཀྱང་དེ་དང་འདྲ་བར་རིག་པར་བྱའོ། །ཀུན་ཏུ་རྒྱུས་ཡང་གསོལ་པ། གཽ་ཏ་མ་བདག་གིས་ནི་འཇིག་རྟེན་ན་ཆོས་ཁ་ཅིག་རྟེན་ཅིང་འབྲེལ་ཏེ་འབྱུང་བ་མ་ལགས་པར་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་འཇིག་རྟེན་གྱི་ཆོས་གང་དག་རྟེན་ཅིང་འབྲེལ་ཏེ་འབྱུང་བ་མ་ཡིན་པར་མཐོང་། ཀུན་ཏུ་རྒྱུས་གསོལ་པ། འདི་ལྟ་སྟེ་ཞུགས་ཆེན་པོ་ཤོར་བ་ན། མེ་ལྕེ་རླུང་གིས་བཏབ་ནས་གནས་གཞན་དག་ཀྱང་ཚིག་པར་འགྱུར་བ་དེ་རྟེན་ཅིང་འབྲེལ་ཏེ་འབྱུང་བ་མ་ལགས་པ་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ནི་མེ་དེ་ཡང་རྟེན་ཅིང་འབྲེལ་ཏེ་འབྱུང་བ་ལས་སྐྱེས་ཏེ། རྟེན་ཅིང་འབྲེལ་ཏེ་འབྱུང་བ་མ་ཡིན་པ་ལས་མ་ཡིན་ནོ། །ཀུན་ཏུ་རྒྱུས་གསོལ་པ། གཽ་ཏ་མ་མེ་ལྕེ་ཆད་དེ་ཚིག་པ་ནི་ཤིང་ངམ་མདག་མེ་ལས་བྱུང་བ་མ་ལགས་ན། ཅིའི་སླད་དུ་རྟེན་ཅིང་འབྲེལ་ཏེ་འབྱུང་བ་ལགས་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཤིང་དང་མདག་མེ་ནི་མེད་མོད་ཀྱི། འོན་ཀྱང་རླུང་གི་དབང་གིས་མེ་ལྕེ་ཆད་དོ། །རླུང་གི་རྒྱུ་དང་རྐྱེན་གྱིས་མེ་ལྕེ་མེད་པར་མ་གྱུར་ཏོ། །ཀུན་ཏུ་རྒྱུས་གསོལ་པ།
གཽ་ཏ་མ་མི་ཞིག་ཚེ་འཕོས་ནས་ལུས་ཕྱི་མ་མ་བླངས་ཀྱི་བར་དུ་ཚེ་ལེན་པའི་རྒྱུ་དང་རྐྱེན་དུ་གྱུར་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་རྒྱུ་མ་རིག་པ་དང་སྲེད་པ་ནི་དེའི་རྒྱུ་དེའི་རྐྱེན་དུ་འགྱུར་ཏེ། མ་རིག་པ་དང་སྲེད་པ་གཉིས་ཀྱི་རྒྱུ་དང་རྐྱེན་གྱི་དབང་གིས་འཚོ་བ་གནས་པར་འགྱུར་རོ། །རིགས་ཀྱི་བུ་རྒྱུ་དང་རྐྱེན་གྱི་ཕྱིར་ལུས་ཉིད་སྲོག་ཡིན་ལ་སྲོག་ཉིད་ཀྱང་ལུས་ཡིན་ནོ། །རྒྱུ་དང་རྐྱེན་གྱི་ཕྱིར་ལུས་ཀྱང་གཞན་ལ་སྲོག་ཀྱང་གཞན་ཏེ། མཁས་པ་ཤེས་རབ་ཅན་ནི་ཕྱོགས་གཅིག་ཏུ་ལུས་ཀྱང་ཐ་དད་ལ་སྲོག་ཀྱང་ཐ་དད་དོ་ཞེས་མི་སྨྲའོ། །ཀུན་དུ་རྒྱུས་གསོལ་པ། བཅོམ་ལྡན་འདས་བདག་ལ་རྣམ་པར་གྲོལ་ཞིང་བསྟན་ཏེ། རྒྱུ་དང་འབྲས་བུ་མངོན་པར་རྟོགས་པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་རྒྱུ་རྒྱུ་ཡང་ཕུང་པོ་ལྔ་ཡིན་ཏེ། འབྲས་བུ་ཡང་ཕུང་པོ་ལྔ་ཡིན་ནོ། །རིགས་ཀྱི་བུ་གལ་ཏེ་སེམས་ཅན་དག་མེ་མ་བུས་ན་དུད་པ་མེད་དོ། །ཀུན་དུ་རྒྱུས་གསོལ་པ། བཅོམ་ལྡན་འདས་བདག་གིས་ནི་འཚལ་ཏོ་རྟོགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟ་བུར་ཤེས་ཤིང་རྟོགས། གསོལ་པ། བཅོམ་ལྡན་འདས་ཞུགས་ཞེས་བགྱི་བ་ནི་ཉོན་མོངས་པ་སྟེ། སེམས་ཅན་དམྱལ་བ་དང་། ཡི་དགས་དང་བྱོལ་སོང་གི་སྐྱེ་གནས་དང་། ལྷ་དང་མིའི་གནས་སུ་ཤིན་ཏུ་འབར་བའོ། །དུད་པ་ཞེས་བགྱི་བ་ནི་ཉོན་མོངས་པའི་འབྲས་བུ་སྨིན་པ་སྟེ། མི་རྟག་པ་དང་མི་གཙང་བ་དང་ཤིན་ཏུ་བཙོག་པས་ན་དུད་པ་ཞེས་བགྱི་སྟེ། སེམས་ཅན་གང་ཉོན་མོངས་པ་མ་བྱས་ན་དེ་ལ་ཉོན་མོངས་པའི་རྣམ་པར་སྨིན་པའི་འབྲས་བུ་མ་མཆིས་ཏེ། དེ་བས་ན་དེ་བཞིན་གཤེགས་པས་མེ་མ་བུས་ན་དུད་པ་མེད་དོ་ཞེས་གསུངས་སོ། །བཅོམ་ལྡན་འདས་བདག་ནི་ཡང་དག་པར་ལྟ་བ་ལགས་ན། ཐུགས་བརྩེ་བའི་སླད་དུ་རབ་ཏུ་འབྱུང་བར་ཅི་གནང་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀཽཎྜི་ནྱ་ལ་འདི་སྐད་ཅེས་བཀའ་སྩལ་ཏོ། །ཀུན་དུ་རྒྱུ་འདི་རབ་ཏུ་ཕྱུང་ལ་བསྙེན་པར་རྫོགས་པར་གྱིས་ཤིག །དེ་ནས་ཀཽཎྜི་ནྱས་སངས་རྒྱས་ཀྱིས་བཀའ་སྩལ་པ་དེ་བཞིན་དུ་དགེ་སློང་
གི་དགེ་འདུན་ལ་དད་པ་གསོལ་ནས་རབ་ཏུ་ཕྱུང་སྟེ། བསྙེན་པར་རྫོགས་ནས་ཞག་ལྔ་ལོན་པ་དང་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །མུ་སྟེགས་ཅན་གྱི་འཁོར་གྱི་ནང་ན་གཞན་ཡང་ཀུན་དུ་རྒྱུ་པུ་ན་ཞེས་བྱ་བས་འདི་སྐད་ཅེས་གསོལ་ཏོ། །གཽ་ཏ་མ་ཁྱོད་ཀྱིས་འཇིག་རྟེན་ན་རྟག་པའི་ཆོས་གཟིགས་པས་རྟག་ཅེས་གསུང་ངམ། དེ་སྐད་ཅེས་གསུངས་པ་བདེན་ནམ་བརྫུན་ནམ། རྟག་གམ་མི་རྟག་གམ། རྟག་པ་དང་མི་རྟག་པ་ལགས་སམ། རྟག་པ་ཡང་མ་ཡིན་མི་རྟག་པ་ཡང་མ་ཡིན་པ་ལགས་སམ། མཐའ་མཆིས་སམ། མཐའ་མ་མཆིས་པ་ལགས་སམ། མཐའ་མཆིས་ཀྱང་མཆིས་ལ་མཐའ་མ་མཆིས་ཀྱང་མ་མཆིས་པ་ལགས་སམ། མཐའ་མཆིས་པ་ཡང་མ་ལགས་མཐའ་མ་མཆིས་པ་ཡང་མ་ལགས་སམ། ལུས་ཀྱང་ལགས་སྲོག་ཀྱང་ལགས་སམ། ལུས་དང་སྲོག་ཐ་དད་པ་ལགས་སམ། དེ་བཞིན་གཤེགས་པ་ཡོངས་སུ་མྱ་ངན་ལས་འདས་པ་འགྲོ་བ་ལྟ་བུའམ། འགྲོ་བ་ལྟ་བུ་མ་ལགས་སམ། འགྲོ་བ་ལྟ་བུ་ལགས་ཀྱང་ལགས་ལ་འགྲོ་བ་ལྟ་བུ་མ་ལགས་ཀྱང་མ་ལགས་སམ། འགྲོ་བ་ལྟ་བུ་ཡང་མ་ལགས་འགྲོ་བ་ལྟ་བུ་མ་ལགས་པ་ཡང་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། པུ་ན་ངས་ནི་འཇིག་རྟེན་ན་རྟག་པའམ། བདེན་པའམ་བརྫུན་པའམ་མི་རྟག་པའམ་རྟག་པའམ། རྟག་པ་ཡང་མ་ཡིན་མི་རྟག་པ་ཡང་མ་ཡིན་པའམ། མཐའ་ཡོད་པའམ་མཐའ་མེད་པའམ། མཐའ་ཡོད་པ་ཡང་ཡིན་མཐའ་མེད་པ་ཡང་ཡིན་པའམ། མཐའ་ཡོད་པ་ཡང་མ་ཡིན་མཐའ་མེད་པ་ཡང་མ་ཡིན་པའམ། ལུས་ཡིན་པའམ་སྲོག་ཡིན་པའམ་ལུས་དང་སྲོག་ཐ་དད་པའམ། དེ་བཞིན་གཤེགས་པ་མྱ་ངན་ལས་འདས་པ་འགྲོ་བ་ལྟ་བུའམ། མི་འགྲོ་བ་ལྟ་བུའམ་འགྲོ་བ་ལྟ་བུ་ཡང་མ་ཡིན་ལ་མི་འགྲོ་བ་ལྟ་བུ་ཡང་མ་ཡིན་པའམ། འགྲོ་བ་ལྟ་བུ་ཡང་མ་ཡིན་འགྲོ་བ་ལྟ་བུ་མ་ཡིན་པ་ཡང་མ་ཡིན་པར་མ་གསུངས་སོ། །པུ་ནས་གསོལ་པ། གཽ་ཏ་མ་སྐྱོན་ཅི་ཞིག་གཟིགས་ན་དེ་སྐད་ཅེས་མི་གསུང་། བཅོམ་ལྡན་འདས་ཀྱིས་བཀའ་སྩལ་པ། དེ་ལ་གང་ཞིག་འཇིག་རྟེན་ནི་རྟག་སྟེ་འདི་ནི་བདེན་གྱི། གཞན་ནི་བརྫུན་ནོ་ཞེས་སྨྲ་ན་དེ་ནི་ལྟ་བའོ། །ལྟ་བས་ལྟ་
བའི་གནས་ནི་འདུ་བྱེད་དུ་ལྟ་བས་ལྟ་བ། ཆགས་པར་ལྟ་བ་བཅིངས་པར་ལྟ་བ་སྡུག་བསྔལ་དུ་ལྟ་བ་ལེན་པར་ལྟ་བ་འཇིག་པར་ལྟ་བ་གདུང་བར་ལྟ་བའམ། ཀུན་ནས་དཀྲིས་པར་ལྟ་བ་ཞེས་བྱའོ། །པུ་ན་བྱིས་པ་སོ་སོའི་སྐྱེ་བོ་ནི་ལྟ་བས་ཀུན་དུ་དཀྲིས་པས་ན། སྐྱེ་བ་དང་། རྒ་བ་དང་ན་བ་དང་། འཆི་བ་དང་མ་བྲལ་ཏེ་རྒྱུད་དྲུག་ཏུ་འཁོར་ནས་སྡུག་བསྔལ་ཚད་མེད་པ་མྱོང་སྟེ། འགྲོ་བ་ལྟ་བུ་མ་ཡིན་པ་དང་། མི་འགྲོ་བ་ལྟ་བུ་མ་ཡིན་པའི་བར་དུ་དེ་བཞིན་དུ་རིག་པར་བྱའོ། །པུ་ན་ལྟ་བ་དེ་ལ་དེ་ལྟ་བུའི་སྐྱོན་ཡོད་པར་མཐོང་བས་དེ་བས་ན་མ་ཆགས་ཏེ་གཞན་ལ་ཡང་མི་སྟོན་ཏོ། །པུ་ནས་གསོལ་པ། གཽ་ཏ་མ་དེ་ལྟ་བུའི་སྐྱོན་གཟིགས་ཏེ་མ་ཆགས་མི་སྟོན་ན། གཽ་ཏ་མ་ད་ལྟ་ཅི་ལ་ཆགས་ཅི་ཞིག་སྟོན། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆགས་པར་ལྟ་བ་ནི་འཁོར་བའི་ཆོས་ཞེས་བྱའོ། །དེ་བཞིན་གཤེགས་པ་ནི་འཁོར་བའི་ཆོས་དང་བྲལ་བས་མ་ཆགས་པ་ཞེས་བྱའོ། །རིགས་ཀྱི་བུ་དེ་བཞིན་གཤེགས་པ་ནི་མཐོང་བ་དང་སྟོན་པ་ཞེས་བྱའི། ཆགས་པ་ཞེས་མི་བྱའོ། །པུ་ནས་གསོལ་པ། གཽ་ཏ་མ་ཇི་ལྟ་བུར་གཟིགས། ཇི་ལྟ་བུར་སྟོན། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ནི་སྡུག་བསྔལ་དང་། ཀུན་འབྱུང་བ་དང་། འགོག་པ་དང་ལམ་གསལ་བར་གཟིགས་ཏེ། དེ་བས་ན་འཕགས་པའི་བདེན་པ་བཞི་རྣམ་པར་ཕྱེ་སྟེ་སྟོན་ཏོ། །ངས་དེ་ལྟ་བུ་དག་གཟིགས་པས་ལྟ་བ་ཐམས་ཅད་དང་། སྲེད་པ་ཐམས་ཅད་དང་། འཐབ་པ་ཐམས་ཅད་དང་། ང་རྒྱལ་ཐམས་ཅད་ཡོངས་སུ་སྤངས་ཏེ། དེ་བས་ན་བདག་ནི་ཡོངས་སུ་དག་པའི་ཚངས་པར་སྤྱོད་པ་དང་ལྡན་ཞིང་བླ་ན་མེད་པའི་རབ་ཏུ་ཞི་བས་རྟག་པའི་སྐུ་ཐོབ་པར་གྱུར་ཏོ། །རྟག་པའི་སྐུ་འདི་ནི་ཤར་ཕྱོགས་དང་། ནུབ་ཕྱོགས་དང་། ལྷོ་ཕྱོགས་དང་། བྱང་ཕྱོགས་མ་ཡིན་ནོ། །པུ་ནས་གསོལ་པ། ཅིའི་རྒྱུ་ཅིའི་རྐྱེན་གྱིས་འདི་རྟག་པའི་སྐུ་ཤར་ཕྱོགས་དང་། ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་མ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ཁྱོད་ལ་ཅི་དང་ཅི་དྲིས་པ་དེ་དང་དེའི་ལན་ཡིད་བཞིན་དུ་སྨྲོས་ཤིག །རིགས་ཀྱི་བུ་འདི་ཁྱོད་ཀྱིས་ཡིད་ལ་ཇི་སྙམ་ཁྱོད་ཀྱི་མདུན་དུ་མེ་ཆེན་པོ་ཞིག་
བུས་ན་མེ་འབར་བའི་ཚེ་ཁྱོད་ཀྱང་འབར་བར་ཤེས་མོད། དེ་བཞིན་ནོ། །གཽ་ཏ་མ་མེ་ཤི་བའི་ཚེ་ཁྱོད་ཀྱང་ཤི་བར་ཤེས་མོད། དེ་བཞིན་ནོ། །པུ་ན་གལ་ཏེ་མི་ཞིག་གིས་ཁྱོད་ལ་མེའི་ཕུང་པོ་འདི་འབར་བ་གང་ནས་འོངས། ཤི་བ་ན་གར་སོང་ཞེས་འདྲི་ན་དེ་ལ་ཁྱོད་ཇི་སྐད་ཅེས་བྱ། པུ་ནས་གསོལ་པ། གཽ་ཏ་མ་གལ་ཏེ་དེ་སྐད་ཅེས་འདྲི་བ་ཞིག་མཆིས་ན་དེ་ལ་བདག་གིས་འདི་སྐད་ཅེས་བགྱིའོ། །མེ་འབར་བ་ནི་རྐྱེན་མང་པོ་ལ་ལྟོས་སོ། །རྐྱེན་རྙིང་པ་ནི་ཟད་རྐྱེན་གསར་གྱིས་མ་བསྣན་པས་ན་མེ་ཟད་པ་ཞེས་བགྱིའོ། །གལ་ཏེ་གཞན་ཡང་མེ་ཤི་ནས་གང་ཕྱོགས་སུ་སོང་ཞེས་འདྲི་ན། དེ་ལ་ཇི་སྐད་ཅེས་བྱ། གསོལ་པ། གཽ་ཏ་མ་དེ་ལ་བདག་གིས་རྐྱེན་ཟད་ནས་མེ་ཤི་ཡང་ཕྱོགས་སུ་སོང་བ་མ་མཆིས་སོ་ཞེས་བགྱིའོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་སྟེ། གལ་ཏེ་མི་རྟག་པའི་གཟུགས་ཡོད་པ་ནས་མི་རྟག་པའི་རྣམ་པར་ཤེས་པའི་བར་དུ་ཡོད་ན་སྲེད་པའི་རྐྱེན་གྱིས་འབར་རོ། །འབར་བ་ཞེས་བྱ་བ་ནི་སྲིད་པ་ཉི་ཤུ་རྩ་ལྔ་པོ་མྱོང་བའོ། །དེ་བས་ན་འབར་བའི་དུས་ན་མེ་འདི་ནི་ཤར་ཕྱོགས་སམ་། ནུབ་ཕྱོགས་སམ། ལྷོ་ཕྱོགས་སམ། བྱང་ཕྱོགས་ཞེས་བརྗོད་དུ་རུང་ངོ་། །ད་ལྟར་གྱི་སྲེད་པ་འགགས་ཏེ་སྲིད་པ་ཉི་ཤུ་རྩ་ལྔ་པོའི་རྣམ་པར་སྨིན་པའི་འབྲས་བུ་མི་འབར་ན་དེ་ལ་ནི་ཤར་ཕྱོགས་སམ། ལྷོ་དང་། ནུབ་དང་། བྱང་ཕྱོགས་ཞེས་བརྗོད་དུ་མེད་དོ། །རིགས་ཀྱི་བུ་དེ་བཞིན་གཤེགས་པ་ནི་མི་རྟག་པའི་གཟུགས་མེད་པ་ནས། མི་རྟག་པའི་རྣམ་པར་ཤེས་པའི་བར་དུ་མེད་དེ། དེ་བས་ན་སྐུ་ནི་རྟག་པ་ཡིན་ནོ། །གལ་ཏེ་སྐུ་རྟག་པ་ཡིན་ན། ཤར་ཕྱོགས་སམ། ལྷོའམ་། ནུབ་བམ། བྱང་ཕྱོགས་ཞེས་བརྗོད་དུ་མེད་དོ། །པུ་ནས་གསོལ་པ། བདག་གིས་དཔེ་ཞིག་གསོལ་བར་འཚལ་ན། དེ་བཞིན་གཤེགས་པས་གསན་པར་ཅི་གནང་། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །བསམས་པ་བཞིན་དུ་སྨྲོས་ཤིག །བཅོམ་ལྡན་འདས་དཔེར་ན་གྲོང་ཁྱེར་ཆེན་པོ་ཞིག་གི་ཕྱི་རོལ་ན་ཤིང་སཱ་ལའི་ཚལ་གྱི་ནང་ན་ཤིང་གཅིག་ཅིག་སྔར་སྐྱེས་ཏེ་ལོ་བརྒྱ་ལོན་ནོ། །དེའི་ཚེ་ན་ཚལ་གྱི་བདག་པོ་དེ་དུས་དུས་སུ་ཆུ་འཆུ་ཞིང་ལས་བགྱིད་དོ། །ཤིང་
དེའི་ཤུན་པ་རུལ་ན་ཤུན་པ་དང་། ལོ་མ་དང་ཡལ་ག་ཀུན་ས་ལ་ལྟུང་སྟེ། ནང་གི་སྙིང་པོ་འབའ་ཞིག་ལུས་སོ། །དེ་བཞིན་གཤེགས་པ་ཡང་དེ་དང་འདྲ་སྟེ། ཇི་ཙམ་དུ་རུལ་བར་གྱུར་པ་ཐམས་ཅད་ཟད་ནས་ཡང་དག་པའི་ཆོས་འབའ་ཞིག་ལུས་སོ། །བཅོམ་ལྡན་འདས་བདག་རབ་ཏུ་དབྱུང་བར་གསོལ་ལོ། །བཅོམ་ལྡན་འདས་ཀྱིས་ལེགས་པར་འོངས་སོ་ཞེས་བཀའ་སྩལ་ནས་དེ་མ་ཐག་ཏུ་དགེ་སློང་དུ་གྱུར་ཏེ་ཟག་པ་ཟད་ནས་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །གཞན་ཡང་ཀུན་དུ་རྒྱུ་རྣམ་པར་དག་པ་ཞེས་བྱ་བས་འདི་སྐད་ཅེས་གསོལ་ཏོ། །གཽ་ཏ་མ་སོ་སོའི་སྐྱེ་བོ་དག་ཆོས་གང་མ་རྟོགས་ན་འཇིག་རྟེན་རྟག་པ་དང་། མི་རྟག་པ་དང་། རྟག་པ་ཡང་ལགས་ལ་མི་རྟག་པ་ཡང་ལགས་པ་དང་། རྟག་པ་ཡང་མ་ལགས་ལ་མི་རྟག་པ་ཡང་མ་ལགས་པ་ནས། འགྲོ་བ་ལྟ་བུ་ཡང་མ་ལགས། མི་འགྲོ་བ་ཡང་མ་ལགས་པའི་བར་དུ་ལྟ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གཟུགས་མི་ཤེས་པ་ནས། རྣམ་པར་ཤེས་པའི་བར་དུ་མི་ཤེས་པས་ན་འཇིག་རྟེན་རྟག་པ་ནས། འགྲོ་བ་ལྟ་བུ་ཡང་མ་ཡིན། མི་འགྲོ་བ་ལྟ་བུ་ཡང་མ་ཡིན་པའི་བར་དུ་ལྟ་བར་གྱུར་ཏོ། །ཀུན་དུ་རྒྱུས་གསོལ་པ། གཽ་ཏ་མ་སེམས་ཅན་གྱིས་ཆོས་གང་དག་རྟོགས་ན་འཇིག་རྟེན་རྟག་པ་ནས། འགྲོ་བ་ལྟ་བུ་ཡང་མ་ཡིན། མི་འགྲོ་བ་ལྟ་བུ་ཡང་མ་ཡིན་པའི་བར་དུ་མི་ལྟ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གཟུགས་ཤེས་པ་ནས། རྣམ་པར་ཤེས་པའི་བར་དུ་ཤེས་ན། འཇིག་རྟེན་རྟག་པ་ནས། འགྲོ་བ་ལྟ་བུ་ཡང་མ་ཡིན། མི་འགྲོ་བ་ལྟ་བུ་ཡང་མ་ཡིན་པའི་བར་དུ་མི་ལྟ་བར་འགྱུར་རོ། །ཀུན་དུ་རྒྱུས་གསོལ་པ། བཅོམ་ལྡན་འདས་འཇིག་རྟེན་རྟག་པ་དང་མི་རྟག་པ་བདག་ལ་རྒྱས་པར་ཕྱེ་སྟེ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ཞིག་གིས་རྙིང་པ་ནི་སྤངས་ནས་ལས་གསར་མ་བྱས་ན་གང་ཟག་དེས་ནི་རྟག་པ་དང་མི་རྟག་པ་རྟོགས་པར་འགྱུར་རོ། །ཀུན་དུ་རྒྱུས་གསོལ་པ། བཅོམ་ལྡན་འདས་བདག་གིས་ནི་རྟོགས་སོ། །བཅོམ་ལྡན་འདས་
ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟ་བུར་མཐོང་། ཇི་ལྟ་བུར་རྟོགས། གསོལ་པ་བཅོམ་ལྡན་འདས་རྙིང་པ་ནི་མ་རིག་པ་དང་སྲེད་པའོ། །གསར་པ་ནི་ལེན་པ་དང་སྲིད་པ་སྟེ། དེ་ལ་གང་ཞིག་གིས་མ་རིག་པ་དང་སྲེད་པ་ཡོངས་སུ་སྤངས་ཏེ། ལེན་པ་དང་སྲིད་པ་མི་བགྱིད་ན་གང་ཟག་དེ་ནི་རྟག་པ་དང་མི་རྟག་པ་ཡང་དག་པར་རྟོགས་ཏེ། བདག་གིས་ནི་ཡང་དག་པའི་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ནས། དཀོན་མཆོག་གསུམ་ལ་སྐྱབས་སུ་མཆིའོ། །དེ་བཞིན་གཤེགས་པས་བདག་རབ་ཏུ་དབྱུང་བ་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། ཀུན་དུ་རྒྱུ་འདི་རབ་ཏུ་ཕྱུང་ལ་བསྙེན་པར་རྫོགས་པར་གྱིས་ཤིག །དེ་ནས་ཀཽཎྜི་ནྱས། བཅོམ་ལྡན་འདས་ཀྱི་བཀའ་བཞིན་དུ་དགེ་འདུན་ལ་གསོལ་བ་དང་ཞུ་བའི་ལས་བྱས་ནས་རབ་ཏུ་ཕྱུང་ངོ་། །དེ་ནས་ཞག་བཅྭ་ལྔ་ལོན་པ་དང་། ཟག་པ་ཀུན་ཟད་དེ་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །གཞན་ཡང་ཀུན་དུ་རྒྱུ་བེའུ་ཞེས་བྱ་བས་འདི་སྐད་ཅེས་གསོལ་ཏོ། །གཽ་ཏ་མ་བདག་ཞུ་བ་ཞུ་ན་ཅི་གནང་ངམ། དེ་བཞིན་གཤེགས་པ་ཅང་མི་གསུང་སྟེ། དེ་བཞིན་དུ་ལན་གཉིས་ལན་གསུམ་གྱི་བར་དུའོ། །བེའུས་ཡང་གསོལ་པ། གཽ་ཏ་མ་བདག་ནི་ཁྱོད་དང་མཛའ་བོ་ཡིན་ཏེ། བདག་ཅག་གཉིས་ཀྱི་དོན་ཡང་གཉིས་སུ་མེད་ན། བདག་གིས་དྲིས་པ་ཅིའི་ཕྱིར་ཅང་མི་གསུང་བར་བཞུགས། དེ་ནས་བཅོམ་ལྡན་འདས་ཐུགས་ལ་འདི་སྙམ་དུ་དགོངས་སོ། །ཀུན་དུ་རྒྱུ་འདི་རང་བཞིན་གྱིས་མཉེན་ཏེ་དེས་ལ་ཤིན་ཏུ་དྲང་བས། ང་དང་བཤེས་ཏེ་དྲི་བ་འདྲི་བ་ཡང་ཀླན་ཀ་ཚོལ་བའི་ཕྱིར་མ་ཡིན་ན། ཅི་དང་ཅི་དྲིས་པ་དེ་དང་དེའི་ལན་གདབ་བོ་སྙམ་དུ་དགོངས་ནས་འདི་སྐད་ཅེས་བཀའ་སྩལ་ཏོ། །ཀྱེ་བེའུ་ལེགས་སོ་ལེགས་སོ། །ཅི་དང་ཅི་འདོད་པ་དྲིས་ཤིག་དང་། དེ་དང་དེའི་ལན་གདབ་པར་བྱའོ། །བེའུས་གསོལ་པ། གཽ་ཏ་མ་འཇིག་རྟེན་ན་དགེ་བ་མཆིས་སམ། དེ་བཞིན་ནོ། །གཽ་ཏ་མ་མི་དགེ་བ་མཆིས་སམ་དེ་བཞིན་ནོ། །ཀུན་དུ་རྒྱུ་བེའུས་གསོལ་པ། གཽ་ཏ་མ་བདག་ཅག་ལ་བསྟན་ཅིང་བཤད་དེ། དགེ་བ་དང་མི་དགེ་བའི་ཆོས་བདག་གིས་རྟོགས་
པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ངས་ནི་དོན་དེ་དག་སྟོན་པ་ལ་ཤིན་ཏུ་རྒྱས་པར་མཁྱེན་མོད་ཀྱི། ད་ཁྱོད་ལ་ཕྱོགས་ཙམ་ཞིག་བཤད་པར་བྱའོ། །རིགས་ཀྱི་བུ་འདོད་པ་ནི་མི་དགེ་བ་སྟེ། རྣམ་པར་གྲོལ་བ་ལ་འདོད་པ་ནི་དགེ་བའོ། །ཞེ་སྡང་དང་གཏི་མུག་ཀྱང་དེ་བཞིན་དུ་ཤེས་པར་བྱའོ། །སྲོག་གཅོད་པ་ནི་མི་དགེ་བའོ། །སྲོག་གཅོད་པ་ཡོངས་སུ་སྤངས་པ་ནི་དགེ་བ་ནས། ངན་པར་ལྟ་བའི་བར་དུ་རྒྱས་པར་རིག་པར་བྱའོ། །རིགས་ཀྱི་བུ་ངས་ནི་ཁྱོད་ལ་དགེ་བ་དང་མི་དགེ་བའི་ཆོས་རྣམ་པ་གསུམ་དང་། དགེ་བ་དང་མི་དགེ་བའི་ཆོས་རྣམ་པ་བཅུ་ཡང་བསྟན་ཅིང་བཤད་པ་ཡིན་ནོ། །གལ་ཏེ་ངའི་ཉེ་གནས་སུ་གྱུར་པ་གང་ཞིག་དགེ་བ་དང་མི་དགེ་བ་རྣམ་པ་གསུམ་ནས། དགེ་བ་དང་མི་དགེ་བའི་ཆོས་རྣམ་པ་བཅུའི་བར་དུ་བྱེ་བྲག་ཕྱེད་དེ་ནན་ཏན་དུ་བྱེད་ན། གང་ཟག་དེས་ནི་འདོད་ཆགས་དང་ཞེ་སྡང་དང་གཏི་མུག་མེད་པར་འགྱུར་བ་དང་། ཟག་པ་ཐམས་ཅད་ཟད་པ་དང་། སྲིད་པ་ཐམས་ཅད་ཡོངས་སུ་གཅོད་པར་འགྱུར་རོ། །ཀུན་དུ་རྒྱུས་གསོལ་པ། གཽ་ཏ་མ་བཅོམ་ལྡན་འདས་ཀྱི་བསྟན་པ་ལ། དགེ་སློང་འགའ་ཙམ་ཡང་འདོད་ཆགས་དང་། ཞེ་སྡང་དང་། གཏི་མུག་དང་། ཟག་པ་ཐམས་ཅད་ཟད་པ་དང་། སྲིད་པ་ཐམས་ཅད་ཡོངས་སུ་བཅད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་བསྟན་པ་ལ། འདོད་ཆགས་དང་ཞེ་སྡང་དང་གཏི་མུག་དང་། ཟག་པ་ཐམས་ཅད་དང་། སྲིད་པ་ཐམས་ཅད་ཟད་པ་གཅིག་གམ། གཉིས་སམ། གསུམ་མམ། ལྔའམ། བརྒྱར་མ་ཟད་ཀྱི། དེ་ལྟ་བུའི་དགེ་སློང་ནི་གྲངས་མེད་དོ། །གཽ་ཏ་མ་དགེ་སློང་ལྟ་ཞོག་ལ། སངས་རྒྱས་ཀྱི་བསྟན་པ་ལ། དགེ་སློང་མ་འགའ་ཙམ་འདོད་ཆགས་དང་ཞེ་སྡང་དང་། གཏི་མུག་དང་། ཟག་པ་ཐམས་ཅད་དང་།
སྲིད་པ་ཐམས་ཅད་ཟད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་བསྟན་པ་ལ་དགེ་སློང་མ་གཅིག་གམ། གཉིས་སམ། གསུམ་མམ་ལྔའམ། བརྒྱར་མ་ཟད་ཀྱི། འདོད་ཆགས་དང་། ཞེ་སྡང་དང་གཏི་མུག་དང་། ཟག་པ་ཐམས་ཅད་དང་། སྲིད་པ་ཐམས་ཅད་ཟད་པའི་དགེ་སློང་མ་ནི་གྲངས་མེད་དོ། །བེའུས་གསོལ་པ། གཽ་ཏ་མ་དགེ་སློང་ཕ་དང་དགེ་སློང་མ་ཡང་ཞོག་ལ། སངས་རྒྱས་ཀྱི་བསྟན་པ་ལ། དགེ་བསྙེན་འགའ་ཙམ་ཡང་ཚུལ་ཁྲིམས་སྲུང་བ་ལ་བརྩོན་ཞིང་ཚངས་པར་སྤྱོད་པ་ཡོངས་སུ་དག་པ་དང་། ཐེ་ཙོམ་གྱི་ཕ་རོལ་ཏུ་ཕྱིན་ཏེ། ཐེ་ཙོམ་གྱི་དྲ་བ་ཡོངས་སུ་ཆོད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་བསྟན་པ་ལ་དེ་ལྟ་བུའི་དགེ་བསྙེན་གཅིག་གམ། གཉིས་སམ། གསུམ་མམ། ལྔའམ། བརྒྱར་མ་ཟད་ཀྱི། ཚུལ་ཁྲིམས་བསྲུང་བ་ལ་བརྩོན་ཞིང་ཚངས་པར་སྤྱོད་པ་ཡོངས་སུ་དག་ནས་ཀུན་ནས་ཉོན་མོངས་པ་ཐ་མ་ལྔ་པོ་བཅད་དེ་ལན་ཅིག་ཕྱིར་མི་ལྡོག་པ་ཐོབ་ནས་ཐེ་ཚོམ་གྱི་ཕ་རོལ་ཏུ་ཕྱིན་ཏེ་ཐེ་ཙོམ་གྱི་དྲ་བ་ཡོངས་སུ་བཅད་པའི་དགེ་བསྙེན་ནི་གྲངས་མེད་དོ། །བེའུས་ཡང་གསོལ་པ། གཽ་ཏ་མ་དགེ་སློང་དང་། དགེ་སློང་མ་དང་། དགེ་བསྙེན་ཕ་ཡང་ཞོག་ལ། སངས་རྒྱས་ཀྱི་བསྟན་པ་ལ་དགེ་བསྙེན་མ་འགའ་ཙམ་ཚུལ་ཁྲིམས་སྲུང་བ་ལ་བརྩོན་ཞིང་ཚངས་པར་སྤྱོད་པ་ཡོངས་སུ་དག་པ་དང་། ཐེ་ཚོམ་གྱི་ཕ་རོལ་ཏུ་ཕྱིན་ཏེ། ཐེ་ཚོམ་གྱི་དྲ་བ་ཆོད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་བསྟན་པ་ལ་དགེ་བསྙེན་མ་དེ་ལྟ་བུ་གཅིག་གམ། གཉིས་སམ། གསུམ་མམ། ལྔའམ། བརྒྱར་མ་ཟད་ཀྱི། ཚུལ་ཁྲིམས་སྲུང་བ་ལ་བརྩོན་ཞིང་ཚངས་པར་སྤྱོད་པ་ཡོངས་སུ་དག་པ་དང་། ཀུན་ནས་ཉོན་མོངས་པ་ཐ་མ་ལྔ་པོ་ཆོད་ནས་ལན་ཅིག་ཕྱིར་མི་ལྡོག་པ་ཐོབ་ནས་ཐེ་ཚོམ་གྱི་ཕ་རོལ་ཏུ་ཕྱིན་ཏེ་ཐེ་ཚོམ་གྱི་དྲ་བ་ཆོད་པའི་དགེ་བསྙེན་མ་ནི་གྲངས་མེད་དོ། །བེའུས་གསོལ་པ། སངས་རྒྱས་ཀྱི་བསྟན་པ་ལ་ཚུལ་ཁྲིམས་སྲུང་བ་ལ་བརྩོན་ཞིང་ཚངས་པར་སྤྱོད་པ་ཡོངས་སུ་དག་པ་དང་། ཐེ་ཚོམ་གྱི་དྲ་བ་ཡོངས་སུ་བཅད་པའི་དགེ་སློང་ཕ་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལྟ་ཞོག་ལ། སངས་རྒྱས་ཀྱི་བསྟན་པ་ལ་དགེ་
བསྙེན་འགའ་ཡང་འདོད་པ་ལྔ་ལ་ལོངས་མི་སྤྱོད་ཅིང་ཐེ་ཚོམ་གྱི་དྲ་བ་ཆོད་པ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་བསྟན་པ་ལ་དགེ་བསྙེན་དེ་ལྟ་བུ་ནི་གཅིག་གམ། གཉིས་སམ། གསུམ་མམ། ལྔའམ། བརྒྱར་མ་ཟད་ཀྱི། ཀུན་ནས་ཉོན་མོངས་པ་གསུམ་བཅད་ནས་རྒྱུན་དུ་ཞུགས་པ་ཐོབ་ནས་འདོད་ཆགས་དང་། ཞེ་སྡང་དང་། གཏི་མུག་བསྲབས་ཏེ། ལན་ཅིག་ཕྱིར་ལྡོག་པ་ཐོབ་པའི་དགེ་བསྙེན་ཡང་གྲངས་མེད་དོ། །དགེ་བསྙེན་ཇི་ལྟ་བ་བཞིན་དུ་དགེ་བསྙེན་མ་ཡང་རྒྱས་པར་རིག་པར་བྱའོ། །བེའུས་གསོལ་པ། བཅོམ་ལྡན་འདས་བདག་དཔེ་ཞིག་གསོལ་བར་དད་དོ། །བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་ལེགས་ཀྱིས་ཇི་དགའ་བར་སྨྲོས་ཤིག །བཅོམ་ལྡན་འདས་དཔེར་ན་ཀླུའི་རྒྱལ་པོ་དགའ་བོ་དང་། བསྙེན་དགའ་བོ་ཀུན་དུ་ཁྱབ་པར་ཆར་ཆེན་པོ་འབེབས་པ་དང་འདྲ་བར་དེ་བཞིན་གཤེགས་པའི་ཆོས་ཀྱི་ཆར་ཡང་དེ་དང་འདྲ་སྟེ། དགེ་བསྙེན་ཕ་དང་དགེ་བསྙེན་མ་ལ་མཉམ་པར་ཕབ་བོ། །བེའུས་གསོལ་པ། བཅོམ་ལྡན་འདས་གལ་ཏེ་མུ་སྟེགས་ཅན་དག་རབ་ཏུ་བྱུང་བར་གསོལ་ན་དེ་བཞིན་གཤེགས་པ་ཟླ་བ་དུའི་བར་དུ་བརྟག་འཚལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཟླ་བ་བཞིའི་བར་དུ་བརྟག་དགོས་ཏེ་གཅིག་ཏུ་ངེས་པ་ནི་མ་ཡིན་ནོ། །བཅོམ་ལྡན་འདས་གལ་ཏེ་གཅིག་ཏུ་མ་ངེས་ན་ཐུགས་རྗེ་ཆེན་པོས་བདག་རབ་ཏུ་དབྱུང་བར་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀཽཎྜི་ནྱ་ལ་བཀའ་སྩལ་པ། ཀུན་དུ་རྒྱུ་བེའུ་འདི་རབ་ཏུ་ཕྱུང་ལ་བསྙེན་པར་རྫོགས་པར་གྱིས་ཤིག །དེ་ནས་ཀཽཎྜི་ནྱས་སངས་རྒྱས་ཀྱི་བཀའ་བཞིན་དུ་དགེ་སློང་གི་དགེ་འདུན་ལ་གསོལ་པ་དང་ཞུ་བའི་ལས་བྱས་ནས་རབ་ཏུ་ཕྱུང་ངོ་། །དེ་ནས་ཞག་བཅོ་ལྔ་ལོན་པ་དང་རྒྱུན་དུ་ཞུགས་པའི་འབྲས་བུ་ཐོབ་པར་གྱུར་ཏོ། །འབྲས་བུ་ཐོབ་ནས་ཡང་འདི་སྙམ་དུ་སེམས་སོ། །གང་ཤེས་རབ་ཀྱིས་སློབ་པའི་སྒོ་ནས་ཐོབ་པར་འགྱུར་བ་ནི་བདག་གིས་ང་ཐོབ་པས་སངས་རྒྱས་མཐོང་བར་བཟོད་དོ་སྙམ་ནས་སངས་རྒྱས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ལ་མགོ་བོས་ཕྱག་འཚལ་ཏེ། བསྟི་སྟང་བྱས་ནས་ཕྱོགས་གཅིག་ཏུ་འདུག་སྟེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་རབ་གང་བསླབ་པ་ལས་ཐོབ་པར་འགྱུར་
བ་ནི་བདག་གིས་ཐོབ་ལགས་ན། བདག་གིས་བསླབ་པ་མ་མཆིས་པའི་ཤེས་རབ་ཐོབ་པར་འགྱུར་བ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་གཉིས་ཏེ། ཞི་གནས་དང་ལྷག་མཐོང་ལ་བརྩོན་འགྲུས་སུ་ནན་ཏན་བྱའོ། །རིགས་ཀྱི་བུ་དགེ་སློང་ཞིག་རྒྱུན་དུ་ཞུགས་པའི་འབྲས་བུ་ཐོབ་པར་འདོད་ན་ཆོས་རྣམ་པ་གཉིས་པོ་ལ་བརྩོན་འགྲུས་སུ་ནན་ཏན་བྱའོ། །གང་ཞིག་གིས་ལན་ཅིག་ཕྱིར་ལྡོག་པ་དང་། ལན་ཅིག་ཕྱིར་མི་ལྡོག་པ་དང་། དགྲ་བཅོམ་པའི་འབྲས་བུ་ཐོབ་པར་འདོད་ན་ཡང་། ཆོས་རྣམ་པ་གཉིས་པོ་ལ་ནན་ཏན་བྱའོ། །རིགས་ཀྱི་བུ་དགེ་སློང་གང་ཞིག་བསམ་གཏན་བཞི་དང་། ཚད་མེད་པ་བཞི་དང་། མངོན་པར་ཤེས་པ་དྲུག་དང་། སྐྱེས་བུ་བརྒྱད་དང་། མཆོག་གི་གནས་བརྒྱད་དང་། རྩོད་པ་མེད་པའི་ཡེ་ཤེས་དང་། སྤྱི་བོའི་ཡེ་ཤེས་དང་། མཐར་ཕྱིན་པའི་ཡེ་ཤེས་དང་། སོ་སོར་ཡང་དག་པར་ཤེས་པ་བཞི་དང་། རྡོ་རྗེ་ལྟ་བུའི་ཏིང་ངེ་འཛིན་དང་། ཟད་པའི་ཡེ་ཤེས་དང་། མི་སྐྱེ་བའི་ཡེ་ཤེས་ཐོབ་པར་འདོད་པ་ཡང་ཆོས་གཉིས་པོ་དེ་ལ་ནན་ཏན་བྱའོ། །རིགས་ཀྱི་བུ་གང་ཞིག་གིས་ས་བཅུ་དང་། མ་སྐྱེས་པའི་ཆོས་ཀྱི་བཟོད་པ་དང་། མཚན་ཉིད་མེད་པའི་ཆོས་ཀྱི་བཟོད་པ་དང་། བསམ་གྱིས་མི་ཁྱབ་པའི་ཆོས་ཀྱི་བཟོད་པ་དང་། འཕགས་པའི་སྤྱོད་པ་དང་། ཚངས་པར་སྤྱོད་པ་དང་། ལྷས་སྤྱོད་པ་དང་། བྱང་ཆུབ་སེམས་དཔས་སྤྱོད་པ་དང་། ནམ་མཁའ་ལྟ་བུའི་ཏིང་ངེ་འཛིན་དང་། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་དང་། སྟོང་པ་ཉིད་དང་མཚན་མ་མེད་པ་དང་། སྨོན་པ་མེད་པའི་ཏིང་ངེ་འཛིན་དང་། སའི་ཏིང་ངེ་འཛིན་དང་། ཕྱིར་མི་ལྡོག་པའི་ཏིང་ངེ་འཛིན་དང་། དཔའ་བར་འགྲོ་བའི་ཏིང་ངེ་འཛིན་དང་། རྡོ་རྗེ་ལྟ་བུའི་ཏིང་ངེ་འཛིན་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་། སངས་རྒྱས་ཀྱི་སྤྱོད་པ་འདོད་པ་ཡང་ཆོས་རྣམ་པ་གཉིས་པོ་ལ་ནན་ཏན་བྱའོ། །བེའུས་དེ་སྐད་ཅེས་ཐོས་ནས་བཅོམ་ལྡན་འདས་ལ་ཕྱག་འཚལ་ཏེ་ཕྱིར་བྱུང་ནས་ཤིང་སཱ་ལའི་ཚལ་དུ་ཆོས་གཉིས་པོ་ལ་ནན་ཏན་བྱས་པས་རིང་པོར་མ་ཐོགས་པར་དགྲ་བཅོམ་པའི་འབྲས་བུ་ཐོབ་
པར་གྱུར་ཏོ། །དེའི་ཚེ་ན་དགེ་སློང་གྲངས་མེད་པ་ཞིག་སངས་རྒྱས་གང་ན་བར་འདོང་བ་ལས་བེའུས་མཐོང་ནས་བཙུན་པ་གར་འདོང་ཞེས་སྨྲས་སོ། །དགེ་སློང་རྣམས་ཀྱིས་སྨྲས་པ། བདག་ཅག་ནི་སངས་རྒྱས་ཀྱི་སྤྱན་སྔར་མཆིའོ། །བེའུས་ཡང་སྨྲས་པ། བཙུན་པ་དག་སངས་རྒྱས་ཀྱི་སྤྱན་སྔར་གཤེགས་ན་བེའུའི་མཆིད་ནས་ཆོས་རྣམ་པ་གཉིས་ལ་ནན་ཏན་བགྱིས་ན་བསླབ་པ་མ་མཆིས་པའི་ཤེས་རབ་ཐོབ་སྟེ། བཅོམ་ལྡན་འདས་ཀྱི་བཀའ་དྲིན་དྲན་པའི་སླད་དུ་མྱ་ངན་ལས་འདའོ་ཞེས་གསོལ་ཅིག །དེའི་ཚེ་དགེ་སློང་དེ་རྣམས་སངས་རྒྱས་གང་ན་བ་དེར་ཕྱིན་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དགེ་སློང་བེའུའི་མཆིད་ནས་བདག་ནི་བསླབ་པ་མ་མཆིས་པའི་ཤེས་རབ་ཐོབ་ནས་བཅོམ་ལྡན་འདས་ཀྱི་བཀའ་དྲིན་གཟོ་བའི་སླད་དུ་མྱ་ངན་ལས་འདའོ་ཞེས་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་བེའུ་དགྲ་བཅོམ་པའི་འབྲས་བུ་ཐོབ་ཀྱིས་དེའི་ལུས་ལ་ཁྱེད་མཆོད་པ་གྱིས་ཤིག །དེའི་ཚེ་དགེ་སློང་རྣམས་སངས་རྒྱས་ཀྱི་བཀའ་བཞིན་དུ་རུས་བུ་གང་ན་བ་དེར་སོང་ནས་མཆོད་པ་ཆེན་པོ་བྱས་སོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ལྔ་བཅུ་གསུམ་པ། དེའི་ཚེ་ཀུན་ཏུ་རྒྱུ་ཚེམ་བུ་ཅན་གྱིས་ཡང་འདི་སྐད་ཅེས་གསོལ་ཏོ། །གཽ་ཏ་མ་གསུང་བ་ལྟར་སྐྱེ་བ་གྲངས་མེད་པའི་བར་དུ་དགེ་བ་དང་མི་དགེ་བ་བགྱིས་པའང་ཕྱིས་མ་འོངས་པའི་དུས་སུ་ཡང་དགེ་བ་དང་མི་དགེ་བའི་ལུས་ཐོབ་པར་འགྱུར་རོ་ཞེས་བགྱིས་པ་དེ་མི་རུང་ངོ་། །དེ་ཅིའི་སླད་དུ་ཞེ་ན། གཽ་ཏ་མ་གསུང་བ་ལྟར་ཉོན་མོངས་པའི་རྒྱུ་ལས་ལུས་ཐོབ་པར་གྱུར་ཏོ་ཞེས་བགྱི་བ་ཇི་སྟེ་ཉོན་མོངས་པའི་རྒྱུ་ལས་ལུས་ཐོབ་པར་གྱུར་ན་ལུས་སྔའམ་ཉོན་མོངས་པ་སྔ། ཇི་སྟེ་ཉོན་མོངས་པ་སྔ་ན་ཅི་ལ་གནས། གང་དུ་གནས་ཅི་སྟེ་ལུས་སྔ་ན་ཉོན་མོངས་པའི་རྒྱུ་ལས་ཐོབ་ཅེས་བགྱིར་རུང་ངམ། དེ་བས་ན་ཉོན་མོངས་པ་སྔ་ཞེས་བགྱིར་ཡང་མི་རུང་ལ། ལུས་སྔ་ཞེས་བགྱིར་ཡང་མི་རུང་ངོ་། །དུས་གཅིག་གོ་ཞེས་བགྱིར་ཡང་མི་རུང་། སྔ་ཕྱི་དུས་གཅིག་ཅེས་བགྱིར་ཡང་ཆོས་མ་མཆིས་སོ། །དེ་བས་
