བཅུ་བཞི་པ། བསྟན་པ་གཞག་པའི་ལེའུ།
དེའི་ཚེ་བཅོམ་ལྡན་འདས་ཀྱིས་དགའ་བོ་དང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་ཁྱེད་འཁོར་རྣམ་པ་བཞི་དག་ངའི་མྱ་ངན་ལས་འདས་པ་ཆེན་པོ་འདི་འཛིན་པ་ལ་བརྩོན་པར་གྱིས་ཤིག །ངས་ནི་བསྐལ་པ་ཁྲག་ཁྲིག་ཚད་མེད་པའི་བར་དུ་ཤིན་ཏུ་ཐོབ་དཀའ་བའི་མྱ་ངན་ལས་འདས་པའི་ཆོས་ཀྱི་གཞུང་འདི་བསྒྲུབས་ནས་ད་ལྟར་བསྟན་པ་ཡིན་ནོ། །ཁྱེད་རྣམས་འདི་ལྟར་རིག་པར་གྱིས་ཤིག །ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཀྱི་གཞུང་འདི་ནི་ཕྱོགས་བཅུ་ན་དུས་གསུམ་དུ་བཞུགས་པའི་སངས་རྒྱས་ཐམས་ཅད་ཀྱི་རིན་པོ་ཆེ་རྡོ་རྗེའི་གཏེར་རྟག་པ་དང་། བདེ་བ་དང་། བདག་དང་། ཡོངས་སུ་དག་པ་དང་། ཡོངས་སུ་རྫོགས་པ་མ་གོད་པ་སྟེ། སངས་རྒྱས་ཐམས་ཅད་ཀྱང་མྱ་ངན་ལས་འདའ་བ་འདིས་ཡོངས་སུ་མྱ་ངན་ལས་འདའ་སྟེ་མཐར་ཕྱིན་པ་ལྷག་མ་མ་ལུས་པ། སངས་རྒྱས་ཐམས་ཅད་ཀྱང་སྐུ་ཚེ་འདིར་
གཏོང་བས་མྱ་ངན་ལས་འདའ་བ་ཞེས་བྱའོ། །ཁྱེད་ཀྱིས་སངས་རྒྱས་ཀྱི་དྲིན་ལ་ཡང་དག་པར་ལན་གློན་ཞིང་བྱང་ཆུབ་མྱུར་དུ་ཐོབ་པར་འདོད་པ་དང་། སངས་རྒྱས་རྣམས་ཀྱིས་སྤྱི་བོ་ནས་དབང་བསྐུར་ཞིང་གང་ནས་གང་དུ་སྐྱེས་ཀྱང་ཡང་དག་པར་རྗེས་སུ་དྲན་པ་མི་བརྗེད་པར་འདོད་པ་དང་། ཕྱོགས་བཅུའི་སངས་རྒྱས་མངོན་སུམ་དུ་གཤེགས་ཏེ་ཉིན་མཚན་དུ་སྐྱོབ་པར་འདོད་པ་དང་། སེམས་ཅན་ཐམས་ཅད་ཀྱིས་འཇིག་རྟེན་ལས་འདའ་བའི་ཆོས་ཐོབ་པར་འདོད་ན། ཡོངས་སུ་མྱ་ངན་ལས་འདའ་བའི་མདོ་སྡེ་འདི་ལ་བརྩོན་འགྲུས་སུ་ནན་ཏན་བྱའོ། །བཅོམ་ལྡན་འདས་ཀྱིས་ཡང་དགའ་བོ་ལ་བཀའ་སྩལ་པ། ང་མངོན་པར་སངས་མ་རྒྱས་པ་ན་ཡང་མུ་སྟེགས་ཅན་ཨུར་ཏུ་ལམ་པའི་བསྟན་པ་ལ་ཞུགས་ཏེ། བསམ་གཏན་བཞི་དང་། ཏིང་ངེ་འཛིན་བརྒྱད་སློབ་པ་ལ་ཞུགས་ནས་དེའི་བསྟན་པ་བཞིན་དུ་བྱས་སོ། །མངོན་པར་སངས་རྒྱས་ནས་དེའི་ཆོས་སྨད་དེ་མཐར་གྱིས་ཤིན་ཏུ་བཟང་པོ་ཡང་བཏུལ་ནས་སངས་རྒྱས་ཀྱི་བསྟན་པ་ལ་བཞག་གོ །དེ་བཞིན་གཤེགས་པའི་ཡེ་ཤེས་ཆེན་པོའི་མེས་ངན་པར་ལྟ་བའི་རྒྱལ་མཚན་བསྲེགས་པ་ནི་ཇི་ལྟར་ཤིང་ལོ་སྐམ་པོ་མེ་ཆེན་པོའི་ནང་དུ་བཅུག་པ་དང་འདྲའོ། །དགའ་བོ་ངའི་གཉེན་དུ་གྱུར་པ་ཤཱཀ་རིགས་ལ་ཤིན་ཏུ་ཐུགས་བརྩེའོ། །ང་མྱ་ངན་ལས་འདས་ནས་ཁྱོད་ཀྱིས་བརྩོན་འགྲུས་སུ་ལེགས་པར་སྟོན་ཅིང་ཆོས་ཤིག །ངའི་ཉེ་གནས་རྣམས་ལ་དམ་པའི་ཆོས་བསྟན་ཏེ། རྩེད་མོ་དང་བག་མེད་པར་སྤྱོད་ཡུལ་རྣམས་ལ་འཇུག་པ་དང་། ངན་པར་ལྟ་བའི་ཆོས་ལ་སྤྱོད་པར་མི་འགྱུར་བ་དང་། ཁམས་གསུམ་གྱི་སྡུག་བསྔལ་ལས་ནི་རྣམ་པར་མ་གྲོལ་ན་མྱུར་དུ་རྣམ་པར་གྲོལ་བར་བྱ་བ་དང་། རྙོག་མ་ལྔའི་འདོད་པ་ལ་ཤིན་ཏུ་འཇིགས་པ་བསྐྱེད་དེ་མགོན་མེད་པའི་འདུ་ཤེས་བསྐྱེད་པར་བྱ་བ་དང་། མིའི་ལུས་ལན་ཅིག་སྟོར་ནས་ཕྱིར་ཐོབ་པར་དཀའ་བ་དང་། ཚེ་གཅིག་ཏུ་བག་བྱ་བ་དང་། མི་རྟག་པའི་གདོན་ཆེན་པོ་ལས་རྣམ་པར་ཐར་བར་བྱ་བ་དང་། སེམས་ཅན་ལ་སྙིང་རྗེ་བ་བསྐྱེད་དེ་སེམས་ཅན་གྱི་སྲོག་མི་གཅོད་པ་དང་། ཆུང་ངུ་ན་གྲོག་སྦུར་གྱི་བར་དུ་མི་འཇིགས་པ་སྦྱིན་པ་དང་། ལུས་ཀྱི་ལས་ཡོངས་སུ་དག་པས་འཇིག་རྟེན་གྱི་ཁམས་བཟང་པོར་སྐྱེ་བ་དང་། ངག་གི་ལས་ཡོངས་སུ་དག་པས་ཉེས་པའི་སྐྱོན་ཐམས་ཅད་དང་བྲལ་བར་འགྱུར་བ་དང་། ཤ་མི་ཟ་བ་
དང་། ཆང་མི་འཐུང་བ་དང་། སེམས་ཀྱི་སྦྲུལ་གདུལ་ཞིང་བྱང་ཆུབ་ཀྱི་ལམ་ལ་དགོད་པ་དང་། དགེ་བ་དང་སྡིག་པའི་རྣམ་པར་སྨིན་པ་ལུས་ཀྱི་གྲིབ་མ་བཞིན་དུ་འབྲང་བར་འདུ་བྱེད་ཀྱི་ལས་ལ་ཤིན་ཏུ་བརྟགས་པ་དང་། དུས་གསུམ་གྱི་འབྲས་བུ་ཡོངས་སུ་འཁོར་བ་མེད་པར་མི་འགྱུར་བ་དང་། སྐྱེ་བ་འདི་ཆུད་གསན་ནས་ཕྱིས་འགྱོད་ཀྱང་མི་ཕན་པར་སྟོན་ཅིང་ཆོངས་ཤིག །ང་མྱ་ངན་ལས་འདའ་བའི་དུས་ལ་བབ་སྟེ། ཁྱོད་ལ་བསྟན་པ་འདི་དག་ཡིན་ནོ། །དེའི་ཚེ་ན་དགའ་བོས་བཅོམ་ལྡན་འདས་ཀྱིས་བཀའ་སྩལ་པ་ཐོས་ནས། ལུས་དང་སེམས་འདར་ཞིང་གཡོ་སྟེ། ཤིན་ཏུ་འཁྲུགས་ནས་མྱ་ངན་གྱིས་གདུངས་ཏེ་སྐད་ཀྱང་མ་ཕྱིན་ལ། བརྒྱལ་བ་ཙམ་དུ་འཁྲུགས་ནས་དེ་བཞིན་གཤེགས་པའི་སྤྱན་སྔར་ཤི་བ་བཞིན་དུ་གྱུར་ཏོ། །དེ་ནས་མ་འགགས་པས་དགའ་བོ་ལ་སྤྲོ་བ་བསྐྱེད་དེ་མྱ་ངན་བསངས་ནས་འདི་སྐད་ཅེས་སྨྲས་སོ། །ཁྱོད་དེ་ལྟར་མྱ་ངན་མ་བྱེད་ཅིག །དེ་བཞིན་གཤེགས་པ་མྱ་ངན་ལས་འདའ་བའི་དུས་ལ་བབ་སྟེ། དེང་བཞུགས་ཀྱང་སང་མི་བཞུགས་སོ། །ཁྱོད་ཀྱིས་ངས་སྨྲས་པ་བཞིན་དུ་ཞུ་བ་རྣམ་པ་བཞི་པོ་འདི་ཞུས་ཤིག །སངས་རྒྱས་མྱ་ངན་ལས་འདས་ནས་དགེ་སློང་དྲུག་སྡེ་ཁྱིམ་སུན་འབྱིན་པ་དང་། འདོད་ལྡན་སྡིག་ཏོ་ཅན་དང་། ཇི་ལྟར་ལྷན་ཅིག་ཏུ་གནས་ཤིང་བསྟན་པ་བཞིན་དུ་བགྱི་བ་དང་། དེ་བཞིན་གཤེགས་པ་འཇིག་རྟེན་ན་བཞུགས་ན་སྟོན་པ་སངས་རྒྱས་ཀྱིས་མཛད་ན། བཅོམ་ལྡན་འདས་མྱ་ངན་ལས་འདས་ནས་སྟོན་པ་སུས་བགྱི་བ་དང་། དེ་བཞིན་གཤེགས་པ་འཇིག་རྟེན་ན་བཞུགས་ན། དེ་བཞིན་གཤེགས་པ་ལ་གནས་ཤིང་བརྟེན་ན་མྱ་ངན་ལས་འདས་པའི་འོག་ཏུ་སུ་ལ་གནས་ཤིང་རྟེན་པ་དང་། དེ་བཞིན་གཤེགས་པ་མྱ་ངན་ལས་འདས་ནས་ཆོས་ཀྱི་སྡེ་སྣོད་བསྡུ་བ་ན། མདོ་སྡེ་ཐམས་ཅད་ཀྱི་མགོ་ནན་ལ་ཇི་སྐད་བྱ་བ་ཞུས་ཤིག་ཅེས་སྨྲས་སོ། །དེའི་ཚེ་དགའ་བོའི་རྨི་ལམ་ན་མ་འགགས་པས་སྨྲས་པ་ལྟ་བུར་ཞུ་བ་བཞི་པོ་ཞུས་ཤིག་ཅེས་སྨྲས་པ་ཐོས་ནས་བགས་ཀྱིས་སངས་ཏེ། ཞུ་བ་བཞི་པོ་བཅོམ་ལྡན་འདས་ལ་ཞུས་སོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ཁྱོད་ཅིའི་ཕྱིར་འདི་ལྟར་མི་དགའ་ཞིང་ཤིན་ཏུ་མྱ་ངན་བྱེད། སངས་རྒྱས་ཀྱིས་གདུལ་བའི་མཛད་པ་ཀུན་མཛད་དོ། །ཆོས་ཉིད་ཀྱིས་འདི་ལྟར་གཤེགས་པ་ཡིན་
ནོ། །ལེགས་སོ་ལེགས་སོ། །དགའ་བོ་ཁྱོད་ཀྱིས་ཞུ་བ་བཞི་པོ་འདི་ནི་ནང་གི་ཐ་མར་ཞུས་པ་སྟེ། འཇིག་རྟེན་དུ་བཅས་པ་ཐམས་ཅད་ལ་ཕན་པ་དང་བདེ་བར་འགྱུར་བ་ཡིན་ནོ། །དེ་བས་ན་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དེ་བཞིན་ནོ། །བཅོམ་ལྡན་འདས་ཞེས་གསོལ་ནས་བཅོམ་ལྡན་འདས་ལ་སླར་ཉན་ཏོ། །བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ཁྱོད་འདྲི་བ་ལྟར་སངས་རྒྱས་མྱ་ངན་ལས་འདས་ནས་དགེ་སློང་དྲུག་སྡེ་དང་། འདོད་ལྡན་སྡིག་ཏོ་ཅན་ཁྱིམ་སུན་འབྱིན་པ་དང་། ཇི་ལྟ་བུར་ལྷན་ཅིག་ཏུ་གནས་ཤིང་བསྟན་པ་ལ་གནས་པར་འགྱུར་ཞེས་དྲིས་པ་ནི། དགའ་བོ་དགེ་སློང་འདོད་ལྡན་རང་བཞིན་གྱིས་མ་རུངས་པ་ང་མྱ་ངན་ལས་འདས་ནས་རང་དུལ་ཞིང་ངེས་པར་འགྱུར་ཏེ། སྡིག་ཏོའི་སེམས་ཀྱང་སྤོང་བར་འགྱུར་རོ། །དགའ་བོ་ངའི་ནུ་བོ་ཀུན་དགའ་བོ་འདོད་པ་དང་ལྡན་ཏེ་མ་རུངས་པ་ཡང་། དེ་བཞིན་གཤེགས་པས་ཐབས་མཁས་པས་བསྟན་ཅིང་བཅོས་ནས་དེའི་དབང་པོ་དང་ཤེས་རབ་ཅི་ལྕོགས་པས་རྟེན་ཅིང་འབྲེལ་ཏེ་འབྱུང་བ་བཅུ་གཉིས་བསྟན་ཏོ། །འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ནས་རྒ་ཤི་དང་། ཟློས་པའི་མྱ་ངན་དང་། སྨྲེ་སྔགས་འདོན་པའི་བར་དུ་ཐམས་ཅད་ཀྱང་མ་རིག་པ་འདོད་པའི་ཐིབས་པོའོ། །འདུ་བྱེད་ཀྱི་སྡུག་བསྔལ་གྱིས་ཁམས་གསུམ་དུ་གང་ནས་རྒྱུད་དྲུག་ཏུ་འཁོར་ཏེ། སྡུག་བསྔལ་ཆེན་པོའི་རྩ་བ་ནི་མ་རིག་པ་ཡིན་ནོ། །དེ་ལྟར་ཤེས་རབ་ཀྱིས་རང་བཞིན་གྱིས་དག་པ་བརྟགས་ནས། སྲིད་པའི་སྐྱོན་མ་རིག་པ་ཡོངས་སུ་གཅོད་དོ། །རྩ་བ་འགགས་པས་མ་རིག་པ་འགག་གོ །མ་རིག་པ་འགགས་པས་འདུ་བྱེད་འགག་པ་ནས། རྒ་ཤི་དང་། ཟློས་པའི་མྱ་ངན་དང་། སྨྲེ་སྔགས་འདོན་པའི་བར་དུ་འགག་གོ །དེ་ལྟར་ཡང་དག་པར་སྤྱོད་པ་ན་སེམས་གནས་པར་གྱུར་ཏེ། ཏིང་ངེ་འཛིན་དུ་ཞུགས་སོ། །ཏིང་ངེ་འཛིན་གྱི་ཤུགས་ཀྱིས་བསམ་གཏན་དང་པོ་ཐོབ་བོ། །དེ་ནས་མཐར་གྱིས་བསམ་གཏན་བཞི་ཡང་ཐོབ་ནས་དྲན་པ་ཡང་དག་པའི་སེམས་ཀྱིས་དེ་ལྟར་ནན་ཏན་བྱས་ནས་འབྲས་བུ་བླ་མ་ཡང་རང་ཐོབ་སྟེ། ཁམས་གསུམ་གྱི་སྡུག་བསྔལ་ཡོངས་སུ་སྤོང་བར་འགྱུར་རོ། །དགའ་བོ་དེའི་ཚེ་ན་དགེ་སློང་ཀུན་དགའ་བོས་དེ་ལྟར་བསམ་པ་ཤིན་ཏུ་དག་པས་ངས་བསྟན་པ་བཞིན་དུ་བརྩོན་འགྲུས་སུ་ནན་ཏན་བྱེད་པས། རིང་པོ་མི་ཐོགས་པར་
དགྲ་བཅོམ་པའི་འབྲས་བུ་ཐོབ་པར་འགྱུར་རོ། །དགའ་བོ་ང་མྱ་ངན་ལས་འདས་ནས་ཁྱོད་ཀྱིས་ངས་བསྟན་པ་བཞིན་དུ་དྲུག་སྡེ་དང་། འདོད་ལྡན་ལ་སྟོན་ཅིག་དང་། དགེ་སློང་དེ་དག་བསམ་པ་དག་པས་རྣམ་པར་དག་པའི་དམ་པའི་ཆོས་འདི་ལ་བརྟེན་ཏེ། རིང་པོ་མི་ཐོགས་པར་འབྲས་བུ་མཆོག་ཐོབ་པར་འགྱུར་རོ། །དགའ་བོ་དེ་བས་ན་མ་རིག་པ་ལས་ཁམས་གསུམ་དུ་འཁོར་བའི་ཤིང་ཆེན་པོ་སྐྱེས་ཏེ། འདོད་པའི་རླུང་གིས་ཁྱེར་ནས། ཡུན་རིང་པོར་སྡུག་བསྔལ་གྱིས་ཉིན་མཚན་དུ་གདུངས་ཏེ། མུན་པ་ནག་པོའི་འཁོར་བའི་ཀ་བ་ལ་འཁོར་ཞིང་རྣམ་པར་ཤེས་པ་དྲུག་གི་ཡལ་ག་དང་ངན་པར་རྟོག་པའི་རྩ་བ་དང་། མ་རིག་པའི་དབའ་རླབས་དང་། སེམས་དང་རྣམ་པར་ཤེས་པ་ཁོལ་པོ་ལྟ་བུས་ཡུལ་དྲུག་ལ་རྒྱུ་ཞིང་། སྡུག་བསྔལ་གྱི་ས་བོན་བཏབ་ནས་ཕྱིར་ཟློགས་པ་མེད་དེ། རྒྱལ་པོ་དང་འདྲ་བར་དབང་ཆེ་བས་ན་མ་རིག་པ་ནི་རྗེ་བོ་ལྟ་བུ་སྟེ་སྐད་ཅིག་ཏུ་གནོན་པར་བྱེད་པར་སེམས་ཅན་གྱིས་མ་ཚོར་བར་འཁོར་བ་ན་རྒྱུན་དུ་འཁོར་བར་གྱུར་ཏོ། །དགའ་བོ་སེམས་ཅན་ཐམས་ཅད་ནི་མ་རིག་པ་འདིའི་དབང་གིས་འདོད་པའི་ཉོན་མོངས་པ་ལ་ཞུགས་ཏེ། བདག་ཏུ་ལྟ་བས་ཟིལ་གྱིས་མནན་ནས་ཉོན་མོངས་པ་རྗེ་བོ་ལྟ་བུ་བརྒྱད་ཁྲི་བཞི་སྟོང་གིས་ལུས་བཀོལ་ཏེ་ལུས་ཞིག་ཀྱང་རང་དབང་དུ་མི་འགྱུར་རོ། །དགའ་བོ་མ་རིག་པའི་སྡུག་བསྔལ་འགགས་ཏེ་ཁམས་གསུམ་ཟད་ན་དེའི་ཕྱིར་འཇིག་རྟེན་ལས་འདའ་བ་ཞེས་བྱའོ། །དགའ་བོ་གང་གིས་རྟེན་ཅིང་འབྲེལ་ཏེ་འབྱུང་བ་བཅུ་གཉིས་མཐར་བདག་མེད་ཅིང་ཡོངས་སུ་དག་པའི་སྤྱོད་ཡུལ་ལ་ཞུགས་པར་རྟོགས་ན། དེས་ནི་ཁམས་གསུམ་གྱི་མེ་ཆེན་པོ་ཡོངས་སུ་སྤོང་བར་འགྱུར་རོ། །དགའ་བོ་དེ་བཞིན་གཤེགས་པ་ནི་ཡང་དག་པར་གསུང་པ་སྟེ། ཡང་དག་པའི་གསུང་གིས་ཁྱོད་ལ་གཏམས་པ་འདི་ཁྱོད་ཀྱིས་ལེགས་པར་ནན་ཏན་གྱིས་ཤིག །དགའ་བོ་ཁྱོད་ཀྱིས་ཞུ་བ་ལྟར་སངས་རྒྱས་མྱ་ངན་ལས་འདས་ཏེ་འཇིག་རྟེན་ན་མི་བཞུགས་ན་སྟོན་པ་སུས་བྱ་ཞེས་བྱ་བ་ནི་དགའ་བོ་ཚུལ་ཁྲིམས་ནི་ཁྱོད་ཀྱི་སྟོན་པ་ཆེན་པོ་ཡིན་གྱིས་དེ་ལ་གནས་ཏེ་ནན་ཏན་བྱས་ན། འཇིག་རྟེན་ལས་འདས་པའི་ཏིང་ངེ་འཛིན་དང་ཤེས་རབ་ཐོབ་པར་འགྱུར་རོ། །དགའ་བོ་ཁྱོད་ཞུ་བ་ལྟར་སངས་རྒྱས་མྱ་ངན་ལས་འདས་ནས་ཅི་ལ་གནས་ཤིང་རྟེན་ཅེས་བྱ་བ་ནི་དགའ་བོ་དྲན་པ་ཉེ་བར་གཞག་པ་བཞི་ལ་གནས་ཏེ་སེམས་བརྒྱན་ནས་གནས་