ན་བདག་ནི་ཆོས་ཐམས་ཅད་རང་བཞིན་དུ་ཟད་དེ། རྒྱུ་དང་རྐྱེན་ལས་ནི་མ་ཡིན་ནོ་ཞེས་སྨྲའོ། །གཞན་ཡང་གཽ་ཏ་མ་སྲ་བ་ནི་སའི་རང་བཞིན། གཤེར་བ་ནི་ཆུའི་རང་བཞིན། ཚ་བ་ནི་མེའི་རང་བཞིན། གཡོ་བ་ནི་རླུང་གི་རང་བཞིན། ཐོགས་པ་མེད་པ་ནི་ནམ་མཁའི་རང་བཞིན་ཏེ། ཆེན་པོ་ལྔའི་རང་བཞིན་ནི་རྒྱུ་དང་རྐྱེན་གྱིས་ཡོད་པ་མ་ལགས་སོ། །ཅི་སྟེ་འཇིག་རྟེན་ན་ཆོས་གཅིག་ཙམ་གྱི་རང་བཞིན་རྒྱུ་དང་རྐྱེན་གྱིས་མཆིས་པ་མ་ལགས་ན། ཆོས་ཐམས་ཅད་ཀྱི་རང་བཞིན་ཡང་དེ་དང་འདྲ་སྟེ། རྒྱུ་དང་རྐྱེན་གྱིས་མཆིས་པ་མ་ལགས་སོ། །ཇི་སྟེ་ཆོས་གཅིག་ཙམ་ཡང་རྒྱུ་དང་རྐྱེན་གྱིས་མཆིས་པ་ལགས་ན། ཅིའི་སླད་དུ་ཆེན་པོ་ལྔའི་རང་བཞིན་རྒྱུ་དང་རྐྱེན་ལས་མ་གྱུར། གཽ་ཏ་མ་སེམས་ཅན་གྱིས་དགེ་བའི་ལུས་དང་མི་དགེ་བའི་ལུས་ཀྱིས་རྣམ་པར་གྲོལ་བ་ཐོབ་པ་ཡང་རང་བཞིན་ལགས་ཀྱི། རྒྱུ་དང་རྐྱེན་ལས་ནི་མ་ལགས་སོ། །དེ་བས་ན་ཆོས་ཐམས་ཅད་རང་བཞིན་གྱིས་ཡོད་ཀྱི་རྒྱུ་དང་རྐྱེན་ལས་ནི་མ་ཡིན་པར་བདག་སྨྲའོ། ། གཞན་ཡང་གཽ་ཏ་མ་འཇིག་རྟེན་གྱི་ཆོས་ནི་དགོས་པའི་གནས་གཅིག་ཏུ་ཆད་པའོ། །དཔེར་ན་ཤིང་མཁན་ན་རེ་ཤིང་འདི་ནི་ཤིང་རྟ་དང་ཁྱོགས་སུ་འོས་སོ། །ཤིང་འདི་ནི་སྒོ་དང་། ཁྲི་འུར་རུང་ངོ་ཞེས་སྨྲ་བ་དང་། དཔེར་ན་གསེར་མགར་གྱིས་བརྡུངས་སུ་བྱས་ཏེ་འཕྲལ་བ་ལ་བཏགས་པ་ནི་ཕྲེང་བ་ཞེས་བྱ། མགུལ་དུ་བཏགས་པ་ནི་དོ་ཤལ་ཞེས་བྱ། དཔུང་པ་ལ་བཏགས་པ་ནི་དཔུང་རྒྱན་ཞེས་བྱ། སོར་མོ་ལ་བཏགས་པ་ནི་སོར་གདུབ་ཅེས་བྱ་སྟེ། དགོས་པའི་གནས་ངེས་པས་ན་རང་བཞིན་ངེས་པ་ཞེས་བྱའོ། །གཽ་ཏ་མ་སེམས་ཅན་ཐམས་ཅད་ཀྱང་དེ་དང་འདྲ་སྟེ། རྒྱུད་ལྔའི་རང་བཞིན་ཡོད་པས་སེམས་ཅན་དམྱལ་བ་དང་། ཡི་དགས་དང་། བྱོལ་སོང་དང་། ལྷ་དང་། མིའོ། །ཇི་སྟེ་དེ་ལྟ་བུ་ལགས་ན་རྒྱུ་དང་རྐྱེན་ལས་འགྱུར་ཞེས་བགྱིར་རུང་ངམ། གཽ་ཏ་མ་གཞན་ཡང་སེམས་ཅན་ཐམས་ཅད་རང་བཞིན་སོ་སོ་སྟེ། དེ་བས་ན་ཐམས་ཅད་རང་བཞིན་ཞེས་བགྱིའོ། །དཔེར་ན་རུ་སྦལ་ཐང་ལས་སྐྱེས་ཀྱང་ཆུར་འགྲོ་བ་དང་། བེའུ་འབྲངས་མ་ཐག་ཏུ་ནུ་བ་དང་ཉ་མཆིལ་པ་མིད་པ་དང་སྦྲུལ་གདུག་པ་བྱུང་མ་ཐག་ཏུ་ས་ཟ་བ་
དང་། དེ་དག་ལ་སོགས་པ་སུས་བསྟན། དཔེར་ན་ཚེར་མ་རང་བཞིན་གྱིས་རྣོ་བ་དང་། བྱའི་འདབ་མ་རང་བཞིན་གྱིས་ཁ་དོག་ཐ་དད་པ་ལྟར་འཇིག་རྟེན་གྱི་སེམས་ཅན་ཡང་དེ་དང་འདྲ་སྟེ། དབང་པོ་རྣོ་བ་དང་། རྟུལ་བ་དང་ཕྱུག་པ་དང་དབུལ་བ་དང་བཟང་བ་དང་ངན་པ་དང་རྣམ་པར་གྲོལ་བ་ཐོབ་པ་དང་། སྲིད་པ་ཐ་མ་ཐོབ་པར་གྱུར་ཏེ། དེ་བས་ན་ཆོས་ཐམས་ཅད་རང་བཞིན་སོ་སོ་བར་རིག་པར་བྱའོ། །གཞན་ཡང་། གཽ་ཏ་མ་གསུང་བ་ལྟར་འདོད་ཆགས་དང་། ཞེ་སྡང་དང་། གཏི་མུག་ནི་རྒྱུ་དང་རྐྱེན་ལས་སྐྱེས་ཏེ་གདུག་པ་གསུམ་གྱི་རྒྱུ་དང་རྐྱེན་ནི་ཡུལ་ལྔ་ཡིན་ནོ་ཞེས་བགྱི་བ་དེ་ཡང་མི་རུང་ངོ་། །དེ་ཅིའི་སླད་དུ་ཞེ་ན། དཔེར་ན་སེམས་ཅན་གཉིད་ལོག་པའི་ཚེ་ཡུལ་ལྔ་མངོན་དུ་མི་སྤྱོད་ཀྱང་འདོད་ཆགས་དང་ཞེ་སྡང་དང་། གཏི་མུག་སྐྱེས་ཏེ་མངལ་ན་འདུག་པ་དང་། མངལ་ནས་བྱུང་མ་ཐག་པ་ཡང་ཡུལ་ལྔའི་བཟང་པོ་དང་། ངན་པ་བྱེ་བྲག་མི་ཕྱེད་ཀྱང་འདོད་ཆགས་དང་། ཞེ་སྡང་དང་། གཏི་མུག་སྐྱེའོ། །དྲང་སྲོང་འཕགས་པའི་རྣམས་དགོན་པར་གནས་པ་ཡང་ཡུལ་ལྔ་མངོན་དུ་མི་སྤྱོད་ཀྱང་། འདོད་ཆགས་དང་། ཞེ་སྡང་དང་། གཏི་མུག་སྐྱེའོ། །ཁ་ཅིག་ནི་ཡུལ་དྲུག་གི་དབང་གིས་འདོད་མི་ཆགས་པ་དང་། ཞེ་མི་སྡང་བ་དང་། གཏི་མི་མུག་པ་ཡང་ཡོད་དེ་དེ་བས་ན་རྒྱུ་དང་རྐྱེན་ལས་ཆོས་ཐམས་ཅད་སྐྱེའོ་ཞེས་ངེས་པ་མེད་ཀྱི། རང་བཞིན་དུ་ཟད་དོ། །གཽ་ཏ་མ་གཞན་ཡང་འཇིག་རྟེན་ན་ཁ་ཅིག་ནི་དབང་པོ་ལྔ་དང་མི་ལྡན་ཡང་ལོངས་སྤྱོད་ཆེན་པོ་དང་ལྡན་ཞིང་དབང་དུ་འགྱུར་བ་ཡང་ཡོད་དོ། །ཁ་ཅིག་ནི་དབང་པོ་དང་ལྡན་ཡང་ངན་ཅིང་དབུལ་ལ་དབང་མེད་དེ་གཞན་གྱི་བྲན་བྱེད་པ་ཡང་ཡོད་ན། ཇི་སྟེ་རྒྱུ་དང་རྐྱེན་ལས་གྱུར་ན་ཅིའི་སླད་དུ་དེ་ལྟར་གྱུར། དེ་བས་ན་ཆོས་ཐམས་ཅད་རང་བཞིན་ནི་སོ་སོ་སྟེ་རྒྱུ་དང་རྐྱེན་ལས་མ་ཡིན་ནོ། །གཽ་ཏ་མ་གཞན་ཡང་འཇིག་རྟེན་ན་བུས་པ་ཤེད་མ་བྱེ་བ་ཡང་ཡུལ་ལྔ་བྱེ་བྲག་མི་ཕྱེད་མོད་ཀྱི། བར་འགའ་ནི་དགོད། བར་འགའ་ནི་ངུའོ། །དགོད་པའི་ཚེ་ནི་དགའ་བར་ཤེས་ཀྱི། ངུ་བའི་ཚེ་མི་དགའ་བར་ཤེས་སོ། །དེ་བས་ན་ཆོས་ཐམས་ཅད་སོ་སོའི་རང་བཞིན་ཡོད་དོ། །གཽ་ཏ་
མ་གཞན་ཡང་འཇིག་རྟེན་གྱི་ཆོས་ལ་རྣམ་པ་གཉིས་ཏེ། ཡོད་པ་དང་མེད་པའོ། །ཡོད་པ་ནི་ནམ་མཁའོ། །མེད་པ་ནི་རི་བོང་གི་རྭའོ། །དེ་ལྟར་ཆོས་གཉིས་པོ་ཡང་ཡོད་པ་ཡང་རྒྱུ་དང་རྐྱེན་མ་ཡིན། མེད་པ་ཡང་རྒྱུ་དང་རྐྱེན་མ་ཡིན་ཏེ། དེ་བས་ན་ཆོས་ཐམས་ཅད་རང་བཞིན་དུ་ཟད་ཀྱི། རྒྱུ་དང་རྐྱེན་ལས་མ་ཡིན་ནོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་སྨྲ་བ་ལྟར་ཆེན་པོ་ལྔའི་རང་བཞིན་དང་འདྲ་བར་ཆོས་ཐམས་ཅད་ཀྱང་དེ་དང་འདྲའོ་ཞེས་བྱ་བ་མི་རུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་ཁྱོད་ཀྱི་ཆོས་ལ་ཆེན་པོ་ལྔ་རྟག་པ་ཡིན་ན་ཅིའི་ཕྱིར་ཆོས་ཐམས་ཅད་རྟག་པ་མ་ཡིན་ནོ་ཞེས་སྨྲ། ཇི་སྟེ་འཇིག་རྟེན་གྱི་དངོས་པོ་མི་རྟག་པ་ཞིག་ཡིན་ན་ཆེན་པོ་ལྔའི་རང་བཞིན་ཅིའི་ཕྱིར་མི་རྟག་པ་མ་ཡིན། ཇི་སྟེ་ཆེན་པོ་ལྔ་རྟག་པ་ཞིག་ཡིན་ན་འཇིག་རྟེན་གྱི་དངོས་པོ་ཡང་རྟག་པ་ཡིན་པའི་རིགས་ཏེ། དེ་བས་ན་ཁྱོད་ཀྱིས་ཆེན་པོ་ལྔའི་རང་བཞིན་ཡོད་པས་རྒྱུ་དང་རྐྱེན་ལས་མ་ཡིན་ཏེ། ཆོས་ཐམས་ཅད་ཀྱང་ཆེན་པོ་ལྔ་དང་འདྲའོ་ཞེས་བྱ་བ་མི་རུང་ངོ་། །རིགས་ཀྱི་བུ་ཁྱོད་སྨྲ་བ་ལྟར་དགོས་པའི་གནས་ངེས་པ་ན་རང་བཞིན་ཡོད་དོ་ཞེས་བྱ་བར་ཡང་མི་རུང་ངོ་། །དེ་ཅིའི་ཕྱིར་ཞེ་ན། རྒྱུ་དང་རྐྱེན་ལས་མིང་ཁྱེར་ཐོབ་པའི་ཕྱིར་རོ། །ཇི་སྟེ་རྒྱུ་ལས་མིང་ཁྱེར་ཐོབ་ན་དོན་ཡང་རྒྱུ་ལས་མིང་ཁྱེར་ཐོབ་བོ། །ཇི་ལྟར་རྒྱུ་ལས་མིང་ཁྱེར་ཐོབ་པ་ཞེ་ན། དཔེར་ན་འཕྲལ་བར་བཏགས་པ་ནི་ཕྲེང་བ་ཞེས་བྱ་བ་དང་། མགུལ་དུ་བཏགས་པ་ནི་དོ་ཤལ་ཞེས་བྱ་བ་དང་། ལག་པ་ལ་བཏགས་པ་ནི་གདུ་བུ་ཅེས་བྱ་བ་དང་། ཤིང་རྟ་ལ་བཏགས་པ་ནི་འཁོར་ལོ་ཞེས་བྱ་བ་དང་། ཤིང་དང་རྩྭ་ལས་འབར་ན་ཤིང་དང་རྩྭའི་མེ་ཞེས་བྱ་བ་དང་། རིགས་ཀྱི་བུ་ཤིང་ཐོག་མ་སྐྱེས་པ་ན་མདའ་དང་། མདུང་གི་རང་བཞིན་མེད་མོད་ཀྱི། རྒྱུ་དང་རྐྱེན་གྱིས་བཟོས་མདའ་དང་མདུང་དུ་བྱེད་དོ། །དེ་བས་ན་ཆོས་ཐམས་ཅད་ལ་རང་བཞིན་ཡོད་ཅེས་བྱ་བའི་མི་རིགས་སོ། །རིགས་ཀྱི་བུ་ཁྱོད་སྨྲ་བ་ལྟར་རུ་སྦལ་ཐང་ལས་སྐྱེས་ཀྱང་རང་བཞིན་གྱིས་ཆུར་འགྲོ་བ་དང་། བེའུ་འབྲངས་མ་ཐག་ཏུ་རང་བཞིན་གྱིས་ནུའོ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཆུར་འགྲོ་བ་
རྒྱུ་དང་རྐྱེན་མ་ཡིན་ལ། གཉིས་ཀ་རྒྱུ་དང་རྐྱེན་ཡིན་པར་འདྲ་ན། ཅིའི་ཕྱིར་མེའི་ནང་དུ་མི་འགྲོ། བེའུ་འབྲངས་མ་ཐག་ཏུ་རང་བཞིན་གྱིས་ནུ་བ་རྒྱུ་དང་རྐྱེན་མ་ཡིན། གཉིས་ཀ་རྒྱུ་དང་རྐྱེན་མ་ཡིན་པར་འདྲ་བས་ཅིའི་ཕྱིར་རྭ་ལ་མི་ནུ། རིགས་ཀྱི་བུ་ཇི་སྟེ་ཆོས་ཐམས་ཅད་ལ་རང་བཞིན་ཡོད་དེ། བསྟན་ཅིང་བསླབས་ཀྱང་སྐྱེད་སྤོགས་མེད་དོ་ཞེས་སྨྲ་ན་ཡོད་དུ་མི་རུང་ངོ་། །དེ་ཅིའི་ཕྱིར་ཞེ་ན། ད་ལྟར་བསྟན་ཅིང་བསླབ་པ་ལས་སྐྱེད་སྤོགས་ཡོད་པར་སྣང་སྟེ། དེ་བས་ན་རང་བཞིན་ཞེས་བྱ་བ་མེད་པར་རིག་པར་བྱའོ། །རིགས་ཀྱི་བུ་ཇི་སྟེ་ཆོས་ཐམས་ཅད་ལ་རང་བཞིན་ཞེས་བྱ་བ་ཡོད་ན་བྲམ་ཟེ་ཐམས་ཅད་ལུས་ཀྱི་ལས་ཡང་དག་པར་བྱ་བའི་ཕྱིར་ལུག་བསད་དེ་ལྷ་རྗེད་པའི་མི་རིགས་སོ། །ཇི་སྟེ་རྗེད་པས་དག་པར་གྱུར་ན་རང་བཞིན་ཡང་མེད་པར་རིག་པར་བྱའོ། །རིགས་ཀྱི་བུ་འཇིག་རྟེན་གྱི་སྨྲ་བའི་ཆོས་ལ་རྣམ་པ་གསུམ་སྟེ། བྱ་བ་དང་བྱེད་པ་དང་བྱས་པའོ། །ཇི་སྟེ་ཆོས་ཐམས་ཅད་ལ་རང་བཞིན་ཡོད་ན་ཅིའི་ཕྱིར་འཇིག་རྟེན་ན་རྣམ་པ་གསུམ་དུ་བཏགས་པར་གྱུར། རྣམ་པ་གསུམ་དུ་བཏགས་པ་ལས་ན་ཐམས་ཅད་ལ་རང་བཞིན་མེད་པར་མངོན་ནོ། །རིགས་ཀྱི་བུ་ཇི་སྟེ་ཆོས་ཐམས་ཅད་ལ་རང་བཞིན་ཡོད་ན་ཆོས་ཐམས་ཅད་ལ་སོ་སོར་ངེས་པའི་རང་བཞིན་ཡོད་པར་འགྱུར་རོ། །ཇི་སྟེ་གཅིག་ཏུ་ཆད་པའི་ངེས་པའི་རང་བཞིན་ཡོད་ན་བུ་རམ་གྱི་ཤིང་ལས་ཅིའི་ཕྱིར་སྐོམ་དང་། ཤ་ཁ་ར་དང་། བུ་རམ་དང་། ཆང་དང་། ཁ་བའི་ཆང་དུ་འགྱུར། ཇི་སྟེ་རང་བཞིན་གཅིག་ན། ཅིའི་ཕྱིར་དངོས་པོ་དེ་དག་བྱུང་བར་གྱུར། ཇི་སྟེ་དངོས་པོ་གཅིག་པོ་ལས་དེ་ལྟ་བུ་དག་བྱུང་ན། ཆོས་ཐམས་ཅད་ལ་རང་བཞིན་གཅིག་ཏུ་ངེས་ཏེ་སོ་སོའི་རང་བཞིན་གཅིག་ཏུ་མི་རུང་བར་རིག་པར་བྱའོ། །རིགས་ཀྱི་བུ་ཇི་སྟེ་ཆོས་ཐམས་ཅད་རང་བཞིན་གཅིག་ཏུ་ངེས་ན། ཅིའི་ཕྱིར་འཕགས་པ་དག་བུ་རམ་ཤིང་གི་སྐོམ་དང་ཤ་ཁ་ར་དང་བུ་རམ་གྱི་ཚེ་བཏུང་དུ་རུང་ལ། ཆང་གི་ཚེ་བཏུང་དུ་མི་རུང་ཞིང་ཕྱིར་ཡང་ཁ་བའི་ཆང་དུ་གྱུར་པ་ན་བཏུང་དུ་རུང་། དེ་བས་ན་ངེས་པའི་རང་བཞིན་མེད་པར་རིག་པར་བྱའོ། །ཇི་སྟེ་ངེས་པའི་རང་བཞིན་མེད་ན་རྒྱུ་དང་རྐྱེན་ལས་མ་གྱུར་ཅེས་བྱར་ག་ལ་རུང་།
རིགས་ཀྱི་བུ་ཁྱོད་ཀྱིས་ཆོས་ཐམས་ཅད་ལ་རང་བཞིན་ཡོད་དོ་ཞེས་བྱ་བ་ཇི་ལྟ་བུར་དཔེ་བསྟན་དུ་རུང་། ཇི་སྟེ་དཔེ་བརྗོད་དུ་ཡོད་ན་ཆོས་ཐམས་ཅད་ལ་རང་བཞིན་མེད་པར་རིག་པར་བྱའོ། །ཇི་སྟེ་རང་བཞིན་ཡོད་ན་ནི་དཔེ་བྱར་མེད་པར་རིག་པར་བྱའོ། །འཇིག་རྟེན་ན་མཁས་པ་ཤེས་རབ་ཅན་དཔེ་སྟོན་ཏེ། དེ་བས་ན་ཆོས་ཐམས་ཅད་རང་བཞིན་མེད་པ་དང་རང་བཞིན་གཅིག་ཏུ་ངེས་པ་མེད་པར་རིག་པར་བྱའོ། །རིགས་ཀྱི་བུ་ཁྱོད་སྨྲ་བ་ལྟར་ལུས་སྔའམ་ཉོན་མོངས་པ་སྔ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཇི་སྟེ་ངས་ལུས་སྔའོ། །ཞེས་བརྗོད་ན་ནི་ཁྱོད་ཀྱིས་ང་དང་འཐུན་ནོ་ཞེའམ། ལུས་མི་སྔའོ་ཞེས་བརྒལ་དུ་ཡང་རུང་ན། རིགས་ཀྱི་བུ་སེམས་ཅན་ཐམས་ཅད་ཀྱི་ལུས་དང་ཉོན་མོངས་པ་ནི་གཉིས་ཀ་སྔ་ཕྱི་མེད་དེ། དུས་གཅིག་ཏུ་ཡོད་དོ། །དེ་ལྟར་དུས་གཅིག་ཏུ་ཡོད་མོད་ཀྱི། འོན་ཀྱང་ཉོན་མོངས་པའི་རྒྱུ་ལས་ལུས་ཡོད་པར་གྱུར་གྱི་ལུས་ཀྱི་རྒྱུ་ལས་ཉོན་མོངས་པར་གྱུར་པ་མ་ཡིན་ནོ། །ཇི་སྟེ་ཁྱོད་ཀྱི་ཡིད་ལ་དཔེར་ན་མིའི་མིག་གཉིས་ཀྱང་དུས་གཅིག་ཏུ་ཐོབ་སྟེ་གཅིག་ལ་གཅིག་མི་ལྟོས་པ་ནི་གཡས་པ་གཡོན་པ་ལ་མི་ལྟོས་ལ། གཡོན་པའང་གཡས་པ་ལ་མི་ལྟོས་པ་དང་འདྲ་བར་ཉོན་མོངས་པ་དང་ལུས་ཀྱང་དེ་དང་འདྲ་བར་སེམས་ན་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་འཇིག་རྟེན་ན་མིག་གིས་བལྟར་སྣང་བ་མེ་མར་གྱི་སྙིང་པོ་དང་སྣང་བ་གཉིས་དུས་གཅིག་ཏུ་ཡོད་མོད་ཀྱི། སྙིང་པོའི་རྒྱུས་སྣང་བར་གྱུར་གྱི་སྙིང་པོ་མེད་པ་ལས་སྣང་བ་ནི་མ་ཡིན་ནོ། །རིགས་ཀྱི་བུ་ཅི་ཁྱོད་ཀྱི་ཡིད་ལ་ལུས་མི་སྔ་བས་རྒྱུ་མེད་པར་སེམས་ན་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཇི་སྟེ་ལུས་སྔ་བས་རྒྱུ་དང་རྐྱེན་མེད་པའི་ཕྱིར་མེད་པ་ཞེས་བྱ་ན་ལྟ་ཁྱོད་ཀྱང་ཆོས་ཐམས་ཅད་ལ་རྒྱུ་དང་རྐྱེན་མེད་དོ་ཞེས་སྨྲ་བའི་རིགས་སོ། །ཇི་སྟེ་བལྟར་མི་སྣང་བའི་ཕྱིར་དེ་སྐད་ཅེས་མི་སྨྲ་ན་ཡང་ད་ལྟར་རྫ་མ་ལ་སོགས་པ་རྒྱུ་དང་རྐྱེན་ལས་བྱུང་བར་མངོན་སུམ་དུ་བལྟར་སྣང་ན་ཅིའི་ཕྱིར་དེ་སྐད་ཅེས་མི་སྨྲ། ཇི་ལྟར་རྫ་མ་དང་འདྲ་བར་ལུས་སྔ་བའི་རྒྱུ་དང་རྐྱེན་ཀྱང་དེ་བཞིན་དུ་རིག་པར་བྱའོ། །རིགས་ཀྱི་བུ་སྣང་ཡང་རུང་མི་སྣང་ཡང་རུང་ཆོས་ཐམས་ཅད་རྒྱུ་དང་རྐྱེན་ལས་བྱུང་གི་རང་བཞིན་