པར་བྱའོ། །ལུས་ལ་ལུས་ཀྱི་རྗེས་སུ་བརྟགས་ཏེ་ནམ་མཁའ་དང་འདྲ་བར་རྟོགས་ན་ལུས་ལ་ལུས་ཀྱི་རྗེས་སུ་དྲན་པ་ཉེ་བར་གཞག་པ་ཞེས་བྱའོ། །ཚོར་བ་ལ་ཚོར་བའི་རྗེས་སུ་དྲན་པར་བྱས་ཏེ། ཚོར་བ་ཕྱི་རོལ་ན་ཡང་མི་གནས། ནང་ན་ཡང་མི་གནས། གཉིས་ཀའི་བར་ན་ཡང་མི་གནས་པར་རྟོགས་ན་ཚོར་བ་ལ་ཚོར་བའི་རྗེས་སུ་དྲན་པ་ཉེ་བར་གཞག་པ་ཞེས་བྱའོ། །སེམས་ལ་སེམས་ཀྱི་རྗེས་སུ་བརྟགས་ཏེ། སེམས་ནི་མིང་ཙམ་དུ་ཟད་དེ། མིང་ཉིད་དང་ཡང་བྲལ་བར་རྟོགས་ན་སེམས་ལ་སེམས་ཀྱི་རྗེས་སུ་དྲན་པ་ཉེ་བར་གཞག་པ་ཞེས་བྱའོ། །ཆོས་ལ་ཆོས་ཀྱི་རྗེས་སུ་བརྟགས་ཏེ་དགེ་བའི་ཆོས་སུ་ཡང་མི་དམིགས། མི་དགེ་བའི་ཆོས་སུ་ཡང་མི་དམིགས་ན་ཆོས་ལ་ཆོས་ཀྱི་རྗེས་སུ་ལྟ་བའི་དྲན་པ་ཉེ་བར་གཞག་པ་ཞེས་བྱའོ། །དགའ་བོ་ཁྱོད་ཞུ་བ་ལྟར་དེ་བཞིན་གཤེགས་པ་མྱ་ངན་ལས་འདས་ནས་ཆོས་ཀྱི་མཛོད་བསྡུས་པ་ན། མདོ་སྡེ་ཐམས་ཅད་ཀྱི་མགོ་ནན་ལ་ཇི་སྐད་གདགས་ཞེས་བྱ་བ་ནི་དགའ་བོ་དེ་བཞིན་གཤེགས་པ་མྱ་ངན་ལས་འདས་ནས་ཆོས་ཀྱི་མཛོད་བསྡུས་པའི་མདོ་སྡེ་ཐམས་ཅད་ཀྱི་མགོ་ནན་ལ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཆེ་གེ་མོ་ཞིག་ན་འཁོར་རྣམ་བཞི་དང་ཐབས་ཅིག་ཏུ་བཞུགས་ཏེ། མདོ་སྡེ་འདི་གསུངས་སོ་ཞེས་ཐོགས་ཤིག །དེའི་ཚེ་དགའ་བོས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་སངས་རྒྱས་འཇིག་རྟེན་ན་བཞུགས་ཀྱང་རུང་། མྱ་ངན་ལས་འདས་ཀྱང་རུང་། སྦྱིན་བདག་དད་པས་དེ་བཞིན་གཤེགས་པ་ལ་གསེར་དང་། དངུལ་དང་། རིན་པོ་ཆེ་སྣ་བདུན་དང་། ལོངས་སྤྱོད་ཀྱི་ཡོ་བྱད་མང་པོ་ཕུལ་ནས་ཇི་ལྟ་བུར་སུ་ལ་བཞག་པར་བགྱི་བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། གལ་ཏེ་སངས་རྒྱས་མངོན་དུ་བཞུགས་ན། སངས་རྒྱས་ལ་ཅི་ཕུལ་བ་ཐམས་ཅད་དགེ་འདུན་ལ་གཏད་པར་བྱའོ། །གལ་ཏེ་སངས་རྒྱས་མྱ་ངན་ལས་འདས་ནས་ཡོན་བདག་དད་པས་སངས་རྒྱས་ལ་བསྔོས་ཤིང་ཕུལ་བ་ཐམས་ཅད་སངས་རྒྱས་ཀྱི་སྐུ་གཟུགས་དང་། སངས་རྒྱས་ཀྱི་ན་བཟའ་དང་རིན་པོ་ཆེ་སྣ་བདུན་གྱི་བ་དན་དང་གདུགས་སུ་བྱ་ཞིང་མར་བསུང་ཅན་དང་། རིན་པོ་ཆེའི་མེ་ཏོག་ཉོས་ཏེ་སངས་རྒྱས་ལ་མཆོད་པ་བྱའོ། །སངས་རྒྱས་ལ་མཆོད་པ་བྱ་བ་མ་གཏོགས་པར་གཞན་དུ་སྤྱད་དུ་མི་རུང་ངོ་། །གལ་ཏེ་གཞན་དུ་སྤྱད་ན་སངས་རྒྱས་ཀྱི་དཀོར་བརྐུས་པ་ཡིན་ནོ། །དགའ་
བོས་ཡང་གསོལ་པ། བཅོམ་ལྡན་འདས་སངས་རྒྱས་བཞུགས་པ་ན། གལ་ཏེ་སྐྱེས་བུ་ཞིག་གིས་གསེར་དང་། དངུལ་དང་། རིན་པོ་ཆེ་སྣ་བདུན་དང་། གཞལ་མེད་ཁང་དང་། བུ་དང་། ཆུང་མ་དང་། བྲན་ཁོལ་དང་། གོས་དང་། ཟས་དང་། བདེ་བའི་ཡོ་བྱད་ཐམས་ཅད་ཕུལ་ནས་བསྟི་སྟང་དང་བཅས་པས་ཕྱག་བྱས་ཏེ། མཆོད་པ་བྱས་པ་དང་། དེ་བཞིན་གཤེགས་པ་མྱ་ངན་ལས་འདས་ནས། གལ་ཏེ་སྐྱེས་བུ་ཞིག་གིས་གསེར་དང་། དངུལ་དང་། རིན་པོ་ཆེ་སྣ་བདུན་དང་། བུ་དང་། ཆུང་མ་དང་། བྲན་ཁོལ་དང་། གོས་དང་། ཟས་དང་། བདེ་བའི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པའི་སྐུ་གཟུགས་ལ་ཕུལ་ཏེ། དད་པའི་སེམས་ཀྱིས་བསྟི་སྟང་དང་བཅས་པས་ཕྱག་འཚལ་ཏེ་མཆོད་པ་བྱས་ན། བཅོམ་ལྡན་འདས་དེ་ལྟར་སྐྱེས་བུ་དེ་གཉིས་ཀྱིས་དད་པའི་སེམས་ཀྱིས་མཆོད་པ་བགྱིས་ན་བསོད་ནམས་གང་གིས་མང་དུ་ཐོབ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སྐྱེས་བུ་དེ་གཉིས་ཀྱིས་དེ་ལྟར་དད་པའི་སེམས་ཀྱིས་མཆོད་ན་བསོད་ནམས་ཐོབ་པའི་ཁྱད་པར་མེད་དོ། །དེ་ཅིའི་ཕྱིར་ཞེ་ན། སངས་རྒྱས་མྱ་ངན་ལས་འདས་ཀྱང་ཆོས་ཀྱི་སྐུ་ནི་རྟག་པ་ཡིན་པས་དད་པའི་སེམས་ཀྱིས་མཆོད་ན་བསོད་ནམས་འདྲ་སྟེ་ཁྱད་པར་མེད་དོ། །དགའ་བོས་ཡང་གསོལ་པ། བཅོམ་ལྡན་འདས་སངས་རྒྱས་མངོན་དུ་བཞུགས་པ་ལ་གལ་ཏེ་སྐྱེས་བུ་ཞིག་དད་པའི་སེམས་ཀྱིས་གོང་དུ་སྨོས་པ་དང་འདྲ་བར་བསྟི་སྟང་དང་བཅས་པས་མཆོད་པ་བགྱིད་པ་དང་། སངས་རྒྱས་མྱ་ངན་ལས་འདས་ནས་གལ་ཏེ་སྐྱེས་བུ་ཞིག་དད་པའི་སེམས་ཀྱིས་གོང་དུ་སྨོས་པ་དང་འདྲ་བར་བསྟི་སྟང་དང་བཅས་པས་སངས་རྒྱས་ཀྱི་སྐུ་གདུང་རིལ་པོ་ལ་མཆོད་པ་བགྱིས་ན། བཅོམ་ལྡན་འདས་སྐྱེས་བུ་དེ་གཉིས་གང་གིས་བསོད་ནམས་མང་དུ་ཐོབ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སྐྱེས་བུ་དེ་གཉིས་ཀྱི་བསོད་ནམས་ནི་མཉམ་པས་ཁྱད་པར་མེད་དེ། བསོད་ནམས་ཚད་མེད་དཔག་ཏུ་མེད་པར་རྒྱ་ཆེ་བས་སྡུག་བསྔལ་གྱི་མཐར་ཕྱིན་པའི་བར་དུ་བསོད་ནམས་མི་ཟད་དོ། །དགའ་བོས་ཡང་གསོལ་པ། བཅོམ་ལྡན་འདས་སངས་རྒྱས་མངོན་དུ་བཞུགས་པ་ལ། གལ་ཏེ་སྐྱེས་བུ་ཞིག་དད་པའི་སེམས་ཀྱིས་གོང་དུ་སྨོས་པའི་མཆོད་པའི་ཡོ་བྱད་ཐམས་ཅད་ཀྱིས་དེ་བཞིན་གཤེགས་པ་ལ་མཆོད་པ་དང་། སངས་རྒྱས་མྱ་ངན་ལས་འདས་ནས། གལ་
ཏེ་སྐྱེས་བུ་ཞིག་དད་པའི་སེམས་ཀྱིས་བསྟི་སྟང་དང་བཅས་པས་དེ་བཞིན་གཤེགས་པའི་སྐུ་གདུང་ཕྱེད་ལ་མཆོད་པ་བགྱིས་ན། བཅོམ་ལྡན་འདས་སྐྱེས་བུ་དེ་གཉིས་གང་གིས་བསོད་ནམས་མང་དུ་ཐོབ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སྐྱེས་བུ་དེ་གཉིས་དད་པའི་སེམས་ཀྱིས་མཆོད་ན། བསོད་ནམས་ལ་ཁྱད་པར་མེད་དེ། བསོད་ནམས་ཀྱི་ཕུང་པོ་ཚད་མེད་དཔག་ཏུ་མེད་དོ། །དགའ་བོ་གལ་ཏེ་སྐྱེས་བུ་ཞིག་གིས་དད་པའི་སེམས་ཀྱིས་དེ་བཞིན་གཤེགས་པའི་སྐུ་གདུང་བཞི་ཆ་གཅིག་གམ། བརྒྱད་ཆ་གཅིག་གམ། བཅུ་དྲུག་གི་ཆ་གཅིག་གམ། བརྒྱའི་ཆ་གཅིག་གམ། སྟོང་གི་ཆ་གཅིག་གམ། ཁྲིའི་ཆ་གཅིག་གམ། ཀླུང་གང་གཱའི་བྱེ་མའི་ཆ་གཅིག་ཙམ་ནས་ཆུང་ངུ་ན་ཡུངས་ཀར་ཙམ་གཅིག་ལ་དད་པའི་སེམས་ཀྱིས་བསྟི་སྟང་དང་བཅས། རིམ་གྲོ་དང་བཅས་པས་མཆོད་པ་དང་བསྟོད་པ་བྱས་པ་དང་། གལ་ཏེ་སངས་རྒྱས་མངོན་དུ་བཞུགས་པ་ལ་བསྟི་སྟང་དང་བཅས་པས་མཆོད་པ་བྱས་ན། སྐྱེས་བུ་དེ་གཉིས་ཀྱི་བསོད་ནམས་ནི་ཐམས་ཅད་ཁྱད་པར་མེད་པར་མཉམ་སྟེ། ཚད་མེད་དཔག་ཏུ་མེད་དོ། །དགའ་བོ་སངས་རྒྱས་མངོན་དུ་བཞུགས་སམ། མྱ་ངན་ལས་འདས་ཀྱང་རུང་། གང་ཞིག་དད་པའི་སེམས་ཀྱིས་བསྟི་སྟང་དང་བཅས་པས་ཕྱག་འཚལ་ཏེ། བླ་མར་བྱས། བཀུར་སྟིར་བྱས། བསྟོད་པ་བྱས་ན། སྐྱེས་བུ་དེ་གཉིས་ཀྱི་བསོད་ནམས་ཐོབ་པ་ནི་གཉིས་སུ་མེད། དབྱེར་མེད་པར་རིག་པར་བྱའོ། །བཅོམ་ལྡན་འདས་ཀྱིས་དགའ་བོ་དང་འཁོར་མང་པོ་རྣམས་ལ་བཀའ་སྩལ་པ། ང་མྱ་ངན་ལས་འདས་ནས་གནམ་གྱི་སྟེང་ངམ། མིའི་འཇིག་རྟེན་ན་སེམས་ཅན་གྱིས་ངའི་སྐུ་གདུང་ལག་ཏུ་ཐོབ་སྟེ། མྱ་ངན་དང་དགའ་བ་བཅས་པས་བསྟི་སྟང་དུ་ཕྱག་འཚལ་ཏེ་དད་པའི་སེམས་ཀྱིས་མཆོད་པ་བྱས་ན། བསོད་ནམས་ཚད་མེད་དཔག་ཏུ་མེད་པ་ཐོབ་པར་འགྱུར་རོ། །དགའ་བོ་གང་གིས་དེ་བཞིན་གཤེགས་པའི་སྐུ་གདུང་མཐོང་ན། དེས་ནི་སངས་རྒྱས་མཐོང་ངོ་། །སངས་རྒྱས་མཐོང་བ་དེས་ནི་ཆོས་མཐོང་ངོ་། །ཆོས་མཐོང་བ་དེས་ནི་དགེ་འདུན་མཐོང་ངོ་། །དགེ་འདུན་མཐོང་བ་དེས་ནི་མྱ་ངན་ལས་འདས་པ་མཐོང་ངོ་། །དགའ་བོ་དེ་བས་ན་དཀོན་མཆོག་གསུམ་ནི་རྟག་པ་གནས་པ་མི་འགྱུར་མི་འཕོ་བ་སྟེ། སེམས་ཅན་ཐམས་ཅད་ཀྱི་མགོན་དང་སྐྱབས་ཀྱི་གནས་སུ་འགྱུར་བར་རིག་པར་བྱའོ། །དགའ་
བོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་ཡོངས་སུ་མྱ་ངན་ལས་འདས་ནས་བདག་ཅག་གིས་ཆོ་ག་གང་དང་སྦྱར་ཏེ་དེ་བཞིན་གཤེགས་པའི་སྐུ་ཞུགས་ལ་བཞེན་ན་སྐུ་གདུང་འཐོབ་ཅིང་དད་པས་མཆོད་པར་འགྱུར། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། ང་མྱ་ངན་ལས་འདས་ནས་ཁྱེད་ཀྱིས་འཁོར་ལོས་སྒྱུར་བའི་རྒྱལ་པོའི་ཐབས་སུ་སྲེགས་ཤིག །དགའ་བོས་ཡང་གསོལ་པ། འཁོར་ལོས་སྒྱུར་བའི་རྒྱལ་པོ་བསྲེག་པའི་ཆོ་ག་ཇི་ལྟ་བུ་ལགས། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། འཁོར་ལོས་སྒྱུར་བའི་རྒྱལ་པོ་ནི་ཤི་ནས་ཞག་བདུན་གྱི་བར་དུ་འཇོག་སྟེ། གདོད་ལྕགས་ཀྱི་སྒྲོམ་གྱི་ནང་དུ་འཛུད་དོ། །སྒྲོམ་དུ་བཅུག་ནས་འབྲུ་མར་བསུང་ཅན་གྱིས་སྒྲོམ་གྱི་ནང་དུ་བཀང་ནས། ཁ་ལེགས་པར་བཅད་དེ་ཡང་ཞག་བདུན་དུ་འཇོག་གོ །དེ་ནས་སྒྲོམ་ནས་ཕྱུང་སྟེ་སྤོས་ཆུས་བཀྲུའོ། །སྤོས་ཆུས་བཀྲུས་ནས་བདུག་སྤོས་ཀྱིས་མཆོད་ཅིང་བདུགས་ལ་ཤིང་བལ་གྱིས་ལུས་ཀུན་དཀྲིའོ། །ཤིང་བལ་གྱིས་དཀྲིས་པའི་སྟེང་དུ་རས་དཀར་པོ་བཟང་པོ་ཡུག་སྟོང་གིས་མཐར་ཆགས་སུ་དཀྲིའོ། །དེ་ལྟར་དཀྲིས་ནས་སྒྲོམ་གྱི་ནང་དུ་འབྲུ་མར་བསུང་ཅན་གྱིས་བཀང་སྟེ། རྒྱལ་པོའི་རུས་བུ་ཕྱིར་སྒྲོམ་གྱི་ནང་དུ་བཅུག་ལ་སྒྲོམ་གྱི་ཁ་ལེགས་པར་གཅད་དོ། །ཤིང་བསུང་ཅན་གྱི་རིན་པོ་ཆེ་སྣ་བདུན་གྱི་ཤིང་རྟའི་སྟེང་དུ་དྲངས་ཏེ། ཤིང་རྟའི་ངོགས་གཞི་ཡང་རྒྱན་ཕྱང་དཔྱངས་ཤིང་རིན་པོ་ཆེ་སྣ་ཚོགས་ཀྱིས་ཀྱང་ཤིང་རྟ་སྤྲའོ། །གྲངས་མེད་པའི་མེ་ཏོག་དང་། བ་དན་དང་། རིན་པོ་ཆེ་སྣ་བདུན་གྱི་གདུགས་དང་། རྒྱལ་མཚན་དང་། སྤོས་བཟང་པོ་སྣ་ཚོགས་དང་། ལྷའི་རོལ་མོས་བསྐོར་ཞིང་མཆོད་པ་བྱའོ། །དེ་ནས་ཤིང་བསུང་ཅན་ཕྱི་ནང་རི་མོ་དང་ལྡན་པ་དང་མར་བསུང་ཅན་གྱིས་འཁོར་ལོས་སྒྱུར་བའི་རྒྱལ་པོའི་རུས་བུ་བསྲེག་གོ །དེ་ལྟར་བསྲེགས་ནས་རིང་བསྲེལ་བསྡུས་ཏེ་གྲོང་ཁྱེར་ཆེན་པོའི་བཞི་མདོར་རིན་པོ་ཆེ་སྣ་བདུན་གྱི་མཆོད་རྟེན་སྒོ་བཞི་བཀོད་པ་བྱས་ཏེ། རིང་བསྲེལ་དེའི་ནང་དུ་བཞག་ལ་འཇིག་རྟེན་དུ་བཅས་པ་ཐམས་ཅད་ཀྱིས་རྗེས་སུ་ཡི་རང་བས་བལྟར་གཞུག་གོ །དགའ་བོ་འཁོར་ལོས་སྒྱུར་བའི་རྒྱལ་པོ་དེ་བསོད་ནམས་ཅུང་ཟད་ཅིག་གིས་རྒྱལ་པོའི་ཐབས་ཐོབ་ཀྱང་སྲིད་པ་ལས་རྣམ་པར་མ་གྲོལ། འདོད་པ་ལྔ་དང་ལྡན་ཏེ། བཙུན་མོ་དང་ཕོ་
བྲང་གི་སླས་སུ་བཅས། ངན་པར་ལྟ་བ་དང་གདུག་པ་གསུམ་དུ་བཅས། ཉོན་མོངས་པ་དང་ཀུན་ནས་ཉོན་མོངས་པ་བ་སྤུའི་ཉག་མ་ཙམ་ཡང་མ་སྤངས་པ་ཤི་ནས་འཇིག་རྟེན་དུ་བཅས་པས་དེ་ལྟ་བུའི་ཆོ་ག་བྱེད་ཅིང་། མཆོད་རྟེན་བརྩིགས་ནས་ཐམས་ཅད་རྗེས་སུ་ཡི་རང་ཞིང་བལྟ་ན་དགའ་བོ་དེ་བཞིན་གཤེགས་པ་ལྟ་ཅི་སྨོས་ཏེ། བསྐལ་པ་ཚད་མེད་མཐའ་ཡས་དཔག་ཏུ་མེད་གྲངས་མེད་པ་ནས་བཙུན་མོ་དང་ཕོ་བྲང་གི་སླས་དང་འདོད་པ་ལྔ་ཡོངས་སུ་སྤངས་ཏེ། འཇིག་རྟེན་གྱི་ཆོས་ལ་བ་མོའམ་སེར་བ་ལྟ་བུར་རྟོགས་ནས་རྩོལ་དཀའ་བ་བཙལ་ཏེ་ཤིན་ཏུ་སྤྱོད་དཀའ་བ་སྤྱད་ནས། བྱང་ཆུབ་སེམས་དཔའ་ཐམས་ཅད་ཀྱིས་འཇིག་རྟེན་ལས་འདས་པའི་སྤྱོད་དཀའ་བ་སྤྱད་དེ། ཕྱོགས་བཅུ་ན་དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱིས་མཛད་པ་ཡོངས་སུ་དག་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་སྟོན་པ་དང་། ཕ་རོལ་ཏུ་ཕྱིན་པ་དྲུག་མ་བསྒྲུབས་པ་གང་ཡང་མེད་ལ། གཞན་ཡང་དེ་བཞིན་གཤེགས་པའི་སྟོབས་བཅུ་དང་། སྙིང་རྗེ་ཆེན་པོ་དང་། མི་འཇིགས་པ་བཞི་དང་། རྣམ་པར་ཐར་པའི་སྒོ་གསུམ་དང་། སྟོང་པ་ཉིད་བཅྭ་བརྒྱད་དང་། མངོན་པར་ཤེས་པ་དྲུག་དང་། སྤྱན་ལྔ་དང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། མ་འདྲེས་པའི་ཆོས་བཅྭ་བརྒྱད་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། སངས་རྒྱས་ཐམས་ཅད་ཀྱི་སྐུ་ཚེ་དང་། སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱང་བ་དང་། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། སྤྱོད་དཀའ་བ་ཐམས་ཅད་དང་། དགེ་བ་སྡུད་པའི་ཚུལ་ཁྲིམས་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་དང་། སྡོམ་པའི་ཚུལ་ཁྲིམས་དང་། ཡོན་ཏན་ཐམས་ཅད་དང་། ཡེ་ཤེས་ཐམས་ཅད་དང་། རྒྱན་ཐམས་ཅད་དང་། སྨོན་ལམ་ཆེན་པོ་ཐམས་ཅད་དང་། ཐབས་མཁས་པ་ཐམས་ཅད་དང་། དེ་ལ་སོགས་ཏེ་བསམ་གྱིས་མི་ཁྱབ་པའི་བསོད་ནམས་དང་ཡེ་ཤེས་ཐམས་ཅད་ཡོངས་སུ་རྫོགས་པར་ལྷུན་གྱིས་གྲུབ་སྟེ། མི་དགེ་བ་ཐམས་ཅད་ཀྱང་ཡོངས་སུ་བཅད། ཉོན་མོངས་པ་ཐམས་ཅད་ཀྱང་ཡོངས་སུ་བཅད། ཉོན་མོངས་པའི་བག་ཆགས་ཐམས་ཅད་ཀྱང་
ཡོངས་སུ་བཅད་དེ། བདེན་པ་བཞི་དང་། རྟེན་ཅིང་འབྲེལ་ཏེ་འབྱུང་བ་བཅུ་གཉིས་ཤིན་ཏུ་རྟོགས་ནས་བྱང་ཆུབ་ཀྱི་ཤིང་དྲུང་དུ་བདུད་རྣམ་བཞི་བཏུལ་ཏེ། ཐམས་ཅད་མཁྱེན་པའི་ཡེ་ཤེས་སུ་གྱུར་ནས་དེ་ལྟ་བུའི་དམ་པའི་ཆོས་ཐམས་ཅད་ལ་ནན་ཏན་བྱས་པས་སངས་རྒྱས་ཐམས་ཅད་ཀྱིས་གསུང་འཐུན་པར་ལེགས་སོ་ལེགས་སོ་ཞེས་བཀའ་སྩལ་ནས། འཐུན་པར་ཆོས་ཉིད་ཀྱི་ཡེ་ཤེས་ཀྱི་ཆུ། ཆོས་ཀྱི་སྐུའི་སྤྱི་བོར་དབང་བསྐུར་ཏེ། གདོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ་ཞེས་བསྒྲགས་སོ། །དེ་བས་ན་ང་ནི་ད་ལྟར་ལྷ་དང་མི་རྣམས་ཀྱི་སྟོན་པ་སྟེ། ཕྱོགས་བཅུར་རྣམ་པར་སངས་རྒྱས་པ་མཐར་ཕྱིན་པ་བཅོམ་ལྡན་འདས་ཞེས་བྱ་སྟེ། ལྷ་དང་མིའི་ནང་ན་དཔེ་ཟླ་མེད་པ། སེམས་ཅན་ཐམས་ཅད་ལ་སྒྲ་གཅན་འཛིན་དང་འདྲ་བར་གཟིགས་པས་དེ་བཞིན་གཤེགས་པ་ཡང་དག་པར་རྫོགས་པ། མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་རིག་པ། བླ་ན་མེད་པ། སྐྱེས་བུ་འདུལ་ཞིང་ཁ་ལོ་སྒྱུར་བ། ལྷ་དང་མིའི་སྟོན་པ་སངས་རྒྱས་བཅོམ་ལྡན་འདས་ཞེས་བྱ་སྟེ། འཇིག་རྟེན་ལ་ཐུགས་བརྩེ་བར་མཛད་པ་ཀུན་མཛད་ནས་སེམས་ཅན་གྱི་ཕྱིར་མྱ་ངན་ལས་འདས་ན། འཇིག་རྟེན་གྱི་ཆོས་བཞིན་དུ་འཁོར་ལོས་སྒྱུར་བའི་རྒྱལ་པོ་ལྟར་སེམས་ཅན་ཐམས་ཅད་ཀྱིས་མཆོད་པ་བྱེད་པར་འགྱུར་བར་བྱའོ། །དགའ་བོ་ང་མྱ་ངན་ལས་འདས་ནས་འཁོར་ལོས་སྒྱུར་བའི་རྒྱལ་པོ་ལྟར་ཞག་བདུན་གྱི་བར་དུ་ཞོག་ལ། གདོད་ལྕགས་ཀྱི་སྒྲོམ་དུ་ཆུག་ཤིག །ལྕགས་ཀྱི་སྒྲོམ་དུ་བཅུག་ནས་མར་བསུང་ཅན་གྱིས་ཁོང་ལ་ཁ་ལེགས་པར་ཆོད་ཅིག །སྒྲོམ་ཡང་རིན་པོ་ཆེ་སྣ་བདུན་གྱིས་རབ་ཏུ་སྤྲས་ཤིང་བརྒྱན་ལ་སྒྲོམ་འཁོར་བར་རིན་པོ་ཆེའི་རྒྱལ་མཚན་དང་། སྤོས་དང་། མེ་ཏོག་གིས་མཆོད་པ་གྱིས་ཤིག །དེ་ལྟ་བུར་ཞག་བདུན་དུ་མཆོད་ནས་སྒྲོམ་ནས་ཕྱུང་ལ། སྤོས་ཆུས་ལེགས་པར་ཁྲུས་ཤིག །དེ་ལྟར་སྤོས་ཆུས་དེ་བཞིན་གཤེགས་པའི་སྐུ་ལེགས་པར་བཀྲུས་ནས་ཤིང་བལ་གྱིས་སྐུ་ཁྱབ་པར་དཀྲིས་ཤིག །དེའི་སྟེང་དུ་རིན་ཐང་མེད་པའི་རས་དཀར་པོ་ཡུག་སྟོང་གིས་དཀྲིས་ཤིག །དེ་ལྟར་དཀྲིས་ནས་ཕྱིར་ལྕགས་ཀྱི་སྒྲོམ་དུ་ཆུག་ལ་མར་བསུང་ཅན་གྱིས་བཀང་སྟེ་ཁ་ལེགས་པར་ཆོད་ཅིག །དེ་ནས་གོ་ཤིར་ཥ་ཙན་དན་
དང་། ཨ་ག་རུ་དང་། ཤིང་བསུང་ཅན་ཐམས་ཅད་དང་བཅས་སུ་རིན་པོ་ཆེ་སྣ་བདུན་གྱི་ཤིང་རྟའི་སྟེང་དུ་ཞོག་ལ། རིན་པོ་ཆེ་ཐམས་ཅད་ཀྱིས་བརྒྱན་ཏེ་སྲེག་པའི་གནས་སུ་དྲོངས་ཤིག །རིན་པོ་ཆེའི་རྒྱལ་མཚན་གྲངས་མེད་པ་དང་། རིན་པོ་ཆེའི་གདུགས་གྲངས་མེད་པ་དང་། རིན་པོ་ཆེའི་གོས་གྲངས་མེད་པ་དང་། གྲངས་མེད་པའི་ལྷའི་རོལ་མོ་དང་། གྲངས་མེད་པའི་མེ་ཏོག་དང་སྤོས་ཀྱིས་ནམ་མཁའ་ཡང་གང་བ་ཙམ་དུ་མཆོད་པ་གྱིས་ལ་ངུས་ཤིག །ལྷ་དང་མི་དང་། འཁོར་ཐམས་ཅད་ཀྱིས་སྤོས་ཀྱི་ཤིང་ཙན་དན་དང་། ཨ་ཀ་རུ་དང་། མར་བསུང་ཅན་གྱིས་ང་སྲེགས་ལ་ངུས་ཤིག །དེ་ལྟར་བསྲེགས་ནས་ལྷ་དང་མི་དང་། འཁོར་རྣམ་བཞིས་རིང་བསྲེལ་བསྡུས་ལ། རིན་པོ་ཆེ་སྣ་བདུན་གྱི་བུམ་པར་བཅུག་སྟེ། གྲོང་ཁྱེར་ཆེན་པོའི་ལམ་གྱི་བཞི་མདོར་རིན་པོ་ཆེ་སྣ་བདུན་གྱི་མཆོད་རྟེན་བྱས་ལ། རིང་བསྲེལ་མཆོད་ན་སེམས་ཅན་དག་བསོད་ནམས་ཆེན་པོ་ཐོབ་ཅིང་། སྲིད་པ་གསུམ་གྱི་སྡུག་བསྔལ་སྤངས་ནས་མྱ་ངན་ལས་འདའ་བའི་བདེ་བ་ཐོབ་པར་འགྱུར་རོ། །དགའ་བོ་འཁོར་རྣམ་པ་བཞི་པོས། སངས་རྒྱས་ཀྱི་སྐུ་གདུང་གི་རིན་པོ་ཆེ་སྣ་བདུན་གྱི་མཆོད་རྟེན་བྱས་ནས། གཞན་ཡང་མཆོད་རྟེན་གསུམ་བྱའོ། །གང་ཞེ་ན་འདི་ལྟ་སྟེ། རང་སངས་རྒྱས་ཀྱི་མཆོད་རྟེན་དང་། དགྲ་བཅོམ་པའི་མཆོད་རྟེན་དང་། འཁོར་ལོས་སྒྱུར་བའི་རྒྱལ་པོའི་མཆོད་རྟེན་ཏེ། འཇིག་རྟེན་དུ་བཅས་པས་སྐྱབས་སུ་འགྲོ་བའི་གནས་ཤེས་པར་བྱ་བའི་ཕྱིར་རོ། །དགའ་བོས་གསོལ་པ། བཅོམ་ལྡན་འདས་དེ་བཞིན་གཤེགས་པ་འཇིག་རྟེན་དུ་གཤེགས་པ་ནི་སེམས་ཅན་ལ་ཐུགས་བརྩེ་བའི་སླད་དུ་སྟོབས་བཅུ་དང་། ཐུགས་རྗེ་ཆེན་པོ་དང་། མི་བསྙེངས་པ་བཞི་དང་། རྟེན་ཅིང་འབྲེལ་ཏེ་འབྱུང་བ་བཅུ་གཉིས་དང་། བདེན་པ་བཞི་དང་། རྣམ་པར་ཐར་པའི་སྒོ་གསུམ་དང་། ཚངས་པའི་དབྱངས་རྣམ་པ་བརྒྱད་ཀྱིས་ཁམས་གསུམ་དུ་བསྒྲགས་པ་དང་། ཁ་དོག་རྣམ་པ་ལྔ་དང་ལྡན་པའི་བྱམས་པའི་འོད་ཀྱིས་ལམ་རྒྱུད་དྲུག་སྣང་བར་མཛད་ནས་སེམས་ཅན་གྱི་བསམ་པ་བཞིན་དུ། ལ་ལ་ནི་འབྲས་བུ་བཞི་དང་། ཐེག་པ་གཉིས་ལ་སྤྱོད་པར་གྱུར། ལ་ལ་ནི་ཟག་པ་མེད་པ་འདུས་མ་བྱས་པའི་རང་སངས་རྒྱས་ཀྱི་བྱང་ཆུབ་ཐོབ་པར་གྱུར། ལ་ལ་ནི་མི་འགོག་པ་མི་སྐྱེ་བའི་བྱང་ཆུབ་ཀྱི་ས་ནོན་པར་གྱུར། ལ་ལ་ནི་ཚད་མེད་པའི་གཟུངས་རྣམས་ཐོབ་པར་གྱུར། ལ་ལ་ནི་སྤྱན་ལྔ་