མེད་དོ། །རིགས་ཀྱི་བུ་ཇི་སྟེ་ཆོས་ཐམས་ཅད་ལ་རང་བཞིན་ཡོད་དེ། རྒྱུ་དང་རྐྱེན་མེད་དོ་ཞེས་སྨྲ་ན། ཁྱོད་ཅིའི་ཕྱིར་ཆེན་པོ་ལྔ་ཡོད་དོ་ཞེས་སྨྲ། ཆེན་པོ་ལྔའི་རང་བཞིན་ཉིད་ནི་རྒྱུ་དང་རྐྱེན་ཡིན་ནོ། །རིགས་ཀྱི་བུ་ཆེན་པོ་ལྔའི་རྒྱུ་དང་རྐྱེན་ནི་དེ་ལྟ་བུ་ཡིན་མོད་ཀྱི། ཆོས་ཐམས་ཅད་ཀྱང་ཆེན་པོ་ལྔའི་རྒྱུ་དང་རྐྱེན་དུ་འཐུན་ནོ་ཞེས་སྨྲ་བའི་མི་རིགས་སོ། །དཔེར་ན་འཇིག་རྟེན་གྱི་གཏམ་དུ་རབ་ཏུ་བྱུང་བ་ཐམས་ཅད་ནི་ཚུལ་ཁྲིམས་སྲུང་བ་ལ་བརྩོན་པ་ཡིན་པས་གདོལ་པ་ལ་སོགས་པ་ཡང་དེ་བཞིན་དུ་ཚུལ་ཁྲིམས་སྲུང་བ་ལ་བརྩོན་པ་ཡིན་ནོ། །ཞེས་བརྗོད་པ་དང་འདྲ་བར་འགྱུར་རོ། །རིགས་ཀྱི་བུ་ཁྱོད་སྨྲ་བ་ལྟར་ཆེན་པོ་ལྔ་ལ་ངེས་པའི་རང་བཞིན་ཡོད་དོ་ཞེས་སྨྲ་བ་ནི་ངས་བལྟས་ན་རང་བཞིན་དེ་ནི་འགྱུར་བ་སྟེ་ངེས་པ་མ་ཡིན་ནོ། །རིགས་ཀྱི་བུ་ཁྱོད་ཀྱི་ཆོས་ལ་མར་དང་སྤྲ་ཚིལ་དང་སྤྲ་རྩི་ལ་ས་ཞེས་བྱ་སྟེ། ཁྱོད་ཀྱིས་ས་ཞེས་བཏགས་པ་དེ་ནི་མ་ངེས་ཏེ་བར་བར་ནི་ཆུ་ལྟ་བུར་ཡང་བཏུབ། བར་བར་ནི་ས་ལྟ་བུར་ཡང་བཏུབ་སྟེ། དེ་བས་ན་རང་བཞིན་གྱིས་སྲ་བའོ་ཞེས་བྱར་མི་རུང་ངོ་། །རིགས་ཀྱི་བུ་ཁྱོད་ཀྱི་ཆོས་ལ་ཚོན་མོ་སྟེངས་དང་། ཞ་ཉེ་དང་། ཟངས་དང་། ལྕགས་དང་། གསེར་དང་། དངུལ་ལ་མེའོ་ཞེས་བྱ་བ་དེ་ལ་རང་བཞིན་བཞི་ཡོད་དེ། འབབ་པའི་ཚེ་ནི་ཆུ་ཞེས་བྱ། གཡོ་བའི་ཚེ་ནི་རླུང་ཞེས་བྱ། ཚ་བའི་ཚེ་ནི་མེ་ཞེས་བྱ། སྲ་བའི་ཚེ་ནི་ས་ཞེས་བྱ་ན་ཅིའི་ཕྱིར་དེ་ལ་ངེས་པར་མེའི་རང་བཞིན་ནོ་ཞེས་གདགས། རིགས་ཀྱི་བུ་ཆུའི་རང་བཞིན་ནི་འབབ་པ་སྟེ། གལ་ཏེ་ཆུ་འཁྱགས་ཀྱང་དེ་ལ་ས་ཞེས་མི་བྱའོ། །འོན་ཀྱང་ཆུ་ཞེས་བྱའོ། །དེ་ཅིའི་ཕྱིར་ཞེ་ན། དབའ་རླབས་གཡོ་བའི་ཚེ་རླུང་ཞེས་མི་བྱའོ། །དེ་ལྟར་གཡོ་བ་ལ་རླུང་ཞེས་མི་བྱ་ན་འཁྱགས་ཀྱང་ཆུ་མ་ཡིན་ཞེས་བྱར་མི་རུང་ངོ་། །དེ་ལྟར་དངོས་པོ་གཉིས་པོ་ཡང་རྒྱུ་དང་རྐྱེན་ལས་གྱུར་ན་ཅིའི་ཕྱིར་ཆོས་ཐམས་ཅད་རྒྱུ་དང་རྐྱེན་ལས་མ་གྱུར་ཅེས་སྨྲ། རིགས་ཀྱི་བུ་ཇི་སྟེ་དབང་པོ་ལྔ་རང་བཞིན་གྱིས་མཐོང་བ་དང་ཐོས་པ་དང་ཚོར་བ་དང་། ཤེས་པ་དང་རེག་པ་ཡང་རང་བཞིན་ཡིན་ཏེ། རྒྱུ་དང་རྐྱེན་ལས་མ་གྱུར་ཏོ་ཞེས་བྱ་བ་ནི་མི་རུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་རང་བཞིན་
ཉིད་ཀྱིས་རང་བཞིན་མི་འགྱུར་བ་ཞིག་ཡིན་ན་མིག་གི་རང་བཞིན་མཐོང་བ་ཡང་རྟག་ཏུ་མཐོང་བའི་རིགས་ཏེ། མཐོང་བ་དང་མི་མཐོང་བའི་དུས་ཀྱང་མེད་པའི་རིགས་སོ། །དེ་བས་ན་རྒྱུ་དང་རྐྱེན་གྱིས་མཐོང་གི་རྒྱུ་དང་རྐྱེན་མེད་པ་ལས་མ་ཡིན་པར་རིག་པར་བྱའོ། །རིགས་ཀྱི་བུ་ཁྱོད་སྨྲ་བ་ལྟར་འདོད་ཆགས་སྐྱེ་བ་དང་རྣམ་པར་གྲོལ་བ་ནི་ཡུལ་ལྔའི་རྒྱུ་ལས་མ་ཡིན་ནོ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། རིགས་ཀྱི་བུ་འདོད་ཆགས་སྐྱེ་བ་དང་རྣམ་པར་གྲོལ་བ་ཡུལ་ལྔ་པོའི་རྒྱུ་ལས་མ་གྱུར་མོད་ཀྱི། མི་དགེ་བ་རྣམ་པར་རྟོག་པའི་ཕྱིར་འདོད་ཆགས་སྐྱེའོ། །དགེ་བར་རྣམ་པར་རྟོགས་པའི་ཕྱིར་རྣམ་པར་གྲོལ་བར་འགྱུར་རོ། །རིགས་ཀྱི་བུ་ནང་གི་རྒྱུ་དང་རྐྱེན་གྱིས་འདོད་ཆགས་སྐྱེ་བ་དང་རྣམ་པར་གྲོལ་བར་འགྱུར་རོ། །ཕ་རོལ་གྱི་རྒྱུ་དང་རྐྱེན་གྱིས་སྐྱེ་ཞིང་རྒྱས་པར་འགྱུར་རོ། །དེ་བས་ན་ཁྱོད་ཆོས་ཐམས་ཅད་ལ་སོ་སོའི་རང་བཞིན་ཡོད་དེ་འདོད་ཆགས་སྐྱེ་བ་དང་རྣམ་པར་གྲོལ་བ་ཡང་ཡུལ་ལྔའི་རྒྱུ་ལས་མ་ཡིན་ཞེས་བྱ་བ་དེ་མི་རུང་ངོ་། །རིགས་ཀྱི་བུ་ཁྱོད་སྨྲ་བ་ལྟར་དབང་པོ་རྣམས་དང་ལྡན་པ་རྣམས་ནི་དབུལ་ཕོངས་ལ་དབང་ཡང་མེད། དབང་པོ་དང་མི་ལྡན་ཞིང་ཉམས་པ་ནི་ལོངས་སྤྱོད་ཆེ་ཞིང་དབང་དང་ལྡན་ཏེ། དེ་ལས་བལྟས་ན་རང་བཞིན་ཡོད་དེ་རྒྱུ་དང་རྐྱེན་ལས་མ་ཡིན་ནོ་ཞེས་བྱ་བ་དེ་མི་རུང་ངོ་། །དེ་ཅིའི་ཕྱིར་ཞེ་ན། སེམས་ཅན་ནི་ལས་ལས་འབྲས་བུ་རྣམ་པར་སྨིན་ཏེ། དེ་ལྟར་འབྲས་བུ་རྣམ་པར་སྨིན་པ་ཡང་རྣམ་པ་གསུམ་སྟེ། མངོན་སུམ་དུ་སྨིན་པ་དང་། སྐྱེས་ནས་སྨིན་པ་དང་ཕྱིས་སྨིན་པའོ། །དབུལ་ཕོངས་པ་དང་ཕྱུག་སྐྱིད་པ་དང་དབང་པོ་དང་ལྡན་པ་དང་མི་ལྡན་པ་ཡང་སོ་སོ་བ་ཡིན་ནོ། །རང་བཞིན་ཡོད་ན་དབང་པོ་དང་ལྡན་པ་ནི་ལོངས་སྤྱོད་ཆེ་བའི་རིགས། ལོངས་སྤྱོད་ཆེ་བ་ནི་དབང་པོ་དང་ལྡན་པའི་རིགས་སོ། །དེ་དེ་ལྟར་མ་གྱུར་པས་དེ་བས་ན་ངེས་པར་རང་བཞིན་མེད་དེ་རྒྱུ་དང་རྐྱེན་ལས་གྱུར་ཏོ། །རིགས་ཀྱི་བུ་ཁྱོད་སྨྲ་བ་ལྟར་འཇིག་རྟེན་ན་བྱིས་པ་ཤེད་མ་བྱེ་བ་ཡུལ་ལྔ་པོ་བྱེ་བྲག་མི་ཕྱེད་པས་བར་བར་ནི་ངུ་། བར་བར་ནི་དགོད་དེ། དེ་བས་ན་ཐམས་ཅད་ལ་རང་བཞིན་ཡོད་དེ་ཞེས་བྱ་བ་དེ་ཡང་མི་རུང་ངོ་། །དེ་ཅིའི་ཕྱིར་ཞེ་ན། ཇི་སྟེ་རང་བཞིན་ཡོད་ན་དགོད་པ་ཡང་རྟག་ཏུ་དགོད།
ངུ་བ་ཡང་རྟག་ཏུ་ངུ་བའི་རིགས་ཏེ། རེས་འགའ་ནི་དགོད། རེས་འགའ་ནི་ངུ་བའི་མི་རིགས་སོ། །དེ་ལྟར་རེས་འགའ་ནི་དགོད། རེས་འགའ་ནི་ངུ་བ་ལས་ན་ཐམས་ཅད་རྒྱུ་དང་རྐྱེན་ལས་འགྱུར་བར་རིག་པར་བྱ་སྟེ། དེ་བས་ན་ཆོས་ཐམས་ཅད་ལ་རང་བཞིན་ཡོད་དེ་རྒྱུ་དང་རྐྱེན་ལས་མ་ཡིན་ནོ་ཞེས་བྱ་བའི་མི་རིགས་སོ། །ཀུན་ཏུ་རྒྱུས་གསོལ་པ། བཅོམ་ལྡན་འདས་གལ་ཏེ་ཆོས་ཐམས་ཅད་རྒྱུ་དང་རྐྱེན་ལས་བྱུང་བ་ཡིན་ན། ལུས་འདི་རྒྱུ་དང་རྐྱེན་གང་ལས་བྱུང་། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལུས་འདིའི་རྒྱུ་དང་རྐྱེན་ནི་ཉོན་མོངས་པ་དང་ལས་སོ། །ཀུན་ཏུ་རྒྱུས་གསོལ་པ། བཅོམ་ལྡན་འདས་ལུས་འདི་ཉིད་ཉོན་མོངས་པ་དང་ལས་ལས་གྱུར་ན་ཉོན་མོངས་པ་དང་ལས་འདི་གཅད་དུ་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ཏེ། དེ་དེ་བཞིན་ནོ། །ཀུན་ཏུ་རྒྱུས་ཡང་གསོལ་པ། བཅོམ་ལྡན་འདས་བདག་ལ་རྣམ་པར་ཕྱེ་སྟེ་བསྟན་པས་བདག་གིས་ཐོས་ནས་གནས་འདི་ཉིད་ལས་མ་གཡོས་པར་ཡོངས་སུ་ཆོད་པར་མཛད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་མཐའ་གཉིས་ཤེས་ལ་དབུ་མ་ལ་ཐོགས་པ་མེད་ན་གང་ཟག་དེས་ནི་ཉོན་མོངས་པ་དང་ལས་ཡོངས་སུ་ཆོད་པར་འགྱུར་རོ། །ཀུན་ཏུ་རྒྱུས་གསོལ་པ། བཅོམ་ལྡན་འདས་བདག་གིས་ནི་ཤེས་ཤིང་རྟོགས་ཏེ་དམ་པའི་ཆོས་ལ་ཆོས་ཀྱི་མིག་རྣམ་པར་དག་གོ །བཅོམ་ལྡན་འདས་ཀྱིས་བཀའ་སྩལ་པ། ཇི་ལྟ་བུར་ཤེས་ཤིང་རྟོགས། གསོལ་པ། བཅོམ་ལྡན་འདས་མཐའ་གཉིས་ནི་གཟུགས་དང་། གཟུགས་ཀྱི་རྣམ་པར་གྲོལ་བའོ། །དབུ་མ་ཞེས་བགྱི་བ་ནི་འཕགས་པའི་ལམ་བརྒྱད་དེ། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་ཡང་དེ་བཞིན་དུ་རྒྱས་པར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་མཐའ་གཉིས་ཤིན་ཏུ་རྟོགས་ཏེ། ཉོན་མོངས་པ་དང་ལས་ཡོངས་སུ་ཆོད་དོ། །གསོལ་པ། བཅོམ་ལྡན་འདས་བདག་རབ་ཏུ་བྱུང་ཞིང་བསྙེན་པར་རྫོགས་པར་གསོལ་ལོ། །བཅོམ་ལྡན་འདས་ཀྱིས་ལེགས་པར་འོངས་སོ་ཞེས་བཀའ་སྩལ་པས་དགེ་སློང་དུ་གྱུར་ཏེ། དེའི་ཚེ་ཁམས་གསུམ་གྱི་ཉོན་མོངས་པ་ཀུན་ཆོད་ནས་དགྲ་བཅོམ་པའི་འབྲས་
བུ་ཐོབ་པར་གྱུར་ཏོ། །དེ་ནས་གཞན་ཡང་བྲམ་ཟེ་ཤིན་ཏུ་རྒྱས་པ་ཞེས་བྱ་བས་ཡང་འདི་སྐད་ཅེས་གསོལ་ཏོ། །གཽ་ཏ་མ་བདག་ཅི་སེམས་པ་མཁྱེན་ནམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་མྱ་ངན་ལས་འདས་པ་ནི་རྟག་པའོ། །འདུས་བྱས་ནི་མི་རྟག་པའོ། །ཡོན་པོ་ནི་ངན་པར་ལྟ་བའོ། །དྲང་པོ་ནི་འཕགས་པའི་ལམ་མོ། །བྲམ་ཟེས་གསོལ་པ། གཽ་ཏ་མ་ཅིའི་རྒྱུ་ཅིའི་རྐྱེན་གྱིས་དེ་སྐད་ཅེས་གསུངས། བཀའ་སྩལ་པ། རིགས་ཀྱི་བུ་ཁྱོད་ཀྱི་ཡིད་ལ་བསོད་སྙོམས་བྱེད་པ་ནི་རྟག་པ། མགྲོན་དུ་བོས་པ་ནི་མི་རྟག་པ། ཡོན་པོ་ནི་མ་རབས། དྲང་པོ་ནི་རྒྱལ་མཚན་ནོ་སྙམ་སེམས་ཏེ། དེ་བས་ན་མྱ་ངན་ལས་འདས་པ་ནི་རྟག་པ། འདུས་བྱས་ནི་མི་རྟག་པ། ཡོན་པོ་ནི་ངན་པར་ལྟ་བ། དྲང་པོ་ནི་འཕགས་པའི་ལམ་བརྒྱད་དེ། ཁྱོད་ཀྱིས་སྔོན་སེམས་པ་ལྟ་བུ་ནི་མ་ཡིན་ནོ། །བྲམ་ཟེས་གསོལ་པ། གཽ་ཏ་མ་བདག་གིས་བསམས་པ་ཡང་དག་པར་མཁྱེན་ནོ། །འཕགས་པའི་ལམ་བརྒྱད་ཀྱིས་སེམས་ཅན་ཐམས་ཅད་རྣམ་པར་གྲོལ་བར་འགྱུར་རམ། དེའི་ཚེ་བཅོམ་ལྡན་འདས་ཅང་མི་གསུང་སྟེ་ལན་མ་བཏབ་བོ། །བྲམ་ཟེས་གསོལ་པ། གཽ་ཏ་མ་བདག་གིས་བསམས་པ་མཁྱེན་ན་ཅིའི་སླད་དུ་བདག་གིས་ཞུས་པའི་ལན་མ་གནང་ནས་ཅང་མི་གསུང་བར་བཞུགས། དེ་ནས་ཚེ་དང་ལྡན་པ་ཀུན་ཤེས་ཀཽཎྜི་ནྱས་འདི་སྐད་ཅེས་སྨྲས་སོ། །བྲམ་ཟེ་ཆེན་པོ་གལ་ཏེ་འཇིག་རྟེན་མཐའ་ཡོད་དམ་མཐའ་མེད་ཅེས་འདྲི་ན་དེ་བཞིན་གཤེགས་པ་ཆོས་ཉིད་ཀྱིས་ཅང་མི་གསུང་སྟེ་ལན་མི་འདེབས་སོ། །འཕགས་པའི་ལམ་བརྒྱད་ནི་དྲང་པོའོ། །མྱ་ངན་ལས་འདའ་བ་ནི་རྟག་པའོ། །གལ་ཏེ་འཕགས་པའི་ལམ་བརྒྱད་ལ་ནན་ཏན་བྱས་ན་རྣམ་པར་གྲོལ་བ་ཐོབ་པར་འགྱུར་རོ། །ཇི་སྟེ་ནན་ཏན་མ་བྱས་ན་ཐོབ་པར་མི་འགྱུར་རོ། །བྲམ་ཟེ་ཆེན་པོ་དཔེར་ན་མཁར་ཆེན་པོ་ཞིག་གི་ངོས་བཞི་ན་ཐར་བའི་ཁུང་དང་ལམ་མེད་དེ་སྒོ་གཅིག་པུ་ཡོད་ན་དེའི་སྒོ་སྲུངས་མཁས་པ་ཤེས་རབ་དང་ལྡན་ན་གང་གཏང་བའི་རིགས་པ་ནི་གཏོང་ངོ་། །གང་གཏང་བའི་མི་རིགས་པ་ནི་མི་གཏོང་སྟེ། ཇི་སྙེད་རྒྱུ་བ་གྲངས་ཉིད་མི་ཤེས་ཀྱང་། རྒྱུ་བ་ཐམས་ཅད་སྒོ་དེ་ལ་རྒྱུ་བར་ངེས་པར་ཤེས་སོ། །རིགས་ཀྱི་བུ་དེ་བཞིན་གཤེགས་པ་ཡང་དེ་དང་འདྲ་
སྟེ། མཁར་ནི་མྱ་ངན་ལས་འདའ་བའི་དཔེའོ། །སྒོ་ནི་འཕགས་པའི་ལམ་བརྒྱད་ཀྱི་དཔེའོ། །སྒོ་སྲུངས་ནི་དེ་བཞིན་གཤེགས་པའི་དཔེའོ། །རིགས་ཀྱི་བུ་དེ་བཞིན་གཤེགས་པས་ཟད་པ་དང་མི་ཟད་པའི་ལན་མ་གསུངས་མོད་ཀྱི། ཇི་ཙམ་དུ་ཟད་པར་འགྱུར་བ་དེ་ནི་འཕགས་པའི་ལམ་བརྒྱད་ནན་ཏན་བྱེད་པ་ལས་འགྱུར་རོ། །བྲམ་ཟེས་སྨྲས་པ། ལེགས་སོ་ལེགས་སོ། །བཙུན་པ་ཀཽཎྜི་ནྱས་དེ་བཞིན་གཤེགས་པ་དམ་པའི་ཆོས་སྟོན་པ་ལ་ཤིན་ཏུ་མཁས་སོ། ། བདག་ཀྱང་མཁར་དང་ལམ་ཤེས་ཤིང་སྒོ་སྲུངས་ལྟ་བུར་དད་དོ། །ཀཽཎྜི་ནྱས་སྨྲས་པ། ལེགས་སོ། །བྲམ་ཟེ་བླ་ན་མེད་པ་རྒྱ་ཆེ་བའི་སེམས་བསྐྱེད་པ་ལེགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཤེས་ཀཽཎྜི་ནྱ་དེ་སྐད་མ་ཟེར་ཅིག །བྲམ་ཟེ་འདི་ནི་ད་གདོད་དེ་ལྟར་སེམས་བསྐྱེད་པ་མ་ཡིན་གྱི། ཀཽཎྜི་ནྱ་སྔོན་འདས་པའི་དུས་ན་བཅོམ་ལྡན་འདས་ཚད་མེད་པ་སྙེད་འདས་པའི་སྔ་རོལ་ན་སངས་རྒྱས་བཅོམ་ལྡན་འདས་ཀུན་ཏུ་འོད་ཅེས་བྱ་བ་དེ་བཞིན་གཤེགས་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་གཤེགས་ཏེ། སངས་རྒྱས་དེ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བསྐལ་པ་བཟང་པོ་འདིར་མངོན་པར་སངས་རྒྱས་ཏེ། ཆོས་ཀྱི་མཚན་ཉིད་ཁོང་དུ་ཆུད་ཅིང་རྟོགས་ནས་ཡུན་རིང་མོད་ཀྱི། སེམས་ཅན་གྱི་ཕྱིར་མུ་སྟེགས་ཅན་དུ་སྟོན་ཏེ་མི་ཤེས་པ་ལྟར་བྱེད་དོ། །དེ་བས་ན་ཀཽཎྜི་ནྱ་ཁྱོད་བླ་ན་མེད་པའི་སེམས་བསྐྱེད་པ་ལེགས་སོ་ལེགས་སོ་ཞེས་མ་ཟེར་ཅིག །དེའི་ཚེ་བཅོམ་ལྡན་འདས་མཁྱེན་བཞིན་དུ་ཚེ་དང་ལྡན་པ་ཀཽཎྜི་ནྱ་ལ་དགེ་སློང་དགའ་བོ་ད་ལྟར་གང་ན་འདུག་ཅེས་བཀའ་སྩལ་ཏོ། །ཚེ་དང་ལྡན་པ་ཀཽཎྜི་ནྱས་གསོལ་པ། བཅོམ་ལྡན་འདས་དགེ་སློང་དགའ་བོ་ནི་ད་ལྟར་ཤིང་སཱ་ལའི་ཚལ་འདི་ནས་དཔག་ཚད་བཅུ་གཉིས་ཀྱི་ཕ་རོལ་ན་བདུད་དྲུག་ཁྲི་བཞི་སྟོང་སྙེད་ཀྱིས་ཡོངས་སུ་གཙེ་ཞིང་མཆིས་སོ། །བདུད་དེ་རྣམས་དེ་བཞིན་གཤེགས་པའི་གཟུགས་སུ་སྤྲུལ་
ནས། ལ་ལ་ནི་ཆོས་ཐམས་ཅད་རྟེན་ཅིང་འབྲེལ་ཏེ་འབྱུང་བ་ཡིན་ནོ་ཞེས་སྨྲ། ལ་ལ་ནི་ཆོས་ཐམས་ཅད་རྟེན་ཅིང་འབྲེལ་ཏེ་འབྱུང་བ་མ་ཡིན་ནོ་ཞེས་སྨྲ། ལ་ལ་ནི་རྟེན་ཅིང་འབྲེལ་ཏེ་འབྱུང་བའི་ཆོས་ཐམས་ཅད་རྟག་པ་ཡིན་ནོ་ཞེས་སྨྲ། ལ་ལ་ནི་རྟེན་ཅིང་འབྲེལ་ཏེ་འབྱུང་བའི་ཆོས་ཐམས་ཅད་མི་རྟག་པ་ཡིན་ནོ་ཞེས་སྨྲ། ལ་ལ་ནི་ཕུང་པོ་ལྔ་བདེན་པ་ཡིན་ནོ་ཞེས་སྨྲ། ལ་ལ་ནི་སྒྱུ་མ་ཡིན་ནོ་ཞེས་སྨྲ་སྟེ། དེ་བཞིན་དུ་སྐྱེ་མཆེད་དང་། ཁམས་དང་། རྒྱས་པར་རོ། །ལ་ལ་ནི་རྟེན་ཅིང་འབྲེལ་ཏེ་འབྱུང་བ་ཡོད་དོ་ཞེས་སྨྲ། ལ་ལ་ནི་རྐྱེན་བཞི་འབའ་ཞིག་ཡོད་དོ་ཞེས་སྨྲ། ལ་ལ་ནི་ཆོས་ཐམས་ཅད་སྒྱུ་མ་ལྟ་བུ་དང་། སྤྲུལ་པ་ལྟ་བུ་དང་། སྨིག་རྒྱུ་བ་ལྟ་བུའོ་ཞེས་སྨྲ། ལ་ལ་ནི་ཐོས་པའི་རྒྱུ་ལས་ཆོས་ཐོབ་པོ་ཞེས་སྨྲ། ལ་ལ་ནི་བསམས་པའི་རྒྱུ་ལས་ཆོས་ཐོབ་པོ་ཞེས་སྨྲ། ལ་ལ་ནི་བསྒོམས་པའི་རྒྱུ་ལས་ཆོས་ཐོབ་བོ་ཞེས་སྨྲ། ལ་ལ་ནི་མི་སྡུག་པ་ཡང་དག་པར་རྟོགས་པའི་ཆོས་སྨྲ། ལ་ལ་ནི་དབུགས་ཕྱི་ནང་དུ་རྒྱུ་བའི་ཆོས་སྨྲ། ལ་ལ་ནི་དྲན་པ་ཉེ་བར་གཞག་པ་བཞི་ཡང་དག་པར་རྟོག་པ་སྨྲ། ལ་ལ་ནི་ཡང་དག་པའི་སྤྱོད་པའི་དོན་གསུམ་དང་ཐབས་མཁས་པ་བདུན་པོ་སྨྲ། ལ་ལ་ནི་དྲོད་དང་། སྤྱི་བོ་དང་། བཟོད་པ་དང་། འཇིག་རྟེན་མཆོག་གི་ཆོས་དང་། སློབ་པ་དང་། མི་སློབ་པ་དང་། བྱང་ཆུབ་སེམས་དཔའི་ས་དང་པོ་ནས་ས་བཅུ་པའི་བར་དུ་སྨྲའོ། །ལ་ལ་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་སྨྲ། ལ་ལ་ནི་མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ཚིགས་སུ་བཅད་པའི་སྡེ་དང་། ལུང་དུ་བསྟན་པའི་སྡེ་དང་། ཆེད་དུ་བརྗོད་པའི་སྡེ་དང་། ད་ལྟར་དང་། འདས་པའི་སྡེ་དང་། སྐྱེས་པ་རབས་ཀྱི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། རྨད་དུ་བྱུང་བའི་སྡེ་དང་། ཤིན་ཏུ་རྒྱས་པའི་སྡེ་དང་། གཏན་ལ་དབབ་པར་བསྟན་པའི་སྡེ་ཡང་སྨྲའོ། །ལ་ལ་ནི་དྲན་པ་ཉེ་བར་གཞག་པ་བཞི་དང་། ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་
དང་། འཕགས་པའི་ལམ་གྱི་ཡན་ལག་བརྒྱད་སྨྲའོ། །ལ་ལ་ནི་ནང་སྟོང་པ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་དང་། ཐོག་མ་དང་། ཐ་མ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་དང་། དོར་བ་མེད་པ་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མཚན་མ་མེད་པ་སྟོང་པ་ཉིད་དང་། ཕུང་པོ་སྟོང་པ་ཉིད་དང་། ཁམས་སྟོང་པ་དང་། སྐྱེ་མཆེད་སྟོང་པ་དང་། དགེ་བ་སྟོང་པ་དང་། མི་དགེ་བ་སྟོང་པ་དང་། ལུང་དུ་མི་སྟོན་པ་སྟོང་པ་དང་། བྱང་ཆུབ་སྟོང་པ་དང་། ལམ་སྟོང་པ་དང་། མྱ་ངན་ལས་འདས་པ་སྟོང་པ་དང་། སྤྱོད་པ་སྟོང་པ་དང་། ཐོབ་པ་སྟོང་པ་དང་། དོན་དམ་པ་སྟོང་པ་དང་། སྟོང་པ་ཉིད་སྟོང་པ་ཉིད་དང་། ཆེན་པོ་སྟོང་པ་ཉིད་ཀྱང་སྟོན་ཏོ། །ལ་ལ་ནི་མངོན་པར་ཤེས་པ་སྟོན་ཏོ། །ལུས་ལས་ཆུ་དང་མེ་འབྱུང་སྟེ། ལུས་ཀྱི་སྟོད་ནས་ཆུ་འབབ་ན། ལུས་ཀྱི་སྨད་ནས་མེ་འབར། ལུས་ཀྱི་སྨད་ནས་ཆུ་འབབ་ན། ལུས་ཀྱི་སྟོད་ནས་མེ་འབར། མཆན་གཡས་པ་འོག་ཏུ་ཕབ་ན་མཆན་གཡོན་ནས་ཆུ་འབྱུང་། མཆན་གཡོན་པ་འོག་ཏུ་ཕབ་ན་གཡས་ནས་ཆུ་འབྱུང་། མཆན་ཁུང་གཅིག་ནས་འབྲུག་བསྒྲགས་ན་མཆན་ཁུང་གཅིག་ནས་ཆར་འབབ་པ་ཡང་སྟོན་ཏོ། །ལ་ལ་ནི་སངས་རྒྱས་ཀྱི་ཞིང་མང་པོ་ཡང་སྟོན་ཏོ། །ལ་ལ་ནི་བྱང་ཆུབ་སེམས་དཔའ་ཐོག་མ་ལྷུམས་ནས་བལྟམས་ནས་གོམ་པ་བདུན་བདུན་གཤེགས་པ་དང་། ཕོ་བྲང་ན་འདོད་པ་ལྔ་ལ་ལོངས་སྤྱོད་པ་དང་། ཐོག་མ་རབ་ཏུ་བྱུང་བ་ནས་དཀའ་བ་མཛད་པ་དང་། བྱང་ཆུབ་ཀྱི་ཤིང་དྲུང་དུ་གཤེགས་ཏེ་ཏིང་ངེ་འཛིན་དུ་ཞུགས་པ་དང་། བདུད་ཀྱི་སྡེ་རྣམས་ཕབ་ནས་ཆོས་ཀྱི་འཁོར་ལོ་སྐོར་བ་དང་། རྫུ་འཕྲུལ་ཆེན་པོ་བསྟན་ནས་ཡོངས་སུ་མྱ་ངན་ལས་འདའ་བ་ཡང་སྟོན་ཏོ། །བཅོམ་ལྡན་འདས་དགེ་སློང་དགའ་བོས་དེ་ལྟ་བུའི་དངོས་པོ་དག་མཐོང་ནས། དེ་ཡིད་ལ་འདི་སྙམ་དུ་རྫུ་འཕྲུལ་སྔོན་མ་མཐོང་བ་འདི་དག་སུས་བྱས། བཅོམ་ལྡན་
འདས་ཤཱཀྱ་ཐུབ་པས་མཛད་པ་མ་ཡིན་ནམ་སྙམ་སེམས་ཏེ། ལངས་སམ་སྨྲའམ་ཅི་བགྱི་བའི་གཏོལ་མ་མཆིས་སོ། །དགེ་སློང་དགའ་བོ་ནི་བདུད་ཀྱི་ཞགས་པས་ཟིན་པ་ཡང་འདི་སྙམ་དུ་སངས་རྒྱས་བཅོམ་ལྡན་འདས་རྣམས་ཀྱིས་གསུངས་པ་ནི་སོ་སོར་མི་འཐུན་ན། བདག་གིས་ད་གང་གཟུང་སྙམ་སེམས་སོ། །བཅོམ་ལྡན་འདས་དགེ་སློང་དགའ་བོ་ནི་དེ་ལྟར་སྡུག་བསྔལ་ཆེན་པོ་མྱོང་སྟེ། དེ་བཞིན་གཤེགས་པ་ཡིད་ལ་དྲན་ཡང་དཔུང་གཉེན་དུ་འགྱུར་བ་མ་མཆིས་པས། འཁོར་གྱི་དཀྱིལ་འཁོར་འདིར་མ་མཆིས་པ་ལགས་སོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་གྱི་དཀྱིལ་འཁོར་འདི་ན་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་སྐྱེ་བ་གཅིག་ལོན་པ་དང་། བྱང་ཆུབ་ཏུ་སེམས་བསྐྱེད་ནས་སྐྱེ་བ་ཚད་མེད་པ་སྙེད་ལོན་ཏེ། སངས་རྒྱས་ཚད་མེད་པ་སྙེད་ལ་མཆོད་པས་མཆོད་པ་སེམས་ཤིན་ཏུ་བརྟན་པས། སྦྱིན་པའི་ཕ་རོལ་ཏུ་ཕྱིན་པ་སྤྱོད་པ་ཡོངས་སུ་རྫོགས་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་ཡོངས་སུ་རྫོགས་ཏེ། ཡོན་ཏན་དང་ལྡན་པ་ཡུན་རིང་པོ་ནས། སངས་རྒྱས་ཚད་མེད་པ་སྙེད་ལ་བསྙེན་བཀུར་བགྱིས་ནས་ཚངས་པར་སྤྱོད་པ་ཡོངས་སུ་དག་པ་དང་། བྱང་ཆུབ་ཀྱི་སེམས་ལས་ཕྱིར་མི་ལྡོག་པ་དང་། ཕྱིར་མི་ལྡོག་པའི་བཟོད་པ་ཐོབ་པ་དང་། ཕྱིར་མི་ལྡོག་པའི་གཟུངས་ཐོབ་པ་དང་། ཆོས་ཀྱི་བཟོད་པ་ཐོབ་པ་དང་། དཔའ་བར་འགྲོ་བའི་ཏིང་ངེ་འཛིན་ལ་སོགས་ཏེ་ཏིང་ངེ་འཛིན་ཚད་མེད་པ་ཐོབ་པ་འདི་དག་གིས་ནི་ཐེག་པ་ཆེན་པོའི་མདོ་སྡེ་ལ་ནམ་དུ་ཡང་ཐེ་ཙོམ་མི་འབྱུང་ཞིང་། དཀོན་མཆོག་གསུམ་མཚན་ཉིད་གཅིག་པ་དང་། རྟག་པ་དང་། གནས་པ་དང་། མི་འགྱུར་མི་འཕོ་བ་རྣམ་པར་འབྱེད་ཅིང་སྟོན་པ་ལ་ཡང་ཤིན་ཏུ་མཁས་ཏེ། བསམ་གྱིས་མི་ཁྱབ་པའི་ཆོས་ཐོས་ན་ཡང་ངོ་མཚར་རྨད་དུ་མི་འཛིན་ལ། སྟོང་པ་ཉིད་རྣམ་པ་མང་པོ་ཐོས་ཀྱང་སེམས་མི་ཞུམ་མི་སྐྲག་པས་ཆོས་ཐམས་ཅད་ཀྱི་མཚན་ཉིད་ཀྱང་མངོན་དུ་རྟོགས་
པར་བགྱིད། མདོ་སྡེ་བཅུ་གཉིས་ཀྱང་འཛིན་ཅིང་དོན་ལ་ཡང་ཤིན་ཏུ་མཁས་ཏེ། དེ་མ་ལགས་པ་སངས་རྒྱས་ཚད་མེད་པ་སྙེད་ཀྱི་མདོ་སྡེ་གསུང་རབ་བཅུ་གཉིས་ཀྱང་འཛིན་ནུས་པ་མཆིས་ན་ཅིའི་སླད་དུ་ཡོངས་སུ་མྱ་ངན་ལས་འདས་པའི་ཆོས་ཀྱི་རྣམ་གྲངས་འདི་འཛིན་མི་ནུས་སྙམ་དགོངས་ནས་ཀཽཎྜི་ནྱ་ལ་དགེ་སློང་དགའ་བོ་ག་རེ་ཞེས་བཀའ་སྩལ། དེ་ནས་བཅོམ་ལྡན་འདས་ཀྱིས་འཇམ་དཔལ་ལ་འདི་སྐད་ཅེས་བཀའ་སྩལ་ཏོ། །ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག །རིགས་ཀྱི་བུ་ང་མངོན་པར་སངས་རྒྱས་ནས་ལོ་སུམ་ཅུ་ལྷག་ལོན་ཏེ། རྒྱལ་པོའི་ཁབ་ན་བཞུགས་པ་ན་དེའི་ཚེ་དེའི་དུས་ན་ངས་དགེ་སློང་རྣམས་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་སུ་ཞིག་གིས་དེ་བཞིན་གཤེགས་པས་གསུངས་པའི་མདོ་སྡེ་བཅུ་གཉིས་འཛིན་ཅིང་ངའི་གཡོག་ཀྱང་བྱེད་ལ། བདག་གི་དོན་ཡང་བྱེད་ནུས་ཞེས་བཀའ་སྩལ་པ་ན། འཁོར་གྱི་ནང་ན་ཚེ་དང་ལྡན་པ་ཀུན་ཤེས་ཀཽཎྜི་ནྱས་ང་ལ་འདི་སྐད་ཅེས་གསོལ་ཏོ། །བདག་གིས་ནི་དེ་བཞིན་གཤེགས་པས་གསུངས་པའི་གསུང་རབ་བཅུ་གཉིས་འཛིན་ཅིང་། དེ་བཞིན་གཤེགས་པས་མཛད་པའི་གཡོག་དང་། བདག་གི་དོན་ཀྱང་བགྱིད་ནུས་སོ་ཞེས་གསོལ་ཏོ། །དེ་ལ་ངས་འདི་སྐད་ཅེས་བཀའ་སྩལ་ཏོ། །ཀཽཎྜི་ནྱ་ཁྱོད་ཉིད་ཀྱང་རྒས་འཁོགས་ཏེ། གཡོག་སྦྱིན་དགོས་ན་ཁྱོད་ཀྱིས་ངའི་གཡོག་ཇི་ལྟར་བྱ། དེ་ནས་ཤཱ་རིའི་བུས་གསོལ་པ། བདག་གིས་ནི་གསུང་རབ་ཐམས་ཅད་འཛིན་ཅིང་མཛད་པ་ཐམས་ཅད་ཀྱི་གཡོག་ཀྱང་བགྱིད་ལ། བདག་གི་དོན་ཡང་བགྱིད་ནུས་སོ་ཞེས་གསོལ་ཏོ། །དེའི་ཚེ་ཤཱ་རིའི་བུ་ལ་ཡང་ཁྱོད་ཉིད་ཀྱང་རྒས་འཁོགས་ཏེ་གཡོག་དགོས་ན། ངའི་གཡོག་ཇི་ལྟར་བྱ་ཞེས་བཀའ་སྩལ་པ་ནས་དགྲ་བཅོམ་པ་ལྔ་བརྒྱའི་བར་དུ་གསོལ་ནས་ངས་མ་གནང་བ་ནི་དེ་བཞིན་དུ་རྒྱས་པར་རིག་པར་བྱའོ། །དེའི་ཚེ་མཽད་གལ་ཡ་ན་འཁོར་དེའི་ནང་དུ་འདུས་པར་གྱུར་ཏེ། དེ་ཡིད་ལ་འདི་སྙམ་དུ་བསམས་སོ། །དེ་བཞིན་གཤེགས་པས་དགེ་སློང་ལྔ་བརྒྱ་པོ་གང་ཡང་གཡོག་ཏུ་མ་གནང་ན། བཅོམ་ལྡན་འདས་ཐུགས་
གང་ལ་དད་སྙམ་བསམས་ཏེ། ཏིང་ངེ་འཛིན་ལ་སྙོམས་པར་ཞུགས་ན་དེ་བཞིན་གཤེགས་པའི་ཐུགས་དགའ་བོ་ལ་དགྱེས་པ་ནི་ཇི་ལྟར་ཉི་མ་ཐོག་མ་ཤར་ན་ནུབ་ཕྱོགས་ཀྱི་རྩིག་ངོས་ལ་སྣང་བ་དང་འདྲ་བར་སེམས་ཀྱིས་རྟོགས་ནས་ཏིང་ངེ་འཛིན་ལས་ལངས་ཏེ། ཀཽཎྜི་ནྱ་ལ་འདི་སྐད་ཅེས་སྨྲས་སོ། །བཙུན་པ་བདག་གིས་བརྟགས་ན། དེ་བཞིན་གཤེགས་པ་ནི་ཞབས་འབྲིང་དུ་དགའ་བོ་དགྱེས་སོ། །དེ་ནས་ཀཽཎྜི་ནྱ་དགྲ་བཅོམ་པ་ལྔ་བརྒྱ་དང་བཅས་ཏེ་དགའ་བོ་གང་ན་བར་སོང་ནས་དགའ་བོ་ལ་འདི་སྐད་ཅེས་སྨྲས་སོ། །དགའ་བོ་ཁྱོད་དེ་བཞིན་གཤེགས་པའི་ཞབས་འབྲིང་དུ་བསྐོས་ཀྱིས་བཟོད་པ་ལོང་ཤིག །དགའ་བོས་སྨྲས་པ། བཙུན་པ་བདག་གིས་ནི་དེ་བཞིན་གཤེགས་པའི་ཞབས་འབྲིང་བགྱིད་པའི་རྔོ་མི་ཐོགས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་སེང་གེའི་རྒྱལ་པོའམ། ཀླུའམ། མེ་ལྟ་བུར་བྱིན་ཆེ་བ་ལགས་ཏེ། བདག་ནི་ཤིན་ཏུ་ཡང་ཞན་པས་ཞབས་འབྲིང་བགྱིད་པའི་རྔོ་མི་ཐོགས་སོ། །དགེ་སློང་རྣམས་ཀྱིས་སྨྲས་པ། དགའ་བོ་ཁྱོད་ངེད་ཀྱིས་བསྒོ་བ་བཞིན་དུ་དེ་བཞིན་གཤེགས་པའི་ཞབས་འབྲིང་གྱིས་ཤིག །ཕན་པ་དང་བདེ་བ་ཆེན་པོ་ཐོབ་པར་འགྱུར་རོ་ཞེས་ལན་གཉིས་ལན་གསུམ་གྱི་བར་དུ་བསྒོའོ། །ཡང་དགའ་བོས་སྨྲས་པ། བཙུན་པ་བདག་ནི་ཕན་པ་དང་བདེ་བ་ཆེན་པོ་ཡང་མི་འཚལ་ཏེ། དེ་བཞིན་གཤེགས་པའི་ཞབས་འབྲིང་ཡང་རྔོ་མི་ཐོགས་སོ་ཞེས་སྨྲས་སོ། །དེ་ནས་མཽད་གལ་གྱིས་དགའ་བོ་ལ་སྨྲས་པ། ཁྱོད་མི་ཤེས་སོ། །དགའ་བོས་སྨྲས་པ། བཙུན་པ་བདག་ལ་བསྟན་དུ་གསོལ། མཽད་གལ་གྱིས་སྨྲས་པ། དེ་བཞིན་གཤེགས་པས་སྔར་དགེ་འདུན་གྱི་ནང་ན་ཞབས་འབྲིང་བ་བཏུས་ན་དགྲ་བཅོམ་པ་ལྔ་བརྒྱས་ཞབས་འབྲིང་དུ་གསོལ་ཀྱང་། དེ་བཞིན་གཤེགས་པས་མ་གནང་སྟེ། བདག་གིས་ཏིང་ངེ་འཛིན་དུ་ཞུགས་ཏེ་བལྟས་ན། དེ་བཞིན་གཤེགས་པའི་ཐུགས་ཁྱོད་ལ་དགྱེས་པར་རྟོགས་ན། ཁྱོད་ཅིའི་ཕྱིར་མི་བཏུབ། དགའ་བོས་དེ་སྐད་ཅེས་སྨྲས་པ་ཐོས་ནས་ཐལ་མོ་སྦྱར་ཏེ་པུས་མོ་བཙུགས་ནས་འདི་སྐད་ཅེས་སྨྲས་སོ། །བཙུན་པ་ཇི་སྟེ་དེ་ལྟ་བུ་ཞིག་ལགས་ན་དེ་བཞིན་
གཤེགས་པས་བདག་གིས་གསོལ་བ་རྣམ་པ་གསུམ་ཞིག་གནང་ན། བདག་གིས་དགེ་འདུན་གྱི་བཀའ་བཞིན་དུ་དེ་བཞིན་གཤེགས་པའི་ཞབས་འབྲིང་བགྱིའོ། །ཞེས་སྨྲས་སོ། །མཽད་གལ་གྱིས་སྨྲས་པ། ཁྱོད་ཅི་དང་ཅི་འདོད། དགའ་བོས་སྨྲས་པ། བདག་གིས་འདོད་པ་གསུམ་ནི་ཇི་སྟེ་དེ་བཞིན་གཤེགས་པས་ན་བཟའ་རྙིང་པ་བདག་ལ་སྩལ་ན་བདག་མི་འཚལ་དུ་གནང་བ་དང་། ཇི་སྟེ་དེ་བཞིན་གཤེགས་པ་སྦྱིན་བདག་གི་དེར་གཤེགས་ན་བདག་མི་མཆི་བ་དང་། བདག་དུས་མ་མཆིས་པར་གང་ཡང་མཆི་བར་གནང་ན། བདག་གིས་དགེ་འདུན་གྱི་བཀའ་བཞིན་དུ་དེ་བཞིན་གཤེགས་པའི་གཡོག་བགྱིའོ། །དེ་ནས་ཀཽཎྜི་ནྱ་དང་། དགེ་སློང་ལྔ་བརྒྱ་པོ་རྣམས་ཕྱིར་ང་གང་ན་བར་ལྷགས་ནས་ང་ལ་འདི་སྐད་ཅེས་གསོལ་ཏོ། །བདག་ཅག་གིས་དགེ་སློང་དགའ་བོ་ལ་བསྒོ་ན། སྨོན་པ་རྣམ་པ་འདི་གསུམ་གནང་ན་བདག་གིས་དགེ་འདུན་གྱི་བཀའ་བཞིན་དུ་བགྱིའོ་ཞེས་མཆིའོ། །འཇམ་དཔལ་ངས་དེའི་ཚེ་ན་དགའ་བོ་ལ་ཤིན་ཏུ་ལེགས་སོ་ལེགས་སོ་ཞེས་བྱ་བ་བྱིན་ནོ། །དགེ་སློང་དགའ་བོ་ནི་ཤེས་རབ་དང་ལྡན་པས་དཔྱས་སུ་འགྱུར་བ་སྔ་ནས་ཤེས་སོ། །དེ་ཅིའི་ཕྱིར་ཞེ་ན། གང་ཟག་དག་ཁྱོད་ནི་གོས་དང་ཟས་ཀྱི་ཕྱིར་དེ་བཞིན་གཤེགས་པའི་གཡོག་བྱེད་དོ་ཞེས་སྨྲ་བར་གྱུར་ཏེ། དེ་བས་ན་ན་བཟའ་རྙིང་པ་མི་འདོད་ཅིང་མགྲོན་དུ་མི་འགྲོའོ་ཞེས་སྨྲས་པ་ཡིན་ནོ། །ཀཽཎྜི་ནྱས་དགེ་སློང་དགའ་བོ་ནི་ཤེས་རབ་དང་ལྡན་པས་ཇི་སྟེ་འགྲོ་བ་ལ་དུས་དང་ཚོད་བཟུང་ན། འཁོར་བཞི་པོ་ལ་ཕན་པ་དང་བདེ་བའི་དོན་རྒྱས་པར་བྱེད་མི་ནུས་ཏེ། དེ་བས་ན་འགྲོ་བ་ལ་དུས་མེད་པར་གསོལ་བ་ཡིན་ནོ། །ཀཽཎྜི་ནྱ་ངས་ནི་དགེ་སློང་དགའ་བོས་གསོལ་པ་རྣམ་པ་གསུམ་པོ་ཡིད་བཞིན་དུ་གནང་ངོ་། །དེ་ནས་མཽད་གལ་ཕྱིར་དགེ་སློང་དགའ་བོའི་གན་དུ་སོང་སྟེ། དགའ་བོ་ལ་འདི་སྐད་ཅེས་སྨྲས་སོ། །ཁྱོད་ཀྱི་གསོལ་བ་རྣམ་པ་གསུམ་པོ་ཁོ་བོས་གསོལ་ནས་དེ་བཞིན་གཤེགས་པ་ཐུགས་རྗེ་ཆེན་པོས་ཐམས་ཅད་གནང་ངོ་། །དགའ་བོས་སྨྲས་པ། བཙུན་པ་གལ་ཏེ་བཅོམ་ལྡན་འདས་ཀྱིས་གནང་ན། བདག་གིས་གཡོག་བགྱིའོ་ཞེས་
སྨྲས་སོ། །འཇམ་དཔལ་དགའ་བོས་ངའི་གཡོག་ལོ་ཉི་ཤུ་ལྷག་ཅིག་བྱས་ཏེ་བསམ་གྱིས་མི་ཁྱབ་པ་རྣམ་པ་བརྒྱད་དང་ལྡན་ནོ། །བརྒྱད་གང་ཞེ་ན། འདི་ལྟ་སྟེ། ལོ་ཉི་ཤུ་ལྷག་གི་བར་དུ་ངའི་གཡོག་བྱས་ཀྱང་ངའི་ཕྱི་བཞིན་མགྲོན་དུ་མི་འགྲོ་བ་ཡིན། ངའི་གཡོག་བྱས་ནས་ད་ཙམ་གྱི་བར་དུ་ན་བཟའ་རྙིང་པ་མི་འདོད་པ་ཡིན། ངའི་གཡོག་བྱས་ནས་ངའི་དྲུང་དུ་འོང་བ་ན་དུས་མ་ཡིན་པར་མི་འོང་བ་ཡིན། ངའི་གཡོག་བྱེད་དེ་ཉོན་མོངས་པ་དང་ལྡན་ཡང་ངའི་ཞབས་འབྲིང་དུ་རྒྱལ་པོའི་ཕོ་བྲང་དང་རིགས་ཆེན་པོ་བཙུན་པའི་གནས་སུ་ཕྱིན་ཏེ། བུ་མོ་བཟང་མོ་དང་ལྷ་དང་ཀླུའི་བུ་མོ་མཐོང་ཡང་འདོད་པའི་སེམས་མི་སྐྱེ་བ་ཡིན། ངའི་གཡོག་བྱས་ནས་ངས་གསུངས་པའི་མདོ་སྡེ་བཅུ་གཉིས་བཟུང་ནས་ལན་ཅིག་ཐོས་ནས་ཕྱིར་འདྲི་མི་སྲིད་དེ། ཇི་ལྟར་སྣོད་གཅིག་གི་ནང་ན་ཆུ་ཡོད་པ་སྣོད་གཅིག་གི་ནང་དུ་བྱོ་བ་དང་འདྲ་བ་ཡིན་ཏེ། འདྲི་བ་གཅིག་མ་གཏོགས་པ་ནི་རྒྱལ་ཚབ་བེ་རོ་ཞེས་བྱ་བས་ཤཱཀ་རིགས་བསད་ནས་གྲོང་ཁྱེར་སེར་སྐྱ་བཤིག་པ་ན། དགའ་བོ་དེའི་ཚེ་ཤིན་ཏུ་མི་དགའ་ནས་སྐད་ཆེན་པོར་ངུས་ཏེ་ང་གང་ན་བར་འོང་ནས་ང་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་ཡང་གྲོང་ཁྱེར་འདིར་བལྟམས་ལ། བདག་ཀྱང་འདིར་བཙས་ཏེ། ཤཱཀ་རིགས་སུ་འཐུན་ན་ཅིའི་སླད་དུ་དེ་བཞིན་གཤེགས་པ་ནི་མདངས་ཡོད་པའི་འོད་ཅན་དུ་གྱུར་ལ། བདག་ནི་མདངས་མ་མཆིས་པར་གྱུར་ཞེས་གསོལ་ནས་ངས་དེ་ལ་འདི་སྐད་ཅེས་བཀའ་སྩལ་ཏོ། །དགའ་བོ་ང་ནི་སྟོང་པའི་ཏིང་ངེ་འཛིན་ལ་ནན་ཏན་མཛད་པས་ཁྱོད་དང་མི་འདྲ་བ་ཡིན་ནོ། །དེ་ནས་ལོ་གསུམ་འདས་ནས་ཕྱིར་ང་ལ་འདི་སྐད་ཅེས་ཞུས་སོ། །བཅོམ་ལྡན་འདས་བདག་སྔོན་གྲོང་ཁྱེར་སེར་སྐྱར་དེ་བཞིན་གཤེགས་པ་ལ་སྟོང་པའི་ཏིང་ངེ་འཛིན་ཞུས་པ་བདེན་ནམ་བརྫུན་ཞེས་ཞུས་ནས་ངས་དགའ་བོ་ལ་དེ་དེ་བཞིན་ནོ། །དེ་དེ་བཞིན་ནོ། །ཞེས་བཀའ་སྩལ་པ་ཡིན། ངའི་གཡོག་བྱས་ནས་ཕ་རོལ་གྱི་སེམས་ཤེས་པའི་ཡེ་ཤེས་མ་ཐོབ་མོད་ཀྱི། དེ་བཞིན་གཤེགས་པ་ཏིང་ངེ་འཛིན་གང་ལ་བཞུགས་པ་ཤེས་པ་ཡིན། ངའི་གཡོག་བྱས་ནས་སྨོན་ལམ་གྱི་ཡེ་ཤེས་མ་ཐོབ་མོད་ཀྱི། སེམས་ཅན་གང་དེ་བཞིན་
གཤེགས་པའི་སྤྱན་སྔར་ཕྱིན་ན་དགེ་སྦྱོང་གི་འབྲས་བུ་མངོན་སུམ་དུ་ཐོབ་པ་དང་། ཕྱིས་ཐོབ་པར་འགྱུར་བ་དང་། ལྷ་དང་མིའི་ལུས་གང་གིས་ཐོབ་པ་མངོན་སུམ་དུ་རྟོགས་པ་ཡིན། ངའི་གཡོག་བྱས་ནས་དེ་བཞིན་གཤེགས་པས་དགོངས་ཏེ་གསུངས་པ་ཐམས་ཅད་ཁོང་དུ་ཆུད་ཅིང་རྟོགས་པ་ཡིན་ནོ། །རིགས་ཀྱི་བུ་དགེ་སློང་དགའ་བོ་ནི་དེ་ལྟར་བསམ་གྱིས་མི་ཁྱབ་པའི་ཆོས་བརྒྱད་དང་ལྡན་ཏེ། དེ་བས་ན་དགེ་སློང་དགའ་བོ་ནི་མང་དུ་ཐོས་པའི་མཛོད་ཡིན་ནོ་ཞེས་གྲགས་སོ། །རིགས་ཀྱི་བུ་དགེ་སློང་དགའ་བོ་ནི་ཆོས་རྣམ་པ་བརྒྱད་དང་ལྡན་པས་དེ་བཞིན་གཤེགས་པས་གསུངས་པའི་མདོ་སྡེ་བཅུ་གཉིས་འཛིན་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། དད་པའི་དབང་པོ་ཤིན་ཏུ་བརྟན་པ་དང་། ཤིན་ཏུ་དྲང་བ་དང་། ལུས་ལ་ནད་མེད་པ་དང་། བརྩོན་འགྲུས་དང་ལྡན་པ་དང་། དྲན་པ་དང་ལྡན་པ་དང་། ང་རྒྱལ་མེད་པ་དང་། ཏིང་ངེ་འཛིན་དང་ཤེས་རབ་དང་ལྡན་པ་དང་། ཐོས་པ་ལས་ཤེས་རབ་སྐྱེ་བ་དང་ལྡན་པ་ཡིན་ཏེ། འཇམ་དཔལ་སངས་རྒྱས་རྣམ་པར་གཟིགས་ཀྱི་ཉེ་གནས་མྱ་ངན་མེད་ཅེས་བྱ་བ་ཡང་འདི་བཞིན་དུ་ཆོས་བརྒྱད་དང་ལྡན་ནོ། །དེ་བཞིན་གཤེགས་པ་གཙུག་ཏོར་ཅན་གྱི་ཉེ་གནས་ཙ་པ་ཀ་ལ་དང་། སངས་རྒྱས་ཐམས་ཅད་སྐྱོབ་ཀྱི་ཉེ་གནས་ཨུ་པ་ཤན་ཏ་དང་། སངས་རྒྱས་ལོག་པར་དད་སེལ་གྱི་ཉེ་གནས་པ་ཏེ་ཞེས་བྱ་བ་དང་། སངས་རྒྱས་གསེར་ཐུབ་བསོད་སྐྱབས་ཀྱི་ཉེ་གནས་སོ་ཏེ་ཞེས་བྱ་བ་དང་། སངས་རྒྱས་འོད་སྲུང་གི་ཉེ་གནས་ཡ་བ་མི་ཏ་ཞེས་བྱ་བ་ཡང་ཐམས་ཅད་ཆོས་བརྒྱད་དང་ལྡན་ཏེ། ད་ལྟར་ངའི་དགའ་བོ་ཡང་ཆོས་བརྒྱད་དང་ལྡན་ནོ། །དེ་བས་ན་དགེ་སློང་དགའ་བོ་ནི་མང་དུ་ཐོས་པའི་མཛོད་ཅེས་གྲགས་སོ། །རིགས་ཀྱི་བུ་ཁྱོད་སྨྲ་བ་ལྟར་འཁོར་གྱི་དཀྱིལ་འཁོར་འདི་ན་བྱང་ཆུབ་སེམས་དཔའ་ཚད་མེད། མཐའ་ཡས་པ་ཞིག་འདུས་མོད་ཀྱི། བྱང་ཆུབ་སེམས་དཔའ་དེ་དག་ཀྱང་བྱམས་པ་ཆེན་པོ་དང་། སྙིང་རྗེ་ཆེན་པོས་བྱེད་དཀའ་བ་བྱེད་དེ། དེ་ལྟར་བྱམས་པ་དང་། སྙིང་རྗེའི་དབང་གིས་སོ་སོ་ན་ལས་ཡོད་ལ། འཁོར་རྣམས་གདུལ་བ་དང་། བདག་གི་ལུས་བརྒྱན་པའི་ལས་བྱེད་དེ། དེ་
བས་ན་ང་ཡོངས་སུ་མྱ་ངན་ལས་འདས་ན་མདོ་སྡེ་སྡེ་བཅུ་གཉིས་རྒྱས་པར་སྒྲོགས་མི་ནུས་སོ། །ཇི་སྟེ་བྱང་ཆུབ་སེམས་དཔས་བར་བར་སྒྲོགས་ན་ཡང་གཞན་དག་ཡིད་མི་ཆེས་སོ། །འཇམ་དཔལ་དགེ་སློང་དགའ་བོ་ནི་ངའི་གཅུང་ཡིན་ཏེ། ལོ་ཉི་ཤུ་ལྷག་གི་བར་དུ་ངའི་གཡོག་བྱས་ནས་ཅི་ཐོས་པ་ཐམས་ཅད་ཡོངས་སུ་འཛིན་པ་ནི་ཇི་ལྟར་སྣོད་གཅིག་གི་ཆུ་གཅིག་གི་ནང་དུ་བྱོ་བ་བཞིན་ནོ། །དེ་བས་ན་ངས་དགའ་བོ་ག་རེ་ཞེས་དྲིས་ཏེ། ཡོངས་སུ་མྱ་ངན་ལས་འདའ་བའི་མདོ་སྡེ་འདི་འཛིན་དུ་གཞུག་པའི་ཕྱིར་བོས་སོ། །དགེ་སློང་དགའ་བོས་གང་མ་ཐོས་པའི་རྣམས་ཀྱང་བྱང་ཆུབ་སེམས་དཔའ་རྣམས་ལ་ཤིན་ཏུ་རྒྱས་པར་སྟོན་ཏེ། དགའ་བོས་ཅི་ཐོས་པ་ཐམས་ཅད་ཁོང་དུ་ཆུད་ཅིང་རྟོགས་པར་འགྱུར་རོ། །འཇམ་དཔལ་དགེ་སློང་དགའ་བོ་ནི་ད་ལྟར་འདི་ནས་དཔག་ཚད་བཅུ་གཉིས་ཀྱི་ཕ་རོལ་གནས་གཞན་ཞིག་ན་བདུད་དྲུག་ཁྲི་བཞི་སྟོང་སྙེད་ཀྱིས་རྣམ་པར་གཙེ་ཞིང་འདུག་གིས། ཁྱོད་སོང་ལ་སྐད་ཆེན་པོས་བདུད་རྣམས་ལ་ལེགས་པར་ཉོན་ཅིག །ལེགས་པར་ཉོན་ཅིག །དེ་བཞིན་གཤེགས་པས་གསུངས་པའི་གཟུངས་ཆེན་པོ་ནི་འདི་ཡིན་ནོ་ཞེས་བསྒོ་ཞིག །ལྷ་དང་། ཀླུ་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་། མི་མ་ཡིན་པ་དང་། རིའི་ལྷ་དང་། ཤིང་གི་ལྷ་དང་། ཆུའི་ལྷ་དང་། རྒྱ་མཚོའི་ལྷ་དང་། ཁྱིམ་གྱི་ལྷ་ལ་སོགས་ཏེ། ལྷ་ཐམས་ཅད་ཀྱིས་གཟུངས་ཀྱི་མིང་འདི་ཐོས་པ་ཙམ་གྱིས་བསྟི་སྟང་མི་བྱེད་པའམ། གཟུངས་ཀྱི་མིང་མི་འཛིན་པ་གང་ཡང་མེད་དོ། །གཟུངས་འདི་ནི་སངས་རྒྱས་གང་གཱའི་ཀླུང་བཅུའི་བྱེ་མ་སྙེད་ཀྱིས་གསུངས་ཏེ། བུད་མེད་ཀྱི་ལུས་སྤོང་ཞིང་སྔོན་གྱི་གནས་དྲན་པར་འགྱུར་རོ། །གལ་ཏེ་ཚངས་པར་སྤྱོད་པ་དང་། ཤ་མི་ཟ་བ་དང་། ཆང་མི་འཐུང་བ་དང་། དཀུ་བག་མི་ཟ་བ་དང་། གནས་དབེན་པ་ལ་དགའ་བ་དང་། རྣམ་པ་འདི་ལྔ་ལྟར་བྱས་ཏེ། དད་པའི་སེམས་ཀྱིས་གཟུངས་འདི་ཀློག་གམ། འདོན་ཏམ། གླེགས་བམ་དུ་འདྲི་ན་གང་ཟག་དེས་ནི་སྡིག་པ་མི་དགེ་བའི་ལས་ཁྲག་ཁྲིག་བདུན་ཅུ་རྩ་བདུན་ལས་འདས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ།
སྔགས་ལ། ཨ་མ་ལེ། བི་མ་ལེ། ནིར་མ་ལེ། མུ་ག་ལེ། ཧེ་མ་ལ་ཛ་གརྦེ། ས་མན་ཏ་བྷ་དྲེ། ཤ་བ་ཐ། ས་དན་ནེ། པ་ར་མ་ཨརྠ་སཱ་དྷ་ནེ། མ་ན་སེ། ཨ་ཤུད་དྷེ། བི་ལ་གི །ཨ་མ་ལེ་ཏེ། བ་ལམ་མི། བ་ལམ་བ་སྭ་རེ། པུ་ཎྱེ་པུ་ཎྱེ། མ་ནོ་ལ་དཻ། དེའི་ཚེ་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལས་གཟུངས་དེ་མནོས་ནས་དགའ་བོ་གང་ན་བར་སོང་སྟེ་བདུད་རྣམས་ལ་འདི་སྐད་ཅེས་སྨྲས་སོ། །བདུད་ཀྱི་འཁོར་ཁྱོད་ལེགས་པར་ཉོན་ཅིག །ངས་བཅོམ་ལྡན་འདས་ལས་མནོས་པའི་གཟུངས་བརྗོད་པར་བྱའོ་ཞེས་སྨྲས་སོ། །བདུད་ཀྱི་རྒྱལ་པོས་གཟུངས་འདི་ཐོས་མ་ཐག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། བདུད་ཀྱི་ལས་ཡོངས་སུ་སྤངས་ནས་དགའ་བོ་ཡང་བཏང་ངོ་། །འཇམ་དཔལ་གཞོན་ནུ་དགའ་བོ་དང་བཅས་ཏེ་ཕྱིར་སངས་རྒྱས་གང་ན་བར་འོངས་ནས་ཕྱིན་པ་དང་། དགའ་བོས་སངས་རྒྱས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །དེ་ནས་བཅོམ་ལྡན་འདས་ཀྱིས་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཤིང་སཱ་ལའི་ཚལ་གྱི་ཕྱི་རོལ་ན་ཀུན་ཏུ་རྒྱུ་ཤིན་ཏུ་བཟང་པོ་ཞེས་བྱ་བ་ལོ་བརྒྱ་ཉི་ཤུ་ལོན་ཏེ་རྒས་ཤིང་འཁོགས་པ། མངོན་པར་ཤེས་པ་ལྔ་ཐོབ་ཀྱང་ང་རྒྱལ་མ་བཏང་སྟེ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་ཏིང་ངེ་འཛིན་ཐོབ་ནས་ཐམས་ཅད་མཁྱེན་པའི་ཡེ་ཤེས་སུ་བཟུང་སྟེ། མྱ་ངན་ལས་འདའ་བར་འདུ་ཤེས་སོ། །ཁྱོད་སོང་ལ་ཤིན་ཏུ་བཟང་པོ་ལ་འདི་སྐད་ཅེས་བསྒོ་ཤིག །དེ་བཞིན་གཤེགས་པ་འཇིག་རྟེན་དུ་བྱུང་བ་ནི་མེ་ཏོག་ཨུ་དུམ་བཱ་ར་དང་འདྲ་སྟེ། དོ་ནུབ་ནམ་གྱི་གུང་ལ་ཡོངས་སུ་མྱ་ངན་ལས་འདའ་བར་གཤེགས་ཀྱིས། བྱ་བ་ཡོད་ན་དུས་ལ་བབ་ཀྱིས་ཕྱིས་འགྱོད་པའི་སེམས་སྐྱེས་ས་རེ་ཞེས་གྱིས་ཤིག །དགའ་བོ་ཁྱོད་ཀྱིས་བསྒོ་ན་གདོན་མི་ཟ་བར་ཉན་པར་འགྱུར་རོ། །དེ་ཅིའི་ཕྱིར་ཞེ་ན། ཁྱོད་སྔོན་སྐྱེ་བ་ལྔ་བརྒྱའི་བར་དུ་ཤིན་ཏུ་བཟང་པོའི་བུར་སྐྱེས་ཏེ། དགའ་ཞིང་འདོད་པའི་བག་ཆགས་ད་དུང་མ་ཟད་པས། དེ་བས་ན་ཁྱོད་ཀྱིས་བསྒོ་བའི་ཚིག་ཉན་པར་འགྱུར་རོ། །དེ་ནས་དགའ་བོ་སངས་རྒྱས་ཀྱི་བཀའ་བཞིན་དུ་ཤིན་ཏུ་བཟང་པོ་གང་ན་བར་སོང་
ནས་འདི་སྐད་ཅེས་སྨྲས་སོ། །སྐྱེས་བུ་འདི་ལྟར་རིག་པར་གྱིས་ཤིག །དེ་བཞིན་གཤེགས་པ་འཇིག་རྟེན་དུ་འབྱུང་བ་ནི་མེ་ཏོག་ཨུ་དུམ་བཱ་ར་དང་འདྲ་སྟེ། དོ་ནུབ་ནམ་གྱི་གུང་ལ་ཡོངས་སུ་མྱ་ངན་ལས་འདའ་བར་གཤེགས་ཀྱིས། བྱ་བ་ཅི་ཡོད་པ་ད་དུས་ལ་བབ་ཀྱིས་ཕྱིས་འགྱོད་པ་མེད་པར་བྱའོ། །ཤིན་ཏུ་བཟང་པོས་སྨྲས་པ། ལེགས་སོ། །དགའ་བོ་བདག་དེ་བཞིན་གཤེགས་པ་གང་ན་བར་འགྲོའོ། །དེ་ནས་དགའ་བོ་ཤིན་ཏུ་བཟང་པོ་དང་འགྲོགས་ཏེ་སངས་རྒྱས་གང་ན་བར་འོངས་ནས་ཤིན་ཏུ་བཟང་པོས་སངས་རྒྱས་ལ་བསྙུན་གསོལ་ནས་འདི་སྐད་ཅེས་གསོལ་ཏོ། །གཽ་ཏ་མ་བདག་གིས་ཞུ་བ་ཞུ་ན། བདག་གིས་བསམས་པ་བཞིན་དུ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་བཟང་པོ་དུས་ལ་བབ་ཀྱིས་ཅི་དང་ཅི་འདོད་པ་དྲིས་ཤིག་དང་ངས་དེ་དང་དེའི་ལན་སྨྲ་བར་བྱའོ། །གསོལ་པ། གཽ་ཏ་མ་དགེ་སྦྱོང་དང་བྲམ་ཟེ་དག་འདི་སྐད་སྨྲ་བ་མཆིས་སོ། །སེམས་ཅན་ཐམས་ཅད་སྡུག་བསྔལ་བ་དང་བདེ་བ་མྱོང་བ་ནི་ཐམས་ཅད་ཀྱང་སྔོན་གྱི་ལས་ལགས་ཏེ། དེ་བས་ན་གལ་ཏེ་ཚུལ་ཁྲིམས་བསྲུང་བ་ལ་བརྩོན་ཞིང་ལུས་དང་སེམས་སྡུག་བསྔལ་བར་གྱུར་ན། སྔོན་གྱི་ལས་ཟད་པར་འགྱུར་རོ། །སྔོན་གྱི་ལས་ཟད་ན་སྡུག་བསྔལ་ཟད་པར་འགྱུར་རོ། །སྡུག་བསྔལ་ཟད་ན་མྱ་ངན་ལས་འདའོ་ཞེས་མཆི་བའི་དོན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་དགེ་སྦྱོང་ངམ་བྲམ་ཟེ་དག་དེ་སྐད་ཅེས་སྨྲ་བ་ཡོད་ན། དེ་ལ་ཐུགས་བརྩེ་བའི་ཕྱིར་ཡང་དང་ཡང་དེའི་དྲུང་དུ་གཤེགས་ནས་དེ་ལ་ཁྱོད་འདི་སྐད་ཅེས་སྨྲ་བ་བདེན་ནམ་ཞེས་དྲིས་ཏེ། གལ་ཏེ་དེས་བདག་དེ་སྐད་ཅེས་སྨྲས་པ་བདེན་ནོ། །དེ་ཅིའི་ཕྱིར་ཞེ་ན། གཽ་ཏ་མ་བདག་གིས་མངོན་དུ་མཐོང་སྟེ། སེམས་ཅན་ཁ་ཅིག་སྡིག་པ་མི་དགེ་བའི་ཆོས་བྱེད་ལ་ལོངས་སྤྱོད་དང་དབང་དུ་ལྡན་པ་ཡོད་དོ། །ཁ་ཅིག་ནི་དགེ་བའི་ལས་བྱེད་ཀྱང་དབུལ་ཕོངས་ཏེ་དབང་དང་མི་ལྡན་ནོ། །ཁ་ཅིག་ནི་ལས་མང་དུ་བྱས་ཀྱང་ནོར་མི་ཐོབ་ལ། ཁ་ཅིག་ནི་མ་བསྒྲུབས་ཀྱང་རང་ཐོབ་བོ། །ཁ་ཅིག་ནི་བྱམས་པའི་སེམས་དང་ལྡན་ཏེ་སྲོག་མི་གཅོད་ཀྱང་ཚེ་ཐུང་ལ། ཁ་ཅིག་ནི་སྲོག་གཅོད་པ་ལ་དགའ་ཡང་ཚེ་མཐར་ཕྱིན་པ་ཡོད་དོ། །ཁ་ཅིག་ནི་ཚངས་པར་སྤྱོད་པ་ཡོངས་སུ་དག་ཅིང་ཚུལ་ཁྲིམས་སྲུང་བ་ལ་