དང་མངོན་པར་ཤེས་པ་དྲུག་ཐོབ་པར་གྱུར། ལ་ལ་ནི་ངན་སོང་གསུམ་ལས་ཐར་བར་གྱུར། ལ་ལ་ནི་མི་ཁོམ་པ་བརྒྱད་དང་བྲལ་བར་གྱུར། ལ་ལ་ནི་ལྷ་དང་མིའི་འཇིག་རྟེན་གསུམ་གྱི་སྡུག་བསྔལ་དང་བྲལ་བར་གྱུར་ཏེ། དེ་བཞིན་གཤེགས་པའི་བྱམས་པའི་ཤུགས་རྣམ་པར་དག་པ་དང་། དེ་བཞིན་གཤེགས་པའི་རྣམ་པར་གྲོལ་བའི་ཆོས་ཀྱི་གཞུང་བསམ་གྱིས་མི་ཁྱབ་པས་མྱ་ངན་ལས་འདའ་བའི་བར་དུ་འཇིག་རྟེན་དུ་བཅས་པ། ལྷ་དང་མི་དང་འཁོར་རྣམ་པ་བཞིས་རིན་པོ་ཆེ་སྣ་བདུན་གྱི་མཆོད་རྟེན་བྱས་ཏེ་རིང་བསྲེལ་ལ་མཆོད་ན་བསོད་ནམས་ཆེན་པོ་ཐོབ་ཅིང་སོ་སོའི་སྐྱེ་བོ་དག་ཁམས་གསུམ་གྱི་སྡུག་བསྔལ་ལས་ཐར་ཅིང་ཡང་དག་པའི་རྣམ་པར་གྲོལ་བ་ལ་འཇུག་པར་འགྱུར་ཏེ། དེ་བས་ན་སངས་རྒྱས་མྱ་ངན་ལས་འདས་ནས་འཇིག་རྟེན་དུ་བཅས་པ་ལྷ་དང་མི་དང་། འཁོར་ཐམས་ཅད་ཀྱིས་སངས་རྒྱས་ཀྱིས་མཛད་པའི་དྲིན་ཆེན་པོ་དང་། བྱམས་པ་ཚད་མ་མཆིས་པ་རྗེས་སུ་བཟུང་བའི་སླད་དུ་རིན་པོ་ཆེ་སྣ་བདུན་གྱི་མཆོད་རྟེན་བགྱིད་ཅིང་རིང་བསྲེལ་ལ་མཆོད་པ་བགྱིད་པ་ནི་འོས་ན། བཅོམ་ལྡན་འདས་མཆོད་རྟེན་རྣམ་པ་གསུམ་པོ་བགྱིས་པས་སེམས་ཅན་རྣམས་ལ་སྨན་པ་ཅི་མཆིས་ན་མཆོད་རྟེན་བགྱིས་ཤིང་མཆོད་པ་བགྱི། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། རང་སངས་རྒྱས་ནི་རྟེན་ཅིང་འབྲེལ་ཏེ་འབྱུང་བའི་ཆོས་ཤིན་ཏུ་ཟབ་མོ་རྟོགས་ནས་སྲིད་པ་ཐམས་ཅད་ལས་རྣམ་པར་གྲོལ་ཏེ། ཉེས་པའི་སྐྱོན་ཐམས་ཅད་བྲལ་ནས་ལྷ་དང་མིའི་བསོད་ནམས་ཀྱི་ཞིང་དུ་འགྱུར་ཏེ། དེ་བས་ན་མཆོད་རྟེན་བྱས་ཏེ་མཆོད་ན་བསོད་ནམས་འཐོབ་པར་འགྱུར་རོ། །དེ་བཞིན་གཤེགས་པའི་འོག་ཏུ་འགྲོ་བ་མང་པོ་འབྲས་བུ་མཆོག་ཐོབ་པར་བྱེད་པའི་ཕྱིར་རོ། །དགའ་བོ་དགྲ་བཅོམ་པ་ནི་སྐྱེ་བའི་ཕྱོགས་ཟད་དེ་སྲིད་པ་ཕྱི་མ་མི་ལེན་ལ་ཚངས་པར་སྤྱོད་པ་ཡོངས་སུ་རྫོགས་པས་འཇིག་རྟེན་གྱི་བསོད་ནམས་ཀྱི་ཞིང་དུ་འགྱུར་ཏེ། དེ་བས་ན་མཆོད་རྟེན་བྱས་ཏེ་མཆོད་ན་བསོད་ནམས་ཐོབ་པ་ནི་རང་སངས་རྒྱས་ཀྱི་འོག་ཏུ་དེ་མང་སྟེ། དེས་ཀྱང་འགྲོ་བ་རྣམ་པར་གྲོལ་བར་བྱེད་དོ། །དགའ་བོ་འཁོར་ལོས་སྒྱུར་བའི་རྒྱལ་པོ་ཡང་ཁམས་གསུམ་གྱི་ཉོན་མོངས་པ་ལས་རྣམ་པར་མ་གྲོལ་མོད་ཀྱི། བསོད་ནམས་ཀྱི་ཤུགས་ཀྱིས་གླིང་བཞི་ལ་དབང་སྟེ། དགེ་བ་བཅུའི་ལས་ཀྱིས་སེམས་ཅན་གྱི་སྲིད་བྱེད་པས་སེམས་ཅན་
དེ་དག་གི་བཀུར་སྟིའི་གནས་ཡིན་ཏེ། དེ་བས་ན་འཁོར་རྣམ་བཞིས་མཆོད་རྟེན་བྱས་ཏེ་མཆོད་ན་བསོད་ནམས་ཚད་མེད་པ་ཐོབ་པར་འགྱུར་རོ། །དགའ་བོས་ཡང་གསོལ་པ། བཅོམ་ལྡན་འདས་སངས་རྒྱས་མྱ་ངན་ལས་འདས་ནས་བདག་ཅག་འཁོར་རྣམ་བཞིས་གང་དུ་དེ་བཞིན་གཤེགས་པའི་སྐུ་ཞུགས་ལ་བཞེན་ན། དེ་བཞིན་གཤེགས་པའི་རིང་བསྲེལ་ཐོབ་པར་འགྱུར་བ། བཅོམ་ལྡན་འདས་ཀྱིས་བསྟན་དུ་གསོལ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སངས་རྒྱས་མྱ་ངན་ལས་འདས་ནས་འཁོར་རྣམ་བཞིས་གལ་ཏེ་རྩྭ་མཆོག་གི་གྲོང་ཁྱེར་གྱི་ནང་དུ་ང་བསྲེགས་ན། གྲོང་ཁྱེར་དེའི་མི་དག་རྒྱལ་པོའི་ལས་ཀྱི་ཆད་པ་དང་རྩོད་པ་ཚད་མེད་པ་འབྱུང་སྟེ། ཐམས་ཅད་ཀྱིས་བསོད་ནམས་མཉམ་པར་མི་ཐོབ་བོ། །དགའ་བོ་གལ་ཏེ་འཁོར་རྣམ་བཞིས་གྲོང་ཁྱེར་གྱི་ཕྱི་རོལ་དུ་ང་བསྲེགས་ན་འཇིག་རྟེན་པ་དག་བསོད་ནམས་མཉམ་པར་ཐོབ་བོ། །དགའ་བོས་གསོལ་པ། བཅོམ་ལྡན་འདས་སངས་རྒྱས་མྱ་ངན་ལས་འདས་ནས་ཞུགས་ལ་བཞེན་པའི་འོག་ཏུ་འཁོར་རྣམ་བཞིས་རིང་བསྲེལ་བསྡུས་ཏེ། རིན་པོ་ཆེའི་བུམ་པར་སྩལ་ནས་རིན་པོ་ཆེ་སྣ་བདུན་གྱི་མཆོད་རྟེན་གང་དུ་བརྩིགས་ན་ཐམས་ཅད་དད་པའི་སེམས་སྐྱེ་ཞིང་མཆོད་པར་འགྱུར་བ་བཅོམ་ལྡན་འདས་བསྟན་དུ་གསོལ། བཅོམ་ལྡན་འདས་ཀྱིས་དགའ་བོ་ལ་བཀའ་སྩལ་པ། སངས་རྒྱས་མྱ་ངན་ལས་འདས་ཏེ་བསྲེགས་ནས་འཁོར་རྣམ་བཞིས་རིང་བསྲེལ་བསྡུས་ཏེ། རིན་པོ་ཆེ་སྣ་བདུན་གྱི་བུམ་པར་ཆུག་ལ་རྩྭ་མཆོག་གི་གྲོང་ཁྱེར་གྱི་ནང་དུ་ལམ་གྱི་བཞི་མདོར་རིན་པོ་ཆེ་སྣ་བདུན་གྱི་མཆོད་རྟེན་བང་རིམ་བཅུ་གསུམ་དང་ལྡན་པ། ཕང་ལོ་དང་བཅས་པ། རིན་པོ་ཆེ་ཐམས་ཅད་ཀྱིས་བརྒྱན་ཅིང་སྤྲས་པ། འཇིག་རྟེན་པ་ཐམས་ཅད་ཀྱིས་མཆོག་ཏུ་བྱ་བའི་བ་དན་གྱིས་ཤིན་ཏུ་བརྒྱན་པ། ངོས་བཞིའི་པུ་ཤུ་ཡང་རིན་པོ་ཆེ་སྣ་བདུན་ལས་བྱས་པ། ཐམས་ཅད་དུ་རྒྱན་གྱིས་རབ་ཏུ་སྤྲས་པ། མཆོད་རྟེན་དེ་རིམ་པ་ཅིག་ཅར་ཡང་ངོས་བཞིར་སྒོ་རེ་རེ་བཏོད་པ། སྐར་ཁུང་ཐད་ཀར་འབབ་པའི་ནང་དུ་རིན་པོ་ཆེ་ཆེན་པོའི་བུམ་པ་བཅུག་སྟེ། འཁོར་རྣམ་བཞིས་མཆོད་པ་བྱའོ། །དགའ་བོ་རང་སངས་རྒྱས་ཀྱི་མཆོད་རྟེན་ནི་རིམ་པ་བཅུ་གཅིག་དང་ལྡན་པ། རིན་པོ་ཆེ་རྣམ་པ་སྣ་ཚོགས་ཀྱིས་སྤྲས་པར་བྱའོ། །དགའ་བོ་དགྲ་བཅོམ་པའི་མཆོད་རྟེན་ནི་རིམ་པ་བཞི་དང་ལྡན་པ་
སྟེ། དེ་ཡང་རིན་པོ་ཆེ་སྣ་ཚོགས་ཀྱིས་སྤྲའོ། །དགའ་བོ་འཁོར་ལོས་སྒྱུར་བའི་རྒྱལ་པོའི་མཆོད་རྟེན་ཡང་རིན་པོ་ཆེ་སྣ་བདུན་ལས་བྱས་ཏེ། རིམ་པ་དང་བཅས་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཁམས་གསུམ་གྱི་སྲིད་པའི་སྡུག་བསྔལ་ལས་མ་གྲོལ་བའི་ཕྱིར་རོ། །དེའི་ཚེ་མ་འགགས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་མྱ་ངན་ལས་འདས་ཏེ་ཞུགས་ལ་བཞེན་ནས་ལྷ་དང་མི་དང་འཁོར་རྣམ་བཞིས་དེ་བཞིན་གཤེགས་པའི་རིང་བསྲེལ་ཇི་ལྟར་བགོས་ན་ཐམས་ཅད་ཀྱིས་མཆོད་པར་འགྱུར། དེའི་ཚེ་བཅོམ་ལྡན་འདས་ཀྱིས་མ་འགགས་པ་ལ་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་ལྷ་དང་མི་ལ་སོགས་པས་སངས་རྒྱས་ཀྱི་རིང་བསྲེལ་བསྡུས་ཏེ། ཤིན་ཏུ་མཉམ་པའི་སེམས་ཀྱིས་ཁམས་གསུམ་དང་རྒྱུད་དྲུག་ཐམས་ཅད་ལ་ཡང་བགོས་ཏེ་མཆོད་པ་བྱེད་པར་འགྱུར་བར་བྱའོ། །དེའི་ཚེ་བརྒྱ་བྱིན་ལྷའི་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པ་ལས་དེ་བཞིན་གཤེགས་པའི་རིང་བསྲེལ་གྱི་ཕྱེད་གསོལ་ཏོ། །བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྲས་སྒྲ་གཅན་འཛིན་དང་འདྲ་བར་གཟིགས་ཏེ། དེ་བས་ན་ཁྱོད་རིང་བསྲེལ་གྱི་ཕྱེད་འདོད་དོ་ཞེས་མ་ཟེར་ཅིག །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ལ་ཕན་པའི་དོན་སྙོམས་པར་མཛད་པའི་ཕྱིར་རོ། །བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་ཕྱུག་ལ་བཀའ་སྩལ་པ། ངས་ཁྱོད་ལ་འགྲམ་པ་གཡས་པའི་ཚེམས་མཆེ་བ་གཅིག་སྦྱིན་གྱིས། ཁྱོད་ཀྱིས་ལྷའི་འཇིག་རྟེན་དུ་མཆོད་རྟེན་བྱོས་ལ་མཆོད་ཅིག་དང་། ཁྱོད་ཀྱིས་བསོད་ནམས་ཟད་མི་ཤེས་པ་ཐོབ་པར་འགྱུར་རོ། །དེའི་ཚེ་ལྷ་དང་མི་ཐམས་ཅད་ཆོ་ངེས་འདེབས་ཤིང་ངུས་སོ། །དེ་ནས་བཅོམ་ལྡན་འདས་ཀྱིས་འཁོར་བཞི་པོ་ལ་བཀའ་སྩལ་པ། སངས་རྒྱས་མྱ་ངན་ལས་འདའ་བ་ལ་ལྷ་དང་མི་ལ་སོགས་པ་ཁྱེད་མྱ་ངན་མ་བྱེད་ཅིག །དེ་ཅིའི་ཕྱིར་ཞེ་ན། སངས་རྒྱས་ཡོངས་སུ་མྱ་ངན་ལས་འདས་ཀྱང་རིང་བསྲེལ་རྟག་ཏུ་མཆོད་དུ་ཡོད་ལ། གཞན་ཡང་བླ་ན་མེད་པའི་ཆོས་ཀྱི་དཀོན་མཆོག་མདོ་སྡེ་དང་། འདུལ་བ་དང་། ཆོས་མངོན་པ་ཡོད་དོ། །དེ་བས་ན་དཀོན་མཆོག་གསུམ་དང་། བདེན་པ་བཞི་རྟག་ཏུ་འཇིག་རྟེན་ན་ཡོད་དེ། སེམས་ཅན་དག་དད་པས་མཆོད་
པའི་གནས་ཡོད་པ་ཡིན་ནོ། །དེ་ཅིའི་ཕྱིར་ཞེ་ན། རིང་བསྲེལ་ལ་མཆོད་པ་ནི་སངས་རྒྱས་དཀོན་མཆོག་མཆོད་པ་ཡིན་ནོ། །སངས་རྒྱས་མཐོང་བ་དེས་ནི་ཆོས་ཀྱི་སྐུ་མཐོང་ངོ་། །ཆོས་མཐོང་བ་དེས་ནི་འཕགས་པ་མཐོང་ངོ་། །འཕགས་པ་མཐོང་བ་དེས་ནི་བདེན་པ་བཞི་མཐོང་ངོ་། །བདེན་པ་བཞི་མཐོང་བ་དེས་ནི་མྱ་ངན་ལས་འདའ་བ་མཐོང་ངོ་། །དེ་བས་ན་དཀོན་མཆོག་གསུམ་ནི་རྟག་པ་གནས་པ་མི་འགྱུར་མི་འཕོ་བ་སྟེ། འཇིག་རྟེན་གྱི་གནས་དང་རྟེན་དུ་འགྱུར་བར་རིག་པར་བྱའོ། །བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ། ཁྱེད་སྡུག་བསྔལ་གྱིས་གདུངས་པར་འགྱུར་བའི་མྱ་ངན་ཆེན་པོ་མ་བྱེད་ཅིག །ང་ནི་མྱ་ངན་ལས་འདའ་བར་གཤེགས་སུ་ཉེའི། ཚུལ་ཁྲིམས་སམ། གནས་སམ། རྟག་པའམ། མི་རྟག་པའམ། དཀོན་མཆོག་གསུམ་མམ། བདེན་པ་བཞིའམ། ཕ་རོལ་ཏུ་ཕྱིན་པ་དྲུག་གམ། རྟེན་ཅིང་འབྲེལ་ཏེ་འབྱུང་བ་བཅུ་གཉིས་ལས་ཐེ་ཚོམ་དུ་གྱུར་པ་ཡོད་ན། མྱུར་དུ་དྲིས་ཤིག །འདྲི་བ་འདི་ནི་ཐ་མར་འདྲི་བ་སྟེ། སངས་རྒྱས་མྱ་ངན་ལས་འདས་ནས་འགྱོད་པ་མེད་པར་བྱའོ། །ཞེས་ལན་གསུམ་གྱི་བར་དུ་བཀའ་སྩལ་ཏོ། །དེའི་ཚེ་འཁོར་རྣམ་བཞི་ལ་སོགས་པ་མྱ་ངན་གྱིས་ཡིད་གདུངས་ཏེ། སྐད་བརྣངས་ནས་ཡི་ཆད་པ་ཙམ་དུ་ཡིད་ལ་གཅགས་ཏེ་མྱ་ངན་གྱིས་བརྒྱལ་ལོ། །སངས་རྒྱས་ཀྱི་བྱིན་གྱིས་རླབས་ཀྱིས་མཆི་མ་ཕྱུང་ནས་ཅང་མི་སྨྲ་སྟེ་ཞུ་བ་ཡང་མེད་དོ། །དེ་ཅིའི་ཕྱིར་ཞེ་ན། འཁོར་བཞི་པོ་འདི་དག་ཐམས་ཅད་ནི་ཚུལ་ཁྲིམས་དང་། གནས་དང་། དཀོན་མཆོག་གསུམ་དང་། བདེན་པ་བཞི་མངོན་སུམ་དུ་རྟོགས་ཏེ་ཐེ་ཚོམ་མེད་པར་གྱུར་ཏོ། །དེའི་ཚེ་བཅོམ་ལྡན་འདས་ཀྱིས་འཁོར་བཞི་པོ་ལ་ཐེ་ཚོམ་མེད་པར་ཐུགས་ཀྱིས་མཁྱེན་ནས་ལེགས་སོ་ཤིན་ཏུ་ལེགས་སོ། །འཁོར་བཞི་པོ་ཁྱེད་དཀོན་མཆོག་གསུམ་དང་། བདེན་པ་བཞི་ཤིན་ཏུ་རྟོགས་ཏེ་ཐེ་ཚོམ་མེད་པ་ནི་ཇི་ལྟར་ཆུ་དང་བས་དྲི་མ་བཀྲུས་པ་དང་འདྲ་སྟེ། ཁྱེད་ཀྱང་བརྩོན་འགྲུས་གྱིས་ཤིག་དང་། མྱུར་དུ་འབྱུང་བའི་ལམ་ཐོབ་པར་འགྱུར་གྱིས་བརྒྱལ་བ་ཙམ་དུ་མྱ་ངན་མ་བྱེད་ཅིག །དེའི་ཚེ་བཅོམ་ལྡན་འདས་སེང་གེའི་ཁྲི་ལ་བཞུགས་བཞིན་དུ་གསེར་ལྟ་བུའི་ཕྱག་གིས་ན་བཟའ་སྦྱར་མ་བཞག་ནས་གསེར་བཙོ་མའི་ཁ་དོག་ལྟ་བུའི་སེང་གེའི་ཐོང་ཀ་དཔལ་བེའུ་ཕྱུང་སྟེ་འཁོར་མང་པོ་རྣམས་ལ་བསྟན་ནས་ལྷ་དང་། མི་དང་། འཁོར་མང་པོ་རྣམས་ལ་ངའི་སྐུ་ཁ་དོག་གསེར་བཙོ་མ་ལྟ་བུ་ལ་ལྟོས་ཤིག་ཅེས་བཀའ་སྩལ་ཏོ།། །།
འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ། བམ་པོ་ལྔ་བཅུ་ལྔ་པ། དེའི་ཚེ་འཁོར་རྣམ་བཞི་དང་ཐམས་ཅད་ཀྱིས་དེ་བཞིན་གཤེགས་པའི་སྐུ་གསེར་བཙོ་མའི་ཁ་དོག་ལྟ་བུ་ལ་མིག་མི་འཛུམས་པས་བལྟས་པས་རབ་ཏུ་བདེ་བ་ནི་ཇི་ལྟར་དགེ་སློང་དག་བསམ་གཏན་གསུམ་པ་ལ་རེག་པ་དང་འདྲ་བར་གྱུར་ཏོ། །དེའི་ཚེ་བཅོམ་ལྡན་འདས་གསེར་བཙོ་མའི་ཁ་དོག་ལྟ་བུའི་སྐུ་འཁོར་མང་པོ་ལ་བསྟན་ནས། མྱ་ངན་ལས་འདའ་བ་ཆེན་པོའི་འོད་ཟེར་ཚད་མེད་དཔག་ཏུ་མེད་པ་ཁྲག་ཁྲིག་བརྒྱད་སྟོང་སྙེད་བཀྱེ་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་སྣང་བར་བྱས་པས་ཉི་ཟླའི་འོད་ཀྱང་ཟིལ་གྱིས་ནོན་ཏེ། དེ་ལྟར་འོད་བཀྱེ་ནས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་ནི་ཁྱེད་ཀྱི་ཕྱིར་བསྐལ་པ་བགྲངས་པའི་བར་དུ་ཤིན་ཏུ་སྤྱོད་དཀའ་བ་སྤྱད་དེ། ལུས་ཀྱི་ཡན་ལག་ལག་པ་དང་། རྐང་པ་ཡང་གཏུབས་ནས་ཤིན་ཏུ་སྤྱོད་དཀའ་བ་ཐམས་ཅད་སྤྱད་དེ། སྙིང་རྗེ་ཆེན་པོའི་སྨོན་ལམ་གྱི་དབང་གིས་རྙོག་པ་ལྔའི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་ཏེ། རྡོ་རྗེ་ལྟ་བུར་མི་འཇིག་པའི་གསེར་བཙོ་མའི་ཁ་དོག་གི་སྐུ་མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་ལྡན་པ་ཚད་མེད་པའི་འོད་ཟེར་གྱིས་ཐམས་ཅད་དུ་སྣང་བར་བྱས་པ་ཐོབ་སྟེ། འོད་ཟེར་གྱིས་རེག་གམ་སྐུ་མཐོང་བ་ཙམ་གྱིས་ཀྱང་རྣམ་པར་མ་གྲོལ་བ་མེད་དོ། །བཅོམ་ལྡན་འདས་ཀྱིས་ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །སངས་རྒྱས་འཇིག་རྟེན་དུ་གཤེགས་པ་ཤིན་ཏུ་དཀའ་བ་ནི་མེ་ཏོག་ཨུ་དུམ་བཱ་ར་དང་འདྲ་སྟེ་ཤིན་ཏུ་མཐོང་བར་དཀའོ། །ཁྱེད་ཀྱིས་ནང་གི་ཐ་མར་ངའི་སྐུ་མཐོང་བར་འགྱུར་བ་འདི་ལ་དོན་མེད་པར་མི་བྱའོ། །སྔོན་གྱི་སྨོན་ལམ་གྱི་མཐུས་རྙོག་པའི་འཇིག་རྟེན་གྱི་ཁམས་འདིར་གཤེགས་ཏེ། ད་ནི་གདུལ་བའི་མཛད་པ་མཛད་ནས་ང་མྱ་ངན་འདར་ཉེའོ། །ཁྱེད་ལ་སོགས་པ་སེམས་རྩེ་གཅིག་ཏུ་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ཤིན་ཏུ་ལྟོས་ཤིག །ཁྱེད་ཀྱང་ཡོངས་སུ་དག་པའི་ལས་ལ་ནན་ཏན་བྱས་ན་འབྲས་བུ་འདི་ཐོབ་པར་འགྱུར་རོ། །དེའི་ཚེ་བཅོམ་ལྡན་འདས་དེ་བཞིན་དུ་ཡང་དང་ཡང་ལན་གསུམ་གྱི་བར་དུ་