བརྩོན་པ་རྣམ་པར་གྲོལ་བ་ཐོབ་པ་དང་མི་ཐོབ་པ་ཡང་ཡོད་དེ། དེ་བས་ན་བདག་གིས་སེམས་ཅན་ཐམས་ཅད་སྡུག་བསྔལ་བ་དང་བདེ་བ་མྱོང་བ་ནི་སྔོན་གྱི་ལས་ཀྱི་རྒྱུ་དང་རྐྱེན་ཡིན་ནོ་ཞེས་སྨྲ་ན། ཤིན་ཏུ་བཟང་པོ་དེ་ལ་ངས་ཡང་འདི་སྐད་ཅེས་འདྲིའོ། །ཁྱོད་ཀྱིས་འདས་པའི་ལས་ཡང་དག་པར་མཐོང་ངམ། གལ་ཏེ་ལས་ཡོད་པ་ཞིག་ཡིན་ན་མང་ངམ་ཉུང་། ད་ལྟར་དཀའ་ཐུབ་སྤྱོད་པས་ཇི་ཙམ་ཞིག་མེད་པར་འགྱུར། ལས་དེ་ཟད་པར་འགྱུར་བ་ཞིག་གམ་ཟད་པར་མི་འགྱུར། ལས་དེ་ཟད་པར་འགྱུར་ན་ཐམས་ཅད་ཟད་དམ་ཞེས་འདྲིའོ། །ཇི་སྟེ་དེས་ང་ལ་མི་ཤེས་སོ་ཞེས་སྨྲ་ན་ངས་དེའི་ཕྱིར་དཔེ་འདི་བཤད་པར་བྱའོ། །འདི་ལྟ་སྟེ་དཔེར་ན་མི་ཞིག་ལ་དུག་མདས་ཕོག་ན། དེའི་གཉེན་བཤེས་དག་མདའ་འབྱིན་པའི་སྨན་པ་བཙལ་ནས་མདའ་ཕྱུང་ན་དེའི་ལུས་རབ་ཏུ་བདེ་བར་འགྱུར་ཏེ། ཕྱིས་ལོ་བཅུ་ལོན་ཀྱང་སྨན་པ་དེས་མདའ་ཕྱུང་ནས་རྨ་ཁ་སྨན་གྱིས་བསྐུས་པས་སོས་པར་གྱུར་ཏེ་རབ་ཏུ་བདེ་བ་ཡིན་ནོ་སྙམ་གསལ་བར་དྲན་ནོ། །ཁྱོད་ཀྱིས་སྔོན་འདས་པའི་ལས་ཀྱང་མི་ཤེས་ན། ཇི་ལྟར་ད་ལྟར་དཀའ་ཐུབ་སྤྱོད་པས་འདས་པའི་ལས་མེད་པར་བྱེད་ནུས་པར་ཤེས་ཞེས་འདྲིའོ། །གལ་ཏེ་དེས་ཡང་འདི་སྐད་དུ་གཽ་ཏ་མ་ཁྱོད་ལ་ཡང་འདས་པའི་ལས་ཡོད་ན། ང་ཡང་འབའ་ཞིག་གི་འདས་པའི་ལས་ལ་སྨད་དུ་ཅི་ཞིག་ཡོད། གཽ་ཏ་མས་གསུངས་པའི་མདོ་སྡེ་ལས་ཀྱང་འདི་སྐད་ཅེས་གསུངས་ཏེ། ཕྱུག་ཅིང་ལོངས་སྤྱོད་དང་ལྡན་ལ་དབང་ཆེ་བ་ཞིག་མཐོང་ན་འདི་ནི་སྔོན་སྦྱིན་པ་བྱས་པ་ཡིན་ནོ་ཞེས་བགྱི་བ་དེ་སྔོན་གྱི་ལས་མ་ཡིན་ནམ་ཞེས་སྨྲ་ན་ཡང་དེ་ལ་ངས་འདི་སྐད་ཅེས་བྱའོ། །དེ་ནི་རྗེས་སུ་དཔགས་པས་ཤེས་པ་ཡིན་གྱི་ཡང་དག་པར་ཤེས་པ་ཞེས་མི་བྱའོ། །ངའི་བསྟན་པ་ལ་ཁ་ཅིག་ནི་རྒྱུའི་དབང་གིས་འབྲས་བུ་ཤེས་ལ་ཁ་ཅིག་ནི་འབྲས་བུ་ལས་རྒྱུ་ཤེས་པ་ཡང་ཡོད་དོ། །སངས་རྒྱས་ཀྱིས་བསྟན་པ་ལ་ནི་འདས་པའི་ལས་ཀྱང་ཡོད་ལ། ད་ལྟར་གྱི་ལས་ཀྱང་ཡོད་དེ། ཁྱོད་ནི་དེ་ལྟ་མ་ཡིན་གྱི། འདས་པའི་ལས་འབའ་ཞིག་ཡོད་ལ། ད་ལྟར་གྱི་ལས་མེད་དོ། །ཁྱོད་ཀྱི་ཆོས་ནི་ཐབས་དང་སྦྱོར་བས་ལས་གཅོད་པ་མ་ཡིན་ཏེ། ངའི་བསྟན་པ་ནི་དེ་ལྟ་མ་ཡིན་གྱི་ཐབས་དང་སྦྱོར་བས་གཅོད་དོ། །ཁྱོད་ནི་ལས་ཟད་ན་སྡུག་བསྔལ་ཟད་ཅེས་ཟེར་ཏེ། ང་ནི་དེ་ལྟ་མ་ཡིན་
གྱི་ཉོན་མོངས་པ་ཟད་ན་ལས་དང་སྡུག་བསྔལ་ཟད་པར་འགྱུར་ཏེ། དེ་བས་ན་ཁྱོད་ཀྱི་འདས་པའི་ལས་ལ་ང་སྨོད་པ་ཡིན་ནོ། །ཡང་འདི་སྐད་དུ་གཽ་ཏ་མ་བདག་ནི་མི་ཤེས་ཀྱི། སློབ་དཔོན་གྱིས་འདི་སྐད་དུ་བཤད་དེ། བདག་མ་ཉེས་སོ་ཞེས་ཟེར་ན་ཡང་། ངས་དེ་ལ་ཁྱོད་ཀྱི་སྟོན་པ་སུ་ཡིན་ཞེས་བྱའོ། །དེས་ངའི་སྟོན་པ་ནི་འོད་སྲུང་རྫོགས་བྱེད་ཡིན་ནོ་ཞེས་ཟེར་ན་ཡང་ངས་དེ་ལ་ཁྱོད་ཀྱི་སྟོན་པ་ལ་འདས་པའི་ལས་ཤེས་སམ་ཞེས་ལེགས་པར་འདྲི་ན་ཅི་ཉེས་ཞེས་བྱའོ། །ཇི་སྟེ་ཁྱོད་ཀྱི་སྟོན་པ་མི་ཤེས་ཟེར་ན། ཁྱོད་དེའི་ཚིག་ཅིའི་ཕྱིར་ཉན། ཇི་སྟེ་ཤེས་ཞེས་སྨྲ་ན་ཡང་འདི་སྐད་དྲིའོ། །སྡུག་བསྔལ་བའི་རྒྱུ་ཐ་མས་སྡུག་བསྔལ་རབ་དང་འབྲིང་མྱོང་བར་འགྱུར་རམ། སྡུག་བསྔལ་གྱི་རྒྱུ་འབྲིང་གིས་སྡུག་བསྔལ་ཐ་མ་དང་རབ་མྱོང་བར་འགྱུར་རམ། སྡུག་བསྔལ་གྱི་རྒྱུ་རབ་ཀྱིས་སྡུག་བསྔལ་འབྲིང་དང་ཐ་མར་འགྱུར་རམ་ཞེས་དྲི་སྟེ། ཇི་སྟེ་མི་འགྱུར་རོ་ཞེས་སྨྲ་ན་ཡང་འདི་སྐད་དུ་སྟོན་པ་ཁྱོད་ཅིའི་ཕྱིར་སྡུག་བསྔལ་དང་བདེ་བ་མྱོང་བ་ནི་འདས་པའི་འབའ་ཞིག་ཡིན་གྱི་ད་ལྟར་གྱི་མ་ཡིན་ནོ་ཞེས་སྨྲ། ཡང་འདི་སྐད་དུ་ད་ལྟར་གྱི་སྡུག་བསྔལ་དེ་འདས་པའི་དུས་ཀྱི་ལས་ཡིན་ནམ་ཞེས་དྲིས་ཤིག །ཇི་སྟེ་འདས་པའི་དུས་ནས་ཡོད་ན་འདས་པའི་ལས་ནི་ཐམས་ཅད་ཟད་པ་ཡིན་ནོ། །ཇི་སྟེ་ཐམས་ཅད་ཟད་པ་ཞིག་ཡིན་ན་ཅིའི་ཕྱིར་ད་ལྟར་གྱི་ལུས་འདིར་མྱོང་བར་འགྱུར། ཇི་སྟེ་འདས་པའི་དུས་ལ་མེད་ན་ད་ལྟར་གྱི་དུས་འབའ་ཞིག་ན་ཡོད་པ་ཞིག་ཡིན་ན། ཅིའི་ཕྱིར་སེམས་ཅན་རྣམས་ཀྱི་སྡུག་བསྔལ་དང་བདེ་བ་ནི་ཐམས་ཅད་སྔོན་གྱི་ལས་ཡིན་ནོ་ཞེས་སྨྲ། ཁྱོད་ཀྱིས་གལ་ཏེ་ད་ལྟར་དཀའ་ཐུབ་སྤྱོད་པས་འདས་པའི་ལས་མེད་པར་འགྱུར་རོ་ཞེ་ན། ད་ལྟར་གྱི་དཀའ་ཐུབ་ཀྱི་སྤྱོད་པ་ཅིས་མེད་པར་འགྱུར། མེད་པར་མི་འགྱུར་བ་ཞིག་ཡིན་ན་སྡུག་བསྔལ་ནི་རྟག་པར་འགྱུར་རོ། །སྡུག་བསྔལ་རྟག་པ་ཞིག་ཡིན་ན་ཅིའི་ཕྱིར་སྡུག་བསྔལ་ལས་རྣམ་པར་གྲོལ་ལོ་ཞེས་སྨྲ། ཇི་སྟེ་སྤྱོད་པ་གཞན་ཞིག་གིས་དཀའ་ཐུབ་སྤྱོད་པ་མེད་པར་བྱེད་ན། འདས་པ་ནི་ཟད་པ་ཡིན་ན་ཇི་ལྟར་སྡུག་བསྔལ་ཡོད་པར་རུང་། སྐྱེས་བུ་དེ་ལྟར་དཀའ་ཐུབ་སྤྱོད་པ་དེ་བདེ་བའི་ལས་བྱས་པས་སྡུག་བསྔལ་གྱི་འབྲས་བུ་མྱོང་བར་འགྱུར་བ་ཡོད་དམ། སྡུག་བསྔལ་གྱི་ལས་བྱས་པས་བདེ་བའི་འབྲས་བུ་མྱོང་བར་འགྱུར་བ་ཡོད་དམ། སྡུག་བསྔལ་ཡང་མེད་བདེ་བ་ཡང་མེད་པའི་ལས་ཀྱི་འབྲས་བུ་མི་མྱོང་བ་ཡོད་དམ།
ད་ལྟར་གྱི་རྣམ་པར་སྨིན་པ་ལས་སྐྱེ་བའི་རྣམ་པར་སྨིན་པར་འགྱུར་བ་ཡོད་དམ། སྐྱེ་བའི་རྣམ་པར་སྨིན་པ་ལས་ད་ལྟར་གྱི་རྣམ་པར་སྨིན་པར་འགྱུར་བ་ཡོད་དམ། རྣམ་པར་སྨིན་པ་གཉིས་པོ་ལས་རྣམ་པར་སྨིན་པ་མེད་པར་འགྱུར་བ་ཡོད་དམ། ངེས་པར་རྣམ་པར་སྨིན་པ་ལས་རྣམ་པར་སྨིན་པ་མེད་པར་འགྱུར་བ་ཡོད་དམ། རྣམ་པར་སྨིན་པ་མེད་པ་ལས་ངེས་པར་རྣམ་པར་སྨིན་པ་ཡོད་དམ་ཞེས་དྲིས་ཤིག །ཇི་སྟེ་གཽ་ཏ་མ་མེད་ཅེས་ཟེར་ན། ངས་ཡང་དེ་ལ་འདི་སྐད་ཅེས་བྱའོ། ། ཇི་སྟེ་དེ་ལྟར་མི་འགྱུར་ན་ཅིའི་ཕྱིར་དཀའ་ཐུབ་སྤྱོད། དེ་བས་ན་ངེས་པར་འདས་པའི་ཆོས་ཀྱང་ཡོད་ལ། ད་ལྟར་གྱི་རྒྱུ་དང་རྐྱེན་ཡང་ཡོད་དེ། དེ་བས་ན་ངས་ཉོན་མོངས་པའི་རྐྱེན་གྱིས་ལས་སྐྱེས་སོ། །ལས་ཀྱི་རྐྱེན་གྱིས་རྣམ་པར་སྨིན་པ་མྱོང་བར་གྱུར་ཏོ་ཞེས་གསུངས་སོ། །དེ་བས་ན་སེམས་ཅན་ཐམས་ཅད་ལ་སྔ་མ་འདས་པའི་ལས་དང་། ད་ལྟར་གྱི་རྒྱུ་དང་རྐྱེན་ཡོད་པར་རིག་པར་བྱ་སྟེ། སྔོན་འདས་པའི་ཚེ་ལས་ཡོད་མོད་ཀྱི། ད་ལྟར་གྱི་དུས་ཀྱི་ཟས་དང་སྐོམ་གྱི་རྒྱུ་དང་རྐྱེན་དགོས་སོ། །སྐྱེས་བུ་ཁྱོད་ཇི་སྟེ་སོ་སོའི་སྐྱེ་བོ་དག་བདེ་བ་མྱོང་བ་དང་སྡུག་བསྔལ་མྱོང་བ་ནི་སྔོན་འདས་པའི་ལས་ཀྱི་རྒྱུ་དང་རྐྱེན་ཡིན་ནོ་ཞེས་སྨྲ་ན་ཡང་དེ་མི་རུང་ངོ་། །དེ་ཅིའི་ཕྱིར་ཞེ་ན། འདི་ལྟ་སྟེ་དཔེར་ན་སྐྱེས་བུ་ཞིག་རྒྱལ་པོ་ལ་དགྲར་འགྱུར་བ་བསད་ན། དེའི་རྒྱུ་དེའི་རྐྱེན་གྱིས་ནོར་དང་རིན་པོ་ཆེ་མང་དུ་ཐོབ་བོ། །དེ་ལྟར་ནོར་དང་རིན་པོ་ཆེ་ཐོབ་པས་ད་ལྟར་གྱི་དུས་ན་བདེ་བ་མྱོང་བར་འགྱུར་ཏེ། དེ་ནི་ད་ལྟར་གྱི་དུས་སུ་བདེ་བར་འགྱུར་བའི་རྒྱུ་བྱས་ནས། ད་ལྟར་གྱི་དུས་སུ་བདེ་བ་མྱོང་བ་ཡིན་ནོ། །འདི་ལྟ་སྟེ་དཔེར་ན་མི་ཞིག་རྒྱལ་པོའི་སྲས་གང་སྡུག་པ་ཞིག་བསད་ན། དེའི་རྒྱུ་དེའི་རྐྱེན་གྱིས་ལུས་དང་སྲོག་ཡལ་བར་འགྱུར་ཏེ། དེ་ནི་ད་ལྟར་གྱི་དུས་སུ་སྡུག་བསྔལ་དུ་འགྱུར་བའི་རྒྱུ་བྱས་ནས་ད་ལྟར་གྱི་དུས་སུ་སྡུག་བསྔལ་རྣམ་པར་སྨིན་པ་ཡིན་ནོ། །སྐྱེས་བུ་སེམས་ཅན་ཐམས་ཅད་ཀྱི་ད་ལྟར་གྱི་དུས་ཀྱི་རྒྱུ་ནི་ཆེན་པོ་བཞི་དང་། དུས་དང་། ཚོད་དང་། ས་དང་། མེ་ལས་གྱུར་ཏེ། སྡུག་བསྔལ་དང་བདེ་བ་མྱོང་ངོ་། །དེ་བས་ན་སེམས་ཅན་ཐམས་ཅད་ནི་ངེས་པར་སྔོན་གྱི་ལས་ཀྱིས་སྡུག་བསྔལ་དང་བདེ་བ་མྱོང་བ་ཡིན་ནོ། །སྐྱེས་བུ་ཇི་སྟེ་ལས་བཅད་པའི་རྒྱུ་དང་རྐྱེན་གྱི་མཐུ་ལས་རྣམ་པར་གྲོལ་བར་འགྱུར་ན་འཕགས་པ་ཐམས་ཅད་རྣམ་པར་གྲོལ་བ་མ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་
སྔོན་གྱི་ལས་ནི་ཐོག་མ་དང་ཐ་མ་མེད་པའི་ཕྱིར་རོ། །དེ་བས་ན་ངས་ནི་འཕགས་པའི་ལམ་བསྒོམ་པ་ནི། ལམ་གྱིས་ཐོག་མ་དང་ཐ་མ་པའི་ལས་རྣམ་པར་བཟློག་པར་འགྱུར་རོ་ཞེས་གསུངས་སོ། །སྐྱེས་བུ་ཇི་སྟེ་དཀའ་ཐུབ་སྤྱོད་པས་ལམ་ཐོབ་ན་བྱོལ་སོང་ཐམས་ཅད་ཀྱིས་ཀྱང་བྱང་ཆུབ་ཐོབ་པའི་རིགས་སོ། །དེ་བས་ན་སྔར་སེམས་གདུལ་བར་བྱའི་ལུས་གདུལ་བ་མ་ཡིན་ནོ། །དེ་བས་ན་ངས་མདོ་སྡེ་ལས་ཀྱང་གསུངས་ཏེ། ཚལ་གཅོད་ན་ཤིང་མ་གཅོད་ཅིག །དེ་ཅིའི་ཕྱིར་ཞེ་ན། ཚལ་ལས་འཇིགས་པ་སྐྱེའི་ཤིང་ལས་སྐྱེ་བ་མ་ཡིན་ནོ། །ལུས་གདུལ་བར་འདོད་ན་སྔར་སེམས་གདུལ་བར་བྱའོ། །སེམས་ནི་ཚལ་གྱི་དཔེའོ། །ལུས་ནི་ཤིང་གི་དཔེའོ། །ཤིན་ཏུ་བཟང་པོས་གསོལ་པ། བཅོམ་ལྡན་འདས་བདག་གིས་ནི་སེམས་སྔར་བཏུལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟ་བུར་སེམས་སྔར་བཏུལ། ཤིན་ཏུ་བཟང་པོས་གསོལ་པ། བཅོམ་ལྡན་འདས་བདག་གིས་ནི་འདོད་པ་ལ་མི་རྟག་པ་དང་། བདེ་བ་མེད་པ་དང་། ཡོངས་སུ་མ་དག་པར་ཡིད་ལ་བྱས་ཏེ། གཟུགས་ལ་རྟག་པ་དང་། བདེ་བ་དང་། བདག་དང་། ཡོངས་སུ་དག་པར་བརྟགས་སོ། །དེ་ལྟར་རྟོགས་ནས་འདོད་པའི་ཁམས་ཀྱི་ཉོན་མོངས་པ་ཆོད་དེ། གཟུགས་ཀྱི་སྐྱེ་མཆེད་ཐོབ་བོ། །དེ་བས་ན་བདག་གིས་ནི་སེམས་སྔར་བཏུལ་ལོ། །དེ་ནས་གཟུགས་ལ་བརྟགས་ན་གཟུགས་ནི་མི་རྟག་པ་སྟེ། རྨའམ། ཤུ་བའམ། གདུག་པའམ། ཟུག་རྔུ་ལྟ་བུར་རྟོགས་སོ། །གཟུགས་མེད་པ་ལ་ནི་རྟག་པ་དང་། རྣམ་པར་དག་པ་དང་། རབ་ཏུ་ཞི་བར་མཐོང་སྟེ། དེ་ལྟར་རྟོགས་ནས་གཟུགས་ཀྱི་ཁམས་ཀྱི་ཉོན་མོངས་པ་ཟད་པས་གཟུགས་མེད་པའི་སྐྱེ་མཆེད་ཐོབ་བོ། །དེ་བས་ན་བདག་གིས་སེམས་ནི་སྔར་བཏུལ་ལོ། །དེ་ནས་ཡང་འདུ་ཤེས་ལ་བརྟགས་ན་མི་རྟག་པ་དང་། རྨ་དང་། ཤུ་བ་དང་། གདུག་པ་དང་། ཟུག་རྔུ་ལྟ་བུར་རྟོགས་ཏེ། དེ་ལྟར་རྟོགས་ནས་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་ཏིང་ངེ་འཛིན་ཐོབ་བོ། །དེ་ལྟར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱི་ཐམས་ཅད་མཁྱེན་པའི་ཡེ་ཤེས་ཡིན་ཏེ། རབ་ཏུ་ཞི་བ། རྣམ་པར་དག་པ། ལྟུང་བ་མེད་པ། རྟག་པ་མི་འགྱུར་
བ་སྟེ། དེ་བས་ན་བདག་གིས་སེམས་བཏུལ་ལོ།། །།འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ལྔ་བཅུ་བཞི་པ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁྱོད་ཀྱིས་ཇི་ལྟར་ན་སེམས་བཏུལ། ཁྱོད་ཀྱིས་ཐོབ་པ་ནི་འདུ་ཤེས་མེད་འདུ་ཤེས་མེད་མིན་སྟེངས་ཀྱི་ཏིང་ངེ་འཛིན་ཏེ། དེ་ཡང་འདུ་ཤེས་ཞེས་བྱའོ། །མྱ་ངན་ལས་འདའ་བ་ནི་འདུ་ཤེས་མེད་པ་ཡིན་ན་ཅིའི་ཕྱིར་མྱ་ངན་ལས་འདའ་བ་ཐོབ་པ་ཞེས་བྱ། རིགས་ཀྱི་བུ་སྔར་ཁྱོད་ཀྱིས་སྔར་འདུ་ཤེས་སྦོམ་པོ་ལ་ནི་སྨོད་ན་ད་ཅིའི་ཕྱིར་འདུ་ཤེས་ཕྲ་མོ་ལ་ཆགས་ཏེ་སྨད་པ་མི་ཤེས། དེ་ལྟར་འདུ་ཤེས་མེད་འདུ་ཤེས་མེད་མིན་སྐྱེ་མཆེད་སྟེངས་ཀྱང་འདུ་ཤེས་ཞེས་བྱ་སྟེ། རྨ་ལྟ་བུ། ཤུ་བ་ལྟ་བུ། གདུག་པ་ལྟ་བུ། ཟུག་རྔུ་ལྟ་བུའོ། །རིགས་ཀྱི་བུ་ཁྱོད་ཀྱི་སྟོན་པ་ཨུར་ཏོ་ལམ་པ་དབང་པོ་རྣོ་ལ་ཡིད་གཞུངས་པ་ཡང་འདུ་ཤེས་མེད་འདུ་ཤེས་མེད་མིན་སྐྱེ་མཆེད་མཆོད་དེ། ལས་ངན་པ་མྱོང་བར་འགྱུར་ན་གཞན་ལྟ་སྨོས་ཀྱང་ཅི་དགོས། ཤིན་ཏུ་བཟང་པོས་གསོལ་པ། བཅོམ་ལྡན་འདས་ཇི་ལྟར་ན་སྲིད་པ་ཐམས་ཅད་གཅོད་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གལ་ཏེ་ཡང་དག་པའི་འདུ་ཤེས་སྤྱོད་ན་གང་ཟག་དེས་ནི་སྲིད་པ་ཐམས་ཅད་ཆོད་པར་འགྱུར་རོ། །ཤིན་ཏུ་བཟང་པོས་གསོལ་པ། བཅོམ་ལྡན་འདས་ཡང་དག་པའི་འདུ་ཤེས་ཞེས་བགྱི་བ་ཇི་ལྟ་བུ་ལགས། རིགས་ཀྱི་བུ་འདུ་ཤེས་མེད་པའི་འདུ་ཤེས་ནི་ཡང་དག་པའི་འདུ་ཤེས་ཞེས་བྱའོ། །གསོལ་པ། བཅོམ་ལྡན་འདས་ཇི་ལྟར་ན་འདུ་ཤེས་མ་མཆིས་པའི་འདུ་ཤེས་ཞེས་བགྱི། རིགས་ཀྱི་བུ་ཆོས་ཐམས་ཅད་ལ་བདག་གི་མཚན་ཉིད་མེད། གཞན་གྱི་མཚན་ཉིད་མེད། བདག་དང་གཞན་གྱི་མཚན་ཉིད་མེད། རྒྱུ་མེད་པའི་མཚན་ཉིད་མེད། བྱས་པའི་མཚན་ཉིད་མེད། སོང་བའི་མཚན་ཉིད་མེད། བྱེད་པའི་མཚན་ཉིད་མེད། མྱོང་བའི་མཚན་ཉིད་མེད། ཆོས་ཀྱི་མཚན་ཉིད་མེད། ཆོས་མ་ཡིན་པའི་མཚན་ཉིད་མེད། ཕོ་དང་མོའི་མཚན་ཉིད་མེད། སྐྱེས་བུའི་མཚན་ཉིད་མེད། རྡུལ་ཕྲ་མོའི་མཚན་ཉིད་མེད། དུས་དང་ཚོད་ཀྱི་མཚན་ཉིད་མེད། བདག་ཏུ་བྱས་པའི་མཚན་ཉིད་མེད། གཞན་དུ་བྱས་པའི་མཚན་ཉིད་མེད། བདག་དང་གཞན་དུ་བྱས་པའི་མཚན་ཉིད་མེད། ཡོད་པའི་མཚན་ཉིད་མེད། མེད་པའི་མཚན་ཉིད་མེད། སྐྱེས་པའི་མཚན་
ཉིད་མེད། བསྐྱེད་པའི་མཚན་ཉིད་མེད། རྒྱུའི་མཚན་ཉིད་མེད། རྒྱུ་ལས་རྒྱུར་འགྱུར་བའི་མཚན་ཉིད་མེད། འབྲས་བུའི་མཚན་ཉིད་མེད། འབྲས་བུ་ལས་འབྲས་བུར་འགྱུར་བའི་མཚན་ཉིད་མེད། ཉིན་དང་མཚན་གྱི་མཚན་ཉིད་མེད། སྣང་བ་དང་མུན་པའི་མཚན་ཉིད་མེད། མཐོང་བའི་མཚན་ཉིད་མེད། མཐོང་བར་བྱེད་པའི་མཚན་ཉིད་མེད། ཐོས་པའི་མཚན་ཉིད་མེད། ཐོས་པར་བྱེད་པའི་མཚན་ཉིད་མེད། ཚོར་བ་དང་ཤེས་པའི་མཚན་ཉིད་མེད། ཚོར་བ་དང་ཤེས་པར་བྱེད་པའི་མཚན་ཉིད་མེད། བྱང་ཆུབ་ཀྱི་མཚན་ཉིད་མེད། བྱང་ཆུབ་ཐོབ་པར་བྱེད་པའི་མཚན་ཉིད་མེད། ལས་ཀྱི་མཚན་ཉིད་མེད། ལས་ཀྱི་བདག་པོའི་མཚན་ཉིད་མེད། ཉོན་མོངས་པའི་མཚན་ཉིད་མེད། ཉོན་མོངས་པའི་བདག་པོའི་མཚན་ཉིད་མེད་པའོ། །རིགས་ཀྱི་བུ་མཚན་ཉིད་གང་དུ་འགོག་པ་དེ་ནི་ཡང་དག་པའི་མཚན་ཉིད་ཅེས་བྱའོ། །རིགས་ཀྱི་བུ་ཆོས་ཐམས་ཅད་ནི་མི་བདེན་པ་སྟེ། གང་དུ་འགོག་པ་དེ་ན་ཡང་དག་པ་ཞེས་བྱ། ཡང་དག་པའི་འདུ་ཤེས་ཞེས་བྱ། ཆོས་ཀྱི་དབྱིངས་ཞེས་བྱ། མཐར་ཕྱིན་པའི་ཡེ་ཤེས་ཞེས་བྱ། དོན་དམ་པ་ཞེས་བྱ། དོན་དམ་པའི་སྟོང་པ་ཉིད་ཅེས་བྱའོ། །རིགས་ཀྱི་བུ་མཚན་ཉིད་དང་། ཆོས་ཀྱི་དབྱིངས་དང་། མཐར་ཕྱིན་པའི་ཡེ་ཤེས་དང་། དོན་དམ་པའི་བདེན་པ་དང་། དོན་དམ་པའི་སྟོང་པ་ཉིད་ལ་ཤེས་རབ་ཐ་མས་ཡང་དག་པར་སྤྱོད་ན་ཉན་ཐོས་ཀྱི་བྱང་ཆུབ་ཐོབ་པར་འགྱུར་རོ། །ཤེས་རབ་འབྲིང་གིས་ཡང་དག་པར་སྤྱོད་ན་རང་རྒྱལ་བའི་བྱང་ཆུབ་ཐོབ་པར་འགྱུར་རོ། །ཤེས་རབ་མཆོག་གིས་ཡང་དག་པར་སྤྱོད་ན་བླ་ན་མེད་པའི་བྱང་ཆུབ་ཐོབ་པར་འགྱུར་རོ། །ཆོས་འདི་བསྟན་པ་ན་བྱང་ཆུབ་སེམས་དཔའ་བརྒྱ་ཕྲག་སྟོང་གིས་ཚེ་གཅིག་གིས་ཐོགས་པའི་ཡང་དག་པའི་འདུ་ཤེས་ཐོབ་བོ། །བྱང་ཆུབ་སེམས་དཔའ་ཁྲི་ལྔ་སྟོང་སྙེད་ཀྱིས་ཚེ་གཉིས་ཀྱིས་ཆོས་ཀྱི་དབྱིངས་ཐོབ་བོ། །བྱང་ཆུབ་སེམས་དཔའ་ཉི་ཁྲི་ལྔ་སྟོང་གིས་མཐར་ཕྱིན་པའི་ཡེ་ཤེས་ཐོབ་པར་གྱུར་ཏོ། །བྱང་ཆུབ་སེམས་དཔའ་སུམ་ཁྲི་ལྔ་སྟོང་གིས་དོན་དམ་པའི་བདེན་པ་ཐོབ་བོ། །དོན་དམ་པའི་བདེན་པ་ནི་དོན་དམ་པའི་སྟོང་པ་ཉིད་ཅེས་ཀྱང་བྱ། དཔའ་བར་འགྲོ་བའི་ཏིང་ངེ་འཛིན་ཅེས་ཀྱང་བྱའོ། །བྱང་ཆུབ་སེམས་དཔའ་བཞི་ཁྲི་ལྔ་སྟོང་སྙེད་ཀྱིས་ནམ་མཁའ་ལྟ་བུའི་ཏིང་ངེ་འཛིན་ཐོབ་བོ། །ནམ་མཁའ་ལྟ་བུའི་ཏིང་ངེ་འཛིན་ནི་རྒྱ་ཆེན་པོའི་ཏིང་ངེ་འཛིན་ཅེས་བྱ།
ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ཅེས་བྱའོ། །བྱང་ཆུབ་སེམས་དཔའ་ལྔ་ཁྲི་ལྔ་སྟོང་གིས་ནི་ཕྱིར་མི་ལྡོག་པའི་བཟོད་པ་ཐོབ་པར་གྱུར་ཏོ། །ཕྱིར་མི་ལྡོག་པའི་བཟོད་པ་ནི་ཆོས་ཀྱི་བཟོད་པ་ཞེས་ཀྱང་བྱ། ཆོས་དབྱིངས་ལྟ་བུ་ཞེས་ཀྱང་བྱའོ། །བྱང་ཆུབ་སེམས་དཔའ་དྲུག་ཁྲི་ལྔ་སྟོང་སྙེད་ཀྱིས་ནི་གཟུངས་ཐོབ་པར་འགྱུར་རོ། །གཟུངས་དེ་ནི་དྲན་པ་ཆེན་པོའི་སེམས་ཞེས་ཀྱང་བྱ། ཐོགས་པ་མེད་པའི་ཡེ་ཤེས་ཞེས་ཀྱང་བྱའོ། །བྱང་ཆུབ་སེམས་དཔའ་བདུན་ཁྲི་ལྔ་སྟོང་སྙེད་ཀྱིས་ནི་སེང་གེའི་སྒྲ་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ། །སེང་གེའི་སྒྲའི་ཏིང་ངེ་འཛིན་ནི་རྡོ་རྗེ་ལྟ་བུའི་ཏིང་ངེ་འཛིན་ཅེས་ཀྱང་བྱ། ཡེ་ཤེས་ཀྱི་ཕྱག་རྒྱའི་ཏིང་ངེ་འཛིན་ཅེས་ཀྱང་བྱའོ། །བྱང་ཆུབ་སེམས་དཔའ་བརྒྱད་ཁྲི་ལྔ་སྟོང་སྙེད་ཀྱིས་ནི་མཉམ་པའི་ཏིང་ངེ་འཛིན་ཐོབ་པར་གྱུར་ཏོ། །མཉམ་པའི་ཏིང་ངེ་འཛིན་དེ་ནི་བྱམས་པ་ཆེན་པོ་དང་། སྙིང་རྗེ་ཆེན་པོ་ཞེས་ཀྱང་བྱའོ། །སེམས་ཅན་གྲངས་མེད་པ་གང་གཱའི་ཀླུང་གི་བྱེ་མ་སྙེད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །སེམས་ཅན་གྲངས་མེད་པ་གང་གཱའི་ཀླུང་གི་བྱེ་མ་སྙེད་ནི་རང་སངས་རྒྱས་ཀྱི་སེམས་བསྐྱེད་དོ། །སེམས་ཅན་གྲངས་མེད་པ་གང་གཱའི་ཀླུང་གི་བྱེ་མ་སྙེད་ནི་ཉན་ཐོས་སུ་སེམས་བསྐྱེད་པར་གྱུར་ཏོ། །མི་དང་ལྷའི་བུ་མོ་སྟོང་ཕྲག་ཉི་ཤུ་སྙེད་ནི་མངོན་དུ་བུད་མེད་ཀྱི་ལུས་ལས་སྐྱེས་པའི་ལུས་སུ་གྱུར་ཏོ། །ཤིན་ཏུ་བཟང་པོ་ནི་དགྲ་བཅོམ་པའི་འབྲས་བུ་ཐོབ་པར་གྱུར་ཏོ། །དེའི་ཚེ་ཤིན་ཏུ་བཟང་པོས་བཅོམ་ལྡན་འདས་ལས་ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཤིན་ཏུ་ཟབ་མོ་ཐོས་ནས་ཆོས་ལ་ཆོས་ཀྱི་མིག་རྣམ་པར་དག་པར་གྱུར་ཏེ། ཡོངས་སུ་དག་པའི་ཆོས་མཐོང་ནས་དམ་པའི་ཆོས་འདོད་པས་ངན་པར་ལྟ་བ་ཡོངས་སུ་སྤངས་ཏེ། སངས་རྒྱས་ཀྱི་བསྟན་པ་ལ་དད་པ་ཤིན་ཏུ་བརྟན་པར་གྱུར་ནས། དེ་བཞིན་གཤེགས་པ་ལས་རབ་ཏུ་འབྱུང་བར་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །ཤིན་ཏུ་བཟང་པོ་ལེགས་པར་འོངས་པའི་དགེ་སློང་ཡིན་ཏེ། འཕགས་པ་རྣམས་ཀྱང་དགྱེས་པས་སངས་རྒྱས་ཀྱི་བྱང་ཆུབ་ལ་ལེགས་པར་ཞུགས་སོ། །ཤིན་ཏུ་བཟང་པོ་རབ་ཏུ་དགའ་མགུ་རངས་ནས་མོས་པ་ཚད་མེད་
པར་གྱུར་ཏེ། དེའི་ཚེ་སྐྲ་དང་ཁ་སྤུ་རང་བྱི་ནས་དགེ་སློང་དུ་གྱུར་ཏོ། །ཆོས་ཉིད་ཀྱིས་ཡེ་ཤེས་ཀྱི་ཆུ་སེམས་ཀྱི་དབྱེ་ལ་བཅུས་པས་འཆིང་བས་མ་བཅིངས་ཏེ་ཟག་པ་ཟད་ནས་སེམས་རྣམ་པར་གྲོལ་བའི་དགྲ་བཅོམ་པར་གྱུར་ཏོ། །ཤིན་ཏུ་བཟང་པོ་དགྲ་བཅོམ་པའི་འབྲས་བུ་ཐོབ་ནས་སངས་རྒྱས་ལ་ཉེ་བར་བསྙེན་ཏེ། བཅོམ་ལྡན་འདས་ཀྱི་ཞལ་དུ་མིག་མི་འཛུམས་པར་ལྟ་ཞིང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བླ་གོས་ཕྲག་པ་གཅིག་ཏུ་བྱས་པུས་མོ་གཡས་པའི་ལྷ་ང་ས་ལ་བཙུགས་ནས་ཐལ་མོ་སྦྱར་ཏེ། མྱ་ངན་དང་དགའ་བ་དུས་གཅིག་ཏུ་གྱུར་ནས་སྔོན་གྱི་ཉེས་པ་འགྱོད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་གིས་གདུག་པའི་ལུས་འདིས་ཡུན་རིང་པོ་ནས་བདག་བསླུས་པས། ཡུན་རིང་པོར་མ་རིག་པ་ངན་པ་ལྟ་བུའི་ནང་དུ་ནུབ་པས་ཁམས་གསུམ་དུ་འཁོར་ཞིང་མུ་སྟེགས་ཅན་གྱི་ཆོས་ཀྱིས་གླགས་པར་གྱུར་ཏོ། །ཀྱི་ཧུད་ཀྱི་ཧུད་ཤིན་ཏུ་གནོད་པ་ཆེན་པོར་གྱུར་པ་ལས། ང་ནི་དེ་བཞིན་གཤེགས་པའི་བཀའ་དྲིན་གྱིས་དམ་པའི་ཆོས་ལ་ཞུགས་པར་གྱུར་ཏོ། །བཅོམ་ལྡན་འདས་ཡེ་ཤེས་ཀྱི་རྒྱ་མཚོའི་ཐུགས་རྗེ་ཆེན་པོ་ཚད་མ་མཆིས་པ་ནི་བསྐལ་པའི་བར་དུ་ཡང་བཀའ་དྲིན་ལ་ལན་མི་ལོན་ནོ་སྙམ་སེམས་སོ། །ཤིན་ཏུ་བཟང་པོས་དེ་སྐད་ཅེས་གསོལ་ནས་མཆི་མ་བླགས་ཏེ། ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་རྒས་འཁོགས་ཏེ་སྡུག་བསྔལ་ལས་ནི་རྣམ་པར་མ་གྲོལ་གྱི། འདུ་བྱེད་ཀྱི་སྡུག་བསྔལ་གྱིས་ནི་རབ་ཏུ་གཙེ་བར་གྱུར་ན་བཅོམ་ལྡན་འདས་ཐུགས་བརྩེ་བའི་སླད་དུ་ཚུལ་ཁྲིམས་བསྟན་ཏེ་མགོན་དང་སྐྱབས་མཛད་ཅིང་། རེ་ཞིག་མྱ་ངན་ལས་མི་འདའ་བར་བཞུགས་སུ་གསོལ་ལོ། །དེའི་ཚེ་བཅོམ་ལྡན་འདས་ཅང་མི་གསུང་ནས་མི་གནང་ངོ་། །ཤིན་ཏུ་བཟང་པོས་གསོལ་པ་བཞིན་དུ་མ་གནང་ནས་མྱ་ངན་གྱིས་ཡིད་རབ་ཏུ་གདུངས་ཏེ་སྐད་ཆེན་པོས་འདི་སྐད་ཅེས་སྨྲས་སོ། །ཀྱི་ཧུད་ཀྱི་ཧུད་འཇིག་རྟེན་སྟོངས་སོ། །འཇིག་རྟེན་སྟོངས་སོ། །ད་ནི་འཇིགས་པ་ཆེན་པོས་བསྙེན་ནས་ཤིན་ཏུ་གདུང་བ་མངོན་དུ་གྱུར་ཏོ། །ཀྱི་ཧུད་ཀྱི་ཧུད་སེམས་ཅན་གྱི་བསོད་ནམས་ཟད་པས་ཡང་དག་པའི་ཤེས་རབ་ཀྱི་མིག་མདོངས་སོ་ཞེས་སྨྲས་ནས་རབ་ཏུ་ཆོ་ངེས་རྡུང་ཞིང་སྐད་
ཀྱང་མི་ཕྱིན་པ་ཙམ་དུ་ངུས་ནས་ལུས་ཁྲག་གིས་རྒྱས་སོ། །སྐད་ཆེན་པོ་ཕྱུང་སྟེ་ངུས་ནས། དེ་བཞིན་གཤེགས་པའི་སྤྱན་སྔར་ལུས་ས་ལ་བརྡབས་པས་དེར་བརྒྱལ་ནས་རིང་ཞིག་ལོན་པ་དང་ཕྱིར་སངས་ཏེ་ངུ་བཞིན་དུ་བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པ་མྱ་ངན་ལས་འདའ་བ་མཐོང་མི་བཟོད་དེ། སེམས་རབ་ཏུ་གདུངས་ནས་ཤིན་ཏུ་གཅགས་སོ། །བདག་ཀྱང་རྫ་སོ་མ་བཏང་བ་དང་འདྲ་བའི་ལུས་གདུག་པ་ཅན་འདི་དང་འགྲོགས་མི་འཚལ་ཏེ་བདག་སྔར་མཆིས། བཅོམ་ལྡན་འདས་ནི་སླད་ཀྱིས་མྱ་ངན་ལས་འདའ་བར་གཤེགས་སུ་གསོལ། དེའི་ཚེ་ཤིན་ཏུ་བཟང་པོས་དེ་སྐད་ཅེས་གསོལ་ནས། ཆོ་ངེས་རྡུང་ཞིང་དེ་ཉིད་དུ་མྱ་ངན་ལས་འདའ་བར་ཞུགས་སོ། །དེའི་ཚེ་བརྗོད་དུ་མེད་པའི་ཡང་བརྗོད་དུ་མེད་པའི་ཀླུང་གང་གཱའི་བྱེ་མ་སྙེད་ཀྱི་བྱང་ཆུབ་སེམས་དཔའ་ཆེན་པོ་དང་། དགེ་སློང་དང་། དགེ་སློང་མ་དང་། འཇིག་རྟེན་དུ་བཅས་པའི་ལྷ་དང་མི་དང་། ལྷ་མ་ཡིན་ལ་སོགས་པ་ཐམས་ཅད་ཀྱིས་སྐད་འཐུན་པར་འདི་སྐད་ཅེས་སྨྲས་སོ། །ཀྱི་ཧུད་ཀྱི་ཧུད་ཡང་དག་པར་རྫོགས་པའི་སངས་རྒྱས་ཀྱིས་ནང་གཅིག་ཏུ་བོར་བས་གནས་མ་མཆིས། རྟེན་མ་མཆིས། སྐྱབས་མ་མཆིས། མགོན་མ་མཆིས་ཏེ། ཤིན་ཏུ་གཅགས་སོ་ཞེས་སྨྲས་ནས་ཐམས་ཅད་ངུས་ཏེ། གཅིག་ལ་གཅིག་འཇུ་ཞིང་བྲང་དུ་ཁུ་ཚུར་གྱིས་རྡེག་པས་བརྒྱལ་ནས་ཕྱོགས་ཀྱང་བསླད་དེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་གཡོས་སོ། །དེའི་ཚེ་བཅོམ་ལྡན་འདས་ཀྱིས་གསུང་རྣམ་པ་བརྒྱད་དང་ལྡན་པས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ཁྱེད་བུས་པ་ཆུང་ངུ་ལྟར་མ་ངུ་བར་སོ་སོ་ནས་ངུ་བ་ཐོང་ལ་སེམས་མ་འཁྲུགས་པར་གྱིས་ཤིག །ཁྱེད་འདུ་བྱེད་ཀྱི་སྡུག་བསྔལ་འཁོར་བའི་རྒྱ་མཚོ་འདིར་བསམ་པ་དག་པ་ལ་ནན་ཏན་བྱ་ཞིང་རྗེས་སུ་དྲན་པའི་ཤེས་རབ་མ་བརྗེད་ཅིག །ཡང་དག་པའི་ཡེ་ཤེས་ཀྱིས་སྲིད་པ་ལས་འབྱུང་བ་ལ་བརྩོན་པར་གྱིས་ཤིག །ཁམས་གསུམ་དུ་ལུས་མྱོང་བ་ནི་སྡུག་བསྔལ་གྱི་འཁོར་ལོ་མཐའ་མེད་པ་སྟེ། མ་རིག་པའི་རྗེ་བོ་དང་། འདོད་པའི་བདུད་ཀྱི་རྒྱལ་པོས་ལུས་དང་སེམས་བཀོལ་བའི་བྲན་དུ་མི་འགྱུར་བར་བྱའོ། །སྤྱོད་པའི་ཁམས་ལ་དམིགས་པས་འཁོར་བའི་ལས་བྱེད་དེ། འདོད་ཆགས་
དང་། ཞེ་སྡང་དང་། གཏི་མུག་གིས་སྐད་ཅིག་སྐད་ཅིག་ཏུ་རྣམ་པར་གཙེས་ནས་བསྐལ་པ་ཚད་མེད་པའི་བར་དུ་སྡུག་བསྔལ་མྱོང་བར་གྱུར་ན། མཁས་པ་ཤེས་རབ་ཅན་སུ་ཞིག་དེ་ལ་མི་རྟོག །ཁྱེད་རྣམས་འདི་ལྟར་རིག་པར་གྱིས་ཤིག །ང་ནི་བསྐལ་པ་འདས་པ་ནས་ཞི་བ་ཆེན་པོའི་ཕུང་པོ་དང་ཁམས་དང་སྐྱེ་མཆེད་མེད་པ་ལ་ཞུགས་ཏེ་སྲིད་པ་ཡོངས་སུ་བཅད་ནས་རིན་པོ་ཆེ་རྡོ་རྗེའི་གཏེར་ལྟ་བུ་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་ཐོབ་ཀྱང་ངས་འདིར་བསམ་གྱིས་མི་ཁྱབ་པའི་ཐབས་བསྟན་པའི་ཕྱིར་འཇིག་རྟེན་གྱི་ཆོས་དང་འཐུན་པར་མྱ་ངན་ལས་འདའ་བར་བསྟན་ཏེ། དེ་ཡང་སོ་སོའི་སྐྱེ་བོ་དག་ལུས་གློག་ལྟ་བུར་ཤེས་པར་བྱ་ཞིང་གཅགས་པའི་སེམས་བསྐྱེད་པའི་ཕྱིར་རོ། །འཁོར་བའི་འོད་པ་འབབ་པ་ནི་ཤིན་ཏུ་དྲག་ཅིང་མྱུར་ལ། འདུ་བྱེད་རྣམས་ནི་འཁོར་བར་འཁོར་རོ། །ཆོས་ཉིད་ཀྱིས་དེ་བཞིན་ཏེ། དེ་བཞིན་གཤེགས་པ་མྱ་ངན་ལས་འདའ་བ་ནི་ཤིན་ཏུ་ཟབ་ལ་བསམ་གྱིས་མི་ཁྱབ་པས་དེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་ཡིན་གྱི། ཉན་ཐོས་དང་རང་སངས་རྒྱས་རྣམས་ཀྱིས་ཤེས་པ་མ་ཡིན་ནོ། །བཅོམ་ལྡན་འདས་ཀྱིས་འཁོར་མང་པོ་རྣམས་ལ་ཡང་འདི་སྐད་ཅེས་བཀའ་སྩལ་ཏོ། །ཤིན་ཏུ་བཟང་པོ་འདི་སྔོན་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་ཏེ། སངས་རྒྱས་དེ་དག་ལས་དགེ་བའི་རྩ་བ་ཤིན་ཏུ་བསྐྱེད་ནས་སྔོན་གྱི་སྨོན་ལམ་གྱི་ཤུགས་ཀྱིས་རྟག་ཏུ་གཅེར་བུ་པ་མུ་སྟེགས་ཅན་གྱི་ཆོས་ལ་རབ་ཏུ་བྱུང་སྟེ་སྤྱད་པ་སྤྱོད་ཅིང་། ཐབས་མཁས་པའི་ཤེས་རབ་ཀྱིས་ངན་པར་ལྟ་བ་ལོག་པར་ཞུགས་པའི་སེམས་ཅན་རྣམས་ཡང་དག་པའི་ཡེ་ཤེས་ལ་དགོད་པར་བྱེད་དོ། །ཤིན་ཏུ་བཟང་པོ་འདི་སྔོན་གྱི་སྨོན་ལམ་གྱི་ཤུགས་ཀྱིས་མྱ་ངན་ལས་འདའ་ཀར་ང་དང་ཕྲད་ནས་དམ་པའི་ཆོས་ཐོས་པར་གྱུར་ཏོ། །དམ་པའི་ཆོས་ཐོས་ནས་ཀྱང་དགྲ་བཅོམ་པའི་འབྲས་བུ་ཐོབ་བོ། །དགྲ་བཅོམ་པའི་འབྲས་བུ་ཐོབ་ནས་ཀྱང་མྱ་ངན་ལས་འདའ་བར་ཞུགས་སོ། །ང་ཐོག་མ་མངོན་པར་སངས་རྒྱས་ནས་ཚེ་དང་ལྡན་པ་ཅང་ཤེས་ཀཽཎྜི་ནྱ་རབ་ཏུ་ཕྱུང་ངོ་། །ཐ་མ་མྱ་ངན་ལས་འདའ་ཀར་ཤིན་ཏུ་བཟང་པོ་བཏུལ་ནས་མཛད་པའི་མཐར་ཕྱིན་ཏེ། མཛད་པ་མེད་པས་ང་ཡུན་དུ་བཞུགས་ཀྱང་དེ་ལས་མཛད་པ་གཞན་མེད་དོ། །དེའི་ཚེ་བཅོམ་
ལྡན་འདས་དེ་སྐད་ཅེས་གསུངས་ནས་ཤུགས་ནར་ཅེས་མཛད་དེ། ལེགས་སོ་ལེགས་སོ། །ཤིན་ཏུ་བཟང་པོ་སངས་རྒྱས་ཀྱི་དྲིན་ལེགས་པར་གླན་ཏོ། །ཁྱེད་ཀྱིས་དེའི་རུས་བུ་ལ་མཆོད་པ་བྱ་ཞིང་མཆོད་རྟེན་གྱིས་ཤིག །དེའི་ཚེ་འཁོར་མང་པོ་རྣམས་ཤིན་ཏུ་མི་དགའ་སྟེ་མཆི་མ་བླགས་ནས། སངས་རྒྱས་ཀྱི་བཀའ་བཞིན་དུ་སྤོས་ཀྱི་ཤིང་དང་། མར་གྱིས་དེའི་རུས་བུ་བསྲེགས་སོ། །ཤིན་ཏུ་བཟང་པོའི་རུས་བུ་བསྲེགས་པ་ནས་མེའི་ནང་ན་འོད་ཆེན་པོ་བཏང་སྟེ། ཆོ་འཕྲུལ་རྣམ་པ་བཅྭ་བརྒྱད་མངོན་དུ་བསྟན་ཏོ། །ལུས་ཀྱི་སྟོད་ནས་ཆུ་འབབ་ན་ལུས་ཀྱི་སྨད་ནས་མེ་འབར། མཆན་ཁུང་གཡས་ནས་མེ་འབར་ན་མཆན་ཁུང་གཡོན་ནས་ཆུ་འབབ། ཆུང་ངུ་ལས་ཆེན་པོར་གྱུར་ནས་ཆེན་པོ་ལས་ཆུང་ངུར་གྱུར་ཏེ། ནམ་མཁའ་ཡང་ཡོངས་སུ་གང་བར་བྱས་སོ། །དེའི་ཚེ་འཁོར་ཚད་མེད་པ་རྣམས་དང་། མུ་སྟེགས་ཅན་ངན་པར་ལྟ་བའི་སེམས་ཅན་དག་བྱང་ཆུབ་ཏུ་སེམས་བསྐྱེད་ནས་ཡང་དག་པར་ལྟ་བ་ལ་ཞུགས་སོ། །ཤིན་ཏུ་བཟང་པོས་ཆོ་འཕྲུལ་མངོན་པར་བསྟན་ནས་ཕྱིར་མེའི་ནང་དུ་ཞུགས་སོ། །དེར་བསྲེགས་ནས་འཁོར་མང་པོ་རྣམས་རིང་བསྲེལ་བསྡུས་ཏེ། མཆོད་རྟེན་བྱས་ནས་མཆོད་པ་བྱེད་དོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། ཚེ་དང་ལྡན་པ་ཅང་ཤེས་ཀཽཎྜི་ནྱའི་ལེའུའོ།། །།