བཀའ་སྩལ་ནས། གསེར་བཙོ་མ་ལྟ་བུའི་སྐུ་འཁོར་མང་པོ་རྣམས་ལ་མངོན་དུ་བསྟན་ཏོ། །དེ་ནས་རིན་པོ་ཆེ་སྣ་བདུན་གྱི་སེང་གེའི་ཁྲི་ལས་བཞེངས་ཏེ་སྟེང་གི་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས་ཡང་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་འཁོར་མང་པོ་རྣམས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག །དེ་བཞིན་དུ་མཐར་གྱིས་ཤིང་ཏ་ལ་གཅིག་གི་སྲིད་དུ་འཕགས་ནས་ང་ནི་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་འཁོར་མང་པོ་རྣམས་བསམ་པ་ཤིན་ཏུ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་ལན་བདུན་གྱི་བར་དུ་བཀའ་སྩལ་ཏོ། །དེ་ནས་ནམ་མཁའ་ལས་བབས་ཏེ་སེང་གེའི་ཁྲི་ལ་བཞུགས་ནས་ཡང་འཁོར་མང་པོ་རྣམས་ལ་ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་ཤིན་ཏུ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་བཀའ་སྩལ་ཏེ། དེ་ནས་ཡང་བཅོམ་ལྡན་འདས་སེང་གེའི་ཁྲི་ལས་བཞེངས་ནས་སྟེང་གི་ནམ་མཁའ་ལ་ཤིང་ཏ་ལ་གཅིག་གི་སྲིད་དུ་འཕགས་ནས་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག །དེ་བཞིན་དུ་ཤིང་ཏ་ལ་བདུན་སྲིད་དུ་འཕགས་ནས་ལན་བདུན་གྱི་བར་དུ་ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་འཁོར་མང་པོ་རྣམས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་བཀའ་སྩལ་ཏོ། །དེ་ནས་ནམ་མཁའ་ལས་ཕྱིར་བབས་ནས་སེང་གེའི་ཁྲི་ལ་བཞུགས་ཏེ་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག །དེ་ནས་བཅོམ་ལྡན་འདས་ཡང་སེང་གེའི་ཁྲི་ལས་བཞེངས་ནས་སྟེང་གི་ནམ་མཁའ་ལ་ཤིང་ཏ་ལ་གཅིག་གི་སྲིད་དུ་འཕགས་ནས་འཁོར་མང་པོ་རྣམས་ལ་བཀའ་སྩལ་པ། ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས། དེ་བཞིན་
དུ་ཡང་དང་ཡང་ཤིང་ཏ་ལ་བདུན་སྲིད་དུ་འཕགས་ནས་ལན་བདུན་གྱི་བར་དུ་ང་ནི་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ལྟོས་ཤིག་ཅེས་ལན་བདུན་གྱི་བར་དུ་བཀའ་སྩལ་ཏོ། །དེ་ནས་ཡང་ནམ་མཁའ་ལས་བབས་ནས་སེང་གེའི་ཁྲི་ལ་བཞུགས་ཏེ། ཡང་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ངའི་སྐུ་གསེར་བཙོ་མའི་ཁ ་དོག་ལྟ་བུ་ལ་ལྟོས་ཤིག །དེའི་ཚེ་བཅོམ་ལྡན་འདས་དེ་བཞིན་གཤེགས་པའི་སྐུ་གསེར་བཙོ་མའི་ཁ་དོག་ལྟ་བུ་མངོན་པར་བསྟན་ཏེ། འཁོར་མང་པོ་རྣམས་ལ་མངོན་སུམ་དུ་བསྟན་པའི་ཕྱིར། དེ་ལྟར་ལན་གསུམ་གྱི་བར་དུ་སྟེང་གི་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས། ལན་གསུམ་གྱི་བར་དུ་ནམ་མཁའ་ལས་ཕྱིར་བབས་ནས་སེང་གེའི་ཁྲི་ལ་བཞུགས་ཏེ། དེ་བཞིན་དུ་ཡང་དང་ཡང་ལན་ཉི་ཤུ་རྩ་བཞིའི་བར་དུ་འཁོར་མང་པོ་རྣམས་ལ་འདི་སྐད་ཅེས་བཀའ་སྩལ་ཏོ། །ང་ཡོངས་སུ་མྱ་ངན་ལས་འདར་ཉེ་ཡིས་ངའི་སྐུ་རྡོ་རྗེ་ལྟ་བུར་བརྟན་པ་མི་འཇིག་པ་གསེར་བཙོ་མའི་ཁ་དོག་ལྟ་བུ་འཇིག་པ་མེད་པ་ལ་ལྟོས་ཤིག །མེ་ཏོག་ཨུ་དུམ་བཱ་ར་ལྟར་ཤིན་ཏུ་མཐོང་དཀའ་བ་ཡིན་གྱིས་ཁྱེད་ལ་སོགས་པས་ཤེས་པར་གྱིས་ཤིག །ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་སེམས་རྩེ་གཅིག་ཏུ་ངའི་སྐུ་གསེར་བཙོ་མའི་ཁ་དོག་ལྟ་བུ་ལ་ཤིན་ཏུ་ལྟོས་ཤིག །དཔེར་ན་མི་ཞིག་ཚ་བས་གདུངས་ཏེ་ཤིན་ཏུ་སྐོམ་པ་ཆུ་གྲང་མོ་འཐུངས་ན་ངོམས་པར་འགྱུར་བ་ལས་གཞན་མི་སེམས་པ་དང་འདྲ་བར་ཁྱེད་ལ་སོགས་པ་ཡང་དེ་དང་འདྲ་སྟེ། ང་ཡོངས་སུ་མྱ་ངན་ལས་འདར་ཉེ་ཡིས་ཁྱེད་ལ་སོགས་པ་བསམ་པ་དག་པས་ཤིན་ཏུ་ལྟོས་ཤིག །འདི་ནི་ནང་གི་ཐ་མར་མཐོང་བ་སྟེ། མཐོང་བ་འདི་ལས་ཕྱིན་ཆད་མཐོང་བའི་དུས་མེད་ཀྱི་ཁྱེད་ལ་སོགས་པ་འཁོར་མང་པོ་རྣམས་ཕྱིན་ཆད་འགྱོད་པ་མེད་པར་ལྟ་བས་ངོམས་པར་གྱིས་ཤིག །དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་ཡང་འདི་སྐད་ཅེས་བཀའ་སྩལ་ཏོ། །ང་མྱ་ངན་ལས་འདས་ནས་ཁྱེད་ལ་
སོགས་པ་འཁོར་མང་པོ་རྣམས་སྲིད་པ་གསུམ་ལ་མྱུར་དུ་འདའ་བའི་ཕྱིར་རྒྱས་པར་ནན་ཏན་དུ་སྤྱོད་པ་ལ་ལེ་ལོ་མེད་པར་བག་ཡོད་གྱིས་ཤིག །དེའི་ཚེ་འཇིག་རྟེན་གྱི་ཁམས་ཐམས་ཅད་ན་ལྷ་དང་། མི་དང་འཁོར་རྣམ་པ་བཞི་ལ་སོགས་པ་མྱ་ངན་ལས་འདའ་བའི་འོད་ཀྱིས་རེག་ནས་སངས་རྒྱས་ལ་ལྟ་བ་ཐམས་ཅད་ཀྱི་ངན་སོང་གསུམ་དང་མི་ཁོམ་པ་བརྒྱད་དང་། འཇིག་རྟེན་གྱི་ལྷ་དང་མིའི་ཉོན་མོངས་པ་དང་། རྩ་བ་བཞི་དང་། མཚམས་མེད་པ་ལྔའི་ཁ་ན་མ་ཐོ་བའི་སྡིག་པ་ཐམས་ཅད་ལྷག་མ་མ་ལུས་པར་ཡོངས་སུ་བྱང་སྟེ་རྣམ་པར་གྲོལ་བ་ཐོབ་པར་གྱུར་ཏོ། །དེའི་ཚེ་བཅོམ་ལྡན་འདས་གསེར་བཙོ་མའི་ཁ་དོག་ལྟ་བུའི་སྐུ་ཕྱུང་སྟེ་ཡང་དང་ཡང་ལྟོས་ཤིག་ཅེས། འཁོར་མང་པོ་རྣམས་ལ་བཀའ་སྩལ་ནས་སླར་ཆོས་གོས་སྦྱར་མ་སྐུ་ལ་གསོལ་ཏོ། །འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས། བསྟན་པ་གཞག་པའི་ལེའུའོ།། །།